GEN 1:1 ཐོག་མར་དཀོན་མཆོག་གིས་ནམ་མཁའ་དང་ས་གཞི་གསར་དུ་བཀོད་པ་ལགས༌སོ།།
GEN 1:2 ས་གཞི་ནི་སྟོངས་ཤིང་གོ་རིམ་མེད་པ་དང་མཚོ་ཆེན་པོའི་ངོས་སུ་མུན་ནག་གིས་ཁེབས༌ཤིང༌། དཀོན་མཆོག་གི་ཐུགས་ཉིད་མཚོའི་ངོས་སུ་ཕར་ཚུར༌རྒྱུའོ།།
GEN 1:3 དེ་ནས་དཀོན་མཆོག་གིས་འདི་སྐད༌དུ། འོད་ཡོད་པར་གྱུར་ཅིག་ཅེས་གསུངས་པ་དང་འོད་བྱུང༌ངོ༌།།
GEN 1:4 ཁོང་གིས་འོད་ནི་ལེགས་པར་དགོངས་ཏེ་འོད་དང་མུན་པའི་དབྱེ་བ༌ཕྱེས་སོ།།
GEN 1:5 ཁོང་གིས་འོད་ལ་ཉིན་མོ་ཞེས་བཏགས་པ༌དང༌། མུན་པར་མཚན་མོ་ཞེས་མིང་བཏགས༌སོ། །དེ་ནི་མཚན་མོ་དང་ཞོགས་པ་བྱུང་བའི་ཉིན་མཚན་དང༌པོའོ།།
GEN 1:6 དེ་ནས་ཡང་དཀོན་མཆོག་གིས་འདི་སྐད༌དུ། ཆུའི་བར་དུ་དབྱིངས་དང་ལྡན་པར་གྱུར་ནས་ཆུ་དང་ཆུའི་བར་མཚམས་ཕྱེས་ཤིག་ཅེས་གསུངས་པ༌དང༌།
GEN 1:7 ཁོང་གིས་དབྱིངས་མཛད༌དེ། དབྱིངས་ཀྱི་གོང་དུ་ཡོད་པའི་ཆུ་དང་དབྱིངས་ཀྱི་འོག་ཏུ་ཡོད་པའི་ཆུ་གཉིས་སོ་སོར་ཕྱེས་ནས་དེ་བཞིན་དུ་བྱུང༌ངོ༌།།
GEN 1:8 དཀོན་མཆོག་གིས་དབྱིངས་ཀྱི་མིང་ལ་ནམ་མཁའ་ཞེས་བཏགས༌སོ། །དེ་ནི་མཚན་མོ་དང་ཞོགས་པ་བྱུང་བའི་ཉིན་མཚན་གཉིས༌པའོ།།
GEN 1:9 དེ་ནས་ཡང་དཀོན་མཆོག་གིས་འདི་སྐད༌དུ། ནམ་མཁའི་འོག་ཏུ་ཡོད་པའི་ཆུ་རྣམས་གནས་གཅིག་ཏུ་འདུས་ཏེ་སྐམ་ས་མངོན་པར་གྱུར་ཅིག་ཅེས་གསུངས་པ་དང་དེ་བཞིན་དུ་བྱུང༌ངོ༌།།
GEN 1:10 དཀོན་མཆོག་གིས་སྐམ་སའི་མིང་ལ་ས་གཞི་ཞེས་བཏགས་པ༌དང༌། ཆུ་རྣམས་ལྷན་དུ་འདུས་པ་ལ་རྒྱ་མཚོ་ཞེས་མིང་བཏགས༌ཤིང༌། ཁོང་གིས་དེ་ནི་ལེགས་པར་དགོངས༌སོ།།
GEN 1:11 ཡང་དཀོན་མཆོག་གིས་འདི་སྐད༌དུ། ས་ལས་སྔོ་རིགས༌ཏེ། ས་བོན་བསྐྱེད་པའི་སྔོ་ཚལ༌དང༌། ས་བོན་ལྡན་པའི་ཤིང་འབྲས་བསྐྱེད་པའི་ལྗོན་ཤིང་ཐམས་ཅད་རང་རང་གི་རིགས་བཞིན་དུ་སྐྱེ་བར་གྱུར་ཅིག་ཅེས་གསུངས་པ་དང་དེ་བཞིན་དུ་བྱུང༌ངོ༌།།
GEN 1:12 དེ་ནས་ས་ལས་སྔོ་རིགས༌ཏེ། རང་རང་གི་རིགས་བཞིན་དུ་ས་བོན་བསྐྱེད་པའི་སྔོ་ཚལ༌དང༌། ས་བོན་ལྡན་པའི་ཤིང་འབྲས་བསྐྱེད་པའི་ལྗོན་ཤིང་ཐམས་ཅད་རང་རང་གི་རིགས་བཞིན་དུ་སྐྱེས་པར་གྱུར༌ཏོ། །ཁོང་གིས་དེ་ནི་ལེགས་པར་དགོངས༌སོ།།
GEN 1:13 དེ་ནི་མཚན་མོ་དང་ཞོགས་པ་བྱུང་བའི་ཉིན་མཚན་གསུམ༌པའོ།།
GEN 1:14 དེ་ནས་ཡང་དཀོན་མཆོག་གིས་འདི་སྐད༌དུ། ཉིན་མོ་དང་མཚན་མོ་འབྱེད་པའི་ཕྱིར་ནམ་མཁའི་དབྱིངས་སུ་འོད་ཀྱི་ཕུང་པོ་རྣམས་ཡོད་པར་གྱུར༌ཅིག དེ་ནི་དུས་ཚིགས༌དང༌། ཉིན༌མོ། ལོ་ཟླའི་རྟགས་སུ་འགྱུར་བ༌དང༌།
GEN 1:15 ནམ་མཁའི་དབྱིངས་སུ་འོད་འཕྲོ་བ་དང་ས་ལ་འོད་སྣང་བའི་ཕྱིར་རོ་ཞེས་གསུངས་པ་དང་དེ་བཞིན་དུ་བྱུང༌ངོ༌།།
GEN 1:16 དེ་ནས་ཁོང་གིས་འོད་ཆེན་པོ་གཉིས་མཛད༌ཅིང༌། དེ་ནི་འོད་ཆེན་པོས་ཉིན་མོ་ལ་དབང་བྱེད་པ༌དང༌། འོད་ཆུང་བས་མཚན་མོ་ལ་དབང་བྱེད་པའི་ཕྱིར་ཡིན༌ཞིང༌། ཡང་སྐར་མ་རྣམས་ཀྱང་མཛད༌དོ།།
GEN 1:17 ཁོང་གིས་འོད་དེ་གཉིས་ནམ་མཁའི་དབྱིངས་སུ་བཤམས་པར་མཛད༌དོ། །ཅིའི་ཕྱིར་ཞེ༌ན། དེ་གཉིས་ས་གཞི་ལ་སྣང་བར་བྱེད་པ༌དང༌།
GEN 1:18 ཉིན་དང་མཚན་ལའང་དབང་བྱེད་པར་འགྱུར་བ༌དང༌། འོད་དང་མུན་པ་འབྱེད་པའི་ཕྱིར༌རོ། །ཁོང་གིས་དེ་ནི་ལེགས་པར་དགོངས༌སོ།།
GEN 1:19 དེ་ནི་མཚན་མོ་དང་ཞོགས་པ་བྱུང་བའི་ཉིན་མཚན་བཞི༌པའོ།།
GEN 1:20 དེ་ནས་ཡང་དཀོན་མཆོག་གིས་འདི་སྐད༌དུ། ཆུའི་ནང་དུ་སྲོག་དང་ལྡན་པའི་སེམས་ཅན་ཧ་ཅང་མང་དུ་འབྱུང་བ༌དང༌། འདབ་ཆགས་རྣམས་ས་སྟེང་གི་བར་སྣང་དུ་ཕུར་ཅིག་ཅེས་གསུངས༌ཏེ།
GEN 1:21 ཁོང་གིས་ཆུ་ལ་གནས་པའི་སྲོག་ལྡན་ཆེན་པོ༌དང༌། ཆུའི་ནང་དུ་བྱུང་བའི་སྲོག༌ལྡན། འདབ་ཆགས་རྣམས་ཀྱང་རང་རང་གི་རིགས་བཞིན་དུ་བཀོད་པར་མཛད་ཅིང་ཁོང་གིས་དེ་ནི་ལེགས་པར་དགོངས༌སོ།།
GEN 1:22 ཡང་དཀོན་མཆོག་གིས་དེ་དག་ལ་བྱིན་གྱིས་བརླབས་ཏེ་འདི་སྐད༌དུ། རྒྱུད་དང་ལྡན་པར་གྱུར་ནས་མང་དུ་སྤེལ་ཏེ་རྒྱ་མཚོའི་ཆུ་ལ་གང་བར་གྱིས༌དང༌། འདབ་ཆགས་རྣམས་ཀྱང་ས་ལ་འཕེལ་བར་གྱུར་ཅིག་ཅེས་གསུངས༌སོ།།
GEN 1:23 དེ་ནི་མཚན་མོ་དང་ཞོགས་པ་བྱུང་བའི་ཉིན་མཚན་ལྔ༌པའོ།།
GEN 1:24 དེ་ནས་ཡང་དཀོན་མཆོག་གིས་འདི་སྐད༌དུ། ས་གཞིའི་སྟེང་དུ་རང་རང་གི་རིགས་བཞིན་དུ་སྲོག་ལྡན་ཏེ་ཕྱུགས་ཟོག༌དང༌། ལྟོ་འགྲོ་དང་འབུ༌སྲིན། རི་དྭགས་རྣམས་སྐྱེ་བར་གྱུར་ཅིག་ཅེས་གསུངས་པ་དང་དེ་བཞིན་དུ་བྱུང༌ངོ༌།།
GEN 1:25 དཀོན་མཆོག་གིས་རི་དྭགས༌དང༌། ཕྱུགས༌ཟོག ས་སྟེང་གི་ལྟོ་འགྲོ་དང་འབུ་སྲིན་ཐམས་ཅད་རང་རང་གི་རིགས་བཞིན་དུ་བཀོད་པར་མཛད༌ཅིང༌། དཀོན་མཆོག་གིས་དེ་ནི་ལེགས་པར་དགོངས༌སོ།།
GEN 1:26 དེ་ནས་ཡང་དཀོན་མཆོག་གིས་འདི་སྐད༌དུ། ངེད་ཅག་ གིས་རང་གི་སྣང་བརྙན༌ལྟར། ངེད་ཅག་དང་མཚུངས་པའི་མིའི་རིགས་བསྐྲུན་པར༌བྱའོ། །དེ་དག་གིས་རྒྱ་མཚོའི་ཉ་རྣམས༌དང༌། ནམ་མཁའི༌བྱ། ཕྱུགས༌ཟོག ས་གཞི༌ཡོངས། ས་སྟེང་གི་ལྟོ་འགྲོ་དང་འབུ་སྲིན་ཐམས་ཅད་ལ་དབང་བྱེད་པར་གྱུར་ཅིག་ཅེས་གསུངས༌སོ།།
GEN 1:27 དཀོན་མཆོག་གིས་རང་གི་སྣང་བརྙན་ལྟར་མིའི་རིགས་བསྐྲུན་པར་མཛད༌ཅིང༌། དེ་ནི་དཀོན་མཆོག་ཉིད་ཀྱི་སྣང་བརྙན་བཞིན་ཕོ་མོ་གཉིས་སུ་མཛད༌དོ།།
GEN 1:28 དཀོན་མཆོག་གིས་དེ་གཉིས་ལ་བྱིན་གྱིས་བརླབས་ཏེ་འདི་སྐད༌དུ། ཁྱོད་རྣམས་རྒྱུད་དང་ལྡན་པར་གྱུར་ནས་མང་དུ་སྤེལ་ཏེ་ས་གཞིར་གང་བར་བྱོས༌ཤིག ཡང་ས་གཞིར་དབང་བསྒྱུར་བ་དང་རྒྱ་མཚོའི་ཉ༌དང༌། ནམ་མཁའི༌བྱ། ས་ཐོག་ཏུ་རྒྱུ་བའི་སྲོག་ཆགས་ཀུན་ལའང་དབང་བྱེད་པར་གྱིས་ཞེས་གསུངས༌སོ།།
GEN 1:29 དེ་ནས་ཡང་དཀོན་མཆོག་གིས་འདི་སྐད༌དུ། ལྟོས༌དང༌། བདག་གིས་ས་སྟེང་དུ་ས་བོན་བསྐྱེད་པའི་སྔོ་ཚལ་དང་ས་བོན་ལྡན་པའི་ཤིང་འབྲས་བསྐྱེད་པའི་ལྗོན་ཤིང་ཐམས་ཅད་ཁྱོད་ཅག་ལ་ཟས་སུ་སྦྱིན་པ་ཡིན༌ནོ།།
GEN 1:30 ཡང་ས་སྟེང་གི་དུད་འགྲོ་ཐམས་ཅད༌དང༌། ནམ་མཁའི་བྱ་མཐའ་དག༌དང༌། ས་ཐོག་ཏུ་རྒྱུ་བའི་སྲོག་ལྡན་ཡོངས་ལ་སྔོ་རིགས་ཟས་སུ་སྦྱིན་ནོ་ཞེས་གསུངས་པ་དང་དེ་བཞིན་དུ་བྱུང༌ངོ༌།།
GEN 1:31 དེ་ནས་དཀོན་མཆོག་གིས་རང་ཉིད་ཀྱིས་ཇི་བཞིན་མཛད་པ་ཐམས་ཅད་ལ་གཟིགས་ཤིང་དེ་ནི་ཤིན་ཏུ་ལེགས་པར་དགོངས༌སོ། །དེ་ནི་མཚན་མོ་དང་ཞོགས་པ་བྱུང་བའི་ཉིན་མཚན་དྲུག༌པའོ།།
GEN 2:1 དེ་ལྟར་ནམ་མཁའ་དང་ས་གཞི་དང་དངོས་པོ་ཐམས་ཅད་ལེགས་པར་བཀོད༌ཅིང༌།
GEN 2:2 ཉིན་བདུན་པའི་སྔོན་དུ་དཀོན་མཆོག་གིས་མཛད་པའི་འཕྲིན་ལས་ཐམས་ཅད་ལེགས་པར་གྲུབ་པ་དང་ཉིན་བདུན་པ་ལ་ངལ་གསོ་མཛད༌དོ།།
GEN 2:3 དཀོན་མཆོག་གིས་ཉིན་བདུན་པ་ལ་བྱིན་གྱིས་བརླབས་ཤིང་ཉིན་དེ་ནི་དམ་པར་མཛད་པ༌སྟེ། རྒྱུ་མཚན་ནི་ཉིན་དེར་ཁོང་གིས་བཀོད་པའི་འཕྲིན་ལས་ཐམས་ཅད་འགྲུབ་པར་མཛད་ནས་ངལ་གསོ་གནང་བའི་ཕྱིར༌རོ།།
GEN 2:4 དེ་ཡང་ནམ་མཁའ་དང་ས་གཞི་བཀོད་པའི་ལོ་རྒྱུས་ནི་འདི་ལྟ༌སྟེ། དཀོན་མཆོག་ཡ་ཝཱེས་ ནམ་མཁའ་དང་ས་གཞི་བཀོད་པའི་དུས༌ལ།
GEN 2:5 ས་རྒོད་སྟེང་དུ་སྡོང་ཕྲན་མེད་ལ་ཞིང་ཁར་སྔོ་ཚལ་ཡང་སྐྱེ་མེད༌དེ། དཀོན་མཆོག་ཡ་ཝཱེས་ད་དུང་ས་ལ་ཆར་བ་འབབ་པར་མ་མཛད༌ཅིང༌། ཞིང་འདེབས་མཁན་ཡང་མེད༌དོ།།
GEN 2:6 འོན་ཀྱང་ས་ནས་རླངས་པ་འཕྱུར་ཏེ་ས་གཞི་ཡོངས་སུ་བརླན་པར་བྱས༌སོ།།
GEN 2:7 དཀོན་མཆོག་ཡ་ཝཱེས་ས་རྡུལ་གྱིས་སྐྱེས་པ་ཞིག་བཟོས་པ༌དང༌། དེའི་སྣ་ཁུང་ལ་ཚེ་སྲོག་གི་ཞལ་ཕུ་བརྒྱབ་ནས་སྲོག་དང་ལྡན་པའི་མི་ཞིག་ཏུ་འགྱུར་བར་མཛད༌དོ།།
GEN 2:8 དེ་ནས་དཀོན་མཆོག་ཡ་ཝཱེས་ཤར་ཕྱོགས་ཀྱི་ཨེ་དེན་ཡུལ་དུ་ལྡུམ་ར་ཞིག་བསྐྲུན་ཅིང་ཁོང་གིས་བཟོས་པའི་སྐྱེས་པ་དེའང་ཡུལ་དེར་བསྐྱལ༌ཏོ།།
GEN 2:9 དཀོན་མཆོག་ཡ་ཝཱེས་ས་ནས་ལྗོན་ཤིང་སྣ་ཚོགས་སྐྱེ་རུ་བཅུག་ཅིང་དེ་དག་ནི་ལྟ་ན་སྡུག་པ་དང་དེ་དག་གི་ཤིང་ཏོག་ཟོས་ན་ཞིམ་མངར་ལྡན་པར་མཛད༌ཅིང༌། ལྡུམ་རའི་དཀྱིལ་དུ་ཚེ་སྲོག་གི་ལྗོན་ཤིང་དང་བཟང་ངན་རྟོགས་པའི་ལྗོན་ཤིང་ཡང་ཡོད་པ་ཡིན༌ནོ།།
GEN 2:10 དེ་ཡང་ཨེ་དེན་ཡུལ་ནས་ཆུ་བོ་ཞིག་བཞུར་འོངས་ཏེ་ལྡུམ་ར་བརླན་པར་བྱས་པ༌དང༌། གནས་དེར་ཆུ་བོ་བཞི་རུ་གྱེས༌ཤིང༌།
GEN 2:11 ཆུ་བོ་དང་པོའི་མིང་ལ་ཕི་ཤོན་ཟེར་བ༌དང༌། དེ་ནི་ཧ་བེ་ལཱའི་ཡུལ་ཐམས་ཅད་བརྒྱུད་ནས་བཞུར་བ་དང་ཡུལ་དེ་རུ་གསེར་ཡང་ཡོད༌ཅིང༌།
GEN 2:12 ཡུལ་དེའི་གསེར་ནི་ཤིན་ཏུ་ལེགས༌སོ། །ཡུལ་དེ་རུ་པེ་དེལ་ཡོན་ཞེས་པའི་ཐང་ཆུ་དང་རིན་པོ་ཆེ་གཟིའང་ཡོད༌དོ།།
GEN 2:13 ཆུ་བོ་གཉིས་པའི་མིང་ལ་གེ་ཧོན་ཟེར་བ་དང་དེ་ནི་གུ་ཤའི་ཡུལ་ཐམས་ཅད་བརྒྱུད་ནས་བཞུར༌རོ།།
GEN 2:14 ཆུ་བོ་གསུམ་པའི་མིང་ལ་ཧི་དཱི་ཀེལ་ཟེར་ཞིང་ཨ་སུར་ཡུལ་གྱི་ཤར་ཕྱོགས་སུ་བཞུར༌རོ། །ཆུ་བོ་བཞི་པའི་མིང་ལ་ཕི་རཱད་ཅེས་ཟེར༌རོ།།
GEN 2:15 དེ་ནས་དཀོན་མཆོག་ཡ་ཝཱེས་སྐྱེས་པ་དེ་ཨེ་དེན་ལྡུམ་རར་བསྐྱལ་ནས་བདག་གཉེར་བྱེད་མཁན་དུ་བསྐོས༌སོ།།
GEN 2:16 ཁོང་གིས་སྐྱེས་པ་དེ་ལ་འདི་སྐད༌དུ། ལྡུམ་ར་ནང་གི་ལྗོན་ཤིང་སྣ་ཚོགས་ཀྱི་ཤིང་ཏོག་ཟས་སུ་སྤྱོད་རུང༌མོད།
GEN 2:17 འོན་ཀྱང་བཟང་ངན་རྟོགས་པའི་ལྗོན་ཤིང་དེའི་ཤིང་ཏོག་བཟའ་མི༌རུང༌། ཅིའི་ཕྱིར་ཞེ༌ན། ཁྱོད་ཀྱིས་དུས་ནམ་ཞིག་ལ་ཟོས་པར་གྱུར་ན་འཆི་བར་འགྱུར་བའི་ཕྱིར་ཡིན་ཞེས་བཀའ་གནང༌ངོ༌།།
GEN 2:18 དེ་ནས་ཡང་དཀོན་མཆོག་ཡ་ཝཱེས་འདི་སྐད༌དུ། སྐྱེས་པ་དེ་གཅིག་པུ་བསྡད་ན་མི་ལེགས༌ཏེ། བདག་གིས་ཁོ་ལ་འཚམ་པའི་ལས་གྲོགས་ཤིག་བཟོ་བར་བྱ་ཞེས་གསུངས༌སོ།།
GEN 2:19 དེ་ནས་དཀོན་མཆོག་ཡ་ཝཱེས་ས་སྟེང་གི་དུད་འགྲོ་དང་ནམ་མཁའི་བྱ་ཐམས་ཅད་ས་ལས་བཟོས་པ་དང་སྐྱེས་པ་དེའི་མདུན་དུ་ཁྲིད་ཡོང༌སྟེ། ཁོས་དེ་དག་ལ་མིང་ཅི་གདགས་པར་གཟིགས༌སོ། །སྐྱེས་པ་དེས་སེམས་ཅན་རྣམས་ལ་མིང་གང་ཞིག་བཏགས་པ་བཞིན་སེམས་ཅན་མཐའ་དག་ལ་མིང་ཡོད་པར༌གྱུར།
GEN 2:20 སྐྱེས་པ་དེས་ཕྱུགས་ཟོག་ཐམས་ཅད༌དང༌། ནམ་མཁའི་བྱ༌དང༌། ས་སྟེང་གི་དུད་འགྲོ་རེ་རེ་བཞིན་དུ་མིང་བཏགས༌ཀྱང༌། ཨ་དམ་ གྱིས་རང་ལ་འོས་པའི་ལས་གྲོགས་ཤིག་རྩ་བ་ནས་མ་མཐོང༌ངོ༌།།
GEN 2:21 དེ་ནས་དཀོན་མཆོག་ཡ་ཝཱེས་ཨ་དམ་གཉིད་ལྕི་མོ་ཁུགས་སུ་བཅུག་པ༌དང༌། ཁོང་གིས་ཨ་དམ་གྱི་རྩིབ་རུས་གཅིག་བླངས་ཤིང་རྨ་ཤུལ་ཤ་ཡིས་སྦྱར་བར་མཛད༌དོ།།
GEN 2:22 དེར་དཀོན་མཆོག་ཡ་ཝཱེས་སྐྱེས་པ་དེའི་རྩིབ་མ་ལས་བུད་མེད་ཅིག་མཛད་དེ་ཁོའི་གམ་དུ་ཁྲིད་པ༌ལ།
GEN 2:23 ཁོས་འདི་ལྟར་སྨྲས༌པ། འདི་ནི་རུས་པ་ལས་བྱུང་རུས་པ༌དང༌།། བདག་གི་ཤ་ལས་བྱུང་བའི་ཤ་ཡིན༌ནོ།། ཁོ་མོའི་མིང་ལ་སྐྱེས་མ་འདོགས་པར༌བྱ།། དེ་ནི་སྐྱེས་པའི་ལུས་ནས་བྱུང་ཕྱིར༌རོ། །ཞེས༌པའོ།།
GEN 2:24 དེ་བས་སྐྱེས་པ་ནི་རང་གི་ཕ་མ་དང་ཁ་བྲལ་ནས་རང་གི་ཆུང་མར་འབྲེལ་ཏེ་ཁོ་གཉིས་ལུས་པོ་གཅིག་ཏུ་འགྱུར༌རོ།།
GEN 2:25 དུས་དེར་ཁྱོ་ཤུག་གཉིས་ལུས་པོ་གཅེར་བུ་ཡིན་ཡང་ངོ་གནོང་བ་མེད༌དོ།།
GEN 3:1 དེ་ཡང་དཀོན་མཆོག་ཡ་ཝཱེས་མཛད་པའི་སྦྲུལ་ནི་ས་སྟེང་གི་སེམས་ཅན་ཐམས་ཅད་ལས་ཆེས་གཡོ་སྒྱུ་ཆེ་བ་ཞིག་ཡིན༌པས། སྦྲུལ་གྱིས་བུད་མེད་དེ་ལ་འདི་ལྟར་དྲིས༌པ། དཀོན་མཆོག་གིས་ལྡུམ་ར་ནང་གི་ལྗོན་ཤིང་ཐམས་ཅད་ཀྱི་ཤིང་ཏོག་བཟའ་མི་རུང་ཞེས་དངོས་གནས་བཀའ་གནང་ངམ་ཞེས་པ༌ལ།
GEN 3:2 བུད་མེད་ན༌རེ། ངེད་གཉིས་ཀྱིས་ལྡུམ་ར་ནང་གི་ལྗོན་ཤིང་གི་ཤིང་ཏོག་བཟའ་རུང༌མོད།
GEN 3:3 འོན་ཀྱང་ལྡུམ་རའི་དཀྱིལ་དུ་ཡོད་པའི་ལྗོན་ཤིང་དེའི་ཤིང་ཏོག་བཟའ་མི་རུང༌སྟེ། དཀོན་མཆོག་གིས་དེ་ནི་བཟའ་མི་རུང་ལ་རེག་ཀྱང་མི༌རུང༌། གལ་ཏེ་ཟོས་ན་འཆི་བར་འགྱུར་ཞེས་བཀའ་གནང་བའི་ཕྱིར་ཡིན་ཞེས་སྨྲས༌སོ།།
GEN 3:4 ཡང་སྦྲུལ་ན༌རེ། ཁྱོད་ནི་ཅིས་ཀྱང་འཆི་མི་སྲིད༌དེ།
GEN 3:5 ཁྱོད་ཀྱིས་དེ་ཉིད་ཟོས་པ་ཙམ་གྱིས་མིག་ཟུང་གསལ་པོར་གྱུར༌ཏེ། དཀོན་མཆོག་དང་འདྲ་བར་གྱུར་ནས་བཟང་ངན་ཤེས་པར་འགྱུར་བ་དཀོན་མཆོག་གིས་མཁྱེན་པ་ཡིན་ཞེས་སྨྲས༌སོ།།
GEN 3:6 དེ་ནས་བུད་མེད་ཀྱིས་ལྗོན་ཤིང་དེའི་ཤིང་ཏོག་ནི་ཁ་ལ་ཞིམ་ཞིང་ལྟ་ན་སྡུག་པ༌དང༌། མཁས་པར་འགྱུར་ཆེད་ཡིད་དུ་འོང་བ་མཐོང་ནས། ཤིང་ཏོག་བཏོགས་ནས་ཟོས་ཤིང་རང་གི་ཁྱོ་ག་ལའང་སྤྲད་པ་དང་དེས་ཀྱང་ཟོས༌སོ།།
GEN 3:7 དེར་ཁོ་གཉིས་ཀྱི་མིག་ཟུང་གསལ་པོར་གྱུར་ཏེ་རང་ལུས་གཅེར་བུ་ཡིན་པ་མཐོང༌བས། སེ་ཡབ་ཤིང་གི་ལོ་མ་བསླས་ནས་རང་ཉིད་ལ་སྨད་གོས་བཟོས༌སོ།།
GEN 3:8 དེ་ནས་བསིལ་རླུང་ལྡང་བའི་དུས༌སུ། དཀོན་མཆོག་ཡ་ཝཱེ་ལྡུམ་རའི་ནང་དུ་ཕེབས་པ༌དང༌། སྐྱེས་པ་དེ་དང་ཁོའི་ཆུང་མ་གཉིས་ཀྱིས་ཁོང་ཉིད་ཕེབས་པའི་སྒྲ་ཐོས་ནས་སྡོང་གསེབ་ཏུ་ཁོང་ལ་གཡོལ་བ༌རེད།
GEN 3:9 དཀོན་མཆོག་ཡ་ཝཱེས་སྐྱེས་པ་དེ་ལ་ཁྱོད་གང་དུ་ཡོད་ཅེས་དྲིས་པ༌ན།
GEN 3:10 ཁོ་ན༌རེ། ངས་ལྡུམ་རའི་ནང་ཁྱེད་ཀྱི་སྒྲ་ཐོས་པས་འཇིགས༌ཤིང༌། བདག་གི་ལུས་པོ་གཅེར་བུ་ཡིན་པས་སྦས་པ་ཡིན་ཞེས་སྨྲས༌སོ།།
GEN 3:11 ཡང་ཁོང་གིས་འདི་སྐད༌དུ། ཁྱོད་ཀྱི་ལུས་གཅེར་བུ་ཡིན་པ་སུ་ཞིག་གིས་སྨྲས༌སམ། བདག་གིས་བཟའ་མི་རུང་བར་བཀའ་བསྒོས་པའི་ཤིང་ཏོག་དེ་ཟོས་སམ་ཞེས་དྲིས་པ༌ན།
GEN 3:12 ཁོ་ན༌རེ། ཁྱེད་ཀྱིས་བདག་ལ་གནང་ཞིང་བདག་དང་འགྲོགས་པའི་བུད་མེད་དེས་ལྗོན་ཤིང་དེའི་ཤིང་ཏོག་བདག་ལ་སྤྲད་པས་ངས་ཀྱང་ཟོས་པ་ཡིན་ཞེས༌སྨྲས།
GEN 3:13 དེ་ནས་དཀོན་མཆོག་ཡ་ཝཱེས་བུད་མེད་དེ་ལ་འདི་སྐད༌དུ། ཁྱོད་ཀྱིས་ཅི་ཞིག་བྱས་སམ་ཞེས་དྲིས་པ༌ལ། ཁོ་མོ་ན༌རེ། སྦྲུལ་གྱིས་བདག་ལ་བསླུ་བྲིད་བྱས་པས་བདག་གིས་ཟོས་པ་ཡིན་ཞེས་སྨྲས༌སོ།།
GEN 3:14 དེ་ནས་དཀོན་མཆོག་ཡ་ཝཱེས་སྦྲུལ་ལ་འདི་སྐད༌དུ། ཁྱོད་ཀྱིས་ལས་དེ་བྱས་པའི་དབང་གིས་ཕྱུགས་ཟོག་དང་ས་སྟེང་གི་དུད་འགྲོ་ཐམས་ཅད་ལས་ཁྱོད་ལ་ལྷག་ཏུ་དམོད་པ་འཕོག་པ༌དང༌། ལྟོ་བས་འགྲོ་ཞིང་ནམ་ཡང་ས་རྡུལ་བཟའ་བར་གྱུར༌ཅིག
GEN 3:15 བདག་གིས་ཁྱོད་དང་བུད་མེད་གཉིས༌དང༌། ཁྱོད་དང་བུད་མེད་གཉིས་ཀྱི་བུ་རྒྱུད་བར་ཕན་ཚུན་དགྲ་ཟླར་ལངས་པ༌དང༌། བུད་མེད་ཀྱི་བུ་རྒྱུད་དེས་ ཁྱོད་ཀྱི་མགོ་བོ་རྨ་བར་བྱེད་པ༌དང༌། ཁྱོད་ཀྱིས་ཁོང་གི་རྐང་པའི་ཕྱི་རྟིང་རྨ་བར་བྱེད་ཅེས་གསུངས་པ༌དང༌།
GEN 3:16 ཡང་ཁོང་གིས་བུད་མེད་ལ་འདི་སྐད༌དུ། བདག་གིས་ཁྱོད་ལ་མངལ་སྦྲུམ་པའི་སྡུག་བསྔལ་ཆེ་རུ་བསྐྱེད༌དེ། ཕྲུ་གུ་བཙའ་དུས་ཟུག་གཟེར་ཆེན་པོ་འབྱུང་བར་འགྱུར་ངེས༌སོ། །ཁྱོད་ནི་ཁྱོ་གར་ཞེན་ཅིང་ཆགས་པ༌དང༌། ཁྱོ་གས་ཁྱོད་ལ་དབང་བྱེད་པར་འགྱུར་ཞེས་གསུངས༌སོ།།
GEN 3:17 ཡང་ཁོང་གིས་ཨ་དམ་ལ་འདི་སྐད༌དུ། ཁྱོད་ཀྱིས་བུད་མེད་ཀྱི་ངག་ལ་མཉན་པ༌དང༌། བདག་གིས་བཟའ་མི་རུང་ཞེས་སྨྲས་པའི་ལྗོན་ཤིང་དེའི་ཤིང་ཏོག་ཟོས་པའི༌ཕྱིར། ཁྱོད་ཀྱི་རྐྱེན་གྱིས་ས་སྟེང་དུ་དམོད་པ་འབྱུང༌ངོ༌། །ཁྱོད་ཀྱིས་ཇི་སྲིད་འཚོ་བའི་བར་དུ་ངལ་རྩོལ་བྱས་ན་ད་གཟོད་ས་ལས་ཁྱོད་ལ་ཁ་ཟས་འཐོབ་པར༌འགྱུར།
GEN 3:18 ཁྱོད་ཀྱི་རྐྱེན་གྱིས་ས་གཞི་ལས་ཚེར་མ་དང་སྤྱང་ཚེར་སྐྱེ་བ༌དང༌། ཁྱོད་ཀྱིས་ས་ཞིང་གི་སྔོ་ཚལ་ཡང་བཟའ་བར༌འགྱུར།
GEN 3:19 ཁྱོད་ཀྱིས་རང་ཉིད་ས་ལ་འཐིམ་པའི་བར་དུ་རྔུལ་ཆུ་མང་པོ་བཏོན་ན་ད་གཟོད་ལྟོ་བ་འགྲང་བར་འགྱུར༌ཏེ། ཁྱོད་ནི་ས་རྡུལ་ལས་བྱུང་བ༌དང༌། ཁྱོད་ས་རྡུལ་ཡིན་པས་སླར་ཡང་ས་རྡུལ་དུ་འགྱུར་བའི་ཕྱིར་ཡིན་ཞེས་གསུངས༌སོ།།
GEN 3:20 དེ་ནས་ཨ་དམ་གྱིས་རང་གི་ཆུང་མའི་མིང་ལ་ཧ་ཝཱ་ཞེས་བཏགས༌སོ། །ཅིའི་ཕྱིར་ཞེ༌ན། ཁོ་མོ་ནི་མིའི་རིགས་ཀྱི་མ་ཡུམ་ཡིན་པའི་ཕྱིར༌རོ།།
GEN 3:21 དེ་ནས་དཀོན་མཆོག་ཡ་ཝཱེས་ཨ་དམ་དང་ཁོའི་ཆུང་མ་གཉིས་ལ་ཀོ་བའི་གྱོན་པ་བཟོས་ནས་ལུས་ལ་བསྐོན༌ཏོ།།
GEN 3:22 དཀོན་མཆོག་ཡ་ཝཱེས་འདི་སྐད༌དུ། ལྟོས༌དང༌། མི་དེ་ནི་ངེད་ཅག་དང་འདྲ་བར་གྱུར༌ཏེ་བཟང་ངན་ཤེས༌སོ། །ད་ལྟ་སླར་ཡང་ལག་པ་བརྐྱངས་ནས་ཚེ་སྲོག་གི་ལྗོན་ཤིང་གི་ཤིང་ཏོག་ཟོས༌ན། ནམ་ཡང་གསོན་པར་འགྱུར་ཞེས་གསུངས༌སོ།།
GEN 3:23 དེའི༌ཕྱིར། དཀོན་མཆོག་ཡ་ཝཱེས་ཁོ་རང་ཨེ་དེན་ལྡུམ་ར་ནས་བཏོན༌ཏེ། སྔར་ཁོ་རང་མཛད་པའི་ས་དེ་རྨོ་བར་བཏང་བ༌དང༌།
GEN 3:24 ཕྱིར་བསྐྲད་པའི་རྗེས༌སུ། ཨེ་དེན་ལྡུམ་རའི་ཤར་ཕྱོགས་སུ་ཀེ་རུབ་ མངགས་པ༌དང༌། ཕྱོགས་བཞིར་འཁོར་བའི་མེ་ཡི་རལ་གྲི་ཞིག་བཙུགས་པར་མཛད༌དེ། ཚེ་སྲོག་གི་ལྗོན་ཤིང་ཡོད་སར་འགྲོ་བའི་ལམ་དེ་བསྲུང་དགོས་པའི་ཕྱིར༌རོ།།
GEN 4:1 དེ་ཡང་ཨ་དམ་རང་གི་ཆུང་མ་ཧ་ཝཱ་དང་ལུས་འབྲེལ་བྱས་ཤིང་ཁོ་མོ་མངལ་དང་ལྡན་པར་གྱུར༌ཏེ། བུ་ཀཱ་ཡན་ཞེས་པ་སྐྱེས་པས་ཁོ་མོ་ན༌རེ། དཀོན་མཆོག་ཡ་ཝཱེ་ ལ་བརྟེན་ནས་བདག་ལ་བུ་ཞིག་ཐོབ་ཅེས་སྨྲས༌སོ།།
GEN 4:2 ཡང་ཁོ་མོར་ཀཱ་ཡན་གྱི་ནུ་བོ་ཧ་བེལ་ཞེས་པ་སྐྱེས༌སོ། །ཧ་བེལ་ལུག་རྫི་ཡིན་ཞིང་ཀཱ་ཡན་ཞིང་པ་ཡིན༌ནོ།།
GEN 4:3 དེ་ནས་དུས་ཤིག་ལ་ཀཱ་ཡན་གྱིས་ས་ཞིང་ལས་སྐྱེས་པའི་འབྲས་བུ་དཀོན་མཆོག་ཡ་ཝཱེ་ལ་མཆོད་པར་ཕུལ་བ༌དང༌།
GEN 4:4 ཧ་བེལ་གྱིས་ཀྱང་ལུག་ཁྱུ་ལས་བཙས་པའི་ལུ་གུ་ཐོག་མ་དང་ལུག་ཚིལ་དཀོན་མཆོག་ཡ་ཝཱེ་ལ་མཆོད་པར་ཕུལ༌ཞིང༌། ཁོང་ཉིད་ཧ་བེལ་དང་ཁོའི་མཆོད་པ་ལ་ཐུགས་དགྱེས་ཀྱང་།
GEN 4:5 ཀཱ་ཡན་དང་ཁོའི་མཆོད་པ་ལ་ཐུགས་མ་དགྱེས་པས། ཀཱ་ཡན་ཤིན་ཏུ་ཁྲོས་ཤིང་ངོ་མདངས་ཀྱང་འགྱུར་བར་གྱུར་ཏོ།།
GEN 4:6 དེ་ནས་དཀོན་མཆོག་ཡ་ཝཱེས་ཀཱ་ཡན་ལ་འདི་སྐད༌དུ། ཁྱོད་ཁྲོས་ནས་ངོ་མདངས་འགྱུར་བ་ཅི་ཡིན༌ནམ།
GEN 4:7 ཁྱོད་རང་སྤྱོད་ལམ་བཟང་ན་ཁྱོད་ཀྱི་མགོ་ཡར་འདེགས་ཐུབ་པ་མ་ཡིན༌ནམ། གལ་ཏེ་སྤྱོད་ལམ་ངན་ན་སྡིག་པས་སྒོ་མདུན་ནས་ཁྱོད་ལ་འཇབ་འདུག༌གོ །དེས་ཁྱོད་འདོད་ཀྱང་ཁྱོད་ཀྱིས་དེ་ལ་དབང་བསྒྱུར་དགོས་ཞེས་གསུངས༌སོ།།
GEN 4:8 དེ་ནས་ཀཱ་ཡན་གྱིས་ཧ་བེལ་ལ་གཏམ་གླེང་བ༌དང༌། ཁོ་གཉིས་ཞིང་བར་དུ་ཡོད་པའི་ཚེ༌ན། ཀཱ་ཡན་ལངས་ནས་རང་གི་སྤུན་ཧ་བེལ་ལ་བརྒྱབ་སྟེ་བསད༌དོ།།
GEN 4:9 དེར་དཀོན་མཆོག་ཡ་ཝཱེས་ཀཱ་ཡན་ལ་འདི་སྐད༌དུ། ཁྱོད་ཀྱི་སྤུན་ཧ་བེལ་གང་དུ་ཡོད་ཅེས་དྲིས་པ༌ལ། ཀཱ་ཡན་ན༌རེ། ངས་མི༌ཤེས། ང་ནི་སྤུན་སྲུང་མཁན་ཡིན་ནམ་ཞེས༌སྨྲས།
GEN 4:10 ཡང་ཁོང་གིས་འདི་སྐད༌དུ། ཁྱོད་ཀྱིས་ཅི་བྱས༌སམ། ཁྱོད་ཀྱི་སྤུན་ཧ་བེལ་གྱི་ཁྲག་གིས་ས་འོག་ནས་བདག་ལ་ངུ་སྐད་འདོན༌ནོ།།
GEN 4:11 ས་ཡིས་ཁ་གདངས་ཏེ་ཁྱོད་ཀྱི་ལག་ནས་ཁྱོད་རང་གི་སྤུན་ཆུང་ཧ་བེལ་གྱི་ཁྲག་བླངས༌པས། ད་ལྟ་ཁྱོད་ལ་ས་འདི་ལས་དམོད་པ་ཐེབས༌དགོས།
GEN 4:12 ཁྱོད་ཀྱིས་ཞིང་རྨོས་ཀྱང་ས་ཡིས་ཁྱོད་ལ་འབྲས་བུ་མི་བསྐྱེད་པས་ཁྱོད་ས་སྟེང་དུ་འཁྱམ་པར་འགྱུར་ཞེས་གསུངས༌སོ།།
GEN 4:13 དེ་ནས་ཀཱ་ཡན་ན༌རེ། ང་ལ་ཉེས་ཆད་བཅད་པ་ལྗིད་དྲགས་པས་འཁུར་མི་ནུས༌སོ།།
GEN 4:14 ཁྱེད་ཀྱིས་ད་ལྟ་ང་རང་ས་ཆ་འདི་ནས་བདས་པས་ངས་ཁྱེད་རང་མཇལ་མི་ནུས་པ༌དང༌། ང་རང་ས་མཐར་འཁྱམ་པ་སུ་ཞིག་གིས་མཐོང༌ན། དེས་ང་གསོད་པར་འགྱུར་ཞེས་སྨྲས༌སོ།།
GEN 4:15 ཡང་དཀོན་མཆོག་ཡ་ཝཱེས་འདི་སྐད༌དུ། སུ་ཞིག་གིས་ཀཱ་ཡན་བསད་ན་དེ་ལ་ཉེས་ཆད་ལན་བདུན་འཕོག་ངེས་ཡིན་ཞེས་གསུངས་པ༌དང༌། ཀཱ་ཡན་ལ་རྟགས་ཤིག་གནང་སྟེ་སུས་མཐོང་ཡང་མི་གསོད་པར་མཛད༌དོ།།
GEN 4:16 དེ་ནས་ཀཱ་ཡན་ནི་དཀོན་མཆོག་ཡ་ཝཱེའི་སྤྱན་སྔ་ནས་ཁ་གྱེས་ཏེ་ཨེ་དེན་ཡུལ་གྱི་ཤར་ཕྱོགས་སུ་ཡོད་པའི་ནོད་ཅེས་པའི་ཡུལ་དུ་སོང་ནས་བསྡད༌དོ།།
GEN 4:17 དེ་ནས་ཀཱ་ཡན་རང་གི་ཆུང་མ་དང་ལུས་འབྲེལ་བྱས༌ཤིང༌། ཁོའི་ཆུང་མར་མངལ་སྦྲུམ་སྟེ་བུ་ཧ་ནོག་སྐྱེས༌སོ། །ཀཱ་ཡན་གྱིས་གྲོང་ཁྱེར་ཞིག་བརྩིགས་ཤིང་རང་གི་བུའི་མིང་བཞིན་ཧ་ནོག་གྲོང་ཁྱེར་ཞེས༌བཏགས།
GEN 4:18 ཧ་ནོག་ལ་བུ་ཨི་རཱད་སྐྱེས་པ༌དང༌། ཨི་རཱད་ལ་བུ་མཱ་ཧུ་ཡ་ཨེལ་སྐྱེས་པ༌དང༌། མཱ་ཧུ་ཡ་ཨེལ་ལ་བུ་མཱ་ཐུ་ཤཱ་ཨེལ་སྐྱེས་པ༌དང༌། མཱ་ཐུ་ཤཱ་ཨེལ་ལ་བུ་ལཱ་མེག་སྐྱེས་སོ།།
GEN 4:19 དེ་ནས་ལཱ་མེག་གིས་ཆུང་མ་གཉིས་བླངས་ཤིང་གཅིག་གི་མིང་ལ་ཨ་དཱ་ཞེས་ཟེར་བ་དང་ཅིག་ཤོས་ལ་ཚི་ལཱ་ཞེས་ཟེར༌རོ།།
GEN 4:20 ཨ་དཱ་ལ་བུ་ཡཱ་བལ་སྐྱེས༌ཤིང༌། དེ་ནི་གུར་དུ་སྡོད་པ་དང་ཕྱུགས་འཚོ་བའི་མི་རྣམས་ཀྱི་མེས་པོ་ཡིན༌ནོ།།
GEN 4:21 དེ་ཡང་ཡཱ་བལ་ལ་ཡུ་བཱལ་ཞེས་ཟེར་བའི་སྤུན་ཞིག་ཡོད་པ་ནི་པི་ཝང་འཁྲོལ་བ་དང་འཕྲེད་གླིང་འབུད་པའི་མི་ཐམས་ཅད་ཀྱི་མེས་པོ་ཡིན༌ནོ།།
GEN 4:22 ཚི་ལཱ་ཡིས་ཀྱང་བུ་ཐུ་བཱལ་ཀཱ་ཡན་བཙས༌ཤིང༌། དེ་ནི་ཟངས་ལྕགས་ལས་སྣོན་བྱེད་མཁན་གྱི་མགར་པ་ཐོག་མ༌ཡིན། ཐུ་བཱལ་ཀཱ་ཡན་ལ་སྲིང་མོ་ཞིག་ཡོད་པ་ནི་ནཱ་ཨ་མཱ་ཡིན༌ནོ།།
GEN 4:23 དེ་ནས་ལཱ་མེག་གིས་རང་གི་ཆུང་མ་གཉིས་ལ་འདི་ལྟར་སྨྲས་པ༌སྟེ། ང་ཡི་སྐད་ལ་ཉོན་ཅིག་ཨ་དཱ་དང་ཚི༌ལཱ།། ང་ཡི་གཏམ་ལ་གསོན་དང་ལཱ་མེག་གི་ཆུང༌མ།། ང་རང་རྨས་པར་བྱས་པས་མི་ཞིག་བདག་གིས༌བསད།། ང་ལ་བརྒྱབ་པས་གཞོན་ནུ་ཞིག་ཀྱང་བདག་གིས༌བསད།།
GEN 4:24 ཀཱ་ཡན་བསད་ན་ཉེས་ཆད་ལན་བདུན་དུ་འབྱུང༌ཞིང༌།། ང་རང་བསད་ན་ཉེས་ལན་དོན་བདུན་ནི་དགོས༌སོ། །ཞེས༌པའོ།།
GEN 4:25 ཨ་དམ་སླར་ཡང་རང་གི་ཆུང་མ་དང་ལུས་འབྲེལ་བྱས༌ཤིང༌། ཁོ་མོས་བུ་ཞིག་བཙས་པ་དང་མིང་ལ་སེད་ཐུ་ཞེས་བཏགས་པ༌སྟེ། ཀཱ་ཡན་གྱིས་ཧ་བེལ་བསད་པས་དཀོན་མཆོག་གིས་བདག་ལ་ཧ་བེལ་གྱི་ཚབ་ཏུ་བུ་འདི་གནང་བ་ཡིན་ཞེས༌སྨྲས།
GEN 4:26 དེ་ནས་སེད་ཐུ་ལའང་བུ་ཞིག་སྐྱེས་ཤིང་མིང་ལ་ཨེ་ནོ་ཤཱ་ཞེས་བཏགས༌སོ། །དུས་དེ་ནས༌བཟུང༌། མི་རྣམས་ཀྱིས་དཀོན་མཆོག་ཡ་ཝཱེའི་མཚན་ནས་འབོད་པའི་འགོ་ཚུགས་པ་ཡིན༌ནོ།།
GEN 5:1 འདིའི་མན་ནི་ཨ་དམ་གྱི་རིགས་རྒྱུད་ཀྱི་མིང་ཐོ་ཡིན༌ནོ། །དེ་ཡང་དཀོན་མཆོག་གིས་མིའི་རིགས་བསྐྲུན་པའི་ཉིན༌ལ། ཁོང་གིས་རང་ཉིད་ཀྱི་སྣང་བརྙན་ལྟར་མི་བསྐྲུན་པ༌དང༌།
GEN 5:2 ཕོ་མོ་གཉིས་སུ་མཛད་ཅིང་བྱིན་གྱིས་བརླབས་ཏེ་མིང་ལ་མི་ཞེས་བཏགས༌སོ།།
GEN 5:3 དེ་ནས་ཨ་དམ་དགུང་ལོ་བརྒྱ་དང་སུམ་ཅུ་ཡིན་པའི་དུས༌སུ། བྱད་གཟུགས་དང་སྣང་བརྙན་རང་ཉིད་དང་མཚུངས་པའི་བུ་ཞིག་སྐྱེས་པ་ལ་སེད་ཐུ་ཞེས་མིང་བཏགས༌སོ།།
GEN 5:4 ཨ་དམ་ལ་བུ་སེད་ཐུ་སྐྱེས༌རྗེས། ཡང་ལོ་བརྒྱད་བརྒྱ་ལ་བཞུགས་ཤིང་བུ་དང་བུ་མོ་གཞན་དག་ཀྱང་བསྐྱངས༌སོ།།
GEN 5:5 དེ་ལྟར་ཨ་དམ་བསྡོམས་པས་ལོ་དགུ་བརྒྱ་སུམ་ཅུར་བཞུགས་རྗེས་ཚེ་ལས་འདས༌སོ།།
GEN 5:6 དེ་ནས་སེད་ཐུ་ལོ་བརྒྱ་དང་ལྔ་ལོན་པའི་དུས་སུ་བུ་ཨེ་ནོ་ཤཱ༌སྐྱེས།
GEN 5:7 ཨེ་ནོ་ཤཱ་སྐྱེས་པའི་རྗེས་སུ་སེད་ཐུ་ཡང་ལོ་བརྒྱད་བརྒྱ་དང་བདུན་ལ་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 5:8 དེ་ལྟར་སེད་ཐུ་བསྡོམས་པས་ལོ་དགུ་བརྒྱ་དང་བཅུ་གཉིས་ལ་བཞུགས་རྗེས་ཚེ་ལས་འདས༌སོ།།
GEN 5:9 དེ་ཡང་ཨེ་ནོ་ཤཱ་ལོ་དགུ་བཅུ་ལོན་པའི་དུས་སུ་བུ་ཀེ་ནན༌སྐྱེས།
GEN 5:10 ཀེ་ནན་སྐྱེས་རྗེས་ཨེ་ནོ་ཤཱ་ཡང་ལོ་བརྒྱད་བརྒྱ་དང་བཅོ་ལྔར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 5:11 ཨེ་ནོ་ཤཱ་བསྡོམས་པས་ལོ་དགུ་བརྒྱ་དང་ལྔ་ལ་བཞུགས་རྗེས་ཚེ་ལས་འདས༌སོ།།
GEN 5:12 དེ་ནས་ཀེ་ནན་ལོ་བདུན་ཅུ་ལོན་པའི་དུས་སུ་བུ་མཱ་ཧ་ལ་ཨེལ་ཞེས་པ༌སྐྱེས།
GEN 5:13 དེའི་རྗེས་སུ་ཀེ་ནན་ཡང་ལོ་བརྒྱད་བརྒྱ་དང་བཞི་བཅུར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 5:14 དེ་ལྟར་ཀེ་ནན་བསྡོམས་པས་ལོ་དགུ་བརྒྱ་དང་བཅུ་ལ་བཞུགས་རྗེས་ཚེ་ལས་འདས༌སོ།།
GEN 5:15 དེ་ནས་མཱ་ཧ་ལ་ཨེལ་ལོ་དྲུག་ཅུ་རེ་ལྔ་ལོན་པའི་དུས་སུ་བུ་ཡཱ་རཱད༌སྐྱེས།
GEN 5:16 དེའི་རྗེས་སུ་མཱ་ཧ་ལ་ཨེལ་ཡང་ལོ་བརྒྱད་བརྒྱ་དང་སུམ་ཅུར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 5:17 དེ་ལྟར་མཱ་ཧ་ལ་ཨེལ་བསྡོམས་པས་ལོ་བརྒྱད་བརྒྱ་དང་གོ་ལྔར་བཞུགས་རྗེས་ཚེ་ལས་འདས༌སོ།།
GEN 5:18 དེ་ནས་ཡཱ་རཱད་ལོ་བརྒྱ་དང་རེ་གཉིས་ཡིན་པའི་དུས་སུ་བུ་ཧ་ནོག་ཅེས་པ༌སྐྱེས།
GEN 5:19 དེའི་རྗེས་སུ་ཡཱ་རཱད་ཡང་ལོ་བརྒྱད་བརྒྱར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 5:20 དེ་ལྟར་ཡཱ་རཱད་བསྡོམས་པས་ལོ་དགུ་བརྒྱ་དང་རེ་གཉིས་ལ་བཞུགས་རྗེས་ཚེ་ལས་འདས༌སོ།།
GEN 5:21 དེ་ནས་ཧ་ནོག་ལོ་དྲུག་ཅུ་རེ་ལྔ་ལོན་རྗེས་བུ་མཱ་ཐུ་ཤ་ལཱ༌སྐྱེས།
GEN 5:22 དེའི་རྗེས་སུ་ཧ་ནོག་ནི་ལོ་སུམ་བརྒྱར་དཀོན་མཆོག་དང་ལྷན་དུ་བསྐྱོད་དེ་བུ་དང་བུ་མོ་གཞན་དག་ཀྱང་བསྐྱངས༌སོ།།
GEN 5:23 དེ་ལྟར་ཧ་ནོག་བསྡོམས་པས་ལོ་སུམ་བརྒྱ་དང་རེ་ལྔ་ལ་བཞུགས༌སོ།།
GEN 5:24 ཧ་ནོག་ནི་དཀོན་མཆོག་དང་མཉམ་དུ་འགྲོགས་པ༌དང༌། དཀོན་མཆོག་གིས་ཁོ་རང་འཇིག་རྟེན་ལས་དྲངས་པས་ མི་མཐོང་བར་གྱུར༌ཏོ།།
GEN 5:25 དེ་ནས་མཱ་ཐུ་ཤ་ལཱ་ལོ་བརྒྱ་དང་གྱ་བདུན་ལོན་རྗེས་བུ་ལཱ་མེག༌སྐྱེས།
GEN 5:26 དེའི་རྗེས་སུ་མཱ་ཐུ་ཤ་ལཱ་ཡང་ལོ་བདུན་བརྒྱ་དང་གྱ་གཉིས་ལ་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 5:27 དེ་ལྟར་མཱ་ཐུ་ཤ་ལཱ་བསྡོམས་པས་ལོ་དགུ་བརྒྱ་དང་རེ་དགུ་ལ་བཞུགས་རྗེས་ཚེ་ལས་འདས༌སོ།།
GEN 5:28 དེ་ནས་ལཱ་མེག་ལོ་བརྒྱ་དང་གྱ་གཉིས་ལོན་ནས་བུ་ཞིག་སྐྱེས༌ཤིང༌།
GEN 5:29 ཁོང་གིས་བུའི་མིང་ལ་ནོ་ཨ་ཞེས་བཏགས༌ཏེ། བུ་འདིས་རང་ཅག་གི་ངལ་རྩོལ་དང་དཀའ་ཚེགས་ལ་སེམས་གསོ་བྱེད་པར་འགྱུར༌རོ། །རྒྱུ་མཚན་ནི་དཀོན་མཆོག་ཡ་ཝཱེས་ས་ལ་དམོད་པ་མཛད་པའི་ཕྱིར་ཡིན་ཞེས་སྨྲས༌སོ།།
GEN 5:30 དེ་ནས་ལཱ་མེག་ལ་བུ་ནོ་ཨ་སྐྱེས༌རྗེས། ཡང་ལོ་ལྔ་བརྒྱ་དང་གོ་ལྔར་བཞུགས་ཏེ་བུ་དང་བུ་མོ་གཞན་དག་ཀྱང་བསྐྱངས༌སོ།།
GEN 5:31 དེ་ལྟར་ལཱ་མེག་བསྡོམས་པས་ལོ་བདུན་བརྒྱ་དང་དོན་བདུན་ལ་བཞུགས་རྗེས་ཚེ་ལས་འདས༌སོ།།
GEN 5:32 དེ་ནས་ནོ་ཨ་ལོ་ལྔ་བརྒྱ་ལོན་པའི་དུས་སུ་ཤེམ་དང་ཧཱམ་དང་ཡ་ཕེད་ཅེས་བྱ་བའི་བུ་གསུམ་སྐྱེས༌སོ།།
GEN 6:1 དེ་ཡང་ས་སྟེང་དུ་མིའི་རིགས་ཇེ་མང་དུ་གྱུར་པ༌དང༌། ཁོ་རྣམས་ལ་བུ་མོ་སྐྱེ་བའི་དུས༌སུ།
GEN 6:2 དཀོན་མཆོག་གི་བུ་རྣམས་ཀྱིས་མིའི་རིགས་ཀྱི་བུ་མོ་རྣམས་མཛེས་མ་ཡིན་པར་མཐོང༌སྟེ། རང་གི་འདོད་མོས་བཞིན་བདམས་ནས་ཆུང་མར་བླངས༌པས།
GEN 6:3 དཀོན་མཆོག་ཡ་ཝཱེས་འདི་སྐད༌དུ། མི་ནི་ཤ་ཁྲག་གདོས་བཅས་ཀྱི་ཕུང་བོ་ཡིན༌ཏེ། བདག་གི་སེམས་ཉིད་ནི་དེ་དག་གི་ཁྲོད་དུ་ཇི་སྲིད་བར་དུ་མི་གནས༌ཀྱང༌། དེ་དག་ཚེ་ལོ་བརྒྱ་དང་ཉི་ཤུའི་རིང་ལ་འཚོ་ཐུབ་པར་བྱ་ཞེས་གསུངས༌སོ།།
GEN 6:4 དེའི་དུས་སུ་ས་སྟེང་དུ་ནེ་ཕེ་ལིམ་པ་རྣམས་ཀྱང་ཡོད་པ༌དང༌། རྗེས་སུ་དཀོན་མཆོག་གི་བུ་རྣམས་མིའི་བུ་མོ་རྣམས་ཀྱི་གྲས་སུ་ཚུད་ཅིང་དེ་དག་དང་འབྲེལ་ཏེ་བུ་སྐྱེས་པ༌ནི། གནའ་དུས་ཀྱི་མི་ཆེན་ཏེ་དཔའ་རྩལ་ཅན་དུ་གྲགས་པའི་མི་རྣམས་ཡིན༌ནོ།།
GEN 6:5 དེ་ནས་དཀོན་མཆོག་ཡ་ཝཱེས་ས་སྟེང་གི་མི་རྣམས་ཀྱི་སྤྱོད་ངན་ཤིན་ཏུ་ཚབས་ཆེ་ཞིང་སེམས་སུ་དྲན་པ་ནི་ནམ་ཡང་ངན་པ་ཤ་སྟག་ཡིན་པར་གཟིགས༌ཏེ།
GEN 6:6 ཁོང་གིས་འཇིག་རྟེན་དུ་མིའི་རིགས་བསྐྲུན་པར་འགྱོད་ཅིང་ཐུགས་སེམས་ཤིན་ཏུ་སྐྱོ༌བའོ།།
GEN 6:7 དེ་ནས་དཀོན་མཆོག་ཡ་ཝཱེས་འདི་སྐད༌དུ། བདག་གིས་བསྐྲུན་པའི་མི༌དང༌། དུད་འགྲོ༌དང༌། ལྟོ་འགྲོ་འབུ༌སྲིན། ནམ་མཁའི་བྱ་དང་བཅས་པ་ཐམས་ཅད་ས་སྟེང་ནས་མེད་པར༌བྱའོ། །རྒྱུ་མཚན་ནི་དེ་རྣམས་བསྐྲུན་པ་ལ་བདག་འགྱོད་པའི་ཕྱིར་ཡིན་ཞེས་གསུངས༌སོ།།
GEN 6:8 ནོ་ཨ་ཁོ་ནར་དཀོན་མཆོག་ཡ་ཝཱེའི་སྤྱན་སྔ་ནས་ཐུགས་རྗེ་ཐོབ༌བོ།།
GEN 6:9 དེ་ཡང་ནོ་ཨ་ཡི་རིགས་རྒྱུད་ནི་གཤམ་གསལ༌ལྟར། ནོ་ཨ་ནི་གཞུང་རྒྱུད་དྲང་པོ་ཞིག་ཡིན༌ཞིང༌། སྐབས་དེའི་མི་རབས་ལས་ཁོ་ནི་ཕུལ་དུ་བྱུང་བ་ཞིག་ཀྱང་ཡིན༌ལ། ཁོ་དཀོན་མཆོག་དང་ལྷན་དུ་བསྐྱོད་པ་ཡིན༌ནོ།།
GEN 6:10 ནོ་ཨ་ལ་བུ་གསུམ་སྐྱེས་པ༌ནི། ཤེམ༌དང༌། ཧཱམ། ཡ་ཕེད་བཅས༌སོ།།
GEN 6:11 དེ་ཡང་དཀོན་མཆོག་གི་སྤྱན་སྔར་འཇིག་རྟེན་ནི་ངན་རུལ་དུ་གྱུར་ཅིང་གདུག་རྩུབ་ཀྱིས་ཁེངས་ཡོད༌དོ།།
GEN 6:12 ཁོང་གིས་འཇིག་རྟེན་ལ་གཟིགས༌པའི་ཚེ། ཀྱེ་མ། འཇིག་རྟེན་ནི་ངན་པས་ཁེངས་འདུག ཅིའི་ཕྱིར་ཞེ་ན། མི་ཐམས་ཅད་ཀྱིས་ས་སྟེང་དུ་རང་རང་གི་བྱ་སྤྱོད་ངན་པ་སྤེལ་བས་སོ།།
GEN 6:13 དེ་ནས་དཀོན་མཆོག་གིས་ནོ་ཨ་ལ་འདི་སྐད༌དུ། ཤ་ཁྲག་གདོས་བཅས་ཀྱི་མི་དེ་དག་གི་མཇུག་འབྲས་བདག་གི་མདུན་དུ་སླེབས༌ཤིང༌། ས་སྟེང་དུ་དེ་དག་གི་གདུག་རྩུབ་ཀྱིས་བཀང་ཡོད་པའི༌ཕྱིར། ལྟོས༌དང༌། བདག་གིས་དེ་རྣམས་ས་གཞི་དང་མཉམ་དུ་མེད་པར༌བྱའོ།།
GEN 6:14 ཁྱོད་ཀྱིས་རང་ཉིད་ལ་ཐང་ཤིང་གིས་གྲུ་གཟིངས་ཁང་མིག་མང་པོ་ཅན་ཞིག་བཟོ་བར༌གྱིས། གྲུའི་ཕྱི་ནང་གཉིས་ལ་ཐང་ཆུ་བསྐུས༌ཤིག
GEN 6:15 གྲུ་གཟིངས་བཟོ་ཚུལ་ནི་འདི་ལྟ༌སྟེ། རིང་ཐུང་ཁྲུ་སུམ་བརྒྱ༌དང༌། ཞེང་ཚད་ཁྲུ་ལྔ༌བཅུ། མཐོ་ཚད་ཁྲུ་སུམ༌ཅུའོ།།
GEN 6:16 གྲུའི་སྟེང་དུ་དཀར་ཁུང་མཐོ་ཚད་ཁྲུ་གཅིག་ཅན་ཞིག་བཟོ་བར༌གྱིས། གྲུའི་སྒོ་ནི་འགྲམ་དུ་འབྱེད་པར་བྱེད་པ༌དང༌། གྲུ་དེ་རིམ་པ་སྟེང་འོག་བར་གསུམ་དུ་ཕྱེས་ནས་བཟོས༌ཤིག
GEN 6:17 ལྟོས༌དང༌། བདག་གིས་ས་སྟེང་དུ་ཆུ་ལོག་བཏང་ནས་གནམ་འོག་ཐམས་ཅད་མེད་པར་བྱས༌ཏེ། ས་སྟེང་གི་དབུགས་དང་ལྡན་པའི་སྲོག་ལྡན་མཐའ་དག་གཅིག་ཀྱང་མི་ལུས་པར་འཆི་བར༌བྱའོ།།
GEN 6:18 འོན་ཀྱང་བདག་གིས་ཁྱོད་དང་ཁ་ཆད་འཇོག༌སྟེ། ཁྱོད་དང་རང་གི་ཆུང་མ༌དང༌། བུ་དང་མནའ་མ་རྣམས་གྲུ་གཟིངས་ནང་དུ་འཇུག༌དགོས།
GEN 6:19 སྲོག་དང་ལྡན་པ་ཐམས་ཅད་ལས་ཕོ་མོ་ཆ་རེ་བྱས་ནས་ཁྱོད་ཀྱིས་གྲུ་གཟིངས་ནང་དུ་འཇུག་པར༌གྱིས། ཅིའི་ཕྱིར་ཞེ༌ན། དེ་དག་ཁྱོད་དང་མཉམ་དུ་སྲོག་བསྐྱབ་པར་འགྱུར་བའི་ཕྱིར༌རོ།།
GEN 6:20 བྱ་དང་དུད༌འགྲོ། ས་སྟེང་གི་ལྟོ་འགྲོ་དང་འབུ་སྲིན་བཅས་པ་ཆ་རེ་བྱས་ནས་ཐམས་ཅད་རང་རང་གི་རིགས་བཞིན་དུ་སྲོག་སྐྱོབ་པའི༌ཕྱིར་ཁྱོད་ཀྱི་གནས་དེར་ཡོང་ངེས༌ཡིན།
GEN 6:21 ཁྱོད་ཀྱིས་རང་ཉིད་དང་དེ་དག་གི་ཟས་སུ་བཟའ་ཆས་སྣ་ཚོགས་གསོག་པར་གྱིས་ཤིག་ཅེས་གསུངས༌སོ།།
GEN 6:22 དེ་ནས་ནོ་ཨས་ཀྱང་དེ་ལྟར་བྱས་པ༌རེད། དཀོན་མཆོག་གིས་ཇི་ལྟར་བཀའ་གནང་བ་བཞིན་ཁོས་ཀྱང་དོན་ཐམས་ཅད་དེ་ལྟར་བསྒྲུབས༌སོ།།
GEN 7:1 དེ་ནས་ཡང་དཀོན་མཆོག་ཡ་ཝཱེས་ནོ་ཨ་ལ་འདི་སྐད༌དུ། ཁྱོད་དང་ཁྱོད་ཀྱི་ཁྱིམ་མི་ཐམས་ཅད་གྲུ་གཟིངས་ནང་དུ་སོང༌ཞིག རྒྱུ་མཚན་ནི་བདག་གིས་དུས་རབས་འདིར་ཁྱོད་ཁོ་ན་བདག་གི་དྲུང་དུ་མི་གཞུང་དྲང་ཞིག་ཡིན་པ་མཐོང་བའི་ཕྱིར༌རོ།།
GEN 7:2 ཁྱོད་ཀྱིས་དུད་འགྲོ་གཙང་མའི་རིགས་རེ་རེ་ལས་ཕོ་མོ་ཆ་བདུན་རེ༌དང༌། དུད་འགྲོ་མི་གཙང་བའི་རིགས་རེ་རེ་ལས་ཕོ་མོ་ཆ་གཅིག༌རེ།
GEN 7:3 བར་སྣང་དུ་འཕུར་བའི་འདབ་ཆགས་ཀྱི་རིགས་རེ་རེ་ལས་ཕོ་མོ་ཆ་བདུན་རེ་བཅས་ཁྱོད་དང་མཉམ་དུ་ཁྲིད༌ཅིག དེ་ནི་ས་གཞི་ཡོངས་སུ་རིགས་རྒྱུད་ཀྱི་ས་བོན་གསོན་པོར་གནས་པའི་ཕྱིར༌རོ།།
GEN 7:4 རྒྱུ་མཚན་ནི་ད་ནས་ཉིན་བདུན་སོང་བ༌ན། བདག་གིས་ཉིན་ཞག་བཞི་བཅུའི་རིང་ལ་ས་སྟེང་དུ་ཆར་བ་འབབ་ཏུ་བཅུག༌སྟེ། བདག་གིས་བསྐྲུན་པའི་སྲོག་ལྡན་ཐམས་ཅད་ས་སྟེང་ནས་མེད་པར་བཟོ་བའི་ཕྱིར་ཡིན་ཞེས་གསུངས༌སོ།།
GEN 7:5 ནོ་ཨས་ཀྱང་དཀོན་མཆོག་ཡ་ཝཱེས་ཇི་ལྟར་བཀའ་གནང་བ་བཞིན་དུ་བསྒྲུབས༌སོ།།
GEN 7:6 དེ་ནས་ས་སྟེང་དུ་ཆུ་ལོག་བྱུང་བའི་སྐབས་སུ་ནོ་ཨ་དགུང་ལོ་དྲུག་བརྒྱ་ཡིན༌ལ།
GEN 7:7 ནོ་ཨ་དང་རང་གི་ཆུང༌མ། བུ་དང་མནའ་མ་རྣམས་མཉམ་དུ་གྲུ་གཟིངས་ནང་དུ་སོང་ནས་ཆུ་ལོག་ལ་བྱོལ་བར༌བྱས།
GEN 7:8 དཀོན་མཆོག་གིས་ནོ་ཨ་ལ་བཀའ་གནང་བ༌ལྟར། དུད་འགྲོ་གཙང་མི་གཙང༌དང༌། བྱ་རྣམས༌དང༌། ལྟོ་འགྲོ་དང་འབུ་སྲིན་ཐམས་ཅད༌ལས།
GEN 7:9 ཕོ་མོ་ཆ་རེ་ཡོད་པ་ཐམས་ཅད་ནོ་ཨའི་མདུན་དུ་ཡོང་ནས་གྲུ་གཟིངས་ནང་ལ་ཞུགས།
GEN 7:10 དེ་ནས་ཉིན་བདུན་གྱི་རྗེས་སུ་ས་སྟེང་དུ་ཆུ་ལོག་བྱུང༌ངོ༌།།
GEN 7:11 ནོ་ཨ་དགུང་ལོ་དྲུག་བརྒྱ་ལོན་པའི་ཟླ་གཉིས་པའི་ཚེས་བཅུ་བདུན༌ཉིན། རྒྱ་མཚོའི་གཏིང་འོག་གི་ཆུ་མིག་ཐམས་ཅད་བརྡོལ་ཞིང་ནམ་མཁའི་སྒེའུ་ཁུང་ཡང་ཕྱེས་པ་དང༌།
GEN 7:12 ཉིན་ཞག་བཞི་བཅུའི་རིང་ལ་ས་སྟེང་དུ་ཆར་བ་ཆེན་པོ་བབས་པ་རེད།
GEN 7:13 དེ་ཡང་ཉིན་དེ་ལ་ནོ་ཨ་དང་ཁོའི་བུ་ཤེམ༌དང༌། ཧཱམ། ཡ་ཕེད་བཅས༌དང༌། ཁོའི་ཆུང་མ་དང་མནའ་མ་གསུམ་པོ་དང་བཅས་པ་ཐམས་ཅད་གྲུ་གཟིངས་ནང་དུ་སོང༌ངོ༌།།
GEN 7:14 ཁོ་རྣམས༌དང༌། དུད༌འགྲོ། ཕྱུགས༌ཟོག ས་སྟེང་གི་ལྟོ་འགྲོ་དང་འབུ་སྲིན་ཐམས་ཅད༌དང༌། འདབ་ཆགས་ཀྱི་རིགས་སུ་གྱུར་པ་ཐམས་ཅད་རང་རང་གི་རིགས་བཞིན་དུ་ཚང་མ་གྲུ་གཟིངས་ནང་དུ༌སོང༌།
GEN 7:15 དེ་ལྟར་སྲོག་དང་ལྡན་པ་ཐམས་ཅད་ལས་ཆ་རེ་བཞིན་ནོ་ཨའི་མདུན་དུ་ཡོང་ནས་གྲུ་གཟིངས་ནང་ལ་ཞུགས།
GEN 7:16 དཀོན་མཆོག་གིས་ནོ་ཨ་ལ་བཀའ་གནང་བ་བཞིན་སྲོག་ཆགས་ཕོ་མོ་ཆ་རེ་བཞིན་གྲུ་གཟིངས་ནང་དུ་སོང་བ༌དང༌། ཁོང་གིས་ནོ་ཨའི་རྒྱབ་ཏུ་གྲུ་གཟིངས་ཀྱི་སྒོ་བརྒྱབ༌པའོ།།
GEN 7:17 དེ་ཡང་ཉིན་བཞི་བཅུའི་རིང་ལ་ས་སྟེང་དུ་ཆུ་ལོག་བྱུང་སྟེ་ཆུ་རྒྱས་ནས་གྲུ་གཟིངས་ཀྱང་ཡར་བཏེགས༌སོ།།
GEN 7:18 ཆུ་ཤུགས་ཆེན་པོར་གྱུར་ཏེ་ས་སྟེང་དུ་ཆུ་ཆེན་པོ་རྒྱས་པས་གྲུ་གཟིངས་ནི་ཆུའི་ངོས་སུ་ཕར་གཡོ་ཚུར་གཡོ་བྱུང༌ངོ༌།།
GEN 7:19 དེ་ནས་ས་སྟེང་དུ་ཆུ་ཆེར་རྒྱས་པས་གནམ་འོག་གི་རི་མཐོན་པོ་ཐམས་ཅད་བསྣུབས༌ཤིང༌།
GEN 7:20 ཆུ་རྒྱས་པ་ནི་རི་བོ་ལས་ཁྲུ་བཅོ་ལྔས་མཐོ་བས་རི་ལུང་ཐམས་ཅད་བསྣུབས༌སོ།།
GEN 7:21 ས་སྟེང་དུ་ཡོད་པའི་སྲོག་ལྡན༌ཏེ། འདབ་ཆགས༌དང༌། ཕྱུགས༌ཟོག རི༌དྭགས། ལྟོ་འགྲོ་དང་འབུ་སྲིན་དང་མིའི་རིགས་དང་བཅས་པ་ཐམས་ཅད་འཆི་བར་གྱུར༌ཏོ།།
GEN 7:22 དེ་ཡང་སྐམ་སའི་སྟེང་གི་དབུགས་དང་ལྡན་པའི་སྲོག་ལྡན་ཐམས་ཅད་འཆི་བར་གྱུར་པ༌དང༌།
GEN 7:23 གྲུ་གཟིངས་ཀྱི་ནང་དུ་ནོ་ཨ་དང་མཉམ་དུ་ཡོད་པ་དག་ལས༌གཞན། ས་སྟེང་གི་སྲོག་དང་ལྡན་པ༌སྟེ། མིའི་རིགས༌དང༌། དུད་འགྲོ་དང་ལྟོ་འགྲོ་འབུ༌སྲིན། ནམ་མཁའི་བྱ་དང་བཅས་པ་ཐམས་ཅད་ས་སྟེང་ནས་མེད་པར་གྱུར༌ཏོ།།
GEN 7:24 དེ་ལྟར་ས་སྟེང་དུ་ཆུ་ལོག་ཆེན་པོ་རྒྱས་ཏེ་བསྡོམས་པས་ཉིན་བརྒྱ་དང་ལྔ་བཅུ་སོང་ངོ་། །
GEN 8:1 དེ་ཡང་དཀོན་མཆོག་གིས་ནོ་ཨ་དང་ཁོའི་གྲུ་གཟིངས་ནང་གི་སྲོག་ལྡན་ཐམས་ཅད་ཐུགས་ལ་དགོངས༌ཏེ། ས་རུ་རླུང་གཡུག་ཏུ་བཅུག་པས་ཆུ་རིམ་གྱིས་བྲི་བར༌གྱུར།
GEN 8:2 དེ་ནས་རྒྱ་མཚོའི་གཏིང་འོག་གི་ཆུ་མིག་དང་ནམ་མཁའི་དཀར་ཁུང་བཅད་དེ་ཆར་བའང་འབབ་མཚམས་བཞག༌གོ །
GEN 8:3 ས་གཞིའི་སྟེང་དུ་ཆུ་ལོག་བྱུང་བ་ནས་ཉིན་བརྒྱ་དང་ལྔ་བཅུ་འགོར་རྗེས་ཆུ་རིམ་གྱིས༌བྲིའོ།།
GEN 8:4 ཟླ་བདུན་པའི་ཚེས་བཅུ་བདུན་ཉིན༌ལ། གྲུ་གཟིངས་དེ་རི་རྒྱུད་ཨ་ར་རད་ ཅེས་པ་དེའི་སྟེང་དུ་བསྡད་པ༌རེད།
GEN 8:5 ཡང་ཆུ་རིམ་གྱིས་བྲི་ཞིང་ཟླ་བཅུ་པའི་ཚེས་གཅིག་ཉིན༌ལ། རི་རྩེ་གཞན་དག་ཀྱང་ཕྱིར་མངོན་པར་གྱུར༌ཏོ།།
GEN 8:6 དེ་ནས་ཉིན་བཞི་བཅུ་འགོར་བ༌ན། ནོ་ཨས་དེ་སྔར་བཟོས་པའི་གྲུ་གཟིངས་ཀྱི་སྒེའུ་ཁུང་ཕྱེས་ཏེ།
GEN 8:7 བྱ་ཕོ་རོག་ཅིག་ཕྱིར་བཏང་བ༌དང༌། ས་སྟེང་གི་ཆུ་བྲི་བའི་བར་དུ་ཕོ་རོག་ཕར་ཚུར་འཕུར་བསྐྱོད་བྱས་པ༌རེད།
GEN 8:8 ཡང་ཁོས་ཕུག་རོན་ཅིག་ཕྱིར་བཏང་ནས་ཆུ་ས་སྟེང་ནས་བྲི་མིན་ལ་བལྟས༌ཀྱང༌།
GEN 8:9 ས་གཞི་ཡོངས་ལ་ད་དུང་ཆུས་བཀང་ཡོད་པས་ཕུག་རོན་ས་ལ་འབབ་ས་མེད་པར་ཕྱིར་གྲུ་གཟིངས་ཀྱི་ཕྱོགས་སུ་ནོ་ཨའི་རྩར་འཕུར་འོངས་པ༌དང༌། ཁོས་ལག་པ་བརྐྱངས་ནས་ཕུག་རོན་གྲུ་གཟིངས་ཀྱི་ནང་དུ་བླངས༌སོ།།
GEN 8:10 ཡང་ཉིན་བདུན་ལ་བསྒུགས༌རྗེས། ནོ་ཨས་སླར་ཡང་ཕུག་རོན་དེ་གྲུ་ལས་བཏང་བ༌ལ།
GEN 8:11 ས་རུབ་རྗེས་ཕུག་རོན་གྱི་མཆུ་ཏོར་སྐྱུ་རུ་རའི་ལོ་མ་གསར་པ་ཞིག་བཟུང་ནས་ཕྱིར་ཡོང༌བས། ནོ་ཨས་ས་སྟེང་གི་ཆུ་བྲི་སོང་བ་ཤེས༌སོ།།
GEN 8:12 ཡང་ཉིན་བདུན་ལ་བསྒུགས༌རྗེས། ནོ་ཨས་ཕུག་རོན་དེ་གྲུ་ལས་བཏང་བ་ལ་ཕུག་རོན་ཕྱིར་མ་ལོག༌གོ །
GEN 8:13 དེ་ནས་ནོ་ཨ་ལོ་དྲུག་བརྒྱ་དང་གཅིག་ལོན་པའི་ཟླ་དང་པོའི་ཚེས་གཅིག༌ཉིན། ས་སྟེང་གི་ཆུ་ཐམས་ཅད་བྲི༌ཞིང༌། ནོ་ཨས་གྲུ་གཟིངས་ཀྱི་དཀར་ཁུང་ཕྱེས་ནས་བལྟས་པ་ན་ས་ངོས་སྐམ་འདུག་པ༌མཐོང༌།
GEN 8:14 ཟླ་གཉིས་པའི་ཚེས་ཉེར་བདུན༌ཉིན་ས་གཞི་ཡོངས་སུ་སྐམ་པར་གྱུར༌ཏོ།།
GEN 8:15 དེ་ནས་དཀོན་མཆོག་གིས་ནོ་ཨ་ལ་འདི་སྐད༌དུ།
GEN 8:16 ཁྱོད་དང་ཁྱོད་ཀྱི་ཆུང་མ༌དང༌། བུ་དང་མནའ་མ་ཐམས་ཅད་གྲུ་གཟིངས་ལས་བོབས༌དང༌།
GEN 8:17 ཁྱོད་དང་མཉམ་དུ་ཡོད་པའི་སྲོག་ལྡན་ཐམས་ཅད༌དེ། འདབ་ཆགས༌དང༌། དུད༌འགྲོ། ལྟོ་འགྲོ་དང་འབུ་སྲིན་མཐའ་དག་ཕྱི་རོལ་ཏུ་ཁྲིད༌ཅིག ཅིའི་ཕྱིར་ཞེ༌ན། དེ་རྣམས་ས་སྟེང་དུ་ཧ་ཅང་མང་དུ་འབྱུང་བ༌དང༌། རྒྱུད་དང་ལྡན་པར་གྱུར་ནས་མང་པོར་འཕེལ་བར་འགྱུར་བའི་ཕྱིར་ཡིན་ཞེས་གསུངས༌སོ།།
GEN 8:18 དེ་ནས་ནོ་ཨ་དང་ཁོའི་ཆུང་མ༌དང༌། བུ་དང་མནའ་མ་བཅས་ཐམས་ཅད་ཕྱི་རོལ་ཏུ་ཐོན༌ཞིང༌།
GEN 8:19 དུད་འགྲོ་ཐམས་ཅད༌དང༌། ལྟོ་འགྲོ་འབུ༌སྲིན། འདབ༌ཆགས། ས་སྟེང་དུ་རྒྱུ་བའི་སྲོག་ཆགས་ཐམས་ཅད་ཀྱང་རང་རང་གི་རིགས་བཞིན་དུ་གྲུ་གཟིངས་ལས་ཕྱིར་བུད༌དོ།།
GEN 8:20 དེ་ནས་ནོ་ཨས་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས༌ཤིང༌། ཕྱུགས་ཟོག་དང་འདབ་ཆགས་ལས་སྲོག་ལྡན་གཙང་མ་འགའ་ཤས་མཆོད་ཁྲིའི་སྟེང་སྦྱིན་སྲེག་ཏུ་ཕུལ༌ཏོ།།
GEN 8:21 དཀོན་མཆོག་ཡ་ཝཱེས་དྲི་བསུང་ཞིམ་པོ་འཐུལ་འོང་བ་བསྣམས༌ཏེ། ཁོང་གི་ཐུགས༌ལ། མིའི་རིགས་ནི་ལོ་ན་གཞོན་པའི་དུས་ནས་ངན་སེམས་བཅངས་ཡོད༌ནའང༌། དེང་ཕྱིན་བདག་གིས་མིའི་རྐྱེན་ལ་བརྟེན་ནས་ས་གཞིར་དམོད་པ་མི༌བྱའོ། །ད་ལྟ་བྱས་པ་བཞིན་དུ་སྲོག་དང་ལྡན་པ་རྣམས་བརླག་པར་ཡང་མི༌བྱའོ།།
GEN 8:22 ས་གཞི་གནས་པའི་དུས༌སུ། ས་བོན་འདེབས་པ་དང་སྟོན་བསྡུ༌བ། གྲང་ངར་དང་ཚ༌བ། དབྱར་དང༌དགུན། ཉིན་མོ་དང་མཚན་མོའི་རྒྱུན་ནི་ནམ་ཡང་གཅོད་པར་མི་བྱ་བར་དགོངས༌སོ།།
GEN 9:1 དེ་ནས་དཀོན་མཆོག་གིས་ནོ་ཨ་དང་ཁོའི་བུ་རྣམས་ལ་བྱིན་གྱིས་བརླབས་ཏེ་འདི་སྐད༌དུ། ཁྱོད་རྣམས་ཀྱིས་རྒྱུད་དང་ལྡན་པར་གྱུར་ནས་མང་དུ་སྤེལ་ཏེ་ས་གཞིར་གང་བར་གྱིས༌ཤིག
GEN 9:2 བདག་གིས་ས་སྟེང་དུ་རྒྱུ་བའི་དུད་འགྲོ༌དང༌། ནམ་མཁའི༌བྱ། ས་སྟེང་གི་ལྟོ་འགྲོ་དང་འབུ་སྲིན་དང་རྒྱ་མཚོའི་ཉ་ཐམས་ཅད་ཁྱོད་ཅག་ལ་དབང་བར་བྱས༌ཤིང༌། དེ་རྣམས་ཁྱོད་ཅག་ལ་འཇིགས་ཤིང་སྐྲག་པར་གྱུར༌ཅིག
