﻿Bↄa.
15.
Ɔ̃ Mↄizi ń Isailiↄ píi lɛɛ bee sì Diiɛ aa mɛ̀: Má lɛsi Diiɛ, asa à tↄbↄ̀, à sↄ̃deↄ ń ń sↄ̃́ↄ kà ísiau. 
Dii mɛ́ ma gbãa ũ, má lɛ́mawà, aàpi mɛ́ ma suabà. Ɔ̃mɛ ma Lua ũ, má aà táasilɛ. Ɔ̃mɛ ma mae Lua ũ, má aà tↄbↄ. 
Diiá zĩgↄ̃ɛ, aà tↄ́n Dii. 
À Falaↄ̃ↄ sↄ̃́goↄ ń aà zĩgↄ̃ↄ kà ísiau, à zĩgↄ̃ kíaↄ sↄ̃̀ↄlɛ Ísia Tɛ̃au. 
Ípi dàńla, aa kpàlɛ zĩ́lɛ lán gbɛwa. 
Dii, n ↄplaa n gbãa tↄbↄ̀, Dii, n n ibɛɛↄ ulↄ̀ ń n ↄplaao. 
N n wɛ̀lɛↄ nɛ̀ n gawi zↄ̃ↄ guu, n pↄ pà, n ń kwɛ́ lán sɛ̃wa. 
N pↄbↄ̀ n níu, ↄ̃ í fɛ̀lɛ, a zɛa lán bĩ́iwa, ísia í ì a guoguo. 
Wá ibɛɛpiↄ mɛ̀, wa pɛ́lɛwázi wà wá leɛ, wi wá pↄ́ↄ síwá lá wa yeiwa, wi ń fɛ̃ndaↄ wo wà wá dɛdɛò. 
N n lɛ́'ĩana gbàɛ, ↄ̃ ísia dàńla, aa kpàlɛ lán bɛↄmawa í zↄ̃ↄpiu. 
Dii, tã́a kpele mɛ́ muaannↄi? Démɛ muaannↄi? Yãbↄnsaɛkɛna, n zↄ̃ↄkɛ adoa, n gawi ì to vĩa wá kṹ. 
N n ↄplaa dↄ̀, ↄ̃ tↄↄlɛ ń mↄmↄ. 
Ńyↄ̃ dↄaa wá gbɛ̃́ pↄ́ n wá bóↄnɛ n gbɛ̃kɛ guu, ńyↄ̃ gɛ́wanↄ n bùsuu ń n gbãao. 
Tó buipãleↄ mà, aa lualua, iwãa a ka Filitɛ̃ bùsudeↄ pↄa. 
Ɛdↄũↄ kíaↄ bílikɛ, gili a gɛ̃ Mↄabu dↄaanaↄgu, Kanaa bùsudeↄ kúsu a kwɛ ḿpii. 
Vĩa zↄ̃ↄ a ń kṹ, sↄ̃ i kɛ̃́ńgu, aa gↄ̃ kílikili lán gbɛwa n gbãa zↄ̃ↄ yã́i Dii, e wá gbɛ̃́ pↄ́ ń wá é n pↄ́ ũↄ gɛ̃. 
Dii, ńyↄ̃ gɛ́wanↄ gbɛ̀sĩsĩ pↄ́ ń sɛ̀ n pↄ́ ũ kĩ́i, ní wá zɛdↄ gu pↄ́ ń dìlɛ n zↄ̃lɛkĩi ũ, n kúkĩi pↄ́ ń kɛ̀kɛ nzĩaɛ guu. 
Dii aↄ kible gↄↄpiiɛ. 
Kɛ́ Falaↄ̃ↄ sↄ̃́ↄ ń a sↄ̃́goↄ ń a sↄ̃deↄ gɛ̃̀ ísia guu, ↄ̃ Dii sù ń ío à dàńla, kási Isailiↄ táa'ò gugiiu ísiapiuɛ. 
Ɔ̃ ãnabi Miliaũ, Aalona dãe, sɛ̃́sɛ̃na sɛ̀, ↄ̃ nↄɛↄ bↄ̀ tɛaàzi píi, aalɛ sɛ̃́sɛ̃napa, aalɛ ↄ̃wã. 
Miliaũ lɛsìnɛ́ à mɛ̀: À lɛsi Diiɛ, asa à tↄbↄ̀, à sↄ̃deↄ ń ń sↄ̃́ↄ kà ísiau. 
Mↄizi dàzɛu ń Isailiↄ, aa kɛ̃̀ Ísia Tɛ̃awa aa gɛ̃̀ Sulu guwaiwaiu. Aa táa'ò gↄↄ àaↄ̃ guwaiwaipiu, aai í eo. 
Kɛ́ aa kà gu pↄ́ wì mɛ Mala, aai fↄ̃ a imìo, kɛ́ a fĩ̀ii yã́i. A yã́i tò wà tↄkpà gupiɛ Mala. 
Ɔ̃ gbɛ̃́ↄ zↄadↄ̀ Mↄiziwa aa mɛ̀: Bↄ́ wá mii? 
Mↄizi wiilɛ̀ Diiwa, ↄ̃ Dii lí ↄ̀lↄɛ̀. Kɛ́ a zù íu, ↄ̃ ípi nakũ̀. Wekĩi ↄ̃ Dii ikoyã dìlɛnɛ́ à ń yↄ̃́ 
à mɛ̀: Tó a laaidↄ̀ ma Dii á Lua ma yã́wa mɛ́ álɛ yã́ pↄ́ má yei kɛ, tó a yã́ pↄ́ má dìlɛↄ mà mɛ́ á ma ikoyãↄ kũa píi, má gyã pↄ́ má kà Egipiↄgu kee kááguo, asa mámɛmaa Dii á gbã̀gbãna ũ. 
Bee gbɛa aa kà Eliũ, gu pↄ́ nibↄna mɛ̀n kuɛplaↄ kuu ń daminali mɛ̀n bàaↄ̃kwiↄ. Ɔ̃ aa bòokpà í saɛ we. 
