﻿Naokɛa.
7.
Gↄↄ pↄ́ Mↄizi zwã̀akpɛ dↄ̀ a làa, à nísikàwà ń a pↄkeleↄ píi, à a sakɛ̃̀, ↄ̃ à nísikà sa'okĩiwa ń a pↄkeleↄ píi, à a sakɛ̃̀. 
Ɔ̃ Isaili kíaↄ mↄ̀ ń gbao. Aamɛ aa ń deziↄ buiↄ kía pↄ́ wà ń dílɛ gbɛ̃naon dↄaanaↄ ũ. 
Aa mↄ̀ ń ń gbao Diiɛ, zugo mɛ̀n soolo ń zuↄ mɛ̀n kuɛpla. Kía gbɛ̃ↄn plapla zugo mɛ̀ndodo, baade miwa zù mɛ̀ndodo, ↄ̃ aa gɛ̀ò zwã̀akpɛ kpɛɛlɛ. 
Dii yã'ò Mↄiziɛ à mɛ̀: 
Gba pↄ́ aa mↄ̀opiↄ sí, iↄ dɛ kpaaũkpɛ zĩkɛbↄↄ ũ, ní kpá Levii buiↄwa, lá a mↄ́má ń zĩ guuwa. 
Ɔ̃ Mↄizi zugoↄ ń zupiↄ sì a kpà Levii buiↄwa. 
À zugo mɛ̀n pla ń zù mɛ̀n síiↄ̃o kpà Geesↄ̃ buiↄwa ń zĩ lɛ́u. 
À zugo mɛ̀n síiↄ̃ ń zù mɛ̀n swaaↄ̃o kpà Mɛlali buiↄwa ń zĩ lɛ́u. Sa'onkia Aalona nɛ́ Itamaa mɛ́ ń dↄaana ũ. 
I asosɛbↄe kpa Kɛata buiↄwao, asa aa Dii kpɛ́ pↄ́ↄ sɛ́ ń gã̀uɛ. 
Zĩ́ pↄ́ wà nísikà sa'okĩiwa, ↄ̃ kíapiↄ mↄ̀ ń ń gbaↄ sa'okĩipi aɛ sa'okĩipi sakɛ̃a yã́i. 
Dii ò Mↄiziɛ yãa à mɛ̀, lá gu lɛ́ dↄ kíapiↄ líↄ mↄ dodo sa'okĩi sakɛ̃a yã́i. 
Gↄↄ sɛ̃́ia zĩ́ Aminadabu nɛ́ Naasↄ̃, Yuda bui mɛ́ mↄ̀ ń a gbao. Gↄↄ plaade zĩ́ Zuaa nɛ́ Nɛtanɛli, Isakaa buiↄ kía mↄ̀ ń a gbao. Gↄↄ àaↄ̃de zĩ́ Heloni nɛ́ Ɛliabu, Zabulↄni buiↄ kía mↄ̀ ń a gbao. Gↄↄ síiↄ̃de zĩ́ Sedeu nɛ́ Ɛlizuu, Lubɛni buiↄ kía mↄ̀ ń a gbao. Gↄↄ sↄode zĩ́ Zulisadai nɛ́ Selumiɛ, Simɛↄ buiↄ kía mↄ̀ ń a gbao. Gↄↄ soolode zĩ́ Deuɛli nɛ́ Ɛliasafa, Gada buiↄ kía mↄ̀ ń a gbao. Gↄↄ soplade zĩ́ Amihudu nɛ́ Ɛlisama, Ɛflaiũ buiↄ kía mↄ̀ ń a gbao. Gↄↄ swaaↄ̃de zĩ́ Pedazuu nɛ́ Gamaliɛli, Manase buiↄ kía mↄ̀ ń a gbao. Gↄↄ kɛ̃okwide zĩ́ Gidoni nɛ́ Abidã, Bɛ̃yãmɛɛ buiↄ kía mↄ̀ ń a gbao. Gↄↄ kwide zĩ́ Amisadai nɛ́ Ahiɛzɛɛ, Dã buiↄ kía mↄ̀ ń a gbao. Gↄↄ kuɛdode zĩ́ Ɔkɛlana nɛ́ Pagiɛli, Asɛɛ buiↄ kía mↄ̀ ń a gbao. Gↄↄ kuɛplade zĩ́ Enana nɛ́ Ahila, Nɛfatali buiↄ kía mↄ̀ ń a gbao. Gba pↄ́ an baade mↄ̀on kɛ: Ãnusu tapɛlɛnti pↄ́ a gbia kiloo do ń kĩnio, au'ɛlɛbↄ pↄ́ wa pì ń ã́nusuo a gbia galaũ ↄ̀aa síiↄ̃ɛ, lá wà a gbia lɛ́ dìlɛ luakukĩiwa. Wà pↄ́wɛnti yãalɛa ń nísio kà tapiↄ pai pↄ́wɛn gba ũ. Vua toona pↄ́ a gbia galaũ basↄokwi, wà tulaletikà a pai. Sa pↄ́ wì a pↄ́ kátɛu à tɛ́kũ obↄↄn kɛ: Zugaaena do, sãsakao do, sãsa wɛ̃dona do. Duun awakpabↄn kɛ: Blesana do. Sáaukpasaↄn kɛ: Zu pla, sãsakao sↄo, blesana sↄo, sãsa wɛ̃dona sↄo. 
Gba pↄ́ Isaili kíaↄ dà sa'okĩi sakɛ̃a yã́i nísikaa sa'okĩipiwa gbɛapiↄ dasilɛn kɛ: Ãnusu tapɛlɛnti mɛ̀n kuɛpla, au'ɛlɛbↄ pↄ́ wa pì ń ã́nusuo mɛ̀n kuɛpla, vua toona mɛ̀n kuɛpla. 
Tapɛlɛntipiↄ gbia kiloo dodo ń kĩnioɛ, au'ɛlɛbↄↄ sↄ̃ galaũ ↄ̀aa síiↄ̃siiↄ̃. Apii fɛ̀lɛ ã́nusu kiloo baasↄo ń plao ń galaũ ↄ̀aa àaↄ̃o, lá wà a gbia lɛ́ dìlɛ luakukĩiwa. 
Vua toona pↄ́ wà tulaletikà a pai mɛ̀n kuɛplaↄ gbia galaũ basↄokwikwi, lá wà a gbia lɛ́ dìlɛ luakukĩiwa. À kɛ̀ píi galaũ ↄ̀aa soolo ń basooloo (1.320). 
Sa pↄ́ wì a pↄ́ kátɛu à tɛ́kũ obↄↄ dasilɛn kɛ: Zugaaena kuɛpla, sãsakao kuɛpla, sãsa wɛ̃dona kuɛpla, apii ń a pↄ́wɛntio. Blesan mɛ̀n kuɛpla ↄ̃ wà duuna awakpàò. 
Pↄ́ pↄ́ wà sáaukpa sa'òòↄ dasilɛn kɛ: Zu baasↄo mɛ̀ndosai, sãsakao bàaↄ̃, blesana bàaↄ̃, sãsa wɛ̃dona bàaↄ̃. Sa pↄ́ wa ò sa'okĩi sakɛ̃a yã́i nísikaawà gbɛan we. 
Kɛ́ Mↄizi gɛ̃̀ kpaaũkpɛu yã'oi ń Diio, à aà lↄↄ mà duunkɛ̃makĩi pↄ́ kú ikoyã kpagoloa musu malaika gã̀sĩade mɛ̀n plaↄ zãnguo, Dii lɛ́ yã'òɛ̀. 