GEN 9:3 སྲོག་ཆགས་ཐམས་ཅད་ཁྱོད་རྣམས་ཀྱིས་ཟས་སུ་བྱོས༌དང༌། འདི་ཐམས་ཅད་ནི་སྔོན་ལ་སྔོ་ཚལ་སྤྲད་པ་བཞིན་དུ་བདག་གིས་ཁྱོད་ཅག་ལ་སྦྱིན་པ་ཡིན༌ནོ།།
GEN 9:4 འོན་ཀྱང་ཤ་ལ་ཁྲག་འདྲེས་པ་ནི་དེ་དག་གི་ཚེ་སྲོག་ཡིན་པས་བཟའ་མི་རུང༌ངོ༌།།
GEN 9:5 ཁྱོད་ཅག་ལ་ཁྲག་བཞུར་བར་བྱེད༌ན། བདག་གིས་དེ་ལས་སྐྱིན་ཚབ་ལེན་པ༌དང༌། གཅན་གཟན་གང་གིས་ཁྱོད་རྣམས་ཀྱི་སྲོག་བཅད༌ན། བདག་གིས་དེ་ལས་སྐྱིན་ཚབ་ལེན་པར༌ངེས། ལག་དམར་སུ་ཡིན་ཡང་དེ་ལས་རང་གི་སྤུན་ཟླའི་ཚེ་སྲོག་གི་སྐྱིན་ཚབ་ཏུ་དེའི་ཚེ་སྲོག་ཀྱང་ལེན་དགོས༌སོ།།
GEN 9:6 ཡང་སུ་ཞིག་གིས་མི་བསད༌ན། ལག་དམར་དེའི་སྲོག་ཀྱང་མི་གཞན་གྱིས་ལེན་དགོས༌སོ། །ཅིའི་ཕྱིར་ཞེ༌ན། དཀོན་མཆོག་གིས་མིའི་རིགས་བསྐྲུན་པ་ནི་རང་གི་སྣང་བརྙན་ལྟར་བསྐྲུན་པའི་ཕྱིར༌རོ།།
GEN 9:7 ཡང་ཁྱོད་རྣམས་ཀྱིས་རྒྱུད་དང་ལྡན་པར་གྱུར་ནས་མང་དུ་སྤེལ་ཏེ་ས་སྟེང་དུ་དར་ཞིང་རྒྱས་པར་གྱིས་ཞེས་གསུངས༌སོ།།
GEN 9:8 དེ་ནས་ཡང་དཀོན་མཆོག་གིས་ནོ་ཨ་དང་ཁོའི་བུ་རྣམས་ལ་འདི་སྐད༌དུ།
GEN 9:9 ལྟོས༌དང༌། བདག་གིས་ཁྱོད་དང་ཁྱོད་ཅག་གི་མི་རབས་ཕྱི་མ་རྣམས་ལ་ཁ་ཆད་འཇོག་པ༌དང༌།
GEN 9:10 ཁྱོད་ཅག་དང་མཉམ་དུ་ཡོད་པའི་སྲོག་ཆགས་ཐམས་ཅད༌དེ། འདབ་ཆགས༌དང༌། ཕྱུགས་ཟོག་དང་རི་དྭགས་ཐམས༌ཅད། གྲུ་གཟིངས་ལས་ཕྱིར་འོངས་པའི་སྲོག་ལྡན་ཐམས་ཅད་ལའང་ཁ་ཆད་འཇོག་པ༌དང༌།
GEN 9:11 བདག་དང་ཁྱོད་རྣམས་ཀྱི་བར་དུ་ཁ་ཆད་འཇོག༌སྟེ། དུས་ད་ནས༌བཟུང༌། སྲོག་དང་ལྡན་པ་ཐམས་ཅད་ཆུ་ལོག་གིས་བསྣུབ་པར་མི་བྱེད་པ༌དང༌། ས་གཞིའང་ཆུ་ལོག་གིས་བསྣུབ་པར་མི་བྱ་ཞེས་གསུངས༌སོ།།
GEN 9:12 ཡང་དཀོན་མཆོག་གིས་འདི་སྐད༌དུ། བདག་གིས་ཁྱོད་དང་ཁྱོད་ཅག་དང་མཉམ་དུ་ཡོད་པའི་སྲོག་ཆགས་ཐམས་ཅད༌དང༌། མི་རབས་ཕྱི་མ་ཐམས་ཅད་ལ་ཁ་ཆད་ཀྱི་རྟགས་ཤིག་བཀོད་ཡོད༌དེ།
GEN 9:13 བདག་གིས་འཇའ་ཚོན་ནི་སྤྲིན་ཕུང་ནང་དུ་བཞག༌ཅིང༌། དེ་ནི་བདག་དང་ས་གཞིའི་བར་དུ་ཁ་ཆད་བཞག་པའི་རྟགས་སུ་བྱས་པ༌ཡིན།
GEN 9:14 ཕྱིས་སུ་སྤྲིན་ཕུང་གིས་ས་གཞི་ཡོངས་སུ་བསྒྲིབས་པའི་དུས༌སུ། བདག་གིས་སྤྲིན་ཕུང་ལས་འཇའ་ཚོན་མཐོང་བར༌འགྱུར།
GEN 9:15 དེས་ན་བདག་གིས་ཁྱོད་ཅག་དང་སྲོག་ལྡན་ཐམས་ཅད་ཀྱི་བར་དུ་བཞག་པའི་ཁ་ཆད་དྲན་པར་འགྱུར་ཞིང་ཆུ་ཡང་བསྐྱར་རྒྱས་ནས་ས་གཞིའི་སྟེང་གི་སྲོག་དང་ལྡན་པ་ཐམས་ཅད་མེད་པར་མི་བྱེད༌དོ།།
GEN 9:16 འཇའ་ཚོན་ནི་སྤྲིན་གྱི་ནང་དུ་འཆར་ངེས་པ་དང་བདག་གིས་དེ་མཐོང་བ༌ན། བདག་གིས་སྲོག་དང་ལྡན་པ་ཐམས་ཅད་ཀྱི་བར་དུ་བཞག་པའི་དུས་གཏན་གྱི་ཁ་ཆད་དེ་དྲན་པར་ངེས་ཞེས་གསུངས༌སོ།།
GEN 9:17 དེ་ནས་ཡང་དཀོན་མཆོག་གིས་ནོ་ཨ་ལ་འདི་སྐད༌དུ། འདི་ནི་བདག་གིས་ས་གཞིའི་སྟེང་གི་སྲོག་དང་ལྡན་པ་ཐམས་ཅད་ལ་ཁ་ཆད་བཞག་པའི་རྟགས་ཡིན་ཞེས་གསུངས༌སོ།།
GEN 9:18 དེ་ནས་གྲུ་གཟིངས་ལས་ཕྱིར་བུད་པའི་ནོ་ཨའི་བུ་ནི་ཤེམ་དང་ཧཱམ་དང་ཡ་ཕེད་གསུམ་ཡིན༌ལ། ཧཱམ་ནི་ཀ་ན་ཨན་གྱི་ཕ་ཡིན༌ནོ།།
GEN 9:19 འདི་གསུམ་པོ་ནི་ནོ་ཨའི་བུ་ཡིན༌ལ། ཁོ་ཚོའི་རིགས་རྒྱུད་ས་གཞི་ཡོངས་སུ་ཁྱབ་པ་ཡིན༌ནོ།།
GEN 9:20 དེ་ཡང་ནོ་ཨ་ཡིས་ཞིང་ལས་བྱེད་འགོ་བརྩམས༌ཏེ། ཁོས་རྒུན་འབྲུམ་ར་བ་ཞིག༌བཙུགས།
GEN 9:21 ཁོས་རྒུན་ཆང་བཏུང་བ་དང་བཟི་བར་གྱུར་ཏེ་སྦྲ་གུར་ནང་དུ་ལུས་གཅེར་བུར་བསྡད་པ༌ལ།
GEN 9:22 ཀ་ན་ཨན་གྱི་ཕ་ཧཱམ་གྱིས་ཁོའི་ཕ་ལུས་གཅེར་བུར་སྡོད་པ་མཐོང༌སྟེ། ཕྱི་རུ་སོང་ནས་ཁོའི་སྤུན་གཉིས་ལ་སྨྲས་པ༌རེད།
GEN 9:23 དེ་ནས་ཤེམ་དང་ཡ་ཕེད་གཉིས་ཀྱིས་རང་གི་ཕྲག་པར་གྱོན་གོས་བཀལ་ནས་ཕྱི་ནུར་གྱིས་གུར་ནང་དུ་སོང་སྟེ་ཕ་ཡི་ལུས་ལ་བཀབ༌བོ། །སྐབས་དེར་ཁོ་གཉིས་ཀྱིས་ཁ་རྒྱབ་ལ་གཏད་དེ་ཕྱི་ནུར་བྱས་ནས་སོང་ཞིང་དེ་ནི་ཕ་གཅེར་བུ་ཡིན་པ་མི་མཐོང་བའི་ཕྱིར༌རོ།།
GEN 9:24 དེ་ནས་ནོ་ཨ་བཟི་དྭངས་པར་གྱུར་པ༌དང༌། བུ་ཆུང་བ་ཧཱམ་གྱིས་ཁོ་ལ་ལས་ཅི་བྱས་པ་ཤེས༌ཏེ།
GEN 9:25 ཁོ་ན༌རེ། ཀ་ན་ཨན་ལ་དམོད་པ་འཕོག་ཅིང་ཁོའི་སྤུན་གྱི་གཡོག་པོ་རྣམས་ཀྱི་གཡོག་པོ་བྱེད་པར་གྱུར་ཅིག་ཅེས་སྨྲས༌སོ།།
GEN 9:26 ཡང་ཁོ་ན༌རེ། ཤེམ་གྱི་དཀོན་མཆོག་ཡ་ཝཱེ་ལ་བསྟོད་ཅིང་བསྔགས་པར༌གྱིས། ཀ་ན་ཨན་ནི་ཁོའི་གཡོག་པོར་འགྱུར་བར༌སྨོན།
GEN 9:27 དཀོན་མཆོག་གིས་ཡ་ཕེད་ཀྱི་རིགས་རྒྱུད་དར་ཞིང་རྒྱས་པར་མཛོད༌ཅིག ཡ་ཕེད་ནི་ཤེམ་གྱི་སྦྲ་གུར་ནང་དུ་སྡོད་པར་གྱུར༌ཅིག ཡང་ཀ་ན་ཨན་ནི་ཡ་ཕེད་ཀྱི་གཡོག་པོར་གྱུར་ཅིག་ཅེས་སྨྲས༌སོ།།
GEN 9:28 ཆུ་ལོག་བྱུང་བའི་རྗེས༌སུ། ནོ་ཨ་ཡང་ལོ་སུམ་བརྒྱ་དང་ལྔ་བཅུར་བཞུགས་པ༌རེད།
GEN 9:29 ནོ་ཨ་བསྡོམས་པས་ལོ་དགུ་བརྒྱ་དང་ལྔ་བཅུར་བཞུགས་རྗེས་ཚེ་ལས་འདས༌སོ།།
GEN 10:1 དེ་ཡང་ཆུ་ལོག་བྱུང་བའི་རྗེས་སུ་ནོ་ཨའི་བུ་ཤེམ་དང་ཧཱམ་དང་ཡ་ཕེད་བཅས་ལའང་བུ་སྐྱེས༌སོ། །ནོ་ཨའི་བུ་སོ་སོའི་རིགས་རྒྱུད་རྣམས་ནི་འདི་ལྟ༌སྟེ།
GEN 10:2 ཡ་ཕེད་ཀྱི་བུ་རྣམས་ནི་གོ་མེར༌དང༌། མ༌གཱོག མཱ་ཏི། ཡཱ༌ཝན། ཐུ༌བཱལ། མེ༌ཤེག ཐི་རཱ་བཅས༌སོ།།
GEN 10:3 གོ་མེར་གྱི་བུ་རྣམས་ནི་ཨ་ཤ་ཀེ་ནཱ༌དང༌། རི༌ཕད། ཐོ་གར་མཱ་བཅས༌སོ།།
GEN 10:4 ཡཱ་ཝན་གྱི་བུ་རྣམས་ནི་ཨི་ལི་ཤཱ༌དང༌། ཐཱར༌ཞིས། ཀི༌ཐིམ། དོའུ་དཱ་ནིམ་བཅས༌སོ།།
GEN 10:5 དེ་རྣམས་ལས་མཚོ་འགྲམ་དུ་སྡོད་པའི་མི་རིགས་དེ་དག་ནི་སོ་སོའི་སྐད་རིགས༌དང༌། ཁྱིམ༌རྒྱུད། རྒྱལ་ཕྲན་ལྟར་རང་རང་གི་ཡུལ་དུ་དར་བར་གྱུར༌ཏོ།།
GEN 10:6 ཧཱམ་གྱི་བུ་རྣམས་ནི་གུ་ཤ༌དང༌། མུས་རཱ༌ཡིམ ། ཕུ༌ཏཱ། ཀ་ན་ཨན་བཅས༌སོ།།
GEN 10:7 གུ་ཤ་ཡི་བུ་རྣམས་ནི་སེ་བཱ༌དང༌། ཧ་བེ༌ལཱ། སཱབ༌ཐ། རཱ་ཨེ༌མཱ། སཱབ་ཐེ་ཀཱ་བཅས༌སོ། །རཱ་ཨེ་མཱའི་བུ་ནི་ཤེ་བཱ་དང་དི་དན་ཞེས་བྱ༌བའོ།།
GEN 10:8 དེ་ནས་གུ་ཤ་ཞེས་པ་ལས་ནིམ་རོད་མཆེད་ཅིང༌། དེ་ནི་འཇིག་རྟེན་གྱི་དཔའ་རྒོད་ཐོག༌མའོ།།
GEN 10:9 ཁོ་ནི་དཀོན་མཆོག་ཡ་ཝཱེའི་དྲུང་དུ་རྔོན་པ་དཔའ་བོ་ཞིག་ཡིན༌པས། ཁ་དཔེ༌ལ། དཀོན་མཆོག་ཡ་ཝཱེ་དྲུང་གི་རྔོན་པ་དཔའ་བོ་ནིམ་རོད་དང་འདྲ་བ་ཡིན་ཞེས་བརྗོད༌དོ།།
GEN 10:10 ནིམ་རོད་ཀྱི་རྒྱལ་སྲིད་ཐོག་མ་ནི་ཤིན་ཨར་ཡུལ་གྱི་པཱ་པེལ༌དང༌། ཨེ༌རེགས། ཨ༌ཁཱད། ཀལ་ནེ་བཅས༌ཡིན།
GEN 10:11 ཁོ་རང་གནས་དེ་ནས་ཨ་སུར་ཡུལ་དུ་སོང༌སྟེ། ནིན་ཝེ༌དང༌། རེའེ་ཧོ་པེད༌ཨིར། ཀ་ལཱ་བཅས་བཞེངས་པ༌དང༌།
GEN 10:12 ནིན་ཝེ་དང་ཀ་ལཱ་གཉིས་བར་དུ་གྲོང་ཁྱེར་ཆེན་པོ་ཞིག་བཞེངས་པ་ནི་རེའེ་སཱན་ཞེས་པ་དེ་ཡིན༌ནོ།།
GEN 10:13 དེ་ནས་མུས་རཱ་ཡིམ་ལས་ལུ་དཱ་པ༌དང༌། ཨ་ནཱམ༌པ། ལེ་ཧ༌པ། ནཱབ་ཐུ༌པ།
GEN 10:14 ཕཱད་རུའུ༌པ། ཀཱ་སི་ལི༌པ། ༼འདི་བརྒྱུད་ནས་ཕེ་ལེ་ཤེད་མི་རིགས༌བྱུང༌།༽ ཀབ་ཐོར་པ་བཅས༌མཆེད་དོ།།
GEN 10:15 དེ་ནས་ཀ་ན་ཨན་ལས་བུ་སྐྱེས་འགོ་ཚི་ཏུན་དང་། ཡང་ཧེད་དང་།
GEN 10:16 ཡེ་བུ་སི་པ། ཨེ་མོར༌པ། གིར་གས༌པ།
GEN 10:17 ཧེ་བི༌པ། ཨར་ཀི༌པ། སི་ནེ༌པ།
GEN 10:18 ཨར་ཝཱ་དིའུ༌པ། ཚཱ་མཱ་རེའེ༌པ། ཧ་མཱད་པ་བཅས་མཆེད་དོ། །ཕྱིས་སུ་ཀ་ན་ཨན་གྱི་རིགས་རྒྱུད་འཐོར་བར་གྱུར༌ཏོ།།
GEN 10:19 ཀ་ན་ཨན་པའི་ས་མཚམས་ནི་ཚི་ཏུན་ནས་གེ་རཱར་གྱི་ཕྱོགས་སུ་འགྲོ་བའི་ལམ་ནས་གཱ་ཟཱ་བར་ཡིན་པ༌དང༌། དེ་ནས་སཱ་དོམ༌དང༌། གཱ་མོ༌ར། ཨད༌མཱ། ཚཱ་བོ་ཡིམ་བཅས་ཀྱི་ཕྱོགས་སུ་འགྲོ་བའི་ལམ་ནས་ལཱ་ཤཱ་ཞེས་པའི་བར་ཡིན༌ནོ།།
GEN 10:20 དེ་དག་ནི་ཧཱམ་གྱི་བུ་རྒྱུད༌དེ། སོ་སོའི་ཁྱིམ་རྒྱུད༌དང༌། སྐད༌རིགས། ཡུལ༌ལུང༌། རྒྱལ་ཕྲན་བཞིན་དུ་ཡིན༌ནོ།།
GEN 10:21 དེ་ཡང་ཡ་ཕེད་ཀྱི་ཕུ་བོ་ཤེམ་ནི་ཨེ་བེར་ཞེས་པའི་རིགས་རྒྱུད་རྣམས་ཀྱི་མེས་པོ་ཡིན༌ལ། ཁོ་ལ་བུ་སྐྱེས༌སོ།།
GEN 10:22 ཤེམ་གྱི་བུ་རྣམས་ནི་ཨེ་ལཱམ༌དང༌། ཨ༌ཤུར། ཨར་པག༌ཤད། ལུ༌ཏི། ཨ་རམ་བཅས༌སོ།།
GEN 10:23 ཨ་རམ་གྱི་བུ་རྣམས་ནི་ཨུ་ཟཱ༌དང༌། ཧུལ། གེ༌ཐེར། མཱ་ཤཱ་བཅས༌སོ།།
GEN 10:24 ཨར་པག་ཤད་ལས་ཤེ་ལཱ་མཆེད་པ་དང༌། ཤེ་ལཱ་ནས་ཨེ་བེར་མཆེད་དོ།།
GEN 10:25 ཨེ་བེར་ལས་བུ་གཉིས་མཆེད་ཅིང། གཅིག་ལ་ཕེ་ལེག་ཅེས་བྱ༌སྟེ། རྒྱུ་མཚན་ནི་དེའི་དུས་སུ་ས་གཞིའི་མི་རྣམས་ཁག་སོ་སོར་གྱེས་པའི་ཕྱིར་རོ། །ཁོའི་ནུ་བོའི་མིང་ལ་ཡོག་ཏན་ཞེས་བྱའོ།།
GEN 10:26 ཡོག་ཏན་ལས་ཨལ་མོ་དཱད༌དང༌། ཤེ་ལཱ༌ཕཱ། ཧ་ཚཱར་མ༌ཝེད། ཡཱ༌ར།
GEN 10:27 ཧ་དོ༌རམ། ཨུ༌ཟཱལ། དིག༌ལཱ།
GEN 10:28 ཨོ༌བཱལ། ཨ་བི་མཱ༌ཨེལ། ཤེ༌བཱ།
GEN 10:29 ཨོ་ཕིར། ཧ་བེ༌ལཱ། ཡོ་བཱབ་བཅས༌མཆེད་ཅིང་། དེ་ཐམས་ཅད་ཡོག་ཏན་གྱི་བུ་རྣམས་སོ།།
GEN 10:30 ཁོ་རྣམས་ཀྱི་སྡོད་གནས་ནི་མེ་ཤཱ་ཡུལ་ནས་སེ་ཕཱར་ཡུལ་གྱི་ཤར་ཕྱོགས་ཀྱི་རི་ཁུལ་བར༌དུའོ།།
GEN 10:31 དེ་དག་ནི་ཤེམ་གྱི་བུ་རྒྱུད༌དེ། སོ་སོའི་ཁྱིམ་རྒྱུད༌དང༌། སྐད༌རིགས། ཡུལ༌ལུང༌། རྒྱལ་ཕྲན་བཞིན་དུ་ཡིན༌ནོ།།
GEN 10:32 དེ་དག་ནི་ནོ་ཨའི་བུ་རྣམས་ཀྱི་རྒྱུད་པ༌སྟེ། སོ་སོའི་རིགས་རྒྱུད་དང་རྒྱལ་ཕྲན་བཞིན་དུ༌ཡིན། ཆུ་ལོག་བྱུང་བའི་རྗེས༌སུ། དེ་རྣམས་ལས་ས་སྟེང་གི་རྒྱལ་ཕྲན་རྣམས་སོ་སོའི་གནས་སུ་དར་བར་གྱུར༌ཏོ།།
GEN 11:1 དེ་ཡང་སྐབས་དེར་ས་སྟེང་གི་མི་ཀུན་གྱི་སྐད་དང་བརྗོད་པ་གཅིག་མཚུངས༌ཡིན།
GEN 11:2 མི་དེ་རྣམས་ཤར་ཕྱོགས་སུ་གནས་སྤོར་བའི་དུས༌སུ། ཤིན་ཨར་ཡུལ་གྱི་ཐང་བདེ་མོ་ཞིག་མཐོང་སྟེ་གནས་དེར༌བསྡད།
GEN 11:3 དེ་ནས་ཁོ་རྣམས་ཀྱིས་ཕན་ཚུན་ལ་ན༌རེ། རང་ཅག་གིས་སོ་ཕག་བཟོ་བར༌བྱའོ། །མེར་བསྲེག་པར་བྱའོ་ཞེས་གྲོས་བྱས༌ཤིང༌། མི་དེ་རྣམས་ཀྱིས་སོ་ཕག་བླངས་ཏེ་རྡོ་རུ་བྱས་པ༌དང༌། འཇིམ་པའི་ཚབ་ལ་རྒྱ་སྐྱེགས་བཀོལ་ཏེ་ན༌རེ།
GEN 11:4 ཤོག༌དང༌། རང་ཅག་གི་མཚན་སྙན་གྲགས་རྒྱས་པའི༌ཕྱིར། རང་ཅག་གིས་གྲོང་ཁྱེར་ཞིག་དང་ལྕོག་མཁར་ཞིག་བཟོ་བར༌བྱའོ། །ལྕོག་མཁར་གྱི་རྩེ་མོ་གནམ་ལ་ཟུག་པ་ཞིག་བཟོ་བར༌བྱའོ། །དེ་ལྟར་མ་བྱས༌ཚེ། རང་ཅག་རྣམས་ས་སྟེང་ཀུན་ལ་འཐོར་ཉེན་ཆེ་ཞེས་སྨྲས༌སོ།།
GEN 11:5 དེ་ཡང་འཇིག་རྟེན་མི་ཀུན་གྱིས་གྲོང་ཁྱེར་དང་ལྕོག་མཁར་བཞེང་བཞིན་པ་མཐོང་བའི་ཆེད་དུ་དཀོན་མཆོག་ཡ་ཝཱེ་མར་འཇིག་རྟེན་དུ་ཕེབས༌ཏེ།
GEN 11:6 ཁོང་གིས་འདི་སྐད༌དུ། ལྟོས༌དང༌། དེ་རྣམས་མི་རིགས་གཅིག་ཡིན་ཞིང་སྐད་རིགས་གཅིག་སྨྲ་བ༌དང༌། དེང་སང་དོན་འདི་སྒྲུབ་འགོ་བརྩམས༌ཤིང༌། ཕྱིས་སུ་དེ་དག་གིས་བསྒྲུབ་པར་འགྱུར་བའི་ལས་ལ་མི་འགྲུབ་པ་ཅི་ཡང༌མེད།
GEN 11:7 ངེད་རྣམས་སོང་ནས་དེ་དག་གི་སྐད་ལ་འགྱུར་བ་བྱུང་དུ་བཅུག༌སྟེ། ཕན་ཚུན་བར་གོ་བརྡའང་མི་འཕྲོད་པར་བྱའོ་ཞེས་གསུངས༌སོ།།
GEN 11:8 དེ་ནས་དཀོན་མཆོག་ཡ་ཝཱེས་མི་དེ་རྣམས་ས་སྟེང་ཀུན་ལ་གཏོར་བ༌དང༌། དེ་རྣམས་ཀྱིས་ཀྱང་གྲོང་ཁྱེར་བཟོ་མཚམས་བཞག༌གོ །
GEN 11:9 གྲོང་ཁྱེར་དེའི་མིང་ལ་པཱ་པེལ་ཞེས་ཟེར༌ཏེ། དཀོན་མཆོག་ཡ་ཝཱེས་ས་སྟེང་ཀུན་གྱི་སྐད་རིགས་ཉོག་ཏུ་བཅུག་པ༌དང༌། མི་ཐམས་ཅད་ཀྱང་ས་གཞི་ཡོངས་ལ་འཐོར་བར་མཛད་པའི་ཕྱིར༌རོ།།
GEN 11:10 ཤེམ་གྱི་རིགས་རྒྱུད་ནི་གཤམ་གསལ༌ལྟར། དེ་ཡང་ཆུ་ལོག་བྱུང་བའི་ལོ་གཉིས་ཀྱི་རྗེས༌སུ། ཤེམ་ལོ་བརྒྱ་ལོན་པའི་དུས་ལ་བུ་ཨར་པག་ཤད༌སྐྱེས།
GEN 11:11 ཨར་པག་ཤད་སྐྱེས་པའི་རྗེས༌སུ། ཤེམ་ཡང་ལོ་ལྔ་བརྒྱར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 11:12 ཨར་པག་ཤད་ལོ་སོ་ལྔ་ལོན་པའི་དུས་སུ་བུ་ཤེ་ལཱ༌སྐྱེས།
GEN 11:13 ཤེ་ལཱ་སྐྱེས་པའི་རྗེས་སུ་ཨར་པག་ཤད་ཡང་ལོ་བཞི་བརྒྱ་དང་གསུམ་ལ་བཞུགས་ཏེ་བུ་དང་བུ་མོ་གཞན་དག་ཀྱང་བསྐྱངས༌སོ།།
GEN 11:14 ཤེ་ལཱ་ལོ་སུམ་ཅུ་ལོན་པའི་དུས་སུ་བུ་ཨེ་བེར༌སྐྱེས།
GEN 11:15 ཨེ་བེར་སྐྱེས་པའི་རྗེས་སུ་ཤེ་ལཱ་ཡང་ལོ་བཞི་བརྒྱ་དང་གསུམ་ལ་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 11:16 ཨེ་བེར་ལོ་སོ་བཞི་ལོན་པའི་དུས་སུ་བུ་ཕེ་ལེག༌སྐྱེས།
GEN 11:17 ཕེ་ལེག་སྐྱེས་པའི་རྗེས་སུ་ཨེ་བེར་ཡང་ལོ་བཞི་བརྒྱ་དང་སུམ་ཅུ་ལ་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 11:18 ཕེ་ལེག་ལོ་སུམ་ཅུ་ལོན་པའི་དུས་སུ་བུ་རེའེ་ཨུ༌སྐྱེས།
GEN 11:19 རེའེ་ཨུ་སྐྱེས་པའི་རྗེས་སུ་ཕེ་ལེག་ཡང་ལོ་ཉིས་བརྒྱ་དང་དགུ་ལ་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 11:20 རེའེ་ཨུ་ལོ་སུམ་ཅུ་སོ་གཉིས་ལོན་པའི་དུས་སུ་བུ་སེ་རུག༌སྐྱེས།
GEN 11:21 སེ་རུག་སྐྱེས་པའི་རྗེས་སུ་རེའེ་ཨུ་ཡང་ལོ་ཉིས་བརྒྱ་དང་བདུན་ལ་བཞུགས་ཏེ་བུ་དང་བུ་མོ་གཞན་དག་ཀྱང་བསྐྱངས༌སོ།།
GEN 11:22 སེ་རུག་ལོ་སུམ་ཅུ་ལོན་པའི་དུས་སུ་བུ་ནཱ་ཧོར༌སྐྱེས།
GEN 11:23 ནཱ་ཧོར་སྐྱེས་པའི་རྗེས་སུ་སེ་རུག་ཡང་ལོ་ཉིས་བརྒྱར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 11:24 ནཱ་ཧོར་ལོ་ཉེར་དགུ་ལོན་པའི་དུས་སུ་བུ་ཐ་རཱ༌སྐྱེས།
GEN 11:25 ཐ་རཱ་སྐྱེས་པའི་རྗེས་སུ་ནཱ་ཧོར་ཡང་ལོ་བརྒྱ་དང་བཅུ་དགུར་བཞུགས་ཏེ་བུ་དང་བུ་མོ་གཞན་རྣམས་ཀྱང་བསྐྱངས༌སོ།།
GEN 11:26 ཐ་རཱ་ལོ་བདུན་ཅུ་ལོན་པའི་དུས་སུ་བུ་ཨབ་རམ༌དང༌། ནཱ་ཧོར༌དང༌། ཧཱ་རན་བཅས་སྐྱེས༌སོ།།
GEN 11:27 ཐ་རཱའི་རིགས་རྒྱུད་རྣམས་གཤམ་དུ་བཀོད་པ་འདི་ལྟ༌སྟེ། ཐ་རཱ་ལ་བུ་ཨབ་རམ༌དང༌། ནཱ་ཧོར༌དང༌། ཧཱ་རན་བཅས་སྐྱེས༌ཤིང༌། ཧཱ་རན་ལ་བུ་ལོད་ཐུ༌སྐྱེས།
GEN 11:28 ཧཱ་རན་ནི་ཁོའི་ཕ་སྟེ་ཐ་རཱ་འཇིག་རྟེན་དུ་བཞུགས་དུས་ཚེ་ལས་འདས༌སོ། །གང་དུ་ཞེ༌ན། ཀལ་དི་ཡུལ་དུ་ཡོད་པའི་རང་གི་ཕ་ཡུལ་ཨུར་གྲོང་ཁྱེར་ནས་ཤི༌བའོ།།
GEN 11:29 ཨབ་རམ་དང་ནཱ་ཧོར་གཉིས་ཀྱིས་ཆུང་མ་བླངས༌ཤིང༌། ཨབ་རམ་གྱི་ཆུང་མའི་མིང་ལ་སཱ་ར་ཡུ་ཞེས་ཟེར་བ༌དང༌། ནཱ་ཧོར་གྱི་ཆུང་མའི་མིང་ལ་མིལ་ཀཱ་ཞེས་འབོད༌དོ། །ཁོ་མོ་ནི་ཧཱ་རན་གྱི་བུ་མོ་ཡིན་ཞིང་ཧཱ་རན་ནི་མིལ་ཀཱ་དང་ཡེས་ཀཱ་ཞེས་བྱ་བའི་ཕ་ཡིན༌ནོ།།
GEN 11:30 སཱ་ར་ཡུ་ནི་མོ་གཤམ་ཡིན་པས་བུ་མ་བྱུང༌ངོ༌།།
GEN 11:31 དེ་ནས་ཐ་རཱ་ཡིས་རང་གི་བུ་ཨབ་རམ་དང་རང་གི་ཚ་བོ་སྟེ་ཧཱ་རན་གྱི་བུ་ལོད་ཐུ༌དང༌། གཞན༌ཡང༌། བུ་ཨབ་རམ་གྱི་ཆུང་མ་སཱ་ར་ཡུ་བཅས་ཁྲིད༌དེ། ཀལ་དི་ཡུལ་དུ་ཡོད་པའི་ཨུར་ནས་ཀ་ན་ཨན་ཡུལ་དུ་འགྲོ་བའི་ལམ་ལ༌ཆས། འོན་ཀྱང་ཁོ་རྣམས་ཧཱ་རན་གྲོང་ཁྱེར་དུ་ཕྱིན་ཏེ་བསྡད༌དོ།།
GEN 11:32 ཐ་རཱ་བསྡོམས་པས་ལོ་ཉིས་བརྒྱ་དང་ལྔ་ལ་བཞུགས་ཏེ་ཧཱ་རན་གྲོང་ཁྱེར་དུ་ཚེ་ལས་འདས༌སོ།།
GEN 12:1 དེ་ནས་དཀོན་མཆོག་ཡ་ཝཱེས་ཨབ་རམ་ལ་འདི་སྐད༌དུ། ཁྱོད་ནི་རང་གི་ཕ་ཡུལ་དང་ཉེ༌འབྲེལ། ཕ་གཞིས་བཅས་དང་ཁ་བྲལ་ནས་བདག་གིས་ཁྱོད་ལ་སྟོན་པར་འགྱུར་བའི་ཡུལ་དེར་སོང༌ཞིག
GEN 12:2 བདག་གིས་ཁྱོད་རྒྱལ་ཁབ་ཆེན་པོར་འགྱུར་བར་བྱེད་པ༌དང༌། བདག་གིས་ཁྱོད་ལ་བྱིན་གྱིས་བརླབས་ཏེ་ཁྱོད་སྙན་གྲགས་དང་ལྡན་པར་བྱེད༌པས། ཁྱོད་ཀྱིས་ཀྱང་མི་གཞན་ལ་བདེ་སྐྱིད་བསྐྲུན་ངེས༌ཡིན།
GEN 12:3 ཁྱོད་ལ་བདེ་བ་སྐྲུན་མཁན་གང་ཞིག་ལ་བདག་གིས་ཀྱང་བྱིན་རླབས་གནང་བར༌བྱའོ། །ཁྱོད་ལ་སྡིགས་དམོད་བྱེད་མཁན་གང་ཞིག་ལ་བདག་གིས་ཀྱང་སྡིགས་དམོད༌བྱའོ། །ཡང་ས་སྟེང་གི་མི་རིགས་ཐམས་ཅད་ལ་ཁྱོད་རང་བརྒྱུད་ནས་བྱིན་རླབས་འཐོབ་པར་འགྱུར་ཞེས་གསུངས༌སོ།།
GEN 12:4 དེ་ནས་ཨབ་རམ་ནི་དཀོན་མཆོག་ཡ་ཝཱེའི་བཀའ་ལྟར་ཕར་ཕྱིན༌ཅིང༌། ལོད་ཐུའང་ཨབ་རམ་དང་མཉམ་དུ་སོང༌ངོ༌། །ཨབ་རམ་ཞེས་བྱ་བ་ཧཱ་རན་གྲོང་ཁྱེར་ནས་འགྲོ་དུས་དགུང་ལོ་བདུན་ཅུ་དོན་ལྔ་ཡིན༌ནོ།།
GEN 12:5 ཨབ་རམ་གྱིས་ཁོང་གི་ཆུང་མ་སཱ་ར་ཡུ་དང་ཚ་བོ་ལོད་ཐུ་ཁྲིད༌དེ། ཁོ་རྣམས་ཀྱིས་ཧཱ་རན་དུ་བསགས་པའི་རྒྱུ་ནོར་ཁྱེར་ནས་མི་རྣམས་དང་བཅས་པ་ཀ་ན་ཨན་ཡུལ་དུ་ཆས་ཤིང་དེ་རུ་སླེབས༌སོ།།
GEN 12:6 ཨབ་རམ་ཡུལ་དེ་བརྒྱུད་ནས་སི་ཀེམ་ཡུལ་གྱི་མོར་རེའེ་ཡི་བེ་ཤིང་རྩར་སླེབས་པ༌དང༌། དུས་དེར་ཀ་ན་ཨན་གྱི་མི་རྣམས་ཀྱང་ཡུལ་དེར་བསྡད་ཡོད༌དོ།།
GEN 12:7 དེ་ནས་དཀོན་མཆོག་ཡ་ཝཱེས་ཨབ་རམ་ལ་མངོན་པར་མཛད་དེ་འདི་སྐད༌དུ། བདག་གིས་ཡུལ་འདི་ཁྱོད་ཀྱི་རིགས་རྒྱུད་ཕྱི་མ་རྣམས་ལ་སྦྱིན་པར་བྱའོ་ཞེས་གསུངས༌པས། ཨབ་རམ་གྱིས་ཡུལ་དེ་ནས་རང་ལ་མངོན་པར་མཛད་པའི་དཀོན་མཆོག་ཡ་ཝཱེ་ལ་མཆོད་ཁྲི་ཞིག༌བཞེངས།
GEN 12:8 ཡང་ཨབ་རམ་ཡུལ་དེ་ནས་པེད་ཨེལ་གྱི་ཤར་ཕྱོགས་སུ་ཡོད་པའི་རི་བོའི་གནས་སུ་སྤར་ཏེ་སྦྲ་གུར་ཕུབ་པར་མཛད༌དོ། །ཡུལ་དེའི་ནུབ་ཕྱོགས་ནི་པེད་ཨེལ་དང་ཤར་ཕྱོགས་ནི་ཨེ་ཡུ་གཉིས༌སོ། །ཡང་ཁོང་གིས་ཡུལ་དེ་ནས་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་ཏེ་ཁོང་གི་མཚན་ལ་ཞུ་བ༌ཞུས།
GEN 12:9 ཕྱིས་སུ་ཨབ་རམ་ཡང་རིམ་གྱིས་ནེ་གུབ་ཡུལ་ཕྱོགས་སུ་གནས་སྤར༌ཏོ།།
GEN 12:10 དེ་ཡང་ཀ་ན་ཨན་ཡུལ་དུ་མུ་གེ་ཤིན་ཏུ་ཆེན་པོ་བྱུང༌བས། ཨབ་རམ་འཁོར་དང་བཅས་པ་གནས་སྐབས་སུ་སྡོད་པའི་ཕྱིར་མར་ཨེ་ཅིབ་ཡུལ་དུ་སོང་བ༌དང༌།
GEN 12:11 ཨེ་ཅིབ་ཡུལ་དུ་སླེབས་ལ་ཉེ་བ༌ན། ཁོས་རང་གི་ཆུང་མ་སཱ་ར་ཡུ་ལ་འདི༌ལྟར། ཉོན༌དང༌། བདག་གིས་ཁྱོད་ནི་མཛེས་ཤིང་སྡུག་པའི་བུད་མེད་ཅིག་ཡིན་པ་ཤེས༌སོ།།
GEN 12:12 ཨེ་ཅིབ་ཀྱི་མི་རྣམས་ཀྱིས་ཁྱོད་རང་མཐོང་བ༌ན། འདི་ནི་ཁོའི་ཆུང་མ་ཡིན་ཞེས་སྨྲ་ངེས༌ཤིང༌། དེ་དག་གིས་ང་རང་གསོད་པར་འགྱུར་ཡང་ཁྱོད་ནི་གསོན་པར་བྱེད༌དོ།།
GEN 12:13 དེའི༌ཕྱིར། ཁྱོད་ནི་བདག་གི་སྲིང་མོ་ཡིན་ཞེས་སྨྲ་བར༌མཛོད། ཅིའི་ཕྱིར་ཞེ༌ན། ང་རང་ཁྱོད་ལ་བརྟེན་ནས་བདེ་བར་གནས༌ཤིང༌། ངའི་ཚེ་སྲོག་ཀྱང་ཁྱོད་ལ་བརྟེན་ནས་གསོན་ཐུབ་པའི་ཕྱིར་ཡིན་ཞེས་སྨྲས༌སོ།།
GEN 12:14 དེ་ནས་ཨབ་རམ་འཁོར་དང་བཅས་པ་ཨེ་ཅིབ་ཡུལ་དུ་སླེབས་པ༌དང༌། ཨེ་ཅིབ་ཀྱི་མི་རྣམས་ཀྱིས་བུད་མེད་དེ་ཤིན་ཏུ་མཛེས་པར་མཐོང༌ཞིང༌།
GEN 12:15 རྒྱལ་པོ་ཕཱར་ཨོལ་གྱི་བློན་ཆེན་རྣམས་ཀྱིས་བུད་མེད་མཛེས་མ་དེ་མཐོང་ཞིང་ཁོའི་མདུན་དུ་བསྟོད་བསྔགས་བྱས༌པས། བུད་མེད་དེའང་རྒྱལ་པོའི་ཕོ་བྲང་དུ་ཁྲིད༌དོ།།
GEN 12:16 རྒྱལ་པོས་བུད་མེད་དེའི་དབང་གིས་ཨབ་རམ་ལ་སྣེ་ལེན་རྒྱ་ཆེན་པོ་མཛད༌ཅིང༌། ཁོང་ལ་ར་ལུག༌དང༌། བ༌གླང༌། རྔ༌མོང༌། བོང༌གསེབ། བོང༌མ། གཡོག་པོ་དང་གཡོག་མོ་རྣམས་ཀྱང་ཐོབ༌བོ།།
GEN 12:17 དེ་ནས་དཀོན་མཆོག་ཡ་ཝཱེས་ཨབ་རམ་གྱི་ཆུང་མ་སཱ་ར་ཡུའི་དོན་རྐྱེན་གྱི་དབང་གིས་ཕཱར་ཨོལ་དང་ཁོའི་ཁྱིམ་མི་ཡོངས་ལ་སྡུག་བསྔལ་ཆེན་པོ་ཕོག་པར་མཛད༌ཅིང༌།
GEN 12:18 ཕཱར་ཨོལ་གྱིས་ཨབ་རམ་བོས་ཏེ་ན༌རེ། ཁྱོད་ཀྱིས་བདག་ལ་ཅི་བྱས༌སམ། བུད་མེད་དེ་ཁྱོད་ཀྱི་ཆུང་མ་ཡིན་ཞེས་མི་སྨྲ་བའི་རྒྱུ་མཚན༌ཅི།
GEN 12:19 བུད་མེད་དེ་ཁྱོད་ཀྱི་སྲིང་མོ་ཡིན་ཞེས་སྨྲས༌ཏེ། ཁོ་མོ་བདག་གི་ཆུང་མར་ལེན་དུ་འཇུག་དོན༌ཅི། ད་ལྟ་ཁྱོད་ཀྱི་ཆུང་མ་འདི་རུ་ཡོད་པས་ཁྱོད་ཀྱིས་ཕྱིར་ཁྲིད་ཅིག་ཅེས་སྨྲས༌སོ།།
GEN 12:20 དེ་ནས་ཕཱར་ཨོལ་གྱིས་རང་གི་མི་རྣམས་ལ་བཀའ་བསྒོས༌ཏེ། ཨབ་རམ་དང་ཁོའི་ཆུང༌མ། ད་དུང་ཁོ་ལ་དབང་བ་ཐམས་ཅད་ཀྱང་ཕྱིར་བསྐྱལ༌ཏོ།།
GEN 13:1 དེ་ནས་ཨབ་རམ་གྱིས་ཁོའི་ཆུང་མ་དང་ལོད་ཐུ༌དང༌། རང་ལ་དབང་བ་ཐམས་ཅད་ཁྱེར༌ཏེ། ཨེ་ཅིབ་ཡུལ་ནས་ཡར་ནེ་གུབ་ཡུལ་དུ་ཕྱིན་པ༌དང༌།
GEN 13:2 ཨབ་རམ་ལ་གསེར་དང་དངུལ་དང་ཕྱུགས་ཟོག་ཤིན་ཏུ་མང་པོ་མཆིས༌སོ།།
GEN 13:3 དེ་ནས་ཨབ་རམ་དང་བཅས་པ་ནེ་གུབ་ཡུལ་ནས་རིམ་གྱིས་པེད་ཨེལ་གྱི་ཕྱོགས་སུ་སོང༌སྟེ། པེད་ཨེལ་དང་ཨེ་ཡུ་གཉིས་ཀྱི་བར་དུ་སླེབས་སོ། །དེ་ནི་སྔོན་ཆད་ཁོ་རྣམས་ཀྱིས་སྦྲ་གུར་ཕུབ་པའི་གནས་དེ་ཡིན༌ལ།
GEN 13:4 ཁོང་གིས་ཐོག་མར་མཆོད་ཁྲི་བཞེངས་པའི་གནས་དེའང་ཡིན༌ནོ། །ཁོང་གིས་གནས་དེ་རུ་དཀོན་མཆོག་ཡ་ཝཱེའི་མཚན་ནས་བོས༌པའོ།།
GEN 13:5 ཨབ་རམ་དང་མཉམ་དུ་སོང་བའི་ལོད་ཐུ་ལའང་བ་ཁྱུ༌དང༌། ར་ལུག་གི་ཁྱུ༌དང༌། སྦྲ་གུར་བཅས་ལྡན༌ནོ།།
GEN 13:6 ཁོ་རྣམས་ལ་རྒྱུ་ནོར་དེ་འདྲ་མང་པོ་ཡོད་པས་ཡུལ་དེར་ཁོ་རྣམས་མ་ཤོང་བ་དང་ལྷན་དུའང་སྡོད་མ་ནུས༌པར།
GEN 13:7 ཨབ་རམ་གྱི་རྫི་བོ་དང་ལོད་ཐུའི་རྫི་བོ་རྣམས་ཀྱི་བར་དུ་འཁྲུག་རྩོད་བྱུང་བ༌རེད། དུས༌དེར། ཀ་ན་ཨན་མི་རིགས་དང་ཕེ་རེ་ཟི་མི་རིགས་ཀྱང་གནས་དེར་བསྡད་ཡོད༌དོ།།
GEN 13:8 དེ་ནས་ཨབ་རམ་གྱིས་ལོད་ཐུ་ལ་འདི་སྐད༌དུ། ངེད་གཉིས་འཁྲུག་རྩོད་བྱ་མི་འོས༌ལ། ཁྱོད་ཀྱི་རྫི་བོ་དང་བདག་གི་རྫི་བོ་གཉིས་ཀྱང་རྩོད་མི་འོས༌སོ། །ཅིའི་ཕྱིར་ཞེ༌ན། རང་ཅག་ནི་སྤུན་མཆེད་ཡིན་པའི་ཕྱིར༌རོ།།
GEN 13:9 ས་གཞི་ཐམས་ཅད་ཁྱོད་ཀྱི་མིག་མདུན་དུ་ཡོད་པ་མ་ཡིན༌ནམ། ཁྱོད་བདག་དང་ཁ་འབྲལ་བར༌གྱིས། ཁྱོད་རང་གཡོན་ཕྱོགས་སུ་སོང༌ན། ང་རང་གཡས་ཕྱོགས་སུ༌འགྲོའོ། །ཁྱོད་རང་གཡས་ཕྱོགས་སུ་སོང༌ན། ང་རང་གཡོན་ཕྱོགས་སུ་འགྲོ་བར་བྱའོ་ཞེས་སྨྲས༌སོ།།
GEN 13:10 དེ་ནས་ལོད་ཐུས་མགོ་ཡར་བཀྱགས་ཏེ་ཡོར་དན་གཙང་པོའི་ཡུལ་འཁོར་ཐམས་ཅད་ལ་བལྟས་པ༌ན། ས་ཆ་ཡོངས་སུ་ཆུ་ཤིན་ཏུ་མང་བ༌མཐོང༌། ཡུལ་དེ་ནི་ཚོ་ཨར་གྱི་བར་དུ་དཀོན་མཆོག་ཡ་ཝཱེས་སཱ་དོམ་དང་གཱ་མོ་ར་གཉིས་འཇོམས་པར་མ་མཛད་སྔོན་གྱི་དཀོན་མཆོག་ཡ་ཝཱེའི་ལྡུམ་ར་དང་འདྲ༌ཞིང༌། ཨེ་ཅིབ་ཀྱི་ཡུལ་དང་མཚུངས༌པས།
GEN 13:11 ལོད་ཐུ་ཡིས་ཡོར་དན་གཙང་པོའི་ཡུལ་འཁོར་ཐམས་ཅད་བདམས༌ཏེ། ཤར་ཕྱོགས་སུ་གནས་སྤར་བ་དང་ཁོ་རྣམས་ཕན་ཚུན་ཁ་གྱེས་པ༌རེད།
GEN 13:12 དེ་ནས་ཨབ་རམ་ཞེས་བྱ་བ་ཀ་ན་ཨན་ཡུལ་དུ་བསྡད་པ༌དང༌། ལོད་ཐུ་ཡུལ་འཁོར་གྱི་གྲོང་ཁྱེར་རྣམས་སུ་བསྡད༌ཅིང༌། ཡང་རིམ་གྱིས་སྦྲ་གུར་རྣམས་སཱ་དོམ་བར་དུ་གནས་སྤར༌ཏོ།།
GEN 13:13 དེ་ཡང་སཱ་དོམ་གྱི་མི་རྣམས་ངན་པ་ཤ་སྟག་ཡིན༌ཞིང༌། དཀོན་མཆོག་ཡ་ཝཱེའི་སྤྱན་སྔར་སྡིག་པ་ཚབས་ཆེན་བྱེད༌དོ།།
GEN 13:14 དེ་ནས་ལོད་ཐུ་ཞེས་བྱ་བ་ཨབ་རམ་དང་ཁ་གྱེས༌རྗེས། དཀོན་མཆོག་ཡ་ཝཱེས་ཨབ་རམ་ལ་འདི་སྐད༌དུ། ཁྱོད་ཀྱིས་རང་གི་གནས་ཡུལ་ནས་མགོ་ཡར་བཀྱགས་ཏེ་ཤར་ལྷོ་ནུབ་བྱང་གི་ཕྱོགས་སུ་ལྟོས༌དང༌།
GEN 13:15 ཁྱོད་ཀྱི་མིག་གིས་མཐོང་ཚད་ཐམས་ཅད་བདག་གིས་ཁྱོད་དང་ཁྱོད་ཀྱི་བུ་རྒྱུད་ལ་གཏན་དུ་སྦྱིན་པར་འགྱུར༌རོ།།
GEN 13:16 བདག་གིས་ཁྱོད་ཀྱི་རིགས་རྒྱུད་རྣམས་རྡུལ་གྲངས་དང་མཉམ་པར་བྱ་ངེས༌ཡིན། སུ་ཞིག་གིས་ས་ཡི་རྡུལ་གྲངས་ལ་རྩིས་ལེན་ཐུབ༌ན། ད་གཟོད་ཁྱོད་ཀྱི་རིགས་རྒྱུད་ལའང་རྩིས་ལེན་ནུས༌སོ།།
GEN 13:17 ཁྱོད་ཡར་ལོངས༌དང༌། ཡུལ་འདིའི་ཕྱོགས་ཀུན་ལ་སོང༌ཞིག རྒྱུ་མཚན་ནི་བདག་གིས་ས་འདི་ཁྱོད་ལ་སྦྱིན་ངེས་ཡིན་པའི་ཕྱིར་རོ་ཞེས་གསུངས༌སོ།།
GEN 13:18 དེ་ནས་ཨབ་རམ་གྱིས་རང་གི་སྦྲ་གུར་གནས་སྤར༌ཞིང༌། ཧེབ་རོན་གྱི་མཱན་རེའེ་ཞེས་བྱ་བའི་བེ་ཤིང་སྐྱེད་ཚལ་གྱི་ཉེ་འགྲམ་དུ་བསྡད་པ་དང་། གནས་དེ་རུ་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས༌སོ།།
GEN 14:1 དེ་ཡང་ཤིན་ཨར་ཡུལ་གྱི་རྒྱལ་པོ་ཨམ་རཱ་ཕིལ༌དང༌། ཨེལ་ལ་སཱར་ཡུལ་གྱི་རྒྱལ་པོ་ཨར༌ཡོག ཨེ་ལཱམ་ཡུལ་གྱི་རྒྱལ་པོ་ཀཱ་དོར་ལཱ་ཨོ༌མེར། གོ་ཡེམ་ཡུལ་གྱི་རྒྱལ་པོ་ཐིད་ཨལ་བཅས་ཀྱི་དུས༌སུ།
GEN 14:2 རྒྱལ་པོ་འདི་བཞི་པོས་སཱ་དོམ་གྱི་རྒྱལ་པོ་པེ་རཱ༌དང༌། གཱ་མོ་ར་ཡི་རྒྱལ་པོ་པེར༌ཤཱ། ཨད་མཱ་ཡི་རྒྱལ་པོ་ཤིན༌ཨབ། ཚཱ་བོ་ཡིམ་གྱི་རྒྱལ་པོ་ཤེམ་ཨེ༌བེར། པེ་ལཱ་༼དེང་སང་ཚོ་ཨར་ཞེས་ཀྱང་བྱ།༽ཡི་རྒྱལ་པོ་དང་བཅས་པར་དམག་དྲངས༌སོ།།
GEN 14:3 དེ་ནས་རྒྱལ་པོ་དེ་རྣམས་སིད་དིམ་ལུང་པར་གཅིག་ཏུ༌འདུས། ལུང་པ་དེ་ནི་ཚྭ་མཚོ༌དེའོ།།
GEN 14:4 དེ་སྔར་དེ་དག་ཀཱ་དོར་ལཱ་ཨོ་མེར་གྱི་མངའ་འོག་ཏུ་ལོ་བཅུ་གཉིས་རིང་ལ་བསྡད་ཅིང་ལོ་བཅུ་གསུམ་པར་ངོ་ལོག༌བྱས།
GEN 14:5 དེ་ཡང་ལོ་བཅུ་བཞི༌པར། ཀཱ་དོར་ལཱ་ཨོ་མེར་གྱི་མནའ་འབྲེལ་རྒྱལ་པོ་ཐམས་ཅད་ཨ་ཤ་ཐ་རོད་ཀར་ནཱ་ཡེམ་ཞེས་པའི་ཡུལ་དུ་འོངས༌ཏེ། རེ་པཱ་མི་རིགས༌དང༌། ཧཱམ་ཞེས་པའི་ཡུལ་གྱི་ཟུ་ཟ་མི༌རིགས། ཤཱ་ཝེ་ཀིར་ཡ་ཐཱ་ཡེམ་ཡུལ་གྱི་ཨེ་མཱ་མི༌རིགས།
GEN 14:6 དབེན་སྟོང་གི་འགྲམ་དུ་ཡོད་པའི་ཨེལ་ཕཱ་རན་ཡུལ་ནས་སེ་ཨིར་རི་བོའི་བར་དུ་གནས་པའི་ཧོར་མི་རིགས་བཅས་ལ་དམག་དྲངས་ཤིང་དེ་ལས་རྣམ་པར་རྒྱལ༌ཏོ།།
GEN 14:7 དེ་ནས་ཁོ་རྣམས་ཕྱིར་ལོག་པའི་ལམ་བར་དུ་ཨིན་མུས་ཕཱད་ཅེས་པ་སྟེ་ཀཱ་དེའེ་ཤཱ་ཡུལ་དུ་སོང༌སྟེ། ཨ་མཱད་ལེག་མི་རིགས་ཀྱི་ཡུལ་ཐམས་ཅད༌དང༌། ཧ་ཚོན་ཐལ་མཱར་ཡུལ་དུ་གནས་པའི་ཨེ་མོར་མི་རིགས་བཅས་ལ་དམག་དྲངས་ཤིང་དེ་ལས་རྣམ་པར་རྒྱལ༌ཏོ།།
GEN 14:8 དེ་ནས་སཱ་དོམ༌དང༌། གཱ་མོ༌ར། ཨད༌མཱ། ཚཱ་བོ༌ཡིམ། པེ་ལཱའམ་ཚོ་ཨར་བཅས་ཀྱི་རྒྱལ་པོ་རྣམས་སླེབས་པ༌དང༌། སིད་དིམ་ལུང་པ་ནས་གཡུལ་བཤམས་ཏེ་ཁོ་རྣམས་ལ་གཡུལ་འགྱེད་པ༌སྟེ།
GEN 14:9 ཨེ་ལཱམ་གྱི་རྒྱལ་པོ་ཀཱ་དོར་ལཱ་ཨོ་མེར༌དང༌། གོ་ཡེམ་གྱི་རྒྱལ་པོ་ཐིད༌ཨལ། ཤིན་ཨར་གྱི་རྒྱལ་པོ་ཨམ་རཱ་ཕིལ། ཨེལ་ལ་སཱར་གྱི་རྒྱལ་པོ་ཨར་ཡོག་བཅས་ཡིན༌ཞིང༌། རྒྱལ་པོ་བཞི་པོས་རྒྱལ་པོ་ལྔ་པོར་གཡུལ་འགྱེད༌པའོ།།
GEN 14:10 དེ་ཡང་སིད་དིམ་ལུང་པར་རྒྱ་སྐྱེགས་ཀྱིས་བཀང་བའི་དོང་མང་པོ་ཡོད༌ལ། སཱ་དོམ་གྱི་རྒྱལ་པོ་དང་གཱ་མོ་ར་ཡི་རྒྱལ་པོ་གཉིས་བྲོས་ཏེ་རྒྱ་སྐྱེགས་ཀྱི་དོང་ནང་དུ་ལྷུང་ཞིང་གཞན་རྣམས་རི་ཁྲོད་དུ༌བྲོས།
GEN 14:11 དེ་ནས་རྒྱལ་པོ་བཞི་པོས་སཱ་དོམ་དང་གཱ་མོ་ར་ཡི་རྒྱུ་ནོར་དང་འབྲུ་རིགས་ཐམས་ཅད་ཕྲོགས་ཤིང་།
GEN 14:12 ཨབ་རམ་གྱི་ཚ་བོ་ལོད་ཐུ་དང་ཁོའི་རྒྱུ་ནོར་ཡང་ཕྲོགས་ནས་སོང༌། ཅིའི་ཕྱིར་ཞེ༌ན། དུས་དེར་ལོད་ཐུ་ནི་སཱ་དོམ་དུ་བསྡད་ཡོད་པའི་ཕྱིར༌རོ།།
GEN 14:13 དེ་ཡང་ཕྱིར་བྲོས་འོངས་པའི་མི་ཞིག་གིས་ཨིབ་རི་པ་ཨབ་རམ་ལ་གནས་ཚུལ་དེའི་སྐོར༌སྨྲས། ཨབ་རམ་ནི་སྐབས་དེར་ཨེ་མོར་མི་རིགས་ཀྱི་མཱན་རེའེ་ཞེས་བྱ་བའི་བེ་ཤིང་སྐྱེད་ཚལ་གྱི་ཉེ་འགྲམ་དུ་བསྡད་ཡོད༌ཅིང༌། མཱན་རེའེ་བྱ་བ་ནི་ཨེ་ཤ་ཀོལ་དང་ཨ་ནེར་གཉིས་ཀྱི་སྤུན་ཡིན༌ལ། ཁོ་རྣམས་ཀྱིས་ཨབ་རམ་དང་མནའ་འབྲེལ་བྱས་མྱོང༌ངོ༌།།
GEN 14:14 དེ་ནས་ཨབ་རམ་གྱིས་ཁོང་གི་ཚ་བོ་ལོད་ཐུ་བཙན་བཟུང་བྱས་པའི་གནས་ཚུལ་ཐོས༌ཏེ། རང་ཁྱིམ་ནས་ནར་སོན་ཅིང་དམག་རྩལ་སྦྱངས་པའི་ཕོ་རྒོད་སུམ་བརྒྱ་དང་བཅོ་བརྒྱད་ཁྲིད་ནས་དཱན་ཞེས་པའི་ཡུལ་བར་དུ་ར་མདར༌རྒྱུགས།
GEN 14:15 མཚན་མོའི་དུས༌སུ། ཨབ་རམ་གྱིས་རང་ཉིད་དང་དམག་མི་སྡེ་ཚན་བགོས་ནས་དགྲ་བོ་འཇོམས་པར་བྱས་པ༌དང༌། དེ་ནས་ཡང་དཱ་མེ་སེག་གི་བྱང་ཕྱོགས་སུ་ཡོད་པའི་ཧོ་བཱ་ཡུལ་བར་དུ་བདས༌ཏེ།
GEN 14:16 སྔར་ཕྲོགས་ཟིན་པའི་རྒྱུ་ནོར་ཐམས་ཅད་ཕྱིར་བླངས་པར་མ༌ཟད། ད་དུང་ཁོང་གི་ཚ་བོ་ལོད་ཐུ༌དང༌། ཁོའི་རྒྱུ་ནོར་དང་བུད༌མེད། འབངས་མི་ཐམས་ཅད་ཀྱང་ཕྱིར་བླངས༌སོ།།
GEN 14:17 དེ་ཡང་ཨབ་རམ་བྱ་བ་ཀཱ་དོར་ལཱ་ཨོ་མེར་དང་དེའི་མནའ་འབྲེལ་རྒྱལ་པོ་གཞན་རྣམས་ལས་རྣམ་པར་རྒྱལ་ཏེ་ཕྱིར་ལོག་པའི་དུས༌སུ། སཱ་དོམ་གྱི་རྒྱལ་པོ་འོངས་ནས་ཤཱ་ཝེ་ལུང་པ་རུ་ཁོང་ལ་བསུ་བ༌བྱས། ཤཱ་ཝེ་ལུང་པ་ལ་རྒྱལ་པོའི་ལུང་པ་ཞེས་ཀྱང༌ཟེར།
GEN 14:18 དེ་ནས་སཱ་ལེམ་གྱི་རྒྱལ་པོ་མཱལ་ཀི་ཚེ་དེག་གིས་ཀྱང་བག་ལེབ་དང་རྒུན་ཆང་ཁྱེར་ནས་བསུ་བ་བྱེད་དུ༌ཕེབས། ཁོང་ནི་བླ་ན་མེད་པའི་དཀོན་མཆོག་གི་མཆོད་དཔོན་ཞིག་ཡིན༌ནོ།།
GEN 14:19 ཁོང་གིས་ཨབ་རམ་ལ་བྱིན་གྱིས་བརླབས་ཏེ་འདི་སྐད༌དུ། གནམ་ས་གཉིས་ཀྱི་བྱེད་པོ༌དང༌།། བླ་ན་མེད་པའི་དཀོན་མཆོག༌གིས།། ཨབ་རམ་ཁྱོད་ལ་བྱིན་བརླབས༌མཛོད།།
GEN 14:20 དགྲ་བོ་ཐམས་ཅད་ཁྱོད་སྤྲད༌པའི།། བླ་ན་མེད་པའི་དཀོན་མཆོག༌ལ།། བསྟོད་ཅིང་བསྔགས་པར་འོས་སོ༌ལོ། །ཞེས་གསུངས༌སོ།། ཨབ་རམ་གྱིས་རང་ལ་ཐོབ་པའི་བཅུ་ཆ་གཅིག་ནི་མཱལ་ཀི་ཚེ་དེག་ལ་ཕུལ༌ཏོ།།
GEN 14:21 དེ་ནས་སཱ་དོམ་གྱི་རྒྱལ་པོས་ཨབ་རམ་ལ་འདི་ལྟར། ཁྱོད་ཀྱིས་འབངས་མི་རྣམས་བདག་ལ་བྱིན༌དང༌། རྒྱུ་ནོར་རྣམས་ཁྱོད་ཀྱིས་ཁྱེར་ཞིག་ཅེས་སྨྲས༌སོ།།
GEN 14:22 དེ་ནས་ཨབ་རམ་གྱིས་སཱ་དོམ་གྱི་རྒྱལ་པོ་ལ་འདི་སྐད༌དུ། བདག་གིས་གནམ་ས་གཉིས་ཀྱི་བྱེད་པོ་སྟེ་བླ་ན་མེད་པའི་དཀོན་མཆོག་ཡ་ཝཱེ་ལ་དམ་བཅས༌ཏེ།
GEN 14:23 ཁྱོད་ལ་གཏོགས་པའི་རྒྱུ་རྫས་ནི་སྐུད་པ་ཞིག༌གམ། ཡང་ན་ལྷམ་མདུད་ཅིག་ཡིན་ཡང་བདག་གིས་མི་འཁྱེར༌རོ། །ཅིའི་ཕྱིར་ཞེ༌ན། ཁྱོད་ན༌རེ། བདག་གིས་ཨབ་རམ་ཕྱུག་པོར་བཏང་བ་ཡིན་ཞེས་མི་སྨྲ་བའི་ཕྱིར༌རོ།།
GEN 14:24 དམག་མི་རྣམས་ཀྱིས་གང་ཞིག་ཟོས་པ༌དང༌། བདག་དང་མཉམ་དུ་ཕྱིན་པའི་ཨ་ནེར༌དང༌། ཨེ་ཤ༌ཀོལ། མཱན་རེའེ་བཅས་ལ་རང་གི་བགོ་སྐལ་འཁྱེར་དུ་འཇུག་པ་ལས༌གཞན། བདག་གིས་ཅི་ཡང་མི་འཁྱེར་ཞེས་སྨྲས༌སོ།།
GEN 15:1 དོན་དེའི་རྗེས༌སུ། ཨབ་རམ་གྱི་ཞལ་གཟིགས་ནང་དུ་དཀོན་མཆོག་ཡ་ཝཱེས་བཀའ་བབས་ཤིང་ཁོང་ལ་འདི་སྐད༌དུ། ཨབ༌རམ། ཁྱོད་རང་འཇིགས་མི་དགོས༌ཏེ། བདག་ནི་ཁྱོད་ཀྱི་ཕུབ་ཡིན༌ཞིང༌། བདག་གིས་ཁྱོད་ལ་བྱ་དགའ་ཆེན་པོ་ཞིག་སྦྱིན་པར་བྱ་ཞེས་པ༌དང༌།
GEN 15:2 ཨབ་རམ་ན༌རེ། ཀྱེ། གཙོ་བོ་ཡ་ཝཱེ༌ལགས། བདག་ལ་བུ་མེད་པས་ཁྱེད་ཀྱིས་བདག་ལ་ཅི་ཞིག་གནང་བར༌བྱའམ། བདག་གི་ཁྱིམ་རྒྱུད་འཛིན་མཁན་ནི་དཱ་མེ་སེག་གི་ཨེ་ལི་ཨེ་བཟིར་ཡིན་ཞེས་པ༌དང༌།
GEN 15:3 ཡང་ཨབ་རམ་ན༌རེ། ཁྱེད་ཀྱིས་བདག་ལ་བུ་རྒྱུད་མ་གནང༌བས། བདག་གི་ཁྱིམ་དུ་སྐྱེས་པའི་མི་དེ་ནི་བདག་གི་ཁྱིམ་རྒྱུད་འཛིན་མཁན་ཡིན་ནོ་ཞེས་པ༌ལ།
GEN 15:4 ཡང་དཀོན་མཆོག་ཡ་ཝཱེས་བཀའ་བབས་ཏེ་འདི་སྐད༌དུ། མི་དེ་ཁྱོད་ཀྱི་ཁྱིམ་རྒྱུད་འཛིན་མཁན་དུ་མི༌འགྱུར། ཁྱོད་རང་ལས་སྐྱེས་པའི་བུ་ནི་ཁྱོད་ཀྱི་ཁྱིམ་རྒྱུད་འཛིན་མཁན་དུ་འགྱུར་བ་ཡིན་ཞེས༌པའོ།།
GEN 15:5 དེ་ནས་ཁོང་གིས་ཨབ་རམ་ཕྱི་རོལ་ཏུ་ཁྲིད་དེ་འདི་སྐད༌དུ། ཁྱོད་ཀྱིས་ནམ་མཁར་ལྟོས༌དང༌། ནམ་མཁའི་སྐར་མ་ཐམས་ཅད་བརྩི་ནུས༌སམ། བརྩི་ནུས་ན་རྩིས་ཤིག་ཅེས༌དང༌། ཡང་ཁོང་གིས་འདི་སྐད༌དུ། ཁྱོད་ཀྱི་རིགས་རྒྱུད་ཀྱང་དེ་བཞིན་དུ་འབྱུང་བར་འགྱུར་ཞེས་གསུངས༌སོ།།
GEN 15:6 དེ་ནས་ཨབ་རམ་གྱིས་དཀོན་མཆོག་ཡ་ཝཱེ་ལ་དད་པ་བྱས་ཤིང་དཀོན་མཆོག་ཡ་ཝཱེས་ཀྱང་ཁོང་ནི་མི་རྣམ་དག་ཏུ་བརྩིས༌སོ།།
GEN 15:7 དེ་ནས་ཡང་དཀོན་མཆོག་ཡ་ཝཱེས་ཨབ་རམ་ལ་འདི་སྐད༌དུ། བདག་ནི་ཡ་ཝཱེ་ཡིན༌ཏེ། བདག་གིས་ཀ་ན་ཨན་གྱི་ཡུལ་འདི་ཁྱོད་ལ་བགོ་སྐལ་དུ་སྦྱིན་པའི༌ཕྱིར། དེ་སྔར་ཁྱོད་རང་ཀལ་དི་ཡུལ་གྱི་ཨུར་ནས་ཁྲིད་ཡོང་བ་ཡིན་ཞེས་གསུངས་པ༌ལ།
GEN 15:8 ཨབ་རམ་ན༌རེ། ཀྱེ། གཙོ་བོ་ཡ་ཝཱེ༌ལགས། ངས་ཡུལ་འདི་བདག་གི་བགོ་སྐལ་ཡིན་པ་ཅི་ལྟར་ཤེས་ནུས་སམ་ཞེས་ཞུས༌ཤིང༌།
GEN 15:9 ཡང་དཀོན་མཆོག་གིས་འདི་སྐད༌དུ། ཁྱོད་ཀྱིས་བ་དྲུས་མ༌དང༌། ར༌མ། ལུག་ཐུག་བཅས་ལོ་གསུམ་ཅན་གཅིག་རེ༌དང༌། གཞན༌ཡང༌། བྱ་ཐི་བ་དང་ཕུག་རོན་ཆུང་ངུ་གཅིག་རེ་བདག་གི་མདུན་དུ་ཁྱེར་ཤོག་ཅེས་གསུངས་པ༌ལ།
GEN 15:10 ཨབ་རམ་གྱིས་ཀྱང་དེ་ལྟར་ཁྱེར་ཡོང་བ༌དང༌། དེ་དག་རེ་རེ་བཞིན་དུམ་བུ་གཉིས་སུ་བགོས་ཤིང་དུམ་བུ་རེ་རེ་བཞིན་བཤམས་ནས༌བཞག འོན༌ཀྱང༌། བྱ་ཐི་བ་དང་ཕུག་རོན་ཆུང་ངུ་གཉིས་དུམ་བུར་མ་བགོས༌སོ།།
GEN 15:11 དེ་ནས་བྱ་རྒོད་རྣམས་འཕུར་འོངས་ནས་ཕྱུགས་ཟོག་གི་ཤ་སྟེང་དུ་བབས་པས་ཨབ་རམ་གྱིས་དེ་རྣམས་བདས༌སོ།།
GEN 15:12 དེ་ཡང་ཉི་མ་ནུབ་པའི་དུས༌སུ། ཨབ་རམ་ལ་གཉིད་ལྕི་མོ་ཁུགས་པ་དང་འཇིགས་སུ་རུང་བའི་མུན་ནག་ཆེན་པོ་ཁོང་གི་ལུས་ལ་ཁྱབ་པར༌གྱུར།
GEN 15:13 དཀོན་མཆོག་ཡ་ཝཱེས་ཨབ་རམ་ལ་འདི་སྐད༌དུ། ཁྱོད་ཀྱིས་ངེས་པར་ཤེས་དགོས་པ༌ནི། ཁྱོད་ཀྱི་རིགས་རྒྱུད་རྣམས་མི་རིགས་གཞན་གྱི་ཡུལ་དུ་སྡོད་པར་བྱེད༌ཅིང༌། ཁོ་རྣམས་ཀྱིས་ལོ་འཁོར་བཞི་བརྒྱའི་རིང་ལ་ཡུལ་དེའི་མི་རྣམས་ལ་གཡོག་བྱེད་པ་དང་དེ་དག་གི་གཉའ་གནོན་མྱང་བར་འགྱུར༌རོ།།
GEN 15:14 དེ་ནས་ཁོ་རྣམས་ཀྱིས་གཡོག་བྱེད་པའི་རྒྱལ་ཁབ་དེ་ལ་བདག་གིས་ཉེས་ཆད་གཅོད་པར་འགྱུར༌ཞིང༌། དེའི་རྗེས༌སུ། ཁྱོད་ཀྱི་རིགས་རྒྱུད་རྣམས་ཀྱིས་ཡུལ་དེ་ནས་རྒྱུ་ནོར་མང་པོ་ཁྱེར་ནས་ཡུལ་དེ་དང་ཁ་འབྲལ་བར༌འགྱུར།
GEN 15:15 འོན༌ཀྱང༌། ཁྱོད་ནི་ཚེ་རིང་བར་འགྱུར༌ཞིང༌། མཇུག་མཐར་བདེ་བའི་ངང་ཕ་མེས་ཡང་མེས་རྣམས་ཀྱི་གམ་དུ་འགྲོ་བ་དང་དུར་ལ་འཇུག་པར་བྱེད༌དོ།།
GEN 15:16 དེ་ནས་མི་རབས་བཞི༌པར། ཁྱོད་ཀྱི་རིགས་རྒྱུད་རྣམས་ཕྱིར་ཡུལ་འདིར་འབྱོན་ངེས༌ཏེ། ཨེ་མོར་མི་རིགས་ཀྱི་ནག་ཉེས་ད་དུང་ལོངས་མེད་པའི་ཕྱིར་ཡིན་ཞེས་གསུངས༌སོ།།
GEN 15:17 དེ་ནས་ཉི་མ་ནུབ་ནས་མུན་རུབ་པ༌ན། གློ་བུར༌ཉིད་དུ། དུ་བ་འཕྱུར་བའི་ཐབ་ཀ་དང་དམར་ལམ་ལམ་བྱེད་པའི་དཔལ་འབར་དེ་གཉིས་ནི་ཕྱུགས་ཟོག་གི་ཤ་རྣམས་ཀྱི་བར་བརྒྱུད་ནས་སོང༌ངོ༌།།
GEN 15:18 ཉིན་དེ༌ལ། དཀོན་མཆོག་ཡ་ཝཱེས་ཨབ་རམ་ལ་ཞལ་ཆད་བཞག་སྟེ་འདི་སྐད༌དུ། བདག་གིས་ཨེ་ཅིབ་ཀྱི་ཆུ་བོ་ནས་ཕི་རཱད་ཆུ་བོའི་བར་གྱི་ས་ཆ་འདི་དག་ཁྱོད་ཀྱི་རིགས་རྒྱུད་ལ་སྤྲད་ཟིན༌ཏེ།
GEN 15:19 དེའང་ས་ཆ་དེ་དག་གི་ད་ལྟའི་བདག་པོ་ནི་ཀེ་ནེ་མི་རིགས༌དང༌། ཀ་ནེ་ཟི་མི༌རིགས། ཀད་མོན་མི༌རིགས།
GEN 15:20 ཧེད་མི༌རིགས། ཕེ་རེ་ཟི་མི༌རིགས། རེ་པཱ་མི༌རིགས།
GEN 15:21 ཨེ་མོར་མི༌རིགས། ཀ་ན་ཨན་མི༌རིགས། གིར་གས་མི༌རིགས། ཡེ་བུ་སི་མི་རིགས་བཅས་ཡིན་ཞེས་གསུངས༌སོ།།
GEN 16:1 དེ་ཡང་ཨབ་རམ་གྱི་ཆུང་མ་སཱ་ར་ཡུ་ལ་བུ་དང་བུ་མོ་མ་སྐྱེས༌ཤིང༌། ཁོ་མོར་ཧ་གར་ཞེས་པའི་གཡོག་མོ་ཞིག་ཡོད༌ལ། ཁོ་མོ་ནི་ཨེ་ཅིབ་ཀྱི་མི༌ཡིན།
GEN 16:2 དེ་ནས་སཱ་ར་ཡུ་ཡིས་ཨབ་རམ་ལ་འདི༌ལྟར། ལྟོས༌དང༌། དཀོན་མཆོག་ཡ་ཝཱེས་བདག་ལ་བུ་ཕྲུག་མི་སྐྱེ་བར་མཛད༌པས། ཁྱོད་བདག་གི་གཡོག་མོ་དང་ལུས་འབྲེལ་བྱེད་པར༌ཞུ། ཁོ་མོར་བརྟེན་ནས་བདག་ལ་བུ་ཕྲུག་ཡོད་ཀྱང་སྲིད་ཅེས་སྨྲས༌ཤིང༌། ཨབ་རམ་གྱིས་ཀྱང་སཱ་ར་ཡུའི་གཏམ་ལ་མཉན༌ཏོ།།
GEN 16:3 དེ་ཡང་ཨབ་རམ་ནི་ཀ་ན་ཨན་ཡུལ་དུ་ལོ་བཅུར་བསྡད་པའི་རྗེས༌སུ། ཨབ་རམ་གྱི་ཆུང་མ་སཱ་ར་ཡུ་ཡིས་ཨེ་ཅིབ་ཀྱི་གཡོག་མོ་ཧ་གར་ཞེས་པ་རང་གི་ཁྱོ་ག་ལ་ཆུན་མར་ལེན་དུ་བཅུག༌གོ །
GEN 16:4 དེ་ནས་ཨབ་རམ་དང་ཧ་གར་གཉིས་ལུས་འབྲེལ་བྱས་པས་ཧ་གར་ལ་མངལ་ཆགས་པ༌དང༌། ཧ་གར་གྱིས་རང་ལ་མངལ་སྦྲུམ་པ་ཤེས༌རྗེས། རང་གི་བདག་མོར་མཐོང་ཆུང་བྱས༌སོ།།
GEN 16:5 སཱ་ར་ཡུ་ཡིས་ཨབ་རམ་ལ་འདི་ལྟར་སྨྲས་པ༌སྟེ། ཁྱོད་ཀྱི་རྐྱེན་གྱིས་བདག་ལ་མ་ཉེས་ཁག་གཡོགས་ཐེབས་པ༌སྟེ། བདག་གིས་རང་གི་གཡོག་མོ་ཁྱོད་ཀྱི་པང་ཁར་གཏད༌ཅིང༌། ཁོ་མོས་རང་ལ་མངལ་སྦྲུམ་པ་ཤེས་རྗེས་ང་ལ་མཐོང་ཆུང་བྱེད༌དོ། །ཀྱེ། དཀོན་མཆོག་ཡ་ཝཱེས་ངེད་གཉིས་བར་དུ་ལེགས་ཉེས་ཀྱི་ཤན་འབྱེད་པར་སྨོན་ཞེས༌པའོ།།
GEN 16:6 དེ་ནས་ཨབ་རམ་གྱིས་སཱ་ར་ཡུ་ལ་འདི་སྐད༌དུ། གཡོག་མོ་ནི་ཁྱོད་ཀྱི་དབང་འོག་ཏུ་ཡོད༌པས། ཁྱོད་ཀྱིས་ཁོ་མོར་ཇི་ལྟར་བྱས་ཀྱང་རུང་ཞེས་སྨྲས༌སོ། །དེ་ནས་སཱ་ར་ཡུ་ཡིས་ཧ་གར་ལ་མནར་གཅོད་བྱས་པས་ཧ་གར་ཁོ་མོའི་མདུན་ནས་བྲོས༌སོ།།
GEN 16:7 དེ་ཡང་དཀོན་མཆོག་ཡ་ཝཱེའི་ཕོ་ཉ་དབེན་སྟོང་གི་ཆུ་མིག་དྲུང་དུ་གཡོག་མོ་ཧ་གར་དང་ཕྲད་ཅིང༌། དབེན་སྟོང་དེ་ནི་ཤུར་ཞེས་པའི་ཡུལ་གྱི་ལམ་བར་དུ་ཡོད་པ༌རེད།
GEN 16:8 དེ་ནས་ཕོ་ཉས་འདི་སྐད༌དུ། སཱ་ར་ཡུའི་གཡོག་མོ་ཧ་གར་ཁྱོད་གང་ནས་འོངས་པ་དང་གང་དུ་འགྲོའམ་ཞེས་དྲིས་པ༌ལ། ཧ་གར་ན༌རེ། ང་ནི་རང་གི་བདག་མོ་སཱ་ར་ཡུའི་མདུན་ནས་བྲོས་ཡོང་བ་ཡིན་ཞེས༌སྨྲས།
GEN 16:9 དེ་ནས་དཀོན་མཆོག་ཡ་ཝཱེའི་ཕོ་ཉས་ཁོ་མོ་ལ་འདི་སྐད༌དུ། ཁྱོད་ཕྱིར་རང་གི་བདག་མོའི་དྲུང་དུ་སོང་སྟེ་ཁོ་མོའི་དབང་འོག་ཏུ་སྡོད་ཅིག་ཅེས་གསུངས༌སོ།།
GEN 16:10 ཡང་འདི་སྐད༌དུ། བདག་གིས་ཁྱོད་ཀྱི་རིགས་རྒྱུད་མང་དུ་སྤེལ་ནས་བགྲང་གིས་མི་ལང་བར་བྱའོ་ཞེས༌དང༌།
GEN 16:11 ཡང་འདི་སྐད༌དུ། ལྟོས་དང་ཁྱོད་ཀྱི་མངལ་དུ་སྦྲུམ་པར་བུ་སྐྱེས༌ཏེ།། ཡ་ཝཱེས་ཁྱོད་ཀྱི་སྐྱོ་སྡུག་རྟོགས་པའི་རྐྱེན་གྱིས༌ནི།། བུ་ཡི་མིང་ལ་ཡེས་མ་ཨེལ་ཞེས་འདོགས་པར༌གྱིས།།
GEN 16:12 བུ་དེ་ངེས་པར་བོང་བུ་ཇི་བཞིན་ཨུ་ཚུགས༌ཀྱིས།། མི་རྣམས་ཀུན་ལ་དགག་ཅིང་རྒོལ་བར་འགྱུར་བ༌དང༌།། མི་རྣམས་ཀྱིས་ཀྱང་བུ་དེར་དགག་ཅིང་རྒོལ་བར༌འགྱུར།། བུ་དེ་རང་གི་སྤུན་ཟླའི་ཤར་དུ་སྡོད་པར༌འགྱུར། །ཞེས་གསུངས༌སོ།།
GEN 16:13 དེ་ནས་ཧ་གར་གྱིས་རང་ལ་བཀའ་གསུང་མཁན་དཀོན་མཆོག་ཡ་ཝཱེའི་མཚན་ལ་ཁྱེད་ནི་ང་རང་གཟིགས་པའི་དཀོན་མཆོག་ཡིན་ཞེས་བཏགས༌སོ། །ཅིའི་ཕྱིར་ཞེ༌ན། དེ་སྔར་ཁོ་མོ་ན༌རེ། ངས་གནས་འདི་རུ་ང་རང་མཐོང་བའི་དཀོན་མཆོག་མཇལ་ནུས་སམ་ཞེས་སྨྲས་པའི་ཕྱིར༌རོ།།
GEN 16:14 དེ་བས་ཆུ་མིག་དེའི་མིང་ལ་པེར་ལཱ་ཧེད་རོའུ་ཞེས་བཏགས་ཤིང་དེ་ནི་ཀཱ་དེའེ་ཤཱ་དང་པེ་རཱད་ཅེས་པའི་ཡུལ་གཉིས་བར་དུ་མཆིས༌སོ།།
GEN 16:15 ཕྱིས་སུ་ཧ་གར་གྱིས་ཨབ་རམ་ལ་བུ་ཞིག་བཙས༌ཤིང༌། ཨབ་རམ་གྱིས་བུའི་མིང་ལ་ཡེས་མ་ཨེལ་ཞེས༌བཏགས།
GEN 16:16 ཧ་གར་གྱིས་ཨབ་རམ་ལ་བུ་ཡེས་མ་ཨེལ་བཙའ་བའི་དུས༌སུ། ཨབ་རམ་དགུང་ལོ་གྱ་དྲུག་ཡིན༌ནོ།།
GEN 17:1 དེ་ཡང་ཨབ་རམ་དགུང་ལོ་དགུ་བཅུ་གོ་དགུ་ལོན་པའི་དུས༌སུ། དཀོན་མཆོག་ཡ་ཝཱེས་ཁོང་ལ་མངོན་པར་མཛད་དེ་འདི་སྐད༌དུ། བདག་ནི་ཀུན་དབང་དཀོན་མཆོག་ཡིན༌ལ། ཁྱོད་ཀྱིས་བདག་གི་དྲུང་དུ་མི་རྣམ་དག་གི་སྤྱོད་པ་ཟུངས༌དང༌།
GEN 17:2 བདག་གིས་ཁྱོད་དང་ཁ་ཆད་བཞག༌ནས། ཁྱོད་ཀྱི་རིགས་རྒྱུད་དར་ཞིང་རྒྱས་པར་བྱའོ་ཞེས་གསུངས༌སོ།།
GEN 17:3 དེ་ནས་ཨབ་རམ་གྱིས་ཕྱག་བཙལ་ནས་བསྡད་པ༌ལ། ཡང་དཀོན་མཆོག་གིས་འདི་སྐད༌དུ།
GEN 17:4 བདག་གིས་ཁྱོད་ལ་ཁ་ཆད་འཇོག༌སྟེ། ཁྱོད་ནི་མི་རིགས་མང་པོ་ཞིག་གི་མེས་པོར༌བྱའོ།།
GEN 17:5 ད་ནས་བཟུང་ཁྱོད་ཀྱི་མིང་ལ་ཨབ་རམ་མི་ཟེར་བར་ཨབ་ར་ཧམ་ཞེས་འབོད་པར་བྱ༌སྟེ། བདག་གིས་ཁྱོད་མི་རིགས་མང་པོའི་མེས་པོར་བྱེད་པའི་ཕྱིར༌རོ།།
GEN 17:6 བདག་གིས་ངེས་པར་ཁྱོད་ཀྱི་རིགས་རྒྱུད་དར་ཞིང་རྒྱས་པ༌དང༌། ཁྱོད་ལས་མི་རིགས་མང་པོ་འབྱུང་བ༌དང༌། ཁྱོད་ལས་རྒྱལ་པོ་འབྱུང་བར༌བྱའོ།།
GEN 17:7 བདག་གིས་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་ཐམས་ཅད་ལ་དུས་གཏན་གྱི་ཁ་ཆད་འཇོག་པར་བྱ༌སྟེ། བདག་ནི་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་རྣམས་ཀྱི་དཀོན་མཆོག༌ཡིན།
GEN 17:8 བདག་གིས་ད་ལྟ་ཁྱོད་རང་སྡོད་པའི་ཡུལ་ཏེ་ཀ་ན་ཨན་གྱི་ས་ཆ་ཐམས་ཅད་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་རྣམས་ལ་སྦྱིན་པ༌དང༌། ཁྱོད་རྣམས་རྟག་ཏུ་ཡུལ་འདིའི་བདག་པོར་བྱེད་ཅིང་བདག་ནི་རིགས་རྒྱུད་ཕྱི་མ་རྣམས་ཀྱི་དཀོན་མཆོག་ཀྱང་ཡིན་ཞེས་གསུངས༌སོ།།
