﻿Qotei qa Lou.
38.
O Tamo Koba Qotei, ni ino aŋ na e lubobuloqnsim ino baŋ na e ugeugeibeqnum deqa e ni mermonum, ni na e ŋiriŋtbosim ŋolawotbaim. Ni e qa minjiŋ oqaiq. 
O Abu Qotei, ni e qa ŋiriŋeqnum deqa e ma uge ejunum. E une ti unum deqa ijo jejamu aqa siŋgila saieqnu. 
Ijo une di kobaquja deqa e na qoboiyqa keresai. Une dena e tulaŋ kabutbejunu. 
Ni ijo nanari kumbra qa e ŋolawotbem deqa yu siŋgila kokba tulaŋ uge quleq ti ijo jejamuq di bumbraŋyeleŋeb. 
Deqa e are gulbe ti sosim padaleqnum. E qolo ti qanam ti are ugeibeqnaqa akameqnum. 
Ijo jejamu ŋamyuwo bulosiq tulaŋ kaŋkaŋeqnu. E ma uge ejunum. 
E tulaŋ niñaqosim sougetejunum. Tamo bei a siŋga na ijo jejamu sosqas dego kere. E are tulaŋ ugeibeqnu deqa e ijo jaqatiŋ qa leleŋkobaeqnum. 
O Tamo Koba, e iŋgi kiye qa arearetbeqnu di ni qalie. Ijo are miligiq di e akamkobaeqnum di dego ni qalie. Ijo akam di ni qa uliesosai. 
Ijo blom a waukobaeqnu. Ijo siŋgila saiqo. Ijo ŋamdamu ambruibeqnaqa e sawa unqa keresaiibeqnu. 
Ijo kadoi naŋgi ijo yu unqa urateqnub deqa naŋgi e jojombosaieqnub. Ijo was ti ijo aŋgro ti kalil naŋgi dego e qa isaq di unub. 
Jeu tamo naŋgi na e ojsib ugeugeibosib moiyotbqajqa deqa anjam qosoqnsib kakaŋ waiyobuleqnub. Qolo ti qanam ti naŋgi e kumbra uge ebqajqa are qaleqnub. Naŋgi e qa anjam uge mareqnub. 
Ariya e naŋgo anjam di quosaibuleqnum deqa e kamba naŋgi anjam bei minjrqasai. Od, e tamo meŋ siŋgilaiyo qaji bul unum deqa e ijo medabu waqtqasai. E tamo dabkala geteŋyo qaji bul unum deqa e naŋgo anjam quetnjrqasai. 
O Tamo Koba, ni ijo Qotei. Ni na e aqaryaibqajqa deqa e ni qa tariŋeqnum. E ni qa ijo areqalo siŋgilateqnum. E qalie, e ni pailmitqa ni ijo pailyo quetbqam. 
E endegsi ni pailmem, “O Abu Qotei, e gulbe ti soqnitqa ni na ijo jeu tamo naŋgi saidnjrim naŋgi e qa diqoqnsib areboleboleinjrqasai.” O Abu Qotei, e degsi ni pailmem. 
Di kiyaqa? E moiqa jojomoqnsim gaigai jaqatiŋ ti unum deqa. 
O Abu Qotei, e ijo une ni qa ubteqnum. E ijo une deqa are ugeibeqnu. 
Ijo jeu tamo gargekoba unub. Naŋgi siŋgila koba. Naŋgi na e laŋa jeutbeqnub utru saiqoji. 
E na naŋgi kumbra bole enjreqnam naŋgi na olo e kumbra uge ebeqnub. E kumbra bole dauryeqnum deqa naŋgi ijo jejamuq di une qametbeqnub. 
O Tamo Koba Qotei, ni na e uratbaim. O ijo Qotei, ni isaq di saim. 
O Tamo Koba, ni ijo aqaryaibo tamo unum deqa ni urur e padalo sawaq na ame. 
