﻿Qotei qa Lou.
3.
O Tamo Koba Qotei, ijo jeu tamo naŋgi tulaŋ gargekobaeqnub. Naŋgi e ugeugeibqajqa laqnub. 
Naŋgi e endegsib merbeqnub, “Ni padalqa laqnim Qotei na ni uratmqas. A na ni oqasai. Deqa ni padalqam.” 
Ariya naŋgo anjam di bole sai. O Tamo Koba Qotei, e qalie, ni dumu bul unum deqa ni na e ulitbeqnum. Ni segi qujai na e ñam bole eboqnsim e siŋgilatbeqnum deqa e qoto buŋyeqnum. 
E Tamo Koba Qotei metoqnsim pailyeqnam a aqa segi getento manaq di sosiqa ijo pailyo queqnu. 
E ijo bijalq di ŋeisim qambumtem. E olo tigelosim bole soqnem. Di kiyaqa? Tamo Koba Qotei na e taqatbeqnu deqa. 
Jeu tamo tulaŋ gargekoba 10,000 naŋgi bosib e agutbqab di uŋgum. E naŋgi qa ulaqasai. 
O Tamo Koba Qotei, ni au. O ijo Qotei, ni bosim e aqaryaibime. Ni degyqam di e padalqasai. E qalie, ni ijo jeu tamo kalil naŋgi ñumeqnum. Ni tamo uge naŋgo qalagei paratetnjreqnum. 
O Tamo Koba Qotei, ni segi qujai gago aqaryaigo tamo unum deqa iga padalosaieqnum. Deqa ni na ino segi tamo uŋgasari naŋgi boletnjrime. 