GEN 17:9 ཡང་དཀོན་མཆོག་གིས་ཨབ་ར་ཧམ་ལ་འདི་སྐད༌དུ། ཁྱོད་དང་ཁྱོད་ཀྱི་རིགས་རྒྱུད་ཕྱི་མ་ཐམས་ཅད་ཀྱིས་དུས་ནམ་ཡང་བདག་གི་ཁ་ཆད་བསྲུང་དགོས༌སོ།།
GEN 17:10 ཁྱོད་རྣམས་ལས་ཕོ་ཐམས་ཅད་ཀྱི་མཚན་སྐྱི་གཅོད་པར༌གྱིས། འདི་ནི་བདག་དང༌ཁྱོད། ཁྱོད་ཀྱི་རིགས་རྒྱུད་ཕྱི་མ་རྣམས་བར་གྱི་ཁ་ཆད་ཡིན༌ལ། ཁྱོད་རྣམས་ཀྱིས་བསྲུང་བར་བྱ༌འོས།
GEN 17:11 ཁྱོད་ཅག་ཐམས་ཅད་ཀྱི་མཚན་སྐྱི་གཅོད་དགོས༌ཏེ། འདི་ནི་བདག་དང་ཁྱོད་རྣམས་བར་གྱི་ཁ་ཆད་ཀྱི་རྟགས༌ཡིན།
GEN 17:12 ཁྱོད་ཅག་སྐྱེས་པ་ཐམས་ཅད་ནི་རང་ཁྱིམ་ནས་སྐྱེས༌པའམ། ཡང་ན་ཁྱོད་ཀྱི་རིགས་རྒྱུད་མ་ཡིན་པའི་ཕྱི་ཕྱོགས་པ་ལས་དངུལ་གྱིས་ཉོས་པ་གང་ཡིན༌ཡང༌། ཁྱོད་ཀྱི་རིགས་རྒྱུད་ཕྱི་མ་ཐམས་ཅད་ཀྱིས་བུ་སྐྱེས་ནས་ཉིན་བརྒྱད་པར་མཚན་སྐྱི་གཅོད༌དགོས།
GEN 17:13 ཁྱོད་ཀྱི་ཁྱིམ་ནས་སྐྱེས་པའམ་ཁྱོད་ཀྱིས་དངུལ་སྤྲད་ནས་ཉོས་པ་གང་ཡིན་ཡང་ཐམས་ཅད་ཀྱི་མཚན་སྐྱི་གཅོད་དགོས༌སོ། །འདི་ལྟར་བྱས༌ན། བདག་གི་ཁ་ཆད་ཁྱོད་ཅག་གི་ལུས་སྟེང་དུ་མཆིས་ཤིང་དུས་གཏན་གྱི་ཁ་ཆད་ཡིན་པར་བསྟན༌ཏོ།།
GEN 17:14 འོན༌ཀྱང༌། མཚན་སྐྱི་མ་བཅད་པའི་སྐྱེས་པ་རྣམས་ནི་ཁྱོད་ཀྱི་རིགས་རྒྱུད་ལས་ཕྱིར་ཕུད་པར་བྱ༌སྟེ། དེ་དག་བདག་གི་ཁ་ཆད་དང་འགལ་བའི་ཕྱིར་ཡིན་ཞེས་གསུངས༌སོ།།
GEN 17:15 དེ་ནས་ཡང་དཀོན་མཆོག་གིས་ཨབ་ར་ཧམ་ལ་འདི་སྐད༌དུ། ཁྱོད་ཀྱི་ཆུང་མ་སཱ་ར་ཡུའི་མིང་ལ་སཱ་ར་ཡུ་ཞེས་མི་ཟེར་བར་སཱ་ར་ཞེས་འབོད་པར་འགྱུར༌རོ།།
GEN 17:16 བདག་གིས་ཁོ་མོར་བྱིན་རླབས་གནང་བ༌དང༌། ཁོ་མོ་ལས་ཁྱོད་ལ་བུ་ཞིག་སྦྱིན་པར་བྱའོ། །ཡང་བདག་གིས་ཁོ་མོར་བྱིན་རླབས་གནང་བ༌དང༌། ཁོ་མོ་མི་རིགས་མང་པོ་ཞིག་གི་ཡུམ་ཡིན་པར་འགྱུར༌ཞིང༌། འབངས་མི་རྣམས་ཀྱི་རྒྱལ་པོའང་ཁོ་མོ་ལས་འབྱུང་བར་འགྱུར་ཞེས་གསུངས༌སོ།།
GEN 17:17 དེ་ནས་ཨབ་ར་ཧམ་གྱིས་ཕྱག་བཙལ་ནས་བསྡད༌དེ། ལོ་བརྒྱ་ལོན་པའི་མི་ཞིག་ལ་བུ་འཐོབ་སྲིད༌དམ། སཱ་རའང་ལོ་དགུ་བཅུ་ལོན་པས་བུ་སྐྱེ་སྲིད་དམ་ཞེས་སེམས་ལ་དྲན་ཞིང་དགོད་བྲོ་བར༌གྱུར།
GEN 17:18 དེ་ནས་ཨབ་ར་ཧམ་གྱིས་དཀོན་མཆོག༌ལ། ཁྱེད་ཀྱི་སྤྱན་སྔར་ཡེས་མ་ཨེལ་འཚོ་བར་གྱུར་ན་ཅི་མ་རུང་ཞེས་ཞུས་པ༌ན།
GEN 17:19 ཡང་དཀོན་མཆོག་གིས་ཨབ་ར་ཧམ་ལ་འདི་སྐད༌དུ། དེ་འདྲ་མིན༌ཏེ། ཁྱོད་ཀྱི་ཆུང་མ་སཱ་རས་ཁྱོད་ལ་བུ་ཞིག་བཙའ་བ༌དང༌། ཁྱོད་ཀྱིས་བུའི་མིང་ལ་ཨི་སཱག་ཅེས་འདོགས་པར༌གྱིས། བདག་གིས་ཁོ་དང་ཁོའི་རིགས་རྒྱུད་ཕྱི་མ་རྣམས་ལ་དུས་གཏན་གྱི་ཁ་ཆད་འཇོག་པར༌བྱའོ།།
GEN 17:20 དེ་ཡང་ཡེས་མ་ཨེལ་ལ་མཚོན༌ན། བདག་གིས་ཁྱོད་ཀྱི་ངག་བཞིན་དུ་ཁོ་ལའང་བྱིན་རླབས་གནང་སྟེ་དར་ཞིང་རྒྱས་པ་དང་རིགས་རྒྱུད་མང་དུ་འཕེལ་བར༌བྱའོ། །ཁོ་ལས་ཚོ་དཔོན་བཅུ་གཉིས་འབྱུང་བ་དང་བདག་གིས་ཁོ་རྒྱལ་ཁབ་ཆེན་པོར་འགྱུར་བར་བྱེད༌དོ།།
GEN 17:21 སང་ལོའི་དུས་འདི༌ལ། སཱ་རས་ཁྱོད་ལ་བུ་ཨི་སཱག་བཙའ་ཞིང་བདག་གིས་དེ་ལ་ཁ་ཆད་འཇོག་པར་བྱ་ཞེས་གསུངས་པ༌དང༌།
GEN 17:22 དཀོན་མཆོག་ཨབ་ར་ཧམ་དང་ཁ་བྲལ་ནས་ནམ་མཁའི་ཞིང་ཁམས་སུ་འཕགས༌སོ།།
GEN 17:23 ཉིན་དེ༌ལ། ཨབ་ར་ཧམ་གྱིས་དཀོན་མཆོག་གི་བཀའ་བསྲུངས་པ༌དང༌། ཁོང་གི་བུ་ཡེས་མ་ཨེལ་དང་རང་ཉིད་ཀྱི་ཁྱིམ་དུ་ཡོད་པའི་སྐྱེས་པ་ཐམས་ཅད༌དེ། ཁྱིམ་ལས་བཙས་པའམ་དངུལ་གྱིས་ཉོས་པའི་སྐྱེས་པ་ཐམས་ཅད་ཀྱི་མཚན་སྐྱི་བཅད༌དོ།།
GEN 17:24 དེ་ཡང་ཨབ་ར་ཧམ་རང་ཉིད་ཀྱི་མཚན་སྐྱི་གཅོད་པའི་དུས༌སུ། ཁོང་ནི་དགུང་ལོ་དགུ་བཅུ་གོ་དགུ་ཡིན༌ལ།
GEN 17:25 ཁོང་གི་བུ་ཡེས་མ་ཨེལ་གྱི་མཚན་སྐྱི་གཅོད་པའི་དུས༌སུ། བུ་དེ་ལོ་བཅུ་གསུམ་ཡིན༌ནོ།།
GEN 17:26 ཉིན་དེ༌ལ། ཨབ་ར་ཧམ་དང་ཁོང་གི་བུ་ཡེས་མ་ཨེལ་གཉིས་མཉམ་དུ་མཚན་སྐྱི་བཅད་པ༌དང༌།
GEN 17:27 གཞན་ཡང་ཁོང་གི་ཁྱིམ་དུ་ཡོད་པའི་སྐྱེས་པ་ཐམས་ཅད༌དེ། ཁྱིམ་དུ་བཙས་པའམ་ཕྱི་ཕྱོགས་པ་ལས་དངུལ་གྱིས་ཉོས་པའི་སྐྱེས་པ་ཐམས་ཅད་ཀྱི་མཚན་སྐྱིའང་ཁོང་དང་མཉམ་དུ་བཅད༌དོ།།
GEN 18:1 དེ་ཡང་དཀོན་མཆོག་ཡ་ཝཱེས་མཱན་རེའེ་ཟེར་བའི་བེ་ཤིང་ཡོད་སར་ཨབ་ར་ཧམ་ལ་མངོན་པར༌མཛད། ཉིན་མོར་ཚ་བ་ཆེ་བའི་སྐབས་དེར་ཨབ་ར་ཧམ་སྦྲ་གུར་གྱི་སྒོ་མདུན་དུ་བསྡད་ཡོད་པ༌དང༌།
GEN 18:2 ཁོང་གིས་མགོ་ཡར་བཀྱགས་ནས་བལྟས་པ༌ན། མདུན་ཕྱོགས་སུ་མི་གསུམ་ཡར་ལངས་ནས་བསྡད་ཡོད་པ༌མཐོང༌། ཁོང་གིས་དེ་མཐོང་བ༌དང༌། སྦྲ་གུར་གྱི་སྒོ་མདུན་ནས་བརྒྱུགས་ཏེ་མི་དེ་རྣམས་བསུ་རུ་སོང་བ་དང་ཕྱག་བཙལ་ནས་འདི་སྐད༌དུ།
GEN 18:3 ཇོ་བོ༌ལགས། བདག་ལ་ཁྱེད་ཀྱི་སྤྱན་དྲུང་ནས་ཐུགས་རྗེ་ཐོབ༌ན། ཁྱེད་ནི་རང་གི་ཞབས་ཕྱི་པ་བདག་དང་ཁ་བྲལ་ནས་ཕར་མི་ཕེབས་པར༌ཞུ།
GEN 18:4 ངས་ཆུ་ཁྱེར་འོང་ལ་ཁྱེད་རྣམས་ཀྱིས་རྐང་པ་བཀྲུས་རྗེས་ལྗོན་ཤིང་གི་གྲིབ་བསིལ་འོག་ཏུ་ངལ་གསོ༌མཛོད།
GEN 18:5 ཡང་ཁྱེད་རྣམས་ཀྱི་ལུས་ལ་སྟོབས་རྒྱས་པའི༌ཕྱིར། ངས་ཁྱེད་རྣམས་ལ་བག་ལེབ་ཁྱེར་འོང་བར༌བྱའོ། །དེའི་རྗེས་ཁྱེད་རྣམས་ཕར་ཕེབས་པར༌བྱ། ཁྱེད་རྣམས་རང་གི་ཞབས་ཕྱི་པའི་གམ་དུ་ཡོང་ན་འདི་ལྟར་བྱ་འོས་ཞེས་སྨྲས་པ༌དང༌། ཁོང་རྣམས་ཀྱིས་འདི་སྐད༌དུ། དེས་ན་ཁྱོད་ཀྱིས་སྨྲས་པ་བཞིན་དུ་བྱོས་ཤིག་ཅེས་གསུངས༌སོ།།
GEN 18:6 དེ་ནས་ཨབ་ར་ཧམ་བྲེལ་འཚབ་ངང་སྦྲ་གུར་ནང་དུ་སོང་སྟེ་སཱ་ར་ལ་འདི་ལྟར་སྨྲས༌པ། ཁྱོད་ཀྱིས་ཕྱེ་བཟང་པོ་བྲེ་ གསུམ་བླངས་ཏེ་མྱུར་དུ་བརྫིས་ནས་བག་ལེབ་བཟོ་བར་གྱིས་ཞེས་པ༌དང༌།
GEN 18:7 ཨབ་ར་ཧམ་བ་ཁྱུ་ནང་དུ་བརྒྱུགས་ནས་བ་ཕྲུག་ཤ་ཤེད་ཅན་ཞིག་བཟུང་སྟེ་གཡོག་པོར་སྤྲད་ཅིང་གཡོག་པོས་ཀྱང་མྱུར་དུ་སྟ་གོན་བྱས༌སོ།།
GEN 18:8 ཡང་ཨབ་ར་ཧམ་གྱིས་ཞོ་དང་འོ༌མ། སྟ་གོན་བྱས་པའི་བ་ཕྲུག་གི་ཤ་བཅས་ཁྱེར་ཡོང་ནས་ཁོང་རྣམས་ཀྱི་མདུན་དུ་བཤམས༌ཤིང༌། ཁོང་རྣམས་ཀྱིས་ཀྱང་ཞལ་ཟས་བཞེས་པ༌དང༌། ཨབ་ར་ཧམ་རང་ཉིད་ནི་ལྗོན་ཤིང་གི་གྲིབ་བསིལ་འོག་ཏུ་ལངས་ནས་བསྡད༌དོ།།
GEN 18:9 དེ་ནས་ཁོང་རྣམས་ཀྱིས་ཨབ་ར་ཧམ་ལ་འདི་སྐད༌དུ། ཁྱོད་ཀྱི་ཆུང་མ་སཱ་ར་གང་དུ་ཡོད་ཅེས་དྲིས་པ༌ན། ཨབ་ར་ཧམ་ན༌རེ། སྦྲ་གུར་ནང་དུ་ཡོད་ཅེས་ལན་བཏབ༌བོ།།
GEN 18:10 དེ་ནས་ཁོང་རྣམས་ལས་གཅིག་ན༌རེ། སང་ལོའི་དུས་འདི༌ལ། ང་རང་ཕྱིར་ཁྱོད་ཀྱི་ཡུལ་འདིར་འོང་ངེས༌ཤིང༌། ཁྱོད་ཀྱི་ཆུང་མ་སཱ་ར་ལ་བུ་ཞིག་སྐྱེ་བར་འགྱུར་ཞེས་གསུངས་པ༌དང༌། སཱ་རས་ཀྱང་མི་དེའི་ལྟག་རྒྱབ་ཀྱི་སྦྲ་གུར་མདུན་ནས་གཏམ་དེར་ཉན་བཞིན༌བསྡད།
GEN 18:11 སྐབས་དེར་ཨབ་ར་ཧམ་དང་སཱ་ར་གཉིས་དགུང་ལོ་མཐོ༌ཞིང༌། སཱ་རའི་ཟླ་མཚན་ཡང་ཆད་ཟིན༌ཏོ།།
GEN 18:12 སཱ་རའི་སེམས་སུ་ཁོང་དགོད་ཅིག་བྱས༌ཏེ། བདག་ནི་རྒས་ཤིང་ཉམས་པ་དང་ངའི་བདག་པོའང་རྒས་ཟིན༌པས། དོན་ལེགས་པོ་འདི་ལྟ་བུ་འབྱུང་སྲིད་དམ་སྙམ༌མོ།།
GEN 18:13 དེ་ནས་དཀོན་མཆོག་ཡ་ཝཱེས་ཨབ་ར་ཧམ་ལ་འདི་སྐད༌དུ། སཱ་རས་ཅིའི་ཕྱིར་ཁོང་དགོད་བྱས༌ཏེ། བདག་ནི་རྒས་འཁོགས་རྒན་མོར་གྱུར་པ་ལ་བུ་སྐྱེ་ནུས་སམ་ཞེས༌སྨྲའམ།
GEN 18:14 དཀོན་མཆོག་ཡ་ཝཱེ་ལ་བསྒྲུབ་མི་ནུས་པའི་བྱ་བ་ཡོད་སྲིད༌དམ། སང་ལོའི་དུས་འདིར་སླེབས་ཚེ། བདག་ནི་ཁྱོད་ཀྱི་ཡུལ་འདིར་འོང་ངེས༌ཤིང༌། སཱ་ར་ལའང་བུ་ཞིག་སྐྱེ་ངེས་ཡིན་ཞེས་གསུངས༌སོ།།
GEN 18:15 སཱ་རས་གསུང་དེ་ཐོས་པ་དང་འཇིགས་པར་གྱུར་ནས་དོན་དེ་ཁས་མ་བླངས་པར་ན༌རེ། ང་རང་མ་བགད་ཅེས༌སྨྲས། ཡང་ཁོང་གིས་འདི་སྐད༌དུ། དེ་འདྲ་ག་ལ༌ཡིན། ཁྱོད་རང་བགད་བྱུང་ཞེས་གསུངས༌སོ།།
GEN 18:16 དེ་ནས་ཁོང་གསུམ་པོ་གནས་དེ་ནས་ལམ་ལ་ཆས་ཏེ་སཱ་དོམ་གྱི་ཕྱོགས་སུ་གཟིགས༌ཤིང༌། ཨབ་ར་ཧམ་ཡང་ཁོང་རྣམས་དང་མཉམ་དུ་ལམ་ལ་ཆས་ཏེ་སྐྱེལ་མ་མཛད༌དོ།།
GEN 18:17 ཡང་དཀོན་མཆོག་ཡ་ཝཱེས་འདི་སྐད༌དུ། བདག་གིས་བསྒྲུབ་པར་འགྱུར་བའི་དོན་རྣམས་ཨབ་ར་ཧམ་ལ་གསང་འོས༌སམ།
GEN 18:18 ཨབ་ར་ཧམ་ནི་རྒྱལ་ཁབ་ཆེན་པོ་ཞིག་ཏུ་འགྱུར་ངེས༌ཤིང༌། ས་སྟེང་གི་མི་རིགས་ཐམས་ཅད་ལ་ཁོ་རང་བརྒྱུད་ནས་བྱིན་རླབས་འཐོབ་པར༌འགྱུར།
GEN 18:19 ཅིའི་ཕྱིར་ཞེ༌ན། ཁོས་རང་ཉིད་ཀྱི་བུ་ཕྲུག་དང་རིགས་རྒྱུད་རྣམས་ལ་བདེན་པ་བདེན་དྲང་སྒོས་བདག་གི་ལམ་བསྲུང་བར་གདམས་པ༌དང༌། བདག་གིས་ཨབ་ར་ཧམ་གྱི་སྐོར་ལ་སྨྲས་པའི་དོན་རྣམས་ཀྱང་འགྲུབ་པར་འགྱུར་བའི༌ཕྱིར། བདག་གིས་ཁོ་རང་བདམས་པ་ཡིན་ཞེས༌དང༌།
GEN 18:20 ཡང་ཁོང་གིས་འདི་སྐད༌དུ། སཱ་དོམ་དང་གཱ་མོ་ར་གཉིས་ཀྱི་ནག་ཉེས་སྐད་གྲགས་ཆེ་ཞིང་སྡིག་པའང་ཤིན་ཏུ་ཚབས༌ཆེ།
GEN 18:21 ད་ལྟ་བདག་མར་སོང་སྟེ་ཁོ་རྣམས་ཀྱི་བྱ་སྤྱོད་ལ་རྟོག་དཔྱོད་བྱེད༌དེ། དངོས་གནས་བདག་གི་རྣ་བས་ཐོས་པའི་གྲགས་སྐད་ཇི་བཞིན་ཡིན༌ནམ། གལ་སྲིད་དེ་འདྲ་མིན་ན་བདག་གིས་རྟོགས་ངེས་ཡིན་ཞེས་གསུངས༌སོ།།
GEN 18:22 ཡང་དེ་རྣམས་ལས་མི་གཉིས་ཡུལ་དེ་དང་ཁ་བྲལ་ནས་སཱ་དོམ་གྱི་ཕྱོགས་སུ་སོང༌ནའང༌། ཨབ་ར་ཧམ་ནི་དཀོན་མཆོག་ཡ་ཝཱེའི་དྲུང་དུ་སྔར་བཞིན་ལངས་ནས་བསྡད༌དོ།།
GEN 18:23 དེ་ནས་ཨབ་ར་ཧམ་དཀོན་མཆོག་ཡ་ཝཱེའི་མདུན་དྲུང་དུ་ཡོང་སྟེ་ན༌རེ། ཁྱེད་ཀྱིས་མི་རྣམ་དག་དང་མི་ངན་པ་གང་ཡིན་ཡང་མཉམ་དུ་མེད་པར༌བཟོའམ།
GEN 18:24 གལ༌ཏེ། གྲོང་ཁྱེར་དེ་རུ་མི་རྣམ་དག་ལྔ་བཅུ་ཡོད་ན་ཁྱེད་ཀྱིས་གྲོང་ཁྱེར་དེ་མེད་པར་གཏོང༌ངམ། མི་རྣམ་དག་ལྔ་བཅུ་བོ་དེའི་རྐྱེན་གྱིས་གྲོང་ཁྱེར་དེ་ལ་དགོངས་ཡངས་མི་མཛད༌དམ།
GEN 18:25 ཁྱེད་ཀྱིས་མི་རྣམ་དག་དང་མི་ངན་པ་མཉམ་དུ་གསོད༌པའམ། ཡང་ན་མི་རྣམ་དག་དང་མི་ངན་པ་གཉིས་ལ་འདྲ་མཉམ་གྱི་ལྟ་སྟངས་འཛིན༌ནམ། ཁྱེད་ཀྱིས་འདི་ལྟར་བྱ་རུང༌ངམ། ས་གཞི་ཐམས་ཅད་ཀྱི་ཁྲིམས་དཔོན་ཆེན་པོ་ཁྱེད་ཀྱིས་དྲང་བདེན་གྱི་ལས་མི་མཛད་དམ་ཞེས་ཞུས༌སོ།།
GEN 18:26 དེ་ནས་དཀོན་མཆོག་ཡ་ཝཱེས་འདི་སྐད༌དུ། གལ་སྲིད་བདག་གིས་སཱ་དོམ་གྲོང་ཁྱེར་ནས་མི་རྣམ་དག་ལྔ་བཅུ་མཐོང༌ཚེ། བདག་གིས་ཁོ་རྣམས་ཀྱི་རྐྱེན་གྱིས་ཡུལ་དེ་ཐམས་ཅད་ལ་གུ་ཡངས་གཏོང་ངེས་ཡིན་ཞེས་གསུངས༌སོ།།
GEN 18:27 དེ་ནས་ཨབ་ར་ཧམ་ན༌རེ། བདག་ནི་རྡུལ་ཕྲན་ཙམ་ཡིན༌ཡང༌། དཀོན་མཆོག་ཁྱེད་ལ་འདི་ལྟར་ཞུ་ཕོད༌དོ།།
GEN 18:28 གལ་ཏེ་མི་རྣམ་དག་ལྔ་བཅུ་ལས་མི་ལྔ་ཇེ་ཉུང་དུ་སོང༌ན། ཁྱེད་ཀྱིས་མི་རྣམ་དག་ལྔ་ཇེ་ཉུང་དུ་སོང་བའི་རྒྱུ་མཚན་གྱིས་གྲོང་ཁྱེར་ཡོངས་རྫོགས་མེད་པར་གཏོང་ངམ་ཞེས་ཞུས༌སོ། །ཡང་དཀོན་མཆོག་ཡ་ཝཱེས་འདི་སྐད༌དུ། གལ་སྲིད་བདག་གིས་ཡུལ་དེ་ནས་མི་རྣམ་དག་བཞི་བཅུ་ཞེ་ལྔ་མཐོང་ན་གྲོང་ཁྱེར་དེ་མེད་པར་མི་བྱ་ཞེས་གསུངས༌སོ།།
GEN 18:29 ཡང་ཨབ་ར་ཧམ་གྱིས་དཀོན་མཆོག་ཡ་ཝཱེ༌ལ། གལ་ཏེ་ཡུལ་དེ་ནས་མི་རྣམ་དག་བཞི་བཅུ་མཐོང་ན་ཅི་ལྟར་བྱེད་དམ་ཞེས་ཞུས་པ༌དང༌། ཡང་དཀོན་མཆོག་ཡ་ཝཱེས་འདི་སྐད༌དུ། བདག་གིས་མི་རྣམ་དག་བཞི་བཅུ་བོ་དེའི་རྐྱེན་གྱིས་དོན་འདི་མི་བྱ་ཞེས་གསུངས༌སོ།།
GEN 18:30 ཡང་ཨབ་ར་ཧམ་ན༌རེ། ཀྱེ། གཙོ་བོ༌ལགས། ཁྱེད་རང་དགོངས་པ་མི་ཚོམ་པར༌མཁྱེན། བདག་ལ་གསུང་གནང་བར་མཛོད༌དང༌། གལ་སྲིད་ཁྱེད་ཀྱིས་ཡུལ་དེ་ནས་མི་རྣམ་དག་སུམ་ཅུ་མཐོང་ན་ཅི་ལྟར་བྱའམ་ཞུས་པ༌ལ། ཡང་དཀོན་མཆོག་ཡ་ཝཱེས་འདི་སྐད༌དུ། གལ་ཏེ་བདག་གིས་ཡུལ་དེ་ནས་མི་རྣམ་དག་སུམ་ཅུ་མཐོང་ན་དོན་འདི་མི་བསྒྲུབ་ཅེས་གསུངས༌སོ།།
GEN 18:31 ཡང་ཨབ་ར་ཧམ་ན༌རེ། བདག་གིས་ད་དུང་དཀོན་མཆོག་ལ་གཏམ་སྨྲ་བར་ཕོད༌དེ། གལ་སྲིད་ཁྱེད་ཀྱིས་ཡུལ་དེ་ནས་མི་རྣམ་དག་ཉི་ཤུ་མཐོང་ན་ཅི་ལྟར་བྱའམ་ཞེས་ཞུས་པ༌ལ། ཡང་དཀོན་མཆོག་ཡ་ཝཱེས་འདི་སྐད༌དུ། བདག་གིས་མི་རྣམ་དག་ཉི་ཤུ་བོ་དེའི་རྐྱེན་གྱིས་གྲོང་ཁྱེར་དེ་ཉིད་མེད་པར་མི་བྱ་ཞེས་གསུངས༌སོ།།
GEN 18:32 ཡང་ཨབ་ར་ཧམ་ན༌རེ། ཀྱེ། གཙོ་བོ༌ལགས། ཁྱེད་རང་དགོངས་པ་མི་ཚོམ་པར༌མཁྱེན། བདག་ལ་ད་དུང་ཐེངས་གཅིག་ལ་གསུང་གནང་བར༌མཛོད། གལ་ཏེ་ཁྱེད་ཀྱིས་ཡུལ་དེ་ནས་མི་རྣམ་དག་བཅུ་མཐོང་ན་ཅི་ལྟར་བྱའམ་ཞེས་ཞུས་པ༌ལ། ཡང་དཀོན་མཆོག་ཡ་ཝཱེས་འདི་སྐད༌དུ། བདག་གིས་མི་རྣམ་དག་བཅུ་བོ་དེའི་རྐྱེན་གྱིས་གྲོང་ཁྱེར་དེ་ཉིད་མེད་པར་མི་བྱ་ཞེས་གསུངས༌སོ།།
GEN 18:33 དེ་ནས་དཀོན་མཆོག་ཡ་ཝཱེས་ཨབ་ར་ཧམ་ལ་གསུང་གླེང་མཛད་རྗེས་བཞུད༌ཅིང༌། ཨབ་ར་ཧམ་ཡང་ཕྱིར་རང་ཡུལ་དུ་ལོག༌གོ།
GEN 19:1 དེ་ཡང་མཚན་མོའི་དུས་སུ་ཕོ་ཉ་དེ་གཉིས་སཱ་དོམ་དུ༌སླེབས། སྐབས་དེར་ལོད་ཐུ་ནི་སཱ་དོམ་གྱི་མཁར་སྒོར་སྡོད༌ཅིང༌། ཕོ་ཉ་གཉིས་ཕེབས་པ་མཐོང་སྟེ་ཡར་ལངས་ནས་བསུ་བ་བྱས་པ་དང་ཕྱག་བཙལ་ཏེ་ན༌རེ།
GEN 19:2 ཀྱེ། བདག་གི་ཇོ་བོ༌ལགས། ཁྱེད་གཉིས་རང་གི་ཞབས་ཕྱི་པ་བདག་གི་ཁྱིམ་དུ་ཕེབས་ཏེ་རྐང་པ་བཀྲུས་ནས་ཞག་གཅིག་ལ་བཞུགས༌རྗེས། སང་ཉིན་ཞོགས་པ་ཡར་བཞེངས་ནས་ཕེབས་པར་མཛོད་ཅེས་ཞུས་པ༌ལ། ཁོང་གཉིས་ཀྱིས་འདི་སྐད༌དུ། མིན་ཏེ། ངེད་གཉིས་ཁྲོམ་སྲང་དུ་ཞག་སྡོད་བྱ་ཞེས་གསུངས༌སོ།།
GEN 19:3 དེ་ནས་ལོད་ཐུ་ཡིས་གུས་གུས་ཞུམ་ཞུམ་ངང་གདན་འདྲེན་ཡང་ཡང་ཞུས་པ༌ན། ཕོ་ཉ་གཉིས་པོ་ད་གཟོད་ཁོའི་ཁྱིམ་དུ་ཕེབས་པ༌རེད། ལོད་ཐུ་ཡིས་ཕོ་ཉ་གཉིས་ལ་གསོལ་སྟོན་སྟ་གོན་བྱས་ཤིང་སྐྱུར་མེད་བག་ལེབ་བསྲེགས་པ་དང་ཁོང་རྣམས་ཀྱིས་ཞལ་ཟས་བཞེས༌སོ།།
GEN 19:4 དེ་ཡང་ཁོང་རྣམས་མལ་དུ་མ་གཟིམ་པའི་སྐབས༌སུ། སཱ་དོམ་གྲོང་ཁྱེར་གྱི་གནས་སོ་སོའི་སྐྱེས་པ་རྒན་གཞོན་ཐམས་ཅད་ཡོང་ནས་ལོད་ཐུ་ཡི་ཁང་པའི་མཐའ་བསྐོར༌ཞིང༌།
GEN 19:5 ལོད་ཐུའི་མིང་ནས་བོས་ཏེ་ན༌རེ། དོ་དགོང་ཁྱོད་ཚང་ལ་ཡོང་བའི་མི་དེ་གཉིས་གང་དུ༌ཡོད། ངེད་ཅག་མི་དེ་གཉིས་དང་འགྲོགས་འདོད་ པས། སྒོའི་ཕྱི་རོལ་ཏུ་ཁྲིད་ཤོག་ཅེས་འུར་བརྒྱབ༌བོ།།
GEN 19:6 དེ་ནས་ལོད་ཐུ་ཁང་པ་ལས་ཕྱིར་ཐོན༌ཞིང༌། སླར་ཡང་ཁང་པའི་སྒོ་བརྒྱབ་ནས་མི་ཚོགས་ཀྱི་མདུན་དུ་སོང་སྟེ་ན༌རེ།
GEN 19:7 ཀྱེ། བདག་གི་སྤུན་ཟླ༌རྣམས། ཁྱོད་ཅག་གིས་དོན་ངན་འདི་བསྒྲུབ་པར་མི༌བྱའོ།།
GEN 19:8 བདག་ལ་སྐྱེས་པར་འགྲོགས་མ་མྱོང་བའི་བུ་མོ་གཉིས་ཡོད༌དེ། ད་ལྟ་བདག་གིས་ཁོ་མོ་གཉིས་ཁྲིད་ཡོང་ནས་ཁྱོད་ཅག་གི་འདོད་པ་བཞིན་བྱེད་དུ་འཇུག༌གོ །མི་གཞན་གཉིས་པོ་བདག་གི་ཁྱིམ་དུ་ཡོད༌ན། ཁྱོད་ཅག་གིས་ཁོ་གཉིས་ལ་ཅི་ཡང་མི་བྱེད་པར་མཛོད་ཅེས་སྨྲས༌སོ།།
GEN 19:9 མི་ཚོགས་ན༌རེ། ཁྱོད་ཕར་སོང་ཞིག་ཅེས་སྨྲས་པ༌དང༌། ཡང་མི་ཚོགས་ན༌རེ། ཁྱོད་ནི་ཕྱི་མི་ཡིན༌ལ། ད་དུང་ཁྲིམས་དཔོན་གྱི་གོ་ས་འཛིན་འདོད༌དམ། ད་ལྟ་ངེད་རྣམས་ཀྱིས་མི་དེ་གཉིས་ལས་ཀྱང་ཁྱོད་ལ་གནོད་འཚེ་ཆེན་པོ་བྱེད་ངེས་ཡིན་ཞེས་འུར་རྒྱག་བཞིན་ལོད་ཐུ་ཕར་དེད་ནས་སྒོ་གཅོག་རྩིས༌བྱས།
GEN 19:10 འོན༌ཀྱང༌། སྐབས་དེར་ཕོ་ཉ་གཉིས་ཀྱིས་ཕྱག་བསྲིངས་ནས་ལོད་ཐུ་ཁང་པའི་ནང་དུ་འཐེན་པ་དང་སྒོ་བརྒྱབ་པར་མ༌ཟད།
GEN 19:11 སྒོའི་ཕྱི་རོལ་ཏུ་ཡོད་པའི་མི་ཚོགས་རྒན་གཞོན་རྣམས་ལ་མིག་འཁྲུལ་བྱུང་དུ་བཅུག༌པས། དེ་རྣམས་ཀྱིས་ལག་སྙོབ་བྱས་ཀྱང་སྒོ་མ་རྙེད༌དོ།།
GEN 19:12 དེ་ནས་ཕོ་ཉ་གཉིས་ཀྱིས་ལོད་ཐུ་ལ་འདི་སྐད༌དུ། ཁྱོད་ཀྱི་ཡུལ་འདི་རུ་མི་གཞན་སུ་ཡོད༌དམ། མག་པ༌དང༌། བུ་དང་བུ༌མོ། ཁྱོད་ལ་གཏོགས་པའི་གྲོང་ཁྱེར་ནང་གི་མི་ཐམས་ཅད་སུ་ཡིན་ཡང་གནས་འདི་ནས་ཕྱི་རུ་ཁྲིད༌ཅིག
GEN 19:13 ངེད་གཉིས་ཀྱིས་ས་ཆ་འདི་མྱུར་དུ་མེད་པར༌བཟོའོ། །ཅིའི་ཕྱིར་ཞེ༌ན། དཀོན་མཆོག་ཡ་ཝཱེའི་སྤྱན་སྔར་གྲོང་ཁྱེར་ནང་གི་ནག་ཉེས་ཀྱི་གྲགས་སྐད་ཆེ་བའི་ཕྱིར༌རོ། །དེ་བས་དཀོན་མཆོག་ཡ་ཝཱེས་ངེད་གཉིས་ས་ཆ་འདི་མེད་པར་གཏོང་བའི་ཆེད་དུ་མངགས་པ་ཡིན་ཞེས་གསུངས༌སོ།།
GEN 19:14 དེ་ནས་ལོད་ཐུ་སྒོའི་ཕྱི་རུ་སོང་ནས་ཁོ་ཚང་གི་མག་པར་འགྱུར་ངེས་པ་གཉིས༌ལ། ཁྱོད་རྣམས་ཡར་ལངས་ནས་ས་ཆ་འདི་དང་ཁ་འབྲལ་བར་གྱུར༌ཅིག རྒྱུ་མཚན་ནི་དཀོན་མཆོག་ཡ་ཝཱེས་གྲོང་ཁྱེར་འདི་མེད་པར་བཟོ་བའི་ཕྱིར་ཡིན་ཞེས་སྨྲས༌ཀྱང༌། ཁོའི་མག་པར་འགྱུར་ངེས་པ་རྣམས་ཀྱིས་ལོད་ཐུས་ཀུ་རེ་སྨྲས་པར་བསམས་སོ།།
GEN 19:15 དེ་ནས་ནམ་ལངས་པ༌དང༌། ཕོ་ཉ་གཉིས་ཀྱིས་ལོད་ཐུ་ལ་ནན་སྐུལ་གྱིས་འདི་སྐད༌དུ། ཡར་ལོངས༌དང༌། གནས་འདི་ནས་རང་གི་ཆུང་མ་དང་བུ་མོ་གཉིས་ཀ་ཁྲིད་དེ་སོང༌ཞིག ཅིའི་ཕྱིར་ཞེ༌ན། ཁྱོད་གྲོང་ཁྱེར་འདིའི་ཉེས་ཆད་དང་མཉམ་དུ་མེད་པར་མི་གཏོང་བའི་ཕྱིར་ཡིན་ཞེས་གསུངས༌ནའང༌།
GEN 19:16 ལོད་ཐུ་ཐེ་ཚོམ་སྐྱེས་ཏེ་མྱུར་དུ་མ་སོང༌ངོ༌། །དེ་ཡང་དཀོན་མཆོག་ཡ་ཝཱེས་ལོད་ཐུ་ལ་ཐུགས་རྗེ་དགོངས་པའི༌ཕྱིར། ཕོ་ཉ་གཉིས་ཀྱིས་ཁོ་དང་ཁོའི་ཆུང་མ་དང་བུ་མོ་གཉིས་ཀྱི་ལག་པར་འཇུས་ནས་ཁོ་རྣམས་ཕྱི་རུ་ཁྲིད༌ཅིང༌། གྲོང་ཁྱེར་ཕྱི་རོལ་ཏུ་བདེ་བར་བཀོད་པ༌དང༌།
GEN 19:17 ཁོ་རྣམས་ཕྱིར་ཁྲིད་པའི་རྗེས༌སུ། ཕོ་ཉ་གཉིས་ཀྱིས་འདི་སྐད༌དུ། ཁྱོད་རྣམས་སྲོག་ཐར་བའི་ཕྱིར་ཕྲོས༌ཤིག ཁ་ཕྱིར་མི་འཁོར་བར༌གྱིས། ཡུལ་འཁོར་དུ་ཡང་མི་སྡོད་པར་རི་ཁྲོད་དུ་ཕྲོས༌ཤིག དེ་ལྟར་མ་བྱས་ན་ཁྱོད་རྣམས་མེད་པར་འགྱུར་ངེས་ཡིན་ཞེས་གསུངས༌སོ།།
GEN 19:18 དེ་ནས་ལོད་ཐུ་ན༌རེ། བདག་གི་ཇོ་བོ༌ལགས། དེ་ལྟར་མི་བྱེད་པར༌མཛོད།
GEN 19:19 ཁྱེད་ཀྱི་ཞབས་ཕྱི་པ་ལ་ཁྱེད་ཀྱི་སྤྱན་དྲུང་ནས་ཐུགས་རྗེ་ཐོབ་ཟིན་པ༌དང༌། ཁྱེད་ཀྱིས་བདག་ལ་སྙིང་རྗེ་ཆེན་པོའང་མངོན་པར་གྱུར་ནས་བདག་གི་སྲོག་བསྐྱབས༌སོ། །འོན༌ཀྱང༌། བདག་ནི་རི་ཁྲོད་དུ་འབྲོ་མི་ཐུབ༌སྟེ། ཆག་སྒོ་འདི་བདག་གི་ལུས་སྟེང་དུ་བྱུང་ནས་ང་རང་འཆི་བར༌འགྱུར།
GEN 19:20 གཟིགས་དང༌། ཕ་གིའི་གྲོང་རྡལ་དེ་ནི་ཆུང་བ༌དང༌། བདག་དང་བར་ཐག་ཀྱང་ཉེ་བས་འབྲོ་སླ་བ༌ཡིན། གྲོང་རྡལ་དེ་ཆུང་བ་མ་ཡིན༌ནམ། བདག་གི་སྲོག་སྐྱོབ་པའི༌ཕྱིར་ཁྱེད་ཀྱིས་བདག་གྲོང་རྡལ་དེར་འབྲོ་རུ་འཇུག་པར་མཛོད་ཅེས་ཞུས༌སོ།།
GEN 19:21 དེ་ནས་ཕོ་ཉས་འདི་སྐད༌དུ། བདག་གིས་དོན་འདི་ཁྱོད་ལ་ཁས་བླངས་པ༌དང༌། བདག་གིས་ཁྱོད་ཀྱིས་སྨྲས་པའི་གྲོང་རྡལ་དེ་མེད་པར་མི་གཏོང༌ངོ༌།།
GEN 19:22 ཁྱོད་རང་མྱུར་བ་མྱུར་དུ་གྲོང་རྡལ་དེར་ཕྲོས༌ཤིག ཅིའི་ཕྱིར་ཞེ༌ན། ཁྱོད་གྲོང་རྡལ་དེ་ལ་སླེབས་པའི་བར་དུ་བདག་གིས་ཅི་ཡང་བྱ་མི་ནུས་པའི་ཕྱིར་ཡིན་ཞེས་གསུངས༌སོ། །དེ་བས་གྲོང་རྡལ་དེའི་མིང་ལ་ཚོ་ཨར་ཞེས་ཟེར༌རོ།།
GEN 19:23 དེ་ནས་ལོད་ཐུ་ཁོ་རང་ཚོ་ཨར་དུ་སླེབས་དུས་ས་གཞིར་ཉི་མ༌ཤར།
GEN 19:24 སྐབས༌དེར། དཀོན་མཆོག་ཡ་ཝཱེས་ནམ་མཁའ་ནས་མེ་དང་མུ་ཟིའི་ཆར་བ་འབབ་ཏུ་བཅུག༌སྟེ། སཱ་དོམ་དང་གཱ་མོ་ར༌དང༌།
GEN 19:25 གྲོང་ཁྱེར་དེ་དག་དང་ཡུལ་འཁོར་ཐམས་ཅད༌དང༌། གྲོང་ཁྱེར་ནང་གི་མི་རྣམས༌དང༌། ས་ལས་སྐྱེས་པ་ཐམས་ཅད་ཀྱང་མེད་པར་བཏང༌ངོ༌།།
GEN 19:26 དེ་ནས་ལོད་ཐུའི་ཆུང་མས་ཁ་ཕྱིར་འཁོར་ནས་བལྟས་མ་ཐག་ཁོ་མོ་ལན་ཚྭའི་ཀ་བ་ཞིག་ཏུ་གྱུར༌ཏོ།།
GEN 19:27 ཞོགས་པར་ཨབ་ར་ཧམ་ཡར་ལངས༌ཏེ། ཁོ་རང་དེ་སྔོན་དཀོན་མཆོག་ཡ་ཝཱེའི་མདུན་དྲུང་དུ་ལངས་ནས་བསྡད་མྱོང་བའི་གནས་དེར་སོང༌སྟེ།
GEN 19:28 སཱ་དོམ་དང་གཱ་མོ་ར་གཉིས༌དང༌། ཡུལ་འཁོར་ཐམས་ཅད་ཀྱི་ཕྱོགས་སུ་གཟིགས་པ༌ན། ཡུལ་དེ་དག་ལས་དུ་བ་འཕྱུར༌ཞིང༌། མེ་ཐབ་ལས་དུ་བ་འཕྱུར་བ་དང་མཚུངས༌སོ།།
GEN 19:29 དེ་ཡང་དཀོན་མཆོག་གིས་ཡུལ་འཁོར་གྱི་གྲོང་ཁྱེར་ཐམས་ཅད་རྡུལ་དུ་བརླག་པ་དང་ལོད་ཐུ་སྡོད་སའི་གྲོང་ཁྱེར་དེའང་མེད་པར་བཟོ་བའི་དུས༌སུ། ཁོང་གིས་ཨབ་ར་ཧམ་ཐུགས་ལ་དགོངས་ཏེ་ལོད་ཐུའང་གྲོང་ཁྱེར་དེ་ལས་ཕྱི་རུ་ཁྲིད་པར་མཛད༌དོ།།
GEN 19:30 དེ་ཡང་ལོད་ཐུ་ཁོ་རང་ཚོ་ཨར་གྲོང་རྡལ་དུ་སྡོད་པར་འཇིགས༌པས། རང་གི་བུ་མོ་གཉིས་ཀ་ཁྲིད་ཅིང་ཚོ་ཨར་དང་ཁ་བྲལ་ཏེ་རི་ཁྲོད་དུ་སོང་ནས་ཁོ་རྣམས་བྲག་ཁུང་ཞིག་ལ་མཉམ་དུ༌བསྡད།
GEN 19:31 དེ་ནས་བུ་མོ་ཆེ་བས་བུ་མོ་ཆུང་བར་ན༌རེ། ངེད་གཉིས་ཀྱི་ཕ་ལོ་ན་རྒས༌ཤིང༌། ཡུལ་འདི་རུ་འཇིག་རྟེན་གྱི་ལུགས་སྲོལ་བཞིན་ངེད་གཉིས་དང་འགྲོགས་མཁན་མེད༌པས།
GEN 19:32 ཤོག༌དང༌། ངེད་གཉིས་ཀྱིས་རང་གི་ཕ་ལ་རྒུན་ཆང་འདྲེན་པ༌དང༌། ཁོ་དང་འགྲོགས་པར༌བྱའོ། །དེ་ལྟར་བྱས༌ན། ངེད་གཉིས་ལ་ཕ་ལས་རིགས་རྒྱུད་ལྡན་པར་འགྱུར་ཞེས་སྨྲས༌སོ།།
GEN 19:33 དེའི༌ཕྱིར། མཚན་མོ་དེར་ཁོ་མོ་གཉིས་ཀྱིས་ཕ་ལ་རྒུན་ཆང་དྲངས་པ༌དང༌། ཐོག་མར་བུ་མོ་ཆེ་བ་སོང་ནས་ཕ་དང་ལུས་འབྲེལ༌བྱས། འོན༌ཀྱང༌། ཁོ་མོ་ག་དུས་ཉལ་བ༌དང༌། དུས་ནམ་ཞིག་ཡར་ལངས་པ་སོགས་ཕ་ཡིས་ཅི་ཡང་མ་ཤེས༌སོ།།
GEN 19:34 དེའི་ཕྱི༌ཉིན། བུ་མོ་ཆེ་བས་བུ་མོ་ཆུང་བར་ན༌རེ། མདང་ནུབ་བདག་ཕ་དང་འགྲོགས༌ཤིང༌། དོ་དགོང་ཡང་ངེད་གཉིས་ཀྱིས་ཕ་ལ་རྒུན་ཆང་འདྲེན་པ༌དང༌། ཁྱོད་ཕ་དང་འགྲོགས་པར༌བྱའོ། །དེ་ལྟར་བྱས༌ན། ངེད་གཉིས་ལ་ཕ་ལས་རིགས་རྒྱུད་ཡོད་པར་འགྱུར་ཞེས་སྨྲས༌སོ།།
GEN 19:35 དེའི༌ཕྱིར། མཚན་མོ་དེར་ཡང་ཁོ་མོ་གཉིས་ཀྱིས་ཕ་ལ་རྒུན་ཆང་དྲངས་པ༌དང༌། བུ་མོ་ཆུང་བ་ཡར་ལངས་ནས་ཕ་དང་ལུས་འབྲེལ་བྱས༌སོ། །འོན༌ཀྱང༌། ཁོ་མོ་ག་དུས་ཉལ་བ༌དང༌། དུས་ནམ་ཞིག་ཡར་ལངས་པ་སོགས་ཕ་ཡིས་ཅི་ཡང་མ་ཤེས༌སོ།།
GEN 19:36 དེ་ལྟར་ལོད་ཐུའི་བུ་མོ་གཉིས་ལ་རང་གི་ཕ་ལས་མངལ་སྦྲུམ་པར༌གྱུར།
GEN 19:37 དེ་ཡང་བུ་མོ་ཆེ་བར་བུ་ཞིག་སྐྱེས་ཤིང་མིང་ལ་མོ་ཨབ་ཅེས་བཏགས་པ༌དང༌། དེ་ནི་དེང་དུས་ཀྱི་མོ་ཨབ་མི་རིགས་ཀྱི་མེས་པོ་ཡིན༌ལ།
GEN 19:38 བུ་མོ་ཆུང་བས་ཀྱང་བུ་ཞིག་བཙས་ཤིང་མིང་ལ་པེན་ཨ་མེ་ཞེས་བཏགས་པ༌དང༌། དེ་ནི་དེང་དུས་ཀྱི་ཨམ་མོན་མི་རིགས་ཀྱི་མེས་པོ་ཡིན༌ནོ།།
GEN 20:1 དེ་ཡང་ཨབ་ར་ཧམ་ཡུལ་དེ་ནས་ནེ་གུབ་ཡུལ་ཕྱོགས་ཀྱི་ཀཱ་དེའེ་ཤཱ་དང་ཤུར་ཞེས་པའི་ཡུལ་བར་དུ་ཁྱིམ་གཞིས་སྤར་བ་དང་གེ་རཱར་གྲོང་ཁྱེར་དུ་བསྡད༌དོ།།
GEN 20:2 དེ་ནས་ཨབ་ར་ཧམ་གྱིས་རང་གི་ཆུང་མ་སཱ་ར་ནི་རང་གི་སྲིང་མོ་ཡིན་ཟེར༌བས། གེ་རཱར་གྱི་རྒྱལ་པོ་ཨ་བི་མེ་ལེག་གིས་མི་མངགས་ནས་སཱ་ར་རང་གི་ཁྱིམ་དུ་བླངས༌སོ།།
GEN 20:3 འོན༌ཀྱང༌། མཚན་མོའི་དུས༌སུ། རྒྱལ་པོ་ཨ་བི་མེ་ལེག་གི་རྨི་ལམ་དུ་དཀོན་མཆོག་དངོས་སུ་ཕེབས་ཏེ་ཁོ་རང་ལ་འདི་སྐད༌དུ། ཁྱོད་ནི་གཤིན་པོ་ལྟ་བུ༌ཡིན། ཅིའི་ཕྱིར་ཞེ༌ན། ཁྱོད་ཀྱིས་བུད་མེད་དེ་རང་གི་ཁྱིམ་དུ་བླངས་པའི་ཕྱིར༌ཡིན། བུད་མེད་དེ་ནི་མི་གཞན་གྱི་ཆུང་མ་ཡིན་ཞེས་གསུངས༌སོ།།
GEN 20:4 ཨ་བི་མེ་ལེག་ནི་སཱ་ར་དང་ཉེ་བར་འགྲོགས་མེད༌པས། ཁོ་ན༌རེ། གཙོ་བོ་ལགས། ཁྱེད་ཀྱིས་སྐྱོན་གྱི་དྲི་མས་མ་གོས་པའི་རྒྱལ་ཁབ་ཀྱང་མེད་པར༌བཟོའམ།
GEN 20:5 མི་དེས་བདག་ལ་ཁོ་མོ་ང་ཡི་སྲིང་མོ་ཡིན་ཞེས་སྨྲས་པ་མ་ཡིན༌ནམ། བུད་མེད་དེས་ཀྱང་བདག་ལ་ཁོ་ངའི་གཅེན་པོ་ཡིན་ཞེས་སྨྲས་མྱོང་བ༌དང༌། བདག་གིས་དོན་འདི་བསྒྲུབས་པ་ནི་བསམ་པ་དྲང་ཞིང་སྤྱོད་ལམ་གཙང་བ་ཡིན་ཞེས་སྨྲས༌སོ།།
GEN 20:6 ཡང་དཀོན་མཆོག་གིས་ཁོའི་རྨི་ལམ་ལས་འདི་སྐད༌དུ། ཁྱོད་ཀྱིས་བསམ་པ་དྲང་པོའི་ངང་ནས་དོན་འདི་བསྒྲུབས་པ་བདག་གིས༌ཤེས། ཁྱོད་ཀྱིས་བདག་ལ་འགལ་བའི་སྡིག་པ་མི་བྱེད་པའི་ཕྱིར་ངས་ཁྱོད་རང་བཀག༌པར་མ་ཟད། ཁྱོད་ལ་ཁོ་མོར་རེག་ཏུའང་མ་བཅུག་པ་ཡིན།
GEN 20:7 ད་ལྟ་ཁྱོད་ཀྱིས་བུད་མེད་དེ་ཕྱིར་ཁོ་མོའི་ཁྱོ་གར་སྤྲོད༌ཅིག ཁོ་མོའི་ཁྱོ་ག་ལུང་སྟོན་པ་ཞིག་ཡིན༌ཞིང༌། ཁོས་ཁྱོད་ཀྱི་ཆེད་དུ་གསོལ་བ་འདེབས་པ་དང་ཁྱོད་ཀྱང་འཆི་བར་མི་འགྱུར༌རོ། །གལ་ཏེ་ཁྱོད་ཀྱིས་ཁོ་མོ་ཕྱིར་མ་སྤྲད༌ན། ཁྱོད་དང་ཁྱོད་ཀྱི་མི་ཐམས་ཅད་འཆི་ངེས་པ་ཁྱོད་ཀྱིས་ཤེས་དགོས་ཞེས་གསུངས༌སོ།།
GEN 20:8 ཞོགས་པར་ཨ་བི་མེ་ལེག་ཡར་ལངས་ཏེ་བློན་པོ་ཐམས་ཅད་བསྡུས༌ཤིང༌། དོན་དེ་དག་ཁོ་རྣམས་ལ་སྨྲས་པ་དང་དེ་དག་ཤིན་ཏུ་འཇིགས་པར༌གྱུར།
GEN 20:9 དེ་ནས་ཨ་བི་མེ་ལེག་གིས་ཨབ་ར་ཧམ་བོས༌ཏེ། ཁྱོད་ཀྱིས་ངེད་རྣམས་ལ་འདི་ལྟར་བྱེད་དོན༌ཅི། བདག་གིས་དོན་གང་ཞིག་གི་ཆ་ནས་ཁྱོད་ལ་འགལ་བའི་སྡིག་པ་བྱས༌སམ། ཁྱོད་ཀྱིས་བདག་དང་བདག་གི་རྒྱལ་ཁབ་ཀྱི་མི་རྣམས་ལ་མ་ཉེས་ཁག་འགེལ་བྱེད༌དམ། ཁྱོད་ཀྱིས་བདག་ལ་བྱ་མི་འོས་པ་བྱས་སོ་ཞེས་སྨྲས་པ༌དང༌།
GEN 20:10 ཡང་ཨ་བི་མེ་ལེག་ན༌རེ། ཁྱོད་ཀྱིས་དོན་གང་ཞིག་མཐོང་སྟེ་འདི་ལྟར་བྱས་སམ་ཞེས་སྨྲས༌སོ།།
GEN 20:11 ཡང་ཨབ་ར་ཧམ་གྱིས་འདི་སྐད༌དུ། ངས་ས་ཆ་འདིའི་མི་རྣམས་དཀོན་མཆོག་ལ་མི་གུས་མི་འཇིགས་པར་འདོད༌ཅིང༌། ཁྱོད་རྣམས་ཀྱིས་བདག་གི་ཆུང་མའི་རྐྱེན་གྱིས་ང་རང་གསོད་ངེས་པར༌བསམས།
GEN 20:12 ཁོ་མོ་དངོས་གནས་བདག་གི་སྲིང་མོ་ཡིན༌ཏེ། ངེད་གཉིས་ནི་ཕ་གཅིག་དང་མ་མི་གཅིག་པའི་མིང་སྲིང་ཡིན་པ༌དང༌། ཕྱིས་སུ་ཁོ་མོ་བདག་གི་ཆུང་མར་གྱུར༌ཏོ།།
GEN 20:13 དེ་སྔར་དཀོན་མཆོག་གིས་ང་རང་ཕ་གཞིས་དང་ཁ་བྲལ་ནས་ས་མཐར་འགྲིམས་པར་མཛད་པའི་དུས༌དེར། ངས་ཁོ་མོ་ལ་འདི་ལྟར་སྨྲས་པ༌སྟེ། ངེད་གཉིས་ས་ཆ་གང་དུ་སོང༌ནའང༌། ཁྱོད་ཀྱིས་མི་གཞན་ལ་ཁོ་བདག་གི་གཅེན་པོ་ཡིན་ཞེས་སྨྲོས༌དང༌། དེ་ལྟར་བྱས་ན་ཁྱོད་ཀྱིས་བདག་ལ་རོགས་རམ་བྱས་པ་ཡིན་ཞེས་བཤད་མྱོང་ཞེས་སྨྲས༌སོ།།
GEN 20:14 དེ་ནས་ཨ་བི་མེ་ལེག་གིས་ར་ལུག་དང་བ༌གླང༌། གཡོག་པོ་དང་གཡོག་མོ་དག་ཨབ་ར་ཧམ་ལ་གནང་བ༌དང༌། ཁོང་གི་ཆུང་མ་སཱ་རའང་ཕྱིར་སྤྲད༌དོ།།
GEN 20:15 ཡང་ཁོ་ན༌རེ། ལྟོས༌དང༌། བདག་གི་ས་ཐམས་ཅད་ཁྱོད་ཀྱི་མིག་མདུན་དུ་ཡོད༌པས། ཁྱོད་རང་གི་འདོད་མོས་བཞིན་གང་དུ་བཞུགས་ཀྱང་འོས་པ་ཡིན་ཞེས་སྨྲས༌སོ།།
GEN 20:16 ཡང་ཁོས་སཱ་ར་ལ་འདི་ལྟར་སྨྲས་པ༌སྟེ། ངས་ཁྱོད་ཀྱི་གཅེན་པོར་དངུལ་སྒོར་ཆིག་སྟོང་སྤྲད་པ༌དང༌། དེ་ནི་ཁྱོད་རང་མི་ཚོགས་ཀྱི་མདུན་དུ་ངོ་གནོང་མི་དགོས་པ༌དང༌། ཁྱོད་ལ་ཉེས་སྐྱོན་མེད་པའི་སྐྱིན་ཚབ་ཏུ་སྤྲད་པ་ཡིན་ཞེས་སྨྲས༌སོ།།
GEN 20:17 དེ་ནས་ཨབ་ར་ཧམ་གྱིས་དཀོན་མཆོག་ལ་གསོལ་བ་བཏབ་པ༌དང༌། དཀོན་མཆོག་གིས་ཨ་བི་མེ་ལེག༌དང༌། ཁོའི་ཆུང་མ༌དང༌། གཡོག་མོ་ཐམས་ཅད་ཀྱི་ནད་གསོས་ཤིང་དེ་དག་ལ་མངལ་ཆགས་ཐུབ་པར་མཛད༌དོ།།
GEN 20:18 རྒྱུ་མཚན་ནི་དཀོན་མཆོག་ཡ་ཝཱེས་ཨབ་ར་ཧམ་གྱི་ཆུང་མ་སཱ་རའི་རྐྱེན༌གྱིས། དེ་སྔར་ཨ་བི་མེ་ལེག་ཚང་གི་བུད་མེད་ཐམས་ཅད་མངལ་མི་ཆགས་པར་མཛད་པའི་ཕྱིར༌རོ།།
GEN 21:1 དེ་ཡང་དཀོན་མཆོག་ཡ་ཝཱེས་དེ་སྔར་ཞལ་བཞེས་གནང་བ་བཞིན་སཱ་ར་ལ་ཐུགས་རྗེ་གནང་བ་དང་དེ་བཞིན་དུ་འགྲུབ་པར་མཛད༌དོ།།
GEN 21:2 དེ་ནས་ཨབ་ར་ཧམ་དགུང་ལོ་བགྲེས་པའི་དུས་སུ་སཱ་ར་ལ་མངལ་སྦྲུམ་པ༌དང༌། དཀོན་མཆོག་གིས་གསུངས་པའི་དུས་དེར་ཨབ་ར་ཧམ་ལ་བུ་ཞིག༌སྐྱེས།
GEN 21:3 ཨབ་ར་ཧམ་གྱིས་སཱ་ར་ལས་ཐོབ་པའི་བུ་དེའི་མིང་ལ་ཨི་སཱག་ཅེས་བཏགས༌སོ།།
GEN 21:4 བུ་སྐྱེས་ནས་ཉིན་བརྒྱད་པ༌ལ། དཀོན་མཆོག་གིས་བཀའ་གནང་བ་བཞིན་ཨབ་ར་ཧམ་གྱིས་བུའི་མཚན་སྐྱི་བཅད༌དོ།།
GEN 21:5 བུ་ཨི་སཱག་སྐྱེས་པའི་དུས༌སུ། ཨབ་ར་ཧམ་དགུང་ལོ་བརྒྱ་ཐམ་པ་ཡིན༌ནོ།།
GEN 21:6 དེ་ནས་སཱ་ར་ན༌རེ། དཀོན་མཆོག་གིས་ང་རང་དགོད་པར་མཛད་པ༌དང༌། ང་ལ་བུ་སྐྱེས་པའི་དོན་འདི་ཐོས་མཁན་སུ་ཡིན་ཡང་བདག་དང་མཉམ་དུ་དགོད་ངེས་ཡིན་ཞེས་སྨྲས་པ༌དང༌།
GEN 21:7 ཡང་ཁོ་མོ་ན༌རེ། སུ་ཞིག་གིས་སྔ་མོ་ནས་ཨབ་ར་ཧམ་ལ་འདི་སྐད༌དུ། སཱ་རས་བུ་ལ་ནུ་ཞོ་སྟེར་ངེས་ཡིན་ཞེས་སྨྲ་ནུས༌སམ། འོན༌ཀྱང༌། ངས་ཨབ་ར་ཧམ་དགུང་ལོ་མཐོ་བའི་དུས༌སུ་ཁོང་ལ་བུ་ཞིག་བཙས་པ་ཡིན་ཞེས་སྨྲས༌སོ།།
GEN 21:8 དེ་ཡང་བུ་ཨི་སཱག་རིམ་གྱིས་ནར་སོན་པ་དང་ནུ་ཞོ་སྟེར་མཚམས་བཞག༌གོ །བུའི་ནུ་ཞོ་བཀར་བའི་ཉིན༌ལ། ཨབ་ར་ཧམ་གྱིས་གསོལ་སྟོན་གཟབ་རྒྱས་བསྡུས༌སོ།།
GEN 21:9 དུས༌དེར། ཨེ་ཅིབ་ཀྱི་གཡོག་མོ་ཧ་གར་ནས་ཨབ་ར་ཧམ་ལ་སྐྱེས་པའི་བུ་ཡེས་མ་ཨེལ་གྱིས་བུ་ཨི་སཱག་ལ་འཕྱ་དམོད་བྱེད་བཞིན་པ་སཱ་རས་མཐོང༌སྟེ།
GEN 21:10 ཨབ་ར་ཧམ་ལ་འདི་ལྟར་སྨྲས༌པ། གཡོག་མོའི་བུ་ཡིས་བདག་གི་བུ་ཨི་སཱག་དང་མཉམ་དུ་ཁྱིམ་རྒྱུད་འཛིན་མི་རུང༌བས། གཡོག་མོ་མ་བུ་གཉིས་ཀ་ཕྱིར་ཕུད་ཅིག་ཅེས་པ༌དང༌།
GEN 21:11 ཨབ་ར་ཧམ་རང་གི་བུ་ཡི་རྐྱེན་གྱིས་སེམས་སྡུག་ཆེན་པོར༌ལྷུང༌།
GEN 21:12 འོན༌ཀྱང༌། དཀོན་མཆོག་གིས་ཨབ་ར་ཧམ་ལ་འདི་སྐད༌དུ། བུ་དང་གཡོག་མོའི་ཆེད་དུ་སེམས་སྡུག་མ༌བྱེད། སཱ་རས་གཏམ་གང་ཞིག་སྨྲས་པ་ལ་ཁྱོད་ཀྱིས་ཉན་པར༌བྱའོ། །ཅིའི་ཕྱིར་ཞེ༌ན། ཨི་སཱག་བརྒྱུད་ནས་ཁྱོད་ཀྱི་རིགས་རྒྱུད་ཀྱི་མིང་ཐོན་པར་འགྱུར་བའི་ཕྱིར༌རོ།།
GEN 21:13 གཡོག་མོའི་བུ་ལ་མཚོན༌ན། བདག་གིས་ཁོའི་རིགས་རྒྱུད་ལའང་རྒྱལ་ཁབ་ཅིག་འཛུགས་པར༌བྱའོ། །ཅིའི་ཕྱིར་ཞེ༌ན། བུ་དེའང་ཁྱོད་ཀྱི་བུ་ཡིན་པས་སོ་ཞེས་གསུངས༌སོ།།
GEN 21:14 དེ་ནས་ཞོགས་པར་ཨབ་ར་ཧམ་ཡར་ལངས་ཏེ་ཧ་གར་གྱི་ཕྲག་ལ་བག་ལེབ་དང་སྐྱི་ཁུག་བཀལ་བ་དང་ཁོ་མོའི་བུའང་ཁོ་མོར་སྤྲད་ནས་འགྲོ་རུ༌བཅུག དེ་ལྟར་ཧ་གར་མ་བུ་གཉིས་སོང་བ་དང་པེར་ཤ་བཱ་ཡི་དབེན་སྟོང་དུ༌འཁྱམས།
GEN 21:15 དེར་སྐྱི་ཁུག་ནང་གི་སྐོམ་ཆུ་བཏུངས་ཚར༌བས། ཧ་གར་གྱིས་བུ་ཆུང་སྡོང་ཕྲན་ཞིག་གི་གྲིབ་བསིལ་འོག་ཏུ་བཞག་པ༌དང༌།
GEN 21:16 ཁོ་མོ་མདའ་འཕེན་ཐེངས་གཅིག་གི་མཚམས་སུ་སོང་བ་དང་བུའི་ཕྱོགས་སུ་ཁ་གཏད་ནས་བསྡད༌དེ། ངས་བུ་འཆི་བར་མིག་གིས་བལྟ་མི་བཟོད་ཅེས་སྨྲ་བཞིན་སྐད་ཆེན་པོ་བརྒྱབ་ནས་ངུས༌སོ།།
GEN 21:17 དེ་ཡང་དཀོན་མཆོག་གིས་བུ་ཆུང་ཞིག་ངུ་བའི་སྐད་གསན༌ཏོ། །དཀོན་མཆོག་གི་ཕོ་ཉས་ནམ་མཁའི་ཞིང་ཁམས་ནས་ཧ་གར་གྱི་མིང་ནས་བོས་ཏེ་འདི་སྐད༌དུ། ཧ༌གར། ཁྱོད་ཀྱིས་འདི་ལྟར་བྱེད་དོན༌ཅི། ཁྱོད་རང་འཇིགས་མི་དགོས༌ཏེ། དཀོན་མཆོག་གིས་བུ་ཆུང་གི་སྐད་གསན༌ཏོ།།
GEN 21:18 ཡར་ལོངས༌དང༌། བུ་ཡར་བསྐྱོར་ནས་ཁོའི་ལག་པར་འཇུས༌ཤིག ཅིའི་ཕྱིར་ཞེ༌ན། བདག་གིས་བུའི་རིགས་རྒྱུད་ལ་རྒྱལ་ཁབ་ཆེན་པོ་ཞིག་འཛུགས་པར་བྱ་ངེས་ཡིན་ཞེས་གསུངས༌སོ།།
GEN 21:19 དཀོན་མཆོག་གིས་ཁོ་མོའི་མིག་ཟུང་གསལ་པོར་མཛད་པ༌དང༌། ཁོ་མོས་དོང་ཆུ་ཞིག་མཐོང་ཞིང་སྐྱི་ཁུག་ནང་དུ་ཆུ་བླངས་ནས་བུ་ཆུང་ལ་འཐུང་དུ༌བཅུག
GEN 21:20 དེ་ལྟར་དཀོན་མཆོག་གིས་བུ་དེ་ལ་གཟིགས་སྐྱོང་གནང་བ༌དང༌། བུ་དེ་རིམ་གྱིས་ནར་སོན་པ་དང་དབེན་སྟོང་གི་ཡུལ་དུ་བསྡད༌ཅིང༌། ཕྱིས་སུ་མདའ་རྩལ་པ་ཞིག་ཏུ་གྱུར༌ཏོ།།
GEN 21:21 བུ་དེ་ཕཱ་རན་ཞེས་པའི་དབེན་སྟོང་དུ་སྡོད༌དུས། ཁོའི་ཡུམ་གྱིས་ཨེ་ཅིབ་ཡུལ་ནས་ཁོ་རང་ལ་ཆུང་མ་ཞིག་བླངས༌སོ།།
GEN 21:22 སྐབས་དེར་ཨ་བི་མེ་ལེག་དང་ཁོང་གི་དམག་དཔོན་ཆེན་པོ་ཕི་ཀོལ་ཞེས་བྱ་བ་གཉིས་ཀྱིས་ཨབ་ར་ཧམ་ལ་འདི་ལྟར་སྨྲས་པ༌སྟེ། ཁྱོད་ཀྱིས་དོན་གང་ཞིག་བསྒྲུབས་ཀྱང་དཀོན་མཆོག་གིས་ཁྱོད་ལ་གཟིགས་སྐྱོང་གནང༌ངོ༌།།
GEN 21:23 ད་ལྟ་ཁྱོད་ཀྱིས་འདི་ནས་དཀོན་མཆོག་དཔང་དུ་བཙུགས༌ཏེ། བདག་དང་བདག་གི༌བུ། བདག་གི་རིགས་རྒྱུད་རྣམས་ལ་མགོ་སྐོར་མི་གཏོང་བ༌དང༌། བདག་གིས་ཁྱོད་ལ་ཇི་ལྟར་དྲིན་གཟོ་བ༌བཞིན། ཁྱོད་ཀྱིས་ཀྱང་དེ་ལྟར་བདག་ལ་དྲིན་གཟོ་བ༌དང༌། ཁྱོད་སྡོད་སའི་ཡུལ་འདིའི་འབངས་མི་རྣམས་ལའང་དྲིན་གཟོ་བའི་དམ་བཅའ་འཇོག་པར་གྱིས་ཞེས་པ༌ལ།
GEN 21:24 ཨབ་ར་ཧམ་གྱིས་ང་རང་དམ་བཅའ་འཇོག་པར་འཐད་པ་ཡིན་ཞེས་སྨྲས༌སོ།།
GEN 21:25 དེ་ཡང་སྔོན་ཆད་ཨ་བི་མེ་ལེག་གི་གཡོག་པོ་རྣམས་ཀྱིས་དོང་ཆུ་ཞིག་བཙན་འཕྲོག་བྱས་མྱོང༌བས། ཨབ་ར་ཧམ་གྱིས་དོན་དེའི་ཕྱིར་ཨ་བི་མེ་ལེག་ལ་བཀའ་བཀྱོན་གནང་བ༌རེད།
GEN 21:26 དེ་ནས་ཨ་བི་མེ་ལེག་ན༌རེ། དོན་དེ་སུ་ཞིག་གིས་བྱས་པ་བདག་གིས་མི་ཤེས༌ཏེ། ཁྱོད་ཀྱིས་ཀྱང་བདག་ལ་མ་སྨྲས་ཤིང་བདག་གིས་དེ་རིང་བར་དུ་རྣ་བས་ཐོས་མ་མྱོང་ཞེས་སྨྲས༌སོ།།
GEN 21:27 དེ་ནས་ཨབ་ར་ཧམ་གྱིས་ཨ་བི་མེ་ལེག་ལ་བ་གླང་དང་ར་ལུག་བཅས་སྤྲད་པ༌དང༌། ཁོ་གཉིས་ཕན་ཚུན་བར་གྲོས་འཆམ་བྱུང༌ངོ༌།།
GEN 21:28 ཨབ་ར་ཧམ་གྱིས་མ་མོ་བདུན་གནས་གཞན་དུ་བཞག་ཡོད༌པས།
GEN 21:29 ཨ་བི་མེ་ལེག་གིས་ཨབ་ར་ཧམ་ལ་འདི༌ལྟར། ཁྱོད་ཀྱིས་མ་མོ་བདུན་གནས་གཞན་དུ་འཇོག་པའི་རྒྱུ་མཚན་ཅི་ཞེས་དྲིས་པ༌དང༌།
GEN 21:30 ཨབ་ར་ཧམ་གྱིས་འདི་སྐད༌དུ། ངས་དོང་ཆུ་འདི་བརྐོས་པའི་དཔང་རྟགས༌སུ། ཁྱོད་ཀྱིས་བདག་ནས་མ་མོ་བདུན་ལེན་དགོས་གསུངས༌སོ།།
GEN 21:31 དེའི༌ཕྱིར། ཨབ་ར་ཧམ་གྱིས་གནས་དེའི་མིང་ལ་པེར་ཤ་བཱ་ ཞེས་བཏགས༌སོ། །ཅིའི་ཕྱིར་ཞེ༌ན། ཁོ་གཉིས་ཀྱིས་གནས་དེ་རུ་དམ་བཅའ་བཞག་པའི་ཕྱིར༌རོ།།
GEN 21:32 དེ་ལྟར་ཁོ་གཉིས་པེར་ཤ་བཱ་ཡུལ་དུ་གྲོས་འཆམ་བྱུང་བ༌དང༌། ཨ་བི་མེ་ལེག་ཁོང་གི་དམག་དཔོན་ཕི་ཀོལ་དང་མཉམ་དུ་ཕེ་ལེ་ཤེད་མི་རིགས་ཀྱི་ཡུལ་དུ་ཕྱིར༌ལོག
GEN 21:33 ཨབ་ར་ཧམ་གྱིས་པེར་ཤ་བཱ་ཡུལ་དུ་འོམ་བུ་ཤིང་ཕྲན་ཞིག་བཙུགས༌ཤིང༌། གནས་དེ་ནས་ཐོག་མཐའ་མེད་པའི་དཀོན་མཆོག་ཡ་ཝཱེའི་མཚན་ནས་བོས༌པའོ།།
GEN 21:34 ཨབ་ར་ཧམ་ཁོང་ཉིད་ཕེ་ལེ་ཤེད་མི་རིགས་ཀྱི་ཡུལ་དུ་ཉིན་མང་པོར་བཞུགས༌སོ།།
GEN 22:1 དོན་དེའི་རྗེས༌སུ། དཀོན་མཆོག་གིས་ཨབ་ར་ཧམ་ལ་བརྟག་པར་དགོངས་ཏེ་ཨབ་ར་ཧམ་ཞེས་ཁོའི་མིང་ནས་བོས་པ༌ན། ཁོ་ན༌རེ། ང་རང་འདི་རུ་ཡོད་ཅེས་ལན་བཏབ༌བོ།།
GEN 22:2 དེ་ནས་དཀོན་མཆོག་གིས་འདི་སྐད༌དུ། ཁྱོད་ཀྱིས་རང་གི་གཅེས་པའི་བུ་གཅིག་པུ་སྟེ་ཨི་སཱག་ཁྲིད་ནས་མོ་རེའེ་ཡཱ་ཡུལ་དུ་སོང༌དང༌། བདག་གིས་སྟོན་པར་འགྱུར་བའི་རི་བོ་ཞིག་གི་སྟེང་དུ་བུ་དེ་སྦྱིན་སྲེག་ཏུ་ཕུལ་ཞིག་ཅེས་གསུངས༌སོ།།
GEN 22:3 དེ་ནས་ཞོགས་པར་ཨབ་ར་ཧམ་ཡར་ལངས་ཏེ་བོང་བུར་སྒ་གཏད༌ཅིང༌། སྦྱིན་སྲེག་གི་བུད་ཤིང་གཏུབས་རྗེས་གཡོག་པོ་གཉིས་དང་རང་གི་བུ་ཨི་སཱག་བཅས་ཁྲིད་དེ་དཀོན་མཆོག་གི་བཀའ་བཞིན་དུ་ཡུལ་དེའི་ལམ་ལ༌ཆས།
GEN 22:4 དེ་ནས་ཉིན་གསུམ་པ༌ལ། ཨབ་ར་ཧམ་གྱིས་མགོ་ཡར་བཀྱགས་ཏེ་རྒྱང་རིང་ནས་ཡུལ་དེ་མཐོང་བ༌དང༌།
GEN 22:5 གཡོག་པོ་གཉིས་ལ་འདི་སྐད༌དུ། ཁྱོད་གཉིས་ཀྱིས་བོང་བུ་བཟུང་ནས་འདིར་སྒུགས༌དང༌། བདག་དང་བུ་གཉིས་ཀ་གནས་དེར་སོང་ནས་དཀོན་མཆོག་ལ་གུས་ཕྱག་ཕུལ༌རྗེས། ཕྱིར་ཁྱོད་གཉིས་ཀྱི་གམ་དུ་ཡོང་ངེས་ཡིན་ཞེས་གསུངས༌སོ།།
GEN 22:6 དེ་ནས་ཨབ་ར་ཧམ་གྱིས་བུ་ཨི་སཱག་ལ་སྦྱིན་སྲེག་གི་བུད་ཤིང་ཁུར་དུ་བཅུག་པ་དང་རང་གི་ལག་ཏུ་མེ་དང་གྲི་བཟུང་ནས་ཁོ་གཉིས་ཕ་རོལ་ཏུ༌སོང༌།
GEN 22:7 དེ་ནས་བུ་ན༌རེ། ཕ་ལགས་ཞེས་ཞུས་པ༌དང༌། ཕ་ན༌རེ། བདག་གི༌བུ། ང་རང་འདི་རུ་ཡོད་ཅེས་སྨྲས༌སོ། །ཡང་བུ་ན༌རེ། ཁྱེད་ཀྱིས་གཟིགས༌དང༌། མེ་དང་བུད་ཤིང་ཐམས་ཅད་འཛོམས༌མོད། འོན་ཀྱང་སྦྱིན་སྲེག་ཏུ་ཕུལ་བའི་ལུ་གུ་གང་དུ་ཡོད་ཅེས་ཞུས་པ༌ལ།
GEN 22:8 ཕ་ན༌རེ། བདག་གི༌བུ། དཀོན་མཆོག་གིས་དངོས་སུ་སྦྱིན་སྲེག་གི་ལུ་གུ་གནང་ངེས་ཡིན་ཞེས་སྨྲས་པ་དང་ཕ་བུ་གཉིས་ཀ་མཉམ་དུ༌སོང༌།
GEN 22:9 དེ་ནས་ཁོ་གཉིས་དཀོན་མཆོག་གིས་བསྟན་པའི་གནས་དེར་སླེབས་པ༌དང༌། ཨབ་ར་ཧམ་གྱིས་གནས་དེ་རུ་མཆོད་ཁྲི་ཞིག་བཞེངས་པ་དང་དེའི་སྟེང་དུ་བུད་ཤིང་ལེགས་པར་བསྒྲིགས༌རྗེས། རང་གི་བུ་ཨི་སཱག་ཐག་པས་བསྡམས་ཏེ་བུད་ཤིང་གི་སྟེང་དུ༌བཞག
GEN 22:10 ཨབ་ར་ཧམ་གྱིས་ལག་པ་བརྐྱངས་ནས་གྲི་བླངས་ཏེ་བུ་གསོད་པར་རྩོམ་པ༌ལ།
GEN 22:11 གློ་བུར་ཉིད་ལ་དཀོན་མཆོག་ཡ་ཝཱེའི་ཕོ་ཉས་ནམ་མཁའི་ཞིང་ཁམས་ནས་ཨབ་ར༌ཧམ། ཨབ་ར་ཧམ་ཞེས་ཁོའི་མིང་ནས་བོས་པ༌དང༌། ཁོས་ང་རང་འདི་རུ་ཡོད་ཅེས་ལན་བཏབ༌བོ།།
GEN 22:12 དེ་ནས་ཕོ་ཉས་འདི་སྐད༌དུ། ཁྱོད་ཀྱིས་བུ་དེ་ལ་ལག་པས་རེག་པར་མི༌བྱའོ། །བུ་དེ་ལ་གནོད་པ་ཅི་ཡང་བྱ་མི་རུང༌ངོ༌། །ཁྱོད་ཀྱིས་དཀོན་མཆོག་ལ་དད་གུས་བྱེད་པ་ད་ལྟ་བདག་གིས༌ཤེས། ཅིའི་ཕྱིར་ཞེ༌ན། ཁྱོད་ཀྱིས་རང་གི་བུ་གཅིག་པུ་བདག་ལ་འབུལ་བར་ཡང་མ་འཛེམ་པའི་ཕྱིར་ཡིན་ཞེས་གསུངས་པ༌དང༌།
GEN 22:13 ཨབ་ར་ཧམ་གྱིས་མགོ་ཡར་བཀྱགས་ནས་བལྟས་པ༌ན། ལུག་ཐུག་ཅིག་མཐོང་ཞིང་རྭ་ཅོ་གཉིས་ཚེར་མའི་གསེབ་ཏུ་ཟུག་ཡོད་པ༌ལ། ཁོང་གིས་ལུག་ཐུག་དེ་ཚེར་མ་ལས་བླངས་ཏེ་རང་གི་བུའི་ཚབ་ཏུ་དཀོན་མཆོག་ལ་སྦྱིན་སྲེག་ཏུ་ཕུལ༌ཏོ།།
GEN 22:14 ཨབ་ར་ཧམ་གྱིས་གནས་དེའི་མིང་ལ་ཡ་ཝཱེས་ཡིར་ཨེ་ཞེས་བཏགས་ཤིང་དོན་ནི་དཀོན་མཆོག་ཡ་ཝཱེས་གནང་ངེས་ཡིན་ཞེས་པའོ། །ད་ལྟའི་བར་དུ་མི་རྣམས་ཀྱིས་དཀོན་མཆོག་ཡ་ཝཱེའི་རི་བོར་ཁོང་གིས་གནང་ངེས་ཡིན་ཞེས༌སྨྲའོ།།
GEN 22:15 དེ་ནས་དཀོན་མཆོག་ཡ་ཝཱེའི་ཕོ་ཉས་ཐེངས་གཉིས་པར་ནམ་མཁའི་ཞིང་ཁམས་ལས་ཨབ་ར་ཧམ་ཞེས་ཁོའི་མིང་ནས་བོས༌ཤིང༌།
GEN 22:16 དཀོན་མཆོག་ཡ་ཝཱེས་འདི་སྐད༌དུ། ཁྱོད་ཀྱིས་དོན་འདི་བསྒྲུབས་པར་རང་གི་བུ་གཅིག་པུ་ལའང་མ་འཛེམ༌པས། ངས་རང་ལ་བརྟེན་ནས་དམ་བཅས་པ༌སྟེ།
GEN 22:17 བདག་གིས་ཁྱོད་ལ་བྱིན་རླབས་ཆེན་པོ་གནང་ངེས༌ཤིང༌། ཁྱོད་ཀྱི་བུ་རྒྱུད་ནི་ནམ་མཁའི་སྐར་མ་དང་རྒྱ་མཚོའི་འགྲམ་གྱི་བྱེ་མ་ཇི་བཞིན་མང་དུ་འཕེལ་བར༌བྱ། ཁྱོད་ཀྱི་བུ་རྒྱུད་ཀྱིས་རང་གི་དགྲ་བོ་རྣམས་ཀྱི་མཁར་འཛིན་པ༌དང༌།
GEN 22:18 ཁྱོད་ཀྱིས་བདག་གི་གཏམ་ལ་མཉན་པའི༌ཕྱིར། ཁྱོད་ཀྱི་བུ་རྒྱུད་བརྒྱུད་ནས་ས་སྟེང་གི་མི་རིགས་ཐམས་ཅད་ལ་བྱིན་རླབས་འཐོབ་པར་འགྱུར་ཞེས་གསུངས༌སོ།།
GEN 22:19 དེའི༌ཕྱིར། ཨབ་ར་ཧམ་ཕ་བུ་གཉིས་རང་གི་གཡོག་པོའི་གམ་དུ་སོང་བ༌དང༌། ཁོ་རྣམས་ལྷན་དུ་པེར་ཤ་བཱ་རུ་ཕྱིར་ལོག༌རྗེས། ཨབ་ར་ཧམ་ནི་པེར་ཤ་བཱ་ཡུལ་དུ་བཞུགས༌སོ།།
GEN 22:20 དོན་དེའི་རྗེས༌སུ། མི་གཞན་གྱིས་ཨབ་ར་ཧམ་ལ་འདི་ལྟར་སྨྲས༌པ། ལྟོས༌དང༌། མིལ་ཀཱ་ཡིས་ཁྱེད་ཀྱི་སྤུན་ནཱ་ཧོར་ལ་བུ་དུ་མ་བཙས་པ༌སྟེ།
GEN 22:21 བུ་སྐྱེས་འགོ་ནི་ཨུ་ཟཱ་ཡིན༌ལ། ཁོའི་གཅུང་པོ་ནི་པུ་ཟཱ༌དང༌། ཀཱ་མུ༌ཨེལ། ༼དེ་ནི་ཨ་རམ་གྱི་ཕ༌ཡིན།༽
GEN 22:22 ཀེ༌སེད། ཧ༌ཟོ། ཕིལ༌དཱ། ཡེད༌ལིབ། པཱ་ཐུ་ཨེལ་བཅས༌སོ།།
GEN 22:23 པཱ་ཐུ་ཨེལ་ནི་ཕྱིས་སུ་བུ་མོ་རིབ་ཀཱ་ཞེས་བྱ་བའི་ཕ་ཡིན༌ལ། བུ་དེ་བརྒྱད་པོ་ནི་མིལ་ཀཱ་ཡིས་ཨབ་ར་ཧམ་གྱི་སྤུན་ནཱ་ཧོར་ལ་བཙས༌པའོ།།
GEN 22:24 དེ་ཡང་ནཱ་ཧོར་གྱི་ཆུན་མ་རཱ་ཨུ་མཱ༌ལས། ཐེ་པཱག༌དང༌། གཱ༌ཧམ། ཐཱ་ཧ༌ཤཱ མཱ་ཨ་ཀཱ་བཅས་བུ་བཞི་སྐྱེས༌སོ།།
GEN 23:1 དེ་ཡང་སཱ་ར་དགུང་ལོ་བརྒྱ་དང་ཉེར་བདུན་ལ་བཞུགས༌ཤིང༌། དེ་ནི་སཱ་རའི་མི་ཚེ་གང་པོའི་ཚེ་ཚད་ཡིན༌ནོ།།
GEN 23:2 ཁོ་མོ་ཀ་ན་ཨན་ཡུལ་གྱི་ཀིར་ཡཱད་ཨར་པཱ་གྲོང་ཁྱེར༌ཏེ། དེང་སང་གི་ཧེབ་རོན་དུ་ཚེ་ལས་འདས༌པས། ཨབ་ར་ཧམ་ནང་དུ་སོང་ནས་མྱ་ངན་དང་ངུ་འབོད་བྱས་པ༌དང༌།
GEN 23:3 ཕྱིས་སུ་ཨབ་ར་ཧམ་འདས་པོ་སཱ་རའི་མདུན་ནས་ཡར་ལངས༌ཏེ། ཧེད་ཀྱི་བུ་རྒྱུད་རྣམས་ལ་འདི་སྐད༌དུ།
