MAT 1:1 Ainore Jesus Cristo uwobe ekiere. Mariguduwuge uwobe etumana iere Davi. Mariguduwuge uwobe etuo iere Abraão.
MAT 1:2 Abraão onaregedu imedu iere Isaque. Isaque onaregedu imedu iere Jacó. Jacó ore ime emagare. Ia iere Judá.
MAT 1:3 Judá onaregedu imedu iere Peres. Ia onaregedu imedu iere Zera. Nou Peres, nou Zera etuje iere Tamar. Peres onaregedu imedu iere Esrom. Esrom onaregedu imedu iere Arão.
MAT 1:4 Arão onaregedu imedu iere Aminadabe. Aminadabe onaregedu imedu iere Nasom. Nasom onaregedu imedu iere Salmom.
MAT 1:5 Salmom onaregedu imedu iere Boaz. Nou Boaz uče iere Raabe. Boaz onaregedu imedu iere Obede. Nou Obede uče iere Rute. Obede onaregedu imedu iere Jessé.
MAT 1:6 Jessé onaregedu imedu iere Davi. Boe eimijera kurireu nure ema. Nou Davi ure tugeragu Urias oredujeji toreduječe. Etonaregedu imedure. Iere Salomão.
MAT 1:7 Salomão onaregedu imedu iere Roboão. Roboão onaregedu imedu iere Abias. Abias onaregedu imedu iere Asa.
MAT 1:8 Asa onaregedu imedu iere Josafá. Josafá onaregedu imedu iere Jorão. Jorão onaregedu imedu iere Uzias.
MAT 1:9 Uzias onaregedu imedu iere Jotão. Jotão onaregedu iere Acaz. Acaz onaregedu imedu iere Ezequias.
MAT 1:10 Ezequias onaregedu imedu iere Manassés. Manassés onaregedu imedu iere Amom. Amom onaregedu imedu iere Josias.
MAT 1:11 Josias onaregedu imedu iere Jeconias. Jeconias uwiemagere jamedu. Nou Josias ore ime edu kimore Judá moto keje dukeje Babilônia kejewuge tugobaigarege ere tugeragu Judá kejewugei turaga tabo tuduwo ebo toro to moto Babilônia moto ka.
MAT 1:12 Babilônia kejewuge ere Judá kejewuge erego Babilônia moto ka dukeje nou Jeconias onaregedu imedure. Ure iedo Salatiel. Nou Salatiel onaregedu imedu iere Zorobabel.
MAT 1:13 Zorobabel onaregedu imedu iere Abiúde. Abiúde onaregedu imedu iere Eliaquim. Eliaquim onaregedu imedu iere Azor.
MAT 1:14 Azor onaregedu imedu iere Sadoque. Sadoque onaregedu imedu iere Aquim. Aquim onaregedu imedu iere Eliúde.
MAT 1:15 Eliúde onaregedu imedu iere Eleazar. Eleazar onaregedu imedu iere Matã. Matã onaregedu imedu iere Jacó.
MAT 1:16 Jacó onaregedu imedu iere José. Nou José oreduje iere Maria. Nou Maria onaregedure Jesus rema. Nou Jesus iere Pao Kurireu ure boe ekinorudowu nure ema. Ainore Jesus iere.
MAT 1:17 Ainore Jesus uwobe imere. Abraão pijire boe ere catorze jii Davi boture du ka. Davi pijire boe ere catorze pugeje jii Babilônia kejewuge ere Judá moto kejewuge etawuje du ka. Judá kejewuge edure Babilônia moto keje du pijire boe ere catorze pugeje jii nou Jesus boture du ka.
MAT 1:18 Ainore Jesus Cristo boture. Uče Maria ure tuwadaru maku boe etai tumugumoduie imedu José apo rugadu. Mare emugukare puapo raga. Eribarikare pui raga. Nogwaredu jeribarikareudo nure nou Mariače rugadu. Mare Maria kuiarure. Pao Kurireu Uwari koiare Maria kuiarure.
MAT 1:19 José jorduwagodure nou tumugumode apowu aredu kuiarure duji. Imedu pemegareu nure Joseče rugadu. Jorduwakare kaba kodiba Maria kuiarure dukodire aidukare tumuguwo apo pugeje. Mare aidukare tuwo Maria pogurudo boe egai. Dukodire ukare boe ewie. Ure tumeardae tawuje tumagowo tu Mariaji tumugumodukaie apo pugeje.
MAT 1:20 Nou José ure nou tumeardae tawuje dukeje ia boečoji uniaure. Nou uniau tada ia Pao Kurireu utugare baru tadawu aregodure José ae. Makore José ieji. Akore: – José. Davi onaregedu nure aki. Apagudukaba amuguwo Maria apo rugadu. Reko awai ka amuguwo apo rugadu. Kuiarure mare jeribarikare ia imeduji. Pao Kurireu Uwari koiare ure kuiarudo.
MAT 1:21 Onaregedu imedumode rugadu. Emare umode boe ekinorudo ewarigudukawo bope doge eda kejewu joruto ero pegareu moriče pugeje. Dukodire tamode iedo Jesus. Ainore nou Pao Kurireu utugare baru tadawu akore Joseji.
MAT 1:22 Marigudu Pao Kurireu makore ia imeduji tuwo boe ewie ainore boemoduie duji. Akore: – Nogwaredu jeribarikareudo kuiarumode. Onaregedu imedu mode. Emode iedo Emanuel. Ainore Pao Kurireu akore marigudu. Aino ča nou Pao Kurireu bataru jeture pudui rugadu. (Nou boe egore “Emanuel” aino tuwadaru tabo. Pawadaru tabo pamagore Pao Kurireu Mugure Pagabo.)
MAT 1:24 Nono čare José jetadure. Meartorure nou Pao Kurireu makore pudui duji rugadu. Ure Maria reko tuwai ka tumuguwo apo rugadu.
MAT 1:25 Mare jeribarikare nou Mariaji jii toro nou Maria kuri buture du ka. Ča Maria kuri buture rugadu. Imedu rugadu. José ure iedo Jesus rugadu.
MAT 2:1 Jesus boture Belém ba kurireu keje Judéia moto keje. Nou Judéia moto kejewu boe eimijera kurireu iere Herodes. Jesus boture dukeje ia boe tuginaiwuge jorduwareuge etaregodure to moto piji Jerusalém ba kurireu ka. Leste pijire etaregodure.
MAT 2:2 Etaregodure Jerusalém ba kurireu ka dukeje enarare nou boe dogei. Egore: – Čerdure Judeu doge eimijera kurireu maiwu o kuieje tuginaiwuji baru tada. Nou kuieje tuginaiwu ruture dukeje čerdure ji. Dukodire čerduware Judeu doge eimijera kurireu maiwu boture rugadu duji. Dukodire čedaregodure aino čewo čebu jodo moto keje jokorai čemago pemegawo ji rugadu. Ema pa? Kaiba rakojere?
MAT 2:3 Nou Jerusalém kejewu boe eimijera kurireu Herodes meardure nou egoino duji dukeje mororamagadure rugadu. Jerusalém ba kurireu kejewuge emeardure ewadaruji jamedu dukodire eiamedu boe emororamagadure jamedu.
MAT 2:4 Dukodire Herodes makore nou ure Judeu doge enomea maku Pao Kurireu aiwuge eimijerage ewagai. Makore nou jorduware Judeu doge eno bakaru jiwuge eiamedu boe ewagai jamedu. Etaregodure dukeje Herodes unarare ei kaiba nou umode boe ekinorudowu botumoduie.
MAT 2:5 Erduware rugadu dukodire emagore Herodes bataru jipagi. Egore: – Nou umode boe ekinorudowu botumode Belém ba kurireu keje. Ainore nou mariguduwu makore Pao Kurireu bataru jiwu batarure marigudu. Nou bataru padure bapera keje. Akore:
MAT 2:6 – Belém ba kurireu mugure Judá uwobe eno moto keje. Boe eda kurikareu nure nou Belémče. Boe eimijera kurikareu mugure Belém keje. Mare nou Belém boe eda kejere ia Judeu doge eimijera kurireu botumode nono. Nou boe eimijera kurireu jetu pemegamode iwobe Israel doge eiamedu boei rugadu. – Ainore Pao Kurireu akore marigudu.
MAT 2:7 Nono Herodes makore nou boe tuginaiwuge jorduwareuge ewagai etaregoduwo pudae. Makore ei tuginaigodu. Unarare ei dukodire ere Herodes biedu pemegado nuba merire pudui tuiorduie nou kuieje tuginaiwu rutuie duji.
MAT 2:8 Nono Herodes makore ei etuwo Belém ba kurireu ka rugadu. Akore: – Tadudo toro rugadu. Tagaiwodo rugadu nou imedu rogu bagai. Tardumode ji dukeje tagirimi kuri mato tawo iwie rugadu kaiba rakojere ituwo toro jamedu iwo ipu jodo moto keje imago pemegawo ji jamedu.
MAT 2:9 Nou boe tuginaiwuge jorduwareuge emeardure nou Herodes makore puduiwu boeji dukeje eture pugeje. Ča nou erdure jiwu kuieje rakoje kimore baru tada. Erdure ji. Nou kuieje uture etododai rugadu jii je rugadu. Dukeje nou kuieje ure tuwuredo nono nou imedu rogu rakojere tadawu bai aogeje.
MAT 2:10 Nou boe tuginaiwuge jorduwareuge erdure nou kuieje roinoduji dukeje egarere pudui rugadu.
MAT 2:11 Ere tuburedo nou baiji. Nono ere turemo nou baito rugadu. Dukejere čare erdure nou imedu roguji. Rakojere tuje Maria apo rugadu. Nou jorduwareuge ere tubu jodo moto keje nou imedu rogu jokorai tumago pemegawo ji. Emago pemegare ji rugadu. Nono ere toe tadaboe jado tuwo toe maku nou imedu rogu ai. Ere toe mori kurireu maku ai rugadu. Ere tori kuieje maku imedu rogu ai. Ere roreboe mori kurireu maku ai. Ere jorubo pemegareu mori kurireu maku ai. Nou jorubo pemegareu iere mirra.
MAT 2:12 Nou boečoji eniaure Pao Kurireu aregodure pudae duji. Pao Kurireu makore ei pagaie Herodes akoino ei. Pao Kurireu makore ei ekaiago tugirimi Herodes ae. Dukodire nou barogwato ekare tugirimi Herodes ae rugadu. Eture ia awaraji Belém piji tuduwo to moto ka rugadu.
MAT 2:13 Nou boe tuginaiwuge jorduwareuge eture dukeje José uniaure Pao Kurireu utugare baru tadawu aregodure pudae duji. Nou Pao Kurireu utugare baru tadawu makore Joseji. Akore: – Aragojedo. Akeragu imedu roguji tuje apo jamedu taregodudo toro Egito moto ka tawo tawiado toro Herodes piji. Herodes aiwomode nou imedu rogu bagai tuwo nou imedu rogu bito. Tarego piji toro Egito moto ka. Tagaba tagirimi tago moto ka jii toro ire tawie kejewu meri ka. Imire imode tawie kaba meri kejeba tamode tagirimi tago moto ka pugeje. Ainore Pao Kurireu akore Joseji uniau tada.
MAT 2:14 Dukodire José ure turagojedo kuri je nou boečoji rugadu. Ure tugeragu nou imedu roguji, nou učeji. Eture nou boečoji rugadu nou tieda piji tuduwo toro Egito moto ka. Eture jii toro etaregodure Egito moto ka rugadu.
MAT 2:15 Emugu raire nono Egito moto keje jii nou Herodes bire kejewu meri ka. Marigudu Pao Kurireu ure boe ewie ainore eromoduie. Makore Pao Kurireu bataru jiwu ure nou bataru bu bapera keje. Akore: – Imagore itonaregedu bagai utuwo Egito moto piji. Aino nou bataru jeture pudui rugadu.
MAT 2:16 Ča nou boe tuginaiwuge jorduwareuge ere činorudo Herodes piji. Ekare tugirimi ae rugadu. Nou Herodes jorduwagodure nou inoduji dukodire korigodure rugadu. Aidure tuwo nou imedu rogu bito marigudu. Mare nou jorduwareuge ekare tuiorduwado duboba nure ema duji. Dukodire korigodure. Makore to tugobaigaregei etuwo Belém ba kurireu ka ewo boe etore ime eiamedu ewido rugadu. Nou boture maibariwuge, nou jorure mitotu, pobetu kejewuge eiamedu boe ewido. Emode nou Belém ba kurireu tadawuge boe etore kugure ime ewido, nou mugure pureduwuge boe etore ime ewido jamedu. Nou boe tuginaiwuge jorduwareuge ere Herodes bie kaba meri kejeba eture to moto piji. Dukodire Herodes meardaere jorumoduie pobe ei etaiwore bagaiwu imedu roguji. Dukodire makore to tugobaigaregei ewo nou boe etore ime ewido, ewo nou boture maibariwuge ewido, nou o jorure mitotu, pobetu kejewuge boe etore ime ewido jamedu. Dukodire nou tugobaigarege eture toro. Ere nou boe etore ime eiamedu boe ewido rugadu Belém ba kurireu keje, nou rakojere nou Belém ba kurireu pureduwuge ewido jamedu.
MAT 2:17 Pao Kurireu ure boe ewie nou inoduji marigudu. Ure tuwadaru maku makore Pao Kurireu bataru jiwu Jeremias ai. Akore:
MAT 2:18 – Boe eda Ramá rakoje jaekare Belém piji. Ramá kejewuge etragudu rakamode rugadu. Ekiarigodumode rugadu. Boe emeardumode etraguduji rugadu. Nou moto kejewuge etuje Raquel uwobe areme etragudumode tore ewagai. Boe erduwamodukare tuwo ewudugugo nou tugiarigodure dupiji. Etore kugure eiamedu boe ewire dukodi. Ainore Pao Kurireu akore marigudu. Aino čare nou Pao Kurireu bataru jeture pudui rugadu.
MAT 2:19 Toro ia meri keje Herodes bire rugadu. Nono ia Pao Kurireu utugare baru tadawu aregodure José ae toro Egito moto ka. Makore Joseji uniau tada.
MAT 2:20 Akore: – Nou aidure tuwo imedu rogu bitowu bokware. Aino ča taragojedo taduwo taibagi tago moto ka pugeje, aki, nou imedu rogu, nou uče jamedu tawo tagirimi Israel moto ka.
MAT 2:21 Dukodire José ure turagojedo. Ure tugeragu toredujeji, nou imedu roguji dukeje eture rugadu toro to moto Israel moto ka rugadu.
MAT 2:22 Kodure awaraji dukeje José meardure nou imedu Arquelau muguie tuo Herodes mugato boe eimijera kurireuwo ema nono Judéia moto keje. Dukodire José pagudure tuduwo Judéia moto ka. Uniau tadare Pao Kurireu ure bie jamedu utukawo toro Judéia moto ka. Dukodire José uture toreduje apo nou imedu rogu apo jamedu toro Galiléia moto ka.
MAT 2:23 Etaregodure Galiléia moto ka dukeje eture toro Nazaré ba kurireu ka tumuguwo nono. Marigudu Pao Kurireu ure boe ewie eromoduie aino. Nou makore Pao Kurireu bataru jiwuge ere nou Pao Kurireu bataru bu bapera keje. Akore: – Nou umode boe ekinorudowu iemode Nazaré ba kurireu pijiwu nure ema. Ainore Pao Kurireu akore marigudu. Aino ča nou Pao Kurireu bataru jeture pudui rugadu.
MAT 3:1 Ia meri keje João Batista rakojere boe maereu keje Judéia moto keje. Nonore rakojere tumago tabo Pao Kurireu bataruji.
MAT 3:2 Akore: – Tagera ra taro pegareu piji. Boe puredugodu Pao Kurireu uwo boe eimijera kurireudo pudumi rugadu.
MAT 3:3 Ainore João Batista akore. Marigudu Pao Kurireu ure boe ewie ia makore Pao Kurireu bataru jiwu aregodumoduie nono João Batista mogadure rugadu. Mariguduwu makore Pao Kurireu bataru jiwu Isaías ure nou Pao Kurireu bataru bu bapera keje. Akore: – Ia imedu uwadodunure boe maereu keje boe ewo awara jetorodo boe eimijera aregodu pemegawo boe etae. Mare awara ji karega akoino. Boe ewo turo jetorodo. Dujire akoino. Boe ewo turo pemegado, umode boe ekinorudowu imedu aregodumode Pao Kurireu piji kodi. Dujire akoino. João Batista jirabodu Pao Kurireu akoino.
MAT 3:4 João Batista ukudaure camelo buče. Pegajejewure tapira biri rema. Okwagere tu kitariga dogei, ropa doge eweguruji tu rugadu.
MAT 3:5 Boe emagare tudu tabo João Batista ae. Etaregodure Judéia moto piji. Etaregodure Jerusalém ba kurireu piji. Etaregodure Jordão Po okwaiwu moto jamedu boe piji tumearduwo João Batista makore jiboeji.
MAT 3:6 Emeardure João Batista bataruji dukeje emagore turo pegareu jiboeji, taiduie tuwo tugera ra nou turo pegareu jiboe piji. Nono João Batista ure etao pegodo Jordão Po tada.
MAT 3:7 Mare ia fariseu doge etaregodure João Batista ae. Ia saduceu doge etaregodure João Batista ae jamedu. Judeu doge eimijerage nure emage. Etaregodure João Batista ae etao pegododuwo jamedu. Mare etaidukare tuwo tugera ra nou turo pegareu piji. Dukodire João Batista makore ei. Akore: – Tare nono awage pegareuge emogadure. Mare awagu ji karega inagoino. Tare tadugarege Judeu doge ekiripagado. Tagagore taro pemegaie mare ro pegareuge nure tagi rugadu. Kočare tagaregodure mato iwagai. Tarokwačereu bokware. Pao Kurireu umode boe pegado tai taro pegareu moriče rugadu.
MAT 3:8 Mare taro jetorodo tarore jiboeji boe erduwo taroji boe erduwawo tare tagera ra taro pegareu piji duji.
MAT 3:9 Mare tamodukare tagera ra taro pegareu piji dukeje Pao Kurireu uwobe emodukare tagi. Tagagore boe etuo Abraão ore enuie tagi dukodire Pao Kurireu uwobe enuie tagi. Ainore tagagore. Boe jokodu jire tagagoino. Abraão uwobe nure tagi rugadu. Mare du inodu kodi karega Pao Kurireu ro pegamodukare tai taro pegareu moriče. Ro pegareuge nure tagi rugadu. Dukodire tagare nono Abraão uwobe remawuge emogadure pugeje. Pao Kurireu roiware tuwo tori udo nono boe mogadure tuwo Abraão uwobedo emage tamugato.
MAT 3:10 Boe emode tudureboe i butudo jerigiče tudu bokware dukodi. Tagi tagagomode tamoduie tagera ra taro pegareu piji mare taro pemegamodukare, tameardae pemegamodukare dukeje Pao Kurireu ro pegamode tai jamedu nono boe erore nou jerigi jitu mogadure. Mare jerigi ji karega inagoino. Boe pegamode tai rugadu. Dujire inagoino. Pao Kurireu umode boe pegado tai taro pegareu moriče kuri je rugadu. Dujire inagoino.
MAT 3:11 Boe ere tugera ra turo pegareu piji dukodire ire etao pegodo pobo tabo. Mare ia imedu ro kodumode ikoriwu aregodumode kuri iregodaji. Boe pemegareu nure ema, boe kurireu mode ema rugadu. Dukodire ipogurumode ipureduwo ji, kurikareu nure imi kodi. Emare umode Tuwari tugu boe emeardaeto boe ero pemegawo. Umode ro pegareuge ewarigu joruto jamedu.
MAT 3:12 Romode nono ia imedu rore trigo jitu mogadure. Imedu umode trigo jukodo baku tabo tuwo iwo tawuje nou trigo piji. Nou trigo remawure umode tugu baito. Nou iwore umode barigu joruto. Nou umode boe ekinorudowu romode aino boei jamedu. Meartorure Pao Kurireu jiwuge ere nono trigo mogadure. Mare trigo ji karega inagoino. Umode boe ekinorudowu umode meartorure Pao Kurireu jiwuge etawuje ro pegareuge epiji tuwo edudo pudabo. Dujire inagoino. Umode ro pegareuge ewarigu bope doge eda kejewu joru pegareuto. Dujire inagoino. Nou joru akedumodukare rugadu. Ainore João Batista akore.
MAT 3:13 Ia meri keje Jesus uture Galiléia moto piji toro Jordão Po ka, João Batista bagai, João Batista uwo Jesus ao pegodo.
MAT 3:14 Jesus aregodure João Batista ae mare João Batista aidukare tuwo Jesus ao pegodo. Akore: – Ro pegareu nure imi dukodire ipemegakare iwo akao pegodo. Aki apemegare awo itao pegodo rugadu.
MAT 3:15 Mare Jesus akore: – Boro. Amode itao pegodo rugadu. Ainore Pao Kurireu meardaere. Amode itao pegodo dukeje pamode Pao Kurireu makore jiboe jamedu boe jetudo pudui. Aino Pao Kurireu meardae pemegareu jire paroino rugadu. Dukodire João Batista ure tumeardaedo nono Jesus makore jiboe mogadure.
MAT 3:16 Ure Jesus ao pegodo rugadu. Dukeje Jesus ure tudawuje Jordão Po piji. Nono barure tuiado. Jesus jordure Pao Kurireu Uwari ure turawuje baru piji rugadu. Ure nono metugore. Ure tumugudo Jesus keje.
MAT 3:17 Nono Pao Kurireu makore baru piji. Akore: – Itonaregedu reo. Imeardu kurire ji rugadu. Ure iagaredo i rugadu.
MAT 4:1 Nono Pao Kurireu Uwari makore Jesusji utuwo toro boe maereu ka. Nonore mareboe doge eimijera umoduie turokogado Jesusji tuwo Jesus meardae pegado tumeardaeji.
MAT 4:2 Torore merire quarenta Jesusji. Nou meri jameduji Jesus okwagekare iaboeji iaboeji. Dukodire uke boeire ji.
MAT 4:3 Nono nou mareboe aregodure Jesus ae rugadu. Akore: – Pao Kurireu onaregedu remawu mode aki dukeje amagodo awu toriji uwo tudo nono amireu mogadure awo kowuje.
MAT 4:4 Jesus akore: – Padure bapera kejewu Pao Kurireu bataru koiare iromodukare nono ameardae mogadure. Nou bakaru akore: “Boe eke mitodu tabo karega imedu rakojemode moto keje mare Pao Kurireu o bataru jamedu boe tabo.”
MAT 4:5 Mareboe eimijera uture Jesus apo toro Jerusalém ba kurireu ka. Uture apo toro Pao Kurireu uwai ričoreu ao ka.
MAT 4:6 Nono makore Jesusji pugeje. Akore: – Pao Kurireu onaregedu remawu mode aki dukeje amode akaredo awu bai ričoreu ao piji toro moto ka. Padure bapera kejewu Pao Kurireu bataru akore tumoduie tudugarege baru tadawuge ekera bararedo ai. Etu pemegamoduie ai akawo akogorido. Awure jamedu jetumodukaie toriji.
MAT 4:7 Mare Jesus akore: – Boro iromodukare aino. Nou padure bapera kejewu Pao Kurireu bataru remawu akore: “Boe ekawo turokogado Pao Kurireuji.”
MAT 4:8 Dukejere nou mareboe eimijera uture Jesus apo toro ia tori kurireu ao ka. Ure Jesus jordudo moto jamedu boeji tači je. Akore: – Awu moto jamedu boe makudure inai inoče. Awu moto kejewuge eimijera nure imi. Itaidumode dukeje imode awu moto maku itaidure jiwuge etai. Ča amode apu jodo iogorai akagomode akaiduie i amoduie akimijerado imi ameartoruwo i dukeje imode awu moto jamedu boe maku akai, imode awu moto kejewuge eimijerado aki.
MAT 4:10 Jesus akore: – Boro. Iromodukare aino. Padure bapera kejewu Pao Kurireu bataru akore: “Boe etaiduwo tu Pao Kurireuji ewo tubu jodo moto keje tu Pao Kurireu jokorai emago pemegawo tu Pao Kurireuji rugadu. Boe emeartoruwo tu Pao Kurireuji rugadu.” Mare akiere Satanás. Mareboe nure aki rugadu. Ča atudo ipiji.
MAT 4:11 Dukodire mareboe eimijera uture Jesus piji rugadu. Nono Pao Kurireu utugarege baru tadawuge etaregodure Jesus ae. Etu pemegare Jesusji rugadu.
MAT 4:12 Mare boe eimijera ure João Batista tugu baičoreuto. Ča Jesus meardure nou inoduji dukeje ure tugirimi Galiléia moto ka Nazaré ba kurireu ka.
MAT 4:13 Nono Jesus uture Nazaré ba kurireu piji. Uture toro Cafarnaum ba kurireu ka. Nou Cafarnaum ba kurireu mugure nou pobo maereu okwai. Nou pobo maereu iere Galiléia. Naftali moto kejere nou Cafarnaum ba kurireu mugure. Nou Cafarnaum ba kurireu mugu puredure Zebulom motoji jamedu.
MAT 4:14 Dukodire ia Pao Kurireu bataru jeture pudui. Nou makore Pao Kurireu bataru jiwu imedu Isaías ure nou bataru bu bapera keje. Akore:
MAT 4:15 – Nou iere Galiléia aino jiwu pobo maereu okwai Zebulom moto mugure, Naftali moto mugure jamedu. Boe ekodumode nou moto kajeje taregoduwo nou pobo maereu ka, taregoduwo Jordão Po ka jamedu. Boe tuginaiwuge emugure nou moto keje jamedu. Nou boe emugu pemegakare. Emugure boečo tada. Emugure kejewu moto ure nono bireuge eda mogadure. Mare boečo ji karega inagoino. Nou boe erduware tuwimoduie. Dujire inagoino. Erduwakare tuwo tuginorudo nou tuwi piji. Dujire inagoino. Mare aino erdure ia jorugu kurireuji. Ure nono meri joku rutu mogadure. Mare jorugu ji karega inagoino. Meri joku rutu ji karega inagoino jamedu. Umode boe ekinorudowu jire inagoino. Boe erduware umode boe ekinorudowuji. Dujire inagoino. Ainore Pao Kurireu akore marigudu. Aino čare Jesus aregodure. Dujire nou Pao Kurireu bataru akoino.
MAT 4:17 Nou meri kejere Jesus makogodure boei. Makore tu tu je boe ewiagai tuwo boe erduwado Pao Kurireu meardaeji. Akore: – Tagera ra taro pegareu piji. Kuri aino Pao Kurireu umode boe eimijera kurireudo pudumi rugadu.
MAT 4:18 Ia meri keje Jesus merure nou Galiléia Po Maereu okwaji. Nono jordure Simãoji nono pobo okwai. Nou Simão iere Pedro jamedu. Jesus jordure nou Simão umanaji jamedu. Nou umana iere André. Nou ime pobedu doge ere tuwuge barigu poboto kare ewagai. Emaragodae reno.
MAT 4:19 Nono Jesus makore etae. Akore: – Mato itabo. Imode tawogudo ime ewagai. Mare tawogu ji karega inagoino. Tamode boe emeartorudo Pao Kurireuji. Dujire inagoino. Ainore Jesus akore.
MAT 4:20 Ča nou ime pobedu doge ere tugera ra tuwuge piji tači je. Eture Jesus apo rugadu tumaragodae piji rugadu.
MAT 4:21 Eture ji je dukeje erdure ia boei pugeje. Zebedeu ore ime nure emage. Ere pobe. Ia iere Tiago. Nou uwie imedu iere João. Emugure tuo apo to ika kurireu tada. Emaragodure tuwugeji tuwo tuwuge pemegado. Nono Jesus makore etae.
MAT 4:22 Ča eture to ika kurireu piji kuri je. Nono eture tuo piji tuduwo Jesus apo rugadu.
MAT 4:23 Nono Jesus kodure nou Galiléia moto jamedu boe parugajeje tuwo boe eiamedu boe erduwado Pao Kurireu bataruji. Ure turemo tu tu nou Judeu doge ere bato puiwu to baito tuwo erduwado nono. Ure ewie tu tu je Pao Kurireu umoduie boe eimijera kurireudo pudumi kuri aino rugadu. Ure kogodureuge epemegago jamedu.
MAT 4:24 Nou Jesus akaru ure tumaedo Síria moto jamedu boe ka. Dukodire boe etaregodure Jesus bagai kogodureuge eiamedu boebo. Iage etaora, emorora, ekana, epogora korire ei rugadu. Bope doge emedure iage etada. Iage epogora pegare emeru bokware. Iage ewi kigodure tu tu je tumagadu tabo. Jesus ure awu kogodureuge eiamedu boe epemegago.
MAT 4:25 Boe emagare taregodu tabo Jesus ae tuduwo Jesus apo rugadu. Boe etaregodure Galiléia moto piji, Decápolis moto piji, Jerusalém ba kurireu piji, Judéia moto piji. Nou torowu Jordão Po bakowu kejewuge boe ekurugodure nou pobo kajeje mato Jesus ae tuduwo apo jamedu.
MAT 5:1 Jesus jordure nou boei dukeje ruture ia tori kurireu ao ka. Nono ure tumugudo. Nou ure jorduwadowuge etaregodure Jesus ae jamedu.
MAT 5:2 Nono Jesus makore ei tuwo erduwado. Akore: –
MAT 5:3 Ia boe enojarokare pudui. Dukodire eragojemode Pao Kurireu apo. Ere tugimijerado ema dukodire eragojemode apo rugadu boe pemegareu keje. Dukodire egaremode pudui. Boe pemegamode ei rugadu.
MAT 5:4 Ia boe etragudure tugiarigodure dukodi. Mare du inodu tabo Pao Kurireu umode ewudugugo. Dukodire egaremode pudui rugadu. Boe pemegamode ei rugadu.
MAT 5:5 Ia boe emaragodu pemegamode tugimijera ai mare ekorigodumodukare ji rugadu. Mare Pao Kurireu umode tumagore jiboe maku nou maragodu pemegareuge etai rugadu. Dukodire egaremode pudui. Boe pemegamode ei rugadu.
MAT 5:6 Ia boe ere turagado pudui tumeartoruwo Pao Kurireuji tuwo turo jetorodo. Ewiagorore tu turo pemegawo tu rugadu. Ewiapagakare iaboeji iaboeji. Dukodire Pao Kurireu umode turaga maku etai rugadu ewo turo jetorodo. Dukodire egaremode pudui. Boe pemegamode ei rugadu.
MAT 5:7 Ia boe enogudugodure boebo rugadu. Dukodire Pao Kurireu okudugodumode ebo nou ero jipagi. Dukodire boe pemegamode ei rugadu. Egaremode pudui rugadu.
MAT 5:8 Ia boe emeardae pegareu bokware. Emeardae pemegare. Boe pemegamode ei rugadu. Erdumode Pao Kurireuji tuioku tabo rugadu. Dukodire egaremode pudui rugadu.
MAT 5:9 Ia boe erugodukare boei. Emago kigodure boei erugodukawo pui pugeje epemegawo pui rugadu. Boe pemegamode nou boei. Pao Kurireu umode toredo emage. Dukodire egaremode pudui rugadu.
MAT 5:10 Ia boe emeartorure Pao Kurireuji dukodire ro pegareuge emago pegare ei, ero pega kigodure ei. Mare du inodu tabo boe pemegamode nou meartorure Pao Kurireu jiwugei. Ere tugimijerado Pao Kurireuče dukodire eragojemode Pao Kurireu apo rugadu boe pemegareu keje. Dukodire egaremode pudui rugadu.
MAT 5:11 Tameartorumode imagore tai jiboeji dukodire boe emago pegamode tarore jiboeji boe emeartorukawo tai pugeje. Tagodumode iwadaru kodaji dukeje boe emago pegamode tai, ero pegamode tai, egomode taro pegaie tuwadrarodu tabo. Ainore ewobe emago pegare jamedu jaoboei. Mariguduwuge ewobe ero pegare nou mariguduwuge makore Pao Kurireu bataru jiwugei jamedu. Mare tare tameartorudo i dukodire emago pegare aino tai jamedu. Mare kočare tameartorukaba egoino jiboeji. Taegaredo tai. Mare paga karega. Pao Kurireu umode mori kurido tagai toro baru tada. Dukodire čare taegaregodumode tai rugadu.
MAT 5:13 Jesus mako kimore. Akore: – Tameartorure i dukodire tare nono sal mogadure. Sal pemegare. Mare nou sal pegomode dukeje nou sal akedumode. Nono umodukare nono sal mogadure pugeje. Dukodire boe eromodukare iaboeji nou sal tabo pugeje. Emode barigu. Ewure jomode keje. Mare sal ji karega inagoino. Tameartorure i. Dujire inagoino. Tagaba tagera ra tameartorure i dupiji. Nono meartorukareuge erdumode taro pemegareuji. Nono etaidumode tumeartoruwo i jamedu. Dujire inagoino.
MAT 5:14 – Tameartorure i dukodire tare nono jorugu mogadure. Boe emode jorugudo ia tori kurireu ao keje dukeje boe eiamedu boe erdumode joruguji.
MAT 5:15 Boe emode pori bu jorugu aogeje dukeje urugumodukare. Mare boe emode jorugu bararedo, uruguwo pudui.
MAT 5:16 Mare jorugu ji karega inagoino. Tameartorure i. Dujire inagoino. Tamodukare tagera ra tameartorure i dupiji dukeje boe erdumode taro pemegareuji. Dujire inagoino. Boe erdumode taro pemegareuji dukeje emago pemegamode tameartorure jiwu Pao Kurireuji. Emagomode Pao Kurireu bagai baruto. Dujire inagoino.
MAT 5:17 – Ia boe egore itaregoduie iwo Moisés ure maku Judeu doge etaiwu bakaru akedudo. Mare itaregodukare iwo nou bakaru akedudo. Ia boe egore itaregoduie iwo makore Pao Kurireu bataru jiwuge emagore jiboe akedudo. Mare itaregodukare iwo nou emagore jiboe akedudo. Itaregodure iwo Moisés ure maku Judeu doge etaiwu bakaru makore jiboe jetudo pudui. Itaregodure iwo nou makore Pao Kurireu bataru jiwuge emagore jiboe jetudo pudui.
MAT 5:18 Moisés makore jiwu Pao Kurireu o bakaru jetumode pudui rugadu. Nouia makore Pao Kurireu bataru jiwuge emagore jiwu Pao Kurireu o bakaru jetumode pudui rugadu. Nou Pao Kurireu o bakaru tadawu ia bataru rogu akedumodukare piji rugadu jii toro moto akedumode du ka, jii toro baru akedumode du ka. Nou makore jiboe jamedu boe jetumode pudui rugadu. Boe jokodu jire inagoino rugadu.
MAT 5:19 Ia boe emeartorumodukare awu Pao Kurireu bakaru tadawu bataru roguji. Emode ia boe emeartoru bokwado nou bataru roguji jamedu dukeje Pao Kurireu umode boe eimijerado pudumi dukeje mako pegamode ei. Akomode nou roinowugei: – Itugarege jorduwakareuge nure tagi pemegakareuge nure tagi. Ainore Pao Kurireu akomode ei. Umode boe eimijera kurireudo pudumi dukeje ainore akomode ei rugadu. Mare ia boe emeartorumode awu Pao Kurireu bataruji, emode boe erduwado awu Pao Kurireu bataruji dukeje Pao Kurireu mako pemegamode ei. Akomode ei erduwaie epemegaie ekurie nou tudugarege eiamedu boe ekori. Pao Kurireu umode boe eimijera kurireudo pudumi dukeje ainore akomode ei.
MAT 5:20 Iwo tawie. Pao Kurireu umode boe eimijera kurireudo pudumi rugadu. Mare tamodukare taro jetorodo fariseu doge ero kori dukeje tagimijera umodukare Pao Kurireuče. Tamodukare taro jetorodo nou jorduware Judeu doge eno bakaru jiwuge ero kori dukeje tagimijera umodukare Pao Kurireuče.
MAT 5:21 – Marigudu Pao Kurireu makore boei ekawo boe ewido. Tarduware nou bataruji marigudu. Pao Kurireu akore boe emoduie boe ewido dukeje boe eimijerage emoduie boe pegado ei ero pegareu moriče.
MAT 5:22 Mare imode tawie Pao Kurireu meardae remawuji. Boe ekorigodumode timediaji dukeje Pao Kurireu umode boe pegado ei nono turo moga nou ure boe ewidowu jitu mogadure. Ia pugeje. Ia boe akomode timediaji boe kaieguie ema dukeje nou metia umode nou akoino puduiwu reko Judeu doge ekimijerage etae ewo boe pegado ji nou bataru pegareu moriče. Ainore tarore. Mare imode tawie Pao Kurireu meardae remawuji. Ia boe akomode timediaji jorduwa bokwaie rugadu dukeje boe pegamode ji rugadu. Umodukare togwa ra nou tuwadaru pegareu piji dukeje barigudumode bope doge eda kejewu joru pegareuto rugadu.
MAT 5:23 Dukodire imode tawie. Tagaregodumode Pao Kurireu uwai ka ia tagoe tabo tawo maku Pao Kurireu ai. Mare tagaregodu keje tawiabuture ia taro pegare tamedia jitu keje. Nou tamedia jordu pemegakaie nou taroino pudui duji.
MAT 5:24 Dukodire tamode nou tagoe bu moto keje nono Pao Kurireu uwai tada taduwo kuri nou tamedia bagai. Tardumode nou tamediaji dukeje tamago pemegado ji tagiarigoduie nou taro pegareuji, tamodukaie nou taro towuje pugeje. Dutabore tamode tabemegado ji pugeje. Tabemegamode pui pugeje dukeje tamode tagirimi Pao Kurireu uwai ka tawo nou tagoe maku Pao Kurireu ai rugadu.
MAT 5:25 Ia boe ekorigodumode tai. Egomode tumoduie tarego boe eimijera kurireu ae tumago pegawo ia tarore jiboeji nou boe eimijera biagai. Nou boe eimijera makomoduie tai tawo iaboe maku nou boe etai taro pegareu moriče. Nou boe eimijera umoduie tamagu tugobaigarege etai. Umoduie tadugu baičoreuto. Ainore nou korigodure taiwuge egomode. Parduwakare boemode aino tai rugadu duji. Dukodire imode tawie. Ia boe ekorigodumode tai. Emagomode tai tumoduie tarego boe eimijera bagai aiwowo ia taro pegareu bagai dukeje tamago pemegado ei tawo nou boe ekorigoduredu barigu epiji. Taro pemegado ei ekorigodukawo tai pugeje kuri je.
MAT 5:26 Boe jokodu jire inagoino. Tamodukare tabemegado nou korigodure taiwugei dukeje emode tarego boe eimijera bagai rugadu. Nou boe eimijera umode tadugu baičoreuto rugadu. Taedumode nono jii tamode taro pegareu morido du ka.
MAT 5:27 – Marigudu tarduware bakaruji rugadu. Akore boe eribarikaiago toreduje piji toredu piji.
MAT 5:28 Mare aino čare imode tawie Pao Kurireu meardae remawuji. Boe etaiwomode areduji tumeardae pegareu tabo tuwo tugeragu nou areduji. Dutabore emeardae ure nono boe ero moga tieribari tabo jitu mogadure Pao Kurireu jakai. Dukodire Pao Kurireu jordu pegare nou emeardaeji.
MAT 5:29 Boe etaidukare tuioku bokwawo. Mare epagudure tuwariguduwo bope doge eda kejewu joru pegareuto rugadu. Dukodire imode tawie. Taeku umode tameardae pegado dukeje nou taeku tawuje. Mare taeku remawu ji karega inagoino. Tagaidure jiwu tameardae pegareu jire inagoino. Nou tameardae pegareu barigu tagaora piji rugadu tameardaekawo nou tameardae pegareuji pugeje. Dujire inagoino.
MAT 5:30 Boe etaidukare tugera kadoduwo tugana piji. Mare epagudure tuwariguduwo bope doge eda kejewu joru pegareuto rugadu. Dukodire imode tawie. Tagera umode taro pegado dukeje nou tagera kado tagana piji rugadu. Mare tagera remawu ji karega inagoino. Tagaidure jiwu taro pegareu jire inagoino. Nou taro pegareu barigu tabiji rugadu tarokawo nou taro pegareuji pugeje. Dujire inagoino.
MAT 5:31 – Marigudu Moisés ure taro maku tagai. Akore ia imedu umoduie tugera ra toreduje piji dukeje umoduie bapera atugodo tuwo maku toreduje ai tuwo toreduje bie tuie tugera ra piji duji. Umoduie tugie bu nou bapera atugododureu keje rugadu.
MAT 5:32 Mare imode tawie Pao Kurireu meardae remawuji. Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai rugadu. Nou imedu ro peganure nou toreduje boetojiwudo piji rugadu. Ure tudo nono jeribarire toreduje pijiwu mogadure Pao Kurireu jakai. Mare imedu oreduje jeribarimode nou toredu piji dukeje nou imedu aidumode tuwo tugera ra toreduje piji du pegakare. Mare imedu oreduje jeribarikare toredu piji mare nou imedu umode tugera ra toreduje piji dukeje ro peganure nou toredujeji rugadu. Turoino dutabo umode toreduje udo nono jeribarire toredu pijiwu aredu mogadure Pao Kurireu jakai. Imedu jamedu mugukawo ia aredu ure tugera ra toredu pijiwudo apo. Mugumode apo dukeje umode tudo nono jeribarire toreduje pijiwu mogadure Pao Kurireu jakai.
MAT 5:33 – Marigudu Pao Kurireu makore boei emagomoduie Pao Kurireu ie tabo turomode jiboeji dukeje ekawo tuwadaru pogurudo. Mare boe emagomoduie Pao Kurireu ie tabo dukeje nou emagore jiboe ewo towuje rugadu. Tarduware nou bataruji marigudu.
MAT 5:34 Mare imode tawie Pao Kurireu meardae remawuji. Tamagokaba iaboe iaboe ie tabo. Mare tamagodo tameardae pemegareuji. Tawadrarodukaba rugadu. Tamagomode jiboe jetudo pudui rugadu. Tagaba tawadaru pogurudo. Tamagomode uu taromoduie ia taroji dukeje tarodo ji rugadu. Tamagomode boro taromodukaie ia boe eroji dukeje tarokaba ji rugadu. Ia boe emagore baru ie tabo tuwo boe emeartorudo tuwadaruji. Mare tamagokaba baru ie tabo. Nonore Pao Kurireu mugure. Ia boe emagore moto ie tabo tuwo boe emeartorudo tuwadaruji. Mare tamagokaba moto ie tabo. Nonore Pao Kurireu umode tuwure udo tamudo. Ia boe emagomode Jerusalém ba kurireu ie tabo tuwo boe emeartorudo tuwadaruji. Tamagokaba Jerusalém ba kurireu ie tabo. Jerusalém tadare Pagimijera Kurireu mugumode rugadu. Ia boe emagomode taora ie tabo tuwo boe emeartorudo tuwadaruji. Mare tamagokaba tagaora ie tabo. Taroiwakare tawo tagao čoreu kigadudo. Taroiwakare tawo tagao kigadureu čodo pugeje. Tu Pao Kurireu emare roiware tuwo boe etao udo nono tumeardae mogadure. Dukodire inagoino. Tawadrarodukaba. Tamagore jiboe jamedu boe jetudo pudui rugadu tawo boe emeartorudo tawadaruji. Mareboe aidure boe ewadraroduwo boe emeartorukawo pui. Dukodire nou mareboe meardae jire boe eroino tumagowo iaboe ie tabo ia tumagore jiboeji.
MAT 5:38 – Marigudu Pao Kurireu ure boe ewie nuba eromoduie tuwo ia boe ero pegare jiboe morido etai. Akore boe erowo ji nono ro pegare jitu mogadure. Ia boe umoduie ia timedia joku pegado dukeje boe ewo nou ro pegare timedia jiwu joku pegado jamedu ro pegare timedia jitu moriče. Ia boe umoduie ia timedia o kado dukeje boe ewo nou ro pegare timedia jiwu o kado jamedu ro pegare timedia jitu moriče. Tarduware nou Pao Kurireu bataruji marigudu.
MAT 5:39 Mare imode tawie Pao Kurireu meardae remawuji rugadu. Tagaba ro pegareu rore taiboe morido ai. Ia ro pegareu umode tugera to taeji tae abowu metia maku ai jamedu uwo tugera to ji jamedu.
MAT 5:40 Ia boe etumode boe eimijera bagai tuwo tugeragu tagudau meture taiwuji tabiji dukeje maku etai rugadu. Mare ia tagudau okwatorureu biaku epa maku etai jamedu.
MAT 5:41 Ia boe tuginaiwuge tugobaigarege ero rakamode tai tagoreduwo toe tabo pudai jii quilômetro oto pa ka tageragu ji tagoreduwo tabo rugadu. Mare quilômetro udo pobe taroino enoe tabo duji.
MAT 5:42 Ia boe enogwamagudumode tai iaboe bagai dukeje maku etai rugadu. Ia boe enogwamagudumode tai ia tago diero bagai mare ia meri kejeie tumoduie morido tagai dukeje diero maku etai rugadu.
MAT 5:43 – Marigudu Pao Kurireu akore boe emeardu kuriwo tumedagei tuwobei. Marigudu tagimijerage egore boe erdu pegawo jordu pegare puduiwugei. Tameardure nou bataruji marigudu.
MAT 5:44 Mare imode tawie Pao Kurireu meardae remawuji. Tameardu kurido jordu pegare taiwugei, onare taiwugei. Tamagodo baruto Pao Kurireu bagai nou ro pegare taiwuge eparu tabo.
MAT 5:45 Dukodire čare boe erduwamode Pao Kurireu ore nure tagi duji. Pao Kurireu emare ure meri joku jorugudo ro pemegareugei ro pegareugei jamedu. Emare ure bubutudo ro pemegareuge eno moto keje ro pegareuge eno moto keje jamedu.
MAT 5:46 Tameardu kurimode tu ro pemegare taiwugei dukeje taro pemegamodukare ro pegareuge ero kori. Nou ure tugeragu boe enoe mori jiwu imedu ro pemegare nou ro pemegare puduiwugei jamedu. Mare tameardu kuriwo boe eiamedu boei nono Pao Kurireu umode boe pemegado tai jamedu.
MAT 5:47 Tagimadumode tu tawobebo tu tamedagebo dukeje taro pemegamodukare ro pegareuge ero kori. Ro pegareuge meartorukare Pao Kurireu jiwuge ekimadure tuwobebo tumedagebo jamedu. Mare tagimaduwo boe eiamedu boebo. Nono Pao Kurireu jordu pemegamode tarore jiboeji.
MAT 5:48 Dukodire inure tawie. Taro jamedu boe pemegado nono Pao Kurireu ro pemegareu mogadure rugadu.
MAT 6:1 – Taro pemegamode boei tu boe egai mare boe etaiwokare dukeje tamodukare taro pemegado boei dukeje Pao Kurireu umodukare nou taro pemegareu morido baru tada.
MAT 6:2 Dukodire tamode ia tagoe maku marenarue doge etai dukeje tagaba boe ewie tapira ukiga tabo. Ia meartorukare tuwadaru jiwuge emode boe edo tapira ukiga akodo Judeu doge ere bato puiwu bai tada, awara okwai jamedu tuwo boe eiamedu boe ewie tuie ia toe maku marenarue doge etai. Etaidure tuwo boe emeardae pemegado pudui. Dukodire boe emago pemegamode ei eroino nou marenarue dogei duji. Mare ere turo pegareu biado boe epiji. Dukodire boe emago pemegare ei du morimode tu nouče rugadu. Mare Pao Kurireu umodukare nou ero pemegareu morido etai.
MAT 6:3 Iwo tawie. Tamode iaboe maku marenarue doge etai dukeje tagaba boe ewie taroino duji. Tagaba tamedage ewie. Tagaba tawobe ewie taroino duji.
MAT 6:4 Aino taro pemegareu biadodumode boe epiji. Mare Pao Kurireu jordumode tarore jiboe jamedu boeji. Emare umode nou taro pemegareu morido tagai rugadu.
MAT 6:5 – Ia boe emeartorukare tuwadaruji. Emagere etaidure tuwo turagojedo nono Judeu doge ere bato puiwu bai tada tumagowo baruto Pao Kurireu bagai boe erduwo turoinoduji. Etaidure turagojewo nono awara kajeje nono boe eda oiadada tumagowo Pao Kurireu bagai baruto boe eiamedu boe erduwo turoinoduji. Iwo tawie. Tarokaba nono ero mogadure tamagowo Pao Kurireu bagai baruto. Boe erdure egoino duji. Dukodire boe emago pemegamode ei. Du erore ainodu morireu tu rugadu. Mare Pao Kurireu jorduware boe remawuji. Dukodire meardae pemegamodukare ei nou eroino duji.
MAT 6:6 Mare tagi taremo tawaito tamagowo baruto Pao Kurireu bagai. Tawai bai poro mi tawo taro biado boe epiji. Boe erdukare Pao Kurireuji mare Pao Kurireu jordure boe erore jiboe jamedu boeji. Dukodire umode nou tare biadowu taro pemegareu morido rugadu.
MAT 6:7 Tarokaba nono meartorukare Pao Kurireu jiwuge ero mogadure tamagowo Pao Kurireu bagai baruto. Meartorukare Pao Kurireu jiwuge emago raimode tumeartorure jiwu bagai. Emode tuwadaru udo nono tuwadarure tu tu je tumago raiwo tumeartorure jiwu bagai. Egore boe emodukaie tuwadaru udo nono tuwadarure tu tu je dukeje tumeartorure jiwu meardumodukaie tumagore jiboeji.
MAT 6:8 Tarokaba nono ero mogadure. Tamagokare tagaidure jiboe bagai raga mare Pao Kurireu jorduware marigudu tagaidure jiboeji.
MAT 6:9 Dukodire imode tawie. Tamagore Pao Kurireu bagai baruto dukeje ainore tagagomode: “Iogwa Kurireu. Mugure baru tadawu nure aki. Boe emago pemegawo akieji tuwo boe emeartorudo tu ai rugadu.
MAT 6:10 Boe emeartoruwo awadaru jamedu boeji tuwo tugimijera kurireudo aki rugadu. Akaregodu pemegado aro pemegareu tabo mato moto ka ameardae rugadu boe jetuwo pudui rugadu, nono aro mogadure toro baru tada dumogadure.
MAT 6:11 Čege maku čenai meri jameduji.
MAT 6:12 Awiagodudo čero pegareu piji nono čewiagodure ro pegare čeiwuge ero piji dumogadure.
MAT 6:13 Iage etaidumode tuwo tumeardae pegareu maku čenai tuwo čero pegado. Čeginorudo epiji čewiapagakawo nou emeardae pegareuji. Čeginorudo mareboe piji rugadu. Mare paga karega. Boe eimijera kurireu nure aki. Aragare boe jamedu boe kori. Apemegare rugadu. Are aino jii toro rugadu. Ainore uwo rugadu.” – Ainore tagagomode Pao Kurireu bagai baruto.
MAT 6:14 – Tawiagodumode ro pegare taiwuge ero piji dukeje Pao Kurireu biagodumode taro pegare jiboe piji jamedu.
MAT 6:15 Mare tawiagodumodukare ro pegare taiwuge ero piji dukeje Pao Kurireu biagodumodukare taro pegare jiboe piji jamedu.
MAT 6:16 – Ia tagimijerage emeartorukare tuwadaruji. Etaidure tuwo turo pegareu biado boe epiji. Mare emode tugera ra togwage piji ia meri keje tumagowo Pao Kurireu bagai baruto nou meriji dukeje emode tie makodudo. Mare pagare eroino. Emode tie makodudo boe erduwo pudui boe emeardae pemegawo pudui. Dukodire etaidure boe erduwo turoino duji. Boe erdure eroino duji. Dukodire boe emago pemegamode ei eroino duji. Dukodire nou boe emago pemegare pudui nou morimode tu nouče rugadu. Mare Pao Kurireu jorduware boe remawuji. Dukodire Pao Kurireu meardae pemegamodukare ei eroino duji rugadu. Ča. Iwo tawie boe remawuji. Tarokaba nono ero mogadure.
MAT 6:17 Tamode tagera ra tagwage piji tu tu ia meri keje tamagowo Pao Kurireu bagai baruto dukeje nou taro biado boe epiji. Tae kabi. Puduga tugu tagaoji. Roreboe reko tawiriji. Tae makodukawo.
MAT 6:18 Nono boe erduwamodukare tare tagera ra tagwage piji. Tu Pao Kurireu jorduwamode taroino duji. Boe erdumodukare Pao Kurireuji. Mare Pao Kurireu jordure boe ere biadowu turore jiboe jamedu boeji. Dukodire emare umode taro morido rugadu.
MAT 6:19 – Tawiagorokaba tu tawo tagoe kurido woe moto keje. Tamode tagoe kurido woe moto keje mare boreu umode tagoe pegado. Tagoe akedumode. Iwogureuge ekiwogumode tagoeji tabiji.
MAT 6:20 Mare tawiagorodo tawo tagoe kurido baru tada. Mare moto kejewu tagoe ji karega inagoino. Tawiagorodo tameartoruwo Pao Kurireu bataruji, tameardu kuriwo Pao Kurireuji. Dujire inagoino. Tawiagorodo tawo taro pemegado. Dujire inagoino. Tameartorumode Pao Kurireuji dukeje umode boe pemegado tai baru tada. Dujire inagoino. Baru tadare boreu umodukare boe pegado. Iwogureuge ekiwogumodukare nou Pao Kurireu ro pemegareuji tabiji. Nou boe pemegare taiboe akedumodukare rugadu.
MAT 6:21 Boe etaidure tuwo toe kurido woe moto keje dukodire ewiagoromode tu nou toeji rugadu. Nou boe ewiapagamodukare Pao Kurireu bataruji. Mare boe enoe jetumode baru tada dukodire ewiagoromodukare ia moto kejewu toeji pugeje, ewiapagamode tu Pao Kurireu bataruji rugadu.
MAT 6:22 – Tuioku tabore boe erdumode boeji. Mare boe eku pegare dukeje erdumodukare boeji. Imagore jiboe ure nono boe eku mogadure. Mare boe eku ji karega inagoino. Boe emeartorumode imagore jiboeji dukeje erduwamode rugadu. Dujire inagoino. Mare boe emeartorumodukare imagore jiboeji dukeje erduwa bokwamode rugadu. Dujire inagoino. Dukodire tagi tagaidumodukare tarduwawo iwadaruji dukeje boečomode tai rugadu. Mare boečo ji karega inagoino. Tarduwamodukare boe pemegareuji rugadu.
MAT 6:24 – Ia imedu ukimijerage emode pobe dukeje meardu kurimode nouia tugimijeraji. Mare jordu pegamode nouia tugimijeraji. Meartorumode nouia tugimijera bataruji. Mare meartoru bokwamode nouia tugimijera bataruji. Dukodire boe emode tugimijerado dieroče dukeje ewiapagamodukare tumeartoruwo Pao Kurireuji pugeje.
MAT 6:25 Tamororamagadukaba tage bagai, tagudumode čeboe bagai, tagudau areia bagai. Pao Kurireu ure tadowuje. Ure tawodudo. Emare jetu pemegamode tai.
MAT 6:26 Tagaiwodo awu kiebaregei. Ekare boe tugu. Ekare tugeragu boeji. Eke ja bokware. Eke muga bokware. Mare du inodu tabo Pao Kurireu koiare ure enogwagedo. Boe nure tagi. Pao Kurireu meardu kurire boei nou kiebarege ekori. Dukodire inagoino tai jetu pemegamoduie tai rugadu.
MAT 6:27 Tamororamagadumode mare du inodu tabo tamodukare tawimode kejewu meri barigu tabiji.
MAT 6:28 Tamororamagadukaba tagudau areia bagai. Tagaiwodo awu okureboeji. Emodure rugadu mare emage eigoia karega ere tumodudo aino. Pao Kurireu koiare ure awu okureboe emodudo aino. Mariguduwu Israel doge eimijera kurireu Salomão oe kuričigore dukodire meture jiwu ukudau areia moture rugadu. Mare motukare nono awu okureboe emodu mogadure. Ča okureboe emodure mare joru umode ekowu kuri je. Mare boe nure tagi. Pao Kurireu meardu kurire boei nou okureboe kori. Dukodire umode tugera maku tagai rugadu. Dukodire inagoino tai tamororamagadukaiago tagudau areia bagai, tameartoruwo tu Pao Kurireuji rugadu. Tameartorumode ji dukeje tamode nono awu okureboe emogadure jamedu. Pao Kurireu jetu pemegamode tai rugadu. Kočare tameartorukare ji.
MAT 6:31 Dukodire inagoino tai tamororamagadukaiago tagwagemode jiboe bagai tagudumode čeboe bagai. Tamororamagadukaba tagudau areia bagai jamedu.
MAT 6:32 Mare meartorukare Pao Kurireu jiwuge ewiagorore tu nou tuge roguji toe roguji rugadu. Mare tameartorumode Pao Kurireuji dukeje tawiagoromodukare nou inoduji pugeje. Pao Kurireu jorduware kaba jiba tagaidure. Dukodire tawiagorodo tawo tagimijera kurireudo Pao Kurireuče rugadu. Tawiagorodo tawo taro jetorodo nono Pao Kurireu meardae mogadure. Tamode tagimijerado ema dukeje umode tage jamedu boe maku tagai rugadu. Umode tagudau areia maku tagai. Jetu pemegamode tai rugadu. Tamororamagadukaba barogwato boe pegamode tai du bagai, boe rakamode tai dubagai. Boe rakare boei meri jameduji. Mare tamode tagimijerado Pao Kurireuče dukeje umode tugera maku tagai awu meriji rugadu. Umode tugera maku tagai barogwato jamedu.
MAT 7:1 – Tawiapagakaba boei boe pegareu tabo. Tawiapagamode boei boe pegareu tabo dukeje Pao Kurireu biapagamode tai boe pegareu tabo jamedu. Tameardae pegamode boe erore jiboeji tamago pegawo nou boei dukeje Pao Kurireu meardae pegamode tarore jiboeji jamedu tumago pegawo tai jamedu nono tamago mogadure. Tamode tameardae tawuje taro pegawo ia tamediaji nou tamedia ro pegareu moriče. Aino jamedu Pao Kurireu romode aino tai taro pegareu moriče nono taro moga tamediaji dumogadure.
MAT 7:3 Meartorukare tuwadaru jiwuge nure tagi. Tardure tamedia joku tadawu boebutu roguji. Mare tardukare taeku tadawu iraji. Mare boebutu rogu ji karega inagoino. Boe ero pegareu rogu jire inagoino. Biagare tu je mare tardure ji. Dujire inagoino. Dukodire tamago pegare nou tamediaji. Tagagore: “Aro pegare”, aino ji. Tagagore tarduwaie tamedia ro pegareuji mare tardukare ia taro pegareuji. Dukodire tameartorukare tawadaruji. Tardukare taeku tadawu ira kurireuji. Mare ira ji karega inagoino. Taro pegareu kurireu jire inagoino. Taro pega kurire rugadu mare tagare tardudo ji. Dujire inagoino. Kočare. Tagera ra taro pegareu piji. Tamode tagera ra taro pegareu piji dukeje tarduwamode rugadu tamago pemegawo nou tamediaji nou tamedia uwo tugera ra turo pegareu biagareu piji jamedu.
MAT 7:6 – Tagaba Pao Kurireu maragodae pemegareu maku ariga doge etai. Mare ariga ji karega inagoino. Meartorukare Pao Kurireu jiwuge ro pegareuge eire inagoino. Tamode taragado tawo Pao Kurireu maragodae pemegareu maku nou meartoru bokware Pao Kurireu jiwuge etai dukeje nou meartorukare Pao Kurireu jiwuge ro pegareuge ekadakagirimode tai tuwo boe emeartoru akedudo tawadaruji. Emeardaere Pao Kurireu maragodae uie pagatu je. Dujire inagoino. Tagaba Pao Kurireu maragodae pemegareu maku jugureuge etai. Mare jugureu ji karega inagoino. Meartoru bokware Pao Kurireu jiwuge ro pegareuge eire inagoino. Tamode taragado tawo Pao Kurireu maragodae pemegareu maku nou meartorukare Pao Kurireu jiwuge etai dukeje emode tumeardae pegareu tawuje nou Pao Kurireu maragodae pemegareu piji tuwo nou Pao Kurireu maragodae pemegareu akedudo boe epiji. Emeardaere Pao Kurireu maragodae uie pagatu je. Dujire inagoino.
MAT 7:7 – Tagogwamagudumode Pao Kurireuji iaboe bagai dukeje Pao Kurireu umode tamagore bagaiboe maku tagai rugadu. Pao Kurireu aidure tuwo boe erduwado pudui. Dukodire taemarumode Pao Kurireu bagai dukeje umode tarduwado pudui rugadu. Pao Kurireu aidure tuwo tuwai poro jado baru tada tuwo boe edo turemo baruto. Dukodire tamode tagera to Pao Kurireu uwai poroji dukeje umode tuwai poro jado tagai rugadu. Mare bai poro ji karega inagoino. Boe emeartoruwo Pao Kurireuji rugadu. Dujire inagoino.
MAT 7:9 Ro pegareuge ero pemegamode torei. Dukodire tagore emagomode tai amireu bagai tuge boei koia. Nono tamodukare tori maku etai. Tamode amireu maku etai rugadu eke boeire ei kodi.
MAT 7:10 Tagore emagomode tai karo bagai tuge boei koia. Nono tamodukare awagu maku etai. Tawogumode karo bagai ekeče rugadu.
MAT 7:11 Ro pegareuge nure tagi mare du inodu tabo tarduware taro pemegawo tagorei tawo eke maku etai rugadu. Tarduware tawo boe pemegareu maku tagore etai. Mare Pao Kurireu pemegare rugadu. Dukodire umode boe pemegareu maku boe etai rugadu du kodumode nou tare maku tagore etaiboe kori.
MAT 7:12 Dukodire ire tawie. Taro pemegado boei boetoji nono tagaidu moga boe ero pemegawo tai dumogadure. Du nono tameartorunure makudure Judeu doge etaiwu bakaruji. Tameartorunure nou mariguduwuge makore Pao Kurireu bataru jiwuge emagore jiboeji jamedu.
MAT 7:13 – Pao Kurireu meardae ure nono baiporo biagareu ja mogadure. Ure nono awara barikareu mogadure. Boe emode baiporo biagareu jado tugoduwo nou awara barikareuji taregoduwo Pao Kurireu ae. Mare baiporo ji karega inagoino. Awara ji karega inagoino. Pao Kurireu meardae jire inagoino. Taragado tai tawo tameardae pemegado nono Pao Kurireu meardae mogadure tawo taremo baruto Pao Kurireu mugureu ka. Dujire inagoino. Bope doge eimijera meardae pegareu ure nono baiporo kurireu ja mogadure. Bope doge eimijera meardae pegareu ure nono awara barireu mogadure. Boe emode nou baiporo kurireu jado tugoduwo nou awara barireuji dukeje ewarigudumode bope doge eda kejewu joru pegareuto rugadu. Mare baiporo ji karega inagoino. Awara ji karega inagoino. Bope doge eimijera meardae pegareu jire inagoino. Boe emeartorumode kuri je nou bope doge eimijera meardae pegareuji. Dujire inagoino. Meartorure jiwuge emagare rugadu. Dujire inagoino. Etaidure tuwo turemo baru tadawu Pao Kurireu uwaito rugadu mare ekare tugimijerado Pao Kurireuče. Dukodire umodukare edo turemo rugadu. Meartorure Pao Kurireu meardae remawu jiwuge emagakare.
MAT 7:15 – Taeku jado. Nouia boe emagomode tai tumagoie Pao Kurireu bataruji. Mare pagare egoino. Ewadrarodunure. Ere tudo nono ovelha doge emogadure. Mare ovelha ji karega inagoino. Ere tuwadaru motudo boe etaiduwo tumagore jiboeji. Mare pagare egoino. Etada ere nono rie pegareuge emogadure. Mare rie ji karega inagoino. Etadare emeardae pegareure. Ewadrarodure tuwo boe ekiripagado Pao Kurireu bataru remawu piji. Dujire inagoino.
MAT 7:16 Mare tagaiwodo erore jiboeji. Erore jiboe umode tarduwado ei. Erore jiboe ure nono kurodureu tudu mogadure. Boe emodukare tugeragu uva tuduji ia boto iku piji. Boe emodukare tugeragu figo tuduji ia boto iku piji jamedu. Emode tugeragu uva tuduji ia uva iku piji. Emode tugeragu figo tuduji ia figo i piji. Mare kurodureu tudu ji karega inagoino. Makore Pao Kurireu bataru jiwuge batrarodureuge eire inagoino. Ewadaru moture mare emeardae pegare dukodire erore jiboe pegamode jamedu. Dujire inagoino.
MAT 7:17 I pemegareu tudu pemegamode. Tudu kurodumode dukeje betumode rugadu. Mare i pegareu tudu pemegamodukare. Nou i tudu pegamode rugadu. Pagodumode rugadu.
MAT 7:18 I pemegamode dukeje tudu pegareu bokwamode. I pegamode dukeje tudu pemegareu bokwamode.
MAT 7:19 Ia i tudu pegareumode dukeje boe emode nou i kado rugadu. Emode barigu joruto.
MAT 7:20 Mare i tudu ji karega inagoino. Makore Pao Kurireu bataru jiwuge eire inagoino. Tumeardae jire erore aino. Dujire inagoino. Tagaiwo pemegado nou boe erore jiboeji tarduwawo ei rugadu. Nono tarduwamode makore Pao Kurireu bataru jiwuge remawugei, batrarodureugei jamedu. Tarduwa pemegamode ei rugadu.
MAT 7:21 – Ia boe egomode i: “Ikimijera. Ikimijera.” Ainore nou boe egomode i. Mare pagare egoino dukodire imodukare eremo baruto. Egomode: – Ikimijera. Ikimijera nure aki. Akie tabore imagore awadaruji boe ewiagai. Akie tabore ire bope doge ewarigu boe epiji. Akie tabore iro rakare rugadu tu tu je. Ainore nou boe egomode i. Mare imagomode ewadaru jipagi. Inagomode: “Pagare tagagoino. Iorduware tarore jiboeji. Tameartorukare Iogwa Kurireu meardaeji. Dukodire ikare iwobedo tagi. Ča. Tadudo ipiji rugadu. Ro pegareuge nure tagi.” Ainore inagomode nou boei rugadu. Dukodire inure tawie. Tu nou boe emeartorumode baru tadawu Iogwa Kurireu meardae jiwuge emode turemo baruto. Nou boe ere tugimijera remawudo Pao Kurireuče rugadu dukodire emode turemo baruto.
MAT 7:24 – Dukodire imode tawie aino. Boe ewiapagamode iwadaruji dukeje emeartorumode nou imagore jiboeji rugadu dukeje jorduwareuge emode emage. Jorduwareuge emode emage nono ia jorduware tuwo tuwai pemegadowu imedu mogadure. Nou imedu ure tuwai towuje. Ure iguru pemegareu tugu mototo rugadu tuwo tuwai pemegado bakuru ukawo tuwai butudo.
MAT 7:25 Nono bubuture rugadu. Pobo aregodure rugadu. Bakurure rugadu. Nou poborereu jeture nou imedu uwaiji. Mare nou uwai butukare rakare dukodi. Ča meartorure iwadaru jiwu jorduwamode tuwo boe pemegado pudui nono nou jorduwareu ure bai pemegado dumogadure. Mare bai ji karega inagoino. Boe ewiapaga pemegamode iwadaruji dukeje emeartorumode rugadu imagore jiboe jamedu boeji. Dukodire nou boe erduwamode rugadu dukodire boe pemegamode ei rugadu. Dujire inagoino.
MAT 7:26 Mare boe ewiapagamode iwadaruji mare emeartorumodukare nou imagore jiboeji rugadu dukeje jorduwa bokwareuge umode emage. Jorduwa bokwareuge umode emage nono ia jorduwa bokwareu imedu ro moga tuwai jitu mogadure. Nou imedu ure tuwai pemegado jamedu mare ure tugeragu iguru pegareuji. Ure tugu mototo mare ukare tugudu pemegado.
MAT 7:27 Nono bubuture. Nou pobo aregodure. Dukodire pobo jeture nou imedu ure towu baiji. Bakuru pegareu jetu rakare ji jamedu. Dukodire nou uwai buture tiaruru tabo rugadu. Ča nou meartorukare iwadaru jiwu jorduwa bokwamode dukodire boe pegamode ji nono boe pegare nou bai jitu mogadure. Mare bai ji karega inagoino. Boe emeartorumodukare tumeardure jiwu iwadaruji dukeje boe pegamode ei rugadu. Dujire inagoino.
MAT 7:28 Ča Jesus ure tumago akedudo. Mare nou biapagare nou Jesus bataru jiwuge eku kidure nou Jesus makore jiboeji.
MAT 7:29 Jesus makore jiboe ukare nono nou boe eimijerage jorduware Judeu doge eno bakaru jiwuge ewadaru mogadure. Jesus mako pemegare mako jetorore rugadu dukodire boe erduware Pao Kurireu bataru remawu jire Jesus akoino rugadu.
MAT 8:1 Jesus ure turawuje tori ri ao piji. Mare boe eture rekodaji rugadu. Emagare rugadu.
MAT 8:2 Nono ia imedu kogodureu aregodure Jesus togi. Nou imedu kogodae pegare ji rugadu. Ure biri pegado rugadu. Nou imedu aregodure Jesus togi dukeje ure tubu jodo moto keje Jesus jokorai. Nono makore Jesusji. Akore: – Ikimijera. Aragare rugadu awo ipemegago. Akaidumode dukeje amode ipemegago rugadu.
MAT 8:3 Nono Jesus ure tugera raido nou imedu ae. Ure tugera bu imedu keje. Nono Jesus makore ji. Akore: – Uu. Itaidure. Ča. Apemegare rugadu. Ča nou imedu pemegagodure tači je. Nou imedu biri pegakare pugeje.
MAT 8:4 Nono Jesus makore imeduji pugeje. Akore: – Amagokaba awu irore ai boeji. Atudo kuri nou Pao Kurireu uwai ka. Nonore amode nou ure Judeu doge enomea maku Pao Kurireu aiwu imedu jordudo awiriji. Jordumode apemegagodure duji rugadu. Nono amode nou Moisés makore jiwu mori maku ai rugadu nono paro mogadure. Nono nou ure boe enomea maku Pao Kurireu aiwu imedu umode nou are maku pudaiwu mori maku Pao Kurireu ai rugadu. Dukodire boe eiamedu boe erduwamode apemegagodure rugadu duji. Ainore Jesus makore nou imeduji.
MAT 8:5 Nono Jesus aregodure Cafarnaum ba kurireu ka. Nonore ia tugobaigarege eimijera aregodure Jesus ae rugadu. Okwamagudure Jesusji rugadu.
MAT 8:6 Akore: – Boe eimijera nure aki. Itugare imedu padure toro iwai tada tugogodure dutabo. Kogodure rugadu dukodire meru bokware. Korire ji rugadu.
MAT 8:7 Jesus makore ji. Akore: – Itumode toro awai ka iwo atugare pemegago.
MAT 8:8 Mare nou tugobaigarege eimijera makore Jesusji pugeje. Akore: – Boe eimijera kurireu nure aki rugadu. Atukaba iwai ka. Mare tu nou awadaru tabore amode itugare pemegago. Amagomode dukeje itugare pemegagodumode rugadu.
MAT 8:9 Ikimijerare. Tugobaigarege eimijera nure imi jamedu. Imagomode tugobaigare imeduji utuwo toro dukeje utumode toro rugadu. Imagomode iaji aregoduwo mato itae dukeje aregodumode itae rugadu. Imagomode itugareji maragoduiago ia imaragodaeji dukeje nou itugare maragodumode ji rugadu. Dukodire iorduware nou itugare kogodae meartorumode awadaruji nono nou itugare meartorure i dumogadure.
MAT 8:10 Jesus meardure nou tugobaigarege eimijera akoino duji dukeje Jesus jebogodure. Makore nou rakojere pudabowugei. Akore: – Iwo tawie. Judeu karegure ema mare awu imedu meartorure i rugadu Israel moto kejewu Judeu doge eiamedu boe emeartoru kori.
MAT 8:11 Marigudu Pao Kurireu makore Judeu doge ewagai emeartoruwo pudui. Makore ei tumoduie nou umode boe ekinorudowu arego etae. Abraão meartorure nou bataruji. Onaregedu Isaque meartorure. Isaque onaregedu Jacó meartorure jamedu. Dukodire toro ia meri keje Pao Kurireu umode boe ekimijerado pudumi dukeje umode ia tuwadae tawuje etai toro baru tada. Ča nou umode boe ekinorudowu aregodure. Mare Judeu doge emeartorure nou umode boe ekinorudowu jiwuge emagakare. Meartorukare nou umode boe ekinorudowu jiwuge ewarigudumode toro boečo tadawu joru pegareuto. Nonore boe etragudu rakamode rugadu, emode to reko pui tuwiri boe kori koia. Mare boe tuginaiwuge emeartorumode nou umode boe ekinorudowuji rugadu. Meartorure jiwuge emagamode rugadu moto jamedu boe parugajeje. Emugumode Abraão apo, Isaque apo, Jacó apo nono Pao Kurireu uwadae keje toro baru tada.
MAT 8:13 Nono Jesus makore nou tugobaigarege eimijeraji pugeje. Akore: – Ča. Ameartorure i rugadu. Ire nou atugare pemegago tu iwadaru tabo nono ameartorure i dumogadure. Atudo aibagi toro awai ka arduwo ji. Ča Jesus ure tuwadaru iado dukeje nou tugobaigarege eimijera utugare pemegagodure rugadu tači je.
MAT 8:14 Nono Jesus aregodure Pedro uwai ka. Nou Pedro uwai tadare Jesus jordure Pedro učarugoji. Nou Pedro učarugo kogodure rugadu. Biri urure dukodire padure nono tuba keje.
MAT 8:15 Nono Jesus ure tugera bu Pedro učarugo iera keje. Ča nou biri uru akedure piji tači je. Dukodire nou Pedro učarugo ure tumugudo. Ure turagojedo. Dukejere ure ia tuge rogu towuje. Ure ia maku Jesus ai ukeje rugadu.
MAT 8:16 Nou boečoji ia boe etaregodure Jesus ae. Emagare pugeje. Etaregodure bope doge emedure tadawugebo rugadu. Nono Jesus ure nou bope doge etawuje nou boe epiji tuwadaru tabo. Makore ei dukodire eture nou boe epiji. Jesus ure kogodureuge epemegago jamedu.
MAT 8:17 Dukodire čare Pao Kurireu bataru jeture pudui rugadu. Marigudu makore Pao Kurireu bataru jiwu Isaías ure nou Pao Kurireu bataru bu bapera keje. Akore: – Rakare boe ekogodaeji. Ure boe epemegago rugadu. Ainore Pao Kurireu akore marigudu nou umode boe ekinorudowu romoduie aino rugadu.
MAT 8:18 Boe emagare nono Jesus apo rugadu. Ere taiado Jesus apo rugadu. Jesus jordure nou boe eiamedu boei emagare rugadu dukodire makore nou ture jorduwadowugei etuwo pudabo toro nou pobo maereu okwa abowu ka.
MAT 8:19 Ere tudo turugadu tuduwo dukeje ia jorduware Judeu doge eno bakaru jiwu imedu aregodure Jesus ae. Makore Jesusji. Akore: – Boe eimijera nure aki. Itaidure ikoduwo akabo akodure jiboe ka.
MAT 8:20 Mare Jesus makore ji. Akore: – Okwa doge emugure tiari poro ja tada. Kiebarege emode tamudo tuwaradu ja tada jamedu. Imire Imedu Onaregedu nure imi. Mare iwai bokware iedureu bokware iwo itamudo tada, inuduwo tada. Boe rakamode kodure itabowugei jamedu.
MAT 8:21 Ia Jesus ure jorduwadowu imedu makore Jesusji jamedu. Akore: – Ikodumode akabo rugadu mare kajao. Aino kuri aino itumode kuri iogwa uwai ka. Iogwa bire dukodire itaidure iwo iogwa tugu mototo jao. Dukejere ikodumode akabo akodure jiboe ka.
MAT 8:22 Mare Jesus makore ji. Akore: – Bireuge etugudumode bireugebo mare awiapagakaba ei. Atudo epiji. Ako itabo rugadu.
MAT 8:23 Nono Jesus ure turemo ika kurireuto. Nou ure jorduwadowuge ere turemo apo jamedu.
MAT 8:24 Ekodure nou ika kurireu tabo nou pobo maereu kajeje dukeje Jesus unudure nou ika kurireu ja tada. Ča ia bakuru pegareu aregodure etae tači je. Nou bakuru ure nou pobo redo. Nou inodu kodire pobo jeture nou ika kurireuji. Dukodire pobo ure turemo nou ika kurireuto rugadu.
MAT 8:25 Nou Jesus ure jorduwadowuge epagudugodure dukodire ere Jesus jetadudo. Egore: – Čegimijera. Pawimode poboto! Arodo iaboeji awo paginorudo.
MAT 8:26 Jesus akore: – Kočare tabagudure? Kočare tameartorukare i? Nono Jesus ure turagojedo ika ja tada. Nono makore nou bakuruji nou poboji dukodire nou bakuru akedure, nou pobo butugugodure jamedu.
MAT 8:27 Nou Jesus ure jorduwadowuge ebogodure rugadu. Egore pui: – Duboba nure awu imeduče? Kočare bakuru, pobo emeartorure awu imedu bataruji rugadu!
MAT 8:28 Dukejere Jesus aregodure toro nou pobo maereu okwa abowu ka ture jorduwadowugebo nou ika kurireu tabo. Nou etaregodure kawu moto iere Gadara. Etaregodure dukeje ere tudawuje ika kurireu piji. Mare bope doge emedu tadawu ime eture Jesus togi. Marigudu nou bope doge emedure nou ime etada dukodire erore pudabo turo pega tabo boe eiamedu boei. Dukodire boe epagudure eče. Dukodire boe etukare toro etae pugeje. Nou ime pobedu doge edu pagare nono aroe eda keje jamedu.
MAT 8:29 Nono ekudugodure Jesus ae. Egore: – Pao Kurireu onaregedu nure aki. Kodiba akaregodure mato čedae? Kaba kodiba aroino čewagai? Toro ia meri keje Pao Kurireu umode boe pegado čei rugadu. Aki kana amode boe pegado čei kuri aino?
MAT 8:30 Jugureuge edu puredure nono togwage tabo. Emagare rugadu.
MAT 8:31 Nou meture nou ime tadawu bope doge emagore nou ime eiabiji Jesusji. Egore: – Amode čedawuje awu ime epiji dukeje čedudo toro nou jugureuge etae. Čedo čeremo nou jugureugeto.
MAT 8:32 Dukodire Jesus akore: – Toro. Dukodire ere tudawuje nou ime epiji. Eture toro nou jugureuge etae. Ere turemo nou jugureugeto. Dukodire nou jugureuge eregodure toro ia moto ri ao piji tači poboto. Dukodire eiamedu boe ewire poboto rugadu.
MAT 8:33 Nou jeture nou jugureuge eiwuge eregodure Jesus piji toro nou tuwai mugure tadawu ba kurireu ka tureadoduwo boe ewiagai nono. Ereadodure nou Jesus rore jiboeji boe eiamedu boe ewiagai.
MAT 8:34 Nou ba kurireu kejewuge eiamedu boe eture toro Jesus ae. Erdure Jesusji dukeje emagore ji utuwo nou boe epiji. Enogwamagudure Jesusji rugadu utuwo nou moto piji rugadu.
MAT 9:1 Nono Jesus ure turemo ika kurireuto pugeje. Ure tugirimi nou pobo maereu kajeje pugeje nou ture jorduwadowugebo. Dukejere etaregodure nou Jesus mugure kejewu ba kurireu ka.
MAT 9:2 Nono ia boe etaregodure ia imedu pogora pegareu apo. Nou imedu pogora pegareu padure tugudau kodo keje. Jesus jordure emeartorure pudui duji kodire etaregodure aino nou imedu pogora pegareu apo pudae rugadu duji. Dukodire makore nou imedu pogora pegareuji. Akore: – Me. Ire aro pegareu jamedu boe barigu apiji dukodire Pao Kurireu biagodumode aro pegare jiboe piji rugadu.
MAT 9:3 Ia boe eimijerage jorduware Judeu doge eno bakaru jiwuge etaidukare nou Jesus akoino duji. Egore tudada: – Awu makore jiboe ukare turugadu! Pagare akoino. Unure tudo nono Pao Kurireure. Tu Pao Kurireu umode boe ero pegareu barigu boe epiji.
MAT 9:4 Jesus jorduware emeardaere jiboeji rugadu. Dukodire makore ei. Akore: – Kočare kodiba tameardae pegare aino i.
MAT 9:5 Boe jokodu. Boe emodukare boe ero pegareu barigu boe epiji rugadu. Tu Pao Kurireu umode boe ero pegareu barigu boe epiji rugadu. Mare boe emodukare awu imedu pogora pegareu pemegago jamedu. Emodukare pemegago rugadu. Tu Pao Kurireu koiare umode nou imedu pogora pemegago.
MAT 9:6 Dukodire imode awu imedu pemegago dukeje tarduwamode Imedu Onaregedu nure imi duji. Dukodire imode tarduwado iragare iwo boe ero pegareu barigu epiji ewarigudukawo bope doge eda kejewu joru pegareuto rugadu. Ainore Jesus akore nou boe eimijeragei. Nono ure tuie mekido nou imedu pogora pegareu ae. Nono makore ji. Akore: – Me. Aragojedo. Akeragu akudau kodoji atuwo tabo aibagi awai ka.
MAT 9:7 Ča nou imedu ure turagojedo rugadu. Meru pegakare dukodire uture tuwai ka rugadu.
MAT 9:8 Nou boe eiamedu boe erdure nou rore aino duji. Erore ta je. Mare emago pemegare Pao Kurireuji. Egore emaie roino Jesusji uwo nou imedu pogora pegareu pemegago.
MAT 9:9 Jesus uture nou boe epiji. Kodure awaraji dukeje jordure ure tugeragu boe enoe mori jiwu imeduji. Du iere Mateus. Nou Mateus mugure nono ira keje. Nonore ure tugeragu dieroji boe epiji tuwo maku boe eimijera kurireu ai. Nono Jesus makore ji. Akore: – Ako itabo. Nono Mateus ure turagojedo. Ure tugera ra tumaragodae piji tuduwo Jesus apo rugadu.
MAT 9:10 Mateus makore Jesusji okwagewo tuwai keje pudabo. Dukodire Jesus uture Mateus apo toro uwai ka. Jesus ure jorduwadowuge eture Jesus apo jamedu. Boe emagare nono togwage tabo ebo. Imposto diero makudure aiwuge ime nure emage. Boe egore ro pegareuge enuie emage. Ia boe etaidukare jiwuge eragojere nono Jesus apo jamedu.
MAT 9:11 Fariseu doge etaregodure toro etae jamedu. Erdure Jesus rore jiboeji dukeje emagore nou Jesus ure jorduwadowugei. Egore: – Kočare tagimijera okwagere awu ro pegareugebo? Ukare turugadu!
MAT 9:12 Jesus meardure egoino duji dukeje makore nou fariseu doge ewadaru jipagi. Akore: – Jorubo kuru epa jemarumodukare kogodukareuge ewagai. Mare kogodureuge ewagaire jemarumode tuwo epemegago.
MAT 9:13 Irore nono nou jorubo kuru epa ro mogadure. Mare jorubo kuru epa ji karega inagoino. Itaregodure woe mare ro pemegareuge ewagai karega iroino. Ro pegareuge ewagaire iroino ewo tugera ra turo pegareu piji. Dujire inagoino. Marigudu Pao Kurireu ure tawie. Tagaiwodo nou Pao Kurireu bagai. Akore: “Boe emode boe egu barogo rogu kowu tuwo maku inai turo pegareu moriče. Mare itaidure boe enogudugoduwo puapo rugadu. Dujire itaidure rugadu.” Ainore Pao Kurireu akore marigudu. Ča tarduwado nou bataruji tameartoruwo ji tarore jiboe tabo.
MAT 9:14 Ia meri keje João Batista ure jorduwadowuge etaregodure Jesus ae. Egore: – Ia meri keje čenogwagemodukare nou meriji čemagowo Pao Kurireu bagai baruto nou meri keje. Ainore čerore. Fariseu doge eromode aino jamedu čero mogadure. Kodiba nou are jorduwadowuge erokare aino jamedu?
MAT 9:15 Jesus makore ewadaru jipagi. Akore: – Ire nono uwiremodewu imedu mogadure. Boe etuwirere dukeje boe ere tuwadae towuje. Nou ewadae kejere boe enogwagemode rugadu. Ewadae reno. Ekiarigodumodukare nou meriji. Mare ewadae akedure dukeje uwirereu imedu utumode epiji toreduje apo. Dukejere čare boe emode ia meri tawuje togwagekawo nou meriji tumagowo Pao Kurireu bagai baruto nou meriji. Ire nono nou uwiremodewu imedu mogadure. Mare uwiremodewu imedu ji karega inagoino. Ire inagoino. Ire irawuje baru piji mato boe ewagai. Mare ia meri keje itumode nou boe epiji. Dujire inagoino. Itumode nou boe epiji dukeje boe emode ia meri tawuje togwagekawo nou meriji tumagowo Pao Kurireu bagai baruto nou meri keje. Dujire inagoino.
MAT 9:16 Boe ekudau areia pegagodureu umode tuwowuje. Mare boe emodukare tugudau areia maiwu kado tuwo nou tugudau pegagodureu poro miwuje tabo. Boe eromode aino dukeje nou ekudau areia maiwu gigirimode. Dukodire umode tuwowuje nou boe ekudau areia pegagodureu piji kuri je rugadu. Dukodire nou ekudau areia pegagodureu umode tuwowuje ja je pugeje.
MAT 9:17 Boe ere tapira biri maiwu pemegado nou tuge vinho kuru maiwu jače. Mare emode vinho kuru maiwu tugu tapira biri čodureuto dukeje nou tapira biri čodureu umode tuwowuje. Nono nou vinho kuru umode tuwarigu nou tapira biri čodureu piji rugadu. Dukodire boe ekare tuge vinho kuru maiwu tugu tapira biri čodureuto. Ere tuge vinho kuru maiwu tugu tapira biri maiwuto tu tu je. Ainore Jesus akore. Mare areia ji karega akoino. Vinho kuru ji karega akoino. Tuwadaru maiwu jire Jesus akoino.
MAT 9:18 Jesus akoino dukeje ia boe eimijera aregodure ae. Ure tubu jodo moto keje Jesus jokorai. Makore Jesusji. Akore: – Itonaregedu aredu bire aino maigodu. Mare atudo itabo iwai ka awo akera bu nou itonaregedu aredu biri keje dukeje jewodumode pugeje.
MAT 9:19 Jesus ure turagojedo tumuga piji. Uture nou boe eimijera apo toro uwai ka ture jorduwadowugebo.
MAT 9:20 Ekodure awaraji dukeje ia aredu kodure ebo Jesus rekodaji. Marigudu nou aredu kogodaere tu tu je. Nou aredu ku rere piji nono areme etorewudae mogadure. Mare nou aredu o akedukare piji. Re kimonure piji meri jameduji. Joru oto padu kejeboere doze nou aredu ku rere piji duji. Aino nou aredu makore tudada. Akore: – Imode ikera otorogu jetudo Jesus ukudau areiaji dukeje ipemegagodumode. Ainore nou aredu akore tudada. Dukodire nou aredu ure tugera raido. Nono iera otorogu jeture Jesus ukudau areiaji.
MAT 9:22 Nono Jesus ure tuie mekido. Jordure nou areduji rugadu. Akore: – Are. Ameartorure i rugadu. Dukodire apemegagodumode rugadu. Nono nou aredu pemegagodure tači je rugadu.
MAT 9:23 Nono Jesus aregodure nou boe eimijera uwai ka. Boe emagare nono tragudu tabo. Edukiorokare. Nou boe ere tuwabo ako rakado jamedu. Jesus jordure nou inoduji dukeje makore nou boei. Akore: – Tadawuje awu bai piji. Aredu rogu bikare. Unudunure tu je. Mare nou boe erduware nou nogwaredu bire rugadu duji dukodire enogwarigodure Jesusji.
MAT 9:25 Mare nou boe eimijera ure nou boe etawuje tuwai piji. Dukejere Jesus ure turemo nou nogwaredu padure tadawu baito. Dukeje ure tugeragu nou nogwaredu ieraji. Nono nou nogwaredu jewodure pugeje rugadu. Ure tumugudo rugadu.
MAT 9:26 Nou boe erduware nou inoduji dukodire ereadodure boe eiamedu boe ewiagai awu Jesus rore jiboeji nou moto jamedu boe parugajeje.
MAT 9:27 Nono Jesus uture pugeje. Mare ia ime joku bokwareuge ekodure Jesus rekodaji. Ere pobe. Ekudugodure Jesus bagai. Egore: – Mariguduwu Judeu doge eimijera kurireu Davi uwobe nure aki. Akogudugo čedabo.
MAT 9:28 Jesus ure turemo ia baito. Nono nou ime joku bokwareuge ere turemo Jesus rekodaji. Etaregodure Jesus ae rugadu. Jesus makore ei. Akore: – Tameartorure i imode tabemegago duji rugadu kana? Egore: – Uu. Čegimijera nure aki.
MAT 9:29 Dukejere Jesus ure tugera bu eku keje. Nono makore ei. Akore: – Tameartorure jiboe jetuwo pudui tai rugadu.
MAT 9:30 Nono epemegagodure tači je rugadu. Etaiwore pugeje rugadu. Mare Jesus makogodure ei. Akore: – Tareadodukaba boe ewiagai awu irore jiboeji.
MAT 9:31 Mare eture Jesus piji dukeje ereadodure Jesus rore jiboeji boe eiamedu boe ewiagai nou moto rugadu boe parugajeje.
MAT 9:32 Eture dukeje iage etaregodure ia imedu apo Jesus bagai pugeje. Nou imedu mako bokware. Roiwakare tumagowo. Bope meture tada kodi.
MAT 9:33 Mare Jesus ure nou bope tawuje nou imedu piji dukeje nou imedu makore pugeje. Boe emagare nono tuiordure Jesus roino jitu tabo. Eiamedu boe ebogodure rugadu. Egore: – Marigudu Israel moto kejewu boe erdukare ia awu inodu boeji jii aino.
MAT 9:34 Mare fariseu doge etaidukare Jesus rore jiboeji. Emago pegare ji. Egore: – Bope doge eimijera kurireu raka tabore awu Jesus roino tuwo bope doge etawuje boe epiji.
MAT 9:35 Jesus kodure nou moto jamedu boe parugajeje boe eda jamedu boe ka. Aregodumode ia boe eda ka dukeje ure turemo nou Judeu doge ere bato pui towu baito. Nonore ure erduwado tuwadaru pemegareuji tu tu je. Ure ewie Pao Kurireu umoduie boe eimijerado pudumi kuri je rugadu. Ure kogodureuge eiamedu boe epemegago jamedu.
MAT 9:36 Boe emagare Jesus apo tu tu je. Jesus jordure nou boei dukeje okudugodure ebo rugadu. Akore eie nono ovelha doge emogadure. Jetu pemegare eiwu bokwaie. Boe pegaie ei. Erduwakaie nuba turomode. Mare ovelha ji karega akoino. Nou boe eroiwakare tuwo tuginorudo. Dujire akoino. Ure erduwado Pao Kurireu bataru remawu jiwu bokware. Dujire akoino.
MAT 9:37 Nono Jesus makore ture jorduwadowugei. Akore: – Boepa kurire rugadu. Nou boepa tadaboe ure turugadu boe ewo kado. Mare umode boepa tadaboe kadowuge emagakare.
MAT 9:38 Dukodire tamagodo baruto Pao Kurireu bagai. Boepa jiwu boe eimijera kurireu nure ema. Tamagodo ji maragoduwo boepa jiwuge emagawo etuwo boepato ewo boepa tadaboe kado rugadu. Mare boepa ji karega Jesus akoino. Meartorumode Pao Kurireu jiwugeire akoino. Boe emode boe erduwado Pao Kurireu bataruji dukeje emeartorumode ji, Pao Kurireu umode ekinorudo. Dujire akoino.
MAT 10:1 Jesus makore nou ture jorduwadowuge ewagai pudae. Ere doze. Nono ure eragado ewo bope doge etawuje boe epiji. Ure eragado ewo boe epemegago ekogodae boe piji.
MAT 10:2 Ainore nou Jesus ure jorduwadowuge ekiere: Simão. Iere Pedro jamedu. André. Pedro uwie nure ema. Tiago. Nou Tiago uo iere Zebedeu. João. Tiago uwie nure ema.
MAT 10:3 Filipe, Bartolomeu, Tomé, Mateus. Boe ere to diero maku nou Mateus ai uwo maku boe eimijerage etai. Tiago. Alfeu onaregedu nure ema. Tadeu.
MAT 10:4 Simão. Emare makore tumedagei marigudu emeartorukawo Roma kejewu boe eimijeragei pugeje. Judas Iscariotes. Emare umode Jesus maku boe eimijera pegareuge etai. Nou ime eture Jesus bataru tabowuge umode emage rugadu.
MAT 10:5 Awu doze ime dogere Jesus ure etudo tuwadaru tabo. Makore ei. Akore: – Tadukaba boe tuginaiwuge etae. Tadukaba ia Samaritano doge eda ka.
MAT 10:6 Tadudo tu Judeu doge etae. Ere nono okware boetowuge ovelha doge emogadure. Mare ovelha ji karega inagoino. Nou Judeu doge emeartorukare Pao Kurireuji pugeje. Dujire inagoino.
MAT 10:7 Tadumode dukeje tamagomode tardure jiwuge ewiagai awu iwadaruji. Tamagodo: “Pao Kurireu umode boe eimijera kurireudo pudumi kuri je.” Ainore tagagomode boei.
MAT 10:8 Tadumode dukeje tamode kogodureuge epemegago. Tamode bireuge eewodudo pugeje. Tamode kogodureuge biri pegareuge epemegago. Tamode bope doge etawuje boe epiji. Ire taragado tarowo awu inagoino jiwu taroji mare ikare nou ire maku tagaiboe morido. Dukodire tamodukare boe edo iaboe maku tagai tarore jiboe moriče jamedu.
MAT 10:9 Tadukaba tori kuieje tabo. Tadukaba prata tabo. Tadukaba ia diero tabo rugadu.
MAT 10:10 Tadukaba ia tagudau areia meture tadawu kadarabo tabo. Tadukaba ia tagudau areia tabo. Tadukaba ia tawure okeakejewu tabo. Tadukaba ia tagedu jiwu tagaibo tabo. Tadudo tu meture taiwu tagudau areia tabo. Tadumode tawo boe ewie iwadaruji. Dukodire boe etu pemegamode tai.
MAT 10:11 Tagaregodumode ia boe eda ka dukeje tagaiwodo ia ro pemegareu bagai tamuguwo nono uwai keje jii tadure kejewu meri ka.
MAT 10:12 Tamode taremo nou baito dukeje tagimadudo nou boebo.
MAT 10:13 Nou bai tadawuge ero pemegamode tai, etaidumode tai tietu pemegawo tai dukeje tawadaru pemegareu maku etai Pao Kurireu uwo boe pemegado ei. Mare ero pemegamodukare tai dukeje tagaba tawadaru pemegareu maku etai.
MAT 10:14 Ia boe eda kejewuge etaidumodukare tamagore jiboeji. Ekimadumodukare tagabo dukeje tadudo epiji. Tadumode nou boe eda piji dukeje tawure okeakejewu to pui egai tawo moto urugudu tawuje nou tawure okeakejewu piji nou boe erduwo Pao Kurireu aidukare nou erore jiboe jituji kodire umode tugera ra epiji.
MAT 10:15 Inure tawie. Boe pegamode nou aidukare taiwugei rugadu. Toro ia meri keje Pao Kurireu aiwomode boe eiamedu boe erore jiboeji. Mariguduwuge Sodoma kejewuge ero pegare. Gomorra kejewuge ero pegare jamedu. Dukodire nou meri keje Pao Kurireu umode boe pegado nou Sodoma kejewugei ero pegareu moriče. Umode boe pegado nou Gomorra kejewugei ero pegareu moriče. Mare nou aidukare taiwuge boe eire Pao Kurireu ro pega kuričigomode nou Sodoma kejewuge ekori, nou Gomorra kejewuge ekori jamedu.
MAT 10:16 – Nou ire tadudo etaewuge ere nono rie doge emogadure. Tare nono ovelha doge emogadure. Mare barogo ji karega inagoino. Tameardae pegareu bokware. Dujire inagoino. Mare tadumode ewagaiwuge emeardae pegamode rugadu. Dujire inagoino. Dukodire inure tawie. Taeku jado nono awagu ro mogadure. Mare awagu ji karega inagoino. Tarduwado boe emeardae jamedu boeji. Dujire inagoino. Mare tameardae pegareu bokwado nono metugo mogadure. Mare metugo ji karega inagoino. Tameardae pegakaba boei rugadu. Dujire inagoino.
MAT 10:17 Taeku jado ro pegareuge emeardae pegareu bagai. Mare ro pegareuge emode tugeragu tai rugadu. Emode tamagu Judeu doge eimijerage etai. Emode tarego Judeu doge ere bato puiwu bai ka. Nonore emode boeto tai tapira biri iku tabo.
MAT 10:18 Tameartorumode i dukodire ro pegareuge emode tamagu boe ekimijera governador doge etai. Emode tamagu boe ekimijerage kurireuge etai rugadu. Nono tamode nou boe ekimijerage ewie iwadaruji jamedu. Tamode boe tuginaiwuge ewie iwadaruji jamedu.
MAT 10:19 Mare nou boe ekimijerage emode tadugu baičoreuto dukeje tamororamagadukaba ia tamagomode jiboe bagai. Tamororamagadukaba tamode ewie jiboe bagai. Tamagomode mare tawadaru karega. Pao Kurireu Uwari makomode tai tuwo tamagore jiboe maku tagai Tao nure ema kodi. Emare umode tarduwado Pao Kurireu makomode jiboeji tamagowo nou Pao Kurireu bataruji nou boe ekimijerage ewiagai.
MAT 10:21 – Imode tawie iaboeji pugeje. Tameartorure i dukodire boe erdu pegamode tai, ero pegamode tai. Mare tamodukare tagera ra ipiji dukeje imode taginorudo rugadu. Ia boe emeartorumode i dukodire etumana mage emode nou tuwiemage meartorure iwuge emagu boe eimijerage pegareuge etai ewidoduwo. Ia boe emeartorumode i dukodire etuo jordu pegamode ei. Dukodire nou etuo umode tore meartorure iwuge emagu boe eimijerage pegareuge etai ewidoduwo. Ia boe etore etuje meartorumode i dukodire boe etore etaidumodukare nou tujeji pugeje. Ia boe etore etuo meartorumode i dukodire nou boe etore etaidumodukare nou tuoji pugeje. Dukodire nou boe etore emode tujemage tuomage meartorure iwuge emagu boe eimijerage pegareuge etai ewidoduwo jamedu.
MAT 10:23 Mare ia boe ero pegamode tai dukeje tarego nou boe epiji tamuguwo ia boe eda keje pugeje. Iwo tawie. Imedu Onaregedu nure imi. Tadumode Judeu doge eno moto kejewu boe eda jamedu boe ka jii toro imode ikirimi kejewu meri ka. Mare tagaregodumodukare nou Judeu doge emugure kejewu eda jamedu boe ka jii itaregodumode du ka.
MAT 10:24 Boe emeartorumodukare ia mugure bapera kejewuji jorduwamodukare nono tugimijera mogadure. Boe emeartorumode tu nou mugure bapera kejewu ukimijeraji. Boe emeartorumodukare ia boe eimijera utugareji. Boe emeartorumode tu nou boe eimijeraji.
MAT 10:25 Mare nou mugure bapera kejewu jorduware jiboe umode nono nou ukimijera jorduware jiboe mogadure. Du ure turugadu. Nou boe eimijera utugare romode nono tugimijera ro mogadure. Du ure turugadu. Boe emode ia boe etuo iedo “Mareboe” aino dukeje emode nou imedu uwobe ekiedo aino jamedu. Mare ire inagoino. Taire inagoino jamedu. Boe etokire i nou bope ie tabo. Etokimode tai jamedu. Dujire inagoino. Etoki kuričigomode tai rugadu tokire i dupiji rugadu.
MAT 10:26 Mare tabagudukaba eče. Boe ero pegamode dukeje etaidumode tuwo nou turo pegareu biado boe epiji tumagowo ro pemegareuge nuie pudumi. Mare Pao Kurireu jorduware marigudu ero pegareuji dukodire boe erduwamode nou ero pegareuji jamedu.
MAT 10:27 Tu tagi tarduware ia ire tarduwado jiboeji mare tamagodo nou ire tarduwado jiboeji boe ewiagai rugadu. Tamago pemegado ji boe eiamedu boe emearduwo tamagore jiboeji.
MAT 10:28 – Tabagudukaba boeče. Boe emode tawido mare eragakare tuwo tawarigu bope doge eda kejewu joru pegareuto. Dukodire inagoino tai. Tabagudukaba eče. Tu Pao Kurireu meardae koiare umode boe ewarigu bope doge eda kejewu joru pegareuto boe ewi keje. Tabagududo tu Pao Kurireuče. Mare tabagudu remawu ji karega inagoino. Taragado tai rugadu tameartoruwo tu Pao Kurireuji rugadu. Dujire inagoino.
MAT 10:29 Ča kiebarege kugure emode pobe dukeje boe emode to diero tori rogu udo mitotu je tuwo akirodo nou kiebarege kugurei tugeče tuwo kowuje. Nou kiebarege emori bokware mare du inodu tabo Pao Kurireu biagodumodukare epiji rugadu. Ewudumodukare moto ka Pao Kurireu meardae piji.
MAT 10:30 Mare Pao Kurireu aidure tai du kodure nou kiebarege kugure eiamedu boe ekori. Dukodire jetu pemegamode tai rugadu. Jorduware tai rugadu. Jorduware tagao iku jamedu boeji. Jorduware nou inodu rogu boeji kodire jorduware nuba boe mode tai duji rugadu. Jetu pemegamode tai rugadu. Dukodire inagoino tai tabagudukawo boeče rugadu.
MAT 10:32 – Iwo tawie iaboeji pugeje. Ia boe emagomode boe eiamedu boe ewiagai tuie tumagu inai tumeartoruwo tu i dukeje imagomode Pao Kurireu biagai baru tada nou meartorure iwu nuie ema rugadu. Toro nou Pao Kurireu aiwomode boe ero pegareu bagaiwu meri kejere imagomode aino ji.
MAT 10:33 Mare ia boe makomode boe ewiagai tugaie tumagu inai, tumeartorukaie i dukeje imagomode Pao Kurireu biagai baru tada nou meartorukare iwu nuie ema rugadu.
MAT 10:34 Tameardaere itaregodure iwo boe epemegado pui. Ča itaregodure iwo boe pemegado boei rugadu. Mare ia boe emeartorumodukare i. Dukodire emeardaemodukare nono pumeardae mogadure imagore jiboeji. Dukodire boe epemegamodukare pui.
MAT 10:35 Marigudu Pao Kurireu ure boe ewie nuba boemode meartorure iwugei. Aino nou Pao Kurireu bataru jetumode pudui rugadu. Akore: – Ime emeardaemodukare nono tuo meardae mogadure. Dukodire nou etuo meardae pegamode nou tore imei. Areme emeardaemodukare nono tuje meardae mogadure. Dukodire nou etuje meardae pegamode nou tore aremei. Areme emeardaemodukare nono turagomage emeardae mogadure. Dukodire nou eturago mage emeardae pegamode nou tujarugo magei. Nou imedu uwobe erdu pegamode ji. Jordu pegare jiwuge emode emage. – Ainore Pao Kurireu akore marigudu.
MAT 10:37 Iwo tawie pugeje. Boe emeardu kurimodukare i tuje kori, tuo kori, tore ime ekori, tore areme ekori, dukeje ukare turugadu iwo erduwado imeardaeji.
MAT 10:38 Imeartorure Iogwa Kurireuji dukodire boe erdu pegare i, emode iwido. Boe etaidumode tuwo tumeartorudo imeardaeji dukeje ewo tudo turugadu tuwiwo nono iwimode dumogadure. Emodukare tudo turugadu tuwiwo nono iwimode dumogadure dukeje imodukare erduwado imeardaeji.
MAT 10:39 Boe emeardae pemegare tuwo tuginorudo mare emeardaere tu pudui. Mare nou eraga akedumode epiji rugadu. Egare remawu modukare. Emodukare tuginorudo bope doge eda kejewu joru pegareu piji rugadu. Mare ia boe ewiapagamodukare tumeardaeji pugeje tuwo tugera ra tumeardae piji, taidure jiboe piji tumeartoruwo i rugadu. Dukejere Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto.
MAT 10:40 Inure tawie. Ia boe erduware tameartorure i duji. Nono ekimadumode tagabo ekimadunure itabo jamedu. Ire eroino jamedu. Boe ekimadumode itabo ekimadunure ure itarego matowu Pao Kurireu apo jamedu. Ire eroino Pao Kurireu jire eroino jamedu.
MAT 10:41 Boe erduware ia makore Pao Kurireu bataru jiwugei dukodire ekimadumode ebo dukodire Pao Kurireu umode boe pemegado ei nono turo moga makore Pao Kurireu bataru jiwugei dumogadure. Boe erduware ia ro pemegareugei dukodire ekimadumode ebo dukodire Pao Kurireu umode boe pemegado ei nono turo moga ro pemegareugei dumogadure.
MAT 10:42 Iwo tawie rugadu. Boe erduware meartorure iwugei dukodire emode pobo maku etai ekuduwo če. Dukodire Pao Kurireu umode boe pemegado ei eroino du moriče.
MAT 11:1 Jesus ure tumago akedudo nou ture jorduwadowugei dukeje uture pugeje. Nou ure jorduwadowuge enodo padure doze. Ča uture Galiléia moto kejewu boe eda jamedu boe ka tuwo boe erduwado. Makore Pao Kurireu bataruji boe ewiagai tu tu je.
MAT 11:2 João Batista rakojere baičoreu tada. Boe ere João Batista bie nou Jesus rore jiboeji makore jiboeji. Dukodire João Batista ure ia ture jorduwadowuge etudo toro Jesus bagai.
MAT 11:3 Makore ei enarawo Jesusji Pao Kurireu umoduie maku boe etaiwu boe ekinorudowu nure ema rugadu kana? Enarawo Jesusji boe epagaiago ia bagai kimo kana? Dukodire eture Jesus ae rugadu. Enarare Jesusji nono tugimijera makore pudui dumogadure rugadu.
MAT 11:4 Nono Jesus makore ewadaru jipagi. Akore: – Tagirimi tawo João biedu pemegado rugadu tardure jiwu irore jiboeji tameardure jiwu imagore jiboeji.
MAT 11:5 Ire joku bokwareuge epemegago etaiwowo pugeje. Ire pogora pegareuge epemegago emeruwo pugeje. Ire kogodureuge ewiri pegareuge epemegago ewiri pemegawo pugeje. Ire bija bokwareuge epemegago emearduwo pugeje. Ire bireuge eewodudo pugeje. Ire marenarue doge ewie nou umode boe ekinorudowu aregoduie rugadu.
MAT 11:6 Boe pemegamode nou meartorure iwu boei. Emodukare tugera ra tumeartorure i dupiji nono egaremode pudui rugadu.
MAT 11:7 Nou João Batista ure jorduwadowuge eture pugeje Jesus piji. Dukeje Jesus makore João Batista rore jiboeji nou rakojere pudabowuge boe ewiagai. Akore: – Marigudu tadure jiče boe akurugudu maereu ka mare tarduwo bakuru jeture boebutu jitu bagai karega. Tarduwo ukudau areia motureu jiwu boe ewagai karega. Tarduwo oe kurireuge ewagai karega. Nou ukudau areia motureu jiwu boe emugure bai kurireu tada. Oe kurireuge emugure bai kurireu tada. Tadumode bai kurireu ka nouge ewagai. Mare tadure boe maereu ka. Tadure toro tarduwo João Batistaji. Tarduware João Batista makore Pao Kurireu bataru jituji. Dukodire tadure toro boe maereu ka João Batista bagai. Aino ča imode tawie. João Batista makore Pao Kurireu bataruji rugadu. Mare imode tawie iaboeji pugeje. João Batista rore nono Pao Kurireu meardae mogadure rugadu.
MAT 11:10 Dujire Pao Kurireu ure boe ewie marigudu. Nou bataru padure bapera keje. Akore: “Imode itugare arego uwo boe pemegado nou umode boe ekinorudowu togi.” Ainore Pao Kurireu akore marigudu. João Batista jire akoino. Dukodire čare awu bataru jeture pudui rugadu.
MAT 11:11 Jesus mako kimore. Akore: – Iwo tawie boe remawuji rugadu. João Batista kurire boe eiamedu boe ekori. Mare aino ia boe etugare umode tugimijerado Pao Kurireuče dukeje kurimode João Batista kori Pao Kurireu jakai.
MAT 11:12 João Batista aregodure dukeje ure boe ewie Pao Kurireu ure maku aiwu tuwadaru pemegareuji. Ainore rore jii aino. Akore Pao Kurireu umoduie boe eimijera kurireudo pudumi kuri aino. Dukodire nou aidukare nou bataru pemegareu jiwuge ere turokogado nou ure tugimijerado Pao Kurireu čewugei emeartorukawo ji pugeje.
MAT 11:13 Moisés ure maku Judeu doge etaiwu bakaru ure boe ewie nuba Pao Kurireu romode. Makore Pao Kurireu bataru jiwuge ere Pao Kurireu bataru bu bapera keje jamedu boe erduwawo Pao Kurireu meardaeji. Ainore Pao Kurireu rore tuwo boe ewie tumeardaere jiboeji jii toro João Batista aregodure du ka.
MAT 11:14 Marigudu Pao Kurireu ure boe ewie tumoduie Elias arego mato boe etae. Mare Elias ji karega akoino. Nou aregodumodewu romode nono Elias ro mogadure. Dujire akoino. Aino ča imode tawie. Awu João Batista nure ema rugadu. João Batista jire Pao Kurireu akoino. Rore nono Elias ro mogadure. Tameartorumode nou inoduji dukeje tameartorumode iwadaruji jamedu.
MAT 11:15 Tawiapaga pemegado iwadaruji.
MAT 11:16 Imode tarduwado nuba meartorukare João Batista jiwuge emeardaere. Ere nono boe etore ewadure puapo nono bawadu keje dumogadure. Ewadure puapo mare etokire pui.
MAT 11:17 Egore: “Čere bapo akodo. Nono čemagore tai tareruwo mare tarerukare. Nono čemagore tai tagraguduwo čedabo mare tagragudukare.” – Ainore boe etore egore pui. Epemegakare pui rugadu. Ča nou meartorukare João Batista jiwuge ere nono nou boe etore emogadure. Mare boe etore ei karega inagoino. João Batista makore boe ewiagai ewo tugimijerado Pao Kurireuče mare erokare aino. Dujire inagoino.
MAT 11:18 João Batista ure tugera ra tuge piji jao tumagowo baruto nono boe ero mogadure. João Batista kudukare vinho kuruče nono ro pemegareu ro mogadure. Mare boe emago pegare ji. Egore bope uwari metuie tada.
MAT 11:19 Imedu Onaregedu nure imi. Pao Kurireu ure itarego mato boe etae. Inogwagere boebo. Ikudure boebo. Mare du inodu tabo boe emago pegare i jamedu. Egore inogwage ierikaie. Mare pagare egoino. Egore ikudu kigoduie vinho kuruče. Mare pagare egoino. Egore itaiduie ro pegareugei, nou ure tugeragu boe enoe mori jiwugei, marenarue dogei jamedu. Ainore egore. Mare tumago pegawo i dubagaire egoino. Mare ia boe emeartorumode i. Dukodire boe erduwagodumode Pao Kurireu bataru remawu jire João Batista akoino duji. Boe erduwagodumode Pao Kurireu bataru remawu jire inagoino duji jamedu.
MAT 11:20 Nono Jesus mako pegare ia boe eda kejewugei. Jesus ure turo rakado boe egai nono nou boe eda jamedu boe keje mare du inodu tabo nou boe ekare tugera ra turo pegareu piji. Emeartorukare Jesusji rugadu.
MAT 11:21 Jesus akore: – Iro rakare Corazim ba kurireu keje iwo nou boe erduwado i. Dukodire erdure iro rakareuji. Mare du inodu tabo emeartorukare i. Dukodire boe pegamode ei rugadu. Iro rakare Betsaida ba kurireu keje iwo nou boe erduwado i. Erdure iro rakareuji. Mare du inodu tabo emeartorukare i. Dukodire boe pegamode ei jamedu. Marigudu Tiro ba kurireu kejewuge emeartorukare Pao Kurireuji. Marigudu Sidom ba kurireu kejewuge emeartorukare Pao Kurireuji. Nou Tiro ba kurireu kejewuge, nou Sidom ba kurireu kejewuge erdumode iro rakareuji dukeje ekiarigodumode turo pegareuji rugadu. Emode tugera ra turo pegareu piji. Emode jorugudu bu taora keje tuwo boe erduwado tugiarigodure turo pegareu boeji. Emode tugudau areia kwatorureu tugu pudui tuwo boe erduwado tugiarigodure turo pegareu boeji rugadu tumode tugera ra turo pegare jiboe piji duji. Mare erdukare i, erdukare iro rakareuji dukodire erduwakare i. Ekare tugera ra turo pegareu piji rugadu. Mare kočare Corazim ba kurireu kejewuge, Betsaida ba kurireu kejewuge, erdure iro rakareuji mare du inodu tabo ekiarigodukare turo pegareuji. Etaidukare tuwo tugera ra turo pegareu piji rugadu.
MAT 11:22 Pao Kurireu ure ia meri tawuje taiwowo boe eiamedu boe ero pegareu bagai nou meri keje. Tiro ba kurireu kejewuge emeartorukare Pao Kurireuji dukodire Pao Kurireu umode boe pegado ei nou ture tawujewu meri keje. Sidom ba kurireu kejewuge emeartorukare Pao Kurireuji dukodire Pao Kurireu umode boe pegado ei jamedu nou ture tawujewu meri keje. Mare Corazim ba kurireu kejewuge, Betsaida ba kurireu kejewuge erdure iro rakareuji mare du inodu tabo emeartorukare i. Dukodire Corazim ba kurireu kejewuge eire, Betsaida ba kurireu kejewuge eire, Pao Kurireu ro pega kurimode ei rugadu nou Sidom kejewuge ekori, nou Tiro kejewuge ekori. Pao Kurireu romode aino ei toro ia meri keje. Nou ture tawujewu meri kejere umode boe pegado ei rugadu.
MAT 11:23 Cafarnaum ba kurireu kejewuge emeartorure tu pudui turuduwo baruto. Mare pagatu je. Pao Kurireu umode ewarigu toro bope doge eda kejewu joruto nou taiwomode boe ero pegareu bagaiwu meri keje. Marigudu Sodoma ba kurireu kejewuge erdukare Pao Kurireu jordae pemegareuji dukodire ero pegare rugadu. Erdumode iro rakareuji nono Cafarnaum ba kurireu kejewuge erdure dumogadure dukeje ekiarigodumode turo pegareuji rugadu. Emode tugera ra turo pegareu piji. Mare erdukare. Dukodire ekare tugera ra turo pegareu piji rugadu. Dukodire Pao Kurireu ure nou Sodoma ba kurireu akedudo. Mare nou Cafarnaum ba kurireu kejewuge erdure iro rakareuji rugadu. Mare du inodu tabo ekiarigodukare turo pegareuji.
MAT 11:24 Dukodire imode tawie. Boe pegamode nou Sodoma kejewugei nou Pao Kurireu aiwomode boe ero pegareu bagaiwu meri keje. Mare nou meri keje nou Cafarnaum ba kurireu kejewuge eire Pao Kurireu ro pega kurimode ei rugadu nou Sodoma kejewuge ekori.
MAT 11:25 Nono Jesus makore Pao Kurireu bagai baruto. Akore: – Iogwa. Imago pemegawo ai. Baru tadawuge eimijera kurireu nure aki. Moto kejewuge eimijera kurireu nure aki. Are mugukare bapera kejewuge erduwado ameardaeji. Mare are nou ameardae biado jorduwareuge epiji. Are biado mugure bapera kejewuge epiji. Mare are mugukare bapera kejewuge erduwado. Dukodire imago pemegare aino ai.
MAT 11:26 Ainore ameardaere. Nou ameardae ure aegaredo ai rugadu.
MAT 11:27 Jesus ure nou tuwadaru akedudo baruto dukeje makore boei. Akore: – Iogwa ure boe jamedu boe maku inai. Tu Pao Kurireu jorduware Tonaregeduji. Tu nou Onaregedu jorduware Tuoji. Mare Onaregedu umode nou ture tugeragu jiwuge erduwado Pao Kurireuji jamedu.
MAT 11:28 Ia tagi tamagore tameartorumoduie Pao Kurireuji dukodire tare taragado tai tameartoruwo nou Judeu doge eno bakaruji. Mare taraga tabore taroiwakare. Dukodire tagiarigodure, tamedugodure. Ča. Mato itae. Imode taraga maku tagai tawo tagamudo.
MAT 11:29 Imode maku boe etaiwu iwadaru rakakare. Iro butugumode boei rugadu. Ikare boe remawudo imi iwo imeardae pemegado boe eiamedu boei. Imode maku boe etaiwu iro rakakare boei. Dukodire meartorure iwuge emode tamudo rugadu. Dukodire inagoino tai tameartoruwo i. Tarduwagoduwo iwadaruji rugadu tameartoruwo i rugadu.
MAT 12:1 Jesus merure boepa oiagi sábado meriji. Trigo ure nou boepa tada. Nou ure jorduwadowuge ekodure apo. Ča nou Jesus ure jorduwadowuge eke boeire ei. Dukodire ere tugeragu trigo enariji tuwo ko.
MAT 12:2 Fariseu doge erdure erore aino duji dukeje emagore Jesusji. Egore: – Akaiwodo. Judeu doge nure pagi. Sábado meriji pamaragodumodukare rugadu. Dukodire pamodukare pageragu trigoji sábado meri keje. Mare nou are jorduwadowuge ere tugeragu ji. Ukare turugadu!
MAT 12:3 Jesus akore: – Kočare tarduwakare Pao Kurireu bataruji! Dukodire tarduwakare Pao Kurireu meardae remawuji. Tarduwamode Pao Kurireu meardae remawuji dukeje tamago pegamodukare čeroino aino duji. Mariguduwu Judeu doge eimijera kurireu Davi rore jiboe padure Pao Kurireu bataru keje. Dujire tarduwakare. Nou Davi uke boeire ji. Utugarege tugobaigarege eke boeire ei jamedu.
MAT 12:4 Dukodire ure turemo Pao Kurireu uwaito. Okwagere boe ere maku Pao Kurireu aiwu amireuji. Pao Kurireu ure turo maku mariguduwuge pawobe Judeu doge etai. Makore ei ekawo nou amireu kowuje. Tu nou ure Judeu doge enomea maku Pao Kurireu aiwuge emode nou Pao Kurireu uwai tadawu amireu kowuje. Ainore Pao Kurireu akore. Ainore pawobe Judeu doge erore. Mare Davi ure nou Pao Kurireu uwai tadawu amireu kowuje. Ure ia maku tudugarege etai ewo kowuje jamedu. Mare Pao Kurireu mako pegakare eroino duji. Dukodire imagore aino tai tamago pegakawo čere čegeragu trigo jituji jamedu.
MAT 12:5 Kočare tarduwakare Pao Kurireu bataruji! Nou Moisés ure maku Judeu doge etaiwu bakaru akore nou maragodure Pao Kurireu uwai tadawuge ewo tagu barogo kowu boe ero pegareu moriče sábado meri keje. Ainore Pao Kurireu akore. Aino emaragodure sábado meri keje. Mare Pao Kurireu jordu pegakare eroino duji.
MAT 12:6 Iwo tawie. Ikurire Pao Kurireu uwai kori.
MAT 12:7 Pao Kurireu bataru remawu akore Pao Kurireu aiduie boe enoguduwo puapo. Aiduie boe ewo tagu barogo rogu kowu turo pegareu moriče mare aidu kurie boe enoguduwo puapo rugadu. Tarduwamode awu Pao Kurireu bataru remawuji dukeje tameartorumode ji. Dukeje tamago pegamodukare aino ro pega bokwareugei.
MAT 12:8 Ča iwo tawie. Imedu Onaregedu nure imi. Imire imode boe erduwado rugadu nuba boe eromode sábado meri keje.
MAT 12:9 Jesus ure nou tuwadaru akedudo dukeje uture nou boe epiji. Uture ere bato puiwu bai ka. Ure turemo.
MAT 12:10 Ia imedu rakojere nono. Iera pegare. Nou ierare tudorido puapo. Ia boe eimijerage edu nono jamedu. Erdu pegare Jesusji. Dukodire etaiwore Jesus ia ro pegamode tiagai dubagai. Judeu doge eromodukare ia turore jiboeji sábado meri keje. Dukodire etaidukare boe eiogowo boei sábado meri keje. Mare Jesus umode nou imedu iera pemegago nou meriji dukodire nou boe eimijerage erdu pegamode nou Jesus rore aino duji. Dukodire enarare Jesusji. Egore: – Pago bakaru ure parduwado boe eiogowo sábado meri keje?
MAT 12:11 Mare Jesus makore ewadaru jipagi. Akore: – Tagagore boe emaragodukaiago sábado meri keje tumeartoruwo pago bakaruji. Mare nuba paromode pagagu ie ovelha dogei sábado meri keje? Ia pagagu ovelha butumode moto poroto sábado meri keje dukeje pamodukare tawuje rugadu kana? Boro pamode tawuje rugadu. Kočare pamaragodu tabo kana parore aino?
MAT 12:12 Ča Pao Kurireu aidure boei nou boe egu ovelha doge ekori. Dukodire paro pemegamode boei sábado meri keje du pegamodukare Pao Kurireu ure maku pagaiwu bakaruji.
MAT 12:13 Nono Jesus makore nou imedu iera pegareuji. Akore: – Akera raido itae. Nono nou imedu ure tugera raido Jesus ae. Čare iera pemegagodure tači je rugadu. Pemegare nono nou iera abowu mogadure.
MAT 12:14 Nou boe eimijerage fariseu doge ekorigodure rugadu. Erdu pegare Jesus rore aino duji sábado meri keje. Du ainodu otobiji emagore pui tu tu je tuwo ia tumeardae pegareu tawuje tuwo Jesus bito rugadu.
MAT 12:15 Mare Jesus jorduware emeardae pegareuji. Dukodire uture nou boe eda piji. Mare boe emagare tudure Jesus apo duji. Dukodire Jesus ure nou uture pudabowuge kogodureuge epemegago.
MAT 12:16 Mare makore ei ekawo boe ewie kaboba ure pudumi duji.
MAT 12:17 Dujire Pao Kurireu makore marigudu. Marigudu ure tuwadaru maku Isaías ai uwo bu bapera keje. Akore:
MAT 12:18 – Itugare reo. Ire ikeragu ji rugadu. Imeardu kurire ji rugadu. Ure iagaredo i rugadu. Imode Iwari maku ai rugadu. Emare umode boe ewie Pao Kurireu ro pemegamoduie boei duji. Umode boe ewie Pao Kurireu umoduie meartorure puduiwuge ekinorudo ero pegareu mori piji. Umode Judeu doge ewie. Umode boe tuginaiwuge ewie jamedu.
MAT 12:19 Okimodukare boei. Mako rakamodukare boei. Mako pegamodukare toro nou boe etae.
MAT 12:20 Umodukare boe pegado rakakareugei. Umodukare boe pegado marenarue dogei. Ainore itugare romode jii boe emeartorure jitu ka uwo boe ekinorudo turo pegareu mori piji.
MAT 12:21 Nou itugare ie jire boe eiamedu boe emeartorumode. Epagamode uwo meartorure puduiwuge eiamedu boe ekinorudo du bagai rugadu. Aino čare awu Pao Kurireu bataru jeture pudui rugadu.
MAT 12:22 Ia meri keje boe etaregodure Jesus ae ia joku bokwareu imedu apo. Nou imedu mako bokware jamedu. Mare bope uwari meture tada dukodire nou bope uwari koiare ure nou imedu joku bokwado ure mako bokwado. Nono Jesus ure nou imedu pemegago rugadu dukodire nou imedu makore pugeje, aiwore pugeje.
MAT 12:23 Nou boe eiamedu boe erore ta je. Enarare pui. Egore: – Nou Pao Kurireu umoduie maku pagaiwu Davi Onaregedu kana?
MAT 12:24 Fariseu doge emeardure egoino duji dukeje emago pegare Jesusji pu biagai. Egore: – Bope doge eimijera Belzebu meture Jesus tada dukodire ure turaga maku Jesus ai Jesus uwo bope uwari tawuje boe epiji.
MAT 12:25 Mare Jesus jorduware emeardae pegareuji. Dukodire makore nou fariseu dogei. Akore: – Nou epokare puapowu boe erugodumode pui rugadu. Dukeje eraga akedumode epiji kuri je. Boe erugodumode tuwobei dukeje emode tugera ra pubiji rugadu.
MAT 12:26 Ča meartorure Satanás jiwuge emode Satanás utugarege bope doge etawuje ia boe epiji dukeje ere nono epokare puapowuge emogadure. Erugodumode pui rugadu. Dukodire nou meartorure Satanás jiwuge eragamodukare rugadu etagedumode rugadu.
MAT 12:27 Kočare tagagore nou Belzebu raka taboie ire bope uwari pegareu tawuje boe epiji. Mare nou tare jorduwadowuge nuba erore tuwo bope uwari tawuje boe epiji? Pao Kurireu raka tabore eroino na? Tu Pao Kurireu rakare tuwo bope doge etawuje boe epiji tu rugadu. Dukodire nou tare jorduwadowuge egomode pagaie tagagoino Belzebu raka taboie ire bope uwari tawuje boe epiji.
MAT 12:28 Pao Kurireu koiare ure turaga maku inai iwo bope doge etawuje boe epiji rugadu. Dukodire boe erdure Pao Kurireu ro rakareuji rugadu. Turore aino dutabo Pao Kurireu makonure boe ewagai ewo tugimijera kurireudo tu pudumi rugadu.
MAT 12:29 Ča iwogureu aidure tuwo turemo ia tugobaigare uwaito tuwo tugeragu nou tugobaigare oeji. Mare umode nou tugobaigare kogudo bukigu tabo boetoji. Nono umode tugeragu nou tugobaigare oeji rugadu tuduwo tabo rugadu.
MAT 12:30 Aidukare iwu aidumode tuwo imeardae pegado tuwo iro bokwado. Ukare tugera maku inaiwu umodukare boe etarego itae. Umode boe edo taodo ipiji.
MAT 12:31 Boe jokodu jire inagoino. Boe etaidukare turo pegareuji pugeje dukeje Pao Kurireu biagodumode nou ero pegareu piji. Boe emago pegamode Imedu Onaregeduji mare toro ia meri keje ekiarigodumode nou tuwadaru pegareuji. Emagomode Pao Kurireuji biagoduwo nou tuwadaru pegareu piji. Dukeje Pao Kurireu biagodumode ewadaru pegareu piji rugadu. Mare ia boe emago pegamode Pao Kurireu Uwariji dukeje Pao Kurireu biagodumodukare nou ewadaru pegareu piji. Nou bataru metumode nou boebo jii rugadu. Du akedumodukare rugadu. Dukodire Pao Kurireu biagodumodukare nou inodu piji rugadu.
MAT 12:33 – Iwo tawie. Iguru pegareu tudu pemegamodukare. Iguru pemegareu tudu pemegamode rugadu. Boe erduwamode tuduji dukeje erduwamode nou tudu iji jamedu. Mare iguru ji karega inagoino. Ire inagoino. Ča tameardae tawuje nuba ire taegai.
MAT 12:34 Mare tare nono awage pegareuge emogadure. Mare awagu ji karega inagoino. Ro pegareuge nure tagi marigudu. Dujire inagoino. Dukodire tameardae pemegamodukare i rugadu. Dukodire tamago pemegamodukare i jamedu. Boe ewiagoromode tumeardae pegareu tabo dukeje emago pegamode nono nou tumeardae mogadure.
MAT 12:35 Boe ewiagoromode tumeardae pegareu tabo dukeje ero pegamode emago pegamode nono nou tumeardae mogadure. Mare boe ewiagoromode tumeardae pemegareu tabo dukeje ero pemegamode emago pemegamode nono nou tumeardae mogadure jamedu.
MAT 12:36 Toro ia meri keje Pao Kurireu aiwomode boe eiamedu boei ero pegareu bagai. Dukeje boe eiamedu boe emagomode turore jiboeji tumagore jiboeji Pao Kurireu biagai rugadu. Boe etaidumode tuwo ia tuwadaru biado mare pagatu je. Pao Kurireu jorduware marigudu emeardaeji.
MAT 12:37 Dukodire imode tawie. Tamagore jiboe pemegamode dukeje Pao Kurireu mako pegamodukare tai. Mare tamagore jiboe pegare dukeje Pao Kurireu makomode tai tumoduie boe pegado tai tawadaru pegareu moriče.
MAT 12:38 Nono ia fariseu doge emagore Jesusji. Ia jorduware Judeu doge eno bakaru jiwuge emagore Jesusji jamedu. Egore: – Čegimijera. Čerdudo ia aro rakareuji čemeartoruwo ai. Mare pagatu jere egoino. Etaidukare tumeartoruwo Jesus bataruji.
MAT 12:39 Nono Jesus makore ewadaru jipagi. Akore: – Aino čare boe emeardae pegare rugadu, ero pegare rugadu. Ainore tameardaere jamedu. Tamagore i iwo ia iro rakareu tawuje taegai tarduwo iro rakareuji tarduwawo kaboba ure imi duji. Mare pagatu jere tagagoino. Dukodire iromodukare ia iro rakareuji taegai pugeje. Mare boemode i nono boe moga Jonas jitu mogadure. Dukejere boe erduwamode i rugadu.
MAT 12:40 Marigudu Jonas meture karo kurireu kuri tada. Merire pobe metia bokware ji nono nou karo kuri tada. Dukejere Pao Kurireu ure Jonas tawuje nou karo kurireu kuri piji rugadu. Aino Imedu Onaregedu rakojemode moto tada jamedu. Merimode pobe metia bokware ji nono jamedu.
MAT 12:41 Pao Kurireu ure Jonas tawuje karo kurireu kuri piji dukeje uture Nínive ba kurireu ka Pao Kurireu bataru tabo. Dukodire nou Nínive kejewuge erduware boe jokodu jire Jonas akoino pudui duji. Ekiarigodure turo pegareuji. Ere tugera ra turo pegareu piji rugadu tumeartoruwo Pao Kurireuji. Mare boe eimijera kurireu nure imi. Ikodure Jonas kori. Iorduware jiboe kodure Jonas jorduware jiboe kori. Mare du inodu tabo tagaidukare tarduwawo i. Tagaidukare tawo tagera ra taro pegareu piji. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meri keje nou Nínive ba kurireu kejewuge emago pegamode tai tawiapagakare iwadaruji dukodi.
MAT 12:42 Marigudu Sabá moto kejewuge boe eimijerago kurireudo aidure rugadu tuiorduwawo Judeu doge eimijera kurireu Salomão jorduware jiboeji. Dukodire ure tudawuje to moto piji tuduwo toro Salomão uwai ka tumearduwo Salomão makore jiboeji. Mare boe eimijera kurireu nure imi. Ikodure Salomão kori. Iorduware jiboe kodure Salomão jorduware jiboe kori. Mare du inodu tabo tagaidukare tarduwawo i. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meri keje nou Sabá moto kejewu boe eimijerago aredu mako pegamode tai tawiapagakare iwadaruji dukodi.
MAT 12:43 Jesus mako kimore boei. Akore: – Bope uwari pegareu umode tudawuje ia imedu piji dukeje utumode toro boe maereu ka taiwo tabo tumode tamudo kejewu bagai. Jordumodukare taidure jiboeji dukeje meardaemode tuwo tugirimi nou tumedure tadawu imedu ae pugeje tuwo turemo to pugeje. Dukodire nou bope uwari pegareu umode tugirimi nou tumedure tadawu imedu ae rugadu. Aregodumode dukeje jordumode ji pemegare duji. Jordumode ji ure nono tuwai motureu umogadure.
MAT 12:45 Dukejere utumode toro tumedage bope doge ewagai. Enodo padure sete. Epegare nou bope uwari boetojiwu kori. Bope uwari boetojiwu makomode ei etuwo pudabo toro nou imedu ae. Nono emode turemo nou imeduto pugeje. Dukodire boe pegamode nou imeduji rugadu. Boetojiwu meture tadawu bope uwari ure mitotu je. Aino čare bope doge enodo padu kejeboere oito nou imedu tada. Dukodire boe pegamode nou imeduji rugadu. Ča iwo tawie. Meartoru bokware iwugeire boe pegamode rugadu nono boe pegare nou imedu jitu mogadure.
MAT 12:46 Jesus mako kimore boei dukeje uče uwiemage etaregodure bagai. Etaidure tumagowo ji. Mare ekare turemo baito. Epagare bagai toro bawadu keje.
MAT 12:47 Ia imedu ure Jesus bie. Akore: – Ače, awiemage etaregodure. Eragojere toro bawadu keje. Etaidure tumagowo ai.
MAT 12:48 Jesus akore: – Imode tawie ioguduba nure mugače, ioguduba nure iwobeče.
MAT 12:49 Nono Jesus ure tugera raido nou ture jorduwadowuge eiagwai. Akore: – Awu ire jorduwadowuge ere nono iwobe emogadure.
MAT 12:50 Meartorure Iogwa Kurireu meardae jamedu boe jiwuge ere nono iwobe emogadure rugadu. Ere nono iwie mage emogadure rugadu. Ere nono muga mage emogadure rugadu.
MAT 13:1 Nou meriji rugadu Jesus uture nou bai piji pobo maereu okwa ka pugeje. Boe ere bato pui nono tumearduwo Jesus bataruji pugeje. Emagare rugadu. Dukodire Jesus ure taredo ia ika kurireuto. Nou ika kurireu padure nono pobo tada. Nou boe edure pobo okwai tumearduwo Jesus bataruji. Jesus ure tumugudo nou ika kurireu ja tada.
MAT 13:3 Dukejere Jesus readodure ewiagai ia bakaruji tuwo erduwado toro nouia Pao Kurireu meardaeji. Akore: – Ia imedu ure tudawuje tuwo boe a roto ja ja moto joki to boepa tada.
MAT 13:4 Ia a buture awara okwaji. Dukodire kiebarege ere nou buture awara okwa jiwu boe a rugadu kowuje.
MAT 13:5 Ia a buture toriguru tada. Boture kuri je mare moto pegare ji.
MAT 13:6 Dukodire boeru jeture ji dukejere nou boeru ure nou botureboe bito kuri je rugadu. Ukwa bokware kodi. Moto pegare kodi.
MAT 13:7 Ia a buture botoguru tada. Botoguru boture tabo mare botoguru ure bito.
MAT 13:8 Mare ia a buture moto pemegareu keje. Ere tuguwu sacu ure mitotu je. Botu pemegare, ričodu pemegare, enari kurire rugadu. Kidure dukeje ere rawuje čiwu piji. Ere a rawuje tuwo tugu sacuto. Nou sacu doge emagare. Enodo padu kejeboere trinta, ere sessenta, ere cem nou boe a tabo rugadu.
MAT 13:9 Tawiapaga pemegado awu iwadaruji tarduwawo kaba jiba inagoino tai.
MAT 13:10 Nou Jesus ure jorduwadowuge enarare Jesusji. Egore: – Kaba kodiba areadodure bakaruji aino boe ewiagai?
MAT 13:11 Jesus akore: – Ireadodure bakaruji iwo boe erduwado toro nouia Pao Kurireu meardaeji. Mare paga karega. Ireadodure bakaruji aino Pao Kurireu uwo tarduwado meture pudabowu tumeardae boeji, boe ewo tugimijerado ema. Mare iage emodukare boe pa nou bakaruji.
MAT 13:12 Boe erduware Pao Kurireu bataruji. Etaidure tumeartoruwo ji dukeje Pao Kurireu umode erduwa kurido pudui emeartoruwo pudui rugadu. Mare ia boe etaidumodukare tumeartoruwo tuiorduware jiwu Pao Kurireu bataruji dukeje Pao Kurireu umode erduwa bokwado tuwadaruji. Emeardaere tuiorduwaie rugadu mare pagatu je.
MAT 13:13 Dukodire ire boe erduwado toro nouia Pao Kurireu meardaeji nou bakaru tabo boe ewiagai. Dukodire etaiwomode rugadu mare erdumodukare boeji. Ewiapagamode mare erduwamodukare boeji.
MAT 13:14 Marigudu Isaías ure Pao Kurireu bataru bu bapera keje. Awu boe eire nou bataru akoino. Akore: – Tameardumode Pao Kurireu bataruji jii je mare tarduwamodukare ji. Tardumode Pao Kurireu rore jiboeji jii je mare tameartorumodukare emare roino duji rugadu.
MAT 13:15 Boe etaidukare tumeartoruwo Pao Kurireuji. Etaidumode tumeartoruwo Pao Kurireuji dukeje etaiwomode Pao Kurireu rore jiboeji tuiorduwawo Pao Kurireu meardaeji. Etaidumode tumeartoruwo Pao Kurireuji dukeje ewiapaga pemegamode Pao Kurireu bataruji tuiorduwawo Pao Kurireu meardaeji rugadu. Dukejere etaidumodukare turo pegareuji pugeje. Emode tugera ra turo pegareu piji. Dukodire imode ekinorudo ero pegareu piji. Mare etaidukare tumeartoruwo dukodire ewijare mare ewiapaga pemegamodukare. Ekure mare ere tuioku mi taiwokawo Pao Kurireu rore jiboeji. – Ainore Pao Kurireu makore marigudu.
MAT 13:16 Mare tagi tagaidure tameartoruwo rugadu dukodire tagaiwore irore jiwu Pao Kurireu rore jiboeji. Tawiapaga pemegare imagore jiwu Pao Kurireu bataruji. Dukodire tarduwagodunure Pao Kurireu meardaeji rugadu.
MAT 13:17 Imode tawie. Mariguduwuge makore Pao Kurireu bataru jiwuge etaidure rugadu tuiorduwo tardure jiwu irore jiboeji. Mariguduwuge ro pemegareuge etaidure rugadu tuiorduwo tardure jiwu irore jiboeji. Mare erdukare ji. Etaidure tumearduwo tameardure jiwu imagore jiboeji mare emeardukare ji rugadu.
MAT 13:18 – Dukodire čare imode tawie nou imagore jiwu bakaruji.
MAT 13:19 Ainore awu bakaru ure. Boe eire inagoino. Pao Kurireu o bataru ure nono nou boe a mogadure. Mare boe a ji karega inagoino. Pao Kurireu bataru aregodumode boe etae. Nono boe emeardumode Pao Kurireu bataruji. Dujire inagoino. Boe emeardumode Pao Kurireu bataruji dukeje bope doge eimijera umode nou Pao Kurireu bataru tawuje nou boe epiji nono nou kiebarege ere nou boe a tawuje awara piji dumogadure. Mare kiebarege ei karega inagoino. Bope doge eimijera jire inagoino. Umode boe ewiago Pao Kurireu bataru piji rugadu. Dujire inagoino. Dukodire nou boe emeartorumodukare Pao Kurireu bataruji rugadu. Emodukare tugimijerado ema rugadu.
MAT 13:20 Ia boe emeardumode Pao Kurireu bataruji pugeje. Nono nou boe emode nono nou boture toriguru tadawu boe a mogadure. Nou boture toriguru tadawu boe a rakamodukare. Mare boe a ji karega inagoino. Boe eire inagoino. Nou boe eragamodukare tumeartoru raiwo Pao Kurireuji. Dujire inagoino. Emode tugeragu Pao Kurireu bataruji tiagare tabo mare emeartoru raimodukare ji. Dujire inagoino. Boe emode boe pegado ei dukeje emode tugera ra tumeartorure Pao Kurireu jitu piji kuri je.
MAT 13:22 Ia boe emeardumode Pao Kurireu bataruji pugeje. Awu boe emode nono nou boture botoguru tadawu boe a mogadure. Botoguru umode boe pegado ji umode bito. Mare boture botoguru tadawu boe a ji karega inagoino. Boe eire inagoino. Nou boe emeardumode Pao Kurireu bataruji. Etaidure tumeartoruwo ji mare kuri je emororamagadumode tu tumeardae boeji pugeje. Dujire inagoino. Emeardaere tu pudui tuwo to diero kurido. Dujire inagoino. Emeardaere to diero umode tuginorudo pagatu je. Dukodire emode tugera ra Pao Kurireu bataru piji. Dujire inagoino.
MAT 13:23 Mare ia boe emeardumode Pao Kurireu bataruji dukeje emeartorumode ji rugadu. Dukodire epemegamode rugadu nono nou boture moto pemegareu boe a mogadure. Mare boture moto pemegareu kejewu boe a ji karega inagoino. Boe eire inagoino. Nou boe emeardumode Pao Kurireu bataruji nono emeartorumode ji rugadu. Dujire inagoino. Emodukare tugera ra tumeartorure jitu piji rugadu jii toro rugadu. Dujire inagoino.
MAT 13:24 Jesus makore boei pugeje. Readodure ia bakaruji tuwo boe erduwado toro nouia Pao Kurireu meardaeji pugeje. Akore: – Imode tawie duba ure tugimijerado Pao Kurireu čewuge ere. Boemode ei du mode nono ia imedu moga ure to boepa pemegado dumogadure. Imedu ure boe a pemegareu tugu to boepato.
MAT 13:25 Dukejere boečoji boe eiamedu boe enudure. Mare nou boečoji ia jordu pegare nou imedu jiwu uture nou imedu o boepa ka. Ure boto a tugu nou boepato nou trigo oiadada. Dukeje uture pugeje.
MAT 13:26 Nou trigo a boture dukeje ričodure. Mare boto boture nou trigo tabo dukodire boto ričodure trigo tabo rugadu.
MAT 13:27 Nou ore boepa čewu utugarege etaregodure tugimijera ae. Emagore tugimijeraji. Egore: “Čegimijera. Are trigo a pemegareu tugu ako boepa tada rugadu. Kočare kodiba boto boture nou trigo tabo rugadu?”
MAT 13:28 – Nou ore boepa čewu akore: “Imedu jordu pegare iwu ro pegare ino boepaji rugadu.” – Utugarege enarare ji. Egore: “Akaidure čeduwo ako boepato čewo nou boto tawuje moto piji čegera tabo čewo ako boepa akudo kana?”
MAT 13:29 – Ore boepa čewu akore: “Boro. Tamode boto tawuje moto piji dukeje nou trigo tawujedumode jamedu boto tabo.
MAT 13:30 Parokawo boeji botoji ji je. Ričodumode trigo tabo gu nou trigo kurodumode du ka. Trigo kurodure dukeje imode nou umode trigo kadowuge ewie ewo boto kado boetoji. Emode boto kado trigo piji dukeje ewo boto kogudo. Nono emode barigu joruto tuwo boto kowu rugadu. Nono imagomode ei ewo trigo kado rugadu, ewo trigo reko nou ire trigo jeto tadawu bai ka.” Ainore Jesus akore.
MAT 13:31 Jesus readodure ia bakaruji pugeje tuwo boe erduwado toro nouia Pao Kurireu meardaeji pugeje. Akore: – Imode tawie nuba nou emode tugimijerado Pao Kurireu čewuge emode. Nou emode tugimijerado Pao Kurireu čewuge emagamodukare boetoji mare ia meri keje emagagodumode rugadu. Emode nono mostarda a mogadure. Imedu ure nou mostarda a tugu to boepato.
MAT 13:32 Nou mostarda a kurikare rugadu. Boe a jamedu boe kurire nou mostarda a kori. Mare boture dukeje ričodumode rugadu nou boe emode tugu to boepa tadaboe iku jamedu boe kori. Ričomode nono iguru mogadure. I kurimode. Tugu kurimode jamedu. Dukodire kiebarege emode tumugudo keje.
MAT 13:33 Nono Jesus readodure ia bakaruji pugeje tuwo boe erduwado toro nouia Pao Kurireu meardaeji pugeje. Akore: – Imode tawie nuba nou ere tugimijerado Pao Kurireu čewuge emode. Nou emode tugimijerado Pao Kurireu čewuge emagamodukare boetoji mare ia meri keje Pao Kurireu utugarege emagagodumode rugadu. Emode nono fermento mogadure. Aredu ure tugeragu fermentuji. Ure tugu trigo kuduto. Nono ure trigo kudu udo amireuče. Nou fermento jore nou amireu jamedu boeto.
MAT 13:34 Ainore Jesus akore. Readodu kigodure bakaruji boe ewiagai tuwo boe erduwado toro nouia Pao Kurireu meardaeji rugadu. Tu tureadodu tabore ure boe erduwado.
MAT 13:35 Dujire Pao Kurireu ure boe ewie marigudu. Akore: – Imagomode dukeje ireadodumode bakaruji iwo boe erduwado toro ia Pao Kurireu meardaeji. Marigudu Pao Kurireu ure nou tumeardae biado boe epiji boe erduwakawo ji. Ure moto towuje baru towuje dupijire boe erduwakare nou Pao Kurireu meardaeji. Nono ireadodumode bakaruji boe ewiagai iwo erduwado toro nou Pao Kurireu meardaeji rugadu. Ainore nou makore Pao Kurireu bataru jiwu akore marigudu. Ure nou tuwadaru bu bapera keje marigudu rugadu. Aino ča nou bataru jeture pudui rugadu. Jesus jire akoino.
MAT 13:36 Jesus ure nou tuwadaru akedudo dukeje uture nou boe epiji toro ia bai ka. Ure turemo nou baito. Nono nou Jesus ure jorduwadowuge etaregodure ae. Enarare ji. Egore: – Kaba jiba akagoino nou boepa tadawu botoguru bakaru jiboeji?
MAT 13:37 Jesus makore ewadaru jipagi. Akore: – Nou ure boe a pemegareu tugu to boepa towu ure nono Imedu Onaregedu mogadure.
MAT 13:38 Nou boepa ure nono boe emogadure. Nou boe a pemegareu ure nono nou ure tugimijerado Pao Kurireu čewuge emogadure. Nou boto ure nono nou meartorure bope doge eimijera jiwuge emogadure.
MAT 13:39 Nou ure boto tugu boepa towu ure nono bope doge eimijera mogadure. Boe ere nou boepa tadaboe kado dure nono Pao Kurireu umode moto akedudo kejewu meri mogadure. Nou ure boepa tadaboe kadowuge ere nono Pao Kurireu utugarege baru tadawuge emogadure.
MAT 13:40 Mare boto ji karega inagoino. Meartorure bope doge eimijera jiwugeire inagoino. Boe a pemegareu ji karega inagoino. Ure tugimijerado Pao Kurireu čewugeire inagoino. Imedu Onaregedu umode tugirimi pugeje dukeje umode tudugarege baru tadawuge etudo tododai nou meartorure bope doge eimijera jiwuge ro pegareuge ewagai. Pao Kurireu utugarege baru tadawuge emode tugeragu nou meartorure bope doge eimijera jiwuge eiamedu boei nou ure tugimijerado Pao Kurireu čewuge epiji. Emodukare tugeragu nou ure tugimijerado Pao Kurireu čewugei. Nono nou Pao Kurireu utugarege baru tadawuge emode nou meartorure bope doge eimijera jiwuge ewarigu toro bope doge eda kejewu joru pegareuto. Nonore etragudu rakamode rugadu joru kori koia. Emode to reko pui tuwiri boe kori koia.
MAT 13:43 Mare nou ure tugimijerado Pao Kurireu čewuge ro pemegareuge emugumode nou Pao Kurireu apo. Ekimijera mode ema rugadu. Pao Kurireu umode emugu pemegado nono rugadu. Umode egaredo pudui rugadu. Boe eiamedu boe erdumode ei egarere pudui duji boe pemegare ei duji. Meardure awu inagoino jiwuge ewiapaga pemegawo awu iwadaruji rugadu tumeartoruwo ji rugadu.
MAT 13:44 Jesus mako kimore boei. Readodure ia bakaruji ewiagai tuwo erduwado toro ia Pao Kurireu meardaeji. Akore: – Boe etaiduwo tuwo tugimijerado Pao Kurireuče nono boe etaidure biadodureu tori kuieje mori kurireu jitu mogadure. Nou tori kuieje tugudure mototo biadoduwo boe epiji. Toro ia meri keje imedu jordure nou biadodureu tori kuiejeji nou moto keje. Jakarere pudui rugadu. Mare utukare tabo raga. Ure tugu mototo pugeje jii tumode akirodo nou moto jitu ka. Dukeje rekodure tuibagi tuwai ka. Ure nouia toe jamedu boe maku diero bagai. Nou diero tabore ure akirodo nou motoji rugadu. Nono ore nou tori kuieje mori kurireuče jamedu. Ainore rore tuwo tugeragu nou tori kuieje mori kurireuji toče. Mare tori kuieje ji karega Jesus akoino. Boe ewo tuwia ra tumeardae jamedu boe piji tumeartoruwo Pao Kurireuji tuwo tugimijerado ema. Dujire akoino.
MAT 13:45 Jesus makore boei pugeje. Readodure ia bakaruji ewiagai pugeje tuwo ewie nou Pao Kurireu meardaeji. Akore: – Nou ure tugimijerado Pao Kurireu čewuge ere nono ia umode akirodo pérola tori jiwu imedu mogadure.
MAT 13:46 Nou imedu aiwore ia pérola tori mori kurireu bagai. Jordure ia motureu mori kurireuji dukeje uture tuibagi tuwai ka. Ure toe jamedu boe maku diero bagai. Nou diero tabore ure tugirimi nou pérola tori mori kurireu bagai pugeje. Nou diero tabore ure akirodo nou pérola tori mori kurireuji rugadu. Ča boe etaiduwo rugadu tuwo tugimijerado Pao Kurireuče nono nou imedu aidure rugadu tuwo akirodo nou pérola tori mori kurireu jitu mogadure. Mare pérola tori ji karega Jesus akoino. Boe ewo tuwia ra tumeardae jamedu boe piji tumeartoruwo Pao Kurireuji tuwo tugimijerado ema. Dujire akoino.
MAT 13:47 Jesus makore boei pugeje. Readodure ia bakaruji ewiagai pugeje tuwo ewie toro ia Pao Kurireu meardaeji. Akore: – Nou ure tugimijerado Pao Kurireu čewuge ere nono boe ewogure tabowu buke mogadure. Boe ere buke barigu dukejere ere tugeragu karei rugadu.
MAT 13:48 Nou buke korobadure karebo dukeje boe ere buke tawuje pobo piji toro pobo okwa ka. Nono boe ere kare etawuje buke piji. Karo pemegareugere boe ere tugu kadaraboto. Mare karo pegareugere boe ere barigu.
MAT 13:49 Nou karo pegareuge ere nono meartorukare Pao Kurireu jiwuge emogadure. Karo pemegareuge ere nono nou ure tugimijerado Pao Kurireu čewuge emogadure. Mare karo ji karega inagoino. Boe eire inagoino. Imode moto akedudo dukeje imode Pao Kurireu utugarege baru tadawuge etudo itododai. Emage emode ro pegareuge etawuje nou meartorure Pao Kurireu jiwuge epiji. Nono emode nou ro pegareuge ewarigu toro bope doge eda kejewu joru pegareuto rugadu. Nono etragudu rakamode rugadu joru kori koia. Emode to reko pui tuwiri boe kori koia.
MAT 13:51 Nono Jesus unarare nou boei. Akore: – Tarduware awu imagore jiboe jamedu boeji kana? Egore: – Uu. Čerduware akagoino jiboeji rugadu.
MAT 13:52 Nono Jesus makore ei. Akore: – Jorduware Judeu doge eno bakaru jiwuge nure tagi. Aino ire tarduwado ure tugimijerado Pao Kurireu čewuge ere. Dukodire tare nono ia ore bai čewu mogadure. Nou ore bai čewu aiwomode tuwaito toe bagai. Nono jordumode nou ture tugeragu mariguduwu toeji. Mare jordumode nouia ture tugeragu jiwu toe maiwuji jamedu. Mare ore bai čewu ji karega Jesus akoino. Ture jorduwadowuge eire Jesus akoino. Boe enoe maiwu ji karega akoino. Ture erduwado jiboe jire akoino.
MAT 13:53 Jesus readodure awu bakaru jamedu boeji. Dukeje uture nou boe epiji.
MAT 13:54 Aregodure turijodure kejewu Nazaré ba kurireu ka. Uture nou Judeu doge ere bato puiwu bai ka. Nonore ure boe erduwado pugeje. Nou boe erdu pemegakare nou Jesus makore jiboeji. Egore: – Ioguduba ure awu imedu jorduwado? Ioguduba ure turaga maku ai ro rakawo awu turo rakareu boeji?
MAT 13:55 Maragodure ira jiwu imedu onaregedu nure ema. Uče iere Maria. Uwie ime ekiere Tiago, José, Simão, Judas. Čerduware ji marigudu.
MAT 13:56 Uwie areme emugu kimore woe awu pago ba kurireu keje rugadu. Boe eimijera karegure ema. Boe eimijera ukare jorduwado. Pagare akoino. Ro rakare mare pagatu je.
MAT 13:57 Dukodire nou boe etaidukare Jesus makore jiboeji rore jiboeji. Mare Jesus makore nou boei. Akore: – Makore Pao Kurireu bataru jiwu makore jiboe pemegamode boei. Boe emeartorumode ji. Mare turijodure kejewu boe eda kejewuge etaidumodukare makore jiboeji. Uwai tadawu boe etaidumodukare makore jiboeji. Tu emage rugadu. Iage etaidumode ji.
MAT 13:58 Dukodire Jesus ukare turo rakareu makado nono Nazaré ba kurireu keje. Emeartorukare Jesusji dukodire ukare turo rakareu makado nono rugadu.
MAT 14:1 Ča boe eimijera governador nure Herodes toro nou Galiléia moto keje. Herodes meardure boe emagore Jesus akaru jituji.
MAT 14:2 Nono ča Herodes makore tudugaregei. Akore nou imedu nuie João Batistače. Emare jewoduie pugeje dukodire ro rakaie nono boe ereadodure jiboe mogaduie jamedu. Ainore Herodes akore.
MAT 14:3 Mare Herodes ure tiekiripagado. João Batista karega. João Batista bire marigudu. Marigudu Herodes ure boe edo tugeragu João Batistaji. Ere iera kogudo tuwo tugu baičoreuto. Mare paga karega. Herodes ure tugeragu tumana Filipe oredujeji tumana piji toreduječe. Nou aredu iere Herodias. Herodes ure tugeragu ji tumana piji tumuguwo apo rugadu. Dukodire João Batista mako pegare Herodes rore nono duji. Mako raire ji. Akore: – Arokaba aino amana oredujeji. Paro kigodukare aino. Ameartoru bokware dukodire amugure nou aredu Herodias apo. Ainore João Batista akore.
MAT 14:5 Dukodire Herodes korigodure. Aidure tuwo João Batista bito mare pagudure boe eče. Boe etaidure João Batistaji. Emeardaere makore Pao Kurireu bataru jiwu nure ema rugadu. Dukodire Herodes roiwakare tuwo João Batista bito rugadu.
MAT 14:6 Ia meri keje Herodes ure tuwadae towuje tuwiabutuwo tuwudure kejewu ariji meriji. Nou uwadae keje nou aredu Herodias onaregedu aredu rerure boe eiamedu boe egai. Moture rugadu. Ure Herodes jakaredo pudui rugadu.
MAT 14:7 Nono Herodes makore nou nogwareduji. Akore: – Ameartorudo i. Imode akogwamagudure bagaiboe jamedu boe maku akai rugadu.
MAT 14:8 Dukodire nogwaredu uture tuje bagai okituwawo pudui nuba turowo nuba togwamaguduwo Herodiji. Uče okituware ji dukodire okwamagudure João Batista aora bagai paduwo ia baku keje kuri aino rugadu.
MAT 14:9 Boe eimijera Herodes kiarigodure. Makore nou boe egai tumoduie nou nogwaredu okwamagudure bagaiboe jamedu boe maku ai rugadu. Nou makore bagaiboe makudumode ai rugadu.
MAT 14:10 Nono ča makore tugobaigaregei ewo João Batista aora kado nou baičoreu tada rugadu.
MAT 14:11 Dukodire tugobaigarege etaregodure aora tabo. Padure baku keje rugadu. Nono ča ere maku nou nogwaredu ai. Dukejere ure reko toro tuje ae rugadu.
MAT 14:12 Nono João Batista utugarege etaregodure tugimijera bireu ka. Nono ere tugeragu tugimijera biji. Ere reko toro to moto ka tuwo tugu mototo. Dukodire eture toro tureadoduwo Jesus biagai.
MAT 14:13 Jorduware boe pegare João Batista jituji. Dukodire čare Jesus ure tudawuje nou boe epiji. Nono ure taredo ika kurireuto tuduwo nou boe maereu ka turagojewo nono tuginaigodu. Du inodu tabo nou boe makareuge erduware kaiba rakojere. Tieda pijire nou boe eture tuwure tabo Jesus rekodaji.
MAT 14:14 Ča Jesus ure tudawuje ika kurireu piji. Aiwore, jordure boe emagare duji. Okudugodure ebo rugadu. Nono ča iogore nou kogodureugei, nou mugure nonowugei jamedu.
MAT 14:15 Nono ča nou Jesus ure jorduwadowuge etaregodure Jesus ae merirekodutabo. Ča egore: – Merirekodu. Awu boe etudo awu boe maereu piji. Emeardaere tuwo nou boe etudo ia boe etae ewo tugeragu ia tuge roguji.
MAT 14:16 Dukeje Jesus makogodure ewadaru jipagi. Akore: – Nou boe etumodukare. Taigoiare tamode enogwagedo.
MAT 14:17 Ča egore: – Čege amireure ikera aboudure tu je. Čege karo rogu ere pobetu je jamedu.
MAT 14:18 Jesus akore: – Arego mato itae.
MAT 14:19 Nono ča makore nou boei ewo tumugudo boebutu keje. Dukeje ure tugeragu nou amireuji nou kare kugurei jamedu. Nono ča aiwore baruto. Imadure Pao Kurireu apo nou amireu paru tabo nou kare kugure eparu tabo uwo nou amireu nou kare kugure eidodudo. Nono ča ure nou amireu kado puiato. Ča ure maku tudugarege etai ewo pedo boei.
MAT 14:20 Nono ča eiamedu boe enogwagere. Nono ča ekuredure egarere pudui rugadu. Ča nou utugarege ere nou kadarabo doge korau nou boe eke kobo tabo. Nou kadarabo dogere enodo padu kejeboere doze nou boe eke kobo tabo rugadu.
MAT 14:21 Nou okwagereuge ime enodo padu kejeboere cinco mil. Ekare areme eremagu. Ekare etore eremagu jamedu.
MAT 14:22 Kuri je dukeje Jesus makore nou ture jorduwadowugei etuwo pobo maereu okwa ka ewo turemo ika kurireuto etuwo tododai. Ekurugoduwo nou pobo maereu kajeje toro bakowu ka. Jesus rakojere eiageje tumago tabo nou boei tuwo etudo.
MAT 14:23 Ure boe etudo dukeje Jesus ruture ia tori ao ka tumagowo Pao Kurireuji tuginaigodu. Nono ča boečodure. Mare Jesus mugu kimore nono tuginaigodu kimo.
MAT 14:24 Dukeje čare nou ure jorduwadowuge ekodure tabowu ika kurireu mugu kimore pobo maereu oiadada rugadu. Nono bakuru jore etogi dukodire nou pobo jetu rakare nou ika kurireuji rugadu.
MAT 14:25 Toro baregodutabo, Jesus uture toro tumeru tabo pobo aoji.
MAT 14:26 Dukeje nou utugarege erdure Jesus merure pobo ao jituji. Dukodire etokudure tubagudu koia. Egore: – Pardure ia boe pegareuji!
MAT 14:27 Mare Jesus akore: – Taragado tai! Imi rugadu reo. Tabagudukaba.
MAT 14:28 Nono Pedro makore: – Ikimijera mode aki rugadu dukeje imerudo pobo aoji jii toro akae.
MAT 14:29 Jesus akore: – Mato. Dukodire čare Pedro ure tudawuje ika kurireu piji dukeje čare merure pobo aoji jii toro Jesus ae jamedu.
MAT 14:30 Mare puredugodure Jesus ae dukeje jordure bakuru rakare pudui duji. Dukeje ča pagudugodure. Nono ure tuwogwaiago poboto dukeje ča kudugodure. Akore: – Ikimijera! Akeragu ikeraji! Iwogwakawo poboto!
MAT 14:31 Kuri je Jesus ure tugera raido. Nono ča ure tugera kogudo Pedro iera kajeje. Makore Pedroji. Akore: – Ča ameartoru biagare tu je. Kodiba amororamagadure iwadaru boeji? Ameartorukanure i pugeje?
MAT 14:32 Nono ča ei pobedu ere turemo ika kurireuto. Nono ča bakuru akedure jamedu.
MAT 14:33 Nono ča nou Jesus ure jorduwadowuge emeartorure Jesusji rugadu. Ere tubu jodo tumago pemegawo Jesusji rugadu. Egore: – Pao Kurireu onaregedu nure aki rugadu.
MAT 14:34 Jesus kurugodure ture jorduwadowugebo pobo maereu kajeje dukeje etaregodure Genesaré ba kurireu ka.
MAT 14:35 Boe erduware Jesusji dukodi ča ere mugure puredure puduiwuge kogodureuge ewie. Dukeje čare nou boe ere kogodureuge erego toro Jesus ae.
MAT 14:36 Boe enogwamagudure Jesusji nou kogodureuge ewo tugera bu nou Jesus ukudau areia okwa keje. Nou ure tugera bu ukudau areia okwa kejewuge epemegagodure rugadu.
MAT 15:1 Ča ia fariseu doge etaregodure Jerusalém piji. Nouia jorduware bakaru jiwuge jamedu etaregodure Jerusalém piji jamedu tumagowo Jesusji. Ča enarare ji.
MAT 15:2 Egore: – Kodiba atugarege enogwagere tugera rorogodu tabo? Emeartorukare nou jaoboe emagore jiboeji. Erokare nono jaoboe ero mogadure.
MAT 15:3 Jesus makogodure ei. Akore: – Kodiba tameartorukare Pao Kurireu makore jiboeji? Tagodure tu nou tameardae rekodaji.
MAT 15:4 Ča Pao Kurireu akore: “Tameartorudo taoji, tajeji. Ča nou boe mako pegamode tuoji, tujeji tuwo epogurudo dukeje bitoduiago.” Ainore Pao Kurireu akore jawu tawobei.
MAT 15:5 Mare tagi tare boe erduwado ia bataru tuginaiwuji boe ekawo tugera maku tuwo ai tuje ai. Tagagore imedu makomoduie tujeji tuoji tumodukaie tugera maku etai tumoduie toe maku Pao Kurireu ai kodi. Dukodire tumodukaie tugera maku tuwo ai tuje ai. Ainore boe eromoduie. Mare pagare egoino. Etaidukare tuwo tugera maku tuwo ai tuje ai dukodire egoino. Taigoiare tare boe egodo aino. Dukodire čare tagaidukare Pao Kurireu bataruji rugadu. Tameartorukare ji. Tagaidure tagoduwo tu nou tameardae rekodaji.
MAT 15:7 Ča tamagore boei tawo boe erduwado. Mare tameartorukare tagagoino jiboeji. Tagodu pegare nou tagagoino jiboeji tarore jiboeji rugadu. Mariguduwu makore Pao Kurireu bataru jiwu Imedu Isaías mako pemegare. Makore ainore taromode rugadu duji. Akore:
MAT 15:8 – Pao Kurireu akore: “Awu boe emagore togwa tabo tumeartoruie i mare nou boe rugadu boe emeardae remawu ure tuginai rugadu toro imeardae piji rugadu.
MAT 15:9 Awu boe ere tubu jodo tumago pemegawo i mare pagare egoino. Ere boe erduwado bakaruji. Egore iwadaruie. Mare pagare egoino. Ia tumagore jiwu bakaru jire nou boe egoino rugadu.”
MAT 15:10 Jesus makore boe makareuge etae ewo bato pui pudae. Akore: – Tawiapagado. Tarduwado.
MAT 15:11 Nou tagwagemode jiboe umodukare tabegado Pao Kurireu jakai dukodire tawujedumodukare mugure tagabowu tago bakaru piji rugadu. Mare nou taiabijiwu tawadaru pegareu emare umode tabegado Pao Kurireu jakai dukodire tawujedumode mugure tagabowu tago bakaru piji rugadu jii toro rugadu.
MAT 15:12 Ča nou Jesus ure jorduwadowuge ere tuburedo ji. Egore: – Nou fariseu doge ekorigodure nou amagore čei jiboeji.
MAT 15:13 Ča Jesus makore pugeje. Akore: – Nou baru tadawu Iogwa ukare tuguwu iguru rugadu boe tawujedumode. Mare iguru ji karega inagoino. Nou fariseu doge eire inagoino.
MAT 15:14 Dukodire tamororamagadukaba nou fariseu dogei. Eku bokware. Mare nou joku bokwareu iera bararemode nou timedia joku bokwareuji dukeje ei pobedu ewudumode nou boeiakoto. Mare eku bokwa ji karega inagoino. Emeardae pegare nou Pao Kurireu meardae remawu piji. Dujire inagoino.
MAT 15:15 Ča Pedro okwamagudure: – Čerduwado nou akagoino mariguduboe jiboeji čewiagai.
MAT 15:16 Jesus akore: – Kočare tagaora rakare tarduwagoduwo boe remawuji?
MAT 15:17 Nou tagwagere jiboe utumode tagurito mare umode tudawuje tabiji.
MAT 15:18 Mare nou umode tudawuje taiabijiwu tawadaru aregodumode nou tameardae piji. Nou inodu koiare umode boe epegado Pao Kurireu jakai dukodire etawujedumode to bakaru tadawu turo piji jii je.
MAT 15:19 Du nou tameardae pegareu aregodumode tabiji rugadu. Nou umode boe ewidowu, nou jeribarimode toreduje pijiwu toredu pijiwu, nou umode turo pegareu tieribari tabowu, nou iwogureu, nou umode boe ekiripagadowu, nou mako pegamode timedia ro jiwu.
MAT 15:20 Awu boe ero pegareu koiare umode boe epegado rugadu Pao Kurireu jakai dukodire etawujedumode to bakaru tadawu turo piji rugadu. Mare boe enogwagemode tugera rorogodutabo du umodukare boe epegado Pao Kurireu jakai.
MAT 15:21 Jesus ure tudawuje nou boe piji nono utu puredure nouia boe eda ka. Nou boe eda mugu puredure nou Tiro ba kurireuji, nou Sidom ba kurireuji jamedu.
MAT 15:22 Ča nouia aredu cananeu kejewudo mugure nou moto kejewudo ure tuburedo Jesus ae. Ča kudugodure boe eiamedu boe emearduwo. Akore: – Ikimijera nure aki. Jawu boe eimijera kurireu Davi onaregedu nure aki. Ča akogududo itabo. Bope meture itonaregedu aredu tada. Ro pega kigodure ji dukodire boe pegare ji rugadu. Awo nou bope tawuje itonaregedu piji.
MAT 15:23 Mare Jesus makokare boeji. Dukodire čare ure jorduwadowuge etaregodu puredure ae. Ča egore: – Awu aredu utudo pabiji. Ukare boe kiorodo paregodaji.
MAT 15:24 Ča Jesus makogodure: – Imi itaregodure woe itaiwowo nou Israel doge egu ovelha okwareuge ewagai. Mare ovelha ji karega inagoino. Israel moto kejewu meartorukare Pao Kurireu jiwuge eire inagoino.
MAT 15:25 Ča nou aredu aregodure. Ča ure tubu jodo moto keje Jesus bure keje. Ča akore: – Akera maku inai.
MAT 15:26 Jesus akore: – Ukare turugadu boe ewo tore eke rogu tawuje epiji tuwo maku tagu ariga doge etai.
MAT 15:27 Ča aredu makogodure: – Boe rugadu. Mare ariga doge emode nou buture nou ira kudawu boe eke gigudu rugadu boe kowuje.
MAT 15:28 Ča Jesus akore aino nou areduji. Akore: – Aredu. Ameartoru kurire i rugadu. Nou akaidure bagaiboe todumode rugadu. Ča kuri je nou aredu onaregedu pemegagodure rugadu.
MAT 15:29 Jesus ure tudawuje nou boe epiji. Nono uture toro nou Galiléia pobo maereu okwa ka. Nono Jesus kodure nou Galiléia pobo maereu okwaji. Nono ča ruture nouia tori ao ka. Ča ure tumugudo nono.
MAT 15:30 Nono ča boe makareuge eture Jesus ae. Ere nou kogodureuge erego toro Jesus ae. Nou joku bokwareuge, nou mako bokwareuge, nou meru bokwareuge, nou pogora pegareuge, nou kana pegareuge, nou kogodureuge jamedu ere erego toro Jesus ae. Nono Jesus iogore eiamedu boei.
MAT 15:31 Nou boe erore ta je erdure nou mako bokwareuge emagore duji, nou kana pegareuge nou pogora pegareuge epemegagodure duji, nou meru bokwareuge emerure duji, nou joku bokwareuge etaiwore duji. Nono ča nou boe emago pemegare Pao Kurireuji. Egore: – Israel moto kejewu pawobe emeartorure jiwu Pao Kurireu ro pemegare pai rugadu.
MAT 15:32 Jesus makore nou ture jorduwadowuge etae. Nono ča makore ei. Akore: – Inogudugodure awu boebo. Merire pobe metia bokware ei woe itabo. Woe boe eke bokware rugadu ewo ko. Itaidukare iwo etudo tuguri bioro tabo. Eragamodukare tumeruwo awaraji tuguri bioro tabo.
MAT 15:33 Nono ča Jesus ure jorduwadowuge egore nou boe emagaie nono dukodire enaragodure nuba turomoduie nou boe maereuto boe eke bagai nou boe ekeje.
MAT 15:34 Jesus akore: – Nuba tage amireu rogure tu je? Egore: – Amireu oto padure sete. Kare kugure enowarore tu je.
MAT 15:35 Nono ča Jesus makore nou boe ewo tumugudo moto keje.
MAT 15:36 Nono ča ure tugeragu nou sete amireuji nou kare kugurei jamedu. Nono ča imadure Pao Kurireu apo nou amireu paru tabo nou kare kugure eparu tabo jamedu uwo nou amireu nou kare kugure eidodudo. Nono ča ure kado puiato. Ure maku nou ture jorduwadowuge etai. Nono ere reko nou boe etae. Ere pedo boei rugadu.
MAT 15:37 Nono ča nou boe eiamedu boe enogwagere rugadu. Egarere pudui rugadu tuguredure duji. Nono ča nou Jesus ure jorduwadowuge ere kadarabo korobadureugedo sete nou boe eke kobo tabo.
MAT 15:38 Nou okwagereuge boe enodo padu kejeboere quatro mil ime. Aremere jamedu. Boe etore kugurere jamedu.
MAT 15:39 Nono ča Jesus makore nou boei etuwo. Ča ure taredo nou ika kurireuto. Nono ča uture nou pobo maereu kajeje toro nou Magadã ba kurireu ka.
MAT 16:1 Nouia fariseu doge nouia saduceu doge jamedu eture tumagowo Jesusji. Etaidure tuiorduwawo nouia ro rakareu bagai. Dukeje enogwamagudure Jesusji uwo ia turo rakareu to tiagai tuiorduwo nouia ro rakareu aregodure rugadu Pao Kurireu piji du bagai.
MAT 16:2 Mare Jesus makogodure: – Baru kujagure merirekodutabo dukeje tamagore boe pemegamoduie baru kujaguie dukodi. Bubutumodukaie barogwato. Ainore tagagore. Ainore tarduware.
MAT 16:3 Mare baru kujagumode braekododutabo dukeje tagagore bubutumoduie baru kujagure boe tugure dukodi. Tarduware tagaiwowo baruto. Tarduware boetugu umode bubutudo. Kočare iro rakare jiboe ukare tarduwado Pao Kurireu meardae remawuji?
MAT 16:4 Tagi taro pegare tameartorukare Pao Kurireuji. Dukodire tagogwamagudure ia iro rakareu bagai mare pagatu je. Ča marigudu jawu makore Pao Kurireu bataru jiwu Jonas jiboere makudumode tagai. Mare boemode i nono boe moga Jonas jitu mogadure jamedu. Dujire inagoino. Dukodire boe erduwamode i rugadu. Mare du inodu tabo tameartorumodukare i. Tamagore i iwo ia iro rakareu tawuje taegai. Mare pagatu jere tagagoino. Dukodire iromodukare ia iro rakareuji taegai pugeje. Jesus ure tuwadaru akedudo dukeje ure tudawuje epiji. Ča uture.
MAT 16:5 Dukeje nou Jesus ure jorduwadowuge ekurugodure Jesus apo toro nouia pobo maereu okwa ka. Nono ewiagodure tuwo nouia tuge amireu towuje.
MAT 16:6 Jesus makore ei. Akore: – Tamearduwadudo tai nou fariseu doge nou saduceu doge eno fermentuji.
MAT 16:7 Nou Jesus ure jorduwadowuge emagore pui kaba jiba akoino nou fermento jiboeji. Nono egore pui: – Pawiagodure page amireu piji dukodire pagimijera akoino pai.
MAT 16:8 Jesus jorduware egoino pui duji. Nono unaragodure ei. Akore: – Kodiba tamagore pui nou tage amireu bokwaie duji? Tameartoru kurikare. Tameartoru biagare tu je.
MAT 16:9 Kočare tarduwa bokware kimo. Tawiabutudo nou irore jiboe keje nou amireu rogu ure ikera aboudure tu je. Dutabore ire boe enogwagedo nou ime enodo padure cinco mil. Ča nuba tare nou kadarabo dogedo nou boe eke kobo tabo?
MAT 16:10 Ča ia meri keje pugeje nou amireu doge enodo padure sete boe etai pugeje du nou ime enodo padure quatro mil. Ča nuba tare nou kadarabo dogedo nou boe eke kobo tabo?
MAT 16:11 Kočare tarduwakare kimo imago karegure amireu jiboeji. Imagore tai tamearduwaduwo tai nou fariseu doge nou saduceu doge emeardaere jiboeji. Emeardae ure nono fermento mogadure. Mare fermento ji karega inagoino. Emeardaere jiboe jire inagoino.
MAT 16:12 Nono ča nou Jesus ure jorduwadowuge ere tuwia tugu boeto nou Jesus akoino jiboeji. Dukodire erduwagodure makore pudui jiboeji. Erduwagodure fermento remawu ji karega akoino duji. Mare nou fariseu doge nou saduceu doge ere boe erduwado jiboe jire akoino. Dujire Jesus akoino ture jorduwadowugei emeardu waduwo pudui rugadu.
MAT 16:13 Jesus uture ia moto ka ture jorduwadowugebo. Etaregodure toro dukeje ure tuwuredo ebo. Epuredure nou Cesaréia Filipe ba kurireuji. Nono ča Jesus unaragodure nou ture jorduwadowugei nuba boe emeardaere nou Imedu Onaregeduji.
MAT 16:14 Emage emagogodure: – Boe egore João Batista nuie aki. Nouiage egore Elias nuie aki. Nouiage egore Jeremias nuie aki. Nouiage egore ia mariguduwu makore Pao Kurireu bataru jiwu nuie aki.
MAT 16:15 Jesus unaragodure ei pugeje. Akore: – Tagi. Nuba tameardaere i?
MAT 16:16 Nono ča Simão Pedro makogodure. Akore: – Umode boe ekinorudowu nure aki rugadu. Pao Kurireu remawu onaregedu nure aki rugadu.
MAT 16:17 Jesus makore Pedroji. Akore: – Akiere Simão. João onaregedu nure aki. Boe remawu jire akagoino. Mare boe ekare arduwado. Pao Kurireu koiare ure arduwado aino. Dukodire boe pemegare ai rugadu.
MAT 16:18 Dukodire inagoino ai akire akiere Pedro. Awu tori tabore imode iwai towuje. Mare iwai ji karega inagoino. Meartorure iwuge emagagodumode. Dujire inagoino. Imode emagagodudo rugadu. Bope doge etaidumode turo pegawo ei. Mare du inodu tabo boe emagamode tumeartorure i dutabo rugadu.
MAT 16:19 Nono imode mugure baru tadawu chave maku akai. Mare chave ji karega inagoino. Ardu pegamode boe erore jiboeji woe moto keje baru tadawuge erdu pegamode ji jamedu. Dujire inagoino. Nono ardu pemegamode boe erore jiboeji woe moto keje baru tadawuge erdu pemegamode ji jamedu. Dujire inagoino.
MAT 16:20 Nono Jesus makore nou ture jorduwadowugei ereadodukawo boe ewiagai umode boe ekinorudowu nuie pudumi duji.
MAT 16:21 Nono ča Jesus makogodure rugadu nou ture jorduwadowugei. Akore: – Itumode nou Jerusalém ba kurireu ka. Nonore Judeu doge eimijerage emode boe pegado i rugadu. Nou ure Judeu doge enomea maku Pao Kurireu aiwuge eimijerage ero pegamode i jamedu. Nou jorduware Judeu doge eno bakaru jiwuge emode boe pegado i jamedu. Nou boe eiamedu boe emode iordudo boe koriji rugadu. Iwimode rugadu. Mare merimode pobe metia bokware i dukeje iewodumode pugeje.
MAT 16:22 Mare Pedro aidukare nou Jesus makore jiboeji. Ure tumegido Jesus apo kuri nono tumagowo ji. Akore: – Boe modukare aino ai. Pao Kurireu aidukare boewo aino ai rugadu.
MAT 16:23 Mare Jesus ure tumegido nono makore Pedroji. Akore: – Akaradai ikoda piji bope Satanás. Are nono ia tori mogadure nou itowara oiadada. Arore aino i awo iwududo. Mare tori ji karega inagoino. Ameardae jire inagoino. Ameardaere nono boe emeardae mogadure. Boe emeardae kare nono Pao Kurireu meardae mogadure dukodi.
MAT 16:24 Nono Jesus makore nou ture jorduwadowugei. Akore: – Ia tagi tagaidumode tameartoruwo i dukeje tagera ra nou taro pegareu piji, tawia ra tameardae pegareu piji tagaidure jiboe piji. Tado tarugadu boe pegawo tai nono boe pegamode i dumogadure. Iwimode ipo padure pugajejewu keje. Dukodire inagoino tai tado tarugadu tagoduwo itabo.
MAT 16:25 Boe etaidumode tuwo boe pemegado tu pudui turaga tabo dukeje nou boe eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare nou boe ewiapagamodukare tumeardaeji pugeje tuwo tugera ra turo pegareu piji tumeardae pegareu piji taidure jiboe piji dukeje Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto jamedu.
MAT 16:26 Boe emode toedo boe jamedu boeče. Mare nou enoe umodukare erududo baruto. Boe ewiagorokare tuwo tumeartorudo Pao Kurireuji. Ewiagorore tu tuwo toe kurido pagatu je. Mare paga karega inagoino. Boe emodukare turudure barutodu morido toe tabo.
MAT 16:27 Imedu Onaregedu nure imi. Imode ikirimi mato moto ka pugeje. Itaregodumode nono iraga mode nono iogwa raka mogadure. Itaregodumode Pao Kurireu utugarege baru tadawugebo. Itaregodumode iogwa o jorugu pemegareu tabo. Nono imode ro pegareuge ero morido etai rugadu. Imode ro pemegareuge ero morido etai jamedu.
MAT 16:28 Boe jokodu jire inagoino tawiagai. Imedu Onaregedu nure imi. Imode boe eimijera kurireudo imi dukeje imode ikirimi pugeje. Ia tagi tardumode awu inagoino jiboeji. Tawimodukare jii toro tardumode awu inagoino jiboe jitu ka.
MAT 17:1 Meri oto padure seis Jesusji pugeje. Nono ča uture ia ture jorduwadowugebo toro ia tori ričoreu ao ka. Nou ure jorduwadowuge ere pobe metia bokware. Pedrore, Tiagore, Joãore. Tiago uwie nure Joãoče.
MAT 17:2 Etaregodure nou tori ao ka rugadu. Nonore Jesus jere tuginai. Nou ure jorduwadowuge erdure ji rugadu. Mare Pao Kurireu koiare ure Jesus je udo aino. Dukodire Jesus jere nono meri joku urugu mogadure. Dukodire je ure nono jorugu urugu mogadure. Pao Kurireu ure Jesus ukudau areia kigadu maereudo ji. Kigadure rugadu kigadureboe jamedu boe kori.
MAT 17:3 Nono ča rore puku ei ime pobedu doge edure nono ebo. Moisere, Eliare edu nono tumago tabo Jesusji.
MAT 17:4 Nono Pedro makore Jesusji. Akore: – Čegimijera nure aki rugadu. Padure woe dure turugadu pai. Ameardaemode nono imeardaeji dukeje imode ia mačebradudo pobe metia bokware woe. Iamode akai. Iamode Moisés ai. Iamode Elias ai jamedu.
MAT 17:5 Pedro mako kimore dukeje nono ia boetugu ure turawuje etae. Nou boetugu urugu kigadure rugadu. Ure taiado ebo. Nono nou boe emeardure ia boe emagoji nou boetugu piji. Akore: – Itonaregedu reo. Imeardu kurire ji rugadu. Rore jiboe ure iagaredo i rugadu. Tawiapaga pemegado awu itonaregedu bataruji rugadu.
MAT 17:6 Nou Jesus utugarege emeardure nou bataruji dukeje epagudugodure rugadu. Nono ere tubu jodo tori keje.
MAT 17:7 Mare Jesus ure tuburedo ei nono ure tugera bu ewugeje. Akore: – Taragojedo. Tabagudukaba.
MAT 17:8 Nono ere turagojedo. Nono ere tie maedo mare erdukare ia boei pugeje. Tu emage eragojere nono Jesus apo.
MAT 17:9 Nono ere turawuje nou tori ao piji. Dukejere Jesus makore ei. Akore: – Tareadodukaba tardure jiboeji boe ewiagai. Imedu Onaregedu nure imi. Iewodumode pugeje dukeje tareadodumode awu tardure jiboeji boe ewiagai.
MAT 17:10 Nou ure jorduwadowuge enarare ji. Egore: – Kodiba pawobe erduware Judeu doge eno bakaru jiwuge egore Elias aregodumoduie nou umode boe ekinorudowu otodai?
MAT 17:11 Jesus akore: – Boe jokodu. Pao Kurireu akore Elias aregodumoduie rugadu. Umoduie boe ewie ewo tudo turugadu nou umode boe ekinorudowu togi.
MAT 17:12 Mare inure tawie. Nou Pao Kurireu makore jiwu imedu Elias aregodure marigudu. Rore nono Elias ro mogadure. Mare boe etaidukare ji. Ero pegare ji tumeardae pegareu tabo. Inure tawie. Imedu Onaregedu nure imi. Nou boe ero pegamode i nono erore jitu mogadure.
MAT 17:13 Nono nou Jesus ure jorduwadowuge erduwagodure João Batista jire Jesus akoino duji rugadu.
MAT 17:14 Nono Jesus ure turawuje tori ao piji boe etae pugeje Pedro apo, João apo, Tiago apo. Boe emagare nono. Nono ča ia imedu aregodure Jesus ae rugadu. Ure tubu jodo moto keje Jesus jokorai.
MAT 17:15 Nou imedu makore Jesusji. Akore: – Boe eimijera nure aki. Inogwamagudunure ai akoguduwo itonaregedu iparedu apo. Boe pegare ji rugadu. Ia boe kogodae pegareu jeture ji dukodire butumode moto ka pagatu je. Boe romode puku ji buture duji. Butumode joruto. Butumode poboto.
MAT 17:16 Itaregodure apo nouia are jorduwadowuge ewagai ewo pemegago. Mare eroiwakare tuwo pemegago rugadu.
MAT 17:17 Jesus makore ei. Akore: – Tare ikiarigo. Tameartorukare rugadu. Tarduwakare tawo tameardae pemegado. Iragoje raimodukare tagabo. Nuba tagaidure irowo tameartoruwo i? Nono Jesus makore iagei. Akore: – Mato nou iparedu apo itae!
MAT 17:18 Jesus mako pegare nou meture nou iparedu tadawu mareboeji. Dukodire ure tudawuje nou iparedu piji rugadu. Nono ča nou iparedu pemegare rugadu. Jesus ure pemegago tači je rugadu.
MAT 17:19 Nou boe eture dukeje Jesus rakojere nou ture jorduwadowugebo. Emagore Jesusji. Egore: – Kodiba čeroiwakare čewo nou mareboe tawuje nou iparedu piji?
MAT 17:20 Jesus makore ewadaru jipagi. Akore: – Iwo tawie. Tameartoru biagare Pao Kurireuji kodire taroiwakare. Mare tameartoru biagamode Pao Kurireuji mare tamode taragado tai tameartoru rakawo tu jao. Nono tamagomode ia tori ričoreuji uwo tudawuje tumuga piji. Nono Pao Kurireu koiare umode nou tori ričoreu meartorudo tawadaruji rugadu. Pao Kurireu raka koiare umode taroiwado boe jamedu boeji.
MAT 17:21 Boe emodukare togwa ra tuge piji jao tumagowo Pao Kurireu bagai baruto dukeje eroiwamodukare tuwo awu inodu mareboe tawuje boe epiji. Boe emode togwa ra tuge piji ia meri keje togwamaguduwo Pao Kurireu bagai baruto nono eroiwamode tuwo awu inodu mareboe tawuje boe epiji rugadu.
MAT 17:22 Jesus uture nou moto piji ture jorduwadowugebo jii toro nou Galiléia moto ka. Nonore Jesus makore nou ture jorduwadowugei. Akore: – Imedu Onaregedu nure imi. Imagudumode ro pegareuge etai.
MAT 17:23 Emode iwido. Mare merimode pobe metia bokware dukeje iewodumode pugeje. Dukodi nou Jesus ure jorduwadowuge ekiarigodure rugadu.
MAT 17:24 Jesus aregodure ture jorduwadowugebo Cafarnaum ba kurireu ka. Nono nou Pao Kurireu uwai pijiwuge ime etaregodure Pedro ae. Ure tugeragu boe enoe mori jiwuge nure emage. Ere tugeragu Pao Kurireu uwai mori roguji boe eiamedu boe epiji tuwo maku Pao Kurireu uwai tadawuge eimijera ai. Awu ime emaragodae nure nou inoduče rugadu. Nono enarare Pedroji. Egore: – Nou ure tarduwadowu imedu umode Pao Kurireu uwai mori maku kana?
MAT 17:25 Pedro akore: – Uu! Ure maku rugadu. Nono Pedro uture epiji. Ure turemo Jesus rakojere tadawu baito. Nouia utugarege edu nono jamedu. Nono Jesus makore boetoji. Akore: – Nuba ameardaere Pedro? Ioguduba pijiba moto kejewu boe eimijerage emode tugeragu boe enoe moriji? Emode tugeragu ji tuwobe epiji? Emode tugeragu ji ia boe tuginaiwuge epiji kana?
MAT 17:26 Pedro akore: – Boro. Emode tugeragu boe tuginaiwuge enoe moriji mare emodukare tugeragu tuwobe enoe moriji rugadu. Jesus akore: – Uu. Boe jokodu jire akagoino. Emodukare tugeragu tuwobe enoe moriji rugadu.
MAT 17:27 Ča Pao Kurireu Onaregedu nure imi dukodire ukare turugadu iwo nou Pao Kurireu uwai mori maku. Mare pagawo nou Pao Kurireu uwai tadawuge eimijera korigo. Pawo nou mori maku rugadu. Ča atudo toro nou pobo maereu ka. Awodiku barigu. Amode bitowu karo boetojiwu okwa jado. Nou karo okwa ja tadare ardumode ia diero toriji. Nou diero umode turugadu pai pawo nou Pao Kurireu uwai mori maku. Nou tardumode jiwu diero tori reko nou ure tugeragu Pao Kurireu mori jiwuge etae rugadu.
MAT 18:1 Nono ča nou Jesus ure jorduwadowuge etaregodure Jesus ae. Enarare ji. Egore: – Pao Kurireu umode boe eimijera kurireudo pudumi dukeje umode boe eimijeragedo iageče jamedu. Ča duboba umode emage?
MAT 18:2 Jesus makore ia boe etonaregedu rogu bagai. Makore ji rakojewo nono nou boe etoiadada.
MAT 18:3 Nono Jesus akore: – Boe remawu jire imode tawie. Tamodukare tameardae udo nono boe etore emeardae mogadure dukeje tamodukare tagimijerado Pao Kurireuče. Tamodukare taremo baruto.
MAT 18:4 Mare boe emode tumeardae pemegado tugawo boe remawugedo pudumi nono boe etore emogadure dukeje Pao Kurireu umode boe eimijerage paru towugedo emage. Pao Kurireu umode boe eimijera kurireudo pudumi dukeje umode boe eimijera paru towugedo emage jamedu.
MAT 18:5 Boe emode tugera podo boe etonaregedu apo dukeje itabore ere tugera podo jamedu.
MAT 18:6 Boe emode tori kurireu kogudo imedu itoru kajeje tuwo barigu poboto dukodire nou barigudure pobo towu imedu bimode rugadu. Mare ia boe umode nou itore meartorure maibari iwuge edo tugera ra ipiji ero pegawo pugeje dukeje boe pegamode nou ure nou boe etore etaora pegadowuji rugadu. Jire boe pegareu kodumode nou barigudure pobo towu imedu kori.
MAT 18:7 Boe pegamode meartorukare iwugei. Ere tumeardae kodudo boe emeardae pegareu kodaji dukodire boe pegamode ei ero pegareu moriče. Boe emeardae pegareu makudumode boe etai tu tu je emeardae pegawo ero pegawo jamedu. Mare boe pegamode rugadu nou ure tumeardae pegareu maku boe etaiwugei rugadu.
MAT 18:8 Jesus mako kimore: – Tagera umode taro pegado tameartorukawo i dukeje tagera kado tabiji. Tawure jamedu umode taro pegado tameartorukawo i dukeje tawure kado tabiji. Mare tagera remawu tawure remawu ji karega inagoino. Tameardae pegareu jire inagoino tawo barigu tabiji. Mare paga karega. Tameartorumodukare i dukeje tawarigudumode bope doge eda kejewu joru maereuto. Nou joru akedumodukare rugadu. Tadumode toro dukeje boe pegamode tai rugadu jii toro rugadu. Mare tameartorumode i dukeje imode tarududo baruto. Tadumode toro dukeje boe pemegamode tai nono jii toro rugadu. Kodire inagoino tai. Boe ekera umode mitotu je, boe ewure umode mitotu je mare du inodu tabo emeartorure i dukeje erudumode baruto rugadu tuwikawo pugeje.
MAT 18:9 Taeku jamedu umode taro pegado tameartorukawo i dukeje taeku tawuje tabiji. Mare taeku remawu ji karega inagoino. Tameardae pegareu jire inagoino tawo barigu tabiji. Mare paga karega. Tameartorumodukare i dukeje tawarigudumode bope doge eda kejewu joru maereuto. Nou joru umode boe ekowu jii toro rugadu. Nou joru akedumodukare. Mare tameartorumode i dukeje imode tarududo baruto. Tarudumode baruto dukeje boe pemegamode tai rugadu jii toro rugadu. Kodire inagoino tai. Taeku umode mitotu je mare tameartorure i rugadu dukeje tarudumode baruto rugadu tawikawo pugeje.
MAT 18:10 Jesus mako kimore: – Taeku jado. Tardu pegakaba nou meartorure maibari iwugei. Itore nure emage. Pao Kurireu utugarege baru tadawuge emagore awu itore eparu tabo Pao Kurireu bagai. Nou Pao Kurireu utugarege baru tadawuge edu nono Pao Kurireu apo tu je. Imedu Onaregedu nure imi. Itaregodure iwo ure tuwarigu boetowuge ekinorudo etukawo bope doge eda kejewu joru pegareuto, etuwo baruto rugadu.
MAT 18:12 Jesus mako kimore: – Ireadoduwo ia bakaruji tawiagai iwo tarduwado ia Pao Kurireu meardae pemegareuji. Ia imedu aku carneiro doge enodo padure cem. Ia okware boeto nou iage epiji. Nou akure čewu imedu uture rugadu nou tagu noventa e nove carneiro doge epiji taiwowo nou okware boetowu carneiro bagai rugadu. Nou noventa e nove carneiro doge edure nono boebutu pemegareu keje. Mare nou akure čewu imedu aiwore rugadu nou okware boetowu tagu carneiro bagai jii toro tuiordure jitu ka.
MAT 18:13 Jordure ji dukeje jakaregodure pudui rugadu. Jakarere tagu noventa e nove carneiro dogei. Mare jakarere pudui rugadu nou tuiordure jiwu carneiro roguji nou tiagarere noventa e nove carneiro dogei du kori.
MAT 18:14 Iwo tawie. Pao Kurireu aiwomode meartorumode puduiwuge ewagai nono nou imedu aiwore tagu carneiro bagai dumogadure. Mare carneiro ji karega inagoino. Boe eire inagoino. Emeartorumodukare Pao Kurireuji dukeje emode tuwarigu boeto. Ewarigudumode bope doge eda kejewu joru maereuto. Pao Kurireu aidukare boewo aino boei rugadu.
MAT 18:15 Jesus mako kimore: – Ia meartorure iwu ro pegamode ia tai dukeje atudo toro ae awo nou ro pegare aiwu bie. Amagodo ji ro pegare ai du boeji. Mare amago rakakaba ji. Tu aki amagodo ji. Tamagodo tu pui. Nono nou ro pegare aiwu biapagamode amagore jiboeji dukeje amedia mode ema. Tamedage mode pugi pugeje. Awiagodumode nou ro pegare ai dupiji.
MAT 18:16 Mare biapagamodukare amagore pudui duji dukeje akaiwodo ia meartorure iwuge ewagai. Emode mito pobe dukeje atudo ebo toro nou ro pegare aiwu bagai pugeje. Nou uture akabowuge ewiapagamode tamagore pui jiboeji. Ainore padure bapera kejewu Pao Kurireu bataru akore marigudu. Makore boei erowo pui tuwo tumeardae pegare puidu barigu pubiji. Akore: “Boe ewo pobe, boe ewo pobe metia bokware emagore jiboe uwo nono pu mogadure boe erduwawo boe remawuji.” Ainore padure bapera kejewu Pao Kurireu bataru akore marigudu.
MAT 18:17 Dukodire atumode amedagebo nou ro pegare aiwu bagai mare nou ro pegare aiwu biapagamodukare amagore jiboeji, amedage emagore jiboeji dukeje atumode nou meartorure iwuge ere bato puiwu bai ka tawo nou meartorure iwuge eiamedu boe ewie nou ro pegare aiwu ro pegare jiboeji. Nono nou meartorure iwuge emagomode nou ro pegare aiwuji jamedu. Biapagamodukare nou meartorure iwugei dukeje tamode tagera ra nou ro pegare aiwu piji. Tamode udo nono meartorukare iwu mogadure taegai. Tamode udo nono ia ro pegareu ure tugeragu boe enoe mori jiwu iwogureu mogadure taegai.
MAT 18:18 Inure tawie boe remawuji. Tardu pegamode boe erore jiboeji woe moto keje du baru tadawuge erdu pegamode ji jamedu. Nono tardu pemegamode boe erore jiboeji woe moto keje du baru tadawuge erdu pemegamode ji jamedu.
MAT 18:19 Iwo tawie pugeje. Ia tagi tamode pobe, tamode pobe metia bokware dukeje tamode bato pui tamagowo pui, tarduwawo imeardaeji. Nono iragojemode tagabo rugadu. Dukodire tameardaemode nono pu meardaere dukeje tamagomode nou tameardaeji Pao Kurireu bagai baruto dukeje Pao Kurireu umode nou tagogwamagudure bagaiboe udo turugadu tai ure nono imeardae mogadure dukodi.
MAT 18:21 Jesus akoino dukeje Pedro ure tuburedo Jesusji. Unarare: – Čegimijera nure aki. Ia meartorure aiwu ro pegamode i dukeje nuba iromode ji? Iwiagodumode nou ro pegare iboe piji kana? Mare ro pegamode i oto padumode sete dukeje nuba iromode? Iwiagodumode nou ro pegare iboe jamedu boe piji rugadu kana?
MAT 18:22 Jesus makore nou Pedro bataru jipagi. Akore: – Iwo awie rugadu. Sete karega. Ia meartorure iwu ro pegamode ai dumode setenta e sete dukeje awiago nou ro pegare aidu jamedu boe piji.
MAT 18:23 Jesus mako kimore. Akore: – Ireadoduwo iwo tarduwado nou Pao Kurireu meardaeji tawiagai. Pao Kurireu umode boe eimijerado pudumi dukeje romode nono ia boe eimijera kurireu ro mogadure. Nou boe eimijera aidure tuwo nou tudugarege ere tugeragu jiboe mori makuduwo pudai.
MAT 18:24 Dukodire makore tudugarege ewagai ewo nou mori maku pudai rugadu. Ča ia utugare aregodure tugimijera ae. Nou utugare ure tugeragu jiboe kurire rugadu. Maragodumode jii toro tuwi ka mare umodukare tugeragu jiboe morido ai rugadu.
MAT 18:25 Nono roiwakare tuwo nou mori maku tugimijera ai rugadu. Dukodire nou boe eimijera makore tumoduie nou tudugare maku oreduje maku ore kugure emagu jamedu diero bagai rugadu.
MAT 18:26 Jesus mako kimore: – Nou boe eimijera utugare jorduware nou tugimijera meardaeji dukeje ure tubu jodo moto keje nou tugimijera jokorai. Okwamagudure tugimijeraji. Akore: “Akorigodukaba i. Arokaba ia arore jiboeji i kuri je imode ikare maku akaiboe rugadu maku akai rugadu.”
MAT 18:27 – Ča nou ukimijera okudure apo rugadu. Makore nou tudugareji ukaiago ture tugeragu jiboe morido pudai. Nou rore jiboe akeduie rugadu. Tuwiagodumoduie nou rore jiboe piji rugadu. Nono makore nouia tudugaregei ekawo nou tudugare barigu baičoreuto pugeje.
MAT 18:28 – Nono nou utugare imedu uture pugeje nou tugimijera piji. Toro jordure ia timediaji emaragodure puapo tugimijera ai. Mare nou metia ukare ia boe mori maku ai dukodire aidure nou toe mori bagai. Mare nou boe mori rogu kurikare. Mare nou imedu okudugodukare timedia apo rugadu. Ure tugera kogudo nou timedia itoru kajeje. Mako rakare ji. Akore: “Nou akare boe mori maku inaiwu mori maku inai rugadu kuri aino rugadu.”
MAT 18:29 – Nou metia ure tubu jodo moto keje. Okwamagudure nou imeduji tragudu tabo. Akore: “Akorigodukaba i. Arokaba ia arore jiboeji i kuri je. Imode ikare maku akaiboe rugadu maku akai rugadu.”
MAT 18:30 – Mare nou imedu ukare tumeardae mekido nou tumeardae pegareu piji rugadu. Uture tugobaigarege ewagai. Makore ei ewo nou timedia barigu baičoreuto. Rakojemoduie baičoreu tada jii tugare morido inaiboe oto pa ka.
MAT 18:31 Nou boe eimijera ia utugarege erduware nou timedia rore jiboeji dukeje emororamagadugodure rugadu. Eture tugimijera bagai. Ereadodure nou timedia rore jiboe jamedu boeji tugimijera biagai.
MAT 18:32 Nono nou ekimijera makore nou tudugare bagai pugeje. Nou roiwakare tuwo toe morido pudaiboe tudugare bagaire makore. Nou utugare aregodure pugeje dukeje nou boe eimijera mako rakare ji rugadu. Akore: “Itugare pegareu nure aki. Ro pegareu nure aki rugadu. Akogwamagudure i akragudu tabo. Dukodire inogudugodure akabo rugadu. Imagore ai akaiago nou are akeragu jiboe morido inai pugeje. Amodukaie maku inai jii toro rugadu. Iwiagodumoduie nou diero piji rugadu.
MAT 18:33 Kočare akogudugoduwo amedia apo jamedu nono iro mogadure. Mare ameardae pegare rugadu. Akogudukare amedia apo rugadu.”
MAT 18:34 – Nono nou boe eimijera korigodure nou tudugareji rugadu. Ure nou tudugare maku tugobaigarege etai rugadu ewo boeto ji rugadu, ewo tugu baičoreuto rugadu jii umode ture tugeragu jiboe moridodu ka.
MAT 18:35 Jesus mako kimore: – Ainore baru tadawu Iogwa Kurireu romode taiamedu boei. Tagogudugodumodukare tamedagebo dukeje Iogwa Kurireu ro pegamode tai jamedu. Tawiagodumode tamedage ero pegare tai dupiji tagaidu tabo dukeje Iogwa Kurireu okudugodumode tagabo jamedu.
MAT 19:1 Jesus ure nou tumago akedudo dukeje uture Galiléia moto piji. Uture Judéia moto ka. Kurugodure Jordão po kajeje toro bakowu ka.
MAT 19:2 Boe emagare tudu tabo Jesus rekodaji toro nou moto ka. Jesus ure kogodureuge epemegago.
MAT 19:3 Ia fariseu doge etaregodure nono Jesus rakojereu ka jamedu. Etaidure tuwo turokogado Jesusji tuiorduwo ia Jesus ro pegareuji ia Jesus mako pegareuji. Erdumode dukeje emago pegamode ji rugadu. Dukodire enarare Jesusji. Egore: – Nuba Pao Kurireu ure maku Moisés aiwu pago bakaru akore? Ukana turugadu imedu uwo toreduje utudo tubiji tumugukawo apo pugeje? Romode aino pagatu je mare pegakare kana? Nou pago bakaru ukana turugadu imedu rore aino duji?
MAT 19:4 Jesus makore ewadaru jipagi. Akore: – Tagaiwore Pao Kurireu bataru remawu boetojiwuji rugadu. Kočare tarduwakare ji. Nou bataru akoino Pao Kurireu uie boe jamedu boe towuje dukeje ure imedu boetojiwu towuje. Ure aredu boetojiwudo towuje jamedu.
MAT 19:5 Pao Kurireu makoie ei imedu utumoduie tuo piji tuje piji tumuguwo toreduje apo dukeje emodukaie pobe pugeje, emoduie mitotu je rugadu.
MAT 19:6 Dukodire imedu mugumode aredu apo dukeje ere nono mitotu puapo turoi pui dutabo Pao Kurireu jakai. Ča Pao Kurireu aidure emugure puapo duji. Dukodire emuguwo puapo jii toro rugadu. Ekawo tugera ra pubiji rugadu.
MAT 19:7 Nono nou fariseu doge enarare Jesusji pugeje. Egore: – Mare nou ure pago bakaru maku pagaiwu Moisés makore nou mariguduwuge pawobei. Nou bakaru akore imedu aiduie tuwo toreduje utudo tubiji dukeje uwo ia bapera atugodo tuwo toreduje bie kaba kodiba tuie utudo tubiji rugadu. Imedu romoduie aino du pegakaie. Uwo toreduje utudo tubiji rugadu. Ainore nou mariguduwu jorduware Pao Kurireu bataru jiwu makore pawobei marigudu. Nou bataru ure turugadu kana?
MAT 19:8 Jesus akore: – Uu. Mariguduwuge pawobe etaora rakare dukodire etaidukare tuiorduwawo, etaidukare turo pemegawo. Dukodire Moisés ure nou paro maku mariguduwuge pawobe etai ewo tugera ra toreduje piji. Mare Pao Kurireu meardae remawu ukare aino boetoji. Aidukare imedu uwo tugera ra toreduje piji rugadu.
MAT 19:9 Dukodire iwo tawie Pao Kurireu meardae remawuji pugeje. Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai. Nou imedu ro peganure nou toreduje boetojiwudoji rugadu. Ure tudo nono jeribarire toreduje pijiwu mogadure Pao Kurireu jakai. Mare imedu oreduje jeribarimode nou toredu piji dukeje nou imedu aidumode tuwo tugera ra toreduje piji du pegakare.
MAT 19:10 Nono nou Jesus ure jorduwadowuge emeardure Jesus akoino duji dukeje emagore Jesusji. Egore: – Ča nou akagoino jiwu Pao Kurireu meardae remawu rakare boei rugadu. Ime eragamodukare tumuguwo tu toreduje apo rugadu. Dukodire ukare turugadu imedu uwirewo.
MAT 19:11 Jesus makore ewadaru jipagi. Akore: – Awu iwadaru rakare dukodire ia boe etaidumodukare ji. Mare Pao Kurireu ure tumeardae maku etaiwuge etaidumode nou iwadaruji rugadu emeartorure Pao Kurireuji kodi.
MAT 19:12 Ia ime ewodure dukeje ewa pegare dukodire ime mode emage mare eroiwakare tieribariwo areduji dukodire etuwiremodukare. Ia ime ewa bokware mare ime ro pegareuge ero koiare ere nou ime ewa tawuje. Dukodire etuwiremodukare. Mare ia ime emode tumeardae tawuje tuwirekawo. Mare paga karega. Etuwiremodukare tuwo tumagu Pao Kurireu ai tuwo Pao Kurireu utugaregedo pudumi. Ia boe eragare taiduwo awu iwadaruji du etaiduwo ji rugadu.
MAT 19:13 Nono ia boe etaregodure Jesus ae ia boe torebo. Emagore Jesusji uwo tugera bu nou boe etore ewugeje makowo eparu tabo Pao Kurireu bagai baruto. Mare Jesus ure jorduwadowuge etaidukare eroino duji. Emagore ei etuwo torebo Jesus piji.
MAT 19:14 Mare Jesus makore ture jorduwadowugei rugadu. Akore: – Tagaba tawu boe etore emeardae ekajeje etaregoduwo itae rugadu. Etarego itae rugadu. Boe ewo tumeardae udo nono boe etore emeardae mogadure tuwo tugimijerado Pao Kurireuče rugadu turuduwo baruto.
MAT 19:15 Nono ča Jesus ure tugera bu nou boe etore ewugeje. Nono uture nou boe epiji rugadu.
MAT 19:16 Ia imedu aregodure Jesus ae. Unarare Jesusji. Akore: – Jorduwareu nure aki. Nuba iromode iwo iro pemegado iewoduwo pugeje imuguwo baru tada Pao Kurireu apo du akedukawo rugadu?
MAT 19:17 Jesus akore: – Ča anarare i boe ero pemegareu bagai. Arduwa kana kaba jiba akagoino? Pemegareu ure mitotu je. Marigudu arduware nou Pao Kurireu ure maku Judeu doge etaiwu bakaruji. Ure maku etai marigudu. Akaidure aewoduwo pugeje amuguwo Pao Kurireu apo du akedukawo dukodi ameartorudo nou Pao Kurireu ure maku Judeu doge etaiwu bakaruji.
MAT 19:18 Nou imedu unarare pugeje. Akore: – Nou bakaru kurire rugadu. Imeartorumodu kana nou bakaru jamedu boeji? Kaba bataru ji ba imeartorumode? Jesus makore nou imedu bataru jipagi. Akore: – Akaba boe ewido. Aeribarikaba akoreduje piji. Akiwogukaba. Awadrarodukaba boe erore jiboeji.
MAT 19:19 Ameartorudo ačeji, aoji. Ameardu kurido amedagei nono ameardu kuri moga ai dumogadure. Ameartorudo awu bataru boeji.
MAT 19:20 Nou imedu akore: – Marigudu imeartorure awu bataru jamedu boeji ji aino. Kaba jiba iromode pugeje?
MAT 19:21 Nono Jesus makore imeduji pugeje. Akore: – Akaidure awo ro pemegareu remawudo aki dukeje akoe jamedu boe maku diero bagai. Nou ako diero rugadu maku marenarue doge etai. Dukeje Pao Kurireu umode akoe kurido baru tada. Aromode aino dukeje akaregodumode itae pugeje akoduwo itabo rugadu.
MAT 19:22 Nou imedu meardure Jesus bataruji dukeje kiarigodure. Oe kurire dukodire aidukare tuwo toe maku. Kiarigodure rugadu. Kodire uture Jesus piji. Meartorukare Jesus bataruji.
MAT 19:23 Nono Jesus makore ture jorduwadowugei. Akore: – Iwo tawie boe remawuji. Kočare. Boe rakare oe kurireugei etaiduwo tuwo tugimijerado Pao Kurireuče tumuguwo Pao Kurireu apo baru tada.
MAT 19:24 Boe rakare oe kurireu imeduji rugadu uwo tugimijerado Pao Kurireuče tumuguwo apo nono boe rakare cameloji uwo turemo agulha poroto dumogadure.
MAT 19:25 Nou Jesus ure jorduwadowuge emeardure nou Jesus bataruji dukeje eku kidure ji. Dukodire enarare ji. Egore: – Kočare. Ioguduba umode tuginorudo tuiewoduwo pugeje tumuguwo Pao Kurireu apo?
MAT 19:26 Jesus aiwore nou ture jorduwadowugei. Akore: – Boe eroiwakare tuwo činorudo rugadu. Mare Pao Kurireu roiware tuwo boe ekinorudo rugadu. Pao Kurireu rakare tuwo boe jamedu boe pemegado boei.
MAT 19:27 Nono Pedro akore: – Čegi čere čegera ra čenoe jamedu boe piji čegoduwo akabo. Nuba boemode čei?
MAT 19:28 Jesus akore: – Imode tawie boe remawuji rugadu. Toro ia meri keje Pao Kurireu umode boe jamedu boe maiwudo pugeje. Nono Imedu Onaregedu mugumode boe eimijera kurireu mugure kejewu to ira motureu keje, dukeje nou kodure itabowuge tagi tamugumode boe eimijera mugure kejewu ira keje jamedu. Nono tagaiwomode Israel doge erore jiboeji ero pegareu bagai ero pemegareu bagai jamedu. Nou ira doge enodo padumode doze nono nou Israel doge eno clã dogere doze dumogadure.
MAT 19:29 Boe emode tugera ra tuwai piji, tuo piji, tuje piji, tumanamage epiji, tuwiemage epiji, to boepa piji tugoduwo itabo tuwo boe ewie iwadaru pemegareuji dukeje boe rugadu boe makudumode etai eroino du moriče. Nou mori kurimode eture pijiboe kori rugadu. Nono ia meri keje eewodumode pugeje emuguwo toro baru tada. Ewimodukare pugeje jii toro rugadu.
MAT 19:30 Boe emeardae pemegare oe kurireugei dukeje egore boe eimijerage nuie emage mare emeartorumodukare Pao Kurireuji dukeje marenarue doge mode emage. Iage enoe bokware dukodire boe emeardae pegare ei mare emeartorumode Pao Kurireuji dukeje oe kurireuge mode emage toro ia meri keje rugadu.
MAT 20:1 Jesus makore boei pugeje. Akore: – Ireadodumode ia maragodure boepa jiwuge erore jiboeji tawiagai iwo tawie ia Pao Kurireu meardaeji. Boe eimijera kurireu nure ema. Boe emode tugimijerado ema tumuguwo apo baru tada dukeje Pao Kurireu romode ei nono ia ore moto čewu ro mogadure. Nou ore moto čewu o boepare. Uva iku makare nou o boepa tada. Nou boepa kurire. Ia meri keje meri rutukare raga dukeje nou ore moto čewu ure tudawuje tuwai piji taiwowo ia ime ewagai tumagowo ei emaragoduwo to boepa tada pudai.
MAT 20:2 Jordure ia imei dukeje makore ei tumoduie emaragodae morido rugadu. Tumoduie nou moto kejewu diero udo mitotu je etai emaragodae moriče. Nou moto keje emaragodae ainore morire rugadu. Dukodire nou ime etaidure nou ore moto čewu meardaeji. Nono ere tuwadaru maku ai tumaragodumoduie ai nou meriji jii merirekodu ka nou akoino jiwu mori bagai rugadu.
MAT 20:3 Nono emaragodure rugadu. Mare meri aregodure gu je pugeje nou ore moto čewu ure tumeardae tawuje tuwo tugeragu ia maragodureugei pugeje. Nono uture nou boe eda ka pugeje nou ime ewagai. Jordure ia imei toro. Emugu pagare nono.
MAT 20:4 Nono makore ei. Akore: “Tadumode ino boepa ka. Tamaragodumode tada jii merirekodu ka dukeje imode diero maku tagai tamaragodae moriče rugadu. Iro pegamodukare tai.”
MAT 20:5 – Nou ime etaidure nou ore moto čewu bataruji dukodire eture o boepa ka rugadu. – Nono meri aregodure pagaia ka dukeje nou ore moto čewu uture boe eda ka pugeje. Ure tugeragu ia imei pugeje emaragoduwo to boepa tada. Makore ei nono tumagore boetojiwugei dumogadure. Merirekodutabo nou ore moto čewu rore aino pugeje ia maragodure to boepa jiwuge ewagai pugeje.
MAT 20:6 Nono merirekodugodutabo rugadu dukeje nou ore moto čewu uture boe eda ka pugeje. Jordure ia imei nono pugeje. Edu pagare tu nono. Nono nou ore moto čewu unarare ei. Akore: “Kaba kodiba tadu pagare woe awu meriji jii merirekodu ka?”
MAT 20:7 – Egore: “Iaboe emagokare čei čemaragoduwo pudai. Čemaragodae bokware.” – Nono nou ore moto čewu makore ei. Akore: “Ča tadudo toro ino boepa ka tamaragoduwo tada. Nono imode diero maku tagai tamaragodae moriče.” – Dukodire eture toro rugadu tumaragoduwo nou ore moto čewu o boepa tada.
MAT 20:8 – Nono ča merirekodure rugadu dukodire boečodure ei rugadu dukeje nou ore moto čewu makore nou to boepa kejewu boe eimijeraji makowo nou maragodureuge eiamedu boe ewagai. Tumoduie diero maku etai emaragodae moriče. Makoiago nou aregodure boeiwuge ewagai boetoji.
MAT 20:9 – Dukodire nou boepa kejewu boe eimijera makore nou aregodure boeiwuge ewagai etaregoduwo mato nou ore moto čewu imedu ae. Emage etaregodure tumaragoduwo boigodu, merirekodutabo rugadu. Nono nou ore moto čewu ure ia nou moto kejewu eno diero udo mitotu je etai emaragodae moriče.
MAT 20:10 Nou aregodure boetojiwuge erduware nou inoduji dukeje emeardaere to diero kurimode nou aregodure boeiwuge eno diero kori rugadu. Nou aregodure boetojiwuge emaragodure aino ča je jii merirekodu ka rugadu. Emaragodu rakare rugadu. Dukodire emeardaere nou ore moto čewu umoduie to diero kurido tumagore jiboe kori. Mare nou ore moto čewu ure eno diero udo mitotu je etai jamedu nono turore nou aregodu boeiwugei dumogadure.
MAT 20:11 Ure nou diero maku etai dukeje erduware to diero ure mitotu je rugadu. Emago pegare nou ore moto čewu rore pudui duji. Egore ukaie turugadu.
MAT 20:12 Egore: “Čegi čemaragodu rakare aino ča je jii merirekodu ka rugadu boeru kuda rugadu. Nou aregodure boeiwuge etaregodure merirekodutabo rugadu. Emaragodure kuri uma hora ka. Mare are emaragodae mori udo nono čemaragodae mori mogadure. Ukare turugadu čegai.”
MAT 20:13 – Mare nou ore moto čewu makore ei. Akore: “Imedage nure tagi. Iro pega karegure tai. Imagore tawagai tamaragoduwo inai dukeje ire tawie nuba imode diero udo tamaragodae moriče. Tagi tagagore uie turugadu tai.
MAT 20:14 Ča ire nou imagore jiboe maku tagai rugadu. Tageragu ji. Taegaredo tai nou tamaragodae moriji. Nou aregodure boeiwuge etaire itaidure iwo emaragodae mori udo nono tamaragodae mori mogadure du pegakare.
MAT 20:15 Iromode ino dieroji nono imeardae mogadure rugadu du pegakare. Itaidure iro pemegawo ei du pegakare. Mare kočare iro pemegare ei mare tardu pegare iro pemegare ei duji. Du ukare turugadu.”
MAT 20:16 Jesus mako kimore: – Nou ore moto čewu rore jiboe ure nono Pao Kurireu ro mogadure meartorure puduiwugei. Mare maragodure boepa jiwugei karega inagoino. Ure tugimijerado Pao Kurireu čewugeire inagoino. Iage ere tugimijerado Pao Kurireuče marigudu. Iage ere tugimijerado ema aino maibari. Mare Pao Kurireu ro pemegamode eiamedu boei. Ro pemegamode nou meartorure puduiwuge boeiwugei. Ro pemegamode nou meartorure puduiwuge boetojiwugei jamedu. Umode eiamedu boe emugudo pudabo baru tada rugadu.
MAT 20:17 Nono Jesus uture pugeje. Kodure Jerusalém ba kurireu kawu awaraji. Nono ure tuwuredo nou ture jorduwadowugebo tumagowo ei. Enodo padure doze.
MAT 20:18 Akore: – Padumode Jerusalém ba kurireu ka. Imedu Onaregedu nure imi. Imagudumode nou ure Judeu doge enomea maku Pao Kurireu aiwuge eimijerage etai. Imagudumode nou jorduware Judeu doge eno bakaru jiwuge etai. Nou boe eimijerage egomode ipegaie. Etaidumode tuwo iwido rugadu.
MAT 20:19 Dukodire emode imagu boe tuginaiwuge eimijera ai nou boe tuginaiwuge eimijera uwo to tugobaigarege edo boeto i. Emode iwido ipadumode ipo padure pugajejewu keje. Mare merimode pobe metia bokware dukeje iewodumode pugeje rugadu.
MAT 20:20 Ia aredu aregodure Jesus ae tore ime pobedu dogebo. Etuo iere Zebedeu. Nou aredu ore ime ekodure Jesus apo marigudu. Jesus ure jorduwadowuge nure emage. Etuje ure tubu jodo moto keje togwamaguduwo Jesusji iaboe bagai.
MAT 20:21 Jesus makore nou areduji. Akore: – Kaba jiba akaidure? Nou aredu akore: – Amode boe eimijerado aki woe dukeje amugumode ira kurireu keje nono boe ekimijerage ero mogadure. Itaidure awo itore ime emugudo amegi boe eimijera mugure kejewu ira keje jamedu. Ia mugudo nono akana pemegareu jagwai. Metia mugudo akana pegareu jagwai.
MAT 20:22 Jesus meardure nou aredu bataruji dukeje makore nou aredu ore ime pobedu dogei. Akore: – Tarduwakare kaboba bagaiba taje akoino. Boe pegamode tai nono boe pegamode i dumogadure dukeje taroiwakana tawo taragado tai tagawo tagera ra tameartorure idu piji? Egore: – Uu. Čemode čeragado čei rugadu.
MAT 20:23 Jesus makore ei pugeje. Akore: – Inure tawie. Boe pegamode tai rugadu nono boe pegamode i dumogadure. Mare iroiwakare iwo tamugudo itabo ikana pemegareu jagwai, ikana pegareu jagwai. Iogwa Kurireu emare ure nou imegiwu udo turugadu. Tu ema jorduware turomode jiboeji. Emare umode taidure jiwuge emugudo ikana pemegareu jagwai, ikana pegareu jagwai.
MAT 20:24 Nou pobedu doge emedage enodo padure dez. Jesus ure erduwado jamedu. Emeardure nou tumedage etuje okwamagudure jiboeji dukeje ekorigodure nou tumedage pobedu dogei.
MAT 20:25 Nono Jesus makore eiamedu boe etae ewiapagawo tuwadaruji. Akore: – Tarduware boe tuginaiwuge ekimijerage erore jiboeji. Ero rakare boei. Boe emeartorumode tugimijeragei rugadu. Emeartorumodukare ei dukeje nou boe ekimijerage emode boe pegado nou meartorukare puduiwugei rugadu.
MAT 20:26 Mare tarokaba nono nou boe tuginaiwuge ekimijerage ero mogadure. Ia tagi tagaidumode tawo boe ekimijerado tagi dukeje tameardae udo nono boe utugare meardae mogadure tawo boe eimijera pemegareugedo tagi. Boe eimijera romode nono boe utugare ro mogadure tuwo boe eimijera pemegareudo pudumi.
MAT 20:28 Tarodo nono iro mogadure. Imedu Onaregedu nure imi. Itaregodukare iwo boe ekimijerado imi. Itaregodure iwo boe etugaredo imi. Itaregodure iwo imagu boe etai. Itaregodure iwiwo boe ero pegareu moriče rugadu.
MAT 20:29 Toro ia meri keje, Jesus uture Jericó ba kurireu piji ture jorduwadowugebo. Ia boe ekodure awaraji Jesus apo jamedu. Emagare rugadu.
MAT 20:30 Joku bokwareuge ime pobedu doge emugure nono nou awara okwai. Emeardure Jesus kodure tugori duji. Kodire ekudure Jesus rekodaji. Egore: – Čegimijera! Davi Onaregedu nure aki! Akogududo čedabo! Nou joku bokwareu ime erduware Davi uwobe nure Jesusče duji dukodire egoino Davi Onaregedu nuie ema.
MAT 20:31 Nou kodure nonowu boe emago rakare ei emugu kiorowo. Mare ekudu rakare pugeje. Egore: – Čegimijera! Davi Onaregedu nure aki! Akogududo čedabo!
MAT 20:32 Nono ča Jesus ure tuwuredo nono. Makore toro etae. Akore: – Kaba jiba tagaidure irowo tai?
MAT 20:33 Egore: – Čegimijera nure aki. Čedaidure čedaiwowo pugeje.
MAT 20:34 Jesus okudugodure ebo rugadu. Ure tugera bu eku keje. Aino ča etaiwore pugeje tači je. Etaiwo pemegare rugadu. Dukodire ekodure Jesus rekodaji rugadu.
MAT 21:1 Nou inodu otobiji Jesus uture Jerusalém ba kurireu ka ture jorduwadowugebo. Epuredugodure boe eda Betfagé ka. Nou boe eda mugu puredure Oliveira Riji. Aregodure toro dukeje makore nou ture jorduwadowuge ime pobedu dogei tuwo etudo tododai.
MAT 21:2 Akore ei: – Tadudo toro nou boe eda ka. Tagaregodumode dukeje tardumode ia jumenta areduji onaregedu apo duji. Boe ere ekogudo nono duji. Tamode bukigu kiwuje dukeje tadumode mato ebo itae.
MAT 21:3 Ia boe enaramode kaba kodiba tarore aino dukeje tamagodo aino ji: “Pagimijera aidure ei”, aino. Nono nou boe emode tadudo ebo itae rugadu.
MAT 21:4 Dukodire ia Pao Kurireu bataru jeture pudui. Marigudu ia makore Pao Kurireu bataru jiwu ure nou bataru bu bapera keje. Akore:
MAT 21:5 – Awu mugure Jerusalém kejewuge tagi. Tabagudukaba. Tagimijera kurireu ro butugumode boei rugadu. Mugumode jumenta keje taregoduwo tagae. Jumenta onaregedu kejere mugumode rugadu taregoduwo tagae.
MAT 21:6 Nono ča nou Jesus ure jorduwadowuge pobedu doge erore nono Jesus makore pudui dumogadure rugadu.
MAT 21:7 Etaregodure tuibagi nou jumenta apo, nou jumenta onaregedu apo rugadu Jesus ae rugadu. Nono nou boe ere tugudau areia cobertor boe bu nou jumenta poru keje, nou jumenta onaregedu poru keje Jesus muguwo keje rugadu.
MAT 21:8 Boe emagare nono nou Jerusalém kawu awara keje. Iage ere tugudau areia cobertor bu awara keje rugadu. Iage ere bai kado. Ere nou bai bu awara keje jamedu Jesus koduwo nou jumenta apo nou awaraji Jerusalém ba kurireu ka.
MAT 21:9 Boe emagare rugadu tugodu tabo Jesus apo. Eture tiegarere pudui dutabo rugadu. Dukodire ewadodu rakare Pao Kurireu ie tabo tumago pemegare ji dutabo. Egore: – Davi onaregedu nure ema dukodire pagimijera kurireu nure ema rugadu. Pao Kurireu uwo boe pemegado ji rugadu! Pao Kurireu ure arego mato pagae. Ure turaga maku ai rugadu. Boe eiamedu boe emago pemegawo ji rugadu woe moto keje, baru tada jamedu.
MAT 21:10 Nono ča Jesus aregodure Jerusalém ba kurireu ka rugadu. Nou ba kurireu tadawuge eiamedu boe erore ta je. Erduwakare kodiba nou boe eroino. Dukodire enarare boei. Egore: – Ioguduba ure ema?
MAT 21:11 Nou kodure Jesus apowuge boe emagareuge egore: – Jesus reo. Emare makore Pao Kurireu bataruji. Aregodure Galiléia moto piji, Nazaré ba kurireu piji.
MAT 21:12 Jesus ure turemo Pao Kurireu uwaito. Nono jordure nou boei ere tagu metugoe emagu diero bagai duji ere diero maku puai duji. Dukodire korigodure rugadu. Ure nou boe enoe rugadu barigu. Ure emugure kejewu ira rugadu boe barigu. Ure nou metugoe emedure tadaboe rugadu barigu. Ure nou boe etudo Pao Kurireu uwai piji rugadu.
MAT 21:13 Jesus akore: – Pao Kurireu uwai tadare boe emagomode bagai baruto. Ainore Pao Kurireu akore. Ainore bapera atugo ure. Mare tare awu Pao Kurireu uwai udo nono iwogureuge ewai mogadure.
MAT 21:14 Joku bokwareuge, pogora pegareuge, etaregodure Jesus ae nou Pao Kurireu uwaito. Nono Jesus ure epemegago.
MAT 21:15 Mare nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge erdure Jesus ure boe epemegago duji. Emeardure nou boe etore ekudure Jesus ro pemegareu tabo boe egai duji. Dukodire ekorigodure. Nou boe etore egore Davi onaregedu nuie ema duji. Pagimijera kurireu nuie ema rugadu. Pawo boe pemegado ji rugadu! Dukodire nou boe eimijerage erdu pegare Jesusji. Ekorigodure.
MAT 21:16 Dukodire emagore Jesusji. Egore: – Ameardu kana nou boe etore emagoji? Emagore jiboe ukare turugadu. Pagare egoino. Atudo toro etae awo edukiorodo. Mare Jesus akore: – Boro. Tarduwakare Pao Kurireu bataru remawuji. Marigudu Pao Kurireu ure boe ewie nou emagomoduie aino duji rugadu. Padure bapera keje. Akore Pao Kurireu uie boe etore kugure emago pemegado rugadu. Emago pemegaie Pao Kurireuji rugadu. Dujire Pao Kurireu aidure. Dujire Pao Kurireu meardae remawure.
MAT 21:17 Nono ča Jesus uture nou boe epiji. Uture Jerusalém ba kurireu piji toro Betânia boe eda ka. Nonore unudure nou boečoji.
MAT 21:18 Nou barogwato ča boečoto Jesus kodure awaraji pugeje tuwo tugirimi Jerusalém ba kurireu ka pugeje. Mare uke boeire ji.
MAT 21:19 Nono jordure ia figo iji nou awara okwai. Uture nou i ka. Aiwore ia tudu kurodureu bagai mare jordukare boeji. Jordure tu aruji rugadu. Nono Jesus mako pegare nou iji. Akore: – Boe emodukare akurodu kowuje pugeje awimode kodi. Ča nono nou figo i bire aino tači je!
MAT 21:20 Nou Jesus ure jorduwadowuge erdure nou inoduji dukeje eku kidure rugadu. Egore: – Kočare awu figo i bire aino tači je rugadu?
MAT 21:21 Jesus makore ei. Akore: – Inure tawie boe remawuji. Tameartorudo Pao Kurireuji rugadu. Tameartugukaba ji. Tameartorumode dukeje taromode figo iji nono iro mogadure. Nono tamagomode tori riji uwo tuwarigu pobo maereuto. Tamagomode ji dukeje barigudumode pobo maereuto rugadu. Mare tameartorumodukare dukeje umodukare tuwarigu.
MAT 21:22 Tameartorumode dukeje tamagomode Pao Kurireu bagai baruto iaboe bagai dukeje umode tamagore bagaiboe maku tagai rugadu.
MAT 21:23 Jesus aregodure Pao Kurireu uwai ka pugeje. Ure turemo dukeje ure boe erduwado nono. Nou ure Judeu doge enomea maku Pao Kurireu aiwuge eimijerage, nouia boe eimijerage etaregodure Jesus ae jamedu. Emagore Jesusji: – Ioguduba ure akarego mato? Ioguduba ure turaga maku akai aro rakawo aino?
MAT 21:24 Jesus akore: – Imi jamedu inaramode tai. Ioguduba ure João Batista udo boe etao pegodo? Pao Kurireu koia kana? Ia boe eigoia kana? Tamagomode iwadaru jipagi dukeje imagomode tawadaru jipagi jamedu. Mare nou boe eimijerage erduwakare tumagowo Jesus bataru jipagi. Dukodire emagore pui nuba tagomode Jesus bataru jipagi. Egore: – Pamagomode Pao Kurireu koiare ure João Batista udo boe etao pegodo mare pameartorukare nou inoduji. Awu Jesus jorduware pameartorukare nou inodu jituji. Dukodire pagagomode aino dukeje Jesus umode pawadaru pogurudo. Akomode: “Kodiba tameartorukare ji?” Ainore akomode pai.
MAT 21:26 Mare pagagomode boe eigoiaie dukeje awu woewu boe ekorigodumode pai rugadu. Boe eiamedu boe emeartorure João Batista makore Pao Kurireu bataru jituji. Egore Pao Kurireu koiare ure João Batista udo boe etao pegodo rugadu. Pagagomode boe eigoiaie mare pabagudure boeče dukodire pamagomodukare aino.
MAT 21:27 Nono nou boe eimijerage emagore Jesusji. Egore: – Čerduwakare ioguduba koiare ure João Batista udo boe etao pegodo. Nono Jesus makore ei. Akore: – Tamagokare iwadaru jipagi dukodire imagomodukare ioguduba ure itarego mato jamedu duji.
MAT 21:28 Jesus mako kimore nou boe eimijeragei. Akore: – Ireadodumode ia bakaruji iwo tawie ia Pao Kurireu meardaeji. Ia imedu ore ime ere pobe. Nou imedu makore nou tonaregedu imedu boetojiwuji. Makore ji. Akore: “Atudo toro pago boepato amaragoduwo nou boepa tadawu uva ikuji.”
MAT 21:29 – Mare nou imedu onaregedu boetojiwu akore tudumodukaie, tumaragodumodukaie boepaji nou meriji. Mare nou imedu onaregedu boetojiwu ure tumeardae mekido dukodire uture rugadu boepato rugadu. Maragodure ji rugadu nou meriji.
MAT 21:30 Mare nou uo jorduwakare nou inoduji dukodire uture nou tonaregedu boigoduwu bagai. Makore ji utuiago to boepato nou meriji, maragoduiago boepaji nou meriji. Nou imedu onaregedu boigoduwu akore tudumoduie tumaragoduwo rugadu. Mare ča utukare rugadu.
MAT 21:31 Ainore Jesus readodure. Nono Jesus unarare nou boe eimijeragei. Akore: – Kakojiwu imedu onaregedu ba meartorure nou tuo makore pudui duji? Nou boe eimijerage egore: – Nou imedu onaregedu boetojiwu emare meartorure tuo bataruji. Jesus akore: – Boe jokodu jire tagagoino. Boe egore nou umoduie tugeragu boe enoe morijiwu emugumodukaie Pao Kurireu apo baru tada. Boe egore nou areme ure tugeragu dieroji tieribari tabowuge emugumodukaie Pao Kurireu apo baru tada erore aino dukodi. Mare iwo tawie boe remawuji. João Batista makore nou boei dukodire ekiarigodure nou turo pegareuji. Ere nou tumeardae pegareu barigu tubiji tumeartoruwo Pao Kurireuji rugadu. Ainore boe erore tuwo tudo turugadu tumuguwo Pao Kurireu apo baru tada rugadu. João Batista ure tarduwado jamedu. Ure tarduwado Pao Kurireu meardaeji. Ure tarduwado nuba taromode tawo tado nono ro pemegareugere Pao Kurireu jakai. Tardure nouia boei ere tumeardae pegareu barigu tubiji duji. Tardure nouia boei emeartorure João Batista makore pudui duji. Mare tagire tameartorukare. Tagare tameardae pegareu barigu tabiji. Dukodire tagare tarugadu raga tamuguwo Pao Kurireu apo baru tada rugadu.
MAT 21:33 Jesus mako kimore nou boe eimijerage pegareugei. Akore: – Imagowo ia bakaruji tawiagai iwo tawie Pao Kurireu meardae remawuji pugeje. Ainore nou bakaru ure. Ia imedu ure uva tugu to boepa tada. Ure ramiku aiado to boepa tabo. Ure ia moto porodo tuwo tuwuredo nou uva kurodu keje tuwo kuru tawuje. Ure ia tugamo pemegado boe ewo tumugudo toro aogeje taiwo pemegawo boepaji. Nono ure tugeragu ia boei tuwo etudo nou to boepaji. Nono nou ore boepa čewu uture epiji tugiriadu tabo toro ia boe eda jaereu ka.
MAT 21:34 Nou boepa tadawu uva kurodumode kejewu ari puredugodure dukeje nou ore boepa čewu imedu ure tudugarege etudo toro nou jeture to boepa jiwuge etae nou tugiriadure kawu moto piji. Ure nou tudugarege etudo ewo tugeragu nou makudumode pudaiwu boeji. Nou jeture nou boepa jiwuge emode uva rugadu kado dukeje emode ia kado puiato nou ore boepa čewu imedu ai.
MAT 21:35 Nou imedu utugarege etaregodure nou boepa ka. Mare nou jeture nou boepa jiwuge etaidukare tuwo uva kado puiato pugeje nou ore boepa čewu ai. Dukodire ere tugeragu nou imedu utugaregei turaga tabo. Ere boeto iaji. Ere ia bito. Eidore tori tabo iaji.
MAT 21:36 Jesus mako kimore: – Nou utugarege etaregodukare iaboe tabo dukeje nou ore boepa čewu imedu ure ia tudugarege etudo pugeje toro nou jeture to boepa jiwuge ewagai pugeje. Ure tudugarege emagado toro rugadu. Mare nou jeture boepa jiwuge ero pegare nou imedu utugaregei nono turo mogadure pugeje.
MAT 21:37 Nono ča nou ore boepa čewu ure tonaregedu imedu utudo nou jeture boepa jiwuge ewagai boigodu. Imedu makore tudada tonaregedu jie emeartorumoduie.
MAT 21:38 Mare nou jeture boepa jiwuge erdure nou ore boepa čewu onaregedu kodure aino pudae duji dukeje emagore pui. Egore: “Awu ore boepa čewu onaregedu reo. Emare omode tuo oe jamedu boeče. Pawo bito pagowo oe jamedu boeče.”
MAT 21:39 Ainore emagore pui. Nono ere tugeragu nou ore boepa čewu onaregeduji. Ere barigu nou boepa piji. Nono ere bito toro.
MAT 21:40 Jesus mako kimore nou boe eimijeragei. Akore: – Ainore erore rugadu. Ča. Nuba tameardaere nou ore boepa čewu romode nou jeture boepa jiwugei?
MAT 21:41 Nou boe eimijerage emagore Jesus bataru jipagi. Egore: – Umode nou jeture to boepa jiwuge ro pegareuge ewido. Nono umode to boepa maku ia ime etai etuwo ji. Nouge ča emode ia kurodureboe maku nou ore boepa čewu ai rugadu.
MAT 21:42 Jesus akore: – Boe rugadu jire tagagoino. Mare tagaiwokare rugadu kana ia padure bapera kejewu Pao Kurireu bataruji? Ainore awu Pao Kurireu bataru akore: – Boe emeardae pegare toriji. Egore pegaie tuwo tuwaido ema. Mare nou tori pemegareu nure ema rugadu boe ewo tuwaido ema rugadu. Pao Kurireu koiare ure nou tori pemegado aino. Ure pemegado nouia tori jamedu boe ekori. Boe eiamedu boe ebogodure nou Pao Kurireu roino duji. – Ainore nou batarure.
MAT 21:43 Jesus mako kimore: – Iwo tawie awu Pao Kurireu bataru boeji. Tori ji karega akoino. Umode boe ekinorudowu imedu jire Pao Kurireu akoino. Nou umode boe ekinorudowu romode boei nono ia boe ewudure kejewu tori ro mogadure. Buture tori aogejewuge eiamedu boe emode togorido. Mare tori ji karega inagoino. Nou umode boe ekinorudowu umode meartorukare puduiwuge erugadu boe epegado. Dujire inagoino. Nou umode boe ekinorudowu romode boei nono ia buture boe ewugejewu tori ro mogadure jamedu. Tori butumode boe ewugeje dukeje umode nou boe egugudo. Mare tori ji karega inagoino. Nou umode boe ekinorudowu umode boe pegado nou meartorukare puduiwuge eiamedu boei. Dujire Pao Kurireu akoino. Čare imode tawie boe remawuji. Tameardaere tamugumoduie Pao Kurireu apo baru tada. Tameardaere tagimijera nuie Pao Kurireuče. Mare pagare tagagoino. Pao Kurireu makomodukare tawagai pugeje. Makomode ia boe ewagai. Nono emeartorumode Pao Kurireuji rugadu dukodire emagere emugumode Pao Kurireu apo baru tada rugadu. Emode tugimijerado Pao Kurireuče rugadu.
MAT 21:45 Nou ure Judeu doge enomea maku Pao Kurireu aiwuge eimijerage emeardure nou Jesus bataruji. Nou boe eimijerage fariseu doge emeardure jamedu. Emeardure Jesus readodure jiwu bakaruji dukeje erduware puduire Jesus akoino duji.
MAT 21:46 Dukodire nou boe eimijerage pegareuge eiamedu boe etaidure tuwo tugeragu Jesusji tuwo tugu baičoreuto kuri je rugadu. Mare boe etaidukare ero pegawo Jesusji. Egore makore Pao Kurireu bataru jiwu nuie ema rugadu. Pao Kurireu uie arego rugadu. Boe etaidure tuwiapagawo Jesus makore jiboeji. Dukodire nou boe eimijerage pegareuge epagudure, eroiwakare tuwo tugeragu Jesusji nou boe epiji rugadu.
MAT 22:1 Jesus makore nou boei pugeje. Makore ia bakaruji tuwo boe ewie toro ia Pao Kurireu meardae ka pugeje.
MAT 22:2 Akore: – Pao Kurireu umode boe eimijera kurireudo pudumi dukeje ainore boemode. Imode tawie bakaruji. Ia boe eimijera kurireu onaregedu imedu uwiremode. Dukodire nou boe eimijera kurireu ure ia boe ewadae kurireu towuje.
MAT 22:3 Ure boe jamedu boe udo turugadu dukeje ure tudugarege etudo nou tumagore bagaiwuge ewagai tuwo ewie boe uie turugadu duji etaregoduwo tuwadae ka rugadu. Mare nou makore bagaiwuge etaidukare tuduwo toro. Eiamedu boe egore tudumodukaie.
MAT 22:4 Dukodire nou boe eimijera kurireu ure ia tudugarege etudo pugeje toro nou makore bagaiwuge ewagai pugeje. Akore nou tudugaregei: “Tamagodo nou imagore bagaiwugei ire boe eke kurido rugadu. Tapira kodu kareu uie turugadu. Boe jamedu boe uie turugadu.”
MAT 22:5 Ainore nou boe eimijera kurireu akore. Dukodire nou utugarege eture nou boe ewagai. Mare nou boe ewiapagakare ewadaruji. Eture nou boe eimijera kurireu utugarege epiji. Ia uture to boepato. Ia uture tumaragodure tadawu bai ka.
MAT 22:6 Iage ere tugeragu nou boe eimijera kurireu utugaregei. Ero pegare ei. Ere ewido.
MAT 22:7 Nou boe eimijera jorduware nou inoduji dukeje korigodure nou boei rugadu. Ure to tugobaigarege etudo nou boe eda ka. Nou tugobaigarege ere nou boe ewido rugadu. Ere joru tugu nou ewai jamedu boeto.
MAT 22:8 Nono nou boe eimijera kurireu makore tudugaregei pugeje. Akore: “Itonaregedu uwiremode dukodire ire ewadae pemegado. Boe jamedu boe ure turugadu. Mare nou imagore bagaiwuge epemegakare, etaregodukare. Itaidukare ei pugeje.
MAT 22:9 Dukodire čare tadudo toro nou boe eda ka ia boe ewagai pugeje. Tamagodo tardumode jiwuge eiamedu boei etaregoduwo mato nou iwadae ka.”
MAT 22:10 Dukodire čare nou utugarege eture nou boe eda ka rugadu. Ekodure nou boe eda jamedu boe parugajeje. Emagore tuiordure jiwuge eiamedu boei etaregoduwo nou tugimijera kurireu uwadae ka. Nou emagore jiwuge epemegare iage epegare. Dukodire nou boe eimijera kurireu uwadae kejewu bai kurireu korobadure boebo rugadu.
MAT 22:11 Nono nou boe eimijera kurireu ure turemo nou boe ewadaemode kejewu bai kurireuto tuiorduwo nou aregodureuge boei. Nono jordure ia imeduji nono nou bai tada. Mare nou imedu ukudau areia ure tuginai. Ukare nou tugudau areia boe ewadae kejewu tugu pudui.
MAT 22:12 Nou boe eimijera kurireu makore nou imeduji. Akore: “Me. Boe ewadae kejewu akudau areia metukare ai. Kočare nuba arore awo aremo awu iwaito?” – Mare nou imedu bataru bokware.
MAT 22:13 Nono nou boe eimijera kurireu makore tudugaregei. Akore: “Tageragu nou imeduji. Iera kogudo. Bure kogudo. Nono barigu toro bawadu ka, toro boečo ka. Torore boe etragudu rakare. Torore boe emode to reko pui tuwiri boe kori koia.”
MAT 22:14 Mare paga karega. Pao Kurireu makore bagaiwuge emagare mare ure tugeragu jiwuge emagakare rugadu.
MAT 22:15 Ia fariseu doge ere tumeardae pegareu tawuje. Etaidure tuwo Jesus barigu boeto tagoino jiboeji.
MAT 22:16 Dukodire ere ture jorduwadowuge etudo Jesus bagai. Aidure Herodes jiwuge eture ebo jamedu. Etaregodure Jesus ae dukeje enarare ji. Egore: – Boe eimijera nure aki. Awiapagakare boe ewadaru pegareuji. Boe jokodu jire akagoino. Akare awadaru udo paga boei. Ameardaere boei boe remawu tabo. Arduware Pao Kurireu meardaeji. Are boe erduwado nou Pao Kurireu meardaeji tu tu je. Awiapagakare ia boe emeardae pegareuji rugadu.
MAT 22:17 Dukodire čare čedaidure čenarawo ai ameardae bagai. Nuba pago bakaru akomode paromode jiboeji? Pamode pagoe mori maku Roma kejewu boe eimijera kurireu César ai na? Pamode maku kana? Pamodukana maku?
MAT 22:18 Mare Jesus jorduware emeardae pegareu boeji. Dukodire mako rakare ei. Akore: – Meardae pegareuge nure tagi. Tameartorukare tawadaruji. Kaba kodiba tagaidure tawo iwarigu boeto tagagoino idu tabo?
MAT 22:19 Nou boe mode morido aiwu imedu boe enoe diero tori maku inai iorduwo ji ka. Nono ia boe ere ia diero tori maku Jesus ai.
MAT 22:20 Nono Jesus unarare ei: – Ioguduba je ba padure awu diero tori keje? Ioguduba ie ba padure awu diero tori keje?
MAT 22:21 Nou boe egore: – Roma kejewu boe eimijera kurireu César ie padure keje. Nono Jesus makore ei. Akore: – Boe rugadu. Čare awu César oeboe maku César ai. Mare Pao Kurireu oeboe maku Pao Kurireu ai jamedu.
MAT 22:22 Nou boe emeardure Jesus akoino duji dukodire erore ta je akoino pudui duji. Dukodire emagokare ji pugeje. Nono eture piji.
MAT 22:23 Nou meriji rugadu ia saduceu doge etaregodure Jesus ae tuwo Jesus barigu boeto tagoino jiboeji jamedu. Nou saduceu doge emeardaere boe eewodumodukaie pugeje.
MAT 22:24 Nono emagore Jesusji. Egore: – Jorduwareu nure aki. Ča mariguduwu makore Pao Kurireu bataru jiwu Moisés ure jaoboe ero maku etai pameartoruwo ji jii aino rugadu. Akore imedu bimoduie mare ore bokwaie dukeje nou imedu uwie muguwo nou tumana bireu oreduje apo orewo nou bireu tumana ai.
MAT 22:25 Ča ia meri keje ime enodo padure sete. Etumana etuwie mage nure pugi. Etumana mugure ia aredu apo. Mare čare bire. Mare ore bokware. Dukodire nou imedu uwie mugure nou tumana bireu oreduje apo rugadu.
MAT 22:26 Ča nou bire jamedu. Dukodire uwie imedu mugure nou aredu apo. Mare bire jamedu. Dukodire nou uwie ime eiamedu boe emugure nou aredu apo rugadu. Mare eiamedu boe ewire.
MAT 22:27 Dukeje čare nou aredu bire jamedu.
MAT 22:28 Dukodire čedaidure čenarawo ai. Pao Kurireu umode eewodudo pugeje dukeje duboba mugumode nou aredu apo? Eiamedu boe emugure apo moto keje mare duboba mugumode nou aredu apo baru tada?
MAT 22:29 Jesus makore nou boe ewadaru jipagi. Akore: – Tarduwa bokware. Tarduwakare Pao Kurireu bataru padure kejewu baperaji. Tarduwakare Pao Kurireu ro rakareuji.
MAT 22:30 Bireuge eewodumode pugeje dukeje emode nono Pao Kurireu utugarege baru tadawuge emogadure. Etuwiremodukare. Etugogemodukare.
MAT 22:31 Mare tameardaere boe eewodumodukaie pugeje. Tagaiwo kana padure bapera kejewu Pao Kurireu bataruji? Pao Kurireu akore: “Abraão meartorure jiwu Pao Kurireu nure imi. Isaque meartorure jiwu Pao Kurireu nure imi. Jacó meartorure jiwu Pao Kurireu nure imi.” – Pao Kurireu makore jiwu ime ewire marigudu. Mare Pao Kurireu makore emeartoruie pudui rugadu. Dukodire parduware eewodure pugeje duji. Bireuge emeartorumodukare Pao Kurireuji. Jewodureuge emeartorumode ji. Dukodire tameardae ukare turugadu. Boe eewodumode pugeje rugadu.
MAT 22:33 Mare boe emagare nono tuwiapaga tabo Jesus akoino duji. Emeardure dukeje eku kidure nou Jesus bataruji rugadu.
MAT 22:34 Fariseu doge erduware Jesus mako pemegare nou saduceu doge ewadaru jipagi duji. Dukodire ere bato pui pugeje.
MAT 22:35 Ia jorduware Pao Kurireu ure maku etaiwu bakaruji rugadu. Emare ure tumeardae tawuje tunarawo Jesusji pugeje.
MAT 22:36 Akore: – Kakojiwu Pao Kurireu bataru pemegareu remawu jiba pamode pageragu?
MAT 22:37 Jesus akore: – Ere pobe. Boetojiwu bataru kurireu ure aino: “Pao Kurireu ure mitotu je. Tameardu kurido Pao Kurireuji taraga tabo, tameardae pemegareu tabo, tarore jiboe jamedu boe tabo. Boe eiamedu boe erduwawo awu bataruji rugadu.” Ainore Pao Kurireu bataru kurireu boetojiwu ure.
MAT 22:39 Pao Kurireu bataru boigoduwu ure aino: “Tameardu kurido tamedagei nono tameardu kuri moga tai dumogadure.” Ia bataru kurireu bokware nono awu bataru pobedu doge emogadure.
MAT 22:40 Boe emeartorumode nou bataru pobedu dogei boetoji. Dutabore emeartorumode makudure Judeu doge etaiwu bakaruji rugadu. Dutabore emeartorumode nou mariguduwu makore Pao Kurireu bataru jiwuge emagore jiboeji jamedu.
MAT 22:41 Fariseu doge edure nono Jesus apo kimo. Dukejere Jesus unarare ei.
MAT 22:42 Akore: – Nuba tameardaere nou umode boe ekinorudowuji. Ioguduba onaregedu mode ema? Egore: – Mariguduwu pawobe ekimijera kurireu Davi onaregedu mode ema.
MAT 22:43 Jesus akore: – Mare Pao Kurireu Uwari ure Pao Kurireu bataru maku nou Davi ai marigudu. Dukodire Davi akore: – Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode nou jordu pegare aiwuge etagedudo du ka.” – Ainore nou Davi akore marigudu tuwo boe ewie Pao Kurireu bataruji rugadu.
MAT 22:45 Tagoino dutabo Davi akore tugimijera nuie nou umode boe ekinorudowuče. Mare Davi onaregedu mode ema jamedu. Ča nuba nou umode boe ekinorudowu ure?
MAT 22:46 Nou boe erduwakare tumagowo nou Jesus bataru jipagi pugeje. Dupijire boe eraga bokware tunarawo Jesusji pugeje. Eraga bokware tuwo Jesus barigu boeto tagoino jiboeji rugadu.
MAT 23:1 Nono Jesus makore ture jorduwadowugei. Boe emagare nono ebo. Jesus makore nou boe eiamedu boei.
MAT 23:2 Akore: – Nou ure boe erduwado Judeu doge eno bakaru jiwuge ere tumugudo Moisés mugato. Nou fariseu doge ere tumugudo Moisés mugato. Dukodire tagimijerage nure emage.
MAT 23:3 Dukodire tameartorudo ei emagore taiboe jamedu boeji. Mare tarokaba nono ero mogadure. Emage emeartorukare tuwadaruji rugadu. Dukodire inagoino tarokawo nono ero mogadure.
MAT 23:4 Ere turo makado boe etai tuwo boe rakado ei rugadu. Mare ekare tugera maku nou boe etai tuwo turaga maku etai.
MAT 23:5 Erore jiboe etaidure boe erduwo turore jiboeji boe emagowo pudui boe emago pemegawo pudui. Ere boe etaiwodo tugudau areia motureu meture pudui duji. Etaidure tuwo boe epogurudo. Egore tu pudumie tuiorduwaie tumago raiwo Pao Kurireu bagai. Mare pagatu je. Emago raikare tumeardae remawu tabo Pao Kurireu bagai.
MAT 23:6 Etumode boe ewadae ka dukeje etumode boe eke jeture kejewu ira ka boe etododai togwagewo boetoji. Etumode Judeu doge ere bato puiwu bai ka dukeje emode tugeragu nou boe eimijera mugure kejewu iraji tumuguwo keje.
MAT 23:7 Etumode ba kurireu ka dukeje etaidure boe emago pemegawo pudui etaidure boe ekimijeragewo pudumi dukodi.
MAT 23:8 – Mare tarokaba nono ero mogadure. Tagimijera ure mitotu je. Pao Kurireu nure ema. Dukodire taiamedu boe tawobe nure pugi. Tagaidukaba tawo boe eimijeragedo tagi.
MAT 23:9 Tagaidukaba tawo tado nono boe etuo mogadure. Pao ure mitotu je. Rakojere baru tada.
MAT 23:10 Tagaidukaba tawo tado nono umode boe erduwadowu mogadure. Umode boe erduwadowu remawu ure mitotu je. Umode boe ekinorudowu nure ema.
MAT 23:11 Mare ia tagi tagaidumode tawo boe ekimijeragedo tagi dukeje tameardaemode nono boe utugare meardae mogadure tawo boe eimijera pemegareugedo tagi.
MAT 23:12 Boe enojaromode pudui, emode tugimijerado pudumi tumeardae tabo dukeje Pao Kurireu umode epogurudo. Mare boe emode boe utugaregedo pudumi turo pemegawo boei dukeje Pao Kurireu umode boe eimijera pemegareugedo emage rugadu.
MAT 23:13 Nono ča Jesus makore fariseu dogei. Makore ure boe erduwado Judeu doge eno bakaru jiwugei jamedu. Akore: – Boe eimijerage nure tagi mare tameartorukare tawadaruji. Dukodire boe pegamode tai rugadu. Tare boe emeartoru okwado Pao Kurireuji dukodire emodukare tugimijerado Pao Kurireuče. Tagi jamedu tagare tagimijerado Pao Kurireuče. Mare ia boe etaidure tuwo tugimijerado Pao Kurireuče rugadu. Mare tare ewarigu boeto nou emeardae piji rugadu. Dukodire boe pegamode tai rugadu.
MAT 23:14 Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tagiwogure okoge bokwareuge eno dieroji epiji. Mare tagaidure tawo boe etaidudo tai dukodire tamago raimode Pao Kurireu bagai baruto boe ewiagai. Mare pagare taroino tagagoino. Boe emeardae pemegawo tai dubagaire taroino. Dukodire boe pegamode tai rugadu.
MAT 23:15 Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tagodu jaemode. Tagurugodumode pobo maereu kajeje tagaiwowo ia boe ewagai tawo emeartorudo tawadaruji, tarore jiboeji. Nono tamode emeartorudo mare taroino dutabo tamode ro pegareu remawugedo emage. Ero pegamode taro pegareu kori. Dukodire ewarigudumode bope doge eda kejewu joru pegareuto rugadu tagabo rugadu.
MAT 23:16 Boe pegamode tai rugadu. Tare nono joku bokwareuge emogadure. Mare taeku ji karega inagoino. Tarduwakare boe remawuji rugadu. Dujire inagoino. Tare boe erduwado tameardaeji. Tagagore boe emagomoduie Pao Kurireu uwai kurireu ie tabo. Mare emodukaie nou tumagore jiboe towuje. Dukeje boe pegamodukaie ei. Ainore tagagore. Dujire tare boe erduwado. Mare tagagore boe emagomoduie Pao Kurireu uwai tadawu tori kuieje ie tabo. Mare boe emodukaie nou tumagore jiboe towuje. Dukeje boe pegamoduie ei rugadu. Ainore tagagore. Dujire tare boe erduwado.
MAT 23:17 Mare pagare tagagoino. Jorduwa bokwareuge nure tagi. Tare nono joku bokwareuge emogadure. Mare taeku ji karega inagoino. Tarduwakare boe remawuji. Dujire inagoino. Ča iwo tawie boe remawuji. Nou mugure Pao kurireu uwai tadawu tori kuieje na ure Pao kurireu uwaido tuginai? Boro. Pao kurireu uwai pemegare nou tori kuieje kori rugadu. Mare nou tori kuieje mugumodukare Pao kurireu uwai ja tada dukeje tori kuieje tuginaiwu modukare ema rugadu. Pao Kurireu uwai pemegare nou tori kuieje kori rugadu. Dukodire inagoino tamagore jiboe ukare turugadu.
MAT 23:18 Tagagore boei emagomoduie Pao Kurireu uwai tadawu kamo ie tabo. Mare emodukaie tumagore jiboe towuje. Dukeje boe pegamodukaie ei. Ainore tagagore. Mare tagagore boei emagomoduie nou padure nou kamo kejeboe ie tabo. Mare emodukaie nou tumagore jiboe towuje. Dukeje boe pegamoduie ei rugadu. Ainore tagagore.
MAT 23:19 Tare nono joku bokwareuge emogadure. Mare taeku ji karega inagoino. Tarduwa bokware. Dujire inagoino. Nou Pao Kurireu uwai tadawu kamo kejere boe emode ia tagu barogo kodu kowu tomeawo tabo Pao Kurireu ai. Padumodukare nou kamo keje dukeje tagomeamodukare tabo Pao Kurireu ai. Dukodire nou kamo pemegare nou padure kamo kejeboe kori.
MAT 23:20 Dukodire imode tawie. Boe emagomode nou Pao Kurireu uwai tadawu kamo ie tabo dukeje nou kamo kejeboe ie tabore egoino jamedu.
MAT 23:21 Boe emagomode Pao Kurireu uwai kurireu ie tabo dukeje Pao Kurireu ie jire egoino jamedu. Pao Kurireu mugure tuwai kurireu tada rugadu dukodi.
MAT 23:22 Boe emagomode baru ie tabo dukeje nou baru tadawu Pao Kurireu mugure kejewu ira ie tabore egoino jamedu. Pao Kurireu ie tabore egoino jamedu.
MAT 23:23 Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tare tago boepa pijiwu boe aru rogu mori kado puiato tu tu je tagomeawo iarogu tabo Pao Kurireu ae. Nou tarore jiboe pegakare. Tarodo ji rugadu. Mare tagare tameartorudo Pao Kurireu bataru remawuji rugadu. Tameardaekare tawo taro jetorodo boei. Tameardaekare tagoguduwo boebo. Tameardaekare tameartoruwo Pao Kurireu bataruji jii toro rugadu. Dujire inagoino. Dukodire čare boe pegamode tai rugadu. Ča taro jetorodo boei. Tagogududo boebo. Tameartorudo Pao Kurireu bataruji jii toro rugadu. Dujire inagoino tameartoruwo Pao Kurireu bataru remawuji.
MAT 23:24 Joku bokwareuge nure tagi mare du inodu tabo tare boe erduwado awaraji. Mare taeku ji karega inagoino. Tarduwa bokware Pao Kurireu bataru remawuji. Dujire inagoino. Dukodire tawiapagare tawo ia ruke rogu tawuje tagudumode čewu pobo piji mare tare barogo kurireu remo tagogwato. Mare ruke ji karega inagoino. Taro pegareu biagareu jire inagoino. Barogo ji karega inagoino. Taro pegareu remawu jire inagoino. Tamororamagadure taro pegareu biagareuji mare tawiapagakare nou taro pegareu remawuji rugadu. Dujire inagoino.
MAT 23:25 Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tare tago pagaga kabi tawo pemegado tarowo nou taro boeji nou pagaga tabo. Tare tago ruwobo kabi tawo pemegado tarowo nou taro boeji nou ruwobo tabo jamedu. Ainore tago bakaru ure. Tameardaere tare Pao Kurireu jakaredo pudui nou taro tabo. Mare pagatu jere taroino. Tadadare tameardae pegare rugadu. Tagogwa kidure tu tagai tawo tagoe kurido tamedage epiji. Tagaidure tawo boe pemegado tu tai.
MAT 23:26 Tarduwa bokware! Tadadare tamode tameardae pemegado dukeje tabemegamode Pao Kurireu jakai. Mare taro jire inagoino jamedu.
MAT 23:27 Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tare nono bireuge emedure tadawu moto poro mogadure. Mare moto poro ji karega inagoino. Tabegareu meture tadada tameardae pegare dukodi. Dujire inagoino. Boe etaiwore tai dukeje emeardae pemegare tai. Egore ro pemegareuge nuie tagi. Mare tadadare tameardae ure nono bireu ra mogadure. Tameardae ure nono bireu apowu ro kigoreboe mogadure. Mare bireu ra ji karega inagoino. Ro kigoreboe ji karega inagoino. Tameardaere jiboe jire inagoino. Tameardaere tawo Judeu doge erduwado tawadaruji. Mare pagatu je. Tameartoru bokware nou tawadaruji. Dujire inagoino. Tameardae pegare taro pegawo rugadu. Dujire inagoino.
MAT 23:29 Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Mariguduwu tawobe ero pegare makore Pao Kurireu bataru jiwugei rugadu. Ere iage ewido rugadu. Aino čare tare tori motureu rakojedo nou bireuge etugudure towu moto keje boe erduwawo nonore nou makore Pao Kurireu bataru jiwuge bireuge emedure duji.
MAT 23:30 Tagagore: “Paragojemode nou mariguduwu pawobebo dukeje pamodukare nou makore Pao Kurireu bataru jiwuge ewido nono pawobe ero mogadure.”
MAT 23:31 Mare pagare tagagoino. Tameartorukare i. Dukodire tagi rugadu tare boe erduwado tameardae remawuji. Tare nono nou mariguduwuge emogadure ere makore Pao Kurireu bataru jiwuge ewido rugadu. Tare nono emogadure.
MAT 23:32 Dukodire čare taromode nono nou mariguduwuge tawobe ero mogadure jii nou tameardae pegareu idu oto pa ka.
MAT 23:33 – Tare nono awagu pegareuge emogadure rugadu. Mare awagu ji karega inagoino. Tameardae pegare rugadu taro pegawo rugadu. Dujire inagoino. Dukodire tawarigudumode bope doge eda kejewu joru pegareuto rugadu.
MAT 23:34 Mare paga karega. Imode makore Pao Kurireu bataru jiwuge etarego tawagai. Imode jorduwareuge etarego tawagai. Imode ure boe erduwadowuge etarego tawagai. Mare tawiapagamodukare ei. Taro pegamode ei. Tamode iage ewido ipo padure pugajejewu keje. Tamode boeto iagei bukigu tabo Judeu doge ere bato puiwu bai tada. Taregodumode iage eregodaji boe eda jamedu boe parugajeje.
MAT 23:35 Dukodire nou ro pemegareuge eiamedu boe ewi mori butumode tawugeje rugadu. Tawobe ere ro pemegareuge ewido marigudu. Ere ro pemegareu boetojiwu Abel bito. Ere ro pemegareu boigoduwu Baraquias onaregedu Zacarias bito jamedu. Ere nou Zacarias bito Pao Kurireu uwai jokorai. Nou Abel piji jii Zacarias ae ro pemegareuge emagare rugadu. Mare tawobe mariguduwuge ere bitowuge emagare jamedu. Mare tagaire Pao Kurireu umode nou tawobe ero pegareu jamedu boe morido tagai.
MAT 23:36 Nou mariguduwuge tawobe ero pegareu jamedu boe mori barigudumode tawugeje rugadu meartorukare iwuge tawobe ewugeje jamedu aino kuri aino. Inure tawie boe remawuji rugadu.
MAT 23:37 Jesus aiwore toro Jerusalém ba kurireu ka. Dukejere čare kiarigodure rugadu. Mako kimore. Nou Jerusalém kejewugeire akoino. Akore: – Jerusalém kejewuge nure tagi. Tare nou mariguduwuge makore Pao Kurireu bataru jiwuge ewido. Aregodure Pao kurireu bataru tabo tagaewuge tare tori barigu etae tawo ewido. Mare imeardu kurire tai rugadu. Kagariga umode tore ewiado tugana kuda tietu pemegawo ei. Itaidure irowo taiamedu boei nono nou kagariga ro moga torei dumogadure. Mare tagaidukare i.
MAT 23:38 Dukodire Pao Kurireu mugumodukare Jerusalém kejewu tuwai tada pugeje.
MAT 23:39 Iwo tawie. Tardumodukare i pugeje jii toro tameartorumode i du ka. Tagagomode: “Pagimijera reo! Aregodure Pao Kurireu meardae tabo. Pao Kurireu ro pemegawo ji.” Tamagomode aino i dukeje itaregodumode tagae pugeje rugadu.
MAT 24:1 Jesus ure tudawuje Pao Kurireu uwai kurireu piji. Kodure dukeje nou ure jorduwadowuge ere tuburedo Jesusji. Etaiwore nou Pao Kurireu uwai kurireuji. Egore nou bai motuie rugadu.
MAT 24:2 Nono Jesus akore: – Iwo tawie boe remawuji. Ro pegareuge emode nou tardure jiwu bai kurireu butudo rugadu. Tori tabore pawobe ere towuje marigudu. Mare ia meri keje nou tori jamedu boe epadumodukare pu aogeje pugeje.
MAT 24:3 Jesus uture Oliveira ri ao ka. Nono ure tumugudo nono. Nou ure jorduwadowuge ere tumugudo nono Jesus apo jamedu. Tu emagere emugure nono. Nono enarare Jesusji. Egore: – Akagore ro pegareuge emoduie Pao Kurireu uwai butudo ia meri keje. Kaba meri kejeba emode butudo? Kaba jiba čerdumode čerduwawo boe puredugodure akaregoduwo pugeje rugadu duji? Kaba jiba čerdumode čerduwawo moto akedumode kuri aino duji?
MAT 24:4 Jesus akore: – Taeku jado boe ekawo taekiripagado.
MAT 24:5 Boe emagamode tuwadaru pemegareu tabo. Egomode umode boe ekinorudowu nuie pudumi. Mare pagare egoino. Mare du inodu tabo emode boe ekiripagado rugadu.
MAT 24:6 Tameardumode bakaru pegareuji. Boe emode tawie boe erugoduie pui tuwaiga tabo. Boe erugodu akedukaie. Boe egomode nou torowu boe ekorigoduie dukodie erugodu kurie pui rugadu. Mare taragado tai tamororamagadukawo. Pao Kurireu jorduware ro pegareuge erugoduji marigudu. Umodukare nou erugodu tawuje epiji. Erugodumode pui tuwaiga tabo rugadu mare moto akedumodukare raga.
MAT 24:7 Boe eimijerage kurireuge erugodumode pui tugobaigaregebo. Boe eke bokwamode boe jamedu boe parugajeje. Dukodire boe ewimode tuge boei koia. Moto magadugodumode boe jamedu boe parugajeje jamedu.
MAT 24:8 Awu inagoino jiwu iwadaru jetumode pudui dukeje tarduwamode moto akedumode kuri aino duji nono aredu kurijirigodu mogadure. Aredu kurijirigodure dukeje boe erduware kuri butumode kuri aino duji. Mare aredu kurijirigodu ji karega inagoino. Boe pegamode motoji nono iwadaru mogadure dukeje tarduwamode moto akedumode kuri aino duji. Dujire inagoino.
MAT 24:9 Nono ro pegareuge emode tamagu boe eimijerage pegareuge etai ero pegawo tai, ewo tawido. Tameartorure i dukeje boe erdu pegamode tai moto jamedu boe parugajeje.
MAT 24:10 Nou meri keje boe emode tugera ra tumeartorure idu piji rugadu. Erdu pegamode pui. Emode pu maku boe eimijera pegareuge etai.
MAT 24:11 Boe egomode tumagoie Pao Kurireu bataruji. Mare pagatu jere egoino. Mare du inodu tabo boe emeartorumode ei. Emode jekiripagadowuge emagamode rugadu.
MAT 24:12 Boe emode turo pegareu kodudo tugori pugeje. Dukodi boe emeardu kurimodukare pui pugeje. Meardu kurire puiwuge enowaromode tu je.
MAT 24:13 Mare ia boe emodukare tugera ra tumeartorure i dupiji dukeje imode ekinorudo.
MAT 24:14 Nono boe emagomode boei ewo tugimijerado Pao Kurireuče moto jamedu boe parugajeje. Emagomode nou bataruji boe tuginaiwuge eiamedu boe ewiagai dukeje moto akedumode.
MAT 24:15 Iwo tawie. Tardumode nou Pao Kurireu jordu pegare jiboeji Pao Kurireu uwai tada. Marigudu nou makore Pao Kurireu bataru jiwu imedu Daniel ure boe ewie boemoduie aino rugadu. Jordumode awu bapera jiwuge eiamedu boe ewiapaga pemegawo awu bataruji.
MAT 24:16 Mare boe erdumode nou Pao Kurireu jordu pegare jiboeji Pao Kurireu uwai tada dukeje Judéia moto kejewuge eregodu rakamode toro tori ao ka tuwo tuginorudo boe pegareu piji.
MAT 24:17 Nou rakojere tuwai ao kejewuge eregoduwo tuwai piji kuri je rugadu. Ekawo turemo tuwai jagi iaboe bagai. Etuwo tugera kedo tabo rugadu.
MAT 24:18 Nou maragodure to boepa jiwuge eregoduwo nou to boepa piji kuri je jamedu. Ekawo tugirimi tuwai ka ia tugudau areia bagai.
MAT 24:19 Nou meriji boe pegamode kuiarureugei rugadu. Boe pegamode ei rugadu eroiwakare turegodu rakawo dukodi. Boe pegamode boe etore etuje magei jamedu eroiwakare ture rakawo dukodi.
MAT 24:20 Tamagodo baruto Pao Kurireu bagai boe pegakawo aino boei sábado meri keje. Tamagodo baruto Pao Kurireu bagai biaku butukawo boei nou eregodure jiwu meri keje.
MAT 24:21 Mare paga karega. Boe pegamode boei rugadu boe pega jamedu boe kori. Pao Kurireu ure moto to dupiji boe erdukare awu boe pegareu boeji jii aino. Mare boe pegamode motoji rugadu. Nou boe pegamode kejewu meri makamode. Mare Pao Kurireu umode nou merido biagatu je rugadu. Nou boe pegamode kejewu meri makamode rugadu dukeje boe eiamedu boe ewimode rugadu. Mare Pao Kurireu umode nou boe pegamode kejewu merido biagatu je tuwo meartorure puduiwuge edo činorudo.
MAT 24:23 Mare boe pegamode kejewu meri aregodumode dukeje boe egomode: “Umode boe ekinorudowu aregodu! Ema reo!” Ainore boe egomode. Mare tawiapagakaba ewadaruji. Pagare egoino.
MAT 24:24 Mare paga karega inagoino. Boe etaregodumode rugadu nou tuwadaru tabo rugadu. Egomode umode boe ekinorudowu nuie pudumi. Mare pagare egoino. Egomode tumagoie Pao Kurireu bataruji mare pagare egoino. Ero rakamode boe emeartoruwo pudui Pao Kurireu piji pagatu je. Emodukare meartorure Pao Kurireu jiwuge remawuge ekiripagado. Mare etaidumode tuwo meartorure Pao Kurireu jiwuge ekiripagado nou turo rakareu tabo rugadu.
MAT 24:25 Dukodi čare ire tawie rugadu. Taeku jado. Pagare eroino.
MAT 24:26 Dukodire tarduwamode. Boe egomode umode boe ekinorudowu rakojeie boe maereu keje mare tameartorukaba ei. Boe egomode rakojeie ia bai tada mare tameartorukaba ei.
MAT 24:27 Imedu Onaregedu aregodumode moto ka pugeje dukeje boe erdumode ji rugadu nono boe erdure boeiaragudu jitu mogadure. Boeiaragudure dukeje boe erdu jaere ji. Nono boe erdu jaemode itaregoduji jamedu.
MAT 24:28 Boe erdumode Imedu Onaregedu aregoduji nono boe erdure pobureuge ere tago puae barogo bireu kodu keje jitu mogadure.
MAT 24:29 Boe pegare moto jiboe akedumode dukeje meri joku akedumode jamedu. Ari joku akedumode. Kuieje doge ewudumode baru piji jamedu. Baru magadugodumode rugadu.
MAT 24:30 Dukeje čare boe erdumode Imedu Onaregeduji baru tada. Boe tuginaiwuge eiamedu boe ekiarigodumode rugadu boe jamedu boe parugajeje. Erdumode Imedu Onaregeduji kodure boetugu aoji. Erdumode Imedu Onaregedu ro rakareuji. Erdumode Imedu Onaregedu o jorugu kurireuji. Jorugure moto jamedu boe parugajeje.
MAT 24:31 Nono umode tudugare baru tadawu udo tapira ukiga akodo tuwo tudugarege baru tadawuge etudo Pao Kurireu ure tugeragu jiwuge ewagai moto jamedu boe parugajeje. Emode edo tudo pui.
MAT 24:32 Figo i ure tarduwado tu tu je. Figo i okurogu boture dukeje tarduware bubutumode kuri je rugadu. Tagaiwore figo iji tarduwawo bubutumode kejewu meriji. Ainore tarore tu tu je.
MAT 24:33 Ča ire tawie nuba boemode meri jokuji nuba boemode ari jokuji. Iwo tawie. Tagaiwodo awu ire tawie jiboe jamedu boeji emode tarduwado dubagai. Tardumode ire tawie jiwu iwadaru jetumode pudui duji dukeje tarduwamode boe puredugodure itaregoduwo iwo boe jamedu boe akedudo. Mare bubutu ji karega inagoino. Nou itaregodumode jiwu meri jire inagoino.
MAT 24:34 Iwo tawie boe remawuji. Toro ia meri keje ia tawobe erdumode awu imagore jiboe jeture pudui duji rugadu. Jetumode pudui rugadu tuwimodedu otodai.
MAT 24:35 Baru akedumode. Moto akedumode jamedu. Mare iwadaru akedumodukare jii toro rugadu. Jetumode pudui rugadu.
MAT 24:36 Nono Jesus mako kimore. Akore: – Boe erduwakare nou meriji rugadu. Boe erduwakare nuba meri mode awu iwadaru jetuwo pudui. Pao Kurireu utugarege baru tadawuge erduwakare. Pao Kurireu Onaregedu jorduwakare. Tu Pao Kurireu jorduware tu rugadu.
MAT 24:37 Imedu Onaregedu aregodumode pugeje dukeje boe emeardaemode nono rakojere boe etumana Noé apowuge emeardae pegareu mogadure.
MAT 24:38 Mariguduboe etumana Noé rakoje kimore dukeje boe ewiapagakare pobo aregodumode duji. Ewiapagare tu tugeji tugudure če boeji. Ime ewiapagare tu tuwirewo. Areme ewiapagare tu tugogewo jamedu. Erore aino jii toro Noé ure turemo ikarereu to du ka. Noé ure turemo ikarereuto tu tuwobebo rugadu. Mare iage ewiapagakare Noéji dukodire erduwa bokware pobo umode moto kejewuge eiamedu boe etagedudo duji. Dukodire nou pobo aregodure, ure eiamedu boe etagedudo rugadu. Ainore boe emeardaemode pugeje. Imedu Onaregedu aregodumode pugeje mare boe ewiapagamodukare bagai rugadu.
MAT 24:40 Ime emode pobe tumaragodae keje ipoguru keje. Imode ikeragu iaji mare metia utumodukare.
MAT 24:41 Areme emode pobe tumaragodae keje tuwo trigo kududo. Imode ikeragu iarodoji mare metago utumodukare.
MAT 24:42 Dukodire inagoino tai taeku jaewo. Tarduwakare kaba meri kejeba Tagimijera Kurireu aregodumode pugeje.
MAT 24:43 Mare tawiagodukaba. Uwaire bai čewu jorduwamode kaba meri kejeba iwogureu aregodumode dukeje umode tudo turugadu taiwo tabo nou iwogureu bagai nou iwogureu ukawo turemo nou baito nou boečoji.
MAT 24:44 Tado tarugadu tagaiwo tabo jamedu. Mare iwogureu bagai karega. Tado tarugadu Imedu Onaregedu aregodumode dubagai. Tarduwakare kaba meri kejeba aregodumode dukodire inagoino tawo tado tarugadu jii toro rugadu.
MAT 24:45 Jesus mako kimore. Akore: – Nuba boemode boe utugare pemegareu jorduwareuji? Ukimijera aidumode tuduwo toro ia moto ka dukeje umode nou tudugare pemegareu mugudo tumugato tudugarege eimijerawo ema uwo iage eke maku etai nou tudure jiwu meri keje.
MAT 24:46 Nou utugare ro pemegamode meartorumode tugimijeraji jii toro tugimijera aregodumode kejewu meri ka dukeje jakaremode pudui rugadu.
MAT 24:47 Dukejere čare nou boe eimijera umode nou tudugare jetudo toe jamedu boeji jetu pemegawo ji. Boe jokodu jire inagoino rugadu.
MAT 24:48 Mare ia boe utugare meardae pegamode. Nou ukimijera utu jaemode jamedu dukeje aregodumodukare tuibagi kuri je. Nono nou utugare pegareu meardaemode tugimijera aregodumodukaie pugeje duji.
MAT 24:49 Nono umode boeto nouia tudugarege imei, aremei jamedu. Nono maragodumodukare pugeje mare okwagemode, kudumode jamedu. Nono uke kurumode ji jamedu.
MAT 24:50 Čare ia meri keje nou ukimijera aregodumode tuibagi pugeje. Mare nou utugare upagakare bagai. Jorduwakare aregodumode kejewu meriji.
MAT 24:51 Nono nou boe eimijera jordumode nou tudugare ro pegare duji. Dukodire nou ukimijera umode nou tudugare bito. Umode bowuje rugadu. Nono umode nou tudugare barigu toro boe pegareuto ime pegareugebo nou meartorukare tuwadaru jiwugebo. Torore boe etragudu rakamode. Torore boe emode to reko pui tuwiri boe kori koia.
MAT 25:1 Jesus mako kimore. Akore: – Imode tawie nuba ure tugimijerado Pao Kurireu čewuge emode toro nou inagoino jiwu meri keje. Ireadodumode bakaruji iwo tawie. Ča nogware enodo padu kejeboere dez. Ere tudawuje tuwai piji joru kuru meture tadawu to jorugu tabo tuduwo uwiremodewu iparedu togi.
MAT 25:2 Jorduwareuge nogwarere ikera aboudure. Jorduwa bokwareuge nogwarere ikera aboudure jamedu.
MAT 25:3 Nou jorduwa bokwareuge nogware eture to jorugu tabo mare etukare ia joru kuru kobo tabo. Eture tabowu joru kuru meture to jorugu tada tu rugadu.
MAT 25:4 Mare nou jorduwareu nogware eture to jorugu tabo, nou meture to jorugu tadawu joru kuru tabo, ia joru kuru kobo tabo jamedu, joru kuru akedukawo.
MAT 25:5 Ča nou uwiremodewu iparedu akekare ji dukodire aregodukare jii boečoji. Dukodire nou nogware eiamedu boe enudure. Norire ekuji dukodire enudure.
MAT 25:6 Ča ari aregodure baru oia ka dukeje boe ekudure boe etae. Egore: “Uwiremodewu iparedu aregodu! Mato! Mato togi!”
MAT 25:7 Dukodire nou nogware edadure. Ere nou to jorugu uradu rogu kado urugu pemegawo.
MAT 25:8 Mare nou jorduwa bokwareuge nogware emagore nou jorduwareugei. Egore: “Ia joru kuru maku čenai. Čeno joru kuru akedugodu.”
MAT 25:9 Mare nou jorduwareuge nogware egore: “Boro. Čeno joru kuru kurikare. Umode turugadu tu čei tu rugadu. Umodukare turugadu tai. Tadudo toro boe jetureu ka tawo tageragu ia joru kuruji pugeje tagoče.”
MAT 25:10 Dukodire nou jorduwa bokwareuge nogware eture rugadu tuwo akirodo joru kuruji. Mare ekare tugirimi dukeje nou uwiremodewu iparedu aregodure. Nou jorduwareuge nogware ere tudo turugadu marigudu dukodire ere turemo nou uwiremodewu uwaito nou boe ewadae ka rugadu. Nono nou bai poro midure tuku rugadu.
MAT 25:11 Jii je dukeje nou jorduwa bokwareuge nogware etaregodure boe jetureu piji. Nono egore: “Čegimijera. Bai poro jado čenai.”
MAT 25:12 Mare nou uwiremodewu iparedu uwai tadawu boe eimijera akore: “Iorduwakare tai. Imodukare jado.”
MAT 25:13 Jesus mako kimore. Akore: – Ainore nou boe egore. Mare Pao Kurireu meardae jire ireadodure aino tawiagai. Tarduwakare kaba meri kejeba Pao Kurireu aregodumode pugeje dukodire tado tarugadu marigudu.
MAT 25:14 Jesus mako kimore. Akore: – Ča ia bakaru reo pugeje iwo tawie nuba ure tugimijerado Pao Kurireu čewuge emode toro nou inagoino jiwu meri keje. Ia meri keje imedu ure tumeardae tawuje tudu jaewo toro ia moto ka. Dukodire makore tudugarege ewagai. Ure etudo toe jamedu boeji.
MAT 25:15 Nou utugarege pemegareuge etaire ure to diero kurido etai. Dukodire ure diero tori kuieje oto padudo quinhentos makuduwo ia tudugare pemegareu ai. Ure udo quinhentos ai utugare pemegareu nure ema kodi. Ure diero tori kuieje oto padudo duzentos makuduwo ia tudugare ai. Ure diero tori kuieje oto padudo cem makuduwo ia tudugare ai pugeje. Ure udo cem ai utugare pemega jokodukare dukodi. Nono nou imedu uture. Utu jaere toro ia moto ka.
MAT 25:16 Nou quinhentos makudure aiwu imedu ure tudawuje kuri je tumaragoduwo nou diero tabo tuwo nou diero kurido tugori pugeje. Dukodire ure nou diero kurido rugadu dukodire o diero oto padure mil.
MAT 25:17 Nou duzentos makudure aiwu imedu rore nono nou timedia ro mogadure jamedu. Ure to diero kurido jamedu dukodire o diero oto padure quatrocentos pugeje.
MAT 25:18 Mare nou cem makudure aiwu imedu maragodukare nou makudure pudaiwu diero tabo. Ure tudawuje nou diero tabo. Ure moto porodo nono ure nou makudure pudaiwu diero tugu nou mototo tuwo nou tugimijera o diero biado.
MAT 25:19 Toro ia meri keje nou utu jaereu imedu aregodure tuibagi to moto ka tuwai ka. Dukeje čare makore nou tudugarege ewagai pugeje tumagowo nou eture jiwu diero bagai.
MAT 25:20 Nou quinhentos makudure aiwu utugare aregodure nou to diero rugadu boe tabo. Akore: “Ikimijera. Are quinhentos maku inai. Ča ire kurido dukodire oto padure mil aino. Ema reo.”
MAT 25:21 Ukimijera akore: “Aru! Aro pemegare rugadu. Itugare pemegareu nure aki rugadu! Ameartorure i rugadu dukodire aro pemegare inoe roguji. Dukodire imode boe eimijerado aki rugadu aetu pemegawo inoe kurireuji rugadu. Mato. Aremo iwaito aegarewo ai itabo.”
MAT 25:22 Nono nouia utugare aregodure jamedu. Akore: “Ikimijera. Are duzentos maku inai. Akaiwodo. Ire ako diero kurido. Dukodire oto padure quatrocentos aino. Ema reo.”
MAT 25:23 Ukimijera akore: “Aru! Aro pemegare rugadu. Itugare pemegareu nure aki rugadu! Ameartorure i rugadu dukodire aro pemegare inoe roguji. Dukodire imode boe eimijerado aki rugadu aetu pemegawo inoe kurireuji rugadu. Mato. Aremo iwaito aegarewo ai itabo.”
MAT 25:24 Nono nou utugare pemega jokodukareu aregodure jamedu. Akore: “Ikimijera. Ipagudure ače. Are boe emaragodae rakado ei awo akoe kurido. Are boe emaragodu rakado ako boepaji. Emagere ere ako boepa pemegado mare akai rugadu. Are emaragodae rakado ei ako boepa tadaboe kadoduwo mare etai karega akai rugadu.
MAT 25:25 Dukodire itaidukare iwo ako diero barigu boeto. Dukodire imaragodukare ako diero tabo. Ire biado moto kuda akedukawo. Ča itaregodure tabo. Ema reo.”
MAT 25:26 Mare nou ukimijera jordu pegare tudugare roino duji. Akore: “Aro pega! Akera kiarire rugadu. Ameardae pega kana irore jiboeji? Ire tamaragodae maku tagai tawo ino boepa pemegado rugadu dukodire inoe kurire rugadu.
MAT 25:27 Mare kodiba akare ino diero tugu boe mode tugeragu diero pijiwu baito? Aromode aino dukeje ino diero itodumode rugadu.”
MAT 25:28 Nono nou ukimijera makore ia tudugarege ewagai. Makore ei. Akore: “Tageragu nou dieroji nou itugare pegareu piji tawo maku nou mil apowu ai.
MAT 25:29 Imode tawie. Maragodu pemegareuge etaire boe makudumode. Mare nou maragodu pegareuge etaire boe makudumodukare rugadu. Nou maragodu pegareuge enoe rogu mode mare nou enoe rogu akedumode epiji rugadu.
MAT 25:30 Ča nou itugare pegareu barigu toro boečoto. Nou rakojere torowuge etragudu rakamode rugadu. Torore nou boe emode to reko pui tuwiri boe kori koia rugadu.”
MAT 25:31 Jesus mako kimore. Akore: – Toro ia meri keje Imedu Onaregedu aregodumode to jorugu kurireu tabo joruguwo moto jamedu boe parugajeje. Aregodumode turo rakareu tabo jamedu. Pao Kurireu utugarege baru tadawuge etaregodumode apo jamedu. Dukeje Imedu Onaregedu umode tumugudo boe eimijera mugure kejewu to ira motureu keje. Boe erduwamode baru tadawu nure ema duji.
MAT 25:32 Nono boe eiamedu boe etaregodumode bagai moto jamedu boe piji. Dukeje čare Imedu Onaregedu aiwomode boei. Umode tugeragu meartorure Pao Kurireu jiwuge remawugei tuwo etawuje meartorukare Pao Kurireu jiwuge epiji. Romode nono ia imedu jeture boe eguie jitu ro mogadure. Jeture ovelha dogeiwu umode ovelha doge etawuje cabrito doge epiji.
MAT 25:33 Nono umode nou ture tugeragu jiwuge ovelha doge emugudo nono tugana pemegareu jagwai. Mare umode nou cabrito doge emugudo nono tugana pegareu jagwai.
MAT 25:34 Mare boe eguie ji karega inagoino. Boe eire inagoino. Boe Eimijera Pao Kurireu makomode nou mugure tugana pemegareu jagwaiwugei. Akomode: “Mato. Taremo Pao Kurireu uwaito. Pao Kurireu aidure tai. Tare tagimijerado ema tameartoruwo tu ji dukodire umode nou tameartorure pudui du morido tagai tamuguwo boe pemegareu keje. Ure nou boe pemegareu towuje marigudu. Ukare moto to raga dukeje ure nou boe pemegareu towuje meartorure puduiwuge emuguwo keje toro ia meri keje.
MAT 25:35 Mare paga karega. Ike boeire i dukeje tare ike maku inai. Pobo boeire i dukeje tare pobo maku inai ikuduwo če. Boe tuginaiwure imi dukeje tare iremo tawaito iwo itamudo.
MAT 25:36 Ikudau areia bokware dukeje tare ia boe ekudau areia maku inai ikudauče. Ikogodure dukeje taetu pemegare i. Iragojere baičoreu tada dukeje tagaregodure itae tamagowo i tawo ikiarigodu barigu ipiji.” Ainore Pao Kurireu makomode nou mugure tugana pemegareu jagwaiwugei.
MAT 25:37 Nono nou ro pemegareuge emagomode Pao Kurireuji. Egomode: “Čegimijera. Kočare čerdukare ai ake boeire ai duji dukodire čegare boe eke maku akai. Čerdukare ai pobo boeire ai duji dukodire čegare pobo maku akai akuduwo če.
MAT 25:38 Čerdukare ai boe tuginaiwu nure aki duji dukodire čegare aremo čewaito. Čerdukare ai akudau bokware duji dukodire čegare čegudau areia maku akai.
MAT 25:39 Čerdukare ai akogodure baičoreu tada duji dukodire čedaregodukare akae čewo akiarigodu barigu apiji.” Ainore nou ro pemegareuge egomode.
MAT 25:40 Mare Pao Kurireu makomode ei: “Iwo tawie boe remawuji. Meartorure iwugeire tarore awu inagoino jiboeji dukodire inaire taroino. Emeartorure i dukodire iwobere emage. Rakakareuge nure emage marenarue doge nure emage mare du inodu tabo taro pemegare ei dukodire inaire taroino.” Ainore Pao Kurireu makomode nou mugure tugana pemegareu jagwaiwugei.
MAT 25:41 Mare Pao Kurireu makomode nou mugure tugana pegareu jagwaiwugei. Akomode: “Ipiji! Boe pegamode tai rugadu! Ire joru pegareu towuje bope doge eimijera bariguduwo to, bope doge ewariguduwo to. Nou joru pegareu akedumodukare jii toro rugadu. Ča tawariguduwo to ipiji jamedu.
MAT 25:42 Mare paga karega. Tardure i ike boeire iduji mare tagare ike maku inai. Pobo boeire i mare tagare pobo maku inai.
MAT 25:43 Tardure i boe tuginaiwu nure imi duji mare tagare iremo tawaito iwo itamudo. Ikudau areia bokware mare tagare tagudau areia maku inai ikudauče. Ikogodure. Iragojere baičoreu tada. Mare tagaiwokare i taetu pemegakare i.” Ainore Pao Kurireu akomode nou mugure tugana pegareu jagwaiwugei.
MAT 25:44 Mare egomode: “Čegimijera. Kočare čerdukare ai ake boeire ai duji. Čerdukare ai pobo boeire ai duji. Čerdukare ai boe tuginaiwu nure aki duji. Čerdukare ai akogodure duji. Čerdukare ai baičoreu tada. Dukodire čegare čegera maku akai.”
MAT 25:45 Mare Pao Kurireu akomode: “Mare imode tawie boe remawuji. Tardure meartorure iwugei rugadu. Eire inagoino. Tagare tagera maku nou meartorure iwuge etai dukodire inagoino tagare tagera maku inai. Ire taroino. Eragakare marenarue doge nure emage mare du inodu tabo iwobere emage dukodire inagoino ire taroino.”
MAT 25:46 – Dukeje čare nou boe ewarigudumode nou bope doge eda kejewu joru pegareuto eragojewo nono jii toro rugadu. Mare nou ro pemegareuge emugumode Pao Kurireu apo rugadu jii toro rugadu.
MAT 26:1 Jesus ure tuwadaru akedudo nou boei. Nono čare makore ture jorduwadowugei.
MAT 26:2 Akore: – Merimode pobe dukeje boe emode tuwadae Páscoa towuje nono paroiaji. Nono Imedu Onaregedu makudumode boe eimijerage pegareuge etai bitoduwo ipo padure pugajejewu keje.
MAT 26:3 Toro nou ure Judeu doge enomea maku Pao Kurireu aiwuge eimijera kurireu rakojere tuwai kurireu tada nouia Judeu doge eimijeragebo. Nou ure Judeu doge enomea maku Pao Kurireu aiwuge eimijera kurireu iere Caifás.
MAT 26:4 Ere bato pui nono tuwo tumeardae pegareu tawuje tuwo tugeragu Jesusji tuwo bito. Mare emagore pui tumoduie nou tumeardae biado boe epiji.
MAT 26:5 Egore: – Pawadae Páscoa kejere pamodukare pageragu ji. Pamode pageragu ji pawadae keje dukeje boe ekorigodumode pai. Emode bato pui turugoduwo pai. Dukodire pamodukare pageragu ji pawadae keje rugadu.
MAT 26:6 Nono Jesus uture boe eda Betânia ka. Nonore rakojere Simão uwai tada. Nou Simão iere Biri Pegareu jamedu.
MAT 26:7 Jesus mugure nono nou bai tada ira keje togwage tabo. Nono ia aredu aregodure Jesus ae poari rogu tabo. Nou boe ere nou poari towuje tori tabo. Nou tori iere alabastro. Roreboe mori kurireu meture nou poari rogu tada. Nono ča nou aredu ure nou poari jado. Ure nou roreboe redo Jesus aora joki.
MAT 26:8 Jesus ure jorduwadowuge erdure nou aredu roino duji dukeje emago pegare rore jiboeji. Egore: – Kočare ure barigu.
MAT 26:9 Nou roreboe mori kurire rugadu. Kočare ukare maku diero bagai tuwo diero kurido tuwo maku marenarue doge etai.
MAT 26:10 Mare Jesus jorduware emagore pui duji. Dukodire makore ei. Akore: – Tagaba awu aredu pogurudo rore i duji. Rore i du moture Pao Kurireu jakai.
MAT 26:11 Mare paga karega. Marenarue doge edumode tagabo jii toro rugadu. Mare imire itumode tabiji rugadu.
MAT 26:12 Emarodo ure iwiri udo turugadu ituguduwo mototo iwi keje.
MAT 26:13 Dukodire imode tawie boe remawuji. Awu aredu rore iboe akedumodukare boe etaora piji jii toro rugadu. Boe etumode moto jamedu boe parugajeje tuwo boe erduwado emeartoruwo i iwo ekinorudo dukeje ereadodumode awu aredu rore iduji boe eiamedu boe ewiagai. Dukodire boe ewiagodumodukare awu aredu piji rugadu jii toro rugadu.
MAT 26:14 Nono nou Jesus ure jorduwadowu Judas Iscariotes uture nou ure Judeu doge enomea maku Pao Kurireu aiwuge eimijerage etae. Makore ei: – Imode Jesus maku tagai dukeje nuba tamode dierodo inai nou iro moriče? Etaidure Judas bataruji dukodire ere diero prata oto padudo trinta Judas Iscariotes ai uwo Jesus maku pudai.
MAT 26:16 Du nou meri pijire nou Judas Iscariotes aiwore Jesus rore jiboeji tuiorduwo tumode maku boe eimijerage pegareuge etaiwu meri bagai.
MAT 26:17 Páscoa meri boetojiwu aregodure dukeje Judeu doge ere tuge amireu pemegado nono turo mogadure tuwaduwo Páscoaji. Nou meriji nou Jesus ure jorduwadowuge enarare Jesusji. Egore: – Kaiba čemode page pemegado pawo ko, pawaduwo Páscoaji?
MAT 26:18 Jesus akore: – Tadudo toro nou ba kurireu ka. Torore tardumode imeduji. Tamagodo ji tagimijera akoie uwai tadare uie turugadu tuwo tuge ko tuwaduwo Pascoaji ture jorduwadowugebo.
MAT 26:19 Jesus akoino ei dukodire nou ure jorduwadowuge erore nono Jesus mako mogadure. Nono ere tuge pemegado tuwaduwo Pascoaji.
MAT 26:20 Nou boečoji Jesus mugure nono ira keje togwagewo ture jorduwadowugebo. Nou ure jorduwadowuge eiamedu boe edu nono dukodire enodo padure doze nono Jesus apo.
MAT 26:21 Enogwagere dukeje Jesus makore ei. Akore: – Iwo tawie boe remawuji. Ia tagi tamode imagu boe eimijerage pegareuge etai.
MAT 26:22 Ekiarigodure nou Jesus makore pudui duji. Dukodire emagore tugimijeraji tu tu puregodaji. Egore: – I karega akagoino ikimijera?
MAT 26:23 Jesus akore: – Nou ure tuge amireu pegodo nou carneiro kuru towu nono itabowu emare umode imagu boe ekimijerage pegareuge etai.
MAT 26:24 Marigudu Pao Kurireu ure boe ewie iwimoduie duji. Nou Pao Kurireu bataru padure bapera keje. Aino čare iwimode nou Pao Kurireu meardae koia. Mare boe pegamode rugadu nou ure imagu boe eimijerage pegareuge etaiwuji. Botumodukare dukeje boe pegamodukaie ji. Mare aino čare umode imagu boe ekimijerage pegareuge etai dukodire boe pegamode ji rugadu.
MAT 26:25 Judas umode Jesus maku rugadu boe eimijerage pegareuge etai rugadu. Nono emare makore Jesusji. Akore: – I karega akagoino ikimijera? Jesus akore: – Uu. Aki rugadu.
MAT 26:26 Čare enogwage kimore. Jesus ure tugeragu amireuji. Imadure Pao Kurireu bagai nou amireu paru tabo. Nono ure nou amireu kado dukeje ure pedo nou ture jorduwadowugei. Akore: – Tagwagedo awuji. Ikodu reo tawiabutuwo iwugeje, irore jiboe keje.
MAT 26:27 Nono ure tugeragu vinho kuruji jamedu. Imadure Pao Kurireu bagai nou uva kuru paru tabo dukeje ure pedo ei jamedu. Akore: – Tagududo če taiamedu boe.
MAT 26:28 Ikure nou uva kuru rema. Iku redodumode boe eiamedu boe ero pegareu moriče. Pao Kurireu ure boe ewie marigudu tumoduie turo maiwu maku boe etai tuwo boe ekinorudo. Aino čare iku umode nou Pao Kurireu bataru jetudo pudui rugadu. Nou iku koiare Pao Kurireu biagodumode meartorure puduiwuge ero pegare jiboe piji tuwo ekinorudo rugadu.
MAT 26:29 Mare iwo tawie. Ikudumodukare awu vinho kuruče pugeje jii toro itaregodumode mato ibagi pugeje du ka. Itaregodumode pugeje dukeje boe eiamedu boe eimijera kurireu mode imi. Nono ikudumode vinho kuru maiwuče tagabo.
MAT 26:30 Jesus akoino dukeje urare Pao Kurireu bataru tabo nou ture jorduwadowugebo. Nono ere tudawuje nou ba kurireu piji tuduwo toro Oliveira Ri ao ka.
MAT 26:31 Nono Jesus makore ture jorduwadowugei pugeje. Akore: – Awu boečoji ro pegareuge emode tugeragu i rugadu. Dukodire taiamedu boe tamode tagera ra ipiji. Pao Kurireu ure boe ewie marigudu. Nou bataru padure bapera keje. Akore: “Pao Kurireu umode nou jeture boeiwu bito. Nono nou boe eiamedu boe emode taodo nou tugimijera piji nono ovelha doge ero mogadure.”
MAT 26:32 Ainore Pao Kurireu akore marigudu. Ire akoino. Mare iewodumode pugeje dukeje itumode tagododai toro Galiléia moto ka.
MAT 26:33 Mare Pedro makore Jesusji. Akore: – Nou iage emode tugera ra apiji mare imire iromodukare aino. Imodukare ikera ra apiji rugadu.
MAT 26:34 Jesus akore: – Imode awie boe remawuji. Awu boečoji rugadu akagomode arduwakaie i dumode pobe metia bokware rugadu. Dukeje čare kagariga kudugodumode.
MAT 26:35 Mare Pedro aidukare Jesus akoino pudui duji. Akore: – Iwimode akabo mare imodukare iwadaru udo nono akago mogadure. Imodukare ikera ra apiji rugadu. Ainore Pedro akore. Nono nouia Jesus ure jorduwadowuge egore nono Pedro ako mogadure jamedu.
MAT 26:36 Nono Jesus aregodure ture jorduwadowugebo ia iguru jetureu ka. Nou iguru iere Getsêmani. Nono Jesus makore nou ture jorduwadowugei. Akore: – Tamugudo woe. Itumode kuri je. Imagomode baruto Pao Kurireu bagai.
MAT 26:37 Nono Jesus ure tugeragu Pedroji, Tiagoji, Joãoji tuduwo ebo kuri nono. Dukeje kiarigodu rakare. Jorduware boe pegamode pudui duji rugadu.
MAT 26:38 Nono makore nou ture tugeragu jiwugei. Akore: – Ikiarigodu rakare rugadu. Rakare tuwo iwido rugadu. Ča tadu ruga woe tamagowo baruto Pao Kurireu bagai itabo.
MAT 26:39 Nono Jesus ure tudaru gu epiji. Nono ure tuie jodo moto ka tumagowo Pao Kurireu bagai baruto. Akore: – Iogwa Kurireu nure aki. Boe ero pegamode idu utudo ipiji. Mare ukawo nono itaidu mogadure. Mare uwo nono akaidu mogadure.
MAT 26:40 Čare ure tugirimi nou ture jorduwadowuge ewagai. Mare kočare enudunure. Nono makore Pedroji. Akore: – Amagodo Pao Kurireu bagai itabowu hora uwo mitotu je mare kočare anudure kuri je.
MAT 26:41 Ameardae pemegare. Mare araga bokware. Aino čare anudukaba pugeje. Amagodo itabo Pao Kurireu bagai baruto bope ukawo tumeardae pegareu maku akai aro pegakawo.
MAT 26:42 Nono Jesus ure tudaru gu epiji pugeje. Čare makore Pao Kurireu bagai baruto pugeje. Akore: – Iogwa. Boe ero pegamode idu utumodukare ipiji dukeje uwo nono akaidu mogadure.
MAT 26:43 Nono Jesus ure tugirimi nou ture jorduwadowuge etae pugeje. Jordure ei enudu kimore duji. Norire ekuji dukodire enudure rugadu.
MAT 26:44 Dukodire ure tudaru gu epiji pugeje. Makore baruto Pao Kurireu bagai pugeje. Makore nono nou tuwadaru mogadure pugeje.
MAT 26:45 Dukeje čare ure tugirimi nou ture jorduwadowuge etae pugeje. Nono makore ei. Akore: – Tamugudo. Tanudu kimo nure rugadu kana? Aino čare imagudumode boe eimijerage pegareuge etai kuri aino rugadu.
MAT 26:46 Ča taragojedo. Pugeje. Paduwo. Nou ure imagu boe eimijerage pegareuge etaiwu aregodu!
MAT 26:47 Jesus mako kimore dukeje Judas Iscariotes aregodure. Jesus ure jorduwadowu nure ema rugadu. Mare aino nou Judas Iscariotes aregodure boebo. Nou ure Judeu doge enomea maku Pao Kurireu aiwuge eimijerage, nouia boe eimijerage pegareuge ere nou boe etudo toro Jesus bagai dukodire etaregodure rago tabo, tariga kurireu tabo.
MAT 26:48 Nou Judas Iscariotes makore ei tumoduie Jesus maku etai. Tugimadumoduie Jesus apo, tumoduie togwa to je koduto tuwo boe pegareuge erdudo etaidure tuwo tugeragu jiwu nure ema duji.
MAT 26:49 Dukodire Judas Iscariotes uture kuri Jesus ae rugadu. Ukimadure apo rugadu. Akore: – Jorduwareu nure aki rugadu. Nono Judas Iscariotes ure togwa to Jesus je koduto.
MAT 26:50 Jesus makore ji. Akore: – Me. Arodo akaidure jiboeji rugadu. Nono nouia ime ere tuburedo Jesusji. Nono ere tugeragu Jesusji turaga tabo rugadu.
MAT 26:51 Mare ia Jesus ure jorduwadowu ure tugeragu tariga kurireuji. Ure ia imedu bija kado. Nou imedu nou ure Judeu doge enomea maku Pao Kurireu aiwuge eimijera kurireu utugare nure ema.
