﻿Qotei qa Lou.
54.
O Abu Qotei, ni ino ñam qa are qalsim jeu tamo naŋgo baŋq na e ame. Ni siŋgila koba ti unum deqa ni na tamo uge naŋgi ijo kumbra bole osornjre. Yim naŋgi qalieqab, e une saiqoji unum. 
O Abu Qotei, ni ijo pailyo que. E ijo medabu waqtosiy pailmitqa ni ino dabkala na ijo anjam quetbe. 
Tamo diqeqnub qaji naŋgi e qoto itboqnsib e lubib moiqajqa waueqnub. Tamo naŋgi di tulaŋ uge. Naŋgi Qotei qa are qalosaieqnub. 
Ariya Tamo Koba a na e aqaryaibeqnu. Od, a na e taqatbeqnu deqa e bole unum. 
Qotei na ijo jeu tamo naŋgi ŋolawotnjrsim naŋgo kumbra uge qa naŋgi kambatnjrqas. O Abu Qotei, ni na e uratbosaieqnum deqa ni na ijo jeu tamo naŋgi di torei kobotnjre. 
O Tamo Koba Qotei, e na wagme iŋgi iŋgi ni atraimqajqa arearetbeqnu. Ino ñam a tulaŋ bolequja deqa e na ino ñam di biŋiyoqnqai. 
Gulbe bei bei ijoq beqnabqa ni na e aqaryaibeqnum deqa gulbe dena e ugeugeibosaieqnub. Ni na ijo jeu tamo naŋgi qoto itnjroqnsim buŋnjreqnam e uneqnum. 