GEN 23:4 བདག་ནི་ཁྱེད་རྣམས་ཀྱི་ཁྲོད་ནས་ཕྱི་ཕྱོགས་པ་ཡིན༌ལ། བྱེས་པ་ཞིག་ཀྱང་ཡིན༌པས། ཁྱེད་ཅག་གིས་འདི་ནས་བདག་ལ་དུར་ས་ཞིག་གནང་བར༌ཞུ། ངས་ཁོ་མོའི་བེམ་པོ་བདག་གི་མིག་ལམ་ནས་དུར་ལ་སྦ་བར་བྱ་ཞེས་གསུངས་པ༌དང༌།
GEN 23:5 ཧེད་ཀྱི་བུ་རྒྱུད་རྣམས་ན༌རེ།
GEN 23:6 ཇོ་བོ༌ལགས། ཁྱེད་ཀྱིས་གསན་རོགས༌གནང༌། ཁྱེད་ནི་ངེད་ཅག་གི་ཁྲོད་དུ་རྒྱལ་སྲས་མཆོག་གྱུར་ཞིག་ཡིན༌ལ། ཁྱེད་ཀྱིས་ངེད་ཅག་གི་དུར་ཁྲོད་ལས་ཆེས་བཟང་བའི་གནས་སུ་ཁྱེད་ཀྱི་བེམ་པོ་དུར་ལ་སྦས་ཀྱང་རུང༌སྟེ། ངེད་ཅག་སུ་ཞིག་གིས་ཀྱང་རང་གི་དུར་ཁྲོད་དུ་ཁྱེད་ཀྱི་བེམ་པོ་དུར་ལ་སྦ་རུ་མི་འཇུག་པ་མེད་ཅེས་ལན་བཏབ༌བོ།།
GEN 23:7 དེ་ནས་ཨབ་ར་ཧམ་ཡར་ལངས་ཤིང་གནས་དེའི་ཧེད་ཀྱི་བུ་རྒྱུད་རྣམས་ལ་གུས་པ་བྱས༌ཏེ།
GEN 23:8 འདི་སྐད༌དུ། ངས་ཁོ་མོའི་བེམ་པོ་བདག་གི་མིག་ལམ་ནས་དུར་ལ་སྦ་བར་ཁྱེད་རྣམས་འཐད་པ་ཡིན༌ན། ཁྱེད་ཅག་གིས་གསོན་དང༌། བདག་གི་ཆེད་དུ་ཁྱེད་རྣམས་བར་སྡོད་པ་བྱས་ནས་ཚོ་ཧར་གྱི་བུ་ཨེབ་རོན་ལ་ཞུ་བ་ཞུས༌ཏེ།
GEN 23:9 ས་ཞིང་གི་གོང་དུ་ཡོད་པའི་མཱག་ཕེ་ལཱ་བྲག་ཁུང་དེ་བདག་ལ་དུར་ས་རུ་གནང་བ༌དང༌། ཨེབ་རོན་གྱིས་བྲག་ཁུང་དེ་རིན་གོང་དངོས་མ་ལྟར་ཁྱེད་ཀྱི་མིག་མདུན་ནས་བདག་ལ་བཙོང་བར་མཛོད་ཅེས་གསུངས༌སོ།།
GEN 23:10 སྐབས་དེར་ཧེད་ཀྱི་བུ་རྒྱུད་ཨེབ་རོན་རང་གི་སྤུན་ཟླ་རྣམས་ཀྱི་ཁྲོད་དུ་ཡོད༌པས། ཨེབ་རོན་གྱིས་མཁར་སྒོ་བརྒྱུད་ནས་འགྲོ་འོང་བྱེད་པའི་ཧེད་ཀྱི་བུ་རྒྱུད་ཐམས་ཅད་ཀྱི་ཁྲོད་དུ་ཨབ་ར་ཧམ་ལ་འདི་ལྟར་སྨྲས་པ༌སྟེ།
GEN 23:11 དེ་འདྲ་ག་ལ༌ཡིན། བདག་གི་ཇོ་བོ༌ལགས། གསོན་དང༌། བདག་གིས་ས་ཞིང་འདི་ཁྱེད་ལ་སྟེར་བ༌དང༌། ཐ་ན་ཞིང་བར་གྱི་བྲག་ཁུང་ཡང་ཁྱེད་ལ་སྟེར་རྒྱུ༌དང༌། ངེད་ཅག་མི་རིགས་ཀྱི་མིག་མདུན་ནས་ཐམས་ཅད་ཁྱེད་ལ་སྟེར་རྒྱུ་ཡིན༌པས། ཁྱེད་ཀྱིས་རང་གི་བེམ་པོ་དུར་ལ་སྦ་བར་གྱིས་ཞེས༌པའོ།།
GEN 23:12 དེ་ནས་ཡང་ཨབ་ར་ཧམ་གྱིས་ཡུལ་དེའི་མི་རྣམས་ལ་གུས་པ་བྱས༌རྗེས།
GEN 23:13 ཁོ་རྣམས་ཀྱི་མིག་མདུན་ནས་ཨེབ་རོན་ལ་འདི་སྐད༌དུ། ཁྱེད་རང་འཐད་པ་ཡིན༌ན། བདག་གི་གཏམ་ལ་མཉན་པར༌མཛོད། ངས་ས་རིན་ཐམས་ཅད་ཁྱེད་ལ་སྟེར་རྒྱུ་ཡིན་པ༌དང༌། ཁྱེད་ཀྱིས་ཀྱང་ལེན་པར༌མཛོད། ངས་གནས་དེ་རུ་བདག་གི་བེམ་པོ་དུར་ལ་སྦ་བར་བྱ་ཞེས་གསུངས་པ༌དང༌།
GEN 23:14 ཨེབ་རོན་ན༌རེ།
GEN 23:15 བདག་གི་ཇོ་བོ༌ལགས། ཁྱེད་ཀྱིས་གསོན་དང༌། ས་རིན་དངུལ་སྲང་ བཞི་བརྒྱ་ཡིན་པའི་ས་ཞིང་ནི་ངེད་གཉིས་བར་དུ་ཅི་ཡང་མ་ཡིན༌ཏེ། ཁྱེད་ཀྱིས་རང་གི་བེམ་པོ་དུར་དུ་སྦ་བར་གྱིས་ཞེས་ལན་བཏབ༌བོ།།
GEN 23:16 དེ་ནས་ཨབ་ར་ཧམ་གྱིས་ཨེབ་རོན་གྱི་གཏམ་ལ་མཉན༌ཅིང་། ཁོང་གིས་ཧེད་ཀྱི་བུ་རྒྱུད་རྣམས་ཀྱི་མདུན་དུ་སྨྲས་པ་བཞིན་བསྒྲུབས༌ཏེ། ཉོ་འཚོང་བྱེད་པར་བཀོལ་བའི་དངུལ་སྲང་བཞི་བརྒྱ་དེ་སྲང་ལ་འཇལ་ནས་ཨེབ་རོན་ལ་སྤྲད་དོ།།
GEN 23:17 དེ་ལྟར་ཨབ་ར་ཧམ་གྱིས་ཨེབ་རོན་གྱི་ས་ཞིང་ཉོས་པ༌དང༌། ས་ཞིང་དེ་ནི་མཱག་ཕེ་ལཱ་ཞེས་པའི་ས་ཆར་ཡོད་པར་མ༌ཟད། མཱན་རེའེ་ཡུལ་གྱི་མདུན་ཕྱོགས་སུ་ཡོད༌ཅིང༌། ས་ཞིང་དེ་དང་དེ་རུ་ཡོད་པའི་བྲག་ཁུང༌དང༌། ཞིང་བར་དང་དེའི་མཐའ་སྐོར་གྱི་ལྗོན་ཤིང་ཐམས་ཅད་ཨབ་ར་ཧམ་ལ་དབང་བ༌དང༌། ས་ཞིང་དེ་ནི་མཁར་སྒོ་བརྒྱུད་ནས་འགྲོ་འོང་བྱེད་པའི་ཧེད་ཀྱི་བུ་རྒྱུད་ཐམས་ཅད་ཀྱི་མིག་མདུན་ནས་ཉོས༌པའོ།།
GEN 23:19 དོན་དེའི་རྗེས༌སུ། ཨབ་ར་ཧམ་གྱིས་རང་གི་ཆུང་མ་སཱ་རའི་བེམ་པོ་ཀ་ན་ཨན་ཡུལ་གྱི་མཱག་ཕེ་ལཱ་ཞེས་པའི་ས་ཆར་ཡོད་པའི་ས་ཞིང་གི་བྲག་ཁུང་དུ་དུར་ལ་སྦས༌སོ། །བྲག་ཁུང་དེ་མཱན་རེའེ་ཡུལ་གྱི་མདུན་ཕྱོགས་སུ་ཡོད༌ཅིང༌། མཱན་རེའེ་ཞེས་པ་ནི་ཧེབ་རོན༌ཡིན།
GEN 23:20 དུས་དེ་ནས༌བཟུང༌། ས་ཞིང་དེ་དང་དེ་རུ་ཡོད་པའི་བྲག་ཁུང་ནི་ཧེད་ཀྱི་བུ་རྒྱུད་རྣམས་ཀྱིས་ཁས་བླངས་པ་ལྟར་ཨབ་ར་ཧམ་ལ་དབང་བ་དང་ཁོང་གི་ཁྱིམ་རྒྱུད་ཀྱི་དུར་ཁྲོད་དུ་གྱུར༌ཏོ།།
GEN 24:1 དེ་ཡང་ཨབ་ར་ཧམ་དགུང་ལོ་མཐོ་བ་དང་དོན་གང་ཅིའི་ཐད་ནས་དཀོན་མཆོག་ཡ་ཝཱེས་ཁོང་ལ་བྱིན་རླབས་གནང༌ངོ༌།།
GEN 24:2 ཨབ་ར་ཧམ་གྱིས་རང་ཁྱིམ་གྱི་རྒྱུ་ནོར་ཡོངས་ལ་དོ་དམ་བྱེད་པའི་གཡོག་པོ་ལོ་ན་ཆེས་རྒན་པ་དེ་ལ་འདི་སྐད༌དུ། ཁྱོད་ཀྱིས་རང་གི་ལག་པ་བདག་གི་བརླ་འོག་ཏུ་འཇོག་པར༌གྱིས།
GEN 24:3 ཁྱོད་ཀྱིས་གནམ་ས་གཉིས་ཀྱི་དཀོན་མཆོག་ཡ་ཝཱེ་དཔང་དུ་བཙུགས་ནས་དམ་བཅའ་ཞོག༌ཅིག ང་རང་སྡོད་པའི་ཡུལ་འདི་ནས་བདག་གི་བུ་ལ་ཀ་ན་ཨན་མི་རིགས་ཀྱི་བུ་མོ་ཆུང་མར་ལེན་པར་མི༌བྱའོ།།
GEN 24:4 ཁྱོད་རང་བདག་གི་ཕ་ཡུལ་དང་བདག་གི་གཉེན་ཉེའི་གམ་དུ་སོང་ནས་བདག་གི་བུ་ཨི་སཱག་ལ་ཆུང་མ་ཞིག་ལེན་དགོས་ཞེས་གསུངས་པ༌ལ།
GEN 24:5 གཡོག་པོ་ན༌རེ། གལ༌སྲིད། བུ་མོ་བདག་དང་མཉམ་དུ་གནས་འདིར་མི་ཡོང༌ན། ངས་ཁྱེད་ཀྱི་བུ་ཕྱིར་ཕ་ཡུལ་དུ་འཁྲིད་དམ་ཞེས་སྨྲས་པ༌དང༌།
GEN 24:6 ཡང་ཨབ་ར་ཧམ་གྱིས་འདི་སྐད༌དུ། ཁྱོད་ཀྱིས་མཉམ་འཇོག་པར༌གྱིས། བདག་གི་བུ་ཕྱིར་མ་འཁྲིད༌ཅིག
GEN 24:7 ནམ་མཁའི་དཀོན་མཆོག་ཡ་ཝཱེས་ཁོང་གི་ཕོ་ཉ་ཁྱོད་ཀྱི་མདུན་དུ་མངགས་ངེས༌ཏེ། ཁྱོད་ཀྱིས་གནས་དེ་ནས་བདག་གི་བུ་ལ་ཆུང་མ་ཞིག་ལེན་པར༌བྱའོ། །ཁོང་གིས་སྔོན་ཆད་ང་རང་བདག་གི་ཕ་གཞིས་དང་རང་མི་རིགས་ཀྱི་ཡུལ་དང་ཁ་འབྲལ་བར་མཛད་དེ་འདི་སྐད༌དུ། བདག་གིས་ཡུལ་འདི་ཁྱོད་ཀྱི་རིགས་རྒྱུད་ཕྱི་མ་རྣམས་ལ་གནང་བར་བྱ་ཞེས་མནའ་བཞེས་མྱོང༌ངོ༌།།
GEN 24:8 གལ༌ཏེ། བུ་མོ་དེ་ཁྱོད་དང་མཉམ་དུ་ཡོང་མི་འདོད༌ན། ཁྱོད་ཀྱིས་བདག་ལ་དམ་བཅས་པའང་ཁྱོད་དང་འབྲེལ་བ་མེད་པ༌ཡིན། བདག་གི་བུ་གཏན་ནས་ཕྱིར་འཁྲིད་མི་རུང་ཞེས་གསུངས༌སོ།།
GEN 24:9 དེ་ནས་གཡོག་པོས་རང་གི་བདག་པོ་ཨབ་ར་ཧམ་གྱི་བརླ་འོག་ཏུ་ལག་པ་བཞག་སྟེ་དོན་འདིའི་ཆེད་དུ་དམ་བཅས༌སོ།།
GEN 24:10 དེར་གཡོག་པོས་རང་གི་བདག་པོའི་རྔ་མོང་ལས་རྔ་མོང་བཅུ་ཁྲིད་ཅིང་ནོར་རྫས་སྣ་ཚོགས་བཟུང༌སྟེ། མེ་སོ་པོ་ཐེམ་ཡཱ་ཡུལ་དུ་སོང་བ་དང་ནཱ་ཧོར་གྲོང་ཁྱེར་དུ༌སླེབས།
GEN 24:11 ས་མ་རུབ་སྔོན༌ལ། བུ་མོ་རྣམས་ཆུ་འཁུར་དུ་འགྲོ་བའི་དུས༌སུ། གཡོག་པོས་རྔ་མོང་རྣམས་གྲོང་ཁྱེར་ཕྱི་རོལ་གྱི་ཁྲོན་པ་ཞིག་གི་ཉེ་སར་འདུག་ཏུ་བཅུག༌གོ །
GEN 24:12 དེ་ནས་གཡོག་པོས་དཀོན་མཆོག་ལ་འདི༌ལྟར། ཀྱེ། དཀོན་མཆོག་ཡ༌ཝཱེ། ང་ཡི་བདག་པོ་ཨབ་ར་ཧམ་གྱི་དཀོན་མཆོག༌ལགས། ཁྱེད་ཀྱིས་ང་ཡི་བདག་པོ་ཨབ་ར་ཧམ་ལ་ཐུགས་རྗེས་གཟིགས༌དང༌། དེ་རིང་བདག་གོ་སྐབས་ལེགས་པོ་ཞིག་དང་འཕྲད་པར༌མཛོད།
GEN 24:13 ང་རང་ད་ལྟ་ཁྲོན་པའི་འགྲམ་དུ་ཡོད༌ཅིང༌། གྲོང་ཁྱེར་ནང་གི་བུ་མོ་རྣམས་ཆུ་ལེན་དུ་ཡོང་བཞིན་ཡོད༌པས།
GEN 24:14 ངས་བུ་མོ་སུ་ཞིག༌ལ། ཁྱོད་ཀྱིས་ཆུ་ཟོ་ཁྱེར་ཤོག༌དང༌། ངས་ཆུ་འཐུང་འདོད་ཅེས་སྨྲ་བ༌དང༌། གལ༌ཏེ། ཁོ་མོ་ན༌རེ། ཁྱོད་ཀྱིས་འཐུང༌དང༌། ངས་ཁྱོད་ཀྱི་རྔ་མོང་ལའང་ཆུ་ལྡུད་པར་བྱ་ཞེས་སྨྲས༌ན། བུ་མོ་དེ་ནི་ཁྱེད་ཀྱིས་བསྐོས་པ་ལྟར་ཁྱེད་ཀྱི་ཞབས་ཕྱི་པ་ཨི་སཱག་གི་ཆུང་མ་ཡིན་པར༌མཛོད། འདི་ལྟར་གྲུབ༌ཚེ། ཁྱེད་ཀྱིས་ང་ཡི་བདག་པོ་ལ་ཐུགས་རྗེ་གནང་བ་བདག་གིས་ཤེས་ནུས་པ་ཡིན་ཞེས་གསོལ་བ་བཏབ༌བོ།།
GEN 24:15 དེ་ལྟར་གཡོག་པོས་གསོལ་བ་བཏབ་མ་ཚར༌བར། རིབ་ཀཱ་ཞེས་བྱ་བའི་བུ་མོས་ཕྲག་ལ་ཆུ་ཟོ་ཁུར་ནས་ཆུ་ལེན་དུ་ཡོང༌ངོ༌། །རིབ་ཀཱ་ནི་པཱ་ཐུ་ཨེལ་གྱི་བུ་མོ་ཡིན༌ནོ། །པཱ་ཐུ་ཨེལ་ནི་མིལ་ཀཱ་ཡི་བུ་ཡིན༌ལ། མིལ་ཀཱ་ནི་ཨབ་ར་ཧམ་གྱི་གཅུང་པོ་ནཱ་ཧོར་གྱི་ཆུང་མ་ཡིན༌ནོ།།
GEN 24:16 བུ་མོ་དེ་ནི་ཤིན་ཏུ་མཛེས་ཤིང་ལྟ་ན་སྡུག་པ་དང་སྐྱེས་པ་སུ་ལའང་འགྲོགས་མ་མྱོང་བ་ཞིག་ཡིན༌ནོ། །བུ་མོ་དེ་མར་ཁྲོན་པའི་འགྲམ་དུ་སོང་ནས་ཆུ་ཟོར་ཆུ་བཅུས་ཏེ་ཕྱིར་ཐོན༌ནོ།།
GEN 24:17 དེ་ནས་གཡོག་པོ་བུ་མོའི་མདུན་དུ་བརྒྱུགས་ཏེ་ན༌རེ། ཁྱོད་ཀྱིས་ཆུ་ཟོ་ནང་གི་ཆུ་དེ་བདག་ལ་འཐུང་བར་མཛོད་ཅིག་ཅེས་སྨྲས་པ༌ན།
GEN 24:18 བུ་མོ་ན༌རེ། བདག་གི་ཇོ་བོ༌ལགས། ཁྱེད་ཀྱིས་འཐུང་བར་མཛོད་ཅེས་སྨྲ་བཞིན་ཆུ་ཟོ་མྱུར་དུ་མར་བླངས་ཤིང་ལག་པས་ཡར་བཏེགས་ནས་ཁོ་ལ་འཐུང་དུ༌བཅུག
GEN 24:19 བུ་མོས་ཁོ་ལ་ཆུ་འཐུང་དུ་བཅུག་རྗེས་ན༌རེ། ངས་ཆུ་བླངས་ཏེ་ཁྱེད་ཀྱི་རྔ་མོང་ལའང་ཆུ་བླུད་ནས་འགྲང་བར་བྱེད་ཅེས་སྨྲས༌ཏེ།
GEN 24:20 ཁོ་མོས་ཆུ་ཟོ་ལས་ཆུ་གཞོང་ནང་དུ་ཆུ་བླུགས་ཤིང་སླར་ཡང་ཁྲོན་པར་ཆུ་ལེན་དུ་སོང་བ༌དང༌། རྔ་མོང་ཐམས་ཅད་ལ་ཆུ་ལྡུད་པའི་ཕྱིར་ཆུ༌བླངས།
GEN 24:21 སྐབས༌དེར། གཡོག་པོས་སྐད་ཆ་ཅི་ཡང་མ་སྨྲས༌པར། དཀོན་མཆོག་ཡ་ཝཱེས་རང་གི་མཛད་དོན་ལེགས་པར་མཛད་དོ་སྙམ་སྟེ་བུ་མོ་དེར་མིག་གིས་ཡང་ཡང༌བལྟས།
GEN 24:22 དེ་ནས་རྔ་མོང་དག་ཆུས་ངོམས་པ༌དང༌། གཡོག་པོས་ལྗིད་ཚད་སྲང་ཕྱེད་ ཙམ་གྱི་གསེར་གྱི་སྣ་ཆ་གཅིག༌དང༌། སྲང་བཅུ་ཡོད་པའི་གསེར་གྱི་གདུབ་བུ་ཆ་གཅིག་བླངས་ནས་བུ་མོ་དེར་སྤྲད་དེ་ན༌རེ།
GEN 24:23 བདག་ལ་ཤོད༌དང༌། ཁྱོད་ནི་སུ་ཚང་གི་བུ་མོ་ཡིན༌ནམ། ཁྱོད་ཀྱི་ཕ་གཞིས་སུ་ངེད་ཅག་ལ་སྡོད་གནས་ཡོད་དམ་མེད་ཅེས་དྲིས་པ༌ལ།
GEN 24:24 བུ་མོ་ན༌རེ། བདག་ནི་ནཱ་ཧོར་དང་མིལ་ཀཱ་གཉིས་ཀྱི་བུ་པཱ་ཐུ་ཨེལ་ཞེས་པའི་བུ་མོ་ཡིན་ཞེས་སྨྲས་པ༌དང༌།
GEN 24:25 ཡང་ཁོ་མོ་ན༌རེ། ངེད་ཀྱི་ཡུལ་དུ་གཟན་ཆས་དང་རྩྭ་མོད་པོ་ཡོད་ལ་སྡོད་གནས་ཀྱང་མང་པོ་ཡོད་ཅེས་ལན་བཏབ༌བོ།།
GEN 24:26 དེ་ནས་གཡོག་པོས་མགོ་སྨད་དུ་བསྒུར་ནས་དཀོན་མཆོག་ཡ་ཝཱེ་ལ་ཕྱག་བྱས༌ཏེ།
GEN 24:27 ཀྱེ། ང་ཡི་བདག་པོ་ཨབ་ར་ཧམ་གྱི་དཀོན་མཆོག་ཡ་ཝཱེ་ལ་བསྟོད་ཅིང་བསྔགས་པར༌བྱའོ། །ཅིའི་ཕྱིར་ཞེ༌ན། ཁོང་གིས་ང་ཡི་བདག་པོ་ལ་བཅངས་པའི་བྱམས་སྙིང་རྗེ་དང་དྲང་བདེན་ནི་ནམ་ཡང་དོར་མ་མྱོང་བའི་ཕྱིར༌རོ། །བདག་ལ་མཚོན༌ན། དཀོན་མཆོག་ཡ་ཝཱེས་ང་རང་ལ་ལམ་བསྟན༌ཏེ། ང་ཡི་བདག་པོའི་སྤུན་ཟླའི་ཁྱིམ་དུ་ཐད་ཀར་ཁྲིད་པ་ཡིན་ཞེས་སྨྲས༌སོ།།
GEN 24:28 དེ་ནས་བུ་མོ་ཡུལ་དུ་བརྒྱུགས་ཏེ་ཁོ་མོའི་ཡུམ་དང་ཡུམ་གྱི་ཁྱིམ་མི་རྣམས་ལ་གཏམ་དེ་དག་སྨྲས༌སོ།།
GEN 24:29 དེ་ཡང་བུ་མོ་རིབ་ཀཱ་ཞེས་བྱ་བར་གཅེན་པོ་ཞིག་ཡོད་པའི་མིང་ལ་ལཱ་པན་ཞེས༌ཟེར། ཁོས་གསེར་གྱི་སྣ་ཆ་དང་སྲིང་མོའི་ལག་མགོའི་གསེར་གྱི་གདུབ་བུ་གཉིས་མཐོང་བ༌དང༌། ཁོ་མོས་བཤད་པ་ལྟར་མི་དེས་ཁོ་མོ་ལ་ཅི་ལྟར་སྨྲས་པ་སོགས་ཀྱི་སྐད་ཆ་ཐོས༌རྗེས། ཁོ་རང་ཡང་ཁྲོན་པའི་ཕྱོགས་སུ་བརྒྱུགས་ནས་མི་དེའི་གམ་དུ་སླེབས་པ༌དང༌། རྔ་མོང་གི་འགྲམ་དུ་ཡོད་པའི་མི་དེ་ད་དུང་ཁྲོན་པའི་གནས་དེར་ལངས་ནས་བསྡད་ཡོད་པ་མཐོང་སྟེ་ན༌རེ།
GEN 24:31 ཁྱོད་ལ་དཀོན་མཆོག་ཡ་ཝཱེའི་བྱིན་རླབས་ཐོབ༌ཅིང༌། ཁྱོད་རང་ཁྱིམ་དུ་ཕེབས་པར༌ཞུ། ཕྱི་རུ་འདུག་དགོས་དོན༌མེད། ངས་ཁང་པ་གད་བདར་བྱས་ཚར་བ༌དང༌། རྔ་མོང་འདོགས་སའང་སྟ་གོན་བྱས་ཡོད་ཅེས་སྨྲས༌སོ།།
GEN 24:32 དེ་ལྟར་མི་དེའང་ལཱ་པན་གྱི་ཁྱིམ་དུ་སོང་ཞིང་། ལཱ་པན་གྱིས་རྔ་མོང་རྒྱབ་ཀྱི་ཁུར་པོ་མར་ཕོག་པ༌དང༌། རྔ་མོང་དག་ལ་གཟན་ཆས་དང་རྩྭ་བྱིན༌ཅིང༌། མི་དེ་རྣམས་ལ་རྐང་པ་བཀྲུ་བྱེད་ཀྱི་ཆུ་བླུགས་པ༌དང༌།
GEN 24:33 མདུན་དུ་ཟས་བཤམས་པ་དང་ཟས་བཞེས་པར་གྱིས་ཞེས་སྨྲས་ཀྱང་མི་དེ་ན༌རེ། ངས་ཟས་མི༌བཟའོ། །ངས་ཐོག་མར་རང་གི་དོན་དག་གསལ་པོར་སྨྲས༌རྗེས་ད་གཟོད་ཟས་བཟའ་བར་བྱ་ཞེས་སྨྲས་པ༌དང༌། ལཱ་པན་ན༌རེ། དེས་ན་ཁྱོད་ཀྱིས་རང་གི་དོན་དག་བརྗོད་པར་གྱིས་ཞེས་སྨྲས༌སོ།།
GEN 24:34 དེ་ནས་ཁོ་ན༌རེ། བདག་ནི་ཨབ་ར་ཧམ་གྱི་གཡོག་པོ་ཡིན༌ལ།
GEN 24:35 དཀོན་མཆོག་ཡ་ཝཱེས་ང་ཡི་བདག་པོ་ལ་བྱིན་རླབས་ཆེན་པོ་གནང་སྟེ་ཁོང་ལ་ར་ལུག་དང་བ༌གླང་གི་ཁྱུ། གསེར་དང༌དངུལ། གཡོག་པོ་དང་གཡོག༌མོ། རྔ་མོང་དང་བོང་བུ་བཅས་ཐོབ་ཅིང་ཆེས་ཆེར་ཕྱུག་པོར་གྱུར༌ཏོ།།
GEN 24:36 ང་ཡི་བདག་པོའི་ཆུང་མ་སཱ་ར་ཡིས་དགུང་ལོ་མཐོ་བའི་དུས་སུ་བདག་པོར་བུ་ཞིག་བཙས་ཤིང་བདག་པོས་རྒྱུ་ནོར་ཐམས་ཅད་བུ་དེ་ལ་གནང༌ངོ༌།།
GEN 24:37 དེ་ནས་ངས་རང་གི་བདག་པོ་ལ་དམ་བཅའ་འཇོག་དགོས་པར་ཁོང་གིས་འདི་སྐད༌དུ། ཁྱོད་ཀྱིས་ང་རང་སྡོད་པའི་ཡུལ་འདི་ནས་བདག་གི་བུ་ལ་ཀ་ན་ཨན་མི་རིགས་ཀྱི་བུ་མོ་ཞིག་ཆུང་མར་ལེན་པར་མི༌བྱའོ།།
GEN 24:38 ཁྱོད་རང་བདག་གི་ཕ་གཞིས་དང་བདག་གི་གཉེན་ཉེའི་གམ་དུ་སོང༌སྟེ། ངའི་བུ་ཨི་སཱག་ལ་ཆུང་མ་ཞིག་ལེན་དགོས་ཞེས་གསུངས༌སོ།།
GEN 24:39 དེ་ནས་ངས་འདི༌ལྟར། བུ་མོ་དེ་བདག་དང་མཉམ་དུ་གནས་འདིར་མི་ཡོང་ན་ཅི་བྱའམ་ཞེས་དྲིས་པ༌དང༌།
GEN 24:40 བདག་པོ་ན༌རེ། བདག་གིས་ཞབས་ཏོག་བསྒྲུབས་པའི་དཀོན་མཆོག་ཡ་ཝཱེས་ངེས་པར་རང་ཉིད་ཀྱི་ཕོ་ཉ་མངགས་ཏེ་ཁྱོད་དང་མཉམ་དུ་འགྲོ་བ་དང་ཁྱོད་ཀྱི་བགྲོད་ལམ་བདེ་བར་མཛད༌ཅིང༌། ཁྱོད་རང་བདག་གི་ཕ་གཞིས་དང་བདག་གི་གཉེན་ཉེའི་གམ་དུ་སོང༌སྟེ། ངའི་བུ་ཨི་སཱག་ལ་ཆུང་མ་ཞིག་ལེན་པར༌བྱའོ།།
GEN 24:41 ཁྱོད་རང་བདག་གི་གཉེན་ཉེའི་གམ་དུ་སླེབས་པ༌ན། གལ༌སྲིད། དེ་རྣམས་ཀྱིས་བུ་མོ་དེ་ཁྱོད་ལ་མི་སྟེར༌ན། བདག་གིས་ཁྱོད་ལ་འཇོག་ཏུ་བཅུག་པའི་དམ་བཅའ་ནི་ཁྱོད་དང་འབྲེལ་བ་ཅི་ཡང་མེད་ཅེས་གསུངས་མྱོང༌ངོ༌།།
GEN 24:42 དེ་རིང་བདག་ཁྲོན་པའི་འགྲམ་དུ་སླེབས་ཏེ། ཀྱེ། དཀོན་མཆོག་ཡ༌ཝཱེ། ང་ཡི་བདག་པོ་ཨབ་ར་ཧམ་གྱི་དཀོན་མཆོག༌ལགས། ཁྱེད་ཀྱིས་བདག་གི་དོན་འདི་ལེགས་པར་བསྒྲུབ་ཏུ༌མཛོད།
GEN 24:43 ད་ལྟ་ང་རང་ཁྲོན་པའི་འགྲམ་དུ་ཡོད༌ཅིང༌། ངས་ཆུ་ལེན་བུ་མོ་ལ་འདི་ལྟར་སྨྲ༌སྟེ། ཁྱོད་ཀྱི་ཆུ་ཟོ་ལས་བདག་ལ་ཆུ་གནང་བར་མཛོད་ཅེས་པ༌ལ།
GEN 24:44 བུ་མོ་ན༌རེ། ལགས༌སོ། །ཁྱོད་ཀྱིས་ཐུངས༌ཤིག ངས་ཁྱོད་ཀྱི་རྔ་མོང་ལའང་ཆུ་ལྡུད་པར་བྱ་ཞེས་སྨྲས༌ན། བུ་མོ་དེ་ནི་དཀོན་མཆོག་ཡ་ཝཱེས་ང་ཡི་བདག་པོའི་བུ་ལ་ཆུང་མར་བསྐོས་པ་ཡིན་པར༌མཛོད།
GEN 24:45 ངའི་སེམས་ནས་དེ་བཞིན་གསོལ་བ་བཏབ་མ་ཚར་སྔོན༌ལ། བུ་མོ་རིབ་ཀཱས་ཕྲག་ལ་ཆུ་ཟོ་ཁུར་ནས་མར་ཁྲོན་པའི་འགྲམ་དུ་སོང་བ་དང་ཆུ་ཟོར་ཆུ་བཅུས༌ཤིང༌། ངས་ཁོ་མོར་འདི་ལྟར་སྨྲས་པ༌སྟེ། ཁྱོད་ཀྱིས་བདག་ལ་ཆུ་གནང་བར་མཛོད་ཅེས་པ༌ལ།
GEN 24:46 ཁོ་མོས་བྲེལ་འཚབ་ངང་ནས་ཆུ་ཟོ་ཕྲག་ལས་མར་བླངས་ཤིང་ཁྱེད་ཀྱིས་ཐུངས༌ཤིག ངས་ཁྱེད་ཀྱི་རྔ་མོང་ལའང་ཆུ་ལྡུད་པར་བྱ་ཞེས་སྨྲས་པ༌དང༌། བདག་གིས་ཆུ་འཐུང་བ་དང་ཁོ་མོས་བདག་གི་རྔ་མོང་དག་ལའང་ཆུ་འཐུང་དུ་བཅུག༌གོ །
GEN 24:47 དེ་ནས་བདག་གིས་ཁོ་མོར་ཁྱོད་སུ་ཚང་གི་བུ་མོ་ཡིན་ནམ་ཞེས་དྲིས་པ༌ན། ཁོ་མོ་ན༌རེ། བདག་ནི་ནཱ་ཧོར་དང་མིལ་ཀཱ་གཉིས་ཀྱི་བུ་པཱ་ཐུ་ཨེལ་ཞེས་པའི་བུ་མོ་ཡིན་ཞེས་སྨྲས་པ༌དང༌། དེ་ནས་ངས་གསེར་གྱི་སྣ་ཆ་ཁོ་མོའི་སྣ་ལ་བཏགས་པ༌དང༌། གསེར་གྱི་གདུབ་བུ་གཉིས་ཀྱང་ཁོ་མོའི་ལག་པ་གཉིས་ལ་བསྐོན༌ཏོ།།
GEN 24:48 དེའི༌རྗེས། ངས་མགོ་སྨད་དུ་བསྒུར་ནས་དཀོན་མཆོག་ཡ་ཝཱེ་ལ་ཕྱག་བྱས༌ཏེ། ང་ཡི་བདག་པོ་ཨབ་ར་ཧམ་གྱི་དཀོན་མཆོག་ལ་བསྟོད་ཅིང་བསྔགས༌སོ། །ཅིའི་ཕྱིར་ཞེ༌ན། ཁོང་གིས་བདག་འོས་ཤིང་འཚམ་པའི་ལམ་དུ་ཁྲིད༌ཅིང༌། ང་ཡི་བདག་པོའི་གཉེན་ཉེའི་བུ་མོ་ནི་ཁོང་གི་བུ་ལ་ཆུང་མར་མཛད་པའི་ཕྱིར༌རོ།།
GEN 24:49 ཁྱེད་རྣམས་ཀྱིས་ང་ཡི་བདག་པོ་ལ་བྱམས་སྙིང་རྗེ་དང་བློས་ཐུབ་སེམས་ཀྱིས་སྣེ་ལེན་བྱ་འདོད༌ན། ད་ལྟ་བདག་ལ་སྨྲ་བར༌བྱའོ། །གལ་ཏེ་ཁྱེད་རྣམས་མི་འཐད་ནའང་བདག་ལ་དྲང་པོར་སྨྲ་བར༌མཛོད། བདག་གིས་ཅི་ཞིག་བྱེད་དགོས་པ་ཐག་གིས་གཅོད་དགོས་ཞེས་སྨྲས༌སོ།།
GEN 24:50 དེ་ནས་པཱ་ཐུ་ཨེལ་དང་ལཱ་པན་གཉིས་ཀྱིས་ལན་འདི་ལྟར་བཏབ་པ༌སྟེ། དོན་འདི་ནི་དཀོན་མཆོག་ཡ་ཝཱེ་ལས་བྱུང་བ་ཡིན༌པས། ངེད་རྣམས་ཀྱིས་ཁྱོད་ལ་བཟང་ངན་ཅི་ཡང་སྨྲ་མི་ནུས༌སོ།།
GEN 24:51 ལྟོས༌དང༌། བུ་མོ་རིབ་ཀཱ་ཁྱོད་ཀྱི་མིག་མདུན་དུ་ཡོད༌དེ། ཁྱོད་ཀྱིས་ཁོ་མོ་ཁྲིད་ནས་དཀོན་མཆོག་ཡ་ཝཱེས་གསུངས་པ༌བཞིན། ཁྱོད་ཀྱི་བདག་པོའི་བུ་ལ་ཆུང་མ་བྱེད་པར་མཛོད་ཅེས་སྨྲས༌སོ།།
GEN 24:52 དེ་ནས་ཨབ་ར་ཧམ་གྱི་གཡོག་པོས་མི་དེ་གཉིས་ཀྱི་གཏམ་ཐོས་པ་དང་པུས་མོ་སར་བཙུགས་ནས་དཀོན་མཆོག་ཡ་ཝཱེ་ལ་ཕྱག་བཙལ༌ཏོ།།
GEN 24:53 གཡོག་པོས་གསེར་དངུལ་གྱི་རྒྱན་ཆ་དང་རྒྱན་གོས་བཅས་བུ་མོ་རིབ་ཀཱ་ལ་སྤྲད་པ༌དང༌། བུ་མོ་རིབ་ཀཱའི་ཡུམ་དང་གཅེན་པོ་ལའང་ནོར་རྫས་གཞན་དག་ཕུལ༌ཏོ།།
GEN 24:54 དེ་ནས་གཡོག་པོ་དང་ཁོའི་འཁོར་གཡོག་རྣམས་ཀྱིས་མཉམ་དུ་བཟའ་བཏུང་ལོངས་སུ་སྤྱད་ཅིང་ཞག་གཅིག་ལ༌བསྡད། ཕྱི་ཉིན་ཞོགས་པ་ཡར་ལངས༌ཏེ། གཡོག་པོ་ན༌རེ། ངེད་རྣམས་རང་གི་བདག་པོའི་དྲུང་དུ་འགྲོ་བར་མཛོད་ཅེས་སྨྲས་པ༌ལ།
GEN 24:55 བུ་མོ་རིབ་ཀཱའི་ཡུམ་དང་གཅེན་པོ་ན༌རེ། བུ་མོ་ངེད་རྣམས་དང་མཉམ་དུ་ཉིན་འགར་འདུག་པར༌གྱིས། མ་མཐའ་ཡང་ཉིན་བཅུ་ལ་སྡོད་པར༌བྱ། དེའི་རྗེས་སུ་ཁོ་མོ་སོང་ཆོག་ཅེས་སྨྲས༌སོ།།
GEN 24:56 ཡང་གཡོག་པོ་ན༌རེ། དཀོན་མཆོག་ཡ་ཝཱེས་བདག་ལ་འགྲོ་ལམ་ལེགས་པར་མཛད༌པས། ཁྱེད་རྣམས་ཀྱིས་དལ་འགོར་མི་བྱ༌བར། ངེད་རྣམས་རང་གི་བདག་པོའི་དྲུང་དུ་འགྲོ་བར་མཛོད་ཅེས་སྨྲས་པ༌དང༌།
GEN 24:57 ཡང་ཁོ་རྣམས་ན༌རེ། འོ༌ན། ངེད་ཅག་གིས་བུ་མོ་བོས་ཏེ་དྲི་བར་བྱ་ཞེས་སྨྲས༌ཏེ།
GEN 24:58 བུ་མོ་རིབ་ཀཱ་བོས་ནས་འདི༌ལྟར། ཁྱོད་ནི་མི་འདི་དང་མཉམ་དུ་འགྲོའམ་ཞེས་དྲིས་པ༌ལ། བུ་མོ་རིབ་ཀཱ་ན༌རེ། ང་རང་འགྲོ་རྒྱུ་ཡིན་ཞེས་ལན་བཏབ༌བོ།།
GEN 24:59 དེའི༌ཕྱིར། ཁོ་རྣམས་ཀྱིས་བུ་མོ་རིབ་ཀཱ་དང་ཁོ་མོའི་ཉེ་བའི་མ་མ་སོགས་ཨབ་ར་ཧམ་གྱི་གཡོག་པོ་དང་མཉམ་དུ་འགྲོ་རུ་བཅུག༌ཅིང༌།
GEN 24:60 འདི་ལྟར་སྨོན་འདུན་ཞུས་པ༌སྟེ། ཀྱེ་ཀྱེ་ང་ཚོའི་སྲིང་མོ༌ལགས།། ཁྱོད་ནི་ཀུན་གྱི་མ་རུ༌མཛོད།། ཁྱོད་ཀྱི་བུ་རྒྱུད་དེ་ཡིས་ནི།། དགྲ་བོའི་མཁར་ཡང་འཛིན་པར༌ཤོག །ཅེས༌པའོ།།
GEN 24:61 དེ་ནས་བུ་མོ་རིབ་ཀཱ་དང་ཁོ་མོའི་གཡོག་མོ་རྣམས་ཡར་ལངས་ནས་རྔ་མོང་ལ་ཞོན་པ༌དང༌། ཨབ་ར་ཧམ་གྱི་གཡོག་པོའི་རྗེས་སུ་འབྲངས་ཤིང་གཡོག་པོས་ཀྱང་བུ་མོ་རིབ་ཀཱ་ཁྲིད་ནས་སོང༌ངོ༌།།
GEN 24:62 སྐབས༌དེར། ཨི་སཱག་ནི་ནེ་གུབ་ཡུལ་དུ་བཞུགས༌ཤིང༌། ཁོ་རང་པེར་ལཱ་ཧེད་རོའུ་ཞེས་པའི་ཆུ་མིག་ཅེས་པ་ནས་ཡོང་མ་ཐག༌ཡིན།
GEN 24:63 ས་རུབ་ལ་ཉེ་བའི་དུས༌སུ། ཁོ་རང་ཐང་དཀྱིལ་ཞིག་ཏུ་སོང་ནས་བསམ་བློ་གཏོང་བཞིན་བསྡད༌ཅིང༌། ཁོས་མགོ་ཡར་བཀྱགས་ནས་བལྟས་པ༌ན། རྔ་མོང་ལ་བཞོན་མཁན་འགའ་ཤས་ཡོང་བཞིན་པ༌མཐོང༌།
GEN 24:64 བུ་མོ་རིབ་ཀཱས་ཀྱང་མགོ་ཡར་བཀྱགས་ནས་ཨི་སཱག་མཐོང་བ་དང་མྱུར་དུ་རྔ་མོང་ལས་མར་བབས༌ཏེ།
GEN 24:65 ཐང་དཀྱིལ་ནས་རང་ཅག་རྣམས་བསུ་བར་ཡོང་བའི་མི་དེ་སུ་ཡིན་ནམ་ཞེས་གཡོག་པོ་ལ་དྲིས་པ༌དང༌། གཡོག་པོ་ན༌རེ། དེ་ནི་ང་ཡི་བདག་པོ་ཡིན་ཞེས་ལན་བཏབ་པ༌དང༌། བུ་མོ་རིབ་ཀཱས་གདོང་ཁེབས་བླངས་ནས་རང་གི་ཞལ་རས༌བཀབ།
GEN 24:66 དེ་ནས་གཡོག་པོས་རང་གིས་བསྒྲུབས་པའི་ལས་ཐམས་ཅད་ཨི་སཱག་ལ་སྨྲས་པ༌དང༌།
GEN 24:67 ཨི་སཱག་གིས་བུ་མོ་རིབ་ཀཱ་ཁྲིད་ནས་ཁོང་གི་འདས་ཟིན་པའི་ཡུམ་སཱ་རའི་སྦྲ་གུར་ནང་དུ་སོང༌ཞིང༌། བུ་མོ་རིབ་ཀཱ་རང་གི་ཆུང་མར་བླངས་པ་དང་ཁོ་མོར་ཤིན་ཏུ་གཅེས༌སོ། །དེ་ལྟར་རང་གི་ཡུམ་ཚེ་ལས་འདས་པའི་མྱ་ངན་ལས་ཁོང་ལ་ད་གཟོད་སེམས་གསོ་ཐོབ༌བོ།།
GEN 25:1 དེ་ནས་ཡང་ཨབ་ར་ཧམ་གྱིས་མིང་ལ་ཀེ་ཏི་རཱ་ཞེས་བྱ་བ་རང་གི་ཆུང་མར་བླངས༌ཤིང༌།
GEN 25:2 ཁོ་མོས་ཟིམ་རན༌དང༌། ཡོག༌ཤན། མཱ༌དན། མིད༌ཡཱན། ཡེས༌པག ཤུ་ཨག་བཅས་བུ་དྲུག་བཙས༌སོ།།
GEN 25:3 དེ་ཡང་ཡོག་ཤན་ལ་བུ་ཤེ་བཱ་དང་དི་དན་གཉིས་སྐྱེས༌སོ། །བུ་དི་དན་ལས་ཨ་ཤུར་མི་རིགས༌དང༌། ལཱ་ཐུ་མི༌རིགས། ལཱ་ཨུམ་མི་རིགས་གསུམ་བྱུང༌ངོ༌།།
GEN 25:4 དེ་ཡང་མིད་ཡཱན་ལ་ཨེ་ཕཱ༌དང༌། ཨེ༌ཕེར། ཧ༌ནོག ཨ་བི༌དཱ། ཨེལ་དཱ་ཨ་བཅས་བུ་ལྔ་སྐྱེས༌སོ། །དེ་ཐམས་ཅད་ནི་ཀེ་ཏི་རཱ་ཡི་བུ་རབས་ཚ་རྒྱུད་ཡིན༌ནོ།།
GEN 25:5 དེ་ཡང་ཨབ་ར་ཧམ་གྱིས་རང་ལ་ཅི་ཡོད་པ་ཐམས་ཅད་བུ་ཨི་སཱག་ལ་གནང་བ༌དང༌།
GEN 25:6 ཆུང་མ་གཞན་དག་གི་བུ་རྣམས་ལའང་གནང་སྦྱིན་ཐོབ༌བོ། །རང་ཉིད་ཚེ་ལས་མ་འདས་པའི་སྔོན་ལ་ཁོ་རྣམས་རང་གི་བུ་ཨི་སཱག་དང་ཁ་བྲལ་ནས་ཤར་ཕྱོགས་ཡུལ་དུ་འགྲོ་བར་བསྐུལ༌ཏོ།།
GEN 25:7 དེ་ཡང་ཨབ་ར་ཧམ་བསྡོམས་པས་ལོ་བརྒྱ་དང་དོན་ལྔར་བཞུགས༌སོ།།
GEN 25:8 ཁོང་དགུང་ལོ་མཐོ་ཞིང་ལོ་ན་རྒས་ཏེ་ཚེ་ལོ་མཐར་ཕྱིན་ནས་སྐུ་གཤེགས་པ་དང་མེས་པོ་རྣམས་ཀྱི་དྲུང་དུ་འཛོམས་པར༌གྱུར།
GEN 25:9 ཨབ་ར་ཧམ་གྱི་བུ་ཨི་སཱག་དང་ཡེས་མ་ཨེལ་གཉིས་ཀྱིས་ཁོང་གི་སྐུ་གདུང་མཱག་ཕེ་ལཱ་བྲག་ཁུང་དུ་དུར་ལ་སྦས༌སོ། །བྲག་ཁུང་དེ་ནི་མཱན་རེའེ་ཡུལ་གྱི་མདུན་ཕྱོགས༌དང༌། ཧེ་བི་མི་རིགས་ཀྱི་ཚོ་ཧར་ཞེས་བྱ་བའི་བུ་ཨེབ་རོན་གྱི་ཞིང་ནང་དུ༌ཡོད།
GEN 25:10 དེ་ནི་ཨབ་ར་ཧམ་གྱིས་ཧེད་ཀྱི་བུ་རྒྱུད་ལས་ཉོས་པའི་ས་ཞིང་དེ་ཡིན༌ལ། གནས་དེ་རུ་ཨབ་ར་ཧམ་དང་ཁོང་གི་ཆུང་མ་སཱ་ར་གཉིས་ཀྱི་སྐུ་གདུང་དུར་ལ་སྦས་ཡོད༌དོ།།
GEN 25:11 ཨབ་ར་ཧམ་སྐུ་གཤེགས༌རྗེས། དཀོན་མཆོག་གིས་ཁོང་གི་བུ་ཨི་སཱག་ལ་བྱིན་རླབས་གནང་བ༌དང༌། ཨི་སཱག་ནི་པེར་ལཱ་ཧེད་རོའུ་ཞེས་པའི་ཆུ་མིག་གི་ཡུལ་དུ་བཞུགས༌སོ།།
GEN 25:12 དེ་ཡང་སཱ་རའི་གཡོག་མོ་སྟེ་ཨེ་ཅིབ་ཀྱི་བུད་མེད་ཧ་གར་གྱིས་ཨབ་ར་ཧམ་ལ་བཙས་པའི་བུ་ཡེས་མ་ཨེལ་གྱི་རིགས་རྒྱུད་ནི་འདི་ལྟ༌སྟེ།
GEN 25:13 ཡེས་མ་ཨེལ་གྱི་བུ་སྐྱེས་འགོ་ནི་ནཱ་བ་ཨོད༌དང༌། དེ་ནས་ཀེ་དཱར༌དང༌། ཨད་པཱ༌ཨེལ། མིབ༌སཱམ།
GEN 25:14 མུས༌མཱ། དུའུ༌མཱ། མཱ༌ས།
GEN 25:15 ཧ༌དཱད། ཐེ༌མཱ། ཡཱ༌ཐར། ནཱ༌ཕིས། ཀད་མཱ་བཅས་བཅུ་གཉིས༌སོ།།
GEN 25:16 དེ་རྣམས་ནི་ཡེས་མ་ཨེལ་གྱི་བུ་དག་གི་མིང་ཡིན༌ལ། ཁོ་རྣམས་ནི་གྲོང་སྡེ་དང་ཚོ་པ་བཅུ་གཉིས་ལྟར་ཚོ་དཔོན་བཅུ་གཉིས་ཀྱང་ཡིན༌ནོ།།
GEN 25:17 ཡེས་མ་ཨེལ་དགུང་ལོ་བརྒྱ་དང་སོ་བདུན་ལ་བཞུགས་ཤིང་ལོ་ན་རྒས་ཏེ་ཚེ་ལས་འདས་པ་དང་མེས་པོ་རྣམས་ཀྱི་དྲུང་དུ་འཛོམས་པར༌གྱུར།
GEN 25:18 ཁོའི་བུ་རབས་ཚ་རྒྱུད་ཀྱི་སྡོད་གནས་ནི་ཨེ་ཅིབ་ཡུལ་གྱི་ཤར་ཕྱོགས༌ཏེ། ཨ་སུར་ཡུལ་དུ་འགྲོ་བའི་ཧ་བེ་ལཱ་ཡུལ་ནས་ཤུར་ཞེས་པའི་ཡུལ་གྱི་བར་དུ་ཡིན༌ནོ།།
GEN 25:19 དེ་ཡང་ཨབ་ར་ཧམ་གྱི་བུ་ཨི་སཱག་གི་རིགས་རྒྱུད་ནི་འདི་ལྟ༌སྟེ། ཨབ་ར་ཧམ་ལས་བུ་ཨི་སཱག་སྐྱེས་པ༌དང༌།
GEN 25:20 ཨི་སཱག་གིས་རིབ་ཀཱ་ཆུང་མར་ལེན་པའི་དུས༌སུ། ཁོ་དགུང་ལོ་བཞི་བཅུ་ཡིན༌ཞིང༌། རིབ་ཀཱ་ནི་ཕཱ་དན་ཨ་རམ་ཡུལ་གྱི༌ཆར། ཨ་རམ་མི་རིགས་ཀྱི་པཱ་ཐུ་ཨེལ་གྱི་བུ་མོ༌དང༌། ཨ་རམ་མི་རིགས་ཀྱི་ལཱ་པན་གྱི་སྲིང་མོ་ཡིན༌ནོ།།
GEN 25:21 དེ་ཡང་ཨི་སཱག་གི་ཆུང་མ་ནི་མོ་གཤམ་ཡིན༌པས། ཨི་སཱག་གིས་ཁོ་མོའི་ཆེད་དུ་དཀོན་མཆོག་ཡ་ཝཱེ་ལ་གསོལ་བ་བཏབ༌ཅིང༌། དཀོན་མཆོག་ཡ་ཝཱེས་ཀྱང་གསོལ་བ་བཏབ་པ་ལྟར་མཛད༌པས། ཁོའི་ཆུང་མ་རིབ་ཀཱར་མངལ་ཆགས་པར༌གྱུར།
GEN 25:22 དེ་ཡང་རིབ་ཀཱའི་མངལ་དུ་མཚེ་མ་ཞིག་ཕན་ཚུན་འཇུ་རེས་བྱས༌པས། ཁོ་མོ་ན༌རེ། དོན་འདི་ཅིའི་ཕྱིར་བདག་གི་ལུས་སྟེང་དུ་བྱུང་ངམ་ཞེས་སྨྲས་ཤིང་དཀོན་མཆོག་ཡ་ཝཱེ་ལ་སྐྱབས་སུ༌རེའོ།།
GEN 25:23 དེ་ནས་དཀོན་མཆོག་ཡ་ཝཱེས་འདི་སྐད༌དུ། ཁྱོད་ཀྱི་མངལ་ལས་རིགས་རྒྱུད༌གཉིས།། ངེས་པར་འབྱུང་ཞིང་མི་རིགས༌གཉིས།། དེ་བཞིན་འབྱུང་བས་དེ་གཉིས༌ནི།། གཅིག་ལས་གཅིག་རྒྱལ་མཐའ་མའི༌དུས།། ཆེ་བས་ཆུང་བར་ཞབས་ཕྱི༌འགྱུར། །ཞེས་གསུངས༌སོ།།
GEN 25:24 དེ་ཡང་བུ་བཙའ་བའི་དུས་ལ་སླེབས་པ་དང་ཁོ་མོའི་མངལ་དུ་དངོས་གནས་མཚེ་མ་ཞིག་མཆིས༌སོ།།
GEN 25:25 ཐོག་མར་བཙས་པའི་བུ་ཡི་ལུས་པོ་ནི་ཁ་དོག་དམར་པོ་ཡིན་པ་དང་ལུས་ཡོངས་སུ་བ་སྤུས་གང་སྟེ་ལྤགས་པ་ཞིག་དང་མཚུངས༌ཤིང༌། བུ་དེའི་མིང་ལ་ཨེ་སཱབ་ཅེས་བཏགས་པ༌དང༌།
GEN 25:26 བུ་ཨེ་སཱབ་ལ་སྤུན་ཞིག་བཙས་པ༌ན། དེ་ཡི་ལག་པས་ཨེ་སཱབ་ཀྱི་རྐང་པའི་ཕྱི་རྟིང་ནས་བཟུང་འདུག༌པས། བུ་དེའི་མིང་ལ་ཡ་ཀོབ་ ཅེས༌བཏགས། དེ་ལྟར་རིབ་ཀཱས་བུ་གཉིས་བཙའ་བའི་དུས༌སུ། ཨི་སཱག་དགུང་ལོ་དྲུག་ཅུ་ཡིན༌ནོ།།
GEN 25:27 དེ་ནས་བུ་གཉིས་རིམ་གྱིས་ནར་སོན་པ་དང་བུ་ཆེ་བ་ཨེ་སཱབ་ནི་རི་དྭགས་རྔོན་པར་མཁས་ཤིང་རྟག་ཏུ་དབེན་སྟོང་དུ་མཆིས་པ༌དང༌། བུ་ཆུང་བ་ཡ་ཀོབ་ནི་གཤིས་རྒྱུད་དུལ་བས་ནམ་རྒྱུན་སྦྲ་གུར་དུ་སྡོད༌དོ།།
GEN 25:28 ཨི་སཱག་གིས་ཨེ་སཱབ་ལ་གཅེས་པར༌བྱེད། ཅིའི་ཕྱིར་ཞེ༌ན། ཁོ་ནི་རྟག་ཏུ་རི་དྭགས་ཀྱི་ཤ་བཟའ་བར་དགའ་བའི་ཕྱིར༌ཡིན། འོན་ཀྱང་ཡུམ་རིབ་ཀཱས་ནི་ཡ་ཀོབ་ལ་གཅེས༌སོ།།
GEN 25:29 ཉིན་ཞིག༌ལ། ཡ་ཀོབ་ཀྱིས་སྲན་ཁུ་ཞིག་བསྐོལ་ནས་སྡོད་པ༌ལ། ཨེ་སཱབ་དབེན་སྟོང་ནས་ཐོན་ཞིང་ལུས་ཐང་ཆད་དེ་བརྒྱལ་ལ༌ཉེའོ།།
GEN 25:30 དེ་ནས་ཨེ་སཱབ་ཀྱིས་ཡ་ཀོབ་ལ་འདི༌ལྟར། ང་རང་ལུས་ཐང་ཆད་ནས་བརྒྱལ་ལ༌ཉེ། ཁྱོད་ཀྱིས་སྲན་ཁུ་དམར་པོ་དེ་བདག་ལ་གནང་བར་མཛོད་ཅིག་ཅེས་བརྗོད་པའི༌ཕྱིར། ཨེ་སཱབ་ཀྱི་མིང་ལ་ཨེ་དོམ་ ཞེས་ཀྱང་ཐོགས༌སོ།།
GEN 25:31 དེ་ནས་ཡ་ཀོབ་ན༌རེ། དེ་རིང་ཁྱོད་ཀྱིས་བུ་ཆེ་བའི་ཐོབ་ཐང་ བདག་ལ་བཙོང་བར་མཛོད་ཅེས་སྨྲས་པ༌ལ།
GEN 25:32 ཨེ་སཱབ་ན༌རེ། བདག་ནི་འཆི་ལ་ཉེ་བས་བུ་ཆེ་བའི་ཐོབ་ཐང་འདི་བདག་ལ་མཚོན་ན་ཕན་ཐོགས་ཅི་ཞིག་ཡོད་དམ་ཞེས་སྨྲས༌སོ།།
GEN 25:33 ཡང་ཡ་ཀོབ་ན༌རེ། ཁྱོད་ཀྱིས་དེ་རིང་བདག་ལ་དམ་བཅའ་འཇོག་པར་གྱིས་ཞེས་སྨྲས་པ༌ན། ཨེ་སཱབ་ཀྱིས་ཀྱང་ཁོ་ལ་དམ་བཅས་ཏེ་བུ་ཆེ་བའི་ཐོབ་ཐང་དེ་ཡ་ཀོབ་ལ་བཙོངས༌སོ།།
GEN 25:34 དེའི༌ཕྱིར། ཡ་ཀོབ་ཀྱིས་ཨེ་སཱབ་ལ་བག་ལེབ་དང་སྲན་ཁུ་ཕུལ་བ༌དང༌། ཨེ་སཱབ་ཀྱིས་ཀྱང་བཟའ་བཏུང་སྤྱད་རྗེས་ཡར་ལངས་ནས་སོང༌ངོ༌། །དེ་ལྟར་ཨེ་སཱབ་ཀྱིས་བུ་ཆེ་བའི་ཐོབ་ཐང་ལ་མཐོང་ཆུང་བྱས༌སོ།།
GEN 26:1 དེ་ཡང་ཨབ་ར་ཧམ་གྱི་དུས༌སུ། ཡུལ་དེར་མུ་གེ་བྱུང་མྱོང་བ་དང་དུས་འདིར་ཡང་མུ་གེ་བྱུང༌བས། ཨི་སཱག་ཅེས་བྱ་བ་གེ་རཱར་གྲོང་ཁྱེར་དང་ཕེ་ལེ་ཤེད་མི་རིགས་ཀྱི་རྒྱལ་པོ་ཨ་བི་མེ་ལེག་གི་དྲུང་དུ་སོང་བ༌དང༌།
GEN 26:2 དཀོན་མཆོག་ཡ་ཝཱེས་ཨི་སཱག་ལ་མངོན་པར་མཛད་དེ་འདི་སྐད༌དུ། ཁྱོད་མར་ཨེ་ཅིབ་ཡུལ་དུ་འགྲོ་བར་མི༌བྱའོ། །བདག་གིས་ཁྱོད་ལ་སྟོན་པར་འགྱུར་བའི་ཡུལ་དེ་རུ་སྡོད༌ཅིག
GEN 26:3 ད་ལྟ་ཁྱོད་རང་ཡུལ་འདིར་བསྡད༌ན། བདག་ནི་ངེས་པར་ཁྱོད་དང་མཉམ་དུ་གནས་ཤིང་ཁྱོད་ལ་བྱིན་རླབས་གནང༌ངོ༌། །ཅིའི་ཕྱིར་ཞེ༌ན། བདག་གིས་ཡུལ་འདི་ཐམས་ཅད་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་རྣམས་ལ་སྦྱིན་ངེས་པའི་ཕྱིར༌རོ། །བདག་གིས་ཁྱོད་ཀྱི་ཡབ་ཨབ་ར་ཧམ་ལ་བཞག་པའི་དམ་བཅའ་བཞིན་བྱེད་པར༌འགྱུར།
GEN 26:4 བདག་གིས་ཁྱོད་ཀྱི་རིགས་རྒྱུད་ནི་ནམ་མཁའི་སྐར་མ་ཇི་བཞིན་མང་དུ་སྤེལ་བ༌དང༌། ས་ཆ་འདི་དག་ཀྱང་ཁྱོད་ཀྱི་རིགས་རྒྱུད་ཕྱི་མ་རྣམས་ལ་སྦྱིན་པར་མ༌ཟད། ས་སྟེང་གི་མི་རིགས་ཐམས་ཅད་ལའང་ཁྱོད་ཀྱི་རིགས་རྒྱུད་བརྒྱུད་ནས་བྱིན་རླབས་འཐོབ་པར༌འགྱུར།
GEN 26:5 ཅིའི་ཕྱིར་ཞེ༌ན། ཨབ་ར་ཧམ་གྱིས་བདག་གི་གསུང་ལ་མཉན་པ་དང་། བདག་གི་མན་ངག༌དང༌། བཀའ༌རྒྱ། སྒྲིག་ཁྲིམས། བཀའ་ཁྲིམས་བཅས་བསྲུངས་པའི་ཕྱིར་རོ་ཞེས་གསུངས།
GEN 26:6 དེའི༌ཕྱིར། ཨི་སཱག་ནི་གེ་རཱར་གྲོང་ཁྱེར་དུ་བཞུགས༌སོ།།
GEN 26:7 དེ་ནས་ཡུལ་དེའི་མི་རྣམས་ཀྱིས་ཨི་སཱག་ལ་ཁོའི་ཆུང་མའི་སྐོར་དྲིས་པ༌ན། ཨི་སཱག་ན༌རེ། ཁོ་མོ་བདག་གི་སྲིང་མོ་ཡིན་ནོ་ཞེས་སྨྲས༌ཤིང༌། དེ་ནི་བདག་གི་ཆུང་མ་ཡིན་ཞེས་བརྗོད་པར་འཇིགས་པ༌དང༌། ཁོའི་སེམས་སུ་རིབ་ཀཱ་ནི་བུད་མེད་མཛེས་མ་ཞིག་ཡིན་པའི༌ཕྱིར་དེ་དག་གིས་རང་ཉིད་གསོད་ངེས་ཡིན་སྙམ༌པའོ།།
GEN 26:8 ཁོ་རང་ཡུལ་དེ་རུ་ཡུན་རིང་པོར༌བསྡད། ཉིན་ཞིག༌ལ། ཕེ་ལེ་ཤེད་མི་རིགས་ཀྱི་རྒྱལ་པོ་ཨ་བི་མེ་ལེག་གིས་སྒེའུ་ཁུང་ལས་ཕྱི་རོལ་ཏུ་བལྟས་པ༌ན། ཨི་སཱག་དང་ཁོའི་ཆུང་མ་རིབ་ཀཱ་གཉིས་རྩེད་མོར་གཡེང་བ་མཐོང༌ངོ༌།།
GEN 26:9 ཨ་བི་མེ་ལེག་གིས་ཨི་སཱག་བོས༌ཏེ། ཁོ་མོ་དངོས་གནས་ཁྱོད་ཀྱི་ཆུང་མ་ཡིན༌པས། ཁྱོད་ཀྱིས་ཁོ་མོ་རང་གི་སྲིང་མོ་ཡིན་ཞེས་སྨྲ་བའི་རྒྱུ་མཚན་ཅི་ཞེས་དྲིས་པ༌ལ། ཨི་སཱག་ན༌རེ། བདག་ནི་ཁོ་མོའི་རྐྱེན་ལས་འཆི་བར་ངེས་སྙམ་པ་ཡིན་ཞེས་ལན་བཏབ༌བོ།།
GEN 26:10 དེ་ནས་ཨ་བི་མེ་ལེག་ན༌རེ། ཁྱོད་ཀྱིས་ངེད་རྣམས་ལ་དོན་ཅི་ཞིག་བྱས༌སམ། མང་ཚོགས་ལས་མི་ཞིག་ཁྱོད་ཀྱི་ཆུང་མར་ལུས་འབྲེལ་བྱས༌ན། ངེད་རྣམས་ལ་ཉེས་པ་འཕོག་ཉེན་ཆེ་ཞེས༌སྨྲས།
GEN 26:11 དེའི༌ཕྱིར། ཨ་བི་མེ་ལེག་གིས་མང་ཚོགས་ལ་འདི༌ལྟར། མི་སུ་ཞིག་གིས་ཁོའམ་ཁོའི་ཆུང་མར་གནོད་འཚེ་བྱས༌ན། མི་དེ་ངེས་པར་གསོད་དགོས་ཞེས་བཀའ་གནང༌ངོ༌།།
GEN 26:12 དེ་ནས་ཨི་སཱག་གིས་ཡུལ་དེ་རུ་ཞིང་བཏབ་པ་དང་ལོ་དེ་ལ་འབྲས་བུ་ལྡབ་བརྒྱ་ཐོབ༌ཅིང༌། དཀོན་མཆོག་ཡ་ཝཱེས་ཁོ་ལ་བྱིན་རླབས་གནང༌བས།
GEN 26:13 ཁོ་ནི་སྟོབས་དང་ལྡན་པ༌དང༌། གོང་ནས་གོང་དུ་འཕེལ་ཏེ་འབྱོར་ཕྱུག་ལྡན་པར་གྱུར༌ཏོ།།
GEN 26:14 ཁོ་ལ་ར་ལུག་གི་ཁྱུ་དང་བ་ཁྱུ་ཡོད་པར་མ༌ཟད། གཡོག་པོའང་མང་དུ་ཡོད་པས་ཕེ་ལེ་ཤེད་མི་རིགས་ཀྱིས་ཁོ་ལ་ཕྲག་དོག༌བྱས།
GEN 26:15 དེ་ཡང་ཁོའི་ཡབ་ཨབ་ར་ཧམ་བཞུགས་པའི་དུས༌སུ། ཡབ་ཀྱི་གཡོག་པོས་བརྐོས་པའི་ཁྲོན་པ་དེ་དག་ཕེ་ལེ་ཤེད་མི་རིགས་ཀྱིས་ས་ཡིས་བཅད་ཅིང་སྙོམས་པར་བྱས༌སོ།།
GEN 26:16 དེ་ནས་ཨ་བི་མེ་ལེག་གིས་ཨི་སཱག་ལ་འདི༌ལྟར། ཁྱོད་ནི་ངེད་ཅག་ལས་སྟོབས་འབྱོར་ཆེ་བས་ངེད་ཅག་དང་ཁ་བྲལ་ནས་སོང་ཞིག་ཅེས་སྨྲས་པ༌དང༌།
GEN 26:17 ཨི་སཱག་ཡུལ་དེ་དང་ཁ་བྲལ་ཞིང་གེ་རཱར་ལུང་པ་རུ་སོང་ནས་དེར་སྦྲ་གུར་ཕུབ་སྟེ་གནས་བཅས༌སོ།།
GEN 26:18 དེ་ཡང་ཁོའི་ཡབ་ཨབ་ར་ཧམ་བཞུགས་པའི་དུས་སུ་བརྐོས་པའི་ཁྲོན་པ་དེ་དག་ཕེ་ལེ་ཤེད་མི་རིགས་ཀྱིས་ཨབ་ར་ཧམ་སྐུ་གཤེགས་པའི་རྗེས་སུ་ས་ཡིས་བཅད༌ཀྱང༌། ཨི་སཱག་གིས་ཁྲོན་པ་དེ་དག་སླར་ཡང་བརྐོས་ཤིང་ཁོའི་ཡབ་ཀྱིས་མིང་བཏགས་པ་བཞིན་ཁྲོན་པ་དེ་དག་ལ་མིང་བཏགས་པ༌རེད།
GEN 26:19 ཡང་ཨི་སཱག་གི་གཡོག་པོས་ལུང་པའི་ནང་དུ་ཁྲོན་པ་ཞིག་བརྐོས་ཏེ་ས་འོག་གི་ཆུ་རྒྱུན་ཆེན་པོ་ཞིག་རྙེད༌པས།
GEN 26:20 གེ་རཱར་ལུང་པར་ཡོད་པའི་ཕྱུགས་རྫི་རྣམས་ཀྱིས་ཨི་སཱག་གི་ཕྱུགས་རྫི་ལ་ཆུ་འདི་ནི་ངེད་ཅག་གི་ཡིན་ཞེས་རྩོད་གླེང་བྱས་པ༌དང༌། ཨི་སཱག་གིས་ཁྲོན་པ་དེ་ལ་ཨེ་སཱ་ ཞེས་མིང་བཏགས༌སོ། །རྒྱུ་མཚན་ནི་ཁོ་རྣམས་ཀྱིས་ཁོ་དང་རྩོད་གླེང་བྱས་པའི་ཕྱིར༌རོ།།
GEN 26:21 དེ་ནས་ཡང་ཨི་སཱག་གི་གཡོག་པོས་ཁྲོན་པ་གཞན་ཞིག་བརྐོས་པ༌དང༌། དེ་རྣམས་ཁྲོན་པ་དེ་ལ་རྩོད་པ་བྱུང་བས་ཨི་སཱག་གིས་ཁྲོན་པ་དེའི་མིང་ལ་ཤིད་ནཱ་ ཞེས་བཏགས༌སོ།།
GEN 26:22 དེ་ནས་ཨི་སཱག་ཡུལ་དེ་དང་ཁ་བྲལ་ཞིང་ཁྲོན་པ་གཞན་ཞིག་བརྐོས་པ༌དང༌། མི་དེ་རྣམས་ཀྱིས་རྩོད་པ་མ་བྱས་པས་ཁོས་ཁྲོན་པ་དེའི་མིང་ལ་རེའེ་ཧོ་པེད་ ཅེས་བཏགས༌ཤིང༌། ཁོ་ན༌རེ། དཀོན་མཆོག་ཡ་ཝཱེས་རང་ཅག་རྣམས་ལ་ས་གཞི་རྒྱ་ཆེ་བ་ཞིག་གནང་བ༌དང༌། རང་ཅག་རྣམས་ས་གཞི་འདིའི་སྟེང་ནས་དར་ཞིང་རྒྱས་པར་བྱེད་དགོས་ཞེས་སྨྲས༌སོ།།
GEN 26:23 དེ་ནས་ཨི་སཱག་ཡུལ་དེ་དང་ཁ་བྲལ་ནས་ཡར་པེར་ཤ་བཱ་རུ་སོང་བ༌དང༌།
GEN 26:24 ཉིན་དེའི་མཚན༌མོར། དཀོན་མཆོག་ཡ་ཝཱེས་ཁོ་རང་ལ་མངོན་པར་མཛད་དེ་འདི་སྐད༌དུ། བདག་ནི་ཁྱོད་ཀྱི་ཡབ་ཨབ་ར་ཧམ་གྱི་དཀོན་མཆོག་ཡིན༌ལ། བདག་ནི་ཁྱོད་དང་མཉམ་དུ་ཡོད་པས་འཇིགས་མི་དགོས༌སོ། །བདག་གིས་ཁྱོད་ལ་བྱིན་རླབས་གནང་བ༌དང༌། བདག་གི་ཞབས་ཕྱི་པ་ཨབ་ར་ཧམ་གྱི་རྐྱེན་གྱིས་ཁྱོད་ཀྱི་རིགས་རྒྱུད་མང་དུ་སྤེལ་བར་བྱ་ཞེས་གསུངས༌སོ།།
GEN 26:25 དེ་ནས་ཨི་སཱག་གིས་གནས་དེ་རུ་མཆོད་ཁྲི་ཞིག་བཞེངས་ཤིང་དཀོན་མཆོག་ཡ་ཝཱེའི་མཚན་ནས་བོས་པ༌དང༌། སྦྲ་གུར་ཡང་ཕུབ་པ་དང་ཁོའི་གཡོག་པོ་རྣམས་ཀྱིས་གནས་དེ་རུ་ཁྲོན་པ་ཞིག་ཀྱང་བརྐོས༌སོ།།
GEN 26:26 དེ་ཡང་ཨ་བི་མེ་ལེག་དང་ཁོའི་མནའ་གྲོགས་ཨ་ཧུའུ་ཟད་དང་དམག་དཔོན་ཕི་ཀོལ་བྱ་བ་གསུམ་གེ་རཱར་ནས་སླེབས་པ༌དང༌།
GEN 26:27 ཨི་སཱག་ན༌རེ། དེ་སྔར་ཁྱོད་རྣམས་བདག་ལ་སྡང་ཞིང་ང་རང་འགྲོ་རུ་བཅུག་པ༌དང༌། ད་ལྟ་ཁྱོད་རྣམས་བདག་གི་གམ་དུ་ཡོང་བ་ཅི་ཡིན་ཞེས་སྨྲས་པ༌ལ།
GEN 26:28 དེ་རྣམས་ན༌རེ། ངེད་ཅག་གིས་དཀོན་མཆོག་ཡ་ཝཱེ་ཁྱོད་དང་མཉམ་དུ་བཞུགས་པ་གསལ་པོར་མཐོང༌བས། རང་ཅག་བར་དུ་དམ་བཅའ་བཞག་ནས་གྲོས་འཆམ་བྱུང་ན་ལེགས༌ཏེ།
GEN 26:29 ཁྱོད་ཀྱིས་ངེད་ཅག་ལ་གནོད་པ་མི་བྱེད་པའི་ཕྱིར༌རོ། །ངེད་ཅག་གིས་ཁྱོད་ལ་གནོད་པ་བྱས་མ་མྱོང༌བར། སྔར་བཞིན་ཁྱོད་ལ་སྣེ་ལེན་བཟང་པོ་བྱས་པར་མ༌ཟད། ཁྱོད་རང་བདེ་བའི་ངང་འགྲོ་རུ་བཅུག་པ་དེ་བཞིན༌ནོ། །ཁྱོད་ནི་དཀོན་མཆོག་ཡ་ཝཱེའི་བྱིན་རླབས་ཐོབ་པའི་མི་ཡིན་ཞེས་སྨྲས༌སོ།།
GEN 26:30 དེ་ནས་ཨི་སཱག་གིས་ཁོ་རྣམས་ལ་གསོལ་སྟོན་བཤམས་ཤིང་དེ་རྣམས་ཀྱང་བཟའ་བཏུང་ལ་རོལ༌ཏོ།།
GEN 26:31 ཕྱི་ཉིན་ཞོགས༌པར། ཁོ་རྣམས་སྔ་མོ་ནས་ཡར་ལངས་ཏེ་ཕན་ཚུན་བར་དམ་བཅས༌སོ། །དེ་ནས་ཨི་སཱག་གིས་མི་དེ་རྣམས་ཕྱིར་འགྲོ་རུ་བཅུག་ཅིང་དེ་རྣམས་ཀྱང་བདེ་བར་སོང༌ངོ༌།།
GEN 26:32 ཉིན་དེ༌ལ། ཨི་སཱག་གི་གཡོག་པོ་ཡོང་ནས་ངེད་ཅག་གིས་ཆུ་རྙེད་དོ་ཞེས་ཁྲོན་པ་བརྐོས་པའི་དོན་དེ་ཁོ་ལ༌སྨྲས།།
GEN 26:33 དེ་ནས་ཁོས་ཁྲོན་པ་དེའི་མིང་ལ་ཤིབ་ཨ་ཞེས་བཏགས༌པས། གྲོང་ཁྱེར་དེའི་མིང་ལ་པེར་ཤ་བཱ་ཞེས་ཟེར༌ཞིང༌། གྲོང་ཁྱེར་དེའི་མིང་ནི་ད་ལྟའི་བར་དུ་གནས་ཡོད༌དོ།།
GEN 26:34 དེ་ཡང་ཨེ་སཱབ་དགུང་ལོ་བཞི་བཅུ་ཡིན་པའི་སྐབས༌སུ། ཧེ་བི་མི་རིགས་ཀྱི་པེ་རེ་ཞེས་བྱ་བའི་བུ་མོ་ཡ་ཧུ་དིད༌དང༌། ཧེ་བི་མི་རིགས་ཀྱི་ཨེད་ལོན་ཞེས་བྱ་བའི་བུ་མོ་པཱ་ས་མཱད་ཅེས་པ་གཉིས་མཉམ་དུ་ཆུང་མར་བླངས༌སོ།།
GEN 26:35 དེ་ནས་ཁོ་རྣམས་ཀྱིས་ཨི་སཱག་དང་རིབ་ཀཱ་གཉིས་ཀྱི་སེམས་དཀྲུག་པར་བྱས༌སོ།།
GEN 27:1 དེ་ཡང་ཨི་སཱག་རྒས་ཤིང་མིག་ཟུང་རབ་རིབ་ཏུ་གྱུར་ནས་ཅི་ཡང་མི་མཐོང་བའི་ཚེ། བདག་གི་བུ་ཞེས་རང་གི་བུ་ཆེ་བ་ཨེ་སཱབ་བོས་པ༌དང༌། བུ་ན༌རེ། ཡབ༌ལགས། ང་རང་འདི་རུ་ཡོད་ཅེས་ལན་བཏབ་པ༌དང༌།
GEN 27:2 ཡབ་ན༌རེ། ལྟོས༌དང༌། ད་ལྟ་ང་རང་རྒས་ཤིང་ནམ་འཆི་ངེས་མེད་ཡིན༌པས།
GEN 27:3 ད་ནི་ཁྱོད་ཀྱིས་རང་གི་མཚོན་ཆ་སྟེ་མདའ་གཞུ་ཐོགས་པ་དང་དབེན་སྟོང་དུ་སོང་ནས་བདག་ལ་རི་དྭགས་རྔོན་པར༌བྱོས།
GEN 27:4 བདག་གི་དགའ་མོས་ལྟར་ཁ་ཟས་ཞིམ་པོ་གཡོས་སྦྱོར་བྱས་ནས་བདག་ལ་ཁྱེར༌ཤོག ང་རང་མ་ཤི་གོང་དུ་ཁྱོད་ལ་བྱིན་རླབས་གནང་བར་བྱ་ཞེས་སྨྲས༌སོ།།
GEN 27:5 ཨི་སཱག་གིས་རང་གི་བུ་ལ་དེ་ལྟར་སྨྲས་པ་རིབ་ཀཱས་ཐོས༌སོ། །དེ་ནས་བུ་ཆེ་བ་དབེན་སྟོང་ལ་རི་དྭགས་རྔོན་དུ་སོང་བ༌དང༌།
GEN 27:6 རིབ་ཀཱས་རང་གི་བུ་ཡ་ཀོབ་ལ་འདི་ལྟར། ལྟོས༌དང༌། ཁྱོད་ཀྱི་ཡབ་ཀྱིས་ཁྱོད་ཀྱི་གཅེན་པོ་ཨེ་སཱབ༌ལ། ཁྱོད་རང་སོང་ནས་རི་དྭགས་བརྔོན༌ཏེ། ཁ་ཟས་ཞིམ་པོ་གཡོས་སྦྱོར་བྱས་ནས་ང་རང་ལ་བཟའ་བར་ཁྱེར༌ཤོག ང་རང་མ་ཤི་གོང་དུ་དཀོན་མཆོག་ཡ་ཝཱེའི་སྤྱན་སྔ་ནས་ཁྱོད་ལ་བྱིན་རླབས་གནང་བར་བྱའོ་ཞེས་སྨྲས་པ་ངས་ཐོས༌པས།
GEN 27:8 བདག་གི༌བུ། ངས་ཁྱོད་ལ་སྨྲས་པ་བཞིན་ད་ལྟ་ཁྱོད་ཀྱིས་བདག་གི་གཏམ་ལ་མཉན་པར་བྱ༌སྟེ།
GEN 27:9 ཁྱོད་རང་ར་ཁྱུའི་ནང་དུ་སོང་ནས་རེའུ་ཤ་ཤེད་ཅན་གཉིས་ཁུར་ཤོག༌དང༌། བདག་གིས་ཁྱོད་ཀྱི་ཡབ་ལ་དགའ་བའི་ཁ་ཟས་ཞིམ་པོོ་གཡོས་སྦྱོར་བྱེད་པར༌བྱ།
GEN 27:10 ཁྱོད་ཀྱིས་ཁ་ཟས་དེ་རང་གི་ཡབ་ཀྱི་དྲུང་དུ་ཁྱེར་སོང༌དང༌། ཁོང་མ་ཤི་གོང་དུ་ཁོང་གིས་ཁྱོད་ལ་བྱིན་རླབས་གནང་བར་བྱ་ཞེས་སྨྲས༌སོ།།
GEN 27:11 དེ་ནས་ཡ་ཀོབ་ཀྱིས་རང་གི་ཡུམ་རིབ་ཀཱ་ལ་འདི༌ལྟར། བདག་གི་གཅེན་པོ་ཨེ་སཱབ་ཀྱི་ལུས་ཡོངས་ལ་བ་སྤུས་བཀང་ཞིང་བདག་གི་ལུས་ནི་འཇམ་པོ་ཡིན༌པས།
GEN 27:12 གལ་ཏེ་ཡབ་ཀྱིས་བདག་གི་ལུས་ལ་རེག༌ན། བདག་གིས་ཁོང་ལ་མགོ་སྐོར་བཏང་བ་ཤེས་ངེས༌ཡིན། བདག་ལ་དམོད་པ་འཕོག་ཅིང་བྱིན་རླབས་འཐོབ་པར་མི་འགྱུར་ཞེས་སྨྲས་པ༌དང༌།
GEN 27:13 ཡང་ཁོའི་ཡུམ་ན༌རེ། བདག་གི༌བུ། ཁྱོད་ལ་ཕོག་པའི་དམོད་པ་དེ་བདག་གི་ལུས་ལ་འཕོག་པར༌སྨོན། ཁྱོད་ཀྱིས་བདག་གི་གཏམ་ལ་མཉན་ཏེ་རེའུ་ཁྲིད་ཤོག་ཅེས་སྨྲས་པ༌དང༌།
GEN 27:14 ཁོས་དེ་ལྟར་བྱས་ནས་ཡུམ་ལ་སྤྲད་པ༌དང༌། ཁོ་མོས་ཀྱང་ཡབ་ཀྱི་དགའ་མོས་ལྟར་ཁ་ཟས་ཞིམ་པོ་གཡོས་སྦྱོར་བྱས༌སོ།།
GEN 27:15 དེ་ནས་རིབ་ཀཱས་ཡུལ་དུ་ཡོད་པའི་བུ་ཆེ་བའི་གྱོན་གོས་ལེགས་པོ་དེ་བླངས་ནས་རང་གི་བུ་ཆུང་བ་ཡ་ཀོབ་ཀྱི་ལུས་ལ་གྱོན་དུ་བཅུག་པ༌དང༌།
GEN 27:16 ཡང་རིབ་ཀཱས་ར་ལྤགས་ཀྱིས་ཡ་ཀོབ་ཀྱི་ལག་པ་དང་མཇིང་པ་བཅས་འཇམ་པོ་ཡིན་ས་རྣམས་གཡོགས༌ཤིང༌།
GEN 27:17 ཁ་ཟས་ཞིམ་པོ་གཡོས་སྦྱོར་བྱས་པ་དེ་དང་བག་ལེབ་བཅས་རང་གི་བུ་ཆུང་བའི་ལག་ཏུ་བཞག༌གོ །
GEN 27:18 དེ་ནས་ཡ་ཀོབ་ཁོ་རང་ཡབ་ཀྱི་དྲུང་དུ་སོང་སྟེ་བདག་གི་ཡབ་ལགས་ཞེས་སྨྲས་པ༌དང༌། ཡབ་ན༌རེ། ང་རང་འདི་རུ་ཡོད། བདག་གི༌བུ། ཁྱོད་ནི་བུ་གང་ཞིག་ཡིན་ནམ་ཞེས་དྲིས་པ༌ན།
GEN 27:19 ཡ་ཀོབ་ཀྱིས་ཕ་ལ་འདི་ལྟར་སྨྲས་པ༌སྟེ། ང་རང་ཁྱེད་ཀྱི་བུ་སྐྱེས་འགོ་ཨེ་སཱབ༌ཡིན། ཁྱེད་ཀྱི་བྱིན་རླབས་འཐོབ་པའི༌ཕྱིར། བདག་གིས་ཁྱེད་ཀྱི་བཀའ་ལྟར་བསྒྲུབས༌པ་ཡིན། ཁྱེད་རང་ཡར་བཞེངས་ནས་ཁ་ཟས་བཞེས་པར་མཛོད་ཅིག་ཅེས་པ༌ལ།
GEN 27:20 ཨི་སཱག་གིས་རང་གི་བུ་ལ་འདི་ལྟར་སྨྲས༌པ། བདག་གི༌བུ། ཁྱོད་རང་འདི་འདྲ་མགྱོགས་པ་ཅི་ཡིན་ནམ་ཞེས་པ༌ན། བུ་ན༌རེ། དཀོན་མཆོག་ཡ་ཝཱེ་སྟེ་ཁྱེད་ཀྱི་དཀོན་མཆོག་གིས་བདག་ལ་གོ་སྐབས་ལེགས་པོ་གནང་བས་ལག་ཏུ་འབྱོར་བ་ཡིན་ཞེས་ལན་བཏབ༌བོ།།
GEN 27:21 དེ་ནས་ཨི་སཱག་གིས་ཡ་ཀོབ་ལ་འདི༌ལྟར། བདག་གི༌བུ། ཁྱོད་རང་བདག་གི་ཉེ་སར་ཤོག༌དང༌། བདག་གིས་ཁྱོད་ལ་རེག༌སྟེ། ཁྱོད་ནི་བདག་གི་བུ་ཨེ་སཱབ་ཡིན་མིན་ལ་བལྟ་བར་བྱ་ཞེས་སྨྲས་པ༌དང༌།
GEN 27:22 ཡ་ཀོབ་རང་གི་ཡབ་ཨི་སཱག་གི་ཉེ་སར་བཅར་བ༌དང༌། ཨི་སཱག་གིས་ཁོ་ལ་རེག་སྟེ་ན༌རེ། ཁྱོད་ཀྱི་སྐད་ནི་ཡ་ཀོབ་ཀྱི་སྐད་ཡིན་ཡང་ལག་པ་ནི་ཨེ་སཱབ་ཀྱི་ལག་པ་ཡིན་འདུག་ཅེས་སྨྲས༌ཤིང༌།
GEN 27:23 ཨི་སཱག་གིས་བུ་སུ་ཡིན་མ་ཤེས༌སོ། །ཅིའི་ཕྱིར་ཞེ༌ན། ཁོའི་ལག་པའི་སྟེང་དུའང་བ་སྤུ་ཡོད་པས་ཁོའི་གཅེན་པོ་ཨེ་སཱབ་ཀྱི་ལག་པ་དང་མཚུངས་པའི་ཕྱིར༌རོ། །དེ་ནས་བུ་ཡ་ཀོབ་ལ་བྱིན་རླབས་གནང་བ༌དང༌།