MAT 26:52 Mare Jesus akore: – Arokaba aino. Tariga kurireu tugu tuiato pugeje. Boe emode tugeragu tariga kurireuji turugoduwo tabo dukeje ewimode tariga kurireu tabo rugadu.
MAT 26:53 Tawiapagakare iragaji rugadu. Itaidumode imagowo Iogwa Kurireu bagai dukeje umode tudugarege baru tadawuge enodo padu kejewudo doze mil etuwo mato iwagai emeartoruwo i erowo nono imeardae mogadure.
MAT 26:54 Mare imagomodukare ewagai. Marigudu Pao Kurireu ure boe ewie tumeardae remawuji iwimoduie. Padure bapera keje. Aino čare nou bataru jetumode pudui rugadu. Dukodire imagomodukare nou baru tadawuge Pao Kurireu utugarege ewagai rugadu.
MAT 26:55 Nono Jesus makore nou ro pegamoduie puduiwuge eiamedu boei. Akore: – Ire boe emeardae pegado kana emeartorukawo tugimijeragei kana? Kočare tagaregodure tariga kurireu tabo rago tabo tawo tageragu i nono taro moga ro pegareuge eidu mogadure. Iragojere tagabo meri jameduji Pao Kurireu uwai tada. Ire boe erduwado nono. Mare tagare tageragu i nono.
MAT 26:56 Mare aino tagaregodure iwagai woe tarowo i nono tarore ro pegareugei dumogadure. Dujire Pao Kurireu akoino marigudu. Aino ča nou Pao Kurireu makore jiboe jeture pudui. Nou makore Pao Kurireu bataru jiwuge ere nou bataru bu bapera keje marigudu. Jesus akoino dukeje nou ure jorduwadowuge eiamedu boe eregodure piji rugadu.
MAT 26:57 Nou boe ere Jesus reko toro Judeu doge ekimijera kurireu uwai ka. Nou imedu iere Caifás. Ure Judeu doge enomea maku Pao Kurireu aiwuge ekimijera kurireu nure ema. Nouia Judeu doge eimijerage edu nono jamedu. Jorduware Judeu doge eno bakaru jiwuge edu nono jamedu. Boe eimijerage paru towuge edu nono jamedu.
MAT 26:58 Pedro kodu jaere boei tudu tabo Jesus rekodaji boe erdukawo pudui. Nono aregodure nou Judeu doge ekimijera kurireu uwai ka. Nou uwai kejere ure tumugudo nono tugobaigaregebo tuiorduwawo nuba boemode Jesusji.
MAT 26:59 Nou bai ja tadare nou ure Judeu doge enomea maku Pao Kurireu aiwuge eimijerage edure. Nou Jerusalém kejewu Judeu doge eimijerage eiamedu boe edure nono jamedu. Eiamedu boe etaiwore ia Jesus ro pegareu bagai. Ewiapagare batrarodureuge ewadaruji taiwo tabo nou Jesus ro pegareu bagai. Etaidure tuwo Jesus bito.
MAT 26:60 Mare erdukare ia Jesus ro pegareuji. Nou boe egore Jesus ro pegaie. Mare ewadaru kodukare puregodaji. Nono čare imere pobe ere turagojedo tumagowo.
MAT 26:61 Egore: – Awu imedu akore tumoduie awu Pao Kurireu uwai kurireu butudo dukeje merimoduie pobe metia bokware tuwo nou bai rakojedo pugeje.
MAT 26:62 Nono nou ure Judeu doge enomea maku Pao Kurireu aiwuge eimijera kurireu ure turagojedo jamedu. Makore Jesusji. Akore: – Amagomodukare nou ewadaru jipagi kana? Boe rugadu ji kana egoino ai rugadu?
MAT 26:63 Mare Jesus makokare boeji rugadu. Nono nou ure Judeu doge enomea maku Pao Kurireu aiwuge eimijera kurireu unarare ji pugeje. Akore: – Pao Kurireu aiwore pai. Dukodire amagodo boe remawuji čei rugadu. Umode boe ekinorudowu nure aki kana? Pao Kurireu onaregedu nure aki rugadu kana?
MAT 26:64 Jesus akore: – Uu. Boe jokodu jire akagoino. Mare iwo tawie Imedu Onaregedu romode jiboeji. Awu inodu otobiji tardumode i imugure Pao Kurireu ukana pemegareu jagwai duji. Tardumode i ire irawuje baru piji boetugu tabo duji.
MAT 26:65 Čare nou ure Judeu doge enomea maku Pao Kurireu aiwuge eimijera kurireu ure tugudau areia mega bowuje tugorigodure dukodi. Dukodire makore tumedage boe eimijeragei. Akore: – Unure tudo nono Pao Kurireure. Pagare akoino. Mako peganure Pao Kurireuji rugadu. Pawiapagamodukare ia boe emagore jiboeji pugeje. Tameardure ji mako pegare Pao Kurireu jituji rugadu.
MAT 26:66 Dukodi čare nuba tameardaere? Nuba paromode? Nou boe eimijerage egore: – Mako pegare Pao Kurireuji rugadu. Dukodire čare bitoduwo rugadu.
MAT 26:67 Nono ere todoguru barigu Jesus je joki. Ere boeto ji jamedu.
MAT 26:68 Egokodure ji. Egore: – Umode boe ekinorudowu nure aki rugadu kana? Ioguduba ure boeto ai? Amagodo!
MAT 26:69 Pedro mugu kimore nono bawadu keje. Nono ia aredu maragodure nou bai tadawu ure tuburedo Pedro ae. Akore: – Aragojere nou Galiléia kejewu Jesus apo jamedu.
MAT 26:70 Mare Pedro akore turagojekaie apo rugadu nou boe eiamedu boe ewiagai. Akore: – Iorduwakare kaba jiba akagoino.
MAT 26:71 Dukejere Pedro uture nou bai poro bawadu kejewu ka mare ukare tudawuje. Nonore rakojere rugadu. Dukejere čare ia aredu jordure ji. Makore boei nono. Akore: – Awu imedu rakojere nou Nazaré kejewu imedu Jesus apo rugadu.
MAT 26:72 Mare Pedro akore: – Boe rugadu jire inagoino. Iorduwakare ji rugadu.
MAT 26:73 Mare Pedro utukare. Rakojere ji je nono rugadu. Dukejere čare iage ere tuburedo Pedroji pugeje. Egore: – Awadarure nono nou rakojere Jesus apowuge ewadaru mogadure. Dukodire čare boe erduware aragojere Jesus apo duji rugadu.
MAT 26:74 Mare Pedro mako pegare ei tumagomodukaie boe remawuji dukeje Pao Kurireu uiago boe pegado pudui. Akore: – Iorduwakare nou tagagoino jiwu imeduji rugadu. Čare rore puku kagariga kudugodure rugadu duji.
MAT 26:75 Kodire Pedro biabuture Jesus makore puduiwu tuwadaru keje. Jesus makore Pedroji makomoduie tuiorduwakaie pudui dukeje nou kagariga kudugodumoduie rugadu. Pedro makomoduie tuiorduwakaie Jesusji dumoduie pobe metia bokware rugadu. Aino ča Pedro biabuture nou Jesus bataru keje rugadu jeture pudui duji rugadu. Dukodire uture nou boe epiji rugadu. Ragudure rugadu turore aino duji.
MAT 27:1 Nou barogwato, barogwakododutabo nou Judeu doge enomea makudure aiwuge eimijerage, nou Judeu doge eimijerage eiamedu boe emagore pui tuwo tumeardae tawuje tuwo Jesus bito rugadu.
MAT 27:2 Nono ere Jesus kogudo. Dukejere ere reko nou boe eimijera governador Pilatos bagai rugadu.
MAT 27:3 Nou ure Jesus maku boe eimijera pegareuge etaiwu Judas Iscariotes jorduware Jesus bitodumoduie dukeje kiarigodure rugadu. Dukeje čare uture nou Judeu doge eimijerage ewagai pugeje, nou ure Judeu doge enomea maku Pao Kurireu aiwuge eimijerage ewagai pugeje tuwo nou diero tori maku tuibagi etai. Ere nou diero tori prata oto padudo trinta Judas Iscariotes ai uwo Jesus maku pudai.
MAT 27:4 Judas Iscariotes akore: – Iro pegare. Ire maku tagaiwu imedu ro pegareu bokware. Mare nou boe eimijerage egore: – Aki rugadu aroino. Čegi karega.
MAT 27:5 Ča Judas Iscariotes ure nou diero tori rugadu boe barigu nou Pao Kurireu uwai kurireuto. Dukeje čare uture pugeje toro nou ba kurireu piji. Dukeje čare ure tuwido ture bukigu kogudo tugidoru kajeje dutabo.
MAT 27:6 Nou Pao Kurireu uwai kurireu tadare nou ure Judeu doge enomea maku Pao Kurireu aiwuge eimijerage ere tugeragu nou diero tori kugurei. Egore pui: – Awu diero makudure imedu bitoduwo. Parore jiboe koiare pamodukare awu diero maku Pao Kurireu uwai tadaboe bagai. Pago bakaru jire paromodukare aino.
MAT 27:7 Dukodire nou boe eimijerage ere tumeardae tawuje puapo tuwo tugeragu ia moto roguji nou diero tabo. Nonore boe tuginaiwuge etugudumode mototo aroe eda keje.
MAT 27:8 Nou diero makudure Jesus bitoduwo dukodire nou boe ere nou moto iedo. Egore Boe Eku Jeture Kejewu Moto Reo aino ji. Ainore iere jii aino.
MAT 27:9 Mare paga karega. Marigudu Pao Kurireu ure boe ewie boe eromoduie aino duji. Makore Pao Kurireu bataru jiwu imedu Jeremias ure nou bataru bu bapera keje. Akore: – Israel kejewuge ere tumeardae tawuje puapo tuwo diero prata tori oto padudo trinta nou imedu moriče.
MAT 27:10 Nono boe ere tugeragu nou dieroji. Ere nou diero maku ia maragodure rotu jiwu imedu ai tuwo tugeragu ia moto roguji. Mare paga karega emeartoruwo Pao Kurireu makore jiboeji. Ainore nou padure bapera kejewu Pao Kurireu bataru akore rugadu. Jeture pudui rugadu.
MAT 27:11 Toro nou boe eimijera governador uwai kejere Jesus rakojere nou boe eimijera kurireu Pilatos jokorai. Unarare Jesusji. Akore: – Boe rugadu kana? Judeu doge eimijera kurireu nure aki rugadu? Jesus akore: – Uu. Boe jokodu jire akagoino.
MAT 27:12 Mare nouia boe eimijerage, nou ure Judeu doge enomea maku Pao Kurireu aiwuge eimijerage emago pegare Jesus rore jiboeji makore jiboeji nou Pilatos biagai. Mare Jesus makokare boeji tubaru tabo ewadaru jipagi.
MAT 27:13 Dukodire čare Pilatos unarare Jesusji pugeje. Akore: – Ameardu kana nou boe emago pegare ai duji rugadu?
MAT 27:14 Mare Jesus makokare boeji pugeje. Dukodire nou Pilatos joku kidure Jesusji rugadu.
MAT 27:15 Judeu doge ewadae Páscoa kejere Pilatos ure ia ro pegareu tawuje baičoreu piji Judeu doge eroiaji. Judeu doge emagomode ia ro pegareu ieji dukeje Pilatos umode nou ro pegareu tawuje baičoreu piji utuwo pugeje joru jameduji.
MAT 27:16 Ča awu joruji ia boe erduware jiwu ro pegareu imedu rakojere baičoreu tada. Iere Barrabás. Boe eiamedu boe erduware ji rugadu. Ro pegareu remawu nure ema rugadu.
MAT 27:17 Nono nou boe emagare ture bato pui dutabo Pilatos ae. Dukejere Pilatos unarare ei. Akore: – Ioguduba jiba tagaidure iwo tawuje baičoreu piji awu joruji utuwo pugeje? Tagaidu kana Barrabaji utuwo pugeje kana? Tagaidu kana awu boe egoino umode boe ekinorudowu Jesusji kana utuwo pugeje?
MAT 27:18 Pilatos akoino tuwo Jesus utudo pugeje rugadu. Jorduware nou Judeu doge eimijerage emeardae pegare Jesus jituji. Etaidure boe emeartoruwo tu pudui rugadu. Dukodire etaregodure Jesus apo Pilatos ae boe emeartorukawo Jesusji pugeje.
MAT 27:19 Ča Pilatos mugure nou taiwore boe ero pegareu bagaiwu ira keje. Dukeje čare oreduje bataru makudure ai nono. Akore: – Akera ra nou imedu piji. Ro pegareu bokware rugadu. Iniau pegare ji awu boečoji dukodire ipagudure če. Ainore nou Pilatos oreduje makore nou toredu bagai.
MAT 27:20 Mare nou Judeu doge eimijerage, nou ure Judeu doge enomea maku Pao Kurireu aiwuge eimijerage ere boe ero jodo nono Pilatos jokorai. Dukodire nou boe emagore Pilatoji uwo ro pegareu imedu Barrabás tawuje baičoreu piji utuwo pugeje. Mare uwo Jesus bito rugadu.
MAT 27:21 Pilatos unarare ei pugeje. Akore: – Ioguduba imode tawuje baičoreu piji utuwo pugeje? Egore: – Barrabás tawujeduiago rugadu!
MAT 27:22 Dukeje čare Pilatos unarare pugeje. Akore: – Nuba iromode awu boe egoino umode boe ekinorudowu Jesusji? Nou boe eiamedu boe egore: – Bito ipo padure pugajejewu keje rugadu!
MAT 27:23 Pilatos akore: – Kodiba tagagoino? Ro pegareu pa? Mare ewiapagakare ji. Ere tugudu rakado. Egore: – Bito ipo padure pugajejewu keje rugadu!
MAT 27:24 Ča Pilatos jorduware nou boe ekorigodure rugadu tugaie ewudugugo kodi. Dukeje čare ure tugeragu poboji. Ure tugera kabi nou boe egai. Akore: – Ča. Imi karega imode awu imedu ku redo. Tagire taromode aino rugadu.
MAT 27:25 Nou boe eiamedu boe egore: – Uu! Čeigoia rugadu čemode ku redo rugadu dukodire čegire čemode morido, čedore emode morido jamedu.
MAT 27:26 Dukodire čare Pilatos ure Barrabás tawuje baičoreu piji utuwo pugeje. Mare ure tugobaigarege edo boeto Jesusji bukigu tabo. Nono ure maku etai ewo Jesus bito ipo padure pugajejewu keje.
MAT 27:27 Tugobaigarege ere tugeragu Jesusji. Ere turemo apo nou tugimijera Pilatos uwaito. Nono emagore nouia tugobaigarege ewagai. Ere bato pui nono Jesus ae.
MAT 27:28 Čare ere Jesus ukudau areia tawuje piji. Nono ere ia boe eimijera kurireu ukudau areia motureu kujagureu tugu Jesusji.
MAT 27:29 Ere ia boe eimijera kurireu atadawu towuje. Ere nou atadawudo botoguruče. Dukejere ere tugu Jesus aoto atadawuwo ema. Ere Jesus iedudo ia ipoji tugana pemegareu tabo. Dukejere čare ere tubu jodo Jesus jokorai tuwadarukeadae pegareu tabo. Egore: – Judeu doge eimijera kurireu nure aki. Boe pemegawo ai rugadu. Mare pagare egoino. Emeartorukare Jesusji dukodi rugadu.
MAT 27:30 Dukodire ere todoguru barigu ji. Ere tugeragu nou ipoji piji dutabore ere boeto ji nou ipo tabo rugadu. Ere boeto boeto aoraji rugadu.
MAT 27:31 Ere tumago pegado ji pugeje. Dukejere čare ere nou boe eimijera kurireu ukudau areia motureu tawuje Jesus piji. Ere Jesus ukudau areia tugu ji pugeje. Nono ere tugeragu Jesusji tuduwo apo Jerusalém piji tuwo bito ipo padure pugajejewu keje rugadu.
MAT 27:32 Eture Jesus apo rugadu. Ekodure dukeje erdure ia imeduji. Iere Simão. Cirene ba kurireu pijiwu nure ema. Ča nou tugobaigarege ere tugeragu nou Simãoji oreduwo nou Jesus bitodumode kejewu ipo tabo rugadu.
MAT 27:33 Nono eture Jesus apo toro ia tori ri ao ka. Ewadaru tabo nou tori iere Gólgota. Nou Gólgota ewadaru tabo iere: “Boe ewireuge etaora ra jeta reo”, aino.
MAT 27:34 Ere ia jorubo barigu vinho kuruto. Nou jorubo iere mirra. Nono ere nou vinho kuru maku Jesus ai kuduwo če. Mare Jesus ure togwa pagado ji dukodire aidukare tuguduwo če.
MAT 27:35 Nono tugobaigarege ere Jesus bu ipo padure pugajejewu keje. Ere Jesus ukudau areia pedo pui. Ere tuwadumode tabowu tori rogu barigu tuiorduwawo duboba umode tugeragu Jesus ukudau areiaji.
MAT 27:36 Dukejere čare ere tumugudo nono taiwo tabo Jesusji rugadu.
MAT 27:37 Ere atugoreboe bu ipo keje Jesus aora bukajeje. Egore: – Judeu doge eimijera kurireu reo. Iere Jesus.
MAT 27:38 Ere ia ro pegareuge ime pobedu doge emugudo nono Jesus apo jamedu nou meriji. Ia rakojere Jesus kana pemegareu jagwai. Metia rakojere Jesus kana pegareu jagwai jamedu.
MAT 27:39 Boe etaregodure nono dukeje ere taora paradudo. Emago pegare Jesusji.
MAT 27:40 Egore: – Akagore amoduie Pao Kurireu uwai butudo mare merimoduie pobe metia bokware dukeje amoduie rakojedo pugeje. Ča Pao Kurireu onaregedu mode aki dukeje amode arawuje nou ipo piji awo akinorudo.
MAT 27:41 Nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge, nouia Judeu doge eimijerage eiamedu boe edu nono tumago pega tabo Jesusji jamedu.
MAT 27:42 Egore: – Ure boe ekinorudo mare kočare roiwakare tuwo tuginorudo rugadu! Judeu doge eimijera kurireu karegure ema kana? Umode turawuje nou ipo padure pugajejewu piji dukeje čemeartorumode ji rugadu.
MAT 27:43 Kočare awu Jesus meartoruie Pao Kurireuji. Akore Pao Kurireu onaregedu nuie pudumi. Mare pagare akoino. Aino Pao Kurireu umodukare udo činorudo rugadu. Ainore nou boe eimijerage eiamedu boe egore tumago pega tabo ji rugadu.
MAT 27:44 Nou rakojere Jesus apowuge ro pegareuge pobedu doge emago pegare Jesusji jamedu.
MAT 27:45 Meri aregodure pagaia ka dukeje boečodure moto jamedu boe parugajeje. Boečodure rugadu. Nou boečo kodure kuri toro nou três hora ka.
MAT 27:46 Dukeje čare Jesus makore tugudu tabo nou boe ewadaru tabo. Akore: – Eli, Eli lemá sabactani? Boe ewadaru tabore akore: – Pao Kurireu, Pao Kurireu! Kaba kodiba are akera ra ipiji? – Dujire akoino tuwadaru tabo.
MAT 27:47 Ia boe emeardure nou Jesus bataruji dukeje egore: – Tawiapagado. Jesus kudugodure Elias bagai.
MAT 27:48 Ia imedu rekodure ia esponja tabo. Ure nou esponja pegodo vinho kuru tabo. Nono aregodure tabo Jesus ae. Ure nou esponja kogudo ipo oto tabo. Nono ure nou esponja raido nou ipo tabo toro Jesus okwa ka kuduwo če.
MAT 27:49 Nou iage egore: – Ča parokawo iaboeji pugeje. Pabagawo Elias bagai. Aregodumode rugadu kana? Umode Jesus rawuje nou ipo padure pugajejewu piji kana?
MAT 27:50 Nono Jesus kudugodu rakare dukeje bire.
MAT 27:51 Čare rore puku je nou areia kurireu bararere Pao Kurireu uwai ja tadawu ure tuwowuje nou bai ja oto piji moto ka. Moto magadugodure. Nou tori boe ere tuwowuje.
MAT 27:52 Bireuge eiari ere tuiado jamedu. Nono meartorure Pao Kurireu jiwuge bireuge eewodure pugeje. Emagare rugadu.
MAT 27:53 Ere tudawuje nou etugudure towu tori poro boe piji. Jesus jewodumode pugeje dukeje nou jewodureuge etumode nou Jerusalém ba kurireuto. Israel doge emuga kurireu reo. Nonore boe erdure nou jewodureugei rugadu. Jordure eiwuge emagare nou ba kurireu keje.
MAT 27:54 Mare aino nou Romano doge tugobaigarege eimijera jordure moto magadugodure duji. Nou tugobaigarege erdure jamedu. Eiamedu boe erdure nou inodu boeji. Dukodire epagudugodure rugadu. Egore: – Boe rugadu! Awu imedu nure Pao Kurireu onaregeduče rugadu.
MAT 27:55 Areme eragojere nono jamedu. Emagare. Iarodo iere Maria Madalena. Ia etumedago iere Maria jamedu. Nou Maria ore ime ere pobe. Ia iere Tiago. Umana iere José. Zebedeu ore etuje rakojere nono jamedu. Jesus rakoje kimore Galiléia moto keje dutabo nou areme emeartorure ji. Ekodure Jesus apo tu tu je tietu pemegawo Jesusji rugadu.
MAT 27:57 Merirekodugodutabo José aregodure. Arimatéia ba kurireu pijiwu nure ema. Oe kurireu nure ema. Meartorure Jesusji jamedu. Nou José uture boe eimijera Pilatos bagai tumagowo ji bireu Jesus bagai tuwo Jesus tugu mototo. Nono Pilatos makore tugobaigaregei ewo Jesus bireu maku nou José ai rugadu.
MAT 27:59 Dukodire čare José ure tugeragu bireu Jesusji. Ure upodo areia pemegareu tabo.
MAT 27:60 Nono ure Jesus tugu to tori poro maiwuto. Emare ure nou tori porodo aino maigodu. Dukeje ure tuiodo nouia tori kurireu keje tuwo bu nou tori poro je keje tuwo nou tori poro midu pemegado.
MAT 27:61 Nou Maria Madalena, nou iarodo Maria ere tudaru nou tori poro ka tumugu pureduwo nou tori poroji taiwo tabo nou José roino duji.
MAT 27:62 Nou barogwato nou ure Judeu doge enomea maku Pao Kurireu aiwuge eimijerage eture Pilatos bagai ia fariseu dogebo. Sábado meri kejere eroino.
MAT 27:63 Emagore Pilatoji. Egore: – Čegimijera. Čewiabuture nou Jesus bataru keje. Akore merimoduie pobe metia bokware pudui dukeje tuiewodumoduie pugeje. Tuwo boe ekiripagado dubagaire nou Jesus akoino.
MAT 27:64 Dukodire čedaidure čewo čemeardae maku akai. Ukana turugadu awo ia tugobaigarege etu pemegado nou bireu meture tadawu tori poroji jii nou akoino jiwu meri akedumode du ka? Amodukare tugobaigarege etudo toro dukeje ia ure jorduwadowuge etumode toro nou tori poro ka. Emode bireu tawuje nou tori poro piji. Nono ewadrarodumode boe ewiagai jewoduie pugeje duji. Dutabore emode boe ekiripaga kurido nou Jesus makore jiboe kori.
MAT 27:65 Nono Pilatos akore: – Ča. Tadudo awu tugobaigaregebo taetu pemegawo nou bireu meture tadawu tori poroji nono tameardae umogadure.
MAT 27:66 Dukodi ča eture rugadu. Ere iaboe bu nou tori okwaji boe erduwawo tawujedukare nou tori poro piji rugadu. Nono ere nou tugobaigarege emugudo nono etaiwo pemegawo nou tori poroji rugadu boe ekawo tugeragu nou bireuji nou tori poro piji.
MAT 28:1 Nou Sábado meri akedure dukeje nou barogwato kuri ča je Maria Madalena uture nou Maria apo toro nou Jesus meture tadawu tori poro ka taiwowo ji.
MAT 28:2 Ča moto magadugodu rakare rugadu. Mare ia Pao Kurireu utugare baru tadawu ure turawuje baru piji. Aregodure nou tori poro ka rugadu. Dukeje ča ure tuiodo nou padure nou tori poro je kejewu tori kurireu keje tuwo nou tori poro jado. Dukeje ča ure tumugudo nou tori keje.
MAT 28:3 Ukudau areia kigadure rugadu. Ure nono boeiaragudu mogadure boe etaiwo tabo ji.
MAT 28:4 Dukodire čare nou tugobaigarege epagudugodure če rugadu. Dukodire epogora kugudugodure rugadu. Ere nono bireuge emogadure. Mare ewi ji karega inagoino. Erokare iaboeji iaboeji. Dujire inagoino.
MAT 28:5 Ča nono nou baru pijiwu Pao Kurireu utugare makore nou aremei. Akore: – Tabagudukaba. Iorduware tagaiwore bagaiwu boeji. Tagaiwore bitodureu Jesus bagai.
MAT 28:6 Ča rakojekare woe pugeje. Jewodure pugeje. Makore jiwu bataru jeture pudui rugadu. Mato tagaiwowo padureu ka.
MAT 28:7 Tadumode dukeje tadudo tamara tabo tawo ure jorduwadowuge ewie jewodure pugeje duji. Ewie utumoduie tagododai toro Galiléia moto ka. Toroie tardumoduie pudui. Ča inure tawie aino.
MAT 28:8 Dukodire nou areme eture nou tori poro piji tumara tabo rugadu. Epagudure. Mare egarere pudui jamedu. Eregodu rakare toro nou Jesus ure jorduwadowuge ewagai.
MAT 28:9 Mare erore puku je Jesus ure tuie bu tači etae. Akore: – Itaregodu. Ere tuburedo ji. Nono ere tubu jodo jokorai. Ere tugeragu bureji. Emago pemegare ji.
MAT 28:10 Nono Jesus makore ei. Akore: – Tabagudukaba. Tadudo toro ire jorduwadowuge ewagai. Aino ere nono imedage remawuge emogadure. Tamagodo ei etuwo toro Galiléia moto ka. Nonore erdumode i rugadu.
MAT 28:11 Ča nou areme eture rugadu. Mare ča nou tugobaigarege eture jamedu toro ba kurireu ka tureadoduwo nou ure Judeu doge enomea maku Pao Kurireu aiwuge eimijerage ewiagai nou boe jamedu boeji.
MAT 28:12 Nono ča nou ure Judeu doge enomea maku Pao Kurireu aiwuge eimijerage ere bato pui nouia boe eimijeragebo tuwo tumeardae tawuje. Dukodire ere tumeardae maku puai tuwo diero kurireu maku nou tugobaigarege etai.
MAT 28:13 Ere nou diero maku nou tugobaigarege etai tumagore ei dutabo. Egore: – Tawadrarodumode boe eiamedu boei tanuduie nou boečoji dukejeie ure jorduwadowuge etaregoduie nou tori poro ka. Emageie ere tugeragu nou bireuji nou tori poro piji.
MAT 28:14 Nou tagimijera Pilatos meardumode nou tawadrarodaeji dukeje korigodumode tai tanudure duji. Mare tamororamagadukaba. Čegi čemode butugugo boe pegakawo tai.
MAT 28:15 Dukodire čare nou tugobaigarege ere tugeragu nou dieroji rugadu. Dukeje ewadrarodure nono nou boe eimijerage egore pudui dumogadure. Dukodire nou ewadrarodae ure tumaedo nou Judeu doge ekao jii aino.
MAT 28:16 Aino ča nou Jesus ure jorduwadowuge enodo padure onze. Nono ča eture Galiléia moto ka rugadu. Dukeje čare etaregodure nou Jesus makore jiwu tori ao ka.
MAT 28:17 Etaregodure dukeje erdure Jesusji rugadu. Ere tubu jodo moto keje tumago pemegawo ji. Mare iage erduwa jokodukare ure ema duji.
MAT 28:18 Dukeje čare Jesus ure tuburedo ei. Nono akore: – Pao Kurireu ure baru tadawu raka jamedu boe maku inai. Ure moto kejewu raka jamedu boe maku inai.
MAT 28:19 Dukodire imode tawie. Tadudo boe eiamedu boe ewagai moto jamedu boe parugajeje tamago raiwo boei emeartoruwo i ewo tugimijerado imi. Emeartorumode i dukeje etao pegodo jamedu Pao Kurireu ie tabo, Onaregedu ie tabo, Uwari ie tabo jamedu.
MAT 28:20 Erduwado ire maku tagaiwu taro jamedu boeji emeartoruwo ji jamedu. Mare tawiagodukaba. Iragojemode tagabo meri jameduji rugadu jii toro moto akedumode du ka.
MAR 1:1 Pao Kurireu o bakaru pemegareu reo. Jesus Cristo jire Pao Kurireu akoino. Onaregedu nure ema.
MAR 1:2 Marigudu rugadu imedu Isaías ure Pao Kurireu bataru bu bapera keje. Ainore nou bataru akore: – Imode itugare utudo uwo boe pemegado nou umode boe ekinorudowu togi. – Itugare kudugodumode boe ewagai boe maereu keje boe ewo awara jetorodo boe eimijera kurireu aregodumode boe etae duji. Mare awara ji karega inagoino. Boe ewo turo pemegado. Dujire inagoino.
MAR 1:4 Nou Pao Kurireu makore jiboe jeture pudui rugadu. João Batista jirabodu Pao Kurireu akoino. Pao Kurireu utugare nure ema. Aregodure boe maereu ka. Makore Pao Kurireu bataruji boe ewiagai. Ure boe etao pegodo. Akore: – Tagera ra taro pegareu piji dukeje imode tagao pegodo. Nono Pao Kurireu biagodumode taro pegareu piji.
MAR 1:5 Boe eture João ae. Emagare tudu tabo toro ae. Etaregodure Judéia moto piji. Etaregodure Jerusalém ba kurireu piji jamedu. Emeardure João Batista bataruji dukeje emagore turo pegareuji, taiduie tuwo tugera ra nou turo pegareu piji. Nono João Batista ure etao pegodo Jordão Po tada.
MAR 1:6 João Batista ukudaure camelo buče. Pegajejewure tapira biri rema. Okwagere tu kitariga dogei, ropa doge eweguruji tu rugadu.
MAR 1:7 Nono ure boe ewie Pao Kurireu bataruji. Akore: – Ia imedu ro kodumode ikoriwu aregodumode iregodaji. Boe pemegareu nure ema, boe kurireu mode ema rugadu. Dukodire ipogurumode ipureduwo ji iro rakakare kodi. Imire ire boe etao pegodo pobo tabo. Emare umode Tuwari tugu boe emeardaeto boe ero pemegawo.
MAR 1:9 Ia meri keje Jesus uture tuwai piji Nazaré ba kurireu piji toro Galiléia moto ka. Nono aregodure João Batista ae toro Jordão Po ka. Nonore João ure Jesus ao pegodo Jordão Po tada.
MAR 1:10 Nono Jesus ure tudawuje Jordão Po piji dukeje aiwore baruto. Nono barure tuiado dukeje Pao Kurireu Uwari ure turawuje baru piji. Ure tudo nono metugore. Ure tumugudo Jesus keje.
MAR 1:11 Nono Pao Kurireu makore baru piji. Akore: – Itonaregedu nure aki. Imeardu kurire ai rugadu. Are iagaredo i rugadu.
MAR 1:12 Dukeje Pao Kurireu Uwari ure Jesus utudo toro boe maereu ka.
MAR 1:13 Meri oto padure quarenta Jesusji nono. Bope doge eimijera Satanás aregodure ae nono. Aidure tuwo turokogado Jesusji tuwo Jesus meardae pegado nono tumeardae mogadure. Barege pegareuge emagare nono Jesus apo. Mare Pao Kurireu utugarege baru tadawuge etaregodure ae. Etu pemegare Jesusji rugadu.
MAR 1:14 Boe eimijera pegareu ure João Batista tugu baičoreuto. Jesus uture Galiléia moto ka. Nonore makore Pao Kurireu bataru pemegareuji boe ewiagai.
MAR 1:15 Akore: – Kuri aino Pao Kurireu umode boe eimijera kurireudo imi rugadu. Ča tagera ra taro pegareu piji. Tameartorudo Pao Kurireu bataruji rugadu.
MAR 1:16 Jesus merure pobo maereu okwaji. Nou pobo maereu iere Galiléia. Nono Jesus jordure imei. Ere pobe. Ia iere Simão. Uwie iere André. Ewogure tuwuge tabo. Ere kare ewido.
MAR 1:17 Jesus makore etae. Akore: – Mato tagoduwo itabo. Imode tarduwado tawoguwo ime ewagai. Mare tawogu ji karega inagoino. Tamode boe emeartorudo Pao Kurireuji. Dujire inagoino.
MAR 1:18 Nono ere tugera ra tuwogu piji tači je. Eture Jesus apo rugadu tumaragodae piji.
MAR 1:19 Jesus kodure nou pobo maereu okwaji kimo. Nono jordure ia imei. Ere pobe. Ia iere Tiago. Nou uwie imedu iere João. Etuo iere Zebedeu. Eragojere to ika kurireu tada. Emaragodure tuwugeji tuwo pemegado.
MAR 1:20 Jesus jordure ei dukeje makore etae. Dukodire eture tuo piji, to ika kurireu piji, tudugarege epiji tugoduwo Jesus apo.
MAR 1:21 Jesus aregodure Cafarnaum ba kurireu ka ture jorduwadowuge ebo. Sábado meri keje Jesus uture nou Judeu doge ere bato puiwu bai ka. Nonore ure boe erduwado.
MAR 1:22 Boe emeardure Jesus bataruji dukeje nono eiamedu boe eku kidure rugadu nou Jesus makore jiboeji. Jesus makore jiboe ukare nono nou boe eimijerage jorduware Judeu doge eno bakaru jiwuge ewadaru mogadure. Jesus mako pemegare mako jetorore rugadu dukodire boe erduware Pao Kurireu bataru remawu jire Jesus akoino duji.
MAR 1:23 Nono ia bope meture tadawu imedu kudugodure. Nou bope uwari emare akoino.
MAR 1:24 Akore: – Nazaré pijiwu Jesus nure aki rugadu. Nuba aromode čei? Amode čedagedudo na? Čerduware ai. Aro pega bokware. Pao Kurireu ure akarego mato tuwadaru pemegareu tabo boe ewagai rugadu!
MAR 1:25 Nono Jesus makore nou bope bataru jipagi. Akore: – Amagokaba boeji pugeje. Atawuje awu imedu piji.
MAR 1:26 Nou bope uwari ure nou imedu magadudo ure kudugodudo jamedu. Dukejere ure tudawuje nou imedu piji.
MAR 1:27 Boe erore ta je Jesus rore aino duji. Dukodire emagore pui. Egore: – Nuba awu Jesus rore? Ure nou bope uwari utudo tači awu imedu piji. Nou bope meartorure awu Jesus bataruji. Marigudu čerduwakare čerowo aino.
MAR 1:28 Dukodire boe ere nou Galiléia moto kejewuge boe eiamedu boe ewie Jesus rore jiboeji makore jiboeji jamedu.
MAR 1:29 Jesus uture nou Judeu doge ere bato puiwu bai piji. Uture nou ture jorduwadowugebo. Tiago uture apo. João uture apo jamedu. Eture Simão, André ewai ka.
MAR 1:30 Simão učarugo kogodure. Biri urure. Padure nono tuba keje. Jesus aregodure dukeje boe ere bie.
MAR 1:31 Dukodire uture ae. Ure tugeragu ieraji. Ure rakojedo dukeje nou biri uru akedure tači je. Pemegagodure pugeje. Dukodire ure eke pemegado.
MAR 1:32 Boečoji boe etaregodure Jesus ae kogodureugebo, bope doge emedure tadawugebo jamedu.
MAR 1:33 Nou mugure ba kurireu kejewuge eiamedu boe etaregodure Jesus ae.
MAR 1:34 Jesus ure nou kogodureuge epemegago. Ure bope doge etawuje boe epiji tuwo etudo epiji rugadu. Nou bope doge erduware Jesusji dukodire Jesus ure nou bope doge emago bokwado.
MAR 1:35 Nou barogwato boedugu kimoto Jesus ure tudawuje. Uture nou bai piji. Uture nou ba kurireu piji toro ia boe maereu ka tumagowo Tuo bagai baruto.
MAR 1:36 Nono Simão uture tumedagebo tiemaru tabo bagai.
MAR 1:37 Nono erdure ji dukeje egore: – Boe emarure awagai tumearduwo awadaruji pugeje.
MAR 1:38 Mare Jesus makore ei. Akore: – Emeardure iwadaruji marigudu dukodire padumode ia boe etae pugeje. Imagomode Iogwa Kurireu bataruji ewiagai jamedu. Dukodire itaregodure baru piji.
MAR 1:39 Dukodire uture Galiléia moto jamedu boe parugajeje tumagowo Tuo bataruji boe ewiagai. Makore boei ere bato puiwu bai tada. Ure bope doge etawuje boe epiji jamedu.
MAR 1:40 Ia imedu kogodureu aregodure Jesus ae pugeje. Nou kogodae ure biri pegado rugadu. Aregodure Jesus ae dukeje ure tubu jodo moto keje jokorai. Okwamagudure Jesusji uwo tugera maku pudai rugadu. Akore: – Aragare rugadu awo ipemegago. Mare akaidumode dukeje amode ipemegago.
MAR 1:41 Jesus okudugodure apo. Dukodire ure tugera bu nou imedu keje. Akore: – Uu. Itaidure. Ča. Apemegare rugadu.
MAR 1:42 Nono nou imedu biri pemegagodure tači je rugadu.
MAR 1:43 Nono Jesus ure tumago rakado ji ukawo boe ewie nou turore jiboeji. Akore: – Amagokaba awu irore jiboeji boe ewiagai. Atudo kuri nou Pao Kurireu uwai ka. Nonore amode nou ure Judeu doge enomea maku Pao Kurireu aiwu imedu jordudo awiriji. Jordumode awiri pemegagodure duji rugadu. Nono amode nou Moisés makore jiwu mori maku ai rugadu nono paro mogadure. Nono nou ure boe enomea maku Pao Kurireu aiwu imedu umode nou are maku pudaiwu mori maku Pao Kurireu ai rugadu. Dukodire boe eiamedu boe erduwamode apemegagodure duji. Jesus makore aino tuwo nou imedu utudo pugeje.
MAR 1:45 Nou imedu uture mare meartorukare Jesus makore pudui jiboeji. Makore boe eiamedu boe ewiagai nuba Jesus rore pudui duji. Nono boe eiamedu boe etaidure tumagowo Jesusji. Dukodire Jesus roiwakare tuduwo boe eda ka. Rakojere boe maereu keje. Mare nou moto kejewu boe emarure Jesus bagai tuiorduwo ji.
MAR 2:1 Ia meri keje Jesus uture tuibagi Cafarnaum ba kurireu ka. Aregodure dukeje boe ere pu rugadu boe bie aregodure duji.
MAR 2:2 Dukodire boe eture nou Jesus rakojere tadawu bai ka. Emagare. Emagare rugadu. Ere turemo nou baito mare nou bai čekare nou boe dogei. Dukodire iage edure bawadu keje. Jesus makore Pao Kurireu bataruji ewiagai.
MAR 2:3 Nono ia ime etaregodure. Enodo padure pobe puibiji. Enoredure ia imedu pogora pegareu apo. Etaidure taregoduwo apo Jesus ae.
MAR 2:4 Mare boe emagare nono Jesus apo dukodire eroiwakare tubureduwo Jesusji. Dukodire erudure nou bai ao ka nou imedu pogora pegareu apo. Nono ere nou bai ao porodo. Dukejere ere nou imedu pogora pegareu rawuje nou bai ao piji moto ka bukigu tabo. Nou imedu padure kodo keje. Ere bukigu kogudo nou imedu padure kejewu kodo tabo. Dutabore ere rawuje moto ka Jesus jokora ka.
MAR 2:5 Jesus jordure emeartorure pudui duji kodire etaregodure aino nou imedu apo pudae duji. Dukodire makore nou imedu pogora pegareuji. Akore: – Me. Ire aro pegareu jamedu boe barigu apiji dukodire Pao Kurireu biagodumode aro pegare jiboe piji.
MAR 2:6 Jorduware Judeu doge eno bakaru jiwuge edure nono nou boe dogebo. Ewiapagare Jesus bataruji dukeje emeardaere tudada.
MAR 2:7 Egore: – Awu Jesus makore jiboe ukare turugadu. Unure tudo nono Pao Kurireure. Mare pagare akoino. Dukodire mako peganure Pao Kurireuji. Tu Pao Kurireu umode boe ero pegareu barigu boe epiji tuwiagoduwo ero pegareu piji.
MAR 2:8 Jesus jorduware emeardaere jiboeji. Dukodire makore ei. Akore: – Kočare tameardae pegare imagore jiboeji.
MAR 2:9 Boe jokodu. Boe emodukare boe ero pegareu barigu epiji rugadu. Mare boe emodukare awu imedu pogora pegareu pemegago jamedu. Emodukare pemegago rugadu. Tu Pao Kurireu umode pemegago. Tu Pao Kurireu umode boe ero pegareu barigu boe epiji tuwiagoduwo ero pegareu piji rugadu.
MAR 2:10 Dukodire imode awu imedu pogora pegareu pemegago dukeje tarduwamode Imedu Onaregedu nure imi duji. Dukodire imode tarduwado iragare iwo boe ero pegareu barigu epiji duji ewarigudukawo bope doge eda kejewu joru pegareuto rugadu. Ainore Jesus akore nou boe eimijeragei. Nono Jesus makore nou imedu pogora pegareuji.
MAR 2:11 Akore: – Me. Aragojedo. Akeragu akudau kodoji atuwo tabo aibagi awai ka.
MAR 2:12 Boe etaiwore nou imedu pogora pegareuji. Ča ure turagojedo rugadu. Ure tugeragu tugudau kodoji. Dukejere uture tabo pugeje. Meru pegakare. Boe eiamedu boe eku kidugodure nou rore aino duji. Dukodire emago pemegare Pao Kurireuji. Egore: – Marigudu čerdukare awu inoduji rugadu.
MAR 2:13 Jesus uture tuibagi pobo maereu okwa ka. Nou pobo maereu iere Galiléia. Nou boe etaregodure nono ae pugeje. Emagare. Dukejere Jesus ure erduwado Pao Kurireu bataruji.
MAR 2:14 Merure pobo okwaji dukeje jordure imposto diero makudure aiwu imeduji. Nou imedu iere Levi. Alfeu onaregedu nure ema. Mugure nono ira keje. Nonore ure tugeragu dieroji boe epiji enoe imposto moriče tuwo maku boe eimijera kurireu ai. Nou imedu maragodae nure nou inoduče. Jesus makore ji. Akore: – Ako itabo. Ča Levi ure turagojedo. Uture Jesus apo rugadu.
MAR 2:15 Nou boečoji eragojere Levi uwai tada togwagewo. Jesus ure jorduwadowuge edure nono jamedu. Ia kodure Jesus apowuge emagare nono. Nou imposto mori makudure aiwuge edure nono jamedu. Boe egore ro pegareuge enuie emage. Ia boe etaidukare jiwuge eragojere nono Jesus apo jamedu. Nou boe eiamedu boe emugure nono togwage tabo Jesus apo.
MAR 2:16 Dukejere ia fariseu doge etaregodure jamedu. Jorduware Judeu doge eno bakaru jiwuge nure emage. Erdure Jesus okwagere nou ro pegareugebo duji. Etaidukare nou ro pegareugei dukodire emagore nou Jesus ure jorduwadowugei. Egore: – Kočare Jesus okwagere awu ro pegareugebo? Ukare turugadu!
MAR 2:17 Jesus meardure nou fariseu doge egoino duji. Dukodire makore ei. Akore: – Jorubo kuru epa jemarumodukare kogodukareuge ewagai. Mare kogodureuge ewagaire jemarumode tuwo epemegago. Irore nono nou jorubo kuru epa ro mogadure. Mare jorubo kuru epa ji karega inagoino. Itaregodure woe mare ro pemegareuge ewagai karega iroino. Ro pegareuge ewagaire iroino ewo tugera ra turo pegareu piji. Dujire inagoino.
MAR 2:18 Ia meri keje aidure João Batista bataru jiwuge enogwage bokware tumagowo Pao Kurireu bagai baruto nou meriji. Ainore Fariseu doge erore jamedu. Ia boe etaregodure Jesus ae dukeje enarare ji. Egore: – João Batista ure jorduwadowuge enogwagekare awu meriji tumagowo Pao Kurireu bagai baruto awu meriji. Fariseu doge ere jorduwadowuge erore aino awu meriji jamedu. Kodiba are jorduwadowuge enogwagekare tumagowo Pao Kurireu bagai baruto awu meriji?
MAR 2:19 Jesus akore: – Ire nono uwiremodewu imedu mogadure. Mare uwiremodewu karega. Boe etuwirere dukeje ere tuwadae towuje. Nou ewadae kejere boe enogwagemode rugadu. Ewadae reno. Ekiarigodumodukare nou meriji.
MAR 2:20 Mare ewadae akedure dukeje uwirereu imedu utumode epiji toreduje apo. Dukejere čare boe emode ia meri tawuje togwagekawo nou meriji tumagowo Pao Kurireu bagai baruto nou meriji. Ire nono nou uwiremodewu imedu mogadure. Mare uwiremodewu imedu ji karega inagoino. Ire inagoino. Ire irawuje baru piji mato boe ewagai. Mare ia meri keje itumode nou boe epiji baruto dukeje boe emode nou meri tawuje togwagekawo nou meriji tumagowo Pao Kurireu bagai baruto nou meri keje. Dujire inagoino.
MAR 2:21 Boe ekudau areia pegagodureu umode tuwowuje. Mare boe emodukare tugudau areia maiwu kado tuwo nou tugudau pegagodureu poro miwuje tabo. Boe eromode aino dukeje nou ekudau areia maiwu gigirimode. Dukodire umode tuwowuje nou boe ekudau areia pegagodureu piji kuri je pugeje. Dukodire nou ekudau areia pegagodureu umode tuwowuje ja je. Nono nou poro kodumode tugori.
MAR 2:22 Boe ere tapira biri maiwu pemegado nou tuge vinho kuru maiwu jače. Mare emode vinho kuru maiwu tugu tapira biri čodureuto dukeje nou tapira biri čodureu umode tuwowuje. Nono nou vinho kuru umode tuwarigu nou tapira biri čodureu piji rugadu. Dukodire boe ekare tuge vinho kuru maiwu tugu tapira biri čodureuto. Ere tuge vinho kuru maiwu tugu tapira biri maiwuto tu tu je. Ainore Jesus akore. Mare areia ji karega akoino. Vinho kuru ji karega akoino. Tuwadaru maiwu jire Jesus akoino.
MAR 2:23 Jesus merure boepa oiagi sábado meriji. Trigo ure nou boepa tada. Ure jorduwadowuge ekodure apo. Nono nou Jesus ure jorduwadowuge ere tugeragu trigo enariji tuwo ko.
MAR 2:24 Fariseu doge emeardae pegare nou inoduji. Dukodire emagore Jesusji. Egore: – Akaiwodo. Judeu doge nure pagi. Pamaragodumodukare sábado meriji. Dukodire pamodukare pageragu trigoji sábado meri keje. Mare nou are jorduwadowuge ere tugeragu trigoji. Ukare turugadu! Mare erduwakare. Boe ewo tugeragu ia tuge roguji ji karega Pao Kurireu akoino boe emaragodukaiago sábado meriji.
MAR 2:25 Jesus akore: – Tarduwakare Pao Kurireu bataruji! Dukodire tarduwakare Pao Kurireu meardae remawuji. Tarduwamode Pao Kurireu meardae remawuji dukeje tamago pegamodukare čeroino duji. Marigudu Judeu doge eimijera kurireu Davi rore jiboe padure Pao Kurireu bataru keje. Dujire tarduwakare. Nou Davi uke boeire ji. Utugarege tugobaigarege eke boeire ei jamedu.
MAR 2:26 Dukodire ure turemo Pao Kurireu uwaito. Okwagere boe ere maku Pao Kurireu aiwu amireuji. Nou joruji nou ure Judeu doge enomea maku Pao Kurireu aiwuge eimijera kurireu iere Abiatar. Pao Kurireu ure turo maku pawobe Judeu doge etai. Makore ei ekawo nou amireu ko. Tu nou ure boe enomea maku Pao Kurireu aiwuge emode nou Pao Kurireu uwai tadawu amireu kowuje. Mare Davi ure kowuje. Ure ia maku tudugarege etai ewo kowuje jamedu.
MAR 2:27 Imedu Onaregedu nure imi. Imire imode boe erduwado rugadu nuba boe eromode sábado meri keje. Dukodire imagomode aino tai. Pao Kurireu ure boe ero maku boe etai erowo aino sábado meriji tu tu je. Mare paga karega boe pemegawo boei. Boe pegawo boei karega.
MAR 3:1 Jesus uture Judeu doge ere bato puiwu bai ka pugeje sábado meri keje. Ia imedu rakojere nono. Iera pegare. Ierare tudorido puapo.
MAR 3:2 Ia boe erdu pegare Jesusji. Edure nono jamedu. Dukodire etaiwore Jesus ia ro pegamode dubagai. Judeu doge eromodukare ia turore jiboeji sábado meri keje. Dukodire etaidukare boe eiogowo boei sábado meri keje. Mare Jesus umode nou imedu iera pemegago nou meriji dukodire nou boe erdu pegamode Jesus rore aino duji.
MAR 3:3 Jesus makore nou imedu iera pegareuji. Akore: – Aragojedo. Mato itae woe boe etoia ka.
MAR 3:4 Nono Jesus unarare nouia boei. Akore: – Nuba pago bakaru akore paromoduie sábado meri keje? Paro pegamoduie boei kana? Paro pemegamoduie boei kana? Pamode boe ekinorudo boe pegareu piji sábado meri keje kana? Pamode boe ewarigu boe pegareuto sábado meri keje kana? Nou boe emagokare boeji.
MAR 3:5 Jesus korigodure ei. Aiwore ei. Etaidukare tumearduwo Jesus makore jiboeji emeardae pegare kodi. Mare Jesus okudugodure ebo jamedu. Dukejere Jesus makore nou imedu iera pegareuji. Akore: – Akera raido itae. Nono nou imedu ure tugera raido ae. Čare iera pemegagodure tači je.
MAR 3:6 Mare fariseu doge eture nou bai piji tumara tabo boe korire ei kodi. Erdu pegare Jesus rore aino duji sábado meri keje. Sábado meriji emaragodumodukare eromodukare ia turore jiboeji. Dukodire ekorigodure Jesusji. Ere bato pui ia meartorure Herodes bataru jiwu imebo. Emagore pui tuwo ia tumeardae tawuje tuwo Jesus bito.
MAR 3:7 Jesus uture ture jorduwadowugebo pobo maereu okwa ka. Nou pobo maereu iere Galiléia Po. Aidure Jesus bataru jiwuge eture Jesus rekodaji pugeje. Emagare rugadu.
MAR 3:8 Galiléia kejewugere. Judéia kejewugere. Iduméia kejewugere. Tiro ba kurireu kejewugere. Sidom ba kurireu kejewugere. Ia Jordão Po bakowu kejewuge ekurugodure Jordão Po kajeje taregoduwo Jesus ae jamedu. Emeardure Jesus rore jiboeji dukodire nou boe etaregodure tuiorduwo Jesusji.
MAR 3:9 Boe ere tuiodo puwugeje pu otodai dukodire Jesus roiwakare tumago pemegawo ei. Dukodire makore ture jorduwadowugei ewo ia ika kurireu po barigu tuwo taredo to. Ewo tuiodo ika keje pobo oiado. Nono akuamode tumago pemegawo nou boei nou ika piji.
MAR 3:10 Jesus ure kogodureuge epemegago. Emagare rugadu. Mare ia kogodureuge kimore. Etaidure tuwo tuburedo Jesusji tuwo tugera jetudo Jesus ukudau areiaji tubemegagoduwo.
MAR 3:11 Bope doge emedure iage etada. Etaregodure Jesus ae dukeje ere tuwududo moto keje tugudu tabo Jesus jokorai. Egore: – Pao Kurireu Onaregedu nure aki!
MAR 3:12 Jesus mako rakare nou bope doge ewadaru jipagi emagokawo nou inoduji boe ewiagai.
MAR 3:13 Nono Jesus ruture ia tori ao ka. Nono makore taidure jiwuge boe ewagai. Nono etaregodure ae.
MAR 3:14 Jesus ure tugeragu jiwuge ime enodo padure kejewugere doze. Ure tugie maku etai. Akore: – Uture iwadaru tabowu boe nure tagi. Ire ikeragu tai taragojewo itabo. Imode tarduwado tamagowo iboeji boe ewiagai.
MAR 3:15 Imode taragado tawo bope doge etawuje boe epiji.
MAR 3:16 Ainore nou Jesus ure tugeragu jiwuge ekiere. Ia iere Simão. (Jesus ure awu Simão iedo Pedro)
MAR 3:17 Ia iere Tiago. Zebedeu onaregedu nure ema. Ia iere João. Tiago uwie nure ema. (Jesus ure nou ime pobedu doge ekiedo Boanerges. Ewadaru tabo egore aino: “Boeiaruru ore nure emage.”)
MAR 3:18 Ia iere André. Ia iere Filipe. Ia iere Bartolomeu. Ia iere Mateus. Ia iere Tomé. Ia iere Tiago. Nou Tiago Alfeu onaregedu nure ema. Ia iere Tadeu. Ia iere Simão Zelote.
MAR 3:19 Ia imedu iere Judas Iscariotes. Emare umode Jesus maku boe eimijerage pegareuge etai.
MAR 3:20 Nono Jesus ure turemo ia baito. Boe emagare nono apo pugeje. Dukodire Jesus roiwakare togwagewo ture jorduwadowugebo.
MAR 3:21 Jesus uwobe emeardure nou inoduji dukeje etaidure tuwo Jesus utudo nou boe doge epiji. Boe egore Jesus aora bai baie kodi.
MAR 3:22 Ia jorduware Judeu doge eno bakaru jiwuge etaregodure Jerusalém ba kurireu piji. Erdu pegare Jesus rore jiboeji dukodire emago pegare ji. Egore: – Bope doge eimijera iere Belzebu. Emare meture nou Jesus tada. Emare ure turaga maku Jesus ai Jesus uwo bope doge etawuje boe epiji.
MAR 3:23 Dukodire Jesus makore ewagai tumagowo ewadaru jipagi. Akore: – Bope doge eimijera iere Satanás jamedu. Umodukare tudawuje boe epiji tuginai. Mare ia imedu ro rakareu koiare umode tawuje boe epiji.
MAR 3:24 Ia boe epokare puapo dukeje erugodure pui. Dukeje eraga akedumode epiji kuri je.
MAR 3:25 Boe erugodumode tuwobei dukeje emode tugera ra pubiji rugadu. Dukodire eraga bokwamode rugadu.
MAR 3:26 Mare meartorure Satanás jiwugeire inagoino. Epomodukare puapo dukeje eragamodukare pugeje. Boe pegamode ei rugadu. Etagedumode rugadu.
MAR 3:27 Ča iwogureu aidure tuwo turemo ia tugobaigare uwaito tuwo tugeragu nou tugobaigare ia oeji. Mare umode nou tugobaigare kogudo bukigu tabo boetoji. Nono umode tugeragu nou tugobaigare oeji rugadu tuduwo tabo rugadu.
MAR 3:28 – Boe jokodu jire inagoino. Boe etaidukare turo pegareuji pugeje dukeje Pao Kurireu biagodumode nou ero pegareu piji. Emago pegamode Pao Kurireuji. Mare ekiarigodumode nou tuwadaru pegareuji dukeje Pao Kurireu biagodumode ewadaru pegareu piji.
MAR 3:29 Mare ia boe emago pegamode Pao Kurireu Uwariji dukeje Pao Kurireu biagodumodukare nou ewadaru pegareu piji rugadu. Nou bataru metumode nou boebo ji rugadu. Du akedumodukare rugadu. Dukodire Pao Kurireu biagodumodukare nou inodu piji.
MAR 3:30 Nou boe egore bope uwari metuie Jesus tada dukodire Jesus akoino ei.
MAR 3:31 Jesus uče, uwiemage etaregodure bagai. Eragojere bawadu keje. Emagore Jesus bagai toro nou baito.
MAR 3:32 Boe emagare nou bai tada Jesus apo. Emagore Jesusji. Egore: – Akaiwodo. Ače, awiemage etaregodure. Epagare awagai bawadu keje.
MAR 3:33 Jesus makore ewadaru jipagi. Akore: – Imode tawie ioguduba nure mugače, ioguduba nure iwobeče. Nono Jesus aiwore nou mugure pudabowugei. Akore: – Awu boe ere nono iwobe mogadure. Meartorure Pao Kurireu meardae jiwu areme ime ere nono iwobe emogadure rugadu. Ere nono iwie mage emogadure rugadu. Ere nono muga mage emogadure rugadu.
MAR 4:1 Nono Jesus uture nou Galiléia pobo maereu okwa ka pugeje. Boe ere bato pui nono tumearduwo Jesus bataruji pugeje. Emagare rugadu. Dukodire Jesus ure taredo ia ika kurireuto. Nou ika kurireu padure nono pobo tada. Nou boe edure pobo okwai tumearduwo Jesus bataruji. Jesus ure tumugudo nou ika kurireu ja tada.
MAR 4:2 Nono Jesus makore ia bakaruji nou boe ewiagai tuwo nou boe erduwado nouia Pao Kurireu meardaeji.
MAR 4:3 Akore: – Tawiapaga pemegado iwadaruji. Ia meri keje imedu uture to boepato tuwo boe tugu mototo.
MAR 4:4 Ure boe a roto ja ja moto joki to boepa tada. Ia a buture awara okwaji. Dukodire kiebarege ere nou buture awara okwa jiwu boe a rugadu kowuje.
MAR 4:5 Ia a buture toriguru tada. Boture kuri je mare moto pegare ji.
MAR 4:6 Dukodire boeru jeture ji dukejere nou boeru ure nou botureboe bito kuri je rugadu. Ukwa bokware kodi. Moto pegare kodi.
MAR 4:7 Ia a buture botoguru tada. Botoguru boture tabo jamedu mare botoguru ure bito. Dukodire nou buture botoguru tadawu boe a ričodukare pemegakare jamedu.
MAR 4:8 Mare ia a buture moto pemegareu keje. Ere tuguwu sacu ure mitotu je. Botu pemegare, ričodu pemegare, enari kurire rugadu. Kidure dukeje ere rawuje čiwu piji. Ere a rawuje tuwo tugu sacuto. Nou sacu doge emagare. Parduwakare nuba nou ere korau sacu dogere. Ere cem, ere sessenta, ere trinta rabodu nou boe a tabo. Tawiapaga pemegado awu iwadaruji tarduwawo kaba jiba inagoino tai.
MAR 4:9 Jesus ure nou bakaru akedudo dukeje makore ei pugeje. Akore: – Tawiapaga pemegado iwadaruji.
MAR 4:10 Jesus uture nou boe epiji ture jorduwadowugebo. Mare iage etaidure tuiorduwawo kaboba jiba nou bakaru akoino. Dukodire eture rekodaji tumeardu pemegawo kaba jiba akoino.
MAR 4:11 Jesus makore ei. Akore: – Ireadodure bakaruji iwo boe erduwado nouia Pao Kurireu meardaeji. Mare paga karega. Ireadodure bakaruji aino Pao Kurireu uwo tarduwado meture pudabowu tumeardae boeji boe ewo tugimijerado tu ema. Mare meartorukare Pao Kurireu jiwuge emeardumode imagore jiwu bakaruji mare emodukare boe pa nou bakaruji.
MAR 4:12 Dukodire: – Etaiwomode rugadu mare erdumodukare boeji; Ewiapagamode mare erduwamodukare boeji. Mare erduwamode dukeje emode tumagu Pao Kurireu ai. Dukejere Pao Kurireu biagodumode nou ero pegareu boe piji.
MAR 4:13 Nono Jesus unarare ture jorduwadowugei. Akore: – Tarduware awu inagoino jiwu bakaruji? Nuba taromode tarduwawo awu bakaruji?
MAR 4:14 Nono Jesus ure erduwado nou bakaruji. Akore: – Boe eire inagoino. Pao Kurireu bataru jire inagoino jamedu.
MAR 4:15 Pao Kurireu o bataru ure nono nou boe a mogadure. Mare boe a ji karega inagoino. Pao Kurireu bataru aregodumode boe etae. Nono boe emeardumode Pao Kurireu bataruji. Dujire inagoino. Boe emeardumode Pao Kurireu bataruji mare bope doge eimijera umode nou boe ewiagodudo nou tumeardure jiwu Pao Kurireu bataru piji. Dukodire emeartorumodukare ji rugadu. Dujire inagoino.
MAR 4:16 Ia boe emeardumode Pao Kurireu bataruji pugeje. Nono nou boe emode nono nou boture toriguru tadawu boe a mogadure. Mare boe a ji karega inagoino. Boe eire inagoino. Nou boe eragamodukare tumeartoru raiwo Pao Kurireuji. Dujire inagoino. Emode tugeragu Pao Kurireu bataruji tiagare tabo mare emeartoru raimodukare ji. Dujire inagoino.
MAR 4:18 Ia boe emeardumode Pao Kurireu bataruji pugeje. Awu boe emode nono nou boture botoguru tadawu boe a mogadure. Botoguru umode boe pegado ji umode bito. Mare boture botoguru tadawu boe a ji karega inagoino. Boe eire inagoino. Nou boe emeardumode Pao Kurireu bataruji. Etaidure tumeartoruwo ji. Dujire inagoino.
MAR 4:19 Mare emororamagadumode tu tumeardae boeji kuri je. Emeardaere tu pudui tuwo to diero kurido. Dujire inagoino. Etaidumode tu taidure jiboeji. Emeardaere nou taidure jiboe umode tuginorudo boe pegareu piji mare pagatu je. Dukodire emode tugera ra Pao Kurireu bataru piji. Dujire inagoino.
MAR 4:20 Mare ia boe emeardumode Pao Kurireu bataruji dukeje emeartorumode ji rugadu. Dukodire epemegamode rugadu nono nou boture moto pemegareu boe a mogadure. Mare boture moto pemegareu kejewu boe a ji karega inagoino. Boe eire inagoino. Nou boe emeardumode Pao Kurireu bataruji nono emeartorumode ji rugadu. Dujire inagoino. Emodukare tugera ra tumeartorure jitu piji rugadu jii toro rugadu. Dujire inagoino.
MAR 4:21 Jesus makore kimo. Akore: – Boe emode pori bu lamparina aogeje dukeje urugumodukare. Boe emode jorugu mugudo tuba kuda dukeje urugumodukare jamedu. Mare boe emode lamparina urugu bararedo, uruguwo pudui.
MAR 4:22 Ča boe etaidumode tuwo turo pegareu biado boe epiji. Mare Pao Kurireu jorduware marigudu ero pegareuji. Dukodire boe erduwamode nou ero pegareuji jamedu.
MAR 4:23 Taipaga pemegado iwadaruji.
MAR 4:24 Nono Jesus makore ei pugeje. Akore: – Taipaga pemegado tameardure jiboeji. Tagaiwomode boe eroji ero pegamode dubagai dukeje Pao Kurireu aiwomode taro pegareu bagai jamedu. Tagaidumode boe pegawo boei ero pegareu moriče dukeje Pao Kurireu umode boe pegado tai rugadu taro pegareu moriče.
MAR 4:25 Boe erduware Pao Kurireu bataruji. Etaidure tumeartoruwo ji dukeje Pao Kurireu umode erduwa kurido pudui emeartoruwo pudui rugadu. Mare ia boe etaidumodukare tumeartoruwo tuiorduware jiwu Pao Kurireu bataruji dukeje Pao Kurireu umode erduwa bokwado tuwadaruji. Emeardaere tuiorduwaie rugadu mare pagatu je.
MAR 4:26 Jesus makore boei pugeje. Akore: – Boe eimijera kurireu nure Pao Kurireuče rugadu. Meartorure jiwuge emagamode rugadu. Mare boe erduwakare meartorumode jiwugei meartorumodukare jiwugei jamedu. Imode tarduwado nou inoduji bakaru tabo. Imedu ure boe a tugu mototo mare jorduwakare botumodewugei botumodukareugei jamedu. Ure boe a roto ja ja moto joki.
MAR 4:27 Nono nudure boečoji. Nou barogwato ure tie bu. Ure tuguwu boe a boture mare imedu jordukare ji mototo. Jorduwakare nuba nou boe a rore tuwoduwo.
MAR 4:28 Moto koiare ure nou boe a botudo. Boture dukeje ričodure. Ričore dukeje enarire. Enari kurire.
MAR 4:29 Imedu pagare kuroduwo. Kurodumode dukeje ure kado tariga tabo. Inagore imedu uie boe a tugu mototo. Boere nono nou boe a mogadure. Mare boe a ji karega inagoino. Boe eire inagoino. Ia boe emeartorumode Pao Kurireuji rugadu. Iage emeartorumodukare ji jamedu.
MAR 4:30 Jesus makore boei pugeje. Akore: – Itaidure iwo tarduwado nuba Pao Kurireu utugarege ere. Pao Kurireu utugarege emagakare mare ia meri keje Pao Kurireu utugarege emagagodumode rugadu. Ireadoduwo ia bakaruji tawiagai.
MAR 4:31 Ia imedu ure ia mostarda a tugu to boepato. Mostarda a kurikare rugadu. Boe a jamedu boe kurire nou mostarda a kori. Imedu ure tugu to boepato.
MAR 4:32 Nono ia meri keje boture. Ričodure rugadu. Nono iku kurire nou boe emode tugu to boepa tadaboe iku jamedu boe kori. Kiebarege ere tumugudo keje. Ere tuwaradu pemegado keje. Pao Kurireu utugarege ere nono nou mostarda a rogu mogadure. Mare mostarda a ji karega inagoino. Pao Kurireu utugarege eire inagoino. Emagakare mare ia meri keje Pao Kurireu utugarege emagamode rugadu. Dujire inagoino.
MAR 4:33 Ainore Jesus akore. Readodu kigodure bakaruji nou boe ewiagai tuwo erduwado toro nouia Pao Kurireu meardaeji rugadu jii erduwamode jitu oto pa ka.
MAR 4:34 Bakaru jire Jesus akoino boe ewiagai. Mare Jesus mugure nou ture jorduwadowugebo tuginai dukeje ure nou ture jorduwadowuge erduwado nou tumagore jiwu bakaruji ewiagai. Nou Jesus ure jorduwadowuge enodo padure doze.
MAR 4:35 Nou meriji rugadu boečoji Jesus makore ture jorduwadowugei. Akore: – Pagurugoduwo awu pobo maereu okwa abowu ka.
MAR 4:36 Dukodire emagore nou boei etuwo pugeje. Jesus ure jorduwadowuge enodo padure doze. Ere taredo ika kurireuto Jesus apo. Nono eture. Ia boe eture eregodaji ika kurireugebo jamedu.
MAR 4:37 Ekurugodure dukeje bakuru pegareu aregodure etae. Nou bakuru pegareu ure pobo maereu rutudo. Dukodire pobo jeture nou ika kurireuji. Dukodire pobo ure turemo nou ika kurireuto. Dukodire nou ika kurireu korobadugodure pobo tabo.
MAR 4:38 Mare Jesus unudure toro nou ika kurireu upo keje. Aora padure takudau keje. Ča ure jorduwadowuge ere Jesus jetadudo. Egore: – Čegimijera! Akaidure pawiwo? Pawimode!
MAR 4:39 Ča Jesus ure turagojedo. Nono mako rakare bakuruji. Akore: – Akaguru akedudo! Nono makore poboji. Akore: – Akaba aporudo pugeje! Dukodire nou bakuru akedure rugadu. Nou pobo butugugodure jamedu.
MAR 4:40 Nono Jesus makore nou ture jorduwadowugei. Akore: – Kodiba tabagudugodure? Kočare tameartorukare i na?
MAR 4:41 Mare epagudugodure rugadu. Nono emagore pui. Egore: – Duboba nure awu imeduče? Kočare bakuru, pobo emeartorure awu Jesus bataruji rugadu!
MAR 5:1 Jesus aregodure ture jorduwadowugebo toro nou Galiléia pobo maereu okwa abowu ka. Nou etaregodure kawu moto iere Gerasa.
MAR 5:2 Nono Jesus ure tudawuje ika kurireu piji dukeje bope doge emedure tadawu imedu uture Jesus togi.
MAR 5:3 Dukodire nou imedu mugure boe ere bireuge etugu tadawu tori poro tada. Boe etaidure tuwo nou imedu kogudo meriri iku tabo mare meriri iku rakakare nou imeduji.
MAR 5:4 Marigudu boe ere nou imedu bure kogudo meriri iku tabo. Ere nou imedu iera kogudo meriri iku tabo. Mare nou imedu ure nou meriri iku kado turaga tabo tu tu je. Raka kodure boe eiamedu boe ekori.
MAR 5:5 Nou imedu meru pagare tori aoji, nou tori poro jamedu boe parugajeje meriji boečoji. Kudu pagare meri jamedu boeji tu tu je. Ure tuwiri kado nou tori mega tabo rugadu.
MAR 5:6 Nou imedu aiwo jaere Jesus togi. Nono rekodure toro ae. Aregodure Jesus ae dukeje ure tubu jodo moto keje Jesus jokorai.
MAR 5:7 Dukejere ure tugudu rakado. Akore: – Jesus nure aki! Pao Kurireu Onaregedu nure aki! Boe eiamedu boe eimijera kurireu nure Pao Kurireuče! Jesus akore: – Bope uwari nure aki. Atawuje awu imedu piji! Nou bope uwari akore: – Nuba aromode čei? Akaba itudo boe pegareuto. Amagodo Pao Kurireu biagai aro pegamodukaie i rugadu.
MAR 5:9 Jesus unarare ji. Akore: – Nuba akiere? Nou meture nou imedu tadawu bope uwari akore: – Čegiere bope doge makareuge. Čemagare awu imedu tada.
MAR 5:10 Nono nou meture nou imedu tadawu bope doge enogwamagudure Jesusji ukawo tududo nou moto piji.
MAR 5:11 Jugureuge edu puredure togwage tabo nono.
MAR 5:12 Dukodire nou meture nou imedu tadawu bope doge enogwamagudure Jesusji nou imedu ja piji. Egore: – Čedudo toro nou jugureuge etae. Čedo čeremo nou jugureugeto.
MAR 5:13 Nono Jesus ure etudo. Dukodire nou bope doge ere tudawuje nou imedu piji. Ere turemo nou jugureugeto. Dukodire nou jugureuge eiamedu boe eregodure kuri ia moto ri ao piji tači poboto. Dukodire eiamedu boe ewire poboto. Enodo padure dois mil.
MAR 5:14 Nou jeture nou jugureuge eiwuge ime eregodure nou boe epiji toro tuwai mugure tadawu ba kurireu ka. Ereadodure Jesus rore jiboeji nou ba kurireu tadawu boe ewiagai. Ereadodure boe eiamedu boe ewiagai nou moto jamedu boe parugajeje jamedu. Dukodire nou boe eture Jesus ae tuiorduwo ji, tuiorduwo nou imeduji jamedu.
MAR 5:15 Etaregodure Jesus ae dukeje erdure nou bope doge emedure tadawu imeduji pemegagodure duji. Butugugodure. Ukudau areia meture ji. Erduware ji. Erduware Jesus ure bope doge etawuje nou imedu piji dukodire nou imedu pemegagodure. Dukodire nou boe epagudugodure.
MAR 5:16 Jordure nou Jesus rore jiwuge ereadodure nouia boe ewiagai nuba Jesus rore nou bope doge emedure tadawu imeduji. Ereadodure nou bope doge ere turemo jugureugeto duji nouia boe ewiagai jamedu.
MAR 5:17 Nou boe epagudugodure dukodire enogwamagudure Jesusji utuwo nou to moto piji.
MAR 5:18 Dukodire Jesus uiago taredo ika kurireuto pugeje. Mare nou bope doge ere tudawuje pijiwu imedu okwamagudure Jesusji. Akore: – Itaidure ikoduwo akabo.
MAR 5:19 Mare Jesus makore ji. Akore: – Boro. Atudo aibagi awobe etae. Areadoduwo ewiagai nuba Pao Kurireu ro pemegare ai duji rugadu. Areadodudo ewiagai Pao Kurireu ro pemegare ai du boeji.
MAR 5:20 Dukodire nou imedu uture Jesus piji tuwobe etae. Boe eda enodo padure dez nou moto keje. Nou imedu readodure Pao Kurireu ro pemegare pudui duji boe eiamedu boe ewiagai nou moto jamedu boe parugajeje. Boe eiamedu boe erore ta je nou imedu akoino tureadodu tabo Pao Kurireu bataruji boe ewiagai duji.
MAR 5:21 Jesus kurugodure nou pobo maereu kajeje tuibagi. Aregodure toro dukeje boe emagare nono pobo okwai.
MAR 5:22 Judeu doge ere bato pui ia bai tada tu tu je. Jeture nou bai jiwu boe eimijera iere Jairo. Nou imedu Jairo aregodure Jesus togi. Dukejere ure tuwududo moto keje Jesus jokorai.
MAR 5:23 Dukejere okwamagudure Jesusji. Akore: – Itonaregedu aredu bigodunure. Mato itabo awo akera bu biri keje pemegagoduwo, bikawo.
MAR 5:24 Dukodire Jesus uture nou Jairo apo. Boe emagare rugadu tugodui Jesus rekodaji dutabo. Nono nou boe emagare rugadu dukodire ere taiado pači Jesus apo.
MAR 5:25 Ia aredu kodure ebo Jesus rekodaji. Marigudu nou aredu kogodaere tu tu je. Nou aredu ku rere piji nono areme etorewudae mogadure. Mare nou aredu o akedukare piji. Re kimore piji meri jamedu boeji. Joru oto padure doze nou aredu ku rere piji dukeje. Kodire uture jorubo epage etae. Ure diero rugadu maku jorubo epage etai mare ekare nou aredu pemegago. Pegare kimo. Jorubo epage etaiwore ji dukeje nou kogodae ure turagado ji rugadu.
MAR 5:27 Nou aredu meardure Jesus rore jiboeji. Dukodire uture ae. Mare boe emagare nono Jesus apo. Dukodire nou aredu makore tudada. Akore: – Ikera otorogu jetumode awu Jesus ukudau areiaji dukeje ipemegagodumode. Nono nou aredu ure tugera raido. Nono iera otorogu jeture Jesus ukudau areiaji.
MAR 5:29 Ča nou aredu pemegagodure tači je. Nou aredu ku rekare piji pugeje. Jorduware tubemegagodure duji rugadu.
MAR 5:30 Ča Jesus jorduware ia turaga iogore ia boei duji. Dukodire ure tuwuredo taiwowo nou boei. Akore: – Ioguduba ure tugera raido ikudau areia ka?
MAR 5:31 Nou ure jorduwadowuge emagore ji. Egore: – Kodiba akagore aino? Boe emagare woe pagabo. Boe eiamedu boe ekera jeture akudau areiaji.
MAR 5:32 Mare Jesus aiwore nou boei nou iera jeture tugudau areia jiwu bagai.
MAR 5:33 Nou aredu jorduware tubemegagodure duji. Dukodire ure tuburedo Jesusji. Mare pagudure dukodire mororamagadure. Ure tubu jodo moto keje Jesus jokorai dukejere readodure turore jiboeji Jesus biagai.
MAR 5:34 Jesus makore ji. Akore: – Are. Ameartorure i dukodire apemegagodure. Amororamagadukaba. Ire akogodae akedudo apiji rugadu.
MAR 5:35 Jesus mako kimore nou areduji dukeje ime etaregodure etae Jairo uwai piji. Emagore Jairoji. Egore: – Akanaregedu rogu bokware. Amagokaba nou pagimijeraji pugeje. Piji.
MAR 5:36 Jesus meardure emagore jiboeji mare biapagakare ewadaruji. Makore Jairoji. Akore: – Amororamagadukaba. Ameartorudo i rugadu.
MAR 5:37 Nono uture Jairo apo, Pedro apo, Tiago apo, Tiago uwie João apo. Eture toro Jairo uwai ka. Mare nouia ture jorduwadowuge ukare etudo pudabo. Kodire etukare rugadu.
MAR 5:38 Jesus aregodure Jairo uwai ka Pedro apo, Tiago apo, João apo dukeje erdure boei nono. Nou boe etragudu rakare. Ekiarigodure rugadu etonaregedu bire kodi.
MAR 5:39 Nono Jesus ure turemo tumagowo ei. Akore: – Kodiba tagragudure? Kodiba tagiarigodure? Aredu bikare. Unudunure! Jorduware tumoduie jewodudo pugeje. Dukodire akoino unudunuie.
MAR 5:40 Mare nou boe erduware nou nogwaredu bire rugadu duji dukodire enogwarigodure Jesusji. Dukodire Jesus ure etudo nou bai piji. Nono ure tugeragu nou aredu učeji, ure tugeragu aredu uoji. Ure tugeragu Pedroji, Tiagoji, Joãoji jamedu. Nono ure turemo ebo nou aredu padure tadawu baito.
MAR 5:41 Jesus ure tugeragu nou aredu ieraji dukeje makore ji ewadaru tabo. Akore: – Talitá cumi! (Boe ewadaru tabo akore: – Are! Amugudo! Imire inagoino ai!)
MAR 5:42 Ča nou aredu ure tumugudo tači je. (Nou aredu o joru oto padure doze.) Nono ure turagojedo. Merure nou bai ja tada. Uče, uo erore ta je.
MAR 5:43 Nono Jesus makore ei ekawo boe ewie turore jiboeji boe ewiagai. Dukejere Jesus akore: – Awu tagonaregedu okwagedo.
MAR 6:1 Jesus uture Jairo uwai piji tuduwo turijodure kejewu Nazaré ba kurireu ka. Ure jorduwadowuge eture rekodaji.
MAR 6:2 Sábado meriji Jesus uture Judeu doge ere bato puiwu bai ka. Nonore ure boe erduwado nou bai tada. Nono boe emagare nou bai tada jamedu. Emeardure Jesus bataruji dukodire erore ta je. Mare erdu pemegakare ji. Egore: – Awu Jesus maragodumode ira jiwu imedu nure ema. Boe eimijera karegure ema. Čerduware uwobe eiamedu boei. Uče iere Maria. Uwie ime ekiere Tiago, José, Judas, Simão. Uwie areme emugu kimore woe awu pago ba kurireu keje rugadu. Ioguduba ure awu imedu jorduwado? Ioguduba ure turaga maku ai ro rakawo awu turo rakareu boeji? Boe eimijera karegure ema. Boe eimijera ukare jorduwado. Pagare akoino. Ro rakare mare pagatu je. Nono nou boe emeartorukare Jesusji.
MAR 6:4 Jesus makore nou boei. Akore: – Makore Pao Kurireu bataru jiwu makore jiboe pemegamode boei. Boe emeartorumode ji. Mare turijodure kejewu boe eda kejewuge etaidumodukare makore jiboeji. Uwobe uwai tadawu boe etaidumodukare makore jiboeji. Tu emage rugadu. Iage etaidumode ji.
MAR 6:5 Boe emeartorukare Jesusji nono. Dukodire Jesus roiwakare tuwo turo rakareu makado nono nou turijodure kejewu moto keje. Akore: – Kočare awu boe emeartorukare i. Ure ia boe epemegago. Mare emagakare. Ure tugera bu ewugeje dukeje ure epemegago rugadu. Nono Jesus uture nou boe epiji. Aregodure ia boe eda ka pugeje. Nono ure boe erduwado pugeje.
MAR 6:7 Nono makore ture jorduwadowuge ewagai. Enodo padure doze. Jesus aidure tuwo etudo tuwadaru tabo boe eiamedu boe etae. Ure edo pobe tu tu puapo boe etae. Ure eragado ewo bope doge etawuje boe epiji. Jesus makore nou ture jorduwadowugei.
MAR 6:8 Akore: – Tadukaba tage tabo. Tadukaba diero tabo. Tagaba tagoroe reko jamedu. Tadukaba ia tagedu jiwu tagaibo tabo. Tadudo tu meture taiwu tagudau areia tabo. Tadudo tu nou tawure tadawu tabo. Tadukaba ia tagudau tabo pugeje.
MAR 6:10 Tagaregodumode ia boe eda ka dukeje tardumode boei. Etaidumode tai dukeje tagamudo ebo ji nou tadumode kejewu meri ka.
MAR 6:11 Mare tagaregodumode ia boe eda ka pugeje mare nou boe ekimadumodukare tagabo. Etaidumodukare tuwiapagawo tawadaruji. Dukeje tadudo epiji. Tadumode epiji dukeje tawure okeakejewu to pui egai tawo moto urugudu barigu tawure okeakejewu piji nou boe erduwo Pao Kurireu aidukare nou erore jiboeji kodire umode tugera ra epiji.
MAR 6:12 Nono nou Jesus ure jorduwadowuge eture. Emagore Jesus bataruji boe ewiagai ewo tugera ra turo pegareu piji.
MAR 6:13 Nou Jesus ure jorduwadowuge ere bope doge ewari etawuje boe epiji. Ere boekaguru redo kogodureuge etaora keje nono Pao Kurireu ure epemegago rugadu.
MAR 6:14 Boe eiamedu boe emeardure nou Jesus rore jiboeji. Etaidure tuiorduwawo kakojiwu imedu ba ure ema. Iage egore: – Elias nure ema. Mare iage egore: – Boro. Elias karega. Ia makore Pao Kurireu bataru jiwu nure ema. Ure nono jaoboe makore Pao Kurireu bataru jiwuge emogadure. Mare ia boe egore: – Boro. João Batista nure ema. Jewodure pugeje! Dukodire rakare tuwo boe pemegado boei. Boe eimijera kurireu Herodes meardure nou inoduji jamedu.
MAR 6:16 Herodes akore: – João Batista nure ema rugadu. Ire João Batista itoru kado kodire bire. Mačare jewodure pugeje. Mare Herodes okware boeto. João Batista bire rugadu.
MAR 6:17 Marigudu nou Herodes ure tugeragu tumana Filipe oredujeji tumana piji toreduječe. Nou aredu iere Herodias. Herodes ure tugeragu ji tumana piji tumuguwo apo rugadu. Dukodire João Batista mako pegare Herodes rore aino duji. Mako raire ji. Akore: – Arokaba aino amana oredujeji. Paro kigodukare aino. Ameartoru bokware dukodire amugure nou aredu Herodias apo. Ainore João Batista akore. Herodias korigodure João Batista akoino duji dukodire Herodes makore to tugobaigaregei ewo João Batista kogudo tuwo tugu baičoreuto.
MAR 6:19 Herodias korigodu kimore João Batistaji dukodire aidure tuwo bito. Mare boe etaidure João Batistaji. João Batista ro pemega kuričigore boe eiamedu boeji. Dukodire Herodes pagudure turo pegawo João Batistaji dukodire ukare João Batista bito. Herodes aidure tuwiapagawo João Batista bataruji. Mare biapagare João Batista bataruji dukeje biagorore rugadu.
MAR 6:21 Ia meri keje Herodias jorduware nuba turomode tuwo João Batista bito. Herodes ure tuwadae towuje tuwiabutuwo tuwudure kejewu ari keje. Makore boe eimijerage eiamedu boe ewagai Galiléia moto keje. Etaregodure tuwaduwo apo nou meriji. Makore tugobaigarege eimijerage ewagai jamedu.
MAR 6:22 Ere bato pui dukeje Herodias onaregedu rerure nou boe eiamedu boe egai. Ure Herodes jakaredo pudui. Ure nou boe eimijerage eiamedu boe egaredo pudui jamedu. Dukodire Herodes makore nou nogwareduji. Akore: – Ameartorudo i. Kaba jiba akaidure? Imode akogwamagudure bagaiboe jamedu boe maku akai rugadu.
MAR 6:23 Nono Herodes mako pemegare ji pugeje. Akore: – Imagore jiboe imodukare udo tugirimi. Imode maku. Imode akaidure jiboe maku akai rugadu. Akaidumode ia ino motoji dukeje imode ino moto kado puiato. Imode maku akai rugadu.
MAR 6:24 Nono nou nogwaredu uture epiji tuje bagai. Makore tujeji. Akore: – Kaboba bagaiba inogwamagudumode Herodiji? Uče makore tonaregeduji. Akore: – Akogwamagududo João Batista aora bagai.
MAR 6:25 Dukodire nou nogwaredu uture tuibagi tumara tabo Herodes ae. Akore: – Itaidure João Batista aoraji. João Batista aora bu ia baku keje kuri aino rugadu awo aora maku inai.
MAR 6:26 Herodes meardure nou inoduji dukeje kiarigodure rugadu. Aidukare tuwo João Batista bito. Mare makore nou boe egai tumoduie nou nogwaredu okwamagudure bagaiboe jamedu boe maku ai rugadu. Nou makore bagaiboe makudumoduie ai rugadu. Dukodire Herodes aidukare tuwo tuwadaru pogurudo.
MAR 6:27 Dukodire makore ia tugobaigare bagai uwo João Batista bito, uwo aora kado piji, uwo João Batista aora reko pudae. Dukodire nou tugobaigare uture João Batista bagai nou baičoreu ka tuwo João Batista bito. Ure João Batista itoru kado kodire ure bito.
MAR 6:28 Dukejere tugobaigare aregodure João Batista aora tabo. Padure baku keje. Nono ča ure maku nou nogwaredu ai. Dukeje čare nou nogwaredu ure reko toro tuje ae rugadu.
MAR 6:29 Nono ča João Batista utugarege emeardure nou inoduji dukeje etaregodure tugimijera bireu bagai. Nono ča ere tugeragu bireuji. Ere reko toro to moto ka tuwo tugu toro to moto keje.
MAR 6:30 Uture Jesus bataru tabowuge ere tugirimi Jesus ae pugeje. Enodo padure doze. Ereadodure turore jiboeji, tumagore jiboeji Jesus biagai.
MAR 6:31 Boe emagare nono. Etaregodure tumagowo Jesusji. Iage eture mare iage etaregodure pugeje tumagowo Jesusji jamedu. Dukodire Jesus roiwakare tuwo boe kowuje nou boe doge eigoia. Nou ure jorduwadowuge enogwagekare jamedu. Dukodire Jesus makore ei. Akore: – Paduwo ia boe eda tuginaiwu ka awu boe epiji pawo pagamudo.
MAR 6:32 Dukodire eture ika kurireu tabo ia boe maereu ka nou boe epiji tuwo tamudo.
MAR 6:33 Mare boe erdure ei rugadu. Dukodire eregodure ika kurireu me keje taregoduwo nou ika kurireu otodai tubagawo ewagai toro. Nou boe emagare toro. Etaregodure boe eda jamedu boe piji.
MAR 6:34 Jesus aregodure nou pobo maereu okwa ka ture jorduwadowugebo. Mare boe emagare nono marigudu. Jesus ure tudawuje ika kurireu piji dukeje jordure nou boei rugadu. Okudugodure ebo rugadu. Akore eie nono ovelha doge emogadure. Jetu pemegare eiwu bokwaie. Mare ovelha ji karega akoino. Nou boe eroiwakare tuwo tuginorudo. Dujire akoino. Dukodire mako raire ei tuwo erduwado boe jamedu boeji.
MAR 6:35 Merirekodutabo Jesus ure jorduwadowuge etaregodure ae. Enodo padure doze. Emagore Jesusji. Egore: – Merirekodure. Awu boe etudo awu boe maereu piji. Boe bokware woe du kodi.
MAR 6:36 Awu boe etudo ia boe etae ewo tugeragu ia tuge roguji.
MAR 6:37 Mare Jesus makore nou ture jorduwadowugei. Akore: – Boro. Taigoiare tamode enogwagedo. Egore: – Awu boe emagare. Boe maragodumode kejewu arimode oito dukeje o dieromode tuwo akirodo boe ekeji awu boe ekeče. Mare pago diero bokware. Nuba paromode pawo enogwagedo?
MAR 6:38 Nono Jesus makore ei. Akore: – Page amireu rogure? Tagaiwodo bagai. Dukodire Jesus ure jorduwadowuge etaiwore amireu bagai. Erdu iaji dukeje ere reko Jesus ae. Egore: – Akaiwodo. Čerdure jiwu amireu ure ikera aboudure tu je. Page karo rogu ere pobetu je.
MAR 6:39 Nono Jesus makore nou boei ewo tudo pui ewo tudo cinquenta ewo tudo cem tu tu tumuga boe keje.
MAR 6:40 Dukodire nou boe eiamedu boe ere tudo pui. Ere tudo cinquenta ere tudo cem tu tu nou tumuga boebutu keje.
MAR 6:41 Nono Jesus ure tugeragu nou amireuji nou kare kugurei. Nou amireu ure ikera aboudure. Nou kare kugure ere pobetu je. Nono Jesus aiwore baruto. Dukeje Jesus imadure Pao Kurireu apo nou amireu paru tabo nou kare kugure eparu tabo jamedu. Nono ure nou amireu kado tuwo maku nou ture jorduwadowuge etai ewo pedo nou boe dogei jamedu. Nono Jesus ure nou kare ekado jamedu nou ture jorduwadowuge ewo pedo ei jamedu.
MAR 6:42 Jesus koiare ure nou boe doge eke kodudo tugori boe eiamedu boe etai. Boe eiamedu boe enogwagere rugadu. Ekuredure egarere pudui rugadu.
MAR 6:43 Ča nou Jesus ure jorduwadowuge ere nou kadarabo doge korau nou boe eke kobo tabo. Nou kadarabo doge enodo padure doze nou boe eke kobo tabo rugadu.
MAR 6:44 Ime enodo padure cinco mil nono togwage tabo nou meriji.
MAR 6:45 Kuri je dukeje Jesus makore nou ture jorduwadowugei ewo turemo ika kurireuto etuwo tododai. Ekurugoduwo nou pobo maereu kajeje toro bakowu ka toro Betsaida ba kurireu ka. Jesus rakojere eiageje tumago tabo nou boei tuwo etudo.
MAR 6:46 Jesus uture nou boe epiji dukeje Jesus ruture toro ia tori ao ka tuginaigodu tumagowo Pao Kurireuji.
MAR 6:47 Boečodure dukeje nou Jesus ure jorduwadowuge eture tabowu ika kurireu mugu kimore nou pobo maereu oiadada. Mare Jesus rakoje kimore toro nou tori aogeje tuginaigodu.
MAR 6:48 Barogwakododukare raga dutabo Jesus jordure ture jorduwadowugei toro pobo maereu oiadada. Bakuru jore etogi. Boe korire nou bakuruji rugadu dukodire ere tubeodo pudui traiga tabo nou ikaji nou bakuru togi. Toro baregodutabo, Jesus uture toro tumeru tabo pobo aoji. Ča ure tugoduiago toro etododai.
MAR 6:49 Mare nou ture jorduwadowuge erdure Jesus merure pobo aoji. Emeardaere ia boe pegareu nuie ema. Dukodire epagudugodure. Nono etokudure tubagudu koia če.
MAR 6:50 Eiamedu boe epagudugodure rugadu. Ča Jesus makore ei. Akore: – Taragado tai! Imi rugadu reo. Tabagudukaba.
MAR 6:51 Nono ure turemo ika kurireuto ebo. Ča nou bakuru rakareu akedure tači je. Nou ure jorduwadowuge erore ta je.
MAR 6:52 Jesus ure boe enogwagedo jawu meriji. Boe ekuredure rugadu dukodire egarere pudui. Mare nou ure jorduwadowuge etaidukare tumeartoruwo ji dukodire erduwakare Jesus rore jiboeji. Pao Kurireu maragodae reno. Ča Jesus merure pobo aoji, ure bakuru rakareu akedudo jamedu mare nou ure jorduwadowuge etaidukare tumeartoruwo ji raga dukodire erduwakare nou Jesus rore jiboeji pugeje. Pao Kurireu maragodae reno pugeje.
MAR 6:53 Ekurugodure nou pobo maereu kajeje dukeje etaregodure Genesaré moto ka. Nonore ere to ika kurireu bu. Ere kogudo.
MAR 6:54 Ere tudawuje to ika kurireu piji dukeje boe erdure Jesusji. Erduware Jesus ure ema duji.
MAR 6:55 Dukodire nou boe eregodure nou boe eda jamedu boeji tuwo nou boe ewie Jesus aregodure duji. Dukodire boe eiamedu boe etaregodure tuwobe kogodureugebo Jesus ae. Nou kogodureuge epadure tugudau kodo keje.
MAR 6:56 Jesus uture nou boe eiamedu boe eda ka. Uture boe eda ka dukeje boe etaregodure ae kogodureugebo. Enogwamagudure Jesusji kogodureuge ewo tugera bu Jesus ukudau areia okwa keje. Uture ba kurireu ka dukeje boe etaregodure ae kogodureugebo nono jamedu. Enogwamagudure Jesusji kogodureuge ewo tugera bu Jesus ukudau areia okwa keje jamedu. Nono nou ure tugera bu Jesus ukudau areia okwa kejewuge eiamedu boe epemegagodure rugadu.
MAR 7:1 Ia fariseu doge etaregodure Jerusalém piji Jesus ae. Ia jorduware Judeu doge eno bakaru jiwuge etaregodure Jerusalém piji Jesus ae jamedu. Ere bato pui Jesus ae.
MAR 7:2 Erduware Jesus ure jorduwadowuge enogwagere tugera tabo duji. Nou fariseu doge etaidure boe ewo tugera kabi nono mariguduwuge tuwobe ero mogadure. Judeu doge erore tu tu aino togwagewo. Mare nou Jesus ure jorduwadowuge erokare nono ero mogadure.
MAR 7:3 Marigudu fariseu doge, Judeu doge eiamedu boe erore nou mariguduwuge tugimijerage ere maku pudaiwu bakaru tadawu ero boeji tu tu je. Dukodire marigudu ere tugera kabi nono mariguduwuge Judeu doge ero mogadure togwagewo tu tu je. Ainore erore jii aino.
MAR 7:4 Emode akirodo tugeji nou boe jeto tadawu bai piji dukeje emode kabi nono mariguduwuge Judeu doge ero mogadure jamedu tu tu je. Mariguduwuge Judeu doge eno bakaru kurire dukodire erore jiboe makare rugadu. Kodire ere turuwobo kabi tu tu je. Ere tudaria kabi tu tu je. Ere tubagaga kabi tu tu je. Ere tubadure kejewu kamoreu kabi tu tu je jamedu. Emodukare tugera ra turore aino dupiji rugadu. Turoia jire eroino tu tu je tuwo nou jamedu boe pemegado turowo nou to bakaru tadawu turo boeji tu tu je.
MAR 7:5 Dukodire nou fariseu doge, nou jorduware Judeu doge eno bakaru jiwuge etaidukare nou Jesus ure jorduwadowuge ekare tugera kabi duji. Enarare Jesusji. Egore: – Kodiba nou are jorduwadowuge emeartorukare mariguduwuge pawobe emagore jiboeji? Erokare nono nou mariguduwuge pawobe ero mogadure. Enogwagere mare ekare tugera kabi nono nou mariguduwu paro mogadure. Ukare turugadu.
MAR 7:6 Mare Jesus makore ei. Akore: – Tare boe erduwado mare tameartorukare tawadaruji. Boe jokodu jire Isaías akoino marigudu. Marigudu rugadu ure pawobe ewie taromode tameardaemode jiboeji. Marigudu Isaías akore: – Pao Kurireu ure boe ewie rugadu. Akore: “Awu boe emagore togwa tabo tumeartoruie i mare emeardae remawu ure tuginai rugadu toro imeardae piji rugadu.
MAR 7:7 – “Awu boe ere tubu jodo tumago pemegawo i mare pagare egoino. Ere boe erduwado bakaruji. Egore iwadaruie. Mare pagare egoino. Ia tumagore jiwu bakaru jire nou boe egoino.”
MAR 7:8 Jesus makore nou fariseu dogei pugeje. Akore: – Taro kodure nou imedu Isaías ure boe ewie jiboeji rugadu. Tare tagera ra Pao Kurireu bataru remawu piji tameartoruwo tu tameardaeji. Pao Kurireu bataru ji karega tagagoino.
MAR 7:9 – Jeroreuge nure tagi. Tamago moture tawo boe emeartorudo tawadaruji ekoduwo nou tameardae rekodaji emeartorukawo Pao Kurireu bataru remawuji.
MAR 7:10 Marigudu Moisés ure pawobe erduwado Pao Kurireu bataru remawuji. Akore: “Tameartorudo taoji tajeji. Ča nou boe mako pegamode tuoji tujeji tuwo epogurudo dukeje bitoduiago.” Ainore Pao Kurireu akore jawu tawobei.
MAR 7:11 Mare tagi tare boe erduwado ia bataru tuginaiwuji boe ekawo tugera maku tuo ai tuje ai. Tagagore imedu makomoduie tujeji tuoji tumodukaie tugera maku etai tumoduie toe maku Pao Kurireu ai kodi. Dukodire tumodukaie tugera maku tuo ai tuje ai. Ainore boe eromoduie.
MAR 7:12 Mare pagare egoino. Etaidukare tuwo tugera maku tuje ai tuo ai dukodire egoino.
MAR 7:13 Taigoiare tare boe egodo aino. Dukodire čare tagaidukare Pao Kurireu bataruji rugadu. Tameartorukare ji. Tagaidure tagoduwo nou tameardae rekodaji. Ainore tarore ia taroji jamedu. Tare taro udo tuginai Pao Kurireu meardae remawu piji rugadu.
MAR 7:14 Nono Jesus makore boe makareuge etae ewo bato pui pudae. Makore nou boei. Akore: – Taiamedu boe tawiapaga pemegado iwadaruji. Iwo tarduwa kuričigodo iwadaruji.
MAR 7:15 Nou tagwagemode jiboe umodukare tabegado Pao Kurireu jakai dukodire tawujedumodukare tago bakaru tadawu taro piji. Mare nou taiabijiwu tawadaru pegareu umode tabegado Pao Kurireu jakai dukodire tawujedumode tago bakaru tadawu taro piji jii je.
MAR 7:17 Dukeje Jesus uture nou boe epiji. Ure turemo ia baito. Nono nou ure jorduwadowuge enarare Jesusji uwo tuiorduwado kaba jiba akoino nou boei.
MAR 7:18 Jesus makore nou ture jorduwadowugei. Akore: – Tarduwa bokware nono nou boe emogadure. Tawiapaga pemegado iwadaruji. Tamodukare tabegado tage tabo rugadu.
MAR 7:19 Tamode tage ko dukeje taguredumode. Nono umode tudawuje tabiji. Mare tabemega kimomode tarowo boe eno bakaru tadawu boe ero boeji. Tage umodukare tameardae pegado boei. Tagoino dutabo Jesus ure nou Judeu doge eno bakaru tadawu ia ero akedudo. Nou bakaru akore ekaiago ia tuge kowuje tuwo tubemegado turowo nou to bakaru tadawu boe ero boeji. Aino čare Jesus ure nou bakaru akedudo. Boe eke jamedu boe uie turugadu.
MAR 7:20 Nono Jesus makore ei pugeje. Akore: – Boe ero pegareu umode tudawuje boe emeardae piji. Nou inodu koiare umode boe epegado Pao Kurireu jakai dukodire etawujedumode to bakaru tadawu turo piji jii je.
MAR 7:21 Du nou boe emeardae pegareu aregodumode epiji rugadu. Emode nou tumeardae tawuje turo pegawo rugadu. Ero pegamode tieribari tabo. Ekiwogumode. Emode boe ewido.
MAR 7:22 Eribarimode toreduje piji toredu piji. Enogwa kidumode tu pudai tuwo toe kurido tumedage epiji. Emode turo pegareu kurido rugadu. Boe emode boe ekiripagado. Boe etaora bai baimode tuge kurure pudui dutabo. Boe ekorigodumode boe enoe keje. Boe emago pegamode tumedage eroji. Boe enojaromode tuwadaruji. Boe erduwa bokwamode turore jiboeji.
MAR 7:23 Boe emode tumeardae pegareu tawuje turowo awu boe ero pegareu jamedu boeji. Awu boe ero pegareu koiare umode boe epegado rugadu Pao Kurireu jakai dukodire etawujedumode to bakaru tadawu turo piji jii je.
MAR 7:24 Nono Jesus uture nou boe epiji. Uture toro ia moto ka. Puredure Tiro ba kurireuji. Nono ure turemo ia boe ewaito. Aidure tuwo tamudo. Aidukare boe erduwawo turagojere nono duji mare boe erdure ure turemo nou bai toduji.
MAR 7:25 Ia aredu jorduware Jesus rakojere nono duji. Bope uwari meture nou aredu onaregedu tada. Dukodire uče aregodure Jesus ae. Ure tubu jodo moto keje Jesus jokorai.
MAR 7:26 Nou aredu Judeu kejewu aredu karegure ema. Boture Fenícia moto keje puredure Síria motoji. Okwamagudure Jesusji uwo nou bope uwari tawuje tonaregedu aredu piji.
MAR 7:27 Mare Jesus makore ji. Akore: – Boe etore enogwagewo jii tuguredu ka. Ukare turugadu boe ewo tore eke rogu tawuje epiji tuwo maku tagu ariga doge etai.
MAR 7:28 Nou aredu jorduware boe etore ji karega Jesus akoino duji. Jorduware Judeu dogeire Jesus akoino duji. Jesus aregodure moto ka tumagowo Judeu dogei rugadu. Nono nou aredu makore Jesus bataru jipagi. Akore: – Boe rugadu. Mare ariga doge epuredumode boe etorei tuwo nou buture ira kudawu boe etore eke gigudu rugadu boe kowuje.
MAR 7:29 Jesus akore: – Boe jokodu. Atudo aibagi awai ka akanaregedu aredu bagai. Ire nou bope uwari tawuje piji dukodire akanaregedu pemegagodure rugadu. Nou bope uwari ure tudawuje piji.
MAR 7:30 Dukodire nou aredu ure tugirimi tuibagi tuwai ka tuiorduwo tonaregeduji. Aregodure tuwai ka dukeje jordure tonaregedu padure kamoreu keje duji. Pemegagodure. Nou bope uwari ure tudawuje piji rugadu.
MAR 7:31 Nono Jesus uture nou Tiro ba kurireu kejewuge epiji. Uture Sidom ba kurireu ka. Dukeje merure boe eda kejewu motoji. Boe eda enodo padure dez nono nou moto keje. Nono aregodure nou Galiléia pobo maereu okwa ka.
MAR 7:32 Nonore ia boe etaregodure Jesus ae ia bija bokwareu imedu apo. Roiwakare tumagowo jamedu. Nono nou boe enogwamagudure Jesusji uwo tugera bu nou imedu keje pemegagoduwo.
MAR 7:33 Dukodire Jesus ure taradaino boe epiji nou imedu apo. Jesus ure tugera bu nou imedu bija keje pudogi. Dukejere ure todoguru bu tugerako keje. Nono ure raido nou imedu eru ka.
MAR 7:34 Nono Jesus aiwore baruto. Ure ake tawuje tubiji. Dukejere makore Judeu doge ewadaru tabo. Akore: – Efatá. (Boe ewadaru tabore boe egore: “Uwo tuiado” aino.)
MAR 7:35 Ča nou imedu bija pemegagodure pugeje tači je. Meardure boe emagoji rugadu. Makore jamedu. Mako pemegare.
MAR 7:36 Nono Jesus makore nou boei ekawo boe ewie nou turore jiboeji. Makore ei mare emeartorukare. Ere boe ewie rugadu.
MAR 7:37 Biapagare nou Jesus ro jiwuge eiamedu boe erore ta je. Egore: – Awu Jesus ro pemegare rugadu! Rakare rugadu kodire umode bija bokwareuge ewija epemegago emearduwo boeji erduwawo boe emagore pudui duji. Rakare tuwo mako bokwareuge emagodo pugeje.
MAR 8:1 Ia meri keje boe ere bato pui pugeje tuwiapagawo Jesus bataruji. Emagare rugadu. Enodo padure quatro mil. Čare eke akedure dukeje Jesus makore nou ture jorduwadowuge etae. Nono ča makore ei.
MAR 8:2 Akore: – Inogudugodure awu boebo. Merire pobe metia bokware ei woe itabo. Woe boe eke bokware rugadu ewo ko.
MAR 8:3 Itaidukare iwo etudo tuguri bioro tabo mare eragamodukare tumeruwo awaraji pugeje. Iage etaregodu jaere woe itae.
MAR 8:4 Nou Jesus ure jorduwadowuge egore: – Nou boe emagare rugadu woe pagabo. Nuba čeromode woe boe maereuto boe eke bagai nou boe ekeje?
MAR 8:5 Jesus akore: – Nuba tage amireu rogure tu je? Egore: – Amireu oto padure sete.
MAR 8:6 Nono Jesus makore boe eiamedu boei ewo tumugudo moto keje. Dukejere ure tugeragu nou amireuji. Nono imadure Pao Kurireu apo nou amireu paru tabo. Dukejere ure nou amireu kado. Ure maku ture jorduwadowuge etai ewo reko boe etae. Dukodire ere pedo boe eiamedu boei rugadu.
MAR 8:7 Ia kare kugurere nono jamedu. Jesus imadure Pao Kurireu apo nou kare kugure eparu tabo. Dukejere makore ture jorduwadowugei ewo nou kare kugure pedo boe eiamedu boei jamedu.
MAR 8:8 Nono ča nou boe eiamedu boe enogwagere. Egarere pudui rugadu tuguredure duji. Emagare. Enodo padure quatro mil. Nono ča nou Jesus ure jorduwadowuge ere kadarabo korobadureugedo sete nou boe eke kobo tabo. Nono Jesus makore nou boei ewo tugirimi tuibagi tuwai ka pugeje.
MAR 8:10 Dukejere Jesus ure taredo ika kurireuto ture jorduwadowugebo. Eture toro Dalmanuta moto ka.
MAR 8:11 Ia fariseu doge etaregodure Jesus ae. Ere tunarado ji tumago rakareu tabo tuiorduwo jorduwamode rugadu dubagai. Dukodire enogwamagudure Jesusji uwo ia turo ro rakareu to tiagai tuiorduwo nouia ro rakareu aregodure rugadu Pao Kurireu piji du bagai.
MAR 8:12 Mare Jesus jorduware nou boe emeartorukare pudui duji dukodire ure ake ta tubiji tugiarigodure dukodi. Nono akore: – Kočare awu boe etaidure tu iro rakawo tuiorduwawo i rugadu. Boro! Iromodukare ia iro rakareuji rugadu! Pagare egoino. Etaidukare tumeartoruwo i rugadu.
MAR 8:13 Dukodire uture epiji. Ure taredo ika kurireuto pugeje tugurugoduwo nou pobo maereu okwa ka.
MAR 8:14 Jesus ure jorduwadowuge ewiagodure tuwo tugeragu ia tuge amireuji pugeje. Dukodire eke akedugodure. Eke amireure mitotu je nou ika kurireu tada.
MAR 8:15 Jesus makore ei. Akore: – Tawiapagado tawo tado tarugadu. Fariseu doge emeardae ure nono fermento mogadure. Herodes meardae ure nono fermento mogadure jamedu. Tameardaekaba nono nou emeardae mogadure.
MAR 8:16 Dukodire nou Jesus ure jorduwadowuge emagore pui kaba jiba akoino nou fermento jiboeji. Egore pui: – Pawiagodure page amireu piji dukodire Pagimijera akoino pai.
MAR 8:17 Jesus jorduware egoino pui duji. Nono unaragodure ei. Akore: – Kodiba tamagore pui nou tage amireu bokwaie duji? Kočare tarduwa bokware kimo? Tagaora rakare tarduwawo iwadaruji.
MAR 8:18 Taekure tarduwo irore jiboeji. Tawijare tamearduwo imagore jiboeji. Mare tawiagodure irore jiboe piji, imagore jiboe piji marigudu.
MAR 8:19 Ire boe eke rogu kado dukeje nou boe eke kodure kuri boe ekori. Ire boe enogwagedo nou boe eke roguji. Nou boe enodo padure cinco mil. Enogwagere dukeje tare boe eke kobo tugu kadaraboto boe etuwo tabo. Nuba tare korau kadarabo ure nou boe eke kobo tabo? Egore: – Oto padure doze.
MAR 8:20 Jesus makore ei pugeje. Akore: – Ča ia meri keje ire boe enogwagedo pugeje. Nou amireu ure sete. Ire kado boe etai pugeje du nou ime enodo padure quatro mil. Ča nuba tare korau kadarabo dogere nou boe eke kobo tabo? Egore: – Oto padure sete.
MAR 8:21 Jesus akore: – Kočare tarduwa bokware imeardae remawuji kana?
MAR 8:22 Jesus aregodure ture jorduwadowugebo Betsaida ba kurireu ka. Nono ia boe etaregodure Jesus ae ia joku bokwareu imedu apo. Enogwamagudure Jesusji uwo tugera bu keje.
MAR 8:23 Jesus ure tugeragu nou joku bokwareu imedu ieraji. Uture apo toro nou ba kurireu piji tugiogowo nou imeduji. Nono Jesus ure todoguru bu nou imedu joku keje. Nono Jesus ure tugera bu nou imedu keje jamedu. Dukejere unarare ji. Akore: – Ardure iaboeji?
MAR 8:24 Nou imedu aiwore. Dukeje akore: – Uu. Iordure ia boei. Mare iorduwakare ei. Ere nono igurure tumeru tabo mato, toro, mato, toro, mato.
MAR 8:25 Nono Jesus ure tugera bu nou imedu joku keje. Dukejere nou imedu aiwore pugeje. Čare joku pemegagodure. Jordure boeji rugadu.
MAR 8:26 Nono Jesus makore ji utuwo tuibagi tuwai ka. Akore: – Akaba akirimi ba kurireu ka. Atudo jii toro awai ka.
MAR 8:27 Dukejere Jesus uture ture jorduwadowugebo nou ba kurireu piji toro ia boe eda ka. Nou boe eda puredure Cesaréia Filipe ba kurireuji. Nou awaraji Jesus unarare nou ture jorduwadowugei. Akore: – Nuba boe emeardaere i?
MAR 8:28 Egore: – Boe egore João Batista nuie aki. Nouiage egore Elias nuie aki. Nouiage egore ia mariguduwu makore Pao Kurireu bataru jiwu nuie aki.
MAR 8:29 Nono Jesus unarare ei pugeje. Akore: – Tagi. Nuba tameardaere i? Pedro akore: – Umode boe ekinorudowu nure aki rugadu.
MAR 8:30 Nono Jesus akore: – Tamagokaba awu tameardaere idu jiboeji boe ewiagai.
MAR 8:31 Nono Jesus ure nou ture jorduwadowuge erduwado pugeje. Akore: – Imedu Onaregedu nure imi. Judeu doge eimijerage erdu pegamode i. Nou ure Judeu doge enomea maku Pao Kurireu aiwuge eimijerage erdu pegamode i. Jorduware Judeu doge eno bakaru jiwuge erdu pegamode i. Emode boe pegado i rugadu. Emode iwido. Mare merimode pobe metia bokware dukeje iewodumode pugeje.
MAR 8:32 Jesus mako pemegare nou tuwadaruji nou ture jorduwadowuge ewiagai erduwawo boe mode pudui duji. Mare Pedro aidukare nou Jesus bataruji. Ure tumegido Jesus apo kuri nono tumagowo ji. Akore: – Boe modukare aino ai.
MAR 8:33 Mare Jesus ure tumegido. Nono aiwore nou ture jorduwadowuge eiamedu boei. Dukejere mako rakare Pedroji. Akore: – Akaradai ikoda piji Satanás. Ameardae jire inagoino. Ameardaere nono boe emeardae mogadure. Boe emeardaekare nono Pao Kurireu meardae mogadure.
MAR 8:34 Nono Jesus makore nou ture jorduwadowuge ewagai ewo tuburedo pudui. Makore ia boe ewagai jamedu. Dukejere makore ei. Akore: – Ia tagi tagaidumode tameartoruwo i dukeje tagera ra taro pegareu piji, tawia ra tameardae pegareu piji, tagaidure jiboe piji. Tado tarugadu boe pegawo tai nono boe pegamode i dumogadure. Iwimode ipo padure pugajejewu keje. Dukodire inagoino tai tawo tado tarugadu tagoduwo itabo.
MAR 8:35 Boe ewiapagamode tuwo boe pemegado tu pudui turaga tabo dukeje nou boe eraga akedumode epiji rugadu. Egare remawu modukare. Emodukare tuginorudo bope doge eda kejewu joru pegareu piji rugadu. Mare boe ewiapagamodukare tumeardaeji pugeje tuwo tugera ra turo pegareu piji tumeardae pegareu piji tuwo tumagu inai tuwo boe erduwado iwu bakaru pemegareuji dukeje Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto jamedu.
MAR 8:36 Imedu umode toedo boe jamedu boeče. Mare nou oe umodukare imedu rutudo baruto. Ča nou imedu biagorokare tuwo tumeartorudo Pao Kurireuji. Biagorore tu tuwo toe kurido pagatu je. Mare paga karega inagoino. Boe emodukare turudu morido toe tabo.
MAR 8:38 Ro pegareuge emagare rugadu. Ro pegareuge tieribari tabowuge emagare rugadu. Mare ia boe epogurure tumagowo iwu bakaruji nou boe ewiagai dukeje imodukare ikeragu ei itae. Itaregodumode Pao Kurireu o jorugu pemegareu tabo Pao Kurireu utugarege baru tadawugebo dukeje imodukare ikeragu ei. Nou Pao Kurireu o jorugu pemegareu urugure Pao Kurireu kujegajeje. Imode ikirimi mato dukeje urugumode nou aregodumode itabowu Pao Kurireu utugarege baru tadawuge ekujegajeje jamedu.
MAR 9:1 Nono Jesus makore ture jorduwadowugei pugeje. Akore: – Iwo tawie. Pao Kurireu umode boe eimijera kurireudo pudumi dukeje aregodumode turaga tabo rugadu. Ia tagi tardumode awu inagoino jiboeji. Tawimodukare jii toro tardumode nou Pao Kurireu roino jitu ka.
MAR 9:2 Meri oto padure seis Jesusji pugeje. Nono ča uture Pedro apo, Tiago apo, João apo toro ia tori ričoreu ao ka. Tu emagere edure nono nou tori aogeje. Nono nou Jesus je ure tudo tuginai. Nou ure jorduwadowuge erdure ji rugadu. Mare Pao Kurireu koiare ure Jesus je udo tuginai.
MAR 9:3 Pao Kurireu ure Jesus ukudau areia kigadu maereudo ji. Kigadure rugadu kigadureboe jamedu boe kori.
MAR 9:4 Nono ča rore puku ei ime edure nono ebo. Eliare Moisere edu nono tumago tabo Jesusji.
MAR 9:5 Nono Pedro makore Jesusji. Akore: – Ikimijera. Ure turugadu paeduwo woe. Čemode ia mačebradudo pobe metia bokware. Iamode akai. Iamode Moisés ai. Iamode Elias ai jamedu.
MAR 9:6 Pedro, Tiago, João epagudugodure dukodire Pedro makore aino. Dukodire erduwakare tumagomode jiboeji.
MAR 9:7 Nono ia boetugu ure turawuje etae. Nou boetugu ure taiado ebo. Nono emeardure ia boe emagoji nou boetugu piji. Akore: – Imeardu kurire jiwu itonaregedu reo. Tawiapaga pemegado awu itonaregedu bataruji.
MAR 9:8 Nono ere tie maedo mare erdukare ia boei pugeje. Tu emagere eragojere nono Jesus apo.
MAR 9:9 Nono ere turawuje nou tori ao piji. Dukejere Jesus makore ei. Akore: – Tareadodukaba tardure jiboeji boe ewiagai. Imedu Onaregedu nure imi. Iewodumode pugeje dukeje tareadodumode awu tardure jiboeji boe ewiagai.
MAR 9:10 Emeartorure awu Jesus bataruji. Mare puire enarare. Egore: – Nuburedu jiba akoino pai tuiewodumoduie pugeje?
MAR 9:11 Dukodire enarare Jesusji. Egore: – Kodiba pawobe erduware Judeu doge eno bakaru jiwuge egore Elias aregodumoduie nou umode boe ekinorudowu otodai?
MAR 9:12 Jesus akore: – Pao Kurireu makore boei marigudu Elias aregodumoduie boetoji rugadu. Umoduie boe ewie ewo tudo turugadu nou umode boe ekinorudowu aregoduwo etae rugadu. Mare Pao Kurireu bataru makore boei marigudu boe pegamoduie nou Imedu Onaregeduji. Boe etaidumodukaie nou Imedu Onaregeduji.
MAR 9:13 Mare inure tawie. Nou Pao Kurireu makore jiwu imedu Elias aregodure marigudu. João Batistare ema. Rore nono Elias ro mogadure. Mare boe etaidukare ji. Pao Kurireu ure boe ewie marigudu ainoie boemoduie nou Eliaji. Nou Pao Kurireu bataru jeture pudui rugadu João Batistaji.
MAR 9:14 Nono Jesus aregodure nouia ture jorduwadowuge etae Pedro apo, João apo, Tiago apo. Boe emagare nono nou Jesus ure jorduwadowugebo. Ia jorduware Judeu doge eno bakaru jiwuge edure nono ebo jamedu. Etokire pui.
MAR 9:15 Boe erdure Jesusji dukeje egarere pudui. Nono eregodure togi. Ekimadure Jesus apo.
MAR 9:16 Mare Jesus unarare ture jorduwadowugei. Akore: – Kaba tawadaru jiba tagagoino nou jorduware Judeu doge eno bakaru jiwugei?
MAR 9:17 Nono ia imedu rakojere boe etoiadada. Makore Jesusji. Akore: – Ikimijera. Itaregodure itonaregedu apo woe are jorduwadowuge etae. Bope uwari meture awu itonaregedu tada. Dukodire itonaregedu roiwakare tumagowo.
MAR 9:18 Nou bope uwari ro pegare itonaregeduji. Ure butudo moto ka. Nou itonaregedu jataro aregodure jabiji. Ure tora reko pui. Nono rakagodure. Inogwamagudure are jorduwadowugei ewo nou bope uwari pegareu barigu piji mare ero čekare ji.
MAR 9:19 Jesus makore ei. Akore: – Tare ikiarigo. Tameartorukare rugadu. Iragoje raimodukare tagabo. Nuba tagaidure irowo tameartoruwo i? Nono Jesus makore iagei. Akore: – Mato nou iparedu apo itae!
MAR 9:20 Dukodire boe ere nou iparedu reko Jesus ae. Nou meture nou iparedu tadawu bope uwari jordure Jesusji dukeje ure nou iparedu butudo moto ka pugeje. Magadugodure moto keje. Nou iparedu jataro aregodure ja piji. Dukodire Jesus makore nou iparedu uoji jamedu.
MAR 9:21 Akore: – Marigudu na nou bope roino akanaregeduji? Nou iparedu uo akore: – Marigudu rugadu. Imedu rogu biagare tu je dutabore nou bope uwari roino ji jii aino.
MAR 9:22 Mai karega roino ji. Ure barigu joruto biwo joru tada. Dukeje ure barigu poboto biwo pobo tada. Inogwamagudunure ai. Akogududo čedabo. Aroiware dukeje awu itonaregedu pemegago.
MAR 9:23 Jesus akore: – Uu. Mare ameartorumode rugadu dukeje aroiwamode boe jamedu boeji.
MAR 9:24 Nou imedu aidure rugadu. Akore: – Imeartorure ai. Imeardae pegareu tawuje ipiji imeartoru raiwo ai rugadu.
MAR 9:25 Jesus jordure nou boe emagare turegodu tabo mato pudae duji. Nono mako pegare nou meture nou iparedu tadawu bope uwariji. Akore: – Bope uwari nure aki. Mako bokwareu nure aki. Bija bokwareu nure aki. Atudo awu iparedu piji. Amodukare aremo to pugeje!
MAR 9:26 Nou bope uwari kudugodure. Nono ure nou iparedu butudo moto ka pugeje. Mare ure tudawuje nou iparedu piji rugadu. Nono nou iparedu ure nono bireuboe mogadure. Nou boe egore: – Bire rugadu!
MAR 9:27 Mare Jesus ure tugeragu nou iparedu ieraji. Dukejere ure udo turagojedo pugeje.
MAR 9:28 Nono Jesus ure turemo ia baito. Nono nou ure jorduwadowuge enarare Jesusji. Egore: – Kodiba čeroiwakare čewo nou bope uwari tawuje nou iparedu piji?
MAR 9:29 Jesus akore: – Boe emagomodukare baruto dukeje eroiwamodukare tuwo awu bope uwari tawuje boe epiji. Boe enogwamaguduwo baruto nono boe eroiwamode tuwo bope uwari tawuje piji. Ia boe eroiwamodukare tuwo tawuje rugadu.
MAR 9:30 Jesus uture nou moto piji ture jorduwadowugebo jii toro nou Galiléia moto ka.
MAR 9:31 Jesus meardaere tuwo tudaru kuri boe poru ka jao ture jorduwadowugebo tuwo erduwado nuba boemode pudui duji. Makore ei. Akore: – Imedu Onaregedu nure imi. Imagudumode ro pegareuge etai. Emode iwido. Mare merimode pobe metia bokware i dukejere iewodumode pugeje.
MAR 9:32 Mare nou Jesus ure jorduwadowuge erduwakare nou Jesus makore jiboeji. Mare epagudure tunarawo Jesusji kaba jiba Jesus akoino pudui.
MAR 9:33 Jesus aregodure Cafarnaum ba kurireu ka ture jorduwadowugebo. Ere turemo ia baito dukeje Jesus unarare ei. Akore: – Tagokire pui awaraji. Kaboba bagaiba tagagoino pui?
MAR 9:34 Mare emagokare Jesus bataru jipagi. Eiamedu boe etaidure tuwo boe eimijera kurireudo pudumi tumedage epiji. Dukodire etokire pui awaraji. Nono epogurure tumagowo tumeardae boeji Jesus biagai. Dukodire emagokare Jesus bataru jipagi.
MAR 9:35 Nono Jesus ure tumugudo nou bai tada tumagowo nou ture jorduwadowugei mare jorduware emeardae boeji rugadu. Makore ei. Akore: – Boe eimijera meardaemode nono boe utugare meardae mogadure tuwo boe eimijera pemegareudo pudumi. Boe eimijera romode nono boe utugare ro mogadure tuwo boe eimijera ro pemegareudo pudumi.
MAR 9:36 Nono Jesus ure tugeragu ia boe etonaregedu roguji. Makore ji rakojewo nono boe etoiadada. Nono ukimadure apo dukeje makore nou ture jorduwadowugei pugeje.
MAR 9:37 Akore: – Boe emode tugera podo boe etonaregedu apo inai itabore ere tugera podo. Boe emode tugera podo itabo ure itarego matowu apore ure tugera podo jamedu.
MAR 9:38 João makore Jesusji. Akore: – Čerdure ia imeduji. Ure bope doge etawuje boe epiji akie tabo. Čemagore ji uwo tugera ra nou turo piji. Ia are jorduwadowu karegure ema.
MAR 9:39 Mare Jesus makore ei. Akore: – Piji. Umode bope tawuje boe epiji ikie tabo dukeje mako pegamodukare i.
MAR 9:40 Ro pegakare paiwuge emeardu kurinure pai.
MAR 9:41 Inure tawie. Ia boe erduware tameartorure i duji. Nono emode pobo maku tagai taguduwo če dukeje Pao Kurireu umode boe pemegado ei rugadu eroino du moriče.
MAR 9:42 Jesus akore: – Boe emode tori kurireu kogudo ia boe ekidoru kajeje tuwo ewarigu poboto dukodire nou ewarigudure pobo towuge ewimode. Mare ia boe umode nou itore meartorure maibari iwuge edo tugera ra ipiji ero pegawo pugeje dukeje boe pegamode nou ure nou boe etore etaora pegadowuji rugadu. Jire boe pegareu kodumode nou barigudure pobo towuge ekori.
MAR 9:43 Boe etaidukare tugera kadoduwo tugana piji. Mare tagera umode taro pegado tameartorukawo i dukeje tagera kado tabiji. Mare tagera remawu ji karega inagoino. Tameardae pegareu jire inagoino tawo barigu tabiji. Mare paga karega. Tameartorumodukare i dukeje tawarigudumode bope doge eda kejewu joru maereuto. Nou joru akedumodukare rugadu. Tadumode toro dukeje boe pegamode tai rugadu jii toro rugadu. Mare tameartorumode i dukeje imode tarududo baruto. Tadumode toro dukeje boe pemegamode tai nono jii toro rugadu. Dukodire inagoino tai. Tagera umode mitotu je mare du inodu tabo tameartorure i dukeje tarudumode baruto rugadu tawikawo pugeje.
MAR 9:45 Boe etaidukare tuwure kadoduwo tubogora piji. Mare tawure umode taro pegado tameartorukawo i dukeje tawure kado tabogora piji. Mare tawure remawu ji karega inagoino. Tameardae pegareu jire inagoino tawo barigu tabiji. Mare paga karega. Tameartorumodukare i dukeje tawarigudumode bope doge eda kejewu joru maereuto. Tadumode toro dukeje boe pegamode tai rugadu jii toro rugadu. Mare tameartorumode i dukeje imode tarududo baruto. Tadumode toro dukeje boe pemegamode tai nono jii toro rugadu. Dukodire inagoino tai. Tawure umode mitotu je mare du inodu tabo tameartorure i dukeje tarudumode baruto rugadu tawikawo pugeje.
MAR 9:47 Boe etaidukare tuioku bokwawo. Mare taeku umode taro pegado tameartorukawo i dukeje taeku tawuje tabiji. Mare taeku remawu ji karega inagoino. Tameardae pegareu jire inagoino tawo barigu tabiji. Mare paga karega. Tamodukare tagimijerado Pao Kurireuče dukeje tawarigudumode bope doge eda kejewu joru maereuto. Tadumode toro dukeje boe pegamode tai rugadu. Toro ate doge enogwagemode boei jii toro. Etagedumodukare. Toro joru umode boe ekowu jii toro. Nou joru akedumodukare jii toro rugadu. Mare tamode tameardae pegareu barigu tagaora piji tawo tagimijerado Pao Kurireuče dukeje boe pemegamode tai rugadu. Dukodire inagoino tai. Taeku umode mitotu je mare tameartorure i rugadu dukeje tarudumode baruto rugadu tawikawo pugeje.
MAR 9:49 – Joru butumode boe eiamedu boe ewugeje. Nou joru umode boe pegareu kowu. Nou boe pemegareu jetumode.
MAR 9:50 – Sal pemegare. Mare sal pegomode dukeje nou sal akedumode. Nono umodukare nono sal mogadure pugeje. Sal umode boe eke pemegado. Tarodo pui nono sal mogadure. Mare sal ji karega inagoino. Tagogududo tagabo. Taro pemegado pui tabemegawo pui rugadu.
MAR 10:1 Nono Jesus uture nou moto piji toro Judéia moto ka. Kurugodure Jordão po kajeje. Boe emagare taregodutabo Jesus ae pugeje. Dukodire Jesus ure erduwado nono turo mogadure.
MAR 10:2 Ia fariseu doge etaregodure Jesus ae jamedu. Etaidure tuwo turokogado Jesusji tuiorduwo ia Jesus ro pegareuji ia Jesus mako pegareuji. Erdumode dukeje emago pegamode ji rugadu. Dukodire enarare Jesusji. Egore: – Nuba Pao Kurireu ure maku Moisés aiwu pago bakaru akore? Ukana turugadu imedu uwo toreduje utudo tubiji tumugukawo apo pugeje?
MAR 10:3 Jesus makore ei. Akore: – Nuba nou mariguduwu Moisés ure maku pagaiwu bakaru akore?
MAR 10:4 Nou fariseu doge egore: – Moisés makore mariguduwuge pawobei. Nou bakaru akore imedu aiduie tuwo tugera ra toreduje piji dukeje uwo ia bapera atugodo tuwo toreduje bie kaba kodiba tuie tugera ra toreduje piji rugadu. Imedu romoduie aino du pegakaie. Uwo toreduje utudo tubiji rugadu. Ainore nou jorduware Pao Kurireu bataru jiwu akore pawobei marigudu.
MAR 10:5 Jesus akore: – Uu. Nou mariguduwuge pawobe etaora rakare dukodire etaidukare tuiorduwawo, etaidukare turo pemegawo. Dukodire Moisés ure nou paro maku mariguduwuge pawobe etai ewo tugera ra toreduje piji.
MAR 10:6 Mare ukare aino boetoji. Pao Kurireu ure baru to. Ure moto to. Dukejere ure imedu boetojiwu towuje. Ure aredu boetojiwudo towuje oreduječe. Ainore Pao Kurireu bataru padure bapera kejewure.
MAR 10:7 Dukodire imedu utumoduie tuo piji tuje piji tumuguwo toreduje apo dukeje emodukaie pobe pugeje, emoduie mitotu je rugadu.
MAR 10:8 Dukodire imedu mugumode aredu apo dukeje ere mitotu puapo turoi pui dutabo Pao Kurireu jakai. Ainore Pao Kurireu bataru padure bapera kejewure.
MAR 10:9 Ča Pao Kurireu aidure emugure puapo duji. Dukodire emuguwo puapo jii toro rugadu. Ekawo tugera ra pubiji rugadu.
MAR 10:10 Nono Jesus uture ia bai ka ture jorduwadowugebo. Ere turemo dukeje nou ure jorduwadowuge enarare Jesusji nou Jesus bataru bagai.
MAR 10:11 Jesus makore ei. Akore: – Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai. Nou imedu ro peganure nou toreduje boetojiwudoji rugadu. Ure tudo nono jeribarire toreduje pijiwu mogadure Pao Kurireu jakai.
MAR 10:12 Aredu jamedu umode tugera ra toredu piji mare mugumode ia imedu apo pugeje. Dutabore ro peganure nou toredu boetojiwuji rugadu. Ure tudo nono jeribarire toredu pijiwudo mogadure Pao Kurireu jakai.
MAR 10:13 Ia boe etaregodure torebo Jesus ae Jesus uwo tugera bu nou boe etore ewugeje. Mare nou Jesus ure jorduwadowuge etaidukare eroino duji. Emagore nou boei etaregodukaiago torebo Jesus bagai.
MAR 10:14 Jesus jorduware nou inoduji dukodire korigodure nou ture jorduwadowugei. Akore: – Tagaba tawu boe etore ekajeje etaregoduwo itae. Etarego itae rugadu. Boe ewo tumeardae udo nono boe etore emeardae mogadure tuwo tugimijerado Pao Kurireuče rugadu turuduwo baruto.
MAR 10:15 Boe jokodu jire inagoino tai. Boe etore emeartorure tuo tuje makore jiboeji. Mare boe etore ji karega inagoino. Boe ewo tugimijerado Pao Kurireuče tumeartoruwo Pao Kurireu bataruji. Dujire inagoino. Boe emeartorumode Pao Kurireuji dukeje emugumode Pao Kurireu apo jamedu. Mare emeartorumodukare Pao Kurireuji dukeje emugumodukare Pao Kurireu apo pugeje.
MAR 10:16 Nono Jesus ure tona bu nou boe etore ekajeje. Nono ure tugera bu ewugeje. Ure tuwadaru pemegareu bu ewugeje jamedu.
MAR 10:17 Nono Jesus uture nou boe epiji pugeje. Merure awaraji dukeje ia imedu rekodure Jesus rekodaji aidure tumagowo ji kodi. Aregodure Jesus ae dukeje ure tubu jodo moto keje Jesus bure paru. Makore Jesusji. Akore: – Jorduwareu pemegareu nure aki. Nuba iromode iewoduwo pugeje imuguwo baru tada Pao Kurireu apo du akedukawo?
MAR 10:18 Jesus akore: – Ča akagore pemegareu nuie imi. Mare tu Pao Kurireure pemegare tu rugadu. Arduwa kana Pao Kurireu nuie imi rugadu? Aino čare ameardae pemegado ameartoruwo i rugadu.
MAR 10:19 Marigudu arduware nou Pao Kurireu ure maku Judeu doge etaiwu bakaruji. Ure maku etai marigudu. Pao Kurireu akore: “Akaba boe ewido. Aeribarikaba akoreduje piji akoredu piji. Akiwogukaba. Awadrarodukaba boe erore jiboeji. Akaba boe ekiripagado jamedu. Ameartorudo aoji ačeji jamedu.”
MAR 10:20 Nou imedu akore: – Uu. Iparedurogu ure imi dutabore imeartorure awu bataru jamedu boeji ji aino.
MAR 10:21 Jesus aiwore tu nou imeduji. Meardu kurire nou imeduji. Nono makore ji. Akore: – Iaboe kimore arowo ji. Akoe jamedu boe maku diero bagai. Nou ako diero rugadu maku marenarue doge etai. Dukeje Pao Kurireu umode akoe kurido baru tada. Aromode aino dukeje akaregodumode itae pugeje akoduwo itabo.
MAR 10:22 Nou imedu meardure Jesus bataruji dukeje kiarigodure. Oe kurire dukodire aidukare tuwo toe maku. Je kiarigodure. Kodire uture Jesus piji. Meartorukare Jesus bataruji.
MAR 10:23 Jesus aiwore tumebiji ture jorduwadowuge ewagai. Makore ei. Akore: – Kočare. Boe rakare oe kurireugei etaiduwo tuwo tugimijerado Pao Kurireuče tumuguwo Pao Kurireu apo baru tada. Oe kurireuge etaidure tumeartoruwo tu toeji tuwo činorudo.
MAR 10:24 Nou ure jorduwadowuge erore ta je nou Jesus bataru keje. Mare Jesus makore ei pugeje. Akore: – Itore nure tagi. Boe rakare oe kurireugei etaiduwo tuwo tugimijerado Pao Kurireuče rugadu.
MAR 10:25 Boe rakare oe kurireu imeduji uwo tugimijerado Pao Kurireuče tumuguwo apo nono boe rakare cameloji uwo turemo agulha poroto dumogadure.
MAR 10:26 Nono Jesus ure jorduwadowuge erore ta je. Egore pui: – Kočare. Ioguduba umode činorudo tuiewoduwo pugeje tumuguwo Pao Kurireu apo?
MAR 10:27 Jesus aiwore tu ei. Dukeje akore: – Boe eroiwakare tuwo činorudo rugadu. Mare Pao Kurireu roiware tuwo boe ekinorudo rugadu. Pao Kurireu rakare tuwo boe jamedu boe pemegado boei.
MAR 10:28 Nono Pedro akore: – Akaiwodo. Čere čegera ra čenoe jamedu boe piji čegoduwo akabo.
MAR 10:29 Nono Jesus makore ei. Akore: – Uu. Mare iwo tawie boe remawuji. Boe emode tugera ra tuwai piji, tuo piji, tuje piji, tumanamage epiji, tuwiemage epiji, to boepa piji tugoduwo itabo tuwo boe ewie iwadaru pemegareuji dukeje boe rugadu boe makudumode etai awu moto keje. Ewai kurimode. Etumana mage emagamode. Etuwie mage emagamode. Etuje mage emagamode. Etore emagamode. Eno boepa kurimode. Mare ro pegareuge ero pegamode ei pugeje. Mare ia meri keje eewodumode pugeje emuguwo baru tada jii toro rugadu. Ewimodukare pugeje rugadu.
MAR 10:31 Boe emeardae pemegare oe kurireugei dukeje egore boe eimijerage nuie emage mare emeartorumodukare Pao Kurireuji dukeje marenarue doge mode emage. Iage enoe bokware dukodire boe emeardae pegare ei mare emeartorumode Pao Kurireuji dukeje oe kurireuge mode emage toro ia meri keje.
MAR 10:32 Jesus uture Jerusalém kawu awaraji ture jorduwadowugebo tuduwo Jerusalém ba kurireu ka. Enodo padure doze. Jesus kodure etododai. Nou ure jorduwadowuge epagudure Jerusalém tadawu boe eimijerageče. Ia boe ekodure eregodaji jamedu. Nou kodure eregodajiwuge epagudure nou boe eimijerageče jamedu. Dukodire Jesus ure tuwuredo. Makore tu nou ture jorduwadowugei nuba boemode pudui duji.
MAR 10:33 Akore: – Tawiapagado iwadaruji. Padumode Jerusalém ba kurireu ka. Imedu Onaregedu nure imi. Imagudumode nou ure Judeu doge enomea maku Pao Kurireu aiwuge eimijerage etai. Imagudumode nou jorduware Judeu doge eno bakaru jiwuge eimijerage etai. Nou boe eimijerage egomode ipegaie. Etaidumode tuwo iwido rugadu. Dukodire emode imagu boe tuginaiwuge ekimijerage etai.
MAR 10:34 Nou boe ekadakagirimode i. Emode todoguru to i. Emode boeto i bukigu tabo. Emode iwido. Mare merimode pobe metia bokware i dukeje iewodumode pugeje.
MAR 10:35 Nono Zebedeu ore ime emagore Jesusji. Ia iere Tiago. Uwie iere João. Emagore Jesusji. Egore: – Čegimijera kurireu nure aki. Čedaidure awo iaboe towuje čenai.
MAR 10:36 Jesus akore: – Nuba tagaidure irowo tai?
MAR 10:37 Egore: – Boe ekimijera kurireu mode aki dukeje boe pemegamode ai rugadu. Amugumode ira kurireu keje nono boe ekimijerage ero mogadure. Dukejere čedaidure čewo čemugudo amegi boe eimijera mugure kejewu ira keje jamedu. Ia čegi čedaidure čemuguwo ira keje akana pemegareu jagwai. Ia čedaidure čemuguwo akana pegareu jagwai jamedu.
MAR 10:38 Jesus makore ei. Akore: – Tarduwakare kaba bagaiba tagagoino. Boe pegamode tai nono boe pegamode i dumogadure dukeje taroiwakana tawo taragado tai tagawo tagera ra tameartorure idu piji kana?
MAR 10:39 Egore: – Uu. Čemode čeragado čei. Jesus akore: – Inure tawie. Boe pegamode tai rugadu nono boe pegamode i dumogadure.
MAR 10:40 Mare iroiwakare iwo tamugudo itabo ikana pemegareu jagwai, ikana pegareu jagwai. Pao Kurireu emare ure nou imegiwu pemegado. Tu ema jorduware turomode jiboeji. Emare umode taidure jiwuge emugudo ikana pemegareu jagwai, ikana pegareu jagwai.
MAR 10:41 Nouia Jesus ure jorduwadowuge enodo padure dez. Emeardure nou Tiago nou João enogwamagudure jiboeji dukeje ekorigodure nou tumedage pobedu dogei.
MAR 10:42 Dukodire Jesus makore nou ture jorduwadowuge eiamedu boe ewagai. Enodo padure doze. Jesus makore ei. Akore: – Tarduware boe tuginaiwuge eimijerage erore jiboeji. Ero rakare boei. Boe emeartorure tugimijeragei rugadu. Emeartorumodukare ei dukeje nou boe ekimijerage emode boe pegado nou meartorukare puduiwugei rugadu.
MAR 10:43 Ča tarokaba nono nou boe eimijera kurireuge ero mogadure. Ia tagi tagaidumode tawo boe eimijerado tagi dukeje tameardae udo nono boe utugare meardae mogadure tawo boe eimijera pemegareugedo tagi. Boe eimijera romode nono boe utugare ro mogadure tuwo boe eimijera pemegareudo pudumi.
MAR 10:45 Ainore irore rugadu. Imedu Onaregedu nure imi. Mare itaregodukare iwo boe ekimijerado imi. Itaregodure iwo boe etugaredo imi. Itaregodure iwo imagu boe etai. Itaregodure iwiwo boe ero pegareu moriče.
MAR 10:46 Etaregodure Jericó ba kurireu ka. Nono Jesus uture nou ba kurireu piji ture jorduwadowugebo. Ia boe ekodure awaraji Jesus apo jamedu. Emagare rugadu. Nono ia imedu joku bokwareu mugure nou awara okwai. Iere Bartimeu. Timeu onaregedu nure ema. Okwamagudure boei nono tuge rogu bagai meri jamedu boeji.
MAR 10:47 Meardure Jesus kodure tugori duji. Dukodire kudugodure Jesus rekodaji. Akore: – Jesus! Davi Onaregedu nure aki! Akogududo itabo! Nou joku bokwareu imedu jorduware Davi uwobe nure Jesus če duji kodire akoino Davi Onaregedu nure ema.
MAR 10:48 Boe emagare nono apo. Emago pegare ji mugu kiorowo. Mare kudugodu rakare pugeje. Akore: – Davi Onaregedu nure aki! Akogududo itabo marenaru nure imi!
MAR 10:49 Jesus ure tuwuredo. Akore: – Mato apo itae. Nono nou boe emagore nou joku bokwareu imeduji. Egore: – Ča. Akiarigodukaba pugeje. Jesus makore awagai. Aragojedo.
MAR 10:50 Dukodire ure tugudau areia biaku epa barigu tubiji tuwo tugera jodo mototo tuwo turagojedo. Uture Jesus ae.
MAR 10:51 Jesus makore ji. Akore: – Kaba jiba akaidure irowo ai? Nou joku bokwareu imedu akore: – Ikimijera nure aki. Itaidure itaiwowo pugeje.
MAR 10:52 Jesus akore: – Ča. Ameartorure i dukodire ire apemegago akaiwowo pugeje. Atudo aibagi awai ka. Jesus makore dukeje nou imedu aiwore pugeje tači je. Aiwore pugeje rugadu. Nono kodure Jesus rekodaji nou awaraji.
MAR 11:1 Jesus ure taregoduiago Jerusalém ba kurireu ka ture jorduwadowugebo. Epuredugodure boe eda Betfagé ka. Epuredugodure boe eda Betânia ka jamedu. Nou boe eda Betfagé, nou boe eda Betânia eragoje puredure Oliveira Riji. Dukejere Jesus makore ture jorduwadowuge ime pobedu dogei tuwo etudo tododai.
MAR 11:2 Jesus makore ei. Akore: – Tadudo toro nou boe eda ka. Tagaregodumode toro dukeje tardumode ia jumenta onaregeduji. Boe ere kogudo nono duji. Nou jumenta rakojere nono mare ia boe ekare tumugudo keje ji aino. Tamode bukigu kiwuje dukeje tadumode mato apo itae.
MAR 11:3 Ia boe enaramode tai kaba kodiba taroino apo. Tamagodo ei Boe Eimijera aiduie ji. Tumoduie reko tuibagi kuri je.
MAR 11:4 Dukodire nou ime pobedu doge eture nou boe eda ka. Erdure nou jumenta onaregeduji nono Jesus bataru mogadure. Kogure ia bai poro keje. Ere nou bukigu kiwuje dukeje ia boe enarare ei.
MAR 11:5 Egore: – Mure kodiba tamode tageragu nou jumenta onaregeduji?
MAR 11:6 Nou ime pobedu doge emagore nou Jesus makore puduiboe tabore emagore nou boe ewadaru jipagi. Dukodire nou boe emago pegakare etuwo apo.
MAR 11:7 Etaregodure Jesus ae nou jumenta onaregedu apo dukeje ere padure tuwugejewu tugudau areia boe bu nou jumenta onaregedu poru keje. Nono Jesus ure tumugudo nou jumenta keje.
MAR 11:8 Boe emagare nono. Ere padure tuwugejewu areia boe bu nou Jesus kodure jiwu awaraji. Ia boe ere bai kado. Ere nou bai bu awara keje jamedu.
MAR 11:9 Boe emagare rugadu tugodu tabo Jesus apo. Eture tiegarere pudui dutabo rugadu. Dukodire ewadodu rakare Pao Kurireu ie tabo. Egore: – Pao Kurireu pemegare! Pagimijera reo! Pameartoruwo ji nono mariguduwuge pao mage emeartorure tugimijera kurireu Davi jitu mogadure. Pao Kurireu ure arego mato pagae. Uwo boe pemegado ji rugadu! Boe eiamedu boe emago pemegawo ji rugadu moto keje, baru tada jamedu.
MAR 11:11 Jesus aregodure Jerusalém ba kurireu ka dukeje uture Pao Kurireu uwai ka. Ure turemo dukeje aiwore boe parugajeje boe jamedu boeji. Mare merirekodure dukodire uture pugeje. Uture Betânia ba kurireu ka tuibagi pugeje ture jorduwadowugebo. Enodo padure doze.
MAR 11:12 Nou barogwato Jesus utuiago tuibagi boe eda Betânia piji ture jorduwadowugebo. Mare Jesus uke boeire ji.
MAR 11:13 Jesus aiwo jaere dukeje jordure ia figo iji. Nou figo i arure rugadu. Dukodire uture ka taiwowo tudu kurodureu bagai. Mare jordukare boeji. Jordure tu nou aruji. Nou i tudumodukare nou ariji.
MAR 11:14 Nono Jesus mako pegare nou figo iji. Akore: – Boe emodukare akurodu kowuje pugeje awimode kodi. Nou Jesus ure jorduwadowuge emeardure nou Jesus akoe nou figo i jituji.
MAR 11:15 Etaregodure Jerusalém ba kurireu ka pugeje. Jesus uture Pao Kurireu uwai ka. Ure turemo nono. Jordure nou boei ere tagu ie metugoe emagu diero bagai duji, ere diero maku puai duji. Dukodire korigodure. Ure nou boe enoe rugadu barigu. Ure emugure kejewu ira rugadu boe barigu. Ure nou metugoe meture tadaboe rugadu barigu. Ure nou boe etudo Pao Kurireu uwai piji rugadu.
MAR 11:16 Makore boe eiamedu boei etaregodukawo toe tabo pugeje Pao Kurireu uwai ka.
MAR 11:17 Nono makore boei tuwo erduwado. Akore: – Moto rugadu boe kejewuge etaregoduwo awu Pao Kurireu uwai ka tumagowo Pao Kurireu bagai baruto. Ainore Pao Kurireu akore. Ainore bapera atugo ure. Mare tare awu Pao Kurireu uwai udo nono iwogureuge ewai mogadure.
MAR 11:18 Nou ure Judeu doge enomea maku Pao Kurireu aiwuge eimijerage emeardure nou inoduji. Nou jorduware Judeu doge eno bakaru jiwuge emeardure nou inoduji jamedu. Dukejere eiamedu boe ekorigodure Jesusji. Etaiwore ia tumeardae bagai tuwo Jesus bito. Mare boe doge etaidure Jesusji. Egaregodure pudui Jesus rore jiboeji, makore jiboeji. Dukodire nou boe eimijerage epagudure turo pegamode Jesus jituji tumode nou boe doge ekorigo pudui dukodi.
MAR 11:19 Merirekodutabo Jesus uture Jerusalém ba kurireu piji ture jorduwadowugebo.
MAR 11:20 Nou barogwato ča je Jesus merure awaraji pugeje ture jorduwadowugebo. Nono erdure nou figo iji pugeje. Ma kočare nou figo i bire rugadu.
MAR 11:21 Nono Pedro biabuture Jesus makore jiboe keje. Dukodire makore Jesusji. Akore: – Akaiwodo. Awu amago pegare jiwu figo i bire rugadu.
MAR 11:22 Jesus akore: – Tameartorudo Pao Kurireuji.
MAR 11:23 Boe jokodu jire inagoino tai. Tamororamagadukaba. Tameartorudo rugadu. Tameartorumode dukeje tamagomode nou tori riji uwo tuwarigu pobo maereuto. Tamagomode ji dukeje barigudumode pobo maereuto rugadu. Mare tameartorumodukare dukeje umodukare tuwarigu.
MAR 11:24 Dukodire tamagomode Pao Kurireu bagai baruto iaboe bagai, tameartorumode makudumode tagai duji dukeje Pao Kurireu umode tamagore bagaiboe maku tagai rugadu.
MAR 11:25 Tamagomode baruto dukeje tawiagodudo boe ero pegare taidu piji. Dukodire baru tadare Pao Kurireu biagodumode taro pegare jiboe piji jamedu.
MAR 11:27 Jesus aregodure Jerusalém ba kurireu ka pugeje ture jorduwadowugebo. Jesus merure Pao Kurireu uwai kurireu oiagi. Nono nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge, nouia Judeu doge eimijerage eiamedu boe etaregodure Jesus ae jamedu.
MAR 11:28 Eiamedu boe emagore Jesusji. Egore: – Ioguduba ure turaga maku akai aro rakawo aino?
MAR 11:29 Jesus makore ewadaru jipagi. Akore: – Inaramode tai iaboeji jamedu. Tamagomode iwadaru jipagi dukeje imagomode tawadaru jipagi.
MAR 11:30 Ča ioguduba ure João Batista udo boe etao pegodo? Pao Kurireu koia kana? Ia boe eigoia kana? Nuba tameardaere? Tamagodo.
MAR 11:31 Mare nou boe eimijerage erduwakare tumagowo Jesus bataru jipagi. Dukodire emagore pui nuba tagomode Jesus bataru jipagi. Egore: – Pamagomode Pao Kurireu koiaie ure João Batista udo boe etao pegodo mare pameartorukare nou inoduji. Awu Jesus jorduware pameartorukare nou inodu jituji. Dukodire pagagomode aino dukeje Jesus umode pawadaru pogurudo. Akomode: “Kodiba tameartorukare ji?” Ainore akomode pai.
MAR 11:32 Mare pagagomodukare boe eigoiaie. Boe eiamedu boe emeartorure João Batista makore Pao Kurireu bataru jituji. Egore Pao Kurireu koiare ure João Batista udo boe etao pegodo. Dukodire nou boe eimijerage epagudure tumago pegawo João Batista rore jiboeji tumode boe ekorigo pudui dukodi.
MAR 11:33 Nono nou boe eimijerage emagore Jesusji. Egore: – Čerduwakare ioguduba koiare ure João Batista udo boe etao pegodo. Nono Jesus makore ei. Akore: – Ča tamagokare iwadaru jipagi dukodire imagomodukare ioguduba ure itarego mato jamedu.
MAR 12:1 Jesus readodure ia bakaruji boe ewiagai tuwo ewie Pao Kurireu meardae remawuji. Akore: – Marigudu ia imedu ure uva tugu to boepa tada. Ure ramiku aiado to boepa tabo. Ure ia moto porodo tuwo tuwuredo nou uva kurodu keje tuwo kuru tawuje. Ure ia tugamo pemegado boe ewo tumugudo toro aogeje taiwo pemegawo boepaji. Nono ure tugeragu ia boei tuwo etudo nou to boepaji emaragoduwo ji. Nono nou ore boepa čewu uture epiji tugiriadu tabo toro ia boe eda jaereu ka.
MAR 12:2 Nou boepa tadawu uva kurodumode kejewu ari puredugodure dukeje nou ore boepa čewu ure tudugare utudo toro nou jeture to boepa jiwuge boe etae nou tugiriadure kawu moto piji. Ure nou tudugare utudo uwo tugeragu nou makudumode pudaiwu boeji. Nou jeture nou boepa jiwuge emode uva rugadu kado dukeje emode ia kado puiato nou ore boepa čewu imedu ai.
MAR 12:3 Ča nou utugare aregodure nou boepa ka. Mare nou jeture boepa jiwuge etaidukare tuwo uva kado puiato pugeje nou ore boepa čewu imedu ai. Dukodire ere tugeragu nou ore boepa čewu utugareji. Ere boeto ji. Dukeje ere utudo tuibagi tugimijera ae tugera kedo tabo.
MAR 12:4 Nono nou ore boepa čewu ure ia tudugare utudo etae pugeje. Mare nou jeture boepa jiwuge ere boeto nou utugareji pugeje. Ere boeto aoraji. Ero pegare ji rugadu. Ere utudo tuibagi tugera kedo tabo pugeje.
MAR 12:5 Nono nou ore boepa čewu ure ia tudugare utudo etae pugeje. Mare ere nou utugare bito. Nou ore boepa čewu ure tudugarege emagado toro etae rugadu. Mare nou jeture boepa jiwuge ero pegare nou ore boepa čewu utugarege eiamedu boei. Ere boeto ei. Ere iage ewido.
MAR 12:6 Nono nou ore boepa čewu onaregedu imedu ure mitotu je. Meardu kurire nou tonaregeduji rugadu. Čare ure nou tonaregedu utudo toro nou jeture boepa jiwuge ewagai aino boigodu. Nou ore boepa čewu akore: “Emeartorumode itonaregeduji rugadu.”
MAR 12:7 – Mare nou jeture boepa jiwuge emagore pui. Egore: “Awu ore boepa čewu onaregedu reo. Emare omode tuo oe jamedu boeče. Pawo bito pagowo awu uo o motoče.”
MAR 12:8 – Dukodire nou jeture boepa jiwuge ere tugeragu nou ore boepa čewu onaregeduji. Ere bito. Ere barigu toro nou boepa piji.
MAR 12:9 Jesus mako kimore nou boei. Akore: – Ainore erore rugadu. Ča. Nuba nou ore boepa čewu romode nou jeture boepa jiwugei? Aregodumode etae. Umode ewido. Nono umode to boepa maku iage etai etuwo ji pugeje.
MAR 12:10 Mare tagaiwokare rugadu ia padure bapera kejewu Pao Kurireu bataruji kana? Ainore awu Pao Kurireu bataru akore: – Boe emeardae pegare ia toriji. Egore pegaie tuwo tuwaido ema. Mare nou tori pemegareu nure ema rugadu boe ewo tuwaido ema rugadu.
MAR 12:11 – Pao Kurireu koiare ure nou tori pemegado aino. Ure pemegado nouia tori jamedu boe ekori. Boe eiamedu boe ebogodure nou Pao Kurireu roino duji.
MAR 12:12 Judeu doge eimijerage emeardure Jesus akoino jiboeji dukeje erduware puduire Jesus akoino duji. Dukodire etaidure tuwo tugeragu Jesusji tuwo tugu baičoreuto kuri je rugadu. Mare boe etaidure Jesusji. Dukodire nou boe eimijerage epagudure, eroiwakare tuwo tugeragu Jesusji. Dukodire eture piji.
MAR 12:13 Judeu doge eimijerage ere fariseu doge etudo Jesus ae. Ere ia aidure Herodes jiwuge etudo Jesus ae jamedu. Judeu doge eimijerage emagore nou boei etuwo Jesus ae tunarawo ji tuwo Jesus barigu boeto tagoino jiboeji.
MAR 12:14 Dukodire etaregodure Jesus ae. Emagore Jesusji. Egore: – Boe eimijera nure aki rugadu. Akare awadaru udo paga boei. Ameardaere boei boe remawu tabo. Boe jokodu jire akagoino. Awiapagakare boe ewadaru pegareuji. Ameardaere Pao Kurireu meardaeji. Are boe erduwado Pao Kurireu meardaeji tu tu je. Awiapagakare ia boe emeardae pegareuji rugadu. Ča. Nuba pago bakaru umode parduwado paromode jiboeji? Pamode pagoe imposto mori maku Roma kejewu boe eimijera kurireu César ai na? Pamode maku kana? Pamodukana maku kana?
MAR 12:15 Mare Jesus jorduware emeardae pegareuji. Jorduware emeartorukare tuwadaruji. Akore: – Kaba kodiba tagaidure tawo iwarigu boeto tagagoino idu tabo? Ia imposto morireu diero tori maku inai iorduwo ji.
MAR 12:16 Ere ia diero tori maku Jesus ai. Nono Jesus akore: – Ioguduba je ba padure awu diero tori keje? Ioguduba ie ba padure awu diero tori keje? Egore: – Roma kejewu boe eimijera kurireu César ie padure keje.
MAR 12:17 Nono Jesus akore: – Boe rugadu. Čare César oeboe maku César ai. Mare Pao Kurireu oeboe maku Pao Kurireu ai jamedu. Nou boe emeardure Jesus akoino duji dukodire erore ta je akoino pudui duji.
MAR 12:18 Nono ia saduceu doge etaregodure Jesus ae tuwo Jesus barigu boeto tagoino jiboeji jamedu. Nou saduceu doge emeardaere boe eewodumodukaie pugeje. Nono emagore Jesusji.
MAR 12:19 Egore: – Jorduwareu imedu nure aki. Ča mariguduwu makore Pao Kurireu bataru jiwu Moisés ure jaoboe ero maku etai pameartoruwo ji jii aino rugadu. Akore imedu bimoduie mare ore bokwaie dukeje nou imedu uwie muguwo nou tumana bireu oreduje apo torewo nou bireu tumana ai.
MAR 12:20 Ča ia meri keje ime enodo padure sete. Etumana etuwie mage nure pugi. Etumana mugure ia aredu apo. Mare čare bire. Mare ore bokware.
MAR 12:21 Dukodire nou uwie imedu mugure nou aredu apo. Mare nou imedu bire jamedu. Etore bokware. Nono uwie imedu mugure nou aredu apo jamedu. Mare bire jamedu.
MAR 12:22 Dukodire nou uwie ime eiamedu boe emugure nou aredu apo rugadu. Mare eiamedu boe ewire. Etore bokware. Dukeje čare nou aredu bire jamedu.
MAR 12:23 Dukodire čedaidure čenarawo ai. Pao Kurireu umode eewodudo pugeje dukeje duboba mugumode nou aredu apo? Eiamedu boe emugure apo moto keje mare duboba mugumode nou aredu apo baru tada?
MAR 12:24 Jesus makore nou boe ewadaru jipagi. Akore: – Tarduwa bokware. Tarduwakare Pao Kurireu bataru padure kejewu baperaji. Tarduwakare Pao Kurireu ro rakareuji.
MAR 12:25 Bireuge eewodumode pugeje dukeje emode nono Pao Kurireu utugarege baru tadawuge emogadure. Etuwiremodukare. Etugogemodukare.
MAR 12:26 Mare tameardaere boe eewodumodukaie pugeje. Tagaiwokare Moisés ure bu bapera kejewu Pao Kurireu bataruji? Pao Kurireu ure Moisés jordudo pudui ia enado i piji. Joru čere nou enado ito mare nou joru ukare nou enado i kowu. Nou enado i pijire Pao Kurireu makore Moisesji. Akore: “Abraão meartorure jiwu Pao Kurireu nure imi. Isaque meartorure jiwu Pao Kurireu nure imi. Jacó meartorure jiwu Pao Kurireu nure imi.”
MAR 12:27 Pao Kurireu makore jiwu ime ewire marigudu. Mare Pao Kurireu makore emeartoruie pudui rugadu. Dukodire parduware eewodure pugeje duji. Bireuge emeartorumodukare Pao Kurireuji. Eewodureuge emeartorumode ji. Dukodire tameardae ukare turugadu. Boe eewodumode pugeje rugadu.
MAR 12:28 Ia jorduware Pao Kurireu ure maku etaiwu bakaru jiwu meardure nou Jesus bataruji. Jorduware Jesus mako pemegare nou saduceu doge ewadaru jipagi duji. Mare meardaere tunarawo Jesusji jamedu. Akore: – Kakojiwu Pao Kurireu bataru pemegareu remawu jiba pamode pageragu?
MAR 12:29 Jesus akore: – Ere pobe. Boetojiwu bataru kurireu ure aino: “Pao Kurireu ure mitotu je. Tameardu kurido Pao Kurireuji taraga tabo, tameardae pemegareu tabo, tarore jiboe jamedu boe tabo. Judeu doge eiamedu boe erduwawo awu bataruji rugadu.” Ainore Pao Kurireu bataru kurireu boetojiwu ure.
MAR 12:31 Pao Kurireu bataru boigoduwu ure aino: “Tameardu kurido tamedagei nono tameardu kuri moga tai dumogadure.” Ia bataru kurireu bokware nono awu bataru pobedu doge emogadure.
MAR 12:32 Nou jorduware Judeu doge eno bakaru jiwu imedu makore Jesusji pugeje. Akore: – Awadaru ure turugadu. Jorduwareu nure aki. Boe jokodu jire akagoino. Pao Kurireu ure mitotu je. Ia boe umodukare nono umogadure.
MAR 12:33 Boe emeardu kuriwo Pao Kurireuji turaga tabo, tumeardae pemegareu jamedu boe tabo. Boe emeardu kuriwo tumedagei nono tumeardu kuri moga pudui dumogadure. Boe emeartorumode awu Pao Kurireu bataru kurireu boetojiwuji dukeje emeartorumode Pao Kurireu bataru jamedu boeji. Boe emode boe egu barogo rogu bito tuwo maku Pao Kurireu ai turo pegareu boe moriče. Emode boe egu barogo rogu kodu kowu tuwo tomeado če Pao Kurireu ai. Mare emeardu kurimode Pao Kurireuji rugadu emeardu kurimode tumedagei rugadu. Dure pemegare nou turo boe egu barogo rogu jitu kori rugadu.
MAR 12:34 Jesus meardure nou imedu bataruji. Jordure ji jorduware Pao Kurireu bataru jiwu nure ema duji. Dukodire Jesus makore ji pugeje. Akore: – Arduware awo akimijerado Pao Kurireuče. Ča. Ameartorudo ji rugadu. Nono boe eraga bokware tunarawo Jesusji pugeje. Eraga bokware tuwo Jesus barigu boeto tagoino jiboeji rugadu.
MAR 12:35 Jesus ure boe erduwado Pao Kurireu uwai tada. Nono unarare boei. Akore: – Jorduware Judeu doge eno bakaru jiwuge ere boe erduwado nou umode boe ekinorudowuji. Egore Davi onaregedu moduie ema. Mare erduwa pemegakare Pao Kurireu bataruji
MAR 12:36 Pao Kurireu Uwari ure Pao Kurireu bataru maku Davi ai marigudu. Dukodire Davi akore: – Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode nou jordu pegare aiwuge etagedudo du ka.”
MAR 12:37 – Tagoino dutabo Davi akore tugimijera nuie nou umode boe ekinorudowuče. Mare Davi onaregedu mode ema jamedu. Ča nuba nou umode boe ekinorudowu ure? Boe emagare nono tuwiapaga tabo Jesus bataruji.
MAR 12:38 Nono Jesus ure erduwado rugadu. Akore: – Tagaiwo pemegado jorduware Judeu doge eno bakaru jiwugei. Etaidure boe emeartoruwo pudui. Ere boe etaiwodo tugudau areia motureu meture pudui duji. Etaidure tuwo boe epogurudo. Etumode ba kurireu ka dukeje etaidure boe emago pemegawo pudui etaidure boe ekimijeragewo pudumi kodi. Dukodire erore aino.
MAR 12:39 Nou jorduware Judeu doge eno bakaru jiwuge etumode Judeu doge ere bato puiwu bai ka dukeje emode tugeragu boe eimijera mugure kejewu iraji tumuguwo keje. Etumode boe ewadae ka dukeje etumode boe eke jeture kejewu ira ka boe etododai togwagewo boetoji.
MAR 12:40 Eragojemode boebo dukeje emago raimode baruto boe emearduwo tagoi tuwadaru motureu jituji. Mare pagatu je. Ekiwogure okoge bokwareuge aremei. Ere nou areme okoge bokwareuge ewai aru epiji. Dukodire Pao Kurireu ro pegamode ei rugadu nou ero pegareu boe moriče.
MAR 12:41 Jesus ure tumugudo nono Pao Kurireu uwai tada taiwo tabo boei. Ere ia to diero tugu ira jagi tuwo maku Pao Kurireu ai. Oe kurireuge ere ture tuguboe kurido rugadu.
MAR 12:42 Nono ia okoge bokwareudo aredu marenaru aregodure. Nou okoge bokwareudo ure to diero tori rogu pobedu tugu nou ira jagi. Ure nono um centavo mogadure.
MAR 12:43 Nono Jesus makore nou ture jorduwadowugei. Akore: – Iwo tawie boe remawuji. Awu marenaru aredu okoge bokwareudo ure to diero jamedu boe maku dukodire ure to diero makudu kurido nou oe kurireuge eiamedu boe ekori.
MAR 12:44 Mare diero kurireu ji karega inagoino. Nou oe kurireuge ere to diero kurido Pao Kurireu ai mare etaidukare jiwu kobo rogure ere maku. Eno diero kurire ebo kimo. Mare awu aredu ure to diero rugadu maku. Dujire inagoino.
MAR 13:1 Nono Jesus ure tudawuje Pao Kurireu uwai piji ture jorduwadowugebo. Ia akore: – Ikimijera. Akaiwodo. Awu Pao Kurireu uwai moture rugadu, rakare jamedu.
MAR 13:2 Mare Jesus makore nou ture jorduwadowugei. Akore: – Awu tardure jiwu bai rakare, moture. Mare ro pegareuge emode nou tardure jiwu bai kurireu butudo rugadu. Tori tabore pawobe ere towuje marigudu. Mare ia meri keje nou tori jamedu boe epadumodukare puaoji pugeje.
MAR 13:3 Jesus uture Oliveira Ri ao ka. Mugu jaekare Pao Kurireu uwai piji. Jesus ure tumugudo nono. Pedro, Tiago, João, André eiamedu boe etaregodure Jesus ae. Ia boe edukare nono ebo. Nono enarare Jesusji.
MAR 13:4 Egore: – Kaba meri kejeba Pao Kurireu uwai butumode, nou akagoino jiboe jetumode pudui kuri aino na? Kaba jiba čerdumode čerduwawo nou akagoino jiboe jetumode pudui kuri aino duji?
MAR 13:5 Jesus makore ei. Akore: – Taeku jado boe ekawo taekiripagado.
MAR 13:6 Boe emagamode tuwadaru pegareu tabo. Egomode umode boe ekinorudowu nuie pudumi. Mare pagare egoino. Mare du inodu tabo emode boe ekiripagado rugadu.
MAR 13:7 Tameardumode bakaru pegareuji. Boe emode tawie boe erugoduie pui tuwaiga tabo. Boe erugodu akedukaie. Boe egomode nou torowu boe ekorigoduie dukodie erugodu kurie pui rugadu. Mare taragado tai tamororamagadukawo. Pao Kurireu jorduware ro pegareuge erugoduji marigudu. Umodukare nou erugodu tawuje epiji. Erugodumode pui tuwaiga tabo rugadu mare moto akedumodukare raga.
MAR 13:8 Boe eimijera kurireuge erugodumode pui tugobaigaregebo. Boe eke bokwamode boe jamedu boe parugajeje. Dukodire boe ewimode tuge boei koia. Moto magadugodumode boe jamedu boe parugajeje jamedu. Awu inagoino jiwu iwadaru jetumode pudui dukeje tarduwamode moto akedumode kuri aino duji nono aredu kurijirigodu mogadure. Aredu kurijirigodure dukeje boe erduware kuri butumode kuri aino duji. Mare aredu kurijirigodu ji karega inagoino. Boe pegamode motoji nono iwadaru mogadure dukeje tarduwamode moto akedumode kuri aino duji. Dujire inagoino.
MAR 13:9 Taeku jado. Boe emode tugeragu tai. Emode tadugu baičoreuto. Etaiwomode ia taro pegare jiboe bagai. Emode boeto tai Judeu doge ere bato puiwu bai tada. Tameartorure i kodire boe eimijera kurireuge emagomode tawagai. Dukejere tamagodo iwadaru pemegareuji ewadaru jipagi.
MAR 13:10 Boe eiamedu boe emeardumode iwu bakaru pemegareuji moto jamedu boe parugajeje dukeje moto akedumode.
MAR 13:11 Boe emode tadugu baičoreuto. Emagomode tai ia taro pegareu bagai. Mare tamororamagadukaba tamagore jiboe bagai. Tamagomode mare tawadaru karega. Pao Kurireu Uwari umode tuwadaru maku tagai tamagowo ewadaru jipagi.
MAR 13:12 Boe emode tuwiemage emagu boe eimijerage pegareuge etai ewidoduwo. Boe emode tore emagu boe eimijerage pegareuge etai ewidoduwo. Boe etore emode tuo tuje emagu boe eimijerage pegareuge etai ewidoduwo.
MAR 13:13 Tameartorumode i kodire boe eiamedu boe erdu pegamode tai. Mare tamodukare tagera ra tameartorure i dupiji kodire imode taginorudo rugadu.
MAR 13:14 Jesus makore kimo. Akore: – Tardumode nou Pao Kurireu jordu pegare jiboeji Pao Kurireu uwai tada dukeje tarduwamode boe pegamode kuri aino duji. Tardumode nou inoduji kodire inagoino tai. Boe erdumode awu bataru padure kejewu baperaji rugadu. Mare boe erdumode nou Pao Kurireu jordu pegare jiboeji Pao Kurireu uwai tada dukeje Judéia moto kejewuge eregodu rakamode toro tori ao ka tuwo tuginorudo boe pegareu piji.
MAR 13:15 Nou rakojere tuwai aogejewuge eregoduwo tuwai piji toro tori ao ka. Ekawo turemo tuwaito iaboe bagai. Etuwo tugera kedo tabo.
MAR 13:16 Nou maragodure to boepa jiwuge eregoduwo nou to boepa piji toro nou tori ao ka jamedu. Ekawo tugirimi tuwai ka ia tugudau areia bagai.
MAR 13:17 Nou Pao Kurireu jordu pegare jiboe rakojemode Pao Kurireu uwai tada dukeje boe pegamode boei rugadu. Dukodire inagoino boei eregoduwo rugadu toro tori ao ka. Nou meriji boe pegamode kuiarureugei rugadu. Boe pegamode ei rugadu eroiwakare turegodu rakawo dukodi. Boe pegamode etore kugure etuje magei jamedu eroiwakare ture rakawo dukodi.
MAR 13:18 Tamagodo baruto Pao Kurireu bagai biaku butukawo boei nou eregodure jiwu meri keje.
MAR 13:19 Boe pegamode boei rugadu boe pega jamedu boe kori. Pao Kurireu ure moto to dupiji boe erdukare awu boe pegareu boeji jii aino. Mare boe pegamode motoji rugadu.
MAR 13:20 Nou boe pegamode kejewu meri makamode. Mare Pao Kurireu umode nou merido biagatu je pugeje. Nou boe pegamode kejewu meri makamode rugadu dukeje boe eiamedu boe ewimode rugadu. Mare Pao Kurireu umode nou boe pegamode kejewu merido biagatu je tuwo meartorure puduiwuge edo činorudo.
MAR 13:21 Mare boe pegamode kejewu meri aregodumode dukeje boe egomode: “Umode boe ekinorudowu aregodu. Ema reo!” Ainore boe egomode. Mare tawiapagakaba ewadaruji. Pagare egoino.
MAR 13:22 Mare paga karega inagoino. Boe etaregodumode rugadu nou tuwadaru tabo rugadu. Egomode umode boe ekinorudowu nuie pudumi. Mare pagare egoino. Egomode tumagoie Pao Kurireu bataruji mare pagare egoino. Ero rakamode boe emeartoruwo pudui Pao Kurireu piji pagatu je. Emodukare meartorure Pao Kurireu jiwuge remawuge ekiripagado. Mare etaidumode tuwo meartorure Pao Kurireu jiwuge ekiripagado nou turo rakareu tabo rugadu.
MAR 13:23 Dukodi čare taeku jado. Pagare eroino tai. Tameartorukaba ei. Ire tawie boe jamedu boeji marigudu.
MAR 13:24 – Boe pegare moto jiboe akedumode dukeje meri joku akedumode jamedu. Ari joku akedumode jamedu.
MAR 13:25 Kuieje doge ewudumode baru piji jamedu. Baru magadugodumode rugadu.
MAR 13:26 Dukejere čare boe erdumode Imedu Onaregedu aregodumode tugodu tabo boetugu aojitu duji. Erdumode Imedu Onaregedu ro rakareuji. Erdumode Imedu Onaregedu o jorugu kurireuji. Jorugure moto jamedu boe parugajeje.
MAR 13:27 Umode Pao Kurireu utugarege baru tadawuge etudo tododai Pao Kurireu ure tugeragu jiwuge ewagai moto jamedu boe parugajeje. Emode edo tudo pui.
MAR 13:28 Jesus mako kimore. Akore: – Figo i ure tarduwado tu tu je. Figo i okurogu boture dukeje tarduware bubutumode kuri je rugadu. Tagaiwore figo iji tarduwawo bubutumode kejewu meriji. Ainore tarore tu tu je.
MAR 13:29 Ča ire tawie nuba boemode meri jokuji nuba boemode ari jokuji. Iwo tawie. Tagaiwodo awu ire tawie jiboe jamedu boeji emode tarduwado dubagai. Tardumode ire tawie jiwu iwadaru jetumode pudui duji dukeje tarduwamode boe puredugodure itaregoduwo iwo boe jamedu boe akedudo. Mare bubutu ji karega inagoino. Nou itaregodumode jiwu meri jire inagoino.
MAR 13:30 Iwo tawie boe remawuji. Toro ia meri keje ia tawobe erdumode awu imagore jiboe jeture pudui duji rugadu. Jetumode pudui rugadu tuwimodedu otodai.
MAR 13:31 Baru akedumode. Moto akedumode jamedu. Mare iwadaru akedumodukare jii toro rugadu. Jetumode pudui rugadu.
MAR 13:32 Nono Jesus mako kimore. Akore: – Boe erduwakare nou meriji rugadu. Boe erduwakare kaiba meri jetumode awu iwadaru jetuwo pudui. Pao Kurireu utugarege baru tadawuge erduwakare. Pao Kurireu Onaregedu jorduwakare. Tu Pao Kurireu jorduware tu rugadu.
MAR 13:33 Tarduwakare itaregodumode kejewu meriji. Dukodire tado tarugadu. Tagaiwodo itaregodumode dubagai.
MAR 13:34 Iromode nono ia imedu ro mogadure. Utu jaere tugiriaduwo. Ure tudugarege etu pemegado tuwaiji. Ure emaragodae maku etai. Ure ia tudugare rakojedo bai poro keje. Makore nou tudugareji jetu pemegawo nou bai poroji tubaga tabo tuwagai.
MAR 13:35 Iromode nono nou imedu ro mogadure. Dukodire inagoino tai taeku jaewo. Tarduwakare kaba meri kejeba itaregodumode. Itaregodumode boečoji rakudu, meriji rakudu, baburedugodutabo rakudu, čaboečoto rakudu, merirekodutabo rakudu. Tarduwakare.
MAR 13:36 Dukodire tado tarugadu tabaga tabo iwagai. Itaregodumode tači je. Itaidukare iorduwo tai tameartorukare i dutabo.
MAR 13:37 Dukodi inagoino tai. Inagoino boe eiamedu boei. Tado tarugadu tabaga tabo iwagai.
MAR 14:1 Merimode pobe dukeje Judeu doge emode tuwadae Páscoa towuje. Nou ewadae kejere emode ia tuge amireu tuginaiwu kowuje. Fermento metukare nou amireu tada. Čare nou ure Judeu doge enomea maku Pao Kurireu aiwuge eimijerage etaidure tuwo tugeragu Jesusji tuwo bito. Nou jorduware Judeu doge eno bakaru jiwuge etaidure tuwo Jesus bito jamedu. Mare etaidukare boe erduwawo nou tumeardae pegareuji.
MAR 14:2 Emagore pui. Egore: – Pamode pageragu Jesusji nou Judeu doge ewadae keje dukeje boe ekorigodumode pai rugadu. Emode bato pui turo pegawo pai. Dukodire paromodukare aino ewadae keje.
MAR 14:3 Jesus rakojere boe eda Betânia keje Simão uwai tada. Nou Simão iere Biri Pegareu jamedu. Jesus mugure nono nou bai tada ira keje togwage tabo. Nono ia aredu aregodure Jesus ae poari rogu tabo. Boe ere nou poari towuje tori tabo. Nou tori iere alabastro. Roreboe mori kurireu meture nou poari rogu tada. Boe ere nou roreboe towuje nardo tabo. Nono ča nou aredu ure nou poari rogu jado. Ure nou roreboe redo Jesus aora joki.
MAR 14:4 Boe erdure nou aredu roino duji dukeje iage emago pegare nou aredu roino Jesus jituji. Egore: – Awu aredu ro pegare. Ure nou roreboe barigu. Nou roreboe mori kurire rugadu. Boe emaragodumode jii joru akedu ka tuwo tugeragu nou diero kurireuji tuwo akirodo nou roreboeji. Kočare ukare nou roreboe maku diero bagai tuwo diero kurido tuwo maku marenarue doge etai? Nono emago pegare nou areduji.
MAR 14:6 Mare Jesus makore nou boei. Akore: – Tagaba awu aredu pogurudo rore iduji. Rore i du moture Pao Kurireu jakai. Mare paga karega.
MAR 14:7 Marenarue doge edumode tagabo jii toro rugadu. Tagaidumode taro pemegawo ei dukeje taro pemegado ei tagaidure jiwu meri keje. Mare imire itumode tabiji rugadu.
MAR 14:8 Awu aredu jorduware nou inoduji dukodire ure nou roreboe redo iogi tuwo iwiri udo turugadu ituguduwo mototo iwi keje.
MAR 14:9 Ča iwo tawie boe remawuji. Awu aredu rore iboe akedumodukare boe etaora piji jii toro rugadu. Boe etumode moto jamedu boe parugajeje tuwo boe erduwado emeartoruwo i iwo ekinorudo dukeje ereadodumode awu aredu rore iduji boe eiamedu boe ewiagai. Dukodire boe ewiagodumodukare awu aredu piji rugadu jii toro rugadu.
MAR 14:10 Nou Jesus ure jorduwadowu Judas Iscariotes uture toro nou ure Judeu doge enomea maku Pao Kurireu aiwuge eimijerage etae. Judas Iscariotes makore ei tumoduie Jesus maku etai.
MAR 14:11 Egarere nou Judas Iscariotes makore pudui boeji rugadu. Dukodire egore tumoduie diero maku ai. Du nou meri pijire nou Judas Iscariotes aiwore Jesus rore jiboeji tuiorduwo tumode Jesus maku boe eimijerage pegareuge etaiwu meri bagai.
MAR 14:12 Páscoa meri boetojiwu aregodure dukeje Judeu doge ere tagu carneiro doge kugure ewido tuwo tuge pemegado nono turo mogadure tuwaduwo Páscoaji. Nou meriji nou Jesus ure jorduwadowuge enarare Jesusji. Egore: – Kaiba čemode page pemegado pawo kowuje, pawaduwo Páscoaji?
MAR 14:13 Nono Jesus ure tugeragu imei. Ere pobe. Ure jorduwadowuge nure emage. Makore ei. Akore: – Tadudo toro ba kurireu ka. Tagaregodumode toro dukeje ia imedu aregodumode tadogi ia pori po tabo. Tadudo nou imedu rekodaji.
MAR 14:14 Umode turemo ia baito dukeje tanarado nou uwaire bai čewuji ia paedumodewu bagai. Tagagodo aino: “Pagimijera aidure ia tumugumodewu bagai togwagewo Páscoa kejewu boe ekeji ture jorduwadowugebo nou boe edureu tada.”
MAR 14:15 Tamagomode aino dukeje nou uwaire bai čewu umode tardudo ia boe edu tadawu bai pemegareuji. Nou bai pemegamode rugadu pagwagewo Páscoa kejewu pageji. Nonore tamode page pemegado.
MAR 14:16 Nou Jesus ure jorduwadowuge pobedu doge eture nou ba kurireu ka. Erdure nou boeji nono Jesus akoino jiboeji. Nono ere tuge pemegado tuwaduwo Páscoaji nou bai tada rugadu.
MAR 14:17 Nou boečoji Jesus aregodure nouia ture jorduwadowugebo nou bai ka nou ime pobedu doge etae. Dukodire enodo padure doze nono Jesus apo.
MAR 14:18 Emugure nono ira keje togwage tabo rugadu. Dukeje Jesus makore ei. Akore: – Iwo tawie boe remawuji. Tagwagere itabo woe mare ia tagi tamode imagu boe eimijerage pegareuge etai.
MAR 14:19 Nou Jesus ure jorduwadowuge eiamedu boe ekiarigodure. Dukodire enarare Jesusji tu tu puregodaji. Egore: – I na akagoino? Imi na?
MAR 14:20 Jesus akore: – Tare doze. Mare umode tuge amireu pegodo nou carneiro kaguru tabowu emare umode imagu boe ekimijerage pegareuge etai.
MAR 14:21 Marigudu Pao Kurireu ure boe ewie iwimoduie duji. Nou Pao Kurireu bataru padure bapera keje. Aino čare iwimode nou Pao Kurireu meardae koia. Mare boe pegamode rugadu nou ure imagu boe eimijerage pegareuge etaiwuji. Botumodukare dukeje boe pegamodukare ji. Mare boture. Aino čare umode imagu boe eimijerage pegareuge etai dukodire boe pegamode ji rugadu.
MAR 14:22 Ča enogwage kimore. Jesus ure tugeragu tuge amireuji. Imadure Pao Kurireu bagai nou amireu paru tabo. Nono ure nou amireu kado dukeje ure pedo nou ture jorduwadowugei. Akore: – Tagwagedo awuji. Ikodu reo tawiabutuwo iwugeje, irore jiboe keje.
MAR 14:23 Nono Jesus ure tugeragu vinho kuruji jamedu. Nono imadure Pao Kurireu bagai nou uva kuru paru tabo. Dukejere ure pedo ei jamedu ekuduwo če.
MAR 14:24 Nono Jesus makore ei. Akore: – Ikure nou uva kuru rema. Iku redodumode boe eiamedu boe ero pegareu moriče. Pao Kurireu ure boe ewie marigudu tumoduie turo maiwu maku boe etai tuwo boe ekinorudo. Aino čare iku umode nou Pao Kurireu bataru jetudo pudui rugadu. Nou iku koiare umode meartorure Pao Kurireu jiwuge etawuje tuwobeče tuwo ekinorudo rugadu.
MAR 14:25 Mare iwo tawie. Ikudumodukare awu vinho kuruče pugeje jii toro itaregodumode mato ibagi pugeje du ka. Itaregodumode pugeje dukeje boe eiamedu boe eimijera kurireu mode imi. Nono ikudumode vinho kuru maiwuče tagabo.
MAR 14:26 Jesus akoino dukeje urare Pao Kurireu bataru tabo nou ture jorduwadowugebo. Nono ere tudawuje nou ba kurireu piji tuduwo toro Oliveira Ri ao ka.
MAR 14:27 Jesus makore ture jorduwadowugei. Akore: – Taiamedu boe tamode tagera ra ipiji. Pao Kurireu ure boe ewie marigudu. Nou bataru padure bapera keje. Akore: “Pao Kurireu umode nou jeture boeiwu bito. Nono nou boe eiamedu boe emode taodo nou tugimijera piji nono ovelha doge ero mogadure.”
MAR 14:28 Mare iewodumode pugeje dukeje itumode tagododai toro Galiléia moto ka.
MAR 14:29 Pedro akore: – Nou iage emode tugera ra apiji mare imire iromodukare aino. Imodukare ikera ra apiji rugadu.
MAR 14:30 Jesus makore Pedroji. Akore: – Imode awie boe remawuji. Awu boečoji rugadu akagomode arduwakaie i dumode pobe metia bokware rugadu. Dukeje čare kagariga kudugodumode.
MAR 14:31 Mare Pedro aidukare awu Jesus akoino pudui duji. Akore: – Boro. Iwimode akabo mare imodukare iwadaru udo nono akago mogadure. Imodukare ikera ra apiji rugadu. Ainore Pedro akore. Nono nouia Jesus ure jorduwadowuge egore nono Pedro ako mogadure jamedu.
MAR 14:32 Nono Jesus aregodure ture jorduwadowugebo ia iguru jetureu ka. Nou iguru iere Getsêmani. Nono Jesus makore nou ture jorduwadowugei. Akore: – Tamugudo woe. Imagomode baruto Pao Kurireu bagai.
MAR 14:33 Jesus ure tugeragu Pedroji, Tiagoji, Joãoji. Uture ebo kuri nono. Dukeje kiarigodu rakare. Jorduware boe pegamode pudui duji rugadu.
MAR 14:34 Makore nou ture tugeragu jiwugei. Akore: – Ikiarigodu rakare rugadu. Rakare tuwo iwido rugadu. Ča tadu rugadu woe tamagowo baruto Pao Kurireu bagai.
MAR 14:35 Nono Jesus ure tudaru gu epiji. Nono ure tubu jodo moto keje tumagowo baruto Pao Kurireu bagai. Makore Pao Kurireu bagai boe pegakawo pudui. Makore Pao Kurireu bagai uwo tumeardae mekido.
MAR 14:36 Akore: – Iogwa Kurireu nure aki. Aromode boe jamedu boeji. Boe ero pegamode idu utudo piji. Mare ukawo nono itaidu mogadure. Mare uwo nono akaidu mogadure.
MAR 14:37 Nono Jesus ure tugirimi nou ture jorduwadowuge ewagai. Mare kočare enudure. Nono Jesus makore Pedro bagai. Akore: – Simão Pedro! Anudure? Amagodo Pao Kurireu bagai itabowu hora uwo mitotu je mare kočare anudure kuri je.
MAR 14:38 Nono Jesus makore eiamedu boei. Ere pobe metia bokware. Akore: – Tameardae pemegare. Mare taraga bokware. Aino ča tanudukaba pugeje. Tamagodo itabo Pao Kurireu bagai baruto bope ukawo tumeardae pegareu maku tagai taro pegakawo.
MAR 14:39 Nono Jesus ure tudaru gu epiji pugeje. Nono makore baruto nono tumago mogadure boetoji pugeje.
MAR 14:40 Nono Jesus ure tugirimi nou ture jorduwadowuge etae pugeje. Jordure ei enudu kimore duji. Norire ekuji rugadu dukodire enudure rugadu. Nono erduwakare tumagomode jiboeji pugeje.
MAR 14:41 Nono Jesus uture epiji pugeje tumagowo baruto pugeje. Dukejere čare ure tugirimi etae pugeje. Nono makore ei. Akore: – Tanudu kimo nure rugadu kana? Urugadu. Aino čare imagudumode boe eimijerage pegareuge etai kuri aino rugadu.
MAR 14:42 Ča taragojedo. Pugeje. Nou ure imagu boe eimijerage pegareuge etaiwu aregodu. Paduwo togi.
MAR 14:43 Jesus mako kimore dukeje Judas Iscariotes aregodure etae. Jesus ure jorduwadowu nure ema. Aregodure boebo. Nou boe etaregodure tariga kurireu tabo. Etaregodure rago tabo. Boe ekimijerage ere nou boe etudo toro Jesus bagai. Nou ure Judeu doge enomea maku Pao Kurireu aiwuge ere nou boe etudo toro Jesus bagai. Jorduware Judeu doge eno bakaru jiwuge ere nou boe etudo toro Jesus bagai.
MAR 14:44 Nou Judas Iscariotes makore nou boei tugimadumoduie Jesus apo, tumoduie togwa to je koduto tuwo nou boe pegareuge erdudo taidure tuwo tugeragu jiwu nure ema duji.
MAR 14:45 Dukodire Judas Iscariotes uture kuri Jesus ae rugadu. Ukimadure apo rugadu. Akore: – Jorduwareu nure aki. Nono Judas Iscariotes ure togwa to Jesus je koduto.
MAR 14:46 Nono nou boe pegareuge ere tugeragu Jesusji turaga tabo.
MAR 14:47 Mare ia Jesus ure jorduwadowu ure tugeragu tariga kurireuji. Ure ia imedu bija kado. Nou imedu nou ure Judeu doge enomea maku Pao Kurireu aiwuge ekimijera kurireu utugare nure ema.
MAR 14:48 Mare Jesus makore nou boei. Akore: – Ire boe emeardae pegado kana emeartorukawo tugimijeragei kana? Ro pegareu karegure imi. Kočare tagaregodure tariga kurireu tabo rago tabo tawo tageragu i nono taro moga ro pegareuge eidu mogadure.
MAR 14:49 Iragojere tagabo meri jameduji Pao Kurireu uwai tada. Ire boe erduwado nono. Mare tagare tageragu i. Mare aino čare Pao Kurireu bataru jeture pudui rugadu. Tagaregodure tawo tageragu i nono Pao Kurireu bataru mogadure.
MAR 14:50 Dukodire Jesus ure jorduwadowuge eiamedu boe eregodure Jesus piji.
MAR 14:51 Nou boe pegareuge eture Jesus apo dukeje ia iparedu uture eregodaji. Dukodire nou boe pegareuge etaidure tuwo tugeragu ji jamedu. Nou iparedu ukudau areiare mitotu je.
MAR 14:52 Mare uture piji tuwo činorudo nou boe pegareuge epiji tuwiri kedo tabo.
MAR 14:53 Nou boe ere Jesus reko toro Judeu doge ekimijera kurireu uwai ka. Nou ure Judeu doge enomea maku Pao Kurireu aiwuge ekimijera kurireu nure ema. Nouia Judeu doge ekimijerage edu nono jamedu. Ure Judeu doge enomea maku Pao Kurireu aiwuge ekimijerage nure iage. Jorduware Judeu doge eno bakaru jiwuge nure iage. Boe eimijerage paru towuge nure iage.
MAR 14:54 Pedro kodu jaere boei tudu tabo Jesus rekodaji boe erdukawo pudui. Nono aregodure nou Judeu doge ekimijera kurireu uwai ka. Nou uwai kejere ure tumugudo nono tugobaigaregebo joru okwai.
MAR 14:55 Nou bai ja tadare nou ure Judeu doge enomea maku Pao Kurireu aiwuge eimijerage edure. Nou Jerusalém kejewu Judeu doge eimijerage eiamedu boe edure nono jamedu. Eiamedu boe etaiwore ia Jesus ro pegareu bagai. Ewiapagare batrarodureuge ewadaruji taiwo tabo nou Jesus ro pegareu bagai. Etaidure tuwo Jesus bito. Mare erdukare ia Jesus ro pegareuji.
MAR 14:56 Boe egore Jesus ro pegaie. Mare ewadaru kodukare puregodaji.
MAR 14:57 Nono ia boe ewadrarodure pugeje Jesus roji.
MAR 14:58 Egore: – Čemeardure awu imedu bataruji. Akore ime eie Pao Kurireu uwai towuje. Mare tumoduie Pao Kurireu uwai kurireu butudo dukeje merimoduie pobe metia bokware tuwo nou bai rakojedo pugeje. Ia ime karega. Pudumie tumoduie Pao Kurireu uwai rakojedo pugeje.
MAR 14:59 Mare awu ime ewadaru kodukare puregodaji jamedu.
MAR 14:60 Nono nou ure Judeu doge enomea maku Pao Kurireu aiwuge eimijera kurireu ure turagojedo. Makore Jesusji. Akore: – Amagomodukare nou ewadaru jipagi kana? Boe rugadu ji kana egoino rugadu?
MAR 14:61 Mare Jesus makokare boeji. Nono nou ure Judeu doge enomea maku Pao Kurireu aiwuge ekimijera kurireu unarare Jesusji pugeje. Akore: – Umode boe ekinorudowu nure aki? Pao Kurireu Onaregedu nure aki?
MAR 14:62 Jesus akore: – Imi rugadu. Mare iwo tawie Imedu Onaregedu romode jiboeji. Awu inodu otobiji tardumode i imugure Pao Kurireu ukana pemegareu jagwai duji. Tardumode i ire irawuje baru piji boetugu tabo duji.
MAR 14:63 Ča nou ure Judeu doge enomea maku Pao Kurireu aiwuge eimijera kurireu ure tugudau areia mega bowuje tugorigodure dukodi. Dukodire makore tumedage boe eimijeragei. Akore: – Ča. Pameardure awu Jesus bataru pegareuji rugadu.
MAR 14:64 Unure tudo nono Pao Kurireure. Pagare akoino. Mako peganure Pao Kurireuji rugadu. Dukodi čare nuba tameardaere? Nuba paromode ji? Nou boe eimijerage eiamedu boe ere tumeardaedo nono nou boe eimijera kurireu meardae mogadure. Emeartorukare Jesus akoinoduji. Egore pagaie akoino. Jesus ro pegaie rugadu. Tumoduie Jesus bito.
MAR 14:65 Nono ere todoguru barigu Jesus joki. Ere areia kogudo Jesus jegajeje. Nono ere boeto Jesusji. Egokodure ji. Egore: – Ioguduba roino ai? Nono nou tugobaigarege ere tugeragu ji pugeje tuwo boeto ji.
MAR 14:66 Pedro rakoje kimore nono nou bawadu keje. Nou ure Judeu doge enomea maku Pao Kurireu aiwuge ekimijera kurireu utugare aredu kodure nono.
MAR 14:67 Nou aredu jordure Pedroji. Pedro mugure nou joru okwai ture tugera urudo dutabo. Nou aredu aiwore ji. Akore: – Ature Nazaré kejewu Jesus apo jamedu.
MAR 14:68 Mare Pedro akore: – Boro. Iorduwakare kaba jiba akagoino. Nono Pedro uture nou bawadu kejewu bai poro ka. Nono ia kagariga kudugodure.
MAR 14:69 Nono nou aredu makore ia boei. Akore: – Jowu imedu ia Jesus ure jorduwadowu nure ema rugadu.
MAR 14:70 Mare Pedro akore pugeje tuiorduwakaie Jesusji. Ča Pedro rakoje kimore nono ji je. Dukejere ia boe emagore Pedroji pugeje. Egore: – Galiléia moto kejewu nure aki nono Jesus mogadure. Ia Jesus ure jorduwadowu nure aki rugadu.
MAR 14:71 Mare Pedro mako pegare ei tumagomodukaie boe remawuji dukeje Pao Kurireu uiago boe pegado pudui. Akore: – Iorduwakare nou tagagoino jiwu imeduji rugadu.
MAR 14:72 Čare rore puku kagariga kudugodure pugeje. Dukodire Pedro biabuture Jesus makore puduiwu tuwadaru keje. Jesus makore Pedroji makomoduie tuiorduwakaie pudui dukeje nou kagariga kudugodumoduie rugadu. Pedro makomoduie tuiorduwakaie Jesusji dumode pobe metia bokware rugadu. Aino ča Pedro biabuture nou Jesus bataru keje rugadu jeture pudui duji rugadu. Dukodire kiarigodure turo pegareuji. Dukodire ragudure.
MAR 15:1 Nou barogwato, barogwakododutabo nou Judeu doge enomea makudure aiwuge eimijerage, nouia Judeu doge eimijerage, nou jorduware Judeu doge eno bakaru jiwuge emagore pui tuwo tumeardae tawuje tuwo Jesus bito rugadu. Nono ere Jesus kogudo. Dukejere ere Jesus reko nou boe eimijera governador Pilatos bagai rugadu.
MAR 15:2 Etaregodure Jesus apo Pilatos ae dukeje Pilatos unarare Jesusji. Akore: – Boe rugadu kana? Judeu doge eimijera kurireu nure aki rugadu kana? Jesus akore: – Uu. Boe jokodu jire akagoino.
MAR 15:3 Nou ure Judeu doge enomea maku Pao Kurireu aiwuge eimijerage emago pegare Jesus rore jiboeji nou Pilatos biagai. Ewadrarodure Jesus rore jiboeji.
MAR 15:4 Dukodire Pilatos makore Jesusji pugeje. Akore: – Egore aro pegaie. Kočare amagokare boeji ewadaru jipagi.
MAR 15:5 Mare Jesus makokare boeji pugeje. Dukodire Pilatos jorduwakare nuba turomode Jesusji pugeje.
MAR 15:6 Judeu doge ewadae Páscoa kejere Pilatos ure ia ro pegareu tawuje baičoreu piji Judeu doge eroiaji. Judeu doge emagomode ia ro pegareu ieji dukeje Pilatos umode nou ro pegareu tawuje baičoreu piji utuwo pugeje.
MAR 15:7 Ro pegareuge emagare baičoreu tada nou joruji. Iage ekorigodure pui ba kurireu tada dukodire ere ia imedu bito. Dukodire eragojere nono baičoreu tada. Ia ro pegareu imedu rakojere ebo jamedu. Iere Barrabás.
MAR 15:8 Aino čare boe emagore Pilatoji uwo ia ro pegareu tawuje baičoreu piji utuwo pugeje turoiaji.
MAR 15:9 Dukodire Pilatos makore ei. Akore: – Tagaidure iwo awu Judeu doge eimijera kurireu tawuje baičoreu piji utuwo pugeje? Jesus jire nou Pilatos akoino.
MAR 15:10 Pilatos jorduware nou ure Judeu doge enomea maku Pao Kurireu aiwuge eimijerage emeardae pegare Jesus jituji. Etaidure boe emeartoruwo tu pudui rugadu. Dukodire etaregodure Jesus apo Pilatos ae boe emeartorukawo Jesusji pugeje. Mare Pilatos jorduware Jesus ro pegareu bokwaie duji. Dukodire aidure Jesus utuwo pugeje. Aidukare turo pegawo Jesusji.
MAR 15:11 Mare nou ure Judeu doge enomea maku Pao Kurireu aiwuge eimijerage ere boe ero jodo. Dukodire nou boe emagore Pilatoji uwo ro pegareu imedu Barrabás tawuje baičoreu piji utuwo pugeje.
MAR 15:12 Mare Pilatos makore ei. Akore: – Nuba iromode awu tagagoino Judeu doge eimijera kurireuji?
MAR 15:13 Nou boe doge ekudugodure. Egore: – Nou Jesus bito! Bito ipo padure pugajejewu keje!
MAR 15:14 Pilatos akore: – Kodiba tagagoino? Ro pegareu pa? Mare ewiapagakare ji. Ere tugudu rakado. Egore: – Bito ipo padure pugajejewu keje rugadu!
MAR 15:15 Pilatos aidure tuwo nou boe doge ewudugugo. Dukodire rore nono etaidu mogadure. Ure Barrabás tawuje baičoreu piji utuwo pugeje. Dukejere ure tugobaigarege edo boeto Jesusji tapira biri iku tabo. Nono ure Jesus maku etai ewo bito ipo padure pugajejewu keje.
MAR 15:16 Tugobaigarege ere tugeragu Jesusji. Ere turemo apo nou tugimijera Pilatos uwaito. Nono emagore nouia tugobaigarege ewagai. Ere bato pui nono Jesus ae.
MAR 15:17 Nono ere ia boe eimijera kurireu ukudau areia motureu tugu Jesusji. Nou areia kaworu dugunure. Ere ia boe eimijera kurireu atadawu towuje. Ere nou atadawudo botoguruče. Dukejere ere tugu Jesus aoto atadawuwo ema.
MAR 15:18 Nono emago pegare Jesusji. Egore: – Judeu doge eimijera kurireu nure aki. Boe pemegawo ai awikawo jii toro. Mare tuwudorekeadae tabore egoino Jesusji.
MAR 15:19 Nono ere ipo to Jesus aoraji. Ere todoguru to ji. Ere tubu jodo Jesus jokorai. Ere tuie jodo mototo tuwudorekeadae pegareu tabo.
MAR 15:20 Ere tumago pegareu akedudo dukeje ere nou boe eimijera kurireu ukudau areia motureu tawuje Jesus piji. Ere Jesus ukudau areia tugu ji pugeje. Nono ere tugeragu Jesusji tuduwo apo Jerusalém piji tuwo bito ipo padure pugajejewu keje toro ture boe ewidodureu ka.
MAR 15:21 Eture Jesus apo dukeje tugobaigarege ere tugeragu ia imeduji oreduwo nou Jesus bitodumode kejewu ipo tabo. Nou imedu iere Simão. Aregodure ipoguru piji ba kurireu ka. Cirene ba kurireu pijiwu nure ema. Onaregedu imedu iere Alexandre. Ia onaregedu imedu iere Rufo. Tugobaigarege ere tugeragu Simãoji oreduwo nou ipo tabo.
MAR 15:22 Nono eture Jesus apo toro ia tori ao ka. Ewadaru tabo nou tori iere Gólgota. Boe ewadaru tabo iere: “Boe ewireuge etaora ra jeta reo.”
MAR 15:23 Ere ia jorubo barigu vinho kuruto. Nou jorubo iere mirra. Nono ere nou vinho kuru maku Jesus ai kuduwo če. Mare Jesus aidukare tuguduwo če.
MAR 15:24 Nono tugobaigarege ere Jesus bu ipo padure pugajejewu keje. Ere Jesus ukudau areia pedo pui. Ere tuwadumode tabowu tori rogu barigu tuiorduwawo ioguduba umode tugeragu Jesus ukudau areiaji.
MAR 15:25 Meri jeture toro baru kugajeje dukeje ere bu ipo padure pugajejewu keje.
MAR 15:26 Ere atugoreboe bu ipo keje Jesus aora bukajeje. Egore: – Judeu doge eimijera kurireu reo.
MAR 15:27 Ere ia ro pegareu ime pobedu doge emugudo nono Jesus apo jamedu nou meriji. Ia rakojere Jesus kana pemegareu jagwai. Metia rakojere Jesus kana pegareu jagwai jamedu.
MAR 15:29 Boe etaregodure nono dukeje ere taora paradudo. Emago pegare Jesusji. Egore: – Akagore amoduie Pao Kurireu uwai butudo mare merimoduie pobe metia bokware dukeje amoduie rakojedo pugeje.
MAR 15:30 Kočare amodukare arawuje nou ipo piji? Ča arawuje. Amodukare akinorudo nou ipo piji rugadu?
MAR 15:31 Nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge emagore pui tugodakagiriwo Jesusji. Egore: – Awu imedu akore tumoduie boe ekinorudo. Mare roiwakare tuwo činorudo. Kočare umodukare boe ekinorudo rugadu.
MAR 15:32 Umode turawuje awu ipo piji dukeje pameartorumode ji. Kočare umode boe ekinorudowu karegure ema pugeje. Israel doge eimijera kurireu karegure ema rugadu. Nou ro pegareuge epadure ipo keje Jesus apowuge emago pegare Jesusji nou boe eimijera pegareugebo jamedu.
MAR 15:33 Meri aregodure pagaia ka dukeje boečodure moto jamedu boe parugajeje. Boečodure rugadu. Nou boečo kodure kuri toro nou três hora ka. Nou três hora otobiji baru aregodure nono tumogadure pugeje.
MAR 15:34 Dukeje čare Jesus makore tugudu tabo tuwadaru tabo. Akore: – Eloí. Eloí. Lemá sabactani? Boe ewadaru tabore akore: – Pao Kurireu. Pao Kurireu. Kodiba are akera ra ipiji?
MAR 15:35 Boe emeardure nou Jesus bataruji dukeje egore: – Tawiapagado. Jesus kudugodure Elias bagai.
MAR 15:36 Ia imedu rekodure ia esponja tabo. Ure nou esponja pegodo vinho kuru tabo. Nono aregodure tabo Jesus ae. Ure nou esponja kogudo ipo oto tabo. Nono ure nou esponja raido nou ipo tabo toro Jesus okwa ka. Akore: – Pabagamode Elias bagai uwo Jesus rawuje nou ipo piji.
MAR 15:37 Nono Jesus kudugodu rakare tugiarigodure dukodi dukeje bire.
MAR 15:38 Nou areia kurireu bararere Pao Kurireu uwai ja tadawu ure tuwowuje nou bai ja oto piji moto ka jamedu.
MAR 15:39 Ia tugobaigarege eimijera rakoje puredure nou Jesus padure kejewu ipoji. Jordure Jesus bire duji. Akore: – Boe rugadu. Pao Kurireu onaregedu nure ema rugadu.
MAR 15:40 Areme eragojere nono jamedu. Etaiwo jaere Jesus ae. Iarodo iere Maria Madalena. Metago iere Salomé. Ia etumedago iere Maria jamedu. Nou Maria ore ime ere pobe. Ia iere Tiago. Umana iere José.
MAR 15:41 Jesus rakoje kimore Galiléia moto keje dutabo nou areme emeartorure ji. Aino eragojere nou Jesus bireu keje. Ia areme etaregodure Jerusalém piji turagojewo nono jamedu.
MAR 15:42 Merirekodutabo José aregodure. Arimatéia ba kurireu kejewu nure ema. Boe eimijera nure ema jamedu. Boe etaidure ji. Emeartorure ji. Nou José upagare Pao Kurireu bagai boe eiamedu boe eimijerawo ema. Aino čare Jesus bire sexta feira meri keje. Dukodire José uture boe eimijera Pilatos bagai tumagowo ji. Pogurukare tumagowo ji. Aidure tuwo Jesus tugu mototo.
MAR 15:44 Pilatos okeare Jesus bire kuri aino duji. Makore tugobaigarege eimijera bagai tunarawo ji Jesus bagai. Nou tugobaigarege eimijera akore Jesus bie rugadu. Nono Pilatos akore: – Kočare Jesus bire kuri je. Nono Pilatos makore Joseji uwo tugeragu Jesusji uwo tugu mototo.
MAR 15:46 Nono José ure akirodo ia boe ekudau areia motureuji. Uture tabo bireu Jesus ae. Ure Jesus rawuje nou ipo piji. Ure Jesus upodo nou areia tabo. Nono ure Jesus tugu ia tori poro maiwuto nono Judeu doge ero mogadure. Ere nou tori porodo tuwo ia bireuge etugu nono. Mare ekare ia bireuge etugu nou tori poroto raga. Ča José ure Jesus tugu nou tori poroto dukeje ure ia tori kurireu bu nou tori poro je keje tuwo miwuje.
MAR 15:47 Areme eku kidure rore aino duji. Iarodo iere Maria Madalena. Metago iere Maria. José uče nure ema. Emagere erduware kaiba Jesus padure.
MAR 16:1 Sábado boečoji nou areme ere tudawuje tuwo akirodo roreboeji tuwo reko Jesus biri joki. Iarodo iere Maria Madalena. Metago iere Maria. Tiago uče nure ema. Metago iere Salomé.
MAR 16:2 Domingo meriji, ča boečoto eture nou tori poro ka.
MAR 16:3 Epuredugodure dukeje emagore pui. Egore: – Nuba paromode pawo nou tori poro jado? Tori kurireu padure nou tori poro je keje. Paragakare pawo nou tori kurireu tawuje nou tori poro piji. Etaregodure dukeje etaiwore mare nou tori kurireu padukare nou tori poro je keje pugeje.
MAR 16:5 Dukodire ere turemo nou tori poroto rugadu. Nono erdure ia ipareduji. Mugure nono nou tori poro ja tada. Ukudau areia kigadu maere ji rugadu. Dukodire čare epagudugodure nou ipareduče.
MAR 16:6 Nou iparedu makore ei. Akore: – Tabagudukaba. Iorduware kaba bagaiba taroino taemaru tabo. Tagaiwonure Nazaré pijiwu bitodureu Jesus bagai. Ča rakojekare woe pugeje. Tagaiwodo padure kejewu toriji. Jewodure pugeje.
MAR 16:7 Tadudo pugeje toro Jesus ure jorduwadowuge ewagai, Pedro bagai jamedu. Tawo ewie Jesus utumoduie etododai Galiléia moto ka. Torore boe erdumoduie pudui. Ure ewie marigudu erdumoduie pudui toro.
MAR 16:8 Nono nou areme eregodure nou tori poro piji tubagudu koia. Emororamagadure nou tuiordure jiboeji rugadu. Dukodire emagokare boeji boe ewiagai.
MAR 16:9 Domingo meriji ča boečoto Jesus jewodure pugeje. Nono ure Maria Madalena jordudo pudui. Marigudu ure nou bope doge etuwaire ewarigu nou Maria Madalena piji. Nou bope doge etuwaire enodo padure sete.
MAR 16:10 Aino čare ure Maria Madalena jordudo pudui dukeje Maria Madalena uture nou Jesus ure jorduwadowuge etae tuwo ewie tuiordure Jesus jituji. Emage edure tuwai keje tragudu tabo tugiarigodu tabo.
MAR 16:11 Maria Madalena ure ewie. Akore: – Jesus jewodure pugeje. Iordure ji rugadu. Mare emeartorukare Maria Madalena makore jiboeji.
MAR 16:12 Ia ime pobedu doge eture tuwai piji ipoguru ka. Jesus ure jorduwadowuge nure emage. Nono Jesus ure erdudo pudui.
MAR 16:13 Dukodi čare ere tugirimi nouia Jesus ure jorduwadowuge ewagai tuwo ewie tuiordure Jesus jituji. Mare emeartorukare nou ime pobedu doge egoino jiboeji.
MAR 16:14 Dukeje čare Jesus ure ture jorduwadowuge eiamedu boe erdudo pudui. Enodo padure onze. Enogwagere dukeje Jesus aregodure etae. Mako rakare ei. Emeartorukare nouia tumedage ewadaruji. Nou emedage erdure Jesusji dukeje ere tumedage ewie mare emeartorukare. Dukodire Jesus mako rakare ei.
MAR 16:15 Dukodi čare makore ei pugeje. Akore: – Tadudo moto jamedu boe parugajeje tawo boe eiamedu boe ewie iwadaru pemegareuji.
MAR 16:16 Imode meartorure iwuge eiamedu boe ekinorudo. Emeartorumode i dukeje etao pegododumode dukeje imode ekinorudo. Mare meartorukare iwuge imode ewarigu boe pegareuto.
MAR 16:17 Imode meartorure iwuge ero rakado. Emode bope doge etuwaire etawuje boe epiji. Mare turaga tabo karega. Ikie tabore imeardae tabore eroino. Emagomode boe tuginaiwuge ewadaruji jamedu. Boe erdumode eroino duji dukeje erduwamode iragojere ebo duji.
MAR 16:18 Emode tugeragu awagei mare boe pegamodukare ei. Ekudumode jorubo pegareuče mare boe pegamodukare ei. Emode tugera bu kogodureuge ewugeje dukeje nou kogodureuge epemegagodumode jamedu.
MAR 16:19 Jesus ure tumago akedudo nou ture jorduwadowugei dukeje ruture baruto. Aregodure toro baruto dukeje mugure Pao Kurireu kana pemegareu jagwai. Aino Pagimijera kurireu nure ema rugadu.
MAR 16:20 Nou Jesus ure jorduwadowuge emagore Jesus bataru pemegareuji boe eiamedu boe ewiagai moto jamedu boe parugajeje. Pagimijera Jesus ure ero rakado. Dukodi čare boe erduware boe jokodu jirabodu boe egoino.
LUK 1:1 Imedia Teófilo nure aki. Ire awu bapera atugodo awagai boe remawu tabo arduwawo boe remawuji rugadu. Boe ereadodure boe ewiagai tuiordure jiwu Jesus rore jiboeji tumeardure jiwu Jesus makore jiboeji. Ia boe etaidure tuwo nou boe ereadodure jiwu Jesus rore jiboe bu bapera keje, boe ereadodure jiwu Jesus makore jiboe bu bapera keje jamedu. Ere boe ereadodure jiboe bu bapera keje jamedu. Mare imire, ire iragado i iorduwawo boe remawuji rugadu. Ire iragado i iorduwawo Jesus rore jiboeji, makore jiboeji. Dukodire imagore jordure Jesus rore jiboe jiwugei, meardure Jesus bataru jiwugei. Ere iorduwado boe remawuji rugadu. Dukodire inure awu bapera atugodo awagai boe remawu tabo arduwawo boe remawuji rugadu.
LUK 1:5 Judéia moto keje Herodes boe eimijera unure ema. Dukejere ia imedu maragodure Pao Kurireu uwai tada. Nou imedu iere Zacarias. Maragodure Pao Kurireu uwai tada tuwo Judeu doge enomea maku Pao Kurireu ai. Abias uwobe nure nou Zacariače. Nou Zacarias oreduje iere Isabel. Nou oreduje uwobe nure Arãoče jamedu.
LUK 1:6 Nou Zacarias toreduje apo emeartorure rugadu Pao Kurireu ure maku Judeu doge etaiwu bakaruji. Dukodire Pao Kurireu aidure ei. Makore ro pemegareuge nuie emage.
LUK 1:7 Mare Isabel kuiarumodukare dukodire etore bokware. Aino čare epegagodure tore bokware dutabo rugadu.
LUK 1:8 Nou maragodure Pao Kurireu uwai tadawuge ime emagare rugadu. Emode roreboe kowu. Nou roreboe uredudu rore Pao Kurireu uwai tada. Ere kowu kamo keje Pao Kurireu ai. Ere tori barigu tu tu je tuiorduwawo ioguduba umode roreboe kowu nou meriji. Ia meri keje nou tori buture Zacarias ie keje dukodire Zacarias ure turemo tuginaigodu Pao Kurireu mugure tadawu baito tuwo nou roreboe kowu kamo keje Pao Kurireu ai nou tori buture tugie keje kodi.
LUK 1:10 Nono boere turugadu dukodire Zacarias ure roreboe kowu kamo keje rugadu. Toro bawadu kejere boe emagare. Emagore baruto Pao Kurireu bagai tubaga tabo Zacarias uwo tumaragodae iado.
LUK 1:11 Mare ukare iado raga dukeje ia Pao Kurireu utugare baru tadawu aregodure Zacarias ae. Rore puku ji nou baru tadawu rakojere nono pudabo nou kamo jagwai.
LUK 1:12 Zacarias jordure nou Pao Kurireu utugare baru tadawuji dukeje pagudugodure.
LUK 1:13 Mare nou baru tadawu akore: – Apagudukaba. Amagore baruto Pao Kurireu bagai uwo akoredo. Pao Kurireu meardure amagore jiboeji. Akoreduje Isabel kuiarumode rugadu. Taganaregedu imedu mode. Tamode iedo João aino.
LUK 1:14 Botumode dukeje taegaremode ji rugadu. Boe egaregodumode ji rugadu.
LUK 1:15 Pao Kurireu aidu kurimode nou taganaregedu Joãoji. Mako pemegamode João rore jiboeji rugadu. Mare nou taganaregedu João biedu pemegado kudukawo vinho kuruče jii toro rugadu, kudukawo piga kuruče jamedu jii toro rugadu. Pao Kurireure akoino. Botumode dukeje Pao Kurireu Uwari rakojemode apo rugadu tuwo ro pemegado jii toro rugadu.
LUK 1:16 Ričodumode dukeje nou taganaregedu João makomode Pao Kurireu bataruji Israel moto kejewu Judeu doge ewiagai. Dukodire umode Judeu doge emeartorudo Pao Kurireuji pugeje. Nou meartorure Pao Kurireu jiwuge emagamode pugeje Israel moto keje. Emode tugimijerado Pao Kurireuče pugeje.
LUK 1:17 Nou taganaregedu João kodumode Pao Kurireu otodai. Rakamode, kurimode nono jorduware Pao Kurireu bataru jiwu Elias mogadure. Nou taganaregedu João okituwamode boei ewudugugoduwo torebo. Umode ro pegareuge edo tugera ra turo pegareu piji ro pemegareuge emeardae ka pugeje. Umode Judeu doge ewie Pagimijera Kurireu aregodumoduie kuri je ewo tudo turugadu Pagimijera Kurireu togi.
LUK 1:18 Zacarias unarare nou Pao Kurireu utugare baru tadawuji. Akore: – Kodiba iorduwamode awadaru jetumode pudui duji? Ipegagodure. Itoreduje pegagodure jamedu.
LUK 1:19 Nou Pao Kurireu utugare baru tadawu akore: – Ikiere Gabriel. Imire imugure Pao Kurireu apo tu tu je. Emare ure itarego mato iwo awie tumeardae pemegareuji.
LUK 1:20 Pao Kurireu umode imagore jiboe jetudo pudui rugadu taidure jiwu meri keje. Mare ameartorukare imagore jiboeji. Dukodire amago bokwamode jii toro nou inagore jiwu akanaregedu botumode du ka. Botumode dukeje amago padumode tači akajeje pugeje.
LUK 1:21 Toro nou Pao Kurireu uwai jokorai boe edure nono tubaga tabo nou Zacarias uwo tumaragodae iado. Mare nou Zacarias rakoje raire toro bai tada. Dukodire nou boe emororamagadure bagai. Egore: – Kočare ukare tuie bu raga.
LUK 1:22 Dukejere Zacarias ure tuie bu rugadu. Mare mako bokware dukodire boe erduware jordure iaboeji nono duji. Zacarias roiwakare tumagowo dukodire ure boe erduwado tumeardaeji tugera tabo.
LUK 1:23 Nou Zacarias maragodure kejewu ari akedure dukeje uture tuibagi toro tuwai ka nouia ba kurireu ka.
LUK 1:24 Ia meri keje oreduje Isabel kuiarure. Dukodire ukare tudawuje tuwai piji jii toro. Arire ikera aboudure ji tumugu tabo tuwai keje.
LUK 1:25 Akore: – Mare aino Ikimijera Pao Kurireu ure tugera maku inai. Marigudu ikuiarukare dukodire ipogurure. Mare aino čare ikuiarure dukodire ipogurukare imeruwo imedage aremebo pugeje.
LUK 1:26 Arire seis Isabelji kuiarure dutabo. Dukejere Pao Kurireu ure nou tudugare baru tadawu Gabriel utudo ia nogwaredu bagai tuwadaru tabo Nazaré ba kurireu ka. Nazaré ba kurireu rakojere Galiléia moto keje. Nou nogwaredu iere Maria. Nogwaredu nure ema. Bowadukare ia imeduji raga. Mugumode ia Davi uwobe imedu apo. Nou imedu iere José. Erduware tumugumode puapo duji rugadu.
LUK 1:28 Nou Pao Kurireu utugare baru tadawu aregodure Maria ae dukeje makore Mariaji. Akore: – Itaregodu. Pao Kurireu rakojere akabo. Ro pemegamode ai taidu tabo rugadu.
LUK 1:29 Maria pagudugodure če. Mare jorduwakare kaba kodiba akoino pudui.
LUK 1:30 Mare nou Pao Kurireu utugare baru tadawu makore ji. Akore: – Are. Apagudukaba. Pao Kurireu ro pemegamode ai rugadu. Akuiarumode. Akanaregedu imedu mode. Iemode Jesus. Boe kurireu umode ema. Iemode Pao Kurireu Onaregedu. Pao Kurireu umode boe eimijera kurireudo ema. Nou Jacó uwobe Judeu doge eimijera kurireu mode ema rugadu. Umode nono Judeu doge eimijera kurireu Davi umogadure. Judeu doge eimijera kurireu mode ema jii toro rugadu. Du akedumodukare rugadu.
LUK 1:34 Maria akore: – Nuba ikuiarumode? Nogwaredu kimo nure imi. Imedu jeribarikare i raga.
LUK 1:35 Nou baru tadawu akore: – Pao Kurireu Uwari umode turawuje akae. Pao Kurireu umode tonaregedu maku akai. Dukodire akanaregedumode. Boe egomode Pao Kurireu onaregedu iure ema rugadu. Pao Kurireu ro rakare kodi. Atuie Isabel kuiarure. Boe egore kuiarumodukaie pugeje pegagoduie kodi. Mare aino čare kuiarure kejewu ari oto padure seis. Pao Kurireu koiare umode onaregedudo toredu apo rugadu. Pao Kurireu ro rakare dukodire rore aino Isabelji romode aino ai jamedu.
LUK 1:38 Maria akore: – Pao Kurireu utugare nure imi. Awadaru ure turugadu inai. Nono nou baru pijiwu Pao Kurireu utugare uture tuibagi Maria piji.
LUK 1:39 Maria ure tugera pemegado pudui tuduwo Judéia moto ka tugiriaduwo tuduie Isabel bagai. Nou Isabel mugure kejewu boe eda mugure toriguru tada. Maria aregodure dukeje ure turemo Zacarias uwaito tugimaduwo Isabel apo.
LUK 1:41 Isabel meardure Maria makoji. Dukeje Isabel onaregedu jakarere pudui kuri tada. Pao Kurireu ure Isabel korau tubemega tabo turaga tabo, Uwari rakojere Isabel apo dukodi.
LUK 1:42 Isabel makore Mariaji. Akore: – Pao Kurireu ro pemegare ai rugadu awu areme epiji. Akanaregedu botumode dukeje Pao Kurireu ro pemegamode ji jamedu.
LUK 1:43 Ikimijera mode ema. Boe karegure imi. Kočare ikimijera kurireu uče aregodure itae.
LUK 1:44 Nono imeardure amago jitu keje itonaregedu jakaregodure magadure ikuri tada jorduware boe ekimijera kurireu mode akanaregeduče dukodi.
LUK 1:45 Ameartorure Pao Kurireu makore ai duji dukodire boe pemegamode ai rugadu. Pao Kurireu akore turomoduie aino rugadu tuwiagodumodukaie tuwadaru piji. Aki ameartorure nou bataruji. Dukodire boe pemegamode ai rugadu.
LUK 1:46 Maria akore: – Imeardu kurire Pao Kurireuji. Iagarere i Pao Kurireu rore aino iduji. Emare umode ikinorudo. Utugare nure imi. Boe kurireu karegure imi. Mare ro pemegare i rugadu. Dukodire boe eiamedu boe ewiabutumode iwugeje. Egomode jakarere puduiwu nuie imi Pao Kurireu ro pemegare i kodi. Ro pemegareu nure ema.
LUK 1:50 – Okudugodure meartorure puduiwugebo ji aino rugadu. Okudugodure jawu boebo. Aino maiwu boebo jamedu.
LUK 1:51 – Očarore tuwadaru jiwuge ere tumeardae tawuje mare Pao Kurireu ure tuwu ekajeje tugana rakareu tabo ekawo nou tumeardae utudo tudobiji.
LUK 1:52 – Ure boe eimijera kurireuge etagedudo. Ure boe eimijeragedo marenarue dogeče.
LUK 1:53 – Ure uke boeire jiwuge ekuredudo tuge pemegareu tabo. Ure nou o diero kurireuge etudo tugera kedo tabo.
LUK 1:54 – Marigudu ure tuwadaru maku mariguduwuge pawobe etai. Aino ure tumagore jiboe jetudo pudui rugadu. Dukodire aregodure tuwo tugera maku tudugarege Israel kejewu Judeu doge etai. – Biabuture tumeardae keje rugadu togudugoduwo Abraão uwobe eiamedu boebo jii toro rugadu. Ainore Maria akore tura tabo.
LUK 1:56 Maria rakoje raire tuduie Isabel apo. Arire pobe metia bokware ji nono dukeje ure tugirimi tuibagi tuwai ka.
LUK 1:57 Ari aregodure Isabel kuri butumodewu ka. Dukodire kuri buture rugadu. Imedu rogure ema.
LUK 1:58 Nono Isabel jakarere pudui rugadu. Nou uwobe nou mugu puredure jiwuge eiamedu boe egarere pudui jamedu nou Isabel kuri butu pemegare kodi. Erduware Pao Kurireu ro pemegare jituji rugadu.
LUK 1:59 Merire sete nou negeduroguji dukeje boe etaregodure Isabel uwai ka tuwo nou imedu rogu oe oto biri rogu kado nono turoiaji. Dukeje etaidure tuwo iedo Zacarias nono uo ie mogadure turoiaji.
LUK 1:60 Mare uče akore: – Boro. Pamode iedo João.
LUK 1:61 Mare nou boe egore: – Tawobe ekiemodukare João.
LUK 1:62 Nono ere tugera onado nou uo ae tunarawo ji nuba nou imedu rogu iemode.
LUK 1:63 Zacarias ure tugera onado ei tunara tabo bapera bagai. Dukejere ure tuwadaru bu nou bapera keje. Akore: – Iemode João. Ure iedo João dukodire nou boe erore toku je.
LUK 1:64 Zacarias ure nou ie bu nou bapera keje dukeje bataru padure tači kajeje. Dukodire mako pemegare Pao Kurireuji.
LUK 1:65 Nou boe erdure nou inoduji dukeje epagudugodure nou bataru padure tači kajeje duji. Boe ereadodure nou boeji nou Judéia moto kejewuge boe eiamedu boe ewiagai.
LUK 1:66 Boe emeardure nou ereadodaeji dukeje ewiagorore tuiedui. Erduware Pao Kurireu raka meture nou imedu rogu apo duji. Boe enarare pui. Egore: – Nuba nou imedu rogu romode?
LUK 1:67 João uo Zacarias korobadure Pao Kurireu Uwari apo. Ure Zacarias jorduwado nuba Maria onaregedu botumodewu romode. Dukodire Zacarias makore nou Pao Kurireu bataruji. Akore:
LUK 1:68 – Pamago pemegawo Pagimijeraji. Israel moto kejewuge emeartorure jiwu Pao Kurireu nure ema. Aregodure tuwo tugera maku meartorure puduiwuge etai tuwo ekinorudo rugadu.
LUK 1:69 – Ure nou umode boe ekinorudowu arego mato pagae. Jawu pawobe eimijera kurireu iere Davi. Meartorure Pao Kurireuji. Nou mariguduwu boe eimijera Davi uwobe nure nou umode boe ekinorudowuče jamedu.
LUK 1:70 – Marigudu Pao Kurireu akore tumoduie paginorudo jordu pegare paiwuge epiji, eraga piji. Makore Pao Kurireu bataru jiwuge ere boe ewie nou Pao Kurireu bataruji.
LUK 1:72 – Ure tumeardae pemegareu maku jawu pawobe etai eno bakaruwo ema. Makore ei tuwiagodumodukaie nou ture maku etaiwu tumeardae piji jii toro rugadu. Makore ei togudugodumoduie ebo rugadu.
LUK 1:73 – Pao Kurireu makore jawu pawobe etuo Abraãoji tumoduie tumagore jiboe jetudo pudui rugadu. Makore tumoduie paginorudo jordu pegare paiwuge epiji. Makore tumoduie pabagudure jiboe okwado pabiji tudugaregewo pagi rugadu paro pemegawo, parore jiboe uwo tuginai meartorukare jiwuge ero piji nono Pao Kurireu aidu mogadure jii toro pawimodedu ka. Ainore Zacarias akore. Maria onaregedu jire akoino. Nono Zacarias makore pugeje. Akore: – Aino čare itonaregedu jire imagomode iwo boe erduwado nuba itonaregedumode.
LUK 1:76 – Itonaregedu imedu rogu nure aki. Boe emago pemegamode ai. Egomode makore Pao Kurireu bataru jiwu nuie aki. – Akaregodure Pagimijera Kurireu otodai awo boe udo turugadu Pagimijera Kurireu togi.
LUK 1:77 – Amode boe ewie nuba boe eromode tureadoduwo turo pegareu boeji Pao Kurireu biagai Pao Kurireu uwo ekinorudo. Boe ereadodumode turo pegareu boeji Pao Kurireu biagai dukeje Pao Kurireu biagodumode ero pegareu boe piji. Dukodire umode ekinorudo etukawo bope doge eda kejewu joru pegareu ka.
LUK 1:78 – Pao Kurireu okudugodure boebo. Ro pemegamode boei rugadu. Dukodire umode parduwado nou umode paginorudowu meardaere jiboeji. Nou umode paginorudowu meardae ure nono meri rutu mogadure. Mare meri rutu ji karega inagoino. Umode boe ekinorudowu umode boe erduwado Pao Kurireu bataru remawuji. Dujire inagoino. Marigudu boe eiamedu boe erduware rugadu tuwimode duji jii aino rugadu. Dukodire boe emeardae ure nono boečo mogadure. Mare boečo ji karega inagoino. Ekiarigodure, emororamagadure tuwimode duji rugadu. Dujire inagoino. Mare aino nou umode paginorudowu umode paroiwado parore jiboeji tuwo padawuje pagiarigodure dupiji pabemegawo boebo pamugu pemegawo Pao Kurireu apo. Ainore Zacarias akore.
LUK 1:80 Nou Zacarias onaregedu ričodure. Ure turagado pudui tumeardae jetororeu tabo. Dukodire uture tuje piji tuo piji tumuguwo ia boe maereu keje. Mugu raire nono. Toro ia meri keje aregodure tuibagi Israel moto kejewu Judeu doge etae tuwo ewie Pao Kurireu bataruji. Maragodumode nou inoduji rugadu.
LUK 2:1 Síria moto kejewu boe eimijera governador iere Cirênio. Dukejere Roma kejewu boe eimijera kurireu César Augusto ure tuwadaru utudo boe eiamedu boe etae. Akore eiago tugirimi tuwobe edure kejewu moto ka ewo tugie bu bapera keje. Aidure tuiorduwawo nou to moto kejewu boe emagamode dubagai. Dukodire boe eiamedu boe eture mariguduwuge tuwobe ewodure kejewu ba kurireu ka tuwo tugie bu bapera keje.
LUK 2:4 Dukodire Maria uture toredu José apo Nazaré ba kurireu piji Belém ba kurireu ka nou mariguduwuge tuwobe ewodure kejewu moto Belém ba kurireu ka tuwo tugie bu bapera keje. Nou Belém ba kurireu padure Judéia moto keje. Mariguduwu Judeu doge eimijera kurireu Davi boture Belém ba kurireu keje. Nono José, Maria, Davi uwobe nure emage. Dukodire eture Belém ba kurireu ka.
LUK 2:6 Maria kurijirigodure etaregodure Belém ba kurireu to dukeje. Mare boe emagare nono tuwo tugie bu bapera keje dutabo. Dukodire nou Belém ba kurireu korobadure nou boebo. Maria, José eda bokware. Dukodire eture tubaduwo ia boe egu tapira doge ewai tada. Nonore kuri buture. Imedu rogure ema. Onaregedu boetojiwu nure ema rugadu. Maria ure areia upodo tonaregedu apo. Nono ure tonaregedu rogu bu ia tapira doge eke ja tada. Enudure nono nou bai tada.
LUK 2:8 Nou boečoji ia boe edu puredure tietu tabo tagu cabrito dogei, tagu carneiro dogei, ipoguru keje.
LUK 2:9 Nono Pao Kurireu utugare baru tadawu aregodure etae. Pao Kurireu o jorugu pemegareu urugure ei. Nono epagudugodure.
LUK 2:10 Mare nou baru tadawu akore: – Tabagudukaba. Itaregodure Pao Kurireu o bakaru pemegareu tabo uwo boe eiamedu boe egaredo pudui.
LUK 2:11 Ainore awu bakaru ure. Awu meriji Belém ba kurireu keje umode boe ekinorudowu boture. Pao Kurireu ure maku boe etaiwu tagimijera nure ema. Boe eimijera kurireu mode ema rugadu.
LUK 2:12 Tadudo toro tarduwo ji. Tardumode ji areia upore apo duji. Tardumode ji ia boe egu tapira doge ewai tada, ia tapira doge eke ja tada. Tardumode aino ji dukeje tarduwamode ema rugaduie duji.
LUK 2:13 Ča ia Pao Kurireu utugarege baru tadawuge etaregodure pugeje. Emagare rugadu. Emago pemegare Pao Kurireuji.
LUK 2:14 Egore: – Boe emago pemegawo Pao Kurireuji rugadu baru tada. Pao Kurireu uwo taidure jiwuge epemegado pui woe moto keje.
LUK 2:15 Nono nou baru tadawuge erudure tuibagi baruto. Nou jeture tagu ie jiwuge emagore pui. Egore: – Paduwo Belém ba kurireu ka. Parduwo Pagimijera Pao Kurireu makore pai jiboeji.
LUK 2:16 Nono eture tači je toro Belém ba kurireu ka rugadu. Nono erdure nou Joseji nou Mariaji, nou etonaregedu roguji jamedu. Nou negedurogu padure ia tapira doge eke ja tada nono nou baru tadawuge ego mogadure rugadu.
LUK 2:17 Erdure ji dukeje ereadodure boe ewiagai Pao Kurireu utugarege baru tadawuge emagore jiboeji. Boe eku kidugodure nou egore tuwiagai duji.
LUK 2:19 Mare Maria jorduware marigudu. Dukodire roiwakare tuwiagoduwo nou Pao Kurireu bataru piji. Biagorore nou bataru boeji rugadu.
LUK 2:20 Nou jeture ovelha doge eiwuge ere tugirimi tagu ie etae. Erare tumago pemegawo Pao Kurireuji tuiordure jiboeji tumeardure jiboeji tuwo Pao Kurireu ie kurido rugadu. Nou Pao Kurireu utugare baru tadawu makore jiboe jeture pudui rugadu. Dukodire eragodure aino čimaduwo Pao Kurireu apo.
LUK 2:21 Merire sete Joseji Mariaji. Dukejere ere tonaregedu baka oto biri kado nono nou tuwobe Judeu doge ero mogadure. Nono ere iedo Jesus nono nou Pao Kurireu utugare baru tadawu makore ei dumogadure. Makore marigudu Mariaji kuiarure du otodai uwo iedo Jesus aino.
LUK 2:22 Merire 40 Joseji Mariaji etukare Pao Kurireu uwai ka dutabo. Ainore Judeu doge erore. Etonaregedu imedu boture dukeje etukare Pao Kurireu uwai ka jii je. Ainore Moisés ure maku Judeu doge etaiwu bakaru jawu akore. Merimoduie 40 ei dukejere etuwo tonaregedu apo Pao Kurireu uwai ka. Nono merire 40 ei dukeje Maria, José eture Pao Kurireu uwai ka Jerusalém ba kurireu ka tonaregedu rogu apo tuwo Pao Kurireu jordudo ji tumagowo paru tabo jamedu Pao Kurireu utugarewo ema.
LUK 2:23 Marigudu Pao Kurireu makore Judeu dogei. Moisés ure bu bapera keje Judeu doge eno bakaruče. Pao Kurireu akore: – Nou taganaregedu imedu boetojiwu maku inai itugarewo ema.
LUK 2:24 Ainore erore rugadu. Merire 40 ei dukeje ere metugoe pobedu doge ekowu tuwo turemo Pao Kurireu uwaito. Marigudu Pao Kurireu makore Judeu dogei. Akore: – Taganaregedu botumode dukeje tamode metugoe pobedu doge ekowu tawo maku inai, tawo taremo iwaito. Tago diero kurikare dukeje tamode metugo gigiri dogedo pobe. Tago diero kurire dukeje tamode metugo kurireugedo pobe tawo ekowu tawo taganaregedu maku inai. Ainore Pao Kurireu akore. Moisés ure nou bataru bu bapera keje marigudu Judeu doge eno bakaruče. Dukodire José roino toreduje apo metugoe pobedu dogei.
LUK 2:25 Nono Jerusalém ba kurireu kejere ia imedu pemegareu rakojere. Iere Simeão. Meartorure Pao Kurireuji. Meartorure Pao Kurireu bataruji. Pao Kurireu akore tumoduie Judeu doge ekinorudo boe pegareuge epiji. Pao Kurireu Uwari rakojere nou imedu Simeão apo. Ure Simeão bie. Akore: – Ardumode umode boe ekinorudowu imeduji awimodukare du otodai.
LUK 2:27 Pao Kurireu Uwari ure nou Simeão utudo Pao Kurireu uwai ka nou meriji. Maria, José, etaregodure Jesus apo tumagowo Pao Kurireuji aiwowo ji.
LUK 2:28 Nou Simeão jordure ji dukeje jorduware ji rugadu, umode boe ekinorudowu mode ema rugadu. Nono Simeão ure tugeragu Jesus roguji. Nono mako pemegare Pao Kurireu bagai.
LUK 2:29 Akore: – Ikimijera nure aki. Aino čare are awadaru jetudo pudui rugadu. Iordure ioku remawu tabo umode boe ekinorudowuji rugadu dukodire imode itamudo. Are akeragu awu imedu roguji boe eiamedu boe emeartoruwo ji. Umode boe tuginaiwuge erduwado ameardae pemegareuji. Umode Judeu doge epemegado, ero pemegawo boe egai.
LUK 2:33 Nou Jesus uo uče ebogodure nou Simeão akoino nou imedu rogu jituji.
LUK 2:34 Simeão ure tuwadaru pemegareu bu ewugeje. Akore Mariaji: – Pao Kurireu ure tugeragu akanaregeduji. Umode ia Israel moto kejewuge etagedudo. Mare umode nouia Israel doge ekinorudo jamedu. Pao Kurireu umode akanaregedu udo nono tuwadaru mariguduwu mogadure. Dukodire boe erdumode Pao Kurireu makore jiboe jetumode pudui rugadu duji. Mare boe emeartorumodukare makore jiboeji. Emago pegamode akanaregeduji.
LUK 2:35 Boe emeardumode egoino duji dukodire erduwamode nou boe emeardae pegareu boeji. Nono akiarigodumode rugadu. Nou akiarigodae umode boe pegado ai rugadu.
LUK 2:36 Nou Pao Kurireu uwai ja tadare ia makore Pao Kurireu bataru jiwudo mugure jamedu. Iere Ana. Uo iere Fanuel. Judeu doge mariguduwuge etumana Aser uwobe nure ema. Ana okoge bokware. Marigudu oredu bire. Emugure puapo dukeje jorure sete ei dukejere oredu bire piji. Nono Ana okogekare pugeje. Aino čare o jorure oitenta e quatro. Ukare tudawuje Pao Kurireu uwai piji rugadu. Meriji, boečoji rakojere nono tumago pemegawo Pao Kurireuji. Ure tugera ra togwage piji tu tu je tumagowo baruto Pao Kurireu bagai. Aino čare jordure Mariaji, Joseji. Aregodure dukeje imadure Pao Kurireu apo nou etonaregedu rogu paru tabo. Akore nou etonaregeduie umoduie boe ekinorudo rugadu. Boe epagare Pao Kurireu bagai rugadu uwo Judeu doge ekinorudo. Aino čare nou okoge bokwareudo makore nou imedu rogu umoduie boe ekinorudo rugadu.
LUK 2:39 Ere nou Pao Kurireu makore jiboe jamedu boe udo turugadu dukeje Maria, José ere tugirimi tuibagi tuwai ka Nazaré ba kurireu ka Galiléia moto ka.
LUK 2:40 Etonaregedu ričodure rugadu. Rakagodure pudui. Jorduwagodure rugadu. Pao Kurireu ro pemegare ji rugadu.
LUK 2:41 Jesus o jorure doze. Dukejere José, Maria ere Jesus reko toro Jerusalém ba kurireu ka tuwadae Páscoa ka. Ainore erore joru jamedu boeji.
LUK 2:43 Nou ewadae akedure dukeje Jesus uo uče ere tugirimi tuwobebo tuibagi tieda ka. Emerure jii toro meriji. Mare Jesus kodukare ebo. Mugure Jerusalém ba kurireu keje eiageje. Uče uo erdukare ji pudabo dukeje etaiwore bagai tuwobe ekao.
LUK 2:45 Mare erdukare ji. Dukodire ere tugirimi tuibagi Jerusalém ba kurireu ka tiemaru tabo bagai.
LUK 2:46 Merire pobe metia bokware dukeje erdure ji Pao Kurireu uwai tada. Mugure jorduware Pao Kurireu bataru jiwugebo tumearduwo ewadaruji, tumagowo ewadaru jipagi. Ure boe eku kidugo tagoino duji. Nou boe eiamedu boe ebogodure akoino tuwadaru jipagi duji.
LUK 2:48 Jesus uče, uo erore ta tonaregeduji. Maria akore: – Me. Kodiba arore aino? Imi, ao čemororamagadure čemaru tabo awagai!
LUK 2:49 Jesus akore: – Kodiba taemarure iwagai? Tarduwakare imugure iogwa uwai tada duji?
LUK 2:50 Uče uo emeardure Jesus makore pudui duji mare erduwakare nou tonaregedu bataruto.
LUK 2:51 Jesus ure tugirimi tuo apo tuje apo toro Nazaré ba kurireu ka. Nonore Jesus ričodure. Meartorure tujeji, tuoji. Ričodure tumeardae kurigodureu tabo jamedu. Pao Kurireu jordu pemegare rore jiboeji makore jiboeji. Boe eiamedu boe erdu pemegare ji. Uče biagodukare tonaregedu roredu piji akoredu piji.
LUK 3:1 Jorure quinze Tibério César boe eimijera kurireure ema nono Roma ba kurireu keje duji. Dukeje Judéia moto kejewuge eimijera governador iere Pôncio Pilatos. Galiléia moto kejewuge eimijera iere Herodes. Itureia moto kejewuge eimijera iere Filipe. Traconites moto kejewuge eimijera nure ema jamedu. Herodes umana nure ema. Abilene moto kejewuge eimijera iere Lisânias. Jerusalém ba kurireu tadare nou ure Judeu doge enomea maku Pao Kurireu aiwuge eimijera kurireuge ere pobe. Ia iere Caifás. Metia iere Anás. Emugu kimore dutabo Pao Kurireu bataru aregodure Zacarias onaregedu João Batista ae. Ema rakojere boe maereu keje. Dukejere João Batista kodure Jordão Po okwaji tumago tabo boei. Akore: – Tagera ra taro pegareu boe piji. Nono imode tagao pegodo. Nono Pao Kurireu biagodumode taro pegareu boe piji jamedu.
LUK 3:4 Dujire nou makore Pao Kurireu bataru jiwu imedu Isaías makore marigudu. Akore: – Ia boe kudugodumode boe maereu keje boe ewo awara jetorodo boe eimijera aregodu pemegawo boe etae. Kudugodumode boe ewo moto ri butudo ewo barigu koiareuto korobaduwo moto tabo. Moto ri jamedu boe butumode dukeje nou tori jamedu ao kororogodumode. Nono boe emode awara mekireu jetorodo. Boeiako mode awara keje boe emode korau boe ewo ao kororogo jamedu nou umode boe ekinorudowu imedu aregodu pemegawo boe etae. Mare tori ji karega akoino. Awara ji karega akoino. Boe ewo tumeardae jetorodo. Dujire akoino. Boe ewo turo pemegado. Dujire akoino. Boe ewo tugera bararedo pui, umode boe ekinorudowu imedu aregodumode Pao Kurireu piji dukodi. Dujire akoino. Aino boe eiamedu boe erduwamode nuba Pao Kurireu romode tuwo boe ekinorudo.
LUK 3:7 Boe emagare taregodu tabo João Batista ae tuwiapagawo bataruji. Emagore João Batistaji uiago etao pegodo. Mare João Batista makore ei. Akore: – Nou iguru tudu pegare dukeje boe ere butudo tuwo jerigido ema. Tagi tagagomode tamoduie tagera ra taro pegareu piji mare taro pemegamodukare, tameardae pemegamodukare dukeje Pao Kurireu ro pegamode tai jamedu nono boe erore nou jerigi jitu mogadure. Mare jerigi ji karega inagoino. Boe pegamode tai rugadu. Dujire inagoino. Boe pegareuge nure tagi. Tagagore boe etuo Abraão ore enuie tagi dukodire Pao Kurireu uwobe enuie tagi. Ainore tagagore. Boe jokodu jire tagagoino. Abraão uwobe nure tagi rugadu. Mare dukodi karega Pao Kurireu ro pegamodukare tai taro pegareu moriče. Ro pegareuge nure tagi rugadu. Dukodire tagare nono Abraão uwobe remawuge emogadure pugeje. Pao Kurireu roiware tuwo tori udo nono Abraão uwobe maiwuge emogadure tamugato. Tamodukare tagera ra taro pegareu piji dukeje tamodukare taginorudo Pao Kurireu piji rugadu. Umode boe pegado tai rugadu tameartorukare Pao Kurireu bataruji kodi.
LUK 3:10 Dukodire nou boe enarare João Batistaji. Egore: – Nuba akaidure čerowo?
LUK 3:11 João Batista akore: – Nou ukudau areiare pobewu dukeje metia maku nou ukudau areia bokwareu imedu ai. Nou ukereu umode ia tuge maku uke bokwareuge etai.
LUK 3:12 Dukeje iage enaragodure João Batistaji etaidure João Batista uwo tao pegodo kodi. Egore: – Čegire čemode čegeragu imposto moriji boe epiji makuduwo boe eimijera kurireu ai. Nuba čeromode?
LUK 3:13 João Batista akore: – Tagiwogukaba. Tagaba boe eno imposto mori utudo tugori.
LUK 3:14 Tugobaigarege enarare João Batistaji jamedu. Egore: – Nuba čeromode? João Batista akore: – Tagorigodukaba boei. Taroreru kaba boei. Tagaba tageragu dieroji epiji. Tawudugugo tu je tamaragodae mori makudure tagai duji.
LUK 3:15 Nou boe epagare rugadu umode boe ekinorudowu imedu bagai. Emeardaere nou umode boe ekinorudowu nuie nou João Batistače. Dukodire enaragodure João Batistaji. Egore: – Aki na, amode boe ekinorudo? Amode boe ekinorudo boe pegareu piji?
LUK 3:16 Mare João Batista akore: – Ire boe etao pegodo pobo tabo mare ia imedu tuginaiwu aregodumode. Ro kodumode ikori. Boe pemegareu nure ema, boe kurireu mode ema rugadu. Dukodire ipogurumode ipureduwo ji, kurikareu nure imi dukodi. Emare umode Tuwari tugu boe emeardaeto boe ero pemegawo. Umode ro pegareuge ewarigu joruto jamedu. Romode nono ia imedu ro mogadure. Imedu umode trigo jukodo baku tabo nou pegareu uwo tudawuje nou trigo piji. Nou trigo remawu umode remo baito. Nou iwore umode barigu joruto. Umode boe ekinorudowu romode aino boei jamedu. Meartorure Pao Kurireu jiwuge ere nono trigo mogadure. Mare trigo ji karega inagoino. Umode boe ekinorudowu umode meartorure Pao Kurireu jiwuge etawuje ro pegareuge epiji tuwo edudo pudabo. Dujire inagoino. Umode ro pegareuge ewarigu bope doge eda kejewu joru pegareuto. Dujire inagoino. Nou joru akedumodukare rugadu.
LUK 3:18 Ainore João Batista mako raire boei tuwo erduwado Pao Kurireu bataruji, tuwo e mekido emeardae pegareu piji tuwo edo tugera ra turo pegareu piji.
LUK 3:19 João Batista mako pegare boe eimijera kurireu Herodes rore jiboeji. Herodes ure tugeragu tumana oredujeji tumana piji tumuguwo nou tumana oreduje apo. Nou aredu iere Herodias. Herodes ro pegare ia turo pegareuji jamedu. Ro pegare jiboe makare. Dukodire João Batista mako pegare nou Herodes rore jiboeji.
LUK 3:20 Dukodire Herodes ure João Batista tugu baičoreuto. Kodire ro pegareu kuričigore nouia turo pegareu kori.
LUK 3:21 João Batista rakojekare raga baičoreu tada dukejere maragodaere tuwo boe etao pegodo kimo. Boe ere tugera ra turo pegareu piji dukeje João Batista ure nou boe etao pegodo pobo tabo. Čare Jesus aregodure João Batista ae jamedu uwo tao pegodo pobo tabo jamedu. João Batista ure Jesus ao pegodo pobo tabo rugadu. Nono Jesus makore baruto tuo bagai. Dukejere Pao Kurireu Uwari ure turawuje Jesus ae. Ure tudo nono metugore. Ure tumugudo Jesus keje. Nono Pao Kurireu makore Jesusji baru piji. Akore: – Imeardu kuričigore jiwu itonaregedu unure aki. Are iagare kuričigodo i ai.
LUK 3:23 Jesus ure tugera tugu tumaragodaeto tuwo boe ewie Pao Kurireu bataruji tuwo boe erdudo turomode jiboeji kodire o jorure trinta. Boe emeardaere José onaregedu nuie ema duji. José uo iere Eli.
LUK 3:24 Eli uo iere Matate. Matate uo iere Levi. Levi uo iere Melqui. Melqui uo iere Janai. Janai uo iere José.
LUK 3:25 José uo iere Matatias. Matatias uo iere Amós. Amós uo iere Naum. Naum uo iere Esli. Esli uo iere Nagai.
LUK 3:26 Nagai uo iere Maate. Maate uo iere Matatias. Matatias uo iere Semei. Semei uo iere José. José uo iere Jodá.
LUK 3:27 Jodá uo iere Joanã. Joanã uo iere Resa. Resa uo iere Zorobabel. Zorobabel uo iere Salatiel. Salatiel uo iere Neri.
LUK 3:28 Neri uo iere Melqui. Melqui uo iere Adi. Adi uo iere Cosã. Cosã uo iere Elmadã. Elmadã uo iere Er.
LUK 3:29 Er uo iere Josué. Josué uo iere Eliézer. Eliézer uo iere Jorim. Jorim uo iere Matate. Matate uo iere Levi.
LUK 3:30 Levi uo iere Simeão. Simeão uo iere Judá. Judá uo iere José. José uo iere Jonã. Jonã uo iere Eliaquim.
LUK 3:31 Eliaquim uo iere Meleá. Meleá uo iere Mená. Mená uo iere Matatá. Matatá uo iere Natã. Natã uo iere Davi.
LUK 3:32 Davi uo iere Jessé. Jessé uo iere Obede. Obede uo iere Boaz. Boaz uo iere Sala. Sala uo iere Nasom.
LUK 3:33 Nasom uo iere Aminadabe. Aminadabe uo iere Admim. Admim uo iere Arni. Arni uo iere Esrom. Esrom uo iere Peres. Peres uo iere Judá.
LUK 3:34 Judá uo iere Jacó. Jacó uo iere Isaque. Isaque uo iere Abraão. Abraão uo iere Tera. Tera uo iere Nacor.
LUK 3:35 Nacor uo iere Serugue. Serugue uo iere Reú. Reú uo iere Pelegue. Pelegue uo iere Éber. Éber uo iere Selá.
LUK 3:36 Selá uo iere Cainã. Cainã uo iere Arpaxade. Arpaxade uo iere Sem. Sem uo iere Noé. Noé uo iere Lameque.
LUK 3:37 Lameque uo iere Matusalém. Matusalém uo iere Enoque. Enoque uo iere Jarede. Jarede uo iere Maalalel. Maalalel uo iere Cainã.
LUK 3:38 Cainã uo iere Enos. Enos uo iere Sete. Sete uo iere Adão. Imedu boetojiwu nure Adãoče. Pao Kurireu koiare ure Adão towuje.
LUK 4:1 Pao Kurireu Uwari rakojere Jesus apo. Dutabore Jesus ure tugirimi Jordão Po piji. Nou Pao Kurireu Uwari pemegareu makore Jesusji utuwo boe maereu ka.
LUK 4:2 Torore merire 40 ji dutabore bope doge eimijera ure turokogado Jesusji tuwo Jesus meardae pegado tuiordae tumeardae ka. Nou meri jameduji Jesus okwagekare dukodire uke boeire ji.
LUK 4:3 Nou bope doge eimijera iere Satanás. Ča nou bope doge eimijera makore Jesusji. Akore: – Pao Kurireu onaregedu remawu mode aki dukeje amagodo awu toriji uwo tudo nono amireu mogadure awo kowuje.
LUK 4:4 Jesus akore: – Pao Kurireu o bakaru koiare iromodukare aino. Pao Kurireu meardaekare nono ameardae mogadure. Nou bakaru akore: “Boe eke mitodu tabo karega imedu jere mare Pao Kurireu o bataru jamedu boe tabore boe ewodure boe eragare.”
LUK 4:5 Dukejere nou bope doge eimijera uture Jesus apo toro ia tori raireu ao ka. Ure Jesus jordudo moto jamedu boeji tači je. Akore: – Awu moto jamedu boe makudure inai inoče. Awu moto kejewuge eimijera nure imi. Itaidumode dukeje imode awu boe jamedu boe maku itaidure jiwuge etai. Ča amode apu jodo iogorai amagomode akaiduie i amoduie akimijerado imi ameartorumoduie i dukeje imode awu moto jamedu boe maku akai, imode awu moto kejewuge eimijerado aki.
LUK 4:8 Jesus akore: – Boro. Iromodukare aino. Padure bapera kejewu Pao Kurireu bataru akore: “Boe etaiduwo tu Pao Kurireuji. Boe ewo tubu jodo moto keje tu Pao Kurireu jokorai boe emago pemegawo tu Pao Kurireuji rugadu. Boe emeartoruwo tu Pao Kurireuji rugadu.”
LUK 4:9 Bope doge eimijera uture Jesus apo toro Jerusalém ba kurireu ka. Uture apo toro Pao Kurireu uwai ričoreu ao ka. Nono makore Jesusji pugeje. Akore: – Pao Kurireu onaregedu remawu mode aki dukeje amode akaredo awu bai ričoreu ao piji toro moto ka. Padure bapera kejewu Pao Kurireu bataru akore tumoduie tudugarege baru tadawuge ekera bararedo ai etu pemegawo ai. Awure jamedu jetumodukaie toriji.
LUK 4:12 Mare Jesus akore: – Boro iromodukare aino. Nou padure bapera kejewu Pao Kurireu bataru remawu akore: “Boe ekawo turokogado Pao Kurireuji.”
LUK 4:13 Ainore Jesus akore nou bope doge eimijera bataru jipagi. Dukejere nou bope doge eimijera uture piji tubagawo toro ia meri ka pugeje.
LUK 4:14 Jesus ure tugirimi tuibagi Galiléia moto ka. Pao Kurireu Uwari ure Jesus rakado turowo Pao Kurireu ro rakareuji. Nou moto kejewuge emeardure Jesus akaru pemegareuji dukodire boe erduware Jesus rore jiboeji makore jiboeji. Jesus ure boe erduwado tu tu je. Ure nou boe erduwado ere bato puiwu bai tada. Nonore ure boe ewie tu tu je Pao Kurireu bataru remawuji. Boe eiamedu boe emago pemegare Jesusji rore jiboeji makore jiboeji.
LUK 4:16 Jesus ure tugirimi nou Nazaré ba kurireu ka nou turijodure kejewu moto ka. Sábado meriji ure turemo nou baito, Judeu doge ere bato puiwu baito turo mogadure. Nono ure turagojedo tumagowo padure bapera kejewu Pao Kurireu bataruji boe ewiagai nou bai ja tada.
LUK 4:17 Nou boe ere Isaías ure bu bapera kejewu Pao Kurireu o bakaru maku Jesus ai aiwowo ji, makowo ji. Ure bapera jado. Aiwore taidure jiwu bataru bagai. Nono Jesus makore ji nou boe ewiagai. Akore:
LUK 4:18 – Pao Kurireu ure tugeragu jiwu akore aino: “Pao Kurireu ure tugeragu i dukodire Uwari rakojere itabo. Ure ido bakaru pemegareu arego marenarue doge ewagai. Ure itudo boe pegare jiwuge ewagai iwo ewie tuwadaru pemegareuji. Iwo ro pegareuge ewie Pao Kurireu umode turaga maku etai duji. Dukodire ro pegareuge ero pegamodukare pugeje emeartorumodukare bope doge eimijeraji pugeje. Joku bokwareuge etaiwomode pugeje. Boe pegare jiwuge etawujedumode boe pegareu piji rugadu. Pagimijera Kurireu umode meartorure puduiwuge ekinorudo rugadu. Dujire imode boe ewie rugadu.”
LUK 4:20 Jesus mako akedure dukeje ure nou Pao Kurireu o bapera okwa bu pugeje. Ure maku nou bai tadawu imedu ai. Nono Jesus ure tumugudo. Nou meardure Jesus akoinowuge eiamedu boe etaiwore Jesusji.
LUK 4:21 Nono Jesus akore: – Awu meriji tameardure jiwu Pao Kurireu bataru jeture pudui rugadu. Ire akoino.
LUK 4:22 Nou boe erdu pemegaiago Jesus bataruji. Egore: – Awu imedu mako moture. Mare kočare José onaregedu nure ema. Jorduware Pao Kurireu bataru jiwu umodukare ema rugadu.
LUK 4:23 Jesus makore nou boe ewadaru jipagi. Akore: – Iorduware nuba tagagomode i. Ia meri keje tagagomode: “Boe egore jorubo epa remawu nuie aki dukeje akiogodo ai rugadu, čerduwo aro rakaredu bagai. Cafarnaum ba kurireu kejewuge egore aro rakaie. Ča aro rakado nouia aroji woe čegai čerduwo aroinoduji.” Ainore tagagomode i.
LUK 4:24 – Mare imire itaidure iwo tawie boe remawuji tu rugadu. Makore Pao Kurireu bataru jiwu makomode boe eiamedu boe ewiagai. Mare turijodure kejewu boe eda kejewuge etaidumodukare makore jiboeji rugadu.
LUK 4:25 Marigudu Elias makore Pao Kurireu bataruji tuwobe jaoboe Judeu doge ewiagai woe Israel moto keje. Nou Elias ure bubutu akedudo rugadu. Jorure pobe metia bokware bubutu bokware duji. Dukodire boe eke bokware rugadu. Elias rore aino dukeje okoge bokwareu areme emagare Israel moto keje. Mare Pao Kurireu ukare Elias utudo nou Judeu doge ewagai emeartorukare pudui dukodi. Ure utudo toro ia moto jaereu ka ia aredu tuginaiwudo okoge bokwareudo bagai Sarepta ba kurireu ka, Sidom moto keje. Nou aredu tuginaiwudo meartorure Pao Kurireuji dukodire Pao Kurireu ure Elias utudo bagai.
LUK 4:27 Marigudu Eliseu makore Pao Kurireu bataruji tuwobe jaoboe Judeu doge ewiagai woe Israel moto keje. Judeu doge ewiri pegareuge emagare Israel moto keje. Mare Eliseu ukare epemegago emeartorukare Pao Kurireuji kodi. Tu ia Síria moto kejewu biri pegareu meartorure. Dukodire Eliseu ure nou Síria moto kejewu boe tuginaiwu imedu biri pemegago tu je. Nou Síria moto kejewu imedu iere Naamã.
LUK 4:28 Ainore Jesus akore tumago pegareu tabo nou rakojere nou bai tadawu Judeu doge etuwobei. Nou boe emeardure Jesus akoino duji dukejere ekorigodure.
LUK 4:29 Dukodire ere tugeragu Jesusji. Ere tawuje nou bai piji turaga tabo nou ba kurireu piji toro tori ao ka tuwo barigu nou tori ao piji moto ka.
LUK 4:30 Mare Jesus padure ekajeje tači je dukodire uture epiji.
LUK 4:31 Jesus uture Cafarnaum ba kurireu ka. Nou Cafarnaum ba kurireu padure Galiléia moto keje. Sábado meriji Jesus uture Judeu doge ere bato puiwu bai ka. Nonore ure boe erduwado.
LUK 4:32 Boe eiamedu boe eku kidure nou Jesus makore jiboeji. Jesus mako pemegare mako jetorore rugadu dukodire boe erduware Pao Kurireu bataru remawu jire akoino rugadu.
LUK 4:33 Nou meri keje bope uwari pegareu meture tadawu imedu rakojere nou bai tada. Nou bope uwari ure tumago rakado Jesusji.
LUK 4:34 Akore: – Jesus nure aki rugadu! Arijodure Nazaré ba kurireu keje. Ča nuba aromode čei? Amode čedagedudo na? Iorduware ai rugadu. Aro pega bokware. Pao Kurireu ure akarego mato tuwadaru pemegareu tabo boe ewagai rugadu!
LUK 4:35 Jesus mako rakare nou bope uwari bataru jipagi. Akore: – Amugu kiorodo. Amagokaba boeji pugeje. Atawuje awu imedu piji atuwo pugeje. Ča nou bope uwari ure nou imedu butudo moto keje nou boe egorai. Dukeje ure tudawuje nou imedu piji. Mare boe pegakare nou imeduji. Ure turugadu.
LUK 4:36 Nou boe erdure nou inoduji dukejere erore ta je. Emagore pui. Egore: – Awu Jesus makore jiboe rakare rugadu. Makore nou bope uwariji dukeje nou bope uwari meartorure makore pudui duji rugadu. Ure tudawuje nou imedu piji kodire uture piji rugadu. Ainore nou boe egore.
LUK 4:37 Dukejere boe ere nou moto kejewuge boe eiamedu boe ewie nou Jesus rore jiboeji, makore jiboeji.
LUK 4:38 Jesus uture nou bai piji. Uture Simão Pedro uwai ka. Simão Pedro učarugo kogodure. Biri urure rugadu. Boe ere Jesus bie nou aredu kogodure duji.
LUK 4:39 Dukodire Jesus uture nou aredu ae. Nono rakojere nono nou Pedro učarugo upa jagwai dukeje Jesus makore ji biri urukawo pugeje. Ča nou Pedro učarugo biri uru akedure tači piji. Ča nou aredu ure turagojedo. Ure tuie bu tuwo nou boe eke pemegado ewo ko.
LUK 4:40 Nou boečoji boe eiamedu boe etaregodure tumedage kogodureugebo Jesus bagai. Jesus ure tugera bu nou kogodureuge ewugeje. Nono ure nou kogodureuge epemegago rugadu.
LUK 4:41 Bope doge etuwari pegareu meture iage etada. Nou bope doge ere tudawuje nou boe epiji jamedu. Ere tugudu rakado ture tudawuje nou boe epiji dukeje. Nou bope doge egore: – Pao Kurireu Onaregedu nure aki rugadu! Erduware umode boe ekinorudowu nure Jesusče rugadu mare Jesus aidukare boe erduwawo pudui. Dukodire Jesus mako rakare nou bope doge etuwairei emagokawo iaboeji pugeje. Dukodire nou bope doge emagokare iaboeji pugeje.
LUK 4:42 Barogwakododure dukeje Jesus uture nou boe eda piji toro ia boe maereu ka. Mare boe emarure bagai. Erdure ji dukeje emagore ji utukawo pugeje.
LUK 4:43 Mare Jesus makore ei. Akore: – Pao Kurireu ure itudo mato iwo boe ewie tuwadaru pemegareuji, imagowo Pao Kurireu rore jiboeji boe ewiagai. Imagowo boei ewo tugimijerado Pao Kurireuče tu rugadu. Imaragodae jire iroino. Dukodire itumode ia boe eda tuginaiwu ka pugeje.
LUK 4:44 Dukodire Jesus uture nou moto kejewu boe eda jamedu boe ka. Uture tu tu nou Judeu doge ere bato puiwu bai ka eda jamedu boe ka. Makore Pao Kurireu bataruji boe eiamedu boe ewiagai.
LUK 5:1 Ia meri keje Jesus rakojere ia kugaru keje Galiléia pobo maereu okwai. Jesus ure boe erduwado Pao Kurireu bataruji nono pobo maereu okwai. Boe etaregodure tuwiapagawo Jesus makore jiboeji. Emagare rugadu. Nono ere tuiodo pugeje tuwo tuburedo ji. Dukodire Jesus roiwakare tumagowo ei. Aidure tuwo tudaru epiji tumagowo ei. Jordure ika kurireu pobedu dogei nono pobo okwai. Nou ore nou ika kurireu čewuge ere tuwuge kabi nono pobo okwai jamedu.
LUK 5:3 Jesus ure taredo nou ika kurireuto. Ore nou ika čewu iere Simão Pedro. Jesus makore Pedroji. Akore: – Ako ika kogudo gu toro nowari okwa piji. Imode imugudo nou ika ja tada imagowo awu boei. Simão Pedro meartorure Jesus bataruji. Ure to ika kurireu kogudo gu toro nowari okwa piji. Nono Jesus ure tumugudo nou ika kurireu ja tada. Dukejere makore boei tuwo boe erduwado rugadu.
LUK 5:4 Jesus mako raire boei tuwo erduwado. Nono ure tuwadaru akedudo dukeje makore Simão Pedroji pugeje. Akore: – Awu ika reko toro awu pobo maereu po koreu ka. Aki amedagebo tawo tawuge barigu tawoguwo.
LUK 5:5 Simão Pedro akore: – Čegimijera. Čewogure awu boečoji jii barogwakododu ka. Mare čegare boe bito rugadu. Du amagore i dukodire imode iwuge barigu pugeje. Imeartorure awadaruji dukodire imode iwuge barigu pugeje.
LUK 5:6 Nono Simão Pedro timediapo ere to ika reko Jesus apo toro pobo maereu po koreu ka. Ere tuwuge barigu. Ča ere tugeragu karei rugadu. Nou buke korobadure karebo dukodire nou bukere tuiago tuwowuje kare emodudu koia.
LUK 5:7 Nono makore ia tumedage etae ewo tugera maku pudai nouia ika kurireu tabo. Ere ika kurireuge ekorau karebo. Ere tuwogwaiago poboto kare emodudu koia.
LUK 5:8 Dukodire Simão Pedro jorduware Jesus emare rore aino duji. Nou metage ekiere Tiago, João. Zebedeu ore nure emage. Erore ta je jamedu Jesus ure edo kare ewido aino duji. Nono Simão Pedro ure tubu jodo Jesus jokorai. Akore: – Imedu ro pegareu nure imi. Aiado i. Ukare turugadu iragojewo akabo. Nono Jesus makore Simão Pedroji. Akore: – Apagudukaba. Atumode itabo. Awu inodu otobiji awogumodukare kare ewagai pugeje. Awogumode boe ewagai. Mare awogu ji karega inagoino. Amode boe emeartorudo Pao Kurireuji. Dujire inagoino.
LUK 5:11 Nono eture tuibagi pobo maereu okwa ka. Nono Pedro, nou metage, eture Jesus apo rugadu toe rugadu boe piji tumaragodae piji rugadu.
LUK 5:12 Ia meri keje Jesus rakojere ia boe eda keje. Ia imedu mugure nou boe eda keje tugogodae tabo. Nou kogodae koiare ure nou imedu biri pegado rugadu. Boe epagudure nou kogodaeče rugadu. Nou biri pegareu imedu jordure Jesusji dukeje ure tubu jodo moto keje Jesus jokorai. Okwamagudure Jesusji. Akore: – Ikimijera. Aro rakare rugadu awo iwiri pemegago. Akaidumode dukeje amode ipemegago rugadu.
LUK 5:13 Jesus ure tugera raido nou imedu ae. Ure tugera bu imedu keje. Akore: – Uu. Itaidure. Ča. Apemegare rugadu. Nono nou imedu biri pemegagodure tači je.
LUK 5:14 Mare Jesus makore ji. Akore: – Amagokaba awu irore ai duji. Atudo kuri nou Pao Kurireu uwai ka. Nonore amode nou ure Judeu doge enomea maku Pao Kurireu aiwu imedu jordudo awiriji. Jordumode awiri pemegagodure duji rugadu. Nono amode nou Moisés makore jiwu mori maku ai rugadu nono paro mogadure. Nono nou ure boe enomea maku Pao Kurireu aiwu imedu umode nou are maku pudaiwu mori maku Pao Kurireu ai rugadu. Dukodire boe eiamedu boe erduwamode awiri pemegagodure duji. Ainore Jesus makore nou imeduji.
LUK 5:15 Mare boe erduwagodure Jesus rore jiboeji rugadu. Emagare taregodu tabo Jesus ae tuwiapagawo Jesus bataruji, tubemegagoduwo tugogodae piji.
LUK 5:16 Mare Jesus rakoje raikare boebo ji je. Uture boe epiji tu tu je toro boe maereu ka tumagowo baruto Tuo Kurireu bagai.
LUK 5:17 Ia meri keje Jesus ure boe erduwado pugeje. Ia boe eimijerage fariseu doge edure nono nou boebo tuwiapaga tabo Jesus bataruji. Ia boe eimijerage jorduware Judeu doge eno bakaru jiwuge edure nono jamedu. Nou boe eimijerage etaregodure tumuga jamedu boe piji. Etaregodure Galiléia moto piji, Judéia moto piji, Jerusalém ba kurireu piji jamedu. Pao Kurireu raka meture Jesus apo dukodire roiware tuwo boe epemegago.
LUK 5:18 Nono ia boe etaregodure ia imedu pogora pegareu apo. Nou imedu pogora pegareu padure tugudau kodo keje. Etaidure tuwo turemo toro nou Jesus rakojere tadawu baito tuwo Jesus jordudo nou imedu pogora pegareuji.
LUK 5:19 Mare boe emagare tuiedui nono. Nou bai čekare nou boei. Dukodire nou boe eroiwakare tuwo turemo nou baito nou imedu apo. Dukodire erudure nou bai ao ka nou imedu pogora pegareu apo. Ere nou bai aia porodo. Nono ere nou imedu pogora pegareu rawuje bukigu tabo tuwo mugudo Jesus jokorai nou boe etoiadada.
LUK 5:20 Jesus jordure emeartorure pudui duji kodire etaregodure aino nou imedu pogora pegareu apo pudae duji. Dukodire makore nou imedu pogora pegareuji. Akore: – Ča. Me. Ire aro pegareu jamedu boe barigu apiji Pao Kurireu biagoduwo aro pegare jiboe piji.
LUK 5:21 Mare nou boe eimijerage fariseu doge, nou boe eimijerage jorduware Judeu doge eno bakaru jiwuge erdu pegare nou Jesus akoino duji. Egore tudada: – Awu makore jiboe ukare turugadu! Tu Pao Kurireu umode boe ero pegareu barigu boe epiji. Awu imedu ure tudo nono Pao Kurireure. Makočarore tuwadaruji rugadu. Ukare turugadu. Mako peganure tagoino dutabo Pao Kurireuji!
LUK 5:22 Jesus jorduware emeardaere jiboeji rugadu. Dukodire makore ei. Akore: – Kočare tameardae peganure imagore jiboeji tadada na?
LUK 5:23 Boe jokodu. Boe emodukare boe ero pegareu barigu boe epiji rugadu. Mare boe emodukare awu imedu pogora pegareu pemegago jamedu. Emodukare pemegago rugadu. Tu Pao Kurireu koiare umode nou imedu pogora pemegago. Tu Pao Kurireu koiare umode boe ero pegareu barigu boe epiji dukodire biagodumode nou boe ero pegareu piji jamedu.
LUK 5:24 Ča imode awu imedu pogora pegareu pemegago dukeje tarduwamode Imedu Onaregedu nure imi duji. Dukodire imode tarduwado iragare iwo boe ero pegareu barigu boe epiji ewarigudukawo bope doge eda kejewu joru pegareuto rugadu. Ainore Jesus akore nou boe eimijeragei. Nono Jesus makore nou imedu pogora pegareuji. Akore: – Me. Aragojedo. Akeragu akudau kodoji atuwo tabo aibagi awai ka.
LUK 5:25 Ča nou imedu ure turagojedo rugadu. Ure tugeragu tugudau kodoji. Dukejere uture tabo pugeje. Meru pegakare. Uture tumago pemegareu tabo Pao Kurireuji. Nou boe eiamedu boe erdure nou rore aino duji.
LUK 5:26 Dukejere erore ta je. Nono epagudugodure jamedu. Mare emago pemegare Pao Kurireuji. Egore: – Awu meriji čerdure Pao Kurireu ro pemegareuji rugadu.
LUK 5:27 Nou inodu otobiji Jesus jordure imposto diero makudumode aiwu imeduji. Nou imedu iere Levi. Nou Levi mugure nono ira keje. Nonore ure tugeragu dieroji boe epiji eno imposto moriji tuwo maku boe eimijera kurireu ai. Nono Jesus makore ji. Akore: – Ako itabo. Levi ure turagojedo. Ure tugera ra tumaragodae piji tuduwo Jesus apo.
LUK 5:29 Levi makore Jesusji okwagewo toro tuwai keje pudabo. Dukodire Jesus uture Levi apo toro uwai ka. Boe emagare togwage tabo ebo nono. Imposto diero makudure aiwuge ime nure emage. Boe egore ro pegareuge nuie emage. Ia boe etaidukare jiwuge eragojere nono Jesus apo jamedu.
LUK 5:30 Nono fariseu doge etaregodure, jorduware Judeu doge eno bakaru jiwuge etaregodure jamedu. Ča emagore nou Jesus ure jorduwadowugei. Egore: – Kočare tagwagere tagudure awu ro pegareugebo? Ukare turugadu!
LUK 5:31 Jesus akore: – Jorubokuru epa jemarumodukare kogodukareuge ewagai. Mare kogodureuge ewagaire jemarumode tuwo epemegago.
LUK 5:32 Irore nono nou jorubo kuru epa ro mogadure. Mare jorubokuru epa ji karega inagoino. Itaregodure woe mare ro pemegareuge ewagai karega iroino. Ro pegareuge ewagaire iroino ewo tugera ra turo pegareu piji. Dujire inagoino.
LUK 5:33 Ia meri keje boe etaregodure Jesus ae dukeje enarare ji. Egore: – Ia meri keje João Batista ure jorduwadowuge enogwagemodukare nou meri keje tumagowo baruto Pao Kurireu bagai nou meri keje. Eromode aino tu tu je. Tu turoia jire eroino. Fariseu doge ere jorduwadowuge eromode nono ero mogadure jamedu. Kodiba nou are jorduwadowuge erokare aino jamedu?
LUK 5:34 Jesus akore: – Ire nono uwiremodewu imedu mogadure. Boe etuwiremode dukeje boe emode tuwadae towuje. Nou ewadae kejere boe enogwagemode rugadu. Ewadae reno. Mare ewadae akedure dukeje uwirereu imedu utumode epiji. Dukeje ia meri keje boe enogwagemodukare rugadu nou meri keje tumagowo Pao Kurireu bagai baruto. Ire nono nou uwiremodewu imedu mogadure. Mare uwiremodewu imedu ji karega inagoino. Ire irawuje baru piji mato boe ewagai. Mare ia meri keje itumode nou boe epiji. Dujire inagoino. Itumode nou boe epiji dukeje emode ia meri tawuje togwagekawo nou meri keje tumagowo Pao Kurireu bagai baruto. Dujire inagoino.
LUK 5:36 Nono Jesus makore ia bakaruji nou boe ewiagai tuwo jebato toro nouia Pao Kurireu meardaeji. Akore: – Boe ekudau areia pegagodureu umode tuwowuje dukeje boe emodukare tugudau areia maiwu kado tuwo bu nou tugudau areia pegagodureu tuwowujewu keje tuwo miwuje tabo pegagodure dukodi. Boe eromode aino dukeje emode nou tugudau areia maiwu pegado. Nou emode kadowu areia maiwu umodukare turugadu nou tugudau areia pegagodureu okwa togi jamedu.
LUK 5:37 Boe ere tapira biri maiwu kado tuwo udo nono poari mogadure tuge vinho kuru maiwu jače. Mare emode vinho kuru maiwu tugu tapira biri čodureuto dukeje nou tapira biri čodureu umode tuwowuje. Nono nou vinho kuru umode tuwarigu nou tapira biri čodureu piji rugadu.
LUK 5:38 Dukodire boe ekare tuge vinho kuru maiwu tugu tapira biri čodureuto. Ere tuge vinho kuru maiwu tugu tapira biri maiwuto tu tu je.
LUK 5:39 Nou aidure vinho kuru čodureu jiwuge etaidumodukare vinho kuru maiwuji. Egomode: “Jowu metu raire tapira biri čodureu tadawu vinho kuru pemegare čei.” Ainore Jesus akore. Mare areia ji karega akoino. Vinho kuru ji karega akoino. Tuwadaru maiwu jire Jesus akoino.
LUK 6:1 Jesus merure boepa oiagi sábado meriji. Trigore nou boepa tada. Nou ure jorduwadowuge ekodure apo jamedu. Nono nou Jesus ure jorduwadowuge ere tugeragu trigo enariji. Ere tugera reko pui nou trigo enari tabo tuwo nou trigo tawuje čiwu piji tuwo trigo ko.
LUK 6:2 Fariseu doge erdure erore aino duji dukeje emagore Jesusji. Egore: – Akaiwodo. Judeu doge nure pagi. Sábado meriji pamaragodumodukare pugeje. Dukodire pamodukare pageragu trigoji sábado meri keje. Mare tare tageragu trigoji sábado meri keje. Ukare turugadu!
LUK 6:3 Jesus akore: – Tarduwakare Pao Kurireu bataruji! Dukodire tarduwakare Pao Kurireu meardae remawuji. Tarduwamode Pao Kurireu meardae remawuji dukeje tamago pegamodukare čeroino duji. Mariguduwu Judeu doge eimijera kurireu Davi rore jiboe padure Pao Kurireu bataru keje. Dujire tarduwakare. Nou Davi uke boeire ji. Utugarege tugobaigarege eke boeire ei jamedu.
LUK 6:4 Dukodire ure turemo Pao Kurireu uwaito. Okwagere boe ere maku Pao Kurireu aiwu amireuji. Pao Kurireu ure tuwadaru maku mariguduwuge pawobe Judeu doge etai. Dukodire makore ei ekawo nou amireu kowuje. Tu nou ure Judeu doge enomea maku Pao Kurireu aiwuge emode nou Pao Kurireu uwai tadawu amireu kowuje. Ainore Pao Kurireu akore. Mare Davi ure nou Pao Kurireu uwai tadawu amireu kowuje. Ure ia maku tudugarege etai ewo kowuje jamedu. Mare Pao Kurireu mako pegakare eroino duji. Dukodire imagore aino tai tamago pegakawo čere čegeragu trigo jituji.
LUK 6:5 Ča iwo tawie. Imedu Onaregedu nure imi. Imire imode boe erduwado rugadu nuba boe eromode sábado meri keje.
LUK 6:6 Ia Sábado meri keje Jesus ure turemo ia Judeu doge ere bato puiwu baito pugeje. Ure nou boe erduwado Pao Kurireu bataruji. Ia imedu rakojere nono. Iera pegare. Nou iera bekurure pudo.
LUK 6:7 Ia fariseu doge, ia jorduware Judeu doge eno bakaru jiwuge edu nono jamedu. Boe eimijerage nure emage. Nou boe eimijerage erdu pegare Jesusji. Dukodire etaiwore Jesus ia ro pegamode tiagai dubagai. Judeu doge eromodukare ia turoji sábado meri keje. Dukodire etaidukare boe eiogowo boei sábado meri keje. Mare Jesus umode nou imedu iera pemegago nou meriji dukeje nou boe eimijerage erdu pegamode nou Jesus rore aino duji.
LUK 6:8 Mare Jesus jorduware erdu pegare pudui duji. Jorduware emeardaere jiboe jamedu boeji. Nono Jesus makore nou imedu iera pegareuji. Akore: – Aragojedo. Mato itae awu boe etoiado. Nou imedu ure turagojedo. Nono uture Jesus ae nou boe etoiado.
LUK 6:9 Nono Jesus unarare nou boei. Akore: – Nuba pago bakaru ure parduwado paroiago sábado meriji? Paro pegamode boei kana? Paro pemegamodukana boei? Sábado meri keje pamodukana boe ekinorudo boe pegareu piji? Pamodukana boe ewarigu boe pegareuto sábado meri keje?
LUK 6:10 Jesus aiwore ei. Mare emago bokware Jesus bataru jipagi. Nono Jesus makore nou imedu iera pegareuji. Akore: – Akera raido itae. Nono nou imedu ure tugera raido ae. Čare iera pemegagodure tači je.
LUK 6:11 Nou boe eimijerage erdure nou inoduji dukeje ekorigodure rugadu. Erdu pegare Jesus rore aino sábado meri keje duji. Du otobiji emagore pui tu tu je tuwo ia tumeardae tawuje turo pegawo Jesusji.
LUK 6:12 Ia meri keje Jesus ruture ia tori ao ka tumagowo baruto. Nono makore Pao Kurireuji jii je barogwakododu ka.
LUK 6:13 Barogwakododure dukeje makore ture jorduwadowuge ewagai. Nou ture jorduwadowuge epiji ure tugeragu jiwuge enodo padure doze. Du emagere etumode Jesus bataru tabo boe eiamedu boe ewagai.
LUK 6:14 Ainore nou boe ekiere. Simão, Jesus ure iedo Pedro. Uwie André. Tiago, João, Filipe, Bartolomeu, Mateus, Tomé. Tiago, Alfeu onaregedu. Simão, Zelote ure ema. Judas, Tiago onaregedu. Judas Iscariotes. Emare umode Jesus maku boe eimijera pegareuge etai.
LUK 6:17 Nono Jesus ure turawuje nou tori ao piji nou ture tugeragu jiwu boebo. Boe emagare taregodu tabo ae tumearduwo bataruji. Boe etaregodure Judéia moto piji, Jerusalém ba kurireu piji, Tiro ba kurireu piji, Sidom ba kurireu piji tumearduwo Jesus bataruji, uwo tubemegago tugogodae boe piji. Bope ro pegare jiwu boe doge etaregodure ae jamedu. Jesus ure nou bope doge etawuje nou boe epiji. Nou boe emagare rugadu. Erduware Jesus ure boe epemegago duji rugadu. Etaidure tuwo tugera bu Jesus keje. Emeardaere tumoduie tugera bu Jesus keje dukeje umoduie tubemegago.
LUK 6:20 Jesus makore ture jorduwadowugei. Akore: – Marenarue nure ia tagi mare taegaredo tai. Taragojemode Pao Kurireu apo rugadu. Tare tagimijerado ema dukodire taragojemode apo rugadu boe pemegareu keje. Dukodire boe pemegamode tai rugadu.
LUK 6:21 Ia tagi tage boeire tai mare du inodu tabo taegaredo tai. Boe pemegamode tai. Mare paga karega. Tage kurimode rugadu. Ia tagi tagragudure tagiarigodu koia. Mare du inodu tabo boe pemegamode tai rugadu dukodire taegaredo tai. Tagogwarigodumode rugadu.
LUK 6:22 Boe ekadakagirimode tai tameartorumode imagore tai jiboeji. Tagodumode iwadaru kodaji dukeje boe emodukare tuiordudo tai, erorerumode tai, egomode meridoge enuie tagi. Ainore etuwobe emago pegare nou jaoboei jamedu. Mariguduwu etuwobe ero pegare nou mariguduwuge makore Pao Kurireu bataru jiwugei jamedu. Mare tare tameartorudo i dukodire emago pegamode aino tai jamedu. Mare taegaredo tai. Boe pemegamode tai. Mare paga karega Pao Kurireu umode mori kurido tagai toro baru tada. Dukodire čare taegaregodumode tai rugadu.
LUK 6:24 Mare Jesus mako pegare iagei. Akore: – Ia tagi oe kurireuge nure tagi. Dukodire taegarere tai nou tagoeji. Mare tawiapagakare baru tadaboe bagai. Dukodire boe pemegamodukare tai. Nou tagoe akedumode rugadu. Nou tagoe umodukare taginorudo boe pegareu piji.
LUK 6:25 – Ia tagi tage kurire. Dukodire taegarere tai tageji. Mare tawiapagakare baru tadaboeji. Dukodire boe pemegamodukare tai. Tage akedumode rugadu. Tage umodukare taginorudo boe pegareu piji. – Ia tagi taegarere tai dukodire tagogwarire aino jamedu. Mare tawiapagakare baru tadaboeji. Dukodire boe pemegamodukare tai rugadu. Tagragudumode, tamode maido tagabo jamedu.
LUK 6:26 – Boe ebogodure ia tai. Dukodire taegaregodure tai nou ewadaruji. Mare pagare egoino. Mariguduwuge ewobe ebogodure batrarodure Pao Kurireu bataru jiwugei. Aino čare boe ebogodure tai jamedu. Mare tawiapagakare Pao Kurireu mako pemegare tai jiboeji. Dukodire boe pemegamodukare tai.
LUK 6:27 Jesus mako kimore. Akore: – Tawiapagado awu iwadaruji. Tameardu kurido jordu pegare taiwugei. Taro pemegado kadakagirire taiwugei jamedu.
LUK 6:28 Tawadaru pemegado nou bataru pegare taiwugei. Tamagodo baruto Pao Kurireu bagai nou ro pegare taiwuge eparu tabo jamedu.
LUK 6:29 Ia ro pegareu umode tugera to aeji, ae abowu metia maku ai uwo tugera to ji jamedu. Ia boe umode akudau areia okwatorureu biaku epa tawuje apiji dukeje maku ai rugadu. Mare ia akudau areia meture aiwu maku ai jamedu.
LUK 6:30 Iaboe maku okwamagudure aiwu boe etai. Nouia boe ure tugeragu akoe jitu keje akaba udo maku akai tuibagi pugeje.
LUK 6:31 Taro pemegado boei boetoji nono tagaidu mogadure boe ero pemegawo tai du mogadure jamedu.
LUK 6:32 Tameardu kurimode tu ro pemegare taiwugei dukeje taro pemegamodukare ro pegareuge ero kori. Ro pegareuge emeardu kurire ro pemegare puduiwugei jamedu. Taro pemegamode nou ro pemegare taiwugei mare taro pegamode nou ro pegare taiwugei dukeje tarore nono nou ro pegareuge ero mogadure jamedu. Ro pegareuge emeardu kurire ro pemegare puduiwugei jamedu. Mare tameardu kurimode ro pegare taiwugei dukeje Pao Kurireu ro pemegamode tai.
LUK 6:34 Tamode diero maku boe etai mare tagaidure ewo maku tuibagi tagai pugeje. Taromode aino dukeje tarore nono ro pegareuge ero mogadure. Pao Kurireu mako pemegamodukare tai pugeje. Ro pegareuge emode diero maku iage etai mare ewo nou diero rugadu maku pudai tuibagi pugeje.
LUK 6:35 Aino čare imode tarduwado. Pao Kurireu ro pemegare ro pegareugei. Pao Kurireu okudure boebo rugadu. Ča taro pemegado nono Pao Kurireu ro mogadure jamedu. Tameardu kurido aidukare taiwugei nono Pao Kurireu ro mogadure. Ia tagoe maku etai jamedu. Taipagakaba ewo maku tuibagi tagai pugeje nono Pao Kurireu ro mogadure. Tagogududo boebo nono Pao Kurireu okudu mogadure boebo dumogadure jamedu. Taromode aino dukeje Pao Kurireu oremode tagi. Umode boe pemegareu maku tagai.
LUK 6:37 – Tawiapagakaba boei boe pegareu tabo. Nono Pao Kurireu ro pegamodukare tai. Tagaba boe ewarigu boe pegareuto Pao Kurireu ukawo tawarigu boe pegareuto jamedu. Boe ero pegare tai dukeje tawiago nou erore tai dupiji. Dukeje Pao Kurireu biagodumode taro pegareu boe piji jamedu.
LUK 6:38 Ia tagoe maku ia boe enoe bokwareuge etai. Nono Pao Kurireu umode ia boe pemegareu maku tagai jamedu. Umode maku tagaiboe kurimode rugadu. Umode maku tagai nono tamode maku boe etai du mogadure.
LUK 6:39 Nono Jesus ure nou tuwadaru jebato toro ia Pao Kurireu meardae ka tuwo nou boe erduwado ji. Akore: – Joku bokwareuge ekera bararemode pui dukeje ewudumode boeiakoto. Jorduwakare Pao Kurireu jiwuge ere nono nou joku bokwareuge emogadure. Mare joku bokwareuge ei karega inagoino. Jorduwakare Pao Kurireu jiwuge eroiwakare tuwo boe erduwado Pao Kurireuji. Dujire inagoino. Etaidumode tuwo erduwado mare emode ewarigu Pao Kurireu piji. Dujire inagoino. Erduwakare Pao Kurireuji. Emeartorukare ji jamedu. Dukodire eroiwakare tuwo boe erduwado Pao Kurireuji rugadu.
LUK 6:40 Boe emeartorumodukare ia mugure bapera kejewuji jorduwamodukare nono tugimijera mogadure. Boe emeartorumode tu nou mugure bapera kejewu ukimijeraji. Mare nou ukimijera umode nou mugure bapera kejewu jorduwado tuiorduware jiboe jamedu boeji dukeje nou mugure bapera kejewu jorduware jiboe umode nono nou tugimijera jorduware jiboe mogadure. Du ure turugadu.
LUK 6:41 Tagi tardure tamedia joku tadawu boe giguduji. Mare tardukare taeku tadawu iraji. Mare boe gigudu ji karega inagoino. Boe ero pegareu rogu jire inagoino. Biagare tu je mare tardure ji. Dujire inagoino. Dukodire tamago pegare nou tamediaji. Tagagore: “Aro pega” aino ji. Tagagore tarduwaie tamedia ro pegareuji mare tardukare ia taro pegareuji. Dukodire tameartorukare tawadaruji. Tardukare taeku tadawu ira kurireuji. Mare ira ji karega inagoino. Taro pegareu kurireu jire inagoino. Taro pega kurire rugadu mare tagare tardudo ji. Dujire inagoino. Kočare. Tagera ra taro pegareu piji. Tamode tagera ra taro pegareu piji dukeje tarduwamode rugadu tamago pemegawo nou tamediaji nou tamedia uwo tugera ra turo pegareu biagareu piji jamedu.
LUK 6:43 – I pegareure tudu pegare. I pemegareure tudu pemegare.
LUK 6:44 Boe erduwamode tuduji dukeje erduwamode nou tudu iji jamedu. Boe emodukare tugeragu figo tuduji botoguru i piji. Figo i pijire boe emode tugeragu figo tuduji. Boe emodukare tugeragu uva tuduji botoguru i piji. Uva iku pijire boe emode tugeragu uva tuduji.
LUK 6:45 Boe ere nono nou iguru mogadure. Mare iguru ji karega inagoino. Boe emeardae koiare umode boe ero pemegado umode boe ero pegado. Dujire inagoino. Boe ewiagoromode tumeardae pegareuji dukeje ero pegamode emago pegamode nono nou tumeardae mogadure. Mare boe ewiagoromode tumeardae pemegareuji dukeje ero pemegamode emago pemegamode nono nou tumeardae mogadure. Dujire inagoino. Tumeardaere jiboe jire boe emagomode, eromode tu tu je.
LUK 6:46 Jesus mako kimore nou boei. Akore: – Ia tagi tamagore tagimijera nuie imi. Ma kočare tameartorukare iwadaruji.
LUK 6:47 Ia imedu ure tuwai towuje. Ure ia iguru pemegareu tugu mototo. Ure tugera pemegado ji tuwo tuwai pemegado bakuru ukawo tuwai butudo. Nono bubuture. Pobo aregodure rugadu. Nou poborereu jeture nou imedu uwaiji. Mare nou uwai rakare rugadu. Butukare. Ča meartorure iwadaru jiwu akedumodukare nono nou bai mogadure. Mare bai ji karega inagoino. Boe ewiapaga pemegamode iwadaruji dukeje emeartorumode rugadu imagore jiboe jamedu boeji. Dukodire nou boe erduwamode rugadu dukodire boe pemegamode ei rugadu. Dujire inagoino.
LUK 6:49 Ia imedu ure tuwai pemegado jamedu mare ure tugeragu ia iguru pegareuji. Ure tugu mototo mare ukare bure tugu pemegado. Iera kiogwakare nou tuwaiji. Nono pobo aregodure. Dukodire pobo jeture nou imedu ure towu baiji. Nono nou uwai buture. Pobo ure nou uwai butudo rugadu. Ure rugadu pegado tači je. Ča nou meartorukare iwadaru jiwu jorduwa bokwamode dukodire boe pegamode ji nono boe pegare nou bai jitu mogadure. Mare bai ji karega inagoino. Boe emeartorumodukare tumeardure jiwu iwadaruji dukeje boe pegamode ei rugadu. Dujire inagoino.
LUK 7:1 Jesus mako akedure nou boei dukeje uture epiji toro Cafarnaum ba kurireu ka.
LUK 7:2 Roma kejewu tugobaigarege edure nono nou ba kurireu keje jamedu. Nou tugobaigarege eimijera aidure rugadu ia tudugare imeduji. Mača aino nou utugare imedu kogodure. Puredugodure tuwiwo.
LUK 7:3 Nou tugobaigarege eimijera meardure Jesus rore jiboeji. Meardure Jesus aregodure mato duji. Dukodire ure Judeu doge eimijerage etudo toro Jesus bagai Jesus aregoduwo uwo nou tudugare imedu kogodureu pemegago.
LUK 7:4 Dukodire nou Judeu doge eimijerage eture Jesus bagai. Etaregodure Jesus ae dukeje enogwamagudure Jesusji utuwo pudabo toro nou tugobaigarege eimijera uwai ka uwo nou tugobaigarege eimijera utugare imedu pemegago. Emagore Jesusji. Egore: – Awu tugobaigarege eimijera ro pemegare boei.
LUK 7:5 Meardu kurire Judeu dogei. Čegimijera pemegareu nure ema. Ure ia bai rakojedo čenai čewo bato pui nou bai ja tada čemagowo baruto Pao Kurireu bagai nono.
LUK 7:6 Dukodire Jesus uture nou Judeu doge eimijeragebo toro nou tugobaigarege eimijera uwai ka. Mare etaregodukare toro raga dukeje ia tugobaigarege etaregodure etogi nou tugimijera bataru tabo. Emagore Jesusji. Egore: – Čegimijera makore atukaiago toro tuwai ka pugeje. Akore boe eimijera kurireu nuie aki. Akore boe eimijera kurireu ukaie gure pudumi. Dukodire akore akaregodukaiago pudae toro tuwai ka.
LUK 7:7 Akore tuboguruie turore jiboeji dukodire taregodumodukaie mato atogi. Akore amagomoduie dukeje tudugare pemegagodumoduie.
LUK 7:8 Akore tugobaigarege eimijera nuie pudumi. Akore tugimijeraie jamedu. Kodire tuiorduwaie boe eimijera rore jiboeji. Akore tumagomoduie ia tugobaigare utuwo ia boe eda ka dukeje nono tugobaigare utumoduie rugadu. Meartoruie tuwadaruji kodi. Tumagomoduie ia tugobaigare aregoduwo pudae dukeje nou tugobaigare aregodumoduie pudae rugadu. Tumagomoduie tudugare rowo iaboeji dukeje tudugare meartorumoduie tumagore jiboeji rugadu. Akore boe eimijera kurireu nuie aki rugadu. Boe ekogodae meartorumoduie awadaruji rugadu. Amagomoduie dukeje tudugare pemegagodumoduie tači rugadu.
LUK 7:9 Nou tugobaigarege eimijera bataru ure Jesus joku kidugo. Jesus makore nou rakojere pudabowu boe dogei. Akore: – Iwo tawie. Nou tugobaigarege eimijera meartorure idu kodure Israel moto kejewu Judeu doge eiamedu boe emeartorure idu kori.
LUK 7:10 Nono nou tugobaigarege eimijera utugarege ere tugirimi Jesus piji tugimijera uwai ka. Etaregodure dukeje erdure nou tugimijera utugare kogodureuji. Mare kogodukare pugeje. Pemegagodure rugadu.
LUK 7:11 Nouia barogwato Jesus uture Naim ba kurireu ka ture jorduwadowugebo. Nouia boe emagare rugadu tugodui Jesus rekodaji.
LUK 7:12 Jesus puredugodure nou ba kurireu ka dukeje ia boe ere tudawuje nou Naim ba kurireu piji ia iparedu bireu apo tuwo tugu mototo. Nou iparedu uče oredu bire pijiwudo onaregedu rogu ure mitotu je. Boe emagare rugadu ture tudawuje nou Naim ba kurireu piji tudui nou bireu apo dutabo.
LUK 7:13 Jesus jordure nou areduji dukeje okudugodu kuričigore nou aredu apo. Akore: – Akragudukaba.
LUK 7:14 Nono ure tuburedo nou bireu meture tadawu ira ka. Nono ure tugera bu nou metu tadawu ira aogeje. Nono nou oredure nou bireu apowuge ere tuwuredo. Jesus makore nou bireu ipareduji. Akore: – Me. Amugudo. Atawuje nou ira piji.
LUK 7:15 Nono nou iparedu ure tumugudo. Jewodure tuwi piji rugadu dukodire makore jamedu. Nono Jesus ure nou iparedu maku tuje ai.
LUK 7:16 Nou boe eiamedu boe epagudugodure Jesus rore aino duji. Egore: – Ča makore Pao Kurireu bataru jiwu imedu kurireu aregodure pagae rugadu. Pao Kurireu aregodure tuwo tugera maku pagai rugadu.
LUK 7:17 Awu bataru pemegareu ure tumaedo nou Judéia moto jamedu boe parugajeje. Ure tumaedo nou moto tuginaiwu jamedu boe parugajeje jamedu.
LUK 7:18 João Batista ure jorduwadowuge eture João Batista ae baičoreu ka tureadoduwo biagai awu Jesus rore jiboeji. Ereadodure biagai dukeje João Batista makore nou ture jorduwadowuge pobedu doge ewagai. Makore ei. Akore: – Tanarado Jesusji, “Nou Pao Kurireu umoduie maku boe etaiwu boe ekinorudowu nure aki rugadu kana? Čebagamode ia bagai kimo kana?” Tanarado aino Jesusji inai.
LUK 7:20 Nono nou ime eture Jesus ae rugadu. Emagore Jesusji. Egore: – João Batista ure čedudo mato akae čenaragoduwo aino ai. Nou Pao Kurireu umoduie maku boe etaiwu boe ekinorudowu remawu nure aki? Čebaga kimomode kana ia bagai?
LUK 7:21 Nou meriji Jesus ure kogodureuge epemegago. Ure bope doge etawuje epijiwuge emagare jamedu. Ure joku bokwareuge etaiwodo pugeje jamedu.
LUK 7:22 Dukodire Jesus makore nou João Batista ure jorduwadowugei. Akore: – Tagirimi tawo João Batista biedu pemegado rugadu tardure jiwu irore jiboeji, tameardure jiwu imagore jiboeji. Ire joku bokwareuge epemegago etaiwowo pugeje. Ire pogora pegareuge epemegago emeruwo pugeje. Ire kogodureuge ewiri pegareuge epemegago ewiri pemegawo pugeje. Ire bija bokwareuge epemegago emearduwo pugeje. Ire bireuge eewodudo pugeje. Ire marenarue doge ewie nou umode boe ekinorudowu aregoduie rugadu.
LUK 7:23 Boe pemegamode nou meartorure iwu boei. Emodukare tugera ra tumeartorure i dupiji nono egaremode pudui rugadu.
LUK 7:24 Nou João Batista ure jorduwadowuge eture pugeje dukeje Jesus makore João Batista rore jiboeji nou rakojere pudabowu boe doge ewiagai. Akore: – Marigudu tadure jiče boe maereu ka mare tarduwo bakuru jeture boebutu jitu bagai karega. Tarduwo ukudau areia motureu jiwu boe ewagai karega. Tarduwo oe kurireuge ewagai karega. Nou ukudau areia motureu jiwu boe emugure bai kurireu tada. Oe kurireuge emugure bai kurireu tada. Tadumode bai kurireu ka nouge ewagai. Mare tadure boe maereu ka. Tadure toro tarduwo João Batistaji. João Batista mugure boe maereu keje. Ukudau areia pemegakare, motukare ji.
LUK 7:26 Tarduware João Batista makore Pao Kurireu bataru jituji. Dukodire tadure toro boe maereu ka João Batista bagai. Aino ča imode tawie. João Batista makore Pao Kurireu bataruji rugadu. Iwo tawie iaboeji pugeje. João Batista rore nono Pao Kurireu meardae mogadure rugadu.
LUK 7:27 Marigudu Pao Kurireu akore: “Imode itugare arego uwo boe pemegado nou umode boe ekinorudowu togi.” Ainore Pao Kurireu akore marigudu. João Batista jire akoino. Dukodi čare awu bataru jeture pudui rugadu.
LUK 7:28 Jesus mako kimore. Akore: – Iwo tawie. João Batista kurire boe eiamedu boe ekori. Mare aino ia boe etugare umode tugimijerado Pao Kurireuče dukeje Pao Kurireu jakai boe kurireu mode ema João Batista kori.
LUK 7:29 Nou boe eiamedu boe emeardure nou Jesus makore jiboeji. Ia imposto mori makudure aiwuge eragojere nono ebo jamedu. Marigudu João Batista ure etao pegodo. Emeartorure Pao Kurireu bataruji dukodire João Batista ure etao pegodo. Aino čare emeardure Jesus makore jiboeji dukeje emago pemegare Pao Kurireu meardaeji. Egore pemegaie.
LUK 7:30 Mare fariseu doge ekare João Batista udo tao pegodo. Nou jorduware Judeu doge eno bakaru jiwuge ekare João Batista udo tao pegodo jamedu. Turore aino dutabo ere boe erduwado tumeardae pegareuji. Nou fariseu doge, nou jorduware Judeu doge eno bakaru jiwuge ere tumeardae pegareu tawuje tumeartorukawo Pao Kurireu makore pudui jiboeji.
LUK 7:31 Jesus makore boei pugeje. Akore: – Imode tarduwado nuba nou meartoru bokwareuge emeardaere.
LUK 7:32 Boe etore ewadure puapo mare etokire pui. Egore: “Čere bapo akodo. Nono čemagore tai tareruwo mare tarerukare. Nono čemagore tai tagraguduwo čedabo mare tagragudukare.” – Ainore boe etore egore pui. Epemegakare pui rugadu. Ča nou meartoru bokwareuge ere nono nou boe etore emogadure. Mare boe etore ei karega inagoino. Pao Kurireu makore meartoru bokwareuge ewagai mare erokare iaboeji. Dujire inagoino
LUK 7:33 Pao Kurireu ure João Batista arego mato boe etae. João Batista ure tugera ra tuge piji tumagowo baruto jao nono boe ero mogadure. João Batista kudukare vinho kuruče nono ro pemegareu boe ero mogadure. Mare boe emago pegare ji. Egore bope uwari metuie tada.
LUK 7:34 Nono Pao Kurireu ure Imedu Onaregedu arego mato boe etae. Mare ire inagoino. Inogwagere boebo. Ikudure boebo. Mare du inodu tabo boe emago pegare i jamedu. Egore inogwage ierikaie. Mare pagare egoino. Egore Ikudu kigoduie vinho kuruče. Itaiduie ro pegareugei, imposto mori makudure aiwugei, marenarue dogei jamedu. Ainore egore. Mare tumago pegareu tabore egoino i. Dukodire inagoino meartoru bokwareuge nure emage.
LUK 7:35 Mare Pao Kurireu jorduware boe jamedu boeji. Ia boe emeartorumode Pao Kurireu bataruji dukeje meardae kurireuge mode emage. Nou ero koiare umode boe erdudo Pao Kurireu ure erduwado boe remawu jituji rugadu.
LUK 7:36 Fariseu imedu makore Jesusji okwagewo pudabo tuwai keje. Nou imedu iere Simão. Jesus uture uwai ka. Ure tumugudo ebo togwagewo.
LUK 7:37 Dukeje aredu umode tumagu paga paga ime etaiwudo jorduware Jesus okwagere nou fariseu uwai keje duji. Dukejere nou aredu aregodure Jesus ae nou boe ewai ka poari rogu tabo. Nou boe ere nou poari towuje tori tabo. Nou tori iere alabastro. Roreboe mori kurireu meture nou poari rogu tada. Nono nou aredu biabuture nou turo pegareu boe keje dukodire ragudu kuričigore dukodire nou jokuru buture Jesus bure keje. Ča nono nou aredu ure Jesus bure kidudo tao tabo. Nono ure togwa to bureto. Nono ure nou roreboe redo Jesus bure joki.
LUK 7:39 Nou fariseu imedu jordure nou aredu rore aino duji dukeje jordu motukare nou aredu rore aino Jesus jituji. Dukodire nou fariseu imedu biagorore tudada. Akore: – Kočare nou aredu rore aino nou Jesusji. Iordu motukare rore aino iwai ja tada duji. Kodiba Jesus ure nou aredu rodo ino pudui? Makore Pao Kurireu bataru jiwu karegure ema. Makore Pao Kurireu bataru jiwu umode ema dukeje jorduwamode nou aredu rore jiboeji, umode tumagu paga paga ime etaiwudo nure emarodo rugadu. Dukeje awu Jesus umodukare nou aredu rodo ino pudui. Makore Pao Kurireu bataru jiwu karegure ema rugadu.