GEN 27:24 ཡང་ཡབ་ན༌རེ། ཁྱོད་ནི་དངོས་གནས་བདག་གི་བུ་ཨེ་སཱབ་ཡིན་ནམ་ཞེས་དྲིས་པ༌ན། བུ་ཡ་ཀོབ་ཀྱིས་ང་རང་ཡིན་ཞེས་ལན་བཏབ༌བོ།།
GEN 27:25 དེ་ནས་ཨི་སཱག་ན༌རེ། ཁྱོད་ཀྱིས་བདག་ལ་བྱིན༌དང༌། བདག་གིས་རང་གི་བུས་གཡོས་སྦྱོར་བྱས་པའི་ཁ་ཟས་བཟའ་བར༌བྱ། དེ་ནས་ཁྱོད་ལ་བྱིན་རླབས་གནང་བར་བྱ་ཞེས་སྨྲས༌སོ། །ཡ་ཀོབ་ཀྱིས་ཡབ་ལ་ཁ་ཟས་ཕུལ་བར་ཡབ་ཀྱིས་བཞེས༌ཤིང༌། རྒུན་ཆང་དྲངས་པ་ལ་ཁོང་གིས་དེའང་བཞེས༌སོ།།
GEN 27:26 དེ་ནས་ཡབ་ཀྱིས་བུ་ཨེ་སཱབ་ཡིན་པར་སྙམ་ནས་འདི༌ལྟར། བདག་གི༌བུ། ཁྱོད་བདག་གི་གམ་དུ་ཡོང་ནས་བདག་ལ་འོ་བྱེད་པར་གྱིས་ཞེས་སྨྲས་པ༌དང༌།
GEN 27:27 བུ་ཡ་ཀོབ་ཀྱིས་ཡབ་ལ་འོ་བྱས་པ༌དང༌། ཡབ་ཀྱིས་བུའི་གྱོན་གོས་སྟེང་གི་དྲི་མ་བསྣམས་ནས་བྱིན་རླབས་གནང་སྟེ་འདི་སྐད༌དུ། བདག་གི་བུ་ཡི་ལུས་ཀྱི་དྲི་མ༌དང༌།། ཡ་ཝཱེས་བྱིན་རླབས་གནང་བར་མཛད་པ༌ཡི།། ཞིང་སའི་དྲི་ཞིམ་ལ་ནི་ཡང་དག༌མཚུངས།།
GEN 27:28 དཀོན་མཆོག་གིས་ནི་མཁའ་ལས་ཟིལ་བ༌དང༌།། ས་གཤིས་ལེགས་ཤིང་འབྲུ་རིགས་སྣ་ལྔ༌དང༌།། རྒུན་ཆང་གསར་པ་ཁྱོད་ལ་གནང་བར༌སྨོན།།
GEN 27:29 མི་རྣམས་ཀུན་གྱིས་ཁྱོད་ལ་བསྙེན་བཀུར༌དང༌།། མི་རིགས་ཡོངས་ཀྱིས་ཁྱོད་ལ་བཀུར་སྟི༌དང༌།། ཁྱོད་ནི་སྤུན་ཟླ་རྣམས་ཀྱི་བདག་པོ༌དང༌།། མ་ཡི་བུས་ཀྱང་བཀུར་སྟི་བྱེད་པར༌སྨོན།། ཁྱོད་ལ་དམོད་པའི་མི་རྣམས་ཀུན་ལ༌ཡང༌།། དེ་བཞིན་དམོད་པ་འཕོག་པར་འགྱུར་བ༌དང༌།། ཁྱོད་ལ་བྱིན་རླབས་གནང་མཁན་ཉིད་ལ༌ནི།། དེ་དང་དེ་བཞིན་བྱིན་རླབས་འཐོབ་པར༌སྨོན། །ཞེས་སྨྲས༌སོ།།
GEN 27:30 དེ་ནས་ཨི་སཱག་གིས་ཡ་ཀོབ་ལ་བྱིན་རླབས་གནང་ཚར༌རྗེས། ཡ་ཀོབ་ཡབ་ཀྱི་མདུན་ནས་ཕྱིར་ཡོང་མ་ཐག༌ཏུ། ཁོའི་གཅེན་པོ་ཨེ་སཱབ་ཀྱིས་ཀྱང་རི་དྭགས་བརྔོན་ནས་ཕྱིར་སླེབས་ཤིང་།
GEN 27:31 ཁོས་ཀྱང་ཁ་ཟས་ཞིམ་པོ་གཡོས་སྦྱོར་བྱས༌ཏེ། ཡབ༌ལགས། ཡར་བཞེངས༌དང༌། བདག་ལ་བྱིན་རླབས་འཐོབ་པའི༌ཕྱིར། ཁྱེད་ཀྱི་བུས་གཡོས་སྦྱོར་བྱས་པའི་ཁ་ཟས་བཞེས་པར་མཛོད་ཅིག་ཅེས་སྨྲས་པ༌ལ།
GEN 27:32 ཁོའི་ཡབ་ཀྱིས་ཨེ་སཱབ་ལ་ཁྱོད་རང་སུ་ཡིན་ནམ་ཞེས་དྲིས་པ༌ན། བུ་ན༌རེ། བདག་ནི་ཁྱེད་ཀྱི་བུ་སྐྱེས་འགོ་ཨེ་སཱབ་ཡིན་ཞེས་ལན་བཏབ༌བོ།།
GEN 27:33 དེ་ནས་ཨི་སཱག་དྲག་ཏུ་འདར་ཞིང་འདི་ལྟར། ཁྱོད་རང་མ་ཡོང་བའི་སྔོན༌དུ། སུ་ཞིག་གིས་རི་དྭགས་བརྔོན་ཏེ་བདག་ལ་ཁ་ཟས་ཞིམ་པོ་ཁྱེར་ཡོང༌ངམ། བདག་གིས་ཟོས་ནས་དེ་ལ་བྱིན་རླབས་གནང་བ༌དང༌། མ་འོངས་པར་དེ་ལ་བྱིན་རླབས་ཀྱང་འཐོབ་ངེས་ཡིན་ཞེས་སྨྲས༌སོ།།
GEN 27:34 ཨེ་སཱབ་ཀྱིས་ཡབ་ཀྱི་གཏམ་དེ་ཐོས་རྗེས་སྐད་ཆེན་པོ་བརྒྱབ་ནས་ངུ་བཞིན་ན༌རེ། ཀྱེ། བདག་གི་ཡབ༌ལགས། ཁྱེད་ཀྱིས་བདག་ལའང་བྱིན་རླབས་གནང་བར་མཛོད་ཅིག་ཅེས་སྨྲས་པ༌དང༌།
GEN 27:35 ཨི་སཱག་གིས་འདི་ལྟར། ཁྱོད་ཀྱི་གཅུང་པོས་གཡོ་སྒྱུའི་སྦྱོར་བ་སྤེལ་ནས་ཁྱོད་ལ་འཐོབ་ངེས་པའི་བྱིན་རླབས་ཀྱི་བགོ་སྐལ་ཁྱེར་སོང་བ་ཡིན་ཞེས་སྨྲས་པ༌ལ།
GEN 27:36 ཨེ་སཱབ་ན༌རེ། ཁོའི་མིང་ལ་ཡ་ཀོབ་ཅེས་བཏགས་ཡོད་པ་ཅི་མ༌བདེན། ཅིའི་ཕྱིར་ཞེ༌ན། ཁོས་བདག་ལ་མགོ་སྐོར་ཐེངས་གཉིས་ལ་བཏང་བ༌སྟེ། སྔོན་ཆད་བུ་ཆེ་བ་བདག་གི་ཐོབ་ཐང་ཕྲོགས་ཤིང་། ལྟོས༌དང༌། ད་ལྟ་བདག་གི་བྱིན་རླབས་ཀྱི་བགོ་སྐལ་ཡང་ཕྲོགས་པ་རེད་ཅེས་སྨྲས་པ༌དང༌། ཡང་ཁོ་ན༌རེ། ཁྱེད་ཀྱིས་བདག་ལ་བྱིན་རླབས་ཀྱི་བགོ་སྐལ་མ་བསྐྱུར་རམ་ཞེས་དྲིས་པ༌ལ།
GEN 27:37 ཨི་སཱག་ན༌རེ། ལྟོས༌དང༌། བདག་གིས་ཁོ་རང་ནི་ཁྱོད་ཀྱི་བདག་པོར་བྱས་ཤིང་། ཁོའི་སྤུན་ཟླ་ཐམས་ཅད་ཁོའི་ཞབས་ཕྱི་པར་བྱས་པ༌དང༌། ཁོ་རང་ལ་འབྲུ་རིགས་སྣ་ལྔ་དང་རྒུན་ཆང་གསར་པ་བསྩལ་ཏེ་འཚོ་བ་བསྐྲུན༌ནོ། །བདག་གི༌བུ། ད་ལྟ་བདག་གིས་ཁྱོད་ལ་ཅི་བྱ་ནུས་སམ་ཞེས་ལན་བཏབ༌བོ།།
GEN 27:38 དེ་ནས་ཨེ་སཱབ་ཀྱིས་རང་གི་ཡབ་ལ་འདི༌ལྟར། ཀྱེ། ཡབ༌ལགས། ཁྱེད་ལ་བྱིན་རླབས་དེ་མ་གཏོགས་མེད༌དམ། བདག་གི་ཡབ༌ལགས། ཁྱེད་ཀྱིས་བདག་ལའང་བྱིན་རླབས་གནང་བར་ཞུ་ཞེས་སྨྲས་ཤིང་སྐད་ཆེན་པོས་ངུས༌སོ།།
GEN 27:39 དེ་ནས་ཡབ་ན༌རེ། ཁྱོད་ནི་ས་གཤིས་ལེགས་པོར་འབྲལ་འགྱུར༌ཞིང༌།། ནམ་མཁའི་ཟིལ་བ་དེ་ཡང་རིང་དུ༌གནས།།
GEN 27:40 ཁྱོད་ནི་རལ་གྲིར་བརྟེན་ནས་འཚོ་བ༌དང༌།། ཁྱོད་ཀྱིས་གཅུང་པོ་ལ་ཡང་བསྙེན་བཀུར༌བྱེད།། ཁྱོད་ལ་སྟོབས་འབྱོར་མངའ་ཐང་རྒྱས་པའི༌དུས།། ཁོ་ཡི་གཉའ་ཤིང་ལས་ནི་ཐར་བར༌ངེས། །ཞེས་སྨྲས༌སོ།།
GEN 27:41 དེ་ཡང་ཡབ་ཀྱིས་ཡ་ཀོབ་ལ་བྱིན་རླབས་གནང་བའི༌ཕྱིར། ཨེ་སཱབ་ཀྱིས་ཡ་ཀོབ་དགྲ་རུ་བཟུང་སྟེ་ཁོའི་སེམས་སུ་ཕ་ལ་མྱ་ངན་བྱེད་པའི་དུས་སླེབས་ལ༌ཉེའོ། །དེའི་རྗེས༌སུ། བདག་གིས་གཅུང་པོ་ཡ་ཀོབ་གསོད་པར་བྱ་སྙམ་པ༌རེད།
GEN 27:42 དེ་ནས་མི་གཞན་དག་གིས་རིབ་ཀཱའི་བུ་ཆེ་བ་ཨེ་སཱབ་ཀྱིས་སྨྲས་པའི་གཏམ་དེ་ཁོ་མོར་སྨྲས༌ཤིང༌། ཁོ་མོས་མི་མངགས་ཏེ་བུ་ཆུང་བ་ཡ་ཀོབ་ཚུར་བོས་པ༌དང༌། ཁོ་ལ་འདི༌ལྟར། ལྟོས༌དང༌། ཁྱོད་ཀྱི་གཅེན་པོས་ཁྱོད་ལ་དགྲ་ཤ་ལེན་ཕྱིར་གསོད་པར་རྩོམ་མོ་ཞེས་སྨྲས་པ༌དང༌།
GEN 27:43 བདག་གི༌བུ། ད་ལྟ་ཁྱོད་ཀྱིས་བདག་གི་གཏམ་ལ་ཉོན༌ཅིག ཡར་ལངས་ནས་ངའི་མིང་པོ་ལཱ་པན་གྱི་དྲུང་དུ་ཧཱ་རན་ཡུལ་ལ་ཕྲོས༌ཤིག
GEN 27:44 ཁྱོད་ཀྱི་གཅེན་པོའི་ཞེ་སྡང་ཞི་བའི་བར་དུ་ཁོང་དང་མཉམ་དུ་ཉིན་ཁ་ཤས་ལ་སྡོད༌ཅིག
GEN 27:45 ཁྱོད་ཀྱི་གཅེན་པོའི་ཞེ་སྡང་ཞི་བ་དང་ཁྱོད་ཀྱིས་ཁོ་རང་ལ་བྱས་པའི་ལས་དེ་བརྗེད་པར་གྱུར༌ཚེ། བདག་གིས་མི་མངགས་ནས་ཁྱོད་རང་ཕྱིར་འབོད་པར༌བྱའོ། །ཉིན་གཅིག་ལ་ཁྱོད་སྤུན་གཉིས་ཀ་འཆི་དགོས་དོན་ཅི་ཡོད་དམ་ཞེས་སྨྲས༌སོ།།
GEN 27:46 དེ་ནས་ཡང་རིབ་ཀཱས་ཨི་སཱག་ལ་འདི༌ལྟར། བདག་ནི་ཧེད་མི་རིགས་ཀྱི་བུ་མོའི་རྐྱེན་གྱིས་ཡིད་སྐྱོ་བར་གྱུར་ཏེ་སྲོག་ཀྱང་འཚོ་མི་འདོད༌ལ། ཡ་ཀོབ་ཀྱིས་ཀྱང་ཧེད་མི་རིགས་ཀྱི་བུ་མོ་འདི་ལྟ་བུ་ཞིག་ཆུང་མར་བླངས༌ན། བདག་གི་སྲོག་འཚོ་ཐུབ་ཀྱང་ཅི་ལ་ཕན་ཞེས་སྨྲས༌སོ།།
GEN 28:1 དེ་ནས་ཨི་སཱག་གིས་ཡ་ཀོབ་བོས་ཏེ་བྱིན་རླབས་གནང་བ་དང་འདི་ལྟར་སྨྲས༌པ། ཁྱོད་ཀྱིས་ཀ་ན་ཨན་མི་རིགས་ཀྱི་བུ་མོ་ཆུང་མར་ལེན་པར་མི༌བྱའོ།།
GEN 28:2 ཁྱོད་རང་ཡར་ལངས་ནས་ཕཱ་དན་ཨ་རམ་ཡུལ་གྱི་སྒྱུག་པོ་པཱ་ཐུ་ཨེལ་གྱི་ཁྱིམ་དུ་སོང༌དང༌། ཨ་མའི་མིང་པོ་ལཱ་པན་གྱི་བུ་མོ་རྣམས་ལས་བུ་མོ་གཅིག་རང་གི་ཆུང་མར་ལོངས༌ཤིག
GEN 28:3 ཀུན་དབང་དཀོན་མཆོག་གིས་ཁྱོད་ལ་བྱིན་གྱིས་རླབས༌ཏེ། ཁྱོད་ནི་རྒྱུད་དང་ལྡན་པར་གྱུར་ནས་མང་པོར་འཕེལ་ཏེ་མི་རིགས་ཆེན་པོ་ཞིག་ཏུ་འགྱུར་བ༌དང༌།
GEN 28:4 ཁྱོད་ཀྱིས་རང་ཉིད་སྡོད་སའི་ཡུལ་འདིར་བདག་པོ་བྱེད་པའི༌ཕྱིར། ཁོང་གིས་མེས་པོ་ཨབ་ར་ཧམ་གྱི་བྱིན་རླབས་དེའང་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་རྣམས་ལ་གནང་བར༌སྨོན། ཡུལ་འདི་ནི་དཀོན་མཆོག་གིས་ཨབ་ར་ཧམ་གྱི་ས་གཞིར་གནང་བ་ཡིན་ཞེས༌པའོ།།
GEN 28:5 དེ་ནས་ཨི་སཱག་གིས་ཡ་ཀོབ་མངགས་པ༌དང༌། ཡ་ཀོབ་ཕཱ་དན་ཨ་རམ་ཡུལ་གྱི་ཨ་རམ་མི་རིགས་ཀྱི་པཱ་ཐུ་ཨེལ་ཞེས་བྱ་བའི་བུ་ལཱ་པན་གྱི་དྲུང་དུ༌སོང༌། ལཱ་པན་ནི་ཡ་ཀོབ་དང་ཨེ་སཱབ་གཉིས་ཀྱི་ཞང་པོ་ཡིན༌ནོ།།
GEN 28:6 དེ་ནས་ཨི་སཱག་གིས་ཡ་ཀོབ་ལ་བྱིན་རླབས་གནང་ཟིན་པ་ཨེ་སཱབ་ཀྱིས་མཐོང་བ༌སྟེ། ཨི་སཱག་གིས་བུ་ཆུང་བ་ཡ་ཀོབ་ནི་ཕཱ་དན་ཨ་རམ་ཞེས་པའི་ཡུལ་དུ་མངགས༌ཤིང༌། ཡུལ་དེ་ནས་ཁོ་རང་ལ་ཆུང་མ་ཞིག་ལེན་པའི་བྱིན་རླབས་གནང་བའི་གཏམ་འདི༌ལྟར། ཁྱོད་ཀྱིས་ཀ་ན་ཨན་མི་རིགས་ཀྱི་བུ་མོ་ཆུང་མར་མི་ལེན་པར་གྱིས་ཞེས་སྨྲས་པ༌དང༌།
GEN 28:7 ཡ་ཀོབ་ཀྱིས་ཡབ་ཡུམ་གཉིས་ཀྱི་ངག་ལ་མཉན་ནས་ཕཱ་དན་ཨ་རམ་ཡུལ་དུ་སོང་བའང་ཨེ་སཱབ་ཀྱིས་མཐོང༌བས།
GEN 28:8 ཨེ་སཱབ་ཀྱིས་ཁོའི་ཡབ་ཨི་སཱག་གིས་ཀ་ན་ཨན་མི་རིགས་ཀྱི་བུ་མོ་མི་འདོད་པ་ཤེས༌ཏེ།
GEN 28:9 ཡེས་མ་ཨེལ་གྱི་དྲུང་དུ་སོང༌སྟེ། རང་ཉིད་ལ་ཆུང་མ་གཞན་ཞིག་ཀྱང་བླངས༌སོ། །ཁོ་མོ་ནི་ཨབ་ར་ཧམ་གྱི་བུ་ཡེས་མ་ཨེལ་གྱི་བུ་མོ་སྟེ་ནཱ་བ་ཨོད་ཀྱི་ནུ་མོ་ཡིན༌ལ། མིང་ལ་མཱ་ཧ་ལཱད་ཅེས་ཟེར༌རོ།།
GEN 28:10 དེ་ནས་ཡ་ཀོབ་ཁོ་རང་པེར་ཤ་བཱ་དང་ཁ་བྲལ་ནས་ཧཱ་རན་གྱི་ལམ་དུ་ཆས་པ༌དང༌།
GEN 28:11 ས་ཆ་ཞིག་ཏུ་སླེབས་རྗེས་ཉི་མ་ནུབ་པས་གནས་དེར་ཞག་སྡོད་བྱས་ཤིང་། རྡོ་ལེབ་ཅིག་ཁྱེར་ཡོང་ནས་སྔས་མགོ་བྱས་ཏེ་ཉལ༌ཏོ།།
GEN 28:12 དེ་ནས་ཁོའི་རྨི་ལམ་ནང་དུ་སྐས་ཤིག་ས་ནས་ཡར་བསྒྲེངས་ཡོད་པ་དང་སྐས་མགོ་ནམ་མཁར་ཟུག༌ཅིང༌། དཀོན་མཆོག་གི་ཕོ་ཉ་རྣམས་སྐས་དེ་ལ་བརྟེན་ནས་ཡར་འཕགས་ཤིང་མར་ཕེབས་པ༌དང༌།
GEN 28:13 དཀོན་མཆོག་ཡ་ཝཱེ་ཁོང་ཉིད་ཀྱང་སྐས་དེའི་སྟེང་དུ་ཡར་བཞེངས་ཏེ་འདི་སྐད༌དུ། བདག་ནི་ཡ་ཝཱེ་སྟེ་ཁྱོད་ཀྱི་མེས་པོ་ཨབ་ར་ཧམ་གྱི་དཀོན་མཆོག་ཡིན༌ལ། ཨི་སཱག་གི་དཀོན་མཆོག་ཀྱང༌ཡིན། ད་ལྟ་བདག་གིས་ཁྱོད་རང་ཉལ་སའི་ས་ཆ་དེ་ནི་ཁྱོད་དང་ཁྱོད་ཀྱི་རིགས་རྒྱུད་རྣམས་ལ་སྦྱིན་པར་བྱ།
GEN 28:14 ཁྱོད་ཀྱི་རིགས་རྒྱུད་དག་ནི་ས་སྟེང་གི་རྡུལ་གྲངས་དང་མཉམ་པར་འགྱུར་ངེས༌ཤིང༌། དེ་རྣམས་ཤར་ལྷོ་ནུབ་བྱང་གི་ཕྱོགས་སུ་འཕེལ་བར་འགྱུར་བ༌དང༌། ས་སྟེང་གི་མི་རིགས་ཐམས་ཅད་ལ་ཁྱོད་དང་ཁྱོད་ཀྱི་རིགས་རྒྱུད་རྣམས་ལས་བྱིན་རླབས་འཐོབ་པར་འགྱུར༌རོ།།
GEN 28:15 བདག་ནི་ཁྱོད་དང་མཉམ་དུ་གནས་ཤིང་ཁྱོད་རང་གང་དུ་སོང་ནའང་བདག་གིས་ཁྱོད་རང་བསྲུང་བ་དང༌། བདག་གིས་ཁྱོད་ལ་ཁས་བླངས་པ་བཞིན་དུ་འགྲུབ་པའི༌བར་དུ། ཁྱོད་རང་ཁྲིད་ནས་ས་ཆ་འདིར་ཡོང་བ་དང་ནམ་ཡང་ཁྱོད་དང་ཁ་མི་འབྲལ་ཞེས་གསུངས༌སོ།།
GEN 28:16 དེ་ནས་ཡ་ཀོབ་གཉིད་ལས་སད་དེ་ན༌རེ། དཀོན་མཆོག་ཡ་ཝཱེ་དངོས་གནས་ས་ཆ་འདིར་བཞུགས་ཡོད་ཀྱང་བདག་གིས་མ་ཤེས་ཞེས་སྨྲས་པ༌དང༌།
GEN 28:17 ཡང་ཁོ་རང་འཇིགས་སྐྲག་ངང་ན༌རེ། ས་ཆ་འདི་ཇི་འདྲའི་འཇིགས་སུ་རུང་བ་ལ༌ཨང༌། གནས་འདི་ནི་ཡུལ་གཞན་མ་ཡིན་ཏེ། དཀོན་མཆོག་གི་བཞུགས་གནས་ཡིན༌ལ། ནམ་མཁའི་ཞིང་ཁམས་ཀྱི་སྒོ་ཆེན་ཡང་ཡིན་ཞེས་སྨྲས༌སོ།།
GEN 28:18 དེ་ཡང་ཞོགས་པར་ཡ་ཀོབ་ཡར་ལངས༌ཤིང༌། སྔས་མགོ་བྱས་པའི་རྡོ་ལེབ་དེ་ཀ་བ་རུ་བསྒྲེངས་པ་དང་དེའི་སྟེང་དུ་སྣུམ་བླུགས༌སོ།།
GEN 28:19 དེ་ནས་ཁོས་ས་ཆ་དེའི་མིང་ལ་པེད་ཨེལ་ཞེས༌བཏགས། འོན༌ཀྱང༌། སྔོན་ཆད་གྲོང་ཁྱེར་དེ་ལ་ལོ་ཟི་ཞེས་ཟེར༌རོ།།
GEN 28:20 དེ་ནས་ཡ་ཀོབ་ཀྱིས་དཀོན་མཆོག་ལ་འདི་ལྟར་དམ་བཅས་པ༌སྟེ། གལ༌སྲིད། དཀོན་མཆོག་ཁྱེད་ནི་བདག་དང་མཉམ་དུ་བཞུགས་པ༌དང༌། ང་རང་གང་ལ་འགྲོ་བའི་ལམ་དུ་བདག་ལ་སྲུང་སྐྱོབ་མཛད༌པ། བདག་ལ་ཟས་གོས་གནང༌བ།
GEN 28:21 ང་རང་བདེ་འཇགས་ངང་རང་གི་ཕ་གཞིས་སུ་ལོག་ཐུབ་པ་བཅས་ཡིན༌ན། བདག་གིས་དཀོན་མཆོག་ཡ་ཝཱེ་ཁྱེད་ཉིད་ང་རང་གི་དཀོན་མཆོག་ཏུ་བཀུར་བ༌དང༌།
GEN 28:22 ངས་ཀ་བ་རུ་བསྒྲེངས་པའི་རྡོ་ལེབ་དེའང་དཀོན་མཆོག་གི་བཞུགས་གནས་སུ་བྱེད༌དོ། །ཁྱེད་ཀྱིས་བདག་ལ་གནང་བ་ཐམས་ཅད་ལས་བདག་གིས་བཅུ་ཆ་གཅིག་ཁྱེད་ལ་འབུལ་ངེས་ཡིན་ཞེས་ཞུས༌སོ།།
GEN 29:1 དེ་ནས་ཡ་ཀོབ་ལམ་ལ་ཆས་ནས་ཤར་ཕྱོགས་པའི་ཡུལ་དུ་སོང་བ༌དང༌།
GEN 29:2 ཞིང་ནང་དུ་ཁྲོན་པ་ཞིག་ཡོད་པ་མཐོང་ཞིང་ལུག་ཁྱུ་སྐོར་གསུམ་ཁྲོན་པའི་འགྲམ་དུ་ཉལ་འདུག་པ༌སྟེ། རྒྱུ་མཚན་ནི་མི་རྣམས་ཀྱིས་ཁྲོན་པ་དེ་ལས་ལུག་ཁྱུ་ལ་ཆུ་ལྡུད་པའི་ཕྱིར༌ཡིན། ཁྲོན་པའི་སྟེང་རྡོ་ལེབ་ཆེན་པོ་ཞིག་ཡོད༌དོ།།
GEN 29:3 ནམ་རྒྱུན་ཁྲོན་པའི་འགྲམ་དུ་ལུག་ཁྱུས་བཀང་བ༌ན། ལུག་རྫི་རྣམས་ཀྱིས་ཁྲོན་པའི་རྡོ་ལེབ་ཕར་བསྒྲིལ་ཏེ་ལུག་ཁྱུ་ལ་ཆུ་ལྡུད་པར་བྱེད་པ༌དང༌། དེའི་རྗེས་སུ་རྡོ་ལེབ་ཕྱིར་འགེབ་པར་བྱེད༌དོ།།
GEN 29:4 དེ་ནས་ཡ་ཀོབ་ཀྱིས་ལུག་རྫི་ལ་འདི༌ལྟར། སྤུན་ཟླ༌རྣམས། ཁྱོད་ཅག་གང་ནས་ཡོང་བ་ཡིན་ནམ་ཞེས་དྲིས་པ༌ལ། ལུག་རྫི་རྣམས་ན༌རེ། ངེད་ཅག་ཧཱ་རན་ནས་ཡོང་བ་ཡིན་ཞེས་ལན་བཏབ་པ༌དང༌།
GEN 29:5 ཡང་ཡ་ཀོབ་ན༌རེ། ཁྱོད་ཅག་གིས་ནཱ་ཧོར་གྱི་ཚ་བོ་ལཱ་པན་བྱ་བ་ངོ་ཤེས་སམ་ཞེས་དྲིས་པ༌ན། ཁོ་རྣམས་ན༌རེ། ངེད་ཅག་གིས་ཁོ་རང་ངོ་ཤེས་པ་ཡིན་ཞེས་ལན༌བཏབ།
GEN 29:6 ཡང་ཡ་ཀོབ་ན༌རེ། ཁོ་རང་བདེ་ལགས་སམ་ཞེས་དྲིས་པ༌ལ། ཁོ་རྣམས་ན༌རེ། ཁོ་རང་བདེ་བར༌བཞུགས། ལྟོས༌དང༌། ཁོའི་བུ་མོ་རཱ་ཧེལ་གྱིས་ལུག་ཁྱུ་དེད་ནས་སླེབས་བྱུང་ཞེས་སྨྲས༌སོ།།
GEN 29:7 དེ་ནས་ཡ་ཀོབ་ན༌རེ། ད་ལྟ་ཉིན་གུང་ཡིན་པས་ལུག་ཁྱུ་འདེད་པའི་དུས་མ་ཡིན༌ཏེ། ཁྱོད་ཅག་གིས་ལུག་ཁྱུ་ལ་ཆུ་བླུད་ནས་འཚོ་རུ་སོང་ན་ལེགས་ཞེས་སྨྲས་པ༌ལ།
GEN 29:8 ཁོ་རྣམས་ན༌རེ། མིན༌ཏེ། ངེད་ཅག་གིས་ངེས་པར་ལུག་ཁྱུ་ཐམས་ཅད་བསྡུ་བར་སྒུག་ཅིང་ཁྲོན་པའི་རྡོ་ལེབ་ཕར་བསྒྲིལ་ནས་ལུག་ཁྱུ་ལ་ཆུ་ལྡུད་དགོས་ཞེས་སྨྲས༌སོ།།
GEN 29:9 དེ་ལྟར་ཡ་ཀོབ་དང་ལུག་རྫི་རྣམས་ཀྱིས་ཕན་ཚུན་ལ་ལབ་གླེང་བྱེད་པའི་དུས༌སུ། རཱ་ཧེལ་གྱིས་ཁོ་མོའི་ཕ་ཡི་ལུག་ཁྱུ་དེད་ནས་སླེབས་པ༌དང༌། ཁོ་མོ་ལུག་ཁྱུ་དེའི་ལུག་རྫི་ཡིན༌ནོ།།
GEN 29:10 དེ་ནས་ཡ་ཀོབ་ཀྱིས་རང་གི་ཞང་པོ་ལཱ་པན་གྱི་བུ་མོ་རཱ་ཧེལ་དང་ལུག་ཁྱུ་མཐོང་བ༌དང༌། ཁྲོན་པའི་རྡོ་ལེབ་ཕར་བསྒྲིལ་ཏེ་ཞང་པོའི་ལུག་ཁྱུ་ལ་ཆུ་བླུད༌དོ།།
GEN 29:11 ཡ་ཀོབ་ཀྱིས་རཱ་ཧེལ་ལ་འོ་བྱས་པ་དང་ངུ་སྒྲ་ཕྱུང་ངོ་།།
GEN 29:12 ཡ་ཀོབ་ཀྱིས་རཱ་ཧེལ་ལ་ཁོ་རང་ནི་ཁོ་མོའི་ཕ་ཡི་ཚ་བོ་སྟེ་རིབ་ཀཱའི་བུ་ཡིན་པར་བརྗོད་པ༌དང༌། རཱ་ཧེལ་ཕ་ཡི་གམ་དུ་རྒྱུགས་ཤིང་དོན་དེ་ཕ་ལ་སྨྲས༌སོ།།
GEN 29:13 དེ་ནས་ལཱ་པན་གྱིས་ཚ་བོ་ཡ་ཀོབ་ཀྱི་གནས་ཚུལ་ཐོས༌རྗེས། མྱུར་དུ་ཁོ་བོའི་མདུན་བསུས་ཤིང་ཁོ་བོར་འཐམས་ནས་འོ་བྱས་ཏེ་རང་ཁྱིམ་དུ་གདན་དྲངས༌སོ། །དེར་ཡ་ཀོབ་ཀྱིས་ཀྱང་དོན་ཐམས་ཅད་ལཱ་པན་ལ་སྨྲས༌སོ།།
GEN 29:14 དེ་ནས་ལཱ་པན་ན༌རེ། ཁྱོད་ནི་ངའི་ཤ་དང་རུས་པའི་གཉེན་ཉེ་ཡིན་ཞེས་སྨྲས་པ༌དང༌། ཡ་ཀོབ་ཟླ་བ་གཅིག་ལ་ལཱ་པན་དང་མཉམ་དུ་བསྡད༌དོ།།
GEN 29:15 དེ་ནས་ལཱ་པན་གྱིས་ཡ་ཀོབ་ལ་འདི༌ལྟར། ཁྱོད་བདག་གི་གཉེན་ཉེ་ཡིན་ཡང་གླ་མེད་པར་བདག་ལ་ཞབས་ཕྱི་བྱེད་ག་ལ༌སྲིད། ཁྱོད་ལ་གླ་ཕོགས་ག་ཚོད་དགོས་པ་བདག་ལ་སྨྲོས་ཤིག་ཅེས༌སྨྲས།
GEN 29:16 དེ་ཡང་ལཱ་པན་ལ་བུ་མོ་གཉིས་ཡོད༌དེ། བུ་མོ་ཆེ་བའི་མིང་ལ་ལེ་ཨ་ཞེས་དང་བུ་མོ་ཆུང་བའི་མིང་ལ་རཱ་ཧེལ་ཟེར༌རོ།།
GEN 29:17 ལེ་ཨ་ནི་མིག་དབང་ཞན་པ༌དང༌། རཱ་ཧེལ་ནི་བྱད་གཟུགས་མཛེས་ཤིང་ལྟ་ན་སྡུག་པ་ཞིག༌ཡིན།
GEN 29:18 ཡ་ཀོབ་ནི་རཱ་ཧེལ་ལ་དགའ་བར་གྱུར༌ཏེ། འདི༌ལྟར། བདག་གིས་ཁྱེད་ཀྱི་བུ་མོ་ཆུང་བ་རཱ་ཧེལ་གྱི་ཆེད༌དུ། ལོ་ངོ་བདུན་རིང་ཁྱེད་ལ་ཞབས་ཕྱི་བསྒྲུབ་འདོད་པ་ཡིན་ཞེས་སྨྲས་པ༌ལ།
GEN 29:19 ལཱ་པན་ན༌རེ། བདག་གིས་བུ་མོ་ཆུང་བ་མི་གཞན་ལ་སྟེར་བ་ལས་ཁྱོད་ལ་བྱིན་ན༌ལེགས། ཁྱོད་རང་བདག་དང་མཉམ་དུ་འདུག་པར་གྱིས་ཞེས༌སྨྲས།
GEN 29:20 དེ་ནས་ཡ་ཀོབ་ཀྱིས་རཱ་ཧེལ་གྱི་ཆེད༌དུ་ལོ་ངོ་བདུན་རིང་ཞབས་ཕྱི༌བསྒྲུབས། ཡ་ཀོབ་ནི་རཱ་ཧེལ་ལ་དགའ་བའི་དབང་གིས་ལོ་བདུན་གྱི་དུས་ནི་ཉིན་འགའ་ཤས་ཙམ་ལ་སྣང༌ངོ༌།།
GEN 29:21 དེ་ནས་ཡ་ཀོབ་ཀྱིས་ལཱ་པན་ལ་འདི་ལྟར་སྨྲས༌པ། ད་ནི་དུས་ལ་སླེབས་པས། ཁྱེད་ཀྱིས་བདག་གི་ཆུང་མ་བདག་ལ་གནང་བར༌མཛོད། བདག་ཁོ་མོར་འགྲོགས་འདོད་པ་ཡིན་ཞེས་པ༌ལ།
GEN 29:22 ལཱ་པན་གྱིས་གཉེན་སྟོན་གཟབ་རྒྱས་བསྡུས་ཤིང་ཡུལ་ཕྱོགས་དེའི་མི་རྣམས་མགྲོན་ལ་བོས་པ༌རེད།
GEN 29:23 དེར་མཚན་མོའི་དུས༌སུ། ལཱ་པན་གྱིས་བུ་མོ་ལེ་ཨ་བྱ་བ་ཡ་ཀོབ་ཀྱི་གམ་དུ་བསྐྱལ་ཏེ་ཁོ་གཉིས་ལུས་འབྲེལ་བྱས་པ༌དང༌།
GEN 29:24 ལཱ་པན་གྱིས་གཡོག་མོ་ཟིལ་པཱ་ཞེས་བྱ་བ་བུ་མོ་ལེ་ཨའི་གཡོག་མོར་བསྐོས༌སོ།།
GEN 29:25 ཕྱི་ཉིན་ཞོགས༌པར། ཡ་ཀོབ་ཀྱིས་ལེ་ཨ་ཡིན་པ་མཐོང༌སྟེ། ལཱ་པན་ལ་འདི་ལྟར་སྨྲས༌པ། ཁྱེད་ཀྱིས་བདག་ལ་ཅི་བྱས༌སམ། བདག་གིས་ཁྱེད་ལ་ཞབས་ཕྱི་བསྒྲུབས་པ་ནི་རཱ་ཧེལ་གྱི་ཆེད་དུ་མ་ཡིན༌ནམ། ཁྱེད་ཀྱིས་བདག་ལ་མགོ་སྐོར་གཏོང་བའི་རྒྱུ་མཚན་ཅི་ཞེས་པ༌ལ།
GEN 29:26 ལཱ་པན་ན༌རེ། བུ་མོ་ཆེ་བ་གནས་ལ་མ་བྱིན་པར་བུ་མོ་ཆུང་བ་གནས་ལ་སྟེར་བ་ནི་ངེད་ཅག་གི་ཡུལ་འདིའི་གོམས་སྲོལ་མ༌ཡིན།
GEN 29:27 ཁྱོད་ཀྱིས་གཉེན་སྟོན་གྱི་ཉིན་བདུན་ལོངས་སུ་བཅུག༌རྗེས། བདག་གིས་བུ་མོ་ཆུང་བའང་ཁྱོད་ལ་སྟེར་ངེས༌ཤིང༌། ཁྱོད་ཀྱིས་ད་དུང་ལོ་ངོ་བདུན་རིང་བདག་ལ་ཞབས་ཕྱི་བསྒྲུབ་དགོས་ཞེས་སྨྲས༌སོ།།
GEN 29:28 དེ་ནས་ཡ་ཀོབ་ཀྱིས་དེ་ལྟར་བསྒྲུབས༌ཤིང༌། ལེ་ཨའི་གཉེན་སྟོན་གྱི་ཉིན་བདུན་ལོངས༌རྗེས། ལཱ་པན་གྱིས་བུ་མོ་རཱ་ཧེལ་ཡ་ཀོབ་ལ་ཆུང་མར་གནང༌ངོ༌།།
GEN 29:29 ཡང་ལཱ་པན་གྱིས་གཡོག་མོ་པིལ་ཧ་ཞེས་བྱ་བ་བུ་མོ་རཱ་ཧེལ་གྱི་གཡོག་མོར་བསྐོས༌སོ།།
GEN 29:30 དེར་ཡ་ཀོབ་ནི་རཱ་ཧེལ་ལའང་ལུས་འབྲེལ་བྱས༌ཤིང༌། ཁོ་རང་ལེ་ཨ་ལས་རཱ་ཧེལ་ལ་ཤིན་ཏུ་དགའ༌བས། ཡང་ལོ་ངོ་བདུན་རིང་ལཱ་པན་ལ་ཞབས་ཕྱི་བསྒྲུབས༌སོ།།
GEN 29:31 དེ་ཡང་དཀོན་མཆོག་ཡ་ཝཱེས་ལེ་ཨ་ལ་ཡ་ཀོབ་ཀྱི༌བྱམས་བརྩེ་མ་ཐོབ་པ་དེ་གཟིགས༌པས། ཁོ་མོ་ལ་མངལ་སྦྲུམ་ནུས་པར་མཛད་ཀྱང་རཱ་ཧེལ་ནི་མོ་གཤམ་ཡིན༌ནོ།།
GEN 29:32 དེ་ནས་ལེ་ཨ་ལ་མངལ་སྦྲུམ་ཞིང་བུ་ཞིག་བཙས་པ་དང་བུའི་མིང་ལ་རུ་བེན་ཞེས༌བཏགས། ཅིའི་ཕྱིར་ཞེ༌ན། ཁོ་མོ་ན༌རེ། དཀོན་མཆོག་ཡ་ཝཱེས་བདག་གི་སྐྱོ་སྡུག་གཟིགས༌པས། ད་ལྟ་བདག་གི་ཁྱོ་གས་ང་རང་ལ་གཅེས་ངེས་ཡིན་ཞེས་བརྗོད་པའི་ཕྱིར༌རོ།།
GEN 29:33 དེ་ནས་ཡང་ཁོ་མོར་མངལ་སྦྲུམ་ཞིང་བུ་ཞིག་བཙས་པ༌ལ། ཁོ་མོ་ན༌རེ། དཀོན་མཆོག་ཡ་ཝཱེས་བདག་ལ་བརྩེ་འདང་མ་ཐོབ་པ་གསན༌པས། ཁོང་གིས་བདག་ལ་བུ་འདིའང་གནང་བ་ཡིན་ཞེས་སྨྲས་པའི༌ཕྱིར། བུའི་མིང་ལ་སི་མུ་ཨོན་ ཞེས་བཏགས༌སོ།།
GEN 29:34 དེ་ནས་ཡང་ཁོ་མོར་མངལ་སྦྲུམ་ཞིང་བུ་ཞིག་བཙས་པ༌དང༌། ཡང་ཁོ་མོ་ན༌རེ། བདག་གིས་ཁྱོ་གར་བུ་གསུམ་བཙས༌པས། ཁོ་ནི་བདག་དང་འབྲེལ་ངེས་ཡིན་ཞེས་སྨྲས་པའི༌ཕྱིར། བུའི་མིང་ལ་ལེ་ཝི་ ཞེས་བཏགས༌སོ།།
GEN 29:35 དེ་ནས་ཡང་ཁོ་མོར་མངལ་སྦྲུམ་ཞིང་བུ་ཞིག་བཙས་པ༌དང༌། ཁོ་མོ་ན༌རེ། ཐེངས་འདིར་བདག་གིས་དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་པར་བྱ་ཞེས་སྨྲས་པའི༌ཕྱིར། བུའི་མིང་ལ་ཡ་ཧུ་དཱ་ ཞེས༌བཏགས། དེའི་རྗེས་སུ་ཁོ་མོར་མངལ་སྦྲུམ་མཚམས་ཆད༌དོ།།
GEN 30:1 དེ་ནས་རཱ་ཧེལ་གྱིས་རང་གི་ཁྱོ་ག་ཡ་ཀོབ་ལ་ཕྲུ་གུ་སྐྱེ་མ་ཐུབ་པ་ཤེས་ཏེ་གཅེན་མོ་ལེ་ཨ་ལ་ཕྲག་དོག་བྱས་ནས་ཡ་ཀོབ་ལ་འདི་ལྟར་སྨྲས༌པ། ཁྱོད་ཀྱིས་བདག་ལ་ཕྲུ་གུ་སྐྱེ་བར་མཛོད༌ཅིག དེ་ལྟར་མི་བྱེད་ན་བདག་འཆིའོ་ཞེས་པ༌ལ།
GEN 30:2 ཡ་ཀོབ་ཁོང་ཁྲོ་ལངས་ཏེ་རཱ་ཧེལ་ལ་འདི་ལྟར་སྨྲས༌པ། ཁྱོད་ལ་ཕྲུ་གུ་མི་སྐྱེ་བར་མཛད་མཁན་ནི་དཀོན་མཆོག་ཡིན་པ༌ལས། བདག་གིས་ཁོང་གི་འཐུས་ཚབ་བྱེད་ག་ལ་ནུས་ཞེས་པ༌ན།
GEN 30:3 རཱ་ཧེལ་ན༌རེ། བདག་གི་གཡོག་མོ་པིལ་ཧ་འདི་རུ་ཡོད༌པས། ཁྱོད་ཁོ་མོར་ལུས་འབྲེལ་བྱེད་ཅིང་ཁོ་མོས་བདག་ལ་ཕྲུ་གུ་སྐྱེ་བར་བྱས༌ན། བདག་ལ་ཁོ་མོ་བརྒྱུད་ནས་ཕྲུ་གུ་ཡོད་པར་འགྱུར་ཞེས་སྨྲས༌སོ།།
GEN 30:4 དེའི་ཕྱིར་རཱ་ཧེལ་གྱིས་ཁོ་མོའི་གཡོག་མོ་པིལ་ཧ་རང་གི་ཁྱོ་གའི་ཆུན་མར་བཅོས་ཏེ་ཁོ་གཉིས་ལུས་འབྲེལ་བྱེད་དུ་བཅུག༌གོ །
GEN 30:5 དེ་ནས་པིལ་ཧ་ལ་མངལ་སྦྲུམ་སྟེ་ཡ་ཀོབ་ལ་བུ་ཞིག་བཙས་པ༌རེད།
GEN 30:6 དེར་རཱ་ཧེལ་ན༌རེ། དཀོན་མཆོག་གིས་བདག་ལ་ཐུགས་རྗེས་གཟིགས་ཤིང་བདག་གི་སྐད་ལའང་གསན༌པས། བདག་ལ་བུ་ཞིག་གནང་བྱུང་ཞེས་སྨྲས་པའི༌ཕྱིར། བུའི་མིང་ལ་དཱན་ ཞེས་བཏགས༌སོ།།
GEN 30:7 རཱ་ཧེལ་གྱི་གཡོག་མོ་པིལ་ཧ་ལ་ཡང་མངལ་སྦྲུམ་སྟེ་ཡ་ཀོབ་ལ་བུ་གཉིས་པ་བཙས༌སོ།།
GEN 30:8 ཡང་རཱ་ཧེལ་ན༌རེ། བདག་གིས་གཅེན་མོ་དང་འགྲན་རྩོད་བྱས་ཤིང་ཁོ་མོ་ལས་རྣམ་པར་རྒྱལ་བ་ཡིན་ཞེས་སྨྲས་པའི༌ཕྱིར། བུ་གཉིས་པའི་མིང་ལ་ནཱབ་ཐ་ལི་ ཞེས་བཏགས༌སོ།།
GEN 30:9 དེ་ཡང་ལེ་ཨས་རང་ལ་མངལ་སྦྲུམ་མཚམས་ཆད་པ་ཤེས་ཏེ་རང་གི་གཡོག་མོ་ཟིལ་པཱ་ཞེས་བྱ་བ་ཡ་ཀོབ་ཀྱི་ཆུན་མར་བཅོས༌སོ།།
GEN 30:10 དེ་ནས་ལེ་ཨའི་གཡོག་མོ་ཟིལ་པཱ་ཞེས་བྱ་བས་ཡ་ཀོབ་ལ་བུ་ཞིག་བཙས༌སོ།།
GEN 30:11 དེར་ལེ་ཨ་ན༌རེ། ཤིན་ཏུ་ལེགས་སོ་ཞེས་སྨྲས་པའི༌ཕྱིར། བུའི་མིང་ལ་གཱ་རྡུ་ ཞེས་བཏགས༌སོ།།
GEN 30:12 ལེ་ཨའི་གཡོག་མོ་ཟིལ་པཱ་ཞེས་བྱ་བས་ཡང་ཡ་ཀོབ་ལ་བུ་གཉིས་པ་བཙས༌སོ།།
GEN 30:13 དེ་ནས་ལེ་ཨ་ན༌རེ། བདག་ནི་ཅི་འདྲའི་དགའ་ཞིང་སྤྲོ་བ༌ལ། བུད་མེད་རྣམས་ཀྱིས་ཀྱང་བདག་ལ་དགའ་ཞིང་སྤྲོའོ་ཞེས་འབོད་པར་འགྱུར་ཞེས་སྨྲས་པའི༌ཕྱིར། བུའི་མིང་ལ་ཨ་ཤེར་ ཞེས་བཏགས༌སོ།།
GEN 30:14 དེ་ཡང་སྟོན་ཁར་གྲོ་འབྲེག་པའི་དུས༌སུ། རུ་བེན་ཞིང་ནང་དུ་སོང་ནས་དུའུ་དཱ་ ཞེས་པའི་རྩྭ་སྨན་བཙལ་ཏེ་ཡུམ་ལེ་ཨ་ལ་སྤྲད་དོ། །དེ་ནས་རཱ་ཧེལ་གྱིས་ལེ་ཨ་ལ་འདི༌ལྟར། ཁྱོད་ཀྱིས་རང་གི་བུ་ཡི་རྩྭ་སྨན་དུའུ་དཱ་དེ་བདག་ལའང་ཉུང་ཙམ་གནང་བར་འཚལ་ཞེས་སྨྲས་པ༌ལ།
GEN 30:15 ལེ་ཨ་ན༌རེ། ཁྱོད་ཀྱིས་བདག་གི་ཁྱོ་ག་ཕྲོགས་པ་དོན་ཆུང་ངུ་ཞིག་ཡིན༌ནམ། ད་ལྟ་བདག་གི་བུ་ཡི་དུའུ་དཱ་ཡང་འཕྲོག་འདོད་དམ་ཞེས་པ༌ན། རཱ་ཧེལ་ན༌རེ། ཁྱོད་ཀྱི་བུ་ཡི་རྩྭ་སྨན་དུའུ་དཱ་ཡི་ཆེད༌དུ། ཡ་ཀོབ་དོ་དགོང་ཁྱོད་དང་འགྲོགས་པར་བྱེད་ཅེས་སྨྲས༌སོ།།
GEN 30:16 ཉིན་དེའི་མཚན༌མོར། ཡ་ཀོབ་ཞིང་ཁ་ནས་ཕྱིར་ལོག་པ༌ན། ལེ་ཨ་ནི་ཡ་ཀོབ་ཀྱི་མདུན་བསུ་རུ་སོང་སྟེ་ཁྱོད་བདག་དང་འགྲོགས་པར༌བྱ། ཅིའི་ཕྱིར་ཞེ༌ན། བདག་གིས་རང་གི་བུ་ཡི་རྩྭ་སྨན་དུའུ་དཱ་ལ་བརྟེན་ནས་ཁྱོད་རང་གླས་པ་ཡིན་ཞེས་སྨྲས་པ་དང་མཚན་མོ་དེར་ཁོ་གཉིས་ལུས་འབྲེལ་བྱས༌སོ།།
GEN 30:17 དཀོན་མཆོག་གིས་ལེ་ཨ་ལ་གསན་ནས་ཁོ་མོར་མངལ་སྦྲུམ་སྟེ་ཁོ་མོས་ཡ་ཀོབ་ལ་བུ་ལྔ་པ་བཙས༌སོ།།
GEN 30:18 དེ་ནས་ལེ་ཨ་ན༌རེ། དཀོན་མཆོག་གིས་བདག་ལ་གླ་ཆ་གནང༌ངོ༌། །ཅིའི་ཕྱིར་ཞེ༌ན། ངས་རང་གི་གཡོག་མོ་རང་གི་ཁྱོ་ག་ལ་སྤྲད་པའི་ཕྱིར་ཡིན་ཞེས་སྨྲས་པའི་རྐྱེན༌གྱིས། བུ་ལྔ་བའི་མིང་ལ་ཡེས་སི་ཀཱར་ ཞེས་བཏགས༌སོ།།
GEN 30:19 ལེ་ཨར་ཡང་མངལ་སྦྲུམ་སྟེ་ཡ་ཀོབ་ལ་བུ་དྲུག་པ་བཙས༌སོ།།
GEN 30:20 དེ་ནས་ལེ་ཨ་ན༌རེ། དཀོན་མཆོག་གིས་བདག་ལ་བྱ་དགའ་ལེགས་པོ་གནང་ཞིང་། བདག་གི་ཁྱོ་ག་བདག་དང་མཉམ་དུ་འདུག་ངེས༌ཡིན། ཅིའི་ཕྱིར་ཞེ༌ན། བདག་གིས་ཡ་ཀོབ་ལ་བུ་དྲུག་བཙས་པའི་ཕྱིར་རོ་ཞེས་སྨྲས་པའི༌ཕྱིར། བུ་དྲུག་པའི་མིང་ལ་ཟེ་བུ་ལུན་ ཞེས་བཏགས༌སོ།།
GEN 30:21 དེའི་རྗེས༌སུ། ཡང་ལེ་ཨས་བུ་མོ་ཞིག་བཙས་ཤིང་ཁོ་མོའི་མིང་ལ་དི་ནཱ་ཞེས་བཏགས༌སོ།།
GEN 30:22 དེ་ཡང་དཀོན་མཆོག་གིས་རཱ་ཧེལ་ལ་ཐུགས་རྗེ་དགོངས་ཏེ་ཁོ་མོར་མངལ་སྦྲུམ་ནུས་པར་མཛད༌དོ།།
GEN 30:23 རཱ་ཧེལ་ལ་མངལ་སྦྲུམ་སྟེ་བུ་ཞིག་བཙས་པ༌དང༌། ཁོ་མོ་ན༌རེ། དཀོན་མཆོག་གིས་བདག་གི་ངོ་ཚ་སེལ་ཏོ་ཞེས༌དང༌།
GEN 30:24 དཀོན་མཆོག་ཡ་ཝཱེས་ད་དུང་བདག་ལ་བུ་ཞིག་སྩོལ་བར་སྨོན་ཞེས་སྨྲས་པའི༌ཕྱིར། བུའི་མིང་ལ་ཡོ་སེབ་ ཅེས་བཏགས༌སོ།།
GEN 30:25 དེ་ཡང་རཱ་ཧེལ་གྱིས་ཡོ་སེབ་བཙས་པའི་རྗེས༌སུ། ཡ་ཀོབ་ཀྱིས་ལཱ་པན་ལ་འདི༌ལྟར། ཁྱེད་ཀྱིས་བདག་རང་ཡུལ་དུ་འགྲོ་རུ་མཛོད༌ཅིག
GEN 30:26 བདག་གིས་ཁྱེད་ལ་ཞབས་ཕྱི་བསྒྲུབས་ནས་ཐོབ་པའི་ཆུང་མ་དང་བུ་ཕྲུག་རྣམས་བདག་ལ་གནང་སྟེ་ང་རང་འགྲོ་རུ་ཆུག ངས་ཁྱེད་ལ་ཞབས་ཕྱི་ཇི་ལྟར་བསྒྲུབས་པ་ཁྱེད་ཀྱིས་ཤེས་སོ་ཞེས་སྨྲས་པ༌ལ།
GEN 30:27 ལཱ་པན་ན༌རེ། གལ༌ཏེ། བདག་ཁྱོད་ཀྱི་སེམས་ཁོང་དུ་ཡོད༌ན། ཁྱོད་བདག་དང་མཉམ་དུ་འདུག་པར༌གྱིས། བདག་གིས་མོ་བཏབ་པ་ལྟར་དཀོན་མཆོག་ཡ་ཝཱེས་བདག་ལ་བྱིན་རླབས་གནང་བ་ནི་ཁྱོད་ཀྱི་རྐྱེན་གྱིས་ཡིན་པའི་ཕྱིར་རོ་ཞེས༌དང༌།
GEN 30:28 ཡང་ལཱ་པན་ན༌རེ། ཁྱོད་ལ་གླ་ཆ་ག་ཙམ་དགོས་པ་ཤོད༌ཅིག བདག་གིས་ཁྱོད་ལ་སྟེར་ངེས་ཡིན་ཞེས་སྨྲས་པ༌དང༌།
GEN 30:29 ཡ་ཀོབ་ན༌རེ། བདག་གིས་ཁྱེད་ལ་ཞབས་ཕྱི་ཇི་ལྟར་བསྒྲུབས་པ༌དང༌། བདག་གིས་ཁྱེད་ཀྱི་ཕྱུགས་ཟོག་ཇི་ལྟར་འཚོས་པ་ནི་ཁྱེད་ཀྱིས་ཤེས་གསལ་ལྟར༌རོ།།
GEN 30:30 བདག་མ་ཡོང་བའི་སྔོན༌དུ། ཁྱེད་ཀྱི་ཕྱུགས་ཟོག་ཤིན་ཏུ་ཉུང་ཡང་ད་ལྟ་འཕེལ་ཁ་རྒྱས་པ་དང༌། བདག་གིས་གོམ་པའི་འདེགས་འཇོག་གང་ལ་བསྒྱུར་ནའང་དཀོན་མཆོག་ཡ་ཝཱེས་ཁྱེད་ལ་བྱིན་རླབས་གནང༌ངོ༌། །ད་ལྟ་རང་གི་ཁྱིམ་གཞིས་སྐྱོང་བའི་དུས་ནི་ནམ་ཞིག་གམ་ཞེས་སྨྲས་པ༌ལ།
GEN 30:31 ཡང་ལཱ་པན་ན༌རེ། བདག་གིས་ཁྱོད་ལ་ཅི་ཞིག་སྟེར་རམ་ཞེས་པ༌ན། ཡ་ཀོབ་ན༌རེ། བདག་ལ་རེ་བ་གཅིག་ཁོ་ན་ཡོད་པ་ལས༌གཞན། ཁྱེད་ཀྱིས་བདག་ལ་ཅི་ཡང་སྟེར་མི་དགོས༌སོ། །གལ༌ཏེ། ཁྱེད་ཀྱིས་ཁས་ལེན་པར་བྱེད༌ན། བདག་སླར་ཡང་ཁྱེད་ཀྱི་ལུག་རྫི་བྱེད་འདོད༌དོ།།
GEN 30:32 དེ་རིང་བདག་ཁྱེད་ཀྱི་ལུག་ཁྱུ་ཐམས་ཅད་ཀྱི་ཁྲོད་དུ་སོང་ནས་ལུག་ནག་ཐིག་ཅན༌དང༌། ཐིག་ལེ༌ཅན། ལུ་གུ་ནག་པོ་ཅན་བཅས༌དང༌། ཡང་ར་མའི་ཁྲོད་ཀྱི་ནག་ཐིག་ཅན་དང་ཐིག་ལེ་ཅན་བཅས་བདམས་ནས་དེ་དག་བདག་གི་གླ་ཆ་ཡིན་པར༌བྱའོ།།
GEN 30:33 ཕྱིས་སུ་ཁྱེད་བདག་གི་གླ་ཆ་ལ་ལྟ་ཞིབ་བྱེད་དུ་ཡོང་བ༌ན། བདག་གི་ར་ལུག་གཉིས་ལས་ར་མ་ནི་ནག་ཐིག་ཅན་དང་ཐིག་ལེ་ཅན༌དང༌། ལུག་ནི་ནག་པོ་ཅན་བཅས་མ་ཡིན༌ན། བདག་གིས་རྐུ་བྱས་པའི་རྟགས་སུ་འགྱུར་བར་མ༌ཟད། བདག་གི་གཞུང་རྒྱུད་དྲང་མིན་ལའང་བདེན་དཔང་བྱེད་ནུས་པ་ཡིན་ཞེས་སྨྲས་པ༌དང༌།
GEN 30:34 ཡང་ལཱ་པན་ན༌རེ། དེ་ལེགས༌སོ། །ཁྱོད་ཀྱིས་སྨྲས་པ་བཞིན་གྱུར་ཅིག་ཅེས་སྨྲས༌སོ།།
GEN 30:35 ཉིན༌དེར། ལཱ་པན་གྱིས་ར་ཐུག་སྟག་རིས་ཅན་དང་ཐིག་ལེ་ཅན་གང་ཡོད་པ་ཐམས་ཅད༌དང༌། ར་མ་ནག་ཐིག་ཅན་དང་ཐིག་ལེ༌ཅན། དཀར་ཁྲ་ཅན་མཐའ་དག༌དང༌། ལུག་ནག་པོ་ཅན་བཅས་བདམས་ཏེ་ཁོའི་བུ་ཕྲུག་རྣམས་ལ་བཅོལ་བ༌དང༌།
GEN 30:36 ཡང་ཁོ་དང་ཡ་ཀོབ་གཉིས་ནི་ཉིན་གསུམ་གྱི་ལམ་ཐག་ཏུ་ཁ་གྱེས་པ༌དང༌། ཡ་ཀོབ་ཀྱིས་མུ་མཐུད་དུ་ལཱ་པན་གྱི་ར་ལུག་གི་ཁྱུ་གཞན་དག་འཚོས༌སོ།།
GEN 30:37 དེ་ནས་ཡ་ཀོབ་ཀྱིས་ཤིང་སྦྱར་བ༌དང༌། སྟར་ཀའི་སྡོང་པོ། ཤིང་ཙི་ནཱར་བཅས་ཀྱི་མཉེན་ལྕུག་ཡལ་གའི་ཕྱི་ཤུན་ཤར་མ་རེ་རེ་བཞིན་བཤུས་ཏེ་ཡལ་གའི་ཁ་དོག་དཀར་པོ་མངོན་དུ་བཅུག༌རྗེས།
GEN 30:38 ཕྱི་ཤུན་བཤུས་པའི་ཡལ་ག་ཁྲ་བོ་དེ་དག་ཆུ་རྐ་དང་ཆུ་གཞོང་ནང་དུ༌བཙུགས། དེ་ནི་ལུག་ཁྱུ་རྣམས་ཆུ་འཐུང་དུ་ཡོང་བའི་སྐབས༌སུ། ར་ལུག་ཕོ་མོ་དག་གིས་འཁྲིག་པ་སྤྱོད་པའི་ཕྱིར༌རོ།།
GEN 30:39 དེ་ལྟར་ར་ལུག་དག་གིས་ཡལ་ག་ཁྲ་བོ་མཐོང་སྟེ་འཁྲིག་སྦྱོར་བྱས་ནས་ར་ལུག་གི་ཁྱུ་ཡིས་སྟག་རིས་ཅན༌དང༌། ཐིག་ལེ༌ཅན། ནག་ཐིག་ཅན་བཅས་རྩེབས་པ༌རེད།
GEN 30:40 དེ་ནས་ཡ་ཀོབ་ཀྱིས་ལུ་གུ་རྣམས་སོ་སོར་བཀར་བ༌དང༌། ལཱ་པན་གྱི་ལུག་ཁྱུ་ལས་ར་ལུག་སྟག་རིས་ཅན་དང་ར་ལུག་ནག་པོ་ཅན་བཅས༌དང༌། ར་ལུག་དཀར་པོའི་ཁྱུ་གཉིས་སོ་སོར་བཀར་ནས་ཁ་གཏད་དུ་བཞག་པ༌དང༌། རང་ཉིད་ཀྱི་ལུ་གུ་ནི་ལཱ་པན་གྱི་ལུག་ཁྱུ་དང་མི་འདྲེས་པར་བྱས༌སོ།།
GEN 30:41 དེ་ཡང་ར་ལུག་ཤ་ཤེད་ཅན་དག་གིས་འཁྲིག་པ་སྤྱོད་པའི་སྐབས༌སུ། ཡང་ཡ་ཀོབ་ཀྱིས་ཡལ་ག་ཁྲ་བོ་དེ་དག་ཆུ་རྐའི་ནང་དུ་བཙུགས༌ཏེ། ར་ལུག་ཕོ་མོ་དག་ལ་ཡལ་ག་ཁྲ་བོ་མཐོང་ས་ནས་འཁྲིག་པ་སྤྱོད་དུ་བཅུག༌གོ །
GEN 30:42 འོན༌ཀྱང༌། ར་ལུག་རིད་པ་རྣམས་ཀྱིས་འཁྲིག་པ་སྤྱོད་པའི་སྐབས༌སུ། ཡལ་ག་ཁྲ་བོ་དེ་འཛུགས་པར་མི་བྱེད༌དོ། །དེ་ལྟར་ར་ལུག་རིད་པ་དག་ལཱ་པན་ལ་བགོས་པ་དང་ར་ལུག་ཤ་ཤེད་ཅན་རྣམས་རང་ལ་དབང་བར་བྱས༌པས།
GEN 30:43 ཡ་ཀོབ་ལ་ར་ལུག༌དང༌། གཡོག་པོ་དང་གཡོག༌མོ། རྔ་མོང་དང་བོང་བུ་མང་པོ་ཐོབ་སྟེ་འབྱོར་ཕྱུག་ལྡན་པར་གྱུར༌ཏོ།།
GEN 31:1 དེ་ཡང་ཡ་ཀོབ་ཀྱིས་ལཱ་པན་གྱི་བུ་རྣམས་ཀྱི་ངག་ལས་ཁོས་ངེད་ཅག་གི་ཕ་ཡི་རྒྱུ་ནོར་ཐམས་ཅད་ཕྲོགས་པ༌དང༌། ངེད་ཅག་གི་ཕ་ལ་བརྟེན་ནས་ད་ལྟ་ཁོ་འབྱོར་ཕྱུག་ལྡན་པར་གྱུར་པ་ཡིན་ཞེས་སྨྲ་བ་ཐོས༌སོ།།
GEN 31:2 ཡ་ཀོབ་ཀྱིས་ལཱ་པན་ནི་རང་ལ་སྔོན་ཆད་ལྟར་མི་དགའ་བའང་མཐོང༌ངོ༌།།
GEN 31:3 དེ་ནས་དཀོན་མཆོག་ཡ་ཝཱེས་ཡ་ཀོབ་ལ་འདི་སྐད༌དུ། ད་ལྟ་ཁྱོད་ནི་རང་གི་ཕ་མེས་ཡང་མེས་ཀྱི་ཡུལ་དུ་སོང༌ཞིག ཁྱོད་རང་གི་གཉེན་ཉེའི་གམ་དུ་སོང༌ཞིག བདག་ཁྱོད་དང་མཉམ་དུ་གནས་པར་འགྱུར་ཞེས་གསུངས༌སོ།།
GEN 31:4 དེའི་ཕྱིར་ཡ་ཀོབ་ཀྱིས་མི་མངགས་ཏེ་རཱ་ཧེལ་དང་ལེ་ཨ་གཉིས་སྤང་ཐང་དུ་ཡོད་པའི་རང་གི་ར་ལུག་གི་ཁྱུ་ཡི་གམ་དུ་ཡོང་བར་བོས་པ༌དང༌།
GEN 31:5 ཡ་ཀོབ་ཀྱིས་ཁོ་མོ་གཉིས་ལ་འདི༌ལྟར། ཁྱོད་གཉིས་ཀྱི་ཕ་ནི་བདག་ལ་སྔར་བཞིན་མི་དགའ༌ནའང༌། བདག་གི་ཕ་ཡི་དཀོན་མཆོག་ནི་རྒྱུན་དུ་བདག་དང་མཉམ་དུ་བཞུགས༌སོ།།
GEN 31:6 ཁྱོད་གཉིས་ཀྱིས་ཤེས་གསལ༌ལྟར། བདག་གིས་ནུས་ཤུགས་ཡོད་ཚད་བཏོན་ནས་ཁྱོད་གཉིས་ཀྱི་ཕ་ལ་ཞབས་ཕྱི་བསྒྲུབས༌ཀྱང༌།
GEN 31:7 ཁྱོད་གཉིས་ཀྱི་ཕ་ཡིས་བདག་ལ་མགོ་སྐོར་བཏང་བ་དང་བདག་གི་གླ་ཆ་ཐེངས་བཅུ་ལ་བསྒྱུར་ཏོ། །འོན༌ཀྱང༌། ཁོས་བདག་ལ་གནོད་པ་བཟོ་བ་དཀོན་མཆོག་གིས་བཟློག་པར་མཛད༌དོ།།
GEN 31:8 གལ་ཏེ་ཁོ་ན༌རེ། ནག་ཐིག་ཅན་ནི་ཁྱོད་ཀྱི་གླ་ཆ་ཡིན་ཞེས་སྨྲས༌ན། ར་ལུག་གི་ཁྱུ་ཐམས་ཅད་ལས་ནག་ཐིག་ཅན་རྩེབས༌སོ། །ཡང་ཁོ་ན༌རེ། སྟག་རིས་ཅན་ནི་ཁྱོད་ཀྱི་གླ་ཆ་ཡིན་ཞེས་སྨྲས༌ན། ར་ལུག་གི་ཁྱུ་ཐམས་ཅད་ལས་སྟག་རིས་ཅན་རྩེབས༌སོ།།
GEN 31:9 དེ་ལྟར་དཀོན་མཆོག་གིས་ཁྱོད་གཉིས་ཀྱི་ཕ་ཡི་ཕྱུགས་ཟོག་བླངས་ཏེ་བདག་ལ་གནང་བ་ཡིན༌ནོ།།
GEN 31:10 དེ་ཡང་ར་ལུག་ཕོ་མོ་རྣམས་ཀྱིས་འཁྲིག་པ་སྤྱོད་པའི་སྐབས༌སུ། བདག་གིས་རྨི་ལམ་ནང་དུ་མགོ་ཡར་བཀྱགས་ནས་བལྟས་པ༌ན། ར་མའི་ཐོག་ཏུ་ལྡིང་བའི་ར་ཐུག་ཐམས་ཅད་ནི་སྟག་རིས་ཅན༌དང༌། ནག་ཐིག༌ཅན། ཁྲ་བོ་ཅན་བཅས་ཡིན༌ནོ།།
GEN 31:11 དེ་ནས་དཀོན་མཆོག་གི་ཕོ་ཉས་རྨི་ལམ་ནང་དུ་ཡ་ཀོབ་ཅེས་ང་རང་བོས་པ༌དང༌། བདག་གིས་ང་རང་འདི་རུ་ཡོད་ཅེས་ལན་བཏབ་པར་ཁོང་གིས་འདི་སྐད༌དུ།
GEN 31:12 ཁྱོད་ཀྱིས་མགོ་ཡར་བཀྱགས་ནས་ལྟོས༌དང༌། ར་མའི་སྟེང་དུ་ལྡིང་བའི་ར་ཐུག་ཐམས་ཅད་ནི་སྟག་རིས་ཅན༌དང༌། ནག་ཐིག༌ཅན། ཁྲ་བོ་ཅན་ཡིན༌ནོ། །ཅིའི་ཕྱིར་ཞེ༌ན། ལཱ་པན་གྱིས་ཁྱོད་ལ་ལས་ཅི་ཞིག་བྱས་པ་ཐམས་ཅད་བདག་གིས་མཐོང་བའི་ཕྱིར༌རོ།།
GEN 31:13 བདག་ནི་པེད་ཨེལ་ཡུལ་གྱི་དཀོན་མཆོག༌སྟེ། ཁྱོད་ཀྱིས་ཀ་བའི་སྟེང་དུ་སྣུམ་བླུགས་ཏེ་བདག་ལ་དམ་བཅའ་ཕུལ་མྱོང་བ་དེ༌ཡིན། ད་ལྟ་ཁྱོད་ཡར་ལངས་ཏེ་ས་ཆ་འདི་དང་ཁ་བྲལ་ནས་རང་ཉིད་ཀྱི་སྐྱེས་ཡུལ་དུ་ལོག་ཅིག་ཅེས་གསུངས་པ་ཡིན་ཞེས་སྨྲས༌སོ།།
GEN 31:14 དེ་ནས་རཱ་ཧེལ་དང་ལེ་ཨ་གཉིས་ཀྱིས་ཡ་ཀོབ་ལ་འདི༌ལྟར། ངེད་གཉིས་ལ་ཕ་གཞིས་ལས་ད་དུང་བགོ་སྐལ་ཡོད༌དམ།
GEN 31:15 ཕ་ཡིས་ངེད་གཉིས་ཕྱི་ཕྱོགས་པ་རུ་བྱས་པ་མ་ཡིན༌ནམ། ཅིའི་ཕྱིར་ཞེ༌ན། ཕ་ཡིས་ངེད་གཉིས་བཙོངས་ཏེ་ངེད་གཉིས་ཀྱི་རིན་ཐང་ཐམས་ཅད་ཆུད་ཟོས་སུ་བཏང་བ་མ་ཡིན༌ནམ།
GEN 31:16 དཀོན་མཆོག་གིས་ངེད་གཉིས་ཀྱི་ཕ་ཡི་དྲུང་ནས་ཕྲོགས་པའི་རྒྱུ་ནོར་ཐམས་ཅད་ངེད་གཉིས་དང་ངེད་གཉིས་ཀྱི་བུ་ཕྲུག་རྣམས་ཀྱི༌ཡིན། ད་ལྟ་དཀོན་མཆོག་གིས་ཁྱོད་ལ་ཇི་ལྟར་བཀའ་གནང་བ་བཞིན་ཁྱོད་ཀྱིས་ཀྱང་དེ་ལྟར་བསྒྲུབ་པར་གྱིས་ཞེས་སྨྲས༌སོ།།
GEN 31:17 དེ་ནས་ཡ་ཀོབ་ཡར་ལངས་ཏེ་རང་གི་བུ་དང་ཆུང་མ་བཅས་རྔ་མོང་དག་ལ་བཞོན་དུ་བཅུག་པ༌དང༌།
GEN 31:18 ཡང་ཕཱ་དན་ཨ་རམ་ཡུལ་ནས་ཐོབ་པའི་ཕྱུགས་ཟོག་དང་རྒྱུ་ནོར་ཐམས་ཅད་ཁྱེར་ནས་ཀ་ན་ཨན་ཡུལ་གྱི་ཕ་ཨི་སཱག་གི་ཡུལ་དུ་ཆས༌སོ།།
GEN 31:19 སྐབས༌དེར། ལཱ་པན་ལུག་བལ་འབྲེག་ཏུ་སོང་བ༌དང༌། རཱ་ཧེལ་གྱིས་ཕ་ཡི་ཁྱིམ་ནས་ལྷ་སྐུ་རྣམས་བརྐུས༌སོ།།
GEN 31:20 ཡ་ཀོབ་ཀྱིས་ཨ་རམ་མི་རིགས་ཀྱི་ལཱ་པན་ལ་མགོ་སྐོར་བཏང་ཞིང་ཁོ་ལ་ཅི་ཡང་མ་སྨྲས་པར་བྲོས་པ༌དང༌།
GEN 31:21 རང་ལ་དབང་བ་ཐམས་ཅད་ཁྱེར་ཏེ་ཆུ་བོ་ཕི་རཱད་བརྒལ་ནས་གིལ་ཨད་རི་ཁུལ་གྱི་ཕྱོགས་སུ་སོང༌ངོ༌།།
GEN 31:22 དེ་ནས་ཉིན་གསུམ་པ༌ལ། མི་ཞིག་གིས་ལཱ་པན་ལ་ཡ་ཀོབ་བྲོས་སོང་ཞེས་སྨྲས་པ༌དང༌།
GEN 31:23 ལཱ་པན་གྱིས་ཁོའི་སྤུན་ཟླ་འགའ་ཁྲིད་ནས་ཡ་ཀོབ་ཀྱི་རྗེས་བསྙེགས་པ༌དང༌། ཉིན་བདུན་པ་ལ་གིལ་ཨད་རི་ཁུལ་ནས་རྗེས་ཆོད༌དོ།།
GEN 31:24 མཚན་མོའི་སྐབས༌སུ། དཀོན་མཆོག་ཨ་རམ་མི་རིགས་ཀྱི་ལཱ་པན་ཞེས་བྱ་བའི་རྨི་ལམ་དུ་བྱུང་སྟེ་ཁོ་ལ་འདི་སྐད༌དུ། ཁྱོད་ཀྱིས་གཟབ་གཟབ༌བྱོས། ཡ་ཀོབ་ལ་གཏམ་བཟང་ངན་ཅི་ཡང་མི་སྨྲ་བར་གྱིས་ཞེས་གསུངས༌སོ།།
GEN 31:25 དེ་ཡང་ལཱ་པན་གྱིས་ཡ་ཀོབ་ཀྱི་རྗེས་ཆོད༌ཅིང༌། ཡ་ཀོབ་ཀྱིས་རི་ཁུལ་དེ་ནས་གུར་ཕུབ་པ༌དང༌། ལཱ་པན་དང་ཁོའི་སྤུན་རྣམས་ཀྱིས་ཀྱང་གིལ་ཨད་རི་བོའི་སྟེང་དུ་གུར་ཕུབ༌པའོ།།
GEN 31:26 དེ་ནས་ལཱ་པན་གྱིས་ཡ་ཀོབ་ལ་འདི་ལྟར་སྨྲས༌པ། ཁྱོད་ཀྱིས་ཅི་ཞིག་བྱས་པ་ཡིན༌ནམ། ཁྱོད་ཀྱིས་བདག་ལ་མགོ་སྐོར་བཏང་སྟེ་བདག་གི་བུ་མོ་རྣམས་ཁྲིད་སོང་བ་ནི་དམག་འཁྲུག་བརྒྱབ་ནས་བཙན་འཕྲོག་བྱས་པ་དང་མཚུངས༌སོ།།
GEN 31:27 ཁྱོད་ཀྱིས་བདག་ལ་མགོ་སྐོར་བཏང་ནས་ལྐོག་ཏུ་བྲོས་པ་ཅི་ཡིན༌ནམ། བདག་ལ་མི་སྨྲ་བའི་རྒྱུ་མཚན༌ཅི། གལ་ཏེ་བདག་ལ་སྨྲས༌ན། བདག་གིས་དགའ་སྟོན་བསྡུས་ཏེ་དགའ་སྐྱིད་ཀྱི་གླུ་གཞས་གཏོང་བ༌དང༌། སིལ་རྔ་རྡུང༌བ། པི་ཝང་དཀྲོལ་བ་བཅས་ཀྱིས་ཁྱོད་ལ་སྐྱེལ་མ་བྱེད་པ་མ་ཡིན༌ནམ།
GEN 31:28 ཡང་ཁྱོད་ཀྱིས་བདག་གི་ཚ་རྒྱུད་དང་བུ་མོ་རྣམས་ལ་འོ་བྱེད་དུ་མ་བཅུག་པར་བྲོས་པ་ནི་ཇི་འདྲའི་གླེན་པ་ཞིག་རེད༌ཨང༌།
GEN 31:29 བདག་ལ་སྔར་ནས་ཁྱོད་རང་གསོད་པའི་དབང་ཆ་ཡོད༌ནའང༌། མདང་དགོང་ཁྱོད་ཀྱི་ཕ་ཡི་དཀོན་མཆོག་གིས་བདག་ལ་འདི་སྐད༌དུ། ཁྱོད་ཀྱིས་གཟབ་གཟབ༌བྱོས། ཡ་ཀོབ་ལ་གཏམ་བཟང་ངན་ཅི་ཡང་མི་སྨྲ་བར་གྱིས་གསུངས༌སོ།།
GEN 31:30 ད་ལྟ་ཁྱོད་ཀྱིས་རང་གི་ཕ་ཡི་ཁྱིམ་མི་དང་བཅས་པ་ཤིན་ཏུ་དྲན་ཏེ་ཡུལ་ལ་མི་འགྲོ་ཐབས་མེད་ཡིན༌ཡང༌། ཁྱོད་ཀྱིས་བདག་གི་ལྷ་སྐུ་རྣམས་བརྐུས་པའི་རྒྱུ་མཚན་ཅི་ཞེས་དྲིས་པ༌ལ།
GEN 31:31 ཡ་ཀོབ་ན༌རེ། ཁྱེད་ཀྱིས་བདག་ལས་ཁྱེད་ཀྱི་བུ་མོ་འཕྲོག་པར་བསམས་ཏེ་འཇིགས་ཤིང་བྲོས༌པའོ།།
GEN 31:32 ཁྱེད་ཀྱིས་སུ་ཞིག་གི་ལག་ནས་ལྷ་སྐུ་རྣམས་བཙལ་ཏེ་རྙེད༌ཚེ། མི་དེ་བསད་ཀྱང་རུང༌ངོ༌། །བདག་གི་འདི་རུ་དངོས་པོ་གང་ཞིག་ཁྱེད་ཀྱི་ཡིན་ན་ཁྱེར༌ཞིག ཁྱེད་ཀྱིས་རང་ཅག་སྤུན་ཟླ་རྣམས་ཀྱི་མིག་མདུན་ནས་འཚོལ་ཞིག་ཅེས་སྨྲས༌སོ། །དེ་ནི་ཡ་ཀོབ་ཀྱིས་རཱ་ཧེལ་གྱིས་ལྷ་སྐུ་དག་བརྐུས་ཟིན་པ་མི་ཤེས་པའི་ཕྱིར༌རོ།།
GEN 31:33 དེ་ནས་ལཱ་པན་ནི་ཡ་ཀོབ༌དང༌། ལེ༌ཨ། གཡོག་མོ་གཉིས་དང་བཅས་པའི་གུར་རེ་རེའི་ནང་དུ་སོང་བ་དང་ཅི་ཡང་མ་རྙེད༌དོ། །དེ་ནས་ཁོ་རང་ལེ་ཨའི་གུར་ལས་ཕྱིར་བུད་དེ་རཱ་ཧེལ་གྱི་གུར་ནང་དུ་སོང༌ངོ༌།།
GEN 31:34 དེ་ཡང་རཱ་ཧེལ་གྱིས་ལྷ་སྐུ་རྣམས་ཏ་ལན་ནང་དུ་སྦས་ཤིང་ཁོ་མོ་ཏ་ལན་སྟེང་དུ་ཙོག་པུར་བསྡད་ཡོད༌དོ། །དེ་ནས་ལཱ་པན་གྱིས་སྦྲ་གུར་ཡོངས་སུ་བཙལ་ཡང་ཅི་ཡང་མ་རྙེད༌དོ།།
GEN 31:35 རཱ་ཧེལ་གྱིས་ཁོ་མོའི་ཕ་ལཱ་པན་ལ་འདི༌ལྟར། ཕ༌ལགས། ད་ལྟ་བདག་གི་ལུས་པོ་དེ་འདྲ་མི་བདེ་བས་ཁྱེད་ཀྱི་དྲུང་དུ་བདག་ཡར་ལངས་མ་ཐུབ༌ན། ཁྱེད་ཉིད་ཐུགས་རྒྱལ་མི་བཞེངས་པར་མཛོད་ཅེས་སྨྲས༌སོ། །དེ་ལྟར་ལཱ་པན་གྱིས་ལྷ་སྐུ་རྣམས་བཙལ་ནས་མ་རྙེད༌དོ།།
GEN 31:36 དེར་ཡ་ཀོབ་ཁོང་ཁྲོ་ལངས་ཏེ་ལཱ་པན་ལ་འདི་ལྟར་སྡིགས་དམོད་བྱས་པ༌སྟེ། བདག་ལ་ནོར་འཁྲུལ་ཅི་དང་ཉེས་པ་ཅི་ཡོད༌དམ། ཁྱེད་ཀྱིས་འདི་ལྟར་བདག་གི་རྗེས་བསྙེགས༌སམ།
GEN 31:37 ཁྱེད་ཀྱིས་བདག་གི་ཅ་ལག་ཐམས་ཅད་བསློགས་ཀྱང་ཁྱེད་ཀྱི་དངོས་པོ་བཙལ་ནས་རྙེད༌དམ། གལ༌ཏེ། ད་ལྟ་དངོས་པོ་དེ་བཙལ་ནས་རྙེད༌ན། ངེད་གཉིས་ཀྱི་སྤུན་ཟླ་དག་གི་མིག་མདུན་དུ་བཤམས༌ཏེ། ཁོ་རྣམས་ལ་ངེད་གཉིས་བར་ཤན་འབྱེད་དུ༌བཅུག
GEN 31:38 བདག་ནི་ཁྱེད་ཀྱི་ཁྱིམ་དུ་ལོ་ངོ་ཉི་ཤུའི་རིང་ལ་བསྡད་མྱོང༌སྟེ། ཁྱེད་ཀྱི་མ་མོ་དང་ར་མ་ལ་མངལ་ཤོར་དུ་བཅུག་མ་མྱོང་བ༌དང༌། བདག་གིས་ཁྱེད་ཀྱི་ལུག་ཁྱུ་ལས་ལུག་ཐུག་གཅིག་ཀྱང་བཤས་མ༌མྱོང༌།
GEN 31:39 གཅན་གཟན་གྱིས་བསད་པའི་ལུག་རོ་དག་ཀྱང་ཁྱེད་ཀྱི་མདུན་དུ་ཁྱེར་མ་ཡོང་བར་རང་གིས་སྐྱིན་ཚབ་སྤྲད་པ༌དང༌། རྐུན་མས་ཉིན་མཚན་དབྱེ་བ་མེད་པར་བརྐུས་པ་དག་གི་ཚབ་ཀྱང་ཁྱེད་ཀྱིས་བདག་ལས་བླངས་པ༌ཡིན།
GEN 31:40 བདག་གིས་རྒྱུན་དུ་ཉིན་མོར་ཚ་བ་དང་མཚན་མོར་གྲང་ངར་གྱི་དཀའ་བ་མྱངས་ཤིང་གཉིད་ཀྱང་མ༌ཁུགས།
GEN 31:41 དེ་ལྟར་བདག་ནི་ལོ་ངོ་ཉི་ཤུའི་རིང་ལ་ཁྱེད་ཀྱི་ཁྱིམ་དུ་བསྡད༌ཅིང༌། ཁྱེད་ཀྱི་བུ་མོ་གཉིས་ཀྱི་ཆེད་དུ་ལོ་ངོ་བཅུ་བཞིའི་རིང་ཁྱེད་ལ་ཞབས་ཕྱི་བསྒྲུབས་པ༌དང༌། བདག་ལ་ར་ལུག་གི་ཁྱུ་འཐོབ་པའི༌ཕྱིར། བདག་གིས་ལོ་ངོ་དྲུག་གི་རིང་ཁྱེད་ལ་ཞབས་ཕྱི་བསྒྲུབས་པ༌དང༌། ཡང་ཁྱེད་ཀྱིས་བདག་གི་གླ་ཆ་ཐེངས་བཅུ་ལ་བསྒྱུར་ཏོ།།
GEN 31:42 གལ༌ཏེ། བདག་གི་ཕ་ཨི་སཱག་གུས་ཤིང་འཇིགས་པའི་དཀོན་མཆོག༌སྟེ། ཨབ་ར་ཧམ་གྱི་དཀོན་མཆོག་བདག་དང་མཉམ་དུ་གནས་མེད༌ན། ད་ལྟ་ཁྱེད་ཀྱིས་བདག་ལག་སྟོང་དུ་ཕྱིར་བདའ་བར༌ངེས། འོན༌ཀྱང༌། དཀོན་མཆོག་གིས་བདག་གི་སྐྱོ་སྡུག་དང་ངལ་བ་གཟིགས༌ཏེ། མདང་དགོང་ཁྱེད་ལ་བཀའ་བཀྱོན་གནང་བ་ཡིན་ཞེས་སྨྲས༌སོ།།
GEN 31:43 དེ་ནས་ལཱ་པན་གྱིས་ཡ་ཀོབ་ལ་འདི་ལྟར་ལན་བཏབ༌པ། བུ་མོ་འདི་གཉིས་ནི་བདག་གི་བུ་མོ་ཡིན་པ༌དང༌། བྱིས་པ་འདི་དག་ཀྱང་བདག་གི་བྱིས་པ་ཡིན༌ལ། ར་ལུག་གི་ཁྱུ་འདི་དག་ཀྱང་བདག་གི་ཡིན་པར་མ༌ཟད། ཁྱོད་ཀྱི་མིག་མདུན་དུ་ཡོད་པ་ཐམས་ཅད་བདག་གི་ཡིན༌མོད། འོན་ཀྱང་དེ་རིང་བདག་གི་བུ་མོ་གཉིས་དང་ཁོ་མོ་གཉིས་ཀྱིས་བཙས་པའི་བྱིས་པ་དག་ལ་བདག་གིས་ཅི་བྱ་འོས༌སམ།
GEN 31:44 ཤོག༌དང༌། ངེད་གཉིས་ཀྱིས་གྲོས་འཆམ་བཞག༌སྟེ། ངེད་གཉིས་བར་གྱི་དཔང་རྟགས་སུ་བྱའོ་ཞེས་སྨྲས་པ༌དང༌།
GEN 31:45 ཡང་ཡ་ཀོབ་ཀྱིས་རྡོ་ལེབ་ཅིག་གྱེན་དུ་བསྒྲེངས་ནས་ཀ་བ་རུ་བྱས༌ཏེ།
GEN 31:46 སྤུན་ཟླ་རྣམས་ལ་ན༌རེ། ཁྱོད་རྣམས་ཀྱིས་རྡོ་སྤུངས་རྒྱོབས་ཤིག་ཅེས་སྨྲས་པ་དང་ཁོ་རྣམས་ཀྱིས་དེ་ལྟར་བྱས་ཤིང་མི་ཚང་མས་རྡོ་སྤུངས་ཀྱི་འགྲམ་དུ་ཁ་ཟས༌སྤྱད།
GEN 31:47 ལཱ་པན་གྱིས་རྡོ་སྤུངས་དེ་ལ་ཡཱ་གར་སཱ་ཧ་དཱ་ཐཱ་ཞེས་མིང་བཏགས་པ༌དང༌། ཡ་ཀོབ་ཀྱིས་དེ་ལ་ག་ལེད་ ཅེས༌བཏགས།
GEN 31:48 ལཱ་པན་ན༌རེ། དེ་རིང་གི་རྡོ་སྤུངས་འདི་ནི་ངེད་གཉིས་བར་གྱི་དཔང་རྟགས་ཡིན་ཞེས་སྨྲས་པའི་རྐྱེན༌གྱིས། ས་ཆ་འདིའི་མིང་ལ་ག་ལེད་ཅེས་ཟེར་བ༌དང༌།
GEN 31:49 ས་ཆ་འདིའི་མིང་ལ་མཱས་ཟི་ཕཱ་ཡང༌ཟེར། ཅིའི་ཕྱིར་ཞེ༌ན། ལཱ་པན་ན༌རེ། ངེད་རང་གཉིས་ཁ་བྲལ་བའི་རྗེས༌སུ། དཀོན་མཆོག་ཡ་ཝཱེས་ངེད་གཉིས་བར་དུ་ལྟ་རྟོགས་མཛད་པ༌དང༌།
GEN 31:50 གལ༌ཏེ། ཁྱོད་ཀྱིས་བདག་གི་བུ་མོ་གཉིས་ཀ་དཀའ་སྡུག་ལ་སྦྱར་བ༌དང༌། ཡང་བདག་གི་བུ་མོ་གཉིས་ཀའི་ཕན་ཆད་ནས་གཞན་ཞིག་ཆུང་མར་བླངས་པ་སུས་ཀྱང་མི་ཤེས༌ནའང༌། དཀོན་མཆོག་གིས་ངེད་གཉིས་བར་དུ་བདེན་དཔང་མཛད་པ་ཡིན་ཞེས་སྨྲས༌སོ།།
GEN 31:51 ཡང་ལཱ་པན་ན༌རེ། བདག་གིས་ངེད་གཉིས་བར་དུ་སྤུངས་པའི་རྡོ་སྤུངས་དང་གྱེན་དུ་བསྒྲེངས་པའི་ཀ་བ་ལ་ལྟོས༌དང༌།
GEN 31:52 རྡོ་སྤུངས་འདིས་བདེན་དཔང་བྱེད་པར་མ༌ཟད། ཀ་བ་འདིས་ཀྱང་བདེན་དཔང་བྱེད་པར་འགྱུར་བ༌དང༌། བདག་གིས་རྡོ་སྤུངས་འདི་ལས་བརྒལ་ནས་ཁྱོད་ལ་གནོད་པ་བྱེད་མི་སྲིད༌ལ། ཁྱོད་ཀྱིས་ཀྱང་རྡོ་སྤུངས་དང་ཀ་བ་འདི་ལས་བརྒལ་ནས་བདག་ལ་གནོད་པ་བྱེད་མི་རུང༌ངོ༌།།
GEN 31:53 ཨབ་ར་ཧམ་དང་ནཱ་ཧོར་གྱི་དཀོན་མཆོག༌སྟེ། ཁོ་གཉིས་ཀྱི་ཕ་ཡི་དཀོན་མཆོག་གིས་ངེད་གཉིས་བར་དུ་ལེགས་ཉེས་ཀྱི་ཤན་འབྱེད་པར་འགྱུར་ཞེས་སྨྲས༌སོ། །དེ་ནས་ཡ་ཀོབ་ཀྱིས་རང་གི་ཕ་ཨི་སཱག་གུས་ཤིང་འཇིགས་པའི་དཀོན་མཆོག་ལ་དམ་བཅས༌ཤིང༌།
GEN 31:54 ཡང་རི་སྒང་དུ་དམར་མཆོད་ཕུལ་བ༌དང༌། སྤུན་ཟླ་རྣམས་གདན་དྲངས་པ་དང་དེ་དག་གིས་ཁ་ཟས་སྤྱད་ནས་རི་སྒང་ནས་ཞག་སྡོད་བྱས༌སོ།།
GEN 31:55 དེ་ནས་ཞོགས་པར་ལཱ་པན་ཡར་ལངས་ཏེ་རང་གི་ཚ་བོ་དང་ཚ༌མོ། བུ་མོ་རྣམས་ལ་འོ་བྱས་པ་དང་བྱིན་རླབས་གནང་རྗེས་ཕྱིར་རང་ཡུལ་དུ་ལོག༌གོ །
GEN 32:1 དེ་ནས་ཡ་ཀོབ་མུ་མཐུད་དུ་ལམ་ལ་ཆས་ཤིང་དཀོན་མཆོག་གི་ཕོ་ཉ་རྣམས་ཁོ་དང་ཕྲད་པ༌དང༌།
GEN 32:2 ཡ་ཀོབ་ཀྱིས་ཕོ་ཉ་རྣམས་མཐོང༌སྟེ། འདི་ནི་དཀོན་མཆོག་གི་དམག་དཔུང་ཡིན་ཞེས་སྨྲས་པས་གནས་དེར་མཱ་ཧ་ནཱ་ཡིམ་ ཞེས་མིང་བཏགས༌སོ།།
GEN 32:3 དེ་ནས་ཡ་ཀོབ་ཀྱིས་ཨེ་དོམ་ཡུལ་གྱི་སེ་ཨེར་དུ་ཡོད་པའི་གཅེན་པོ་ཨེ་སཱབ་ཀྱི་གམ་དུ་མི་འགའ་མངགས་ཤིང་དེ་རྣམས་ལ་ན་རེ།
GEN 32:4 ཁྱོད་ཅག་གིས་བདག་གི་ཇོ་བོ་ཨེ་སཱབ་ལ་འདི་ལྟར་ཤོད་ཅིག ཁྱེད་ཀྱི་ཞབས་ཕྱི་པ་ཡ་ཀོབ་ཀྱིས་ཁྱེད་ལ་འདི༌ལྟར་སྨྲའོ།། བདག་ནི་ད་ལྟའི་བར་དུ་ལཱ་པན་དང་མཉམ་དུ་བསྡད༌ཅིང༌།
GEN 32:5 བདག་ལ་བ་གླང༌དང༌། བོང༌བུ། ར་ལུག་གི༌ཁྱུ། གཡོག་པོ་གཡོག་མོ་སོགས་ཡོད་པ༌དང༌། ཁྱེད་ཀྱི་སྤྱན་དྲུང་ནས་བདག་ལ་ཐུགས་རྗེ་འཐོབ་པའི༌ཕྱིར། ད་ལྟ་བདག་གིས་དོན་འདི་ཁྱེད་ལ་ཞུ་བར་མི་མངགས་པ་ཡིན་ཞེས་སྨྲས་སོ། །
GEN 32:6 དེ་ནས་ཡ་ཀོབ་ཀྱིས་མངགས་པའི་མི་རྣམས་ཕྱིར་ལོག་སྟེ་ན༌རེ། ངེད་ཅག་ཁྱེད་ཀྱི་གཅེན་པོ་ཨེ་སཱབ་ཀྱི་དྲུང་དུ་སོང་བ༌དང༌། ད་ལྟ་ཁོང་གིས་མི་བཞི་བརྒྱ་ཁྲིད་དེ་ཁྱེད་ཀྱི་མདུན་བསུས་ནས་ཡོང་བཞིན་ཡོད་ཅེས་སྨྲས་པ༌དང༌།
GEN 32:7 ཡ་ཀོབ་ཤིན་ཏུ་འཇིགས་ནས་སེམས་ཁྲལ་བྱུང་བ༌དང༌། རང་གི་འཁོར་དང་བཅས་པའི་མི་ཐམས་ཅད༌དང༌། ར་ལུག་དང་བ་གླང་གི༌ཁྱུ། རྔ་མོང་སོགས་སྐོར་ཁྱུ་ཆེན་པོ་གཉིས་སུ་བགོས༌ཏེ།
GEN 32:8 སེམས་སུ་གལ་སྲིད་ཨེ་སཱབ་སླེབས་ནས་སྐོར་ཁྱུ་འདི་འཇོམས་པར་བྱས༌ན། སྐོར་ཁྱུ་ཅིག་ཤོས་ནི་ད་དུང་བྲོས་ཆོག་པ་ཡིན་སྙམ༌པའོ།།
GEN 32:9 ཡ་ཀོབ་ན༌རེ། ཀྱེ། དཀོན་མཆོག་ཡ༌ཝཱེ། བདག་གི་མེས་པོ་ཨབ་ར་ཧམ་དང་ཡབ་ཨི་སཱག་གི་དཀོན་མཆོག༌ལགས། ཁྱེད་ཀྱིས་དེ་སྔར་བདག་ལ་ཁྱོད་ནི་རང་གི་ཕ་ཡུལ་དང་གཉེན་ཉེ་རྣམས་ཀྱི་གམ་དུ་སོང༌ཞིག བདག་གིས་ཁྱོད་ལ་སྐྱབས་མཛད་ངེས་ཡིན་ཞེས་གསུངས་པ་མ་ཡིན༌ནམ།
GEN 32:10 ཁྱེད་ཀྱིས་ཞབས་ཕྱི་པ་བདག་ལ་གནང་བའི་བྱམས་སྙིང་རྗེ་དང་དྲང་བདེན་ཐམས་ཅད་ནི་བདག་ལ་མི་འོས༌སོ། །སྔོན་ཆད་བདག་གིས་མཁར་བ་བཟུང་ནས་ཡོར་དན་གཙང་པོ་འདི་ལས་བརྒལ་བ༌དང༌། ད་ལྟ་བདག་ནི་སྡེ་ཚན་ཆེན་པོ་གཉིས་སུ་གྱུར༌ཡོད།
GEN 32:11 ཁྱེད་ཀྱིས་ང་རང་བདག་གི་གཅེན་པོ་ཨེ་སཱབ་ལས་སྐྱོབ་པར༌མཛོད། ཅིའི་ཕྱིར་ཞེ༌ན། གཅེན་པོས་བདག་དང་བདག་གི་ཆུང་མ་བུ་ཕྲུག་བཅས་མཉམ་དུ་གསོད་པར་འཇིགས་པའི་ཕྱིར༌རོ།།
GEN 32:12 ཁྱེད་ཀྱིས་དེ་སྔར་བདག་ལ་འདི་སྐད༌དུ། བདག་གིས་ཁྱོད་ལ་སྐྱབས་མཛད་ངེས༌ཡིན། ཁྱོད་ཀྱི་རིགས་རྒྱུད་ནི་རྒྱ་མཚོའི་འགྲམ་གྱི་བྱེ་མ་བཞིན་མང་དུ་སྤེལ་བར་ངེས་ཞེས་གསུངས་མྱོང་བ་ཡིན་ཞེས་གསོལ་བ་བཏབ༌བོ།།
GEN 32:13 ཉིན་དེའི་མཚན༌མོར། ཡ་ཀོབ་ཡུལ་དེར་བསྡད་ཅིང་ཁོ་ལ་དབང་བའི་རྒྱུ་ནོར་ཐམས་ཅད་ལས་རང་གི་གཅེན་པོར་ལེགས་སྐྱེས༌སུ།
GEN 32:14 ར་མ་ཉིས་བརྒྱ༌དང༌། ར་ཐུག་ཉི༌ཤུ། མ་མོ་ཉིས༌བརྒྱ། ལུག་ཐུག་ཉི༌ཤུ།
GEN 32:15 འོ་མ་སྣུན་པའི་རྔ་མོང་སུམ་ཅུ་དང་དེའི་ཕྲུ་གུ་དང་བཅས༌པ། བ་མོ་བཞི་བཅུ་དང་བ་གླང༌བཅུ། བོང་མ་ཉི་ཤུ་དང་བོང་གསེབ་བཅུ་བཅས༌ཏེ།
GEN 32:16 རིགས་རེ་རེ་ལས་ཁྱུ་རེ་བླངས་ནས་གཡོག་པོ་རྣམས་ལ་སྤྲད༌དེ། ཁྱོད་ཅག་བདག་གི་སྔོན་ལ་སོང༌དང༌། ཕྱུགས་ཁྱུ་རེ་རེ་བཞིན་སོ་སོར་ཕྱེས་ནས་སོང་ཞིག་ཅེས་སྨྲས༌སོ།།
GEN 32:17 དེ་ནས་ཡ་ཀོབ་ཀྱིས་འགྲོ་ཐེངས་ཐོག་མ་རྣམས་ལ་འདི་ལྟར་སྨྲས༌པ། བདག་གི་གཅེན་པོ་ཨེ་སཱབ་ཁྱོད་དང་འཕྲད་པའི་དུས༌སུ། ཁོ་ན༌རེ། ཁྱོད་སུ་ཚང་གི་ཡིན་པ་དང་གང་ལ་འགྲོ་བ༌ཡིན། ཁྱོད་ཀྱི་སྔོན་དུ་ཡོད་པའི་ཕྱུགས་ཁྱུ་འདི་དག་སུ་ཞིག་གི་ཡིན་ནམ་ཞེས་དྲིས༌ན།
GEN 32:18 ཁྱོད་ཀྱིས་འདི་ལྟར་ཤོད༌ཅིག འདི་དག་ནི་ཁྱེད་ཀྱི་ཞབས་ཕྱི་པ་ཡ་ཀོབ་ཀྱི་ཡིན༌ལ། བདག་གི་ཇོ་བོ་ཨེ་སཱབ་ལ་བསྐུར་བའི་ལེགས་སྐྱེས་ཡིན༌ཞིང༌། ཡ་ཀོབ་ཁོ་རང་ཡང་ངེད་ཅག་གི་རྗེས་སུ་ཡོད་ཅེས་སྨྲོས་ཤིག་ཅེས་པའོ། །
GEN 32:19 དེ་ནས་ཡང་ཡ་ཀོབ་ཀྱིས་འགྲོ་ཐེངས་གཉིས་པ་དང་གསུམ༌པ། ཕྱུགས་ཟོག་འདེད་མཁན་གཞན་ཐམས་ཅད་ལ་འདི༌ལྟར། ཁྱོད་ཅག་བདག་གི་གཅེན་པོ་ཨེ་སཱབ་ལ་འཕྲད་པའི་དུས་སུའང་འདི་ལྟར་སྨྲ་དགོས་པར་མ༌ཟད།
GEN 32:20 ཁྱེད་ཀྱི་ཞབས་ཕྱི་པ་ཡ་ཀོབ་ནི་ངེད་ཅག་གི་རྗེས་སུ་ཡོད་ཅེས་སྨྲོས་ཤིག་ཅེས་སྨྲས༌སོ། །ཅིའི་ཕྱིར་ཞེ༌ན། ཡ་ཀོབ་ཀྱི་སེམས༌སུ། བདག་གིས་སྔོན་ལ་མངགས་པའི་ལེགས་སྐྱེས་ལ་བརྟེན་ནས་གཅེན་པོའི་ཞེ་སྡང་ཞི་བར་བྱེད་པ༌དང༌། ཕྱིས་སུ་ཁོ་དང་ངོ་འཕྲད་དུས་སུ་ཁོས་ང་རང་ལ་དགའ་བསུ་བྱེད་ཀྱང་སྲིད་སྙམ་པའི་ཕྱིར༌རོ།།
GEN 32:21 དེ་ལྟར་ལེགས་སྐྱེས་ཐམས་ཅད་སྔོན་དུ་བསྐུར་ཟིན༌ལ། ཉིན་དེའི་མཚན༌མོར། ཡ་ཀོབ་ལམ་བར་དུ་ཞག་སྡོད་བྱས༌སོ།།
GEN 32:22 དེ་ནས་ཡ་ཀོབ་མཚན་མོ་དེར་མལ་ལས་ལངས་ཏེ་ཆུང་མ་གཉིས་ཀ༌དང༌། གཡོག་མོ༌གཉིས་ཀ གཞན་ཡང་བུ་ཕྲུག་བཅུ་གཅིག་དང་བཅས་པ་ཁྲིད་དེ་ཡཱབ་པོག་ཆུ་བོའི་རབ་ཁ་བརྒལ་ནས༌སོང༌།
GEN 32:23 དེ་ཡང་ཡ་ཀོབ་ཀྱིས་ཐོག་མར་ཁོ་རྣམས་ཆུ་བོར་བརྒལ་དུ་བཅུག་པ༌དང༌། དེ་ནས་གཞན་ཐམས་ཅད་ཀྱང་འགྲོ་རུ༌བཅུག
GEN 32:24 ཡ་ཀོབ་ཁོ་ན་ཤུལ་དུ་ལུས་ཤིང་མི་ཞིག་ཡོང་སྟེ་ནམ་ལངས་པའི་བར་དུ་ཁོ་དང་འཇུ་རེས༌བྱས།
GEN 32:25 མི་དེས་ཡ་ཀོབ་ལས་རྒྱལ་མི་ཐུབ་པ་ཤེས་ཏེ་ཡ་ཀོབ་ཀྱི་དཔྱི་མིག་ལ་རེག་པ༌ན། ཡ་ཀོབ་ཀྱི་དཔྱི་མགོ་ནི་འཇུ་རེས་བྱེད་སྐབས་ཚིགས་འཁྲོག་པ༌རེད།
GEN 32:26 དེ་ནས་མི་དེ་ན༌རེ། ད་ནི་ནམ་ལངས་སོང་བས་ང་རང་འགྲོ་རུ་ཆུག་ཅེས་སྨྲས་པ༌དང༌། ཡ་ཀོབ་ན༌རེ། ཁྱེད་ཀྱིས་བདག་ལ་བྱིན་རླབས་གནང་བ་མིན༌ན། བདག་གིས་ཁྱེད་འགྲོ་རུ་མི་འཇུག་ཅེས་སྨྲས༌སོ།།
GEN 32:27 དེར་མི་དེ་ན༌རེ། ཁྱོད་ཀྱི་མིང་ལ་ཅི་ཟེར་ཞེས་དྲིས་པ༌དང༌། ཡ་ཀོབ་ན༌རེ། བདག་གི་མིང་ལ་ཡ་ཀོབ་ཟེར་ཞེས་ལན༌བཏབ།
GEN 32:28 ཡང་མི་དེ་ན༌རེ། ད་ནས་བཟུང་ཁྱོད་ལ་ཡ་ཀོབ་ཅེས་མི་འབོད་པར་ཡེས་ར་ཨེལ་ཞེས་འདོགས་པར༌གྱིས། ཅིའི་ཕྱིར་ཞེ༌ན། ཁྱོད་ནི་དཀོན་མཆོག་དང་མིའི་རིགས་ལ་འགྲན་ཏེ་རྣམ་པར་རྒྱལ་བའི་ཕྱིར་ཡིན་ཞེས་སྨྲས༌སོ།།
GEN 32:29 ཡ་ཀོབ་ཀྱིས་མི་དེ་ལ་ཁྱེད་ཀྱི་མིང་ལ་ཅི་ཟེར་ཞེས་དྲིས་པ༌དང༌། མི་དེ་ན༌རེ། བདག་གི་མིང་འདྲི་བའི་རྒྱུ་མཚན་ཅི་ཞེས་སྨྲས་པ་དང་ཡ་ཀོབ་ལ་བྱིན་རླབས་གནང༌ངོ༌།།
GEN 32:30 དེ་ནས་ཡ་ཀོབ་ཀྱིས་ས་ཆ་དེའི་མིང་ལ་ཕཱ་ནེ་ཨེལ་ཞེས་བཏགས༌སོ། །ཅིའི་ཕྱིར་ཞེ༌ན། ངས་ཁ་རི་ཁ་ཐུག་ཏུ་དཀོན་མཆོག་མཇལ༌ནའང༌། ཁོང་གིས་བདག་གི་ཚེ་སྲོག་བསྐྱབས་པ་ཡིན་ཞེས་སྨྲས་པའི་ཕྱིར༌རོ།།
GEN 32:31 དེ་ཡང་ཡ་ཀོབ་ནི་ཕཱ་ནེ་ཨེལ་ཡུལ་བརྒྱུད་ནས་འགྲོ་བའི་དུས༌སུ། ཁོའི་ལུས་ལ་ཉི་འོད་ཤར་བ༌དང༌། ཁོའི་དཔྱི་ཚིགས་ན་བའི་རྐྱེན་གྱིས་རྐང་པ་གྱོལ་བཞིན་ཡོད༌དོ།།
GEN 32:32 དེའི༌ཕྱིར། ཡེས་ར་ཨེལ་པ་རྣམས་ཀྱིས་ད་ལྟའི་བར་དུ་ཕྱུགས་ཟོག་གི་དཔྱི་མགོའི་རྩ་རྒྱུས་མི༌ཟའོ། །ཅིའི་ཕྱིར་ཞེ༌ན། མི་དེས་ཡ་ཀོབ་ཀྱི་དཔྱི་མགོའི་རྩ་རྒྱུས་ལ་རེག་པའི་ཕྱིར༌རོ།།
GEN 33:1 དེ་ནས་ཡ་ཀོབ་ཀྱིས་མགོ་ཡར་བཀྱགས་ནས་བལྟས་པ༌ན། ཨེ་སཱབ་དང་མི་བཞི་བརྒྱ་ལྷག་ཡོང་བཞིན་པ་མཐོང༌ངོ༌། །ཡ་ཀོབ་ཀྱིས་བྱིས་པ་རྣམས་སོ་སོར་བཀར་ནས་ལེ་ཨ༌དང༌། རཱ༌ཧེལ། གཡོག་མོ་གཉིས་བཅས་ལ་སྤྲད་པར་མ༌ཟད།
GEN 33:2 གཡོག་མོ་གཉིས་ཀ་དང་ཁོ་ཚོའི་བྱིས་པ་རྣམས་སྔོན་དུ་འགྲོ་བ༌དང༌། ལེ་ཨ་དང་ཁོ་མོའི་བྱིས་པ་རྣམས་བར་དུ་འགྲོ་བ༌དང༌། རཱ་ཧེལ་དང་ཁོ་མོའི་བུ་ཡོ་སེབ་གཉིས་ཀ་རྗེས་སུ་འགྲོ་རུ་བཅུག་པ༌དང༌།
GEN 33:3 ཁོ་རང་དེ་དག་གི་མདུན་དུ་སྐྱོད༌ཅིང༌། ཐེངས་བདུན་ཙམ་ལ་ཕྱག་འཚལ་བཞིན་ཁོའི་གཅེན་པོའི་དྲུང་དུ་སླེབས་སོ། །
GEN 33:4 དེ་ནས་ཨེ་སཱབ་རྒྱུགས་འོངས་ནས་བསུ་བ་བྱེད་བཞིན་ཡ་ཀོབ་ལ་འཐམས་པ༌དང༌། ཡང་ཡ་ཀོབ་ཀྱི་སྐེ་ལ་དམ་པོར་འཇུས་ཏེ་འོ་བྱས་པ་དང་ཁོ་གཉིས་ངུས༌སོ།།
GEN 33:5 ཨེ་སཱབ་ཀྱིས་མགོ་ཡར་བཀྱགས་ནས་བུད་མེད་དང་བྱིས་པ་རྣམས་ལ་བལྟས༌ཏེ། ཁྱོད་དང་འགྲོགས་ནས་ཡོང་བ་འདི་དག་སུ་ཡིན་ནམ་ཞེས་དྲིས་པ༌ན། ཡ་ཀོབ་ན༌རེ། བྱིས་པ་འདི་དག་ནི་དཀོན་མཆོག་གི་ཐུགས་རྗེ་ལས་ཁྱོད་ཀྱི་ཞབས་ཕྱི་པ་ཕྲན་ལ་གནང་བ་ཡིན་ཞེས་ལན་བཏབ༌བོ།།
GEN 33:6 དེ་ནས་གཡོག་མོ་གཉིས་ཀ་དང་ཁོ་ཚོའི་བྱིས་པ་རྣམས་ཡོང་ནས་ཨེ་སཱབ་ལ་ཕྱག་བཙལ་བ༌དང༌།
GEN 33:7 ལེ་ཨ་དང་ཁོ་མོའི་བྱིས་པ་རྣམས་ཀྱང་ཡོང་ནས་ཁོ་ལ་ཕྱག་བཙལ་བ༌དང༌། དེའི་འཕྲོར་རཱ་ཧེལ་དང་ཁོ་མོའི་བུ་ཡོ་སེབ་གཉིས་ཀྱང་ཡོང་ནས་ཁོ་ལ་ཕྱག་བཙལ༌ཏོ།།
GEN 33:8 དེ་ནས་ཨེ་སཱབ་ན༌རེ། བདག་ལ་ཕྱུགས་ཟོག་འདི་དག་གནང་བའི་དོན་ཅི་ཡིན་ནམ་ཞེས་པ༌ལ། ཡ་ཀོབ་ན༌རེ། བདག་གི་ཇོ་བོ༌ལགས། ཁྱེད་ཀྱིས་བདག་ལ་ཐུགས་རྗེས་གཟིགས་པའི་ཕྱིར་ཡིན་ཞེས་སྨྲས༌སོ།།
GEN 33:9 ཡང་ཨེ་སཱབ་ན༌རེ། བདག་གི་གཅུང༌པོ། བདག་ལ་རྒྱུ་ནོར་མང་པོ་ཡོད་པས་ཁྱོད་ཀྱི་རྒྱུ་རྫས་ནི་རང་ཉིད་ལ་དབང་བར་གྱིས་ཞེས་སྨྲས་པ༌དང༌།
GEN 33:10 ཡ་ཀོབ་ན༌རེ། མིན༌ཏེ། བདག་ལ་ཁྱེད་ཀྱི་སྤྱན་དྲུང་ནས་ཐུགས་རྗེ་ཐོབ༌ན། ཁྱེད་ཀྱིས་བདག་ལས་ལེགས་སྐྱེས་འདི་དག་ལེན་པར༌མཛོད། ཅིའི་ཕྱིར་ཞེ༌ན། བདག་གིས་ཁྱེད་རང་མཐོང་བ་ནི་དཀོན་མཆོག་གི་ཞལ་རས་མཇལ་བ་དང་མཚུངས་ཤིང་ཁྱེད་ཀྱིས་བདག་ལ་དགའ་བསུའང་བྱས་པའི་ཕྱིར༌རོ།།
GEN 33:11 བདག་གིས་ཁྱེར་འོངས་པའི་ལེགས་སྐྱེས་འདི་དག་ཁྱེད་ཀྱིས་ལེན་པར༌མཛོད། ཅིའི་ཕྱིར་ཞེ༌ན། དཀོན་མཆོག་གིས་བདག་ལ་ཐུགས་རྗེས་གཟིགས་ཏེ་རྒྱུ་ནོར་མང་པོ་དང་ལྡན་པར་མཛད་པའི་ཕྱིར་ཡིན་ཞེས་སྨྲས་པ༌དང༌། ཡ་ཀོབ་ཀྱིས་ཨེ་སཱབ་ལ་ཡང་ཡང་ཞུ་བ་བྱས་པས་ཁོས་ཀྱང་བླངས༌སོ།།
GEN 33:12 དེ་ནས་ཨེ་སཱབ་ན༌རེ། རང་ཅག་ཡར་ལངས་ཏེ་ལམ་དུ་ཆས་པར༌བྱ། ང་ཁྱོད་ཀྱི་སྔོན་དུ་འགྲོ་བར་བྱའོ་ཞེས་སྨྲས་པ༌དང༌།
GEN 33:13 ཡ་ཀོབ་ན༌རེ། བྱིས་པ་རྣམས་ལོ་ན་ཕྲ་བ༌དང༌། ཕྱུགས་ཁྱུས་འོ་མ་སྣུན་པའི་དུས༌སུ། བཙན་གྱིས་ཉིན་གཅིག་རིང་ལ་དེད་ན་ར་ལུག་གི་ཁྱུ་ཡོངས་རྫོགས་འཆི་ངེས་པ་ཇོ་བོ་ཁྱེད་ཀྱིས་ཤེས༌སོ།།
GEN 33:14 ཇོ་བོ༌ལགས། ཁྱེད་ནི་ཞབས་ཕྱི་པ་བདག་གི་སྔོན་དུ་འགྲོ་བར༌མཛོད། བདག་གིས་མདུན་ཕྱོགས་ཀྱི་ཕྱུགས་ཁྱུའི་མྱུར་ཚད༌དང༌། བྱིས་པ་རྣམས་ཀྱི་མགྱོགས་ཚད༌ལྟར། སེ་ཨིར་ཡུལ་ལ་ཇོ་བོའི་མདུན་དུ་སླེབས་པའི་བར་དུ་ག་ལེར་མདུན་དུ་བསྐྱོད་པར་བྱ་ཞེས་སྨྲས༌སོ།།
GEN 33:15 ཡང་ཨེ་སཱབ་ན༌རེ། བདག་དང་མཉམ་དུ་ཡོད་པའི་མི་འགའ་ཞིག་ཁྱོད་ཀྱི་གམ་དུ་བསྐྱུར་ཆོག་པར་ཞུ་ཞེས་སྨྲས་པ༌ལ། ཡ་ཀོབ་ན༌རེ། བདག་གི་ཇོ་བོ༌ལགས། དེ་འདྲ་བྱེད་དགོས་དོན་མེད༌དེ། ཁྱེད་ཀྱི་མིག་མདུན་ནས་བདག་ལ་ཐུགས་རྗེས་གཟིགས་པར་ཞུ་ཞེས་སྨྲས༌སོ།།
GEN 33:16 དེའི༌ཕྱིར། ཨེ་སཱབ་ཉིན་དེར་སེ་ཨིར་ཡུལ་དུ་འགྲོ་བའི་ལམ་ལ་ཆས༌སོ།།
GEN 33:17 དེ་ནས་ཡ་ཀོབ་འཁོར་དང་བཅས་པ་སོའུ་ཀོད་ཡུལ་དུ་སོང་བ་དང་དེ་རུ་རང་ལ་ཁང་པ་དང་ཕྱུགས་ལ་སྤྱིལ་བུའང་བཟོས༌པས། ཡུལ་དེའི་མིང་ལ་སོའུ་ཀོད་ ཅེས་འབོད་པར་བྱེད༌དོ།།
GEN 33:18 དེ་ནས་ཡ་ཀོབ་ཁོ་རང་ཕཱ་དན་ཨ་རམ་ཡུལ་ནས་ཕྱིར་ལོག་པའི་དུས༌སུ། བདེ་བའི་ངང་ཀ་ན་ཨན་ཡུལ་གྱི་སི་ཀེམ་གྲོང་ཁྱེར་དུ་སླེབས་ཤིང་གྲོང་ཁྱེར་དེའི་མདུན་ཕྱོགས་སུ་གུར་ཕུབ་པ༌དང༌།
GEN 33:19 སི་ཀེམ་གྱི་ཕ་སྟེ་ཧ་མོར་གྱི་བུ་རྣམས་ལ་དངུལ་སྒོར་བརྒྱ་སྤྲད་དེ་གུར་ཕུབ་སའི་ས་ཉོས༌ཤིང༌།
GEN 33:20 གནས་དེ་རུ་མཆོད་ཁྲི་ཞིག་ཀྱང་བཞེངས༌ཏེ། མིང་ལ་ཨེལ་ཨེ་ལོ་ཧེ་ཡེས་ར་ཨེལ་ ཞེས་བཏགས༌པའོ།།
GEN 34:1 དེ་ཡང་ལེ་ཨ་ཡིས་ཡ་ཀོབ་ལ་བཙས་པའི་བུ་མོ་དི་ནཱ་བྱ་བ་ཡུལ་དེའི་བུ་མོ་རྣམས་ལ་བལྟ་རུ་སོང་བ༌དང༌།
GEN 34:2 ཡུལ་དེའི་ས་གནས་དཔོན་པོ་ཧ་མོར་ཞེས་པའི་བུ་སི་ཀེམ་གྱིས་ཁོ་མོ་མཐོང་བ་དང་བཙན་གཡེམ༌བྱས། ཧ་མོར་ནི་ཧེ་བི་མི་རིགས་ལ་གཏོགས༌སོ།།
GEN 34:3 དེ་ནས་སི་ཀེམ་གྱི་སེམས་སུ་ཡ་ཀོབ་ཀྱི་བུ་མོ་དི་ནཱ་ཤིན་ཏུ་འདོད་ཅིང་ཁོ་མོར་དགའ་བར་གྱུར་པས་ཚིག་སྙན་སྨྲས༌སོ།།
GEN 34:4 སི་ཀེམ་གྱིས་རང་གི་ཕ་ཧ་མོར་ལ་འདི༌ལྟར། ཕ༌ལགས། ཁྱེད་ཀྱིས་བུ་མོ་འདི་བདག་ལ་ཆུང་མར་ལེན་པར་མཛོད་ཅེས་ཞུ་བ༌བྱས།
GEN 34:5 དེ་ནས་སི་ཀེམ་གྱིས་བུ་མོ་དི་ནཱ་མི་གཙང་བར་བྱས་པའི་གཏམ་དེ་ཡ་ཀོབ་ཀྱིས་ཐོས༌ཤིང༌། སྐབས༌དེར། ཡ་ཀོབ་ཀྱི་བུ་རྣམས་ཕྱུགས་ཟོག་དང་མཉམ་དུ་སྤང་ཐང་དུ་ཡོད༌པས། ཡ་ཀོབ་ཀྱིས་ཅི་ཡང་མི་སྨྲ་བར་བུ་རྣམས་ཕྱིར་ལོག་པར་སྒུག༌གོ །
GEN 34:6 དེ་ནས་སི་ཀེམ་གྱི་ཕ་ཧ་མོར་ཞེས་བྱ་བ་ཡ་ཀོབ་ལ་གྲོས་འདེབས་པར་ཡོང་བ༌དང༌།
GEN 34:7 ཡ་ཀོབ་ཀྱི་བུ་རྣམས་ཀྱིས་དོན་དེ་ཐོས་པ་དང་སྤང་ཐང་ནས་ཡུལ་དུ་ལོག༌ཅིང༌། ཁོ་རྣམས་སེམས་སྐྱོ་ཞིང་ཁོང་ཁྲོ་ཆེན་པོ༌ལངས། ཅིའི་ཕྱིར་ཞེ༌ན། སི་ཀེམ་གྱིས་ཡེས་ར་ཨེལ་གྱི་ཁྱིམ་དུ་སྐྱུག་བྲོ་བའི་ལས་བྱས་པ༌སྟེ། ཡ་ཀོབ་ཀྱི་བུ་མོ་ལ་བཙན་གཡེམ་བྱས་པ༌དང༌། དོན་དེ་ནི་འབྱུང་མི་འོས་པའི་ཕྱིར༌རོ།།
GEN 34:8 ཧ་མོར་གྱིས་ཡ་ཀོབ་ཕ་བུ་རྣམས་ལ་འདི་ལྟར་གྲོས་བཏབ་པ༌སྟེ། བདག་གི་བུ་སི་ཀེམ་གྱི་སེམས་ནི་བུ་མོ་འདི་ལ་དགའ་བས་ན། ཁྱོད་ཅག་གིས་ཁོ་མོ་བདག་གི་བུ་ལ་ཆུང་མར་གནང་བར༌མཛོད།
GEN 34:9 ད་ནས་བཟུང་ངེད་རྣམས་བར་དུ་གཉེན་བཙུགས༌ཏེ། ཁྱོད་ཅག་གིས་བུ་མོ་རྣམས་ངེད་ཅག་ལ་སྟེར་བ༌དང༌། ངེད་ཅག་གི་བུ་མོ་རྣམས་ཀྱང་ཁྱོད་ཅག་གིས་ཆུང་མར་ལེན་པར༌མཛོད།
GEN 34:10 ངེད་རྣམས་དང་མཉམ་དུ་འདུག་པར༌གྱིས། ཡུལ་འདི་ནི་ཁྱོད་ཅག་གི་མདུན་དུ་ཡོད༌པས། འདི་རུ་བསྡད་ནས་ཚོང་ལས་གཉེར་བ་དང་ས་ཉོས་ཀྱང་ཆོག་ཅེས་སྨྲས༌སོ།།
GEN 34:11 དེ་ནས་སི་ཀེམ་གྱིས་བུ་མོའི་ཕ་དང་གཅེན་གཅུང་རྣམས་ལ་འདི༌ལྟར། བདག་ལ་ཁྱོད་ཅག་གི་མིག་མདུན་ནས་ཐུགས་རྗེ་ཐོབ༌ན། ཁྱོད་ཅག་གིས་བདག་ལ་ཅི་ཞིག་བསླངས༌ཚེ། བདག་གིས་དེ་ནི་ཁྱོད་ཅག་ལ་སྟེར་ངེས༌སོ།།
GEN 34:12 ཁྱོད་ཅག་གིས་ཁོ་མོ་བདག་ལ་སྟེར་རྒྱུ་ཤ་སྟག་ཡིན༌ན། བག་རིན་དང་ལེགས་སྐྱེས་གང་རུང་བདག་ལ་བསླངས༌ནའང༌། བདག་གིས་ཁྱོད་ཅག་གིས་སྨྲས་པ་བཞིན་སྟེར་ངེས་ཡིན་ཞེས་སྨྲས༌སོ།།
GEN 34:13 དེ་ཡང་སི་ཀེམ་གྱིས་དི་ནཱ་མི་གཙང་བར་བྱས་པའི༌ཕྱིར། ཡ་ཀོབ་ཀྱི་བུ་རྣམས་ཀྱིས་གཡོ་སྒྱུའི་ངང་ནས་སི་ཀེམ་དང་ཁོའི་ཕ་ཧ་མོར་ལ་ལན་འདི་ལྟར་བཏབ་པ༌སྟེ།
GEN 34:14 ངེད་ཅག་གིས་རང་གི་སྲིང་མོ་མཚན་སྐྱི་བཅད་མེད་པའི་མི་ཞིག་ལ་ཆུང་མར་སྟེར་མི༌རུང༌། ཅིའི་ཕྱིར་ཞེ༌ན། དེ་ནི་ངེད་ཅག་གི་ངོ་ཚ་ཡིན༌ནོ།།
GEN 34:15 འོན༌ཀྱང༌། ཁྱོད་ཅག་གིས་དོན་དག་གཅིག་ཁོ་ན་བསྒྲུབ་ཐུབ༌ན་ངེད་ཅག་འཐད་པ་འབྱུང་ངེས་ཡིན༌ཏེ། ཁྱོད་ཅག་གི་སྐྱེས་པ་ཐམས་ཅད་ཀྱིས་ངེད་ཅག་དང་མཚུངས་པར་མཚན་སྐྱི་གཅོད་དགོས་པ༌དེའོ།།
GEN 34:16 དེས་ན་ངེད་ཅག་གིས་བུ་མོ་རྣམས་ཁྱོད་ལ་སྟེར་བ༌དང༌། ཁྱོད་ཅག་གི་བུ་མོ་རྣམས་ཀྱང་ངེད་ཅག་གི་ཆུང་མར་ལེན་ངེས༌ཡིན། ངེད་རྣམས་ཀྱང་ཁྱོད་ཅག་དང་མཉམ་དུ་བསྡད་ནས་མི་རིགས་གཅིག་ཏུ་འགྱུར༌རོ།།
GEN 34:17 གལ༌ཏེ། ཁྱོད་ཅག་གིས་ངེད་རྣམས་ཀྱི་ངག་ལ་མི་ཉན་པ་དང་མཚན་སྐྱིའང་མི་གཅོད༌ན། ངེད་ཅག་གིས་སྲིང་མོ་ཁྲིད་ནས་འགྲོ་བར་བྱ་ཞེས་སྨྲས༌སོ།།
GEN 34:18 དེ་ནས་ཧ་མོར་དང་ཁོའི་བུ་སི་ཀེམ་གཉིས་ཀྱིས་གཏམ་དེ་ཐོས་ནས་དགའ་བར་གྱུར་པ་དང༌།
GEN 34:19 བུ་དེས་དོན་འདི་བསྒྲུབ་པར་འགོར་འགྱངས་ཅི་ཡང་མ་བྱས༌ཏེ། ཁོ་ནི་ཡ་ཀོབ་ཀྱི་བུ་མོ་ལ་ཤིན་ཏུ་དགའ་བའི་ཕྱིར༌རོ། །ཁོ་ཡང་རང་གི་ཕ་ཡི་ཁྱིམ་དུ་ཆེས་བརྩི་བཀུར་ཐོབ་པའི་མི་ཡིན༌ནོ།།
GEN 34:20 དེ་ནས་ཧ་མོར་དང་ཁོའི་བུ་སི་ཀེམ་གཉིས་གྲོང་ཁྱེར་དེའི་སྒོ་ཁར་སོང་ནས་སྐྱེས་པ་རྣམས་ལ་འདི་ལྟར་སྨྲས༌པ།
GEN 34:21 མི་འདི་རྣམས་ངེད་ཅག་དང་སེམས་མཐུན༌པས། ཁོ་རྣམས་འདི་རུ་སྡོད་པ་དང་ཚོང་ལས་བྱེད་དུ་བཅུག་ནའང་ཡུལ་འདི་ས་རྒྱ་ཆེ་བས་ཁོ་རྣམས་ཤོང༌ཐུབ། ངེད་ཅག་གིས་ཁོ་རྣམས་ཀྱི་བུ་མོ་ཆུང་མར་ལེན་པ༌དང༌། རང་ཅག་གི་བུ་མོ་རྣམས་ཀྱང་ཁོ་རྣམས་ལ་བག་མར་སྟེར་རུང༌ངོ༌།།
GEN 34:22 འོན༌ཀྱང༌། རང་ཅག་གིས་དོན་དག་གཅིག་ཁོ་ན་བསྒྲུབ་དགོས༌ཤིང༌། དེ་ལྟར་བྱས་ན་ཁོ་རྣམས་ད་གཟོད་རང་ཅག་དང་མཉམ་དུ་བསྡད་ནས་མི་རིགས་གཅིག་ཏུ་འགྱུར་བར་འཐད་པ་འབྱུང་བ༌སྟེ། ཁོ་རྣམས་དང་མཚུངས་པར་རང་ཅག་སྐྱེས་པ་ཐམས་ཅད་ཀྱིས་ཀྱང་མཚན་སྐྱི་གཅོད་དགོས༌སོ།།
GEN 34:23 དེ་ལྟར་བྱས༌ན། ཁོ་རྣམས་ཀྱི་ཕྱུགས་ཟོག་དང་རྒྱུ་ནོར་ཐམས་ཅད་རང་ཅག་ལ་དབང་བ་མ་ཡིན༌ནམ། དེའི༌ཕྱིར། རང་ཅག་གིས་ཁོ་རྣམས་ལ་བསྟུན་པ་ཡིན་ན། ཁོ་རྣམས་རང་ཅག་དང་མཉམ་དུ་འདུག་པར་བྱེད་ཅེས་སྨྲས༌སོ།།
GEN 34:24 དེ་ནས་གྲོང་ཁྱེར་གྱི་མཁར་སྒོ་ལས་ཕར་འགྲོ་ཚུར་འོང་བྱེད་པའི་མི་ཀུན་གྱིས་ཧ་མོར་དང་ཁོའི་བུ་སི་ཀེམ་གཉིས་ཀྱི་གཏམ་ལ་མཉན༌པས། གྲོང་ཁྱེར་གྱི་མཁར་སྒོ་ལས་ཕར་འགྲོ་ཚུར་འོང་བྱེད་པའི་སྐྱེས་པ་ཐམས་ཅད་ཀྱིས་མཚན་སྐྱི་བཅད༌དོ།།
GEN 34:25 དེ་ནས་ཉིན་གསུམ་པར་སྐྱེས་པ་རྣམས་ལ་ན་ཟུག་ལངས་པའི་སྐབས༌དེར། ཡ་ཀོབ་ཀྱི་བུ་སི་མུ་ཨོན་དང་ལེ་ཝི་ཞེས་བྱ་བ༌སྟེ། དི་ནཱའི་གཅེན་པོ་གཉིས་ཀྱིས་ལག་ཏུ་རལ་གྲི་ཐོགས༌ཏེ། མི་དེ་རྣམས་ཀྱིས་མཉམ་བཞག་མེད་པའི་སྐབས༌སུ། གྲོང་ཁྱེར་དེའི་ནང་དུ་བརྒྱུགས་ནས་སྐྱེས་པ་ཐམས་ཅད་བསད་པ༌དང༌།
GEN 34:26 ཧ་མོར་དང་ཁོའི་བུ་སི་ཀེམ་གཉིས་ཀའང་བསད༌ཅིང༌། སི་ཀེམ་གྱི་ཁྱིམ་ནས་དི་ནཱ་ཁྲིད་དེ་སོང༌ངོ༌།།
GEN 34:27 དེ་ནས་སྲིང་མོ་དི་ནཱ་མི་གཙང་བར་བཟོས་པའི་རྐྱེན༌གྱིས། ཡ་ཀོབ་ཀྱི་བུ་གཞན་རྣམས་བེམ་པོས་བཀང་བའི་གྲོང་ཁྱེར་དེར་ཡོང་ནས་དེ་ཕྲོགས་ཤིང་།
GEN 34:28 ར་ལུག་གི་ཁྱུ༌དང༌། བ༌ཁྱུ། བོང༌བུ། གྲོང་ཁྱེར་ནང་དང་ཞིང་བར་དུ་ཡོད་པའི་དངོས་པོ་ཐམས་ཅད་ཁྱེར་བ༌དང༌།
GEN 34:29 རྒྱུ་ནོར༌དང༌། བྱིས༌པ། བུད༌མེད། ཁང་པའི་ནང་གི་དངོས་པོ་དང་བཅས་པ་ཕྲོགས་ཏེ་སོང༌ངོ༌།།
GEN 34:30 དེ་ནས་ཡ་ཀོབ་ཀྱིས་བུ་སི་མུ་ཨོན་དང་ལེ་ཝི་གཉིས་ལ་འདི༌ལྟར། ཁྱོད་ཅག་གིས་བདག་སྡུག་ལ་གཏད༌དེ། བདག་ནི་ཡུལ་འདིར་ཡོད་པའི་ཀ་ན་ཨན་མི་རིགས་དང་ཕེ་རེ་ཟི་མི་རིགས་ཀྱི་ཁྲོད་དུ་ངན་པ་རྟགས་ཅན་དུ་བྱས༌སོ། །བདག་གི་མི་གྲངས་ཉུང་བས་དེ་རྣམས་ཀྱིས་མི་ཚོགས་བསྡུས་ནས་བདག་ཅག་ལ་རྒོལ་བར་བྱེད་པ༌དང༌། བདག་དང་བདག་གི་ཁྱིམ་མི་ཐམས་ཅད་རྡུལ་དུ་བརླག་པར་བྱེད་ཅེས་པ༌ན།
GEN 34:31 ཁོ་རྣམས་ན༌རེ། སི་ཀེམ་གྱིས་རང་ཅག་གི་སྲིང་མོ་སྨད་འཚོང་མ་བཞིན་དུ་བྱེད་རུང་ངམ་ཞེས་སྨྲས༌སོ།།
GEN 35:1 དེ་ནས་དཀོན་མཆོག་གིས་ཡ་ཀོབ་ལ་འདི་སྐད༌དུ། ཡར་ལོངས༌དང༌། པེད་ཨེལ་དུ་སོང་ནས་སྡོད༌ཅིག གནས་དེ་རུ་དཀོན་མཆོག་ལ་མཆོད་ཁྲི་ཞིག་བཞེང་བར་གྱིས། དཀོན་མཆོག་གང་ཞེ༌ན། དེ་སྔར་ཁྱོད་ནི་རང་གི་གཅེན་པོ་ཨེ་སཱབ་ལ་གཞའ་ནས་འབྲོ་བའི་དུས་སུ་ཁྱོད་ལ་མངོན་པ་དེ་ཉིད་ཡིན་ཞེས་གསུངས༌པས།
GEN 35:2 ཡ་ཀོབ་ཀྱིས་རང་གི་ཁྱིམ་མི་འཁོར་དང་བཅས་པ་ལ་འདི༌ལྟར། ཁྱོད་ཅག་གིས་ཁྱོད་རྣམས་ཀྱི་ཁྲོད་དུ་ཕྱི་རོལ་པའི་ལྷ་སྐུ་ཡོད་པ་ཐམས་ཅད་དོར༌ཅིག རང་ཉིད་གཙང་མར་བྱས་ནས་གྱོན་གོས་བརྗེ་བར༌གྱིས།
GEN 35:3 ངེད་ཅག་ལངས་ནས་ཡར་པེད་ཨེལ་དུ་འགྲོ་བར༌བྱ། བདག་གིས་གནས་དེ་རུ་དཀོན་མཆོག་ལ་མཆོད་ཁྲི་ཞིག་བཞེང་བར་བྱ༌སྟེ། གང་ཡིན་ཟེར༌ན། བདག་ལ་སྡུག་བསྔལ་བྱུང་བའི་དུས༌སུ། བདག་གིས་གསོལ་བ་བཏབ་པར་གསན་པ༌དང༌། ལམ་ལ་ཆས་པའི་སྐབས་སུ་བདག་ལ་སྐྱབས་མཛད་མཁན་དེ་ཉིད་ཡིན་ཞེས་སྨྲས༌པས།
GEN 35:4 ཁྱིམ་མི་འཁོར་དང་བཅས་པས་ཕྱི་རོལ་པའི་ལྷ་སྐུ་དང་རྣ་ཆ་ཐམས་ཅད་བླངས་ནས་ཡ་ཀོབ་ལ་སྤྲད་པ༌དང༌། ཁོས་ཀྱང་དངོས་པོ་དེ་རྣམས་སི་ཀེམ་གྱི་བེ་ཤིང་གི་རྩར་སྦས༌སོ།།
GEN 35:5 དེ་ནས་ཁོ་རྣམས་ཡར་ལངས་ནས་ལམ་ལ་ཆས༌སྐབས། དཀོན་མཆོག་གིས་ཉེ་འཁོར་གྱི་གྲོང་ཁྱེར་དེ་དག་གི་མི་རྣམས་ལ་འཇིགས་སྣང་བསྐུལ༌བས། མི་དེ་རྣམས་ཡ་ཀོབ་ཀྱི་བུ་རྣམས་ཀྱི་རྗེས་སུ་སྙེག་མ་ནུས༌སོ།།
GEN 35:6 དེའི༌ཕྱིར། ཡ་ཀོབ་འཁོར་དང་བཅས་པ་ཀ་ན་ཨན་ཡུལ་གྱི་ལོ་ཟི་གྲོང་ཁྱེར་ཏེ་པེད་ཨེལ་དུ་སླེབས་སོ། །
GEN 35:7 དེ་ནས་ཡ་ཀོབ་ཀྱིས་གནས་དེ་རུ་མཆོད་ཁྲི་ཞིག་བཞེངས༌པ་དང་། ཡུལ་དེའི་མིང་ལ་ཨེལ་པེད་ཨེལ་ ཞེས་བཏགས༌སོ། །ཅིའི་ཕྱིར་ཞེ༌ན། ཡ་ཀོབ་རང་གི་གཅེན་པོ་ལ་གཞའ་ནས་འབྲོ་བའི་དུས༌སུ། དཀོན་མཆོག་གནས་དེ་རུ་ཁོ་ལ་མངོན་པར་མཛད་པའི་ཕྱིར༌རོ།།
GEN 35:8 དེ་ཡང་རིབ་ཀཱའི་ནུ་ཞོ་མ་ཚབ་སྟེ་དི་བོ་རཱ་ཚེ་ལས་འདས༌ཤིང༌། པེད་ཨེལ་སྨད་ཕྱོགས་ཀྱི་བེ་ཤིང་གི་རྩར་དུར་དུ་སྦས་པ༌དང༌། བེ་ཤིང་དེའི་མིང་ལ་ཨ་ལུན་པཱ་ཀུད་ ཅེས་བཏགས༌སོ།།
GEN 35:9 དེ་ནས་ཡ་ཀོབ་ཁོ་རང་ཕཱ་དན་ཨ་རམ་ཡུལ་ནས་ཐོན་པ༌དང༌། ཡང་དཀོན་མཆོག་གིས་ཁོ་ལ་མངོན་པར་མཛད་ཅིང་བྱིན་རླབས་གནང་སྟེ་འདི་སྐད༌དུ།
GEN 35:10 ཁྱོད་ཀྱི་མིང་དངོས་ལ་ཡ་ཀོབ་ཅེས་ཟེར༌ཞིང༌། ད་ནས་བཟུང་ཡ་ཀོབ་ཅེས་མི་འབོད་པར་ཡེས་ར་ཨེལ་ཞེས་འབོད་དགོས་ཞེས་གསུངས་པ་དང་ཡ་ཀོབ་ཀྱི་མིང་ལ་ཡེས་ར་ཨེལ་ཞེས༌བཏགས།
GEN 35:11 ཡང་དཀོན་མཆོག་གིས་ཡ་ཀོབ་ལ་འདི་སྐད༌དུ། བདག་ནི་ཀུན་དབང་དཀོན་མཆོག༌ཡིན། ཁྱོད་ཀྱིས་རྒྱུད་དང་ལྡན་པར་གྱུར་ནས་མང་པོར་སྤེལ་བར༌བྱའོ། །ཁྱོད་ལས་རྒྱལ་ཁབ་ཅིག་དང་མི་རིགས་མང་དུ་འབྱུང༌ཞིང༌། ཁྱོད་རང་བརྒྱུད་ནས་རྒྱལ་པོ་རྣམས་ཀྱང་འབྱུང་བར་འགྱུར༌རོ།།
GEN 35:12 བདག་གིས་ཨབ་ར་ཧམ་དང་ཨི་སཱག་ལ་སྤྲད་པའི་ས་ཆ་དེ་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་དག་ལ་སྦྱིན་པར་བྱ་ཞེས་གསུངས་པ༌དང༌།
GEN 35:13 དཀོན་མཆོག་ནི་ཡ་ཀོབ་དང་གསུང་མོལ་མཛད་པའི་གནས་དེ་ནས་ནམ་མཁའི་ཞིང་ཁམས་སུ་འཕགས༌སོ།།
GEN 35:14 དེ་ནས་ཡ་ཀོབ་ཀྱིས་གནས་དེ་རུ་རྡོའི་ཀ་བ་ཞིག་གྱེན་དུ་བསྒྲེངས༌ཤིང༌། དེའི་སྟེང་དུ་རྒུན་ཆང་དང་སྣུམ་བླུགས་ནས་མཆོད་པ་ཕུལ་བ༌དང༌།
GEN 35:15 གནས་དེའི་མིང་ལ་པེད་ཨེལ་ཞེས་བཏགས༌སོ།།
GEN 35:16 དེ་ནས་ཁོ་རྣམས་པེད་ཨེལ་ཡུལ་ནས་ལམ་ལ་ཆས་ཤིང་ཨེབ་རཱད་གྲོང་རྡལ་དང་ཉེ་བའི་ལམ་བར༌དུ། རཱ་ཧེལ་ལ་ཕྲུ་གུ་བཙའ་རན་ཞིང་ཟུག་གཟེར་ཆེན་པོ༌ལངས།
GEN 35:17 དེ་ལྟར་ཟུག་གཟེར་ཆེན་པོ་ལངས་པའི་དུས༌སུ། སྐྱེ་གཡོག་མ་ན༌རེ། ཁྱོད་རང་འཇིགས་མི༌དགོས། ཁྱོད་ལ་ཡང་བུ་ཞིག་སྐྱེས་པ་རེད་ཅེས་སྨྲས་པ༌དང༌།
GEN 35:18 རཱ་ཧེལ་འཆི་ལ་ཉེ་ཞིང་ཁོ་མོའི་ཚེ་འཕོ་བར་རྩོམ་པའི་དུས༌སུ། ཁོ་མོས་རང་གི་བུའི་མིང་ལ་པེན་ཨོ་ནེ་ ཞེས་བཏགས་ནའང་ཡ་ཀོབ་ཀྱིས་རང་གི་བུའི་མིང་ལ་པེན་ཡཱ་མེན་ཞེས་བཏགས༌སོ།།
GEN 35:19 དེ་ལྟར་རཱ་ཧེལ་ཚེ་ལས་འདས་ཤིང་ཨེབ་རཱད་ཀྱི་ལམ་འགྲམ་དུ་དུར་ལ་སྦས་པ༌དང༌། ཨེབ་རཱད་ཅེས་པ་པེད་ལེ་ཧེམ་གྲོང་རྡལ་ཡིན༌ནོ།།
GEN 35:20 ཡ་ཀོབ་ཀྱིས་ཁོ་མོའི་དུར་སའི་སྟེང་དུ་རྡོ་རིང་ཞིག་བཙུགས་པ༌དང༌། དེ་ནི་རཱ་ཧེལ་གྱི་དུར་རྟགས་ཡིན་ཏེ་ད་ལྟའི་བར་དུ་གནས་ཡོད་པ༌ཡིན།
GEN 35:21 དེ་ནས་ཡེས་ར་ཨེལ་ལམ་ལ་ཆས་ཤིང་ཨེ་དེར་མཁར་རྫོང་གི་ཕ་རོལ་ཏུ་སླེབས་ནས་གུར་ཕུབ་པ༌དང༌།
GEN 35:22 ཡེས་ར་ཨེལ་གནས་དེར་སྡོད་པའི་དུས༌སུ། རུ་བེན་ནི་ཕ་ཡི་ཆུན་མ་པིལ་ཧ་ཞེས་པ་དང་ལུས་འབྲེལ་བྱས་ཤིང་དོན་དེ་ཡེས་ར་ཨེལ་གྱིས་ཀྱང་ཐོས༌སོ།། དེ་ཡང་ཡ་ཀོབ་ལ་བུ་བཅུ་གཉིས་ཡོད་པ་གཤམ་གསལ༌ལྟར།
GEN 35:23 ལེ་ཨ་ཡིས་བཙས་པའི་བུ་རྣམས་ནི་ཡ་ཀོབ་ཀྱི་བུ་སྐྱེས་འགོ་རུ་བེན༌དང༌། གཞན་ཡང་སི་མུ་ཨོན༌དང༌། ལེ༌ཝི། ཡ་ཧུ༌དཱ། ཡེས་སི༌ཀཱར། ཟེ་བུ་ལུན་བཅས་དྲུག༌གོ །
GEN 35:24 རཱ་ཧེལ་གྱིས་བཙས་པའི་བུ་ནི་ཡོ་སེབ་དང་པེན་ཡཱ་མེན་གཉིས༌སོ།།
GEN 35:25 རཱ་ཧེལ་གྱི་གཡོག་མོ་པིལ་ཧ་ཡིས་བཙས་པའི་བུ་ནི་དཱན་དང་ནཱབ་ཐ་ལི་གཉིས༌སོ།།
GEN 35:26 ལེ་ཨའི་གཡོག་མོ་ཟིལ་པཱ་ཡིས་བཙས་པའི་བུ་ནི་གཱ་རྡུ་དང་ཨ་ཤེར་གཉིས༌སོ། །བུ་དེ་དག་ནི་ཡ་ཀོབ་ཁོ་རང་ཕཱ་དན་ཨ་རམ་ཡུལ་དུ་ཡོད་པའི་དུས་སུ་སྐྱེས༌པའོ།།
GEN 35:27 དེ་ནས་ཡ་ཀོབ་རང་གི་ཕ་ཨི་སཱག་གི་དྲུང་དུ་སླེབས་པ༌དང༌། ཕ་ཡི་ཡུལ་ནི་ཀིར་ཡཱད་ཨར་པཱ་དང་བར་ཐག་ཉེ་བའི་མཱན་རེའེ་ཞེས་པའི་ཡུལ༌ཏེ། ཨབ་ར་ཧམ་དང་ཨི་སཱག་གི་སྡོད་གནས་ཀྱང་ཡིན༌ལ། ཀིར་ཡཱད་ཨར་པཱ་ཞེས་པར་ཧེབ་རོན་ཞེས་ཀྱང་ཟེར༌རོ།།
GEN 35:28 དེ་ཡང་ཨི་སཱག་དགུང་ལོ་བརྒྱ་དང་བརྒྱད་ཅུར་བཞུགས༌ཤིང༌།
GEN 35:29 ཨི་སཱག་ལོ་ན་རྒས་ཤིང་ཚེ་ལོ་མཐར་ཕྱིན་ཏེ་ཚེ་ལས་འདས་པ་དང་མེས་པོ་རྣམས་ཀྱི་དྲུང་དུ་འཛོམས་པར་གྱུར༌ལ། ཨི་སཱག་གི་བུ་ཨེ་སཱབ་དང་ཡ་ཀོབ་གཉིས་ཀྱིས་ཁོའི་སྐུ་གདུང་དུར་དུ་སྦས༌སོ།།
GEN 36:1 དེ་ཡང་ཨེ་སཱབ་ཅེས་པ་ཨེ་དོམ་ཡིན༌ཞིང༌། ཁོའི་རིགས་རྒྱུད་ནི་གཤམ་གསལ༌ལྟར།
GEN 36:2 ཨེ་སཱབ་ཀྱིས་ཀ་ན་ཨན་མི་རིགས་ཀྱི་བུ་མོ་རྣམས་ལས་བུ་མོ་འགའ་ཆུང་མར་བླངས་པ༌སྟེ། ཧེ་བི་མི་རིགས་ཀྱི་ཨེད་ལོན་ཞེས་བྱ་བའི་བུ་མོ་ཨ་དཱ༌དང༌། ཧི་ཝི་མི་རིགས་ཀྱི་ཚིབ་ཨོན་ཞེས་པའི་ཚ་མོ་དང་ཨ་ནཱ་ཞེས་པའི་བུ་མོ་སྟེ་ཨོ་ཧོ་ལི་བཱ་མཱ༌དང༌།
GEN 36:3 ཡེས་མ་ཨེལ་གྱི་བུ་མོ་སྟེ་ནཱ་བ་ཨོད་བྱ་བའི་སྲིང་མོ་པཱ་ས་མཱད་བཅས་གསུམ༌མོ།།
GEN 36:4 དེ་ཡང་ཨ་དཱ་ཡིས་ཨེ་སཱབ་ལ་བུ་ཨེ་ལི་ཕཱ་ཟི་བཙས་ཤིང་། པཱ་ས་མཱད་ཀྱིས་བུ་རུའུ་ཨེལ་བཙས་པ༌དང༌།
GEN 36:5 ཨོ་ཧོ་ལི་བཱ་མཱ་ཡིས་བུ་ཡེ་ཨུ་སི༌དང༌། ཡཱ་ཨེ༌ལཱམ། ཀོ་རཱག་བཅས་གསུམ་བཙས༌སོ། །བུ་དེ་དག་ནི་ཀ་ན་ཨན་ཡུལ་དུ་ཨེ་སཱབ་ལ་ཐོབ་པའི་བུ་རྣམས་ཡིན༌ནོ།།
GEN 36:6 དེ་ནས་ཨེ་སཱབ་ཀྱིས་རང་གི་ཆུང་མ༌དང༌། བུ་དང་བུ༌མོ། ཁྱིམ་ཚང་ནང་གི་འཁོར་གཡོག་ཐམས་ཅད༌དང༌། ཀ་ན་ཨན་ཡུལ་ནས་ཐོབ་པའི་ཕྱུགས་ཟོག་དང་རྒྱུ་ནོར་ཐམས་ཅད་ཁྱེར༌ཏེ། རང་གི་གཅུང་པོ་ཡ་ཀོབ་དང་ཁ་བྲལ་ནས་ཡུལ་གཞན་དུ་སོང༌ངོ༌།།
GEN 36:7 ཅིའི་ཕྱིར་ཞེ༌ན། ཁོ་གཉིས་ལ་རྒྱུ་ནོར་དང་ཕྱུགས་ཟོག་ཤིན་ཏུ་མང་བས་ཡུལ་དེར་མ་ཤོང་བ༌དང༌། ཁོ་གཉིས་མཉམ་དུ་འདུག་ཐབས་མ་བྱུང་བའི་ཕྱིར༌རོ།།
GEN 36:8 དེའི༌ཕྱིར། ཨེ་སཱབ་ནི་སེ་ཨིར་རི་ཁུལ་དུ་བསྡད༌ཅིང༌། ཨེ་སཱབ་ལ་ཨེ་དོམ་ཞེས་ཀྱང་ཟེར༌རོ།།
GEN 36:9 ཨེ་སཱབ་ནི་སེ་ཨིར་རི་ཁུལ་གྱི་ཨེ་དོམ་མི་རིགས་ཀྱི་མེས་པོ་ཡིན༌ཞིང༌། ཁོའི་རིགས་རྒྱུད་ནི་འདི་ལྟར་བྲིས་ཡོད༌དེ།
GEN 36:10 དེ་ཡང་ཨེ་སཱབ་ཀྱི་བུ་རྣམས་འདི་ལྟ༌སྟེ། ཨེ་སཱབ་ཀྱི་ཆུང་མ་ཨ་དཱ་ལས་སྐྱེས་པའི་བུ་ནི་ཨེ་ལི་ཕཱ་ཟི༌དང༌། ཨེ་སཱབ་ཀྱི་ཆུང་མ་པཱ་ས་མཱད་ལས་སྐྱེས་པའི་བུ་ནི་རུའུ་ཨེལ་ཞེས་པ་ཡིན༌ལ།
GEN 36:11 ཨེ་ལི་ཕཱ་ཟི་ཡི་བུ་རྣམས་ནི་ཐེ་མཱན༌དང༌། ཨོ༌མཱར། ཚཱ༌པཱའོ། གཱ༌ཐམ། ཀེ་ནཱ་ཟཱ་བཅས༌དང༌།
GEN 36:12 ཨེ་སཱབ་ཀྱི་བུ་ཨེ་ལི་ཕཱ་ཟིའི་ཆུན་མ་ཐིམ་ནཱ་ཞེས་པ་ལས་བུ་ཨ་མཱད་ལེག་སྐྱེས༌ཤིང༌། དེ་དག་ནི་ཨེ་སཱབ་ཀྱི་ཆུང་མ་ཨ་དཱ་ཡི་ཚ་བོ་རྣམས་ཡིན༌ནོ།།
GEN 36:13 དེ་ཡང་རུའུ་ཨེལ་གྱི་བུ་རྣམས་ནི་ནཱ་ཧད༌དང༌། ཟེ༌རག ཤམ༌མཱ། མེ་སཱ་ཞེས་བྱ་བ་རྣམས༌སོ། །དེ་དག་ནི་ཨེ་སཱབ་ཀྱི་ཆུང་མ་པཱ་ས་མཱད་ཀྱི་ཚ་བོ་རྣམས་ཡིན༌ནོ།།
GEN 36:14 ཨེ་སཱབ་ཀྱི་ཆུང་མ་ཨོ་ཧོ་ལི་བཱ་མཱ་ནི་ཚིབ་ཨོན་ཞེས་པའི་ཚ་མོ་དང་ཨ་ནཱ་ཞེས་པའི་བུ་མོ་ཡིན༌ལ། ཁོ་མོས་ཨེ་སཱབ་ལ་ཡེ་ཨུ་སི༌དང༌། ཡཱ་ཨེ༌ལཱམ། ཀོ་རཱག་བཅས་བུ་གསུམ་བཙས༌པའོ།།
GEN 36:15 དེ་ཡང་ཨེ་སཱབ་ཀྱི་ཚ་བོ་རྣམས་ལས་ཚོ་དཔོན་དག་ནི་འདི་ལྟར་བྲིས་ཡོད༌དེ། ཨེ་སཱབ་ཀྱི་བུ་སྐྱེས་འགོ་ཨེ་ལི་ཕཱ་ཟི་ཡི་བུ་རྣམས་ལས་ཚོ་དཔོན་དག༌ནི། ཐེ་མཱན༌དང༌། ཨོ༌མཱར། ཚཱ༌པཱའོ། ཀེ་ནཱ༌ཟཱ།
GEN 36:16 ཀོ༌རཱག གཱ༌ཐམ། ཨ་མཱད་ལེག་བཅས༌སོ། །དེ་དག་ནི་ཨེ་དོམ་ཡུལ་དུ་ཨེ་ལི་ཕཱ་ཟི་ནས་མཆེད་པའི་རིགས་རྒྱུད་ཀྱི་ཚོ་དཔོན་རྣམས་ཡིན༌ལ། དེ་དག་ཐམས་ཅད་ཨ་དཱ་ཡི་ཚ་བོ་རྣམས་ཡིན༌ནོ།།
GEN 36:17 དེ་ཡང་ཨེ་སཱབ་ཀྱི་བུ་རུའུ་ཨེལ་གྱི་བུ་རྣམས་ལས་ཚོ་དཔོན་དག༌ནི། ནཱ་ཧད༌དང༌། ཟེ༌རག ཤམ༌མཱ། མེ་སཱ་བཅས༌སོ། །དེ་དག་ནི་ཨེ་དོམ་ཡུལ་ནས་རུའུ་ཨེལ་ལས་མཆེད་པའི་ཚོ་དཔོན་དག་ཡིན༌ལ། དེ་དག་ཐམས་ཅད་ཨེ་སཱབ་ཀྱི་ཆུང་མ་པཱ་ས་མཱད་ཀྱི་ཚ་བོ་རྣམས་ཡིན༌ནོ།།
GEN 36:18 དེ་ཡང་ཨེ་སཱབ་ཀྱི་ཆུང་མ་ཨོ་ཧོ་ལི་བཱ་མཱ་ཡི་བུ་རྣམས་ལས་ཚོ་དཔོན་དག་ནི་ཡེ་ཨུ་སི༌དང༌། ཡཱ་ཨེ༌ལཱམ། ཀོ་རཱག་བཅས༌སོ། །དེ་དག་ནི་ཨེ་སཱབ་ཀྱི་ཆུང་མ་དང་ཨ་ནཱ་ཡི་བུ་མོ་སྟེ་ཨོ་ཧོ་ལི་བཱ་མཱ་ལས་མཆེད་པའི་ཚོ་དཔོན་དག་ཡིན༌ནོ།།
GEN 36:19 གོང་དུ་བརྗོད་པའི་ཚོ་དཔོན་དེ་དག་ནི་ཨེ་སཱབ་ཀྱི་བུ་རབས་ཚ་རྒྱུད་རྣམས་ཡིན༌ཞིང༌། ཨེ་སཱབ་ལ་ཨེ་དོམ་ཞེས་ཀྱང༌བྱའོ།།
GEN 36:20 དེ་ཡང་སྔ་མོ་ནས་ཡུལ་དེར་ཡོད་པའི་ཧོར་མི་རིགས་ཀྱི་སེ་ཨིར་ཞེས་བྱ་བའི་བུ་རྣམས་ནི་འདི་ལྟར་བྲིས་ཡོད༌དེ། ལོད་ཐན༌དང༌། ཤོ༌བཱལ། ཚིབ༌ཨོན། ཨ༌ནཱ།
GEN 36:21 དི༌ཤོན། ཨེ༌བཟིར། དི་ཞན་བཅས༌སོ། །དེ་དག་ནི་ཨེ་དོམ་ཡུལ་གྱི་སེ་ཨིར་གྱི་བུ་རྣམས་ཏེ་ཧོར་མི་རིགས་ཀྱི་ཚོ་དཔོན་རྣམས་ཡིན༌ནོ།།
GEN 36:22 ལོད་ཐན་གྱི་བུ་ནི་ཧོ་རི་དང་ཧེ་མཱམ་ཞེས་པ་གཉིས་ཡིན༌ཞིང༌། ལོད་ཐན་གྱི་སྲིང་མོ་ནི་ཐིམ་ནཱ་ཡིན༌ནོ།།
GEN 36:23 ཤོ་བཱལ་གྱི་བུ་ནི་ཨལ་ཝན༌དང༌། མཱ་ན༌ཧད། ཨེ༌བཱལ། ཤེ༌པོ། ཨོ་ནཱམ་བཅས༌ལྔའོ།།
GEN 36:24 ཚིབ་ཨོན་གྱི་བུ་ནི་ཨ་ཡཱ་དང་ཨ་ནཱ་གཉིས༌སོ། །ཨ་ནཱ་ཞེས་པ་ནི་དེ་སྔར་དབེན་སྟོང་ཡུལ་ནས་ཡབ་ཀྱི་བོང་བུ་འཚོ་བའི་དུས་སུ་ཆུ་ཁོལ་གྱི་ཆུ་མིག་རྙེད་མཁན་དེ་ཡིན༌ནོ།།
GEN 36:25 ཨ་ནཱ་ཡི་བུ་ནི་དི་ཤོན་ཞེས་པ༌དང༌། ཨ་ནཱའི་བུ་མོ་ནི་ཨོ་ཧོ་ལི་བཱ་མཱ་ཞེས་བྱ༌བའོ།།
GEN 36:26 དི་ཤོན་གྱི་བུ་ནི་ཧེམ་དཱན༌དང༌། ཨེས༌པཱན། ཡེད༌རཱན། ཀཱ་རཱན་བཅས༌བཞིའོ།།
GEN 36:27 ཨེ་བཟིར་གྱི་བུ་ནི་པིལ་ཧན༌དང༌། ཟ་ཨ༌ཝན། ཨ་ཀན་གསུམ༌མོ།།
GEN 36:28 དི་ཞན་གྱི་བུ་ནི་ཨུ་ཟཱ་དང་ཨ་རན་གཉིས༌སོ།།
GEN 36:29 དེ་ཡང་ཧོར་མི་རིགས་ཀྱི་ཚོ་དཔོན་རྣམས་ནི་འདི་ལྟར་བྲིས་ཡོད༌དེ། ཚོ་དཔོན་ལོད་ཐན༌དང༌། ཤོ༌བཱལ། ཚིབ༌ཨོན། ཨ༌ནཱ།
GEN 36:30 དི༌ཤོན། ཨེ༌བཟིར། དི་ཞན་བཅས༌སོ། །དེ་དག་ནི་ཧོར་མི་རིགས་ལས་བྱུང་བའི་ཚོ་དཔོན་རྣམས་ཡིན༌ལ། ཁོ་རྣམས་ནི་སེ་ཨིར་ཡུལ་དུ་ཡོད་ཅིང་རང་རང་གི་ཚོ་པའི་ཚོ་དཔོན་ཡིན༌ནོ།།
GEN 36:31 དེ་ཡང་ཡེས་ར་ཨེལ་པ་རྣམས་ལ་རྒྱལ་པོ་གང་གིས་ཀྱང་སྲིད་མ་བསྐྱངས་པའི་སྔོན་དུ་ཨེ་དོམ་ཡུལ་གྱི་རྒྱལ་པོ་རྣམས་ནི་འདི་ལྟར་བྲིས་ཡོད༌དེ།
GEN 36:32 ཨེ་དོམ་ཡུལ་གྱི་རྒྱལ་པོ་ནི་པཱ་ཨོར་གྱི་བུ་པེ་ལཱ་ཡིན༌ཞིང༌། ཁོའི་གྲོང་ཁྱེར་གྱི་མིང་ལ་དིན་ཧ་བཱ་ཞེས་ཟེར༌རོ།།
GEN 36:33 དེ་ནས་པེ་ལཱ་ཚེ་ལས་འདས༌རྗེས། པོ་ཚ་རཱ་གྲོང་ཁྱེར་གྱི་ཟེ་རག་ཅེས་བྱ་བའི་བུ༌སྟེ། ཡོ་བཱབ་ནི་དེའི་རྒྱུན་མཐུད་ནས་རྒྱལ་པོར་བཞུགས་སོ།།
GEN 36:34 དེ་ནས་ཡོ་བཱབ་ཚེ་ལས་འདས༌རྗེས། ཐེ་མཱན་ཡུལ་གྱི་ཧུ་སཱམ་ནི་དེའི་རྒྱུན་མཐུད་ནས་རྒྱལ་པོར་བཞུགས་སོ།།
GEN 36:35 དེ་ནས་ཧུ་སཱམ་ཚེ་ལས་འདས༌རྗེས། པཱ་དད་ཀྱི་བུ་ཧ་དཱད་ཅེས་པ་དེའི་རྒྱུན་མཐུད་ནས་རྒྱལ་པོར་བཞུགས་སོ། །ཧ་དཱད་ནི་མོ་ཨབ་ཀྱི་ཐང་དུ་མིད་ཡཱན་མི་རིགས་འཇོམས་མཁན་དེ་ཡིན༌ལ། ཁོའི་རྒྱལ་སའི་མིང་ལ་ཨ་ཝིད་ཅེས་ཟེར༌རོ།།
GEN 36:36 དེ་ནས་ཧ་དཱད་ཚེ་ལས་འདས༌རྗེས། མཱས་རེ་ཁཱ་ཡུལ་གྱི་སམ་ལཱ་ཞེས་བྱ་བ་དེའི་རྒྱུན་མཐུད་ནས་རྒྱལ་པོར་བཞུགས་སོ།།
GEN 36:37 དེ་ནས་སམ་ལཱ་ཚེ་ལས་འདས༌རྗེས། གཙང་པོའི་ཕར་འགྲམ་གྱི་རེའེ་ཧོ་པེད་ཡུལ་གྱི་སོ་ལོ་ནི་དེའི་རྒྱུན་མཐུད་ནས་རྒྱལ་པོར་བཞུགས་སོ།།
GEN 36:38 དེ་ནས་སོ་ལོ་ཚེ་ལས་འདས༌རྗེས། ཨག་པོར་གྱི་བུ་པཱ་ཨལ་ཧ་ནན་ཞེས་པ་དེའི་རྒྱུན་མཐུད་ནས་རྒྱལ་པོར་བཞུགས་སོ།།
GEN 36:39 དེ་ནས་ཨག་པོར་གྱི་བུ་པཱ་ཨལ་ཧ་ནན་ཚེ་ལས་འདས༌རྗེས། ཧ་དཱར་ནི་དེའི་རྒྱུན་མཐུད་ནས་རྒྱལ་པོར་བཞུགས་སོ། །ཁོའི་རྒྱལ་སའི་མིང་ལ་ཕཱ་ཨུའུ་ཞེས་ཟེར་བ༌དང༌། ཁོའི་ཆུང་མའི་མིང་ལ་མཱ་ཧེ་ཐབ་ཨེལ་ཞེས་ཟེར༌ཞིང༌། ཁོ་མོ་ནི་མཱད་རཱད་ཅེས་པའི་བུ་མོ་དང་མེ་སཱ་ཧབ་ཅེས་པའི་ཚ་མོ་ཡིན༌ནོ།།
GEN 36:40 དེ་ཡང་ཨེ་སཱབ་ནས་བྱུང་བའི་ཚོ་དཔོན་རྣམས་ནི་རང་རང་གི་རིགས་རྒྱུད༌དང༌། སྡོད༌ཡུལ། རུས་མིང་ལྟར་བྲིས་ཡོད༌དེ། ཐིམ་ནཱ༌དང༌། ཨལ༌ཝཱ། ཡཱ༌ཐེད།
GEN 36:41 ཨོ་ཧོ་ལི་བཱ༌མཱ། ཨེ༌ལཱ། ཕི༌ནོན།
GEN 36:42 ཀེ་ནཱ༌ཟཱ། ཐེ༌མཱན། མིབ༌ཚཱར།
GEN 36:43 མག་དི༌ཨེལ། ཨི་རཱམ་བཅས༌སོ། །དེ་དག་ནི་ཨེ་དོམ་མི་རིགས་ཀྱིས་དབང་བསྒྱུར་བའི་ཡུལ་དང་ཁོ་ཚོའི་སྡོད་གནས་ཀྱི་ཚོ་དཔོན་རྣམས་ཡིན༌ལ། ཐམས་ཅད་ཨེ་དོམ་མི་རིགས་ཀྱི་མེས་པོ་ཨེ་སཱབ་ཀྱི་རིགས་རྒྱུད་ཡིན༌ནོ།།
GEN 37:1 དེ་ཡང་ཡ་ཀོབ་ནི་ཀ་ན་ཨན་ཡུལ་དུ་སྡོད་ཅིང་ཡུལ་དེ་ཁོའི་ཕ་བསྡད་མྱོང་བའི་ཡུལ་ཡང་ཡིན༌ནོ།།
GEN 37:2 ཡ་ཀོབ་ཀྱི་མཛད་རྗེས་ནི་འདི་ལྟ༌སྟེ། ཡོ་སེབ་ཀྱིས་ལོ་བཅུ་བདུན་སྟེང་རང་གི་གཅེན་པོ་རྣམས་དང་མཉམ་དུ་ར་ལུག་འཚོས༌ཤིང༌། ཁོ་གཞོན་ནུ་ཞིག་ཡིན༌ལ། རྒྱུན་དུ་ཁོའི་ཕ་ཡི་ཆུན་མ་པིལ་ཧ་དང་ཟིལ་པཱ་ཡི་བུ་རྣམས་དང་མཉམ་དུ༌བསྡད། ཡོ་སེབ་ཀྱིས་གཅེན་པོ་རྣམས་ཀྱི་སྤྱོད་ངན་མཐའ་དག་ཕ་ལ་སྨྲས༌སོ།།
GEN 37:3 ཡེས་ར་ཨེལ་གྱིས་བུ་གཞན་རྣམས་ལས་ཡོ་སེབ་ལ་ཤིན་ཏུ་གཅེས༌སོ། །ཅིའི་ཕྱིར་ཞེ༌ན། ཡོ་སེབ་ནི་ཁོ་རང་ལོ་ན་རྒས་པའི་དུས་སུ་སྐྱེས་པའི་བུ་ཡིན་པའི་ཕྱིར༌རོ། །ཁོས་ཡོ་སེབ་ལ་ཕྱི་གོས་ཁྲ་བོ་ཞིག་ཀྱང༌བཟོས།
GEN 37:4 དེ་ནས་ཡོ་སེབ་ཀྱི་གཅེན་པོ་རྣམས་ཀྱིས་ཕ་ཡིས་ཁོ་རྣམས་ལས་ཡོ་སེབ་ལ་ཤིན་ཏུ་གཅེས་པ་མཐོང༌སྟེ། ཡོ་སེབ་ལ་སྡང་ཞིང་ཡིད་སེམས་མཐུན་པའི་གཏམ་མི༌སྨྲའོ།།
GEN 37:5 དེ་ཡང་ཡོ་སེབ་ཀྱིས་རྨི་ལམ་ཞིག་རྨིས་ཏེ་གཅེན་པོ་རྣམས་ལ་སྨྲས་པ་དང་ཁོ་རྣམས་ཡོ་སེབ་ལ་ལྷག་ཏུ་སྡང་བར༌གྱུར།
GEN 37:6 ཡོ་སེབ་ཀྱིས་གཅེན་པོ་རྣམས་ལ་འདི༌ལྟར། ཁྱོད་ཅག་གིས་བདག་གི་རྨི་ལམ་ལ་གསན་པར༌ཞུ།
GEN 37:7 ལྟོས༌དང༌། རང་ཅག་གིས་ཞིང་ནང་དུ་ཚར་ཕོན་སྡོམ་པའི་སྐབས༌སུ། བདག་གིས་བསྡམས་པའི་ཚར་ཕོན་ནི་གྱེན་དུ་བསྒྲེངས༌ཤིང༌། ཁྱོད་ཅག་གིས་བསྡམས་པའི་ཚར་ཕོན་དག་གིས་བདག་གི་ཚར་ཕོན་གྱི་མཐའ་བསྐོར་ནས་ཕྱག་བཙལ་བ་ཡིན་ཞེས་སྨྲས༌པའོ།།
GEN 37:8 དེ་ནས་ཁོའི་གཅེན་པོ་རྣམས་ན༌རེ། ཁྱོད་ནི་དངོས་གནས་ངེད་ཅག་གི་རྒྱལ་པོར་བྱེད༌དམ། ཁྱོད་ཀྱིས་དངོས་གནས་ངེད་ཅག་ལ་དབང་བསྒྱུར་རམ་ཞེས་སྨྲས་པ༌དང༌། ཁོ་རྣམས་ཀྱིས་ཡོ་སེབ་ཀྱི་རྨི་ལམ་དང་ཁོས་སྨྲས་པའི་སྐད་ཆ་ཐོས་པ་དང་ཁོ་ལ་ལྷག་ཏུ་སྡང་བར་གྱུར༌ཏོ།།
GEN 37:9 ཕྱིས་སུ་ཡོ་སེབ་ཀྱིས་ཡང་རྨི་ལམ་གཞན་ཞིག་རྨིས་ཤིང་ཁོའི་གཅེན་པོ་རྣམས་ལ་འདི༌ལྟར། ལྟོས༌དང༌། ཡང་བདག་གིས་རྨི་ལམ་ཞིག་རྨིས༌ཏེ། རྨི་ལམ་ནང་དུ་ཉི་མ༌དང༌། ཟླ༌བ། སྐར་མ་བཅུ་གཅིག་བཅས་ཀྱིས་བདག་ལ་ཕྱག་བཙལ་བ་ཡིན་ཞེས་སྨྲས༌སོ།།
GEN 37:10 དེ་ནས་ཡོ་སེབ་ཀྱིས་ཐེངས་འདིའི་རྨི་ལམ་དེ་རང་གི་ཕ་ལའང་སྨྲས་པ༌ན། ཕ་ན༌རེ། ཁྱོད་ཀྱི་རྨི་ལམ་དེ་ཅི་ཡིན༌ནམ། བདག༌དང༌། ཁྱོད་ཀྱི་མ༌ཡུམ། ཁྱོད་ཀྱི་གཅེན་པོ་རྣམས་དངོས་གནས་ཁྱོད་ཀྱི་མདུན་དུ་ཡོང་སྟེ་ཁྱོད་ལ་ཕྱག་འཚལ་ལམ་ཞེས་སྨྲས༌སོ།།
GEN 37:11 དེ་ནས་ཁོའི་གཅེན་པོ་རྣམས་ཀྱིས་ཁོ་ལ་ཕྲག་དོག་བྱས་ནའང་ཕ་ཡིས་བུའི་གཏམ་དེ་སེམས་སུ་བཟུང་བ༌རེད།
GEN 37:12 དེ་ཡང་ཡོ་སེབ་ཀྱི་གཅེན་པོ་རྣམས་ནི་ཁོ་རྣམས་ཀྱི་ཕ་ཡི་ར་ལུག་འཚོ་བར་སི་ཀེམ་ཡུལ་དུ་སོང་ཡོད༌ལ།
GEN 37:13 ཡེས་ར་ཨེལ་གྱིས་ཡོ་སེབ་ལ་འདི༌ལྟར། ཁྱོད་ཀྱི་གཅེན་པོ་རྣམས་ཀྱིས་སི་ཀེམ་ཡུལ་དུ་ར་ལུག་འཚོ་བ་མ་ཡིན༌ནམ། ཁྱོད་འདིར་ཤོག༌དང༌། བདག་གིས་ཁྱོད་རང་ཁོ་རྣམས་ཀྱི་གནས་དེར་མངག་པར་བྱ་ཞེས་སྨྲས་པ༌ན། ཡོ་སེབ་ཀྱིས་ལགས་སོ་ཞེས༌སྨྲས།
GEN 37:14 ཡང་ཡེས་ར་ཨེལ་ན༌རེ། ཁྱོད་རང་གི་གཅེན་པོ་རྣམས་བདེའམ་མི་བདེ༌དང༌། ར་ཁྱུ་དང་ལུག་ཁྱུ་བདེའམ་མི་བདེ་ལ་བལྟ་རུ་སོང༌སྟེ། ཕྱིར་ཡོང་ནས་བདག་ལ་སྨྲོས་ཤིག་ཅེས་སྨྲས་པ་དང་ཧེབ་རོན་ལུང་པ་ནས་མངགས༌ཤིང༌། ཁོ་རང་ལམ་ལ་ཆས་ཏེ་སི་ཀེམ་ཡུལ་དུ་སོང༌ངོ༌།།
GEN 37:15 དེ་ནས་མི་གཞན་གྱིས་ཁོ་རང་སྤང་ཐང་དུ་མགོ་འཁོར་ནས་ལམ་ནོར་བ་མཐོང༌སྟེ། ཁྱོད་ཀྱིས་ཅི་ཞིག་འཚོལ་བཞིན་ཡོད་ཅེས་དྲིས་པ༌ན།
GEN 37:16 ཁོ་ན༌རེ། ངས་རང་གི་གཅེན་པོ་རྣམས་འཚོལ་བཞིན༌ཡོད། ཁོ་རྣམས་ཀྱིས་གནས་གང་དུ་ར་ལུག་འཚོ་བཞིན་པ་བདག་ལ་སྨྲ་བར་མཛོད་ཅེས་ཞུས་པ༌ན།
GEN 37:17 མི་དེ་ན༌རེ། ཁོ་རྣམས་ཀྱིས་མཚེར་ས་སྤར༌ཟིན། བདག་གིས་ཐོས་པ་ལྟར༌ན་ཁོ་རྣམས་དོའུ་ཐཱན་ཡུལ་དུ་འགྲོ་བར་སྨྲ་ཞེས༌སྨྲས། དེ་ནས་ཡོ་སེབ་ཀྱིས་རང་གི་གཅེན་པོ་རྣམས་ཀྱི་རྗེས་བསྙེགས༌ཏེ། ཁོ་རྣམས་དོའུ་ཐཱན་དུ་ཡོད་པ་མཐོང༌ངོ༌།།
GEN 37:18 ཡོ་སེབ་ཀྱི་གཅེན་པོ་རྣམས་ཀྱིས་རྒྱང་རིང་ནས་ཁོ་རང་མཐོང་བ་དང་ཉེ་བར་མ་སླེབས་པའི་སྐབས་དང་བསྟུན་ནས་ཁོ་རང་གསོད་པར་གྲོས་བྱས༌ཏེ།