LUK 7:40 Mare Jesus jorduware nou Simão makore tudada jiboeji. Dukodire makore Simãoji. Akore: – Iorduware awu areduji, umode tumagu paga paga ime etaiwudo nure ema rodo rugadu. Ča ireadodumode iaboeji tawiagai. Simão akore: – Areadodudo.
LUK 7:41 Jesus akore: – Imedu ure diero maku aiwuge imere pobe. Ia ai ure oto bu 500. Nou metia ai ure oto bu 50.
LUK 7:42 Boe aregodure nou meri ka ewo nou diero maku tuibagi nou imedu ai. Mare ere nou diero rugadu akedudo kodire eroiwakare tuwo morido tuibagi. Dukodire nou imedu makore ei ekawo morido pudai enoe bokware kodi. Kaibowu imedu ba meardu kurimode nou imeduji rugadu?
LUK 7:43 Simão akore: – Ure diero oto bu 500 aiwu imedure meardu kurimode rugadu nou ure diero maku pudaiwu imeduji rugadu ukare udo morido pudai kodi. Jakaremode pudui akore aino pudui duji. Okwa imadumode apo rugadu ukare udo morido pudai kodi. Nono Jesus akore: – Boe jokodu. Ča ire iremo awaito mare akimadukare itabo. Akare pobo maku inai iwo iwure kabi akimaduwo itabo nono Judeu doge ero mogadure. Mare awudorema ure iwure kabi tuioguru tabo, ure iwure kidudo tao tabo.
LUK 7:45 Aki akare akogwa to ie koduto akimaduwo itabo nono Judeu doge ero mogadure mare awudorema ukare tugera ra ture togwa to iwureto dupiji.
LUK 7:46 Akare boekaguru tugu itaoto nono Judeu doge erore tugimaduwo boebo dumogadure, mare awudorema ure roreboe reko iwure joki.
LUK 7:47 Awu aredu rore aino i dukodire iorduware meardu kurire i rugadu duji. Pao Kurireu biagodure awu aredu ro pegare jiboe piji tuwo awu aredu ro pegareu boe pijido ukawo morido pugeje dukodire meardu kuričigore aino i. Mare tagi tameardaere taro pegareu bokwaie kodire Pao Kurireu ukare taro pegareu pijido. Dukodire tameardu kurikare aino i rugadu.
LUK 7:48 Nono Jesus makore nou areduji. Akore: – Aro pegareu jamedu boe iwiagodure piji marigudu.
LUK 7:49 Dukodire čare nou Simão, nou mugure nono apowuge, erdu pegare Jesus akoino duji. Egore: – Ukare turugadu. Awu Jesus umodukare boe ero pegareu barigu boe epiji. Tu Pao Kurireu romode aino tu rugadu. Emeartorukare Jesusji dukodire egoino.
LUK 7:50 Jesus makore nou areduji pugeje. Akore: – Ameartorure i dukodire akinorudodure aro pegareu jamedu boe piji dukodire awarigudumodukare toro bope doge eda kejewu joru pegareuto. Akirimi aibagi awai ka. Amororamagadukaba. Boe pegareu puredumodukare ai.
LUK 8:1 Jesus uture ture jorduwadowu imebo boe eda jamedu boe ka tuwo boe ewie tuwadaru pemegareuji, tumagowo Pao Kurireu rore jiboeji boe ewiagai. Makore boei Pao Kurireu umoduie boe eimijerado pudumi kuri je. Nou Jesus ure jorduwadowuge enodo padure doze.
LUK 8:2 Ia areme ekodure Jesus apo jamedu. Iarodo iere Maria Madalena. Metago iere Joana. Nou iarodo iere Susana. Marigudu bope doge emedure nou Maria Madalena tada. Nou bope doge enodo padure sete. Mare Jesus ure nou bope doge etawuje nou Maria Madalena piji dukodire nou Maria Madalena kodure apo. Nou Joana oredu iere Cuza. Nou Cuza maragodure boe eimijera Herodes ai. Ia areme ekodure Jesus apo jamedu. Jesus ure bope doge etawuje iage epiji. Ure iage epemegago tugogodae piji. Dukodire nou areme ere tugera maku etai nou toe makudu tabo Jesus ai, nou utugarege etai jamedu.
LUK 8:4 Boe emagare taregodu tabo Jesus ae. Etaregodure tieda jamedu boe piji tuwo bato pui Jesus ae tumearduwo Jesus makore jiboeji. Dukeje Jesus readodure ewiagai ia bakaruji tuwo jebato toro nouia Pao Kurireu meardae ka.
LUK 8:5 Akore: – Ia imedu ure tudawuje tuwo boe a roto ja ja moto joki to boepa tada. Ia a buture awara okwaji. Boe ewure jore nou buture awara okwa jiwu a keje, kiebarege ere nou boe a rugadu kowuje.
LUK 8:6 Ia a buture toriguru tada. Boture mare kidure, tori uru koia, moto pegare ji kodi.
LUK 8:7 Ia a buture botoguru tada. Botoguru boture tabo jamedu mare botoguru ure bito.
LUK 8:8 Mare ia a buture moto pemegareu keje. Ere tuguwu sacu ure mitotu je. Botu pemegare, ričodu pemegare, enari kurire rugadu. Kidure dukeje ere rawuje čiwu piji. Ere a rawuje tuwo tugu sacuto. Nou sacu oto padure kejeboere cem nou boe a tabo. Nono Jesus okituware nou boei. Akore: – Tawiapaga pemegado awu iwadaruji tarduwawo kaba jiba inagoino tai.
LUK 8:9 Nou Jesus ure jorduwadowuge enarare ji: – Kaba awadaru jiba akaidure čerduwawo akagoino čei duji?
LUK 8:10 Jesus akore: – Ire boe erduwado toro nouia Pao Kurireu meardaeji rugadu nou bakaru tabo. Mare paga karega. Ireadodure aino Pao Kurireu uwo tarduwado meture pudabowu tumeardae boeji, boe ewo tugimijerado tu ema, tarduwawo nuba Pao Kurireu romode tudugaregei. Mare ireadodure bakaruji kodire ia boe erduwamode awu bakaruji mare emodukare boe pa nou bakaruji. Ewiapagamode ji mare erduwamodukare nou Pao Kurireu meardaeji.
LUK 8:11 – Ainore awu bakaru ure. Boe eire inagoino. Pao Kurireu bataru ure nono nou boe a mogadure. Mare boe a ji karega inagoino. Pao Kurireu bataru aregodumode boe etae. Nono boe emeardumode Pao Kurireu bataruji. Dujire inagoino.
LUK 8:12 Boe emeardumode Pao Kurireu bataruji dukeje bope doge eimijera umode nou Pao Kurireu bataru tawuje nou boe epiji nono nou kiebarege ere nou boe a tawuje moto piji dumogadure. Mare kiebarege ei karega inagoino. Bope doge eimijera jire inagoino. Umode boe ewiago Pao Kurireu bataru piji. Dujire inagoino. Dukodire nou boe emeartorumodukare Pao Kurireu bataruji pugeje.
LUK 8:13 Ia boe emeardumode Pao Kurireu bataruji pugeje. Nono nou boe emode nono nou boture toriguru tadawu boe a mogadure. Nou boture toriguru tadawu boe a rakamodukare. Mare boe a ji karega inagoino. Boe eire inagoino. Nou boe eragamodukare tumeartoru raiwo Pao Kurireuji. Dujire inagoino. Emode tugeragu Pao Kurireu bataruji tiagare tabo mare emeartoru raimodukare ji. Dujire inagoino.
LUK 8:14 Ia boe emeardumode Pao Kurireu bataruji pugeje. Awu boe emode nono nou boture botoguru tadawu boe a mogadure. Botoguru umode boe pegado ji. Mare boture botoguru tadawu boe a ji karega inagoino. Boe eire inagoino. Nou boe emeardumode Pao Kurireu bataruji mare emororamagadumode tu nou tumeardae pegareu boeji. Dujire inagoino. Emeardaere tu pudui tuwo to diero kurido. Emeardaere tu nou taidure jiboeji. Dukodire toro ia meri keje nou boe emode tugera ra Pao Kurireu bataru piji. Dujire inagoino.
LUK 8:15 Mare ia boe emeardumode Pao Kurireu bataruji dukeje emeartorumode ji rugadu. Dukodire epemegamode rugadu nono nou boture moto pemegareu boe a mogadure. Mare boture moto pemegareu kejewu boe a ji karega inagoino. Boe eire inagoino. Nou boe emeardumode Pao Kurireu bataruji nono emeartorumode ji rugadu. Dujire inagoino. Emodukare tugera ra tumeartorure jitu piji rugadu jii toro rugadu. Dujire inagoino.
LUK 8:16 Jesus makore kimo. Akore: – Boe emode pori bu jorugu aogeje dukeje urugumodukare. Boe emode jorugu mugudo tuba kuda dukeje urugumodukare jamedu. Mare boe emode jorugu bararedo, uruguwo pudui.
LUK 8:17 Mare paga karega iwadaru ure nono nou lamparina urugu mogadure. Mare lamparina urugu ji karega inagoino. Marigudu boe erduwakare ia Pao Kurireu meardaeji. Marigudu boe erduwakare ia boe ero pegare jiboeji. Mare boe emeardumode iwadaruji dukeje boe erduwamode Pao Kurireu meardae pemegareu jamedu boeji. Boe emeardumode iwadaruji dukeje erduwamode boe ero pegare jiboeji. Dujire inagoino. Erduwakare ia boe ero pegare jiboeji mare erduwamode ji. Dujire inagoino. Erduwakare ia Pao Kurireu meardae pemegareuji mare erduwamode ji. Dujire inagoino. Dukodire tameardae pemegado tawiapagare jiwu iwadaruji tawo taragado tai tameartoruwo ji rugadu. Mare paga karega. Boe etaidumode tumeartoruwo tuiorduware jiwu Pao Kurireu bataruji dukeje Pao Kurireu umode erduwa kurido pudui emeartoruwo pudui rugadu. Mare ia boe etaidumodukare tumeartoruwo tuiorduware jiwu Pao Kurireu bataruji dukeje Pao Kurireu umode erduwa bokwado tuwadaruji. Emeardaere tuiorduwaie rugadu mare pagatu je.
LUK 8:19 Jesus uče uwiemage etaregodure tuiorduwo Jesusji tumagowo ji. Mare eroiwakare tubureduwo ji boe emagare nono apo kodi.
LUK 8:20 Ia imedu ure Jesus bie. Akore: – Ikimijera. Ače, awiemage etaregodure awagai. Etaidure tumagowo ai.
LUK 8:21 Mare Jesus makore: – Biapagare Pao Kurireu bataru jiwuge emeartorure jiwuge ere nono iwobe emogadure. Ere nono iwie mage emogadure. Ere nono muga mage emogadure.
LUK 8:22 Ia meri keje Jesus ure turemo ture jorduwadowugebo ia ika kurireuto. Makore ei: – Pagurugoduwo awu pobo maereu okwa abowu ka.
LUK 8:23 Nono eture. Ekurugodure dutabo Jesus unudure. Mačare ia bakuru pegareu aregodure etae tači je. Nou bakuru ure nou pobo maereu rutudo. Kodire pobo jeture nou ika kurireuji. Dukejere nou pobore turemo nou ika kurireuto rugadu. Boe pegare nou ika kurireu tadawu boe dogei rugadu.
LUK 8:24 Jesus ure jorduwadowuge epagudugodure rugadu dukodire ere Jesus jetadudo. Egore: – Čegimijera! Pawimode poboto! Nono Jesus ure turagojedo. Nono makore nou bakuruji nou poboji dukodire nou bakuru akedure, nou pobo butugugodure jamedu.
LUK 8:25 Nono Jesus makore nou ture jorduwadowugei. Akore: – Tameartorukare i na? Mare epagudure. Ebogodure. Egore pui: – Duboba nure awu imeduče? Kočare bakuru, pobo emeartorure awu imedu bataruji rugadu!
LUK 8:26 Ekurugodure Galiléia pobo maereu okwa abowu ka. Nou etaregodure kawu moto iere Gerasa.
LUK 8:27 Nono Jesus ure tudawuje ika piji dukeje bope doge emedu tadawu imedu uture Jesus togi. Marigudu nou bope doge emedure nou imedu tada dukodire boe ere kogudo ia meriri iku tabo boe etuwo ji rekodukawo. Mare nou bope doge ere nou imedu rakado rugadu dukodire nou imedu ure nou meriri iku kado tu tu je. Nono nou bope doge ere nou imedu utudo boe epiji. Dukodire merure tuwiri kedo tabo, rekodure tuwai piji jamedu. Mugure boe ere bireuge etugu tadawu tori poro ja tada boe maereu keje. Nono Jesus makore nou meture nou imedu tadawu bope dogei. Akore: – Tadawuje nou imedu piji! Nou imedu kudugodu rakare dukeje ure tuwududo Jesus jokorai. Ure tumago rakado. Akore: – Jesus! Boe eimijera Pao Kurireu onaregedu nure aki! Nuba aromode čei? Inogwamagudumode ai. Akaba čedudo boe pegareuto.
LUK 8:30 Jesus unarare ji: – Nuba akiere? Nou meture nou imedu tadawu mareboe doge emagare dukodire egore: – Čegiere bope doge makareuge. Nono nou meture nou imedu tadawu bope doge enogwamagudu raire Jesusji ro pegakawo pudui ukawo tuwarigu boe eiawu moto koreuto.
LUK 8:32 Jugureuge edu puredure nono togwage tabo. Nono nou mareboe doge enogwamagudure Jesusji uwo tudo turemo nou jugureugeto. Jesus makore ei uie turugadu.
LUK 8:33 Nono ere tudawuje nou imedu piji dukejere ere turemo nou jugureugeto. Dukodire nou jugureuge eregodure kuri ia moto ri ao piji poboto. Dukodi eiamedu boe ewire poboto.
LUK 8:34 Dukodire nou jeture jugureuge eiwuge ime eregodure toro nou tuwai mugure tadawu ba kurireu ka tureadoduwo boe ewiagai nono. Ereadodure nou Jesus rore jiboeji boe eiamedu boe ewiagai nou moto jamedu boe parugajeje.
LUK 8:35 Nou ba kurireu kejewuge eture toro Jesus ae dukeje erdure nou bope doge emedu tadawu imeduji pemegagodure duji. Butugugodure. Ukudau areia meture jituji. Erduware Jesus ure bope doge etawuje nou imedu piji dukejere epagudugodure. Eiamedu boe emagore Jesusji utuwo nou to moto piji. Dukodire Jesus ure tuduiago dukeje nou bope doge ere tudawuje pijiwu imedu makore Jesusji. Akore: – Itaidure ikoduwo akabo. Mare Jesus akore: – Atudo aibagi awai ka. Areadoduwo boe ewiagai nuba Pao Kurireu ro pemegare ai duji. Dukodire nou imedu uture tuibagi tuwai ka. Readodure nou ba kurireu kejewuge boe eiamedu boe ewiagai nuba Jesus ro pemegare pudui duji.
LUK 8:40 Jesus kurugodure tuibagi ika kurireu tabo pobo maereu okwa abowu ka pugeje ture jorduwadowugebo. Etaregodure dukeje boe ekimadure Jesus apo. Epagare bagai marigudu tuwiapagawo Jesus bataruji.
LUK 8:41 Ča ia bai kejewu boe eimijera iere Jairo. Judeu doge ere bato puiwu bai kejewu boe eimijera nure ema. Nou imedu Jairo aregodure Jesus ae, tragudu tabo. Okwamagudure Jesusji koduiago pudabo toro tuwai ka. Tonaregedu nogwaredu rogu ure mitotu jedu bigoduiure. Dukodire Jesus uture apo uwai ka. Mare nono nou boe emagare rugadu dukodire ere taiado pači Jesus apo.
LUK 8:43 Ia aredu kodure ebo Jesus rekodaji. Marigudu nou aredu kogodaere tu tu je. Nou aredu ku rere piji nono areme etorewudae mogadure. Mare nou aredu ku akedukare piji. Re kimore piji meri jamedu boeji. Joru oto padure doze nou aredu ku rere piji dukeje. Kodire uture jorubo epage etae. Mare ekare nou aredu pemegago nou tugogodae piji. Pega kimore rugadu.
LUK 8:44 Aino čare nou aredu ure tugera raido. Nono iera otorogu jeture Jesus ukudau areiaji. Dukeje nou aredu pemegagodure tači je. Nou aredu ku rekare piji pugeje.
LUK 8:45 Ča Jesus ure tuwuredo tu je. Akore: – Ioguduba ure tugera raido ikudau areia ka? Boe emagokare boeji. Dukejere Pedro akore: – Kodiba akagore aino? Boe emagare woe pagabo. Boe eiamedu boe ekera jeture akudau areiaji.
LUK 8:46 Mare Jesus akore: – Iorduware ipijire ia iraga rakareu ure tudawuje dukejere iogore ia boei. Dukodire iorduware ia boe ekera jeture ikudau areia jituji.
LUK 8:47 Nou aredu jorduwagodure Jesus jorduware pudumie tuie tugera raido pudae duji. Dukodire ure tuburedo Jesusji. Mare pagudure dukodire mororamagadure. Ure tubu jodo moto keje Jesus jokorai dukejere readodure turore jiboeji Jesus biagai.
LUK 8:48 Jesus makore ji. Akore: – Are. Ameartorure tu i dukodire apemegagodure. Mare amororamagadukaba. Ire akogodae akedudo apiji rugadu.
LUK 8:49 Jesus mako kimore nou areduji dukeje ia imedu aregodure etae Jairo uwai piji. Makore Jairoji. Akore: – Akanaregedu rogu bokware. Amagokaba nou pagimijeraji pugeje.
LUK 8:50 Mare Jesus meardure emagore pui duji. Nono makore Jairoji. Akore: – Amororamagadukaba. Ameartorudo i rugadu. Akanaregedu pemegagodumode.
LUK 8:51 Makore aino dukeje Jesus uture ture jorduwadowugebo Jairo apo uwai ka. Etaregodure uwai ka dukeje boe emagare nono tragudu tabo nou Jairo onaregedu rekodaji bire kodi. Jesus akore: – Tagragudukaba pugeje. Bikare. Unudunure. Unure tamudo tu je. Mare nou nogwaredu bire rugadu. Mare Jesus jorduware turomode jiboeji dukodire akoino ei. Mare nou boe erduware nou nogwaredu bire rugadu duji. Dukodire enogwarigodure ji emeartorukare ji kodi. Nono Jesus makore Pedroji, Joãoji, Tiagoji jamedu, ewo turemo pudabo, Jairo apo, Jairo oreduje apo jamedu. Makore nou iagei epagawo toro bawadu keje.
LUK 8:54 Ere turemo dukeje Jesus ure tugeragu nou nogwaredu ieraji. Makore ji. Akore: – Are. Aragojedo.
LUK 8:55 Ča. Nou nogwaredu jewodure tači je. Nono ure turagojedo. Uče, uo erore ta je Jesus rore aino duji. Mare Jesus makore ei. Akore: – Awu tagonaregedu okwagedo. Imode tawie. Tareadodukaba boe ewiagai irore aino woe tawai keje duji.
LUK 9:1 Nono Jesus makore ture jorduwadowuge ewagai. Enodo padure doze. Ure turaga maku etai ewo boe epemegago ewo bope doge etawuje boe epiji jamedu. Ure eragado turaga tabo ewo boe epemegago ekogodae boe piji.
LUK 9:2 Jesus makore nou ture jorduwadowugei. Akore: – Tadukaba nou tagedure jiwu tagaibo tabo. Tadukaba marenaru ukudau areia meture tadawu kadarabo tabo. Tadukaba tage tabo. Tadukaba diero tabo. Tadudo tu meture taiwu tagudau areia tabo. Tadukaba ia tagudau areia metia tabo pugeje. Tagaregodumode ia boe eda ka dukeje tardumode boei. Etaidumode tai dukeje tamugudo ebo jii nou tadumode kejewu meri ka. Mare tagaregodumode ia boe eda ka pugeje mare nou boe etaidumodukare tai. Ekimadumodukare tagabo dukeje tadudo epiji. Tadumode epiji dukeje tawure okeakejewu to pui egai tawo moto urugudu tawuje nou tawure okeakejewu piji nou boe erduwo Pao Kurireu aidukare nou erore jiboeji kodire umode tugera ra epiji. Jesus makore nou ture jorduwadowugei dukeje ure etudo ewo boe ewie Pao Kurireu bataru pemegareuji boe ewo tugimijerado tu Pao Kurireuče. Ure etudo ewo kogodureuge boe epemegago jamedu.
LUK 9:6 Dukodire nou Jesus ure jorduwadowuge eture. Eture boe eda jamedu boe ka. Ere boe eiamedu boe ewie nou Jesus bataru pemegareu jamedu boeji. Ere kogodureuge epemegago jamedu.
LUK 9:7 Galiléia moto kejewu boe eimijera iere Herodes. Meardure nou Jesus rore jiboeji makore jiboeji. Mare jorduwa bokware ioguduba nuie ema duji. Ia boe egore João Batista jewoduie pugeje kodie João Batista nure ema.
LUK 9:8 Ia boe egore Elias uie tugirimi baru piji. Iage egore ia mariguduwu makore Pao Kurireu bataru jiwu jewoduie pugeje.
LUK 9:9 Herodes akore: – Boe egore ia imedu ro rakaie rugadu. Dukodire imire imagore itugaregei ewo João Batista itoru kado. Dukodire ere bito rugadu. Ema karega rore aino. Ča kakojiwu imedu ba ro rakare aino pugeje? Dukodire Herodes jemarure Jesus bagai tunarawo ji ioguduba nuie ema rugadu.
LUK 9:10 Nou uture Jesus bataru tabowuge ere tugirimi tuibagi Jesus ae. Ereadodure turore jiboeji Jesus biagai. Dukejere Jesus uture ebo pugeje boe epiji. Etuiago toro Betsaida ba kurireu ka. Mare boe erduware Jesus kodure toro duji dukeje eture rekodaji. Emagare. Dukodire Jesus ure tuwuredo nono boe maereu keje tumagowo nou boei. Ure erduwado Pao Kurireu bataru pemegareuji boe ewo tugimijerado Pao Kurireuče. Nono nou tumugureu keje ure boe kogodureuge epemegago jamedu.
LUK 9:12 Nono merirekodutabo nou Jesus ure jorduwadowuge emagore Jesusji. Egore: – Boe doge etudo awu boe maereu piji. Edo taodo ia tieda puredureu bagai emuguwo keje etaiwowo ia tuge rogu bagai. Boe bokware woe du kodire.
LUK 9:13 Jesus akore: – Boro. Taigoiare tamode enogwagedo. Egore: – Awu boe emagare rugadu. Ime enodo padure cinco mil. Mare page amireu rogure ikera aboudure tu je. Page karo rogure pobetu je. Tu rugadu. Akaidukana čeduwo toro ba kurireuto čewo čegeragu awu boe eiamedu boe ekeji kana? Mare Jesus akore: – Tamagodo awu boei ewo tudo pui enodo paduwo cinquenta tu tu tumuga boe keje.
LUK 9:15 Nono nou Jesus ure jorduwadowuge erore aino. Ere nou boe eiamedu boe edo tudo pui tumuga jamedu boe keje. Eiamedu boe ere tudo pui rugadu. Dukodire ere tumugudo tu tu tumuga boe keje.
LUK 9:16 Nono Jesus ure tugeragu nou boe eke roguji tumagowo Tuwo Kurireu bagai baruto nou boe eke rogu paru tabo. Imadure Tuwo Kurireu apo nou boe eke rogu paru tabo dukeje Jesus ure nou boe eke kado puiato ture jorduwadowuge ewo maku boe etai. Nou boe erore puku je nou boe eke itodure aino duji. Dukodire nou boe eke ure turugadu boe eiamedu boei.
LUK 9:17 Boe eiamedu boe enogwagere. Nono ča ekuredure egarere pudui rugadu. Ča nou Jesus ure jorduwadowuge ere nou kadarabo doge ekorau nou boe eke kobo tabo. Nou kadarabo doge enodo padure doze nou boe eke kobo tabo rugadu.
LUK 9:18 Ia meri keje Jesus makore baruto Tuo Kurireu bagai. Rakojere tuginaigodu. Tu nou Jesus ure jorduwadowuge edure tu nono Jesus apo. Jesus ure tuwadaru akedudo dukeje unarare nou ture jorduwadowugei: – Nuba boe emeardaere i?
LUK 9:19 Egore: – Boe egore João Batista nuie aki. Nou iage egore Elias nuie aki. Nou iage egore ia mariguduwu makore Pao Kurireu bataru jiwu imedu jewodureu nuie aki.
LUK 9:20 Jesus akore: – Mare tagi. Nuba tameardaere i? Pedro akore: – Pao Kurireu ure maku boe etaiwu nure aki. Umode boe ekinorudowu nure aki.
LUK 9:21 Jesus akore: – Tareadodukaba nou inoduji boe ewiagai. Mare du inodu tabo boe erorerumode i. Boe etaidumodukare i. Judeu doge eimijerage erdu pegamode i rugadu. Jorduware Judeu doge eno bakaru jiwuge erdu pegamode i rugadu. Nou ure Judeu doge enomea maku Pao Kurireu aiwuge eimijerage erdu pegamode i rugadu. Boe emode iwido rugadu. Mare merimode pobe metia bokware dukeje iewodumode tači je pugeje.
LUK 9:23 Nono Jesus makore nouia boei pugeje. Akore: – Ia tagi tagaidure tagoduwo itabo kana? Ča iwo tawie. Tagaidumode dukeje tameartorudo tu i dukeje tagera ra taro pegareu piji, tawia ra tameardae pegareu piji, tagaidure jiboe piji jamedu. Tado tarugadu meri jameduji boe pegamode tai nono boe pegamode i dumogadure. Iwimode ipo padure pugajejewu keje. Dukodire inagoino tai tado tarugadu tagoduwo itabo.
LUK 9:24 Mare ia boe ewiapagamode tuwo boe pemegado tu pudui turaga tabo dukeje nou boe eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare ia boe ewiapagamodukare tumeardaeji pugeje tuwo tugera ra nou turo pegareu piji tumeardae pegareu piji taidure jiboe piji dukeje Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto jamedu.
LUK 9:25 Pagatu jere boe emode turagado pudui toe kuriwo awu moto keje. Ča nou enoe umodukare erududo baruto. Ewiagorokare tuwo tumeartorudo tu Pao Kurireuji kodi. Ewiagorore tu tuwo toe kurido mare pagatu je.
LUK 9:26 Ia boe epogurumode tumagowo iwadaruji tumedage ewiagai dukeje imi imodukare ikeragu ei itae. Itaregodumode Pao Kurireu o jorugu kurireu tabo Pao Kurireu utugarege baru tadawugebo dukeje imodukare ikeragu ei. Nou Pao Kurireu o jorugu kurireu urugure Pao Kurireu kujegajeje. Imode ikirimi mato dukeje urugumode ikujegajeje jamedu. Urugumode nou aregodumode itabowu Pao Kurireu utugarege baru tadawuge ekujegajeje jamedu.
LUK 9:27 Iwo tawie boe remawuji. Pao Kurireu umode boe eimijera kurireudo pudumi dukeje ia tagi tardumode awu Pao Kurireu roino duji. Tawimodukare jii toro tardumode roino jitu ka.
LUK 9:28 Nou akoinodu bataru rekodaji semanare mito. Dukeje Jesus uture Pedro apo, Tiago apo, João apo jamedu toro ia tori ričoreu ao ka. Toro nou tori ričoreu ao kejere Jesus makore Pao Kurireu bagai baruto.
LUK 9:29 Jesus makore baruto dukeje je ure tudo tuginai. Ukudau areia kigadu maere ji. Gurugure nono boeiaragudu urugu mogadure rugadu.
LUK 9:30 Nono ia ime doge epadure tači toro ae. Ere pobe. Ia iere Moisés. Metia iere Elias. Nou Pao Kurireu jorugu pemegareu urugure ekujegajeje. Emagore Jesusji. Jesus makore ei jamedu. Ere pu bie Pao Kurireu meardaeji. Nou Pao Kurireu meardae koiare boe pegamoduie Jesusji nono Jerusalém ba kurireu keje dukodire Jesus bimoduie Jerusalém ba kurireu keje rugadu. Mare jewodumoduie pugeje turuduwo baruto rugadu.
LUK 9:32 Mare Pedro unudure tumedagebo. Čare edadure dukeje erdure nou urugure Jesus kujegajejewu Pao Kurireu jorugu pemegareuji. Erdure nou ime pobedu dogei jamedu.
LUK 9:33 Ča nou ime pobedu doge ere tuduiago tuibagi baruto dukeje Pedro makore Jesusji. Akore: – Ikimijera. Ure turugadu paeduwo woe. Čemode ia mačebradudo pobe metia bokware. Iamode akai. Iamode Moisés ai. Iamode Elias ai jamedu. Mare Pedro jorduwakare tuiordure jiboeji dukodire mako pagare.
LUK 9:34 Pedro mako kimore dukeje ia boe tugu ure turawuje etae. Nou boe tugu ure turorido eiogi. Dukodire nou Pedro, nou rakojere apowuge metage epagudugodure.
LUK 9:35 Nono emeardure ia boe emagoji nou boe tugu piji. Akore: – Imeardu kurire jiwu itonaregedu reo. Ire ikeragu ji iwo udo boe ekinorudo. Tawiapaga pemegado makore jiboeji.
LUK 9:36 Akore aino dukeje nou boe tugu akedure. Ča Jesus rakojere nono. Nou ime pobedu doge eragojekare nono pugeje. Mare Pedro, Tiago, João nou meriji ereadodukare tumedage ewiagai tuiordure tumeardure jiboeji jii toro, ia boe ewiagai jii toro jamedu.
LUK 9:37 Nou barogwato ere turawuje nou tori ao piji dukejere boe emagare taregodu tabo Jesus togi.
LUK 9:38 Ia imedu akore: – Ikimijera! Ikimijera! Inogwamaguduwo ai itonaregedu rogu paru tabo bope uwari pegareu meture tada kodi. Nou bope uwari ro pegare ji kodire ure magadudo, ure kudugo. Jataro aregodure jabiji, rakakare tuwo turagojedo pugeje. Kodire ure tiamedu boe korido. Ukare tudawuje itonaregedu piji rugadu. Dukodire inogwamagudunure ai akaiwowo ji awo pemegago. Rogure mitotu inai. Imagore awu ia are jorduwadowugei ewo nou bope uwari pegareu barigu piji. Mare ero rakakare ji.
LUK 9:41 Jesus akore nou boei: – Tare ikiarigo. Tameartorukare rugadu. Tarduwakare tawo tameardae pemegado. Iragoje raimodukare tagabo. Nuba tagaidure irowo tameartoruwo i? Nono Jesus makore nou imeduji. Akore: – Mato akanaregedu apo.
LUK 9:42 Nono boe ere nou iparedu reko Jesus ae dukeje nou bope uwari pegareu ure nou iparedu butudo moto keje pugeje. Magadugodure nono nou moto keje. Mare Jesus mako rakare nou bope uwariji uwo tudawuje nou iparedu piji. Ainore čare ure nou bope tawuje nou iparedu piji rugadu. Dukodire ure pemegago. Nono ure nou iparedu maku tuo ai pugeje.
LUK 9:43 Boe eiamedu boe ebogodure Pao Kurireu ro rakare aino duji. Nou boe ebogodu kimore Jesus rore jiboeji. Dukeje Jesus makore ture jorduwadowugei pugeje.
LUK 9:44 Akore: – Imedu Onaregedu nure imi. Imagudumode ro pegareuge etai ero pegawo i. Tawiagodukaba awu imagore tai dupiji.
LUK 9:45 Mare nou Jesus ure jorduwadowuge erduwakare kaba jiba Jesus akoino pudui duji. Nou Jesus makore jiboe ukare turemo etaorato. Dukodire ure tuwiado epiji. Mare epagudure jamedu tunarawo Jesusji kaba jiba Jesus akoino pudui.
LUK 9:46 Nou Jesus ure jorduwadowuge ere bato pui tunarawo kakojiwu pudumiba boe kurireu mode ema. Eiamedu boe egore boe eimijera kurireu moduie pudumi nou tumedage epiji.
LUK 9:47 Mare Jesus jorduware emeardae jamedu boeji. Nono Jesus ure tugeragu ia boe etonaregedu roguji. Makore ji rakojewo nono pudabo tugana pemegareu jagwai.
LUK 9:48 Nono Jesus makore ture jorduwadowugei. Akore: – Meartorure iwu umode tugera podo boe etonaregedu apo dukeje unure tugera podo itabo jamedu. Meartorure iwu umode tugera podo itabo dukeje unure tugera podo nou ure itarego matowu apo jamedu. Tagaidumodukare tawo tagurido tamedage ekori pugeje, mare tamode tado itugaregedo tagi dukeje Pao Kurireu aidu kurimode tai boe eimijerage kurireuge ekori.
LUK 9:49 João makore Jesusji. Akore: – Čerdure ia imeduji. Ure bope doge etawuje boe epiji akie tabo. Pamedia karegure ema. Dukodire čemagore ji uwo tugera ra nou turo piji makokawo akie tabo pugeje.
LUK 9:50 Mare Jesus makore ei. Akore: – Piji. Ro pegakare paiwuge emeardu kurinure pai.
LUK 9:51 Jesus jorduware meri puredugodure pudui turuduwo baruto. Dukodire ure tumeardae udo turugadu tuduwo Jerusalém ba kurireu ka.
LUK 9:52 Ure tugeragu nouia ture jorduwadowuge pobedu dogei tuwo etudo tododai tuwadaru tabo toro Samaria moto kejewu ia boe eda ka ewo boe udo turugadu Jesus togi aregodumode toro kodi.
LUK 9:53 Dukodire nou pobedu doge eture nou Samaria moto kejewu boe eda ka rugadu. Mare nou boe erduware Jesus utumoduie Jerusalém ba kurireu ka dukodire etaidukare Jesus aregoduwo pudae.
LUK 9:54 Mare nou pobedu doge erduware nou boe emeardaeji dukodire ere tugirimi Jesus ae tuwo Jesus bie nou boe egore Jesus jituji. Ere Jesus bie dukeje nou Tiago, nou João emeardure egoino duji jamedu. Dukodire emagore Jesusji. Egore: – Čegimijera. Akaidukana čemagowo baruto joru butuwo nou boe ewugeje, uwo nou boe etagedudo?
LUK 9:55 Mare Jesus akore: – Boro. Tameardae pegakaba ei.
LUK 9:56 Dukejere Jesus uture ture jorduwadowugebo toro ia boe eda ka pugeje.
LUK 9:57 Jesus kodure awaraji dukeje ia imedu aregodure ae. Makore ji. Akore: – Itaidure ikoduwo akabo rugadu atumode kaboe ka.
LUK 9:58 Jesus makore ji. Akore: – Okwa doge emode tamudo tiari poro ja tada. Kiebarege emode tamudo tuwaradu ja tada jamedu. Imedu Onaregedu nure imi. Mare iwai bokware dukodire imode itamudo tadaboe bokware.
LUK 9:59 Dukeje Jesus makore ia imeduji. Akore: – Ako itabo. Mare nou imedu akore: – Ikodumode akabo rugadu mare kajao. Aino kuri aino itumode iogwa uwai ka. Iogwa bire dukodire iwo iogwa tugu mototo jao. Dukejere ikodumode akabo akodure jiboe ka.
LUK 9:60 Jesus akore: – Bireuge etugudumode mototo bireugebo mare awiapagakaba ei. Atudo epiji ia boe eda ka awo nou boe ewie boe eimijera kurireu moduie Pao Kurireuče rugadu duji.
LUK 9:61 Ia boe makore Jesusji pugeje. Akore: – Ikodumode akabo rugadu. Mare kajao. Iwo ikirimi iwai ka jao ikimaduwo iwobebo.
LUK 9:62 Mare Jesus makore ji. Akore: – Ia boe aidumode tumaragoduwo motoji tuwo nou merirido moto kado kuwaru apo dukeje umodukare tuie mekido tododaiwu moto piji tuwo nou ture kadowu moto jetorodo. Aiwomodukare tuibagi. Tarodo nono nou umode moto kadowu ro mogadure. Mare umode moto kadowu ro ji karega inagoino. Tamaragoduwo Pao Kurireu ai tawo boe ewie boe eimijera kurireu mode Pao Kurireuče. Dujire inagoino. Boe etaidumode tumaragoduwo Pao Kurireu ai dukeje ekawo tugera ra Pao Kurireu piji tuwo tugirimi turo pegareu ka pugeje. Dujire inagoino. Emode tugera ra Pao Kurireu piji dukeje Pao Kurireu umodukare tudugaregedo emage.
LUK 10:1 Jesus ure tugeragu imei pugeje tuwo etudo tuwadaru tabo boe etae. Enodo padure kejewugere setenta e dois. Ure edo pobe čai čai je puapo tudumodewu ka.
LUK 10:2 Makore ei. Akore: – Boepa kurire rugadu. Nou boepa tadaboe ure turugadu boe ewo kado. Mare nou umode boepa tadaboe kadowuge emagakare. Dukodire tamagodo baruto Pao Kurireu bagai. Boepa jiwu boe eimijera kurireu nure ema. Tamagodo ji uwo nou maragodure boepa jiwuge emagado etuwo boepato ewo boepa tadaboe kado rugadu. Mare boepa remawu ji karega Jesus akoino. Meartorumode Pao Kurireu jiwugeire akoino. Boe emode boe erduwado Pao Kurireu bataruji dukeje emeartorumode ji, Pao Kurireu umode ekinorudo rugadu. Dujire akoino.
LUK 10:3 Nono Jesus makore ei pugeje. Akore: – Nou imode tadudo etaewuge ere nono rie doge emogadure. Mare tagire tare nono ovelha doge emogadure. Mare barogo remawu ji karega inagoino. Tameardae pegareu bokware. Dujire inagoino. Mare nou tadumode etaewuge emeardae pegamode tai rugadu. Dujire inagoino. Ča tadudo toro boe ewagai.
LUK 10:4 Mare tadukaba ia diero tabo. Tadukaba marenaru ukudau areia meture tadawu kadarabo tabo. Mare tadudo tu nou meture tawuretadau tawure okeakejewu tabo. Tadukaba ia metia tabo pugeje. Tagaba tawuredo awara kajeje tagimaduwo ia boebo.
LUK 10:5 Tagaregodumode nou boe ewai ka dukeje tagimadudo nou boebo. Tamagodo aino ei: “Boe epemegawo awu bai tadawugei.”
LUK 10:6 – Tamagomode aino nou boei dukeje tarduwamode ei. Etaidure tuwo tubemegado boei dukeje tawadaru pemegareu maku etai Pao Kurireu uwo boe pemegado ei. Mare etaidumodukare tuwo tubemegado boei dukeje tagaba tawadaru pemegareu maku etai jamedu.
LUK 10:7 Nou boe etaidumode tai dukeje tabaduwo nou ewai keje. Tabadu paga paga kaba ia boe ewai keje. Nou aidure taiwuge ewai kejere tabaduwo. Tagwagedo nou emode maku tagaiwu tageji. Taeku irukaba nou emode maku tagai boeji. Tagududo nou emode maku tagaiwu boeče. Nou tagwagere jiboe, nou tagudure čewu makudure tagai tamaragodae moriče.
LUK 10:9 Tawo nou boe eda kejewu kogodureuge epemegago. Tamagodo nou boei Pao Kurireu umoduie boe eimijera kurireudo pudumi kuri aino.
LUK 10:10 Mare tagaregodumode ia boe eda metia ka dukeje etaidumodukare tugimaduwo tagabo dukeje tagaba taremo ewaito nou boe eda keje. Dukeje toro bawadu keje tagagomode aino ia boe ewiagai.
LUK 10:11 Tamagodo aino ei: “Čedaregodure čewo boe ewie Pao Kurireu umoduie boe eimijera kurireudo pudumi kuri aino. Mare ia tagi tawiapagakare čewadaruji. Dukeje čemode čewure okeakejewu to pui taegai čewo nou moto urugudu tawuje čewure okeakejewu piji nou boe erduwo Pao Kurireu aidukare tarore aino čei duji.” Ainore tagagomode ei.
LUK 10:12 Mare imode tawie. Pao Kurireu okudugodumodukare nou aidukare taiwugei. Toro ia meri keje aiwomode boe eiamedu boe erore jiboeji tuwo nou erore jiboe morido etai. Marigudu nou Sodoma kejewuge ero pegare. Dukodire nou meri keje Pao Kurireu umode boe pegado nou Sodoma kejewugei ero pegareu moriče. Mare nou aidukare taiwuge boe eire Pao Kurireu ro pega kuričigomode nou Sodoma kejewuge ekori. Ainore Jesus akore nou setenta e dois boe doge ewiagai.
LUK 10:13 Nono Jesus makore nouia boei. Akore: – Iro rakare Corazim ba kurireu keje iwo nou boe erduwado i. Mare emeartorukare i. Dukodire boe pegamode ei rugadu. Iro rakare Betsaida ba kurireu keje iwo nou boe erduwado i. Mare emeartorukare i. Dukodire boe pegamode ei jamedu. Marigudu rugadu Tiro ba kurireu kejewuge emeartorukare Pao Kurireuji. Marigudu rugadu Sidom ba kurireu kejewuge emeartorukare Pao Kurireuji. Nou Tiro ba kurireu kejewuge, nou Sidom ba kurireu kejewuge erdumode nou Corazim ba kurireu kejewuge erdure jiwu iro rakareuji dukeje ekiarigodumode turo pegare jiboeji rugadu. Emode tugera ra turo pegareu piji. Emode jorugudu bu taora keje tuwo boe erduwado tugiarigodure turo pegareu boe jituji tuwo tugera ra turo pegareu piji. Mare erdukare i, erdukare iro rakareuji dukodire erduwakare i. Ekare tugera ra turo pegareu piji rugadu. Mare kočare Corazim ba kurireu kejewuge, Betsaida ba kurireu kejewuge, erdure iro rakareuji mare du inodu tabo ekiarigodukare turo pegareuji. Etaidukare tuwo tugera ra turo pegareu piji rugadu.
LUK 10:14 Mare Pao Kurireu ure ia meri tawuje taiwowo boe eiamedu boe ero pegareu bagai nou meri keje. Mare nou Tiro ba kurireu kejewuge emeartorukare Pao Kurireuji dukodire Pao Kurireu umode boe pegado ei nou makore kejewu meri keje. Sidom ba kurireu kejewuge emeartorukare Pao Kurireuji dukodire Pao Kurireu umode boe pegado ei jamedu nou makore kejewu meri keje. Mare Corazim ba kurireu kejewuge, Betsaida ba kurireu kejewuge erdure iro rakareuji mare du inodu tabo emeartorukare i. Dukodire Corazim ba kurireu kejewuge eire, Betsaida ba kurireu kejewuge eire, Pao Kurireu ro pega kuričigomode nou Sidom kejewuge ekori, nou Tiro kejewuge ekori jamedu. Pao Kurireu romode aino ei toro ia meri keje. Nou makore kejewu meri keje umode boe pegado ei rugadu.
LUK 10:15 Cafarnaum ba kurireu kejewuge emeartorure tu pudui turuduwo baruto. Mare pagatu je. Pao Kurireu umode ewarigu toro bope doge eda kejewu joruto nou taiwomode boe ero pegareu bagaiwu meri keje.
LUK 10:16 Nono Jesus makore ture jorduwadowugei. Akore: – Biapagare taiwuge ewiapagare i jamedu. Jordu pegare taiwuge erdu pegare i jamedu. Jordu pegare iwuge erdu pegare ure itarego matowuji jamedu.
LUK 10:17 Uture Jesus bataru tabowuge ere tugirimi tuibagi Jesus ae. Enodo padure kejeboere setenta e dois. Egarere pudui taregodure dutabo rugadu. Egore: – Čegimijera. Čemagore bope dogei akie tabo ewo tudawuje boe epiji dukodire emeartorure čewadaruji rugadu!
LUK 10:18 Jesus akore ei: – Iordure bope doge eimijera pegareu Satanás buture baru piji duji. Buture nono boeiaragudu butu mogadure.
LUK 10:19 Tawiapaga pemegado awu iwadaruji. Ire tarduwado. Ire ia iraga maku tagai. Dukodire taragare jordu pegare paiwu Satanásji. Dukodire čare boe pegareu umodukare tagogorido. Awagu umodukare toedo tai. Betaga umodukare tudugo tugu tado.
LUK 10:20 Bope doge etuwaire emeartorure tai mare taegaregodukaba nou inoduji. Taiamedu boe taegaredo tai nou tagie padure bapera keje baru tada kodi.
LUK 10:21 Nou meriji Pao Kurireu Uwari ure Jesus jakaredo pudui rugadu. Dukodire Jesus makore Pao Kurireu bagai baruto. Akore: – Iogwa. Baru tadawuge, moto kejewuge eiamedu boe eimijera kurireu nure aki tu rugadu. Are nou mugukare bapera kejewuge erduwado. Nou are erduwado jiboe are biado jorduwareuge epiji marigudu. Are biado nou mugure bapera kejewuge epiji jamedu. Mare are mugukare bapera kejewuge erduwado. Dukodire ikimadure toro awagai. Are nou ameardae jetudo pudui rugadu akaidu tabo.
LUK 10:22 Jesus ure nou tuwadaru iado tumagore tuo jitu keje makore nou boei. Akore: – Iogwa ure boe jamedu boe maku tu inai. Tu Pao Kurireu jorduware nou Tonaregeduji. Tu nou Onaregedu jorduware Tuoji. Dukodi nou Onaregedu umode nou taidure jiwuge erduwado Pao Kurireuji jamedu.
LUK 10:23 Nono Jesus ure tumegido nou ture jorduwadowuge etae. Dukeje makore ei. Akore: – Tardure irore jiboeji dukodire boe pemegare tai.
LUK 10:24 Jawu pawobe emagore Pao Kurireu bataru jiwuge etaidure tuiorduwo i nou itaregodumode kejewu meri keje tuiorduwo nou tardure jiwu irore jiboeji. Mare ewire marigudu dukodire erdukare i. Jawu pawobe eimijera kurireuge etaidure tuiorduwo i nou itaregodumode kejewu meri keje tuiorduwo nou tardure jiwu irore jiboeji. Mare ewire marigudu dukodire erdukare i. Etaidure tumearduwo tameardure jiwu imagore jiboeji. Mare emeardukare ji, ewire kodi.
LUK 10:25 Ia meri keje ia jorduware Pao Kurireu o bakaru jiwu unarare Jesusji: – Nuba iromode iewoduwo pugeje iragojewo Pao Kurireu apo baru tada jii toro rugadu? Mare pagatu jere ure tunarado Jesusji. Aidure tuwo Jesus barigu boeto Jesus makowo ia tuwadaru pegareuji nono tumago pegawo Jesusji.
LUK 10:26 Jesus akore: – Nuba Pao Kurireu bataru akore boe eroiago? Nuba ameardaere ji?
LUK 10:27 Nou imedu akore: – Pao Kurireu makore pai pameardu kuriwo Pao Kurireuji paraga tabo, pameardae pemegareu tabo, parore jiboe jamedu boe tabo. Makore pai pameardu kuriwo pamedagei nono pameardu kurimode pai dumogadure.
LUK 10:28 Jesus akore: – Boe jokodu jire akagoino. Aromode aino dukeje aragojemode Pao Kurireu apo du akedumodukare rugadu.
LUK 10:29 Mare nou imedu aidukare turo pemegawo tumeardae pemegawo tumedagei. Dukodire unarare Jesusji pugeje. Akore: – Kaibowugeba imedage mode emage rugadu?
LUK 10:30 Nono Jesus akore: – Ia imedu ure turawuje Jerusalém ba kurireu piji tuduwo toro Jericó ba kurireu ka. Nou awara keje iwogureuge eiwogure nou imeduji. Ere ukudau areia tawuje piji tugiwoguwo ji. Ere boeto ji. Ere kugudugodudo. Nono dukeje eture piji. Nou imedu bigodunure. Boe etaiwomodukare ji puredugodure tuwiwo kodi.
LUK 10:31 Ča ia ure Judeu doge enomea maku Pao Kurireu aiwu imedu kodure nou awaraji. Jordure nou ere boeto jiwu imeduji mare ure tumegido awara okwa abowu ka. Aidukare tuwo tugera maku ai.
LUK 10:32 Dukeje ia Levi uwobe imedu kodure nono pugeje. Aiwore ji mare ure tumegido awara okwa abowu ka jamedu.
LUK 10:33 Nono ia moto tuginaiwu kejewu imedu kodure nou awaraji. Samaria moto kejewu nure ema. Jordure nou imeduji dukeje okudugodure apo. Jorduwakare ji mare okudugodure apo, dukodire ure tugera maku ai.
LUK 10:34 Ure tuburedo ji. Iogore nou epae oiaji. Dukejere ure barigu tagu kuwaru ao ka. Nono ure reko toro boe enudumode boe enogwagemode kejewu bai ka.
LUK 10:35 Nou barogwato ure dierodo pobe uwaire bai čewu ai jetuwo nou imeduji. Akore: “Imode ikirimi dukeje imode aeture jidu morido akai pugeje.”
LUK 10:36 Nono Jesus unaragodure nou imeduji. Akore: – Kaibowu imedu ba ure timediado nou imedu koridodureuče?
LUK 10:37 Nou jorduware Judeu doge eno bakaru jiwu akore: – Nou Samaria moto kejewu imedure jeture nou imedu koridodureuji kodire ure timediado ema. Jesus akore: – Toro. Arodo nono nou Samaria moto kejewu imedu ro mogadure.
LUK 10:38 Jesus uture pugeje ture jorduwadowugebo. Etaregodure ia boe eda ka. Nou boe eda kejere ia aredu mugure. Iere Marta. Imadure ebo. Makore ei enogwagewo tuwai keje.
LUK 10:39 Nou aredu uwie iere Maria. Jesus ure turemo ewaito dukeje Maria ure tumugudo nono Jesus jokorai tuwiapagawo Jesus bataruji rugadu.
LUK 10:40 Marta maragodu kimore tumugure kejewu bai tada tuwo tuge udo turugadu, tuwo boe jamedu boe udo turugadu. Mare nou uwie ukare tugera maku ai dukodire korigodure tuwie areduji. Dukodire Marta mako pegare tuwieji Jesus biagai. Akore: – Ikimijera nure aki. Mare awu iwie ukare tugera maku inai. Imire ire boe jamedu boe towuje ikinaigodu. Kočare amagokare ji uwo tugera maku inai. Amagodo ji uwo tugera maku inai rugadu.
LUK 10:41 Mare Jesus makore Martaji. Akore: – Amororamagadu kurire amaragodae jamedu boeji.
LUK 10:42 Mare awie Maria meardae pemegare ameardae kori. Kodire ure tumugudo iogorai tuwiapagawo imagore jiboeji. Boe emodukare nou biapagare jiboe tawuje aora piji rugadu. Dukodire boe emeardaemode tuwiapagawo iwadaruji nono nou Maria meardae mogadure, dukeje nou emeardae koiare umode boe pemegado boei.
LUK 11:1 Ia meri keje Jesus makore baruto tuo bagai. Ure jorduwadowuge eragojere nono apo. Ia akore: – Čegimijera. Čerduwado čemagowo baruto nono João Batista ure jorduwadowuge emogadure.
LUK 11:2 Jesus akore: – Ainore tagagomode baruto. Iogwa Kurireu. Mugure baru tadawu nure aki. Boe emago pemegawo akieji tuwo boe emeartorudo tu ai rugadu. Boe emeartoruwo awadaru jamedu boeji tuwo tugimijera kurireudo aki rugadu. Akaregodu pemegado aro pemegareu tabo mato moto ka ameardae rugadu boe jetuwo pudui rugadu, nono aro mogadure toro baru tada dumogadure.
LUK 11:3 Čege maku čenai meri jameduji.
LUK 11:4 Awiagodudo čero pegareu piji nono čewiagodure ro pegare čeiwuge ero piji dumogadure. Iage etaidumode tuwo tumeardae pegareu maku čenai tuwo čero pegado. Čeginorudo epiji čewiapagakawo nou emeardae pegareuji. Čeginorudo boe pegareu piji rugadu.
LUK 11:5 Nono Jesus makore ture jorduwadowugei pugeje. Akore: – Ia boečo aregodure toia ka dukeje imedu utumode timedia uwai ka tumagowo timediaji ia uke amireu bagai. Akore: “Me. Imedia aregodu. Utu jaere tugiriadu tabo mato iwai ka. Mare ike bokware. Ia ake amireu udo pobe metia bokware inai jao. Barogwato imode ia maku akai tuibagi pugeje.”
LUK 11:7 Mare nou imedu umodukare tie bu. Rakojemode tu tuwai ja tada tumago tabo bataru jipagi. Akomode: “Boro. Akaradaino ipiji. Ire iwai baiporo mi marigudu. Itore enudunure. Ipadure ipa kamoreu keje marigudu iwo itamudo. Imodukare ie bu iwo iaboe maku akai rugadu. Atudo iwai piji.”
LUK 11:8 Mare nou imedu utumodukare nou timedia uwai piji rugadu. Pogurukare togwamagudu raiwo nou imeduji ia uke amireu bagai. Nono nou tumagore dutabo ure nou timediado tie bu pudae rugadu. Nono nou metia ure nou imedu makore bagaiwu amireu maku ai rugadu.
LUK 11:9 Imedu rore aino. Pao Kurireu ro kodumode nou imedu ro kori. Dukodire imode tawie. Pao Kurireu aidure tuwo boe emagore bagaiboe maku boe etai rugadu. Dukodire tagogwamagudumode Pao Kurireuji iaboe bagai dukeje Pao Kurireu umode tamagore bagaiboe maku tagai rugadu. Pao Kurireu aidure tuwo boe erduwado pudui. Dukodire taemarumode Pao Kurireu bagai dukeje umode tarduwado pudui rugadu. Pao Kurireu aidure tuwo tuwai poro jado baru tada tuwo boe edo turemo baruto. Dukodire tamode tagera to Pao Kurireu uwai poroji dukeje umode tuwai poro jado tagai rugadu. Mare bai poro ji karega inagoino. Boe emeartoruwo Pao Kurireuji rugadu. Dujire inagoino.
LUK 11:11 – Ro pegareuge erduware turo pemegawo torei. Dukodire tagore emagomode tai karo bagai tuge boei koia. Nono tamodukare awagu maku etai. Tawogumode karo bagai ekeče.
LUK 11:12 Tagore enogwamagudumode kagariga ba bagai tuge boei koia dukeje tamode maku etai. Tamodukare betaga maku etai rugadu.
LUK 11:13 Ro pegareuge nure tagi mare du inodu tabo tarduware taro pemegawo tagorei tawo eke pemegareu maku etai. Tarduware tawo boe pemegareu maku tagore etai. Mare Pao Kurireu pemegare rugadu. Dukodire umode boe pemegareu maku boe etai rugadu du kodumode nou tare maku tagore etaiboe kori. Umode Tuwari maku okwamagudure puduiwuge etai rugadu.
LUK 11:14 Jesus ure bope uwari pegareu tawuje imedu piji. Nou bope uwari ure nou imedu mako bokwado. Mare Jesus ure nou bope uwari tawuje piji dukodire nou imedu makore pugeje. Boe erdure Jesus rore aino duji dukeje erore ta je.
LUK 11:15 Mare iage emeartorukare ji. Dukodire egore: – Bope doge eimijera pegareu Belzebu meture Jesus tada dukodire ure turaga maku Jesus ai Jesus uwo bope uwari pegareu tawuje boe epiji.
LUK 11:16 Ia meartorukare Jesus jiwuge etaidure tunarawo Jesusji tuwo Jesus barigu boeto. Enogwamagudure Jesusji uwo ia turo rakareu to tiagai tuiorduwo nouia ro rakareu aregodure rugadu Pao Kurireu piji du bagai.
LUK 11:17 Mare Jesus jorduware emeardae pegareuji. Dukodire makore ei. Akore: – Boe epomodukare puapo dukeje emeardaere tu turugoduwo pui dukeje etagedumode. Boe erugodumode tuwobei dukeje emode tugera ra pubiji rugadu.
LUK 11:18 Ča meartorure Satanás jiwuge epomodukare puapo dukeje emeardaere tu turugoduwo pui dukodi etagedumode. Kočare tagagore nou Satanás raka taboie ire bope uwari pegareu tawuje boe epiji.
LUK 11:19 Mare nou tare jorduwadowuge nuba erore tuwo nou bope uwari tawuje boe epiji? Pao Kurireu raka tabore eroino kana? Tu Pao Kurireu rakare tuwo bope doge etawuje boe epiji rugadu. Dukodire nou tare jorduwadowuge egomode pagaie tagagoino, Belzebu raka tabo karega ire bope uwari pegareu tawuje boe epiji rugadu.
LUK 11:20 Pao Kurireu koiare ure turaga maku inai iwo bope doge etawuje boe epiji rugadu. Dukodire boe erdure Pao Kurireu ro rakareuji rugadu. Turore aino dutabo Pao Kurireu makonure boe ewagai ewo tugimijera kurireudo tu pudumi rugadu.
LUK 11:21 – Tugobaigare rakareu umode tuwaiga pemegado rugadu. Umode tudariga merido tietu pemegawo tuwaiji, tietu pemegawo toeji.
LUK 11:22 Mare iwogureu jorduware turagamode ji dukeje umode tubodo apo rugadu. Umode tugobaigare butudo dukeje umode tugeragu uwaigaji piji, utariga kurireuji piji jamedu. Umode tugeragu nou tugobaigare oeji tuduwo tabo toro tumedage etae tuwo pedo pui.
LUK 11:23 – Aidukare iwu aidumode turo pegawo i tuwo iro pegado. Ukare tugera maku inaiwu umodukare boe etarego itae. Umode boe edo taodo ipiji.
LUK 11:24 Jesus mako kimore boei. Akore: – Bope uwari pegareu umode tudawuje ia imedu piji dukeje utumode toro boe maereu ka taiwo tabo tumode tamudo kejeboe bagai. Jordumodukare taidure jiboeji dukeje meardaemode tuwo tugirimi nou tumedure tadawu imedu bagai pugeje tuwo turemo to pugeje.
LUK 11:25 Dukodire nou bope uwari pegareu umode tugirimi nou tumedure tadawu imedu ae rugadu. Aregodumode dukeje jordumode ji pemegare duji. Jordumode ji ure nono tuwai motureu mogadure duji.
LUK 11:26 Dukejere utumode toro tumedage bope doge ewagai. Enodo padure sete. Makomode ei etuwo pudabo toro nou imedu ae. Nono emode turemo nou imeduto pugeje. Dukodire boe pegamode nou imeduji rugadu. Boetojiwu meture tadawu bope uwari ure mitotu je. Aino čare bope doge enodo padu kejewumode oito nou imedu tada. Dukodire boe pegamode nou imeduji rugadu.
LUK 11:27 Jesus ure nou tuwadaru akedudo dukeje, nou boe etoiadada ia aredu ure tumago rakado toro Jesus ae mare mako pemeganure ji. Akore: – Ače maragodu rakare tuwo arijodudo. Kurijirigodure awoduwo. Ure akogwagirido. Mare aino čare boe pemegare ačeji rugadu. Jakarere pudui rugadu arore jiboeji, amagore jiboeji.
LUK 11:28 Jesus makore nou aredu bataru jipagi. Akore: – Boro. Boe pemegamode biapagare Pao Kurireu bataru jiwugei, meartorure Pao Kurireu bataru jiwugei. Egare remawumode pudui rugadu.
LUK 11:29 Boe emagare nono Jesus apo. Ere taiado apo rugadu tuwiapagawo Jesus bataruji. Mare pagatu jere eroino. Etaidukare tumeartoruwo Jesus bataruji. Nono Jesus akore: – Aino čare boe emeardae pegare rugadu, ero pegare rugadu. Ainore tameardaere jamedu. Tamagore i iwo ia iro rakareu towuje taegai tarduwo iro rakareuji tarduwawo kaboba nuie imi. Mare pagatu jere tagagoino. Tardure iro rakareuji marigudu. Mare tagaidukare tarduwawo i. Tagaidukare tameartoruwo i rugadu. Dukodire iromodukare ia iro rakareuji taegai pugeje. Mare boemode i nono boere Jonas jitu mogadure. Dukejere boe erduwamode i rugadu.
LUK 11:30 Marigudu Pao Kurireu ure Jonas tawuje karo kurireu kuri piji turo rakareu tabo Jonas utuwo Nínive ba kurireu ka Pao Kurireu bataru tabo. Dukodire nou Nínive kejewuge erduware boe jokodu jire Jonas akoino pudui duji. Pao Kurireu umode itawuje bireuge eda piji turo rakareu tabo jamedu dukodire tarduwamode boe jokodu jire inagoino tai duji rugadu.
LUK 11:31 Marigudu Sabá moto kejewuge boe eimijerago kurireudo aidure rugadu tuiorduwawo Judeu doge eimijera kurireu Salomão jorduware jiboeji. Dukodire ure tudawuje to moto piji tuduwo toro Salomão uwai ka tumearduwo Salomão makore jiboeji. Mare boe eimijera kurireu nure imi. Iro kodure Salomão ro kori. Iorduware jiboe kodure Salomão jorduware jiboe kori. Mare du inodu tabo tagaidukare tameartoruwo i. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meriji nou Sabá moto kejewu boe eimijerago aredu mako pegamode tai tawiapagakare awu iwadaruji kodi.
LUK 11:32 Marigudu Jonas uture Nínive ba kurireu ka tuwo nou ba kurireu kejewuge ewie Pao Kurireu bataruji. Emeardure Pao Kurireu bataruji dukodi ekiarigodure turo pegareuji. Ere tugera ra nou turo pegareu piji rugadu tumeartoruwo tu Pao Kurireuji. Mare boe eimijera kurireu nure imi. Iro kodure nou Jonas ro kori. Iorduware jiboe kodure Jonas jorduware jiboe kori. Mare du inodu tabo tagaidukare tameartoruwo i. Tagaidukare tawo tagera ra nou taro pegareu piji rugadu. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meri keje nou Nínive kejewuge emago pegamode tai tawiapagakare awu iwadaruji dukodi.
LUK 11:33 Jesus mako kimore boei. Akore: – Boe emode jorugu biado dukeje urugumodukare. Boe emode pori bu jorugu aogeje dukeje urugumodukare. Mare boe emode jorugu bararedo, uruguwo pudui boe ewo turemo tuwaito.
LUK 11:34 Tuioku tabore boe erdure boeji. Mare boe eku pegare dukeje erdumodukare boeji. Imagore jiboe ure nono boe eku mogadure. Mare boe eku ji karega inagoino. Boe emeartorumode tu imagore jiboeji dukeje boe emeardae kurimode rugadu. Dujire inagoino. Mare boe emeartorumodukare imagore jiboeji dukeje emeardae bokwamode rugadu. Dujire inagoino.
LUK 11:35 Dukodire čare tameartorudo imagore jiboeji. Tagaidumodukare tameartoruwo imagore jiboeji dukeje boečomode tai rugadu. Mare boečo ji karega inagoino. Tarduwa bokwamode taro pegare jiboeji rugadu. Dujire inagoino.
LUK 11:36 Mare tameartorumode imagore jiboeji dukeje jorugumode tai. Mare jorugu ji karega inagoino. Tameardae pegareu bokwamode pugeje. Dujire inagoino. Tagaidumodukare taro pegawo pugeje. Taro pemegamode rugadu. Dujire inagoino.
LUK 11:37 Jesus ure nou tuwadaru akedudo dukeje ia fariseu imedu makore ji utuwo pudabo toro tuwai ka okwagewo pudabo tuwai keje. Dukodire Jesus uture nou fariseu uwai ka. Ure turemo uwaito dukeje ure tumugudo ira keje togwagewo.
LUK 11:38 Mare Jesus ukare tugera kabi nono Judeu doge ero mogadure. Nou fariseu jerore ta je tuiordure Jesus rore aino duji.
LUK 11:39 Mare Jesus jorduware nou fariseu meardaeji. Dukodire akore: – Fariseu doge nure tagi. Tare taruwobo kabi tabagaga kabi tawo epemegado tarowo nono Pao Kurireu ure maku tagaiwu bakaru umogadure. Tare taragado tai tawo nou tagoroe kabi rugadu tabemegawo nono nou makudure tagaiwu bakaru umogadure taro boeji. Mare kočare tu tadadare tameardae pegareu meture. Tarduwa bokware! Tagare tameardae pegareu barigu tabiji. Tawiapagare tu tai tawo tagoe kurido tamedage ekori rugadu. Tagaidure tawo boe pegado boei, tawo boe rakado boei. Mare Pao Kurireu koiare ure boe jamedu boe towuje. Ure boe etowuje jamedu. Eire Pao Kurireu ure maku tagaiwu bakaru akoino jamedu boe ewo nono nou ture kabiwu turuwobo mogadure tubagaga mogadure jamedu. Mare tu boe eruwobo ji karega akoino. Tu boe epagaga ji karega akoino jamedu. Meture boe etadawu emeardae jire akoino. Ča meture taruwobo tadaboe maku marenarue doge etai. Padure tabagaga tadaboe maku marenarue doge etai jamedu. Taromode aino dukeje tabemegamode tarowo nono tago bakaru umogadure taro boeji. Mare nou tameardae pemegareu tabo tamode boe pemegado tai jamedu.
LUK 11:42 Jesus mako raire nou boei. Akore: – Fariseu doge nure tagi. Tare tago boepa pijiwu boe aru rogu mori kurireboe kado puiato tu tu je tagomeawo iarogu tabo Pao Kurireu ai jamedu. Mare tameardaekare tawo taro jetorodo boei. Tameardaekare tameardu kuriwo Pao Kurireuji jamedu. Kodire boe pegamode tai rugadu. Tameardu kurido Pao Kurireuji. Taro jetorodo boei. Mare tawiagodukaba tawo nou mori kurireboe kado puiato tu tu je tagomeawo iarogu tabo Pao Kurireu ai jamedu.
LUK 11:43 – Fariseu doge nure tagi. Tadumode Judeu doge ere bato puiwu bai ka dukeje tare tageragu boe eimijera mugure kejewu iraji tamuguwo keje. Tadumode ba kurireu ka dukeje tagaidure boe emago pemegawo tai tagaidure boe ekimijeragewo tagi kodi. Dukodire boe pegamode tai rugadu!
LUK 11:44 Tare nono bireuge emedure tadawu moto poro mogadure. Mare moto poro ji karega inagoino. Tabegareu meture tadada tameardae pegare kodi. Dujire inagoino. Boe erduwakare ia bireuge edaji dukodire emerumode bireuge etaoji. Erdumodukare bireu meture nou moto tada duji. Tare nono nou boe erduwakare jiwu bireuge eda mogadure. Mare bireuge eda ji karega inagoino tai. Boe erdukare nou meture tadadawu tameardae pegareuji. Dujire inagoino tai. Dukodire boe pegamode tai rugadu!
LUK 11:45 Ia jorduware Judeu doge eno bakaru jiwu makore Jesusji. Akore: – Amago pegare fariseu dogei dutabore amago pegare čei jamedu.
LUK 11:46 Jesus akore: – Jorduware Judeu doge eno bakaru jiwuge nure ia tagi. Mare boe pegamode tai jamedu. Tare boe erduwado bakaruji mare tawo boe pemegado ei karega. Tagogudukare boebo. Tagaidure tawo boe rakado boei rugadu. Tagare tagera maku boe etai rugadu.
LUK 11:47 Marigudu Pao Kurireu makore tumoduie jorduware tuwadaru jiwuge etarego boe etae ewo boe ewie iwu bakaruji. Mare boe emoduie iage ewido. Emoduie boe pegado iagei jamedu. Ainore Pao Kurireu akore marigudu. Ainore mariguduwu tawobe erore rugadu. Ero pegare nou makore Pao Kurireu bataru jiwugei rugadu. Ere iage ewido rugadu. Aino čare tare tori motureu rakojedo nou bireuge etugudure towu moto keje boe erduwawo nonore nou makore Pao Kurireu bataru jiwuge bireuge emedure. Mare tameartorukare nou bitodureuge emagore jiwu Pao Kurireu bataruji. Dukodire boe erduware tameardaeji. Tameardaere nono nou tawobe mariguduwu emeardae pegareu mogadure rugadu. Tagaidure emeardae pegareuji rugadu.
LUK 11:50 Dukodire Pao Kurireu umode boe pegado tai rugadu nou makore Pao Kurireu bataru jiwuge eiamedu boe ewi moriče.
LUK 11:51 Tawobe ere ro pemegareuge ewido marigudu. Ere imedu Abel bito. Makore Pao Kurireu bataru jiwu boetojiwu nure ema. Ere makore Pao Kurireu bataru jiwu boigoduwu Zacarias bito jamedu. Ere nou Zacarias bito Pao Kurireu uwai jokorai rugadu. Nou Abel pijire jii nou Zacarias ae makore Pao Kurireu bataru jiwuge emagare rugadu. Mare tawobe mariguduwuge ere iage ewido jamedu. Dukodire awu maiwu pawobe emode mariguduwu jaoboe ero pegareu morido, aino kuri aino. Inure tawie boe remawuji rugadu.
LUK 11:52 Taetu pemegare Pao Kurireu bataru padure bapera kejewuji. Taro pemegare nou baperaji rugadu. Tarduware Pao Kurireu bataruji. Mare du inodu tabo tarduwakare Pao Kurireu meardae remawuji. Dukodire tameartorukare ji. Tagagore taie boe erduwado Pao Kurireu bataruji. Mare tu tameardae jire tare boe erduwado. Pao Kurireu bataru remawu ji karega tagagoino boei. Dukodire nou tare jorduwadowuge erduwakare Pao Kurireu meardae remawuji jamedu. Dukodi čare boe pegamode tai rugadu.
LUK 11:53 Jesus ure tuwadaru iado dukeje uture nou boe epiji. Dukejere nou fariseu doge, nou jorduware Judeu doge eno bakaru jiwuge emago pegare Jesusji rugadu. Eture rekodaji tunarawo ji dutabore ere tumago rakado ji boe jamedu boe bagai.
LUK 11:54 Etaidure tuwo Jesus barigu boeto ia tuwadaru keje.
LUK 12:1 Boe emagare nono Jesus apo. Dukodire ere tuwuredo pu bure keje rugadu. Mare Jesus makore tu ture jorduwadowugei boetoji. Akore: – Taeku jado nou fariseu doge emeardaere jiboeji. Emeardae ure nono fermento mogadure. Mare fermento remawu ji karega inagoino. Emeardaere tuwo turo pegareu biado boe epiji tu tu je. Ere boe emeartorudo tu tuwadaruji mare emage emeartorukare nou tumagore jiboeji. Dujire inagoino. Tarokaba nono ero mogadure.
LUK 12:2 Boe ero pegamode dukeje etaidumode tuwo nou turo pegareu biado boe epiji tagowo ro pemegareuge nuie pudumi. Mare Pao Kurireu jorduware ero pegareuji marigudu dukodire boe erduwamode nou ero pegareuji jamedu. Dukodire itaidure iwo tawie. Tarokaba nono fariseu doge ero mogadure. Tamago pegamode iaboeji boečoji dukeje Pao Kurireu meardumode rugadu. Toro ia meri keje boe eiamedu boe emeardumode nou tamagore jiboeji jamedu. Tamago podumode pui pu bijato ia tameardae pegareuji tawai tada mare Pao Kurireu meardumode nou tamagore jiboeji rugadu. Dukodire uwadodumode nou tamagore jiboe tabo boe eiamedu boe ewiagai. Dukodire inure tawie. Taro pegakaba, tamago pegakaba nono nou fariseu doge ero mogadure.
LUK 12:4 Jesus mako kimore. Akore: – Imedage nure tagi. Iwo tawie. Tabagudukaba boeče. Tabagudukaba bope dogeče. Boe emode tawido mare eragakare tuwo tawarigu bope doge eda kejewu joru pegareuto. Bope uwari umode boe pegado tai mare rakakare tuwo tawarigu tieda kejewu joru pegareuto.
LUK 12:5 Iwo tawie. Tabagududo tu Pao Kurireuče. Tu Pao Kurireu meardae koiare umode boe ewarigu bope doge eda kejewu joru pegareuto boe ewi keje. Dukodire inagoino tai. Tabagududo tu Pao Kurireuče.
LUK 12:6 Mare tabagudu remawu ji karega inagoino. Taeku kidugo Pao Kurireuji tameartoruwo tu ji rugadu. Dujire inagoino. Tameartorumode tu Pao Kurireuji dukeje tamororamagadumodukare boe pega boeji pugeje. Dujire inagoino. Pao Kurireu jetu pemegamode tai rugadu. Dukodire tameartorudo tu ji rugadu. Dukodire inagoino tai. Ča kiebarege kugure emode ikera aboudure dukeje boe emode diero tori rogu udo pobe emoriče tuwo akirodo ei tugeče tuwo ekowuje. Nou kiebarege emori bokware. Mare du inodu tabo Pao Kurireu biagodumodukare nou kiebarege ekugure piji rugadu jii toro. Jorduware kiebarege eiamedu boei. Aidure kiebarege kugurei. Mare Pao Kurireu aidure tai du kodure nou kiebarege kugure eiamedu boe ekori. Dukodire jetu pemegamode tai rugadu. Jorduware tai rugadu. Jorduware tagao iku jamedu boeji. Jorduware nou inodu rogu boeji kodire jorduware nuba boe mode tai duji rugadu. Jetu pemegamode tai rugadu. Dukodire inagoino tai tabagudukawo boeče pugeje.
LUK 12:8 Jesus mako kimore. Akore: – Imedu Onaregedu nure imi. Iwo tawie. Ia boe emagomode boe eiamedu boe ewiagai tuie tumagu inai tumeartoruwo tu i dukeje imagomode Pao Kurireu utugarege baru tadawuge ewiagai nou meartorure iwu nuie ema rugadu.
LUK 12:9 Mare ia boe emagomode boe ewiagai tugaie tumagu inai, tumeartorukaie i dukeje imagomode Pao Kurireu utugarege baru tadawuge ewiagai nou meartorukare iwu nuie ema rugadu.
LUK 12:10 Boe emago pegamode Imedu Onaregeduji mare toro ia meri keje ekiarigodumode nou tuwadaru pegareuji. Emagomode Pao Kurireuji biagoduwo nou tuwadaru pegareu piji. Dukeje Pao Kurireu biagodumode ewadaru pegareu piji rugadu. Mare ia boe emago pegamode Pao Kurireu Uwariji dukeje Pao Kurireu biagodumodukare nou ewadaru pegareu piji rugadu.
LUK 12:11 Tameartorure i. Dukodire boe emode tugeragu tai tuwo tarego boe eimijerage etae etaiwowo taro pegareu bagai tuwo boe pegado tai tameartorure i dukodi. Emago pegamode tai mare tamororamagadukaba tamagowo ewadaru jipagi.
LUK 12:12 Pao Kurireu Uwari umode tarduwado nou meriji tamago pemegawo ewadaru jipagi.
LUK 12:13 Boe emagare nono Jesus apo. Ia imedu makore Jesusji. Akore: – Ure boe erduwadowu nure aki rugadu. Čare inogwamaguduwo ai. Amagodo imanaji uwo iogware maku pudaiwu moto kado puiato uwo ia maku inai inoče jamedu.
LUK 12:14 Jesus akore: – Itaidure ai. Mare umode boe enoe kado puiatowu boe eimijera karegure imi.
LUK 12:15 Dukodire Jesus makore boe eiamedu boei. Akore: – Taeku jado. Boe emeardaere tu pudui tuwo toe kurido tumedage ekori rugadu. Taragado tai tarokawo nono nou boe ero mogadure. Tagoe kurimode mare tagoe umodukare tamugu pemegado. Boe enoe koia karega umode boe emugu pemegado moto keje tiegarere pudui dutabo.
LUK 12:16 Nono Jesus makore ia bakaruji nou boe ewiagai. Akore: – Ia imedu oe kurire. O moto kurire. O boepa kurire rugadu. Nouia joruji ure kadoboe kurire rugadu.
LUK 12:17 Ure boe jamedu boe tawuje nou to boepa piji dukeje makore tudada. Akore: “Imode biadowu towu bai kurikare iwo ire kadoboe jamedu boe jetudo ja tada. Ča nuba iromode?”
LUK 12:18 Nono ure tumeardae tawuje pugeje. Akore: “Ainore iromode. Imode nou iwai jamedu boe butudo iwo ia iwai kurireu mugudo pugeje iwo ire kadoboe jamedu boe jetudo nou iwai kurireu maiwu ja tada, iwo inoe kurireu jamedu boe jetudo nou iwai kurireu ja tada jamedu.
LUK 12:19 Dukeje inagomode iwaidigirire rugadu. Aino čare imode itamudo rugadu. Imaragodumodukare pugeje. Nono iagaremode inogwarimode nou inoe kurireu jamedu boeji. Joru makamode i mare inoe akedumodukare inoe kurire kodi. Čare iwadumode imedagebo. Inogwagemode. Ikudumode. Boe pemegamode i rugadu jii toro rugadu. Boe rakamodukare i pugeje.”
LUK 12:20 – Ainore nou imedu akore. Mare Pao Kurireu makore nou oe kurireu imeduji. Akore: “Arduwa bokware. Awu boečoji awimode rugadu. Mare atumodukare nou akoe kurireu boe tabo. Nou akoe mugumode aiageje moto keje. Ča duboba umode tugeragu nou akoeji?”
LUK 12:21 Nono Jesus makore pugeje. Akore: – Ainore boemode nou ure toe kuridowuge boe eiamedu boei. Ere toe kurido mare ewiapagakare tumeartoruwo Pao Kurireuji. Dukodire enoe bokwamode baru tada. Marenarue doge nure emage Pao Kurireu jakai.
LUK 12:22 Jesus mako kimore ture jorduwadowugei. Akore: – Tamororamagadukaba tage bagai, tagudau areia bagai.
LUK 12:23 Pao Kurireu ure tadowuje. Ure tawodudo. Emare jetu pemegamode tai.
LUK 12:24 Tagaiwodo awu kiebaregei. Ekare boe tugu. Ekare tugeragu boeji. Eke ja bokware. Eke muga bokware. Mare du inodu tabo Pao Kurireu koiare ure enogwagedo. Boe nure tagi. Pao Kurireu meardu kurire boei nou kiebarege ekori. Dukodire inagoino, jetu pemegamoduie tai.
LUK 12:25 Pao Kurireu jorduware tawimode kejewu meriji. Tagi rema tarduwakare. Tamororamagadumode mare tamodukare tawimode kejewu meri raido toro tagododai tamugu raiwo moto keje. Dukodire inagoino, tamororamagadukaiago iaboe rogu bagai pugeje. Tameartorudo tu Pao Kurireuji.
LUK 12:27 Tagaiwodo awu okureboeji. Emodure mare emage eigoia karega ere tumodudo. Pao Kurireu koiare ure awu okureboe emodudo aino. Mariguduwu Israel doge eimijera kurireu Salomão oe kuričigore dukodire meture jiwu ukudau areia moture rugadu. Mare motukare nono awu okureboe emodu mogadure. Ča okureboe emodure mare joru umode ekowu kuri je. Mare boe nure tagi. Pao Kurireu meardu kurire boei nou okureboe ekori. Dukodire umode tugera maku tagai rugadu. Dukodire inagoino tai tamororamagadukaba tagudau areia bagai, tameartoruwo tu Pao Kurireuji rugadu. Tameartorumode ji dukeje tamode nono awu okureboe umogadure jamedu. Pao Kurireu jetu pemegamode tai rugadu. Kočare tameartoru kurikare ji?
LUK 12:29 Tamororamagadukaba nou tagwagemode jiboe bagai. Tamororamagadukaba nou tagudumode čeboe bagai.
LUK 12:30 Mare meartorukare Pao Kurireu jiwuge ewiagorore tu nou tuge roguji tuge rogu bagai. Mare tameartorumode Pao Kurireuji dukeje tawiagoromodukare nou inoduji. Pao Kurireu jorduware kaba jiba tagaidure.
LUK 12:31 Dukodire tameardae tawuje tawo tagimijera kurireudo tu Pao Kurireuče. Tamode tagimijerado ema dukeje umode tage jamedu boe maku tagai rugadu.
LUK 12:32 Jesus mako kimore: – Tabagudukaba. Pao Kurireu aidure tuwo tagimijerado pudumi tuwo boe pemegareu maku tagai baru tada.
LUK 12:33 Tagoe rugadu boe maku. Nou morire tamode maku marenarue etai. Taromode aino dukeje tanure tagoe kurireu jetudo baru tada. Toro tagoe akedumodukare rugadu. Toro iwogureu iwogumodukare nou tagoeji. Toro boreu umodukare nou tagoe pegado.
LUK 12:34 Boe etaidure tu tuwo toe kurido woe moto keje dukodire ewiagoromode tu nou toeji woe rugadu. Nou boe ewiapagamodukare Pao Kurireu bataruji. Mare boe emode toe jetudo baru tada dukeje boe ewiagoromodukare ia moto kejewu toeji pugeje, boe ewiapagamode tu Pao Kurireu bataruji rugadu.
LUK 12:35 – Tado tarugadu tamaragoduwo Pao Kurireu ai. Tarodo nono boe eimijera utugarege ero mogadure. Ere tumaragodure tabowu tugudau areia metudo pudui. Enoredure jorugu tabo tumaragoduwo boečoji.
LUK 12:36 Epagare tugimijera bagai. Ekimijera uture uwiremodewu bowadae ka. Mare aregodure tuibagi tuwai ka boečoji dukeje ure tugera to tuwai poroji. Nono utugarege ere baiporo jado kuri kuri je rugadu.
LUK 12:37 Ekimijera aregodure dukeje jordure nou tudugaregei enudukare duji. Dukodire jakarere pudui nou tudugaregei. Nono utugarege egarere pudui rugadu. Egarere pudui nou tugimijera jakarere pudui dukodi.
LUK 12:38 Ekimijera aregodukare kuri je. Boečo aregodure toia ka dukejere aregodure. Mare utugarege ere tudo turugadu tugimijera aregodu bagai rugadu. Dukodire egarere pudui rugadu.
LUK 12:39 Uwaire bai čewu jorduwamode kaba meri kejeba iwogu kigodureu aregodumode. Dukeje umode tudo turugadu taiwo tabo nou iwogu kigodureu bagai, nou iwogu kigodureu ukawo turemo nou tuwaito.
LUK 12:40 Ča iwo tawie. Tado tarugadu, taerodo tagaiwo tabo tabiji. Mare iwogureu bagai karega. Tado tarugadu Imedu Onaregedu togi. Tarduwakare kaba meri kejeba aregodumode dukodire inagoino tai, tawo tado tarugadu jii toro rugadu.
LUK 12:41 Pedro unarare Jesusji. Akore: – Tu čei na akagoino? Boe eiamedu boei na akagoino nou bakaruji?
LUK 12:42 Jesus akore: – Ča nuba boemode pemegareu jorduwareu boe etugareji? Ukimijera aidumode tuduwo toro ia moto ka dukeje umode nou tudugare pemegareu mugudo tumugato tudugarege eimijerawo ema uwo eke maku etai nou tudure jiwu meri keje.
LUK 12:43 Nou utugare ro pemegamode meartorumode tugimijeraji jii toro tugimijera aregodumode kejewu meri ka dukeje jakaremode pudui rugadu.
LUK 12:44 Dukejere čare nou boe eimijera umode nou tudugare jetudo toe jamedu boeji rugadu jetu pemegawo ji. Boe jokodu jire inagoino nou meartorure iwadaru jiwugei.
LUK 12:45 Mare ia boe utugare meardae pegamode. Nou ukimijera utu jaemode jamedu dukeje aregodumodukare tuibagi kuri je. Nono nou utugare pegareu meardaemode tugimijera aregodumodukaie pugeje. Nono umode boeto nouia tudugarege imei, aremei jamedu. Nono maragodumodukare pugeje mare okwagemode, kudumode jamedu. Nono uke kurumode ji jamedu.
LUK 12:46 Čare ia meri keje nou ukimijera aregodumode tuibagi pugeje. Mare nou utugare upagakare bagai. Jorduwakare aregodumode kejewu meriji. Nono nou boe eimijera jordumode nou tudugare ro pegare duji. Dukodire nou ukimijera umode nou tudugare bito. Umode bowuje rugadu. Nono umode nou tudugare mugudo meartoru bokwareugebo bope doge eda kejewu joru pegareu keje.
LUK 12:47 – Ia boe utugare jorduware tugimijera meardaeji mare ukare turagado pudui tumeartoruwo tugimijera bataruji. Nono nou ukimijera umode boeto ji bukigu tabo turaga tabo rugadu. Umode boetodu kurido ji rugadu.
LUK 12:48 Ia utugare jorduwakare nou tugimijera meardaeji dukodire ro pegare. Dukodire ukimijera umode boeto ji bukigu tabo jamedu mare umodukare boetodu kurido ji. Boe eimijera umode tudugare maragodae rogu maku ai dukeje nou ukimijera aidumode nou tudugare meartoruwo pudui tuwadaruji uwo nou tumaragodae rogu iado rugadu. Mare nou ukimijera meardaemodukare tuwo ia tumaragodae maiwu maku tudugare ai, jorduwamodukare tuwo towuje kodi. Mare boe eimijera umode tudugare jorduwado tumaragodae jamedu boeji dukeje nou ukimijera aidumode nou tudugare uwo nou tumaragodae jamedu boe towuje rugadu.
LUK 12:49 Jesus mako raire boei kimo. Akore: – Itaregodure iwo joru barigu moto ka. Itaidure joru bariguduwo moto ka marigudu mare Iogwa aidukare raga. Mare joru remawu ji karega inagoino. Pao Kurireu umode boe pegado ro pegareugei. Dujire inagoino. Ro pegareuge ewarigudumode toro nou joru pegareuto. Dujire inagoino.
LUK 12:50 Mare boe pegamode i boetoji dukodire ikiarigodure rugadu.
LUK 12:51 Tameardaere itaregodure iwo boe epemegado tai. Ča itaregodure iwo boe pemegado boei rugadu. Mare ia boe doge emeartorumodukare i. Dukodire emeardaemodukare nono pumeardae mogadure imagore jiboeji. Dukodire boe epemegamodukare pui.
LUK 12:52 Dukodi čare boe epomodukare puapo dukeje emeardaemodukare nono tuwobe emeardae mogadure. Emode tugera aboudure dukeje. Nou ime pobedu doge emeardae pegamode nouia tuwobe emeardaere jiboeji, dukodire emode tuiado pubiji.
LUK 12:53 Ime emeardaemodukare nono tuo meardae mogadure. Dukodire nou etuo meardae pegamode nou tore imei. Areme emeardaemodukare nono tuje meardae mogadure. Dukodire nou etuje meardae pegamode nou tore aremei. Areme emeardaemodukare nono turagomage emeardae mogadure. Dukodire nou eturagomage emeardae pegamode nou tujarugomagei.
LUK 12:54 Jesus mako kimore nou boei. Akore: – Tardumode ia boe tugu čoreuji baru tada kodure tagae duji dukeje tagagomode bubutumoduie rugadu. Nono bubuture rugadu.
LUK 12:55 Bakuru urureu jetumode tai dukeje tagagomode awu meriji boeru butumoduie jamedu. Nono boerure rugadu.
LUK 12:56 Tarduware tawo boe ewie bubutuji boeruji. Dukodire tagagore jorduwareuge nuie tagi. Nono tagagomode tarduwaie nuba boemoduie boei. Mare kočare meartorukare tuwadaru jiwuge nure tagi. Tagagore tarduwaie Pao Kurireu meardae remawuji. Tardure iro rakareu remawuji mare tarduwakare kaba jiba iroino. Dukodi čare tarduwakare Pao Kurireu meardae remawuji.
LUK 12:57 Jesus mako kimore boei. Akore: – Kodiba tagare tameardae tawuje nuba boe ero pemegareumode?
LUK 12:58 Ia boe aidumodukare ia arore pudui duji. Aidumode tuduwo akabo toro boe eimijera ae aiwowo aroji aro pegareu bagai. Mare amago pemegado ji tawo tameardae maku puai taro pegakawo pugeje tawo tabemegado pui. Mare amago pemegamodukare ji dukeje umode arego toro boe eimijera ae rugadu. Nou boe eimijera aiwomode arore jiboeji dukeje jorduwamode aro pegare jiboeji rugadu. Nono umode amagu tugobaigarege etai ewo atugu baičoreuto.
LUK 12:59 Iwo awie. Amodukare apemegado nou korigodure aiwuji dukeje atugudumode baičoreuto rugadu. Aragojemode nono baičoreu tada jii amode aro morido du ka.
LUK 13:1 Nou meriji ia boe ere Jesus bie. Egore: – Boe pega. Ia pawobe Galiléia kejewuge eiago boe egu barogo rogu kowu tomeawo Pao Kurireu bagai mare Roma pijiwu boe eimijera Pilatos ure ewido.
LUK 13:2 Jesus akore: – Tameardaere nou pawobe Galiléia kejewuge bireuge ero pegaie nou tumedage ekori dukodire ewidodure aino? Ainore boe emeardaere.
LUK 13:3 Mare imode tarduwado. Ero pegareu koia karega ewire aino. Paedure boe pegareu tada kodire boe ewimode. Iwo tawie. Tamodukare tagera ra taro pegareu piji dukeje tawimode jamedu nono ewi mogadure.
LUK 13:4 Ia Jerusalém kejewuge ewire jamedu. Enodo padure dezoito. Edure Siloé tada Jerusalém ba kurireu keje. Dukejere ia mačebradu ričoreu buture ewugeje dukodire ure ewido. Boe egore nou boe ero pegaie nouia tumedage Jerusalém ba kurireu kejewuge ekori dukodire ewire aino.
LUK 13:5 Mare iwo tarduwado. Du inodu kodi karega ero pegare tumedage ekori. Iwo tawie. Boe eiamedu boe ero pegare. Tagi jamedu. Tamodukare tagera ra taro pegareu piji dukeje tawimode jamedu nono nou enodo padure dezoito boe doge ewi mogadure.
LUK 13:6 Nono Jesus readodure ia to bakaruji nou boe ewiagai. Mare bakaru remawu karega. Readodure tuwo erduwado toro nouia Pao Kurireu meardaeji. Akore: – Ia imedu o boepare. Uva ikure nou boepa tada. Nono nou uva iku oiadada ia figo i rakojere jamedu. Nou ore boepa čewu aiwore nou figo ito ia tudu kurodu bagai mare jordukare ia tuduji rugadu.
LUK 13:7 Dukodire makore tudugareji. Akore: “Jorure pobe metia bokware i itaiwo tabo nou figo ito. Mare iordukare ia tudu roguji. Dukodi awu figo i kado. Butudo. Rakojekawo nono ino boepa tada pugeje!” Ainore nou ore boepa čewu akore.
LUK 13:8 Mare nou utugare akore: “Kajao. Imaragodumode nou figo iji awu joruji pugeje. Imode boe pemegado ji rugadu. Imode tapira pe bu nou figo i paru keje moto pemegawo nou figo iji tuduwo.
LUK 13:9 Nono tudumode. Mare tudumodukare boeiwu joru keje dukeje pamode nou figo i kado rugadu.” Ainore Jesus akore.
LUK 13:10 Ia sábado meri keje Jesus rakojere Judeu doge ere bato pui towu bai ja tada. Ure boe erduwado nono.
LUK 13:11 Nono jordure ia aredu kogodureudoji. Bope ure pegado kejewu joru oto padure dezoito. Merukare tiedoro tabo. Roiwakare tuwo tiedorodo.
LUK 13:12 Jesus makore bagai dukeje makore ji. Akore: – Ire akinorudo akogodae piji. Ire apemegago.
LUK 13:13 Nono Jesus ure tugera bu nou aredu poru keje. Ča nou aredu pemegagodure tači je. Jakaregodure pudui rugadu. Mako pemegare Pao Kurireuji, Jesus rore aino pudui dukodi.
LUK 13:14 Nou jeture nou bai jiwu boe eimijera korigodure Jesus rore aino Sábado meri keje duji. Dukodire makore nou bai tadawu boei: – Pao Kurireu makore pai pamaragodukawo sábado meri keje. Dukodire tagaregodukaba mato sábado meriji boe ewo tabemegago. Tagarego mato boe ewo tabemegago ia meri keje.
LUK 13:15 Jesus akore: – Ča tameartorukare tamagore jiboeji jamedu. Tamode tagagu ie etarego pobo ka tawo ekududo poboče sábado meriji mare tardu pegakare nou tarore aino duji. Mare tagaidukare boe pemegawo awu areduji sábado meriji. Pawobe nure ema. Bope doge eimijera Satanás ure kogodudo marigudu. Kogodure oto padure kejewu jorure dezoito rugadu. Mare aino Pao Kurireu ure pemegago awu meriji. Mure kodiba tagaidukare pemegagoduwo sábado meriji? Tamagore Pao Kurireu makore jiboeji mare tameartorukare ji!
LUK 13:17 Jesus akore aino dukeje nou aidukare Jesus jiwuge erduwakare tumagowo Jesus bataru jipagi. Dukodire epogurure tumagowo ia tuwadaruji pugeje. Mare boe eiamedu boe egarere pudui Jesus ro pemegare aino duji.
LUK 13:18 Jesus akore: – Itaidure iwo tarduwado nuba nou ure tugimijerado Pao Kurireu čewuge ere. Nou Pao Kurireu utugarege emagakare mare ia meri keje Pao Kurireu utugarege emagagodumode rugadu. Ireadoduwo ia bakaruji tawiagai, dukeje tarduwamode kaboba jiba inagoino.
LUK 13:19 Ia imedu ure ia mostarda a tugu to boepato. Nono boture. Ričodure rugadu. Nono i kurire, tugu kurire jamedu. Kiebarege ere tumugudo keje. Ere tuwaradu pemegado keje. Pao Kurireu utugarege ere nono nou mostarda a rogu mogadure. Mare mostarda a remawu ji karega inagoino. Ure tugimijerado Pao Kurireu čewuge eire inagoino. Emagakare mare ia meri keje nou Pao Kurireu utugarege emagamode rugadu.
LUK 13:20 Jesus mako kimore ei. Akore: – Itaidure iwo tarduwado nuba ure tugimijerado Pao Kurireu čewuge emode. Nou Pao Kurireu utugarege emagakare mare toro ia meri keje nou Pao Kurireu utugarege emagagodumode rugadu. Ireadoduwo ia bakaruji tawiagai, dukeje tarduwamode kaboba jiba inagoino.
LUK 13:21 Ia aredu ure fermento tugu trigo kuduto. Dukejere ure nou trigo udo amireuče. Nono nou fermento jore nou amireu jamedu boeto, dukeje ure nou amireu barodudo. Pao Kurireu utugarege ere nono nou fermento mogadure. Mare fermento remawu ji karega inagoino. Ure tugimijerado Pao Kurireu čewuge eire inagoino. Emagakare boetoji mare toro ia meri keje nou Pao Kurireu utugarege emagagodumode rugadu.
LUK 13:22 Jesus uture pugeje. Kodure Jerusalém ba kurireu kawu awaraji tuduwo Jerusalém ba kurireu ka. Boe eda jamedu boe keje ure boe erduwado.
LUK 13:23 Toro ia boe eda keje ia boe enarare ji. Egore: – Ioguduba umode činorudo? Ure činorudowuge emagamodu kana?
LUK 13:24 Jesus makore nou boei. Akore: – Pao Kurireu meardae ure nono baiporo biagareu ja mogadure. Boe emode turemo baiporo biagareuto taregoduwo Pao Kurireu ae. Mare baiporo remawu ji karega inagoino. Pao Kurireu meardae jire inagoino. Taragado tai tawo tameardae pemegado nono Pao Kurireu meardae mogadure tawo taremo baruto Pao Kurireu mugureu ka. Aidumode tuwo turemo baru tadawu Pao Kurireu uwai towuge emagamode rugadu mare eroiwamodukare tuwo turemo toro. Ekare tugimijerado Pao Kurireuče dukodire iage emodukare turemo rugadu.
LUK 13:25 Pao Kurireu umode tuwai kejewu baiporo miwuje dukeje ia tagi tamodukare taremo baru tadawu Pao Kurireu uwaito rugadu. Mare baiporo remawu ji karega inagoino. Pao Kurireu jorduware jiwu meri jire inagoino. Toro ia meri keje Pao Kurireu umode tumeardae tawuje tuwo nou meartorukare puduiwuge ewarigu bope doge eda kejewu joru pegareuto. Dujire inagoino. Dukodire nou boe eroiwamodukare tuwo turemo baruto rugadu. Ia tagi tagare tagimijerado Pao Kurireuče. Tamagomode Pao Kurireuji: “Čeremo baruto čeragojewo čemedagebo baru tada.” Ainore tagagomode Pao Kurireuji. Mare umodukare taremo baruto rugadu. Pao Kurireu makomode: “Imedage karegure tagi. Iwobe karegure tagi.” Ainore Pao Kurireu akomode ia tai rugadu.
LUK 13:26 Nono tagagomode: “Čenogwagere akabo. Čegudure akabo. Are boe erduwado čedabo čeda keje.” Ainore tagagomode.
LUK 13:27 Mare Pao Kurireu makomode pugeje: “Iwobe karegure tagi. Tadudo ipiji. Ro pegareuge nure tagi.” Ainore Pao Kurireu akomode tai.
LUK 13:28 Nou meriji tardumode Abraãoji, Isaqueji, Jacoji nono Pao Kurireu apo rugadu. Nou meriji tardumode nouia makore Pao Kurireu bataru jiwugei jamedu nono Pao Kurireu apo rugadu. Mare tawarigudumode toro bope doge eda kejewu joru pegareuto. Dukodire tagragudu rakamode rugadu. Tamode tago reko pui tawiri boe kori koia.
LUK 13:29 Nou meriji Pao Kurireu umode boe eimijera kurireudo pudumi nono meartorure Pao Kurireu jiwuge etaregodumode Pao Kurireu ae moto jamedu boe piji. Nono emode tumugudo Pao Kurireu apo nono Pao Kurireu bowadae keje toro baru tada.
LUK 13:30 Ia meartorukare iwuge enoe kurire woe moto keje mare nou meriji Pao Kurireu umode marenarue dogedo emage. Ia marenarue doge emeartorure i woe moto keje dukodire nou meriji Pao Kurireu umode enoe kurido rugadu nono Pao Kurireu muga keje.
LUK 13:31 Nono ia fariseu doge etaregodure Jesus ae tumagowo ji. Egore: – Atudo awu boe piji toro ia boe eda ka. Boe eimijera pegareu Herodes aidure tuwo awido.
LUK 13:32 Jesus akore: – Herodes ro pegare nono okwa ro pega mogadure. Jerore turo pegawo tu tu je. Tadudo toro bagai tawo Herodes bie nuba iromode boei duji. Awu meriji, barogwato imode bope doge etawuje boe epiji. Imode boe epemegago jamedu. Boeiwu barogwato imode nou imaragodae iado. Biedu pemegado awu inagore aino duji.
LUK 13:33 Mare iwo tawie. Iturumode Jerusalém ba kurireu ka awu meriji, barogwato, boeiwu barogwato jamedu. Mariguduwuge ere nouia makore Pao Kurireu bataru jiwuge ewido nono Jerusalém ba kurireu keje tu tu je. Dukodire itumode toro iwiwo nono jamedu.
LUK 13:34 – Jerusalém kejewuge nure tagi. Tare nou mariguduwuge makore Pao Kurireu bataru jiwuge ewido. Tagidore tori tabo aregodure Pao Kurireu bataru tabowugei. Mare imeardu kurire tai rugadu. Kagariga umode tore ewiado tugana kuda tietu pemegawo ei. Itaidure irowo taiamedu boei nono nou kagariga ro moga torei dumogadure. Mare tagaidukare i.
LUK 13:35 Dukodire Pao Kurireu mugumodukare Jerusalém kejewu tuwai tada pugeje. Iwo tawie. Tardumodukare i pugeje jii toro tameartorumode i du ka. Tagagomode: “Pagimijera reo! Aregodure Pao Kurireu meardae tabo. Pao Kurireu ro pemegawo ji.” Tagagomode aino i dukeje itaregodumode tagae pugeje.
LUK 14:1 Ia sábado meri keje Jesus uture toro ia fariseu uwai ka togwagewo apo. Judeu doge eimijera nure ema. Dukodire boe etaiwore Jesus makore nou boe eimijera jituji. Ia fariseu doge edure nono jamedu. Ia jorduware Judeu doge eno bakaru jiwuge edure nono jamedu.
LUK 14:2 Nono ia imedu aregodure Jesus ae nono nou fariseu uwai ka. Pogora bokodure. Kana bokodure jamedu.
LUK 14:3 Nono Jesus unarare nou fariseu dogei, nou jorduware Judeu doge eno bakaru jiwugei jamedu. Akore: – Nuba pago bakarure? Pamodukana boe epemegago sábado meri keje?
LUK 14:4 Nou fariseu doge, nou jorduware Judeu doge eno bakaru jiwuge emagokare boeji. Nono Jesus ure nou imedu pemegago. Ure kana bokodu akedudo, ure pogora bokodu akedudo jamedu. Nono Jesus ure nou imedu utudo tuibagi tuwai ka. Mare nou fariseu doge, nou jorduware Judeu doge eno bakaru jiwuge erdu motukare boewo boe epemegago sábado meri keje.
LUK 14:5 Mare Jesus makore nou fariseu dogei. Makore nou jorduware Judeu doge eno bakaru jiwugei jamedu. Akore: – Ia tagi tagagu tapira imedu butumode ia kačiba poto sábado meriji dukeje tamode nou tagagu tapira tawuje nou kačiba po piji nou meri keje rugadu. Ia tagi taganaregedu butumode kačiba poto sábado meriji dukeje tamode nou taganaregedu tawuje nou kačiba po piji nou meri keje kuri je rugadu.
LUK 14:6 Nou boe eimijerage fariseu doge eroiwakare tumagowo Jesus bataru jipagi. Nou jorduware Judeu doge eno bakaru jiwuge eroiwakare tumagowo Jesus bataru jipagi jamedu.
LUK 14:7 Boe etaregodure nou bai ka togwagewo dukeje Jesus aiwore nou boe erore jiboeji. Aregodure boetojiwuge ere tumugudo boe eimijerage emuga keje boe pemegareu keje. Dukodire Jesus makore nou boei tuwo emeardae pemegado.
LUK 14:8 Akore: – Boe emagomode tawagai tagaregoduwo boe uwiremodewu bowadae ka dukeje tadumode toro. Nou makore tawagaiwu makomode ia boe eimijera kurireu bagai jamedu mare tarduwakare. Tagaregodure dukeje tagaba tamugudo boe pemegareu keje tagojaro tabo tai. Tamode tamugudo boe pemegareu keje.
LUK 14:9 Mare nou boe eimijera kurireu aregodumode dukeje nou makore tawagaiwu umode tadawuje nou boe pemegareu piji nou boe eimijera kurireu uwo tumugudo tumuga keje. Akomode aino tai: “Aragojedo awu boe eimijera uwo tumugudo woe awu boe pemegareu keje.” Ainore akomode tai. Nono tabogurumode. Nono tamode tamugudo toro nou boe etugarege emuga keje.
LUK 14:10 Dukodire inagomode aino tai. Tagaba tamugudo boe pemegareu keje tameardae tabo. Tagaregodumode boe ewadae ka dukeje tamugudo nono nou boe etugaregebo. Nono nou boe ewadae kejewu boe eimijera makomode tawagai tuwo tamugudo nono taidure jiboe keje. Nono tabogurumodukare. Boe emago pemegamode tarore jiboeji.
LUK 14:11 Iwo tawie. Boe enojaromode pudui, emode tugimijerado tu pudumi tumeardae tabo dukeje Pao Kurireu umode epogurudo. Mare boe emode boe utugaregedo pudumi turo pemegawo boei dukeje Pao Kurireu umode boe eimijera pemegareugedo emage.
LUK 14:12 Nono Jesus makore nou uwaire bai čewuji. Akore: – Amode ake kurido awadae keje mare amagokaba amedage ewagai enogwagewo akabo. Amagokaba awobe ewagai enogwagewo akabo. Amagokaba oe kurireuge ewagai enogwagewo akabo jamedu. Enogwagemode akabo dukeje toro ia meri keje emage emagomode awagai jamedu akwagewo pudabo jamedu nou arore pudui du moriče.
LUK 14:13 Mare are ake kuričigodo awadae keje. Dukeje amagodo marenarue doge ewagai, joku bokwareuge ewagai, pogora pegareuge ewagai, kogodureuge ewagai enogwagewo akabo.
LUK 14:14 Nono boe pemegamode ai rugadu. Emagere emodukare boe pemegareu maku akai nou arore pudui du moriče. Mare toro ia meri keje Pao Kurireu umode boe eewodudo pugeje dukeje umode boe pemegado ai nou aro pemegareu moriče.
LUK 14:15 Nouia mugure nono Jesus apowu meardure Jesus akore aino duji dukejere makore Jesusji. Akore: – Pao Kurireu umode boe eimijera kurireudo pudumi dukeje umode boe enogwagedo pudabo. Nou baru tadawu Pao Kurireu uke kurimode rugadu. Dukodire boe pemegamode nou okwagemode Pao Kurireu apowugei. Egaremode pudui rugadu.
LUK 14:16 Nono Jesus makore ji. Akore: – Marigudu ia imedu ure ia boe ewadae kurireu towuje. Makore bagaiwuge emagare rugadu. Mare makore ewagai etaregoduwo nou ture tawujewu meri ka enogwagewo pudabo.
LUK 14:17 Ure boe jamedu boe udo turugadu dukeje ure tudugare utudo nou tumagore bagaiwuge ewagai tuwo ewie boe uie turugadu duji etaregoduwo tuwadae ka rugadu. Nou utugare uture nou boe ewagai rugadu. Makore ei. Akore: “Mato boe ewadae ka. Ikimijera ure boe jamedu boe udo turugadu.”
LUK 14:18 – Mare nou makore bagaiwuge etaidukare tuduwo toro. Eiamedu boe egore nou utugareji tudumodukaie. Ia akore: “Ire ikeragu ia motoji inoče dukodire itumode toro nou moto ka iorduwo ji. Dukodire iroiwakare ituwo nou akimijera bowadae ka.”
LUK 14:19 – Metia akore jamedu: “Ire akirodo tapira dogei. Enodo padure dez. Ewo tumugudo ino carroça keje. Dukodire itumode toro nou tapira doge ewagai iorduwo emaragodu pemegamode dubagai. Dukodire iroiwakare ituwo nou akimijera bowadae ka.”
LUK 14:20 – Ia metia akore: “Maigodure iwirere. Iragojemode tu woe itoreduje apo. Dukodire iroiwakare ituwo nou akimijera bowadae ka.”
LUK 14:21 – Nono nou utugare ure tugirimi tuibagi tugimijera bagai. Readodure nou boe egore aino pudui duji nou tugimijera biagai. Nou ukimijera korigodure nou tumagore bagaiwuge ewagai. Makore nou tudugareji. Akore: “Atudo toro nou boe eda ka amara tabo. Amagodo marenarue dogei. Amagodo joku bokwareugei. Amagodo pogora pegareugei. Amagodo kogodureugei. Akarego mato ebo enogwagewo pagabo.”
LUK 14:22 – Nou utugare meartorure nou tugimijera bataruji rugadu. Makore nou boe eiamedu boei rugadu. Aregodure nou boebo tuibagi kuri je. Dukeje makore tugimijeraji pugeje. Akore: “Imeartorure awadaruji rugadu. Mare aino čare pawai ja kuri kimore dukodire čere boei kimo.”
LUK 14:23 – Dukodire nou ukimijera akore: “Atudo toro ia boe eda kawu awaraji nou mugure awara okwaiwu boe ewai jamedu boe ka amagowo nou boe ewagai jamedu. Etudo mato rugadu. Itaidure iwai korobaduwo boebo rugadu.
LUK 14:24 Mare iwo tawie. Nou imagore bagaiwuge boetojiwuge enogwagemodukare woe itabo rugadu.” Ainore nou Jesus readodure jiwu bakaru ure.
LUK 14:25 Ia meri keje boe emagare nono Jesus apo tugodui apo. Nono Jesus ure tuwuredo tumagowo ei.
LUK 14:26 Akore: – Ia boe etaidumode tumeartoruwo imeardaeji. Mare emeardu kurimode i dukeje imode erduwado imeardae remawuji rugadu. Emeardu kurimode i tuje kori, tuo kori, tore ekori, tumanamage ekori, tuduiemage ekori dukeje imode erduwado imeardae remawuji. Mare emeardu kurimodukare i tuje piji, tuo piji, toreduje piji, tore epiji, tumanamage epiji, tuduiemage epiji dukeje imodukare erduwado imeardae remawuji.
LUK 14:27 Imeartoru kurire Iogwa Kurireuji dukodire boe erdu pegare i, emode iwido. Boe etaidumode tuwo tumeartorudo imeardaeji dukeje ewo tudo turugadu tuwiwo nono iwimode dumogadure. Emodukare tudo turugadu tuwiwo nono iwimode dumogadure dukeje imodukare erduwado imeardae remawuji.
LUK 14:28 Boe emode ia tuwai towuje dukeje boe emode tumeardae pemegareu tawuje tuiorduwawo nuba turomode tuwo tugeragu boe jamedu boeji tuwo nou tuwai pemegado. Etaiwomode to diero kurimode dubagai tuwo akirodo boe jamedu boeji tuwo tuwai iado.
LUK 14:29 Emodukare tumeardae pemegado dukeje eromode ta je to diero akedure duji rugadu dukodire emodukare tuwai iado. Nono boe egokodumode ei.
LUK 14:30 Egomode aino: “Akare awai iado. Ameardae pegare kodi.” Ainore egomode.
LUK 14:31 – Ča ia bakaru reo pugeje. Ia boe eimijera o tugobaigarege enodo padure dez mil. Mare nou turugodumode jiwu boe eimijera o tugobaigarege enodo padure vinte mil. Dukodire nou boe eimijera urugodumodukare nouia boe eimijeraji kuri je. Umode tumeardae pemegareu tawuje. Jordumode nou to tugobaigarege eraga kodumode nou iage eraga kori duji.
LUK 14:32 Eragamodukare dukeje umode tuwadaru maku tudugarege etai ewo reko toro nou turugodumode jiwu boe eimijera bagai. Mare erugodukare pui raga dukodire makomode nou boe eimijeraji tumoduie iaboe pemegareu maku ai erugodukawo pui pugeje tuwo tumedagedo puče.
LUK 14:33 – Ča tarodo aino jamedu. Tagera ra tagoe jamedu boe piji tameartoruwo tu i. Nono imode tarduwado tameartoruwo imeardae jamedu boeji.
LUK 14:34 Jesus makore pugeje: – Sal pemegare. Mare nou sal pegomode dukeje nou sal akedumode. Nono umodukare nono sal mogadure pugeje.
LUK 14:35 Dukodire boe eromodukare iaboeji nou sal tabo pugeje. Emode barigu. Mare sal remawu ji karega inagoino. Meartorure iwugeire inagoino ekawo tugera ra tumeartorure i dupiji rugadu. Tawiapaga pemegado awu iwadaruji tawo awu iwadaru metudo tagaora tada tameartoruwo ji rugadu.
LUK 15:1 Ia meri keje Judeu doge etaidukare jiwuge boe etaregodure Jesus ae tuwiapagawo Jesus makore jiboeji. Imposto mori makudure aiwuge nure iage. Nou Judeu doge egore ro pegareuge uie iage.
LUK 15:2 Nono fariseu doge etaregodure jamedu. Jorduware Judeu doge eno bakaru jiwuge etaregodure jamedu. Emago pegare pu biagai nou Jesus rore aino nou boe dogei duji. Egore: – Awu Jesus imadure nou boe etaidukare jiwuge ro pegareugebo. Okwagere ebo jamedu. Nou ukare turugadu.
LUK 15:3 Dukodire Jesus readodure ia bakaruji ewiagai. Mare tuwo jebato toro Pao Kurireu meardae pemegareu jitu bagaire akoino, tuwo jebato nou boe eimijerage emeardae pegareu jitu bagaire akoino jamedu.
LUK 15:4 Akore: – Ia tagi tagagu carneiro doge enodo padumode cem. Ia okwamode boeto nou iage epiji dukeje tadumode rugadu nou noventa e nove carneiro doge epiji tagaiwowo nou okware boetowu carneiro bagai rugadu. Nou noventa e nove carneiro doge tamode edudo tubaga tabo ia boebutu pemegareu keje. Nono tadumode tagaiwowo nou okware boetowu carneiro bagai jii toro tardure jitu ka.
LUK 15:5 Tardumode ji dukeje taegaregodumode tai rugadu. Tamode bu taganaura keje tawo reko tawai ka tuibagi pugeje.
LUK 15:6 Tagaregodumode apo tawai ka dukeje tamagomode tamedage ewagai tawo ewie tarduie okware boetowu carneiroji rugadu. Taegaregoduie tai. Tamoduie boe ewadae towuje ebo. Ainore tarore. Ainore boe erore rugadu.
LUK 15:7 Ča baru tadawuge erore nono nou taro mogadure jamedu. Mare carneiro doge ewagai karega eroino. Boe ero pemegamode dukeje baru tadawuge egaremode pudui. Ro pemegareuge emode noventa e nove dukeje baru tadawuge egaremode nou noventa e nove eiamedu boei. Mare ia ro pegareu umode mitotu je dukeje umode tugera ra turo pegareu piji turokawo aino nou turo pegareuji pugeje dukeje baru tadawuge egaregodumode pudui rugadu. Egaremode nou ure tugera ra turo pegareu pijiwuji nou noventa e nove ro pemegareuge eiamedu boe ekori.
LUK 15:8 Jesus mako kimore. Akore: – Ia aredu o diero tori rogu enodo padure dez. Ure nono prata mogadure dukodire mori kurire. Mare akore ia okwaie tubiji. Nuba tameardaere nou aredu romode? Umode jorugu pemegado tuwai ja tada. Umode vassoura reko tuwai ja otoji. Aiwo pemegamode tuwai ja otoji jii toro tuiordure nou diero tori jitu ka.
LUK 15:9 Ča jordure ji dukeje makomode tumedage areme ewagai ewo bato pui pudae. Etaregodure pudae dukeje makomode ei. Akore: “Iagarere i rugadu iordure čewu ino diero tori rogu okware ipijiwuji. Pawaduwo rugadu.” Ainore nou aredu akomode tumedage aremei.
LUK 15:10 Pao Kurireu utugarege baru tadawuge egaremode pudui jamedu nono nou aredu jakare moga pudui dumogadure. Mare diero remawu ji karega egaremode. Ure tugera ra turo pegareu pijiwu jire egaregodumode. Ia ro pegareu umode tugera ra turo pegareu piji turokawo nono nou turo mogadure pugeje dukeje Pao Kurireu utugarege baru tadawuge egaregodumode pudui nou inoduji rugadu.
LUK 15:11 Jesus readodure ia bakaruji pugeje tuwo jebato toro nouia Pao Kurireu meardaeji boe ewiagai. Akore: – Ia imedu orere pobe. Iparere emage.
LUK 15:12 Naregedu boigoduwu aidukare tubagawo tuo bimodedu bagai, aidure tuo oe kadoduwo puiato makuduwo pudai. Nou naregedu boigoduwu aidure makudumode pudaiwu tuo oeji kuri je. Makore tuoji. Akore: “Iogwa. Itaidukare ipagawo awimode du bagai nou akoe makuduwo čenai. Itaidure awo čeno diero kado puiato awo ino maku inai kuri je.” Ainore nou onaregedu boigoduwu akore tuoji.
LUK 15:13 Dukodire uo ure to diero kado puiato ei. Ure maku tore pobedu doge etai rugadu. Nono nou onaregedu boigoduwu ure tugeragu nou dieroji. Dukeje čare uture pugeje nou diero tabo. Utu jaere toro ia moto ka. Nono ure nou to diero rugadu akedudo boe pega boeto.
LUK 15:14 Dukodi čare ure to diero rugadu akedudo. Nono ča nou joruji boe pegare boe eiamedu boei. Bubutu bokware dukodire boe eke bokware. Dukodire nou iparedu uke boeire ji o diero akedure dukodi.
LUK 15:15 Nono nou iparedu okwamagudure ia oe kurireu imeduji tumaragoduwo ai. Nono nou oe kurireu imedu ure nou iparedu maragodae maku ai jetuwo jugureugei uwo nou jugureuge enogwagedo.
LUK 15:16 Nono nou iparedu maragodure nono nou oe kurireu imedu ai rugadu. Ure jugureuge eke maku etai tu tu je. Mare aidure tuwo jugureuge eke kowuje tuge boe koia. Mare nou oe kurireu imedu aidukare uwo ko jugureugebo.
LUK 15:17 Toro ia meri keje čare nou iparedu biagorore turo pegareuji. Makore tudada. Akore: “Iragojemode woe iwimode ike boe koia. Mare iogwa uwai keje iogwa utugarege eke makare rugadu.
LUK 15:18 Imode ikirimi iogwa uwai ka. Imagomode ji ie iwarigu boeto. Iro pegaie Pao Kurireuji rugadu. Iro pegaie ji jamedu.
LUK 15:19 Dukodire ukare turugadu onaregeduwo imi pugeje. Nono utugare rumode imi rugadu. Imaragodumode ai rugadu. Ainore inagomode iogwaji rugadu.”
LUK 15:20 – Ainore nou iparedu akore tudada. Dukeje čare ure tudawuje nou boe piji tuduwo toro tuo uwai ka rugadu. Ča uo jordu jaere tonaregedu iparedu puredugodure pudae duji. Nono okudugodure nou tonaregedu apo rugadu. Rekodure tiagare tabo nou tonaregedu togi. Nono ure tona bu kajeje.
LUK 15:21 Nono nou iparedu makore tuoji. Akore: “Ire iwarigu boeto. Iro pegare Pao kurireuji. Iro pegare ai jamedu. Dukodire ukare turugadu akanaregeduwo imi pugeje.”
LUK 15:22 – Mare nou uo biapagakare nou tonaregedu bataruji. Makore tudugarege ewagai. Makore ei. Akore: “Tageragu ia areia pemegareuji. Mato tabo tawo tugu awu itonaregeduji. Ia ieratadau tugu ierakoto jamedu. Ia bure okeakejewu tugu bureto jamedu.
LUK 15:23 Tapira kareu bito pagwagewo, pawaduwo, paegarewo pai, itonaregedu ure tugirimi kodi.
LUK 15:24 Imeardaere bie kodi. Mare awu meriji čare iorduware bikaie duji. Itonaregedu uture ipiji nono imeardaere umodukaie tugirimi pugeje duji, mare awu meriji aregodure tuibagi iwai ka pugeje.” – Nono ewadure tiagarere pudui dutabo rugadu.
LUK 15:25 – Mare nou onaregedu boetojiwu rakojere toro ipoguru keje tumaragodu tabo. Jorduwakare tuwie aregodure duji. Nono ure tugirimi tuibagi tuo uwai ka. Mare puredugodure tuo uwai ka dukeje meardure boe eraji, boe enogwariji toro tuo uwai keje.
LUK 15:26 Dukodire unaragodure tudugaregei. Akore: “Kaba kodiba boe egoino tiagarere pudui dutabo?”
LUK 15:27 – Nou utugare akore: “Awie ure tugirimi. Aregodure pugeje. Aregodu pegakare dukodire ao ure tapira kareu bito boe ewaduwo ia tuwadaeji.”
LUK 15:28 – Nou naregedu boetojiwu korigodure. Korigodure rugadu dukodire ukare turemo nou tuo uwaito ewadae ka boe kori koia. Dukodire uo ure tie bu toro tonaregedu boetojiwu ae togwamaguduwo ji uwo turemo tuwaito.
LUK 15:29 Mare nou onaregedu boetojiwu mako rakare tuoji. Akore: “Imaragodu rakare akai marigudu. Irore nono atugarege ero mogadure rugadu. Imeartorure amagore i jamedu boeji. Mare akare iaboe maku inai. Akare ia cabrito rogu maku inai iwo iwadae towuje imedagebo.
LUK 15:30 Aino čare nou akanaregedu boigoduwu ro pegare, ure ako diero rugadu maku areme pegareuge etai pagatu je. Mare aregodure tuibagi mato pugeje dukeje are ia tapira kareu bito boe ewaduwo aregodure dukodi. Ukare turugadu!”
LUK 15:31 – Nono uo makore nou tonaregedu boetojiwuji. Akore: “Boro. Akagore aino du ukare turugadu. Itonaregedu nure aki. Atukare ipiji. Aragoje pemegare woe itabo jii aino. Ire inoe jamedu boe maku akai marigudu akoče.
LUK 15:32 Mare awu awie ča imeardaere bire marigudu. Mare bikare rabodu. Aregodure pugeje rugadu. Dukodi čare pawaduwo paegarewo pai ji rugadu. Ure tuwarigu boeto mare aino ča boe erdure ji pugeje.”
LUK 16:1 Jesus makore ture jorduwadowugei. Akore: – Ia imedu oe kurireu utugare jeture nou tugimijera oe jamedu boeji. Mare jetu pemegakare ji. Dukodire ia boe ereadodure nou imedu oe kurireu biagai nou utugare ro pegare jiboeji uie nou tugimijera o diero akedudo boe pegareuto paga tu je.
LUK 16:2 Dukodire nou imedu oe kurireu makore nou tudugare bagai. Makore ji: “Boe ere iwie arore jiboeji. Dukodire aetumodukare inoe boeji pugeje. Nou inoe mori padure kejewu bapera jamedu boe maku inai iwo ia itugare jetudo ji pugeje.”
LUK 16:3 – Dukodire nou utugare uture nou bapera jamedu boe bagai. Mare meardaere tu tudada. Akore: “Ikimijera unure itawuje imaragodae piji. Nuba iromode imaragoduwo pugeje? Iraga bokware imaragoduwo iwo boepa butudo ia boe etai. Ipogurure dukodire inogwamagudumodukare ia boei eke kobo rogu bagai ikeje. Nuba iromode?
LUK 16:4 Ča iorduware. Imagomode nou ukare toe morido ikimijera aiwuge ewagai. Imode nou ere tugeragu ikimijera pijiboe mori kado tu tu puiato. Dukodire nou boe ewiagodumodukare ipiji. Imedage mode emage.” Ainore nou imedu oe kurireu utugare meardaere tudada. Dukodire makore nou ukare toe moridowu tugimijera aiwuge eiamedu boe ewagai. Unarare nou aregodure boetojiwuji. Akore: “Are akirodo ikimijera pijiboe akare morido raga. Nuba nou jetu kimore akaboboe mori oto padu kejeboere?”
LUK 16:6 – Nou imedu akore: “Tambor oto padure cem azeite kuru tabo iwo maku nou akimijera ai.” – Mare nou utugare akore: “Uu. Ainore ure woe awu bapera keje jamedu. Mare akaiwodo. Pamodukare morido cem pugeje. Pawo udo cinquenta ai pugeje awu bapera keje.” – Dukodire padure nou bapera keje nou imedu umoduie maku aiwu tambor oto padure cinquenta tu rugadu azeite kuru tabo. Ainore nou utugare ure nou imedu jakaredo pudui mare ukimijera jorduwakare nou tudugare rore aino pudui duji.
LUK 16:7 – Nono nou utugare makore nouia imeduji. Akore: “Are akirodo ikimijera pijiboe akare morido raga. Nuba nou jetu kimore akaboboe mori oto padu kejeboere?” – Nou imedu akore: “Trigo oto padure 25 mil quilos iwo maku akimijera ai.” – Nono nou utugare ure tugeragu nou imedu o baperaji jamedu. Akore: “Ča. Pawo oto padudo vinte mil quilos tu rugadu awo maku ikimijera ai.”
LUK 16:8 – Nou oe kurireu imedu jorduwagodure nou tudugare rore aino pudui duji dukejere mako pemegare nou tudugare rore jiboeji. Akore jeroreu nuie ema. Jesus mako kimore ture jorduwadowugei. Akore: – Imode tawie. Meartorure Pao Kurireu jiwuge emodukare jeroreugedo pudumi. Mare meartorukare Pao Kurireu jiwuge ere jeroreugedo pudumi tu tu je emode tuiorduwa jetorodo nuba turowo taidure jiboe bagai.
LUK 16:9 – Ča iwo tarduwado. Tameardaekaba tawo tago diero kurido. Mare tago diero maku, tagoe maku jamedu boe etai tamedagewo emage. Awu moto kejewu tagoe rugadu boe akedumode. Mare baru tadare tamugu pemegamode jii toro rugadu.
LUK 16:10 Boe etu pemegamode iaboe roguji dukeje etu pemegamode iaboe kurireuji jamedu. Mare boe eiwogumode iaboe roguji dukeje eiwogumode iaboe kurireuji jamedu.
LUK 16:11 Taetu pemegamodukare moto kejewu boe enoeji dukeje Pao Kurireu umodukare taetudo baru tadawu boe remawu boeji rugadu.
LUK 16:12 Taetu pemegamodukare ia boe enoeji dukeje Pao Kurireu umodukare ia baru tadawu tagoe remawu maku tagai.
LUK 16:13 Ia imedu ukimijerage emode pobe dukeje meardu kurimode nouia tugimijeraji. Mare jordu pegamode nouia tugimijeraji. Meartorumode nouia tugimijera bataruji. Mare meartoru bokwamode nouia tugimijera bataruji. Dukodire boe emode tugimijerado dieroče dukeje ewiapagamodukare tumeartoruwo Pao Kurireuji pugeje.
LUK 16:14 Ia fariseu doge emeardure Jesus akore aino duji. Emeardu kurire dieroji rugadu. Dukodire egokodure Jesus akore aino duji.
LUK 16:15 Mare Jesus makore ei. Akore: – Tare taro pemegado boe egai. Mare Pao Kurireu jorduware tameardae pegare tadada duji. Jorduware tagaidukare pudui duji. Tagaidure tu dieroji. Kočare boe etaidu kurimode Pao Kurireu jordu pegare jiwu boe ero pegareuji rugadu.
LUK 16:16 – Moisés ure Pao Kurireu bataru maku Judeu doge etai eno bakaruwo ema boe emeartoruwo tu ji. Makore Pao Kurireu bataru jiwuge ere Pao Kurireu bataru bu bapera keje boe emeartoruwo ji. Boe emeartoruwo nou bataru jamedu boeji jii toro João Batista aregodure du ka. João Batista aregodure dukeje ure boe ewie ia Pao Kurireu bataru pemegareuji. Makore boe eimijera kurireu moduie Pao Kurireuče rugadu. Dukodire nou aidure nou bataru pemegareu jiwuge eiamedu boe ere turagado pudui tuwo tugimijerado tu Pao Kurireuče rugadu.
LUK 16:17 Moto, baru akedumode mare Pao Kurireu makore jiboe akedumodukare rugadu jii toro rugadu. Pao Kurireu makore jiboe jamedu boe jetumode pudui rugadu.
LUK 16:18 Ča iwo tawie Pao Kurireu meardae remawuji. Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai rugadu. Nou imedu ro peganure nou toreduje boetojiwudoji rugadu. Ure tudo nono jeribarire toreduje pijiwu mogadure Pao Kurireu jakai. Ainore Pao Kurireu meardaere. Aredu umode tugera ra toredu piji dukeje ia imedu mugumode nou aredu apo pugeje. Du pegare Pao Kurireu jakai jamedu. Nou mugure nou aredu apowu imedu ure tudo nono jeribarire toreduje pijiwu mogadure Pao Kurireu jakai jamedu. Ainore Pao Kurireu meardaere.
LUK 16:19 Jesus mako kimore boei: – Marigudu ia imedu oe kurire. Ukudau areia mori kurire. Uwai kurire. Oe kurire rugadu. Iaboe iaboe bokwakare ai meri jamedu boeji.
LUK 16:20 Ia marenaru imedu rakojere nou boe keje jamedu. Iere Lázaro. Nou Lázaro biri jamedu boe pegare. Boe ere nou Lázaro reko tu tu je nou oe kurireu imedu uwai poro ka okwamaguduwo ia uke rogu bagai.
LUK 16:21 Meardaere tumoduie tugeragu nou buture moto kejewu ia boe eke roguji nono nou oe kurireu imedu uwai tada. Ariga doge etaregodure tu tu nou Lázaro ae tuwo tugeru reko nou Lázaro biri pegareu jamedu boeji.
LUK 16:22 Ia meri keje nou marenaru imedu Lázaro bire rugadu. Pao Kurireu utugarege baru tadawuge ere nou Lázaro reko toro baruto muguwo Abraão apo okwagewo nono jii toro tuguredu ka. Nono nou imedu oe kurireu bire jamedu. Boe ere nou imedu oe kurireu tugu mototo.
LUK 16:23 Čare rakojere bireuge eda pegareu keje. Nonore joru ure nou oe kurireu imedu korido rugadu. Dukejere aiwore toro. Jordure Abraãoji toro baru tada. Jordure nou marenaru imedu Lazaruji jamedu Abraão apo.
LUK 16:24 Dukodire makogodure toro etae. Akore: “Iogwa Abraão! Akogududo itabo! Nou imedu Lázaro arego mato itae uwo tugerako tugu poboto tuwo reko ikeruji boeru akeduwo ikeru piji. Awu joru unure ikowu rugadu.”
LUK 16:25 – Mare Abraão akore: “Kočare. Awikare dukeje akoe kurire, boe pemegareboe kurire awai tada. Mare boe pegare awu Lazaruji rugadu. Mare aino čare boe pemegare awu Lazaruji rugadu mare boe pegare ai, joru unure akowu.
LUK 16:26 Čare iaboe ure nono moto poro kurireu mogadure. Padure nono pagaiadada. Dukodire taroiwakare tagurugoduwo mato nou moto poro kurireu kajeje. Dukodire tagurugodumodukare mato rugadu. Čeroiwakare čegurugoduwo kajeje toro tagae jamedu.”
LUK 16:27 – Dukodire nou oe kurireu imedu akore: “Iogwa Abraão! Inogwamagudunure ai rugadu. Nou imedu Lázaro jewodudo pugeje utuwo tuibagi iogwa uwai ka uwo iwie mage ewie. Iwie magere ikera aboudure. Nou Lázaro utudo toro ewagai tuwo ewie boe pegaie woe duji. Emeartoruwo tu Pao Kurireuji etukawo mato awu joru ka jorukawo ekowu nono boe moga idu mogadure.”
LUK 16:29 – Mare Abraão akore: “Moisés makore jiwu Pao Kurireu bataru padure bapera keje. Nou iage makore Pao Kurireu bataru jiwuge ewadaru padure bapera keje jamedu. Awie mage etaiwowo nou baperaji tuiorduwawo boe pegamode pudui duji. Emeartoruwo nou Pao Kurireu bataruji etukawo nou boe pegareu ka.”
LUK 16:30 – Mare nou oe kurireu imedu akore: “Ukare turugadu. Emeartorumodukare nou bapera kejewu bataruji. Mare ia boe jewodumode pugeje tuduwo etae tuwo ewie dukeje emeartorumode, emode tugera ra turo pegareu piji.”
LUK 16:31 – Mare Abraão akore: “Ewiapagamodukare Moisés makore jiwu Pao Kurireu bataruji. Ewiapagamodukare nou iage emagore Pao Kurireu bataru jiwuge ewadaruji dukeje, ewiapagamodukare ia jewodureu imedu bataruji jamedu. Emeartorumodukare ji rugadu.”
LUK 17:1 Jesus makore ture jorduwadowugei. Akore: – Boe emode turokogado boei tuwo tumeardae pegareu maku boe etai tu tu je emeardae pegawo ero pegawo jamedu. Mare boe pegamode rugadu nou ure tumeardae pegareu maku boe etaiwugei rugadu.
LUK 17:2 Boe emode tori kurireu kogudo ia boe ekidoru kajeje tuwo ewarigu poboto dukodire ewimode. Mare ia boe umode nou itore meartorure maibari iwuge edo tugera ra ipiji ero pegawo pugeje dukeje boe pegamode nou ure nou boe etore etaora pegadowuji rugadu. Jire boe pegareu kodumode nou barigudure pobo towuge ekori.
LUK 17:3 Taeku jado tarore jiboeji. Mare ia tawobe ro pegare dukeje tamagodo ji rokawo aino pugeje. Mare kiarigodumodukare nou turo pegareuji dukeje umodukare tugera ra turo pegareu piji rugadu. Mare kiarigodumode nou turo pegareuji dukeje makomode turomodukaie aino pugeje. Nono tagogudugo apo. Tawiago nou ro pegare dupiji.
LUK 17:4 Ia meri keje ro pegamode tai nono aregodumode tagae tumagowo tai tagoguduwo pudabo, tawiagoduwo nou turo pegareu piji. Nono nou meriji rugadu ro pegare tai pugeje. Uture tagae pugeje tumagowo tai tawiagoduwo nou turo pegareu piji pugeje. Dukeje nou meriji rugadu ro pegare tai pugeje. Dukeje uture tagae pugeje tumagowo tai tawiagoduwo turo pegareu piji pugeje. Nono nou ro pegareu oto aregodumode sete ka nou meri keje rugadu dukeje tawiago nou ro pegareu boe piji. Ainore Jesus akore boe ewiagoduiago boe ero pegare emago pegare pudui dupiji.
LUK 17:5 Nou Jesus ure jorduwadowuge emagore tugimijeraji. Utumode Jesus bataru tabowuge emode emage. Egore: – Čemeartoru kurido Pao Kurireuji.
LUK 17:6 Jesus akore: – Tameartoru biagamode Pao Kurireuji. Mare tamode taragado tai tameartoru rakawo tu jao. Nono tamagomode ia kodui iji uwo tudawuje tumuga piji tuguduwo toro pobo maereuto. Nono Pao Kurireu koiare umode nou kodui i meartorudo tawadaruji rugadu.
LUK 17:7 Jesus mako kimore. Akore: – Boe utugare maragodure boepaji. Jeture boe egu ieji ipoguru keje jamedu. Dukeje aregodumode tuibagi tugimijera uwai ka mare okwagemodukare kuri je taregodu keje.
LUK 17:8 Ukimijera makomode ji tuge bagai. Dukodire umode tugimijera uke pemegado. Umode maku tugimijera ai. Ukimijera umode togwage iado dukeje makomode tudugareji okwagewo jamedu.
LUK 17:9 Boe eimijera makomodukare nou tudugare pemegareuji tuwo timediado ema. Umodukare timediado ema rugadu. Mare utugare pemegareu meartorumode tu tugimijeraji rugadu.
LUK 17:10 Tarodo nono nou utugare pemegareu ro mogadure jamedu. Tameardaekaba tawo boe eimijerado tagi. Tameartorudo tu Pao Kurireu makore taiboe jamedu boeji dukeje tamagomode aino: “Boe eimijerawo imi kodi karega irore aino. Pao Kurireu utugare rogu nure imi. Ire irugadu imeartoruwo ji rugadu.” Tamagodo aino. Tameardaedo aino jamedu.
LUK 17:11 Jesus kodure Jerusalém ba kurireu kawu awaraji tuduwo Jerusalém ba kurireuto rugadu. Nou awara kodure Samaria moto okwaji Galiléia moto okwaji. Nou Samaria moto, nou Galiléia moto okwa jore pudodu oiagi nou awara kodure.
LUK 17:12 Jesus puredugodure taregoduwo ia boe eda ka. Dukeje ia ime etaregodure Jesus togi. Nou ime enodo padure dez. Ekogodure. Nou ekogodae pegare ei rugadu. Ure ewiri pegado rugadu. Dukodire ekare tuburedo boei. Dukodire ekare tuburedo Jesusji jamedu.
LUK 17:13 Ere tumago pemegado toro Jesus ae. Egore: – Jesus! Čegimijera nure aki! Akogudugo čedabo awo čebemegago!
LUK 17:14 Jesus jordure ei. Nono makore toro etae. Akore: – Tadudo toro nou ure Judeu doge enomea maku Pao Kurireu aiwuge etae. Etaiwomode tai tuiorduwawo tabemegagodure dubagai. Ča eture. Ekodure awaraji dukeje epemegagodure tači je rugadu.
LUK 17:15 Nono ia jorduware tubemegagodure duji dukeje ure tugirimi pači tuibagi Jesus togi pugeje. Ure tumago pemegado boe eiamedu boe emearduwo tagoino duji. Mako pemegare Pao Kurireuji rugadu. Aregodure Jesus togi dukeje ure tubu jodo Jesus bure paru. Imadure Jesus apo rore aino pudui duji. Nou rore ainowu imedu boture Samaria moto keje. Samaria moto kejewu imedu nure ema.
LUK 17:17 Nono Jesus akore: – Ire pemegagodureuge ime enodo padure dez. Nou iage pa?
LUK 17:18 Tu nou boe tuginaiwu imedu ure tugirimi itae tumago pemegawo Pao Kurireuji. Kodiba nou iage erokare aino jamedu?
LUK 17:19 Nono Jesus makore nou imeduji. Akore: – Aragojedo. Ameartorure i dukodire ire apemegago.
LUK 17:20 Ia fariseu imedu unarare Jesusji. Akore: – Kaba meri kejeba Pao Kurireu aregodumode turo pemegareu tabo boe eiamedu boe eimijerawo ema? Jesus akore: – Ča Pao Kurireu nure ema rugadu. Umode boe emeardae pemegado ewo tugimijerado Pao Kurireuče rugadu. Dukodire Pao Kurireu aregodumodukare nono ia boe erdu jiboe mogadure. Boe egomodukare: “Emareo, emariče”, aino.
LUK 17:22 Nono Jesus makore ture jorduwadowugei. Akore: – Ia meri keje tagaidumode tarduwo Pao Kurireu Onaregeduji mare tardumodukare ji rakojemode baru tada kodi.
LUK 17:23 Boe egomode tai: “Emareo! Aregodu!” Mare tameartorukaba nou boe ewadaruji. Mare ia meri keje Imedu Onaregedu umode tugirimi pugeje rugadu.
LUK 17:24 Aregodumode dukeje boe erdumode ji rugadu nono boe erdure boeiaraguduji dumogadure. Umode nono boeiaragudu rugu jo moga boeto dumogadure.
LUK 17:25 Mare aino boetoji boe ero pegamode ji, boe etaidumodukare ji, boe pegamode ji rugadu.
LUK 17:26 – Imedu Onaregedu aregodumode pugeje dukeje boe emeardaemode nono rakojere boe etumana Noé apowuge emeardae pegareuge emogadure.
LUK 17:27 Mariguduboe etumana Noé rakoje kimore dukeje boe ewiapagakare boeji. Ewiapagare tu tugeji tugudure čeboeji. Ime ewiapagare tu tuwirewo. Areme ewiapagare tu tugogewo jamedu. Erore aino jii toro Noé ure turemo ikarereu to du ka. Noé ure turemo ikarereuto tu tuwobebo rugadu. Emagere ere činorudo pobo piji. Mare iage ewiapagakare Noéji dukodire erduwa bokware pobo umode moto kejewuge eiamedu boe etagedudo duji. Dukodire nou pobo aregodure, ure eiamedu boe etagedudo rugadu. Ainore boe emeardaemode pugeje. Imedu Onaregedu aregodumode pugeje mare boe ewiapagamodukare bagai rugadu.
LUK 17:28 Jaoboe etumana Ló rakoje kimore dukeje ainore nou rakojere apowuge boe erore jamedu. Eiamedu boe ewiapagare tu tugeji tugudure čeboeji. Ewiapagare tuwo akirodo boeji. Ewiapagare tuwo boe maku diero bagai. Ewiapagare tuwo boe tugu to boepato. Ewiapagare tuwo tuwai kurido.
LUK 17:29 Ló ure ewie boe pegareu butumoduie nou boe eda keje. Makore ei eregoduwo tuwai piji mare ewiapagakare bataruji. Nono Ló rekodure nou tuwai piji Sodoma ba kurireu piji rugadu. Nou meri keje rugadu joru buture baru piji Sodoma keje. Nou enxofre buture baru piji jamedu. Nou joru, nou enxofre ure nou Sodoma kejewuge eiamedu boe ewido.
LUK 17:30 Imedu Onaregedu umode tugirimi moto ka pugeje dukeje ainore boemode boei jamedu. Mare boe ewiapagamodukare nou inodu bagai pugeje.
LUK 17:31 – Itaregodumode pugeje nono boe pegamode motoji rugadu. Nou meriji rugadu rakojere tuwai ao kejewuge eregoduwo tuwai piji tači je. Ekawo turemo tuwai jagi iaboe bagai. Nou maragodure to boepa jiwuge eregoduwo nou to boepa piji tači je jamedu. Ekawo tugirimi tuwai ka iaboe bagai jamedu.
LUK 17:32 Tawiabutudo Ló oreduje rore jiboe keje tarokawo aino. Uture Sodoma ba kurireu piji mare ure tuwuredo taiwowo tuibagi tuwai ka dukeje bire.
LUK 17:33 Ia boe etaidumode tuwo boe pemegado tu pudui turaga tabo dukeje eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare iage ewiapagamodukare tumeardae pegareuji tuwo tugera ra turo pegareu piji taidure jiboe piji dukeje Pao Kurireu umode nou boe ekinorudo. Umode boe pemegado ei, umode egare remawudo rugadu.
LUK 17:34 Nou itaregodumode kejewu boečoji nudureuge emode pobe tubadure ira keje dutabo. Imode ikeragu iaji mare nou metia utumodukare.
LUK 17:35 Areme emode pobe tumaragodae keje tuwo trigo kududo. Imode ikeragu iarodoji mare metago utumodukare.
LUK 17:36 Ime emode pobe ipoguru keje. Imode ikeragu iaji mare metia utumodukare.
LUK 17:37 Nou Jesus ure jorduwadowuge enarare ji. Egore: – Čegimijera. Kaiba aromode aino? Jesus akore: – Boe erdumode Imedu Onaregedu aregoduji nono boe erdure pobureuge ere tago puae tuge barogo bireu ka dumogadure.
LUK 18:1 Nono Jesus makore ture jorduwadowugei. Aidure tuwo erduwado emagowo baruto Pao Kurireu bagai tu tu je ekiarigodukawo jii toro rugadu. Dukodire makore ia bakaruji ewiagai. Mare bakaru remawu karega tuwo jebato toro ia Pao Kurireu meardae ka.
LUK 18:2 Akore: – Ia boe eda keje ia boe eimijera kurireu mugure. Emare umode ro pegareuge mori maku etai. Aiwore boe ero pegareu bagai tu tu je. Jordure boe ero pegareu jitu keje ure nou boe edo turo pegareu morido jamedu. Nou inodure maragodae rema. Mare nou boe eimijera meartoru bokware Pao Kurireuji. Meartoru bokware boei jamedu. Biapagakare boei jamedu. Dukodire maragodu pemegakare tumaragodaeji.
LUK 18:3 Nou boe eda keje ia aredu okoge bokwareudo rakojere jamedu. Ia boe ero pegare nou areduji dukodire nou aredu aregodure nou boe eimijera ae tumagowo ji uwo nou ro pegare puduiwuge edo turo pegareu morido.
LUK 18:4 Mare nou boe eimijera pegareu rokare iaboeji jii toro. Makokare iaboeji nou ro pegare nou aredu jiwugei. Mare nou aredu ukare togwa rawuje tumagore nou boe eimijera jitu piji. Aregodure ae tu tu je tumagowo ji uwo nou ro pegare puduiwuge edo turo pegareu morido. Dukodire toro ia meri keje nou boe eimijera makore tudada. Akore: “Ikare ioku kidugo Pao Kurireuji dukodire imeartoru bokware Pao Kurireuji. Imeartoru bokware boei.
LUK 18:5 Mare nou aredu ukare togwa rawuje idu piji rugadu. Nou aredu butugugodukare. Dukodire imode aidure jiboe towuje. Imodukare boe pemegado ai dukeje umodukare togwa ra ipiji rugadu tumagowo i dupiji. Mako raimode i rugadu. Ča imedugodure nou aredu makore i du boeji. Dukodire imode boe pemegado ai. Imode nou ro pegare jiwuge edo turo pegareu morido ai rugadu.”
LUK 18:6 Nono Jesus makore ture jorduwadowugei. Akore: – Tawiapagado nou boe eimijera pegareu bataruji. Pegare mare ro pemegare nou areduji.
LUK 18:7 Mare Pao Kurireu pemegare dukodire ro pemegareu kodumode nou boe eimijera pegareu ro kori rugadu. Boečoji, meriji, boe enogwamagudumode Pao Kurireuji uwo tuginorudo ro pegare puduiwuge epiji dukeje umode tugera maku etai rugadu tuwo ekinorudo nou ro pegare puduiwuge epiji rugadu. Umodukare tumeardae raido tuwo tumeardae tawuje tuiorduwawo nuba turomode nou ro pegareugei duji. Aiwomode nou meartorure puduiwuge ereadodure jiboeji nono umode tumeardae tawuje kuri je rugadu. Mare Imedu Onaregedu aregodumode pugeje. Aregodumode dukeje romode aino rugadu. Nou meriji jordumode meartorukare puduiwugei. Emagamode moto keje rugadu.
LUK 18:9 Jesus jorduware iagei enojarore pudui duji rugadu. Nou boe emeardaere turo jetoroie mare emeardae pegare iagei jamedu. Dukodire Jesus makore ia bakaruji nou boe ewiagai tuwo erduwado emeardaeji, tuwo erduwado pudui dubagai.
LUK 18:10 Akore: – Imere pobe tudu tabo Pao Kurireu uwai ka tumagowo bagai baruto. Fariseure ia. Imposto mori makudure aiwu ro pegareu imedure ia. Nou fariseu očarore tuwadaruji rugadu. Meardaere tuiorduwaie Pao Kurireu bataruji, meardaere tugoduie Pao Kurireu bataru kodaji. Mare jorduwakare Pao Kurireu bataruji. Kodukare Pao Kurireu bataru kodaji.
LUK 18:11 Nono makore Pao Kurireuji turagoje tabo očarore tuwadaruji kodi. Rakojere boe egorai tumago tabo baruto tubaru tabo. Akore: “Iogwa, iagarere i imedu pemegareu nure imi kodi. Ikare nono awu imedu ro pegareu imposto mori makudure aiwu mogadure. Ro pegareu nure ema. Mare imi karega. Ikiwogukare. Iwadrarodukare. Ieribarikare imugure apowu aredu piji. Irore nono akaidure jiboe mogadure.
LUK 18:12 Merire ikera aboudure i inogwagere dukeje. Merire pobe inogwagekare dukeje imago tabo baruto tu tu awagai. Ainore irore tu tu je. Ire ia ino diero maku akai tu tu je jamedu.” Ainore nou očarore tuwadaru jiwu imedu akore.
LUK 18:13 – Mare nou imposto makudure aiwu ro pegareu imedu jorduware tugiwogure boei duji. Jorduware tuwadrarodure boei duji. Kiarigodure turo pegareuji. Aidukare turo pegareuji pugeje dukodire pogurure tuwo tuburedo boei. Rakoje jaere nou boei. Pogurure taiwowo baruto. Dukodire makore baruto tie jo tabo Pao Kurireu bagai. Akore: “Iogwa Kurireu. Imedu ro pegareu nure imi rugadu. Dukodire iorduware aro pegamode i iro pegareu moriče rugadu. Mare inogwamagudunure ai akoguduwo itabo akawo iwarigu joru pegareuto.” Ainore nou ro pegareu imedu akore.
LUK 18:14 Nono Jesus ure tuwadaru iado. Akore: – Imagomode aino tai. Awu ro pegareu imedu makore turo pegareuji Pao Kurireu biagai dukodire emare ure tugirimi tuwai ka tubemegare Pao Kurireu jitu tabo. Dukodire Pao Kurireu pemegare ji jamedu. Mare čewu fariseu imedu makokare nono nou ro pegareu imedu mako mogadure. Nou fariseu meardaekare turo pegareuji. Akore tubemegaie mare Pao Kurireu jorduware pegare duji. Dukodire imagomode aino tai. Boe enojaromode pudui, emode tugimijerado pudumi tumeardae tabo dukeje Pao Kurireu umode epogurudo. Mare boe epogurumode turo pegareuji, emode boe utugaregedo pudumi dukeje Pao Kurireu umode boe pemegado ei, umode boe remawugedo emage.
LUK 18:15 Ia boe etaregodure torebo Jesus ae uwo tugera bu nou tore ewugeje. Mare Jesus ure jorduwadowuge erdure nou inodu jiboeji dukeje etaidukare eroino duji. Emagore ei etaregodukaiago torebo Jesus bagai.
LUK 18:16 Mare Jesus makore nou boe etorei rugadu. Akore: – Mato. Etaregodure dukeje Jesus makore nouia boei. Akore: – Tagaba tawu boe etore emeardae kajeje etaregoduwo itae. Etarego itae rugadu. Boe ewo tumeardae udo nono boe etore emeardae mogadure tuwo tugimijerado Pao Kurireuče rugadu turuduwo baruto.
LUK 18:17 Tawiagodukaba iwadaru piji. Boe etore emeartorure tuo tuje makore jiboeji. Mare boe etore ji karega inagoino. Boe emeartoruwo Pao Kurireu bataruji. Dujire inagoino. Boe emeartorumode Pao Kurireuji tuwo tugimijerado ema dukeje emugumode Pao Kurireu apo jamedu. Mare emeartorumodukare Pao Kurireuji dukeje emugumodukare Pao Kurireu apo rugadu.
LUK 18:18 Ia Judeu doge eimijera unarare Jesusji. Akore: – Čegimijera pemegareu nure aki. Nuba iromode iewoduwo pugeje imuguwo Pao Kurireu apo du akedukawo?
LUK 18:19 Jesus akore: – Ča akagore ipemegaie. Mare tu Pao Kurireure pemegare rugadu. Arduwa kana Pao Kurireu nuie imi rugadu? Aino čare ameardae pemegado ameartoruwo i rugadu. Marigudu arduware nou Pao Kurireu ure maku Judeu doge etaiwu bakaruji. Ure maku etai marigudu. Nou bakaru akore aeribarikaiago akoreduje piji, akaiago boe ewido, akiwogukaiago boei, awadrarodukaiago, ameartoruwo aoji ačeji.
LUK 18:21 Nono nou imedu akore: – Ikodu maidure dutabo imeartorure awu bataru jamedu boeji ji aino.
LUK 18:22 Nono Jesus akore: – Iaboe okwa kimore ameartoruwo ji jamedu. Akoe rugadu boe maku diero bagai. Nono nou ako diero rugadu maku marenarue doge etai. Dukeje Pao Kurireu umode akoe kurido baru tada. Aromode aino dukeje akaregodumode itae pugeje akoduwo itabo rugadu.
LUK 18:23 Nou imedu meardure Jesus akore aino pudui duji dukeje kiarigodure rugadu. Oe kurire rugadu. Aidukare tuwo tugera ra nou toe jamedu boe piji rugadu.
LUK 18:24 Jesus jordure nou imedu kiarigodure duji dukodire akore: – Kočare boe rakare oe kurireu imeduji uwo tugimijerado tu Pao Kurireuče rugadu tumuguwo Pao Kurireu apo baru tada. Oe kurire dukodire biapagakare Pao Kurireuji. Boe rakare oe kurireu imeduji uwo tugimijerado tu Pao Kurireuče nono boe raka cameloji uwo turemo agulha poroto dumogadure.
LUK 18:26 Boe emeardure nou Jesus bataruji dukeje enarare ji: – Mare ioguduba umode činorudo tuiewoduwo pugeje tumuguwo Pao Kurireu apo?
LUK 18:27 Nono Jesus akore: – Boe eroiwakare jiboe, Pao Kurireu roiware ji.
LUK 18:28 Nono Pedro makore Jesusji. Akore: – Čeiamedu boe čere čegera ra čenoe jamedu boe piji čegoduwo akabo.
LUK 18:29 Jesus akore: – Uu. Boe jokodu jire inagoino tai. Boe emode tugera ra tuwai piji, toreduje piji, tuo piji tuje piji tumanamage epiji, tuwiemage epiji tuwo tugimijerado tu Pao Kurireuče tuwo boe emeartorudo Pao Kurireuji dukeje boe pemegareu makudumode etai eroino du moriče. Eture tuwai piji, toreduje piji, tumana mage epiji, tuo tuje epiji, tore epiji tumeartoruwo Pao Kurireuji. Dukodire nou mori kurimode eture pijiboe kori rugadu woe awu moto keje. Mare toro ia meri keje Pao Kurireu umode boe pemegareu kurido etai rugadu baru tada. Toro baru tadare emugumode rugadu, ewimodukare pugeje rugadu jii toro.
LUK 18:31 Ia meri keje Jesus makore tu nou ture jorduwadowugei. Akore: – Tawiapagado. Padurumode Jerusalém ba kurireu ka. Mariguduwuge makore Pao Kurireu bataru jiwuge ere Pao Kurireu meardae bu bapera keje. Egore imagudumoduie boe tuginaiwuge etai. Nou boe tuginaiwuge egorerumoduie i, erorerumoduie i, emoduie todoguru to i, emoduie boeto i, emoduie iwido. Mare merimoduie pobe metia bokware dukeje iewodumoduie pugeje. Ainore nou mariguduwuge makore Pao Kurireu bataru jiwuge egore. Pao Kurireu meardae jire egoino. Boemode aino i rugadu. Nou bataru jetumode pudui rugadu.
LUK 18:34 Mare nou ure jorduwadowuge erduwakare kaba jiba Jesus akoino. Erduwa bokware Jesus akoino jiboeji. Dukodire erduwakare rugadu.
LUK 18:35 Jesus aregodure Jericó ba kurireu ka dukeje ia joku bokwareu imedu mugure awara okwai togwamagudu tabo boei ia diero bagai, ia boe eke rogu bagai jamedu.
LUK 18:36 Boe emagare tugodu tabo Jesus apo. Etaregodure dukeje nou joku bokwareu imedu meardure nou ewure akoji. Dukeje unarare ia imeduji. Akore: – Kaibowu boeba ekodure aino? Amagodo iwiagai.
LUK 18:37 Nou imedu akore: – Jesusre kodure aino woe. Nazaré ba kurireu kejewu nure ema.
LUK 18:38 Nono nou joku bokwareu imedu kudugodure Jesus rekodaji. Akore: – Jesus! Jesus! Mariguduwu Judeu doge eimijera kurireu Davi uwobe nure aki. Akogudugo itabo!
LUK 18:39 Ia boe emago pegare nou joku bokwareu imeduji mugu kiorowo. Mare ure tugudu rakado pugeje rugadu. Akore: – Jesus! Davi Onaregedu nure aki. Akogudugo itabo!
LUK 18:40 Nono Jesus ure tuwuredo. Makore boei ewo nou joku bokwareu imedu reko pudae. Aregodure ae dukeje Jesus akore: – Kaba jiba akaidure irowo ai? Nou joku bokwareu imedu akore: – Ikimijera. Itaidure itaiwowo pugeje.
LUK 18:42 Jesus akore: – Ča akaiwodo. Ameartorure i dukodire apemegagodure.
LUK 18:43 Ča nou imedu joku bokwareu pemegagodure tači je rugadu. Aiwore pugeje rugadu. Dukodire nou imedu jakaregodu kuričigore pudui rugadu. Mako pemegare Pao Kurireuji rore aino pudui duji boe eiamedu boe ewiagai. Nono kodure Jesus rekodaji tagoino dutabo. Boe erdure Jesus rore aino duji dukodire nou boe emago pemegare Pao Kurireuji rugadu.
LUK 19:1 Jesus aregodure Jericó ba kurireu ka dukeje boe emagare tugodui rekodaji dutabo.
LUK 19:2 Ia imedu iere Zaqueu. Nou ure tugeragu imposto diero jiwuge eimijera nure ema. O diero kurire. Ure tugeragu boe eno imposto dieroji tuwo maku boe eimijera kurireu ai.
LUK 19:3 Nou Zaqueu aidure tuiorduwo Jesusji nou boe ekao. Mare roiwakare ričokare kodi.
LUK 19:4 Dukodire čare rekodure Jesus otodai nou boe etododai. Dukeje ruture ia kodui i ričoreuto tubagawo Jesus bagai nono. Meardaere taiwowo nou i piji toro moto ka. Jesus kodumode nono dukeje nou Zaqueu jordumode ji rugadu.
LUK 19:5 Ča Jesus kodure nono rugadu. Mare jorduware Zaqueu rakojere nou i tada duji rugadu dukodire ure tuwuredo nou i paru taiwo tabo nou Zaqueu bagai. Jordure Zaqueuji nono makore Zaqueu ieji. Akore: – Zaqueu. Arawuje nou i piji. Amara tabo. Awu meriji itaidure ipaduwo awai keje.
LUK 19:6 Dukodire Zaqueu ure turawuje tumara tabo. Nono uture Jesus apo tuwai ka tiegarere pudui dutabo.
LUK 19:7 Boe eiamedu boe erdu pegare Jesus uture Zaqueu apo duji. Egore: – Jesus uture tubaduwo ia ro pegareu uwai keje.
LUK 19:8 Toro nou Zaqueu uwai ja tada Zaqueu ure turagojedo. Nono makore Jesusji. Akore: – Ikimijera. Aino čare imode inoe kado puiato iwo ia maku marenarue doge etai. Ikiwogure jiwuge etaire imode makudu kurido pobe puibiji etai.
LUK 19:9 Nono Jesus akore: – Awu meriji Pao Kurireu ure awu bai tadawuge ekinorudo ero pegareu boe piji. Mare paga karega awu meriji rugadu emeartorure Pao Kurireuji kodi nono nou mariguduwu etuo Abraão meartoru mogadure. Itaregodure iemaruwo ro pegareuge ewagai iwo etawuje ero pegareu boe piji iwo ekinorudo etukawo bope doge eda kejewu joru pegareu ka ero pegareu moriče.
LUK 19:11 Jesus kodure Jerusalém kawu awaraji rugadu. Jaekare Jerusalém ba kurireuji rugadu. Boe ekodure rekodaji tuwiapaga tabo Jesus akoino duji. Nou boe emeardaere Pao Kurireu umode boe eimijerado pudumi woe moto keje kuri je. Egore nou boe eimijera umoduie Jesusče rugadu. Mare Jesus makore nou boei.
LUK 19:12 Akore: – Ia meri keje ia oe kurireu imedu ure tudo turugadu tudu jaewo rugadu toro ia moto tuginaiwu ka. Nou moto tuginaiwu boe eimijera kurireu makore nou oe kurireu imedu bagai tumagowo ji boe eimijerawo ema toro to moto keje. Nono nou oe kurireu imedu umode tugirimi mato to moto ka pugeje boe eimijerawo ema nono to moto keje.
LUK 19:13 Dukodire makore tudugarege ewagai. Enodo padure dez. Ure ia to diero tori kuieje maku eiamedu boe etai. Ure udo mito mito eiamedu boe etai. Makore ei. Akore: “Itu jaemode rugadu. Nou ire maku tagaiwu diero kurido tu tu je jii toro itaregodumode mato ibagi du ka.” Ainore nou boe eimijera makore tudugaregei.
LUK 19:14 Mare nou moto kejewu ia boe etaidukare nou oe kurireu imeduji. Etaidukare boe eimijerawo ema nono pudabo. Dukodire ere ia tumedage etudo toro nou moto tuginaiwu boe eimijera kurireu bagai tuwo bie taidukaie nou oe kurireu imeduji, taidukaie boe eimijerawo ema nono pudabo.
LUK 19:15 – Mare nou moto tuginaiwu boe eimijera kurireu aidure nou oe kurireu imeduji rugadu. Ure boe eimijerado ema rugadu. Nono nou oe kurireu imedu ure tugirimi tuibagi to moto ka pugeje boe eimijerawo pudumi nono to moto keje rugadu. Aregodure dukeje makore tudugarege eiamedu boe ewagai. Aidure tuiorduwawo nuba erore to diero jamedu boe tabo.
LUK 19:16 Utugare boetojiwu aregodure tugimijera ae. Akore: “Ire ako diero mitodu rogu kurido pugeje. Nou diero rogu tabo imaragodure. Ire oto padudo dez.” Ainore nou utugare akore.
LUK 19:17 Nono nou boe eimijera akore: “Ure turugadu. Amaragodu pemegare inoe rogu boeji. Dukodi čare imode boe eimijerado aki jamedu. Akaiwomode jiwuge emugure kejewu boe eda oto padumode dez.” Ainore nou boe eimijera akore tudugare boetojiwuji.
LUK 19:18 Nono nouia utugare aregodure tugimijera ae. Akore: “Ire ako diero mitodu rogu kurido pugeje. Ire udo ikera aboudure.” Ainore nou utugare akore.
LUK 19:19 Nono nou boe eimijera akore: “Ure turugadu. Imode boe eimijerado aki jamedu. Akaiwomode jiwuge emugure kejewu boe eda umode ikera aboudure.” Ainore nou boe eimijera akore nou tudugareji jamedu.
LUK 19:20 Nono ia utugare aregodure tugimijera ae jamedu. Akore: “Ikimijera nure aki. Ikare ako diero rogu barigu. Ire biado boe epiji ia ikudau areia rogu tada. Ema reo.
LUK 19:21 Ipagudure ače. Are boe emaragodae rakado ei awo akoe kurido. Are boe emaragodu rakado ako boepaji. Emagere ere ako boepa pemegado mare akai rugadu. Are boe emaragodae rakado ei ako boepa tadaboe kadoduwo mare etai karega, akai rugadu.” Ainore nou utugare akore tugimijeraji. Mare pagare akoino.
LUK 19:22 Nono nou boe eimijera akore: “Aro pega. Iromode ai nono akago mogadure. Akagore ie amaragodae rakado ai. Akagore amaragodu rakaie ino boepaji dukodie inoe kurie. Kodire akire ameardae pegare i.
LUK 19:23 Kočare akare ino diero rogu tugu bancoto metu pemegawo nono banco tada, makagoduwo nono banco tada.”
LUK 19:24 Nono nou boe eimijera makore nouia tudugaregei. Akore: “Tageragu nou ino diero tori kuieje mitodu roguji nou imedu piji. Maku nouia itugare ai nou diero oto padure dez apowu ai.” Ainore nou boe eimijera akore.
LUK 19:25 Mare nou rakojere nonowuge egore: “Akaba maku ai. O diero tori kuieje kurire. Enodo padure dez.” Egore.
LUK 19:26 Mare nou boe eimijera makore ewadaru jipagi. Akore: “Boe makudumode nou maragodu pemegareuge etai. Mare nou maragodu pegareuge etaire boe makudumodukare rugadu. Nou maragodu pegareuge enoe rogu mode mare nou enoe rogu akedumode epiji rugadu.
LUK 19:27 Aino čare tageragu nou aidukare iwugei emagore boe ekimijera kurireuji taidukaie i woe pudabo tugimijerawo imi. Mato ebo itae tawo ewido woe. Emagore boe eimijera kurireuji taidukaie i. Emagore taidukaie tugimijerawo imi. Dukodire ewimode.”
LUK 19:28 Nou inodu otobiji Jesus uture nou Jerusalém ba kurireu kawu awaraji rugadu.
LUK 19:29 Puredugodure boe eda Betfagé ka, boe eda Betânia ka jamedu. Nou boe eda mugu puredure Oliveira Tori Riji. Aregodure toro dukeje makore nou ture jorduwadowuge ime pobedu dogei tuwo etudo tododai.
LUK 19:30 Akore ei: – Tadudo toro nou boe eda ka. Tagaregodumode toro dukeje tardumode ia jumenta onaregeduji boe ere kogudo nono duji. Ia boe ekare tumugudo nou jumenta onaregedu keje raga. Tamode bukigu kiwuje dukeje tadumode mato apo itae.
LUK 19:31 Ia boe enaramode nukodiba tarore aino dukeje tamagodo bataru jipagi: “Pagimijera aidure ji”, aino.
LUK 19:32 Nono nou ime pobedu doge eture toro nou boe eda ka rugadu. Erdure nou jumenta onaregeduji nono Jesus mako mogadure.
LUK 19:33 Ere kiwuje dukeje nou akure čewuge enarare ei. Egore: – Kaba kodiba taroino nou čenagu jumenta onaregeduji?
LUK 19:34 Egore: – Pagimijera aidure ji.
LUK 19:35 Nono eture apo Jesus togi. Etaregodure Jesus ae dukeje ere tugudau areia cobertor boe bu nou jumenta naregedu poru keje Jesus uwo tumugudo keje. Nono ere tugera maku Jesus ai rutuwo nou jumenta naregedu ao ka.
LUK 19:36 Nou jumenta naregedu boe korikare ji. Pagudu bokware rugadu. Jesus uture apo. Uture dukeje boe ere tugudau areia cobertor bu awaraji tuwo awara pemegado. Nou awara ure turawuje Oliveira Tori Ri piji. Kodure Jerusalém ba kurireu ka rugadu. Boe emagare rugadu tugodui Jesus apo. Eture tiegarere pudui dutabo rugadu. Egarere Jesus ro rakare jiboeji. Dukodire ewadodu rakare Pao Kurireu ie tabo tumago pemegare ji dutabo.
LUK 19:38 Egore: – Pagimijera Kurireu reo. Pao Kurireu ure arego mato pagae. Ča Pao Kurireu uwo boe pemegado ji rugadu! Pao Kurireu uwo boe pemegado baru tadawugei rugadu. Boe eiamedu boe emago pemegawo pagimijeraji rugadu moto keje, baru tada jamedu.
LUK 19:39 Fariseu doge edure nono nou boebo jamedu mare emeardaekare nono nou boe emeardae mogadure. Egore Jesusji: – Amagodo nou merure akabowu boei edukiorowo.
LUK 19:40 Jesus makore ewadaru jipagi. Akore: – Nou boe egarere pudui kodire egoino tugudu tabo. Emagomodukare dukeje nou toriguru mako pemegamode Pao Kurireuji aino nou boe emugato.
LUK 19:41 Jesus jordure Jerusalém ba kurireuji dukeje ure tuwuredo nono. Okudure nou Jerusalém ba kurireu kejewugebo dukodire ragudure.
LUK 19:42 Akore: – Jerusalém ba kurireu kejewuge nure tagi. Kočare awu meriji umode boe ekinorudowu aregodure tagae mare tameartorukare ji dukodire tarduwakare tabemegawo pui, Pao Kurireuji jamedu.
LUK 19:43 Ia meri keje jordu pegare taiwuge emode taiado tagabo dukeje emode tubodo tagabo jiče woje.
LUK 19:44 Emode tabegado. Emode tagore erugadu etagedudo. Nono emode tawai rugadu boe butudo jamedu. Mare paga karega. Pao Kurireu ure umode boe ekinorudowu arego tawagai tuwo taginorudo taro pegareu piji mare tameartorukare ji dukodire boe pegamode aino tai rugadu.
LUK 19:45 Jesus aregodure Jerusalém ba kurireu ka dukeje ure turemo Pao Kurireu uwaito. Nono jordure nou boei ere toe maku diero bagai duji ere morido puai duji ere tagu ie maku diero bagai duji. Dukodire korigodure. Ure nou boe enoe rugadu barigu. Ure nou boe etudo Pao Kurireu uwai piji rugadu.
LUK 19:46 Jesus akore: – Pao Kurireu uwai tadare boe emagomode bagai baruto. Ainore Pao Kurireu akore. Ainore nou bapera atugo ure. Mare tare awu Pao Kurireu uwai udo nono iwogu kigodureuge ewaire.
LUK 19:47 Meri jameduji Jesus ure boe erduwado Pao Kurireu uwai tada. Mare nou ure Judeu doge enomea maku Pao Kurireu aiwuge eimijerage, nou jorduware nou Judeu doge eno bakaru jiwuge eimijerage, nou ba kurireu tadawu boe eimijerage eiamedu boe ere bato pui tumagowo pui nuba turowo Jesusji. Etaidure tuwo bito mare eroiwakare ji. Mare paga karega. Boe emagare tu tu je tuwiapaga tabo Jesus bataruji. Boe etaidure tumearduwo Jesus makore jiboeji. Dukodire nou boe eimijerage eroiwakare tuwo tugeragu Jesusji.
LUK 20:1 Ia meri keje Jesus rakojere Pao Kurireu uwai tada tuwo boe erduwado Pao Kurireu bataru pemegareuji tuwo boe emeartorudo pudui. Nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge eimijerage, nouia Judeu doge eimijerage etaregodure Jesus ae.
LUK 20:2 Emagore Jesusji. Egore: – Amagodo čei. Ioguduba koiare ure turaga maku akai aro rakawo aino?
LUK 20:3 Jesus akore: – Imi jamedu inaramode tai. Ioguduba ure João Batista udo boe etao pegodo? Pao Kurireu koia kana? Ia boe koia kana?
LUK 20:5 Mare nou boe eimijerage erduwakare tumagowo Jesus bataru jipagi. Dukodire emagore pui nuba tagomode Jesus bataru jipagi. Egore: – Pagagomode Pao Kurireu koiaie ure João Batista udo boe etao pegodo mare pameartorukare nou inoduji. Awu Jesus jorduware pameartorukare nou inodu jituji. Du inodu tabo pagagomode aino dukeje Jesus umode pabogurudo. Akomode: “Kodiba tameartorukare ji?” Ainore akomode pai.
LUK 20:6 Mare pagagomode boe eigoiaie dukeje awu woewu boe ekorigodumode pai rugadu. Boe eiamedu boe emeartorure João Batista makore Pao Kurireu bataruji kodi. Egore Pao Kurireu koiaie ure João Batista udo boe etao pegodo rugadu. Du inodu tabo ekorigodumode pai. Eidomode tori tabo pai tuwo pawido rugadu.
LUK 20:7 Dukodire nou boe eimijerage emagore Jesusji. Egore: – Čerduwakare ioguduba ure João Batista udo boe etao pegodo.
LUK 20:8 Nono Jesus makore ei. Akore: – Tamagokare iwadaru jipagi dukodire imagomodukare ioguduba ure itarego mato jamedu.
LUK 20:9 Nono Jesus makore ia bakaruji nou boe ewiagai tuwo jebato toro Pao Kurireu meardae ka. Akore: – Ia imedu ure uva tugu to boepato. Nono ure tugeragu ia boei tuwo etudo nou to boepaji emaragoduwo ji. Nono nou ore boepa čewu uture epiji tugiriaduwo. Boe raire ji nou tugiriadu tabo.
LUK 20:10 Nou boepa tadawu uva kurodumode kejewu ari puredugodure pudui dukeje nou ore boepa čewu ure ia tudugare utudo toro nou jeture to boepa jiwuge etae nou tugiriadure jiwu moto piji. Ure nou tudugare utudo uwo tugeragu nou makudumode pudaiwu boeji. Nou jeture nou boepa jiwuge emode uva rugadu kado dukeje emode ia kado puiato nou ore boepa čewu imedu ai. Ča nou utugare aregodure nou boepa ka. Mare nou jeture boepa jiwuge etaidukare tuwo uva kado puiato pugeje nou ore boepa čewu ai. Dukodire ere tugeragu nou imedu utugareji. Ere boeto ji. Ere utudo tuibagi tugera kedo tabo.
LUK 20:11 Dukeje nou ore boepa čewu ure ia tudugare utudo etae toro pugeje. Mare nou jeture boepa jiwuge ere boeto ji jamedu. Ere udo tugirimi tugera kedo tabo.
LUK 20:12 Dukejere nou ore boepa čewu ure ia tudugare utudo etae pugeje. Mare ere boeto ji dukeje ere barigu toro tubiji.
LUK 20:13 Nono nou ore boepa čewu makore tudada. Akore: “Imode imeardu kurire jiwu itonaregedu utudo etae toro. Jire emeartorumode.”
LUK 20:14 – Mare nou jeture boepa jiwuge erdure nou ore boepa čewu onaregedu kodure aino pudae duji dukeje emagore pui. Egore: “Awu ore boepa čewu onaregedu reo. Emare omode nou tuo oe jamedu boeče. Pawo bito pagowo awu uo o motoče.”
LUK 20:15 – Dukeje nou jeture boepa jiwuge ere nou ore boepa čewu onaregedu barigu boepa piji. Ere bito toro rugadu. Ainore erore. Ča. Nuba nou ore boepa čewu romode nou jeture boepa jiwugei? Aregodumode etae. Umode ewido. Nono umode to boepa maku ia ime etai pugeje etuwo ji. Ainore Jesus akore. Mare ia boe etaidukare nou ure tuwie jiwu bakaruji. Egore: – Boro. Nou ore boepa čewu romodukare aino.
LUK 20:17 Nono Jesus aiwore tu nou boei. Dukejere akore: – Ainore nou padure bapera kejewu Pao Kurireu bataru ure marigudu. Akore: “Boe emeardae pegare toriji. Egore pegaie tuwo tuwaido ema. Mare nou tori pemegareu ure turugadu boe ewo tuwaido tabo rugadu.” Ainore nou batarure. Mare tori ji karega akoino. Umode boe ekinorudowu imedu jire Pao Kurireu akoino. Nou umode boe ekinorudowu romode boei nono ia boe ewudure kejewu tori ro mogadure. Buture tori aogejewuge eiamedu boe emode togorido. Mare tori ji karega inagoino. Nou umode boe ekinorudowu umode meartorukare puduiwuge erugadu boe epegado. Dujire inagoino. Nou umode boe ekinorudowu romode boei nono ia buture boe ewugejewu tori ro mogadure jamedu. Tori butumode boe ewugeje dukeje umode nou boe egugudo. Mare tori ji karega inagoino. Nou umode boe ekinorudowu umode boe pegado nou meartorukare puduiwuge eiamedu boei. Dujire inagoino.
LUK 20:19 Nou jorduware Judeu doge eno bakaru jiwuge eimijerage erduware puduie Jesus akoino duji. Nou ure Judeu doge enomea maku Pao Kurireu aiwuge eimijerage erduware puduie Jesus akoino jamedu. Dukodire nou boe eimijerage pegareuge eiamedu boe etaidure tuwo tugeragu Jesusji tuwo tugu baičoreuto kuri je rugadu. Mare nouia boe etaidure Jesusji. Dukodire nou boe eimijerage epagudure, eroiwakare tuwo tugeragu Jesusji.
LUK 20:20 Nou boe eimijerage etaiwore ia Jesus ro pegareu bagai rugadu. Ere ime etudo taiwo tabo Jesus ae ia Jesus bataru pegareu umode dubagai. Etaidure Jesus ro pegawo mako pegawo tuwo maku boe eimijera governador ai. Dukodire nou ime ere tudo nono ro pemegareuge mogadure mare pagare eroino.
LUK 20:21 Nono ia unaragodure Jesusji tuwo barigu boeto dubagai. Akore: – Boe eimijera nure aki. Boe jokodu jire akagore tu je. Arduware Pao Kurireu bataru remawuji. Are boe eiamedu boe erduwado rugadu Pao Kurireu bataruji rugadu. Ameardaere boei boe remawu tabo.
LUK 20:22 Ča amagodo čei. Nuba pago bakaru akomode paromode jiboeji? Pamode pagoe imposto mori maku Roma kejewu boe eimijera kurireu César ai na? Pamode maku kana? Pamodukare maku kana?
LUK 20:23 Mare Jesus jorduware pagare egoino duji. Emeartorukare tuwadaruji rugadu. Dukodire makore ei. Akore: – Ia imposto morireu diero tori maku inai. Ere ia diero tori maku Jesus ai dukeje Jesus unarare ei. Akore: – Ioguduba je ba padure awu diero tori keje? Ioguduba ie ba padure awu diero tori keje? Nou boe egore: – Roma kejewu boe eimijera kurireu César iere padure keje.
LUK 20:25 Jesus akore: – Boe rugadu. Čare awu César oeboe maku César ai. Mare Pao Kurireu oeboe maku Pao Kurireu ai jamedu.
LUK 20:26 Dukodi čare nou boe eimijerage pegareuge ekare Jesus udo tuwarigu boeto tagoino jiboeji. Dukodire eroiwakare tumago pegawo Jesus makore jiboeji boe ewiagai. Erore ta je akoino pudui duji. Dukodire emagokare pugeje.
LUK 20:27 Nono ia saduceu doge etaregodure Jesus ae tuwo Jesus barigu boeto tagoino dutabo jamedu. Nou saduceu doge emeartorukare boe eewodumode pugeje duji. Ča emagore Jesusji.
LUK 20:28 Egore: – Jorduwareu imedu nure aki. Ča mariguduwu makore Pao Kurireu bataru jiwu Moisés ure jaoboe ero maku etai pameartoruwo ji jii aino. Moisés akore imedu bimoduie mare ore bokwaie dukeje nou imedu uwie muguwo nou tumana bireu oreduje apo torewo nou tumana bireu oreduje apo.
LUK 20:29 Ainore Moisés akore marigudu tuwo paro maku pagai. Ča ia meri keje ime enodo padure sete. Etumana etuwie mage nure pugi. Etumana mugure ia aredu apo. Čare bire. Mare ore bokware.
LUK 20:30 Dukodire nou uwie imedu mugure nou aredu apo. Mare nou imedu bire jamedu.
LUK 20:31 Nono uwie imedu mugure nou aredu apo jamedu. Mare bire jamedu. Nou uwie ime eiamedu boe emugure nou aredu apo. Mare eiamedu boe ewire. Etore bokware nou aredu apo rugadu.
LUK 20:32 Dukeje čare nou aredu bire jamedu.
LUK 20:33 Dukodire čedaidure čenarawo ai. Pao Kurireu umode erugadu boe eewodudo dukeje duboba mugumode nou aredu apo? Eiamedu boe emugure apo woe moto keje mare duboba mugumode nou aredu apo baru tada?
LUK 20:34 Jesus makore ei. Akore: – Boe emugumode puapo tu woe moto keje
LUK 20:35 Meartorure Pao Kurireu jiwuge eewodumode pugeje dukeje emode nono Pao Kurireu utugarege baru tadawuge emogadure. Ewimodukare pugeje. Etuwiremodukare pugeje. Etugogemodukare pugeje. Pao Kurireu ore mode emage eewodure pugeje dukodi.
LUK 20:37 Moisés ure bu bapera kejewu Pao Kurireu bataru ure boe erduwado boe eewodumode pugeje duji. Pao Kurireu ure Moisés meardudo tuwadaruji ture iaboedo nono joru mogadure enado i piji. Dukejere Pao Kurireu makore Moisesji. Akore: “Abraão meartorure jiwu Pao Kurireu nure imi. Isaque meartorure jiwu Pao Kurireu nure imi. Jacó meartorure jiwu Pao Kurireu nure imi.”
LUK 20:38 Ainore Pao Kurireu akore. Mare nou Pao Kurireu akoino jiwu ime ewire marigudu. Mare Pao Kurireu makore emeartoruie pudui rugadu. Dukodire parduware eewodure pugeje duji. Bireuge emeartorumodukare Pao Kurireuji. Jewodureuge emeartorumode ji. Pao Kurireu umode meartorure puduiwuge eiamedu boe eewodudo pugeje rugadu.
LUK 20:39 Nono ia jorduware Judeu doge eno bakaru jiwuge eimijerage egore: – Boe jokodu jire akagoino.
LUK 20:40 Mare pagare egoino. Ča boe eraga bokware tunarawo Jesusji pugeje. Eraga bokware tuwo Jesus barigu boeto tagoino jiboe tabo rugadu.
LUK 20:41 Nono Jesus unarare nou boei. Akore: – Boere boe erduwado umode boe ekinorudowuji. Egore Davi onaregedu moduie ema. Mare erduwa pemegakare Pao Kurireu bataruji.
LUK 20:42 Nou mariguduwu boe eimijera Davi ure ia Pao Kurireu bataru bu bapera keje. Akore: – Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode nou jordu pegare aiwuge etagedudo du ka.”
LUK 20:44 – Tagoino dutabo Davi akore tugimijera nuie nou umode boe ekinorudowuče. Mare Davi onaregedu mode ema jamedu. Ča nuba nou umode boe ekinorudowu ure?
LUK 20:45 Boe emagare nono tuwiapaga tabo Jesus bataruji. Nono Jesus ure ture jorduwadowuge erduwado.
LUK 20:46 Akore: – Taeku jado jorduware Judeu doge eno bakaru jiwugei. Etaidure boe emeartoruwo tu pudui. Ere boe etaiwodo tugudau areia motureu meture pudui duji. Etaidure tuwo boe epogurudo. Etumode ba kurireu ka dukeje etaidure boe emago pemegawo pudui etaidure boe ekimijeragewo pudumi kodi. Dukodire erore aino. Nou jorduware Judeu doge eno bakaru jiwuge etumode Judeu doge ere bato puiwu bai ka dukeje emode tugeragu boe eimijera mugure kejewu iraji tumuguwo keje. Etumode boe ewadae ka dukeje etumode boe eke jeture kejewu ira ka boe etododai togwagewo boetoji.
LUK 20:47 Eragojemode boebo dukeje emago raimode baruto boe emearduwo tagoi tuwadaru motureu jituji. Mare pagatu je. Ekiwogure okoge bokwareuge aremei. Ere nou areme okoge bokwareuge ewai aru epiji. Dukodire Pao Kurireu ro pega kuričigomode ei rugadu nou ero pegareu moriče.
LUK 21:1 Jesus rakojere Pao Kurireu uwai ja tada taiwo tabo nou boei. Dukejere jordure nou oe kurireugei. Ere ia toe tugu ia ira jagi tuwo maku Pao Kurireu ai.
LUK 21:2 Dukejere jordure ia okoge bokwareudo areduji, marenaruji. Nou okoge bokwareudo ure to diero tori rogu pobedu tugu nou ira jagi. Toe mitodu rogu ure maku.
LUK 21:3 Nono Jesus akore: – Iwo tawie boe remawuji. Awu marenaru aredu okoge bokwareudo ure to diero jamedu boe maku dukodire ure to diero makudu kurido nou oe kurireuge eiamedu boe ekori.
LUK 21:4 Mare diero kurireu ji karega inagoino. Nou oe kurireuge ere to diero kurido Pao Kurireu ai mare etaidukare jiwu kobo rogure ere maku. Enoe kurire rugadu kimo. Mare awu aredu ure to diero rugadu boe maku. Dujire inagoino tai.
LUK 21:5 Ia Jesus ure jorduwadowuge emagore pui Pao Kurireu uwai jiboeji. Egore Pao Kurireu uwai motuie. Boe ere towuje tabowu tori motuie. Boe eie toe makudu kurido Pao Kurireu ai. Du paduie nono nou Pao Kurireu uwai ja tada.
LUK 21:6 Mare Jesus makore nou ture jorduwadowugei. Akore: – Moture mare ia meri keje ro pegareuge emode awu Pao Kurireu uwai butudo rugadu. Tori tabore pawobe ere towuje marigudu. Mare nou tori jamedu boe epadumodukare pu aogeje pugeje.
LUK 21:7 Nou Jesus ure jorduwadowuge enarare Jesusji. Egore: – Kaba meri kejeba Pao Kurireu uwai butumode? Kaba jiba čerdumode čerduwawo nou akagoino jiboe jetumode pudui kuri aino duji?
LUK 21:8 Jesus makore ei. Akore: – Taeku jado boe ekawo taekiripagado. Boe emagamode tuwadaru pegareu tabo. Egomode umode boe ekinorudowu nuie pudumi. Boe puredugoduie moto akeduwo. Mare pagare egoino. Mare du inodu tabo emode boe ekiripagado rugadu. Mare tameartorukaba ei.
LUK 21:9 Tameardumode bakaru pegareuji. Boe emode tawie boe erugoduie pui tuwaiga tabo. Erugodu akedukaie. Emoduie tugimijerage etawuje turaga tabo. Mare taragado tai tamororamagadukawo. Pao Kurireu jorduware ro pegareuge erugoduji marigudu. Umodukare nou erugodu tawuje epiji. Erugodumode pui tuwaiga tabo rugadu mare moto akedumodukare raga.
LUK 21:10 Jesus mako kimore ei. Akore: – Boe eimijera kurireuge erugodumode pui tugobaigaregebo.
LUK 21:11 Moto magadugodumode boe jamedu boe parugajeje. Boe eke bokwamode boe jamedu boe parugajeje. Dukodire boe ewimode tuge boei koia. Jorubo pegareu jetumode boei moto jamedu boe parugajeje. Boe erdumode boe pegareu boeji ure turawuje baru piji duji.
LUK 21:12 Mare ro pegareuge emode tugeragu tai. Emode boe pegado tai rugadu. Emode tamagu Judeu doge eimijerage etai. Nou boe eimijerage emode tarego Judeu doge ere bato puiwu bai ka taiwowo ia taro pegare jiboe bagai. Nono emode tadugu baičoreuto. Boe eimijera kurireuge emagomode tawagai jamedu tumago pegawo tarore jiboeji.
LUK 21:13 Dukejere tamagodo iwadaru pemegareuji ewadaru jipagi.
LUK 21:14 Mare tamororamagadukaba tamagore jiboe bagai. Tamagomode mare tawadaru karega.
LUK 21:15 Imode iwadaru maku tagai tamagowo ewadaru jipagi. Dukodire nou boe eimijerage ero rakamodukare tai tawadaru jipagi pugeje.
LUK 21:16 Tawie mage emode tamagu boe eimijerage pegareuge etai. Taomage tajemage emode tamagu boe eimijerage pegareuge etai. Ia tawobe emode tamagu boe eimijerage pegareuge etai. Ia tamedage emode tamagu boe eimijerage pegareuge etai. Ia tagi tawidodumode rugadu.
LUK 21:17 Tameartorumode i dukodire boe eiamedu boe erdu pegamode tai.
LUK 21:18 Mare ietu pemegamode tai ia tagao iku butukawo tagaora piji rugadu.
LUK 21:19 Tagaba tagera ra tameartorure i dupiji dukeje imode taginorudo tawarigudukawo bope doge eda ka rugadu taruduwo baruto itae.
LUK 21:20 Jesus makore kimo. Akore: – Tardumode tugobaigarege pegareuge ere taiado Jerusalém ba kurireu tabo duji dukeje tarduwamode boe akedumode kuri aino duji.
LUK 21:21 Inure tawie. Boe erdumode nou inoduji dukeje Judéia moto kejewuge eregodu rakawo toro tori ao ka. Jerusalém ba kurireu tadawuge eregodu rakawo. Nou rakojere ipoguru kejewuge eregodu rakawo jamedu. Ekawo tugirimi tuwai ka iaboe bagai pugeje tuwo tuginorudo boe pegareu piji.
LUK 21:22 Nou meri keje boe pegamode boei rugadu ero pegareu moriče. Pao Kurireu ure boe ewie marigudu boe pegamoduie boei rugadu boe ero pegareu moriče. Aino makore jiboe jetumode pudui rugadu.
LUK 21:23 Nou meriji boe pegamode kuiarureugei rugadu. Boe pegamode ei rugadu eroiwamoka turegodu rakawo kodi. Boe pegamode etore kugure etuje magei jamedu eroiwamoka turegodu rakawo kodi. Boe pegamode awu motoji rugadu. Pao Kurireu umode boe pegado awu Judeu dogei rugadu ero pegareu moriče.
LUK 21:24 Iage ewidodumode tariga kurireu tabo. Boe emode iage etudo toro moto tuginaiwu ka etuguduwo baičoreuto toro. Nono boe tuginaiwuge etaregodumode Jerusalém ba kurireu ka tuwo akedudo rugadu jii toro Pao Kurireu jorduware jiwu meri ka.
LUK 21:25 Jesus mako kimore: – Meri joku umode tuginai. Ari joku umode tuginai. Kuieje doge emode tuginai jamedu. Moto kejewu boe eimijera kurireuge epagudumode rugadu. Epagudumode pobo maereu ako pegareu akoji. Pobo maereu umode pobo barigu moto ao ka.
LUK 21:26 Boe erduwamode boe pegare moto jituji. Baru magadugodumode jamedu. Boe edu pagamode turoiwakare nou boe pegare jiboeji kodi. Dukodire ekugudugodumode tubagudu koia.
LUK 21:27 Dukejere čare boe erdumode Imedu Onaregedu aregodumode tugodu tabo boetugu ao jituji. Erdumode Imedu Onaregedu ro rakareuji. Erdumode Imedu Onaregedu o jorugu kurireuji. Jorugure moto jamedu boe parugajeje.
LUK 21:28 Tardumode nou iwadaru jetumode pudui duji dukeje taragojedo tawo tado tarugadu. Tagaiwowo iwagai. Tarduwamode imode taginorudo rugadu kuri aino duji rugadu.
LUK 21:29 Jesus mako kimore. Akore: – Figo i ure tarduwado tu tu je.
LUK 21:30 Figo i okurogu boture dukeje tardure roino duji rugadu. Dukodi čare tarduware bubutumode kuri je rugadu. Tagaiwore figo iji tarduwawo bubutumode kejewu meriji. Ainore tarore tu tu je.
LUK 21:31 Ča ire tawie nuba boemode meri jokuji nuba boemode ari jokuji. Iwo tawie. Tagaiwodo awu ire tawie jiboe jamedu boeji emode tarduwado dubagai. Tardumode ire tawie jiwu iwadaru jetumode pudui duji dukeje tarduwamode itaregodumode kuri aino duji boe eimijera kurireuwo imi. Bubutu ji karega inagoino. Ire inagoino rugadu. Itaregodumode kejewu meri jire inagoino tai.
LUK 21:32 Iwo tawie boe remawuji. Toro ia meri keje ia tawobe erdumode awu imagore jiboe jeture pudui duji rugadu. Jetumode pudui rugadu tuwimodedu otodai.
LUK 21:33 Baru akedumode. Moto akedumode. Mare iwadaru akedumodukare rugadu jii toro rugadu. Jetumode pudui rugadu.
LUK 21:34 Jesus mako kimore ei. Akore: – Taeku jado. Tamororamagadukaba tawadae bagai. Tagaba tage kurudo tai. Tamororamagadukaba tamaragodae bagai. Tamororamagadumode nou inoduji dukeje tamodukare tado tarugadu nou ire tawie jiwu meri aregodumodedu ka.
LUK 21:35 Nou meri keje aregodumode tagae tae pagare tu je du ka. Moto kejewuge eiamedu boe emodukare činorudo nou itaregodumode kejewu meri keje.
LUK 21:36 Dukodire inagoino tai. Taeku jado. Tamagodo baruto Pao Kurireu bagai tu tu je uwo taragado, uwo taginorudo boe pegareu boe piji, tagawo tagera ra tameartorure i dupiji jii toro itaregodumode du ka.
LUK 21:37 Nono Jesus ure boe erduwado Pao Kurireu uwai ja tada meri jamedu boeji jii toro merirekodu ka tu tu je. Nou boečoji ure tudawuje nou ba kurireu piji tuduwo toro Oliveira Ri tori ao ka tu tu je.
LUK 21:38 Barogwakododure dukeje ure tugirimi Pao Kurireu uwai ka pugeje tuwo boe erduwado nono. Boe eiamedu boe eture Pao Kurireu uwai ka Jesus togi tu tu je tuwiapagawo Jesus makore jiboeji pugeje. Ainore Jesus rore nou meri jameduji.
LUK 22:1 Judeu doge epuredugodure tuwo tuwadae towuje. Nou ewadae iere Páscoa. Nou tuwadae kejere emode ia amireu tuginaiwu ko. Fermento metukare nou amireu tada.
LUK 22:2 Nou ure Judeu doge enomea maku Pao Kurireu aiwuge eimijerage ere bato pui jorduware Judeu doge eno bakaru jiwugebo. Emagore pui nuba turowo tuwo tugeragu Jesusji tuwo bito du bagai. Mare boe etaidure Jesusji dukodire nou jordu pegare Jesus jiwuge boe eimijerage epagudure turo pegawo ji.
LUK 22:3 Nono bope doge eimijera Satanás ure turemo nou Jesus ure jorduwadowu Judas Iscariotito.
LUK 22:4 Dukodire Judas Iscariotes uture toro nou ure Judeu doge enomea maku Pao Kurireu aiwuge eimijerage etae tumagowo ei tumoduie Jesus maku etai. Pao Kurireu uwai tadawu tugobaigarege eimijerage eire Judas Iscariotes akoino jamedu.
LUK 22:5 Dukodire nou boe eimijerage eiamedu boe egarere pudui. Nou boe eimijerage ere diero tori udo 30 Judas Iscariotes ai.
LUK 22:6 Dukodire Judas ure tugeragu nou dieroji. Du nou meri pijire nou Judas Iscariotes aiwore Jesus rore jiboeji tuiorduwo boe emagakare apo dubagai tuwo Jesus maku boe eimijerage pegareuge etai nou meri keje.
LUK 22:7 Páscoa meri aregodure Judeu doge ere tuge amireu pemegado, ere tagu carneiro doge kugure ewido tuwo pemegado tuwo kowuje jamedu nono turo mogadure tuwaduwo Páscoaji.
LUK 22:8 Jesus makore Pedroji, Joãoji jamedu. Akore: – Tadudo toro tawo page pemegado pawo kowuje pawaduwo Páscoaji.
LUK 22:9 Egore: – Kaiba čemode nou page pemegado?
LUK 22:10 Jesus akore: – Tadumode Jerusalém ba kurireu ka. Tagaregodumode toro dukeje ia imedu aregodumode tadogi ia pori po tabo. Tadudo nou imedu rekodaji. Umode turemo ia baito dukeje tanarado nou uwaire bai čewuji ia paedumodureu bagai. Tagagodo aino: “Pagimijera aidure ia tiedumodureu bagai togwagewo Páscoa kejewu boe ekeji ture jorduwadowugebo nou boe edureu ja tada.”
LUK 22:12 Tagagomode aino dukeje nou uwaire bai čewu umode tardudo ia boe edure kejewu bai pemegareuji. Nou bai pemegamode rugadu pagwagewo Páscoa kejewu pageji. Nonore tamode page pemegado.
LUK 22:13 Nono Pedro uture João apo jamedu. Etaregodure Jerusalém ba kurireu ka dukeje erdure boeji nono Jesus akoino jiboeji. Nono ere tuge pemegado tuwaduwo Pascoaji nou bai tada rugadu.
LUK 22:14 Nono Jesus aregodure nouia ture jorduwadowugebo. Nou boečoji Jesus mugure nono ia ira keje togwage tabo ebo. Utumode Jesus bataru tabowuge emode emage.
LUK 22:15 Akore: – Itaidure rugadu iwo awu Páscoa kejewu boe eke kowuje mare boe ero pegamode i du otodai.
LUK 22:16 Nono imodukare awu boe eke kowuje pugeje jii toro Boe Eimijera Pao Kurireu aregodumode nou meartorure puduiwuge ewagai du ka. Nono imode Pao Kurireu uke remawu kowuje Pao Kurireu apo.
LUK 22:17 Jesus ure tugeragu vinho kuruji. Imadure Pao Kurireu apo nou vinho kuru paru tabo. Dukeje makore pugeje nou ture jorduwadowugei. Akore: – Awu pedo tai.
LUK 22:18 Inure tawie aino. Ikudumodukare awu vinho kuruče pugeje jii toro itaregodumode iwo boe eimijera kurireudo imi du ka.
LUK 22:19 Jesus ure tugeragu amireuji. Imadure Pao Kurireu apo nou amireu paru tabo. Nono ure nou amireu kado dukeje ure pedo ei. Akore: – Ikodu reo. Makudumode taro pegareu moriče. Tagwagedo awuji tawiabutuwo iwugeje, irore jiboe keje.
LUK 22:20 Enogwagere dukeje Jesus ure tugeragu vinho kuruji jamedu turowo ji nono turo moga amireu jitu mogadure. Akore: – Ikure nou uva kuru rema. Pao Kurireu meardae maiwu koiare imode iku redo boe ero pegareu moriče.
LUK 22:21 Ča. Tagaiwodo. Umode imagu boe eimijerage pegareuge etaiwu mugure woe itabo ira keje.
LUK 22:22 Mare iwimode nono Pao Kurireu meardae mogadure rugadu. Mare boe pegamode nou umode imagu boe eimijerage pegareuge etaiwuji jamedu.
LUK 22:23 Jesus akore aino dukeje čare nou ure jorduwadowuge enarare pui duboba romode aino tuwo Jesus maku boe eimijerage etai du bagai.
LUK 22:24 Nono Jesus ure jorduwadowuge eiamedu boe etokire pui. Eiamedu boe egore boe eimijera kurireu moduie pudumi nou tumedage ekori.
LUK 22:25 Mare Jesus makore ei. Akore: – Boe tuginaiwuge eimijerage meartorukare Pao Kurireu jiwuge egore boe emedage enuie pudumi mare pagare egoino. Ero rakare boei. Boe emeartorure tugimijeragei rugadu. Emeartorumodukare ei dukeje nou boe eimijerage emode boe pegado nou meartorukare puduiwugei rugadu.
LUK 22:26 Mare tagi tarokaba nono nou boe eimijera kurireuge ero mogadure. Ia tagi tagaidumode tawo boe eimijerado tagi dukeje tagojarokaba tai tawo tado nono ipare enojaromoga pudui tumanamagei dumogadure. Ia tagi tagaidumode tawo boe eimijerado tagi dukeje tameardae udo nono boe utugare meardae mogadure tawo boe eimijera pemegareugedo tagi. Boe eimijera romode nono boe utugare ro mogadure tuwo boe eimijera pemegareudo pudumi.
LUK 22:27 Boe eimijerage kurireuge enogwagemode boetoji. Utugarege emode boe eke maku etai. Boe eimijera kurireu nure imi rugadu mare ire ido nono boe etugare mogadure iwo tage maku tagai. Tarodo nono iro mogadure jamedu.
LUK 22:28 Boe rakare i. Du inodu tabo taragojere woe itabo. Tardure boe rakare i duji. Mare Iogwa Kurireu ure boe eimijera kurireudo imi ietuwo boei. Dukodire imode boe eimijerado tagi jamedu taetuwo boei.
LUK 22:30 Mare boe eimijera kurireu mode imi dukeje tagwagemode itabo tagudumode itabo imugureu keje. Tamugumode boe eimijerage emuga keje jamedu. Boe eimijerage emode tagi jamedu tagaiwowo Judeu doge eiamedu boe ero pegareu bagai.
LUK 22:31 Nono Jesus makore Pedroji. Akore: – Simão. Simão. Awiapaga pemegado imagomode ai jiboeji. Bope doge eimijera Satanás okwamagudure tuwo turokogado ai tuwo ameardae pegado. Dukodire imagore Pao Kurireuji aparu tabo ameartorure idu akedukawo. Nono amode akirimi ameartoruwo i pugeje nono amode amedage emeartoru kurido i jamedu.
LUK 22:33 Mare Pedro akore: – Ikimijera kurireu nure aki rugadu. Imeartorure tu ai rugadu. Ire irugadu ikoduwo akabo imeduwo baičoreu tada akabo, iwiwo akabo jamedu.
LUK 22:34 Jesus akore: – Inure awie boe remawuji. Awu boečoji akagomode arduwakaie i dumode pobe metia bokware. Dukeje čare kagariga kudugodumode.
LUK 22:35 Nono Jesus makore ture jorduwadowuge eiamedu boei pugeje. Akore: – Ire tadudo toro boe etae marigudu tawo boe ewie iwadaruji. Mare ire tadudo tagadarabo bokware dutabo, tamijigu bokware dutabo, tawure okeakejewu bokware dutabo. Ča inarawo tai. Tadure toro ia boe bokware tagai kana? Egore: – Boro. Iaboe okwakare čenai rugadu.
LUK 22:36 Jesus akore: – Aino čare ore mičigureu umode tugeragu to mičiguji. Ukadaraboreu umode tugeragu tugodaraboji. Iaboe maku diero bagai tawo akirodo ia tarigaji.
LUK 22:37 Tawiapaga pemegado iwadaruji. Pao Kurireu bataru padure bapera keje marigudu. Akore aino: “Boe ere udo nono ro pegareu mogadure.” Ainore padure bapera kejewu Pao Kurireu bataru akore marigudu. Aino ča nou bataru jetumode pudui rugadu. Boe mode aino i rugadu nono nou bataru mogadure.
LUK 22:38 Ia nou Jesus ure jorduwadowu imedu akore: – Akaiwodo. Padarigare pobe woe. Jesus akore: – Ure turugadu.
LUK 22:39 Jesus uture ture jorduwadowugebo nou Jerusalém ba kurireu piji Oliveira ri ao ka turoiaji.
LUK 22:40 Aregodure taidure jiboe ka dukeje Jesus makore ei. Akore: – Tamagodo itabo Pao Kurireu bagai baruto bope ukawo tumeardae pegareu maku tagai taro pegakawo.
LUK 22:41 Nono Jesus ure tudawuje epiji kuri je tumagowo baruto. Ure tubu jodo moto keje tumagowo Tuoji.
LUK 22:42 Akore: – Iogwa. Boe ero pegamode idu utudo ipiji. Mare umodukare nono itaidu mogadure. Mare uwo nono akaidu mogadure.
LUK 22:43 Dukeje ia Pao Kurireu utugare baru tadawu aregodure Jesus ae tuwo raka maku ai.
LUK 22:44 Jesus mako kimore baruto turaga tabo. Akaru ure nono boe ekure tuwudure moto ka dutabo.
LUK 22:45 Ure tumago akedudo dukeje Jesus ure tugirimi ture jorduwadowuge etae. Jordure ei enudure duji. Emedugodure tugiarigodure dukodi.
LUK 22:46 Jesus makore ei. Akore: – Kodiba tanudure? Taragojedo. Tamagodo baruto Pao Kurireu bagai bope ukawo tumeardae pegareu maku tagai taro pegakawo.
LUK 22:47 Jesus mako kimore aino nou ture jorduwadowugei dukeje boe emagare taregodu tabo ae. Nou Jesus ure jorduwadowu Judas Iscariotes emare roino ebo tuwo erego Jesus bagai tuwo Jesus maku etai. Nono Judas ure tuburedo Jesusji tugimaduwo apo. Ure togwa to čo Jesus je koduto tuwo nou boe pegareuge erdudo taidure tuwo tugeragu jiwu imedu nure ema duji.
LUK 22:48 Jesus makore Judaji. Akore: – Are imagu awu boe pegareuge etai. Kočare akaidure akimaduwo aino itabo?
LUK 22:49 Ia Jesus ure jorduwadowuge erdure nou boe pegareuge emode tugeragu Jesus jituji dukeje enarare Jesusji: – Čegimijera! Čemode čebodo ebo tariga tabo?
LUK 22:50 Mare nouia Jesus ure jorduwadowu upagakare Jesus makowo nou tumedage ewadaru jipagi. Ure taredo nou ure Judeu doge enomea maku Pao Kurireu aiwuge eimijera kurireu utugare ae. Ure tariga bu nou utugare bija kajeje.
LUK 22:51 Mare Jesus akore: – Tarokaba aino. Urugadu. Nono Jesus ure tugera bu nou imedu bija keje. Ča ure pemegago tači je.
LUK 22:52 Dukeje Jesus makore nou ure Judeu doge enomea maku Pao Kurireu aiwuge eimijeragei, nou Pao Kurireu uwai tadawu tugobaigaregei jamedu, nouia boe eimijeragei jamedu. Akore: – Ire boe emeardae pegado kana emeartorukawo tugimijeragei kana? Kočare tagaregodure tariga kurireu tabo, rago tabo, tawo tageragu i nono taro moga ro pegareuge eidu mogadure. Iragojere tagabo meri jameduji Pao Kurireu uwai ja tada. Mare tagare tageragu i nono. Mare bope aidure boečoji kodire tare tarodo aino boečo kao tawo tageragu aino i boečoji rugadu tameartorure tagimijera bope doge eimijeraji dukodi.
LUK 22:54 Dukeje nou tugobaigarege ere tugeragu Jesusji. Eture apo. Ere reko nou Judeu doge eimijerage etae toro ure Judeu doge enomea maku Pao Kurireu aiwuge eimijera kurireu uwai ka. Pedro uture eregodaji mare ure tugodu jaedo ei. Nou boe eimijerage ere nou tugobaigarege etudo Jesusji nono bawadu keje.
LUK 22:55 Nono boe ere jorugo nono bawadu keje. Pedro uture nou boe etae. Ure tumugudo nono ebo.
LUK 22:56 Ia utugare aredu jordure Pedroji nono nou joru okwai. Aiwo pemegare ji dukeje akore: – Awu imedu rakojere Jesus apo jamedu.
LUK 22:57 Mare Pedro akore: – Boro. Iorduwakare ji.
LUK 22:58 Mare Pedro utukare. Rakoje kimore nono nou bawadu keje. Nono ia imedu jordure ji dukeje makore Pedroji. Akore: – Ia Jesus apowu nure aki jamedu? Pedro akore: – Boro. Imi karega.
LUK 22:59 Nou inodu rekodaji ia imedu makore Pedroji pugeje. Akore: – Iorduware ai. Aragojere Jesus apo. Awadarure nono Galiléia kejewu boe ewadaru mogadure.
LUK 22:60 Mare Pedro akore: – Iorduwakare kaba jiba akagoino. Pedro makore aino dukeje ia kagariga kudugodure.
LUK 22:61 Nono Jesus aiwore tu Pedroji. Dukeje Pedro biabuture Jesus makore puduiwu bataru keje. Jesus makore Pedroji makomoduie tuiorduwakaie pudui dukeje kagariga kudugodumoduie rugadu. Pedro makomoduie tuiorduwakaie Jesusji dumode pobe metia bokware rugadu.
LUK 22:62 Nono Pedro biabuture nou Jesus bataru keje jeture pudui rugadu duji. Dukodi čare Pedro uture nou boe epiji rugadu. Ragudu rakare rugadu turore aino duji.
LUK 22:63 Tugobaigarege ere boeto Jesusji, egokodure ji jamedu.
LUK 22:64 Ere areia kogudo Jesus je kajeje. Nono enarare ji: – Ioguduba ure boeto ai? Amagodo! Mare pagare egoino. Enure tago kodudo ji turoi jitu tabo.
LUK 22:65 Nono emago pegare ji rugadu.
LUK 22:66 Barogwakododure dutabo boe eimijera kurireuge ere bato pui. Nou ure Judeu doge enomea maku Pao Kurireu aiwuge eimijerage edure nono. Jorduware Judeu doge eno bakaru jiwuge edure nono jamedu. Nono tugobaigarege etaregodure Jesus apo etae.
LUK 22:67 Dukeje nou boe eimijerage enaragodure Jesusji. Egore: – Amagodo. Aki na umode boe ekinorudowu nure aki? Jesus akore: – Inagomode uu. Imie rugadu mare tameartorumodukare i dukodire imagomodukare tawadaru jipagi. Inaramode tai iaboeji mare tarduwamodukare tamagowo iwadaru jipagi jamedu. Dukodire inaramodukare boeji tai.
LUK 22:69 Mare Pao Kurireu raka kodure boe eiamedu boe kori. Nono inure tawie. Awu inodu otobiji imugumode Pao Kurireu ukana pemegareu jagwai.
LUK 22:70 Jesus akore aino dukeje nou boe eimijerage enarare Jesusji. Egore: – Mare aki na Pao Kurireu Onaregedu nure aki? Jesus akore: – Boe jokodu jire tagagoino. Imi rugadu.
LUK 22:71 Mare nou boe eimijerage emeartorukare nou inoduji marigudu. Dukodire emagore pui tumago pegare Jesus jitu tabo. Egore: – Pagare akoino. Batrarodunure. Mako peganure Pao Kurireuji. Kodi čare ure tumagu pagai nou tuwadaru pegareu tabo. Paipagamodukare ia bataru pegareu bagai pugeje.
LUK 23:1 Nono nou Judeu doge eimijerage ere Jesus reko toro Pilatos ae. Emare Romano doge eimijera kurireu nure ema nono.
LUK 23:2 Etaregodure Pilatos ae dukeje nou Judeu doge eimijerage emago pegare Jesusji Pilatos biagai tuwadrarodu tabo. Egore: – Čerdure awu imedu ro pegareuji. Ure čewobe Judeu doge emeardae pegado Roma kejewu pagimijera kurireuji. Makore boei ekawo imposto diero maku Roma kejewu pagimijera kurireu César ai. Akore tumoduie boe ekinorudo Roma kejewuge epiji. Akore boe eimijera kurireu unuie pudumi.
LUK 23:3 Dukodire Pilatos unarare Jesusji. Akore: – Boe rugadu na? Judeu doge eimijera kurireu nure aki rugadu? Jesus akore: – Uu. Boe jokodu jire akagoino.
LUK 23:4 Mare Pilatos makore nou Judeu dogei, eimijeragei jamedu. Akore: – Iordukare awu imedu ia ro pegareuji. Imodukare barigu boe pegareuto.
LUK 23:5 Mare nou boe emagore Pilatoji pugeje. Egore: – Ure boe ekiripagado Judéia kejewu moto parugajeje tuwadaru tabo. Ainore rore Galiléia moto keje ji taregodure aino woe du ka.
LUK 23:6 Pilatos unarare nou boei. Akore: – Nou Galiléia moto kejewu nure ema na? Nou boe egore uie ema rugadu. Dukodire Pilatos ure nou Judeu doge eimijerage etudo Galiléia moto kejewuge eimijera bagai Jesus apo. Nou Galiléia moto kejewuge eimijera iere Herodes. Nou Herodes rakojere nono Jerusalém ba kurireu keje nou meriji. Dukodire Pilatos ure Jesus utudo toro bagai.
LUK 23:8 Etaregodure Jesus apo Herodes ae dukeje Herodes jakaregodure pudui. Marigudu aidure tuiorduwo ia Jesus ro rakareuji kodi.
LUK 23:9 Dukodire Herodes unara raire Jesusji. Mare Jesus makokare boeji, rokare ia boeji.
LUK 23:10 Nono nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge emago pegare Jesusji nou Herodes biagai.
LUK 23:11 Nono Herodes ure tuwadaru očarodo Jesusji. Nou rakojere apowu tugobaigarege ere tuwadaru očarodo ji jamedu. Dukeje Herodes ure ia tugudau areia motureu tugu ji mare roreru nure ji. Dukeje ure Jesus utudo toro tuibagi Pilatos ae.
LUK 23:12 Dukodire nou meriji Herodes, Pilatos ere tumedagedo puče. Marigudu erdu pegare pui. Aino čare ere tubemegado pui.
LUK 23:13 Etaregodure tuibagi Pilatos ae pugeje. Dukeje Pilatos makore nou ure Judeu doge enomea maku Pao Kurireu aiwuge eimijeragei, nouia Judeu doge eimijeragei, nouia boei jamedu.
LUK 23:14 Akore: – Tagaregodure awu imedu Jesus apo woe itae. Tagagore uie boe emeardae pegado emeartorukawo tugimijerage čei pugeje. Aino inara raire ji woe taiamedu boe taegai. Mare iordukare ia tagagoino jiwu awu imedu ro pegareuji. Iordukare ia tagagoino jiwu awu imedu bataru pegareuji.
LUK 23:15 Ire utudo Herodes ae. Mare Herodes jordukare ia awu imedu ro pegareuji jamedu. Ure utudo tuibagi mato itae pugeje. Awu imedu ro pegareu kurimode dukeje imagomode tugobaigaregei ewo bito. Mare iagai ro pegareu remawu bokware dukodire imodukare edo bito.
LUK 23:16 Imode tugobaigarege edo boeto ji bukigu tabo nono imode ikera ra piji utuwo pugeje.
LUK 23:17 Páscoa kejewu meriji nou Judeu doge ero koiare nou Pilatos umode ia mugure baičoreu tadawu imedu tawuje utuwo nou boe epiji ainore rore tu tu je. Ainore erore joru jamedu boeji. Dukodire Pilatos meardaere tuwo Jesus utudo aino. Ia imedu iere Barrabás. Ure boe ewido. Ure boe ero pegado rugadu boe eimijeragei. Ro pegareu nure ema rugadu. Dukodire nou Barrabás rakojere baičoreu tada marigudu. Mare nou boe ere tumago rakado toro Pilatos ae. Egore: – Nou imedu Barrabás tawuje čenai utuwo pugeje! Awu imedu Jesus remo baičoreuto nou Barrabás mugato bitoduwo!
LUK 23:20 Pilatos meardaere tuwo Jesus utudo rugadu dukodire makore nou boei pugeje.
LUK 23:21 Mare ere tumago rakado toro Pilatos ae. Egore: – Bito ipo padure pugajejewu keje! Bito ipo padure pugajejewu keje!
LUK 23:22 Mare Pilatos makore nou boei pugeje. Akore: – Kodiba tagagoino? Ro pegareu pa? Iagai awu imedu ro pegareu remawu bokware dukodire imodukare tugobaigarege edo bito. Imode edo boeto ji bukigu tabo nono imode ikera ra piji utuwo pugeje.
LUK 23:23 Mare nou boe ere tugudu rakado toro Pilatos ae rugadu Jesus bitoduwo ipo padure pugajejewu keje rugadu! Ere tumago raido aino dukodire ere nou Pilatos meardae kodudo nou tumeardae rekodaji.
LUK 23:24 Dukodire Pilatos ure Barrabás utudo baičoreu piji mare makore nou boei Jesus bitodumoduie. Nou Barrabás imedu ro pegareu nure ema rugadu. Ure boe ewido. Ure boe emeardae pegado tumeartorukawo tugimijeragei pugeje. Mare nou meriji boe etaidure ji. Emagore Pilatoji uwo nou Barrabás tawuje baičoreu piji. Dukodire Pilatos ure utudo rugadu. Mare boe etaidukare Jesusji. Etaidure tuwo Jesus bito rugadu. Nono Pilatos ure Jesus maku tugobaigarege etai bitoduwo nono nou boe etaidu mogadure.
LUK 23:26 Du inodu rekodaji tugobaigarege eture toro Jesus apo. Jesus oredure nou tubadumode kejewu ipo tabo. Mare Jesus rakakare nou ipo tabo. Dukodire tugobaigarege emagore ia imeduji oreduwo nou ipo tabo Jesus rekodaji. Nou imedu iere Simão. Cirene ba kurireu pijiwu nure ema. Maigodu aino nou Simão aregodure ipoguru piji nou Jerusalém ba kurireu ka.
LUK 23:27 Boe emagare Jesus kodumode jiwu awaraji. Ia Jerusalém kejewuge areme etragudu rakare Jesus apo.
LUK 23:28 Mare Jesus makore nou aremei. Akore: – Tagragudukaba itabo. Tagragududo tagabo. Tagragududo tagorebo. Mare paga karega boe pegareu aregodumode tagae kodi. Boe pega rakamode boe etorei rugadu dukodire areme ekiarigodumode rugadu, etragudumode rugadu torebo. Boe emagomode aino: “Čerdure boe pegare čedorei rugadu dukodire boe pega kuričigore čei rugadu. Dukodi boe pegakare ore bokwareu aremei. Ore bokwareu areme egarere pudui.” Ainore boe egomode.
LUK 23:30 Mare paga karega. Boe pegamode boei rugadu. Dukodi nou meri keje boe emagomode tori ri butuwo tuwugeje, tuwiwo boe pegareu koda piji.
LUK 23:31 Iwidodumode nono boe ere joru tugu ia jerigi kidukareu to dumogadure. Mare ia meri keje tagi tamode nono jerigi pemegareure. Boe pegamode tai rugadu nono joru ure jerigi kowu dumogadure. Mare joru ji karega Jesus akoino ei. Boe pega raimodukare pudui. Dujire akoino ei. Toro ia meri keje boe pega kuričigomode Judeu dogei. Dujire akoino ei.
LUK 23:32 Tugobaigarege eture ia ime pobedu dogebo Jesus apo jamedu. Ro pegareuge nure emage. Ewidodumode jamedu.
LUK 23:33 Nono etaregodure ture boe ewido kejewu tori ao ka. Nou tori iere “Boe ewireuge etaora era jeta reo”. Nonore ere Jesus bito ipo padure pugajejewu keje. Ere nou ro pegareu ime pobedu doge ewido nono jamedu. Ia rakojere Jesus kana pemegareu jagwai. Metia rakojere Jesus kana pegareu jagwai jamedu.
LUK 23:34 Nono Jesus akore: – Iogwa. Awiago awu boe ero pegare i dupiji. Erduwakare kaba jiba turoino. Nou tugobaigarege ere Jesus ukudau areia pedo pui. Ere tuwadu rogu towuje tori rogu tabo tuiorduwo duboba umode tugeragu Jesus ukudau areiaji.
LUK 23:35 Boe etaregodure nou Jesus ae nou ipo padure pugajejewu ka. Eragojere nono taiwo tabo Jesus bimode dubagai. Nou boe eimijerage ekadakagirire Jesus jiwuge etaregodure nono tuiorduwo Jesus bire duji. Egore: – Are boe ekinorudo boe pegareu piji. Ča akinorudo jamedu nou ipo padure pugajejewu piji. Pao Kurireu ure tugeragu jiwu umode boe ekinorudowu mode aki rugadu dukeje amode akinorudo nou ipo padure pugajejewu piji.
LUK 23:36 Tugobaigarege etomeare turore Jesus jituji jamedu. Ere vinho kuru maku Jesus ai mare kudukare če. Nono emagore ji. Egore: – Judeu doge eimijera kurireu nure aki dukeje amode akinorudo awu ipo padure pugajejewu piji.
LUK 23:38 Nono ere ia ira atugodo. Ere bu Jesus aogeje. Ainore nou ira atugo ure: – Judeu doge eimijera kurireu reo.
LUK 23:39 Nou ro pegareu pobedu doge epadure ipo padure pugajejewu keje nono jamedu Jesus apo jamedu. Ia makore Jesusji. Akore: – Umode boe ekinorudowu nure aki dukeje amode akinorudo amode čeginorudo jamedu.
LUK 23:40 Mare nou metia makore nou timediaji. Akore: – Kočare akare aeku kidugo Pao Kurireuji rugadu. Boe pegare aino pai paro pegare kodi. Boe enure pawido ipo padure pugajejewu keje paro pegareu moriče. Mare awu pagaiadadawu imedu ro pega bokware rugadu. Dukodire ukare turugadu biwo aino pawi mogadure.
LUK 23:42 Dukeje makore Jesusji. Akore: – Akaregodumode pugeje boe eimijera kurireu ure aki dutabo dukeje awiabutudo iwugeje.
LUK 23:43 Jesus akore: – Boe jokodu jire imagomode ai. Awu meriji rugadu aragojemode itabo boe pemegareu keje.
LUK 23:44 Meri puredugodure pagaia ka dukeje boečodure tači je moto jamedu boe parugajeje. Boečodure rugadu. Nou boečo kodure kuri toro nou três hora ka.
LUK 23:45 Čare rore puku je nou areia kurireu bararere Pao Kurireu uwai ja tadawu ure tuwowuje nou bai ja oto piji moto ka.
LUK 23:46 Nono Jesus kudugodu rakare. Akore: – Iogwa. Iwinure aino mare imugudo akera keje. Makore aino dukeje bire.
LUK 23:47 Tugobaigarege eimijera jordure nou inoduji dukeje makore Pao Kurireu bagai baruto. Akore: – Boe rugadu. Awu imedu ro jetororeu nure ema rugadu.
LUK 23:48 Nou etaregodure taiwowo boe ewimode dujiwuge erdure Jesus bire duji dukeje ere tugirimi tuibagi tuwai ka pugeje tugiarigodu tabo. Ere boeto tumororaji nono Judeu doge ero mogadure tuwo boe erdudo tugiarigodure rugadu duji.
LUK 23:49 Mare nou Jesus metage edu kimore nono taiwo tabo. Nou aregodure Jesus rekodajiwuge Galiléia pijiwuge areme edu kimore nono jamedu taiwo tabo Jesus bire duji.
LUK 23:50 Ia Judéia moto kejewu Arimatéia ba kurireu kejewu imedu Judeu doge eimijera pemegareu iere José. Upagare umode boe ekinorudowu bagai boe emeartoruwo ji boe ewo tugimijerado Pao Kurireuče. Boe eimijerare ema jamedu mare meardaekare nono tumedage Judeu doge eimijerage emeardaere. Aidukare Jesus bitoduwo.
LUK 23:52 Barogwato Judeu doge emaragodumodukare. Dukodire nou José okwamagudure Pilatoji tuwo Jesus tugu ia tori poroto nou Sábado rekodajiwu meri keje. Pilatos akore pegakaie dukodire nou imedu José ure Jesus rawuje nou ipo padure pugajejewu piji. Ure upodo areia pemegareu tabo. Nono ure Jesus reko tumode tugu towu tori poro ka. Boe ere nou tori porodo mare ekare ia bireu tugu to raga. Ča nou José ure Jesus tugu nou tori poroto sexta feira meriji merirekodutabo.
LUK 23:55 Nou etaregodure Galiléia pijiwuge areme ekodure nou José rekodaji. Erdure José ure tugu tori poro to duji. Ere turemo nou tori poroto tuiorduwo Jesus meture nono duji.
LUK 23:56 Nono ere tugirimi tuwai ka pugeje tuwo roreboe pemegado tuwo reko nou Jesus biriji. Nono Sábado meri keje nou areme ere tamudo tuwai keje tumeartoruwo Judeu doge eno bakaruji nono turoiaji.
LUK 24:1 Domingo boečoto nou areme eture Jesus meture tadawu tori poro ka nou ture tugera pemegado jiwu roreboe tabo.
LUK 24:2 Etaregodure toro dukeje erdure nou Jesus meture tadawu tori poro jare duji. Sexta feira meriji ime ere nou tori poro mi ia tori kurireu tabo. Mare aino nou tori kurireu padukare nou tori poro keje pugeje.
LUK 24:3 Dukodire nou areme ere turemo. Etaiwore mare Jesus padukare nono pugeje.
LUK 24:4 Eragoje kimore nono tuiorduwa bokwa tabo dukeje nou areme etaiwore tubiji. Erore puku je erdure Pao Kurireu utugarege baru tadawugei. Ere pobe. Ekudau kigadure ei rugadu. Kigadure nono boeiaragudu mogadure boe etaiwowo ji.
LUK 24:5 Ča nou areme epagudugodure rugadu. Ere tubu jodo moto keje. Ere tuie jodo jamedu. Nono nou baru tadawuge egore: – Kodiba tagaregodure woe bireu metumode tadawu tori poro ka?
LUK 24:6 Tardumodukare tagaiwore bagaiwuji. Tagaiwore bagaiwu jewodure pugeje dukodire rakojekare woe pugeje. Marigudu, toro Galiléia moto keje, ure tawie turomode jiboeji. Tawiabutudo nou makore jiboe keje.
LUK 24:7 Akore aino: “Imagudumode ro pegareuge etai. Emode iwido ipo padure pugajejewu keje. Mare merimode pobe metia bokware dukeje iewodumode pugeje.” Ainore akore tai marigudu.
LUK 24:8 Nono nou areme ewiabuture nou Jesus makore jiboe keje rugadu. Dukodire čare eregodure boe piji toro nou Jesus ure jorduwadowuge etae tureadoduwo tuiordure jiboeji tumeardure jiboeji eiamedu boe ewiagai.
LUK 24:10 Nou areme ekiere Maria Madalena, Joana, Maria. Nou Maria Tiago uče nure ema. Ia areme ekodure ebo jamedu. Nou areme etaregodure nou Jesus ure jorduwadowuge etae dukeje ereadodure tuiordure jiboe jamedu boeji nou Jesus ure jorduwadowuge ime ewiagai.
LUK 24:11 Jesus ure nou ime erduwado tuwo etudo tuwadaru tabo boe ewagai moto jamedu boe parugajeje. Mare nou areme ereadodure tuiordure jiboeji nou uture Jesus bataru tabowuge ewiagai dukeje nou ime emeardaere pagare egoino duji. Emeartorukare nou aremei.
LUK 24:12 Mare Pedro rekodure toro nou Jesus meture tadawu tori poro ka. Aregodure toro dukeje ure turemo mare jordukare boeji. Tu nou areia jire jordure. Nono ure tugirimi tuibagi tuwiagoro tabo. Meardaere tudada nuba boere?
LUK 24:13 Nou meri keje rugadu nouia Jesus ure jorduwadowuge ere pobedu doge eture Jerusalém ba kurireu piji toro ia boe eda ka. Nou boe eda iere Emaús. Nou Emaús rakojere dez quilômetros Jerusalém ba kurireu piji.
LUK 24:14 Nou ime pobedu doge ekodure nou Emaús kawu awaraji dukeje emagore pui tuiordure jiboeji Jerusalém ba kurireu tada.
LUK 24:15 Emagore aino pui dukeje Jesus aregodure eregodaji tugoduwo ebo jamedu.
LUK 24:16 Etaiwore ji mare erduwakare ji.
LUK 24:17 Nono Jesus makore ei. Akore: – Kaboba jiba tagagoino pui tagodui aino awaraji? Ere tuwuredo ča je. Ekiarigodure rugadu.
LUK 24:18 Ia iere Cleopas. Emare makore Jesusji. Akore: – Boe pegare Jerusalém ba kurireu tada rugadu. Nou Jerusalém kejewuge eiamedu boe erduware nou inoduji. Kočare arduwakare?
LUK 24:19 Jesus akore: – Kaba jiba boe eroino? Iwie. Egore: – Boe ero pegare Jesusji rugadu. Nazaré pijiwu Jesus jire eroino. Makore Pao Kurireu bataru jiwu nure ema. Pao Kurireu aidure ji. Boe etaidure ji jamedu. Ro rakare rugadu turo jamedu boe tabo. Mako pemegare jamedu. Jorduware rugadu Pao Kurireu bataruji boe eiamedu boe kori.
LUK 24:20 Mare nou pagimijerage nou ure Judeu doge enomea maku Pao Kurireu aiwuge eimijerage, nouia pagimijerage jamedu ero pegare ji. Ere maku nouia boe eimijera kurireu ai. Ere tumeardae pegareu maku nou boe eimijera kurireu ai jamedu uwo Jesus maku tugobaigarege etai ewo bito. Dukodire ere bito ipo padure pugajejewu keje rugadu.
LUK 24:21 Čemeartorure Jesusji. Čemeardaere umode pawobe Judeu doge ekinorudo boe pegareuge epiji duji. Ča iaboe kimore. Merire pobe metia bokware jamedu.
LUK 24:22 Awu meriji ia čerduware jiwu areme ere čeku kidugo rugadu. Eture nou ere Jesus tugu towu tori poro ka.
LUK 24:23 Mare erdukare ji nono. Ere tugirimi tuibagi tureadoduwo nou boe ewiagai tuiorduie Pao Kurireu utugarege baru tadawugei. Nou Pao Kurireu utugarege baru tadawuge egoie Jesus jewoduie pugeje.
LUK 24:24 Ia čemedage eregodure toro nou tori poro ka jamedu. Erdure jiboe ure nono nou areme emagore jiboe mogadure. Erdukare Jesusji rugadu.
LUK 24:25 Nono Jesus makore nou imei. Akore: – Tagaora rakare boe emagore jiwu Pao Kurireu bakaruji. Dukodire tarduwa jokodukare makore Pao Kurireu bataru jiwuge emagore jiboeji. Tameartoru pemegakare ji jamedu kodi.
LUK 24:26 Ere boe ewie marigudu boe pegamode nou umode boe ekinorudowuji rugadu. Dukejere rutumoduie baruto pugeje. Ainore nou makore Pao Kurireu bataru jiwuge egore marigudu.
LUK 24:27 Nono Jesus ure erduwado nou padure bapera kejewu Pao Kurireu bataru makore pudui jiboeji. Makore Moisés ure bu bapera kejewu Pao Kurireu bataruji ewiagai. Makore nouia makore Pao Kurireu bataru jiwuge ewadaruji jamedu tuwo erduwado nuba boemode pudui. Mare erduwakare raga puduire Jesus akoino duji.
LUK 24:28 Ča etaregoduiago nou boe eda ka dukeje Jesus utuiago nouia awaraji pugeje.
LUK 24:29 Mare nou ime emagore ji. Egore: – Mato čedabo čewai ka. Merirekodu. Akamudo čewai keje jao. Dukodire Jesus uture ebo ewai ka.
LUK 24:30 Etaregodure dukeje ere tumugudo ira keje togwagewo. Nono Jesus imadure Pao Kurireu apo nou tuge amireu paru tabo. Nono ure nou boe eke amireu kado puiato. Ure ia maku nou ime etai.
LUK 24:31 Dukejere nou ime erduwagodure Jesus nuie ema duji rugadu. Mare Jesus okware tači epiji pugeje.
LUK 24:32 Emagore pui. Egore: – Pagodure awaraji dukeje ure parduwado Pao Kurireu bataruji. Dukejere paebogodure nou makore pai jiboeji rugadu.
LUK 24:33 Dukodire ere tugirimi tumara tabo rugadu Jerusalém ba kurireu ka nou tumedage ewagai tureadoduwo ewiagai. Mare Jesus ure Simão Pedro jordudo pudui. Nono Pedro readodure nouia Jesus ure jorduwadowuge ewiagai dukodire ere bato pui tumagowo pui. Egore: – Boe jokodu! Pagimijera jewodure pugeje! Simão Pedro jordure ji!
LUK 24:35 Nono nou pobedu doge ereadodure nou boe ewiagai tuiorduie Jesusji jamedu. Ereadodure tuiorduie ji jamedu duji tugoduie Emaús kawu awaraji dutabo. Ereadodure tuiorduware Jesusji ure amireu kado dukeje erduware Jesus uiure ema duji.
LUK 24:36 Emago kimore pui dukeje Jesus jepadure tači etoiado. Akore: – Itaregodure pugeje.
LUK 24:37 Nou boe epagudugodure rugadu. Emeardaere aroe uiure ema.
LUK 24:38 Mare Jesus makore ei. Akore: – Mure kodiba tabagudure? Mure kodiba tamororamagadure iwadaruji tarduwa jokodukare imire iroino duji?
LUK 24:39 Tagaiwodo ikeraji, iwureji. Imi rugadu reo! Aroe karegure imi. Aroe mode imi dukeje ikodu modukare iwiri modukare. Ča tagera pagado i dukeje tameartorumode i.
LUK 24:40 Makore aino ei dutabo ure erdudo tugeraji, tuwureji.
LUK 24:41 Ebogodure ji rugadu. Egarere pudui rugadu. Mare emeartoru jokodukare ji kimo. Nono Jesus unarare ei ia eke bagai togwagewo.
LUK 24:42 Ere ia karo kodu maku ai. Nono Jesus ure ko egai.
LUK 24:44 Nono Jesus ure nou boe emeardae pemegado tuwo erduwado. Akore: – Iragojere tagabo dukeje ire tawie boe mode aino i duji. Ainore Moisés, makore Pao Kurireu bataru jiwuge, ere bu bapera keje iboe jamedu boe jeture pudui rugadu.
LUK 24:46 Egore nou umode boe ekinorudowu bimoduie mare merimoduie pobe metia bokware dukeje jewodumoduie pugeje.
LUK 24:47 Egore nou umoduie boe ekinorudowu ie taboie boe etumoduie moto jamedu boe parugajeje tuwo boe eiamedu boe ewie Pao Kurireu bataru pemegareuji boe ewo tugera ra tumeardae pegareu piji, boe emagowo turo pegareuji Pao Kurireu biagai Pao Kurireu biagoduwo nou ero pegareu piji. Boe etumoduie nou bataru tabo Jerusalém ba kurireu kejewuge etae boetoji. Nono etumoduie nou bataru tabo moto jamedu boe parugajeje. Ainore Pao Kurireu akore marigudu.
LUK 24:48 – Aino čare nou Pao Kurireu bataru jeture pudui rugadu. Nou umode boe ekinorudowu nure imi. Tagire tarduware i rugadu. Tagire tardure iro rugadu boeji. Dukodire ikie jire tamode boe ewie rugadu imagore jiboeji irore jiboeji nono Pao Kurireu bataru mogadure. Imode Iogwa Kurireu Uwari utudo tagae. Mare tabagado bagai woe Jerusalém ba kurireu keje. Iogwa Kurireu Uwari aregodumode tagae woe. Ema umode taragado rugadu. Nono tareadodumode imagore jiboeji irore jiboeji boe eiamedu boe ewiagai moto jamedu boe parugajeje.
LUK 24:50 Nono Jesus uture ebo Jerusalém ba kurireu piji nou boe eda Betânia kawu awaraji. Epuredugodure Betânia ka dukeje ure tugera rakojedo ewugajeje tumago pemegawo eiogi.
LUK 24:51 Mako kimore eiogi dukeje uture epiji. Dukeje čare ruture baruto rugadu.
LUK 24:52 Ere tubu jodo moto keje tumago pemegawo ji rugadu. Dukeje čare ere tugirimi tuibagi Jerusalém ba kurireu ka. Eiamedu boe egarere pudui rugadu.
LUK 24:53 Nono eture Pao Kurireu uwai ka. Edure tu nono rugadu. Emago pemegare Pao Kurireuji rugadu nou Pao Kurireu uwai tada tu tu je.
JOH 1:1 Awu motokare raga mare Bakaru Remawu ure. Awu Bakaru Remawu mugure Pao Kurireu apo rugadu. Awu Bakaru Remawu Pao Kurireu nure ema.
JOH 1:2 Bakaru Remawu mugure Pao Kurireu apo boetoji. Mare Jesus jire inagoino.
JOH 1:3 Pao Kurireu koiare ure awu Bakaru Remawu udo boe jamedu boe towuje. Ia ukare towujeboe bokwakare moto jamedu boe parugajeje, baru tadaboe jamedu. Ure boe jamedu boe towuje rugadu.
JOH 1:4 Nou Bakaru Remawu koiare ure boe edudo aino. Nou Bakaru Remawu ure nono ia jorugu pemegareu mogadure. Nou Bakaru Remawu umode boe erduwado turo pegareuji, turore jiboeji boečoji nou bakaru remawu ure nono jorugu mogadure. Mare jorugu ji karega inagoino. Nou Bakaru Remawu ure boe erduwado boe pemegareuji rugadu. Dujire inagoino. Nou Bakaru Remawu ure boe erduwado dukeje boe erduwamode turo pegareuji rugadu. Dujire inagoino. Ro pegareuge ere nono boečo mogadure. Mare boečo ji karega inagoino. Ro pegareuge erore jiboe pegare. Dujire inagoino. Mare ro pegareuge emodukare Bakaru Remawu akedudo jamedu.
JOH 1:6 Pao Kurireu ure tudugare imedu arego mato pagae. Nou imedu iere João Batista.
JOH 1:7 João Batista aregodure tumagowo boei Jorugu Pemegareu paru tabo boe erduwawo ji emeartoruwo ji jamedu.
JOH 1:8 Jorugu Pemegareu karegure ema. Mare aregodure tuwo boe erduwado Jorugu Pemegareuji.
JOH 1:9 Jorugu remawu jire João Batista akoino. Urugumode boe eiamedu boei. Mare jorugu karega. Jesus jire akoino.
JOH 1:10 Pao Kurireu koiare ure Bakaru Remawu udo moto towuje. Nou Bakaru Remawu aregodure moto ka. Jesus jire inagoino. Mare moto kejewuge erduwakare ji.
JOH 1:11 Aregodure ture towujewu moto ka tuwobe etae, mare uwobe etaidukare ji.
JOH 1:12 Iagere etaidure ji. Emeartorure ji. Nou meartorure jiwugere ure Pao Kurireu oredo emage.
JOH 1:13 Ewodukare Pao Kurireu piji nono boe etore ewodu moga tujemage epiji dumogadure. Mare Pao Kurireu ure toredo emage. Emeartorure pudui dukodire ure toredo emage.
JOH 1:14 Bakaru Remawu ure imedudo pudumi. Rakojere pagabo. Emare meardu kurire boei rugadu. Emare ro pemegare boei jamedu. Boe jokodu jire akoino boe emeartoruwo ji rugadu. Pardure Pao Kurireu ure maku aiwu ro kurireuji. Pao Kurireu onaregedu mitodu nure ema dukodire ure turo rakareu maku nou tonaregedu ai.
JOH 1:15 João Batista ure boe ewie ji. Akore: – Dujire ire tawie marigudu. Inagore aregodumoduie iregodaji. Kurimoduie ikori. Iwodukare raga dukeje emare rakojere baru tada marigudu.
JOH 1:16 Emare meardu kurire boei rugadu dukodire ro pemegare paiamedu boeji. Ukare turo pemegareu akedudo.
JOH 1:17 Marigudu Pao Kurireu ure tumeardae maku Moisés ai Judeu doge eno bakaruwo ema. Mare maigodu aino čare Jesus Cristo ure boe erduwado Pao Kurireu meardu kurire boei rugadu duji. Ure boe erduwado Pao Kurireu ro pemegareuji. Ure boe erduwado bakaru remawuji.
JOH 1:18 Marigudu boe erdukare Pao Kurireuji. Pao Kurireu onaregedu ure mitotu je. Ure nono tuo mogadure. Mugure Pao Kurireu meki. Dukodire ure boe erduwado Pao Kurireuji rugadu.
JOH 1:19 Jerusalém ba kurireu kejewuge boe eimijerage ere ia boe etudo João Batista ae. Iage Levita doge nure emage. Iage ure Judeu doge enomea maku Pao Kurireu aiwuge nure emage. Enarare João Batistaji. Egore: – Ioguduba nure aki?
JOH 1:20 João Batista mako pemegare ei. Ukare tumeardae biado epiji. Akore: – Pabagare bagaiwu umode boe ekinorudowu karegure imi.
JOH 1:21 Egore: – Mare ioguduba nure aki? Elias nure aki? João Batista akore: – Boro. Elias karegure imi. Egore: – Pabagare bagaiwu makore Pao Kurireu bataru jiwu nure aki? João Batista akore: – Boro.
JOH 1:22 Egore: – Dukodi čewie. Ioguduba nure aki? Čedaidure čewo čegimijerage ewie kaboba ure aki. Emagere ere čerojino čerduwawo ai. Nuba akagomode čei?
JOH 1:23 Dukejere João Batista makore Pao Kurireu bataruji ewiagai. Makore Isaías ure bu bapera kejewu Pao Kurireu bataruji ewiagai. Akore: – Kudugodure boe maereu kejewu nure imi. Ainore inagore boe ero pemegaiago Pagimijera aregoduwo boe etae.
JOH 1:24 Jerusalém ba kurireu kejewuge boe eimijerage ere fariseu doge etudo nou João Batista ae jamedu. Čare nou fariseu doge emagore João Batistaji jamedu. Egore: – Kočare pabagare bagaiwu umode boe ekinorudowu karegure aki. Elias karegure aki. Pabagare bagaiwu makore Pao Kurireu bataru jiwu karegure aki. Kodiba are boe etao pegodo?
JOH 1:26 João Batista akore: – Imi ire boe etao pegodo pobo tabo. Mare ia tarduwakare jiwu rakojere tagabo.
JOH 1:27 Emare aregodumode iregodaji. Mare ipogurumode ipureduwo ji boe kurireu karegure imi dukodi.
JOH 1:28 Jordão po okwa abowu kejere João Batista akoino nou boei ia boe eda keje. Nou boe eda iere Betânia. Nonore João Batista ure boe etao pegodo.
JOH 1:29 Nou barogwato João Batista jordure Jesus kodure pudae duji. Akore: – Makudure boe ero pegareu mori čewu Pao Kurireu aku ovelha reo. Emare umode boe ero pegareu barigu boe epiji. Jesus jire João Batista akoino.
JOH 1:30 João Batista makore kimo. Akore: – Dujire ire tawie marigudu. Inagore ia imedu aregodumoduie iregodaji. Kurimoduie ikori. Iwodukare raga dukeje rakojere baru tada marigudu.
JOH 1:31 Imi iorduwakare ioguduba ure ema. Mare ire boe etao pegodo pobo tabo. Nono Judeu doge erdure irore jiboeji dukeje erduwamode nou makudure boe ero pegareu mori čewu aregodumode kuri aino rugadu.
JOH 1:32 João Batista ure boe etao pegodo mare ure boe erduwado jamedu. Akore: – Iordure Pao Kurireu Uwariji rugadu. Ure metugodo pudumi. Ure turawuje baru piji. Ure tumugudo Jesus keje.
JOH 1:33 Dukodi aino iorduware ji. Pao Kurireu ure iwie marigudu. Akore: “Ardumode Iwariji. Umode turawuje baru piji tuwo tumugudo nou imedu kanaura keje. Nou imedu koiare umode Iwari metudo boe eiamedu boe etada.”
JOH 1:34 João Batista mako kimore. Akore: – Iordure ji rugadu. Dukodire inagoino tai. Awu Jesus Pao Kurireu Onaregedu nure ema rugadu.
JOH 1:35 Nou barogwato João Batista rakojere nono ia ture jorduwadowugebo. Ere pobetu je.
JOH 1:36 Nono jordure Jesusji. Merure awaraji. Nono João Batista akore: – Makudure boe ero pegareu mori čewu Pao Kurireu aku ovelha reo.
JOH 1:37 Nou ime pobedu doge emeardure nou João Batista bataruji dukeje eture Jesus rekodaji.
JOH 1:38 Jesus aiwore tuibagi dukeje jordure nou ime pobedu doge ekodure turegodaji duji. Unarare ei. Akore: – Kaba bagaiba taroino? Egore: – Čerduware jorduwareu nure aki duji. Kaiba amugure?
JOH 1:39 Jesus akore: – Mato itabo tarduwo. Merirekodutabore akoino ei. Nono eture Jesus apo. Erdure mugureuji. Eragojere apo nono nou meriji.
JOH 1:40 Nouia imedu iere André. Simão Pedro umana nure ema.
JOH 1:41 Ča uture Jesus piji tiemaru tabo tuwie Simão Pedro bagai. Jordure ji dukeje makore ji. Akore: – Čerdure umode boe ekinorudowuji. (Grego bataru tabore egore “Cristo” aino ji.) Pawobe epagare bagaiwu nure ema rugadu.
JOH 1:42 Nono André uture tuwie Simão Pedro apo Jesus ae. Etaregodure ae dukeje Jesus aiwore Simão Pedroji. Nono Jesus makore: – Akiere Simão. João onaregedu nure aki. Mare awu inodu otobiji akiemode Cefas.
JOH 1:43 Nou barogwato Jesus ure tumeardae tawuje tuduwo Galiléia moto ka. Nono jordure Filipiji. Makore ji. Akore: – Ako itabo.
JOH 1:44 Nou Filipe boture kejewu ba kurireu iere Betsaida. Nonore André, Pedro emugure jamedu.
JOH 1:45 Ča Filipe uture imedu Natanael bagai jamedu. Jordure ji dukeje Filipe makore ji. Akore: – Čerdure boe epagare bagaiwuji. Dujire Moisés ure maku Judeu doge etaiwu bakaru akoino. Dujire jaoboe emagore Pao Kurireu bataru jiwuge ere bu bapera keje jamedu. Iere Jesus. José onaregedu nure ema. Mugure kejewu ba kurireu iere Nazaré.
JOH 1:46 Mare Natanael akore: – Boe pemegareu aregodumodukare Nazaré piji. Mare Filipe akore: – Mato itabo arduwo.
JOH 1:47 Jesus jordure Natanael kodure pudae duji. Dukodire čare makore boei. Akore: – Judeu remawu nure ema. Marigudu ukare boe ekiripagado.
JOH 1:48 Natanael meardure Jesus akoinoduji. Nono akore: – Kočare arduware i na? Jesus akore: – Iorduware aragojere figo i paru akinaigodu duji. Dukejere Filipe aregodure akae. Iragojekare mare iorduware.
JOH 1:49 Nono Natanael akore: – Jorduwareu nure aki rugadu. Pao Kurireu Onaregedu nure aki rugadu. Israel doge eimijera kurireu nure aki rugadu.
JOH 1:50 Jesus makore ji pugeje. Akore: – Iorduware aragojere figo i paru duji dukodire ameartorure i. Iro biagareu reo. Iro kurimode rugadu kimo awu iro biagareu kori.
JOH 1:51 Nono Jesus makore nou boe dogei. Akore: – Boe jokodu jire inagoino tawiagai. Imedu Onaregedu remawu nure imi rugadu. Tardumode barure tuiado duji. Tardumode Pao Kurireu utugarege baru tadawugei etu pemegamode i rugadu.
JOH 2:1 Merire pobe dukeje Jesus uture Caná ba kurireu ka ia boe emugure puapowuge ewadae ka. Caná ba kurireu mugure Galiléia moto keje. Jesus uče rakojere nou ba kurireu keje jamedu. Boe emagore Jesus bagai nou ure jorduwadowuge ewagai jamedu etuwo nou boe ewadae ka. Dukodire čare eture.
JOH 2:3 Eragojere nono ji je. Nono nou boe eke vinho kuru akedure. Dukeje čare Jesus uče makore nou tonaregeduji. Akore: – Vinho kuru akedu.
JOH 2:4 Jesus makore tuje bataru jipagi. Akore: – Pao Kurireu koiare umode imaragodae maku inai. Mare meri aregodukare ka raga iwo Pao Kurireu maragodae towuje.
JOH 2:5 Nono Jesus uče makore boe etugaregei. Akore: – Tarodo nono Jesus makore tai dumogadure.
JOH 2:6 Poridoge enodo padu kejewugere seis nono pobo tabo nou boe ewo taimo Judeu doge turoiaji. Pobo oto padure 80 rabodu, oto padure 100 rabodu tu tu je nou pori jamedu boe etada.
JOH 2:7 Nono Jesus makore nou boe etugaregei. Akore: – Awu poridoge ekorau pobo tabo. Dukeje ere korobadudo rugadu pobo tabo.
JOH 2:8 Nono Jesus makore ei pugeje. Akore: – Ča nouia pobo tawuje tawo reko toro nou boe ewadae kejewu boe eimijera ae kuduwo če. Dukeje čare ere ia pobo tawuje nou pori piji. Ere reko toro nou boe ewadae kejewu boe eimijera ae.
JOH 2:9 Mare Jesus ure vinhodo nou poboče. Nono nou boe ewadae kejewu boe eimijera kudure če. Mare jorduwakare kaiba pijiba nou vinho kuru aregodure. (Mare nou boe etugarege erduware.) Dukodire čare nou boe ewadae kejewu boe eimijera makore nou uwiremodewu imedu bagai.
JOH 2:10 Akore ji: – Vinho kuru pemegareure boe emode maku boetoji tuwadae keje. Vinho kuru pemegareu akedure dukeje boe emode vinho kuru mori bokwareu maku pugeje. Ainore boe erore. Aki čare are vinho kuru pemegareu maku aino boigodu.
JOH 2:11 Jesus ure vinhodo nou poboče. Boetojiwu turo rakareu jire roino nono nou Caná ba kurireu keje. Caná ba kurireu mugure Galiléia moto keje. Nonore ure boe erdudo turagare duji. Ure boe erdudo turo rakamode rugadu duji. Nono nou ure jorduwadowuge emeartorure ji rugadu.
JOH 2:12 Nou turoino dupiji Jesus uture Cafarnaum ba kurireu ka tuje apo, tuwiemagebo, ture jorduwadowugebo jamedu. Rakojere nono du meri makakare ji rugadu.
JOH 2:13 Boe puredugodure Judeu doge ewadumode ia tuwadae ji du ka. Nou ewadae iere Páscoa. Dukodire Jesus uture Jerusalém ba kurireu ka.
JOH 2:14 Aregodure toro dukeje ure turemo Pao Kurireu uwaito. Nonore jordure boe ere toe maku duji, ere tagu tapira doge, tagu ovelha doge, tagu metugoe emagu diero bagai jordure ere diero maku puai puibagi duji.
JOH 2:15 Jesus korigodure ei erore aino duji. Ure ia barogo birido nono bukigure. Dukeje čare ure nou boe doge eguie rugadu boe etudo nou Pao Kurireu uwai piji nou barogo biri bukigu tabo. Ure tapira doge etudo. Ure ovelha doge etudo. Ure nou boe enoe padure kejewu ira jamedu boe butudo tuwo nou eno diero jamedu boe barigu epiji moto ka.
JOH 2:16 Nono mako rakare nou ure metugoe emaguwugei. Akore: – Tadudo awu bai piji nou tagagu metugoebo. Tare Iogwa Kurireu uwaido nono boe makudure kejewu bai mogadure diero bagai tagoče. Tarokaba aino pugeje!
JOH 2:17 Nou Jesus ure jorduwadowuge ewiabuture Pao Kurireu bataru keje. Nou Pao Kurireu bataru akore: – Imeardu kurire Pao Kurireu uwaiji rugadu. Ietu pemegamode ji rugadu.
JOH 2:18 Judeu doge etaidukare nou Jesus rore jiboeji. Enarare ji. Egore: – Čemeartugure ai. Čegimijera karegure aki rabodu. Ča ia aro rakareu towuje čemeartoruwo ai rugadu. Aro rakareumode dukeje čegimijera mode aki arowo aino aro mogadure woe Pao Kurireu uwai tada.
JOH 2:19 Dukodi čare Jesus makore ei. Akore: – Awu Pao Kurireu uwai butudo. Nono merimode pobe metia bokware dukeje imode rakojedo pugeje.
JOH 2:20 Nou boe eimijerage emeartorukare ji. Egore: – Joru oto padure quarenta e seis boei ewo awu Pao Kurireu uwai iado. Merimode pobe metia bokware dukeje amodukare awu Pao Kurireu uwai towuje pugeje.
JOH 2:21 Mare Pao Kurireu uwai ji karega Jesus akoino. Tuwiri, tugodu jire akoino. Mare tuwimode du jire akoino merimode pobe metia bokware dukeje tuiewodumoduie pugeje. Du jire Jesus akoino.
JOH 2:22 Jewodure dukeje ure ture jorduwadowuge ewiabutudo awu tuwadaru keje. Dukodire emeartorure Pao Kurireu bataruji rugadu. Emeartorure Jesus bataru jamedu boeji.
JOH 2:23 Nono Jesus rakojere Jerusalém ba kurireu keje jii toro nou Judeu doge ewadae Páscoa akedu ka. Ro rakare nono. Boe erdure Jesus ro rakareuji dukeje emeartorugodure ji.
JOH 2:24 Mare Jesus jorduware nou boei emeartoru raimodukare pudui duji. Dukodire Jesus meartorukare nou boei.
JOH 2:25 Boe ekare Jesus jorduwado nou boei. Jorduware boe eiamedu boe emeardaeji marigudu.
JOH 3:1 Ia Judeu doge eimijera iere Nicodemos. Fariseu nure ema.
JOH 3:2 Ia boečoji uture Jesus ae tumagowo ji. Akore: – Boe eimijera nure aki. Pao Kurireu ure akarego mato čedae rugadu. Ema koiare ure ado boe erduwado rugadu. Pao Kurireu rakojemodukare akabo dukeje aro rakamodukare. Mare aro rakare rugadu. Dukodire čerduware Pao Kurireu merure akabo rugadu duji.
JOH 3:3 Jesus akore: – Boe jokodu jire inagoino ai. Boe ewodumode pugeje kodire eimijeramode Pao Kurireuče pugeje turuduwo baruto.
JOH 3:4 Nono Nicodemos akore: – Nuba imedu romode tuwoduwo pugeje? Umodukare turemo tuje kurito tuwoduwo pugeje.
JOH 3:5 Mare Jesus akore: – Boe jokodu jire inagoino ai. Boe ewodure tuje piji dukodire emugure woe moto keje. Pao Kurireu Uwari koiare umode boe ewodudo pugeje. Mare ewoduwo pugeje ji karega inagoino. Pao Kurireu Uwari umode boe edo tuwia ra tuiordae tumeardae pegareu piji. Dujire inagoino. Ure edo tuwia ra tuiordae pegareu piji dukeje epemegamode nono ure taimowu biri kabi dumogadure. Mare ewiri ji karega inagoino. Emeardae pegareu jire inagoino boe ewo barigu tubiji. Pao Kurireu Uwari umode emeardae pemegado ewo tugimijerado Pao Kurireuče turuduwo baruto. Dujire inagoino.
JOH 3:7 Dukodire inagoino ai awoduwo pugeje. Kodire apagudugodukaba awu iwadaruče. Boe rakakare ai arduwawo awu iwadaruji.
JOH 3:8 Ia iwadaru pugeje. Bakuru jomode taidureu ka. Boe emeardumode bakuru akoji mare erduwamodukare kaibowu pijiba nou bakuru aregodure. Boe erduwakare kaiba nou bakuru kodumode. Pao Kurireu Uwari rore nono bakuru mogadure. Mare bakuru ji karega inagoino. Pao Kurireu Uwari koiare umode boe emeardae pemegareu maku etai mare nou boe erduwakare kaibowu pijiba nou tumeardae pemegareu aregodure pudae. Dujire inagoino.
JOH 3:9 Nono Nicodemos akore: – Nuba akagore jiboe mode boei?
JOH 3:10 Jesus akore: – Israel doge eimijera nure aki. Are erduwado Israel doge eno bakaruji. Kodiba arduwakare inagoino jiboeji?
JOH 3:11 Boe jokodu jire inagoino. Imagore iorduware jiboeji tawiagai. Ireadodure iordure jiboeji tawiagai. Mare taiamedu boe tameartorukare iwadaruji.
JOH 3:12 Imagore awu moto kejewu boeji tawiagai mare tameartorukare ji. Imagomode baru tadawu boeji tawiagai jamedu dukeje tameartorumodukare ji rugadu.
JOH 3:13 Imedu Onaregedu nure imi. Iragojere baru tada marigudu. Iaboe iaboe erudukare baruto rugadu. Itaregodure baru piji mato moto ka.
JOH 3:14 – Marigudu Israel doge eragojere toro boe maereu keje dukeje Moisés ure ia merirido nono awagure ipo oto keje. Imedu Onaregedu padumode ipo keje nono nou awagu umogadure.
JOH 3:15 Nono meartorure iwuge emugumode Pao Kurireu apo rugadu. Du akedumodukare rugadu. Ewimodukare pugeje.
JOH 3:16 Pao Kurireu meardu kurire boei rugadu. Dukodire ure tonaregedu mitodu rawuje baru piji mato boe etae. Meartorure jiwuge eiamedu boe ewimodukare pugeje. Meartorure jiwuge emugumode Pao Kurireu apo rugadu. Du akedumodukare rugadu.
JOH 3:17 Pao Kurireu ure tonaregedu rawuje mato moto ka mare tuwo boe ero pegareu morido. Ukare rawuje uwo boe pegado boei. Mare ure rawuje tuwo boe ekinorudo etukawo bope doge eda kejewu joru pegareu ka.
JOH 3:18 – Pao Kurireu umodukare meartorure iwuge boe pegado ei. Mare meartorukare iwugeire Pao Kurireu umode edo turo pegareu morido rugadu. Pao Kurireu Onaregedu mitodu nure imi.
JOH 3:19 Nou ro pegareuge etaidukare joruguji. Emodukare tuburedo ji. Boečo jire etaidure turo pegawo boe erdukawo turoino duji. Mare ro pemegareuge emode tuburedo joruguji urugu pemegawo pudui boe erduwo tumeartorure Pao Kurireu jituji. Čare jorugu pemegareu aregodure moto ka. Mare jorugu ji karega inagoino. Ire inagoino. Mare kočare boe emeardu kurire boečoji jorugu piji. Mare boečo ji karega inagoino. Nou boe ero pegareu jire inagoino emeardu kurire turo pegareuji kodi. Etaidukare tumeartoruwo i rugadu. Dukodire Pao Kurireu umode edo turo pegareu morido rugadu.
JOH 3:22 Nonore Jesus uture ture jorduwadowugebo toro Judéia moto ka. Nonore rakojere jii je. Ure boe etao pegodo nono.
JOH 3:23 João Batista ure boe etao pegodo jamedu boe eda Enom keje. Padu puredure boe eda Salimji. Pobo kurireu mugure nono.
JOH 3:24 (Boe eimijera pegareu ukare João Batista tugu baičoreuto raga.)
JOH 3:25 João Batista ure jorduwadowuge emago raire ia Judeu imeduji. Emeardaekare nono pumeardae mogadure tuwo taimo turoiaji tuwo turemo Pao Kurireu uwaito. Dujire emago raire pui.
JOH 3:26 Nono čare eture João Batista ae tumagowo ji. Egore: – Jorduwareu nure aki. Awiabuture čowu rakojere toro Jordão po okwa bakowu kejewu imedu keje? Rakojere pagabo toro. Amagore nou imedu paru tabo čei. Ča unure boe etao pegodo jamedu nono paro mogadure. Dukodi čare boe eture toro ae čebiji.
JOH 3:27 João Batista makore nou ture jorduwadowugei. Akore: – Boe emodukare boe pemegado pudui tao biji. Tu Pao Kurireu koiare umode boe pemegado boei rugadu.
JOH 3:28 Tarduware iwadaruji. Ire tawie marigudu. Inagore: – Pabagare bagaiwu umode boe ekinorudowu karegure imi. Pao Kurireu koiare ure itarego umode boe ekinorudowu otodai.
JOH 3:29 Imedu ure timedia bie tuwiremoduie duji. Dukodire metia ure boe pemegado timedia togi timedia uwiremode dukodi dukeje boe ewadumode. Ure boedo turugadu dukeje upagare nou uwiremodewu bagai. Meardure uwiremodewu kudu jitu dukeje jakaregodumode pudui rugadu. Ire nono nou uwiremodewu metia mogadure. Ire boedo turugadu Jesus aregodumode kodi. Čare aregodure dukodire iagarere i rugadu nono nou uwiremodewu metia mogadure. Jesus ro pemegare boei dukodire iagarere i. Ure boe etao pegodo dukodire iagarere i.
JOH 3:30 Boe etaidu kurimode ji rugadu. Ewiagodumode ipiji. Du pegakare i rugadu. Ure turugadu iagai.
JOH 3:31 João Batista mako kimore. Akore: – Aregodumode baru pijiwu ro kurimode paiamedu boe kori. Boture moto kejewu jorduware moto kejeboe jamedu boeji. Makomode moto keje boeji. Mare aregodure baru pijiwu ro kurimode moto kejewu eiamedu boe ekori.
JOH 3:32 Makomode tuiordure jiboeji tumeardure jiboeji boe ewiagai mare emeartorumodukare ji.
JOH 3:33 Mare meartorure bataru jiwuge erduware boe jokodu jire Pao Kurireu akoino duji.
JOH 3:34 Pao Kurireu Uwari umode tugera maku nou Pao Kurireu ure arego matowu tonaregedu ai. Dukodire nou aregodure matowu makomode Pao Kurireu bataruji boe ewiagai rugadu.
JOH 3:35 Pao Kurireu meardu kurire nou tonaregeduji rugadu. Dukodire ure turaga jamedu boe maku tonaregedu ai rakawo nono turaga mogadure.
JOH 3:36 Nono nou meartorure Onaregedu jiwuge emugumode Pao Kurireu apo rugadu jii toro rugadu. Dukodire etagedumodukare. Ewimodukare pugeje. Mare meartorukare nou Pao Kurireu Onaregedu jiwuge emugumodukare Pao Kurireu apo jamedu. Pao Kurireu ro pegamode ei jamedu. Nou ro pegare eidu akedumodukare rugadu.
JOH 4:1 Fariseu doge emeardure Jesus ure boe etao pegodo duji. Emeardure nou Jesus ure jorduwadowuge emagagodure nou João Batista ure jorduwadowuge epiji.
JOH 4:2 (Ča Jesus ukare boe etao pegodo. Nou ure jorduwadowuge eigoiare ere boe etao pegodo.)
JOH 4:3 Nono Jesus jorduware nou fariseu doge emeardaeji. Dukodi čare uture Judéia moto piji tuduwo tuibagi pugeje Galiléia moto ka.
JOH 4:4 Kodure Samaria moto oiagi tuduwo Galiléia moto ka.
JOH 4:5 Dukeje aregodure Sicar ba kurireu ka. Nou Sicar ba kurireu mugure nou Samaria moto keje rugadu. Marigudu jawu Israel doge etuo Jacó ure ia moto maku tonaregedu José ai. Nou Sicar ba kurireu padu jakare nou motoji.
JOH 4:6 Nou Jacó ure porodowu kačiba mugure nono jamedu. Ča Jesus metugodure dukodi čare ure tuwuredo nono nou kačiba keje. Ure tumugudo nono tuwo tamudo. Meri aregodure pagaia ka dukeje.
JOH 4:7 Mare nou Jesus ure jorduwadowuge eture otodai nou ba kurireu ka tuwo akirodo tugeji. Jesus mugure nou kačiba po okwai ture tamudo dutabo. Nono ia Samaria kejewudo aredu aregodure pobo bagai nou kačiba po ka. Jesus makore ji. Akore: – Pobo maku inai ikuduwo če.
JOH 4:9 Nono nou aredu makore: – Judeu nure aki. Imire Samaria kejewudo nure imi. Judeu doge etaidukare čei rugadu. Ekudumodukare poboče čegopo tabo. Enogwagemodukare čeno meriri keje jamedu. Aki čare amagore i pobo bagai akuduwo če.
JOH 4:10 Jesus makore: – Arduwakare Pao Kurireu ure maku boe etai boeji. Arduwamode i rugadu dukeje akogwamagudumode i pobo remawu bagai awikawo.
JOH 4:11 Nou aredu akore: – Are pobo tugu toboe bokware. Pobo padu jaere čemoroi nou kačiba ja tada. Nuba aromode awo akeragu nou akagoino jiwu pobo remawuji?
JOH 4:12 Jao pawobe etuo Jacó koiare ure awu kačiba towuje. Dukodire pagore aino ema. Emare kudure awu poboče boetoji. Ore ekudure awu poboče. Aku ie ekudure awu poboče jamedu. Ji aino pobore kimo. Aro kodumodukana nou Jacó ro kori? Nuba aromode awo ia pobo maku čenai pugeje?
JOH 4:13 Jesus akore: – Boe ekudumode awu poboče mare pobo boeimode ei pugeje.
JOH 4:14 Mare boe ekudumode ire maku etaiwu poboče dukeje pobo boeimodukare ei pugeje jii toro rugadu. Kačiba mugumode etada kodire nou etadawu pobo akedumodukare epiji rugadu. Mare pobo ji karega Jesus akoino. Boe emeartorumode Jesus ure maku pudaiwu tuwadaruji dukeje ewimodukare pugeje. Jesus umode emugudo Pao Kurireu apo. Du akedumodukare rugadu.
JOH 4:15 Mare nou aredu meardaere pobo remawu ji rugadu Jesus akoino. Akore: – Nou akagoino jiwu pobo maku inai ikuduwo če pobo boeikawo i pugeje itaregodukawo woe pugeje pobo bagai.
JOH 4:16 Jesus akore: – Toro. Atudo awo akoredu bie. Dukeje amode akirimi mato pugeje.
JOH 4:17 Aredu akore: – Ikogekare. Itoredu bokwa. Jesus akore: – Uu. Iorduware. Akogere mare are akera ra epiji.
JOH 4:18 Akogere ikera aboudure. Aino čare amugure ia apo pugeje mare akoredu karegure ema. Awadunure ji. Boe jokodu jire akagoino iwiagai.
JOH 4:19 Nou aredu akore: – Kočare arduware i rugadu! Jorduwareu nure aki rugadu. Makore Pao Kurireu bataru jiwu rabodunure aki rugadu.
JOH 4:20 Jao iwobe Samaria kejewuge ere tubu jodo tumago pemegawo Pao Kurireuji woe awu tori aogeje. Judeu doge tagire tagagore awu čerore jiboe ukaie turugadu. Tagagore tu Jerusalém ba kurireu kejeie boe emode tubu jodo tumago pemegawo tu Pao Kurireuji.
JOH 4:21 Jesus akore: – Ameartorudo awu iwadaruji. Tu awu tori aogeje karega boe emode tubu jodo tumago pemegawo Pao Kurireuji. Tu Jerusalém ba kurireu keje karega boe emode tubu jodo tumago pemegawo Pao Kurireuji. Kuri aino boe emode tubu jodo moto keje moto jamedu boe parugajeje tumago pemegawo Pao Kurireuji.
JOH 4:22 Samaria kejewuge nure tagi. Tamago pemegare Pao Kurireuji mare tarduwakare ji. Judeu doge nure čegi. Čerduware Pao Kurireuji. Ure Judeu doge ewie marigudu tumoduie boe ekinorudo duji.
JOH 4:23 Kuri aino Pao Kurireu Uwari umode boe eragado emago pemegawo Pao Kurireuji rugadu. Erduwamode Pao Kurireu meardae remawuji rugadu dukodire emode tubu jodo tumago pemegawo Pao Kurireuji rugadu boe remawu tabo rugadu.
JOH 4:24 Pao Kurireu ure nono tuwari mogadure. Dukodire boe erdukare ji. Kodire boe emodukare tuwadaru udo paga paga tumago tabo Pao Kurireuji. Pao Kurireu Uwari koiare umode boe erduwado Pao Kurireu meardae pemegareuji ewo tubu jodo tumago pemegawo Pao Kurireuji boe remawu tabo rugadu.
JOH 4:25 Nou aredu makore Jesusji: – Iorduware umode boe ekinorudowu aregodumoduie duji. Aregodumode dukeje umode parduwado boe jamedu boeji rugadu.
JOH 4:26 Jesus akore: – Nou akagoino jiwu umode boe ekinorudowu nure imi rugadu.
JOH 4:27 Ča nou Jesus ure jorduwadowuge etaregodure ba kurireu piji tuibagi. Erdure Jesus makore nou aredu jituji dukodi čare eku kidure ei. Ere tumagoiago nou areduji kaboba bagaiba roino. Mare emagokare. Ere tumagoiago Jesusji jamedu kodiba akoino nou areduji. Mare emagokare.
JOH 4:28 Ča nou aredu uture tubori piji toro ba kurireu ka tuibagi. Aregodure ba kurireu ka dukeje makore boei.
JOH 4:29 Akore: – Mato itabo tarduwo ia imedu kurireuji. Emare jorduware mariguduwu irore jiboe jamedu boeji rugadu. Ema koia kana umode boe ekinorudo? Ema kana pabagare bagai marigudu?
JOH 4:30 Dukodi čare nou boe eture nou aredu apo ba kurireu piji toro Jesus bagai.
JOH 4:31 Nou aredu rakoje kimore toro ba kurireu tada dukeje nou Jesus ure jorduwadowuge emagore Jesusji. Egore: – Akwagedo.
JOH 4:32 Mare Jesus akore: – Ire ia tarduwakare jiwu ike rogu kowuje.
JOH 4:33 Dukeje nou ure jorduwadowuge emagore pui. Egore: – Ia boe etaregodu kana ia tuge tabo tuwo maku ai?
JOH 4:34 Mare Jesus akore: – Boe eke ji karega inagoino. Pao Kurireu koiare ure itarego mato. Imeartorure bataruji kodire umode iraga maku inai. Imode ure maku inaiwu imaragodae iado rugadu. Dujire inagoino.
JOH 4:35 Boe egore: “Arimode pobe puibiji dukeje boe eno boepa tadaboe kurodumode.” Tagaiwodo boe dogei. Ere turugadu tumeartoruwo Pao Kurireuji marigudu rugadu. Ere nono boepa tadawu kurodureboe mogadure.
JOH 4:36 Boe emode tugeragu kurodureboe jitu keje emaragodae mori makudumode etai. Mare boepa tadaboe ji karega inagoino. Boe emode Pao Kurireu bataru maku boe etai dukeje Pao Kurireu umode emaragodae mori maku etai jamedu. Boe emagare tumaragodae tabo tuwo boe emeartorudo Pao Kurireuji rugadu emuguwo Pao Kurireu apo baru tada jii toro rugadu, ewikawo pugeje. Boe emeartorure Pao Kurireu bataruji dukeje nou ure Pao Kurireu bataru maku boe etaiwuge eiamedu boe egaremode pudui rugadu. Egaremode pudui nono nou ure boepa tuguwu jakarere pudui dumogadure. Egaremode pudui nono nou ure tugeragu kurodureboe jiwu jakarere pudui dumogadure.
JOH 4:37 Boe jokodu jire boe egoino: “Ia imedu umode to boepa tugu. Ia umode kurodu rawuje.”
JOH 4:38 Ča tare nono nou umode kurodureboe rawujewu mogadure. Mare boepa tadaboe ji karega inagoino. Tadumodukare boepa ka. Boeire inagoino. Inure tadudo iwadaru tabo boe etae rugadu. Iage ere nou boe erduwado Pao Kurireu bataruji tuwo edo turugadu emeartoruwo i. Aino ča tadumode iwadaru tabo etae emeartoruwo i rugadu.
JOH 4:39 Ča nou aredu makore nou Samaria kejewu boe ewiagai Jesus bataruji dukodi čare emeartorure Jesusji rugadu. Akore: – Emare jorduware mariguduwu irore jiboe jamedu boeji rugadu. Dukodire nou ba kurireu kejewuge emeartorure Jesusji rugadu. Emagare.
JOH 4:40 Nono nou Samaria kejewuge etaregodure Jesus ae. Enogwamagudure Jesusji muguwo pudabo jao. Dukodire merire pobe Jesusji toro ebo.
JOH 4:41 Jesus ure erduwado dukodi čare boe emagare nono apo tumeartorure jitu tabo.
JOH 4:42 Emagore nou areduji. Egore: – Aino čare pameartorure ji rugadu. Are čewie marigudu. Mare aino čewiapagare ji rugadu. Čewiapagare bataruji dukodire čemeartorure ji. Čerduware emaie umode boe ekinorudo rugadu.
JOH 4:43 Merire pobe Jesusji nono nou ba kurireu keje. Dukeje uture pugeje Galiléia moto ka.
JOH 4:44 Marigudu akore: – Makore Pao Kurireu bataru jiwu makomode Pao Kurireu bataruji boe eiamedu boe ewiagai. Mare turijodure kejewu moto kejewuge etaidumodukare makore jiboeji.
JOH 4:45 Jesus aregodure Galiléia moto ka dukeje nou boe ekimadure apo. Judeu doge ewadae Páscoa kejere Jesus ro rakare Jerusalém ba kurireu keje. Awu Galiléia kejewuge edure nono jamedu dukodire erdure Jesus rore jiboeji. Dukodire egarere pudui Jesus aregodure pudae duji.
JOH 4:46 Dukejere Jesus uture pugeje Caná ba kurireu ka. Marigudu ure pobo udo vinho kuruče nou Caná ba kurireu keje. Ia Cafarnaum ba kurireu kejewu boe eimijera rakojere nono Caná ba kurireu keje jamedu. Onaregedu kogodure toro Cafarnaum keje.
JOH 4:47 Jorduware Jesus aregodure Judéia moto piji Galiléia moto ka. Dukodire uture ae. Okwamagudure Jesusji tonaregedu paru tabo ure tuwiago kodi. Aidure Jesus utuwo Cafarnaum ba kurireu ka uwo nou tonaregedu pemegago.
JOH 4:48 Jesus akore ji: – Taiamedu boe tagaidure tarduwo ia iro rakareuji tameartoruwo i.
JOH 4:49 Nou boe eimijera akore: – Ikimijera nure aki. Itonaregedu bimode. Mato itabo awo itonaregedu pemegago.
JOH 4:50 Jesus akore ji: – Toro. Atudo akinai. Akanaregedu pemegagodumode. Nou boe eimijera meartorure Jesus bataruji dukodire uture.
JOH 4:51 Nou barogwato nou boe eimijera kodu kimore awaraji dukeje ia utugarege etaregodure togi. Ere bie. Egore: – Akanaregedu pemegagodure.
JOH 4:52 Unaragodure kaiba meri jeture dukejeba tonaregedu pemegagodure. Egore: – Jao meriji meri aregodure pagaia ka dukeje biri uru akedure piji.
JOH 4:53 Nono nou boe eimijera biabuture meri aregodure pagaia ka dukeje Jesus akore tonaregedu pemegagodumoduie. Meri aregodure pagaia ka dukeje pemegagodure rugadu. Dukodire nou boe eimijera meartorure Jesusji tuwobe eiamedu boe ebo.
JOH 4:54 Jesus ro rakareu boetojiwu koiare ure vinhodo poboče. Aino aregodure Judéia moto piji Galiléia moto ka pugeje. Dukeje ure nou boe eimijera onaregedu pemegago. Dukodire boe erdure Jesus ro rakareu ure pobetu je nono Galiléia moto keje duji.
JOH 5:1 Nono Jesus uture Jerusalém ba kurireu ka. Uture tuwaduwo ia Pao Kurireu bowadaeji Judeu dogebo.
JOH 5:2 Jerusalém kejewu ia baiporo ri iere “Ovelha”. Ia brae etaimoda kejewu pobo puredure nou bai poroji. Hebreu bataru tabo nou brae etaimoda iere “Betezata”.
JOH 5:3 Boe emagare tubadu nono dutabo nouia bai koadureu tada nou bai koadureuge enodo padure kejewugere ikera aboudure. Ekogodure kodi. Iage eku bokware. Iage epogora pegare. Emeru bokware. Epadure nono tubaga tabo nou brae etaimoda tadawu pobo magadugoduwo tuwo turemo nou poboto tubemegagoduwo. Nou pobo magadugodu paga karegure. Ia Pao Kurireu utugare baru tadawu koiare ure pobo magadudo toro ia meri keje. Meri jamedu boeji karega nou pobo magadugodumode. Pobo magadugodure dukeje nou ure taredo boetojiwu pobo towu pemegagodure.
JOH 5:5 Joru oto padure kejewure ure trinta e oito ia imedu kogodureuji tubaduie nono dutabo. Pogora pegare dukodire meru bokware.
JOH 5:6 Jesus jordure padure nono duji. Jorduware nou imedu kogodure marigudu rugadu. Dukodire unarare ji. Akore: – Akaidure apemegagoduwo?
JOH 5:7 Nou kogodureu imedu akore: – Uu. Itaidure. Mare iroiwakare iwo iremo nou poboto ipemegagoduwo. Awu pobo magadugodure dukeje ia kogodureu ure taredo nou poboto itododai tu tu je tubemegagoduwo. Nou pobo magadugodure dukeje umode boe epemegago.
JOH 5:8 Jesus makore ji. Akore: – Aragojedo. Amerudo. Akeragu akudau kodoji atuwo pugeje.
JOH 5:9 Dukodi čare nou imedu pemegagodure tači rugadu. Ure turagojedo. Ure tugeragu tugudau kodoji. Dukeje uture tumeru tabo rugadu. Sábado meri kejere Jesus rore aino ji.
JOH 5:10 Ča Judeu doge eimijerage erdure nou imeduji dukeje ekorigodure ji. Egore: – Amerure aino akudau kodo tabo Sábado meri keje du pegare rugadu. Arokaba aino pugeje.
JOH 5:11 Nou imedu akore: – Ure ipemegadowu imedu makore i iwo ikeragu awu ikudau kodoji imeruwo tabo pugeje.
JOH 5:12 Nou boe eimijerage egore: – Duba koiaba ure arodo aino?
JOH 5:13 Mare nou imedu jorduwakare Jesusji. Jesus ure pemegago dukejere uture piji. Boe emagare nono dukodire nou imedu jordukare uture tubiji duji. Dukodire makokare ji pugeje.
JOH 5:14 Merirekodutabo Jesus jordure nou imeduji pugeje Pao Kurireu uwai tada. Jesus makore ji. Akore: – Awiapaga pemegado iwadaruji. Apemegagodure. Mare akera ra aro pegareu piji jamedu. Amodukare akera ra aro pegareu piji dukeje boe pegamode ai pugeje du kodumode awu boetojiwu akogodae kori rugadu.
JOH 5:15 Nono nou imedu uture Jesus piji Judeu doge eimijerage etae. Ure ewie Jesus ieji. Makore ema koiaie uie tubemegago.
JOH 5:16 Nono nou boe eimijerage erdu pegare Jesus rore aino duji. Etaidukare Jesus ure nou imedu pemegago sábado meri keje duji. Erokare aino kodi. Egore boe ekaiago boe epemegado sábado meriji. Dukodire etaidure tuwo boe pegado Jesusji rugadu.
JOH 5:17 Mare Jesus makore ewadaru jipagi. Akore: – Iogwa maragodure meri jamedu boeji. Iromode aino jamedu.
JOH 5:18 Ainore Jesus rore rugadu. Judeu doge eromodukare ia turore jiboeji sábado meriji. Edu pagamode tu tumuga keje rugadu. Mare Jesus meartorukare nou erore jiboeji. Jesus akore tuoie Pao Kurireu rema. Akore aino dutabo akore Pao Kurireu nuie pudumi jamedu. Mare nou Judeu doge eimijerage erdu pegare akoinoduji. Dukodire čare ekorigodure ji. Ere tumeardae tawuje tuwo Jesus bito.
JOH 5:19 Nono Jesus makore nou Judeu doge eimijeragei. Akore: – Boe jokodu jire inagoino tawiagai. Pao Kurireu Onaregedu romodukare ia boeji tumeardae tabo. Jordumode Tuo Kurireu roji dukeje romode nono nou Tuo ro mogadure. Onaregedu romode nono Tuo ro mogadure rugadu.
JOH 5:20 Awu Pao Kurireu Onaregedu nure imi. Iogwa meardu kurire i. Dukodire ure iorduwado turo jamedu boeji irowo nono turo mogadure jamedu. Ča Iogwa ro kurimode nou turo kori pugeje. Umode iorduwado nou turo kurireuji irowo ji jamedu. Tardumode nou iro kurireuji dukeje taebogodumode i rugadu.
JOH 5:21 Iogwa Kurireu umode bireuge eewodudo pugeje tuwo emugu pemegado turo pegareu piji. Onaregedu nure imi. Imode itaidure jiwuge emugu pemegado ero pegareu piji jamedu.
JOH 5:22 Iogwa Kurireu aiwomodukare boe ero pegareu bagai. Ure boe eimijerado imi. Dukodire imire itaiwomode boe ero pegareu bagai.
JOH 5:23 Itaiwomode boe ero pegareu bagai dukodire boe emode ikie kurido nono ere Iogwa Kurireu ie kurido dumogadure. Mare mako pemegakare iwu mako peganure Iogwaji jamedu. Iogwa koiare ure itarego mato boe etae.
JOH 5:24 – Boe jokodu jire inagoino. Iogwa Kurireu ure itarego mato boe etae. Ewiapagamode iwadaruji dukeje emeartorumode Iogwa Kurireuji jamedu. Dukeje emugumode Iogwa Kurireu apo jii toro rugadu. Du akedumodukare. Emeartorumode Iogwaji dukeje umodukare boe pegado boei. Boe ero pegare dukodire ewimode. Dukodire ere nono bireuge emogadure. Mare emeartorumode Iogwaji dukeje ewimodukare pugeje. Emugu pemegamode Iogwapo rugadu jii toro rugadu.
JOH 5:25 Boe jokodu jire inagoino tawiagai. Pao Kurireu ure tawie marigudu bireuge emeardumoduie Tonaregedu bataruji. Pao Kurireu Onaregedu nure imi rugadu. Tare nono bireuge emogadure. Ča tameardure iwadaruji. Tameartorumode iwadaruji dukeje tamodukare nono bireugere pugeje.
JOH 5:26 Iogwa Kurireu koiare ure boe etowuje erijodudo. Emare jeture boei kodi. Ema koiare ure tonaregedu rakado uwo boe etowuje jamedu. Emare jeture boei jamedu.
JOH 5:27 Pao Kurireu Onaregedu nure imi. Imedu Onaregedu nure imi. Dukodire Iogwa ure boe eimijerado imi itaiwowo boe ero pegareu bagai ewo turo pegareu morido rugadu.
JOH 5:28 Ia meri keje bireuge eiamedu boe eewodumode pugeje bireuge eda piji. Ro pemegareuge eewodumode pugeje. Nono ewimodukare pugeje. Emugu pemegamode Iogwapo. Du akedumodukare. Ro pegareuge eewodumode jamedu mare imago pegamode erore jiboeji dukeje ewarigudumode bope doge eda kejewu joru pegareuto boe pegawo ei jii toro rugadu. Du akedumodukare rugadu.
JOH 5:30 Jesus mako kimore. Akore: – Imi karega ire boe eimijerado imi. Iromodukare itaidure jiboeji itaobiji. Dukodire imeardae karega mare Pao Kurireu koiare ure imeardae maku inai itaiwowo boe ero pegareu bagai. Pao Kurireu koiare ure itarego woe. Dukodire iromode aidure jiboeji tu tu je rugadu.
JOH 5:31 Mare imagomode boei iro pemegaie dukeje emeartorumodukare i.
JOH 5:32 Mare Pao Kurireu makore boe ewiagai iro pemegaie. Boe jokodu jire akoino.
JOH 5:33 Boe jokodu jire João Batista akoino jamedu. Tare boe etudo ae. Ure tawie iromode jiboeji marigudu.
JOH 5:34 Itaiwokare mako pemegare iwuge ewadaru bagai iwo tameartorudo i. Pao Kurireu uwo tawie irore jiboeji du pegakare. Mare ire tawiabutudo João Batista bataru keje. Makore boe ewiagai iro pemegamoduie tai duji tameartoruwo i iwo taginorudo boe pegareu piji rugadu.
JOH 5:35 João Batista bataru ure nono jorugu mogadure. Mare jorugu karega. Ure tarduwado. Tagaidure bataruji ia ari keje.
JOH 5:36 João Batista makore tawiagai i boeji. Mare iro pemegareu, iro rakareu, umode tarduwado i rugadu. Iogwa Kurireu ure iragado iro rakawo rugadu. Iro rakamode dukeje tarduwamode Iogwa Kurireu koiare ure itarego mato boe etae duji.
JOH 5:37 Iogwa Kurireu koiare ure tawie iromode jiboeji. Ure itarego mato mare marigudure tardukare ji. Marigudu tameardukare makoji. Tameartorukare ji jamedu dukodire tagare Iogwa Kurireu bataru metudo tagaora tada. Tawiagodure piji.
JOH 5:39 Tagaiwore Pao Kurireu bataru padure kejewu baperaji. Tameardaere nou taro koiare umode tamugu pemegado Pao Kurireu apo tawikawo pugeje. Mare nou tagaiwore jiwu Pao Kurireu bataru unure tawie irore jiboeji.
JOH 5:40 Mare tagaidukare tarduwawo i tagaidukare tameartoruwo i. Tameartorumode i dukeje tamugu pemegamode Pao Kurireu apo jii toro rugadu. Dukodi tawimodukare pugeje.
JOH 5:41 – Itaiwokare mako pemegare iwuge ewadaru bagai.
JOH 5:42 Iorduware tai rugadu. Tawiapagakare tameardu kuriwo Pao Kurireuji pugeje.
JOH 5:43 Iogwa Kurireu koiare ure boe eimijerado imi. Du inodu tabo tameartorukare i. Ia imedu aregodumode tagae. Umode boe eimijerado pudumi dukeje tameartorumode ji rugadu.
JOH 5:44 Tagaidure boe emago pemegare tai duji boe ebogoduwo tai. Mare tagaidukare tawiapagawo Pao Kurireu bataruji tameartoruwo ji mako pemegawo tai. Ča. Tameartorumodukare i jamedu.
JOH 5:45 Mare imago pegamodukare tai Iogwa Kurireu biagai. Tagaidure jawu Judeu doge eimijera Moisés bataruji. Mare emare mako pegamode tai Pao Kurireu biagai tameartorukaie i.
JOH 5:46 Tameartorumode Moisés bataruji rugadu dukeje tameartorumode i jamedu. Emare makore irore jiboeji. Ure nou tuwadaru bu bapera keje.
JOH 5:47 Mare tameartorukare nou padure bapera kejewu Moisés bataruji dukodire tameartorumodukare iwadaruji jamedu.
JOH 6:1 Jesus ro rakare rugadu. Ure kogodureuge epemegago. Nono Jesus kurugodure nou Galiléia pobo maereu bakowu ka ture jorduwadowugebo. Nou pobo maereu iere Tiberíades jamedu. Boe eture Jesus rekodaji. Emagare rugadu. Erdure Jesus ro rakare jiboeji dukodire eture rekodaji.
JOH 6:3 Etaregodure bakowu ka dukeje Jesus ruture ia tori ao ka. Nonore ure tumugudo ture jorduwadowugebo.
JOH 6:4 Judeu doge ewiapagagodure tuwadae Páscoaji mare nou meri kodu mai kimore nou ewadae ka.
JOH 6:5 Jesus aiwore tubiji dukeje jordure boe doge ekodure pudae duji. Emagare rugadu. Nono unarare Filipiji. Akore: – Kaiba pagodumode pawo pageragu boe ekeji awu boe doge ekeje?
JOH 6:6 Jesus jorduware tumeardaeji marigudu. Du inodu tabo unarare Filipiji tuiorduwo Filipe meartorumode pudui dubagai.
JOH 6:7 Filipe akore: – Awu boe emagare rugadu. Pamode pageragu boe ekeji eiamedu boewo kowuje mare mori kurimode rugadu. Imedu maragodumode kejewu ari oto padumode oito dukeje o diero mode tuwo akirodo boe ekeji.
JOH 6:8 Jesus ure jorduwadowu ia imedu iere André. Simão Pedro uwie nure ema.
JOH 6:9 André akore: – Čege amireu ure ikera aboudure woe ia imedu rogu apo. Čege karo rogu ure pobe apo jamedu. Mare awu boe eke rogu aregodumodukare enodo ka emagare rugadu kodi.
JOH 6:10 Boebutu pemegareu jeture nono dukodire Jesus akore: – Tamagodo awu boei ewo tumugudo nou boebutu keje. Nono nou boe doge eiamedu boe ere tumugudo nou boebutu keje. Ime doge enodo padu kejeboere cinco mil nono.
JOH 6:11 Jesus ure tugeragu nou imedu rogu uke amireu roguji. Imadure Pao Kurireu apo nou amireu paru tabo. Dukeje čare ure kado puiato. Ure maku nou boe doge etai. Boe eiamedu boe ere tugeragu ji. Rorino nou kare kugurei jamedu. Ure kado puiato dukeje ure maku etai jamedu. Boe eiamedu boe ere tugeragu ji. Nou boe eiamedu boe enogwagere rugadu. Ere ko jii toro tuguredu ka.
JOH 6:12 Ekuredure dukeje Jesus makore ture jorduwadowugei. Akore: – Tageragu nou boe eke koboji. Tagaba barigu.
JOH 6:13 Dukodire nou Jesus ure jorduwadowuge ere tugeragu nou boe eke koboji boe epiji. Ere kadarabo doge korau nou boe eke kobo tabo. Nou kadarabo enodo padu kejeboere doze nou boe eke kobo tabo rugadu.
JOH 6:14 Nou boe doge erdure nou Jesus rore aino duji dukeje emagore pui. Egore: – Makore Pao Kurireu bataru jiwu nure ema rugadu. Boe epagare bagai marigudu. Marigudu Pao Kurireu ure boe ewie ia makore Pao Kurireu bataru jiwu aregodumoduie boe etae. Aino čare aregodure boe etae rugadu. Ema rugadu. Pao Kurireu bataru jeture pudui rugadu.
JOH 6:15 Ere turagado tuwo tugeragu Jesusji tugimijera kurireuwo ema. Mare Jesus jorduware emeardaeji. Dukodire uture epiji turagojewo tuginaigodu toro ia tori aogeje.
JOH 6:16 Nou boečoji Jesus ure jorduwadowuge eture pobo maereu okwa ka.
JOH 6:17 Ere turemo ika kurireuto tugurugoduwo pobo maereu kajeje toro Cafarnaum ba kurireu ka. Ča boečodure ei rugadu. Jesus aregodukare etae raga.
JOH 6:18 Ekurugodu kimore nou pobo maereu kajeje dukeje bakuru rakareu aregodure etogi. Dukodire nou pobo jetu rakare nou ika kurireuji.
JOH 6:19 Traiga tabore nou Jesus ure jorduwadowuge emaragodure traiga tabo ika kurireuji. Ekodu ja kimore nou pobo maereu okwaji dukeje erdure Jesus merure pobo ao jituji. Kodu mato etae ika kurireu ka. Nou ure jorduwadowuge epagudugodure če rugadu.
JOH 6:20 Mare Jesus makore ei. Akore: – Tabagudukaba. Imire iroino!
JOH 6:21 Dukodi čare epagudu akedure. Ere udo turemo ika kurireuto pudabo. Dukeje čare erore puku etaregodure toro nou turoino kaboe ka duji.
JOH 6:22 Nou barogwato nou boe doge edu kimore toro nou pobo maereu bakowu keje. Erduware ika kurireu ure mitotu je duji. Erduware Jesus kodukare ture jorduwadowugebo duji. Nou Jesus ure jorduwadowuge eture ika kurireu tabo Jesus piji.
JOH 6:23 Dukeje čare ia boe etaregodure nou boe etae ika kurireu tabo jamedu. Etaregodure Tiberíades ba kurireu piji. Ika kurireuge ebore etaregodure. Etaregodure dukeje erudure Jesus ure boe eke maku boe etaiwu tori ao ka.
JOH 6:24 Mare Jesus rakojekare nono. Ure jorduwadowuge eragojekare nono jamedu. Dukodi čare nou boe eture tuibagi pobo maereu okwa ka. Ere taredo ika kurireugeto dukeje eture Cafarnaum ba kurireu ka taiwo tabo Jesus bagai.
JOH 6:25 Nou boe erdure Jesusji nou pobo maereu okwa bakowu keje dukeje eture ae. Egore: – Nuba arore akaregoduwo woe?
JOH 6:26 Jesus akore: – Boe jokodu jire inagoino. Tare ire maku tagaiwu amireu kowuje dukodire taguredure. Dukodire taemarure iwagai pugeje. Mare tarduwakare imeardaeji. Tarduwakare kodiba iro rakare aino duji.
JOH 6:27 Tawiapagakaba tu tage bagai. Pegamode. Mare tawiapagado tu baru tadawu boe eke remawu bagai. Tamode kowuje dukeje tamugumode Pao Kurireu apo rugadu jii toro rugadu. Du akedumodukare. Imedu Onaregedu nure imi. Pao Kurireu ure iro rakado tuwo boe erduwado taidure i duji. Imire imode nou boe eke remawu maku tagai.
JOH 6:28 Nono enarare Jesusji. Egore: – Nuba čeromode Pao Kurireu ai aiduwo čei?
JOH 6:29 Jesus akore: – Pao Kurireu koiare ure itarego mato. Emare aidure tameartoruwo i.
JOH 6:30 Egore: – Aro rakamode čegai dukeje čemeartorumode ai rugadu. Nuba aromode?
JOH 6:31 Jao pawobe ere baru pijiwu boe eke kowuje toro boe maereu keje. Moisés ure turo rakareu to tuwo nou boe eke maku etai. Pao Kurireu bataru padure kejewu bapera akore: “Pao Kurireu ure baru pijiwu boe eke maku etai ewo kowuje.”
JOH 6:32 Jesus akore: – Boe jokodu jire inagoino tai. Nou Moisés ure maku etaiwu boe eke baru pijiwu boe eke remawu karega. Pao Kurireu koiare emare umode boe eke remawu maku tagai baru piji.
JOH 6:33 Aregodure baru piji rugadu. Pao Kurireu ure nou boe eke remawu rawuje mato moto ka tuwo boe emugu pemegado pudabo. Du akedumodukare.
JOH 6:34 Erduwakare kaba jiba Jesus akoino. Egore: – Nou akagoino jiwu boe eke remawu maku čenai tu tu je.
JOH 6:35 Jesus akore: – Nou boe eke remawu nure imi. Aidure tuiorduwawo iwuge emeartorumode i dukeje eke boeimodukare ei pugeje. Mare boe eke ji karega inagoino. Emugu pemegamode Pao Kurireu apo. Meartorure iwuge pobo boeimodukare ei jamedu. Mare pobo ji karega inagoino. Emugu pemegamode Pao Kurireu apo rugadu.
JOH 6:36 Aino čare ire tawie. Tardure i mare tameartorumodukare i.
JOH 6:37 Iogwa Kurireu ure maku inaiwu boe etaregodumode itae rugadu. Imodukare etudo ipiji.
JOH 6:38 Itaregodukare iwo itaidure jiboe towuje. Itaregodure baru piji imeartoruwo ure itarego matowu Iogwa bataruji.
JOH 6:39 Emare aidukare iwo ia aregodure itaewuge ewarigu ipiji. Dukodire imodukare ewarigu rugadu. Mare awu moto akedumode dukeje imode eewodudo pugeje ewikawo pugeje.
JOH 6:40 Pao Kurireu aidure meartorure iwugei. Erdumode i mare emeartorumode i dukeje emugu pemegamode Pao Kurireu apo rugadu. Du akedumodukare. Imire imode eewodudo pugeje awu moto akedu keje.
JOH 6:41 Jesus makore nou baru pijiwu boe eke remawu nuie pudumi mare boe etaidukare nou akoinoduji.
JOH 6:42 Egore pui: – José onaregedu nure ema. Parduware uoji učeji. Pagare akoino tuie turawuje baru piji duji.
JOH 6:43 Mare Jesus akore: – Tagagokaba aino.
JOH 6:44 Iogwa Kurireu umodukare boe etudo itae dukeje etaregodumodukare itae rugadu. Iogwa Kurireu koiare ure itarego mato. Umode boe etudo itae dukeje emeartorumode i rugadu. Nono imode eewodudo pugeje awu moto akedu keje.
JOH 6:45 Makore Pao Kurireu bataru jiwuge ere Pao Kurireu bataru bu bapera keje. Egore: “Pao Kurireu umode boe eiamedu boe erduwado.” Dukodire imagore aino. Biapagare Iogwa Kurireu bataru jiwu aregodumode itae. Iogwa umode jorduwado dukeje aregodumode itae.
JOH 6:46 Mare inagokare boe erduie Iogwa Kurireuji. Tu nou aregodure Pao Kurireu pijiwu jordure Iogwa Kurireuji.
JOH 6:47 Boe jokodu jire inagoino. Meartorure iwu mugu pemegamode Pao Kurireu apo. Du akedumodukare rugadu.
JOH 6:48 Boe eke remawu nure imi.
JOH 6:49 Jawu jaoboe ere ia boe eke kowuje boe maereu keje. Mare ewire tiamedu boe tabo.
JOH 6:50 Mare baru pijire boe eke remawu aregodure. Umode kowujewuge ewimodukare pugeje.
JOH 6:51 Nou boe eke remawu nure imi. Nou aregodure baru pijiwu nure imi. Tamode nou boe eke remawu kowuje dukeje tamugu pemegamode Pao Kurireu apo. Du akedumodukare. Boe eke remawu nure ikoduče. Imode ikodu maku tagai tawo kowuje. Imode ikodu maku boe etai ewikawo pugeje.
JOH 6:52 Nou boe erdu pegare nou Jesus batarure aino duji. Etokire pui nou bataru keje. Egore: – Boe emodukare awu imedu kodu kowuje rugadu.
JOH 6:53 Jesus akore: – Boe jokodu jire inagoino. Imedu Onaregedu nure imi. Boe emodukare ikodu kowuje mare emugu pemegamodukare jamedu. Boe ekudumodukare ikuče dukeje emugu pemegamodukare.
JOH 6:54 Mare boe emode ikodu kowuje, ekudumode ikuče dukeje emugu pemegamode Pao Kurireu apo rugadu. Du akedumodukare. Moto akedumode dukeje imode eewodudo pugeje ewikawo pugeje.
JOH 6:55 Boe eke remawu nure ikoduče. Boe eke remawu nure ikuče.
JOH 6:56 Boe emode ikodu kowuje dukeje emugumode itabo. Imugumode ebo jamedu. Boe ekudumode ikuče dukeje emugumode itabo. Imugumode ebo jamedu.
JOH 6:57 Iogwa Kurireu ure rugadu. Ema koiare ure itarego mato. Ema koiare ure imugu pemegado jamedu. Aino čare boe emode ikowuje dukeje imode emugu pemegado jamedu.
JOH 6:58 Ainore baru pijiwu boe ekere. Ukare nono nou jawu jaoboe enogwagere jiboere. Jawu jaoboe eiamedu boe ewire. Mare boe emode awu inagoino jiwu boe eke remawu kowuje dukeje ewimodukare pugeje. Emugumode Pao Kurireu apo jii toro rugadu. Du akedumodukare rugadu.
JOH 6:59 Cafarnaum ba kurireu kejere Jesus rakojere. Nou Judeu doge ere bato puiwu bai kejere akoino nou boe dogei.
JOH 6:60 Nou uture Jesus rekodajiwugere emeardure nou Jesus akoinoduji dukodire etaidukare ji. Egore: – Awu makore jiboe rakare pai. Boe erduwamodukare ji. Boe emeartorumodukare ji jamedu.
JOH 6:61 Jesus meardukare ewadaruji mare jorduware emago pegare pudui duji. Dukodire čare makore ei pugeje. Akore: – Kočare tagaidukare imagore jiboeji.
JOH 6:62 Tardumode irudure baruto duji ibagi duji dukeje nuba tameardaemode i pugeje?
JOH 6:63 Inagore taiago ikodu kowuje. Mare ikodu remawu ji karega inagoino. Pao Kurireu Uwari jire inagoino. Inagore taguduiago ikuče jamedu mare iku remawu ji karega inagoino. Pao Kurireu Uwari jire inagoino. Ema koiare umode meartorure iwuge emugu pemegado Pao Kurireu apo. Taraga tabo karega tamugu pemegamode. Mare Pao Kurireu Uwari koiare umode boe emugu pemegado.
JOH 6:64 Mare ia tagi tameartorukare i rugadu. Marigudu Jesus jorduware meartorumodukare puduiwugei. Jorduware ia imedu umoduie tumagu boe eimijerage pegareuge etai duji jamedu. Jorduware nou imedu romode pudui duji marigudu.
JOH 6:65 Nono Jesus makore pugeje. Akore: – Tameartorukare dukodire inagoino. Boe etaregodumodukare itae tao biji. Pao Kurireu koiare umode boe pemegado boei etaregoduwo itae.
JOH 6:66 Ča Jesus akore aino nou boe dogei dukodi čare emagare tudu tabo piji. Etukare Jesus rekodaji pugeje.
JOH 6:67 Dukodire Jesus unarare ture jorduwadowugei. Enodo padu kejeboere doze. Akore: – Tagaidure taduwo ipiji jamedu?
JOH 6:68 Mare Simão Pedro akore: – Boro. Awadaru koiare umode čemugu pemegado Pao Kurireu apo jii toro rugadu. Čerduwakare ia boe ewagai pugeje.
JOH 6:69 Aino čare čemeartorure ai rugadu. Čerduware Boe Pemegareu Remawu nure aki duji rugadu. Akire akaregodure Pao Kurireu piji rugadu.
JOH 6:70 Jesus akore: – Tanodo padu kejeboere doze. Ire ikeragu taiamedu boei inai. Mare ia tamedia bope nure ema nono tagabo.
JOH 6:71 Judas Iscariotes jire Jesus akoino. Simão Iscariotes onaregedu nure ema. Jesus ure nou Judas Iscariotes jorduwado. Du inodu tabo umode Jesus maku boe eimijerage pegareuge etai rugadu.
JOH 7:1 Nou inodu otobiji Jesus kodure Galiléia motoji. Judéia moto kejewu Judeu doge eimijerage etaidure tuwo Jesus bito. Dukodire Jesus aidukare tugoduwo Judéia motoji.
JOH 7:2 Kuri aino Judeu doge ewadumode ia tuwadaeji. Nou ewadure jiwu ewadae iere “Mačebradu”.
JOH 7:3 Nono Jesus uwiemage emagore ji. Egore: – Boe etaidumode boe erduwawo pudui boe emodukare turo rakareu biado boe epiji. Ča atudo toro Judéia moto ka. Nou Judéia moto kejewuge emeardure boe egore aro rakaie. Etaidure tuduwo akabo. Atudo toro awo erdudo aro rakareuji. Dukodire boe eiamedu boe erduwamode ai rugadu.
JOH 7:5 Mare nou Jesus uwiemage emeartorukare ji dukodire egoino.
JOH 7:6 Mare Jesus makore ei. Akore: – Tameardae pagare. Iorduware itumode toro kejewu meriji. Kajao.
JOH 7:7 Boe erdu pegakare tai. Mare imi ire boe ewie ero pegareu jamedu boeji dukodire erdu pegare i rugadu.
JOH 7:8 Tadudo nou Judeu doge ewadae ka. Itumodukare raga. Nou itumode kejewu meri aregodukare raga.
JOH 7:9 Jesus utukare nou Galiléia moto piji nou meriji rugadu.
JOH 7:10 Jesus uwiemage eture toro nou Judeu doge ewadae ka. Dukejere Jesus uture toro jamedu. Mare ure tuwiado boe epiji.
JOH 7:11 Nou ewadae kejere nou Judeu doge eimijerage emarure Jesus bagai. Egore: – Ema pa?
JOH 7:12 Nou ewadae kejewu boe doge enogwa podure pui Jesus jiboeji. Iage egore: – Imedu pemegareu nure ema. Mare iage egore: – Boro. Unure boe ekiripagado.
JOH 7:13 Mare emagokare nou inodu boeji boe ewiagai. Epagudure tugimijerageče kodi.
JOH 7:14 Nou Judeu doge ewadure rugadu nou tuwadaeji. Mare ewadu kimore dukeje Jesus uture Pao Kurireu uwai ka. Nonore ure boe erduwado.
JOH 7:15 Judeu doge eimijerage erore ta je. Egore: – Boe ekare awu imedu jorduwado. Kodiba čare jorduware aino?
JOH 7:16 Jesus akore: – Pao Kurireu koiare ure itarego woe. Du bataru jire inagore aino iwo boe erduwado.
JOH 7:17 Aidure tumeartoruwo Pao Kurireu bataru jiwuge erduwamode iwadaruji. Erduwamode jamedu iwadaru ji karega inagoino. Erduwamode Pao Kurireu bataru remawu jire inagoino duji.
JOH 7:18 Ia boe emagomode tu pudumie tuiorduware. Nouge etaidure boe etaiwowo tu pudui, boe enojarowo nou tuwadaruji. Mare ia aidumode boe emago pemegawo nou ure tarego matowuji dukeje batrarodumodukare. Boe jokodu jire akoino boe etaiduwo nou ure tarego matowuji.
JOH 7:19 Mariguduwuge pawobe eimijera Moisés ure Pao Kurireu meardae maku etai eno bakaruče. Dukodire tago bakarure aino jii aino. Mare taiamedu boe tameartorukare nou tago bakaruji rugadu. Kodiba tagaidure tawo iwido?
JOH 7:20 Nou boe egore: – Čedaidukare čewo awido. Ia bope uwari meture atada rugadu kodire akagoino.
JOH 7:21 Jesus akore: – Iro rakare sábado meri keje dukodire taerore ta je.
JOH 7:22 Marigudu Moisés ure taro maku tagai tawo tagore ime ewaga oto biri kado. Mare ia jawu jaoboe eigoiare ere nou taro maku tagai boetoji. Nono Moisés rore aino tai jamedu aino boigodu. Dukodire tare tagore ime eiamedu boe ewaga oto biri kado rugadu. Taromode aino sábado meri keje jamedu.
JOH 7:23 Moisés ure tago bakaru maku tagai. Akore tamaragodukaiago sábado meri keje mare boe pegakaie tai tawo tagore ime ewaga oto biri kado sábado meri keje. Ire nou imedu pemegado sábado meri keje dukodire tagorigodure aino i. Tagagore boe erokaie aino sábado meri keje.
JOH 7:24 Tagaiwokaba boei tameardae pegareu tabo. Tagaiwodo boei eromode jiboeji emeardaemode jiboeji jamedu. Dukodire tarduwamode ei rugadu.
JOH 7:25 Nouia mugure Jerusalém ba kurireu kejewuge egore: – Čowu pagimijerage etaidure tuwo bitowu imedu karegau?
JOH 7:26 Kočare makore boe eiamedu boe ewiagai boe eiamedu boe egai. Mare boe emago pegareu bokware ia tuwadaruji ji. Pagimijerage erduwa kana umode boe ekinorudowu nure ema duji? Erduwa kana pabagare bagaiwu nure ema duji?
JOH 7:27 Boe erduwamodukare kaibowu pijiba umode boe ekinorudowu aregodumode. Mare paiamedu boe parduware kaibowu pijiba awu imedu aregodure.
JOH 7:28 Jesus ure boe erduwado Pao Kurireu uwai tada dukeje ure tumago pemegado toro boe etae boe eiamedu boe emearduwo tuwadaruji. Akore: – Tameardaere tarduwaie itaregodure pijiwu motoji. Mare nou ure itarego matowu emare ure itudo jetu. Imi itaobiji karega itaregodure. Nou ure itarego matowu batrarodumodukare. Boe remawu nure ema rugadu. Mare tarduwakare ji.
JOH 7:29 Iragojere apo dukodire iorduware ji. Ema koiare ure itarego mato.
JOH 7:30 Nono iage etaidure tuwo tugeragu ji tuwo tugu baičoreuto. Mare Pao Kurireu aidukare dukodire erokare aino ji rugadu.
JOH 7:31 Mare iage emeartorure Jesusji. Awu meartorure jiwuge emagare. Egore: – Awu imedu ro rakare nono pabagare bagaiwu umode boe ekinorudowu mogadure rugadu.
JOH 7:32 Fariseu doge emeardure nou boe enogwa podure pui Jesus jiboe jituji. Dukejere ere tugobaigarege etudo toro tuwo tugeragu Jesusji. Nou ure Judeu doge enomea maku Pao Kurireu aiwuge eimijerage emeardaere nono nou fariseu doge emeardae mogadure jamedu.
JOH 7:33 Jesus makore boei. Akore: – Iragoje biagamode tu tagabo. Kuri aino itumode tabiji toro ure itarego matowu bagai ibagi.
JOH 7:34 Tagaiwomode iwagai mare tardumodukare i. Taroiwamodukare taduwo toro iragojemodewu ka.
JOH 7:35 Nou Judeu doge egore pui: – Kaiba kodumode? Utumode kana toro pawobe etae toro ia Grécia moto kejewu ba kurireu ka tuwo nou Grécia kejewuge erduwado? Nuba romode pardukawo pudui pugeje?
JOH 7:36 Akore pagaiwomoduie tuwagai mare pardumodukaie pudui. Akore paroiwamodukaie paduwo toro turagojemodewu ka. Kaba jiba akoino?
JOH 7:37 Awu meriji nou Judeu doge ewadae remawu akedu kejewu meri reo. Jesus ure turagojedo. Ure tumago pemegado boe eiamedu boe emearduwo. Akore: – Pobo boeire ia tai dukeje tadudo itae.
JOH 7:38 Pao Kurireu bataru padure bapera keje. Akore: “Meartorure iwuge ekudumode nou poboče dukeje umode turedo epiji. Nou pobo umode emugu pemegado rugadu. Du akedumodukare rugadu.”
JOH 7:39 Mare pobo ji karega Jesus akoino. Pao Kurireu Uwari jire Jesus akoino. Boe emeartorumode Jesusji dukeje Pao Kurireu umode Tuwari maku nou boe etai. Dujire Jesus akoino. Mare Jesus akore aino nou boei kimo mare Pao Kurireu ukare Tuwari maku boe etai raga. Jesus jewodukare tuwi piji raga turuduwo baruto dukodire ukare maku etai raga.
JOH 7:40 Nou boe emeardure nou Jesus bataruji dukeje iage egore: – Pao Kurireu ure pawie jiwu, makore Pao Kurireu bataru jiwu nure awu imeduče rugadu.
JOH 7:41 Iage egore: – Pabagare bagaiwu umode boe ekinorudowu nure ema. Mare iage emeartorukare. Erduwakare Jesus boture Belém ba kurireu keje duji. Dukodire egore: – Ema karega. Awu imedu boture Galiléia moto keje.
JOH 7:42 Pao Kurireu akore Belém ba kurireu kejeie nou pabagare bagaiwu umode boe ekinorudowu botumode. Jao pagimijera kurireu Davi uwobe moduie ema. Belém ba kurireu kejere nou Davi mugure. Mare awu Jesus botukare Belém ba kurireu keje. Ainore nou boe egore. Mare erduwakare Jesus boture Belém ba kurireu keje duji. Dukodire egoino.
JOH 7:43 Dukodire emeartorukare ji. Dukodire nou boe emeardaekare pumeardae mogadure Jesus jiture.
JOH 7:44 Iage etaidure tuwo tugeragu ji tuwo tugu baičoreuto. Mare boe eragakare tuduwo ae.
JOH 7:45 Dukodire tugobaigarege eture tuibagi tugimijerage fariseu doge etae, tugimijerage ure Judeu doge enomea maku Pao Kurireu aiwuge eimijerage etae. Nou tugobaigarege eimijerage enarare ei. Egore: – Kodiba tagaregodukare apo?
JOH 7:46 Nou tugobaigarege egore: – Marigudu boe emagokare nono nou imedu makore jiboe mogadure ji aino. Mako pemegare rugadu.
JOH 7:47 Nou fariseu doge ekorigodure. Egore: – Ure taekiripagado rugadu.
JOH 7:48 Judeu doge eimijerage eiamedu boe emeartorukare ji rugadu. Fariseu doge nure čegi. Čeiamedu boe čemeartorukare ji rugadu.
JOH 7:49 Awu boe erduwakare Moisés ure maku pagaiwu pago bakaruji paroji. Dukodire Pao Kurireu ro pegare ei. Dukodi čare boe pegamode ei rugadu. Ainore nou fariseu doge egore.
JOH 7:50 Ia fariseu iere Nicodemos. Emare uture Jesus ae marigudu tuiorduwawo Jesus bataruji. Aino čare makore tumedage fariseu dogei.
JOH 7:51 Akore: – Pawiapagamode boe ewadaruji parduwawo eroji dukeje pagaiwomode ero pegareu bagai. Ainore pago bakaru ure. Ainore parore. Paromodukare aino dukeje paro peganure.
JOH 7:52 Mare nou fariseu doge egore: – Awodu kana Galiléia moto keje jamedu nono awu imedu Jesus mogadure? Akaidure ji? Akaiwodo Pao Kurireu bataru padure kejewu baperaji. Akaiwomode ji dukeje arduwamode nou makore Pao Kurireu bataru jiwuge eiamedu boe ewodukare nou Galiléia moto keje rugadu.
JOH 8:1 Boe eiamedu boe eture tuibagi tuwai ka pugeje. Mare Jesus ruture ia tori iere Oliveira Ri ao ka.
JOH 8:2 Barogwakododu kejere ure turawuje. Uture tuibagi Pao Kurireu uwai ka pugeje. Boe ere bato pui ae. Emagare. Dukodire ure tumugudo boebo dukeje ure erduwado.
JOH 8:3 Jorduware Judeu doge eno bakaru jiwuge etaregodure ae aredu apo. Fariseu doge etaregodure ebo jamedu. Erdure nou aredu jeribarire tumugukare apowu imedu jituji. Dukodire etaregodure nou aredu apo aino. Nono ere nou aredu rakojedo boe etoiadada.
JOH 8:4 Emagore Jesusji. Egore: – Jorduwareu nure aki. Čerdure awu aredu jeribarire tumugukare apowu imedu jituji.
JOH 8:5 Marigudu Moisés ure Pao Kurireu meardae maku jawu pawobe etai pago bakaruče kodire parore aino rugadu. Emare akore aredu jeribarie tumugukare apowu imeduji dukeje boe eiago nou aredu bito tori tabo. Ča nuba ameardaere parowo awu areduji?
JOH 8:6 Nou boe eimijerage etaidure tuwo turokogado Jesusji tumearduwo ia Jesus bataru pegareu bagai. Dukodire egoino ji. Mare Jesus makokare boeji. Ure tubu jodo moto keje tuwo tuwadaru bu moto keje tugerako tabo.
JOH 8:7 Nou boe eimijerage enara kimore ji dukeje Jesus ure turagojedo pugeje. Dukeje makore ei. Akore: – Ia tagi taro pegareu bokware dukeje tagidomode tori tabo nou areduji boetoji.
JOH 8:8 Nono Jesus ure tubu jodo moto keje pugeje dukeje ure ia tuwadaru bu moto keje tugerako tabo pugeje.
JOH 8:9 Nou boe eimijerage emeardure nou Jesus akoino duji dukeje eture Jesus piji etododai. Pegagodureuge eture boetoji. Dukeje iage eture eregodaji. Nono iage eture pugeje. Ča nou boe eimijerage eiamedu boe eture rugadu. Aino Jesus rakojere nono tuginaigodu nou etaregodure apowu aredu apo.
JOH 8:10 Nono Jesus ure turagodo dukeje makore nou areduji. Akore: – Kaiba ekodure? Boe edukare woe pugeje tumago pegawo ai.
JOH 8:11 Nou aredu akore: – Boro. Eiamedu boe eture marigudu. Jesus akore: – Ča imago pegamodukare ai jamedu. Atudo awai ka aibagi. Mare paga karega. Aro pegakaba pugeje.
JOH 8:12 Jesus makore nou fariseu dogei pugeje. Akore: – Jorugu pemegareu koiare umode boe edo činorudo boe pegareu piji boečoji. Ire nono jorugu pemegareu mogadure. Mare jorugu ji karega inagoino. Imode boe edo činorudo turo pegareu piji. Boe ekodumode itabo dukeje imode boe erdudo turo pegareuji erokawo aino pugeje. Imode eroiwado tuwo tugera ra turo pegareu piji.
JOH 8:13 Nou fariseu doge egore: – Amagore čei mare aragojere woe akinaigodu. Tu akire akagoino. Dukodire čare awadaru ukare turugadu čegai.
JOH 8:14 Jesus akore: – Boro. Iorduware boe jokodu jire inagoino tai duji. Tarduwakare kaibowu pijiba itaregodure. Imire iorduware. Tarduwakare kaiba ikodumode. Imire iorduware. Dukodire inagoino irore jiboeji tawiagai.
JOH 8:15 Tagaiwomode boe eroji dukeje tamagomode ero pegareuji boe ewiagai nono boe ero mogadure. Mare imi imagokare boe ero pegareu boeji tawiagai.
JOH 8:16 Imagomode boe ero pegareu boeji boe ewiagai dukeje iwadrarodumodukare. Boe jokodu jire imagomode. Iragojekare woe ikinaigodu. Iogwa Kurireu rakojere itabo.
JOH 8:17 Tamode pobe dukeje tamagomode jiboe kodumode puregodaji dukeje boe emeartorumode tagagoino jiboeji. Egomode boe remawu jie tagagoino. Ainore tago bakaru akore. Tagi taro reo. Boere pobe tumago pegare dutabo ia ro pegareu jitu dutabo dukeje boe emeartorumode emagore jiboeji. Umode mito tumagore dutabo dukeje boe emeartorumodukare ji. Ainore tagagore. Padure bapera keje.
JOH 8:18 Ča imagore irore jiboeji tawiagai. Mare Iogwa Kurireu koiare ure itarego mato. Emare makore irore jiboeji boe ewiagai jamedu. Aino čere pobe jamedu tameartoruwo čemagore jiboeji.
JOH 8:19 Enarare Jesusji. Egore: – Ao pa? Jesus akore: – Tarduwakare i. Tarduwakare iogwaji jamedu. Tarduwamode i dukeje tarduwamode iogwaji jamedu.
JOH 8:20 Ainore Jesus akore Pao Kurireu uwai tada. Ure boe erduwado nono. Ia ira mugure nono jamedu boe ewo toe tugu jagi tuwo maku Pao Kurireu ai.
JOH 8:21 Nono Jesus makore boei pugeje. Akore: – Iturumode tabiji pugeje. Tagaiwomode iwagai. Mare taro pegare kodi tawimode. Itumode tabiji dukeje taroiwakare taduwo iregodaji.
JOH 8:22 Nou Judeu doge eimijerage emagore pui. Egore: – Emare akoino paroiwamodukaie paduwo turegodaji. Tuwimodedu ji kana akoino? Umokana tuwido?
JOH 8:23 Jesus makore ewadaru jipagi. Akore: – Awu moto kejewuge nure tagi. Imi rema itaregodure baru piji. Tawodure woe awu moto keje. Mare imi moto kejewu karegure imi.
JOH 8:24 Dukodire inagoino tai tawimode nou taro pegareu kodi. Ča itagedumodukare rugadu. Tameartorumodukare i dukeje tawimode rugadu taro pegareu jamedu boe tabo.
JOH 8:25 Egore: – Ioguduba nure aki? Jesus akore: – Ire tawie marigudu.
JOH 8:26 Itaidure imago raiwo taro boeji. Itaidure iwo boe ewie taro pegareu jamedu boeji. Mare ure itarego matowu ure tuwadaru maku inai iwo boe ewie. Emare batrarodumodukare. Imagomodukare ia iwadaruji tawiagai.
JOH 8:27 Pao Kurireu jire Jesus akoino. Mare nou boe erduwakare akoino jiboeji.
JOH 8:28 Dukeje Jesus makore ei pugeje. Akore: – Imedu Onaregedu nure imi. Tamode ipo padure pugajejewu rakojedo itabo dukeje tarduwamode akedumodukareu nure imi duji. Nono tarduwamode Iogwa Kurireu bataru jire inagoino rugadu. Imeardae ji karega inagoino. Iogwa Kurireu meardae koiare ure inagodo aino tai.
JOH 8:29 Ema koiare ure itarego mato. Rakojere itabo jamedu. Imeartorure ji rugadu dukodire utukare ipiji.
JOH 8:30 Boe emeardure Jesus akoino duji dukodire emagare tumeartorure jitu tabo.
JOH 8:31 Nono Jesus makore nou meartorure puduiwugei. Akore: – Tameartorumode iwadaruji rugadu dukeje ire jorduwadowuge remawuge emode tagi rugadu.
JOH 8:32 Tarduwamode iwadaru remawuji dukodire nou iwadaru remawu umode tadawuje boe pegareu piji. Tawiapagamodukare tameardae pegareuji taibagi pugeje. Tamode tagamudo piji rugadu.
JOH 8:33 Egore: – Amode čedawuje boe pegareu piji? Kaba jiba akagoino čei? Čemugu pegakare. Abraão uwobe nure čegi. Marigudu čemaragodukare ia boe tuginaiwuge etai jii aino. Čewiapagakare ei. Čeragojekare boe pegareu keje.
JOH 8:34 Mare Jesus akore: – Boe jokodu jire inagoino tawiagai. Boe ero pegare dukodire emeardu kurire nou turo pegare jiboeji. Ewiapagamode tu tu nou turo pegareu boeji.
JOH 8:35 Boe emaragodumode ia boe etai dukeje utugarege nure emage. Emugumode ebo mare etuwobe karegure emage. Mare boe etore boe etuwobe nure emage rugadu jii toro.
JOH 8:36 Pao Kurireu Onaregedu nure imi. Imode tadawuje boe pegareu piji tagawo tagirimi nou taro pegareu ka pugeje dukeje tawiapagamodukare taro pega boeji taibagi pugeje.
JOH 8:37 Iorduware Abraão uwobe nure tagi duji. Mare tameartorukare iwadaruji dukodire tagaidure tawo iwido.
JOH 8:38 Imagore Iogwa Kurireu ure iorduwado jiwu tuwadaruji. Mare tagi tameartorure tao bataru pegareu jamedu boeji.
JOH 8:39 Egore: – Iogware Abraão rema. Jesus akore: – Abraão ore mode tagi dukeje taromode nono Abraão ro mogadure.
JOH 8:40 Itaidure iwo tarduwado Pao Kurireu makore iwu tuwadaru remawuji tawiagai. Boe jokodu jire Pao Kurireu akoino. Mare tagaidure tawo iwido. Abraão rokare aino. Kodire tao karegure ema.
JOH 8:41 Mare tagaidure tarowo nono tao remawu ro mogadure. Egore: – Pao Kurireu ure mitotu je kodire ure toredo čegi rugadu. Pao Kurireu ore remawuge nure čegi rugadu.
JOH 8:42 Jesus akore: – Pao Kurireu oremode tagi dukeje tameardu kurimode i. Itaregodure Pao Kurireu piji. Ča imi reo. Pao Kurireu koiare ure itarego mato tuwadaru tabo. Imi igoia karega.
JOH 8:43 Mare tagaidukare iwadaruji dukodire tagaidukare tawiapagawo imagore jiboeji. Dukodire tarduwakare iwadaruji.
JOH 8:44 Bope doge eimijera ore nure tagi. Tameartorure tao bope doge eimijera meardaeji. Marigudu ure boe ewido ji aino kimo. Aidukare boe ewadaru pemegareuji rugadu. Tuwadrarodae jire jorduware tu rugadu. Marigudu batrarodure tu tu je ji aino. Batrarodureuge etuo nure ema.
JOH 8:45 Boe jokodu jire inagoino tai. Tao batrarodureu koiare ure tawarigu ipiji tameartorukawo i.
JOH 8:46 Iro pegakare dukodire tarduwakare ia iro pegareu bagai. Imagore boe remawuji tawiagai tameartoruwo i mare tameartorukare i.
JOH 8:47 Pao Kurireu ore ewiapagamode Pao Kurireu bataruji. Mare Pao Kurireu ore karegure tagi. Dukodire tagaidukare tawiapagawo ji.
JOH 8:48 Nono emagore Jesusji. Egore: – Boro. Čegi čerduware boe remawuji rugadu. Samaria moto kejewu nure aki. Bope uwari meture atada. Nou boe erdu pegare Samaria moto kejewugei dukodire erdu pegare Jesusji jamedu.
JOH 8:49 Jesus makore ewadaru jipagi. Akore: – Bope uwari metukare itada. Imeartorure Iogwa Kurireu bataruji kodi. Mare tamago pegare ikieji.
JOH 8:50 Itaidukare boe emago pemegawo ikieji. Mare Iogware aidure boe emago pemegawo ikieji. Emare aiwore irore jiboeji dukodire mako pemegare irore jiboeji.
JOH 8:51 Boe jokodu jire inagoino. Boe emeartorumode iwadaruji dukeje ewimodukare jii toro rugadu.
JOH 8:52 Egore: – Ča ainore čerduware bope uwari meture atada rugadu duji. Abraão bire marigudu. Nou makore Pao Kurireu bataru jiwuge eiamedu boe ewire marigudu jamedu. Mare aki akagore meartorumode aiwuge ewimodukaie jii toro.
JOH 8:53 Iogwa Abraão bire marigudu. Akurikare Abraão kori. Nou makore Pao Kurireu bataru jiwuge eiamedu boe ewire marigudu. Ioguduba nure aki?
JOH 8:54 Jesus akore: – Imode ikie kurido ikinaigodu dukeje boe kurireu modukare imi. Mare Iogwa Kurireu koiare ure ikie kurido. Tagagore tameartoruie Pao Kurireuji rugadu. Mare marigudu tarduwakare ji. Mare imire iorduware ji rugadu. Imagomode iorduwakaie jituji dukeje iwadrarodumode nono tawadrarodu mogadure. Mare iorduware ji rugadu. Imeartorure makore jiboeji.
JOH 8:56 Tao Abraão jorduware tuiordumoduie itaregodure duji dukodi jakarere pudui rugadu. Nono jordure i dukeje jakarere pudui rugadu.
JOH 8:57 Egore: – Ako joru oto padukare 50. Dukodire ardukare Abraãoji rugadu.
JOH 8:58 Jesus akore: – Boe jokodu jire inagoino tai. Abraão botukare raga mare imire imugure baru tada marigudu.
JOH 8:59 Nono nou boe ere tugeragu toriji tugidowo tabo ji mare Jesus ure tuwiado epiji. Dukeje uture Pao Kurireu uwai piji.
JOH 9:1 Jesus merure awaraji. Nono jordure joku bokwareu imeduji. Nou imedu boture tuioku bokwa tabo ji aino imedure pudumi du ka.
JOH 9:2 Nono nou Jesus ure jorduwadowuge enarare ji. Egore: – Jorduwareu nure aki. Ioguduba ro pegare? Kodiba awu imedu boture tuioku bokwa tabo? Ema na ro pegare? Dukodi kana joku bokware? Uo kana ro pegare? Uče na ro pegare? Dukodi kana boture tuioku bokwa tabo?
JOH 9:3 Jesus akore: – Boe ero pegareu koia karega joku bokware. Boture tuioku bokwa tabo Pao Kurireu uwo pemegago tuwo boe erdudo ture joku pemegago duji tuwo boe erdudo turo rakareuji.
JOH 9:4 Mare Pao Kurireu ure itarego mato. Pamaragoduwo meri kimoto iwo ure itarego matowu meardae towuje ji je. Mare kuri aino boe pegamode boei. Boe mode boei nono boečo mogadure. Boe emaragodumodukare pugeje.
JOH 9:5 Iragojere woe moto keje dukeje imode nono jorugu pemegareu mogadure. Mare jorugu ji karega inagoino. Imode boe erduwado boe remawuji rugadu. Dujire inagoino.
JOH 9:6 Jesus akore aino dukeje ure todoguru barigu mototo. Ure moto bekurudo nou todoguru tabo. Ure tugeragu nou moto bekuruji. Ure bu nou imedu joku bokwareu joku keje. Nono makore ji.
JOH 9:7 Akore: – Atudo toro nou Siloé po ka awo ae kabi. Nou Judeu doge ewadaru tabore egore “Utudowu”. Ainore egore nou Siloé poji tuwadaru tabo. Nono nou imedu joku bokwareu uture nou Siloé po ka. Ure tuie kabi dukeje joku pemegagodure. Ure tugirimi tuibagi tuwai ka pugeje.
JOH 9:8 Nono nou jorduware jiwuge erore ta je. Egore: – Čewu imedu joku bokwareu karega? Kočare mugure woe maigodu togwamaguduwo boei diero rogu bagai toče.
JOH 9:9 Iage egore: – Ema rugadu. Mare iage egore: – Ema karega. Jere nono nou joku bokwareu je mogadure mare ema karega. Mare nou imedu akore: – Imi rugadu reo.
JOH 9:10 Nou boe egore: – Kočare akaiwo pemegare rugadu? Nuba boere ai?
JOH 9:11 Dukeje akore: – Ia imedu iere Jesus. Ema koiare ure moto bekurudo todoguru tabo. Ure nou moto bekuru bu ioku keje. Dukeje makore i ituwo toro Siloé po ka iwo ie kabi poče. Dukodi čare iture toro. Ire ie kabi rugadu. Dukodi čare itaiwo pemegare aino rugadu.
JOH 9:12 Nou boe egore: – Nou Jesus pa? Imedu akore: – Iorduwakare bagai.
JOH 9:13 Nou boe ere nou imedu reko toro fariseu doge etae.
JOH 9:14 Jesus ure nou imedu joku pemegago Sábado meriji.
JOH 9:15 Nou fariseu doge enarare nou imeduji. Egore: – Nuba boere ai aeku pemegagoduwo aino? Nou imedu akore: – Ia imedu ure moto bekuru bu ioku keje. Dukeje makore i iwo ie kabi. Dukeje čare itaiwo pemegare aino rugadu.
JOH 9:16 Ia fariseu doge egore: – Nou roinowu imedu meartorukare paroji kodire rore aino Sábado meri keje. Pagi parokare aino. Dukodire Pao Kurireu piji karega aregodure. Mare iage egore: – Ia ro pegareu imedu ro rakamodukare nono awu imedu ro raka mogadure. Awu imedu pemegare rugadu. Dukeje čare emeardaekare nono pumeardaere.
JOH 9:17 Dukodi čare nou fariseu doge enarare nou joku bokwareu imeduji pugeje. Egore: – Nou imedu ure aeku pemegagowu nuba ameardaere ji? Nou imedu pemegare rugadu? Nou joku bokwareu imedu makore ewadaru jipagi. Akore: – Ia makore Pao Kurireu bataru jiwu nure ema rugadu.
JOH 9:18 Mare nou Judeu doge eimijerage etaidukare tumeartoruwo nou joku bokwareu akoino duji. Emeardaere joku bokwareu karegure ema. Dukodire emagore nou imedu uče bagai uo bagai jamedu.
JOH 9:19 Enarare nou učeji, nou uoji jamedu. Egore: – Taganaregedu nure awu imeduče? Boture tuioku bokwa tabo? Nuba boere ji joku pemegagoduwo aino?
JOH 9:20 Nou uče uo egore: – Čedonaregedu nure ema rugadu. Boture tuioku bokwa tabo rugadu.
JOH 9:21 Mare čerduwakare nuba boere ji kodiba joku pemegagodure aino. Čerduwakare iduba koiaba ure joku pemegago. Ča. Imedu nure ema. Tanarado ji. Ema koiare umode tawiedu pemegado nuba nou imedu rore pudui duji.
JOH 9:22 Mare marigudu nou Judeu doge eimijerage emagore boei emeartorukawo Jesusji. Egore ia meartorumoduie Jesusji umode boe ekinorudowu nure ema duji dukeje tumode utudo nou ture bato puiwu bai piji rugadu aregodukawo nou bai ka pugeje. Dukodire nou joku bokwareu uče uo epagudugodure nou tugimijerageče.
JOH 9:23 Dukodire emagokare Jesus ieji tugimijerage ewiagai. Egore tonaregedu koiaie umoduie ewie iduba roino pudui duji.
JOH 9:24 Dukodire nou Judeu doge eimijerage emagore nou joku bokwareu imedu bagai pugeje. Emagore ji. Egore: – Pao Kurireu aiwonure ai rugadu. Awadarudo turugadu. Nou ure apemegadowu imedu ro pegareu nure ema rugadu.
JOH 9:25 Nono nou imedu joku bokwareu akore: – Imedu ro pegareu mode ema dukeje mare iorduwakare ji. Mare imire ioku bokware rugadu. Aino čare itaiwo pemegare rugadu.
JOH 9:26 Egore: – Nuba rore ai tuwo aeku pemegado akaiwo pemegawo pugeje?
JOH 9:27 Nou imedu akore: – Ire tawie marigudu. Tawiapagakare iwadaruji. Kodiba tanarare i pugeje? Tagaidure tameartoruwo ji uwo tarduwado jamedu?
JOH 9:28 Nono nou fariseu doge ekorigodure. Emago pegare nou joku bokwareu imeduji. Egore: – Akire ure jorduwadowu nure aki. Mare čegi Moisés ure jorduwadowuge nure čegi.
JOH 9:29 Pao Kurireu makore Moisesji rugadu. Mare awu imedu karega. Čerduwakare kaibowu pijiba awu imedu aregodure.
JOH 9:30 Nou joku bokwareu imedu akore: – Nou imedu ure ipemegago itaiwowo pugeje. Ioku bokwakare pugeje. Boe eimijerage nure tagi. Kočare tarduwakare nou imeduji. Kočare arduwakare kaibowu pijiba awu imedu aregodure.
JOH 9:31 Iwodure ioku bokwa tabo. Aino ča nou imedu ure itaiwodo pugeje. Marigudu rugadu ia boe erokare nono ro mogadure. Ča Pao Kurireu biapagamodukare ro pegareuge emagore pudui jiboe bagai. Boe jokodu. Mare Pao Kurireu biapagamode meartorure puduiwuge ewagai rugadu. Boe emeartorumode Pao Kurireu bataruji dukeje Pao Kurireu biapagamode ewadaruji.
JOH 9:33 Nou imedu aregodukare Pao Kurireu piji dukeje ro rakamodukare. Umodukare ipemegago. Kodiba ure ipemegago? Ča aregodure Pao Kurireu piji rugadu.
JOH 9:34 Nou boe eimijerage egore: – Awodure dukeje ro pegareu nure aki rugadu jii aino. Aki na akaidure awo čerduwado? Arduwa bokwa. Dukodi čare ere nou imedu utudo nou ture bato puiwu bai piji aregodukawo nou bai ka pugeje.
JOH 9:35 Jesus meardure nou boe eimijerage erore aino duji dukeje jemarure nou ture pemegagowu imedu bagai. Jordure ji dukeje makore ji. Akore: – Aki na ameartorure Imedu Onaregeduji rugadu?
JOH 9:36 Nou imedu akore: – Ioguduba nure ema? Iwie imeartoruwo ji rugadu.
JOH 9:37 Jesus akore: – Ardure ji marigudu. Imi reo rugadu. Imi rugadu inagoino ai.
JOH 9:38 Nou imedu ure tubu jodo moto keje Jesus jokorai. Akore: – Imeartorumode ai rugadu. Ikimijera mode aki rugadu.
JOH 9:39 Jesus akore: – Itaregodure woe moto ka itaiwowo boe ero pegareu bagai. Aino joku bokwareuge etaiwomode pugeje. Mare joku bokwareuge ei karega inagoino. Jorduwakare iwugeire inagoino emeartoruwo i rugadu. Mare očarore tuwadaru jiwuge emode nono joku bokwareuge emogadure. Mare joku bokwareuge ei karega inagoino. Egore tuiorduwaie Pao Kurireu meardaeji. Mare pagatu jere egoino. Dukodire erduwamodukare i rugadu.
JOH 9:40 Ia fariseu doge eragojere nono jamedu. Emeardure nou Jesus akoino duji. Dukodire emagore Jesusji. Egore: – Ameardaere joku bokwareuge nure čegi rugadu? Čedaiwo pemegare.
JOH 9:41 Jesus akore: – Inagore joku bokwareugeie. Mare joku bokwareuge ei karega inagoino. Boe egomode turo pegaie mare turo pegamodukaie aino pugeje. Dukeje Pao Kurireu biagodumode nou ero pegare jiboe piji rugadu. Mare tagagore tarduwaie Pao Kurireu meardaeji rugadu. Tagagore taro pega bokwaie. Aino tagojarore tawadaruji rugadu. Dukodi ro pegareuge nure tagi aino rugadu.
JOH 10:1 Jesus akore: – Boe jokodu jire inagoino. Boe emode tagu carneiro doge edu tadawu ibora pemegado eduwo tada boečoji. Jeture carneiro doge eiwu umode turemo etae nou eda ibora baiporoji. Mare iwogureu umodukare turemo nou edu tadawu ibora baiporoji. Umode turemo edu tadawu ibora kujiado.
JOH 10:3 Nou jeture nou ibora baiporo jiwu umode nou carneiro doge eda baiporo jado nou jeture carneiro doge eiwu uwo turemo carneiro doge etae. Nou jeture carneiro doge eiwu jorduware tagu carneiro doge ekieji. Dukodire makomode tagu carneiro doge ewagai dukeje erduware makoji. Kodire etumode rekodaji tieda piji.
JOH 10:4 Umode etawuje eda piji dukeje etumode rekodaji rugadu erduware jetu pemegare puduiwu makoji rugadu. Jeture eiwu utumode etododai.
JOH 10:5 Carneiro doge etumodukare ia boe eregodaji rugadu. Ia makomode ewagai mare eregodumode piji rugadu. Erduwakare makoji dukodi eregodumode piji.
JOH 10:6 Jesus makore nou inoduji boe ewiagai mare nou boe erduwakare kaba jiba akoino.
JOH 10:7 Nono Jesus makore ei pugeje. Akore: – Boe jokodu jire inagoino tawiagai. Ire nono nou carneiro doge eda kejewu bai poro mogadure. Mare bai poro ji karega inagoino.
JOH 10:8 Meartorure iwuge ere nono carneiro doge emogadure. Mare carneiro dogei karega inagoino. Marigudu iage etaregodure tuwo boe erego ikoda piji mare meartorure iwuge ewiapagakare ei.
JOH 10:9 Iwogureu aidure tu tuwo tugeragu boeji boe epiji. Aidure tu tuwo boe ewido. Aidure tu tuwo boe etagedudo. Mare imire ire nono bai poro remawu mogadure. Mare bai poro ji karega inagoino. Boe etumode itae dukeje imode ekodiwado tugodure jiboeji. Ča itaregodure woe iwo boe emugu pemegado. Emugu pemegamode rugadu.
JOH 10:11 – Jetu pemegare carneiro dogeiwu umode iaboedo tuwido tuwo tagu carneiro doge ekinorudo barege pegareuge epiji. Ča iromode nono nou jetu pemegare carneiro dogeiwu ro mogadure. Mare carneiro doge ewugeje karega imode imagu boe etai. Imode imagu ro pegareuge etai iwo boedo činorudo boe pegareu piji.
JOH 10:12 Nou akure carneiro doge ečewu utugare biagoromodukare tietu pemegawo carneiro dogei. Aku ie karega. Dukodire rekodumode nou barogo pegareu piji. Umode tugera ra carneiro doge epiji. Dukeje nou barogo pegareu umode tugeragu ia carneiroji. Umode nouia carneiro doge edo taodo pubiji toro boe maereu ka.
JOH 10:14 Ča irore nono nou jetu pemegare carneiro dogeiwu ro mogadure. Mare carneiro dogei karega inagoino. Ietu pemegamode boe dogei rugadu. Iogwa Kurireu jorduware i. Iorduware Iogwa Kurireuji jamedu. Nono iorduware meartorure iwugei rugadu. Meartorure iwuge erduware i rugadu. Ire irugadu iwiwo emugato.
JOH 10:16 Ia boe emeartorumode i jamedu. Mare eragojekare woe. Imode ikeragu ei jamedu emugu pemegawo itabo rugadu. Ewiapagamode iwadaruji rugadu. Meartorumode iwuge eiamedu boe emugumode puapo. Jetu pemegare eiwu umode mitotu je.
JOH 10:17 – Ire irugadu iwiwo dukodire Iogwa Kurireu meardu kurire i rugadu. Dukodire umode iewodudo pugeje.
JOH 10:18 Imi imode imagu boe pegareuge etai itaidu tabo ewo iwido. Itaidumode imode imagu. Itaidumode iewoduwo dukeje iewodumode. Ainore Pao kurireu akore iroiago.
JOH 10:19 Jesus makore aino dukeje nou boe emeardaekare nono pumeardae mogadure pugeje nou Jesus bataru keje.
JOH 10:20 Iage egore: – Ia bope uwari meture awu Jesus tada. Aora bai baire rugadu. Pawiapagamodukare ji rugadu.
JOH 10:21 Mare iage egore: – Ia bope uwari metumode tada dukeje makomodukare aino. Romodukare aino. Ure joku bokwareu aiwodo pugeje. Ča bope uwari meture tadawu romode aino? Romodukare aino!
JOH 10:22 Biaku buture dukeje nou Judeu doge ewadure ia tuwadaeji Jerusalém ba kurireu keje. Nou tuwadae tabore ewiabuture ture Pao Kurireu uwai rakojedo du ka.
JOH 10:23 Jesus merure Pao Kurireu uwai ja tada. Salomão Uwai Jokora jire merure.
JOH 10:24 Nono boe ere bato pui ae dukeje enarare ji. Egore: – Akare čewie marigudu dukodire boe raire čerduwawo ai rugadu. Ča čewiedu pemegado. Aki na amode boe ekinorudo? Čebagare bagaiwu nure aki?
JOH 10:25 Jesus akore: – Ire tawie marigudu. Mare tameartorukare i. Iogwa Kurireu ure iro rakado tameartoruwo iro rakare rugadu duji.
JOH 10:26 Mare tameartorukare i. Iwobe karegure tagi.
JOH 10:27 Meartorure iwuge eromode nono carneiro doge ero mogadure. Ire nono jeture carneiro dogeiwu mogadure. Mare carneiro dogei karega inagoino. Meartorure iwuge ewiapagamode iwadaruji. Iorduware ei. Ekodumode iregodaji.
JOH 10:28 Imode emugu pemegado. Du akedumodukare rugadu. Ewimodukare pugeje. Ia boe emodukare tugeragu ei ipiji.
JOH 10:29 Imeardu kurire awu Iogwa ure maku inaiwugei. Iogwa Kurireu jetu pemegamode ei rugadu dukodire ia boe emodukare tugeragu ei Iogwa piji.
JOH 10:30 Iogwa imi čere aino pure tu je.
JOH 10:31 Nono boe ere tugeragu toriji tuwo tori to Jesusji.
JOH 10:32 Mare Jesus makore ei. Akore: – Iogwa Kurireu koiare ure iro rakado. Tardure nou iro pemegareuji. Kodiba tagaidure tawo iwido?
JOH 10:33 Egore: – Aro pemegakare kodi. Imedu nure aki. Mare akaidure awo Pao Kurireudo aki. Mare akagoino dutabo amago peganure Pao Kurireuji rugadu.
JOH 10:34 Nono Jesus akore: – Pao Kurireu ure taro maku tagai dukodi nou taro padure bapera keje nou tago bakaru tada. Nou bakaru akore: “Pao Kurireu ore nure tagi.”
JOH 10:35 Boe jokodu jire bapera kejewu Pao Kurireu bataru akoino. Ainore ure jii aino. Akedumodukare rugadu. Ča Pao Kurireu ure tuwadaru maku boe etai. Emare makore ei tore nuie emage.
JOH 10:36 Mare imi. Iogwa Kurireu ure tugeragu i. Ure itarego mato moto ka. Imire inagoino Pao Kurireu Onaregedu nuie imi. Itaidukare tamago pegawo i. Imi imago pegakare Iogwa Kurireuji rugadu.
JOH 10:37 Iromodukare Iogwa Kurireu aidure jiboeji dukeje tameartorumodukare i.
JOH 10:38 Tameartorumodukare i mare iromode Iogwa Kurireu aidure jiwu iro rakareuji dukeje tameartorudo iro rakare jiboeji. Tameartorumode irore jiboeji dukeje tarduwamode Iogwa merure itabo rugadu duji. Tarduwamode iragojere Iogwa Kurireu apo rugadu duji. Čere aino pure tu je.
JOH 10:39 Ča ere tuiago tugeragu Jesusji rugadu mare Jesus ure tumegido pači toro epiji.
JOH 10:40 Nono uture pugeje. Kurugodure Jordão po kajeje toro João Batista ure boe etao pegodo kejewu ka. Nonore Jesus rakojere tu jao.
JOH 10:41 Nonore boe etaregodure Jesus ae pugeje. Emagare. Egore: – João Batista ro rakareu bokware. Mare ure boe erduwado Jesus jiboe jamedu boe jeture pudui rugadu.
JOH 10:42 Dukodire boe emagare nono tumeartorure Jesus jitu tabo rugadu.
JOH 11:1 Ia imedu kogodure. Mugure Betânia ba kurireu keje. Nou imedu iere Lázaro. Uwie aredu iere Maria. Nou Maria utuie iere Marta. Eiamedu boe emugure nou Betânia ba kurireu keje.
JOH 11:2 Marigudu nou Maria ure roreboe pemegareu reko Jesus bure joki. Ure reko dukejere ure kidudo tao tabo pugeje. Mare aino čare uwuri kogodure.
JOH 11:3 Dukodire nou Maria, nou Marta ere boe erego tuwadaru tabo toro Jesus bagai. Egore nou boe egoiago nou Jesusji tuwuri kogoduie. Meardu kurire jiwu tuwuri kogoduie.
JOH 11:4 Nou boe etaregodure Jesus ae dukeje ere Jesus bie nou areme ewadaruji. Jesus meardure nou ewadaruji dukeje akore: – Iorduware nuba boe mode nou imedu Lazaruji. Kogodure mare bimodukare. Kogodure Pao Kurireu ie kuriwo. Lázaro bimodukare dukodi Pao Kurireu ie kurimode boe emago pemegawo ji. Lázaro bimodukare dukodi Pao Kurireu Onaregedu ie kurimode boe emago pemegawo ji jamedu.
JOH 11:5 Jesus meardu kurire Martaji, Mariaji, Lazaruji jamedu.
JOH 11:6 Mare utukare toro ewai ka kuri je. Merire pobe ji nono dukejere makore nou ture jorduwadowugei. Akore: – Pugeje. Pawo pagirimi toro Judéia moto ka Lázaro uwai ka.
JOH 11:8 Mare etaidukare utuwo. Egore: – Čegimijera. Maibari nou jeture Judéia moto kejewuge etaidure tuwo awido tori tabo. Atukaba toro pugeje.
JOH 11:9 Mare Jesus akore: – Meri oto padukare doze hora raga. Boe emerumode meriji dukeje ewure jetumodukare iaboeji erdure boeji kodi. Meri jire boe etaiwo pemegare.
JOH 11:10 Mare boe emerumode boečoji dukeje ewure jetumode iaboeji rugadu jorugu bokware kodi.
JOH 11:11 Nono Jesus makore ei: – Pamedia Lázaro unudunure mare itumode toro bagai iwo jetadudo.
JOH 11:12 Nou ure jorduwadowuge egore: – Ča unudure. Čare pemegagodumode.
JOH 11:13 Erduwakare Jesus ure tuwadaru inodudo pudui duji. Jesus akore Lázaro unudunuie mare jorduware Lázaro bire duji. Dujire akoino. Mare nou ure jorduwadowuge emeardaere Lázaro unudunuie rugadu duji. Emeardaere bikaie raga.
JOH 11:14 Dukodi čare Jesus mako pemegare ei. Akore: – Lázaro bire rugadu.
JOH 11:15 Iragojekare toro apo iwo pemegago. Mare aino tardumode iraga rakare duji. Dukodi tameartorumode i rugadu. Ča paduwo toro bagai.
JOH 11:16 Nono Tomé makore tumedagei. Akore: – Pagimijera bimode toro Judéia moto keje. Paduwo toro pagimijerapo pawiwo apo jamedu. Boe egore “Tomé” aino ji. Judeu doge ewadaru tabo egore “emegure puapowu”.
JOH 11:17 Ča Jesus uture toro Betânia ba kurireu ka ture jorduwadowugebo. Etaregodure dukeje boe ere Jesus bie Lázaro bie marigudu. Egore tuie merido pobe puibiji ji meture moto tada dukeje. Aino ča Jesus aregodure.
JOH 11:18 Ča Judéia moto kejewuge etaregodure nou Lázaro uwiemage ewai ka tuwo uwie Marta, uwie Maria ewudugugo. Nou boe emagare rugadu. Etaregodure Maria ae Marta ae tuwo etaora butugugo ewiagoduwo nou tuwuri piji. Nou Betânia ba kurireu padu puredure Jerusalém ba kurireuji. Du ure três quilômetros.
JOH 11:20 Ča Marta jorduware Jesus aregodure duji dukeje ure tudawuje tuwai piji Jesus togi. Mare Maria ukare tudawuje.
JOH 11:21 Marta aregodure Jesus ae dukeje makore ji. Akore: – Aragojemode woe čedabo čewuri bimodukare.
JOH 11:22 Mare iorduware Pao Kurireu umode amagore bagaiboe maku akai rugadu duji.
JOH 11:23 Jesus makore Martaji. Akore: – Awuri jewodumode pugeje.
JOH 11:24 Marta akore: – Iorduware. Ia meri keje awu moto akedumode dukeje iwuri jewodumode pugeje turuduwo baruto.
JOH 11:25 Nono Jesus makore ji. Akore: – Imire ire boe etowuje. Imire imode boe eewodudo rugadu. Meartorure iwuge ewimode mare eewodumode pugeje.
JOH 11:26 Meartorure iwuge ewimodukare pugeje jamedu. Meartorure iwadaru jiwuge ewimodukare pugeje rugadu. Ameartorure nou inoduji?
JOH 11:27 Marta akore: – Uu! Imeartorure rugadu. Čebagare bagaiwu umode boe ekinorudowu nure aki. Pao Kurireu Onaregedu nure aki. Pao Kurireu ure jawu pawobe ewie marigudu akaregodumoduie mato moto ka duji.
JOH 11:28 Marta ure tuwadaru akedudo Jesusji dukeje ure tugirimi tuwai ka. Makore tuwie Maria bagai. Makore tu ji. Akore: – Pagimijera aregodu. Makore awagai.
JOH 11:29 Maria meardure nou tuduie bataruji dukeje ure tuie bu tači je. Ure tumara tabo pudui toro Jesus togi.
JOH 11:30 Jesus aregodukare nou Betânia ba kurireu ka raga mare rakoje kimore toro tuiordure Marta jiwu awara keje.
JOH 11:31 Nou rakojere Maria uwai tadawuge erdure Maria uture toro duji. Dukeje eture rekodaji. Emeardaere Maria utumoduie toro bireu bagai traguduwo joki.
JOH 11:32 Mare Maria uture Jesus togi. Jordure Jesus jitu keje ure tuwududo moto keje Jesus bure paru. Makore Jesusji. Akore: – Čegimijera. Aragojemode woe dukeje iwuri bimodukare.
JOH 11:33 Jesus aiwore ji akoe tragudu tabo duji. Nono jordure nouia boe etragudure jamedu duji. Okudugodure ebo rugadu.
JOH 11:34 Nono makore ei. Akore: – Kaiba tare tugu? Egore: – Mato ka.
JOH 11:35 Eture apo toro ture Lázaro tugu towu tori poro ka. Nono Jesus ragudure.
JOH 11:36 Nou boe erdure Jesus ragudure duji dukeje emagore pui. Egore: – Ča Jesus meardu kurire Lazaruji rugadu.
JOH 11:37 Mare iage egore: – Kočare. Ure joku bokwareuge etaiwodo pugeje. Kodiba aregodukare kuri je tuwo Lázaro pemegago bikawo?
JOH 11:38 Jesus okudugodure nou Lázaro uwobebo rugadu. Dukejere ure tuburedo nou bireu padure tadawu tori poroji. Ia tori kurireu padure nou tori poro je keje.
JOH 11:39 Dukeje Jesus makore nou boei. Akore: – Nou tori kurireu tawuje tori poro je piji. Mare Marta akore: – Merire pobe puibiji ji meture nou tori poro tada duji. Dukodire kigogodure rugadu.
JOH 11:40 Mare Jesus makore ji. Akore: – Ire awie. Ameartorumode i dukeje ardumode Pao Kurireu ro rakare duji.
JOH 11:41 Nono nou boe ere nou tori kurireu tawuje nou tori poro je piji. Nono Jesus aiwore baruto dukeje akore: – Iogwa Kurireu. Awiapagare iwadaruji. Dukodire itaidure imago pemegawo ai rugadu.
JOH 11:42 Iorduware awiapagare iwadaru jituji rugadu mare itaidure iwo awu boe erduwado nou inoduji jamedu emeartoruwo i, emeartoruwo aki aigoiare are itarego mato rugadu duji.
JOH 11:43 Jesus ure tuwadaru akedudo tuo bagai dukeje makore toro nou Lázaro bagai. Akore: – Lázaro! Ae bu mato nou tori poro piji!
JOH 11:44 Ča Lázaro ure tudawuje nou tori poro piji rugadu! Bikare pugeje. Jewodure pugeje rugadu. Nou boe ere upodo tabowu areia upo kimore apo. Upo kimore je tabo jamedu. Nono Jesus makore nou boei. Akore: – Nou areia tawuje piji utuwo tuwai ka.
JOH 11:45 Nou rakojere nonowu boe eiamedu boe erdure Jesus rore aino duji. Dukodire emeartorure Jesusji.
JOH 11:46 Mare iagere tugirimi tuibagi Jerusalém ba kurireu ka. Eture tugimijerage fariseu doge etae tuwo ewie Jesus rore jiboeji.
JOH 11:47 Dukodire nou fariseu doge ere bato pui nou Judeu doge eimijeragebo. Nou ure Judeu doge enomea maku Pao Kurireu aiwuge eimijerage edure nono jamedu. Emororamagadure rugadu boe emeartorumodukare pudui pugeje duji. Emagore pui. Egore: – Nuba paromode? Nou imedu Jesus ro rakare rugadu.
JOH 11:48 Boe eiamedu boe emeartorumodukare pai pugeje tumeartoruwo awu imedu Jesusji. Nono Roma kejewuge boe eimijerage erdu pegamode boe eroino duji jamedu. Dukodire Roma kejewuge boe eimijerage etaidumode turo pegawo pai. Emode awu Pao Kurireu uwai pegado. Emode pawobe etagedudo.
JOH 11:49 Awu joruji nou ure Judeu doge enomea maku Pao Kurireu aiwuge boe eimijera kurireu iere Caifás. Rakojere nono nou boe eimijeragebo jamedu. Makore nou tumedagei. Akore: – Tarduwa bokware.
JOH 11:50 Boe pegakawo pai pawo nou imedu bito pawobe ewo činorudo Roma kejewu boe eimijerage pegareuge epiji. Pamodukare bito paiamedu boe pawimode.
JOH 11:51 Nou Caifás nou ure Judeu doge enomea maku Pao Kurireu aiwuge eimijera kurireu nure ema nou joruji. Dukodire Pao Kurireu ure tumeardae maku ai makowo nou tuwadaruji nou boe eimijerage ewiagai. Mare nou Caifás jorduwakare Pao Kurireu bataru taboie tagoino duji. Akomode pudumie tagoino. Mare ema karega akoino. Pao Kurireure akoino. Ainore Pao Kurireu rore tuwo boe ewie Jesus bimoduie duji Judeu doge ero pegareu boe moriče.
JOH 11:52 Jesus bimode boe eiamedu boe ero pegareu moriče jamedu. Dukodire meartorure Jesus jiwuge eiamedu boe Pao Kurireu oremode emage. Etuwobe mode pugi.
JOH 11:53 Nou meri otobiji nou Judeu doge eimijerage ere tumeardae pegareu tawuje tuwo Jesus bito.
JOH 11:54 Jesus jorduware emeardaeji. Dukodire merukare Judéia motoji pugeje mare utu jaere ia moto akurugudu maereu ka. Uture ture jorduwadowugebo toro ia boe eda ka. Nou boe eda iere Efraim. Nonore rakojere ture jorduwadowugebo pugeje.
JOH 11:55 Boe puredugodure Judeu dogei ewaduwo ia tuwadaeji. Nou ewadae iere Páscoa. Dukodire boe emagare tudu tabo Jerusalém ka Judéia moto piji tuwo tubemegado turowo nou to bakaru tadawu turo boeji tuwaduwo nou tuwadae Pascoaji.
JOH 11:56 Nou fariseu doge, nou ure Judeu doge enomea maku Pao Kurireu aiwuge eimijerage emagore boe eiamedu boei ewo Jesus maku pudai. Boe erdumode Jesusji dukeje ewo nou boe eimijerage ewie nou boe eimijerage ewo tugeragu Jesusji. Dukodire nou boe etaiwore Jesus bagai nono Pao Kurireu uwai tada. Emagore pui. Egore: – Nuba tameardaere? Jesus aregodumokana? Iage egore: – Aregodumodukare. Jorduware pagimijerage etaidure turo pegawo pudui duji.
JOH 12:1 Ča Jesus uture Betânia ba kurireu ka pugeje. Uture ture jewodudowu Lázaro uwai ka. Okwareu meri oto padure seis Judeu doge ewaduwo tuwadae Pascoaji.
JOH 12:2 Ča Jesus rakojere nou Lázaro uwai keje. Nou uwai kejewuge ere boe eke pemegado Jesus uwo kowuje. Aredu Marta ure ia boe eke maku Jesus ai. Lázaro mugure nou ira keje togwagewo jamedu.
JOH 12:3 Nono Maria aregodure roreboe mori kurireu tabo. Nou roreboe iere nardo. Nono Maria ure nou roreboe reko Jesus bure joki nou boe erduwawo boe eimijera kurireu nure ema duji. Dukejere ure Jesus bure kidudo tao tabo. Nou roreboe ro jore nou bai oto jamedu boeto.
JOH 12:4 Nono Jesus ure jorduwadowu imedu makore ji. Nou imedu iere Judas Iscariotes. Ema koiare umode Jesus maku boe eimijerage pegareuge etai.
JOH 12:5 Akore: – Kodiba awu aredu ukare nou roreboe maku diero bagai tuwo diero kurido tuwo maku marenarue doge etai? Awu roreboe mori kurire rugadu. Boe emaragodumode jii joru akedu ka tuwo tugeragu nou diero kurireuji tuwo akirodo awu roreboeji.
JOH 12:6 Mare pagare Judas akoino. Aidukare tuwo diero maku marenarue doge etai. Aidure tugiwoguwo ji. Jesus ure nou Judas jetudo to dieroji. Mare nou Judas iwogure tu tu Jesus o dieroji.
JOH 12:7 Mare Jesus akore: – Akaba awu aredu pogurudo rore i duji. Ure reko iwure joki tuwo iwiri udo turugadu ituguduwo mototo iwi keje nono Pao Kurireu meardae mogadure.
JOH 12:8 Marenarue doge edumode tagabo jii toro rugadu. Mare imire itumode tabiji rugadu.
JOH 12:9 Boe erduware Jesus rakojere Lázaro uwai keje Betânia keje duji. Dukodire eture toro ae. Emagare. Etaidure tuiorduwo nou Jesus ure jewodudowu Lazaruji jamedu.
JOH 12:10 Mare nou ure Judeu doge enomea maku Pao Kurireu aiwuge eimijerage etaidukare nou Lazaruji jamedu. Jesus ure Lázaro jewodudo dukodire Judeu doge emeartorukare nou ure Judeu doge enomea maku Pao Kurireu aiwugei pugeje tumeartoruwo Jesusji. Dukodire nou ure Judeu doge enomea maku Pao Kurireu aiwuge eimijerage ere tumeardae pegareu tawuje tuwo Lázaro bito jamedu.
JOH 12:12 Nou barogwato boe emagare nono Jerusalém ba kurireu keje tuwaduwo nou tuwadae pascoaji. Erduware Jesus aregodumode pudae duji.
JOH 12:13 Dukodire ere tugeragu apidoguru aiji. Eture tabo toro Jesus togi. Ekudugodure bagai. Egore: – Israel kejewu boe eimijera kurireu reo! Pao Kurireu ure arego mato pagae. Ure turaga maku ai rugadu. Boe eiamedu boe emago pemegawo ji rugadu! Pao Kurireu uwo boe pemegado ji rugadu!
JOH 12:14 Nono Jesus jordure ia jumenta onaregeduji. Mugure keje tuduwo Jerusalém ba kurireu ka. Marigudu Pao Kurireu makore ainoie Jesus romode rugadu. Akore:
JOH 12:15 – Awu mugure Jerusalém kejewuge tagi. Tabagudukaba. Tagimijera kurireu mugumode jumenta onaregedu keje taregoduwo tagae.
JOH 12:16 Nou Jesus ure jorduwadowuge erduwakare nou Pao Kurireu akoino jiboeji. Mare ia meri keje Jesus jewodumode pugeje. Jesus jewodumode pugeje dukeje nou ure jorduwadowuge ewiabutumode nou Pao Kurireu bataru keje. Dukodi čare erduwamode ji. Erduware Pao Kurireu makore Jesus jiboeji jeture pudui rugadu duji.
JOH 12:17 Jesus ure Lázaro jewodudo pugeje dukeje ia boe ere boe eiamedu boe ewie nou Jesus rore aino duji. Erdure Jesus rore aino duji dukodi čare ere boe ewie. Dukodire boe eiamedu boe erduware Jesus ro rakare duji.
JOH 12:18 Dukodire boe emagare tugodui Jesus togi.
JOH 12:19 Mare fariseu doge etaidukare. Egore pui: – Tagaiwodo. Boe erore tači pabiji. Boe eiamedu boe emeartorure awu Jesusji. Dukodire erore tači pabiji toro togi.
JOH 12:20 Ia Grécia kejewuge eragojere Jerusalém ba kurireu keje tuwaduwo nou Judeu doge ewadaeji ebo tumago pemegawo Pao Kurireuji.
JOH 12:21 Eture Filipe ae. Nou Filipe boture Betsaida ba kurireu keje. Nou Betsaida ba kurireu mugure Galiléia moto keje. Nou Grécia kejewuge emagore nou Filipiji. Egore: – Čedaidure čerduwo Jesusji.
JOH 12:22 Filipe uture André ae. Ure André bie nou Grécia kejewuge etaidure jiboeji. Dukejere eture puapo Jesus ae tuwo Jesus bie.
JOH 12:23 Dukeje Jesus makore ewadaru jipagi. Akore: – Imedu Onaregedu nure imi. Kuri aino boe erduwamode boe kurireure imi duji, boe pemegareure imi duji.
JOH 12:24 Boe jokodu jire inagoino. Boe emodukare ia trigo a tugu mototo botuwo dukeje botumodukare rugadu. Mare umode mitotu je tu rugadu. Mare boe emode trigo a tugu mototo dukeje nou trigo enogo botumode. Mare botumode dukeje nou trigo a pegagodumode moto tada. Botumode dukeje ričodumode enarimode. A makamode rugadu.
JOH 12:25 Ia boe etaidu kurimode turowo taidure jiboeji turaga tabo tu rugadu. Nou boe eraga akedumode epiji rugadu. Egare remawu modukare. Nou boe ewarigudumode toro bope doge eda kejewu joru pegareuto jamedu. Mare ia boe etaidumodukare tumeardaere jiboeji tuwo tugera ra taidure jiboe piji tumeartoruwo Pao Kurireuji dukeje boe pemegamode ei rugadu. Egare remawumode rugadu. Ewarigudumodukare bope doge eda kejewu joru pegareuto jamedu. Mare emugumode baru tada jii toro rugadu. Du akedumodukare.
JOH 12:26 Ia boe aidumode tumeartoruwo iwadaruji dukeje umode tugera ra taidure jiwu turo tago pegareu boe piji tuduwo itabo. Dukeje nou meartorure iwu rakojemode itabo. Iogwa Kurireu umode boe pemegado meartorure iwadaru jiwugei. Mako pemegamode ei rugadu.
JOH 12:27 – Boe ero pegamode i dukodire ikiarigodure rugadu. Mare imago pegamodukare Iogwa Kurireuji uwo ero pegamode idu utudo ipiji. Boro. Iogwa ure maku inaiwu imaragodae koiare boe ero pegamode i. Dukodire itaregodure woe moto ka.
JOH 12:28 Dukeje Jesus makore baruto tuo bagai. Akore: – Iogwa. Boe erdudo aro kurireuji boe erduwawo akurire rugadu duji. Nono Pao Kurireu makore baru piji. Akore: – Ire boe erdudo iro rakareuji marigudu. Imode erdudo iro rakareuji pugeje, iro pemegareuji jamedu.
JOH 12:29 Boe emeardure nou baru pijiwu makoji. Iage emeardaere boeiaruruie akoino. Mare iage egore: – Ia Pao Kurireu utugare baru tadawure akoino baru piji Jesusji.
JOH 12:30 Mare Jesus makore ei. Akore: – I karega akoino mare taire akoino tarduwawo Pao Kurireu bataruji.
JOH 12:31 Kuri aino Pao Kurireu aiwomode awu moto kejewuge eiamedu boe eroji ero pemegareu bagai, ero pegareu bagai jamedu. Kuri aino Pao Kurireu umode awu moto kejewu bope doge eimijera raka ta piji.
JOH 12:32 Boe emode ipo padure pugajejewu rakojedo itabo dukeje imode boe emeartorudo i rugadu.
JOH 12:33 Jesus akoino nou boei tuwo erduwado nuba boe eromode pudui tuwo tuwido ipo padure pugajejewu keje.
JOH 12:34 Nou boe egore: – Pago bakaru ure parduwado. Akore umode boe ekinorudowu bimodukaie. Akedumodukaie. Mare akagore Imedu Onaregedu bimoduie ipo padure pugajejewu keje. Ioguduba nure aki?
JOH 12:35 Jesus akore: – Jorugu pemegareu rakojemode tagabo tu je. Tamerudo nou jorugu tabo. Tamerumode jorugu tabo dukeje boečomodukare tumaedo taiogi. Merumode boečo kaowu jorduwamodukare kaiba tuiomode. Mare boečo ji karega inagoino. Boe ero pegareu jire inagoino. Jorugu ji karega inagoino jamedu. Ire inagoino.
JOH 12:36 Iragoje kimore tagabo dukeje tameartorudo i rugadu. Tameartorumode i dukeje tarduwamode taro pemegawo nono boe erdure boeji jorugu tada dumogadure. Mare jorugu ji karega inagoino. Boe ero pemegareu jire inagoino. Jesus ure nou tuwadaru akedudo dukeje uture boe epiji tuwo tuwiado epiji.
JOH 12:37 Ure turo rakareu towuje nou boe egai. Ure epemegado. Ure boe pemegado ei. Mare emeartorukare Jesusji.
JOH 12:38 Erore aino dukodire Isaías makore jiboe mariguduboe jeture pudui rugadu. Emare makore Pao Kurireu bataruji marigudu. Marigudu ure Pao Kurireu bataru bu bapera keje. Akore: – Pao Kurireu nure aki. Boe emeartorumodukare are maku inaiwu awadaruji. Ire boe ewie ji mare emeartorukare Pao Kurireu nure aki duji. Are boe erdudo aragaji. Mare emeartorukare ai rugadu.
JOH 12:39 Nono nou boe eroiwakare tumeartoruwo rugadu. Ainore Isaías akore marigudu:
JOH 12:40 – Pao Kurireu ure erduwa bokwado emeartorukawo pudui. Pao Kurireu akore: “Ire eku bokwado. Ire etaora pegado. Mare emeardae remawu jire inagoino. Dukodire ekure mare emeardaemodukare taiwowo irore jiboeji. Etaorare mare erduwamodukare irore jiboeji. Dukodire emodukare tugera ra turo pegare jiboe piji tumeartoruwo i rugadu. Dukodire imodukare ekinorudo ero pegareu piji.”
JOH 12:41 Marigudu rugadu Isaías makore. Emare jordure Jesus ro pemegamode jiboeji, ro rakamode jiboeji. Dukodire ure awu bataru bu bapera keje.
JOH 12:42 Ma čare ia Judeu doge eimijerage emeartorure Jesusji. Mare fariseu doge etaidukare Jesusji dukodire nou meartorure Jesus jiwuge emagokare boeji. Emagokare tumeartorure Jesus jituji. Emagomode dukeje fariseu doge emode etudo nou Judeu doge ere bato puiwu bai piji.
JOH 12:43 Etaidu kurire boe emago pemegawo pudui. Dukodire etaidu kurikare Pao Kurireu mako pemegawo pudui epagudure nou boe eimijerageče dukodi.
JOH 12:44 Jesus uwadodure tuwadaru tabo nou boe eiamedu boe emearduwo tagoino jiboeji. Akore: – Meartorure iwuge emeartorumode ure itarego matowuji jamedu.
JOH 12:45 Jordure iwuge erdure ure itarego matowuji jamedu.
JOH 12:46 Itaregodure mato moto ka iwo nono jorugu mogadure. Mare jorugu ji karega inagoino. Iwo boe ewie turo pegareuji. Dujire inagoino. Boe emeartorumode i dukeje emerumodukare boečo kao pugeje. Mare boečo ji karega inagoino. Boe emeartorumode i dukeje emode tugera ra turo pegareu piji. Dujire inagoino.
JOH 12:47 Mare boe emeartorumodukare iwadaruji du inodu tabo imodukare boe pegado ei kuri aino. Iwo boe pegado boei dubagai karega iroino mato. Itaregodure iwo boe ekinorudo bope doge eda kejewu joru pegareu piji.
JOH 12:48 Mare ia meri keje boe pegamode meartorukare iwugei, aidukare iwugei. Awu moto akedumode dukeje imode ewiabutudo awu iwadaru keje dukeje boe pegamode ei rugadu emeartorukare i kodi.
JOH 12:49 Boe rugadu jire inagoino. Mare iwadaru karega. Iogwa Kurireu koiare ure itarego mato. Emare ure awu iwadaru maku inai iwo boe ewie ji. Dukodire imagore jiboe ure turugadu.
JOH 12:50 Iogwa Kurireu bataru umode meartorure puduiwuge ekinorudo eduwo pudabo jii toro. Du akedumodukare. Awu tuwadarure Iogwa Kurireu ure maku inai iwo boe ewie ji rugadu.
JOH 13:1 Ča okwareu merire mitotu je Judeu doge ewaduwo tuwadae Pascoaji. Dukodire Jesus jorduware tudumode baruto kuri aino duji awu moto piji Tuo bagai. Jesus meardu kurire meartorure puduiwugei rugadu. Meardu kurire ei jii toro tuwimodedu ka.
JOH 13:2 Nou boečoji Jesus ure tumugudo ia bai tada togwagewo nou ture jorduwadowugebo. Bope doge eimijera ure tumeardae pegareu tugu Judas aorato tuwo Jesus maku boe eimijera pegareuge etai. Nou Judas uo iere Simão Iscariotes.
JOH 13:3 Jesus jorduware Pao Kurireu ure turaga jamedu boe maku pudai duji. Jorduware taregodure Pao Kurireu piji rugadu. Jorduware tudumode tuibagi Pao Kurireu ae pugeje duji.
JOH 13:4 Dukodire Jesus ure turagojedo nou bai tada. Ure tugudau areia biaku epa tawuje tubiji. Ure ia areia kogudo tubeagajeje.
JOH 13:5 Dukejere ure pobo redo pori piji ia meririto. Nono ure nou ture jorduwadowuge ewure kabi nou pobo tabo. Ure ewure kabi dukeje ure ekidudo nou areia tabo.
JOH 13:6 Uiago Simão Pedro bure kabi dukeje Simão Pedro makore ji. Akore: – Ukare turugadu awo iwure kabi. Ikimijera nure aki kodi.
JOH 13:7 Jesus makore Simão Pedroji. Akore: – Arduwakare irore jiboeji. Mare ia meri keje arduwamode.
JOH 13:8 Simão Pedro akore: – Amodukare iwure kabi rugadu! Mare Jesus makore ji pugeje. Akore: – Imodukare awure kabi dukeje ire jorduwadowu modukare aki pugeje.
JOH 13:9 Nono Simão Pedro akore: – Ča iwure kabi. Itaora kabi. Ikera kabi. Iamedu boe kabi.
JOH 13:10 Jesus akore: – Boe emode taimo dukeje ekabidure rugadu. Dukeje etumode tuibagi tuwai ka dukeje emodukare taimo pugeje kuri aino. Tu tuwurere emode kabi. Mare boe ewiri ji karega inagoino. Boe ero pegareu jire inagoino. Ča Pao Kurireu ure taro pegareu jamedu boe barigu tabiji. Mare ia imedu ro pegareu ure mitotu tagabo. Pao Kurireu ukare nou imedu ro pegareu barigu piji.
JOH 13:11 Jesus jorduware nou imeduji dukodire akoino. Nou imedu umode Jesus maku boe eimijera pegareuge etai. Jesus jorduware nou imedu romode pudui duji. Dujire akoino nou ture jorduwadowugei. Akore: – Pao Kurireu ukare ia imedu mitotu jedu ro pegareu barigu piji.
JOH 13:12 Jesus ure nou ture jorduwadowuge ewure kabi dukeje ure tugudau areia jamedu tugu pudui pugeje. Dukejere ure tumugudo tumuga ira keje. Nono akore: – Kodiba ire tawure kabi? Imode tarduwado.
JOH 13:13 Tagagore “Jorduwareu” aino i. Tagagore “Boe Eimijera” aino i. Boe jokodu jire tagagoino. Ure Tarduwadowu nure imi rugadu. Tagimijera nure imi rugadu.
JOH 13:14 Mare ire ido nono tadugaregere iwo tawure kabi. Tarowo nono iro mogadure. Dukodire tamode pu bure boe kabi. Tamode tagera maku puai.
JOH 13:15 Ire tardudo iroji tarowo nono iro mogadure tarduwawo nuba taromode.
JOH 13:16 Boe jokodu jire inagoino tai. Boe emeartorumodukare ia boe eimijera utugareji ukimijera kori. Boe emeartorumodukare ia boe eimijera utugare uture tugimijera bataru tabowuji tugimijera kori jamedu.
JOH 13:17 Dukodi čare tarodo nono iro mogadure jamedu. Taromode nono iro mogadure dukeje taegaregodumode tai. Boe pemegamode tai rugadu. Tawiagodukaba awu ire tarduwado jiwu iwadaru piji.
JOH 13:18 – Iorduware ire ikeragu jiwugei. Taire inagoino tarowo nono iro mogadure. Mare ia romodukare aino. Pao Kurireu ure boe ewie marigudu. Akore: “Okwagere itabowu jordu pegamode i.”
JOH 13:19 Ča itaidure iwo tawie tarduwawo nuba boe mode i duji. Nou iwadaru jetumode pudui dukeje tarduwamode i rugadu. Pao Kurireu nure imi rugadu. Itagedumodukare rugadu.
JOH 13:20 Boe jokodu jire inagoino. Boe emode tugera upodo nou uture iwadaru tabowugebo enure tugera upodo itabo jamedu iragojere nou uture iwadaru tabowugebo kodi. Pao Kurireu koiare ure itarego boe etae rugadu. Dukodire boe emode tugera upodo itabo enure tugera upodo Pao Kurireu apo jamedu.
JOH 13:21 Jesus ure nou tuwadaru akedudo dukeje kiarigodure rugadu. Dukodire makore pugeje. Akore: – Iwo tawie boe remawuji. Ia tagi tamode imagu boe eimijerage pegareuge etai.
JOH 13:22 Nou Jesus ure jorduwadowuge etaiwore pui. Erduwakare kaba jiba Jesus akoino.
JOH 13:23 Ia mugure Jesus meki. Jesus meardu kurire nou ture jorduwadowuji.
JOH 13:24 Nono Simão Pedro ure tugera nado ae utuwo pudae. Nono makore ji. Akore: – Anarado ji uwo pawie ioguduba jiba akoino.
JOH 13:25 Dukodire nou Jesus ure jorduwadowu ure tuburedo Jesusji tunarawo ji. Akore: – Ioguduba jiba akagoino?
JOH 13:26 Jesus akore: – Imode awu amireu pegodo nou iaboe kuru to dukeje imode maku ia imedu ai. Nou imedu koiare umode imagu boe eimijerage pegareuge etai. Nono Jesus ure tugeragu amireuji. Ure pegodo tagoino jiboe kuruto. Dukejere ure maku Judas ai. Nou Judas uo iere Simão Iscariotes.
JOH 13:27 Judas ure tugeragu nou amireuji dukeje bope doge eimijera pegareu Satanás ure turemo nou Judato. Jesus makore Judaji. Akore: – Ameardae pegareu towuje. Amara tabo!
JOH 13:28 Nouia rakojere Jesus apowuge erduwakare kodiba Jesus akoino Judaji.
JOH 13:29 Marigudu Judas jeture nou eno dieroji. Dukodire iage emeardaere Judas umoduie akirodo ia boe ekeji pugeje. Iage emeardaere Judas umoduie ia diero maku marenarue doge etai.
JOH 13:30 Judas ure tugeragu nou amireuji dukeje uture epiji kuri je. Boečodure marigudu.
JOH 13:31 Judas uture epiji dukeje Jesus makore nouia ture jorduwadowugei. Akore: – Boe erdunure aino Imedu Onaregedu pemegareuji. Awu imedu onaregedu nure imi. Inure Pao Kurireu ro pemegareu towuje dukodire boe erdumode Pao Kurireu ro pemegareuji rugadu.
JOH 13:32 Iromode Pao Kurireu ro pemegareuji dukeje Pao Kurireu romode iro pemegareuji jamedu boe eiamedu boe erduwawo čero pemegareuji kuri aino rugadu ewo Pao Kurireu ie kurido rugadu kuri je rugadu.
JOH 13:33 Tare nono itore emogadure. Iragojemodukare tagabo kuri aino pugeje. Tagaiwomode iwagai mare taroiwakare taduwo iregodaji. Ire Judeu doge eimijerage ewie nou inoduji marigudu.
JOH 13:34 Mare imode ia taro maiwu maku tagai. Tameardu kurido pui. Tameardu kurido pui aino imeardu kurimoga tai dure.
JOH 13:35 Tameardu kurimode pui dukeje boe erduwamode ire jorduwadowuge nuie tagi duji.
JOH 13:36 Pedro makore Jesusji. Akore: – Kaiba akodumode? Jesus akore: – Akare arugadu atuwo itabo. Mare ia meri keje atumode toro itae.
JOH 13:37 Pedro akore: – Ikimijera nure aki. Itaidure ituwo akabo. Ire irugadu iwiwo amugato.
JOH 13:38 Jesus akore: – Iwo awie. Akare arugadu awiwo imugato. Awu boečoji akagomode arduwakaie i dumode pobe metia bokware rugadu. Dukeje čare kagariga kudugodumode.
JOH 14:1 Jesus makore ture jorduwadowugei. Akore: – Tamororamagadukaba. Tameartorudo Pao Kurireuji. Tameartorudo i jamedu.
JOH 14:2 Iogwa uwai kurireu tadare boe eda kurireu mugure. Itumode toro iwo tawai pemegado nono. Ainore ure rugadu. Dukodire ire tawie aino.
JOH 14:3 Imode tawai pemegado toro baru tada dukeje imode ikirimi mato pugeje tawagai iwo tarego baruto taragojewo itabo toro.
JOH 14:4 Tarduware ikodumode jiwu awaraji.
JOH 14:5 Mare Tomé makore Jesusji. Akore: – Čegimijera. Čerduwakare kaiba akodumode. Nuba čeromode čerduwawo awaraji čedaregoduwo toro?
JOH 14:6 Jesus akore: – Umode boe erego baru towu nure imi. Boe remawu nure imi. Imire imode boe eraga maku boe etai. Imire imode boe eewodudo pugeje. Boe etumodukare tuginaigodu Pao Kurireu ae. Tu imire imode boe erego Pao Kurireu ae.
JOH 14:7 Tarduware i. Dukodi tarduwamode Iogwa Kurireuji jamedu. Awu meriji čare tarduware ji. Tardure ji rugadu.
JOH 14:8 Felipe akore: – Čegimijera. Čedaidure čerduwo Pao Kurireuji. Čerdudo ji. Dukodire čemode čerugadu.
JOH 14:9 Jesus makore Felipeji. Akore: – Iragojere tagabo marigudu. Aki na arduwakare i? Jordure iwu jordure Iogwa Kurireuji. Kodiba akagoino iwo tardudo Iogwa Kurireuji?
JOH 14:10 Felipe nure aki. Iragojere Iogwa Kurireu apo. Iogwa Kurireu rakojere itabo. Ameartorure nou inoduji? Imagore tai mare iwadaru ji karega inagoino. Iogwa Kurireu rakojere itabo dukodire inagoino Iogwa bataruji tawiagai. Iogwa maragodae jire iroino.
JOH 14:11 Tameartorudo awu iwadaruji. Iragojere Iogwa Kurireu apo. Iogwa Kurireu rakojere itabo jamedu. Tameartorumodukare inagoino jiboeji dukeje mare tameartorudo tardure jiwu iro rakareuji tameartoruwo i.
JOH 14:12 Boe jokodu jire inagoino. Boe emeartorumode i dukeje eromode nono iro mogadure. Uu. Ero kurimode iro kori rugadu. Itumode Iogwa Kurireu ae. Dukodire meartorure iwuge ero kurimode rugadu.
JOH 14:13 Itumode Iogwa Kurireu ae dukodire iromode tagaidure jiboeji. Tamagomode itaidure jiboe bagai dukeje iromode awu tamagore bagai boeji. Irore aino dutabo imode boe erdudo Iogwa Kurireu ro pemegareu rugadu boeji, ro rakareu rugadu boeji jamedu.
JOH 14:14 Tamagomode itaidure jiboe bagai dukeje iromode awu tamagore bagai boeji jamedu.
JOH 14:15 – Tameardu kurire i dukeje tameartorumode iwadaruji rugadu.
JOH 14:16 Inogwamagudumode Iogwa Kurireuji dukeje umode Tuwari maku tagai rugadu. Nou Uwari umode tugera bararedo tai. Rakojemode tagabo jii toro. Utumodukare tabiji.
JOH 14:17 Pao Kurireu Uwari nure ema. Emare ure boe erduwado Pao Kurireuji. Boe jokodu jire ure boe erduwado. Meartorukare Pao Kurireu jiwuge erdumodukare Pao Kurireu Uwariji. Erduwamodukare ji jamedu. Dukodi nou meartorukare Pao Kurireu jiwuge emodukare tugeragu Uwariji. Mare tarduware ji. Nou Pao Kurireu Uwari rakojere tagabo. Rakojemode tagabo jii toro rugadu.
JOH 14:18 – Iturumode. Mare ietu pemegamode tai. Nono imode ikirimi tagae.
JOH 14:19 Kuri aino boe erdumodukare i pugeje. Mare tardumode i rugadu. Iewodumode dukodire taewodumode pugeje jamedu.
JOH 14:20 Iewodumode pugeje dukeje tarduwamode iragojere Iogwa Kurireu apo duji. Tarduwamode taragojere itabo duji jamedu. Tarduwamode iragojere tagabo duji rugadu.
JOH 14:21 Meardu kurire iwuge etaidumode iwadaruji. Meardu kurire iwuge emeartorumode iwadaruji. Iogwa Kurireu meardu kurimode meardu kurire iwugei. Imeardu kurimode ei jamedu. Imode erduwado i rugadu.
JOH 14:22 Judas makore Jesusji mare Judas Iscariotes karega. Akore: – Čegimijera. Amode čerduwado ai mare amodukare meartorukare aiwuge erduwado ai. Kodiba meartorukare aiwuge erduwamodukare ai?
JOH 14:23 Jesus makore ji. Akore: – Meardu kurire iwuge emeartorumode iwadaruji. Iogwa Kurireu meardu kurimode ei jamedu. Itaregodumode etae iogwapo čemuguwo ebo.
JOH 14:24 Mare meardu kurikare iwuge emeartorumodukare iwadaruji. Ikare tarduwado iwadaruji. Ire tarduwado Iogwa Kurireu bataruji. Ema koiare ure itarego mato tagae.
JOH 14:25 Iragoje biagamode tu tagabo dukodire ire tawie aino.
JOH 14:26 Mare Pao Kurireu umode Tuwari maku tagai imugato. Umode tugera bararedo tai. Umode tarduwado nou imagore jiwu Iogwa bataru rugadu boeji. Umode tawiabutudo awu imagore jiwu Iogwa bataru jamedu boe keje.
JOH 14:27 – Inure tado tagamudo tameardae kuriwo Pao Kurireuji. Meartorukare iwuge emodukare tameardae kurido Pao Kurireuji nono iro mogadure. Tamororamagadukaba. Tagiarigodukaba. Tabagudugodukaba jamedu.
JOH 14:28 Tameardure iwadaruji marigudu. Ire tawie itumoduie tabiji duji. Mare imoduie ikirimi pugeje tagae. Tameardu kurimode i dukeje taegaremode tai iture Iogwa Kurireu ae duji. Iogwa Kurireu ro kurire iro kori.
JOH 14:29 Ire tawie nuba boemode tai, nuba boemode i jamedu. Tardumode awu inagoino jiboeji dukeje tameartorumode i rugadu.
JOH 14:30 Awu moto kejewu bope doge eimijera aregodumode iwagai awu boečoji rugadu dukodire imago raimodukare tai. Nou bope doge eimijera rakakare i mare Iogwa Kurireu meardae koiare imode imagu ai. Imeardu kurire Iogwaji dukodi. Itaidure boe eiamedu boe erduwawo imeardu kurire Iogwa Kurireu jituji. Dukodire imeartorure Iogwa Kurireu bataruji rugadu. – Ča paduwo awu bai piji.
JOH 15:1 Jesus makore kimo ture jorduwadowugei. Akore: – Ire nono uva iku paru pemegareu mogadure. Iogwa Kurireu ure nono jetu pemegare boepa jiwu mogadure.
JOH 15:2 Ire nono uva iku paru pemegareu mogadure. Tare nono uva iku mogadure. Iku kadodumode dukeje nou iku bimode, tudumodukare pugeje. Mare iku jetu kimomode čiguto dukeje bimodukare, tudumode rugadu. Iku tudumodukare dukeje Iogwa Kurireu umode nou iku kado tubaru piji. Mare iku tudumode dukeje Iogwa Kurireu umode nou iku pemegado nou iku tudu pemegawo rugadu. Mare uva iku paru ji karega inagoino. I rugadure inagoino. Iku ji karega inagoino. Meartorure iwugeire inagoino. Boepa ji karega inagoino jamedu. Pao Kurireu jire inagoino. Ire tarduwado dukodire ire tabemegado, taro pemegawo. Tameartoru raimode i dukeje iragojemode tagabo. Nono taedu pemegamode itabo rugadu. Tameartoru raimode i dukeje imode taragado taro pemegawo, tawo taro pegareu barigu tabiji. Mare iragojemodukare tagabo dukeje taro pemegamodukare rugadu.
JOH 15:6 Meartorukare iwuge ewarigudumode joruto nono jerigi mogadure. Mare jerigi ji karega inagoino. Ewarigudumode Pao Kurireu piji emeartorukare ji kodi.
JOH 15:7 Mare tameartoru raimode i tarduwamode iwadaruji rugadu dukeje tamagomode i tagaidure jiboe bagai. Imode tardudo tagaidure jiboeji tameartorure i kodi.
JOH 15:8 Taro pemegamode nono Iogwa Kurireu ro mogadure dukeje tamode boe erduwado Iogwa Kurireu ro pemegareuji. Taromode aino dukeje ire jorduwadowuge nure tagi.
JOH 15:9 – Imeardu kurire tai nono Iogwa Kurireu meardu kurimoga i dumogadure. Tagaba iwarigu tabiji imeardu kuriwo tai jii toro.
JOH 15:10 Tameartorumode iwadaruji dukeje tamodukare iwarigu tabiji. Dukodi imeardu kurimode tai jii toro rugadu. Imeartorure Iogwa Kurireu bataruji. Ikare barigu ipiji. Emare meardu kurire i rugadu.
JOH 15:11 Ire tawie aino tameartoruwo awu inagoino jiboeji, iagarewo tai rugadu. Taegarewo pui jamedu.
JOH 15:12 Ča iwadaru reo. Tameardu kurido pui nono imeardu kurimoga tai dumogadure.
JOH 15:13 Ia boe meardu kurimode rugadu ia timediaji dukeje aidumode tuwiwo nou timedia mugato nou timedia bikawo.
JOH 15:14 Ča tameartorumode iwadaruji dukeje imedage mode tagi.
JOH 15:15 Itugarege modukare tagi pugeje. Boe eimijera utugarege erduwakare tugimijera meardaeji. Mare imedage nure tagi. Dukodire ire tawie imeardae jamedu boeji. Ire tawie Iogwa Kurireu makore iwu tuwadaru jamedu boeji.
JOH 15:16 Tagare tageragu i. Imire ire ikeragu tai. Imagore tai taro pemegawo, tawo boe pemegado boei. Taro akedumodukare. Dukodire Iogwa Kurireu umode tamagore bagaiboe maku tagai rugadu. Tamagomode itaidure jiboe bagai dukeje Iogwa umode maku tagai rugadu.
JOH 15:17 Ča itaidure jiwu taro reo. Tameardu kurido pui rugadu.
JOH 15:18 – Tawiagodukaba. Meartorukare iwuge erdu pegamode tai mare erdu pegare i boetoji.
JOH 15:19 Taromode nono meartorukare iwuge ero mogadure dukeje etaidumode tai. Etaidumode tai nono etaidumoga pui dumogadure. Mare ire ikeragu tai nou meartorukare iwuge ero piji tarokawo nono ero mogadure pugeje. Dukodire meartorukare iwuge erdu pegare tai.
JOH 15:20 Tawiagodukaba imagore tai dupiji. Boe etugarege ekurikare tugimijera kori dukodire boe emeartorumodukare nou boe etugaregei ekimijera piji. Tagimijera nure imi. Boe emeartorumode iwadaruji dukeje emeartorumode ire maku tagaiwu tawadaruji jamedu. Mare boe ero pegare i dukodire ero pegamode tai jamedu.
JOH 15:21 Ero pegamode tai tameartorure i kodi. Erduwakare ure itarego matowu Iogwa Kurireuji kodi.
JOH 15:22 Imodukare ewie ero pegareu boeji dukeje egomode turo pegakaie. Mare ire ewie. Ire ewie ero pegareu boeji. Dukodire egomodukare tuiorduwakaie turo pegareuji.
JOH 15:23 Jordu pegare iwuge erdu pegare Iogwa Kurireuji jamedu.
JOH 15:24 Itaregodure etae iro rakareu tabo. Ire erdudo iro rakareuji. Ia boe erokare nono iro rakareure marigudu. Erdumodukare iro rakareuji dukeje erduwamodukare i. Nono egomode tuiorduwakaie turo pegareuji. Mare erdure iro rakareuji dukodire erduware i. Erduware ipemegare duji. Mare erdu pegare i. Erdu pegare Iogwa Kurireuji.
JOH 15:25 Pao Kurireu makore marigudu nuba eromoduie. Nou bataru padure bapera keje eno bakaruče. Akore: “Iro pegakare ei mare erdu pegare i.” Aino čare awu bataru jeture pudui rugadu.
JOH 15:26 Jesus mako kimore. Akore: – Pao Kurireu Uwari aregodumode tagae. Umode tarduwado Pao Kurireuji rugadu. Boe jokodu jire makomode. Imi igoiare imode Pao Kurireu Uwari arego tagae. Umode tarduwado i rugadu.
JOH 15:27 Nono tamode nou mugu jaereuge pawobe ewie i jamedu. Taragojere itabo marigudu dukodi tamode nou boe erduwado i jamedu.
JOH 16:1 Jesus mako kimore. Akore: – Ire tawie marigudu. Dukodi tagaba tagera ra tameartorure i dupiji.
JOH 16:2 Judeu doge emode tadudo nou ture bato puiwu bai piji. Emode ia tawido jamedu. Emeardaere ainore Pao Kurireu aidure boe erowo meartorure iwugei.
JOH 16:3 Mare erduwakare i. Erduwakare Iogwa Kurireuji. Dukodire ero pegamode tai.
JOH 16:4 Marigudu iragojere tagabo dukodire ikare tawie. Mare aino čare ire tawie. Dukodi boe ero pegamode tai dukeje tawiabutumode awu iwadaru keje rugadu.
JOH 16:5 Jesus mako kimore. Akore: – Kuri aino imode ikirimi ure itarego matowu Iogwa bagai. Marigudu tanarakare i kaiba ikodumode.
JOH 16:6 Ča ire tawie dukodire tagiarigodure rugadu.
JOH 16:7 Boe jokodu jire inagoino tawiagai. Itumode tabiji dukeje boe pegamode tai rugadu. Ire tawie. Mare itumode tabiji boe pemegawo tai dubagai jamedu. Itumode tabiji Pao Kurireu Uwari aregoduwo tagae dubagai jamedu. Itumodukare tabiji dukeje Pao Kurireu Uwari aregodumodukare tagae. Mare itumode tabiji dukeje imode Pao Kurireu Uwari arego tagae rugadu. Dukodire inagoino boe pemegamoduie tai rugadu.
JOH 16:8 Boe erduwakare turo pegareu boeji. Mare Pao Kurireu Uwari aregodumode boe etae dukeje umode boe erduwado Pao Kurireu aidukare jiwu boe ero pegareu boeji boe ewo tugera ra turo pegareu boe piji rugadu. Boe emeardaere ro jetororeuge nuie pudumi. Erduwakare tuwo turo jetorodo. Pao Kurireu Uwari aregodumode dukeje umode erduwado ero jetorokare duji. Umode boe erduwado iro jetorore duji. Boe emeardaere tuiorduwaie Pao Kurireuji. Mare Pao Kurireu Uwari umode erduwado erduwakare Pao Kurireu jituji. Pao Kurireu umode boe pegado meartorukare iwugei ero pegareu moriče.
JOH 16:9 Emeartorukare i dukodire erduwakare ro pegareuge nuie pudumi duji.
JOH 16:10 Iro jetorore. Nono itumode Iogwa Kurireu bagai dukeje Iogwa Kurireu umode tona bu ikajeje toro. Pao Kurireu Uwari umode boe erduwado nou inoduji rugadu tuwo erduwado iro jetorore duji. Dukeje čare boe erduwamode iro jetorore duji rugadu. Pao Kurireu Uwari umode boe erduwado ro jetorokareuge nure emage duji jamedu.
JOH 16:11 Emeardaere Pao Kurireu ro pegamodukaie pudui. Mare erduwakare. Marigudu ure bope doge eimijera bie tumoduie boe pegado ji nou bope doge eimijera ro pegareu moriče. Ro pegareuge emeartorure nou bope doge eimijeraji jamedu. Dukodire Pao Kurireu ro pegamode ei jamedu ero pegareu moriče rugadu.
JOH 16:12 – Iwadaru kurire iwo tawie ji. Mare taragakare tarduwawo jamedu boeji.
JOH 16:13 Mare Pao Kurireu Uwari aregodumode tagae dukeje umode tarduwado Pao Kurireuji rugadu. Umode tarduwado boe jokodu remawuji. Makomodukare tuwadaruji. Makomode tumeardure jiwu Pao Kurireu bataruji tu rugadu. Umode tawie nuba boe mode boei awu moto jituji.
JOH 16:14 Umode tawie i jamedu. Umode tawie iwadaruji. Dukodire umode boe erduwado i. Ipemegare rugadu. Dujire umode boe erduwado.
JOH 16:15 Iogwa Kurireu bataru jire inagoino. Dukodire ire tawie aino. Pao Kurireu Uwari makomode iwadaruji tawiagai rugadu.
JOH 16:16 – Kuri aino tardumodukare i pugeje. Mare ia meri keje tardumode i rugadu.
JOH 16:17 Jesus ure jorduwadowuge emagore pui. Egore: – Kaba jiba akoino pai? Akore pardumodukare pudui kuri aino. Akore ia meri kejeie pardumoduie pudui pugeje. Akore tudumoduie Pao Kurireu ae kuri aino.
JOH 16:18 Kaboba jiba akoino? Parduwakare kaba jiba akoino pai.
JOH 16:19 Jesus jorduware nou ture jorduwadowuge emeardaeji. Dukodire makore ei pugeje. Akore: – Inagore tai tardumodukaie i kuri aino mare ia meri keje tardumoduie i pugeje. Mare tarduwakare awu iwadaruji dukodire tagagoino aino pui.
JOH 16:20 Boe jokodu jire inagoino tawiagai. Tagiarigodumode rugadu. Tagragudumode rugadu. Mare meartorukare iwugere egaremode pudui. Tagiarigodumode mare taegaregodumode tai pugeje.
JOH 16:21 Aredu kurijirigodure dukeje kiarigodure tugurijiri kori koia. Mare kuri buture dukeje biagodure nou tugurijiriredu piji. Jakarere tonaregeduji rugadu tonaregedu boture kodi.
JOH 16:22 Tagiarigodure mare iordumode tai pugeje. Dukeje taegaregodumode tai pugeje. Boe emodukare taegare akedudo tabiji rugadu.
JOH 16:23 Iwo tawie. Nou meriji Pao Kurireu umode tagaidure jiboe maku tagai dukodire tagogwamagudumodukare i iaboe bagai. Tamagomode tagaidure jiboe bagai ikie tabo dukeje Iogwa Kurireu umode maku tagai rugadu.
JOH 16:24 Marigudu tagogwamagudukare i iaboe bagai ikie tabo. Tamagomode bagai dukeje makudumode tagai rugadu. Dukodire taegaregodumode tai rugadu.
JOH 16:25 – Ireadodure boeji tawiagai iwo Iogwa Kurireu jebato iaboeji iwo tarduwado Iogwa Kurireu rore jiboeji. Mare ia meri keje imodukare Iogwa Kurireu jebato iaboeji pugeje. Imago pemegamode iwo tarduwado rugadu Iogwa Kurireuji.
JOH 16:26 Nou meriji tagi rugadu tamagomode ji rugadu tagaidure jiboe bagai ikie tabo. Imi karega imagomodukare ji. Tagire tamagomode ji rugadu.
JOH 16:27 Emare meardu kurire tai. Tameardu kurire i. Tameartorure Pao Kurireu ure itarego mato duji dukodire Iogwa Kurireu meardu kurire tai rugadu.
JOH 16:28 Itaregodure Iogwa Kurireu piji rugadu. Itaregodure mato moto ka. Mare itumode awu moto piji pugeje ituwo Iogwa Kurireu bagai.
JOH 16:29 Nono nou Jesus ure jorduwadowuge emagore Jesusji. Egore: – Aino čare amago kičarure čewiagai. Akare Pao Kurireu bataru jebato iaboeji pugeje.
JOH 16:30 Aino čerduware ai. Arduware boe jamedu boeji rugadu. Boe emodukare awie tumeardaeji mare arduware emeardaeji rugadu. Dukodire čerduware ai. Akaregodure Pao Kurireu piji rugadu.
JOH 16:31 Nono Jesus makore ei. Akore: – Ča. Tameartoru kana i rugadu?
JOH 16:32 Kuri aino ro pegareuge emode tagaodo ipiji taduwo tawai ka ipiji. Dukodi iragojemode ikinaigodu. Mare ikinaigodu jokodu karega. Iogwa Kurireu rakojemode itabo.
JOH 16:33 Ire tawie. Dukodi čare tadudo itabo. Tadumode itabo dukeje tamode tagamudo rugadu tameardae kuriwo Pao Kurireuji. Meartorukare iwuge ero pegamode tai. Mare tardu pegakaba. Taragado tai! Toro ia meri keje imode etagedudo rugadu.
JOH 17:1 Jesus ure tuwadaru akedudo ture jorduwadowugei dukeje aiwore baruto tumagowo Pao Kurireu bagai. Akore: – Iogwa. Akanaregedu nure imi. Iwimode kuri aino boe ero pegareu moriče. Mare paga karega iwo boe ekinorudo rugadu. Are boe eiamedu boe eimijerado imi iwo akaidure jiwuge ekinorudo ewikawo pugeje emuguwo akabo jii toro rugadu. Ča iro udo turugadu iwo awu imaragodae iado, iwo imaragodae pemegado. Imode iado dukeje boe erdumode ameardaere jiwu imaragodae pemegare rugadu duji, kurire rugadu duji. Ameardae kurire boe eiamedu boe emeardae piji. Ameardae kurire awo boe ekinorudo ewikawo pugeje emuguwo akabo jii toro rugadu.
JOH 17:3 Pao Kurireu nure aki rugadu. Ia bokware. Are mitotu je. Boe remawu nure aki rugadu. Akurire boe eiamedu boe kori. Aire boe erduwamode rugadu tumeartoruwo ai rugadu tumuguwo akabo baru tada du akedukawo. Ameardae koiare are itarego mato moto ka. Ire boe erduwamode jamedu tumeartoruwo i emuguwo pagabo rugadu jii toro rugadu. Jesus Cristo nure imi rugadu.
JOH 17:4 Ire boe erduwado aro rakareuji aro pemegareuji woe moto keje. Aino čare ire are maku inaiwu imaragodae iado woe. Dukodire ire boe erdudo apemegare duji. Apemegare boe eiamedu boe piji.
JOH 17:5 Iogwa Kurireu nure aki. Marigudu akare awu moto to raga dukeje baru tadawuge erduware marigudu ipemegare duji. Dukodire baru tadawuge emago pemegare i. Ere ikie kurido. Aino ire irawuje mato moto ka. Kuri aino itumode ibagi baruto iragojewo akabo pugeje. Itaidure awo boe erdudo ipemegare duji nono baru tadawuge erdu mogadure.
JOH 17:6 – Are ia awu moto kejewu boe emagu inai emeartoruwo i. Ire erduwado ai rugadu. Emeartorure ai. Dukodire are emagu inai iwo erduwado. Nono emeartorure awadaruji rugadu.
JOH 17:7 Aino erduware are maku inai boeji. Apijire are maku inai.
JOH 17:8 Ire awadaru maku etai. Are awadaru maku inai dukeje ire ewie awadaruji. Emeartorure ji rugadu. Erduware itaregodure apiji duji rugadu. Are itarego mato rugadu. Emeartorure rugadu.
JOH 17:9 – Meartorure aiwuge eparu tabore inagoino baruto awagai. Imagokare meartorukare iwuge eparu tabo. Mare imagore nou are maku inaiwuge boe eparu tabo emeartorure ai kodi.
JOH 17:10 Meartorure iwuge emeartorumode ai jamedu. Meartorure aiwuge emeartorumode i jamedu. Emeartorumode iwadaruji dukeje boe eiamedu boe erduwamode imi rugadu iro pemegareu kodure boe eiamedu boe kori duji.
JOH 17:11 Kuri aino itumode baruto akae. Iragojemodukare meartorukare iwugebo pugeje. Mare meartorure iwuge eragojemode woe awu moto keje kimo. Ča Iogwa Pemegareu nure aki rugadu. Aragare rugadu. Aetu pemegado awu meartorure iwugei emeardae pemegawo pui nono imi aki pamogadure puapo dumogadure. Pameardae ure mitotu je. Are nou araga maku inai marigudu.
JOH 17:12 Dukodire ietu pemegare awu meartorure iwugei nou are maku inaiwu araga tabo. Dukodire ekare tugera ra tumeartorure i dupiji. Ma kočare ure tugera ra ipijiwu ure mitotu je. Emare meartorukare i rugadu. Marigudu akagore ia ure tugera ra ipijiwu umoduie imagu boe eimijera pegareuge etai amoduie boe pegado ji rugadu. Dukodire boe pegamode nou umode imagu etaiwuji rugadu. Dukodire nou awadaru jetumode pudui rugadu.
JOH 17:13 Ča, kuri aino itaregodumode baruto akae pugeje. Ire iwadaru maku awu ire jorduwadowuge etai egarewo iwadaruji rugadu nono iagare mogadure.
JOH 17:14 Ire awadaru maku awu ire jorduwadowuge etai mare meartorukare iwuge erdu pegare ei rugadu. Awu ire jorduwadowuge emeartorure i dukodire erore nono iro mogadure. Erokare nono meartorukare iwuge ero mogadure. Dukodire meartorukare iwuge erdu pegare ei jamedu.
JOH 17:15 Imagokare awagai awo awu meartorure iwuge etawuje awu moto piji. Mare itaidure aetu pemegawo ei rugadu awo ekinorudo bope doge eimijera piji.
JOH 17:16 Imeardaekare nono awu meartorukare iwuge emeardae mogadure. Awu ire jorduwadowuge emeardaekare nono awu meartorukare iwuge emeardae mogadure jamedu.
JOH 17:17 Awadaru ure turugadu. Boe jokodu jire akagoino. Meartorure iwuge ero pemegawo. Emeartoruwo awadaruji atugaregewo emage awo ero jetorodo rugadu.
JOH 17:18 Are itarego mato moto ka meartorukare iwuge etae. Dukodire ire awu ire jorduwadowuge etudo meartorukare iwuge etae jamedu nono are itarego meartorukare iwuge etae dumogadure.
JOH 17:19 Dukodire akaidumode jiboe ire irugadu imeartoruwo awadaruji rugadu. Awu ire jorduwadowuge ewo tudo turugadu jamedu tumeartoruwo awadaruji jamedu nono imogadure.
JOH 17:20 – Imagore eparu tabo awagai toro baruto. Emode boe erduwado iwadaruji dukodire boe emeartorumode i rugadu. Imagore nou meartorumode iwuge eparu tabo jamedu.
JOH 17:21 Imagore eparu tabo emeardae pemegawo puapo, emeardaewo nono pameardae dumogadure. Aragojere itabo. Iragojere akabo jamedu. Paedure puapo. Pawiapagare tu pu bataruji. Dukodire pameardae ure mitotu je. Itaidure awu meartorure iwuge eduwo pagabo emeardae pemegawo puapo nono pameardae mogadure. Ia boe erdumode nou boe emeardae pemegare puapo duji dukeje emeartorumode i are itarego moto ka duji rugadu.
JOH 17:22 Are iro rakado woe moto keje. Are iro pemegado woe moto keje jamedu. Dukodire boe erdure ipemegare rugadu duji. Ča ire awu iro rakareu maku awu meartorure iwuge etai. Dukodire boe erdumode meartorure iwuge epemegare duji jamedu. Nono emeardae pemegamode puapo nono pameardae dumogadure rugadu. Ikare imeardae udo tuginai apiji. Akare ameardae udo tuginai ipiji jamedu. Nono are iraga maku inai. Imode meartorure iwuge eragado jamedu. Nono emodukare tumeardae udo tuginai pubiji jamedu. Nono boe eiamedu boe erdure nou meartorure iwuge emeardae pemegare puapo duji dukeje emeartorumode i, are itarego moto ka duji rugadu. Erduwamode ameardu kurire nou meartorure iwugei duji jamedu. Ameardu kurire ei nono ameardu kurire i dumogadure.
JOH 17:24 – Iogwa Kurireu nure aki. Are nou meartorure iwuge emagu inai. Dukodire itaidure eduwo itabo toro imugureu keje. Eragojemode itabo dukeje erdumode iragare boe jamedu boe jituji, erdumode boe pemegare irore jiboeji. Are iraga maku inai marigudu. Are boe pemegado i marigudu. Akare moto to raga mare are iraga maku inai marigudu. Are boe pemegado i marigudu jamedu. Mare paga karega. Ameardu kurire i dukodire aroino i.
JOH 17:25 Iogwa Kurireu nure aki kodi. Apemegare rugadu. Meartorukare iwuge erduwakare ai. Mare imire iorduware ai rugadu. Awu meartorure iwuge erduware ai are itudo mato duji.
JOH 17:26 Ire ewie ai. Mare imode erduwado ai tu tu je jamedu emeardu kuriwo boei rugadu nono ameardu kurimoga i dumogadure. Imode erduwado iragojere ebo duji emeardu kuriwo boei nono imeardae mogadure.
JOH 18:1 Jesus ure nou baru towu tuwadaru iado dukeje uture pugeje ture jorduwadowugebo. Ekurugodure pobo kajeje. Nou pobo iere Cedrom. Nono etaregodure nou oliveira iguru ka.
JOH 18:2 Judas Iscariotes jorduware nou oliveira iguruji. Marigudu Jesus uture ture jorduwadowugebo nou oliveira iguru jetureu ka tu tu je. Dukodire Judas Iscariotes jorduware eragojere nono duji. Meardaere tuwo Jesus maku boe eimijerage pegareuge etai nou tugobaigarege etai jamedu.
JOH 18:3 Dukodire nou Judas Iscariotes uture nou oliveira iguru ka Roma kejewu tugobaigaregebo. Fariseu doge, nou ure Judeu doge enomea maku Pao Kurireu aiwuge eimijerage ere Pao Kurireu uwai tadawu tugobaigarege etudo ebo jamedu. Eture tariga kurireu tabo, rago tabo. Eture jorugu tabo jamedu tuiordu pemegawo awaraji.
JOH 18:4 Jesus jorduware boe mode nono pudui duji rugadu. Jorduware eromode pudui rugadu boeji. Nono uture etogi. Dukejere unaragodure ei. Akore: – Ioguduba bagaiba taroino?
JOH 18:5 Egore: – Čedaiwonure Jesus bagai. Nazaré kejewu nure ema. Jesus akore: – Imireo. Judas Iscariotes rakojere nono ebo jamedu. Emare ure etarego toro Jesus ae tuwo Jesus maku etai.
JOH 18:6 Jesus akore “imireo” aino dukeje nou tugobaigarege ere tudaru piji. Dukeje ewudure moto ka.
JOH 18:7 Nono Jesus unarare ei pugeje. Akore: – Ioguduba bagaiba tagaiwore? Egore: – Čedaiwonure Jesus bagai. Nazaré kejewu nure ema.
JOH 18:8 Jesus akore: – Imireo. Iwagaire taroino. Mare tagaba tageragu awugei. Etudo pugeje.
JOH 18:9 Jesus akore aino tuwadaru jetuwo pudui. Ture jorduwadowugeire akoino. Marigudu makore Pao Kurireu bagai baruto dukeje akore: – Ietu pemegare nou ire jorduwadowugei dukodire ekare tugera ra tumeartorure i dupiji.
JOH 18:10 Simão Pedro iedure ia tariga kurireuji. Ure tawuje tuia piji dukeje ure ia imedu bija kado. Nou imedu iere Malco. Maragodure nou ure Judeu doge enomea maku Pao Kurireu aiwuge eimijera kurireu ai. Nou imedu ukana pemegareu jagwaiwu bijare ure kado.
JOH 18:11 Mare Jesus makore Pedroji. Akore: – Arokaba aino. Tariga kurireu tugu tuiato. Arduwakare. Imode imagu awu boe pegareuge etai boe pegawo i rugadu nono Iogwa Kurireu meardae mogadure.
JOH 18:12 Nono nou Roma kejewuge tugobaigarege eture Jesus apo. Eimijera uture ebo jamedu. Judeu doge nou tugobaigarege eture ebo jamedu. Ere Jesus kogudo.
JOH 18:13 Dukejere eture Jesus apo toro nou ure Judeu doge enomea maku Pao Kurireu aiwuge boe eimijerage etae. Ere maku Anás ai. Nou Anás uwagedu iere Caifás. Nou Caifás nou ure Judeu doge enomea maku Pao Kurireu aiwuge eimijera kurireu nure ema nou joruji.
JOH 18:14 Marigudu nou Caifás makore tumeardaeji Judeu doge eimijerage ewiagai. Akore: – Boe pegakare pai pawo ia imedu bito pawobe Judeu doge ewo činorudo Roma kejewu boe eimijerage pegareuge epiji.
JOH 18:15 Simão Pedro uture Jesus rekodaji. Ia Jesus ure jorduwadowu uture eregodaji jamedu. Caifás jorduware nou Jesus ure jorduwadowu imeduji. Dukodire nou imedu uture Jesus rekodaji nou Caifás uwai ka.
JOH 18:16 Mare Pedro ukare turemo nou baito. Nono nouia Jesus ure jorduwadowu ure tuie bu nou Caifás uwai piji toro Pedro ae. Makore nou jeture nou baiporo jiwudo areduji Pedro uwo turemo. Dukeje nou jeture baiporo jiwudo ure Pedro udo turemo nou baito.
JOH 18:17 Mare nou aredu makore Pedroji. Akore: – Ia Jesus ure jorduwadowu karegure aki? Mare Pedro akore: – Boro. Imi karega.
JOH 18:18 Biakure ei dukodire nou utugarege, nou tugobaigarege ere jorugu nono nou bai tada. Nono ere taiado nou joru tabo tuwo tuwarudo jao. Nono Pedro ure tuburedo nou joruji tuwo tuwarudo nono ebo jamedu.
JOH 18:19 Anás unarare Jesusji jorduware jiboe bagai. Akore: – Kaba jiba are boe erduwado?
JOH 18:20 Jesus akore: – Ikare iwadaru biado boe epiji marigudu. Boe eiamedu boe emeardure ire boe erduwado jiwu iwadaruji. Ire boe erduwado Judeu doge ere bato puiwu bai ja tada. Ire boe erduwado Pao Kurireu uwai tada. Boe ere bato pui itae tumearduwo iwadaruji rugadu.
JOH 18:21 Kočare anarare maigodu i iorduware jiboe bagai? Anarado nou meardure iwadaru jiwugei. Emagere erduware iwadaruji.
JOH 18:22 Jesus makore aino dukeje ia tugobaigare ure boeto Jesusji. Dukejere makore Jesusji. Akore: – Akagokaba aino awu ure Judeu doge enomea maku Pao Kurireu aiwuge eimijera kurireu bataru jipagi! Boe eimijera kurireu nure ema!
JOH 18:23 Mare Jesus akore: – Iwadaru pegareumode dukeje awu boe ewie nou iwadaru pegareuji. Mare iwadaru pegareu bokware. Kodiba are boeto i?
JOH 18:24 Dukejere Anás ure tugobaigarege edo Jesus reko Caifás ae. Jesus kana kogu kimore puapo rugadu. Caifás nou ure Judeu doge enomea maku Pao Kurireu aiwuge eimijera kurireu nure ema.
JOH 18:25 Pedro rakoje kimore nono joru okwai. Iage emagore ji. Egore: – Ia Jesus ure jorduwadowu karegure aki? Mare Pedro akore: – Boro. Imi karega.
JOH 18:26 Nono ia Caifás utugare makore Pedroji jamedu. Akore: – Iordure ai Jesus apo toro oliveira iguru keje. Pedro ure bija kadowu imedu uwobe nure ema.
JOH 18:27 Mare Pedro akore: – Boro. Čare rore puku kagariga kudugodure dukeje rugadu.
JOH 18:28 Čaboečoto ere Jesus reko Caifás uwai piji toro Roma pijiwu boe eimijera governador uwai ka. Judeu doge ere tuwaduiago tuwadae Pascoaji kuri aino. Judeu doge eimijerage ere tudo turugadu tuwaduwo nou tuwadaeji nou meri keje dukodire ekare turemo nou boe eimijera uwaito. Judeu karegure ema dukodi. Emode turemo ia boe tuginaiwuge ewaito dukeje epemegamodukare turowo to bakaru tadawu boe ero boeji. Dukodire ewadumodukare nou tuwadaeji pugeje. Enogwagemodukare nou Páscoa jiwu boe ekeji pugeje. Mare eno bakaru tadawu boe ero reo. Dukodire ekare turemo nou Roma eimijera uwaito.
JOH 18:29 Nou boe eimijera kurireu iere Pilatos. Emare ure tuie bu toro bawadu ka nou Judeu doge eimijerage etogi tumagowo ei. Akore: – Nuba awu imedu rore? Awu imedu ro pegareu pa?
JOH 18:30 Nou Judeu doge eimijerage egore: – Ro pegamodukare dukeje čedaregodumodukare apo woe akae. Ro pegare rugadu bitoduwo.
JOH 18:31 Mare Pilatos akore: – Dukodi tadudo apo toro tawai ka tagaiwowo awu imedu ro pegareu bagai taroiaji tawo boe pegado ji tardu jiwu ro pegareu moriče taroiaji. Egore: – Roma kejewu boe eimijera kurireu akore čei čegawo ia boe ewido. Ure ado mitotu woe čedabo. Akagomode bito. Boe emode bito rugadu. Amagomodukare dukeje boe emodukare bito rugadu.
JOH 18:32 Erduwakare mare Jesus makore marigudu tuwimoduie duji. Tuwimoduie ipo padure pugajejewu keje. Aino čare Jesus bataru jeture pudui rugadu.
JOH 18:33 Pilatos ure turemo tuwaito tuibagi tumagowo Jesusji pugeje. Unarare ji. Akore: – Boe rugadu kana? Judeu doge eimijera kurireu nure aki rugadu kana?
JOH 18:34 Jesus akore: – Aki na akaidure arduwawo? Ia boe eigoia na ere arduwado?
JOH 18:35 Pilatos akore: – Judeu karegure imi. Awobe ere amagu inai. Awobe nou ure Judeu doge enomea maku Pao Kurireu aiwuge eimijerage ere amagu inai. Kaba jiba arore? Kodiba egoino aino ai?
JOH 18:36 Jesus akore: – Boe eimijera kurireu nure imi mare awu woewu moto kejewu karegure imi. Boe eimijera mode imi woe moto keje dukeje meartorure iwuge erugodumode awu Judeu doge eimijeragei ekawo tugeragu i. Boe eimijera kurireu nure imi rugadu mare woe karega.
JOH 18:37 Pilatos akore: – Boe eimijera kurireu nure aki? Jesus akore: – Uu. Iwodure woe awu moto keje iwo boe erduwado boe jokodu jiboeji. Aidure tuiorduwawo boe remawu jiboe ewiapagamode iwadaruji rugadu.
JOH 18:38 Mare Pilatos akore: – Boe remawu bokware. Boe pemegareu bokware rugadu. Nono Pilatos ure tie bu toro bawadu ka pugeje nou Judeu doge eimijerage etae. Makore ei. Akore: – Iorduwakare awu imedu ia ro pegareuji. Ro pegakare i. Imodukare bito.
JOH 18:39 Tawadae Páscoa kejere tare ido ro pegareu tawuje baičoreu piji utuwo pugeje nono taroia mogadure. Ča tagaidu kana iwo awu Judeu doge eimijera kurireu Jesus tawuje baičoreu piji utuwo pugeje?
JOH 18:40 Mare nou Judeu doge eimijerage ekudugodure. Egore: – Boro! Ema karega! Čedaidukare ji. Čedaidure nou imedu Barrabásji awo tawuje baičoreu piji utuwo pugeje. Nou boe emagore bagaiwu imedu iere Barrabás. Imedu iwogu kigodureu nure ema. Ure boe ewidowu nure ema jamedu.
JOH 19:1 Nono Pilatos ure tugobaigarege edo boeto Jesusji bukigu tabo.
JOH 19:2 Nou tugobaigarege ere ia ikuredu otoreu upodo puapo tuwo udo nono boe eimijera atadawu mogadure. Nono ere tugu Jesus aorato koriwo aoraji rugadu. Nono ere boe eimijera ukudau areia rugureu motureu tugu Jesusji jamedu.
JOH 19:3 Nono nou tugobaigarege emagore Jesusji. Egore: – Judeu doge eimijera kurireu nure aki. Boe pemegawo ai awikawo jii toro. Mare tuwudorekeadae tabore egoino Jesusji. Nono ere tugera to ji jamedu.
JOH 19:4 Pilatos ure tugirimi toro boe doge etae pugeje. Akore: – Tagaiwodo. Imode awu imedu Jesus reko mato tagae tarduwo ji. Iordukare awu Jesus ia ro pegareuji. Dukodire imodukare boe edo bito.
JOH 19:5 Nono tugobaigarege etaregodure Jesus apo etae. Nou ikuredu otoreu kogu kimore aora kajeje. Nou ukudau areia rugureu motureu metu kimore ji. Nono Pilatos makore nou boei pugeje. Akore: – Emareo.
JOH 19:6 Nono nou ure Judeu doge enomea maku Pao Kurireu aiwuge eimijerage erdure Jesusji. Nou Pao Kurireu uwai tadawu tugobaigarege erdure Jesusji jamedu. Dukejere eiamedu ekudugodure. Egore: – Bito ipo padure pugajejewu keje! Bito ipo padure pugajejewu keje! Nono Pilatos akore: – Iordukare ia Jesus ro pegareuji. Imodukare bito. Tagaidumode tawo bito. Bito.
JOH 19:7 Nono nou boe egore: – Čeno bakarure. Dukodire čeroiare woe. Ia boe makomode Pao Kurireu Onaregedu nuie pudumi dukeje čemode bito rugadu. Ainore čeno bakarure. Ainore akore. Ča awu imedu Jesus makore Pao Kurireu Onaregedu nuie pudumi rugadu. Dukodire bitodumode rugadu nono čeno bakaru mogadure.
JOH 19:8 Pilatos meardure egore aino duji dukeje pagudugodure.
JOH 19:9 Ure tugirimi tuibagi tuwaito Jesus ae pugeje. Unarare Jesusji. Akore: – Kaiba pijiba akaregodure? Mare Jesus makokare boeji.
JOH 19:10 Nono Pilatos makore ji pugeje. Akore: – Amagodo. Itaidure imearduwo awadaruji. Akimijera kurireu nure imi. Imagomode atuwo atumode. Imagomode tugobaigaregei ewo awido emode awido.
JOH 19:11 Nono Jesus makore ji. Akore: – Mare Pao Kurireu emare ure ikimijerado aki. Umodukare ikimijerado aki dukeje aromodukare boeji i. Dukodire ure imagu akaiwu ro pegare rugadu.
JOH 19:12 Pilatos meardure Jesus bataruji dukeje aidure tuwo Jesus tawuje baičoreu piji utuwo pugeje. Mare nou boe ekudugodure kimo. Egore: – Amode tawuje baičoreu piji dukeje Roma kejewu boe eimijera kurireu César aidumodukare ai pugeje. Awu Jesus makore boe eimijera kurireu nuie pudumi. Makore boei emeartorukaiago Roma kejewu boe eimijera kurireu César bataruji.
JOH 19:13 Pilatos meardure ewadaruji. Dukejere uture Jesus apo toro bawadu ka. Dukejere Pilatos ure tumugudo tumuga ira pemegareu keje. Nou ira kejere makore tumeardaeji tu tu je boe ewiagai nuba turomode ro pegareugei. Nou ira mugure kejewu bawadu iere Bawadu Kejewu Tori. Hebreu bataru tabore egore: “Gabatá” aino ji.
JOH 19:14 Nou barogwato ewadumode tuwadae Pascoaji. Mare aino čare meri aregodure baru oia ka dukeje Pilatos makore nou boei. Pilatos akore: – Tagimijera kurireu reo!
JOH 19:15 Mare nou boe ekudugodure. Egore: – Bito! Bito! Bito ipo padure pugajejewu keje! Pilatos unaragodure ei. Akore: – Tagaidure iwo tagimijera kurireu bito? Nou ure Judeu doge enomea maku Pao Kurireu aiwuge eimijerage egore: – Čegimijera karega. Čemeartorure tu nou Roma kejewu pagimijera kurireuji.
JOH 19:16 Nono Pilatos ure Jesus maku etai ewo bito ipo padure pugajejewu keje. Nono nou boe ere tugeragu Jesusji.
JOH 19:17 Tugobaigarege eture Jesus apo nou Jerusalém ba kurireu piji. Oredure tuwimode kejewu ipo tabo. Eture tori ao ka. Nou tori iere Boe Ewireuge Etaora Ra Jeta. Judeu doge ewadaru tabore egore: “Gólgota” aino ji.
JOH 19:18 Nou tori ao keje ere Jesus bito ipo padure pugajejewu keje. Ere ia ro pegareuge ewido nono jamedu. Jesus rakojere etoiadada.
JOH 19:19 Pilatos ure tuwadaru bu ira keje. Ure tudugare udo nou ira bu Jesus ao keje nou ipo oto keje. Nou Pilatos bataru akore: – Nazaré pijiwu Jesus nure ema. Judeu doge eimijera kurireu nure ema rugadu.
JOH 19:20 Boe eture toro ere Jesus bito kejewu tori ao ka. Emagare. Erdure nou Pilatos ure tuwadaru bu kejewu iraji Jesus ao keje nou ipo oto keje. Pilatos ure tuwadaru bu nou Judeu doge ewadaru tabo, latim bataru tabo, grego bataru tabo jamedu boe eiamedu boe erduwawo tagoino jituji.
JOH 19:21 Nou ure Judeu doge enomea maku Pao Kurireu aiwuge eimijerage erdure nou iraji. Etaidukare nou ira kejewu bataruji. Nono eture Pilatos ae. Egore: – Judeu doge eimijera kurireu karegure ema. Akagokaba aino. Boe eimijera kurireu karegure ema. Amagodo aino. Emare akoino Judeu doge eimijera kurireu nuie pudumi. Emare akore tu aino pudui rugadu.
JOH 19:22 Pilatos makore ei. Akore: – Imodukare iwadaru pegado.
JOH 19:23 Tugobaigarege ere Jesus bito ipo padure pugajejewu keje. Dukejere ere tugeragu Jesus ukudau areiaji. Ere pedo pui. Nou tugobaigarege ere pobe puibiji. Dukodire eiamedu boe ere tugeragu ia Jesus ukudau areiaji. Jesus ukudau areia biaku epa ure mitotu je.
JOH 19:24 Tugobaigarege eroiwakare tuwo kado puiato dukeje egore pui: – Pagawo kado puiato. Pawaduwo tori roguji. Nou tori umode tudawuje ie tabowu ukudaumode nou ukudau areiače. Erduwakare mare marigudu Pao Kurireu makore eromoduie aino pudui rugadu. Pao Kurireu akore: – Boe emode ikudau areia pedo pui. Ewadumode ia tori roguji jao. Nou tori umode tudawuje ie tabowu ukudaumode awu ikudau areiače. Ainore nou tugobaigarege erore rugadu. Nou Pao Kurireu bataru jeture pudui rugadu.
JOH 19:25 Jesus uče rakoje puredure nono nou tonaregedu bitodure kejewu ipo padure pugajejewuji. Clopas oreduje rakojere nono jamedu. Iere Maria. Jesus uče uwie rakojere nono jamedu. Maria Madalena rakojere nono jamedu.
JOH 19:26 Nou Jesus meardu kurire jiwu imedu rakojere nono jamedu. Ure jorduwadowu nure ema. Jesus jordure ji. Jordure tujeji jamedu. Dukeje makore tujeji. Akore: – Awu imeardu kurire jiwu imedu akanaregedu mode ema rugadu.
JOH 19:27 Dukejere Jesus makore nou tumeardu kurire jiwu imeduji jamedu. Akore: – Awu imuga ače mode ema jamedu. Dukodire nou imedu ure tuwai maku Jesus uče ai uwaiče muguwo tada rugadu.
JOH 19:28 Jesus jorduware ture tumaragodae iado duji. Marigudu Pao Kurireu ure boe ewie Jesus romode jiboeji, makomode jiboeji. Marigudu Pao Kurireu ure boe ewie Jesus makomoduie pobo bagai rugadu. Aino čare Jesus akore: – Itaidure ikuduwo poboče. Dukodi čare Pao Kurireu bataru jeture pudui rugadu.
JOH 19:29 Ia pori mugure nono vinho kuru pagodureu tabo. Nou vinho kuru mori kurikare. Dukeje boe ere ia areia pemegareu pegodo nou vinho kuruto. Ere nou areia pemegareu kogudo ipo oto tabo. Dukejere ere nou areia pemegareu raido toro Jesus okwa ka.
JOH 19:30 Jesus kudure nou vinho kuruče dukeje makore ei. Akore: – Ire imaragodae rugadu iado. Boe bokwa. Nono itoru kugudugodure tuwi tabo rugadu. Dukodi bire rugadu.
JOH 19:31 Ča nou Judeu doge eimijerage eture Pilatos ae pugeje. Etaidure tuwo nou ere bitowuge epogora kado tuwo ewido kuri je tuwo erawuje ipo padure pugajejewu piji kuri je rugadu. Turo koiare etaidukare turowo boeji ia bireuji nou boečoji. Nou barogwato sábado meriji mode ema. Etaidukare bireuge epaduwo ipo padure pugajejewu keje sábado meriji. Nou barogwato ewadumode tuwadae páscoaji kodi. Ukare turugadu ei erowo boeji bireugei nou sábado meri keje.
JOH 19:32 Dukodire tugobaigarege ere nou iwogu kigodureu imedu pogora kado. Dukeje ere nouia iwogu kigodureu imedu pogora kado jamedu.
JOH 19:33 Mare etaregodure Jesus ae dukeje erdure Jesus bire rugadu duji. Dukodire ekare Jesus pogora kado.
JOH 19:34 Ia tugobaigare ure rago tugu Jesus japoroto. Ure rago tawuje dukeje Jesus ku rere japoro piji, pobo rere japoro piji jamedu.
JOH 19:35 Imire iordure awu inagore jiboeji ioku tabo. Boe jokodu jire inagoino. Iwadrarodukaregure. Dukodire ire bu bapera keje aino.
JOH 19:36 Marigudu Pao Kurireu makore nuba boe mode Jesusji rugadu. Akore Jesus ra kadodumodukaie rugadu.
JOH 19:37 Akore boe emoduie rago tugu to rugadu. Boe erdumoduie ere rago tugu to duji rugadu. Aino čare nou Pao Kurireu makore jiboe rugadu boe jeture pudui rugadu.
JOH 19:38 Dukejere José makore Pilatoji Jesus bagai tuwo Jesus tugu mototo. Nou José boture Arimatéia ba kurireu keje. Meartorure Jesusji mare ukare boe ewie. Pagudure Judeu doge eimijerageče kodi. Dukodire readodukare boe ewiagai tumeartorure Jesus jituji. Ča Pilatos makore nou Joseji uie turugadu uwo tugeragu Jesusji uwo tugu mototo. Dukodire José ure tugeragu Jesusji.
JOH 19:39 Imedu Nicodemos uture José apo. Nou Nicodemos uture Jesus ae boečoji marigudu tuiorduwawo Jesus bataruji. Aino čare uture roreboe tabo tuwo reko Jesus biri joki. Nou roreboe motudu oto padure trinta e cinco quilos.
JOH 19:40 Nou ime pobedu doge ere tugeragu bireu Jesusji. Ere nou roreboe reko biri joki nono Judeu doge ero mogadure. Ere upodo areia tabo nono turo mogadure tuwo tugu mototo.
JOH 19:41 Boe ere Jesus bitowu kejere nouia iguru jeture nono. Puredure nono ere Jesus bitowuji. Nou iguru tadare ia tori poro mugure nono. Boe ere nou tori porodo tuwo bireuge etugu to. Mare ekare ia bireu tugu to raga ji aino.
JOH 19:42 Barogwato Judeu doge emaragodumodukare dukodire akere ei tuwo boe jamedu iado nou meriji rugadu. Aino merirekodure ei dukodire nou ime pobedu doge ere Jesus tugu nou tori poroto rugadu.
JOH 20:1 Domingo meriji ča boečoto Maria Madalena uture ere Jesus tugu towu tori poro ka. Aregodure toro dukeje jordure tori baiporo jadodure duji. Boe ere Jesus tugu to dukeje ere ia tori kurireu bu nou tori poro je keje tuwo nou tori poro miwuje. Mačare nou tori padukare tumuga keje pugeje. Nou tori poro jadodure rugadu.
JOH 20:2 Nono Maria Madalena rekodure nou tori poro piji Simão Pedro bagai, nouia Jesus ure jorduwadowu imedu bagai jamedu. Jesus meardu kurire nouia ture jorduwadowu imeduji. Maria Madalena aregodure etae dukeje makore ei. Akore: – Ia boe ere tugeragu Pagimijeraji nou tori poro piji. Parduwakare kaiba padure pugeje.
JOH 20:3 Maria makore aino ei dukeje nou ime pobedu doge eregodure toro tori poro ka.
JOH 20:4 Eregodure rugadu. Nou metia aregodure boetoji.
JOH 20:5 Aiwore nou tori poroto. Ukare turemo tori poroto mare jordure nou upore Jesus apowu areiaji.
JOH 20:6 Dukejere Simão Pedro aregodure jamedu. Ure turemo krai je. Jordure nou upore Jesus apowu areiaji jamedu.
JOH 20:7 Jordure nou upore Jesus aora tabowu areiaji jamedu. Padure nouia upore apowu areia meki. Mare erdukare Jesusji.
JOH 20:8 Nono nouia Jesus ure jorduwadowu ure turemo jamedu. Emare aregodure nou tori poro ka boetoji. Aiwore mare jordukare Jesusji jamedu. Nono meartorure Jesus jewodure pugeje duji.
JOH 20:9 Pao Kurireu makore marigudu Jesus jewodumoduie pugeje. Mare nou ime erduwakare raga nou Pao Kurireu bataruji.
JOH 20:10 Nono nou ime pobedu doge ere tugirimi tuibagi tuwai ka.
JOH 20:11 Maria rakoje puredure nou tori baiporoji pugeje. Ragudu kimore rugadu. Dukeje ure tumegido taiwowo nou tori poro ka.
JOH 20:12 Aiwore dukeje jordure ime pobedu dogei. Mare ime karega. Pao Kurireu utugarege baru tadawuge eire jordure. Emugure nono nou tori poro tada nou Jesus padure kejewu tori keje. Jesus padukare nono pugeje mare nou Pao Kurireu utugarege baru tadawuge emugure nono. Ia mugure Jesus aora jagwai. Nouia okwačere bure jagwai.
JOH 20:13 Emagore Mariaji. Egore: – Are! Kodiba akragudure? Maria makore ei. Akore: – Ia boe ere tugeragu ikimijeraji awu tori poro piji. Iorduwakare kaiba ere tugu pugeje.
JOH 20:14 Nono Maria ure tumegido pugeje nou tori poro piji. Nono jordure Jesusji nono. Mare jorduwakare Jesus ure ema duji.
JOH 20:15 Jesus makore Mariaji. Akore: – Are! Kodiba akragudure? Ioguduba bagaiba akaiwore? Maria jorduwakare raga Jesus nuie ema duji. Meardaere maragodure boepa jiwu utugare nuie ema. Dukodire makore ji Jesus bagai. Akore: – Aki na are akeragu Jesusji? Kaiba are tugu pugeje? Iorduwado ituwo bagai.
JOH 20:16 Nono Jesus makore Maria ieji. Akore: – Maria. Makore tugie jitu keje čare Maria jorduware Jesus ure ema duji rugadu. Dukodire uture ae. Nono Maria makore aramaico bataru tabo. Akore: – Rabôni! Maria makore tuwadaru tabo mare Imedu Jorduwareu jire akoino.
JOH 20:17 Jesus makore Mariaji pugeje. Akore: – Akaba akeragu i. Irudukare raga Iogwa Kurireu ae. Ča atudo toro ire jorduwadowuge etae awo ewie. Imode ikirimi Iogwa Kurireu ae duji. Iogwa Kurireu Etuo Kurireu nure ema jamedu. Pao Kurireu nure ema rugadu.
JOH 20:18 Dukodire Maria Madalena uture nou Jesus ure jorduwadowuge etae. Ure ewie tuiordure Jesus jituji. Ure ewie Jesus makore pudui duji rugadu.
JOH 20:19 Nou Domingo meriji boečoji Jesus ure jorduwadowuge ere bato pui ia bai ja tada. Ere baiporo rugadu miwuje pudui epagudure Judeu doge eimijerageče dukodi. Dukeje Jesus jepadure tači etoiado nou bai ja tada. Makore ei. Akore: – Itaregodure pugeje.
JOH 20:20 Nono Jesus ure erdudo tugeraji. Ure erdudo tiaporoji. Nou Jesus ure jorduwadowuge erdure nou rago oiaji japoroto. Erdure nou meriri oiaji ierato. Dukodire erduware emaie rugadu duji. Dukodire egarere Jesusji rugadu.
JOH 20:21 Nono Jesus makore ei pugeje. Akore: – Tamororamagadukaba. Iogwa Kurireu ure itarego mato tawagai. Nono imode tadudo boe ewagai jamedu.
JOH 20:22 Nono Jesus ure togwamu ei. Dukejere akore: – Ča Pao Kurireu Uwari umode turawuje tagae dukeje tagaba utudo tabiji.
JOH 20:23 Boe ekiarigodumode turo pegareuji dukeje tawiagodumode ero pegareu piji. Nono Pao Kurireu biagodumode ero pegareu piji jamedu. Mare ia boe ekiarigodumodukare turo pegareuji dukeje tawiagodumodukare ero pegareu piji jamedu. Nono Pao Kurireu biagodumodukare ero pegareu piji jamedu.
JOH 20:24 Ia Jesus ure jorduwadowu iere Tomé. Iere Dídimo jamedu. Metage eiamedu boe eragojere nono kodire erdure Jesusji. Mare emare rakojekare nono kodire jordukare Jesusji.
JOH 20:25 Nou Jesus ure jorduwadowuge ere Tomé bie. Egore: – Čerdure Jesusji rugadu! Mare Tomé akore: – Imeartorukare. Iordumode enoe oiaji Jesus ierato dukeje imode ikera reko nou epaeji. Nono imeartorumode emaie rugadu duji. Iordumode japoroji dukeje imode ikera reko ji jamedu. Nono imeartorumode emaie rugadu duji. Mare iordumodukare dukeje imeartorumodukare rugadu.
JOH 20:26 Semanare mito ei pugeje dukeje nou Jesus ure jorduwadowuge eragojere ia bai ja tada. Ere baiporo miwuje pudui rugadu. Tomé rakojere ebo. Ma čare Jesus aregodure kuri etae. Rakojere nono ebo dukeje makore ei. Akore: – Itaregodu.
JOH 20:27 Nono Jesus makore Toméji. Akore: – Akera reko ikeraji. Akera reko iaporoji jamedu. Akaiwodo ikeraji. Imi rugadu reo! Amororamagadukaba i pugeje arduwawo rugadu imire iroino duji. Ameartorudo i.
JOH 20:28 Nono Tomé makogodure ji. Akore: – Ikimijera kurireu nure aki. Pao Kurireu nure aki. Imeartorumode ai rugadu.
JOH 20:29 Jesus akore: – Ardure i dukeje ameartorure i rugadu. Mare iage erdumodukare i mare du inodu tabo emeartorumode i rugadu. Dukodire boe pemegamode ei rugadu egarewo pudui rugadu.
JOH 20:30 Jesus ro rakare rugadu. Ure jorduwadowuge erdure Jesus rore jiboeji. Ire Jesus ro rakare jiboe bu awu bapera keje mare boe jamedu karega.
JOH 20:31 Mare ire awu Jesus bataru bu bapera keje mare boe emeartoruwo Jesusji rugadu du bagai. Umode boe ekinorudowu nure ema rugadu. Pao Kurireu Onaregedu nure ema rugadu. Boe emeartorumode ji dukeje emugu pemegamode Pao Kurireu apo rugadu.
JOH 21:1 Jesus ure ia ture jorduwadowuge erdudo pudui pugeje Galiléia pobo maereu okwai. Nou pobo maereu iere Tiberíades jamedu.
JOH 21:2 Simão Pedro, Tomé, Natã, ere bato pui nono. Zebedeu ore ime pobedu doge eragojere nono ebo jamedu. Ia Jesus ure jorduwadowuge eragojere nono jamedu. Ere pobe.
JOH 21:3 Jesus rakojekare ebo raga mare Pedro makore ei. Akore: – Pawoguwo. Egore: – Uu. Pawoguwo. Nono ere taredo to ika kurireuto dukeje ewogure. Mare nou boečoji ekare boe bito jii toro barogwakododu ka.
JOH 21:4 Barogwakododure dukeje Jesus rakojere nono kugaru keje pobo maereu okwai. Ure jorduwadowuge etaiwo jaere toro ae ika kurireu piji. Erdure ji mare erduwakare ji.
JOH 21:5 Jesus unaragodure ei ere boe bito dubagai. Akore: – Tare boe bito? Egore: – Boro! Čegare boe bito rugadu!
JOH 21:6 Jesus makore ei. Akore: – Tawuge barigu tagana pemegareu jagwai. Nono tamode tageragu karei rugadu. Dukodire ere tuwuge barigu tugana pemegareu jagwai. Ča eroiwakare tuwo tuwuge tawuje pobo piji. Motudure rugadu karebo.
JOH 21:7 Nou Jesus meardu kurire jiwu ure jorduwadowu makore Pedroji. Akore: – Pagimijera nure ema rugadu. Pedro meardure nou bataruji dukeje ure tugudau areia biaku epa tugu pudui dukeje ure taredo poboto ika piji. Nou pobo maereu po kokare nono dukodire Pedro aregodure nou pobo maereu okwa ka.
JOH 21:8 Edu jaere pobo okwa jitu oto padure cem metros. Nono nouia ure jorduwadowuge eture ika kurireu tabo pobo okwa ka. Ere tumugudo nou tuwuge keje nou karebo.
JOH 21:9 Etaregodure dukeje ere tudawuje nou ika kurireu piji. Dukejere erdure Jesusji nono. Erdure joruji, kare epadure joradu keje duji jamedu. Ia amireu padure joradu keje jamedu. Jesus maragodae reo.
JOH 21:10 Nono Jesus makore ei. Akore: – Mato ia tare bitowu karebo itae.
JOH 21:11 Simão Pedro ure tugirimi ika ka pugeje kare ewagai. Ure nou buke tawuje ika piji. Ure reko pobo okwa ka. Nou buke korobadure kare kurireugebo. Kare enodo padure kejeboere cento e cinquenta e cinco nou buke tada. Mare buke ukare tuwowuje ebo.
JOH 21:12 Nono Jesus makore ei pugeje. Akore: – Mato. Tagwagewo. Nou Jesus ure jorduwadowuge enarakare Jesus ie bagai. Erduware ure ema duji rugadu.
JOH 21:13 Nono Jesus ure tugeragu amireuji dukeje ure maku nou ture jorduwadowuge etai. Nono ure kare emagu etai jamedu.
JOH 21:14 Ainore Jesus rore tuwo nou ture jorduwadowuge erdudo pudui. Tiewodure dukodi rugadu.
JOH 21:15 Enogwagere dukeje Jesus makore Simão Pedroji. Akore: – Akiere Simão. João onaregedu nure aki. Aki na ameardu kurire i rugadu awu amedage epiji? Pedro akore: – Ikimijera nure aki rugadu. Imeardu kurire ai rugadu. Jesus akore: – Aetu pemegado inagu carneiro dogei. Mare carneiro dogei karega inagoino. Meartorure iwuge eire inagoino.
JOH 21:16 Nono Jesus makore Pedroji pugeje. Akore: – Simão. João onaregedu nure aki. Aki na ameardu kurire i rugadu? Pedro akore: – Uu. Ikimijera nure aki. Imeardu kurire ai rugadu. Jesus akore: – Aetu pemegado inagu carneiro dogei. Mare carneiro dogei karega inagoino. Meartorure iwuge eire inagoino.
JOH 21:17 Nono Jesus makore Pedroji pugeje. Akore: – Simão. João onaregedu nure aki. Ameardu kurire i na? Jesus makore aino pugeje dukodire Pedro kiarigodure rugadu. Akore: – Ikimijera nure aki rugadu. Arduware boe jamedu boeji. Imeardu kurire ai duji. Jesus akore: – Aetu pemegado inagu carneiro dogei. Mare carneiro dogei karega inagoino. Meartorure iwuge eire inagoino.
JOH 21:18 Boe jokodu jire inagoino ai. Iparedure aki dukeje are arugadu atuwo akaidure jiboe ka. Mare apegagodumode dukeje ro pegareuge emode tugeragu ai tuwo akana raido tuwo akera kogudo rugadu tuwo atudo taidure jiboe ka tuwo awido.
JOH 21:19 Jesus akoino dutabo ure Pedro bie ro pegareuge eromoduie jitu duji. Ro pegareuge emoduie Pedro bito mare du inodu tabo Pedro umodukaie tugera ra tumeartorure Pao Kurireu jitu piji rugadu. Dukodire boe erduwamoduie Pao Kurireu pemegare rugadu duji. Emoduie Pao Kurireu ie kurido rugadu duji. Čare Jesus makore Pedroji pugeje. Akore: – Mato itabo.
JOH 21:20 Pedro ure tumegido dukeje jordure nou Jesus meardu kurire jiwu imeduji. Jesus ure jorduwadowu imedu nure ema jamedu. Marigudu Jesus okwagere nou ture jorduwadowugebo boečoji dukeje nou ure jorduwadowu ure tuburedo Jesusji tunaragoduwo Jesusji nubureu imedu koiaba umode Jesus maku boe eimijerage pegareuge etai. Nou Jesus meardu kurire jiwu imedu emare unarare Jesusji marigudu.
JOH 21:21 Aino čare Pedro jordure nou Jesus meardu kurire jiwu imeduji dukeje makore Jesusji. Akore: – Nuba boemode awu pamediaji?
JOH 21:22 Jesus akore: – Itaidumodukare bikawo jii toro itaregodure du ka du bimodukare rugadu. Mare amororamagadukaba bagai. Ameartorudo imagore jiboeji rugadu.
JOH 21:23 Nou Jesus ure jorduwadowuge emeardaere Jesus makore nou tumeardu kurire jiwu imedu bimodukaie duji. Mare makokare aino. Akore: – Itaidumodukare bikawo dukeje bimodukare rugadu.
JOH 21:24 Ire Jesus akoino. Imire ikiere João. Jesus ure jorduwadowu nure imi. Imagore awu Jesus rore jiboeji boe ewiagai. Ire bu bapera keje jamedu. Boe jokodu jire inagoino tawiagai.
JOH 21:25 Jesus rore ia turoji jamedu. Mare bapera kurimode rugadu boe ewo Jesus rore jiboe makore jiboe jamedu boe bu nou bapera keje. Boe mode bataru jamedu bu bapera keje dukeje kodumode awu moto kori rugadu.
ACT 1:1 Imedia Teófilo nure aki. Ire atugoreboe maku akai marigudu iwo awie Jesus rore jiboeji, ure boe erduwado jiboeji. Aino inure ia atugoreboe pemegado pugeje iwo awie boe jamedu boeji. Nou atugo padure bapera kejewu boetojiwu tabore ire awie nuba Jesus rore tuwo tumaragodae towuje. Ire arduwado ruture baru to duji. Ruture čeboje mare ure tugeragu jiwu ime ure erduwado Pao Kurireu Uwari rakareu makudumode tagai duji. Ure tugeragu nou imei tuwo etudo tuwadaru tabo boe eiamedu boe ewagai.
ACT 1:3 Jesus bire dukeje jewodure pugeje. Nono meri oto padure 40 ji tumugui boe ebo dukeje. Nou ure tugeragu jiwuge erdure ji rugadu. Emare ure erduwado Pao Kurireu umode boe eimijera kurireudo pudumi duji. Erdure ji dukeje erduware ure ema rugadu duji. Erdure roji dukeje erduware ure ema rugadu duji. Dukodire erduware rugadu Jesus jewodure pugeje duji.
ACT 1:4 Ere bato pui dukeje Jesus makore aino ei. Akore: – Tadukaba Jerusalém ba kurireu piji. Tabagado woe jao nou imode maku tagaiboe bagai. Ire tawie marigudu. Pao Kurireu umoduie Tuwari maku tagai. Tabagado bagai woe.
ACT 1:5 João Batista ure boe etao pegodo pobo tabo. Mare kuri aino Pao Kurireu umode Tuwari rawuje tagae metuwo tameardae tada.
ACT 1:6 Nou uture Jesus bataru tabowuge ere bato pui Jesus apo dukeje enarare ji. Egore: – Amode Israel doge ekinorudo Roma kejewuge eimijera piji Israel doge eimijerawo aki woe Israel moto keje kuri aino na?
ACT 1:7 Jesus akore: – Tu Pao Kurireu jorduwamode turomode kejewu meriji. Ema koiare umode boe eimijeragedo; umode boe eimijerage eraga tawuje epiji. Tagi tarduwamodukare kaba meri kejeba romode aino.
ACT 1:8 Mare umode Tuwari maku tagai dukeje umode taraga maku tagai rugadu. Dukejere tamagomode boe ewiagai irore jiboeji, imagore jiboeji. Tamagomode boei woe Jerusalém ba kurireu keje tu jao. Dukeje tamagomode boe ewiagai Judéia moto keje, Samaria moto keje. Dukeje tadumode awu bataru tabo moto jamedu boe parugajeje.
ACT 1:9 Jesus akoino dukeje ruture baruto. Nou meartorure Jesus jiwuge erdure ji ruture duji. Etaiwore ji dukeje okware boetuguto.
ACT 1:10 Etaiwo kimore baruto dukeje ia baru tadawu Pao Kurireu utugarege etaregodure etae tači je. Ekudau kigadure rugadu.
ACT 1:11 Nono egore: – Galiléia kejewuge nure tagi. Kodiba tagaiwo kimore baruto Jesus bagai? Tardure Jesus ruture baru to duji. Dureore ia meri keje umode tugirimi tuibagi. Mare umode nono tumogadure.
ACT 1:12 Nou uture Jesus bataru tabowuge ere tugirimi tuibagi Jerusalém ba kurireu ka Oliveira Ri piji. Jaere mare puredure du je jamedu.
ACT 1:13 Ainore nou uture Jesus bataru tabowuge ekiere. Ia iere Pedro. Metia iere João. Ia iere Tiago. Metia iere André. Ia iere Filipe. Ia iere Tomé. Ia iere Bartolomeu. Ia iere Mateus. Iare Alfeu onaregedu nure ema. Iere Tiago. Ia iere Simão Zelote. Iare Tiago onaregedu nure ema. Iere Judas. Eiamedu boe ere turemo nou Jerusalém ba kurireuto dukejere etaregodure tubadure kejewu bai ka.
ACT 1:14 Nonore ere bato pui pu ae tumagowo baruto. Areme eture toro jamedu tumagowo baruto ebo. Jesus uče Maria uture toro jamedu. Jesus uwiemage eture toro jamedu.
ACT 1:15 Ia meri keje nou meartorure Jesus jiwuge eiamedu boe ere bato pui. Enodo oto padure kejewure cento e vinte boe doge. Dukeje Pedro ure turagojedo etoiadada tumagowo ei.
ACT 1:16 Akore: – Imedage nure tagi. Pao Kurireu bataru jeture pudui rugadu. Marigudu Pao Kurireu Uwari ure jawu Israel doge eimijera Davi makodo. Davi makore nou Judas Iscariotes romoduie aino duji, umoduie Jesus maku nou boe eimijerage pegareuge etai.
ACT 1:17 Judas Iscariotes tawujedure maragoduwo pagabo dukodire pamedia ure ema.
ACT 1:18 (Boe ere diero maku Judas Iscariotes ai ro pegawo aino. Nou diero tabore ure tugeragu ia motoji pudai. Nou moto kejere nou Judas ure tuwududo tori ao piji moto ka. Buture dukeje kurire tuborodo nono peguru jamedu boe ure tudawuje piji. Dukodi bire.
ACT 1:19 Jerusalém kejewuge eiamedu boe emeardure nou inoduji dukodire ere nou moto iedo: “Aceldama” aino. Israel doge ewadaru reno. Ainore nou boe egore: “Boe eku jeture nou moto keje”.)
ACT 1:20 Pedro mako kimore. Akore: – Pagimijera kurireu Davi ure Pao Kurireu bataru bu bapera keje marigudu. Akore: “Boe edukare uwai tada. Boe emugumodukare uwai keje pugeje.” – Davi ure ia Pao Kurireu bataru bu bapera keje jamedu. Akore: “Ia mugumode mugato maragoduwo maragodaeji.”
ACT 1:21 – Pao Kurireu akore aino dukodire pawo pageragu ia jordure Jesus jiwu imeduji maragoduwo pagabo uwo boe ewie Jesus jewoduie pugeje duji. Pawo pageragu jiwu rakojere Jesus apo. Pawo pageragu jiwu meardure João Batista bataruji jamedu. Pawo pageragu jiwu imedu merure paro kao Jesus rekodajiwu imeduji. Pawo pageragu jiwu jordure Jesus ruture baru to duji.
ACT 1:23 Dukodire nou Pedro metage emagore ime ewagai. Ere pobetu je. Ia iere José. Metia iere Matias. Nou José iere Barsabás jamedu. Boe egore Justo aino ji jamedu.
ACT 1:24 Ča nou meartorure Jesus jiwuge emagore baruto. Egore: – Čegimijera nure aki. Aki arduware boe eiamedu boe emeardaeji. Ča čerdudo akaidure jiwu imeduji maragoduwo čedabo Judas Iscariotes mugato. Utumode awadaru tabowu mode ema. Judas uture čebiji toro boe pegareu ka turo pegareu moriče.
ACT 1:26 Dukejere nou meartorure Jesus jiwuge ere nou ime pobedu doge ekie bu ia tori rogu keje. Nono ere nou tori barigu. Dukejere etaiwore nou toriji tuiorduwawo Jesus aidure jiwu imedu bagai. Jesus ure erdudo nou Matias ieji. Aino ere Matias mugudo Judas mugato tuwo uture Jesus bataru tabowuge enodo padudo doze pugeje.
ACT 2:1 Ia Judeu doge ewadae iere Pentecostes. Nou Pentecostes meri keje nou meartorure Jesus jiwuge eiamedu boe ere bato pui.
ACT 2:2 Ča emeardure ia baru tadawu jaruruji. Jarurure nono bakuru rakareu jaruru mogadure. Nou jaruru aregodure nou meartorure Jesus jiwuge edu tadawu bai ka. Ure turemo nou baito. Jarurure ewai ja tada rugadu.
ACT 2:3 Dukeje erdure iaboe ruguji. Ure nono joru mogadure mare joru karega. Ure nono boe ekeru mogadure mare boe ekeru karega. Ure taodo nono eiogi. Ure taodo nou meartorure Jesus jiwuge eiamedu boe eiogi.
ACT 2:4 Dukeje Pao Kurireu Uwari meture eiamedu boebo. Dukodire emagore ia boe tuginaiwuge ewadaru tabo. Pao Kurireu Uwari koiare ure emagodo nou boe tuginaiwuge ewadaruji aino.
ACT 2:5 Judeu doge etaregodure Jerusalém ba kurireu ka boe eno moto jamedu boe piji. Eku kidugodure Pao Kurireuji dukodire etaregodure tuwaduwo nou tuwadaeji tumeartoruwo Pao Kurireu ure maku Judeu doge etaiwu bakaruji.
ACT 2:6 Ewiapagare nou meartorure Jesus jiwuge egoino duji. Dukodire eture tuwo bato pui ebo tumeardu pemegawo emagore jiboeji. Emagare. Egarere pudui eiamedu boe ewiapagare tuwadaruji kodi. Nou meartorure Jesus jiwuge emagore nou boe tuginaiwuge eiamedu boe ewadaru tabo rugadu.
ACT 2:7 Nou meartorure Jesus jiwuge ere nou boe eku kidugo turoji dukodire egore: – Awu makore čeiwuge Galiléia kejewuge nure emage.
ACT 2:8 Mare kočare erduware paiamedu boe pawadaruji! Nuba erore tuiorduwawo paiamedu boe pawadaruji?
ACT 2:9 Ia čegi čemugure Pártia moto keje. Ia čegi čemugure Média moto keje. Ia čegi čemugure Elão moto keje. Ia čegi čemugure Mesopotâmia moto keje. Ia čegi čemugure Judéia moto keje. Ia čegi čemugure Capadócia moto keje. Ia čegi čemugure Ponto moto keje. Ia čegi čemugure Ásia moto keje. Ia čegi čemugure Frígia moto keje. Ia čegi čemugure Panfília moto keje. Ia čegi čemugure Egito moto keje. Ia čegi čemugure Líbia moto keje puredure Cireneji. Ia čegi čedaregodure Roma ba kurireu piji.
ACT 2:11 Ia čegi Judeu doge nure čegi. Ia čegi čemeartorure Judeu doge erore jiboeji. Iage etaregodure Creta moto piji. Iage etaregodure Arábia moto piji. Pawadaru ure tuginai pume keje. Mare kočare awu ime emagore aino pai pawadaru tabo. Emagore pai pawadaru tabo Pao Kurireu ro kurire jiboeji. Nuba erore tuiorduwawo aino pawadaruji?
ACT 2:12 Boe eiamedu boe ebogodure rugadu. Erduwakare kaboba ure aino duji. Enarare pui: – Nuba boe mode?
ACT 2:13 Mare iage emago pegare nou meartorure Jesus jiwugei. Egore: – Awuge eke kurure ei rugadu. Eku pegare.
ACT 2:14 Dukeje nou utumode Jesus bataru tabowuge ere turagojedo. Nono Pedro mako pemegare boe eiamedu boe emearduwo. Akore: – Judeu doge nure tagi dukodire iwobe nure tagi. Iwo tawie. Iwo nouia Jerusalém kejewuge ewie jamedu. Imode tarduwado awu boe erore jiboeji. Tawiapagado iwadaruji.
ACT 2:15 Tameardaere awu boe doge eke kurure ei duji. Mare awu boe doge ekudukare piga kuruče. Meri kodu mai kimo.
ACT 2:16 Mare erore nono makore Pao Kurireu bataru jiwu Joel bataru mogadure. Ainore Joel akore:
ACT 2:17 – Pao Kurireu akore: “Imode moto akedudo. Du otodaire imode Iwari maku boe eiamedu boe etai. Tawobe ime, tawobe areme emagomode iwadaruji boe ewiagai. Imode tawobe ipare erdudo iwadaruji. Ime pegagodureuge eniamode iwadaruji.
ACT 2:18 “Ainore umode rugadu. Imode Iwari maku itugarege ime etai, itugarege areme etai jamedu nou moto akedumode kejewu meri otodai. Dukodire nou ime nou areme emagomode iwadaruji.
ACT 2:19 “Imode iro rakareu to baru tada. Imode iro rakareu to moto keje. Boe eku remode boe epiji. Joru, jeredudu umode tumaedo boe jamedu boe parugajeje.
ACT 2:20 “Dukodire meri joku akedugodumode. Ari joku kujagumode nono boe ku kujagu mogadure. Dukejere Pagimijera Kurireu aregodumode kejewu meri mode. Nou meri kurimode, pemegamode.
ACT 2:21 “Dukejere imode nou makore Pagimijera bagaiwuge eiamedu boe ekinorudo.” Ainore Pao Kurireu akore.
ACT 2:22 Ča Pedro makore pugeje. Akore: – Iwobe nure tagi. Israel doge nure tagi. Tawiapaga pemegado awu iwadaruji. Jesus ričodure Nazaré ba kurireu keje. Pao Kurireu ure nou Jesus ro rakado, ro pemegado. Tardure nou Jesus rore jiboeji. Dukodire tarduware Pao Kurireu ure arego mato pagae.
ACT 2:23 Pao Kurireu meardae reo. Marigudu Pao Kurireu jorduware Jesus makudumode tagai tawo bito. Tagire tare bito. Tare ro pegareuge edo Jesus bito ipo padure pugajejewu keje.
ACT 2:24 Mare Pao Kurireu ure jewodudo pugeje rugadu. Ure tawuje bireuge eda piji. Bireuge eda rakakare ji muguwo nono.
ACT 2:25 Dujire nou mariguduwu Judeu doge eimijera kurireu akoino. Akore: – Iordure Pagimijera Kurireuji meri jameduji. Rakoje puredure i dukodire imororamagadukare.
ACT 2:26 – Dukodire iagarere i. Iwadaru jakarere. Imedu nure imi. Iwimode. Mare ipagamode bagai dukodire iwudugugodumode.
ACT 2:27 – Pao Kurireu nure aki. Iwimode mare amodukare akera ra ipiji. Imeartorure awadaruji kodi. Dukodire amode itawuje bireuge eda piji. Amode iewodudo pugeje dukodire iwiri guborogodumodukare moto tada.
ACT 2:28 – Are iordudo awara pemegareuji imugu pemegawo. Aragojere itabo dukodire iagarere i rugadu.
ACT 2:29 Pedro mako kimore: – Imedage nure tagi. Imode tarduwa pemegado awu jawu pamana Davi bataruji. Jao pawobe eimijera kurireu nure ema. Imode tarduwado bataruji. Pudui karega akoino. Emare bire. Boe ere tugu mototo. Meture tadawu moto ure kimo jii aino.
ACT 2:30 Mare makore Pao Kurireu bataru jiwu nure ema rugadu. Pao Kurireu ure bie marigudu. Akore tumoduie Davi ia uwobe Boe Eimijera Kurireudo ema nono Davi umogadure. Akore tuwiagodumodukaie awu tuwadaru piji rugadu.
ACT 2:31 Ča Davi meartorure Pao Kurireu bataruji. Pao Kurireu ure Davi bie turomode jiboeji. Dukodire Davi jorduware Pao Kurireu romode jiboeji. Jorduware Pao Kurireu umode nou umode boe ekinorudowu maku boe etai. Jorduware nou umode boe ekinorudowu jewodumode pugeje duji. Dukodire akore aino: “Bimode mare Pao Kurireu umodukare tugera ra piji. Umode tawuje bireuge eda piji. Umode jewodudo pugeje dukodire biri guborogodumodukare moto tada.”
ACT 2:32 – Jesus jire akoino. Pao Kurireu ure Jesus jewodudo rugadu. Čeiamedu boe čerdure nou Jesus jewodure duji.
ACT 2:33 Pao Kurireu ure Jesus rutudo baruto. Dukodire mugure Tuo Kurireu meki. Pao Kurireu makore ji marigudu tumoduie Tuwari maku ai. Dukejere ure Tuwari maku ai rugadu uwo maku meartorure puduiwuge etai jamedu. Ča Pao Kurireu Uwari makudure čenai dukodire čerore, čemagore aino tawadaru tabo.
ACT 2:34 Marigudu pagimijera Davi makore Jesus bataruji. Utukare baruto raga dukeje akore: – Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode jordu pegare aiwuge etagedudo du ka.”
ACT 2:36 Pedro mako kimore. Akore: – Israel kejewuge nure tagi. Taiamedu boe tawiapaga pemegado iwadaruji tarduwawo boe remawuji rugadu. Iwo tawie rugadu. Tare Jesus bito. Mare Pao Kurireu ure pagimijera kurireudo ema. Umode boe ekinorudowu nure ema rugadu.
ACT 2:37 Nou boe doge emeardure nou bataruji dukeje ekiarigodure turore aino duji rugadu. Emagore Pedroji. Emagore nouia uture Jesus bataru tabowugei jamedu. Egore: – Čemana mage nure tagi. Nuba čeromode?
ACT 2:38 Pedro makore ei. Akore: – Taiamedu boe tameardae tawuje tawo tagera ra taro pegareu boe piji. Dukejere Pao Kurireu biagodumode nou taro pegareu piji. Tagao pegododuwo boe erduwawo tameartorure Jesus jitu duji. Dukejere Pao Kurireu umode Tuwari maku tagai rugadu.
ACT 2:39 Ainore Pao Kurireu romode tumagore bagaiwugei. Ainore akore tai, tagorei, boe eiamedu boei moto jamedu boe parugajeje.
ACT 2:40 Pedro mako raire aino nou boei tuwo emeartorudo Jesusji. Akore: – Pao Kurireu ro pegamode ro pegareugei rugadu kuri aino. Dukodire čare tamagodo Pao Kurireu bagai uwo taginorudo.
ACT 2:41 Boe emeartorure Jesusji nou Pedro bataru koia. Dukeje etao pegododure. Emagare. Nou meriji ure etao pegododureuge enodo padure três mil emeartorure Jesusji kodi.
ACT 2:42 Nou uture Jesus bataru tabowuge ere nou meartorureuge erduwado Pao Kurireu bataruji. Ere bato pui tu tu je. Enogwagere puapo. Emagore puapo baruto jamedu.
ACT 2:43 Uture Jesus bataru tabowuge ero rakareu kurire. Jesus koiare ure ero rakado aino. Ere boe eku kidugo rugadu. Dukodire boe eiamedu boe ebogodure.
ACT 2:44 Meartorure Jesus jiwuge eiamedu boe ere bato pui tu tu je. Ere toe kobo pedo pui.
ACT 2:45 Iage ere to moto maku diero bagai. Dukeje ere nou diero maku nouia meartorure Jesus jiwuge etai nou uke bokwareuge etai. Ere nou toe maku diero bagai dukeje ere nou diero maku meartorure Jesus jiwuge etai nou uke bokwareuge etai.
ACT 2:46 Ere bato pui Pao Kurireu uwai ja tada meri jameduji. Enogwagere puapo tuwai ja tada. Egarere pui. Enojarokare tuwadaruji.
ACT 2:47 Mare emago pemegare Pao Kurireuji. Boe eiamedu boe etaidu pemegare ei. Meri koduredu jamedu boeji iage emeartorure Jesusji uwo tuginorudo boe pegareu piji. Dukodire Pao Kurireu ure meartorure puduiwuge emagado rugadu.
ACT 3:1 Ia meri keje Pedro uture Pao Kurireu uwai ka João apo merirekodutabo. Judeu doge emagomode baruto merirekodutabo tu tu je.
ACT 3:2 Nou Pao Kurireu uwai ia bai poro iere Motureu. Boe etaregodure nono ia marenaru imedu apo meri jameduji muguwo nono togwamaguduwo diero bagai. Nou imedu boture tubogora pegare dutabo dukodire meru bokware. Meri jameduji okwamagudure nou ure turemo Pao Kurireu uwai towugei diero bagai.
ACT 3:3 Ča Pedro João etaregodure nono. Nou imedu jordure ei dukeje okwamagudure ei ia boe bagai.
ACT 3:4 Etaiwore tu ji dukeje Pedro akore: – Akaiwodo čei.
ACT 3:5 Dukodire aiwore ei. Meardaere emoduie ia iaboe maku pudai.
ACT 3:6 Mare Pedro akore: – Ino diero bokwa. Mare imode ia iaboe maku akai. Nazaré pijiwu nure Jesusče. Umode boe ekinorudowu nure ema. Jesus koiare umode inagojino aino ai. Aragojedo! Amerudo!
ACT 3:7 Dukejere Pedro ure tugeragu nou imedu ieraji. Ure rakojedo. Ča Pao Kurireu ure nou imedu bure, pogora pemegado jamedu.
ACT 3:8 Ure turagojedo. Rakojere tuginaigodu. Merure jamedu. Dukejere ure turemo Pao Kurireu uwaito tumeruredu tabo. Ure taredo tiagare tabo. Mako pemegare Pao Kurireuji.
ACT 3:9 Boe emagare tuiordu tabo nou imedu merure duji. Emeardure mako pemegare Pao Kurireu jituji.
ACT 3:10 Mare erduware rakojere nou Pao Kurireu uwai poro kejewu marenaru imedu nure ema duji. Dukodire ebogodure rugadu. Nou Pao Kurireu ro ure nou boe eku kidugo.
ACT 3:11 Nou imedu ukare tugera ra Pedro piji, João piji. Ia bawadu padure nou Pao Kurireu uwai kurireu tada. Nou bawadu iere Salomão Uwai Jokora. Pedro, João eragojere nono. Boe eregodure etae nono tiegarere pudui dutabo.
ACT 3:12 Pedro jordure nou boei dukeje makore ei. Akore: – Israel kejewuge nure tagi. Iwobe nure tagi jamedu. Kodiba taebogodure aino? Kodiba tagaiwore tu čei? Čere nou imedu pemegago dukodire tameardaemode ro rakareuge nure čegi. Tameardaemode ro pemegareuge nure čegi. Čere nou imedu pemegago mare čegi karega. Čere nono tamogadure rugadu.
ACT 3:13 Abraão meartorure Pao Kurireuji. Isaque meartorure Pao Kurireuji. Jacó meartorure Pao Kurireuji. Jao pawobe emeartorure Pao Kurireuji. Awu emeartorure jiwu Pao Kurireu ure boe kurireudo Jesusče baru tada Jesus rowo Pao Kurireu roji. Mare tagi tagaidukare Jesusji. Dukodire tare maku boe eimijera pegareuge etai. Tagimijera Pilatos aidure tuwo Jesus udo činorudo mare tagaidukare.
ACT 3:14 Jesus ro pemegare. Ro pegareu bokware. Mare tagaidukare ji. Tagagore Pilatoji uwo ia ure boe ewidowu imedu tawuje baičoreu piji utuwo pugeje. Nono tagagore Pilatoji uwo Jesus mugudo mugato.
ACT 3:15 Tare Jesus bito. Emare umode boe eewodudo. Tare bito mare Pao Kurireu ure jewodudo pugeje. Čerdure awu jamedu boeji.
ACT 3:16 Čemeartorure Jesusji. Nou imedu meartorure ji jamedu. Dukodire pemegagodure aino. Jesus rakare. Jesus ure turaga maku nou imedu ai tuwo pemegago. Tagaiwodo ji.
ACT 3:17 – Ča. Imedage nure tagi. Taro pegare Jesusji mare tarduwakare jitu kodi. Tagimijerage ero pegare aino Jesusji mare erduwakare jitu kodi.
ACT 3:18 Marigudu Pao Kurireu ure pawie. Makore Pao Kurireu bataru jiwuge egore boe pegamoduie nou umode boe ekinorudowuji. Ča ainore Pao Kurireu ure udo rugadu. Nou makore jiboe jeture pudui rugadu.
ACT 3:19 Tagaidukaba taro pegareuji pugeje. Tagera ra piji. Tagaiwodo Pao Kurireu bagai. Dukeje Pao Kurireu biagodumode taro pegareu jamedu boe piji. Dukeje Pao Kurireu umode tado tawia ra boe pegareu piji. Umode Jesus arego tagae. Ure tugeragu Jesusji marigudu uwo boe ekinorudo.
ACT 3:21 Jesus rakojemode baru tada tu jao. Marigudu Pao Kurireu ure boe ewie tumoduie boe jamedu boe maidudo. Mariguduwuge makore Pao Kurireu bataru jiwuge ere boe ewie rugadu. Pao Kurireu umode boe jamedu boe maidudo dukeje Jesus aregodumode.
ACT 3:22 Moisés akore: “Tameartorure jiwu Pao Kurireu umode ia makore Pao Kurireu bataru jiwu arego tagae nono ure itarego dumogadure. Tawobe mode ema. Tameartorudo tu ji rugadu.
ACT 3:23 Meartorukare jiwuge ewarigudumode Pao Kurireu uwobe epiji etageduwo.”
ACT 3:24 – Makore Pao Kurireu bataru jiwuge eiamedu boe ewadaru kodure puregodaji. Ainore makore Pao Kurireu bataru jiwu imedu Samuel akore jamedu. Marigudu emagore Pao Kurireu romode pai jiboeji.
ACT 3:25 Marigudu Pao Kurireu makore Abraãoji. Akore: “Tagore ebo imode boe pemegado boe eiamedu boei.” Awu Pao Kurireu bataru ure turugadu tai jamedu. Makore Pao Kurireu bataru jiwuge ere mariguduwuge tawobe ewie Pao Kurireu bataruji. Nou ewadaru ure turugadu tai jamedu.
ACT 3:26 Ča Pao Kurireu ure tugeragu Jesusji tudugarewo ema. Ure Jesus arego tagae boetoji. Emare aidure turo pemegawo tai, tuwo tado tagera ra taro pegareu piji.
ACT 4:1 Pedro João emago kimore boe dogei dukeje nou ure Judeu doge enomea maku Pao Kurireu aiwuge etaregodure. Pao Kurireu uwai tadawu tugobaigarege eimijera aregodure jamedu. Saduceu doge etaregodure nono jamedu.
ACT 4:2 Erdu pegare nou Pedro nou João ewadaruji. Pedro João egore Jesus jewoduie pugeje. Aino boe erduwaie bireuge eewodumode pugeje duji. Mare nou aregodureuge emeartorukare nou inoduji.
ACT 4:3 Dukodire ere tugeragu Pedroji, Joãoji. Ere etugu baičoreuto nou boečoji.
ACT 4:4 Mare nouia boe emeartorure Pedro bataruji. Dukodire emeartorure Jesus jiwuge emagagodure rugadu. Enodo padure cinco mil boe doge.
ACT 4:5 Nou barogwato nou Judeu doge eimijerage eiamedu boe ere bato pui Jerusalém ba kurireu tada. Nou jorduware Judeu doge eno bakaru jiwuge etaregodure jamedu.
ACT 4:6 Nou ure Judeu doge enomea maku Pao Kurireu aiwuge eimijera kurireu rakojere nono jamedu. Iere Anás. Uwagedu rakojere jamedu. Iere Caifás. Nou Anás ia uwobe eragojere nono jamedu. Ia iere João. Ia iere Alexandre.
ACT 4:7 Nou Judeu doge eimijerage ere Pedro João etawuje baičoreu piji tuwo eragojedo nono tiogorai. Dukeje nou boe eimijerage enaragodure Pedroji, Joãoji. Egore: – Nuba tare tarodo tawo nou imedu pemegago? Nuba tare tarodo kodiba nou taraga makudure tagai?
ACT 4:8 Pedro korobadure Pao Kurireu Uwari apo. Dutabore makore nou Judeu doge eimijerage ewadaru jipagi.
ACT 4:9 Akore: – Nuba tagaidure tarduwawo? Tagaidure tarduwawo nuba čerore čewo nou meru bokwareu imedu pemegago?
ACT 4:10 Čemode tawie tarduwawo, boe eiamedu boe erduwawo. Čere nou imedu pemegago mare čegi karega. Mare Jesus Cristo rakare. Emare ure nou imedu pemegago rugadu. Nou Jesus ričodure boe eda Nazaré keje. Tagi tare nou Jesus bito ipo padure pugajejewu keje. Mare Pao Kurireu ure jewodudo pugeje.
ACT 4:11 Nou Jesus jire Pao Kurireu akoino. Akore: “Boe emeardae pegare toriji. Egore nou tori pegaie tuwo tuwaido ema. Mare tori pemegareu nure ema rugadu boe ewo tuwaido ema rugadu.” – Mare tori ji karega Pao Kurireu akoino. Jesus jire akoino.
ACT 4:12 Tu Jesus umode boe ekinorudo boe pegareu piji. Pao Kurireu ukare tugeragu ia metiaji. Dukodire ia boe bokware moto jamedu boe parugajeje tuwo boe ekinorudo.
ACT 4:13 Pedro João emugukare bapera keje mare epogurukare tumagowo nou Judeu doge eimijeragei. Nou boe eimijerage erore ta je egoino duji. Dukeje erduware eragojere Jesus apo duji.
ACT 4:14 Ča nou boe eimijerage eroiwakare tumagowo iaboeji pugeje. Nou pemegagodureu imedu rakojere nono Pedro apo João apo jamedu.
ACT 4:15 Dukeje egore nou imei ewo tudawuje nou bai piji tu jao. Nono nou boe eimijerage emagore pui nuba turomode.
ACT 4:16 Egore: – Nuba paromode nou imei? Ere nou imedu pemegago. Ča Jerusalém ba kurireu kejewuge eiamedu boe erduware nou ero rakareuji. Paroiwakare pawo boe ekiripagado pugeje.
ACT 4:17 Pawo pamago rakado nou imei ekawo boe erduwado Jesus jiboeji pugeje. Aino ia boe erduwamodukare nou inoduji pugeje.
ACT 4:18 Dukeje nou eimijerage emagore nou ime ewagai pugeje. Emago rakare ei ekawo boe erduwado Jesus jiboeji pugeje, emagokawo Jesus bataruji boe ewiagai pugeje.
ACT 4:19 Mare Pedro, nou João emagore nou boe eimijerage ewadaru jipagi jamedu: – Tagaiwodo boe pemegareu bagai. Nuba Pao Kurireu aidumode? Čemeartorumode tawadaruji na? Pao Kurireu bataruji kana?
ACT 4:20 Čemodukare čegera ra čemago piji rugadu čewo boe ewie rugadu čerdure jiboeji, čemeardure jiboeji.
ACT 4:21 Mare nou boe eimijerage emago rakare ei pugeje. Dukeje ere etudo. Nou imedu pemegagodure dukodire boe eiamedu boe emago pemegare Pao Kurireuji. Dukodire nou boe eimijerage eroiwakare turo pegawo nou imei.
ACT 4:22 Nou Pao Kurireu ro rakare jiwu imedu o joru oto padure quarenta.
ACT 4:23 Nou boe eimijerage ere nou Pedro nou João etudo dukeje eture tuibagi toro meartorure Jesus jiwuge etae. Ere ewie nou boe eimijerage ewadaruji.
ACT 4:24 Nou meartorure Jesus jiwuge emeardure nou inoduji dukeje emagore baruto puapo Pao Kurireu bagai. Egore: – Čegimijera nure aki. Aki are baru to, are moto to, are pobo maereu to. Are boe eiamedu boe etowuje.
ACT 4:25 Are Awari makodo jawu čegimijera Daviji. Nou Davi atugare nure ema. Awari makore aino ji. Akore: “Kodiba boe tuginaiwuge ekorigodure? Kodiba Judeu doge ere tumeardae pegareu tawuje?
ACT 4:26 Eiamedu boe eimijerage ere tudo turugadu. Ere bato pui turugoduwo Pao Kurireuji, turugoduwo umode boe ekinorudowuji.”
ACT 4:27 – Ča boe jokodu jire čegimijera Davi akoino. Ainore nou čegimijera Herodes, nou čegimijera Pôncio Pilatos ere bato pui woe awu ba kurireu tada boe tuginaiwugebo, Israel kejewugebo jamedu tuwo tumeardae pegareu tawuje turo pegawo Jesusji. Atugare pemegareu nure Jesusče. Are boe ekinorudowudo ema.
ACT 4:28 Awu čegimijerage pegareuge ere bato pui mare erore jiboe ure nono ameardae mogadure. Are nou ameardae tawuje marigudu. Are udo araga tabo.
ACT 4:29 Ča čeginorudo nou čegimijerage ewadaru pegareu piji. Čegimijera kurireu nure aki. Atugarege nure čegi. Čeboguru bokwado čemago pemegawo awadaruji boe ewiagai.
ACT 4:30 Amagodo boe ewiagai Jesus rore jiboeji makore jiboeji. Atugare pemegareu nure Jesusče. Dutabore akera bu boe ewugeje epemegagoduwo. Aro rakareu towuje boe egai.
ACT 4:31 Emagore baruto akedure dukeje nou eragojere tadawu bai magadugodure. Dukejere ekorobadure Pao Kurireu Uwari apo. Nono epogurukare tumagowo Pao Kurireu bataruji boe ewiagai. Ere boe ewie rugadu.
ACT 4:32 Nou meartorure Jesus jiwuge emeardae ure mitotu je. Ekare toe biado pubiji dukodire ere toe rugadu boe pedo pui.
ACT 4:33 Pao Kurireu ure nou uture Jesus bataru tabowuge eragado rugadu emago pemegawo boei. Ere boe erduwado Jesus jewodure pugeje duji. Pao Kurireu ure turo pemegareu maku etai rugadu.
ACT 4:34 Boe bokwakare etai rugadu. Iage ere to moto maku diero bagai. Iage ere tuwai maku diero bagai. Dukeje etaregodure nou diero tabo nou uture Jesus bataru tabowuge etae. Nou uture Jesus bataru tabowuge ere nou diero pedo nou meartorure Jesus jiwuge uke bokwareuge etai jamedu.
ACT 4:36 Ia imedu iere José. Rore aino jamedu. Levi uwobe nure ema. Boture Chipre moto keje. Nou uture Jesus bataru tabowuge ere nou imedu iedo Barnabé. Ewadaru reo. Ainore egore “ure boe eragado rugadu”.
ACT 4:37 Nou Barnabé ure ia to moto maku diero bagai. Dukeje aregodure nou uture Jesus bataru tabowuge etae nou to diero tabo. Ure maku etai rugadu.
ACT 5:1 Ia imedu iere Ananias. Oreduje iere Safira. Ere ia to moto maku diero bagai.
ACT 5:2 Ere tumeardae tawuje tuwo nou diero kado puiato. Ere ia diero biado toče. Nouia diero ere maku nou uture Jesus bataru tabowuge etai.
ACT 5:3 Ananias ure maku etai dukeje Pedro makore Ananiaji. Akore: – Kodiba awiapagare bope doge eimijera Satanás meardae pegareuji? Nou bope doge eimijera ure tumeardae pegareu maku akai awadraroduwo Pao Kurireu Uwariji. Are ia ako moto maku diero bagai. Akagore aie nou diero rugadu maku čenai mare are ia biado.
ACT 5:4 Akore nou ako motoče rugadu. Are maku dukeje akore nou dieroče rugadu jamedu. Amodukare nou ako diero maku čenai du pegakare. Mare awadrarodure! Akagore aie diero rugadu boe maku mare akare rugadu boe maku. Are ia tawuje akoče. Awadrarodure mare čei karega. Awadrarodure tu Pao Kurireuji!
ACT 5:5 Ananias meardure nou Pedro makoji dukeje bire kuri rugadu. Buture kuri tai moto keje tuwi tabo. Ia ipare ere turemo nou uwaito. Ere nou bireu upodo. Dukeje ere reko. Ere tugu mototo. Boe erduware nou Pao Kurireu rore jiboeji dukeje eiamedu boe epagudugodure rugadu.
ACT 5:7 Nono merirekodure pobe metia bokware dukeje nou Ananias oreduje aregodure Pedro ae jamedu. Jorduwakare nuba Pao Kurireu rore toreduji. Ure turemo.
ACT 5:8 Dukeje Pedro unarare ji. Akore: – Iwie. Akoredu ure nou tare tageragu jiwu diero rugadu maku čenai? Ia kimore? Nou Safira akore: – Boro. Ia bokware. Ure rugadu boe maku tagai.
ACT 5:9 Dukeje Pedro akore: – Mare kočare. Aki akoredu tagaidure tawo Pao Kurireu Uwari jekiripagado. Dukodire akoredu bire marigudu. Aino nou ipare ere akoredu tugu mototo. Emage etaregodure pugeje. Emode arego jamedu tuwo atugu mototo jamedu.
ACT 5:10 Nou inodu kodi nou aredu buture kuri tai moto keje tuwi tabo jamedu. Nou ipare ere turemo nou baito dukeje erdure ji bire duji. Dukeje ere nou aredu reko pugeje. Ere tugu mototo jamedu toredu meki.
ACT 5:11 Meartorure Jesus jiwuge eiamedu boe epagudugodure. Nou emeardure nou Pao Kurireu rore jiboeji dukeje eiamedu boe epagudugodure rugadu.
ACT 5:12 Nou uture Jesus bataru tabowuge ere Pao Kurireu ro rakareu to rugadu. Kogodureuge epemegagodure. Nou meartorure Jesus jiwuge ere bato pui nou Salomão O Iogora ka tu tu je.
ACT 5:13 Mare meartorukare Jesus jiwuge etaidukare turagojewo ebo. Mare boe eiamedu boe etaidure nou meartorure Jesus jiwugei.
ACT 5:14 Iage emeartorure Jesusji rugadu. Dukodire meartorure Jesus jiwuge emagare. Emagagodure rugadu.
ACT 5:15 Nou uture Jesus bataru tabowuge ero rakare dukodire kogodureuge ere tudawuje tuwai piji turagojewo awara okwai. Boe ere kogodureuge ewu kodo keje nono awara okwai jamedu tubaga tabo ewagai. Nono Pedro kodure nou awaraji dukeje utugu kodure nou kogodureu boe etaoji. Dukejere epemegagodure. Pedro rakare Pao Kurireu Uwari meture tada kodi. Dukodire utugu rore aino kogodureugei.
ACT 5:16 Boe eiamedu boe etaregodure tieda piji Jerusalém ba kurireu ka kogodureugebo. Etaregodure mareboe meture tadawugebo jamedu. Pao Kurireu ure nou kogodureuge nou mareboe meture tadawuge erugadu boe epemegago rugadu.
ACT 5:17 Nou ure Judeu doge enomea maku Pao Kurireu aiwuge eimijera kurireu ure tumeardae pegareu tawuje nou tumedage saduceu dogebo. Eiamedu boe erdu pegare nou uture Jesus bataru tabowugei. Emeardaere boe emeartoruwo tu pudui boe erduwawo boeji. Dukodire ere tumeardae pegareu tawuje turo pegawo nou uture Jesus bataru tabowugei.
ACT 5:18 Ere tugeragu ei. Ere etugu baičoreuto.
ACT 5:19 Mare nou boečoji Pao Kurireu utugare baru tadawu aregodure nou uture Jesus bataru tabowuge etae. Ure nou baičoreu baiporo jado. Ure nou uture Jesus bataru tabowuge etawuje baičoreu piji. Dukeje makore ei.
ACT 5:20 Akore: – Tadudo toro Pao Kurireu uwai ka tawo boe ewie nuba Jesus romode ei emugu pemegawo.
ACT 5:21 Nou uture Jesus bataru tabowuge emeartorure nou baru tadawu Pao Kurireu utugare bataruji. Čaboečoto eture Pao Kurireu uwai ka. Nono ere boe erduwado. Nou ure Judeu doge enomea maku Pao Kurireu aiwuge eimijera kurireu, eimijerage parutowuge emagore nouia Judeu doge eimijerage ewagai tuwo bato pui tuwo tumeardae tawuje pugeje. Dukeje iage eture nou ere tugu baičoreu towuge ewagai pugeje.
ACT 5:22 Etaregodure baičoreu ka dukeje erdukare nou uture Jesus bataru tabowugei nou baičoreu ja tada. Dukodire ere tugirimi toro tumedage boe eimijerage etae tuwo ewie.
ACT 5:23 Egore: – Čedaregodure baičoreu ka. Nou baičoreu baiporo jadodukare. Nou jeture baičoreu jiwuge eragojere nono jamedu. Ma kočare čere nou baičoreu jado dukeje boe edukare tada.
ACT 5:24 Nou ure Judeu doge enomea maku Pao Kurireu aiwuge eimijerage emeardure nou inoduji dukeje erduwakare nuba nou uture Jesus bataru tabowuge erore. Nou Pao Kurireu uwai tadawu tugobaigarege eimijera jorduwakare jamedu. Ewiagorore ewagai.
ACT 5:25 Ča ia imedu aregodure etae dukeje akore: – Tawiapagado. Awu tare tugu baičoreu towu ime eragojere Pao Kurireu uwai ja tada. Enure boe erduwado.
ACT 5:26 Dukodire nou tugobaigarege eimijera uture to tugobaigaregebo toro. Ere nou ime erego mato nou boe eimijerage etae. Mare epagudure nou boe dogeče dukodire ero rakakare nou uture Jesus bataru tabowugei. Epagudure nou boe doge emode togorido tori tabo duji.
ACT 5:27 Tugobaigarege etaregodure nou uture Jesus bataru tabowugebo nou boe eimijerage ewai ka. Ere eragojedo nou boe eimijerage etoiadada. Nono nou ure Judeu doge enomea maku Pao Kurireu aiwuge eimijera kurireu unarare ei.
ACT 5:28 Akore: – Čemago rakare tai tagawo boe erduwado Jesus jiboeji. Mare tameartorukare čei. Tare tawadarudo taodo nou Jerusalém ba kurireu parugajeje. Tagagore čegie čere Jesus bito.
ACT 5:29 Ča Pedro nouia uture Jesus bataru tabowuge egore: – Čemeartorumodukare imei. Čemeartorumode tu Pao Kurireuji.
ACT 5:30 Jawu pawobe emeartorure tu Pao Kurireuji. Tare Jesus kana jado ipo padure pugajejewu keje. Tare bito. Mare Pao Kurireu ure Jesus jewodudo pugeje. Awu Pao Kurireu jire jawu pawobe emeartorure.
ACT 5:31 Dukeje Pao Kurireu ure rutudo baruto pudae rakojewo tumegi. Ure umode boe ekinorudowudo ema. Ure boe eimijera kurireudo ema. Rore aino tuwo nou Israel doge ewiago turo pegareu piji, etaidukawo turo pegareuji pugeje. Israel doge eromode aino dukeje Pao Kurireu biagodumode nou ero pegareu piji rugadu.
ACT 5:32 Dujire čerdure, čerduware. Dukodire čenure boe ewie. Pao Kurireu umode Tuwari maku meartorure Jesus bataru jiwuge etai. Nou Pao Kurireu Uwari unure boe ewie awu boe jamedu boeji.
ACT 5:33 Nou boe eimijerage emeardure nou ewadaruji dukeje ekorigodure rugadu. Etaidure tuwo nou uture Jesus bataru tabowuge eiamedu boe ewido.
ACT 5:34 Mare ia nou boe eimijera ure turagojedo tumago tabo tuwo nou tumedage etaora butugugo. Fariseu nure ema. Iere Gamaliel. Jorduware Israel doge eno bakaruji rugadu. Boe eiamedu boe erdu pemegare ji. Ča ure boedo nou uture Jesus bataru tabowuge etawuje nou bai piji tu jao.
ACT 5:35 Dukeje nou Gamaliel makore tumedage boe eimijeragei. Akore: – Pabagawo tu jao pagaiwo tabo nou imei boe emeartoru raimode ewadaru jitu bagai.
ACT 5:36 Čowu imedu Teudas aregodure marigudu. Emare akore boe kurireu nuie pudumi. Dukodire boe etaidure ji. Nono eture apo rugadu. Enodo padure quatrocentos. Mare nou Teudas bitodure dukeje nou boe ere taodo pubiji. Emeartorukare nou Teudas bataruji pugeje.
ACT 5:37 Dukejere ia metia aregodure pugeje. Judas Galileu aregodure. Boe eimijera kurireu aidure tuiorduwawo nou boe emagamode dubagai dukodire ure nou boe edo tugie bu bapera keje. Dukejere nou Judas aregodure. Eture nou Judas apowuge emagare jamedu. Mare nou Judas bitodure dukeje nou uture apowuge ere taodo pubiji jamedu. Emeartorukare nou Judas bataruji pugeje.
ACT 5:38 Aino pabagawo tu jao pagaiwo tabo awu meartorure Jesus jiwugei. Pagare egore aino enure boe ekiripagado tu je.
ACT 5:39 Mare Pao Kurireu umode nou emeardae maku etai dukodi akedumodukare rugadu. Pagaiwowo tu jao pagaiwo tabo ei parduwawo nuba boemode. Pao Kurireu umode emeardae maku etai dukeje pamodukare boe edo tugera ra ewadaru piji. Pamode ewido dukeje Pao Kurireu umode awu tuwadaru maku iage etai emagowo ji boe ewiagai pugeje. Nou boe eimijerage etaidure nou Gamaliel bataruji.
ACT 5:40 Dukodire ere nou uture Jesus bataru tabowuge eremo nou baito pugeje. Ere tugobaigarege edo boeto ei. Dukeje emagore ei ekawo boe erduwado Jesus bataruji pugeje. Dukejere ere etudo.
ACT 5:41 Nou uture Jesus bataru tabowuge eture nou boe eimijerage epiji dukeje egarere pudui. Boe ero pegare ei emeartorure Jesusji kodi. Dukodire erduware Pao Kurireu ro pemegare pudui duji rugadu.
ACT 5:42 Meri jameduji nou uture Jesus bataru tabowuge ere boe erduwado Jesus jiboeji Pao Kurireu uwai ja tada, nou boe ewai ja tada jamedu. Ere boe ewie Pao Kurireu bataru pemegareuji. Ere boe ewie Jesus umode boe ekinorudowu nure ema duji.
ACT 6:1 Meartorure Jesus jiwuge emagagodure pugeje. Emagare rugadu. Mare ia meri keje ia meartorure Jesus jiwuge etokire pui. Jorduware Grécia bataru jiwuge Judeu doge emagore nou Judéia kejewu Judeu dogei. Egore boe eke makudukaie tuje okoge bokwareuge areme etai.
ACT 6:2 Nou uture Jesus bataru tabowuge enodo padure doze. Emeardure nou boe etokire pui duji dukeje emagore ewagai. Nou meartorure Jesus jiwuge eiamedu boe ere bato pui dukeje nou uture Jesus bataru tabowuge egore: – Ukare turugadu čewo čegera ra čemaragodae piji čewo boe eke maku boe etai. Čemaragodunure čemago tabo Pao Kurireu bataruji boe ewiagai.
ACT 6:3 Čemedage nure tagi. Dukodire tagaiwodo pui tawo tageragu ia imei. Tagaiwodo mugure Pao Kurireu Uwari apowu ime ewagai. Tagaiwodo jorduwareuge ime ewagai. Tare tageragu ei dukeje čemode edo boe eke maku boe etai.
ACT 6:4 Čegire čewiagoromode čemagowo baruto, čemagowo Pao Kurireu bataruji boe ewiagai. Awu čemaragodae mode tu rugadu.
ACT 6:5 Nou meartorure Jesus jiwuge eiamedu boe etaidure nou uture Jesus bataru tabowuge ewadaruji. Dukodire ere tugeragu jiwu ime enodo padure sete. Ia iere Estêvão. Nou Estêvão meartorure rugadu Jesusji. Korobadure Pao Kurireu Uwari apo. Ia iere Filipe. Ia iere Prócoro. Ia iere Nicanor. Ia iere Timom. Ia iere Pármenas. Ia iere Nicolau. Nou Nicolau aregodure Antioquia ba kurireu piji. Judeu karegure ema. Mare meartorure Pao Kurireuji marigudu Judeu doge ero mogadure.
ACT 6:6 Ča meartorure Jesus jiwuge ere nou uture Jesus bataru tabowuge ime etaiwodo nou ture tugeragu jiwu imei. Dukeje nou uture Jesus bataru tabowuge ere tugera bu nou ime etaora keje dukeje emagore baruto eparu tabo.
ACT 6:7 Dukodire Pao Kurireu bataru ure taodo boe parugajeje. Meartorure Jesus jiwuge emagagodure Jerusalém tada. Emagare rugadu. Ia ure Judeu doge enomea maku Pao Kurireu aiwuge emeartorure Jesusji jamedu. Emagare jamedu.
ACT 6:8 Pao Kurireu ro pemegare Estêvãoji rugadu. Estêvão rakare rugadu turo rakawo, turo kuriwo boe egai.
ACT 6:9 Mare ia ime erdu pegare Estêvãoji. Nou ime Judeu doge nure emage. Ere bato pui tu tu je ia bai tada. Judeu doge emagore Pao Kurireu bagai nou bai ja tada tu tu je. Nou bai iere “Ime Pemegareuge”. Nou Judeu doge etaregodure Cirene ba kurireu piji, Alexandria ba kurireu piji jamedu. Nou Judeu doge etaidukare nou Estêvão meardaeji. Emagore Estêvãoji tuwo nou Estêvão meardae mekido. Ia Judeu doge erorino jamedu. Nouge etaregodure Cilícia moto piji, Ásia moto piji jamedu marigudu.
ACT 6:10 Mare Pao Kurireu Uwari ure Estêvão jorduwado tumago pemegawo rugadu. Dukodire nou Judeu doge eroiwakare tumagowo Estêvão bataru jipagi.
ACT 6:11 Dukejere ere diero maku ia ime etai ewadraroduwo. Dukodire ere Estêvão bataru aodo boe ewiagai. Egore: – Čemeardure awu Estêvão bataru pegareuji. Mako pegare jawu pamana Moisesji. Mako pegare Pao Kurireuji jamedu.
ACT 6:12 Ainore erore tuwo boe ekorigo rugadu. Ere boe eimijerage ekorigo jamedu. Ere jorduware Judeu doge eno bakaru jiwuge ekorigo jamedu. Dukodire nou boe eimijerage ere tugeragu Estêvãoji. Ere reko toro boe eimijerage etae.
ACT 6:13 Dukejere nou batrarodureuge etaregodure jamedu tuwadraroduwo pugeje. Egore: – Awu imedu mako pega raire awu Pao Kurireu uwaiji. Mako pegare Moisés ure maku boe etaiwu Pao Kurireu bataruji jamedu.
ACT 6:14 Čemeardure ji jamedu. Akore nou Nazaré pijiwu Jesus umoduie awu Pao Kurireu uwai butudo. Akore nou Jesus umoduie Moisés ure maku pagaiwu paro akedudo.
ACT 6:15 Nou mugure nou bai kejewuge boe eimijerage etaiwore nou Estêvãoji. Erdure nou Estêvão jeji. Nou Estêvão je ure nono ia Pao Kurireu utugare baru tadawu je mogadure.
ACT 7:1 Nou ure Judeu doge enomea maku Pao Kurireu aiwuge eimijera kurireu makore Estêvãoji. Akore: – Boe jokodu ji na awu ime doge egoino?
ACT 7:2 Estêvão akore: – Ikimijerage nure tagi. Tawiapaga pemegado iwadaruji. Pao Kurireu pemegare rugadu. Rakojere boe pemegareu remawu keje. Marigudu nou pawobe etuo Abraão mugure Mesopotâmia moto keje. Nono Pao Kurireu makore ji. Akore: “Akera ra awobe epiji, ako moto piji. Atudo toro imode ardudo jiwu moto ka.” Dukeje Abraão uture Mesopotâmia moto piji toro Harã moto ka. Nono Abraão uo bire. Dukeje Pao Kurireu ure Abraão utudo pugeje awu tamugure kejewu moto ka.
ACT 7:5 Pao Kurireu ukare awu moto maku Abraão ai. Abraão o moto bokware. Mare Pao Kurireu makore tumoduie maku Abraão ore etai. Makore ia boe umodukaie tawuje Abraão ore epiji pugeje uwobe eno moto moduie ema rugadu ji aino. Mare Abraão ore bokware. Dukodire Pao Kurireu ro pemegare Abraãoji. Dukodire Abraão onaregedu boture rugadu.
ACT 7:6 Pao Kurireu makore aino ji. Akore: “Akanaregedu ore emugumode ia boe tuginaiwuge eno moto keje. Joru oto padu kejeboe mode quatrocentos ei toro nou boe tuginaiwuge eno moto keje. Nou akore nou boe tuginaiwuge etugarege mode emage. Nou boe tuginaiwuge ero pegamode akorei rugadu.
ACT 7:7 Mare imire imode boe pegado nou boe tuginaiwugei. Dukejere nou akore ewobe emode tudawuje nou moto piji. Etaregodumode mato pugeje tuwo tubu jodo tumago pemegawo i woe.”
ACT 7:8 – Pao Kurireu makore aino Abraãoji dukeje ure turo maku Abraão ai boe erduwawo nou Pao Kurireu bataruji. Dukodire pawobe ime eiamedu ere tuwaga oto biri kado. Pao Kurireu ure awu paro maku nou pao Abraão ai marigudu. Dukeje Abraão ure tonaregedu Isaque baka oto biri kado. Nou Isaque boture dukeje meri oto padure sete ji dukeje ure nou Isaque baka oto biri kado. Nou Isaque ure tonaregedu Jacó baka oto biri kado jamedu. Nou Jacó ure tore ime eiamedu boe ewaga oto biri kado jamedu. Jacó ore ime enodo padure doze. Judeu doge etumana mage nure emage.
ACT 7:9 – Nou Jacó ore erdu pegare tuwie Joseji. Dukodire ere nou tuwie José maku Egito kejewuge etai diero bagai. Mare Pao Kurireu rakojere José apo.
ACT 7:10 Boe pegare Joseji rugadu dukejere Pao Kurireu ure ukinorudo nou boe pegareu piji. Nou Egito kejewu boe eimijera kurireu makore nou José bagai dukeje Pao Kurireu ure José mako pemegado, ure José jorduwado rugadu. Dukodire nou boe eimijera kurireu aidure Joseji. Ure boe eimijera paru towudo ema rugadu aiwowo motoji, aiwowo nou boe eimijera kurireu uwobei.
ACT 7:11 Dukodi toro ia meri keje boe pegare nou Egito moto keje, nou Canaã moto keje jamedu. Boe pegare nou boei rugadu bubutu bokware kodi. José umana mage eragojere nou Canaã moto keje. Eke bokware rugadu jamedu.
ACT 7:12 Etuo Jacó meardure boe eke makaie Egito moto keje duji. Dukeje ure tore etudo toro Egito moto ka tuge bagai. Jawu pawobe nure emage, eture toro mare ere tugirimi.
ACT 7:13 Dukodi toro ia meri keje ere tugirimi Egito moto ka pugeje. Nono José ure erduwado pudui. Ainore nou Egito kejewu boe eimijera kurireu jorduware José uwobei.
ACT 7:14 Dukodire José makore toro tuo Jacó bagai. Makore tuwobe eiamedu boe ewagai. Enodo padure kejewugere setenta e cinco. Etuwo toro Egito moto ka.
ACT 7:15 Dukodire Jacó uture toro Egito moto ka rugadu. Nonore bire. Nou ore ewire nono jamedu.
ACT 7:16 Mare ewobe ekare etugu nou Egito moto keje. Ere erego toro nou etuo Abraão ure akirodo jiwu moto ka tuwo etugu nono. Nou moto iere Siquém. Abraão ure akirodo nou motoji Hamor doge epiji diero tabo.
ACT 7:17 – Ča boe puredugodure Pao Kurireu bataru jetuwu puduiwu ka. Ainore boere nono pawobei toro Egito keje nono Pao Kurireu makore Abraãoji dumogadure. Pawobe emagagodure eidodure nono Egito keje rugadu.
ACT 7:18 Dukejere ia Egito kejewu boe eimijera kurireu maiwure pugeje. Nou boe eimijera jorduwakare Joseji.
ACT 7:19 Ure jawu pawobe ekiripagado. Ro pegare ei rugadu. Ure edo etore ewarigu tuwai piji toro poboto ewiwo.
ACT 7:20 Dukejere Moisés boture. Rogu moture rugadu. Uo uče etu pemegare ji tuwai tada. Ari ure pobe metia bokware dukeje eroiwakare tuwo nou tonaregedu rogu biado boe eimijera pegareu piji pugeje. Nono ere tugu nouia kadaraboto. Bereagu tabo ere kadarabo okwa mi okwakawo poboto. Dukejere ere nou kadarabo mugudo pobo aogeje. Mare nou Egito kejewu boe eimijera kurireu onaregedu aredu jordure ji dukeje ure tugeragu Moisesji tonaregeduče.
ACT 7:22 Aino Moisés jorduware nou Egito kejewuge erduware jiboeji. Imedu kurireu nure ema. Mako pemegare. Ro pegakare.
ACT 7:23 – Moisés o joru oto padure quarenta dukeje meardaere taiwowo tuwobe Israel doge ewagai tuiorduwawo nuba boere ei dubagai.
ACT 7:24 Jordure ia Egito kejewu ure boeto ia jituji. Dukodire ure tugera maku nou tuwobe imedu ai. Ure nou Egito kejewu imedu bito nou ro pegareu du moriče.
ACT 7:25 (Moisés meardaere nou tuwobe erduware pudui duji, tugimijera nure pudumi duji. Pao Kurireu umode rakado uwo tuwobe ekinorudo Egito kejewuge epiji. Mare erduwakare ji raga.)
ACT 7:26 Nou barogwato jordure ia Israelita ime pobedu dogei. Erugodure pui duji. Moisés aidure tuwo togwa bu ewugeje erugodukawo pui. Akore: “Israelita doge nure tagi. Tawobe nure pugi. Tarugodukaba pui.”
ACT 7:27 – Mare emeartorukare Moisesji. Dukodire ia akore: “Čegimijera karegure aki.
ACT 7:28 Jao meriji are ia Egito kejewu imedu bito. Akaidunure awo iwido jamedu?”
ACT 7:29 – Moisés meardure nou imedu bataruji dukeje pagudugodure. Boe erduware ure ia imedu bito duji. Dukodire rekodure Egito moto piji. Mugure toro Midiã moto keje. Uwirere toro. Dukeje botureu ore imere pobe nono nou moto keje.
ACT 7:30 – Joru oto padure quarenta ji toro. Dukeje Pao Kurireu utugare baru tadawu aregodure Moisés ae. Ure Moisés jordudo pudui. Moisés jordure ia i roguji, joru čere to duji. Rakojere boe maereu keje puredure Sinai Tori Riji.
ACT 7:31 Moisés jordure nou joru ure i rogu kowu duji dukeje ure tuburedo ji taiwo pemegawo ji. Mare meardure Pao Kurireu makore pudui duji.
ACT 7:32 Pao Kurireu akore: “Jao awobe emeartorure jiwu Pao Kurireu nure imi. Abraão meartorure i. Isaque meartorure i. Jacó meartorure i jamedu.” Moisés meardure Pao Kurireu makore pudui duji dukeje magadugodure tubagudu koia. Aidukare taiwowo nou iji pugeje.
ACT 7:33 Mare Pao Kurireu makore ji pugeje. Akore: “Awu aragojere kejewu moto ino moto reo. Ire udo tuginai inoče. Dukodi čare awure okeakejewu tawuje awure piji. Nono iorduwamode ameartorure iduji.
ACT 7:34 Ča iorduware boe pegare iwobei duji toro Egito moto keje. Epadu kiorokare boe kori koia. Itaregodure iwo ekinorudo Egito kejewuge epiji. Mato itabo. Iwo arego toro Egito moto ka.”
ACT 7:35 – Mare nou Moisés remawu Israel doge etaidukare ji marigudu. Egore: “Čegimijera karegure aki.” Mare Pao Kurireu ure nou Israel doge eimijerado Moisesče. Emare ure Moisés utudo tuibagi Egito moto ka uwo nou Israel doge ekinorudo nou Egito kejewuge epiji. Nou ure Moisés jordudo puduiwu nou i rogu pijiwu Pao Kurireu utugare baru tadawu ure tugera maku Moisés ai jamedu.
ACT 7:36 Dukejere nou Moisés ure nou boe ekinorudo Egito piji. Ro rakare, ro kurire Egito keje. Ro rakare, ro kurire Pobo Maereu Kujagureu keje. Ro rakare, ro kurire boe maereu keje. Joru oto padure quarenta ei toro nou boe maereu keje.
ACT 7:37 Dukodi nou Moisés mitodure makore tuwobe Israel dogei. Akore: “Pao Kurireu umode ia makore Pao Kurireu bataru jiwu imedu arego tagae rugadu nono turomoga idu mogadure. Pawobe mode ema rugadu.”
ACT 7:38 – Nou Moisés aire Pao Kurireu ure tuwadaru pemegareu maku. Ure maku ai toro Sinai Tori Ri aogeje rugadu. Nou jawu pawobe Israel doge eragojere nono jamedu nou tori paru nou boe maereu keje. Pao Kurireu utugare baru tadawu rakojere nono jamedu. Pao Kurireu bataru akedukare jii aino. Du akedumodukare rugadu.
ACT 7:39 – Mare nou jawu pawobe emeartorukare Moisés bataruji. Etaidure tuwo tugera ra piji tuduwo tuibagi Egito moto ka.
ACT 7:40 Dukodire emagore Arãoji. Egore: “Ia iaboe towuje pameartoruwo ji pawo pabu jodo jokorai. Imedu Moisés ure čedawuje Egito piji mare čerduwakare nuba boere ji pugeje.”
ACT 7:41 Dukodire Arão ure ia iaboe towuje etai ure nono santo mogadure nou boe emeartoruwo ji. Nou ure toboe ure nono tapira naregedu imedu mogadure. Nono ere iaboe kowu tuwo maku nou ture towu tapira ai. Ewadure rugadu tumeartorure nou tapira jitu kodi.
ACT 7:42 Dukodire Pao Kurireu ure tugera ra epiji ewo ia tumeardae tawuje pugeje. Dukodire etaidure tumeartoruwo kuieje dogei pugeje. Etaidure tuwo tubu jodo tumago pemegawo kuieje dogei Pao Kurireu mugato. Makore Pao Kurireu bataru jiwuge ere awu Pao Kurireu bataru bu bapera keje rugadu. Akore: – Israel doge nure tagi. Inai karega tare boe egu barege ekowu taro pegareu moriče. Tare tagera ra ipiji. Tameartoruwo ia boe pegareuji pugeje. Tarore ainowu joru oto padure quarenta toro boe maereu keje.
ACT 7:43 – Tare tabu jodo tawai tadawu santo doge egorai tamago pemegawo ei tawo pao kurireugedo emage. Ia iere Moloque. Metia iere Renfã. Tagoredure nou Moloque uwai rogu tabo tagodureu jamedu boeji. Tagoredure nou Renfã uwai rogu tabo jamedu. Tagagore nou Renfã uwai roguie nono kuieje mogadure. Tare tagera ra ipiji tameartoruwo nou tawai tadawu santo dogei. Dukodire imode tadudo tago moto piji toro Babilônia moto jagwai aino toro. – Ainore Pao Kurireu akore.
ACT 7:44 Estêvão mako kimore. Akore: – Nou pawobe eragojere nou boe maereu keje dukeje ere Pao Kurireu uwai rogu mugudo. Pao Kurireu ure Moisés jorduwado dukodire ere nou bai rogu mugudo aino.
ACT 7:45 Nou pawobe Israel doge ere nou Pao Kurireu uwai rogu maku tore etai. Ere tugeragu nou boe pegareuge eno motoji Josué apo dukeje enoredure tabo. Eture nou motoji dukeje Pao Kurireu ure nou boe pegareuge etudo epiji. Nou Pao Kurireu uwai rogu mugure ebo jii toro ekimijera kurireu Davi muguredu ka.
ACT 7:46 Pao Kurireu aidure rugadu nou Daviji. Mare Davi makore Pao Kurireuji taiduie tuwo ia bai kurireu to Pao Kurireu uwaiče. Jacó meartorure jiwu Pao Kurireu uwaiče.
ACT 7:47 Nou Davi ukare nou bai towuje mare onaregedu Salomão ure towuje rugadu.
ACT 7:48 – Mare ainore inagomode tai. Pao Kurireu mugumodukare ime ere towu bai tada. Makore Pao Kurireu bataru jiwu imedu ure Pao Kurireu bataru bu bapera keje. Ainore Pao Kurireu akore:
ACT 7:49 – Imugure baru tada. Iwure emode tamudo moto keje. Boe emodukare ia bai towuje iwaiče. Boe ere towu bai kurikare imuguwo ja tada.
ACT 7:50 – Imire ire boe jamedu boe towuje. – Ainore Pao kurireu akore.
ACT 7:51 Ča nou Estêvão mako kimore nou Judeu doge eimijeragei. Akore: – Tameartoru bokwa! Tameardae pega! Tawija bokwa! Tameardukare Pao Kurireu bataruji! Tare nono jawu pawobe mogadure. Tagaidukare tawiapagawo Pao Kurireu Uwari bataruji tu tu je.
ACT 7:52 Mariguduwuge pawobe ero pegare makore Pao Kurireu bataru jiwuge eiamedu boei. Mariguduwuge pawobe ere makore Pao Kurireu bataru jiwuge ewido. Nou makore Pao Kurireu bataru jiwuge ere boe ewie marigudu Pao Kurireu Utugare Pemegareu aregodumoduie duji. Ča aregodure rugadu. Jesus nure ema. Mare tarore Jesusji nono ro pegareu mogadure. Tare bito.
ACT 7:53 Pao Kurireu ure tuwadaru maku tagai tago bakaruwo ema. Utugarege baru tadawuge ere nou o bakaru reko boe ewagai mare emeartorukare ji.
ACT 7:54 Nou Judeu doge eimijerage emeardure nou Estêvão bataruji dukeje ekorigodure rugadu. Ere to reko pui tugoridure dukodi.
ACT 7:55 Mare Pao Kurireu ure Estêvão rakado rugadu nou Tuwari apo. Aiwore baruto dukeje jordure Pao Kurireu o jorugu pemegareuji. Nono Jordure Jesusji. Rakojere Pao Kurireu meki.
ACT 7:56 Estêvão akore: – Tagaiwodo. Iordure baru jadodure duji. Imedu Onaregedu Jesus rakojere tuo meki.
ACT 7:57 Nou boe eimijerage ekudugodure tugorigodure dukodi. Ere tugera bu tuwija keje tumeardukawo nou Estêvão makore jiboeji pugeje. Dukeje eregodure Estêvão ae.
ACT 7:58 Ere tugeragu ji. Ere tawuje toro nou ba kurireu piji. Dukeje eidore tori tabo ji. Ere tugudau biaku epa areia tawuje tubiji tugidowo nou tori tabo ji. Ere nou tugudau areia maku ia iparedu ai jetu pemegawo ji. Nou iparedu iere Saulo.
ACT 7:59 Eidore tori tabo Estêvãoji kimo dukeje Estêvão mako rakare tugimijera Jesus bagai. Akore: – Ikimijera Jesus! Iwimode dukeje akeragu i.
ACT 7:60 Estêvão ure tubu jodo moto keje dukeje kudugodure pugeje. Akore: – Ikimijera Jesus. Awiabutukaba awu ero pegare idu keje! Estêvão makore aino dukeje bire.
ACT 8:1 Saulo aidure nou tugimijerage eroino duji, ere Estêvão bito duji. Nou inodu otobiji boe ero pegare meartorure Jesus jiwugei rugadu. Dukodire meartorure Jesus jiwuge ere taodo Jerusalém piji toro Judéia moto ka, Samaria moto ka. Tu nou uture Jesus bataru tabowuge edu kimore Jerusalém ba kurireu tada.
ACT 8:2 Aidu kurire Pao Kurireu jiwu ime ere Estêvão tugu mototo. Etragudure joki.
ACT 8:3 Mare Saulo aidure tuwo meartorure Jesus jiwuge etagedudo. Uture boe ewai jamedu boeji meartorure Jesus jiwuge ewagai. Ure tugeragu ei tuwo etugu baičoreuto.
ACT 8:4 Nou meartorure Jesus jiwuge ere taodo moto jamedu boe parugajeje. Dukeje ere boe ewie Pao Kurireu bataru pemegareuji.
ACT 8:5 Filipe uture Samaria ba kurireu ka. Ure nou boe erduwado Jesus umode boe ekinorudowu nure ema duji.
ACT 8:6 Nou Samaria kejewu boe ewiapaga pemegare nou Filipe makore jiboeji. Etaiwo pemegare nou Filipe ro rakare duji.
ACT 8:7 Ure bope doge etawuje boe epiji. Nou bope doge ewari ere tudawuje boe piji tugudu tabo. Dukeje ure pogora pegareuge emerudo. Ure meru bokwareuge emerudo jamedu. Emagare rugadu.
ACT 8:8 Dukodire nou ba kurireu kejewuge egarere pudui rugadu.
ACT 8:9 Ia imedu iere Simão. Mugure nou ba kurireu tada. Akore bari nuie pudumi. Marigudu ure boe erdudo turore jiboeji boe emeartoruwo pudui duji.
ACT 8:10 Nou ba kurireu kejewuge eiamedu boe emeartorure ji. Boe kurireuge. Marenarue doge. Eiamedu boe egore: – Awu Simão raka ure nono Pao Kurireu raka mogadure. Iere Imedu Rakareu.
ACT 8:11 Marigudu Simão ure erodo ta je turore jiboeji dukodire emeartorure ji rugadu.
ACT 8:12 Mare emeartorure Filipe bataruji dukodire etao pegododure. Emeartorure Jesusji. Emeartorure Pao Kurireuji boe eiamedu boe eimijera nure ema duji rugadu. Ime areme etao pegododure rugadu.
ACT 8:13 Simão jamedu meartorure ji. Ao pegododure dukeje uture Filipe apo. Jordure Filipe ro rakare duji, ro kurireuji dukeje je rore ta je.
ACT 8:14 Jerusalém kejewuge nou uture Jesus bataru tabowuge emeardure nou Samaria moto kejewuge emeartoruie Pao Kurireu bataruji duji. Dukodire ere Pedro utudo toro nou Samaria moto kejewuge etae. Ere João utudo etae jamedu.
ACT 8:15 Etaregodure toro dukeje emagore baruto nou meartorure maigoduwuge eparu tabo Pao Kurireu Uwari aregoduwo etae jamedu.
ACT 8:16 Pao Kurireu Uwari ukare turawuje etae raga. Etao pegododure tu je emeartorure Jesusji kodi.
ACT 8:17 Dukejere Pedro João ere tugera bu nou meartorure maigoduwuge boe etao keje. Dukeje Pao Kurireu Uwari ure turawuje etae tuwo eraga maku etai.
ACT 8:18 Simão jordure nou Pao Kurireu Uwari ure turawuje nou meartorure Jesus jiwuge etae dukeje aidure tuwo diero maku Pedro ai João ai.
ACT 8:19 Akore: – Nou taraga maku inai jamedu iwo nou Pao Kurireu Uwari maku ire ikera bu kejewuge etai jamedu.
ACT 8:20 Mare Pedro akore: – Ameardaere awo akirodo Pao Kurireu ure maku boe etaiwu Uwariji diero tabo. Nou ameardae pega. Atudo ako diero rugadu boe tabo boe pegareuto.
ACT 8:21 Aromodukare nono čerore jiboeji. Amaragodumodukare čedabo. Pao Kurireu jorduware ai kodi. Ameardaekare ameartoruwo Pao Kurireuji. Ameardaere tu ameardae pegareuji rugadu.
ACT 8:22 Ča akaidukaba nou ameardae pegareuji pugeje. Amagodo Pao Kurireuji biagoduwo nou ameardae pegareu piji.
ACT 8:23 Iordure akimaredure rugadu duji. Aro pegareu ure tugeragu ai kodi.
ACT 8:24 Simão makore Pedroji, Joãoji. Akore: – Tamagodo Pagimijeraji iparu tabo nou tagagore jiwu boe pegareu jetukawo i.
ACT 8:25 Nou Pedro nou João ere boe ewie nuba boe eromode tumeartoruwo Jesusji. Emagore Jesus rore jiboeji boe ewiagai. Dukeje eture tuibagi toro Jerusalém ba kurireu ka. Eture dukeje emagore Jesus rore jiboeji nou Samaria kejewu boe doge ewiagai jamedu. Nou boe doge emagare nono nou moto keje.
ACT 8:26 Ia Pao Kurireu utugare baru tadawu makore Filipiji. Akore: – Ado arugadu. Atudo toro nou Jerusalém pijiwu Gaza kawu awara ka. (Boe edukare nou Gaza tada pugeje).
ACT 8:27 Dukodire Filipe ure tudo turugadu. Uture dukeje toro rugadu jordure ia imeduji. Nou imedu Etiópia kejewu nure ema. Nou Etiópia moto kejewuge eimijera kurireu iere Candace. Aredu nure ema. Nou Filipe jordure jiwu imedu jeture tugimijera Candace o dieroji. Dukodi umaragodae reno. Filipe jordure ji awara kajeje. Unure tugirimi Etiópia ka Jerusalém piji carreta tabo. Uture Jerusalém ka tuwo tubu jodo tumago pemegawo Pao Kurireuji. Aino ča uture tuibagi to moto ka taiwo tabo Pao Kurireu bataruji. Aiwore nou makore Pao Kurireu bataru jiwu imedu Isaías ure bu bapera kejewu Pao Kurireu bataruji.
ACT 8:29 Ča Pao Kurireu Uwari makore Filipiji. Akore: – Atudo toro nou Etiópia kejewu imedu o carreta ka.
ACT 8:30 Dukejere Filipe rekodure nou carreta ka. Dukeje meardure nou Etiópia kejewu imedu bataruji. Aiwore Pao Kurireu bataruji tumago tabo tu pudui. Filipe meardure nou bataruji. Dukodire unarare nou Etiópia kejewu imeduji. Akore: – Arduware nou akaiwore jiwu bataruji?
ACT 8:31 Nou Etiópia kejewu imedu akore: – Boro. Ia boe edukare woe tuwo iorduwado awu bataruji. Dukeje makore Filipiji uwo taredo nou carretato muguwo keje uwo tuiorduwado.
ACT 8:32 Aiwore jiwu Pao Kurireu bataru akore aino: – Boe ere imedu bito nono boe emode ovelha bito dumogadure. Boe emode ovelha bu kado piji dukeje nou ovelha makomodukare. Nou imedu makokare jamedu. Rore nono nou ovelha ro mogadure.
ACT 8:33 – Ero pegare ji rugadu mare boe ekare nou ero pegareu morido etai pugeje. Tugodu mai dutabore bire dukodire ore bokware.
ACT 8:34 Nou Etiópia kejewu boe eimijera makore Filipiji. Akore: – Itaidure awo iwie. Nuba nou ere bitowu iere? Pudui na nou makore Pao Kurireu bataru jiwu akoino kana? Ia boei na akoino kana?
ACT 8:35 Dukeje Filipe ure jorduwado nou Pao Kurireu bataruji. Marigudu Pao Kurireu uie boe ewie turomodedu boeji nou bataru tabo. Mare paga karega Jesus jie Pao Kurireu akoino. Jesus umoduie boe ekinorudo rugadu.
ACT 8:36 Ekodu kimore awaraji nou carreta tabo. Dukejere etaregodure ia kurugwa okwa ka. Nono nou Etiópia kejewu boe eimijera akore: – Pobo reo. Ukana turugadu itao pegododuwo?
ACT 8:38 Dutabore ure tuwuredo to carreta tabo nono. Emare ure turawuje carreta piji Filipe apo. Ere turemo poboto. Dukeje Filipe ure ao pegodo.
ACT 8:39 Ere tudawuje pobo piji dukeje Pao Kurireu Uwari ure Filipe tawuje piji pugeje. Nou Etiópia kejewu boe eimijera jordukare nou Filipiji pugeje. Mare uture pugeje tiegarere pudui dutabo rugadu.
ACT 8:40 Rore puku Filipiji turagojere Azoto ba kurireu keje duji. Nono uture toro Cesaréia ba kurireu ka. Nou Cesaréia kawu awara keje ure boe eiamedu boe ewie Jesus bataru pemegareuji rugadu.
ACT 9:1 Saulo ro pegare meartorure Jesus jiwugei kimo. Akore tumoduie ewido rugadu. Aidure tuduwo Damasco ba kurireu ka taiwowo rore Jesus ro jiwuge ewagai tuwo tugeragu ei tuwo erego pudabo Jerusalém ba kurireu ka tuwo etugu baičoreuto nono. Dukodire uture nou ure Judeu doge enomea maku Pao Kurireu aiwuge eimijera kurireu ae tuwo tugeragu nou atugo padure kejewu baperaji tuduwo tabo toro Damasco ka. Nou bapera umode nou Damasco kejewu Judeu doge eimijerage erduwado nuba Saulo romode nou meartorure Jesus jiwugei, imei aremei.
ACT 9:3 Saulo ure tugeragu nou baperaji dukeje uture. Puredugodure nou Damasco ba kurireuji dukeje rore puku je ia jorugu aregodure baru piji duji.
ACT 9:4 Dukejere buture moto keje. Meardure iaboe makoji. Akore: – Saulo nure aki. Kodiba aro pegare i?
ACT 9:5 Saulo akore: – Kakojiwu ba ure aki? Nono akore: – Jesus nure imi. Aro peganure i.
ACT 9:6 Ča aragojedo. Atudo toro Damasco ba kurireu ka. Ia imedu umode awie aromode jiboeji.
ACT 9:7 Nou uture Saulo apowuge ime ere tuwuredo jamedu. Emagokare boeji. Emeardure nou Jesus makore jiboeji jamedu. Mare erdukare boeji.
ACT 9:8 Saulo ure turagojedo. Ure tuioku jado mare joku bokware. Dukodire nou uture apowu ime ere tugeragu ji tugera tabo tuduwo apo toro Damasco ba kurireu ka.
ACT 9:9 Merire pobe metia bokware ji joku bokware dukeje. Dukodire okwagekare kudukare poboče jamedu.
ACT 9:10 Damasco keje ia meartorure Jesus jiwu imedu iere Ananias. Nou Ananias jordure ia iaboeji. Uniau mogadure dupiji Jesus makore ji. Akore: – Ananias. Ananias akore: – Imireo.
ACT 9:11 Jesus akore: – Ado arugadu. Atudo toro Judas uwai ka. Nou Judas uwai mugure kejewu awara iere Awara Jetororeu. Nou Judas uwai kejere amagomode Saulo bagai. Nou Saulo Tarso ba kurireu pijiwu nure ema. Emare makore baruto.
ACT 9:12 Dukodi jordure ia iaboeji. Tuiordure jiboe piji jordure ai. Are aremo pudae tumugure kejewu baito duji. Nono are akera bu ao keje joku pemegagoduwo pugeje.
ACT 9:13 Ananias akore: – Ikimijera nure aki. Mare boe ere iwie nou imedu Saulo ro pegareuji. Emare ro pegare meartorure aiwugei rugadu Jerusalém keje.
ACT 9:14 Aregodure mato turo pegawo nou mako pemegare aiwuge eiamedu boei. Nou ure Judeu doge enomea maku Pao Kurireu aiwuge eimijerage ere tugie maku ai rugadu ro pegawo rugadu.
ACT 9:15 Jesus akore: – Atudo Saulo ae rugadu. Ire ikeragu ji maragoduwo inai. Emare umode boe tuginaiwuge erduwado i. Umode boe eimijerage erduwado i. Umode Israel doge erduwado i.
ACT 9:16 Saulo meartorumode i rugadu. Boe rakamode ji jamedu. Mare imire imode bie nou boe rakamode jituji.
ACT 9:17 Nou Ananias uniau akedure dukeje uture Saulo bagai rugadu. Ure turemo nou Saulo rakojere tadawu baito. Ure tugera bu Saulo aora keje. Makore ji. Akore: – Ameartorure Jesusji dukodi iwobe nure aki. Jesus koiare ure itarego mato akae. Emare ure ardudo pudui toro awara keje. Ure itarego mato akae iwo aku pemegado pugeje, Pao Kurireu Uwari rakojewo akabo.
ACT 9:18 Ananias akoino dukeje čare ia iaboe ure tudawuje Saulo joku piji. Ure nono karo botore. Nono Saulo joku pemegagodure pugeje. Ure turagojedo. Ao pegododure jamedu.
ACT 9:19 Nono okwagere dukodire rakare pugeje. Saulo rakoje raikare meartorure Jesus jiwugebo Damasco ba kurireu keje.
ACT 9:20 Uture Judeu doge etae ere bato puiwu bai ka. Nonore makore ei Pao Kurireu Onaregedu nuie Jesusče.
ACT 9:21 Meardure jiwuge eiamedu boe ebogodure ji. Egore: – Awu Saulo emare ure nou meartorure Jesus jiwuge ewido Jerusalém keje. Emare aregodure mato tuwo tugeragu nou meartorure Jesus jiwugei tuwo erego Jerusalém ka tuwo emagu nou ure Judeu doge enomea maku Pao Kurireu aiwuge eimijerage etai. Mare rokare aino pugeje.
ACT 9:22 Dukodire Saulo mako pemegare rugadu. Roiware tuwo boe etaora mekido rugadu tuwo Pao Kurireu meardae maku etai. Makore ewiagai tuiorduwa tabo Jesus umode boe ekinorudowu nuie ema duji. Dukodire nou Damasco kejewu Judeu doge eroiwakare tumagowo nou Saulo bataru jipagi.
ACT 9:23 Meri raire ji nono. Dukeje Judeu doge ere bato pui tuwo tumeardae pegareu tawuje tuwo Saulo bito.
ACT 9:24 Etaiwore nou ba kurireu bai poroji meriji boečoji tuwo tugeragu Sauloji tuwo bito. Mare ia boe ure Saulo bie nou emeardae pegareuji.
ACT 9:25 Ia boečoji aidure Saulo jiwuge eture apo nou ure taiado nou ba kurireu tabowu moto ri ao ka ia baito. Dukeje nou moto ri ao piji, nou bai piji ere Saulo tugu tugodaraboto dukeje ere rawuje toro moto ka. Dukodire Saulo uture Damasco piji.
ACT 9:26 Saulo uture Jerusalém ba kurireu ka. Aidure turagojewo Jesus ure jorduwadowugebo nono. Mare emeartorukare ji. Epagudure če.
ACT 9:27 Nono Barnabé ure tugera maku ai. Ure Saulo reko nou uture Jesus bataru tabowuge etae. Ure ewie nou Saulo jorduie Jesusji awara keje duji. Jesus makoie nou Sauloji. Ure ewie Saulo rore jiboeji makore jiboeji Damasco keje. Saulo uie boe erduwado Jesus jiboeji rugadu.
ACT 9:28 Barnabé makore aino ei dukeje etaidu pemegare nou Sauloji. Saulo rakojere ebo. Uture Jerusalém jamedu boeji tumagowo boei Jesus jiboeji.
ACT 9:29 Mako raire nou jorduware Grécia bataru jiwu Judeu dogei. Mare etaidure tuwo Saulo bito.
ACT 9:30 Nou meartorure Jesus jiwuge erduware nou emeardae pegareuji dukeje ere Saulo reko Cesaréia ba kurireu ka tuwo utudo toro Tarso ba kurireu ka, nou ričodure kejewu ba kurireu ka.
ACT 9:31 Aino nou Judéia kejewuge meartorure Jesus jiwuge, nou Galiléia kejewuge meartorure Jesus jiwuge, nou Samaria kejewuge emeartorure Jesus jiwuge eiamedu boe ere tamudo. Boe ero pegare eidu akedure kodi. Nou meartorure Jesus jiwuge eku kidugodure Pao Kurireuji tumeartoruwo ji rugadu dukodire Pao Kurireu Uwari ure eragado, ure emagado pugeje.
ACT 9:32 Pedro uture moto jamedu boe parugajeje. Ia meri keje aregodure Lida ba kurireu ka. Aidure tuiorduwo meartorure Jesus jiwugei nono.
ACT 9:33 Aregodure toro dukeje jordure ia imeduji. Iere Enéias. Nou Enéias ukare turagojedo kejewu joru oto padure oito pogora kugudure dukodi.
ACT 9:34 Pedro makore ji. Akore: – Jesus Cristo unure apemegago. Aragojedo. Akeragu apadure kejewu kodoji. Ča nou Enéias ure turagojedo tači je tugudau kodo tabo.
ACT 9:35 Nou Lida kejewuge eiamedu erdure nou inoduji. Nou Sarom ba kurireu kejewuge eiamedu boe erdure nou inoduji jamedu. Dukodire ere tugera ra tumeartorure jiboe piji tumeartoruwo tu Jesusji.
ACT 9:36 Jope ba kurireu kejere ia meartorure Jesus jiwu aredu iere Tabita. Iere Dorcas jamedu. Ro pemegare boei meri jameduji. Ure tugera maku marenarue doge etai rugadu.
ACT 9:37 Ia meri keje kogodure. Nono bire kuri rugadu. Boe ere nou bireu pemegado dukeje ere tugu ia baito.
ACT 9:38 Jope ba kurireu jakare Lida ba kurireu piji. Dukodire nou Jope kejewu meartorure Jesus jiwuge emeardure Pedro rakojeie Lida keje duji. Dukodire ere ime pobedu doge etudo toro Pedro bagai. Etaregodure ae dukeje emagore ji: – Mato čedabo amara tabo.
ACT 9:39 Dukodire Pedro ure tudo turugadu. Uture ebo Jope ba kurireu ka. Etaregodure toro dukeje ere Pedro remo nou bireu padure tadawu baito. Areme ere tuburedo Pedroji tragudu tabo. Ere Pedro jordudo nou Dorcas maragodae pemegareuji. Nou aredu Dorcas areia midodu epa nure ema.
ACT 9:40 Pedro makore nou boei ewo tudawuje nou bai piji. Nono ure tubu jodo moto keje. Makore baruto dukeje makore nou bireudoji. Akore: – Are. Aragojedo. Ča nou aredu ure tuioku jado. Jordure Pedroji dukeje ure tumugudo.
ACT 9:41 Pedro ure tugera maku ai uwo turagojedo. Dukeje makore meartorure Jesus jiwuge ewagai, nou oragudureu areme ewagai. Nono ure erdudo ji. Bikare pugeje duji.
ACT 9:42 Nou rore ainodu ure tumaedo nou ba kurireu Jope jamedu boe parugajeje. Boe emagare tumeartorure Jesus jitu tabo.
ACT 9:43 Pedro rakoje raire nou Jope ba kurireu keje. Mugure ia maragodure tapira biri urugudowu imedu uwai keje. Nou imedu iere Simão.
ACT 10:1 Ia imedu iere Cornélio. Mugure Cesaréia ba kurireu keje. Judeu karegure ema. Romano doge tugobaigarege eimijera nure ema. Nou Romano doge tugobaigarege ekiere “Italiano doge”.
ACT 10:2 Nou Cornélio aidure Pao Kurireuji. Ema uwobe eiamedu boe eku kidugodure Pao Kurireuji tumeartoruwo ji. Nou Cornélio ure tugera maku Judeu doge marenarue doge etai jamedu. Makore baruto Pao Kurireu bagai tu tu je.
ACT 10:3 Ia meri keje merirekodutabo emare makore baruto pugeje. Makore dukeje jordure jiboe ure nono uniau mogadure. Jordure Pao Kurireu utugare baru tadawuji. Ure turemo Cornélio uwaito dukeje makore ji. Akore: – Cornélio.
ACT 10:4 Cornélio aiwore tu nou Pao Kurireu utugare baru tadawuji tubagudu tabo. Dukeje akore: – Imireo. Nou Pao Kurireu utugare baru tadawu akore: – Pao Kurireu aidure rugadu aro pemegareuji. Aidure amagore baruto duji. Umode amagore bagaiboe maku akai rugadu.
ACT 10:5 Ia ime etudo toro Jope ba kurireu ka ia imedu bagai. Nou imedu iere Simão Pedro.
ACT 10:6 Emare mugure ia maragodure tapira biri urugudowu imedu uwai keje. Nou maragodure tapira biri urugudowu imedu iere Simão jamedu. Mugure pobo maereu okwai.
ACT 10:7 Nono nou Pao Kurireu utugare baru tadawu uture piji. Dukeje Cornélio makore tudugare pobedu doge ewagai. Makore ia tugobaigare bagai. Nou tugobaigare aidure Pao Kurireuji jamedu. Emare jetu pemegare nou Cornélio oeji tu tu je.
ACT 10:8 Cornélio readodure nou tuniauji ewiagai dukeje ure etudo Jope ba kurireu ka Pedro bagai.
ACT 10:9 Nou barogwato etaregodukare raga dukeje Pedro ruture tuwai ao ka tumagowo baruto. Meri jeture pagaia keje.
ACT 10:10 Dukeje uke boeire ji. Aidure togwagewo mare boe ekare uke pemegado raga. Nono jordure ia iaboeji.
ACT 10:11 Jordure baru ure tuiado duji. Jordure ia boe ekudau areia kigadureuji. Nou boe ekudau areia kurire, jadodure duji. Ure turawuje baru piji gu je.
ACT 10:12 Nou boe ekudau kejere barege pegareuge emugure, kiebarege pegareuge emugure jamedu. Iage ere nono batrareuge emogadure. Emugure keje jamedu.
ACT 10:13 Nono ia boe makore Pedroji baru piji. Akore: – Pedro. Aragojedo. Akeragu iaji awo bito, awo kowuje.
ACT 10:14 Mare Pedro aidukare. Nou Pao Kurireu ure maku Judeu doge etaiwu eno bakaru koiare emodukare nou barege nou kiebarege ekowuje. Dukodi Pedro akore: – Boro. Marigudu are mariguduwuge iwobe eno bakaru maku etai. Nou bakaru akore boe ekaiago ia barege ekowuje ekaiago ia kiebarege ekowuje. Akore emoduie kowuje dukeje epemegamodukaie turowo nou bakaru tadawu boe ero boeji pugeje. Marigudu ikare nou barege nou kiebarege ekowuje rugadu jii aino. Aino imodukare ekowuje rugadu.
ACT 10:15 Mare nou baru pijiwu makore pugeje. Akore: – Pao Kurireu nure imi. Imagomode ai ia barogo uie turugadu boe ewo ko dukeje akaidudo ji.
ACT 10:16 Pao Kurireu akore ainodu ure pobe metia bokware. Dukeje čare nou boe ekudau areia kigadureu ruture tuibagi kuri je baruto.
ACT 10:17 Pedro biagorore nou tuiordure jiboeji. Aidure tuiorduwawo nuba boe mode. Dukeje nou Cornélio ure etudowuge etaregodure nou rakojere tadawu bai ka.
ACT 10:18 Emagore Pedro bagai. Egore: – Simão Pedro mugure woe?
ACT 10:19 Pedro biagoro kimore nou tuiordure jiboeji dukodire meardukare nou ime etaregodure pudae duji. Nono nou Pao Kurireu Uwari makore Pedroji. Akore: – Akaiwodo. Ime etaregodu awagai.
ACT 10:20 Ado arugadu atuwo ebo. Ire etarego mato awagai.
ACT 10:21 Dukodire Pedro ure turawuje nou bai ao piji. Nono makore nou imei. Akore: – Iwagai na taroino? Kodiba tagaregodure woe?
ACT 10:22 Egore: – Tugobaigarege eimijera Cornélio koiare ure čedudo mato awagai. Imedu pemegareu nure ema. Joku kidugore Pao Kurireu jiwu nure ema tumago pemegawo Pao Kurireuji rugadu. Judeu doge eiamedu boe etaidure ji. Pao Kurireu utugare baru tadawu ure čegimijera Cornélio jorduwado tumagowo awagai atuwo tuwai ka tumearduwo awadaruji.
ACT 10:23 Nono Pedro ure eremo tuwaito enuduwo nono nou boečoji. Nou barogwato Pedro ure tudo turugadu dukeje uture ebo. Ia mugure Jope ba kurireu kejewu meartorure Jesus jiwuge eture ebo jamedu.
ACT 10:24 Nou barogwato pugeje etaregodure Cesaréia ba kurireu ka. Cornélio upagare ewagai nono tuwobebo tumagore bagaiwu tumedagebo jamedu.
ACT 10:25 Pedro uiago turemo uwaito mare nou Cornélio uture togi. Nono ure tubu jodo moto keje Pedro jokorai.
ACT 10:26 Mare Pedro ure rakojedo. Akore: – Aragojedo. Imedu nure imi. Pao Kurireu karegure imi.
ACT 10:27 Nono Pedro makore nou Cornélioji. Ere turemo baito. Nono Pedro jordure nou boei nou bai ja tada. Emagare rugadu.
ACT 10:28 Makore ei. Akore: – Tagi tarduware Judeu doge eno bakaru tadawu boe ero boeji. Nou bakaru akore čedaregodukaiago ia boe tuginaiwuge ewai ka. Čemugukaiago ia boe tuginaiwugebo. Mare maigodu aino Pao Kurireu ure iorduwado tuwo imeardae pemegado boe tuginaiwugei. Boe pegareuge kaiegure emage duji. Emodukaie čebegado duji.
ACT 10:29 Dukodire itaregodure aino woe. Amagore iwagai dukeje iture mato. Ča. Kodiba akagoino iwagai?
ACT 10:30 Cornélio akore: – Ia jawu meriji imagore baruto iwai tada merirekodutabo. Irore puku ia imedu rakojere itogi duji. Ukudau kigadu maere ji.
ACT 10:31 Emare makore i. Akore, “Pao Kurireu meardure akagoino baru to duji. Jordure aro pemegareuji.
ACT 10:32 Ia boe utudo Jope ba kurireu ka ia imedu bagai. Nou imedu iere Simão Pedro. Rakojere ia maragodure tapira biri urugudowu imedu uwai keje. Nou maragodure tapira biri urugudowu jiwu iere Simão jamedu. Mugure pobo maereu okwai.”
ACT 10:33 Dukodire imagore aino awagai. Ča akaregodure mato rugadu. Aino paragojere woe Pao Kurireu apo. Čebaganure awagai awo čewie Pao Kurireu bataruji.
ACT 10:34 Nono Pedro makore ei. Akore: – Aino iorduwagodure Pao Kurireu meardaeji. Marigudu imeardaere Pao Kurireu aidure tu Judeu dogei duji. Mare aino iorduware Pao Kurireu aidure boe eiamedu boei duji. Aidumode meartorure puduiwuge eiamedu boei. Aidumode rore Pao Kurireu aidure jiwuge eiamedu boei. Aiwomodukare boe ewiriji boe ekudaeji. Aiwomode tu emeartorure puduidu bagai, ero pemegaredu bagai.
ACT 10:36 Tarduware Pao Kurireu ure maku Judeu doge etaiwu eno bataruji. Ure pawie Jesus Cristo umoduie boe ekinorudo ewudugugoduwo. Jesus Cristo boe eiamedu boe eimijera kurireu nure ema rugadu.
ACT 10:37 Tarduware nuba boere Judeu doge eno moto keje. João Batista ure boe erduwado Pao Kurireu bataruji. Nouge ere tugera ra turo pegareu piji dukeje João ure etao pegodo.
ACT 10:38 Dukeje Jesus ure boe erdudo turoji Galiléia keje. Emare mugure Nazaré ba kurireu keje. Pao Kurireu ure Tuwari maku Jesus ai. Ure Jesus rakado rugadu. Dukeje uture nou moto jamedu boe parugajeje turo pemegareu tabo. Ure bope doge etawuje boe epiji tuwo epemegago. Pao Kurireu rakojere apo dukodire rore aino.
ACT 10:39 Čegi čerdure Jesus rore jiboeji Israel moto keje. Čerdure rore jiboeji Jerusalém keje. Iage ere Jesus bu ipo padure pugajejewu keje. Nonore ere bito nono.
ACT 10:40 Mare merire pobe metia bokware dukeje Pao Kurireu ure Jesus jewodudo pugeje.
ACT 10:41 Ure boe erdudo Jesusji. Mare boe eiamedu karega. Ia čegi čerdure ji. Pao Kurireu ure nou ture tugeragu jiwuge erdudo Jesusji rugadu. Jesus jewodure dukeje čenogwagere apo, čegudure apo jamedu.
ACT 10:42 Makore čei čewo boe ewie tuwadaru pemegareuji. Čewo boe ewie Pao Kurireu ure boe eimijerado pudumi duji. Dukodire Jesus aiwomode jaoboe eroji, maiwu boe eroji jamedu ero pemegareu bagai, ero pegareu bagai.
ACT 10:43 Dujire nou jaoboe makore Pao Kurireu bataru jiwuge eiamedu boe emagore. Ere boe ewie Jesus biagodumoduie meartorure puduiwuge eiamedu boe ero pegare jiboe piji. Emeartorure Jesusji dukodire biagodumode ero pegare jiboe jamedu boe piji rugadu.
ACT 10:44 Pedro makore aino dukeje Pao Kurireu Uwari ure turawuje nou meardureuge etae.
ACT 10:45 Nou aregodure Pedro apowuge erore ta je nou inoduji. Judeu doge nure emage. Emeartorure Jesusji. Mare aino Pao Kurireu Uwari ure turemo boe tuginaiwugeto jamedu.
ACT 10:46 Dukejere nou boe tuginaiwuge emagore ia boe tuginaiwuge ewadaru tabo. Nono emago pemegare Pao Kurireuji rugadu. Pemegaie, kurie rugadu.
ACT 10:47 Nono Pedro akore pugeje: – Pao Kurireu Uwari ure turemo awu boe tuginaiwugeto nono ure turemo čedo dumogadure. Ča ure turugadu etao pegododuwo jamedu.
ACT 10:48 Dukodire makore ia tumedagei ewo nou boe tuginaiwuge etao pegodo emeartorure Jesus Cristoji kodi. Nono emagore Pedroji rakojewo nono pudabo tu jao.
ACT 11:1 Nou uture Jesus bataru tabowuge emeardure boe tuginaiwuge emeartoruie Pao Kurireu bataruji jamedu duji. Nou Judéia kejewu meartorure Jesus jiwuge eiamedu erduware jamedu.
ACT 11:2 Nono Pedro uture Jerusalém ba kurireu ka. Iage etaidure tuwo nou meartorureuge boe tuginaiwuge enoe oto biri kado nono Judeu doge ero mogadure. Emago pegare Pedroji.
ACT 11:3 Egore: – Ukare turugadu aragojewo akwagewo aino boe tuginaiwuge ewai tada.
ACT 11:4 Dukodire Pedro readodure ewiagai nuba boere pudui toro rugadu.
ACT 11:5 Akore: – Iragojere Jope ba kurireu tada dukeje imagore baruto. Nono iordure iaboeji. Ure nono iniau mogadure. Iordure ia boe ekudau areia kigadureuji. Nou boe ekudau areia kurire, ture tuiado dukeje. Ure turawuje baru piji itae rugadu.
ACT 11:6 Nou boe ekudau kejere barege pegareuge emugure, kiebarege pegareuge emugure jamedu. Iage ere nono batrareuge emogadure. Emugure keje jamedu.
ACT 11:7 Dukejere imeardure ia boe makore baru piji duji. Akore, “Pedro. Aragojedo. Akeragu iaji awo bito, awo kowuje.”
ACT 11:8 Mare inagore, “Boro. Marigudu are nou mariguduwuge iwobe eno bakaru maku etai. Nou bakaru akore boe ekaiago ia barege ekowuje ekaiago ia kiebarege ekowuje. Akore emoduie kowuje epemegamodukaie turowo nou bakaru tadawu boe ero boeji pugeje. Mare ikare nou barege nou kiebarege ekowuje rugadu jii aino. Aino imodukare ekowuje rugadu.”
ACT 11:9 Nono nou baru pijiwu makore pugeje. Akore, “Pao Kurireu nure imi. Imagomode ai ia barogo uie turugadu boe ewo ko dukeje akaidudo ji.”
ACT 11:10 Akoino i dure pobe metia bokware. Dukeje čare nou boe ekudau areia kigadureu ruture tuibagi baruto.
ACT 11:11 Ruture dukeje ime etaregodure iwagai. Ere pobe metia bokware. Etaregodure Cesaréia ba kurireu piji.
ACT 11:12 Pao Kurireu Uwari makore i ituwo ebo imara tabo. Awu meartorure Jesus jiwuge eture itabo jamedu. Jope kejewuge nure emage. Enodo padure seis. Čedure toro Cesaréia ba kurireu ka. Čere čeremo Cornélio uwaito nono.
ACT 11:13 Emare readodure čewiagai tuiorduie Pao Kurireu utugare baru tadawuji tuwai ja tada. Akoie aino pudui, “Ia boe utudo Jope ba kurireu ka ia imedu bagai. Nou imedu iere Simão Pedro.
ACT 11:14 Emare umode arduwado nuba aromode, nuba awobe eromode tawo taginorudo boe pegareu piji.”
ACT 11:15 Ča itaregodure toro etae dukeje ire ewie Pao Kurireu bataru pemegareuji. Dukejere Pao Kurireu Uwari ure turawuje etae nono ure turawuje pagae dumogadure.
ACT 11:16 Dukeje iwiabuture Pagimijera Jesus bataru keje. Akore, “João ure boe etao pegodo pobo tabo mare imire imode Pao Kurireu Uwari rawuje tagae iwo tugu tameardaeto.”
ACT 11:17 Boe jokodu jire inagoino. Pagimijera Jesus ure Pao Kurireu Uwari maku awu boe tuginaiwuge etai nono ture maku pagai dumogadure. Pameartorure Pagimijera Jesus Cristoji dukeje ure Tuwari maku pagai. Aino ure maku etai jamedu. Imire imodukare imeardae udo tuginai Pao Kurireu meardae piji.
ACT 11:18 Nou boe emeardure nou inoduji dukeje emago pegakare nou boe tuginaiwugei pugeje. Emago pemegare Pao Kurireuji. Egore: – Pao Kurireu aidure boe tuginaiwugei ewo tugera ra turo pegareu piji jamedu, Pao Kurireu uwo ekinorudo boe pegareu piji.
ACT 11:19 Boe eimijera pegareuge ere Estêvão bito dukeje boe pegare meartorure Jesus jiwugei rugadu. Dukodire ere taodo Jerusalém piji. Iage eture Fenícia moto ka. Iage eture Chipre moto ka. Iage eture Cirene moto ka. Emagore Pao Kurireu bataru pemegareuji tu Judeu doge ewiagai nono.
ACT 11:20 Mare ia Chipre kejewu meartorure Jesus jiwuge eture Antioquia ba kurireu ka. Ia Cirene kejewu meartorure Jesus jiwuge eture Antioquia ba kurireu ka jamedu. Emagere emagore Jesus bataru pemegareuji boe tuginaiwuge ewiagai jamedu. Ere ewie Jesus umode ekinorudo boe pegareu piji duji. Ewo tugimijerado ema.
ACT 11:21 Jesus ure turaga maku etai. Dukodire boe emagare tumeartoru tabo ewadaruji. Ere tugera ra tumeartorure jiboe piji tumeartoruwo tu Jesusji.
ACT 11:22 Nou Jerusalém kejewu meartorure Jesus jiwuge emeardure nou inoduji dukeje ere Barnabé utudo etae toro Antioquia ba kurireu ka.
ACT 11:23 Emare aregodure toro dukeje jordure Pao Kurireu ro pemegare ei duji. Dukodire jakarere pudui. Makore ei ekawo tugera ra Jesus piji. Emeartoru rakawo ji rugadu.
ACT 11:24 Nou Barnabé imedu pemegareu nure ema. Pao Kurireu Uwari rakojere apo. Meartoru rakare Jesusji. Ure boe emeartorudo Jesusji rugadu. Emagare.
ACT 11:25 Dukeje Barnabé uture Tarso ba kurireu ka taiwo tabo Saulo bagai.
ACT 11:26 Jordure Sauloji dukeje ure tugirimi apo Antioquia ba kurireu ka. Jorure mitotu je ei toro ere boe erduwado Pao Kurireu bataruji dutabo. Ere bato pui meartorure Jesus jiwugebo tu tu je. Nou Antioquia kejere boe ere nou meartorure Jesus jiwuge ekiedo. Egore: “Cristo uwobe reo.”
ACT 11:27 Ia makore Pao Kurireu bataru jiwuge eture Jerusalém piji Antioquia ba kurireu ka.
ACT 11:28 Ia iere Ágabo. Ure turagojedo. Pao Kurireu Uwari ure Ágabo makodo. Akore bubutumodukaie moto jamedu boe parugajeje. (Ča Cláudio Romano doge eimijera kurireu ure ema dukeje bubutukare nono nou Ágabo bataru mogadure.)
ACT 11:29 Dukodire nou Antioquia kejewu meartorure Jesus jiwuge ere tumeardae tawuje tuwo ia tuge maku diero bagai tuwo nou diero maku toro nou Judéia kejewu meartorure Jesus jiwuge ewagai.
ACT 11:30 Erore aino rugadu. Nono ere Barnabé, Saulo etudo diero tabo toro nou Judéia kejewu meartorure Jesus jiwuge ewagai rugadu.
ACT 12:1 Boe eimijera kurireu Herodes ro pegare meartorure Jesus jiwugei. Ure iage etugu baičoreuto.
ACT 12:2 Ure to tugobaigarege edo Tiago bito tariga kurireu tabo. Nou Tiago, João umana nure ema.
ACT 12:3 Judeu doge etaidure nou Herodes ro pegareuji. Dukodire Herodes ure tugeragu Pedroji jamedu. Ure tugu baičoreuto. Rore aino mare Judeu doge ewadure ia tuwadaeji. Nou ewadae iere Páscoa. Dukodire Herodes roiwakare tuwo Pedro bito nou meriji. Meardaere tuwo bito nou Judeu doge ewadae akedu keje. Nono Herodes ure tugeragu tugobaigaregei. Enodo padure dezesseis. Ure etu pemegado Pedroji nou baičoreu ja tada. Herodes aidure Judeu doge emagowo boe ewo nou Pedro bito.
ACT 12:5 Dukodire Pedro rakojere baičoreu ja tada. Mare meartorure Jesus jiwuge emago raire baruto Pao Kurireu bagai Pedro paru tabo.
ACT 12:6 Herodes uiago Pedro maku Judeu doge etai barogwakododu keje. Mare nou boečoji Pedro unudure tugobaigarege etoiadada. Ere pobe. Ere Pedro kogudo corrente pobedu tabo. Tugobaigarege edure nou baičoreu bai poro keje jamedu.
ACT 12:7 Rore puku Pedroji ia Pao Kurireu utugare baru tadawu rakojere nono apo duji. Urugu rakare nou baičoreu ja tada. Nou Pao Kurireu utugare baru tadawu ure tugerado Pedro poru keje jetaduwo. Akore: – Aragojedo. Amara tabo. Ča nou corrente ure tugiwuje Pedro piji.
ACT 12:8 Nono nou Pao Kurireu utugare baru tadawu akore: – Akudau areia tugu ai kogudo. Awure tugu awuretadauto. Paduwo. Atudo itabo. Ča Pedro meartorure nou Pao Kurireu utugare baru tadawu bataruji.
ACT 12:9 Uture rekodaji nou baičoreu piji. Mare meardaere tuniaunure duji. Jorduwakare boe remawu nure aino pudui duji.
ACT 12:10 Ekodure nou tugobaigare boetojiwu kori dukeje ekodure ia kori pugeje. Nono etaregodure nou baičoreu bai poro ka. Nou bai poro ure tuiado poku je dukeje ere tudawuje nou baičoreu piji. Ekodure nou ba kurireu tadawu awaraji. Nono Pedro rore puku nou Pao Kurireu utugare baru tadawu uture tubiji duji.
ACT 12:11 Aino čare Pedro jorduware turore jiboeji dukeje akore: – Boe remawu rugadu. Pao Kurireu ure tudugare baru tadawu arego itae uwo ikinorudo nou Herodes ro pegareu piji, nou Judeu doge etaidure jiwu ero pegareu jiboe piji jamedu.
ACT 12:12 Jorduware ure tudawuje baičoreu piji dukeje Pedro uture João Marcos uče uwai ka. Nou uče iere Maria. Boe emagare nono. Ere bato pui tumagowo Pao Kurireu bagai Pedro paru tabo.
ACT 12:13 Pedro aregodure toro dukeje ure tugera to nou bawadu kejewu bai poroji. Ia bai kejewu utugare nogwaredu uture tugimaduwo apo. Iere Rode.
ACT 12:14 Puredugodure toro dukeje meardure Pedro makoji. Jorduware ji dukeje jakaregodure pudui rugadu. Dukodire rekodure tuwaito pugeje. Mare ukare bai poro jado dukodire Pedro rakoje kimore toro bawadu keje. Nou Rode makore nou boei Pedro rakojeie bawadu keje.
ACT 12:15 Mare emeartorukare. Egore: – Akaora bai baire. Mare emare ukare togwa ra tumagore ei dupiji. Dukodire egore: – Pedro karega. Uwarire akoino.
ACT 12:16 Mare Pedro ure tugera to bai poroji kimo. Dukodire boe ere bai poro jado. Nono erdure ji. Pedro nure ema rugadu. Dukodire ebogodure.
ACT 12:17 Pedro ure tugera raido emugu kiorowo nono. Readodure ewiagai nuba Pao Kurireu rore pudui tuwo tudawuje baičoreu piji duji. Akore: – Tadudo toro nou Tiago ae tawo bie. Nou meartorure Jesus jiwuge eiamedu boe ewie jamedu. Nono Pedro uture epiji toro ia ba kurireu ka.
ACT 12:18 Barogwakododure dukeje nou baičoreu tadawu tugobaigarege erduwakare nuba boere Pedroji dukodire etokire pui.
ACT 12:19 Herodes mako rakare ei etaiwowo Pedro bagai mare erdukare ji. Dukodire Herodes ure nou tugobaigarege etarego pudae. Unara raire ei dukeje ure ewido. Rore aino ei dukeje Herodes uture Judéia moto piji tugiriaduwo toro Cesaréia moto ka.
ACT 12:20 Herodes korigodure Tiro ba kurireu kejewugei, Sidom ba kurireu kejewugei jamedu. Dukejere ia nou ba kurireu kejewuge eture ae. Mare ere tumeardae maku ia Herodes uwai tadawu boe eimijera ai jao. Etaiduie tubemegawo Herodiji, etaiduie Herodes pemegawo pudui jamedu. Etuwobe etaiduie tuwo akirodo nouia tugeji Herodes piji jamedu. Nou Herodes uwai tadawu boe eimijera iere Blasto. Nou Blasto jordu pemegare nou emeardaeji. Dukodire ure tuwadaru utudo toro Herodes ae eparu tabo tuwo emeardae maku Herodes ai epemegawo pui pugeje.
ACT 12:21 Dukodire Herodes makore ewagai. Ure meri maku etai etaregoduwo nou meriji. Ča nou meri keje Herodes ure nou tugudau boe eimijera kurireu areia motureu tugu pudui. Ure tumugudo to boe eimijera kurireu muga ira keje. Dukejere mako raire boei.
ACT 12:22 Nou meardure nou Herodes bataru jiwuge etaidure ji rugadu. Egore: – Imedu karegure ema. Ia baru tadawu pao nure ema rugadu.
ACT 12:23 Erore puku Pao Kurireu ure Herodes bito duji. Herodes aidure tuwo Pao Kurireu udo pudumi kodi dukodire Pao Kurireu ure bito. Ate doge ere Herodes kodu rugadu ko dukodire Herodes bire.
ACT 12:24 Mare Pao Kurireu bataru ure tumaedo moto jamedu boe parugajeje. Meartorure Jesus jiwuge emagagodure rugadu.
ACT 12:25 Barnabé uture Jerusalém ba kurireu ka Saulo apo tuwo nou diero reko nou meartorure Jesus jiwuge ewagai. Ere maku etai dukeje ere tugirimi Antioquia ba kurireu ka João Marcos apo.
ACT 13:1 Makore Pao Kurireu bataru jiwuge eragojere Antioquia kejewu meartorure Jesus jiwugebo. Ure boe erduwado Pao Kurireu bataru jiwuge eragojere nono ebo jamedu. Ainore ekiere. Ia iere Barnabé. Metia iere Simão. Nou Simão iere Čoreu jamedu. Ia iere Lúcio. Nou Lúcio aregodure Cirene moto piji. Ia metia iere Manaém. Nou Manaém ričodure tu nou boe eimijera Herodes apo. Ia iere Saulo.
ACT 13:2 Awu jorduware Pao Kurireu bataru jiwuge enogwagekare nou meri keje tuwo tubu jodo tumago pemegawo Pao Kurireuji tu rugadu nou meriji. Dukeje Pao Kurireu Uwari makore ei. Akore: – Tamedia Barnabé, tamedia Saulo etudo tabiji ewo itaidure jiwu ire maku etaiwu emaragodae towuje.
ACT 13:3 Dukodire nou boe enogwagekare nou meriji rugadu jii nou meri butu ka rugadu. Dukeje ere tugera bu nou Saulo keje, nou Barnabé keje tumagowo baruto eparu tabo Pao Kurireu utugaregewo emage rugadu. Dukeje ere etudo.
ACT 13:4 Pao Kurireu Uwari ure tumeardae maku etai dukodire Barnabé, Saulo eture toro Selêucia ba kurireu ka. Nou Selêucia piji eture toro Chipre moto ka ikarereu tabo.
ACT 13:5 Etaregodure toro dukeje ere turemo Salamina ba kurireuto. Emagore Pao Kurireu bataruji boe ewiagai nou Judeu doge ere bato puiwu bai ja tada. João Marcos uture ebo tuwo tugera maku etai.
ACT 13:6 Eture nou Chipre moto okwa ka toro nou Pafos ba kurireu ka. Nonore erdure ia bariji. Nou bari iere Barjesus. Judeu nure ema. Emare akore tumagoie Pao Kurireu bataruji mare pagare akoino.
ACT 13:7 Nou Chipre kejewu boe eimijera iere Sérgio Paulo. Jorduwareu nure ema. Emare aidure nou Barjesusji. Nou Sérgio Paulo makore Barnabé bagai nou Saulo bagai jamedu. Aidure tumearduwo Pao Kurireu bataruji.
ACT 13:8 Mare nou Barjesus rakojere nono jamedu. Emare iere Elimas jamedu. Bari nure ema dukodire boe ere iedo Elimas jamedu. Makore nou boe eimijeraji meartorukawo nou Barnabé nou Saulo ewadaruji, meartorukawo Pao Kurireuji.
ACT 13:9 Nou Saulo iere Paulo jamedu. Emare Pao Kurireu Uwari rakojere apo. Paulo aiwore tu nou bariji.
ACT 13:10 Nono Makore ji. Akore: – Bope onaregedu nure aki. Ardu pegare boe pemegareu boeji. Arduware tu boe pegareuji awo boe ekiripagado. Akaidure awo Pao Kurireu bataru pemegareu mekido awadrarodutabo.
ACT 13:11 Pao Kurireu umode tugera rakado ai rugadu kuri aino. Aku bokwamode ardukawo boeji tu jao. Rore puku ji nou Elimas joku bokware duji. Ure nono boetugu čoreu mogadure buture joku keje duji. Dukodire meru pagare jetu woje ia boe ewagai ewo tugeragu tugeraji tumeruwo apo.
ACT 13:12 Nou Chipre kejewu boe eimijera jordure nou inoduji dukeje meartorure rugadu. Jebogodure nou Paulo nou Barnabé emagore jiwu Pao Kurireu bataruji.
ACT 13:13 Paulo uture tumedagebo ikarereu tabo Pafos ba kurireu piji toro Perge ba kurireu ka. Perge rakojere Panfília moto keje. Toro João Marcos uture epiji tuduwo tuibagi Jerusalém ka.
ACT 13:14 Dukejere eture Perge piji. Etaregodure Antioquia ba kurireu ka Pisídia moto keje. Sábado meriji eture Judeu doge ere bato puiwu bai ka. Edure nono bai ja tada.
ACT 13:15 Ia boe aiwore Pao Kurireu ure maku Moisés aiwu bataruji tumagowo nou rakojere nou bai tadawu boe ewiagai. Aiwore ia makore Pao Kurireu bataru jiwuge ere bu bapera kejewu Pao Kurireu bataruji jamedu. Makore ji nou boe ewiagai jamedu. Nou bai kejewuge eimijerage erdure nou Pauloji nou metagei. Dukeje emagore ewagai. Egore: – Ia tagi tagaidure tamagowo ia bataru pemegareuji čewiagai?
ACT 13:16 Dukodire Paulo ure turagojedo. Ure tugera awagado boe emagokawo pugeje ewiapagawo nou tuwadaruji. Dukeje makore ei. Akore: – Iwobe nure ia tagi Judeu nure imi kodi. Boe tuginaiwuge nure ia tagi jamedu. Tagaregodure woe tawo tabu jodo tamago pemegawo Pao Kurireuji. Dukodi tawiapaga pemegado iwadaruji.
ACT 13:17 Judeu doge emeartorure jiwu Pao Kurireu ure tugeragu jawu pawobei marigudu. Eragojere Egito moto keje dukeje ure emagado rugadu. Dukeje Pao Kurireu ure etawuje Egito moto piji turo rakareu tabo.
ACT 13:18 Mare pawobe emeartorukare ji dukodire emeru pagare jetu woje boe maereu keje. Jorure 40 ei nono duji.
ACT 13:19 Dukejere Pao Kurireu ure boe pegareuge etagedudo jawu pawobe etododai tuwo nou boe pegareuge eno moto maku jawu pawobe etai enoče.
ACT 13:20 Jorure 450 ei eture Canaã moto piji Egito moto ka ewo tugirimi tuibagi Canaã moto ka pugeje ewo tugeragu nou motoji toče. Eimijera bokware mare Pao Kurireu ure tugeragu iagei etaiwowo nou jawu pawobe erore jiboeji. Erore aino jii toro makore Pao Kurireu bataru jiwu Samuel muguredu ka.
ACT 13:21 Nono nou pawobe etaidure ia tugimijera kurireu bagai. Dukodire Pao Kurireu ure tugeragu Saulji eimijera kurireuče. Quis onaregedu nure ema. Judeu doge etumana Benjamim uwobe nure ema jamedu. Nou Saul nou Judeu doge eimijera kurireu nure ema dukejere jorure 40 ei nono.
ACT 13:22 Nono Pao Kurireu ure Saul tawuje epiji. Ure tugeragu Daviji eimijera kurireuče pugeje. Jessé onaregedu nure ema. Pao Kurireu akore, “Itaidure awu Davi rore jiboeji. Emare ro pemegamode itaidure jiboeji.”
ACT 13:23 Ča Jesusre Davi uwobe nure ema. Pao Kurireu ure tugeragu Jesusji uwo boe ekinorudowu udo ema. Ure udo aino nono nou tuwadaru mogadure. Ure aino rugadu. Emare umode Judeu doge ekinorudo boe pegareu piji.
ACT 13:24 Jesus otodaire João Batista ure Judeu doge ewie ewo tugera ra turo pegareu piji etao pegododuwo.
ACT 13:25 João Batista uiago tumaragodae iado dukeje ure boe ewie. Akore, “Tabagare bagaiwu karegure imi. Boe kurireu karegure imi. Mare tabagare bagaiwu aregodumode iregodaji kuri je. Boe kurireu mode ema rugadu. Ipogurumode ipureduwo ji.”
ACT 13:26 – Ia tagi iwobe nure tagi. Abraão uwobe Judeu doge nure ia tagi jamedu. Ia tagi boe tuginaiwuge taeku kigodure Pao Kurireuji tamago pemegawo ji jamedu. Pao Kurireu ure tuwadaru pemegareu maku pagai rugadu. Ure boe ekinorudowu maku pagai rugadu.
ACT 13:27 Jerusalém kejewuge erduwakare ji. Eimijerage erduwakare ji jamedu. Jesus umode boe ekinorudowu nure ema mare emeartorukare nou inoduji. Erduwakare tumeardure jiwu Pao Kurireu bataruji. Makore Pao Kurireu bataru jiwuge ere Pao Kurireu bataru bu bapera keje marigudu. Nou Jerusalém kejewuge emeardure nou bapera kejewu Pao Kurireu bataruji Sábado meriji tu tu je. Mare erduwakare nou padure kejewu bapera akoino jiboeji. Emeartorukare ji jamedu. Mare erore jiboe ure nou Pao Kurireu bataru jetudo pudui rugadu. Nou makore Pao Kurireu bataru jiwuge egore nou umode boe ekinorudowu bimoduie. Ča nou Jerusalém kejewuge emeartorukare nou bataruji. Mare ere Jesus bito. Turoino dutabo ere nou bataru jetudo pudui rugadu.
ACT 13:28 Erdukare ia Jesus ro pegareuji tuwo bito mare emagore tugimijera Pilatoji uwo bito.
ACT 13:29 Aino ere Pao Kurireu bataru udo turugadu. Jesus bire dukeje ere tawuje ipo padure pugajejewu piji. Ere tugu tori poroto.
ACT 13:30 Mare Pao Kurireu ure jewodudo pugeje.
ACT 13:31 Nono Jesus ure boe erdudo pudui. Boe raire ji rore aino duji. Galiléia kejewuge erdure ji. Jerusalém kejewuge erdure ji jamedu. Nou jordure jiwuge emagore tuiordure jiboeji nou Judeu doge ewiagai.
ACT 13:32 Dukodire čedaregodure woe tagae. Čedaidure čewo tawie nou Jesus bataru pemegareuji. Pao Kurireu makore jawu pawobei turomode jiboeji. Aino čare ure tuwadaru jetudo pudui rugadu. Ure Jesus jewodudo rugadu. Ainore akore Salmo capítulo 2 keje. Akore, “Itonaregedu nure aki. Awu meriji ao nure imi.”
ACT 13:34 – Nono Pao Kurireu makore tumoduie nou umode boe ekinorudowu jewodudo biri pegamodukaie moto tada bireuge eda keje. Akore, “Imode nou imagore Davi jiwu iro pemegareu maku tagai.”
ACT 13:35 – Ainore akore jamedu, “Amode atugare pemegareu tawuje bireuge eda piji biri pegakawo toro.”
ACT 13:36 – Jao pagimijera Davi rore Pao Kurireu roji. Pegagodure dukeje bire. Boe ere tugu mototo nono turo mogadure. Biri pegare toro tori poro ja tada.
ACT 13:37 Mare nou Pao Kurireu ure jewodudowu biri pegakare toro tori ja tada. Jewodure rugadu.
ACT 13:38 Iwobe Judeu doge nure tagi. Iwo tawie. Moisés ure maku Judeu doge etaiwu bakaru ukare boe etawuje ero pegareu piji. Mare awu Jesus umode meartorure puduiwuge eiamedu boe etawuje ero pegareu piji. Jesus koiare umode Pao Kurireu biagodudo boe ero pegareu piji. Dukodi čenure tawie aino.
ACT 13:40 Taeku jado tarokawo nono jawu pawobe ero mogadure. Makore Pao Kurireu bataru jiwuge emagore ei marigudu.
ACT 13:41 Egore, “Mako pegareuge nure tagi. Ča tarduwakare mare tawimode kuri aino. Tameartorumodukare iroji awu meriji. Boe emode tarduwado mare tameartorumodukare ji.” Ainore Pao Kurireu akore nou boei marigudu. – Ča tarokaba nono jorduwa bokwareuge ero mogadure.
ACT 13:42 Ewadaru akedure dukeje nou Paulo, nou Barnabé etuiago pugeje. Nou boe emagore ei ewo tugirimi boeiwu Sábado keje ewo boe erduwado pugeje.
ACT 13:43 Boe ere tudawuje nou bai piji dukeje eture nou Paulo nou Barnabé eregodaji. Judeu doge nure iage. Rore Judeu doge ero jiwu boe tuginaiwuge nure iage jamedu. Paulo, Barnabé utumode Pao Kurireu bataru tabowuge nure emage dukodi emagore ei. Ere egarego. Emagore ei ekawo tugera ra turo pemegareu piji Pao Kurireu ro pemegawo ei.
ACT 13:44 Boeiwu Sábado meri keje nou ba kurireu kejewuge eiamedu boe ere bato pui tumearduwo Pao Kurireu bataruji.
ACT 13:45 Nou Judeu doge erdure nou inoduji dukeje erdu pegare ei rugadu. Etaidukare nouia boe emearduwo Pao Kurireu bataruji. Dukodire emago pegare Paulo bataruji. Emago pegare ji rugadu.
ACT 13:46 Mare nou Paulo nou Barnabé epogurukare tumagowo rugadu nou Judeu dogei. Egore: – Čemagore Pao Kurireu bataruji tawiagai boetoji. Judeu doge nure tagi. Mare tameartorukare Pao Kurireu bataruji. Tagaidukare tawo tado tarugadu tameartoruwo Jesusji. Dukodire tamugumodukare apo rugadu. Dukodire čedumode tabiji čewo boe tuginaiwuge ewie nou Pao Kurireu bataru pemegareuji.
ACT 13:47 Ainore Pao Kurireu akore, “Ire atudo boe tuginaiwuge etae awo erduwado i nono jorugu umode boe erduwado awara jitu mogadure. Iwo boe tuginaiwuge eiamedu boe ekinorudo.”
ACT 13:48 Nou rakojere nonowu boe tuginaiwuge emeardure nou bataruji dukeje egaregodure nou bataru keje rugadu. Emago pemegare nou Pao Kurireu bataruji. Pao Kurireu ure tugeragu jiwuge emeartorure rugadu. Aino ewimode mare eragojemode Pao Kurireu apo du akedumodukare.
ACT 13:49 Aino Pao Kurireu bataru ure tumaedo nou moto jamedu boeji.
ACT 13:50 Mare ia Judeu doge ere boe eimijerage ero pegado nou Pauloji nou Barnabeji. Nou boe eimijerage ere Paulo Barnabé etudo to moto piji. Ia mako pemegare Pao Kurireu jiwu areme etaidukare Pauloji Barnabeji jamedu nou Judeu doge ewadaru koia. Oe kurireuge nure emage. Ere Paulo Barnabé etudo jamedu.
ACT 13:51 Dukodire Paulo Barnabé eture. Ere tuwure okeakejewu to pui tuwo moto urugudu tawuje tuwure okeakejewu piji nou boe erduwo taidukare nou ba kurireu kejewuge erore jiboe jituji. Dukeje eture Icônio ba kurireu ka.
ACT 13:52 Mare nou Antioquia kejewu meartorure Jesus jiwuge egarere kimo. Pao Kurireu Uwari meture etada rugadu.
ACT 14:1 Paulo uture Barnabé apo toro Icônio ba kurireu ka. Toro boe erore ei nono nou Antioquia kejewuge ero mogadure. Paulo uture nou Judeu doge ere bato puiwu bai ka. Nonore ure boe erduwado Pao Kurireu bataruji rugadu. Dukodire Judeu doge emeartorure Jesusji. Emagare rugadu. Boe tuginaiwuge emeartorure Jesusji jamedu. Emagare jamedu.
ACT 14:2 Mare iage emeartorukare ji. Judeu doge nure emage. Ere boe tuginaiwuge ekorigo nou meartorure Jesus bataru jiwugei.
ACT 14:3 Nou uture Jesus bataru tabowuge eragoje raire nono Icônio ba kurireu keje. Epogurukare tumagowo rugadu Jesus roji, bataruji. Jesus ure eragado ero rakawo, ero kuriwo. Ainore ure boe erduwado boe jokodu jire nou Paulo nou Barnabé egoino. Egore Pao Kurireu ro pemegamoduie meartorure puduiwugei.
ACT 14:4 Nou Icônio kejewuge epokare puapo. Emeardaekare nono pu meardae mogadure. Iage etaidure Paulo meardaeji, Barnabé meardaeji. Mare iage etaidure nou Judeu doge emeardae pegareuji jamedu.
ACT 14:5 Dukeje ia boe tuginaiwuge, ia Judeu doge emeardaere turo pegawo nou Pauloji nou Barnabeji. Nou ba kurireu boe eimijerage etaidure turowo aino jamedu. Etaidure tugidowo tori tabo ei.
ACT 14:6 Nou Paulo nou Barnabé erduware nou emeardae pegareuji dukodire eture nou ba kurireu piji. Eture Listra ba kurireu ka. Eture Derbe ba kurireu ka jamedu Licaônia moto ka. Eture nou puredureu boe eda jamedu boe ka.
ACT 14:7 Tugodui dutabo ere boe erduwado Jesus bataru pemegareuji rugadu.
ACT 14:8 Listra ba kurireu kejere ia pogora pegareu imedu mugure. Marigudu meru bokware jii je, boture tubogora pegare dutabo.
ACT 14:9 Emare mugu puredure tu Pauloji. Meardure Paulo makore jiboeji. Meartorure rugadu. Paulo aiwore tu ji. Jordure meartorure duji. Dukodire jorduware Pao Kurireu umode pemegado duji.
ACT 14:10 Dukodire mako pemegare ji boe eiamedu boe emearduwo. Akore: – Aragojedo ameruwo. Ča nou imedu ure turagojedo tači je. Merure tuwure tabo rugadu.
ACT 14:11 Nou boe erdure nou inoduji dukeje etaiwore Pauloji Barnabeji. Emeardae pegare ei egore bope doge ewari nuie emage. Ekudugodure tuwadaru tabo: – Pameartorure jiwu pawari ere imedudo pudumi taregoduwo mato pagae. Awu ime pobedu doge pawari nure emage.
ACT 14:12 Paulo makore boetoji dukodire ere Paulo iedo Mercúrio. Ere Barnabé iedo Júpiter.
ACT 14:13 Nou ewari Júpiter uwai mugure nou ba kurireu jokorai. Nou Júpiter uwai tadawu bari aregodure tapira doge imebo, okureboe tabo jamedu nou boe ewo nou tapira doge ekowu tomeawo ema Paulo ai, Barnabé ai tuwo tuwarido emage.
ACT 14:14 Paulo Barnabé erduware nuba nou boe eromode duji dukeje ere tugudau areia bowuje. Eregodure nou boe etoiagi.
ACT 14:15 Ekudugodure: – Tarokaba aino! Ime nure čegi nono tamogadure. Čedaregodure čewo tawie Jesus bataru pemegareuji tawo tagera ra nou tameardae pagareu piji tameartoruwo tu Pao Kurireuji. Mare paga karega. Ure rugadu. Ema koiare ure baru to, moto to, pobo maereu to, boe jamedu boe towuje.
ACT 14:16 Marigudu boe ere tumeardae tawuje tumeartoruwo taidure jiboeji.
ACT 14:17 Mare Pao Kurireu ro pemegare boei marigudu. Ure bubutudo turo pemegawo boe ere tugu boeji. Ure boe eke maku etai. Ure boe egaredo pudui rugadu.
ACT 14:18 Mare nou boe etaidure tuwariwo Barnabé Paulo emageče. Etaidure tuwo iaboe kowu tuwo maku etai.
ACT 14:19 Dukeje ia Judeu doge etaregodure Antioquia ba kurireu piji, Icônio ba kurireu piji jamedu. Ere nou boe emeardae mekido turo pegawo Pauloji. Dukodire eidore tori tabo Pauloji. Emeardaere tuie bito rugadu tori tabo dukodire ere tumugudo kororo keje toro nou ba kurireu piji.
ACT 14:20 Ča meartorure Jesus jiwuge ere bato pui taiwowo Pauloji. Ure turagojedo dukeje uture tuibagi ebo nou ba kurireu ka pugeje. Nou barogwato nou Paulo, nou Barnabé eture epiji Derbe ba kurireu ka.
ACT 14:21 Paulo, Barnabé emagore nou Derbe kejewu boe ewiagai Jesus bataru pemegareuji. Dukodire ia boe emeartorure Jesusji nono jamedu. Emagare. Dukejere Paulo Barnabé eture tuibagi Listra ba kurireu ka, Icônio moto ka. Dupijire eture Pisídia moto kejewu Antioquia ba kurireu ka pugeje.
ACT 14:22 Nono ere meartorure Jesus jiwuge emeartoru rakado. Emagore ei ekawo tugera ra tumeartorure Jesus jitu piji. Egore: – Pamode pagimijerado tu Pao Kurireuče dukeje boe rakamode pai woe awu moto keje tu jao. Mare paga karega paruduwo baruto dukodire paroino.
ACT 14:23 Nou emeartorure Jesus jiwuge eda jamedu boe kejere nou Paulo nou Barnabé ere tugeragu iagei tuwo meartorure Jesus jiwuge eimijeragedo emage. Enogwagekare nou ture tugeragu ei kejewu meriji tumagowo baruto Pao Kurireu bagai Pao Kurireu jetu pemegawo nou meartorure Jesus jiwuge eiamedu boei.
ACT 14:24 Ekodure nou Pisídia motoji dukeje etaregodure toro Panfília moto ka.
ACT 14:25 Nonore ere nou Perge kejewuge ewie Pao Kurireu bataru pemegareuji. Dukeje eture Atália ba kurireu ka.
ACT 14:26 Nou Atália pijire eture ikarereu tabo tuibagi Síria moto kejewu Antioquia ba kurireu ka. Nou Antioquia kejewu meartorure Jesus jiwuge emagere ere Paulo Barnabé etudo emaragoduwo Pao Kurireu ai. Aino ere tugirimi tuibagi pugeje. Pao Kurireu jetu pemegare ei etaregodu pemegawo tuibagi.
ACT 14:27 Etaregodure Antioquia ba kurireu ka dukeje ere nou meartorure Jesus jiwuge edo bato pui tureadoduwo nuba Pao Kurireu rore pudui duji. Pao Kurireu ure boedo turugadu boe tuginaiwugei emeartorure Jesusji dukodi.
ACT 14:28 Nono edu raire nono nou meartorure Jesus jiwugebo rugadu.
ACT 15:1 Ia Judéia kejewuge etaregodure Antioquia ba kurireu ka. Ere meartorure Jesus jiwuge erduwado. Egore: – Pao Kurireu ure maku Moisés aiwu bakaru akore boe ewo tuwaga oto biri kado. Boe emodukare tuwaga oto biri kado dukeje Pao Kurireu umodukare ekinorudo.
ACT 15:2 Paulo Barnabé emeardaekare nono emeardae mogadure. Dukodire emago rakare ei. Mare emeardae kodukare pu meardae kodaji. Nono nou meartorure Jesus jiwuge eimijerage ere tumeardae tawuje Paulo Barnabé etuwo Jerusalém ka ia Antioquia kejewu meartorure Jesus jiwugebo emagowo nou uture Jesus bataru tabowugei, emagowo nouia meartorure Jesus jiwuge eimijeragei jamedu. Nonore erduwamode nuba turomode nou Judéia kejewuge emeardaeji.
ACT 15:3 Dukodire nou Antioquia kejewu meartorure Jesus jiwuge ere Paulo Barnabé etudo Jerusalém ka. Ekodure jii toro dukeje etaregodure Fenícia moto ka. Ere nou moto kejewuge ewie nuba turore nou boe tuginaiwugei emeartoruwo Jesusji jamedu. Nou moto kejewu meartorure Jesus jiwuge emeardure nou inoduji dukeje egaregodure pudui. Paulo, Barnabé etaregodure Samaria moto ka jamedu turore aino dutabo jamedu. Nou Samaria moto kejewu meartorure Jesus jiwuge egarere pudui jamedu.
ACT 15:4 Nou Paulo nou Barnabé etaregodure Jerusalém ka dukeje nou meartorure Jesus jiwuge ekimadure ebo. Nou eimijerage, nou uture Jesus bataru tabowuge ekimadure ebo jamedu. Nono Paulo makore ei tugoduie toro boe tuginaiwuge etae Pao Kurireu ro pemegaie nou boe tuginaiwugei jamedu.
ACT 15:5 Ia meartorure Jesus jiwuge ere tudawuje fariseu doge epiji tumeartoruwo Jesusji marigudu. Nouge etaidure tuwo tumeardae maku nou boe tuginaiwuge etai. Emeardure nou Paulo bataruji dukeje ere turagojedo tumagowo jamedu. Egore: – Moisés ure maku čenaiwu bakaru koiare ure awu boe tuginaiwuge edo tuwaga oto biri kado nono čero mogadure. Eromodukare aino dukeje emeartorure Jesus jiwuge emodukare emage. Emeartoruwo čeno bakaru jamedu boeji meartorure Jesus jiwugewo emage.
ACT 15:6 Nou uture Jesus bataru tabowuge, nou meartorure Jesus jiwuge eimijerage ere bato pui tumagowo pui nou emeardaeji.
ACT 15:7 Emago raire pui dukeje Pedro ure turagojedo. Akore: – Imedage nure tagi. Marigudu Pao Kurireu ure tugeragu i tabiji imagowo Jesus bataru pemegareuji awu boe tuginaiwuge ewiagai, emeartoruwo tu Jesusji jamedu.
ACT 15:8 Pao Kurireu jorduware boe eiamedu boe emeardaeji. Emare aidure nou boe tuginaiwugei nono taidumoga pai dumogadure. Ure tuwari maku etai nono ure maku pagai dumogadure dukodire parduware aidure ei duji.
ACT 15:9 Pao Kurireu ukare turo tuginaiwudo ei. Rore ei nono turore pai dumogadure. Emeartorure Jesusji dukodire biagodure ero pegareu piji nono turore pai dumogadure.
ACT 15:10 Ča pagawo Pao Kurireu korigo. Pagawo ia paroia maku boe tuginaiwuge etai. Jao pawobe eroiwakare tuwo nou paroia towuje. Ča aino pagi paroiwakare pawo nou paroia to jamedu. Pagawo maku etai.
ACT 15:11 Pameartorumode Pagimijera Jesusji dukeje emare umode paginorudo taidu tabo. Pagi pamodukare paginorudo ia paro pemegareu tabo.
ACT 15:12 Nono Barnabé, nou Paulo ere nou boe ewie nuba boere ei eture nouia moto ka dukeje. Egore Pao Kurireu ro rakaie, ro kurie nou boe tuginaiwugei. Nou boe edukiorore tuwiapaga tabo nou Paulo, nou Barnabé ewadaruji.
ACT 15:13 Ere tuwadaru akedudo dukeje Tiago makore tumeardaeji jamedu. Akore: – Tawiapagado iwadaruji. Imedage nure tagi.
ACT 15:14 Pedro ure pawie nuba Pao Kurireu rore tuwo tugeragu nouia boe tuginaiwugei emeartoruwo pudui uwobewo emage.
ACT 15:15 Ia mariguduwuge makore Pao Kurireu bataru jiwuge ewadaru ure nono nou Pedro bataru mogadure jamedu. Ere Pao Kurireu bataru bu bapera keje.
ACT 15:16 Akore: – Tagimijera nure imi. Imire imode boe kurireugedo tagi pugeje nono tare tagimijera Davi apo dumogadure. Imode tawai jamedu boe epemegado pugeje tago moto keje tawo tagirimi moto jamedu boe piji tago moto ka. Imode taragado pugeje.
ACT 15:17 Dukeje nouia moto kejewuge etaregodumode itae. Nou ire ikeragu jiwuge boe tuginaiwuge etaregodumode itae jamedu.
ACT 15:18 Pao Kurireu nure imi. Marigudu rugadu ire boe ewie rugadu. Ainore iromode duji.
ACT 15:19 Tiago mako kimore: – Imeardaere pagawo nou meartorure Jesus jiwuge boe tuginaiwuge erodo nono parore jiboeji.
ACT 15:20 Pawo ia atugoreboe maku etai. Pamagowo ei ekawo ia makudure santo doge etaiwu bope doge eke kowuje. Ime eribarikawo tumugukare apowu aremei. Areme eribarikawo tumugukare apowu imei. Ekawo bukigu kogure itoru kajejewu barogo ko. Ekawo barogo ku kowuje jamedu.
ACT 15:21 Boe eiamedu boe erduware nou Pao Kurireu ure maku Moisés aiwu bakaruji. Boe etaiwore ji ture bato puiwu bai doge emagare dutada.
ACT 15:22 Dukejere nou uture Jesus bataru tabowuge, nou boe eimijerage, nou meartorure Jesus jiwuge eiamedu boe emeardaere tuwo tugeragu imei tuwo etudo Paulo apo Barnabé apo toro Antioquia kejewuge meartorure Jesus jiwuge etae. Ere tugeragu ime pobedu dogei. Emeartoru rakare Jesusji rugadu. Ia iere Judas. Iere Barsabás jamedu. Nou metia iere Silas.
ACT 15:23 Ainore nou boe ere ia atugoreboe pemegado tuwo maku nou Antioquia kejewuge ewagai nou ime pobedu dogebo. Ainore nou atugoreboe ure. Akore: – Uture Jesus bataru tabowuge nure čegi. Meartorure Jesus jiwuge nure čegi. Čenure awu atugoreboe maku Antioquia kejewuge etai, Síria moto kejewuge etai, Cilícia moto kejewuge etai. Judeu doge karegure tagi mare tameartorure Jesusji dukodire čewobe nure tagi. –
ACT 15:24 Ia čewobe eture tagae dukeje etaidure tuwo tumeardae maku tagai. Mare čegare nou emeardae maku etai. Nou emeardae koiare ure tagiarigo ure tamororamagadudo.
ACT 15:25 Mare čere bato pui woe čewo čemeardae tawuje. Dukodire čenure awu ime etudo toro čewadaru tabo tagae. Etaregodumode pameardu kurire jiwu pamedia Paulo apo, pamedia Barnabé apo jamedu.
ACT 15:26 Emaragodure Pao Kurireu ai dukeje boe pegare ei rugadu. Boe ere tori to ei tuwo ewido mare ewikare.
ACT 15:27 Ča nouia čere etudowu tagaewu imedu iere Judas. Nou metia iere Silas. Emagere emode tawie čewadaruji, awu čere bu bapera kejewu čewadaruji rugadu.
ACT 15:28 Čewo tawie. Tagaba makudure santo doge etaiwu bope doge eke kowuje. Tagaba barogo ku kowuje. Tagaba bukigu kogure itoru kajejewu barogo ko. Taeribarikaba tamugukare apowu aremei. Taeribarikaba tamugukare apowu imei. Taromodukare nou ro pegareuji dukeje boe pemegamode tai rugadu. Pao Kurireu Uwari ukare ia Judeu doge ero maku tagai tarokawo ji. Ainore čemeardaere jamedu. Čedaidure boe pemegawo tai. Kodire čere tawie. Ča urugadureu.
ACT 15:30 Ča nou ime pobedu doge eture toro Antioquia ba kurireu ka nou atugoreboe tabo. Toro nou meartorure Jesus jiwuge eiamedu boe ere bato pui nou ime pobedu dogebo. Nou ime ere nou atugoreboe maku etai.
ACT 15:31 Etaiwore ji dukeje egarere pudui rugadu. Nou atugoreboe ure nou ekiarigodu barigu epiji.
ACT 15:32 Nou Judas, nou Silas makore Pao Kurireu bataru jiwuge nure emage. Dukodire emago raire nou meartorure Jesus jiwugei tuwo emeartoru rakado tuwo emeardae pemegado.
ACT 15:33 Edu raire nono nou boe dogebo. Nou Antioquia kejewu meartorure Jesus jiwuge etaidu pemegare ei. Nono ere tuwadaru pemegareu maku etai tuwo nou ime pobedu doge edo tugirimi tuibagi nou uture Jesus bataru tabowuge etae Jerusalém ka.
ACT 15:35 Mare Paulo utukare. Rakoje raire nou Antioquia ba kurireu keje Barnabé apo. Iagebo ere boe erduwado Pagimijera Jesus jiboeji. Emago pemegare ji rugadu boe eiamedu boe emearduwo.
ACT 15:36 Ia meri keje Paulo makore Barnabeji. Akore: – Paduwo toro nou pamagore Pagimijera bataru kejewu boe eda jamedu boe ka parduwo meartorure Jesus jiwugei nono, parduwawo nuba boere nou pamedagei.
ACT 15:37 Barnabé aidure João Marcos utuwo pudabo jamedu.
ACT 15:38 Mare Paulo aidukare. João Marcos uture ebo boetoji dutabo nou João Marcos ure tugera ra epiji. Panfília moto keje ure tugera ra epiji. Ekare tumaragodae iado mare ure tugera ra epiji dukodire Paulo aidukare utuwo pudabo pugeje.
ACT 15:39 Paulo Barnabé emago rakare pui mare ekare tumeardae tawuje. Dukodire ere tugera ra pubiji. Barnabé uture João Marcos apo toro Chipre moto ka ikarereu tabo.
ACT 15:40 Paulo ure tugeragu imedu Silasji tuduwo apo. Nou Antioquia kejewu meartorure Jesus jiwuge emagore Jesus bagai eparu tabo Jesus ro pemegawo ei dukejere eture.
ACT 15:41 Eture meartorure Jesus jiwuge eiamedu boe etae Síria moto ka, Cilícia moto ka. Ere nou meartorure Jesus jiwuge emeartoru rakado rugadu.
ACT 16:1 Paulo uture Derbe ba kurireu ka. Uture Listra ba kurireu ka. Listra kejere ia meartorure Jesus jiwu mugure. Iere Timóteo. Timóteo uče meartorure Jesusji jamedu. Judeu nure ema. Mare Timóteo uo Grego nure ema.
ACT 16:2 Nou Listra kejewu meartorure Jesus jiwuge eiamedu boe emago pemegare nou Timóteo rore jiboeji. Icônio kejewu meartorure Jesus jiwuge emago pemegare Timóteo rore jiboeji jamedu.
ACT 16:3 Paulo ure Timóteo baka oto biri kado nono Judeu doge ero mogadure Judeu doge emago pegakawo ji. Uo Judeu karegure ema dukodire boture dukeje uče ukare Timóteo baka oto biri kado. Paulo aidure Timóteo utuwo pudabo makowo Pao Kurireu bataruji Judeu doge ewiagai jamedu.
ACT 16:4 Ča eture. Ere nou Jerusalém kejewuge ewadaru tadawu atugoreboe maku nou meartorure Jesus jiwuge eiamedu boe etai. Enogituware ei emeartoruwo nou atugoreboe kejewu bataruji.
ACT 16:5 Dukodire nou meartorure Jesus jiwuge emeartoru rakare Jesusji pugeje. Meri jamedu boeji emagagodure rugadu.
ACT 16:6 Eture Frígia motoji, Galácia motoji mare Pao Kurireu Uwari ure tumeardae maku etai etukawo Ásia moto ka emagokawo Pao Kurireu bataruji nono.
ACT 16:7 Etaregodure Mísia moto ka dukeje etaidure tuduwo Bitínia moto ka jamedu. Mare Pao Kurireu Uwari ure tugeragu ei etukawo toro.
ACT 16:8 Dukodire eture Mísia moto piji toro Trôade ba kurireu ka.
ACT 16:9 Etaregodure toro dukeje nou boečoji Paulo jordure iaboeji. Ure nono boe uniau mogadure. Jordure ia Macedônia kejewu imeduji. Rakojere duji. Makore nou Paulo bagai. Akore: – Mato Macedônia moto ka čedae tawo tagera maku čenai.
ACT 16:10 Paulo jordure nou inoduji dukodire čerduware Pao Kurireu aidure čemagowo Jesus bataru pemegareuji nou moto kejewuge ewiagai jamedu. Dukeje čere čegera pemegado čei čeduwo Macedônia moto ka.
ACT 16:11 Čedure ikarereu tabo Trôade piji toro Samotrácia moto ka. Nou barogwato čedaregodure Neápolis ba kurireu ka.
ACT 16:12 Neápolis pijire čedure awaraji toro Filipos ba kurireu ka. Nou Filipos ba kurireu mugure Macedônia moto keje. Romano doge ere nou Filipos ba kurireu rakojedo. Čedukare nou ba kurireu piji kuri je.
ACT 16:13 Sábado meriji čedure poborereu okwa ka. Puredure nou ba kurireuji. Čemeardaere Judeu doge emoduie bato pui nono tumagowo baruto. Čere čemugudo nono pobo okwai. Čemagore ia aremei nono.
ACT 16:14 Ia aredu iere Lídia. Aregodure Tiatira ba kurireu piji tuwo boe ekudau areia pemegareu maku diero bagai. Nou aredu ure tubu jodo tumago pemegawo Pao Kurireuji tu tu je. Dukodire Pao Kurireu ure nou aredu jorduwado Paulo bataruji meartoruwo Jesusji.
ACT 16:15 Dukodire ao pegododure. Nou rakojere uwai tadawuge eiamedu boe etao pegododure jamedu. Dukeje makore čei. Akore: – Tameardaere imeartorure Jesusji rugadu dukodi mato taragojewo iwai tada. Akore aino dukodire čebadure uwai tada rugadu.
ACT 16:16 Ia meri keje čedure boe emagore baruto kejewu bai ka dukeje čedaregodure ia nogwaredu togi. Nou nogwaredu maragodure ia ime etai. Ia bope meture nou nogwaredu tada dukodire jorduware nuba boemode boei. Nou nogwaredu jorduware boe jameduji. Makore jiboe jeture pudui tu tu je. Dukodire boe ere nou bataru boe morido. Ure tugeragu diero kurireuji tugimijerage enoče.
ACT 16:17 Nono meri raire nou nogwareduji uture Paulo rekodaji dutabo. Kudugodure jamedu. Akore: – Awu ime emaragodure baru tadawu Pao Kurireu ai. Emage enure boe ewie nuba boe eromode tuwo činorudo.
ACT 16:18 Meri raire ji rore aino duji dukejere Paulo korigodure ji. Dukodire ure tuie kirimi togi. Makore nou bopeji. Akore: – Jesus Cristo ie tabore inagoino ai. Ema koiare atawuje nou nogwaredu piji. Ča nou bope ure tudawuje nou nogwaredu piji rugadu.
ACT 16:19 Nou maragodure aiwu ime erduware nou inoduji dukeje ekorigodure rugadu. Nou nogwaredu makomodukare pugeje nuba boemode duji dukodire umodukare tugeragu dieroji pugeje enoče. Dukodire nou ime ere tugeragu Pauloji, Silasji. Eture ebo toro nou ba kurireu kejewu boe eimijerage etae nou ba kurireu oia ka.
ACT 16:20 Etaregodure nou Romano doge eimijerage etae dukeje egore: – Awu ime Judeu doge nure emage. Ero pegare woe awu ba kurireu keje.
ACT 16:21 Enure boe ero mekido paroia piji ero pegawo. Romano doge nure pagi. Pagaidukare nou eroiaji. Paromodukare nono ero mogadure.
ACT 16:22 Boe eiamedu boe emago pegare aino nou Pauloji nou Silasji. Dukodire nou boe eimijerage ere nou Paulo nou Silas ekudau areia tawuje epiji. Emagore tugobaigaregei ewo boeto ei.
ACT 16:23 Tugobaigarege ere boeto ei dukeje ere ewarigu baičoreuto. Emagore nou baičoreu tadawu boe eimijeraji uwo ekogudo rugadu.
ACT 16:24 Nou baičoreu tadawu boe eimijera meardure ewadaruji dukeje ure Paulo Silas etugu nou baičoreu tadawu baičoreu roguto. Ure ewure ekogudo ira kurireu tabo.
ACT 16:25 Ari aregodure baru oia ka dukeje Paulo Silas eragodure Pao Kurireu bataruji. Emagore baruto Pao Kurireu bagai. Nouia baičoreu tadawu ro pegareuge ewiapagare ei.
ACT 16:26 Rore puku ei moto magadugodu rakare duji. Ure nou baičoreu magadudo jamedu. Ča nou baičoreu bai poro rugadu boe ere tuiado. Nou corrente ere tugiwuje nou ro pegareuge eiamedu boe epiji.
ACT 16:27 Nou baičoreu tadawu boe eimijera jetadure dukeje jordure nou bai poro rugadu boe jadodure duji. Meardaere nou baičoreu tadawuge eiamedu boe ere marigudu. Dukodire ure tugeragu to tariga kurireuji. Ure tuiago tuwido tabo.
ACT 16:28 Mare Paulo kudugodure ae ukawo tuwido. Akore: – Akaba awido. Čeiamedu boe čeragoje kimore woe baičoreu tada.
ACT 16:29 Nou baičoreu tadawu boe eimijera makore jorugu bagai. Dutabore ure turemo Paulo ae. Ure tubu jodo moto keje Paulo Silas egorai tumago pemegawo ei.
ACT 16:30 Nono ure erego toro bawadu ka. Unarare ei. Akore: – Nuba iromode iwo ikinorudo?
ACT 16:31 Egore: – Ameartorudo Pagimijera Jesusji dukeje umode akinorudo. Umode awobe ekinorudo jamedu.
ACT 16:32 Dukejere emagore Pao Kurireu bataruji biagai, nou uwai tadawu uwobe ewiagai jamedu.
ACT 16:33 Nou boečoji rugadu nou baičoreu tadawu boe eimijera ure jorubo reko nou ime pobedu doge ečebaeji. Nou boečoji rugadu nou baičoreu tadawu boe eimijera ao pegododure tuwobe eiamedu boe apo.
ACT 16:34 Dukejere uture Paulo apo Silas apo toro tuwai ka tuwo enogwagedo nono tuwai keje. Ema uwobe eiamedu boe emeartorure Pao Kurireuji dukodire egarere pudui rugadu.
ACT 16:35 Nou barogwato nou Romano doge eimijerage ere tugobaigaregedo atugoreboe maku toro nou baičoreu tadawu boe eimijera bagai. Nou atugoreboe akore: – Nou ime etudo.
ACT 16:36 Dukodire nou baičoreu tadawu boe eimijera ure Paulo bie. Akore: – Pagimijerage ere atugoreboe maku mato inai. Egore iago tadudo baičoreu piji. Ča ure turugadu tawo tadawuje taduwo. Tadu pemegawo taibagi.
ACT 16:37 Mare Paulo makore nou tugobaigaregei. Akore: – Boe erdukare ia čero pegareuji. Mare jawu meriji tare boeto čei boe egai. Romano doge nure čegi jamedu! Jawu meriji tagimijerage ere čedugu baičoreuto boe egai. Mare etaidukare boe erduwawo čedure duji. Mare čeromodukare aino. Nou Romano doge eimijerage emagere etaregoduwo woe tuwo čedawuje awu baičoreu piji čeduwo pugeje.
ACT 16:38 Nou tugobaigarege ere tugimijerage ewie nou Paulo bataruji rugadu. Nou eimijerage emeardure Paulo Silas Romano dogere emage duji dukeje epagudugodure rugadu.
ACT 16:39 Dukodire eture toro etae. Eimadure ebo dukeje ere etawuje baičoreu piji. Nono emagore ei etuwo nou ba kurireu piji.
ACT 16:40 Mare Paulo Silas ere tudawuje nou baičoreu piji dukeje eture nou aredu Lídia uwai ka nou meartorure Jesus jiwuge etae. Emagore nou tumedagei tuwo emeartoru rakado dukeje eture. Mare imi itukare ebo.
ACT 17:1 Paulo Silas eture Anfípolis ba kurireu ka nou pijire eture toro Apolônia ba kurireu ka. Nono etaregodure Tessalônica ba kurireu ka. Ia Judeu doge ere bato puiwu bai mugure nou ba kurireu keje.
ACT 17:2 Paulo uture nou bai ka tu tu je Sábado meriji turo mogadure. Sábado merire pobe metia bokware akoe tumago tabo nou boei dukeje. Nou boe emagore ji jamedu.
ACT 17:3 Paulo ure erduwado Pao Kurireu bataruji. Nou Pao Kurireu bataru akore nou umode boe ekinorudowu bimoduie dukeje jewodumoduie pugeje. Paulo akore: – Inure tawie Jesus umode boe ekinorudowu nure ema duji.
ACT 17:4 Iage emeartorure Paulo bataruji dukodire ere bato pui Paulo Silas etae. Ia boe eimijerage areme emeartorure jamedu. Emagare. Ia mako pemegare Pao Kurireu jiwu Grego doge emeartorure jamedu. Emagare jamedu.
ACT 17:5 Mare ia Judeu doge erdu pegare dukodire ere tugeragu ro pegareugei awara piji tuwo ero pegado. Ero pegare nou ba kurireuji rugadu. Ere turemo ia baito turaga tabo. Nou uwaire bai čewu iere Jasom. Meartorure Jesus jiwu nure ema. Nou ro pegareuge etaiwore Paulo bagai, nou Silas bagai.
ACT 17:6 Erdukare ei dukeje ere tugeragu nou Jasomji turaga tabo. Ere tumugudo keje kororo je ia meartorure Jesus jiwugebo toro nou ba kurireu tadawu boe eimijerage etae. Egore: – Nou ime ero pegare rugadu moto jamedu boe parugajeje. Ča etaregodure woe jamedu.
ACT 17:7 Awu Jasom emare ure tugera upodo ebo tuwai keje. Dukodire eiamedu boe emeartorukare pagimijera kurireu Roma tadawu Cesaji pugeje. Egore tumeartoruie ia tugimijera kurireuji. Nou ekimijera iere Jesus.
ACT 17:8 Nou tuwadrarodu tabore ere boe ekorigo, ere nou ba kurireu tadawu boe eimijerage ekorigo rugadu.
ACT 17:9 Nou boe eimijerage emagore nou Jasomji nou iagei ewo turo morido diero tabo etawujeduwo. Ere morido dukeje eture.
ACT 17:10 Boečodure dukeje nou ba kurireu tadawu meartorure Jesus jiwuge ere Paulo Silas etudo Beréia ba kurireu ka. Etaregodure toro dukeje eture Judeu doge ere bato puiwu bai ka.
ACT 17:11 Nou Beréia kejewuge ekare nono nou Tessalônica kejewuge emogadure. Beréia kejewuge etaidure tuiorduwawo rugadu. Ewiapaga pemegare Paulo bataruji tiegarere puduidu tabo. Meri jamedu boeji etaiwore Pao Kurireu bataruji tuiorduwo Paulo bataruji nono boe jokodumode dubagai.
ACT 17:12 Iage emeartorure Jesusji rugadu. Emagare. Oe kurireu areme emeartorure jamedu. Emagare. Grego doge ime emeartorure jamedu. Emagare jamedu.
ACT 17:13 Mare toro nou Tessalônica ba kurireu keje Judeu doge emeardure Paulo rakojeie Beréia keje duji. Emeardure Paulo uie boe ewie Pao Kurireu bataruji nono duji. Dukodire nou Judeu doge etaregodure bagai turo pegawo Pauloji pugeje. Ere nou Beréia kejewu boe ekorigo Pauloji. Ere boe emagado pugeje turo pegawo Pauloji pugeje.
ACT 17:14 Ča je nou meartorure Jesus jiwuge ere Paulo utudo nou ro pegareuge epiji. Mare Silas, Timóteo eragoje kimore Beréia keje.
ACT 17:15 Nou eture Paulo apowu ime eture apo Atenas ba kurireu ka dukeje ere tugirimi tuibagi tuwai ka. Paulo ure tuwadaru maku etai ewo Silas Timóteo ewie etuwo kuri aino mato tuwagai.
ACT 17:16 Nou Atenas ba kurireu kejewuge emeartoru rakare tuwai tadawu santo dogei rugadu. Paulo upagare Silas bagai, Timóteo bagai dukeje jordure nou santo doge eiamedu boei. Emagare rugadu. Dukodire Paulo kiarigodure.
ACT 17:17 Dukodire makore Judeu dogei nou ere bato puiwu bai ja tada tuwo emeartorudo tu Jesusji. Makore nou boe tuginaiwugei jamedu. Nou boe tuginaiwuge eku kidugodure Pao Kurireuji tumago pemegawo ji. Mare Paulo makore ei tuwo emeartorudo Jesusji. Dukeje makore nou ba kurireu oiadada jamedu boe eiamedu boei tuwo emeartorudo tu Pao Kurireuji.
ACT 17:18 Ia jorduwareuge emago raire Pauloji jamedu. Epicureu nure iage. Estóico nure iage. Iage egore: – Awu Paulo jorduwa bokwa. Očarore tumago tabo tuwadaruji. Iage egore: – Makonure čewiagai ia boe tuginaiwuge eno Santo dogei. Paulo makore nou boe ewiagai Jesus bataru pemegareuji dukodire egoino. Akore Jesus jewoduie pugeje. Mare emeartorukare dukodire egoino Paulo makore jiboeji.
ACT 17:19 Dukodire ere Paulo reko toro nou ba kurireu kejewu boe eimijerage etae. Edure kejewu bai iere Areópago. Nou boe eimijerage egore: – Čedaidure čerduwawo nou akagoino jiwu awadaru maiwuji.
ACT 17:20 Marigudu čemeardukare nou inodu awadaruji. Čedaidure awo čerduwado nuba awadarure.
ACT 17:21 (Nou Atenas kejewuge, nouia rakojere nou ba kurireu kejewuge emago raire pui bakaru maiwu jamedu boeji.)
ACT 17:22 Nono Paulo ure turagojedo nou ba kurireu kejewuge boe eimijerage egai. Akore: – Tagire Atenas kejewuge meartorureuge nure tagi taro jamedu boe tabo.
ACT 17:23 Ikodure tago ba kurireuji dukeje iordure tameartorure jiwu santo doge ewai rogu jamedu boeji bawadu keje. Nono iordure ia bairoguji pugeje. Nou bairogu keje ia bataru padure. Akore, “Parduwakare Jiwu Pao Kurireu Uwai Rogu Reo.” Ča tare tabu jodo tamago pemegawo tarduwakare jiboeji. Mare imire imode tarduwado Pao Kurireuji.
ACT 17:24 Pao Kurireu ure moto to. Ure boe jamedu boe towuje. Baru tadawuge eimijera nure ema. Moto kejewuge eiamedu boe eimijera kurireu nure ema. Mugukare ia ime ere towu bai ja tada.
ACT 17:25 Iaboe bokwakare ai jii aino. Emare ure paewodudo. Emare ure ake maku pagai. Emare ure boe jamedu boe maku boe etai.
ACT 17:26 Emare ure imedu towuje. Nou imedu koiare ure boe eiamedu boe boture. Emare ure boe etaodo moto jamedu boe parugajeje. Pao Kurireu emare ure tumeardae tawuje tuwo ewodure kejewu meri udo turugadu, tuwo ewire kejewu meri udo turugadu, tuwo etudo tu taidure jiwu moto ka emuguwo nono.
ACT 17:27 Pao Kurireu rore aino boei etaiwowo tuwagai. Etaiwomode bagai dukeje iage erdumode ji. Ma čare Pao Kurireu rakoje puredure tu pai.
ACT 17:28 Ia jorduware Pao Kurireu bataru jiwu akore, “Pao Kurireu koiare ure paewodudo. Pao Kurireu koiare ure pamerudo.” Ia tagi mako motureuge nure tagi. Tagagore, “Pao Kurireu ore nure pagi jamedu.”
ACT 17:29 – Ča Pao Kurireu ore mode pagi dukeje parduwamode ji. Ukare nono ia imedu ure toboe mogadure. Ukare nono tori kuieje mogadure. Ukare nono prata mogadure. Ukare nono ia tori mogadure.