GEN 37:19 ཕན་ཚུན་ལ་འདི༌ལྟར། ལྟོས༌དང༌། རྨི་ལམ་རྨི་མཁན་དེ་ཡོང་བཞིན༌འདུག
GEN 37:20 ཤོག༌དང༌། རང་ཅག་གིས་ཁོ་རང་བསད་ནས་ས་དོང་ཞིག་གི་ནང་དུ་འཕེན་པར༌བྱ། ཁོ་རང་གཅན་གཟན་གྱིས་ཟོས་སོང་ཞེས་སྨྲ་བར༌བྱ། དེས་ན་ཁོའི་རྨི་ལམ་མ་འོངས་པར་ཅི་འདྲ་ཞིག་ཡིན་པར་བལྟ་ཞེས་སྨྲས༌སོ།།
GEN 37:21 དེ་ནས་རུ་བེན་གྱིས་གཏམ་དེ་དག་ཐོས་པ་དང་ཁོ་རྣམས་ལས་ཡོ་སེབ་སྐྱོབ་འདོད་དེ་འདི༌ལྟར། རང་ཅག་གིས་ཁོ་རང་གསོད་མི་རུང་ཞེས༌དང༌།
GEN 37:22 ཡང་ན༌རེ། ཁོ་རང་གསོད་མི༌རུང༌། གནོད་འཚེ་ཅི་ཡང་མི་བྱེད་པར་དབེན་སྟོང་དུ་ཡོད་པའི་ས་དོང་འདིའི་ནང་དུ་འཕེན་པར་བྱ་ཞེས་སྨྲས༌སོ། །རུ་བེན་གྱིས་དེ་ལྟར་སྨྲས་པ་ནི་ཡོ་སེབ་ཁོ་རྣམས་ལས་བསྐྱབས་ཏེ་ཁོའི་ཕ་ལ་སྤྲོད་འདོད་པའི་ཕྱིར༌རོ།།
GEN 37:23 དེ་ནས་ཡོ་སེབ་རང་གི་གཅེན་པོ་རྣམས་ཀྱི་གམ་དུ་སླེབས་པ་དང༌། ཁོ་རྣམས་ཀྱིས་ཡོ་སེབ་ཀྱི་ལུས་ལ་གྱོན་ཡོད་པའི་ཕྱི་གོས་ཁྲ་བོ་དེ་ཕུད༌ཅིང༌།
GEN 37:24 ཁོ་རང་ས་དོང་ནང་དུ༌འཕངས། ས་དོང་དེའི་ནང་དུ་ཆུ་མེད་པར་སྟོང་བ་ཡིན༌ནོ།།
GEN 37:25 དེ་ནས་ཁོའི་གཅེན་པོ་རྣམས་ས་ལ་བསྡད་ནས་ཁ་ཟས་སྤྱད་ཅིང་མགོ་ཡར་བཀྱགས་ནས་བལྟས་པ༌ན། ཡེས་མ་ཨེལ་མི་རིགས་ཀྱི་ཚོང་པ་སྐོར་ཞིག་གིལ་ཨད་ཡུལ་ནས་ཡོང་བཞིན་ཡོད་པ༌དང༌། ཁོ་རྣམས་ཀྱིས་བསུང་རྫས༌དང༌། སྤོས་དཀར། གུ་གུལ་བཅས་རྔ་མོང་དག་ལ་བཀལ་ནས་མར་ཨེ་ཅིབ་ཡུལ་དུ་འགྲོ་བཞིན་པ་མཐོང༌ངོ༌།།
GEN 37:26 དེ་ནས་ཡ་ཧུ་དཱ་ཡིས་སྤུན་གཞན་རྣམས་ལ་འདི༌ལྟར། རང་ཅག་གིས་སྤུན་ཆུང་བསད་ནས་དོན་དེ་གསང་ན་ཅི་ལ༌ཕན།
GEN 37:27 དེའི༌ཕྱིར། རང་ཅག་གིས་ཁོ་རང་ཡེས་མ་ཨེལ་མི་རིགས་ལ་བཙོངས་ན་ལེགས༌སོ། །ཁོ་རང་གསོད་མི་འོས༌ཏེ། ཁོ་ནི་རང་ཅག་དང་ཤ་ཁྲག་གཅིག་ལས་མཆེད་པའི་སྤུན་ཡིན༌པའི་ཕྱིར་རོ་ཞེས་སྨྲས་པ་དང་སྤུན་གཞན་རྣམས་ཀྱིས་ཀྱང་ཁོའི་གཏམ་ལ༌མཉན་ཏོ།།
GEN 37:28 དེ་ནས་ཡེས་མ་ཨེལ་ཞེས་བྱ་བ་སྟེ་མིད་ཡཱན་མི་རིགས་ཀྱི་ཚོང་པ་འགའ་ཤས་ཡུལ་དེ་བརྒྱུད་ནས་འགྲོ་བའི་ཚེ༌ན། ཡོ་སེབ་ཀྱི་གཅེན་པོ་རྣམས་ཀྱིས་ཁོ་རང་ས་དོང་ལས་བླངས༌ཏེ། དངུལ་སྲང་ཉི་ཤུར་ཐག་བཅད་པ་ལྟར་ཁོ་རང་ཡེས་མ་ཨེལ་མི་རིགས་ཀྱི་ཚོང་པ་རྣམས་ལ་བཙོངས་པ༌དང༌། དེ་རྣམས་ཀྱིས་ཁོ་རང་ཨེ་ཅིབ་ཡུལ་དུ་ཁྲིད༌དོ།།
GEN 37:29 དེ་ནས་རུ་བེན་ས་དོང་གི་གམ་དུ་ཡོང་བ་དང་ཡོ་སེབ་མེད་པ་མཐོང་ནས་ཡིད་ཤིན་ཏུ་སྐྱོ་སྟེ་རང་གི་གྱོན་གོས་ཀྱང་བཤགས་པ༌དང༌།
GEN 37:30 སྤུན་རྣམས་ཀྱི་གམ་དུ་སོང༌སྟེ། སྤུན་ཡོ་སེབ་མི༌མཐོང༌། ད་ནི་ང་རང་གང་དུ་འགྲོའམ་ཞེས་སྨྲས༌སོ།།
GEN 37:31 དེ་ནས་གཅེན་པོ་རྣམས་ཀྱིས་ར་ཕོ་ཞིག་བཤས་ཤིང་ཡོ་སེབ་ཀྱི་ཕྱི་གོས་དེ་ཁྲག་གི་ནང་དུ་སྦངས༌རྗེས།
GEN 37:32 མི་ཞིག་གྱོན་གོས་དེ་ཁོ་རྣམས་ཀྱི་ཕ་ཡི་དྲུང་དུ་བསྐྱལ་བར་མངགས༌ཤིང༌། ཕ་ལ་འདི་ལྟར་བརྗོད་པ་སྟེ། ངེད་ཅག་གིས་གྱོན་གོས་འདི་རྙེད་པ༌ཡིན། དེ་ནི་ཁྱེད་ཀྱི་བུ་ཡོ་སེབ་ཀྱི་གྱོན་གོས་ཡིན་མིན་ལ་བལྟ་བར་མཛོད་ཅེས་སྨྲས༌པའོ།།
GEN 37:33 དེ་ནས་ཕ་ཡིས་བུའི་གྱོན་གོས་ཡིན་པ་ཤེས་ཏེ་འདི་སྐད༌དུ། འདི་ནི་བདག་གི་བུ་ཡོ་སེབ་ཀྱི་ཕྱི་གོས་ཡིན༌འདུག ཁོ་ནི་ད་ལྟ་གཅན་གཟན་གྱིས་ཟོས༌སོང༌། བུ་ཡོ་སེབ་དུམ་བུ་དུམ་བུར་བྱས་པ་ཤ་སྟག་རེད་ཅེས་སྨྲས༌ཤིང༌།
GEN 37:34 ཡ་ཀོབ་ཀྱིས་རང་གི་གྱོན་གོས་བཤགས་པ༌དང༌། ལུས་སྨད་དུ་རྩིད་རས་གྱོན༌ཏེ་བུ་ཡི་ཆེད་དུ་ཉིན་དུ་མར་མྱ་ངན༌བྱས།
GEN 37:35 དེ་ནས་ཡ་ཀོབ་ཀྱི་བུ་བུ་མོ་ཐམས་ཅད་ཡོང་ནས་ཁོང་ལ་སེམས་གསོ་བྱས༌ནའང༌། ཁོང་གིས་དེ་དག་གི་སེམས་གསོའི་གཏམ་ལ་མི་ཉན་པར་མ་ཟད་འདི་སྐད༌དུ། བདག་ནི་མྱ་ངན་གྱི་ངང་ནས་གཤིན་པོའི་གནས་ཀྱི་བུ་ཡོ་སེབ་གམ་དུ་འགྲོ་ངེས་ཡིན་ཞེས་སྨྲས་པ་དང་བུ་ཡི་རྐྱེན་གྱིས་ཡིད་སྐྱོ་བའི་ངང་ནས་ངུས༌སོ།།
GEN 37:36 དེ་ཡང་མིད་ཡཱན་པ་དེ་རྣམས་ཀྱིས་ཡོ་སེབ་ཅེས་བྱ་བ་ཨེ་ཅིབ་ཡུལ་དུ་ཁྲིད༌ཅིང༌། ཡང་ཁོ་རང་རྒྱལ་པོ་ཕཱར་ཨོལ་གྱི་ནང་བློན༌ཏེ། རྒྱལ་པོའི་སྐུ་སྲུང་དམག་དཔོན་ཕའོ་ཏི་ཕར་ལ་བཙོངས༌སོ།།
GEN 38:1 སྐབས༌དེར། ཡ་ཧུ་དཱ་རང་གི་སྤུན་ཟླ་རྣམས་དང་ཁ་བྲལ་ནས་ཨ་དུལ་ལཱམ་མི་རིགས་ཀྱི་ཧི་རཱ་ཞེས་པའི་ཁྱིམ་དུ་སོང༌ཞིང༌།
GEN 38:2 ཡ་ཧུ་དཱ་ཡིས་ཁྱིམ་དེ་ནས་ཀ་ན་ཨན་མི་རིགས་ཀྱི་ཤུ་ཨ་ཞེས་པ་དེའི་བུ་མོ་མཐོང་ནས་རང་གི་ཆུང་མར་བླངས་ཤིང་ལུས་འབྲེལ་བྱས་པ༌དང༌།
GEN 38:3 ཁོ་མོར་མངལ་ཆགས་ཏེ་བུ་ཞིག་སྐྱེས་པ་ལ་ཡ་ཧུ་དཱ་ཡིས་བུའི་མིང་ལ་ཨེར་ཞེས་བཏགས༌སོ།།
GEN 38:4 དེ་ནས་ཡང་ཁོ་མོར་མངལ་སྦྲུམ་ནས་བུ་ཞིག་སྐྱེས་པ་ལ་མ་ཡིས་བུའི་མིང་ལ་ཨོ་ནན་ཞེས་བཏགས༌སོ།།
GEN 38:5 དེ་ནས་ཡང་ཁོ་མོར་མངལ་ཆགས་ཏེ་བུ་ཞིག་སྐྱེས་པ་ལ་ཤེ་ལཱ་ཞེས་བཏགས་པ༌དང༌། ཁོ་མོས་བུ་ཤེ་ལཱ་བཙའ་བའི་དུས་སུ་ཡ་ཧུ་དཱ་ནི་ཀཱ་ཟིབ་གྲོང་རྡལ་དུ་ཡོད༌དོ།།
GEN 38:6 དེ་ནས་ཡ་ཧུ་དཱ་ཡིས་བུ་སྐྱེས་འགོ་ཨེར་ལ་ཆུང་མ་ཞིག་བླངས་ཤིང་ཁོ་མོའི་མིང་ལ་ཐལ་མཱར་ཞེས༌ཟེར།
GEN 38:7 འོན༌ཀྱང༌། དཀོན་མཆོག་ཡ་ཝཱེའི་སྤྱན་ལམ་དུ་ཡ་ཧུ་དཱའི་བུ་སྐྱེས་འགོ་ཨེར་ནི་མི་ཐ་ཤལ་ཅན་དུ་མཐོང༌བས། དཀོན་མཆོག་ཡ་ཝཱེས་ཁོ་རང་འཆི་བར་མཛད༌དོ།།
GEN 38:8 དེ་ནས་ཡ་ཧུ་དཱ་ཡིས་བུ་འབྲིང་བ་ཨོ་ནན་ལ་འདི༌ལྟར། ཁྱོད་ནི་རང་གི་གཅེན་པོའི་ཆུང་མར་འགྲོགས་པ༌དང༌། གཅུང་པོའི་འགན་ཁུར་དང་དུ་བླངས་ཏེ་གཅེན་པོའི་ཆེད་དུ་ཁོ་མོར་བུ་ཞིག་སྐྱེས་པར་གྱིས་ཞེས༌སྨྲས།
GEN 38:9 འོན་ཀྱང་ཨོ་ནན་གྱིས་ཁོ་མོར་བུ་སྐྱེས་ནའང་རང་ལ་མི་དབང་བ་ཤེས༌ཏེ། གཅེན་པོར་རིགས་རྒྱུད་མི་འབྱུང་བའི་ཆེད་དུ་ལུས་འབྲེལ་བྱེད་པའི་དུས་སུ་རང་གི་ཁམས་དཀར་ས་རུ་གཏོར་བ༌རེད།
GEN 38:10 དེ་ཡང་དཀོན་མཆོག་ཡ་ཝཱེའི་སྤྱན་ལམ་དུ་ཨོ་ནན་གྱི་ལས་དེ་ནི་ལས་ངན་པར་གཟིགས༌པས། ཁོང་གིས་ཨོ་ནན་ཡང་འཆི་བར་མཛད༌དོ།།
GEN 38:11 དེ་ནས་ཡ་ཧུ་དཱ་ཡི་སེམས་སུ་བུ་ཆུང་བ་ཤེ་ལཱའང་ཁོའི་གཅེན་པོ་གཉིས་ལྟར་འཆིའོ་སྙམ༌སྟེ། མནའ་མ་ཐལ་མཱར་ལ་འདི༌ལྟར། བདག་གི་བུ་ཤེ་ལཱ་ནར་སོན་པའི་བར༌དུ། ཁྱོད་རང་གི་ཕ་གཞིས་སུ་སོང་ནས་ཡུགས་མོར་སྡོད་ཅིག་ཅེས་སྨྲས་པ༌དང༌། ཁོ་མོ་ཕ་གཞིས་སུ་སོང་ནས༌བསྡད་དོ།།
GEN 38:12 དེ་ནས་དུས་ཡུན་རིང་པོ་འགོར་བའི་རྗེས༌སུ། ཡ་ཧུ་དཱའི་ཆུང་མ་ཤུ་ཨ་ཡི་བུ་མོ༌ཤིའོ། །དེ་ནས་ཡ་ཧུ་དཱ་མྱ་ངན་ལས་སངས་ཏེ་ཁོའི་གྲོགས་པོ་ཨ་དུལ་ལཱམ་མི་རིགས་ཀྱི་ཧི་རཱ་ཞེས་པ་དང་མཉམ་དུ་ཐིམ་ནཱ་ཡུལ་གྱི་རང་གི་ལུག་བལ་འབྲེག་མཁན་རྣམས་ཀྱི་གམ་དུ་སོང༌ངོ༌།།
GEN 38:13 དེར་མི་ཞིག་གིས་ཐལ་མཱར་ལ་འདི༌ལྟར། ཁྱོད་ཀྱི་སྒྱུག་པོ་ཐིམ་ནཱ་རུ་རང་གི་ལུག་བལ་འབྲེག་ཏུ་སོང་ཞེས་པ༌ལ།
GEN 38:14 ཐལ་མཱར་གྱིས་ཤེ་ལཱ་ནར་སོན་ཡོད་པ་མཐོང་ཞིང་ཁོས་ད་དུང་རང་ཉིད་ཆུང་མར་མ་བླངས༌པས། ཡུགས་མོའི་གྱོན་གོས་ཕུད་དེ་གདོང་ཁེབས་ཀྱིས་ངོ་བཀབ་པ་དང་ལུས་པོའང་བཀབ༌རྗེས། ཐིམ་ནཱ་རུ་འགྲོ་བའི་ལམ་དུ་ཨེ་ནཱ་ཡིམ་གྱི་མཁར་སྒོའི་འགྲམ་དུ་ཙོག་པུར༌བསྡད།
GEN 38:15 ཡ་ཧུ་དཱ་ཡིས་ཁོ་མོ་མཐོང་སྟེ་སྨད་འཚོང་མ་ཞིག་ཡིན་པར་སྙམ་པ༌སྟེ། ཁོ་མོས་གདོང་ཁེབས་ཀྱིས་ངོ་བཀབ་ཡོད་པའི་ཕྱིར༌རོ།།
GEN 38:16 དེ་ནས་ཡ་ཧུ་དཱ་ཕྱིར་འཁོར་ནས་ཁོ་མོའི་མདུན་དུ་ཡོང་སྟེ་ན༌རེ། ཤོག༌དང༌། ང་རང་ཁྱོད་དང་འགྲོགས་པར་བྱ་ཞེས་སྨྲས༌སོ། །རྒྱུ་མཚན་ནི་ཡ་ཧུ་དཱས་ཁོ་མོ་རང་གི་མནའ་མ་ཡིན་པ་མ་ཤེས་པའི་ཕྱིར༌རོ། །ཐལ་མཱར་ན༌རེ། ཁྱོད་བདག་དང་འགྲོགས་འདོད༌ན། ཁྱོད་ཀྱིས་བདག་ལ་ཅི་ཞིག་སྟེར་རམ་ཞེས་པ༌ལ།
GEN 38:17 ཡ་ཧུ་དཱ་ན༌རེ། བདག་གིས་མི་ཞིག་མངགས་ནས་རང་གི་ར་ཁྱུ་ལས་རེའུ་ཞིག་འཁྱེར་ཡོང་སྟེ་ཁྱོད་ལ་སྟེར་ཞེས༌སྨྲས། ཡང་ཐལ་མཱར་ན༌རེ། ཁྱོད་ཀྱིས་རེའུ་མ་བསྐྱལ་བའི་སྔོན༌ལ། བདག་ལ་གཏའ་མ་ཅི་ཞིག་འཇོག་གམ་ཞེས་སྨྲས་པ༌ན།
GEN 38:18 ཡང་ཡ་ཧུ་དཱ་ན༌རེ། བདག་གིས་ཁྱོད་ལ་གཏའ་མ་ཅི་ཞིག་འཇོག་གམ་ཞེས་སྨྲས༌ཤིང༌། ཡང་ཐལ་མཱར་ན༌རེ། ཁྱོད་ཀྱི་ཐམ་ག༌དང༌། ཐམ་གའི་རྒྱུན༌བུ། ལག་ཏུ་ཐོགས་པའི་མཁར་བ་བཅས་འཇོག་པར་མཛོད་ཅིག་ཅེས་སྨྲས་པ༌དང༌། ཡ་ཧུ་དཱ་ཡིས་དངོས་པོ་དེ་དག་ཁོ་མོར་སྤྲད༌རྗེས། ཁོ་མོ་དང་ལུས་འབྲེལ་བྱས་ཤིང་ཁོ་མོར་ཡ་ཧུ་དཱ་ལས་མངལ་སྦྲུམ་པར༌གྱུར།
GEN 38:19 དེ་ནས་ཁོ་མོ་ཡར་ལངས་ནས་སོང་བ་དང༌། གདོང་ཁེབས་བླངས་ཏེ་ཡང་ཡུགས་མོའི་གྱོན་གོས་ལུས་ལ་གྱོན༌ཏོ།།
GEN 38:20 ཡ་ཧུ་དཱ་ཡིས་རང་གི་གྲོགས་པོ་ཧི་རཱ་ལ་རེའུ་ཞིག་བསྐུར༌ཏེ། བུད་མེད་དེ་ལས་གཏའ་མ་ཕྱིར་ལེན་པར་ཕྱིན་ནའང་བུད་མེད་དེ་མ་རྙེད༌པས།
GEN 38:21 ཡུལ་དེ་གའི་སྐྱེས་པ་རྣམས་ལ་ཨེ་ནཱ་ཡིམ་གྱི་ལམ་ཁར་སྡོད་པའི་ཆོས་རྫུ་སྨད་འཚོང་མ་ནི་གང་དུ་ཡོད་ཅེས་དྲིས་པ༌ན། དེ་རྣམས་ཀྱིས་འདི་རུ་ཆོས་རྫུ་སྨད་འཚོང་མ་མེད་ཅེས་ལན་བཏབ༌བོ།།
GEN 38:22 དེ་ནས་ཧི་རཱ་ཕྱིར་ཡ་ཧུ་དཱའི་དྲུང་དུ་སོང་སྟེ་འདི༌ལྟར། ངས་ཁོ་མོ་རྙེད་མ༌བྱུང༌། ཡུལ་དེའི་སྐྱེས་པ་རྣམས་ཀྱིས་འདི་རུ་ཆོས་རྫུ་སྨད་འཚོང་མ་མེད་ཟེར་ཞེས་སྨྲས་པ༌དང༌།
GEN 38:23 ཡ་ཧུ་དཱ་ན༌རེ། ལྟོས༌དང༌། བདག་གིས་རེའུ་བསྐྱལ་ནའང་ཁྱོད་ཀྱིས་ཁོ་མོ་བཙལ་ནས་མ༌རྙེད། མི་གཞན་གྱིས་རང་ཅག་ལ་འཕྱ་སྨོད་མི་བྱེད་པའི༌ཕྱིར། ཁོ་མོར་ཁྱེར་ན་འཁྱེར་དུ་ཆུག་ཅེས་སྨྲས༌སོ།།
GEN 38:24 དེ་ནས་ཟླ་བ་གསུམ་ཙམ་འགོར༌རྗེས། མི་ཞིག་གིས་ཡ་ཧུ་དཱ་ལ་འདི་ལྟར་སྨྲས༌པ། ཁྱོད་ཀྱི་མནའ་མ་ཐལ་མཱར་ནི་སྨད་འཚོང་མར་གྱུར་པར་མ༌ཟད། ཁོ་མོས་ལོག་གཡེམ་བྱས་ཏེ་མངལ་སྦྲུམ་འདུག་ཅེས་པ༌ན། ཡ་ཧུ་དཱ་ན༌རེ། ཁོ་མོ་དྲུད་ཡོང་ནས་མེར་བསྲེག་པར་གྱིས་ཞེས་སྨྲས༌སོ།།
GEN 38:25 དེ་ནས་ཐལ་མཱར་དྲུད་ནས་ཡོང་བའི་སྐབས༌སུ། ཁོ་མོས་རང་གི་སྒྱུག་པོར་ངག་འཕྲིན་ཞིག་བསྐུར་བ༌སྟེ། དངོས་པོ་འདི་དག་སུ་ཞིག་གི་ཡིན༌ན། བདག་ལ་དེ་ལས་མངལ་སྦྲུམ་པ༌ཡིན། དེའི༌ཕྱིར། ཁྱོད་ཀྱིས་ཐམ་ག༌དང༌། ཐམ་གའི་རྒྱུན༌བུ། མཁར་བ་འདི་དག་སུ་ཞིག་གི་ཡིན་པ་ངོས་འཛིན་པར་གྱིས་ཞེས་མི་ཞིག་ཡ་ཧུ་དཱའི་དྲུང་དུ༌མངགས།
GEN 38:26 དེ་ནས་ཡ་ཧུ་དཱས་ཀྱང་དངོས་པོ་དེ་དག་ངོས་ཟིན༌ཏེ། ཁོ་མོ་ནི་བདག་ལས་ཀྱང་དྲང་པོ་ཡིན༌ཏེ། བདག་གིས་ཁོ་མོ་རང་གི་བུ་ཤེ་ལཱ་ལ་ཆུང་མར་མ་བྱིན་པའི་ཕྱིར་ཡིན་ཞེས་སྨྲས༌སོ། །དུས་དེ་ནས་བཟུང་ཡ་ཧུ་དཱ་ཁོ་མོ་དང་ལུས་འབྲེལ་མ་མྱོང༌ངོ༌།།
GEN 38:27 དེ་ཡང་ཐལ་མཱར་བུ་བཙའ་རན་ལ་སླེབས་པའི་སྐབས༌སུ། ཁོ་མོའི་མངལ་དུ་མཚེ་མ་ཞིག་ཆགས་ཡོད་པ་ཡིན༌ནོ།།
GEN 38:28 ཁོ་མོས་བུ་བཙའ་བའི་དུས༌སུ། ཕྲུ་གུ་ཞིག་གི་ལག་པ་ཐོག་མར་མངལ་ལས་ཐོན་པ༌དང༌། སྐྱེ་གཡོག་མས་སྐུད་པ་དམར་པོ་ཕྲུ་གུའི་ལག་པར་མདུད༌དེ། འདི་ནི་ཕྲུ་གུ་ཐོག་མ་ཡིན་ཞེས་སྨྲས༌སོ།།
GEN 38:29 དེ་ནས་ཅུང་མ་འགོར་བར་ཕྲུ་གུའི་ལག་པ་ཕྱིར་མངལ་ནང་དུ་བསྐུམས་པ༌དང༌། ཕྲུ་གུ་གཞན་དེ་ཐོག་མར༌བཙས། དེ་ནས་སྐྱེ་གཡོག་མ་ན༌རེ། ཁྱོད་ཅིའི་ཕྱིར་འཚང་ནས་ཡོང་ངམ་ཞེས་སྨྲས་པའི༌ཕྱིར། ཕྲུ་གུ་དེའི་མིང་ལ་ཕེ་རེལ་ཟི་ཞེས་བཏགས༌སོ།།
GEN 38:30 དེའི་རྗེས་ནས་ལག་པར་སྐུད་པ་དམར་པོ་མདུད་པའི་ཕྲུ་གུའང་བཙས་པ༌དང༌། ཕྲུ་གུ་དེའི་མིང་ལ་ཟེ་རག་ཅེས་བཏགས༌སོ།།
GEN 39:1 དེ་ཡང་ཡོ་སེབ་ནི་ཨེ་ཅིབ་ཡུལ་དུ་ཁྲིད་པ༌དང༌། ཨེ་ཅིབ་ཀྱི་མི་ཞིག་སྟེ་ཕཱར་ཨོལ་གྱི་ནང་བློན་དང་རྒྱལ་པོའི་སྐུ་སྲུང་དམག་དཔོན་ཕའོ་ཏི་ཕར་གྱིས་ཡེས་མ་ཨེལ་མི་རིགས་ཀྱི་ཚོང་པ་དེ་རྣམས་ལས་ཡོ་སེབ་ཉོས༌སོ།།
GEN 39:2 དེ་ནས་ཡོ་སེབ་ནི་ཨེ་ཅིབ་ཡུལ་གྱི་རང་གི་བདག་པོ་ཕའོ་ཏི་ཕར་གྱི་ཁྱིམ་དུ་བསྡད༌ཅིང༌། དཀོན་མཆོག་ཡ་ཝཱེ་ཡང་ཁོ་དང་མཉམ་དུ་བཞུགས་པས་ཁོའི་བྱ་བ་ཐམས་ཅད་བདེ་བར༌གྲུབ།
GEN 39:3 བདག་པོ་ཕའོ་ཏི་ཕར་གྱིས་དཀོན་མཆོག་ཡ་ཝཱེ་ཁོ་དང་མཉམ་དུ་བཞུགས་པ་དང་དཀོན་མཆོག་ཡ་ཝཱེས་ཁོའི་བྱ་བ་ཐམས་ཅད་བདེ་བར་འགྲུབ་པར་མཛད་པ་མཐོང༌བས།
GEN 39:4 ཡོ་སེབ་ལ་བདག་པོ་ཕའོ་ཏི་ཕར་གྱི་མདུན་དུ་ཐུགས་རྗེ་ཐོབ་པ་དང་ཁོས་བདག་པོ་ལ་ཞབས་ཕྱི་བསྒྲུབས་པར་མ༌ཟད། བདག་པོས་ཁོ་རང་ཁྱིམ་ལས་གཉེར་མཁན་དུ་བསྐོས་ཤིང་རྒྱུ་ནོར་ཐམས་ཅད་ཁོ་ལ་བཅོལ་བ༌རེད།
GEN 39:5 དུས་དེ་ནས༌བཟུང༌། དཀོན་མཆོག་ཡ་ཝཱེས་ཡོ་སེབ་ཀྱི་རྐྱེན་ལ་བརྟེན་ནས་ཨེ་ཅིབ་ཀྱི་མི་དེའི་ཁྱིམ་ལ་བྱིན་རླབས་གནང༌སྟེ། བདག་པོའི་ཁྱིམ་ཚང་ཕྱི་ནང་ཐམས་ཅད་ལ་བྱིན་རླབས་ཐོབ༌བོ།།
GEN 39:6 དེ་ལྟར་བདག་པོས་རྒྱུ་ནོར་ཐམས་ཅད་ཡོ་སེབ་ལ་བཅོལ་བ༌དང༌། རང་གི་བཟའ་བཏུང་ཁོ་ན་མ༌གཏོགས། དོན་གཞན་དག་ལ་སེམས་ཁུར་ཅི་ཡང་མི་བྱེད༌དོ།། དེ་ཡང་ཡོ་སེབ་ནི་སྐྱེས་གཟུགས་ལེགས་ཤིང་ཞལ་རས་མཛེས་པའི་ཕོ་གསར་ཞིག་ཡིན༌ནོ།།
GEN 39:7 དོན་དེའི་རྗེས༌སུ། བདག་པོའི་ཆུང་མས་ཡོ་སེབ་ལ་ཟུར་མིག་བསྟན༌ཏེ། ཁྱོད་བདག་དང་འགྲོགས་པར་གྱིས་ཞེས༌སྨྲས།
GEN 39:8 འོན་ཀྱང་ཡོ་སེབ་ཀྱིས་དོན་དེ་ཁས་མ་བླངས་པར་ཁོ་མོ་ལ་འདི༌ལྟར། ལྟོས༌དང༌། བདག་པོས་རྒྱུ་ནོར་ཐམས་ཅད་བདག་ལ་བཅོལ་བ༌དང༌། ཁྱིམ་ཚང་ལ་སེམས་ཁུར་ཅི་ཡང་མི༌བྱེད།
GEN 39:9 ཁྱིམ་འདི་རུ་བདག་ལས་དབང་ཅན་ཞིག༌མེད། བདག་པོས་ཁྱོད་རང་ཁོ་ན་ལས༌གཞན། བདག་ལ་མ་བཅོལ་བ་གཅིག་ཀྱང་མེད༌དེ། ཅིའི་ཕྱིར་ཞེ༌ན། ཁྱོད་ནི་བདག་པོའི་ཆུང་མ་ཡིན་པའི་ཕྱིར༌རོ། །དེའི༌ཕྱིར། བདག་གིས་ལས་ངན་པ་འདི་ལྟ་བུ་བྱེད་རུང༌ངམ། གལ་ཏེ་འདི་ལྟར་བྱས་ན་བདག་གིས་དཀོན་མཆོག་ལ་འགལ་བའི་སྡིག་པ་བྱས་པ་ཡིན་ཞེས་སྨྲས༌སོ།།
GEN 39:10 ཕྱིས་སུའང་ཁོ་མོས་ནམ་རྒྱུན་ཡོ་སེབ་ལ་དེ་ལྟར་སྨྲས་ཀྱང་ཡོ་སེབ་ཀྱིས་དོན་དེ་ཁས་མི་ལེན་པར་མ༌ཟད། ཁོ་མོ་དང་མཉམ་དུའང་མ་བསྡད༌དོ།།
GEN 39:11 ཉིན་ཞིག༌ལ། ཡོ་སེབ་ཁྱིམ་ནང་དུ་ཞབས་ཕྱི་བསྒྲུབ་ཏུ་སོང༌ཞིང༌། ཁྱིམ་དུ་ཞབས་ཕྱི་པ་གཞན་སུ་ཡང་མེད༌པས།
GEN 39:12 བུད་མེད་དེས་ཡོ་སེབ་ཀྱི་ལྭ་བ་ནས་བཟུང༌སྟེ། ཁྱོད་བདག་དང་འགྲོགས་པར་གྱིས་ཞེས་སྨྲས་པ༌ན། ཡོ་སེབ་ཀྱིས་ལྭ་བ་བསྐྱུར་ཏེ་སྒོའི་ཕྱི་རོལ་ཏུ་བྲོས༌སོ།།
GEN 39:13 དེ་ནས་བུད་མེད་དེས་ཡོ་སེབ་ཀྱིས་ལྭ་བ་བསྐྱུར་ནས་བྲོས་པ་མཐོང་བ༌དང༌།
GEN 39:14 ཞབས་ཕྱི་པ་གཞན་དག་བོས༌ཏེ། ཁྱོད་ཅག་གིས་ལྟོས༌དང༌། བདག་པོས་ཨིབ་རི་པ་ཞིག་རང་ཁྱིམ་དུ་ཁྲིད་ཡོང་ནས་རང་ཅག་ལ་བརྙས་བཅོས་བྱེད༌དོ། །ཡོ་སེབ་ང་རང་ལ་འགྲོགས་སུ་ཡོང་བ་དང་ངས་སྐད་ཆེན་པོས་ཀི་བཏབ་པ༌ཡིན།
GEN 39:15 ཁོས་ཀི་སྒྲ་ཐོས་པ་དང་ལྭ་བ་འདི་རུ་བསྐྱུར་ཏེ་སྒོའི་ཕྱི་རོལ་ཏུ་བྲོས་སོང་ཞེས་སྨྲས༌སོ།།
GEN 39:16 དེ་ནས་བུད་མེད་དེས་ཡོ་སེབ་ཀྱི་ལྭ་བ་ཁོ་མོའི་གནས་དེར་བཞག་སྟེ་བདག་པོ་ཡོང་བར་སྒུག་པ༌རེད།
GEN 39:17 བདག་པོ་ཡོང་བ་དང་ཁོ་མོས་འདི༌ལྟར། ཁྱོད་ཀྱིས་རང་ཁྱིམ་དུ་ཁྲིད་ཡོང་བའི་ཨིབ་རི་པ་གཡོག་པོ་དེས་ང་རང་རྩེད་སྤྱད་བྱེད་པར་རྩོམ་པ༌ན།
GEN 39:18 ངས་སྐད་ཆེན་པོས་ཀི་བཏབ་པ་དང་ཁོས་ལྭ་བ་བསྐྱུར་ནས་བྲོས་སོང་ཞེས་སྨྲས༌སོ།།
GEN 39:19 དེ་ཡང་ཡོ་སེབ་ཀྱི་བདག་པོས་རང་གི་ཆུང་མས་ཁྱོད་ཀྱི་གཡོག་པོས་བདག་ལ་འདི་ལྟར་བྱས་བྱུང་ཞེས་སྨྲས་པའི་གཏམ་ཐོས་པ་དང་ཤིན་ཏུ་ཁྲོས༌ཏེ།
GEN 39:20 རྒྱལ་པོའི་བཙོན་པ་བཙོན་དུ་འཇུག་སར་ཡོ་སེབ་ཀྱང་བཙོན་ལ་བཅུག་པ༌དང༌། ཡོ་སེབ་དེ་རུ་བཙོན་དུ༌བསྡད།
GEN 39:21 འོན༌ཀྱང༌། དཀོན་མཆོག་ཡ་ཝཱེ་ནི་ཡོ་སེབ་དང་ལྷན་དུ་བཞུགས་ཤིང་ཁོང་གིས་ཡོ་སེབ་ལ་ཐུགས་རྗེས་གཟིགས༌པས། བཙོན་བདག་གི་མིག་མདུན་ནས་ཀྱང་ཁོ་རང་ལ་ཐུགས་རྗེ་ཐོབ༌བོ།།
GEN 39:22 དེ་ནས་བཙོན་བདག་གིས་བཙོན་ཁང་ནང་གི་བཙོན་པ་ཐམས་ཅད་ཡོ་སེབ་ལ་བཅོལ༌བས། བཙོན་ཁང་གི་བྱ་བ་གང་ཡིན་ཡང་ཡོ་སེབ་བརྒྱུད་དགོས༌སོ།།
GEN 39:23 ཡོ་སེབ་ཀྱིས་བསྒྲུབས་པའི་བྱ་བར་བཙོན་བདག་གིས་ཀྱང་བརྟག་དཔྱོད་མི་བྱེད༌དེ། དཀོན་མཆོག་ཡ་ཝཱེ་ནི་ཡོ་སེབ་དང་ལྷན་དུ་བཞུགས༌ཤིང༌། ཁོང་གིས་ཡོ་སེབ་ཀྱི་བྱ་བ་ཐམས་ཅད་བདེ་བར་འགྲུབ་པར་མཛད་པའི་ཕྱིར༌རོ།།
GEN 40:1 དེ་ཡང་དོན་དེའི་རྗེས་སུ་ཨེ་ཅིབ་ཀྱི་རྒྱལ་པོའི་ཆང་གཉེར་བློན་ཆེན་དང་གསོལ་དཔོན་བློན་ཆེན་གཉིས་རང་གི་རྒྱལ་པོ་དང་འགལ༌བས།
GEN 40:2 ཕཱར་ཨོལ་ཆང་གཉེར་བློན་ཆེན་དང་གསོལ་དཔོན་བློན་ཆེན་གཉིས་ལ་ཐུགས་ཤིན་ཏུ་ཁྲོས༌ཏེ།
GEN 40:3 ཁོ་གཉིས་རྒྱལ་པོའི་སྐུ་སྲུང་དམག་དཔོན་གྱི་བཙོན་ཁང་དུ༌བཅུག དེ་ནི་ཡོ་སེབ་བཙོན་དུ་བཅུག་པའི་གནས༌དེའོ།།
GEN 40:4 དེ་ནས་སྐུ་སྲུང་དམག་དཔོན་གྱིས་མི་དེ་གཉིས་ཀྱང་ཡོ་སེབ་ལ་བཅོལ་བ༌དང༌། ཡོ་སེབ་ཀྱིས་དེ་གཉིས་ལ་ཞབས་ཕྱི་བསྒྲུབས༌ཤིང༌། ཁོ་རྣམས་དུས་ཡུན་རིང་པོ་ཞིག་ལ་བཙོན་ཁང་ནས་མཉམ་དུ་བསྡད༌དོ།།
GEN 40:5 དེ་ཡང་བཙོན་དུ་བཅུག་པའི་རྒྱལ་པོའི་ཆང་གཉེར་པ་དང་གསོལ་དཔོན་གཉིས་ཀྱིས་ཞག་གཅིག་ལ་རྨི་ལམ་རེ་རྨིས༌ཤིང༌། རྨི་ལམ་རེ་ལ་ནང་དོན་རེ་ཡོད་པ༌རེད།
GEN 40:6 ཞོགས་པར་སླེབས༌དུས། ཡོ་སེབ་མི་དེ་གཉིས་ཀྱི་གམ་དུ་སོང་བ་དང་ཁོ་གཉིས་ཡིད་སྐྱོ་བའི་གནས་སུ་ལྷུང་བའི་ཉམས་འགྱུར་མཐོང༌སྟེ།
GEN 40:7 ཁོས་ཕཱར་ཨོལ་གྱི་བློན་ཆེན་གཉིས་ཏེ་རང་དང་མཉམ་དུ་བདག་པོའི་བཙོན་དུ་བཅུག་ཡོད་པར་འདི༌ལྟར། དེ་རིང་ཁྱོད་གཉིས་ཀྱི་གདོང་ལ་སྐྱོ་བའི་ཉམས་ཤིག་ཤར་ཡོད་པའི་རྒྱུ་མཚན་ཅི་ཞེས་དྲིས་པ༌ན།
GEN 40:8 ཁོ་གཉིས་ན༌རེ། ངེད་གཉིས་ཀྱིས་རྨི་ལམ་རེ་རྨིས་ནའང་རྨི་ལམ་ལ་བརྟག་མཁན་མེད་ཅེས་ལན་བཏབ་པ༌དང༌། ཡང་ཡོ་སེབ་ན༌རེ། རྨི་ལམ་ལ་བརྟག་མཁན་ནི་དཀོན་མཆོག་མ་ཡིན༌ནམ། ཁྱོད་གཉིས་ཀྱིས་རྨི་ལམ་དེ་བདག་ལ་ཤོད་ཅིག་ཅེས་སྨྲས༌སོ།།
GEN 40:9 དེ་ནས་ཆང་གཉེར་པས་རང་གི་རྨི་ལམ་ཡོ་སེབ་ལ་འདི༌ལྟར། བདག་གི་རྨི་ལམ་ནང་དུ་ངའི་མདུན་དུ་རྒུན་འབྲུམ་ཤིང་ཞིག་ཡོད༌ཅིང༌།
GEN 40:10 རྒུན་ཤིང་དེ་ལ་ཡལ་ག་གསུམ་ཡོད་པ༌དང༌། དེ་དག་ལ་ལོ་མ་འབུས་ནས་མེ་ཏོག་བཞད་པ༌དང༌། རྒུན་ཤིང་དེ་ལ་རྒུན་འབྲུམ་ཡང་སྨིན༌ཡོད།
GEN 40:11 བདག་གི་ལག་ཏུ་ཕཱར་ཨོལ་གྱི་ཕོར་བ་ཡོད་པ་དང་བདག་གིས་རྒུན་འབྲུམ་ཕོར་བའི་ནང་བཙིར༌རྗེས། ཕོར་བ་དེ་རྒྱལ་པོའི་ཕྱག་ཏུ་ཕུལ་ཞེས་སྨྲས༌པའོ།།
GEN 40:12 དེ་ནས་ཡོ་སེབ་ན༌རེ། ཁྱོད་ཀྱི་རྨི་ལམ་ལ་བརྟགས་ན་འདི་ལྟ༌སྟེ། ཡལ་ག་གསུམ་ནི་ཉིན་གསུམ་ཡིན༌ལ།
GEN 40:13 ཉིན་གསུམ་གྱི་ནང༌དུ། ཕཱར་ཨོལ་གྱིས་ཁྱོད་རང་བཙོན་ཁང་ནས་ཕྱིར་གཏོང་བ༌དང༌། ཁྱོད་ལ་དཔོན་ས་སྔར་བཞིན་འཐོབ༌ཅིང༌། ཁྱོད་དེ་སྔར་ཆང་གཉེར་བློན་ཆེན་ཡིན་པ༌བཞིན། མུ་མཐུད་ནས་རྒྱལ་པོའི་ཕྱག་ཏུ་ཕོར་བ་འབུལ་བར་འགྱུར༌རོ།།
GEN 40:14 འོན་ཀྱང་ཁྱོད་རང་བདེ་བླག་ཡིན་པའི་དུས་སུ་ང་རང་སེམས་སུ་འཛིན་པ་དང་ཐུགས་རྗེ་གནང་བར༌ཞུ། ཕཱར་ཨོལ་གྱི་དྲུང་དུའང་བདག་གླེང༌ནས། ང་རང་བཙོན་ལས་སྐྱོབ་པར༌ཞུ།
GEN 40:15 བདག་ནི་དངོས་གནས་ཨིབ་རི་པའི་ཡུལ་ནས་མི་གཞན་གྱིས་བཙན་ཁྲིད་བྱས་ཏེ་འདིར་ཡོང་བ༌དང༌། བདག་གིས་གནས་འདི་རུ་བཙོན་དུ་འཇུག་དགོས་པའི་ལས་ཅི་ཡང་བྱས་མེད་ཅེས་སྨྲས༌པའོ།།
GEN 40:16 དེ་ཡང་ཡོ་སེབ་ཀྱིས་རྨི་ལམ་ལ་ལེགས་པར་བརྟགས་པ་གསོལ་དཔོན་གྱིས་མཐོང༌སྟེ། ཡོ་སེབ་ལ་འདི༌ལྟར། ངས་རྨི་ལམ་ནང་དུ་བག་ལེབ་སླེ་བོ་གསུམ་མགོ་ལ་ཁུར༌ཞིང༌།
GEN 40:17 སླེ་བོ་གོང་མའི་ནང་དུ་ཕཱར་ཨོལ་ལ་གཡོས་སྦྱོར་བྱས་པའི་ཟས་རིགས་བསྲེག་མ་སྣ་ཚོགས་ཡོད་པ༌དང༌། བྱ་རྣམས་འཕུར་ཡོང་སྟེ་ཟོས་པ་ཡིན་ཞེས་སྨྲས༌སོ།།
GEN 40:18 དེ་ནས་ཡོ་སེབ་ན༌རེ། ཁྱོད་ཀྱི་རྨི་ལམ་ལ་བརྟགས་ན་འདི་ལྟ༌སྟེ། སླེ་བོ་གསུམ་ནི་ཉིན་གསུམ་ཡིན༌ལ།
GEN 40:19 ཉིན་གསུམ་གྱི་ནང༌དུ། ཕཱར་ཨོལ་གྱིས་ཁྱོད་ཀྱི་མགོ་བོ་གཅོད་པ༌དང༌། ཁྱོད་ཀྱི་བེམ་པོ་ལྗོན་ཤིང་གི་སྟེང་དུ་འགེལ༌ཞིང༌། བྱ་རྣམས་འཕུར་ཡོང་ནས་ཁྱོད་ཀྱི་བེམ་པོ་ཐོག་གི་ཤ་ཐམས་ཅད་བཟའ་བར་འགྱུར་ཞེས་སྨྲས༌སོ།།
GEN 40:20 དེ་ནས་ཉིན་གསུམ་པར་སླེབས་པ༌དང༌། ཉིན་དེ་ནི་ཕཱར་ཨོལ་གྱི་འཁྲུངས་སྐར་ཡིན༌པས། ཁོང་གིས་ཞབས་ཕྱི་པ་རྣམས་ལ་གསོལ་སྟོན་གཟབ་རྒྱས་བསྡུས༌ཤིང༌། བཙོན་ཁང་དུ་ཡོད་པའི་ཆང་གཉེར་པ་དང་གསོལ་དཔོན་གཉིས་ཀྱང་ཁྲིད་ཡོང་བ༌དང༌།
GEN 40:21 ཆང་གཉེར་པ་ནི་སྔར་བཞིན་ཆང་གཉེར་བློན་ཆེན་དུ་བསྐོས་པ༌དང༌། ཁོས་སྔར་བཞིན་ཕཱར་ཨོལ་གྱི་ཕྱག་ཏུ་ཕོར་བ་ཕུལ་ཏོ།།
GEN 40:22 འོན༌ཀྱང༌། ཡོ་སེབ་ཀྱིས་རྨི་ལམ་ལ་བརྟགས་པ་བཞིན་གསོལ་དཔོན་ནི་སྡོང་པོའི་སྟེང་དུ༌བཀལ།
GEN 40:23 ཡིན་ནའང་ཆང་གཉེར་བློན་ཆེན་གྱིས་ཡོ་སེབ་སེམས་སུ་མ་བཟུང་ཞིང་གཏན་དུ་བརྗེད་པར་གྱུར༌ཏོ།།
GEN 41:1 དེ་ཡང་ལོ་གཉིས་འགོར་བའི་རྗེས་སུ་ཕཱར་ཨོལ་གྱིས་རྨི་ལམ་ཞིག་རྨིས༌ཤིང༌། རྨི་ལམ་ནང་དུ་ཁོ་རང་ནཱ་ཡོལ་གཙང་པོའི་འགྲམ་དུ་བསྡད་ཡོད་པ༌ལ།
GEN 41:2 བ་མོ་བདུན་གཙང་པོ་ལས་ཚུར་ཡོང་བ༌དང༌། བ་མོ་དེ་དག་ལྟ་ན་སྡུག་ཅིང་ཤ་ཤེད་རྒྱས་པ་ཞིག་ཡིན་ལ་ཆུ་ནང་གི་རྩྭ་སྔོན་ཟོས་ནས༌བསྡད།
GEN 41:3 དེ་ནས་ཡང་བ་མོ་བདུན་གཙང་པོ་ལས་ཚུར་ཡོང་བ༌དང༌། བ་མོ་དེ་དག་ཤིན་ཏུ་བཙོག་ཅིང་ལུས་ཟུངས་རིད་པོ་ཡིན༌ལ། ཤ་ཤེད་རྒྱས་པའི་བ་མོ་བདུན་པོ་དང་མཉམ་དུ་གཙང་པོའི་འགྲམ་དུ༌བསྡད།
GEN 41:4 དེ་ནས་ཤིན་ཏུ་བཙོག་ཅིང་ལུས་ཟུངས་རིད་པའི་བ་མོ་བདུན་པོས་ལྟ་ན་སྡུག་ཅིང་ཤ་ཤེད་རྒྱས་པའི་བ་མོ་བདུན་པོ་ཟོས་པ༌དང༌། དེ་ནས་ཕཱར་ཨོལ་གཉིད་སད༌དོ།།
GEN 41:5 ཕཱར་ཨོལ་སླར་ཡང་གཉིད་དུ་ཡུར་བ་དང་རྨི་ལམ་རྨིས༌སོ། །རྨི་ལམ་གཉིས་པའི་ནང༌དུ། གྲོ་ཡི་རྩི་ཤིང་གཅིག་ལ་སྙེ་མ་བདུན་ཐོགས༌ཤིང༌། སྙེ་མ་རེ་རེ་ནི་ཁ་གང་ཞིང་འབྲས་བུ་སྨིན་ཡོད༌དོ།།
GEN 41:6 དེ་ནས་ཡང་སྙེ་མ་བདུན་ཐོགས༌ཤིང༌། སྙེ་མ་དེ་དག་ནི་ཤིན་ཏུ་ཕྲ་ཞིང་འབྲས་བུ་མ་སྨིན་པ་དང་ཤར་རླུང་གིས་བསྐམས་པར་གྱུར༌ཏོ།།
GEN 41:7 དེར་སྙེ་མ་ཤིན་ཏུ་ཕྲ་མོ་དེ་དག་གིས་སྙེ་མ་ཁ་གང་ཞིང་འབྲས་བུ་སྨིན་པ་དེ་དག་ཟོས་པར༌གྱུར། དེ་ནས་ཕཱར་ཨོལ་གཉིད་སད་པ་དང་དོན་དེ་རྨི་ལམ་ཡིན་པ་ཤེས༌སོ།།
GEN 41:8 ནམ་ལངས་པ་དང་ཕཱར་ཨོལ་གྱི་སེམས་འཁྲུགས་པར་གྱུར༌པས། ཨེ་ཅིབ་ཡུལ་གྱི་མོ་པ་དང་བློ་གྲོས་ཅན་ཐམས་ཅད་བོས༌ཏེ། རྨི་ལམ་གྱི་དོན་དེ་སྨྲས་ནའང་སུས་ཀྱང་ཁོ་རང་ལ་འགྲེལ་མ་ནུས༌སོ།།
GEN 41:9 དེ་ནས་ཆང་གཉེར་བློན་ཆེན་གྱིས་ཕཱར་ཨོལ་ལ་འདི༌ལྟར། དེ་རིང་བདག་གིས་རང་གི་ཉེས་པ་དྲན༌བྱུང༌།
GEN 41:10 དེ་སྔོན་ཕཱར་ཨོལ་ཐུགས་ཁྲོས༌ཏེ། བདག་དང་གསོལ་དཔོན་གཉིས་ཀ་སྐུ་སྲུང་དམག་དཔོན་གྱི་བཙོན་ཁང་དུ་བཅུག༌ཅིང༌།
GEN 41:11 ངེད་གཉིས་ཀྱིས་ཞག་གཅིག་ལ་རྨི་ལམ་རེ་རྨིས་ཤིང་རྨི་ལམ་རེ་ལ་ནང་དོན་རེ༌མཆིས།
GEN 41:12 གནས་དེར་ངེད་གཉིས་དང་མཉམ་དུ་ཨིབ་རི་པའི་གཞོན་ནུ་ཞིག་ཀྱང༌ཡོད། ཁོ་རང་ནི་སྐུ་སྲུང་དམག་དཔོན་གྱི་ཞབས་ཕྱི་པ༌རེད། ངེད་གཉིས་ཀྱིས་རྨི་ལམ་ཁོ་ལ་སྨྲས་པ༌ན། ཁོས་ངེད་གཉིས་ཀྱི་རྨི་ལམ་ལ་རེ་རེ་བཞིན་བརྟགས༌སོ།།
GEN 41:13 ཕྱིས་སུ་ཁོས་རྨི་ལམ་ལ་བརྟགས་པ༌བཞིན། བདག་ལ་གོ་ས་སྔར་བཞིན་ཐོབ་པ་དང་གསོལ་དཔོན་ནི་སྡོང་པོའི་སྟེང་དུ་བཀལ་བ་ཡིན་ཞེས་སྨྲས༌སོ།།
GEN 41:14 དེ་ནས་ཕཱར་ཨོལ་གྱིས་ཡོ་སེབ་གདན་འདྲེན་པར་མི་འགའ་མངགས༌ཤིང༌། དེ་རྣམས་ཀྱིས་མྱུར་བ་མྱུར་དུ་ཡོ་སེབ་བཙོན་ཁང་ལས་ཕྱིར་ཁྲིད༌ཅིང༌། ཁོའི་སྐྲ་དང་སྨྲ་ར་བཞར་བ་དང་གྱོན་པ་བརྗེས་ཏེ་ཕཱར་ཨོལ་གྱི་དྲུང་དུ་ཁྲིད་ཡོང༌ངོ༌།།
GEN 41:15 དེ་ནས་ཕཱར་ཨོལ་གྱིས་ཡོ་སེབ་ལ་འདི༌ལྟར། བདག་གིས་རྨི་ལམ་ཞིག་རྨིས་ཤིང་སུས་ཀྱང་རྨི་ལམ་ལ་བརྟག་མ༌ཤེས། གོ་ཐོས་ལྟར་ན་ཁྱོད་ཀྱིས་རྨི་ལམ་ཐོས་མ་ཐག་ཏུ་བརྟག་ཤེས་འདུག་ཟེར་ཞེས་སྨྲས་པ༌ན།
GEN 41:16 ཡོ་སེབ་ན༌རེ། དེ་ནི་བདག་ལ་རག་ལས་པ་མིན༌ཏེ། དཀོན་མཆོག་གིས་ཁྱོད་ལ་ལན་ལེགས་པོ་ཞིག་གནང་བར་འགྱུར་ཞེས་སྨྲས༌སོ།།
GEN 41:17 ཡང་ཕཱར་ཨོལ་ན༌རེ། རྨི་ལམ་ནང་དུ་བདག་ནི་ནཱ་ཡོལ་གཙང་པོའི་འགྲམ་དུ་བསྡད་ཡོད༌ལ།
GEN 41:18 བ་མོ་བདུན་གཙང་པོ་ལས་ཚུར་ཡོང་བ་དང་དེ་དག་ནི་ལྟ་ན་སྡུག་ཅིང་ཤ་ཤེད་རྒྱས་པ་ཞིག་ཡིན་པ་དང་ཆུ་ནང་གི་རྩྭ་སྔོན་ཟ་བཞིན༌ཡོད།
GEN 41:19 དེ་ནས་ཡང་བ་མོ་བདུན་གཙང་པོ་ལས་ཚུར་ཡོང་བ་དང་དེ་དག་ནི་ཤིན་ཏུ་བཙོག་ཅིང་ཤ་ཤེད་ཞན༌ལ། བདག་གིས་བ་མོ་བཙོག་པོ་དེ་དག་ལྟ་བུ་ནི་ཨེ་ཅིབ་ཡུལ་ཀུན་ཏུའང་མཐོང་མ༌མྱོང༌།
GEN 41:20 དེ་ནས་ཤིན་ཏུ་བཙོག་ཅིང་ཤ་ཤེད་ཞན་པའི་བ་མོ་བདུན་པོས་དེ་སྔོན་གྱི་ཤ་ཤེད་རྒྱས་པའི་བ་མོ་བདུན་པོ་ཟོས་སོང་བ་དང༌།
GEN 41:21 དེ་དག་གིས་ཟོས་ཚར་ནའང་ཚུགས་ཀ་བཙོག་པོ་ནི་སྔར་བཞིན་ཡིན༌པས། ཟོས་སམ་མ་ཟོས་སུས་ཀྱང་ལྟ་མི་ཤེས༌ལ། དེ་ནས་ང་རང་ཡང་གཉིད་སད༌དོ།།
GEN 41:22 དེ་ནས་ཡང་བདག་གིས་རྨི་ལམ་ཞིག་རྨིས་པ༌དང༌། རྨི་ལམ་ནང་དུ་གྲོ་ཡི་རྩི་ཤིང་གཅིག་ལ་སྙེ་མ་བདུན་ཐོགས༌ཤིང༌། སྙེ་མ་རེ་རེ་ནི་ཁ་གང་ཞིང་འབྲས་བུ་སྨིན་ཡོད༌དོ།།
GEN 41:23 དེ་ནས་ཡང་སྙེ་མ་བདུན་ཐོགས༌ཤིང༌། སྙེ་མ་དེ་དག་ནི་ཤིན་ཏུ་ཕྲ་ཞིང་འབྲས་བུ་མ་སྨིན་པ་དང་ཤར་རླུང་གིས་བསྐམས་པར་གྱུར༌ཡོད།
GEN 41:24 སྙེ་མ་ཤིན་ཏུ་ཕྲ་མོ་དེ་དག་གིས་ཁ་གང་ཞིང་འབྲས་བུ་སྨིན་པའི་སྙེ་མ་བདུན་པོ་ཟོས་པ༌དང༌། བདག་གིས་རྨི་ལམ་འདི་མོ་པ་རྣམས་ལ་སྨྲས་ནའང་སུས་ཀྱང་བརྟག་མ་ཤེས་ཞེས་སྨྲས༌སོ།།
GEN 41:25 དེ་ནས་ཡོ་སེབ་ཀྱིས་ཕཱར་ཨོལ་ལ་འདི༌ལྟར། རྒྱལ་པོ་ཁྱེད་ཀྱིས་རྨིས་པའི་རྨི་ལམ་གཉིས་ཀ་དོན་གཅིག་ཡིན༌འདུག དཀོན་མཆོག་གིས་གང་ཞིག་མཛད་པར་འགྱུར་བ་ཁྱེད་ལ་བསྟན་ཟིན༌ཏོ།།
GEN 41:26 དེ་ཡང་བ་མོ་ཤ་ཤེད་ཅན་བདུན་པོ་ནི་ལོ་བདུན༌དང༌། ཁ་གང་ཞིང་འབྲས་བུ་སྨིན་པའི་སྙེ་མ་བདུན་པོའང་ལོ་བདུན༌ཡིན། འདི་གཉིས་རྨི་ལམ་གཅིག༌ཡིན།
GEN 41:27 དེའང་ཕྱིས་སུ་ཡོང་བའི་ཚུགས་ཀ་ཤིན་ཏུ་བཙོག་ཅིང་ཤ་ཤེད་ཞན་པའི་བ་མོ་བདུན་ནི་ལོ་བདུན༌དང༌། ཤར་རླུང་གིས་བསྐམས་པའི་སྙེ་མ་བདུན་པོའང་ལོ་བདུན༌ཡིན། དེ་གཉིས་ནི་མུ་གེ་འབྱུང་བའི་ལོ་བདུན༌ཡིན།
GEN 41:28 དེའི༌ཕྱིར། བདག་གིས་གོང་ནས་ཕཱར་ཨོལ་ལ་སྨྲས་པ་བཞིན་དཀོན་མཆོག་གིས་གང་ཞིག་མཛད་པར་འགྱུར་བ་ཁྱེད་ལ་བསྟན་ཟིན༌ཏོ།།
GEN 41:29 ཨེ་ཅིབ་ཡུལ་ཡོངས་སུ་ལོ་བདུན་རིང་ལ་ལོ་ལེགས་འབྱུང་བ༌དང༌།
GEN 41:30 དེ་ནས་ལོ་བདུན་རིང་ལ་མུ་གེ་འབྱུང་ངེས༌ཤིང༌། ཐ་ན་ཨེ་ཅིབ་ཡུལ་གྱི་མི་རྣམས་ཀྱིས་ལོ་ལེགས་བྱུང་བའི་དོན་དེའང་བརྗེད་པར་འགྱུར་བ༌དང༌། ཡུལ་ཡོངས་ལ་མུ་གེ་ཆེན་པོ་བྱུང་ནས་བརླག་པར་འགྱུར༌ངེས།
GEN 41:31 ཕྱིས་སུ་འབྱུང་ངེས་པའི་མུ་གེ་དེ་ནི་ཤིན་ཏུ་ཚབས་ཆེ་བའི༌ཕྱིར། ལོ་ལེགས་བྱུང་བའི་དོན་དེ་མི་རྣམས་ཀྱིས་སེམས་སུ་མི་དྲན༌ནོ།།
GEN 41:32 ཕཱར་ཨོལ་ཁྱེད་ཀྱིས་རྨི་ལམ་ཐེངས་གཉིས་ལ་རྨིས་པ་ནི་དཀོན་མཆོག་གིས་ཐུགས་ཐག་བཅད་པའི༌ཕྱིར། ཁོང་གིས་དོན་དེ་མྱུར་དུ་འགྲུབ་པར་མཛད༌ངེས།
GEN 41:33 དེའི༌ཕྱིར། ཕཱར་ཨོལ་ཁྱེད་ཀྱིས་བློ་དང་ཤེས་རབ་ལྡན་པའི་མི་ཞིག་བདམས༌ཏེ། ཨེ་ཅིབ་ཡུལ་སྐྱོང་བ་ལ་བསྐོ་བར༌མཛོད།
GEN 41:34 ཕཱར་ཨོལ་ཁྱེད་ཀྱིས་དེ་ལྟར་བྱས་རྗེས་ས་གནས་དཔོན་པོ་རྣམས་ཀྱང་ཡུལ་དེར་མངགས་ནས་དོ་དམ་བྱེད་པར༌མཛོད། དེ་ཡང་ལོ་བདུན་ལ་ལོ་ལེགས་འབྱུང་བའི་དུས༌སུ། ཨེ་ཅིབ་ཡུལ་གྱི་ལྔ་ཆའི་གཅིག་བསྡུས༌ཏེ།
GEN 41:35 ས་གནས་དཔོན་པོ་རྣམས་ལ་ལོ་ལེགས་བྱུང་བའི་འབྲུ་རིགས་གྲོན་ཆུང་བྱས་ནས་གྲོང་ཁྱེར་ནང་གསོག་ཏུ་འཇུག་པ་དང་ཕཱར་ཨོལ་གྱི་དབང་འོག་ཏུ་འཇུག་པར་བྱ༌དགོས།
GEN 41:36 ཡང་ཡུལ་ཡོངས་ལ་མུ་གེ་ཆེན་པོ་བྱུང་ནས་བརླག་པར་མི་འགྱུར་བའི༌ཕྱིར། འབྲུ་རིགས་གསོག་འཇོག་བྱས་ན་མ་འོངས་པར་ལོ་བདུན་རིང་ལ་མུ་གེ་འབྱུང་བའི་དཀའ་ངལ་སེལ་ཐུབ་ཅེས་སྨྲས༌སོ།།
GEN 41:37 དེ་ཡང་ཕཱར་ཨོལ་དང་ཁོང་གི་འཁོར་གཡོག་ཐམས་ཅད་ཀྱིས་དོན་དེ་ལེགས་པར༌སྙམ།
GEN 41:38 དེ་ནས་ཕཱར་ཨོལ་གྱིས་རང་གི་འཁོར་གཡོག་རྣམས་ལ་འདི༌ལྟར། དཀོན་མཆོག་གི་ཐུགས་ཉིད་དང་ལྡན་པའི་མི་འདི་ལྟ་བུ་ནི་སུ་ཞིག་གིས་བཙལ་ནས་རྙེད་དམ་ཞེས་སྨྲས་པ༌དང༌།
GEN 41:39 ཡང་ཕཱར་ཨོལ་གྱིས་ཡོ་སེབ་ལ་འདི༌ལྟར། དཀོན་མཆོག་གིས་དོན་འདི་ཁྱོད་ལ་མངོན་པར་མཛད༌པས། ཁྱོད་བཞིན་དུ་བློ་དང་ཤེས་རབ་ལྡན་པའི་མི་གཞན་ཞིག་ཡོད་མི༌སྲིད།
GEN 41:40 ཁྱོད་ཀྱིས་བདག་གི་ཕོ་བྲང་སྐྱོང་བ༌དང༌། བདག་གི་འབངས་མི་ཐམས་ཅད་ཀྱིས་ཁྱོད་ཀྱི་ངག་ལ་ཉན་སྲིད་པ༌དང༌། ཁྲི་སྟེང་དུ་བཞུགས་པ་བདག་ཁོ་ན་ཁྱོད་ལས་མཐོའོ་ཞེས༌སྨྲས།
GEN 41:41 ཡང་ཕཱར་ཨོལ་གྱིས་ཡོ་སེབ་ལ་འདི༌ལྟར། ལྟོས༌དང༌། བདག་གིས་ཁྱོད་ནི་ཨེ་ཅིབ་ཡུལ་ཐམས་ཅད་སྐྱོང་བར་བསྐོས་པ་ཡིན་ཞེས་སྨྲས་པ༌དང༌།
GEN 41:42 རང་གི་མཛུབ་མོ་སྟེང་གི་ཐམ་ག་དང་ལྡན་པའི་མཛུབ་དཀྲིས་བླངས་ཏེ་ཡོ་སེབ་ཀྱི་མཛུ་གུར་བསྐོན་པ༌དང༌། ཡོ་སེབ་ཀྱི་ལུས་ལ་སོ་རས་སྲབ་བུའི་གོས་བསྐོན་ཞིང་སྐེ་ལ་གསེར་གྱི་མགུལ་རྒྱན་འདོགས་སུ་བཅུག་པ༌དང༌།
GEN 41:43 རྒྱལ་པོའི་ཤིང་རྟ་གཉིས་པར་ཡོ་སེབ་སྡོད་དུ་བཅུག་པ༌དང༌། དེའི་སྔོན་དུ་མི་མངགས་ཤིང་དེ་དག་གིས་ཕྱག་འཚལ་བར་གྱིས་ཞེས༌སྨྲས། དེ་ལྟར་ཕཱར་ཨོལ་གྱིས་ཡོ་སེབ་ནི་ཨེ་ཅིབ་ཡུལ་ཐམས་ཅད་སྐྱོང་བར་བསྐོས༌སོ།།
GEN 41:44 ཡང་ཕཱར་ཨོལ་གྱིས་ཡོ་སེབ་ལ་འདི༌ལྟར། བདག་ནི་ཕཱར་ཨོལ་ཡིན༌ནོ། །ཨེ་ཅིབ་ཡུལ་ཡོངས་སུ་ཁྱོད་ཀྱི་བཀའ་མེད༌ན། མི་སུས་ཀྱང་གང་འདོད་དུ་བྱ་མི་རུང་ཞེས༌སྨྲས།
GEN 41:45 དེ་ནས་ཕཱར་ཨོལ་གྱིས་ཡོ་སེབ་ཀྱི་མིང་ལ་ཚཱབ་ནཱ་ཕཱ་ནེ་ཨ་ཞེས་བཏགས་པ༌དང༌། ཡང་ཨོ་ནཱ་ཡུལ་གྱི་མཆོད་དཔོན་ཕའོ་ཏི་ཕེ་རཱ་ཞེས་པའི་བུ་མོ་ཨ་སི་ནཱ་ཐི་ཁོའི་ཆུང་མར༌གནང༌། དེ་ནས་ཡོ་སེབ་ནི་ཨེ་ཅིབ་ཀྱི་ཡུལ་སོ་སོར་རྟོག་དཔྱོད་བྱེད་དུ་སོང༌ངོ༌།།
GEN 41:46 དེ་ཡང་རྒྱལ་པོ་ཕཱར་ཨོལ་གྱིས་ཡོ་སེབ་ཁོ་རང་ཨེ་ཅིབ་ཀྱི་ཡུལ་སྐྱོང་བར་བསྐོས་པའི་དུས་སུ་ཁོ་ལོ་སུམ་ཅུ་ཡིན༌ལ། ཁོ་རང་རྒྱལ་པོའི་དྲུང་ནས་ཨེ་ཅིབ་ཀྱི་ཡུལ་ཐམས་ཅད་ལ་རྟོག་དཔྱོད་བྱེད་དུ༌སོང༌།
GEN 41:47 ལོ་ལེགས་བྱུང་བའི་ལོ་བདུན་རིང་ལ་འབྲུ་རིགས་ཕུན་སུམ་ཚོགས་པ་ཐོབ་པ༌དང༌།
GEN 41:48 ཡོ་སེབ་ཀྱིས་ལོ་བདུན་རིང་ལ་ལོ་ལེགས་བྱུང་བའི་འབྲུ་རིགས་ཐམས་ཅད་གྲོང་ཁྱེར་གྱི་འབྲུ་མཛོད་ཁང་དུ་བཅུག༌གོ །གྲོང་ཁྱེར་སོ་སོའི་ཉེ་འཁོར་གྱི་འབྲུ་རིགས་ཐམས་ཅད་གྲོང་ཁྱེར་ནང་དུ༌བཅུག
GEN 41:49 ཡོ་སེབ་ཀྱིས་འབྲུ་རིགས་སྣ་ལྔ་བསགས་པ་ནི་རྒྱ་མཚོའི་འགྲམ་གྱི་བྱེ་མ་དང་མཚུངས་པར་གྲངས་ཀྱིས་མི་ཟིན༌ཏོ། །ཅིའི་ཕྱིར་ཞེ༌ན། འབྲུ་རིགས་ཤིན་ཏུ་མང་བའི་ཕྱིར༌རོ།།
GEN 41:50 དེ་ཡང་མུ་གེ་མ་བྱུང་བའི་ཡར་སྔོན༌དུ། ཨོ་ནཱ་ཡུལ་གྱི་མཆོད་དཔོན་ཕའོ་ཏི་ཕེ་རཱ་ཞེས་པའི་བུ་མོ་ཨ་སི་ནཱ་ཐི་ཡིས་ཡོ་སེབ་ལ་བུ་གཉིས་བཙས་པ༌དང༌།
GEN 41:51 ཡོ་སེབ་ཀྱིས་བུ་སྐྱེས་འགོའི་མིང་ལ་མཱ་ན་ཤེ་ཞེས༌བཏགས། ཅིའི་ཕྱིར་ཞེ༌ན། ཁོ་ན༌རེ། དཀོན་མཆོག་གིས་བདག་ལ་དཀའ་ངལ་སྣ་ཚོགས་དང་བདག་གི་ཕ་ཡི་ཁྱིམ་མི་ཐམས་ཅད་བརྗེད་པར་མཛད་པ་ཡིན་ཞེས་སྨྲས་པའི་ཕྱིར༌རོ།།
GEN 41:52 ཡང་བུ་ཆུང་བའི་མིང་ལ་ཨེ་ཕཱར་ཡིམ་ཞེས༌བཏགས། ཅིའི་ཕྱིར་ཞེ༌ན། ཁོ་ན༌རེ། དཀོན་མཆོག་གིས་བདག་ནི་དཀའ་སྡུག་མྱང་བའི་ཡུལ་དུ་དར་ཞིང་རྒྱས་པར་མཛད་པ་ཡིན་ཞེས་སྨྲས་པའི་ཕྱིར༌རོ།།
GEN 41:53 དེ་ཡང་ཨེ་ཅིབ་ཡུལ་དུ་ལོ་ལེགས་བྱུང་བའི་ལོ་བདུན་པོ་མཇུག་རྫོགས༌རྗེས།
GEN 41:54 ཡོ་སེབ་ཀྱིས་སྨྲས་པ་བཞིན་མུ་གེ་འབྱུང་བའི་ལོ་བདུན་དེ་སླེབས༌སོ། །དེ་ནས་ཡུལ་གཞན་ཐམས་ཅད་ལ་མུ་གེ་བྱུང་ནའང་ཨེ་ཅིབ་ཀྱི་ཡུལ་ཁོ་ནར་འབྲུ་རིགས་མཆིས༌སོ།།
GEN 41:55 ཨེ་ཅིབ་ཀྱི་ཡུལ་ལའང་མུ་གེ་བྱུང་བས་འབངས་མི་རྣམས་ཀྱིས་ཕཱར་ཨོལ་ལ་འབྲུ་རིགས་བསླངས་པ༌ན། རྒྱལ་པོ་ན༌རེ། ཁྱོད་ཅག་ཡོ་སེབ་ཀྱི་དྲུང་དུ་སོང༌ཞིག ཁོས་ཇི་ལྟར་སྨྲས་པ་ཡིན་ན་ཁྱོད་ཅག་གིས་དེ་ལྟར་སྒྲུབས་ཤིག་ཅེས་སྨྲས༌སོ།།
GEN 41:56 སྐབས༌དེར། གནམ་འོག་ཀུན་ལ་མུ་གེ་བྱུང་བ༌དང༌། ཨེ་ཅིབ་ཡུལ་ཀུན་ལའང་མུ་གེ་ཆེན་པོ་བྱུང་བས་ཡོ་སེབ་ཀྱིས་ཡུལ་སོ་སོའི་འབྲུ་མཛོད་ཕྱེས་ཏེ། ཨེ་ཅིབ་ཀྱི་མི་རྣམས་ལ་འབྲུ་རིགས་བཙོངས་པ༌རེད།
GEN 41:57 ཡུལ་སོ་སོའི་མི་རྣམས་ཨེ་ཅིབ་ཀྱི་ཡུལ་དུ་སོང་ཞིང་ཡོ་སེབ་ཀྱི་དྲུང་ནས་འབྲུ་རིགས་ཉོས་པ༌སྟེ། གནམ་འོག་ཀུན་ལ་མུ་གེ་ཆེན་པོ་བྱུང་བས༌སོ།།
GEN 42:1 དེ་ཡང་ཡ་ཀོབ་ཀྱིས་ཨེ་ཅིབ་ཡུལ་དུ་འབྲུ་རིགས་ཡོད་པ་ཤེས་ཏེ་རང་གི་བུ་རྣམས་ལ་འདི་སྐད༌དུ། ཁྱོད་ཅག་གིས་ཅིའི་ཕྱིར་ཕན་ཚུན་ལ༌ལྟའམ།
GEN 42:2 བདག་གིས་ཨེ་ཅིབ་ཡུལ་དུ་འབྲུ་རིགས་ཡོད་པ་ཐོས༌བྱུང༌། རང་ཅག་རྣམས་འཚོ་ཞིང་གཞེས་པ་དང་མི་འཆི་བའི༌ཕྱིར། ཁྱོད་རྣམས་ཀྱང་ཨེ་ཅིབ་ཡུལ་དུ་སོང་ནས་འབྲུ་རིགས་ཉོས་ན་ལེགས་ཞེས་སྨྲས༌སོ།།
GEN 42:3 དེ་ནས་ཡོ་སེབ་ཀྱི་གཅེན་པོ་བཅུ་པོའང་མར་ཨེ་ཅིབ་ཡུལ་དུ་འབྲུ་རིགས་ཉོ་རུ་སོང༌མོད།
GEN 42:4 འོན༌ཀྱང༌། ཡོ་སེབ་ཀྱི་གཅུང་པོ་པེན་ཡཱ་མེན་ནི་ཁོའི་གཅེན་པོ་རྣམས་དང་མཉམ་དུ་མ་མངགས༌ཏེ། ཡ་ཀོབ་ན༌རེ། ཁོ་ལ་བར་ཆད་འབྱུང་སྲིད་ཅེས་སྨྲས་པའི་ཕྱིར༌རོ།།
GEN 42:5 དེ་ཡང་ཀ་ན་ཨན་ཡུལ་ལའང་མུ་གེ་བྱུང་བས་འབྲུ་རིགས་ཉོ་རུ་ཡོང་བའི་མི་རྣམས་ཀྱི་ཁྲོད་དུ་ཡེས་ར་ཨེལ་ཞེས་བྱ་བ་སྟེ་ཡ་ཀོབ་ཀྱི་བུ་རྣམས་ཀྱང་ཡོད༌དོ།།
GEN 42:6 དུས་དེར་ཨེ་ཅིབ་ཀྱི་ཡུལ་ཐམས་ཅད་སྐྱོང་མཁན་ནི་ཡོ་སེབ་ཡིན༌ལ། ཡུལ་སོ་སོའི་མི་རྣམས་ལ་འབྲུ་རིགས་འཚོང་མཁན་ཡང་ཡོ་སེབ༌ཡིན། ཡོ་སེབ་ཀྱི་གཅེན་པོ་རྣམས་ཀྱང་ཡོང་སྟེ་པུས་མོ་སར་བཙུགས་ནས་ཁོང་ལ་ཕྱག་བཙལ་བ༌དང༌།
GEN 42:7 ཡོ་སེབ་ཀྱིས་རང་གི་གཅེན་པོ་རྣམས་མཐོང་བ་དང་ངོ་ཤེས་ནའང་མ་ཤེས་ཁུལ་གྱིས་ཁྱོད་ཅག་གང་ནས་ཡོང་བ་ཡིན་ཞེས་བཙན་གྱིས་དྲིས་པ༌ན། ཁོ་རྣམས་ན༌རེ། ངེད་ཅག་ཀ་ན་ཨན་ཡུལ་ནས་གནས་འདིར་འབྲུ་རིགས་ཉོ་རུ་ཡོང་བ་ཡིན་ཞེས་སྨྲས༌སོ།།
GEN 42:8 ཡོ་སེབ་ཀྱིས་རང་གི་གཅེན་པོ་རྣམས་ངོ་ཤེས་ནའང་ཁོ་རྣམས་ཀྱིས་ཡོ་སེབ་མ་ཤེས༌སོ།།
GEN 42:9 དེ་ནས་ཡོ་སེབ་ཀྱིས་སྔོན་ཆད་རྨི་ལམ་གཉིས་རྨིས་མྱོང་བ་ཡིད་ལ་དྲན༌ཏེ། ཁྱོད་རྣམས་མྱུལ་མ༌ཡིན། སྲུང་དམག་མེད་པའི་ཡུལ་འདིར་ལྐོག་ལྟ་བྱེད་དུ་ཡོང་བ་རེད་ཅེས་སྨྲས་པ༌དང༌།
GEN 42:10 ཁོ་རྣམས་ན༌རེ། ཇོ་བོ་ལགས། དེ་འདྲ་མིན༌ཏེ། ཁྱེད་ཀྱི་ཞབས་ཕྱི་པ་ངེད་རྣམས་ནི་གནས་འདིར་འབྲུ་རིགས་ཉོ་རུ་ཡོང་བ༌ཡིན།
GEN 42:11 ངེད་ཅག་ནི་ཕ་གཅིག་གི་བུ་ཡིན༌ལ། མི་དྲང་པོ་ཡིན་པ་ལས་མྱུལ་མ་མིན་ཞེས་སྨྲས་པ༌ན།
GEN 42:12 ཡོ་སེབ་ན༌རེ། དེ་འདྲ་ག་ལ༌ཡིན། ཁྱོད་རྣམས་སྲུང་དམག་མེད་པའི་ཡུལ་འདིར་ལྐོག་ལྟ་བྱེད་དུ་ཡོང་བ་ཤ་སྟག་རེད་ཅེས་སྨྲས་པ༌དང༌།
GEN 42:13 ཁོ་རྣམས་ན༌རེ། ཁྱེད་ཀྱི་ཞབས་ཕྱི་པ་ངེད་ཅག་ལ་སྤུན་བཅུ་གཉིས་ཡོད་ཅིང་ཀ་ན་ཨན་ཡུལ་གྱི་ཕ་གཅིག་གི་བུ་རྣམས་ཡིན༌ལ། སྤུན་རྣམས་ལས་ཆེས་ཆུང་བ་ད་ལྟ་ཕ་ཡི་དྲུང་དུ་ཡོད་པ༌དང༌། སྤུན་གཞན་ཞིག་ཚེ་ལས་འདས་སོང་ཞེས་སྨྲས༌སོ།།
GEN 42:14 དེ་ནས་ཡོ་སེབ་ན༌རེ། བདག་གིས་ཁྱོད་རྣམས་མྱུལ་མ་རེད་ཅེས་སྨྲས་པ་དོན་ལ༌གནས།
GEN 42:15 བདག་གིས་ཕཱར་ཨོལ་དཔང་དུ་བཙུགས་ནས་དམ་བཅའ་བར་བྱ༌སྟེ། གལ༌སྲིད། ཁྱོད་རྣམས་ཀྱི་སྤུན་ཆེས་ཆུང་བ་གནས་འདིར་ཡོང་བ་མིན༌ན། ཁྱོད་རྣམས་ཀྱང་གནས་འདི་ནས་ཕྱིར་འགྲོ་མི་ཐུབ༌ལ། དེ་ལས་ཁྱོད་རྣམས་ག་འདྲ་ཡིན་པའང་ར་སྤྲོད་བྱེད་ཐུབ་པ༌ཡིན།
GEN 42:16 ཁྱོད་རྣམས་ལས་སྤུན་གཅིག་མངགས་ནས་སྤུན་ཆེས་ཆུང་བའང་འདིར་ཁྲིད་ཤོག༌ཅིག ཁྱོད་ཅག་གིས་སྨྲས་པའི་གཏམ་བདེན་མིན་ལ་བརྟག་པའི༌ཕྱིར། ཁྱོད་རྣམས་འདིར་བཙོན་དུ་འདུག་དགོས་པ༌ཡིན། གལ་ཏེ་ཁྱོད་ཅག་གིས་སྨྲས་པའི་གཏམ་དེ་བདེན་པ་མིན༌ན། བདག་གིས་ཕཱར་ཨོལ་དཔང་དུ་བཙུགས་ནས་དམ་བཅའ༌སྟེ། ཁྱོད་རྣམས་མྱུལ་མ་ཤ་སྟག་རེད་ཅེས་སྨྲས༌སོ།།
GEN 42:17 དེ་ནས་ཡོ་སེབ་ཀྱིས་རང་གི་སྤུན་གཞན་རྣམས་ཉིན་གསུམ་ལ་བཙོན་དུ་བཅུག༌གོ །
GEN 42:18 དེ་ནས་ཉིན་གསུམ་པར་ཡོ་སེབ་ཀྱིས་སྤུན་རྣམས་ལ་འདི༌ལྟར། བདག་ནི་དཀོན་མཆོག་ལ་གུས་ཤིང་འཇིགས་པ་ཞིག་ཡིན༌ཞིང༌། ཁྱོད་ཅག་གིས་དེ་བཞིན་བྱས་ན་རང་སྲོག་འཆོར་མི༌སྲིད།
GEN 42:19 ཁྱོད་ཅག་མི་དྲང་པོ་ཡིན༌ན། ཁྱོད་རྣམས་ལས་སྤུན་གཅིག་བཙོན་དུ་བསྡད་དེ། སྤུན་གཞན་རྣམས་ཀྱིས་འབྲུ་རིགས་ཁུར་ནས་རང་ཁྱིམ་གྱི་བཀྲེས་ལྟོགས་སེལ་བར་འགྲོ་རུང་བ༌ཡིན།
GEN 42:20 འོན༌ཀྱང༌། ཁྱོད་རྣམས་ཀྱིས་རང་གི་སྤུན་ཆེས་ཆུང་བ་དེ་འདིར་ཁྲིད་ཤོག༌ཅིག དེ་ལྟར་བྱས༌ན། ཁྱོད་ཅག་གིས་སྨྲས་པའི་གཏམ་ལ་བདེན་དཔང་བྱེད་ཐུབ༌ཅིང༌། ཁྱོད་རྣམས་ཀྱང་འཆི་མི་སྲིད་ཅེས་སྨྲས་པ༌དང༌། སྤུན་དེ་རྣམས་ཀྱིས་ཀྱང་དེ་ལྟར་བྱས༌སོ།།
GEN 42:21 དེ་ནས་སྤུན་རྣམས་ཀྱིས་ཕན་ཚུན་ན༌རེ། རང་ཅག་ནི་སྤུན་གྱི་ཆ་ནས་ཉེས་པ་ཡོད༌དེ། ཁོས་སྨྲེ་སྔགས་བཏོན་ནས་རང་ཅག་ལ་ཞུ་བ་བྱེད་པའི་སྐབས༌སུ། ངེད་རྣམས་ཀྱིས་ཁོའི་སེམས་སྐྱོ་སྡུག་གིས་ཁེངས་པ་མཐོང༌ཡང༌། ཁོས་ཞུ་བར་མ་མཉན་པས་ད་ནི་སྡུག་བསྔལ་འདི་ལྟ་བུ་རང་ཅག་རྣམས་ལ་བྱུང་བ་ཡིན་ཞེས་སྨྲས༌སོ།།
GEN 42:22 དེར་རུ་བེན་ན༌རེ། བདག་གིས་ཁྱོད་རྣམས་ལ་བྱིས་པ་དེར་སྡིག་པ་བྱེད་མི་རུང་ཞེས་སྨྲས་མྱོང་བ་མ་ཡིན༌ནམ། ཁྱོད་རྣམས་ཀྱིས་བདག་གི་གཏམ་ལ་མ་མཉན༌པས། ཁོ་རང་ལ་ཁྲག་བཞུར་དུ་བཅུག་པའི་སྡིག་པ་ནི་ད་ལྟ་རང་ཅག་རྣམས་ཀྱིས་འཇལ་དགོས་ཞེས་སྨྲས་པ༌དང༌།
GEN 42:23 ཁོ་རྣམས་ཀྱི་སེམས་སུ་ཁོ་ཚོས་སྨྲས་པའི་གཏམ་དེ་དག་ཡོ་སེབ་ཀྱིས་མ་ཐོས་པར༌སྙམ། རྒྱུ་མཚན་ནི་ཡོ་སེབ་དང་ཁོ་རྣམས་བར་དུ་སྐད་སྒྱུར་བ་ཞིག་ཡོད་པའི་ཕྱིར༌རོ།།
GEN 42:24 དེ་ནས་ཡོ་སེབ་ཕར་སོང་ནས་ངུས༌ཤིང༌། ཡང་ཕྱིར་ཡོང་ནས་རང་གི་སྤུན་རྣམས་ལ་གླེང་མོལ་བྱས་པ༌དང༌། སྤུན་དེ་རྣམས་ཀྱི་ཁྲོད་ནས་སི་མུ་ཨོན་ཞེས་པ་བདམས་ཏེ་ཁོ་རྣམས་ཀྱི་མིག་མདུན་ནས་བཀྱིགས༌སོ།།
GEN 42:25 ཡོ་སེབ་ཀྱིས་མི་མངགས་ནས་རང་གི་སྤུན་རྣམས་ཀྱི་སྒྱེ་མོའི་ནང་དུ་འབྲུ་རིགས་ཀྱིས་གཏམས་པར་མཛད༌ཅིང༌། ཁོ་རྣམས་ཀྱི་དངུལ་སྒོར་ཡང་ཕྱིར་ཁོ་རྣམས་ཀྱི་སྒྱེ་མོའི་ནང་དུ་འཇུག་པ༌དང༌། ཁོ་རྣམས་ལ་ལམ་བྲོའང་སྟེར་དགོས་པའི་བཀའ་ཕབ་པ་དང་དེ་ལྟར་བསྒྲུབས༌སོ།།
GEN 42:26 ཁོ་རྣམས་ཀྱིས་ཀྱང་འབྲུ་རིགས་བོང་བུར་བཀལ་ནས་ཡུལ་དེ་དང་ཁ་བྲལ༌ཏོ།།
GEN 42:27 དེ་ནས་ཁོ་རྣམས་ལམ་ལ་ཆས་ཤིང་ལམ་བར་ནས་ཞག་སྡོད་བྱེད་སར་སླེབས༌དུས། ཁོ་རྣམས་ལས་སྤུན་ཞིག་གིས་བོང་བུར་གཟན་ཆས་སྟེར་སྙམ་ནས་སྒྱེ་མོའི་ཁ་ཕྱེས་པ་ན། རང་གི་དངུལ་སྒོར་དེ་སྒྱེ་མོའི་ནང་དུ་ཡོད་པ་མཐོང༌སྟེ།