ACT 17:30 Marigudu boe ere tuwaire etowuje erduwakare Pao Kurireuji kodi mare Pao Kurireu ukare edo nou turo morido. Mare aino ča makore boe eiamedu boei ewo tugera ra turo pegareu boe piji.
ACT 17:31 Ure boe pagado ia meri ka rugadu. Nou meriji rugadu aiwomode boe eiamedu boe eroji. Pao Kurireu ure tugeragu jiwu umode nou boe eiamedu boe edo turo pegareu morido. Pao Kurireu ure nou ture tugeragu jiwu jewodudo pugeje boe eiamedu boe erduwawo ji, boe eiamedu boe erduwawo nou Pao Kurireu ure tugeragu jiwu umode boe eiamedu boe edo turo pegareu morido rugadu.
ACT 17:32 Paulo makore ia boe jewoduie dukodire iage enogwarigodure ji emeartorukare nou readodaeji kodi. Mare iage egore: – Čedaidure čemearduwo awadaruji pugeje ia meri keje.
ACT 17:33 Nono Paulo uture nou boe eimijerage epiji.
ACT 17:34 Ia boe doge eture apo. Emeartorure Jesusji. Ia meartorure jiwu iere Dionísio. Boe eimijera nure ema. Ia aredu meartorure jiwu jamedu. Iere Damáris. Ia boe doge emeartorure Jesusji jamedu.
ACT 18:1 Nono Paulo uture Atenas ba kurireu piji tuduwo toro Corinto ba kurireu ka.
ACT 18:2 Nonore jordure Judeu ia imeduji. Iere Áquila. Boture Ponto moto keje. Aino maigodu aregodure Itália piji toreduje apo. Oreduje iere Priscila. Roma kejewu boe eimijera kurireu makore Judeu dogei eiamedu boe ewo tudawuje Roma ba kurireu piji. Nou boe eimijera kurireu iere Cláudio. Dukodire awu Áquila ure tudawuje Roma piji mato Corinto ba kurireu ka toreduje apo. Nono Paulo uture etae.
ACT 18:3 Rakojere ebo. Maragodure ebo. Emaragodure tapira biriji. Dutabore ere bai rogu to boe ewaiče. Ere nou bai rogu maku diero bagai tuwo tugeragu tuge roguji tugudau areia roguji.
ACT 18:4 Sábado meri keje tu tu je Paulo uture Judeu doge ere bato puiwu bai ka. Makore nou Judeu dogei nono emeartoruwo Jesusji. Makore nou Grego dogei emeartoruwo jamedu.
ACT 18:5 Ča Silas, nou Timóteo etaregodure Macedônia moto piji nou Paulo ae dukeje Paulo ure tugera ra tumaragodae piji. Makore Pao Kurireu bataruji boe ewiagai tu rugadu. Aidure tuwo Judeu doge emeartorudo Jesusji, umode boe ekinorudowu nure ema kodi.
ACT 18:6 Mare etaidukare tumeartoruwo bataruji. Emago pegare ji. Dukodire Paulo ure tugudau areia jukodo tuwo moto urugudu rawuje tugudau piji. Ainore ure nou Judeu doge erdudo ture tugera ra tubiji rugadu duji. Makore ei rugadu. Akore: – Tameartorumodukare dukeje tagi rugadu tamode tawarigu boe pegareuto rugadu. Imi karega. Tamodukare taginorudo. Ire tawie. Aino imagomodukare tai pugeje. Imagomode tu boe tuginaiwugei.
ACT 18:7 Dukodire Paulo uture epiji tumuguwo ia boe tuginaiwu imedu uwai tada. Iere Tício Justo. Nou Tício Justo ure tubu jodo tumago pemegawo Pao Kurireuji tu tu je. Uwai mugu puredure Judeu doge ere bato puiwu kejewu baiji.
ACT 18:8 Nou Judeu doge ere bato puiwu bai tadawu boe eimijera meartorure Jesusji. Ure tugimijerado ema rugadu. Iere Crispo. Uwobe eiamedu boe emeartorure jamedu. Ia Corinto ba kurireu kejewuge emeardure nou Pao Kurireu bataruji dukeje emeartorure jamedu. Dukejere etao pegododure jamedu.
ACT 18:9 Ia boečoji Paulo jordure iaboeji. Ure nono boe uniau mogadure. Nono Pagimijera Jesus makore ji. Akore: – Apagudukaba. Akaba akera ra amagore iwadaru jitu piji.
ACT 18:10 Iragojere akabo. Ia boe pegareuge emoka turo pegado ai. Iwobe emagare awu ba kurireu keje.
ACT 18:11 Dukodire Paulo rakoje raire nou ba kurireu keje. Jorure mito ji nono, ari oto padure seis ji nono pugeje ture boe erduwado Pao Kurireu bataruji duji.
ACT 18:12 Roma kejewu boe eimijera kurireu ure Gálio utudo Acaia moto kejewuge etae eimijerače. Dukejere ia Judeu doge ere bato pui turo pegawo Pauloji. Ere tugeragu ji. Eture apo nou boe eimijera Gálio ae.
ACT 18:13 Egore: – Awu imedu makore boei ewo turo udo tuginai tuwo tubu jodo tumago pemegawo Pao Kurireuji čero piji. Dukodire meartorure awu imedu jiwuge etaidukare tumeartoruwo Roma kejewu boe eimijeraji pugeje.
ACT 18:14 Paulo makoiago nou Gálioji mare nou Gálio makore nou Judeu dogei. Akore: – Tagare iwudugugo nou taro keje. Awu imedu ro pega bokware. Ro pegamode dukeje itaiwomode ji. Mare ro pegare jiboe bokware.
ACT 18:15 Tu tago bakaru koiare ure tagarego woe. Taro jire tagagoino. Roma kejewuge ero karega. Dukodire tagi tarduwamode nuba taromode ji. Imire itaiwomodukare ji.
ACT 18:16 Dukodire ure etudo tuwai piji.
ACT 18:17 Dukejere ere tugeragu ia imeduji. Iere Sóstenes. Ere boeto ji nou Gálio rakojere tadawu bai meki. Emare Judeu doge ere bato puiwu bai tadawu boe eimijera nure ema. Mare nou Gálio aiwokare nou ero pegareuji.
ACT 18:18 Paulo rakoje raire nou Corinto kejewu meartorure Jesus jiwugebo. Aidure tuduwo Síria moto ka Priscila apo Áquila apo jamedu. Dukodire uture pugeje nou Corinto kejewuge tumedage epiji. Etaregodure Cencréia ba kurireu ka dukeje Paulo ure tao kado. Marigudu makore turomoduie aino duji Pao Kurireu biagai. Dukodire ukare tao kado boe erduwawo tumagore aino Pao Kurireu jituji. Mare kuri aino ure tumagore jiwu turo iado dukodire ure tao kado.
ACT 18:19 Eture Cencréia piji ikarereu tabo. Nono etaregodure Éfeso ba kurireu ka. Paulo uture nou Judeu doge ere bato puiwu bai ka. Makore Judeu dogei nono.
ACT 18:20 Etaidure Paulo rakoje raiwo pudabo mare Paulo aidure tuduwo kuri je.
ACT 18:21 Ure ewie. Akore: – Pao Kurireu aidumode dukeje itaregodumode mato pugeje tagae. Dukejere uture Éfeso piji ikarereu tabo pugeje. Mare Áquila Priscila ekodukare apo pugeje. Emugure nono Éfeso ba kurireu keje.
ACT 18:22 Paulo aregodure Cesaréia ba kurireu ka Judéia moto ka. Dukeje uture Jerusalém ka. Nonore uture meartorure Jesus jiwuge etae tugimaduwo ebo. Dupijire uture Antioquia ba kurireu ka Síria moto ka.
ACT 18:23 Paulo rakoje raire nou Antioquia ba kurireu keje. Dukejere uture pugeje toro Galácia moto ka, Frígia moto ka tuwo nou moto kejewu meartorure Jesus jiwuge emeartoru rakado jamedu.
ACT 18:24 Paulo rore aino dukeje ia imedu aregodure Éfeso ba kurireu ka. Judeu nure ema. Iere Apolo. Boture Alexandria ba kurireu keje Egito moto keje. Emare mako pemegare. Jorduware rugadu Pao Kurireu bataruji.
ACT 18:25 Boe ere nou Apolo jorduwado Jesus roji. Dukodire makore boe ewiagai tuwo erduwado Jesus roredu jiboeji tiegare tabo. Mare Apolo jorduwakare meartorure Jesus jiwuge etao pegododure duji. Jorduware tu João Batista ure boe etao pegodo duji.
ACT 18:26 Ča Apolo pogurukare tumagowo Pao Kurireu bataruji Judeu doge ewiagai ere bato pui bai tada. Priscila, Áquila emeardure Apolo bataruji dukeje emagore ji utuwo pudabo toro tuwai ka. Ewai tadare ere Apolo jorduwado Pao Kurireu ro remawuji.
ACT 18:27 Dukejere Apolo ure tumeardae tawuje tuduwo Acaia moto ka. Nou Éfeso kejewu meartorure Jesus jiwuge ere atugoreboe pemegado nou Acaia moto kejewuge ewagai tuwo erduwado nou Apoloji, ewo tugera upodo apo. Ča uture. Aregodure toro dukeje Apolo ure tugera maku nou meartorure Jesus jiwuge etai rugadu. Pao Kurireu ro pemegare ei emeartoruwo Jesusji rugadu.
ACT 18:28 Nou Apolo ure Judeu doge erduwa bokwado tuwadaru pemegareu tabo. Boe erdure nou Apolo roji. Pao Kurireu bataru tabore Apolo ure boe erduwado Jesus umode boe ekinorudowu nure ema rugadu duji.
ACT 19:1 Apolo rakojere Corinto ba kurireu keje dukeje Paulo uture Ásia moto ka taregoduwo Éfeso ba kurireu ka. Aregodure dukeje Paulo jordure ia meartorure Jesus jiwugei.
ACT 19:2 Unarare ei. Akore: – Tameartorure Jesusji? Pao Kurireu Uwari ure turawuje tagae? Egore: – Čerduwakare nou akagore jiwu Pao Kurireu Uwariji.
ACT 19:3 Paulo akore: – Tagao pegododure mare ioguduba bataru koiaba tagao pegododure? Egore: – Čemeartorure João Batista bataruji dukodire čedao pegododure nono João Batista rore boei dumogadure.
ACT 19:4 Paulo akore: – Boe ere tugera ra turo pegareu piji dukeje João Batista ure etao pegodo. Emare ure boe ewie, ure nou Judeu doge ewie, ia imedu kurireu aregodumoduie turegodaji. Makore ei emeartoruwo nou turegodajiwuji. Nou João Batista rekodajiwu Jesus nure ema.
ACT 19:5 Nou boe emeardure nou Paulo bataruji dukeje etao pegododure pugeje emeartorure Pagimijera Jesusji kodi.
ACT 19:6 Paulo ure tugera bu ewugeje dukeje Pao Kurireu Uwari ure turawuje etae. Dukodire emagore tuiorduwakare jiwu boe tuginaiwuge ewadaruji. Emagore Pao Kurireu bataruji nou boe tuginaiwuge ewiagai.
ACT 19:7 Nou ime enodo padure kejewure doze.
ACT 19:8 Paulo rakojere nou ba kurireu keje dukeje arire pobe metia bokware ji. Uture tu tu je Judeu doge ere bato puiwu bai ka tumagowo ei nono. Pogurukare tumagowo boe ewiagai. Aidure tuwo emeartorudo Jesusji rugadu, emeartoruwo Pao Kurireu ure boe eimijera kurireudo ema duji.
ACT 19:9 Mare iage emeartoru bokware. Etaidukare tumeartoruwo rugadu. Emago pegare Pagimijera Jesus ure maku boe etaiwu turoji nou boe eiamedu boe ewiagai. Dukodire Paulo uture nou boe epiji meartorure Jesus jiwugebo tuduwo imedu Tirano o escola ka. Meri jameduji makore nono nou escola tada tuwo boe emeartorudo Jesusji.
ACT 19:10 Jorure pobe ji rore aino duji. Dukodire awu Ásia moto kejewuge eiamedu boe emeardure Pao Kurireu bataruji rugadu. Judeu doge emeardure. Boe tuginaiwuge emeardure jamedu.
ACT 19:11 Pao Kurireu ure Paulo ro rakado.
ACT 19:12 Boe ere tugeragu nou Paulo ukudau areia roguji. Eture nou areia rogu tabo kogodureuge etae. Dukodire nou kogodureuge epemegagodure rugadu. Bope doge ere tudawuje iage epiji.
ACT 19:13 Ča ia Judeu doge erdure nou boe erore jiboeji. Etaidure turowo aino jamedu. Nou ure Judeu doge enomea maku Pao Kurireu aiwuge eimijera ore nure emage. Enodo padure sete. Etuo iere Ceva. Marigudu nou Ceva ore ime ere bope doge etawuje boe epiji. Erore aino tu tu je. Mare aino etaidure tumagowo Jesus ieji tuwo bope doge etawuje boe epiji. Emeartorukare Jesusji mare etaidure tumagowo Jesus ie tabo. Emagore bope dogei. Egore: – Tadawuje awu boe epiji Paulo makore jiwu Jesus ie koia.
ACT 19:15 Mare nou bope makore ei. Akore: – Iorduware Jesusji. Iorduware Pauloji. Mare iorduwakare tai. Imeartorumodukare tai jamedu.
ACT 19:16 Nou bope metu tadawu imedu ure taredo nou Ceva orei turugoduwo ei. Ure turagado ei rugadu dukodire eregodure nou imedu uwai piji. Ure etogorido. Ure ekudau areia bowuje.
ACT 19:17 Nou Éfeso ba kurireu kejewuge eiamedu boe emeardure nou inoduji dukeje epagudugodure rugadu. Ere Pagimijera Jesus ie kurido rugadu.
ACT 19:18 Ia meartorure Jesus jiwuge edure nono jamedu. Marigudu ekare boe ewie nou tumeartorure jituji. Mare aino ere boe eiamedu boe ewie tumeartorure Jesusji rugadu. Egore marigudu turo pegaie rugadu mare aino turo pegamodukaie pugeje.
ACT 19:19 Iage bari nure emage. Ere turo bu bapera keje. Mare emeartorure Jesusji dukeje etaregodure nou bapera tabo tuwo kowu tuwo nou bapera akedudo. Nou ewadaru padure kejewu bapera mori kurire rugadu. Mori oto padure kejewure cinquenta mil moeda de prata. Mare aino ere nou ture towu bapera akedudo.
ACT 19:20 Ča aino Pagimijera Jesus bataru ure taodo boe ewokwaji. Ure boe emeartorudo rugadu.
ACT 19:21 Nou inodu otobiji Paulo ure tumeardae tawuje tuduwo Macedônia moto ka, tuduwo Acaia moto ka, dukeje tuduwo Jerusalém ba kurireu ka jamedu. Akore: – Itumode Jerusalém ka dukeje itaidure ituwo Roma ba kurireu ka.
ACT 19:22 Dukejere ure tudugarege etudo tododai toro Macedônia moto ka. Ere pobe. Ia iere Timóteo. Metia iere Erasto. Mare rakoje kimore Éfeso ba kurireu keje, Ásia moto keje.
ACT 19:23 Rakoje kimo nono dukeje boe pegare meartorure Jesus jiwugei Éfeso keje.
ACT 19:24 Ia Éfeso kejewu imedu ure bairogu towuje boe emeartorure jiwu bope doge ewaiče. Maragodae nure tu ema rugadu. Nou imedu iere Demétrio. Nou ure toboe ure nono nou Éfeso kejewuge emeartorure jiwu bope uwari uwai mogadure. Nou bope aredu uwari iere Diana. Nou Diana uwai kurireu mugure nou ba kurireu keje. Nou Demétrio ure nou bairogu to prata tabo. Nou ure towu bai pigigodure. Nou Éfeso kejewuge ere diero maku nou Demétrio ai tuwo tugeragu nou ure towu bai roguji tuwariče. Dukodire nou Demétrio o diero kurire. Utugarege eno diero kurire jamedu.
ACT 19:25 Demétrio ure tudugarege edo bato pui. Makore nouia maragodure nou inodu jiwuge ewagai jamedu. Demétrio makore ei. Akore: – Tarduware pago diero kurire duji pamaragodae koia.
ACT 19:26 Mare tarduware Paulo bataruji. Ema makore boe emeartorukawo pare towu boeji pugeje, boe ewo tugera ra pare toboe piji. Unure boe emeardae mekido woe Éfeso ba kurireu keje, awu Ásia moto jamedu boe parugajeje. Boe emagare tumeartoru tabo nou Paulo bataruji.
ACT 19:27 Boe emeartorumode nou Paulo bataruji dukeje etaidumodukare awu pare towu boeji pugeje. Erdu pegamode awu pamaragodaeji. Pameartorure jiwu bope aredu uwari Diana uwai kurireu pegamode jamedu. Boe emeartorumodukare ji pugeje. Boe eiamedu boe ere tubu jodo tumago pemegawo awu bope aredu uwari Dianaji moto jamedu boe parugajeje. Mare boe emode tugera ra nou Diana uwai kurireu piji dukeje nou bai pegamode. Boe erdu pegamode paroji jamedu.
ACT 19:28 Nou boe emeardure nou inoduji dukeje ekudugodure. Egore: – Éfeso kejewu uwari Diana kurire rugadu! Pameartorumode tu ji rugadu!
ACT 19:29 Nou erore jiboe ure tumaedo nou ba kurireu jamedu boe parugajeje. Nou boe ere tugeragu Paulo metage pobedu dogei. Ia iere Gaio. Metia iere Aristarco. Macedônia kejewuge nure emage. Nou boe eture ebo toro nou mugure ba kurireu oiadadawu tuwororo okwa ka.
ACT 19:30 Paulo aidure tuduwo nou boe etae tumagowo ei mare nouia meartorure Jesus jiwuge ere togwa bu keje utukawo toro etae.
ACT 19:31 Ia nou moto kejewu boe eimijerage ere tuwadaru maku nou Paulo bagai. Metage nure emage. Emagore Pauloji utukawo toro jamedu.
ACT 19:32 Nou ba kurireu oiadadare nou boe emagare rugadu. Boe korire ei rugadu. Ere taiado puapo. Iage ekudugodure iaboeji. Nou iage ekudugodure ia tumeardae pegareuji pugeje. Erduwakare kodiba ture bato pui kodi boeji.
ACT 19:33 Ia Judeu doge ere ia imedu rakojedo nou boe egorai. Nou imedu iere Alexandre. Iage ekudugodure ji dukeje ure tugera nado edukiorowo. Aidure tumagowo nou boei.
ACT 19:34 Mare nou boe erduware Judeu nure ema duji dukeje ekudugodu rakare pugeje. Hora oto padure pobe ei tagoino dutabo. Egore: – Éfeso kejewu bope aredu uwari Diana kurire rugadu!
ACT 19:35 Ča ia Éfeso kejewu boe eimijera ure nou boe edukiorowo. Akore: – Éfeso kejewuge enure pagi. Boe eiamedu boe erduware paetu pemegare nou buture baru pijiwu tori uwaiji rugadu duji. Awu torire pawari nure ema. Pameartoru kurire ji rugadu. Awu torire iere Diana Kurireu.
ACT 19:36 Boe eiamedu boe erduware nou inoduji. Dukodire tawudugudo tagawo taro pegareu to.
ACT 19:37 Tagaregodure awu imebo woe. Mare ekiwogukare nou tori padure tadawu baiji. Emagokare ia tuwadaru pegareuji nou pameartorure jiwu bope uwari areduji.
ACT 19:38 Awu Demétrio utugaregebo etaidumode tumago pegawo ia boei dukeje etumode nou aiwomode boe ero jiwu boe eimijerage etae etaiwowo ero pegareu bagai.
ACT 19:39 Mare tagaidumode tarowo ia taroji dukeje taro pemegado nono paro mogadure.
ACT 19:40 Boe erduwamode awu meri jiwu parore jiboeji dukeje emago pegamode pai boe eimijera kurireuge ewiagai. Awu paro ukare turugadu. Pameardaekare turugadu awu paroji dukodire paroiwamodukare pawo pagimijerage emeardae pemegado awu meri jiwu parore jiboeji.
ACT 19:41 Nou eimijera makore aino dukeje ure nou boe doge etudo.
ACT 20:1 Nou kudugodureuge eture tuwai ka dukeje Paulo makore meartorure Jesus jiwuge eiamedu boe ewagai. Ure emeartoru rakado. Ukimadure ebo dukeje uture epiji. Uture Macedônia moto ka.
ACT 20:2 Uture nou Macedônia moto kejewuge meartorure Jesus jiwuge etae. Ure emeartoru rakado Pao Kurireu bataruji rugadu. Nou piji uture Acaia moto ka.
ACT 20:3 Rakojere nou Acaia moto kejewu arire pobe metia bokware ji nono. Utuiago Síria moto ka mare jorduware Judeu doge etaidure turo pegawo pudui toro duji. Dukodire ure tumeardae tawuje tuduwo tuibagi Macedônia moto ka pugeje.
ACT 20:4 Ia Beréia ba kurireu kejewu imedu uture apo. Iere Sópatro. Pirro onaregedu nure ema. Ia Tessalônica ba kurireu kejewu ime pobedu doge eture apo jamedu. Ia iere Aristarco. Metia iere Segundo. Nou Derbe ba kurireu kejewu imedu Gaio uture apo jamedu. Timóteo uture apo jamedu. Ásia moto kejewu ime pobedu doge eture apo jamedu. Ia iere Tíquico. Metia iere Trófimo.
ACT 20:5 Nou boe doge eture čedododai tubagawo čewagai toro Trôade ba kurireu keje.
ACT 20:6 Judeu doge ewadae akedure dukeje čedure jamedu. Nou ewadae iere Amireu. Čedure Filipos ba kurireu piji ikarereu tabo. Imire iture Paulo apo jamedu. Merire ikera aboudure dukeje čedaregodure nou pamedage etae Trôade ba kurireu ka. Semana oto padure mito čei nono.
ACT 20:7 Sábado boečoji čere bato pui meartorure Jesus jiwugebo čenogwagewo puapo. Nou barogwato Paulo utumode dukodire nou boečoji mako raire nou boe dogei. Makore ei jii toro ari aregodure baru oia ka du ka.
ACT 20:8 Jorugu urugu makare nou čere bato puiwu bai ja tada. Čere bato pui nou bai aogejewu bai ja tada.
ACT 20:9 Ia iparedu mugure nou bai poro keje tuwiapaga tabo. Iere Êutico. Ča Paulo mako raire dukodire norire nou Êutico jokuji. Dukodire unudure tuku je dukodire buture nou bai poro piji toro moto ka. Boe erdure buture duji dukodire ere turawuje ae. Etaregodure ae dukeje erdure bokware duji.
ACT 20:10 Mare Paulo ure turawuje nou bai piji nou iparedu ae. Ure tugeragu ji. Ure tona bu kajeje. Dukeje akore: – Tamororamagadukaba. Bikare raga. Jere kimo.
ACT 20:11 Dukejere Paulo ruture nou bai aogejewu bai ka pugeje. Ure tumugudo. Ure tuge pemegado dukeje okwagere. Nono mako raire nou boei pugeje jii toro barogwakododu ka. Ča barogwakododure dukeje Paulo uture epiji.
ACT 20:12 Mare nou boe eture nou iparedu apo tuwai ka. Jere kimo. Bikare rugadu. Dukodire ewudugugodure.
ACT 20:13 Čedure Paulo otodai ikarereu tabo Assôs ba kurireu ka čebagawo Paulo bagai nono. Paulo akore tudumoduie toro tuwure tabo.
ACT 20:14 Ča aregodure čedae dukeje ure taredo ikarereuto jamedu. Dukeje čedure Mitilene ba kurireu ka.
ACT 20:15 Nou barogwato čedure pugeje. Čegodu puredure Quios motoji. Pobore taiado nou moto tabo. Nou barogwato čedaregodure Samos moto ka. Merire mito pugeje dukeje čedaregodure Mileto ba kurireu ka.
ACT 20:16 Akere Pauloji taregoduwo Jerusalém ba kurireu ka tuwaduwo nou Judeu doge ewadaeji. Nou ewadae iere Pentecostes. Aidure taregoduwo toro nou ewadumode jiwu meri otodai. Dukodire meardaere tudukawo Éfeso ba kurireu ka.
ACT 20:17 Dukodire Paulo makore nou Éfeso kejewu meartorure Jesus jiwuge eimijerage ewagai etaregoduwo tudogi.
ACT 20:18 Etaregodure dukeje Paulo makore ei. Akore: – Iragoje raire tagabo dukodire tarduware irore jiboeji.
ACT 20:19 Ikare boe remawudo imi Pao Kurireu utugare pemegareuwo imi. Imaragodure dukeje itragudure boe rakare i dukodi. Judeu doge ere tumeardae tawuje turo pegawo i rugadu. Mare Pagimijera Jesus utugare nure imi rugadu dukodire imaragodure aino ai.
ACT 20:20 Tarduware. Ire boe erduwado Pao Kurireu bataruji rugadu. Ipogurukare imagowo rugadu. Ipagudukare imagowo ba kurireu oiadada, boe ewai ja tada jamedu.
ACT 20:21 Ire Judeu doge ewie ewo tugera ra turo pegareu piji tumeartoruwo Pao Kurireuji, tumeartoruwo Pagimijera Jesusji. Ire boe tuginaiwuge ewie aino jamedu.
ACT 20:22 Ča imeartorure Pao Kurireu Uwariji dukodi iturumode Jerusalém ba kurireu ka. Iorduwakare nuba boe eromode i toro.
ACT 20:23 Mare iorduware marigudu Pao Kurireu Uwari ure iwie iwarigudumoduie baičoreuto, boe pegamoduie i rugadu.
ACT 20:24 Mare itaidukare irowo ia imeardaere jiboeji. Itaidukare boe pemegawo i. Itaidure tu imeartoruwo Pagimijera Jesusji iwo ure maku inaiwu imaragodae iado. Imagowo boe ewiagai imaragodae nure ema kodi. Iwo boe ewie Jesus koiare Pao Kurireu aidure tuwo boe ekinorudo rugadu.
ACT 20:25 Iragoje raire tagabo iwo tawie tawo tagimijerado Pao Kurireuče. Mare itaregodumodukare mato pugeje.
ACT 20:26 Dukodire inure tawie aino. Ia tagi tameartorukare Jesusji raga mare imi igoia karega. Tameartorumodukare Jesusji dukeje tamodukare taginorudo bope doge eda pegareu piji. Ire tawie marigudu.
ACT 20:27 Ikare ia Pao Kurireu bataru biado tabiji. Ire tawie Pao Kurireu meardae jamedu boeji.
ACT 20:28 Dukodire taro pemegado, tameardae pemegado taetu pemegawo nou meartorure Jesus jiwugei. Pao Kurireu Uwari ure emagu tagai. Nou meartorure Jesus jiwuge eimijerage nure tagi dukodire taetu pemegado ei. Pao Kurireu onaregedu Jesus ure tugu redo emoriče dukodire Pao Kurireu ure tugeragu ei.
ACT 20:29 Itumode tabiji dukeje ia boe pegareuge etaregodumode turo pegawo meartorure Jesus jiwugei. Ero pegamode nono rie ro mogadure.
ACT 20:30 Ia rakojere tagabowu ime ewadrarodumode awu taetu pemegare jiwu meartorure Jesus jiwugei tuwo tugeragu ei emeartorukawo pugeje Pao Kurireuji.
ACT 20:31 Dukodire inagoino tai. Taetu pemegado ei. Tawiagodukaba iro piji. Itragudu tabo ire tarduwado Pao Kurireu bataruji meriji boečoji. Jorure pobe metia bokware i irore aino tai dutabo.
ACT 20:32 Ča imagonure Pao Kurireuji tabaru tabo jetu pemegawo tai rugadu. Tawo boe ewie jamedu emare aidure tuwo boe ekinorudo. Emare umode turo pemegado tai jamedu tameartoru rakawo pudui. Ainore rore rugadu meartorure Jesus jiwuge eiamedu boei.
ACT 20:33 Imi itaidukare ia boe enoe prataji, itaidukare enoe tori kuiejeji, ekudau areiaji.
ACT 20:34 Tarduware irore jiboeji. Ire boe ewie Pao Kurireu bataruji mare imaragodure ia boe etai jamedu ia diero bagai iwo ikeragu nou itaidure jiboeji nou imedage etaidure jiboeji jamedu.
ACT 20:35 Irore aino iwo boe erduwado tumaragodae tabore emode tugeragu ia dieroji tuwo maku marenarue doge etai. Pagimijera Jesus emare akoino, “Boe emode boe ekuna dukeje egaremode pudui ture ekunauge ekori. Boe pemegamode ei nou ture ekunauge ekori.”
ACT 20:36 Ainore Paulo ure tumago akedudo. Dukeje ure tubu jodo moto keje nou meartorure Jesus jiwuge eimijeragebo. Emagore baruto aino.
ACT 20:37 Etragudure tugiarigodure dukodi. Ere tona bu pugajeje. Ekimadure Paulo apo.
ACT 20:38 Ekiarigodure rugadu Paulo makore ei tuiordumokaie ei pugeje kodi. Dukeje eture apo ikarereu ka utumode kodi.
ACT 21:1 Čegimadure ebo dukeje čedure. Čeno ikarereu utu jetorore toro nou Cós moto ka. Nou barogwato čedaregodure Rodes ba kurireu ka. Dupijire čedure Pátara ba kurireu ka.
ACT 21:2 Nou Pátara kejere čerdure ia ikarereuji. Nou ikarereu kurire tudu jaewo pobo maereuji. Utuiago Fenícia moto ka. Dukodire čere čedaredo to. Dukeje čedure.
ACT 21:3 Čerdure Chipre motoji dukeje čere čemegido toro Síria moto ka. Čedaregodure Tiro ba kurireu ka dukeje čere čedawuje ikarereu piji. Nou ikarereu ure tuwuredo tuwo nou ikarereu tadaboe tawuje nono.
ACT 21:4 Tiro keje čerdure meartorure Jesus jiwugei. Čeragojere ebo kejewu meri oto padure sete. Pao Kurireu Uwari ure ewie boe pegamoduie Pauloji Jerusalém keje dukodire emagore ji utukawo toro.
ACT 21:5 Mare čeragojere ebo kejewu meri akedure dukeje čedure pugeje. Eiamedu boe tuwobebo, torebo eture čedabo toro pobo maereu okwa ka. Nonore čere čebu jodo moto keje čemagowo Pao Kurireu bagai baruto.
ACT 21:6 Dukejere čegimadure ebo. Čere čedaredo nou ikarereuto pugeje. Mare eture tuibagi tuwai ka.
ACT 21:7 Ča čedure pugeje. Čedure Tiro piji Ptolemaida ba kurireu ka. Čegimadure nou meartorure Jesus jiwuge čemedagebo nono. Čeragojere ebo kejewu merire mitotu je.
ACT 21:8 Nou barogwato čedure pugeje. Čedaregodure Cesaréia ba kurireu ka. Nonore čeragojere Filipe apo. Nou Filipe ure boe emeartorudo Jesusji rugadu. Marigudu Jerusalém kejewu meartorure Jesus jiwuge ere tugeragu imei ewo boe eke pedo boei. Enodo padure sete. Iare nou Filipe rema.
ACT 21:9 Ore areme ere pobe puibiji. Emagere ere boe ewie Pao Kurireu bataruji.
ACT 21:10 Čeragojere nono dukeje ia makore Pao Kurireu bataru jiwu imedu aregodure. Iere Ágabo. Aregodure Judéia moto piji.
ACT 21:11 Aregodure čedae dukeje ure tugeragu Paulo opeagajejewuji. Ure tuwure kogudo, tugera kogudo tabo. Dukeje akore: – Pao Kurireu Uwari akore Judeu doge pegareuge ero pegamoduie nou ore opeagajejewu čewuji, emoduie kogudo Jerusalém tada. Emoduie maku boe tuginaiwuge etai ero pegawo ji.
ACT 21:12 Čemeardure nou inoduji dukeje čemago raire Pauloji utukawo Jerusalém ka.
ACT 21:13 Mare Paulo akore: – Kodiba tagagoino i? Tare ikiarigo. Ire irugadu nou Judeu doge ewo ikogudo. Ire irugadu iwiwo imeartorure Pagimijera Jesusji kodi.
ACT 21:14 Čegare Paulo meardae mekido dukodire čere čenogwa ra piji. Čenagore: – Pagimijera Jesus aidumode dukeje ainore umode rugadu.
ACT 21:15 Čeragoje raire nono dukeje čere čenoroe pemegado čeduwo pugeje toro Jerusalém ka.
ACT 21:16 Ia Cesaréia kejewu meartorure Jesus jiwuge eture čedabo jamedu. Ere čerego čebadumode kejewu bai ka. Nou uwaire bai čewu iere Menasom. Chipre kejewu nure ema. Meartorure Jesusji marigudu.
ACT 21:17 Čedaregodure Jerusalém ka dukeje nou meartorure Jesus jiwuge čemedage ekimadure čedabo rugadu.
ACT 21:18 Nou barogwato Paulo uture čedabo Tiago ae. Nou meartorure Jesus jiwuge eimijerage eiamedu boe eragojere nono jamedu.
ACT 21:19 Paulo ukimadure ebo dukeje readodure ewiagai tumaragodaeji, nuba Pao Kurireu rore toro boe tuginaiwugei.
ACT 21:20 Emeardure ji dukeje emago pemegare Pao Kurireuji. Dukeje emagore Pauloji. Egore: – Čemana nure aki. Meartorure Jesus jiwu Judeu doge emagare rugadu. Arduware. Emeartorure rugadu Moisés ure maku pagaiwu Pao Kurireu bataruji.
ACT 21:21 Boe ere čewie akagoie Judeu doge emeartorumoduie Jesusji dukeje ewo tugera ra nou Moisés ure maku pagaiwu bakaru piji paro piji. Akagore ei ekawo tore ime ewaga oto biri kado pugeje. Akagore ei ewo tugera ra Judeu doge ero piji.
ACT 21:22 Judeu doge erduwamode akaregodure duji dukeje etaidumode turo pegawo ai. Nuba aromode?
ACT 21:23 Čedaidure atuwo ia imebo. Ere pobe puibiji. Marigudu emagore Pao Kurireuji turomode jiboeji. Dukodire ekare tao kado.
ACT 21:24 Ča atudo ebo awo ero morido, arowo erore jiboeji jamedu. Emode tao kado kuri je nono paroia mogadure. Nono tamode tarugadu tawo taremo Pao Kurireu uwaito nono Judeu doge ero mogadure. Dukodire čare Judeu doge erduwamode akare akera ra nou Moisés ure maku pagaiwu paro piji rugadu duji. Erduwamode tumeardure jiwu bataru ukare turugadu. Boe ewadrarodure ai boe ewiagai.
ACT 21:25 Mare boe tuginaiwuge meartorure Jesus jiwuge etaire čere ia atugoreboe maku etai marigudu. Čenagore ei ekawo ia makudure santo doge etaiwu bope doge eke kowuje, ekawo barogo ku kowuje, ekawo ia bitodureu bukigu kogure itoru kajejewu barogo ko, eribarikawo tumugukare apowu aremei, eribarikawo tumugukare apowu imei.
ACT 21:26 Dukodire Paulo uture nou imebo. Rore nono erore tuwo tubemegado turowo Judeu doge eno bakaru tadawu turo boeji. Dukeje ure turemo nou Pao Kurireu uwaito. Ure boe ewie nou turoino jiboe akedumoduie kejewu meriji. Akedumoduie dukeje tumoduie ia barogo kowu Pao Kurireu ai turo pegareu moriče, nou ime ero pegareu moriče jamedu.
ACT 21:27 Nou Paulo makore jiwu meri puredugodure pudui dukeje ia Ásia moto pijiwu Judeu doge erdure Pauloji Pao Kurireu uwai ja tada. Ere boe ekorigo tuwadrarodu tabo dukodire ere tugeragu Pauloji.
ACT 21:28 Ekudugodure: – Judeu doge nure pagi. Tagera maku čenai. Awu imedu ure boe eiamedu boe emeardae pegado pai. Ure boe emeardae pegado Moisés ure maku pagaiwu pago bakaruji parore jiboeji jamedu. Ure boe emeardae pegado awu Pao Kurireu uwaiji. Aino ure ia boe tuginaiwuge eremo awu Pao Kurireu uwaito. Ukare turugadu. Ere awu bai pemegareu pegado rugadu.
ACT 21:29 Erdure ia Éfeso kejewu imeduji Paulo apo nou ba kurireu keje. Dukodire emeardaere Paulo uie nou imedu remo Pao Kurireu uwai to duji. Nou imedu iere Trófimo. Mare pagare egoino. Paulo ukare nou imedu remo Pao Kurireu uwaito rugadu.
ACT 21:30 Ča nou ba kurireu kejewuge erduwakare tumeardae bagai pugeje. Boe eregodure tuwo bato pui. Ere tugeragu Pauloji rugadu. Ere tumugudo kororo keje nou Pao Kurireu uwai piji. Nono ere Pao Kurireu uwai poro miwuje.
ACT 21:31 Nou boe etaidure tuwo Paulo bito. Mare nou Jerusalém ba kurireu kejewu Romano doge etugobaigarege eimijera meardure nou emeardaeji.
ACT 21:32 Dukodire rekodure tugobaigaregebo toro etae. Nou boe erdure nou tugobaigaregei dukeje ere tugera ra ture boeto Paulo jitu piji.
ACT 21:33 Nou tugobaigarege eimijera uture Paulo ae. Ure tugeragu ji. Makore tugobaigaregei ewo Paulo kogudo corrente tabo. Dukeje unarare nou boei. Akore: – Ioguduba nure ema? Nuba rore?
ACT 21:34 Nou boe emagore bataru jipagi tugudu tabo, tugorigodu tabo. Mare emagore jiboe ure tuginai pubiji. Iage emagore iaboeji. Mare iage emagore ia bataruji pugeje. Dukodire nou tugobaigarege eimijera jorduwakare nuba tumeardaemode nou boe erore aino Paulo jituji. Dukodire makore tugobaigaregei etuwo Paulo apo toro tubadure tadawu bai rakareu ka.
ACT 21:35 Eture toro apo. Etaregoduiago toro dukeje nou boe ekorigodure rugadu. Eiore jetu woje toro. Ekudugodure. Egore: – Nou Paulo bito! Nou korigodureuge ere taiado pači Paulo apo. Dukodire nou tugobaigarege enoredure Paulo apo tuwo turemo tuwaito nou korigodureuge epiji.
ACT 21:37 Nou tugobaigarege eiago turemo tuwai rakareuto Paulo apo dukeje Paulo makore nou eimijeraji. Akore: – Itaidure imagowo ai. Makore Grego bataru tabo dukodire nou tugobaigarege eimijera makore bataru jipagi. Akore: – Amagore i Grego bataru tabo. Dukodire jowu Egito kejewu imedu karegure aki. Emare aidure tuwo pagagedudo. Uture boe maereu ka imebo. Enodo padu kejewure quatro mil. Ewaigare jamedu.
ACT 21:39 Paulo akore: – Boro. Judeu nure imi. Iwodure Tarso ba kurireu tada Cilícia moto keje. Nou ba kurireu kurire nou moto keje. Ča itaidure imagowo awu boei.
ACT 21:40 Nou tugobaigarege eimijera akore: – Ure turugadu. Dukodire Paulo ure turagojedo nou bai rakareu baiporo keje. Ure tugera nado boe edukiorowo. Edukiorore dukeje Paulo makore ei Judeu doge ewadaru tabo.
ACT 22:1 Paulo makore nou Judeu dogei. Akore: – Iwobe nure tagi. Tawiapaga pemegado iwadaruji iwo tarduwado irore jiboeji.
ACT 22:2 Emeardure ji makore ewadaru tabo duji dukodire edukiorore rugadu.
ACT 22:3 Nono Paulo makore pugeje. Akore: – Judeu nure imi. Iwodure Tarso ba kurireu tada Cilícia moto keje. Mare irijodure woe Jerusalém ba kurireu tada. Jorduwareu Gamaliel ure iorduwado. Ure iorduwado nou mariguduwu pawobe eno bakaruji. Itaidure irowo Pao Kurireu roji nono tagaidu mogadure.
ACT 22:4 Imeardaere Jesusji Pao Kurireu karegure ema duji nono tameardae mogadure. Dukodire iro pegare awu meartorure Jesus jiwugei iwo ewido. Ire ikeragu imei, aremei iwo etugu baičoreuto.
ACT 22:5 Nou ure Judeu doge enomea maku Pao Kurireu aiwuge eimijera kurireu jorduware nou irore jiboeji. Nouia pagimijerage erduware jamedu. Ere bapera maku inai iwo maku Damasco ba kurireu kejewu Judeu doge etai iwo ikeragu nou meartorure Jesus jiwugei toro jamedu. Itaidure iwo ekogudo corrente tabo iwo erego mato Jerusalém ka ibagi iro pegawo ei. Dukodire iture toro.
ACT 22:6 – Ča ikodure nou Damasco kawu awaraji. Ipuredugodure Damasco ba kurireuji. Meri aregodure baru oia ka dukeje ia jorugu rakareu aregodure itae baru piji.
ACT 22:7 Ure iwududo moto ka dukeje imeardure makoji. Akore, “Saulo, Saulo! Kodiba akaidure aro pegawo aino i?”
ACT 22:8 Inagore, “Ioguduba ure aki?” Akore, “Nazaré pijiwu Jesus nure imi. Aro peganure i rugadu.”
ACT 22:9 Nou uture itabowu ime erdure nou joruguji mare emeardukare nou makore jiboeji.
ACT 22:10 Nono inarare ji pugeje. Inagore, “Ikimijera nure aki. Nuba iromode?” Dukeje Pagimijera Jesus akore, “Aragojedo. Atudo Damasco ba kurireu ka. Torore boe emode awie Pao Kurireu aidure jiwu aromode jiboeji.”
ACT 22:11 Ioku bokware nou jorugu rakareu koia. Dukodire nou imedage ere tugeragu ikeraji tuwo irego Damasco ba kurireu ka rugadu.
ACT 22:12 – Nou ba kurireu Damasco tadare ia meartorure pago bakaru jiwu imedu mugure. Iere Ananias. Nou Damasco kejewu Judeu doge eiamedu boe etaidu pemegare ji.
ACT 22:13 Nou Ananias aregodure itae. Makore i. Akore, “Imana Saulo. Akaiwodo pugeje.” Ča ioku pemegagodure tači je. Dukeje itaiwore pugeje.
ACT 22:14 Akore, “Jawu pawobe emeartorure jiwu Pao Kurireu ure tugeragu ai arduwawo taidure jiboeji. Ardumode Utugare Jesusji. Ameardumode bataru jameduji uwo arduwado.
ACT 22:15 Dukodire amode boe eiamedu boe ewie ardure jiboeji, ameardure jiboeji jamedu.
ACT 22:16 Ča amara tabo. Amagodo baruto Pao Kurireu uwo aro pegareu barigu apiji. Akao pegododumode jamedu.”
ACT 22:17 – Ča ire ikirimi ibagi Jerusalém ka. Imagore baruto Pao Kurireu uwai tada dukeje iordure iaboeji. Ure nono boe eniau mogadure.
ACT 22:18 Iordure Pagimijera Jesusji. Makore i. Akore, “Amara tabo. Atudo Jerusalém piji. Awu boe emeartorumodukare akagore iboeji boe ewiagai.”
ACT 22:19 Inagore, “Ikimijera nure aki. Erduware irore jiboeji marigudu. Marigudu iture Judeu doge ere bato puiwu bai jamedu boe ka. Ire ikeragu nou meartorure aiwugei iwo etugu baičoreuto. Ire boeto ei.
ACT 22:20 Boe ere atugare Estêvão bito dukeje iragojere nono jamedu. Itaidure ere bito duji. Ietu pemegare nou ere bitowuge ekudau areiaji.”
ACT 22:21 Nono Pagimijera Jesus makore i pugeje. Akore, “Atudo. Inure atu jado toro boe tuginaiwuge etae.”
ACT 22:22 Paulo makore aino tuduie toro boe tuginaiwuge etae Pao Kurireu bataru tabo dukodire nou Judeu doge ekorigodure rugadu. Ewiapagakare makore jiboeji pugeje. Ekudugodu rakare. Egore: – Awu imedu barigu. Bito. Ukare turugadu rakojewo moto keje.
ACT 22:23 Ekudugodu rakare. Ere motorugudu barigu baruto. Ere tugudau areia jukodo rugadu.
ACT 22:24 Nou Romano doge etugobaigarege eimijera makore tugobaigaregei ewo Paulo remo nou bai rakareuto. Makore ei ewo boeto Pauloji Paulo makowo kodiba nou Judeu doge ekorigodure aino pudui duji.
ACT 22:25 Ča ere remo dukeje ere kogudo. Eiago boeto ji. Mare Paulo makore nouia tugobaigareji. Akore: – Boe etaiwokare raga ia iro pegareu bagai. Romano kejewu nure imi. Ukana turugadu na awo boeto i?
ACT 22:26 Nou tugobaigare meardure nou inoduji dukeje uture tugimijera ae. Akore: – Ukare turugadu pawo boeto awu imeduji. Romano kejewu nure ema.
ACT 22:27 Dukodire nou tugobaigarege eimijera uture Paulo ae. Unarare ji. Akore: – Aki na ia Romano kejewu nure aki? Paulo akore: – Uu.
ACT 22:28 Nono tugobaigarege eimijera akore: – Diero tabore ire Romano kejewudo imi jamedu. Paulo akore: – Kodi iwodure dukeje Romano kejewu nure imi.
ACT 22:29 Ča nou ime epagudugodure ero pegare ia Romano kejewuji kodi. Ere taradaino piji tumagokawo ji pugeje. Nou boe eimijera pagudugodure rugadu. Romano kejewu eimijera kurireu makore tugobaigaregei marigudu ekawo ia Romano kejewu kogudo nono turomoga Paulo jitu mogadure.
ACT 22:30 Nou tugobaigarege eimijera aidure tuiorduwa birigoduwo kodiba nou Judeu doge ekorigodure Pauloji. Dukodire nou barogwato ure nou ture Paulo kogudo tabowu corrente tawuje Paulo piji. Dukejere makore nou Judeu doge eimijeragei ewo tudo pui nou ure Judeu doge enomea maku Pao Kurireu aiwuge eimijeragebo. Dukejere uture Paulo apo toro etae. Ure Paulo rakojedo etoiadada.
ACT 23:1 Paulo aiwore tu nou boe eimijeragei. Dukejere makore ei: – Iwobe nure tagi. Iro pegakare imeartoru rakare Pao Kurireuji ji aino kodi.
ACT 23:2 Nou ure Judeu doge enomea maku Pao Kurireu aiwuge eimijera kurireu iere Ananias. Makore nou rakoje puredure Paulo jiwugei ewo tugera to Paulo okwaji.
ACT 23:3 Dukejere Paulo mako rakare ji. Akore: – Pao Kurireu umode boeto ai rugadu. Boe epaga keje aro pegare boei rugadu. Akaidure akaiwowo iroji ia Judeu doge erokare jiwu iro pegareu bagai. Mare amagore awu imei ewo tugera to i dukodire akire arokare nono Judeu doge ero mogadure.
ACT 23:4 Nono nou puredure Paulo jiwuge ime ere Paulo bie. Egore: – Amago pegare nou ure Judeu doge enomea maku Pao Kurireu aiwuge eimijera kurireuji.
ACT 23:5 Dukodire Paulo kiarigodure nou tumagore jiboeji. Nono akore: – Iwobe nure tagi. Iorduwakare iwobe eimijera kurireu nure ema duji. Ire iwarigu boeto nou imagore jiboeji. Pao Kurireu makore, “Akaba amago pegado boe eimijera kurireugei.”
ACT 23:6 Dukeje Paulo jorduware ia nou boe eimijeragei saduceu doge nure emage duji. Ia nou boe eimijerage fariseu doge nure emage. Dukeje makore nou boe eimijerage eiamedu boei. Akore: – Iwobe nure tagi. Fariseu nure imi. Fariseu onaregedu nure imi. Iorduware meartorure Pao Kurireu jiwuge eewodumode pugeje rugadu. Ire boe ewie nou inoduji. Dukodire tagaiwonure aino iroji woe awu meriji.
ACT 23:7 Paulo makore aino dukeje nou saduceu doge nou fariseu doge etokire pui. Emeardaekare nono pumeardae mogadure.
ACT 23:8 Nou saduceu doge egore bireuge eewodumodukaie pugeje. Egore bope uwari bokwaie. Egore baru tadawu bokwaie jamedu. Mare nou fariseu doge emeardaere marigudu bireuge eewodumoduie pugeje duji. Egore bope dogeie, baru tadawugeie jamedu.
ACT 23:9 Emago rakare pui pugeje. Nono ia jorduware Judeu doge eno bakaru jiwuge ere turagojedo. Fariseu doge nure emage. Egore: – Čerdukare awu imedu ia ro pegareuji. Ia bope rakudu, ia Pao Kurireu utugare baru tadawu rakudu makore aino ji rugadu.
ACT 23:10 Dukodire nou boe eimijerage etaidure turo pegawo pui rugadu. Nou tugobaigarege eimijera rakoje kimore nono. Meardaere emoduie Paulo bowuje nono rugadu. Dukodire makore tugobaigaregei ewo turawuje etae tuwo tugeragu Pauloji epiji tuwo reko tuibagi nou bai rakareu ka.
ACT 23:11 Nou boečoji Pagimijera Jesus aregodure Paulo ae. Makore ji. Akore: – Apagudukaba. Are awu Jerusalém kejewuge ewie iwadaruji. Aino inure atudo toro Roma ba kurireu ka awo ewie toro jamedu.
ACT 23:12 Nou barogwato ia Judeu doge ere bato pui tuwo tumeardae tawuje tuwo Paulo bito. Emagore pui tugudumodukaie, togwagemodukaie jii toro ture Paulo bito du ka.
ACT 23:13 Ime emagare rugadu nono. Enodo padure kejeboe kodure quarenta kori.
ACT 23:14 Dukeje eture nou ure Judeu doge enomea maku Pao Kurireu aiwuge eimijerage etae tumagowo ei. Egore: – Čere čemeardae maku puai čegudumodukaie čenogwagemodukaie jii toro čere Paulo bito du ka.
ACT 23:15 Ča tagi tamagodo nou tugobaigarege eimijeraji aregoduwo Paulo apo mato. Tamagodo ji tagaiduie tamagowo Pauloji pugeje tagaiwowo nou Paulo ro bagai pugeje. Nono čebagamode nono awara keje. Čere čerugadu čewo bito awara keje dukodire aregodumodukare mato pugeje.
ACT 23:16 Ča Paulo utuie onaregedu meardure nou emeardae pegareuji. Dukodire uture nou bai rakareu ka tuwo Paulo bie.
ACT 23:17 Dukodire Paulo makore nouia tugobaigare bagai tumagowo ji. Akore: – Awu iparedu reko akimijera ae. Emare readodumode iaboeji biagai.
ACT 23:18 Dukodire nou tugobaigare ure nou Paulo utuie onaregedu reko tugimijera ae. Makore nou tugimijeraji. Akore: – Nou pare pageragu jiwu imedu Paulo makore iwagai iwo awu iparedu reko mato akae readoduwo ia boe remawuji awiagai.
ACT 23:19 Nou tugobaigarege eimijera ure tugeragu nou iparedu ieraji tuduwo apo toro nou tugobaigarege epiji. Dukejere makore ji. Akore: – Kaba jiba akaidure areadoduwo iwiagai?
ACT 23:20 Nou iparedu makore ji. Akore: – Judeu doge eimijerage emagomode ai nou Paulo bagai pugeje barogwato. Etaidure awo reko toro ere bato pui tadawu bai ka pugeje. Ewadrarodumode taiduie tumagowo Pauloji pugeje tuiorduwawo nou Paulo rore jiboeji pugeje.
ACT 23:21 Awiapagakaba ewadaruji. Ime ekodure quarenta kori emode tuwiado awara okwaji tubagawo Paulo bagai tuwo bito nono awara keje. Emagore tugudumodukaie togwagemodukaie pugeje jii toro ture Paulo bito du ka. Aino ere tudo turugadu tuwo Paulo bito rugadu. Epagamode Paulo bagai barogwato.
ACT 23:22 Nou tugobaigarege eimijera makore nou ipareduji. Akore: – Amagokaba ia boe ewiagai awu akagore iboeji. Dukeje ure nou iparedu utudo pugeje.
ACT 23:23 Nono nou tugobaigarege eimijera kurireu makore nou tugobaigarege eimijerage paru towuge ewagai. Ere pobe. Makore ei. Akore: – Tageragu tugobaigaregei. Enodo padudo duzentos. Edo turugadu taduwo Cesaréia ba kurireu ka. Tageragu mugure kuwaru kejewu tugobaigaregei jamedu. Enodo padudo setenta. Tageragu lança epagei jamedu. Enodo padudo duzentos jamedu. Tadudo nou Paulo apo awu boečoji ari ruture dukeje.
ACT 23:24 Nou Paulo mugudo kuwaru keje. Tagaregodu pemegado apo toro boe eimijera governador Félix ae.
ACT 23:25 Dukejere nou tugobaigarege eimijera ure ia atugoreboe pemegado.
ACT 23:26 Ainore akore: – Ikimijera Félix nure aki. Itaidure boe pemegawo ai rugadu.
ACT 23:27 Judeu doge ere tugeragu awu inure utudo akaewu imeduji. Egore iago bito. Mare iorduware Romano kejewu imedu nure ema duji. Dukodire ire tawuje epiji ino tugobaigaregebo.
ACT 23:28 Itaidure iorduwawo kodiba eroino ji dukodire ire reko tugimijerage etae.
ACT 23:29 Ukare ia turo pegareu to bitoduwo, tuguduwo baičoreuto. Mare nou Paulo bataru kodukare Judeu doge emeardae kodaji. Dukodire ekorigodure aino ji rugadu. Eno bakaru koiare eroino ji.
ACT 23:30 Nono ia boe ure iwie ime ere tumeardae tawuje tuwo Paulo bito dukodire imeardaere iwo awu Paulo utudo toro akae. Ire nou jordu pegare Paulo jiwuge ewie emagowo ai etaidukare jiboeji. Cláudio Lísias nure imi, imire ire awu bapera atugodo toro awagai.
ACT 23:31 Nou tugobaigarege emeartorure nou tugimijera bataruji rugadu. Eture Paulo apo nou boečoji rugadu. Etaregodure Antipátride ba kurireu ka nou boečoji.
ACT 23:32 Nou barogwato nou mugure kuwaru kejewu tugobaigarege eture Paulo apo pugeje. Mare nouia tugobaigarege ere tugirimi tuibagi nou tuwai rakareu ka.
ACT 23:33 Nou mugure kuwaru kejewu tugobaigarege etaregodure Paulo apo toro Cesaréia ba kurireu ka rugadu. Nono ere Paulo maku nou boe eimijera kurireu ai. Ere nou atugoreboe maku ai jamedu.
ACT 23:34 Nou boe eimijera kurireu Félix aiwore nou atugoreboeji dukeje unarare Pauloji. Akore: – Kaibowu moto keje ba awodure? Paulo akore tuwoduie Cilícia moto keje.
ACT 23:35 Dukejere nou Félix akore: – Nou jordu pegare aro jiwuge etaregodumode dukeje iwiapagamode ewadaruji, awadaruji jamedu. Nono makore tugobaigaregei etaiwowo Pauloji, utukawo nou tumaragodure tadawu bai kurireu piji.
ACT 24:1 Merire ikera aboudure dukeje Judeu doge eimijerage eture Cesaréia ba kurireu ka. Ia eimijera iere Ananias. Nou ure Judeu doge enomea maku Pao Kurireu aiwuge eimijera kurireu nure ema. Ia iere Tértulo. Emare jorduware Judeu doge eno bakaruji. Etaregodure nou boe eimijera kurireu Félix ae. Dukeje emagore nou boe eimijeraji. Egore Paulo ro pegaie.
ACT 24:2 Nou boe eimijera Félix makore Paulo bagai. Paulo ure turemo dukeje nou Tértulo makore nou boe eimijera kurireuji rugadu. Akore: – Čegimijera nure aki. Arduwa kurire dukodire aro pemegare čei. Aki aigoiare akare boe pegareuge erugo čei marigudu. Aki aigoiare are čeno moto pemegado.
ACT 24:3 Čedaidure arore jiboeji dukodire čemago pemegare aino ai.
ACT 24:4 Itaidukare iwo akiarigo ma čare awiapagado čewadaruji tu jao.
ACT 24:5 Čedaidukare awu imedu rore jiboeji. Ro pegare rugadu. Ure Judeu doge ekiripagado. Ure boe erugo pui moto jamedu boe parugajeje. Meardae pegareuge eimijera nure ema. Nou boe ekiere nazareno doge.
ACT 24:6 Aidure turo pegawo awu Pao Kurireu uwaiji dukodire čere čegeragu ji čewo tugu baičoreuto.
ACT 24:8 Anara pemegamode ji dukeje arduwamode boe jokodu jire čenagoino duji.
ACT 24:9 Nouia Judeu doge emagore aino pugeje nou boe eimijera kurireuji. Mare pagare egoino biagai. Ewadrarodunure.
ACT 24:10 Nono nou boe eimijera Félix ure tugera nado Paulo ae, Paulo makowo jamedu. Dukodire Paulo makore. Akore: – Marigudu awu woewu boe eimijera kurireu ure aki rugadu. Arduware akaiwowo boei ero pegareu bagai. Dukodire imeartorure ai imagowo awu boe eimijerage ewadaru jipagi awiagai.
ACT 24:11 Iture Jerusalém ba kurireu ka iwo ipu jodo imago pemegawo Pao Kurireuji merire doze iroino dukeje. Anaramode boei dukeje emode awie nou inagoino duji.
ACT 24:12 Mare imago pegakare boei nono Pao Kurireu uwai tada. Ikare boe ekiripagado nono. Awu Judeu doge erduware nou inoduji. Iro pegakare boei nou ba kurireu tada, nou boe ere bato puiwu bai tada jamedu.
ACT 24:13 Akaiwo pemegamode ewadaruji dukeje arduwamode ewadrarodunure duji. Emago pegare i mare ewadrarodunure.
ACT 24:14 Mare imagomode aino ai. Ire ipu jodo imago pemegawo jawu čewobe emeartorure jiwu Pao Kurireuji. Irore nono nou meartorure Jesus jiwuge ero mogadure jamedu. Mare awu emeartorukare Jesus jiwuge. Egore pagaie čenagoino. Mare čemeartorure Moisés ure bu bapera kejewu Pao Kurireu bataruji. Čemeartorure mariguduwuge makore Pao Kurireu bataru jiwugei, ere bu bapera kejewu Pao Kurireu bataruji jamedu.
ACT 24:15 Imeartorure awuge emeartorure jiwu Pao Kurireuji. Awu Pao Kurireu koiare umode ro pemegareuge, ro pegareuge eiamedu boe eewodudo pugeje.
ACT 24:16 Dukodire ire idurudo iro pemegawo Pao Kurireuji, iro pemegawo boei jamedu, ia boe pegareu metukawo itaora tada.
ACT 24:17 Ča iragoje raire toro ia moto keje. Dukejere itaregodure mato pugeje Jerusalém ba kurireu ka ia diero tabo iwo maku iwobe etai. Itaidure iwo iro pegareu mori maku Pao Kurireu ai uwai tada jamedu nono Judeu doge ero mogadure.
ACT 24:18 Dukodire awu Judeu doge erdure i Pao Kurireu uwai tada. Mare inure itaimo nono ero mogadure ipemegawo irowo Judeu doge eno bakaru tadawu boe ero boeji iwo iremo nou Pao Kurireu uwaito nono ero mogadure jamedu. Boe edure nono mare erdu pegakare nou irore jiboeji dukodire ekare bato pui itae. Emago pegareu kare pui.
ACT 24:19 Ia Ásia pijiwuge Judeu doge edure nono jamedu. Erdu pegamode ia irore jiboeji dukeje etaregodumode woe tumago pegawo i. Mare erdu pegakare irore jiboeji dukodire etaregodukare aino mato.
ACT 24:20 Awu woewu Judeu doge erdukare ia iro pegareuji jamedu. Iragojere Judeu doge eimijeragebo dukeje emagokare i ia iro pegareuji.
ACT 24:21 Mare imagore aino, “Imeartorure bireuge eewodumode pugeje duji dukodire tagaiwonure ia iro pegareu bagai.” Ainore inagore. Dukodi ča awuge ekorigodure aino i.
ACT 24:22 Nono Félix ure emago akedudo. Jorduware meartorure Jesus jiwuge emeardaeji erore jiboeji. Akore: – Tugobaigarege eimijera Lísias aregodumode dukeje imode imeardae tawuje iorduwawo nuba iromode ai.
ACT 24:23 Makore tugobaigareji aiwo pemegawo Pauloji baičoreu tada mare ro pegakawo ji, tumagomoduie Paulo metage ewagai etaregoduwo mato ewo tugera maku ai.
ACT 24:24 Ia meri keje Félix aregodure Paulo ae toreduje apo. Iere Drusila. Judeurodo nure ema. Makore Paulo bagai dukeje ewiapagare Paulo bataruji. Dukodire Paulo ure erduwado boe emeartorure Jesus jitu duji.
ACT 24:25 Paulo makore ei boe ewo turagado pudui turo pegakawo. Makore ei boe ewo turo jetorodo. Makore ei Pao Kurireu aiwomoduie boei rugadu ia meri keje. Dukeje Félix pagudugodure. Akore: – Atudo ipiji baičoreuto. Imode irugadu pugeje dukeje imagomode awagai pugeje.
ACT 24:26 Mare aidure Paulo uwo ia diero maku pudai dukodire mako makore Paulo bagai tumagowo pui.
ACT 24:27 Jorure pobe dukeje Félix ure tudawuje boe eimijera governador pudumi dupiji. Pórcio Festo mugure mugato. Mare Félix aidukare tuwo Judeu doge ekorigo dukodire ukare Paulo tawuje baičoreu piji.
ACT 25:1 Boe eimijera kurireu Festo aregodure nou moto ka tumuguwo Félix mugato. Merire pobe metia bokware dukeje uture Cesaréia ba kurireu piji toro Jerusalém ba kurireu ka.
ACT 25:2 Judeu doge eimijerage emago pegare Pauloji nou Festo biagai. Nou ure Judeu doge enomea maku Pao Kurireu aiwuge eimijerage emago pegare Pauloji Festo biagai jamedu.
ACT 25:3 Enogwamagudure Festoji uwo Paulo arego pudae Jerusalém ka. Mare pagare egoino. Ere tumeardae tawuje tuwo Paulo bito awara keje.
ACT 25:4 Mare Festo akore: – Paulo rakojere Cesaréia keje baičoreu tada. Kuri aino imode ikirimi ibagi toro.
ACT 25:5 Tagimijerage etudo itabo toro Cesaréia ba kurireu ka jamedu. Tardumode ia awu Paulo ro pegareuji dukeje tamagodo ro pegareuji jakai rugadu.
ACT 25:6 Festo rakojere nono Jerusalém ba kurireu keje. Meri oto padure oito rabodu, dez rabodu ji nono. Dukejere ure tugirimi tuibagi Cesaréia ba kurireu ka. Nou barogwato ure tumugudo tumuga ira keje taiwowo boe erore jiboeji. Dukeje ča makore Paulo bagai.
ACT 25:7 Etaregodure apo baičoreu piji dukeje nou etaregodure Jerusalém ba kurireu pijiwuge Judeu doge ere taiado apo rugadu. Emago pegare ji rugadu. Egore Paulo ro pegaie rugadu. Mare boe erdukare nou Paulo ia ro pegareuji.
ACT 25:8 Mare paga karega Paulo makore ewadaru jipagi. Akore: – Irore nono Judeu doge ero mogadure. Ikare imegido nou ero piji. Iro pegakare Pao Kurireu uwaiji. Iro pegakare Romano doge eimijera kurireu Cesaji.
ACT 25:9 Mare Festo aidure turo pemegawo Judeu dogei etaiduwo pudui. Dukodire makore Pauloji. Akore: – Akaidure atuwo Jerusalém ba kurireu ka itabo? Nono ča iorduwamode boe jokodu jire akagoino duji.
ACT 25:10 Mare Paulo aidukare. Akore: – Iragojere woe. Boe eimijera nure aki amaragodure Romano doge eimijera kurireu César ai akaiwowo boe erore jiboeji awu amuga ira keje. Woe ča ure turugadu awo ameardae tawuje akaiwowo ia iro pegareu bagai. Iro pega bokware Judeu dogei. Aki arduware nou inoduji.
ACT 25:11 Emode ia ro pegareuge ewido ero pegare kodi. Pegakare. Mare iro pegareu bokware. Ewadrarodunure rabodu dukeje boe emoka imagu etai. Dukodire itaidure Romano doge eimijera kurireu César aiwowo irore jiboeji ia iro pegareu bagai.
ACT 25:12 Dukodire Festo makore okituware puduiwugei. Nono makore Pauloji pugeje. Akore: – Akaidure Romano doge eimijera kurireu aiwowo arore jiboeji ia aro pegareu bagai. Dukodire čemode atudo toro Roma ba kurireu ka nou Romano doge eimijera kurireu César bagai.
ACT 25:13 Ia meri keje boe eimijera Agripa aregodure tuwie Berenice apo Cesaréia ba kurireu ka tugimaduwo Festo apo.
ACT 25:14 Nou boei barogwato Festo readodure ewiagai Paulo rore jiboeji makore jiboeji jamedu. Akore: – Ia imedu rakojere woe. Félix ure tugu baičoreuto.
ACT 25:15 Itaregodure toro Jerusalém ba kurireu ka dukeje imeardure nou Judeu doge eimijerage emago pegare awu imeduji. Etaidure iwo bito.
ACT 25:16 Mare ire ewie awu Romano kejewuge čeroji. Čemodukare ia ro pegareu bito nou ro pegareu ukare tugiegi dukeje. Mako pegare jiwuge emagomode tuiordu pegare jiboeji jokuto dukeje emare makomode ewadaru jipagi. Dukeje čerdumode ia ro pegare jiboeji dukeje čemode tugu baičoreuto rabodu, čemode bito rabodu. Ainore čerore.
ACT 25:17 Dukodire awu Judeu doge eimijerage etaregodure woe. Ča nou barogwato imagore nou imedu bagai emago pegawo ji jokuto rugadu.
ACT 25:18 Jordu pegare jiwuge eragojere woe mare emagokare imeardaere jiboeji.
ACT 25:19 Emagore awu imedu meartorukaie Judeu doge erore jiboeji. Emagore awu imedu meartorukaie Pao Kurireu bataru jameduji. Ia imedu iere Jesus. Egore nou Jesus bie. Mare awu imedu Paulo akore nou Jesus bikaie.
ACT 25:20 Ča iorduwakare emeartorure jiboeji dukodire imeardaere ituwo Jerusalém ba kurireu ka Paulo apo iorduwa pemegawo erore jiboeji, emeartorure jiboeji. Dukeje itaiwowo awu Paulo ia ro pegareu bagai.
ACT 25:21 Mare Paulo aidukare. Makore taiduie Roma kejewu pagimijera kurireu aiwowo ia turo pegareu bagai. Dukodire ire tugu baičoreuto pugeje iwo utudo toro Roma ba kurireu ka pagimijera kurireu César bagai.
ACT 25:22 Agripa makore Festoji. Akore: – Itaidure imearduwo awu imedu bataru jamedu boeji. Festo akore: – Ča barogwato ameardumode ji.
ACT 25:23 Nou barogwato Agripa aregodure tuwie aredu Berenice apo nou boe eimijera kurireu Festo aiwomode boe ero pegareu bagai kejewu bai ka. Tugobaigarege eimijerage etaregodure jamedu. Nou ba kurireu kejewuge eimijerage etaregodure jamedu. Ere turo pemegado tuwo turemo nou baito nono turo mogadure. Dukejere Festo makore Paulo bagai. Dukodire tugobaigarege ere turemo Paulo apo.
ACT 25:24 Festo makore Agripaji, nou bai tadawu boei jamedu. Akore: – Tardure awu imeduji. Judeu doge emago pegare ji rugadu. Etaregodure woe nou tuwadaru pegareu tabo Jerusalém piji. Ekudugodure iwo bito rugadu.
ACT 25:25 Mare iordukare ia ro pegare jiboeji iwo bito. Mare emare aidure Roma kejewu pagimijera kurireu aiwowo turore jiboe bagai ia turo pegareu bagai. Dukodire ire imeardae tawuje iwo utudo Roma ba kurireu ka nou pagimijera kurireu aiwowo rore jiboeji.
ACT 25:26 Mare iorduwakare nuba imagomode atugoreboeto iwo nou pagimijera kurireu bie kodiba ire utudo toro. Dukodire ire arego mato taegai tawo iorduwado nuba imagomode atugoreboeto. Boe eimijera Agripa. Akaiwodo nou Paulo roji awo iorduwado iwo atugoreboe pemegado pagimijera kurireu bagai.
ACT 25:27 Itaidure iwo ia atugoreboe pemegareu to iwo pagimijera jorduwado Paulo rore jiboeji. Iromode aino dukeje imode utudo Roma ba kurireu ka rugadu.
ACT 26:1 Agripa makore Pauloji. Akore: – Aino. Amagodo arore jiboeji čewiagai. Dukodire Paulo ure tugera nado. Dukejere makore turore jiboeji Agripa biagai.
ACT 26:2 Akore: – Ikimijera nure aki. Imagomode irore jiboeji awiagai dukodire iwaidigirire awu meriji. Awu Judeu doge emago pegare irore jiboeji.
ACT 26:3 Mare aki arduware Judeu doge erore jiboeji, egore jiboeji jamedu. Dukodire inogwamagudunure aino ai. Awiapaga pemegado iwadaruji.
ACT 26:4 – Judeu doge eiamedu erduware i marigudu. Ikodu mai kimo dukeje itaregodure ino moto piji Jerusalém ba kurireu ka. Dukodire Judeu doge erduware irore jiboeji marigudu.
ACT 26:5 Itaregodure dukeje ire fariseudo imi. Nou inodu otobiji fariseu ure imi jii aino. Fariseu doge emeartoru rakare rugadu turoji tumeardaeji. Dukodire emeardaere tumeartorure Pao Kurireu jituji. Imire ikare imegido nou fariseu doge ero piji.
ACT 26:6 Aino ča iragojere woe. Mare marigudu Pao Kurireu makore jawu čewobei tuwo turo maku etai. Imeartorure nou Pao Kurireu bataruji rugadu.
ACT 26:7 Čewobe etumana mage ere doze. Čeiamedu boe čemeartorure čebaga tabo awu Pao Kurireu makore jiboe jetuwo pudui rugadu dubagai. Dukodire čemago pemegare rugadu Pao Kurireuji meriji, boečoji čebaga tabo nou umode boe ekinorudowu bagai. Awu čemeartorure jiboe koiare awu Judeu doge emago pegare aino irore jiboeji.
ACT 26:8 Emeartorure Pao Kurireuji mare emeartorukare Pao Kurireu umoduie nou umode boe ekinorudowu jewodudo pugeje bireuge epiji duji. Dukodire erdu pegare iwadaruji.
ACT 26:9 Marigudu imeardaere iwo boe pegado meartorure nou umode boe ekinorudowu jiwugei. Emeartorure Jesus ure ema duji. Itaidure iwo etagedudo.
ACT 26:10 Ainore irore Jerusalém ba kurireu tada. Nou ure Judeu doge enomea maku Pao Kurireu aiwuge eimijerage ere tugie maku inai iwo meartorure Jesus jiwuge etugu baičoreuto rugadu. Boe eimijerage etaidure tuwo ewido dukeje imeardaere nono nou boe eimijerage emeardae mogadure jamedu.
ACT 26:11 Iture Judeu doge ere bato puiwu bai doge etae iro pegawo meartorure Jesus jiwugei nono. Imagore ei ewo tugera ra tumeartorure Jesus jitu piji emago pegawo Jesusji. Ikorigodure ei rugadu dukodire itu jaere ia moto ka meartorure Jesus jiwuge ewagai.
ACT 26:12 Paulo mako kimore. Akore: – Dukodire iture Damasco ba kurireu ka. Nou ure Judeu doge enomea maku Pao Kurireu aiwuge eimijerage ere boe eimijerado imi iro pegawo meartorure Jesus jiwugei nono.
ACT 26:13 Nou awaraji meri aregodure baru oia ka dukeje iordure ia jorugu rakareuji. Urugu kodure meri urugu kori. Urugure baru piji i, uture itabowugei jamedu.
ACT 26:14 Čeiamedu boe čewudure kuri po moto ka. Dukeje imeardure ia baru pijiwu makoji. Makore čewadaru Hebreu bataru tabo rugadu. Makore nou mariguduwu ikieji. Akore, “Saulo! Saulo! Kodiba aro pegare aino i? Arore nono ia boe korire jiwu tapira ro mogadure. Mare tapira karega. Aki ameartorukare i marigudu.”
ACT 26:15 Dukeje inagore ji, “Ioguduba ure aki?” Nono makore i, “Ikiere Jesus. Aro pega remawunure i.
ACT 26:16 Ma ča aragojedo. Ire ardudo aino i itugarewo aki. Aki amode boe ewie iboeji. Awu meri keje ardure aino i. Imode ardudo i rugadu iwo arduwado rugadu. Dukeje amode boe eiamedu boe ewie.
ACT 26:17 Imode atudo boe tuginaiwuge etae. Imode akinorudo Judeu doge epiji, boe tuginaiwuge epiji jamedu.
ACT 26:18 Amode erduwado rugadu awo emegido ero pegareu piji boečo piji ero pemegawo. Awo etawuje bope doge eimijera Satanás piji rakakawo ei pugeje emeartoruwo tu Pao Kurireuji. Emeartorumode i dukodire Pao Kurireu biagodumode ero pegareu jamedu boe piji. Emeartorumode i dukodire Pao Kurireu umode ture tugeragu jiwugedo emage.” – Ainore Jesus makore i.
ACT 26:19 Paulo mako kimore. Akore: – Ainore irore rugadu. Ikare ikera ra awu imeartorure jitu piji. Imeartorure rugadu nou baru pijiwu iordure jiboeji.
ACT 26:20 Boetoji Damasco ba kurireu tada imagore boei ewo tugera ra turo pegareu piji ewo turo mekido tumeartoruwo Pao Kurireuji boe erduwawo ere tugera ra turo pegareu piji duji. Dukejere imagore aino Jerusalém ba kurireu tada jamedu. Dukeje imagore aino nou Judeu doge eno moto jamedu boe parugajeje. Imagore aino nou boe tuginaiwugei jamedu.
ACT 26:21 Dukodire awu Judeu doge ere tugeragu aino i. Iragojere Pao Kurireu uwai tada dukeje ere tugeragu i tuwo iwido.
ACT 26:22 Mare ji aino Pao Kurireu ure tugera maku inai dukodire iragojere aino woe ireadodutabo tawiagai, boe kurireuge ewiagai, marenarue doge ewiagai jamedu. Iwadaru ure nono jawu makore Pao Kurireu bataru jiwuge ewadaru mogadure. Iwadaru ure nono Moisés bataru mogadure. Ere pawie nuba boe mode pai. Inure tawie aino jamedu.
ACT 26:23 Egore nou umode boe ekinorudowu bimoduie mare jewodumoduie pugeje. Jewodureu boetojiwu moduie ema. Umoduie Judeu doge ewie, boe tuginaiwuge ewie nuba eromode tuwo tuginorudo boe pegareu piji. Nou bataru umoduie nono joru urugu mogaduie. Mare joru karega. Nou bataru jire egoino umode boe erduwado boe remawuji kodi.
ACT 26:24 Paulo makore aino dukeje Festo kudugodure bukajeje. Akore: – Akaora bai baire! Are arduwa kurido mare awu arduware jiboe ure akaora bai baido.
ACT 26:25 Paulo akore: – Itaora pegakare, ikimijera. Boe jokodu jire inagoino rugadu tawiagai.
ACT 26:26 Nono Paulo makore nou boe eimijera Agripaji pugeje. Akore: – Aki arduware awu inagoino jiboe jamedu boeji marigudu. Dukodire ipogurukare imagowo aino ai. Awu meartorure Jesus jiwuge ekare turo biado boe epiji. Dukodire arduware erore jiboeji rugadu, ewadaruji rugadu. Ameardae pemegado! Iorduware ameartorure jawu makore Pao Kurireu bataru jiwuge ewadaruji rugadu!
ACT 26:28 Mare Agripa makore Pauloji. Akore: – Akaidure awo imeartorudo Jesusji kuri aino mare imeartorukare ji raga.
ACT 26:29 Paulo akore: – Uu. Itaidure ameartoruwo Jesusji kuri aino. Ameartorukare kuri aino mare ia meri keje itaidure ameartoruwo Jesusji. Imagonure Pao Kurireu bagai baruto aparu tabo ameartoruwo ji rugadu, awu woewu boe eparu tabo emeartoruwo ji jamedu nono imeartoru moga jitu mogadure. Mare itaidukare boe ewo tagogudo corrente tabo nono ero moga i dure.
ACT 26:30 Dukodire nou boe eimijera kurireu Agripa ure turagojedo. Nou boe eimijera kurireu Festo ure turagojedo jamedu. Nou Agripa uwie aredu Berenice ure turagojedo jamedu. Boe eiamedu boe ere turagojedo.
ACT 26:31 Dukejere eture nou bai piji. Egore pui: – Awu imedu ro pega bokware, kodire ukare turugadu bitoduwo, tugudukawo baičoreuto jamedu.
ACT 26:32 Nono Agripa makore Festoji. Akore: – Awu imedu utumode pabiji mare makore taiduie Roma kejewu pagimijera kurireu aiwowo turore jiboeji ia turo pegareu bagai. Dukodire pawo utudo toro pagimijera kurireu César bagai rugadu.
ACT 27:1 Nou boe eimijerage ere tumeardae tawuje tuwo čedudo Roma ba kurireu ka dukeje ere Paulo maku tugobaigarege eimijera ai. Nou tugobaigarege eimijera iere Júlio. Nou Roma padure kejewu moto iere Itália. Ere ia ro pegareuge emagu nou Júlio ai jamedu. Nou tugobaigarege ekiere Roma kejewu boe eimijera kurireu o tugobaigarege reo.
ACT 27:2 Čedure nou moto piji ikarereu tabo. Nou ikarereu aregodure Adramítio ba kurireu piji. Ure turugadu tuduwo Ásia kejewu ba kurireu ka dukodire čedure tabo. Ia Macedônia kejewu imedu uture čedabo jamedu. Aregodure Tessalônica ba kurireu piji. Iere Aristarco.
ACT 27:3 Nou barogwato čedaregodure Sidom ba kurireu ka. Júlio ro pemegare Pauloji dukodire Paulo uture ikarereu piji tuiorduwo tumedagei nono Sidom ba kurireu keje. Emagere ere ia tuge maku Paulo ai utuwo tabo.
ACT 27:4 Sidom pijire čedure pugeje. Mare bakuru jeture čeno ikarereuji dukodire čedure Chipre moto kujegajeje nou bakuru jetukawo ikarereuji pugeje.
ACT 27:5 Čegurugodure nou pobo maereu kajeje toro bakowu ka, Cilícia moto ka, Panfília moto ka jamedu. Dukeje čedaregodure Mirra ba kurireu ka. Nou Mirra rakojere Lícia moto keje.
ACT 27:6 Čere čedawuje nou ikarereu piji nono. Dukejere Júlio jordure ia ikarereuji čeduwo tabo Itália moto ka. Aregodure Alexandria ba kurireu piji. Dukodire čere čedaredo nouia ikarereuto rugadu.
ACT 27:7 Čedure pugeje. Čegodure gu gu je. Boe rakare čei čedaregoduwo Cnido ba kurireu ka. Bakuru jore čedogi dukodire čedukare nou bakuru togi rugadu. Dukodire čere čemegido čeduwo Creta moto ka. Čerdure Salmona Riji.
ACT 27:8 Čegodu puredure nou Creta motoji. Čemaragodu rakare čedaregoduwo ia moto ka pugeje. Iere Čebadada Pemegareu. Puredure Laseia ba kurireuji.
ACT 27:9 Čemugu raire nou Čebadada Pemegareu keje. Čedumode pugeje dukeje boe pegamode čei nou ari kejere bubutu pegareu bakuru pegareu buture tu tu je. Judeu doge ere tuwadae iado marigudu. Nou ewadae iere Boe Ero Pegareu Bariguduwo Epiji. Nono Paulo makore nou ikarereu tadawu imei.
ACT 27:10 Akore: – Ča iordure nuba boe mode pai. Padumode awu boe piji dukeje boe pegamode pai rugadu. Boe pegamode awu ikarereuji jamedu. Boe pegamode awu ikarereu tadawu boei jamedu. Ia pagi pawimode jamedu.
ACT 27:11 Mare nou ikarereu tadawuge eimijera ure tumeardae maku nou tugobaigarege eimijera ai tuduwo pugeje. Emeartorukare Paulo bataruji kodi.
ACT 27:12 Nou čebadada pemegakare ikarereu paduwo keje nou boeki keje. Dukodire boe eiamedu boe etaidure tuduwo pugeje. Etaidure tuduwo Fenice ba kurireu ka turagojewo nono boeki keje. Nou Fenice rakojere Creta moto keje. Nou Fenice kejewu čebadada pemegare ikarereuji paduwo nono boeki keje.
ACT 27:13 Ia meri keje ia bakuru pemegareu aregodure sul piji. Dukodire nou mugure ikarereu tadawuge ime emeardaere tuduwo pugeje. Dukodire ere meriri tawuje pobo piji ikarereu utuwo pugeje. Dukeje čedure nou čebadada piji. Čegodu puredure nou Creta moto okwaji.
ACT 27:14 Ma čare ia bakuru rakareu aregodure nou moto piji pugeje. Bakuru pegareu nure ema rugadu.
ACT 27:15 Nou bakuru pegareu jeture ikarereuji. Čeragakare čewo ikarereu utudo nou bakuru togi dukodire čere čegera ra piji. Nou bakuru pegareu ure tuiodo ikarereu keje toro pobo maereu ka.
ACT 27:16 Čeburedure ia moto roguji. Iere Cauda. Nou moto rogu ure nou bakuru raka tawuje tu jao. Dukodire čere ika ta pobo piji čewo barigu ikarereuto.
ACT 27:17 Ere kogudo rugadu bakuru ukawo barigu poboto pugeje. Ere ikarereu kogudo bukigu kurireu tabo jamedu pobo pegareu ukawo ikarereu bowuje. Epagudure tubureduwo Líbia motoji pobo ko bokware nono kodi. Dukodire ere vela rawuje ikarereu re rakakawo. Bakuru uwo tuiodo ikarereu keje.
ACT 27:18 Nou bakuru pegareu akedukare kuri je. Nou barogwato bakuru pegareu kimore dukodire ere ia meture ikarereu tadaboe barigu poboto.
ACT 27:19 Nou barogwato bakuru pega kimore dukodire ere ia tumaragodure ikarereuji taboboe barigu poboto jamedu ikarereu barigoduwo, bakuru pegareu ukawo ikarereu bowuje.
ACT 27:20 Nou bakuru pegareu jeture ikarereu jiwu meri makare rugadu. Čerdukare meriji, kuiejeji boečoji jamedu. Dukodire čemeardaere čewimoduie rugadu.
ACT 27:21 Boe enogwagekare marigudu. Dukodire Paulo ure turagojedo tumagowo boei. Akore: – Tameartorukare iwadaruji toro Creta moto keje. Tameartorukare iwadaruji dukodire awu boe pegareu buture aino pai rugadu.
ACT 27:22 Mare aino inure tawie. Taragado tai rugadu. Pawimodukare rugadu. Tu awu ikarereu akedumode.
ACT 27:23 Imeartorure Pao Kurireuji. Utugare nure imi kodi. Ure ia tudugare baru tadawu arego itae boečoji.
ACT 27:24 Nou baru tadawu makore i. Akore, “Apagudukaba. Aragojemode Roma kejewu boe eimijera kurireu César jokorai. Pao Kurireu pemegare ai rugadu dukodire umode awu boe ekinorudo awu bakuru pegareu piji ewikawo.”
ACT 27:25 Ainore Pao Kurireu akore i. Dukodire inagoino tai. Tabagudukaba. Taragado tai. Imeartorure Pao Kurireu bataruji rugadu. Umode nono mako moga i dumogadure.
ACT 27:26 Mare nou bakuru pegareu umode parego ia pobo maereu tadawu moto rogu ka.
ACT 27:27 Boečo oto padure catorze bakuru ure čerego kimo nou pobo maereu to dukeje. Nou pobo maereu iere Mediterrâneo. Boečo oia keje nou maragodure ikarereu jiwuge erduware pobo ko akedunure duji. Čebureduiago motoji.
ACT 27:28 Dukodire ere bukigu rawuje buwodo ri tabo poboto tuwo pobo ko remagu. Nou pobo kore trinta e seis metros nono. Epagare tu jao. Nono ere bukigu rawuje pugeje. Pobo kore vinte sete metros.
ACT 27:29 Nono epagudure ikarereu bure jetuwo toriji dukodire ere meriri rawuje dure pobe puibiji tuwo ikarereu buredo nono. Nono nou maragodure ikarereu jiwuge emagore tuwaire ewagai barogwakododuwo kuri je rugadu.
ACT 27:30 Nono nou maragodure ikarereu jiwuge eiago taredo ikarereu piji. Ere ika rawuje poboto ikarereu piji. Boe emeardaere emaragoduie duji.
ACT 27:31 Mare Paulo makore tugobaigarege eimijeraji. Akore: – Nou maragodure ikarereu jiwuge etumode pabiji dukeje tamodukare taginorudo awu bakuru pegareu piji.
ACT 27:32 Dukodire nou tugobaigarege ere bukigu kado nou ikarereu piji ika utuwo epiji maragodure ikarereu jiwuge ekawo taredo nou ikato. Ča bakuru ure tuiodo nou ika keje nou ikarereu piji.
ACT 27:33 Barogwakododure dukeje Paulo mako raire ei enogwagewo. Akore: – Tagwagekare jiwu merire catorze.
ACT 27:34 Ča inogwamagudunure tai. Ia tage ko taragawo tawo taginorudo awu bakuru pegareu piji. Tamode taginorudo rugadu. Tamodukare tagogorido. Ia tagao tawujedumodukare tagaora piji.
ACT 27:35 Paulo makore aino dukeje ure tugeragu amireuji. Nono imadure Pao Kurireu apo nou amireu paru tabo nou boe ewiagai. Dukeje ure nou amireu kado. Nono ure ia kowuje.
ACT 27:36 Dukodire nou boe emororamagadukare pugeje. Eiamedu boe enogwagere jamedu.
ACT 27:37 Nou boe enodo padure kejewure 276 nou ikarereu tada.
ACT 27:38 Eiamedu boe ekuredure tuge tabo dukeje ere nouia trigo jamedu boe barigu poboto nou ikarereu barigoduwo.
ACT 27:39 Barogwakododure dukeje čerdure ia motoji. Mare nou maragodure ikarereu jiwuge erduwakare nou motoji. Mare erdure ia kugaruji nono pobo maereu okwai. Etaidure tuwo nou ikarereu bu nou kugaru keje.
ACT 27:40 Dukodire ere nou kogure meriri tabowu bukigu iku kado. Ere maragodure ikarereu jiwu traiga doge ekiwuje maragoduwo nou ikarereuji pugeje. Nono ere vela rutudo bakuru uwo ikarereu redo pugeje. Dukejere čedure mare ikarereu aregodukare pobo okwa ka.
ACT 27:41 Ča nou ikarereu ure tuwuredo ia pobo ko bokwareu kugaru keje. Nou ikarereu tudure nono. Nou pobo pegareu jetu rakare nou ikarereuji rugadu dukodire uiago nou ikarereu bowuje.
ACT 27:42 Tugobaigarege ere tumeardae tawuje tuwo baičoreu tadawuge ewido, ekawo tuginorudo nou ikarereu piji tugobaigarege epiji.
ACT 27:43 Mare eimijera aidukare Paulo biwo dukodire makore tugobaigaregei ekawo baičoreu tadawuge ewido. Nono makore eiamedu boei ewo taredo poboto tugurugoduwo boe kireu ka.
ACT 27:44 Iage ewo tugeragu ia ikarereu pijiwu iraji tuduwo tabo boe kireu ka. Aino čare čeiamedu boe čedaregodure boe kireu ka rugadu. Dukodire ia čegi čewikare poboto.
ACT 28:1 Čedaregodure nou moto ka dukeje čerduware nou moto iere Malta aino duji.
ACT 28:2 Nou Malta kejewuge ero pemegare čei rugadu. Bubutu aregodure čedae. Biakure čei rugadu. Dukeje iage ere jorugo čenai.
ACT 28:3 Paulo uture jerigi bagai. Ure tugeragu jerigiji dukeje ure bu joru keje. Ča awagu ure tudawuje jerigi piji joru uru koia. Ure toedo Paulo ieraji.
ACT 28:4 Nou Malta kejewuge erdure nou inoduji dukeje egore pui: – Awu imedu ro pegareu nure ema rugadu. Ure boe ewidowu nure ema rugadu. Ure tuginorudo pobo pegareu piji mare umodukare tuginorudo tuwi piji rugadu. Bimode rugadu.
ACT 28:5 Mare Paulo ure nou awagu barigu tugera piji joruto. Boe pegakare ji rugadu.
ACT 28:6 Nou Malta kejewuge epagare Paulo iera bokoduwo, biwo pači je. Čare epagare ji je mare boe pegakare Pauloji. Pegakare rugadu. Dukodire ere tumeardae mekido pugeje. Egore: – Boe etuwari nure ema!
ACT 28:7 Nou moto kejewuge eimijera iere Públio. O boepa padu puredure nou čeragojere kejewu boeji. Dukodire makore čei čeragojewo pudabo tuwai keje. Čeragojere uwai tadawu merire pobe metia bokware.
ACT 28:8 Nou Públio uo kogodure rugadu. Ukare tuie bu tubadure kejewu ira piji. Biri urure. Pegagurure jamedu. Ča Paulo ure turemo nou Públio uo padure tadawu baito. Makore paru tabo baruto Pao Kurireu bagai. Ure tugera bu keje. Nono ure pemegago.
ACT 28:9 Rore aino dukeje nouia kogodureu boe etaregodure nou Malta moto jamedu boe piji. Ure epemegago jamedu.
ACT 28:10 Dukodire emago pemegare čei. Ere turo pemegado čei. Ere toe maku čenai. Čedure pugeje dukeje čegere, čegudau areiare jamedu.
ACT 28:11 Arire pobe metia bokware dukeje čedure Malta moto piji ia ikarereu tabo pugeje. Nou ikarereu aregodure Alexandria ba kurireu piji. Nou ikarereu keje ia santo doge ekie padure, du ekiere Castor e Pólux. Nou ikarereu padure nono Malta moto keje nou boe ki keje. Aino čare čedure nou ikarereu tabo Malta moto piji.
ACT 28:12 Čedaregodure Siracusa ba kurireu ka dukeje čeragojere nonowu merire pobe metia bokware.
ACT 28:13 Dukeje čedure Siracusa ba kurireu piji ikarereu tabo. Nou barogwato čedaregodure Régio ba kurireu ka. Nou barogwato bakuru ure tumegido. Aino ča bakuru ure turugadu tuwo ikarereu re rakado. Dukodire merire pobe čei čedaregoduwo Pozuoli ba kurireu ka.
ACT 28:14 Nou ba kurireu keje čerdure ia čemedagei. Meartorure Jesus jiwuge nure emage. Emagore čei čebaduwo pudabo. Čeragojere ebo kejewu semana oto padure mitotu je. Dukeje čedure Roma ba kurireu ka čewure tabo.
ACT 28:15 Nou Roma kejewu čemedage meartorure Jesus jiwuge emeardure čedaregoduiago duji dukeje eture čedogi toro Ápio ba kurireu ka, Três Vendas ba kurireu ka. Paulo jordure nou meartorure Jesus jiwugei dukeje imadure Pao Kurireu apo nou boe doge etaregodure tudogi duji. Jakaregodure pudui rugadu.
ACT 28:16 Čedaregodure Roma ba kurireu ka dukeje ekare Paulo tugu baičoreuto. Ere mugudo ia bai tada. Tugobaigare mugure taiwo tabo ji nono.
ACT 28:17 Merire pobe metia bokware dukeje Paulo makore Judeu doge eimijerage ewagai ewo bato pui nono tuwai tada. Etaregodure dukeje Paulo makore ei. Akore: – Iwobe nure tagi. Iro pegakare pawobei Jerusalém ba kurireu tada. Ikare ikera ra jawu pawobe ere maku pagaiwu paro piji. Mare ere tugeragu i dukodire ere imagu Romano doge etai.
ACT 28:18 Romano doge enara raire i dukeje etaidure tuwo itudo pugeje. Erdukare ia iro pegareuji dukodire ekare iwido.
ACT 28:19 Mare pawobe Judeu doge etaidukare nou emeardaeji. Dukodire imagore ei ewo imagu Romano doge eimijera kurireu César ai aiwowo ia iro pegareu bagai. Mare imagokare iaboeji awu pawobe Judeu doge erore iboeji.
ACT 28:20 Dukodire imagore aino tawagai iwo tawie. Pawobe Israel doge epagare umode boe ekinorudowu bagai. Dujire imeartorure jamedu. Dukodire ikogudodure woe.
ACT 28:21 Nou boe egore: – Čewobe Judéia moto kejewuge ekare ia atugoreboe maku jetu čewagai tuwo čewie aiboeji. Aregodure nou Judéia moto pijiwuge čewobe emagokare iaboeji čewiagai jamedu. Erdu pegakare ai.
ACT 28:22 Mare čedaidure čerduwawo ameardaeji. Čemeardure boe emago pegare nou meartorure ameardae jiwugei duji.
ACT 28:23 Dukodire ere ia meri tawuje tuwo bato pui pugeje Paulo apo. Nou meriji Judeu doge etaregodure Paulo uwai ka pugeje. Emagare rugadu. Paulo ure erduwado tumeardaeji ča boečoto jii toro boečodumodu ka. Ure erduwado nuba Pao Kurireu rore pugeje, nuba Pao Kurireu utugarege ere, nuba boe eromode tuwo tugimijerado Pao Kurireuče. Paulo makore ei Moisés ure bu bapera kejewu Pao Kurireu bataruji. Makore ei mariguduwu makore Pao Kurireu bataru jiwuge ere bu bapera kejewu Pao Kurireu bataruji jamedu. Akore Jesus jie egoino.
ACT 28:24 Aino Paulo ure nou iage emeartorudo Jesusji. Mare iage emeartorukare rugadu.
ACT 28:25 Eture Paulo piji dukeje ekare tumeardae maku puai. Paulo makore ei marigudu. Akore: – Pao Kurireu Uwari mako pemegare marigudu jawu pawobei. Ainore akore nou makore Pao Kurireu bataru jiwu imedu Isaías biagai.
ACT 28:26 Akore, – Atudo awobe etae amagowo ei. Amagodo aino: “Tameardumode iwadaruji jii je mare tarduwamodukare iwadaruji. Tardumode irore jiboeji jii je mare tameartorumodukare i irore jiboeji rugadu.
ACT 28:27 Tagaidukare tameartoruwo Pao Kurireuji. Tagaidumode tameartoruwo Pao Kurireuji dukeje tagaiwomode Pao Kurireu rore jiboeji tarduwawo Pao Kurireu meardaeji. Tagaidumode tameartoruwo Pao Kurireuji dukeje tawiapaga pemegamode Pao Kurireu bataruji tarduwawo Pao Kurireu meardaeji rugadu. Dukejere tagaidumodukare taro pegareuji pugeje. Tamode tagera ra taro pegareu piji. Dukodire imode taginorudo taro pegareu piji. Mare tagaidukare tameartoruwo, tawijare mare tawiapaga pemegakare. Taekure mare tare taeku bu pugeje tagaiwokawo Pao Kurireu rore jiboeji.” – Ainore Pao Kurireu akore marigudu.
ACT 28:28 Nono Paulo uiago tuwadaru akedudo nou tuwobe Judeu dogei dukeje. Akore: – Inure tawie. Pao Kurireu bataru pemegareu utunure boe tuginaiwuge etae jamedu Pao Kurireu uwo ekinorudo jamedu. Emagere emeartorumode ji rugadu. Paulo akore aino dukeje nou Judeu doge eture piji. Emagore pui: – Akaidure nou Paulo bataruji? Akaidukare bataruji? Amagodo.
ACT 28:30 Paulo mugure nou bai kejewu jorure pobe ji nono. Tugobaigarege edure nono jamedu tietu tabo ji. Paulo ukimadure nou aregodure pudaewu boe eiamedu boebo.
ACT 28:31 Makore Pao Kurireu bataruji ewiagai. Ure erduwado nuba eromode tuwo tugimijerado Pao Kurireuče. Ure erduwado Pagimijera Jesus Cristo roji bataruji. Pogurukare tumagowo jiboeji. Tugobaigarege erdu pegakare nou Paulo makore jiboeji jamedu.
ROM 1:1 Paulo nure imi. Jesus Cristo utugare nure imi. Pao Kurireu makore iwagai. Ure tugeragu i tuwo itudo Jesus bataru pemegareu tabo boe etae iwo boe ewie nou bataru pemegareuji.
ROM 1:2 Marigudu Pao Kurireu ure nou makore Pao Kurireu bataru jiwuge ewie tumoduie nou umode boe ekinorudowu arego etae duji ia meri keje. Nou makore Pao Kurireu bataru jiwuge ere boe ewie nou Pao Kurireu bataru pemegareuji erdumoduie ji ia meri keje. Ere nou bataru pemegareu bu bapera keje jamedu.
ROM 1:3 Jesus Cristo jire nou Pao Kurireu bataru pemegareu akoino. Pao Kurireu onaregedu nure ema. Pagimijera nure ema. Imedure ema jamedu. Jaoboe Judeu doge eimijera kurireu iere Davi. Nou Davi uwobe nure Jesusče.
ROM 1:4 Jesus pemegare rugadu nono Pao Kurireu mogadure. Pao Kurireu ure Jesus jewodudo pugeje dutabore ure boe erdudo turagare duji. Dukodire boe erduware Pao Kurireu onaregedu nure ema duji.
ROM 1:5 Pao Kurireu meardae koiare Jesus makore iwagai tudugarewo imi tuwo itudo boe ewagai imagowo Jesus bataruji boe ewiagai. Itaidure ituwo moto jamedu boe parugajeje iwo boe tuginaiwuge erduwado nou bataruji emeartoruwo ji, emeartoruwo nou bataruji jamedu.
ROM 1:6 Tagi jamedu. Roma ba kurireu kejewuge nure tagi. Pao Kurireu makore tawagai tameartoruwo Jesusji. Tameartorumode Jesus Cristoji dukeje umode tuwobedo tagi.
ROM 1:7 Dukodire ire awu bapera atugodo iwo maku tawagai toro Roma ba kurireu ka. Pao Kurireu meardu kurire tai. Makore tawagai tuwobewo tagi. Pao Kurireu uwo turo pemegareu maku tagai tabemegawo Pao Kurireuji tabemegawo boei jamedu. Pagimijera Jesus Cristo rowo aino tai jamedu.
ROM 1:8 Ča boe eiamedu boe emeardure tameartorure Jesus jituji. Dukodire ikimadure Pao Kurireu apo tarore aino dukodi. Jesus Cristo ure tugu redo paro pegareu moriče. Nou inodu kodire pagimadumode Pao Kurireu apo rugadu.
ROM 1:9 Pao Kurireu utugare nure imi. Imeartorure bataruji iraga tabo, imeardae tabo, itaidu tabo. Dukodire imagore Jesus bataru pemegareuji boe ewiagai. Pao Kurireu onaregedu jire awu bataru pemegareu akoino. Pao Kurireu jorduware boe jokodu jire inagoino duji. Jorduware iwiabuture tu tu tawugeje duji.
ROM 1:10 Imagore Pao Kurireu bagai baruto dukeje iwiabuture tu tu tawugeje. Pao Kurireu meardae pemegare. Dukodire inogwamagudure ji uwo itudo toro tawagai kuri aino iorduwo tai dubagai.
ROM 1:11 Ikiarigodure tawagai dukodire itaidure iorduwo tai rugadu. Itaregodumode tagae dukeje ireadodumode Pao Kurireu ro pemegare jiboeji tawiagai Pao Kurireu Uwari uwo turo pemegareu maku tagai tuwo tumaragodae maku tagai tameartoru rakawo Pao Kurireuji.
ROM 1:12 Itaregodumode tagae dukeje pareadodumode Pao Kurireu rore jiboeji pu biagai. Dukodire tarduwamode imeartoru rakare Pao Kurireuji duji. Dukodire iorduwamode tameartoru rakare Pao Kurireuji duji. Nono paegaremode pai puapo rugadu.
ROM 1:13 Imedage nure tagi. Iwo tawie. Marigudu itaidure ituwo toro tawagai. Mare iroiwakare itaregoduwo tagae. Dukodire iture ia moto ka iwo nouia boe tuginaiwuge ewie Jesus bataru pemegareuji toro. Ire emeardae pemegado emeartoruwo Jesusji rugadu. Judeu doge karegure emage. Mare aino čare itaidure itaregoduwo tagae jamedu. Itaregodumode tagae dukeje itaidure iwo ia meartorukare Jesus jiwuge tamedage emeardae pemegado jamedu emeartoruwo Jesusji.
ROM 1:14 Imaragodae reo. Itaidure boe eiamedu boe emeartoruwo Jesus bataruji. Awu boe tuginaiwuge oe kurireuge, awu boe tuginaiwuge oe bokwareuge jamedu, awu jorduwareuge, awu jorduwa bokwareuge jamedu.
ROM 1:15 Dukodire itaidure itaregoduwo toro tawagai jamedu imagowo Jesus bataru pemegareuji Roma kejewuge ewiagai.
ROM 1:16 Ipogurukare imagowo Jesus bataru pemegareuji boe ewiagai. Nou Jesus bataru pemegareu koiare umode boe erduwado Jesusji. Umode emeartorudo Jesusji. Emeartorumode Jesusji dukeje Pao Kurireu umode ekinorudo bope doge eda kejewu joru pegareu piji. Judeu doge emeardure nou Jesus bataru pemegareuji boetoji. Dukejere boe tuginaiwuge emeardure ji jamedu. Aino čare boe eiamedu boe emeardumode ji jamedu. Pao Kurireu aidure boe eiamedu boe emeartoruwo Jesusji rugadu.
ROM 1:17 Nou Jesus bataru pemegareu ure pawie Pao Kurireu romode pai duji. Paro pemegareu tabo karega pamode Pao Kurireu meardu kurido pai. Pameartorumode Pao Kurireu jitu keje Pao Kurireu umode tugeragu pai pudae tuwo pado nono ro pemegareuge emogadure. Marigudu Pao Kurireu bataru padure nou bapera keje boe erduwawo. Akore: – Boe emeartoruwo tu Pao Kurireuji rugadu meri jameduji jii toro. Nono Pao Kurireu umode tugeragu ei pudae tuwo edo nono ro pemegareuge emogadure. Dukodire nou Pao Kurireu ure tugeragu jiwuge ewimodukare pugeje.
ROM 1:18 Mare Pao Kurireu korigodure boe ero pegare dukodi. Korigodure boe emeardae pegare dukodi. Boe emeardae pegareu koiare ure boe erduwa bokwado Pao Kurireu bataru remawuji. Dukodire Pao Kurireu korigodure.
ROM 1:19 Dukodire Pao Kurireu ro pegare ei rugadu ero pegareu moriče. Marigudu Pao Kurireu ure baru towuje moto towuje jamedu. Boe etaiwomode motoji, baruji dukeje erdumode Pao Kurireu maragodaeji. Nono erduware Pao Kurireu nure ema duji. Erduwamode Pao Kurireu rakare duji, raka akedumodukare rugadu jii toro rugadu. Dujire erduwamode rugadu. Mare emeartorukare Pao Kurireuji etaidukare kodi. Ekimadukare apo. Emeardae pegare rugadu. Emeardae pemegareu metukare etaora tada. Emeardaere tu turo pegawo rugadu. Emeardae ure nono boečore. Mare boečo ji karega inagoino. Ere tumadadudo tu je.
ROM 1:22 Egore tuiorduwaie rugadu. Mare pagare egoino erduwa bokware rugadu.
ROM 1:23 Pao Kurireu bimodukare rugadu ji toro rugadu dukodi akedumodukare. Pemegareu remawu nure ema rugadu. Mare awu boe emagokare bagai. Ekare tumago pemegado Pao Kurireu bagai. Mare emagore ia boe ere towu boeji tumeartoruwo ji. Ere irado nono imedu mogadure. Ere udo nono kiebarege emogadure. Ere udo nono barege emogadure. Ere udo nono batrareu mogadure. Nono ere tubu jodo nou ture towujeboe jokorai nono boe ero moga Pao Kurireu jokorai dumogadure.
ROM 1:24 Dukodire Pao Kurireu ure tugera ra nou boe epiji rugadu. Nono erore tumeardaere jiboeji rugadu. Emeardaere tu turo pegawo. Ero pegare rugadu puapo. Nono boe epogurure nou boe ero pegareuče rugadu.
ROM 1:25 Nou boe emeartorukare boe remawuji. Emeartorukare Pao Kurireu bataruji. Mare emeartorure tu pu batrarodaeji. Ere tubu jodo Pao Kurireu ure toboe jokorai tumago pemegawo ji Pao Kurireu mugato. Etaidure tumeartoruwo Pao Kurireu ure towu boeji. Mare etaidukare tumeartoruwo Pao Kurireuji. Pao Kurireu koiare ure boe jamedu boe towuje. Dukodire ča pawo pabu jodo pamago pemegawo tu Pao Kurireuji rugadu jii toro.
ROM 1:26 Mare nou boe ero pegare. Dukodire Pao Kurireu ure tugera ra epiji. Aino čare nou boe etaidure boe epogurure jiboeji. Etaidure rugadu tu tieribariwo pui. Areme ere tugera ra ime epiji tieribariwo pui.
ROM 1:27 Ime erore aino jamedu. Ere tugera ra areme epiji tieribariwo pui. Boe epogurure jiboe jire etaidure. Nou erore inodu koiare Pao Kurireu ro pegamode ei nou ero pegareu moriče.
ROM 1:28 Nou boe etaidukare tuwiapagawo Pao Kurireu bataru remawuji. Dukodire Pao Kurireu ure tugera ra epiji. Aino etaoragorore nou tumeardae pegareuji turo pegareuji. Dukodire ero pegare tu tu je.
ROM 1:29 Etaora korobadure tumeardae pegareu tabo. Etaidure tu turo pegawo. Enogwa kidure tu pudai diero keje. Eimaredure pui to diero bagai. Ere boe pegado pui. Ekorigodure tumedage enoe keje. Ere tumedage ewido. Etokire pui. Ere pu jekiripagado. Emeardae pegare tumedage erore jiboeji. Enogirure pui.
ROM 1:30 Emago pegare tumedage erore jiboeji. Erdu pegare Pao Kurireuji. Erdu pegare boe emeardae pemegareuji. Ewadaru očarore. Emeardaere maiwu turo pegareuji. Emeartoru bokware tujeji tuoji.
ROM 1:31 Etaidukare turo pemegawo. Emagore ia tuwadaruji boe ewiagai mare pagatu je. Enogudugodukare boebo.
ROM 1:32 Pao Kurireu ure boe erduwado marigudu. Akore boe ero pegamoduie aino dukeje boe ewimoduie. Dukodire nou boe erduware tuwimoduie duji nou Pao Kurireu bataru kodaji. Du inodu ekare tugera ra nou turo pegareu jamedu boe piji. Erdu pemegare nou turo pegareu boeji jamedu. Erdu pemegare boe ero pegareuji jamedu nono turo mogadure. Egore pemegaie aino nou boe ero pegareuji jamedu.
ROM 2:1 Ia tagi tamago pegamode tamedagei ero pegare jiboeji mare taromode nono erore dukeje tamagore jiboe butumode tawugeje jamedu. Tawadaru motumode tai mare du inodu tabo tamodukare taginorudo. Ainore boemode boe eiamedu boei rugadu.
ROM 2:2 Pao Kurireu ro jetororeu reo. Parduware Pao Kurireu batrarodukare rugadu duji. Emare aiwomode boe ero pegareu bagai. Dukodire makomode boei boe ero pegareu jiboeji. Umode boe ewie turo pegamoduie ei nou ero pegareu moriče duji. Dukodire taro pegamode nono ro pegareuge ero mogadure dukeje Pao Kurireu bataru pegareu butumode tawugeje jamedu taigoia kodi taro pegareu moriče. Tagagore ia boe ero pegaie. Mare taromode nono ero mogadure dukeje boe pegamode tai jamedu.
ROM 2:4 Tamago pegakaba Pao Kurireu ro pemegareuji. Emare ro pemegare tai rugadu. Okudugodure tagabo rugadu. Korigodumodukare tai pagatu je. Emare aidure tuwo tagiarigodudo taro pegareuji tawo tagera ra taro pegareu piji. Dukodire ro pemegare tai. Tarduware nou inoduji rugadu.
ROM 2:5 Mare tagiarigodukare nou taro pegareuji. Tagaidure nou tabegareu roriwo tu taiogi. Tagaidukare tameartoruwo Pao Kurireuji rugadu. Dukodire tare Pao Kurireu ro pegareu kuričigodo tai. Pao Kurireu korigodure ro pegareugei. Dukodire toro ia meri keje ro pegamode ei. Mare paga karega ero pegareu moriče rugadu. Tameartorumodukare ji dukeje ro pegamode tai rugadu nouia meri keje jamedu.
ROM 2:6 Boe ero pegamode dukeje Pao Kurireu umode erdudo boe pegareuji rugadu. Boe ero pemegamode dukeje Pao Kurireu umode erdudo boe pemegareuji jamedu.
ROM 2:7 Ia boe ero pemegare tu tu je. Etaidure turo pemegawo. Etaidure tubemegawo. Etaidure tuwo turo pemegado tu tu je. Etaidure tieduwo toro baru tada. Nou boe erore aino emeardaere aino kodire Pao Kurireu umode eewodudo pugeje. Dukodire ewimodukare pugeje. Eragojemode Pao Kurireu apo du akedumodukare rugadu.
ROM 2:8 Mare ia boe ewiapagare tu pudui. Etaidukare boe pemegareuji. Etaidukare Pao Kurireu bataru remawuji. Etaidure tu boe emeardae pegareuji turo pegawo tu tu je. Dukodi čare Pao Kurireu korigodumode ei rugadu. Ro pegamode ei rugadu ero pegareu moriče.
ROM 2:9 Dukodire boe pegamode ro pegareugei rugadu. Boe rakamode ei. Erduwamodukare nuba turomode pugeje. Boe pegareure ei rugadu. Boe pegamode Judeu doge ro pegareugei. Boe pegamode boe tuginaiwuge ro pegareugei jamedu.
ROM 2:10 Mare Pao Kurireu umode boe pemegado ro pemegareugei. Umode epemegado boe eiamedu boe etaiduwo ei eiamedu boe epemegawo pui. Mako pemegamode ei. Umode boe pemegado Judeu doge ro pemegareugei. Umode boe pemegado boe tuginaiwuge ro pemegareugei jamedu.
ROM 2:11 Pao Kurireu jorduware boe eiamedu boei. Boe remawu tabore meardaere boe eiamedu boei. Umodukare tuiordae tumeardae tawujedu pagado boei.
ROM 2:12 Pao Kurireu umode ro pegareuge eiamedu boe ewarigu tubiji bope doge edure kejewu joru pegareuto ero pegareu moriče. Marigudu Pao Kurireu ure Judeu doge eno bakaru maku Judeu doge etai. Dukodire nou bakaru ure Judeu doge erduwado turo pemegawo Pao Kurireu meardaeji. Mare du inodu tabo nouia Judeu doge ekodukare nou Pao Kurireu meardaeji rugadu. Ero pegare Pao Kurireu jakai. Dukodire Pao Kurireu umode ewarigu bope doge edure kejewu joru pegareuto ero pegareu moriče. Pao Kurireu ukare to bakaru maku boe tuginaiwuge etai. Mare nou boe tuginaiwuge erduware turo pemegawo jamedu. Mare du inodu tabo nou boe tuginaiwuge ere tuwarigu boeto nou tuiordae pemegareu piji rugadu. Ero pegare Pao Kurireu jakai jamedu. Dukodire Pao Kurireu umode ewarigu bope doge edure kejewu joru pegareuto ero pegareu moriče.
ROM 2:13 Pao Kurireu ure Judeu doge eno bakaru maku etai dukeje ewiapagare nou bakaruji. Mare emeartorumodukare ji dukeje Pao Kurireu jordu pemegamodukare ei. Mare emeartorumode Pao Kurireu ure maku pudaiwu bakaruji dukeje edu pemegamode Pao Kurireu apo rugadu.
ROM 2:14 Marigudu Pao Kurireu ukare to bakaru maku boe tuginaiwuge etai. Dukodire erduwakare Pao Kurireu o bakaruji. Mare du inodu tabo boe eiamedu boe erduware boe pegareuji boe pemegareuji jamedu. Boe ero pemegare dutabore boe erduware turo pemegare duji. Egore nou ro pemegareu nuie ema.
ROM 2:15 Tu pudumi tumeardae tabo boe tuginaiwuge ere tumeardae udo nono Pao Kurireu meardae mogadure. Dukodire ero pemegamode. Erduware turo pemegawo. Mare ero pegamode dukeje erduwamode turo pegare duji jamedu. Ainore boe eiamedu boe erore. Ainore boe tuginaiwuge eiamedu boe erore jamedu.
ROM 2:16 Inure tawie Jesus bataru pemegareuji. Boe eiamedu boe erduware turo pemegawo. Mare boe etaidure tuwo tumeardae pegareu biado Pao Kurireu piji. Mare Pao Kurireu jorduware boe eiamedu boe emeardaeji. Dukodire ia meri keje Pao Kurireu umode Jesus Cristo rawuje mato moto ka tuwo boe ewie kodiba boe ero pegare emeardae pegare jamedu. Pao Kurireu koiare umode Jesus rawuje tuwo ro pegareuge eiamedu boe edudo boe pegareu keje rugadu.
ROM 2:17 Ia tagi Judeu doge nure tagi. Tagaidure Pao Kurireu ure maku tagaiwu bakaruji. Tagagore tameartoruie ji. Tagagore Pao Kurireu aiduie tai.
ROM 2:18 Tarduware Pao Kurireu aidure jiboeji tameartoruwo ji. Nou ure maku tagaiwu bakaru ure tarduwado tawo tameardae pemegareu tawuje. Ure tarduwado tawo jorduwa bokwareuge erduwado. Ure tarduwado tawo boe etore erduwado. Boe remawu jire ure tarduwado. Ča tagagore tarduwaie tawo jorduwa bokwareuge erduwado nono boe emode joku bokwareuge erduwado dumogadure. Tagagore tarduwaie tawo jorduwa bokwareuge erduwado nono boečojiwu joru urugu pemegareu mogadure boe etododai dumogadure.
ROM 2:21 Kočare tare boe erduwado mare tagare tarduwado. Tamagore boei boe ekiwogukawo. Mare tagire tagaidure tagiwoguwo.
ROM 2:22 Tamagore boei eribarikawo toreduje piji toredu piji jamedu. Mare tagire taeribarire tagoreduje piji tagoredu piji rugadu. Boe ere tuwai tadawu santo dogedo tuwo tubu jodo jokorai tuwo pao kurireugedo emage pudai. Tagagore ei erokawo aino. Mare tagire tagiwogure nou eno santo doge ewai tadawu ia boeji tagoče.
ROM 2:23 Tawadaru očarore Pao Kurireu ure tuwadaru maku tagai duji. Mare tameartorukare ji dukodire tare Pao Kurireu pogurudo.
ROM 2:24 Marigudu padure bapera kejewu Pao Kurireu bataru akore: – Judeu doge ero pegareu koiare ure boe tuginaiwuge emago pegado Pao Kurireuji.
ROM 2:25 Judeu doge ere tonaregedu imedurogu baka oto birirogu kado tuwo Pao Kurireu uwobedo pudumi. Tameartorumode nou Pao Kurireu ure maku Judeu doge etaiwu bakaruji dukeje ure turugadu tawo tagonaregedu imedurogu baka oto birirogu kado nou taroiaji. Mare tameartorumodukare Pao Kurireu ure maku Judeu doge etaiwu bakaruji dukeje pagatu jere taromode ainono.
ROM 2:26 Boe tuginaiwuge ekare tonaregedu imedurogu baka oto birirogu kado. Mare emeartorumode Pao Kurireu ure maku Judeu doge etaiwu bakaruji dukeje Pao Kurireu meardae mode ei nono tumeardae moga nou ure tonaregedu imedurogu baka oto birirogu kadowuge dumogadure.
ROM 2:27 Ia tagi Judeu doge nure tagi. Mare tameartorukare Pao Kurireu ure maku tagaiwu bakaruji. Padure bapera keje. Tare tagonaregedu imedurogu baka oto birirogu kado. Mare tameartorukare tago bakaruji. Boe tuginaiwuge ekare tonaregedu imedurogu baka oto birirogu kado. Mare emeartorure Pao Kurireu ure maku tagaiwu bakaruji. Boe erdure nou boe tuginaiwuge ero pemegareu kodure taro kori duji. Dukodire boe erduware ro pegareuge nure tagi duji. Emago pegamode taro pegareuji Pao Kurireu biagai.
ROM 2:28 Pao Kurireu ure bakaru maku mariguduwuge Judeu doge etai eno bakaruče. Dukodire Judeu doge eiamedu boe emeardaere Pao Kurireu uwobe remawuge nuie pudumi duji. Nou eno bakaru koiare ure Judeu doge edo tonaregedu imedurogu baka oto birirogu kado rugadu. Mare Judeu doge emodukare tumeardae pemegado tumeartoruwo tu Pao Kurireuji taidu tabo dukeje, Pao Kurireu uwobe modukare emage. Pao Kurireu umodukare tuwobedo emage. Pao Kurireu ure bakaru maku Judeu doge etai eno bakaruwo ema. Nou inodu kodi karega Pao Kurireu umode tuwobedo emage. Mare Pao Kurireu Uwari umode Judeu doge emeardae pemegado dukeje etaidumode tumeartoruwo tu Pao Kurireuji rugadu. Judeu doge erore aino dukeje Pao Kurireu uwobere emage rugadu. Pao Kurireu Uwari umode ia boe emeardae pemegado jamedu emeartoruwo tu Pao Kurireuji. Nou boe erore aino dukeje Pao Kurireu uwobere emage rugadu. Nou meartoru kuričigore Pao Kurireu jiwuge eire Pao Kurireu ure tugeragu tuwobewo emage. Dukodire Pao Kurireu mako pemegare ei erore jiboeji rugadu. Boe emago pemegamode iagei mare Pao Kurireu mako pemegamode nou meartorure puduiwugei, kodumode toro nou boe emagore jiwuge ekori.
ROM 3:1 Ia boe enarare. Egore: – Boe pemegamode nou Judeu dogei rugadu ka na boe tuginaiwuge epiji? Judeu doge emeartorumode Pao Kurireu ure maku pudaiwu bakaruji dukeje ekodiwamodu kana rugadu? Nono boe pemegamode ei rugadu kana?
ROM 3:2 Mare iwo tawie boe remawuji. Boe pemegamode Judeu dogei rugadu. Etaire Pao Kurireu ure tuwadaru maku etu pemegawo nou Pao Kurireu bataruji rugadu.
ROM 3:3 Ia boe enarare pugeje. Egore: – Ia Judeu doge emeartorukare Pao Kurireu ure maku pudaiwu bakaruji. Nono Pao Kurireu umode tugera ra epiji kana?
ROM 3:4 Boro! Pao Kurireu umodukare tugera ra epiji. Umode tumagore jiboe jetudo pudui rugadu. Boe eiamedu boe egore tumeartoruie Pao Kurireu bataruji mare pagare egoino. Mare Pao Kurireu umodukare tugera ra epiji. Mariguduwu Judeu doge eimijera kurireu Davi ure Pao Kurireu bataru bu bapera keje marigudu. Davi ro pegare. Mare Pao Kurireu mako pegare nou Davi ro pegareuji nono Davi jorduware Pao Kurireu akoino puduiboe ure turugadu duji. Kodire Davi akore: – Pao Kurireu mako pegare boe ero pegareuji dukodire boe jokodu jire akoino; – Boe erdu pegare Pao Kurireu akoino pudui duji mare boe jokodu jire Pao Kurireu akoino boei dukodire eroiwakare tumagowo iaboeji Pao Kurireu bataru jipagi.
ROM 3:5 Mare ia boe doge egore: – Čero pegare. Boe jokodu. Čero pegare boe egai dukodire nou boe etaidu kurire Pao Kurireu ro pemegareuji. Dukodire čero pegareu koiare ure nou boe etaidudo Pao Kurireu ro pemegareuji. Dukodi čare Pao Kurireu ro pegamodukare čei nou čero pegareu moriče. – Čero pegareu ure boe etaidudo Pao Kurireu ro pemegareuji. Etaidukare čero pegareuji dukodire etaidu kurire Pao Kurireu ro pemegareuji. Čere boe etaidudo Pao Kurireuji. Ča Pao Kurireu ro pegamodukare čei. Ia boe egore aino mare pagare egoino.
ROM 3:6 Nou emagore jiboe ukare turugadu. Pao Kurireu rore jiboe umode turugadu. Ro pegamode boei ero pegareu moriče rugadu. Mare du pegakare.
ROM 3:7 Iage egore: – Čewadrarodure. Boe jokodu. Mare čewadrarodae pegare ia boe doge egai dukodire nou boe doge etaidure Pao Kurireu bataru remawuji. Boe jokodu jie Pao Kurireu akoino rugadu. Nou boe erduware boe jokodu jie Pao Kurireu akoino rugadu duji. Etaidure Pao Kurireu bataru remawuji čewadaru piji. Dukodi čare čere boe etaidudo Pao Kurireu bataru remawuji. – Čewadrarodae koiare ure boe etaidudo Pao Kurireu bataru remawuji. Pao Kurireu bataru pemegare nou boei. Etaidukare čewadrarodaeji dukodire etaidu kurire Pao Kurireu bataru remawuji. Čere etaidudo Pao Kurireu bataruji dukodire Pao Kurireu ro pegamodukare čei čewadrarodae moriče. Ainore ia boe doge egore. Mare pagare egoino. Erduwa bokware tumagore jiboeji.
ROM 3:8 Nou boe doge egore: – Ča pawo paro pegado boei etaiduwo Pao Kurireu ro pemegareuji. Paro pegareu koiare umode boe etaidudo Pao Kurireuji ro pemegareu nure ema kodi. Ainore ia boe doge egore mare pagare egoino. Emeardaere ainoie inagore jamedu. Mare aino karega inagore. Pao Kurireu ro pegamode nou akoinowugei rugadu ero pegareu, ewadaru pegareu moriče.
ROM 3:9 Iage enarare. Egore: – Nou Judeu doge ero pemegare rugadu nou boe tuginaiwuge epiji? Aino rugadu kana? Boro! Ire tarduwado marigudu. Judeu doge eroiwakare tuwo tugera ra nou turo pegareu piji nono nou boe tuginaiwuge emogadure. Nou boe tuginaiwuge eroiwakare tuwo tugera ra turo pegareu piji jamedu.
ROM 3:10 Marigudu Pao Kurireu bataru padure bapera keje. Akore: – Boe eiamedu boe ero pegare. Ro jetororeu bokware.
ROM 3:11 – Boe erduwakare tuwo tumeardae pemegareu tawuje rugadu. Erduwakare tuwo tumeardae jetorodo. Nou inodu boe bokware rugadu. – Mako pemegare Pao Kurireu jiwuge bokwa.
ROM 3:12 – Boe eiamedu boe ere tugera ra Pao Kurireu ro piji. – Eiamedu boe ere tuwarigu boeto. – Boe eiamedu boe ero pemegakare. Ro pemegareuge bokware rugadu.
ROM 3:13 – Boe eiamedu boe emode pu jekiripagado. – Ewadrarodumode rugadu tu tu je jii aino. – Emago pegamode boei. Ewadarure nono awagu o korireu umogadure. Tuwadaru pegareu kodi umode timedia korigo rugadu.
ROM 3:14 – Ewadaru pijire boe pegareboe ure tudawuje.
ROM 3:15 – Ere akedo pudui tuwo boe ewido.
ROM 3:16 – Ere boe jamedu boe pegado tiedureu jamedu boe keje.
ROM 3:17 – Erduwakare tuwo tuiordae pegareu barigu tubiji.
ROM 3:18 – Ekare tuioku kidugo Pao Kurireuji dukodire emeartoru bokware Pao Kurireuji. Ainore Pao Kurireu akore.
ROM 3:19 Boe etaidumode tumeartoruwo Pao Kurireu ure maku Judeu doge etaiwu bakaruji dukeje emeartorudo nou bakaru jamedu boeji. Mare boe eroiwakare tumeartoruwo nou bakaruji rugadu. Boe etaidure tumago pemegawo pudui Pao Kurireu biagai mare parokačereu bokware pugeje emeartoru bokware kodi. Nono Pao Kurireu ro pegamode boe eiamedu boei ero pegareu moriče.
ROM 3:20 Pameartorumode Pao Kurireu ure maku Judeu doge etaiwu bakaruji dukodi karega Pao Kurireu umode pamugu pemegado pudabo. Pao Kurireu ure maku Judeu doge etaiwu bakaru koiare ure parduwado ro pegareuge nure pagi duji.
ROM 3:21 Mare aino Pao Kurireu ure boe erduwado nuba turomode tuwo boe emugu pemegado pudabo. Umodukare udo nono ture maku Judeu doge etaiwu bakaru mogadure rugadu. Ure Moisés jorduwado nou bakaruji uwo maku Judeu doge etai. Nou bakaru ure boe ewie Pao Kurireu umoduie boe emugu pemegado pudabo duji. Nou makore Pao Kurireu bataru jiwuge ere boe ewie jamedu.
ROM 3:22 Mare aino boe emeartorumode Jesus Cristoji dukeje Pao Kurireu umode emugu pemegado pudabo. Umode tugeragu ei pudae tuwo edo nono ro pemegareuge emogadure. Boe eiamedu boe ero pegare rugadu dukodire nou ero pegareu koiare ure edu jaedo Pao Kurireu piji. Mare meartorure Jesus jiwuge emagere Pao Kurireu umode ekinorudo. Umode tugeragu meartorure Jesus jiwuge eiamedu boei tuwo edo nono ro pemegareuge emogadure, tuwo emugu pemegado pudabo. Aidure turowo aino boe eiamedu boei rugadu.
ROM 3:24 Pao Kurireu ro pemegare boei. Ure tonaregedu Jesus Cristo maku boe etai biwo boe emugato ero pegareu moriče. Dukodire Jesus Cristo umode meartorure puduiwuge eiamedu boe ekinorudo. Pao Kurireu umode tugeragu ei pudae tuwo edo nono ro pemegareuge emogadure. Mare Pao Kurireu umodukare nou turore jiboe morido boe etai.
ROM 3:25 Marigudu Pao Kurireu akore tumoduie boe ero pegare jiboe morido etai. Mare okudure boebo jii je dukodire biapagakare nou boe ero pegare jiboeji jii je. Mare aino čare Pao Kurireu ure tonaregedu maku boe etai. Ure tugu redo boe eiamedu boe ero pegareu moriče. Boe emeartorumode Jesusji dukodire Pao Kurireu biagodumode ero pegareu piji. Mare paga karega. Pao Kurireu ure nou boe ero pegareu morido tonaregedu ku tabo. Dukodire Pao Kurireu makore jiboe jeture pudui rugadu boe ero pegareu morimoduie. Dukodire boe erduware Pao Kurireu rore jiboe jamedu boe jetorore duji. Mare paga karega. Pao Kurireu ure meartorure Jesus jiwuge ero pegareu barigu epiji emugu pemegawo pudabo. Dukodi čare Pao Kurireu rore jiboe jetorore rugadu.
ROM 3:27 Dukodire pawadaru očaromodukare parore jiboeji. Pameartorumode Pao Kurireu ure maku Judeu doge etaiwu bakaruji mare pawadaru očarokawo parore jiboeji. Pameartorumode Jesus jitu keje Pao Kurireu umode paro pemegado.
ROM 3:28 Pameartorumode Pao Kurireu ure maku Judeu doge etaiwu bakaruji du inodu tabo Pao Kurireu umodukare pamugu pemegado pudabo. Mare pameartorumode Jesus jitu keje nono Pao Kurireu umode tugeragu pai pudae tuwo pamugu pemegado pudabo.
ROM 3:29 Tu Judeu doge karega. Mare boe eiamedu boe emeartoruwo Pao Kurireuji. Boe tuginaiwuge jamedu emeartoruwo Pao Kurireuji.
ROM 3:30 Pao Kurireu ure mitotu je. Judeu doge emeartorumode Jesus jitu keje Pao Kurireu umode tugeragu ei pudae tuwo emugu pemegado pudabo. Boe tuginaiwuge emeartorumode Jesus jitu keje Pao Kurireu umode tugeragu ei pudae tuwo emugu pemegado pudabo jamedu.
ROM 3:31 Pameartorure tu Jesusji rugadu mare pamodukare Pao Kurireu ure maku Judeu doge etaiwu bakaru pijido. Pameartorure Jesusji dukodire parduware Pao Kurireu ure maku Judeu doge etaiwu bakaru jeture pudui rugadu duji.
ROM 4:1 Tagaiwodo jawu marigudu pawobe etuo Abraão rore jiboeji. Umode tarduwado nou inagore jiboe ure turugadu.
ROM 4:2 Abraão ro pemegare dukodi karega Pao Kurireu ure mugu pemegado pudabo. Boe ero pemegamode tumugu pemegawo Pao Kurireu apo dukeje ewadaru očaromode nou turo pemegareuji. Mare pagatu je. Pao Kurireu aidukare nou inoduji.
ROM 4:3 Pao Kurireu ure tuwadaru bu bapera keje. Akore: – Abraão meartorure Pao Kurireuji dukodire Pao Kurireu ure tugeragu Abraãoji pudae tuwo udo nono ro pemegareu mogadure.
ROM 4:4 Boe emaragodumode dukeje diero makudumode etai. Makudu paga karegure etai makudure etai emaragodae moriče.
ROM 4:5 Mare boe ero pemegare dukodi karega Pao Kurireu aidure boei. Mare boe emeartorumode Pao Kurireuji dukeje emare umode tugeragu ei pudae tuwo edo nono ro pemegareuge emogadure. Pao Kurireu akore turo pegamodukaie nou meartorure puduiwugei, tumodukaie ero pegareu morido etai.
ROM 4:6 Jaoboe Judeu doge eimijera Davi jorduware nou inoduji. Kodire Davi akore Pao Kurireu aidure jiwu jakaremoduie pudui rugadu. Pao Kurireu ure tugeragu nou meartorure puduiwugei tuwo edo nono ro pemegareuge emogadure. Dukodire jordu pemegamode ei dukodire nou meartorure Pao Kurireu jiwuge egaremode pudui rugadu. Boe pemegamode ei. Turo pemegareu kodi karega mare emeartorure Pao Kurireuji dukodire Pao Kurireu jordu pemegare ei. Davi akore:
ROM 4:7 – Pao Kurireu biagodumode ro pegareuge ero pegareu piji dukodi egaremode pudui rugadu. Ero pegare mare du inodu tabo Pao Kurireu umodukare edo turo pegareu morido. Boe pemegamode ei.
ROM 4:8 – Pagimijera Kurireu umodukare ro pegareuge ero pegareu bu bapera keje dukodire egaremode pudui rugadu. Boe pemegamode ei kodi.
ROM 4:9 Judeu dogeire Davi akoino. Boe tuginaiwugeire akoino jamedu. Padure bapera kejewu Pao Kurireu bataru akore: – Abraão meartorure Pao Kurireuji dukodire Pao Kurireu ure tugeragu ji pudae. Ure udo nono ro pemegareu mogadure.
ROM 4:10 Judeu doge emeardaere boe ewo tuwaga oto biri kado Pao Kurireu uwo tugeragu pudui pudae. Mare Abraão ukare tuwaga oto biri kado. Mare ture aino dutabo Pao Kurireu ure tugeragu ji pudae tuwo udo nono ro pemegareu mogadure.
ROM 4:11 Dukejere toro ia meri keje Abraão ure tuwaga oto biri kado tuwo boe erduwado Pao Kurireu ure tugeragu pudui duji. Pao Kurireu ure tugeragu meartorure puduiwuge eiamedu boei pudae tuwo edo nono ro pemegareuge emogadure nono turo moga Abraão jitu mogadure. Dukodire meartorure Pao Kurireu jiwuge eiamedu boe etuo nure Abraãoče. Ekare tuwaga oto biri kado mare emeartorure Pao Kurireuji. Dukodire etuo nure Abraãoče.
ROM 4:12 Judeu doge eiamedu boe ere tonaregedu imedu baka oto biri rogu kado rugadu ji aino. Ia nou ure tuwaga oto biri kadowuge Judeu doge emeartorure Pao Kurireuji jamedu kodire etuo nure Abraãoče jamedu. Mare paga karega. Emeartorure Pao Kurireuji nono Abraão meartoru mogadure. Abraão meartorure Pao Kurireuji nono toro ia meri keje ure tuwaga oto biri kado rugadu.
ROM 4:13 Abraão mugure boe tuginaiwuge eno moto keje. Bikare raga mare Pao Kurireu ukare Judeu doge eno bakaru maku etai. Dukodire Abraão jorduwakare Pao Kurireu ure maku Judeu doge etaiwu bakaruji. Mare Abraão meartorure Pao Kurireuji. Dukodire Pao Kurireu ure tugeragu Abraãoji pudae tuwo udo nono ro pemegareu mogadure. Dukodire Pao Kurireu makore Abraãoji tumoduie boe jamedu boe maku ai, uwobe etai jamedu.
ROM 4:14 Tu nou meartorure Judeu doge eno bakaru jiwuge etaire Pao Kurireu makore jiboe makudumode dukeje boe emeartoru paganure Jesusji. Tu nou meartorure Judeu doge eno bakaru jiwuge etaire Pao Kurireu makore jiboe makudumode dukeje Pao Kurireu mako paga nure. Mare Pao Kurireu makore jiboe makudure boe eiamedu boe etai dukodire ure turugadu boe emeartoru kuriwo Jesusji rugadu.
ROM 4:15 Pao Kurireu makore jiboe makudure meartorure puduiwuge eiamedu boe etai rugadu. Nou Pao Kurireu ure maku Judeu doge etaiwu bakaru ukare Pao Kurireu ro pemegado ei. Nou Pao Kurireu ure maku Judeu doge etaiwu bakaru koiare ure Pao Kurireu korigo ei. Boe emeartorukare nou bakaruji dukodire Pao Kurireu korigodure ei rugadu. Ainore boe erore jamedu. Boe ewadarure boe emeartoruwo ji mare ia boe erdu pegare ji dukodire boe emeartorukare ji. Nono boe ekorigodumode nou meartorukare nou boe ewadaru jiwugei. Boe emodukare tuwadaru udo turugadu boe emeartoruwo ji dukeje boe kare turugadu tumagowo boe ewadaru jipagi. Meartorukare jiwu bokwamode jamedu. Dukodire inagoino Pao Kurireu umode tumagore jiboe maku meartorure Jesus jiwuge etai. Umode tumagore jiboe maku Judeu doge meartorure Jesus jiwuge etai. Emeartorure Judeu doge eno bakaruji mare emeartorure Jesusji dukodire Pao Kurireu umode tumagore jiboe maku etai. Makore tumoduie boe jamedu boe maku etai. Mare Pao Kurireu umode tumagore jiboe maku nouia boe tuginaiwuge meartorure Jesus jiwuge eiamedu boe etai jamedu. Emeartorumode nono Abraão meartoru mogadure dukeje Pao Kurireu umode tumagore jiboe maku etai. Dukodire Pao Kurireu makore tumoduie boe jamedu boe maku rugadu taidu tabo Abraão uwobe eiamedu boe etai. Pameartorure Jesusji dukodire Abraão uwobe nure pagi. Pao nure Abraãoče jamedu.
ROM 4:17 Marigudu Abraão mugure moto keje. Bikare raga. Mare ore bokware rugadu. Nono Pao Kurireu makore Abraãoji. Ure nou tuwadaru bu bapera keje. Akore: – Imode boe etuodo aki. Akoremode rugadu. Akore etore eidodumode rugadu kodire akore emagamode rugadu. Emode taodo pubiji toro ia tumuga ka. Judeu doge emode emage. Iage boe tuginaiwuge emode emage jamedu. Ainore Pao Kurireu akore Abraãoji. Nono makore ji pugeje. Ure nou bataru bu bapera keje jamedu. Akore: – Akoremode rugadu. Akore etore emagamode jamedu. Ainore Pao Kurireu makore Abraãoji rugadu. Nou Abraão, Sara ekodu mai dutabo emugure puapo mare etore bokware rugadu jii toro tubegagodu ka. Nono ča Pao Kurireu makore ji dukeje Abraão o jorure cem. Oreduje Sara pegagodure jamedu. Dukodire meardaere toremodukaie rugadu. Mare du inodu tabo Abraão meartoru kimore Pao Kurireu makore pudui duji. Upagare Pao Kurireu makore puduiwu tonaregedu bagai. Ore bokware. Oremodukare. Mare Pao Kurireu akore tumoduie Abraão oredo dukodire Abraão upagare tonaregedu bagai rugadu. Nono Pao Kurireu ure tuwadaru udo turugadu. Makore jiboe kodure pudui rugadu. Pao Kurireu ure Abraão onaregedu imedudo toreduje Sara apo rugadu. Awu Pao Kurireu emare rakare tuwo bireuge eewodudo pugeje. Emare rakare tuwo boe jamedu boe towuje tuwadaru tabo. Boe bokware mare tuwadaru tabore ure boe jamedu boe towuje. Abraão meartorure Pao Kurireuji. Onaregedure dukodire uwobere. Boe etuore ema. Ore etore eidodure rugadu dukodire ore emagare rugadu. Ere taodo pubiji toro ia tumuga ka.
ROM 4:20 Abraão mororamagadukare tumeartoruwo Pao Kurireuji. Meartoru rakare Pao Kurireuji rugadu. Aidu pemegare Pao Kurireu bataruji. Meartorure rugadu Pao Kurireu akoino jiboeji. Dukodire ure turagado pudui rugadu. Mako pemegare Pao Kurireuji.
ROM 4:22 Abraão meartorure rugadu Pao Kurireuji dukodire Pao Kurireu ure tugeragu ji pudae tuwo udo nono ro pemegareuge emogadure.
ROM 4:23 Nou Pao Kurireu bataru padure bapera keje. Abraão jire Pao Kurireu akoino. Mare iage eire akoino jamedu.
ROM 4:24 Pao Kurireu ure Jesus jewodudo pugeje. Pameartorumode awu Pao Kurireuji dukeje Pao Kurireu umode tugeragu pai pudae tuwo pado nono ro pemegareuge emogadure jamedu. Umode tugeragu pai pudae nono turore Abraão jitu mogadure. Pagimijera kurireu nure Jesus rema.
ROM 4:25 Paro pegareu mori čere Jesus makudure boe eimijerage pegareuge etai ewo bito. Mare Pao Kurireu ure Jesus jewodudo pugeje. Dukodire Pao Kurireu biagodumode meartorure puduiwuge ero pegareu piji tuwo tugeragu ei pudae.
ROM 5:1 Pameartorure Jesusji dukodire Pao Kurireu ure tugeragu pai pudae tuwo pado nono ro pemegareuge emogadure. Pagimijera Jesus Cristo ure pagaora butugugo pamugu pemegawo Pao Kurireu apo.
ROM 5:2 Pameartorure Jesusji dukodire ure parego Pao Kurireu muga pemegareu ka. Nono boe pemegare pai. Pameartorure Jesusji nono parduware ia meri keje pamugumode Pao Kurireu apo duji. Nono pabagare paegare tabo Jesus bagai rugadu. Emare aregodumode pugeje tuwo parududo baruto pamuguwo Pao Kurireu apo baru tada rugadu.
ROM 5:3 Boe rakare pai mare du inodu tabo pagare pae jodo. Mare paga karega. Boe rakamode pai mare pawo paragado pai pae tobu tabo rugadu.
ROM 5:4 Pamode paragado pai pameartoruwo Pao Kurireuji nono Pao Kurireu aidumode pai. Pao Kurireu aidumode pai nono pabagamode Pao Kurireu bagai rugadu pameartorure bataruji kodi.
ROM 5:5 Pabagamode Pao Kurireu bagai pagiarigodumodukare. Pao Kurireu ure Tuwari maku pagai. Nou Uwari ure parduwado Pao Kurireu meardu kurire pai duji. Dukodire pabagamode Pao Kurireu bagai mare pagiarigodumodukare.
ROM 5:6 Ro pegareuge nure pagi kodire paroiwakare pawo paginorudo. Mare Jesus Cristo bire pamugato. Bire Pao Kurireu aidure jiwu meri keje.
ROM 5:7 Boe etaidumodukare tuwiwo ro pegareuge emugato. Boe emeartorukare jamedu tuiordumoduie ia imeduji biwo timedia pemegareu mugato jamedu.
ROM 5:8 Mare ro pegareuge nure pagi. Mare du inodu tabo Jesus Cristo bire pamugato paro pegareu moriče. Dukodire parduware Pao Kurireu meardu kurire pai duji. Meardu kurire pai rugadu.
ROM 5:9 Jesus Cristo ure tugu redo paro pegareu moriče. Pameartorure ji dukodire ure tugeragu pai pudae pamugu pemegawo Pao Kurireu apo. Nou inodu kodi parduware Jesus umode paginorudo duji. Pao Kurireu korigodumode ro pegareugei. Umode boe pegado ei ero pegareu moriče. Mare Jesus umode paginorudo.
ROM 5:10 Pameartorukare marigudu kodire pardu pegare Pao Kurireuji. Mare aino čare pameartorure Jesusji dukodire Pao Kurireu ure tumedagedo pagi. Onaregedu Jesus bire paro pegareu moriče dukodire Pao Kurireu ure tumedagedo pagi. Dukodi čare parduware Jesus Cristo umode paginorudo duji. Jewodure pugeje dukodire umode paginorudo.
ROM 5:11 Paegarere pai rugadu Pao Kurireu rore jiboeji pagai. Pagimijera Jesus Cristo ure Pao Kurireu metagedo pagi pameartorure ji kodi. Dukodire paegarere pai rugadu.
ROM 5:12 Imedu boetojiwu nure Adãoče. Emare ro pegare boetoji dukodire boe eiamedu boe ero pegare jamedu. Turo pegareu koiare ure boe pegado boe eiamedu boei. Adão ro pegare dukodire boe eiamedu boe ewire Adão piji ji aino rugadu. Boe eiamedu boe ewimode turo pegare kodi.
ROM 5:13 Marigudu Pao Kurireu ukare Judeu doge eno bakaru maku etai. Mare boe ero pegare marigudu. Mare eno bakaru bokware dukodire erduwakare turore jiboe pegare Pao Kurireu jakai duji.
ROM 5:14 Mare boe eiamedu boe ewire rugadu Adão piji jii toro Moisés ae. Iage ero pega kurikare mare ewire jamedu. Ero pegare jiboe ukare nono Adão rore jiboe mogadure. Adão ure tuiorduwa bokwado Pao Kurireu makore pudui duji. Nonore ro pega remawu ure rugadu. Iage ero pega kurikare mare ewire jamedu. Boe eiamedu boe ewire. Adão ure nono ia imedu mogadure. Nou imedu aregodumode ia meri keje.
ROM 5:15 Mare ekare nono pu mogadure jamedu. Adão ro pegare. Nouia imedurema umode boe ekinorudo. Iere Jesus Cristo. Pao Kurireu onaregedu nure ema. Pao Kurireu ure nou tonaregedu maku boe etai taidu tabo turo pemegawo boei tuwo boe ekinorudo. Nou Pao Kurireu rore jiboe ukare nono Adão ro mogadure. Adão ro pegare dukodire boe eiamedu boe ewire. Mare Pao Kurireu ro pemegareu kodure nou Adão rore jiboe kori. Dukodire umode ekinorudowuge emagamode.
ROM 5:16 Pao Kurireu ure maku boe etaiwu turo pemegareu ukare nono Adão ro pegareu mogadure. Adão ro pegare dukodire Pao Kurireu makore ji. Akore: – Ro pegareu nure aki. Nono Adão ro pegareu jore boe eiamedu boeto. Dukodire ro pegareuge nure boe eiamedu boeče. Mare Pao Kurireu ro pemegare meartorure puduiwugei taidu tabo tuwiagoduwo ero pegareu jamedu boe piji tuwo ekinorudo. Dukodire ure tugeragu ei pudae.
ROM 5:17 Adão ro pegare dukodire boe eiamedu boe ewire. Moto kejeboe jamedu boe akedumode jamedu. Boe jamedu boe bimode rugadu. Mare Jesus Cristo ure mitotu je jamedu. Jesus ro pemegareu kurire nou Adão ro pegareu kori. Pameartorumode Jesusji dukeje Pao Kurireu umode tugeragu pai pudae tuwo pado nono ro pemegareuge emogadure. Dukodire pameartorumode Jesusji dukeje pagogwamaguduwo Pao Kurireuji uwo nou turo pemegareu maku pagai paro pemegawo. Umode turo pemegareu maku pagai mare pamodukare nou Pao Kurireu ro pemegareu morido ai paro pemegareu tabo. Emare umode maku pagai taidu tabo rugadu. Nono jordu pemegamode pai. Dukodire Jesus Cristo umode paewodudo pugeje pamuguwo pudabo rugadu.
ROM 5:18 Adão ure mitotu je. Ro pegare dukodire boe eiamedu boe ewire. Mare Jesus ure mitotu je jamedu. Ro pemegare tuwo boe eiamedu boe ekinorudo. Bitodure boe ero pegareu moriče. Dukodire umode tugeragu meartorure puduiwugei pudae tuwo eewodudo pugeje ewikawo pugeje.
ROM 5:19 Adão ure tuiorduwa bokwado Pao Kurireu makore pudui duji. Kodire ro pegareu remawu nure ema rugadu. Dukodire boe eiamedu boe ero pegare jamedu. Mare Jesus meartorure tuoji dukodire bire boe ero pegareu moriče. Dukodire Pao Kurireu ure tugeragu nou meartorure puduiwugei pudae tumedagewo emage tuwo edo nono ro pemegareuge emogadure.
ROM 5:20 Pao Kurireu ure Judeu doge eno bakaru maku etai erduwawo turo pegareuji. Dukodire erduware turo pegareu boeji rugadu. Etaidukare tumeartoruwo nou Pao Kurireu ure maku pudaiwu bakaruji. Dukodire ro pegareu remawuge nure emage rugadu. Mare nou inodu kodi karega Pao Kurireu roiwamodukare tuwo nou ro pegareuge ekinorudo ero pegareu piji. Pao Kurireu ure turo pemegareu kurido nou boe ero pegareu kori rugadu.
ROM 5:21 Čare boe ero pegareu koiare umode boe ewido. Mare Pao Kurireu ure turo pemegareu maku boe etai taidu tabo. Dukodire umode tugeragu nou meartorure puduiwuge eiamedu boei pudae tuwo edo nono ro pemegareuge emogadure. Dukodire jordu pemegamode ei. Pameartoruwo ji. Pameartorumode ji dukeje Pagimijera Jesus Cristo umode paewodudo pugeje paragojewo Pao Kurireu apo jii toro rugadu.
ROM 6:1 Ainore parore. Marigudu paro pegare mare maigodu aino pameartorure Pao Kurireuji. Dukodire biagodure paro pegareu boe piji. Ia boe emeardae pegare. Egore: – Paro pega kurimode Pao Kurireu biagodumode paro pegareu piji rugadu. Dukodi čare paro pegawo rugadu pawo Pao Kurireu ro pemegado pai rugadu. Ainore egore. Mare iwo tawie boe remawuji. Pamodukare pagaora mekido nou boe emeardae pegareu rekodaji. Pawo pagera ra paro pegareu piji rugadu. Bireuge emeardaekare turo pegawo pugeje. Pare nono bireuge emogadure. Mare bireuge ei karega inagoino. Pawo pawia ra paro pegareu piji. Du jire inagoino.
ROM 6:3 Pameartorure Jesus Cristoji dukodire ure Tuwari maku pagai. Ainore rore pai tuwo pado nono bireuge emogadure. Dukodire pawire nono Jesus bi mogadure. Mare pawi ji karega inagoino. Pare pagera ra paro pegareu piji. Du jire inagoino. Dukodire meartorure Jesus jiwuge pagi paiamedu boe pamode paremo poboto pagao pegododuwo pawo boe erduwado Pao Kurireu Uwari rore aino pai duji. Pameartorure Jesus Cristoji dukodire ure Tuwari maku pagai. Ainore rore pai tuwo pado nono jewodureuge emogadure jamedu. Dukodire paewodure nono Jesus jewodu mogadure rugadu. Mare paewodu ji karega inagoino. Pao Kurireu ure pardae pameardae udo tuginai paro pemegawo, paro pegakawo pugeje. Du jire inagoino. Dukodire meartorure Jesus jiwuge pagi paiamedu boe pagao pegododure dukeje pamode padawuje pobo piji jamedu pawo boe erduwado Pao Kurireu Uwari rore aino pai duji jamedu. Pao Kurireu ure Jesus jewodudo turaga pemegareu tabo. Nono Pao Kurireu umode turaga maku meartorure puduiwuge eiamedu boe etai tuwo erdae emeardae udo tuginai. Nono ewo tugera ra turo pegareu piji, ero pemegawo, emugu pemegawo pudabo.
ROM 6:5 Pamediare Jesusče rugadu pameardu kurire ji rugadu dukodire paromode nono Jesus ro mogadure rugadu. Emare bire. Pagi pare nono bireuge emogadure jamedu. Mare pawi ji karega inagoino. Pawo pawia ra pameardae pegareu piji paro pegakawo pugeje. Dujire inagoino. Nono Jesus umode paewodudo pugeje jamedu pamuguwo pudabo dubagai. Emare jewodure pugeje. Nono paewodumode pugeje nono Jesus jewodu mogadure jamedu.
ROM 6:6 Jesus Cristo bire ipo padure pugajejewu keje paro pegareu moriče, pameardae pegareu moriče. Nou inodu kodi pameartorumode Jesusji. Nono pameardae pegareu akedumode nono bireu mogadure. Aino pameartorure Jesusji dukodi ure tumeardae pemegareu maku pagai rugadu pameardaeče pawiapagakawo nou pameardae pegareuji pugeje nou pameardae pegareu ukawo tuiodo pawugeje pugeje. Pamode pagamudo nou pameardae pegareu piji.
ROM 6:7 Pawimode dukeje pamode pagamudo paro pegareu piji.
ROM 6:8 Ča pameartorure Jesus Cristoji dukodire pare nono bireuge emogadure. Mare pawi ji karega inagoino. Pawiapagamodukare pameardae pegareuji pugeje paro pegakawo pugeje. Dujire inagoino. Dukodire parduware umode paewodudo pugeje duji pamuguwo pudabo toro baru tada.
ROM 6:9 Pao Kurireu ure Jesus jewodudo pugeje rugadu. Nono bimodukare pugeje rugadu. Jesus rakare rugadu dukodire bimodukare pugeje.
ROM 6:10 Bire boe ero pegareu moriče. Dukodire boe ero pegareu raka kodukare Jesus rore jiboe kori pugeje. Emare raka kodure boe ero pegareu piji toro rugadu. Aino Jesus mugu pemegare Pao Kurireu apo.
ROM 6:11 Tarodo nono Jesus ro mogadure. Tawiapagakaba tameardae pegareuji pugeje nono bireuge ewiapagamodukare boe pegareu jitu mogadure. Mare tameartorudo Jesus Cristoji tawo tamediado ema. Ainore taromode tawo tamugu pemegado Pao Kurireu apo. Jesus ure taginorudo tamugu pemegawo Pao Kurireu apo.
ROM 6:12 Boe ewodure tumeardae pegareu tabo jii toro tuwimode du ka. Boe emeardu kurimode nou tumeardae pegareuji dukeje nou ero pegareu kodumode toro tugori rugadu. Marigudu tawiapagare tameardae pegareuji jamedu. Tarokaba aino pugeje. Tawiapagakaba tameardae pegareuji tameartorukawo ji rugadu.
ROM 6:13 Taro pegakaba tagera tabo, taeku tabo, tawadaru tabo jamedu. Taeku kidukaba ro pegareuji meardae pegareu ukawo turemo tagaorato. Taipagakaba mako pegareuge ewadaruji ewadaru pegareu ukawo turemo tagaorato. Mare tameartorudo Pao Kurireuji utugaregewo tagi. Marigudu taro pegare dukodire tare nono bireuge emogadure. Mare taro pegamodukare pugeje dukeje tamode nono jewodureuge emogadure. Dukodire tameartorudo Pao Kurireuji rugadu taro pemegawo. Tameardaewo nono Pao Kurireu meardaere.
ROM 6:14 Judeu doge eno bakaru ukare taro pegareu barigu tabiji. Marigudu tameartorure nou Judeu doge eno bakaruji mare du inodu tabo tameardaere tu taro pegawo rugadu tu tu je. Dukodire inagoino tai tameartoruwo Jesusji. Aino čare tameartorure Jesusji dukodire Pao Kurireu ro pemegare tai tuwo taro pegareu barigu tabiji. Ro pemegare tai tuwo taraga maku tagai taro pegakawo pugeje.
ROM 6:15 Ča. Parduware nou Judeu doge eno bakaru umodukare paro pegareu barigu pabiji duji rugadu. Dukodire pagare pagimijerado nou Judeu doge eno bakaruče. Mare nuba paromode? Paro pegamokana? Boro. Paro pegamodukare. Pao Kurireu ro pemegare boei dukodire pameartoruwo ji pagaidu tabo rugadu.
ROM 6:16 Tarduware. Boe emode tugeragu ia boei tugimijerače dukeje boe emeartorumode tu ji rugadu bataruji jamedu. Dukodire utugarege mode emage rugadu. Ča. Tameardae tawuje nuba taromode. Tawiapagamode tameardae pegareuji nono umode tuiodo tawugeje rugadu taro pegawo. Nono taro pegamode rugadu. Dukodire tawarigudumode boe pegareuto rugadu tawi keje. Mare Pao Kurireu utugarege mode tagi nono tameartorudo tu ji rugadu. Tawiapagamodukare nou tameardae pegareuji pugeje. Dukodire Pao Kurireu umode tamugu pemegado pudabo.
ROM 6:17 Pao Kurireu pemegare rugadu! Ikimadure apo rugadu! Mare paga karega. Marigudu taiamedu boe taroiwakare tawo tagera ra nou taro pegareu piji. Mare boe ere tarduwado Pao Kurireu bataruji. Dukodire tameartorure ji tameardae jamedu boe tabo.
ROM 6:18 Dukodire Pao Kurireu ure taginorudo taro pegareu piji taro pemegawo. Utugarege nure tagi taro pemegawo rugadu.
ROM 6:19 Inure tawie Pao Kurireu meardaere jiboeji. Mare inure tawie tawadaru ure aino duji tarduwawo imagore jiboeji. Marigudu tameardaere tu taro pegawo. Marigudu tagaidure tu tameardae pegawo tawo taro pegareu kurido tagori. Mare aino ča tawiapagado tameardae pemegareuji taro pemegawo rugadu. Aino ča tameartorudo tu Pao Kurireu makore jiboeji tameardae pemegawo, taro pemegawo, tarore jiboe uwo tuginai meartorukare Pao Kurireu jiwuge ero piji.
ROM 6:20 Marigudu tameardaere tu taro pegawo. Tameardaekare taro pemegawo.
ROM 6:21 Mare iwo tawie nuba nou taro pegareu rore tai duji. Ure boe pegado tai rugadu. Umode tawarigu boe pegareuto tawi keje rugadu. Mare aino ča tabogurure nou taro pegare jiboeji rugadu.
ROM 6:22 Aino čare Pao Kurireu ure taginorudo nou taro pegare jiboe piji. Dukodire Pao Kurireu utugarege nure tagi. Mare paga karega. Tare tameartorudo tu Pao Kurireuji tu rugadu. Dukodire tarore jiboe ure tuginai meartorukare Pao Kurireu jiwuge ero piji. Tarore jiboe ure tuginai ero piji rugadu. Nono ča Pao Kurireu umode taewodudo pugeje dukodire tamugumode apo. Du akedumodukare.
ROM 6:23 Boe ero pegareu morire. Boe ewarigudumode boe pegareuto ewi keje turo pegareu moriče rugadu. Mare Pao Kurireu umode meartorure Jesus jiwuge ekinorudo taidu tabo. Makomode ei ekawo turo pegareu morido pudai. Taidu tabore umode eewodudo pugeje emugu pemegawo pudabo jii toro rugadu. Ewimodukare pugeje. Mare paga karega boe emeartorumode Pagimijera Kurireu Jesus Cristoji. Dukodire romode aino boei rugadu.
ROM 7:1 Imedage nure tagi dukodire iwo tawie. Boe emeartorumode tugimijeragei emagore jiboeji jii toro tuwi ka rugadu. Boe ewi keje boe ere tamudo nou boe eimijerage eno bakaru piji. Taiamedu boe tarduware awu inagoino jiboeji.
ROM 7:2 Aino inure tarduwado. Aredu okogemode dukeje. Boe eno bakaru koiare aredu meartorumode toreduji. Mare oredu bimode dukeje aredu okoge bokwamode pugeje. Toro ia meri keje aidumode tumuguwo ia imedu apo pugeje. Du pegakare.
ROM 7:3 Mare oredu bikare raga dukeje ukare turugadu aredu jeribariwo ia imedu metiaji. Jeribarimode toredu piji dukeje boe emago pegamode ji. Egomode aredu pegareudo nuie ema. Mugu kiorokare toredu apo. Mare oredu bimode nono aredu okoge bokware pugeje. Toro ia meri keje aredu aidumode tumuguwo ia imedu apo pugeje. Du pegakare. Ainore boe erore.
ROM 7:4 Marigudu parore pagaidure jiwu paro pegareuji. Parduware Pao Kurireu ure maku Judeu doge etaiwu bakaruji. Nou bakaru ure pawie paro pemegawo. Mare pameardae pegareu ure tuiodo pawugeje pameartorukawo nou bakaruji. Pagaidure pawiapagawo tu paro pegareuji. Dukodire paro pegare tu tu je. Paro pegareu koiare umode pardudo boe pegareuji dukodire pawimode rugadu. Mare aino pameartorure Jesusji dukodire pare nono bireuge emogadure pugeje. Mare bireu ji karega inagoino. Pameardaemodukare paro pegareuji pugeje. Dujire inagoino. Dukodire pare pawia ra paro pegareu piji. Pameardaekare paro pegawo pugeje. Paro pegareu metumodukare padada pugeje. Pameartorure Jesusji. Dukodire Pao Kurireu ure maku Judeu doge etaiwu bakaru akedure paegai. Imedage nure tagi. Tare nono bireuge emogadure. Mare tawi ji karega inagoino. Jesus bire tamugato tawo tagera ra taro pegareu piji. Dujire inagoino. Jesus Cristo ure tumedagedo tagi. Dukodire tare nono Jesus mogadure. Emare bire dukodire tare nono bireuge emogadure. Mare Jesus jewodure pugeje. Dukodire pameartorure tu Jesusji. Pameartorumodukare mariguduwu parore jiboeji pugeje. Pare pagamudo nou mariguduwu nou boe eno bakaru boe piji. Aino pameartorure Pao Kurireu o bakaru maiwuji. Nou Pao Kurireu Uwari ure nou bakaru maiwu maku pagai dukodire pameartorure ji rugadu.
ROM 7:7 Tameardae pegakaba Pao Kurireu ure maku Judeu doge etaiwu bakaruji. Nou bakaru koiare ure boe erduwado turo pegareuji. Nou bakaru akore: – Taebogodukaba tamedage enoeji. Pao Kurireu makomodukare aino nou boei dukeje boe erduwamodukare tiebogodure tumedage enoeji pudai duji pegare Pao Kurireu jakai duji. Erduwamodukare ia turo pegareuji.
ROM 7:8 Mare nou bakaru ure boe erduwado boe ero pegareuji. Dukodire boe erduware. Mare tu emeardae pegareu koiare ure nou boe emeartoru bokwado nou bakaruji. Erduware nou bakaruji mare du inodu tabo ere tumeartoru bokwado ji. Boe erduwamodukare nou bakaruji nono boe erduwamodukare turo pegareu bagai.
ROM 7:9 Marigudu iorduwakare Pao Kurireu o bakaruji. Dukodire iwiagorokare boeji. Mare iorduware Pao Kurireu o bakaruji dukeje Pao Kurireu bataru ure iorduwado iro pegareuji rugadu. Du inodu tabo imeartorukare ji. Itaidure iro pegawo pugeje.
ROM 7:10 Dukodire iorduware iwarigudumode bope doge eda pegareuto rugadu iwi keje iro pegareu moriče. Imeartorumode Pao Kurireu o bakaru jamedu boeji dukeje iwarigudumodukare bope doge eda kejewu joru pegareuto iwi keje. Mare imeartorukare ji dukodire iro pegareu moridodumode.
ROM 7:11 Iro pegareu ure iekiripagado. Iorduware Pao Kurireu o bakaruji. Mare iro pegareu ure imeartoru bokwado ji. Iro pegareu ure ido nono bireu mogadure. Mare iwi ji karega inagoino. Iwarigudumode bope doge eda kejewu joru pegareuto iwi keje. Du jire inagoino.
ROM 7:12 Pao Kurireu ure nou tuwadaru maku Judeu doge etai eno bakaruče. Nou bakaru pegakare. Pemegare. Umode boe erduwado boe ero pegareuji boe ero pemegareuji jamedu. Boe emeartorumode ji dukeje ero pegamodukare.
ROM 7:13 Imeartorumodukare ji dukeje iwimode. Pao Kurireu o bakaru koia karega umode iwido. Iro pegareu koiare umode iwido. Mare Pao Kurireu o bakaru ure iorduwado iro pegareuji. Ure iorduwado iwarigudumode bope doge eda kejewu joru pegareuto iwi keje iro pegareu boe moriče rugadu.
ROM 7:14 Pao Kurireu o bakaru ure turugadu. Marigudu bimodurewu nure imi. Iragakare iwo ikera ra iro pegareu piji. Imeardae pegareu ure tuiodo iwugeje toro boe pegareu ka rugadu. Ikimijerare ema rugadu.
ROM 7:15 Iorduwakare irore jiboeji. Itaidure iro pemegawo. Mare nou iro pegareu kare iragado iro pemegawo. Itaidukare iro pegawo mare irore itaidukare jiwu iro pegareuji.
ROM 7:16 Boe jokodu jire Pao Kurireu o bakaru akoino pai. Pagaidukare paro pegawo mare ro pegareuge nure pagi.
ROM 7:17 Mare paga karega. Pameardae pegareu ure paro pegado tu tu je. Pagaidure paro pemegawo mare pameardae pegareu koiare ure paro pegado.
ROM 7:18 Ro pegareu nure imi rugadu. Itaidure iro pemegawo mare iragakare iro pemegawo ro pegareu nure imi rugadu.
ROM 7:19 Irokare itaidure jiwu iro pemegareuji. Mare irore itaidukare jiwu iro pegareuji.
ROM 7:20 Iromode itaidukare jiwu irore jiboeji dukeje iorduwamode imeardae pegareu jiboeji. Imi karega. Mare meture itadawu imeardae pegareu koiare ure irodo aino.
ROM 7:21 Itaidure iro pemegawo. Mare imeardae pegareu meture itada. Dukodire iragakare iro pemegawo. Dukodire iro pegare rugadu.
ROM 7:22 Itadare imeardaere imeartoruwo Pao Kurireu o bakaruji itaidure ji kodi.
ROM 7:23 Mare itadare ia imeardae pegareu meture jamedu iwo imeartoru bokwado nou Pao Kurireu bakaruji. Imeardae pemegareu meture itada jamedu. Mare imeardae pegareu kodure imeardae pemegareu kori. Dukodire iroiwakare iwo ikinorudo imeardae pegareu piji.
ROM 7:24 Ainore ire rugadu. Itaidure Pao Kurireu o bakaruji. Mare ire mitotu je dutabo iroiwakare imeartoruwo ji. Imeardae pegareu ure tuiodo iwugeje iro pegawo tu tu je. Dukodire ikiarigodure rugadu. Iwarigudumode bope doge eda kejewu joru pegareuto iwi keje nou imeardae pegareu moriče rugadu. Mare iorduware umode ikinorudowuji. Jesus Cristo umode ikinorudo rugadu. Pagimijera nure ema. Dukodire ikimadure Pao Kurireu apo tu tu je. Imodukare ikera ra ikimadure Pao Kurireu apo dupiji tu tu je rugadu.
ROM 8:1 Meartorure Jesus Cristo jiwuge emugu pemegare Jesus apo rugadu. Dukodire Jesus mako pegamodukare ei. Umodukare ewarigu boe pegareuto.
ROM 8:2 Marigudu paro pegareu koiare ure pamugu jaedo Pao Kurireu piji. Mare pameartorure Jesusji dukodire ure Pao Kurireu Uwari maku pagai tuwo pamugu pemegado Jesus Cristo apo. Pamugu jaemode Pao Kurireu piji dukodi pawi keje pawarigudumode toro nou bope doge eda kejewu joru pegareuto. Mare Pao Kurireu ure Tuwari maku pagai pameartoruwo pudui tuwo paginorudo padukawo nou bope doge eda kejewu joru pegareuto pamugu pemegawo Pao Kurireu apo rugadu. Pao Kurireu ure Tuwari maku pagai tuwo paginorudo paro pegareu piji paro pemegawo.
ROM 8:3 Pao Kurireu makore boei marigudu ero pemegawo, ewo tugera ra turo pegareu piji. Ure nou tuwadaru maku Judeu doge etai eno bakaruče emeartoruwo ji. Mare boe eroiwakare tumeartoruwo nou bakaruji. Eragakare tuwo tugera ra turo pegareu piji. Aino čare Pao Kurireu umode boe eragado tuwo tugera ra turo pegareu piji. Marigudu akore boe ero pegareu morie. Dukodire ure tonaregedu imedu rawuje moto ka. Ure nono boe emogadure. Mare ro pega bokware, ro pegamodukare boei jii toro. Dukodire Pao Kurireu akore ema rugaduie bimode boe ero pegareu moriče emare ro pegareu bokware kodi.
ROM 8:4 Ainore Pao Kurireu rore tuwo boe ero pegareu mori barigu boe epiji. Ure paginorudo nou paro pegareu piji paro pemegawo Pao Kurireu ure maku boe etaiwu bakaruji. Pameartorumode Pao Kurireu Uwariji dukeje paro pemegamode. Pameartorumodukare pameardae pegareuji pugeje. Dukeje paro pemegamode rugadu.
ROM 8:5 Mare boe ewiapagamode tu tumeardae pegareuji dukeje eroiwamodukare tuwo tuwia ra nou tumeardae pegareu piji. Mare boe emeartorumode Pao Kurireu Uwari bataruji dukeje emodukare tuwia ra Pao Kurireu Uwari piji.
ROM 8:6 Boe ewiapagamode tu tumeardae pegareuji dukeje ewarigudumode joru pegareuto ewi keje rugadu. Mare emeartorumode Pao Kurireu Uwariji dukeje emugu pemegamode Pao Kurireu apo. Emororamagadumodukare iaboeji pugeje tumeardae kuriwo Pao Kurireuji rugadu.
ROM 8:7 Mare boe ewiapagamode tu tumeardae pegareuji dukeje erdu pegamode Pao Kurireuji. Emeartorumodukare Pao Kurireu bataruji. Eroiwamodukare tumeartoruwo ji rugadu.
ROM 8:8 Biapagare tumeardae pegareu jiwuge emodukare Pao Kurireu jakaredo pudui rugadu.
ROM 8:9 Ča Pao Kurireu Uwari rakojere tagabo dukodire tawiapagakaba tameardae pegareuji pugeje. Tameartorumode Pao Kurireu Uwari bataruji rugadu. Mare Pao Kurireu Uwari rakojemodukare tagabo dukeje Pao Kurireu uwobe modukare tagi.
ROM 8:10 Mare tameartorumode Jesus Cristoji dukeje mugu pemegamode tagabo. Dukeje Uwari koiare umode tamugu pemegado Pao Kurireu apo. Dukodire umode boe pemegado tai rugadu. Boe ero pegareu koiare ure boe pegado awu motoji. Dukodire paiamedu boe pawimode. Meartorukare Jesus jiwuge ewimode. Meartorure Jesus jiwuge pagi pawimode jamedu.
ROM 8:11 Mare Pao Kurireu ure Jesus jewodudo pugeje. Pameartorure Jesusji kodire Pao Kurireu Uwari rakojere pagabo. Dukodire Pao Kurireu umode Tuwari udo paewodudo pugeje jamedu nono turo moga Jesus jitu mogadure. Dukodire pawarigudumodukare bope doge eda kejewu joru pegareuto paragojewo Pao Kurireu apo.
ROM 8:12 Dukodire Pao Kurireu utugarege nure pagi. Pawo pagera ra pameardae pegareu piji rugadu pawiapagakawo ji pugeje.
ROM 8:13 Pawiapagamode pameardae pegareuji dukeje pawarigudumode bope doge eda kejewu joru pegareuto rugadu pawi keje. Mare Pao Kurireu Uwari raka tabore pamode pagera ra paro pegareu piji dukeje pamugu pemegamode Pao Kurireu apo jii toro rugadu. Du akedumodukare rugadu.
ROM 8:14 Meartorure Pao Kurireu Uwari jiwuge Pao Kurireu ore nure emage.
ROM 8:15 Nou Pao Kurireu ure maku tagaiwu Uwari umodukare tabagududo. Umodukare boe emeardae pegareu utugaregedo tagi. Mare umode Pao Kurireu oredo tagi. Pao Kurireu Uwari romode aino tai dukeje tamagomode Pao Kurireuji. Tagagomode, “Iogwa” aino ji.
ROM 8:16 Pao Kurireu Uwari rakojemode pagabo dukodire ure pawie Pao Kurireu ore nure pagi duji.
ROM 8:17 Pao Kurireu ore nure pagi dukodire umode boe pemegareboe maku pagai rugadu. Umode boe pemegareboe maku tu tuwobe etai. Umodukare maku ia boe etai. Umode boe pemegareboe maku Jesus Cristo ai. Nono umode nou tumode maku Jesus aiboe maku pagai jamedu. Boe pegamode pai nono boe pegare Jesus Cristo jitu mogadure. Dukejere Pao Kurireu umode boe pemegado pai nono turo moga Jesus jitu mogadure jamedu. Ure Jesus ie kurido rugadu. Umode pagie kurido jamedu nono turo moga Jesus jitu mogadure.
ROM 8:18 Boe pegare pai rugadu. Mare jii toro karega. Ia meri keje Pao Kurireu umode boe pemegado pai rugadu. Nono pameardaemodukare nou boe pegare paidu ka pugeje. Toro ia meri keje Pao Kurireu umode boe pemegado pai rugadu.
ROM 8:19 Awu moto kiarigodure Pao Kurireu bagai uwo tore remawuge ekinorudo. Nono boe eiamedu boe erduwamode Pao Kurireu ore remawugei.
ROM 8:20 Jawu boe ero pegare dukodire Pao Kurireu ure boe pegado motoji nou boe ero pegareu moriče. Pao Kurireu ro koiare ure boe pegado motoji.
ROM 8:21 Mare Pao Kurireu makore motoji upagawo umode boe ekinorudowu bagai. Dukejere tumoduie moto udo činorudo jamedu nono turo moga torei dumogadure. Dukejere awu moto akedumodukare pugeje.
ROM 8:22 Ji aino awu moto ako padure kajeje nono aredu ako moga tugurijirigodu kori koia dumogadure.
ROM 8:23 Tu moto karega. Pagi jamedu. Pagiarigodure mare boe pegareu boe koia. Mare Pao Kurireu ure Tuwari maku meartorure Jesus jiwuge etai marigudu. Dukodire rakojere pagabo. Mare pabaganure Pao Kurireu bagai kimo. Umode toredo pagi rugadu. Umode paginorudo rugadu. Pao Kurireu ure paginorudo kodire pamodukare paro pegare jiboe morido pugeje. Dukodire pabagare Pao Kurireu bagai paragojewo apo rugadu boe pemegawo pai rugadu. Pardukare ji raga. Pardumode Pao Kurireuji dukeje nono pabagamodukare bagai pugeje.
ROM 8:25 Mare pardukare ji raga. Dukodire pawuduguwo pai pabaga tabo bagai.
ROM 8:26 Rakakareuge nure pagi. Mare pameartorure Jesusji dukodire Pao Kurireu Uwari aregodure pagae turagojewo pagabo rugadu. Rakakareuge nure pagi. Dukodire parduwakare kaibowu pawadaru taboba pamagomode baruto Pao Kurireu bagai. Mare Pao Kurireu Uwari makore Pao Kurireu bagai baruto pabaru tabo parduwakare pamagowo jitu kodi. Makore jiboe ure tuginai pawadaru piji tumago tabo Pao Kurireu bagai baruto pabaru tabo rugadu. Kodire boe erduwamodukare akoino jiboeji.
ROM 8:27 Pao Kurireu jorduware pameardae jamedu boeji. Jorduware Tuwari meardaeji jamedu. Uwari makore Pao Kurireu bagai meartorure Pao Kurireu jiwuge eparu tabo rugadu. Nou Pao Kurireu Uwari makore jiboe kodure Pao Kurireu jordae meardae boeji rugadu.
ROM 8:28 Boe pegamode meardu kurire Pao Kurireu jiwugei mare du inodu tabo Pao Kurireu umode boe pemegado ei rugadu. Marigudu Pao Kurireu makore ewagai tumeardae tabo emeardu kuriwo pudui dubagai.
ROM 8:29 Marigudu Pao Kurireu jorduware turomode jiboeji. Dukodire ure tumeardae ta ia boei tuwo toredo emage tuwo edo nono tonaregedu Jesus mogadure. Mare Pao Kurireu Onaregedu boetojiwu nure Jesusče. Dukodire meartorure Pao Kurireu jiwuge etumana remawu nure ema.
ROM 8:30 Pao Kurireu ure tumeardae ta nou boei tuwo toredo emage. Dukodire makore ewagai. Nono ure tugeragu nou tumagore bagaiwugei pudae tuwo edo nono ro pemegareuge emogadure. Dukodire umode emugudo pudabo ewi keje. Dukodire boe pemegamode ei toro baru tada rugadu.
ROM 8:31 Pao Kurireu ro pemegare pai aino rugadu. Dukodire pawiapagamodukare ia pameardae pegareuji pugeje. Pao Kurireu bataru remawu jire pawiapagamode tu rugadu. Pao Kurireu umode turaga maku pagai dukeje ia boe eragamodukare pai rugadu.
ROM 8:32 Pao Kurireu rugodumodukare pai. Mako pegamodukare pai. Emare ure tonaregedu maku rugadu paro pegareu moriče. Ure tonaregedu maku pagai dukodire umode boe pemegareu jamedu boe maku pagai rugadu.
ROM 8:33 Boe emago pegamodukare Pao Kurireu ure tugeragu jiwugei. Emago pegamode ei mare pagare egoino. Pao Kurireu emare akoino nou meartorure puduiwuge emodukaie turo pegare jiboe morido.
ROM 8:34 Dukodire boe emagomodukare Pao Kurireu ure tugeragu jiwuge emoduie turo pegare jiboe morido duji. Emagomode mare pagare egoino. Jesus bire mare jewodure pugeje. Dukejere ruture baruto turagojewo nono Pao Kurireu ukana pemegareu jagwai rugadu. Emare mako raire Pao Kurireuji pabaru tabo rugadu.
ROM 8:35 Jesus Cristo meardu kurire pai rugadu. Nono boe emodukare Jesus Cristo meardu kurire paidu akedudo. Boe rakamode pai mare Jesus Cristo meardu kurire pai. Boe pegamode pai mare Jesus meardu kurire pai. Boe emode boe pegado pai mare meardu kurire pai kimo. Page bokwamode, pago diero akedumode, paedu puredumode boe pegareuji, paburedugodumode pawiwo mare Jesus meardu kurire pai kimo.
ROM 8:36 Marigudu Pao Kurireu bataru padure bapera keje. Akore: – Pameartorure Pao Kurireuji dukodire boe etaidure tuwo pawido. Eromode pai nono turo moga ovelha dogei dumogadure tuwo pawido.
ROM 8:37 Boe jokodu jire inagoino. Jesus Cristo meardu kurire pai rugadu. Dukodire ure paragado pameardae pemegawo, paro pemegawo. Boe pegareu keje, boe pemegareu keje umode paragado pameardae pemegawo.
ROM 8:38 Boe emodukare Jesus udo tugera ra pabiji rugadu. Meardu kurimode pai jii toro rugadu. Pawimode mare umodukare tugera ra pabiji. Pawimodukare mare umodukare tugera ra pabiji jamedu. Pao Kurireu utugarege baru tadawuge emodukare Jesus udo tugera ra pabiji. Bope doge etuwaire emodukare Jesus udo tugera ra pabiji. Toro ia meri keje ia boe emodukare Jesus udo tugera ra pabiji jamedu.
ROM 8:39 Baru tadawuge eragakare tuwo Jesus udo tugera ra pabiji. Bireuge eda kejewuge eragakare tuwo Jesus udo tugera ra pabiji. Moto kejewuge eragakare tuwo Jesus udo tugera ra pabiji jamedu. Pagimijera kurireu nure ema rugadu. Pao Kurireu meardu kurimode meartorure Jesus Cristo jiwugei jii toro rugadu.
ROM 9:1 Imeartoru rakare Jesus Cristoji rugadu. Dukodire iwadrarodumodukare tawiagai. Pao Kurireu Uwari koiare ure iordae imeardae udo turugadu. Dukodire iwadrarodu karegure tawiagai. Boe jokodu jire inagoino tawiagai rugadu.
ROM 9:2 Ikiarigodu kuričigore iwobe Judeu doge ewagai emeartorukare Jesusji kodi.
ROM 9:3 Iwobe nure emage. Mare emeartorukare Jesusji raga. Dukodire ikiarigodure toro ewagai. Imeardaere etaidure tumeartoruwo Jesusji rugadu. Itaidure rugadu. Itaidure Pao Kurireu ro pegawo i nou iwobe emugato nou iwobe emeartoruwo Jesus jitu bagai. Mare nou inodu umodukare iwobe emeartorudo Jesusji rugadu.
ROM 9:4 Marigudu Pao Kurireu ure tugeragu Judeu dogei tuwobeče emeartoruwo pudui dubagai. Ure toredo emage. Ure erdudo tuiorugu pemegareuji erduwawo turagojere pudabo duji. Ure tumeardae maku etai tu tu je. Makore ei. Akore: – Tameartorumode imeardaeji dukeje imode boe pemegado tai rugadu. Ainore Pao Kurireu makore ei tu tu je. Ure to bakaru maku etai eno bakaruwo ema emeartoruwo ji. Ere Pao Kurireu uwai pemegado. Ere tubu jodo tumago pemegawo Pao Kurireuji tu tu je nou bai ja tada. Pao Kurireu makore turomode jiboeji ewiagai tu tu je.
ROM 9:5 Mariguduboe Judeu doge etuo mage boetojiwuge emeartorure Pao Kurireuji. Judeu doge epijire Jesus boture. Boe eiamedu boe ekimijera kurireu nure ema rugadu. Pao Kurireu nure ema rugadu. Boe emago pemegawo ji rugadu, jii toro rugadu. Ainore uwo rugadu!
ROM 9:6 Pao Kurireu bataru jetumode pudui rugadu. Mare Judeu doge eiamedu karega emeartorure Pao Kurireuji.
ROM 9:7 Mariguduboe Judeu doge etuo Abraão ore eiamedu karega Pao Kurireu orere emage. Pao Kurireu makore Abraãoji. Akore: – Akanaregedu Isaque pijire nou imagore aiwu nou boe ewodumode. Emage čare awobe remawuge emode emage rugadu.
ROM 9:8 Ainore Pao Kurireu makore Abraãoji. Akore: – Itaidure jiwu meri keje imode ikirimi awagai pugeje. Dukodire akoreduje Sara onaregedu imedu botumode. Ainore Pao Kurireu akore Abraãoji. Nou Abraão Sara etore bokware tugodu maidutabo jii toro tubegagodu ka rugadu. Epegagodure dukeje Pao Kurireu akore aino ei etore moduie rugadu. Nono Pao Kurireu makore jiboe jeture pudui rugadu. Pao Kurireu koiare ure nou Abraão Sara etonaregedu imedu botudo rugadu. Dukodire Pao Kurireu uwobe nure nou imedu roguče. Abraão ure iedo Isaque. Nono Abraão orere pugeje mare Pao Kurireu bataru koia karega. Dukodire Pao Kurireu uwobe karegure emage. Ewodure nono boe etore ewodu mogadure. Dukodire Pao Kurireu uwobe karegure emage.
ROM 9:10 Ia pugeje. Nou Isaque ričodure nono jaoboe Judeu doge etuo nure ema. Oreduje iere Rebeca. Nou Rebeca ore ere pobe kuri tada, emegure pudo. Ewodure puapo. Mare imere emage.
ROM 9:11 Boture boetojiwu iere Esaú. Boture boigoduwu iere Jacó. Ewodukare raga dukeje Pao Kurireu makore etujeji. Akore: – Imeardae koiare imode Esaú meartorudo tuwie Jacoji. Ewodukare raga dukeje Pao Kurireu akoino etujeji. Erokare boeji raga dukeje Pao Kurireu akore aino etujeji. Dukodire parduware Pao Kurireu ure tugeragu uwieji turo pemegawo jitu bagai. Mare Pao Kurireu meardae koiare ure udo aino rugadu. Makore nou uwie bagai dukodire ure tugeragu ji turo pemegawo jitu bagai. Aiwokare ia ero pemegareu bagai. Aiwokare ia ero pegareu bagai jamedu. Pao Kurireu tumeardae pemegareu tabore ure tugeragu ji aino.
ROM 9:13 Pao Kurireu ure tuwadaru bu bapera keje marigudu. Akore: – Imeardu kurire Jacoji. Iordu pegare Esauji. Ainore Pao Kurireu akore rugadu.
ROM 9:14 Mare du inodu tabo pamago pegamodukare Pao Kurireuji. Pao Kurireu rore jiboe jamedu boe ure turugadu. Meardaere jiboe jamedu boe ure turugadu.
ROM 9:15 Marigudu makore Moisesji. Akore: – Inogudumode itaidure jiwu apo. Imodukare udo turo pegare jiboe morido.
ROM 9:16 Dukodire paro pemegare mare dukodi karega Pao Kurireu umode tugeragu pai. Emare jorduwamode tumode tugeragu jiwu boei. Okudugodumode ia boe dogebo dukeje umode tugeragu ei.
ROM 9:17 Marigudu Pao Kurireu ure tuwadaru bu bapera keje. Makore Egito moto kejewu boe eimijera kurireuji. Akore: – Ire boe eimijera kurireudo aki iwo boe erdudo iro rakareuji, iwo boe erduwado i moto jamedu boe parugajeje.
ROM 9:18 Ainore Pao Kurireu meardaere rugadu. Umode tugeragu boei dukeje okudugodumode ebo. Mare umode ia tugare tugeragu jiwuge emeartoru bokwado pudui.
ROM 9:19 Ia boe enaramode i. Egomode: – Pao Kurireu koiare ure iage emeartoru bokwado pudui. Mare Pao Kurireu akore emage eigoiaie emeartorukaie pudui. Kodiba Pao Kurireu akore emage eigoiaie? Ukare turugadu čegai. Pao Kurireu koiare ure emeartoru bokwado pudui rugadu. Boe eragakare Pao Kurireuji. Ema ro rakare boe jamedu boeji rugadu.
ROM 9:20 Ainore iage egore. Mare imode tawie boe remawuji. Tamagokaba Pao Kurireu bataru jipagi. Boe emode ia pori towuje dukeje nou pori makomodukare nou ure nou pori towujewuji: – Kodiba are itowuje? Nou pori akomodukare aino.
ROM 9:21 Nou maragodure rotu jiwu imedu emare jorduware kaboba tumode towuje nou rotu tabo. Pori rabodu aria rabodu ruwobo rabodu.
ROM 9:22 Ainore Pao Kurireu ure jamedu. Jorduware nuba turomode boei. Korigodumode ia boei du pegakare. Umode erdudo tugera rakare pudui duji du pegakare. Mare korigodukare ei kuri je. Mako raire ewagai ewo tugera ra turo pegareu piji mare ekare tugera ra. Dukodire Pao Kurireu korigodure ei. Umode ewarigu toro boe pegareuto nou ero pegareu moriče rugadu.
ROM 9:23 Ia boeire Pao Kurireu aidure tuwo erdudo turo pemegareuji. Okudugodure ebo rugadu. Okudugodure pagabo jamedu. Ure pabemegado tuwo pardudo turo pemegareuji.
ROM 9:24 Makore bagaiwuge nure pagi. Ia pagi Judeu doge nure pagi. Ia pagi boe tuginaiwuge nure pagi. Pao Kurireu makore pawagai pameartoruwo pudui rugadu.
ROM 9:25 Marigudu Pao Kurireu makore tuwadaruji Oséias biagai. Oséias ure bu bapera keje. Akore: – Iwobe karegure emage mare imagomode ewagai iwo iwobedo emage. – Imeardu kurikare ei mare aino čare imeardu kurimode ei.
ROM 9:26 – Marigudu inagore ei: – Iwobe karegure tagi. – Mare ia meri keje imagomode nou boe ewagai rugadu. – Imode iwobedo emage rugadu. Pao Kurireu oremode emage rugadu.
ROM 9:27 Isaías ure Pao Kurireu bataru bu bapera keje jamedu. Akore: – Judeu doge emagamode nono pobo maereu okwa kejewu kugaru mogadure. Mare Pao Kurireu ure ekinorudowugere enowaromode tu je.
ROM 9:28 Pao Kurireu umode boe pegado jeture moto kejewuge eiamedu boei tači je ero pegareu moriče rugadu.
ROM 9:29 Nou Isaías akore: – Pao Kurireu rakare rugadu. Ure Sodoma ba kurireu kejewuge eiamedu boe etagedudo. Ure Gomorra ba kurireu kejewuge eiamedu boe etagedudo jamedu. Umode paiamedu boe pagagedudo jamedu mare ure ia pagi paginorudo. Pagowarore tu je.
ROM 9:30 Dukodire inagoino tai. Boe tuginaiwuge etaiwokare Pao Kurireu bagai. Etaidukare tuwo turo jetorodo tuwo tumugu pemegado Pao Kurireu apo. Mare aino emeartorure Jesusji dukodire Pao Kurireu ure tugeragu ei pudae tietu pemegawo ei rugadu.
ROM 9:31 Mare Pao Kurireu uwobe nure Judeu dogeče. Judeu doge etaiwore ia bakaru bagai tumeartoruwo ji tuwo turo jetorodo tumugu pemegawo Pao Kurireu apo. Mare erdukare ji.
ROM 9:32 Mare paga karega. Etaidukare tumeartoruwo tu Pao Kurireuji. Etaidure tuwo turo jetorodo tumeardae tabo rugadu. Dukodire erduwakare Pao Kurireu ure maku pudaiwu toriji. Egore nou tori pegaie kodire emeartorukare nou toriji. Mare tori ji karega inagoino. Jesus jire inagoino.
ROM 9:33 Marigudu Pao Kurireu ure nou tuwadaru bu bapera keje. Akore: – Tagaiwodo. Ire ia tori bu Judeu doge eno moto keje. Boe ewure jetumode nou toriji. Nou tori umode ewududo. Mare meartorure nou tori jiwuge ekiarigodumodukare pugeje. Mare tori remawu ji karega Pao Kurireu akoino. Jesus jire Pao Kurireu akoino. Judeu doge emeartorukare Jesusji dukodire boe pegare ei. Dujire akoino. Mare boe emeartorumode Jesusji dukeje ekiarigodumodukare pugeje. Dujire Pao Kurireu akoino.
ROM 10:1 Imedage nure tagi. Mare iwiagoro raire iwobe Judeu doge ewagai. Itaidure Judeu doge eiamedu boe emeartoruwo Jesusji. Jesus uwo ekinorudo nou ero pegareu piji ekawo turo pegareu morido ewarigudukawo nou joru pegareuto. Dukodire imagore Pao Kurireu bagai iwobe eparu tabo jii aino.
ROM 10:2 Iorduware ei rugadu. Emeardaere tumeartoruie Pao Kurireuji mare paga. Emeardaere tumeartoruie Pao Kurireuji turaga tabo rugadu mare paga. Erduwakare Pao Kurireu bataru remawuji dukodire emeartorukare Pao Kurireuji.
ROM 10:3 Pao Kurireu umode tugeragu meartorure Jesus jiwugei pudae tietu pemegawo ei. Mare iwobe Judeu doge erduwakare nou Pao Kurireu meardaeji. Emagere emeardaere tuwo turo pemegado Pao Kurireu jordu pemegawo pudui. Mare awu emeardae ukare turugadu. Emeartorukare Pao Kurireu meardaeji. Ero pemegamode mare dukodi karega Pao Kurireu jordu pemegamode ei.
ROM 10:4 Jesus Cristo ure Pao Kurireu ure maku Judeu doge etaiwu bakaru akedudo. Mare paga karega boe emeartorumode Jesusji dukodire Pao Kurireu umode tugeragu ei pudae tietu pemegawo ei.
ROM 10:5 Marigudu Moisés ure Pao Kurireu bataru bu bapera keje. Emare akore boe emeartorumoduie Pao Kurireu ure maku Judeu doge etaiwu bakaruji dukeje emugu pemegamoduie Pao Kurireu apo. Akore: – Boe emeartorumode nou Pao Kurireu ure maku Judeu doge etaiwu bakaruji dukeje boe emeartoruwo nou bakaru jamedu boeji rugadu tumugu pemegawo Pao Kurireu apo.
ROM 10:6 Mare boe eroiwakare tumeartoruwo nou bakaru jamedu boeji rugadu. Dukodire Moisés ure ia Pao Kurireu bataru bu bapera keje jamedu. Makore boe emeartoruwo umode boe ekinorudowuji. Umode boe ekinorudowu umoduie boe emugu pemegado Pao Kurireu apo. Moisés makore boei. Akore: – Aroiwakare aruduwo baruto nou umode boe ekinorudowu bagai mare amororamagadukaba. Boe erudure baruto mare dukodi karega erdumode nou umode boe ekinorudowuji.
ROM 10:7 Aroiwakare awo arawuje bireuge eda ka nou umode boe ekinorudowu bagai mare amororamagadukaba. Boe ere turawuje toro bireuge eda ka dukodi karega erdumode nou umode boe ekinorudowuji.
ROM 10:8 Mare padure bapera kejewu Pao Kurireu bataru akore: – Tameardure Pao Kurireu bataruji dukodire meture tagaora tada. Tawiagorore tawiabuture kuri Pao Kurireu bataru keje tameartoruwo ji rugadu. Tamagomode Pao Kurireu bataruji nono boe emeardumode tamagore jiboeji rugadu. Ainore Pao Kurireu akore. Ča awu bataru jire ire boe ewie emeartoruwo Jesus jitu bagai rugadu.
ROM 10:9 Boe emode boe ewie ture tugeragu Jesus jituji tuwo tugimijerado ema. Boe emeartorumode Pao Kurireu ure Jesus jewodudo pugeje duji rugadu. Dukodire Jesus umode ekinorudo rugadu ero pegareu piji. Dukodire nou boe emugu pemegamode Pao Kurireu apo rugadu.
ROM 10:10 Mare paga karega pameartorumode Jesusji dukeje umode tugeragu pai pudae tietu pemegawo pai. Pagagomode pagimijera nuie ema dukeje Jesus umode paginorudo. Dukodire pamodukare paro pegareu morido pugeje.
ROM 10:11 Padure bapera kejewu Pao Kurireu bataru akore: – Meartorure Jesus jiwuge ekiarigodumodukare ia boe ewagai pugeje boe eimijera pemegareu unure ema rugadu.
ROM 10:12 Boe eiamedu boe eire akoino. Judeu doge eire akoino. Boe tuginaiwuge eire akoino jamedu. Ere nono pure. Boe eiamedu boe eimijera nure Pao Kurireuče. Boe emagomode Pao Kurireu bagai dukeje umode tugera maku boe etai rugadu.
ROM 10:13 Padure bapera kejewu Pao Kurireu bataru akore: – Boe emagomode Pagimijera bagai uwo tugera maku pudai dukeje umode boe ekinorudo rugadu. Emodukare turo pegareu morido pugeje.
ROM 10:14 Mare boe etumodukare Jesus bataru tabo boe etae nono nou boe emeardumodukare Jesus jiboeji. Boe emeardumodukare Jesus bataruji nono emeartorumodukare Jesusji. Boe emeartorumodukare ji nono emagomodukare bagai uwo tugera maku pudai. Padure bapera kejewu Pao Kurireu bataru akore: – Boe etaregodumode ia boe etae tuwo erduwado Jesus bataru pemegareuji du pegakare. Pemegare boei rugadu.
ROM 10:16 Mare ia boe etaidukare Jesus bataru pemegareuji. Marigudu Isaías ure boe ewie Pao Kurireu bataruji mare emeartorukare. Dukodire Isaías makore Pao Kurireuji. Akore: – Boe emeartorukare nou ire ewie jiwu awadaruji.
ROM 10:17 Dukodire inagoino. Boe ewo boe ewie Jesus Cristo makore jiboeji. Boe emeardumode nou Pao Kurireu bataruji dukeje erduwamode tumeartoruwo Jesusji rugadu.
ROM 10:18 Mare nou meartorukare Jesus jiwuge Judeu doge emeardure rugadu. Emeardure Pao Kurireu bataru pemegareuji. Dujire nou padure bapera kejewu Pao Kurireu bataru akore: – Makore iwadaru jiwuge ere boe eiamedu boe ewie moto jamedu boe parugajeje.
ROM 10:19 Mare nou meartorukare Jesus jiwuge Judeu doge erduware Pao Kurireu bataruji mare emeartorukare ji. Moisés ure nou Pao Kurireu bataru bu bapera keje. Pao Kurireu akore: – Imode ia boe tuginaiwuge emeartorudo i dukeje korimode iwobe Judeu dogei. Emeardaere tu puduie imeardu kurie. Mare imode ia jorduwa bokwareu boe tuginaiwuge emeartorudo i rugadu. Dukodire iwobe Judeu doge ekorigodumode. Emeardaere tu pudumie tuiorduwaie i.
ROM 10:20 Isaías ure Pao Kurireu bataru bu bapera keje jamedu. Pao Kurireu akore: – Boe tuginaiwuge etaiwokare iwagai mare ire erdudo i. Emagokare iwagai mare itaregodure etae.
ROM 10:21 Mare Israel kejewu Judeu doge eire Pao Kurireu akoino. Akore: – Ire ikera bararedo ei rugadu ji je. Itaidure ikimaduwo ebo. Mare meartoru bokwareuge nure emage. Araga bokwareuge nure emage.
ROM 11:1 Mare Pao Kurireu aidu kimore tuwobe Judeu dogei. Ukare ewarigu tubiji raga. Judeu nure imi jamedu. Mariguduwuge Judeu doge etuo nure Abraãoče. Du uwobe nure imi jamedu. Mariguduwuge Judeu doge etumana Benjamim uwobe nure imi.
ROM 11:2 Pao Kurireu ukare tugera ra tuwobe Judeu doge epiji. Ure tugeragu ei marigudu tuwo tuwobedo emage. Ukare moto to raga dukeje meardaere tuwo tugeragu ei tuwo tuwobedo emage. Tarduware padure bapera kejewu Pao Kurireu bataruji. Marigudu Elias mako pegare tuwobe Judeu dogei Pao Kurireu biagai. Nou Elias bataru padure nou bapera keje.
ROM 11:3 Elias akore: – Ikimijera nure aki. Awu iwobe Judeu doge ere nou makore awadaru jiwuge ime eiamedu boe ewido. Awu iwobe Judeu doge ere kamo doge erugadu boe butudo. Boe ewo tapira naregedu kowu nou kamo keje turo pegareu moriče. Mare ere kamo rugadu boe butudo. Imire ire mitotu je boe eiageje imeartorure ai dutabo. Ia meartorure aiwu bokware. Dukodire awu Judeu doge etaidure tuwo iwido jamedu.
ROM 11:4 Mare Pao Kurireu makore nou Elias bataru jipagi. Akore: – Meartorure iwuge ime enodo padure sete mil kimo. Ire ewiado nou ro pegareuge epiji. Nou ime ekare tumago pemegado nou egore Baal aino jiwu bope doge eimijeraji. Ainore Pao Kurireu akore.
ROM 11:5 Aino čare boe aregodure nou Pao Kurireu makore jiboe ka pugeje. Nou meartorure Pao Kurireu jiwu Judeu doge enowarore tu je kimo. Mare Pao Kurireu ure tugeragu ei taidu tabo.
ROM 11:6 Okudugodure ebo dukodire ure tugeragu ei. Pao Kurireu aiwokare boei ero pemegareu bagai. Aiwore ei. Okudugodu kurire ebo rugadu. Dukodire meardaekare turo pegawo ei.
ROM 11:7 Mare Judeu doge erdukare taiwore bagai boeji. Mare nou Pao Kurireu ure tugeragu jiwuge erdure ji. Mare enowarore tu je. Nouia Judeu doge erdukare ji. Dukodire ere tudo nono bija bokwareuge emogadure. Pao Kurireu makore ewagai mare ekare tumeardudo.
ROM 11:8 Padure bapera kejewu Pao Kurireu bataru akore: – Pao Kurireu ure etaora rakado erduwa bokwawo. Ure edo nono bija bokwareuge emogadure. Dukodire erduwakare Pao Kurireuji jii aino. Emeardukare Pao Kurireu bataruji jii aino.
ROM 11:9 Davi ure Pao Kurireu bataru bu bapera keje jamedu. Ainore Pao Kurireu akore: – Boe ere tumeardae tawuje tuwo tumeartorudo Pao Kurireuji mare pagatu je. Etaidunure tuwo boe ekiripagado tu je. Dukodire emode tuwadae towuje tiegarewo pudui turore jiboeji. Mare pagatu jere eroino egoino. Ero pegare kimo rugadu. Dukodi čare ere tiekiripagado nou tuwadae keje. Dukodire erore puku nou jordu pegare eiwuge etaregodumode etae tuwo boe pegado ei nou ewadae keje rugadu. Boe pegawo ei ero pegareu moriče.
ROM 11:10 – Ewo nono joku bokwareu mogadure. Boe rakamode ei rugadu nou emeartorukare i du moriče.
ROM 11:11 Judeu doge ero pegare mare etagedukare. Ero pegare dukodire Pao Kurireu uture boe tuginaiwuge etae tuwo ekinorudo. Ainore rore tuwo Judeu doge erdu pegado boe tuginaiwugei. Dukodire Judeu doge emode tugera ra turo pegareu piji tumeartoruwo Jesusji jamedu.
ROM 11:12 Judeu doge ero pegare mare boe pemegare boe tuginaiwugei moto jamedu boe parugajeje. Judeu doge emeartorukare Jesusji dukodire Pao Kurireu ure turo pemegado boe tuginaiwugei emeartoruwo Jesus jitu bagai. Mare Pao Kurireu umode tugeragu jiwu Judeu doge emeartorumode Jesusji jamedu toro ia meri keje. Dukejere boe pemegamode boe eiamedu boei rugadu.
ROM 11:13 Ia tagi boe tuginaiwuge nure tagi. Pao Kurireu ure itudo Jesus bataru tabo boe tuginaiwuge etae. Dukodire imago pemegamode nou bataruji nou boe ewiagai tu tu je.
ROM 11:14 Nono iwobe Judeu doge erduwamode Pao Kurireu bataru aregodure tagae duji. Dukodire ia nou Judeu doge erdumode tameartorure Jesusji dukeje, eku kidumode taromode jiboeji nono etaidumode tumeartoruwo Jesusji jamedu.
ROM 11:15 Pao Kurireu ure tugera ra epiji tumagowo boe tuginaiwuge ewagai dukeje Pao Kurireu jordu pegakare nou boe tuginaiwugei pugeje. Jordu pemegare ei. Mare umode tugera maku Judeu doge etai pugeje dukeje boe pemegamode ei rugadu. Emode nono jewodureuge emogadure.
ROM 11:16 Judeu doge ere boepa tadaboe kado dukeje ere to amireu boetojiwu to. Dukejere ere nou amireu boetojiwu maku Pao Kurireu ai. Ainore Judeu doge erore tumagowo to amireu jamedu boe paru tabo Pao Kurireu bagai. Judeu doge emagore awu tumaragodure jiwu oliveira i ukwa paru tabo Pao Kurireu bagai Pao Kurireu uwo udo nono to mogadure. Ainore Judeu doge emagore mare emagonure nou i rugadu paru tabo Pao Kurireu bagai Pao Kurireu ro pemegawo nou oliveira i ukwaji nou oliveira i ričodu pemegawo. Nou meartorure Pao Kurireu jiwuge Judeu doge boetojiwuge ere nono nou i ukwa mogadure. Mare i ukwa ji karega inagoino. Judeu doge eiamedu boe ewodure nou tuomage Judeu doge boetojiwuge epiji. Dujire inagoino. Pao Kurireu makore Judeu dogei emeartoruwo pudui rugadu nono nou etuo mage ero mogadure. Dujire inagoino.
ROM 11:17 Boe emaragodumode oliveira i tugudureuji. Ere nouia itura pegareu kado oliveira i tugudureu piji. Meartorukare Pao Kurireu jiwuge Judeu doge ere nono nou boe ere kadowu itura mogadure. Mare oliveira itura ji karega inagoino. Pao Kurireu ure tugera ra nou meartorukare puduiwuge Judeu doge epiji. Dujire inagoino. Boe ere ia itura pegareu kado oliveira i tugudureu piji dukejere etaregodure oliveira i itura tadawu itura tabo tuwo tugu nou oliveira i tugudureuto nou itura kadodureu mugato. Dukodire ere itura mekudo nou ture kadowu mugato. Boe tuginaiwuge nure tagi. Tare nono nou ere mekudowu itura mogadure. Mare oliveira itura ji karega inagoino. Tameartorure Jesusji dukodire ure tuwobedo tagi. Dujire inagoino. Dukodire Pao Kurireu ro pemegare tai nono turo moga tuwobe mariguduwuge Judeu doge etuo magei dumogadure.
ROM 11:18 Nou mariguduwuge Judeu doge etuo mage ere nono i ukwa kurireu mogadure. Mare i ukwa ji karega inagoino. Nou mariguduwuge Judeu doge etuo mage emeartorure Pao Kurireuji rugadu. Du jire inagoino. Dukodire tardu pegakaba Judeu dogei. Tagojarokaba tai. Tagare nono i ukwa kurireu mogadure. Tare nono nou boe tadawu itura mogadure. Mare itura ji karega inagoino. Tagire boe tuginaiwuge nure tagi. Dujire inagoino. Tameartorudo Pao Kurireuji rugadu nono nou mariguduwu Judeu doge etuo mage emogadure. Dujire inagoino rugadu.
ROM 11:19 Tagagomode Pao Kurireu uie Judeu doge ewarigu tubiji tuwo tamugudo emugato.
ROM 11:20 Boe jokodu jire tagagoino. Mare tagojarokaba tai. Emeartorukare dukodire Pao Kurireu ure ewarigu tubiji. Tameartorure dukodire ukare tawarigu tubiji jamedu. Mare tagojarokaba tai. Tameartorudo Pao Kurireuji rugadu.
ROM 11:21 Judeu doge ere nono oliveira itura kadodureu mogadure. Mare nou itura ji karega inagoino. Pao Kurireu ure Judeu doge ewarigu tubiji. Dujire inagoino. Tameartorumodukare Pao Kurireuji pugeje dukeje umode tawarigu tubiji jamedu.
ROM 11:22 Aino čare parduware Pao Kurireu ro pemegareuji rugadu. Mare Pao Kurireu ro pegamode boei ero pegareu moriče jamedu. Ro pegamode meartorukare puduiwugei. Mare tamodukare tagera ra tameartorure Pao Kurireu jitu piji dukeje ro pemegamode tai. Mare tamode tagera ra tameartorure Pao Kurireu jitu piji dukeje umode tawarigu tubiji rugadu.
ROM 11:23 Nono Judeu doge emode tugera ra tumeartoru bokware Pao Kurireu jitu piji tumeartoruwo Pao Kurireuji rugadu dukeje Pao Kurireu umode ekirimi pudae pugeje emugu pemegawo pudabo. Pao Kurireu ro kurire ei rugadu.
ROM 11:24 Boe tuginaiwuge nure tagi. Tare nono oliveira i itura tadawu itura mogadure. Mare itura ji karega inagoino. Mariguduwuge tawobe emeartorukare Pao Kurireuji. Dujire inagoino. Boe emodukare itura tadawu oliveira i itura tugu nou oliveira i tugudureu itura kadodureu mugato. Tare nono nou itura tadawu itura mogadure. Mare itura ji karega inagoino. Tameartorure Pao Kurireuji. Pao Kurireu ure tamugudo Judeu doge emugato turo pemegawo tai. Dujire inagoino. Judeu doge ere nono oliveira i tugudureu mogadure. Mare oliveira i ji karega inagoino. Mariguduwu Judeu doge emeartorure Pao Kurireuji. Dujire inagoino. Aino Judeu doge emeartorukare ji pugeje. Dukodire Pao Kurireu ure ewarigu tubiji. Mare Pao Kurireu jorduware tuwo Judeu doge emeartorudo pudui pugeje. Dukodire toro ia meri keje boemode turugadu Judeu dogei emeartoruwo Pao Kurireuji pugeje.
ROM 11:25 Imedage nure tagi. Imode tawie ia boe erduwakare jiwu Pao Kurireu bataru remawuji. Itaidure iwo tarduwado tardu pegakawo Judeu dogei. Inure tawie boe remawuji tagojarokawo tai pugeje. Judeu doge emeartoru bokware Jesusji. Boe tuginaiwuge nure tagi. Mare tameartorure ji. Ia boe tuginaiwuge emeartorumode ji jii toro. Nono iage emeartorumode ji pugeje. Pao Kurireu jorduware nou meartorumode Jesus jiwuge eiamedu boei. Nou boe tuginaiwuge meartorure Jesus jiwuge etaregodumode nou todo pa ka dukeje, toro ia meri keje Pao Kurireu umode tugeragu Judeu dogei pugeje emeartoruwo pudui.
ROM 11:26 Dukodire Pao Kurireu umode Judeu doge eiamedu boe ekinorudo. Padure bapera kejewu Pao Kurireu bataru akore: – Umode boe ekinorudowu aregodumode Judeu doge eno moto ka. – Nonore umode Jacó uwobe Judeu doge ero pegareu jamedu boe barigu epiji.
ROM 11:27 – Pao Kurireu nure imi. Imode iro maiwu maku etai dukeje imode ero pegareu jamedu boe barigu epiji.
ROM 11:28 Judeu doge emeartorukare Jesus bataru pemegareuji dukodire ere nono Pao Kurireu jordu pegare jiwuge emogadure mare jii toro karega. Pao Kurireu ure turo pemegareu mekido epiji tu jao turo pemegawo boe tuginaiwugei emeartoruwo pudui jamedu. Mare marigudu Pao Kurireu ure tugeragu jaoboe Judeu doge etuo magei tuwobewo emage. Dukodire ure nou mariguduwu Judeu doge edo nono tumeardu kurire jiwu tumedage emogadure. Dukodire Pao Kurireu okudugodumode Judeu dogebo toro ia meri keje pugeje.
ROM 11:29 Pao Kurireu umodukare tumeardae mekido tumode tugeragu jiwuge epiji, turo pemegamode jiwuge epiji.
ROM 11:30 Mare boe tuginaiwuge nure tagi. Marigudu tawobe boe tuginaiwuge emeartorukare Pao Kurireuji. Mariguduwuge Judeu doge emeartorure Pao Kurireuji. Awu maiwuge Judeu doge emeartorukare ji. Dukodi čare Pao Kurireu ure turo pemegareu mekido nou Judeu doge epiji jao. Kodire okudugodure boe tuginaiwugebo tuwo emeartorudo pudui. Dukodire tameartorure ji. Boe tuginaiwuge nure tagi.
ROM 11:31 Nono toro ia meri keje Pao Kurireu romode Judeu dogei nono turo moga tai dumogadure. Judeu doge emeartorukare Pao Kurireuji nono mariguduwu tawobe ero mogadure. Dukodire Pao Kurireu okudugodure tagabo. Mare Pao Kurireu okudugodumode Judeu dogebo jamedu nono turo moga tai dumogadure.
ROM 11:32 Boe eiamedu boe emeartorukare Pao Kurireu bataruji marigudu. Pao Kurireu ukare etawuje nou tumeardae pegareu piji kuri je tuwo erduwado turo pegareu jiboeji. Umode ekinorudo ero pegareu piji dukeje erduwamode Pao Kurireu okudugodu kurire pudabo duji rugadu.
ROM 11:33 Čare Pao Kurireu ro kurire. Jorduwa kurire. Roiware rugadu. Boe etaregodumodukare Pao Kurireu jorduware jiboe oto pa ka.
ROM 11:34 Padure bapera kejewu Pao Kurireu bataru akore: – Boe erduwakare Pao Kurireu meardaeji. – Boe enogituwamodukare Pao Kurireuji.
ROM 11:35 – Boe emode iaboe maku Pao Kurireu ai mare ewiapagamodukare mori bagai tuibagi.
ROM 11:36 Pao Kurireu ure boe jamedu boe towuje. Pudaire ure nou boe jamedu boe towuje. Kodire boe epagamodukare ture maku Pao Kurireu aiboe mori bagai tuibagi. Pao Kurireu koiare ure boe jamedu boe udo turugadu. Dukodire pamago pemegawo Pao Kurireuji jii toro. Uwo aino rugadu.
ROM 12:1 Imedage nure tagi. Pao Kurireu okudugodure pagabo. Dukodire inogituwamode tai. Tameartorudo Pao Kurireuji rugadu utugaregewo tagi rugadu. Tagera ra tagaidure jiboe piji tameardae piji taro jamedu boe piji. Pao Kurireu makore jiboe jire taipagado tu rugadu jii toro rugadu. Tagaidudo tu Pao Kurireuji dukodire jakaremode tai. Taromode awu inagoino jiboeji dukeje Pao Kurireu ie kurimode rugadu. Ainore boe eromode tuwo tubu jodo tumago pemegawo Pao Kurireuji. Mare ewo tubu jodo ji karega inagoino. Boe emeartoru remawumode Pao Kurireuji dukeje Pao Kurireu jakaremode pudui ei. Du jire inagoino.
ROM 12:2 Tarokaba nono meartorukare Jesus jiwuge ero mogadure. Tameardaekaba nono meartorukare Jesus jiwuge emeardae mogadure. Mare tamagodo Pao Kurireu bagai uwo tameardae pemegado, uwo tumeardae maku tagai tameardaeče. Dukejere tarduwamode Pao Kurireu meardaeji. Tameartorumode Pao Kurireu meardaeji dukeje taro pemegamode, taromode Pao Kurireu aidure jiboeji, tamode Pao Kurireu jakaredo pudui rugadu.
ROM 12:3 Pao Kurireu aidure turo pemegawo i dukodire ure tuwadaru maku inai. Dukodire inogituwanure aino tai. Tagojarokaba tai, tarore jiboeji, tameardaere jiboeji jamedu. Ča tagaiwodo taroji rugadu taro pegareu bagai taro pemegareu bagai jamedu. Pao Kurireu ure tameartorudo pudui. Tameartorumode ji rugadu dukeje tarduwamode taro pegareuji taro pemegareuji jamedu.
ROM 12:4 Paganare pabogorare. Pagana rore jiboe ure tuginai. Pabogora rore jiboe ure tuginai jamedu. Mare pagana pabogora emodukare tudawuje pabiji pamorora piji pagaora piji. Kodire pagana pabogora jeture tu pado rugadu.
ROM 12:5 Meartorure Jesus jiwuge pagi pare nono pagana pabogora mogadure. Mare pagana pabogora ji karega inagoino. Pao Kurireu ure parduwado parore jiboeji. Du jire inagoino. Mare ure iorduwado jiboe ure tuginai nou ure tarduwado jiboe piji. Ure ia tagi tarduwado jiboe udo tuginai nouia tagi ure tarduwado jiboe piji jamedu. Ure parduwado jiboe udo tuginai čai čai pubiji. Kodire pabadure tu tu parduware jiboe keje. Mare pagare paginai Jesus Cristo piji. Pare nono umogadure. Pagare paginai ia meartorure Jesus jiwuge epiji jamedu kodire pardu pemegamode ei. Kodire padu pemegamode puapo rugadu.
ROM 12:6 Pao Kurireu emare ure tuiordae pemegareu maku tu tu pagai tuwo tumaragodae maku pagai pamaragodaeče. Ure nou ture maku pagaiwu pamaragodae udo tuginai tu tu paiamedu boe ai. Dukodire ia tagi ure tarduwado tamagowo Pao Kurireu bataruji. Dukodi čare tameartoru rakawo Pao Kurireuji rugadu tamagowo Pao Kurireu bataruji boe ewiagai rugadu emeartoruwo Jesusji nono tameartoru mogadure. Ia tagi ure tarduwado tawo tagera maku boe etai. Dukodire čare tagera maku boe etai rugadu tagaidu tabo. Ia tagi ure tarduwado tawo ia boe erduwado jamedu dubagai. Dukodi čare tado tarugadu tawo boe erduwado rugadu.
ROM 12:8 Pao Kurireu ure ia tagi tarduwado tawo boe ekiarigodu barigu epiji rugadu. Dukodi čare tado tarugadu tawo boe ekiarigodu barigu epiji egaregoduwo pudui rugadu. Boe emode toe pedo tumedagei dukeje ewo maku taidu tabo rugadu. Boe eimijerage emaragodu pemegawo boebo taidu tabo rugadu. Boe emode tugera maku boe etai dukeje erowo aino tiagare tabo.
ROM 12:9 Tameardu kurido boei rugadu. Tagaba boe ekiripagado. Tardu pegado boe ero pegareuji. Tagaba tagera ra boe ero pemegareu piji.
ROM 12:10 Tameardu kurido pui rugadu nono boe etuwobe emeardu kurimode pui dumogadure. Ainore meartorure Jesus jiwuge erore. Tado tarugadu tagawo tagera ra tameardu kurire pui du piji.
ROM 12:11 Tamaragodu pemegado. Tawia ra nou tagera kiarire dupiji. Tameartorudo Pagimijera Jesus bataruji taragare dutabo rugadu.
ROM 12:12 Tabagado Jesus bagai taegare tabo. Boe pegamode tai mare tagorigodukaba. Taragado tai boere aino tai duji. Tamagodo baruto Pao Kurireu bagai meri jamedu boeji.
ROM 12:13 Ia meartorure Jesus jiwuge enoe bokwamode dukeje ia akoe kado puiato etai. Tarduwakare jiwuge etaregodumode tawai ka dukeje edo tamudo tawai tada tagabo.
ROM 12:14 Ia boe ero pegamode tai mare tagokikaba ei. Mare tawadaru pemegareu bu ewugeje. Tamagodo baruto Pao Kurireu bagai eparu tabo. Tamagodo Pao Kurireuji uwo tugera maku etai.
ROM 12:15 Boe egaregodumode pudui dukeje taegaredo tai nou jakarere puduiwugebo. Boe etragudumode dukeje tagragududo ebo jamedu.
ROM 12:16 Taetu pemegado boe eiamedu boei nono taro moga tawobei dumogadure. Tagojarokaba tawadaruji. Tamaragodudo marenarue dogebo emaragodae rakareuji. Tamedagewo emage jamedu. Tameardaekaba tarduwaie boe jamedu boe jituji.
ROM 12:17 Boe ero pegamode tai mare taro pegakaba boei. Ero pegamode tai mare tagaba ero kirimi. Taragado tai taro pemegawo. Tarodo boe etaidure jiboeji.
ROM 12:18 Taro pemegado boe eiamedu boei taedu pemegawo ebo tagaidu tabo taegare tabo.
ROM 12:19 Imeardu kurire jiwu imedage nure tagi. Boe ero pegamode tai mare tagaba ro pegareuge ero kirimi. Pao Kurireu ro pegamode ei. Emare umode boe pegado ro pegareugei ero pegareu boe moriče. Padure bapera kejewu Pao Kurireu bataru akore: – Pao Kurireu nure imi. Imire imode boe pegado ro pegareugei ero pegareu moriče.
ROM 12:20 Padure bapera kejewu Pao Kurireu bataru akore: – Jordu pegare taiwuge eke boeimode ei dukeje ia tage maku etai. Jordu pegare taiwuge pobo boeimode ei dukeje pobo maku etai. Taromode aino dukeje tamode epogurudo. Nono ewiabutumode turo pegareu keje.
ROM 12:21 Taro pegakaba nono ro pegareuge ero mogadure. Tagaba ero kirimi. Mare nou boe ero pegareu morido taro pemegareu tabo. Dukeje emode tuwia ra nou tumeardae pegareu piji rugadu.
ROM 13:1 Boe ekimijerage eiamedu boe Pao Kurireu koiare ure boe ekimijeragedo emage. Dukodire paiamedu boe pameartoruwo pagimijeragei.
ROM 13:2 Meartorukare tugimijera jiwu meartorukanure Pao Kurireuji jamedu. Boe emeartorumodukare tugimijeraji dukodire nou ero pegareu moridodumode etai rugadu.
ROM 13:3 Ro pegareuge epagudumode tugimijerageče rugadu. Mare ro pemegareuge epagudumodukare tugimijerageče. Taro pemegamode dukeje tabagudumodukare tagimijerageče pugeje. Taro pemegamode dukeje tagimijerage emago pemegamode tarore jiboeji.
ROM 13:4 Pao Kurireu utugarege nure emage dukodire emago pemegamode taro pemegareuji. Etaidure boe pemegawo tai. Mare taro pegamode dukeje tabagudumode eče rugadu. Eragare rugadu tuwo boe pegado boei ero pegareu moriče. Pao Kurireu utugarege nure emage. Etaire Pao Kurireu ure tumeardae maku ewo boe pegado boei ero pegareu moriče.
ROM 13:5 Dukodire tameartorudo boe ekimijeragei. Tameartorumode dukeje taro pegareu bokwamode. Tamodukare taro pegareu morido pugeje. Nono tawiagoromodukare taro pegawo pugeje.
ROM 13:6 Boe ekimijerage emaragodu pemegamode dukeje emaragodure Pao Kurireu jordae meardaeji rugadu. Dukodire tamode tago imposto mori diero maku boe ekimijerage etai.
ROM 13:7 Boe ekimijerage emagomode boei ewo imposto mori diero maku pudai dukeje tamode ia maku etai rugadu. Tameartorudo boe ekimijeragei rugadu tawo nou emagore bagaiwu diero maku etai. Tamago pemegado ei.
ROM 13:8 Tagaba tageragudu pagado boe eno dieroji. Tamode tageragu ji dukeje morido etai. Tameardu kurido boei nou inodu kori rugadu. Tameardu kurimode boei dukeje tameartorure Pao Kurireu ure maku Judeu doge etaiwu bakaruji rugadu.
ROM 13:9 Nou bakaru akore: – Aeribarikaba akoreduje piji akoredu piji. Akaba boe ewido. Akiwogukaba. Aeku kidukaba boe enoeji akai jamedu. Nono boe emeardu kurimode boei dukeje emeartorumode rugadu awu bakaru jamedu boeji. Padure bapera kejewu Pao Kurireu bataru akore: – Ameardu kurido boei nono ameardu kuri moga ai dumogadure.
ROM 13:10 Tameardu kurimode boei dukeje taro pegamodukare ei rugadu. Dukodire boe emeardu kurimode boei dukeje ere nono meartorure Pao Kurireu bataru jiwuge emogadure.
ROM 13:11 Tameartorure Jesusji. Mare tare nono jorduwa bokwareugere. Ča taedu pagakaba pugeje. Tameardu kurido boei rugadu. Meri puredugodure pai rugadu Pao Kurireu uwo paginorudo.
ROM 13:12 Parowo nono boe ero moga meri jitu mogadure. Boečoji boe ero pegamode. Ewadu raimode tuioku pega tabo toreduje piji toredu piji. Eke kurumode ei. Eribarimode tumugukare apowugei. Emeardae pegamode aremei imei. Erugodumode pui. Ekimaredumode pui. Mare boe puredugodure awu boe ero pegareu akeduwo rugadu nono boečo akedumode dumogadure. Dukodire paromodukare nono awu boe ero mogadure. Paro pemegawo nono meri jiwu boe ero mogadure. Pawo pageragu Jesusji nono boe emoga tugeragu tuwaigaji dumogadure. Jesus umode paragado paro pemegawo. Pagimijera nure ema. Marigudu pagaidure paro pegawo. Pawo pagera ra nou pagaidure jiwu paro pegareu piji. Pawiagoduwo nou paro pegareu piji rugadu.
ROM 14:1 Tardu pegakaba meartoru rakakare Jesus jiwugei. Tagokikaba ei, emeardaere jiboeji.
ROM 14:2 Ia meartorure Jesus jiwuge emeartoru rakare dukodire enogwagemode boe jamedu boeji. Mare ia meartorure Jesus jiwuge emeartoru rakakare dukodire enogwagemodukare ia barogo koduji.
ROM 14:3 Mare nou okwagere boe jamedu jiwu jordu pegakawo nou okwagekare barogo kodu jiwugei. Nono nou okwagekare barogo kodu jiwu mako pegakawo nou okwagere boe jamedu jiwu roji. Pao Kurireu aidure eiamedu boei.
ROM 14:4 Tamago pegakaba ia boe utugaregei emaragodu pegare duji. Eimijera emare jorduwamode emaragodu pegare duji. Meartorure Jesus jiwuge eimijera nure Jesusče rugadu. Emare jorduwamode emeartorure puduiwuge ewagai. Umode eragado emeartoruwo tuwadaru jitu bagai rugadu.
ROM 14:5 Ia boe emeardaere meri ukaie nono pure. Ere nouia meri tawuje. Dukodire nou meri keje eragodumode emago pemegamode Pao Kurireu bagai baruto. Mare iage emeardaere meri uie nono pure. Kodire eragodumode emago pemegamode Pao Kurireu bagai meri jamedu boeji. Awu inodu koiare tamode tameardae pemegareu tawuje tagaora piji.
ROM 14:6 Ia boe emeartorure nouia meri pemegareuji. Mare paga karega tugimaduwo Pagimijera Jesus apo nou meri keje kodire eroino. Ia boe enogwagere boe jamedu boeji. Mare paga karega tuwo boe ekimadudo Pagimijera Jesus apo dukodire eroino. Enogwagemode dukeje ekimadumode Pao Kurireu apo nou tuge paru tabo. Mare ia boe enogwagekare barogo koduji mare paga karega tuwo boe ekimadudo Pagimijera Jesus apo jamedu kodire eroino. Enogwagemode dukeje ekimadumode Pao Kurireu apo nou tuge paru tabo jamedu.
ROM 14:7 Paipagamodukare tu pai mitogodu. Pawimode mare paipagamodukare tu pai mitogodu.
ROM 14:8 Pawiagorowo pameartoruwo tu Pagimijera Jesusji rugadu. Mare pawimode mare du inodu tabo pameartorumode Pagimijera Jesusji rugadu. Paromode aino dukeje Pagimijera Jesus utugarege umode pagi rugadu.
ROM 14:9 Jesus Cristo bire mare jewodure pugeje. Dukodire bikareuge eimijera nure ema. Bireuge aroe eimijera nure ema jamedu.
ROM 14:10 Meartorure Jesus jiwuge nure tagi. Dukodire tamedage nure pugi. Ča tagi tagwagekare barogo koduji. Tamago pegakaba nou okwagere barogo kodu jiwugei. Ia tagi tagwagere boe jamedu boeji. Tamago pegakaba nou okwagekare barogo kodu jiwugei. Paiamedu boe paragojemode Pao Kurireu jokorai rugadu. Pao Kurireu emare aiwomode pai ia paro pegareu bagai.
ROM 14:11 Padure bapera kejewu Pao Kurireu bataru akore: – Pao Kurireu remawu nure imi. Tagimijera nure imi. – Boe eiamedu boe emode tubu jodo moto keje iogorai. – Boe eiamedu boe egomode Pao Kurireu unuie imi rugadu.
ROM 14:12 Dukodire paiamedu boe pamagomode parore jiboeji Pao Kurireu biagai.
ROM 14:13 Čare tagogwa aidukaba boe pegareuji pui. Mare tameardae tawuje taro pemegawo boei tagawo boe emeartoru akedudo Jesus piji. Tameardae tawuje taro pemegawo boei tagawo boe ero pegado.
ROM 14:14 Imugu pemegare Pagimijera Jesus apo dukodire iorduware boe eke jamedu boe ure turugadu boe ewo ko. Mare ia tagi tameardaere ia boe eke ukare turugadu boe ekawo ko. Dukodire nou boe eke ukare turugadu tai rugadu.
ROM 14:15 Ia tagi tagwagemode barogo koduji nou tamedage egai dukeje tamode epogurudo nou tagwagere jiboeji. Tameardu kurikadunure ei kodire tarore aino. Tagera ra nou tamedage etaidukare jiwu tage piji. Tamodukare tagera ra dukeje tamode nou tamedage emeartoru akedudo. Mare paga karega Jesus Cristo bire boe eiamedu boe ero pegareu moriče rugadu.
ROM 14:16 Dukodire taro pegakaba boei emago pegakawo taro pemegare jiboeji.
ROM 14:17 Tagwagere jiboe, tagudure čeboe tabo karega tamode tagimijerado Pao Kurireuče. Tameartorure ji dutabo tamode tagimijerado Pao Kurireuče rugadu. Mare Pao Kurireu Uwari emare umode taro jetorodo. Emare umode tabemegado pui. Emare umode taegaredo tai pu jamedu boeji. Dukodire Pao Kurireu utugarege mode tagi. Tagimijera Kurireu mode ema.
ROM 14:18 Tameartorumode aino Jesus Cristo bataruji dukeje tamode tagimijerado Pao Kurireuče rugadu.
ROM 14:19 Dukodire taragado tai tawo tameardae tawuje tawo tamedagedo boe eiamedu boeče tabemegawo pui. Tameardae maku puai tawo tameartoru kurido Jesusji.
ROM 14:20 Tagokikaba pui boe eke keje. Tagokimode pui boe eke keje nono tamodukare ia boe emeartorudo Pao Kurireu bataruji. Emeartorumodukare Jesusji rugadu. Ča ure turugadu meartorure Jesus jiwuge ewo boe eke jamedu boe ko. Ia boe emodukare nou boe eke ko. Mare imode nou boe eke ko nou boe egai du nou boe emeartorumodukare Jesusji pugeje. Iromode aino dukeje imire ire boe pegado ei emeartorukawo Jesusji.
ROM 14:21 Ia meartorure Jesus jiwuge emodukare barogo kodu ko. Taragojere ebo dukeje tagaba ko egai ekawo ko jamedu. Emode barogo kodu ko tagabo nono emeardaemode turo pega nuie. Ia meartorure Jesus jiwuge ekudumodukare vinho kuruče rugadu. Taragojere ebo dukeje tagudukaba vinho kuruče egai ekudukawo če jamedu. Ekudumode tagabo dukeje emeardaemode turo pega nuie. Ia meartorure Jesus jiwuge eromodukare ia turore jiboeji pugeje. Tarokaba ji aino jamedu egai. Eromode nou taidukare jiwu turoji pugeje emeardaemode turo pega nuie.
ROM 14:22 Dukodire tamagomode tameardaeji tu Pao Kurireu biagai. Boe emode tumeardae pemegado dukeje egaregodumode pudui nou turo pemegareuji. Ekiarigodumodukare turo pemegare dukodi. Boe pemegamode ei rugadu.
ROM 14:23 Mare boe erore gara nou tumode ko boeče mare enogwagemode nou boe ekeji rugadu dukeje nou erore jiboe pegamode Pao Kurireu jakai. Enogwagemode dukeje emeardaemode turo peganuie. Pao Kurireu mako pegamode nou erore jiboeji jamedu. Etaidure turowo nou turore jiboeji mare erduwakare umode turugadu Pao Kurireu jordae meardae jituji. Mare du inodu tabo eromode nou turore jiboeji. Etaidukare tumeartoruwo Pao Kurireu jordae meardaeji. Etaidure turowo tu tuiordae tumeardaeji rugadu. Dukodire nou erdae emeardae pijiwu ero jamedu boe pegare Pao Kurireu jakai rugadu.
ROM 15:1 Ia pagi pameartoru rakare Jesusji rugadu. Mare iage emeartoru rakakare ji. Pawo pagera maku etai pawo emeartoru rakado Jesusji. Pagogudumodukare tu pagabo. Pagoguduwo pamedagebo jamedu.
ROM 15:2 Mare pagaiwo pemegawo pamedagei pawo boe pemegado ei jamedu. Paromode aino dukeje pamode emeartoru rakado Jesusji rugadu.
ROM 15:3 Paromode nono Jesus Cristo ro mogadure. Emare biapagakare boe pemegawo pudui. Biapagare boe pemegawo boe eiamedu boei. Padure bapera kejewu Pao Kurireu bataru akore: – Boe ewadaru pegareu jeture i pugeje. Jesus jire akoino rugadu.
ROM 15:4 Marigudu Pao Kurireu ure boe edo tuwadaru bu bapera keje. Pao Kurireu rore aino tuwo boe erduwado tuwadaruji. Parduwamode Pao Kurireu bataruji dukeje pamode pawudugudo pai. Parduwamode dukeje paegaregodumode pai Pao Kurireu bataru keje. Dukodire pagiarigodumodukare pugeje mare pamode paragado pai pabagawo umode paginorudowu bagai rugadu.
ROM 15:5 Pao Kurireu koiare umode taedu butugudo. Ema koiare umode turaga maku tagai jamedu. Uwo tameardae pemegado pui. Uwo tameardae udo nono Jesus Cristo meardae mogadure. Tarowo nono Jesus ro mogadure. Tardu pemegawo pu rore jiboeji.
ROM 15:6 Dukodire tameardae kodumode pu meardae kodaji taiamedu boe tamago pemegawo Pao Kurireuji tawadaru pemegareu tabo tawo Pao Kurireu ie kurido. Pagimijera Jesus Cristo uo nure Pao Kurireuče rugadu.
ROM 15:7 Tagaidudo pui nono Jesus aidumoga tai dumogadure. Tagaidumode pui dukeje boe erdumode Pao Kurireu koiare ure tameardae pemegado duji.
ROM 15:8 Mare paga karega. Jesus Cristo aregodure moto ka tuwo tudo nono Judeu doge etugare mogadure. Ure erduwado Pao Kurireu rore jiboeji. Ure erduwado Pao Kurireu bataru remawuji. Pao Kurireu umodukaie tugera ra epiji. Dukodi čare Jesus aregodure tuwo Pao Kurireu bataru jetudo pudui rugadu. Marigudu Pao Kurireu makore Judeu dogei nou umode boe ekinorudowu aregodumoduie. Čare aregodure rugadu.
ROM 15:9 Mare Jesus aregodure boe tuginaiwuge etae jamedu emeartoruwo Pao Kurireuji emago pemegawo Pao Kurireuji jamedu. Pao Kurireu okudugodure boebo. Dukodire boe tuginaiwuge emeartorumode Pao Kurireuji emago pemegawo Pao Kurireuji rugadu. Padure bapera kejewu Pao Kurireu bataru akore: – Iragojere boe tuginaiwugebo dukeje imago pemegamode Pao Kurireuji; iragodumode imago pemegare Pao Kurireu jitu tabo.
ROM 15:10 Padure bapera kejewu Pao Kurireu bataru akore pugeje: – Boe tuginaiwuge egaregoduwo pudui Pao Kurireuji rugadu Judeu dogebo!
ROM 15:11 Padure bapera kejewu Pao Kurireu bataru akore pugeje: – Boe tuginaiwuge eiamedu boe emago pemegawo Pao Kurireuji; – Boe eiamedu boe emago pemegawo Pao Kurireuji.
ROM 15:12 Marigudu Isaías ure Pao Kurireu bataru bu bapera keje. Akore: – Ia boe eimijera kurireu Davi naregedu aregodumode boe eimijera kurireuwo pudumi; – Boe tuginaiwuge eimijera mode ema; – Boe tuginaiwuge emeartorumode ji uwo činorudo. Ainore Isaías ure bu bapera kejewu Pao Kurireu batarure. Jesus jire akoino. Jesus aregodure tuwo awu Pao Kurireu bataru jetudo pudui rugadu.
ROM 15:13 Pao Kurireu koiare umode boe ekiarigodu barigu boe epiji rugadu. Tameartorudo ji uwo taegaredo tai, uwo tamedagedo boeče tamororamagadukawo boe pegareuji pugeje. Dukodire Pao Kurireu Uwari umode turaga maku tagai tawo tawia ra tagiarigodu piji tabagawo Jesus bagai rugadu.
ROM 15:14 Imedage nure tagi. Iorduware tarore jiboeji marigudu. Taro pemegare boei marigudu. Tarduware boe remawuji. Tagi tarduware tagogituwawo boei boe pemegareu tabo.
ROM 15:15 Mare awu atugoreboe tabore inogituware tai. Ipogurukare iwo tawiabutudo tarduware jiboe keje. Pao Kurireu ro pemegare i dukodire ure Jesus Cristo utugaredo imi. Makore i ituwo Jesus jiwu bakaru pemegareu tabo iwo boe tuginaiwuge ewie. Dukodire ipogurukare imagowo boei rugadu. Pao Kurireu utugare nure imi. Imaragodae ure nono nou maragodure Pao Kurireu uwai tadawu boe emaragodae mogadure. Emage ere Judeu doge ewie Pao Kurireu bataruji. Imire ire boe tuginaiwuge ewie Jesus jiwu bakaru pemegareuji emeartoruwo Pao Kurireuji ewo tugimijerado ema. Nou boe tuginaiwuge emeartorumode Jesusji dukeje Pao Kurireu Uwari umode ero pegareu barigu epiji. Pao Kurireu aidumode ei rugadu.
ROM 15:17 Jesus Cristo rakojere itabo. Ure imeartoru pemegado Pao Kurireu bataruji dukodire inojarore Pao Kurireu ure maku inaiwu imaragodaeji.
ROM 15:18 Nono ipogurumodukare imagowo rugadu boe tuginaiwuge ewiagai Jesus Cristo ro pemegare i duji. Dukodire imode boe tuginaiwuge emeartorudo Pao Kurireu bataruji. Ure iorduwado imagowo boe ewiagai. Ure iragado iro pemegawo boei.
ROM 15:19 Ure iro rakado. Boe erore ta je irore jiboeji. Pao Kurireu Uwari ure turaga maku inai rugadu. Dukodire ire boe ewie rugadu Jesus Cristo umoduie boe ekinorudo duji. Ikodure Jerusalém ba kurireu piji toro Ilíria moto ka. Imerure boe jamedu boe parugajeje dutabo ire boe ewie awu bakaruji.
ROM 15:20 Imeardaere iwo jorduwakareuge ewie Jesus bataru pemegareuji. Ia boe edure nou boebo ture ewie nou Jesus bataru jitu tabo dukodire itumodukare etae. Mare iage erduwakare Jesus meardaeji umodukaie boe ekinorudo duji. Ia boe ekare ewie. Dukodire itaidure ituwo nou boe ewagai iwo erduwado boe remawuji.
ROM 15:21 Aino čare Pao Kurireu bataru jeture pudui. Padure bapera kejewu Pao Kurireu bataru akore: – Boe ekare ewie marigudu mare aino erduwamode nou umode boe ekinorudowuji, – Marigudu ewiapagakare mare aino erduwamode bataruji rugadu.
ROM 15:22 Itaidure ituwo tawagai marigudu. Mare ji aino iroiwakare ituwo tawagai.
ROM 15:23 Mare kuri aino imode imaragodae iado awu moto keje. Marigudu itaidure ituwo tawagai iorduwo tai.
ROM 15:24 Imeardaere kuri aino itaregodumoduie tagae rugadu. Itumode Espanha moto ka. Tamugure Espanha kawu awara okwai dukodire iordumode tai. Dukodire umode turugadu tawo tagera maku inai ituwo Espanha moto ka. Mare iragojemode tagabo jao pamagowo pu biagai.
ROM 15:25 Mare aino itumode Jerusalém ba kurireu ka jao iwo ikera maku nou meartorure Pao Kurireu jiwuge etai nono.
ROM 15:26 Macedônia kejewu meartorure Jesus jiwuge ere ia to diero maku inai iwo reko toro nou Jerusalém kejewu meartorure Jesus jiwuge ewagai. Eno diero bokware. Acaia moto kejewu meartorure Jesus jiwuge ere ia to diero maku ewagai jamedu.
ROM 15:27 Awu Macedônia moto kejewuge boe tuginaiwuge nure emage. Awu Acaia moto kejewuge boe tuginaiwuge nure emage jamedu. Eiamedu boe ere nou tumeardae tawuje taidu tabo tuwo diero maku awu Jerusalém kejewuge Judeu doge ewagai. Erowo aino rugadu. Mare paga karega. Judeu doge ere Pao Kurireu bataru pemegareu utudo boe tuginaiwuge ewagai emeartoruwo Jesusji dukodire nou boe tuginaiwuge meartorure Jesus jiwuge ere nou to diero maku nou Judeu doge meartorure Jesus jiwuge ewagai.
ROM 15:28 Imode nou diero rugadu maku nou meartorure Jesus jiwuge Judeu doge etai dukeje itumode pugeje epiji ituwo toro Espanha moto ka. Itaregodumode tagae tamugure ikodumode jiwu awara okwai dukodi.
ROM 15:29 Itaregodumode tagae dukeje iorduware Jesus Cristo ro pemegamode pai rugadu duji. Paegaremode pai rugadu.
ROM 15:30 Imedage nure tagi. Pagimijera Kurireu nure Jesus Cristoče rugadu. Pao Kurireu Uwari ure pameardu kurido boei. Dukodire itaidure iwo tawie. Tamago raido iparu tabo Pao Kurireu bagai baruto.
ROM 15:31 Tamagodo Pao Kurireuji iparu tabo uwo ikinorudo Judéia moto kejewuge meartorukare Jesus jiwuge epiji. Tamagodo Pao Kurireuji iparu tabo imaragodu pemegawo Jerusalém ba kurireu kejewuge meartorure Jesus jiwugebo.
ROM 15:32 Imaragodu pemegamode ebo dukeje iagaregodumode i. Pao Kurireu aidumode dukeje itaregodumode tawagai rugadu iagare tabo. Dukejere pamago raimode pui rugadu.
ROM 15:33 Ča Pao Kurireu rakojewo tagabo rugadu. Emare umode tugera bu pawugeje pamororamagadukawo boe pegareuji pugeje. Uwo aino rugadu.
ROM 16:1 Ia pamedago iere Febe. Emare maragodu pemegare meartorure Jesus jiwuge etai Cencréia ba kurireu keje.
ROM 16:2 Awu aredu Febe aregodumode tagae dukeje taro pemegado ji nono Jesus ro mogadure mugu pemegawo tagabo rugadu. Emare ro pemegare boei rugadu. Ro pemegare i jamedu. Dukodire tagera bararedo ji jamedu.
ROM 16:3 Tagimadudo Priscila apo, Áquila apo inai. Emagere emaragodure itabo Jesus Cristo ai.
ROM 16:4 Ere tuiago boe edo tuwido tuwo ikinorudo ro pegareuge epiji. Dukodire itaidure ei rugadu. Imago pemegamode erore jiboeji rugadu. Boe tuginaiwuge meartorure Jesus jiwuge eiamedu boe etaidure ei jamedu.
ROM 16:5 Ia meartorure Jesus jiwuge emode bato pui ewai tada tu tu je. Tagimadudo ebo inai jamedu. Ia imedia iere Epêneto. Imeardu kurire ji. Tagimadudo apo inai. Ásia moto kejewu nure ema. Emare meartorure Jesusji boetoji nou tumedage Ásia moto kejewuge epiji.
ROM 16:6 Tagimadudo Maria apo inai. Emare maragodu rakare tagai.
ROM 16:7 Tagimadudo imedu Andrônico apo inai. Tagimadudo aredu Júnia apo inai jamedu. Iwobe nure emage. Edure itabo baičoreu tada marigudu toro ia ba kurireu keje. Boe kurireuge nure emage. Uture Jesus bataru tabowuge nure emage. Emeartorure Jesusji itododai marigudu.
ROM 16:8 Tagimadudo imedu Amplíato apo inai. Meartorure Jesusji dukodire inagomode imana aino ji. Imeardu kurire ji rugadu.
ROM 16:9 Tagimadudo imedu Urbano apo inai. Emare maragodure itabo Jesus maragodaeji. Tagimadudo imedu Estáquis apo inai jamedu. Imeardu kurire jiwu imedia nure ema.
ROM 16:10 Tagimadudo imedu Apeles apo inai. Jesus Cristo aidure awu imedu maragodaeji. Tagimadudo mugure imedu Aristóbulo uwai tadawugebo inai.
ROM 16:11 Tagimadudo imedu Herodião apo inai. Iwobe nure ema. Tagimadudo mugure imedu Narciso uwai tadawugebo inai. Emeartorure Jesusji dukodi.
ROM 16:12 Tagimadudo aredu Trifena apo inai. Tagimadudo aredu Trifosa apo inai. Emagere emaragodu rakare Pagimijera Jesus ai. Tagimadudo pamedago Pérside apo inai. Paiamedu boe pameardu kurire ji rugadu. Emare maragodu rakare Pagimijera Jesus ai jamedu.
ROM 16:13 Tagimadudo imedu Rufo apo inai. Pao Kurireu ure tugeragu ji meartoruwo Jesusji. Emare maragodu pemegare Jesus ai. Tagimadudo Rufo uče apo inai jamedu. Uče ro pemegare i nono muga ro pemega moga i dumogadure.
ROM 16:14 Tagimadudo imedu Asíncrito apo inai. Tagimadudo imedu Flegonte apo inai. Tagimadudo imedu Hermes apo inai. Tagimadudo imedu Pátrobas apo inai. Tagimadudo imedu Hermas apo inai. Tagimadudo nou rakojere nou ime apowuge pamedagebo inai. Eiamedu boe emeartorure Jesusji dukodire inagoino.
ROM 16:15 Tagimadudo aredu Filólogo apo inai. Tagimadudo aredu Júlia apo inai. Tagimadudo aredu Nereu apo inai. Tagimadudo Nereu uwie aredu Olimpas apo inai jamedu. Tagimadudo rakojere ebowuge meartorure Jesus jiwuge eiamedu boebo inai jamedu.
ROM 16:16 Tagimadudo pu jamedu boe apo. Meartorure Jesus Cristo jiwuge eiamedu boe eimadure taiamedu boe bagai.
ROM 16:17 Imedage nure tagi. Iage etaidure tuwo meartorure Jesus jiwuge emeardae pegado pui. Taeku jado tameardaekawo nono emeardaere. Etaidure tuwo tagaora pegado tarduware jiboe piji. Taipagakaba ewadaruji. Tadaru toro epiji.
ROM 16:18 Awu boe emaragodukare Pagimijera Jesus ai. Emaragodure tumeardae pegareuji tuwo boe ewarigu tumeardae pemegareu piji. Emago pemegare. Emago moture. Mare tuwo boe ekiripagado dubagaire egoino.
ROM 16:19 Mare tameartorure Jesus bataruji rugadu. Boe eiamedu boe erduware nou tarore jiboeji. Dukodire iagarere i tarore jiboeji rugadu. Mare itaidure iwo tarduwado boe pemegareuji. Jorduwareugewo tagi tarduwawo boe pemegareuji. Mare tarduwakawo boe pegareuji.
ROM 16:20 Pao Kurireu umode tugera bu pawugeje pamororamagadukawo boe pegareuji pugeje. Emare umode bope raka tawuje piji rugadu. Bope rakamodukare tai. Umodukare tumorido tai rugadu. Umode nono ia pagatu jewu boere. Pagimijera Jesus ro pemegawo tai rugadu.
ROM 16:21 Pamedia Timóteo aidure čimaduwo tagabo. Lúcio aidure čimaduwo tagabo. Jasom aidure čimaduwo tagabo. Sosípatro aidure čimaduwo tagabo. Judeu doge nure emage. Iwobe nure emage.
ROM 16:22 Imire ikiere Tércio. Imire ire awu Paulo bataru bu bapera keje Paulo ai. Itaidure ikimaduwo tagabo jamedu. Pagimijera ro pemegawo tai.
ROM 16:23 Čeragojere Gaio uwai keje. Ro pemegare čei rugadu. Emare aidure tugimaduwo tagabo. Awu woewu meartorure Jesus jiwuge eiamedu boe etaidure tugimaduwo tagabo jamedu. Awu ba kurireu kejewu boe eimijera iere Erasto. Emare aidure tugimaduwo tagabo. Meartorure Jesus jiwu imedia Quarto aidure tugimaduwo tagabo jamedu. Ča Pagimijera Jesus Cristo ro pemegawo taiamedu boei rugadu.
ROM 16:25 Pamago pemegawo Pao Kurireuji. Pamago pemegawo Pao Kurireu rore jiboeji. Emare roiware tuwo tameartoru rakado Jesusji. Ire boe ewie Jesus bataru pemegareuji emeartoruwo Jesus Cristoji. Jaoboe erduwakare nou bataruji. Pao Kurireu ure nou tuwadaru biado nou jaoboe epiji. Mare Pao Kurireu ure nou tuwadaru maku inai.
ROM 16:26 Maigodu aino čare boe erduware nou bataruji. Marigudu makore Pao Kurireu bataru jiwuge ere Pao Kurireu bataru bu bapera keje tuwo boe ewie nuba boe mode boei ia meri keje. Maigodu aino boe erdure nou bataru jeture pudui duji dukodire erduware boe remawuji. Pao Kurireu bimodukare rugadu. Emare makore boei ewo boe eiamedu boe ewie nou tuwadaruji emeartoruwo Jesusji, emeartoruwo Jesus bataruji jamedu.
ROM 16:27 Pamago pemegawo Pao Kurireuji. Tu emare jorduware boe jamedu boeji. Pao Kurireu ure mitotu je. Iakare toro pugeje. Jesus Cristo bire boe ero pegareu moriče boe emago pemegawo Pao Kurireu rore jiboeji. Boe emago pemegawo jii toro rugadu. Ča uwo aino rugadu.
1CO 1:1 Paulo nure imi. Pao Kurireu ure tumeardae tawuje marigudu tumagowo iwagai. Makore iwagai ituwo Jesus Cristo bataru tabo boe ewagai. Aino čare inure awu bapera atugodo iwo awu Pao Kurireu bataru maku meartorure Jesus jiwuge ewagai toro Corinto ba kurireu ka. Meartorure Jesus jiwuge Corinto ba kurireu kejewuge nure tagi. Pao Kurireu makore tawagai tuwo taro udo tuginai taro pegareu piji taro pemegawo tu rugadu. Dukodire tamugu pemegare Jesus Cristo apo tameartoruwo ji rugadu. Tameartorure ji dukodire ure tumeardae pemegareu maku tagai tarokawo nono meartorukare Jesus jiwuge ero mogadure pugeje. Imode awu atugoreboe maku nou mako pemegare Jesus jiwuge eiamedu boe ewagai jamedu, moto jamedu boe parugajeje. Eimijera kurireu nure Jesusče rugadu. Pagimijera kurireu nure ema rugadu. Itaidure ikimaduwo tagabo. Pamedia Sóstenes aidure tugimaduwo tagabo jamedu.
1CO 1:3 Pao Kurireu uwo turo pemegareu maku tagai. Uwo tabemegado pudui jamedu. Pagimijera Jesus Cristo uwo turo pemegareu maku tagai. Uwo tabemegado pudui jamedu.
1CO 1:4 Ikimadure Pao Kurireu apo tu tu je ro pemegare tai kodi. Tameartorure Jesus Cristoji dukodire Pao Kurireu ro pemegare tai.
1CO 1:5 Dukodire tamugu pemegare Jesus Cristo apo dukodire Pao Kurireu ure tagoe kurido. Mare boe enoe ji karega inagoino. Ure tarduwado tamagowo Jesus bataru pemegareuji. Dujire inagoino. Ure tarduwa kurido. Dujire inagoino. Dukodire tarduware bope doge ewadrarodaeji, tarduware boe remawuji jamedu. Nono tarduware tameartoruwo boe remawuji tu rugadu. Dujire inagoino. Du tarduware tarowo ji. Dujire inagoino.
1CO 1:6 Čere tawie Jesus Cristo o bakaru pemegareuji. Tameartorure ji rugadu. Ji aino tagare tagera ra nou bataru piji rugadu.
1CO 1:7 Dukodire Pao Kurireu Uwari ure tumaragodae maku tagai tamaragodaeče. Ure tawie tuwadaru jamedu boeji dukodire ure tado tarugadu tamaragodu pemegawo nou ture maku tagaiwu tamaragodaeji jii toro rugadu. Tarduware Pagimijera Jesus Cristo aregodumode pugeje duji. Dukodire tabagare bagai rugadu. Jesus Cristo aregodumode pugeje dukeje boe erdumode ji rugadu.
1CO 1:8 Jesus emare umode tameartoru rakado pudui jii toro taregodumode du ka. Tameartorumode Pagimijera Jesusji rugadu jii toro rugadu. Dukodire Jesus mako pegamodukare tarore jiboeji. Pagimijera Jesus aregodumode dukeje mako pegamodukare tarore jiboeji.
1CO 1:9 Boe emeartorure Pao Kurireuji rugadu. Emare makore tawagai tamugu pemegawo tonaregedu Jesus Cristo apo. Pagimijera Kurireu nure ema. Pao Kurireu bataru jetumode pudui rugadu.
1CO 1:10 Imedage nure tagi. Inogituwawo tai Pagimijera Jesus bataru tabo taromode jiboeji. Ča tamago pemegado pui tawo tameardae tawuje. Tameardae udo nono pu jamedu boe meardaere. Tamaragodu pemegawo puapo. Nono taragamode tamagore jiboeji.
1CO 1:11 Mare kočare tagare tameardae tawuje. Tagokire pui. Imedu Cloé uwobe ere iwie nou tarore jiboeji. Ekare taro biado ipiji.
1CO 1:12 Imagowo tarore jiboeji. Taiamedu boe tameardaere ia tameardaeji. Ia tagi tagagore tameartoruie Paulo bataruji tu rugadu. Ia tagi tagagore tameartoruie Apolo bataruji tu rugadu. Ia tagi tagagore tameartoruie Pedro bataruji tu rugadu. Mare ia tagi tagagore tameartoruie Cristo bataruji tu rugadu jamedu.
1CO 1:13 Dutabore tare meartorure Jesus Cristo jiwuge emeardae pegado emeardaekawo nono pumeardaere pugeje. Paulo nure imi. Imi karega iwire taro pegareu moriče! Jesus emare bire taro pegareu moriče. Tagao pegododure mare itugaregewo tagi karega! Jesus emare makore tagao pegododuwo tudugaregewo tagi rugadu. I karega tameartorumode. Tameartorumode tu Jesusji rugadu.
1CO 1:14 Imi igoia karega ire tagao pegodo. Iagarere i ia imedu koiare ure tagao pegodo duji dukodire ikimadure Pao Kurireu apo. Ire ao pegodouge ere pobetu je. Ia iere Crispo. Metia iere Gaio.
1CO 1:15 Tagao pegododure. Mare ikie tabo karega tagao pegododure. Jesus ie tabore tagao pegododure.
1CO 1:16 (Mare ire imedu Estéfanas uwobe eiamedu boe etao pegodo. Mare imeardaekare iagei pugeje, ikare iage etao pegodo pugeje.)
1CO 1:17 Jesus Cristo ure itarego tawagai iwo tawie tuwadaru pemegareu boeji Jesus uwo taginorudo. Itaregodukare iwo tagao pegodo. Itaregodure iwo tawie mare imagokare nono jorduwareuge emago mogadure. Imagomode nono jorduwareuge emago mogadure dukeje tardu motumode imagore jiboeji mare tawiapagamodukare imagore jiboeji. Nono taragamodukare tawo taro pemegado. Mare imagokare nono jorduwareuge emago mogadure. Tu Jesus Cristo bataru jire imagore tawiagai tameartoruwo tu Jesusji uwo taginorudo. Emare bitodure ipo padure pugajejewu keje boe ero pegareu moriče. Boe emeartorumode tu nou bataruji dukeje Jesus umode boe ekinorudo, umode boe eragado ero pemegawo rugadu.
1CO 1:18 Jesus Cristo bire ipo padure pugajejewu keje boe ero pegareu moriče. Mare meartorukare jiwuge egore pagaie Jesus roino. Dukodire ewarigudumode bope doge eda kejewu joru pegareuto. Mare pameartorure ji dukodire nou bataru koiare ure parduwado Pao Kurireu ro rakareuji. Emare rakare tuwo paginorudo rugadu.
1CO 1:19 Padure bapera kejewu Pao Kurireu bataru akore: – Imode jorduwareuge erduware jiboe akedudo. – Imode aiwore bapera jiwuge erduware jiboe okwado epiji. Ainore Pao Kurireu akore.
1CO 1:20 Moto kejewuge erduware boeji. Mare erduwakare nono Pao Kurireu jorduwa mogadure. Dukodire erduwa bokware rugadu Pao Kurireu jakai. Jorduwareuge erduwa bokware Pao Kurireu jakai. Aiwo raire bapera jiwuge erduwa bokware Pao Kurireu jakai. Mako raire puiwuge erduwa bokware jamedu Pao Kurireu jakai.
1CO 1:21 Pao Kurireu jorduware rugadu. Boe etaidure tuiorduwawo Pao Kurireuji tuiorduware jiboe tabo, tumeardae tabo. Mare Pao Kurireu ure boe eiamedu boe eroiwa bokwado dukodire erduwamodukare Pao Kurireuji rugadu tuiorduware jiboe tabo. Mare čere boe ewie Pao Kurireu bataru pemegareuji rugadu. Mare meartorukare Jesus jiwuge egore pagaie čenagoino. Mare boe emeartorumode nou Pao Kurireu bataruji dukeje erduwamode Pao Kurireuji rugadu. Mare tuiorduware jiboe tabo karega. Pao Kurireu umode nou boe ekinorudo.
1CO 1:22 Judeu doge etaiwore ia Pao Kurireu ro rakareu bagai dukodire emeartorukare nou Pao Kurireu bataru pemegareuji. Grego doge etaiwore boe erduware jiboe bagai tuwo tuiorduwa kurido dukodire emeartorukare nou Pao Kurireu bataru pemegareuji.
1CO 1:23 Mare čegi čere boe ewie Pao Kurireu bataru pemegareuji, Jesus Cristo bitodure ipo padure pugajejewu keje. Dujire čenagoino. Mare Judeu doge ekorigodure awu čewadaru keje dukodire emeartorukare ji. Mare eiamedu boe karega ekorigodure. Pao Kurireu makore bagaiwuge Judeu doge emeartorure čewadaruji. Etaidure ji. Boe tuginaiwuge egore pagaie čenagoino jamedu dukodire emeartorukare ji. Mare eiamedu boe karega. Pao Kurireu makore bagaiwuge boe tuginaiwuge emeartorure čewadaruji. Etaidure ji jamedu. Nou meartorure čewadaru jiwuge emeartorure Jesus Cristoji rugadu. Dukodire erduware Pao Kurireu ro rakare rugadu tuwo ekinorudo. Erduware Pao Kurireu jorduwa kurire rugadu tuwo ekinorudo duji. Jesus koiare ure nou meartorure puduiwuge erduwado nou inodu boeji.
1CO 1:25 Boe emeardae pegamode ia Pao Kurireu bataru roguji. Egomode pagaie Pao Kurireu akoino. Egomode nou Pao Kurireu bataru rogu nuie pagatu je, boe emeartorukaiago nou bataru roguji. Mare iwo tarduwado. Nou Pao Kurireu bataru rogu koiare umode boe erduwa pemegado rugadu jorduwareuge eiamedu boe ero boe piji. Ia boe emeardae pegamode Pao Kurireu rore jiboeji. Egomode Pao Kurireu raka akeduie. Mare pagare egoino. Erduwakare kaba jiba Pao Kurireu roino. Pao Kurireu rakare rugadu. Rakare boe eiamedu boe eraga kori.
1CO 1:26 Imedage nure tagi. Tawiabutudo nou mariguduwu taro keje. Marigudu boe egore tarduwa bokwaie rugadu. Egore taragakaie. Egore boe kurireuge kaiegure tagi. Mare Pao Kurireu makore tawagai.
1CO 1:27 Pao Kurireu ure tumeardae tawuje tumagowo boe etaidukare jiwuge ewagai tuwo jorduwareuge epogurudo. Egore tuiorduwaie. Egore nou tumedage erduwa bokwaie. Mare Pao Kurireu makore nou jorduwa bokwareuge ewagai rugadu tuwo nou jorduwareuge epogurudo dubagai. Makore nou rakakareuge ewagai tuwo nou rakareuge epogurudo. Nou rakareuge egore pudumie turagaie. Egore nou tumedage eraga bokwaie. Mare Pao Kurireu makore nou rakakareuge ewagai tuwo nou rakareuge epogurudo dubagai.
1CO 1:28 Boe emeardae pegare boei rugadu. Egore ero pegaie. Egore pagaie eromode turore jiboeji. Mare Pao Kurireu makore nou boe etaidukare jiwuge ewagai tuwo nou boe emeardae pegareu akedudo.
1CO 1:29 Dukodire boe enojarokawo turore jiboeji pugeje Pao Kurireu jakai. Boe enojarokawo tuwadaruji pugeje Pao Kurireu biagai.
1CO 1:30 Mare Pao Kurireu ure pamugu pemegado Jesus Cristo apo. Pameartorure Jesusji dukodire Pao Kurireu ure tugeragu pai pudae. Nono umode parduwado tuiorduware jiboeji. Emare ure paro jetorodo. Ure paro udo tuginai meartorukare jiwuge ero boe piji. Ure paginorudo paro pegareu piji pagawo paro pegareu morido pugeje.
1CO 1:31 Dukodire padure bapera kejewu Pao Kurireu bataru ure turugadu. Akore: – Boe enojarowo tu Pao Kurireu rore jiboeji tu rugadu.
1CO 2:1 Imedage nure tagi. Marigudu Pao Kurireu ure ia tumeardae biado boe epiji. Mare itaregodure tagae dukeje ire tarduwado nou Pao Kurireu ure biadowu tumeardaeji. Imedage nure tagi. Imagokare tai iwadaru kurireu tabo. Imagokare tai jorduwareuge ewadaru tabo.
1CO 2:2 Iragojere tagabo dukeje imeardaekare ia imeardaeji. Imeardaere tu iwo tawie Jesus Cristo jiwu bakaruji. Ire tawie Jesus bitodure ipo padure pugajejewu keje duji rugadu.
1CO 2:3 Iragojere tagabo dukeje iragakare pugeje. Ioku kidugodunure Pao Kurireuji iwo ure maku inaiwu imaragodae pemegado imagowo boe remawuji tawiagai. Mare imororamagadure tarduwamodukare iwadaru jituji. Dukodire ire iragado imagowo boe remawuji tawiagai.
1CO 2:4 Mare itaidukare iwo tameartorudo iwadaru motureuji. Itaidure tameartoruwo tu Jesusji rugadu. Dukodire ikare imago motudo tawiagai. Ire tarduwado mare imagokare tai iwadaru motureu tabo. Ire tarduwado mare imagokare tai jorduwareuge ewadaru tabo. Mare ire tarduwado Pao Kurireu Uwari rakare duji. Ema koiare ure tameartorudo ire tawie jiwu Jesus jiboeji. Dukodire tameartorure Jesusji rugadu. Boe ewadaru motureu ukare tameartorudo. Pao Kurireu rakare rugadu dukodire tameartorure Jesusji.
1CO 2:6 Imode meartoru rakare Jesus jiwuge erduwado rugadu. Mare boe erduware jiboe karega. Boe eimijerage erduware jiboe karega. Bope doge erduware jiboe karega. Nou boe eimijerage eraga akedugodunure. Nou bope doge eraga akedugodunure jamedu.
1CO 2:7 Mare Pao Kurireu meardaere jiboe jire imode boe erduwado. Pao Kurireu ure nou mariguduwu tumeardae biado boe epiji. Marigudu Pao Kurireu ukare moto to raga dukeje ure tumeardae tawuje tuwo boe pemegado meartorure puduiwugei. Mare ukare boe ewie. Ure nou tumeardae biado boe epiji jii je rugadu. Mare ukare moto to raga dukeje jorduware tumode parduwado nou tumeardaeji duji. Dukodire čare ure parduwado nuba turomode meartorure puduiwugei rugadu. Dukodire čare parduware nou Pao Kurireu meardaeji kodire jorduwareuge nure pagi.
1CO 2:8 Moto kejewuge boe eimijerage erduwakare nou Pao Kurireu meardaeji. Erduwamode dukeje emodukare Jesus bito ipo padure pugajejewu keje. Mare erduwakare. Mare pagi parduware. Pagimijera nure Jesusče. Ure nono Pao Kurireure rugadu.
1CO 2:9 Padure bapera kejewu Pao Kurireu bataru makore nou Pao Kurireu meardaeji rugadu. Akore: – Pao Kurireu ure tumeardae tawuje tuwo boe pemegareu towuje meardu kurire puduiwuge etai. – Boe erdukare jiboe, emeardukare jiboe, – Boe emeardaekare jiboe jire – Pao Kurireu roino. Ure tumeardae udo turugadu nou meardu kurire puduiwugei rugadu.
1CO 2:10 Aino čare Pao Kurireu ure Tuwari udo parduwado nou ture biadowu tumeardaeji. Pao Kurireu Uwari aiwore boe jameduji. Jorduware Pao Kurireu meardae jamedu boeji.
1CO 2:11 Boe erduwakare meture pagaora tadawu pameardaeji. Tu pagi parduware pameardaeji. Ainore Pao Kurireu ure jamedu. Tu Uwari jorduware Pao Kurireu meardaeji.
1CO 2:12 Pameartorure Jesusji dukodire meartorukare jiwuge emeardae metukare pagaora tada pugeje. Mare Pao Kurireu ure Tuwari maku pagai uwo parduwado Pao Kurireu ure maku pagaiboe jamedu boeji. Ure nou jamedu boe maku pagai taidu tabo rugadu mare pamodukare morido ai.
1CO 2:13 Mare boe ekare čerduwado nou ire tarduwado jiboeji. Pao Kurireu Uwari ure čerduwado nou ire tarduwado jiboeji. Mare čemagore nou Pao Kurireu Uwari bataruji tu nou Pao Kurireu Uwari rakojere apowuge ewiagai.
1CO 2:14 Pao Kurireu Uwari rakojekare apowuge eroiwakare tuwo tugeragu nou Pao Kurireu Uwari umode maku boe etaiwu boeji. Nou Pao Kurireu Uwari rakojekare apowuge erduwamodukare nou Pao Kurireu Uwari umode maku boe etaiwu boeji. Egore pegaie. Tu nou Pao Kurireu Uwari rakojere apowuge erduwamode nou Pao Kurireu Uwari umode maku boe etai boeji. Egomode pemegaie. Erduware pemegare duji rugadu.
1CO 2:15 Pao Kurireu Uwari rakojere apowuge emagere erduwamode taiwowo boe pemegareu bagai. Erduwamode tuwo boe pegareu barigu boe epiji. Mare meartorukare Jesus jiwuge erduwamodukare nou Pao Kurireu Uwari rakojere apowuge eroji egoji jamedu. Dukodire meartorukare Jesus jiwuge etaidumode taiwowo nou Pao Kurireu Uwari rakojere apowugei erore jiboeji. Egomode ero pegaie. Erduwa bokwaie turore jiboeji. Mare pagare egoino. Dukodire Pao Kurireu Uwari rakojere apowuge emeartorumodukare meartorukare Jesus jiwugei.
1CO 2:16 Padure bapera kejewu Pao Kurireu bataru akore: – Boe erduwakare Pao Kurireu meardaeji rugadu. – Boe erduwakare togituwawo Pao Kurireuji rugadu. Mare meartorure Jesus jiwuge nure pagi. Dukodire ure parduwado tumeardaere jiboeji rugadu.
1CO 3:1 Dukodire imedage nure tagi. Mare čare tagare nono Pao Kurireu Uwari rakojere apowuge emogadure. Dukodire čare iroiwakare imagowo tai nono imagore Pao Kurireu Uwari rakojere apowugei dumogadure. Mare imagomode tai nono imagore boe etorei dumogadure. Tare nono meartorukare Jesus jiwuge emogadure. Marigudu tameartorure Jesusji mare tare nono tare tu kimo. Tameardaekare ia tameardae pemegareu bagai.
1CO 3:2 Itaidure iwo tarduwado Pao Kurireu bataru biadodurewuji. Mare tagare tarugadu tarduwawo nou Pao Kurireu bataru biadodurewuji. Tare nono okwagirireu boe etore emogadure. Mare boe etore ei karega inagoino. Tagare tarugadu raga tarduwawo bataru biadodurewuji. Dujire inagoino. Dukodire Pao Kurireu bataru biagareu jire imagomode tawiagai. Dujire inagoino.
1CO 3:3 Tarore nono meartorukare Jesus jiwuge emogadure. Tardu pegare pui. Tagokire pui. Dukodire inagoino. Tarore nono meartorukare Jesus jiwuge emogadure. Tarore meartorukare Jesus jiwuge emeardaeji.
1CO 3:4 Tare tagado puiato. Tabokare puapo. Dukodire ia tagi tagagore meartorure Paulo jiwuge nuie tagi. Mare ia tagi tagagore meartorure Apolo jiwuge nuie tagi. Mare nou taro ure tado nono meartorukare Jesus jiwuge emogadure.
1CO 3:5 Ča imedia nure nou Apoloče. Pao Kurireu utugare nure ema. Paulo nure imi. Pao Kurireu utugare nure imi jamedu. Čere tawie Pao Kurireu bataruji dukodire tameartorure ji. Mare boe kurireuge karegure čegi. Čemaragodure Pagimijera ure maku čenaiwu čemaragodaeji tu je.
1CO 3:6 Tare nono Pao Kurireu o boepa mogadure. Mare boepa ji karega inagoino. Pao Kurireu aidure tuwo tarduwado tuwadaru pemegareuji muguwo tagaora tada rugadu. Dujire inagoino. Ire tarduwado Pao Kurireu bataruji boetoji. Dukodire imire irore nono imedu ro mogadure. Imire ire boe tugu ino boepato. Mare boepa ji karega inagoino. Tameartoruwo Pao Kurireuji dujire inagoino. Itaregodure tagae Pao Kurireu bataru tabo boetoji. Dujire inagoino. Nono tameartorure nou ire tarduwado jiwu bataruji dukodire tameartorure Jesusji. Dujire inagoino. Nono Apolo aregodure tagae iregodaji Pao Kurireu bataru kurireu tabo jamedu. Emare ure boepa tadaboe rugadu boe pegodo. Mare boepa ji karega inagoino. Ure tarduwa kurido Pao Kurireu bataru kurireuji. Dujire inagoino. Tameartorure Jesusji dukeje nou Apolo aregodure iregodaji. Ure tarduwa kurido Pao Kurireu bataruji jamedu. Dujire inagoino. Mare imi, nou Apolo, čegare čeginai pubiji. Čere nono pure rugadu. Čemaragodure puapo Pao Kurireu ai čewo boe erduwado Pao Kurireu bataruji čewo boe emeartorudo Jesusji rugadu. Dukodire čemedage nure pugi. Mare boe kurireuge karegure čegi. Pao Kurireu utugarege nure čegi. Pao Kurireu emare umode boe eno boepa tadaboe botu pemegado. Emare umode ričodudo. Tare nono nou boepa tadaboe mogadure dukodire umode tarijodudo jamedu. Mare boepa tadaboe ji karega inagoino. Taire inagoino. Meartorure Jesus jiwuge nure tagi. Dujire inagoino. Tarijo ji karega inagoino. Pao Kurireu emare umode turaga maku tagai tuwo tameartoru kurido Jesusji tameartorure jitu kori tu tu je. Dujire inagoino. Pao Kurireu emare umode boe maku tudugarege etai emaragodae moriče rugadu.
1CO 3:10 Tare nono Pao Kurireu ure towu bai mogadure. Pao Kurireu ro pemegare i dukodire ire nono ure bai pemegareu towu mogadure. Iroiware iwo tado nono nou bai pemegareu mogadure. Mare bai ji karega inagoino. Ire tarduwado Pao Kurireu bataruji boetoji tameartoruwo Jesusji uwo taginorudo tawarigudukawo bope doge eda pegareuto. Tare tameardae tawuje tameartoruwo Jesusji rugadu. Dujire inagoino. Dukejere iage ere tarduwado Pao Kurireu bataruji tuwo tameartoru rakado ji rugadu. Mare čare boe ewo tuioku jado tumaragodaeji. Tu Jesus Cristo jire boe emeartoruwo. Umode boe ekinorudowu nure ema tu rugadu. Ire tawie nou inoduji marigudu. Mare iage etaidumode tuwo tuwadaru udo tuginai nou Pao Kurireu bataru remawu piji mare pagare egoino. Boe emode boe erduwado Pao Kurireu bataruji dukeje tawia tugu ewadaruto boe remawu jire egoino dubagai tawo pu jorduwado tawo tameartoru rakado Jesusji rugadu.
1CO 3:12 Boe emaragodumode tuwaiji dukeje emode tuwai pemegado iguru pemegareu tabo. Mare ia boe emaragodu pegamode tuwaiji tuwo tuwai rakojedo tugera kiari tabo, dukeje emode rakojedo iguru pegareu tabo. Ainore meartorure Jesus jiwuge eromode jamedu. Mare bai ji karega inagoino. Iguru pemegareu ji karega inagoino. Emeartoru remawumode Pao Kurireu bataruji rugadu. Dujire inagoino. Emode tugera maku iage etai tuwo erduwado Pao Kurireu bataru remawuji emeartoruwo rugadu Pao Kurireuji rugadu. Dujire inagoino. Mare iage eromode nono nou maragodu pegare tuwai jiwuge emogadure. Mare bai ji karega inagoino. Iguru pegareu ji karega inagoino. Emeartoru rakamodukare Pao Kurireu bataruji. Dujire inagoino. Emodukare tugera maku iage etai. Emodukare erduwado Pao Kurireu bataruji. Emodukare boe emeartorudo Pao Kurireuji. Dujire inagoino.
1CO 3:13 Mare Jesus aregodumode dukeje Jesus aiwomode meartorure puduiwuge eiamedu boe emaragodaeji emaragodu pemegare dubagai. Umode boe erduwado nou emaragodae rugadu boeji nono joru mogadure. Joru čemode torito mare umodukare tori akedudo. Mare joru čemode ito dukeje umode i kowu rugadu. Umode akedudo. Mare joru ji karega inagoino. Tori ji karega inagoino. I ji karega inagoino. Meartorure Jesus jiwuge emaragodae mori jire inagoino. Ainore Pao Kurireu romode.
1CO 3:14 Boe emeartorumode Jesusji rugadu tumaragodu pemegawo Jesus meardaeji dukeje Jesus umode boe pemegareu maku nou meartorure puduiwuge etai emaragodae pemegareu moriče.
1CO 3:15 Mare meartorure Jesus jiwuge ewiapaga pemegamodukare Tugimijera Jesus bataruji tumaragodu pegawo dukeje Jesus umode nou emaragodae pegareu akedudo nono joru mode boe akedudo dumogadure. Mare joru ji karega inagoino. Umodukare boe pemegareboe maku etai. Dujire inagoino. Mare umode ekinorudo nono ia boe ere činorudo joru piji dumogadure.
1CO 3:16 Tameartorure Jesusji dukodire Pao Kurireu Uwari mugure tagabo. Dukodire tare nono Pao Kurireu uwai mogadure. Dujire tarduware marigudu. Mare bai ji karega inagoino. Pao Kurireu Uwari mugure tagabo. Dujire inagoino.
1CO 3:17 Boe pegareu jetukare mugukare Pao Kurireu uwai tada. Mare bai ji karega inagoino. Taire inagoino. Boe emeardae pegareu jire inagoino. Dukodire taipagakaba ia boe emeardae pegareuji. Boe emode tumeardae pegareu maku tagai tuwo tameartoru akedudo dukeje Pao Kurireu umode etagedudo jamedu.
1CO 3:18 Tagaba taekiripagado. Tameardaekaba tarduwaie iaboeji. Tameardaemode tawo tageragu nou meartorukare Jesus jiwuge emeardaeji tawo tarduwado dukeje pagare taroino Pao Kurireu jakai. Tarokaba aino. Nou meartorukare Jesus jiwuge erduware jiboe barigu tabiji tawo tarduwado tu Pao Kurireu jorduware jiboeji. Nono meartorukare Jesus jiwuge egomode tarduwa bokwaie. Mare tawia pagakaba egoino tai duji.
1CO 3:19 Meartorukare Jesus jiwuge egore tuiorduwaie rugadu. Mare Pao Kurireu akore pagaie nou boe egoino. Erduwa bokware Pao Kurireu jakai. Padure bapera kejewu Pao Kurireu bataru akore: – Meartorukare Pao Kurireu jiwuge emeardaere tuiorduwaie rugadu duji. Mare Pao Kurireu ure ewadaru rugadu pogurudo.
1CO 3:20 Ia padure bapera kejewu Pao Kurireu bataru akore jamedu: – Jorduwareuge ere tumeardae tawuje mare Pagimijera Kurireu jorduware pagatu jere eroino duji.
1CO 3:21 Dukodire tagojarokaba boe erore jiboeji. Tamagokaba jorduwareuge enuie tagi. Ča Pao Kurireu utugare nure Jesusče. Dukodire čare tameartorure Jesusji. Nou inodu kodire Jesus Cristo utugarege nure tagi jamedu. Dukodire emare ure boe jamedu boe maku tagai. Ure iwadaru maku tagai. Ure Apolo makore jiboe maku tagai. Ure Pedro makore jiboe maku tagai. Ure awu moto kejewuge erduware jiboe maku tagai. Umode tamugu pemegado. Emare jorduware tawimode kejewu meriji. Emare jorduware nuba boere tai. Jorduware nuba boemode tai rugadu tuwo boe pemegado tagai rugadu jii toro rugadu.
1CO 4:1 Iwo tawie. Jesus Cristo utugarege nure čegi. Jesus Cristo meartorure čei dukodire ure Pao Kurireu bataru biadowu maku čenai četu pemegawo ji. Marigudu boe erduwakare nou Pao Kurireu bataruji. Aino čare čenure boe ewie nou boe erduwakare jiwu Pao Kurireu bataruji. Pao Kurireu bataru remawu jire čenagoino. Dukodire čare tameartorudo čei tawo taro udo turugadu čei.
1CO 4:2 Boe eimijerage emeartorumode tudugaregei dukeje nou etugarege erowo tu nou tugimijerage etaidure jiboeji rugadu. Ainore čerore jamedu nono nou boe etugarege ero mogadure.
1CO 4:3 Tagaiwomode čeroji ia čero pegareu bagai mare imororamagadukare. Itaora butugugodure. Boe etaiwomode čeroji rugadu. Mare Pagimijera Jesus emare mako pegamode ia čero pegareuji. Imi karega. Imago pegamodukare ia čeroji. Itaiwore ia čero pegareu bagai mare iordukare ji. Mare ia čero pegareu mode dukeje Pagimijera Jesus jordumode ji rugadu. Emare mako pegamode čero pegareuji čewiagai. Dujire čewiapagamode čemeartorumode.
1CO 4:5 Dukodire akekaba tai tamago pegawo boe ero pegareuji. Du tabagado Jesus bagai. Jesus aregodumode pugeje dukeje emare aiwomode boe erore jiboeji rugadu ero pegareu bagai. Boe emode turore jiboe biado mare Jesus jorduware ji marigudu. Umode boe erduwado erore jiboeji rugadu. Boe emode tumeardae biado mare Jesus jorduware ji marigudu. Umode boe erduwado emeardaeji rugadu. Dukejere Pao Kurireu mako pemegamode boe ero pemegareuji, emeardae pemegareuji. Mako pegamode ero pegareuji emeardae pegareuji jamedu.
1CO 4:6 Imedage nure tagi. Ia tagi tagagore meartorure Apolo jiwuge enuie tagi. Tagagoino aino dutabo tamago pegare imagore jiboeji. Ia tagi tagagore meartorure Paulo jiwuge enuie tagi. Tagagoino aino dutabo tamago pegare Apolo makore jiboeji. Dukodire inagoino tai tamago pegakawo boe erore jiboeji. Ainore boe egore: – Ameardae kaba ia ameardaeji boei Pao Kurireu bataru remawu piji. Dukodire tardu kurikaba ia boei tardu pegawo ia boei jamedu. Mare tardu kurido eiamedu boei puapo.
1CO 4:7 Kočare tagagore tarduwaie rugadu. Kočare tagagore tagoe kurie rugadu. Mare taigoia karega tare tagoedo. Taigoia karega tare tarduwado. Pao Kurireu koiare ure tagoe rugadu maku tagai. Ure tarduware jiboe rugadu maku tagai. Dukodire čare tagojarokaba tagoeji. Tagojarokaba tarduware jiboeji.
1CO 4:8 Kočare tagagore tagoeie, tagoe kurie. Kočare tagagore jorduwareuge enuie tagi kodie boe eimijerage enuie tagi. Mare tagagore boe eimijerage kaiegure čegi. Boe eimijerage emode tagi rugadu dukeje boe eimijerage emode čegi jamedu. Mare Pao Kurireu utugarege nure čegi. Dukodire boe eimijerage karegure tagi jamedu.
1CO 4:9 Iwo tawie rugadu. Uture Jesus bataru tabowuge nure čegi rugadu. Mare Pao Kurireu ure boe etugaregedo čegi. Ure čedo nono ia bitodumodewu boe emogadure boe egai. Boe etaiwore boe pegare čei duji. Baru tadawuge etaiwore boe pegare čei duji. Ainore imeardaere.
1CO 4:10 Čemeartorure Jesus Cristoji dukodire boe egore jorduwa bokwareuge enuie čegi. Kočare tagagore tameartoruie Jesus Cristoji dukodire jorduwareuge enuie tagi. Pagare tagagoino. Čemeartorure Jesus Cristoji dukodire boe egore čeragakaie. Kočare tagagore taragaie. Pagare tagagoino. Čemeartorure Jesusji dukodire boe erdu pegare čei. Kočare tagagore boe eie tugimijeragedo tagi. Pagare tagagoino.
1CO 4:11 Čewiapagakare čewo boe pemegado čei. Čewiapagare tu čemeartoruwo Jesus Cristoji tu rugadu. Dukodire jii aino čege boeire čei. Pobo boeire čei. Čegudau areia pega. Boe ere boeto čei. Čewai bokware. Dukodire čemeru pagare aino boe parugajeje.
1CO 4:12 Čemaragodu rakare dukodire čemedugodure rugadu. Boe emago pegare čei mare čere čemago pemegado ei nou ewadaru pegareu jipagi. Boe ero pegare čei mare čegorigodukare erore aino čei duji.
1CO 4:13 Boe emago pegare čerore jiboeji mare čemago pegakare erore jiboeji ewadaru pegareu jipagi. Boe etaidure tuwo čewarigu tubiji nono ture ia areia pegagodureu barigu dumogadure. Jii aino boe emeardae pegare čei rugadu.
1CO 4:14 Inure tawie aino awu padure bapera kejewu imeardaeji. Mare itaidukare iwo tabogurudo tameardaere jiboeji. Itaidure iwo tarduwado nono boe emode tumeardu kurire jiwu tore erduwado dumogadure.
1CO 4:15 Nono boe emagamode tuwo tarduwado Jesus jiwu bakaru pemegareuji tietu pemegawo tai mare imire ire tarduwado Jesus jiwu bakaru pemegareuji boetoji. Awu iwadaru koiare ure tameartorudo Jesusji. Dukodire ire ido nono tao mogadure.
1CO 4:16 Dukodire inogwamaguduwo tai. Tarodo nono iro mogadure.
1CO 4:17 Dukodire ire imedu Timóteo utudo tawagai. Emare meartoru kurire Jesus bataruji. Dukodire ure nono imeardu kurire jiwu itonaregedu mogadure. Emare umode tarduwado pugeje irore jiboeji. Imeartorure Jesus Cristoji dukodire imeardaere nono Jesus meardae mogadure. Nou Jesus meardae koiare ure irore jiboe udo tuginai nou mariguduwu irore jiboe piji. Ire meartorure Jesus jiwuge eiamedu boe erduwado nou Jesus meardae pemegareuji moto jamedu boe parugajeje.
1CO 4:18 Ia tagi tameardaere itaregodumodukaie tagae pugeje. Dukodire tagojarore tai. Tagagore Pao Kurireu Uwari uie turaga maku tagai.
1CO 4:19 Mare itaregodumode kuri aino tagae rugadu iorduwo nou očarore puduiwuge erore jiboeji rugadu. Pagimijera aidumode dukeje itaregodumode rugadu. Itaregodumode dukeje itaiwomode erore jiboeji Pao Kurireu Uwari ure turaga maku etai dubagai. Nono imeardumode ewadaruji iwija tabo rugadu. Iordumode erore jiboeji ioku tabo rugadu.
1CO 4:20 Iwo tawie. Boe egomode tumeartoruie Pao Kurireuji mare tu tumago tabo karega boe emeartorumode tugimijeraji. Turore jiboe jamedu boe tabore boe emeartorumode tugimijeraji. Nono nou boe emeartoruwo Pao Kurireu bataruji rugadu turo jamedu boe tabo tuwo tugimijerado Pao Kurireuče. Mare paga karega. Pao Kurireu Uwari umode turaga maku etai dukeje eragamode tumeartoruwo Pao Kurireu bataruji rugadu.
1CO 4:21 Nuba tameardaere? Itaregodumode tagae dukeje kaba ia taro jiba iordumode? Pagare tagagoino tameartoruie Pao Kurireuji kana? Boe rugadu kana tameartorure Pao Kurireuji rugadu tarore jiboe jamedu boe tabo? Pagamode tagagoino dukeje imago rakamode tarore jiboeji iwo taro jetorodo nono Pao Kurireu meardae mogadure. Mare boe rugadu mode tagagoino dukeje imago pemegamode tarore jiboeji. Nono itaora butugumode tai. Tarduwamode imeardu kurire tai duji rugadu.
1CO 5:1 Mare aino čare boe ere iwie tarore jiboeji. Ia tamedia imedu ro pegare rugadu. Ro pegareuge erokare aino. Mare awu imedu ro pegare ro pegareuge ero kori. Jeribarire tuo oredujeji mare tuje ji karega roino.
1CO 5:2 Kočare tardu pegakare nou tamedia ro pegareuji. Kočare tagojarore tarore aino duji. Ukare turugadu! Tagiarigodudo nou imedu ro pegareuji. Tamode bato pui mare nou imedu apo karega. Ukawo bato pui tagabo.
1CO 5:3 Tamode bato pui tamagowo Jesus bataruji pui dukeje iragoje jaere tabiji. Mare iwiakurure imugure tagabo du ka. Dukodire ure nono iragojere tagabo dumogadure. Dukodire čare imago pegare nou imedu ro pegare duji rugadu. Mare paga karega. Pagimijera Jesus jordu pegare nou imedu ro pegare duji dukodire imago pegare aino ji. Tamode bato pui dukeje iragojemode tagabo mare iwiabutu tawugeje dutabo. Tamode bato pui dukeje Pagimijera Jesus rakojemode tagabo jamedu mare turaga tabo rugadu.
1CO 5:5 Dukodire tamode awu imedu maku bope doge eimijera uwari bope ai uwo boe pegado nou imeduji. Mare paga karega nou imedu uwo tudo nono bireu mogadure dubagai kodire taromode aino ji. Mare bi ji karega inagoino. Biapagakawo tuwodure tabowu tumeardae pegareuji pugeje. Dujire inagoino. Nono umode tugera ra nou turo pegareu piji rugadu. Dukodire Pagimijera Jesus aregodumode pugeje dukeje umode awu imedu udo činorudo rugadu.
1CO 5:6 Dukodire inagoino tai. Tagojarokaba tarore jiboeji. Tarduware boe ewadaruji. Egore: “Fermento biagareu tabore boe emode pão barodudo rugadu.” Ainore boe egore.
1CO 5:7 Nono boe ero pegareu ure nono fermento mogadure. Mare fermento ji karega inagoino. Taro pegareu jire inagoino. Taro pegareu umode tameardae jamedu boe pegado. Dujire inagoino. Ča taro pegareu barigu tabiji. Tamode tagera ra taro pegareu piji dukeje tabemegamode, tameardae pemegamode jamedu. Tamode nono amireu remawu mogadure. Mare amireu ji karega inagoino. Tabemegamode, tameardae pemegamode tawo taro pemegado. Dujire inagoino. Mare tameartorure Jesusji dukodire ure tabemegado marigudu. Aino tamode tagera ra taro pegareu piji pugeje tabemegamode nono tamogadure rugadu. Mare paga karega. Jesus Cristo bire boe ero pegareu moriče dukodire ure nono boe ere bitowu Páscoa kejewu cordeiro mogadure. Mare cordeiro ji karega inagoino. Emare bire paro pegareu moriče rugadu. Dujire inagoino.
1CO 5:8 Dukodire pawo pawadae tawuje. Pawo udo nono nou Judeu doge egore Páscoa aino jiwu ewadae mogadure. Mare pawadae ji karega inagoino. Pameartoru pemegawo Jesus bataruji paegare tabo. Dujire inagoino. Pawo paro pegareu barigu pabiji. Pawo pameardae pegareu barigu pabiji. Dujire inagoino. Paro pemegawo. Pameartoruwo boe remawuji. Pamagowo boe remawuji boe ewiagai. Dujire inagoino.
1CO 5:9 Ire bapera atugodo tawagai marigudu. Dutabore ire tawie tawo tagera ra jeribarire tumugukare apowuge ime areme epiji. Taburedukaba ei.
1CO 5:10 Mare meartorukare Jesus jiwuge ei karega inagoino. Meartorukare Jesus jiwuge eribarire tumugukare apowugei. Enogwa kidure tu pudai diero keje. Erdu pegare boe enoe bagai pudai. Ekiwogu kigodure rugadu. Emeartorure tuwai tadawu santo dogei jamedu. Tarduware marigudu tarokawo nono awu ro pegareuge meartorukare Jesus jiwuge ero mogadure. Mare eragojere moto jamedu boe parugajeje. Dukodire taroiwakare taduwo epiji.
1CO 5:11 Mare ia boe egore tumeartoruie Jesusji mare ero pegare kimo nono awu ro pegareuge ero mogadure. Eire inagoino tawo tagera ra epiji. Eribarire tumugukare apowugei rugadu. Enogwa kidure tu pudai diero keje. Emeartorure bai tadawu santoji. Emago pegare ro pemegareugei. Ekudu kigodure piga kuruče. Ekiwogu kigodure. Egore tumeartoruie Jesusji mare pagatu je. Eire inagoino tawo tagera ra epiji rugadu. Tagaba tamedagedo emage. Tagaba tamugudo ebo. Tagwagekaba ebo jamedu.
1CO 5:12 Marigudu Pao Kurireu ure tuwadaru bu bapera keje. Akore: – Tamode ro pegareu utudo tabiji ukawo bato pui tagabo. Ainore Pao Kurireu akore. Mare meartorukare puduiwuge ei karega akoino. Pagi karega pagaiwomodukare meartorukare Jesus jiwuge erore jiboeji. Emare aiwomode meartorukare puduiwuge erore jiboeji ero pegareu bagai. Mare nou egore tumeartoruie Jesus jiwuge eire pagaiwomode ero pegareu bagai. Ere bato pui pagabo dukodire pagaiwomode erore jiboeji rugadu ero pegareu bagai rugadu. Dujire Pao Kurireu akoino ekawo bato pui meartorure puduiwugebo pugeje.
1CO 6:1 Ia tagi tagorigodure pui pu roredu boeji. Dukejere tadure meartorukare Jesus jiwu boe eimijera ae uwo tarduwado tarore jiboeji uwo tamugu pemegado tarore jiboe piji. Kodiba tarore aino? Ukare turugadu. Kodiba tamagokare meartorure Jesus jiwuge boe eimijerage ewagai ewo tabemegado pui tarore jiboe piji?
1CO 6:2 Tarduwa bokware. Ia meri keje Pao Kurireu uwobe emagere etaiwomode boe eiamedu boe erore jiboeji ero pegareu bagai. Meartorure Jesus jiwuge mode tagi dukeje Pao Kurireu uwobe mode tagi rugadu. Dukodire tagaiwomode boe eiamedu boe erore jiboeji. Mare kočare taroiwakare tawo ia taro pegareu biagareu tawuje tabiji tawo tabemegado pui pugeje.
1CO 6:3 Tarduwa bokware. Ia meri keje pagaiwomode Pao Kurireu utugarege baru tadawuge erore jiboeji. Kočare taroiwakare tagaiwowo moto kejewu tarore jiboeji.
1CO 6:4 Kočare tadure meartorukare Jesus jiwuge boe eimijerage etae etaiwowo tarore jiboeji emagowo tai nuba taromode.
1CO 6:5 Taro pega! Iwo tabogurudo tarore jitu bagaire inagoino tai. O kočare ia jorduwareu mugure nono tagabo. Mare kočare tagaidukanure ji na?
1CO 6:6 Meartorure Jesus jiwuge nure tagi dukodire tamedage nure pugi. Mare kočare tagorigodure pui. Kočare tadure meartorukare Jesus jiwuge boe eimijerage etae etaiwowo tarore jiboeji taro pegareu bagai taro pemegareu bagai jamedu. Ukare turugadu!
1CO 6:7 Tadure boe eimijera bagai aiwowo tarore jiboeji tumagowo tai nuba taromode pui tamugu pemegawo pu apo dukodire nou inodu pegare rugadu ukare turugadu! Ia meartorure Jesus jiwu ro pegamode tai mare tagaba rore taidu morido. Ia meartorure Jesus jiwu iwogumode tai mare tagaba rore taidu morido.
1CO 6:8 Mare kočare taro pegare pui puibagi. Tagiwogure pui puibagi jamedu. Meartorure Jesus jiwuge nure tagi. Tamedage nure pugi. Kočare tarore aino!
1CO 6:9 Tarduware Pao Kurireu meardaeji. Ro pegareuge ekare tugimijerado Pao Kurireuče dukodire Pao Kurireu umodukare emugudo baru tada rugadu. Tagaba taekiripagado. Ro pegare tieribari tabowuge, meartorure tuwai tadawu santo jiwuge, jeribarire toreduje pijiwuge, jeribarire toredu pijiwuge, ime ere tugeragu dieroji tieribari tabowuge, jeribarire puiwuge ime, jeribarire puiwuge areme nouge emugumodukare baru tada rugadu.
1CO 6:10 Iwogu kigodureuge, okwa kidure tu pudaiwuge, korigodure tumedage enoe bagaiwuge, uke kurure jiwuge, mako pegare boe ero jiwuge, iwogure tumedage enoroe jiwuge, nouge emugumodukare baru tada jamedu. Ekare tugimijerado Pao Kurireuče dukodire Pao Kurireu umodukare emugudo baru tada.
1CO 6:11 Marigudu tagi tarore awu taro pegareu boeji jamedu. Mare aino čare Pagimijera Jesus Cristo Pao Kurireu Uwari apo ere tagaimo. Mare boe etaimodu ji karega inagoino. Ere taro pegareu barigu tabiji. Dujire inagoino. Ere tado taginai taro pegareu piji taro pemegawo. Ere tugeragu tai pudae tuwo tado nono ro pemegareuge emogadure. Dujire inagoino.
1CO 6:12 Ia tagi tagagore: – Meartorure Jesus jiwuge emeartorumodukare Judeu doge eno bakaruji pugeje dukodire parowo pagaidure jiwu parore jiboe jamedu boeji. Pao Kurireu jordu pegamodukare paromode aino duji. Boe jokodu jire tagagoino. Imi jamedu imeartorumodukare Judeu doge eno bakaruji pugeje. Iromode itaidure jiwu irore jiboeji. Mare pagaidure jiboe jamedu boe karega pemegare pai. Dukodire ire imeardae tawuje irokawo nou pemegakare iwu iroji pugeje. Iromode itaidure jiwu irore jiboeji. Mare itaidumodukare iwo ikera ra nou iro piji pugeje dukeje imode ikera ra nou iro pegareu piji rugadu. Imodukare irore jiboe udo boe pegado i pugeje.
1CO 6:13 Ia tagi tagagore: – Page boeire pai kodi pagwagemode. Pao Kurireu jordu pegamodukare parore aino duji. Mare boe eke ji karega tagagoino. Taro pegareu jire tagagoino. Tagagore: – Boe etaidure areduji nono taidu moga tuge jitu mogadure. Boe emodukare tugeragu areduji dukeje boe pegamode ei nono boe pegare uke bokwareu jitu mogadure. Ainore tagagore. Mare tagaidure taro pegawo taeribari pagawo pui. Dujire tagagoino. Nou tameardae ukare turugadu. Tameardae pegare. Pao Kurireu ure boe etowuje rugadu mare boe emeartoruwo pudui dubagai Pao Kurireu roino. Dukodire pameartoruwo Pao Kurireu bataruji rugadu utugaregewo pagi. Dukodire paeribarikawo pagoreduje piji, pagoredu piji. Toro ia meri keje Pao Kurireu umode pagodu pawiri akedudo. Pameartorure Jesusji dukodire umode pagodu maiwu pawiri maiwu maku pagai pugeje. Dukodire boe eke boeimodukare pai pugeje. Pagimijera Kurireu nure ema kodi. Turaga tabore Pao Kurireu ure Jesus jewodudo pugeje. Dukodire umode paewodudo pugeje jamedu turaga tabo rugadu.
1CO 6:15 Tameartorure Jesusji dukodire tare nono Jesus Cristo biri mogadure. Tagodure nono Jesus Cristo kodu mogadure jamedu. Mare Jesus biri ji karega inagoino. Jesus kodu ji karega inagoino. Jesus rakojere tagabo. Dujire inagoino. Dukodire tabadumode ia aredu ure tugeragu dieroji tieribari tabowudo apo nou taro ukare turugadu! Nou taro peganure. Padure bapera kejewu Pao Kurireu bataru mako pemegare. Akore: – Imedu mugumode aredu apo dukeje ere mitotu puapo turoi pui dutabo Pao Kurireu jakai. Dukodire imedu jeribarimode nou jeribarire diero bagaiwu areduji dukeje emode nono mitotu puapo turoi pui dutabo Pao Kurireu jakai jamedu. Tarduware.
1CO 6:17 Mare tamode tamagu Pagimijera Jesus ai dukeje tameardaere jiboe umode mitotu je tameartoruwo Jesus jitu tabo. Tameartorumodukare ia boe emeardae pegareuji pugeje.
1CO 6:18 Taeribarikaba tawire epiji tagoge epiji ia tamugukare apowugei. Boe emode boe pegado ia boei turo pegareu jamedu boe tabo. Mare boe eribarimode toreduje piji toredu piji dukeje tuwiri jire tugodu jire boe emode boe pegado rugadu.
1CO 6:19 Pao Kurireu Uwari mugure meartorure Jesus jiwuge etada. Dukodire Pao Kurireu Uwari uwai nure tagi. Pao Kurireu ure Tuwari maku tagai rugadu. Tarduware nou inoduji marigudu. Dukodire tagimijera karegure tagi. Pao Kurireu emare tagimijera nure ema. Kočare tarduwakare nou inoduji?
1CO 6:20 Ure akirodo tai. Tamori kurire rugadu. Mare diero ji karega inagoino. Jesus bire tamugato. Dujire inagoino. Jesus ure tugu redo taro pegareu moriče. Dujire inagoino. Dukodire čare tarore jiboe tagodu tabo udo turugadu Pao Kurireu jakai tameartoru tabo ji uwo tamugu pemegado boe emago pemegawo Pao Kurireuji rugadu.
1CO 7:1 Tare atugoreboe maku iwagai. Dutabore tanarare i Pao Kurireu meardae bagai. Tagagore imedu mugumodukaie aredu apo du pegamodukaie.
1CO 7:2 Mare iwo tawie. Boe eribari pagare pui tu tu je. Dukodire imagowo tai. Imedu muguwo tu toreduje remawudo apo. Aredu muguwo tu toredu remawu apo.
1CO 7:3 Imedu umode tugeragu tu toreduje remawudoji. Aredu umode tumagu tu toredu remawu ai. Dukodire emugure puapo. Oreduje jetorimodukare toreduji. Oredu jetorimodukare toredujeji. Aredu umodukare tumeardae tawuje tuginaigodu tieribariwo. Nou oredu umode tumeardae maku toreduje ai ewo tumeardae maku puai. Aino jamedu imedu umodukare tumeardae tawuje tuginaigodu tieribariwo. Nou oreduje umode tumeardae maku toredu ai jamedu ewo tumeardae maku puai emeardaewo nono pumeardae mogadure.
1CO 7:5 Emode tumeardae maku puai tuwo tugera ra tieribarire pui dupiji tu jao tumagowo Pao Kurireu bagai baruto du pegakare. Mare nou emagore jiwu meri akedumode dukeje ure turugadu ewo tugirimi puae pugeje. Nono ero pemeganure pui. Aredu umodukare tumagu toredu ai dukeje mareboe umode oredu aora pegado jemaruwo ia aredu bagai toreduje piji. Rakamodukare tuwo turo pemegado. Imedu aidumodukare tuwo tugeragu toredujeji dukeje mareboe umode nou oreduje aora pegado jemaruwo toro ia imedu bagai toredu piji jamedu. Rakamodukare tuwo turo pemegado jamedu. Mare mugure puapowuge emode tumagu puai dukeje boe pegamodukare ei. Eragamode puapo turo pemegawo rugadu.
1CO 7:6 Tanarare i iwadaru bagai. Dukodire inagoino.
1CO 7:7 Mare itaidure tarowo nono iro mogadure. Itoreduje bokware. Mare Pao Kurireu ure meartorure puduiwuge edo turugadu tumeardae tabo. Umode turaga maku meartorure puduiwuge etai rugadu emeartoru pemegawo pudui rugadu. Dukodire iage etuwire bokware. Mare iage etuwiremode rugadu. Mare nono Pao Kurireu meardae mogadure.
1CO 7:8 Imagowo iparei, imei, okoge bokwareugei jamedu. Tagaidumode tagogekawo pugeje tawirekawo pugeje tawo nono ire. Du pegakare.
1CO 7:9 Mare taroiwamodukare tawo tagera ra taeribari piji dukeje tamugudo apo rugadu. Imedu akore tumugumodukaie aredu apo mare aidu kurire kimo tuwo tugeragu aremei dukeje ukare turugadu. Nou imedu muguwo aredu apo rugadu. Du ure turugadu. Aredu akore togogemodukaie mare aidu kurire kimo tuwo tumagu ime etai dukeje ukare turugadu. Nou aredu muguwo imedu apo rugadu. Du ure turugadu.
1CO 7:10 Čare imagowo Pao Kurireu bataruji okogereuge ewiagai, uwirereuge ewiagai. Iwadaru karega. Pao Kurireu bataru reo. Ainore akore aremei: – Tagaba tagera ra tagoredu piji.
1CO 7:11 Mare aredu umode tugera ra toredu piji dukeje mugukawo ia imedu apo pugeje jii toro rugadu. Mare aidure togogewo pugeje dukeje uwo tugirimi tu nou toredu ae pugeje tu rugadu. Ainore Pao Kurireu akore aremei. Makore imei jamedu. Akore: – Tagaba tagera ra tagoreduje piji rugadu. Ainore Pao Kurireu akore.
1CO 7:12 Čare imagomode boei jamedu. Mare iwo tawie Pao Kurireu meardaeji. Imedu mugure toreduje apo marigudu. Aino maigodu nou imedu meartorure Jesusji mare nou oreduje meartorukare ji raga. Nou aredu aidumode kimo tumuguwo toredu apo dukeje awu imedu ukawo tugera ra nou toreduje piji. Tarowo aino rugadu.
1CO 7:13 Aredu mugure toredu apo marigudu jamedu. Aino maigodu nou aredu meartorure Jesusji mare oredu meartorukare Jesusji raga. Nou meartorukare Jesus jiwu imedu aidumode kimo tumuguwo nou toreduje apo dukeje nou aredu ukawo tugera ra nou toredu piji. Tarowo aino rugadu.
1CO 7:14 Mare paga karega. Aredu meartorure Jesusji dukeje Pao Kurireu jordu pegamodukare nou mugure apowu imeduji. Nou imedu meartorukare Jesusji raga mare Pao Kurireu jordu pegamodukare ji. Mare paga karega. Emugure puapo kodi. Ainore boere imeduji jamedu. Imedu meartorure Jesusji dukeje Pao Kurireu jordu pegamodukare nou mugure apowu areduji. Nou aredu meartorukare Jesusji raga mare Pao Kurireu jordu pegamodukare ji. Mare paga karega. Emugure puapo kodi. Aino ia meartorure Jesusji mare emugu kimore puapo. Du pegakare Pao Kurireu jakai. Du jire inagoino. Pao Kurireu aidumodukare emugure puapo duji dukeje romode etorei nono turo moga meartoru bokwareugei dumogadure ro pegamode ei. Mare aidure emugure puapo duji rugadu. Dukodire ro pemegamode etorei jamedu.
1CO 7:15 Mare meartorukare Jesus jiwu aidukare toreduje meartorure Jesus jituji. Dukodire ure tugera ra toreduje piji rugadu. Du Pao Kurireu jordu pegakare nou areduji. Nou meartorure Jesus jiwudo jordu pegakawo nou toredu ure tugera ra tubiji duji. Pao Kurireu aidure boe emugu pemegawo puapo. Ainore boere imeduji jamedu. Meartorukare Jesus jiwudo oreduje aidukare toredu meartorure Jesus jituji. Dukodire ure tugera ra toredu piji rugadu. Du Pao Kurireu jordu pegakare nou imeduji. Nou meartorure Jesus jiwu imedu jordu pegakawo nou toreduje ure tugera ra tubiji duji jamedu. Pao Kurireu aidure boe emugu pemegawo puapo.
1CO 7:16 Čare meartorure Jesus jiwu aredu aidure toredu meartoruwo Jesusji mare boe erduwakare oredu aidumode dubagai. Meartorure Jesus jiwu imedu aidure toreduje meartoruwo Jesusji mare boe erduwakare oreduje aidumode dubagai jamedu.
1CO 7:17 Pao Kurireu makore tawagai. Dukodire čare tarodo nono Pagimijera ure maku tagaiwu taroji. Mare tado nono tare marigudu. Ainore imagore meartorure Jesus jiwuge eiamedu boei. Mare boe emeardae pegareu boe ero pegareu ji karega inagoino. Ia tagi tare tawaga oto biri kadowuge Judeu doge nure tagi. Pao Kurireu makore tawagai dukodi karega tamode tagera ra Judeu doge ero pemegareu boe piji. Du jire inagoino. Tameartorumode Pao Kurireuji rugadu mare tagaba tagera ra Judeu doge ero pemegareu piji. Tameartorumode Pao Kurireuji mare tagaba tado nono nou ukare tuwaga oto biri kadowuge emogadure. Du jire inagoino. Ča ia tagi ukare tuwaga oto biri kadowuge boe tuginaiwuge nure tagi. Pao Kurireu makore tawagai dukodire tameartorure ji. Mare dukodi karega tamode tagera ra tawobe ero pemegareu boe piji. Tameartorumode Pao Kurireuji mare tagaba tagera ra tawobe ero pemegareu boe piji rugadu. Tagaba tado nono nou ure tuwaga oto biri kadowuge Judeu doge emogadure.
1CO 7:19 Ure tuwaga oto biri kadowuge bagai karega Pao Kurireu aiwore pugeje. Boe ekare tuwaga oto biri kado dubagai karega Pao Kurireu aiwore. Pao Kurireu aiwore nou meartorure tuwadaru jiwuge ewagai tu rugadu.
1CO 7:20 Pao Kurireu makore tawagai. Dukodire tameartorure Pao Kurireuji. Mare tameartorure Pao Kurireu jitu kodi karega tamode tagera ra tamaragodae piji.
1CO 7:21 Ia tagi boe ere tugeragu tai turaga tabo tuwo tudugaregedo tagi. Dukodire tamaragodae rakare tai. Mare tamororamagadukaba. Tamaragodu pemegado nou tagimijera ure maku tagaiwu tamaragodaeji. Tagaba tagera ra tagimijerage epiji. Mare tagimijerage etaidure tuwo taginorudo tamaragodae rakareu piji taduwo ia tamaragodae pemegareu ka dukeje tadudo rugadu tawo tagamudo nou tamaragodae rakareu piji.
1CO 7:22 Ia tagi boe ere tugeragu tai turaga tabo tuwo tudugaregedo tagi. Tameartorure Jesusji mare tamaragodae rakare tai kimo. Mare tameartorure Jesusji dukodire ure taginorudo taro pegareu piji. Dukodire tare tagamudo nou taro pegareu piji. Tamaragodae rakare tai mare tare tagamudo nou taro pegareu boe piji. Ia tagi boe etugarege karegure tagi. Tamaragodure tu tagai rugadu. Mare aino Jesus makore tawagai dukodire ure tudugaregedo tagi rugadu.
1CO 7:23 Pao Kurireu ure akirodo tai. Taro pegareu mori kurire. Dukodire Jesus bire taro pegareu moriče. Dujire inagoino. Dukodire tagaba tagirimi boe emeardae pegareu ka pugeje. Tawiapagakaba boe emeardae pegareuji pugeje. Tamode tagirimi boe emeardae pegareu ka dukeje nou boe emeardae pegareu etugarege emode tagi rugadu. Dukodire inagoino tai tagawo tagirimi emeardae pegareu ka pugeje.
1CO 7:24 Imedage nure tagi. Tameartoru rakamode Jesusji dukeje tamugu pemegamode Pao Kurireu apo. Ča boe etugarege nure tagi. Boe kurireuge nure tagi. Mare tamororamagadukaba. Tameartorure Jesusji dukodi karega tamode tagera ra tamaragodae piji. Tamaragodu pemegado tamaragodaeji. Ainore taromode tameartoru pemegawo Pao Kurireuji rugadu.
1CO 7:25 Tanarare nogware maiwuge ero bagai. Padukare ia Pao Kurireu bataru keje. Mare Pagimijera okudugodure itabo dukodire iorduware Pagimijera meardaeji. Dukodire inogituwamode tai nono Pao Kurireu meardae mogadure.
1CO 7:26 Boe rakare meartorure Jesus jiwugei. Dukodire boe rakare tai rugadu. Dukodire čare tamode nono tare du pegakare.
1CO 7:27 Nou mugure toreduje apowuge nure ia tagi. Dukodire imode tawie. Tagaba tagera ra tagoreduje piji. Mare ia tagi uwire bokwareuge ime nure tagi. Iwo tawie jamedu. Taemarukaba ia aredu bagai tagoreduječe.
1CO 7:28 Mare tawiremode dukeje pegakare jamedu. Taro pegakare. Nogwaredu okogemode dukeje pegakare. Ro pegakare. Mare boe emugumode puapo dukeje boe ewiagoromode toredujeji, torei jamedu. Mare paga karega boe rakamode ei dukeje mororamagadumode ei tuwo boe pemegado ei. Mare uwire bokwareuge ewiagorokare iaboeji iaboeji ure mitotu je dukodi. Dukodire inagoino tai tawiagorokawo aredu bagai, imedu bagai.
1CO 7:29 Boe puredugodure boe jamedu boe akeduwo rugadu. Imedage nure tagi. Dukodire inagoino tai. Nou uwirereu ime ewiagorokawo tuwaiji pugeje toeji pugeje. Mare ewiagorowo tu tumeartoruwo Pao Kurireuji jii toro.
1CO 7:30 Ragudureuge ewiagorokawo traguduji pugeje, ewiagorowo tu tumeartoruwo Pao Kurireuji jii toro. Jakarere puduiwuge ewiagorokawo tiegareji pugeje, ewiagorowo tu tumeartoruwo Pao Kurireuji jii toro. Boe emode akirodo boe enoeji. Mare nou boe ewiagorokawo nou ture akirodo jiboeji pugeje ewiagorowo tu tumeartoruwo Pao Kurireuji tu rugadu jii toro.
1CO 7:31 Biagorore toe jiwuge ewiagorokawo toeji pugeje. Ire tawie aino. Mare paga karega. Awu tadu kejewu moto, awu tarduware jiwu baru akedumode rugadu kuri aino rugadu. Dukodire inagoino tai tawiagorowo tu tameartoruwo Pao Kurireuji tu rugadu.
1CO 7:32 Itaidure iwo tameardae mekido tawiagorore jiboe piji tameartoruwo Pao Kurireuji tu rugadu. Uwirekareu imedu meardaere tu tumaragoduwo Pao Kurireu maragodaeji. Aidure tuwo Pagimijera jakaredo pudui.
1CO 7:33 Mare imedu uwiremode dukeje mororamagadumode toe bagai, tuge bagai tuwo toreduje jakaredo pudui. Mare aidure tumaragoduwo Pao Kurireu maragodaeji jamedu.
1CO 7:34 Dukodire aidure jiwu maragodaere pobe. Pudai Pao Kurireu ai jamedu. Ainore boere aredu okogereudoji jamedu. Aredu okogere dukeje biagorore tuwo toredu jakaredo jamedu. Mare okoge bokwareu aredu, okoge bokwareu nogwaredu ewiagorore tu Pagimijera Jesus maragodaeji. Etaidure tumaragoduwo tu Pao Kurireu ai rugadu turaga tabo tumeardae jamedu boe tabo rugadu.
1CO 7:35 Itaidure iwo boe pemegado tai. Dukodire inagoino. Itaidukare iwo taro akedudo. Mare itaidure tawo taro jetorodo. Itaidure taro pemegawo. Itaidure tamaragoduwo rugadu Pagimijera ai utugaregewo tagi rugadu.
1CO 7:36 Imedu aidure nogwareduji. Meardu kurire ji rugadu. Jorduware turo pegakare nou nogwaredu jituji. Aidure tumuguwo apo rugadu. Mare meardaere turo pegarumode Pao Kurireu jakai tumugumode apo duji. Mare etaidure pui. Iwo tawie. Emuguwo puapo rugadu. Emugumode puapo du pegakare Pao Kurireu jakai rugadu.
1CO 7:37 Mare ia imedu meardaere tuwirekawo rugadu. Emare jorduware tuwo turo jetorodo. Ure tumeardae tawuje rugadu. Nono pegakare uwirekawo rugadu.
1CO 7:38 Imedu uwiremode du pegakare. Mare ia imedu uwiremodukare du pemegare rugadu.
1CO 7:39 Aredu meartorumode toreduji jii toro toredu bire du ka. Mugukawo ia imedu apo pugeje. Mare oredu bire dukeje aredu meardaere tumuguwo ia imedu apo pugeje. Du pegakare. Mare nou aredu muguwo tu meartorure Jesus jiwu imedu apo tu rugadu.
1CO 7:40 Mare nou aredu okogemodukare pugeje dukeje jakaregodumode rugadu. Ainore imeardaere rugadu. Pao Kurireu Uwari rakojere itada dukodire iorduware nou Pao Kurireu Uwari umode imeardae udo nono tumeardae mogadure rugadu.
1CO 8:1 Tanarare i nuba taromoduie makudure santo doge etaiwu bope doge ekeji. Ča boe egore: – Paiamedu boe parduware boeji. Ainore boe egore. Boe jokodu jire boe egoino. Mare boe meardaemode tuiorduwaie rugadu dukeje boe enojaromode tuwadaruji rugadu. Mare boe emeardu kurimode boei dukeje emago pemegamode nou boe erore jiboeji tuwo nou tumedage emeartoru rakado Jesusji rugadu.
1CO 8:2 Boe emeardaemode tuiorduwaie boeji rugadu dukeje emodukare turagado tuiorduwawo iaboeji pugeje. Dukodire nou boe erduwa pemegamodukare iaboeji pugeje.
1CO 8:3 Mare boe emeardu kuriwo Pao Kurireuji. Pao Kurireu jorduware meardu kurire puduiwugei rugadu.
1CO 8:4 Mare Pao Kurireu ure mitotu je. Ia bokware. Mare boe emeardaere tuwai tadawu santo doge eragaie nono Pao Kurireu mogadure. Mare pagatu jere boe eroino. Pao Kurireu karegure emage. Boe ere towujeboe nure emage tu rugadu. Mare boe emeardaere boe rakareuge emagaie baru tada, moto keje jamedu. Dukodire ere to santo doge emagado. Ere etowuje tuwo pao kurireugedo emage. Emeartorure nou ture towujewu santo dogei rugadu dukodire emode ia tuge maku nou tuwai tadawu santo doge etai mare pagatu je. Mare Pao Kurireu ure mitotu je rugadu. Boe Etuo Kurireu nure ema. Emare ure boe jamedu boe towuje. Emare ure baru tadaboe eiamedu boe etowuje. Dukodire pameartoruwo tu Pao Kurireu bataruji tu rugadu. Pagimijera Kurireu ure mitotu je. Jesus Cristo nure ema. Pao Kurireu ure Jesus udo boe jamedu boe towuje moto keje, baru tada jamedu. Ema koiare ure paragojedo aino.
1CO 8:7 Mare ia boe erduwakare nou inoduji. Marigudu emeartorure tuwai tadawu santo dogei rugadu. Dukodire ere ia tuge maku nou santo doge etai bope doge ekeče tu tu je. Mare aino emeartorure Jesusji. Mare erduwakare Jesus meardae jamedu boeji dukodire emeartoru rakakare ji. Dukodire nou boe emodukare nou makudure bope doge etaiwu boe eke ko. Etaidukare ji. Emeardaere bope uwari uke nuie ema duji. Enogwagemode ji dukeje emeardaere turo pega nure.
1CO 8:8 Mare pagare egoino. Pagwagere jiwu page umodukare pado pagera ra Pao Kurireu piji. Pagwagere jiwu page umodukare pamugu pemegado Pao Kurireu apo jamedu. Dukodire inagoino tai. Pagwagemode makudure bope doge etaiwu boe ekeji du pegakare. Pao Kurireu jordu pegamodukare parore aino duji.
1CO 8:9 Mare taeku jado tarore jiboeji. Tameardu kurido tamedagei. Tagaba emeartoru bokwado. Ia tagi tagwagemode bope uwari ukeji du pegakare tawo ko. Mare ia meartorure Jesus jiwuge erdumode tarore aino duji erdu pegamode tarore jiboeji dukeje tagaba ko. Mare paga karega emeartoru rakakare Jesusji dukodire erdu pegare tamode ko duji. Dukodire emode tugera ra Jesus piji.
1CO 8:10 Mare paga karega. Tagwagemode bope uwari ukeji nou bope uwari uwai ja tada. Nono nou meartoru rakakare Jesus jiwu jordumode tarore aino duji. Dukeje umode kowuje jamedu. Nono meardae pegamode turore jiboeji.
1CO 8:11 Ture ko dukeje meardae pegamode ture tugera ra Jesus piji duji. Mare boe rugadu ji karega meardaere. Jesus bire boe ero pegareu moriče. Boe enogwagemode nou bope uwari ukeji mare ero pega karegure. Tarduware nou inoduji. Mare nou tamedia jorduwakare. Dukodire meardae pegare ture ko duji.
1CO 8:12 Dukodire inagoino tai. Tagaba nou bope uke kowuje nou tamedia ukawo ko taro kao. Tamode ko dukeje taro peganure nou meartoru rakakare Jesus jiwu jakai. Tamode nou tamedia ro pagado taidukare jiboeji. Dukodire taro pegamode Jesus Cristoji jamedu taroino dutabo.
1CO 8:13 Inogwagemode bope uwari ukeji. Mare awu iro koiare umode ia meartorure Jesus jiwu ro pegado dukeje inogwagemodukare nou bope uwari ukeji pugeje. Imeardu kurire ji dukodi. Imodukare ia meartorure Jesus jiwu ro pegado rugadu.
1CO 9:1 Iordure Pagimijera Jesusji rugadu. Ure ikinorudo iro pegareu boe piji rugadu. Makore i ituwo tuwadaru tabo boe ewagai rugadu. Dukodire ire tawie nou Jesus makore jiboeji rore jiboeji jamedu. Dukodire tameartorure ji rugadu.
1CO 9:2 Iage emeartorukare i. Egore imagokaie Jesus o bakaru remawuji. Mare tarduware. Tameartorure Jesusji dukodire tamugu pemegare Pagimijera Jesus apo rugadu. Dukodire boe erduware Jesus o bakaru remawu jire inagoino rugadu. Ia uture Jesus bataru tabowu nure imi jamedu.
1CO 9:3 Boe emago pegamode iroji dukeje imagomode ewadaru jipagi.
1CO 9:4 Iwo boe ewie Jesus o bakaruji imaragodaere tu nou rugadu. Dukodire ure turugadu rugadu boe eke rogu makuduwo inai imaragodae moriče, iworo kuru makuduwo inai imaragodae moriče.
1CO 9:5 Itaidumode imuguwo meartorure Jesus jiwu aredu apo utuwo itabo jamedu du pegakare. Ainore Pedro rore rugadu. Ainore Pagimijera Jesus uwiemage erore jamedu. Ainore ia uture Jesus bataru tabowuge erore jamedu.
1CO 9:6 Ure turugadu čedaidure jiboe jamedu boe makuduwo čenai čemaragodae moriče. Mare toro ia boebo imi imedia Barnabé čere ewie Pao Kurireu bataruji mare ekare tuge maku čenai, tugudure čeboe maku čenai jamedu. Mare čenogwamagudu karegure ei. Dukodire čemaragodure ia čemaragodaeji diero bagai čewo akirodo čege roguji, čegudure čeboeji jamedu.
1CO 9:7 Mare iwo tawie. Boe eke makudumode tugobaigarege etai. Emodukare akirodo ji. Maragodure boepa jiwu umode ture tuguboe kowuje. Umodukare akirodo ji. Jeture tapira doge eiwuge ekudumode emoguru kuruče rugadu. Emodukare akirodo ji.
1CO 9:8 Dukodire inagoino tai ure turugadu boe eke makuduwo inai jamedu imaragodae moriče. Mare iwo tawie. Pao Kurireu ure maku Judeu doge etaiwu bakaru akore nono nou imagore jiboe mogadure jamedu.
1CO 9:9 Moisés ure nou bakaru bu bapera keje. Akore: – Boe emode tapira merudo trigo aoji uwo nou trigo a rawuje nou čenari piji dukeje tagaba nou tapira okwa miwuje okwagewo tumaragodutabo jamedu. Ure tuwuredo nou trigo keje tagai kodi. Tapira jire Pao Kurireu akoino.
1CO 9:10 Mare čeire akoino jamedu. Maragodure boepa jiwu maragodumode to boepaji tuge bagai. Nou boepa tadaboe makudumode nou maragodure nou boepa jiwu ai. Nou boepa tadaboe makudumode nou ure kadowu ai jamedu. Boepa ji karega čemaragodure. Jesus o bakaru jire čemaragodure čewo boe ewie ji rugadu. Dukodire čemaragodure jiboe moridoduwo čenai jamedu. Dujire akoino.
1CO 9:11 Čere tawie Jesus jiboeji. Dukodire pemegare rugadu tawo ia tagoe maku čenai čemaragodae moriče.
1CO 9:12 Tare ia tagoe maku ia boe etai. Čemaragodae pemegare nou iage emaragodae kori dukodire pemegare rugadu tawo ia tagoe maku čenai jamedu. Mare čegi čenogwamagudukare tai iaboe bagai. Čere čeragado čei. Čedaidukare čewo boe pegado tai. Tameartoruwo tu nou Jesus jiwu bakaru remawuji kodire čere čeragado čei rugadu.
1CO 9:13 Maragodure Pao Kurireu uwai tadawuge emode tugeragu tugeji nono Pao Kurireu uwai tada rugadu. Tarduware nou inoduji. Nou ure boe enomea maku Pao Kurireu aiwuge emode tugeragu ia nou makudure Pao Kurireu aiwu tapira koduji tugeče. Tarduware nou inoduji.
1CO 9:14 Dukodire Pao Kurireu ure pawie jamedu boe ewo iaboe maku makore Jesus jiwu bataru pemegareu jiwuge etai. Emagomode Jesus jiwu bataru pemegareuji. Emaragodae reno. Dukodire iaboe makuduwo etai emaragodae moriče.
1CO 9:15 Imire imagokare iaboe bagai. Ire awu atugoreboe pemegado mare tawo iaboe maku inai dubagai karega. Imagomodukare iaboe bagai rugadu. Inojaromodukare iwadaruji. Imagomode Jesus jiboeji tu je boe emeartoruwo tu ji rugadu. Jesus emare makore i ituwo tuwadaru pemegareu tabo boe ewagai. Dukodire iture tabo rugadu. Imagomodukare Jesus jiwu bataru pemegareuji boe ewiagai dukeje boe pegamode i rugadu! Dukodire imagore Jesus jiwu bataru pemegareuji tu rugadu. Iwadaru jire inojaromodukare. Dukodire inogwamagudumodukare iaboe bagai imaragodae moriče. Iwimode mare inogwamagudumodukare iaboe bagai imaragodae moriče rugadu.
1CO 9:17 Mare imeardae koiamode umode imaragodudo dukeje umode turugadu itaiduwo boe ewo imaragodae morido. Mare imeardae ji karega iroino. Pao Kurireu emare ure imaragodae maku inai iwo boe ewie Jesus o bakaru remawuji.
1CO 9:18 Dukodire iagarere nou imaragodaeji. Ire imaragodae morido inai iagare tabo. Meartorure Jesus jiwuge emode iaboe maku inai ire ewie Jesus jiwu bataru pemegareu jitu moriče du pegakare. Mare inogwamagudumodukare iaboe bagai. Imodukare boe edo iaboe maku inai imaragodae moriče. Dujire iagarere i rugadu. Dukodi imaragodae mori reno.
1CO 9:19 Boe etugare karegure imi. Imaragodukare ia boe etai. Mare itaidure boe eiamedu boe emeartoruwo Jesusji rugadu. Dukodire ire boe etugaredo imi.
1CO 9:20 Imeartorukare Judeu doge eno bakaruji. Mare Judeu doge emeartorure to bakaruji rugadu. Dukodire iragojere Judeu dogebo dukeje irore nono Judeu doge ero mogadure iwo Judeu doge emeartorudo Jesusji.
1CO 9:21 Boe tuginaiwuge emeartorukare Judeu doge eno bakaruji. Emeartorure turo tuginaiwuji rugadu. Dukodire iragojere boe tuginaiwugebo dukeje irore nono nou boe tuginaiwuge ero mogadure iwo emeartorudo Jesusji jamedu. Mare ikare ikera ra Pao Kurireu bataru piji. Imeartorure Jesus Cristo bataruji rugadu.
1CO 9:22 Meartoru rakakare Jesus jiwuge epagudu pagamode ia iaboeče. Emeartorumode Jesusji rugadu dukeje epagudumodukare. Mare emeartoru rakakare Jesusji dukodire epagudu pagare ia iaboeče. Iragojemode nou meartoru rakakare Jesus jiwugebo dukeje iromodukare nou epagudure čeboeče jamedu nono ero mogadure. Mare paga karega iroino. Itaidure iwo emeartorudo rugadu Jesusji dukodire imodukare epagudu pagado. Itaidure boe emeartoruwo Jesusji rugadu. Dukodire ire iragado i iro pemegawo boe eiamedu boe egai erdu pegakawo imagore jiwu Pao Kurireu bataruji iage emeartoruwo Jesusji uwo ekinorudo ewarigudukawo bope doge eda kejewu joru pegareuto.
1CO 9:23 Ainore irore iwo iragado i iwo boe ewie Jesus jiwu bataru pemegareuji boe emeartoruwo Jesusji rugadu. Emeartorumode ji dukeje boe pemegamode ei. Nono boe pemegamode i jamedu. Iagaremode i rugadu.
1CO 9:24 Boe eregodumode puapo dukeje nou aregodure boetojiwu umode mitotu je. Tameartorudo Jesusji rugadu taraga tabo rugadu. Taromode aino dukeje Jesus umode boe pemegareboe maku tagai nono boe emode boe pemegareboe maku nou aregodure boetojiwu ai dumogadure. Mare boe eregodu ji karega inagoino. Boe emeartoruwo Jesus jire inagoino. Boe emeartoru remawumode Jesusji dukeje umode boe pemegareboe maku etai.
1CO 9:25 Boe etaidumode tuwaduwo dukeje ewadae rakamode ei rugadu. Dukodire emode turagado nou tuwadaeji. Emugu paga karegure. Etaidumode taregoduwo boetoji rugadu. Mare paga karega ia mori bagaire eroino. Mare nou makudure etai mori akedumode kuri je. Mare pamaragodure Jesus ai uwo boe pemegareboe maku pagai. Nou umode maku pagaiboe akedumodukare rugadu.
1CO 9:26 Dukodire ikare itawuje imaragodae piji. Ire iro jetorodo rugadu. Ire nono ure tugera to puiwuge brae ero mogadure. Nou ure tugera to puiwu umode turokogado turagawo rugadu.
1CO 9:27 Ire iragado i jamedu nono nou ure tugera to puiwuge ero mogadure. Mare ire rakawo ji karega inagoino. Iwo ikera to imedu jitu ji karega inagoino. Ire boe pegado i iwo iragado iwo iro jetorodo Pao Kurireu jakai. Dujire inagoino. Ire iragado i iwo ikera ra iro pegareu boe piji. Pao Kurireu jordu pegakawo i. Dujire inagoino. Imagore boe ewagai emeartoruwo Jesusji. Dukodire imire imeartorumode ji rugadu. Nono Pao Kurireu jordu pegamodukare i. Nono toro ia meri keje umode boe pemegareboe maku inai toro baru tada imaragodae moriče rugadu.
1CO 10:1 Imedage nure tagi. Tawiabutudo mariguduwuge pawobe ewugeje. Ere nono boe etao pegododureuge emogadure. Mare etao pegododu ji karega inagoino. Marigudu Pao Kurireu ure boetugu bu egajeje tuwo edo činorudo ro pegareuge Egito doge epiji. Dujire inagoino. Nou mariguduwuge pawobe epagudure mare emeartorure Moisesji. Dukodire emerure nou boetugu kuda Moisés apo nou ro pegareuge Egito doge epiji. Dujire inagoino. Pao Kurireu ure boe kireu bu tači Pobo Maereu Kujagureu oia kajeje nou mariguduwuge pawobe ekoduwo ji jii toro bakowu ka boe kireu ka. Moisés makore ei ekoduwo toro bakowu ka rugadu. Dukodire ekodure Moisés apo toro bakowu ka rugadu boe kireu ka rugadu. Dujire inagoino jamedu. Pao Kurireu ure boetugu bu nou mariguduwuge egajeje. Pao Kurireu ure edo tie bu nou pobo maereu kajeje. Nou mariguduwuge ekodure Moisés apo rugadu nou boetugu kuda. Ekodure Moisés apo nou pobo maereu kujagureu kajeje tači boe kireu ka rugadu jamedu. Dukodire boe erduware meartorure Moisés jiwuge enure emage duji. Dujire inagoino.
1CO 10:3 Nou mariguduwuge pawobe eiamedu boe enogwagere Pao Kurireu ure maku pudaiwu amireuji.
1CO 10:4 Eiamedu boe ekudure Pao Kurireu ure maku pudaiwu poboče jamedu. Nou pobo ure tudawuje Pao Kurireu o tori piji. Jesus Cristo koiare ure nou pobo udo tudawuje nou tori piji tuwo maku nou mariguduwuge pawobe etai.
1CO 10:5 Mare du inodu tabo nou mariguduwuge pawobe ere tugera ra tumeartorure Pao Kurireu jitu piji rugadu. Dukodire Pao Kurireu aidukare nou boe erore jiboeji. Dukodire ewire toro boe maereu keje.
1CO 10:6 Dukodire pawo paeku rakado nou mariguduwuge Israel doge erore jiboeji parokawo nono ero mogadure. Emage ere tumeardae tawuje turo pegawo tu tu je. Mare aino čare pawo pameardae pemegado parokawo nono ero mogadure.
1CO 10:7 Emagere emago pemegare tuwai tadawu tuwari santoji. Etaidure tumeartoruwo ji nono tumeartoru moga Pao Kurireu jitu mogadure. Padure bapera kejewu Pao Kurireu bataru makore nou mariguduwu Israel doge erore jiboeji rugadu. Akore: – Nou boe ere tuwadae tawuje tumago pemegawo nou boe ewai tadawu tuwari santo dogei dukeje ere tumugudo togwagewo tuguduwo jamedu. Nono ekudu raire. Ewadae pega remawure rugadu. Ewadu raire tumeardae pegareu jamedu boeji. Aino čare parokawo nono ero mogadure. Pawo pameardae pemegado pameartorukawo boe ewai tadawu ewari santo dogei parokawo nono ero mogadure.
1CO 10:8 Nou mariguduwuge Israel doge eribarire tuwire epiji dukodire etagedure rugadu. Mare eiamedu karega. Mare nou meri mitoduji bireuge enodo padure vinte e três mil. Aino čare parokawo nono ero mogadure. Paeribarikawo pawire epiji, pagoge epiji.
1CO 10:9 Ia emage ere turokogado Pao Kurireuji. Nou inodu kodi awage ere ewido. Ča parokawo nono ero mogadure. Pagawo parokogado Pao Kurireuji.
1CO 10:10 Ia emage emago pegare Pao Kurireuji pu biagai. Nou inodu kodi Pao Kurireu ure tudugare baru tadawu utudo etae. Nou utugare baru tadawu iere Umode Boe Ewidowu aino. Ema koiare ure etagedudo. Ča pamago pegakawo Pao Kurireuji pui rugadu.
1CO 10:11 Ainore Pao Kurireu rore nou mariguduwu Israel dogei tuwo boe eiamedu boe erduwado tumeardaeji. Nou Pao Kurireu rore jiboe padure bapera keje tuwo pawie paioku jawo. Dukodire čare pagaiwowo nou baperaji parduwawo Pao Kurireu meardaeji rugadu boe puredugodure awu moto akeduwo dukodi. Dukodire pawo pameardae pemegado nono Pao Kurireu aidumogadure.
1CO 10:12 Ia tagi tagagore tameartoru rakaie Pao Kurireuji. Mare taeku jado tagawo tagera ra tameartorure Pao Kurireu jitu piji.
1CO 10:13 Boe etaidumode tuwo tagaora korau nono turomoga ia tumedagei dumogadure. Bope aidumode tuwo tagaora pegado nono turomoga ia tamedagei dumogadure. Mare Pao Kurireu akore tumoduie turaga maku meartorure puduiwuge etai. Pao Kurireu kodumode tuwadaruji tu rugadu. Umode turaga maku tagai rugadu tawudukawo nou etaora pegareu rekodaji rugadu. Dukodire Pao Kurireu umode tarduwado nuba taromode tawo tadawuje nou boe emeardae pegareu piji.
1CO 10:14 Dukodire inagoino tai. Imeardu kurire jiwu imedage nure tagi. Tameartorukaba boe ewai tadawu tuwari santo dogei.
1CO 10:15 Tarduware kodi. Tagaiwodo iwadaruji. Iwadaru pegareu bokware.
1CO 10:16 Pamode bato pui dukeje pagudumode uva kuruče pawiabutuwo Pagimijera Jesus rore jiboe keje. Pagimadumode Pao Kurireu apo nou uva kuru paru tabo. Pamode pedo pui paguduwo če nono pawiabutumode Jesus ku keje. Pagatu je karega. Pawiabutuwo ku keje dukodire parore aino. Pagwagemode amireuji pawiabutuwo boe pegare Pagimijera Jesus jitu keje jamedu. Pamode nou amireu pedo pui pawo ko nono pawiabutumode Jesus kodu keje. Pagatu je karega. Pawiabutuwo boe pegare jitu keje dukodire parore aino.
1CO 10:17 Nou pagwagemode jiwu amireu ure mitotu je. Pagi jamedu pare mitotu je nono nou amireu ure mitotu je dumogadure. Mare amireu ji karega inagoino. Pare nono pawobere pugi dumogadure. Dujire inagoino. Pamagare mare paiamedu boe pagwagemode nou amireu mitoduji. Mare paiamedu boe pameartorure Jesusji dukodire paroino. Emare ure pawobedo pugi.
1CO 10:18 Tawiabutudo nou Israel doge ero keje. Ere boe egu barogo rogu kowu Pao Kurireu uwai tada turo pegareu moriče. Turore aino dukeje ere nou barogo rogu kodu kowuje jamedu. Nou okwagere nou boe egu barogo kodu jiwuge eiamedu boe ere bato pui tuwo nou boe egu barogo rogu kowu tuwo maku Pao Kurireu ai turo pegareu boe moriče.
1CO 10:19 Mare ia boe eromode aino tuwai tadawu santo doge etai jamedu. Boe emode boe egu barogo rogu kodu maku nou tuwai tadawu santo doge etai mare pagare eroino. Boe ere tuwai tadawu santo towuje tuwo udo nono Pao Kurireu mogadure. Mare pagare eroino.
1CO 10:20 Bope doge etaire boe eroino. Dukodire emode boe egu barogo rogu kodu bu ture towu ira rogu keje nou tuwai tadawu santo doge egorai tumago pemegawo Pao Kurireuji. Mare pagare eroino pagare egoino. Pao Kurireu ai karega eroino. Bope doge etaire eroino. Ča iwo tawie. Tarokaba aino. Tagaba tagera maku bope doge etai.
1CO 10:21 Tagaba taremo nou bope doge erore jiboeto. Tamode taremo erore jiboeto dukeje tameartorumodukare Pagimijera Jesusji pugeje. Dukeje tagudumodukare nou uva kuruče, tagwagemodukare nou amireuji pugeje.
1CO 10:22 Mare meartorure Jesus jiwuge nure tagi. Tamode taremo nou bope doge eroiato dukeje tamode Jesus korigo tai. Tameardaekaba taragaie nono Pagimijera Jesus raka mogadure.
1CO 10:23 Ia tagi tagagore: – Paromode pagaidure jiwu parore jiboe jamedu boeji. Boe jokodu jire tagagoino. Mare ia tarore jiboe umode boe pegado ia tai. Tagagore: – Pao Kurireu akore parowo pagaidure jiwu parore jiboe jamedu boeji. Boe jokodu jire tagagoino. Mare ia tarore jiboe umodukare boe pemegado ia tai.
1CO 10:24 Tagaidukaba boe pemegawo tu tai mare tameardaedo boe pemegawo tamedagei jamedu.
1CO 10:25 Ure turugadu tai tawo akirodo boe koduji nou umode boe kodu moridowu bai keje tawo ko. Tanarakaba nou jeture bai kejewugei kaiba pijiba nou boe kodu aregodure. Tabagudukaba nou jeture nou bai tadawu boe koduče. Pegakare rugadu.
1CO 10:26 Mare paga karega. Padure bapera kejewu Pao Kurireu bataru akore: – Moto jamedu boe Pao Kurireu o nure ema. Moto kejeboe jamedu boe Pao Kurireu o nure ema.
1CO 10:27 Meartorukare Jesus jiwu makomode tawagai tagwagewo pudabo dukeje tadudo uwai ka. Umode tuge maku tagai tagwagewo. Dukeje tagwagedo ji rugadu. Tanarakaba ji kaiba pijiba nou boe eke aregodure.
1CO 10:28 Mare ia boe umode tawie nou boe kodu rogu makuduie tuwai tadawu santo doge etai bope doge ekeče dukeje tagaba ko. Nou akoino taiwu meartoru rakakare Jesusji dukodi kana akore aino? Tarduwakare. Dukodire tagaba ko. Pegakare tawo ko jamedu. Mare tamode ko dukeje nou meartoru rakakare Jesus jiwu meardae pegamode tare ko duji. Dukodire inagoino tagawo ko. Mare paga karega. Tamodukare ko dukeje tamodukare meartoru akedudo Jesusji meardae pegakawo kodi. Mare ia tagi tagagore: – Kodiba iromodukare itaidure jiboeji? Kodiba ia meartoru rakakare Jesus jiwu umode iro jodo?
1CO 10:30 Ikimadure Pao Kurireu apo nou ike paru tabo dukodire ure turugadu iwo ko rugadu. Dukodire boe emago pegamodukare iroji. Ainore ia tagi tagagore.
1CO 10:31 Mare iwo tawie. Boe etaiwore tai tagudure čeboeji, tagwagere jiboeji. Erdumode rugadu. Dukodire tagaiwodo tarore jiboe jamedu boeji tawo taro udo nono Pao Kurireu meardae mogadure. Boe erduwo Pao Kurireu meardaeji pemegare rugadu duji.
1CO 10:32 Taro jetorodo boe erdu pegakawo tarore jiboeji. Judeu doge, boe tuginaiwuge, meartorure Jesus jiwuge eiamedu boe erdu pegakawo tarore jiboeji.
1CO 10:33 Tarodo nono iro mogadure. Itaidure iro pemegawo boe eiamedu boei. Imeardaekare tu i. Imeardaere boe pemegawo boe eiamedu boei nou boe emeartoruwo Jesusji uwo ekinorudo rugadu.
1CO 11:1 Irore nono Jesus Cristo ro mogadure. Dukodi tarodo nono iro mogadure.
1CO 11:2 Tawiagodukare ipiji. Tameartorure ire tarduwado jiboeji. Ure turugadu iagai rugadu.
1CO 11:3 Mare itaidure iwo tarduwado iaboeji pugeje. Aredu ukimijerare toreduče. Imedu ukimijerare Jesusče. Jesus ukimijerare Pao Kurireuče.
1CO 11:4 Nono boe emode bato pui tumago pemegawo Pao Kurireuji. Nono imedu makomode baruto Pao Kurireu bagai nou boe egai dukeje umode tatadawu tawuje taora piji. Makomode Pao Kurireu bataruji nou boe ewiagai dukeje umode tatadawu tawuje taora piji. Umodukare tatadawu tawuje taora piji dukeje umode Jesus Cristo pogurudo.
1CO 11:5 Mare aredu makomode baruto nou boe egai dukeje umode iaboe upodo taora tabo. Makomode Pao Kurireu bataruji nou boe ewiagai dukeje umode iaboe upodo taora tabo. Umodukare iaboe upodo taora tabo dukeje umode toredu pogurudo nono ia aredu ro pegareudo ro mogadure. Marigudu boe ere aredu ro pegareudo udo tao kado boe erduwawo ji ro pegareudo nure ema duji. Aredu umodukare iaboe upodo taora tabo tumagowo Pao Kurireu bataruji boe ewiagai dukeje ure tudo nono aredu ao kadodureudo mogadure.
1CO 11:6 Dukodire boe emode bato pui tumago pemegawo Pao Kurireuji dukeje areme ewo iaboe upodo taora tabo. Aredu umodukare iaboe upodo taora tabo dukeje uwo tao rugadu boe kado rugadu. Aredu umode tao rugadu boe kado dukeje čare pogurumode. Dukodire uwo iaboe upodo taora tabo tubogurukawo.
1CO 11:7 Mare imedu umodukare iaboe upodo taora tabo. Emare umode boe erdudo Pao Kurireu ro pemegareuji. Mare aredu umode boe erdudo toredu ro pemegareuji jamedu.
1CO 11:8 Pao Kurireu ukare iaboe tawuje aredu piji tuwo imedu boetojiwu towuje. Ure imedu boetojiwu jura tawuje piji tuwo aredu boetojiwudo towuje.
1CO 11:9 Pao Kurireu ure imedu towuje boetoji. Dukeje čare ure aredu towuje imedu boetojiwu metiawo ema.
1CO 11:10 Dukodire areme emode iaboe upodo taora tabo boe erduwo tumeartorure toredu jituji. Mare Pao Kurireu utugarege baru tadawuge erdumode boei dukodire areme emode iaboe upodo taora tabo nou baru tadawuge erduwo tumeartorure toredu jituji jamedu.
1CO 11:11 Pameartorure Pagimijera Jesusji. Dukodire aredu umodukare tumeardae udo tuginai toredu meardae piji. Nono imedu umodukare tumeardae udo tuginai toreduje meardae piji jamedu.
1CO 11:12 Pao Kurireu ure imedu boetojiwu jura tawuje piji tuwo aredu boetojiwudo towuje. Mare ime eiamedu ewodure tuje areme epiji jamedu. Dukodire emeardae umodukare tuginai pubiji. Nono Pao Kurireu koiare ure boe jamedu boe towuje rugadu.
1CO 11:13 Itaidure tawo tameardae tawuje rugadu. Boe emode bato pui tumago pemegawo Pao Kurireuji. Mare ukana turugadu aredu makowo baruto nou taora kedo tabo?
1CO 11:14 Boro. Ukare turugadu. Boe etaiwore Pao Kurireu ure towu boeji tuwo turore jiboe towuje. Paroia koiare imedu ao raimode dukeje nou imedu pogurumode nou tao raire duji.
1CO 11:15 Mare aredu ao raimode dukeje nou aredu motumode. Pao Kurireu ure aredu aodo atadawu ema. Mare atadawu ji karega inagoino. Nou aredu ao jire inagoino.
1CO 11:16 Ia tagi tagaidumodukare awu iwadaruji. Mare meartorure Jesus jiwuge eiamedu boe erore aino. Ainore čerore jamedu. Meartorure Jesus jiwuge emode bato pui tumago pemegawo Jesusji dukeje ainore erore rugadu.
1CO 11:17 Mare imago pemegamodukare ia tarore jiboeji. Tare bato pui tamago pemegawo Pao Kurireuji. Mare tare boe pegado tai.
1CO 11:18 Boe ere iwie tarore jiboeji. Egore tabokaie puapo. Ia tagi tameardae uie tuginai nouia tamedage epiji. Ainore boe egore. Itaidukare imeartoruwo nou ere iwie jiboeji. Mare imeartorure.
1CO 11:19 Meardae pemegareuge emode tumeardae udo tuginai meardae pegareuge epiji rugadu. Dukodire boe etaiwomode tameardaeji dukeje erduwamode. Ia tagi tameardae pemegare. Boe etaiwomode dukeje erduwamode nou inoduji.
1CO 11:20 Tare bato pui dukeje tameardaere tawo Pagimijera Jesus uke amireu ko taguduwo nou uva kuruče jamedu. Mare tagare Pagimijera Jesus uke amireu ko tagudukare nou uva kuruče jamedu.
1CO 11:21 Tare bato pui dukeje taiamedu boe tagaregodure tage tabo. Nono tare tage kowuje nono rugadu. Tabagakare pu bagai tagwagewo puapo. Dukodire iage eke bokware. Kočare iage eke kurure ei jamedu.
1CO 11:22 Kočare tage boeimode tai dukeje tagwagedo tu toro tawai keje rugadu. Mare tadure tage tabo boe ere bato puiwu bai ka tagwagewo boe egai mare tagare boe ekuna. Tare uke bokwareuge epogurudo. Du taro peganure meartorure Pao Kurireu jiwuge eiamedu boei. Dukodire čare imago peganure awu tarore jiboeji. Tagaidure imago pemegawo tarore jiboeji. Mare itaidukare ji. Ukare turugadu.
1CO 11:23 Pagimijera Jesus ure iorduwado rugadu. Ainore paromode pawo Pagimijera Jesus uke kowuje. Imedu ure Jesus maku boe eimijerage pegareuge etai. Nou boečoji Pagimijera Jesus ure tumugudo ture jorduwadowugebo tuge keje. Ure tugeragu amireuji.
1CO 11:24 Imadure Pao Kurireu bagai nou tuge amireu paru tabo. Dukejere ure nou amireu kado puiato. Nono akore: – Awu amireu ikodu reo. Ire imagu boe ero pegareu moriče. Dujire inagoino. Tagwagedo ji tawiabutuwo iwugeje.
1CO 11:25 Enogwagere dukeje Jesus ure tugeragu vinho kuruji jamedu. Akore: – Ikure nou uva kuru rema. Pao Kurireu meardae maiwu koiare imode iku redo boe ero pegareu moriče. Tagududo awu uva kuruče tawiabutuwo iwugeje, irore jiboe keje jamedu.
1CO 11:26 Tagwagemode awu Pagimijera uke amireuji. Tagudumode awu Pagimijera uke uva kuruče. Tarore aino dukeje tamode boe erduwado Pagimijera bire boe ero pegareu moriče duji boe ewiabutuwo nou bire dukeje. Tarodo aino tu tu je jii toro Pagimijera aregodu ka.
1CO 11:27 Mare tagaiwodo tarore jiboeji tameardaere jiboeji ia taro pegareu bagai, ia tameardae pegareu bagai. Ia tameardae pegareu metumode tagabo dukeje tagaba awu Pagimijera uke kowuje. Ia tameardae pegareu metumode tagabo mare tamode ko dukeje taro peganure Pagimijera koduji, taro peganure Pagimijera kuji. Ia taro pegareu metumode tagabo kimo mare tamode Pagimijera uke kowuje dukeje tamode nono nou ure Pagimijera bitowuge emogadure.
1CO 11:29 Tagudumode awu Pagimijera uke uva kuruče, tagwagemode awu Pagimijera uke amireuji. Mare tawiagodumode Pagimijera Jesus bire paro pegareu moriče dupiji dukeje boe pegamode tai rugadu.
1CO 11:30 Kočare ainore tarore rugadu. Dukodire kogodureuge tamagare. Rakakareuge tamagare jamedu. Ia tamedage ewire jamedu.
1CO 11:31 Mare pagaiwowo parore jiboeji boetoji paro pegareu bagai, pameardae pegareu bagai pawo pameardae tawuje parokawo aino pugeje pameardaekawo aino pugeje. Dukejere Pao Kurireu ro pegamodukare pai.
1CO 11:32 Pao Kurireu aiwomode paroji. Jordumode ia paro pegareuji dukeje umode boe pegado pai tuwo paro pemegado meartorukareuge epiji. Dukodire pawarigudumodukare toro joru pegareuto meartorukare Jesus jiwugebo.
1CO 11:33 Dukodire tamode bato pui tagwagewo Pagimijera ukeji dukeje tabagado pu bagai tagwagewo puapo. Imedage nure tagi.
1CO 11:34 Ia tagi tage boeire tai dukeje tagwagedo tawai keje boetoji. Nono tamode bato pui dukeje taro pegareu bokwamode. Nono Pao Kurireu umodukare boe pegado tai. Itaregodumode tagae dukeje imode tarduwado pugeje iwo ia taro jetorodo pugeje.
1CO 12:1 Tanarare i tarduwawo Pao Kurireu Uwari ure maku boe etaiwu turo pemegareu boeji boe emaragodae boeji jamedu. Imedage nure tagi. Nono imode tarduwado boe remawuji.
1CO 12:2 Marigudu tameartorukare Jesusji. Boe ere taekiripagado rugadu tameartoru pagawo boe ewai tadawu tuwari santo dogei. Nou boe ewai tadawu tuwari santo doge boe karegure emage dukodire emagokare iaboeji boe ewiagai. Pagatu jere tameartorure ei. Marigudu awu inodure aino. Mare aino tameartorure Jesusji rugadu.
1CO 12:3 Dukodire iwo tawie. Boe emago pegamode Jesusji mare Pao Kurireu Uwari koia karega ure egodo aino. Mare Pao Kurireu Uwari umode boe erduwado dukeje emode tugimijerado Jesusče. Mare Pao Kurireu Uwari umodukare boe erduwado dukeje emodukare tugimijerado ema rugadu.
1CO 12:4 Pao Kurireu Uwari ure mitotu je. Emare umode meartorure Jesus jiwuge edo turugadu tumaragodaeji. Mare ure maku boe etaiwu boe emaragodae umode tu tu tuginai pubiji.
1CO 12:5 Meartorure Jesus jiwuge eiamedu boe emaragodae ure tuginai pubiji. Mare tuwo tugera maku puaire eroino tuwo pu meartoru rakado Jesusji rugadu. Jesus jire eiamedu boe emeartorure tuwo nou tumaragodae towuje.
1CO 12:6 Boe erduwamodukare tuwo ia tumedage emaragodae towuje. Mare Pao Kurireu koiare umode boe eiamedu boe eroiwado tu tu ture maku etaiwu emaragodae jamedu boeji.
1CO 12:7 Pao Kurireu Uwari rakojere meartorure Jesus jiwuge eiamedu boebo dukodire umode eiamedu boe edo turugadu tumaragodaeji. Mare umode maku etaiwu emaragodae umode tuginai tu tu pubiji. Mare ewo boe pemegado puai du bagaire nou Pao Kurireu Uwari roino.
1CO 12:8 Pao Kurireu Uwari umode iage edo turugadu tuwo etaora pemegado enogituwawo boei. Ainore nouge emaragodaere tu tu je. Iagere Pao Kurireu Uwari umode edo turugadu tuwo boe erduwa kurido rugadu. Dukodire čare nouge emode tugera maku tumedage meartorure Jesus jiwuge etai nou tuiorduware jiboe tabo.
1CO 12:9 Pao Kurireu Uwari ure mitotu je rugadu. Mare ure ia meartorure Jesus jiwuge edo turugadu emeartoru rakawo rugadu. Dukodire nouge emode meartorure Jesus jiwuge emeartoru rakado Jesusji rugadu tu tu je. Pao Kurireu Uwari umode ia meartorure Jesus jiwuge edo turugadu ewo kogodureuge epemegago. Dukodire nouge emode boe epemegago rugadu tu tu je. Ainore emaragodaere.
1CO 12:10 Pao Kurireu Uwari umode ia meartorure Jesus jiwuge edo turugadu ero rakawo. Umode ia meartorure Jesus jiwuge edo turugadu emagowo Pao Kurireu bataruji boe ewiagai. Pao Kurireu Uwari umode ia meartorure Jesus jiwuge edo turugadu erduwawo tumaragodae remawuji. Erduwawo bopere ure ia boe emaragodae maku etai pagatu je jamedu. Pao Kurireu Uwari umode ia meartorure Jesus jiwuge edo turugadu emagowo boe tuginaiwuge ewadaruji tači je. Umode ia meartorure Jesus jiwuge edo turugadu emearduwo boe tuginaiwuge ewadaruji ewo boe erduwado nou ewadaruji rugadu.
1CO 12:11 Pao Kurireu Uwari ure mitotu je. Umode meartorure Jesus jiwuge eiamedu boe edo turugadu tumaragodaeji. Mare ure maku etaiwu boe emaragodae mode tu tu tuginai pubiji. Emare jorduware ture maku etaiwu emaragodaeji.
1CO 12:12 Boe ekanare pudogi. Boe epogorare pudogi. Boe etaorare jamedu dukodire boere turugadu. Okware jiboe bokware boewo ema. Birire. Kodure. Okware jiboe bokware. Meartorure Jesus Cristo jiwuge ere nono boe ekana boe epogora mogadure boe etaora mogadure jamedu. Mare boe ekana boe epogora boe etaora ji karega inagoino. Meartorure Jesus jiwuge emaragodae jire inagoino. Emaragodae mode tuginai pubiji. Mare ere nono tuwobe nure pugi dumogadure tumeartorure Jesus jitu tabo. Dujire inagoino jamedu.
1CO 12:13 Ia pagi Judeu doge nure pagi. Ia pagi boe tuginaiwuge nure pagi. Ia pagi boe etugarege nure pagi. Ia pagi pamaragodure pagai rugadu. Mare pameartorure Jesusji dukodire Pao Kurireu Uwari ure pameardae maiwu maku pagai tuwo pado nono pawobere pugi dumogadure. Nou Pao Kurireu Uwari ure mitotu je rugadu. Pao Kurireu ure nou Tuwari maku paiamedu boe etai.
1CO 12:14 Dukodire pare nono pawobere pugi dumogadure. Mare pamaragodae ure tu tu tuginai.
1CO 12:15 Boe ewure makomodukare. Mare makomode pogoraji taidukaie tumaragodaeji pugeje. Iera maragodae pemegaie mare iera kaiegure pudumi dukodire tudumoduie boe epogora piji. Dukeje pagare akoino. Boe ewure umodukare tudawuje boe epogora piji rugadu. Ia pagi pare nono nou boe ewure mogadure. Mare boe ewure ji karega inagoino. Nuba boemode boei dujire inagoino. Pao Kurireu Uwari umode pamaragodae maku pagai dukeje paipagamodukare ia pamaragodae bagai pugeje. Dujire inagoino. Nou ure maku pagaiwu pamaragodae koiare pamode boe pemegado meartorure Jesus jiwugei rugadu. Dujire inagoino.
1CO 12:16 Bija makomodukare. Mare makomode taidukaie tumaragodaeji pugeje. Joku maragodae pemegaie mare joku kaiegure pudumi dukodire tudumoduie aora piji. Dukeje pagare akoino. Bija umodukare tudawuje aora piji. Ia pagi pare nono nou bija mogadure. Mare bija ji karega inagoino. Nuba boemode boei dujire inagoino. Pao Kurireu Uwari umode pamaragodae maku pagai dukeje paipagamodukare ia pamaragodae bagai pugeje. Dujire inagoino. Nou ure maku pagaiwu pamaragodae koiare pamode boe pemegado meartorure Jesus jiwugei rugadu. Dujire inagoino.
1CO 12:17 Pawiri mode paeku rema dukeje pameardumodukare ia boe emagoji. Pawiri mode pawija rema dukeje pageno meardumodukare iaboe roji.
1CO 12:18 Meartorure Jesus jiwuge ere aino jamedu. Mare boe eku boe ewija ji karega inagoino. Emaragodae jire inagoino. Pao Kurireu ure meartorure Jesus jiwuge emaragodae maku etai. Du ure tumeardae tawuje ture maku etaiwu emaragodae jamedu boeji. Dujire inagoino.
1CO 12:19 Pao Kurireu umodukare emaragodae udo tu tu tuginai dukeje eroiwamodukare nouia tumaragodaeji. Mare ure meartorure puduiwuge emaragodae udo tu tu tuginai rugadu emaragodu pemegawo boe etai rugadu Pao Kurireu maragodae jamedu boeji. Dukodire awu roiwakare iaboeji mare metia roiware ji. Metia roiwakare iaboeji mare ia metia roiware ji. Dukodire meartorure Jesus jiwuge ere tugera maku tu tu puai tumaragodu pemegawo boe etai Pao Kurireu maragodae jamedu boeji.
1CO 12:21 Paeku makomodukare pageraji taidukaie ji. Pagaora makomodukare pawureji taidukaie ji.
1CO 12:22 Pagana pemegareure, pabogora pemegareure, paeku pemegareure rugadu. Mare pamago pegakawo pagana pegareuji, pabogora pegareuji, paeku pegareuji jamedu. Ere turugadu pado. Emodukare dukeje boe pegamode pai rugadu.
1CO 12:23 Pabogurure pai dukodire pare pagudau areia upodo pabewatabo. Pare nou pagudau areia upodo pabewatabo upowo nou pabogurure čeboe tabo.
1CO 12:24 Mare pagare pagudau areia upodo nou pabogurukare čeboe tabo. Mare Pao Kurireu meardae koiare pare aino. Aidure upowo nou pabogurure čeboe tabo.
1CO 12:25 Mare pabogurure čeboe ji karega inagoino. Pabogora pagana ji karega inagoino. Pawiri pagodu ji karega inagoino. Meartorure Jesus jiwuge eire inagoino etu pemegawo pui, emeardae pemegawo puapo. Dujire inagoino. Emeardae pegakawo pui. Dujire inagoino.
1CO 12:26 Pagaora korimode nono kori jore paiamedu boeto, paganato, pabogorato. Pagera korimode nono kori jore pamororato. Mare pagaora kori pagera kori ji karega inagoino. Meartorure Jesus jiwuge eire inagoino. Boe pegamode iaji dukeje paiamedu boe pagorimode apo jamedu. Boe emago pemegamode akaoji boe egomode akao motuie nono akao karega jakaremode pudui. Akire aegaremode ai. Tu akao mitodu ji karega boe egoino. Aire boe egoino. Mare akao ji karega inagoino. Meartorure Jesus jiwuge eire inagoino. Boe pemegamode ia pamediaji dukeje paiamedu boe paegaremode apo. Dujire inagoino.
1CO 12:27 Čare tameartorure Jesus Cristoji dukodire tare nono Jesus kana, pogora, bija, joku mogadure. Mare Jesus kana, pogora, bija, joku ji karega inagoino. Jesus ure maku tagaiboe tamaragodae jire inagoino. Ure nou tamaragodae udo tuginai pubiji. Dujire inagoino. Mare tagi tamugukare taginai. Tare nono Jesus uwobe emogadure. Dujire inagoino.
1CO 12:28 Pao Kurireu ure meartorure Jesus jiwuge eiamedu boe emaragodae maku etai tuwo edo turugadu turore jiboeji. Dukodire uture Jesus bataru tabowuge nure iage mare eiamedu boe karega. Makore Pao Kurireu bataru jiwuge nure iage mare eiamedu boe karega. Ure boe erduwadowuge nure iage mare eiamedu boe karega. Ro rakareuge nure iage mare eiamedu boe karega. Pao Kurireu ure iage erduwado ewo boe epemegago. Ure iage erduwado ewo tugera maku boe etai. Ure boe eimijerage pemegareugedo iage ewo boe eroiwado egarewo pudui. Ure iage erduwado emagowo boe tuginaiwuge ewadaruji. Ure iage erduwado ewo boe ewie nou makore boe tuginaiwuge ewadaru jiwuge emagore jiboeji. Ainore Pao Kurireu rore tuwo tuiordae pemegareu maku eiamedu boe etai tuwo tumaragodae maku eiamedu boe etai emaragodaeče.
1CO 12:31 Ainore rore tai jamedu. Dukodire tado turugadu taragawo rugadu tagaiduwo Pao Kurireu Uwariji uwo tumaragodae pemegareu maku tagai rugadu. Mare imode tawie meartorure Jesus jiwuge ero pemegareu remawuji.
1CO 13:1 Imagomode boe tuginaiwuge ewadaruji. Imagomode baru tadawuge ewadaruji. Mare imeardu kurimodukare boei dukeje pagare inagoino nou boe tuginaiwuge ewadaru tabo, nou baru tadawuge ewadaru tabo jamedu. Iwadaru pagamode nono boe emoga boeto meriri jitu mogadure pagatu je.
1CO 13:2 Pao Kurireu umode iorduwado imago pemegawo Pao Kurireu bataruji boe ewiagai. Iorduwamode rugadu boe jamedu boeji. Iorduwamode biadodureu boeji. Imeartoru rakamode Pao Kurireuji iwo tori kurireu tawuje tumuga piji. Mare imeardu kurire boei dutabo karega. Nono pagare irore nou iro rakareuji. Pagare inagoino nou Pao Kurireu bataruji. Boe kurireu karegure imi jamedu.
1CO 13:3 Imode inoe jamedu boe maku marenarue doge etai mare itaidu tabo karega imeardu kurire ei dutabo karega. Nono pagatu jere iroino. Boe pemegamodukare i irore inodu moriče. Iwiapagamodukare boei egore tumoduie iwarigu joruto imeartoruie Jesus jitu kodi mare imeardu kurire boei dutabo karega. Nono pagatu jere iroino i. Boe pemegamodukare i irore inodu moriče.
1CO 13:4 Pameardu kurimode boei dukeje pagorigodumodukare ei. Pagogudumode ebo. Pameardu kurimode boei dukeje paro pemegamode ei. Pameardu kurimode boei dukeje pagorigodumodukare nou boe enoe keje. Mare paegaregodumode ei. Pameardu kurimode boei dukeje pagojaromodukare pai pugeje pawadaruji. Pameardu kurimode boei dukeje pamagomodukare tu pameardaeji mare pawiapagamode nou pameardu kurire jiwuge emeardaeji jamedu.
1CO 13:5 Pameardu kurimode boei dukeje pawadaru pegareu modukare ei pamodukare epogurudo. Pameardu kurimode boei dukeje pagaidumodukare boe makuduwo tu pagai. Pagaidumode boe pedoduwo boe eiamedu boei. Pameardu kurimode boei dukeje pagorigodumodukare ei. Pameardu kurimode boei dukeje pawiabutumodukare ero pegareu boe keje.
1CO 13:6 Pameardu kurimode boei dukeje pagaidumodukare boe ero pegareuji mare paegaregodumode boe ero pemegareu boe keje.
1CO 13:7 Pameardu kurimode boei dukeje paetu pemegamode ei rugadu jii toro. Meardu kurire boeiwu meardae pemegamode boei jii toro rugadu. Meardu kurire boeiwu upagamode boe ero pemegareu bagai jii toro rugadu. Meardu kurire boeiwu umode tubemegado boei tu tu je tugawo tugera ra epiji jii toro rugadu.
1CO 13:8 Pao Kurireu meardu kurire boei rugadu. Du akedumodukare. Ainore boere jamedu. Boe emeardu kurire boei dujire boe etaidumode jii toro rugadu. Ia Pao Kurireu rore jiboe akedumode. Pao Kurireu Uwari ure boe edo turugadu ewo boe ewie Pao Kurireu bataruji mare jii toro karega. Emode boe ewie ji jii toro Pao Kurireu aidumode du oto pa ka. Nono emagomodukare pugeje. Pao Kurireu Uwari ure boe erduwado boe tuginaiwuge ewadaruji ewo nou boe ewie Pao Kurireu bataruji nou boe tuginaiwuge ewadaru tabo mare jii toro karega. Emagomode nou boe tuginaiwuge ewadaruji jii toro Pao Kurireu aidumode du oto pa ka. Pao Kurireu Uwari umode boe edo turugadu tuiorduwawo boeji rugadu jamedu mare jii toro karega. Ia meri keje nou boe erduware jiboe akedumode.
1CO 13:9 Pao Kurireu ure boe erduwado erduwawo boeji. Mare erduwamodukare boe jamedu boeji. Pao Kurireu ure ia boe erduwado ewo boe ewie tuwadaruji. Mare erduwamodukare Pao Kurireu bataru rugadu boeji.
1CO 13:10 Mare jorduwareu boe remawu aregodumode rugadu. Dukodire boe erduware jiboe akedumode. Boe emagore jiboe akedumode.
1CO 13:11 Imedurogure imi kimo dukeje imagore nono boe etore emago mogadure. Imeardaere nono boe etore emeardae mogadure. Imeardure nono boe etore emogadure. Mačare irijodure. Imedu nure imi. Dukodire ire boe etore erore jiboe barigu ipiji.
1CO 13:12 Boe etaiwomode pudui espelhoto dukeje erdumode mare erdu arudugodumode boeji. Pagaiwore Pao Kurireu rore jiboeji nono boe etaiwore espelhoto dumogadure. Mare espelho ji karega inagoino. Pardu arudugodure Pao Kurireu rore jiboeji. Dujire inagoino. Mare ia meri keje paragojemode Pao Kurireu apo rugadu dukejere pardu kičarumode ji rugadu. Iorduware Pao Kurireuji mare biagatu je. Mare ia meri keje iorduwamode ji rugadu. Iorduwamode ji nono jorduware i dumogadure.
1CO 13:13 Mare jii toro ia boe ero pemegare jiboe akedumodukare. Nou boe emeartorumode Jesusji jii toro rugadu. Dujire inagoino. Nou boe epagamode bagai aregoduwo pugeje jii toro rugadu. Dujire inagoino jamedu. Nou boe emeardu kurimode Pao Kurireuji jii toro, emeardu kurimode boei jamedu jii toro rugadu. Dujire inagoino jamedu. Mare boe emeardu kurimode du pemegare nou boe ero jamedu boe kori.
1CO 14:1 Tameardu kurido Pao Kurireuji. Tameardu kurido boei. Tagaidudo Pao Kurireu Uwari ure maku tagaiwu tamaragodaeji. Tageragu ji tagaidu tabo rugadu. Tagaidudo rugadu tamagowo Pao Kurireu bataruji.
1CO 14:2 Ia boe emagomode boe tuginaiwuge ewadaru tabo boe etoiadada dukeje boe erduwamodukare nou emagore jiboeji. Boe tuginaiwuge karegure emage dukodire erduwakare nou boe tuginaiwuge ewadaruji. Tu Pao Kurireu jorduwamode egoino jiboeji. Pao Kurireu Uwari koiare ure erduwado turaga tabo emagowo nou boe tuginaiwuge ewadaruji. Dukodire boe erduwakare nou biadodureu boe remawuji.
1CO 14:3 Mare boe emagomode Pao Kurireu bataruji boe ewiagai ewadaru tabo dukeje boe erduwamode emagore jiboeji, tuwadaru jire egoino duji. Dukodire nou Pao Kurireu bataru umode boe pemegado ei emeartoru kuriwo Pao Kurireuji rugadu. Nono ekiarigodu utumode epiji. Dukeje etaora butugugodumode pugeje. Nono eragamode.
1CO 14:4 Mare boe emagomode boe tuginaiwuge ewadaruji dukeje boe pemegamode tu ei. Nou boe tuginaiwuge eragojekare nono. Nou makore nou boe tuginaiwuge ewadaru jiwuge emodukare boe pemegado nouia boei tumagore jiboe tabo erduwakare nou bataruji kodi. Mare boe emagomode Pao Kurireu bataruji boe ewiagai ewadaru tabo dukeje nou boe erduwamode tumeartoruwo Jesusji rugadu.
1CO 14:5 Itaidure taiamedu boe tamagowo boe tuginaiwuge ewadaruji. Mare itaidu jokodukare nou inoduji. Mare itaidure rugadu Pao Kurireu Uwari uwo tarduwado tamagowo Pao Kurireu bataruji boe ewiagai ewadaru tabo. Nou makore Pao Kurireu bataru jiwu pemegare nou makore boe tuginaiwuge ewadaru jiwu kori emagomoka Pao Kurireu bataruji kodi. Mare ia jorduwareu nou boe tuginaiwuge ewadaru jiwu rakojemode ebo dukeje umode boe erduwado nou makore jiboeji. Dukeje boe erduwamode nou makore jiboeji jamedu.
1CO 14:6 Čare imagomode boe tuginaiwuge ewadaru tabo tawiagai dukeje imodukare tarduwado boeji. Mare itaregodumode tagae dukeje imagomodukare tawiagai boe tuginaiwuge ewadaru tabo rugadu. Itaregodumode tagae dukeje imagomode Pao Kurireu ure iorduwado jiboeji. Dukodi imagomode iorduware jiboeji. Imagomode meartorure Jesus jiwuge erduware jiboeji jamedu.
1CO 14:7 Tarduware panaji. Tarduware ikaji. Boe emodukare pana ako pemegado dukeje boe emeardumodukare akoji. Boe emodukare ika ako pemegado dukeje boe emeardumodukare akoji.
1CO 14:8 Boe emodukare tapira ukiga ako pemegado tugobaigarege ewagai dukeje boe emeardumodukare akoji. Nono emeardumodukare ji dukeje emodukare tudo turugadu turugoduwo tumeardukare nou tapira ukiga akoji dukodi.
1CO 14:9 Dukodire tagi jamedu tamagomode boe tuginaiwuge ewadaru tabo dukeje boe erduwamodukare nou tagagoino jiboeji. Tamagore jiboe okwamode tu nono rugadu.
1CO 14:10 Paiamedu boe pawadaru ukare nono pu bataru mogadure. Pawadaru ure tuginai tu tu pubiji. Mare boe eiamedu boe erduware tuwadaruji.
1CO 14:11 Mare iorduwamodukare nou boe tuginaiwuge emagore jiwu tuwadaruji dukeje ire nono boe tuginaiwugere jamedu. Boe tuginaiwuge erduwamodukare imagore jiwu iwadaruji dukodire boe tuginaiwuge nure emage rugadu.
1CO 14:12 Čare tagaidure Pao Kurireu Uwari uwo turo pemegareu maku tagai rugadu uwo tumaragodae maku tagai tamaragodaeče. Dukodire čare tageragu nou maragodaeji rugadu. Mare tagai karega. Tawiagorodo tawo meartorure Jesus jiwuge emeartoru rakado nou tamaragodure jiboe tabo.
1CO 14:13 Nono tamagomode boe tuginaiwuge ewadaru tabo dukeje imode tawie. Tamagodo baruto Pao Kurireu bagai Uwari uwo tarduwado nou tagagoino jiboeji.
1CO 14:14 Imagomode baruto Pao Kurireu bagai boe tuginaiwuge ewadaru tabo dukeje imeardae tabore iorduware imagore baruto duji. Mare iorduwakare imagore jiboeji.
1CO 14:15 Du inodu tabo imagomode baruto boe tuginaiwuge ewadaru tabo. Mare imagomode baruto Pao Kurireu bagai iwadaru tabo rugadu iorduwawo imagore jiboeji. Iragodumode Pao Kurireu bagai boe tuginaiwuge ewadaru tabo. Mare iragodumode Pao Kurireu bagai iwadaru tabo rugadu iorduwawo irare jiboeji.
1CO 14:16 Tamode bato pui tamagowo baruto Pao Kurireu bagai. Mare tagimadumode Pao Kurireu apo boe tuginaiwuge ewadaru tabo dukeje boe erduwamodukare tamagore jiboeji. Eroiwamodukare tuwo tugeragu nou tamagoji tumeardaeče. Erduwamodukare tamagore jiboeji.
1CO 14:17 Tagimadumode Pao Kurireu apo nono jorduwamode tamagore jiboeji. Mare ia boe erduwamodukare tagagoino jiboeji. Dukodire nou tawadaru umodukare emeartorudo Pao Kurireuji rugadu.
1CO 14:18 Pao Kurireu ure imagodo boe tuginaiwuge ewadaru tabo taiamedu boe kori dukodire ikimadure Pao Kurireu apo.
1CO 14:19 Mare boe emode bato pui dukeje imode erduwado ewadaru tabo rugadu. Imago raimode boe tuginaiwuge ewadaru tabo nou boe ewiagai dukeje erduwamodukare imagore jiboeji. Imode iwadaru raido ewiagai boe tuginaiwuge ewadaru tabo mare erduwamodukare ire erduwado jiboeji. Dukodire imagomodukare boe tuginaiwuge ewadaru tabo nou boe ewiagai rugadu. Imagomode boe ewiagai tu ewadaru tabo rugadu. Imode iwadarudo ikera aboudure tu je boe ewiagai ewadaru tabo du pegakare. Erduwamode inagoino jiboeji rugadu. Dukodire imagomode boe ewiagai tu ewadaru remawu tabo tu tu je. Ainore imeardaere.
1CO 14:20 Imedage nure tagi. Tameardaekaba nono boe etore emeardae mogadure. Mare tarodo nono boe etore ero mogadure taro pegakawo. Mare tameardae udo nono ime areme emeardae mogadure.
1CO 14:21 Padure bapera kejewu Pao Kurireu bataru akore: – Boe emagomode boe tuginaiwuge ewadaru tabo. – Dutabore imagomode iwobe Israel doge ewiagai. – Imode boe tuginaiwuge emagodo iwobe Israel dogei. – Mare du inodu tabo ewiapagamodukare iwadaruji. Ainore Pao Kurireu akore.
1CO 14:22 Dukodire čare parduware. Boe emagore boe tuginaiwuge ewadaru tabo dukodire meartorukareuge ewiagoromode Pao Kurireu koiare ure emagodo aino boe tuginaiwuge ewadaru tabo duji ture tuwadaru jetudo pudui duji. Mare Pao Kurireu Uwari ure boe erduwado emagowo Pao Kurireu bataruji boe ewadaru tabo boe ewiagai dukodire meartorure Jesus jiwuge erduware Pao Kurireu bataru jire egoino duji.
1CO 14:23 Dukodire čare meartorure Jesus jiwuge emode bato pui. Nono eiamedu boe emagomode boe tuginaiwuge ewadaru tabo mare ia meartorukare Jesus jiwuge emugumode nono tuwiapaga tabo emagore jiboeji dukeje emeardae pegamode ei. Egomode nouge etaora bai bai nuie kodire egoino.
1CO 14:24 Mare meartorure Jesus jiwuge eiamedu boe emagomode Pao Kurireu bataruji boe ewadaru tabo. Nono ia meartorukare Jesus jiwuge emeardumode ewadaruji dukeje erduwamode emagore jiboeji. Ekiarigodumode turo pegareuji. Emeardumode Pao Kurireu bataruji dukodire erduwamode boe pegamode pudui duji turo pegareu moriče.
1CO 14:25 Nou Pao Kurireu bataru koiare umode erduwado emeardae pega nure duji. Dukeje ekiarigodumode nou tumeardae pegareuji. Emode tubu jodo moto keje tumago pemegawo Pao Kurireuji. Egomode: – Pao Kurireu rakojere woe tagabo rugadu.
1CO 14:26 Dukodire inagoino tai. Tamode bato pui dukeje ia uramode tagabo ia Pao Kurireu ura pemegareuji. Ia umode tarduwado Pao Kurireu bataruji. Ia makomode Pao Kurireu ure tuwie jiwu tuwadaruji tawiagai. Ia makomode Pao Kurireu bakaruji boe tuginaiwuge ewadaru tabo. Ia umode boe erduwado ewadaru tabo nou boe tuginaiwuge ewadaru jipagi. Mare paga karega. Meartorure Jesus jiwuge eiamedu boe emeartoruwo Pao Kurireuji rugadu du bagaire tarore aino.
1CO 14:27 Boe etaidumode tumagowo boe tuginaiwuge ewadaru tabo dukeje nou boe ewo pobetu je, ewo pobe metia bokware tu je. Mare emagokawo puapo. Metia makomode. Umode tuwadaru akedudo dukeje ia makomode pugeje. Nono ia boe uwo boe erduwado emagore jiboeji jamedu.
1CO 14:28 Mare boe edumodukare tagabo tuwo tawie tawadaru tabo nou makore boe tuginaiwuge ewadaru tabowuge emagore jiboeji dukeje nou makore boe tuginaiwuge ewadaru tabowuge edu pagawo tu je. Emagomode tu tudada Pao Kurireuji.
1CO 14:29 Pao Kurireu ure tuwadaru maku aiwuge emode pobe emode pobe metia bokware tumago tabo boe ewiagai. Mare ia meartorure Jesus jiwuge etaiwomode emagore jiboeji taiwo tabo egoino jiboe kodumode Pao Kurireu bataru remawu jitu bagai.
1CO 14:30 Mare Pao Kurireu bataru aregodumode ia meartorure Jesus jiwu ae nono ebo dukeje makomode rugadu. Nou iage eipagamode akoino jiboeji. Nouia makokawo pugeje jao biapagawo akoino tumago tabo duji.
1CO 14:31 Tagaidumode dukeje taiamedu boe tamagomode Pao Kurireu bataruji mare tamagokaba puapo. Taipagado tamediaji uwo tuwadaru akedudo dukeje tamagomode. Dukodire boe eiamedu boe emeardu pemegamode nou tamagore jiboeji. Erduwamode ji rugadu. Dukodire nou Pao Kurireu bataru umode boe eiamedu boe emeartoru rakado Pao Kurireuji rugadu.
1CO 14:32 Pao Kurireu Uwari umode Pao Kurireu bataru maku boe etai emagowo ji. Mare nou makore Pao Kurireu bataru jiwuge ewo tuwudugudo tumago tabo nou bataruji boe ewiagai.
1CO 14:33 Pao Kurireu aidukare boe ewo boe pegado puapo. Mare aidure boe emugu pemegawo puapo rugadu epemegawo pui rugadu. Aidure boe eiamedu boe emeardaewo nono pumeardae mogadure. Meartorure Jesus jiwuge eiamedu boe ero reo.
1CO 14:34 Meartorure Jesus jiwuge emode bato pui dukeje areme edukiorowo ekawo boe pegado. Ainore Judeu doge eno bakaru ure jamedu. Meartorure Jesus jiwuge eimijerage karegure emage.
1CO 14:35 Areme etaidumode tuiorduwawo iaboeji dukeje enarawo tugogei toro tuwai keje. Meartorure Jesus jiwuge emode bato pui tumago pemegawo Pao Kurireuji. Nono aredu makomode dukeje umode tubogurudo.
1CO 14:36 Ia tagi tagagore tu tagi tarduwaie Pao Kurireu bataruji. Tu tagi tamoduie boe ewie Pao Kurireu bataruji. Mare pagare tagagoino.
1CO 14:37 Pao Kurireu Uwari maragodae makudumode tagai rugadu dukeje tarduwamode Pao Kurireu bataru remawu jire inagoino tai duji awu atugoreboe tabo. Tarduwamode Pao Kurireu bataruji rugadu dukeje tarduwamode Pao Kurireu bataru remawu jire inagoino tai duji awu atugoreboe tabo. Du padure awu bapera keje tameartoruwo ji rugadu.
1CO 14:38 Mare ia boe ewiapagamodukare awu imagore jiwu Pao Kurireu bataruji dukeje tawiapagakaba nou imeduji nou areduji.
1CO 14:39 Dukodire čare tagaidudo tamagowo Pao Kurireu bataruji boe ewiagai. Mare tagaba boe emago akedudo boe tuginaiwuge ewadaruji.
1CO 14:40 Tamode bato pui dukeje taro jamedu boe jetorodo. Tarodo aino tu tu puregodaji. Tagaba pu pogurudo rugadu.
1CO 15:1 Imedage nure tagi. Ire tawie Jesus jiwu bakaru pemegareuji. Itaidure iwo tawie pugeje. Tameartorure nou bakaru pemegareuji. Tagare tagera ra tameartorure Jesus jitu piji.
1CO 15:2 Imagore nou bakaru pemegareuji tawiagai. Tamodukare tagera ra nou bataru piji dukeje Jesus umode taginorudo rugadu. Mare iage egore pagaie tameartoruie ji. Egore Jesus jewodukaie pugeje.
1CO 15:3 Mare ire tawie makudure inaiwu bataruji rugadu. Nou bataru pemegare boe jamedu boe kori. Ainore ure. Jesus Cristo bire paro pegareu moriče. Padure bapera kejewu Pao Kurireu bataru ure pawie marigudu. Akore umode boe ekinorudowu bimoduie boe ero pegareu moriče.
1CO 15:4 Boe ere Jesus tugu tori poroto mare merire pobe metia bokware dukeje Jesus jewodure pugeje. Padure bapera kejewu Pao Kurireu bataru ure pawie marigudu. Akore nou umode boe ekinorudowu jewodumoduie pugeje rugadu.
1CO 15:5 Nono Jesus jewodure pugeje rugadu. Dukejere ure Pedro jordudo pudui. Dukejere Jesus ure nou ture jorduwadowuge eiamedu boe erdudo pudui jamedu.
1CO 15:6 Dukejere Jesus ure boe doge erdudo pudui jamedu. Nou boe doge enodo padure quinhentos. Meartorure Jesus jiwugere emage. Nou boe eragoje kimore mare eiamedu boe karega. Iage ewire.
1CO 15:7 Nono Jesus ure Tiago jordudo pudui. Nono ure nou utumode Jesus bataru tabowuge eiamedu boe erdudo pudui.
1CO 15:8 Dukejere Jesus ure iordudo pudui. Imire iordure Jesusji boigodu. Jesus rakojere moto keje mare imeartorukare ji. Ruture baruto. Toro ia meri keje ure iordudo pudui. Dukeje čare imeartorure ji rugadu.
1CO 15:9 Dukodire imire boe karegure imi nou uture Jesus bataru tabowuge ekori. Marigudu imeartorukare Jesusji dukodire iro pegare meartorure Jesus jiwugei rugadu. Dukodire ipogurure Jesus makore iwagai duje.
1CO 15:10 Mare Pao Kurireu ro pemegare i rugadu. Dukodire makore iwagai ituwo Jesus jiwu bakaru tabo boe etae jamedu. Ro pemegare i rugadu dukodire emare ure iragado imaragoduwo pudai rugadu. Imaragodu rakare nouia uture Jesus jiwu bakaru tabowuge ekori. Mare imi karega. Pao Kurireu koiare ure iragado imaragodu pemegawo.
1CO 15:11 Dukodire nou uture Jesus jiwu bakaru tabowuge enogwa kodu pegakare imagore jiboe rekodaji. Dukodire čemagore jiboe ukare tuginai pubiji. Čemagore jiboe jire tameartorure.
1CO 15:12 Čere tawie Jesus Cristo jewoduie pugeje duji. Mare ia tagi tagagore bireuge eewodumodukaie pugeje.
1CO 15:13 Mare bireuge eewodumodukare dukeje Jesus Cristo jewodumodukare pugeje jamedu.
1CO 15:14 Jesus Cristo jewodumodukare pugeje dukeje pagatu je čemagomode Jesus jiboeji boe ewiagai. Jesus Cristo jewodumodukare pugeje dukeje pagatu je boe emeartorumode ji.
1CO 15:15 Jesus jewodumodukare pugeje dukeje čewadrarodunure Pao Kurireu rore jiboeji. Čemagore Pao Kurireu uie Jesus Cristo jewodudo pugeje. Mare bireuge eewodumodukare pugeje dukeje Pao Kurireu umodukare Jesus jewodudo pugeje.
1CO 15:16 Bireuge eewodumodukare pugeje dukeje Jesus jewodumodukare pugeje jamedu.
1CO 15:17 Jesus jewodumodukare pugeje dukeje pameartoru pagamode tu je. Jesus jewodumodukare pugeje dukeje padumode bope doge eda kejewu joru pegareu ka paro pegareu moriče.
1CO 15:18 Bireuge eewodumodukare pugeje dukeje nou meartorure Jesus jiwuge bireuge eewodumodukare pugeje jamedu.
1CO 15:19 Pabagamode Jesus Cristo bagai uwo boe pemegado pai mare paewodumodukare pugeje dukeje kiarigodureuge mode pagi rugadu. Pagiarigodumode boe eiamedu boe ekori moto jamedu boe parugajeje.
1CO 15:20 Mare Jesus Cristo jewodure pugeje rugadu. Dukodire ure parduwado. Bireuge eewodumode pugeje jamedu. Eewodumode rugadu.
1CO 15:21 Boetojiwu imedu Adão ro pegare dukodire bire. Dukodire boe eiamedu boe ewimode rugadu. Boere nono nou Adão umogadure dukodi. Imedu boetojiwu nure ema. Dukodire boe eiamedu boe ere nono Adão umogadure rugadu. Dukodire boe eiamedu boe ewimode jamedu nono Adão bire dumogadure. Mare Jesus jewodure pugeje. Jewodureu boetojiwu nure ema. Dukodire umode boe eiamedu boe eewodudo pugeje jamedu. Mare paga karega. Boe emeartorumode Jesusji dukeje mugu pemegare Jesus apowuge nure emage jamedu. Dukodire Jesus umode meartorure puduiwuge eewodudo pugeje nono tuiewodu mogadure.
1CO 15:23 Mare ukare eewodudo pugeje raga. Umode boe eewodudo pugeje Pao Kurireu aidure kejewu meri keje. Jesus Cristo jewodure pugeje boetoji. Toro ia meri keje aregodumode pugeje. Čare umode meartorure puduiwuge eewodudo pugeje jamedu.
1CO 15:24 Dukejere boe jamedu boe akedumode. Jesus Cristo umode bope doge eraga tawuje epiji. Umode mareboe eimijera raka tawuje piji. Umode boe eimijerage eraga tawuje epiji jamedu. Dukodire emodukare boe pegado boei pugeje. Dukejere Jesus umode tudugarege emagu Pao Kurireu ai emeartoruwo tu Pao Kurireuji rugadu. Eimijera mode Pao Kurireuče rugadu jii toro.
1CO 15:25 Jesus Cristo boe eimijera kurireu nure ema. Pao Kurireu umode jordu pegare puduiwuge eraga tawuje epiji rugadu. Umode nou jordu pegare Jesus Cristo jiwuge eraga akedudo rugadu.
1CO 15:26 Dukejere boigodu Pao Kurireu umode boe ewi akedudo. Dukodire boe ewimodukare pugeje.
1CO 15:27 Padure bapera kejewu Pao Kurireu bataru akore: – Pao Kurireu ure nou umode boe ekinorudowu raka kurido boe jamedu boe kori rugadu. Jesus Cristo jire akoino. Mare nou Jesus Cristo raka kodumodukare Pao Kurireu raka kori. Pao Kurireu emare umode Jesus Cristo raka kurido.
1CO 15:28 Ure Jesus Cristo raka kurido boe jamedu boe kori dukeje Jesus umode tudo nono Pao Kurireu utugarere pudumi dukodiwore. Dukejere boe eiamedu boe eimijera kurireu mode Pao Kurireuče rugadu. Nono boe eiamedu boe emeartorumode tu ji rugadu.
1CO 15:29 Ia tagi tare tagao pegodo tamagowo nou bireuge eparu tabo nono meartorukare Jesus jiwuge ero mogadure. Mare tagagore boe eewodumodukaie pugeje. Dukodire tamagore jiboe ure tuginai taroino jiboe piji. Mare bireuge eewodumode pugeje rugadu.
1CO 15:30 Dujire čere boe ewie rugadu. Čemagore Jesus jiwu bakaru pemegareuji rugadu. Dukodire ro pegareuge etaidure turo pegawo čei rugadu čewo čegera ra nou čemago piji. Mare čewiapagakare ei. Čemago kimore Jesus jiboeji. Mare paga karega. Jesus jewodure pugeje rugadu. Dukodire čegare čegera ra nou čemago piji boe ewiagai rugadu.
1CO 15:31 Ro pegareuge etaidure tuwo iwido meri jameduji. Dukodire ire nono bireu mogadure meri jameduji. Imedage nure tagi. Inojarore i tameartorure Jesus jituji. Pamugu pemegare Jesus Cristo apo kodi. Pagimijera nure ema. Dukodire inure tawie.
1CO 15:32 Ire iragado i nono rugodumode barogo jiwu ro mogadure iwo Éfeso ba kurireu kejewuge emeartorudo Jesusji. Mare irugodu ji karega inagoino. Imago raire ei emeartoruwo Jesusji. Dujire inagoino. Mare itaidumode boe pemegawo tu i imagomodukare aino ewiagai. Jesus jewodumodukare pugeje dukeje pagare inagoino ei. Jesus jewodumodukare pugeje dukeje imagomode nono ia boe emago mogadure. Egore: – Paguduwo rugadu. Parduwamoka nuba boemode pai barogwato. Pagwagewo rugadu pawiwo paguredu tabo. Ainore egore. Mare Jesus jewodure pugeje rugadu dukodire ire iragado i iwo boe emeartorudo Jesusji.
1CO 15:33 Dukodire ire tawie. Boe etaidumode tuwo taekiripagado. Mare boe jokodu jire ia boe egore: – Boe emode tumedagedo ro pegareugeče dukeje ro pemegareuge emodukare emage pugeje. Ero pegamode nono nou tumedage maiwuge ro pegareuge ero mogadure. Boe jokodu jire nou boe egoino.
1CO 15:34 Ča. Taeku jado. Tameardae pemegado pugeje nono tameardae pemegareu boetojiwu mogadure. Tagera ra taro pegareu piji. Iorduware tai. Ia tagi tarduwakare Pao Kurireuji. Taboguruwo dubagaire inagoino tai.
1CO 15:35 Ia tagi tanarare i. Tagagore: – Boe eewodumode mare nuba emode? Emode nono tumogadure? Ainore tanarare i.
1CO 15:36 Kodire imode tawie. Tarduwa bokware! Boe ere iaboe tugu to boepato. Mare nou boe a bimode jao dukeje botumode.
1CO 15:37 Boe emode trigo a tugu mototo. Boe emode kuieda a tugu mototo. Emode nouia boe a tugu jamedu. Mare boe are boe ere tugu. Boe boturedu karega boe ere tugu.
1CO 15:38 Nono nou trigo a botumode ričodumode. Nono umode nono trigo remawu mogadure rugadu. Kuieda a botumode ričodumode. Nono umode nono kuieda remawu mogadure rugadu. Pao Kurireu emare ure nou boe a ričodudo. Motumode rugadu nono tuiordae tumeardaere.
1CO 15:39 Kare, barege, kiebarege ekodu ukare nono pumogadure. Boe ekodu ure tuginai. Barege ekodu ure tuginai. Kiebarege ekodu ure tuginai. Kare ekodu ure tuginai jamedu.
1CO 15:40 Meri rakojere baru tada. Ari rakojere baru tada. Kuieje doge eragojere baru tada jamedu. Eiamedu boe emodure. Mare emodu ure tuginai moto kejeboe emodu piji. Mare meri, ari, kuieje doge erugu ure tuginai tu tu pubiji jamedu. Meri urugu rakare meriji. Ari, kuieje doge erugu rakare boečoji. Nou kuieje doge erugu ure tuginai tu tu pubiji jamedu.
1CO 15:42 Ainore bireuge emode. Ewimode mare eewodumode pugeje. Nono emode tuginai tubiji. Boe ewire dukeje boe ere bireu tugu mototo nono boe ere boe a tugu to boepato dumogadure. Mare boe a ji karega inagoino. Boe ewimode dukeje etugudure mototo. Dujire inagoino. Mare Pao Kurireu umode nou bireu jewodudo pugeje nono nou boepa tadaboe botumode dumogadure. Mare boepa tadaboe ji karega inagoino. Pao Kurireu umode bireu jewodudo pugeje dukeje bimodukare pugeje. Dujire inagoino.
1CO 15:43 Boe emode bireu tugu mototo dukeje nou bireu motu bokware. Raka akedure. Dukodire bire. Mare Pao Kurireu umode jewodudo pugeje dukeje motumode. Rakamode.
1CO 15:44 Boe emode bireu tugu mototo dukeje rare, kodure, birire. Dujire eroino. Boe eragojere moto keje kodi. Dukodire boe emode bireuge etugu mototo. Mare Pao Kurireu umode eewodudo pugeje dukeje ekodu ewiri umode tuginai. Boe ewirimode ekodumode. Mare umode tuginai pugeje emuguwo nono baru tada Pao Kurireu apo.
1CO 15:45 Padure bapera kejewu Pao Kurireu bataru akore: – Imedu boetojiwu iere Adão. Pao Kurireu ure nou Adão towuje dukodire nou Adão ure. Ainore nou Pao Kurireu bataru akore. Mare Jesus jewodure pugeje dukeje kodu, biri ure tuginai pugeje rakojewo baru tada. Emare umode boe eewodudo pugeje dukodire umode nou jewodureuge ewiri, ekodu udo tuginai jamedu eragojewo baru tada pudabo.
1CO 15:46 Pao Kurireu ure Adão towuje moto urugudukudu tabo. Dukodire moto pijire Adão aregodure. Nono boe eiamedu boe ere nono Adão mogadure boetoji. Mare Jesus Cristo aregodure baru piji. Nono meartorure Jesus jiwuge eewodumode pugeje dukeje ewiri, ekodu umode tuginai. Dukodire emode nono baru pijiwu mogadure. Du boigoduwu nure ema.
1CO 15:48 Moto kejewuge ere nono moto pijiwu mogadure. Mare utumode baru towuge emode nono baru pijiwu mogadure.
1CO 15:49 Pare nono nou moto pijiwu Adão mogadure. Mare ia meri keje pamode nono baru pijiwu Jesus umogadure.
1CO 15:50 Imedage nure tagi. Iwo tarduwa pemegado. Pao Kurireu umode boe eimijerado pudumi tuwo boe emugudo pudabo baru tada. Mare boe ekodu utumodukare baruto. Boe ekodu rakojemodukare Pao Kurireu apo. Boe ekodu akedumode. Ukare nono jewodureu kodu mogadure.
1CO 15:51 Imode tawie boe erduwakare jiboeji. Ia pagi pawimodukare. Mare Pao Kurireu o tapira ukiga akomode tači ia boeiwu meri keje dukeje umode paiamedu boe pawiri udo tuginai pagodu udo tuginai tači je. Pamode paeku to piki pui dukeje pawiri umodukare nono tumogadure pugeje, pagodu umodukare nono tumogadure pugeje. Mare Pao Kurireu o tapira ukiga akomode boeiwu meri keje dukejere umode bireuge eewodudo tači je jamedu. Nono ewimodukare pugeje rugadu. Dukejere umode bikareuge emeartorure Jesus jiwuge ewirido tuginai eragojewo pudabo jamedu. Ewimodukare rugadu.
1CO 15:53 Nou bikareuge ewimodukare pugeje. Mare Pao Kurireu umode ewiri udo tuginai ekodu udo tuginai. Dukodire ewimodukare rugadu.
1CO 15:54 Pao Kurireu umode boe eiamedu boe ewiri udo tuginai, ekodu udo tuginai ewikawo pugeje rugadu. Padure bapera kejewu Pao Kurireu bataru akore aino rugadu. Jetumode pudui rugadu. Akore: – Boe ewi akedu. Boe ewimodukare pugeje rugadu. – Pao Kurireu ure boe pegareboe akedudo boe ewikawo pugeje rugadu.
1CO 15:55 – Boe ewi akedure rugadu. – Boe ewi umodukare boe ekorido pugeje! Ainore Pao Kurireu akore.
1CO 15:56 Marigudu Pao Kurireu makore boei ero pegakawo pugeje. Mare nou Pao Kurireu bataru ure boe ekorigo dukodire nou boe emeardae pegareu ure turagado pudui tuwo nou boe ero pegado rugadu. Boe ero pegare dukodire boe ewimode. Boe erokwačereu bokwa. Boe ewimode rugadu.
1CO 15:57 Mare pagimaduwo Pao Kurireu apo. Emare ure Jesus Cristo maku pagai pagimijerače. Jesus emare umode turaga maku pagai pawiapagakawo pameardae pegareuji pugeje pawo pagera ra paro pegareu piji rugadu. Umode paginorudo rugadu.
1CO 15:58 Imeardu kurire jiwuge imedage nure tagi rugadu. Taragado tai tameartoruwo Jesusji rugadu. Tagaba tagera ra piji. Tagera kiarikaba tamaragodaeji tamaragoduwo Pagimijera ai rugadu. Paga karega boe emaragodumode Pao Kurireu ai rugadu. Tarduware nou inoduji marigudu rugadu.
1CO 16:1 Tare iwie tagaiduie tawo ia diero maku toro Judéia moto kejewuge meartorure Jesus jiwuge ewagai. Ire Galácia moto kejewuge meartorure Jesus jiwuge erduwado marigudu. Tarodo nono nou Galácia kejewu meartorure Jesus jiwuge ero mogadure. Ainore erore. Ere bato pui tu tu je domingo meri keje. Ere bato pui dukeje eiamedu boe ere ia to diero rogu maku. Erore aino tu tu je dukodire ere nou diero rogu kurido. Ča. Tarodo nono nou ero mogadure jii itaregodure tagae du ka. Nono itaregodumode tagae dukeje nou tare maku diero kurimode jamedu tawo maku toro Judéia moto kejewuge meartorure Jesus jiwuge ewagai.
1CO 16:3 Itaregodumode tagae dukeje pamode ia tagaidure jiwu boe etudo nou diero tabo ewo nou diero reko toro Judéia moto kejewuge ewagai Jerusalém ba kurireu ka. Imode atugoreboe maku etai nou Judéia moto kejewuge erduwawo kaibowu pijiba nou diero aregodure.
1CO 16:4 Boemode turugadu dukeje itumode ebo toro Jerusalém ba kurireu ka jamedu.
1CO 16:5 Itumode Macedônia moto ka. Dupijire itumode tagae iorduwo tai.
1CO 16:6 Nono iorduwakare kaba meri kejeba itumode tabiji. Itaidure iragoje raiwo tagabo. Mare iorduwakare. Imeardaere iragojewo tagabo jii toro biakumodewu ari akedu ka. Mare iorduwakare. Dukejere tamode tagera maku inai ituwo pugeje. Mare iorduwakare raga kaiba itumode.
1CO 16:7 Itaidukare ituwo tabiji kuri aino. Pagimijera Jesus aidumode dukeje iragoje raimode tagabo rugadu.
1CO 16:8 Iragojere woe Éfeso ba kurireu keje. Iragojemode woe kuri Judeu doge ewadae Pentecostes akedu ka.
1CO 16:9 Inure awu boe ewie Jesus jiwu bakaru pemegareuji. Etaidure tuiorduwawo čewadaruji rugadu. Emagare rugadu. Imeardaere emeartorumode Jesusji rugadu. Mare ia boe erdu pegare čewadaruji jamedu. Nou jordu pegare čeiwuge emagare jamedu.
1CO 16:10 Timóteo aregodumode tagae dukeje tagimadudo apo rugadu mugu pemegawo tagabo. Emare maragodure Pagimijera ai nono imaragodu mogadure.
1CO 16:11 Tagaba tameardae pegado ji. Tagera maku ai utu pemegawo tugodure jiwu awaraji. Utumode tabiji dukeje Timóteo aregodumode mato itae pugeje ia meartorure Jesus jiwugebo pugeje. Ipagare ewagai woe.
1CO 16:12 Imagore pamedia Apoloji utuwo tagae jamedu ia meartorure Jesus jiwugebo. Mare meardaere tugaie turugadu tuduwo kuri aino. Mare umode turugadu dukeje utumode tagae rugadu.
1CO 16:13 Taeku jado. Tameartoru rakado Jesusji. Taragado tai. Tabagudukaba.
1CO 16:14 Tameardu kurido Pao Kurireuji tawo tarore jiboe jamedu boe udo turugadu Pao Kurireu jakai. Tameardu kurido boei jamedu tawo tarore jiboe jamedu boe udo turugadu boei.
1CO 16:15 Imedage nure tagi. Dukodire imode tawie. Tarduware imedu Estéfanaji. Tarduware uwai kejewugei. Meartorure Jesus jiwuge boetojiwuge nure emage tago moto keje, Acaia moto keje. Ere tumagu tagai. Ere tumagu meartorure Jesus jiwuge etai jamedu tuwo tarduwado Pao Kurireu bataruji tuwo boe pemegado tai, tuwo boe pemegado meartorure Jesus jiwuge eiamedu boei. Tameartorudo nou Estéfanas uwai kejewugei. Ia boe emaragodumode Estéfanas apo turowo nono Estéfanas ro mogadure dukeje tameartorudo ei jamedu. Tarodo nono ero mogadure tawo boe pemegado meartorure Jesus jiwugei jamedu. Imedage nure tagi. Dukodire inagoino tai.
1CO 16:17 Imedu Estéfanas aregodure itae. Imedu Fortunato aregodure itae. Imedu Acaico aregodure itae jamedu. Etaregodure mato itae tabiji. Ekimadure itabo tagai. Dukodire ere iagaredo i.
1CO 16:18 Ikiarigodure tawagai mare ekimadure itabo tagai dukodire iagarere i pugeje. Ere iagaredo i nono ero moga tai toro dumogadure. Awu ime ero pemegare rugadu. Tawiagodukaba epiji. Tamago pemegado pu biagai erore jiboeji.
1CO 16:19 Ásia moto kejewu meartorure Jesus jiwuge etaidure tugimaduwo tagabo jamedu. Imedu Áquila, aredu Priscila etaidure tugimaduwo tagabo. Meartorure Jesus jiwuge emode bato pui ewai tada tu tu je. Nou meartorure Jesus jiwuge etaidure tugimaduwo tagabo jamedu.
1CO 16:20 Awu woewu meartorure Jesus jiwuge etaidure tugimaduwo tagabo jamedu. Tagimadudo puapo nono meartorure Jesus jiwuge eiamedu boe ero mogadure. Meartorure Jesus jiwuge ere tumedagedo pugi dukodire eroino pui tugimadu tabo.
1CO 16:21 Paulo nure imi. Imire ire awu bataru bu awu bapera keje ikera tabo rugadu ikimaduwo tagabo rugadu.
1CO 16:22 Boe pegamode meardu kurikare Jesus jiwugei. Ainore inagore. Itaidure Pagimijera Jesus aregoduwo kuri aino jamedu. Aregodumode dukeje meardu kurikare Jesus jiwuge ewarigudumode bope doge eda kejewu joru pegareuto rugadu.
1CO 16:23 Mare pagimijera Jesus Cristo uwo turo pemegareu maku tagai rugadu. Aregodukare pawagai raga.
1CO 16:24 Pameartorure Jesus Cristoji dukodire pawobe nure pugi. Dukodire imeardu kurire tai rugadu. Iwadaru urugadureu.
2CO 1:1 Paulo nure imi. Pao Kurireu makore iwagai tuwo itudo Jesus Cristo bataru tabo boe ewagai. Ainore Pao Kurireu meardaere rugadu. Inure awu atugoreboe pemegado iwo maku meartorure Jesus jiwuge boe etai Corinto ba kurireu tadawuge etae. Inure awu atugoreboe pemegado iwo maku Acaia moto kejewuge meartorure Jesus jiwuge eiamedu boe etai jamedu. Pamedia Timóteo unure awu atugoreboe maku tawagai jamedu.
2CO 1:2 Pao Kurireu ro pemegawo tai. Uwo tameardu kurido pudui tabagudukawo boe pegareuče pugeje tabemegawo pui jamedu. Pagimijera Jesus Cristo ro pemegawo tai jamedu. Uwo tameardu kurido pudui jamedu tabemegawo pui rugadu.
2CO 1:3 Pamago pemegawo Pao Kurireuji. Pagimijera Jesus Cristo uo nure ema. Pao Kurireu emare okudugodumode boebo rugadu. Tu Pao Kurireu umode tugera maku boe etai.
2CO 1:4 Boe pegamode pai dukeje umode tugera maku pagai rugadu. Dukodire paroiware pawo pagera maku iage etai jamedu. Boe pegamode ei dukeje pamode pagera maku etai nono Pao Kurireu rore pai dumogadure.
2CO 1:5 Moto kejere boe pegare Jesus Cristoji rugadu. Aino čare boe pegare čei nono jamedu. Mare čemeartorure Jesus Cristoji dukodire Pao Kurireu ure tugera maku čenai.
2CO 1:6 Čedaidure čewo čegera maku tagai tameartoruwo Jesusji uwo taginorudo tagawo taro pegareu morido pugeje. Dukodire ro pegareuge ere boe pegado čei. Mare Pao Kurireu ure turaga maku čenai čeragawo čei. Dukodire umode tugera maku tagai jamedu. Boe pegamode tai dukeje Pao Kurireu umode turaga maku tagai taragawo tai jamedu tawudugudo tai jii toro nono rore čei dumogadure.
2CO 1:7 Dukodire čerduware tameartorumode Jesus jituji rugadu. Boe pegare tai nono boe pegare čei dumogadure. Mare Pao Kurireu ure tugera maku tagai jamedu nono turo mogadure čei dumogadure.
2CO 1:8 Čemedage nure tagi. Čedaidure čewo tawie pugeje. Čeragojere Ásia moto keje dukeje boe pegare čei rugadu. Boe pegare čei rugadu. Čemeardaere čewimoduie rugadu.
2CO 1:9 Čemeardure boe egore tumoduie čewido rugadu. Boe pegare aino čei rugadu. Pao Kurireu koiare ure boedo aino čei čewiagodukawo čemeartorukawo tu čei. Mare Pao Kurireu bataru jire čemeartorumode tu rugadu. Emare ure tugera maku čenai. Emare umode bireuge eewodudo pugeje rugadu.
2CO 1:10 Pao Kurireu ure čeginorudo čewi piji. Ure čeginorudo ia boe pegareu piji. Umode čeginorudo rugadu. Dukodire čemeartorure ji rugadu kodire čebagamode bagai rugadu. Čerduware umode čeginorudo rugadu duji.
2CO 1:11 Tamagore baruto Pao Kurireu bagai čebaru tabo jamedu. Dutabore tare tagera maku čenai. Boe emagare tumago tabo baruto čebaru tabo. Nono Pao Kurireu umode emagore bagaiboe udo turugadu rugadu. Umode boe pemegado čei rugadu. Dukodire boe emagamode tugimadu tabo Pao Kurireu apo rugadu. Emago pemegamode Pao Kurireu rore jiboeji rugadu.
2CO 1:12 Čemeardaekare toro ia boe emeardae pegareu bagai. Pao Kurireu ure turo pemegareu maku čenai dukodire čegare taekiripagado. Ure turo pemegareu maku čenai dukodire čemago pagakaregure tai. Ainore čerore boe eiamedu boei. Dukodire čedaidure awu Pao Kurireu ure maku čenaiwu čemeardaeji. Ia boe ekare čerduwado awu čemeardaeji. Pao Kurireu koiare ure nou čemeardae maku čenai.
2CO 1:13 Čere awu atugoreboe towuje Pao Kurireu bataru tabo tawagai. Awu atugoreboe tadaboe tagaiwomode ji. Tarduwamode nou atugoji. Mare tarduwamodukare nou atugo jamedu boeji tači je. Mare ia meri keje tarduwamode jamedu boeji rugadu. Toro ia meri keje pugeje Pagimijera Jesus aregodumode dukeje tamago pemegamode čei čere tarduwado Pagimijera bataru jamedu boeji. Nono čemago pemegamode tai jamedu tameardu pemegare čere tarduwado jiwu Pao Kurireu bataru jamedu boeji.
2CO 1:15 Iorduware tagaidure Pao Kurireu bataruji rugadu dukodire ire imeardae boetojiwu tawuje ituwo tawagai iwo tarduwado Pao Kurireu bataru jamedu boeji. Imeardaere itaregoduwo toro tagae iwo taegaredo tai. Dukejere itumode toro Macedônia moto ka tabiji. Nono imode ikirimi pai ibagi ikodaji pugeje toro tawagai iwo taegaredo tai pugeje. Nono tamode diero maku inai tawo itudo nou Judéia moto kejewu meartorure Jesus jiwuge etae.
2CO 1:17 Ire awu imeardae tawuje rugadu. Itaidure irowo aino rugadu. Imode iwadarudo mitotu je. Imodukare iwadarudo pobe.
2CO 1:18 Pao Kurireu kodumode tuwadaruji tu rugadu. Ainore irore jamedu. Imeardaere jiboe ire rugadu tawuje tawiagai. Dukodire ire tawie aino imeardaeji. Nou imeardae imode towuje rugadu. Ia boe emeardae karega. Pao Kurireu jorduware imeardaeji.
2CO 1:19 Jesus Cristo batrarodumodukare. Pao Kurireu onaregedu nure ema. Imedu Silas ure tarduwado Jesusji. Timóteo ure tarduwado Jesusji jamedu. Imi jamedu ire tarduwado Jesusji. Jesus umodukare tuwadaru makado. Umode tuwadarudo mitotu je.
2CO 1:20 Pao Kurireu ure boe ewie marigudu turomode jiboeji. Awu Jesus jire Pao Kurireu akoino rugadu. Pameardumode awu Pao Kurireu bataruji dukeje pagagomode boe jokodu ji rugaduie akoino pamago pemegawo Pao Kurireuji.
2CO 1:21 Pao Kurireu emare ure parduwado rugadu pamugu pemegawo Jesus Cristo apo. Pao Kurireu emare ure tugeragu pai pudae tuwo pado paginai.
2CO 1:22 Ure tugeragu pai dukodire ure pagiedo. Nono parduware Pao Kurireu ure tugeragu jiwu boe nure pagi duji. Pao Kurireu ure Tuwari maku pagai jamedu. Rakojere pagabo. Dukodire parduware Pao Kurireu umode turo pemegareu iado pai duji rugadu.
2CO 1:23 Pao Kurireu jorduware imeardaeji rugadu. Iwadrarodumodukare tai. Itaregodumode tagae dukeje inogwa jetumode taro pegare jiboeji tawiagai. Dukodire itukare tawagai inogwa jetumode taro pegareu jitu kodi. Itaidukare iwo tagiarigo dukodi. Dukodire itukare tawagai toro Corinto ba kurireu ka.
2CO 1:24 Čedaidukare čewo čeragado tai tameartorure jiboeji. Čerduware tai. Tameartorure Jesusji rugadu. Mare čedaidure tameartoruwo Jesusji tagaidu tabo. Čedaidure čewo tarduwado butugu tabo taegare tabo.
2CO 2:1 Dukodire ire imeardae tawuje itukawo tawagai. Itaidukare iwo tagiarigo.
2CO 2:2 Imode tagiarigo dukeje ikiarigodumode jamedu. Ioguduba koia ba umode iagaredo i jamedu?
2CO 2:3 Imororamagadure tai tameartorumodukare Pao Kurireu jitu duji. Dukodire itukare tawagai mare ire atugoreboe boetojiwu pemegado iwo tarduwado taro pegareuji. Ire nou atugoreboe maku tagai marigudu tameartoruwo nou Pao Kurireu bataruji. Nono imeartorure tai tameartorumode Pao Kurireu bataru jituji rugadu. Nono itaregodumode tagae nono iagaremode i taegaregodumode tai jamedu.
2CO 2:4 Mare imororamagadure tawagai. Itragudure taro pegareu keje. Dukodire ire jawu atugoreboe boetojiwu maku tagai tarduwawo taro pegareuji. Ire maku tagai mare iwo tagiarigo karega. Ire maku tagai iwo tardudo imeardu kurire tai duji.
2CO 2:5 Nou imedu ro pegare jiboe ure ikiarigo. Mare ure tagiarigo kurido rugadu. (Mare itaidukare imagowo ji iwadaru kori tabo, iwadaru rakareu tabo jamedu.)
2CO 2:6 Tare tameardae tawuje taburedukawo nou imeduji ro pegare dukodi. Mare paga karega uwo tugirimi tagae tumeardae pemegareu tabo pugeje.
2CO 2:7 Aino čare tawiagodudo nou imedu rore jiboe piji. Tamago pemegado nou imeduji tawo kiarigodu barigu piji ukawo tugera ra tumeartorure Jesus jitu piji.
2CO 2:8 Dukodire inogwamagudunure tai. Tameardu kurido ji rugadu.
2CO 2:9 Ire nou atugoreboe boetojiwu maku tagai iorduwawo tameardae remawuji rugadu. Iorduwawo tameartorumode iwadaru jitu bagai rugadu.
2CO 2:10 Tawiagodumode boe ero pegare tai dupiji dukejere iwiagodumode ero pegare tai dupiji jamedu. Itaidure irowo nono Jesus Cristo ro mogadure. Dukodire iwiagodumode boe ero pegare idu piji nono Jesus ro mogadure.
2CO 2:11 Boe ero pegare pai mare pawiagodumode nou ero pegare pai dupiji. Dukodire bope doge eimijera Satanás rakamodukare pai pugeje. Parduware marigudu bope doge eimijera Satanás meardae pegare pai duji rugadu.
2CO 2:12 Itaregodure Trôade ba kurireu ka iwo nou boe ewie Jesus Cristo jiboeji umoduie boe ekinorudo. Nou boe etaidure tuiorduwawo ire tuwie jiwu Jesus jiboeji rugadu. Dukodire ire ewie ji rugadu. Pagimijera Jesus koiare ure boe udo turugadu nou torowu boe eimijerage erdu pegakawo nou irore jiboeji. Ekare itudo nou Trôade ba kurireu piji.
2CO 2:13 Mare iordukare pamedia Titoji nono. Dukodire imororamagadure bagai. Dukodire ikimadure nou boe dogebo. Dukejere iture epiji toro Macedônia moto ka pamedia Tito bagai.
2CO 2:14 Boe ekimaduwo Pao Kurireu apo rugadu. Jesus Cristo ro rakare boe eiamedu boe kori. Pao Kurireu ure čemugu pemegado Jesus Cristo apo dukodire čegodure meardae rekodaji meardae pemegare kodi. Pao Kurireu ure čedudo tuwadaru tabo boe doge etae čewo boe eiamedu boe ewie Jesus Cristo rore jiboeji. Nou bataru ure nono roreboe mogadure. Mare roreboe ji karega inagoino. Pao Kurireu bataru unure taodo boe jamedu boe parugajeje boe eiamedu boe erduwawo ji. Dujire inagoino.
2CO 2:15 Čere nono Jesus Cristo ure maku Pao Kurireu aiwu roreboe mogadure. Mare roreboe ji karega inagoino. Čemagore jiwu Jesus bataru jire inagoino. Boe eiamedu boe emeardumode nou čemagore jiboeji. Meartorumode Jesus jiwuge emeardumode. Meartorumodukare Jesus jiwuge emeardumode jamedu.
2CO 2:16 Ia boe emeartorumodukare Jesusji. Egai ere Jesus bataru udo nono boe kore boere. Ere udo aino emeartorukare bataruji dukodi. Emeardure čemagore jiwu Jesus bataruji dukodire erduware tuwarigudumode boe pegareuto. Dukodire ere čewadaru udo aino. Mare meartorumode Jesus jiwuge emeardumode čemagore jiwu Jesus bataruji dukejere erduwamode tuiewodumode pugeje duji. Dukodire etaidumode čewadaruji nono etaidumode roreboeji dumogadure. Mare ioguduba mako pemegamode Jesus Cristo bataruji?
2CO 2:17 Ia boe egokodure nou bataru tabo. Epoguru bokware. Boe emode morido etai dukeje emode boe ewie Pao Kurireu bataruji. Boe emodukare morido etai emodukare boe ewie. Mare čegare aino. Pao Kurireu makore čewagai čeduwo nou tuwadaru tabo boe etae. Dukodire čemago pemegare nou bataruji boe ewiagai. Jesus Cristo utugarege nure čegi. Čerduware Pao Kurireu rakojere čedabo duji. Dukodire čenogwarikare čemago tabo Pao Kurireu bataruji boe ewiagai.
2CO 3:1 Čegare nono ia boe emogadure. Čemagomodukare čeroji tawiagai tarduwawo čei. Tarduware čei marigudu. Ia tarduwakare jiwuge emagomode turoji tawiagai tarduwawo pudui tagaiduwo pudui. Mare čegi čerokare nono nou ero mogadure.
2CO 3:2 Čemaragodure Pao Kurireu bataru tabo tawiagai tameardu pemegawo Pao Kurireu bataruji. Nono tameartorure nou Pao Kurireu bataruji rugadu. Ia boe erdure tameartorure Pao Kurireu bataru jituji. Dukodire emeartorure čemaragodaeji.
2CO 3:3 Mare čegi karega. Jesus Cristo koiare ure tameartorudo čemagore tawiagaiwu Pao Kurireu bataru jituji. Pao Kurireu Uwari ukare Pao Kurireu bataru bu ia tori keje pugeje. Mare ure Pao Kurireu bataru tugu boe etaorato boe emearduwo ji emeartoruwo ji rugadu.
2CO 3:4 Mare paga karega inagoino čemaragodu pemegaie Pao Kurireu bataruji tawiagai. Jesus Cristo koiare ure čemaragodu pemegado aino. Čemeartorure ji rugadu dukodire čemeartorure Pao Kurireuji rugadu.
2CO 3:5 Čeroiwakare Pao Kurireu ure maku čenaiwu čemaragodaeji. Mare Pao Kurireu ure čeragado čemaragodu pemegawo ji.
2CO 3:6 Emare ure čeroiwado čemeartoruwo Pao Kurireu meardae maiwuji. Ure čeroiwado čewo boe ewie ji jamedu. Nou Pao Kurireu meardae maiwu ukare nono nou tumeardae jawu mogadure. Jawure ure tori atugodo nou tuwadaru jawu tabo boe emeartoruwo nou tuwadaru jawu jamedu boeji. Kodire emode ovelha rogu bito tuwo maku Pao Kurireu ai nou turo pegareu moriče tu tu je. Mare boe emeartorumodukare nou padure tori kejewu Pao Kurireu bataru jamedu boeji tu tu je. Dukodire ewimode dukeje ewarigudumode boe pegareuto Pao Kurireu piji. Mare boe eragakare tumeartoruwo ji dukodire ewimode dukeje ewarigudumode Pao Kurireu piji boe pegareuto. Nono Pao Kurireu umode ewarigu bope doge eda kejewu joru pegareuto. Mare Pao Kurireu ure tumeardae maiwu tawuje tuwo Jesus arego biwo boe ero pegareu boe moriče. Kodire emodukare ovelha rogu bito pugeje turo pegareu boe moriče pugeje. Emeartorumode tu Jesusji rugadu. Pao Kurireu Uwari ure nou Pao Kurireu meardae maiwu tugu boe etaorato emeartoruwo ji rugadu. Boe emeartorumode Jesusji nono nou Pao Kurireu meardae maiwu mogadure dukeje emugu pemegamode Pao Kurireu apo.
2CO 3:7 Marigudu Pao Kurireu ure tumeardae jawu maku Moisés ai uwo bu tori keje Judeu doge eno bakaruwo ema. Ure maku Moisés ai dukeje Pao Kurireu ro pemegare Moisesji. Kodire Pao Kurireu o jorugu pemegareu jore Moisés jeto. Dukodire Moisés je gurugurure rugadu. Nono Moisés ure turawuje nou tori ao piji tuwo nou tori reko Judeu doge etai dukeje je guruguru akedugodure je piji. Mare du inodu tabo Judeu doge etaidure taiwowo jeji mare eku rakakare taiwowo jeji je gurugurunure dukodi. Ainore Pao Kurireu rore Moisesji tuwo tuwadaru jawu maku nou Judeu doge etai eno bakaruwo ema. Ure Moisés je guruguru rakado tuwo boe erdudo to jorugu pemegareuji boe erduwawo Pao Kurireu rakojere Moisés apo duji tori ao keje, boe emeartoruwo Pao Kurireu ure nou bakaru jawu maku pudai duji. Mare du inodu tabo boe eragakare tumeartoruwo nou bakaru jawuji nono ewire. Dukodire Pao Kurireu umode ewarigu bope doge eda kejewu joru pegareuto.
2CO 3:8 Mare awu Pao Kurireu Uwari ure tugu boe etaora towu Pao Kurireu meardae maiwu pemegare nou bakaru jawu piji.
2CO 3:9 Nou bakaru jawu pemegare mare boe eroiwakare tumeartoruwo ji. Dukodire Pao Kurireu makogodure ei rugadu. Akore ro pegareuge nuie emage rugadu. Emoduie turo pegareu morido tuwire dukeje. Ewire dukejere Pao Kurireu umoduie ewarigu bope doge eda kejewu joru pegareuto. Mare Pao Kurireu ure tumeardae maiwu maku boe etai boe emeartoruwo Jesusji. Boe emeartorumode Jesusji dukeje Pao Kurireu umode ekinorudo nou boe pegareu piji ekawo turo pegareu morido pugeje. Dukodire awu Pao Kurireu meardae maiwu pemegare nou bakaru jawu piji.
2CO 3:10 Mariguduwuge Judeu doge erdure Pao Kurireu jorugu pemegareuji. Nou jorugu kuri remawu nure egai. Epagudure če. Mare nou jorugu akedure. Dukeje boe erdukare ji pugeje. Pao Kurireu ukare tumeardae maiwu maku jorugu tabo. Mare du inodu tabo nou meardae maiwu raka kodure nou bakaru jawu kori. Dukodire boe emeartorukare nou bakaru jawuji pugeje.
2CO 3:11 Nou bakaru jawu pemegare dukodire Judeu doge erdure Pao Kurireu joruguji. Mare nou bakaru jawu akedure. Mare awu Pao Kurireu meardae maiwu ča akedumodukare. Dukodire nou Pao Kurireu meardae maiwu pemegare rugadu nou bakaru jawu piji.
2CO 3:12 Čerduware nou Pao Kurireu meardae maiwu ure turugadu duji. Dukodire čere čeragado čei čewo boe ewie nou Pao Kurireu meardae maiwuji rugadu emeartoruwo Jesusji rugadu.
2CO 3:13 Čegare nono Moisés mogadure. Pao Kurireu ure Moisés je gurugurudo. Mare nou je guruguru ure tageduiago. Dukodire Moisés ure ia tugudau areia rogu bu tuie keje Judeu doge erdukawo nou tuie guruguru ure tageduiago tuie piji duji.
2CO 3:14 Nou Judeu doge etaidukare tuwiapagawo nou bakaru jawu akoino pudui duji. Etaidukare tumeartoruwo ji jii aino. Dukodire boe ekudau areia padure nou emeardae keje nono padure Moisés je keje dumogadure erduwa pemegakawo nou bakaruji. Mare boe ekudau areia ji karega inagoino. Eroiwakare tuiorduwawo nou bakaru jawuji. Du jire inagoino. Ji aino etaidukare tumeartoruwo ji dukodire etaiwomode nou bakaru jawu padure kejewu baperaji mare erduwa pemegamodukare kaba jiba akoino. Mare boe emeartorumode Jesus Cristo jitu keje Jesus umode erduwa pemegado nou bakaru jawuji rugadu.
2CO 3:15 Ji aino Judeu doge erduwakare nou Pao Kurireu meardae maiwuji. Dukodire etaiwomode tu nou Moisés ure bu bapera kejewu Pao Kurireu o bakaru jawuji. Erduware tumagowo nou atugoji mare erduwakare kaba jiba nou atugoreboe akoino pudui duji.
2CO 3:16 Mare boe emode tugera ra turo pegareu piji tugoduwo Pao Kurireu meardae maiwuji tumeartoruwo Jesusji. Nono Pao Kurireu umode erduwado tumeardaeji rugadu erduwawo kaba jiba akoino pudui duji.
2CO 3:17 Pao Kurireu Uwari rakojemode nou meartorure Jesus jiwugebo tuwo erduwado Pao Kurireu bataruji. Umode nou boe ekinorudo ero pegareu piji emeartoruwo Pao Kurireuji rugadu.
2CO 3:18 Pameartorumode Jesusji dukeje paromode nono Pagimijera ro mogadure. Dukodire boe erdumode parore jiwu Pagimijera ro pemegareuji. Aino kodire pamodukare paro biado boe epiji. Nou Pagimijera Pao Kurireu Uwari nure ema. Emare umode paro udo nono Pao Kurireu ro mogadure tu tu je pameardae pemegawo nono meardae mogadure rugadu.
2CO 4:1 Pao Kurireu okudugodure čedabo dukodire ure čemaragodae maku čenai. Dukodire čegiarigodukare.
2CO 4:2 Ia boe ere turo pegareu biado mare čegi čerokare aino. Boe ere pu pogurudo turo pegareuče. Mare čegi čerokare aino. Čegare boe ekiripagado. Čegare Pao Kurireu bataru pagado. Čere udo nono tumogadure rugadu. Čemago pemegare Pao Kurireu bataru remawuji boe ewiagai rugadu. Dukodire boe eiamedu boe erduware tudada čemagore Pao Kurireu bataru remawu jituji. Pao Kurireu jorduware čerore jiboeji. Dukodire Pao Kurireu bataru remawu jire čenogwa jeture boe ewiagai rugadu.
2CO 4:3 Čemagore Jesus bataru pemegareuji boe ewiagai. Mare nou bataru biadodure nou utumode boe pegareu kawuge epiji. Emeardure nou Jesus bataru pemegareuji mare erduwakare kaba jiba akoino pudui emeartorukare ji kodi.
2CO 4:4 Bope doge eimijera Satanás ure emeardae pegado emeartoruwo tu pudui. Aidukare emeartoruwo Jesusji. Dukodire erduwakare kaba jiba nou Jesus bataru pemegareu akoino pudui duji. Dukodire emeartorukare nou Jesus bataru pemegareuji rugadu. Mare nou Jesus bataru pemegareu ure nono jorugu pemegareu umogadure. Mare jorugu ji karega inagoino. Boe emeardumode nou Jesus Cristo jiboe bataru pemegareuji. Nono emeartorumode ji. Nono Jesus umode ekinorudo ero pegareu piji ekawo turo pegareu morido pugeje. Dujire inagoino. Jesus Cristo ure nono Pao Kurireu mogadure rugadu. Mare bope doge eimijera ure boe erduwa bokwado nou Jesus Cristo jiboe bataru pemegareuji.
2CO 4:5 Čegi čemagokare čei boe ewiagai. Jesus Cristo jire čemagore boe ewiagai. Boe eimijera kurireu nure ema. Jesus ure čedudo toro tagae čewo tawie Pao Kurireu bataru remawuji. Mare tagimijera karegure čegi. Čemeardaere tu čewo tawie Pao Kurireu bataruji tu rugadu. Du jire čenagoino boe eiamedu boe ewiagai.
2CO 4:6 Marigudu Pao Kurireu akore: – Jorugu pemegareu uruguwo boečoji. Ainore Pao Kurireu akore tuwo jorugu pemegareu towuje boetoji turaga tabo. Čemeardure Jesus akaru pemegareuji. Nono čemeartorure Jesusji. Dukodire Pao Kurireu ure jorugu urugudo čedada jamedu. Mare jorugu ji karega inagoino. Ure čedaidu kurido pudui tuwo čerduwado tuwadaruji tuwo čerdae čemeardae pegareu barigu čebiji. Dujire inagoino. Rore aino čei dukodire čerduware Pao Kurireu rore jiboeji rugadu. Ro rakare rugadu. Meardu kurire boei rugadu. Jorduware Jesus Cristo jiwuge erduware Pao Kurireuji rugadu.
2CO 4:7 Pao Kurireu ure čerduwado. Mare boe kurireuge karegure čegi. Boe eimijerage karegure čegi. Čere nono pori mogadure. Mare pori ji karega inagoino. Čeragakare kodire inagoino. Pao Kurireu emare rakare boe jamedu boe piji. Ure turaga maku čenai čemeartoruwo makore čei duji.
2CO 4:8 Boe pegare čei tu tu je. Mare čegiarigodukare. Čerduwakare nuba boe mode čei tu tu je. Mare čemororamagadukare.
2CO 4:9 Ure boe pegado čeiwuge emagare. Mare čemedage bokwakare jamedu. Boe ere čedogorido rugadu. Mare ekare čedagedudo.
2CO 4:10 Jesus bire paro pegareu moriče. Čere boe ewie nou inoduji rugadu. Mare ia boe erdu pegare čemagore jiboeji dukodire etaidure tuwo čewido nono boe erore Jesus jitu mogadure. Ero pegare čei rugadu. Mare eroiwakare tuwo čewido raga. Dukodire boe erduware Jesus rakojere čedabo duji.
2CO 4:11 Čemeartorure Jesusji. Čere boe ewie Jesus akaru pemegareuji tu tu je. Dukodire ro pegareuge etaidure tuwo čewido tu tu je. Dukodire boe pegamode čei rugadu jii toro. Mare čemeartorukare egoi čei duji boe erduwo čemeartorure Jesus jitu duji rugadu. Dukodire čero pemegamode Jesus rore jiboeji jii toro čewimode du ka.
2CO 4:12 Čere boe ewie Jesus akaru pemegareuji dukodire ro pegareuge etaidure tuwo čewido. Dukodire ero pegare čei tu tu je. Du inodu tabo čemeartorukare boe ero pegare čei duji. Mare čere tawie Jesus akaru pemegareuji rugadu dukodire tameartorure Jesusji rugadu. Tamugu pemegamode apo rugadu jii toro rugadu.
2CO 4:13 Padure bapera kejewu Pao Kurireu bataru akore: – Imeartorure Pao Kurireuji dukodire ire boe ewie Pao Kurireu makore jiboeji. Čerore nono nou bataru mogadure. Čemeartorure Jesusji dukodire čere boe ewie Jesus jiboeji.
2CO 4:14 Pao Kurireu ure Pagimijera Jesus jewodudo pugeje. Emare umode čewodudo jamedu nono turore Jesus jitu mogadure. Dukejere umode čerududo tagabo baruto pudae.
2CO 4:15 Dukodire inagoino tameartoruwo Jesusji. Boe pegare čei mare čere čeragado nou inoduji boe pemegawo tai rugadu. Dukodire čenagoino tai tameartoruwo Jesusji rugadu. Nouia boe dogei jamedu čenagoino emeartoruwo Jesusji. Dukodire Pao Kurireu ro pemegareu umode tumaedo boe jamedu boe parugajeje. Nou boe eiamedu boe emagomode baruto Pao Kurireu bagai jamedu. Ekimadu raimode apo rugadu. Dutabore boe emode Pao Kurireu ie kurido rugadu.
2CO 4:16 Dukodire čegiarigodukare. Čewiri gigirigodunure čeiogi čebegagodunure dukodi. Čedagedugodunure rugadu. Čeromodukare nono čero mogadure pugeje. Mare Pao Kurireu ure turaga maku čenai tu tu je kodire čemeartorumode Pao Kurireu jitu akedumodukare. Čemeartoru kuričigore Pao Kurireuji rugadu.
2CO 4:17 Nono boe pegare čei mare boe karegano. Akedumode kuri je. Boe pegare čei mare Pao Kurireu umode boe pemegado čei baru tada nou boe pegare čei du moriče. Nou ro pemegare čeidu pemega kuričigomode rugadu. Akedumodukare rugadu.
2CO 4:18 Čewiagoro kurire baru tada boeji. Čewiagorokare moto keje boeji pugeje. Boe erdure jeture moto keje boeji mare jeture moto kejeboe akedumode kuri aino. Mare jeture baru tadaboe akedumodukare rugadu jii toro.
2CO 5:1 Woe moto keje pawiri pagodu ure nono ia bai pegagodu rogu mogadure. Mare bai ji karega inagoino. Pawire dukeje pawiri pagodu akedumode nono ia bai pegagodu rogu mogadure. Dujire inagoino. Pawimode mare Pao Kurireu umode ia pawai pemegado toro baru tada. Nono pamugumode nou Pao Kurireu ure towujewu bai tada. Nou Pao Kurireu ure towujewu pawai čewu akedumodukare rugadu jii toro rugadu. Mare bai ji karega inagoino. Pagodu pawiri maiwu jire inagoino tawiagai. Baru tada Pao Kurireu umode pagodu pawiri maiwudo rugadu. Nou pagodu pawiri maiwu akedumodukare rugadu jii toro.
2CO 5:2 Dukodire woe moto keje pagiarigodure nou baru tadawu pagodu pawiri maiwu bagai mare emare pagodu pawiri maiwu mode ema pugeje jii toro. Pegagodumodukare pugeje. Awu woewu pagodu pawiri pegare pai rugadu. Boe pegare pai woe awu moto keje. Pagaidukare pawiwo mare pagaidure nou pagodu pawiri maiwu bagai rugadu. Dukodire pabagare nou pagodu pawiri maiwu bagai toro pagododai pugeje. Nou pagodu pawiri maiwu akedumodukare pabiji pugeje.
2CO 5:5 Pao Kurireu emare romode aino pai. Ure Tuwari maku pagai pameartoruwo pudui turomode aino pai duji.
2CO 5:6 Dukodire imeartoru akedukare ji. Itukare raga toro nou baru tadawu Pagimijera uwai ka raga. Iragoje kimore woe awu moto keje ikodu iwiri tabo.
2CO 5:7 Pardukare raga pameartorure jiboeji paeku tabo. Mare du inodu tabo pameartorure ji rugadu.
2CO 5:8 Imeartoru akedukare ji rugadu. Itaidure ituwo awu moto piji baruto imuguwo Pagimijerapo toro rugadu.
2CO 5:9 Mare itaidure iwo Pagimijera jakarego i. Dukodire aidumode imugu raiwo woe moto keje du pegakare i. Aidumode iruduwo pudae kuri aino baruto du pegakare i jamedu.
2CO 5:10 Ia meri keje paiamedu boe padumode Jesus Cristo togi toro baruto. Jesus jorduware parore jiboe jamedu boeji woe moto keje. Dukodire pagaregodumode toro ae dukeje aiwomode paro pemegareu bagai, paro pegareu bagai jamedu. Nono umode paro pemegareu morido pagai. Umode paro pegareu morido pagai jamedu.
2CO 5:11 Čerduware čewo čeku kidugo Pagimijera Jesusji čemeartoruwo ji rugadu. Dukodire čemago raire boei rugadu emeartoruwo ji jamedu. Pao Kurireu jorduware čei rugadu. Imeardaere tarduware iduji jamedu.
2CO 5:12 Bataru očaroreuge karegure čegi. Dukodire čemagokaiago čerore jiboeji tawiagai pugeje. Mare boe etaidukare taiwowo ro pemegareuge ewagai. Ekare tuioku rawuje motureuge boe epiji. Ekudau areia moture mare emeardae pemegakare. Dukodire čere tawie boe remawuji tamago pemegawo čerore jiboeji nou boe ewiagai tamagowo ewadaru jipagi ewo tuioku ra ekudau areia motureuge boe epiji etaiwowo ro pemegareuge ewagai.
2CO 5:13 Boe egore čedaora bai bai nure mare pagare egoino. Čemeartoru kurire Pao Kurireuji rugadu. Dukeje iage egore čedaora pegakaie. Boe jokodu jire egoino. Čemagore tameartoruiago Pao Kurireuji rugadu.
2CO 5:14 Jesus Cristo bire boe emugato boe eiamedu boe ero pegareu moriče. Dukodire čerduware boe eiamedu boe ere tuwiago turo pegareu boe moriče. Mare Jesus Cristo bire boe emugato eiamedu boe ero pegareu moriče. Dukodire čerduware Jesus Cristo meardu kurire boei duji. Dukodire čemeartorure ji rugadu.
2CO 5:15 Mare Jesus bire boe emugato dukodire meartorure jiwuge emeartorumodukare tumeardaeji pugeje. Mare emeartorumode tu Jesusji. Emare bire ero pegareu moriče. Pao Kurireu ure jewodudo pugeje uwo nou meartorure puduiwuge ekinorudo.
2CO 5:16 Ia boe erore jiboe pemegare boe egai dukodi karega pardu pemegamode ji. Pagodumode Pao Kurireu meardaeji. Boe erore jiboe pemegare Pao Kurireu jakai dukodire pardu pemegamode nou boe erore jiboeji jamedu. Boe erore jiboe pegare Pao Kurireu jakai dukodire pardu pegamode nou erore jiboeji jamedu. Marigudu Jesus Cristo rore jiboe pegare ia boe egai. Dukodire pardu pegare ji jamedu mare pameartorukare ji kodi. Mare aino pardu pemegare Jesus Cristoji pameartorure ji kodi.
2CO 5:17 Mugu pemegare Jesus Cristo apowu rokare nono turo mogadure pugeje. Ro maiwu nure. Biapagare tumeardae maiwuji.
2CO 5:18 Marigudu jordu pegare Pao Kurireu jiwuge nure pagi. Mare aino ure tumedagedo pagi. Ure Jesus Cristo mugudo pagabo tuwo pardae pameardae pemegado paro pemegawo parokawo nono paro mogadure pugeje. Makore pai paduwo ia boe etae emeartoruwo Pao Kurireuji jamedu Pao Kurireu metagewo emage jamedu.
2CO 5:19 Boe emeartorure Jesus Cristoji dukodire Pao Kurireu ure tumedagedo emage. Tu awu jire čenagoino boe ewiagai. Pao Kurireu biagodure meartorure Jesus jiwuge ero pegareu piji. Ure čedudo boe etae rugadu čewo ewie awu Pao Kurireu bataruji emeartoruwo Jesusji rugadu Pao Kurireu uwo tumedagedo emage.
2CO 5:20 Ča. Čegi reo. Čemagore tai tameartoruwo Jesus Cristoji. Mare čewadaru karega. Pao Kurireu emare akoino tameartoruwo Jesusji rugadu. Dukodire čenagoino tai tameartoruwo Jesus Cristoji rugadu. Pao Kurireu umode tabemegado dukodire jordu pegare Pao Kurireu jiwuge emodukare tagi pugeje. Umode tumedagedo tagi rugadu.
2CO 5:21 Jesus Cristo ro pegareu bokware. Mare Pao Kurireu ure Jesus barigu boe ero pegareu mugato biwo boe ero pegareu moriče. Dukodire Pao Kurireu umode boe edo bato pui pudae. Mare paga karega. Boe emeartorumode Jesusji dukejere emugu pemegamode Jesus apo. Dukejere Pao Kurireu umode epemegado ero pemegawo nono turo mogadure.
2CO 6:1 Čemaragodure Pao Kurireu apo čewo boe ewie Pao Kurireu bataruji. Tameartorure Pao Kurireuji dukodire ure turo pemegareu bu tawugeje. Mare itaidure inogwamaguduwo tai. Tagaba tagera ra tameartorure Pao Kurireu jitu piji.
2CO 6:2 Tawiapagado Pao Kurireu bataruji rugadu. Akore: – Itaidure iro pemegawo tai rugadu dukodire ikare tawadaru pogurudo. Tagogwamagudure i bagaiboe ire udo turugadu. Dukodire itaidure iwo taginorudo taro pegareu piji tagawo taro pegareu morido pugeje. Dukodi ire ikera maku tagai. Ainore Pao Kurireu akore boei. Taipagado iwadaruji! Tageragu Pao Kurireu meardae pemegareuji awu meriji. Dukejere ro pemegamode tai. Umode taginorudo taro pegareu piji awu meriji rugadu tagawo taro pegareu morido pugeje.
2CO 6:3 Boe etaiwore čerore jiboeji. Dukodire čedaidure čero pemegawo boei tu tu je. Čedaidukare čewo boe emeartoru akedudo Pao Kurireuji.
2CO 6:4 Pao Kurireu utugarege nure čegi. Dukodire čemeartorure ji tu tu je. Boe erduware nou inoduji. Boe erduware ia boe ero pegare čei duji jamedu. Mare čero pegakare ei ero pegare čeidu jipagi. Boe pegare čei mare čemagokare boeji. Boe rakare čei mare du inodu tabo čere čeragado nou inoduji čero pemegawo rugadu.
2CO 6:5 Boe ere boeto čei. Boe ere čedugu baičoreuto. Boe eregodure čedae boe korire pudui dutabo. Čemeardae koiare čere čemaragodae rakado čei. Kodire čenudukare. Čenogwagekare.
2CO 6:6 Mare Pao Kurireu utugarege nure čegi. Dukodire čemeardae pemegare. Čere čerduwado boe pemegareuji. Čewudugugodure boebo. Dukodire čero pemegare boei. Boe erduware čerore jiboeji dukodire erduware čei jamedu. Pao Kurireu Uwari ure čero pemegado aino boei. Čemeardu kurire boei rugadu. Čegare boe ekiripagado.
2CO 6:7 Čemagore tu Pao Kurireu bataru remawuji. Pao Kurireu ure turaga maku čenai. Čero pemegareu tabore čemode nou batrarodureuge ewadaru pogurudo. Čero pemegare kodire boe erduware čei rugadu.
2CO 6:8 Ia boe emago pemegare čei mare iage emago pegare čei. Ia boe emago pemegare čerore jiboeji mare iage emago pegare čerore jiboeji. Boe jokodu jire čenagoino boe ewiagai tu tu je mare iage egore čewadrarodunuie.
2CO 6:9 Boe eiamedu boe erduware čei. Mare iage egore tuiorduwakaie čei. Čewikare raga. Mare iage emeardaere čewie marigudu rugadu. Boe ere boe rakado čei mare ekare čewido.
2CO 6:10 Boe ere čegiarigo. Mare du inodu tabo čegarere čei tu tu je. Čeno diero bokware mare čere boe pemegado jiwuge emagare. Boe egore marenarue nuie čegi. Mare čenoe kurireu jeture toro baru tada.
2CO 6:11 Corinto ba kurireu kejewuge nure tagi. Čemedage remawuge nure tagi. Dukodire čere čemago pemegado tai. Čemeardu kurire tai rugadu.
2CO 6:12 Čegare čegera ra čemeardu kurire tai dupiji. Mare tagi tare tagera ra tameardu kurire čei dupiji.
2CO 6:13 Dukodire inogituwanure tai nono boe enogituwa moga torei dumogadure. Ča tameardu kurido čei rugadu nono čemeardu kurire tai dumogadure.
2CO 6:14 Tamaragodumode meartorukare Jesus jiwugebo mare tamediakaba nou meartorukare Jesus jiwugeče. Ro pemegareu mugu pemegamodukare nou ro pegareugebo. Jorugu boečo edu jaemode pui.
2CO 6:15 Jesus Cristo meardaekare nono bope doge eimijera Satanás meardae mogadure. Meartorure Jesus jiwu umodukare tumeardaedo nono meartorukare Jesus jiwuge emeardae mogadure.
2CO 6:16 Pao Kurireu ure tuwaido tuginai bope doge ewai piji. Pao Kurireu mugukare tuwai tada pugeje. Pao Kurireu Uwari mugure meartorure Jesus jiwugebo. Dukodire nou meartorure Jesus jiwuge ere nono Pao Kurireu uwai mogadure. Mare bai ji karega inagoino. Pao Kurireu Uwari rakojere meartorure Jesus jiwuge eiamedu boebo. Dujire inagoino. Pao Kurireu bimodukare rugadu. Marigudu rugadu akore: – Imugumode boebo. – Emeartorumode tu i rugadu. – Iwobe emode emage. Pao Kurireure akoino.
2CO 6:17 Dukodire ainore ia Pao Kurireu batarure pugeje. Akore: – Tagera ra ro pegareuge epiji. – Tadu jaedo epiji jamedu. – Taro pegamodukare dukeje tamodukare tabegado. – Dukodire imode ikeragu tai iwo ikera upodo tagabo. – Tao mode tu imi. – Itore areme itore ime mode tu tagi jamedu. Ainore Pao Kurireu akore. Emare rakare boe eiamedu boe epiji.
2CO 7:1 Imeardu kurire jiwu imedage nure tagi. Pao Kurireu ure tuwadaru pemegado pai parduwawo nuba romode pai duji rugadu. Dukodire pawo pagera ra paro pegareu piji paro pemegawo pugeje. Pameartoru kuriwo Pao Kurireuji pawo paro pemegado jakai rugadu.
2CO 7:2 Tameardu kurido čei rugadu. Čero pegakare boei. Čegare boe emeardae pegado boei. Čegare čegeragu boe enoeji boe epiji.
2CO 7:3 Mare imago pegawo tarore jiboeji dukodi karega inagoino. Marigudu ire tawie. Čemedage mode tagi rugadu. Iwimode tagabo mare imodukare ikera ra tabiji. Imedage mode tagi jii toro rugadu. Dukodire inagoino tai tameardu kuriwo čei jamedu nono čemeardu kurire tai dumogadure.
2CO 7:4 Iorduware tameardaeji rugadu. Inojarore tai rugadu. Boe pegare čei rugadu mare du inodu tabo iagarere i. Iorduware iraga kimore duji.
2CO 7:5 Čedaregodure Macedônia moto ka. Mare čeroiwakare čewo čedamudo. Boe ere boe pegado čei. Meartorukare Jesus jiwuge etokire čei. Čemororamagadure rugadu.
2CO 7:6 Mare Pao Kurireu ure boe egaredo pudui. Ure čegaredo čei rugadu. Ure čemedia Tito arego čedae dukodi čare čegarere čei rugadu.
2CO 7:7 Nou čemedia Tito aregodure čedae tabiji dukeje readodure tarore jiboeji čewiagai. Dukodire čemororamagadukare tawagai pugeje. Tito readodure tarore jiboeji čewiagai. Makore taro pemegaie pudui. Dukodire tare čegaredo čei rugadu. Tito makore tagaiduie tarduwo i pugeje. Makore tagiarigoduie taro pegareuji. Taie tarugadu tamago pemegawo irore jiboeji boe eimijerage ewiagai. Iagarere tai. Dukodi čare iagarere i jii aino rugadu.
2CO 7:8 Nou ire maku tagaiwu atugoreboe boetojiwu ure tagiarigo. Mare imi ipogurukare nou iwadaruji. Ire maku tagai iwo tawie taro pegareuji. Dukodire tagiarigodure mare jii toro karega. Iorduware tagiarigodure duji dukodire ikiarigoduiago jamedu.
2CO 7:9 Ire tagiarigo. Mare taro pegareu jire tagiarigodure dukodire tare tagera ra nou taro pegareu piji. Pao Kurireu emare ure tado tagera ra nou taro pegareu piji tagiarigodure taro pegareuji dukodi. Dukodire čegare boe pegado tai. Aino čare iagarere i rugadu.
2CO 7:10 Boe ekiarigodumode turo pegareuji. Emeartorumode Pao Kurireuji uwo edo tugera ra turo pegareu piji. Dukejere Pao Kurireu umode ekinorudo ero pegareu piji ekawo turo pegareu morido pugeje. Dukodire boe egaregodumode pudui rugadu. Mare boe ekiarigodumode turo pegareuji mare emeartorumodukare Pao Kurireuji dukeje ewimode turo pegareu moriče rugadu.
2CO 7:11 Mare tagare aino. Tagiarigodure taro pegareuji mare tameartorure Pao Kurireuji. Nono tameardae ure turugadu nono imeardae mogadure. Aino tagaidukare boe ero pegareuji pugeje. Tagorigodure boe ero pegareuji. Tagaidukare boe ero pegareuji pugeje. Tameartorure Jesusji rugadu. Tare tarugadu tawo boe rakado ro pegareugei ero pegareu boe moriče. Aino čare iorduware tai. Taro pemegare nou ire tawie jiboe kori rugadu.
2CO 7:12 Ire nou atugoreboe boetojiwu maku tagai. Mare paga karega. Ikare maku nou ro pegareu ai. Ikare maku nou boe pegare jiwu ai jamedu. Mare ire nou atugoreboe boetojiwu pemegado iwo maku tagai iwo tarduwado nuba tare duji. Iwo tarduwado tameardu kurire čei duji. Pao Kurireu jorduware tameardu kurire čei duji rugadu.
2CO 7:13 Dukodire tare čegaredo čei. Mare tu čegi karega. Tare Tito jakaredo pudui jamedu. Tito readodure nou inoduji čewiagai. Dukodire čegarere čei rugadu jamedu.
2CO 7:14 Imago pemegare tarore jiboeji Tito biagai marigudu. Nono Tito aregodure tagae dukeje tarore ji nono taro mogadure rugadu. Čemago kigodure boe remawuji tawiagai rugadu. Nono čemago pemegare tarore jiboeji Tito biagai. Boe jokodu jire čenagoino Tito biagai jamedu.
2CO 7:15 Dukodire Tito meardu kurire tai rugadu. Meardu kurimode tai rugadu. Tito aregodure toro tagae dukeje tare tado tarugadu tameartoruwo Tito ure tawie jiwu Pao Kurireu bataruji rugadu. Tito aregodure toro tagae tare tagera upodo apo tagaidu tabo rugadu. Dukodire Tito biabutumode taro pemegare puduiboe keje kodire meardu kurimode tai rugadu.
2CO 7:16 Aino čare iorduware tai. Tameartorure Jesus bataru remawuji rugadu. Dukodire iagarere i tai rugadu.
2CO 8:1 Čemedage nure tagi. Čedaidure čewo tawie Pao Kurireu rore jiboeji Macedônia moto keje. Pao Kurireu ro pemegare nou meartorure Jesus jiwugei toro nou moto keje.
2CO 8:2 Boe pegare ei rugadu. Boe rakare ei rugadu. Mare egarere pudui nou inodu kujiagi rugadu dukodire ere diero kurido rugadu tuwo maku Pao Kurireu ai. Marenarue doge nure emage mare du inodu tabo ere diero kurireu maku Pao Kurireu ai.
2CO 8:3 Etaidure tuwo tugera maku Judéia moto kejewuge meartorure Jesus jiwuge etai rugadu. Dukodire enogwamagudu maere i iwo awu eno diero reko toro Judéia moto kejewuge etae. Nono ere to diero rugadu maku taidu tabo etai. Dukodire eno diero bokware nono ebo rugadu.
2CO 8:5 Čemeardaekare eromode aino duji. Ere tumagu Pao Kurireu ai tumeartoruwo ji rugadu. Dukodire ere tugera maku čenai jamedu Pao Kurireu meardaere jiboe umogadure.
2CO 8:6 Dukodire čemagore Titoji uwo tarduwado jamedu. Čare Tito ure tawie nou Judéia kejewuge eno diero bokware duji. Nou Tito mugumode tagabo tamaragoduwo diero bagai tawo maku nou Judéia kejewuge meartorure Jesus jiwuge ewagai jamedu. Nono tamode tagera maku etai tagaidu tabo.
2CO 8:7 Tameartoru kurire Jesusji. Tarduware Pao Kurireu makore jiboeji rugadu. Dukodire tamagore Pao Kurireu bataruji rugadu. Tagaidure tawo tagera maku boe etai rugadu. Tameardu kurire čei rugadu. Dukodire čenagoino tai tameardu kuriwo awu Judéia kejewugei meartorure Jesus jiwugei tawo tagera maku etai dubagai. Tagera maku etai tagaidu tabo rugadu.
2CO 8:8 Ikaregure tameartorudo imeardaeji iwadaru rakareu tabo. Mare itaidunure iwo tarduwado ia boe erore jiboeji tarowo nono ero mogadure. Ere tudo turugadu tuwo tugera maku boe doge etai. Tare tado tarugadu tawo tagera maku boe doge etai jamedu dukeje boe erduwamode tameardu kurire boei duji.
2CO 8:9 Tarduware Pagimijera Jesus Cristo ro pemegareuji. Jesus oe kurire baru tada. Mare ure tugera ra toe rugadu boe piji tuwo turawuje mato moto ka pagae. Rakojere woe dukeje oe bokware rugadu. Mare paga karega. Aregodure tuwo boe enoe kurido toro baru tada.
2CO 8:10 Jawu joruji tare tameardae tawuje tawo diero maku nou Judéia moto kejewuge ewagai. Taigoiare tare tameardae tawuje tawo diero reko ewagai. Tare diero maku. Mare tagare diero rugadu boe maku nou boe ewagai. Aino čare nou diero rugadu boe maku toro ewagai rugadu.
2CO 8:11 Tarodo nono tameardae mogadure. Taiamedu boe tago diero rogu to čo čo pui tawo maku tagaidu tabo Judéia kejewuge meartorure Jesus jiwuge ewagai.
2CO 8:12 Pao Kurireu jorduware tagoeji. Aidure tawo ia maku tagaidu tabo. Mare Pao Kurireu okwamagudukare tai ia padukare tagaboboe bagai.
2CO 8:13 Tagoe kurire. Iage enoe kurikare. Nou enoe kurikareuge etaidumode tuwo ia toe maku jamedu dukeje pegakare. Mare itaidure tawo diero maku rugadu marenarue doge etai tago diero kurire kodi. Toro ia meri keje tago diero akedumode dukeje boe emode tugera maku tagai jamedu boe erduware taro pemegare dukodi. Nono boe eiamedu boe ero pemegamode pu jamedu boeji.
2CO 8:15 Padure bapera kejewu Pao Kurireu bataru akore: – Pao Kurireu ure boe eke barigu mato baru piji boe etae ewo tugeragu tugeji. Ia boe umode tugeragudo kurido nou tugeji dukeje umode pedo tuwobei nou meriji rugadu. Nono nouia uwobe ure tugeragu jiboe kurimodukare dukeje umode turugadu ji. Nono eiamedu boe ekere turugadu eiamedu boei rugadu. Ainore Pao Kurireu batarure.
2CO 8:16 Imagore Pao Kurireuji imedu Tito paru tabo. Pao Kurireu ure imedu Tito aidudo tuwo tugera maku tagai nono čedaidu mogadure.
2CO 8:17 Čenogwamagudure Titoji utuwo tawagai uwo tugera maku tagai dukeje aidure rugadu. Akore: – Marigudu itaidure ituwo toro ewagai rugadu. Ainore Tito akore.
2CO 8:18 Dukodire čere utudo toro tawagai rugadu. Nono čere ia pamedia utudo apo toro tawagai jamedu. Meartorure Jesus jiwuge eiamedu boe emago pemegare awu pamedia rore jiboeji. Etaidure awu pamedia rore jiboeji rugadu. Makore Jesus bataru pemegareuji rugadu boe ewiagai.
2CO 8:19 Awu woewuge meartorure Jesus jiwuge eiamedu boe ere tugeragu awu pamediaji utuwo čedabo toro Judéia moto ka čewo nou diero reko toro ewagai. Čemeardu kurire boei dukodire čere čegera maku boe etai emago pemegawo Pagimijera Jesusji. Čere čegera maku boe etai erduwawo čedaidure pudui duji rugadu.
2CO 8:20 Boe ere diero maku čenai čewo reko toro Judéia moto kejewuge ewagai. Dukodire čemode reko toro rugadu.
2CO 8:21 Pagimijera Jesus jorduware čerore jiboeji. Boe eiamedu boe erduwamode čerore jiboeji jamedu. Dukodire čero jetorore nou diero tabo rugadu.
2CO 8:22 Nono čere ia pamedia utudo toro tawagai nou Tito magebo. Čedaiwore awu pamedia rore jiboeji marigudu. Ro pemegare. Ure tudo turugadu tuwo tugera maku boe etai rugadu. Emare jorduware tai rugadu. Dukodire aidure tuduwo toro tawagai tuwo tugera maku tagai rugadu.
2CO 8:23 Tito maragodure itabo rugadu. Imedia nure ema rugadu. Ia pamedage etumode apo jamedu toro tawagai. Emagere emeardaere nono awu meartorure Jesus jiwuge emeardae mogadure jamedu. Emode tarduwado nuba boemode woe duji. Ero pemegare dukodire boe emeartorure Jesus Cristoji rugadu.
2CO 8:24 Tito mage etaregodumode tagae rugadu. Nono tameardu kurido ei rugadu. Tameardu kurimode ei dukeje awu woewuge emeartorure Jesus jiwuge erduwamode tarore jiboeji. Čemago pemegare tarore jiboeji awu woewuge meartorure Jesus jiwuge ewiagai. Taro pemegamode Tito magei dukeje awu woewuge erduwamode boe jokodu jire čenagoino pudui duji.
2CO 9:1 Inure awu bapera atugodo iwo maku tawagai iwo tarduwado diero makudumode meartorure Jesus jiwuge etai. Judéia moto kejewuge meartorure Jesus jiwuge etaire nou diero makudumode rugadu. Mare tarduware nou inoduji marigudu.
2CO 9:2 Tagaidure tawo tagera maku etai rugadu. Iorduware. Dukodire ire Macedônia moto kejewuge meartorure Jesus jiwuge ewie nou tameardaeji rugadu. Inagore: – Acaia moto kejewuge meartorure Jesus jiwuge ere tudo turugadu tuwo diero maku Judéia moto kejewuge ewagai marigudu. Ainore inagore ei. Tare tarugadu tawo diero maku tagaidu tabo dukodire awu Macedônia kejewuge etaidure tuwo ia diero maku Judéia moto kejewuge ewagai jamedu.
2CO 9:3 Nono ire awu pamedage Tito mage etudo toro tawagai tawo nou diero maku etai ewo reko toro Judéia moto kejewuge ewagai. Mare tamodukare maku dukeje boe emeartorumodukare čemagore jiboeji pugeje. Mare imeartorure tamode nou diero maku etai rugadu duji.
2CO 9:4 Mare itaregodumode tagae awu pamedagebo mare tamodukare tarugadu tawo maku dukeje čebogurumode tarore jiboeji. Tabogurumode jamedu.
2CO 9:5 Dukodire ire awu pamedage Tito mage etudo itododai awu atugoreboe tabo toro tawagai tawiabutuwo tamagore jiboe keje. Tagagore tamoduie diero maku nou Judéia moto kejewuge etai rugadu. Nou tago diero tamode makuwu udo turugadu tawo maku etai. Itaregodumode tagae dukeje tare nou diero udo turugadu tawo maku rugadu tagaidu tabo. Boe eiamedu boe erduwamode nou inoduji rugadu.
2CO 9:6 Tarduware. Boe eno boepa biagare tu je kodire nou enoe rogu kurimodukare nou boepa tada. Mare boe eno boepa kurireu kejere enoe kurimode nou boepa tada jamedu.
2CO 9:7 Boe ekare turagado tai tawo tago diero maku. Tamode tameardae tawuje tawo diero kurireu maku Judéia kejewuge meartorure Jesus jiwuge boe etai. Du pegakare. Tamode tameardae tawuje tawo diero biagareu maku. Du pegakare. Mare nou tameardaere jiboe rugadu boe maku tagaidu tabo, taegare tabo. Pao Kurireu aidu kurire nou ure to diero maku tiagare tabowugei.
2CO 9:8 Tamode maku dukeje Pao Kurireu umode boe pemegareboe maku tagai. Tagoe bokwamodukare pugeje. Tagoemode tawo maku marenarue doge etai rugadu. Taro pemegareu kurimode tu tu je rugadu.
2CO 9:9 Ainore padure bapera kejewu Pao Kurireu batarure: – Pao Kurireu ure boe kurido marenarue doge etai. Ro pemegare ei taidu tabo jii toro. Akedumodukare rugadu.
2CO 9:10 Pao Kurireu umode boe a maku boe etai ewo tugu to boepato. Umode amireu maku uke bokwareuge etai ewo kowuje. Emare umode boe pemegareu kurido toro tagai jamedu. Tamode diero maku meartorure Jesus jiwuge etai dukeje Pao Kurireu umode tago diero kobo kurido rugadu. Tago diero umode nono boe a mogadure. Boe ere boe a tugu dukeje boture rugadu. Dukeje enari kurire boe a tabo. Dukodire nou boe a makare pugeje nou boe a mitodu piji. Aino tago diero umode nono nou boe a moga mitotu je dumogadure. Mare boe a ji karega inagoino. Pao Kurireu umode tago diero kurido rugadu. Dujire inagoino.
2CO 9:11 Pao Kurireu umode tago diero kurido tu tu je tawo pedo oe bokwareuge etai jamedu. Nono boe ekimadumode Pao Kurireu apo taro pemegare pudui dukodi. Nono čemode diero reko toro Judéia kejewuge etae rugadu.
2CO 9:12 Tamode diero maku meartorure Jesus jiwuge etai nou marenarue doge etai nono eno diero mode rugadu. Tamode diero maku dukodire boe ekimadumode Pao Kurireu apo tabaru tabo rugadu.
2CO 9:13 Tamode diero maku meartorure Jesus jiwuge marenarue doge etai dukeje boe erduwamode tai rugadu. Tagagore tameartoruie Jesusji rugadu. Nono erduwamode boe rugadu jire tagagoino duji. Tameartoruie Jesusji rugadu. Tare tago diero maku etai rugadu. Tare maku ia boe etai jamedu. Dukodire nou boe emago pemegamode Pao Kurireuji rugadu.
2CO 9:14 Erduwamode Pao Kurireu ro pemegare tai duji rugadu. Nono etaidu kurimode tai rugadu. Emagomode baruto Pao Kurireu bagai tabaru tabo jamedu.
2CO 9:15 Mare Pao Kurireu ure tonaregedu maku pagai boetoji paro pegareu moriče. Paroiwakare rugadu nou paro pegareu mori bagai. Dukodire pagimadumode Pao Kurireu apo rugadu.
2CO 10:1 Paulo nure imi. Iragojere tagabo dukeje boe egore imago rakakaie boei. Boe egore inojarokaie iwadaruji. Mare iragojekare nono tagabo dukeje ia boe egore iragaie imago rakawo tai tae paga keje. Iragojekare tagabo mare itaidure inogwamaguduwo tai. Itaidure imago pemegawo tai nono Jesus mako mogadure. Itaidure iwo iro butugudo tai rugadu nono Jesus Cristo ro mogadure.
2CO 10:2 Itaidure inogwamaguduwo tai. Tameartoruwo awu atugo padure bapera kejewu iwadaruji dukeje imago rakamodukare tai pugeje. Mare iage egomode čemeardaie nono meartorukare Jesus jiwuge emeardae mogadure dukeje imago rakamode ei rugadu ewadaru jipagi.
2CO 10:3 Čeragojere meartorukare Jesus jiwugebo rugadu. Mare čemeardaekare nono emeardae mogadure. Čerugodumode mare čerugodumodukare nono emeardae mogadure.
2CO 10:4 Čerugodumodukare baiga tabo. Pao Kurireu ure čeragado čerugoduwo bope doge etuwairei. Bope uwari umode boe ewadrarodudo Pao Kurireu bataruji dukeje čemode ewadaru to eiagi rugadu. Dujire inagoino tai.
2CO 10:5 Boe enojaromode tuwadaruji Pao Kurireu bataru piji. Mare pagare egoino. Čemode nou ewadaru očaroreu to eiagi rugadu. Čemode čemeardae rugadu udo turugadu čemeartoruwo Jesus Cristo bataruji rugadu.
2CO 10:6 Tagi jamedu tameartoru kurimode Jesus Cristo makore jiboeji jamedu. Mare ia tagi tamode tagera ra tameartorure Jesus makore jiboe piji dukeje čemode boe rakado tai tameartoruwo Jesus makore jiboeji pugeje.
2CO 10:7 Ia tagi tarduwakare čei du inodu tabo tameardae pegare čei tamago pegare čei. Mare čemeartoru kurire Jesus Cristoji nono tamogadure. Tameartorure tu Jesus Cristoji rugadu. Tameartorukare ia boei. Čegi jamedu čemeartorukare ia boei jamedu. Čemeartorure tu Jesus Cristo bataruji nono tameartorure jitu mogadure.
2CO 10:8 Jesus ure nou meartorure puduiwuge eimijerado imi. Ure iorduwado rugadu. Mare paga karega. Ure iorduwado iwo tameartoru rakado pudui. Imodukare tameartoru akedudo tabiji. Dukodire ipogurukare imago raiwo Pao Kurireu bataru remawuji tawiagai rugadu. Inure tawie boe remawuji rugadu.
2CO 10:9 Itaidukare tabaguduwo awu ino atugoreboe aregodumode tagae duji.
2CO 10:10 Iage egomode: – Paulo rakojere čedabo dukeje mako rakakare čei. Mako pegakare čei. Pogurure tumagowo čei kodi. Mare rakoje jaere čebiji dukejere mako rakare nou ture towu atugoreboeto mato čewagai. Ainore ia boe egomode i rugadu.
2CO 10:11 Pagare awu boe egoino iwadaruji. Ikare iwadarudo pobe. Iwadaru ure mitotu je. Iragojere tagabo dukeje imagore jiboe ure nono padure awu atugoreboe kejeboe umogadure. Iromode nono awu atugo padure bapera kejeboe mogadure.
2CO 10:12 Čegare nono nou očarore tuwadaru jiwuge emogadure. Erduwa bokware. Ere tumeardae pegareu tumeardae pemegareu tawuje taora piji tu tumeardae tabo rugadu. Dukodire erdu pegare tumedage erore jiboeji. Mare pudumi erdu pegakare turore jiboeji. Dukodire inagoino erduwa bokware rugadu.
2CO 10:13 Mare Pao Kurireu ure čemaragodae maku čenai čewo boe ewie tuwadaru remawuji. Čenojaromodukare ia čemaragodaeji. Čenojaromode tu nou Pao Kurireu ure maku čenaiwu čemaragodaeji. Čere tawie Pao Kurireu bataru remawuji rugadu dukodire čenojarore nou čemaragodaeji.
2CO 10:14 Pao Kurireu koiare ure čedudo toro tawagai. Dukodire čere tawie Jesus Cristo bataru pemegareuji.
2CO 10:15 Ia boe etaidumode tumaragoduwo tagabo mare čewiagorokare nou inoduji. Pao Kurireu ukare awu emaragodae maku čenai. Čemaragodae ukare nono ero mogadure. Čemeardaere tu tameartoru rakawo Jesusji. Dukodire čedaidure čemaragoduwo rugadu tameartoru rakawo Jesusji rugadu Pao Kurireu meardaeji.
2CO 10:16 Čeromode aino tai dukeje čedumode tabiji toro ia boe ewagai pugeje čewo ewie Jesus bataru pemegareuji jamedu. Boe ekare nou iage ewie raga dukodire čedaidure čeduwo toro ewagai jamedu. Emeartorumode Jesusji dukeje čenojaromode ei jamedu.
2CO 10:17 Padure bapera kejewu Pao Kurireu bataru akore: – Boe enojarowo Pao Kurireu rore jiboeji tu rugadu.
2CO 10:18 Pameardae pemegamode pamaragodaeji mare pagatu je. Paegai ure turugadu. Mare Pagimijera Jesus jakai ukare turugadu. Mare Pagimijera Jesus aidumode nou pamaragodae jitu keje parduwamode pamaragodae ure turugadu duji.
2CO 11:1 Očarore puduiwuge emago pemegare tu pudui mare pagatu jere egoino. Emago paga paganure nou tuwadaruji. Imago pemegamode i dukeje boe egomode imago paga paga nuie iwadaruji jamedu. Ča imago pemegamode i tawiagai rugadu. Mare tamode tawia tugu iwadaruto dukeje tarduwamode imago paga karegure iwadaruji tawiagai. Boe jokodu jire inagoino tawiagai rugadu.
2CO 11:2 Imedu makomode ia imeduji tumoduie tonaregedu nogwaredu maku ai muguwo apo dukodire uo jetu pemegamode nou tonaregedu nogwareduji jii toro mugumode nou imedu apo du ka rugadu. Jetu pemegamode tonaregedu nogwareduji mugukawo toro ia imedu apo mare muguwo tu nou togwamagudure jiwu imedu apo rugadu. Tare nono nou nogwaredu mogadure. Ire nono nou nogwaredu uo mogadure. Mare nogwaredu ji karega inagoino. Uo ji karega inagoino jamedu. Imagore tai tameartorukawo ia boei. Tameartoruwo tu Jesus Cristoji rugadu. Du jire inagoino. Dukodi čare inagoino tai. Tameartorukaba ia boei. Tameartoru rakado tu Jesus Cristoji rugadu. Awu imeardae ure nono Pao Kurireu meardae mogadure. Emare aidure rugadu tameartoruwo tu pudui rugadu.
2CO 11:3 Mare boe etaregodure tagae tuwo tarduwado Jesusji. Mare nou emagore jiwu Jesus ukare nono awu čemagore jiwu mogadure. Ewadrarodunure tawiagai. Mare tameartorure nou ewadrarodaeji. Emagore jiboe ure tuginai. Emagokare Pao Kurireu Uwari bataruji tawiagai. Emagokare Jesus bataru pemegareuji tawiagai. Čegi čere tarduwado Pao Kurireu Uwari remawuji. Čere tarduwado Jesus bataru remawuji. Emagere ere tarduwado ia tuwari tuginaiwuji. Egore tameartoruwo tuwadaruji tawo taginorudo. Mare ewadaru ukare turugadu. Mare tagaidure ewadaruji. Dukodire imororamagadure tawagai. Tameartorumode ewadaruji dukeje ewadaru umode tameardaere jiboe pegado. Ewadaru umode tado tawia ra Jesus Cristo bataru piji. Tameartorumodukare ji pugeje. Emode taekiripagado nono awagu rore aredu boetojiwu Eva jitu mogadure ure jekiripagado tuwadrarodae tabo dumogadure.
2CO 11:5 Nou boe egore uture Jesus bataru tabowuge enuie pudumi. Egore tumago motuie rugadu Pao Kurireu bataruji boe ewiagai. Mare Pao Kurireu bataru remawu pa? Emago kana Pao Kurireu bataru ji rugadu? Nou uture Jesus bataru tabowu remawu nure imi.
2CO 11:6 Egore iorduwakaie imago motuwo boei. Boe rugadu. Iorduwakare imago motuwo boei rugadu. Mare iorduware jiboe kurire rugadu erduware jiboe kori. Ire tarduwado marigudu. Dukodire tarduware i marigudu. Tarduware boe jokodu jire inagoino tawiagai duji.
2CO 11:7 Imagore Pao Kurireu bataruji tawiagai tarduwawo Jesus bataru pemegareuji. Mare imagokare tai tawo morido inai. Nou iage ere tado morido pudai. Imi ikare ino diero kurido. Nou iage ere to diero kurido. Ča iro pegareu pa? Iro pega karegure tai dukodire ire nono marenarue doge emogadure iwo tawie Jesus bataruji boe pemegawo tai rugadu.
2CO 11:8 Imagore Pao Kurireu bataruji tawiagai mare tagare diero maku inai nou imaragodae moriče. Ia mugu jaereuge meartorure Jesus jiwuge eigoiare ere diero maku inai. Dutabore ire akirodo ikeji inoe rogu boeji imuguwo nono tagabo.
2CO 11:9 Iragojere tagabo dukeje ino diero bokware rugadu. Mare imagokare tai ia tago diero bagai inoče. Nou Macedônia moto kejewuge meartorure Jesus jiwuge etaregodure nouia diero rogu tabo tuwo maku inai iwo akirodo ike roguji inoe rogu boeji. Nono iromode tai pugeje nono nou iro mogadure rugadu. Imagomodukare tai iaboe bagai inai rugadu.
2CO 11:10 Jesus Cristo bataru remawu meture itaora tada rugadu. Dukodire imode iwadaru udo turugadu tawiagai. Awu irore jiboe imagomodukare tai tawo morido inai. Tamodukare iwarigu awu irore aino dupiji. Acaia moto kejewuge eiamedu boe emodukare iwarigu awu irore aino dupiji rugadu.
2CO 11:11 Inogwamagudukare tai diero bagai dukodire ia tagi tameardaere imeardu kurikare tai duji. Dukodiba tameardaere aino? Imeardu kurire tai dukodire irore aino tai. Pao Kurireu jorduware boe jokodu jire inagoino tai duji.
2CO 11:12 Iromode nono awu irore jiboe mogadure rugadu. Iage egore uture Jesus bataru tabowuge enuie pudumi. Mare pagare egoino. Dukodire itaidukare boe emeartoruwo nou boei. Nono eroiwamodukare tumago pemegawo turore jiboeji. Enogwa aregodumodukare čemagore jiboe ka. Emago pagarumode tawiagai.
2CO 11:13 Uture Jesus bataru tabowuge remawuge karegure emage. Ewadrarodure turore jiboeji boe ewiagai. Etaidure tuwo boe ekiripagado. Egore uture Jesus bataru tabowuge enuie pudumi. Mare pagare egoino. Ere tudo nono uture Jesus bataru tabowuge emogadure. Mare pagare egoino.
2CO 11:14 Mare paga karega. Erore nono tugimijera pegareu ro mogadure. Ekimijera Satanás umode tudo nono baru tadawu jorugu pemegareu mogadure jamedu boe emeartoruwo pudui dubagai. Umode turo pemegado boe egai boe ewo tie mekido tiagwai. Emeartoruwo tu pudui. Emeartorukawo Pao Kurireuji pugeje.
2CO 11:15 Dukodire nou boe erore nono nou tugimijera Satanás ro mogadure. Ere tudo nono ro pemegareuge emogadure. Mare pagare eroino. Toro ia meri keje boe pegamode ei rugadu nou ero pegareu jamedu boe moriče.
2CO 11:16 Iwo tawie pugeje. Jorduwa bokwareu karegure imi rugadu. Mare imago pemegamode irore jiboeji nono nou jorduwa bokwareuge emago mogadure. Dukodire tameardaemode jorduwa bokwareu nure imi duji. Mare tawiapaga pemegado iwadaruji tameartoruwo i nono tameartoru moga nou jorduwa bokwareugei dumogadure.
2CO 11:17 Pagimijera Jesus aidukare imago pemegawo irore jiboeji. Mare tameartorure nouia jorduwa bokwareugei. Jorduwa bokwareuge nure emage. Mare tameartorure ei. Dukodire imagomode nono emago mogadure tameartoruwo imagore jiboeji jamedu.
2CO 11:18 Mare mako pemegare turo jiwuge emagare. Dukodire inagomode nono ego mogadure.
2CO 11:19 Tameardaere tarduwaie rugadu. Mare tameartorure jorduwa bokwareugei.
2CO 11:20 Boe etaidure tuwo tudugaregedo tagi. Nono tamaragodure etai. Etaidure tuwo toe kurido tagoe tabo. Nono tare tagoe maku etai. Ere taro akedudo. Nono tarokare boeji pugeje. Egore maragodu bokwareuge enuie tagi. Mare tamagokare boeji ewadaru jipagi. Ere boe pegado tai mare tamagokare iaboeji ei.
2CO 11:21 Ipogurure imago pemegawo irore jiboeji mare čerokare nono nou boe erore jiboe umogadure. Emago pemegare turore jiboeji mare ero pegare rugadu. Imi imagore boe remawuji. Du inodu tabo imago pemegamode irore jiboeji rugadu nono nou jorduwa bokwareuge emago mogadure tarduwawo imago jetoronure duji.
2CO 11:22 Nou boe egore Judeu doge enuie pudumi. Judeu nure imi jamedu. Nou boe egore Pao Kurireu uwobe enuie pudumi. Pao Kurireu uwobe nure imi jamedu. Egore Abraão uwobe enuie pudumi. Abraão uwobe nure imi jamedu.
2CO 11:23 Egore Jesus Cristo utugarege enuie pudumi. Mare Jesus Cristo utugare remawu nure imi rugadu. Itaidukare imagowo aino. Imagore nono ia jorduwa bokwareuge emago mogadure. Nou boe egore tumaragodu rakaie. Mare imaragodae kodure emaragodae kori. Boe ere itugu baičoreuto. Boe ere boeto i barogo biri tabo dukejere ere tuiago iwido tu tu je.
2CO 11:24 Judeu doge ere barogo biri to i du oto padure kejewure 39. Du ere to idu ure ikera aboudure.
2CO 11:25 Romano doge ere iwara to i du ure pobe metia bokware. Ia boe eidore tori tabo i tuwo iwido rugadu. Iture tabowu ikarereu doge ere pobe metia bokware duwuge ewogware poboto itabo. Ipadure pobo maereu tada merire mito i boečore mito i jamedu pobo maereu tada.
2CO 11:26 Iture Jesus bataru tabo rugadu dukejere boe pegare i rugadu. Iwikare poboto. Iwogu kigodureuge ero pegare i jamedu. Iwobe Judeu doge ero pegare i jamedu. Boe tuginaiwuge ero pegare i jamedu. Itaregodure ba kurireuto dukeje ba kurireu kejewu boe ero pegare i jamedu. Boe pegare i itura maereu tada jamedu. Boe pegare i pobo maereu tada jamedu. Boe egore imedage enuie pudumi mare ere iordudo boe pegareuji rugadu.
2CO 11:27 Nou imaragodae tore inudu pemegakare, inogwage pemegakare, ikudukare poboče, iwai bokware, ikudau areia bokware.
2CO 11:28 Boe pegare i rugadu. Mare imororamagadure toro meartorure Jesus jiwuge eiamedu boe ewagai jamedu. Nou inodu ure imororamagadudo rugadu.
2CO 11:29 Boe eragakare dukodi čare iraga akedure ipiji jamedu. Boe ere ekiripagado ero pegawo rugadu dukodire ikiarigodure rugadu nou inoduji jamedu.
2CO 11:30 Imago pemegamode irore jiboeji dukeje inogwa jetumode tu aino boere i duji. Dukodire tarduwamode iraga akedure ipiji duji.
2CO 11:31 Iwadrarodukare. Pao Kurireu jorduware boe jokodu jire inagoino duji. Pagimijera Jesus uo nure ema rugadu. Boe emago pemegawo ji rugadu jii toro.
2CO 11:32 Marigudu iragojere Damasco ba kurireu keje dukeje nou moto kejewu boe eimijera kurireu iere Aretas. Nou Aretas ure ia timedia jetudo nou Damasco ba kurireuji boe eimijera governador uwo ema nono nou ba kurireu keje. Nou Damasco ba kurireu kejewu boe eimijera governador makore tugobaigaregei eduwo nou ba kurireu bai poro keje taiwo tabo iwagai tuwo tugeragu i tuwo itugu baičoreuto.
2CO 11:33 Mare boe ere irawuje moto ri aogejewu tuwai poro piji kadarabo kurireu tabo bukigu tabo toro moto ka. Dukodire ire ikinorudo nou boe eimijera pegareu piji.
2CO 12:1 Tagaidure imago pemegawo irore jiboeji tawiagai. Mare imi karega. Itaidukare imago pemegawo irore jiboeji. Itaidure tameartoruwo tu Jesusji rugadu. Mare ireadodumode iordure jiboeji. Ireadodumode Pagimijera Jesus ure iordudo jiboeji.
2CO 12:2 Iorduware ia meartorure Jesus jiwu imeduji. Joru oto padu kejeboere catorze jii toro rekodaji rugadu boere nono nou imeduji. Pao Kurireu ure nou imedu rutudo baruto. Jordure baru tadaboeji. (Iorduwakare nuba Pao Kurireu rore ji tuwo jordudo nou inoduji. Uniauto kana jordure nou inoduji? Ukana rutudo rugadu tuwo jordudo nou boe rugadu boeji? Parduwakare. Mare Pao Kurireu jorduware.)
2CO 12:3 Iorduware nou imedu jordure moto pemegareu jituji. (Iorduwakare nuba Pao Kurireu rore ji tuwo jordudo nou inoduji. Mare Pao Kurireu jorduware.) Nono baru tada nou imedu meardure boeji. Mare boe eguwakare tumagowo nou imedu meardure jiboeji.
2CO 12:5 Dukodire imago pemegamode nou imedu jordure jiboeji rore jiboeji. Mare ia imedu ji karega inagoino. Ire inagoino. Imire iordure nou baru tadaboe jamedu boeji. Mare iwadaru očaromodukare irore jiboeji. Inagomodukare nou boe kurireu nuie imi tawiagai. Imagomode iragakare jiboeji tawiagai.
2CO 12:6 Imago pemegamode irore jiboeji tawiagai du pegakare. Iwadrarodu karegure tawiagai. Ikare nono jorduwa bokwareu mogadure. Boe jokodu jire inagoino tawiagai. Mare imago pemegamodukare irore jiboeji rugadu. Tarduware i. Tarduware irore jiboeji. Tarduware imagore jiboeji. Itaidukare tamagowo i ia irore jiboe bagai. Iwadaru očaromodukare irore jiboeji rugadu. Ire tu nono ire rugadu.
2CO 12:7 Nou imagore jiwu tawiagaiwu imedu nure imi. Iordure nou boe pemegareu boeji baru tada. Nono bope ro pegare i. Dukodire itogorire i. Mare paga karega. Pao Kurireu koiare ure rodo aino i inojarokawo i dubagai. Dukodire inojaromodukare irore jiboeji pugeje. Inojaromodukare iordure jiboeji pugeje.
2CO 12:8 Imagore baruto Pao Kurireu bagai du ure pobe metia bokware uwo nou jeture iboe barigu ipiji ipemegagoduwo.
2CO 12:9 Mare Pao Kurireu akore: – Imodukare barigu apiji. Mare iro pemegamode ai. Aragamodukare dukeje imode iraga maku akai. Dukodire iagarere iraga bokware duji rugadu. Imago pemegamode iragakare duji. Mare paga karega. Jesus Cristo umode turaga maku inai tietu pemegawo i rugadu.
2CO 12:10 Iragamodukare i dukeje Jesus umode turaga maku inai. Dukodire iagaremode i rugadu. Boe emago pegamode i du inodu tabo ire iwudugudo i boebo. Boe pegamode i du inodu tabo iagarere i. Boe ero pegamode i du inodu tabo ikorigodukare nou boei. Boe pegamode i du inodu tabo ikiarigodumodukare rugadu. Iagaremode i rugadu. Iragamodukare i dukeje Jesus umode turaga maku inai rugadu.
2CO 12:11 Kočare tameartorure jorduwa bokwareuge ewadaruji. Emago pemegare turore jiboeji tawiagai dukodire tameartorure ei. Kodire tameartorukare čei pugeje. Dukodire imago pemegamode irore jiboeji tawiagai nono nou jorduwa bokwareuge ero mogadure. Itaidukare imagowo irore jiboeji mare tagire tare irodo aino kodire imago pemegamode irore jiboeji tawiagai. Tagi tarduware i marigudu. Mare kočare tamago pemegakare irore jiboeji. Irore jiboe kodure nou tameartorure jiwu jorduwa bokwareuge ime erore jiboe kori. Egore uture Jesus bataru tabowuge enuie pudumi mare pagare egoino. Egore iro rakakaie. Dukočare tamagokare ewadaru jipagi egore aino i duji. Dukodire imago pemegamode irore jiboeji tawiagai.
2CO 12:12 Mare iragoje raire tagabo dukeje ire tarduwado Jesus jiboeji mare iwadaru pegareu ji karega imagore tawiagai. Iwadaru pemegareu jire imagore tawiagai kodire imago rakakare tai. Ire iro rakado taegai iwo kogodureuge epemegago tarduwo iro rakareuji. Dukodire tarduware uture Jesus bataru tabowu remawu nure imi rugadu. Iaboe iaboe karega. Tu nou uture Jesus bataru tabowuge remawuge ero rakamode nono iro rakareu mogadure.
2CO 12:13 Kočare tamagore iro pegaie. Mare irore tai nono iro mogadure ia meartorure Jesus jiwugei dumogadure. Mare imagokare tai diero bagai. Nou inodu kodi na tardu pegare i?
2CO 12:14 Iture tagae dure pobe. Aino ire irugadu ituwo toro tagae pugeje. Mare imagomodukare tai iaboe bagai. Imagomodukare tai diero bagai. Itaidure iwo ikera maku tagai. Boe etore kugure emaragodumodukare tuo tuje eke bagai. Mare boe emaragodumode tore kugure eke bagai. Ire tado nono itore emogadure.
2CO 12:15 Dukodire imode ino diero rugadu maku iwo ikera maku tagai. Ire ido irugadu iwo ikera maku tagai rugadu. Imeardu kurire tai rugadu. Tagi na tameardu kurimodukare i rugadu?
2CO 12:16 Iragojere tagabo dukeje ikare boe pegado tai. Tarduware. Mare iage egore inure taekiripagado. Egore iwadrarodu nuie tawiagai iwo tameardae pegado.
2CO 12:17 Pagare egoino. Tagaiwodo irore jiboeji. Ikare boe pegado tai. Ire imedage etudo tawagai mare ekare tugeragu ia tagoe boeji tabiji. Eture toro tawagai tuwo iwadaru reko tawagai.
2CO 12:18 Imagore imedia Titoji utuwo tawagai nouia pamedia meartorure Jesus jiwu apo. Mare Tito ukare tugeragu ia boeji tabiji. Emare rore nono iro mogadure. Meardaere nono imeardae mogadure.
2CO 12:19 Ia tagi tameardaere čedaidukare boe jokawo čewugeje dubagaie čenagoino aino tawiagai. Boe emeartoruwo čei dubagaie čenagoino tawiagai. Mare nou inodu karega. Čemagore Jesus Cristo meardaere jiboeji. Pao Kurireu jorduware čerore jiboeji. Čedaidure čewo čegera maku tagai čero jamedu boe tabo. Čemeardu kurire jiwu čemedage nure tagi rugadu.
2CO 12:20 Itaregodumode tagae dukeje iordumode tai. Iordumode tarore jiboeji. Tardumode i jamedu. Tardumode irore jiboeji. Iorduwakare raga tarore jiboeji. Itaidukare iorduwo ia taro pegareuji. Imororamagadure tawagai iordumode ia taro pegareu jitu bagai. Iordumode ia taro pegareuji dukeje imagomode tai taro pegare duji rugadu. Dukeje tagaidumodukare i pugeje. Iorduwakare raga tarore jiboeji. Mare itaregodumode tagae dukeje iordumode. Dukodire imororamagadure toro tawagai itododai tagokimode pui dubagai. Tagimaredumode pui dubagai. Boe korimode tai dubagai. Imororamagadure itododai epokare puapowuge mode tagi dubagai. Tamago pegamode pu roji dubagai. Tagogirumode pui dubagai. Tagojaromode tawadaruji dubagai. Itaidure tawo nou taro jamedu boe jetorodo rugadu.
2CO 12:21 Itaregodumode tagae dukeje iordumode tarore jiboeji. Dukodire imororamagadure toro tawagai itododai. Pao Kurireu umode iordudo taro pegare jiboeji dukeje ipogurumode tarore jiboeji rugadu. Marigudu tagaiwore areme ewagai tawo tageragu ei. Tare tageragu aremei rugadu. Areme taeribarire tamugukare apowu imei jamedu. Tawadae kejere tare tarduwa bokwado kodire taboguru bokware. Ime jamedu erore nono areme ero mogadure kodire erduwakare tuboguru bagai jamedu. Ainore tarore marigudu. Taromode aino kimo dukeje tamode itragududo nou taro pegareu boe keje. Tagiarigodukare nou taro pegare jiboeji dukeje itragudumode nou taro pegareu boe keje rugadu. Mare tagiarigodure nou taro pegare jiboeji tare tagera ra taro pegareu piji dukeje tamode iagarego i rugadu.
2CO 13:1 Iture tawagai boetoji. Ča iture aino tawagai pugeje. Aino ča itaregodumode toro tawagai pugeje. Padure bapera kejewu Pao Kurireu bataru akore: – Boe mode pobe tuiordure ia boe ero pegareu jitu keje emode ia boe ewie nou tuiordure jiwu ro pegareuji. Enogwa kodumode nou pu okwa kodaji dukeje boe emeartorumode ei rugadu. Mare jordure nou ro pegareu jiwu umode mitotu je dukeje aidumode tumagowo nou boe ewiagai duji. Umode mitotu tuginai dutabo kodire boe emeartorumodukare makore jiboeji. Mare ia metiamode dukeje boe emeartorumode emagore jiboeji.
2CO 13:2 Ia tagi taro pegare rugadu. Iwo tawie. Iwo ro pegareuge eiamedu boe ewie. Itaregodumode toro tagae dukeje imago pegamode taro pegare jiboeji rugadu. Iragojere tagabo dukeje ire tawie. Mare aino imode tawie pugeje.
2CO 13:3 Dukejere tarduwamode Jesus Cristo makore i duji. Emare umode boe pegado ro pegareugei turaga tabo. Rakareu nure ema. Umode tardudo turo rakareuji.
2CO 13:4 Jesus ure tudo nono raka bokwareu boere dukodire bire ipo padure pugajejewu keje. Mare Pao Kurireu ure turaga maku ai tuwo jewodudo pugeje. Ainore čerore jamedu. Čere čedo nono raka bokwareugere nono Jesus mogadure. Mare Pao Kurireu ure turaga maku čenai čeragojewo tagabo Pao Kurireu ro rakareu tabo.
2CO 13:5 Tagaiwodo tarore jiboeji tameardaere jiboeji tameartorure Jesus jitu bagai. Tameartorumode Jesus Cristoji dukeje rakojemode tagabo. Tarduware rakojere tagabo duji rugadu. Mare tameartorumodukare ji dukeje rakojemodukare tagabo.
2CO 13:6 Čedaidure tarduwawo čemeartorure Jesus jituji rugadu.
2CO 13:7 Čemagore baruto Pao Kurireu bagai tu tu je tabaru tabo taro pegakawo. Mare boe emeardae pemegakawo čei du bagai karega čenagoino. Ia boe egomode pagaie čeroino mare du inodu tabo čeipagakare nou inoduji. Tu toro tawagaire čemororamagadure taro pemegawo tu tu je.
2CO 13:8 Pamodukare Pao Kurireu bataru remawu akedudo rugadu. Boe etaidumode tuwo Pao Kurireu bataru remawu akedudo mare eroiwakare eragakare Pao Kurireuji. Dukodire emodukare Pao Kurireu bataru akedudo rugadu. Boe etaidukare boe erduwawo Pao Kurireu bataru remawuji mare du inodu tabo Pao Kurireu umode boe erduwado tuwadaruji rugadu. Dukodi čare pawo boe ewie nou bataruji rugadu Pao Kurireu meardae mogadure.
2CO 13:9 Čewiagorokare tu čei. Dukodire čemodukare čemago pemegado čerore jiboeji. Čegaregure boe kurireugedo čegi. Čewiagorore tu toro tawagai. Taragamode taro pemegawo dukeje čegaregodumode tai rugadu. Čemagore Pao Kurireu bagai baruto tu tu je tabaru tabo tameartoru kuriwo Jesusji rugadu.
2CO 13:10 Dukodire inure awu atugoreboe pemegado iwo maku toro tawagai. Iragoje jaere tabiji mare itaidure iwo tarduwado pugeje awu atugoreboe tabo. Tameartorumode awu atugoreboeji dukeje iromodukare iaboeji tai pugeje. Itaregodumode toro tagae pugeje mare tameartorumodukare awu atugoreboeji nono imode iragado tai rugadu tarokawo aino pugeje. Pagimijera Jesus ure meartorure puduiwuge eimijerado imi. Dukodire imago pemegamode taro pemegare jiboeji. Mare imago pegamode taro pegareuji jamedu. Mare paga karega tameartoru kuriwo Jesusji rugadu.
2CO 13:11 Imedage nure tagi rugadu. Dukodire ikimadure toro tawagai. Taro pemegado rugadu. Tawiapaga pemegado awu iwadaruji. Tameardaere jiboe tawuje puapo. Taedu pemegado puapo taegare tabo tabemegawo pui rugadu. Pao Kurireu meardu kurire boei rugadu. Umode boe edu pemegado pudabo rugadu. Rakojemode tagabo rugadu.
2CO 13:12 Tagimadudo puapo inai rugadu. Meartorure Jesus jiwuge eiamedu boe ekimadure toro tawagai.
2CO 13:14 Pagimijera Jesus Cristo ro pemegawo tai. Pao Kurireu meardu kuriwo tai. Pao Kurireu Uwari rakojewo tagabo tuwo tamugu pemegado puapo. Iwadaru urugadureu.
GAL 1:1 Paulo nure imi. Pao Kurireu ure tugeragu i ituwo Jesus bataru tabo boe ewagai iwo boe ewie Jesus jiboeji. Ia boe emeardae tabo karega iture nou Jesus bataru tabo. Pao Kurireu makokare ia boei ewo tugeragu i ituwo nou bataru tabo. Pao Kurireu ure Jesus Cristo udo tugeragu i. Pao Kurireu ure tugeragu i rugadu. Emagere emagore i ituwo nou tuwadaru tabo boe ewagai. Jesus bire mare Pao Kurireu ure jewodudo pugeje.
GAL 1:2 Imire ire awu atugoreboe atugodo iwo maku toro Galácia moto kejewuge meartorure Jesus jiwuge ewagai. Ia pamedage meartorure Jesus jiwuge eragojere woe itabo. Etaidure tugimaduwo tagabo toro Galácia moto ka jamedu.
GAL 1:3 Pao Kurireu ro pemegawo tai. Pagimijera Jesus Cristo ro pemegawo tai jamedu. Pao Kurireu uwo tabemegado pui. Pagimijera Jesus Cristo uwo tabemegado pui jamedu.
GAL 1:4 Mare boe eiamedu boe emeardaere tu turo pegawo. Mare Pao Kurireu ure tumeardae tawuje tuwo boe ekinorudo emeardaekawo nono nou boe emeardae pegareu mogadure pugeje. Dukodire Jesus ure tumagu ro pegareuge etai tuwidoduwo paro pegareu moriče tuwo paginorudo pameardae pegakawo pugeje, paro pegakawo pugeje jamedu.
GAL 1:5 Dukodire pamago pemegawo Pao Kurireuji. Pawo Pao Kurireu ie kurido pamago pemegareu tabo boe ekie jamedu boe kori rugadu. Boe emago pemegawo Pao Kurireuji jii toro rugadu. Parowo aino rugadu.
GAL 1:6 Jesus Cristo ro pemegare tai dukodire ure itudo tawagai puduiwu bakaru pemegareu tabo. Nono ire tawie Jesus jiboeji. Ainore Jesus rore tumagowo tawagai tameartoruwo pudui rugadu. Dukodire tameartorure Jesusji rugadu. Mare kočare tameartoru raikare nou bataru remawuji. Ia boe ere tawie ia bataruji pugeje. Dukodire tare tagera ra nou ire tawie jiwu Jesus bataru remawu piji tameartoruwo nouia bataruji pugeje. Dukodire ierore ta je.
GAL 1:7 Boe emeartorumode nouia bataruji mare nou bataru umodukare ekinorudo. Jesus bataru remawu karegure ema kodi. Mare boe egore Jesus bataru remawu jie tagoino. Mare pagare egoino. Etaidure tuwo taekiripagado. Ere Jesus bataru remawu pegado. Ere Jesus bataru mekido tumeardae pegareu ka. Dukodire ere tawarigu boeto bataru remawu piji.
GAL 1:8 Epega. Imi imode nou ire tawie jiwu bataru udo tuginai Jesus bataru remawu piji dukeje Pao Kurireu ro pegamode i. Nono ro pegawo i rugadu jii toro. Mare imodukare Jesus bataru udo tuginai rugadu. Ia Pao Kurireu utugare baru tadawu umode boe ewie ia bataru tuginaiwuji Jesus bataru remawu piji dukeje Pao Kurireu ro pegamode ji. Nono boe pegamode ji rugadu jii toro rugadu. Mare Pao Kurireu utugarege baru tadawuge emodukare Jesus bataru udo tuginai rugadu. Mare ia boe ere Jesus bataru udo tuginai tawiagai rugadu nou tameartorure jiwu Jesus bataru remawu piji. Eire Pao Kurireu umode boe pegado rugadu jii toro rugadu. Ire tawie marigudu. Mare aino čare ire tawie pugeje.
GAL 1:10 Iwiagoromode boe erdu kuriwo i dukeje Jesus Cristo utugare modukare imi. Imago pegamodukare nouia boe emago pegareuji. Mare iwiagorokare boe emago pemegawo idu bagai. Dukodire imago pegare nou boei tawiagai rugadu. Mare paga karega. Iwiagorore tu Pao Kurireu jordu pemegawo imagore jiboeji irore jiboeji rugadu.
GAL 1:11 Tameartorure Jesusji dukodire imedage nure tagi rugadu. Iwo tawie rugadu. Nou ire tawie jiwu Jesus bataru ure turugadu. Boe etaora piji karega nou bataru tawujedure. Jesusre akoino rugadu.
GAL 1:12 Boe emagokare nou bataruji iwiagai imearduwo ji. Ia boe ekare iorduwado nou bataruji. Mare Jesus Cristo emare ure iordudo pudui tuwo nou puduiboe bataru remawu maku inai rugadu.
GAL 1:13 Marigudu imeartorure Judeu doge eno bakaruji rugadu. Boe ere tawie nou inoduji. Imeartorure Judeu doge eno bakaruji dukodire iro pegare nou meartorure Jesus jiwuge boetojiwugei rugadu. Itaidure iwo etagedudo rugadu boe emeartorukawo Jesusji pugeje. Ainore irore marigudu.
GAL 1:14 Ire iragado i rugadu imeartoruwo nou iwobe Judeu doge eno bakaruji rugadu nou imedage ekori. Itaidure imeartoruwo iwobe etuo mage eno bakaruji rugadu iraga tabo rugadu. Ainore irore marigudu.
GAL 1:15 Mare Pao Kurireu jorduware marigudu nuba turomode i dubagai. Iwodure dukeje Pao Kurireu ure tumeardae tawuje turo pemegawo i rugadu, tumagowo iwagai imeartoruwo Jesusji rugadu. Irijodure mare imeartorukare Jesusji. Mare ia meri keje Pao Kurireu makore iwagai rugadu imeartoruwo Jesusji rugadu. Dukodire ire ikera ra iwobe eno bakaru piji imeartoruwo Jesusji rugadu. Nono Jesus makore i iwo boe tuginaiwuge ewie tuwadaru remawuji jamedu. Mare inarakare boei nou Jesus jiboe bagai, bataru remawu bagai.
GAL 1:17 Itukare Jerusalém ba kurireu ka kodire iordukare nouia uture Jesus bataru tabowugei. Uture Jesus bataru tabowuge boetojiwuge eragojere nono Jerusalém ba kurireu keje. Mare itukare ewagai. Iture Damasco ba kurireu piji kuri Arábia moto ka iragojewo nono ikinaigodu boe maereu keje Jesus uwo iorduwado tuwadaru remawuji nono Arábia moto keje. Toro ia meri keje ire ikirimi Damasco ba kurireu ka.
GAL 1:18 Imeartorure Jesusji du rekodaji jorure pobe metia bokware i. Dukejere iture Jerusalém ba kurireu ka iorduwawo imagowo Pedroji. Iragojere nono Jerusalém ba kurireu keje Pedro apo. Meri oto padure quinze čei nono dukeje iture piji pugeje.
GAL 1:19 Iordukare ia uture Jesus bataru tabowugei nono. Iordure tu Jesus uwie Tiagoji tu rugadu. Uture Jesus bataru tabowu nure ema jamedu. Iordure ji Pedroji jamedu tu rugadu.
GAL 1:20 Boe remawu jire inagoino tawiagai. Pao Kurireu jorduware. Boe jokodu jire inagoino tai awu atugoreboe tada.
GAL 1:21 Iture Jerusalém piji Pedro piji dukeje toro ia meri keje iture Síria moto ka. Iture Cilícia moto ka jamedu.
GAL 1:22 Dukodire Judéia moto kejewu meartorure Jesus jiwuge erduwakare iro maiwuji. Erduware nou iro pegareu jawuji tu rugadu.
GAL 1:23 Mare ia boe ere ewie iboeji. Egore: – Nou ure boe pegado paiwu makonure Jesus bataruji jamedu. Marigudu aidure tuwo boe pegado pai pameartorukawo Jesusji pugeje mare aino čare makore boei emeartoruwo Jesusji rugadu. Ainore boe egore nou Judéia moto kejewu meartorure Jesus jiwuge ewiagai rugadu.
GAL 1:24 Dukodire nou boe emago pemegare Pao Kurireuji nou tumeardure jiwu iro maiwu pemegareu jiboeji rugadu.
GAL 2:1 Joru oto padu kejeboere catorze i pugeje dukeje iture Jerusalém ba kurireu ka imedia Barnabé apo pugeje. Iture imedu Tito apo jamedu.
GAL 2:2 Pao Kurireu makore i ituwo toro nono iture rugadu. Nono itaregodure nou uture Jesus bataru tabowuge etae dukeje čere bato pui nono rugadu. Tu nou uture Jesus bataru tabowuge ere bato pui itabo. Nono ire ewie irore jiboeji. Ire ewie nou imagore tu tu jiwu Jesus bataruji emeardae pegakawo imagore jiboeji. Ire nou uture Jesus bataru tabowuge ewiedu pemegado nou imagore jiwu bataru jamedu boeji erduwawo nuba inagore boe tuginaiwugei rugadu. Erduwamodukare imagore jiboeji dukeje emagomode i iwo nou iwadaru udo tuginai pugeje.
GAL 2:3 Mare ekare iwadaru udo tuginai. Emagokare boeji i. Ekare nou rakojere itabowu imedu Tito meartorudo Judeu doge eno bakaruji kodire ukare tuwaga oto biri kado rugadu. Judeu karegure ema. Grego nure ema kodi. Dukodire ukare tuwaga oto biri kado nono Judeu doge ero mogadure. Mare nou uture Jesus bataru tabowuge emagokare boeji Titoji jamedu.
GAL 2:4 Mare ia boe emagore ji uwo tuwaga oto biri kado. Egore meartorure Jesus jiwuge nuie pudumi tuwo boedo tumedagedo pudumi. Mare pagare egoino. Meartoru remawure Jesus jiwuge ere tamudo nou Judeu doge eno bakaru piji rugadu. Mare nou boe etaidure tuwo tameartorudo ji pugeje. Dukodire egoino Titoji uwo tuwaga oto biri kado nono Judeu doge ero mogadure.
GAL 2:5 Mare čemagore ei ewadaru ukaie turugadu. Čemagore ei Jesus jiwu bataru pemegareu ji karega egoino. Čemagore ei čewadaru modukaie nono ewadaru mogadure rugadu. Čemoduie boe ewie tu Jesus bataru remawuji tu rugadu. Dukodire čenagoino Jesus bataru remawuji tawiagai jamedu.
GAL 2:6 Mare ia meartorure Jesus jiwuge eimijerage ekare iwadaru mekido. Dukodire iwadaru ure turugadu. Dukodi čare ekare ia tuwadaru maku inai pugeje. Boe emago pemegare nou boe eimijeragei mare imire iwiapagakare nou inoduji. Iwiapagare tu Pao Kurireu meardaeji. Emare aiwomodukare boe eji boe emoduji tuiorduwawo emeardae remawuji. Jorduware boe etaora tadawu emeardae remawuji rugadu.
GAL 2:7 Mare nou meartorure Jesus jiwuge eimijerage erduwagodure Jesus ure puduiboe bataru maku inai ituwo tabo boe tuginaiwuge ewagai duji. Dukodire irore nono Pedro rore Judeu dogei dumogadure. Pedro uture Jesus bataru tabo Judeu doge ewagai. Imire iture Jesus bataru tabo boe tuginaiwuge ewagai.
GAL 2:8 Pao Kurireu ure tugera maku Pedro ai utuwo Jesus bataru tabo Judeu doge ewagai. Pedro ure Judeu doge ewie nou bataruji dukeje Pao Kurireu ure tugera maku ai Judeu doge emeartoruwo Jesusji rugadu. Aino Pao Kurireu ure tugera maku inai nono turo mogadure Pedro jitu mogadure jamedu. Ure itudo boe tuginaiwuge ewagai iwo ewie Jesus jiboeji dukeje ure tugera maku inai jamedu boe tuginaiwuge emeartoruwo Jesusji rugadu. Dujire ireadodure nou boe eimijerage ewiagai nono Jerusalém ba kurireu keje.
GAL 2:9 Tiago, Pedro, João eiamedu boe edure nono tuwiapaga tabo nou ireadodaeji. Ere nono boe eimijera kurireugere rugadu. Meartorure Jesus jiwuge emeartorure ei rugadu. Emagere emeardure ireadodure jiboeji. Dukodire erduware rugadu Pao Kurireu ure turo pemegado iduji rugadu. Dukodi čare emago pemegare irore jiboeji. Emago pemegare Barnabé rore jiboeji jamedu. Egore čeroie nono turo mogadure. Čemeardaeie nono tumeardae mogadure. Aino čedumoduie toro boe tuginaiwuge ewagai rugadu. Pudumie tudumoduie woe Judeu doge ewagai rugadu. Ainore čenagore pui.
GAL 2:10 Emagore čei čegaiago čegera ra marenarue doge epiji. Inagore ei mariguduie ire ikera maku marenarue doge etai itaidu tabo rugadu.
GAL 2:11 Toro ia meri keje Pedro aregodure Antioquia ba kurireu ka nou Antioquia ba kurireu kejewu meartorure Jesus jiwuge etae. Imire iragojere nono jamedu. Pedro aregodure čedae toro dukeje ure tumugudo itabo nou boe tuginaiwugebo jamedu togwagewo. Ia Judeu doge enogwagere čedabo jamedu. Mare ia meri keje nou Tiago ure utudo čewagaiwuge ime etaregodure čedae. Meartorure Jesus jiwuge Judeu doge nure emage. Mare emeardae pegare boe tuginaiwugei. Egore boe tuginaiwuge ewo tuwaga oto biri kado rugadu emeartoruwo Jesusji. Emodukaie tuwaga oto biri kado dukeje Jesus aidumodukaie ei rugadu. Nono etaregodure toro dukeje enogwagekare nou meartorure Jesus jiwu boe tuginaiwugebo. Pedro jordure nou inoduji dukeje ure tudawuje nou boe tuginaiwuge epiji jamedu togwagewo nou Judeu dogebo. Aidukare tuwo nou Judeu doge emeardae pegado pudui kodi. Barnabé jordure Pedro roinoduji dukodire uture toro boe tuginaiwuge epiji Pedro apo jamedu. Nou Antioquia kejewu meartorure Jesus jiwu Judeu doge erore nono ero mogadure jamedu. Marigudu Pedro makore boe tuginaiwugei eie nono Judeu doge emogadure. Mare aino Pedro rore jiboe kodukare nou tumagore jiboeji. Barnabé jamedu rore jiboe kodukare tumagore jiboeji jamedu. Emeartorukare nou tagoino jiwu tuwadaruji.
GAL 2:14 Iordure nou Pedro okwagekare boe tuginaiwugebo duji dukodire imago pegare nou Pedro rore jiboeji boe eiamedu boe egai. Boe eiamedu boe erdure Pedro ro pegareuji. Nou Pedro rore jiboe ukare nono Jesus bataru remawu mogadure. Dukodire imagore Pedroji. Inagore: – Judeu nure aki. Mare ameartorukare Judeu doge eno bakaruji pugeje. Are boe tuginaiwudo aki. Mare aino are boe tuginaiwuge emeartorudo Judeu doge eno bakaruji erowo nono Judeu doge ero mogadure.
GAL 2:15 Ainore inagore Pedroji. Inagore: – Pao mage enure Judeu dogeče. Boe tuginaiwuge karegure pagi. Judeu doge etaidukare boe tuginaiwugei. Egore ro pegareuge nuie emage tu tu je.
GAL 2:16 Mare Judeu doge nure pagi. Ainore inagore Pedroji. Inagore: – Parduware boe eroiwakare tumeartoruwo Pao Kurireu ure maku Judeu doge etaiwu eno bakaruji. Mare emeartorumode ji mare du inodu tabo erore jiboe aregodumodukare Pao Kurireu meardae oto pa ka. Dukodire ro pemegareuge emodukare emage Pao Kurireu jakai rugadu. Mare boe emeartorumode tu Jesus Cristoji dukeje Pao Kurireu umode tugeragu ei pudae tuwo edo nono ro pemegareuge emogadure tiagai. Pagi parduware nou inoduji marigudu. Ainore inagore Pedroji. Nono inagore ji pugeje: – Dukodire pagi pameartorure Jesus Cristoji. Dukodire Pao Kurireu ure tugeragu pai pudae tuwo pado nono ro pemegareuge emogadure tiagai. Aino pawiapagakare Judeu doge eno bakaruji pugeje.
GAL 2:17 Ainore inagore Pedroji. Inagore: – Ia boe erdure meartorure Jesus jiwuge ia ero pegareuji dukodire nou boe emeardaere Jesus Cristo aiduie nou ero pegareuji. Ia boe egore. Mare iwo awie. Pagare egoino. Jesus aidukare rugadu nou meartorure puduiwuge ero pegareuji rugadu.
GAL 2:18 Ainore inagore Pedroji. Inagore: – Imeartorumode Jesusji mare du inodu tabo itaidumode imeartoruwo Pao Kurireu ure maku Judeu doge etaiwu bakaruji pugeje iwo ido nono ro pemegareu mogadure Pao Kurireu jakai dukeje imode imeartorure jiboe udo paga. Imeardae remawu pegamode. Meartoru bokware Judeu doge eno bakaru jiwu mode imi rugadu. Boe erduwamode nou inoduji rugadu. Egomode: “Ro pegareu nure ema marigudu.”
GAL 2:19 Ainore inagore Pedroji. Inagore: – Dukodire ire ido nono bireu mogadure iwiapagakawo nou Judeu doge eno bakaruji pugeje. Aino iwiapagare tu imeartoruwo Pao Kurireuji tu rugadu.
GAL 2:20 Ire ido nono Jesus Cristo padure tuwi tabowu ipo padure pugajejewu mogadure. Mare iwi ji karega inagoino. Iwiapagakare imeardaeji pugeje. Dujire inagoino. Imeartorukare iragaji pugeje. Dujire inagoino. Jesus Cristo emare ure turaga maku inai imeartoruwo Jesusji iwiapagawo tu Jesus meardaeji rugadu. Pao Kurireu onaregedu nure ema. Emare meardu kurire i rugadu. Ure tumagu tuwiwo iro pegareu moriče.
GAL 2:21 Ainore Pao Kurireu rore tuwo turo pemegareu bu iwugeje. Ainore inagore Pedroji. Inagore: – Boe emeartorumode rugadu Pao Kurireu ure maku Judeu doge etaiwu bakaru jamedu boeji dukeje Jesus bimodukare. Boe emeartorumode rugadu Pao Kurireu ure maku Judeu doge etaiwu bakaru jamedu boeji dukeje ro pemegareuge mode emage Pao Kurireu jakai. Ero pegareu modukare dukodire Jesus bimodukare. Mare boe eragakare tumeartoruwo Pao Kurireu ure maku Judeu doge etaiwu bakaru jamedu boeji rugadu. Ere turagado pudui mare eragakare tugoduwo ji. Dukodire eroiwakare tuwo tudo nono ro pemegareuge emogadure Pao Kurireu jakai. Dukodire pagatu je karega Jesus bire. Bire boe ero pegareu moriče rugadu. Mare paga karega. Pao Kurireu meardu kurire boei rugadu dukodire roino tuwo turo pemegado boei. Dukodire ikare nou Pao Kurireu ro pemegareu barigu ipiji. Imeartorumode Jesusji rugadu. Ainore inagore Pedroji rugadu.
GAL 3:1 Galácia moto kejewuge nure tagi. Ča tarduwa bokware. Ia boe ere taekiripagado tameartoruwo Judeu doge eno bakaruji jamedu taraga tabo. Iragojere tagabo marigudu dukeje ire tawiedu pemegado rugadu Jesus jiboeji. Jesus bitodure ipo padure pugajejewu keje boe ero pegareu moriče. Ire tarduwado rugadu.
GAL 3:2 Ire tawie dukeje tameartorure Jesusji rugadu. Tameartorure ji dukodire ure Tuwari maku tagai rakojewo tagabo. Tameartorukare Judeu doge eno bakaruji mare du inodu tabo Pao Kurireu Uwari makudure tagai rugadu. Nono tameartorure tu tu je nou Pao Kurireu Uwariji.
GAL 3:3 Tameartorure Jesusji dukeje Pao Kurireu Uwari ure turaga maku tagai rugadu. Tameartorure ji marigudu. Mare aino ča tare tagera ra piji tameartoruwo taragaji tawo tagirimi Judeu doge eno bakaru ka pugeje tawo tado nono ro pemegareuge emogadure tu taraga tabo rugadu. Mare pagatu jere taroino. Dukodire čare tare tado nono jorduwa bokwareuge emogadure.
GAL 3:4 Marigudu tameartorure Jesusji dukodire ro pegareuge ero pegare tai. Mare tare taragado tai tameartoruwo tu Jesusji rugadu. Mare pagatu je. Kuri je tare tameardae pegado tameartoruwo Judeu doge eno bakaruji Jesus piji tawo tado nono ro pemegareuge emogadure. Mare imeardae pemega kimore tai. Imeardaere tamode tagirimi tameartoruwo tu Jesusji pugeje tameartorukawo nou Judeu doge eno bakaruji taraga tabo pugeje.
GAL 3:5 Tagi tarduware rugadu. Boe emeartorumode Pao Kurireu ure maku Judeu doge etaiwu bakaruji mare du inodu tabo Pao Kurireu umodukare Tuwari maku nou boe etai. Mare tameartorure tu Jesusji dukodire Pao Kurireu ure Tuwari maku tagai rugadu. Boe emeartorumode Pao Kurireu ure maku Judeu doge etaiwu bakaruji mare du inodu tabo Pao Kurireu umodukare turo rakado egai. Mare tameartorure Jesusji dukodire Pao Kurireu ure turo rakado nono taegai rugadu.
GAL 3:6 Tarduware Abraão rore jiboeji. Padure bapera keje. Nou Pao Kurireu bataru akore: – Abraão meartorure Pao Kurireuji dukodire Pao Kurireu ure tugeragu ji pudae tuwo udo nono ro pemegareu mogadure.
GAL 3:7 Ainore Pao Kurireu bataru akore. Dukodire imode tawie jamedu. Meartorure Pao Kurireu jiwuge eiamedu boe ere nono Abraão ore emogadure.
GAL 3:8 Pao Kurireu jorduware marigudu nuba turomode boe tuginaiwugei tuwo tugeragu ei pudae tuwo edo nono ro pemegareuge emogadure. Dukodire ure Abraão bie marigudu. Nou bataru padure bapera keje. Akore: – Aki akaigoiare imode boe pemegado boe eiamedu boei. Ainore Pao Kurireu akore Abraãoji marigudu. Emeartoruwo tu pudui dujire akoino. Jesus bataru pemegareu jire akoino. Dukodire boe tuginaiwuge emeartorumode Jesusji nono Abraão meartorure Pao Kurireu jitu mogadure dukeje Pao Kurireu ro pemegamode ei nono turo moga Abraão jitu mogadure. Meartorure Pao Kurireu jiwu nure Abraãoče rugadu.
GAL 3:10 Boe etaidumode tuwo turagado pudui tumeartoruwo nou Pao Kurireu ure maku Judeu doge etaiwu bakaruji tuwo ro pemegareugedo pudumi. Mare boe pegamode ei. Emode turagado pudui mare du inodu tabo eroiwamodukare tumeartoruwo nou Judeu doge eno bakaru jamedu boeji rugadu. Dukodire Pao Kurireu akore tumoduie boe pegado ei rugadu. Nou Pao Kurireu makore jiboe padure bapera keje. Akore: – Ire imeardae maku Judeu doge etai eno bakaruče. Padure bapera keje boe emeartoruwo tu nou bakaru rugadu boeji tu tu je jii toro rugadu. Boe emode turagado pudui tumeartoruwo ji mare nou boe ero jetoromodukare nou ire maku pudaiwu bakaruji. Dukodire imode boe pegado ei rugadu.
GAL 3:11 Ainore Pao Kurireu akore marigudu. Dukodire inagoino. Boe eroiwakare tuwo turo jetorodo nou Pao Kurireu ure maku Judeu doge etaiwu bakaruji. Dukodire eroiwakare tuwo ro pemegareugedo pudumi Pao Kurireu jakai. Dukodire Pao Kurireu makore boei marigudu. Akore: – Imire ire boe edo nono ro pemegareuge emogadure iagai. Nou boe emeartoruwo tu i rugadu meri jameduji jii toro.
GAL 3:12 Mare boe etaidumode tumeartoruwo to bakaruji dukeje emeartoruwo nou bakaru rugadu boeji. Ainore Pao Kurireu akore jamedu. Akore: – Boe ewo turagado pudui tumeartoruwo nou Judeu doge eno bakaru jamedu boeji tu tu je. Ainore Pao Kurireu akore marigudu. Mare boe etaidumode tumeartoruwo Jesusji dukeje emeartoruwo tu ji rugadu emeartorukawo Judeu doge eno bakaruji pugeje.
GAL 3:13 Jesus Cristo bire ipo padure pugajejewu keje paro pegareu moriče. Ure tuwarigu nou ro pegareuge emugato nou Pao Kurireu bataru pegareu jetumode eiwuge emugato, tuwiwo emugato. Ainore rore nou Pao Kurireu bataru pegareu jetukawo meartorure puduiwugei pugeje. Dukodire pameartorure Jesusji dukodire nou Pao Kurireu bataru pegareu jetumodukare pai pugeje. Ainore Pao Kurireu bataru akore: – Imode boe pegado nou rakojere nou ipo padu pugajejewuji rugadu.
GAL 3:14 Ainore Pao Kurireu akore. Dukodire imode tawie. Pao Kurireu ure Jesus Cristo udo paro pegareu morido. Nono boe tuginaiwuge emeartorumode Jesus Cristoji dukeje Pao Kurireu ro pemegamode ei rugadu. Du jire Pao Kurireu roino tuwo nou tumagore Abraão jiwu turo jetudo pudui boe tuginaiwuge etai jamedu. Dukodire inagoino pameartoruwo Jesusji. Pameartorumode ji dukeje Pao Kurireu umode Tuwari maku pagai nono mariguduwu Pao Kurireu makore jiwu bataru mogadure.
GAL 3:15 Imedage nure tagi. Ča imode tarduwado nou inagoino jiwu Pao Kurireu meardaeji. Ime pobedu doge emode tumeardae tawuje puapo dukeje emode nou tumeardae bu bapera keje. Nono emode tugie bu nou bapera keje. Dukodire nou padure nou bapera kejewu emeardae akedumodukare epiji rugadu. Ere tugie bu nou bapera keje tuwo tuwadaru maku puai tumodukaie tugera ra nou tumeardae piji rugadu. Tumodukaie nou tuwadaru mekido pugeje. Ainore boe erore tuwo tumeardae udo turugadu puai. Eromode nono nou tumeardae mogadure rugadu. Nou Pao Kurireu makore Abraão jiwu meardae ure nono nou boe ero mogadure jamedu.
GAL 3:16 Pao Kurireu makore Abraãoji tuwo tumeardae maku Abraão ai, nou Abraão uwobe remawu ai jamedu. Nou Pao Kurireu makore jiboe padure bapera keje. Pao Kurireu makomode tumoduie tumeardae maku Abraão uwobe remawuge etai dukeje nou makudumode aiwuge emagamode. Mare Pao Kurireu makokare tumoduie tumeardae maku Abraão uwobe remawuge etai. Pao Kurireu makore tumoduie tumeardae maku Abraão uwobe remawu ai. Dukodire makudumode aiwu ure mitotu je. Ča Jesus Cristo jire akoino. Nou Pao Kurireu meardae makudure Jesus ai rugadu. Abraão uwobe remawu nure ema kodi.
GAL 3:17 Ča iwo tawie. Pao Kurireu ure tuwadaru maku Abraão ai tuwo Abraão jorduwado turomode jiboeji. Nono joru oto padu kejeboere 430 nou Abraão uwobei dukeje Pao Kurireu ure ia tuwadaru maku nou Abraão uwobe Judeu doge etai eno bakaruče. Dukodire eno bakarure emeartoruwo ji. Mare du inodu tabo nou Pao Kurireu makore Abraão jiwu bataru boetojiwu akedumodukare. Nou Pao Kurireu ure maku Judeu doge etaiwu bakaru ukare nou Pao Kurireu makore Abraão jiwu bataru akedudo.
GAL 3:18 Boe emeartorumode Pao Kurireu ure maku Judeu doge etaiwu bakaruji tuwo Pao Kurireu ro pemegado pudui tumuguwo Pao Kurireu apo baru tada dukeje nou Pao Kurireu makore Abraão jiwu bataru boetojiwu akedumode. Mare nou Pao Kurireu ro pemegareu makudukare nou meartorure nou Pao Kurireu ure maku Judeu doge etaiwu bakaru jiwuge etai rugadu. Nou Pao Kurireu ro pemegareu makudure tu Abraão ai rugadu. Mare Pao Kurireu makore Abraão jiboe jire inagoino. Pao Kurireu makore Abraãoji tumoduie tumeardae maku Abraão uwobe remawu ai. Dujire inagoino. Umoduie tugeragu meartorure nou Abraão uwobe remawu jiwugei pudae tuwo edo nono ro pemegareuge emogadure tuwo emugudo pudabo nono baru tada. Ainore nou Pao Kurireu ro pemegareu ure.
GAL 3:19 Mare Pao Kurireu ure ia tuwadaru maku Judeu doge etai eno bakaruče jamedu emeartoruwo ji. Mare paga karega. Judeu doge erduwawo turo pegare jiboe jitu bagaire Pao Kurireu roino jii nou Pao Kurireu akoino jiwu Abraão uwobe remawu aregodumode du ka. Pao Kurireu ure nou ture maku Judeu doge etaiwu bakaru udo turugadu Judeu doge etai ero pegakawo pugeje. Pao Kurireu utugarege baru tadawuge ere nou Pao Kurireu o bakaru maku Moisés ai. Nono Moisés ure Judeu doge erduwado nou ure maku etaiwu bakaruji.
GAL 3:20 Judeu doge emagare dukodire Pao Kurireu ure tugeragu Moisesji uwo Judeu doge erduwado nou Pao Kurireu ure maku etaiwu bakaruji. Mare Pao Kurireu ure mitotu je. Pao Kurireu makore Abraãoji dukeje ukare tugeragu iaboeji uwo nou tuwadaru maku Abraão ai. Ema rugadu makore tu Abraão biagai rugadu.
GAL 3:21 Mare ia boe egomode nou Pao Kurireu ure maku Judeu doge etaiwu bakaru uie nou Pao Kurireu makore Abraão jiwu bataru pegado. Mare pagare egoino. Nou Pao Kurireu ure maku Judeu doge etaiwu bakaru umode boe edo nono ro pemegareuge emogadure Pao Kurireu jakai dukeje Pao Kurireu umode tumeardae tawuje boe emeartoruwo nou ture maku Judeu doge etaiwu bakaruji tuwo tudo nono ro pemegareuge emogadure Pao Kurireu jakai.
GAL 3:22 Mare nou Pao Kurireu ure maku Judeu doge etaiwu bakaru ukare boe edo nono ro pemegareuge emogadure Pao Kurireu jakai rugadu. Dukodire padure bapera kejewu Pao Kurireu bataru akore boe eiamedu boe eroiwakare tuwo tuginorudo turo pegareu piji rugadu. Ro pegareuge enure boe eiamedu boeče rugadu. Ainore Pao Kurireu akore. Dukodire Pao Kurireu makore marigudu Abraãoji boe emeartoruwo nou Abraão uwobe remawu Jesus Cristoji. Akore emeartorumoduie ji dukeje tumoduie edo nono ro pemegareuge emogadure. Ainore Pao Kurireu akore marigudu.
GAL 3:23 Mare jii nou Jesus aregodure du ka boe eiamedu boe ere nono rakojere baičoreu tadawuge emogadure. Mare baičoreu ji karega inagoino. Boe ere turagado pudui tumeartoruwo nou Pao Kurireu ure maku Judeu doge etaiwu bakaruji tuwo tugera ra turo pegareu piji. Mare eroiwakare tumeartoruwo ji. Eroiwakare tuwo tugera ra turo pegareu piji. Dujire inagoino. Boere aino boei jii Jesus aregodure du ka.
GAL 3:24 Dukodire nou Pao Kurireu ure maku Judeu doge etaiwu bakaru ure nono boe eimijera mogadure. Mare boe eimijera ji karega inagoino. Nou bakaru ure boe erduwado ia umode boe ekinorudowu aregodumoduie duji. Dujire inagoino. Dukodire boe erduware tumeartorumoduie nou umode boe ekinorudowuji Pao Kurireu uwo tugeragu ei pudae tuwo edo nono ro pemegareuge emogadure.
GAL 3:25 Aino ča Jesus aregodure rugadu boe emeartoruwo ji. Dukodire nou Pao Kurireu ure maku Judeu doge etaiwu bakaru ukare nono pagimijera mogadure pugeje.
GAL 3:26 Aino taiamedu boe tameartorure Jesus Cristoji dukodire Pao Kurireu ure tugeragu tai pudae tuwo tado nono tore emogadure.
GAL 3:27 Nono tagao pegododure jamedu tawo boe erduwado tameartorure Jesus jituji. Dukodire tare tageragu Jesus Cristo meardaeji tameardaeče. Dukodire tamugu pemegare Jesus apo rugadu.
GAL 3:28 Meartorure Jesus jiwuge eiamedu boe ere nono pu mogadure Pao Kurireu jakai. Meartorure Jesus jiwuge Judeu doge ere nono meartorure Jesus jiwuge boe tuginaiwuge emogadure Pao Kurireu jakai jamedu. Boe etugarege meartorure Jesus jiwuge ere nono maragodure pudaiwuge ime meartorure Jesus jiwuge emogadure Pao Kurireu jakai. Meartorure Jesus jiwuge ime ere nono meartorure Jesus jiwuge areme emogadure Pao Kurireu jakai.
GAL 3:29 Tameartorure Jesusji dukodire tare nono Abraão uwobe remawuge emogadure Pao Kurireu jakai. Nou Pao Kurireu makore Abraão jiboe jetumode pudui tagai jamedu.
GAL 4:1 Ča imode tawie pugeje. Ia oe kurireu onaregedu kurigodukare raga dukeje nou uo umodukare diero kurido ai. Dukodire nou oe kurireu onaregedu ure nono nou oe kurireu utugare mogadure. Nou oe kurireu oe jamedu boe makudumode nou onaregedu ai toro ia meri keje. Mare kurigodukare raga dukodire makudumodukare ai raga.
GAL 4:2 Nou oe kurireu umode tugeragu ia tudugareji jetuwo nou tonaregeduji jii je. Nou oe kurireu emare jorduware kaba meri kejeba turomode tonaregeduji nono turo moga imedu jitu mogadure.
GAL 4:3 Ča iwo tawie. Pao Kurireu ure nono nou oe kurireu mogadure. Mare oe kurireu ji karega inagoino. Emare umode boe pemegareboe maku meartorure puduiwuge etai. Jesus aregodukare raga dukodire nou boe pemegareboe makudukare nou meartorure Pao Kurireu jiwuge etai raga. Dukodire nou meartorure Pao Kurireu jiwuge ere nono nou oe kurireu onaregedu mogadure. Mare onaregedu ji karega inagoino. Nou Pao Kurireu ro pemegareu jamedu boe makudukare nou meartorure puduiwuge etai raga. Dujire inagoino. Nou meartorure Pao Kurireu jiwuge ere nono boe etugarege emogadure. Mare boe utugare remawu ji karega inagoino. Meartorure Pao Kurireu jiwuge emeartoruwo nou Pao Kurireu ure maku Judeu doge etaiwu bakaruji jii Jesus aregodure du ka. Dujire inagoino. Emeartorure nou bakaruji mare eroiwakare tuwo tugera ra turo pegareu piji. Dujire inagoino. Nou Pao Kurireu ure maku etaiwu bakaru ure boe rakado ei. Dujire inagoino. Mare Pao Kurireu jorduware marigudu. Ure boe pagado nou meri ka rugadu. Nou meri keje ure tonaregedu rawuje mato moto ka pagae rugadu. Boture aredu piji. Boture dukeje boe emeartoru kimore nou Pao Kurireu ure maku Judeu doge etaiwu bakaruji. Erduware nou bakaruji. Nou bakaru ure boe rakado ei kimo. Akore meartorukaie nou bakaru jiwuge ewarigudumoduie toro bope doge eda kejewu joru pegareuto rugadu. Nou boe erduware tumeartoru pemegakaie nou bakaruji rugadu dukodire tuwarigudumoduie nou joru pegareuto rugadu. Mare nou Pao Kurireu onaregedu aregodure tuwiwo ero pegareu moriče tuwo ekinorudo ewarigudukawo nou joru pegareuto. Emeartorumode Pao Kurireu onaregeduji dukeje Pao Kurireu umode tugeragu ei pudae tuwo toredo emage.
GAL 4:6 Aino tameartorure Jesusji dukodire Pao Kurireu ure tugeragu tai pudae tuwo toredo tagi. Dukodire Pao Kurireu ure Tuwari tugu tameardaeto. Dukodire nou Uwari ure parduwado Pao Kurireu ore remawuge nure pagi duji. Dukodire pagagore: – Iogwa – aino Pao Kurireuji.
GAL 4:7 Dukodire imode tawie. Tagare nono boe etugarege emogadure pugeje. Pao Kurireu ore nure tagi rugadu. Pao Kurireu ore nure tagi dukodire Pao Kurireu umode tumagore jiwu turo pemegareu jamedu boe maku tagai rugadu.
GAL 4:8 Marigudu tarduwakare Pao Kurireuji. Tare iaboe towuje. Tare udo nono Pao Kurireu ure taegai. Tameartorure tu ji. Mare bope dogeire taroino. Emage ere tudugaregedo tagi. Ere boe rakado tai. Mare Pao Kurireu remawuge karegure emage rugadu. Mare tarduwakare.
GAL 4:9 Mare aino tarduware Pao Kurireu remawuji. Emare ure tarduwado pudui. Mare kočare tare tagirimi nou taro boetojiwu ka pugeje. Mare aino bope dogei karega tameartorure. Judeu doge eno bakaru jire taroino tameartoruwo. Mare nou bakaru raka bokware nono bope doge eraga bokware dumogadure. Tameartorumode Judeu doge eno bakaruji mare nou bakaru roiwakare tuwo tugera maku tagai tuwo boe pemegado tai. Tameartorumode ji dukeje tamode tado nono nou boe eimijerage etugarege emogadure pugeje. Tamodukare tagamudo piji rugadu nono tagare tagamudo bope doge epiji dumogadure.
GAL 4:10 Tare tagirimi nou bakaru ka dukodire tare tageragu ia meriji nono Judeu doge ero mogadure tawo tawadae towuje nou meri keje taegarewo taroji. Tagagore taie Pao Kurireu jakaredo tai nou taro tabo. Tagagore nou tawadae koiaie Pao Kurireu umodukaie boe pegado tai. Mare pagatu jere tagagoino. Tare tageragu ia ariji nono Judeu doge ero mogadure tawo taro udo tuginai nou ari keje Pao Kurireu ukawo boe pegado tai nou ari keje. Mare pagatu jere taroino. Tabagudure tawo Pao Kurireu korigo joru jamedu boeji dukodire tare taro udo tuginai tu tu je nono Judeu doge ero mogadure. Mare pagatu jere taroino.
GAL 4:11 Imi karega ikare tarduwado awu tarore jiboeji. Ire tarduwado Pao Kurireu bataru remawuji iraga tabo. Dukodire imororamagadure tawagai. Tamodukare tagera ra nou taro piji dukeje pagatu je rabodu ire tarduwado Pao Kurireu bataru remawuji.
GAL 4:12 Inogwamaguduwo tai. Tarodo nono iro mogadure. Ire nono tamogadure. Taro pegakare i.
GAL 4:13 Tarduware irore jiboeji marigudu. Itaregodure tagae boetoji dukeje ikogodure, iraga bokware ituwo pugeje. Dukodire iragojere tagabo jii je. Dukodire ire tarduwado Jesus jiwu bataru pemegareuji tameartoruwo Jesusji uwo taginorudo rugadu.
GAL 4:14 Iraga bokware dukodire tare tado tarugadu tawo tagera maku inai. Tare tageragu i taegare tabo rugadu. Tare ido nono Pao Kurireu utugare baru tadawu mogadure taegai. Taro pemegare i nono taro moga Jesus Cristo jitu mogadure.
GAL 4:15 Taegarere tai taroino i dutabo. Iragojere tagabo dukeje tare tado tarugadu tawo taraga maku inai tawo boe pemegado i rugadu. Taroiwamode dukeje tawo taeku tawuje tawo maku inai dukeje tamode maku inai. Nono iture tabiji dukeje ire boe ewie nou inoduji rugadu. Mare kočare nou taegare pa? Tare tagirimi nou bakaru ka dukodi čare taegarekare tai pugeje.
GAL 4:16 Imagore taiboe pegare tai. Dukodire tagaidukare i pugeje. Mare iwadrarodu karegure tai. Boe jokodu jire imagore tu tu je tawiagai.
GAL 4:17 Nouia aregodure tagaewuge ere turagado pudui rugadu tuwo tagaidudo tuwadaruji. Mare tameartorumode ei dukeje boe pegamode tai. Etaidure tuwo tameardae pegado čei tameartorukawo čere tawie jiwu Pao Kurireu bataruji pugeje. Etaidure tuwo tagaidudo tu pudui tameartoruwo tuwadaruji taraga tabo.
GAL 4:18 Boe emeartorumode boe remawuji turaga tabo du pegakare. Dukodire iwo tawie. Iragojere tagabo dukeje tameartorure ire tarduwado jiwu Pao Kurireu bataru remawuji. Aino iragojekare tagabo mare tameartorudo nou ire tarduwado jiwu Pao Kurireu bataru remawuji tu tu je taraga tabo rugadu.
GAL 4:19 Iragojemode tagabo dukeje imode imago pemegado tai. Mare iragojekare tagabo. Dukodire iorduwa pemegakare tameardaeji. Iorduwa pemegakare nuba imode iwadaru udo tai. Marigudu iragojere tagabo dukeje boe rakare i iwo itoredo tagi nono boe rakare aredu kurijirigodureudo jitu mogadure. Mare aredu kurijirigodureudo ji karega inagoino. Itore remawuge ei karega inagoino. Ire tado tarugadu tameartoruwo Jesusji dukeje boe rakare i. Du jire inagoino. Dukodire imeardu kurire tai rugadu. Dukodire inagoino tare nono itore emogadure. Mare aino boe rakare i pugeje. Iwiagorore tawagai iwo tado tarugadu pugeje tameartoruwo awu ire tarduwado jiwu Pao Kurireu bataruji pugeje tawo nono Jesus Cristo meardae mogadure taro jamedu boe tabo. Dujire inagoino jamedu. Boe rakamode i jii tameartoruwo jitu ka pugeje.
GAL 4:21 Ia tagi tagaidure tawo tagirimi Pao Kurireu ure maku Judeu doge etaiwu bakaru ka tameartoruwo nou bakaru jamedu boeji. Mare tarduwakare nou bakaru makore jiboeji.
GAL 4:22 Padure bapera kejewu Pao Kurireu bataru ure parduwado aino. Abraão onaregedu imedure mitotu je toreduje remawudo ai. Oreduje utugare aredu aire onaregedu imedure mitotu je jamedu. Dukodire Abraão ore imere pobetu je.
GAL 4:23 Nou oreduje utugare aredu iere Hagar. Nou Hagar kuiarure dukodire nou Abraão aiwure tonaregedu boture nono boe etore ewodu mogadure. Mare nou Abraão oreduje remawudo kuiarumodukare rugadu. Dukodire orekare Abraão ai rugadu. Mare Pao Kurireu bataru koiare nou Abraão oreduje remawudo kuiarure. Abraão apore onaregedu imedure rugadu.
GAL 4:24 Boere aino awu aremei marigudu. Dure nono Pao Kurireu meardae mogadure. Pao Kurireu meardae ure pobetu je. Pao Kurireu meardae boetojiwu koiare ure tuwadaru maku Moisés ai Sinai Ri ao keje Arábia moto keje Moisés uwo maku Judeu doge etai eno bakaruče. Nou bakaru ure nono nou Abraão oreduje utugare aredu Hagar mogadure. Mare Hagar ji karega inagoino. Nou meartorure nou bakaru jiwuge ere nono boe etugarege emogadure. Nou bakaru ure emaragodae rakado ei emeartoruwo nou bakaruji. Dujire inagoino. Emodukare tamudo nou bakaru piji rugadu. Dujire inagoino. Jii aino boe etumode Jerusalém ba kurireu ka tumeartoruwo nou bakaruji. Ekare tamudo nou bakaru piji rugadu jii aino. Mare nouia Pao Kurireu meardae boigoduwu koiare boe emeartorumode Jesusji. Nou meardae ure nono nou Abraão oreduje remawudo mogadure. Boe etugare karegure ema. Mare Abraão oreduje ji karega inagoino. Meartorure Jesus jiwugeire inagoino. Ewiagorokare tumeartoruwo nou Judeu doge eno bakaruji pugeje. Ere tamudo piji rugadu. Ewiagorore tumeartoruwo Jesusji tu rugadu. Jesus rakojere baru tada. Dukodire ure nono baru tadawu Jerusalém mogadure. Nou baru tadawu Jerusalém ure nono paje mogadure. Mare paje ji karega inagoino. Pameartorumode Jesusji dukeje umode toredo pagi. Dujire inagoino. Umodukare turo rakado pai nono boe eimijera ro raka moga tudugaregei dumogadure. Dujire inagoino.
GAL 4:27 Padure bapera kejewu Pao Kurireu bataru akore: – Kuiarumodukareu aredu meartorure Pao Kurireuji dukodire kuiarure. Marigudu kuiarukare dukodire jorduwakare tugurijirigoduji. Mare aino kuiarure. Dukodire onaregedure. Dukodire onaregedu ore emagamode nou tumedago ore ekori. Nou metago orere marigudu dukodire oredu aidure ji. Mare aino nou kuiarumodukareu aredu onaregedure dukodire jakarere pudui rugadu. Uwadodumode tiegare tabo boe eiamedu boe emearduwo tuwadaru pemegareuji Pao Kurireu jituji.
GAL 4:28 Abraão ore ime ere pobetu je. Nou utugare aredu pijiwu Abraão onaregedu boture nono boe etore ewodu mogadure rugadu. Mare Pao Kurireu makore Abraãoji oreduje remawudo kuiarumoduie rugadu onaregedumoduie rugadu. Dukodire Pao Kurireu Uwari ure turaga maku Abraão oreduje remawudo ai dukodire kuiarure onaregedure rugadu. Iere Isaque. Dukejere ia meri keje nou utugare aredu onaregedu ro pegare nou Abraão oreduje remawudo onaregeduji. Dukodire padure bapera kejewu Pao Kurireu bataru akore: – Nou utugare aredu utudo nou tonaregedu apo. Imedu oeboe makudumodukare nou utugare aredu onaregedu ai. Imedu oe jamedu boe makudumode tu nou imedu oreduje remawudo onaregedu ai tu rugadu. Ainore Pao Kurireu bataru akore. Ča pameartorure Jesusji dukodire pare nono nou Abraão oreduje remawudo onaregedu Isaque mogadure. Mare Isaque ji karega inagoino. Pao Kurireu ore nure pagi. Dujire inagoino. Dukodire pawobe nure pugi. Pamedage nure pugi. Pagare nono nou utugare aredu onaregedu mogadure. Mare nou aredu ji karega inagoino. Pao Kurireu ure maku Judeu doge etaiwu bakaru jire inagoino. Pameartorumodukare ji pugeje. Pare pagamudo nou bakaru piji rugadu. Dujire inagoino.
GAL 5:1 Pameartorure Jesus Cristoji dukodire ure paginorudo pawo pagamudo nou Judeu doge eno bakaru piji. Pawo paragado pai pameartoruwo Jesusji tu rugadu. Tagaba tagirimi ia boe eno bakaru ka pugeje. Tameartorumode Judeu doge eno bakaruji dukeje nou bakaru umode boe rakado tai, umode tudugaregedo tagi pugeje.
GAL 5:2 Paulo nure imi. Iwo tawie. Ia boe egore tai tameartoruwo Judeu doge eno bakaruji tawo tawaga oto biri kado. Tamoduie tawaga oto biri kado dukejeie Pao Kurireu umoduie tugeragu tai pudae tuwo ro pemegareugedo tagi. Nou boe egore. Mare imire imode tawie. Tamode tawaga oto biri kado dukeje pagatu jere taroino. Mare iwo tawie. Jesus bire boe ero pegareu moriče. Tamodukare udo turugadu tai tameartoruwo nou Judeu doge eno bakaruji. Nono pagatu jere taroino.
GAL 5:3 Iwo tawie rugadu. Nou ure tuwaga oto biri kadowuge eiamedu boe emeartorumodukare nou Judeu doge eno bakaru jamedu boeji dukeje boe pegamode ei rugadu. Emeartoruwo nou bakaru jamedu boeji rugadu jii toro rugadu.
GAL 5:4 Mare nou meartorure nou Judeu doge eno bakaru jiwuge ere nono jordu pegare Jesus jiwuge emogadure Pao Kurireu jakai. Etaidure tumeartoruwo nou Judeu doge eno bakaruji tuwo ro pemegareugedo pudumi. Mare pagatu je. Nou turoino dutabo erdu pegare Jesusji. Dukodire Jesus roino jiboe aregodumodukare etae.
GAL 5:5 Mare pameartorure Jesusji dukodire ure Pao Kurireu Uwari maku pagai rakojewo pagabo jii toro rugadu. Emare ure pawie rugadu Pao Kurireu uie tugeragu meartorure Jesus jiwugei pudae. Ure pawie Pao Kurireu umoduie meartorure Jesus jiwuge edo nono ro pemegareuge emogadure rugadu. Dukodire parduware boemode aino pai duji rugadu.
GAL 5:6 Iwo tawie. Nou ure tuwaga oto biri kadowuge ere nono nou ure tuwaga oto biri kadodukareuge emogadure Jesus Cristo jakai. Jesus biapagakare nou inoduji. Jesus aiwore boei tu emeartorure pudui du bagai. Aiwore boei emeardu kurire Pao Kurireu jitu bagai, emeardu kurire boei dubagai.
GAL 5:7 Ire tawie Jesus bataru pemegareuji dukeje tameartorure Jesusji. Meri jameduji taegarere tai tameartorure Jesus jituji. Tare nono re rakareuge emogadure. Nou re rakareu rekodumode tumedage epiji taregoduwo boetoji nou boe oto pa ka. Mare boe eregodu ji karega inagoino. Tagagore tamodukaie tagera ra tameartorure Jesus jitu piji rugadu. Dujire inagoino. Tare taragado tai tameartoruwo Jesusji rugadu. Dujire inagoino. Ainore tarore boetoji. Mare aino ča ia boe etaregodure tagae ia bataru tabo tameartoruwo ewadaruji. Nono tameartorure ewadaruji Jesus bataru remawu piji rugadu. Nou aregodure tagaewuge erokare nono Pao Kurireu mogadure. Emage ere taekiripagado. Mare Pao Kurireu ure tawie tu boe remawuji tu rugadu. Kočare tameartorure nouia boe ewadaruji Pao Kurireu bataru remawu piji?
GAL 5:9 Nou aregodure tagaewuge ewadaru ure nono fermento mogadure. Fermento rogu umode biagatu je mare du inodu tabo umode nou massa jamedu boe kurido. Nou aregodure tagaewuge ewadaru rogu ure nono fermento mogadure jamedu. Mare fermento ji karega inagoino. Ewadaru rogure mare ure tameardae jamedu boe pegado. Dujire inagoino.
GAL 5:10 Imire imeartorure Jesusji. Emare umode taeku jado nou boe emagore jiboeji. Iorduwakare ei mare nou ure taekiripagadowuge emode tuwadrarodae morido rugadu. Pao Kurireu umode boe pegado ei nou ewadrarodae pegareu moriče.
GAL 5:11 Imedage nure tagi. Imago kimomode boei tuwo tuwaga oto biri kado dukeje boe emodukare boe pegado i pugeje. Erdu pegamodukare iwadaruji. Mare aino imagomodukare boei ewo tuwaga oto biri kado pugeje. Imagore ei emeartoruwo Jesusji tu rugadu Pao Kurireu uwo tugeragu ei pudae uwo edo nono ro pemegareuge emogadure. Dukodire boe erdu pegare iwadaruji.
GAL 5:12 Etokire tai tuwo iwadaru pegado tai pugeje tuwo tagaora pegado. Mare itaidure boe pegawo ei rugadu. Emagore tuie tuwaga oto biri kado rugadu. Aino itaidure ewo tuwa ta jamedu.
GAL 5:13 Mare imedage nure tagi. Pao Kurireu makore tawagai tuwo tagamudo boe eno bakaru piji rugadu. Dukodire tare tagamudo piji rugadu. Mare du inodu tabo tarokaba tawodure tabowu taro pegareuji pugeje. Tawiapagakaba nou tawodure tabowu taro pegareuji pugeje. Mare tagera maku pu ai tameardu kuriwo pui.
GAL 5:14 Tameardu kurido boe eiamedu boei nono tameardu kuri moga tai dumogadure. Ainore taromode taro koduwo nou Pao Kurireu ure maku Judeu doge etaiwu bakaru jamedu boe kori.
GAL 5:15 Mare tamodukare tagera ra tamago pegare pui dupiji dukeje tamode pu akedudo. Tamodukare tagera ra tagokire pui dupiji dukeje tamode pu akedudo jamedu.
GAL 5:16 Dukodire imode tawie. Pao Kurireu Uwari rakojere meartorure Jesus jiwugebo. Aino tawiapagamode rakojere tagabowu Pao Kurireu Uwariji dukeje tawiapagamodukare tawodure tabowu boe emeardae pegareuji.
GAL 5:17 Boe ewodure tumeardae pegareu tabo. Nou boe emeardae pegareu pegare Pao Kurireu Uwari meardaeji. Pao Kurireu Uwari meardae pegare nou boe ewodure tabowu boe emeardae pegareuji jamedu. Epegare pui rugadu. Dukodire boe eroiwakare tuwo tamudo nou tuwodure tabowu tumeardae pegareu piji. Etaidure turo pemegawo mare eroiwakare tuwo nou turo pemegareu to tu tu je.
GAL 5:18 Mare boe ewiapagamode rakojere pudabowu Pao Kurireu Uwari meardaeji dukeje emode tamudo Judeu doge eno bakaru piji emeartorukawo ji pugeje.
GAL 5:19 Mare boe eiamedu boe erduware boe ewodure tabowu boe emeardae pegareuji rugadu. Boe ewiapagamode nou boe emeardae pegareuji dukeje eribarimode tumugukare apowugei. Aredu aidumode tieribariwo tumugukare apowu imeduji. Imedu aidumode tieribariwo tumugukare apowu areduji. Ekudumode piga kuruče tuwo tuwadae pegado tuwo tubogurudo.
GAL 5:20 Boe ewiapagamode tuwodure tabowu tumeardae pegareuji dukeje emeartorumode tuwai tadawu santo dogei. Emode pao kurireugedo emage. Emeartorumode bope dogei tuwo jorubo pegareu barigu boe etae. Erdu pegamode boei tu tu je. Etokimode boei. Ekimaredumode tumedage enoe keje. Emago rakamode tugorigodure dutabo. Emeardaemodukare tumedagei. Emeardaemode tu pudui tuwo boe pemegado tu pudui tumedage epiji. Erdu pegamode tumedage emeardae pemegareuji. Emode boe emeardae pegado pui emode boe etokido pui.
GAL 5:21 Boe ewiapagamode tuwodure tabowu boe emeardae pegareuji dukeje ekorigodumode boe enoe keje. Eke kurumode ei. Emode bato pui tuguduwo piga kuruče tieribariwo pui. Ia ero pegareu ure nono awu ero mogadure. Ire tawie marigudu. Aino imode tawie pugeje. Boe emodukare tugera ra nou inagoino jiwu turo pegareu piji dukeje Pao Kurireu ro pemegamodukare ei. Emugumodukare Pao Kurireu apo baru tada.
GAL 5:22 Mare boe ewiapagamode Pao Kurireu Uwari meardaeji dukeje emeardu kurimode boei. Egaremode pudui. Emororamagadumodukare boe pegareuji pugeje tumeardae kuriwo Pao Kurireuji rugadu. Boe ewudugugodumode boei. Emeardae pemegamode boei. Ero pemegamode boei. Ekodumode tu makudure pudaiwu bataruji tu rugadu.
GAL 5:23 Boe ewiapagamode Pao Kurireu Uwari meardaeji dukeje emode turo butugudo boei. Emode turagado pudui turo pegakawo. Marigudu boe eiamedu boe etaidure nou boe ero pemegareu boeji jii aino. Boe emagomodukare boei ewo ia nou turo pemegareu okwado tubiji rugadu.
GAL 5:24 Mare nou boe ewodure tabowu boe emeardae pegareu ure turagado boei tuwo boe eraga ta epiji emeartoruwo pudui. Dukodire meartorure Jesus jiwuge ere nou tuwodure tabowu tumeardae pegareu bu ipo padure pugajejewu keje tuwo udo nono bireu mogadure. Mare ipo padure pugajejewu ji karega inagoino. Boe ewi ji karega inagoino. Meartorure Jesus jiwuge ewiapagamodukare nou tuwodure tabowu boe emeardae pegareuji pugeje rugadu. Dujire inagoino.
GAL 5:25 Pawiapagare Pao Kurireu Uwari meardaeji. Dukodire pawo paragado pai pameartoruwo nou Pao Kurireu Uwari meardae jamedu boeji tu tu je.
GAL 5:26 Mare boe enojaromode pudui dukeje emode pu korigo pui. Ekorigodumode pu oe keje. Dukodi čare iwo tawie. Pagojarokawo pawadaruji rugadu.
GAL 6:1 Imedage nure tagi. Ia tagi tameartoru pemegare Pao Kurireu Uwari makore tai jamedu boeji. Mare ia tamedage ewiapagamode boe emeardae pegareuji pugeje turo pegawo pugeje dukeje tamagodo ei ewiagoduwo nou turo pegareu piji rugadu, ewo tugera ra nou turo pegareu piji dubagai. Mare tamago rakareu tabo karega. Tamago pemegado ei. Mare taeku jado tawiapagakawo nou ewiapagare jiwu boe emeardae pegareuji taro pegakawo jamedu.
GAL 6:2 Boe rakamode ia meartorure Jesus jiwugei dukeje tagera maku etai rugadu. Boe rakamode tai dukeje tagera maku pu ai. Ainore taromode tameartoruwo Jesus Cristo bataru jamedu boeji.
GAL 6:3 Boe enojaromode pudui dukeje egomode boe pemegareu nuie pudumi. Mare boe pemegareuge emodukare emage dukeje nou boe ere tiekiripagado tu je rugadu.
GAL 6:4 Iwo tawie. Boe eiamedu boe emaragodu pemegawo Pao Kurireu ure maku pudaiwu tumaragodaeji. Mare boe etaiwomode tumedage emaragodaeji dukeje egomode tumaragodu pemegaie timedia maragodae kori. Mare boe ewiagoromode tu tumaragodaeji dukeje etaiwomodukare tumedage erore jiboeji. Emaragodu pemegamode tumaragodaeji dukeje etaidumode tumaragodure jiboeji rugadu. Du pegakare.
GAL 6:6 Boemode tumedage erduwado Pao Kurireu bataruji. Dukeje nou ure jorduwadowuge ewo ia tuge maku ai, ia to diero maku ai, nou ure boe erduwadowu ai rugadu.
GAL 6:7 Tagaba taekiripagado. Ia boe egore Pao Kurireu bataru ukaie turugadu pudui. Mare pagatu jere egoino. Boe ere nono boepa mogadure. Boepa tadare boe emode kuieda tugu dukeje kuieda mode nou boepa tada rugadu. Boe emode jureu tugu dukeje jureu mode nou boepa tada. Boe ere nono boepa mogadure. Mare boepa ji karega inagoino. Boe emeardae jire inagoino. Boe ewiapagamode meture pudabowu tumeardae pegareuji dukeje ero pegamode rugadu nou tumeardae pegareuji. Nono boe pegamode ei jamedu. Nou boe emodukare tuwia ra nou tumeardae pegareu piji dukeje toro ia meri keje ewarigudumode toro bope doge eda kejewu joru pegareuto jamedu. Dujire inagoino. Mare boe ewiapagamode Pao Kurireu Uwari meardae pemegareuji dukeje ero pemegamode rugadu nou Pao Kurireu Uwari meardaeji. Nono boe pemegamode ei jamedu. Toro ia meri keje edumode Pao Kurireu apo toro baru tada. Du akedumodukare rugadu jii toro rugadu. Du jire inagoino.
GAL 6:9 Dukodire pawo paragado pai paro pemegawo nono Jesus meardae mogadure. Pagiarigodukawo paro pemegareuji rugadu jii toro rugadu. Pamodukare pagera ra paro pemegareu piji dukeje toro ia meri keje boe pemegamode pai nono ure to boepa tadaboe kadowuge emogadure. Mare boepa ji karega inagoino. Jesus umode boe pemegado meartorure puduiwugei emeartorure pudui du moriče. Dujire inagoino.
GAL 6:10 Dukodire pawo pagera maku boe eiamedu boe etai. Paroiware dukeje pawo pagera maku boe etai rugadu. Meartorure Jesus jiwuge emode emage dukeje pawo paragado rugadu pawo pagera maku etai rugadu.
GAL 6:11 Ire awu atugoreboe kurido awu bapera keje taroiwawo tarduwawo ji rugadu. Ikera tabore ire towuje. Ikare ia boe edo awu bapera atugodo. Imire ire atugodo rugadu.
GAL 6:12 Jesus bire ipo padure pugajejewu keje boe ero pegareu moriče dukodire boe emeartorumode tu ji Judeu doge eno bakaru piji. Mare Judeu doge erdu pegare nou inoduji dukodire ero pegare tu tu je meartorure Jesus jiwugei. Mare ia boe etaidure tuwo tuginorudo nou Judeu doge ero pegare pudui dupiji. Dukodire emagore tai tawo tawaga oto biri kado nono Judeu doge ero mogadure tameartoruwo Jesusji. Egore boe emodukaie tuwaga oto biri kado dukeje meartorure Jesus jiwuge kaiegure emage. Mare pagare egoino. Ewiagorore tu boe erdumode jiwu turore jiboeji. Ewiagorokare Jesus bataru remawu bagai. Etaidure tuwo tuginorudo Judeu doge erdu pegare pudui dupiji dukodire egoino tai tawo tawaga oto biri kado nono Judeu doge erore turoiaji.
GAL 6:13 Nou meartorure Judeu eiwuge ere tuwaga oto biri kado tumeartoruwo eno bakaruji mare emeartorukare nou to bakaru ia tuwadaruji. Mare emagore tai tawo tawaga oto biri kado. Etaidure tumago pemegawo tarore jiboeji tuwobe Judeu doge ewiagai. Dukodire egoino tai tawo tawaga oto biri kado.
GAL 6:14 Itaidure imago pemegawo tu Pagimijera Jesus Cristo rore jiboeji. Emare bire ipo padure pugajejewu keje paro pegareu moriče. Dujire imago pemegamode tu rugadu jii toro rugadu. Imago pemegamodukare ia boei erore jiboeji. Imago pemegamode tu Pagimijera rore jiboeji rugadu. Tu emare bire boe ero pegareu moriče tu rugadu. Dukodire meartorukare Jesus jiwuge emeardae ure nono bireu mogadure iagai. Mare boe ewi ji karega inagoino. Imeartorure Jesusji dukodire nou meartorukare Jesus jiwuge emeardae roiwakare tuwo imeartorudo pudui pugeje. Dujire inagoino. Imeartorure Jesusji dukodire ire nono bireu mogadure jamedu. Mare iwi ji karega inagoino. Imeartorure Jesusji dukodire iwiapagakare nou meartorukare Jesus jiwuge emeardae pegareuji pugeje. Dujire inagoino.
GAL 6:15 Ia meartorure Jesus jiwuge Judeu doge ere tuwaga oto biri kado nono tuwobe ero mogadure. Mare Pao Kurireu biapagakare nou inoduji. Ia meartorure Jesus jiwuge ekare tuwaga oto biri kado. Mare Pao Kurireu biapagakare nou inoduji jamedu. Mare meartorure Jesus jiwuge emode turo maiwudo nono Jesus meardae mogadure. Dukodire eromodukare nou tuwodure tabowu boe emeardae pegareuji pugeje. Dubagaire Pao Kurireu aiwore.
GAL 6:16 Ča meartorure Jesus jiwuge emeartoruwo awu inagoino jiwu Pao Kurireu bataruji Pao Kurireu uwo epemegado pui. Pao Kurireu okudugoduwo ebo. Meartorure Jesus jiwuge boe tuginaiwuge eire inagoino. Meartorure Jesus jiwuge Judeu dogeire inagoino jamedu.
GAL 6:17 Ča imode iwadaru iado. Ia boe egore tai imeartorukaie Jesusji. Mare Jesus utugare nure imi rugadu. Dukodire boe ero pegare i marigudu. Ere iwiri kado dukodire nou boe enoe oia padure iwiri keje boe erduwo ji rugadu. Dukodire boe emagokawo tai pugeje imeartorukaie Jesusji. Boe erduware imeartorure Jesus jituji rugadu. Tameartorudo ji nono iro mogadure iwiagorokawo tawagai pugeje.
GAL 6:18 Imedage nure tagi. Ča Pagimijera Jesus Cristo ro pemegawo tai tuwo tameardae pemegado rugadu. Iwadaru urugadureu.
EPH 1:1 Paulo nure imi. Pao Kurireu emare ure tumeardae tawuje tuwo itudo boe ewagai Jesus bataru tabo boe emeartoruwo Jesus Cristoji. Itogea kurire kodire ire awu atugoreboe pemegado iwo maku Éfeso ba kurireu kejewuge meartorure Jesus jiwuge ewagai. Emeartorure Jesusji dukodire emugu pemegare Jesus apo rugadu. Nou Éfeso ba kurireu kejewuge ekare tugera ra Jesus Cristo piji rugadu. Emugu pemegare apo rugadu.
EPH 1:2 Pao Kurireu ro pemegawo tai rugadu tabemegawo pudui. Uwo tabemegado boei jamedu. Pagimijera Jesus Cristo ro pemegawo tai tabemegawo pudui jamedu. Uwo tabemegado boei jamedu.
EPH 1:3 Pamago pemegawo Pao Kurireuji. Pagimijera Jesus Cristo uo nure ema. Jesus Cristo meartorure tuoji rugadu. Pameartorure Jesus Cristoji dukodire pamugu pemegare Pao Kurireu apo. Dukodire ure baru tadawu turo pemegareu maku pagai taidu tabo tuwo paroiwado pameartoru rakawo ji.
EPH 1:4 Pao Kurireu ukare moto to raga du otodai mare ure tumeardae tawuje marigudu pameartoruwo Jesus Cristoji rugadu. Jorduware ro pegareuge mode pagi. Mare du inodu tabo ure tumeardae tawuje tuwo tugeragu pai tuwobeče marigudu tuwo paro udo tuginai paro pegareu piji tumeardae ka paro pemegawo. Aino pameartorure Jesus Cristoji dukodire Pao Kurireu ure tugeragu pai pudae tuwo pado nono ro pemegareuge emogadure. Ure tugeragu pai tuwo pado nono tuwobe emogadure. Ainore Pao Kurireu meardaere marigudu. Mare paga karega. Pao Kurireu meardu kurire pai marigudu boetoji. Dukodire ure tumeardae tawuje tuwo toredo pagi. Emare ure tumeardae tawuje pameartoruwo Jesus Cristoji. Pagi karega. Mare pameartorure Jesusji dukodire Pao Kurireu ure tugeragu pai pudae tuwo toredo pagi taidu tabo rugadu. Paigoia karega pare udo tugeragu pai. Emare ure tugeragu pai tumeardae tabo taidu tabo rugadu.
EPH 1:6 Dukodire pamago pemegawo Pao Kurireuji. Emare ro pemegare pai taidu tabo rugadu. Makudure pagaiboe ukare morido pagai. Pao Kurireu ure tumeardu kurire jiwu tonaregedu maku pagai taidu tabo.
EPH 1:7 Pao Kurireu ro pemegare pai rugadu! Mare paro pemegare du moriče karega. Pabegare mare kočare Pao Kurireu ro pemegare pai. Emare ure tumeardae tawuje turo pemegawo pai taidu tabo. Dukodire Jesus Cristo ure tugu redo paro pegareu moriče tuwiagoduwo paro pegareu piji tuwo tugeragu pai paro pegareu piji. Emare ure padawuje paro pegareu piji pagawo paro pegareu morido pugeje.
EPH 1:8 Ure turo pemegareu kurido pagai rugadu. Pao Kurireu jorduware rugadu. Roiware turowo boe jamedu boeji tuwo boe jamedu boe udo turugadu.
EPH 1:9 Dukodire ure tumeardae tawuje marigudu taidu tabo. Mare boe erduwakare nou Pao Kurireu meardaeji. Mare aino čare ure itudo boe ewagai iwo boe erduwado nou tumeardaeji. Ure nou tumeardae tawuje marigudu boe emeartoruwo Jesus Cristoji.
EPH 1:10 Nou tumeardae tabore Pao Kurireu aidure tuwo boe eiamedu boe edo bato pui pudae. Aidure tuwo baru tadawuge eiamedu boe edo bato pui pudae. Aidure tuwo moto kejewuge eiamedu boe edo bato pui pudae. Ure tugeragu Jesus Cristoji tuwo boe eimijera kurireudo ema. Dukodire ia meri keje Pao Kurireu umode boe jamedu boe udo turugadu dukejere umode nou tumeardae jetudo pudui rugadu. Boe eiamedu boe eimijera kurireu mode Jesus Cristoče rugadu.
EPH 1:11 Boe jamedu boe ure nono Pao Kurireu meardae mogadure. Ukare moto to du otodai ure tumeardae tawuje tuwo tugeragu boei tuwo emugu pemegado pudabo. Ji aino ure nou tumeardae pemegado tuwo tugeragu pai pameartoruwo Jesus Cristoji Pao Kurireu uwo pamugu pemegado apo rugadu.
EPH 1:12 Pao Kurireu ure tugeragu čei čegimaduwo apo rugadu jii toro rugadu, čemago pemegawo rore čei duji rugadu jii toro rugadu. Meartorure Jesus jiwuge boetojiwuge nure čegi.
EPH 1:13 Tagi jamedu tameardure Jesus bataru remawuji. Nou bataru pemegare tai rugadu. Nono tameartorure Jesusji jamedu. Dukodire ure taginorudo taro pegareu piji dukodire ukare taro pegareu morido tagai jamedu. Dukodire mugu pemegare Pao Kurireu apowuge nure tagi jamedu. Tameartorure Jesusji dukodire Pao Kurireu ure Tuwari maku tagai. Makore boei marigudu tumoduie Tuwari maku meartorure Jesus jiwuge etai. Aino ure Tuwari maku pagai rugadu. Pao Kurireu Uwari rakojere meartorure Jesus jiwugebo rugadu dukodire boe erduware Pao Kurireu uwobe nure emage duji.
EPH 1:14 Pao Kurireu uwobe nure meartorure Jesus jiwugeče. Dukodire Pao Kurireu Uwari rakojemode meartorure Jesus jiwugebo jii toro Jesus aregodumode du ka. Jesus aregodumode dukeje umode meartorure puduiwuge eewodudo pugeje. Umode etawuje ro pegareuge epiji emuguwo pudabo jii toro rugadu. Pao Kurireu Uwari rakojere nou meartorure Jesus jiwugebo dukodire erduware Pao Kurireu umode nou tumagore jiboe jetudo pudui rugadu. Dukodire pamago pemegawo Pao Kurireu meardae pemegareuji rugadu!
EPH 1:15 Dukodire imagore Pao Kurireu bagai baruto tabaru tabo tu tu je. Imeardure tameartorure Pagimijera Jesus jituji. Imeardure jamedu tameardu kurie Pao Kurireu uwobe eiamedu boei duji.
EPH 1:16 Dukodire ikimadure Pao Kurireu apo tarore jiboeji. Imagore baruto Pao Kurireu bagai tabaru tabo tu tu je.
EPH 1:17 Inogwamagudure Pao Kurireuji uwo Tuwari maku tagai. Pao Kurireu nure ema. Pagimijera Jesus Cristo Uo Kurireu nure ema. Inogwamagudure Pao Kurireuji Uwari uwo tarduwado taro pemegareuji, uwo tarduwado Pao Kurireuji. Dukodire tarduwamode Pao Kurireuji rugadu.
EPH 1:18 Inogwamagudure Pao Kurireuji uwo tagaora pemegado tarduwawo Pao Kurireu bataru remawuji. Pao Kurireu makore tawagai marigudu. Aino imagore Pao Kurireu bagai baruto uwo tarduwado kodiba makore tawagai. Makore tawagai tarduwawo tarudumode baru to duji rugadu. Makore turo pemegamoduie meartorure puduiwugei. Aino imagore Pao Kurireu bagai baruto uwo tarduwado nou turo pemegareuji rugadu.
EPH 1:19 Aino imagore Pao Kurireu bagai baruto uwo tarduwado turagare rugadu duji. Rakare rugadu tuwo meartorure puduiwuge ero pemegado. Dukodire pameartorure ji rugadu. Pao Kurireu emare ure Jesus Cristo jewodudo pugeje nou turaga tabo. Ure Jesus mugudo pudabo tugana pemegareu jagwai baru tada nou turaga tabo jamedu. Nou turaga tabore ure pameartorudo aino pudui jamedu. Pao Kurireu ure Jesus Cristo mugudo baru tada boe eiamedu boe eimijerawo ema. Boe eimijera kurireuge eimijera nure ema. Baru tadawuge eiamedu boe eimijera nure ema. Raka kodure ro rakareu bope doge eraga kori rugadu, bope doge eimijera raka kori rugadu. Boe eimijerage eiamedu boe ekimijera nure ema. Jesus ie kurire moto kejewuge eiamedu boe ekie kori. Ie kurimode nou aregodumode boeiwu moto kejewuge boe ekie kori jamedu.
EPH 1:22 Pao Kurireu ure boe jamedu boe mugudo Jesus iera keje dukodire boe emodukare tuginorudo Jesus piji. Meartorure Jesus jiwuge eiamedu boe eimijera pemegareu nure ema rugadu.
EPH 1:23 Jesus ure nono boe etaora mogadure. Mare boe etaora ji karega inagoino. Meartorure Jesus jiwuge ekimijera nure Jesusče. Dujire inagoino. Meartorure Jesus jiwuge ere nono Jesus ukana upogora mogadure. Mare ukana upogora ji karega inagoino. Jesus uwobe nure nou meartorure puduiwu boeče. Jesus utugarege nure emage jamedu. Dujire inagoino. Meartorure Jesus jiwuge eragakare mare Jesus ure turaga maku nou meartorure puduiwuge etai tuwo eragado erowo nono Jesus meardae mogadure. Jesus ure boe jamedu boe udo nono tumeardae mogadure boe jamedu boe parugajeje.
EPH 2:1 Marigudu tameartorukare Pao Kurireuji dukodire taro pegare tu tu je. Dukodire tare nono bireuge emogadure. Mare tawi ji karega inagoino. Tamugu jaere Pao Kurireu piji. Taduiago bope doge eda kejewu joru pegareuto taro pegareu moriče. Dujire inagoino.
EPH 2:2 Tameartorure ro pegareuge emeardaeji. Tameartorure bope doge eimijeraji. Iere Satanás. Nou meartorukare Pao Kurireu jiwuge eiamedu boe emeartorure nou bope doge eimijera kurireuji rugadu. Utugarege nure emage rugadu. Bope doge mareboe doge eiamedu boe emeartorure nou tugimijera pegareu Satanás bataruji rugadu.
EPH 2:3 Marigudu paiamedu boe pare nono nou meartorukare Pao Kurireu jiwuge emogadure rugadu. Marigudu parore tu pameardaeji rugadu. Paipagakare Pao Kurireu bagai rugadu. Paipagare tu pawodure tabowu pameardae pegare jiboeji rugadu. Parore tu pagaidure jiboeji. Dukodire Pao Kurireu korigodure pai rugadu. Dukodire pawarigudumode boe pegareuto rugadu paro pegareu boe moriče rugadu.
EPH 2:4 Mare Pao Kurireu okudugodure boebo rugadu. Meardu kurire boei rugadu.
EPH 2:5 Dukodire ure tugeragu pai. Pameartorukare Pao Kurireuji dukodire pamugu jaere Pao Kurireu piji. Dukodire pare nono bireuge emogadure. Mare pawi ji karega inagoino. Pao Kurireu ure tugeragu pai pameartoruwo Jesusji. Dujire inagoino. Mare ukare morido pagai. Jesus Cristo bire paro pegareu moriče mare jewodure pugeje tuwo meartorure puduiwuge ekinorudo. Pameartorure Jesusji dukodire ure pado nono jewodureuge emogadure. Mare paewodu ji karega inagoino. Pao Kurireu ro pemegare pai rugadu. Ure paginorudo paro pegareu piji. Mare ukare pado paro pegareu morido pudai. Ema koiare ure paro pegareu morido. Dujire inagoino. Ure pamugu pemegado Jesus Cristo apo dukodire ure padawuje paro pegareu piji tuwo paro udo nono Jesus meardae mogadure. Nono boe ekimijerage umode pagi baru tada Jesus Cristo apo.
EPH 2:7 Pao Kurireu ure paginorudo dukodire boe eiamedu boe erduware Pao Kurireu ro pemegareuji rugadu. Jii aino boe eiamedu boe erduware Pao Kurireu ro pemegareuji rugadu. Pao Kurireu ro pemegare rugadu. Meardu kurire boei rugadu. Dukodire ure Jesus Cristo maku boe etai bitoduwo boe ero pegareu boe moriče. Ia boe eromodukare nono Pao Kurireu ro pemegare boei dumogadure. Nono boe eiamedu boe erduwamode nou Pao Kurireu ro pemegareuji rugadu jii toro rugadu.
EPH 2:8 Boe ekaregure turo pegareu morido tuwo tuginorudo. Tu Pao Kurireu umode boe ekinorudo ero pegareu mori piji. Emare ure tumeardae tawuje taidu tabo tugawo boe ero pegareu morido etai. Mare paga karega. Boe emeartorumode tu Jesusji tu rugadu. Nou Pao Kurireu ro pemegareu emare ure boe ekinorudo tugawo ero pegareu morido etai. Ainore Pao Kurireu ro pemegare meartorure puduiwugei. Boe emeardaere turo pemegawo tuwo turo pegareu morido. Mare pagare eroino. Boe emodukare turo pegareu morido turo pemegareu tabo. Boe ero pemegamode mare du inodu tabo boe emodukare tuginorudo. Dukodire boe emago pemegakaiago turo pemegareuji. Emago pemegawo tu Pao Kurireu ro pemegare pudui duji.
EPH 2:10 Pao Kurireu ro pemegare pai tuwo paginorudo paro pegareu piji tuwo paro pemegado. Nono ure pamugu pemegado Jesus Cristo apo. Nono ure paragado paro pemegawo jii toro rugadu. Marigudu meardaere tuwo nou turo pemegareu maku pagai paro pemegawo nono nou tumeardae mogadure.
EPH 2:11 Boe tuginaiwuge nure tagi. Judeu doge egore boe tuginaiwuge enuie tagi. Egore ukaie tuwaga oto biri kadowuge enuie tagi. Judeu doge egore uie tuwaga oto biri kadowuge enuie pudumi rugadu. Tore ime kugure tuwaga oto biri jire erore aino turoiaji.
EPH 2:12 Pao Kurireu ure nou ero maku Judeu doge etai marigudu. Pao Kurireu uwobe nure emage. Mare tagi karega. Boe tuginaiwuge nure tagi. Pao Kurireu uwobe karegure tagi. Pao Kurireu ukare turo maku tagai. Pao Kurireu akore turo pemegamoduie Judeu dogei. Ure eno bakaru maku etai. Mare tagi karega. Tarduwakare Pao Kurireuji. Tameartorukare Pao Kurireuji dukodire tamugu jaere Pao Kurireu piji. Dukodire tabagakare ia Pao Kurireu ro pemegareu bagai.
EPH 2:13 Mare aino čare tameartorure Jesus Cristoji. Dukodire tamugu pemegare Jesus apo. Jesus Cristo ure tugu redo taro pegareu moriče dutabore ure tugeragu tai. Dukodi čare tamugu puredure Pao Kurireuji.
EPH 2:14 Jesus Cristo emare ure pabemegado pui. Ure Judeu doge boe tuginaiwuge edo nono pumogadure. Marigudu erugodure pui. Marigudu etukare puae. Mare Jesus bire boe eiamedu boe ero pegareu moriče dukodire ure nou boe emeardae pegare puidu akedudo.
EPH 2:15 Ure nou Pao Kurireu ure maku Judeu doge etaiwu eno bakaru rugadu akedudo. Judeu doge emeartorukaiago ji pugeje tuwo tuginorudo. Emeartoruiago tu Jesusji rugadu. Dutabo čare ure Judeu doge boe tuginaiwuge edo nono pumogadure. Ure emugu pemegado pudabo puapo rugadu. Dukodire ure epemegado pui.
EPH 2:16 Jesus bire ipo padure pugajejewu keje dukodire ure nou Judeu doge nou boe tuginaiwuge erugodu puidu akedudo pubiji pugeje tuwo ewobedo pugi puapo. Turoino dutabo ure tumedagedo emage jamedu. Jesus bire ipo padure pugajejewu keje dukodire ure tugeragu boei tuwo etudo Pao Kurireu ae.
EPH 2:17 Ainore Jesus rore rugadu. Aregodure mato moto ka. Ure boe ewie Pao Kurireu bataru pemegareuji. Makore tumoduie boe epemegado Pao Kurireuji. Makore tumoduie boe tuginaiwuge epemegado Pao Kurireuji. Makore tumoduie Judeu doge epemegado Pao Kurireuji. Boe tuginaiwuge erduwakare Pao Kurireu o bakaruji. Judeu doge erduware Pao Kurireu o bakaruji.
EPH 2:18 Mare Jesus Cristo emare ure paiamedu boe pabemegado Pao Kurireuji dukodire paroiware pamagowo Pao Kurireuji. Ia pagi Judeu doge nure pagi. Ia pagi boe tuginaiwuge nure pagi. Mare Pao Kurireu Uwari rakojere paiamedu boebo dukodire pamagomode Pao Kurireuji nono paragojere apo dumogadure.
EPH 2:19 Boe tuginaiwuge nure tagi. Mare aino boe tuginaiwu remawuge karegure tagi pugeje. Aino meartorure Jesus jiwuge eiamedu boe emedage nure tagi. Pao Kurireu uwobe nure tagi jamedu meartorure Jesus jiwuge eiamedu boebo.
EPH 2:20 Makore Pao Kurireu bataru jiwuge ere boe ewie marigudu nuba Pao Kurireu romoduie boei. Uture Jesus bataru tabowuge ere boe ewie jamedu. Tameartorure nou bataruji dukodire Pao Kurireu umode taragado nono boe emode tuwai pemegado tori tabo dumogadure. Jesus Cristo jire nou makore Pao Kurireu bataru jiwuge egoino. Dukodire ure nono tori pemegareu mogadure. Mare bai ji karega inagoino. Tori ji karega inagoino. Jesus jire boe eiamedu boe emeartorumode tumuguwo Pao Kurireu apo. Dujire inagoino.
EPH 2:21 Jesus Cristo emare umode turaga maku tagai tuwo tarduwado taro pemegawo. Emare umode tado tarugadu Pao Kurireu Uwari rakoje pemegawo tagabo. Dukodire ure tabemegado nouia meartorure Jesus jiwugebo. Tamode tameardae pemegareu tawuje puapo rugadu. Nono Pao Kurireu Uwari uwai pemegareu mode tagi. Mare bai ji karega inagoino. Meartorure Jesus jiwuge eire inagoino. Pao Kurireu Uwari rakojere meartorure Jesus jiwuge eiamedu boebo. Dujire inagoino. Dukodire Pao Kurireu mugure tagabo rugadu.
EPH 3:1 Dukodire imagore baruto Pao Kurireu bagai tu tu je tabaru tabo. Paulo nure imi. Boe tuginaiwuge nure tagi. Ire boe tuginaiwuge ewie Jesus Cristo jiboeji emeartoruwo ji dukodire boe eimijerage ere itugu baičoreuto.
EPH 3:2 Pao Kurireu ro pemegare i dukodire ure imaragodae maku inai iwo boe pemegado tai. Tarduware nou inoduji.
EPH 3:3 Pao Kurireu ure iorduwado ture biadowu tumeardaeji. Ure nou tumeardae biado boe epiji marigudu. Mare aino čare ure iorduwado nou tumeardaeji iwo boe ewie tu tu je. (Ire nou Pao Kurireu meardae bu bapera keje. Nono ire nou atugoreboe maku toro tawagai. Tagaiwomode awu atugoreboeji dukeje tarduwamode iorduware jiwu Pao Kurireu meardaeji. Jesus Cristo rore jiboe jiwu Pao Kurireu meardae jire inagoino.)
EPH 3:5 Marigudu Pao Kurireu ukare boe ewie nou tumeardaeji. Mare maigodu aino Pao Kurireu Uwari ure nou uture Jesus bataru tabowuge čegi čewie. Ure nou makore Pao Kurireu bataru jiwuge ewie jamedu. Dukodire čerduware nou Pao Kurireu jordae meardae boeji.
EPH 3:6 Aino inure tawie jamedu tarduwawo nou Pao Kurireu jordae meardaeji jamedu. Nou Pao Kurireu meardae koiare umode Pao Kurireu ro pemegado boe tuginaiwugei nono Pao Kurireu ro pemegare Judeu dogei dumogadure. Boe tuginaiwuge Judeu doge ere nono pumogadure rugadu. Mare paga karega. Nou Pao Kurireu meardae koiare ure boe tuginaiwuge emeartorudo Jesusji. Emeartorumode Jesusji dukeje Pao Kurireu umode tuwobedo emage jamedu nono turore Judeu dogei dumogadure eiamedu boe emugu pemegawo Pao Kurireu apo rugadu. Emeartorumode Jesusji dukeje umode ekinorudo rugadu. Ainore Pao Kurireu jordae meardae ure marigudu. Ukare boe erduwado ji mare aino ča ure boe ewie nou tuiordae tumeardae boeji rugadu.
EPH 3:7 Pao Kurireu ure turaga maku inai. Ure turo pemegareu maku inai tuwo tumaragodae maku inai imaragodaeče. Dukodire ure tudugaredo imi iwo boe ewie nou Jesus bataru pemegareuji.
EPH 3:8 Boe kurireu karegure imi. Meartorure Jesus jiwuge eiamedu boe etugare nure imi. Mare kočare Pao Kurireu ure nou tumaragodae pemegareu maku inai ituwo boe tuginaiwuge ewagai iwo ewie Jesus Cristo bataru pemegareuji. Iwo ewie Jesus Cristo ro pemegareuji. Jesus Cristo koiare umode boe pemegado boei rugadu. Boe erduware jiboe aregodumodukare Jesus Cristo rore jiboe oto pa ka. Boe erduware jiboe aregodumodukare Jesus Cristo meardaere jiboe oto pa ka.
EPH 3:9 Pao Kurireu ure tumeardae rugadu boe towuje rugadu. Aino ure itudo boe ewagai iwo ewie nuba Pao Kurireu romode tuwo tumeardaere jiboe towuje. Marigudu rugadu ure nou tumeardae biado boe epiji jii aino. Mare aino maigodu aino ure iorduwado ji iwo boe ewie.
EPH 3:10 Ukare moto to du otodai ure nou tumeardae tawuje marigudu Jesus Cristo aregoduwo mato moto ka. Mare ure nou tumeardae biado boe epiji jii toro Jesus aregodumode du ka. Aino ča ure Pagimijera Jesus Cristo arego mato moto ka. Dujire Pao Kurireu meardaere. Nono boe emeartorumode Jesusji dukeje nou boe ekodumode nou Pao Kurireu meardae rekodaji. Pao Kurireu jorduware rugadu. Mare boe emeartorumode Jesusji dukeje eiamedu boe emode nono pumogadure Pao Kurireu jakai. Dukodire baru tadawuge rakareuge erduwagodumode Pao Kurireuji, jorduwareu nure ema duji. Egomode Pao Kurireu jorduwaie rugadu boe jamedu boeji. Bope doge rakareuge eiamedu boe egomode jamedu Pao Kurireu jorduwaie rugadu boe jamedu boeji.
EPH 3:12 Pameartorure Jesusji dukodire pamugu pemegare apo. Dukodire pabogurukare pamagowo Pao Kurireu bagai rugadu. Pamugu pemegare apo dukodire pamagomode ji rugadu. Parduware meardumode pamagore tuwagai duji.
EPH 3:13 Dukodire inogwamagudumode tai. Tagiarigodukaba boe pegare i duji. Ire tawie Jesus bataru pemegareuji boe pemegawo tai. Tameartorure ire tawie jiwu bataruji rugadu. Dukodire inagoino tagiarigodukaba.
EPH 3:14 Dukodire ire ipu jodo mototo. Imagore Pao Kurireu bagai tu tu je.
EPH 3:15 Pao Kurireu ure baru tadawuge eiamedu boe etowuje. Ure moto kejewuge eiamedu boe etowuje. Meartorure jiwuge etuo nure ema rugadu.
EPH 3:16 Pao Kurireu kurire rugadu, rakare rugadu. Dukodire inogwamagudure ji uwo turaga maku tagai. Uwari uwo taragado tai rugadu. Dukodire taraga mode rugadu tameartoru kuriwo Jesusji jii toro rugadu. Ainodu koiare umode taragado tai.
EPH 3:17 Inogwamagudure Pao Kurireuji tameartoruwo rugadu Jesus Cristoji. Tameartorumode ji dukeje mugumode tagabo. Inogwamagudure Pao Kurireuji tameardu kuriwo boei rugadu. Tagaba tagera ra tameardu kurire boei dupiji.
EPH 3:18 Jesus Cristo emare meardu kurire boei rugadu. Jesus umodukare tugera ra tumeardu kurire boei dupiji rugadu. Akedumodukare rugadu. Meardu kurire boe eiamedu boei rugadu. Inogwamagudure Pao Kurireuji uwo turaga maku tagai tarduwawo nou inagoino jiwu Jesus meardu kurire boei duji rugadu.
EPH 3:19 Inogwamagudure Pao Kurireuji tarduwawo Jesus meardu kurire tai rugadu duji. Boe erduwa pemegamodukare Jesus meardu kurire boeiwu meardae jamedu boeji. Mare tarduwamode bega bega Jesus meardu kurire boeiwu meardaeji dukeje tameardae pemegamode nono Pao Kurireu meardae mogadure. Taro pemegamode nono Pao Kurireu ro mogadure.
EPH 3:20 Pao Kurireu rakare rugadu. Raka kodure pagogwamagudae boe kori rugadu. Dukodire umode turaga maku pagai rugadu tuwo boe jamedu boe pemegado pai. Pameardae pemegamode mare paroiwakare pameardaewo awu Pao Kurireu ro pemegareu jamedu boeji.
EPH 3:21 Dukodire meartorure Jesus jiwuge eiamedu boe emago pemegawo Pao Kurireuji Jesus apo rugadu. Nou boe emago pemegareu akedukawo. Emago pemegawo Pao Kurireuji jii toro rugadu. Nono rugadu uwo aino rugadu jii toro.
EPH 4:1 Pagimijera Jesus utugare nure imi dukodire ia boe etaidukare i. Dukodire ere itugu baičoreuto. Mare iwo tawie tu je. Pao Kurireu makore tawagai tameartoruwo tuwadaruji. Dukodire taro pemegado nono Pao Kurireu meardae mogadure.
EPH 4:2 Tagaba boe remawugedo tagi boe utugarege pemegawo tagi. Tamago rakakaba boei. Mare tamago pemegado boei. Tagorigodukaba boei. Mare taro butugudo boei. Tameardu kurido boei. Dukodire tagogudugodumode boebo.
EPH 4:3 Pao Kurireu Uwari ure tabemegado pui. Dukodire ure tameardae pegareu akedudo tabiji tameardae pegakawo pui. Ča taragado tai tagawo tagera ra nou Pao Kurireu Uwari rore tai dupiji tameardae pemegawo pui rugadu. Nono tabemegamode pui rugadu.
EPH 4:4 Mare paga karega inagoino. Meartorure Jesus jiwuge ere nono Jesus biri kodu mogadure. Mare kodu ji karega inagoino. Biri ji karega inagoino. Jesus uwobe nure emage. Dujire inagoino. Dukodire emodukare tudo tuginai pubiji. Dujire inagoino. Dukodire inagoino tai tameardae pemegawo meartorure Jesus jiwuge eiamedu boei tabemegawo pui rugadu. Mugure tagabowu Pao Kurireu Uwari ure mitotu je. Pobe karega. Dukodire inagoino tai tameardae pemegawo pui. Pao Kurireu makore tawagai taiamedu boe tameartoruwo tu Jesusji tabagawo bagai uwo tugirimi dubagai. Tabagare bagaiwu ure mitotu je. Tu Jesus bagaire tabagare uwo tugirimi dubagai. Dukodire inagoino tai tameardae pemegawo pui.
EPH 4:5 Pagimijera ure mitotu je. Dukodire inagoino tai tameardae pemegawo pui. Umode paginorudowu ure mitotu je dukodire paiamedu boe pameartorumode tu ji rugadu. Dukodire inagoino tai tameardae pemegawo pui. Boe emeartorure Jesusji dukeje eiamedu boe etao pegododure. Judeu doge etao pegododure nono boe tuginaiwuge etao pegododure dumogadure. Eiamedu boe emeartorure Jesusji dukodire eiamedu boe etao pegododure nono puro mogadure. Tagao pegododure nono ero mogadure jamedu. Dukodire inagoino tai tameardae pemegawo pui rugadu.
EPH 4:6 Pao Kurireu ure mitotu je. Meartorure Jesus jiwuge eiamedu boe etuo nure ema rugadu. Dukodire pao nure ema jamedu. Ia pao kurireu bokware. Ure mitotu pagai. Dukodire inagoino tai tameardae pemegawo pui. Paiamedu boe Pagimijera Kurireu nure ema rugadu. Maragodure pagabo boe jamedu boeji. Rakojere pagabo rugadu. Dukodire inagoino tai tameardae pemegawo pui rugadu jii toro rugadu.
EPH 4:7 Mare Jesus Cristo ure tumeardae tawuje tuwo turo pemegareu maku pagai, meartorure puduiwuge eiamedu boe etai. Tuwo tumaragodae maku pagaire Jesus roino. Mare nou pamaragodae ure tuginai pagai tu tu je. Dukodire umode pamaragodu pemegado nou pamaragodaeji jamedu.
EPH 4:8 Padure bapera kejewu Pao Kurireu bataru akore: – Ure tugeragu nou moto kejewu boei tuwo ekinorudo nou bope doge epiji etuwo pudabo. Ča ruture ebo. Čare ure turo pemegareu maku moto kejewuge boe etai tuwo tumaragodae maku etai emaragodaeče.
EPH 4:9 Jesus jire akoino. Emare ure turawuje boetoji baru piji moto ka, moto towu aroe eiawuto jamedu. Dukejere ruture. Dukodire Pao Kurireu akore “ruture” aino.
EPH 4:10 Nou ure turawujewu ure nono nou rutureu mogadure. Ure mitotu je. Ruture baruto dukeje ruture nou kuieje doge toro etao ka toro turagojewo Pao Kurireu apo baru jamedu boe parugajeje boe eiamedu boe eimijera kurireuwo ema baru jamedu boe tada.
EPH 4:11 Emare ure turo pemegareu maku meartorure puduiwuge etai tuwo tumaragodae maku etai. Dukodire ure ia meartorure puduiwuge etudo puduiboe to bataru tabo ia boe ewagai. Ure ia meartorure puduiwuge erduwado tuwadaruji emagowo ji boe ewiagai. Ure iage erduwado ewo boe emeartorudo Jesusji. Ure iage erduwado etuwo meartorure Jesus jiwugei tuwo emeardae pemegado, ewo boe erduwado Pao Kurireu bataruji.
EPH 4:12 Ainore Jesus rore nou turo pemegareuji tuwo meartorure puduiwuge edo turugadu emeartoruwo Pao Kurireu bataruji rugadu. Ainore Jesus rore tuwo nou meartorure puduiwuge eragado ekawo tugera ra tumeartorure puduidu piji.
EPH 4:13 Dukodire pameartorumode tu Jesusji. Nono pameardae pegamodukare pui. Mare parduwamode Pao Kurireu Onaregeduji rugadu. Nono jorduwareuge mode pagi. Nono pameartorumode Jesus Cristoji nono Jesus Cristo meartorure Pao Kurireu jitu mogadure nono pamode Pao Kurireu jakaredo pudui rugadu parore jiboeji.
EPH 4:14 Dukodire paromodukare nono boe etore ero mogadure pugeje. Boe etore erduwakare kaba jiba tumeartorumode. Mare parduware. Dukodire pameartorumodukare boe meardae pegareugei pugeje. Egore tumagoie Pao Kurireu bataruji, Pao Kurireu meardaeji. Mare pagare egoino. Etaidure tuwo paekiripagado. Emode tuwadaru pemegado pai tuwadrarodae tabo tuwo paekiripagado pameardae pegawo nono tumeardae mogadure. Mare eroiwamodukare pai pugeje. Pameartorumodukare ei pugeje.
EPH 4:15 Mare pameartoru rakamode Jesusji. Emare ure nono pagaora mogadure. Mare pagaora ji karega inagoino. Pagimijera nure ema dukodi. Dujire inagoino. Dukodire pamodukare boe ekiripagado. Pamagomode Pao Kurireu bataru remawuji tu rugadu. Mare pamago rakamodukare boei. Pameardu kurimode boei pawadaru pemegareu tabo. Nono pameartoru rakamode Jesus Cristoji nono Jesus Cristo meartorure Pao Kurireu jitu mogadure.
EPH 4:16 Meartorure Jesus jiwuge ere nono boe etore erijodu umogadure. Boe etore erijodumode dukeje epogora ekana rakagodumode. Meartorure Jesus jiwuge ere nono nou boe etore erijodu umogadure. Erore puiboe ure nono boe epogora boe ekana umogadure. Mare boe erijodu ji karega inagoino. Boe epogora boe ekana ji karega inagoino. Jesus emare jorduware tuwo boe ero jamedu boe udo turugadu. Meartorure Jesus jiwuge emode tugeragu Jesus meardaeji dukeje emeardu kurimode pui. Dujire inagoino. Nono emode tugeragu Jesus ure maku pudaiwu tumaragodaeji tumaragoduwo ji. Nono emode nou tumaragodae towuje rugadu tubemegare pui dutabo tumeardae pemegare pui dutabo. Dujire inagoino. Nono emeardu kurimode pui rugadu jii toro rugadu. Dujire inagoino. Nono emeartoru kurimode Jesusji rugadu. Dukejere emeartoru remawumode Jesusji rugadu. Dujire inagoino.
EPH 4:17 Dukodire iwo tawie Pagimijera Jesus jiboeji. Taeku jado. Tagera ra nou boe tuginaiwuge meartorukareuge ero piji. Tarokaba nono ero mogadure. Emagere emeardaere jiboe ukare turugadu. Emode tumeardae tawuje mare pagatu je.
EPH 4:18 Erduwa bokware nono jorduwa bokware awara bagaiwu boečo kaowu umogadure. Erduwakare rugadu. Emeartoru bokware Pao Kurireuji. Dukodire edu jaere Pao Kurireu meardae pemegareu piji. Ekare tugeragu Pao Kurireu meardaeji rugadu.
EPH 4:19 Epoguru bokware turo pegareuji. Ekigodu tumagu piga kuru bagai. Ime doge areme doge eribari kigodure pui. Emeardaere tu turo pegawo boe ero pegareu jamedu boeji.
EPH 4:20 Mare tagi tarduwagodure Jesus Cristoji. Mare nou ro pegareuge ero tabo karega.
EPH 4:21 Tawiapagare ire tarduwado jiwu Jesus bataruji dukeje tameartoru kurire ji. Nono mugu pemegare Jesus apowuge nure tagi. Dukodire boe ere tarduwado Jesus bataru remawuji.
EPH 4:22 Dukodi čare tagera ra tameardae pegareu jamedu boe piji. Marigudu tameardae pegareu koiare ure taro pegado. Marigudu tameardae pegareu ure taekiripagado dukodire ure tagaidudo boe pegareu boeji. Dukodire tameardae pegareu uiago tagagedudo marigudu.
EPH 4:23 Mare aino čare Jesus bataru remawu ure tarduwado tawo tameardae maiwu mugudo tameardae pegareu mugato tawo tagaidure jiboe maiwudo.
EPH 4:24 Ča tageragu nou Pao Kurireu ure maku tagaiwu tameardae maiwuji. Pao Kurireu ure nou tameardae udo nono tumeardae remawu mogadure. Tameardae maiwumode dukeje taro pemegamode. Taromodukare nono meartoru bokwareuge ero mogadure pugeje.
EPH 4:25 Tagogwa ra tawadrarodae piji. Pameartorure Jesusji dukodire Jesus Cristo uwobe nure pagi. Dukodire tamagodo tu pui tawadaru pemegareu remawu tabo.
EPH 4:26 Tagorigodu raimode dukeje taro pegamode rugadu. Tagorigodumode mare tagorigodu barigu tabiji kuri je rugadu taro pegakawo boei. Tawia ra tagorigodu piji kuri aino.
EPH 4:27 Tawiapagakaba bope doge eimijeraji.
EPH 4:28 Ia tagi tagiwogure mare tagiwogukaba pugeje. Tamaragodudo diero bagai. Tamaragodu pemegamode dukeje diero makudumode tagai tamaragodae moriče. Dukodire taroiwamode tawo tagera maku marenarue doge etai.
EPH 4:29 Tamago pegakaba boei. Tamago pemegado boei tawo erduwado, tawo ero pemegado. Dukejere boe pemegamode nou biapagare taiwugei.
EPH 4:30 Tagaba Pao Kurireu Uwari kiarigo. Tameartorure ji dukodire ure Tuwari maku tagai tuwobewo tagi mare ure Tuwari maku tagai tuwo tarduwado jamedu tumoduie taginorudo taro pegareu piji rugadu jii toro Jesus aregodumode kejewu ia meri ka.
EPH 4:31 Tameardae pegareu barigu tabiji tardu pegakawo boei pugeje. Tagorigodukaba boei pugeje. Boe korikaba tai pugeje. Tagokikaba boei pugeje. Tagaba tagogwa pegado boei pugeje. Tagaba tardu pegado boei pugeje.
EPH 4:32 Mare taro pemegado boei. Tameardu kurido pui. Tawiagodudo boe ero pegare tai dupiji nono Pao Kurireu biagodure taro pegareu piji dumogadure. Tameartorure Jesus Cristoji dukodire Pao Kurireu biagodure taro pegareu piji. Dujire inagoino rugadu.
EPH 5:1 Pao Kurireu meardu kurire jiwuge ore nure tagi. Dukodire taragado tai tarowo nono Pao Kurireu ro mogadure.
EPH 5:2 Jesus Cristo meardu kurire pai dukodire ure tumagu tuwiwo paro pegareu moriče. Dukodire tameardu kurido boei nono Jesus Cristo ro mogadure. Jesus bire pamugato. Jesus rore aino du pemegare Pao Kurireuji nono roreboe pemegareu mogadure. Mare roreboe pemegareu ji karega inagoino. Pao Kurireu jakarere pudui Jesus bitodure duji boe ero pegareu moriče. Dujire inagoino.
EPH 5:3 Pao Kurireu uwobe nure tagi taro jetorowo. Dukodire taeribarikaba tamugukare apowugei. Tawia ra taeribari piji. Tawia ra boe emeardae pegareu jamedu boe piji. Tagogwa kidukaba boeji tu tagai tameardaekawo tawo tagoe kurido tamedage epiji. Taburedukaba boe ero pegareuji boe emeardae pegakawo tarore jiboeji.
EPH 5:4 Tamagokaba boei boe eribariji. Tagaba tamago pegado boei. Tamagokaba tawadaru pegareuji. Mare tagimadudo Pao Kurireu ro pemegareuji.
EPH 5:5 Ime areme ero pegare tieribari tabowuge eragojemodukare Pao Kurireu apo, eragojemodukare Jesus Cristo apo. Boe ero kigodumode nono ariga doge erore pui dumogadure dukeje eragojemodukare Pao Kurireu apo, eragojemodukare Jesus Cristo apo. Boe enogwa kidumode tu pudai tuwo toe kurido tumedage epiji tu tu je dukeje ewiapagamode tu toeji rugadu. Dukodire ere toe udo nono Pao kurireu ure tiagai Pao Kurireu mugato. Eroino jiboe ure nono meartorure tuwari santo dogeiwuge ero mogadure. Nou boe eragojemodukare boe eimijera kurireu Jesus Cristo apo.
EPH 5:6 Pao Kurireu korigodumode nou rore ainowu boei rugadu. Korigodumode meartoru bokware puduiwugei rugadu. Mare boe erduware tuwo boe ewarigu boeto. Egore Pao Kurireu korigodumodukaie ro pegareugei. Mare pagare egoino. Nou tuwadrarodae tabore etaidumode tuwo tawarigu boeto jamedu. Mare tameartorukaba ei rugadu.
EPH 5:7 Tagaba tamedagedo emage.
EPH 5:8 Marigudu tare tawarigu boeto nono boečo ure boe ewarigu boeto awara piji dumogadure. Mare boečo ji karega inagoino. Taro pegareu jire inagoino. Marigudu taro pegare nono ero mogadure jamedu. Tarduwakare Pao Kurireu ro pemegareuji. Tarduware tu taro pegawo. Mare maigodu aino tare tamagu Pagimijera ai uwobewo tagi. Tarduware Pagimijera Jesus bataruji dukodire Pagimijera bataru ure tarduwado taro pemegawo. Ča taro pemegado rugadu. Dukodire tamode nono nou ro pemegare meri jiwuge emogadure. Mare meri ji karega inagoino. Boe ero pemegareu jire inagoino.
EPH 5:9 Pao Kurireu bataru ure nono meri joku urugu pemegareu mogadure. Meri jire boe erdumode boeji turo pemegawo. Mare meri joku ji karega inagoino. Pao Kurireu bataru umode boe erduwado ewo tugera bararedo boei. Dujire inagoino. Pao Kurireu bataru umode boe erduwado ewo turo jetorodo Pao Kurireu jakai. Dujire inagoino. Boe remawu jire boe emagomode pu biagai. Dujire inagoino.
EPH 5:10 Dukodi čare taipaga pemegado Pao Kurireu bataruji tarduwagoduwo Pagimijera Jesus aidure jiboeji tameartoruwo ji rugadu.
EPH 5:11 Meartorukare Jesus jiwuge emode turo tawuje mare pagatu je. Erore jiboe ure nono boečo mogadure. Mare boečo remawu ji karega inagoino. Ero pegare tu tu je. Dujire inagoino. Mare tagi tarokaba nono ero mogadure. Etaidure tuwo turo pegareu biado boe epiji. Tagogituwado ei ero pegare jiboeji.
EPH 5:12 (Nou ia boe ero pega kuričigore rugadu. Boe epogurure tureadoduwo nou erore jiboeji boe ewiagai.)
EPH 5:13 Mare tamagomode Pao Kurireu bataruji ewiagai tagogituwawo ei ero pegareuji dukeje erduwamode ro pegareu nure pudumi duji, erduwamode Pao Kurireu meardae pegare erore aino duji.
EPH 5:14 Boe erduwamode boe ero pegareuji dukeje nou boe emode tugera ra turo pegareu piji. Ainore meartorure Jesus jiwuge egore tura tabo: Are nono nudureu mogadure. Are nono bireu mogadure. Aedadudo! Aewoduwo pugeje! Nono Jesus Cristo umode arduwado nono jorugu pemegareu mogadure. Umode arduwado aro pemegawo. Mare boe enudu ji karega nou boe erare jiboe akoino. Boe ewi ji karega akoino. Boe ero pegareu jiboe jire akoino. Boe ero pegareu koiare ure boe edu jaedo Pao Kurireu piji. Boe emeartoruwo Jesusji taidu tabo. Dujire akoino.
EPH 5:15 Dukodire tagaiwo pemegado tarore jiboeji. Tarokaba nono jorduwa bokwareuge ero mogadure. Tarodo nono jorduwareuge ero mogadure.
EPH 5:16 Ro pegareuge ere tumaedo rugadu. Dukodire taragado tai taro pemegawo rugadu tu tu je.
EPH 5:17 Tagaba jorduwa bokwareugedo tagi. Mare tagaiwodo Pao Kurireu bataruji taemaruwo Pagimijera Jesus meardae bagai tarowo nono Pagimijera meardae mogadure.
EPH 5:18 Tage kurukaba tai vinho kuru tabo. Tage kurumode tai dukeje boe pegamode tai rugadu. Mare tamagu Pao Kurireu Uwari ai uwo taro pemegado.
EPH 5:19 Taragodu pemegado Pao Kurireu ie tabo rugadu. Taegaredo tai Pao Kurireu apo rugadu. Tamago pemegado pui nou taragodure jiwu bataru pemegareu tabo taegarewo tai boe makodukawo.
EPH 5:20 Tameartorure Jesus Cristoji. Pagimijera nure ema. Dukodire tagimadudo Jesus ie tabo boe jamedu boeji Pao Kurireu biagai. Tagimadudo Jesus ie tabo Pao Kurireu rore jiboe jamedu boeji.
EPH 5:21 Tameartorure Jesus Cristoji dukodire tameartorudo pui jamedu.
EPH 5:22 Areme emeartoruwo tugoge ewadaruji nono tumeartorure Jesus jitu mogadure.
EPH 5:23 Meartorure Jesus jiwuge emeartorumode tu ji eimijera nure ema dukodi. Nono aredu meartoruwo toredu bataruji oredure ema dukodi jamedu. Jesus umode meartorure puduiwuge ekinorudo ero pegareu piji rugadu. Uwobe nure emage dukodi.
EPH 5:24 Dukodire areme emeartoru pemegawo tugogei nono meartorure Jesus jiwuge emeartoru moga Jesus jitu mogadure.
EPH 5:25 Ime emeardu kuriwo tuwirei nono Jesus Cristo ro mogadure. Jesus meardu kurire meartorumode puduiwugei rugadu. Dukodire ure tumagu tuwiwo emugato ero pegareu moriče.
EPH 5:26 Bire emugato tuwo meartorumode puduiwuge ero pegareu mori okwado epiji nono boe emode tugudau areia kabi pobo tabo dumogadure. Mare boe ekudau ji karega inagoino. Boe emeartorumode Jesus bataruji dukeje Jesus umode ero pegareu mori okwado epiji tugu tabo. Umode ero pemegado rugadu. Dujire inagoino. Ainore Jesus rore tuwo meartorure puduiwuge emodudo nono aredu motureu mogadure. Mare emodu ji karega inagoino. Jesus umode meartorure puduiwuge ero pemegado. Dujire inagoino. Jesus umode meartorure puduiwuge etudo pudae eragojewo pudabo. Dujire inagoino.
EPH 5:28 Nono imedu meardu kuriwo toredujeji tietu pemegawo ji nono tietu pemegare pudui dumogadure. Boe erdu pegakare pudui rugadu. Dukodire inagoino imei emeardu kuriwo tuwirei tietu pemegawo ei nono tietu pemegare pudui dumogadure. Imedu meardu kurimode toredujeji nono boe pemegamode oredujeji, boe pemegamode ji jamedu. Boe erdu pegakare pudui rugadu. Boe emarure tuge bagai tietu pemegawo pudui. Dukodire inagoino imei emeardu kuriwo tuwirei tietu pemegawo ei nono tietu pemegare pudui dumogadure. Boe etu pemegare pudui nono Jesus Cristo jetu pemegare meartorure puduiwugei dumogadure jamedu.
EPH 5:30 Pameartorumode Jesus Cristoji dukeje uwobe mode pagi rugadu.
EPH 5:31 Padure bapera kejewu Pao Kurireu bataru akore: – Dukodire imedu umode tudawuje tuo piji tuje piji tumuguwo toreduje apo. Dukodire ere pobe puapo mare Pao Kurireu jakai ere mitotu puapo rugadu.
EPH 5:32 Boe jokodu jire awu Pao Kurireu bataru akoino. Mare ia Pao Kurireu ure biadowu tumeardae meture awu bataru tada. Imire iorduware ji. Jesus Cristo jire akoino. Meartorure Jesus jiwuge eire akoino. Meartorure Jesus jiwuge emagare mare emeardaere nono Jesus meardaere puapo dukodire ere mitotu je Jesus apo Pao Kurireu jakai. Dujire akoino.
EPH 5:33 Mare uwirereuge eire akoino jamedu rugadu. Dukodire ure ime emeardu kurido tuwirei tietu pemegawo ei nono tietu pemegare pudui dumogadure. Ure areme emeartorudo tugoge ewadaruji jamedu.
EPH 6:1 Boe etore nure ia tagi. Tameartorure Jesusji. Dukodire tameartorudo tajeji, taoji. Tameartorumode ei dukeje tamode taro jetorodo.
EPH 6:2 Padure bapera kejewu Pao Kurireu bataru akore: – Tameartorudo tajeji, taoji. Mare Pao Kurireu o bataru boetojiwu reo boe emeartoruwo ji tuwo boe pemegado pudui.
EPH 6:3 Akore: – Tameartorumode tajeji taoji dukeje boe pemegamode tai rugadu. Taragoje raimode moto keje rugadu. Ainore Pao Kurireu akore marigudu.
EPH 6:4 Taro pegakaba tagorei jamedu ekorigodukawo tai. Mare erduwado Pao Kurireu bataruji tawo ero jetorodo nono meartorure Jesus jiwuge ero mogadure.
EPH 6:5 Ia tagi boe etugarege nure tagi. Taragado tai tameartoruwo rugadu tagimijeragei. Tameartorudo ei tagaidu tabo nono tameartorure Jesus Cristoji dumogadure.
EPH 6:6 Tagimijerage etaiwomode tai dukeje tamaragodu pemegado rugadu tameartoruwo ei. Mare tagimijerage eragojemodukare tagabo mare du inodu tabo tamaragodu pemegado tameartoruwo tagimijerage ewadaruji rugadu. Nono tagimijerage etaidumode tamaragodaeji. Mare tameartorudo ei taraga tabo rugadu, tagaidu tabo rugadu. Ainore taromode Pao Kurireu aidure jiboeji. Dutabore tamode tado nono Jesus Cristo utugarege emogadure.
EPH 6:7 Tamaragodudo taegarere tai dutabo. Tamaragodure ime etai mare tamaragodu pemegado nou ime etai nono tamaragodu pemegare Pagimijera Jesus ai dumogadure.
EPH 6:8 Ia tagi boe etugarege nure tagi. Ia čegi boe etugarege karegure čegi. Mare tawiagodukaba. Pamode boe pemegado boei dukeje Pagimijera Jesus umode boe pemegado pai pamaragodae moriče.
EPH 6:9 Ia tagi boe ekimijerage nure tagi. Tamago rakakaba tadugaregei. Taro pemegado tadugaregei. Tagimijerare jamedu dukodire inagoino tai tamago rakakaiago, taro pemegaiago tadugaregei. Nono ča tagimijera ure nono ekimijera mogadure. Rakojere baru tada. Pagimijera Jesus jire inagoino. Utugarege nure pagi. Pagimijera jorduware boe eiamedu boei. Boe remawu tabore rore boe eiamedu boei. Umodukare tuiordae tumeardae tawujedu pagado boei.
EPH 6:10 Nono čare tameartoru rakado Pagimijera Jesusji. Emare rakare rugadu. Uwobe nure tagi. Jesus ure turaga maku tagai dukodi ča taragado tai.
EPH 6:11 Pao Kurireu umode tugudau ro rakareu maku tagai. Tugu tai. Tamode tugu tai dukeje tawiapagamodukare bope doge eimijera meardaeji. Mare boe ekudau ji karega inagoino. Tameartorumode Jesus bataruji tawo taragado tai tawiapagakawo bope doge eimijera meardae pegareuji. Dujire inagoino. Bope doge eimijera aidumode tuwo taekiripagado mare tameartorumode Jesusji dukeje bope doge eimijera roiwamodukare tai pugeje.
EPH 6:12 Parugodure rugadu mare boei karega. Parugodure bope dogei mareboei. Ro pegareuge eimijerage nure emage. Boe eimijerage pegareuge eimijerage nure emage. Ro pegareuge etuwaire nure emage. Eire parugodure rugadu. Emeardae pegareu jire parugodumode rugadu.
EPH 6:13 Dukodire inagoino tai. Pao Kurireu ukudau ro rakareu tugu tai rugadu. Ro pegareuge ero pegareu ure tumaedo kejewu meri aregodumode rugadu. Mare tamode Pao Kurireu ukudau areia rakareu tugu tai dukeje tawiapagamodukare emeardae pegareuji. Mare boe ekudau ji karega inagoino. Tameartoruwo Pao Kurireu bataruji rugadu. Dujire inagoino. Tamodukare tagera ra tameartorure Jesus jitu piji rugadu dukeje taragamode tai rugadu ro pegareuge emeardae pegareu piji. Dujire inagoino.
EPH 6:14 Ainore Pao Kurireu ukudau areia rakareu ure nono boe pegajejewu mogadure. Mare boe ekudau areia ji karega inagoino. Boe pegajejewu ji karega inagoino. Tawadrarodukaba. Tamagodo tu boe remawuji. Dujire inagoino. Tawadrarodumodukare. Tamagomode tu boe remawuji. Dure tarugodumode bope doge eimijeraji. Dujire inagoino. Pao Kurireu ukudau rakareu ure nono padure boe emorora kejewu meriri mogadure. Mare padure boe emorora kejewu meriri ji karega inagoino. Taro jetorodo. Dujire inagoino. Tamode taro jetorodo tarugoduwo bope dogei. Dujire inagoino.
EPH 6:15 Pao Kurireu ukudau rakareu ure nono boe ewure okeakejewu mogadure. Mare boe ewure okeakejewu ji karega inagoino. Tado tarugadu tawo boe ewie Jesus bataru pemegareuji tawo boe epemegado pui. Dujire inagoino. Tamode tarugadu tawo boe ewie Jesus jiboeji dure tarugodumode bope doge eimijeraji. Dujire inagoino.
EPH 6:16 Pao Kurireu ukudau rakareu ure nono boere onado puduiwu meriri mogadure. Mare meriri ji karega inagoino. Tameartorudo Jesusji rugadu. Dujire inagoino. Tameartorumode ji dukeje bope doge eimijera meardae pegareu umodukare taekiripagado. Bope doge eimijera aidumode tuwo tumeardae jetudo tai nono boe ere joru tugu tugo ototo dumogadure tuwo barigu toro nou boe ewai ao ka dumogadure. Mare tugo ji karega inagoino. Tameartorumode Jesusji dukeje tameartorumodukare bope doge eimijera meardae pegareuji. Dujire inagoino. Tameartorudo Jesusji rugadu dure tarugodumode bope doge eimijeraji. Dujire inagoino.
EPH 6:17 Pao Kurireu ukudau rakareu ure nono atadawu meriri mogadure. Mare boe etaotadawu meriri ji karega inagoino. Tameartorumode Jesusji dukeje umode taginorudo. Dujire inagoino. Tameartorudo Jesusji uwo taginorudo. Dure tarugodumode bope doge eimijeraji. Dujire inagoino. Tameartorudo Pao Kurireu bataruji rugadu. Pao Kurireu bataru ure nono Pao Kurireu Uwari rago mogadure. Mare rago ji karega inagoino. Tarduwado Pao Kurireu bataruji. Tameartorudo Pao Kurireu bataruji. Dujire inagoino. Tarduwamode Pao Kurireu bataruji. Tameartorumode ji jamedu. Dure Pao Kurireu Uwari rugodumode bope doge eimijeraji. Dujire inagoino.
EPH 6:18 Nono tagaba tagera rawuje tamago tabo baruto Pao Kurireu bagai. Nono Uwari umode tameardae pemegado tamagowo Pao Kurireu bagai rugadu. Boe pegare tai dukeje tamagodo bagai uwo tugera maku tagai. Boe pemegare tai mare tamagodo Pao Kurireu bagai tamago pemegawo ji. Tamagodo Pao Kurireu bagai ia boe eparu tabo jamedu. Tamagodo Pao Kurireu bagai meri jameduji. Mare taeku jado. Taragado tai rugadu tamago raiwo baruto Pao Kurireu bagai meartorure Jesus jiwuge eiamedu boe eparu tabo.
EPH 6:19 Tamagodo baruto Pao Kurireu bagai iparu tabo jamedu. Tamagodo Pao Kurireu bagai uwo tuwadaru maku inai iwo irugadu iwo boe ewie Jesus bataru pemegareuji rugadu. Uwo tugera maku inai ipogurukawo imagowo boe ewiagai rugadu iwo ewie biadodureu Jesus bataru pemegareuji.
EPH 6:20 Imaragodae reo iwo boe erduwado Jesus bataru pemegareuji. Mare itugudure baičoreuto. Tamagodo iparu tabo baruto ipogurukawo imagowo rugadu Jesus bataru pemegareuji boe eiamedu boe ewiagai irowo nono Pao Kurireu meardae mogadure rugadu.
EPH 6:21 Imedu Tíquico aregodumode tagae. Meartorure Pagimijera Jesusji rugadu. Imeardu kurire Tíquicoji. Imedia remawu nure ema. Ukare tugera ra tumeartorure Jesus jitu piji rugadu. Emare umode tawie nuba boere i rugadu. Nono tarduwamode nuba boere i rugadu. Tarduwamode irore jiboeji.
EPH 6:22 Imire ire Tíquico utudo tawagai uwo tawie nuba boe erore i. Aino umode taragado tai rugadu.
EPH 6:23 Ča Pao Kurireu uwo tabemegado pui. Pao Kurireu uwo tameardu kurido pui. Pao Kurireu uwo tameartorudo pudui rugadu. Pagimijera Jesus Cristo uwo tabemegado pui, uwo tameardu kurido pui jamedu. Uwo tameartorudo pudui rugadu jamedu.
EPH 6:24 Boe emeardu kuriwo Pagimijera Jesus Cristoji. Ekawo tugera ra tumeardu kurire Jesus jitu piji jii toro rugadu. Nono Pao Kurireu ro pemegawo tai rugadu.
PHI 1:1 Paulo nure imi. Inure awu atugoreboe pemegado. Timóteo imedia nure ema. Jesus Cristo utugarege nure čegi. Čere awu atugoreboe pemegado čewo maku Filipos ba kurireu kejewuge meartorure Jesus jiwuge ewagai. Tare tamagu Jesus Cristo ai tawo taro udo tuginai taro pegareu piji. Meartorure Jesus jiwuge eimijerage nure ia tagi. Meartorure Jesus jiwuge eimijerage paru towuge nure ia tagi. Etugarege nure ia tagi. Taiamedu boe tawagaire iroino awu atugoreboe tabo.
PHI 1:2 Pao Kurireu uwo turo pemegareu maku tagai. Pao Kurireu uwo tabemegado pui. Jesus Cristo uwo turo pemegareu maku tagai jamedu. Uwo tabemegado pui jamedu.
PHI 1:3 Iwiabuture tawugeje dukeje imago pemegare tarore jiboeji ikimadu tabo Pao Kurireu apo rugadu.
PHI 1:4 Imagore baruto Pao Kurireu bagai tabaru tabo dukeje iagarere i tai.
PHI 1:5 Marigudu itaregodure tagae. Tare tagera maku inai rugadu. Ainore tarore jii aino pawo boe ewie Jesus jiboeji. Dukodire iagarere i tarore jiboeji rugadu.
PHI 1:6 Mare Pao Kurireu emare ure tameardae pemegado tawo tagera maku inai. Umodukare nou turo akedudo jamedu. Pao Kurireu umode tameardae pemegado jii toro Jesus Cristo aregodumode du ka. Iorduware nou inoduji rugadu.
PHI 1:7 Iwiabuture tawugeje iagare tabo. Tamaragodu pemegare itabo pawo Pao Kurireu ure maku pagaiwu pamaragodae pemegado. Ure itudo boe etae iwo ewie Jesus bataru pemegareuji. Ire ewie rugadu. Boe emeartorure Jesusji rugadu. Mare ro pegareuge ere itugu baičoreuto. Dukodi čare iragojere woe baičoreu tada. Mare Pao Kurireu rakojere itabo woe. Ro pemegare i kimo woe. Ro pemega kimore tai jamedu. Nono tare boe ewie Pao Kurireu bataruji kimo. Dukodire iwiabuture tu tu tawugeje iagare tabo jii aino.
PHI 1:8 Boe jokodu jire inagoino. Pao Kurireu jorduware imeardaeji. Imeardu kurire tai nono Jesus Cristo meardu kurire pai dumogadure.
PHI 1:9 Imagore baruto Pao Kurireu bagai tabaru tabo tu tu je tameardu kuriwo pui rugadu tagaidu kuriwo pui rugadu. Imagore Pao Kurireu bagai tabaru tabo tarduwawo boe remawuji, boe ekawo taekiripagado mare tarduwagoduwo boe ero pemegareuji.
PHI 1:10 Dukodire tarduwamode tawo tageragu taro pemegareuji. Nono tamode tadawuje boe ero pegareu piji. Tamode boe emeardae pegareu barigu tabiji. Nono taro pegareu akedumode jii toro Jesus Cristo aregodumode kejewu meri ka.
PHI 1:11 Tu Jesus Cristo umode tameardae pemegado taro pemegawo tu tu je, tameardae pemegawo tu tu je. Taro pemegareu koiare umode boe emago pemegado Pao Kurireuji. Taro pemegareu koiare umode boe egaredo Pao Kurireuji jamedu.
PHI 1:12 Imedage nure tagi tameartorure Jesusji dukodi. Itaidure iwo tarduwado. Jesus Cristo utugare nure imi. Dukodire boe ere itugu baičoreuto. Mare paga karega. Aino ire awu baičoreu tadawu tugobaigarege ewie Jesus bataru pemegareuji. Ire Roma kejewu boe eimijera kurireu uwai tadawu tugobaigarege eiamedu boe ewie Jesus jiboeji. Dukodire inagoino. Boe pegare i mare awu Jesus bataru pemegareu uwo tumaedo boe jamedu boe parugajeje boe erduwawo Jesus jiboeji dukodire boere aino i.
PHI 1:14 Itugudure baičoreuto. Dukodire meartorure Jesus jiwuge emeartorugodure rugadu Pagimijeraji. Epoguru akedure tumagowo rugadu Jesus jiboeji boe ewiagai.
PHI 1:15 Iage emagore Jesus Cristo jiboeji mare tumeardae pegareu tabo etaidure tuiorduwawo nou jorduware Jesus Cristo jiboe jiwuge epiji. Iage emagore Jesus Cristo jiboeji mare ere tuwadaru očarodo tuwo nou boe epogurudo dubagai. Mare iage etaidure turo pemegawo boei rugadu. Dukodire emeardae pemegare. Emagore Jesus jiboeji boe ewiagai tuwo boe pemegado boei rugadu.
PHI 1:16 Nou boe emeardu kurire boei. Emeardu kurire i jamedu. Erduware Pao Kurireu ure maku inaiwu imaragodaeji. Ure imaragodae maku inai iwo boe emeardae pemegado Jesus jiboeji.
PHI 1:17 Nou iage etaidukare i. Emagore Jesus jiboeji mare tuwo tuwadaru očarodo dubagaire eroino. Emeardae pegare tumagowo Jesus jiboeji tuwo tugurido ikori boe egai tuwo boe pegado i woe baičoreu tada.
PHI 1:18 Mare iwiapagakare nou emeardaeji. Imeardae pegakare eroino duji. Ere tuwadaru očarodo Pao Kurireu bataruji mare du inodu tabo Jesus Cristo jiboe jire egoino. Dukodire iagarere i eroino duji. Iage emeardae pemegare tumagowo Jesus jiboeji boe ewiagai. Iage emeardae pegare tuwo boe pegado i mare Jesus jiboe jire egoino. Dukodire boe emeardure Jesus jiboeji rugadu. Dukodire iagarere i eroino duji.
PHI 1:19 Iagarere i du akedumodukare rugadu. Tamagore baruto Pao Kurireu bagai iparu tabo. Nono Jesus Cristo Uwari ure tugera maku inai. Dukodire boe eimijerage emode itawuje awu baičoreu piji rugadu.
PHI 1:20 Itaidure iwo iragado rugadu iro pemegawo tu tu je. Ipogurukawo imagowo Jesus jiboeji boe ewiagai tu tu je. Nono imode boe emago pemegado Jesus Cristoji iro jamedu boe tabo imeardae jamedu boe tabo. Iwimode mare boe ewiagoromode imagore jiboeji dukodire emago pemegamode Jesus Cristoji. Emeartorumode ji rugadu. Iwimodukare dukeje imago kimomode Jesus jiboeji boe ewiagai. Dukejere boe emago pemegamode Jesus Cristoji. Emeartorumode ji rugadu.
PHI 1:21 Kodiba boe eragojere moto keje? Imode tawie. Imire iragojere woe moto keje Jesus Cristo utugarewo imi imeartoruwo ji rugadu. Mare iwimode dukeje irudumode baruto. Nono boe pemegamode i rugadu.
PHI 1:22 Mare iwimodukare kuri aino dukeje imaragodu pemegamode Jesus ai jii toro. Iorduwakare nuba imeardaemode.
PHI 1:23 Itaidure jiwu imeardae ure pobetu je. Itaidure iwiwo itaidukare iwiwo. Itaidure iwiwo iragojewo Jesus Cristo apo. Boemode aino i dukeje boe pemegamode i rugadu. Dukodire itaidure iwiwo.
PHI 1:24 Mare itaidukare iwiwo jamedu kuri aino iwo tameartoru kurido Jesusji. Iwimode dukeje iroiwamodukare iwo tameartoru kurido Jesusji pugeje. Dukodire itaidukare iwiwo.
PHI 1:25 Dukodire iorduware iwimodukare duji rugadu. Iragojemode tagabo pugeje iwo tameartoru kurido Jesusji rugadu. Iwo taegaregodudo Jesus Cristoji rugadu.
PHI 1:26 Dukodire itaregodumode tagae dukeje imode taegaregodudo Jesus Cristoji rugadu. Taegaremode tai Jesus ure itawuje baičoreu piji duji. Tamugu pemegamode Jesus Cristo apo rugadu.
PHI 1:27 Nono tarodo nono Jesus Cristo jiboe bataru mogadure. Tameardaedo nono Jesus Cristo meardae mogadure. Itaregodumode tagae dukeje iorduwamode taroji tameardaeji. Mare itaregodumodukare tagae mare boe emode iwie tarore jiboeji tameardaere jiboeji. Itaidure tameartoru kuriwo Jesusji. Nono tameardae umode mitotu je. Tameardaemode nono pu meardae mogadure. Nono tagaidumode tawo taragado tawo taro pemegado puapo Jesus Cristo jiboe bataru pemegareuji tameartoruwo ji rugadu.
PHI 1:28 Tabagudukaba jordu pegare taiwugei. Taragado tai rugadu jii toro. Nono jordu pegare taiwuge erduwamode pagare eroino tai duji. Etaidure tuwo tameartoru akedudo Jesus piji. Mare erduwamode tamodukare tagera ra tameartorure Jesus jitu piji rugadu. Pao Kurireu emare umode turaga maku tagai tuwo taragado tai tameartoruwo pudui rugadu jii toro. Nou tameardae pemegareu tabore tamode tamorido nou jordu pegare taiwuge emeardae pegareu piji. Dukodire inagoino tai tabagudukaba eče.
PHI 1:29 Nono Pao Kurireu ro pemegare tai. Dukodire Jesus Cristo ure tugeragu tai tudugaregewo tagi. Mare paga karega. Tameartorure ji dukodi. Nono jordu pegare Jesus jiwuge ero pegare tai jamedu. Mare Jesus utugarege nure tagi dukodire taegaredo tai eroino tai duji. Marigudu boe ero pegare i nono Filipos ba kurireu keje. Boe ero pega kimore i woe jamedu. Aino čare ero pegare tai nono turo moga i dumogadure. Dukodire inagoino tai taegarewo tai rugadu nono iro mogadure. Tagaba tagera ra Pao Kurireu ure maku tagaiwu tamaragodae piji rugadu nono iro mogadure.
PHI 2:1 Tare tamagu Jesus Cristo ai tawo tagimijerado ema dukodire ure taragado tai taro pemegawo. Jesus meardu kurire tai dukodire ure tagiarigodu barigu tabiji. Tarduware Pao Kurireu Uwariji. Makore tai. Tamagore ji. Tagi tagaidure meartorure Jesus jiwuge eiamedu boei dukodire taro pemegare ei. Ero pemegare tai jamedu. Tameardu kurire pui rugadu.
PHI 2:2 Dukodire itaidure iwo taro pemegado, iwo tameardae pemegado. Tagaba tameardae udo tuginai nou tamedage emeardae piji. Tameardae maku puai rugadu. Tameardu kurido pui rugadu. Tagaidudo tamedage emeardaere jiboeji. Taragado tai tawo tamedagedo pugi. Tamode tamedage remawugedo pugi dukeje iagaregodumode i rugadu.
PHI 2:3 Tagaba boe kurireugedo tagi tamedage ekori. Tagaba tagoe kurido tamedage enoe kori. Tagaba boe remawugedo tagi tamedage ekori. Pagatu jere boe eroino. Mare tagi taragado tai tawo tameardae udo nono boe etugarege emeardae mogadure. Tameardu kuričigodo boei. Tamago pemegado ei ero pemegaie taro pemegareu kori.
PHI 2:4 Tagaba boe pemegado tu tai. Tawiagorodo tawo boe pemegado ia boei jamedu.
PHI 2:5 Tameardae udo nono Jesus Cristo meardae mogadure.
PHI 2:6 Jesus Cristo ure nono Pao Kurireu mogadure rugadu. Mare meardae kare tumuguwo tu nou baru tadawu tumuga keje. Mare ure tumeardae tawuje tumuguwo moto keje boebo rugadu.
PHI 2:7 Taidu tabore ure tugera ra baru tadawu toe piji tuwo boe etugaredo pudumi. Ure tudo nono ime emogadure.
PHI 2:8 Imedure ema rugadu. Mare ukare boe remawudo pudumi. Ure boe utugare remawudo pudumi rugadu. Meartorure Pao Kurireuji rugadu jii toro. Dukodire bire ipo padure pugajejewu keje.
PHI 2:9 Dukodire Pao Kurireu ure jewodudo pugeje. Ure rutudo baruto pugeje boe jamedu boe ao ka. Ure Jesus ie kurido rugadu boe eiamedu boe ekie kori.
PHI 2:10 Dukodire boe eiamedu boe baru tadawuge, moto kejewuge, bireuge, mareboe doge, emeardumode Jesus ieji dukeje emode tubu jodo tumago pemegawo ji.
PHI 2:11 Awu boe eiamedu boe erduwamode Jesus Cristoji rugadu. Egomode boe eimijera kurireu nuie ema. Pao Kurireu kurie rugadu. Rakaie rugadu.
PHI 2:12 Imeardu kurire jiwuge imedage nure tagi. Iragojere tagabo dukeje tameartorure iwadaruji. Aino iragojekare tagabo pugeje. Mare iwo tawie. Taragado tai tagawo tawia ra tameartorure iwadaru jitu piji. Tameartorure Jesusji dukodire ure taginorudo tawarigudukawo bope doge eda kejewu joru pegareuto. Aino tabagududo tu boe ero pegareuče taro pegakawo pugeje. Taragado tai taro pemegawo nono činorudowuge ero mogadure.
PHI 2:13 Mare paga karega. Pao Kurireu umode tumeardae maku tagai tu tu je tuwo tameardae udo nono tumeardae mogadure. Nono taromode nono Pao Kurireu meardaeji. Nou Pao Kurireu meardae pemegare rugadu. Umode boe pemegado boei rugadu.
PHI 2:14 Tagokikaba pui. Tamago pegakaba tamaragodure jiboeji. Taro pemegado tagaidu tabo.
PHI 2:15 Taromode aino dukeje ro pemegareuge emode tagi. Taromode nono Pao Kurireu ore ero mogadure. Taro pegareu bokwamode. Boe erdumodukare ia taidukare jiwu taroji. Meartorukare Pao Kurireu jiwuge ero pegare marigudu. Emagare rugadu. Dukodire taro pemegamode etoiadada dukeje tamode nono kuieje doge emoga baru tada dumogadure. Mare kuieje ji karega inagoino. Tarore jiboe umode tuginai ero piji. Dujire inagoino. Boe eiamedu boe erdumode taro pemegareuji. Dujire inagoino.
PHI 2:16 Boe erduwamode taro pemegareuji emeardumode tawadaruji dukeje erduwamode tumeartoruwo Jesusji uwo ekinorudo ero pegareu piji ukawo ero pegareu morido etai jamedu. Nono iagaremode i rugadu tarore jiboeji tamagore jiboeji. Nono Jesus Cristo aregodumode pugeje dukeje imago pemegamode tai tameartoruie Jesusji rugadu. Iorduwamode paga karega imaragodu rakare iwo tarduwado Jesus jiboeji.
PHI 2:17 Iorduwakare nuba boe eromode i. Emode iku redo. Emode iwido. Mare iorduwakare. Mare iagaremode i. Tagi tameartorure Jesusji. Tare tagimijerado ema rugadu dukodire tare tagomeado Pao Kurireu bagai tarore jiboe jamedu boe tabo. Tare taro udo nono Pao Kurireu meardae mogadure. Dukodire jordu pegare Jesus jiwuge ero pegare tai. Dujire inagoino. Mare du inodu tabo taegarere tai tameartorure Pao Kurireu jituji. Aino boe emode iwido dukeje imode nono boe enomeare Pao Kurireu ai turo pemegareu tabo dumogadure jamedu. Imeartorure Pao Kurireuji dukodire boe pegamode i. Dujire inagoino. Mare iorduwakare nuba boe eromode i. Mare emode iwido du inodu tabo iagaremode i rugadu nono taro mogadure.
PHI 2:18 Boe pegare tai mare tagiarigodukaba. Taegaredo tai rugadu tameartoruwo Jesusji rugadu. Boe pegamode i mare tagiarigodukaba. Taegaredo tai itabo rugadu.
PHI 2:19 Pagimijera Jesus aidumode dukeje imode Timóteo utudo tawagai kuri aino. Emare umode iwie nuba boere tai. Umode iwie tarore jiboeji. Dukodire umode iagarego i.
PHI 2:20 Tu nou Timóteo meardaere nono imeardae mogadure. Imedia remawu nure ema. Emare meardu kurire tai rugadu.
PHI 2:21 Boe eiamedu boe emeardaekare pui. Emeardaere tu pudui. Emeardaekare tumaragoduwo Jesus Cristo ai.
PHI 2:22 Mare tagi tarduware Timóteo rore jiboeji. Ro pemegare rugadu. Maragodure itabo marigudu. Ure nono itonaregedu mogadure. Čemaragodure puapo čewo boe ewie Jesus bataru pemegareuji rugadu.
PHI 2:23 Dukodire itaidure iwo utudo tawagai. Mare kuri aino iorduwamode nuba boe eromode i. Dukejere imode Timóteo utudo tawagai.
PHI 2:24 Imeartorure Pagimijera Jesusji rugadu. Imeardaere umode ikinorudo baičoreu piji rugadu ituwo tagae kuri aino jamedu.
PHI 2:25 Itaidure iwo imedu Epafrodito utudo tuibagi tawagai jamedu. Imedia nure ema jamedu. Emare maragodure itabo jamedu. Mako raire boe ewiagai erduwawo Jesus jiboeji. Emare aregodure tabiji iwagai. Tare arego mato itae rugadu tawo tagera maku inai. Ure tugera maku inai rugadu tamugato.
PHI 2:26 Akere ji tuwo tugirimi tagae pugeje tuiorduwo tai pugeje. Tameardure imedu Epafrodito kogoduie. Kogodure rugadu. Puredugodure tuwiwo. Mare Pao Kurireu okudugodure apo dukodire pemegagodure. Okudugodure itabo jamedu. Imedu Epafrodito bimode dukeje ikiarigodumode rugadu. Mare pemegagodure dukodire ikiarigodukare. Mare imedu Epafrodito mororamagadure tawagai tuwo tawie tubemegagoduie rugadu duji.
PHI 2:28 Dukodire akere ji tuwo tugirimi tagae. Akere i jamedu iwo utudo tagae rugadu. Aregodumode tagae dukeje taegaremode tai rugadu. Ikiarigodu akedumode jamedu.
PHI 2:29 Aregodumode tagae dukeje tagera upodo apo taegarere tai dutabo rugadu nono Jesus romoga jitu mogadure. Tamago pemegado ji rugadu. Nono ia boe eromode nono nou imedu Epafrodito ro mogadure dukeje tamago pemegado ei jamedu nono taro moga Epafrodito jitu mogadure.
PHI 2:30 Imedu Epafrodito jorduware tuwimode nou tumaragodae keje mare du inodu tabo pagudukare. Maragodure Jesus Cristo ai woe itabo rugadu. Dukodire puredugodure tuwiwo rugadu. Mare paga karega. Rore aino tuwo tugera maku inai taiageje. Dukodire inagoino tamago pemegawo ji rugadu.
PHI 3:1 Imedage nure tagi tameartorure Jesusji dukodi. Tameartorure Pagimijeraji. Dukodire iwo tawie. Taegaredo tai Pagimijera Jesus ure taginorudo duji. Imode tawie iaboeji pugeje. Ire tawie marigudu atugoreboe tabo. Aino čare inure tawie pugeje awu atugoreboe tabo jamedu. Mare paga karega. Tawiapagamode ire tawie jiboeji dukeje boe emodukare taekiripagado.
PHI 3:2 Taeku jado ro pegareugei. Ere nono barogo pegareuge emogadure. Mare barogo ji karega inagoino. Ure boe ewiri kadoduwuge nure emage. Emago raire boei tuwo tumeardae maku etai ewo tuwaga oto biri kado. Dujire inagoino. Egore meartorure Jesus jiwuge emoduie tuwaga oto biri kado tumeartoruwo Jesusji. Egore nou turo taboie boe emode Pao Kurireu uwobedo pudumi. Mare enure tiekiripagado. Ainore Judeu doge egore jamedu. Egore tumeartoruie turoji tuwo Pao Kurireu uwobedo pudumi. Mare enure tiekiripagado. Turo pemegareu tabo karega boe emode Pao Kurireu uwobedo pudumi. Mare boe etaiduwo rugadu Pao Kurireuji tuwo tubu jodo tumago pemegawo ji rugadu. Nono Pao Kurireu umode Tuwari maku meartorure Jesus jiwuge etai tuwo emugu pemegado pudabo. Pagi pameartorure Jesus Cristoji rugadu. Dukodire mugu pemegare Pao Kurireu apowuge remawuge nure pagi. Pameartorukare parore jiboeji. Pameartorure tu Jesus Cristoji dukodire paegarere ji. Nou Uwari emare ure pamugu pemegado Pao Kurireu apo rugadu. Ure pamago pemegado Pao Kurireuji pabu jodo dutabo.
PHI 3:4 Marigudu irore awu Judeu doge ero jamedu boeji marigudu. Mare pagatu jere iroino. Dukodire iorduware. Ia tagi tameardaere tameartoruwo Judeu doge eroji tawo Pao Kurireu uwobedo tagi mare inure tawie. Tamodukare Pao Kurireu uwobedo tagi tameartorure Judeu doge ero jitu tabo. Iorduware.
PHI 3:5 Iwodure dukeje meri oto padure sete i dukeje iwaga oto biri kadodure nono Judeu doge ero mogadure. Iogwa imuga Judeu doge nure emage. Iwobe Benjamim uwobere emage. Judeu remawu nure imi rugadu. Fariseu ure imi marigudu. Imeartorure mariguduwu Judeu doge ero jamedu boeji nono fariseu doge ero mogadure.
PHI 3:6 Ire iragado i rugadu iwo boe emeartorudo fariseu doge eroji. Dukodire iro pegare meartorure Jesus jiwugei. Iro pegare ei rugadu. Imeartorure rugadu mariguduwu Judeu doge eno bakaruji rugadu. Ikare iro mekido eno bakaru piji.
PHI 3:7 Mare ia meri keje ire awu iro jamedu boe barigu ipiji. Imeartorure Jesus Cristoji rugadu. Itaidukare nou boetojiwu iroji pugeje.
PHI 3:8 Ia pugeje. Imode ia iro barigu ipiji jamedu iorduwawo Ikimijera Jesus Cristoji. Inoe moture kurire mare kodukare Jesus Cristo bataru pemegareu kori. Aregodukare Jesus Cristo bataru oto pa ka. Dukodire imode iro jamedu boe barigu ipiji imeartoruwo tu Jesus Cristoji iorduwawo Jesus Cristo jiboeji.
PHI 3:9 Itaidure imugu pemegawo Jesus apo rugadu. Iraga tabo iro pemegamodukare. Iraga tabo itaidumode imeartoruwo Judeu doge eno bakaruji iwo iro pemegado. Mare iroiwamodukare. Mare imeartorure Jesus Cristoji dukodire emare ure turaga maku inai iro pemegawo. Boe emeartorumode Pao Kurireuji dukeje Pao Kurireu umode turaga maku etai ero pemegawo rugadu nono Pao Kurireu meardae mogadure.
PHI 3:10 Itaidure tu iorduwawo Jesus Cristoji. Emare rakare. Jewodure pugeje. Dukodire itaidure uwo turaga maku inai. Boe pegare ji. Bire ipo padure pugajejewu keje. Itaidure boe pegawo i nono boe pegare Jesus jitu mogadure. Itaidure imeardaewo nono Jesus meardae mogadure. Emare meartorure tuoji tuwi tabo. Itaidure imeartoruwo ji jamedu jii toro rugadu. Boe pegamode i, iwimode mare itaidure imeartoruwo Jesusji iorduwawo tu ji tu rugadu.
PHI 3:11 Nono imeardaemode nono Jesus meardae mogadure dukeje Pao Kurireu umode iewodudo pugeje jamedu. Jesus umode turawuje moto ka pugeje dukeje Pao Kurireu umode iewodudo nou meartorure Jesus jiwuge eiamedu boebo rugadu.
PHI 3:12 Jesus ure tugeragu i imeartoru kuriwo pudui. Mare ikare iro jamedu boe pemegado raga. Itaregodukare raga Jesus meardae oto pa ka. Mare ire iragado i iorduwagoduwo Jesus Cristoji rugadu. Itaidure iorduwawo Jesus meardaeji rugadu irowo nono Jesus meardae jamedu boeji.
PHI 3:13 Imedage nure tagi tameartorure Jesusji dukodi. Iwo tawie. Ire iragado i nono re rakareu ro mogadure. Imedu re rakamode taregoduwo boetoji tumedage epiji. Aregodumode boetoji dukeje boe pemegareboe makudumode ai. Mare re rakareu ji karega inagoino. Ire iragado i iwo iro jetorodo iwo iro jamedu boe udo nono Jesus meardae mogadure. Dujire inagoino. Aino ire iro udo nono Jesus meardae mogadure mare iro jamedu boe karega. Mare ire iragado i iwiagoduwo nouia boetojiwu iro piji pugeje iwo iro jamedu boe pemegado rugadu nono Jesus meardae mogadure. Pao Kurireu makore iwagai imeartoruwo Jesus Cristoji. Imeartorure ji dukodire umode ikinorudo rugadu imuguwo baru tada.
PHI 3:15 Meartorure Jesus jiwu remawuge emode tagi dukeje tameardaemode nono awu imeardae mogadure rugadu. Ia tagi tameardaemode ia tameardae tuginaiwuji dukeje Pao Kurireu umode tarduwado boe remawuji tameardaewo nono tumeardae mogadure.
PHI 3:16 Pameartorure Jesusji dukeje paro pemegare. Ča parowo aino rugadu pameartoruwo Jesusji rugadu jii toro rugadu.
PHI 3:17 Imedage nure tagi tameartorure Jesusji dukodi. Ire tarduwado awu irore jiboeji marigudu. Aino ča tarodo nono iro mogadure rugadu. Tagaiwodo nou meartorure iwuge erore jiboeji tarowo nono ero mogadure jamedu. Emage erore nono iro mogadure.
PHI 3:18 Ire tawie marigudu. Aino čare imode tawie pugeje. Iage egore tumeartoruie Jesusji mare ero pegare. Dukodire jordu pegare Jesus jiwuge nure emage. Ero pegare dukodire ia boe emeartorumodukare Jesusji pugeje. Dukodire ikiarigodure rugadu. Ioguru rere ioku piji.
PHI 3:19 Awu ro pegareuge ewimode dukeje emugumode bope doge eda kejewu joru pegareu tada. Eipagare tuwariwo tu pudumi rugadu. Epogurukare turo pegareuji. Enojarore turo pegareuji. Ewiagorore tu awu moto kejewu boeji.
PHI 3:20 Mare pagi karega. Mugure baru tadawuge mode pagi. Pabagare rugadu Umode Paginorudowu bagai. Pagimijera nure ema. Jesus Cristo nure ema. Aregodumode baru piji pawagai.
PHI 3:21 Pawiri rakakare. Pagodu rakakare. Ia meri keje pawimode. Mare Jesus umode pawiri pagodu udo tuginai. Emare rakare tuwo boe eimijera kurireudo pudumi. Nou turaga tabore umode pawiri udo nono tuwiri pemegareu baru tadawu mogadure. Turaga tabore umode pagodu udo nono tugodu pemegareu baru tadawu mogadure.
PHI 4:1 Imedage nure tagi tameartorure Jesusji dukodi. Mare paga karega inagoino. Imeardu kurire tai rugadu. Ikiarigodure tawagai rugadu. Tare itaidu kurido taroji dukodire tare iagaredo i rugadu. Dukodi čare tagaba tagera ra tameartorure Pagimijera Jesus jitu piji taro pemegawo Jesus aidure jiboeji jii toro rugadu.
PHI 4:2 Aredu Evódia, aredu Síntique emeartorure Pagimijera Jesusji dukodire uwobe nure emage. Mare ekare tumeardae tawuje puapo. Čare itaidure imagowo ei ewo tumeardae pemegado puapo rugadu.
PHI 4:3 Ia maragodure itabowu nure aki. Itaidure awo akera maku awu areme etai. Nou areme emaragodure itabo rugadu. Čere boe ewie Jesus bataru pemegareuji rugadu. Dukodire inagoino ai awo akera maku etai ewo tumeardae tawuje puapo epemegawo pui. Imedu Clemente maragodure itabo jamedu ia boe dogebo jamedu. Taiamedu boe tagie padure Pao Kurireu o bapera keje. Boe ekie padumode nou Pao Kurireu bapera keje dukeje nou boe ewimodukare pugeje.
PHI 4:4 Taegaredo tai Pagimijera Jesusji tu tu je. Inure tawie. Taegaredo ji rugadu.
PHI 4:5 Taro butugudo boe eiamedu boei. Pagimijera Jesus aregodumode pugeje kuri aino rugadu.
PHI 4:6 Tamororamagadukaba iaboe bagai. Mare tamagodo baruto Pao Kurireu bagai tagogwamaguduwo ji tagaidure jiboe bagai. Tagimadudo apo rore tai jiboeji. Tagimadudo apo ure maku tagaiboe paru tabo dukeje tagogwamagudumode ji iaboe bagai pugeje.
PHI 4:7 Dukejere Pao Kurireu umode tamororamagadu akedudo rugadu tamugu pemegawo tameardae kuriwo Pao Kurireuji rugadu. Umode tagaora butugugo rugadu. Boe erduwakare tuwo boe emororamagadu akedudo nono Pao Kurireu ro mogadure. Dukodire Pao Kurireu umode tagaora butugugo rugadu. Umode tameardae butugugo rugadu. Mare paga karega tameartoru raimode Jesus Cristoji dukeje Pao Kurireu umode tameardae pemegado rugadu jii toro rugadu.
PHI 4:8 Čare iwadaru akedugodu. Mare iwo tawie iaboeji pugeje. Tu boe pemegareboe tugu tagaorato. Tawiagorodo boe pemegareu boeji. Tawiagorodo boe emago pemegare jiboeji. Tawiagorodo boe jokodureu bataruji. Tawiagorodo boe epogurukare jiwu boe eroji. Tawiagorodo boe ero jetororeuji. Tawiagorodo boe ero pemegareuji. Tawiagorodo boe pega bokwareu boeji. Tawiagorodo boe motureu boeji. Tawiagorodo tawo boe pemegado boei.
PHI 4:9 Tameardure ire tarduwado jiboeji. Dukodi čare tameartorudo ji rugadu. Tardure irore jiboeji. Dukodi čare tarodo nono iro mogadure. Dukejere Pao Kurireu rakojemode tagabo. Emare umode boe epemegado pui. Umode boe emororamagadu akedudo rugadu. Rakojemode tagabo jii toro rugadu.
PHI 4:10 Imago pemegare Pagimijera Jesusji iagarere i dutabo. Mare paga karega. Tare itaidure jiboe maku inai. Marigudu tagaidure tawo boe maku inai mare taroiwakare. Maigodu aino čare tare maku inai taetu pemegawo i rugadu.
PHI 4:11 Imeardae pegakare taroji. Iorduware tagaidure iduji marigudu. Mare iwudugugodure marigudu jeture itabowu inoe boe keje.
PHI 4:12 Boe bokwamode i dukeje pegamodukare i. Ike kurimode, inoe kurimode dukeje boe pegamodukare i jamedu. Iorduware marigudu iroiwawo jeture itabowu boeji. Nono ike boeimode i mare iwudugugodumode. Ikuredumode mare iwudugugodumode. Inoe bokwamode mare iwudugugodumode. Inoe kurimode mare iwudugugodumode. Iwudugugodumode meri jamedu boe keje iragojere kejewu boe parugajeje.
PHI 4:13 Mare paga karega. Jesus Cristo ure turaga maku inai dukodire iragare i iwudugugoduwo boe jamedu boe keje.
PHI 4:14 Aino boe rakare i mare tare boe maku inai tawo tagera bararedo i. Taro pemegare rugadu.
PHI 4:15 Marigudu iture Macedônia moto piji ituwo Tessalônica ba kurireu ka iwo ewie Jesus bataru pemegareuji nono jamedu. Dukejere boe rakare i rugadu nono Tessalônica ba kurireu keje. Mare tare diero maku inai nono. Ia meartorure Jesus jiwuge ekare iaboe maku inai. Mare tagi tare maku inai. Tarduware. Filipos kejewuge meartorure Jesus jiwuge nure tagi. Boe rakare i nono Tessalônica ba kurireu keje dukeje tare iaboe maku inai tu tu je.
PHI 4:17 Aino čare imedu Epafrodito aregodure mato itae pugeje woe baičoreu ka woe Roma ba kurireu ka nou tare maku inaiboe tabo. Ire ikeragu ji. Imagore iaboe rogu bagai mare tare ino diero kurido rugadu. Itaidukare iaji pugeje. Pao Kurireu aidure nou taroji rugadu. Nou tare maku inaiboe ure nono roreboe mogadure Pao Kurireu jakai. Mare roreboe ji karega inagoino. Pao Kurireu jordu moture tarore aino i duji. Dujire inagoino. Tarore aino i mare Pao Kurireu aire taroino. Pao Kurireu jakarere pudui tarore aino duji. Dukodire Pao Kurireu ure tagoe kurido baru tada jamedu. Iorduware. Dukodire ire tawie tawo iaboe rogu maku inai.
PHI 4:19 Nou imeartorure jiwu Pao Kurireu oe kurire rugadu baru tada. Tameartorure Jesus Cristoji dukodire Pao Kurireu umode tagaidure jiboe jamedu boe maku tagai tawikawo tage boe koia, boe okwakawo tagai.
PHI 4:20 Pamago pemegawo Pao Kurireuji pawo ie kurido jii toro. Pagawo pamago pemegareu akedudo rugadu jii toro rugadu.
PHI 4:21 Tagimadudo meartorure Jesus jiwuge eiamedu boebo inai. Awu woewu meartorure Jesus jiwuge eiamedu boe etaidure tugimaduwo tawagai jamedu. Ia woewu meartorure Jesus jiwuge emaragodure Roma kejewu boe eimijera kurireu uwai kurireu tada. Emagere etaidure tugimaduwo tawagai rugadu.
PHI 4:23 Pagimijera Kurireu Jesus Cristo ro pemegawo tai rugadu jii toro rugadu. Urugadureu.
COL 1:1 Paulo nure imi. Pao Kurireu meardae koiare ure Jesus Cristo udo tugeragu i tuwo itudo Jesus bataru pemegareu tabo boe ewagai iwo boe ewie Jesus jiboeji. Inure awu atugoreboe pemegado. Timóteo imedia nure ema. Emare meartorure Jesusji dukodire pamedia nure ema jamedu.
COL 1:2 Čere awu atugoreboe pemegado čewo maku Colossos ba kurireu kejewuge meartorure Jesus Cristo jiwuge ewagai. Emeartorure Jesusji rugadu. Ere turo pemegado nono Pao Kurireu meardae mogadure. Taire inagoino. Tameartorure Jesusji dukodire čemedage nure tagi. Pao Kurireu ro pemegawo tai. Pao Kurireu uwo tabemegado boei rugadu.
COL 1:3 Čemagore baruto Pao Kurireu bagai tu tu je tabaru tabo čegimadu tabo apo rugadu tu tu je. Pagimijera Jesus Cristo uo nure ema.
COL 1:4 Tameartorure Jesus Cristoji rugadu. Tameardu kurire Pao Kurireu uwobe eiamedu boei rugadu. Boere egoino čei. Dukodire čegaregodure čei čemago tabo baruto Pao Kurireu bagai tu tu je.
COL 1:5 Boe ere tawie Jesus bataru pemegareuji. Pao Kurireu bataru remawu jire egoino tawiagai. Boe ere tawie dukodire tarduware Jesus aregodumoduie pugeje tuwo boe ekinorudo. Dukodire tameartorure Jesusji. Dukodire tameardu kurire boei. Pao Kurireu umodukare nou tarduware jiwu bataru mekido. Jesus aregodumode rugadu. Umode meartorure puduiwuge ekinorudo. Umode eewodudo pugeje emuguwo pudabo baru tada rugadu.
COL 1:6 Nou Jesus bataru pemegareu umode boe pemegado boei rugadu. Unure tumaedo moto jamedu boe parugajeje. Nono boe emeartorure ji rugadu. Tameardure nou bataruji dukeje tarduware ji rugadu. Tameartorure nou bataruji dukodire tarduware Pao Kurireu ro pemegareuji rugadu. Tarduware boe jokodu jire nou bataru akoino rugadu. Tarduware nou Pao Kurireu ro pemegareu aregodumode meartorure puduiwuge eiamedu boe ewagai rugadu.
COL 1:7 Imedu Epafras emare ure tawie Pao Kurireu bataru remawuji, Jesus ro pemegamoduie meartorure puduiwugei. Nou imedu Epafras maragodure Jesus Cristo ai itabo. Pao Kurireu utugare nure ema nono čemogadure. Dukodire čemeardu kurire jiwu čemedia nure ema rugadu.
COL 1:8 Nou imedu Epafras ure čewie tarore jiboeji jamedu. Akore Pao Kurireu Uwari uie tameardu kurido boei.
COL 1:9 Ure čewie tarore jiboeji tamagore jiboeji. Dukodire čemagore baruto Pao Kurireu bagai tabaru tabo ji aino. Čenogwamagudure Pao Kurireuji uwo tarduwado rugadu taidure jiboeji, uwo tarduwado taromode jiboeji. Pao Kurireu Uwari umode tarduwado rugadu. Umode taroiwado rugadu.
COL 1:10 Nono tarowo Pagimijera aidure jiboeji. Tawo Pagimijera jakaredo pudui tarore jiboeji. Taro pemegawo boei. Tarduwawo Pao Kurireuji rugadu. Tagaiduwo tarduwawo ji rugadu jii toro rugadu. Dukodire čemagore tu tu tabaru tabo Pao Kurireu bagai baruto.
COL 1:11 Pao Kurireu rakare rugadu boe jamedu boe kori. Imagore bagai baruto tabaru tabo uwo turaga maku tagai jamedu taragawo boe pegareu jamedu boeji. Boe korikawo tai tameardaekawo boe pegareuji. Tagimaduwo Pao Kurireu apo taegare tabo. Dukodire imagore baruto Pao Kurireu bagai tu tu je tabaru tabo. Pao Kurireu ure tabemegado tamuguwo baru tada ia meri keje ia meartorure Jesus jiwugebo. Pao Kurireu uwobe nure emage. Ero pemegareu ure nono jorugu pemegareu mogadure. Mare jorugu ji karega inagoino. Ero pemegareu ure boe pemegado boei. Dujire inagoino. Emeartorure Pao Kurireuji dukodire ekimijera kurireu nure ema. Pao Kurireu ure tabemegado tuwo tado nono emogadure jamedu.
COL 1:13 Pao Kurireu ure paginorudo boečo rakareu piji. Aino pameartorukare nou boečo rakareuji pugeje. Mare boečo remawu ji karega inagoino. Bope doge eimijera meardae pegareu jire inagoino. Marigudu nou bope doge eimijera meardae pegareu ure tumaedo paiogi dukodire paroiwakare pawo pawia ra piji. Dukodire paro pegare nono nou meardae pegareu mogadure tu rugadu. Dujire inagoino. Mare aino čare pameartorure Jesusji dukodire Pao Kurireu ure paginorudo paro pegareu piji. Aino pameartorumodukare nou bope doge eimijera meardae pegareuji pugeje. Dujire inagoino. Aino Pao Kurireu ure tumeardu kurire jiwu Tonaregedu Jesus jetu pemegado pai. Aino pameartorure tu Jesusji. Dukodire pagimijera kurireu nure ema. Jetu pemegamode pai rugadu.
COL 1:14 Emare bire paro pegareu moriče. Dukodire ure paginorudo paro pegareu piji pawarigudukawo bope doge eda kejewu joru pegareuto. Dukodire Pao Kurireu biagodure paro pegareu piji rugadu.
COL 1:15 Pao Kurireu biri bokware, kodu bokware dukodire boe erdumodukare Pao Kurireuji rugadu. Mare boe erdure Jesusji. Pao Kurireu nure ema jamedu. Pao Kurireu Onaregedu nure ema. Emare rakojere boetoji. Rakare Pao Kurireu ure towujeboe jamedu boe kori.
COL 1:16 Pao Kurireu ure Jesus udo boe jamedu boe towuje baru tada, moto keje. Ure boe erdure jiboe jamedu boe towuje. Ure boe erdumodukare jiboe jamedu boe towuje. Ure bope ewaire eiamedu boe etowuje. Ure boe eragareuge eiamedu boe etowuje. Ure boe eimijerage eiamedu boe etowuje. Ure Jesus udo boe jamedu boe towuje rugadu. Boe jamedu boe pemegare Jesus ai jamedu.
COL 1:17 Marigudu boe bokware. Tu Jesus Cristo ure. Nono ure boe jamedu boe towuje. Nono ča turaga tabore Jesus ure boe jamedu boe mugu pemegado tumuga keje boe jamedu boe okwakawo akedukawo.
COL 1:18 Meartorure Jesus jiwuge eimijera kurireu nure ema. Uwobe nure emage. Jesus emare ure meartorure puduiwuge emugu pemegado. Pao Kurireu ure Jesus jewodudo bikawo pugeje. Aino bimodukare pugeje. Dukodire boe eiamedu boe eimijera kurireu nure ema.
COL 1:19 Pao Kurireu ure tumeardae tawuje tuwo tonaregedu udo nono tumogadure. Dukodire Jesus ure nono Tuo Kurireu umogadure rugadu.
COL 1:20 Pao Kurireu aidure tuwo tumedagedo boe eiamedu boeče pugeje. Dukodire ure tugeragu tonaregeduji uwo boe pemegado. Dukodire nou Onaregedu ure tugu redo ipo padure pugajejewu keje boe ero pegareu moriče. Dukodire umode boe ekinorudo tuwo epemegado Pao Kurireu ai pugeje. Dukodire Pao Kurireu ure boe jamedu boe etudo pudae. Ure moto kejeboe jamedu boe etudo pudae. Ure baru tadaboe jamedu boe etudo pudae.
COL 1:21 Tagi jamedu. Marigudu taedu jaere Pao Kurireu piji. Taro pegareu koiare ure tardu pegado Pao Kurireuji. Du ure tagi. Tameardae pegareu koiare jordu pegare Pao Kurireu jiwuge nure tagi.
COL 1:22 Mare aino Jesus bire rugadu ipo padure pugajejewu keje boe ero pegareu moriče. Pao Kurireu Onaregedu nure ema. Dukodire Pao Kurireu ure tumedagedo tagi. Dukodire ure tadudo pudae. Dukodire ure taro pemegado. Dukodire ure taro pegareu barigu tabiji. Mako pegamodukare tarore jiboeji.
COL 1:23 Mare paga karega. Tameartorure Pao Kurireuji dukodire rore aino tai. Ča tagaba tagera ra nou tameartorure Jesus jitu piji. Jesus aregodumode pugeje rugadu. Tarduware nou inoduji rugadu. Tagaba nou tameartoru mekido ia boe emeardae ka. Tamodukare tagera ra tameartorure Jesus jitu piji dukeje Pao Kurireu umode nou turore taiboe jamedu boe udo jii toro turo oto pa ka. Tameardure Jesus bataru pemegareuji dukeje tarduware Jesus aregodumode pugeje duji. Jesus utugare nure imi iwo boe ewie nou bataru pemegareuji. Boe ere boe ewie nou Jesus jiboeji moto jamedu boe parugajeje.
COL 1:24 Ire boe ewie Jesus jiboeji dukodire ro pegareuge ere itogorido, ere boe pegado i. Mare iwiapagakare eroino iduji. Iagarere i kimo. Boe pegare i mare paga karega. Boe pegare i nono boe pegare Jesus Cristo jitu mogadure. Ro pegareuge ere boe pegado Jesusji. Mare Jesus biapagakare ei. Boere aino Jesusji ia boe emeartoruwo Jesusji rugadu. Emeartorure Jesusji dukeje Jesus ure tuwobedo emage. Aino ro pegareuge emode boe pegado meartorure Jesus jiwugei nono turo moga Jesus jitu mogadure.
COL 1:25 Pao Kurireu ure imaragodudo meartorure Jesus jiwuge etai. Ure imaragodae maku inai iwo tawie Jesus jiboeji iwo boe pemegado tai. Ure imaragodae maku inai iwo boe eiamedu boe ewie bataru pemegareuji. Jesus jire nou bataru akoino.
COL 1:26 Marigudu Pao Kurireu ure nou bataru pemegareu biado boe epiji. Ure biado jii toro Jesus aregodure du ka. Mare maigodu aino ure meartorure puduiwuge ewie nou bataru pemegareuji.
COL 1:27 Pao Kurireu meardae reo. Marigudu ukare boe tuginaiwuge ewie nou bataru pemegareuji. Mare aino aidure tuwo meartorure puduiwuge eiamedu boe ewie nou bataru pemegareuji. Nou bataru pemegare moture rugadu. Aino Pao Kurireu aidure boe eiamedu boe emeartoruwo nou bataru pemegareuji. Ča boe emeartorumode Jesus Cristoji dukodire Jesus rakojemode ebo. Dujire nou bataru pemegareu akoino. Jesus rakojemode boebo dukodire emugumode Pao Kurireu apo o boe pemegareu keje. Dujire nou bataru pemegareu akoino jamedu.
COL 1:28 Dukodire čere boe eiamedu boe ewie nou bataru pemegareuji. Čere čewadaru pemegado čerduware jiboe tabo čewo boe erduwa pemegado nuba boe mode ei. Emeartorumodukare Jesusji dukeje čere ewie nuba boe mode ei jamedu. Emeartorumode Jesusji dukeje čere erduwado boe pemegamode ei duji. Dukodire čere čeragado čewo boe emeartorudo Jesusji rugadu. Čedaidure čewo boe emeartoru rakado Jesusji rugadu čewo erego Pao Kurireu ae.
COL 1:29 Dukodire imaragodu rakare. Jesus Cristo ure turaga maku inai rugadu imaragodu pemegawo iwo boe ewie nou bataru pemegareuji rugadu.
COL 2:1 Itukare toro tagae raga. Dukodire tardukare i. Iragojere woe baičoreu tada. Mare iwiagorore tawagai rugadu. Imagore tu tu je Pao Kurireu bagai tabaru tabo rugadu iraga tabo. Imaragodu rakare iwo Jesus jiboe bu bapera keje iwo maku tawagai. Irore nono Laodiceia ba kurireu kejewuge meartorure Jesus jiwuge etai jamedu. Imaragodure iwo Jesus jiboe bu bapera keje iwo maku ia jorduwakare iwuge ewagai jamedu.
COL 2:2 Ire Jesus jiboe bu bapera keje iwo maku tawagai tawo taragado tameartoruwo ji rugadu. Ire Jesus jiboe bu bapera keje iwo maku tawagai tameardu kuriwo pui rugadu tamugu pemegawo puapo. Jorduware Jesus jiwuge erduware boe remawuji rugadu. Dukodire emororamagadumodukare mare erduwamode tudumoduie baruto rugadu. Marigudu Pao Kurireu ure tumeardae biado boe epiji. Mare aino ure boe erduwado nou tumeardaeji. Meardaere aino boe emeartoruwo tu Jesusji rugadu. Nono erduwamode Jesusji rugadu.
COL 2:3 Marigudu Pao Kurireu ure tuiorduware jiboe biado boe epiji. Mare aino Jesus umode meartorure puduiwuge erduwado Pao Kurireu jorduware jiboeji. Ia boe umodukare boe erduwado Pao Kurireu jorduware jiboeji. Nou Pao Kurireu jorduware jiboe ure nono mori kurireboe umogadure.
COL 2:4 Dukodire ire awu atugoreboe pemegado tawagai iwo tarduwado boe remawuji boe ekawo taekiripagado boe remawu piji. Mare paga karega. Ia boe etaidumode tuwo taekiripagado tuwadaru motureu tabo. Mare tuwadrarodu tabore emode tuwadaru motudo. Tameartorukaba ei. Tagaba tameardae mekido emeardae rekodaji.
COL 2:5 Iragojekare tagabo. Mare iwiagorore tu tu tawagai. Aino iorduware tameartoru rakare Jesusji rugadu. Tare taragado tai tameartoruwo ji rugadu. Dukodire tare iagaredo i rugadu.
COL 2:6 Tameartorure Jesus Cristoji. Tare tagimijerado ema. Čare tameartorudo ji rugadu. Tagaba tagera ra tameartorure jitu piji rugadu. Tamugu pemegado apo.
COL 2:7 Tarodo tu Jesus aidure jiboeji. Nono tameartoru rakado Jesusji rugadu nono i kurireu ukwa raka mogadure. Mare i ukwa ji karega inagoino. Tameartoru kuriwo Jesus jitu bagaire inagoino tai rugadu. Dujire inagoino. Aino tameartorumode boe ere tarduwado jiwu Pao Kurireu bataru remawuji. Nono tagimadudo Pao Kurireu apo ro pemegare tai dukodi.
COL 2:8 Ia boe erduware jiboe motumode boe egai. Ia bope doge eimijerage erduware jiboe jamedu motumode boe egai. Dukodire boe etaidumode tuiorduwawo ji rugadu. Du nou ere tore erduwado jiboe nou bope doge ere boe erduwado jiboe aregodukare Pao Kurireu piji. Mare emage rugadu ere nou tumeardae tawuje taobiji. Mare taeku jado. Nou boe erduware jiboe tabore boe etaidumode tuwo taekiripagado. Bope doge eimijera jorduware jiboe tabore boe etaidumode tuwo taekiripagado. Tameartorukaba ei. Tameartorumode ei dukeje ro pegareuge etugarege mode tagi. Tameartorudo tu Jesusji rugadu.
COL 2:9 Jesus Cristo imedure ema woe moto keje. Mare Pao Kurireu nure ema jamedu dukodire ure nono Pao Kurireu mogadure. Rore nono Pao Kurireu ro mogadure. Pao Kurireu nure ema dukodi rugadu.
COL 2:10 Nono tameartorure ji dukodire ure tamugu pemegado pudabo rugadu. Emare raka kodure bope doge eimijerage eraga kori. Raka kodure boe eimijerage eraga kori jamedu.
COL 2:11 Tameartorure Jesusji dukodire tamugu pemegare apo. Marigudu Judeu doge ere tore ime etuwaga oto biri kado Pao Kurireu jorduwo tumeartorure pudui duji nono Pao Kurireu bataru mogadure. Aino tare tagera ra taro pegareu piji nono Judeu doge ero moga tuwo tore ime etuwaga oto biri kado dumogadure. Mare ere tore ime etuwaga oto biri kado ji karega inagoino. Tare tagera ra taro pegareu piji Pao Kurireu jorduwo tameartorure Jesus jituji. Dujire inagoino. Mare taraga tabo karega taroino. Jesus emare ure turaga maku tagai tuwo taragado tawo tagera ra taro pegareu piji tawo tawia ra tameardae pegareu piji.
COL 2:12 Tare taremo poboto tagao pegododuwo dukeje tadugudure poboto nono Jesus tugudure mototo dumogadure. Tare taremo poboto tagao pegododuwo dukejere tare tadawuje pobo piji pugeje nono Jesus ure tudawuje moto piji dumogadure. Jesus jewodure pugeje dukeje ure tudawuje moto piji. Tameartorure Pao Kurireu ro rakareuji. Emare ure Jesus jewodudo pugeje turaga tabo. Tameartorure ji dukodire ure turaga maku tagai tuwo tado tagera ra taro pegareu piji. Aino tagao pegododure tawo boe erdudo awu Jesus rore tai duji.
COL 2:13 Marigudu boe tuginaiwugere tagi dukodire tarduwakare Pao Kurireu ure maku Judeu doge etaiwu eno bakaruji. Taro pegareu koiare ure taedu jaedo Pao Kurireu piji. Dukodire tare nono bireuge emogadure. Mare tawi ji karega inagoino. Taedu jaere Pao Kurireu piji. Dujire inagoino. Aino tameartorure Jesus Cristoji dukodire Pao Kurireu ure tado nono jewodureuge emogadure. Mare paewodu ji karega inagoino. Pameartorure Jesusji dukodire Pao Kurireu biagodure paro pegareu piji. Ure pameardae pemegado paro pemegawo. Dujire inagoino.
COL 2:14 Boe ero pegare dukodire emode nou turo pegareu morido nono to bakaru umogadure. Mare nou eno bakaru rakare boei. Ere turagado pudui tumeartoruwo nou to bakaruji. Ainore paiamedu boe parore tu tu je. Marigudu pare paragado pai pameartoruwo paro jamedu boeji. Mare paroiwakare pawo paro pemegado. Dukodire pamode paro pegareu morido. Mare Jesus bire ipo padure pugajejewu keje nou paro pegareu jamedu boe moriče. Dukodire pamodukare paro pegareu boe morido pugeje.
COL 2:15 Jesus bire ipo padure pugajejewu keje dukodire ure bope doge eimijerage rakareuge erdudo turaga kodure nou eraga kori duji. Du ure eraga tawuje epiji. Ure boe erdudo eraga bokwaie duji. Ure edo nono baičoreu tadawuge emogadure.
COL 2:16 Boe etaidumode tuwo tameartorudo ia bakaru mariguduwu Pao Kurireu ure maku Judeu doge etaiwu eroji. Egomode tai tagwagewo tu ia boe ekeji, tagwagekaiago ia boe ekeji. Mare tameartorukaba ei. Egomode: – Taguduwo awuče. Tagudukaba awuče. Ainore egomode tai. Mare tameartorukaba ei. Egomode tai tawaduwo nouia meri keje tarowo tu ia taro tuginaiwuji tu nou meri keje rugadu. Egomode tai tawaduwo ia ari maiwu kejewu boe ewadaeji. Egomode tai tameartoruwo sábado meri kejewu Judeu doge eroji. Mare tameartorukaba ei. Tameartorukaba nou emeardaeji.
COL 2:17 Marigudu Pao Kurireu ure nou bakaru mariguduwu maku nou Judeu doge etai emeartoruwo nou boe egoino jiboeji. Pao Kurireu ure nou bakaru mariguduwu maku nou Judeu doge etai tuwo boe erduwado Jesus romode jiboeji. Mare du inodu tabo erduwa pemegakare Jesus romode jiboeji. Mare aino Jesus aregodure. Boe remawu nure ema. Dukodire boe erduware boe remawuji. Ewiapagamodukare nou mariguduwu bakaruji pugeje.
COL 2:18 Ia boe egore boe remawuge kaiegure pudumi mare tuiorduie iaboeji. Egore tuiorduie jiboe ure tuginai. Egore pemegaie, kurie. Nono ere tumeardae tuginaiwu tawuje tuwo boe emeartorudo ji. Mare pagare egoino. Pagare eroino. Egore aino boe emeartoruwo pudui. Egore boei ewo tubu jodo tumago pemegawo Pao Kurireu utugarege baru tadawugei. Egore boe kurireuge enuie pudumi. Mare pagare egoino. Emago pegamode taroji mare tameartorukaba ewadaruji. Nou boe emeardaere boe kurireuge enuie pudumi mare pagatu je. Emeardaere nono ro pegareuge emeardae mogadure. Emeardaekare nono Pao Kurireu meardae mogadure.
COL 2:19 Ere tugera ra Jesus Cristo piji. Mare Jesus ure nono boe etaora mogadure. Mare boe etaora ji karega inagoino. Meartorure Jesus jiwuge eimijera kurireu nure ema. Dujire inagoino. Meartorure jiwuge ekare tudawuje pubiji nono boe epogodawu mogadure, boe ekanaura mogadure. Mare boe epogodawu ji karega inagoino. Boe ekanaura ji karega inagoino. Boe emeartorumode Jesusji dukeje ewiagoromode tuwo boe pemegado pui. Dujire inagoino. Jesus umode tumeardae pemegareu maku meartorure puduiwuge etai ero pemegawo pui rugadu. Pao Kurireu umode meartorure Jesus jiwuge emeartoru kurido Jesusji dukeje erore jiboe jamedu boe umode nono Jesus aidure jiboe umogadure.
COL 2:20 Tameartorure Jesus Cristoji dukodire tare nono bireuge emogadure. Mare tawi ji karega inagoino. Tare tameardae pemegareu tawuje taro pegareu bokwawo pugeje. Dujire inagoino. Taragare tawiapagakawo bope doge eimijerage emeardae pegareuji pugeje. Dujire inagoino. Mare kočare tameartorure ia boe ewadaruji. Egore tai tagaiago tagera bu iaboe keje. Egore tai tagaiago ia boe eke kowuje. Egore tai tagaiago tageragu iaboeji. Mare pagatu je nou boe egoino. Pagatu je boe emeartorumode nou eroji. Pagatu je boe eromode nou eroji. Boe ere nou tumeardae tawuje taora piji. Pao Kurireu meardae karega. Mare kočare tameartorure nou ewadaruji. Dukodire tare tado nono meartorukare Jesus jiwuge emogadure. Kodiba taroino?
COL 2:23 Nou boe egore boei ewo tubu jodo tumago pemegawo baru tadawuge Pao Kurireu utugaregei. Emagore nou boei etadragawo pudui eragawo. Egore boe eimijera kaie pudumi. Mare pagare egoino. Etaidure tuwo boe eimijeragedo pudumi rugadu. Boe egomode jorduwa kurireuge enuie emage rugadu. Mare pagatu je. Boe emeartorumode nou boe emeardaeji mare du inodu tabo eraga bokwamode tuwo tugera ra taidure jiwu turo pegareu piji.
COL 3:1 Jesus Cristo jewodure pugeje dukeje ruture baruto boe eimijera kurireuwo ema. Dukodire mugure baru tada to ira keje Pao Kurireu ukana pemegareu jagwai. Tagire ča tameartorure Jesus Cristoji dukodire tare nono jewodureuge emogadure. Mare taewodu ji karega inagoino. Tare tagera ra taro pegareu piji. Tameardae pemegare taro pemegawo nono Jesus Cristo meardae mogadure. Dujire inagoino. Dukodire imode tawie. Tameardae pemegado tu baru tadawu Jesus meardae mogadure taro pemegawo nono Jesus meardaeji. Tameardaekaba awu woewu moto kejewuge emeardae mogadure. Tameardaewo tu baru tadawu Jesus meardae pemegareuji.
COL 3:3 Mare paga karega. Tawire nou taro pegareu piji. Mare tawi ji karega inagoino. Tameardae maiwure tawo tagera ra taro pegareu piji tameardaewo tu baru tadaboe bagai. Dujire inagoino. Mare meartorukare Jesus jiwuge erduwakare raga kaba kodiba taroino. Erduwakare Jesusji dukodire erduwakare raga nuba boemode tai baru tada. Jesus rakojere Pao Kurireu apo. Dukodire erduwakare raga Pao Kurireu meardaeji.
COL 3:4 Mare Jesus Cristo utugarege nure tagi. Tameartorure ji rugadu. Ure tamugu pemegado Pao Kurireu apo. Dukodire Jesus Cristo aregodumode baru piji mato moto ka pugeje dukeje boe eiamedu boe erdumode ji. Taragojemode apo jamedu tameartorure ji kodi. Nono boe erdumode tai jamedu boe pemegare tai duji rugadu. Tamode nono Jesus mogadure rugadu. Boe pemegamode tai rugadu. Nono boe erduwamode rugadu tamugu pemegare Pao Kurireu apo duji rugadu.
COL 3:5 Tagera ra tawodure tabowu tameardae pegareu piji. Boe eiamedu boe ewodure tumeardae pegareu meture tudada dutabo. Dukodire emeardaere tu turo pegawo. Emeardaere tieribariwo tumugukare apowugei tu je. Emeardaere tieribari kigoduwo aremei. Ekare tuwia ra areme epiji. Areme jamedu emeardaere tuwo tumagu ime etai tu tu je. Emeardaere tieribari kigoduwo imei jamedu. Ekare tuwia ra ime epiji jamedu. Moto kejewuge ime areme etaidure tu turo pegawo rugadu. Enogwa kidure tu pudai tuwo toe kurido tumedage epiji. (Boe enogwa kidure tu pudai du aino erore nono meartorure tuwari santo dogeiwuge ero mogadure.) Pagare eroino.
COL 3:6 Pao Kurireu jordu pegare eroino duji. Dukodire umode boe pegado ei rugadu nou eroino du moriče.
COL 3:7 Ainore tarore marigudu. Tameardaere tu taro pegawo nono moto kejewuge ero mogadure jamedu. Taroiwakare tawo tagera ra piji. Mare aino čare tameartorure Jesusji.
COL 3:8 Dukodi čare tarokaba aino pugeje. Tagorigodukaba boei. Tardu pegakaba boei. Tagaba taro pegado boei. Tamago pegakaba boe eroji. Tawadaru pegareu barigu tabiji.
COL 3:9 Tawadrarodukaba boe ewiagai. Tameartorure Jesusji dukodire tare tagera ra nou taro pegareu jamedu boe piji rugadu. Marigudu taro pegareu meture tagaora tada tameardaekawo ia boe emeardae pemegareuji. Mare aino taromodukare ji pugeje.
COL 3:10 Tare tageragu Jesus ure maku tagaiwu taro maiwuji. Pao Kurireu unure tado nono tumogadure gu gu je. Emare ure boe jamedu boe towuje. Emare unure taro udo nono turo mogadure gu gu je. Dukodire umode tarduwado pudui rugadu.
COL 3:11 Meartorure Jesus jiwuge eiamedu boe ere nono pumogadure Pao Kurireu jakai. Meardae pemegare eiamedu boei. Dukodire Judeu doge emode nono boe tuginaiwuge emogadure. Ero umode tuginai pubiji mare Pao Kurireu jakai ere nono pumogadure. Boe emeartorumode Jesusji dukeje emode nono meartorure Jesus jiwuge brae emogadure Pao Kurireu jakai. Kaiamo doge emeartorumode Jesusji dukeje emode nono meartorure Jesus jiwuge boe emogadure Pao Kurireu jakai. Boe etugarege emeartorumode Jesusji dukeje emode nono meartorure Jesus jiwuge boe eimijerage emogadure jamedu. Jesus Cristo kurire moto kejeboe jamedu boe kori, baru tadaboe jamedu boe kori. Tu Jesus Cristo jire boe emeartorumode tiamedu boe tabo. Jesus rakojere meartorure puduiwuge eiamedu boe ebo jamedu.
COL 3:12 Čare Pao Kurireu uwobe nure tagi. Emare meardu kurire tai. Ure tugeragu tai tuwo taro udo tuginai nono tumeardaeji tarokawo tameardae pegareuji pugeje taro pemegawo tu je. Dukodire tageragu Pao Kurireu ro pemegareuji tarowo ji. Tagogududo boebo. Taro pemegado boei. Tagaba boe remawugedo tagi mare boe utugaregedo tagi. Taro pega kaba boei. Taro butugudo boei.
COL 3:13 Tagorigodukaba boei. Tamedage ero pegamode tai mare taro pegakaba ei ero pegareu moriče. Tawiagodudo nou ero pegare tai dupiji. Pagimijera biagodure taro pegareu piji rugadu. Dukodi čare tarodo nono awu Pagimijera Jesus rore tai dumogadure taro pegakawo tamedagei ero pegare tai du moriče.
COL 3:14 Nono tameardu kurido boei. Tameardu kurimode boei dukeje taro pemegamode awu inagoino boe ero pemegareuji rugadu. Boe emeardu kurimode pui dukeje boe pemegamode ei rugadu. Emeardaemode pumeardaeji. Emeardaemodukare toro ia boe emeardaeji pubiji.
COL 3:15 Tamode tameardae pemegareu tawuje dukeje Jesus Cristo umode tamororamagadu akedudo tabiji tameardae kuriwo Pao Kurireuji rugadu. Nono tarduwamode rugadu tare tameardae pemegareu tawuje rugadu. Pao Kurireu makore tawagai tameartoruwo pudui rugadu dukodire ure tamororamagadu akedudo rugadu. Nono ure tado nono tuwobe emogadure taedu pemegawo pudabo taedu pemegawo puapo jamedu. Dukodire Pao Kurireu uwobe nure tagi rugadu. Dukodi čare imode tawie. Tagimadudo Pao Kurireu apo rugadu rore aino tai duji.
COL 3:16 Jesus Cristo jiwu bakaru ure turugadu. Kurire rugadu. Tameartorudo ji rugadu. Tarduwado ji rugadu. Nono tawo pu jorduwado awu Jesus bataruji rugadu boe ewo turo pemegado jamedu. Nono taragodudo Jesus bataruji jamedu. Tawo roia ta Pao Kurireu bataru tabo. Taragodudo Pao Kurireu bataru tabo Pao Kurireu biagai taegarere tai dutabo.
COL 3:17 Taegaredo tai Jesus rore tai jiboeji tagimadu tabo Pao Kurireu biagai. Taro jamedu boe pemegado boei Jesus ie tabo nono Pagimijera Jesus ro mogadure. Tawadaru jamedu boe pemegado boei Jesus ie tabo nono Pagimijera Jesus bataru mogadure jamedu.
COL 3:18 Aremeire imagore. Tameartorudo tagogei. Ainore meartorure Jesus jiwuge areme erore.
COL 3:19 Imeire imagore jamedu. Tameardu kurido tawirei. Tamago rakakaba ei.
COL 3:20 Boe etore eire imagore. Tameartorudo taomagei tajemagei tu tu je taro jamedu boe tabo. Ainore meartorure Jesus jiwuge erore. Tameartorumode taomagei tajemagei dukeje tamode Pao Kurireu jakaredo pudui tarore aino duji.
COL 3:21 Boe etuo mage eire imagore jamedu. Tagaba tagore ekorigo. Tamode ekorigo dukeje ekiarigodumode rugadu.
COL 3:22 Boe etugarege eire imagore. Tameartorudo tagimijeragei tu tu je taro jamedu boe tabo. Etaiwomode taroji dukeje tameartorumode emagore jiboeji tawo egaredo taroji. Mare eragojemodukare tagabo taiwowo taroji mare du inodu tabo tameartorudo emagore jiboeji rugadu. Mare paga karega. Tameardaere tameartoruwo Pagimijera Jesusji. Emare aidure tameartoruwo tagimijeragei tu tu je.
COL 3:23 Tamaragodudo taraga tabo taro jamedu boeji. Tamaragodae udo nono Pagimijera Jesus maragodae mogadure tamaragodu pemegawo rugadu.
COL 3:24 Pagimijera Jesus umode iaboe pemegareu maku meartorure puduiwuge etai ero pemegareu moriče rugadu. Jesus Cristo utugarege nure tagi. Tagimijera Remawu nure ema.
COL 3:25 Mare umode boe pegado ro pegareugei ero pegareu moriče. Boe remawu tabore Pao Kurireu meardaere boe eiamedu boei. Umodukare tuiordae tumeardae tawujedu pagado boei.
COL 4:1 Boe eimijerage eire imagore jamedu. Taro jetorodo tadugaregei. Taro pegakaba ei. Tawiagodukaba Tagimijera Kurireu piji jamedu. Rakojere baru tada.
COL 4:2 Tagaba tagera ra tamagore Pao Kurireu bagai baruto du piji. Tamagodo baruto Pao Kurireu bagai tu tu je. Taeku jado tarduwo Pao Kurireu rore jiboeji. Tagimadudo Pao Kurireu apo taegarere tai dutabo.
COL 4:3 Tamagodo Pao Kurireu bagai čebaru tabo jamedu Pao Kurireu uwo boe emeardae pemegado ewiapagawo čewadaruji. Čere boe ewie Pao Kurireu bataruji tu tu je čewo boe erduwado Jesusji. Boe erduwakare Jesusji marigudu. Dukodire ire boe ewie nou bataruji dukodire ro pegareuge ere itugu baičoreuto.
COL 4:4 Dukodire tamagodo iparu tabo Pao Kurireu bagai baruto iwo irugadu imagowo boe ewiagai. Pao Kurireu uwo imago pemegado boe ewiagai erduwawo rugadu.
COL 4:5 Iwo tawie. Taroiwado taro pemegawo meartorukare Jesus jiwugei. Nono boe emode turugadu tumearduwo tamagore jiboeji. Tagi jamedu tado tarugadu tawo ewie Pao Kurireu bataruji jamedu.
COL 4:6 Tagaba tawadaru rakado boei. Tamago pemegado boe ewiagai etaiduwo tawadaruji. Tarduwa pemegado tarduwawo tamago pemegawo boe enarare jiboe jipagi.
COL 4:7 Pamedia Tíquico maragodu pemegare Pagimijera Jesus ai. Meartorure Jesusji dukodire pamedia remawu nure ema. Pagimijera Jesus utugare nure ema. Imeardu kurire ji. Tíquico aregodumode tagae dukeje readodumode iboeji tawiagai.
COL 4:8 Imire ire utudo tawagai uwo tawie nuba boere i. Čebegakare woe rugadu. Umode tawie dukeje umode taegaredo tai.
COL 4:9 Imeardu kurire jiwu imedu Onésimo utumode apo jamedu. Pamedia remawu nure ema jamedu. Colossos ba kurireu kejewu nure ema jamedu. Awu Tíquico, awu Onésimo emode tawie nuba boere woe rugadu.
COL 4:10 Imedu Aristarco aidure tugimaduwo toro tawagai. Rakojere woe itabo awu baičoreu tada. Marcos aidure tugimaduwo toro tawagai jamedu. Barnabé uwie nure ema. (Ire tawie marigudu. Awu Marcos aregodumode tagae dukeje tagera upodo apo rugadu).
COL 4:11 Josué aidure tugimaduwo toro tawagai jamedu. Iere Justo jamedu. Awu boe Judeu doge nure emage mare emeartorure Jesusji. Emaragodure itabo tuwo boe ewie Jesus jiboeji boe ewo tugimijerado ema. Ia meartorure Jesus jiwuge Judeu doge bokware woe tumaragoduwo itabo. Mare awu Aristarco, Marcos, Josué ere tugera maku inai woe rugadu. Emagere tu je.
COL 4:12 Imedu Epafras aidure tugimaduwo toro tawagai jamedu. Colossos ba kurireu kejewu nure ema jamedu. Jesus Cristo utugare nure ema jamedu. Emare makore baruto Pao Kurireu bagai tu tu je tabaru tabo rugadu. Makore Pao Kurireuji uwo turaga maku tagai tameartoru rakawo Jesusji rugadu, tagawo tagera ra tameartorure Jesus jitu piji. Makore Pao Kurireuji uwo tarduwado rugadu tuwadaruji tameartoruwo Pao Kurireu bataruji rugadu.
COL 4:13 Iorduware Epafras roji. Maragodu rakare tagai rugadu. Maragodu rakare Laodiceia ba kurireu kejewuge meartorure Jesus jiwuge etai. Maragodu rakare Hierápolis ba kurireu kejewuge meartorure Jesus jiwuge etai jamedu.
COL 4:14 Pameardu kurire jiwu pamedia Lucas ukimadure tawagai jamedu. Jorubo epa nure ema rugadu. Imedu Demas ukimadure tawagai jamedu.
COL 4:15 Tagimadudo Laodiceia ba kurireu kejewuge meartorure Jesus jiwugebo čenai. Tagimadudo aredu Ninfa apo čenai. Ia meartorure Jesus jiwuge emode bato pui Ninfa uwai tada tu tu je tumagowo Pao Kurireu bataruji pu biagai. Tagimadudo ebo čenai jamedu.
COL 4:16 Tagaiwomode awu atugoreboeji tamago tabo rakojere tagabowu meartorure Jesus jiwuge ewiagai dukeje awu atugoreboe maku Laodiceia ba kurireu kejewuge meartorure Jesus jiwuge etai etaiwowo ji jamedu erduwawo awu iwadaruji jamedu. Ire ia atugoreboe maku awu Laodiceia ba kurireu kejewuge meartorure Jesus jiwuge etai jamedu. Tagaiwodo nou atugoreboeji jamedu.
COL 4:17 Imedu Arquipo bie jamedu. Pao Kurireu ure tumaragodae maku Arquipo ai. Nou Arquipo biedu pemegado uwo nou tumaragodae iado rugadu tumeartoruwo Pagimijera Jesusji rugadu.
COL 4:18 Paulo nure imi. Imire ire ikie bu awu bapera keje ikera tabo rugadu tarduwawo imire ire awu bapera atugodo duji. Ikimaduwo toro tawagai rugadu. Tawiagodukaba boe ere ikogudo woe awu baičoreu tada du piji. Pao Kurireu ro pemegawo tai rugadu.
1TH 1:1 Paulo nure imi. Inure awu atugoreboe pemegado Silas apo, Timóteo apo jamedu. Awu atugoreboe utumode meartorure Jesus jiwuge etae Tessalônica ba kurireu ka. Tameartorure Jesusji dukodire Pao Kurireu uwobe nure tagi. Jesus Cristo uwobe nure tagi. Jesus pagimijera nure ema. Imagore tabaru tabo baruto Pao Kurireu bagai, Pao Kurireu ro pemegawo tai, uwo tabemegado boei rugadu.
1TH 1:2 Tessalônica kejewuge nure tagi. Čegimadure Pao Kurireu apo čemago pemegare tai dutabo. Čemagore tu tu je tabaru tabo baruto rugadu.
1TH 1:3 Čewiagodukare taro piji. Tameartorure Jesusji rugadu. Tameardu kurire Jesusji dukodire tamaragodure ai rugadu. Tabagare Jesus bagai pugeje uwo turawuje baru piji moto ka pugeje.
1TH 1:4 Parduware Pao Kurireu meardu kurire tai rugadu. Ure tugeragu tai rugadu tuwo tuwobedo tagi, tuwo tudugaregedo tagi. Čemedage nure tagi jamedu.
1TH 1:5 Čegire čedaregodure Jesus bataru pemegareu tabo tagae. Čere tarduwado nou bataru pemegareuji mare čeginaigodu karega. Pao Kurireu Uwari ure čeragado čewo tarduwado. Emare ure tarduwado rugadu nou Jesus bataru pemegareuji. Nou bataru jire čemeartorure rugadu. Ure turugadu rugadu. Čeragojere tagabo dukejere tardure čerore jiboeji. Čero pemegare tai boe pemegawo tai.
1TH 1:6 Dukodire tarore nono čero mogadure. Tarore nono Pagimijera ro mogadure. Tarore Jesus roji dukodire ro pegareuge ero pegare tai. Mare tameartorure rugadu Pao Kurireu bataruji dukodire Pao Kurireu Uwari ure taegaredo rugadu.
1TH 1:7 Taro pemegare aino dukodire itaidure Macedônia moto kejewuge meartorure Jesus jiwuge erowo nono taro mogadure. Itaidure Acaia moto kejewuge meartorure Jesus jiwuge erowo nono taro mogadure jamedu.
1TH 1:8 Taro pemegare dukodire Macedônia moto kejewuge emeartorure Pagimijera Jesusji jamedu, Acaia moto kejewuge emeartorure Pagimijera Jesusji jamedu. Torowu boe doge emeardure nou Pao Kurireu maragodu pemegare tai duji. Dukodire boe eiamedu boe erduware tameartorure Pao Kurireu jituji. Čemagomodukare tai pugeje tarduware tameartorure ji kodi.
1TH 1:9 Awu meartorure Jesus jiwuge emagore tarore jiboeji ia boe ewiagai pugeje. Egore taro pemegaie čei. Čedure tagae dukeje taro pemegaie čei. Egore taie tagera ra tawai tadawu santo doge epiji tameartoruwo tu Pao Kurireuji tu rugadu. Boe remawu nure Pao Kurireuče rugadu. Okwamodukare rugadu. Bimodukare rugadu. Aino taie tagera ra bope doge epiji tameartoruwo tu Pao Kurireuji, Pao Kurireu utugaregewo tagi. Egore.
1TH 1:10 Tabagaie Pao Kurireu bagai onaregedu Jesus aregoduwo baru piji pugeje meartorure puduiwuge ewagai. Egore. Čare iwo tawie pugeje. Pao Kurireu ure Jesus jewodudo pugeje. Pao Kurireu korigodumode moto kejewugei rugadu. Ro pegamode moto kejewugei rugadu. Mare ro pegamodukare meartorure Jesus jiwugei. Pameartorumode Jesusji dukeje umode paginorudo rugadu.
1TH 2:1 Čemedage nure tagi. Tagire tarduware čeroji. Čedaregodure tagae dukeje čerore nono čemeardae mogadure.
1TH 2:2 Tagi tarduware. Čeragojere Filipos ba kurireu keje dukeje ro pegareuge ero pegare čei. Ero pegare čei, emago pegare čei. Dukejere čedaregodure tagae Tessalônica ba kurireu ka. Aino ia ro pegareuge erdu pegare čerore jiboeji nono jamedu. Mare Pao Kurireu ure čeragado čemagowo Jesus bataru pemegareuji tawiagai.
1TH 2:3 Čemagore tawiagai mare čemeardae pegareu tabo karega, čegaregure taekiripagado. Boe jokodu jire čenagoino rugadu.
1TH 2:4 Čemagore Pao Kurireu ure maku čenaiwu Jesus bataru pemegareuji. Emare jorduware čemeardaeji. Čedaidukare boe emago pemegawo čei. Čedaidure tu Pao Kurireu mako pemegawo čei, čeroji. Dukodire aidure čei tuwo nou Jesus bataru maku čenai rugadu.
1TH 2:5 Tagi tarduware čemeardaeji jamedu. Čedaregodure tagae mare čemago pagakare tai. Čenogwa kidukare boeji čenai dukodire čegare taekiripagado. Čedaregodure tagae mare diero bagai karega. Čere tarduwado čemeardae remawuji rugadu. Pao Kurireu jorduware.
1TH 2:6 Uture Jesus Cristo jiboe bataru tabowuge nure čegi. Mare čemarukare tamago pemegawo čei boe ewiagai. Čemarukare ia boe emago pemegawo čei boe ewiagai rugadu.
1TH 2:7 Jesus koiare ure čerojino mato tawagai. Dukodire čemagomode tai ia diero bagai dukeje tamode maku rugadu. Mare čemagokare. Čegi čemago pemegare tai. Čere čero butugudo tai nono aredu ro butugu moga torei dumogadure.
1TH 2:8 Čemeardu kurire tai rugadu dukodire čemagore rugadu tawiagai Jesus bataru pemegareuji. Čedaidure čewo čemagu tagai rugadu. Čerdu pemegare tai rugadu.
1TH 2:9 Tawiabuture čero keje. Čeragojere tagabo dukeje iemarure ia imaragodae bagai iwo akirodo ike rogu boeji tamororamagadukawo i nou tage rogu tabo. Čemaragodure meriji, boečoji. Mare čedure nono tagabo dukeje čemago pemegare nou Jesus bataru pemegareuji tawiagai.
1TH 2:10 Tarduware čeroji. Pao Kurireu jorduware jamedu. Čedaregodure tagae dukeje čero pemegare, čere čero jetorodo, čero pegareu bokware.
1TH 2:11 Čerore tai nono boe erore torei dumogadure. Tagi tarduware.
1TH 2:12 Čeragojere tagabo dukeje čere taragado. Čere tamororamagadu akedudo. Čemagore tai taro pemegawo nono Pao Kurireu aidu mogadure. Emare makore tawagai tudugaregewo tagi taragojewo pudabo boe pemegareu keje.
1TH 2:13 Čedaregodure tagae Pao Kurireu bataru tabo dukeje tameardure ji. Dukejere tameartorure nou bataruji. Tameartorure Pao Kurireu pijire nou bataru aregodure rugadu. Tarduware boe epiji karega nou bataru aregodure. Pao Kurireu o bataru remawu nure ema. Tameartorure ji dukodire nou bataru koiare unure tameardae pemegado rugadu. Dukodire čemago pemegare taroji čegimadu tabo Pao Kurireu apo.
1TH 2:14 Čemedage nure tagi. Judeu doge ero pegare meartorure Jesus jiwugei toro Judéia moto keje. Ča tawobe ro pegareuge ero pegare tai nono nou Judeu doge ero mogadure.
1TH 2:15 Nou Judeu doge ere nou makore Pao Kurireu bataru jiwuge ewido. Ere Pagimijera Jesus bito. Ero pegare čei jamedu. Ere Pao Kurireu kiarigo rugadu. Erdu pegare boei rugadu.
1TH 2:16 Ča etaidure tuwo čemago akedudo čemagokawo ia boe tuginaiwugei pugeje. Etaidukare čewo ewie Pao Kurireu bataruji. Judeu doge etaidure tu pudui Pao Kurireu ukawo boe tuginaiwuge ekinorudo. Marigudu Judeu doge ero pegare. Aino čare ere turo pegareu kurido rugadu. Dukodire Pao Kurireu korigodure ei rugadu. Kodire ro pegamode ei rugadu.
1TH 2:17 Čedure tabiji dukodire čegiarigodure tawagai rugadu jii aino. Čewiagodukare tabiji rugadu. Dukodire čere čeragado čeduwo tagae pugeje.
1TH 2:18 Čedaidure čewo čegirimi tawagai pugeje rugadu. Imire ituiago tagae tu tu je mare bope doge eimijera Satanás aidukare. Ure boe ero pegado ewo čewuredo čedukawo tagae pugeje.
1TH 2:19 Mare čegiarigodure tawagai. Tagi tameartorure Jesusji dukodire tare čegaredo čei. Tameartoru bagaire čeroino. Pagimijera Jesus aregodumode dukeje čegaregodumode tai rugadu tameartorure Jesusji dukodi. Čereadodumode Jesus biagai tameartorure ji rugadu.
1TH 2:20 Dukodire čenojarore tai rugadu. Tare čegaredo rugadu.
1TH 3:1 1Čemororamagadure tawagai rugadu. Dukodire imeardaere iragojewo Atenas ba kurireu keje ikinaigodu iwo imedia Timóteo utudo tawagai.
1TH 3:2 Pamedia remawu nure ema. Maragodure čedabo Pao Kurireu ai. Unure boe ewie Jesus bataru pemegareuji jamedu. Čere utudo tawagai uwo tameartoru rakado tagawo tagera ra Pao Kurireu piji. Ro pegareuge ero pegare tai mare tagaba tagera ra Pao Kurireu piji. Tagaba tagirimi tameardae pegareu ka pugeje. Mare paga karega. Pameartorure Pao Kurireuji dukodire ro pegareuge ero pegamode pai rugadu.
1TH 3:4 Iragojere tagabo dukeje ire tawie ro pegareuge emoduie turo pegado pai rugadu. Ča. Ero pegare pai rugadu. Tarduware.
1TH 3:5 Dukodire ire Timóteo utudo tawagai. Imororamagadure tawagai dukodire ire utudo tagae jorduwawo tameartoru kimore Pao Kurireu jitu bagai. Tawiapagamode bope doge eimijera meardae pegareuji pugeje dukeje tamode čemaragodu pagado tagabo.
1TH 3:6 Maigodu aino Timóteo aregodure tuibagi mato tabiji. Ure čewie tarore jiboeji, tameardaere jiboeji. Akore tameartoru kimoie Pao Kurireuji. Tameardu kurie Pao Kurireuji kimo. Akore tawiabutu pemegaie čewugeje tu tu je. Ure čewie tagaidure tarduwo čei pugeje nono čedaidure čerduwo tai dumogadure jamedu.
1TH 3:7 Dukodire čegiarigodu akedure. Tameartorure rugadu Pao Kurireuji dukodire tare čegiarigodu akedudo. Ro pegareuge ero pegare čei. Boe pegare čei rugadu mare čegiarigodukare.
1TH 3:8 Tamugumode Pagimijera Jesus apo. Tamodukare tagera ra Jesus piji dukeje čegiarigodumodukare rugadu.
1TH 3:9 Timóteo ure čewie taroji. Aino čare čegimadumode Pao Kurireu apo rugadu taro tameardae paru tabo. Aino tare čegaredo čei rugadu. Čegarere rugadu. Čemagore baruto dukeje čewiabuture tawugeje. Dukejere čegarere čei rugadu.
1TH 3:10 Čare meriji, boečoji čenogwamagudure čeraga tabo Pao Kurireuji čeduwo tagae čewo tameartoru pemegado tameartoru remawuwo Pao Kurireuji rugadu.
1TH 3:11 Pameartorure jiwu Pao Kurireu emare uwo boe udo turugadu čei čedaregoduwo tagae rugadu. Pagimijera Jesus uwo boe udo turugadu čei čedaregoduwo tagae rugadu.
1TH 3:12 Pagimijera Jesus uwo tameardu kurido pui, uwo tameardu kurido boe eiamedu boei tameardu kuriwo rugadu. Tameardu kuriwo boei nono čemeardu kuri moga tai dumogadure.
1TH 3:13 Taromode aino dukeje Pao Kurireu umode taragado tai tarokawo tameardae pegareuji pugeje taro pemegawo rugadu, taro pegareu bokwawo. Nono Pagimijera Jesus aregodumode Pao Kurireu utugarege baru tadawugebo dukeje taragojemode Pao Kurireu apo. Toro taro pegareu bokwamode. Pao Kurireu jordumodukare ia taro pegareuji rugadu.
1TH 4:1 Čemedage nure tagi. Čere tarduwado nuba tarowo tawo Pao Kurireu jakaredo. Tarore aino rugadu. Tare Pao Kurireu jakaredo taroji. Aino čemagowo tai pugeje tagawo tagera ra nou taro piji. Čenogituwanure aino tai Pagimijera Jesus aidure kodi.
1TH 4:2 Tagi tarduware Pagimijera Jesus aidure jiboeji. Čere tarduwado marigudu.
1TH 4:3 Tarodo nono Pao Kurireu meardae mogadure tawo taro udo tuginai meartorukare Pao Kurireu jiwuge ero piji, taro pemegawo rugadu, tameardae pemegawo rugadu. Tameardae pemegado jeribarire tumugukare apowuge emeardae pegareu piji taeribarikawo tamugukare apowugei rugadu. Ainore Pao Kurireu meardaere rugadu.
1TH 4:4 Imedu uwo turagado pudui tuwiapagakawo tuwodure tabowu tumeardae pegareuji pugeje, tumugu pemegawo toreduje apo ro pemegawo ji.
1TH 4:5 Imedu uwo turagado pudui taidukawo tuwo tugeragu ia aredu tuginaiwudoji toreduje piji. Meartorukare Pao Kurireu jiwuge erdure aremei dukeje etaidure tuwo tugera ra toreduje piji tuwo tugeragu ia areduji pugeje. Nouge erduwakare Pao Kurireuji.
1TH 4:6 Mare tagi tarokaba aino. Taro pegakaba meartorure Jesus jiwugei. Tagaba meartorure Jesus jiwuge ekiripagado. Nono boe pemegamode ei rugadu. Čere tawie aino marigudu. Pagimijera Jesus ro pegamode ro pegareugei rugadu. Čere tawie marigudu tarokawo nono nou ro pegareuge ero mogadure.
1TH 4:7 Pao Kurireu makore pawagai pawiapagakawo pameardae pegareuji pugeje. Makore pawagai pawo pagera ra paro pegareu piji paro pemegawo rugadu.
1TH 4:8 Pao Kurireu bataru jire čenagoino. Meartorukare awu čewadaru jiwuge emeartorukare Pao Kurireu bataruji. Mare Pao Kurireu ure Tuwari maku tagai tameartoruwo tuwadaruji.
1TH 4:9 Pao Kurireu ure tarduwado tameardu kuriwo pui marigudu. Dukodire čemodukare nou inodu bu bapera keje.
1TH 4:10 Tameardu kurire Macedônia kejewu meartorure Jesus jiwuge eiamedu boei. Aino čenogwamaguduwo tai pugeje tagawo tagera ra nou taro piji. Taro pemegareu ko toro tugori.
1TH 4:11 Čemagore tai marigudu. Tamugu butugudo boebo. Tagaba tagera raido boe emaragodaeto. Tagwagedo tagududo tu tamaragodae tabo.
1TH 4:12 Taromode aino dukeje meartorukare Jesus jiwu boe etaidu pemegamode tai. Taromode aino dukeje taipagamodukare ia boei tage bagai.
1TH 4:13 Čemedage nure tagi. Čedaidure čewo tarduwado boe remawuji. Tarduwamode boe remawuji dukeje tagiarigodumodukare bireuge ewagai pugeje. Mare meartoru bokwareuge epagakare tuiorduwo bireugei pugeje dukodire ekiarigodumode rugadu.
1TH 4:14 Pameartorure Jesus bire duji, jewodure pugeje rugadu. Dukodire pameartorure Pao Kurireuji uwo meartorure Jesus jiwuge bireuge eewodudo pugeje jamedu. Emeartorure Jesusji tuwimode otodai dukodire umode eewodudo pugeje. Nono umode erududo baruto tudogi.
1TH 4:15 Ainore Pagimijera Jesus akore. Ure čerduwado. Pagimijera Jesus aregodumode pugeje dukeje meartorure Jesus jiwuge bireuge eewodumode pugeje. Nono erudumode baruto Jesus togi bikareuge etododai.
1TH 4:16 Ia baru pijiwu uwadodumode. Pao Kurireu utugarege baru tadawuge eimijera makogodumode jamedu. Pao Kurireu o tapira ukiga akomode jamedu. Dukejere Jesus umode turawuje baru piji. Nono meartorure Jesus jiwuge bireuge eewodumode pugeje turuduwo Jesus togi.
1TH 4:17 Dukejere pagi, pameartorure Jesus jiwuge bikareuge pagi parudumode ebo toro boetugu ka baruto Pagimijera Jesus togi. Aino čare pamugumode Pagimijera Jesus apo. Du akedumodukare rugadu.
1TH 4:18 Dukodi čare tamagodo awu bakaruji pu biagai tawo tagiarigodu akedudo.
1TH 5:1 Čemedage nure tagi. Boe erduwakare nou Pagimijera Jesus aregodumode kejewu meriji. Tarduware nou inoduji marigudu. Dukodire imodukare bu awu bapera keje pugeje.
1TH 5:2 Mare Pagimijera Jesus aregodumode kejewu meri aregodumode nono ia iwogu kigodureu mogadure. Iwogureu aregodumode boečoji boe erdukawo pudui.
1TH 5:3 Ainore Jesus romode jamedu. Boe egomode: “Boe pemegare pai. Boe pegamodukare pai.” Mare rore puku boe pegamode ei rugadu. Boe pegare jiboe umode eto pui nono aredu kurijirigodu mogadure. Dukodire nou boe emoka tuginorudo rugadu.
1TH 5:4 Jorduwa bokware Pao Kurireu jiwuge nure emage du kodi. Mare tagi tameartorure Jesusji dukodire tarokare nono nou meartorukare Jesus jiwuge ero mogadure. Dukodire Jesus aregodumode dukeje umodukare taeto pui. Boe epagamodukare iwogu kigodureu bagai mare tabaganure Jesus bagai rugadu.
1TH 5:5 Boe ero pegamode boečoji tuwo turo pegareu biado boe epiji. Mare ro pemegareuge nure tagi. Parokare nono nou ro pegareuge boečojiwuge ero mogadure.
1TH 5:6 Dukodire taeku jado. Pawo pagera ra pagerakiari piji. Pawo paragado pai paro pegakawo.
1TH 5:7 Boe enudumode boečoji dukeje erdumodukare boeji. Uke kurure jiwu jordumodukare boeji.
1TH 5:8 Mare pameartorure Jesusji dukodire paromode nono ro pemegareuge eromoga meri jitu mogadure. Dukodire pawo paragado pai paro pegakawo. Pameartoruwo Jesusji rugadu. Pameardu kuriwo Jesusji rugadu. Ainore pagoduiwawo bope doge epiji nono tugobaigare umode tugeragu tumorora kejewu meririji tugoduiwawo boe etugo piji dumogadure. Pabagawo Jesus bagai aregoduwo tuwo paginorudo. Aino pamode pagoduiwadudo bope doge emeardae pegareu piji nono tugobaigare umode tugeragu tatadawu meririji tuwo tugu taoto dumogadure.
1TH 5:9 Pao Kurireu ure tugeragu pai. Mare tugorigoduwo pai karega. Ure tugeragu pai pameartoruwo Pagimijera Jesus Cristoji uwo paginorudo rugadu.
1TH 5:10 Emare bire pamugato paro pegareu moriče pamuguwo pudabo. Jesus aregodumode pugeje dukeje bireuge bikareuge emugumode apo. Dukodire pamugumode apo rugadu.
1TH 5:11 Nou bataru tabore pawo pagiari barigu pabiji. Pawo pagera maku puai. Ainore tarore rugadu mare tagaba tagera ra nou taro piji.
1TH 5:12 Čemedage nure tagi. Čenogwamagudunure tai. Tameartorudo ure tarduwado Pao Kurireu bataru jiwugei. Tagimijerage nure emage. Enure tarduwado tarowo meartorure Jesus jiwuge eroji.
1TH 5:13 Ero pemeganure tai. Dukodire tagaidu pemegado ei. Tameardu kurido ei. Tamugu pemegawo puapo tabemegawo pui rugadu.
1TH 5:14 Čemedage nure tagi. Dukodire čenogituware aino tai tawo iera kiarireuge ewie ero koiare boe pegamode ei. Iage epogurure tumagowo. Tamagodo ei epogurukawo. Tagera maku rakakareuge etai. Tagorigodukaba boei mare tawudugugoduwo boe eiamedu boebo.
1TH 5:15 Tagaiwodo boei ero pegakawo. Ro pegareuge ero pegamode ei mare emagokawo. Mare taro pemegado meri jameduji boe eiamedu boei.
1TH 5:16 Tagaba taegare akedudo.
1TH 5:17 Tagaba tamago akedudo baruto.
1TH 5:18 Boe pegamode tai mare tagaba tagera ra tamagore baru to dupiji tagimadu tabo Pao Kurireu apo. Tagimadudo Pao Kurireu apo rugadu jii toro rugadu. Ainore Pao Kurireu meardaere tameartorure Jesus jitu kodi.
1TH 5:19 Tagaba tawia ra Pao Kurireu Uwari piji.
1TH 5:20 Tameartorudo makore Pao Kurireu bataru jiwuge ewadaruji.
1TH 5:21 Tagaiwo pemegado boe jameduji. Tawo tageragu boe ero pemegareuji.
1TH 5:22 Tawo boe ero pegareu barigu tabiji. Taburedukaba ji.
1TH 5:23 Ča Pao Kurireu uwo turo pemegareu bu tawugeje taro pemegawo, taro pegareu bokwawo rugadu. Emare umode boe epemegado pui. Umode boe epemegado Pao Kurireuji. Jesus Cristo aregodumode dukeje aiwomode tai. Dukodire Pao Kurireu uwo tameardae jamedu boe pemegado, taro pemegado rugadu. Uwo taro pegareu okwado tabiji jii toro Pagimijera Jesus Cristo aregodumode du ka.
1TH 5:24 Nou makore tawagaiwu Pao Kurireu umodukare tugera ra tabiji. Kodumode tuwadaruji tu rugadu. Dukodire umode nou turo to rugadu.
1TH 5:25 Tameartorure Jesusji dukodire čemedage nure tagi. Tamagodo baruto čebaru tabo.
1TH 5:26 Tagimadu pemegado meartorure Jesus jiwuge eiamedu boebo nono taro moga tawobei dumogadure.
1TH 5:27 Pagimijera Jesus aiwore paroji. Dukodire itaidure tamagowo awu atugoreboeji meartorure Jesus jiwuge eiamedu boe ewiagai erduwawo nuba awu atugoreboe ure jamedu.
1TH 5:28 Pagimijera Jesus Cristo ro pemegawo pai rugadu.
2TH 1:1 Paulo nure imi. Inure awu atugoreboe pemegado Silas apo, Timóteo apo jamedu. Awu atugoreboe utumode meartorure Jesus jiwuge etae Tessalônica ba kurireu ka. Tameartorure Jesusji dukodire Pao Kurireu uwobe nure tagi. Jesus Cristo uwobe nure tagi. Pagimijera nure Jesusče dukodi.
2TH 1:2 Imagore baruto tabaru tabo Pao Kurireu ro pemegawo tai, Pagimijera Jesus Cristo ro pemegawo tai. Pao Kurireu uwo tabemegado pui. Pagimijera Jesus Cristo uwo tabemegado pui jamedu.
2TH 1:3 Čemedage nure tagi. Čemago pemegare taroji čegimadu tabo Pao Kurireu apo. Čemodukare čegera ra awu čegimadure Pao Kurireu apo dupiji rugadu. Tanure tameartoru kurido Pao Kurireuji rugadu. Tanure tameardu kurido pui rugadu. Dukodire čemago pemegare taroji aino čegimadu tabo Pao Kurireu apo meri jameduji.
2TH 1:4 Dukodire čemago pemegare taroji meartorure Jesus jiwuge eiamedu boe ewiagai. Boe pegare tai. Ro pegareuge ero pegare tai. Mare tagare tagera ra tameartorure Jesus jitu piji. Tameartorure ji rugadu. Dukodire čemago pemegare tarore jiboeji.
2TH 1:5 Ro pegareuge ero pegare tai tuwo tameartoru barigu tabiji. Dukodire parduware Pao Kurireu aiwomode rugadu nou boe ero jameduji. Aiwomode taro jameduji. Jordure tameartorure duji dukodire umode tado tarugadu tamuguwo moto maiwu keje utugaregewo tagi. Mare tabagare nou inodu bagai woe awu moto keje dukodire ro pegareuge enure turo pegado tai rugadu tuwo tadawuje nou tameartorure jitu piji.
2TH 1:6 Mare Pao Kurireu umode boe udo turugadu. Umode boe pegado nou ure turo pegado taiwugei rugadu.
2TH 1:7 Umode taginorudo boe pegareu piji. Umode čeginorudo jamedu boe pegareu piji jamedu. Jesus aregodumode pugeje baru piji tudugarege baru tadawugebo dukeje Pao Kurireu umode paginorudo rugadu.
2TH 1:8 Jesus aregodumode joru tabo tuwo turo pegado meartorukare Pao Kurireu jiwugei, meartorukare Jesus bataru pemegareu jiwugei. Emeartorukare Pagimijera Jesusji dukodire umode boe pegado ei rugadu.
2TH 1:9 Boe pegamode ei rugadu. Edu jaemode Pao Kurireu piji. Edu jaemode Pao Kurireu ro rakareu pemegareu piji. Boe pegamode ei rugadu. Du akedumodukare.
2TH 1:10 Jesus aregodumode pugeje dukeje ro pegamode meartorukare puduiwugei rugadu. Mare meartorure jiwuge emago pemegamode ji rugadu. Emode ie kurido rugadu. Ebogodumode ieji rugadu. Tagi jamedu. Tameartorure čere tawie jiwu Pao Kurireu bataru pemegareuji dukodire tamago pemegamode Jesusji nou boebo jamedu.
2TH 1:11 Dukodire čemagore tabaru tabo baruto tu tu je. Čenogwamagudure Pao Kurireuji uwo taro pemegado. Emare makore tawagai tuwo tadawuje taro pegareu piji tuwo taro pemegado. Aino čemagore ji uwo turaga maku tagai. Tagaidure taro pemegawo. Umode turaga maku tagai taro pemegawo rugadu. Tameartorure ji. Umode turaga maku tagai tameartoru pemegawo ji rugadu.
2TH 1:12 Ainore tamode boe emeardae pemegado Pagimijera Jesusji ewo ie kurido rugadu. Emare umode boe emeardae pemegado tai jamedu. Pao Kurireu ro pemegawo tai rugadu. Pagimijera Jesus Cristo ro pemegawo tai rugadu.
2TH 2:1 Ia boe emagonure Pagimijera Jesus Cristo aregoduie marigudu. Pagare egoino. Etaidure tuwo tarduwa bokwado. Etaidure tuwo tagaora pegado. Čegi čemagokare aino atugoreboeto. Nouia inodukare tudawuje čeiabiji rugadu. Ča imedage nure tagi. Imire imode tarduwa pemegado Jesus aregodumode kejewu meriji, umode parego tudogi du ka.
2TH 2:3 Tameartorukaba ia bataruji. Jesus aregodumodukare jii boe erduwamode Ro Pegareu Remawu jitu ka. Boe erduwamode ji dukeje Jesus aregodumode. Mare paga karega. Boe emode turagado pudui tuwo taekiripagado, tuwo tumeartoru bokwado Pao Kurireuji. Čare boe emode boe emeartoru bokwado Pao Kurireuji dukeje boe erduwamode Ro Pegareu Remawuji. Nou Ro Pegareu Remawu meartoru bokwamode rugadu. Pao Kurireu ure boe ewie marigudu nuba turomode nou Ro Pegareu Remawuji, tumoduie barigu bope doge eda kejewu joru pegareuto rugadu. Nou bataru jetumode pudui rugadu
2TH 2:4 Mare nou Ro Pegareu Remawu aidumode tuwo boe emeartorudo pudui boe eiamedu boe piji. Umode tumugudo Pao Kurireu uwai tada. Makomode Pao Kurireu nuie pudumi. Mare Pao Kurireu umode barigu boe pegareuto rugadu.
2TH 2:5 Tawiabutudo iwadaru keje. Iragojere tagabo dukeje ire tawie nou inoduji.
2TH 2:6 Mare nou Ro Pegareu Remawu aregodukare raga. Pao Kurireu aidukare aregoduwo tu aino jao. Tarduware nou inoduji. Mare Pao Kurireu aidumode dukeje nou Ro Pegareu Remawu aregodumode.
2TH 2:7 Boe erore marigudu nou Ro Pegareu Remawu roji. Mare nou Ro Pegareu Remawu aregodumode dukeje umode turo to rugadu. Mare ia boe ekedure ji aregodukawo kuri aino. Mare nou iedure jiwu tawujedumode piji dukeje Ro Pegareu Remawu umode turo to rugadu.
2TH 2:8 Aino boe eiamedu boe erduwamode Ro Pegareu Remawuji. Mare Pagimijera Jesus aregodumode dukeje umode nou Ro Pegareu Remawu bito togwamudu tabo. Joru urugureu tabore romode ji jamedu.
2TH 2:9 Nou Ro Pegareu Remawu aregodumode bope doge eimijera Satanás raka tabo. Ro rakamode mare ro raka remawu modukare. Romode aino tuwo ia boe ekiripagado. Emeartorukare Pao Kurireuji dukodire nou Ro Pegareu Remawu ure ekiripagado tuwo emeartorudo pudui. Nono meartorure nou Ro Pegareu Remawu jiwuge etagedumode rugadu. Emeartorukare boe remawuji dukodi. Etaidukare boe remawuji rugadu. Dukodire Pao Kurireu umodukare edo činorudo.
2TH 2:11 Pao Kurireu umode edo tuwuredo nou emeardae pegareu keje. Nou emeardae pegareu koiare umode emeartorudo batrarodureuji.
2TH 2:12 Aino Pao Kurireu umode meartorukare boe remawu jiwuge ewarigu boe pegareuto. Emeartorukare boe remawuji tiegarewo nou turo pegareuji.
2TH 2:13 Čemedage nure tagi. Čegimadure Pao Kurireu apo meri jameduji tabaru tabo. Pao Kurireu meardu kurire tai rugadu. Tagi tameartorure boe remawuji dukodire ure tugeragu tai tuwo taginorudo Tuwari raka tabo tuwo taro pemegado, tuwo tameardae udo tuginai nou tameardae pegareu piji. Ure tuginorudowuge boetojiwuge nure tagi.
2TH 2:14 Čere tawie Jesus bataru pemegareuji. Dutabore čare Pao Kurireu makore tawagai tamuguwo Pagimijera Jesus Cristo apo toro o boe pemegareu keje.
2TH 2:15 Dukodire tagaba tagera ra Pao Kurireu piji. Čemedage nure tagi. Tameartorudo čere tarduwado jiwu boe jokodureu bataruji. Čere tawie čemago tabo, atugoreboe tabo jamedu.
2TH 2:16 Ča Pagimijera Jesus Cristo, Pao Kurireu ewo tameartoru rakado jii toro rugadu taro pemegawo, tamago pemegawo rugadu. Pao Kurireu meardu kurire pai rugadu. Dukodire ure turo pemegareu maku pagai tuwo paragado, nou paraga akedukawo jii toro rugadu. Aino parduware aregodumode rugadu duji.
2TH 3:1 Imedage nure tagi. Ainore itaidure imagowo tai. Tamagodo baruto čebaru tabo čemago pemegawo Pagimijera Jesus jiboeji boe ewiagai, boe emeartoruwo Pagimijera bataruji, boe emeartoruwo Jesusji moto jamedu boe parugajeje. Tawiapagare Jesus bataruji. Tamagodo baruto ia boe ewiapagawo nono tawiapaga mogadure.
2TH 3:2 Tamagodo baruto čebaru tabo Pao Kurireu uwo čeginorudo ro pegareuge epiji. Čemagomode Pao Kurireu bataruji boe ewiagai dukeje iage emeartorumodukare ji. Etaidumode turo pegawo čei.
2TH 3:3 Mare Pao Kurireu kodumode tuwadaruji tu rugadu. Umodukare tugera ra pabiji. Umode taragado tameartoruwo pudui. Emare umode taginorudo bope doge eimijera piji.
2TH 3:4 Čemeartorure pagimijera Jesus roji. Dukoiare čerduware tameartorumode Pagimijera Jesus bataruji rugadu. Čerduware tai. Tameartorunure čere tawie jiwu Pao Kurireu bataruji. Tameartorumode čere tawie jiwu Pao Kurireu bataruji rugadu.
2TH 3:5 Pagimijera Jesus uwo tarduwado rugadu Pao Kurireu meardu kurire boei duji. Uwo tarduwado Jesus Cristo umode taragado tagawo tagera ra tameartorure pudui dupiji.
2TH 3:6 Čemedage nure tagi. Čewo tawie ia Pagimijera Jesus Cristo meardaeji pugeje. Ia meartorure Jesus jiwuge ekera kiarire, etaidukare tumaragoduwo rugadu. Emeartorukare čewadaruji. Tagera ra epiji. Taburedukaba ei.
2TH 3:7 Tarduware tarowo nono čero mogadure. Čeragojere tagabo dukeje čegera kiarikare.
2TH 3:8 Čere boe ere maku čenaiboe morido rugadu. Čemaragodu rakare diero bagai. Čemaragodure meriji, boečoji. Čedaidukare čewo boe pegareu rakado tai.
2TH 3:9 Čerore aino mare paga karega tarowo aino čero mogadure. Pegakare čemagowo čege bagai tabiji mare čerokare aino.
2TH 3:10 Čeragojere tagabo dukeje čere tawie aino: – Maragodukareu okwagemodukare.
2TH 3:11 Ča. Boe ere čewie ia tagi tagaidukare tamaragoduwo. Tagaidure tagera kiariwo. Tagaidure tagogiruwo tamedagei.
2TH 3:12 Čewo tawie Pagimijera Jesus Cristo meardaeji. Taro pemegawo. Tamaragoduwo diero bagai tawo akirodo boeji tageče. Tagogwamagudukaba boei iaboe bagai tageče.
2TH 3:13 Ča tagaba tagera ra taro pemegareu piji. Tarodo aino tagaidu tabo.
2TH 3:14 Ča iage emeartorumodukare awu čewadaruji dukeje tagera ra epiji. Nono epogurumode.
2TH 3:15 Mare tagaba tardu pegado ei. Emeartorure Jesusji marigudu. Aino čare tagogituwado ei tawo ewie emeartoruwo awu atugoreboeji. Tarodo ei nono taro moga tawie magei dumogadure.
2TH 3:16 Pagimijera uwo tabemegado pui. Emare umode pabemegado boei rugadu meri jameduji jii toro. Pagimijera Uwari rakojewo tagabo.
2TH 3:17 Paulo nure imi. Imire ire awu atugoreboe pemegado. Ainore ire iwadaru bu bapera keje. Ainore imode ikie bu bapera keje.
2TH 3:18 Pagimijera Jesus Cristo uwo turo pemegareu maku tagai. Urugadureu.
1TI 1:1 Paulo nure imi. Uture Jesus Cristo bataru tabowu nure imi. Pao Kurireu Jesus Cristo emagere emagore iwagai ituwo boe etae tuwadaru tabo. Pao Kurireu umode paginorudo. Parduware Jesus Cristo aregodumode pugeje duji.
1TI 1:2 Inure awu atugoreboe maku Timóteo ai. Iwadaru koiare ameartorure Jesusji dukodire itonaregedu nure aki. Itaidure Pao Kurireu uwo turo pemegareu maku akai rugadu. Jesus Cristo uwo turo pemegareu maku akai rugadu. Ewiapagakawo aro pegareuji. Ewo apemegado boei. Ewo boe epemegado ai jamedu.
1TI 1:3 Itaidure aragojewo Éfeso ba kurireu keje jao. Iture apiji Macedônia moto ka dukeje ire awie. Ire awiedu pemegado aino pugeje. Ia Éfeso kejewuge ewadrarodunure boei. Amagodo ei ewo togwa ra tuwadrarodae piji.
1TI 1:4 Etokire pui bakaru keje tuwobe ewugeje. Amagodo ei ewo tumeardae tawuje jao tuwobe epiji, bakaru piji emeardaewo tu Pao Kurireu meardaeji. Boe emeartorumode Pao Kurireuji dukeje erduwamode Pao Kurireu meardae remawuji.
1TI 1:5 Meartorure Jesus jiwugeire inagoino emeardu kuriwo pui. Boe emeartoru remawumode Pao Kurireuji dukeje emeardu kurimode pui. Etaidumodukare turo pegawo dukeje emeardu kurimode pui. Erduwamode turo pegakare duji dukeje emeardu kurimode pui.
1TI 1:6 Iage emeartorure mare emeartoru jokodukare Pao Kurireuji. Iage etaidukare tuwo tumeardae pemegareu tawuje pugeje. Iage erduwakare turo pegareuji. Nouge emago raimode pui mare pagatu je.
1TI 1:7 Etaidure tuwo boe erduwado Pao Kurireu bataruji. Mare erduwa bokware. Erduwakare tumagore jiboeji. Enojarore tuwadaruji mačare erduwa bokware tumagomode jiboe bagai.
1TI 1:8 Parduware Pao Kurireu bataruji. Pemegare rugadu boe ewo to bakarudo ema. Mare emeartoruwo jitu bagaire eroino du pegakare.
1TI 1:9 Boe eimijerage emode boe ero maku boe etai. Boe ero pemegamode dukeje eimijerage emagomodukare boeji. Mare ero pegamode dukeje eimijerage emagomode boe eroji ewiagai rugadu. Tawiagodukaba nou inodu piji. Ro pegareuge ero pegare rugadu. Emeartorukare Pao Kurireuji. Erore Pao Kurireu aidukare jiboeji. Emeardaekare Pao Kurireuji. Emeardaekare Pao Kurireu roji. Emode tuo bito. Emode tuje bito. Emode boe ewido rugadu.
1TI 1:10 Eribarimode toreduje piji toredu piji. Ime emode aredudo pudumi turo pegawo ia imebo. Iage emode tugeragu boei turo pegawo ei tuwo emagu diero bagai. Iage ewadrarodumode boe eroji. Emeartorukare Pao Kurireu bataru remawuji dukodi.
1TI 1:11 Dukodire Pao Kurireu makore turoji pawiagai. Imire ire tawie nou Pao Kurireu bataru pemegareuji. Jesus jiboe jire inagoino tawiagai. Pao Kurireu ro pemegareu kurire dukodi. Dukodire ure tuwadaru maku inai iwo boe ewie Jesus jiboeji rugadu boe emeartoruwo ji rugadu turo pegareu piji.
1TI 1:12 Ikimadunure Pagimijera Jesus Cristo apo. Emare ure iragado imaragoduwo. Emare jorduware imeartorumode pudui duji dukodire ure tudugaredo imi.
1TI 1:13 Marigudu imeartorukare ji dukodire iorduwakare iroji. Imago pegare ji. Iro pegare ji. Imago pegare Pao Kurireu ieji. Mare Pao Kurireu okudugodure itabo.
1TI 1:14 Pagimijera ure turo pemegareu maku inai rugadu taidu tabo. Ure imeartorudo pudui. Ure imeardu kurido boei. Jesus Cristo pamedia mode ema dukeje emare romode aino pai.
1TI 1:15 Jesus Cristo aregodure moto ka tuwo ro pegareuge ekinorudo etukawo bope doge eda kejewu joru pegareu ka. Boe jokodu. Pameartoruwo nou bataruji. Mare paga karega imire iro pegareu kodure boe eiamedu boe ekori.
1TI 1:16 Mare Pao Kurireu okudugodure itabo awu meartorure Jesus jiwuge erduwo rore i jiboeji. Iro pegareu kodure boe eiamedu boe ekori mare Jesus Cristo okudugodure itabo rugadu. Dukodire ure imeartorudo pudui. Ure imugudo Pao Kurireu apo du akedumodukare. Ainore rore i. Boe emeartorumode ji dukeje ainore romode ei jamedu.
1TI 1:17 Pao Kurireu ure mitotu je. Boe erdukare ji. Bimodukare rugadu. Boe eimijera kurireu nure ema. Akedumodukare rugadu. Ča pawo ie kurido. Pamago pemegawo ji pawo ie kurido rugadu. Pagawo pawadaru pemegareu akedudo. Ure turugadu.
1TI 1:18 Iwie Timóteo nure aki. Inogituwanure ai. Awiagodukaba awu iwadaru piji. Pao Kurireu ure boe ewie marigudu boe emeartorumodukare ai duji. Mare tumoduie tugera maku akai. Nou boe ere awie nou Pao Kurireu bataruji. Awiabutudo nou bataru keje. Dukodire apogurukaba amagowo ia batrarodureugei ewadaru jipagi.
1TI 1:19 Aino amodukare akera ra ameartorure Jesus jitu piji. Ainore arduwamode aro pegakare duji. Mare ia boe ewiapagakare tuiorduware jiwu turo pemegareuji. Dukodire ere tumeartorure Jesus jitu akedudo.
1TI 1:20 Imedu Himeneu ure tumeartoru akedudo aino jamedu. Imedu Alexandre ure tumeartoru akedudo jamedu. Iage erore aino jamedu. Emago pegare Pao Kurireuji. Dukodire ire emagu bope doge eimijera Satanás ai ro pegawo ei. Mare paga karega. Ewo togwa ra tumago pegareu piji.
1TI 2:1 Tawiagodukaba awu iwadaru piji rugadu. Tamagodo Pao Kurireu bagai baruto boe eparu tabo. Tagogwamagududo Pao Kurireuji uwo boe enoe pemegado. Tamagodo boe eparu tabo epemegagoduwo, ero pemegawo. Tamago pemegado boe ero pemegareuji tagimadu tabo Pao Kurireu apo.
1TI 2:2 Tamagodo Pao Kurireu bagai boe eimijera kurireuge eparu tabo, boe eimijerage eiamedu boe eparu tabo ero pemegawo boei. Ero pemegamode pai dukeje pamugu pemegamode. Ero pemegamode pai dukeje pamugu kioromode. Emodukare pado pagera ra pameartorure Pao Kurireu jitu piji. Emodukare pado pagera ra paro pemegareu piji.
1TI 2:3 Paromode aino dukeje Pao Kurireu jordu pemegamode pai. Emare ure paginorudo.
1TI 2:4 Aidure tuwo boe eiamedu boe ekinorudo. Aidure tuwo erduwado boe jokodureuji.
1TI 2:5 Pao Kurireu ure mitotu je. Ia bokware pugeje. Umode boe erego Pao Kurireu aewu ure mitotu je jamedu. Jesus Cristo nure ema. Emare umode boe erego Pao Kurireu ae.
1TI 2:6 Emare ure tumagu boe eiamedu boe ero pegareu moriče. Ainore ure parduwado taiduie tuwo boe eiamedu boe edo činorudo duji.
1TI 2:7 Dukodire ure itudo Judeu doge epiji toro ia boe tuginaiwuge etae iwo erduwado Jesus bataruji emeartoruwo Jesusji jamedu, erduwawo boe jokodureuji jamedu. Iwadrarodu karegure. Boe jokodu jire inagoino rugadu.
1TI 2:8 Ča meartorure Jesus jiwuge emode bato pui dukeje ainore itaidure erowo. Ime ewo tumagu Pao Kurireu ai tuwo turo udo tuginai turo pegareu piji turo pemegawo. Ekorigodukawo boei. Etokikawo pui. Emeartorumode awu iwadaruji dukeje ere turugadu tumagowo Pao Kurireu bagai baruto.
1TI 2:9 Ainore itaidure meartorure Jesus jiwuge areme erowo. Ewo ia tugudau areia motureu tugu pudui mare nou tugudau areia torigodureu ukare turugadu. Ewo tudo nono aredu pemegareu mogadure. Itaidukare ewo tao motudo tori kuieje tabo, tori motureu tabo, boe ekudau mori kurireu tabo nono aredu pegareu ro mogadure.
1TI 2:10 Mare meartorure Jesus jiwuge areme emode tumodudo turo pemegareu tabo nono meartorure Pao Kurireu jiwuge areme ero mogadure.
1TI 2:11 Meartorure Jesus jiwuge emode bato pui dukeje areme edukiorowo erduwawo Pao Kurireu bataruji. Enojarokawo tuwadaruji.
1TI 2:12 Pao Kurireu ure imedu Adão to boetoji. Dukejere ure aredu Eva to jamedu. Nono bope ukare Adão jekiripagado mare ure aredu Eva jekiripagado rugadu. Dukodire aredu meartorukare Pao Kurireu bataruji. Dukodire inagore aino tai. Meartorure Jesus jiwuge areme ekare turugadu tuwo ime erduwado Pao Kurireu bataruji, tuwo ime emeardae maku etai.
1TI 2:15 Mare areme etoremode mare ero pemegamode, emeartorumode Jesusji, emeardu kurimode boei, mare emode tumagu Pao Kurireu ai. Dukodire Pao Kurireu umode ekinorudo rugadu.
1TI 3:1 Awu iwadaru ure turugadu. Imedu aidure tuwo meartorure Jesus jiwuge eimijerado pudumi dukeje pegakare. Aidure jiwu maragodae kurire rugadu.
1TI 3:2 Mare ainore meartorure Jesus jiwuge eimijera romode. Umode turo pegareu okwado boe erdu pemegawo turore jiboeji. Mugure apowu aredu umode mitotu je. Umode turagado pudui turo pegakawo. Umode turo jetorodo. Boe etaregodumode uwai ka dukeje ro pemegamode ei. Jorduwamode tuwo boe erduwado.
1TI 3:3 Uke kurumodukare ji. Boe korimodukare ji. Mako pemegamode. Ro butugumode. Okwa kidumodukare diero bagai.
1TI 3:4 Jorduwamode tuwo tore ero pemegado tore emeartoruwo pudui.
1TI 3:5 Kodi ia imedu jorduwakare tuwo tore ero pemegado tore emeartoruwo pudui dukeje jorduwamodukare tumagowo meartorure Jesus jiwugei jamedu. Jorduwamodukare tuwo erduwado rugadu.
1TI 3:6 Maigodu aino imedu ure tumeartorudo Jesusji. Mare meartorure Jesus jiwuge emode tugimijerado ema dukeje romode nono bope doge eimijera Satanás ro mogadure. Satanás očarore pudui Pao Kurireu piji dukodire Pao Kurireu ure barigu baru piji. Ia meartorure Jesus jiwuge eimijera očaromode pudui Pao Kurireu piji dukeje Pao Kurireu ro pegamode ji jamedu.
1TI 3:7 Mare meartorure Jesus jiwuge eimijera ro pemegamode boe eiamedu boei dukodire meartorukare Jesus jiwuge etaidu pemegamode ji jamedu. Dukodire Satanás umodukare nou meartorure Jesus jiwuge eimijera jekiripagado. Nono boe epogurumodukare nou meartorure Jesus jiwuge eimijera roji.
1TI 3:8 Ainore meartorure Jesus jiwuge eimijera parutowu romode. Umodukare boe ekiripagado. Ro pemegamode rugadu. Kudu kurimodukare vinho kuruče. Aidu kurimodukare dieroji.
1TI 3:9 Umodukare tugera ra Pao Kurireu bataru piji. Meartoru raimode ji. Jorduwamode tumeartorure jituji rugadu.
1TI 3:10 Ia boe aidure tuwo meartorure Jesus jiwuge eimijera parutowudo pudumi dukeje boe etaiwomode roji ia ro pegareu bagai. Erdumodukare ia ro pegareuji. Boe emago pegamodukare rore jiboeji dukeje umode turugadu meartorure Jesus jiwuge eimijera parutowuwo ema.
1TI 3:11 Nou eimijera parutowu oreduje ro pemegamode jamedu. Umode tugera ra tuwadaru pegareu piji. Jorduwamode turore jiboeji jamedu. Batrarodumodukare jamedu.
1TI 3:12 Nou eimijera parutowu mugure apowu aredu umode mitotu je. Umode tore ero pemegado. Umode tuwobe ero pemegado jamedu.
1TI 3:13 Nou eimijera parutowu maragodu pemegamode dukeje pogurugodumodukare tumagowo tumeartorure Jesus Cristo jituji boe ewiagai. Boe etaidumode ji rugadu.
1TI 3:14 Inure awu atugoreboe pemegado iwo maku akai. Mare itaidure ituwo akae kuri aino.
1TI 3:15 Mare imode awu atugoreboe maku itododai. Umode arduwado paroji, meartorure Jesus jiwuge eroji. Meartorure Jesus jiwuge Pao Kurireu uwobe nure emage. Pao Kurireu jewodure rugadu. Nou meartorure Jesus jiwuge etu pemegamode Pao Kurireu bataru remawuji boe ekawo pegado boe ekawo mekido.
1TI 3:16 Boe erduwakare tuwo turo pemegado turaga tabo. Mačare Pao Kurireu ure meartorure Jesus jiwuge erduwado tuwo turo pemegado. Boe eiamedu boe egore awu Pao Kurireu bataru kurie rugadu. Ainore awu batarure: Boe erdure Jesusji moto keje. Pao Kurireu Uwari ure boe erduwado Pao Kurireu aidure Jesus ro pemegareu jituji. Pao Kurireu utugarege baru tadawuge erdure Jesusji. Boe emagore Jesus jiboeji boe eiamedu boe ewiagai. Boe emeartorure ji moto jamedu boe parugajeje jamedu. Pao Kurireu ure Jesus rutudo baruto rugadu.
1TI 4:1 Pao Kurireu Uwari ure pawie rugadu. Akore boe puredugodumoduie moto akeduwo du ka dukeje iage emoduie tugera ra tumeartorure Pao Kurireu jitu piji. Emeartorumoduie batrarodureu bope dogei. Etaidumoduie mareboe doge ewadaruji.
1TI 4:2 Batrarodureuge emode boe erduwado nou mareboe doge ewadaruji. Mare meartorukare tuwadaru jiwuge nure emage. Etaidure tuwo boe ekiripagado. Ewiagorokare turo pegareuji. Enogudugodukare nou turo pegare jiwugebo. Etaidure turo pegawo rugadu. Enogudugodukare nou turo pegare jiwugebo.
1TI 4:3 Nou batrarodureuge emagomode boei etuwirekawo, etugogekawo. Emagomode boei ekawo ia boe eke kowuje bope aku ie nuie ema. Egore. Mare bope aku ie karega. Pao Kurireu ure nou boe eke towuje, ure maku boe etai marigudu ewo ko. Dukodire meartorure Jesus jiwuge ekimadumode Pao Kurireu apo nou tuge paru tabo dukeje emode ko rugadu. Pao Kurireu ure erduwado boe remawuji dukodire emode ko rugadu.
1TI 4:4 Pao Kurireu ure boe jamedu boe towuje. Ure boe pemegado rugadu. Kadurumode dukeje meartorure Jesus jiwuge emode ko rugadu. Mare ekimadumode Pao Kurireu apo nou tuge paru tabo dukeje emode ko rugadu.
1TI 4:5 Pao Kurireu umode boe jamedu boe pemegado tuwadaru tabo. Meartorure Jesus jiwuge emago pemegamode Pao Kurireuji iaboe paru tabo dukeje Pao Kurireu umode pemegado rugadu. Dukodire pemegamode rugadu. Pao Kurireu aidumode ji rugadu.
1TI 4:6 Amode awu ire bu bapera kejewu Pao Kurireu bataru maku meartorure Jesus jiwuge etai dukeje Jesus Cristo utugare pemegareu mode aki. Boe jokodu jire Pao Kurireu akoino. Ameartorudo ji. Akaidudo Pao Kurireu bataruji nono boe etaidu mogadure tugeji dumogadure. Awiabutumode keje meri jameduji dukeje amode ameartoru rakado Jesusji.
1TI 4:7 Akera ra Pao Kurireu bataru metukare tadawu bakaru piji. Areadodukaba ji. Pao Kurireu makore jiwu bakaru jire awiapagamode. Mare aragado arowo nono Pao Kurireu ro mogadure.
1TI 4:8 Boe emode turagado du pegakare. Mare boe ero pemegamode Pao Kurireu bataruji dukeje boe pemegamode ei rugadu. Pao Kurireu makore tumoduie boe pemegado meartorure puduiwugei. Makore tumoduie meartorure puduiwuge eewodudo pugeje jamedu.
1TI 4:9 Boe jokodu jire Pao Kurireu akoino. Pameartoruwo ji rugadu.
1TI 4:10 Dukodire pamaragodu rakare aino pawo boe ewie awu bataruji. Pameartorure Pao Kurireuji. Pao Kurireu jewodureu nure ema rugadu. Umode boe ekinorudowu nure ema. Umode meartorure puduiwuge ekinorudo rugadu.
1TI 4:11 Boe ewie awu bataruji rugadu.
1TI 4:12 Iparedu nure aki. Mare apogurukaba awo boe erduwado. Boe emeartoruwo awadaruji. Aro pemegado boei erowo nono aro mogadure, boe emagowo awadaruji, boe emeardu kuriwo nono ameardu kuri moga boei dumogadure, boe emeartoruwo nono ameartoru moga Pao Kurireu jitu mogadure, boe ero pegareu bokwawo nono aro pegareu bokwa mogadure.
1TI 4:13 Akaiwodo Pao Kurireu atugoreboeji amagowo ji boe ewiagai jii toro itaregodure akae du ka. Boe erduwado Pao Kurireu bataruji. Amago pemegado Pao Kurireu bataruji boe ewiagai rugadu.
1TI 4:14 Makore Pao Kurireu bataru jiwuge emagore Pao Kurireu bataruji awiagai dukeje meartorure Jesus jiwuge eimijerage ere tugera bu akaora keje tumagowo aparu tabo baruto. Dukejere Pao Kurireu Uwari ure turo maku akai tuwo tumaragodae maku akai amaragodaeče. Dukodi čare awiagodukaba nou ure maku akaiwu amaragodae piji.
1TI 4:15 Ameartorudo awu Pao Kurireu bataruji. Akaba akera ra piji. Dukejere aro pemegareu kurimode. Boe erdumode aro pemegare boei duji.
1TI 4:16 Akaiwo pemegado aroino jiboeji. Awiagodukaba awadaru piji. Awiapagado awadaruji. Amodukare akera ra Pao Kurireu bataru piji dukeje akinorudodumode rugadu. Meartorure awadaru jiwuge ekinorudodumode jamedu.
1TI 5:1 Amago pegakaba imedu pegagodureuji. Akogwamagududo ji nono amago moga ao jitu mogadure. Arodo iparei nono aro moga amana jitu mogadure.
1TI 5:2 Arodo areme pegagodureugei nono aro moga ače jitu mogadure. Arodo nogwarei nono aro moga awie magei dumogadure. Aro pegakaba ei rugadu.
1TI 5:3 Akera maku marenarue remawuge areme etai. Ewobe bokware dukodi.
1TI 5:4 Ia aredu oredu bokwamode dukeje nou ore etore etu pemegawo nou tuje pegaji. Emeartorure Jesusji dukodire erore aino. Ainore emode etuje mage etuo mage ero pemegareu morido. Ainore emode Pao Kurireu jakaredo pudui.
1TI 5:5 Ia aredu okoge bokwareudo uwobe bokware etuwo pudui dukeje emare umode tumagu Pao Kurireu ai. Makomode bagai baruto meri jameduji tubaru tabo uwo tugera maku pudai meriji, boečoji.
1TI 5:6 Mare ia aredu okoge bokwareudo umode tumagu taidure jiwu tuwadaeji Pao Kurireu piji tiagarewo pudui dukeje ure nono bireu mogadure. Bikare mare puredugodure tuwiwo turo pegareu koia.
1TI 5:7 Ča awu boe ewie awu iwadaruji. Dukodire taro pegamodukare. Boe erdu pemegamode tarore jiboeji.
1TI 5:8 Mare ia boe etu pemegamodukare tuwobei dukeje emeartoru akedure Jesusji marigudu. Ero pegare meartorukare Jesus jiwuge ero kori.
1TI 5:9 Amode areme okoge bokwareuge ekie bu bapera keje ere tumagu Pao Kurireu ai kodi. Mare ia aredu okoge bokwareudo o joru aregodukare 60 ka raga dukeje amodukare ie bu nou bapera keje. Aredu okoge bokwareudo ure tugera ra toredu piji tumuguwo ia imedu apo dukeje amodukare ie bu nou bapera keje jamedu. Mare o joru aregodure 60 ka dukeje ukare tugera ra toredu piji dukeje nou aredu okoge bokwareudo ie bu nou bapera keje rugadu.
1TI 5:10 Aredu okoge bokwareudo ro pemegare boei dukeje amode ie bu nou bapera keje. Nou aredu okoge bokwareudo ure tore ime ero pemegado, ure tore areme ero pemegado. Nou aredu ro pemegare tuiorduwakare jiwugei. Nou aredu meartorure Jesus jiwuge etugare nure ema. Ure tugera maku ia boe etai. Ure tumagu turo pemegareu ka. Ainore nou aredu okoge bokwareudo rore marigudu dukeje amode ie bu bapera keje rugadu.
1TI 5:11 Mare ia aredu okoge bokwareudo pegagodukare raga dukeje amodukare ie bu bapera keje. Aidumode tuwadu pagawo imeduji dukeje umode tugera ra Jesus piji.
1TI 5:12 Makore taiduie tuwo tumagu Jesus ai mare umode tugera ra tuwadaru piji.
1TI 5:13 Dukeje jorduwamode tu tumugu pagawo, tu tugiriaduwo boe ewai ka mare jorduwamodukare tumaragodu pemegawo. Okirureu mode ema rugadu. Aidumode tuwo tumeardae maku boe etai pagatu je. Jorduwamodukare tumagore jiboeji.
1TI 5:14 Dukodire inagoino areme okoge bokwareuge etugogewo pugeje. Epegagodukare raga dukodire etoremode pugeje, etu pemegamode tuwaiji rugadu. Eromode aino dukodire jordu pegare paiwuge erdumodukare ia paro pegareuji. Emodukare tumago pegado paroji.
1TI 5:15 Mačare ia areme okoge bokwareuge ere tugera ra Jesus piji tugoduwo Satanás bataru kodaji.
1TI 5:16 Mare meartorure Jesus jiwuge areme etu pemegawo tuwobe okoge bokwareugei. Etu pemegamode tuwobei dukeje emodukare ia meartorure Jesus jiwuge emaragodae kurido. Mare etu pemegamodukare tuwobei dukeje ia meartorure Jesus jiwuge emaragodae kurimode etai etu pemegawo nou boei. Mare nouia meartorure Jesus jiwuge etu pemegamode uwobe bokwareugei okoge bokwareugei.
1TI 5:17 Meartorure Jesus jiwuge eimijerage emaragodu pemegamode dukeje meartorure Jesus jiwuge ewo diero kurido etai emaragodae moriče. Ia umode turagado tumagowo rugadu Pao Kurireu bataruji boe ewiagai dukeje meartorure Jesus jiwuge ewo diero kurido rugadu ai nou maragodae moriče. Ia umode turagado tuwo boe erduwado Pao Kurireu bataruji dukeje meartorure Jesus jiwuge ewo diero kurido rugadu ai nou maragodae moriče.
1TI 5:18 Padure bapera kejewu Pao Kurireu bataru akore: – Tapira maragodumode boepaji dukeje uke kurido ai. Pao Kurireu makore pugeje. Akore: – Diero maku boe etugarege etai emaragodae moriče.
1TI 5:19 Ia imedu mako pegamode meartorure Jesus jiwuge eimijeraji. Mare awiapagakaba ji iage erdukare nou ro pegareuji kodi. Mare ia boe pobedu doge erdumode ia meartorure Jesus jiwuge eimijera ro pegareuji dukeje awiapagado ewadaruji ewo awie nou ro pegareuji.
1TI 5:20 Nono ia meartorure Jesus jiwu ro pegamode dukeje amagodo ji boe egai. Dukodire nou boe epagudumode turo pegakawo pugeje.
1TI 5:21 Pao Kurireu jorduware awu iwadaruji. Jesus Cristo jorduware awu iwadaruji. Pao Kurireu utugarege baru tadawuge pemegareuge erduware awu iwadaruji. Dukodire ameartorudo ji rugadu. Aro pemegado boe eiamedu boei. Akaidukaba ure mitotu jewuji. Akaidudo boe eiamedu boei.
1TI 5:22 Apagado jao akawo akera bu boe ewugeje. Akaiwodo eroino duji jao. Ero pemegamode dukeje amode akera bu ewugeje awo Pagimijera Jesus utugaregedo emage. Akaba arodo nono ro pegareuge ero mogadure. Aro pemegado tu tu je.
1TI 5:23 Akuri korimode tu tu je. Dukodire akudumode ia vinho kuruče. Akudu biagado tu je jorubo kuruče. Mare akudure poboče du pegakare.
1TI 5:24 Ia boe ero pegamode dukeje boe erduwamode eroji. Dukodire boe erduware boe pegamode ei duji ero pegareu moriče. Mare iage emode turo pegareu biado dukodire boe erduwamodukare nou ero pegareuji kuri je. Mare kajao. Boe erduwamode nou ero pegareuji jamedu ia meri keje. Ero pegareu moridodumode jamedu.
1TI 5:25 Boe ero pemegamode dukeje ia boe erduwamode ero pemegare duji jamedu. Iage erdumodukare nou boe ero pemegareuji mare ia meri keje erduwamode nou ero pemegareuji rugadu.
1TI 6:1 Utugarege emeartoruwo tugimijeragei. Emeartorure Jesusji mare emeartoruwo tugimijeragei jamedu boe erdu pemegawo emeartorure Jesus jituji, emago pegakawo čere erduwadowu Pao Kurireu bataruji.
1TI 6:2 Ukimijera meartorumode Jesusji mare nou utugare meartorure Jesusji jamedu dukeje emedage emode pugi. Mare nou utugare meartoruwo tugimijeraji. Meartoru pemegawo ji rugadu. Meartorure Jesusji dukodire aidumode tuwo boe pemegado meartorure Jesus jiwuge eiamedu boei. Ukimijera meartorure Jesusji dukeje nou utugare meardu kurimode ji rugadu. Itaidure awo meartorure Jesus jiwuge erduwado awu iwadaruji ekoduwo iwadaru kodaji rugadu.
1TI 6:3 Ia boe umode boe erduwado jiboe umodukare nono Pagimijera Jesus Cristo bataru remawu mogadure dukeje jorduwa bokwamode rugadu. Jorduwamodukare Pao Kurireu bataruji tuwo boe erduwado ji dukeje jorduwa bokwamode rugadu. Aidumode tuwo boe ekiripagado. Meardaemode boe kurireu nuie pudumi. Biabutumode boe ero pegareu keje tuwo boe etokido pui, emago pegawo pui, emeartorukawo pui, ekorigoduwo pu oe keje pui rugadu. Mare Pagimijera Jesus bataru remawu ure turugadu pai. Umode paro pemegado rugadu. Mare nou jorduwa bokwareuge emeardae pegare. Etaidure to diero kuriwo Pao Kurireu bataru tabo. Mačare erugodumode pui rugadu. Ča erduwa bokware Pao Kurireu bataru remawuji rugadu.
1TI 6:6 Dukodire pawudugugoduwo pago diero keje. Aino ča umode turugadu pai.
1TI 6:7 Pawodure dukeje pago diero bokware, ia pagoe bokware. Pawimode dukeje pamodukare ia pagoe reko pagabo, pamodukare ia pago diero reko pagabo jamedu.
1TI 6:8 Ča pagemode, pagudau areia mode dukeje pawudugugoduwo keje tu je.
1TI 6:9 Boe etaidure tuwo to diero kurido rugadu dukeje ewiapagamode boe emeardae pegareuji. Mare parokawo aino. Bope umode ekiripagado tuwo ero pegado rugadu. Etaidumode jiboe umode boe pegado ei. Etaidumode jiboe umode erduwa bokwado. Dukejere umode etagedudo rugadu.
1TI 6:10 Meardu kurire dieroji dukodire meardaemode turo pegareu jamedu boeji. Iage etaidu kurire dieroji dukodire ere tugera ra tumeartorure Jesus jitu piji. Mare ere tugera ra Jesus piji dukeje nou ero pegareu ure ekiarigo rugadu. Ekiarigodu kuričigore ji aino.
1TI 6:11 Arokaba aino. Meartorure Pao Kurireu jiwu nure aki. Akaidudo aro pemegawo. Akaidudo arowo nono Pao Kurireu ro mogadure. Ameartorudo Jesusji rugadu. Ameardu kurido boei rugadu. Akaba akera ra ameartorure Jesus jitu piji. Aro butugudo boei.
1TI 6:12 Amagore Pao Kurireuji boe egai ameartorumoduie Jesusji. Dukodi čare aragado ai ameartoruwo Jesusji rugadu. Pao Kurireu makore awagai ameartoruwo Jesusji. Ameartoru pemegamode ji dukodire aewodumode pugeje aragojewo Pao Kurireu apo jii toro rugadu.
1TI 6:13 Pao Kurireu ure boe jamedu boe eewodudo. Dukodire Pao Kurireu biagaire inagoino awagai ameartoruwo awu iwadaruji rugadu arore jiboe jamedu boe tabo. Jesus Cristo mako pemegare Pôncio Pilatoji tumeartoruie Pao Kurireuji. Dukodire Jesus biagaire inagoino awagai ameartoruwo awu iwadaruji rugadu jii toro Pagimijera Jesus Cristo aregodumode kejewu meri ka. Ameartorumode awu iwadaruji rugadu arore jiboe jamedu boe tabo dukeje boe emago pegamodukare arore jiboeji rugadu.
1TI 6:15 Pao Kurireu emare umode Jesus arego pugeje. Emare jorduwamode Jesus aregodumode kejewu meriji. Pao Kurireu boe eimijera kurireu nure ema. Pemegareu nure ema. Boe eimijerage kurireuge eimijera kurireu nure ema.
1TI 6:16 Tu emare bimodukare. Mugure jorugu pemegareu keje. Boe epemegakare dukodire epuredumodukare nou jorugu pemegareuji. Marigudu boe erdukare Pao Kurireuji. Boe erdumodukare ji rugadu. Pao Kurireu raka akedumodukare rugadu. Pamago pemegawo ji rugadu. Uwo aino rugadu.
1TI 6:17 Amagodo oe kurireugei enojarokawo pudui. Amagodo ei emeartorukawo toeji. Nou enoe umodukare ekinorudo boe pegareu piji. Amagodo ei emeartoruwo tu Pao Kurireuji. Emare umode ekinorudo boe pegareu piji. Emare umode pagaidure jiboe rugadu maku pagai pagaiduwo ji.
1TI 6:18 Amagodo boei ero pemegawo ewo turo pemegareu kurido. Amagodo ei ewo toe kado puiato boei taidu tabo.
1TI 6:19 Emode toe kado puiato boei dutabo emode toe kurido baru tada emugu pemegawo baru tada awu moto akedure du rekodaji. Ainore emode tumugu pemegado. Boe eda remawu nure ema.
1TI 6:20 Timóteo nure aki. Akaba akera ra awu makudure akaiwu bataru piji. Akaba amago pagado. Boe emago raimode pagatu je dukeje egomode tuiorduwa kurie. Mare pagare egoino. Arokaba aino ero mogadure.
1TI 6:21 Emagere emeartorure batrarodureuji dukodire ewiagodure tumeartoruwo Jesus jitu piji. Pao Kurireu ro pemegareu butu tawugeje. Urugadureu.
2TI 1:1 Paulo nure imi. Jesus Cristo ure tuwadaru maku inai Pao Kurireu meardae tabo. Ure itudo iwo boe ewie awu Jesus bataruji pamugu pemegawo Jesus Cristo apo.
2TI 1:2 Inure awu atugoreboe pemegado iwo maku imeardu kurire jiwu itonaregedu Timóteo ai. Iwadaru koiare ameartorure Jesusji dukodire itonaregedu nure aki. Itaidure Pao Kurireu uwo turo pemegareu maku akai rugadu. Jesus Cristo uwo turo pemegareu maku akai rugadu. Enogudugodure akabo rugadu. Ewo apemegado boei. Ewo boe epemegado ai jamedu.
2TI 1:3 Imago pemegare ai aro pemegare jiboeji Pao Kurireu biagai. Utugare nure imi dukodi. Imeartoru pemegare bataruji dukodi. Jao iwobe emeartorure Pao Kurireu bataruji jamedu. Imagomode Pao Kurireuji aparu tabo meriji, boečoji dukeje ikimadumode Pao Kurireu apo rugadu.
2TI 1:4 Iwiabuture aegurure dukeje. Dukodire itaidure rugadu iorduwo ai pugeje awo iagaredo i rugadu.
2TI 1:5 Iwiabuture ameartorure Jesus jitu keje. Ameartoru remawure Jesusji rugadu. Ameartorure Jesusji nono ače pega Loide meartoru mogadure. Ameartorure nono ače Eunice meartoru mogadure. Boe jokodu jire inagoino.
2TI 1:6 Dukodire itaidure iwo awiabutudo pugeje. Ire ikera bu akaora keje dukeje Pao Kurireu ure turo pemegareu maku akai tuwo tumaragodae maku akai amaragodaeče. Akaba akera ra awu Pao Kurireu ure maku akaiwu amaragodae piji. Aragado ai awo nou amaragodae to rugadu.
2TI 1:7 Pao Kurireu ure Tuwari maku pagai. Mare nou Uwari umodukare pabogurudo. Mare paga karega. Uwari umode turaga maku pagai. Umode pameardu kurido boei. Umode turaga maku pagai tuwo paro udo tuginai.
2TI 1:8 Dukodire apogurukaba amagowo Pagimijera Jesus jiboeji boe ewiagai. Imagore Pagimijera Jesus Cristo jiboeji boe ewiagai dukodire iragojere baičoreu tada. Apogurukaba iče. Pamedia nure pugi. Boe ero pegamode ai jamedu mare akaba akera ra nou Jesus bataru pemegareu piji. Pao Kurireu umode aragado rugadu.
2TI 1:9 Pagimijera Jesus ure paginorudo rugadu. Emare makore pawagai tuwo paro udo tuginai paro pegareu piji paro pemegawo. Pagi pagare paginorudo. Emare meardaere tuwo paginorudo. Turo pemegareu koiare ure pado paginorudo. Marigudu rugadu awu moto bokware kimo. Pao Kurireu ukare moto to raga. Mare meardaere rugadu tuwo paginorudo turo pemegareu dukodi. Mariguduboe jire akoino. Awu moto bokware kimo. Mare Pao Kurireu jorduware paro pegamode rugadu. Dukodire meardaere Jesus Cristo biwo paro pegareu moriče.
2TI 1:10 Ča ure paginorudowu Jesus Cristo aregodure mato moto ka dukodire boe erduware nou Pao Kurireu meardaeji. Boe emeartorumode Jesusji dukeje emororamagadumodukare tuwimode duji pugeje. Ewimode dukeje umode eewodudo pugeje ewikawo pugeje emeartorure ji dukodi.
2TI 1:11 Pao Kurireu ure tugeragu i tuwo itudo Jesus bataru pemegareu tabo iwo boe erduwado ji, iwo boe ewie Pao Kurireu umoduie meartorure puduiwuge ekinorudo.
2TI 1:12 Ire boe ewie rugadu. Mare iage etaidukare iwadaruji dukodire ero pegare i. Mare imeartoru rakare kimo Pao Kurireuji. Iorduware ji rugadu. Rakare rugadu tietu pemegawo i jii toro ure maku inaiwu imaragodae akedu ka.
2TI 1:13 Ameartoru rakado ire arduwado jiwu Pao Kurireu bataruji jamedu. Nou bataru umode aro pemegado. Akaba akera ra ameartorure Jesus jitu piji. Akaba akera ra ameardu kurire boei dupiji. Pameartorumode Jesusji dukeje emare umode pameartoru rakado. Emare umode pameardu kurido boei.
2TI 1:14 Pao Kurireu Uwari meture padada. Awiapaga pemegado ji uwo aragado akawo ure maku akaiwu Pao Kurireu bataru mekido.
2TI 1:15 Arduware nou Ásia kejewuge meartorure Jesus jiwuge eiamedu boe ere tugera ra ipiji duji. Imedu Fígelo uture ipiji. Imedu Hermógenes uture ipiji.
2TI 1:16 Mare imedu Onesíforo ure iagaredo i rugadu tu tu je. Iragojere baičoreu tada mare emare pogurukare taregoduwo itae. Dukodire itaidure Pao Kurireu ro pemegawo uwobei rugadu.
2TI 1:17 Nou Onesíforo aregodure Roma ba kurireu ka dukeje aiwore iwagai rugadu. Aiwore iwagai dukeje jordure i rugadu.
2TI 1:18 Ire awie marigudu awu Onesíforo uie tugera maku inai rugadu toro Éfeso ba kurireu keje jamedu. Pagimijera Jesus aiwomode boe eiamedu boe eroji mare itaidure Pagimijera okudugoduwo nou Onesíforo apo.
2TI 2:1 Iwadaru koiare ameartorure Jesusji. Dukodire are nono itonaregedu mogadure. Pamugu pemegamode Jesus Cristo apo dukeje umode turo pemegareu maku pagai. Ča ameartoru rakado ji.
2TI 2:2 Imagore boe eiamedu boe ewiagai Pao Kurireu bataruji. Ča akeragu nou imagore jiwu Pao Kurireu bataruji awo ia boe pemegareuge erduwado ji jamedu. Emagere emode ia boe erduwado ji jamedu.
2TI 2:3 Jesus Cristo utugare nure aki dukodire ia boe etaidumodukare ai. Ero pegamode ai. Mare akaba akera ra ameartorure Jesus jitu piji. Nono Jesus utugare pemegareu mode aki.
2TI 2:4 Tugobaigarege emeardaemodukare ia boe emaragodaeji. Tugobaigarege emeardaemode tu tumeartoruwo tugimijeraji tuwo tugimijera jakaredo pudui. Jesus utugarege ere nono nou tugobaigarege emogadure. Mare tugobaigarege karega. Jesus utugarege emeardaemode tu tumeartoruwo tugimijera Jesusji.
2TI 2:5 Boe eregodumode tuwaduwo. Etaidumode taregoduwo boe etododai. Mare ewadu pemegawo tuwo tugeragu nou trofeuji. Jesus utugarege ere nono nou rekodure tuwadae jiwu mogadure. Mare rekodure tuwadae jiwu karega. Jesus utugarege emeartorumode Jesus bataruji turaga tabo.
2TI 2:6 Maragodure to boepa tadawu boe makudumode ai boetoji. Jesus utugarege ere nono nou maragodure to boepa jiwu mogadure. Mare maragodure boepa jiwu karega. Jesus utugarege eire Jesus ro pemegamode boetoji.
2TI 2:7 Awiagoromode awu iwadaruji dukeje Pagimijera Jesus umode arduwado awu iwadaru jamedu boeji.
2TI 2:8 Awiagodukaba Jesus Cristo piji. Ire boe ewie Jesus bataru pemegareuji Jesus jewoduie duji. Jao Judeu doge eimijera kurireu Davi uwobe pijire Jesus boture. Ainore inagore boe ewiagai.
2TI 2:9 Imagore nou Jesus bataru pemegareuji dukeje ia boe etaidukare iwadaruji. Ero pegare i rugadu. Ere ikogudo corrente tabo tuwo itugu baičoreuto imagokawo nou bataruji pugeje. Mare ia meartorure Jesus jiwuge emago kimore Jesus bataruji boe ewiagai imugato. Pao Kurireu bataru nure ema dukodi.
2TI 2:10 Dukodire ire iragado imagokawo nou ro pegare iwuge ewadaru jipagi. Aino ča Pao Kurireu ure tugeragu jiwuge erduwamode Pao Kurireu bataruji jamedu emeartoruwo Jesusji. Emeartorumode ji dukeje Jesus Cristo umode ekinorudo. Ewimode dukeje umode eewodudo pugeje ewikawo pugeje eragojewo Pao Kurireu apo jii toro rugadu.
2TI 2:11 Boe jokodu jire meartorure Jesus jiwuge egoino: – Meartorure Jesus jiwuge eromodukare turo pegareuji pugeje. Nono ewimode dukeje emugu pemegamode Jesus apo.
2TI 2:12 – Meartorure Jesus jiwuge emeartorure Jesusji rugadu. Boe pegamode ei mare emoka tugera ra tumeartorure Jesus jitu piji. Emodukare tugera ra tumeartorure Jesus jitu piji dukeje Jesus umode boe eimijeragedo emage etu pemegawo boei pudabo. Mare boe emagomode tuiorduwakaie Jesusji dukeje emare makomode tuiorduwakaie ei jamedu. Aregodumode dukeje biapagamodukare ei jamedu.
2TI 2:13 – Meartorure Jesus jiwuge etaidumode tuwo tugera ra tumeartorure jitu piji mare Jesus umodukare tugera ra turo pemegareu piji. Umodukare tugera ra tumeardae pemegareu piji rugadu.
2TI 2:14 Meartorure Jesus jiwuge emode bato pui akabo dukeje ewie rugadu erugodukawo pui to bakaru keje. Ewie Pao Kurireu aiwoie ei duji. Erugodumode pui to bakaru keje dukeje boe pemegamodukare ei. Emode ia boe ekiarigo rugadu.
2TI 2:15 Pao Kurireu aiwore boei rugadu. Dukodire aro pemegado Pao Kurireu aidu pemegawo ai. Aromode aino dukeje apogurumodukare amaragodaeji. Amode boe erduwado rugadu Pao Kurireu bataru remawuji. Amodukare Pao Kurireu bataru pegado.
2TI 2:16 Boe emago pagamode pui mare apuredukaba ei. Etaidure nou tumagore jiboe jire boe emeartoruwo. Dukodire ere boe edo tugera ra Pao Kurireu bataru piji.
2TI 2:17 Boe emago pagamode pui dukeje ewadaru ure nono ia boe ewiri bori mogadure. Mare boe ewiri bori karega. Boe emago pagamode pui dukeje emode boe edo tugera ra Pao Kurireu piji. Emode boe ewiagodudo Pao Kurireu piji rugadu. Nou imedu Himeneu bataru koiare ure boe etudo Pao Kurireu piji. Ia imedu Fileto bataru koiare ure boe etudo Pao Kurireu piji jamedu.
2TI 2:18 Nou ime pobedu doge ere tugera ra Pao Kurireu bataru remawu piji dukodire ere iage emeartoru akedudo. Egore meartorure Jesus jiwuge eewodumodukaie pugeje.
2TI 2:19 Mare Pao Kurireu bataru remawu umodukare tumegido. Umode boe emeartoru rakado rugadu. Akore: – Pao Kurireu jorduware meartorure puduiwugei rugadu. Akore: – Boe egomode tumeartoruie Pao Kurireuji dukeje emode tugera ra turo pegareu piji. Ainore Pao Kurireu akore.
2TI 2:20 Ia bai kurireu tadare boe enoe makare. Boe ere copudo tori kuieječe. Boe ere aria merirido prata meririče. Boe ere tubadu irače. Boe ere turuwobodo rotuče. Boe emode tugeragu iaji togwagewo keje meri jameduji. Mare ia jire boe emode tugeragu ji togwagewo keje tu boe eimijerage etaregodu keje.
2TI 2:21 Meartorure Jesus jiwuge emode turo pegareu barigu tubiji dukeje Pao Kurireu umode tumaragodae pemegareu maku etai. Umode erodo tuginai ero pegareu piji ero pemegawo Tugimijera Jesus ai. Etumodukare Tugimijera Jesus maragodae piji. Ere turugadu turo pemegawo rugadu. Pao Kurireu aidumode ei rugadu.
2TI 2:22 Iparedu nure aki mare akera ra ipare nogware etaidure jiboe piji. Aragado ai awo aro jetorodo, ameartoruwo Pao Kurireuji rugadu, ameardu kuriwo boei, aedu pemegawo boebo apemegawo ei rugadu. Ainore makore Pao Kurireu bagaiwuge eromode rugadu. Etaidure tu boe pemegawo boei rugadu.
2TI 2:23 Inagore aino pugeje. Boe emago pagamode pui mare akaba apuredudo ei egoino duji. Etokimode pui. Ire awie.
2TI 2:24 Mare Pagimijera Jesus utugare nure aki. Dukodire akokikaba boei. Aro pemegado boe eiamedu boei. Amago pemegado awo erduwado.
2TI 2:25 Iage etaidumodukare awadaruji mare amago rakakaba ei. Amago pemegado ei. Dukeje Pao Kurireu umodukare etagedudo kuri aino ewo tugera ra turo pegareu piji etaidukawo turo pegareuji pugeje emeartoruwo Pao Kurireu bataru remawuji.
2TI 2:26 Bope doge eimijera ure ekiripagado marigudu dukodire ure emeartorudo tuwadaruji. Mare erduwamode Pao Kurireu bataru remawuji dukeje emeardae pemegamode. Emeartorumode Pao Kurireu bataruji dukeje emode tuginorudo bope doge eimijera piji.
2TI 3:1 Awiagodukaba. Awu moto puredugodumode tageduwo dukeje boe pegamode boei rugadu.
2TI 3:2 Boe emeardaemode tu pudui. Emeardaemode tu tuwo toe kurido. Emode tugurido tuwadaru očaro tabo. Emeardaemode tubemegaie ia tumedage ekori. Emago pegamode boei. Emeartorumodukare tujeji tuoji. Boe emode boe maku etai mare emago pemegamodukare jipagi. Emodukare turo udo tuginai turo pegareu piji rugadu.
2TI 3:3 Ero pegamode boei dukodire epemegamodukare boei. Enogudugodumodukare boebo dukodire ewiagodumodukare boe ero pegareu piji. Emagomode boe ero pegaie mare tuwadrarodu tabo. Emodukare turagado pudui dukodire eroiwamodukare tuwo tugera ra turo pegareu piji. Ero rakamode boei tuwo boe etogorido. Erdu pegamode ro pemegareugei.
2TI 3:4 Emeardaemode tu tuwo boe ekiripagado. Emeartoru bokwamode boe ewadaruji. Enojaromode tuwadaruji boe ewadaru jipagi. Etaidumode tu tuwaduwo. Emeardu kurimodukare Pao Kurireuji.
2TI 3:5 Emagomode ia Pao Kurireu bataruji. Etaidumode turowo aino Pao Kurireu ro mogadure. Mare emeartorumodukare rugadu Pao Kurireuji. Apuredukaba ei arokawo nono ero mogadure.
2TI 3:6 Iage ere turemo boe ewaito tuwo tumeardae maku areme etai. Nou areme eragakare tuwo tumeardae pemegado iage emeardae pegareu piji. Ero pegare dukodire ekiarigodure rugadu nou turo pegareuji. Kočare etaidure tu boe pegareuji dukodire eroino.
2TI 3:7 Awu areme etaidure tuiorduwawo mare marigudu erduwakare boe jokodureu bataruji.
2TI 3:8 Jao pamana Moisés ure boe erduwado. Mare imedu Janes, imedu Jambres emago pegare nou Moisés bataruji jawu pawobe ewiagai. Mare jawu boe emeartorukare Janes bataruji. Emeartorukare Jambres bataruji. Aino ča awu boe erore pugeje nono jawu Janes, Jambres ero mogadure. Awu boe etaidukare boe jokodureu bataruji. Etaora ukare turugadu tuwo ia tumeardae pemegareu tawuje. Ere tugera ra tumeartorure Pao Kurireu jitu piji. Mare boe emeartorumodukare ewadaruji. Boe erduwamode awugei erduwa bokware duji. Aino ča boe emeartorumodukare awugei nono jawu boe emeartorukare Janes, Jambres ewadaru jitu mogadure jamedu.
2TI 3:10 Mare aki ameartorure rugadu iwadaruji. Arore nono iro mogadure. Ameardaere nono imeardae mogadure. Ardure nuba boere i. Ire imeardae tawuje rugadu. Imeartorure Jesusji. Iwudugugodure i boebo. Imeardu kurire boei. Ikare ikera ra imaragodae piji.
2TI 3:11 Boe ero pegare i imeartorure Jesusji dukodi. Boe pegare i itaidure Jesusji dukodi. Arduware awu jamedu boeji. Arduware nuba boere i Antioquia ba kurireu keje. Arduware nuba boere i Icônio ba kurireu keje. Arduware nuba boere i Listra ba kurireu keje. Boe ero pegare i rugadu. Mare Pagimijera Jesus ure ikinorudo awu boe pegareuge epiji.
2TI 3:12 Ča inure awie. Boe etaidumode turo pemegawo tumugu pemegawo Jesus Cristo apo dukeje ro pegareuge ero pegamode ei rugadu.
2TI 3:13 Ro pegareuge emode turo pegado rugadu turo pegareu kori. Mare ekiripagamode rugadu. Ure tuwiadowuge emode boe ekiripagado rugadu. Mare ekiripagamode jamedu.
2TI 3:14 Mare aki arokaba aino. Ameartorudo rugadu boe jokodu jiwu bataruji. Arduware ji rugadu. Arduware ere arduwadowu boei.
2TI 3:15 Iparedu rogure aki dutabo ere arduwado Pao Kurireu bataruji. Pao Kurireu bataru umode boe erduwa kurido. Pao Kurireu bataru koiare boe emeartorumode Jesus Cristoji. Emeartorumode ji dukeje umode ekinorudo boe pegareu piji.
2TI 3:16 Pao Kurireu bataru jamedu boe ure turugadu. Ure tuwadaru maku rugadu boe etai ewo bu bapera keje. Pao Kurireu bataru tabore boe emode boe erduwado boe jokodureuji. Pao Kurireu bataru tabore boe emago pegamode boe ero pegare jiboeji. Pao Kurireu bataru tabore boe emode boe edo turo pegareu barigu tubiji. Pao Kurireu bataru tabore boe enogituwamode boei ero pemegawo.
2TI 3:17 Dukodire boe epemegamode Pao Kurireu utugaregewo emage. Eroiwamode turowo ro pemegareu jamedu boeji.
2TI 4:1 Jesus Cristo aregodumode rugadu. Aiwomode nou bireuge eroji. Aiwomode bikareuge erore jiboeji jamedu. Aiwomode ero pemegareu bagai ero pegareu bagai. Aregodumode dukeje boe eiamedu boe eimijera kurireu mode ema. Ema koiare ure imagodo aino ai. Pao Kurireu koiare ure imagodo aino ai.
2TI 4:2 Amago pemegado Pao Kurireu bataruji boe ewiagai. Boe etaidumodukare tuwiapagawo awadaruji mare akaba akera ra amago piji. Boe erduwado Pao Kurireu bataruji awadaru pemegareu tabo awo boe emeardae pemegareu maku etai. Awo boe emeardae pegareu barigu epiji. Awo boe emeartoru rakado. Mare akorigodukaba boei. Amago raka kaba amagore boei dutabo.
2TI 4:3 Ia meri keje boe ewiapagamodukare boe jokodureu bataruji. Ewiagoromode tu taidure jiboeji. Boe emagomode etaidure jiboeji dukeje etaidumode tumearduwo ewadaruji. Mare boe emagomode etaidukare jiboeji dukeje ewiapagamodukare nou bataruji.
2TI 4:4 Ewiapagamodukare boe jokodureu bataruji. Ewiapagamode tu ia boe jokodukareu bataruji.
2TI 4:5 Mare akire amode aro pemegado meri jameduji. Boe pegamode ai mare amagokaba. Pao Kurireu utugare nure aki. Amaragodudo Pao Kurireu ai. Amago pemegado Pao Kurireu bataru pemegareuji boe ewiagai boe emeartoruwo Jesusji rugadu.
2TI 4:6 Mare imire ire imagu Pao Kurireu ai marigudu imaragoduwo Pao Kurireu ai. Mare aino meri aregodure todo pa ka i iwiwo.
2TI 4:7 Ire imaragodae iado Pao Kurireu ai. Ire iragado imaragoduwo Pao Kurireu ai nono ia boe emoga turagado tuwadae tabo dumogadure. Ikare ikera ra imeartorure Jesus jitu piji.
2TI 4:8 Irore Pao Kurireu aidure jiboeji. Jesus aiwonure boe eiamedu boe eroji. Aregodumode dukeje umode iaboe pemegareu maku inai iro pemegareu moriče. Boe epagamode Jesus bagai tumeardu kurire jitu tabo. Dukeje umode iaboe pemegareu maku eiamedu boe etai ero pemegareu moriče.
2TI 4:9 Aragado akaregoduwo itae kuri aino.
2TI 4:10 Imedu Demas biapagare tu tuwo akirodo boeji toče dukodire ure tugera ra ipiji. Ure marigudu toro Tessalônica ba kurireu ka. Imedu Crescente uture ipiji Galácia moto ka. Imedu Tito uture ipiji Dalmácia moto ka.
2TI 4:11 Lucas emare rakojere tu woe itabo. Akaiwodo João Marcos bagai. Akarego mato apo itae. Emare maragodumode itabo.
2TI 4:12 Ire Tíquico utudo Éfeso ba kurireu ka.
2TI 4:13 Akarego mato ikudau areia biaku epa tabo. Iwiagodure piji imedu Carpo uwai tada Trôade ba kurireu keje. Akarego ino bapera tabo mato iwagai jamedu. Nou tapira biri emare ire ino baperado ema. Akarego tabo mato iwagai.
2TI 4:14 Maragodure meriri jiwu imedu Alexandre emare ro pegare i rugadu. Mare Pagimijera umode nou Alexandre udo turo pegareu morido.
2TI 4:15 Aeku jado ji. Aidukare pawadaruji rugadu. Korigodure pai rugadu.
2TI 4:16 Awu Roma kejewu boe eimijera kurireu makore iwagai ireadoduwo iroji tuwiagai. Ireadodure mare imedage eiamedu boe ere tugera ra ipiji. Boe edukare itabo tumagowo iro pemegareuji. Tu imire ireadodure iroji nou boe eimijera kurireu biagai. Imedage eture ipiji mare inogudure ebo. Pao Kurireu biagoduwo nou ero pegareu piji.
2TI 4:17 Pagimijera Jesus rakojere itabo rugadu. Ure iragado imagowo Pao Kurireu bataru pemegareu jamedu boeji awu boe tuginaiwuge eimijerage ewiagai. Emeardure ji rugadu. Nono Pao Kurireu ure ikinorudo awu boe tuginaiwuge epiji. Emeardure ireadodaeji dukodire ekare tugobaigarege edo iwido.
2TI 4:18 Ča Pagimijera Jesus umode ikinorudo rugadu boe pegareu piji rugadu. Umode irududo baruto rugadu. Nonore boe emago pemegamode Pagimijeraji jii toro tuwo ie kurido. Du akedumodukare.
2TI 4:19 Akimadudo aredu Priscila apo imedu Áquila apo inai. Akimadudo imedu Onesíforo apo uwobe eiamedu boebo inai jamedu.
2TI 4:20 Imedu Erasto rakoje kimore Corinto ba kurireu keje. Imedu Trófimo kogodure Mileto ba kurireu keje. Dukodire utukare itabo.
2TI 4:21 Akarego mato itae biaku otodai. Imedu Êubulo, imedu Prudente, imedu Lino, aredu Cláudia ekimadure awagai. Awu woewu meartorure Jesus jiwuge eiamedu boe ekimadure awagai.
2TI 4:22 Pagimijera Jesus rakojewo akabo rugadu tuwo ameardae pemegado. Pao Kurireu ro pemegawo ai rugadu. Urugadureu.
TIT 1:1 Paulo nure imi. Pao Kurireu utugare nure imi. Iture Jesus Cristo bataru tabo boe ewagai. Pao Kurireu makore i iwo ture tugeragu jiwuge emeartoru rakado. Makore i iwo boe erduwado Pao Kurireu bataru remawuji Jesus jiboeji. Nou bataru jire pameartorumode.
TIT 1:2 Pao Kurireu batrarodukare rugadu. Emare akoino meartorure puduiwuge eewodumoduie. Ewimodukaie pugeje. Eragojemoduie Pao Kurireu apo du akedumodukaie rugadu. Emare akoino marigudu rugadu. Ukare awu moto to raga dukejere akoino. Nou Pao Kurireu bataru koiare pameartorure Pao Kurireu bataruji rugadu.
TIT 1:3 Maigodu aino Pao Kurireu ure boe erduwado nou tuwadaruji taidure jiwu meri keje. Ča ure nou tuwadaru maku inai jamedu iwo boe ewie. Pao Kurireu umode paginorudo rugadu. Emare ure itudo awu tuwadaru tabo boe etae.
TIT 1:4 Imedu Tito nure aki. Iwadaru koiare ameartorure Pao Kurireuji nono imeartoru mogadure. Dukodire itonaregedu nure aki. Inure awu atugoreboe pemegado iwo maku akai. Pao Kurireu ro pemegawo ai. Ure paginorudowu Jesus Cristo ro pemegawo ai jamedu. Ewo apemegado boei. Ewo boe epemegado ai jamedu.
TIT 1:5 Paragojere puapo Creta moto keje. Dukejere iture apiji mare ire amaragodae maku akai aragojewo nono Creta moto keje kimo awo meartorure Jesus jiwuge ero pemegado, awo akeragu ia imei meartorure Jesus jiwuge eimijerageče eda jamedu boe keje. Imagore ai akaiwowo boe erore jiboeji awo akeragu iagei meartorure Jesus jiwuge eimijerageče. Ainore amode akeragu jiwu mode.
TIT 1:6 Ro pemegamode. Boe emago pegamodukare rore jiboeji. Oreduje umode mitotu je. Jeribarimodukare toreduje piji. Ore emeartorumode Jesusji rugadu. Ore etaora pegamodukare kodire emeartorumode tuje tuo bataruji.
TIT 1:7 Meartorure Jesus jiwuge eimijera aiwomode maragodure Pao Kurireu aiwuge ero boeji. Dukodire tagaiwomode ia ro pemegareu imedu bagai. Tagaiwodo boe emago pegakare rore jiboe jiwu bagai. Očaromodukare tuwadaruji. Korigodumodukare boei kuri je. Uke kurumodukare ji. Boe korimodukare ji. Korigodumodukare diero bagai toče.
TIT 1:8 Ukimadumode boebo. Umode eremo tuwaito. Meardu kurimode boe pemegareuji. Umode turagado pudui turo pegakawo. Umode turo jetorodo. Ro pemegamode rugadu. Umode turo pegareu barigu tubiji.
TIT 1:9 Imedu meartoru rakamode Pao Kurireu bataru remawuji. Awu bataru ure turugadu. Awu bataru umode boe erduwado Pao Kurireuji rugadu. Imedu meartoru rakamode ji dukeje umode turugadu tuwo ia boe erduwado jamedu tuwo emeartoru rakado rugadu. Umode boe ewie ia aidukare Pao Kurireu bataru jiwuge emeardae pegareuji. Boe etaidumodukare Pao Kurireu bataruji dukeje etaidumode tuwo boe ekiripagado Pao Kurireu bataru piji.
TIT 1:10 Ia meartorure Jesus jiwuge etaidukare ia Pao Kurireu bataruji. Meartorure Jesus jiwu Judeu doge nure emage. Emagare. Iage meartorure Jesus jiwu boe tuginaiwuge nure emage. Etaidure tuwadaruji Pao Kurireu bataru piji. Kodire nouia tuwadaru tabore enure ia meartorure Jesus jiwuge ekiripagado.
TIT 1:11 Erore aino tuwo tugeragu dieroji nou boe epiji. Epoguru bokware. Pawo awu ewadaru akedudo. Tuwadaru pegareu tabore emode boe ekiripagado tuwadaruji Pao Kurireu bataru remawu piji. Kodire nou boe erduwa bokware kakojiwu boe eimijera bataru jiba tumeartorumode.
TIT 1:12 Ia Creta moto kejewu mako pemegare marigudu. Jorduwareu nure ema. Akore: – Creta kejewuge batrarodureuge nure emage. Ero rakare boei turo pegareu tabo. Etaidukare tumaragoduwo rugadu. Iera kiarireuge nure emage. Boe jokodu jire nou jorduwareu akoino. Dukodire amago rakado awu meartoru jokodukareugei emeartoru rakawo rugadu Pao Kurireu bataru jamedu boeji.
TIT 1:14 Judeu doge ere to bakaru tuginaiwu tawuje taora piji tumeartorukawo boe jokodureuji. Mare meartoru jokodukare Pao Kurireu bataru jiwuge ewo tugera ra nou Judeu doge eno bakaru tuginaiwu piji tumeartoruwo tu Pao Kurireu bataruji. Meartorukare boe jokodureu bataru jiwuge ere tuiordae tawuje taora piji. Mare meartoru jokodukare Pao Kurireu bataru jiwuge ewo tugera ra nou erdae piji jamedu tumeartoruwo tu Pao Kurireu bataruji.
TIT 1:15 Boe emeardaemode tu turo pemegawo dukeje ero pega bokwamode rugadu. Mare boe emeardae kigodumode turo pegawo, emeartorumodukare Pao Kurireu bataruji dukeje ero pegamode rugadu. Emeardae, erdae pegamode rugadu. Etaora buture tu turo pegareu keje rugadu.
TIT 1:16 Egore tuiorduwaie rugadu Pao Kurireuji mare ewadrarodunure. Ero pegareu koiare ure boe erduwado tuwadrarodaeji. Boe erdu pegare nou boe erore jiboeji. Emeartorukare tugimijeraji. Ekare turugadu. Ero pemegamodukare rugadu.
TIT 2:1 Akire amode boe erduwado tu Pao Kurireu bataru remawuji. Akaba boe erduwado ia bataru pegareuji rugadu.
TIT 2:2 Ime erduwado ewo tugera ra piga kuru piji. Emeardae pemegawo rugadu. Ewo turagado pudui turo pegakawo. Emeartoruwo rugadu Jesusji. Emeardu kuriwo rugadu boei. Ekawo tugera ra turo pemegareu piji.
TIT 2:3 Amode areme erduwado jamedu erowo aredu ro pemegareu roji. Ero pegakawo tuwo boe erdudo ture Pao Kurireu utugaredo pudumi duji. Emago pegakawo boe erore jiboeji tuwadrarodu tabo. Etaidukawo tuguduwo vinho kuruče pugeje. Ewo boe erduwado boe pemegareuji.
TIT 2:4 Ewo nogware erduwado emeardu kuriwo toreduji, torei.
TIT 2:5 Ewo turagado pudui turo pegakawo. Ero pemegawo rugadu. Emaragodu pemegawo tuwai tada. Ewo turo butugudo boei. Emeartoruwo toreduji. Eromode aino dukeje boe emago pemegamode Pao Kurireu bataruji rugadu.
TIT 2:6 Ča amagodo iparei jamedu ewo turagado pudui turo pegakawo jamedu.
TIT 2:7 Aki jamedu aro pemegado boe erowo nono aro mogadure. Akaba boe ekiripagado. Awo boe erduwa pemegado.
TIT 2:8 Amagodo boe remawuji. Aino boe emago pegamodukare awadaruji. Jordu pegare aiwuge erdumodukare ia paro pegareuji dukeje epogurumode tumeardae pegareuji.
TIT 2:9 Boe etugarege emeartoruwo tugimijeragei tuwo tugimijerage egaredo tumaragodure jiboeji. Emago pegakawo tugimijera bataru jipagi.
TIT 2:10 Ekiwogukawo tugimijerage enoeji. Mare ero pemegawo tugimijeragei. Emeartoruwo tugimijeragei. Du ainodu tabo emode tugimijerage etaidudo Jesusji emeartorure ji kodi. Emode tugimijerage etaidudo Pao Kurireu bataruji. Pao Kurireu koiare umode paginorudo rugadu.
TIT 2:11 Pao Kurireu ure boe eiamedu boe erdudo turo pemegareuji tuwo boe ekinorudo.
TIT 2:12 Nou Pao Kurireu ro pemegareu ure parduwado pawo pagera ra boe ero pegareu piji, pawo pagera ra meartorukareuge etaidu rakare jiboe piji. Mare pameartorumodukare nou egoino jiboeji rugadu. Pao Kurireu ro pemegareu ure parduwado pawo paragado pai paro pegakawo, paro jetorowo. Parowo nono Pao Kurireu meardae mogadure woe awu moto keje.
TIT 2:13 Pabaganure pameartorure jiwu Jesus Cristo bagai aregoduwo pugeje. Parduware aregodumode duji. Pao Kurireu nure ema. Umode paginorudowu nure ema rugadu. Aregodumode dukeje pardumode ji rugadu. Boe eimijera kurireu mode ema rugadu. Urugu pemegareu umode tudawuje piji rugadu.
TIT 2:14 Jesus ure tumagu paro pegareu moriče tuwo paginorudo paro pegareu piji, boe ero pegareu jamedu boe piji, tuwo paginorudo boe pegareu jamedu boe piji rugadu. Tuwo paro pemegado. Tuwo tugeragu pai pameartoruwo tu pudui rugadu. Meartorukare puduiwuge umodukare tugeragu ei. Meartorure puduiwuge umode tugeragu ei tuwo tuwobedo emage. Tuwo emeardaedo ero pemegawo taidure dutabo.
TIT 2:15 Boe erduwado awu iwadaruji. Apogurukaba. Eimijera nure aki. Dukodire aragado awo boe egaredo. Aragado amagowo boe ero pegareuji ewiagai jamedu. Ewiedu pemegado emeartoruwo ai rugadu.
TIT 3:1 Rakojere akabowu meartorure Jesus jiwuge ewie pugeje emeartoruwo boe eimijeragei ewo turugadu turo pemegawo turo jamedu boe tabo.
TIT 3:2 Amagodo ei emago pegakawo boe erore jiboeji tuwadrarodu tabo. Edu pemegawo boebo epemegawo pui. Etaidu pemegawo boei. Emeardae pemegawo tugawo boe remawugedo pudumi turo pemegawo boe eiamedu boei.
TIT 3:3 Marigudu parduwa bokware jamedu. Pameartorukare pagimijeraji. Paro pegare. Pagaidukare pawo pagera ra paro pegareu piji. Pagaidure tu pameardae pegawo boe ero pegareuji rugadu. Pagaidure pawo boe ekiripagado. Pagorigodure boe enoe keje. Boe erdu pegare pai. Pardu pegare boei jamedu.
TIT 3:4 Mare Pao Kurireu ure pardudo tumeardu kurire pai duji. Ure pardudo turo pemegareuji. Parduware Pao Kurireu meardaeji. Aidure tuwo paginorudo awu paro pegareu jamedu boe piji.
TIT 3:5 Dukejere ure paginorudo rugadu. Ro pemegareu mode pagi mare pagare paginorudo. Pao Kurireu emare ure paginorudo. Okudugodure pagabo kodire ure paginorudo. Uwari ure paro pegareu barigu pabiji tuwo boe maiwudo pagi.
TIT 3:6 Pameartorure Jesus Cristoji dukodire ure paginorudo. Dutabore Pao Kurireu ure Tuwari rawuje pagae rugadu.
TIT 3:7 Rore aino tuwo turo pemegareu maku pagai tuwo tugeragu pai pudae tuwo pamugu pemegado pudabo. Aino pawimode mare umode paewodudo pugeje. Nono paragojemode Pao Kurireu apo du akedumodukare rugadu. Dukodire pabaganure Pao Kurireu bagai rugadu.
TIT 3:8 Boe jokodu jire inagoino. Boe erduwado awu iwadaruji rugadu. Meartorure Pao Kurireu jiwuge erduwamode awu iwadaruji rugadu dukeje emeardaemode turo pemegawo meri jamedu boeji tuwo boe pemegado boe eiamedu boei.
TIT 3:9 Boe emago rakamode pui pagatu je mare arokaba aino. Boe emago raire pui tunara tabo pui kaibowu boe erakuduie pudumi mare arokaba aino. Boe etokimode pui mare arokaba aino. Boe emago rakamode pui turoia keje mare arokaba aino. Pagatu jere nou boe egore aino.
TIT 3:10 Ia boe aidumode tuwo meartorure Jesus jiwuge edo tugera ra pubiji dukeje amagodo ji rokawo aino pugeje. Aidu kimomode dukeje amagodo ji pugeje rokawo aino pugeje. Aidu kimomode tuwo meartorure Jesus jiwuge edo tugera ra pubiji dukeje amagodo ji utuwo tabiji rugadu rokawo aino pugeje meartorure Jesus jiwugei ekawo tugera ra pubiji.
TIT 3:11 Aidure turo pegawo meartorure Jesus jiwugei tuwo edo tugera ra pubiji dukodire tarduware ro pegareu nure ema duji. Ema ure turo pegado Pao Kurireu jakai tumeardae tabo rugadu.
TIT 3:12 Aino itumode Nicópolis ba kurireu ka. Iorduwakare iduba imode utudo akae. Imedu Ártemas rabodu imedu Tíquico rabodu. Imode utudo akae dukeje aragado akaregoduwo mato itae Nicópolis ba kurireu ka. Ire imeardae tawuje iragojewo nono nou ba kurireu keje awu joruji.
TIT 3:13 Imedu Zenas makore boe eimijeragei boe eparu tabo tu tu je. Aidure tuduwo rugadu. Imedu Apolo aidure tuduwo jamedu. Dukodire akera maku etai ewo tudo turugadu tuduwo.
TIT 3:14 Meartorure Jesus jiwuge erduwado ero pemegawo jamedu. Aino emaragodumode rugadu. Dukejere iaboe okwamodukare etai. Mare emaragodumodukare du ukare turugadu.
TIT 3:15 Awu rakojere itabowuge etaidure tugimaduwo akabo. Akimadudo nou meartorure Jesus jiwuge pamedagebo čenai. Pao Kurireu ro pemegawo tai rugadu.
PHM 1:1 Paulo nure imi. Iragojere woe baičoreu tada. Ire boe ewie Jesus Cristo jiboeji dukodire ro pegareuge ere itugu baičoreuto. Inure awu atugoreboe pemegado pamedia Timóteo apo čewo awu atugoreboe maku čemedia Filemom bagai. Čemeardu kurire Filemomji. Emare ure boe ewie Jesus jiboeji jamedu.
PHM 1:2 Čemode awu atugoreboe maku toro aredu Áfia bagai jamedu. Meartorure Jesusji dukodire pamedago nure ema jamedu. Čemode maku imedu Arquipo bagai jamedu. Emare maragodu rakare tuwo boe ewie Jesus jiboeji jamedu. Meartorure Jesus jiwuge ere bato pui Filemom uwai keje tu tu je. Ewagaire čere awu atugoreboe maku jamedu.
PHM 1:3 Pao Kurireu uwo turo pemegareu maku tagai. Uwo tabemegado pui. Pagimijera Jesus Cristo uwo turo pemegareu maku tagai jamedu. Uwo tabemegado pui jamedu.
PHM 1:4 Imedia Filemom nure aki. Boe ere iwie arore jiboeji. Egore ameartoruie Pagimijera Jesusji rugadu. Egore ameardu kurie meartorure Pao Kurireu jiwuge eiamedu boei. Dukodire imago pemegare arore jiboeji Pao Kurireu biagai tu tu je. Imagomode baruto Pao Kurireu bagai dukeje imago pemegare ai arore jiboeji Pao Kurireu biagai.
PHM 1:6 Ameartorure Jesusji dukodire pamedage nure pugi. Boe emeartorumode Jesusji dukeje umode boe emugu pemegado pudabo. Ro pemegamode ei jamedu. Dukodire imagore baruto Pao Kurireu bagai aparu tabo rugadu arduwawo rugadu Jesus ure amugu pemegado pudabo duji, arduwawo rugadu Jesus ro pemegare ai duji.
PHM 1:7 Ameardu kurire meartorure Jesus jiwugei. Dukodire iagarere i rugadu. Are ikiarigodu barigu ipiji. Meartorure Pao Kurireu jiwuge eiamedu boe egarere pudui rugadu nou arore jiboeji. Ameartorure Jesusji dukodire imedia remawu nure aki.
PHM 1:8 Dukodire ipogurukare imagowo ai. Pameartorure Jesus Cristoji dukodire pawobe nure pugi. Dukodire imagomode ai nono boe eimijerage ego moga tudugarege ei dumogadure dukeje ameartorumode iwadaruji rugadu.
PHM 1:9 Mare imeardu kurire ai rugadu. Dukodire imagomodukare ai nono boe eimijera ako moga tudugaregei dumogadure. Inogwamagudumode ai imedu Onésimo paru tabo. Paulo nure imi. Jesus Cristo ure itudo tuwadaru tabo iwo boe ewie Jesus jiboeji. Dukodire ro pegareuge ere itugu baičoreuto. Arduware nou inoduji marigudu. Iragojere woe awu baičoreu tada dukeje ire awu Onésimo bie Jesus jiboeji. Dukodire čare Onésimo meartorure Jesusji rugadu. Imire ire bie Jesus jiboeji dukodire ure nono itonaregedu mogadure. Ire nono uo mogadure. Dukodire inogwamagudunure ai awu imedu Onésimo paru tabo awo akeragu ji pugeje.
PHM 1:11 Marigudu atugarere ema. Mare maragodu pemegakare akai. Rekodure apiji jamedu. Mare aino maragodu pemegare inai. Dukodire iorduware ji. Amode akeragu ji pugeje atugarewo ema pugeje dukeje maragodu pemegamode akai jamedu.
PHM 1:12 Dukodire inure Onésimo utudo tuibagi awagai. Mare itaidu kurire ji.
PHM 1:13 Itaidukare utuwo kuri aino ipiji, rakojewo itabo woe jao. Ire boe ewie Jesus bataru pemegareuji dukodire ro pegareuge ere itugu baičoreuto. Awu imedu Onésimo rakojemode woe imediawo ema nono umode tugera maku inai rugadu. Akaidure awo akera maku inai jamedu. Nono nou Onésimo utumodukare kuri aino dukeje umode tugera maku inai woe amugato.
PHM 1:14 Mare ikaregure iragado ai awo akera bararedo i. Dukodire inure Onésimo utudo tuibagi awagai. Akaidumodukare awo Onésimo udo tugirimi mato uwo tugera bararedo i dukeje pegakare. Mare akaidumode awo udo tugirimi tuibagi mato uwo tugera bararedo i dukeje boe pemegamode i rugadu. Dukodire ipagamode awadaru bagai.
PHM 1:15 Marigudu atugare Onésimo rekodure apiji. Mare boe maegodukare ji apiji. Umode tugirimi tuibagi awagai dukeje utumodukare apiji pugeje jii toro rugadu.
PHM 1:16 Marigudu atugarere ema. Aino čare atugarere ema mare pamedia remawu nure ema jamedu. Meartorure Jesus Cristoji dukodire pamedia nure ema jamedu. Imeardu kurire ji. Ameardu kurimode ji jamedu. Maragodu pemegamode akai dukodire atugare pemegareu mode ema rugadu. Meartorure Pagimijera Jesusji dukodire awobe nure ema jamedu. Dukodire boe pemegamode tai rugadu.
PHM 1:17 Imedia nure aki. Amedia mode imi dukeje akera upodo awu imedu Onésimo apo nono aromode i dumogadure.
PHM 1:18 Awu imedu Onésimo ia ro pegareu mori jetumode akabo imi igoiare imode morido akai. Ure tugeragu ia dieroji apiji mare imi igoiare imode nou diero morido akai.
PHM 1:19 Akaiwodo. Ikera tabore ire awu bapera atugodo. Paulo nure imi. Imi igoiare imode diero maku akai Onésimo ure tugeragu jiboe moriče. (Awiagodukaba. Imire ire awie Jesus jiboeji dukodire ameartorure ji. Dukodire itaidumode iwo ado iro pemegare ai du morido inai du pegakare.)
PHM 1:20 Imedia nure aki. Aromode awu inogwamagudure ai jiboeji aro pemegawo imedu Onésimuji dukeje amode boe pemegado i. Amode iagaredo i. Mare paga karega. Pagimijera Jesus aire aro pemegamode Onésimuji rugadu.
PHM 1:21 Iorduware aromode jiboeji. Aromode inogwamagudure ai jiboeji. Aromode jiboe kodumode inogwamagudure ai jiboe piji.
PHM 1:22 Mare itaidure ituwo awagai jamedu. Itaidure ituwo awu baičoreu piji imuguwo awai keje akabo jamedu. Taiamedu boe tamagore baruto Pao Kurireu bagai uwo itawuje awu baičoreu piji ituwo toro tawagai pugeje imuguwo toro tagabo pugeje. Imeardaere Pao Kurireu umode tagogwamagudae udo turugadu kuri aino rugadu.
PHM 1:23 Imedu Epafras ure boe ewie Jesus Cristo jiboeji jamedu. Dukodire jordu pegare jiwuge ere tugu baičoreuto itabo jamedu. Emare aidure tugimaduwo toro tawagai jamedu.
PHM 1:24 Imedu Aristarco, imedu Demas, imedu Lucas, imedu Marcos emaragodure inai tuwo boe ewie Jesus jiboeji jamedu. Eiamedu boe etaidure tugimaduwo toro tawagai jamedu.
PHM 1:25 Pagimijera Jesus Cristo ro pemegawo tai rugadu tuwo tameardae pemegado.
HEB 1:1 Marigudu Pao Kurireu makore pawobe Judeu doge mariguduwugei. Mare ukare tuwadaru jamedu boe maku boe etai. Makokare boe eiamedu boei. Makore tu nou makore Pao Kurireu bataru jiwugei tu rugadu ewo boe ewie Pao Kurireu bataruji. Mare ukare tuwadaru rugadu maku etai. Makore ia tuwadaruji dukeje makokare pugeje. Toro ia meri keje makore nou boei pugeje. Marigudu Pao Kurireu ure ia tuwadaru maku nou makore Pao Kurireu bataru jiwuge etai eniau tada. Mare ia tuwadaru Pao Kurireu ure ia boe erdudo pudui tumagowo ei tuwo ewie tuwadaruji. Makore ia tuwadaruji ia makore Pao Kurireu bataru jiwuge ewiagai. Makore ia tuwadaruji toro ia boe ewiagai pugeje. Ainore Pao Kurireu rore marigudu tuwo tuwadaru maku nou makore Pao Kurireu bataru jiwuge etai ewo boe ewie tuwadaruji.
HEB 1:2 Mare aino ukare aino pugeje. Aino čare Pao Kurireu ure tonaregedu arego mato pagae makowo pawiagai rugadu. Ainore Pao Kurireu rore tuwo tuwadaru maku boe etai rugadu. Pao Kurireu ure nou tonaregedu udo moto to baru to. Pao Kurireu makore marigudu tuie tugeragu nou tonaregeduji tumoduie boe jamedu boe maku ai mare kuri je karega, toro ia meri keje. Nou meri aregodumode makore jiboe ka dukeje boe jamedu boe makudumode ai.
HEB 1:3 Pao Kurireu rore jiboe ure nono jorugu pemegareu ure tudawuje piji dumogadure. Mare jorugu ji karega inagoino. Pao Kurireu rore jiboe pemegare rugadu boe jamedu boe kori. Nou onaregedu o jorugu ure nono tuo o jorugu mogadure. Mare jorugu ji karega inagoino. Onaregedu rore jiboe pemegare rugadu nono tuo ro mogadure. Ure nono tuo mogadure rugadu. Rakare rugadu. Onaregedu emare jetu pemegare baruji kuieje dogei mare tu tuwadaru rakareu tabo rugadu. Jetu pemegare motoji. Jetu pemegare moto kejeboe jamedu boeji. Mare tu tuwadaru rakareu tabore rore aino. Turo tabo karega. Tugera tabo karega. Tu tumagore jiboe tabore jetu pemegare nou boe jamedu boeji. Makore jiboe jeture pudui rugadu tu tu je. Jetumode pudui rugadu jii toro rugadu. Umode turo rakareu towuje tu tuwadaru tabo rugadu. Emare aregodure mato moto ka jamedu tuwiwo boe eiamedu boe ero pegareu moriče Pao Kurireu biagoduwo boe ero pegareu piji. Dukejere ure tugirimi baruto pugeje. Nono ure tumugudo Tuo Kurireu ukana pemegareu jagwai. Pao Kurireu rakare rugadu boe jamedu boe kori.
HEB 1:4 Dukodi čare Pao Kurireu onaregedu kurire rugadu nou Pao Kurireu utugarege baru tadawuge epiji. Pao Kurireu ure tonaregedu ie kurido nou tudugarege baru tadawuge ekie kori.
HEB 1:5 Padure bapera kejewu Pao Kurireu bataru akore: – Itonaregedu nure aki. Awu meriji ao nure imi rugadu. Ainore Pao Kurireu akore marigudu. Mare tudugarege baru tadawuge ei karega akoino. Tonaregedu jire akoino. Ia padure bapera kejewu Pao Kurireu bataru akore jamedu. Akore: – Uo mode imi. Itonaregedu mode ema. Ainore Pao Kurireu akore marigudu. Mare ia tudugare baru tadawu ji karega akoino. Tonaregedu jire Pao Kurireu akoino tu rugadu. Ainore Pao Kurireu akore marigudu.
HEB 1:6 Nono ure nou tonaregedu boetojiwu rawuje baru piji moto ka dukeje makore nou tudugarege baru tadawugei. Akore: – Tabu jodo tamago pemegawo awu itonaregeduji taiamedu boe puapo.
HEB 1:7 Pao Kurireu makore pugeje. Akore: – Pao Kurireu ure tudugarege baru tadawuge edo nono bakuru mogadure. Pao Kurireu ure tudugarege baru tadawuge edo nono joru mogadure. Tudugarege baru tadawuge eire Pao Kurireu akoino.
HEB 1:8 Mare Pao Kurireu makore tonaregeduji. Akore: – Pao Kurireu nure aki. Boe eimijera kurireu mode aki jii toro rugadu. Du akedumodukare rugadu. Aetu pemegamode meartorure aiwugei aro pemegareu tabo akaiwo pemegareu tabo.
HEB 1:9 Ameardu kurire boe ero pemegareuji. Ardu pegare boe ero pegareuji. Dukodire ameartorure jiwu Pao Kurireu ure tugeragu ai tuwo boe eimijera kurireudo aki. Ure aegaredo ai. Ure akie kurido amedage eiamedu boe ekori. Tonaregedu jire Pao Kurireu akoino marigudu.
HEB 1:10 Makore pugeje. Akore: – Boe eimijera kurireu nure aki. Marigudu awu motokare raga. Barukare raga. Mare aki aragojere boetoji. Dukeje čare are moto towuje. Are baru towuje jamedu. Aki rugadure aroino.
HEB 1:11 Moto akedumode. Baru akedumode. Mare akagedumodukare rugadu. Moto baru epegagodumode nono boe ekudau areia pegagodureu umogadure.
HEB 1:12 Amode upodo puapo nono boe emode tugudau areia upodo puapo dumogadure. Mare boe ekudau areia ji karega inagoino. Amode baru akedudo. Amode moto akedudo. Dujire inagoino. Nono amode moto udo tuginai pugeje. Nono amode baru udo tuginai pugeje. Mare aki amode nono amogadure rugadu jii toro rugadu. Amodukare ado tuginai pugeje. Awimodukare rugadu jii toro rugadu. Tonaregedu jire Pao Kurireu akoino.
HEB 1:13 Pao Kurireu makore tonaregeduji jamedu. Akore: – Amugudo woe ikana pemegareu jagwai jii toro imode jordu pegare aiwuge etagedudo du ka. Imode jordu pegare aiwuge edo nono awure ure tamudo kejewu ira mogadure. Mare ira ji karega inagoino. Imode jordu pegare aiwuge eraga ta epiji. Dujire inagoino. Ainore Pao Kurireu akore tonaregeduji. Makokare aino tudugarege baru tadawugei rugadu.
HEB 1:14 Mare Pao Kurireu utugarege baru tadawuge emeartorure Pao Kurireu bataruji rugadu. Baru tadawuge nure emage. Pao Kurireu ure nou tudugarege baru tadawuge etarego nou tumode ekinorudowuge ewagai tuwo tugera maku etai. Ainore eromode tu tu je.
HEB 2:1 Dukodire pagawo pagera ra Pao Kurireu bataru remawu piji. Pawiapagare ji marigudu. Pawiapaga pemegawo ji pameartoruwo ji rugadu pagaiduwo tu ji rugadu. Dukodire pawiapagamodukare ia boe ewadaruji pugeje. Pamodukare pawarigu boeto bataru remawu piji rugadu.
HEB 2:2 Marigudu Pao Kurireu ure tudugarege baru tadawuge etarego mariguduwuge pawobe etae tuwadaru tabo. Nou Pao Kurireu utugarege baru tadawuge ere nou mariguduwuge pawobe ewie nou Pao Kurireu bataruji. Pao Kurireu bataru remawu jire egoino nou pawobei. Boe pegare nou meartorukare nou bataru jiwugei emeartorukaredu du moriče.
HEB 2:3 Aino čare Pao Kurireu ure tonaregedu arego pagae tuwo pawie tumoduie paginorudo duji. Nou meardure nou bataru jiwuge boetojiwuge emagore pai nou bataru uie turugadu. Boe jokodu jie akoino rugadu. Nono Pao Kurireu ure boe erdudo turo rakareuji jamedu dukodire boe erduware boe jokodu jire akoino duji rugadu. Boe erdure nou Pao Kurireu ro rakare jiboeji dukeje eku kidure nou roinoduji. Dukodire erduware Pao Kurireu emare roino duji rugadu. Dukodire parduware boe jokodu jire Jesus akoino boei. Nono Pao Kurireu Uwari ure turo pemegareu maku nou meartorure Jesus jiwuge etai tuwo tumaragodae maku etai nono Pao Kurireu meardae mogadure dukodire parduware boe jokodu jire akoino duji rugadu. Dukodire inure tawiedu pemegado. Pameartorumodukare Pao Kurireu onaregeduji dukeje pawarigudumode bope doge eda kejewu joru pegareuto rugadu paro pegareu moriče. Mare pameartorumode Pao Kurireu onaregeduji dukeje umode paginorudo nou bope doge eda kejewu joru pegareu piji rugadu.
HEB 2:5 Nou čenagoino jiwu moto baru maiwu mode rugadu. Mare Pao Kurireu makokare tudugare baru tadawugei tumoduie boe eimijeragedo emage toro nou moto maiwu keje nou baru maiwu tada jamedu. Makokare aino ei.
HEB 2:6 Mare marigudu boe ere Pao Kurireu bataru bu bapera keje. Pao Kurireu akore: – Boe ero pegare dukodire Pao Kurireu ure eraga ta epiji jao eragakawo nono Pao Kurireu utugarege baru tadawuge eraga mogadure. Mare Pao Kurireu meardu kurire boei rugadu. Pao Kurireu biagodukare boe epiji rugadu. Ure boe eimijera kurireugedo emage boe jamedu boe meartoruwo ei. Ure ekie kurido. Ure boe pemegado ei rugadu. Ainore Pao Kurireu bataru akore marigudu. Akore Pao Kurireu uie boe pemegado boei boe eimijera kurireugewo emage. Akore moto kejeboe jamedu boe emeartoruie boei. Mare awu bataru jetukare pudui raga. Boe jamedu boe emeartorukare raga boei rugadu. Boe eimijera kurireuge karegure emage.
HEB 2:9 Mare pardure Jesusji. Pao Kurireu ure Jesus raka ta piji jao rakakawo nono Pao Kurireu utugarege baru tadawuge emogadure. Aregodure mato moto ka tuwiwo boe ero pegareu moriče. Mare paga karega. Ainore Pao Kurireu meardaere marigudu tuwo turo pemegado boei. Jesus bire rugadu dukodire čare boe pemegare ji pugeje. Aino čare ie kurire rugadu. Boe eiamedu boe emago pemegare ji rugadu.
HEB 2:10 Pao Kurireu rore jiboe ure turugadu. Emare ure boe jamedu boe towuje pudai. Emare jetu pemegare boe jamedu boeji akedukawo rugadu. Pao Kurireu rore Jesus jiboe ure turugadu jamedu. Pao Kurireu ure boe pegado Jesusji tuwo Jesus rakado uwo boe ekinorudo. Jesus meartorure nou tuo meardaeji boe pegawo pudui duji dukodire boe pemegare Jesusji rugadu. Dukodire čare umode boe pemegado boei jamedu. Umode ekie kurido nono Jesus ie mogadure boe eimijeragewo emage jamedu. Jesus emare makore boe ewagai emeartoruwo pudui. Makore ewagai tuwo ekinorudo ero pegareu piji ewarigudukawo bope doge eda kejewu joru pegareuto ero pegareu moriče.
HEB 2:11 Boe emeartorumode Jesusji dukeje Jesus umode ero pegareu barigu epiji tuwo epemegado. Nono eiamedu boe etuwobe nure pugi. Dukodire Jesus pogurukare tumagowo nou meartorure puduiwugei tuwobe nuie emage dukodi. Etuo ure mitotu je dukodire akoino ei.
HEB 2:12 Jesus makore tuoji. Akore: – Ireadodumode iwobe ewiagai arore jiboe jamedu boeji. Iwobe emode bato pui dukeje iramode akie tabo boe ewiagai apemegare duji. Ainore Jesus akore.
HEB 2:13 Makore pugeje: – Imeartorumode Pao Kurireuji rugadu. Akore: – Imi reo. Pao Kurireu ure maku inaiwu tore eragojere woe itabo. Ainore Jesus akore.
HEB 2:14 Akore Pao Kurireu ore nuie emage rugadu. Boe eire akoino rugadu. Dukodire Jesus ure tudo nono boe emogadure boewo pudumi rugadu. Rore aino tuwiwo boe ero pegareu moriče tuwo bope doge eimijera raka ta piji rugadu. Nou bope doge eimijera aidure tuwo boe eiamedu boe ewido rugadu eduwo pudabo toro nou joru pegareu tada.
HEB 2:15 Dukodire ure boe eiamedu boe ekiripagado emeartoruwo pudui tuwo etagedudo. Epagudure tuwiwo. Dukodire boe ere bope doge emeardaere jiboe towuje tu tu je. Dukodire eroiwakare tuwo tugera ra tumeartorure bope doge eimijera jitu piji. Mare aino čare Jesus ure boe ekinorudo nou bope doge epiji epagudukawo eče pugeje.
HEB 2:16 Dukodi čare parduware Jesus ukare tugera maku tudugarege baru tadawuge etai duji. Ure tugera maku boe etai rugadu. Ure tugera maku Abraão uwobe etai rugadu. Mare Abraão uwobe remawuge ei karega inagoino. Meartorure Pao Kurireu jiwugeire inagoino.
HEB 2:17 Mare ure boedo pudumi tuwo tugera maku nou meartorure puduiwuge etai. Dukodi čare nou ure boe enomea maku Pao Kurireu aiwuge eimijera kurireu remawu nure ema rugadu. Emare ure boe ero pegareu mori remawu maku Pao Kurireu ai rugadu. Dukodi čare Pao Kurireu biagodumode boe ero pegare jiboe piji rugadu. Jesus okudugodure boebo rugadu. Maragodu pemegare rugadu.
HEB 2:18 Mare ia kimore. Bope doge eimijera ure turokogado Jesusji Jesus meartoruwo pudui mare Jesus meartorukare ji. Bope doge eimijera ure boe pegado Jesusji mare Jesus biapagakare nou bope doge eimijera meardaeji rugadu. Dukodire Jesus jorduware tuwo tugera maku boe etai jamedu ewiapagakawo bope dogei, emeartorukawo bope doge eimijeraji pugeje.
HEB 3:1 Dukodi čare imode tawie. Imedage nure tagi. Meartorure Jesus jiwuge nure tagi dukodire iwobe nure tagi jamedu. Pao Kurireu makore tawagai tameartoruwo Jesusji. Dukodire tameartorure ji rugadu. Ča pawiapagawo tu Jesus meardaeji rugadu. Pamagore boe ewiagai pameartoruie Jesusji rugadu. Pao Kurireu ure Jesus rawuje mato moto ka tuwadaru tabo tumagowo pawagai. Ure boe enomea maku Pao Kurireu aiwu Pagimijera Kurireu nure ema rugadu.
HEB 3:2 Pao Kurireu ure tugeragu Jesusji maragoduwo pudai. Jesus meartorure Tuo Kurireuji rugadu nono Moisés meartorure Pao Kurireu jitu mogadure. Marigudu Moisés maragodure Pao Kurireu ai tietuwo Pao Kurireu uwaiji. Mare bai ji karega inagoino. Moisés jeture Judeu dogei Pao Kurireu ai. Jeture ei dukeje meartorure Pao Kurireuji rugadu. Aino čare Jesus meartorure tuoji nono Moisés meartoru mogadure.
HEB 3:3 Boe emode bai pemegado tuwaiče. Mare Pao Kurireu ure boe jamedu boe towuje. Mare bai ji karega inagoino. Pao Kurireu ure tugeragu boei emeartoruwo pudui rugadu. Dujire inagoino. Mare boe emode ia bai pemegado tuwaiče dukeje ia boe emago pemegamode nou baiji emago pemegamode nou ure tuwai pemegadowu imeduji jamedu. Egomode: – Nou imedu jorduware rugadu tuwo tuwai pemegado. Ainore boe egomode. Ča marigudu Moisés ure nono nou bai mogadure mare bai ji karega inagoino. Boe etaidure Moisesji. Emago pemegare ji. Mare aino čare Jesus rore jiboe kodure Moisés rore jiboe kori. Dukodire Jesus ure nono nou ure tuwai towujewu imedu mogadure. Mare ure tuwai towujewu ji karega inagoino. Jesus rore jiboe kodure Moisés kori rugadu. Dukodire boe emago pemegare Jesusji rugadu.
HEB 3:5 Moisés maragodu pemegare Pao Kurireu ai tietu tabo Pao Kurireu uwaiji. Mare bai ji karega inagoino. Judeu dogeire inagoino. Moisés jetu pemegare Judeu dogei Pao Kurireu ai. Pao Kurireu utugare pemegareu nure ema. Moisés ure Judeu doge ewie Pao Kurireu makomoduie ei ia tuwadaruji toro ia meri keje. Moisés ure Judeu doge ewie nou Pao Kurireu makomode jiboeji jamedu.
HEB 3:6 Mare Jesus Cristo emare Pao Kurireu onaregedu nure ema. Dukodire Pao Kurireu uwai tadawu boe eimijera kurireu nure ema. Mare bai ji karega inagoino. Meartorure Pao Kurireu jiwugeire inagoino. Eimijera kurireu nure Jesusče rugadu. Dukodire Jesus maragodae kurire Moisés maragodae kori tietu tabo meartorure Pao Kurireu jiwugei. Pagi pameartorure Jesusji. Parduware Jesus aregodumode pugeje duji. Pawo paragado pai pagawo pagera ra pameartorure Jesus jitu piji pabaga raiwo bagai rugadu. Mare paga karega. Pameartorumode Jesusji jii toro dukeje pamode nono Pao Kurireu uwai mogadure. Mare bai ji karega inagoino. Meartorure Jesus jiwugeire inagoino.
HEB 3:7 Pao Kurireu Uwari akore: – Ameardumode Pao Kurireu makore aiboe jitu keje arokaba nono awobe mariguduwuge Israel doge ero mogadure. Edure boe maereu keje dukeje ere turokogado Pao Kurireuji. Emeartoru bokware Pao Kurireuji.
HEB 3:9 Pao Kurireu akore: “Nou boe ere turokogado i. Egore pagaie inagoino ei, pagaie iroino ei. Dukodire ere ikiarigo. Joru oto padure quarenta ei erdure iro rakareu boeji. Mare du inodu tabo emeartoru bokware i rugadu.
HEB 3:10 “Dukodire ikorigodure ei. Inagore: ‘Emeartorukare iwadaruji rugadu. Ere tugera ra ipiji tumeartoruwo ia boei.’ ” Ainore Pao Kurireu akore.
HEB 3:11 – Akore: “Ikorigodure ei. Ire iwadaru maku etai. Inagore: ‘Ire ia moto maku nou boe etai emuguwo keje, ewo tamudo nono. Mare aino čare etaregodumodukare nou moto ka rugadu. Emugumodukare nou moto keje rugadu. Emodukare tamudo nono rugadu.’ ” Ainore Pao Kurireu akore. Mariguduwuge Israel dogeire akoino.
HEB 3:12 Imedage nure tagi. Tagaiwodo tameardaere jiboeji. Tameardae pegareu barigu tabiji. Tamodukare tameardae pegareu barigu tabiji dukeje nou tameardae pegareu umode tameartoru akedudo Pao Kurireuji. Mare tarokaba aino. Tagaba tagera ra Pao Kurireu piji rugadu.
HEB 3:13 Tagera maku puai tawo pu jorduwado. Boe ero pegamode dukeje nou boe ere tiekiripagado turo pegare dutabo. Dukodire erduwamodukare turoino jiboeji. Ainore boe erore tumeartoru bokwawo Pao Kurireuji rugadu. Mare tagi tagera maku puai tu tu je tawo pu jorduwado tarore jiboeji tarokawo nono nou meartoru bokwareuge ero mogadure. Pao Kurireu bataru akore: “Awu meriji” aino. Dukodire pameartoruwo Pao Kurireu bataruji awu meriji rugadu kuri aino rugadu.
HEB 3:14 Pameartorure Jesusji rugadu. Pawo paragado pai pagawo pagera ra pameartorure jitu piji jii toro rugadu. Mare paga karega. Pameartorumode ji jii toro rugadu dukeje pamugu pemegamode Jesus Cristo apo rugadu.
HEB 3:15 Marigudu Pao Kurireu akore: – Tawobe mariguduwuge emeartoru bokware Pao Kurireuji tumeartoruwo ia boei pugeje. Mare tarokaba nono ero mogadure. Tameardumode Pao Kurireu makore tai boeji awu meriji dukeje tameartoru bokwakaba ji rugadu kuri aino rugadu. Ainore Pao Kurireu akore.
HEB 3:16 Israel dogeire akoino. Nou Moisés ure tawuje Egito moto pijiwugeire Pao Kurireu akoino. Emeartoru bokware Pao Kurireuji tumeartoruwo toro ia boei.
HEB 3:17 Nono Pao Kurireu korigodure ei rugadu. Dukodire Pao Kurireu akore: – Ire ia moto maku etai emuguwo keje ewo tamudo nono. Mare aino čare etaregodumodukare nou moto ka rugadu. Emugumodukare keje rugadu. Emodukare tamudo nono rugadu. Nou meartoru bokware Pao Kurireu jiwugeire Pao Kurireu akoino. Dukodire ure emeru pagado toro boe maereu keje. Joru oto padu keje boere quarenta ei toro nou boe maereu keje rugadu. Nou meartoru bokwareuge eiamedu boe ewudure tuwi tabo nono nou boe maereu keje.
HEB 3:19 Dukodire parduware Pao Kurireu meardaeji. Nou boe emeartorukare Pao Kurireuji dukodire emugukare nou moto keje rugadu nono Pao Kurireu meardae mogadure rugadu.
HEB 4:1 Aino čare Pao Kurireu makore pai jamedu tumoduie pagamudo nono turoiago Israel dogei dumogadure. Israel doge emeardure Pao Kurireu makore pudui boeji. Mare emeartorukare ji. Dukodire nou Pao Kurireu bataru pemegakare ei. Mare aino čare pameardure Pao Kurireu bataru pemegareuji jamedu. Jesus jiboe jire akoino. Makore tumoduie pagamudo jamedu. Dukodi čare pawo paragado pai pameartoruwo Jesusji rugadu.
HEB 4:3 Pameartorumode ji dukeje umode pado pagamudo rugadu. Mare Israel doge ekare tamudo. Pao Kurireu akore: – Ikorigodure ei dukodire ire ia iwadaru maku etai pugeje. Imagore ei etaregodumodukaie imode maku etaiwu moto ka jii toro. Imoduie edo tamudo nou moto keje mare aino imodukaie edo tamudo pugeje. Ainore Pao Kurireu akore. Ema ure tamudo marigudu. Ure baru to, ure moto to marigudu. Dukodire ure tumaragodae iado.
HEB 4:4 Ainore padure bapera kejewu Pao Kurireu bataru ure. Akore: – Meri oto padure seis Pao Kurireuji tuwo boe jamedu boe towuje dukejere nou barogwato ure tamudo. Ainore Pao Kurireu akore.
HEB 4:5 Mare nouia Pao Kurireu bataru akore jamedu: – Imagore ei etaregodumodukaie imode maku etaiwu moto ka rugadu jii toro. Imoduie edo tamudo nou moto keje mare aino imodukaie edo tamudo pugeje. Ainore Pao Kurireu akore.
HEB 4:6 Nou meardure nou Pao Kurireu bataru pemegareu boetojiwuge emeartorukare nou bataruji dukodire Pao Kurireu ukare edo tamudo rugadu. Dukodire ure nou tuwadaru pemegareu maku iage etai emeartoruwo ji.
HEB 4:7 Dukodire toro ia joru keje ia meri keje pugeje makore boe eimijera kurireu Daviji uwo nouia boe ewie. Akore: – Tameardure Pao Kurireu bataruji dukodire tameartoru bokwakaba ji awu meriji rugadu. Pao Kurireu akore: “Awu meriji” aino tuwo nou boe erduwado tumoduie edo tamudo nono turoiago nou mariguduwuge Israel dogei dumogadure.
HEB 4:8 Josué ure Israel doge etarego nou Pao Kurireu ure maku etaiwu moto ka. Emugure keje. Mare Josué ukare nou Israel doge edo tamudo nono Pao Kurireu meardae mogadure. Dukodire Pao Kurireu makore pugeje toro ia joru keje ia meri keje pugeje. Akore tumoduie meartorure puduiwuge edo tamudo ia meri keje.
HEB 4:9 Dukodire parduware meartorure Pao Kurireu jiwuge emode tamudo rugadu. Emode tamudo tumaragodae piji nono Pao Kurireu ro mogadure. Pao Kurireu maragodure jiwu meri oto padure seis tuwo moto towuje dukejere ure iado. Nou barogwato ure tamudo nou tumaragodae piji.
HEB 4:11 Dukodi čare pawo paragado pai pamaragodu pemegawo jii toro rugadu Pao Kurireu uwo pado pagamudo jamedu. Parokawo nono nou mariguduwuge Israel doge ero mogadure. Emagere emeartorukare Pao Kurireuji dukodire ukare edo tamudo rugadu.
HEB 4:12 Pao Kurireu makore jiboe ure nono tariga kurireu meridodure pudogidu umogadure. Mare tariga ji karega inagoino. Pao Kurireu makore jiboe umode parduwado parore jiboeji rugadu. Du jire inagoino. Umode parduwado pameardae jamedu boeji pemegare duji pegare duji. Boe eroiwakare tuwo tumeardae biado Pao Kurireu piji. Boe eragakare Pao Kurireu makore jiboeji. Pao Kurireu makore jiboe rakare rugadu. Makomode pameardaere jiboeji jetumode pudui rugadu. Du jire inagoino.
HEB 4:13 Boe eroiwakare tuwo tumeardae biado Pao Kurireu piji. Pao Kurireu jorduware boe emeardae jamedu boeji. Jorduware boe jamedu boeji moto keje baru tada jamedu. Dukodire pawadrarodumodukare parore jiboeji Pao Kurireu biagai. Pareadodumode rugadu parore jiboeji Pao Kurireu biagai rugadu.
HEB 4:14 Dukodi čare pameartoruwo Jesusji rugadu. Pagawo pagera ra piji. Jesus uture kuri Pao Kurireu ae rugadu. Pao Kurireu Onaregedu nure ema rugadu. Ure paro pegareu mori maku Pao Kurireu ai rugadu. Dukodire ure boe enomea maku Pao Kurireu aiwu pagimijera kurireu nure ema rugadu.
HEB 4:15 Paragakare mare Jesus okudure pagabo rugadu. Jorduware nou pagoda pegareuji. Kodure ji jamedu. Bope eimijera Satanás ure turokogado Jesusji jamedu nono turore pai dumogadure tuwo Jesus ro pegado mare Jesus biapagakare ji. Jesus ro pegakare rugadu.
HEB 4:16 Aino čare Jesus rakojere nono Pao Kurireu apo tumagowo ji pabaru tabo. Dukodi čare pabogurukawo. Pamagowo toro baruto Pao Kurireu bagai rugadu. Pao Kurireu okudugodumode pagabo rugadu. Emare umode turo pemegado pai. Boe rakare pai dukeje umode tugera maku pagai rugadu.
HEB 5:1 Marigudu Pao Kurireu makore Israel dogei ewo tugeragu imei emaragoduwo Pao Kurireu uwai tada Pao Kurireu utugaregewo emage nou Israel doge eparu tabo ewo nou Israel doge enomea maku Pao Kurireu ai. Nono Pao Kurireu utugarege eimijera kurireu mode tu tu je jamedu. Nou eimijera kurireu umoduie boe egu barogo kowu tuwo maku Pao Kurireu ai boe ero pegareu moriče. Maragodaewo tu nouče rugadu.
HEB 5:2 Mare nou eimijera kurireu raka bokware jamedu nono tuwobe emogadure. Dukodire jorduware togudugoduwo boebo turo butuguwo jorduwa bokwareugei, ro pegareugei.
HEB 5:3 Nou eimijera kurireu ro pegare jamedu nono tuwobe emogadure jamedu. Dukodire ure boe egu barege ekowu tuwo maku Pao Kurireu ai boe ero pegareu moriče turo pegareu moriče jamedu.
HEB 5:4 Boe karega ere tugeragu nou boe eimijera kurireuji. Pao Kurireu koiare ure tugeragu nou imeduji tudugare boe eimijera kurireuwo ema, uwo nou tapira kodu kowu tuwo maku Pao Kurireu ai boe ero pegareu moriče. Nou Pao Kurireu ure tugeragu jiwu boetojiwu iere Arão.
HEB 5:5 Ainore Pao Kurireu rore tuwo tugeragu Jesusji jamedu. Jesus Cristo karega okwamagudure boe eimijerawo pudumi. Pao Kurireu ure tugeragu ji boe eimijera kurireuwo ema uwo boe enomea remawu maku Pao Kurireu ai. Pao Kurireu makore tonaregeduji. Akore: – Itonaregedu nure aki. Awu meriji ire Ao Kurireudo imi. Ainore Pao Kurireu akore.
HEB 5:6 Pao Kurireu makore ia tuwadaruji pugeje. Akore: – Aromode nono Melquisedeque ro mogadure. Amode boe enomea maku inai jii toro rugadu. Nou amaragodae akedumodukare rugadu. Ainore Pao Kurireu akore tonaregeduji.
HEB 5:7 Jesus rakojere woe moto keje dukeje makore baruto Tuo Kurireu bagai tragudu tabo Pao Kurireu uwo tudo tuginorudo tuwi piji. Mare aidure tumeartoruwo rugadu Tuo Kurireuji rugadu. Dukodire ure tudo nono Pao Kurireu utugare mogadure. Nono Pao Kurireu meardure nou tonaregedu makore pudui jiboeji.
HEB 5:8 Pao Kurireu onaregedu nure ema rugadu. Mare boe pegare ji rugadu. Dukodire jorduwagodure tumeartoruwo Tuo Kurireuji rugadu.
HEB 5:9 Nono Pao Kurireu ure tonaregedu pemegado rugadu nou tonaregedu uwo boe ekinorudo. Dukodire boe emeartorumode ji dukeje umode nou boe ekinorudo ewarigudukawo bope doge eda kejewu joru pegareuto. Umode emugudo Pao Kurireu apo du akedumodukare rugadu.
HEB 5:10 Nono Pao Kurireu ure boe ewie rugadu nou tonaregedu rore jiboeji. Romoduie nono Melquisedeque ro mogadure jii toro rugadu. Ure boe enomea maku Pao Kurireu aiwu boe eimijera kurireu moduie ema rugadu. Makomoduie Pao Kurireuji boe eparu tabo tu tu je, jii toro rugadu.
HEB 5:11 Čewadaru kurire kimo čewo tarduwado. Mare nou čewadaru rakare dukodire čeroiwakare čewo tarduwado ji. Tagaora rakare tarduwawo boeji.
HEB 5:12 Marigudu tameardure Pao Kurireu bataruji. Tarduwawo ji marigudu mare tarduwakare. Dukodire taroiwakare tawo ia boe erduwado Pao Kurireu bataruji. Tagaidure tu nou tarduware jiwu Pao Kurireu bataru rogu kurikareuji. Tare nono boe etore emogadure. Kudure mokuru kuru čewuge nure tagi. Mare mokuru kuru ji karega inagoino. Pao Kurireu bataru kurikareu jire inagoino.
HEB 5:13 Boe etore emagere ekudumode mokuru kuruče. Imere aremere enogwagemode boe eke remawuji. Tarduware jiboe ure nono mokuru kuru mogadure dukodire tare nono boe etore emogadure. Mare mokuru kuru ji karega inagoino. Boe etore ei karega inagoino. Tarduware tu Pao Kurireu bataru rogu kurikareuji. Tarduwakare Pao Kurireu bataru kurireuji. Dujire inagoino. Boe erduwamode Pao Kurireu bataru kurireuji rugadu dukeje erduwamode boe ero pemegareu ure tuginai boe ero pegareu piji duji. Erduwamode tuwo tugera ra turo pegareu piji. Erduwamode tuwo tugeragu boe ero pemegareuji tu tu je.
HEB 6:1 Pawiagodukawo parduware jiwu Pao Kurireu bataru piji. Mare aino ča parduwagoduwo rugadu Pao Kurireu bataru rugadu boeji. Marigudu boe ere tawie Pao Kurireu bataruji. Ere tawie tamodukaie taginorudo taro pemegareu tabo. Ere tawie tawo tagera ra taro pegareu piji. Egore tameartorumoduie Jesusji dukeje umoduie taginorudo bope doge eda kejewu joru pegareu piji. Tameartorumoduie dukeje tamagomoduie tagao pegododuwo. Boe emoduie tugera bu tawugeje tumagowo baruto Pao Kurireu bagai tabaru tabo. Pao Kurireu umoduie meartorure puduiwuge eewodudo pugeje. Pao Kurireu umoduie meartorukare puduiwuge ewarigu toro bope doge eda kejewu joru pegareuto rugadu eduwo nou joru tada jii toro rugadu. Awu Pao Kurireu bataru jire boe ere tawie marigudu. Ča tawiagodukaba piji. Mare ia kimore. Aino čare itaidure iwo tarduwado ia Pao Kurireu bataruji pugeje. Pao Kurireu meardaemode tuwo tugera maku pagai dukeje tarduwagodumode Pao Kurireu bataru jamedu boeji rugadu.
HEB 6:4 Boe emode tugera ra tumeartorure Jesus jitu piji dukeje ekiarigodumodukare turo pegareuji pugeje. Emodukare tugirimi tumeartorure Jesus jitu ka pugeje. Erduware Pao Kurireu bataru pemegareuji marigudu tumeartoruwo Jesusji. Erduware marigudu baru tadaboe pemegare duji. Pao Kurireu Uwari makudure etai marigudu.
HEB 6:5 Erduware marigudu Pao Kurireu bataru pemegare pudui duji. Erdure marigudu Jesus ro rakareuji. Erduware umode tugirimi mato pugeje moto ka duji. Nou rugadu boe jire erduware marigudu.
HEB 6:6 Mare nou boe emode tugera ra nou jamedu boe piji tumeartorure Jesus jitu piji dukeje nou boe ekiarigodumodukare turo pegareuji pugeje, emodukare tugera ra turo pegareu piji pugeje. Turo pegareu tabore emode Jesus udo nono bitodureu mogadure pudai pugeje. Turo pegareu tabore emode ia boe emeardae pegado Jesusji pugeje.
HEB 6:7 Pao Kurireu ure bubutudo moto ka tuwo moto pegodo boe eno boepa tadaboe botu pemegawo. Boe eke kurimode nou boepa tada dukeje nou boepa pemeganure. Mare botoguru botumode boepa tada tu rugadu umode rorogodudo dukeje nou boepa peganure. Boe emode botoguru ukwa tawuje boe ewo kowu tuwo botoguru akedudo. Ča boe ere nono boepa mogadure jamedu. Mare boepa ji karega inagoino. Boe ero jire inagoino. Boe ero pemegareu bokwamode. Boe ero pegareu mode tu je dukeje ekodu puredumode Pao Kurireu mako pegawo ei. Dukodi čare umode ewarigu bope doge eda kejewu joru pegareuto rugadu. Dujire inagoino. Mare boe eromode nono Pao Kurireu meardae mogadure dukeje Pao Kurireu mako pemegamode ei. Ro pemegamode ei. Dujire inagoino.
HEB 6:9 Awu čemagore jiboe rakare tai mare čemedage nure tagi. Čemeardu kurire tai. Tagiarigodukaba. Čerduware tarore jiboeji. Čerduware tameartorure Jesus jituji dukodire boe pemegamode tai rugadu.
HEB 6:10 Pao Kurireu ro jetorore rugadu. Meardaemode tai boe remawu tabo. Biagodumodukare taro pemegare jiboe piji. Tare tagera maku meartorure Jesus jiwuge etai tu tu je. Tameardu kurire Pao Kurireuji dutabore taroino. Biagodumodukare nou inodu piji rugadu.
HEB 6:11 Čedaidure nou tarore jiboeji rugadu. Dukodire inagoino tai. Tagaba tagera ra nou taro pemegare jiboe piji jii toro rugadu. Tarodo aino tagaidu tabo rugadu. Dukejere nou tameartorure jiwu Pao Kurireu makore tai jiboe jetumode pudui rugadu.
HEB 6:12 Tagera kiarikaba. Tarodo nono nouia meartorure Jesus jiwuge ero mogadure. Ekiarigodukare. Epagare Pao Kurireu bagai tiegare tabo tugawo tugera ra tumeartorure jitu piji. Nono toro ia meri keje Pao Kurireu makore tumoduie boe maku etaiboe makudumode etai rugadu.
HEB 6:13 Marigudu Pao Kurireu makore Abraãoji tumoduie Abraão oredo. Mare paga karega. Ure Abraão biedu pemegado turomode jiboeji rugadu. Pao Kurireu kurire boe jamedu boe piji. Dukodire makokare iaboe ie tabo tuwo Abraão jorduwado tumode tumagore jiboe jetudo pudui duji. Makore tugie tabo rugadu tuwo Abraão jorduwado tumode tumagore jiboe jetudo pudui rugadu.
HEB 6:14 Akore: – Imode imagore jiboe jetudo pudui rugadu. Imode boe pemegado ai. Imode akore etuwobe emagado rugadu. Ainore Pao Kurireu akore.
HEB 6:15 Abraão kiarigodukare. Upagare tiegare tabo nou Pao Kurireu makore puduiboe bagai. Upagare tiegare tabo jii nou Pao Kurireu makore puduiboe jetuwo pudui du ka rugadu. Nono Pao Kurireu ure tumagore jiboe maku Abraão ai rugadu.
HEB 6:16 Pagi pamode boe erduwado ia boe eimijera kurireu ie tabo pamode pamagore jiboe jetudo pudui duji dukeje boe emagomodukare pawadaru jipagi pugeje.
HEB 6:17 Ainore Pao Kurireu rore jamedu. Aidure tuwo boe erduwado rugadu. Tumodukaie ia tumeardae tawuje pugeje. Tumoduie tumagore jiboe jetudo pudui rugadu. Dukodire makore tugie tabo nou boe ewiagai erduwawo rugadu nou tumagore jiboe jetumoduie pudui rugadu.
HEB 6:18 Pao Kurireu ie akedumodukare. Pao Kurireu makore jiboe akedumodukare jamedu. Jetumode pudui rugadu. Dukodire parduware Pao Kurireu batrarodumodukare rugadu. Nono parduware umode paginorudo duji. Dukodire pagiarigodu akedure. Dukodire pare paragado pai. Dukodire pamodukare pagera ra pameartorure Jesus jitu piji rugadu. Nou parduware jiboe umodukare tudawuje pabiji. Jesus umode paginorudo rugadu. Emare rakojere baru tada Pao Kurireu uwai remawu tada. Paroiwakare pawo paro pegareu morido mare Jesus ure tugu redo paro pegareu moriče. Ure nou turo reko toro baruto Pao Kurireu ae. Makore meartorure puduiwuge eparu tabo tu tu je Pao Kurireuji nono Melquisedeque ro mogadure. Mako kimore Pao Kurireuji nou meartorure puduiwuge eparu tabo jii aino rugadu. Makomode eparu tabo jii toro rugadu. Umode meartorure puduiwuge ekinorudo rugadu. Dukodire ure boe enomea maku Pao Kurireu aiwu boe eimijera kurireu nure ema jii toro rugadu.
HEB 7:1 Ainore Melquisedeque rore. Mariguduwuge Salém ba kurireu kejewuge boe eimijera kurireu nure ema. Nou mariguduwuge ere tomea maku nou Melquisedeque ai tu tu je uwo maku Pao Kurireu ai. Mariguduwuge Judeu doge etuo Abraão rugodure boe eimijerage pegareugei. Mare Abraão o tugobaigarege eragare nou boe eimijerage pegareuge eno tugobaigaregei dukodire ere etagedudo. Nono Abraão ure tugirimi nou turugodureu piji tuibagi tuwai ka nou to tugobaigaregebo, nou ture tugeragu jiboe tabo. Nou boe eimijerage pegareuge enoere. Dukodire Abraão ure tugeragu nou enoeji epiji tuwo tugirimi tabo tuwai ka.
HEB 7:2 Abraão kodure awaraji tugobaigaregebo dukeje etaregodure nou Melquisedeque togi. Nono Melquisedeque mako pemegare Abraãoji boe pemegamoduie Abraãoji. Nono Abraão ure ia nou ture tugeragu jiboe maku Melquisedeque ai tomeawo nono makudure Pao Kurireu aiboe umogadure tu tu je. (Nou jaoboe egore ro jetororeu boe eimijera kurireu nuie ema dukodire egore Melquisedeque aino ji tuwadaru tabo. Egore boe emugu pemegare apowu boe eimijera kurireu nuie ema jamedu.)
HEB 7:3 Boe erduwakare Melquisedeque uoji učeji. Boe erduwakare nouia uwobei jamedu. Boe erduwakare nou Melquisedeque boture kejewu meriji. Erduwakare bire kejewu meriji. Dukodire ure nono Pao Kurireu Onaregedu mogadure. Kodire boe ere tomea maku tu tu ai du akedukare jii aino.
HEB 7:4 Iwo tarduwado imedu kurireu nure ema duji. Jao pawobe etuo kurireu Abraão ure ture tugeragu jiboe kado puiato. Dukeje ure ia maku Melquisedeque ai uwo tomea maku Pao Kurireu ai.
HEB 7:5 Toro ia meri keje ia Abraão uwobe etonaregedu iere Levi. Pao Kurireu ure Israel doge eno bakaru maku Moisés ai dukeje nou bakaru makore nou Levi uwobei emaragoduwo Pao Kurireu ai emagowo tu tu Israel dogei ewo toe kado puiato ewo ia maku pudai tomeawo Pao Kurireu ai jamedu. Nou Levi uwobe ime eiamedu boe emaragodumode tu Pao Kurireu ai rugadu jii toro rugadu.
HEB 7:6 Mare Melquisedeque uwobe karegure emage. Abraão uwobere emage. Mare Abraão ure toe kado puiato tuwo ia maku Melquisedeque ai uwo tomea maku Pao Kurireu ai. Dukejere Melquisedeque mako pemegare Abraão paru tabo boe pemegawo Abraãoji. Pao Kurireu makore marigudu turo pemegamoduie Abraãoji. Mare nouia meri keje Melquisedeque mako pemegare Abraão paru tabo boe pemegawo ji.
HEB 7:7 Boe erduware marigudu mako pemegare boe eparu tabowu bataru kurire nou tumagore jiboe kori. Dukodire Melquisedeque bataru kurire Levi bataru kori. Mare Abraão ure toe kado puiato tuwo ia maku Melquisedeque ai uwo tomea maku Pao Kurireu ai. Mare Levi botukare raga. Boe egore nou Levi metu kimoie ia Abraão onaregedu tada. Botumoduie toro ia meri keje. Dukodire boe egore nou Levi metuie tuo Abraão tada. Dukodire Abraão ure toe kado puiato Melquisedeque ai dukeje Levi jamedu ure maku Melquisedeque ai meture nou Abraão tada kodi. Dukodire parduware Melquisedeque bataru kurire Levi bataru kori. Mare toro ia meri keje Levi boture. Nono uwobe emaragodure Pao Kurireu ai jamedu. Emagore boei ewo toe kado puiato ewo ia maku pudai tuwo tomeado Pao Kurireu ai. Mare nou Levi uwobe eiamedu boe ewire tu tu je. Mare nou Melquisedeque čare boe erduwakare bire kejewu meriji. Ainore Pao Kurireu bataru akore. Dukodire parduware Melquisedeque bataru kurire Levi bataru kori, Levi uwobe ewadaru kori jamedu.
HEB 7:11 Ainore Pao Kurireu rore rugadu. Pao Kurireu ure Israel doge eno bakaru maku etai. Nou bakaru makore nou Levi uwobei emaragoduwo Pao Kurireu ai, emagowo Israel dogei ewo toe kado puiato ewo ia maku pudai tomeawo Pao Kurireu ai jamedu. Ainore Israel doge eno bakaru akore. Dukodire nou Levi uwobe erore aino rugadu. Mare nou Levi uwobe eiamedu boe ewire tu tu je. Ia erore jiboe ukare turugadu jamedu. Dukodire Pao Kurireu ure ia imedu ro tuginaiwu mugudo emugato. Nou imedu tuginaiwu rore nono Melquisedeque ro mogadure. Rokare nono Levi onaregedu Arão uwobe ero mogadure pugeje.
HEB 7:12 Ča Jesus jire Pao Kurireu akoino. Judá uwobe nure ema. Levi uwobe karegure ema. Marigudu Israel doge ekare ia toe maku nouia Judá uwobe ai uwo tomea maku Pao Kurireu ai. Judá uwobe ekare boe enomea maku Pao Kurireu ai rugadu jii aino. Emaragodukare Pao Kurireu uwai tada. Boe ere ia toe maku tu Levi uwobe etai ewo tomeado Pao Kurireu ai tu tu je. Ainore Pao Kurireu ure maku Moisés aiwu bakaru akore rugadu. Mare aino čare Pao Kurireu makore Judeu dogei erokawo aino pugeje. Eromode jiboe ure tuginai pugeje nou mariguduwuge tuwobe ero piji. Aino čare Pao Kurireu ure nou Judeu doge eno bakaru udo tuginai pugeje Judeu doge ewo toe maku Pagimijera Jesus ai pugeje, ekawo toe maku Levi uwobe etai rugadu.
HEB 7:15 Dukodi čare parduware rugadu Jesus kurire Levi uwobe epiji duji. Jesus aregodure boe etae. Rore nono Melquisedeque ro mogadure.
HEB 7:16 Levi uwobe mode ema dukeje Jesus romode nono Levi uwobe ero mogadure. Romode nono Judeu doge eno bakaru umogadure. Mare Levi uwobe karegure ema. Levi uwobe eiamedu boe ewire tu tu je. Mare čare Jesus jewodure pugeje. Bimodukare pugeje rugadu jii toro. Dukodire Pao Kurireu ure nou tumaragodae tawuje Levi uwobe epiji tuwo maku Jesus ai rugadu. Dukodire Jesus maragodumode Pao Kurireu ai boe eparu tabo rugadu. Jesus makomode Pao Kurireuji boe eparu tabo rugadu.
HEB 7:17 Padure bapera kejewu Pao Kurireu bataru akore: – Amaragodumode inai boe eparu tabo jii toro rugadu nono Melquisedeque ro mogadure. Du akedumodukare jii toro rugadu. Ainore Pao Kurireu akore.
HEB 7:18 Dukodire nou mariguduwuge pawobe erore jiboe akedure. Nou erore jiboe rakakare tuwo boe ekinorudo. Dukodire boe emodukare ia toe maku Levi uwobe etai pugeje.
HEB 7:19 Boe emeartorure Moisés ure maku etaiwu bakaruji tuwo ia toe maku Levi uwobe etai mare nou bakaru ukare ero pemegado. Mare aino čare boe erduware ia bataru pemegareuji tumeartoruwo ji. Boe emeartorumode ji dukeje edu jaemodukare Pao Kurireu piji pugeje.
HEB 7:20 Ia pugeje. Pao Kurireu makokare tumoduie tuwadaru jetudo pudui Levi uwobe etai. Emaragodure pudai mare makokare tumoduie tuwadaru jetudo pudui etai.
HEB 7:21 Mare Jesus jire Pao Kurireu makore tugie tabo tumoduie tuwadaru jetudo pudui ai rugadu. Akore: – Marigudu imagore ai ikie tabo rugadu amaragodumoduie inai boe eparu tabo tu tu je jii toro rugadu. Imode imagore jiboe jetudo pudui rugadu. Iwiagodumodukare piji. Ainore Pao Kurireu akore Jesusji. Tumeardae maiwu jire akoino.
HEB 7:22 Nou Pao Kurireu makore Jesus jiwu meardae maiwu jeture pudui rugadu. Nono Jesus maragodae koiare Pao Kurireu umodukare tuwadaru mekido pugeje. Nou Pao Kurireu meardae pemegare nou meardae boetojiwu piji rugadu. Dukodi čare Jesus rore jiboe pemegare Levi uwobe ero piji.
HEB 7:23 Levi uwobe emagare tumago tabo baruto boe eparu tabo. Eiamedu boe ewire nou tumaragodae piji. Dukodire ia Levi uwobe emugure emugato tu tu je.
HEB 7:24 Mare Jesus bimodukare pugeje. Dukodire Jesus maragodae makudumodukare ia boe etai pugeje.
HEB 7:25 Dukodire tu Jesus roiware tuwo boe ekinorudo. Ia bokware. Nono boe emeartorumode Jesusji makowo eparu tabo Pao Kurireu bagai dukeje Jesus umode ekinorudo rugadu. Rakojere nono Pao Kurireu apo rugadu. Okwamagudumode Pao Kurireuji nou meartorure puduiwuge eparu tabo rugadu tu tu je. Maragodae nure nou inoduče dukodi.
HEB 7:26 Dukodire makore boe eparu tabowu kurireu nure ema rugadu. Jesus jorduware pagaidure jiboeji rugadu okwareu boeji jamedu. Jesus ro pegareu bokware. Ro pemegare tu rugadu. Ro pemegareu nure ema rugadu. Dukodire makore pabaru tabo rugadu Pao Kurireu bagai nou okwareboe bagai rugadu. Pao Kurireu ure Jesus udo tuginai ro pegareuge epiji. Pao Kurireu ure Jesus rutudo baruto rugadu.
HEB 7:27 Levi uwobe emaragodure Pao Kurireu ai boe eparu tabo tu tu je. Mare ere ia boe egu barogo rogu bito tuwo nou barogo ku redo turo pegareu moriče boetoji. Ainore erore meri jameduji tu tu je. Dukejere ere ia boe egu barogo rogu bito pugeje tuwo ku redo pugeje nouia boe ero pegareu moriče jamedu. Ainore erore meri jameduji tu tu je. Ainore erore tumaragoduwo Pao Kurireu ai boe eparu tabo tuwo enomea maku Pao Kurireu ai. Mare Jesus rokare nono nou Levi uwobe ero mogadure. Ukare ia boe egu barogo bito. Jesus ure tumagu tuwidoduwo. Ukare boe egu barogo ku redo. Ure tugu redo. Ure redo boe eiamedu boe ero pegareu moriče rugadu. Nou rore inodu boe moriče ure turugadu rugadu. Dukodire bimodukare pugeje. Nou mori ure mitotu je. Pemegamode jii toro rugadu. Romodukare nono nou boe ero mogadure.
HEB 7:28 Moisés ure maku Israel doge etaiwu bakaru makore ei ewo tugeragu Levi uwobe imei nou ure boe enomea maku Pao Kurireu aiwugewo emage. Mare eragakare tuwo turo pegareu barigu tubiji jamedu. Mare nou Moisés ure Israel doge eno bakaru maku etai dukeje toro ia meri keje Pao Kurireu makore tonaregeduji tumoduie tugeragu ji uwo boe enomea maku pudai. Pao Kurireu makore tugie tabo tumoduie nou tumeardae maiwu jetudo pudui rugadu. Dukodire nou ure boe enomea maku Pao Kurireu aiwuge eimijera kurireu nure Jesusče rugadu jii toro rugadu. Nono ča Pao Kurireu ure tonaregedu rakado ro pegakawo. Ro pegamodukare jii toro rugadu. Dukodire Pao Kurireu onaregedu pemegare rugadu nou Levi uwobe epiji rugadu.
HEB 8:1 Jesus ure paro pegareu mori maku Pao Kurireu ai rugadu. Dukodire ure boe enomea maku Pao Kurireu aiwu boe eimijera kurireu remawu nure ema rugadu. Awu atugoreboe tabore inure tawie rugadu. Jesus mugure baru tada Pao Kurireu ukana pemegareu jagwai. Boe eimijera kurireu nure Pao Kurireuče rugadu. Mugure boe eimijera kurireu muga ira keje rugadu.
HEB 8:2 Ča Jesus maragodure nono Pao Kurireu uwai remawu tada baru tada. Woe moto keje boe ere ia Pao Kurireu uwai towuje. Mare boe ekare nou baru tadawu Pao Kurireu uwai remawu towuje. Pagimijera Jesus emare ure towuje rugadu baru tada.
HEB 8:3 Marigudu Judeu doge ere tugeragu ia Levi uwobe imei ewo Judeu doge enomea maku Pao Kurireu ai. Ere boe egu barege ewido. Ere nou boe egu barege eku redo tu tu je boe ero pegareu moriče nou mori makuduwo Pao Kurireu ai.
HEB 8:4 Erore aino woe moto keje. Jesus rakojemode woe moto keje dukeje ure boe enomea maku Pao Kurireu aiwu modukare ema. Nou Levi uwobe erore aino marigudu nono nou Moisés ure maku Judeu doge etaiwu bakaru boetojiwu umogadure. Mare boe remawu ji karega eroino. Boe remawu jire Jesus roino baru tada rugadu. Nou Levi uwobe emaragodure woe moto keje Pao Kurireu uwai tada. Baru tada karega. Moisés rakojere tori aogeje dukeje Pao Kurireu ure Moisés jordudo nuba nou baru tadawu tuwai remawu ure. Pao Kurireu makore Moisesji uwo tuwai towuje moto keje jamedu uwo udo nono tuiordure jiwu bai mogadure. Nono nou Levi uwobe emaragodure tu nou moto kejewu Pao Kurireu uwai ja tada. Emaragodaere nono Pao Kurireu maragodae mogadure. Mare remawu karega. Remawu rugadu mugure baru tada. Nou Levi uwobe emaragodukare nou baru tadawu Pao Kurireu uwai remawu tada. Mare Jesus rakojere nou baru tadawu Pao Kurireu uwai remawu tada rugadu. Dukodire boe remawu jire Jesus roino nono. Rore jiboe pemegare nou Levi uwobe erore jiboe kori rugadu. Dukodire nou Jesus aregodure tabowu bakaru maiwu pemegare nou Moisés ure maku Judeu doge etaiwu bakaru boetojiwu piji Pao Kurireu ro pemegawo boei rugadu. Nou bakaru maiwu makore jiboe pemegare nou bakaru boetojiwu piji rugadu.
HEB 8:7 Nou bakaru boetojiwu pemegamode dukeje Pao Kurireu umodukare ia tumeardae maiwu maku boe etai pugeje eno bakaruče. Mare nou mariguduwuge emeartorukare nou Pao Kurireu meardae boetojiwuji. Nou meardae boetojiwu ukare boe ero pemegado. Dukodire Pao Kurireu mako pegare ei. Mako pegare nou ture maku boe etaiwu bakaru boetojiwuji. Nou Pao Kurireu makore jiboe padure bapera keje. Akore: – Toro ia meri keje imode ia imeardae maiwu maku Israel doge etai eno bakaruče emeartoruwo ji. Israel moto kejewuge etuwobeire inagoino. Judá moto kejewuge etuwobeire inagoino jamedu.
HEB 8:9 – Nou imeardae maiwu umodukare nono nou boetojiwu mogadure. Ire nou mariguduwuge Israel doge etawuje Egito moto piji dukeje ire nou imeardae boetojiwu maku etai eno bakaruče. Mare emeartorukare nou bakaruji. Dukodire iro pemegakare ei jamedu.
HEB 8:10 – Mare aino ia meri keje imode ia imeardae maiwu maku Israel doge etai eno bakaruče pugeje. Imode nou boedo tuginai etaiduwo tumeartoruwo i taidu tabo. Imode iwadaru tugu etaorato. Erduwamode imeardaeji rugadu. Erduwamode iroji rugadu. Dukodire emeartorumode tu i. Iwobe mode emage rugadu.
HEB 8:11 – Boe eiamedu boe erduwamode i rugadu. Boe eimijerage kurireuge erduwamode i. Boe etugarege erduwamode i jamedu. Dukodire boe emodukare pu jorduwado i pugeje. Boe emodukare tuwobe erduwado i pugeje. Boe emodukare mugure pudabowuge erduwado i pugeje.
HEB 8:12 – Imode ero pegareu jamedu boe barigu epiji. Iwiagodumode ero pegareu jamedu boe piji rugadu. Dukodire imodukare edo turo pegareu morido.
HEB 8:13 Ainore Pao Kurireu akore marigudu tuwo boe ewie tumoduie ia tumeardae maiwu maku boe etai eno bakaruče. Nou bataru tabore Pao Kurireu ure nou bakaru boetojiwu akedugodudo. Dukodire akedumode kuri je rugadu.
HEB 9:1 Nou Pao Kurireu ure maku Israel doge etaiwu bakaru boetojiwu ure erduwado ewo tubu jodo tumago pemegawo Pao Kurireuji woe moto keje. Ure erduwado tuwo ia bai rogu pemegado moto keje Pao Kurireu uwaiče jamedu boe emago pemegawo Pao Kurireuji nono nou bai rogu ja tada.
HEB 9:2 Dukodire nou boe ere ia bai rogu rakodo tapira biri tabo. Nono ere ia areia kurireu jado nou bai oiagajeje tuwo ia ai kurido tuwo ia ai biagado. Nou areia kurireu motudure rugadu dukodire akedukare rugadu. Pegamodukare rugadu. Ere nou bai ja boe iedo. Nou bai ja kurireu jire egore: “Bai Tuginaiwu” aino. Nou bai ja biagareu jire egore: “Pao Kurireu Mugure Kejewu Bai Tuginaiwu” aino. Nou egore Bai Tuginaiwu aino jiwu ja tadare ere iaboe pemegado jorugu mugače. Ere ia ira pemegado jamedu nou Bai Tuginaiwu ja tada ture maku Pao Kurireu aiwu amireu muguwo nou ira aogeje.
HEB 9:4 Nou egore Pao Kurireu Mugure Kejewu Bai Tuginaiwu aino jiwu bai ja biagareu tadare ia tori kuieje padure kejewu kamo rogu mugure nono. Ere roreboe kowu nono nou kamo rogu aogeje rowo nou bai ja tada. Nou bai ja biagareu tada nou bai oiadada ia ira mugure jamedu. Tori kuieje padure nou ira keje jamedu. Nou ira ja tadare ia ruwobo rogu meture. Ia buture baru pijiwu boe eke meture nou ruwobo rogu ja tada. Nou ruwobo towujedure tori kuieje tabo jamedu. Nou ira ja tadare nou Arão merure tabowu taibo meture jamedu. Aru boture nou utaibo oto piji. Ere nou utaibo tugu nou ira jato. Nou ira ja tadare nou tori atugoreu meture jamedu. Pao Kurireu ure nou ture maku Israel doge etaiwu bakaru atugo bu nou tori keje. Nou tori meture nou ira ja tada jamedu.
HEB 9:5 Boe ere ia barege etowuje tori kuieje tabo jamedu tuwo emugudo nou ira aogeje. Ere nou barege edo nono Pao Kurireu utugarege baru tadawuge emogadure. Ere nou ture towujewu barege emugudo nou ira aogeje boe erduwawo nonore Pao Kurireu mugure duji. Nou barege ere pobetu je. Ekanare nono kiebarege ekana mogadure. Nou barege ekana jare nono nou ira aogeje. Nou ira aogejere boe ero pegareu mori padure. Boe enomea makudure aiwuge Levi uwobe eimijera kurireu umode boe egu barogo ku bu nou iaboe rogu keje nou ira aogeje tuwo maku Pao Kurireu ai Pao Kurireu biagoduwo boe ero pegareu piji. Ainore nou mariguduwuge Israel doge erore joru jameduji. Mare imodukare tarduwado jamedu boeji.
HEB 9:6 Ainore jaoboe erore. Meri jameduji nou ure Judeu doge enomea maku Pao Kurireu aiwuge emaragodure nou Pao Kurireu uwai kurireu ja tada. Emaragodure Pao Kurireu ai boe eparu tabo.
HEB 9:7 Mare nou Pao Kurireu uwai ja biagareu tore emodukare turemo. Tu eimijera kurireu umode turemo to. Mare meri jamedu karega. Merire mitotu je joru jameduji uwo turemo nou Pao Kurireu uwai ja biagareuto. Umode turemo nouia boe egu barogo ku tabo tuwo nou barogo ku bu nou ira aogeje tuwo maku Pao Kurireu ai turo pegareu moriče, boe eiamedu boe erduwakare jiwu turo pegareu moriče.
HEB 9:8 Mare nou erore jiboe woe awu moto kejeboe jire eroino. Boe eke jire eno bakaru akoino. Boe ere towujewu kurureboe jire eno bakaru akoino. Erore nou moto kejewu Pao Kurireu uwai jiboe jire nou bakaru akoino. Nou boe ere boe egu barogo bito ere nou barogo ku redo tuwo maku Pao Kurireu ai nou moto kejewu bai rogu ja tada boe ero pegareu moriče. Nou moto kejewu Pao Kurireu uwai rakoje kimore dukeje erore aino tu tu je. Mare du inodu tabo nou boe ero pega kimore. Dukodire nou boe erduware nou to bakaru akedumoduie toro ia meri keje. Erduware Pao Kurireu umoduie ia tumeardae maiwu maku boe etai eno bakaruče pugeje tuwo ero udo tuginai pugeje. Mare nou bakaru boetojiwu ure boe erduwado nuba Pao Kurireu meardae maiwu mode boei. Nou bakaru boetojiwu tabore Pao Kurireu Uwari ure parduwado boe eiamedu boe ero pegare dukodire epemegakare tubureduwo Pao Kurireuji nou ero pegare dukodi. Nou bakaru boetojiwu makore boei ekawo turemo nou bai ja biagareuto. Dujire inagoino. Tu nou ure boe enomea maku Pao Kurireu aiwuge eimijera kurireu umode turemo to tu rugadu. Ukaiago turemo to meri jameduji. Meri moduie mitotu je joru jameduji uwo turemo nou Pao Kurireu uwai ja biagareuto. Dukodire boe erduware tubemegakaie tubureduwo Pao Kurireuji. Dukodire boe erduware Pao Kurireu umoduie ia tumeardae maiwu maku boe etai eno bakaruče pugeje tuwo boe epemegado etaregoduwo pudae rugadu.
HEB 9:11 Aino čare Jesus Cristo aregodure. Nou ure boe enomea maku Pao Kurireu ai boe eimijera kurireu nure ema rugadu. Ure boe ero pegareu mori maku Pao Kurireu ai rugadu dukodire ure boe pemegado boei. Mare ure boe ero pegareu mori maku Pao Kurireu ai nou Pao Kurireu uwai remawu tada. Nou inagore jiwu moto kejewu bai rogu tada karega. Boe ekare Pao Kurireu uwai remawu towuje. Pao Kurireu uwai remawu rakojekare ture towujewu moto keje.
HEB 9:12 Mare Jesus Cristo ure turemo nou Pao Kurireu uwai remawu baito Pao Kurireu ae rugadu dukeje uture tugu tabo tuwo tugu maku Pao Kurireu ai boe ero pegareu moriče. Ukare tapira ku maku. Ukare cabrito ku maku. Ure tugu maku boe ero pegareu moriče tuwo boe ekinorudo ero pegareu mori piji ewikawo rugadu ewarigudukawo bope doge eda kejewu joru pegareuto. Nou mori ure turugadu rugadu jii toro rugadu. Jesus Cristo ku makudumodukare pugeje rugadu.
HEB 9:13 Jaoboe ero pegare dukeje nou maragodure Pao Kurireu uwai rogu tadawuge ere ia tapira bito tuwo nou tapira ku barigu boe eiogi tuwo epemegado ero pegareu piji. Emodukare tapira bito dukeje emode cabrito bito tuwo nou cabrito ku barigu boe eiogi nou tapira imedu ku mugato. Ere tapira aredu botugodu kowu tuwo nou ture kowu tapira kodu urugudukudu barigu boe eiogi jamedu tuwo epemegado ero pegareu piji jamedu. Dukodire nou boe epemegare. Mare epemega remawukare. Epemegare tu turowo nou bakaru tadawu boe ero boeji tu rugadu. Mare epemegakare taregoduwo Pao Kurireu ae.
HEB 9:14 Dukodi čare Jesus Cristo ure tugu maku Pao Kurireu ai. Pao Kurireu Uwari ure tugera maku Jesus ai Jesus ro pegareu bokwawo. Dukodire ro pegareu bokware rugadu. Pemegare tuwo tugu maku Pao Kurireu ai boe ero pegareu moriče. Ure tugu maku Pao Kurireu ai dukodire ure pagaora butugugo. Dukodire pagaiwomodukare ia paro bagai pugeje paro pegareu moriče. Paromodukare ia parore jiboeji paro pegareu moriče pugeje. Dukodi čare Pao Kurireu utugarege nure pagi rugadu.
HEB 9:15 Dukodire inagoino. Jesus Cristo ure nou Pao Kurireu meardae maiwu udo turugadu boei. Pao Kurireu makore boe ewagai emeartoruwo pudui. Emeartorumode dukeje Pao Kurireu ro pemegamode ei jii toro rugadu. Du akedumodukare. Mare paga karega. Jesus bire boe ero pegareu moriče dukodire umode boe ekinorudo boe ero pegareu piji. Marigudu boe etaidure tumeartoruwo nou bakaru boetojiwuji mare eroiwakare dukodire ero pegare. Mare aino čare Jesus umode boe ekinorudo nou boe ero pegareu piji rugadu.
HEB 9:16 Boe ewikare dukeje emode tumeardae bu bapera keje tuwo tore erduwado ero pemegawo toeji tuwimode dukeje. Imedu bimode dukeje ore etaiwomode nou tuo meardae padure kejewu baperaji tuiorduwawo turomode tuo oe jituji. Nono eromode nou tuo oeji nono tuo meardae mogadure tuwo nou tuo oe pedo pui. Mare bikare raga dukeje etaiwomodukare nou baperaji. Nou etuo oe boe pedodukare nou torei raga. Oe kimo nure toeče. Ukare pedo torei raga.
HEB 9:18 Dukodire Pao Kurireu makore Israel dogei ewo ia boe egu barogo bito tuwo nou barogo ku redo. Pao Kurireu ure tumeardae boetojiwu maku Israel doge etai eno bakaruče dukodire akoino ei ewo boe egu barogo bito.
HEB 9:19 Moisés makore nou bakaru jamedu boeji nou Israel doge ewiagai erduwawo ji rugadu. Dukejere ure tapira ku barigu ariato pobo tabo. Nono ure mekido pugao. Nono ure ovelha bu kujagureu kogudo ia ipo rogu oto kajeje. Nono ure nou ovelha bu pegodo nou poboto tapira kuto. Nono ure nou ku barigu nou bakaru boetojiwu padure kejewu tori aogeje. Ure nou ku barigu toro nou boe eiogi jamedu.
HEB 9:20 Akore: – Pao Kurireu ure tumeardae maku pagai pago bakaruče pameartoruwo ji. Nou tapira ku tabore pare pageragu nou bakaruji pagoče pameartoruwo ji. Ainore Moisés akore nou boei.
HEB 9:21 Dukejere ure ia ku barigu nou Pao Kurireu uwai rogu ao ka jamedu. Ure ia barigu nou jeture nou bai rogu tadaboe jamedu boe joki jamedu.
HEB 9:22 Nou Pao Kurireu ure maku etaiwu bakaru akore boe ku taboie boe emode boe jamedu boe pemegado. Akore boe ku redodumoduie boe ero pegareu moriče mare redodumodukaie dukeje Pao Kurireu biagodumodukaie boe ero pegare jiboe piji.
HEB 9:23 Nou mariguduwuge Israel doge ere nou ture towujeboe jamedu boe udo nono baru tadawuboe umogadure. Mare boe remawu padure baru tada. Mare nou mariguduwuge Israel doge ere boe egu barogo ku barigu nou ture towujeboe keje tuwo pemegado rakojewo ture towujewu Pao Kurireu uwai rogu ja tada. Boe egu barogo ku redodure mare boe ero pegareu mori remawu karegure ema. Dukodire ia boe ku pemegamode nou boe egu barogo ku kori aregoduwo baruto boe ero pegareu mori remawuče. Jesus Cristo ku jire inagoino. Jesus Cristo ku redodure boe ero pegareu mori remawuče.
HEB 9:24 Dukodire Jesus Cristo ukare tugu reko nou moto kejewu Pao Kurireu uwai rogu ka. Ure reko toro baru tadawu Pao Kurireu uwai remawu ka toro baruto. Aino čare rakojere nono baru tada Pao Kurireu apo tumagowo Pao Kurireuji pabaru tabo.
HEB 9:25 Joru jameduji ure mariguduwuge Israel doge enomea maku Pao Kurireu aiwuge eimijera kurireu imedu ure turemo awu moto kejewu Pao Kurireu uwai ja biagareuto ia boe egu barogo ku tabo. Awu bai ja biagareu iere Pao Kurireu Mugure Kejewu Uwai Tuginaiwu aino. Rore aino dukeje boeiwu joru keje rore aino pugeje. Rore aino joru jameduji. Mare Jesus Cristo rokare aino. Ukare tugu maku aino tuwo maku pugeje toro ia meri keje pugeje.
HEB 9:26 Romode aino dukeje umode tumagu tuwidoduwo pugeje tu tu je Pao Kurireu ure moto to dupiji jii toro awu moto akedumode du ka. Mare rokare aino. Ure tumagu tuwidoduwo tuwo tugu maku Pao Kurireu ai boe ero pegareu moriče. Dure mitotu je. Bimodukare pugeje jii toro rugadu.
HEB 9:27 Boe eiamedu boe ewimode rugadu dumode mitotu je jamedu. Boe ewire dukeje Pao Kurireu makomode ei turomode ei duji erore jiboe moriče. Emodukare tugirimi tuibagi pugeje.
HEB 9:28 Nono Jesus Cristo bire jamedu dure mitotu je. Bire boe ero pegareu moriče tuwo boe ero pegareu barigu epiji. Aregodumode pugeje mare tuwiwo kodi karega. Aregodumode tuwo meartorure puduiwuge ekinorudo.
HEB 10:1 Mariguduwuge Israel doge ere nou to bakaru boetojiwu makore jiboe towuje. Nou ere towujewu ure nono baru tadaboe remawu mogadure. Mare baru tadaboe jamedu boe karega. Nou mariguduwuge ere towujewu ure boe erduwado bega bega baru tadawu boe remawu boeji. Dukodire boe erduware mare erduwa pemega jokodukare baru tadawu boe remawu boeji. Dukodire inagoino. Jaoboe emeartorure nou bakaruji tuwo tubu jodo tumago pemegawo Pao Kurireuji dukodire ere boe egu barege ewido turo pegareu moriče. Mare nou erore jiboe ukare epemegado.
HEB 10:2 Nou erore jiboe umode epemegado ewo tubu jodo tumago pemegawo Pao Kurireuji. Nou erore jiboe umode ero pegareu barigu epiji dukeje emode tugera ra nou turo pegareu jamedu boe piji rugadu. Dukodire erduwamode turo pegareu bokware pugeje duji. Nou erore jiboe umode etaora udo tamudo turo pegareu piji. Nono emodukare ia boe egu barogo bito pugeje nou turo pegare jiboe moriče pugeje.
HEB 10:3 Mare erokare aino. Ere boe egu barege ewido tu tu je rugadu turo pegareu moriče. Dukodire nou bitodureu boe egu barogo ure ewiabutudo ero pegareu keje tu tu je. Dukodire erduware turo pega kimore jii aino duji.
HEB 10:4 Dukodire inagoino. Nou tapira ku, nou cabrito ku umodukare boe ero pegareu barigu boe epiji rugadu. Umodukare boe ero pegareu morido rugadu.
HEB 10:5 Dukodire Jesus Cristo makore Tuo Kurireuji. Ure tudo turugadu taregoduwo mato moto ka dukeje makore tuoji. Akore: – Akaidukare boe egu barogo kuji boe ero pegareu moriče pugeje. Akaidure ikoduji ikuji.
HEB 10:6 – Boe ere boe egu barege ekowu kamo keje turo pegareu moriče mare akaidukare ji. Boe ere boe egu barogo ku redo turo pegareu moriče mare akaidukare ji.
HEB 10:7 – Imi reo. Imeartorumode ai rugadu. Nou are maku Israel doge etaiwu eno bakaru tadare amagore iboe padure. Nou awadaru jetumode pudui rugadu. Iromode nono ameardaeji rugadu. Ainore Jesus akore Tuo Kurireuji.
HEB 10:8 Mare ainore Jesus makore boetoji. Akore: – Akaidukare boe egu barogo kuji boe ero pegareu moriče. Akaidure ikoduji ikuji. Ainore Jesus akore boetoji. Mare Pao Kurireu meardae boetojiwu koiare boe ere boe egu barogo ku redo turo pegareu moriče tumeartoruwo Pao Kurireu ure maku pudaiwu bakaru boetojiwuji.
HEB 10:9 Mare aino Jesus akore: – Imi reo. Imeartorumode ai rugadu. Ainore Jesus akore aino boigodu. Dukodire parduware Pao Kurireu ure nou tumeardae boetojiwu akedudo. Ure nou ture maku Israel doge etaiwu eno bakaru boetojiwu tadawu boe ero akedudo rugadu boe emeartoruwo nou Pao Kurireu meardae maiwuji. Jesus Cristo ure tugu redo, ure tugu maku Pao Kurireu ai dukodire boe emodukare boe egu barege eku redo pugeje turo pegareu moriče. Emeartorumode Jesusji tu rugadu.
HEB 10:10 Jesus Cristo meartorure Tuo Kurireu makore puduiboe jamedu boeji. Ure tumagu tuwiwo tuwo tugu redo tuwo nou tugu maku Tuo Kurireu ai boe ero pegareu moriče. Dujire pameartorure. Dukodire emare umode paro udo tuginai paro pegareu piji paro pemegawo rugadu. Umodukare tuwido pugeje rugadu. Umodukare tugu maku Tuo Kurireu ai pugeje.
HEB 10:11 Mariguduwuge Israel doge emagare ture tomea maku nou ure boe enomea maku Pao Kurireu aiwuge etai dukodire emaragodure meri jameduji nou Pao Kurireu uwai rogu tada tuwo boe egu barege eku redo nou tuwobe ero pegareu moriče tu tu je. Mare nou boe egu barege eku ukare nou boe ero pegareu barigu epiji. Ero pegareu mori remawu karegure ema dukodi.
HEB 10:12 Mare Jesus Cristo ure tugu maku Pao Kurireu ai boe ero pegareu moriče. Dure mitotu je. Mare nou ure makuwu tugu umode boe eiamedu boe ero pegareu morido rugadu jii toro rugadu. Ure tugu maku Pao Kurireu ai dukeje ure tumugudo Pao Kurireu kana pemegareu jagwai.
HEB 10:13 Mugu kimore nono ji aino rugadu. Mugumode nono jii toro Pao Kurireu umode jordu pegare Jesus jiwuge eraga ta epiji du ka.
HEB 10:14 Jesus ure tugu maku boe ero pegareu moriče. Dukodire ure nou meartorure puduiwuge ero udo tuginai ero pegareu piji ero pemegawo. Ero pegamode mare umode ero pegareu barigu epiji tu tu je jii toro ero pegareu akedure du ka. Meartorure puduiwugeire romode aino. Dukodire nou meartorure Jesus jiwuge epemegare turo pegareu piji Pao Kurireu jakai rugadu jii toro rugadu. Dukodire Jesus umodukare tugu maku pugeje.
HEB 10:15 Nou inodu jire Pao Kurireu Uwari makore jamedu. Akore:
HEB 10:16 – Mare aino ia meri keje imode ia imeardae maiwu maku Israel doge etai eno bakaruče pugeje. Dutabore imode edo tuginai etaiduwo tumeartoruwo i taidu tabo. Imode iwadaru tugu etaorato. Erduwamode imeardaeji rugadu. Erduwamode iroji rugadu. Dukodire emeartorumode tu i rugadu. Ainore Pao Kurireu Uwari akore.
HEB 10:17 Nono makore pugeje. Akore: – Iwiagodumode ero pegareu piji rugadu. Ainore akore.
HEB 10:18 Pao Kurireu biagodumode boe ero pegareu piji rugadu. Dukodire parduware Jesus rore jiboe ure turugadu duji. Bimodukare boe ero pegareu moriče pugeje.
HEB 10:19 Imedage nure tagi. Iwo tarduwado. Pameartorure Jesusji dukodire ure paginorudo paro pegareu mori piji. Emare bire paro pegareu moriče. Aino pameartorure ji dukodire pare parugadu pamagowo Pao Kurireuji rugadu. Pao Kurireu meardumode pamagore jiboeji rugadu. Pare nono paragojere baru tadawu uwai remawu tada dumogadure.
HEB 10:20 Marigudu boe epemegakare. Mare aino čare Jesus ure meartorure puduiwuge epemegado. Mare paga karega. Ure tumagu tuwidoduwo tuwo tugu maku Pao Kurireu ai boe ero pegareu moriče dukodire pawimodukare paro pegareu moriče. Pamodukare boe egu barogo bito paro pegareu moriče. Pameartorure Jesusji dukodire ure pado nono paragojere baru tadawu Pao Kurireu uwai remawu tada dumogadure pamagowo Pao Kurireuji rugadu.
HEB 10:21 Jesus rakojere nono rugadu Pao Kurireu uwai remawu tada tietu pemegawo ji. Emare makomode pabaru tabo Pao Kurireuji. Ro pemegare rugadu. Dukodire pagomea makudure Pao Kurireu aiwu remawu nure ema rugadu.
HEB 10:22 Dukodire pabogurukawo pamagowo Pao Kurireu bagai baruto pamagowo ji rugadu. Pameartoruwo ji mare pabagudu tabo karega. Pameartoruwo ji pagaidu tabo. Pameartorure ji dukodire ure pameardae pemegado ure pagaora udo tamudo paro pegareu boe mori piji pamororamagadukawo paro pegareu mori bagai pugeje. Ure pado nono ure taimowuge emogadure. Mare pagaimodu ji karega inagoino. Ure paro pegareu barigu pabiji rugadu. Dujire inagoino.
HEB 10:23 Jesus umode tugirimi rugadu dukodire pamagowo boe ewiagai pameartorure jiboeji. Pagawo pagera ra nou pameartorure Jesus jitu piji. Emare ure pawiedu pemegado dukodire parduware umode tugirimi meartorure puduiwuge ewagai duji rugadu.
HEB 10:24 Pawiagorowo pawo boe pemegado boei. Pawo pagera maku puai. Pameardu kuriwo boei rugadu. Paro pemegawo boei rugadu.
HEB 10:25 Pawo bato pui tu tu je pamagowo Pao Kurireu bataruji pu biagai. Mare iage ere tugera ra nou turoino dupiji marigudu. Mare parokawo aino nono ero mogadure. Pawo bato pui tu tu je. Jesus aregodumode kejewu meri aregodumode dukeje boe pegamode boei rugadu. Boe pegare boei marigudu dukodire parduware nou meri aregodumode kuri je. Dukodire inagoino tai pawo bato pui tu tu je pawo pameartoru rakado Jesusji rugadu.
HEB 10:26 Boe erduwamode Pao Kurireu bataru remawuji mare emeartoru bokwamode ji. Ero pegamode taidu tabo rugadu. Dukejere boe eroiwamodukare tuwo iaboe maku Pao Kurireu ai nou boe ero pegareu moriče.
HEB 10:27 Nou ro pegareuge erdumode Pao Kurireu rore pudui duji rugadu. Dukodire epagudumode rugadu jii toro nou meri aregodumode du ka. Pao Kurireu umode meartoru bokware puduiwuge etagedudo joru tabo rugadu tuwo ewarigu toro bope doge eda kejewu joru pegareuto rugadu.
HEB 10:28 Nou Moisés ure maku Israel doge etaiwu bakaru boetojiwu koiare ure mariguduwuge Israel doge edo ro pegareuge ewido. Ro pegareuge emeartorukare nou bakaruji dukodire boe enogudukare ebo. Ere ewido rugadu. Mare paga karega. Jordure ro pegareu jiwuge ewo pobetu je boe ewo boe pegado ro pegareugei. Eno bakaru akoino. Jordure ro pegare jiwuge ere pobe dukeje boe erduware boe jokodu jire egoino duji. Nou jordure ro pegare jiwuge ere boe ewie nou tuiordure jiboeji. Ewadaru umode pu bataru mogadure dukeje boe erduware boe jokodu jire egoino duji. Mare jordure ro pegare jiwu umode mitotu je dukeje boe erduwamodukare raga boe jokodu jire akoino duji. Mare emode pobe dukeje boe erduware rugadu boe rugadu jire egoino. Boe erduware nou ro pegare rugadu. Dukodire ere nou ro pegareu bito rugadu. Ainore mariguduwuge Israel doge erore tu tu je.
HEB 10:29 Mare aino čare Pao Kurireu Onaregedu aregodure boe etae. Emare ure tugu redo tuwo Pao Kurireu meardae maiwu maku boe etai emeartoruwo ji. Ure tugu maku Pao Kurireu ai boe ero pegareu mori remawuče. Ainore nou Pao Kurireu meardae ure. Mare boe emeartorumodukare nou Pao Kurireu meardae maiwuji dukeje Pao Kurireu umode boe pegado ei rugadu. Umode boe pegado ei nou ture maku Israel doge etaiwu bakaru boetojiwu kori. Boe emeartorumodukare boe remawu jire Jesus roino duji dukeje Pao Kurireu umode boe pegado ei rugadu. Boe etaidumodukare Jesus roino pudui duji dukeje Pao Kurireu umode boe pegado ei rugadu. Emago pegamode Pao Kurireu Uwari ro pemegare pudui duji dukeje Pao Kurireu umode boe pegado ei rugadu. Ro pegamode ei rugadu nou bakaru boetojiwu kori rugadu.
HEB 10:30 Pao Kurireu akore: – Imode boe pegado boei ero pegareu jipagi rugadu. Ainore Pao Kurireu akore. Akore pugeje: – Pao Kurireu aiwomode boe ero pegareu bagai tuwo ro pegareuge edo turo pegareu morido. Ainore Pao Kurireu akore.
HEB 10:31 Pao Kurire ure rugadu. Dukodire meartorukare Pao Kurireu jiwuge etaregodumode ae dukeje Pao Kurireu ro pegamode ei rugadu ero pegareu moriče. Nono ča erduwamode tumodukare tuginorudo Pao Kurireu piji rugadu. Dukodire epagudumode če rugadu.
HEB 10:32 Tawiagodukaba boe erore tai mariguduboe dupiji. Tarduwagodure Pao Kurireu bataru remawuji. Marigudu. Nono tameartorure ji. Nono boe ero pegare tai rugadu. Mare tare taragado tai tagawo tagera ra tameartorure Jesus jitu piji.
HEB 10:33 Boe emago pegare tai boe ewiagai. Boe ero pegare tai boe egai. Nono tardure boe erore aino nouia tamedagei jamedu dukodire tadure toro etae nou boe ero pegawo tai jamedu tamedagebo.
HEB 10:34 Boe ere tadugu baičoreuto. Boe ere tugeragu tagoe rugadu boeji tabiji mare tagiarigodukare nou inoduji. Tagare taegare barigu tabiji. Tarduware tagoe pemegareu mode rugadu baru tada. Nou baru tadawu tagoe akedumodukare rugadu.
HEB 10:35 Dukodire inagoino tai. Boe pegamode tai mare taragado tai. Tamode taragado tai tawiapagakawo nou boe pegare tai duji dukeje Pao Kurireu umode tagoe kurido nou tare taragado tai du moriče.
HEB 10:36 Tawudugudo tu tai tagorigodukawo. Tagaba tagera ra tameardae pemegareu piji jii toro rugadu. Tameartorudo Pao Kurireu meardaeji rugadu. Tameartorumode ji dukeje umode tumagore jiboe maku tagai rugadu.
HEB 10:37 Padure bapera kejewu Pao Kurireu bataru akore: – Umode boe ekinorudowu aregodumode kuri je rugadu. Umodukare boe raido taregoduwo pugeje rugadu.
HEB 10:38 Meartorure iwuge ro jetororeuge emodukare tugera ra tumeartorure idu piji rugadu dukodire ewimodukare. Mare emode tugirimi tuibagi turo pegareu ka pugeje tuwo tugera ra ipiji dukeje iagaremodukare ei pugeje. Ainore Pao Kurireu akore.
HEB 10:39 Pamode pagera ra pameartorure Pao Kurireu jitu piji pawo pagirimi paro pegareu ka pugeje dukeje ure tuwarigu boetowuge emode pagi. Mare pamodukare pagirimi paro pegareu ka pugeje rugadu. Pameartorumode Pao Kurireuji jii toro rugadu dukodire umode paginorudo rugadu.
HEB 11:1 Boe emeartorumode Pao Kurireuji dukeje erduwamode makore puduidu jiboe jetumode pudui duji rugadu. Emeartorumode Pao Kurireuji dukeje erduwa kičarumode tuiordukare jiboeji Pao Kurireu ure erduwado dukodi.
HEB 11:2 Ainore jaoboe meartorure Pao Kurireu jiwuge ere rugadu. Emeartorure Pao Kurireuji dukodire Pao Kurireu jordu moture erore jiboeji.
HEB 11:3 Tuwadaru tabore Pao Kurireu ure baru to, ure moto towuje. Mare pardukare roinoduji. Mare pameartorure ji dukodire parduware tuwadaru tabore Pao Kurireu ure baru to duji ure moto to duji rugadu. Pao Kurireu ure boe jamedu boe towuje boe erdukare jiboe tabo boe erduwo ji rugadu.
HEB 11:4 Imedu Abel meartorure Pao Kurireuji dukodire ure Pao Kurireu makore bagaiboe maku Pao Kurireu ai tomeawo Pao Kurireu ai. Mare umana Caim rokare nono tuwie Abel ro mogadure. Mare Abel meartorure Pao Kurireuji dukodire Pao Kurireu aidure nou Abel ure maku pudaiwu boeji. Mako pemegare Abel rore jiboeji. Akore ro jetororeu nuie ema. Nou Abel bire marigudu mare boe erduware rore jiboeji jii aino. Dukodire emeartorure Pao Kurireuji nono Abel meartoru mogadure.
HEB 11:5 Imedu Enoque meartorure Pao Kurireuji dukodire bikare. Pao Kurireu ure Enoque rutudo tači pudae baruto. Dukodire boe erdukare ji pugeje. Padure bapera kejewu Pao Kurireu bataru akore: – Enoque rakoje kimore moto keje dukeje Pao Kurireu jakarere ji rugadu. Ainore Pao Kurireu bataru akore.
HEB 11:6 Mare boe emeartorumodukare Pao Kurireuji dukeje Pao Kurireu jakaregodumodukare boei. Boe etaidure tumagowo Pao Kurireuji iaboe bagai. Mare enogwamaguduwo tumeartorure dutabo Pao Kurireuji rugadu. Emeartoruwo Pao Kurireu ure duji rugadu. Emeartoruwo jamedu Pao Kurireu ro pemegamode nou ure turagado pudui tumeartoruwo Pao Kurireu jiwugei. Boe emeartorumode nou inoduji dukeje Pao Kurireu meardumode emagore jiboeji.
HEB 11:7 Marigudu rugadu boe erduwakare bubutuji. Bubutu bokware. Mare Pao Kurireu makore Noéji bubutumoduie, tumoduie bubutudo. Nono Noé ure tuioku kidugo nou Pao Kurireu bataruji. Dukodire meartorure nou Pao Kurireu makore pudui jiboeji. Jorduwakare bubutuji mare meartorure Pao Kurireu makore pudui jiboeji. Pao Kurireu makore ji uiago ia ikarereu kurireu towuje. Dukodire Noé ure nou ikarereu kurireu towuje rugadu. Nono bubuture rugadu. Pao Kurireu ure pobo maedo moto jamedu boe aoji tuwo boe etagedudo ero pegareu moriče. Mare Noé meartorure Pao Kurireuji dukodire ure turemo ture towujewu ikarereu kurireuto tuwobebo. Dukodire Pao Kurireu ure ekinorudo nou ture boe etagedudo tabowu pobo piji. Noé meartorure Pao Kurireuji dukodire Pao Kurireu ure tugeragu Noéji pudae tuwo udo nono ro pemegareuge emogadure.
HEB 11:8 Marigudu Pao Kurireu makore Abraãoji utuwo to moto piji toro ia tumode maku aiwu moto ka. Abraão jorduwakare nou tugodumode kawu motoji mare meartorure Pao Kurireuji dukodire uture to moto piji rugadu.
HEB 11:9 Nono mugure ia boe tuginaiwuge eno moto keje nono. Mare meartorure Pao Kurireuji. Uwai bokware nono. Ure mačebradu rakojedo tu tu je tuwaiče mare meartorure Pao Kurireuji. Pao Kurireu makore tumoduie nou moto maku ai rugadu. Makore aino Abraão onaregedu Isaqueji, makore aino nou Isaque onaregedu Jacoji jamedu tumoduie nou moto maku etai, etuwobe etai jamedu.
HEB 11:10 Abraão meartorure ji rugadu. Jorduware Pao Kurireu umode ia boe eda kurireu towuje duji. Boe eda motureu mode ema. Pao Kurireu umode towuje nono tumeardae mogadure. Nou boe eda akedumodukare jii toro rugadu. Abraão jorduware tumugumode nou boe eda keje duji rugadu.
HEB 11:11 Abraão oreduje iere Sara. Etore bokware. Kuridoge nure emage dukodire etoremodukare rugadu. Mare Pao Kurireu makore ei etoremoduie. Nono Abraão meartorure Pao Kurireu makore pudui duji rugadu dukodire etonaregedu imedu rogure rugadu.
HEB 11:12 Abraão pegagodure rugadu. Mare onaregedure. Nou onaregedu orere. Nou onaregedu ore etorere. Dukodire uwobe emagagodure rugadu. Emagagodure nono baru tadawu kuieje doge emagare dumogadure. Ere tumaedo nono kugaru umode tumaedo dumogadure. Boe erduwakare nuba ere. Emagare rugadu.
HEB 11:13 Nou inagoino jiwuge eiamedu boe ewire marigudu. Mare ewikare raga dukeje ekare tugera ra tumeartorure Pao Kurireu jitu piji. Erdukare Pao Kurireu makore tumoduie maku pudaiwu boeji. Mare erduware Pao Kurireu umode maku pudai baru tada duji. Eragojere woe moto keje dukeje egore boe tuginaiwuge nuie pudumi. Egore to moto remawu karegau awu moto rema. Egore to moto remawu moduie baru tada.
HEB 11:14 Erduware ia to moto remawu mode pugeje dukodire nou boe egoino.
HEB 11:15 Ekiarigodukare ture tudawuje pijiwu moto bagai pugeje. Ekiarigodumode bagai dukeje emode tugirimi tuibagi nou moto ka pugeje.
HEB 11:16 Mare etaidure ia moto pemegareuji baru tada. Pao Kurireu ure eda pemegado nono baru tada rugadu. Nou boe egore Tuo Kurireu nuie ema rugadu. Nono Pao Kurireu pogurukare eče. Aidure nou boe emagore jiboeji rugadu nou boe emeartorure pudui dukodi.
HEB 11:17 Pao Kurireu aidure tuwo boe rakado Abraãoji Abraão meartorumode pudui dubagai. Dukodire makore Abraãoji uwo tonaregedu Isaque bito uwo tomeado ema pudai. Mare Abraão meartorure nou Pao Kurireu makore pudui jiboeji. Ure turugadu tuwo tonaregedu bito rugadu tuwo tomeado ema Pao Kurireu ai. Pao Kurireu makore Abraãoji marigudu tumoduie nou onaregedu Isaque oredo, tumoduie nou ore etoredo. Tumoduie emagado rugadu.
HEB 11:18 Pao Kurireu akore: – Imagore ai awobe emagagodumoduie. Nou akanaregedu Isaque oremode. Ore etoremode. Epijire nou inagoino jiwu awobe emagagodumode rugadu. Imagore jiboe jetumode pudui rugadu. Ainore Pao Kurireu akore.
HEB 11:19 Dukodire Abraão meardaere Pao Kurireu umoduie tonaregedu Isaque jewodudo pugeje. Abraão meardaere tuwo tonaregedu bito tumeartorure Pao Kurireu makore pudui dukodi. Mare Pao Kurireu umoduie tonaregedu jewodudo pugeje. Ainore Abraão meardaere. Ure tuiago tonaregedu bito dukeje Pao Kurireu makore ji ukawo bito pugeje. Dukodire Isaque ure nono jewodureu mogadure rugadu.
HEB 11:20 Isaque meartorure Pao Kurireuji jamedu dukodire makore tonaregedu Jacó paru tabo tuwo boe pemegado ji. Makore tonaregedu Esaú paru tabo jamedu tuwo boe pemegado ji jamedu. Akore tumagore jiboe jetumoduie pudui rugadu.
HEB 11:21 Jacó meartorure Pao Kurireuji dukodire makore tonaregedu José ore ime pobedu doge eparu tabo tuwo boe pemegado ei. Jacó pegagodure rugadu mare ure turagojedo rugadu. Iera bararere tudaiboji tuwo turagojedo. Ure turagojedo tumago pemegawo Pao Kurireuji rugadu.
HEB 11:22 José meartorure Pao Kurireuji jamedu. Pegagodure rugadu dukeje akore tuwobe Israel doge emoduie tudawuje nou tumugure kejewu Egito moto piji. Makore tuwobei tuwimoduie dukeje ekawo tudugu nou Egito moto keje. Ewo turego toro Pao Kurireu umoduie maku etaiwu moto ka rugadu.
HEB 11:23 Moisés uče uo emeartorure Pao Kurireuji jamedu. Emeartorukare tumugure kejewu Egito moto kejewu boe eimijera kurireu makore puduidu jiboeji. Emare akore nou Israel doge eiamedu boei ewo tore ime kugure eiamedu boe ewido. Mare epagudukare nou boe eimijerače. Etonaregedu imedu rogu Moisés boture dukeje erdure moture duji. Dukodire ere nou tonaregedu Moisés biado nou boe eimijera kurireu piji. Ekare bito. Arire pobe metia bokware ei eroino duji.
HEB 11:24 Nono Egito kejewu boe eimijera kurireu onaregedu aredu ure tugeragu Moisesji tonaregeduče. Dukodire Moisés ričodure nono nou boe eimijera kurireu uwai ja tada. Mare Moisés meartorure Pao Kurireuji dukodire makore nou aredu onaregedu kaiegure pudumi.
HEB 11:25 Nou Moisés uwobe Israel doge emeartorure Pao Kurireuji dukodire nou Egito kejewu boe eimijera kurireu ure boe pegado ei. Moisés rakojemode nono nou Egito kejewu uwai keje jao dukeje boe pemegamode ji. Jakaremode pudui. Mare umode nono nou ro pegare Israel dogeiwu boe eimijera mogadure. Ro pegareu mode ema Pao Kurireu jakai. Mare Moisés aidukare turagojewo nono nou boe eimijera uwai keje nou boe pemegareu keje. Jorduware boe pegamode pudui duji mare uture nou turijodure tadawu boe eimijera uwai piji turagojewo tuwobe Israel dogebo.
HEB 11:26 Jorduware toro ia meri keje Pao Kurireu umode nou umode boe ekinorudowu imedu arego mato boe ewagai duji. Pogurukare tumeartoruwo nou umode boe ekinorudowu aregodumode duji. Meartorumodukare Pao Kurireu romode aino duji dukeje umode tugeragu Egito moto kejewu diero rugadu boeji pagatu je. Mare meartorure Pao Kurireuji rugadu dukodire boe pegare ji. Egito kejewuge emago pegare ji. Mare biapagakare nou boe pegare pudui duji. Biapagare tu toro ia meri kejewu Pao Kurireu umode maku pudaiwu boe pemegareu boeji.
HEB 11:27 Moisés meartorure Pao Kurireuji dukodire uture Egito moto piji. Nou Egito moto kejewu boe eimijera kurireu korigodure ji mare Moisés pagudukare če rugadu. Ure Israel doge etawuje nou Egito moto piji rugadu. Boe erdukare Pao Kurireuji. Mare Moisés meartorure ji dukodire tiagaire Pao Kurireu ure nono boe erdure jiboe mogadure. Dukodire ukare tugirimi Egito moto ka Israel dogebo pugeje.
HEB 11:28 Etukare raga Egito moto piji dukeje Pao Kurireu makore Moisesji uwo Israel doge edo carneiro ku reko tuwai poroji. Pao Kurireu utugare pegareu ure Egito moto kejewuge etore boture boetojiwuge eiamedu boe ewido. Mare Moisés meartorure Pao Kurireuji dukodire ure Israel doge edo nou carneiro rogu ku reko tuwai poroji. Dukodire nou Pao Kurireu utugare pegareu ukare nou Israel doge etore boture boetojiwuge ewido jamedu. Dukodire Moisés ure nou Israel doge ewadae tawuje boe ewiabutuwo nou inodu keje. Egore Páscoa aino nou tuwadaeji.
HEB 11:29 Israel doge emeartorure Pao Kurireuji dukodire Pao Kurireu ure pobo maereu kujagureu kado puiato. Ure kidudo Israel doge etododai Israel doge emeruwo moto kireuji toro bakowu ka tugurugoduwo pobo maereu kujagureu kajeje. Egito kejewu tugobaigarege ekurugodure eregodaji dukeje nou pobo ure tugirimi tumuga ka. Nono pobore turorido nou tugobaigarege eiogi. Dukodire Egito kejewu tugobaigarege eiamedu boe ewire.
HEB 11:30 Nou Israel doge etaregodure nou Jericó ba kurireu ka dukeje emeartorure Pao Kurireuji. Meri oto padure sete ei ere taiado nou ba kurireu kujegajeje rugadu tumeru tabo duji. Dukejere nou padure Jericó ba kurireu kujegajejewu moto ri rugadu buture jo je.
HEB 11:31 Nouia Jericó kejewudo aredu iere Raabe. Marigudu ure tumagu ime etai diero bagai. Tu noure maragodae rema. Mare Israel doge etaregodure Jericó ba kurireu ka dukeje Raabe meartorure Pao Kurireuji. Israel doge ere tugobaigarege etudo Jericó ba kurireu ka tubodu tabo etaiwowo tu toro. Nono nou aredu ure ewiado nou Jericó kejewu tugobaigarege epiji. Meartorure Pao Kurireuji kodi. Dukodire bikare nou tuwobebo. Nou Jericó kejewuge emeartorukare Pao Kurireu bataruji dukodire eiamedu boe ewire. Mare nou aredu bikare.
HEB 11:32 Imago raimode dukeje ireadodumode Gideão rore jiboeji, Baraque rore jiboeji, Sansão rore jiboeji. Ireadodumode Jefté rore jiboeji, Davi rore jiboeji, Samuel rore jiboeji. Ireadodumode nouia makore Pao Kurireu bataru jiwuge erore jiboeji.
HEB 11:33 Emeartorure Pao Kurireuji rugadu. Erugodure moto tuginaiwu kejewu tugobaigaregei. Eragare ei rugadu. Ero pemegare dukodire Pao Kurireu makore eiboe makudure etai rugadu. Ere leão doge enogwa mi ekawo etogorido.
HEB 11:34 Ere joru kurireu akedudo. Ere tuginorudo tugobaigarege eno rago piji. Eraga bokware dukeje Pao Kurireu ure eraga maku etai pugeje. Tugobaigare kurireuge nure emage. Erugodure moto tuginaiwu kejewu tugobaigaregei rugadu. Ere etagedudo rugadu.
HEB 11:35 Areme emeartorure Pao Kurireuji jamedu dukodire etuwobe bireuge eewodure pugeje. Iage emeartorure Pao Kurireuji jamedu mare boe pegare ei. Boe pegareuge emagore ei emeartorukaiago Pao Kurireuji pugeje. Emeartorumodukaie Pao Kurireuji pugeje dukeje tumoduie tugera ra epiji etuwo pugeje. Mare ekare tugera ra tumeartorure Pao Kurireu jitu piji. Dukodire nou boe pegareuge ero pegare ei. Ere ewido rugadu. Nou bitodureuge emeartorure Pao Kurireuji mare paga karega. Erduware Pao Kurireu umode tuiewodudo pugeje duji. Erduware tumugumode boe pemegareu keje duji. Dukodire ekare tugera ra tumeartorure Pao Kurireu jitu piji rugadu.
HEB 11:36 Ro pegareuge emago pegare ia meartorure Pao Kurireu jiwugei. Ere boeto iagei. Ro pegareuge ere ia meartorure Pao Kurireu jiwuge ekera kogudo ewure kogudo tuwo etugu baičoreuto.
HEB 11:37 Ro pegareuge eidore tori tabo iagei. Ro pegareuge ere ia meartorure Pao Kurireu jiwuge ekado puiato serrote tabo. Ro pegareuge ere iage ewido tariga kurireu tabo. Ia meartorure Pao Kurireu jiwuge ekudau areia bokware. Ere tugudaudo cabrito biriče. Eno diero bokware. Boe ero pegare ei. Boe etaidukare emeartoruwo Pao Kurireuji pugeje.
HEB 11:38 Ia meartorure Pao Kurireu jiwuge eno moto bokware dukodire emeru pagare jiče woje boe maereu ka, tori ao ka. Emugure tori poro tada ia moto poro tada jamedu. Nou ro pegare eiwuge emeardae pegare nou meartorure Pao Kurireu jiwugei. Egore boe kaieguie emage. Mare boe kurireuge nure emage Pao Kurireu jakai rugadu. Dukodire čare nou meartorukare Pao Kurireu jiwuge eiamedu boe epogurure eče pugeje.
HEB 11:39 Aino čare boe eiamedu boe erduware nou meartorure Pao Kurireu jiwuge erore jiboeji. Emeartorure Pao Kurireuji. Pao Kurireu mako pemegare emeartorure pudui duji. Mare Pao Kurireu ukare tumagore jiboe maku etai raga.
HEB 11:40 Mare paga karega. Pao Kurireu ure tumeardae pemegareu tawuje tuwo boe pemegado ei rugadu, tuwo boe pemegado pai jamedu. Meardaere tubagawo jao tuwo boe pemegado paiamedu boei puapo. Nou Pao Kurireu meardae maiwu pemegare nou meardae boetojiwu piji tuwo paiamedu boe pado nono tumeardae mogadure rugadu.
HEB 12:1 Aiwore parore jiboe jiwuge boe emagare. Nou inagoino jiwu mariguduwuge meartorure Pao Kurireu jiwugeire inagoino. Ere nono aiwore parore jiboe jiwuge emogadure. Emagare rugadu. Mare etaiwo ji karega inagoino. Parowo nono ero mogadure pameartoruwo Pao Kurireuji rugadu nono emeartoru mogadure. Dujire inagoino. Dukodire pawo boe pega boe barigu pabiji. Pawo paro pegareu barigu pabiji. Paro pegare jiboe ure tugeragu pai marigudu. Aidukare tuwo tugera ra pabiji rugadu. Mare ča pawo paro pegareu barigu pabiji rugadu. Re rakareu umode turagado pudui ture rakawo rugadu. Parowo nono re rakareu mogadure. Mare pare rakareu ji karega inagoino. Pawo paragado pai pameartoru pemegawo Pao Kurireuji jii toro rugadu. Dujire inagoino.
HEB 12:2 Pawiapagawo tu Jesusji tu rugadu pameartorukawo iaji. Emare jorduware tuwimode duji ipo padure pugajejewu keje. Mare biapagakare nou inoduji. Jorduware tiegaremode pudui pugeje tuwimode du rekodaji. Dukodire ukare tugera ra tumeartorure Tuo Kurireu jitu piji. Boe ere Jesus bito ipo padure pugajejewu keje tuwo Jesus pogurudo. Mare Jesus biapagakare nou inoduji. Aino čare mugure baru tada Pao Kurireu ukana pemegareu jagwai boe eimijera mugure kejewu ira keje. Emare makore pawagai pameartoruwo pudui. Emare umode paragado pameartoru rakawo pudui. Dukodire pameartoruwo ji rugadu.
HEB 12:3 Tarodo nono Jesus ro mogadure. Ro pegareuge erdu pegare ji mare biapagakare eroi pudui duji. Tagiarigodukaba jamedu. Tagaba tagera ra tameartorure Jesus jitu piji jamedu.
HEB 12:4 Tare taragado tai taro pegakawo. Tamagore boei tagaidukaie taro pegareu boeji pugeje. Boe ere boe pegado meartorure Jesus jiwugei ewo tugera ra Jesus piji dukodire ere nouia meartorure Jesus jiwuge ewido. Ere boe pegado tai jamedu tuwo taekiripagado taro pegawo pugeje mare ekare tawido.
HEB 12:5 Mare du inodu tabo tawiagodure ia Pao Kurireu bataru pemegareu piji. Akore tore nuie tagi. Boe ewiapagamode nou bataruji dukeje eragamode pugeje tumeartoruwo Pao Kurireuji rugadu. Pao Kurireu akore: – Itonaregedu nure aki. Pao Kurireu nure imi. Inogituwamode ai ia aro pegareuji dukeje awiapagado iwadaruji. Imagomode ai aro pemegawo pugeje dukeje akiarigodukaba.
HEB 12:6 Pao Kurireu nure imi. Imeardu kurimode boei dukeje inogituwamode ei ia ero pegare jiboeji ero pegakawo pugeje. Iromode ei nono boe etuo ro moga torei dumogadure dukodire imode boe rakado ei tu je ia ero pegareu bariguduwo epiji. Ainore Pao Kurireu akore.
HEB 12:7 Boe etuo mage emode boe rakado torei ero pegareu bariguduwo epiji. Ainore Pao Kurireu rore jamedu. Boe rakamode tai dukeje tarduwamode Pao Kurireu emare roino tai duji taro pegareu bariguduwo tabiji nono boe eromode torei dumogadure. Dukodi čare taragado tai tagiarigodukawo nou boe rakamode tai duji.
HEB 12:8 Pao Kurireu ore remawuge emodukare tagi dukeje umodukare boe rakado tai. Umodukare boe rakado tai dukeje tamode nono marenarue doge emogadure.
HEB 12:9 Moto kejewu pao mage ere boe rakado pai paro pegareu bariguduwo pabiji dukeje pameartorure ei paro pegakawo pugeje. Dukodi čare pameartoruwo baru tadawu Pao Kurireuji rugadu pamugu pemegawo apo.
HEB 12:10 Moto kejewu pao mage ere boe rakado pai tu je paro pegareu bariguduwo pabiji nono tumeardae mogadure. Mare Pao Kurireu rore jiboe pemegare pao mage ekori rugadu. Pao Kurireu ure boe rakado pai tuwo paro pemegado rugadu, paro pemegawo nono turo mogadure.
HEB 12:11 Umode boe rakado pai paro pegareu bariguduwo pabiji dukeje pagiarigodumode ro rakare pai duji. Pameardaemodukare pawo paegaredo pai. Mare ure boe rakado pai paro pegareu bariguduwo pabiji dukodire toro ia meri keje boe pemegamode pai rugadu. Paro jetoromode rugadu. Pabemegamode Pao Kurireuji rugadu. Pao Kurireu pemegamode pai. Pamugu pemegamode Pao Kurireu apo rugadu.
HEB 12:12 Tamedugodure. Tabogora kugudugodure. Ča taragado tai.
HEB 12:13 Mare tagana tabogora ji karega inagoino. Taragado tai tameartoruwo rugadu Jesusji jii toro rugadu. Taro pemegado. Taro jetorodo. Nono tabemegagodumode. Mare tabemega ji karega inagoino. Tameardae pemegamode tameartoruwo Jesusji tu rugadu jii toro rugadu. Dujire inagoino. Tamodukare tagera ra tameartorure Jesus jitu piji rugadu.
HEB 12:14 Taragado tai tamugu pemegawo boe eiamedu boebo tabemegawo pui rugadu. Taragado tai tawo taro udo tuginai taro pegareu piji taro pemegawo rugadu. Boe emodukare turo udo tuginai turo pegareu piji dukeje erdumodukare Pagimijeraji.
HEB 12:15 Taeku jado tagawo tagera ra Pao Kurireu ro pemegareu piji. Tardu pegakaba ia boei. Tardu pegamode ia boei dukeje nou tameardae pegareu umode nono jorubo pegareu umogadure. Boe ekudumode če boe ewimode. Mare jorubo ji karega inagoino. Nou tardae tameardae umode boe pegado tai rugadu. Dujire inagoino. Dukodire inagoino tardu pegakawo boei.
HEB 12:16 Taro pegareu pijido. Taeribarikaba tamugukare apowugei rugadu. Tawiagodukaba Pao Kurireu piji nono Esaú ro mogadure. Boe emeartorumodukare Pao Kurireuji dukeje emeardae bokwamode nono Esaú meardae bokware dumogadure. Isaque onaregedu imedu boetojiwu nure ema dukodire Isaque ore jiboe makudumode nou Esaú ai rugadu. Mare ia meri keje Esaú uke boeire ji dukodire nou Esaú makore tuwieji ia tuge rogu bagai. Ure nou makudumode pudai boe rugadu boe maku tuwie ai nou tuge rogu moriče. Meardaekare nuba boemode pudui meri jameduji. Meardaere tu nou meriji rugadu.
HEB 12:17 Toro ia meri keje Esaú makore tuoji mako pemegawo tubaru tabo Pao Kurireu bagai boe pemegawo pudui tu tu je ore jiboe makuduwo pudai. Mare uo makokare. Makore uwieji marigudu. Ure nou uwie udo nono tonaregedu boetojiwure tumago pemegawo paru tabo boe pemegawo ji tu tu je jii toro. Nou Esaú ragudure mare uo ukare tumago pemegado ji. Tarokaba nono Esaú ro mogadure. Tawiagorodo tameardaewo nono Pao Kurireu meardaere dumogadure.
HEB 12:18 Pao Kurireu rokare tai nono turo moga mariguduwuge Israel dogei dumogadure. Marigudu Israel doge etaregodure Sinai Ri ka dukeje erdure joruji toro nou tori ri aogeje. Nono ča boečodure ei. Jeredudure ei. Nono bakuru pegareu buture ewugeje bubutu tabo.
HEB 12:19 Dukejere čare emeardure tapira ukiga akoji. Nono emeardure ia boe emagoji jamedu. Israel doge emeardure nou boe emagoji dukeje enogwamagudure ji makokawo pugeje. Nou bataru rakare ei.
HEB 12:20 Akore: – Ia boe ia barogo umode tugera bu awu tori keje dukeje bimode. Boe eidowo tori tabo ji ewo bito rugadu. Ainore akore. Israel doge emeardure nou bataruji dukeje epagudugodure rugadu. Etaidukare tumearduwo iaboeji pugeje.
HEB 12:21 Nou boe erdure jiboe pegare ei rugadu. Epagudugodure rugadu. Moisés pagudure jamedu. Akore: – Itomagadugodure ipagudu koia.
HEB 12:22 Mare tagire Pao Kurireu ukare tabagudugo aino. Aino čare Jesus bire boe egore Sião Ri aino jiboe tori aogeje boe ero pegareu moriče boe epagudukawo pugeje. Mare paga karega. Nou Jesus jire tameartorumode. Ure tarduwado baru tadawu Jerusalém ba kurireu remawuji. Nonoie Pao Kurireu muguie rugadu. Ure tarduwado tudugarege baru tadawuge emagare rugadu duji. Nou utugarege ere bato pui tiagare tabo nono baru tada. Pao Kurireu ure tawie meartorure Jesus jiwuge edumoduie baru tada tiegare tabo nono tudugarege baru tadawuge emogadure. Nou bataru jire tameartorumode.
HEB 12:23 Pao Kurireu ure meartorure Jesus jiwuge ekie bu baru tadawu bapera keje. Dukodire ere nono boture boetojiwuge emogadure. Mare boe ewodu ji karega inagoino. Pao Kurireu ure meartorure Jesus jiwuge edo nono tore emogadure. Dujire inagoino. Dujire tameartorumode. Pao Kurireu aiwore boe eiamedu boei meartorure puduiwuge ewagai meartorukare puduiwuge ewagai jamedu. Dujire tameartorumode. Dukodire tameartorure Jesusji rugadu tabemegawo Pao Kurireu apo, ukawo taro pegare jiboe morido tagai, Pao Kurireu pemegawo tai tawo nono mariguduwuge meartorure Pao Kurireu jiwuge emogadure. Pao Kurireu ure nou mariguduwuge meartorure puduiwuge epemegado rugadu toro baru tada. Dujire tameartorumode.
HEB 12:24 Tameartorure Jesusji. Emare ure boe pemegado Pao Kurireu meardae maiwu makuduwo boe etai. Marigudu rugadu Caim ure tuwie Abel bito dukodire Abel ku rere pagatu je. Mare Jesus ure tugu redo boe ero pegareu mori remawuče. Dujire tameartorumode.
HEB 12:25 Taeku jado. Tawiapagado Pao Kurireuji rugadu. Marigudu makore Pao Kurireu bataru jiwuge ere boe ewie Pao Kurireu umoduie boe pegado boei ero pegareu moriče. Nou boe emeartorukare dukodire ekare tuginorudo nou Pao Kurireu ro pegare puduidu piji. Dukodi čare pameartorumodukare nou baru tadawu Jesus makore jiboeji dukeje pamodukare paginorudo ro pegare pai dupiji rugadu.
HEB 12:26 Marigudu Pao Kurireu mako ako rakare. Nono ure moto magadudo. Mare aino čare makore boei pugeje. Akore: – Imode moto magadudo pugeje. Imode baru magadudo jamedu. Ainore Pao Kurireu akore.
HEB 12:27 Nou bataru koiare parduware Pao Kurireu umode moto akedudo duji, umode baru akedudo duji. Tu nou magadumodukareu jiboe akedumodukare. Pao Kurireu jire inagoino. Meartorure jiwugeire inagoino.
HEB 12:28 Paegarewo pai. Pameartorure Pao Kurireuji dukodire paragojemode apo pagimijerawo ema. Rakojere apowuge emororamagadumodukare, etagedumodukare rugadu. Dukodi čare pawo pabu jodo pamago pemegawo pagimadu tabo Pao Kurireu apo pawo jakarego. Pawiapaga pemegawo ji. Paboguruwo paro pegareuče pawo paro pegareu barigu pabiji. Pawo paeku kidugodudo Pao Kurireuji pameartoruwo rugadu Pao Kurireu bataru jamedu boeji.
HEB 12:29 Pao Kurireu nure ema. Umode boe pegareu akedudo nono joru pegareu ro mogadure.
HEB 13:1 Tameardu kurido pui nono tameardu kuri moga tawobei dumogadure. Ainore meartorure Jesus jiwuge erore.
HEB 13:2 Tagimadudo tarduwakare jiwugebo. Meartorure Jesus jiwuge emode emage dukeje tarodo ei nono taro moga tawobei dumogadure. Eremo tawaito taro pemegawo ei. Iage erore nono dukodire ekimadure Pao Kurireu utugarege baru tadawugebo. Mare erduwakare baru tadawugeire turoino. Emeardaere ia boe eire turoino.
HEB 13:3 Tawiagodukaba tugudure baičoreu towu boe epiji. Taro pemegado ei. Tadugudumode baičoreuto dukeje tagaidumode boe ero pemegawo tai jamedu. Tagogududo boe pegare jiwugebo. Boe pegamode tai dukeje tagaidumode boe enogudugoduwo tagabo jamedu.
HEB 13:4 Tameartorudo Pao Kurireu bataruji tawirewo tagogewo. Boe eribarikaiago tumugukare apowugei. Boe emugumode puapo dukeje eribariwo tu pui. Emugure puapo dukeje ekawo tugera ra toredu piji toreduje piji tieribariwo iaji iarodoji pugeje. Eribariwo tu pui rugadu. Ia jeribarimode ia tumugukare apowuji ia tumugukare apowudoji dukeje Pao Kurireu umode boe pegado ji rugadu. Iarodo umode tugera ra toredu piji tieribariwo iaji dukeje Pao Kurireu umode boe pegado ji jamedu. Ia umode tugera ra toreduje piji tieribariwo iarodoji dukeje Pao Kurireu umode boe pegado ji rugadu.
HEB 13:5 Tagogwa kidukaba boe eno dieroji. Tawudugugo tu tagoe rogu keje. Mare paga karega. Pao Kurireu akore turagojemoduie tagabo jii toro rugadu. Tumodukaie tugera ra tabiji rugadu jii toro. Ainore Pao Kurireu akore.
HEB 13:6 Dukodire pawo paragado pai. Pamagowo nono mariguduwu makore Pao Kurireu bataru jiwu mako mogadure. Akore: – Pao Kurireu ure tugera maku inai tu tu je. Ipagudumodukare boeče. Boe pegamodukare i rugadu. Ainore padure bapera kejewu Pao Kurireu bataru ure. Ainore pamagomode jamedu.
HEB 13:7 Mariguduwu tagimijerage ere tawie Pao Kurireu bataruji. Tawiabutudo erore jiboe keje, emeartorure Jesusji jii toro tuwi ka. Tameartorudo Pao Kurireuji nono emeartorure jitu mogadure.
HEB 13:8 Jesus Cristo ure nono tu tumogadure rugadu. Umode nono tumogadure jii toro rugadu. Marigudu ukare tumeardaere jiboe udo tuginai ji aino rugadu. Meardaere jiboe umode mitotu je rugadu jii toro rugadu.
HEB 13:9 Dukodi čare boe etaregodumode tagae ia bataru tuginaiwu tabo mare tameartorukaba ji. Tameartorudo tu Pao Kurireu bataru remawuji. Ia boe emeardaere boe emode tumeartoru rakado Jesusji togwagere jiboe tabo. Dukodire enogwagemodukare iaboeji. Emeardaere turore aino dutabo tumoduie tumeartoru rakado Jesusji. Mare pagare eroino. Pao Kurireu emare umode turaga maku boe etai taidu tabo emeartoru rakawo Jesusji.
HEB 13:10 Marigudu jaoboe ere Israel doge enomea maku Pao Kurireu aiwuge eimijera kurireu ure ia barogo ku reko nou Pao Kurireu uwai ja biagareuto tuwo maku Pao Kurireu ai nou joru kejewu boe ero pegare jiboe jamedu boe moriče. Mare ukare nou barogo kodu kowuje. Ure nou barogo barigu toro nou boe eda piji aino toro. Dukeje ure joru tugu to tuwo akedudo. Tuwo kowu karega. Tuwo akedudo rugadu. Ainore boe erore Jesusji jamedu. Eture Jesus apo toro tieda Jerusalém ba kurireu piji aino toro tuwo bito toro. Dukodi čare pameartoruwo Jesusji. Pawo pagera ra pamedage erore jiboe piji pawo parore jiboe udo tuginai paro pegakawo pugeje. Boe erdu pegamode pai emago pegamode pai paroinoduji nono turo moga Jesus jitu mogadure. Mare pabogurumodukare paroinoduje. Paeda remawu mugukare woe awu moto keje. Marigudu Pao Kurireu uwai rogu mugure woe moto keje. Mare nou uwai rogu akedure. Uwai remawu karegure ema dukodi. Pagi jamedu awu moto kejewu pawai jamedu boe akedure tu tu je. Mare paeda remawu mugure baru tada. Pamugumode kejewu ba kurireu remawu mugure baru tada. Dukodire pamode maku Pao Kurireu aiboe ure tuginai nou maragodure Pao Kurireu uwai rogu tadawuge ero piji.
HEB 13:15 Pare maku Pao Kurireu aiboe reo. Pamago pemegare Pao Kurireuji du pare maku Pao Kurireu aiboe reo. Pameartorure Jesusji du pare maku aiboe reo. Pare boe ewie pameartorure jituji du pare maku aiboe reo. Pare pagera maku puai du pare maku Pao Kurireu aiboe reo jamedu. Nou parore jiboe jamedu boe jire pare maku Pao Kurireu aiboe reno. Dujire Pao Kurireu aidure. Dukodire inagoino nou maragodure Pao Kurireu uwai tadawuge mariguduwuge ere maku Pao Kurireu aiboe ure tuginai pare maku Pao Kurireu aiboe piji.
HEB 13:17 Tameartorudo tagimijeragei. Meartorure Jesus jiwuge eimijerage eire inagoino. Etu pemegare tai. Ekare tamudo. Pao Kurireu unaramode ei erore taiboe jamedu boe bagai. Tameartorumode ei dukeje egaremode tumaragodaeji. Egaremode tureadoduwo turore taidu jiboe jamedu boeji Pao Kurireu biagai rugadu. Mare tameartorumodukare ei dukeje ekiarigodumode. Ekiarigodumode dukeje eroiwamodukare tuwo boe pemegado tai.
HEB 13:18 Tamagodo baruto Pao Kurireu bagai čebaru tabo. Čere čeragado čei čero pemegawo tu tu je dukodire čere čedaorado tamudo. Čedaidure čero pemegawo boei rugadu.
HEB 13:19 Tagogwamagududo Pao Kurireu bagai rugadu uwo ido ikirimi ibagi tawagai itaregoduwo tagae kuri je.
HEB 13:20 Pao Kurireu ure Pagimijera Jesus jewodudo pugeje. Jetu pemegare meartorure puduiwugei rugadu. Ure tugu redo tuwo maku Pao Kurireu ai boe ero pegareu moriče emeartorukawo nou bakaru boetojiwuji pugeje. Emeartoruwo tu Jesusji rugadu. Ainore Pao Kurireu meardaere. Nou Pao Kurireu meardae akedumodukare rugadu jii toro rugadu. Aino čare Pao Kurireu uwo boe pemegado tai tameartoruwo ji rugadu. Pao Kurireu uwo turaga maku tagai tardu pemegawo pui. Paiamedu boe pameartoruwo Jesus Cristoji Pao Kurireu uwo taidure jiwu turo pemegareu maku pagai. Dukodi čare boe emago pemegawo Jesus Cristoji rugadu tuwo ie kurido jii toro rugadu. Nou emago akedukawo rugadu jii toro rugadu. Umode turugadu rugadu.
HEB 13:22 Imedage nure tagi. Inogwamaguduwo tai. Taipaga pemegado awu iwadaruji. Ire awu atugoreboe pemegado mare ikare raido.
HEB 13:23 Iwo tawie jamedu. Pamedia Timóteo tawujedure baičoreu piji. Aregodumode mato itae kuri je dukeje itumode apo toro tawagai. Kuri je itumode toro tagae rugadu.
HEB 13:24 Tagimadudo tagimijerage eiamedu boebo čenai. Tagimadudo meartorure Pao Kurireu jiwuge eiamedu boebo čenai. Awu woewuge Itália moto kejewuge meartorure Jesus jiwuge emagore čei čegimaduwo tawagai pudai.
HEB 13:25 Pao Kurireu ro pemegawo tai jii toro rugadu. Iwadaru urugadureu.
JAM 1:1 Imire ikiere Tiago. Pao Kurireu utugare nure imi. Pagimijera Jesus Cristo utugare nure imi. Inure awu atugoreboe pemegado iwo maku meartorure Jesus jiwuge Judeu doge ewagai. Ia meartorure Jesus jiwuge Judeu doge emugukare woe Judeu doge eno moto keje. Emugure toro boe tuginaiwuge eno moto jamedu boe parugajeje. Nou boe tuginaiwuge eno moto kejewuge nure tagi. Tawagaire iroino awu atugoreboe tabo. Ikimaduwo taiamedu boebo rugadu.
JAM 1:2 Imedage nure tagi rugadu. Boe rakamode tai mare tamororamagadukaba. Taegaredo tai. Ro pegareuge emode boe pegado tai mare taegaredo tai. Boe pegamode tai mare taegaredo tai. Bope doge emode turokogado tai tuwo taro pegado mare taragado tai.
JAM 1:3 Tarduware marigudu. Boe pegareu umode turokogado tai tawo tagera ra tameartorure Jesus jitu piji mare taragado tai tameartoruwo rugadu Jesusji. Tamodukare tagera ra tameartorure Jesus jitu piji rugadu dukodire tameartoru rakamode Jesusji rugadu.
JAM 1:4 Nono tamodukare tagera ra tameartorure Jesus jitu piji dukodire tarduwa kurimode tameartoru rakawo Jesusji rugadu taro jamedu boe tabo. Tarduwamode rugadu tawo taro udo nono Jesus meardae mogadure.
JAM 1:5 Ia tagi tarduwakare tawo ia tameardae tawuje dukeje tamagodo Pao Kurireu bagai nou tameardae bagai. Nono emare umode tarduwado tawo nou tameardae pemegareu tawuje. Umodukare tabogurudo tarduwakare jiboeji. Pao Kurireu umode boe erduwa kurido rugadu taidu tabo rugadu tu tu je.
JAM 1:6 Mare tamagomode Pao Kurireu bagai dukeje tameartorudo tu ji rugadu. Tamororamagadukaba Pao Kurireu bataruji. Tameartorudo tu ji rugadu. Ia boe emororamagadumode Pao Kurireu bataruji tumeartoru jokodukawo ji dukeje ere nono pobo maereu mogadure. Bakuru umode nou pobo maereu kejewu pobo utu kurido dumogadure. Bakuru umode nou pobo maereu kejewu pobo utu jodo jiče woje jiče woje. Mare pobo maereu kejewu pobo utu ji karega inagoino. Boe emororamagadumode Pao Kurireu bataruji tumeartoru jokodukawo ji pugeje dukeje eroiwamodukare tumeartoruwo boe remawuji pugeje. Dujire inagoino. Emeartorumode jiboe umode tuginai awu meriji mare barogwato umode tuginai pugeje. Dujire inagoino. Emeartorumode jiboe umode tuginai tu tu je dukodire eroiwamodukare tuwo tumeardae pemegado jamedu. Emeardaere jiboe emodukare nono pu mogadure rugadu. Pao Kurireu umodukare tumeardae pemegareu maku etai jamedu. Nono boe emororamagadumode Pao Kurireu bataruji tumeartoru jokodukawo ji dukeje nou boe emodukare turo pemegareu iado. Ero pemegamode mare emode turo pemegareu kado pugeje.
JAM 1:9 Marenarue meartorure Jesus jiwuge egarere pudui rugadu. Marenarue doge enure emage mare emeartorure Jesusji dukodire Pao Kurireu aidu kurire ei. Dukodire inagoino egarewo pudui.
JAM 1:10 Oe kurireuge enojarokawo pudui rugadu ewo tudo nono boe etugarege emogadure tuwo turo pemegado boei. Nono eroiwamode tiegarewo pudui turo pemegareu boeji. Enoe kurire mare ewimode toe piji kuri je nono ipoguru kejewu okureboe mogadure.
JAM 1:11 Okureboe moture. Mare meri ruture dukeje boeru jeture nou okureboeji rugadu. Dukodire nou boeru umode okureboe bito kuri je. Dukodire nou okureboe motukare nono tumogadure pugeje. Oe kurireu ure nono okureboe mogadure. Mare okureboe ji karega inagoino. Oe kurireu jakarere pudui toe kurire kodi. Mare nou oe kurireu bimode rugadu. Nou oe umodukare udo činorudo tuwi piji rugadu. Dujire inagoino. Maragodumode tuwo toe kurido tugori mare pegagodumode rugadu. Bimode rugadu. Dujire inagoino.
JAM 1:12 Boe rakare meartorure Jesus jiwugei. Mare emodukare tugera ra tumeartorure Jesus jitu piji dukeje egaremode pudui rugadu. Boe pemegamode ei rugadu. Marigudu Pao Kurireu makore tumoduie meardu kurire puduiwuge emugudo pudabo baru tada. Mare boe ere turokogado nou meartorure Jesus jiwugei ewo tugera ra tumeartorure Jesus jitu piji. Mare ekare tugera ra piji rugadu. Dukodire Pao Kurireu umode tuwadaru jetudo pudui etai rugadu. Umode emugudo pudabo baru tada rugadu. Dukodire inagoino ei egarewo pudui rugadu.
JAM 1:13 Boe rakare pai dukodire boe egomode pai pameartorukaiago Jesusji pugeje. Pao Kurireu emaie roino pai tuwo turokogado pai nou boe emeardae pegareu tabo. Ainore ia boe egore. Ča pagawo pawadaru udo nono ewadaru mogadure. Emagore jiboe ukare turugadu. Pao Kurireu biapagamodukare boe emeardae pegareuji. Emare umodukare turokogado boei ia boe emeardae pegareu tabo.
JAM 1:14 Boe etaora pijire rugadu nou boe emeardae pegareu umode tudawuje tu tu je tuwo turokogado nou boei ewo turo pegado boei. Boe etaora pijire rugadu nou boe emeardae pegareu umode boe ekiripagado emeartorukawo Jesusji pugeje.
JAM 1:15 Ewiapagamode nou tumeardae pegareuji dukeje etaidumode nou tumeardae pegareuji. Nono etaiwomode nou turo pegamode kejewu meri bagai. Nono ero pegamode rugadu. Nono ero pegareu akedumodukare. Eroiwamodukare tuwo tugera ra nou turo pegareu piji. Nono nou ero pegareu umode ewido rugadu. Ainore boemode nou biapagare tumeardae pegareu jiwugei rugadu.
JAM 1:16 Imeardu kurire jiwuge imedage nure tagi. Taeku jado boe ekawo taekiripagado.
JAM 1:17 Pao Kurireu umodukare tudo tuginai nono boetugu mogadure. Boetugu umode tudo tuginai tu tu je. Mare Pao Kurireu ukare nono boetugu mogadure. Ure nono tumogadure ji aino. Umode nono tumogadure jii toro rugadu. Emare ure meri towuje. Ure ari towuje. Ure kuieje doge etowuje jamedu. Pao Kurireu pijire boe pemegareboe jamedu boe aregodumode boe etai baru piji.
JAM 1:18 Emare ure tumeardae tawuje tuwo parduwado tuwadaru remawuji. Pameartorure ji dukodire ure pado paginai paewoduwo pugeje. Mare paewodu ji karega inagoino. Pameartorure ji dukodire ure paginorudo pawarigudukawo joru pegareuto paeduwo pudabo nono baru tada. Dukodi čare parduware Pao Kurireu meardaeji. Meardu kurire meartorure puduiwugei rugadu nouia ture towujeboe kori. Dukodire umode edudo toro pudabo.
JAM 1:19 Imeardu kurire jiwuge imedage remawuge nure tagi. Iwo tawie. Boe ewo tudo turugadu tuwiapagawo pu bataruji. Boe emagokawo jii je tubagawo tumedagei ewo tuwadaru iado. Boe ekawo tuwu tumedage ewadaru kajeje. Boe ekorigodukawo kuri je jamedu.
JAM 1:20 Boe ekorigodumode dukeje eroiwamodukare tuwo turo jetorodo nono Pao Kurireu meardae mogadure.
JAM 1:21 Dukodire čare taragado tai tawo boe emeardae pegareu barigu tabiji. Taro pegareu jamedu boe barigu tabiji tawo tado nono Pao Kurireu utugarege emogadure tameartoruwo nou čere tarduwadowu bataru remawuji. Tameartorumode ji dukeje umode taginorudo tawarigudukawo bope doge eda kejewu joru pegareuto.
JAM 1:22 Boe etaiwomode pudui espelhoto. Nono etaiwore mare eture espelho piji dukeje ewiagodure nuba ture pugeje kuri je. Erduwakare nuba tiere pugeje. Nono boe ewiapagamode Pao Kurireu bataruji mare emeartorumodukare ji dukeje ere nono nou uture espelho pijiwuge emogadure. Erduwakare pudui. Emeardae pemegare pudui mare ere tiekiripagado. Erduwakare turo pegareuji. Ča tagaba taekiripagado. Tawiapagado Pao Kurireu bataruji mare tameartorudo ji jamedu.
JAM 1:25 Mare boe etaiwomode rugadu Pao Kurireu bataru pemegareuji tuwo to bakarudo ema pudai. Boe emeartorumode nou Pao Kurireu bataru pemegareuji dukeje emode tamudo bakaru pegareu piji. Emodukare tugera ra tumeartorure nou Pao Kurireu bataru jitu piji dukeje Pao Kurireu umode boe pemegado ei. Ewiagodumodukare nou tumeardure jiwu Pao Kurireu bataru pemegareu piji. Emeartorumode ji rugadu. Nono Pao Kurireu umode boe pemegado ei rugadu.
JAM 1:26 Ia boe emeardaere tumeartoru pemegaie Pao Kurireuji. Mare ekare togwa ra tuwadaru pegareu piji. Ekare togwa ra tuwadaru rakareu piji. Ekare togwa ra tugorigodure duji tuwadaru pegareu jitu piji. Mare ere tiekiripagado. Emeardaere tumeartoruie Pao Kurireuji. Mare pagatu jere egoino.
JAM 1:27 Mare boe emeartoru remawumode Pao Kurireuji dukeje etu pemegamode okoge bokwareu marenarue dogei. Boe emeartoru remawumode Pao Kurireuji dukeje etu pemegamode etuo etuje bokwareu marenarue dogei. Dukeje Pao Kurireu jordu pemegamode eroino duji. Emeartoru remawu nure pudui rugadu. Boe emeartoru remawumode Pao Kurireuji dukeje ewiapagamodukare meartorukare Pao Kurireu jiwuge emeardae pegareuji. Dukeje Pao Kurireu jordu pemegamode eroino duji. Emeartoru remawu nure pudui rugadu. Mako pegamodukare ei rugadu.
JAM 2:1 Imedage nure tagi. Pagimijera Jesus Cristo pemegare boe jamedu boe kori rugadu. Tameartorure Pagimijera Jesusji rugadu. Dukodire iwo tawie. Tagaba tardae tameardae pagado boei. Mare tameardaewo boei boe remawu tabo taro pemegawo boe eiamedu boei.
JAM 2:2 Ia meri keje tamode bato pui tamagowo Pao Kurireu bagai baruto dukeje ime pobedu doge emode turemo tawaito. Tarduwakare ei mare ia ukudau areia moture. Meture ierako tadawu tori kuieje anel moture. Mare nou metia ukudau areia pegagodure. Motu bokware rugadu.
JAM 2:3 Tamode tameardae pagado ei dukeje tagagomode nou ukudau areia motureuji uwo tumugudo nono boe pemegareu keje ira pemegareu keje. Mare tagagomode nou ukudau areia pegagodureuji jamedu ukawo tumugudo. Uwo tumugudo mare toro moto keje boe erdukawo ji. Tagagore aino ei dukeje tanure tameardae pegado ei. Tamode tameardae pagado ei dukeje taro pegamode rugadu. Tamode ekimijerado tagi tagaiwowo ero bagai tarduwo ia ero pegareuji ia ero pemegareuji mare pagatu jere taroino. Mare iwo tawie tarokaba aino boei. Tagaba tardae tameardae pagado boei. Tameardaewo boei boe remawu tabo boe pemegareu tabo taro pemegawo boe eiamedu boei.
JAM 2:5 Imeardu kurire jiwuge imedage nure tagi. Iwo tawie. Meartorukare Pao Kurireu jiwuge emeardae pagare oe bokwareugei, emago pegare ei jamedu enoe bokware kodi. Mare ia oe bokwareuge emeartorure Pao Kurireuji. Dukodire ere nono oe kurireuge emogadure Pao Kurireu jakai. Mare boe enoe ji karega inagoino. Emodukare tugera ra tumeartorure Pao Kurireu jitu piji. Dujire inagoino. Dukodire Pao Kurireu ure tugeragu nou oe bokwareugei pudae tuwo enoe kurido baru tada tuwo emugudo pudabo baru tada, tuwo boe eimijeragedo emage baru tada. Marigudu Pao Kurireu makore meardu kurire puduiwugei. Akore tumoduie meardu kurire puduiwuge eiamedu boe eimijeragedo emage baru tada toro ia meri keje. Ainore Pao Kurireu akore.
JAM 2:6 Ma kočare tagi tamago pegare oe bokwareugei. Mare oe kurireugeire tamago pemegare. Mare kočare emagere ere taekiripagado tuwo tagoe tawuje tabiji pudai. Ere tarego boe eimijera ae tumago pegare dutabo tuwo tumeardae pegareu maku nou boe eimijera ai nou boe eimijera uwo boe pegado tai tagoe bokwawo.
JAM 2:7 Nou oe kurireuge emago pegare tameartorure jiwu Pagimijera Jesusji jamedu. Boe eimijera pemegareu nure Jesusče mare nou oe kurireuge ewiapagakare nou inoduji. Emago pegare ji rugadu. Du inodu tabo tamago pemegare nou oe kurireugei. Kodiba taroino?
JAM 2:8 Pao Kurireu bataru padure bapera keje rugadu. Akore: – Tameardu kurido boei nono tameardu kuri moga tai dumogadure. Ainore Pao Kurireu akore. Tameartorumode nou bataruji dukeje taromode jiboe umode turugadu Pao Kurireu jakai.
JAM 2:9 Mare tamode tardae tameardae pagado boei dukeje taro pegareu jire taroino. Dukodire meartorukare Pao Kurireu bataru jiwuge emode tagi. Dukodire ro pegareuge emode tagi Pao Kurireu jakai.
JAM 2:10 Boe emeartoru kuriago Pao Kurireu bataru jamedu boeji mare emeartorumodukare nouia Pao Kurireu bataru roguji dukeje meartoru bokwareuge emode emage Pao Kurireu jakai. Ro pegareu remawuge emode emage Pao Kurireu jakai rugadu.
JAM 2:11 Pao Kurireu akore boe eribarikaiago toreduje piji toredu piji. Pao Kurireu akore boe ekawo boe ewido jamedu. Ča boe eribarimodukare toreduje piji toredu piji mare emode ia boe ewido dukeje ro pegareuge emode emage rugadu Pao Kurireu jakai.
JAM 2:12 Pao Kurireu okudugodure boebo dukodire ure tuwadaru pemegareu maku boe etai eno bakaruče ewo tamudo bakaru jawu piji. Pao Kurireu ure tuwadaru pemegareu maku boe etai eno bakaru maiwuče emeartoruwo ji. Emeartorumode nou bakaru maiwuji dukeje Pao Kurireu okudugodumode ebo. Umodukare boe pegado ei ia ero pegareu moriče. Mare boe enogudumodukare boebo nono nou bakaru maiwu mako mogadure dukeje Pao Kurireu umode boe pegado ei ero pegareu moriče rugadu. Dukodire inure tawie. Tameartorudo nou Pao Kurireu ure maku boe etaiwu bakaru maiwuji rugadu. Tameartorudo ji tamago pemegareu tabo taro pemegareu tabo. Tameartorumode nou Pao Kurireu ure maku boe etaiwu bakaru maiwuji dukeje Pao Kurireu umodukare boe pegado tai ia taro pegareu moriče. Dukodire tamode tagamudo nouia bakaru jawu piji.
JAM 2:14 Imedage nure tagi. Mare ia tagi tagagomode tameartoruie Jesusji mare tameartorumodukare Jesus bataruji dukodi pagare tagagoino. Tameartoru jokodukare Jesusji rugadu. Jesus umodukare taginorudo.
JAM 2:15 Ia meartorure Jesus jiwuge areme ime ekudau areia bokwamode eke bokwamode mare tamodukare ia tage maku etai tamodukare ia tagudau areia maku etai dukeje pagare tagagoino tameartoruie Jesusji. Etumode tabiji dukeje tagagomode ei: – Toro. Tagemode. Tagudau areia mode. Pao Kurireu uwo maku tagai. Ainore tagagomode mare tagare ia maku etai dukeje pagare tagagoino tameartoruie Jesusji. Tameartoru remawu mode Jesusji dukeje tamode ia tage maku etai, tamode ia tagudau areia maku etai.
JAM 2:17 Du aino ča imode tawie. Boe egomode tumeartoruie Jesusji mare emodukare turo pemegado boei dukeje pagare egoino. Jesus umodukare ekinorudo rugadu.
JAM 2:18 Ia boe egore i pudumie turo pemegaie mare imie imeartoruie Jesusji. Ainore ia boe egore. Mare imire itaidure boe ewo iordudo ia meartoru remawure Jesus jiwuge erore jiboeji. Ča iwo tawie. Boe emeartoru remawu mode Jesusji dukeje emode turo pemegado nono Jesus meardae mogadure rugadu.
JAM 2:19 Ia boe egore Pao Kurireu uie mitotu je. Nou emagore jiboe ure turugadu. Pao Kurireu ure mitotu je rugadu. Mare tu nou inodu jire emeartorumode dukeje emode nono bope doge emogadure. Pao Kurireu umodukare ekinorudo. Bope doge erduware Pao Kurireu ure mitotu je duji jamedu. Epagudure Pao Kurireuče dukodire etomagadugodure. Mare Pao Kurireu umodukare ekinorudo jamedu.
JAM 2:20 Tagagomode meartorure Jesus jiwu boe ewiagoromodukaie turo pemegawo dukeje jorduwa bokwareuge emode tagi. Boe egore tumeartoruie Jesusji mare ero pemegamodukare dukeje pagare egoino.
JAM 2:21 Ča iwo tawie. Meartoru remawu nure Jesus jiwu ro pemegamode rugadu. Boe etuo Abraão rore jiboe umode parduwado nou inoduji rugadu. Marigudu Abraão meartorure Pao Kurireuji dukodire Pao Kurireu ure tugeragu Abraãoji pudae tuwo udo nono ro pemegareu mogadure tiagai. Ainore Pao Kurireu bataru akore. Nono toro ia meri keje Pao Kurireu makore Abraãoji uwo tonaregedu Isaque bito tuwo tonaregedu Isaque maku Pao Kurireu ai. Dukodire Abraão ure tudo turugadu tuwo tonaregedu Isaque bito rugadu tuwo maku Pao Kurireu ai. Pao Kurireu jordure nou inoduji dukeje makore ji ukawo bito. Mare Pao Kurireu jorduware Abraão meartorumoduie pudui turo jamedu boe tabo. Abraão meartoru remawure Pao Kurireuji rugadu. Nono boe egore Pao Kurireu metia nure ema jamedu. Abraão akore tumeartoruie Pao Kurireuji. Nono meartorure Pao Kurireu makore pudui duji rugadu turo jamedu boe tabo. Abraão makore jiboe ure nono rore jiboe mogadure. Dukodire boe erduware Abraão meartoru remawure Pao Kurireuji rugadu.
JAM 2:24 Dukodire čare tarduware. Boe emeartoru remawumode Jesusji dukeje Jesus umode tugeragu ei pudae tuwo edo nono ro pemegareuge emogadure tiagai. Mare tu tuwadaru tabo boe emeartorumode Jesusji dukeje pagare egoino. Boe emeartoru remawumode Jesusji dukeje erore jiboe umode nono Jesus aidu mogadure jamedu. Dukodire Jesus umode tugeragu ei pudae tuwo edo nono ro pemegareuge emogadure tiagai.
JAM 2:25 Iwo tarduwado ia metiaji pugeje meartorure Pao Kurireu jiwuge ero pemegare rugadu. Marigudu Israel doge etaidure turugoduwo Jericó ba kurireu kejewugei tuwo tugeragu nou edaji epiji pudai dukodire ere tumedage etudo toro tubodu tabo taiwowo nou ba kurireu tadawu boei tuiorduwawo nuba turomode turugoduwo ei. Nono etaregodure toro dukeje ere tuwiado nou ba kurireu kejewu tugobaigarege epiji ia aredu jeribari diero bagaiwudo uwai tada. Nou aredu iere Raabe. Nou Raabe ro pemegare nou imei dukodire ure ewiado tugobaigarege epiji tuwai tada. Ure erduwado etuwo ia awaraji tuwo ekinorudo nou ba kurireu kejewu tugobaigarege epiji. Dukodire Pao Kurireu jordu pemegare nou areduji. Ure tugeragu ji pudae tuwo udo nono ro pemegareudo mogadure. Du meartorure Pao Kurireu jiwu ro pemegamode rugadu. Du jire inagoino.
JAM 2:26 Boe bimode rugadu dukeje padumode nono tuwi tabo. Bire rugadu. Boe erdumodukare ji pugeje. Nono ča ia boe egore tumeartoruie Jesusji mare erore jiboe ukare nono Jesus aidu mogadure dukeje nou boe ere nono nou bireu mogadure. Ero pemegare jiboe bokware. Mare ewi ji karega inagoino. Erore jiboe ukare nono Jesus aidu mogadure dukodire pagare egoino tumeartoruie Jesusji. Meartoru remawure Jesus jiwuge ekaregure emage. Jesus umodukare ekinorudo. Ewarigudumode bope doge eda kejewu joru pegareuto rugadu.
JAM 3:1 Imedage nure tagi. Pamode meartorure Jesus jiwuge erduwado Pao Kurireu bataruji dukeje Pao Kurireu aiwomode paroji rugadu ia paro pegareu rogu bagai. Aiwowo pai rugadu ia pawadaru pegareu rogu bagai. Dukodire ia tagi tagaidukare tawo nou meartorure Jesus jiwuge erduwado Pao Kurireu bataruji du pegakare. Mare ia tagi tare taro jetorodo marigudu. Tarduware rugadu Pao Kurireu bataruji. Dukodire tagaidumode tawo nou meartorure Jesus jiwuge erduwado Pao Kurireu bataruji mare taiamedu boe karega. Du pegakare jamedu.
JAM 3:2 Mare ia meri keje paiamedu boe paro pegare jamedu. Pagaidukare mare paro pegare ia meri keje. Pare pagera ra ia paro pegareu piji mare paro pegare iaboeji pugeje. Ainore boe eiamedu boe ere. Mare pawadaru pegareu tabore paiamedu boe paro pegare. Ia boe eroiware pudui tuwo tuwadaru pegareu barigu tubiji dukeje ro jetoro remawuge enure emage rugadu. Ewiapagamodukare tudadawu tumeardae pegareuji rugadu turo pegareu bokwawo rugadu.
JAM 3:3 Boe mode kuwaru okwa tadawu tugu kuwaru okwa to dukeje umode reko taidure jiboe ka. Nou kuwaru okwa tadaboe koiare umode kuwaru meartorudo nou mugure tuwugejewuji.
JAM 3:4 Nou ikarereu bure koiare umode ikarereu je mekido nou ikarereu utuwo nou maragodure ikarereu tabowu aidure jiboe ka. Ikarereu kurire. Ikarereu bure kurikare. Mare nou bure umode nou ikarereu je mekido nou maragodure tabowu aidure jiboe ka rugadu.
JAM 3:5 Boe ekeru ure nono nou kuwaru okwa tadaboe mogadure. Ure nono nou ikarereu bure mogadure jamedu. Mare kuwaru okwa tadaboe ji karega inagoino. Ikarereu bure ji karega inagoino. Boe ekeru kurikare. Mare makore jiboe kurire. Dujire inagoino. Tugeru tabore boe egore tumeardae kurire jiboe jamedu boeji. Dujire inagoino. Ia joru uruberi rogu umode jorudo itura tada dukeje joru čemode iturato rugadu.
JAM 3:6 Boe ekeru ure nono joru mogadure. Mare joru ji karega inagoino. Boe emagore jiboe jire inagoino. Tugeru tabore boe emagore. Dujire inagoino. Tumago pegareu tabore boe ere tumeardae pegado turo pegawo rugadu. Dujire inagoino. Boe emago pegare dukeje nou ewadaru pegareu umode tugirimi nou boe etae tuibagi nono joru čemode itura to dumogadure. Mare joru ji karega inagoino. Boe emago pegamode boei dukeje nou boe emode boe pegado nou mako pegare puduiwugei rugadu. Dujire inagoino. Boe pegamode nou mako pegare boeiwugei rugadu. Mare paga karega. Bope doge eimijera emare ure tumeardae pegareu maku boe etai tuwo emago pegado.
JAM 3:7 Boe erduware tuwo kuwaru doge ewudugugo marigudu. Erduware tuwo ia barege ewudugugo jamedu. Boe erduware tuwo ia kiebarege ewudugugo. Boe erduware tuwo ia pobo maereu tadaboe ewudugugo marigudu.
JAM 3:8 Mare boe eroiwakare tuwo tugeru butugugo. Jorubo pegareu ure nono boe ekeru mogadure. Mare boe ekeru ji karega inagoino. Jorubo ji karega inagoino. Boe emeardae jire inagoino. Boe emeardae pegareu meture boe etaora tada rugadu. Nou boe emeardae pegareu aidure tuwo tuiodo boe ewugeje tuwo boe ero pegado tu tu je.
JAM 3:9 Pamago pemegamode Pao Kurireu rore jiboeji dukeje pageru tabore pagagoino. Mare pamago pegamode ia boei dukeje nou pageru tabore pagagoino jamedu. Pao Kurireu emare ure boe eiamedu boe etowuje. Ure edo nono tumogadure. Kaba kodiba pagagoino pamago pegareu tabo nou boei? Ukare turugadu.
JAM 3:11 Kačiba po pemegamode dukeje pobo rorogodureu umodukare tudawuje nou kačiba piji. Kačiba po pegamode dukeje pobo pemegareu umodukare tudawuje nou kačiba piji rugadu. Mare kačiba ji karega inagoino. Pagogwa jire inagoino pawadaru pegareu ukawo tudawuje paia biji. Ča figo i piji azeitona umodukare tudawuje rugadu. Uva ikuredu itura piji figo umodukare tudawuje jamedu. Mare figo ji karega inagoino. Uva ji karega inagoino. Pagogwa jire inagoino pawadaru pegareu ukawo tudawuje paia biji rugadu.
JAM 3:13 Ia tagi tarduware rugadu taroiware rugadu. Mare tagojarokaba tawadaruji. Tagaba boe remawugedo tagi tawo tado nono boe etugarege emogadure taro pemegawo boei. Ainore taromode dukeje boe erduwamode tai jorduwareuge nure tagi duji.
JAM 3:14 Ia boe emeardae pemegare nou očarore puduiwugei. Egore nou boe erduwaie. Egore jorduwareuge nure emage rugadu. Ia boe emeardae pemegare nou korigodure boe enoe jiwugei. Egore nou boe erduwaie rugadu. Egore jorduwareuge nure emage rugadu. Mare jorduwareuge karegure emage. Erore nono meartorukare Pao Kurireu jiwuge ero mogadure rugadu. Meartorukare Pao Kurireu jiwuge enojarore pudui. Ekorigodure boe enoe keje. Pao Kurireu ro ji karega eroino. Bope doge eimijera koiare ure boe enojarodo tuwadaruji. Bope doge eimijera koiare ure boe ekimaredudo boei. Ča tagojarokaba tai. Tagorigodukaba boei boe enoe keje. Tagojaromode tai dukeje tagera ra nou taro piji. Tagorigodumode boei boe enoe keje dukeje tagaora ra nou tameardae pegareu piji rugadu. Tamago pemegakaba tai taroino duji. Tamago pemegado Pao Kurireu bataru remawuji pugeje.
JAM 3:16 Boe ekorigodumode boei boe enoe keje dukeje nou boe eroiwamodukare tuwo tumeardae tawuje puapo. Emeardaemodukare nono pu meardae mogadure. Ero pegamode pui rugadu boe ero pegareu jamedu boe tabo. Boe enojaromode pudui dukeje ainore boemode ei jamedu. Eroiwamodukare tuwo tumeardae maku puai. Emeardaemodukare nono pu meardae mogadure. Ero pegamode pui rugadu boe ero pegareu jamedu boe tabo.
JAM 3:17 Mare Pao Kurireu pijiwu boe erduware jiboe ure tuginai nou boe ero piji. Pao Kurireu umode boe erduwado dukeje nou boe emeardae pemegamode tuwo boe pemegado boei. Nou boe etaidumode tuwo tubemegado boei. Nou boe emeardaemodukare tu pudui. Emeardaemode tumedagei etaidure jiboeji. Pao Kurireu umode boe erduwado dukeje nou boe emode tudo nono boe etugarege emogadure turo pemegawo boei. Nou boe enogudugodumode boebo rugadu. Ero pemegamode boei rugadu. Nou boe emodukare tumeardae pagado boei. Etaidumode boe eiamedu boei. Emeardaemode boe remawu tabo boe eiamedu boei. Pao Kurireu umode boe erduwado dukeje etaidumodukare tuwo boe ekiripagado.
JAM 3:18 Erugodumodukare pui. Erugodumodukare ia boei. Egomode boei erugodukawo pui. Dukodire toro ia meri keje boe ewiapagamode ei jamedu. Ero pemegamode pui rugadu. Epemegamode pui rugadu.
JAM 4:1 Ia tagaidure jiboe ukare nono Pao Kurireu meardae mogadure. Mare ia tagaidure jiboe pemegare. Ure nono Pao Kurireu meardae mogadure. Mare du inodu tabo tawiagodukare tameardae pegareu piji. Meture tadada rugadu. Dukodire boe korire tai. Tarugodure tamedagei. Tagokire pui rugadu.
JAM 4:2 Tagaidure tamedage enoeji tu tagai tawo tageragu ji. Mare makudukare tagai. Dukodire tarugodure tamedagei nou enoe bagai rugadu. Tagokire pui rugadu. Tare ia tamedage ewido tawo tageragu nou enoeji tagai rugadu. Mare tamagokare Pao Kurireuji uwo nou tagaidure jiboe maku tagai. Dukodire ukare maku tagai rugadu.
JAM 4:3 Mare tamagore Pao Kurireuji ia tagaidure jiboe bagai mare tameardae pegare. Tamagore bagai tawo tagoe kurido du bagai tai taegarewo tagoeji tawo boe pemegado tu tai. Tameardaekare tawo boe pemegado tamedagei. Dukodire tamagore Pao Kurireuji iaboe bagai mare ukare maku tagai.
JAM 4:4 Awu inagoino jiwu tarore jiboe ure tado nono jeribarire toredu pijiwuge areme emogadure. Mare jeribarire toredu pijiwudo ji karega inagoino. Tare tageragu meartorukare Pao Kurireu jiwuge emeardaeji tameardaeče. Dujire inagoino. Ča iwo tawie. Boe etaidumode meartorukare Pao Kurireu jiwuge emeardae pegareuji dukeje erdu pegamode Pao Kurireuji. Pao Kurireu umode edo nono tuiordu pegare jiwuge emogadure jamedu.
JAM 4:5 Padure bapera kejewu Pao Kurireu bataru akore nou Pao Kurireu ure maku meartorure puduiwuge etaiwu Tuwari jordu pegare boei emeartorukawo ia boei toro pugeje. Aidure boe eiamedu boe emeartoruwo Pao Kurireuji tu rugadu.
JAM 4:6 Dukodire Pao Kurireu ure turo pemegareu kurido rugadu nou meartorure puduiwuge etai tuwo eragado rugadu ekawo tugera ra tumeartorure pudui dupiji. Padure bapera kejewu Pao Kurireu bataru akore rugadu. Akore: – Pao Kurireu umode boe pegado očarore puduiwugei tu tu je. Mare umode tugera maku ukare boe remawugedo pudumiwuge etai rugadu tuwo turaga maku etai rugadu. Ainore Pao Kurireu akore.
JAM 4:7 Dukodire imode tawie. Tameartorudo Pao Kurireuji. Tawiapagakaba bope doge eimijera meardae pegareuji. Tameartorumodukare bope doge eimijeraji dukeje emare rekodumode tabiji rugadu.
JAM 4:8 Taburedudo Pao Kurireuji tawiapagado bataruji. Tawiapagamode Pao Kurireu bataruji dukeje Pao Kurireu umode tuburedo tai jamedu. Tagera ra taro pegareu jamedu boe piji. Marigudu tamororamagadure Pao Kurireu bataruji tameartoru jokodukare ji. Mare aino ča tameardae pemegado rugadu tameartoruwo tu Pao Kurireuji rugadu.
JAM 4:9 Tagiarigo taro pegareu keje. Tagragududo rugadu taro pegareuji. Tagogwarikaba taro pegareuji pugeje. Taegarekaba tai taro pegareuji pugeje.
JAM 4:10 Tagojarore tawadaru jitu barigu tabiji tawo tado nono Pao Kurireu utugarege emogadure. Taromode aino dukeje Pao Kurireu umode boe pemegado tai. Emare umode boe remawugedo tagi rugadu.
JAM 4:11 Imedage nure tagi. Tamago pegakaba meartorure Jesus jiwuge ero pemegareuji. Tagaiwomode tamedage meartorure Jesus jiwuge erore jiboeji tamago pegawo nou tamedage ero pemegareuji pu biagai dukeje tamago pega nure Pao Kurireu ure maku tagaiwu bakaruji. Tamago pegamode Pao Kurireu ure maku boe etaiwu bakaruji dukeje tameartorumodukare nou Pao Kurireu bataruji rugadu. Tameardae pegamode nou Pao Kurireu bataruji. Ča iwo tawie. Tamago pegakaba tarore jiboeji pu biagai. Tamago pegakaba ia meartorure Jesus jiwugei ia boe ewiagai.
JAM 4:12 Aiwore boe ero pegareu bagaiwu ure mitotu je. Ure bakaru remawu maku boe etaiwu ure mitotu je. Pao Kurireu nure ema. Tu emare roiware taiwowo boe ero pegareu bagai tu rugadu. Tu emare roiware tuwo boe ekinorudo ewarigudukawo bope doge eda kejewu joruto tu rugadu. Tu emare jorduware meartorukare puduiwugei tuwo ewarigu bope doge eda kejewu joruto rugadu. Mare kočare tagaiwore tu tu tamedage ero pegareu bagai. Ča tarokaba aino pugeje.
JAM 4:13 Ia tagi tameardaere tarduwaie taromode jiboeji. Tagagore: – Awu meriji čedumode kuri woe awu boe eda ka. Barogwato čedumode toro ia ba kurireu ka. Čeedumode nou ba kurireu keje jii boeiwu joru ka. Čemaragodumode nou ba kurireu keje čewo čeno diero kurido. Ainore tagagore.
JAM 4:14 Mare iwo tawie. Pagare tagagoino. Tarduwakare nuba boemode tai barogwato. Tarduwamodukare rugadu nuba boemode tai boeiwu joru keje. Boere nono bokwaro mogadure. Bokwaromode aino ča je. Mare meri rutumode dukeje bokwaro akedumode kuri je. Mare bokwaro ji karega inagoino. Boe ewodumode erijodumode ekurigodumode kuri je. Kuri aino rugadu epegagodumode ewimode kuri pugeje rugadu. Dujire inagoino.
JAM 4:15 Dukodire iwo tawie. Ainore tagagomode pugeje: – Pao Kurireu aidumode dukeje paromode pameardaere jiboeji. Pao Kurireu aidumode dukeje pawimodukare barogwato. Ainore pagagomode pugeje.
JAM 4:16 Mare tagi ča tagojarore tai. Tamago pemegare tai tarore jiboeji taromode jiboeji. Tagagore taro kurimoduie tugori pugeje. Ča iwo tawie. Nou tameardae ukare turugadu Pao Kurireu meardaeji rugadu. Tagagoino dutabo taro peganure Pao Kurireuji.
JAM 4:17 Boe erduware turo pemegawo mare emodukare nou turo pemegareu towuje dukeje enure turo pegado pudui rugadu.
JAM 5:1 Ia tagi oe kurireuge nure tagi mare tameartorukare Jesusji. Ča tawiapagado iwadaruji. Boe pegamode tai rugadu. Ire tawie aino dukodire tagragudumode rugadu. Tagragudu rakamode rugadu.
JAM 5:2 Tagoe kurire mare aino čare tagoe jamedu boe ure tubegado. Tago boepa pijiwu tage kurire rugadu mare aino nou tage jamedu boe pegare rugadu. Boreuge enure tagudau areia kowuje jamedu dukodire ere tagudau areia pegado rugadu.
JAM 5:3 Ferrugem jeture tago tori kuiejeji. Jeture tago prata jamedu boeji jamedu. Dukodire nou tagoe motukare nono tumogadure pugeje. Pao Kurireu aregodumode kuri aino. Mare tawiapagakare nou inodu bagai rugadu. Tawiapagare tu tawo tagoe kurido. Tagare tagera bararedo marenarue dogei. Dukodire Pao Kurireu aregodumode dukeje umode boe erdudo nou tago tori kuieje kejewu ferrugem boeji tago prata kejewu ferrugem boeji tuwo boe erduwado taro pegare duji. Dukodire tawarigudumode bope doge eda kejewu joruto rugadu. Nou joru umode tawiri rugadu kowu rugadu.
JAM 5:4 Tadugarege emaragodure tago boepa tada rugadu. Emaragodu rakare rugadu tuwo tago boepa pemegado. Mare tagare emaragodae mori maku etai. Emaragodu rakare rugadu tuwo tago boepa tadaboe kado mare tagare emaragodae morido rugadu. Aino čare tadugarege emago pegare tugiarigodu tabo taroino pudui duji. Dukodire čare Pao Kurireu meardure egoino duji jamedu.
JAM 5:5 Tagi rema tagoe kurire rugadu. Tare tagoe kurido rugadu. Dukodire tamugu pemegare. Tawiapagakare ia marenarue dogei tawo ia tagoe pedo ei. Tawiapagare tu tai tawo boe pemegado tu tai rugadu. Dukodire tare nono boe emode bitowu tapira kareu mogadure. Mare tapira ji karega inagoino. Jesus aregodumode dukeje umode boe pegado tai. Dujire inagoino. Tawiapagare tu tai tawo boe pemegado tu tai. Tameardaekare tameartoruwo Jesusji dukodire tagogudukare marenarue dogebo. Dukodire Jesus umode boe pegado tai rugadu. Dujire inagoino.
JAM 5:6 Boe eimijerage nure tagi. Tagagore boe ewo ia ro pemegareuge ewido dukodire ewidodure rugadu. Ero pegakare tai mare tare ewido.
JAM 5:7 Mare ia tagi meartorure Jesus jiwuge nure tagi. Dukodire imedage nure tagi. Ča tawudugugo tai tamugu pemegawo tabaga tabo Pagimijera Jesus aregodumode dubagai. Boe emode boe tugu to boepato dukeje epagamode nou ture tuguboe botuwo dubagai. Boture dukeje epagamode ji je bubutu bagai bubutu uwo moto pegodo pugeje nou ture tuguboe ričoduwo rugadu. Ričodure dukeje epagamode jii toro tumode kado kejewu meri bagai tuwo nou ture tuguboe kado tuwo kowuje rugadu.
JAM 5:8 Tarodo nono nou ure to boepa pemegadowu ro mogadure rugadu. Mare boepa ji karega inagoino. Tabagado rugadu Pagimijera Jesus aregodumode dubagai. Dujire inagoino. Tagiarigodukaba. Tagaba tagera ra tameartorure Jesus jitu piji rugadu. Dujire inagoino. Pagimijera Jesus aregodumode kuri aino rugadu.
JAM 5:9 Imedage nure tagi. Tamago pegakaba pu rore jiboeji pu biagai. Pagimijera Jesus rakoje jaekare pai. Rakojere pagabo rugadu. Dukodire jorduware tarore jiboeji. Jorduware tamagore jiboeji. Tamago pegamode tamedage erore jiboeji pu biagai dukeje Jesus mako pegamode nou tamagore jiboeji jamedu. Pagimijera nure ema rugadu dukodire umode tamago pegareu morido tagai rugadu.
JAM 5:10 Imedage nure tagi. Tameartorure Jesusji dukodire ro pegareuge ere boe pegado tai. Ča tarduware mariguduwuge makore Pao Kurireu bataru jiwugei erore jiboeji jamedu. Emagore Pao Kurireu bataruji dukeje ro pegareuge ere boe pegado ei. Mare nou makore Pao Kurireu bataru jiwuge ewiapagakare nou ro pegareuge erore pudui duji. Ekare turo pegado ei. Emeardaekare tuwo nou ero pegare puduidu morido. Mare ekare tugera ra tumagore Pao Kurireu bataru jitu piji rugadu. Dukodire pamago pemegare erore jiboeji. Parduware Pao Kurireu rakojere ebo rugadu. Ia meartorure Pao Kurireu jiwu iere Jó. Nou Jó meartorure Pao Kurireuji rugadu dukodire bope doge eimijera ure boe pegado nou Joji rugadu. Mare Jó ukare tugera ra tumeartorure Pao Kurireu jitu piji rugadu. Dukodire toro ia meri keje Pao Kurireu ure boe pemegado Joji pugeje rugadu. Ča tarodo nono nou mariguduwuge makore Pao Kurireu bataru jiwuge ero mogadure rugadu. Boe pegare tai mare tagorigodukaba. Tagaba tagera ra tameartorure Jesus jitu piji rugadu. Pao Kurireu jorduware boere aino tai duji rugadu. Emare meardu kurire tai rugadu. Okudugodumode tagabo rugadu. Toro ia meri keje umode boe pemegado tai rugadu.
JAM 5:12 Ča iwo tawie ia bataru kurireuji pugeje. Awu bataru kurire imagore jiboe jamedu boe kori. Brae egore: “Juro por Deus.” Egore: “Juro por todos os meus bens.” Ainore brae egore. Ča tamagokaba nono nou brae emago mogadure rugadu. Tamagomode nono nou brae emago mogadure Pao Kurireu ie tabo dukeje Pao Kurireu umode boe pegado tai. Tamagokaba aino Pao Kurireu ie tabo. Tamagokaba aino moto kejeboe ie tabo. Tamagokaba aino iaboe ie tabo boe emeartoruwo tamagore jiboeji. Mare tamagore jiboe udo turugadu. Tagaidumode ia tamedage emeardaeji dukeje tamago pemegado nou boe ewadaru jipagi. Tagagodo aino: “Uu. Tameardae ure turugadu iagai.” Tagagodo aino: “Uu. Iromode aino rugadu.” Tagagomode aino dukeje tagaba nou tameardae pegado pugeje. Tagaba tameardae pegado nou tawadaru piji. Tarodo nono tamago mogadure rugadu. Mare tagaidumodukare nou tamedage emeardaeji dukeje tamago pemegado ewadaru jipagi jamedu. Tagagodo aino: “Boro. Nou tameardae ukare turugadu iagai. Iroiwakare iwo tameardae towuje rugadu.” Tagagodo aino. Nono tamodukare tawadaru biado tamedage epiji. Emeardae ukare turugadu taegai mare ewiedu pemegado. Tagaba ekiripagado epaga pagakawo tawagai.
JAM 5:13 Boe pegamode tai dukeje tamagodo Pao Kurireu bagai baruto. Taegaregodumode tai dukeje tara pemegado Pao Kurireu ie tabo ure boe pemegado tai duji.
JAM 5:14 Tagogodumode dukeje tamagodo meartorure Jesus jiwuge eimijerage ewagai. Nou meartorure Jesus jiwuge eimijerage etaregodumode tagae rugadu. Nono emode boekaguru reko tawiri joki tumagore Pao Kurireu bagai dutabo. Emagomode Pao Kurireu bagai baruto tabaru tabo Pao Kurireu uwo tabemegago.
JAM 5:15 Boe emagomode Pao Kurireu bagai tumeartorure jitu tabo ia kogodureu paru tabo dukeje Pao Kurireu umode nou kogodureu pemegago rugadu. Ro pegare jamedu dukeje Pao Kurireu biagodumode nou ro pegare jiboe piji. Umodukare morido ai rugadu.
JAM 5:16 Dukodire iwo tawie. Taro pegamode ia tamediaji dukeje tagera ra nou taro pegareu piji tagiarigodu tabo. Nono tamagodo nou tamediaji biagoduwo nou taro pegare pudui du piji. Tamagodo aino pu biagai. Tamagodo Pao Kurireu bagai baruto jamedu pu paru tabo dukejere Pao Kurireu umode tabemegago. Ro jetororeu makomode Pao Kurireu bagai baruto dukeje nou makore bagaiboe jetumode pudui rugadu.
JAM 5:17 Mariguduwu makore Pao Kurireu bataru jiwu iere Elias. Ure nono pamogadure. Imedure ema nono pamogadure. Emare makore Pao Kurireu bagai togwamagudure dutabo bubutukawo pugeje. Dukejere Pao Kurireu ure bubutu akedudo nou moto keje. Joru oto padure pobe metia bokware ari oto padure seis pugeje bubutu bokware dukeje.
JAM 5:18 Dukejere Elias makore Pao Kurireu bagai pugeje bubutu bagai. Nono bubuture. Pao Kurireu ure bubutudo nou moto keje pugeje. Nono nou bubutu koiare ure nou boe eno boepa pemegado pugeje.
JAM 5:19 Ča imedage nure tagi. Iwo tawie. Ia meartorure Jesus jiwu makomode nou ro pegareuji uwo tugera ra turo pegareu piji tumeartoruwo Pao Kurireuji pugeje. Dukeje nou ro pegareu umode tugera ra turo pegareu piji rugadu tumeartoruwo Pao Kurireuji dukeje Pao Kurireu biagodumode nou ro pegare jiboe piji. Umodukare boe pegado ji ro pegare jiboe moriče. Nou ro pegareu barigudumodukare bope doge eda kejewu joruto rugadu. Tagoino dutabo nou meartorure Jesus jiwu ure nou ro pegareu udo tuginorudo rugadu. Dukodire iwo tawie rugadu. Ia tagi taro pegamode Pao Kurireu bataru remawu piji mare ia tamedage emagomode tai tawo tagirimi nou taro pegareu piji Pao Kurireu bataru remawu ka pugeje dukeje tawiabutudo nou iwadaru keje. Tagorigodukaba ei. Ero pemeganure tai rugadu. Ča iwadaru rugadu reo.
1PE 1:1 Pedro nure imi. Iture Jesus Cristo bataru tabo boe ewagai. Inure awu atugoreboe towuje iwo maku Pao Kurireu ure tugeragu jiwuge etai. Mare edu jaere pubiji. Emugure Ponto moto keje. Emugure Galácia moto keje. Emugure Capadócia moto keje. Emugure Ásia moto keje. Emugure Bitínia moto keje jamedu. Meartorukare Jesus jiwuge ere boe tuginaiwugedo emage tiagai jamedu.
1PE 1:2 Mare marigudu Pao Kurireu meardaere tuwo tugeragu boei tuwobeče. Dukodire ure tugeragu nou boei rugadu. Uwari ure erodo tuginai ero pemegawo, emeartoruwo tu Jesus Cristo bataruji. Jesus ure tugu redo ero pegareu moriče. Dukodire ero pegareu barigudure epiji. Nou boe ewagaire inure awu atugoreboe maku. Ča Pao Kurireu ro pemegawo tai. Uwo tabemegado boei uwo boe epemegado tai jamedu tawiagorokawo iaboe bagai pugeje.
1PE 1:3 Pamago pemegawo Pao Kurireuji. Pagimijera Jesus Cristo uo nure ema. Okudure pagabo dukodire ure paginorudo. Ure Jesus jewodudo pugeje tuwo paginorudo tuwo paro maiwu maku pagai. Dukodire pabagare Jesus bagai rugadu.
1PE 1:4 Parduware ia meri keje Pao Kurireu umode turo pemegareu maku meartorure Jesus jiwuge etai. Ure nou boe pemegareboe jetudo baru tada. Boe pegamodukare ji nono. Akedumodukare nono.
1PE 1:5 Tameartorure Jesusji dukodire Pao Kurireu umode nou boe pemegareboe maku tagai. Awu moto akedu keje Pao Kurireu umode taginorudo boe pegareu piji. Dukodire Pao Kurireu jetu pemegamode tai turaga tabo jii toro ture tugirimi du ka.
1PE 1:6 Dukodire čare ire tawie taegarewo tai. Mare boe pegare tai jii je. Dukodi čare tagiarigodumode jii toro ia meri ka.
1PE 1:7 Ro pegareuge ere boe pegado tai. Mare paga karega. Pao Kurireu jorduwo tameartorumode pudui dubagai. Boe etaidu kurire tori kuiejeji. Mare Pao Kurireu biapagakare tori kuiejeji rugadu. Biapagare boe emeartorure Jesus jitu bagai. Nono joru čemode tori kuiejeto dukeje nou joru umode meture tori kuieje tadawu pegareboe akedudo tori kuieje piji. Joru umode boe pegareu boe tawuje nou tori kuieje piji rugadu tori kuieje motuwo rugadu boe egai. Ča boe pegamode tai nono nou joru rore kuieje jitu mogadure. Mare joru ji karega inagoino. Pao Kurireu meardae koiare umode boe pegado tai tuiorduwo tameartoru raimode Jesus jitu bagai. Dujire inagoino. Tagaba tagera ra tameartorure Jesus jitu piji jii toro aregodumode pagae du ka. Dujire inagoino. Tamodukare tagera ra Jesus piji dukeje Pao Kurireu mako pemegamode tai. Umode boe pemegado tai. Umode boe kurireugedo tagi.
1PE 1:8 Tardukare Jesusji mare tameardu kurire ji. Tameartorure ji jamedu. Dukodire taegaregodure Jesusji. Ure taegaredo pudui rugadu. Boe erduwakare tuwo boe erduwado taegarere tai duji.
1PE 1:9 Taegarere tai mare paga karega. Tameartorure Jesusji kodi. Dukodire ure taginorudo. Dukodire umodukare tawarigu bope doge eda kejewu joruto.
1PE 1:10 Marigudu makore Pao Kurireu bataru jiwuge emarure Pao Kurireu bataru remawu bagai tuiorduwawo nuba Pao Kurireu romode tuwo boe ekinorudo. Erduware dukejere ere boe ewie Pao Kurireu umoduie boe ekinorudo rugadu duji. Marigudu rugadu egoino.
1PE 1:11 Etaidure tuiorduwawo kaba meri kejeba Pao Kurireu umode boe ekinorudo. Etaidure tuiorduwawo nuba Pao Kurireu romode. Nono Pao Kurireu Uwari ure ewie. Akore boe pegamoduie nou umode boe ekinorudowuji. Dukodi čare ere boe ewie jamedu. Egore boe pegamoduie nou umode boe ekinorudowuji mare boe pemegamoduie ji pugeje.
1PE 1:12 Pao Kurireu ure nou makore Pao Kurireu bataru jiwuge ewie marigudu tumodukaie nou umode boe ekinorudowu arego etae. Tumoduie arego toro ia meri keje pagae. Aino čare nou jaoboe emagore jiboe jeture pudui pai rugadu. Pao Kurireu ure Tuwari arego meartorure puduiwuge etae tuwo eragado ewo boe ewie Jesus bataru pemegareuji rugadu. Dujire nou jaoboe egoino. Čare tameardure aino nou Jesus bataru pemegareuji. Marigudu Pao Kurireu utugarege baru tadawuge etaidure tuiorduwawo nou bataruji mare erduwakare.
1PE 1:13 Dukodi čare tameardae pemegareu tawuje. Taeku jado tawo taragado tai taro pegakawo. Jesus Cristo aregodumode dukeje umode boe pemegado meartorure puduiwugei. Tawiagodukaba nou inodu piji. Taragado tai tabagawo nou inagoino jiwu Jesus ro pemegareu bagai rugadu jii toro rugadu.
1PE 1:14 Tameartorudo Pao Kurireu bataruji. Marigudu tarduwakare Pao Kurireu bataruji dukodire tameardae pegare. Aino čare tarduware. Dukodi čare tameardaekaba nono jawu tameardae mogadure.
1PE 1:15 Mare tarore jiboe jamedu boe udo tuginai taro pegareu piji taro pemegawo rugadu nono Pao Kurireu rore jiboe mogadure. Pao Kurireu makore tawagai. Rore jiboe ure tuginai boe ero pegareu piji rugadu.
1PE 1:16 Marigudu ure tuwadaru bu bapera keje. Akore: – Irore tuginai dukodire čare taro udo tuginai nono iro mogadure taro pemegawo.
1PE 1:17 Tamagore baruto Pao Kurireu bagai dukeje tagagore: “Pao Kurireu” aino ji. Emare aiwore boe eiamedu boe ero jamedu boeji ero pegareu bagai ero pemegareu bagai. Emare jordumode boe eiamedu boe ero pegareuji rugadu ero pemegareuji rugadu. Dukodi čare taeku kidugo Pao Kurireuji tameartoruwo tu ji rugadu jii toro rugadu. Dukodi čare meartorukare Pao Kurireu jiwuge emode tado nono boe tuginaiwuge emogadure tiagai.
1PE 1:18 Marigudu jaoboe ere turo tawuje mare pagatu je. Jaoboe ero ukare boe ekinorudo. Ukare boe ero pemegado. Pao Kurireu ukare taro pegareu morido diero tabo. Ukare taro pegareu morido tori kuieje tabo, prata tabo. Jesus Cristo bire tuwo tugu redo taro pegareu moriče rugadu. Marigudu jaoboe ere carneiro pemegareu bito tu tu je turo pegareu moriče. Jesus Cristo ure nono carneiro pemegareu mogadure. Mare carneiro ji karega inagoino. Ro pemegareu nure ema. Bire boe ero pegareu moriče rugadu. Dujire inagoino. Boe emode diero akedudo. Boe emode tori kuieje akedudo. Boe emode prata akedudo. Mare boe emodukare Jesus rore jiboe akedudo.
1PE 1:20 Pao Kurireu ukare awu moto towuje raga mare ure tumeardae tawuje marigudu tuwo tugeragu Jesusji uwo boe ekinorudo. Maigodu aino ure Jesus arego boe etae uwo boe pemegado tai.
1PE 1:21 Tameartorure Jesusji dukodire ure tameartorudo Pao Kurireuji. Pao Kurireu emare ure Jesus jewodudo pugeje. Pao Kurireu ure boe pemegado Jesusji baru tada. Dukodire Pao Kurireu jire tameartorumode tu rugadu. Emare umode boe pemegado tai toro ia meri keje. Dukodire čare tabagare bagai rugadu.
1PE 1:22 Tameartorure Pao Kurireu bataru remawuji rugadu. Dukodire tare taro pemegado. Dukodi čare tameardu kurire meartorure Jesus jiwugei rugadu. Boe remawu jire taroino. Aino čare tagaba tagera ra tameardu kurire jiwuge tamedage epiji. Tameardu kurido ei tagaidu tabo.
1PE 1:23 Pao Kurireu bataru akedumodukare. Tuwadaru tabore Pao Kurireu ure boe jamedu boedo turugadu. Tameartorure Pao Kurireu bataruji dukodi ure ro pemegareugedo tagi pugeje. Dukodire tare nono Pao Kurireu ore emogadure. Pao Kurireu bimodukare.
1PE 1:24 Marigudu ure tuwadaru bu bapera keje. Akore: – Boe eiamedu boe ere nono boebutu mogadure. Boe eiamedu boe ere nono okureboe mogadure jamedu. Boebutu akedumode rugadu. Boebutu bimode rugadu. Okureboe butumode moto ka tuwi tabo. Mare boebutu ji karega inagoino. Okureboe ji karega inagoino. Boe ewimode. Boe etagedumode. Dujire inagoino.
1PE 1:25 Mare Pao Kurireu bataru akedumodukare rugadu jii toro. Awu Pao Kurireu bataru jire boe ere tawie aino. Jesus jire egoino. Kodire tameartorumode tu ji.
1PE 2:1 Taro pegareu jamedu boe barigu tabiji. Tagaidukaba tawo boe pegado boei pugeje. Tagaba boe ekiripagado pugeje. Tameartorudo tamagore jiboeji. Tagorigodukaba boei boe enoe keje pugeje. Tamago pegakaba boe ero pemegareuji pugeje.
1PE 2:2 Mare tagaidudo tu Pao Kurireu bataru remawuji nono boe etore kugure etaidumoga togwagiriwo dumogadure. Mare boe etore enogwagiri ji karega inagoino. Pao Kurireu bataru remawu jire inagoino. Tameartorudo ji. Tarduwamode Pao Kurireu bataruji tameartorumode ji dukeje Pao Kurireu umode taginorudo taro pegareu mori piji. Tameartorumode Pao Kurireu bataruji dukeje boe pemegareuge emode tagi.
1PE 2:3 Marigudu Pao Kurireu ure tuwadaru bu bapera keje. Akore: – Tarduwamode iwadaruji dukeje tarduwamode i rugadu. Boe eimijera kurireu nure imi rugadu. Itaidure boei. Ro pemegareu nure imi rugadu.
1PE 2:4 Tagarego Pagimijera ae. Boe etaidukare ji nono etaidukare ia toriji dumogadure. Etaidukare tori pegareuji tuwo tuwai pemegado tabo. Etaidukare Jesusji jamedu. Egore Jesus pegaie kodi. Mare Pao Kurireu aidure Jesusji. Akore Jesus pemegaie.
1PE 2:5 Ča tameartorudo Jesusji. Umode tuwobedo tagi. Nono tamode nono Pao Kurireu uwai mogadure. Mare Pao Kurireu uwai ji karega inagoino. Tamaragodu pemegamode puapo Pao Kurireu ai. Dujire inagoino. Tameartorumode Jesusji uwo taginorudo dukodire tamaragodure Pao Kurireu ai nono maragodure Pao Kurireu uwai tadawuge ure boe enomea maku Pao Kurireu aiwuge emogadure. Dujire inagoino. Tamode tamaragodae maku Pao Kurireu ai. Tamode taro udo tuginai taro pegareu piji tawo taro pemegareu maku Pao Kurireu ai jamedu.
1PE 2:6 Marigudu Pao Kurireu ure tuwadaru bu bapera keje. Akore: – Ire ikeragu ji. Ure nono tori pemegareu mogadure boe ewo tuwai pemegado tabo. Mare tori karega. Imedu nure ema. Imode udo turugadu Sião keje. Boe emeartorumode ji dukeje boe ekiarigodumodukare jii toro.
1PE 2:7 Tameartorure ji dukodire tagagore mori kurimoduie. Mare iage emeartorukare ji. Pao Kurireu makore emeardaeji jamedu. Akore: – Boe emeardae pegare toriji. Egore pegaie tuwo tuwaido ema. Mare nou tori pemegareu nure ema rugadu boe ewo tuwaido ema rugadu.
1PE 2:8 Kodire Pao Kurireu akoino ei jamedu: – Boe ewure jetumode awu toriji ewure romode gu joki dukeje umode ewududo rugadu. Mare tori karega. Jesus jire Pao Kurireu akoino. Boe emeartorukare Jesusji dukodire ere tugera ra turo pemegareu piji. Pao Kurireu meardae koiare ure emeartoru bokwado Jesusji.
1PE 2:9 Mare tagi Pao Kurireu ure tugeragu tai tameartoruwo Jesusji. Dukodire tamaragodure Pao Kurireu ai nono uwai tadawuge ure boe enomea maku Pao Kurireu aiwuge emogadure tamago pemegawo Pao Kurireu rore tai jiboeji. Boe eimijera kurireu nure ema. Pao Kurireu ure tarodo tuginai taro pegareu piji taro pemegawo. Pao Kurireu ure tuwobedo tagi. Ure tugeragu tai tawo boe ewie turo pemegareuji. Ure tugeragu tai boečo piji. Ure tamugudo urugure tubijiwu jorugu pemegareu tada.
1PE 2:10 Marigudu Pao Kurireu uwobe kare tagi. Mare aino čare uwobe remawuge nure tagi. Marigudu tarduwakare Pao Kurireuji. Tarduwakare okudugoduie boebo duji. Mare aino Pao Kurireu okudugodure tagabo dukodire čare tarduware ji rugadu.
1PE 2:11 Imeardu kurire jiwu imedage nure tagi. Iwo tarduwado. Tawai remawu keje karega taedure woe awu moto keje. Tawai remawu mugure baru tada. Boe tuginaiwuge nure tagi woe awu moto keje. Dukodi čare tawiapagakaba tameardae pegareuji. Tameardae pegareu aidure tuwo taro pegado, tuwo tabegado jamedu. Mare tawiapagakaba ji.
1PE 2:12 Taro pemegado meartorukare Jesus jiwugei. Etaidumode tumago pegawo taroji. Mare taro pemegamode ei dukeje enaguwamodukare tumago pegawo tarore jiboeji. Erduwamode taro pemegareuji. Toro ia meri keje Pao Kurireu aregodumode dukeje nou meartorukare Jesus jiwuge ewiabutumode taro pemegare jiboe keje. Tarore jiboe umode emago pemegado Pao Kurireuji. Tarore jiboe umode edo Pao Kurireu ie kurido rugadu.
1PE 2:13 Tameartorudo boe eimijera remawuge eiamedu boei. Dukodire tamode boe emago pemegado Pagimijera Jesusji. Tameartorudo Roma kejewu boe eimijera kurireuji. Boe eimijera kurireu nure ema woe awu moto keje boe eimijerage eiamedu boe epiji.
1PE 2:14 Emare ure tugeragu boe eimijeragei tuwo boe eimijera governador dogedo emage. Tameartorudo nou boe eimijera governador dogei jamedu. Emode boe pegado ro pegareugei ero pegareu moriče. Emago pemegamode ro pemegareugei jamedu.
1PE 2:15 Jorduwa bokwareuge emago pegamode meartorure Jesus jiwugei. Mare Pao Kurireu aidure taro pemegawo. Taro pemegamode dukeje tamode jorduwa bokwareuge emago bokwado tarore jiboeji.
1PE 2:16 Tarodo nono tawujedure boe pegareu pijiwuge ero mogadure. Tawujedure boe pegareu pijiwuge nure tagi mare tagaba tagirimi taro pegareu ka pugeje. Tarodo nono Pao Kurireu utugarege ero mogadure.
1PE 2:17 Tawiapaga pemegado boei. Tameardu kurido meartorure Jesus jiwuge eiamedu boei nono taro moga tawobei dumogadure. Taeku kidugo Pao Kurireuji tameartoruwo tu ji rugadu. Tawiapaga pemegado Roma kejewu boe eimijera kurireu bataruji.
1PE 2:18 Boe etugarege emode tagi dukeje tameartorudo tagimijeragei. Tawiapaga pemegado ewadaru jamedu boeji. Emago pemegamode tai, ero pemegamode tai dukeje tameartorudo ei. Emago rakamode tai, ero pegamode tai mare du inodu tabo tameartorudo ei jamedu.
1PE 2:19 Taro pegakare boei mare boe pegare tai dukeje tamagokaba. Tarduware Pao Kurireu meardaeji. Tarduware umode boe pemegado tai duji.
1PE 2:20 Taro pegamode dukeje ča nono umode turugadu boe ewo boe pegado tai taro pegareu moriče. Mare taro pemegamode du inodu tabo boe emode boe pegado tai dukeje Pao Kurireu umode boe pemegado tai. Dukodi boe emode boe pegado tai dukeje tamagokaba.
1PE 2:21 Pao Kurireu meardae reo. Jesus Cristo ro pegareu bokware mare boe pegare ji. Boe pegare ji paro pegareu moriče. Ure nou turo maku pagai parowo nono turo mogadure.
1PE 2:22 Jesus ro pegareu bokware. Batrarodu bokware.
1PE 2:23 Boe emago pegare ji mare makokare ewadaru jipagi. Boe pegare ji mare ukare tumago pegado nou ro pegare puduiwugei. Mare upagare Pao Kurireu bagai. Pao Kurireu aiwore boei boe remawu tabo ero pegareu bagai. Dukodire umode boe pegado nou ro pegareugei ero pegareu boe moriče.
1PE 2:24 Mare Jesus Cristo koiare ure tumagu paro pegareu jamedu boe moriče. Dukodire ure tugobaigarege edo tuwido ipo padure pugajejewu keje. Jesus Cristo koridodure paro pegareu moriče tuwo pabemegado paro pemegawo paro pegakawo pugeje. Dukodire pare nono bireuge emogadure paro pegareu bokwawo pugeje. Mare pawi ji karega inagoino. Pawiapagakare boe emeardae pegareuji pugeje. Dujire inagoino. Mare pare nono jewodureuge emogadure jamedu paro jetorowo Pao Kurireu meardaeji rugadu. Mare paewodu ji karega inagoino. Pawiapagare tu paro jetorowo tu rugadu. Dujire inagoino.
1PE 2:25 Marigudu tare nono carneiro dogere. Mare carneiro dogei karega inagoino. Tare tawarigu boeto Pao Kurireu piji. Dujire inagoino. Mare Jesus ure tadawuje boe pegareu piji pudae tameartoruwo pudui. Emare jetu pemegare boei. Emare jetu pemegamode tai rugadu. Umodukare tugera ra tabiji jii toro rugadu.
1PE 3:1 Areme emeartoruwo tugogei nono tumeartorure Pao Kurireu jitu mogadure. Ia imedu meartorukare Pao Kurireu bataruji mare oreduje meartorure Pao Kurireuji toreduji jamedu. Dukodire oredu aidure tumeartoruwo Pao Kurireuji jamedu. Aredu makomodukare boeji toredu biagai.
1PE 3:2 Mare oredu jordumode toreduje ro pemegareuji, toreduje ro jetororeuji dukeje aidumode tumeartoruwo Pao Kurireuji jamedu.
1PE 3:3 Aredu umodukare tumodudo boe enoe tabo. Umodukare tao motudo tumoduwo. Umodukare tumodudo tuwiatadawu tabo. Umodukare tumodudo tugudau areia motureu tabo.
1PE 3:4 Mare aredu umode tumodudo tudada tumeardae pemegareu tabo. Meardae pemegamode boei dukeje motumode. Mako rakamodukare boei dukeje motumode. Meardae butugumode boei dukeje motumode. Nou roino jiwu motu akedumodukare. Ainore Pao Kurireu aidure jiboere.
1PE 3:5 Jao areme meartorure Pao Kurireu jiwuge epagare Pao Kurireu bagai uwo boe pemegado pudui. Nou areme ere tumodudo tumeartorure tugogei dutabo.
1PE 3:6 Ainore Sara rore. Meartorure toredu Abraãoji. Akore: “Ikimijera” aino ji. Taro pemegamode jamedu tabagudumodukare boeče dukeje tamode nono Sara mogadure.
1PE 3:7 Ime erowo aino jamedu. Ime emugu pemegawo tuwirebo. Erduwawo turo pemegawo tuwirei. Areme eragakare nono ime eraga mogadure. Areme ime emeartorumode Pao Kurireuji dukeje umode eewodudo pugeje ewikawo pugeje. Dukodire ime emago pemegamode tuwirei ero pemegamode ei rugadu. Erore aino dukeje emagomode baruto du nou ewadaru aregodumode toro baruto rugadu.
1PE 3:8 Taiamedu boe tameardae pemegado nono pumeardae mogadure. Tameardu kurido pui nono boe etuwobe eromode pui dumogadure. Taro pemegado pui. Tagaidukaba boe remawugewo tagi tamedage epiji mare tamago pemegado pui tawo boe remawugedo tamedageče.
1PE 3:9 Ro pegareuge ero pegamode tai mare taro pegakaba ei ero jipagi. Ro pegareuge emago pegamode tai mare tamago pegakaba ei ewadaru jipagi. Mare paga karega. Pao Kurireu makore tawagai kodire makore tai. Akore tumoduie boe pemegado tai. Kodire mako pegare taiwuge tamago pegakaba ewadaru jipagi, tamago pemegado ewadaru jipagi.
1PE 3:10 Marigudu Pao Kurireu ure tuwadaru bu bapera keje boe ewiagai. Akore: – Akaidumode aegarewo arore jiboeji. Akaidumode awo boe pemegado ai. Dukodire čare amago pegakaba boei. Awadrarodukaba.
1PE 3:11 Akera ra aro pegareu piji. Aro pemegado jii toro. Aragado amugu pemegawo boebo tabemegawo pui rugadu.
1PE 3:12 Mare paga karega. Pao Kurireu aiwo pemegare ro pemegareugei. Ro pemegareuge emagomode baruto dukeje Pao Kurireu meardumode ewadaruji. Mare Pao Kurireu umode tuwu ro pegareuge etodogajeje.
1PE 3:13 Taro pemegamode dukeje boe emodukare tagorido.
1PE 3:14 Mare boe emode boe pegado tai taro pemegareu moriče dukeje taegaredo tai. Tabagudukaba eče. Tamororamagadukaba. Boe pemegamode tai rugadu.
1PE 3:15 Tameartorudo Jesus Cristo bataruji. Tamago pemegado ji. Tagimijera kurireudo ema. Tado tarugadu tamago pemegawo boe ewadaru jipagi taro butugu tabo tawo erduwado tameartorure jiboeji.
1PE 3:16 Mare tamago rakakaba ei. Tamago butugudo ei tawadaru pemegareu tabo. Tameardae pegakaba taro pegakawo boei. Boe emago pegamode tai. Emago pegamode taro pemegareuji. Mare tameartorumode Jesus Cristo bataruji rugadu dukodire epogurumode tumagore jiboeji.
1PE 3:17 Ro pegareuge emode boe pegado tai taro pemegareu moriče. Mare emode boe pegado tai tu Pao Kurireu aidu keje. Mare Pao Kurireu umode boe pemegado tai. Mare ro pegareuge emode boe pegado tai taro pegareu moriče dukeje boe pegamode tai rugadu.
1PE 3:18 Jesus Cristo bire rugadu boe eiamedu boe ero pegareu moriče. Mare bimodukare pugeje. Ro pemegareu nure ema. Bire ro pegareuge emugato tuwo boe etarego Pao Kurireu ae. Bire rugadu. Mare Pao Kurireu Uwari ure jewodudo tuwi piji bikawo pugeje.
1PE 3:19 Pao Kurireu Uwari uture apo bireuge aroe etae tuwo ewie Pao Kurireu bataruji. Meartorukare Pao Kurireu jiwuge bireuge aroe ewiagaire akoino.
1PE 3:20 Marigudu Pao Kurireu makore Noéji uwo ika kurireu towuje. Ure Noé bie pobo umoduie tuiodo boeto boe jamedu boe parugajeje. Upaga raire rugadu boe emeartoruwo tuwadaruji. Mare emeartorukare. Kodire ewire poboto. Nou bireuge aroe emugu kimore nono tieda keje ji aino. Kodire Jesus makore ei. Tu Noé meartorure Pao Kurireu bataruji tuwobebo. Enodo padu kejewure oito tu rugadu. Emagere pobo ukare ewido. Pao Kurireu ure ekinorudo pobo piji ika kurireu tada.
1PE 3:21 Jesus jewodure pugeje dukodi čare umode boe ekinorudo etukawo nou bope doge eda pegareu ka. Nono pobo tabore Pao Kurireu ure boe erduwado tuwo tao pegodo. Boe emeartorumode Jesus jitu keje boe emode tao pegodo. Mare boe ekawo tuwiri kabi karega. Emode tao pegodo tuwo tuwadaru maku Pao Kurireu ai turo pemegamoduie jii toro.
1PE 3:22 Jesus jewodure pugeje dukeje ruture baruto. Dukejere ure tumugudo nono Pao Kurireu ukana pemegareu jagwai. Nono Pao Kurireu utugarege baru tadawuge eimijera nure ema. Baru tadawuge boe eimijerage eiamedu boe eimijera nure ema. Rakare bope doge eiamedu boe ekori rugadu.
1PE 4:1 Ro pegareuge ere boe pegado Jesus Cristoji. Dukodire biri koridodure. Boe pegamode tai jamedu. Dukodi taragado tai tameardaewo nono Jesus Cristo meardae mogadure. Mare boe pegamode boei dukodire emode tugera ra turo pegareu piji.
1PE 4:2 Aino čare tameartorudo Pao Kurireu meardaere jiboeji jii toro tawimode du ka. Tameartorukaba boe etaidure jiwu tumeardae pegareuji.
1PE 4:3 Marigudu tarore nono meartorukare Pao Kurireu jiwuge ero mogadure. Marigudu taro pega raire rugadu. Tawiapagare tu tawo tageragu aremei. Tage kurure tai meri jamedu boeji. Tawadu raire taro pegareu tabo. Tawadu raire piga kuru tabo. Tamago pemegare mugure tawai tadawu santoji, padure tabara kejewu santoji. Tare tao kurireudo ema mare pagatu jere tagagoino.
1PE 4:4 Aino čare tarokare aino pugeje. Tagaregodukare meartorukare Pao Kurireu jiwuge ewadae ka pugeje taro pegakawo ebo pugeje. Dukodi čare eku kidure tai aino. Emago pegare tai jamedu.
1PE 4:5 Mare Pao Kurireu aiwore boe eiamedu boe ero pegareu bagai tuwo boe pegado ro pegareugei ero pegareu moriče. Dukodi čare eiamedu boe emagomode turo pegareuji Pao Kurireu biagai. Pao Kurireu aiwore jaoboe erore jiboeji. Aiwore maiboe erore jiboeji jamedu.
1PE 4:6 Dukodire Jesus ure bireuge eiamedu boe ewie puduiboe bataru pemegareuji. Boe eiamedu boe ewire dukeje Pao Kurireu aiwomode ero pegareu bagai kaba turo pegareu jiba erore kakojiwu ba meartorure pudui tuwo ewie kaiba tumode ewarigu. Jesus ure bireuge ewie puduiboe bataru pemegareuji tuwo nou meartorure Pao Kurireu jiwuge bireuge emugu pemegado nono Pao Kurireu mugu mogadure.
1PE 4:7 Boe puredugodunure boe jamedu boe akeduwo rugadu. Dukodi čare taragado tai taro pegakawo. Taeku jado. Tamagodo baruto Pao Kurireu bagai.
1PE 4:8 Tameardu kurido pui puapo. Tameardu kurimode pui dukeje tawiagodumode taro pegareu jamedu boe piji.
1PE 4:9 Tagera maku puai. Nou utu jaere Pao Kurireu bataru tabowuge tagera maku etai taegare tabo. Mare tamagokaba nou tamaragodae mori bagai.
1PE 4:10 Pao Kurireu ure tuiordae pemegareu maku tagai tamaragodaeče. Mare ure maku tagaiwu tamaragodae mode tu tu tuginai. Dukodi taiamedu boe taragado tai taro pemegawo nou Pao Kurireu ure maku tagaiwu tamaragodaeji tawo boe pemegado boei.
1PE 4:11 Pao Kurireu ure ia tagi tabemegado tamagowo Pao Kurireu bataruji boe ewiagai. Ča. Tamagodo Pao Kurireu bataruji. Ia tagi Pao Kurireu ure boe etugaregedo tagi. Ča tagera bararedo boei Pao Kurireu ure maku tagaiwu taraga tabo. Dukodire boe emeartorumode Jesus Cristoji. Nono emago pemegamode Pao Kurireuji jamedu tuwo ie kurido rugadu. Boe kurireu nure ema kodi. Boe rakareu nure ema jamedu. Dukodire ro ako akedumodukare rugadu. Dukodi ure aino.
1PE 4:12 Imeardu kurire jiwu imedage nure tagi. Boe pegamode tai rugadu. Mare tamororamagadukaba. Ainore boemode meartorure Jesus jiwugei rugadu.
1PE 4:13 Mare taegaredo tai. Boe pegamode tai nono boe pegare Jesus Cristo jitu mogadure. Nono Jesus aregodumode boe eimijera kurireure pudumi dutabo taegaremode ji rugadu.
1PE 4:14 Tameartorure Jesus Cristoji. Dukodire boe emago pegamode tai. Emago pegamode tameartorure jiboeji. Mare taegaredo tai. Boe pemegamode tai. Tarduware Pao Kurireu Uwari rakojere tagabo duji.
1PE 4:15 Mare tagaba boe ewido boe pegakawo tai. Tagiwogukaba boe pegakawo tai. Taro pegakaba boe pegakawo tai. Taro pegakaba boei boe pegakawo tai.
1PE 4:16 Mare tameartorudo Jesusji. Ia boe erdu pegamode tameartorure Jesus jituji dukodire emode boe pegado tai. Mare tabogurukaba. Tamago pemegado Pao Kurireuji. Jesus Cristo ie meture tagabo kodi.
1PE 4:17 Aino čare Pao Kurireu umode boe pegado ro pegareugei ero pegareu moriče. Aiwomode meartorure puduiwuge ero bagai boetoji. Aiwomode parore jiboeji rugadu. Aiwomode parore jiboeji dukeje aiwomode meartorukare Jesus bataru jiwuge ero bagai jamedu.
1PE 4:18 Marigudu Pao Kurireu ure tuwadaru bu bapera keje boe ewagai. Akore: – Boe rakare ro pemegareugei ewo činorudo. Mare boe pegamode meartorukare Pao Kurireu jiwugei rugadu. Ero pega kigodure kodire Pao Kurireu umode boe pegado ei rugadu.
1PE 4:19 Pao Kurireu ure boe eiamedu boe etowuje. Umodukare tuwadaru pogurudo. Kodumode tumagore jiboeji rugadu. Nono boe pegamode meartorure Pao Kurireu jiwugei mare Pao Kurireu aidumode dukeje. Mare paga karega ewo turo pemegado, ewo tumagu pudai dubagaire roino ei rugadu.
1PE 5:1 Meartorure Jesus jiwuge eimijera nure imi. Meartorure Jesus jiwuge eimijerage nure ia tagi jamedu. Iwo imeardae maku tagai. Iordure Jesus Cristoji. Boe pegare jitu kejere iordure ji. Ia meri keje Jesus aregodumode pugeje. Nono boe erdumode tugimijera kurireu nure ema duji. Pao Kurireu umode boe eimijerado imi jamedu. Dukodire inogituwanure tai aino.
1PE 5:2 Taetu pemegado meartorure Jesus jiwugei. Pao Kurireu ure eimijeragedo tagi taetu pemegawo ei tagaidu tabo. Ainore Pao Kurireu meardaere. Tamaragodudo mare tagogwa kiduwo tu tagai karega. Tamaragodudo tagaidu tabo tawo tagera maku boe etai.
1PE 5:3 Meartorure Jesus jiwuge eimijerage nure tagi. Mare tagaba emeardae tawuje epiji. Mare tawiapagado emeardaeji jamedu. Nono tarduwamode taro pemegawo nou meartorure Jesus jiwugei. Dukodi etaidumode turowo nono taro mogadure.
1PE 5:4 Jetu Pemegare Boeiwu Jesus aregodumode dukeje umode boe eimijera atadawu pemegareu tugu taiamedu boe tagaoto taro pemegareu moriče. Nou atadawu gurugureu akedumodukare jii toro rugadu.
1PE 5:5 Ipare nure tagi. Nogware nure tagi. Tameartorudo tagimijeragei. Taiamedu boe tagaba boe remawugedo tagi mare boe etugaregedo tagi tawo tagera maku puai. Marigudu Pao Kurireu ure tuwadaru bu bapera keje boe ewagai. Akore: – Pao Kurireu umode boe pegado očarore puduiwugei tu tu je. Mare umode tugera maku ukare boe remawugedo pudumiwuge etai rugadu tuwo turaga maku etai rugadu.
1PE 5:6 Dukodi čare tagojarore tawadaru jiboe barigu tabiji tawo tado nono Pao Kurireu utugarege emogadure tameartoruwo Pao Kurireuji rugadu. Emare rakare kodi. Dukodire Pao Kurireu umode boe kurireugedo tagi taidure jiwu meri keje.
1PE 5:7 Pao Kurireu meardu kurire tai dukodire jetu pemegamode tai. Dukodire tamororamagadure bagaiboe tamagodo baruto Pao Kurireu bagai tamororamagadukawo pugeje.
1PE 5:8 Taragado tai. Taeku jado bope doge eimijera Satanás bagai. Jordu pegare tai rugadu. Jore jiče woje tumode akedudowu bagai tago tabo nono leão ako mogadure.
1PE 5:9 Tagaba tagera ra tameartorure Jesus jitu piji. Tawiapagakaba bope doge eimijera meardae pegareuji. Ia moto kejewuge meartorure Jesus jiwuge tamedage erore nono taro mogadure. Boe pegare ei jamedu nono tamogadure.
1PE 5:10 Boe pegamode tai mare jii toro karega. Pao Kurireu umode taragado. Umode tameartorudo pudui rugadu. Umode tarduwado taro pemegawo. Emare ro pemegare boei rugadu. Ia boe ero pemegakare nono Pao Kurireu ro pemega mogadure. Emare makore tawagai tamuguwo pudabo boe pemegareu keje, Jesus apo. Nono tamugumode apo du akedumodukare. Mare paga karega. Tameartorure Jesus Cristoji dukodire romode aino tai.
1PE 5:11 Pao Kurireu raka akedumodukare jii toro. Boe erduwamode nou inoduji rugadu. Kodire ure aino.
1PE 5:12 Silas ure tugera maku inai čewo awu atugoreboe towuje. Iorduware awu Silasji. Meartorure Jesus jiwu nure ema rugadu. Imedia remawu nure ema rugadu. Čare awu iwadaru tabore ire tarduwado Pao Kurireu ro pemegareu remawuji iwo taegaredo. Ire tawiedu pemegado. Dukodi čare tagaba tagera ra awu Pao Kurireu ro pemegareu piji.
1PE 5:13 Ia ba kurireu iere Babilônia kejewu meartorure Jesus jiwuge etaidure tugimaduwo tagabo. Pao Kurireu makore ewagai jamedu. Itonaregedu Marcos aidure tugimaduwo tagabo jamedu.
1PE 5:14 Tagimadudo puapo nono meartorure Jesus jiwuge ero mogadure tameardu kuriwo pui. Ure tumagu Jesus aiwuge emode tagi dukeje Pao Kurireu umode taedu pemegado boebo tamororamagadukawo iaboeji pugeje.
2PE 1:1 Simão Pedro nure imi. Jesus Cristo utugare nure imi. Iture Jesus Cristo bataru tabo boe ewagai iwo boe ewie nou bataruji. Inure awu atugoreboe pemegado iwo maku meartorure Jesus jiwuge etai. Jesus Cristo ure emeardae pemegado emeartoruwo pudui. Umode boe ekinorudowu nure ema. Pao Kurireu nure ema. Ro pemegareu nure ema. Ure turo pemegareu maku meartorure puduiwuge etai emeartoruwo pudui rugadu. Emeartorure Jesusji nono čemeartoru mogadure.
2PE 1:2 Meartorure Jesus jiwuge nure tagi. Tagaire inure awu atugoreboe maku. Tarduwado Pao Kurireuji. Tarduwado Pagimijera Jesusji. Nono Pao Kurireu ro pemegamode tai. Jesus ro pemegawo tai. Ewo tamugu pemegado pudabo tawiagorokawo iaboe bagai pugeje.
2PE 1:3 Pao Kurireu makore pawagai paragojewo pudabo to boe pemegareu keje to boe kurireu keje. Pao Kurireu rakare boe eiamedu boe epiji. Parduwamode Pao Kurireuji dukodire umode turaga maku pagai paro pemegawo rugadu. Pao Kurireu raka tabore paroiwamode paro pemegawo nono Pao Kurireu ro mogadure.
2PE 1:4 Pao Kurireu makore pawagai. Akore tumoduie turaga maku pagai rugadu. Tumoduie turaga pemegareu, turaga kurireu maku pagai. Pao Kurireu raka tabore tamode tagera ra tameardae pegareu piji. Tameardaemode tu tameardae pegareuji dukeje nou tameardae umode tabegado rugadu, umode tagagedudo rugadu. Mare Pao Kurireu ure turaga maku tagai tawiagodukawo tuwadaru piji tarowo nono turo mogadure tameardaewo nono tumeardae mogadure.
2PE 1:5 Pao Kurireu ure turaga maku tagai tawo taragado tai. Dukodi čare taragado tai rugadu. Tameartorudo Jesusji. Taragado taro pemegawo jamedu. Taro pemegado. Tarduwado Pao Kurireuji jamedu.
2PE 1:6 Tarduwamode Pao Kurireuji dukeje tamode taragado tai taro pegakawo rugadu. Tamode taragado tai taro pegakawo pugeje mare tagaba tawia ra tawadaru pemegareu piji. Tagaba tawia ra tameardae pemegareu piji. Tamodukare tawia ra tawadaru pemegareu piji dukeje tarodo nono Pao Kurireu ro mogadure. Tameardaedo nono Pao Kurireu meardae umogadure.
2PE 1:7 Taromode nono Pao Kurireu rore dukeje tagaidudo boei nono Jesus aidure boei dumogadure. Tagaidumode boei nono Jesus aidure boei dumogadure dukeje tameardu kurido boei jamedu.
2PE 1:8 Taromode awu inagoino jiboeji mare taromode ji taraga tabo rugadu dukeje tarduwa pemegamode Pagimijera Jesus Cristoji. Mare paga karega. Nou tarduware jiboe uwo taro pemegado dubagaire inagoino. Tarduware jiboe uwo tamaragodu pemegado dubagaire inagoino.
2PE 1:9 Mare taromodukare awu inagoino jiboeji dukeje jorduwa bokwareuge emode tagi. Taromodukare awu inagoino jiboeji dukeje tawiagodumode Pao Kurireu piji rugadu. Emare ure taro pegareu jamedu boe barigu tabiji. Mare taromodukare awu inagoino jiboeji dukeje tawiagodumode nou Pao Kurireu roino taidu piji rugadu.
2PE 1:10 Dukodire inagoino tai. Taragado tai rugadu taro pemegawo Pao Kurireu makore tai jiboeji. Pao Kurireu makore tawagai taro pemegawo tumeardaeji. Imedage nure tagi. Taro pemegamode Pao Kurireu meardaeji dukeje tamodukare tagera ra tameartorure Jesus jitu piji.
2PE 1:11 Tamodukare tagera ra tameartorure Jesus jitu piji dukeje umode tabemegado tawo taremo Pagimijera Jesus Cristo mugure tadawu baruto. Nono pagimijera mode ema jii toro. Akedumodukare rugadu. Ema koiare umode paginorudo boe pegareu piji rugadu.
2PE 1:12 Marigudu boe ere tawie awu iwadaruji. Jesus bataru remawu reo. Tarduware ji marigudu. Tameartorure ji marigudu. Mare ire tawie pugeje tawiagodukawo piji. Imode tawie pugeje rugadu.
2PE 1:13 Boe pegakare iwo tawie tu tu je jii toro iwimode du ka tawiagodukawo nou Jesus jiboe piji.
2PE 1:14 Kuri aino iwimode. Ikodu akedumode moto tada mare baru tada aroe mode imi. Pagimijera Jesus Cristo ure iorduwa pemegado nou inoduji.
2PE 1:15 Dukodi iwikaredu otodai ire awu bataru bu bapera keje tawiagodukawo nou bataru piji.
2PE 1:16 Pagimijera Jesus aregodumode pugeje. Čere tawie marigudu. Čemeardae remawu ji karega čenagoino tawiagai. Čerdure čeku tabo Jesus o boe pemegareuji.
2PE 1:17 Čeragojere Jesus apo rugadu. Pao Kurireu ure Jesus je urugu maedo joki. Ure Jesus ukudau areia kigadudo rugadu. Kigadu maere ji. Čerdure ji. Čemeardure Pao Kurireu makoji. Akore: – Itonaregedu reo. Imeardu kurire ji rugadu. Rore jiboe ure iagaredo i rugadu. Pao Kurireu kurire boe jamedu boe kori.
2PE 1:18 Čegi čeragojere Jesus apo tori aogeje. Dukejere čemeardure awu Pao Kurireu bataruji baru piji nou Pao Kurireu o tori tuginaiwu aogeje.
2PE 1:19 Čemeardure Pao Kurireu makore jiboeji dukodire čerduware Pao Kurireu makore jiboe jamedu boe ure turugadu duji. Mariguduwuge makore Pao Kurireu bataru jiwuge ewadaru jire inagoino jamedu. Dukodi čare tawiapaga pemegado awu Pao Kurireu bataru jamedu boeji. Pao Kurireu makore jiboe umode boe erduwado nono jorugu mogadure. Mare jorugu karega. Pao Kurireu makore jiboe umode tarduwado jii toro Jesus aregodumode du ka. Jesus aregodumode dukeje umode nono meri joku mogadure. Mare meri joku karega. Jesus aregodumode dukeje umode tarduwado Pao Kurireuji rugadu tameartorure pudui kodi. Nono tarduwamode jiboe umode nono barogwatabowu kuieje joku mogadure. Mare barogwatabowu kuieje joku karega. Tarduwamode boe remawuji rugadu. Dujire inagoino.
2PE 1:20 Mare tawiagodukaba. Nou makore Pao Kurireu bataru jiwuge ekare nou bataru tawuje taora piji.
2PE 1:21 Tumeardae tabo karega ere Pao Kurireu bataru tawuje. Mare Pao Kurireu Uwari koiare ure Pao Kurireu bataru maku etai emagowo ji boe ewiagai.
2PE 2:1 Batrarodureuge etaregodure jaoboe etae. Egore tumagoie Pao Kurireu bataruji. Mare pagare egoino. Aino iage etaregodumode tagae pugeje. Egomode tumagoie Pao Kurireu bataruji. Mare pagare egoino. Batrarodureuge nure emage jamedu. Ewadaru umode boe pegado boei. Emode boe ewarigu Pao Kurireu bataru piji. Emeartorukare ure akirodo paiwu Pagimijeraji. Egomode umodukaie boe ekinorudo. Mare tameartorukaba ei. Umode boe ekinorudowu nure ema rugadu. Dukodi čare nou batrarodureuge emode tagedudo tači je nou tuwadrarodu tabo.
2PE 2:2 Du inodu tabo boe emeartorumode nou batrarodureugei rugadu. Dukodi emode tugeragu aremei nono nou batrarodureuge ero mogadure. Nono ero pegamode ebo. Dukodi čare boe emago pegamode meartorure Jesus jiwugei. Egomode boe remawu ji karegaie eroino.
2PE 2:3 Nou batrarodureuge enogwa kidure tu pudai rugadu. Dukodire emode tugeragu dieroji boe epiji tumagore jiboe moriče. Egomode tumagoie Pao Kurireu bataruji. Mare pagare egoino. Tumeardae tabore ere nou tuwadaru towuje pagatu je. Marigudu Pagimijera ure tudo turugadu tuwo nou batrarodureuge edo nou turo pegareu morido. Umode etagedudowu ure tudo turugadu tuwo etagedudo jamedu!
2PE 2:4 Marigudu rugadu ia Pao Kurireu utugarege baru tadawuge ero pegare. Pao Kurireu ukare ekinorudo ero pegareu mori piji bope dogewo emage. Ure ewarigu toro ia joru pegareuto. Ure ekogudo meririku tabo nono. Boečore rugadu nou bope doge eda keje. Ji aino edu kimo nono nou tieda keje. Epagamode jii toro nuba Pagimijera romode puduidu bagai.
2PE 2:5 Marigudu boe ero pegare. Pao Kurireu ukare ekinorudo ero pegareu mori piji. Pao Kurireu ure pobodo tumaedo moto jamedu boe parugajeje. Pobo ure jeture moto kejewuge eiamedu boe etagedudo rugadu. Pao Kurireu ure imedu Noé udo činorudo tu rugadu. Noé makore boei ero pemegawo. Mare emeartorukare. Dukodi čare Pao Kurireu ure etagedudo. Mare ure imedu Noé udo činorudo tuwobebo. Ure činorudowuge enodo padu kejewure oito. Tu rugadu.
2PE 2:6 Marigudu Pao Kurireu ukare ia ba kurireu iere Sodoma kejewuge ekinorudo ero pegareu mori piji. Ukare ia ba kurireu iere Gomorra kejewuge ekinorudo ero pegareu mori piji jamedu. Pao Kurireu ure joru barigu nou Sodoma Gomorra kejewuge boe dogei. Dukodi čare ure etagedudo rugadu. Nou inodu kodire boe eiamedu boe erduware nuba Pao Kurireu romode ro pegareugei rugadu.
2PE 2:7 Mare ia Sodoma kejewu imedu pemegare. Iere Ló. Dukodire Pao Kurireu ure udo činorudo. Ló kiarigodure nou ro pegareuge ero pegare jiboeji. Emeartoru bokware boe ero remawuji. Tu tumeardae pegareu jire emeartorure tu rugadu. Dukodire ero pegare aremei rugadu.
2PE 2:8 Nou ro pemegareu Ló mugure ebo. Meardure nou ro pegareuge ewadaru pegareuji. Jordure ero pegareu jamedu boeji. Dukodire kiarigodure rugadu erore aino duji.
2PE 2:9 Dukodi čare parduware boe pegamode pai duji. Mare pameartorumode Pao Kurireuji dukeje ro pemegareuge mode pagi. Dukodire Pao Kurireu umode paginorudo boe pegareu piji. Mare ia meri keje Pao Kurireu umode ro pegareuge ero pegareu morido etai rugadu. Pao Kurireu jorduware nou meriji.
2PE 2:10 Ia ro pegareuge emeardaere nono ariga doge emeardae mogadure tuwo tugeragu aremei tu tu je. Erdu pegare Pao Kurireu bataruji. Etaidukare tumeartoruwo Pao Kurireuji rugadu. Emagere Pao Kurireu umode ero pegareu morido etai rugadu. Emodukare činorudo piji rugadu. Nou batrarodureuge enojarore tuwadaruji. Enojarore pudui rugadu. Emeartorukare baru tadawu boe pemegareugei rugadu. Dukodi emago pegare baru tadawuge ero pemegareuji jamedu.
2PE 2:11 Pao Kurireu utugarege baru tadawuge eragare rugadu. Eragare nou batrarodureuge eraga kori. Mare Pao Kurireu utugarege baru tadawuge emago pegakare nou batrarodureuge erore jiboeji Pao Kurireu biagai.
2PE 2:12 Mare nou batrarodureuge emago pegare tuiorduwa bokware jiboeji jamedu. Erore nono barege ro pegareuge emogadure. Barege ero pegare dukodire boe ere ekogudo tuwo ewido. Nono nou batrarodureuge etagedumode nono barege emogadure.
2PE 2:13 Boe pegamode ei nono ere boe pegado boei dumogadure. Pao Kurireu umode boe pegado ei rugadu ero pegareu moriče. Epogurukare tieribariji. Eribari ierikare. Emode tugeragu pui boe egai. Dukodi boe epogurure eče erore aino duje. Enogwagere tagabo mare emeardaere boe erduwakaie turore jiboeji. Etaidure tuwo boe ekiripagado. Etaidure turo pegareuji rugadu kodi.
2PE 2:14 Emarure areme ewagai tieribariwo tuwire epiji. Areme emarure ime ewagai jamedu tieribariwo tugoge epiji jamedu. Ero raire nou turore aino pui dutabo. Ere jorduwa bokwareuge ekiripagado. Marigudu enogwa kidure tu pudai rugadu tuwo to diero kurido boe epiji. Dukodire Pao Kurireu akore tumoduie boe pegado ei rugadu ero pegareu moriče.
2PE 2:15 Ere tugera ra Pao Kurireu meardae pemegareu piji. Dukodire ere tuwarigu boeto rugadu. Jawu imedu Beor onaregedu imedu iere Balaão. Bari nure ema. Marigudu boe pegareuge etaidure tuwo diero maku Balaão ai koduwo nou tumeardae pegareuji jamedu. Balaão aidure nou dieroji rugadu dukodire aidure turowo nono emeardae mogadure rugadu. Mare Pao Kurireu ure Balaão aku burro makodo ji boe ewadaru tabo rokawo nono nou ro pegareuge ero mogadure. Dukodire Pao Kurireu ure Balaão udo tugera ra nou boe emeardae pegareu piji. Aino čare nou batrarodureuge erore nono nou Balaão ro mogadure.
2PE 2:17 Nou batrarodureuge ere nono kačiba po bokwareu umogadure. Ere nono bakuru jeture jiwu boetugu pegareu mogadure. Pao Kurireu jorduware kaiba tumode nou batrarodureuge ewarigu. Umode ewarigu boečo maereuto.
2PE 2:18 Nou batrarodureuge emago raire boei mare erduwa bokware. Ewadaru pegare. Enojarore pudui pagatu je. Ere boe ekiripagado tieribarire pui dutabo. Boe etaidure tuwo tugera ra turo pegareu piji mare nou batrarodureuge emode tumeardae pegareu maku etai tuwo ero pegado rugadu.
2PE 2:19 Nou batrarodureuge eroiwakare tuwo tugera ra turo pegareu piji. Mare egore iagei tuiorduwaie tuwo ekinorudo. Pagare egoino. Turo pegareu jire boe ewiapagamode tu je dukeje eroiwamodukare tuwo tugera ra turo pegareu piji rugadu.
2PE 2:20 Mare boe erduwamode Pagimijera Jesus Cristoji dukeje umode boe ekinorudo ro pegareuge emeardae pegareu piji. Emeardae pegareu koiare ure boe ero pegado tu tu je. Mare Jesus koiare umode boe ekinorudo emeardae pegareu piji. Ia boe emode tugera ra turo pegareu piji mare umode tugirimi nou turo pegareu ka pugeje dukeje boe pegamode ji rugadu. Umode tugirimi nou turo pegareu ka dukeje nono meardaemode tu nou turo pegareuji rugadu. Roiwamodukare tuwo tugera ra nou turo pegareu piji rugadu. Boe pegare ji jao mare aino čare boe pega remawu mode ji rugadu.
2PE 2:21 Boe erduwakare tuwo činorudo turo pegareu piji turo pemegawo Pao Kurireu meardaeji. Dukodi čare boe pegamode ei. Mare boe erduwamode Pao Kurireu koiare umode boedo činorudo boe ero pegareu piji boe pemegareu ka. Du inodu tabo emode tugera ra Pao Kurireu piji tuwo tugirimi nou boetojiwu turo pegareu ka pugeje. Dukeje čare boe pegamode ei rugadu. Boe pega kuričigomode ei rugadu.
2PE 2:22 Erore aino dukodire parduware. Boe jokodu jire boe egoino rugadu. Ariga doge emode tugirimi towearigodure taboboe ka tuwo kowuje pugeje. Boe emode jugureuge etaimo mare jugureuge emode tugirimi moto bekuru ka tuibagi pugeje rugadu.
2PE 3:1 Imeardu kurire jiwu imedage nure tagi. Ire iwadaru boetojiwu bu bapera keje. Ire maku tagai marigudu. Aino ire awu boeiwu iwadaru bu bapera keje makuduwo tawagai pugeje. Dutabore ire tawiabutudo Pao Kurireu bataru keje. Dutabore itaidure iwo tameardae pemegado tameardae pegakawo pugeje.
2PE 3:2 Marigudu makore Pao Kurireu bataru jiwuge ero pemegare rugadu. Tawiabutudo ewadaru keje. Tawiabutudo Pagimijera Jesus bataru keje jamedu tameartoruwo ji. Umode boe ekinorudowu nure ema. Jesus ure ime etudo tuwadaru tabo. Dukodi čare ere tawie Jesus jiboeji rugadu.
2PE 3:3 Ainore awu bataru ure. Tarduwado ji. Boe puredugodumode awu moto akeduwo dukeje ia boe etaregodumode tagae. Emeardaemode tu tumeardae pegareuji rugadu. Ekadakagirimode tai.
2PE 3:4 Enaramode tai: – Jesus pa? Egomode: – Jesus akore tumoduie tugirimi pugeje mare pagare akoino. Aregodumodukare. Jaoboe ewogware marigudu mare boe akedukare ji aino. Marigudu awu moto towujedure mare akedukare ji aino. Akedumodukare rugadu! Ainore nou boe doge egomode tai.
2PE 3:5 Mare taipagakaba ewadaruji. Pagare egoino. Ere taora mekido Pao Kurireu rore jiboe piji. Tuwadaru tabore Pao Kurireu ure baru towuje, ure moto towuje jamedu. Awu boe erduware nou Pao Kurireu rore jiboeji mare ere taora mekido piji tuwiagoduwo piji. Pao Kurireu ure moto tawuje pobo piji dukodi pobo aiare tabo.
2PE 3:6 Mare Pao Kurireu ure moto kejewuge eiamedu boe etagedudo pobo tabo jamedu. Ure pobo maedo moto jamedu boe parugajeje. Dukodire ure jaoboe etagedudo.
2PE 3:7 Aino čare Pao Kurireu jeture awu motoji tuwadaru tabo akedukawo. Pao Kurireu jeture awu baruji tuwadaru tabo akedukawo jamedu. Mare Pao Kurireu makore marigudu tumoduie awu moto awu baru akedudo rugadu joru tabo. Pao Kurireu umode meartorukare Jesus jiwuge ero pegareu morido etai rugadu. Umode etagedudo rugadu. Mare upaganure tu jao tuiorduwo ia boe emeartoruwo pudui dubagai. Dukodire ukare awu moto awu baru akedudo raga.
2PE 3:8 Imeardu kurire jiwu imedage nure tagi. Tawiagodukaba awu iwadaru piji. Pagimijera jordure boe jamedu boeji. Joru oto padu mode mil mare Pagimijera jorduware ji marigudu. Merimode mitotu je mare Pagimijera jorduware ji marigudu. Joru oto padu mode mil Pao Kurireu ai mare ure nono merire mitotu je dumogadure Pao Kurireu ai.
2PE 3:9 Iage egore Pagimijera Jesus umodukaie tumagore jiboedo turugadu kuri aino. Pagare egoino. Boe rai jokodumodukare Jesusji uwo tumagore jiboe udo turugadu tuwo tugirimi mato pugeje. Mare paga karega. Korigodukare boei kuri je. Aidure boe eiamedu boe ewo tugera ra turo pegareu piji tumeartoruwo Jesusji rugadu.
2PE 3:10 Mare Pagimijera Jesus aregodumode kimo rugadu. Parduwakare nou aregodumode kejewu meriji. Jesus umode boe eto pa pui taregodure jiwu meri keje. Nou meri keje joru umode turagoje wadudo woje baru tada. Joru čemode baruto rugadu. Dukodire awu baru akedumode rugadu. Nou meri keje awu moto akedumode jamedu. Awu jeture moto kejeboe jamedu boe etagedumode rugadu.
2PE 3:11 Boe jamedu boe akedumode rugadu. Mare paga karega. Boe jokodu jire akoino rugadu. Dukodire čare taro udo tuginai taro pegakawo pugeje. Taro udo nono Pao Kurireu meardae kodaji rugadu.
2PE 3:12 Tabagado Pao Kurireu bagai. Aregodumode pugeje. Tado tarugadu tawo boe ewie. Tamode boe ewie dukeje Pao Kurireu aregodumode kuri je. Aregodumode dukeje joru čemode awu baruto. Baru akedumode rugadu. Joru uru koiare umode jeture baru tadaboe jamedu boe kowu, umode rugadu boe gigirido.
2PE 3:13 Mare pagi pabagare Pao Kurireu ure pawie jiboe bagai. Ure pawie marigudu tumoduie baru maiwu towuje. Tumoduie moto maiwu towuje. Nou baru maiwu nou moto maiwu kejeie ro pemegareuge edumode. Ro pegareuge edumodukare nono.
2PE 3:14 Imeardu kurire jiwu imedage nure tagi. Tabagare Pagimijera bagai nou inagoino jiboe bagai. Dukodi čare taragado tai taro pemegawo taro pega bokwawo. Taragado tai tameartoruwo Pao Kurireuji rugadu. Taragado tai tamugu pemegawo Pao Kurireu apo. Nono Pao Kurireu mako pegamodukare tai jamedu.
2PE 3:15 Pagimijera aregodukare raga. Mare paga karega. Aidure boe emeartoruwo pudui rugadu. Dukodire upaga raire ewagai. Dukodire čare tameartorudo Jesusji. Ema koiare umode taginorudo tadukawo bope doge eda kejewu joru ka. Čemeardu kurire jiwu čemedia Paulo ure maku tagaiwu atugoreboe ure nono ire maku tagaiwu mogadure. Pao Kurireu ure Paulo jorduwado rugadu uwo boe ewie tuwadaruji.
2PE 3:16 Paulo ure towu atugoreboe jamedu boe ure nono imeardae mogadure rugadu. Paulo ure bu bapera kejewu tuwadaru rakare ia boei rugadu. Jorduwa bokwareuge nure emage. Nou jorduwa bokwareuge ekare nou Paulo makore jiboedo nono ture, boe ewiagai. Ere Pao Kurireu ia batarudo tuginai jamedu. Pao Kurireu bataru remawu ji karega emagore. Dukodire emode tagedudo rugadu.
2PE 3:17 Mare tarduware. Imeardu kurire jiwu imedage nure tagi. Tarduware dukodi čare taeku jado nou batrarodureuge ewagai. Batrarodureuge ewadrarodumode tawiagai mare tameartorukaba ei. Tameartorumode ewadaruji dukeje tawarigudumode Pao Kurireu piji. Meartoru bokware boe ero remawu jiwuge nure emage.
2PE 3:18 Tameartorukaba ei. Tameartorudo tu Pao Kurireuji. Dukodire Pagimijera Jesus Cristo umode turo pemegareu maku tagai. Umode boe ekinorudowu nure ema. Tarduwado ji rugadu. Pawo pamago pemegado Jesusji jii toro rugadu. Pawo ie kurido rugadu jii toro rugadu. Pagawo pagogwa ra piji jii toro rugadu. Umode turugadu rugadu.
1JO 1:1 Inure awu atugoreboe pemegado tawagai iwo tawie iordure jiboeji, imeardure jiboeji. Iordure Jesusji ioku tabo. Ire ikera pagado Jesusji rugadu. Dukodire itaidure iwo tarduwado. Awu Jesus bataru pemegare. Mako pemegare rugadu. Ema koiare ure boe edo. Emare rakojere boetoji boe jamedu boe etododai.
1JO 1:2 Jesus aregodure dukeje čerdure ji. Emare umode boe edu pemegado. Marigudu rakojere Pao Kurireu apo. Dukodire umode meartorure puduiwuge eewodudo pugeje emuguwo Pao Kurireu apo jii toro rugadu. Jesus ure čewie nou turoji dukodire inure tawie jamedu.
1JO 1:3 Inure tawie iordure jiboeji, imeardure jiboeji. Inure tawie tameardu kuriwo Pao Kurireuji nono imeardu kuri moga Pao Kurireu jitu mogadure. Inure tawie tameardu kuriwo Jesus Cristoji nono imeardu kuri moga Jesus jiture jamedu. Pao Kurireu onaregedu nure ema.
1JO 1:4 Dukodire inure iwadaru bu bapera keje iwo atugoreboe maku tagai. Tameartorumode awu iwadaruji dukeje iagaremode i rugadu.
1JO 1:5 Čemeardure Pao Kurireu Onaregedu bataruji. Dujire inure tawie aino. Jorugu bokwamode dukeje boečomode. Mare jorugumode dukeje nou jorugu umode boečo akedudo. Ča Pao Kurireu ure nono jorugu pemegareu mogadure. Boe ero pegareu ure nono boečo mogadure. Mare jorugu ji karega inagoino. Boečo ji karega inagoino. Pao Kurireu ro pemegare tu rugadu. Rokare ia boe ero pegareuji. Dujire inagoino. Pao Kurireu meardae pemegare tu rugadu. Meardaekare ia boe emeardae pegareuji. Dujire inagoino.
1JO 1:6 Ča ia pagi paro pegamode tu tu je mare pagagomode pameardu kurie Pao Kurireuji dukeje batrarodureuge mode pagi rugadu. Pameartorumode boe emeardae pegareuji tu tu je dukeje pamode nono boečo mogadure. Mare boečo ji karega inagoino. Pameartorumode boe emeardae pegareuji dukeje paro pegamode tu tu je. Dujire inagoino. Boe remawu ji karega paromode aino.
1JO 1:7 Mare Pao Kurireu meardae ure nono jorugu pemegareu mogadure. Mare jorugu ji karega inagoino. Pao Kurireu meardae ure boe ero pemegado. Dujire inagoino. Pameartorumode Pao Kurireu meardaeji dukeje paro pemegamode tu tu je. Dukodire pameardu kurimode pui rugadu. Jesus ku umode paro pegareu rugadu boe kado. Pao Kurireu onaregedu nure ema rugadu.
1JO 1:8 Pagagomode paro pegareu bokwaie mare pawadrarodure. Pardukare paro pegareuji dukodire pagagoino.
1JO 1:9 Pao Kurireu batrarodukare rugadu. Emare akoino paiamedu boe paro pegare marigudu. Mare pagagomode paro pegareu bokwaie dukeje pamode udo nono batrarodureu mogadure. Pagagoino dutabo pameartorukare Pao Kurireu bataruji. Pagagoino dutabo Pao Kurireu bataru metukare pagabo. Mare pamagomode paro pegareu boeji Pao Kurireu biagai dukeje biagodumode nou paro pegareu piji. Umode paro pegareu barigu pabiji paro pemegawo. Ainore Pao Kurireu rore. Ainore Pao Kurireu akore marigudu. Kodumode tuwadaruji tu rugadu. Umode turo jetorodo pai rugadu.
1JO 2:1 Imeardu kurire tai nono imeardu kuri moga itorei dumogadure. Nono inure awu atugoreboe pemegado iwo maku tagai taro pegakawo. Mare paro pegamode dukeje ia boe makomode Pao Kurireu bagai pabaru tabo. Iere Jesus Cristo. Emare ro pemegare rugadu.
1JO 2:2 Awu Jesus ure tugu redo ure tugu maku Pao Kurireu ai paro pegareu moriče, boe eiamedu boe ero pegareu moriče moto jamedu boe parugajeje.
1JO 2:3 Pameartorumode Pao Kurireu bataruji dukeje parduware Pao Kurireuji rugadu.
1JO 2:4 Pagagomode parduwaie Pao Kurireuji mare pameartorumodukare bataruji dukeje pawadrarodunure rugadu. Batrarodureuge nure pagi.
1JO 2:5 Mare pameartorumode Pao Kurireu bataruji dukeje boe erduwamode pameardu kurire Pao Kurireu jituji. Pao Kurireu meardu kurire pai rugadu. Dujire boe erduwamode rugadu. Dukodire parduware pamugure Pao Kurireu apo duji. Pagagomode pamugu pemegaie Pao Kurireu apo dukeje paromode nono Jesus Cristo ro mogadure rugadu.
1JO 2:7 Imeardu kurire jiwu imedage nure tagi. Dukodire inure awu Pao Kurireu bataru bu bapera keje iwo maku toro tawagai. Awu Pao Kurireu bataru maiwu karega. Marigudu ure pawie awu tuwadaruji. Marigudu tameardure awu Pao Kurireu bataruji tameartoruwo ji.
1JO 2:8 Mare mariguduwu boe erduwakare awu Pao Kurireu bataruji. Dukodire Pao Kurireu bataru maiwu nure awu bataruče rugadu. Jesus makore awu Pao Kurireu bataru maiwuji. Boe erduware Jesus roji dukeje emeartorure Jesus bataruji. Boe jokodu jire akoino. Inure awu Jesus bataru bu bapera keje iwo maku tawagai. Tarore nono Jesus ro mogadure dukodire ia boe emeartorure Jesus bataruji pugeje. Ere tugera ra turo pegareu piji. Ero pegareu ure nono boečo mogadure. Ero pemegareu ure nono jorugu mogadure. Mare jorugu ji karega inagoino. Boečo ji karega inagoino. Nou ero pegareu akedunure. Dujire inagoino. Ero pemegareu unure tumaedo nono jorugu mogadure. Dujire inagoino.
1JO 2:9 Parduware boe remawuji dukeje pare nono jorugu mogadure. Pare nono boe edu pemegare jorugu pemegareu jitu mogadure. Mare jorugu ji karega inagoino. Pameardu kurire pamedagei dukeje parduware boe remawuji. Pamodukare boe ero pegado. Dujire inagoino. Pagaora butumodukare boe emeardae pegareu ka. Dujire inagoino. Mare pagagomode parduwaie boe remawuji mare pardu pegamode pamedagei dukeje parduwakare boe remawuji rugadu ji aino. Pare nono boe edu pagare boečo tada dumogadure. Mare boečo ji karega inagoino. Pardu pegamode boei dukeje pardumodukare paro pegareuji. Dujire inagoino. Pardumodukare paro pegareuji dukeje paro pegareu umode parduwa bokwado nono boečo kurireu mogadure. Mare boečo ji karega inagoino. Pardumodukare paro pegareuji dukeje parduwamodukare paro pemegareu bagai rugadu. Dujire inagoino.
1JO 2:12 Imeardu kurire tai nono imeardu moga itorei dumogadure. Inure awu bataru bu bapera keje tarduwawo Pao Kurireu biagodure taro pegareu piji rugadu. Jesus bire boe ero pegareu moriče dukodire Pao Kurireu biagodure taro pegareu piji.
1JO 2:13 Ia tagi boe etuo mage nure tagi. Tarduware Pao Kurireuji dukodire inure awu atugoreboe pemegado iwo maku tawagai jamedu. Pao Kurireu emare rakojere boetoji. Ia tagi ipare nure tagi, nogware nure tagi jamedu. Tare bope doge eimijera utudo tabiji dukodire inure awu atugoreboe pemegado iwo maku tawagai jamedu.
1JO 2:14 Tare nono itore emogadure. Inure awu atugoreboe pemegado iwo maku tawagai. Tarduware Pao Kurireuji. Inure awu atugoreboe maku boe etuo mage ewagai erduware Pao Kurireuji kodi. Pao Kurireu emare boetojiwu nure ema. Inure awu atugoreboe maku ipare ewagai nogware ewagai eragare kodi. Pao Kurireu bataru meture etada. Ere bope doge eimijera utudo tubiji dukodi.
1JO 2:15 Tagaidukaba boe ero pegareuji. Tagaidukaba nou ro pegareu boe enoroeji. Tameardu kurimode boe ero pegareuji dukeje tameardu kurimodukare Pao Kurireuji.
1JO 2:16 Ro pegareuge etaidure turo pegawo rugadu. Tumeardae jire eroino. Pao Kurireu meardae ji karega eroino. Ro pegareuge etaidumode boe enoroe jamedu boeji. Etaidure tuwo toe kurido rugadu. Mare Pao Kurireu ro ji karega eroino. Pao Kurireu meardae ji karega eroino. Tumeardae jire eroino. Ro pegareuge enojarore turo pegareuji. Mare Pao Kurireu meardae ji karega eroino. Tumeardae pegareu jire eroino.
1JO 2:17 Awu moto akedunure. Boe etaidure jiboe jamedu boe akedunure jamedu. Mare meartorure Pao Kurireu bataru jiwuge etagedumodukare. Ewimodukare rugadu.
1JO 2:18 Imeardu kurire tai nono imeardu kuri moga itorei dumogadure. Ča Jesus aregodumode kuri aino! Boe ere tawie jordu pegare Jesus jiwu aregodumoduie. Ča jordu pegare Jesus jiwuge emagare. Etaregodure! Dukodire parduware Jesus aregodumode kuri aino duji rugadu.
1JO 2:19 Awu jordu pegare Jesus jiwuge ere bato pui pagabo. Mačare ere tugera ra pabiji. Emeardaekare Jesusji nono pameardae mogadure. Emeardaemode nono pameardae mogadure dukeje eragoje kimomode pagabo. Mačare eture dukodire parduware emeardaeji. Emeardaekare Jesusji nono pameardae mogadure.
1JO 2:20 Mare Jesus Cristo ure Pao Kurireu Uwari maku tagai dukodire taiamedu boe tarduware boe remawuji.
1JO 2:21 Tarduwamodukare boe remawuji dukeje imode awu atugoreboe udo tuginai. Mare tarduware boe remawuji rugadu. Dukodire inure awu atugoreboedo aino tawagai. Tarduware kodi. Ča boe jokodu jiboe batrarodumodukare. Tarduware.
1JO 2:22 Mare batrarodureuge egore nou umode boe ekinorudowu kaiegure Jesusče dukodire ewadrarodure rugadu. Nouge erdu pegare Jesusji. Dukodire egoino. Etaidukare Pao Kurireuji. Etaidukare Pao Kurireu Onaregeduji. Dukodire egoino.
1JO 2:23 Boe etaidumodukare Pao Kurireu Onaregeduji dukeje etaidumodukare Pao Kurireuji jamedu. Boe emeartorumode Pao Kurireu Onaregeduji dukeje emeartorumode Pao Kurireuji jamedu.
1JO 2:24 Tagaba tagera ra tameardure boetojiwu Pao Kurireu bataru piji. Tameartorumode nou bataruji dukeje tamugu pemegamode Pao Kurireu apo, Onaregedu apo. Emagere emugu pemegamode tagabo jamedu jii toro. Du akedumodukare.
1JO 2:25 Ainore Jesus akore rugadu. Ure pawie rugadu tumoduie paewodudo pugeje pamuguwo Pao Kurireu apo jii toro rugadu.
1JO 2:26 Iage etaidure tuwo taekiripagado dukodire inure awu atugoreboe maku tawagai iwo taeku jado, iwo tarduwado erore jiboeji.
1JO 2:27 Ča Jesus Cristo ure Tuwari maku tagai. Emare umode tarduwado Pao Kurireu bataruji. Boe jokodu jire akoino. Batrarodu karegure. Emare rakojere tagabo dukodire tagaiwokare ia jorduwareu bagai pugeje uwo tarduwado. Tameartorure tu Pao Kurireu Uwari bataruji. Ča tagaba tagera ra nou ure tarduwado jiboe piji. Tamugu pemega raido Jesus Cristo apo rugadu.
1JO 2:28 Imeardu kurire tai nono imeardu kurire itorei dumogadure. Dukodire inagoino tai. Tamugu pemegado Jesus Cristo apo. Pamugu pemegamode apo dukeje ema aregodumode dukeje pabagudumodukare če. Pabogurumodukare. Pamodukare pawiado piji.
1JO 2:29 Jesus Cristo ro pega bokware rugadu. Tarduware nou inoduji marigudu. Mare iwo tawie pugeje. Dukodire tarduware Pao Kurireu ore eroji jamedu. Meartorure Pao Kurireu jiwuge ere turo pemegado. Pao Kurireu ure toredo emage rugadu dukodire eroino.
1JO 3:1 Pao Kurireu meardu kurire pai rugadu. Tawiapagado! Meardu kurire pai dukodire ure toredo pagi. Dukodire makore pai. Akore: – Itore nure tagi. Mare meartorukare Pao Kurireu jiwuge erduwakare ji dukodire erduwakare pai jamedu.
1JO 3:2 Imeardu kurire jiwu imedage nure tagi. Ča Pao Kurireu ore nure pagi mare parduwakare raga nuba pamode. Jesus Cristo aregodumode dukeje pardumode ji rugadu. Pardumode ji dukeje umode pado nono ture rugadu. Parduware nou inoduji rugadu.
1JO 3:3 Upagare tumeartoru tabo Jesus Cristo bagaiwuge emode turo pegareu barigu tubiji turo pemegawo nono Jesus Cristo ro mogadure.
1JO 3:4 Boe ero pegamode dukeje emeartorukare Pao Kurireu ure maku boe etaiwu bakaruji. Ča boe ero pegare jiboe jire boe eroino tumeartoru bokware Pao Kurireu ure maku boe etaiwu bakaru jitu piji.
1JO 3:5 Tarduware Jesus Cristo aregodure tuwo boe ero pegareu tawuje epiji. Tarduware ema ro pega bokware.
1JO 3:6 Dukodire mugu pemegamode Jesus apowu umode turo pegareu barigu tubiji. Mare ro pegareuge erdukare Jesusji. Ro pegareuge erduwakare Jesusji.
1JO 3:7 Batrarodureuge etaidure tuwo taekiripagado. Tameartorukaba ei. Imeardu kurire tai nono imeardu kurire itore kugurei dumogadure. Boe ero pemegamode dukeje epemegare nono Jesus pemegare dumogadure.
1JO 3:8 Ro pegareuge emeartorure bope doge eimijeraji. Ekimijera nure ema rugadu. Dukodire ero pegare rugadu. Bope doge eimijera ro pega kurire boei rugadu. Pao Kurireu ure moto to dukeje nou bope doge eimijera ro pegare tu tu je rugadu. Dukodire Pao Kurireu Onaregedu aregodure tuwo bope doge erore jiboe akedudo.
1JO 3:9 Pao Kurireu ore ero pegamode mare ero pegareu raimodukare Pao Kurireu meardae meture etada kodi. Emode turo pegareu barigu tubiji. Etuo nure Pao Kurireuče dukodire ero pega raimodukare.
1JO 3:10 Ainore tarduware Pao Kurireu orei. Mare tarduware bope doge eimijera orei jamedu. Ro pegareuge nure emage. Dukodi čare tarduware ei. Pao Kurireu ore karegure emage. Meardu kuri bokwareuge nure emage. Dukodi čare tarduware ei. Pao Kurireu ore karegure emage. Bope doge eimijera ore nure emage.
1JO 3:11 Tameardure boetojiwu bataru reo. Pameardu kuriwo pai. Ainore awu bataru ure.
1JO 3:12 Parokawo nono imedu Caim ro mogadure. Ema meartorure bope doge eimijeraji dukodire ure tuwie imedu bito. Mare paga karega. Uwie meartorure Pao Kurireu bataruji turo pemegawo. Mare Caim meartorukare Pao Kurireu bataruji turo pemegakawo. Dukodire ure tuwie bito.
1JO 3:13 Imedage nure tagi. Meartorukare Pao Kurireu jiwuge erdu pegamode tai mare tabagudukaba.
1JO 3:14 Meardu kuri bokwareuge ere nono bireuge emogadure. Emodukare tudawuje tuwi piji. Mare pagi karega. Marigudu pare nono bireugere jamedu. Mare aino pare pagera ra paro pegareu piji dukodire pagare nono bireugere pugeje. Pare nono bikareugere. Boe erduware nou inoduji. Pameardu kurire boei dukodire boe erduware bikareuge nure pagi duji.
1JO 3:15 Mare jordu pegare boeiwuge ere nono ure boe ewidowuge emogadure rugadu. Tarduware. Ure boe ewidowuge ewimode rugadu. Eewodumodukare pugeje. Emugumodukare Pao Kurireu apo rugadu.
1JO 3:16 Jesus Cristo ure tumagu paro pegareu moriče. Ainore paromode pameardu kuriwo boei. Paromode nono Jesus ro mogadure. Pamode pamagu pawo pamedia udo tuginorudo boe pegareu piji.
1JO 3:17 Oe kurireu jordumode ia marenaruji. Mare ukare iaboe maku ai. Nono nou oe kurireu makomode tumeardu kurie Pao Kurireuji mare pagare akoino. Ukare boe maku marenaru ai.
1JO 3:18 Imeardu kurire tai nono imeardu kurire itore kugurei dumogadure. Tameardu kurido boei taro pemegareu tabo. Tu tawadaru tabo karega. Taro tabo tamode tameardu kurido boei. Taro udo nono Pao Kurireu bataru remawu mako mogadure. Nono čare tameardu kurimode boei rugadu.
1JO 3:19 Pameardu kurimode pui dukeje parduwamode pameartorure jiboeji. Pao Kurireu jire pameartorure. Boe remawu jire pameartorure. Pameartorumode ji rugadu dukeje pameardu kurimode pui. Nono pabogurumodukare pamagowo Pao Kurireuji.
1JO 3:20 Pawiagoromode paro pegareuji dukeje nou paro pegareu umode pagiarigo. Dukodi čare pameartoruwo Pao Kurireu bataruji. Ema kurire paiamedu boe kori. Emare jorduware boe jamedu boeji. Pameartorure Pao Kurireuji dukeje umode pagiarigodu barigu pabiji.
1JO 3:21 Imeardu kurire jiwu imedage nure tagi rugadu. Čare pawiagoromode paro pegareuji dukeje pameartoruwo tu Pao Kurireuji. Dukejere pabogurumodukare pamagowo Pao Kurireuji pugeje.
1JO 3:22 Pameartorure Pao Kurireu bataruji dukeje umode pamagore bagaiboe maku pagai. Paromode aidure jiboeji dukeje umode pamagore bagaiboe maku pagai. Ainore parduwamode ore remawuge nure pagi duji. Ainore pabogurumodukare pamagowo Pao Kurireuji.
1JO 3:23 Emare makore pai pameartoruwo Tonaregedu Jesus Cristoji. Makore pai pameardu kuriwo pui. Ainore Jesus Cristo makore pai jamedu.
1JO 3:24 Pameartorumode Pao Kurireu bataruji dukeje pamugu pemegamode Pao Kurireu apo. Pao Kurireu mugu pemegamode pagabo jamedu. Pao Kurireu ure Tuwari maku meartorure puduiwuge eiamedu boe etai. Dukodire Pao Kurireu Uwari rakojemode pagabo dukeje parduwamode Pao Kurireu mugure pagabo duji rugadu.
1JO 4:1 Imeardu kurire jiwuge imedage nure tagi. Tameartorukaba kuri aino boe eiamedu boei. Taipaga pemegado ewadaruji jao ewadaru umode nono Pao Kurireu batarure dubagai. Batrarodureuge emagare kodire inagoino. Ere tumaedo moto jamedu boe parugajeje tuwo boe ekiripagado Pao Kurireu bataru remawu piji.
1JO 4:2 Ainore tarduwamode Pao Kurireu Uwari bataru remawuji. Ia imedu akore Jesus Cristo aregoduie baru piji tuwo imedudo pudumi woe moto keje du nou imedu apore nou Pao Kurireu Uwari rakojere.
1JO 4:3 Mare ia imedu akomode Jesus aregodukaie baru piji. Akomode imedu nuie ema tu rugadu. Dukeje Pao Kurireu Uwari rakojekare nou imedu apo. Bope rakojere apo. Urugodure Jesus jiwu bope doge eimijera ure nou bope maku nou imedu ai. Marigudu tameardure nou urugodure Jesus jiwu aregodumoduie. Ča aregodure marigudu. Rakojere woe moto keje rugadu.
1JO 4:4 Mare tagi Pao Kurireu utugarege nure tagi. Tare nono itore emogadure. Pao Kurireu Uwari rakojere tagabo. Bope doge eragojere meartorukare Jesus jiwugebo. Mare Pao Kurireu Uwari rakare bope doge eiamedu boe ekori. Ča iage egore tumagoie Pao Kurireu bataruji mare ewadrarodunure. Pao Kurireu Uwari ure taragado tameartorukawo nou batrarodureugei. Ča tameartorukare ei rugadu.
1JO 4:5 Awu batrarodureuge emagore tu meartorukare Jesus jiwuge emeardaeji. Emagore tu meartorukare Jesus jiwuge ero jiboeji. Dukeje meartorukare Jesus jiwuge emeartorure nou batrarodureuge ewadaruji rugadu emeartorukare Jesusji kodi.
1JO 4:6 Mare pagi pameartorure Pao Kurireuji rugadu. Jorduware Pao Kurireu jiwu biapagamode awu iwadaruji. Meartorukare Pao Kurireu jiwu biapagamodukare awu iwadaruji. Ainore parore parduwawo boe jokodureu Pao Kurireu Uwariji. Ainore parore parduwawo batrarodureu bope dogei.
1JO 4:7 Imeardu kurire jiwu imedage nure tagi. Pao Kurireu umode pameardu kurido pui. Ča pameardu kuriwo pui rugadu. Pao Kurireu ore nure tagi dukeje tameardu kurimode boei. Tarduware Pao Kurireuji dukeje tameardu kurimode boei.
1JO 4:8 Mare jorduwakare Pao Kurireu jiwu meardu kurimodukare boei. Pao Kurireu meardu kurire boei marigudu. Boe emeardu kurimodukare boei dukodire boe erduware nou boei, nou boe erduwakare Pao Kurireu jituji.
1JO 4:9 Pao Kurireu meardu kurire boei rugadu. Dukodire ure tonaregedu mitodu rawuje pagae moto ka paro pegareu moriče pamugu pemegawo Pao Kurireu apo du akedukawo. Dukodire parduware Pao Kurireu meardu kurire boei duji.
1JO 4:10 Ainore ure rugadu. Emare meardu kurire boei boetoji. Pagi karega. Parduwakare pameardu kuriwo Pao Kurireuji. Emare meardu kurire pai boetoji. Dukodire ure tonaregedu rawuje mato moto ka bitoduwo paro pegareu moriče tuwiagoduwo paro pegareu piji.
1JO 4:11 Ainore Pao Kurireu rore. Meardu kurire pai rugadu. Dukodire pameardu kuriwo pui jamedu. Imeardu kurire jiwu imedage nure tagi.
1JO 4:12 Boe erdukare Pao Kurireuji mare pameardu kurimode pui dukeje Pao Kurireu mugu pemegamode pagabo. Umode pameardu kurido pui rugadu.
1JO 4:13 Pao Kurireu ure Tuwari maku pagai. Dukodire parduware pamugu pemegare apo duji. Parduware mugu pemegare pagabo duji jamedu.
1JO 4:14 Pao Kurireu ure tonaregedu rawuje boe etae. Čerdure ji rugadu. Dukodire čere boe ewie aino. Umode boe ekinorudowu nure nou Pao Kurireu onaregeduče rugadu.
1JO 4:15 Pamagomode boe ewiagai Pao Kurireu Onaregedu nuie Jesusče dukeje pamugu pemegamode Pao Kurireu apo. Pao Kurireu mugu pemegamode pagabo jamedu.
1JO 4:16 Pagi parduware Pao Kurireu meardu kurire pai rugadu. Dukodire pabagudukare Pao Kurireuče. Pabogurukare pamagowo ji. Ainore Pao Kurireu ure. Meardu kurireu nure ema rugadu. Dukodire pameardu kuri raimode boei dukeje pamugu pemegamode Pao Kurireu apo. Pao Kurireu mugu pemegamode pagabo jamedu.
1JO 4:17 Ia meri keje Pao Kurireu umode boe erdudo turo pegareu moriji. Mare meartorure Jesus jiwuge emoridodure marigudu dukodire epogurumodukare nou roino jiwu meri keje. Pameartorure Jesusji. Dukodire umode pameardu kurido pudui rugadu. Umode pameardu kurido boei jamedu. Dukodire paromode boei nono Jesus Cristo ro mogadure.
1JO 4:18 Pao Kurireu meardu kurire jiwu pagudumodukare Pao Kurireu rore pudui jiboeji. Pao Kurireu umode pameardu kurido rugadu dukeje umode pabagudu bokwado. Mare jorduwakare Pao Kurireu jiwu pagudure rugadu. Pagudure turo pegareu jitu kodi. Meardu kurimodukare rugadu.
1JO 4:19 Ča Pao Kurireu meardu kurire boei boetoji dukodire pameardu kuriwo ji jamedu. Pameardu kuriwo boe eiamedu boei rugadu.
1JO 4:20 Pamagomode pameardu kurie Pao Kurireuji mare pardu pegare boei dukejere pawadrarodunure. Pagaidu pemegamodukare pardure jiwu boei dukeje pagaidu pemegamodukare pardukare jiwu Pao Kurireuji.
1JO 4:21 Jesus Cristo makore pai rugadu. Pameardu kuriwo boei. Pameardu kurimode Pao Kurireuji dukeje pameardu kurimode boe eiamedu boei.
1JO 5:1 Umode boe ekinorudowu nure Jesusče rugadu. Meartorure nou inodu jiwuge Pao Kurireu ore nure emage jamedu. Boe emeardu kurire boei dukeje emeardu kurimode nou boe etorei jamedu.
1JO 5:2 Pameardu kurimode Pao Kurireuji dukeje pameartorumode Pao Kurireu bataruji. Paromode aino dukeje parduware pameardu kurire Pao Kurireu orei jamedu.
1JO 5:3 Pameardu kurire Pao Kurireuji dukeje pameartorumode Pao Kurireu bataruji jamedu. Pao Kurireu ore ewiapagamodukare ro pegareuge emeardae pegareuji. Ča Pao Kurireu ore nure pagi dukodire boe rakakare pai pameartoruwo Pao Kurireu bataruji. Paromodukare ro pegareuge emeardae pegareuji pameartorure Pao Kurireuji dukodi.
1JO 5:5 Pao Kurireu onaregedu nure Jesusče. Tu nou meartorure nou inodu jiwu biapagamodukare ro pegareuge emeardae pegareuji tu rugadu.
1JO 5:6 Jesus aregodure moto ka dukeje ao pegododure pobo tabo. Aregodure moto ka dukeje bire. Ure tugu maku boe etai kodire bire. Pao Kurireu Uwari akoino jamedu. Emare batrarodumodukare
1JO 5:7 Jesus ao pegododure pobo tabo boe erduwawo Jesus ure pudumi duji. Ure tugu redo boe erduwawo Jesus ure pudumi duji. Pao Kurireu Uwari ure boe ewie Jesus ure ema duji.
1JO 5:9 Pameartorumode boe ewadaruji. Mare Pao Kurireu bataru jetorore boe ewadaru kori. Emare makore tonaregedu jiboeji.
1JO 5:10 Nou Pao Kurireu bataru meture meartorure onaregedu jiwuge ebo. Mare meartorukare Pao Kurireu jiwuge egore batrarodunuie. Emeartorukare Pao Kurireu makore tonaregedu jiboe jituji.
1JO 5:11 Pao Kurireu onaregedu bire paro pegareu moriče dukodire Pao Kurireu umode pamugudo pudabo. Du akedumodukare.
1JO 5:12 Meartorure Pao Kurireu Onaregedu jiwu mugumode Pao Kurireu apo rugadu. Du akedumodukare rugadu. Mare nou meartorukare Pao Kurireu Onaregedu jiwu mugumodukare Pao Kurireu apo rugadu.
1JO 5:13 Inure awu atugoreboe maku tagai tarduwawo tamugumode Pao Kurireu apo rugadu. Nou tamugure Pao Kurireu apo du akedumodukare rugadu. Tameartorure Pao Kurireu Onaregeduji dukeje tamugumode apo rugadu jii toro rugadu. Aino čare tarduware awu ire tawie jiboeji rugadu.
1JO 5:14 Pamagomode Pao Kurireu bagai pagaidure jiboe bagai Pao kurireu meardae pemegareu tabo dukeje meardumode rugadu. Dukodire pabogurumodukare pamagowo Pao Kurireuji rugadu.
1JO 5:15 Pamagomode Pao Kurireuji dukeje meardumode pai rugadu. Parduware nou inoduji dukodire parduware umode pamagore bagaiboe maku pagai rugadu duji.
1JO 5:16 Ia meartorure Jesus jiwu ro pegamode dukeje tamagodo baruto nou meartorure Jesus jiwu paru tabo. Pao Kurireu biagodumode boe ero pegare jiboe piji rugadu. Biagodure piji dukeje nou boe butugugodure Pao Kurireu apo rugadu. Mare ia boe ero pegare jiboe ure tuginai. Du pijire Pao Kurireu biagodumodukare rugadu. Tamagokaba baruto awu rore aino jiwu paru tabo.
1JO 5:17 Boe ero pegamode pui. Mare paga karega Pao Kurireu jire eroino turo pegareu jamedu boe tabo. Mare ia boe ero pegare jiboe ure tuginai. Du pijire Pao Kurireu biagodumodukare rugadu.
1JO 5:18 Parduware Pao Kurireu ore ero pega raimodukare rugadu. Pao Kurireu Onaregedu jetu pemegare ei. Bope doge eimijera umodukare tugera to ei.
1JO 5:19 Parduware Pao Kurireu utugarege nure pagi duji. Mare Bope Doge Eimijera unure tumeardae maku meartorukare Jesus jiwuge eiamedu boe etai emeartoruwo tu nou tumeardae pegareuji rugadu.
1JO 5:20 Parduware Pao Kurireu Onaregedu aregodure rugadu. Emare ure parduwado. Dukodi čare parduware Pao Kurireuji. Boe Remawu nure ema. Pamugu pemegare Pao Kurireu apo. Pamugu pemegare Onaregedu Jesus Cristo apo jamedu. Pao Kurireu Remawu nure ema. Umode pamugudo baru tada pudabo. Du akedumodukare.
1JO 5:21 Imeardu kurire tai nono imeardu kurire itorei dumogadure. Dukodire imagore aino tai. Tameartorukaba bope doge ewadaruji. Tameartorukaba boe ewai tadawu santo dogei. Tagaba Pao Kurireudo emage. Urugadureu.
2JO 1:1 Meartorure Jesus jiwuge eimijera nure imi. Inure awu atugoreboe pemegado iwo maku tagai. Muga paje nure aki. Pao Kurireu ure tugeragu ai. Muga paje ore nure tagi. Pao Kurireu ure tugeragu tai jamedu. Imeardu kurire tai rugadu. Jorduware boe jokodu jiwuge eiamedu emeardu kurire tai rugadu.
2JO 1:2 Parduware boe remawuji. Metumode pagabo jii toro. Akedumodukare.
2JO 1:3 Dukodire Pao Kurireu umode turo pemegareu maku pagai. Okudugodumode pagabo. Umode pabemegado pudui. Umode pabemegado pui. Pao Kurireu Onaregedu Jesus Cristo romode pai nono tuo ro mogadure rugadu. Boe remawu jire eromode pai rugadu. Emeardu kurire pai dutabore eromode aino pai.
2JO 1:4 Iorduware ia akore erore nono Boe Remawu ro mogadure. Emeartorure Pao Kurireu bataruji rugadu. Dukodire iagarere i rugadu.
2JO 1:5 Dukodire inagoino. Pameardu kuriwo pui. Awu ire maku akaiwu iwadaru maiwu karega. Makudure pagai boetoji.
2JO 1:6 Pameardu kurimode aino pui dukeje pameartoruwo Pao Kurireu bataruji jamedu. Emare ure pawie marigudu paiamedu boe pameardu kuriwo pui rugadu.
2JO 1:7 Ure boe ekiripagadowuge emagare. Eture moto jamedu boe parugajeje. Emagere egore Jesus Cristo nuie ia boe etuwariče. Emeardaekare emaie rugadu duji. Ainore etaidure tuwo boe ekiripagado. Erdu pegare Jesusji.
2JO 1:8 Dukodire taeku jado. Tagaba tagera ra taro pemegareu piji. Taro pemegareu moridodumode tagai rugadu.
2JO 1:9 Meartorukare Jesus Cristo bataru jiwu meartorumode ia bataruji jamedu. Meartorure ia bataruji pugeje dukeje mugukare Pao Kurireu apo. Meartorure tu Jesus Cristo bataru jiwu mugure Pao Kurireu apo, Onaregedu apo.
2JO 1:10 Dukodire ia boe etaregodumode tawaito tuwo tarduwado ia bataruji tuwo taekiripagado dukeje tagaba eremo tawaito. Tagimadukaba ebo.
2JO 1:11 Mare tagimadumode ebo dukeje tamode tamedagedo emage. Tagimadumode ebo dukeje tamode ero pegareu maedo. Dukodire inagoino. Tagimadukaba ebo.
2JO 1:12 Iwadaru kurire imagowo tai. Mare imodukare bu bapera keje. Dukodire itaidure itaregoduwo tagae iwo tawie. Dukejere paegaremode pui rugadu.
2JO 1:13 Pao Kurireu ure tugeragu atuieji marigudu. Nou atuie ore etaidure tugimaduwo tawagai rugadu.
3JO 1:1 Meartorure Jesus jiwuge eimijera nure imi. Inure awu atugoreboe maku imedu Gaio ai. Imedia nure aki. Imeardu kurire ai rugadu. Imagore Pao Kurireu bagai baruto aparu tabo boe pemegawo ai, akogodukawo. Iorduware ameartorure Pao Kurireuji rugadu.
3JO 1:3 Ia meartorure Jesus jiwuge etaregodure dukeje ere iwie nuba are duji. Egore ameartoru rakaie boe jokodureu bataruji. Dukodire iagarere i rugadu. Iorduware ai. Are aro pemegado Pao Kurireu bataru kodaji boe jokodu jire akoino kodi.
3JO 1:4 Meartorure Jesus jiwuge ere nono itore emogadure. Imeardumode ere turo pemegado rugadu dukeje iagaremode i rugadu. Ere turo pemegado nono Pao Kurireu bataru kodaji. Boe jokodu jire Pao Kurireu akoino.
3JO 1:5 Imeardu kurire jiwu imedia nure aki. Akare akera ra meartorure Jesus jiwuge epiji awo akera maku etai. Arduwakare ei mare are akera maku etai.
3JO 1:6 Etaregodure mato dukeje ere meartorure Jesus jiwuge ewie woe arore jiboeji. Ameardu kurire ei rugadu. Etumode tuibagi to moto ka dukeje akera maku etai pugeje, aro pemegado ei pugeje etaregodu pemegawo tuwai ka. Pao Kurireu jakaremode pudui aroino duji.
3JO 1:7 Nou are akera maku etaiwuge etu jaere tuwo boe ewie Jesus jiboeji. Mare etaidukare tuwo boe rakado meartorukare Jesus jiwugei dukodire ekare tugeragu eiago maku pudai boeji. Etaiwore tu meartorure Jesus jiwuge ewagai ewo tugera maku pudai tugodu pemegawo.
3JO 1:8 Meartorure Jesus jiwuge nure pagi. Dukodire pawo pagera maku awu boe etai rugadu. Paroino dutabo pamaragodumode ebo ewo boe erduwado Pao Kurireu bataruji. Pao Kurireu bataru remawu jire inagoino.
3JO 1:9 Ire ia atugoreboe biagareu maku meartorure Jesus jiwuge etai toro tawai keje. Mare imedu Diótrefes meartorukare iwadaruji. Aidure tuwo boe eimijerado pudumi.
3JO 1:10 Itaregodumode toro dukeje imode boe erduwado nou Diótrefes ro pegareu jamedu boeji. Emare mako pegare čei boe ewiagai. Jordu pegare čei dukodire okirure rugadu. Mare ukare turo pegareu iado raga. Maigodu aino meartorure Jesus jiwuge etaregodure ae mare ukare tugera upodo ebo, ukare eremo tuwaito. Ure iage edo tugera ra nou meartorure Jesus jiwuge epiji dukodire ekare tugera upodo nou meartorure Jesus jiwuge ebo jamedu. Aidure tuwo etudo Pao Kurireu uwai piji.
3JO 1:11 Mare imeardu kurire jiwu imedia nure aki. Arokaba aino. Akaba akeragu ro pegareuge eroji. Arodo nono ro pemegareuge ero mogadure. Mugu pemegare Pao Kurireu apowu ro pemegamode. Jordukare Pao Kurireu jiwu ro pegamode.
3JO 1:12 Boe emago pemegare imedu Demétrioji. Boe jokodu jire roino. Ainore čemagore ji jamedu. Tarduware boe jokodu jire čenagoino duji.
3JO 1:13 Iwadaru kurire imagowo ai mare itaidukare iwo bu bapera keje.
3JO 1:14 Imeardaere itaregoduwo awagai kuri aino. Dukeje pamagomode pui rugadu.
3JO 1:15 Boe pemegawo ai. Amedage ekimadure awagai. Akimadudo čemedagebo nono jamedu.
JUD 1:1 Judas nure imi. Tiago uwie nure imi. Jesus Cristo utugare nure imi. Ire awu atugoreboe pemegado iwo maku Pao Kurireu makore bagaiwuge meartorure Jesus jiwuge ewagai. Pao Kurireu makore bagaiwuge nure tagi. Pao Kurireu meardu kurire tai rugadu. Jesus Cristo aiwo pemegare tai rugadu.
JUD 1:2 Pao Kurireu okudugoduwo tagabo rugadu, uwo tabemegado pudui rugadu, meardu kuriwo tai rugadu jii toro rugadu.
JUD 1:3 Imeardu kurire jiwu imedage nure tagi rugadu. Imeardaere iwo atugoreboe pemegado iwo tarduwado Jesus rore paidu jiboeji. Pameartorure Jesusji dukodire ure paginorudo pawarigudukawo bope doge eda kejewu joruto paro pegareu moriče. Itaidure iwo nou inodu bu awu atugoreboe keje. Mare iorduware batrarodureuge etaregodure tagae dukodire ire awu atugoreboe pemegado imara tabo iwo taragado tameartoruwo Jesusji rugadu. Pao Kurireu umodukare ia tuwadaru maku boe etai pugeje. Awu ure maku boe etaiwu tuwadaru ure turugadu boe emeartoruwo ji rugadu jii toro rugadu.
JUD 1:4 Mare ia meartorukare Pao Kurireu jiwuge ere bato pui toro tagae. Mare tagare taeku jado ei nou emeardaeji emagore jiboeji. Emagore Pao Kurireu bataruji mare ere nou tumagore jiboe mekido Pao Kurireu bataru remawu piji. Egore boe emeartorukaiago tu Jesus Cristoji emeartoruiago toro iaji jamedu. Egore Pao Kurireu kaieguie ema. Etaidukare tuwo tugera ra turo pegareu piji. Dukodire egoino. Egore Pao Kurireu ro pemegaie boei dukodire Pao Kurireu umodukaie boe ero pegareu morido etai. Egore boe ero pegamoduie du pegakaie. Egore pegakaie boe eribariwo tumugukare apowugei. Egore nono mare pagare egoino. Marigudu Pao Kurireu ure mariguduwuge ewie nuba turomode awu batrarodureugei. Akore turo pegamoduie ei nou ewadrarodae moriče. Mare pameartorure Jesus Cristoji rugadu. Pagimijera Kurireu nure ema. Pameartorumodukare iaji toro.
JUD 1:5 Tarduware awu iwadaruji marigudu. Mare itaidure iwo tawie pugeje. Marigudu Pagimijera ure Israel doge ekinorudo Egito moto piji. Mare du inodu tabo toro ia meri keje ure meartorukare puduiwuge Israel doge etagedudo. Tarduware.
JUD 1:6 Marigudu ia Pao Kurireu utugarege baru tadawuge ere tugera ra Pao Kurireu ure maku pudaiwu tumaragodae piji. Boe eimijerage parutowugere emage mare du inodu tabo ere tugera ra Pao Kurireu piji. Dukodire Pao Kurireu ure ekogudo corrente tabo moto kuda boečo tada. Edu kimore nono jii aino. Pao Kurireu umodukare etawuje rugadu jii toro. Ia meri keje Pao Kurireu umode ro pegareuge ero morido etai. Nou meri keje umode nou boečo tadawu tudugarege etawuje tuwo ewarigu bope doge eda kejewu joru pegareuto ero pegareu moriče. Tarduware.
JUD 1:7 Tarduware Sodoma ba kurireu kejewuge erore jiboeji. Tarduware Gomorra ba kurireu kejewuge erore jiboeji. Marigudu nou ba kurireu kejewuge erore nono nou baru tadawuge ero mogadure. Eribari kigodure tumugukare apowugei tu tu je. Ere turo pegado pui tieribari tabo. Dukodire ewarigudure bope doge eda kejewu joru pegareuto. Eragojere nou joru tada jii aino boe erduwawo nuba Pao Kurireu romode ro pegareugei. Nou joru akedumodukare jii toro rugadu. Tarduware nou inoduji rugadu.
JUD 1:8 Awu rakojere tagabowuge batrarodureuge erore nono Sodoma ba kurireu kejewuge ero mogadure. Emeartorure tuniauji Pao Kurireu bataru piji dukodire egore tumeartorumodukaie boe eimijeragei, tumeartorumodukaie Pao Kurireu bataruji. Emago pegare Pao Kurireu baru tadawu utugaregei jamedu. Eribarire tuwire epiji dukodire ere boe pegado pudui rugadu.
JUD 1:9 Marigudu Pao Kurireu utugarege baru tadawuge eimijera Miguel urugodure bope doge eimijeraji. Etokire pui Moisés bi keje tuwo tugeragu nou Moisés biji pudae. Mare Miguel ukare tumago pegado nou bope doge eimijeraji. Akore: – Pao Kurireu jorduware turomode ai duji.
JUD 1:10 Mare awu rakojere tagabowuge batrarodureuge emago pegare tuiorduwakare jiboe jamedu boeji. Emeardae bokware nono barogo meardae bokwareuge emogadure. Nou rakojere tagabowu boe emeardae bokware dutabo ero pegare. Nou turo pegareu tabore emode boe pegado pudui. Emage emode turugadu akedudo rugadu.
JUD 1:11 Boe pegamode ei rugadu. Erore nono nou imedu Caim ro mogadure. Etaidure dieroji dukodire ere tumegido Pao Kurireu bataru remawu piji nono nou imedu Balaão ro mogadure. Emeartoru bokware Pao Kurireu bataruji nono nou imedu Corá mogadure. Pao Kurireu ure nou imedu Corá akedudo rugadu. Nono umode awu boe etagedudo jamedu.
JUD 1:12 Nou boe epoguru bokware. Nono etaregodumode tawadae ka togwagewo tagabo tuwo meartorure Jesus jiwugedo pudumi. Mare pagare eroino. Emeardaere tietu pemegawo tu pudui. Ere nono bubutu bokwareu boetugu pegareu mogadure. Boetugumode dukeje boe epagare bubutu bagai mare bakuru umode nou boetugu pegareu barigu toro. Bubutumodukare. Mare boetugu ji karega inagoino. Nou boeire inagoino. Emeardaekare tuwo boe pemegado ia boei. Emeardaere tu tuwo boe pemegado pudui tu rugadu. Dujire inagoino. Ere nono tudu bokwareu i mogadure. Ia i tudumodukare dukeje nou ore i čewu umode nou i kado. Umode tawuje moto piji tuwo barigu toro. Dukodire nou i bimode. Tudumodukare rugadu. Mare i tudu ji karega inagoino. Nou boeire inagoino. Emeardaekare tuwo turo pemegado boei. Dujire inagoino. Dukodire Pao Kurireu umode boe pegado ei.
JUD 1:13 Ere nono pobo maereu mogadure. Bakuru rakareu jetumode pobo maereuji dukeje umode pobo barigu toro boe ao ka. Ure padaru kuru barigu pobo ao ka. Mare pobo maereu ji karega inagoino. Boe erdure ero pegareuji mare du inodu tabo nou ro pegareuge epogurukare turore aino duji. Dujire inagoino. Ia kuieje doge ekodure tumuga piji meru pagawo baru oiaji. Du nou boe ere nono nou kuieje doge emeru paga dumogadure. Mare kuieje ji karega inagoino. Pao Kurireu ure ia boečo pegareudo turugadu nou inagoino jiwu boe ewariguduwo to. Ewarigudumode to dukeje eragojemode tada jii toro rugadu. Boečore nono. Boečore rugadu. Eragojemode nono boečo tada jii toro rugadu. Dujire inagoino.
JUD 1:14 Imedu boetojiwu Adão boe etuo nure ema. Ia onaregedu iere Enoque. Awu Enoque ure boe ewie nuba Pao Kurireu romode ro pegareugei. Akore: – Pagimijera aregodumode baru tadawuge tudugaregebo. Nou baru tadawuge utugarege emagamode rugadu. Emagamode emagamode rugadu. Etaregodumode taiwowo ro pegareuge ewagai, tuwo boe pegado nou ro pegareugei ero pegareu moriče. Ro pegareuge ero pegare. Ro pegareuge emago pegare Pao Kurireuji. Dukodire Pao Kurireu umodukare ekinorudo. Umode boe pegado ei ero pegareu jamedu boe moriče.
JUD 1:16 Awu ro pegareuge emago pegare boe emeardaeji. Emago pegare boe erore jiboeji. Egore turo pegakaie mare ia boe ero pegaie. Emeartorure tu tumeardae pegareuji. Emago pemegare turoji. Ere tuwadaru motudo ia boei. Egore nou boei: – Tamodure, tabemegare. Mare pagare egoino. Etaidure tuwo boe eimijeragedo pudumi. Boe emeartoruwo pudui du bagaire eroino.
JUD 1:17 Mare imeardu kurire jiwu imedage nure tagi. Boe ere tarduwado Pagimijera Jesus Cristo bataru remawuji. Uture Jesus bataru tabowuge nure emage. Tawiagodukaba nou ere tarduwado jiwu ewadaru piji.
JUD 1:18 Egore: – Awu moto puredugodumode tageduwo dukeje boe ekadakagirimode tai rugadu. Boe emeartorumode tu tumeardae pegareuji turo pegawo tu tu je.
JUD 1:19 Awu egoino jiwuge etaidure tuwo boe emeardae pegado pui. Ewiapagare tu taidure jiwu tumeardae pegareuji turo pegawo tu tu je. Pao Kurireu Uwari rakojekare ebo.
JUD 1:20 Mare imeardu kurire jiwu imedage nure tagi. Tameartoru kurido Jesusji. Tamagodo pui tameartoruwo tu Jesusji rugadu. Tamagodo baruto Pao Kurireu bagai Pao Kurireu Uwari meardae tabo.
JUD 1:21 Pao Kurireu meardu kurire tai rugadu. Dukodire tameardu kurido Pao Kurireuji jamedu jii toro Jesus Cristo aregodumode tawagai du ka. Pagimijera nure ema. Emare okudugodure pagabo dukodire umode paginorudo. Umode paewodudo pawikawo pugeje pamuguwo pudabo jii toro rugadu.
JUD 1:22 Ia boe emororamagadure Jesus bataruji. Emeartoru rakakare Jesusji. Du tagogududo ebo.
JUD 1:23 Ia boe emeartorukare. Tamagodo ei emeartoruwo Jesusji rugadu. Emeartorumodukare dukeje ewarigudumode bope doge eda kejewu joru pegareuto. Ia boe emeardaere tu turo pegawo aremei. Tagogududo ebo jamedu. Mare taeku jado emeardaere jiboeji. Ewiapagare tumeardae pegareuji tu tu je tieribari kigoduwo aremei. Dujire inagoino. Tawiapagakaba emeardaeji rugadu. Nou emeardae barigu tabiji rugadu.
JUD 1:24 Pao Kurireu ure mitotu je. Tu emare umode boe ekinorudo boe ewarigudukawo bope doge eda kejewu joru pegareuto. Emare jetu pemegamode tai tameartoru raiwo Jesusji. Umode taro pegareu jamedu boe barigu tabiji tuwo tadudo pudae. Taegaremode tai rugadu umode tadudo pudae duji. Emare rakojere boe pemegareu keje rugadu. Emare umode paginorudo rugadu. Jesus Cristo bitodure ipo padure pugajejewu keje paro pegareu moriče. Pagimijera nure ema. Boe eiamedu boe emago pemegawo ji. Boe eiamedu boe ewo ie kurido. Boe eiamedu boe erduwawo Pao Kurireu nure ema duji rugadu. Ia bokware rugadu. Boe eiamedu boe erduwawo boe rakareu nure ema rugadu. Boe eiamedu boe emeartoruwo ji rugadu jii toro. Pao Kurireu nure ema rugadu marigudu. Pao Kurireu mode ema jii toro rugadu. Akedumodukare rugadu. Ainore ure rugadu! Ča iwadaru urugadureu.
REV 1:1 Jesus ure awu bakaru maku pagai. Pao Kurireu makore ji tuwo tudugarege erdudo nuba Pao Kurireu romode kuri aino duji. Jesus ure tudugare baru tadawu utudo nou bakaru tabo tudugare João bagai.
REV 1:2 Nono João ure tuiordure jiboe rugadu boe bu awu bapera keje. João jordure jiwu Pao Kurireu bataru reo. Jordure jiboe Jesus bataru reo jamedu.
REV 1:3 Boe etaiwomode awu baperato dukeje boe pemegamode ei. Boe emeardumode awu bakaruji. Emeartorumode ji dukeje boe pemegamode ei rugadu. Awu bakaru ure boe erduwado nuba boe mode boei duji, nuba Pao Kurireu romode boei duji. Awu Pao Kurireu bataru jetumode pudui kuri aino rugadu.
REV 1:4 João nure imi. Ire awu bakaru bu bapera keje iwo maku meartorure Jesus jiwuge etai Ásia moto kejewuge etai. Meartorure Jesus jiwuge ere bato pui tadawu bai oto padu kejewure sete. Ča. Tabegakare? Pao Kurireu ro pemegawo tai. Uwo tabemegado pui. Pao Kurireu nure ema rugadu. Marigudu emare rakojere boetoji. Du akedumodukare jii toro rugadu. Pao Kurireu mugure tumuga ira keje. Ia baru tadawu utugarege eragojere jokorai. Enodo padu kejewure sete. Emage emode boe pemegado tai jamedu.
REV 1:5 Jesus Cristo umode boe pemegado tai jamedu. Batrarodu bokware mare boe jokodu jire akoino rugadu. Jewodureu boetojiwu nure ema. Moto jamedu kejewu boe eimijera kurireuge eimijera kurireu nure ema. Awu Jesus meardu kurire boei rugadu. Dukodire bire boe emugato tuwo tugu redo boe ero pegareu moriče. Dukodire umode meartorure puduiwuge ekinorudo ero pegareu piji.
REV 1:6 Nono umode nou meartorure puduiwuge edudo Pao Kurireu apo ewo boe enomea maku ai. Eimijera kurireu mode ema rugadu. Jesus uo nure Pao Kurireuče. Jesus rakare rugadu du akedumodukare. Jesus kurire rugadu boe jamedu boe kori du akedumodukare. Ainore umode rugadu jii toro rugadu.
REV 1:7 Tagaiwodo! Jesus aregodumode boetugu tabo. Boe eiamedu boe erdumode ji. Nou ure Jesus bitowuge erdumode ji. Boe eiamedu boe erdumode ji. Etragudumode jamedu turo pegare kodi.
REV 1:8 Pao Kurireu akore: – Ire boe jamedu boe towuje. Aino itaregodumode dukeje imode boe jamedu boe iado jamedu. Marigudu ire. Pao Kurireu nure imi kimo. Itagedumodukare rugadu jii toro rugadu. Iraga kodure boe eiamedu boe ekori. Ainore Pao Kurireu akore. Akedumodukare rugadu.
REV 1:9 João nure imi. Imire ire awu bakaru bu bapera keje. Meartorure Jesus jiwu nure imi. Ire ikimijerado Jesusče rugadu. Dukodire meartorure Jesus jiwuge emedia nure imi. Boe rakare pai mare pagorigodukaba. Pagawo pagera ra pameartorure Jesus jitu piji jii toro rugadu. Pameartorure Jesusji dukodire boe rakamode pai, ro pegareuge ero pegamode pai. Ča imire ire boe ewie Pao Kurireu bataruji. Inagore boe jokodu jie Jesus akoino. Dukodire ro pegareuge ere itugu baičoreuto ia pobo oiadadawu moto kireu keje. Nou pobo oiadadawu moto iere Patmos.
REV 1:10 Ia Domingo meri keje Pao Kurireu Uwari ure tugeragu i. Dukeje imeardure ia boe mako rakareuji ikujei. Ure nono ia tapira ukiga ako mogadure. Makore i rugadu.
REV 1:11 Akore: – Ardumode jiboe bu bapera keje. Dukeje amode maku Ásia moto kejewuge meartorure Jesus jiwuge etai. Meartorure Jesus jiwuge emugure Éfeso ba kurireu keje. Emugure Esmirna ba kurireu keje. Emugure Pérgamo ba kurireu keje. Emugure Tiatira ba kurireu keje. Emugure Sardes ba kurireu keje. Emugure Filadélfia ba kurireu keje. Emugure Laodiceia ba kurireu keje. Etaire amode awu bapera maku.
REV 1:12 Nono ire imegido iorduwo ioku tabo ioguduba akoino iduji dukeje iordure jorugu dogei. Enodo padu kejewure sete. Tori kuieje tabore etowujedure.
REV 1:13 Ia boe rakojere nou jorugu doge etoiadada. Ure nono ia imedu umogadure. Jesus rabodu rakojere aino nou jorugu oiadada. Ukudau areia raire joki. Iaboe kogure morora tabo. Tori kuieje tabore towujedure.
REV 1:14 Ao kigadure rugadu. Joku urugure nono jorugu mogadure.
REV 1:15 Bure gurugure nono meriri mogadure. Akore nono pobo buture tori pijiwu ako mogadure.
REV 1:16 Iedure tugera pemegareu tabo kuieje dogei. Enodo padu kejewure sete. Tariga kurireu merire pudogiwu ure tudawuje ja piji rugadu. Je gurugure nono meri joku mogadure rugadu.
REV 1:17 Iordure ji dukeje iwudure bure keje nono ia bireu butu mogadure. Nono ure tugera bu itaora keje. Dukeje čare akore: – Apagudugodukaba. Ire boe jamedu boe towuje. Imode boe jamedu boe iado.
REV 1:18 Iwire mare iewodure pugeje. Nono iwimodukare pugeje rugadu jii toro rugadu. Imire iragare iwo boe eewodudo pugeje. Ia bokware. Imire iragare iwo boe ewarigu bope doge eda kejewu joru pegareuto jamedu. Ia bokware.
REV 1:19 Nou ardure jiboe bu bapera keje rugadu. Ardumode Pao Kurireu rore jiboeji. Ardumode Pao Kurireu romode ia meri keje jiboeji. Awu rugadu boe bu bapera keje boe erduwawo ji.
REV 1:20 Ardure jorugu dogei. Enodo padure sete. Mare jorugu karega. Meartorure iwuge nure emage. Ere bato pui tadawu boe eda enodo padure sete. Ardure jiwuge kuieje doge enodo padure sete ikera tada duji. Mare kuieje doge karega. Pao Kurireu utugarege baru tadawuge nure emage. Awu baru tadawuge etu pemegare nou meartorure iwugei.
REV 2:1 Jesus mako kimore i. Akore: – Ia Pao Kurireu utugare baru tadawu jetu pemegare meartorure iwugei Éfeso ba kurireu keje. Inure iwadaru utudo nou Éfeso kejewuge ewagai nou baru tadawu itugare apo. Amode bu bapera keje. Ainore awu iwadaru mode. – Imire ikedure kuieje dogei ikera pemegareu tabo. Nou kuieje doge enodo padure sete. Imerure nou jorugu doge ekao. Tori kuieje tabore nou jorugu doge etowujedure. Ča inure iwadaru maku tawagai.
REV 2:2 Iorduware tarore jiboeji. Tagare tagera ra tamaragodae rakareu piji. Tare ro pegareuge erego tabiji rugadu. Iage egore Pao Kurireu ure etarego tagae. Mare tanara pemegare ei tarduwawo ewadaruji. Dukodire tarduware ei uture iwadaru tabowuge karegure emage, batrarodureuge nure emage rugadu.
REV 2:3 Tameartorure i dukodire boe ero pegare tai. Mare tagare tagera ra tameartorure i dupiji. Tare taragado tai tagiarigodukawo.
REV 2:4 Mare iordu pegare ia tarore jiboeji. Tameardu kurire i rugadu boetoji. Mare aino tameardu kuri remawukare i pugeje.
REV 2:5 Iwo Tawie. Tawiabutudo tare tagera ra pijiwu taro pemegareu keje tameardu kuriwo i pugeje. Taro pegareu barigu tabiji tarowo boetojiwu taro pemegareuji. Tamodukare tagera ra taro pegareu piji dukeje itaregodumode tagae iwo tago jorugu tawuje tabiji. Mare jorugu ji karega inagoino. Iro pegamode tai dukodire tamodukare bato pui nono pugeje. Dujire inagoino.
REV 2:6 Mare itaidure ia tarore jiboeji. Tardu pegare nicolaíta doge ero pegareuji. Imi jamedu iordu pegare ero pegareuji jamedu.
REV 2:7 Tawiapagado Pao Kurireu Uwari bataruji. Makonure meartorure Jesus jiwuge ewiagai. Ia tagi tamodukare tagera ra tameartorure i du piji, tamodukare tagera ra taro pemegareu piji dukeje imode tarududo baruto tagwagewo baru tadawu kurodureboeji tawikawo rugadu.
REV 2:8 Jesus mako kimore i. Akore: – Ia itugare baru tadawu jetu pemegare Esmirna kejewuge emeartorure iwugei. Inure iwadaru utudo nou Esmirna kejewuge ewagai nou baru tadawu itugare apo. Amode bu bapera keje. Ainore awu iwadaru mode. – Ire boe jamedu boe towuje. Imode boe jamedu boe iado rugadu. Iwire mare iewodure pugeje.
REV 2:9 Iorduware boe pegare tai duji. Iorduware marenarue dogere tagi duji. Mare tagoe kurire rugadu baru tada. Iorduware ia ro pegareuge emago pegare tai duji. Egore Judeu doge nuie pudumi. Mare emeartorure tu bope doge eimijera Satanásji.
REV 2:10 Boe ero pegamode tai mare tabagudukaba. Ča bope doge eimijera umode boe edo tugeragu ia tai tuwo tadugu baičoreuto unure turokogado ia tai. Boe pegamode tai kejewu merimode ikera pudogi dure. Tagaba tagera ra tameartorure i du piji. Tarduwamode boe emode tawido duji dukeje tagaba tagera ra ipiji. Nono imire imode tamorido dukodire tawimodukare pugeje.
REV 2:11 Tawiapagado Pao Kurireu Uwari bataruji. Makonure meartorure iwuge ewiagai. Ia tagi tamodukare tagera ra tameartorure i du piji, tamodukare tagera ra taro pemegareu piji dukeje tawimodukare pugeje.
REV 2:12 Jesus mako kimore i. Akore: – Ia itugare baru tadawu jetu pemegare meartorure iwugei Pérgamo ba kurireu keje. Inure iwadaru utudo nou Pérgamo kejewuge ewagai nou baru tadawu itugare apo. Amode bu bapera keje. Ainore awu iwadaru mode. – Tariga kurireu merire pudogiwu meture itabo.
REV 2:13 Iorduware kaiba tamugure. Tamugure bope doge eimijera Satanás mugure kejewu moto keje. Meartorure nou bope doge eimijera jiwuge emagare nono. Imedu Antipas ukare tugera ra ture boe ewie iwadaru jitu piji nono tago moto keje. Dukodire boe ere Antipas bito. Mare tagare tagera ra ipiji. Tameartoru kimore i.
REV 2:14 Mare tarore ia itaidukare jiboeji. Marigudu boe eimijera Balaque aidure tuwo Israel doge etagedudo. Nono imedu Balaão makore nou boe eimijera Balaqueji uwo Israel doge enogwagedo makudure bope doge etaiwu ekeji. Makore Balaqueji uwo Israel doge edo tugeragu tumugukare apowu aremei. Ainore ia tagi tarore jamedu nono nou nicolaíta doge emeardae mogadure.
REV 2:16 Ča, tagera ra nou taro pegareu boe piji. Tamodukare tagera ra nou taro pegareu boe piji dukeje itaregodumode rugadu irugoduwo ro pegareu boei nou ure tudawuje inogwa pijiwu tariga kurireu tabo.
REV 2:17 Tawiapaga pemegado Pao Kurireu Uwari bataruji. Makonure meartorure iwuge ewiagai. Ia tagi tamodukare tagera ra tameartorure i du piji, tamodukare tagera ra taro pemegareu piji dukeje imode boe pemegado tai baru tada iro moga Israel dogei boe maereu keje dumogadure. Imode ia tori kigadureu maku tagai jamedu. Ia boe erduwakare jiwu boe ekie maiwu padure nou tori keje. Mare tagi rugadu tarduwamode nou boe ekieji. Tamode tageragu ji dukeje tarduwamode ji.
REV 2:18 Jesus makore kimo i. Akore: – Ia itugare baru tadawu jetu pemegare meartorure iwugei Tiatira ba kurireu keje. Inure iwadaru utudo nou Tiatira kejewuge etae nou baru tadawu itugare apo. Amode bu bapera keje. Ainore awu iwadaru mode. – Pao Kurireu onaregedu nure imi. Ioku urugure nono jorugu mogadure. Iwure gurugure nono meriri gurugu mogadure.
REV 2:19 Iorduware tarore jiboeji. Tameardu kurire i. Tameartorure i rugadu. Taro pemegare. Tamaragodu pemegare inai. Boe rakare tai mare du inodu tabo tagare tagera ra ipiji. Tare taro kurido boetojiwu taro kori.
REV 2:20 Mare itaidukare ia taroji. Ia aredu pegareudo rakojere tagabo. Iere Jezabel. Ema akore taregoduie Pao Kurireu bataru tabo mare pagare akoino. Ure meartorure iwuge ewarigu boeto ero pegawo. Dukodire eribarinure tumugukare apowugei. Dukodire enogwagenure makudure bope doge etaiwu boe ekeji. Ukare turugadu.
REV 2:21 Nou Jezabel ro pegare mare iro pegakare ji raga. Mare aidukare tuwo tugera ra nou turo pegareu piji, nou tieribarire tumugukare apowu imei du piji.
REV 2:22 Dukodire imode barigu ia boe pegareu ka iwo boe pegado ji rugadu kuri aino. Nono nou padure nou aredu apowuge emodukare tugera ra nou turo pegareu piji dukeje imode boe pegado ei jamedu.
REV 2:23 Nono imode meartorure nou aredu pegareudo jiwuge ewido jamedu. Dukeje meartorure iwuge eiamedu boe erduwamode rugadu imire iorduware boe erdae emeardae jituji. Imode taiamedu boe taro pegareu morido tagai.
REV 2:24 – Mare nouia tagi Tiatira kejewuge, tameartorukare nou aredu pegareudo bataruji. Meartorure jiwuge egore tuiorduwaie boe erduwakare jiwu bope doge eimijera Satanás bataruji. Mare tameartorukare ewadaruji. Aino taro pemegare. Dukodire taro pegakaba pugeje mare tameartorudo tu i jii toro itaregodumode tagae du ka.
REV 2:26 Tawiapagado Pao Kurireu Uwari bataruji. Makonure meartorure iwuge ewiagai. Ia tagi tamodukare tagera ra tameartorure i du piji, tamodukare tagera ra taro pemegareu piji jii toro boe akedu ka dukeje imode boe eimijeragedo tagi nono Pao Kurireu ure boe eimijerado imi dumogadure. Imode boe eimijeragedo tagi tardu pemegawo boe eiamedu boei. Taragamode taro pegawo boe pegareugei nono boe emode pori bowuje dumogadure. Nono imode kuieje kurireu baregodu tabowu maku tagai jamedu.
REV 3:1 Jesus mako kimore i. Akore: – Ia itugare baru tadawu jetu pemegare meartorure iwugei Sardes ba kurireu keje. Inure iwadaru utudo nou Sardes kejewuge ewagai nou baru tadawu itugare apo. Amode bu bapera keje. Ainore awu iwadaru mode. – Kuieje doge enodo padure sete. Edure ikera keje. Pao Kurireu utugarege baru tadawuge edure ikera keje jamedu. Edure ikera kejewuge enodo padure sete jamedu. Emaragodure inai. Ča iorduware taroji. Boe egore taroie itaidure jiboeji. Mačare tare nono bireuge emogadure. Mare tawi ji karega inagoino. Tarokare itaidure jiboeji rugadu. Dujire inagoino.
REV 3:2 Taeku jado. Tardae tameardae pemegado pugeje tagawo tagera ra tameartorure i dupiji. Iorduware taroji. Tagare taro pemegado nono Pao Kurireu aidure jiboe dumogadure.
REV 3:3 Dukodire tawiabutudo tarduware jiwu Pao Kurireu bataru keje. Tameartorudo ji. Tagera ra taro pegareu piji. Tamodukare tardae tameardae pemegado dukeje imode boe pegado tai. Imode taetodu remawudo pui nono iwogu kigodureu ro mogadure iwo boe pegado tai.
REV 3:4 Mare ia tagi taro pemegare. Mare tamagakare. Tagire imode tamugudo itabo taro pemegare dukodi. Tamugumode itabo ire ia taro pegareu tawuje tabiji dukodi. Ire taro pegareu tawuje tabiji nono boe ero mogadure tuwo rorogodureu tawuje tugudau areia kigadureu piji dumogadure.
REV 3:5 Tawiapaga pemegado Pao Kurireu Uwari bataruji. Makonure meartorure iwuge ewiagai. Ia tagi tamodukare tagera ra tameartorure i du piji, tamodukare tagera ra taro pemegareu piji dukeje imode ia taro pegareu tawuje tabiji nono boe ero mogadure tuwo rorogodureu tawuje tugudau areia kigadureu piji dumogadure. Imode Iogwa Kurireu bie, utugarege baru tadawuge ewie, itore nuie tagi duji. Imodukare tagie tawuje bimodukareuge ekie padure kejewu bapera piji.
REV 3:7 Jesus mako kimore i. Akore: – Ia itugare baru tadawu jetu pemegare meartorure iwugei Filadélfia ba kurireu keje. Inure iwadaru utudo nou Filadélfia kejewuge ewagai nou baru tadawu itugare apo. Amode bu bapera keje. Ainore awu iwadaru mode. – Boe pemegareu nure imi. Iro pegareu bokware boei. Imago pegareu bokware boei. Boe jokodureu nure imi. Boe eimijera kurireu nure imi. Ire nono ia imedu iedure chave jiwu mogadure. Imode jado dukeje jadodure rugadu. Boe emodukare mi. Imode mi dukeje jadodumodukare pugeje. Ainore irore rugadu. Mare baiporo ji karega iroino. Imire imode itaidure jiwu iro to rugadu. Ia boe umodukare ido ia itaidumodukare jiwu iro to. Dujire inagoino.
REV 3:8 Ča iorduware taroji. Iorduware taraga biagare tu je duji. Tameartorure ire tarduwadowu iwadaruji rugadu. Tagare tagera ra ipiji. Nono iraga kodure boe jamedu boe kori. Dukodire ia boe, ia bope umodukare tawarigu taro pemegareu piji, ire ikera maku tagai kodi.
REV 3:9 Iage egore Judeu doge enuie pudumi mare ewadrarodure tai. Emeartorure bope doge eimijera Satanásji. Ča imode ewadrarodae akedudo. Iraga tabore imode tadugaregedo emage. Erduwamode imeardu kurire jiwuge nure tagi rugadu.
REV 3:10 Imode boe pegado boe eiamedu boei iorduwawo meartorumode iwugei, iorduwawo meartorumodukare iwugei. Mare tabagudukaba. Tawudugudo tai. Imode tawiado nou iroino dupiji tameartorure i kodi.
REV 3:11 Itaregodumode tagae kuri aino. Tameartorudo tu i jii toro itaregodumode pugeje du ka. Imire imode ia boe pemegareu maku tagai taro pemegareu moriče. Boe emodukare nou tamori tawuje tabiji.
REV 3:12 Tawiapaga pemegado Pao Kurireu Uwari bataruji. Makonure tawiagai. Ia tagi tamodukare tagera ra tameartorure i du piji, tamodukare tagera ra taro pemegareu piji dukeje imode tamugudo Pao Kurireu apo. Tamodukare tagera ra piji jii toro. Imode Pao Kurireu ie bu tawugeje. Imode Jerusalém maiwu ie bu tawugeje jamedu. Nou Jerusalém ba kurireu maiwu umode turawuje baru piji Pao Kurireu piji. Imode ikie maiwu bu tawugeje jamedu.
REV 3:14 Jesus mako kimore i. Akore: – Ia itugare baru tadawu jetu pemegare meartorure iwugei Laodiceia ba kurireu keje. Inure iwadaru utudo nou Laodiceia kejewuge ewagai nou itugare baru tadawu apo. Amode bu bapera keje. Ainore awu iwadaru mode. – Imire ire boe jamedu boe udo turugadu. Itabore Pao Kurireu ure boe jamedu boe towuje. Imodukare ikera ra boe epiji. Boe remawu jire inagoino boei tu rugadu. Dukodi čare imode tawie boe remawuji rugadu. Tawiapaga pemegado iwadaruji.
REV 3:15 Iorduware taroji. Tameartorure mare tameartoru jokodukare i. Mare itaidure tameartoru kuriwo i. Tardu pegamode i mare imodukare ikera ra tabiji rugadu.
REV 3:16 Mare tameartoru jokodukare i. Dukodire tare nono pobo uru jokodukareu mogadure. Imode tawarigu ipiji, imode ikera ra tabiji nono boe emode pobo urureu barigu togwa piji dumogadure. Mare pobo ji karega inagoino. Tameartoru jokodukare i dukodire imode tawarigu ipiji. Dujire inagoino.
REV 3:17 Ča tagagore tagoe kurie. Tagagore ia boe okwakaie tagai. Mare tarduwa bokware. Tarduwakare boe pegareuge nure tagi duji. Tameartorukare i dukodire tare nono oe bokwareuge emogadure. Tare nono joku bokwareuge emogadure. Tare nono biri kedoreuge emogadure. Mare oe bokwareugei karega inagoino. Joku bokwareugei karega inagoino. Biri kedoreugei karega inagoino. Tagoe bokware baru tada. Dujire inagoino. Taro pegare kimo. Dujire inagoino. Tarduwa bokware i. Dujire inagoino.
REV 3:18 Inogituwawo tai. Tagirodo ino tori kuieje pemegareuji. Mare tori kuieje ji karega inagoino. Tameartorudo i rugadu. Dujire inagoino. Tameartorumode i dukeje imode baru tadaboe maku tagai. Dujire inagoino. Awu imode maku tagaiboe pemegamode tori kuieje pemegareu kori. Dujire inagoino. Tagirodo tagudau areia kigadureuji. Mare tagudau areia ji karega inagoino. Tameartorudo i tamagowo taro pegareuji iwiagai. Tamagomode taro pegare jiboeji iwiagai dukeje iwiagodumode taro pegareu piji. Dujire inagoino. Nono tabogurure čeboe okwamode tabiji. Dujire inagoino. Tameartorumode i dukeje imode tarduwado i nono jorubo kuru epa ro mogadure joku bokwareuji tuwo aiwodo pugeje. Mare jorubo ji karega inagoino. Imode tarduwado i. Dujire inagoino. Nono tarduwamode boe remawuji rugadu.
REV 3:19 Imeardu kurire jiwuge meartorure iwuge ero pegamode dukeje imode erduwado ero pegare jiboeji, iro rakamode ei ero pegakawo pugeje. Mare inogituwamode ei jamedu iwo erduwado. Dukodire čare tameartorudo iwadaruji. Tagiarigo taro pegare jiboeji tawo tagera ra nou taro pegareu piji rugadu.
REV 3:20 Taipagado iwadaru bagai! Imagonure boe ewagai. Iragoje jakare tai. Ia tagi tameardumode iwadaruji, tamagomode iwagai dukeje ipuredumode tai. Iragojemode tagabo nono ia boe umode turemo tawaito tumuguwo tagabo dumogadure. Aino ča pamagomode pui nono boe emagore pui togwage tabo dumogadure.
REV 3:21 Ikare ikera ra imeartorure Iogwa Kurireu jitu piji dukodire ure imugudo tumegi boe eimijerawo imi. Nono ia tagi tamodukare tagera ra tameartorure i du piji, tamodukare tagera ra taro pemegareu piji dukeje imode tamugudo imegi boe eimijeragewo tagi jamedu nono imugure Iogwa Kurireu meki dumogadure. Tawiapaga pemegado Pao Kurireu Uwari bataruji. Makonure tawiagai.
REV 4:1 Ča Jesus ure tuwadaru akedudo dukeje itaiwore pugeje. Nono iordure ia bai poroji baru tada. Jadodure. Nono imeardure Jesus makoji pugeje. Akore nono ia tapira ukiga ako mogadure. Jesus akore: – Aru mato iwo ardudo iromode jiboeji.
REV 4:2 Rore puku i Pao Kurireu Uwari ure tugeragu i dutabo. Nono ča iragojere baru tada. Itaiwore boe jamedu boe parugajeje. Nono iordure ia boe eimijera kurireu muga iraji. Ia boe mugure keje.
REV 4:3 Je urugu kaworure nono nou tori pemegareu jaspe urugu kaworure dumogadure. Urugu kujagure nono nou tori pemegareu sardônio urugu kujagure dumogadure. Nou boe eimijera muga ira mugure ia jure kaworureu oiadada. Nou jure kaworure nono nou tori pemegareu esmeralda kaworure dumogadure.
REV 4:4 Boe eimijerage emuga ira enodo padu kejewure vinte quatro. Etaiare pači nou boe eimijera kurireu apo. Boe emugure ewugeje jamedu. Boe eimijerage nure emage jamedu. Ekudau areia kigadu maere ei. Nou etaotadawu tadare nou tori kuieje doge emedure.
REV 4:5 Nou boe eimijera kurireu muga ira pijire boeiaragudu ure tudawuje, boeiaruru ure tudawuje. Nou boe eimijera kurireu muga ira jokoraire jorugu enodo padu kejewure sete urugure dutabo. Joru mare joru karega. Pao Kurireu utugarege baru tadawuge nure emage.
REV 4:6 Nou boe eimijera kurireu muga ira kejere iaboere tudawuje jamedu. Ure nono kurugwa mogadure. Nou kurugwa po jokurugudure nono meriri kuru mogadure. Ia barege ere pobe puibiji. Ere taiado nou boe eimijera kurireu muga ira tabo. Nou barege eekukare pobe. Eeku makare etaora keje.
REV 4:7 Ia barogo aorare nono leão aora mogadure. Ia barogo aorare nono tapira imedu aora mogadure. Ia barogo aorare nono boe etaora mogadure. Ia barogo aorare nono aroečeba koduredu umogadure.
REV 4:8 Nou barege eigodo oto padu kejeboere seis tu tu ei. Eeku epadure etaora meji pudogi. Nono nou barege eragodure meriji boečoji. Egore: – Pao Kurireu rore jiboe ure tuginai boe ero pegareu piji rugadu. Ro pegareu bokware rugadu. Pao Kurireu ro rakareu nure ema rugadu. Boe eimijera kurireu nure ema rugadu. Marigudu ure rugadu. Ema nure ema rugadu jii aino. Akedumodukare jamedu jii toro rugadu.
REV 4:9 Nou barege eragodure tuwo nou Boe Eimijera Kurireu ie kurido, čimaduwo apo rugadu. Nou Boe Eimijera Kurireu mugure tumuga ira keje. Emare bimodukare rugadu. Nou barege eragodure dukeje nou boe eimijerage enodo padu kejewure vinte quatro doge ere tubu jodo mototo jokorai. Emago pemegare ji. Ere tadadawu tawuje taora piji tuwo barigu nou Boe Eimijera Kurireu bure paru.
REV 4:11 Egore: – Čegimijera Kurireu nure aki. Pao Kurireu nure aki. Aki are boe jamedu boe towuje. Dukodire apemegare. Boe emago pemegare ai aragare kodi. Boe ewo akie kurido rugadu. Boe emeartoruwo awadaruji rugadu. Akire are ameardae tawuje awo boe jamedu boe towuje. Ameardae koiare boe etagedukare marigudu.
REV 5:1 Iordure ia bapera upododureuji nou boe eimijera kurireu iera pemegareu tada. Bataru padure nou bapera rugadu boe keje. Selo bekururedu oto padure sete nou bapera keje. Nou bekuru koiare ure nou bapera mi.
REV 5:2 Nono iordure Pao Kurireu baru tadawu utugare kurireuji. Kudugodure baru tadawuge ewagai. Akore: – Ioguduba pemegare tuwo nou bekuru rawuje nou bapera piji tuwo nou bapera jado?
REV 5:3 Mare ia pemegareu ukare baru tada, ukare moto keje, ukare bope doge eda keje tuwo nou bapera jado taiwowo nou baperaji.
REV 5:4 Dukodire itragudu rakare ikiarigodure dutabo. Ia boe pemegakare tuwo nou bapera jado, taiwowo nou baperaji dukodire itragudure aino.
REV 5:5 Mačare ia boe eimijera makore i. Akore: – Akragudukaba. Akaiwodo. Iare mitotu je. Israel doge ekimijera kurireu Davi onaregedu nure ema. Iere Leão. Judá uwobe nure ema. Ure boe pegareuge eraga akedudo. Emare pemegare tuwo nou bekuru tawuje bapera piji, tuwo nou bapera jado.
REV 5:6 Nono iordure ji. Iere Cordeiro Jesus jamedu. Iordure nou boe pegareuge ere bitowu enoe oiaji ierato, bureto, orebaru kuda. Ure tumagu tuwidoduwo boe ero pegareu moriče kodi. Rakojere nou boe eimijerage etoiadada, nou baregere pobe puibiji etoiadada, puredure nou boe eimijera kurireu muga iraji. Pao Kurireu o baru tadawu utugaregere enodo padure sete nono jamedu. Pao Kurireu ure erdudo moto jamedu boe parugajeje. Ere nono nou Cordeiro Jesus kejewu joku mogadure. Ere nono nou Cordeiro ukigare.
REV 5:7 Nono nou Cordeiro Jesus ure tugeragu nou baperaji nou boe eimijera kurireu iera piji.
REV 5:8 Dukejere nou baregere pobe puibiji ere tubu jodo nou Cordeiro Jesus jokorai tugimaduwo apo. Nou boe eimijerage ere tubu jodo jamedu. Nou boe eiamedu boe ekedure tuwabo akoreu arpaji tiamedu boe tabo. Eiamedu boe ekedure ruwobo roguji tiamedu boe tabo. Nou ruwobo rogu todure tori kuieje tabo. Nou ruwobo rogu tadare roreboe jeture. Nou roreboe uredudure, rore. Meartorure Jesus jiwuge emagomode baruto Pao Kurireu bagai dukeje nou uredudu rutumode.
REV 5:9 Nono nou barege, nou boe eimijerage erare ia roia maiwuji Cordeiro Jesus joki. Egore: – Aki awidodure awo aku redo boe eiamedu boe ero pegareu moriče. Ainore arore awo akirodo boei Pao Kurireu ai. Mare boe eiamedu karega emeartorure ai. Moto jamedu boe parugajejewuge iage emeartorumode ai. Mare iage emeartorumodukare ai. Are akeragu ei emeartoruwo ai dukeje are emaragodudo Pao Kurireu ai ewo boe enomea maku tu tu Pao Kurireu ai. Boe eimijerage umode emage. Dukodire aki apemegare rugadu awo akeragu nou baperaji awo nou bekuru tawuje nou bapera piji awo jado.
REV 5:11 Ča itaiwore pugeje. Nono iordure Pao Kurireu utugarege baru tadawugei. Emagare rugadu. Mare emagare rugadu! Ekodure cem milhão kori. Ere taiado nou boe eimijera kurireu muga ira tabo. Ere taiado nou baregere pobe puibijidu doge ebo jamedu, nou boe eimijeragebo.
REV 5:12 Nono eragodure jamedu. Egore: – Bitodureu Cordeiro pemegareu Jesus nure aki. Dukodire apemegare boe emago pemegawo ai. Apemegare boe ewo akie kurido. Boe erduwawo boe eimijera kurireu nure aki duji. Boe erduwawo araga kodure boe eiamedu boe eraga kori duji. Boe emagowo arduware boe jamedu boe jituji. Akoe kuriwo boe eiamedu boe ekori du pemegare rugadu.
REV 5:13 Nono ča iwiapagare pugeje. Nono imeardure baru tadawuge eiamedu boe eraji, moto kejewuge eiamedu boe eraji, pobo tadawuge eiamedu boe eraji, bope doge eda kejewuge eiamedu boe eraji. Boe eiamedu boe eragodure. Egore: – Pamago pemegawo Cordeiro Jesusji du akedumodukare. Pamago pemegawo nou Boe Eimijera Kurireuji du akedumodukare. Pamode ie kurido. Pamode boe erduwado raka kodure boe eiamedu boe eraga kori duji. Pamagomode aino jii toro rugadu. Nou pamago akedumodukare rugadu.
REV 5:14 Nono nou barege ere pobe puibijidu doge egore: – Awu bataru ure turugadu! Nono nou boe eimijerage ere tubu jodo mototo Cordeiro Jesus jokorai. Emago pemegare ji rugadu.
REV 6:1 Itaiwore pugeje. Cordeiro Jesus ure nou padure bapera kejewu boetojiwu rawuje nou upododureu bapera piji. Dukodire čare nou baregere pobe puibijidu epijire ia mako rakare. Akore nono boeiaruru ako mogadure. Akore: – Akarego mato!
REV 6:2 Nono ča iordure ia kuwaru kigadureuji. Aregodure. Iordure ia boe mugure keje duji. Nou mugure kuwaru kejewu iedure baigaji. Ia coroa makudure ai metuwo aora tada. Nono uture. Ure boe etagedudo rugadu.
REV 6:3 Nono Cordeiro Jesus ure padure bapera kejewu rawuje nou bapera piji pugeje. Dukodire čare nou baregere pobe puibijidu epiji ia makore pugeje. Akore: – Mato.
REV 6:4 Ča ia kuwaru ure tudawuje. Nou kuwaru kujagure. Ia boe mugure keje. Nou mugure kuwaru kejewu raka makudure ai rugoduwo boei moto keje. Tariga kurireu makudure ai jamedu. Rugodure boei dukeje boe erugodure pui jamedu. Dukodire boe ere pu bito.
REV 6:5 Nono Cordeiro Jesus ure padure bapera kejewu rawuje nou bapera piji pugeje. Dukodire čare nou baregere pobe puibijidu epijire ia makore pugeje. Akore: – Mato. Itaiwore dukeje iordure ia kuwaru čoreuji. Ia boe mugure keje. Nou mugure kuwaru kejewu iedure nou umode boe motudureu remaguwu meririji.
REV 6:6 Imeardure ia akoji nou baregere pobe puibijidu epiji. Akore: – Boe emodukare tugeragu dieroji tumaragodae moriče. Trigo ja rogu mode mito meri jameduji jii semana ao ka emaragodae moriče. Cevada ja mode mito ia padumode kajeje tumoriwo nono nou trigo mori mogadure. Mare boekaguru mode. Vinho mode jamedu.
REV 6:7 Nono Cordeiro Jesus ure padure bapera kejewu rawuje nou bapera piji pugeje. Dukodire čare nou baregere pobe puibijidu epiji ia akore aino pugeje: – Mato!
REV 6:8 Itaiwore dukeje iordure ia kuwaru ekureuji. Mugure kuwaru kejewu iere Bireuge Eimijera. Iaboe kodu puredure nono nou kuwaru rekodaji. Iere Bope Doge Eda. Nono boe ere pobe puibiji eiamedu boe epijire ia boe ewimode nou bireuge eimijera koia. Umode boe ewido rugadu. Umode boe erugodudo pui. Umode ewido tuge boei koia. Umode jorubo pegareu jetudo ei ewiwo. Umode barege pegareuge edo boe ewido jamedu.
REV 6:9 Nono Cordeiro Jesus ure padure bapera kejewu rawuje nou bapera piji pugeje. Iordure boe ere tapira kodu kowu kejewu kamoji baru tada. Nou kamo kuda iordure nou meartorure Pao Kurireu jiwuge bireugei. Ewidodure emagore Pao Kurireu bataruji kodi. Ewidodure ekare tugera ra tumagowo Pao Kurireu bataru jitu piji. Emagore Pao Kurireu bataruji tu tu je boe ewiagai dukodire ewidodure.
REV 6:10 Nou bireuge ekudugodure. Egore: – Pao Kurireu Rakareu nure aki. Pemegareu nure aki rugadu. Boe jokodu remawu nure aki. Kaba meri kejeba akaiwomode boei ero pegareu bagai awo boe pegado nou ure čewidowugei awo čewi morido?
REV 6:11 Ča ia boe ekudau areia pemegareu kigadureu makudure etai. Pao Kurireu makore ei ewo tamudo tu jao nouia meartorure Pao Kurireu jiwuge ewidodumode pugeje du ka.
REV 6:12 Nono Cordeiro Jesus ure padure bapera kejewu rawuje nou bapera piji pugeje. Dukodire čare moto magadugodure rugadu. Meri joku ure tujo maedo. Čore nono areia čoreu mogadure. Ari joku ure tugujagudo nono boe eku kujagu mogadure.
REV 6:13 Ča kuieje doge ewudure moto ka. Ewudure nono kurodureboe butu moga moto ka dumogadure bakuru jeture pudui dukodi.
REV 6:14 Baru akedure tači nono bapera umode tubodo puapo dumogadure. Nono tori jamedu boe ere tudawuje tumuga piji. Pobo oia tadawu moto jamedu boe ere tudawuje tumuga piji.
REV 6:15 Dukodire čare boe eimijera kurireuge, tugobaigarege eimijerage, oe kurireuge, boe eimijerage eiamedu boe ere tuwiado tori poro tada. Ere tuwiado tori kuda jamedu. Boe eiamedu boe ere tuwiado. Boe etugaregere, maragodure pudaiwugere jamedu. Eiamedu boe ere tuwiado.
REV 6:16 Etaidure tuwo tuwiado Pao Kurireu piji. Dukodire emagore tori dogei. Egore: – Tawududo čewugeje tawo čewido Pao Kurireu piji, Cordeiro Jesus piji. Pao Kurireu mugure tumuga keje. Boe korire Cordeiro Jesusji.
REV 6:17 Boe korire Pao Kurireuji rugadu. Boe korire Cordeiroji kejewu meri aregodure. Dukodire boe pegare čei rugadu. Emode boe pegado čei rugadu. Ainore nou boe egomode.
REV 7:1 Nono itaiwore pugeje. Iordure Pao Kurireu utugarege baru tadawugere pobe puibiji duji. Eragojere moto jamedu boe parugajeje. Ere tugeragu bakuruji. Dukodire bakuru akedure rugadu. Bakuru bokware pugeje. Bakuru jetukare motoji, poboji, ituraji.
REV 7:2 Pao Kurireu ure nou tudugarege ere pobe puibijidu eragado tuwo moto pegado, pobo pegado. Nono iordure ia Pao Kurireu utugare baru tadawuji. Meri rutu pijire aregodure. Umode Pao Kurireu ie bu meartorure Pao Kurireu jiwuge eri keje. Dukodire makore nouia baru tadawugei.
REV 7:3 Akore: – Kajao. Tagaba moto pegado, pobo pegado, iguru pegado raga. Pamode Pao Kurireu ie bu meartorure Pao Kurireu jiwuge eri keje.
REV 7:4 Kodire ere iwie Pao Kurireu ie padure kejewu boe enodo padu kejewure 144,000 boe. Nou 144,000 boe Israel dogere emage. Israel doge etumana mage enodo padu kejewure doze.
REV 7:5 Eiere Judá, Rúben, Gade, Aser, Naftali, Manassés, Simeão, Levi, Issacar, Zebulom, José, Benjamim. Nou 144,000 boe epijire Judá uwobe enodo padu kejewure 12,000. Rúben uwobe enodo padu kejewure 12,000. Gade uwobe enodo padu kejewure 12,000. Aser uwobe enodo padu kejewure 12,000. Naftali uwobe enodo padu kejewure 12,000. Manassés uwobe enodo padu kejewure 12,000. Simeão uwobe enodo padu kejewure 12,000. Levi uwobe enodo padu kejewure 12,000. Issacar uwobe enodo padu kejewure 12,000. Zebulom uwobe enodo padu kejewure 12,000. José uwobe enodo padu kejewure 12,000. Benjamim uwobe enodo padu kejewure 12,000 jamedu.
REV 7:9 Ča itaiwore pugeje. Nono iordure ia boei. Emagare rugadu. Boe eroiwakare tuwo awu boe eremagu. Moto jamedu boe pijire etaregodure. Eragojere nou boe eimijera kurireu muga jokorai, Cordeiro Jesus jokorai. Ekudau areia pemegareu kigadure. Ekedure bai oroji.
REV 7:10 Ewadodu rakare. Egore: – Pao Kurireu mugure boe eimijera kurireu muga ira keje. Emare umode boe edo činorudo! Cordeiro Jesus umode boe edo činorudo!
REV 7:11 Nou ere taiado Pao Kurireu apowuge ere tubu jodo nou boe eimijera kurireu muga jokorai. Pao Kurireu utugarege baru tadawuge enure emage. Nouia boe eimijerage ere tubu jodo nou boe eimijera kurireu muga jokorai. Nou baregere pobe puibijidu ere tubu jodo nou boe eimijera kurireu muga jokorai jamedu. Eiamedu boe emago pemegare Pao Kurireuji.
REV 7:12 Egore: – Ainore ure rugadu. Boe emago pemegawo tugimadu tabo Pao Kurireu apo. Boe ewo Pao Kurireu ie kurido rugadu. Boe erduwawo Pao Kurireu jorduware boe eiamedu boe ekori. Boe erduwawo Pao Kurireu pemegare rugadu duji. Boe erduwawo Pao Kurireu raka kodure boe eiamedu boe ekori duji. Ainore Pao Kurireu ure. Ainore Pao Kurireu umode jii toro rugadu. Akedumodukare rugadu. Ema nure ema rugadu.
REV 7:13 Nono ia boe eimijera unarare i. Akore: – Ioguduba boeba enure nou ukudau areia kigadureugeče? Kaibowu boeba enure emage?
REV 7:14 Inagore: – Iorduwakare. Aki arduware rugadu. Nono akore: – Iorduware. Nou boe emeartorure Pao Kurireuji dukodire boe pegare ei. Mare Pao Kurireu ure edo činorudo. Cordeiro Jesus bire emugato boe ero pegareu moriče. Dukodire Pao Kurireu ure ero pegareu kabi epiji nou Cordeiro Jesus ku tabo nono boe emode tugudau areia kabi dumogadure.
REV 7:15 Dukodire eragojere aino Pao Kurireu muga ira jokorai uwai tada turowo nono Pao Kurireu aidu mogadure meriji, boečoji. Ema rakojemode ebo rugadu boe pegakawo ei pugeje.
REV 7:16 Cordeiro Jesus rakoje puredure nou boe eimijera kurireu muga iraji. Emare jetu pemegamode ei jamedu. Umode erego pobo pemegareuto. Ekudumode nou poboče dukeje ewimodukare pugeje. Dukodire boe eke boeimodukare ei pugeje. Pobo boeimodukare ei pugeje. Meri umodukare ekowu pugeje. Joru umodukare ekowu pugeje. Pao Kurireu umode ekiarigodu barigu epiji etragudukawo pugeje. Ainore nou boe eimijera akore.
REV 8:1 Nono Cordeiro Jesus ure padure bapera kejewu rawuje nou bapera upododureu piji pugeje. Ča boe makodure kuri je.
REV 8:2 Nono iordure nou rakojere Pao Kurireu apowu utugarege baru tadawugei. Enodo padu kejewure sete. Tapira ukiga enodo padu kejewure sete jamedu. Makudure nou baru tadawu Pao Kurireu utugarege etai.
REV 8:3 Nono ia baru tadawu Pao Kurireu utugare aregodure pugeje. Aregodure ia tori kuieje tabo. Roreboe meture ja tada. Nono rakojere nou boe ere turo pegareu morido kejewu kamo meki. Makudure aiwu roreboe makare. Meartorure Pao Kurireu jiwuge emagore baruto Pao Kurireu bagai dukeje nou roreboe uredudure. Ure bu ia tori kuiejereu kamo keje tuwo enomeado toro Pao Kurireu ai ureduduwo nono. Meartorure Pao Kurireu jiwuge emagore baruto dukeje nou uredudu ruture.
REV 8:5 Mačare nou rakojere Pao Kurireu jokoraiwu baru tadawu utugare ure tugeragu nou roreboe metu tadawu boeji. Nono ure tugeragu joruji kamo piji. Dukeje ure joru tugu nou roreboe metu tadawu boeto. Dukeje ure nou joru barigu moto ka. Ča boeiaragudure. Boeiarurure. Moto magadugodure rugadu.
REV 8:6 Nono nou tapira ukiga padure apowu baru tadawu utugarege ere tudo turugadu tuwo togwa tugu to tapira ukigato.
REV 8:7 Nou boetojiwu ure togwa tugu to tapira ukigato. Ča bubuture buporira tabo. Bubuture joru tabo jamedu. Nou bubutu buture boe eku tabo jamedu. Ure boebutu kowu. Ure itura kowu. Ukare jamedu boe kowu. Abowure ure kowu.
REV 8:8 Nono ia utugare baru tadawu ure togwa tugu to tapira ukigato pugeje. Iaboe kurireu barigudure pobo maereuto. Ure nono ia tori kurireure. Mare jorure ji. Nono nou tori ure turemo nou poboto dukeje ure pobo maereu udo nono boe eku mogadure.
REV 8:9 Nono nou pobo maereu tadare ia kare ewire. Iage ewikare. Nou tori ure nou mugure pobo maereu kejewu ikarereuge etagedudo. Mare iage etagedukare.
REV 8:10 Nono ia utugare baru tadawu ure togwa tugu to tapira ukigato. Ča ia kuieje kurireu buture baru piji. Jorure ji. Buture poborereuto moto jamedu boe parugajeje. Buture tori po aogeje moto jamedu boe parugajeje.
REV 8:11 Nou kuieje iere jirireu. Dukodire nou poborereu po jirire. Nou tori po jirire. Boe ekudumode če dukeje ewire. Bireuge emagare pobo pegare dukodi.
REV 8:12 Nono ia utugare baru tadawu ure togwa tugu to tapira ukigato pugeje. Ča Pao Kurireu ure boeto meri jokuji, ari jokuji, kuieje dogei. Dukodire erugu pemegakare pugeje meriji boečoji. Meri aregodure pagaia ka dukeje boečo maenure. Boe erdukare meri jokuji ari jokuji. Boečo kodure toia ka dukeje boe erdure ari jokuji, kuieje jokuji.
REV 8:13 Nono itaiwore pugeje. Imeardure ia aroečeba akoji. Kodure toro baru otoji. Akore: – Boe pega! Boe pega remawu! Nouia utugarege baru tadawuge emode togwa tugu to tapira ukigato kimo. Ere pobe metia bokware. Emode togwa tugu to tapira ukigato dukeje boe pegamode boei rugadu moto jamedu boe parugajeje. Ainore aroečeba akore.
REV 9:1 Nono ia utugare baru tadawu ure togwa tugu to tapira ukigato. Nono iordure ia kuiejeji moto keje. Buture baru piji moto ka. Pao Kurireu ure ia chave maku nou kuieje ai uwo moto poro kurireu jado.
REV 9:2 Nou kuieje ure nou moto poro kurireu jado dukeje jeredudure rugadu. Nou jeredudu ure nono ia joru kurireu uredudu mogadure. Nou moto poro pijiwu jeredudu ure meri joku bokwado.
REV 9:3 Nono kitariga doge ere turawuje nou jeredudu piji moto ka. Pao Kurireu ure edo tudugo to boei nono betaga doge ero mogadure.
REV 9:4 Makore ei ekawo boebutu ko, iguru aru ko. Mare etaiwowo Pao Kurireu ie padukare eri kejewu boe ewagai tuwo tudugo to ei nono betaga doge ero mogadure.
REV 9:5 Pao Kurireu ure nou kitariga doge erodo aino ei. Mare ekawo boe ewido mare tu etugowo korire ei rugadu. Ariwo ikera aboudure dukeje koriwo nono ia betaga kori mogadure.
REV 9:6 Nou kitariga doge etugo korire nou boei dure arire ikera aboudure. Dukejere nou ere tudugo towu boe etaidure tuwiwo rugadu kori rakare kodi. Mare ewimodukare. Etaidure tuwo tuwido mare eroiwakare tuwo tuwido.
REV 9:7 Nou kitariga doge ere nono kuwaru dogere. Etaora kejere ia tori kuiejereu pemegareu padure. Jere nono boe ere.
REV 9:8 Etao ure nono areme etao mogadure. Ore nono adugo o mogadure.
REV 9:9 Iaboe padure emorora keje. Ure nono meriri rakareu mogadure. Eigodo jarurure nono kuwaru doge ere tumugudo kejewu imaridoreu rogu jaruru rakare dumogadure. Marigudu boe erugodure pui nou imaridoreu rogu tabo. Nou imaridoreu rogu re rakare dukeje jaruru rakare.
REV 9:10 Nou kitariga doge eto ure nono betaga doge eto mogadure. Nou eto tabore emode boe etogorido arimode ikera aboudure togorire boei dutabo.
REV 9:11 Nou kitariga doge eimijera kurireure. Emare jeture nou moto poro kurireuji kodire eimijera nure ema. Iorduware ieji. Israel doge ewadaru tabo iere “Abadom”. Grécia kejewuge ewadaru tabo iere “Apolião”. Boe ewadaru tabo egore: – Boe Etagedudowu Epa nure ema.
REV 9:12 Ča boe pegareu boetojiwu akedure. Mare boe pegareu kimomode dure pobe.
REV 9:13 Nono ia utugare baru tadawu ure togwa tugu to tapira ukigato. Ča nou Pao Kurireu o tori kuiejereu kamo pijire imeardure ia boe emagoji.
REV 9:14 Makore nou Pao Kurireu utugare baru tadawuji. Akore: – Bope dogere pobe puibiji. Ekogudodure. Epuredure Eufrates poji. Ča ekiwuje etuwo.
REV 9:15 Pao Kurireu ure ekogudo marigudu etukawo nou meri aregodure du otodai. Du aino čare nou utugare baru tadawu ure nou bope doge ekiwuje rugadu. Nono eture. Ere turugadu tuwo boe ewido. Ere bitowuge emagare moto jamedu boe parugajeje.
REV 9:16 Nou bope doge eno tugobaigarege emagare rugadu. Ere 200,000,000. Ekodure kuwaru dogebo.
REV 9:17 Iordure jiboe ure nono boe eniaure. Mare iordure nou kuwaru dogei. Iaboe padure nou mugure kuwaru kejewuge emorora keje. Rakare nono meriri raka mogadure. Iage ekujagure. Iage ekaworure. Iage ekure. Nou kuwaru doge etaora ure nono adugo doge etaora mogadure. Enogwa pijire joru ure tudawuje, jeredudu ure tudawuje, enxofre urugudu ure tudawuje.
REV 9:18 Ere bitowuge emagare moto jamedu boe parugajeje. Nou jeredudu, nou joru, nou enxofre urugudu ere tudawuje nou kuwaru doge enogwa piji tuwo boe ewido.
REV 9:19 Nou kuwaru doge epegare rugadu nou togwa tabo. Nou eto pegare jamedu. Eto ere nono awagure rugadu. Nou awage ere boe etogorido jamedu.
REV 9:20 Mare nou bikareu boe emeartorukare raga Pao Kurireuji. Ere tubu jodo kimo ture towuboe egorai tumago pemegawo ei. Ekare tugera ra piji. Ere tubu jodo kimo bope doge egorai tumago pemegawo bope dogei. Ere tubu jodo kimo tuwai tadawu santo doge egorai tumago pemegawo ei. Ere nou tuwai tadawu santo doge etowuje tori kuieje tabo, prata tabo, meriri tabo, tori tabo, ira tabo. Nou ewai tadawu santo doge eku remawu bokware, emeardu bokware, emeru bokware.
REV 9:21 Nou bikareu boe ekare tugera ra tumode boe ewido dupiji. Ekare tugera ra to jorubo pegareu piji. Ekare tugera ra tieribarire tumugukare apowugei dupiji. Ekare tugera ra tugiwogu piji jamedu.
REV 10:1 Nono iordure ia Pao Kurireu utugare baru tadawu rakareuji. Ure turawuje baru piji. Ia boetugu ure taiado nou baru tadawu apo. Ia jure ure taiado nou baru tadawu aora tabo. Je ure nono meri joku mogadure. Pogora ure nono joru mogadure.
REV 10:2 Ia bapera biagareu padure iera keje. Nou bapera jadodure. Ure ia tuwure bu pobo maereu aogeje. Ure tuwure bu boeki keje.
REV 10:3 Kudugodure nono adugo doge ego mogadure tago tabo. Kudugodure dukeje boeiarurugodure. Nou boeiaruru doge enodo padure sete.
REV 10:4 Emagore tuwadaruji dukeje iago nou ewadaru bu bapera keje. Mare ia boe makore iwagai baru piji. Akore: – Akaba nou ameardure jiwu boeiaruru bataru bu bapera keje boe erduwakawo nou bataruji. Dukodire ikare nou boeiaruru makore jiboe bu bapera keje.
REV 10:5 Nono iordu kimore nou Pao Kurireu utugare baru tadawu rakareuji. Ia bure padu kimore nou pobo maereu aogeje. Ia bure padu kimore boeki keje. Nono ure tugera raido baruto.
REV 10:6 Nono akore: – Ča Pao Kurireu pagamodukare pai pugeje. Umode ture boe ewie marigudu jiboe jetudo pudui kuri aino. Marigudu Pao Kurireu readodure boe erduwakare jiwu turoji meartorure puduiwuge ewiagai, makore Pao Kurireu bataru jiwuge ewiagai. Kuri aino ia Pao Kurireu utugare baru tadawu umode togwa tugu to tapira ukigato pugeje. Dukeje Pao Kurireu umode tuwadaru jetudo pudui rugadu. Umode nou turo towuje rugadu. Pao Kurireu akedumodukare, bimodukare. Ema ure baru to, ure moto to, ure pobo maereu to. Pao Kurireu ure boe jamedu boe towuje rugadu. Emare jorduware awu iwadaru ure turugadu duji. Ainore nou pobo maereu kejewu Pao Kurireu utugare baru tadawu akore.
REV 10:8 Dukeje čare nou baru pijiwu makore i pugeje. Akore: – Toro. Akeragu nou jadodureu bapera roguji. Akeragu ji Pao Kurireu utugare baru tadawu piji. Emare rakojere pobo maereu keje boeki keje.
REV 10:9 Nono iture toro nou Pao Kurireu utugare baru tadawu ae. Imagore ji nou bapera rogu bagai. Ema makore i. Akore: – Akeragu ji. Akwagedo ji. Betumode mare akuri tada pagodumode.
REV 10:10 Čare ire ikeragu nou bapera roguji. Ire kowuje. Nono beture rugadu nono meawe ewedu mogadure. Mare ikuri tada ča pagodure.
REV 10:11 Nono emagore i pugeje. Egore: – Pao Kurireu unure awie nuba turomode boe eimijeragei, nuba turomode boei, nuba turomode boe eiamedu boei moto parugajeje. Amagodo awu Pao Kurireu bataruji boe ewiagai.
REV 11:1 Ere ia ipo maku inai. Nou ipo ure nono ia boe iwara mogadure. Nono Pao Kurireu makore i. Akore: – Atudo toro Pao Kurireu uwai ka. Nou ipo tabore amode nou iwai remagu. Nou ipo tabore amode nou boe ere tapira kowu kejewu turo pegareu mori čewu kamo remagu. Nono amode meardu kurire iwuge eremagu nou iwai tada arduwawo nuba nou ere tubu jodo tumago pemegawo iwugeire nono nou bai ja tada.
REV 11:2 Mare akaba iwai kejewu iogora remagu ire maku boe tuginaiwuge eiamedu boe etai kodi. Nou boe tuginaiwuge emode boe pegado Jerusalém ba kurireu kejewu boe dogei. Iwai rakojere nou ba kurireu keje. Emode pegado kejewu ari oto padumode quarenta e dois.
REV 11:3 Imode itugarege ere pobedu doge etudo boe etae. Makore iwadaru jiwuge unure emage. Readodure imeardaere jiboe irore jiboe jiwuge nure emage. Ekudau areia pegareu tabore eromode aino. Emagomode iwadaruji boe ewiagai. Emagore kejewu meri oto padumode 1,260. Ainore Pao Kurireu makore i.
REV 11:4 Boe eiamedu boe eimijera nure Pao Kurireuče rugadu. Ia i dogere pobe Pao Kurireu apo. Nou i iere Oliveira. Ia jorugu doge ere pobe eragojere Pao Kurireu apo jamedu. Mare Oliveira i ji karega inagoino. Jorugu ji karega inagoino. Nou makore Pao Kurireu bataru jiwu ime pobedu dogeire inagoino.
REV 11:5 Boe etaidumode tuwo nou ime pobedu doge etogorido mare emodukare etogorido. Joru umode tudawuje nou ime pobedu doge enogwa piji. Nou joru tabore nou ime pobedu doge emode nou boe ewido.
REV 11:6 Emagomode Pao Kurireu bataruji mare nou ime pobedu doge eragamode tuwo bubutu akedudo jamedu. Eragamode tuwo pobodo nono boe eku mogadure. Emagomode Pao Kurireu bataruji mare eragamode tuwo jorubo pegareu jamedu boe barigu moto ka jamedu taidure jiwu meri keje rugadu.
REV 11:7 Nono emode tuwadaru akedudo dukeje ia barogo pegareu umode tudawuje nou moto poro kurireu piji turugoduwo nou ime pobedu dogei. Nou barogo pegareu rakamode ei, umode ewido.
REV 11:8 Dukeje umode nou ime pobedu doge ewu Jerusalém ba kurireu tada awara kajeje. Nou Jerusalém kejewu boe ere Jesus bito marigudu. Nou Jerusalém kejewu boe ero pegamode nono Sodoma kejewu boe ero pegare dumogadure. Ero pegamode nono Egito kejewuge ero pegare dumogadure.
REV 11:9 Nou bireuge ime pobedu doge ere boe pegado ro pegareugei. Mare ewire dukeje nou ro pegareuge emaga kimore. Dukodire čare boe doge eiamedu boe etaregodure moto jamedu boe piji. Nono nou boe etaiwo raire nou ime bireugei. Merire pobe metia bokware ei taiwo tabo nou bireu imei. Nono meri aregodure pagaia ka pugeje etaiwo kimore nou pobedu doge bireugei dutabo. Mare boe emodukare nou bireuge ime etugu mototo rugadu.
REV 11:10 Moto jamedu boe pijiwu boe egaremode pudui nou ime ewire kodi. Ewadumode ewi keje. Emode iaboe pemegareu maku puai nou ime ewire kodi. Egaremode turo pegareuji rugadu.
REV 11:11 Merire pobe metia bokware dukeje meri aregodure pagaia ka pugeje dukeje Pao Kurireu ure togwamu nou ime enogwato. Dukodire ime bireuge pobedu doge eewodure pugeje. Ere turagojedo. Jordure eiwuge epagudugodure eče rugadu.
REV 11:12 Nono ia baru tadawu uwadodure nou pobedu doge ime etae. Akore: – Mato baruto itae. Nono jordu pegare nou imeiwuge etaiwo kimore ei. Nono ča erdure nou ime pobedu doge erudure baru to duji boetugu tabo.
REV 11:13 Ča moto magadu rakare rugadu. Dukodire nou Jerusalém ba kurireu tadawu bai doge ewudure tači je. Mare eiamedu boe karega buture. Mare bireuge emagare. Enodo padure 7,000. Dukodire čare ia boe ewikareuge epagudugodure rugadu. Egore baru tadawu Pao Kurireu rakaie rugadu, kurie rugadu.
REV 11:14 Aino ča Pao Kurireu ure awu turo rakareu iado. Mare ia ro rakareu kimomode kuri aino pugeje.
REV 11:15 Nono ia Pao Kurireu utugare baru tadawu ure togwa tugu to tapira ukigato. Ča baru tadawu boe emago rakare. Egore: – Ča Pao Kurireu rakare rugadu. Awu meriji Pao Kurireu raka mugure boe eiamedu boebo moto keje. Boe eimijera kurireu nure ema. Boe eimijera kurireu nure Jesusče jamedu. Boe ekinorudowu nure ema jamedu. Boe eimijera kurireu mode ema jii toro rugadu. Du akedumodukare.
REV 11:16 Nono nou baru tadawu boe eimijeragere enodo padu kejewure vinte quatro ere turagojedo tumuga piji tuwo tubu jodo Pao Kurireu jokorai. Nono emago pemegare Pao Kurireuji.
REV 11:17 Egore: – Pao Kurireu nure aki. Čegimaduwo akabo rugadu čemago pemegare ai dutabo. Aki aragare rugadu dukodire akagedumodukare rugadu. Čegimijera kurireu nure aki. Čedaidure arore jiboeji rugadu. Čedaidure aragaji. Aino čare are boe eimijera kurireudo aki dukodire čemago pemegare aino ai rugadu.
REV 11:18 Ča meartorukare aiwuge ekorigodure rugadu. Mare aino čare are arugadu awo boe pegado meartorukare aiwugei rugadu. Aino ča akaiwomode bireugei meartorure aiwuge ewagai, meartorukare aiwuge ewagai jamedu. Nono amode boe pemegado meartorure aiwugei, makore awadaru jiwugei, meartorure awadaru jiwugei. Atugarege nure emage. Marenarue doge nure emage kodi karega aro pemegamode aino ei. Boe eimijerage nure emage kodi karega aro pemegamode aino ei. Mare emeartorure ai dukodire aro pemegamode ei. Mačare amode ure boe ewidowuge eiamedu boe etagedudo awu meriji. Awu meriji amode boe pegado moto kejewuge ure boe akedudowugei rugadu.
REV 11:19 Nono baru tadawu Pao Kurireu uwai bai poro jadodure. Nono iordure nou Pao Kurireu o iraji. Marigudu ure tuwadaru bu tori keje Israel doge etai. Ere nou tori tugu nou irato. Nou ira jire iordure. Meture nou Pao Kurireu uwai tada. Ča boeiaragudure. Ča boeiarurure. Moto magadu rakare rugadu. Bubuture buporira tabo jamedu.
REV 12:1 Nono iordure ia boe tuginaiwu boeji baru tada. Nou iordure jiboe ure iorduwado meri kurireu aregodure. Iordure ia aredu tuginaiwu ure boe erdudo pudui baru tada duji. Boe erdukare jiboe nure ema. Ukudau areiare meri rema. Bure padure ari keje. Boe eimijerage etaotadawu padure nou aredu aora keje. Kuieje enodo padu kejewure doze nou atadawu keje.
REV 12:2 Kuiarure mare kuri puredugodure tuwuduwo. Aino nou aredu kudugodure tugurijirigodure kodi.
REV 12:3 Ča boe erdure ia boe tuginaiwu boeji baru tada pugeje. Ia butoriku kurireu kujagureu ure boe erdudo pudui baru tada jamedu. Nou butoriku aora oto padu kejewure sete. Ukiga oto padu kejewure dez. Boe eimijerage etaotadawu padure nou butoriku aora jamedu boe keje.
REV 12:4 Nou butoriku o tabore umode tugeragu kuieje dogei. Ure tugeragu jiwu kuieje doge emagare. Ure nou kuieje doge erugadu boe ewarigu moto ka. Nono uture nou aredu togi. Rakojere nono apo. Nou aredu kuri butu keje nou butoriku aidumode tuwo nou naregedu kowuje.
REV 12:5 Ča nou aredu kuri buture. Imedu rogu nure ema. Boe eimijera kurireu mode ema. Boe eiamedu boe eimijera kurireu mode ema. Umode boe emeartorudo pudui turaga tabo. Nou butoriku aidure tuwo nou imedurogu kowuje mare Pao Kurireu ukare udo ko. Ure nou imedurogu rutudo pudae baruto tuwo mugudo boe eimijera kurireu muga keje.
REV 12:6 Ča nou aredu rekodure nou butoriku piji boe maereu ka. Uture Pao Kurireu ure pemegadowu moto ka. Toro Pao Kurireu jetu pemegamode ji. Meri oto padumode 1,260 nou areduji toro nou moto keje.
REV 12:7 Dukeje čare baru tadare Pao Kurireu utugarege baru tadawuge erugodure tugimijera Miguel apo nou butorikuji. Nou butoriku rugodure bope dogebo nou Pao Kurireu utugarege baru tadawugei.
REV 12:8 Ča nou utugarege baru tadawuge eragare nou butorikuji. Dukodire ere butoriku barigu mato baru piji moto ka bope dogebo. Dukodire nou butoriku, bope doge emodukare turemo baruto pugeje.
REV 12:9 Nou butoriku mariguduwu awagu pegareu nure ema. Iere Satanás. Iere Diabo jamedu. Ure boe ekiripagado moto jamedu boe parugajeje. Bope doge eimijera nure ema. Aino čare nou butoriku kurireu barigudure baru piji moto ka tudugarege bope dogebo.
REV 12:10 Nono imeardure ia boe mako pemegare baru tada duji. Akore: – Pao Kurireu umode boe ekinorudo kejewu meri aregodure! Boe eimijera kurireu nure ema. Ure boe erdudo turagaji rugadu. Aino čare Pao Kurireu ure tugeragu jiwu umode boe ekinorudowu ure boe erdudo pudui tuie boe eimijera kurireudo pudumi duji. Marigudu bope doge eimijera mako pegare pamedage meartorure Pao Kurireu jiwugei Pao Kurireu biagai baru tada. Meriji, boečoji mako pegare tuwadrarodu tabo meartorure Pao Kurireu jiwugei Pao Kurireu biagai. Akore ero pegaie rugadu. Mare aino čare bope doge eimijera barigudure baru piji moto ka.
REV 12:11 Meartorure Pao Kurireu jiwuge emagere ere nou bope doge eimijera butudo. Cordeiro Jesus ure tugu redo tuwi tabo boe ero pegareu moriče tuwo boe ero pegareu barigu epiji. Dukodire ere bope doge eimijera butudo. Emagore Pao Kurireu bataru pemegareuji boe ewiagai jamedu. Ewimode, ro pegareuge emode ewido, mare ewiapagakare nou inoduji. Ekare tugera ra nou tagoino dupiji rugadu. Ainore erore tuwo bope doge eimijera butudo.
REV 12:12 Dukodi čare baru tadawuge eiamedu boe egarewo pudui rugadu! Mare bope doge eimijera barigudure baru piji moto ka boe etae. Ča jorduware meri raimodukare pudui duji dukodire boe korire ji rugadu. Dukodire boe pegare motoji, pobo maereuji. Ainore nou baru tadawu akore.
REV 12:13 Nou butoriku jorduware tuwarigudure moto ka duji dukeje rekodure nou imedurogu boture pijiwu aredu rekodaji.
REV 12:14 Aroečeba ikodo makudure nou aredu ai koduwo nou boe maereu ka tuwo tuwiado. Pao Kurireu jetu pemegare nou areduji nono. Jetu pemegare jiwu jorure pobe metia bokware ari oto padu kejewure seis pugeje. Nou butoriku kurireu roiwakare turo pegawo nou areduji toro.
REV 12:15 Mačare nou butoriku ure pobo barigu togwa piji. Nou pobo ure tumaedo nono poborereu mogadure nou aredu bagai tuwo nou aredu barigu nou moto piji.
REV 12:16 Mare Pao Kurireu ure nou moto udo tugera maku nou aredu ai jamedu. Ure tuiado tuwo nou pobo remo tudo. Dukodire nou butoriku pijiwu pobo rugadu boe ure turemo mototo.
REV 12:17 Dukodire boe korire rugadu nou butorikuji pugeje. Roiwakare tuwo turo pegado nou areduji rugadu. Dukodire uture turugoduwo nou aredu uwobei. Mare meartorure Pao Kurireu bataru jiwuge nure nou aredu uwobeče. Ekare tugera ra Jesus bataru piji rugadu.
REV 12:18 Nono nou butoriku kurireu rakojere pobo maereu okwai.
REV 13:1 Ča iordure ia barogo tuginaiwuji. Ure tudawuje pobo maereu piji. Nou barogo ukiga oto padu kejewure dez. Aora oto padu kejewure sete. Boe eimijera atadawu meture nou ukiga jamedu boe tada. Ia ie pegareu padure nou aora jamedu boe keje. Eiamedu boe emago pegare Pao Kurireuji.
REV 13:2 Nou barogo tuginaiwu ure nono adugore. Mare burere nono urso doge ewure mogadure. Okwa ure nono leão okwa mogadure. Butoriku kurireu ure awu barogo tuginaiwu rakado turaga tabo. Butoriku ure barogo tuginaiwu mugudo tumugure kejewu boe eimijera muga keje. Ure moto kejewu boe eimijeragedo nou barogo tuginaiwuče.
REV 13:3 Nouia barogo tuginaiwu aora pegare. Boe emeardaere bimoduie. Mare pemegagodure. Dukodire moto kejewu boe eiamedu boe ebogodure ji. Eture nou barogo tuginaiwu rekodaji tumeartoruwo ji.
REV 13:4 Butoriku ure boe eimijerado nou barogo tuginaiwuče boe emeartoruwo ji dukodire boe eiamedu boe ere tubu jodo tumago pemegawo butorikuji. Ere tubu jodo tumago pemegawo nou barogo tuginaiwuji jamedu. Egore: – Urugodumode jiwu boe eragakare ji. Nou barogo tuginaiwu raka kodure boe eiamedu boe eraga kori.
REV 13:5 Nou barogo tuginaiwu očarore pudui dukodire mako kurire boei rugadu. Mako pegare Pao Kurireuji rugadu. Ari oto padu kejewure 42 nou barogoji boe eimijera kurireu ure ema dukeje. Mare Pao Kurireu rokare iaboeji jii je.
REV 13:6 Ča nou barogo mako pegare rugadu Pao Kurireuji. Mako pegare Pao Kurireu ieji. Mako pegare baruji. Mako pegare baru tadawugei.
REV 13:7 Nono nou barogo urugodure meartorure Pao Kurireu jiwugei. Ure turagado boe eiamedu boei moto jamedu boe parugajeje tuwo emeartorudo pudui. Mare Pao Kurireu rokare iaboeji raga nou barogoji.
REV 13:8 Aino boe eiamedu boe emode tubu jodo tumago pemegawo nou barogoji. Mare meartorure Jesus jiwuge eromodukare aino. Emodukare tubu jodo tumago pemegawo nou barogoji rugadu. Emeartorumodukare nou barogoji. Meartorure Jesus jiwuge ekie padure nou bimodukareuge ekie padure kejewu bapera keje baru tada. Marigudu Pao Kurireu ure moto towuje du otodaire ure nou ekie bu nou bapera keje. Ure nou bapera maku Cordeiro Jesus ai Jesus bire nou boe emugato kodi.
REV 13:9 Tagaiwodo! Boe pegamode ia meartorure Jesus jiwugei rugadu. Boe emode ia meartorure Jesus jiwuge ewido rugadu. Mare tawudugudo tai jii toro rugadu. Tagaba tagera ra Pao Kurireu piji. Tagaba tagera ra tameartorure Pao Kurireu jitu piji.
REV 13:11 Čare iordure ia barogo tuginaiwuji. Ure tudawuje moto piji. Ukigare pobe. Nou ukiga ure nono ia carneirinho ukiga mogadure. Mare nou barogo makore nono ia butoriku kurireu mako mogadure.
REV 13:12 Nou barogo boetojiwu paru towu nure ema. Ure boe eiamedu boe edo tubu jodo tumago pemegawo nou barogo boetojiwuji. Nou barogo boetojiwu aora pegareu pemegagodure.
REV 13:13 Nou barogo boigoduwu ro rakare jamedu. Ure joru udo turawuje baru piji moto ka boe eiamedu boe egai.
REV 13:14 Ure boe eiamedu boe ekiripagado turo rakareu tabo. Nou barogo boetojiwu ure nouia barogo ro rakado turo raka mogadure. Ema rakojere nono jamedu. Nou barogo boigoduwu makore boei ewo iaboe towuje. Emoduie udo nono nou barogo boetojiwu mogadure boe eiamedu boe erduwo ji, etaiduwo nou barogo boetojiwuji. Tariga kurireu ure nou barogo boetojiwu aora pegado mare pemegagodure marigudu.
REV 13:15 Nono nou barogo boigoduwu ure togwamu nou boe ere towujewu barogo okwato dukodire nou boe ere towujewu barogo jewodure. Nou boe ere towujewu barogo makore jamedu. Boe ere tubu jodo tumago pemegawo nou boe ere towujewu barogoji. Mare ia boe ekare tumago pemegado ji. Dukodire nou boe ere towujewu barogo ure ewido.
REV 13:16 Nou barogo boigoduwu ure nou barogo boetojiwu ie bu boe eiamedu boe ekera pemegareu poru keje. Etaidumodukare uwo bu tugera poru keje dukeje ure bu eri keje. Rore aino boe kurireugei. Rore aino boe biagareugei. Rore aino oe kurireugei. Rore aino marenarue dogei. Rore aino boe eiamedu boei. Nou barogo ie padumodukare boe ekera poru keje, eri keje dukeje emodukare akirodo ia boeji, emodukare iaboe maku diero bagai. Dukodire jorduwareuge ere nou barogo ie remagu. Du ure 666. Dukodire taeku jado. Ainore jorduwareuge erduwamode nou barogo ieji.
REV 14:1 Nono itaiwore pugeje. Iordure Cordeiro Jesusji. Rakojere tori kurireu aogeje. Nou tori kurireu iere Sião Ri. Boe eragojere apo nou tori aogeje. Nou boe enodo padu kejewure 144,000. Jesus ie padure nou boe eri keje. Pao Kurireu ie padure ewugeje jamedu.
REV 14:2 Nono imeardure ia baru tadawu akoji pugeje. Nou baru tadawu ako jarurure nono ia pobo jaruru mogadure. Ure nono boeiaruru mogadure. Nou baru tadawu ako ure nono tuwabo arpa ako mogadure.
REV 14:3 Nono nou 144,000 boe eragojere Pao Kurireu jokorai. Eragojere nou puredure Pao Kurireu jiwuge barege egorai. Eragojere nou puredure Pao Kurireu jiwu boe eimijerage egorai. Pao Kurireu ure akirodo jiwuge nure emage dukodire eragodure ia roia maiwuji. Tu nou Pao Kurireu ure akirodo jiwuge erduwamode nou roia maiwuji turawo ji tu rugadu.
REV 14:4 Ekare tugera ra turo pemegareu piji. Eribarikare tumugukare apowu aremei. Dukodire ekare tubegado. Nono nou 144,000 boe ekodumode Cordeiro Jesus rekodaji rugadu. Pao Kurireu ure akirodo ei tuwo ekinorudo boe pegareu piji eruduwo baruto moto kejewuge epiji. Etaregodure Pao Kurireu ae, Cordeiro Jesus ae boetojiwuge nure emage.
REV 14:5 Batrarodureuge karegure emage. Ero pemegare rugadu.
REV 14:6 Nono iordure ia baru tadawu Pao Kurireu utugareji. Kodure jiče baru otoji. Kodure moto jamedu boe parugajeje tuwo boe eiamedu boe ewie Jesus bataru pemegareuji. Nou bataru akedumodukare rugadu.
REV 14:7 Dukodire nou baru tadawu mako pemegare. Akore: – Boe ewo tuioku kidugo Pao Kurireuji tumeartoruwo tu ji rugadu! Boe ewo Pao Kurireu ie kurido! Boe ewo tubu jodo tumago pemegawo Pao Kurireuji rugadu kurire kodi! Aiwomode boeiwu kejewu meri aregodure. Aiwomode boei tuwo ro pegareuge ewarigu boe pegareuto ero pegareu moriče. Aiwomode boei tuwo boe pemegareuge etawuje tuwo erududo baruto. Dukodi tamago pemegado ji ure baru, moto, pobo jamedu boe to kodi.
REV 14:8 Nono ia baru tadawu Pao Kurireu utugare aregodure tugoduwo nouia baru tadawu rekodaji. Awu akore: – Ba kurireu Babilônia buture! Akedure rugadu! Babilônia kejewuge etagedure rugadu. Ero pegare rugadu. Nou Babilônia kejewuge ere boe eiamedu boe etaidudo tieribariwo aremei toreduje piji. Etaidure tieribariwo aremei nono tugudumode piga kuru če dumogadure.
REV 14:9 Ča ia baru tadawu Pao Kurireu utugare aregodure jamedu. Mako pemegare jamedu. Akore: – Pao Kurireu korigodumode nou mako pemegare nou barogo tuginaiwu jiwugei. Korigodumode nou barogo ie padure kejewugei. Korigodumode nou mako pemegare nou boe ere toboe jiwugei. Mare Pao Kurireu korigodumode rugadu. Korigodumode ei rugadu dukodire ro pegamode ei rugadu. Umode ewarigu joruto. Umode ewarigu enxofre uruguduto baru tadawuge egai, Cordeiro Jesus jakai jamedu.
REV 14:11 Nou joru, nou enxofre urugudu umode boe pegado ei. Jeredudumode rugadu. Akedumodukare. Boe pegamode nou mako pemegare barogo tuginaiwu jiwugei meriji, boečoji. Boe pegamode barogo tuginaiwu ie padure kejewugei meriji, boečoji jamedu. Emodukare tamudo nou boe pegare pudui dupiji meriji boečoji jii toro rugadu. Akedumodukare rugadu.
REV 14:12 Mare meartorure Pao Kurireu jiwuge ekare tugera ra tumeartorure jitu piji. Dukodi čare ewo tuwudugudo pudui tumeartoru raiwo Pao Kurireu bataruji tumeartoru raiwo Jesusji rugadu.
REV 14:13 Nono imeardure ia baru tadawu makoji pugeje. Akore: – Awu iwadaru bu bapera keje. Awu inodu otobiji meartorure Pao Kurireu jiwuge ewimode dukeje egaremode pudui! Boe pemegamode ei rugadu. Nono Pao Kurireu Uwari akore: – Boe jokodu rugadu. Meartorure Pao Kurireu jiwuge ewimode dukeje emode tamudo tumaragodae rakareu piji. Nou emaragodae mori padumode ebo emaragodure Pao Kurireu ai kodi.
REV 14:14 Nono iordure Pao Kurireu Onaregeduji. Emare mugure ia boetugu kigadureu aogeje. Boe eimijera kurireu atadawu meture aora tada. Nou atadawure tori kuieječe. Iedure ia tarigaji. Nou tariga ure nono aroe kadodure tabowu mogadure.
REV 14:15 Nono ia Pao Kurireu utugare baru tadawu ure tudawuje Pao Kurireu uwai piji. Mako pemegare nou Pao Kurireu Onaregeduji. Akore: – Akeragu boe pegareugei moto piji boe pegawo ei. Ure turugadu awo akeragu boe pegareugei nono boe ere tugeragu kurodureboeji to boepa piji dumogadure.
REV 14:16 Nono nou mugure boetugu kigadureu aogejewu ure to tariga kodudo moto aoji. Dutabo ure tugeragu boe pegareuge eiamedu boei.
REV 14:17 Nono iordure ia Pao Kurireu utugare baru tadawuji. Ure tudawuje Pao Kurireu uwai piji baru tada. Iedure ia tarigaji jamedu. Nou tariga ure nono aroe kadodure tabowu mogadure jamedu.
REV 14:18 Nono ia Pao Kurireu utugare baru tadawu ure tudawuje boe ere turo pegareu mori maku kejewu kamo piji. Ema jetu pemegare joruji nono. Ure tudawuje dukeje mako pemegare nou iedure tariga jiwu Pao Kurireu utugareji. Akore: – Akeragu moto kejewu boe pegareugei atariga tabo. Ero pegare kejewu meri akedure nono uva kurodureu akedu mogadure.
REV 14:19 Nono nou Pao Kurireu utugare baru tadawu ure tariga kodudo moto aoji. Aino ure tugeragu moto kejewu boe pegareugei nono boe emode tugeragu uva kurodureu jitu mogadure. Nono ure nou boe pegareuge ewarigu toro boe pegareuto Pao Kurireu korigodure ei kodi, ero pegare rugadu kodi. Nono Pao Kurireu umode eku redo nono boe emode tugera biado kurodu tabo dumogadure. Eku remode nono pobo re mogadure. Bariredu oto padu kejewure 300 quilômetros. Koredu oto padu kejewure um metro e meio.
REV 15:1 Nono iordure ia boe tuginaiwuji baru tada pugeje. Boe kurireu nure ema. Dukoiare iebogodure. Pao Kurireu utugarege baru tadawuge enodo padu kejewure sete. Eire iordure. Pao Kurireu korigodure dukodire ure turo pegareu maku nou sete tudugarege etai. Ro pegamode motoji pugeje dure enodo padu kejewure sete pugeje. Dukeje ro pegamodukare motoji pugeje.
REV 15:2 Ča iordure iaboeji pugeje. Ure nono kurugwa kurireu mogadure. Pobore mare pobo karega. Kigadure nono meriri kuru kigadu mogadure. Joru padure nou kurugwa kurireu oiadada jamedu. Nono iordure meartorure Jesus jiwugei. Eragojere nou kurugwa kurireu okwai. Emeartorukare nou barogo tuginaiwuji. Erokare nou barogo tuginaiwu roji. Ekare tumago pemegado nou boe ere towu boeji. Nou barogo tuginaiwu ie padukare ewugeje. Pao Kurireu ure ewabo arpa maku nou meartorure Jesus jiwuge etai.
REV 15:3 Nono eragodure Moisés ukeroiaji, Cordeiro Jesus ukeroiaji. Moisés Pao Kurireu utugare nure ema marigudu. Aino čare eragodure Pao Kurireu joki. Egore tura tabo: – Pao Kurireu nure aki. Araga kodure boe jamedu boe kori. Aro kurire rugadu. Aro pemegare rugadu. Boe eiamedu boe eimijera nure aki. Are boe jetorodo rugadu. Boe jokodu jire aroino rugadu.
REV 15:4 Boe eiamedu boe eku kidugodumode ai rugadu. Boe eiamedu boe emagomode aro kurie rugadu boe ewiagai. Čegimijera nure aki rugadu. Boe pemegareu nure aki tu rugadu. Boe eiamedu boe etaregodumode akae moto jamedu boe piji tuwo tubu jodo tumago pemegawo ai rugadu. Boe eiamedu boe erdure aro pemegareuji rugadu. Ainore nou rakojere kurugwa kurireu okwaiwuge egore tura tabo Pao Kurireu joki.
REV 15:5 Nono iordure Pao Kurireu uwaiji baru tada. Pao Kurireu uwai poro jadodure. Pao Kurireu rakojere nono.
REV 15:6 Dukeje nou Pao Kurireu ro pegareu meture tabowu utugarege ere tudawuje nou Pao Kurireu uwai piji. Enodo padu kejewure sete. Ekudau areia pemegare rugadu. Kabidure. Gurugure ei rugadu. Tori kuieje kogure etoiagajeje.
REV 15:7 Nono ia rakojere Pao Kurireu apowu barogo ure poridoge emagu nou baru tadawu Pao Kurireu utugarege etai. Pao Kurireu akedumodukare. Korigodure rugadu boei ero pegare kodi. Dukodire ure turo pegareu tugu nou poridogeto tuwo maku tudugarege baru tadawuge etai.
REV 15:8 Dukeje jeredudure Pao Kurireu uwai tada. Pao Kurireu rakare rugadu dukodire jeredudure nono Pao Kurireu uwai tada. Pao Kurireu kurire rugadu dukodire jeredudure nono Pao Kurireu uwai tada. Dukodire boe ekare turemo Pao Kurireu uwaito pugeje jii toro Pao Kurireu ure turo pegareu akedudo du ka. Utugarege baru tadawuge emode Pao Kurireu ro pegareu barigu moto ka. Du enodo padu kejewure sete.
REV 16:1 Nono imeardure ia baru tadawu makoji. Makore baru tadawu Pao Kurireu uwai piji nou Pao Kurireu utugarege baru tadawuge enodo padu kejewure sete doge ewiagai. Akore: – Tadudo moto ka. Tago pori tadawu Pao Kurireu ro pegareu barigu moto ka. Pao Kurireu korigodure boe eiamedu boei rugadu. Dukodire taromode aino nou tago pori tadaboe tabo.
REV 16:2 Nono Pao Kurireu utugare baru tadawu ure turawuje. Ure to pori tadaboe redo mototo. Dukeje meartorure barogo tuginaiwu jiwuge ewiri pegare. Emeartorure barogo tuginaiwu ure to boeji. Dukodire ewiri pegare rugadu. Korire ei rugadu. Nou barogo tuginaiwu ie padure ewugeje. Ere tubu jodo nou barogo ure toboe jokorai tumago pemegawo ji. Pao Kurireu korigodure ei rugadu dukodire ure ewiri pegado aino.
REV 16:3 Ča ia Pao Kurireu utugare baru tadawu ure turawuje pugeje. Ure to pori tadaboe redo pobo maereuto. Ča ure nou pobo maereu udo nono bireuge eku mogadure. Nou meture pobo maereu tadaboe erugadu boe ewire.
REV 16:4 Ča ia Pao Kurireu utugare baru tadawu ure turawuje pugeje. Ure to pori tadaboe redo pobo jamedu boeto. Ure nou pobo jamedu boe udo nono boe eku mogadure jamedu.
REV 16:5 Nono imeardure nou pobo eimijera bataruji. Pao Kurireu utugare baru tadawu nure ema. Akore: – Pao Kurireu pemegare rugadu. Ure rugadu du akedumodukare rugadu. Pao Kurireu ro pegawo aino rugadu du pegakare. Nou moto kejewuge ere meartorure Pao Kurireu jiwuge ewido. Ere makore Pao Kurireu bataru jiwuge ewido jamedu. Kodire Pao Kurireu ure boe eku maku nou ure boe ewidowuge etai ekuduwo če. Ainore ro pegareuge ero morire.
REV 16:7 Nono imeardure ia makoji pugeje kamo piji. Roreboe uredudure nou kamo piji Pao Kurireu uwai tada. Akore: – Čegimijera Kurireu nure aki. Araga kodure boe eiamedu boe ekori. Aro pegamode boei dure turugadu. Boe jokodu jire aroino.
REV 16:8 Nono ia Pao Kurireu utugare baru tadawu ure to pori tadaboe redo merito tuwo meri uru rakado. Dukodire meri ure boe ekowu rugadu.
REV 16:9 Meri uru kurireu ure boe ekowu dukodire emago pegare Pao Kurireu ieji. Emare ure awu turo pegareu barigu boe ewugeje. Mare nou boe ekare tugera ra turo pegareu piji. Ekare tumago pemegado Pao Kurireuji. Etaidukare tumagowo Pao Kurireu kurie pemegaie rugadu duji.
REV 16:10 Ča ia Pao Kurireu utugare baru tadawu ure to pori tadaboe redo nou barogo tuginaiwu muga ira keje. Ča boečo ure tumaedo nou barogo tuginaiwu o motoji, nou meartorure barogo tuginaiwu jiwuge eiogi. Mare boečore rugadu. Dukodire boe ere toedo tugeruji tiamedu boe kori koia. Nono emago pegare baru tadawu Pao Kurireu bagai tuwiri pegare kodi, tugodu korire kodi. Mare ekare tugera ra turo pegareu piji.
REV 16:12 Nono ia Pao Kurireu utugare baru tadawu ure to pori tadaboe redo nou Eufrates Poto pugeje. Nou Eufrates Po biture. Aino ča awara pemegare boe eimijerage etaregoduwo meri rutu piji.
REV 16:13 Nono iordure bope dogere pobe metia bokware duji. Ere nono ručia dogere. Ia ure tudawuje butoriku kurireu ja piji. Ia ure tudawuje barogo tuginaiwu ja piji. Ia ure tudawuje barogo boigoduwu ja piji. Nou barogo boigoduwu akore tumagoie Pao Kurireu bataruji mare pagare akoino. Ure boe ekiripagado.
REV 16:14 Ča nou bope doge ero rakare. Ere boe eimijera kurireuge edo bato pui turugoduwo Pao Kurireuji. Nou meriji Pao Kurireu aregodumode moto ka turo pegawo ro pegareugei. Pao Kurireu ro rakamode rugadu dukodire nou meriji kurimode rugadu.
REV 16:15 Jesus akore: – Tawiapagado. Boe erduwakare itaregodumode kejewu meriji nono erduwakare iwogureu umode tugeragu enoroe jitu mogadure. Epagare iwagaiwuge egaregodumode pudui itaregodure dukeje. Emode tudo turugadu tubaga tabo iwagai dukodire epogurumodukare nono boe ere tugudau areia tugu pudui dumogadure tubogurukawo. Mare ekudau areia ji karega inagoino. Ere tudo turugadu tubaga tabo iwagai dukodire epogurumodukare. Dujire inagoino. Dukodire boe pemegamode ei rugadu.
REV 16:16 Mare nou bope doge ere boe eimijera kurireuge edo bato pui Armagedom ka, Israel doge eno moto keje. Israel doge ewadaru tabore awu moto iere Armagedom.
REV 16:17 Nono ia Pao Kurireu utugare baru tadawu ure to pori tadaboe redo baru piji. Ia boe mako pemegare baru tadawu Pao Kurireu uwai tadawu boe eimijera muga ira piji. Akore: – Urugadureu!
REV 16:18 Nono boeiaragudure, boeiarurure. Nono moto magadugodure jamedu. Moto magadugodu kurire rugadu. Moto jamedu boe magadugodu kuričigore rugadu.
REV 16:19 Nou ba kurireu Babilônia ure tugado puiato pobe metia bokware. Moto jamedu boe kejewu ba kurireu tadawu bai rugadu boe buture. Etagedure rugadu. Pao Kurireu biagodukare Babilônia kejewuge ero pegareu piji. Ero pegare rugadu dukodire Pao Kurireu korigodure ei. Dukodire ure turo pegareu barigu ewugeje tuwo ewai butudo rugadu.
REV 16:20 Pobo aiare tabowu moto jamedu boe akedure. Tori kurireuge etagedure.
REV 16:21 Bubuture buporira tabo. Mare kurire rugadu. Motudu oto padu kejewure 40 quilos. Ewudure boe ewugeje dukeje emago pegare Pao Kurireuji. Nou buporira tabowu bubutu ure boe pegado boei rugadu.
REV 17:1 Ča ia Pao Kurireu utugare baru tadawu aregodure itae. Nou utugare baru tadawu koiare ure pori tadaboe redo moto ka. Nono makore i. Akore: – Mato iwo ardudo nuba Pao Kurireu romode nou ba kurireu pegareuji. Nou ba kurireu pegareu mugure pobo doge etoiadada. Nou ba kurireu kejewuge erore nono areme eribari diero bagaiwuge ero mogadure.
REV 17:2 Moto jamedu kejewu boe eimijerage ere tugera ra Pao Kurireu piji tuwo tugeragu nou ba kurireu kejewu boe emeardaeji nono boe emode tugera ra toreduje piji tuwo tugeragu ia aredu jeribarire diero bagaiwudo jitu mogadure. Moto jamedu kejewu boe etaidure nou ba kurireu kejewuge emeardaeji nono boe etaidu moga piga kuruji dumogadure. Dukodire erduwakare Pao Kurireuji nono eke kurure jiwuge emogadure.
REV 17:3 Dukeje Pao Kurireu Uwari ure tugeragu i. Dukodire ia Pao Kurireu utugare baru tadawu ure irego ia boe maereu ka. Toro iordure ia areduji. Nou aredu mugure ia barogo kujagureu keje. Mako pegare Pao Kurireu jiwuge ekie padure nou barogo jamedu boe keje. Nou barogo aora oto padu kejewure sete. Ukigare ikera pudogidure.
REV 17:4 Nou aredu ukudau areia kujagure. Tugure jamedu. Tori kuieje padure nou ukudau areia jamedu boe keje. Tori motureu padure nou ukudau areia keje jamedu. Ia tori tuginaiwu padure nou ukudau areia keje jamedu. Iedure ia poriji. Nou pori pemegadodure tori kuieje tabo. Nou pori korobadure nou aredu ro pegareu boe tabo, nou tieribarire tumugukare apowu imei dutabo rugadu.
REV 17:5 Nou aredu ie padure jeri keje. Ainore iere: – Babilônia. Ro pegareuge tieribari tabowuge eiamedu boe etuje nure ema. Areme eribarire diero bagaiwuge eiamedu boe etuje nure ema. Ainore nou aredu iere.
REV 17:6 Nono itaiwore pugeje. Nou aredu rore nono ia uke kurure jiwudo ro mogadure. Mare piga kuru koia karega. Ure meartorure Pao Kurireu jiwuge ewido. Ekare tugera ra Jesus piji dukodire nou aredu ure eku redo rugadu. Dukodire ure nono ia uke kurure jiwudo mogadure. Iordure nou areduji dukeje ure ipagudugo.
REV 17:7 Ča nou Pao Kurireu utugare baru tadawu unarare i. Akore: – Kodiba apagudugodure aino? Imode arduwado nuba awu ardure jiboe ure duji. Ardure aredu mugure ia barogo kurireu keje duji. Nou barogo aora oto padu kejewure sete. Ukigare ikera pudogidure. Awu barogo kurireu ure. Dukejere bire. Mare jewodumode pugeje. Umode tudawuje ia moto poro kurireu piji tumeruwo motoji pugeje. Mare Pao Kurireu umode akedudo. Mare awu moto kejewu boe ebogodumode nou barogoji rugadu. Mare Pao Kurireu ure moto to du otodai, ure boe etowuje du otodai Pao Kurireu ure meartorumode puduiwuge ekie bu bimodukareuge ekie padure kejewu bapera keje. Nou ie padukare nou bapera kejewuge eiamedu boe ebogodumode nou barogoji jewodumode pugeje dukeje. Ure dukeje bimode. Mare jewodumode pugeje. Dukeje Pao Kurireu umode akedudo.
REV 17:9 Nou Pao Kurireu utugare baru tadawu mako kimore i. Akore: – Jorduwareu jorduwamode awu iwadaruji. Nou barogo kurireu aora enodo padu kejewure sete tori ri nure emage. Boe eiamedu boe eimijerage nure emage moto jamedu boe parugajeje. Nou barogo kurireu boe eimijera nure ema jamedu. Nou boe eimijerage enodo padu kejewure sete. Mare nouiage ewire. Boe eimijerage bireuge ere ikera aboudure. Nono ia mugu kimore. Ure mitotu je. Nono ia umode kimo. Aregodukare raga. Boe eimijera mode ema jii je. Akedumode kuri je. Nou barogo kurireu boe eimijera kurireu mode ema pugeje. Nou barogo ure. Dukejere bire. Mare jewodumode pugeje boe eimijerawo ema pugeje moto jamedu boe parugajeje. Mare ema akedumode rugadu jamedu.
REV 17:12 Nou ukigare boe eimijerage mode emage jamedu. Emode ikera pudogidure. Nou barogo kurireu jewodumode pugeje dukeje boe eimijerage mode emage. Emaragodumode nou barogo apo. Mare emaragodu raimodukare apo.
REV 17:13 Eiamedu emode turaga maku nou barogo kurireu ai. Nou barogo kurireu utugarege emode emage.
REV 17:14 Erugodumode Cordeiro Jesusji. Mare Cordeiro Jesus umode etagedudo. Meartorure Jesus jiwuge erugodumode Jesus apo nou boe eimijera pegareugei jamedu. Jesus umode nou boe eimijera pegareuge etagedudo. Boe eimijerage eimijera kurireu nure Jesusče kodi. Emare raka kodure boe eiamedu boe ekori kodi. Ia boe emeartorure Jesusji, Jesus makore ewagai kodi, Jesus ure tugeragu ei kodi. Emodukare tugera ra Jesus piji pugeje.
REV 17:15 Nou baru tadawu Pao Kurireu utugare mako kimore i. Akore: – Ardure poboji jamedu. Nou aredu jeribarire diero bagaiwudo mugure keje. Nou pobo boe nure emage.
REV 17:16 Nou ardure jiwu ukiga doge nou barogo kurireu apo erdu pegamode nou aredu pegareudoji. Emode tugeragu oroe jamedu boeji. Nou aredu pegareudo biri kedomode. Nou barogo kurireu, nou boe eimijerage emode nou aredu kodu kowuje. Dukeje emode ra barigu joruto.
REV 17:17 Pao Kurireu ure nou boe eimijerage erdaedo emeardaedo aino ewo tugera maku nou barogo kurireu ai, ewo turaga maku nou barogo kurireu ai tuwo tugimijerado ema. Ainore nou boe eimijerage eromode nono Pao Kurireu jordae meardaeji. Nono boe eimijera kurireu mode nou barogo kurireuče jii nou Pao Kurireu makore jiboe jeture pudui du ka.
REV 17:18 Ardure aredu pegareudoji mare aredu karega. Ba kurireu jire ardure aino. Nou ba kurireu kejewuge eimijera kurireu emare ure tumeardae maku boe eimijerage etai moto jamedu boe parugajeje. Emeartorure nou ba kurireu tadawu boe eimijera kurireuji rugadu.
REV 18:1 Dukejere iordure ia Pao Kurireu utugare baru tadawu ure turawuje baru piji. Pao Kurireu ure turaga maku ai rugadu tuwo boe erore jiboe udo nono tumeardae mogadure. Urugure dukodire ure moto urugudo.
REV 18:2 Mako pemegare boe eiamedu boe emearduwo. Akore: – Ba kurireu Babilônia akedure rugadu! Aino bope doge edure nou ba kurireu tada. Kiebarege pegareuge emugumode nono.
REV 18:3 Moto jamedu boe kejewuge ere tugera ra Pao Kurireu piji tuwo tugeragu nou ba kurireu kejewu boe emeardaeji nono boe emode tugera ra toreduje piji tuwo tugeragu ia aredu pegareudoji dumogadure. Moto jamedu boe kejewuge etaidure nou ba kurireu kejewuge emeardaeji nono boe etaidumogadure piga kuru jitu mogadure. Boe eimijerage ere tugera ra Pao Kurireu piji tiemaruwo nou ba kurireu kejewu boe emeardae bagai nono imedu umode tugera ra toreduje piji tiemaruwo aredu pegareudo bagai dumogadure. Oe kurireuge ere toe kurido pugeje turo pegareu tabo nou ba kurireu kejewugebo.
REV 18:4 Ča imeardure ia baru tadawu makoji. Akore: – Meartorure iwuge mato itae. Tagera ra nou ba kurireu kejewu boe epiji. Tarokaba nono ero mogadure. Imode boe pegado ei ero pegare kodi.
REV 18:5 Ero pegare rugadu. Ero pega kurire rugadu. Iwiagodumodukare nou ero pegareu piji.
REV 18:6 Ča imode ikeragu nou ero pegareu jamedu boeji. Imode barigu etae pugeje tuibagi. Boe pegamode ei rugadu ero pegare kodi. Boe pegadodumode ei nono ere boe pegadodu mogadure. Nou ba kurireu kejewuge ere toe kurireu maku puai. Mare aino itugarege emode boe jamedu boe tawuje epiji marenarue doge emode emage pugeje. Nou ba kurireu kejewuge egore pui, “Boe eimijerage nure pagi. Boe pegamodukare pai. Pagare nono okoge bokwareugere.” Ainore nou ba kurireu kejewuge egore pui.
REV 18:8 Mare ia meri keje boe pegamode ei rugadu. Ekogodumode. Eke bokwamode ei rugadu. Boe pegare ei dukeje etragudumode. Joru butumode ei tuwo ekowu. Pao Kurireu umode ero pegareu morido pugeje. Ema rakare rugadu.
REV 18:9 Nou Pao Kurireu utugare baru tadawu mako kimore i. Akore joru umoduie nou ba kurireu akedudo dukodire aidure nou ba kurireu kejewuge emeardae jiwuge boe eimijerage etragudumoduie nou ba kurireu joki. Erdumoduie jereduduji. Joru umoduie nou ba kurireu akedudo dukeje jeredudu rutumoduie nou ba kurireu piji. Eie tugeragu nou ba kurireu kejewuge emeardaeji nono imedu moga tugeragu aredu pegareudoji dumogadure. Dukodire etragudumoduie aino nou ba kurireu joki.
REV 18:10 Mare joru umoduie nou ba kurireu akedudo dukeje nou boe eimijerage edu jaemoduie nou ba kurireu piji. Epagudumoduie nou joru butuwo tuwugeje jamedu. Egomoduie: “Boe pega. Boe pega. Awu ba kurireu Babilônia kurire, moture. Mačare boe pegare ji kuri aino. Akedure kuri je rugadu.” Ainoie egomoduie.
REV 18:11 Nou Pao Kurireu utugare baru tadawu mako kimore i. Akore: – Moto jamedu kejewu oe kurireuge etragudumode nou ba kurireu joki jamedu. Ekiarigodumode nou ba kurireu bagai. Ia boe bokware ewo akirodo nou oe kurireuge enoeji pugeje.
REV 18:12 Dukodire oe kurireuge emodukare toe maku diero bagai pugeje. Emodukare tori kuieje maku. Emodukare prata maku. Emodukare tori motureu maku. Emodukare tori tuginaiwu pérola maku. Emodukare areia maku. Emodukare areia pemegareu, kujagureu, mori kurireu maku. Emodukare boe morireu maku, i pemegareu maku, meriri jiboe maku, tori jiboe maku.
REV 18:13 Emodukare tuge roreu maku. Emodukare roreboe jamedu maku. Emodukare uva kuru maku, boe kaguru maku, pariakudu maku, trigo maku. Emodukare tapira doge emagu, carneiro doge emagu, kuwaru doge emagu. Emodukare imaridoreu maku. Emodukare boe emagu. Emodukare ia boe maku diero bagai rugadu.
REV 18:14 Emagomode nou ba kurireu kejewugei. Egomode: “Tagaidure jiboe jamedu boe akedure. Mori kurireboe jamedu boe akedure. Tago diero akedure. Tagoroe jamedu boe akedure. Tamodukare tageragu ia tagoroeji pugeje.”
REV 18:15 – Marigudu boe ere toe maku nou ba kurireu kejewuge etai diero bagai. Kodire eno diero kurire. Kodire boe kurireugere emage. Mačare epagudure tuwo tuburedo nou ba kurireuji pugeje boe pegare nou ba kurireuji kodi. Dukodire ekiarigodure, etragudure.
REV 18:16 Nou oe kurireuge egomode: “Boe pega. Boe pegare nou ba kurireuji. Marigudu nou ba kurireu moture. Nou ba kurireu kejewuge ekudau areia moture, enoroe kurire.
REV 18:17 Mare kuri je nou enoroe rugadu boe akedure.” – Nono nou uture nou oe kurireuge enoroe tabowu ikarereuge etukare nou ba kurireuto pugeje. Nou ikarereuge eimijerage epagudure tuduwo nou ba kurireu ka pugeje.
REV 18:18 Nono etaiwo jaere nou ba kurireu ka. Erdure jorure nou ba kurireu kowu duji. Dukejere etragudure. Egore: “Ia ba kurireu ukare nono nou ba kurireu mogadure.”
REV 18:19 Nono ere moto urugudu bu taora keje. Etragudure. Ekiarigodure. Egore: “Boe pegare rugadu. Boe pegare nou ba kurireuji rugadu. Kodure pobo maereu towu ikarereuge ere to diero kurido ere boe morireboe reko nou ba kurireu ka diero bagai kodi. Mare kuri je nou ba kurireu oroe jamedu boe akedure!”
REV 18:20 – Mare baru tadawuge egarere pudui rugadu nou ba kurireu akedure kodi. Meartorure Pao Kurireu jiwuge egarere pudui rugadu nou ba kurireu akedure kodi. Makore Pao Kurireu bataru jiwuge egarere pudui rugadu nou ba kurireu akedure kodi. Uture Jesus bataru tabowuge egarere pudui rugadu nou ba kurireu akedure kodi. Nou ba kurireu kejewuge ero pegare nou meartorure Pao Kurireu jiwugei dukodire Pao Kurireu umode nou ba kurireu kejewuge ewarigu boe pegareuto.
REV 18:21 Nono ia Pao Kurireu utugare baru tadawu rakareu ure tugeragu ia tori kurireuji. Dukeje ure nou tori barigu pobo maereuto. Nono akore: – Pao Kurireu umode nou ba kurireu Babilônia kejewuge ewarigu boe pegareuto nono ire awu tori barigu poboto dumogadure. Dukodire boe erdumodukare nou ba kurireu kejewugei pugeje.
REV 18:22 Boe eramodukare nou ba kurireu tada pugeje. Boe emoka tuwabo arpa akodo pugeje nou ba kurireu tada pugeje. Boe emoka togwa tugu panato, ikato nou ba kurireu tada pugeje. Boe emoka togwa tugu tapira ukigato nou ba kurireu tada pugeje. Boe emaragodumodukare nou ba kurireu tada pugeje.
REV 18:23 Boe erdumodukare ia joruguji nou ba kurireu tada pugeje. Boe etuwiremodukare nou ba kurireu tada pugeje. Boe emugumodukare nou ba kurireu tada pugeje. Marigudu nou ba kurireu kejewuge oe kurireuge ere toe kurido moto jamedu kejewuge boe ekori. Marigudu nou ba kurireu kejewuge ere boe eiamedu boe ewarigu boeto jorubo kuru pegareu tabo. Dukodire Pao Kurireu roino nou ba kurireu kejewugei.
REV 18:24 – Nou ba kurireu Babilônia kejewuge ere meartorure Pao Kurireu jiwuge eku redo, ere ewido. Nou Babilônia kejewuge ere makore Pao Kurireu bataru jiwuge eku redo, ere ewido. Nou Babilônia kejewuge emeardae koiare boe eroino aino moto jamedu boe keje. Dukodire Pao Kurireu umode nou ba kurireu kejewuge ewarigu boe pegareuto aino rugadu.
REV 19:1 Dukejere imeardure iaboeji. Ure nono boe emagareuge ego mogadure. Akore aino baru piji: – Pamago pemegawo Pao Kurireuji! Emare pemegare rugadu. Emare rakare rugadu. Emare umode boe ekinorudo rugadu.
REV 19:2 Emare umode boe pegado boei ero pegareu moriče. Boe jokodu jire Pao Kurireu roino ro pegareugei. Mare Pao Kurireure jorduwamode ro pegareuge ero pegareuji. Emare jorduwamode nuba turomode nou ro pegareugei. Nou ro pegareuge eigoiare ere Pao Kurireu ro čino pudui. Mare nou ba kurireu Babilônia kejewugeire inagoino. Nou ba kurireu kejewuge ere moto kejewuge edo turo pegado nono ia aredu jeribarire diero bagaiwudo ro mogadure. Emeartorukare Pao Kurireuji dukodire ere meartorure Jesus jiwuge eku redo tuwo ewido. Dukodire čare Pao Kurireu umode nou ba kurireu kejewuge ewarigu boe pegareuto rugadu.
REV 19:3 Aino nou baru tadawuge emago kimore. Egore: – Pamago pemegawo Pao Kurireuji! Joru unure nou ba kurireu akedudo. Jeredudu rutumode nou ba kurireu piji du akedumodukare.
REV 19:4 Pao Kurireu mugure boe eimijera kurireu muga ira keje. Nou rakojere Pao Kurireu apowu boe eimijerage enodo padu kejewure 24. Ere tubu jodo moto keje tumago pemegawo Pao Kurireuji. Barege ere pobe puibiji Pao Kurireu apo jamedu. Ere tubu jodo moto keje jamedu tumago pemegawo Pao Kurireuji jamedu. Egore: – Ainore umode rugadu. Pao Kurireu pemegare rugadu.
REV 19:5 Dukejere ia boe makore nou Pao Kurireu muga piji. Akore: – Meartorure Pao Kurireu jiwuge emago pemegawo Pao Kurireuji. Joku kidure Pao Kurireu jiwuge eiamedu boe emago pemegawo Pao Kurireuji. Boe eimijerage, boe etugarege emago pemegawo Pao Kurireuji rugadu.
REV 19:6 Nono imeardure boe makareuge emagoji. Emago jarurure nono ia pobo kurireu butu mogadure. Emago jarurure nono boeiaruru jaruru mogadure. Egore: – Pao Kurireu pemegare rugadu! Pao Kurireu Rakareu nure ema. Pagimijera nure ema. Boe eimijera kurireu nure ema moto jamedu boe parugajeje. Dukodire čare paegarewo pai. Pamago pemegawo ji. Pawo ie kurido. Meri aregodure Cordeiro Jesus muguwo meartorure puduiwugebo. Mugumode ebo nono ia imedu mugu mogadure toreduje apo dumogadure. Meartorure Jesus jiwuge ere tudo turugadu tumuguwo Jesus apo nono ia aredu kogemodewudo umode tudo turugadu dumogadure. Aredu kogemodewudo umode tudo turugadu tugogewo tugudau areia pemegareu motureu tabo. Areia motureu pemegareu makudumode aredu ai uwo tudo turugadu tugogewo. Aino meartorure Jesus jiwuge ere tudo turugadu nono aredu kogemodewudo ro mogadure. Mare aredu ji karega inagoino. Ukudau areia ji karega inagoino. Meartorure Jesus jiwugeire inagoino. Ere turo pemegado dutabore ere tudo turugadu tumuguwo tugimijerapo. Dujire inagoino.
REV 19:9 Nono nou Pao Kurireu utugare baru tadawu makore i pugeje. Akore: – Awu iwadaru bu bapera keje. Pao Kurireu bataru ure aino. Pao Kurireu makomode meartorure Jesus jiwuge ewagai enogwagewo Cordeiro Jesus apo nono boe enogwagere tuwire ebo dumogadure tuwadae keje. Mare boe etuwire ji karega inagoino. Pao Kurireu makomode meartorure Jesus jiwuge ewagai eduwo nono Cordeiro Jesus apo. Dujire inagoino. Dukejere egaremode pudui rugadu. Boe pemegamode ei rugadu. Ainore Pao Kurireu akore. Ainore Pao Kurireu bataru remawu ure. Emare batrarodukare.
REV 19:10 Dukodire iago ipu jodo moto keje imago pemegawo ji. Mare makore i. Akore: – Arokaba aino. Aragojedo. Pao Kurireu karegure imi. Pao Kurireu utugarege nure pagi. Pare nono meartorure Jesus jiwugere rugadu. Pameartorure boe jokodu jire Jesus akoino duji rugadu. Amode apu jodo amago pemegawo tu Pao Kurireuji! Ema marigudu ure tuwadaru maku nou makore Pao Kurireu bataru jiwuge etai ewo boe ewie nuba Jesus aregodumoduie duji, nuba Jesus romoduie boei rugadu.
REV 19:11 Nono iordure kuwaru kigadureuji baru tada. Mugure nou kuwaru kejewu iere Boe Jokodureu. Iere Umodukare Tugera Ra Meartorure Puduiwuge Epiji. Tu emare jorduware nuba turomode ro pegareugei. Jorduware nuba turomode ro pemegareugei. Jorduware boe jamedu boeji kodi. Umode boe pegado ro pegareugei du boe remawu jire roino. Tu emare jorduwamode nuba turowo ro pegareugei, ro pemegareugei.
REV 19:12 Joku ure nono joru mogadure. Boe eimijera kurireu atadawuge emagare aora keje. Ia ie padure keje mare boe erduwakare nou ieji. Tu emare jorduware nou tugieji.
REV 19:13 Boe eku padure nou ukudau areia keje. Iere “Pao Kurireu Bataru Reo”.
REV 19:14 Baru tadawu tugobaigarege ekodure rekodaji. Emugure kuwaru kigadureuge ewugeje jamedu. Ekudau areia kigadure ei rugadu jamedu.
REV 19:15 Nou mugure kuwaru kigadureu kejewu boe eimijera okwa pijire tariga kurireu merire pudogiwu ure tudawuje. Dutabore ure boe pegado ro pegareugei. Umode ero udo nono tumeardae mogadure turaga tabo. Nono umode ro pegareuge ewarigu toro boe pegareuto Pao Kurireu korigodure ei kodi, ero pegare rugadu kodi. Nono umode eku redo nono boe emode tugera biado uva kuru tabo dumogadure.
REV 19:16 Ie padure tugudau keje, pogora keje jamedu. Ainore ure: “Boe Eimijera Kurireuge Eimijera Nure Ema.”
REV 19:17 Nono iordure ia Pao Kurireu utugare baru tadawuji. Rakojere meri joku keje. Ure tumago rakado kodure baru tadawu kiebaregei. Akore: – Mato. Mato. Pao Kurireu ure maku tagaiwu tage kurimode rugadu! Umode turugadu tawo Pao Kurireu ure bitowuge ekowuje. Tamode boe eimijerage ekodu ko. Tamode tugobaigarege ekodu ko. Tamode tugobaigarege eimijerage ekodu ko. Tamode kuwaru doge ekodu ko. Tamode mugure kuwaru kejewuge ekodu ko. Tamode koboe kurire rugadu. Tamode boe eimijerage ekowuje. Tamode parutowuge ekowuje. Tamode boe etugarege ekowuje jamedu. Ainore Pao Kurireu utugare baru tadawu akore.
REV 19:19 Nono iordure nou barogo tuginaiwuji. Iordure boe eimijera pegareugei ere bato pui nou barogo tuginaiwu apo duji. Etaregodure to tugobaigaregebo turugoduwo mugure kuwaru kigadureu kejewu boe eimijeraji, tugobaigaregei jamedu.
REV 19:20 Nou mugure kuwaru kigadureu kejewu ure tugeragu nou barogo tuginaiwuji. Ure barigu joru maereuto. Nou joru ure boe pegado nou barogoji enxofre urugudu tabo. Nono nou mugure kuwaru kigadureu kejewu ure nouia barogo tuginaiwu boigoduwu barigu nou joru maereuto jamedu. Nou barogo boigoduwu makore tumagoie Pao Kurireu bataruji mare batrarodunure. Ure boe ekiripagado marigudu ewo tubu jodo nou ture towuboe jokorai tumago pemegawo ji. Aino čare nou mugure kuwaru kigadureu kejewu ure nou barogo boigoduwu barigu nou joru maereuto rugadu.
REV 19:21 Nou mugure kuwaru kigadureu kejewu ure nou barege eno tugobaigarege ewido jamedu nou ure tudawuje okwa pijiwu tariga kurireu tabo. Dukeje nou kiebarege ere bato pui togwagewo nou bireuge ekoduji jii toro tuguredu ka.
REV 20:1 Nono iordure ia Pao Kurireu utugare baru tadawuji. Ure turawuje baru piji. Moto poro kurireu jadodureu chave mugure iera keje. Ia corrente motudureu padure iera keje jamedu.
REV 20:2 Ča nou baru tadawu utugare ure tugeragu nou butoriku kurireuji. Awagu pegagodureu nure ema jamedu. Iere Bope Doge Eimijera. Iere Satanás jamedu. Dukeje ure nou Bope Doge Eimijera kogudo nou corrente motudureu tabo. Dukeje ure Bope Doge Eimijera barigu nou moto poro kurireuto. Dukeje ure nou moto poro kurireu mi. Ure nou moto poro mi aoji nou bope doge eimijera ukawo boe ekiripagado pugeje. Rakojemode nou moto poro ja tada. Joru oto padu kejeboe mode mil ji nono. Joru oto padu kejeboe mode mil ji dukeje Pao Kurireu umode nou moto poro kurireu jado pugeje nou bope doge eimijera uwo tudawuje nou moto poro piji tumeruwo motoji. Mare meri raimodukare ji pugeje.
REV 20:4 Iordure boe eimijerage emuga iraji. Boe eimijerage emugure ewugeje. Pao Kurireu ure boe eimijeragedo emage etaiwowo boei ero pegareu bagai. Nono iordure bitodureuge aroei. Ewidodure emagore Pao Kurireu bataruji kodi. Egore boe jokodu jie Jesus akoino dukodire ewidodure. Ekare tumago pemegado barogo tuginaiwuji. Ekare tubu jodo jokorai. Ekare tumago pemegado boe ere towu boeji. Ekare tubu jodo jokorai. Ekare nou barogo ie bu tuwiri keje. Ča aino čare eewodure pugeje. Pao Kurireu ure boe eimijeragedo emage. Dukodire boe eimijera kurireu Jesus paru towuge nure emage jii joru oto padu kejewu mode mil ei eroino duji.
REV 20:5 Jewodureu boetojiwuge nure emage. Ia bireuge eewodukare raga. Joru oto padu kejewu mode mil dukeje eewodumode pugeje jamedu.
REV 20:6 Boe pemegare nou jewodure boetojiwugei. Pao Kurireu ure ero udo tuginai boe ero pegareu piji rugadu. Aino čare ewimodukare pugeje. Nono emaragodumode Pao Kurireu ai tuwo boe enomea maku Pao Kurireu ai. Emaragodumode ure boe ekinorudowu ai. Paru towuge emode emage. Joru oto padu kejewu mode mil ei eroino dukeje.
REV 20:7 Joru oto padu kejewu mode mil dukeje Pao Kurireu umode moto poro jado Satanás meruwo pugeje.
REV 20:8 Nono Satanás utumode moto jamedu boe parugajeje. Batrarodumode boe eiamedu boe ewiagai pugeje tuwo boe ekiripagado. Meartorure jiwuge emagamode rugadu tumeartoru tabo ji. Dukeje nou Bope Doge Eimijera umode edo bato pui turugoduwo Pao Kurireuji. Emagamode nono kugaru padure pobo maereu okwa jitu mogadure.
REV 20:9 Dukeje emode taiado meartorure Pao Kurireu jiwugebo. Emode taiado edure tadawu ba kurireu okwa tabo. Pao Kurireu meardu kurire nou ba kurireuji. Ča joru butumode baru piji. Umode nou meartorure Bope Doge Eimijera jiwuge etagedudo.
REV 20:10 Bope Doge Eimijera ure boe ekiripagado. Mare aino čare Pao Kurireu umode nou Bope Doge Eimijera barigu joru maereuto, enxofre urugudu maereuto. Torore Pao Kurireu ure barogo tuginaiwu barigu jamedu. Torore ure nou barogo boigoduwu barigu jamedu. Nonore etragudumode boe kori koia meriji boečoji jii toro rugadu. Umode boe pegado ei meriji, boečoji jii toro rugadu. Du akedumodukare.
REV 20:11 Nono iordure ia boe eimijera muga iraji. Kigadure. Kurire. Iordure mugure kejewu boe eimijera kurireuji nono. Moto baru ere tuwiado nou boe eimijera piji. Boe erdukare motoji pugeje. Boe erdukare baruji pugeje.
REV 20:12 Nono bireuge eewodure. Eewodure moto piji, pobo piji bope doge eda piji. Boe eimijeragere, boe etugaregere jamedu. Eiamedu boe eragojere nou boe eimijera kurireu jokorai. Dukeje bapera jadodure. Nou bapera kejere Pao Kurireu ure meartorure Jesus jiwuge ekie bu. Ekie padure nou bapera kejewuge ewimodukare pugeje. Nono ia bapera jadodure pugeje. Nou bapera makore boe eiamedu boe eroji, erore jiboeji, emagore jiboeji. Nono Pao Kurireu ure boe eiamedu boe erdudo ero pegareu jamedu boeji. Dukeje ure edo turo pegareu morido.
REV 20:14 Pao Kurireu ure meartorure Jesus jiwuge ekie bu bapera keje marigudu. Ukare meartorukare Jesus jiwuge ekie bu nou bapera keje. Dukodire nou meartorukare Jesus jiwuge ewarigudure joru maereuto emeartorukare Jesusji kodi. Nono Pao Kurireu ure boe pegareuboe rugadu boe barigu nou joru maereuto akeduwo rugadu. Nono boe ewimodukare pugeje. Pao Kurireu ure bope doge eda barigu joru maereuto jamedu. Bireuge eda boigoduwu nure nou joru maereuče. Awu bireuge eda boigoduwu akedumodukare jii toro rugadu.
REV 21:1 Nono iordure ia baru maiwuji. Iordure ia moto maiwuji jamedu. Baru boetojiwu akedure. Moto boetojiwu akedure jamedu. Pobo maereu akedure jamedu.
REV 21:2 Nono iordure nou Pao Kurireu rakojere tadawu ba kurireu maiwuji. Iere Jerusalém Maiwu. Nou ba kurireu ure turawuje nou baru maiwu piji, Pao Kurireu piji. Pao Kurireu ure nou ba kurireu to. Ure udo turugadu. Nou ba kurireu aregodure nou meartorure Jesus jiwuge etae nono ia okogereudo aredu aregodumode tugudau areia motureu tabo dumogadure. Mare aredu ji karega inagoino. Nou baru pijiwu ba kurireu kurire, moture. Dujire inagoino.
REV 21:3 Nono imeardure ia boe makoji nou boe eimijera muga ira piji. Akore: – Ča Pao Kurireu mugumode boebo. Mugumode boebo dukodire utugarege mode emage. Pao Kurireu rakojemode boebo. Emeartorumode ji rugadu.
REV 21:4 Umode eioguru kabi eku piji. Boe ewimodukare pugeje. Boe ekiarigodumodukare pugeje. Boe etragudumodukare pugeje. Boe ewiri korimodukare pugeje. Awu boe pegareboe jamedu boe akedu.
REV 21:5 Nono Boe Eimijera Kurireu akore: – Ča! Ire boe jamedu boe maiwudo. Dukeje makore i jamedu. Akore: – Iwadaru bu bapera keje boe emeartoruwo awu iwadaruji. Awu iwadaru jetumode pudui rugadu. Boe jokodu jire inagoino rugadu.
REV 21:6 Nono Boe Eimijera Kurireu mako kimore: – Urugadureu! Ire iado. Boetojiwu nure imi. Boigoduwu nure imi jamedu. Ire boetojiboe to. Ire boe jamedu boe iado. Imode pobo boeire jiwuge ekududo ino poboče mare emodukare morido. Kudumode ino pobo čewu bimodukare rugadu.
REV 21:7 Ukare tugera ra ipijiwuge itoremode emage. Emeartorumode i rugadu. Etuo kurireu mode imi rugadu.
REV 21:8 Mare pogurure tumeartorukawo iwuge ewarigudumode joru maereuto. Meartoru bokware iwuge ewarigudumode joru maereuto jamedu. Ro pegareuge ewarigudumode joru maereuto. Ure boe ewidowuge ewarigudumode joru maereuto jamedu. Jeribarire tumugukare apowuge eiwuge ewarigudumode joru maereuto jamedu. Ure jorubo kuru pegareu towujewuge ewarigudumode joru maereuto jamedu. Meartorure tuwai tadawu santo doge eiwuge ewarigudumode joru maereuto. Batrarodureuge ewarigudumode joru maereuto jamedu. Awuge eiamedu boe ewarigudumode joru maereuto, enxofre urugudu maereuto jamedu. Eragojemode nono du akedumodukare rugadu.
REV 21:9 Nono ia Pao Kurireu utugare baru tadawu aregodure itae pugeje. Čewu ure pori tadaboe redo moto kejewu nure ema. Du emare aregodure pugeje. Makore i. Akore: – Mato. Iwo ardudo Cordeiro Jesus oredujeji.
REV 21:10 Dukeje Pao Kurireu Uwari ure tugeragu i. Nono nou baru tadawu Pao Kurireu utugare ure irego ia tori kurireu ao ka. Ure iordudo Jerusalém ba kurireuji. Ure turawuje baru piji. Pao Kurireu rakojere nou ba kurireu tada.
REV 21:11 Dukodire nou ba kurireu jorugure Pao Kurireu jorugu pemegareu tabo. Moture nono ia tori motu mogadure. Kaworure nono ia tori kaworureu dumogadure. Ure nono meriri kuru mogadure jamedu.
REV 21:12 Nono ia moto ri padure nou ba kurireu kujegajeje. Nou moto ri baiporo enodo padu kejewure doze. Pao Kurireu utugarege baru tadawuge enodo padu kejewure doze jamedu. Eeture nou moto ri baiporo dogei. Nou Israel doge etumana mage mariguduwuge enodo padu kejewure doze jamedu. Du ekie padure tu tu nou moto ri baiporo doge ewugeje.
REV 21:13 Meri rutu jagwai nou moto ri baiporo dogere pobe metia bokware. Meri butu jagwai moto ri baiporo dogere pobe metia bokware jamedu. Norte jagwai nou moto ri baiporo dogere pobe metia bokware jamedu. Sul jagwai nou moto ri baiporo dogere pobe metia bokware jamedu.
REV 21:14 Nou moto ri todure aogejewu tori doge enodo padu kejewure doze. Du aiare nou ba kurireu tabo jamedu. Nou tori ewugejere nou uture Cordeiro Jesus bataru tabowuge ekie padure. Enodo padu kejewure doze jamedu.
REV 21:15 Ia makore iwu Pao Kurireu utugare baru tadawu iedure ia ipoji. Nou ipo ure nono ia boe iwara mogadure. Nou ipo tabore umode nou ba kurireu remagu. Ere tori kuiejedo nou ipoče.
REV 21:16 Nono nou Pao Kurireu utugare baru tadawu ure nou ba kurireu remagu nou ipo tabo. Raire 2,200 quilômetros. Barire 2,200 quilômetros jamedu. Ričore 2,200 quilômetros jamedu. Ričore, raire, barire nono pureore rugadu.
REV 21:17 Nono nou Pao Kurireu utugare baru tadawu ure nou moto ri remagu. Ričoredu oto padu kejewure 64 metros.
REV 21:18 Nou moto ri towujedure tori kaworureu tabo. Nou ba kurireu towujedure tori kuieje pemegareu tabo. Nou tori kuieje kigadure nono meriri kuru kigadu mogadure.
REV 21:19 Tori motureuge epadure nou moto ri parugajeje. Ia tori kaworure nono korao bo mogadure. Ia tori kaworure nono ia kudoro bo mogadure. Ia tori kujagure nono nabure bo mogadure. Ia tori kaworure nono kido bo kaworu mogadure.
REV 21:20 Ia tori atugore nono orari atugo mogadure. Ia tori kujagure nono aigo bu kujagu mogadure. Ia tori ekure nono čiwabo oiaga eku mogadure. Ia tori kaworure nono keakorogo bo kaworu mogadure. Ia tori ekure nono kuido bo eku mogadure. Ia tori kigadureu atugo kujagure. Ia tori kaworure nono kuido kaworu mogadure atugo ekureu tabo. Ia tori kujagure nono tadari kujagu mogadure.
REV 21:21 Nou moto ri baiporo doge enodo padu kejewure doze. Etowujedure tori tuginaiwu pérola tabo. Tori tuginaiwu pérola doge enodo padu kejewure doze. Dutabore nou moto ri baiporo doge etowujedure nou tori tuginaiwu tabo. Nou ba kurireu tadawu awara towujedure tori kuieje tabo. Nou tori kuieje kigadure nono meriri kuru kigadu mogadure pemegare rugadu kodi.
REV 21:22 Pao Kurireu rakojere nou ba kurireu oiadada Cordeiro Jesus apo. Dukodire Pao Kurireu uwai bokware nou ba kurireu tada. Kodire boe etumode kuri Pao Kurireu ae, Cordeiro Jesus ae jamedu.
REV 21:23 Merikare, arikare uruguwo nou ba kurireuji. Pao Kurireu pijire jorugu pemegareu ure tudawuje. Urugure nou ba kurireuji. Cordeiro Jesus pijire jorugu pemegareu ure tudawuje. Urugure nou ba kurireu tada jamedu.
REV 21:24 Erugure boe eiamedu boe erduwo boe emeruwo. Boe eimijera kurireuge eiamedu boe etaregodumode nou ba kurireuto tuwo Pao Kurireu ie kurido.
REV 21:25 Nou ba kurireu umodukare to baiporo mi. Boečodumodukare dukodire nou moto ri baiporo doge emidodumodukare pugeje.
REV 21:26 Boe eiamedu boe emode toe kurireu reko nou ba kurireu ka tuwo toe jeto nou ba kurireu tada.
REV 21:27 Ia boe pegareu umodukare nou ba kurireu tada. Ia ro pegareu umodukare turemo nou ba kurireuto. Ia batrarodureu umodukare turemo nou ba kurireuto. Tu nou meartorure Jesus jiwuge emode turemo nou ba kurireuto. Pao Kurireu ure ekie bu nou bimodukareuge ekie padure kejewu bapera keje marigudu.
REV 22:1 Nou Pao Kurireu utugare baru tadawu ure iordudo poborereuji jamedu. Nou poborereu po ure nono meriri kuru kigadureu mogadure. Nou pobo ure tudawuje Pao Kurireu mugure kejewu muga ira piji, Cordeiro Jesus mugure kejewu muga ira piji. Nou pobo ure boe pemegado boei ewikawo pugeje.
REV 22:2 Nou pobo rere nou ba kurireu oiagiwu awaraji. Nou pobo okwai ia i kurireu rakojere. Nou i kurireu iere: “Boe Ewimodukare Pugeje.” Nou i tudumode ari jamedu boeji. Du oto padu kejewu mode doze. Nou i kurireu aru jorubo pemegareu nure ema.
REV 22:3 Boe erdumodukare ia Pao Kurireu aidukare jiboeji nou ba kurireu tada. Pao Kurireu mugumode nou ba kurireu tada tumuga ira keje. Cordeiro Jesus mugumode nou ba kurireu tada tumuga ira keje jamedu. Utugarege emago pemegamode ji boe jamedu boeji.
REV 22:4 Erdumode Pao Kurireu jeji. Pao Kurireu ie padumode eri keje.
REV 22:5 Boečodumodukare pugeje. Merimodukare pugeje. Jorugumodukare pugeje. Pao Kurireu emare urugumode ei erduwo. Boe eimijerage mode emage du akedumodukare rugadu.
REV 22:6 Nono nou Pao Kurireu utugare baru tadawu makore i pugeje. Akore: – Awu ameardure jiwu bataru ure turugadu. Ameartorudo ji. Pao Kurireu ure Tuwari maku makore tuwadaru jiwuge etai. Ainore ure itarego akae iwo ardudo nuba Pao Kurireu romode kuri aino duji. Aino ča boe eiamedu boe ewie nou ardure jiboeji.
REV 22:7 Nono Jesus akore jamedu: – Taipagado! Itaregodumode kuri aino. Meartorure awu bapera kejewu bataru jiwuge egaregodumode pudui rugadu. Boe pemegamode ei rugadu.
REV 22:8 Imire ikiere João. Iordure imeardure awu jamedu boeji. Imeardure iordure dukeje ire ipu jodo moto keje nou Pao Kurireu utugare baru tadawu bure paruto imago pemegawo ji.
REV 22:9 Mare ema makore i. Akore: – Arokaba aino! Pao Kurireu utugare nure imi. Imi ire nono amogadure. Ire nono nou amedage makore Pao Kurireu bataru jiwuge emogadure jamedu. Ire nono nou meartorure awu bapera tadawu bataru jiwugere jamedu. Apu jodo tu Pao Kurireu bure paru amago pemegawo tu ji rugadu.
REV 22:10 Ča! Akaba awu are bu bapera kejewu bataru biado boe epiji. Awu ardure jiboe, ameardure jiboe umode kuri aino rugadu.
REV 22:11 Ro pegareuge etaidumodukare tuwo tugera ra turo pegareu piji. Meardae pegareuge etaidumodukare tuwo tugera ra tumeardae pegareu piji. Mare ro pemegareuge ero pemegawo rugadu. Ure tudawuje turo pegareu pijiwuge ekawo tugirimi turo pegareu ka pugeje.
REV 22:12 Nono Jesus makore pugeje. Akore: – Taipagado! Itaregodumode kuri aino! Itaregodumode dukeje imode ro pemegareuge erdudo ero pemegareu jamedu boeji. Dukeje imode ero pemegareu mori maku etai.
REV 22:13 Boetojiwu boigoduwu nure imi. Ire boetojiboe to. Ire boe jamedu boe iado. Imire itaiwore boe jamedu boeji.
REV 22:14 – Nono ia boe emagomode turo pegareu boeji Pao Kurireu biagai taidukaie turo pegareuji pugeje dukeje Pao Kurireu umode ekabi nono boe ere tugudau areia kabi dumogadure. Mare boe ekudau areia ji karega inagoino. Pao Kurireu umode ero pegareu, emeardae pegareu barigu epiji. Dujire inagoino. Nono emode nou i kurireu pemegareu kurodureboe kowuje. Nou i kurireu iere: “Boe Ewimodukare Pugeje” aino. Nono emode kowuje dukeje emode turemo nou ba kurireuto. Dukodire egaremode pudui rugadu. Boe pemegamode ei rugadu.
REV 22:15 Mare ro pegareuge edu jaere nou ba kurireuji. Ure tugera ra ipijiwuge nure emage. Ro pegareuge nure emage. Jorubo pegareuge nure emage. Ro pegareuge tieribari tabowuge nure emage. Ure boe ewidowuge nure emage. Meartorure tuwai tadawu santo doge eiwuge enure emage. Batrarodureuge nure emage.
REV 22:16 – Jesus nure imi. Ire itugare baru tadawu arego tuwo meartorure iwuge ewie awu iwadaru jamedu boeji. Mariguduwu Israel doge eimijera kurireu Davi uwobe nure imi. Kuieje kurireu ba buredugodu tabowu nure imi.
REV 22:17 Ča Pao Kurireu Uwari makore Jesusji: – Mato. Nono meartorure Jesus jiwuge emagore Jesusji: – Mato. Ameartorure awu bapera kejewu bataruji dukeje amagodo aino Jesusji rugadu. Amagodo: – Mato. Akeragu awu bataruji nono ia pobo boeire jiwu umode tugeragu pobo jitu mogadure. Amode akeragu awu bataruji dukeje akudumode nou Pao Kurireu ure towu poboče. Pao Kurireu umode maku akai taidu tabo. Mare pobo ji karega inagoino. Pao Kurireu umode akinorudo awikawo pugeje. Dujire inagoino. Dukodire awimodukare rugadu. Akaidure nou bataruji dukeje akeragu ji.
REV 22:18 João nure imi. Boe jokodu jire inagoino. Ia boe umode awu bataru mekido dukeje Pao Kurireu ro pegamode ji rugadu. Ro pegamode ji nono awu bapera kejewu bataru pegareu mogadure. Ia boe umode iaboe tawuje awu bataru piji dukeje Pao Kurireu ro pegamode ji jamedu. Umode barigu awu ba kurireu pemegareu piji ukawo nou i kurireu kurodureboe kowuje. Nou i iere: “Boe Ewimodukare Pugeje.” Pao Kurireu ure pawie nuba nou ba kurireu ure duji. Ure pawie jamedu nuba nou i kurireu ure duji. Marigudu awu Pao Kurireu bataru padure awu bapera keje.
REV 22:20 Jesus ure boe ewie rugadu awu jamedu boeji. Akore: – Boe jokodu jire inagoino awu iwadaruji. Itaregodumode kuri aino. Ča ainore umode. Mato pagimijera kurireu Jesus! Mato čedae.
REV 22:21 Itaidure Pagimijera Jesus ro pemegawo boe eiamedu boei. Urugadureu.