GEN 42:28 སྤུན་གཞན་རྣམས་ལ་འདི༌ལྟར། བདག་གི་དངུལ་སྒོར་ཕྱིར་ཡོང༌ངོ༌། །ལྟོས༌དང༌། བདག་གི་སྒྱེ་མོའི་ནང་དུ་འདུག་ཅེས་སྨྲས་པ༌དང༌། ཁོ་རྣམས་ཤིན་ཏུ་འཇིགས་ཤིང་སྐྲག༌སྟེ། འདི་ནི་དཀོན་མཆོག་གིས་རང་ཅག་ལ་ཅི་ཞིག་མཛད་པ་ཡིན་ནམ་ཞེས་སྨྲས༌སོ།།
GEN 42:29 དེ་ནས་ཁོ་རྣམས་ཀ་ན་ཨན་ཡུལ་གྱི་ཡབ་ཡ་ཀོབ་ཀྱི་གམ་དུ་སླེབས་པ༌དང༌། ཁོ་རྣམས་ལ་བྱུང་བའི་དོན་རྣམས་འདི་ལྟར་སྨྲས༌པ།
GEN 42:30 ཡུལ་དེའི་བདག་པོས་ངེད་ཅག་ལ་བཙན་གཏམ་སྨྲས་པ༌དང༌། ངེད་ཅག་ཡུལ་དེར་གསང་མྱུལ་དུ་ཡོང་བར་འདོད༌ཅིང༌།
GEN 42:31 ངེད་རྣམས་ཀྱིས་བདག་པོ་དེ༌ལ། ངེད་ཅག་མི་དྲང་པོ་ཡིན་པ་ལས་མྱུལ་མ༌མིན།
GEN 42:32 ངེད་རྣམས་ལ་སྤུན་བཅུ་གཉིས་ཡོད་ཅིང་ཐམས་ཅད་ཕ་གཅིག་གི་བུ་རྣམས་ཡིན༌ལ། སྤུན་གཅིག་ཚེ་ལས་འདས་པ༌དང༌། སྤུན་ཆེས་ཆུང་བ་ད་ལྟ་ཕ་དང་མཉམ་དུ་ཀ་ན་ཨན་ཡུལ་དུ་ཡོད་ཅེས་སྨྲས་པ༌ན།
GEN 42:33 ཡུལ་དེའི་བདག་པོ་ན༌རེ། བདག་གིས་ཁྱོད་རྣམས་མི་དྲང་པོ་ཡིན་པ་ཤེས་དགོས༌ན། ཁྱོད་ཅག་རྣམས་ལས་གཅིག་བདག་གི་ཡུལ་འདིར་སྡོད༌དང༌། གཞན་རྣམས་ཀྱིས་འབྲུ་རིགས་ཁུར་ནས་རང་ཁྱིམ་གྱི་བཀྲེས་ལྟོགས་སེལ་བར་སོང༌ཞིག
GEN 42:34 འོན༌ཀྱང༌། ཁྱོད་རྣམས་ཀྱིས་རང་གི་སྤུན་ཆེས་ཆུང་བ་དེ་འདིར་ཁྲིད་ཤོག༌དང༌། བདག་གིས་ཁྱོད་རྣམས་མྱུལ་མ་མིན་པར་མི་དྲང་པོ་ཡིན་པ་ཤེས་ནུས་པ༌ཡིན། དེ་ལྟར་བྱས༌ན། བདག་གིས་ཁྱོད་ཅག་གི་སྤུན་ཕྱིར་ཁྱོད་རྣམས་ལ་སྤྲོད་པ༌དང༌། ཁྱོད་རྣམས་ཀྱིས་ཀྱང་ཡུལ་འདི་ནས་ཚོང་ལས་གཉེར་ཆོག་པ་ཡིན་སྨྲས་ཞེས༌བཤད་དོ།།
GEN 42:35 དེ་ཡང་ཕྱིས་སུ་ཁོ་རྣམས་ཀྱིས་རང་རང་གི་སྒྱེ་མོའི་ཁ་ཕྱེས་པ་ན། མི་རེ་རེའི་དངུལ་ཁུག་སྒྱེ་མོའི་ནང་དུ་ཡོད་པ༌དང༌། ཡབ་དང་ཁོ་རྣམས་ཀྱིས་དངུལ་ཁུག་མཐོང་བ་དང་འཇིགས་སྐྲག་སྐྱེས༌སོ།།
GEN 42:36 དེ་ནས་ཡབ་ཡ་ཀོབ་ཀྱིས་བུ་རྣམས་ལ་འདི་སྐད༌དུ། ཁྱོད་ཅག་གིས་བདག་གི་བུ་གཉིས་མེད་པར་བྱས༌ཏེ། ཡོ་སེབ་མེད༌ལ། སི་མུ་ཨོན་ཡང་མེད༌དོ། །ཁྱོད་རྣམས་ཀྱིས་ད་དུང་བདག་གི་བུ་པེན་ཡཱ་མེན་ཡང་ཁྲིད་འདོད་པ༌རེད། ད་ལྟ་སྡུག་བསྔལ་འདི་ཐམས་ཅད་བདག་གི་མགོ་ལ་ཡོང་བ་ཡིན་ཞེས་སྨྲས༌སོ།།
GEN 42:37 དེ་ནས་རུ་བེན་གྱིས་ཡབ་ལ་འདི༌ལྟར། སྤུན་པེན་ཡཱ་མེན་བདག་ལ་སྤྲོད༌དང༌། བདག་གིས་ཁྱེད་ལ་ཕྱིར་སྤྲོད་ངེས༌ཡིན། གལ་ཏེ་བདག་གིས་སྤུན་པེན་ཡཱ་མེན་ཕྱིར་ཁྲིད་མ་ཡོང༌ན། ཁྱེད་ཀྱིས་བདག་གི་བུ་གཉིས་ཀ་བསད་ཆོག་ཅེས་སྨྲས་པ༌ན།
GEN 42:38 ཡ་ཀོབ་ན༌རེ། པེན་ཡཱ་མེན་ཁྱོད་རྣམས་དང་མཉམ་དུ་འགྲོ་མི༌ཆོག ཁོའི་གཅེན་པོ་ཚེ་ལས་འདས་ཤིང་ད་ལྟ་ཁོ་རང་ཁོ་ན་ལུས་འདུག་པ༌དང༌། ཁོ་རང་ཁྱོད་རྣམས་དང་མཉམ་དུ་འགྲོ་བའི་ལམ་བར་དུ་བར་ཆད་བྱུང༌ཚེ། ཁྱོད་རྣམས་ཀྱིས་སྐྲ་དཀར་པོར་གྱུར་པའི་རྒན་པོ་བདག་སྡུག་བསྔལ་གྱི་ངང་ནས་གཤིན་པོའི་གནས་སུ་བསྐྱལ་བ་ཡིན་ཞེས་སྨྲས༌སོ།།
GEN 43:1 དེ་ཡང་ཡུལ་དེར་མུ་གེ་བྱུང་བ་ཚབས་ཆེ༌བས།
GEN 43:2 ཁོ་རྣམས་ཀྱིས་ཨེ་ཅིབ་ཡུལ་ནས་ཁྱེར་ཡོང་བའི་འབྲུ་རིགས་ཐམས་ཅད་ཟོས་ཚར་བ༌དང༌། ཡང་ཁོ་རྣམས་ཀྱི་ཕ་ན༌རེ། ཁྱོད་རྣམས་ཡང་འབྲུ་རིགས་ཉོ་རུ་སོང་ཞིག་ཅེས་སྨྲས༌སོ།།
GEN 43:3 དེ་ནས་ཡ་ཧུ་དཱ་ན༌རེ། དེ་སྔར་མི་དེས་ངེད་ཅག་ལ་ནན་གྱིས་འདི་སྐད༌དུ། ཁྱོད་ཅག་གི་སྤུན་ཁྱོད་ཅག་དང་མཉམ་དུ་མ་ཡོང༌ན། བདག་དང་ངོ་འཕྲད་པར་ཡོང་མི་དགོས་ཞེས་སྨྲས་མྱོང༌བས།
GEN 43:4 ཡབ་ཁྱེད་ཀྱིས་སྤུན་པེན་ཡཱ་མེན་ངེད་ཅག་དང་ལྷན་དུ་འགྲོ་བར་མཛད༌ན། ངེད་ཅག་མར་འབྲུ་རིགས་ཉོ་རུ༌འགྲོ།
GEN 43:5 ཁྱེད་ཀྱིས་སྤུན་པེན་ཡཱ་མེན་ངེད་ཅག་དང་མཉམ་དུ་འགྲོ་རུ་མི་འཇུག་ན། ངེད་ཅག་ཀྱང་འགྲོ་བར་མི༌བྱ། ཅིའི་ཕྱིར་ཞེ༌ན། དེ་སྔར་མི་དེས་ངེད་ཅག་ལ་ཁྱོད་ཅག་གི་སྤུན་ཁྱོད་ཅག་དང་མཉམ་དུ་མ་ཡོང་ན་བདག་དང་ངོ་འཕྲད་པར་མི་བྱ་ཞེས་ནན་གྱིས་སྨྲས་མྱོང་བའི་ཕྱིར་ཡིན་ཞེས་སྨྲས༌སོ།།
GEN 43:6 དེར་ཡེས་ར་ཨེལ་ན༌རེ། ཁྱོད་རྣམས་ཀྱིས་མི་དེར་ངེད་ཅག་ལ་ད་དུང་སྤུན་ཞིག་ཡོད་ཅེས་སྨྲས་ཏེ་བདག་ལ་འདི་ལྟར་གནོད་འཚེ་བྱེད་དོན་ཅི་ཞེས་སྨྲས་པ༌ལ།
GEN 43:7 བུ་རྣམས་ན༌རེ། མི་དེས་ངེད་ཅག་དང་ངེད་ཅག་གི་ཉེ་རིང་སོགས་ཞིབ་ཏུ་འདི༌ལྟར། ཁྱོད་ཅག་གི་ཕ་ནི་བཞུགས་ལགས༌སམ། ཁྱོད་རྣམས་ལ་ད་དུང་སྤུན་གཞན་ཡོད་དམ་ཞེས་དྲིས་པ༌ན། ངེད་ཅག་གིས་ཀྱང་ཁོའི་དྲི་བ་ལྟར་ལན་བཏབ་པ༌ཡིན། ཁོས་ཁྱོད་ཅག་གི་སྤུན་ཁྲིད་ཤོག་ཅིག་ཅེས་སྨྲ་ངེས་པ་ངེད་ཅག་གིས་ཤེས་ནུས་སམ་ཞེས་སྨྲས༌སོ།།
GEN 43:8 དེ་ནས་ཡ་ཧུ་དཱ་ཡིས་ཕ་ལ་འདི༌ལྟར། རང་ཅག་ཚང་གི་མི་ཐམས་ཅད་འཚོ་ཞིང་གཞེས་པ་དང་མི་འཆི་བའི༌ཕྱིར། ཁྱེད་ཀྱིས་སྤུན་ཆུང་བདག་དང་ལྷན་དུ་འགྲོ་རུ་ཆུག༌དང༌། ངེད་ཅག་འབྲུ་རིགས་ཉོ་རུ༌འགྲོ།
GEN 43:9 བདག་གིས་སྤུན་གྱི་བདེ་འཇགས་ལ་ཁག་ཐེག་བྱེད་ཅིང་རང་ཉིད་གཏའ་མར་འཇོག༌གོ །གལ་ཏེ་བདག་གིས་སྤུན་ཕྱིར་ཁྱེད་ཀྱི་དྲུང་དུ་ཁྲིད་མ་ཡོང༌ན། བདག་གིས་ནམ་ཡང་སྡིག་པ་འཁུར་ངེས༌ཡིན།
GEN 43:10 གལ་སྲིད་དུས་འགྱངས་བྱས་པ་མིན༌ན། ད་ལྟ་ངེད་ཅག་ཐེངས་གཉིས་ཙམ་ལའང་ཕྱིར་ཡོང་ཟིན་ཞེས་སྨྲས༌སོ།།
GEN 43:11 དེ་ནས་ཁོ་རྣམས་ཀྱི་ཕ་ཡེས་ར་ཨེལ་ན༌རེ། དངོས་གནས་དེ་ལྟར་བྱེད་དགོས༌ན། ཁྱོད་ཅག་གིས་དེ་བཞིན་བྱོས༌ཤིག རང་ཅག་གི་ཡུལ་འདིའི་ཕུལ་དུ་བྱུང་བའི་སྤོས་དཀར་དང༌། སྦྲང༌རྩི། བསུང་རྫས། གུ༌གུལ། ཚི་གུའི༌རིགས། སྟར་ཀ་བཅས་རེ་རེ་བཞིན་ཉུང་ངུ་རེ་བླངས་ནས་སྣོད་ཀྱི་ནང་དུ་བཞག༌སྟེ། མར་ཨེ་ཅིབ་ཡུལ་གྱི་མི་དེ་ལ་ལེགས་སྐྱེས་སུ་ཁྱེར༌ཅིག
GEN 43:12 གཞན་ཡང་ལག་ཏུ་དངུལ་སྒོར་ལྡབ་གཉིས་མང་དུ་འཛིན་པ༌དང༌། དེ་སྔར་སྒྱེ་མོའི་ནང་དུ་ཡོད་པའི་དངུལ་སྒོར་ཡང་ལག་ཏུ་འཛིན༌དགོས། དེ་ནི་ནོར་འཕྱུག་བྱུང་ནས་སྒྱེ་མོའི་ནང་དུ་བཅུག་པ་ཡིན་ཡང༌སྲིད།
GEN 43:13 ཁྱོད་ཅག་གི་སྤུན་ཁྲིད་ནས་མི་དེའི་དྲུང་དུ་སོང༌ཞིག
GEN 43:14 ཁྱོད་ཅག་གི་སྤུན་སི་མུ་ཨོན་དང་པེན་ཡཱ་མེན་གཉིས་ཀ་ཕྱིར་སྤྲོད་པའི་ཆེད༌དུ། ཀུན་དབང་དཀོན་མཆོག་གིས་མི་དེའི་མདུན་དུ་ཁྱོད་ཅག་ལ་སྙིང་རྗེས་གཟིགས་པར༌མཁྱེན། གལ་ཏེ་བདག་གི་བུ་གཉིས་ཀ་འཆི་བར་གྱུར་ན་འཆི་རུ་བཅུག་ཅེས་སྨྲས༌སོ།།
GEN 43:15 དེ་ནས་ཁོ་རྣམས་ཀྱིས་ལེགས་སྐྱེས་དང་དངུལ་སྒོར་ལྡབ་གཉིས་བཟུང་ཞིང་པེན་ཡཱ་མེན་ཁྲིད་ནས་ཨེ་ཅིབ་ཡུལ་གྱི་ཡོ་སེབ་དྲུང་དུ་སོང༌ངོ༌།།
GEN 43:16 དེ་ཡང་ཡོ་སེབ་ཀྱིས་པེན་ཡཱ་མེན་ཁོ་རྣམས་དང་མཉམ་དུ་ཡོང་བ་མཐོང་སྟེ་རང་གི་ཁྱིམ་ལས་གཉེར་མཁན་ལ་འདི༌ལྟར། མི་འདི་རྣམས་ཁང་པའི་ནང་དུ་ཁྲིད༌ཅིག ཕྱུགས་ཤ་ཤེད་ཅན་ཞིག་བཤས་ནས་སྤྲོ་སྟོན་ལ་སྟ་གོན་བྱེད་པར༌གྱིས། ཅིའི་ཕྱིར་ཞེ༌ན། བདག་གིས་མི་འདི་རྣམས་དང་མཉམ་དུ་གུང་ཚིགས་འཐུང་བའི་ཕྱིར་ཡིན་ཞེས་སྨྲས་པ༌དང༌།
GEN 43:17 ཁྱིམ་ལས་གཉེར་མཁན་གྱིས་ཀྱང་ཡོ་སེབ་ཀྱི་བཀའ་ལྟར་ཁོ་རྣམས་ཡོ་སེབ་ཀྱི་ཁང་པའི་ནང་དུ༌ཁྲིད།
GEN 43:18 དེ་ཡང་ཡོ་སེབ་ཀྱི་ཁང་པའི་ནང་དུ་ཁྲིད་པས་ཁོ་རྣམས་འཇིགས་ཏེ་འདི༌ལྟར། ངེད་ཅག་འདིར་ཁྲིད་ཡོང་བ་ནི་ཐེངས་དང་པོར་འབྲུ་རིགས་ཉོ་རུ་ཡོང་བའི་དུས༌སུ། སྒྱེ་མོའི་ནང་དུ་དངུལ་སྒོར་བཞག་ཡོད་པའི་ཕྱིར་ཡིན་ངེས༌ཤིང༌། བསམ་བཞིན་ངེད་ཅག་ལ་བསྙོན་བཙུགས་ཏེ་གནོད་འཚེ་བྱེད་པ༌དང༌། བཙན་གྱིས་ངེད་རྣམས་བྲན་གཡོག་ཏུ་འགོད༌པ། ངེད་ཅག་གི་བོང་བུའང་འཕྲོག་པར་རྩོམ་པ་རེད་ཅེས་སྨྲས༌སོ།།
GEN 43:19 དེ་ནས་ཁོ་རྣམས་ཡོ་སེབ་ཀྱི་ཁྱིམ་ལས་གཉེར་མཁན་གྱི་གམ་དུ་བཅར་ཏེ་ཁང་པའི་སྒོ་འགྲམ་དུ་འདི༌ལྟར།
GEN 43:20 བདག་པོ༌ལགས། ངེད་ཅག་ཐེངས་དང་པོར་དངོས་གནས་འབྲུ་རིགས་ཉོ་རུ་ཡོང་བ༌དང༌།
GEN 43:21 ཕྱིས་སུ་ལམ་བར་ནས་ཞག་སྡོད་བྱེད་སར་སྒྱེ་མོའི་ཁ་ཕྱེས་པ་ན། མི་རེ་རེའི་དངུལ་སྒོར་མང་ཉུང་མེད་པར་ད་དུང་སྒྱེ་མོའི་ནང་དུ་ཡོད༌ལ། ད་ལྟ་ངེད་ཅག་གིས་ཕྱིར་ཁྱེར་ཡོང༌ངོ༌།།
GEN 43:22 ཐེངས་འདིར་ཡང་དངུལ་སྒོར་བཟུང་ནས་འབྲུ་རིགས་ཉོ་རུ་ཡོང་བ༌ཡིན། འོན་ཀྱང་ཐེངས་སྔ་མར་ངེད་ཅག་གི་སྒྱེ་མོའི་ནང་དུ་དངུལ་སྒོར་འཇོག་མཁན་སུ་ཡིན་མི་ཤེས་ཞེས་སྨྲས༌སོ།།
GEN 43:23 ཁྱིམ་ལས་གཉེར་མཁན་ན༌རེ། ཁྱོད་ཅག་གི་སེམས་བདེ་བར༌གྱིས། འཇིགས་མི༌དགོས། དེ་ནི་ཁྱོད་ཅག་དང་ཁྱོད་རྣམས་ཀྱི་ཕ་ཡི་དཀོན་མཆོག་གིས་རྒྱུ་ནོར་དེ་དག་སྒྱེ་མོའི་ནང་དུ་བཞག་པ༌ཡིན། ཁྱོད་ཅག་གི་དངུལ་སྒོར་བདག་གིས་སྔ་མོ་ནས་བླངས་ཟིན་ཞེས་སྨྲས་པ༌དང༌། སི་མུ་ཨོན་ཁྲིད་ཡོང་ནས་ཁོ་རྣམས་ལ༌སྤྲད།
GEN 43:24 དེ་ནས་ཁོ་རྣམས་ཁང་པའི་ནང་དུ་ཁྲིད་པ་དང་རྐང་པ་བཀྲུ་བྱེད་ཀྱི་ཆུ་བླུགས༌ཤིང༌། བོང་བུ་དག་ལ་རྩྭའང་བྱིན༌ཏོ།།
GEN 43:25 ཁོ་རྣམས་ཀྱིས་ལེགས་སྐྱེས་གྲ་སྒྲིག་བྱེད་ཀྱིན་ཡོ་སེབ་གུང་ཚིགས་བཞེས་སུ་ཡོང་བར་སྒུག་པ༌སྟེ། ཡོ་སེབ་ཀྱིས་ཁོ་རྣམས་དང་མཉམ་དུ་གུང་ཚིགས་བཞེས་ངེས་པ་ཐོས་པའི་ཕྱིར༌རོ།།
GEN 43:26 དེ་ནས་ཡོ་སེབ་ཁྱིམ་དུ་ལོག་པ༌ན། ཁོ་རྣམས་ཀྱིས་ཡོ་སེབ་ལ་ལེགས་སྐྱེས་ཕུལ་བ་དང་ཕྱག་བཙལ༌ཏོ།།
GEN 43:27 ཡོ་སེབ་ཀྱིས་ཀྱང་ཁོ་རྣམས་ལ་འཚམས་འདྲི་བྱས་ཤིང་ན༌རེ། ཁྱོད་རྣམས་ཀྱིས་བརྗོད་པའི་ཕ་ནི༌བདེའམ། ཁོང་ད་དུང་བཞུགས་ལགས་སམ་ཞེས་དྲིས་པ༌ན།
GEN 43:28 ཁོ་རྣམས་ན༌རེ། ཁྱེད་ཀྱི་ཞབས་ཕྱི་པ་སྟེ་ངེད་ཅག་གི་ཕ་ནི་བདེ་བར་བཞུགས་པ་ཡིན་ཞེས་སྨྲས་པ་དང་གུས་པས་ཕྱག་བཙལ༌ཏོ།།
GEN 43:29 དེ་ནས་ཡོ་སེབ་ཀྱིས་མགོ་ཡར་བཀྱགས་ནས་བལྟས་པ༌ན། རང་ཉིད་ཀྱི་མ་གཅིག་གི་སྤུན་པེན་ཡཱ་མེན་མཐོང་སྟེ་འདི༌ལྟར། ཁྱོད་རྣམས་ཀྱིས་དེ་སྔར་བདག་ལ་བརྗོད་པའི་སྤུན་ཆེས་ཆུང་བ་ཞེས་པ་ཁོ་རང་ཡིན་ནམ་ཞེས་དྲིས་པ༌དང༌། ཡང་ཁོ་ན༌རེ། བདག་གི༌བུ། དཀོན་མཆོག་གིས་ཁྱོད་ལ་ཐུགས་རྗེ་གནང་བར་སྨོན་ཞེས་སྨྲས་པ༌དང༌།
GEN 43:30 རང་གི་སྤུན་ལ་བཅངས་པའི་བརྩེ་དུང་ཀུན་ནས་གཡོས༌ཤིང༌། ཁོའི་སེམས་ཁོང་དུ་ངུ་འདོད་པའི་སྣང་བ་ཞིག་སྐྱེས༌ཏེ། མྱུར་དུ་རང་ཉིད་ཀྱི་གཟིམ་ཁང་དུ་སོང་ནས་རབ་ཏུ་ངུས༌སོ།།
GEN 43:31 དེ་ནས་ཁོས་ཁ་ངོ་བཀྲུས་ཤིང་སེམས་སྡུག་གི་བསམ་པ་ནན་གྱིས་གབ་ནས་ཕྱིར་ཐོན་ཏེ་གསོལ་སྟོན་བྱེད་པའི་བཀའ་བསྒོས་པ༌དང༌།
GEN 43:32 ཞབས་ཕྱི་པ་རྣམས་ཀྱིས་ཀྱང་ཡོ་སེབ་ལ་གསོལ་སྟོན་བཤམས༌ཤིང༌། ཁོ་རྣམས་ལའང་གསོལ་སྟོན་བཤམས་པ༌དང༌། ཡང་ཡོ་སེབ་དང་མཉམ་དུ་ཞལ་ཟས་ལ་རོལ་བའི་ཨེ་ཅིབ་ཀྱི་མི་རྣམས་ལའང་གསོལ་སྟོན་བཤམས༌སོ། །ཅིའི་ཕྱིར་ཞེ༌ན། ཨེ་ཅིབ་ཀྱི་མི་རིགས་དང་ཨིབ་རི་པའི་མི་རིགས་གཉིས་ཀྱིས་ལྷན་དུ་ཟས་མི་བཟའ་བའི་ཕྱིར་ཡིན༌ཞིང༌། ཨེ་ཅིབ་མི་རིགས་ཀྱིས་དོན་དེ་ནི་སྐྱུག་བྲོ་བར་སྙམ༌མོ།།
GEN 43:33 དེ་ནས་ཡོ་སེབ་ཀྱིས་རང་གི་མདུན་དུ་སྐྱེས་རིམ་ལྟར་སྤུན་ཟླ་རྣམས་གྲལ་བསྒྲིགས་ནས་འདུག་ཏུ་བཅུག་པ༌ན། སྤུན་ཟླ་རྣམས་ཀྱིས་ཕན་ཚུན་ལ་ལྟ་བཞིན་དོན་དེར་ངོ་མཚར་བར་གྱུར༌ཏོ།།
GEN 43:34 ཡོ་སེབ་ཀྱིས་རང་གི་མདུན་ངོས་ཀྱི་ཟས་རིགས་སོ་སོར་བཀར་ནས་སྤུན་རྣམས་ལ་གནང་དགོས་པའི་བཀའ་ཕབ་པ༌དང༌། པེན་ཡཱ་མེན་ལ་སྤུན་གཞན་ལས་ལྡབ་ལྔ་ཡི་ལྷག་མ་ཐོབ༌ཅིང༌། ཁོ་རྣམས་ཀྱིས་ཡོ་སེབ་དང་ལྷན་དུ་ཆང་དང་སྤྲོ་སྟོན་ལ་རོལ༌ཏོ།།
GEN 44:1 དེ་ནས་ཡོ་སེབ་ཀྱིས་ཁྱིམ་ལས་གཉེར་མཁན་ལ་འདི་སྐད༌དུ། མི་འདི་རྣམས་ཀྱི་སྒྱེ་མོའི་ནང་དུ་འབྲུ་རིགས་ཀྱིས་བཀང་བ་དང་བོང་བུས་ཐེག་ཚད་ཀྱི་ཁལ་འགེལ་བར༌གྱིས། ཡང་ཁོ་རྣམས་ཀྱི་དངུལ་སྒོར་རང་རང་གི་སྒྱེ་མོའི་ནང་དུ་འཇོག་པར༌བྱའོ།།
GEN 44:2 བདག་གི་དངུལ་ཕོར་དང་སྤུན་ཆེས་ཆུང་བའི་དངུལ་སྒོར་རྣམས་ལྷན་དུ་ཁོའི་སྒྱེ་མོའི་ནང་དུ་འཇོག་པར་གྱིས་ཞེས་སྨྲས་པ༌དང༌། ཁྱིམ་ལས་གཉེར་མཁན་གྱིས་ཀྱང་ཡོ་སེབ་ཀྱི་བཀའ་ལྟར་བསྒྲུབས༌ཤིང༌།
GEN 44:3 དེའི་ཕྱི་ཉིན་ནམ་ལངས་པ་དང་ཁོ་རྣམས་བོང་བུ་དང་བཅས་ལམ་དུ་བཅུག༌གོ །
GEN 44:4 དེ་ཡང་ཁོ་རྣམས་གྲོང་ཁྱེར་དང་ཁ་བྲལ་ནས་ཅུང་མ་འགོར༌བར། ཡོ་སེབ་ཀྱིས་ཁྱིམ་ལས་གཉེར་མཁན་ལ་འདི་སྐད༌དུ། ཁྱོད་ཀྱིས་མྱུར་དུ་ཁོ་རྣམས་ཀྱི་རྗེས་བསྙེག་པར༌གྱིས། ཁོ་རྣམས་ཀྱི་རྗེས་ཆོད་པ༌ན། ཁྱོད་ཅག་གིས་དྲིན་ལན་ངན་འཇལ་བྱེད་པ་ཅི༌ཡིན།
GEN 44:5 འདི་ནི་ངེད་ཅག་གི་བདག་པོའི་ཆང་ཕོར་མ་ཡིན༌ནམ། འདི་ནི་ངེད་ཅག་གི་བདག་པོའི་མོ་འདེབས་བྱེད་ཀྱི་ཕོར་བ་མ་ཡིན༌ནམ། ཁྱོད་ཅག་གིས་འདི་ལྟར་བྱས་ན་ཉེས་པ་བྱས་པ་མ་ཡིན་ནམ་ཞེས་སྨྲོས་ཤིག་ཅེས་བཤད་པ༌དང༌།
GEN 44:6 ཁྱིམ་ལས་གཉེར་མཁན་གྱིས་ཁོ་རྣམས་བདས་ཏེ་རྗེས་ཆོད་པ་དང་བདག་པོའི་བཀའ་ལྟར་སྨྲས་པ༌ན།
GEN 44:7 ཁོ་རྣམས་ན༌རེ། རང་ཅག་གི་བདག་པོས་འདི་ལྟར་སྨྲ་བའི་རྒྱུ་མཚན༌ཅི། ཁྱེད་ཀྱི་ཞབས་ཕྱི་པ་ངེད་རྣམས་ཀྱིས་ལས་འདི་ལྟ་བུ་བྱེད་མི༌སྲིད།
GEN 44:8 ལྟོས༌དང༌། དེ་སྔར་ངེད་ཅག་གིས་རང་གི་སྒྱེ་མོའི་ནང་དུ་དངུལ་སྒོར་ཡོད་པ་ཤེས་པ༌དང༌། ཀ་ན་ཨན་ཡུལ་ནས་ཕྱིར་ཁྱེར་ཡོང་ནས་ཁྱེད་ལ་སྤྲད་པ་མ་ཡིན༌ནམ། ངེད་ཅག་གིས་ཁྱེད་ཀྱི་བདག་པོའི་ཁྱིམ་ནས་གསེར་དངུལ་རྐུ་སྲིད༌དམ།
GEN 44:9 ཁྱེད་ཀྱི་ཞབས་ཕྱི་པའི་ཁྲོད་ནས་སུ་ཞིག་ལས་བཙལ་ཏེ་རྙེད༌ན། མི་དེ་ནི་གསོད་པར༌བྱ། ངེད་རྣམས་ཀྱང་རང་ཅག་གི་བདག་པོའི་གཡོག་པོར་བྱེད་ངེས་ཡིན་ཞེས་ལན་བཏབ༌བོ།།
GEN 44:10 ཁྱིམ་ལས་གཉེར་མཁན་ན༌རེ། ད་ལྟ་ཁྱོད་ཅག་གིས་སྨྲས་པ་བཞིན་བྱོས༌ཤིག མི་སུ་ཞིག་ལས་བཙལ་ནས་རྙེད་ན་དེ་ནི་བདག་གི་གཡོག་པོ་བྱེད༌དགོས། གཞན་རྣམས་ལ་ཉེས་པ་མེད་ཅེས་སྨྲས་པ༌ན།
GEN 44:11 ཁོ་རྣམས་ཀྱིས་མྱུར་དུ་རང་རང་གི་སྒྱེ་མོ་ས་རུ་བཞག་སྟེ་ཁ་ཕྱེས་པ་དང༌།
GEN 44:12 ཁྱིམ་ལས་གཉེར་མཁན་གྱིས་ཁོ་རྣམས་ལས་ལོ་ཆེ་བ་ནས་ལོ་ཆུང་བའི་བར་དུ་རིམ་བཞིན་བཙལ་བ༌ན། དངུལ་ཕོར་དེ་པེན་ཡཱ་མེན་གྱི་སྒྱེ་མོ་ལས་རྙེད༌དོ།།
GEN 44:13 དེ་ནས་ཁོ་རྣམས་ཡིད་ཤིན་ཏུ་སྐྱོ་བའི་ངང་གྱོན་པ་བཤགས༌ཤིང༌། རང་རང་གི་སྒྱེ་མོ་བོང་བུར་བཀལ་ནས་ཕྱིར་གྲོང་ཁྱེར་དུ་ལོག༌གོ །
GEN 44:14 དེ་ནས་ཡ་ཧུ་དཱ་དང་ཁོའི་སྤུན་རྣམས་ཡོ་སེབ་ཀྱི་ཁྱིམ་དུ་སོང་བ་དང་ཡོ་སེབ་ཀྱང་དེ་རུ་ཡོད༌པས། ཁོ་རྣམས་ཀྱིས་ཡོ་སེབ་ཀྱི་དྲུང་དུ་པུས་མོ་སར་བཙུགས་ནས་ཕྱག་བཙལ་བ༌ན།
GEN 44:15 ཡོ་སེབ་ན༌རེ། ཁྱོད་རྣམས་ཀྱིས་དེ་ལྟར་བྱེད་དོན༌ཅི། བདག་ལྟ་བུས་མོ་འདེབས་ནུས་པ་ཁྱོད་ཅག་གིས་མི་ཤེས་སམ་ཞེས་སྨྲས༌སོ།།
GEN 44:16 ཡ་ཧུ་དཱ་ན༌རེ། ངེད་རྣམས་ཀྱིས་རང་ཅག་གི་བདག་པོར་ཅི་ཞིག༌སྨྲའམ། ངེད་ཅག་གིས་རང་ལ་ཉེས་སྐྱོན་མེད་ཚུལ་ཇི་ལྟར་བདེན་དཔང་བྱེད༌དམ། དཀོན་མཆོག་གིས་ཁྱེད་ཀྱི་ཞབས་ཕྱི་པ་དག་གི་སྔོན་ཆད་ཀྱི་ཉེས་སྐྱོན་མཁྱེན༌ཞིང༌། ད་ལྟ་ངེད་ཅག་དང་ཕོར་བ་རྙེད་པའི་མི་དང་བཅས་པ་ཐམས་ཅད་རང་ཅག་གི་བདག་པོའི་གཡོག་པོ་ཡིན་ཞེས་སྨྲས༌སོ།།
GEN 44:17 ཡོ་སེབ་ན༌རེ། བདག་གིས་འདི་ལྟར་ཅི་ནས་ཀྱང་མི་བྱ༌སྟེ། སུ་ཞིག་ལས་ཕོར་བ་རྙེད་པ་ཡིན༌ན་མི་དེ་བདག་གི་གཡོག་པོར་བྱེད་དགོས་པ༌ལས། གཞན་རྣམས་བདེ་བའི་ངང་ཁྱོད་ཅག་གི་ཕ་ཡི་དྲུང་དུ་སོང་ཞིག་ཅེས་སྨྲས༌སོ།།
GEN 44:18 ཡང་ཡ་ཧུ་དཱ་ནི་ཡོ་སེབ་ཀྱི་དྲུང་དུ་བཅར་ཏེ་འདི༌ལྟར། བདག་པོ༌ལགས། ཁྱེད་ཀྱིས་ཞབས་ཕྱི་པ་བདག་ལ་གསན་པར༌ཞུ། ཁྱེད་རང་ཐུགས་རྒྱལ་མི་བཞེངས་པར༌མཛོད། ཅིའི་ཕྱིར་ཞེ༌ན། ཁྱེད་ནི་ཕཱར་ཨོལ་དང་འདྲ་མཚུངས་ཡིན་པའི་ཕྱིར༌རོ།།
GEN 44:19 བདག་པོ་ཁྱེད་ཀྱིས་དེ་སྔར་ཞབས་ཕྱི་པ་ངེད་རྣམས༌ལ། ཁྱོད་རྣམས་ཀྱི་ཕ་བཞུགས་ལགས༌སམ། སྤུན་གཞན་ནི་ཡོད་དམ་མེད་ཅེས་དྲིས་མྱོང༌ལ།
GEN 44:20 ངེད་ཅག་གིས་བདག་པོ་ཁྱེད༌ལ། ངེད་རྣམས་ལ་ཕ་ཡོད་ཅིང་ཁོང་ནི་ལོ་ན་བགྲེས་པ༌དང༌། དགུང་ལོ་མཐོ་བའི་དུས་སུ་སྐྱེས་པའི་བུ་ཞིག་ཡོད༌ལ། ཁོའི་གཅེན་པོ་ཚེ་ལས་འདས༌ཤིང༌། ཁོའི་ཨ་མས་ཁོ་རང་ཁོ་ན་བསྐྱུར་བས་ཕ་ཡིས་བུ་དེ་ལ་ཤིན་ཏུ་གཅེས་པ་ཡིན་ཞེས་ལན་བཏབ་པ༌ཡིན།
GEN 44:21 ཡང་ཁྱེད་ན༌རེ། ཁོ་རང་འདིར་ཁྲིད་ཤོག༌ཅིག བདག་གིས་ཁོ་རང་དངོས་སུ་མཐོང་འདོད་ཅེས་སྨྲས་པ༌ལ།
GEN 44:22 ཡང་ངེད་ཅག་གིས་འདི༌ལྟར། བུ་ཆུང་ཕ་དང་མཉམ་དུ་འདུག་དགོས༌ལ། གལ་ཏེ་བུ་ཆུང་ཕ་དང་ཁ་བྲལ༌ན། ཕ་ནི་ཚེ་ལས་འདའ་བར་འགྱུར་ཞེས་སྨྲས་པ༌ཡིན།
GEN 44:23 ཡང་ཁྱེད་ན༌རེ། ཁྱོད་རྣམས་ཀྱི་སྤུན་ཆེས་ཆུང་བ་དེ་ཁྱོད་ཅག་དང་མཉམ་དུ་མ་ཡོང༌ན། ཁྱོད་རྣམས་བདག་དང་ངོ་འཕྲད་པར་ཡོང་མི་དགོས་ཞེས་སྨྲས༌ཤིང༌།
GEN 44:24 ངེད་རྣམས་ཁྱེད་ཀྱི་ཞབས་ཕྱི་པ་སྟེ་བདག་ཅག་གི་ཕ་ཡི་དྲུང་དུ་སོང་ནས་ཁྱེད་ཀྱི་གཏམ་ཇི་བཞིན་ཁོང་ལ་སྨྲས་པ༌དང༌།
GEN 44:25 ངེད་ཅག་གི་ཕ་ན༌རེ། ཁྱོད་རྣམས་སླར་ཡང་འབྲུ་རིགས་ཉོ་རུ་སོང་ཞིག་ཅེས་སྨྲས༌བྱུང༌།
GEN 44:26 ཡང་ངེད་ཅག་གིས་ཁོང་ལ་འདི༌ལྟར། ངེད་ཅག་འགྲོ་མི༌ནུས། གལ་ཏེ་སྤུན་ཆུང་བ་ངེད་ཅག་དང་མཉམ་དུ་འགྲོ་རུ་བཅུག༌ན། ངེད་ཅག་མར་ཨེ་ཅིབ་ཡུལ་དུ་འབྲུ་རིགས་ཉོ་རུ་འགྲོ༌སྟེ། སྤུན་ཆུང་བ་ངེད་ཅག་དང་མཉམ་དུ་མེད༌ན། ངེད་རྣམས་མི་དེ་དང་ངོ་འཕྲད་མི་ཐུབ་པའི་ཕྱིར་ཡིན་ཞེས་སྨྲས་མྱོང༌ངོ༌།།
GEN 44:27 དེ་ནས་ཁྱེད་ཀྱི་ཞབས་ཕྱི་པ་ངེད་ཅག་གི་ཕ་ཡིས་ངེད་རྣམས་ལ་འདི༌ལྟར། བདག་གི་ཆུང་མས་བདག་ལ་བུ་གཉིས་བཙས་པ་ཁྱོད་རྣམས་ཀྱིས་ཤེས་ལ།
GEN 44:28 བུ་གཅིག་ནི་བདག་དང་ཁ་བྲལ་ནས་སོང༌ངོ༌། །བདག་གིས་ད་ལྟའི་བར་དུ་བུ་ཁོ་རང་མ་མཐོང་བས་ཁོ་གཅན་གཟན་གྱིས་དུམ་བུ་དུམ་བུར་བྱས་ནས་ཟོས་པ་ཤ་སྟག་ཡིན་སྙམ༌མོ།།
GEN 44:29 ད་ལྟ་ཁྱོད་རྣམས་ཀྱིས་བདག་གི་བུ་འདིའང་བདག་དང་ཕྲལ་བར་འདོད་པ༌དང༌། གལ་ཏེ་བུ་ཁོ་རང་ལ་བར་ཆད་བྱུང༌ན། ཁྱོད་རྣམས་ཀྱིས་སྐྲ་དཀར་པོར་གྱུར་པའི་རྒན་པོ་བདག་སྡུག་བསྔལ་གྱི་ངང་ནས་གཤིན་པོའི་གནས་སུ་བསྐྱལ་བ་ཡིན་ཞེས་སྨྲས༌ཤིང༌།
GEN 44:30 བདག་གི་ཕ་ཡི་སེམས་ནི་བུ་ཆེས་ཆུང་བ་འདི་ལ་ཤོར་ཡོད༌པས། ད་ལྟ་བདག་ཁྱེད་ཀྱི་ཞབས་ཕྱི་པ་ངེད་ཅག་གི་ཕ་ཡི་དྲུང་དུ་སོང༌ནའང༌། སྤུན་ཆེས་ཆུང་བ་ངེད་ཅག་དང་མཉམ་དུ་མེད༌ན།
GEN 44:31 ངེད་ཅག་གི་ཕ་ཡིས་བུ་ཆེས་ཆུང་བ་མ་མཐོང་བས་ཁོང་ཚེ་ལས་འདའ་བར༌ངེས། དེ་ལྟར་ངེད་རྣམས་ཀྱིས་ཁྱེད་ཀྱི་ཞབས་ཕྱི་པ་སྟེ་དབུ་སྐྲ་དཀར་པོར་གྱུར་པའི་ངེད་ཅག་གི་ཕ་སྡུག་བསྔལ་གྱི་ངང་ནས་གཤིན་པོའི་གནས་སུ་བསྐྱལ་བ་ཡིན༌ནོ།།
GEN 44:32 ཅིའི་ཕྱིར་ཞེ༌ན། ཞབས་ཕྱི་པ་བདག་གིས་དེ་སྔར་ཕ་ཡི་དྲུང་དུ་སྤུན་ཆེས་ཆུང་བ་འདིའི་དོན་དུ་རང་ཉིད་གཏའ་མར་བཞག་པ༌སྟེ། གལ་ཏེ་བདག་གིས་ཁོ་རང་ཕྱིར་ཁྲིད་འོངས་ནས་ཁྱེད་ལ་མ་སྤྲད༌ན། བདག་ཁྱེད་ཀྱི་དྲུང་དུ་ནམ་ཡང་སྡིག་ཅན་ཡིན་ཞེས་སྨྲས་པ༌ཡིན།
GEN 44:33 ད་ལྟ་ཞབས་ཕྱི་པ་བདག་སྤུན་ཆེས་ཆུང་བའི་ཚབ་ཏུ་ཁྱེད་ཀྱི་གཡོག་པོ་བྱེད་དུ་ཆུག སྤུན་ཆུང་ནི་སྤུན་གཞན་རྣམས་དང་མཉམ་དུ་འགྲོ་རུ་འཇུག་པར༌མཁྱེན།
GEN 44:34 གལ་ཏེ་སྤུན་ཆུང་བདག་དང་མཉམ་དུ་མ་སོང༌ན། བདག་ཕ་དང་ཇི་ལྟར་མཇལ༌ལམ། བདག་གིས་རང་གི་ཕ་ལ་འབྱུང་ངེས་པའི་སྡུག་བསྔལ་མིག་གིས་མཐོང་མི་ཕོད་ཅེས་སྨྲས༌སོ།།
GEN 45:1 དེ་ནས་ཡོ་སེབ་ཀྱིས་འཁོར་གཡོག་མང་པོ་ཚོགས་པའི་མདུན་དུ་རང་དབང་མེད་པར་ཁྱོད་རྣམས་ཐམས་ཅད་ཕར་སོང་ཞིག་ཅེས་སྨྲས་པ༌དང༌། ཡོ་སེབ་དང་སྤུན་རྣམས་ཀྱིས་ཕན་ཚུན་ངོས་འཛིན་པའི་སྐབས༌སུ། ཁོ་རྣམས་ཀྱི་གམ་དུ་མི་གཞན་གཅིག་ཀྱང་མེད༌པས།
GEN 45:2 ཡོ་སེབ་ཀྱིས་སྐད་ཆེན་པོ་བརྒྱབ་ནས་ངུས༌ཤིང༌། དོན་དེ་ཨེ་ཅིབ་ཀྱི་མི་རྣམས་ཀྱིས་ཐོས༌པ་དང་། ཕཱར་ཨོལ་གྱི་ཁྱིམ་མི་རྣམས་ཀྱིས་ཀྱང་ཐོས༌སོ།།
GEN 45:3 དེ་ནས་ཡོ་སེབ་ཀྱིས་སྤུན་རྣམས་ལ་འདི༌ལྟར། བདག་ནི་ཡོ་སེབ༌ཡིན། རང་ཅག་གི་ཕ་བདེ་བར་བཞུགས་ལགས་སམ་ཞེས་སྨྲས་ནའང་སྤུན་རྣམས་ཀྱིས་ལན་འདེབས་མ་ནུས༌ཏེ། ཁོ་རྣམས་ཡོ་སེབ་ཀྱི་དྲུང་དུ་འཇིགས་ཤིང་སྐྲག་པའི་ཕྱིར༌རོ།།
GEN 45:4 དེ་ནས་ཡོ་སེབ་ན༌རེ། ཁྱོད་རྣམས་མདུན་དུ་ཤོག་ཅིག་ཅེས་སྨྲས་པ་དང་ཁོ་རྣམས་ཀྱང་ཡོ་སེབ་ཀྱི་མདུན་དུ༌ཡོང༌། ཡང་ཡོ་སེབ་ན༌རེ། བདག་ནི་ཁྱོད་རྣམས་ཀྱི་སྤུན་ཡོ་སེབ༌སྟེ། ཁྱོད་ཅག་གིས་ཨེ་ཅིབ་ཡུལ་དུ་བཙོངས་པ་དེ་ཉིད༌ཡིན།
GEN 45:5 ད་ལྟ་ཁྱོད་རྣམས་ཀྱིས་ང་རང་ཡུལ་འདིར་བཙོངས་པའི་རྐྱེན་གྱིས་སེམས་སྡུག་བྱས་ནས་རང་ལ་སྡང་མི་དགོས༌ཏེ། འདི་ནི་དཀོན་མཆོག་གིས་ང་རང་ཁྱོད་རྣམས་ཀྱི་སྔོན་ལ་ཡུལ་འདིར་ཚེ་སྲོག་སྐྱོབ་པར་མངགས༌སོ།།
GEN 45:6 ད་ལྟ་ཡུལ་འདིར་མུ་གེ་བྱུང་ནས་ལོ་གཉིས་འགོར༌ཞིང༌། ད་དུང་ལོ་ལྔའི་རིང་ལ་ཞིང་འདེབས་མི་ཐུབ་པ་དང་ལོ་ཏོག་ཀྱང་མི་འབྱུང༌ངོ༌།།
GEN 45:7 དཀོན་མཆོག་གིས་ང་རང་ཁྱོད་རྣམས་ཀྱི་སྔོན་ལ་ཡུལ་འདིར་མངགས་དོན༌ནི། ས་གཞིའི་སྟེང་དུ་ཁྱོད་རྣམས་ལ་རིགས་རྒྱུད་ཡོད་པ༌དང༌། ཁྱོད་རྣམས་འཇིག་ཉེན་ལས་སྲོག་ཐར་བའི་ཕྱིར༌ཡིན།
GEN 45:8 དེའི༌ཕྱིར། ང་རང་ཡུལ་འདིར་མངགས་མཁན་ནི་དཀོན་མཆོག་ཡིན་པ་ལས་ཁྱོད་རྣམས་མ་ཡིན༌ལ། ཡང་ཁོང་གིས་བདག་ཕཱར་ཨོལ་གྱི་ཕ་ལྟ་བུར་བསྐོས༌ཤིང༌། རྒྱལ་པོའི་ཕོ་བྲང་གི་བདག་པོ༌དང༌། ཨེ་ཅིབ་ཡུལ་ཐམས་ཅད་ཀྱི་བློན་ཆེན་དུ་བསྐོས་ཡོད།
GEN 45:9 ཁྱོད་རྣམས་མྱུར་དུ་ཡར་རང་ཅག་གི་ཕ་ཡི་དྲུང་དུ་སོང་ནས་ཁོང་ལ་འདི་ལྟར་སྨྲ་བར་བྱ༌སྟེ། ཁྱེད་ཀྱི་བུ་ཡོ་སེབ་ན༌རེ། དཀོན་མཆོག་གིས་ང་རང་ཨེ་ཅིབ་ཡུལ་ཐམས་ཅད་ཀྱི་བདག་པོར་བསྐོས་པ༌དང༌། ཁྱོད་རྣམས་མྱུར་དུ་མར་ཡུལ་འདིར་ཤོག༌ཅིག དུས་འགྱངས་མི༌རུང༌།
GEN 45:10 ཡབ་ཁྱེད་དང་ཁྱེད་ཀྱི་བུ་དང་བུ༌མོ། ཚ་བོ་དང་ཚ༌མོ། ཐ་ན་ར་ལུག་དང་བ་གླང་གི་ཁྱུ་དང་བཅས་པ་ཐམས་ཅད་བདག་དང་ཉེ་སའི་གོ་ཤེན་ཡུལ་དུ་འདུག་པར༌བྱའོ།།
GEN 45:11 བདག་གིས་ཡུལ་དེ་ནས་ཁྱེད་ལ་ཞབས་ཕྱི་བསྒྲུབ་པར༌བྱ། ཅིའི་ཕྱིར་ཞེ༌ན། ད་དུང་ལོ་ལྔའི་རིང་ལ་མུ་གེ་འབྱུང༌བས། དེ་ལྟར་མ་བྱས་ཚེ་ཁྱེད་དང་ཁྱེད་ཀྱི་ཁྱིམ་མི་དང་བཅས་པ་ཐམས་ཅད་ལ་ཆག་སྒོ་འབྱུང༌ངོ༌།།
GEN 45:12 ཡང་ཁྱོད་རྣམས་དང་བདག་གི་སྤུན་པེན་ཡཱ་མེན་བཅས་ཀྱི་མིག་གིས་མཐོང་བ་བཞིན་བདག་གིས་ངག་ནས་འདི་ལྟར་སྨྲས་པ༌ཡིན།
GEN 45:13 ཁྱོད་རྣམས་ཀྱིས་ཀྱང་ཨེ་ཅིབ་ཡུལ་གྱི་བདག་གི་གཟི་བརྗིད་དང་ཅི་ཞིག་མཐོང་བ་རྣམས་ཕ་ལ་སྨྲ་བར༌གྱིས། ཡང་རང་ཅག་གི་ཕའང་མྱུར་དུ་ཡུལ་འདིར་ཁྲིད་ཤོག་ཅེས་སྨྲས༌སོ།།
GEN 45:14 དེ་ནས་ཡོ་སེབ་སྤུན་པེན་ཡཱ་མེན་གྱི་སྐེ་ལ་འཐམས་ནས་ངུས་པ༌དང༌། པེན་ཡཱ་མེན་ཡང་ཡོ་སེབ་ཀྱི་མཇིང་ལ་འཇུས་ནས་ངུས༌སོ།།
GEN 45:15 དེ་ནས་ཡོ་སེབ་ཀྱིས་སྤུན་གཞན་རྣམས་ལ་འོ་བྱེད་བཞིན་ངུས་པ༌རེད། དེའི་རྗེས༌སུ། སྤུན་གཞན་རྣམས་ཀྱིས་ཀྱང་ཡོ་སེབ་ལ་གཏམ་སྨྲས༌སོ།།
GEN 45:16 དེ་ཡང་དོན་དེ་ཐམས་ཅད་ཕཱར་ཨོལ་གྱི་ཕོ་བྲང་དུ་ཁྱབ༌སྟེ། ཡོ་སེབ་ཀྱི་སྤུན་རྣམས་སླེབས་བྱུང་ཞེས་སྨྲ་བཞིན་ཡོད་པ་ཕཱར་ཨོལ་དང་ཁོང་གི་བློན་ཆེན་རྣམས་ཀྱིས་ཐོས་པ་དང་ཐམས་ཅད་དགའ་བར་གྱུར༌ཏོ།།
GEN 45:17 དེ་ནས་ཕཱར་ཨོལ་གྱིས་ཡོ་སེབ་ལ་འདི་སྐད༌དུ། ཁྱོད་ཀྱིས་རང་གི་སྤུན་རྣམས༌ལ། ཁྱོད་ཅག་གིས་ཁལ་མར་ཁལ་བཀལ་ནས་ཀ་ན་ཨན་ཡུལ་དུ་སོང༌ཞིག
GEN 45:18 ཁྱོད་ཅག་གིས་ཕ་དང་གཉེན་ཉེ་ཐམས་ཅད་འདིར་ཁྲིད་ཤོག༌དང༌། བདག་གིས་ཨེ་ཅིབ་ཡུལ་གྱི་ནོམ་པ་མཆོག་ཏུ་གྱུར་པ་དང་ཡུལ་དེའི་ས་ཞིང་གཤིན་པོའི་འབྲས་བུ་ཁྱོད་རྣམས་ལ་སྟེར་བར་བྱ་ཞེས་སྨྲོས༌ཤིག
GEN 45:19 ད་ལྟ་བདག་གིས་ཁྱོད་རྣམས་ལ་འདི་ལྟར་བསྒྲུབ་པར་སྐུལ་བར་བྱ༌སྟེ། ཁྱོད་རྣམས་ཀྱིས་ཨེ་ཅིབ་ཡུལ་ནས་ཤིང་རྟ་དེད་དེ་ཀ་ན་ཨན་ཡུལ་དུ་སོང༌ནས། རང་ཅག་གི་ཕ༌དང༌། རང་རང་གི་ཆུང་མ་དང་བུ་ཕྲུག་བཅས་གནས་འདིར་ཁྲིད་ཤོག༌ཅིག
GEN 45:20 ཁྱོད་ཅག་གི་སེམས་ནས་ཅ་ལག་གཅེས་སུ་འཛིན་མི་འོས༌ཏེ། ཨེ་ཅིབ་ཡུལ་ཐམས་ཅད་ཀྱི་ནོམ་པ་མཆོག་ཏུ་གྱུར་པ་མཐའ་དག་ཁྱོད་ཅག་གི་ཡིན་པའི་ཕྱིར་རོ་ཞེས་སྨྲས༌སོ།།
GEN 45:21 དེ་ནས་ཡེས་ར་ཨེལ་གྱི་བུ་རྣམས་ཀྱིས་དེ་ལྟར་བསྒྲུབས༌ཤིང༌། ཡོ་སེབ་ཀྱིས་ཕཱར་ཨོལ་གྱི་བཀའ་ལྟར་སྤུན་རྣམས་ལ་ཤིང་རྟ་དང་ལམ་བྲོ་སྤྲད་པ༌དང༌།
GEN 45:22 ཡང་ཁོ་རྣམས་ལ་གྱོན་གོས་ཁ་ཚང་རེ་སྤྲད་པ༌དང༌། པེན་ཡཱ་མེན་ཁོ་ནར་དངུལ་སྒོར་སུམ་བརྒྱ་དང་གྱོན་གོས་ཁ་ཚང་ལྔ་སྤྲད་པ༌རེད།
GEN 45:23 རང་གི་ཕ་ལ་བོང་གསེབ་བཅུ་ལ་ཨེ་ཅིབ་ཡུལ་གྱི་ནོམ་པ་མཆོག་ཏུ་གྱུར་པ་བཀལ་བ༌དང༌། ཡང་བོང་མ་བཅུ་ལ་འབྲུ་རིགས་དང་བག་ལེབ་སོགས་བཀལ་ཏེ་ཕ་ཡི་ལམ་བྲོ་རུ༌བྱས།
GEN 45:24 དེ་ནས་ཡོ་སེབ་ཀྱིས་སྤུན་རྣམས་ཡུལ་དུ་འགྲོ་རུ་བཅུག་ཅིང་ཁོ་རྣམས་ལ་ན༌རེ། ཁྱོད་ཅག་གིས་ལམ་བར་དུ་རྩོད་པ་མ་བྱེད་ཅེས་སྨྲས༌སོ།།
GEN 45:25 དེ་ནས་སྤུན་རྣམས་ཨེ་ཅིབ་ཡུལ་ནས་ལམ་ལ་ཆས་ཏེ་ཀ་ན་ཨན་ཡུལ་གྱི་ཕ་ཡ་ཀོབ་ཀྱི་གམ་དུ་སླེབས་པ༌དང༌།
GEN 45:26 ཁོ་རྣམས་ཀྱི་ཕ་ལ་ཡོ་སེབ་ད་དུང་གསོན་པོར་གནས༌ཤིང༌། ཁོ་ནི་ཨེ་ཅིབ་ཡུལ་ཐམས་ཅད་ཀྱི་མངའ་བདག་ཡིན་ནོ་ཞེས་སྨྲས༌ནའང༌། ཕ་ཡ་ཀོབ་ཧ་ལས་ཤིང་ཁོ་རྣམས་ཀྱི་གཏམ་ལ་ཡིད་མ་ཆེས༌སོ།།
GEN 45:27 སྤུན་རྣམས་ཀྱིས་ཁོ་རྣམས་ལ་སྨྲས་པའི་ཡོ་སེབ་ཀྱི་གཏམ་ཐམས་ཅད་ཕ་ལ་སྨྲས་པ༌དང༌། ཡོ་སེབ་ཀྱིས་ཕ་ལེན་པར་མངགས་པའི་ཤིང་རྟ་སོགས་ཡ་ཀོབ་ཀྱིས་མཐོང་བ་དང་མྱ་ངན་ལས་སངས་ཤིང་ཡིད་ཆེས༌སོ།།
GEN 45:28 དེ་ནས་ཡེས་ར་ཨེལ་ན༌རེ། འོ། ལགས༌སོ། །བདག་གི་བུ་ཡོ་སེབ་ད་དུང་གསོན་པོར་གནས༌པས། ང་རང་མ་ཤི་གོང་ལ་ཁོ་དང་འཕྲད་འདོད་ཅེས་སྨྲས༌སོ།།
GEN 46:1 དེ་ནས་ཡེས་ར་ཨེལ་གྱིས་རྒྱུ་ནོར་ཐམས་ཅད་ཁྱེར་ཏེ་པེར་ཤ་བཱ་རུ་སོང་བ༌དང༌། རང་གི་ཕ་ཨི་སཱག་གི་དཀོན་མཆོག་ལ་མཆོད་པ་ཕུལ༌ཏོ།།
GEN 46:2 མཚན་མོའི་དུས༌སུ། དཀོན་མཆོག་གིས་ཞལ་གཟིགས་གནང་ནས་ཡེས་ར་ཨེལ་ལ་འདི་སྐད༌དུ། ཀྱེ། ཡ༌ཀོབ། ཡ་ཀོབ་ཅེས་བོས་པ༌དང༌། ཁོ་ན༌རེ། བདག་འདི་རུ་ཡོད་ཅེས་ལན༌བཏབ།
GEN 46:3 དེ་ནས་དཀོན་མཆོག་གིས་འདི་སྐད༌དུ། བདག་ནི་དཀོན་མཆོག༌སྟེ། ཁྱོད་ཀྱི་ཕ་ཡི་དཀོན་མཆོག༌ཡིན། ཁྱོད་མར་ཨེ་ཅིབ་ཡུལ་དུ་འགྲོ་བར་འཇིགས་མི་དགོས༌ཏེ། བདག་གིས་ཡུལ་དེ་ནས་ཁྱོད་རང་རྒྱལ་ཁབ་ཆེན་པོར་འགྱུར་བར་བྱེད་པའི་ཕྱིར༌རོ།།
GEN 46:4 བདག་ནི་ཁྱོད་དང་མཉམ་དུ་མར་ཨེ་ཅིབ་ཡུལ་དུ་འགྲོ༌ཞིང༌། ཡང་ཁྱོད་རང་ཕྱིར་ཁྲིད་ཡོང་བར༌ངེས། ཁྱོད་ཚེ་ལས་འདའ་སྐབས་ཡོ་སེབ་ཀྱིས་ཁྱོད་ཀྱི་མིག་ཟུང་བཙུམ་པར་བྱེད་ཅེས་གསུངས༌སོ།།
GEN 46:5 དེ་ནས་ཡ་ཀོབ་ནི་པེར་ཤ་བཱ་ནས་ལམ་ལ་ཆས༌ཤིང༌། ཡེས་ར་ཨེལ་གྱི་བུ་རྣམས་ཀྱིས་ཕ་ཡ་ཀོབ༌དང༌། ཁོ་ཚོའི་ཆུང་མ་རྣམས༌དང༌། བུ་དང་བུ་མོ་བཅས་ཐམས་ཅད་ཕཱར་ཨོལ་གྱིས་མངགས་ཡོང་བའི་ཤིང་རྟར་འདུག་ཏུ་བཅུག
GEN 46:6 ཡང་ཁོ་རྣམས་ཀྱིས་ཀ་ན་ཨན་ཡུལ་ནས་ཐོབ་པའི་ཕྱུགས་ཟོག་རྣམས་དེད་པ་དང་རྒྱུ་ནོར་ཐམས་ཅད་ཨེ་ཅིབ་ཡུལ་དུ་ཁྱེར་བར་མ་ཟད། ཡ་ཀོབ་དང་ཁོའི་བུ་རབས་ཚ་རྒྱུད་ཐམས་ཅད་ཀྱང་ཨེ་ཅིབ་ཡུལ་དུ་སོང་བ༌དང༌།
GEN 46:7 ཡ་ཀོབ་ཀྱིས་རང་གི་བུ་དང་བུ༌མོ། ཚ་བོ་དང་ཚ་མོ་བཅས་བུ་རབས་ཚ་རྒྱུད་ཐམས་ཅད་མཉམ་དུ་ཨེ་ཅིབ་ཡུལ་དུ་ཁྲིད༌དོ།།
GEN 46:8 དེ་ཡང་ཨེ་ཅིབ་ཡུལ་དུ་ཕྱིན་པའི་ཡ་ཀོབ་ཀྱི་བུ་རྒྱུད༌དེ། ཡེས་ར་ཨེལ་མི་རིགས་ཀྱི་མིང་ཐོ་ནི་གཤམ་གསལ༌ལྟར། ཡ་ཀོབ་ཀྱི་བུ་སྐྱེས་འགོ་ནི་རུ་བེན་ཡིན༌ལ།
GEN 46:9 རུ་བེན་གྱི་བུ་རྣམས་ནི་ཧ་ནོག༌དང༌། ཕཱ༌ལུའུ། ཧེས༌རོན། ཀར་མའེ་བཅས༌བཞིའོ།།
GEN 46:10 སི་མུ་ཨོན་གྱི་བུ་རྣམས་ནི་ཡཱ་མུ་ཨེལ༌དང༌། ཡཱ༌མེན། ཨོ༌ཧད། ཡཱ༌ཀིན། ཚོ༌ཧར། དེ་མིན་ཀ་ན་ཨན་མི་རིགས་ཀྱི་བུད་མེད་ལས་སྐྱེས་པའི་བུ་ཤཱ་ཨུལ་བཅས་དྲུག༌གོ །
GEN 46:11 ལེ་ཝིའི་བུ་རྣམས་ནི་གེར་ཤོན༌དང༌། ཀོ༌ཧད། མཱ་རཱ་རེའེ་བཅས་གསུམ༌མོ།།
GEN 46:12 ཡ་ཧུ་དཱའི་བུ་རྣམས་ནི་ཨེར༌དང༌། ཨོ༌ནན། ཤེ༌ལཱ། ཕེ་རེ༌ཟི། ཟེ་རག་བཅས༌ལྔའོ། །ཨེར་དང་ཨོ་ནན་གཉིས་ནི་ཀ་ན་ཨན་ཡུལ་ནས་ཚེ་ལས་འདས་པ༌དང༌། ཕེ་རེལ་ཟི་ཡི་བུ་གཉིས་ནི་ཧེས་རོན་དང་ཧ་མུལ༌ཡིན།
GEN 46:13 ཡེས་སི་ཀཱར་གྱི་བུ་རྣམས་ནི་ཐོ་ལཱ༌དང༌། ཕུ༌བཱ། ཡོ༌ཨུབ། ཤིམ་རོན་བཅས༌བཞིའོ།།
GEN 46:14 ཟེ་བུ་ལུན་གྱི་བུ་རྣམས་ནི་སེ་རཱད༌དང༌། ཨེད༌ལོན། ཡ་ལཱ་ཨལ་བཅས་གསུམ༌མོ།།
GEN 46:15 དེ་དག་ནི་ཕཱ་དན་ཨ་རམ་ཡུལ་ནས་བུད་མེད་ལེ་ཨ་ཡིས་ཡ་ཀོབ་ལ་བཙས་པའི་བུ་རྣམས་ཡིན༌ལ། བུ་མོ་དི་ནཱའང་བཙས༌པའོ། །བུ་རབས་ཚ་རྒྱུད་རྣམས་བསྡོམས་པས་སུམ་ཅུ་སོ་གསུམ་བྱུང༌ངོ༌།།
GEN 46:16 དེ་ཡང་གཱ་རྡུ་ཡི་བུ་རྣམས་ནི་ཚིབ་ཡོན༌དང༌། ཧ༌གིད། ཤུ༌ནེ། ཨེས༌པོན། ཨེ༌རི། ཨ་ཪོ༌དི། ཨར་ཨེ་ལི་བཅས་བདུན༌ནོ།།
GEN 46:17 ཨ་ཤེར་གྱི་བུ་རྣམས་ནི་ཡིམ་ནཱ༌དང༌། ཡེས༌བཱ། ཡེས༌བི། པེ་རེ་ཡཱ་དང༌། བུ་མོ་སེ་རཱ་བཅས་བུ་དང་བུ་མོ༌ལྔའོ། །པེ་རེ་ཡཱ་ཡི་བུ་ནི་ཧེ་བེར་དང་མཱལ་ཀི་ཨེལ་གཉིས༌སོ།།
GEN 46:18 དེ་དག་ནི་ལཱ་པན་གྱིས་རང་གི་བུ་མོ་ལེ་ཨ་ལ་གནང་བའི་གཡོག་མོ་ཟིལ་པཱ་ཡིས་ཡ་ཀོབ་ལ་བཙས་པའི་བུ་རབས་ཚ་རྒྱུད་རྣམས་ཡིན༌ལ། བསྡོམས་པས་བཅུ་དྲུག་ཡོད༌དོ།།
GEN 46:19 དེ་ཡང་ཡ་ཀོབ་ཀྱི་ཆུང་མ་རཱ་ཧེལ་གྱི་བུ་ནི་ཡོ་སེབ་དང་པེན་ཡཱ་མེན་གཉིས༌སོ།།
GEN 46:20 ཡོ་སེབ་ཀྱི་ཆུང་མ་ཨ་སི་ནཱ་ཐི་ཡིས་ཨེ་ཅིབ་ཡུལ་ནས་མཱ་ན་ཤེ་དང་ཨེ་ཕཱར་ཡིམ་ཞེས་བྱ་བའི་བུ་གཉིས་བཙས༌ཤིང༌། ཁོ་མོ་ནི་ཨོ་ནཱ་ཡུལ་གྱི་མཆོད་དཔོན་ཕའོ་ཏི་ཕེ་རཱ་ཡི་བུ་མོ་ཡིན༌ནོ།།
GEN 46:21 པེན་ཡཱ་མེན་གྱི་བུ་རྣམས་ནི་པེ་ལཱ༌དང༌། པེ༌ཀེར། ཨ་ཤ༌བེལ། གེ༌རཱ། ནཱ་ཨ༌མཱན། ཨེ༌ཧི། རའོ༌ཤ། མུ༌ཕིམ། ཧུ༌ཕིམ། ཨར་དཱ་བཅས༌བཅུའོ།།
GEN 46:22 དེ་དག་ནི་ཡ་ཀོབ་ལ་ཆུང་མ་རཱ་ཧེལ་ནས་མཆེད་པའི་བུ་རབས་ཚ་རྒྱུད་རྣམས་ཡིན༌ལ། བསྡོམས་པས་བཅུ་བཞི་ཡོད༌དོ།།
GEN 46:23 དཱན་གྱི་བུ་ནི་ཧུ་ཤིམ་ཡིན༌ནོ།།
GEN 46:24 ནཱབ་ཐ་ལི་ཡི་བུ་རྣམས་ནི་ཡཱ་སི་ཨེལ༌དང༌། གུ༌ནེ། ཡེ༌ཚིར། ཤིལ་ལེམ་བཅས༌བཞིའོ།།
GEN 46:25 དེ་དག་ནི་ལཱ་པན་གྱིས་རང་གི་བུ་མོ་རཱ་ཧེལ་ལ་གནང་བའི་གཡོག་མོ་པིལ་ཧ་ཡིས་ཡ་ཀོབ་ལ་བཙས་པའི་བུ་རབས་ཚ་རྒྱུད་རྣམས་ཡིན༌ལ། བསྡོམས་པས་བདུན་ཡོད༌དོ།།
GEN 46:26 དེ་ཡང་ཡ་ཀོབ་དང་ལྷན་དུ་ཨེ་ཅིབ་ཡུལ་དུ་སོང་བའི་མནའ་མ་ལས༌གཞན། ད་དུང་རང་ལས་མཆེད་པའི་བུ་རབས་ཚ་རྒྱུད་རྣམས་བསྡོམས་པས་དྲུག་ཅུ་རེ་དྲུག་ཡོད༌ལ།
GEN 46:27 ཡོ་སེབ་ལ་ཨེ་ཅིབ་ཡུལ་ནས་ཀྱང་བུ་གཉིས་སྐྱེས༌ཤིང༌། ཨེ་ཅིབ་ཡུལ་དུ་སྤར་བའི་ཡ་ཀོབ་ཀྱི་ཁྱིམ་རྒྱུད་ལ་བསྡོམས་པས་མི་གྲངས་བདུན་ཅུ་ཡོད༌དོ།།
GEN 46:28 དེ་ཡང་ཡ་ཀོབ་ཀྱིས་བུ་ཡ་ཧུ་དཱ་ཞེས་པ་ཡོ་སེབ་ཀྱི་དྲུང་དུ་གོ་ཤེན་ཡུལ་ལ་འགྲོ་བར་ལམ་ཁྲིད་པར་མངགས་ཤིང་ཁོ་རྣམས་གོ་ཤེན་ཡུལ་དུ་སོང༌ངོ༌།།
GEN 46:29 ཡོ་སེབ་ཤིང་རྟར་བསྡད་ནས་ཕ་ཡེས་ར་ཨེལ་ལ་དགའ་བསུ་བྱེད་པར་གོ་ཤེན་ཡུལ་དུ་སོང་བ༌དང༌། ཕ་དང་ངོ་ཕྲད་ཅིང་ཕ་ཡི་སྐེ་ལ་འཐམས་ནས་ཡུན་རིང་ངུས༌སོ།།
GEN 46:30 ཡེས་ར་ཨེལ་གྱིས་ཡོ་སེབ་ལ་འདི༌ལྟར། བདག་གིས་ཁྱོད་མིག་གིས་མཐོང༌ཞིང༌། ད་དུང་གསོན་པོར་གནས་པ་ཤེས་པས་ང་རང་འཆི་ཡང་འགྱོད་པ་མེད་ཅེས་སྨྲས༌སོ།།
GEN 46:31 ཡོ་སེབ་ཀྱིས་རང་གི་སྤུན་རྣམས་དང་ཕ་ཡི་ཁྱིམ་གང་པོར་འདི༌ལྟར། བདག་ཕཱར་ཨོལ་གྱི་དྲུང་དུ་སོང་ནས་འདི་ལྟར་སྨྲ་བར་བྱ༌སྟེ། བདག་གི་སྤུན་རྣམས་དང་ཕ་ཡི་ཁྱིམ་གང་པོ་སྔོན་ཆད་ཀ་ན་ཨན་ཡུལ་དུ་མཆིས་ཤིང་ད་ལྟ་བདག་གི་གམ་དུ་ཡོང་བ༌དང༌།
GEN 46:32 ཁོ་རྣམས་ཕྱུགས་རྫི་ཡིན་པས་ཕྱུགས་ཟོག་ལ་བརྟེན༌ཞིང་། ཁོ་རྣམས་ཀྱིས་ར་ལུག་གི་ཁྱུ་དང་བ་ཁྱུ་བཅས་རྒྱུ་ནོར་ཐམས་ཅད་ཁྱེར་ནས་སླེབས་ཡོད་ཅེས་སྨྲ་བར༌བྱའོ།།
GEN 46:33 ཕཱར་ཨོལ་གྱིས་ཁྱོད་རྣམས་ལ་བཀའ་གསུང་བའི་སྐབས༌སུ། ཁྱོད་རྣམས་ཀྱིས་ལས་ཅི་ཞིག་གཉེར་བ་ཡིན་ཞེས་དྲིས༌ན།
GEN 46:34 ཁྱོད་རྣམས་ཀྱིས་འདི༌ལྟར། རྒྱལ་པོ་ཁྱེད་ཀྱི་ཞབས་ཕྱི་པ་ངེད་རྣམས་ཀྱིས་ལོ་ན་གཞོན་པའི་དུས་ནས་ད་ལྟའི་བར་དུ་ཕྱུགས་ལས་གཉེར་བ་ཡིན༌ལ། ཐ་ན་ངེད་ཅག་གི་མེས་པོ་རྣམས་ཀྱིས་ཀྱང་ལས་དོན་འདི་ཉིད་གཉེར་བ་ཡིན་ཞེས་ཤོད༌ཅིག དེ་ནས་ཁྱོད་རྣམས་གོ་ཤེན་ཡུལ་དུ་འདུག་རུང༌ངོ༌། །ཅིའི་ཕྱིར་ཞེ༌ན། ཨེ་ཅིབ་ཀྱི་མི་རྣམས་ཀྱིས་ར་ལུག་འཚོ་མཁན་ནི་མི་ལེགས་སྙམ་པའི་ཕྱིར་ཡིན་ཞེས་སྨྲས༌སོ།།
GEN 47:1 དེ་ནས་ཡོ་སེབ་ཕཱར་ཨོལ་གྱི་དྲུང་དུ་སོང་ནས་འདི༌ལྟར། བདག་གི་ཕ་དང་སྤུན་རྣམས་ཀྱིས་ར་ལུག་གི་ཁྱུ་དང་བ་ཁྱུ་བཅས་རྒྱུ་ནོར་ཐམས་ཅད་ཁྱེར་ཏེ་ཀ་ན་ཨན་ཡུལ་ནས་ད་ལྟ་གོ་ཤེན་ཡུལ་དུ་སླེབས་བྱུང་ཞེས་སྨྲས་པ༌དང༌།
GEN 47:2 ཡོ་སེབ་ཀྱིས་རང་གི་སྤུན་རྣམས་ལས་མི་ལྔ་བདམས༌ཏེ། ཁོ་རྣམས་ཕཱར་ཨོལ་ལ་མཇལ་བར་ཁྲིད༌དོ།།
GEN 47:3 ཕཱར་ཨོལ་གྱིས་ཡོ་སེབ་ཀྱི་སྤུན་རྣམས་ལ་འདི་སྐད༌དུ། ཁྱོད་ཅག་གིས་ལས་ཅི་ཞིག་གཉེར་བ་ཡིན་ཞེས་དྲིས་པ༌དང༌། ཁོ་རྣམས་ན༌རེ། ཁྱེད་ཀྱི་ཞབས་ཕྱི་པ་རྣམས་ར་ལུག་གི་རྫི་བོ་ཡིན༌ལ། ངེད་ཅག་གི་མེས་པོ་རྣམས་ཀྱང་ར་ལུག་གི་རྫི་བོ་ཡིན་ཞེས་སྨྲས་པ༌དང༌།
GEN 47:4 ཡང་ཁོ་རྣམས་ན༌རེ། ཀ་ན་ཨན་ཡུལ་དུ་མུ་གེ་བྱུང་བ་ཚབས་ཆེ་བ༌དང༌། ཞབས་ཕྱི་པ་ངེད་ཅག་གི་ར་ལུག་གི་ཁྱུ་ལ་རྩྭ་མེད་པས་ངེད་རྣམས་ཡུལ་འདིར་ཡོང་བ༌ཡིན། དེའི༌ཕྱིར། རྒྱལ་པོ་ཁྱེད་ཀྱིས་ཞབས་ཕྱི་པ་ངེད་རྣམས་གོ་ཤེན་ཡུལ་ནས་འདུག་ཏུ་འཇུག་པར་མཛོད་ཅེས་སྨྲས༌སོ།།
GEN 47:5 ཕཱར་ཨོལ་གྱིས་ཡོ་སེབ་ལ་འདི་སྐད༌དུ། ཁྱོད་ཀྱི་ཕ་དང་སྤུན་རྣམས་ཁྱོད་ཀྱི་གནས་འདིར་ཡོང༌ངོ༌།།
GEN 47:6 ཨེ་ཅིབ་ཀྱི་ཡུལ་ཐམས་ཅད་ཁྱོད་ལ་དབང༌བས། ཁྱོད་ཀྱིས་རང་གི་ཕ་དང་སྤུན་རྣམས་ཆེས་བཟང་བའི་ས་ཆ་སྟེ་གོ་ཤེན་ཡུལ་ནས་འདུག་ཏུ་འཇུག་པར༌གྱིས། ཁྱོད་ཀྱིས་ཁོ་རྣམས་ཀྱི་ཁྲོད་དུ་མི་ནུས་པ་ཅན་ཡོད་པ་ཤེས༌ན། དེ་རྣམས་བདག་གི་ཕྱུགས་ཟོག་འཚོ་བར་མངགས་པར་གྱིས་ཞེས་སྨྲས༌སོ།།
GEN 47:7 དེར་ཡོ་སེབ་ཀྱིས་རང་གི་ཕ་ཡ་ཀོབ་ཁྲིད་ནས་ཕཱར་ཨོལ་གྱི་དྲུང་དུ་སོང་བ༌དང༌། ཡ་ཀོབ་ཀྱིས་ཕཱར་ཨོལ་ལ་བྱིན་རླབས་གནང་ངོ་།།
GEN 47:8 ཕཱར་ཨོལ་གྱིས་ཡ་ཀོབ་ལ་ལོ་ག་ཚོད་ཡིན་ཞེས་དྲིས་པ༌ན།
GEN 47:9 ཡ་ཀོབ་ན༌རེ། ང་རང་ད་ལྟའི་བར་འཇིག་རྟེན་དུ་ལོ་བརྒྱ་དང་སུམ་ཅུར་བསྡད་པ༌ཡིན། བདག་གི་ཚེ་ཐག་ཐུང་ཞིང་སྡུག་བསྔལ་མང་དུ༌མྱངས། བདག་ནི་མེས་པོ་རྣམས་འཇིག་རྟེན་དུ་འཚོ་གཞེས་གནང་བའི་ཚེ་ཐག་དང་བསྡུར་ཐབས་མེད་ཅེས་སྨྲས་པ༌དང༌།
GEN 47:10 ཡང་ཡ་ཀོབ་ཀྱིས་ཕཱར་ཨོལ་ལ་བྱིན་རླབས་གནང་རྗེས་ཁོང་དང་ཁ་བྲལ་ནས་སོང༌ངོ༌།།
GEN 47:11 ཡོ་སེབ་ཀྱིས་ཕཱར་ཨོལ་གྱི་བཀའ་བཞིན་དུ་ཨེ་ཅིབ་ཡུལ་གྱི་ཆེས་བཟང་བའི་ས་ཆ་སྟེ་རཱ་ཨམ་སེའེ་ཞེས་པའི་ཡུལ་དེ་རང་གི་ཕ་དང་སྤུན་རྣམས་ལ་ས་སྐལ་དུ་གནང་བ༌དང༌།
GEN 47:12 ཡོ་སེབ་ཀྱིས་རང་གི་ཕ༌དང༌། སྤུན་རྣམས༌དང༌། ཕ་ཡི་ཁྱིམ་མི་ཐམས་ཅད་ལའང་རང་རང་གི་བུ་ཕྲུག་གི་གྲངས་ཀ་ལྟར་འབྲུ་རིགས་གནང་སྟེ་བསྐྱངས༌སོ།།
GEN 47:13 དེ་ཡང་ཡུལ་ཐམས་ཅད་ལ་མུ་གེ་བྱུང་བ་ཚབས་ཆེ་བས་འབྲུ་རིགས་མེད་པར་གྱུར་པ༌དང༌། ཐ་ན་ཨེ་ཅིབ་ཡུལ་དང་ཀ་ན་ཨན་ཡུལ་གྱི་མི་རྣམས་ཀྱང་བཀྲེས་ལྟོགས་ཀྱིས་མ་བཟོད་པར་དྲན་མེད་དུ་བརྒྱལ་བར༌གྱུར།
GEN 47:14 ཡོ་སེབ་ཀྱིས་འབྲུ་རིགས་བཙོངས་པའི་ཨེ་ཅིབ་ཡུལ་དང་ཀ་ན་ཨན་ཡུལ་གྱི་དངུལ་སྒོར་ཐམས་ཅད་བསྡུས་ཏེ་ཕཱར་ཨོལ་གྱི་ཕོ་བྲང་དུ་ཁྱེར་སོང༌ངོ༌།།
GEN 47:15 ཨེ་ཅིབ་ཡུལ་དང་ཀ་ན་ཨན་ཡུལ་གྱི་དངུལ་སྒོར་ཐམས་ཅད་བཀོལ་ཚར་སོང༌བས། ཨེ་ཅིབ་ཀྱི་མི་ཚོགས་ཐམས་ཅད་ཡོང་ནས་ཡོ་སེབ་ལ་མཇལ་ཏེ་ན༌རེ། ངེད་ཅག་གི་དངུལ་སྒོར་ཐམས་ཅད་བཀོལ་ཚར་སོང་བས་ངེད་རྣམས་ལ་འབྲུ་རིགས་གནང་བར༌ཞུ། ངེད་ཅག་ཁྱེད་ཀྱི་མིག་མདུན་ནས་འཆི་དགོས་པའི་རྒྱུ་མཚན་ཅི་ཞེས་སྨྲས༌སོ།།
GEN 47:16 ཡོ་སེབ་ན༌རེ། གལ༌ཏེ། ཁྱོད་རྣམས་ཀྱི་དངུལ་སྒོར་བཀོལ་ཚར་བ་ཡིན༌ན། ཁྱོད་ཅག་གི་ཕྱུགས་ཟོག་བདག་ལ་སྤྲད་ཀྱང་ཆོག་པ༌དང༌། བདག་གིས་ཁྱོད་རྣམས་ཀྱི་ཕྱུགས་ཟོག་གི་ཚབ་ཏུ་འབྲུ་རིགས་སྟེར་ཞེས་སྨྲས༌སོ།།
GEN 47:17 དེའི༌ཕྱིར། མང་ཚོགས་ཀྱིས་སྒོ་ཕྱུགས་དེད་ནས་ཡོ་སེབ་ཀྱི་དྲུང་དུ་ཡོང་བ༌དང༌། ཡོ་སེབ་ཀྱིས་འབྲུ་རིགས་ནི་རྟ༌དང༌། ར་ལུག༌དང༌། བ་གླང༌དང༌། བོང་བུ་བཅས་ལ་བརྗེས༌ཤིང༌། ལོ་དེར་སྒོ་ཕྱུགས་དང་འབྲུ་རིགས་བརྗེ་རེས་བྱས་པས་མི་ཚོགས་དེ་རྣམས་ལོ་གཅིག་གི་རིང་ལ་འཚོ་ཐུབ་པར་གྱུར༌ཏོ།།
GEN 47:18 དེ་ཡང་ལོ་དེ་འདས་པ་དང་ལོ་གཉིས་པར་མང་ཚོགས་རྣམས་ཡང་ཡོང་སྟེ་ཡོ་སེབ་ལ་འདི༌ལྟར། ངེད་ཅག་གིས་རང་གི་བདག་པོ་ལ་གསང་བ་མིན༌ཏེ། ངེད་རྣམས་ཀྱི་དངུལ་སྒོར་བཀོལ་ཚར་བ་དང་ཕྱུགས་ཟོག་ཀྱང་ཁྱེད་ལ་བརྗེས་ཚར༌བས། ད་ལྟ་རང་གི་བདག་པོ་ལ་ངེད་ཅག་གི་ལུས་པོ་དང་ས་ཆ་ལས་གཞན་ཅི་ཡང་ལྷག་མེད༌དོ།།
GEN 47:19 ཁྱེད་ཀྱིས་ངེད་ཅག་འཆི་བ་དང་ཡུལ་འདི་ས་སྟོང་དུ་ལུས་པར་བལྟ་བཟོད༌དམ། ཁྱེད་ཀྱིས་འབྲུ་རིགས་ལ་བརྟེན་ནས་ངེད་ཅག་དང་ས་ཆ་ཉོ་བར་བྱེད་པ༌དང༌། ངེད་ཅག་དང་ངེད་ཅག་གི་ས་ཆ་ནི་ཕཱར་ཨོལ་ལ་དབང་བར༌མཛོད། ངེད་རྣམས་མི་འཆི་བར་འཚོ་བ་དང་ས་ཞིང་ཡང་དབེན་སྟོང་དུ་མི་འགྱུར་བའི་ཆེད༌དུ། ཁྱེད་ཀྱིས་ངེད་ཅག་ལ་འབྲུ་རིགས་ཀྱི་ས་བོན་གནང་བར་མཛོད་ཅིག་ཅེས་སྨྲས༌སོ།།
GEN 47:20 དེ་ནས་ཡོ་སེབ་ཀྱིས་ཕཱར་ཨོལ་ལ་ཨེ་ཅིབ་ཡུལ་ཐམས་ཅད་ཉོས༌ཤིང༌། ཨེ་ཅིབ་ཀྱི་མི་རྣམས་ལ་མུ་གེ་ཚབས་ཆེན་བྱུང་བའི་རྐྱེན་གྱིས་མི་ཚང་མས་རང་རང་གི་ས་ཞིང་ཡང་བཙོངས༌པས། ཡུལ་དེ་ཐམས་ཅད་ཕཱར་ཨོལ་ལ་དབང་བར༌གྱུར།
GEN 47:21 ཡོ་སེབ་ཀྱིས་མང་ཚོགས་རྣམས་ཨེ་ཅིབ་ཡུལ་གྱི་གྲོང་ཁྱེར་གཞན་དག་ལ་འགྲོ་རུ་བཅུག༌གོ །
GEN 47:22 འོན༌ཀྱང༌། ཡོ་སེབ་ཀྱིས་མཆོད་དཔོན་རྣམས་ཀྱི་ས་ཆ་མ་ཉོས༌སོ། །ཅིའི་ཕྱིར་ཞེ༌ན། ཕཱར་ཨོལ་གྱིས་ལོ་རེ་བཞིན་མཆོད་དཔོན་རྣམས་ལ་ཟས་སྐལ་གནང་བ༌དང༌། ཟས་སྐལ་དེ་ལ་བརྟེན་པའི་དབང་གིས་ཁོ་རྣམས་ཀྱིས་རང་གི་ས་ཆ་མ་བཙོང་བའི་ཕྱིར༌རོ།།
GEN 47:23 ཡོ་སེབ་ཀྱིས་མང་ཚོགས་ལ་འདི་སྐད༌དུ། ལྟོས༌དང༌། དེ་རིང་བདག་གིས་ཕཱར་ཨོལ་གྱི་ཆེད་དུ་ཁྱོད་ཅག་དང་ཁྱོད་རྣམས་ཀྱི་ས་ཆ་ཉོས་པ༌ཡིན། བདག་གིས་འདི་རུ་ཡོད་པའི་ས་བོན་ཁྱོད་ཅག་ལ་སྟེར་བར༌བྱ། ཁྱོད་ཅག་གིས་ཞིང་འདེབས་པར༌གྱིས།
GEN 47:24 སྟོན་བསྡུ་བའི་སྐབས༌སུ། འབྲུ་རིགས་ཀྱི་ལྔ་ཆ་གཅིག་ཕཱར་ཨོལ་ལ་ཁྲལ་འཇལ་བ༌དང༌། ལྔ་ཆ་བཞི་རང་ལ་དབང་ཞིང་ས་བོན་དུ་བྱས་ཀྱང་ཆོག༌ལ། ཁྱོད་ཅག་དང་ཁྱོད་ཅག་གི་ཁྱིམ་མི་ཡོངས་ཀྱི་ཟས་རིགས་སུ་བྱས་ཀྱང་ཆོག་ཅེས་སྨྲས་པ༌དང༌།
GEN 47:25 མང་ཚོགས་ན༌རེ། ཀྱེ། ཁྱེད་ཀྱིས་ངེད་ཅག་གི་སྲོག་བསྐྱབས་པར་མཛད༌པས། ངེད་ཅག་ལ་བདག་པོ་ཁྱེད་ཀྱི་སྤྱན་ལམ་ནས་ཐུགས་རྗེ་འཐོབ་པར༌སྨོན། ངེད་ཅག་ཕཱར་ཨོལ་གྱི་གཡོག་པོར་འགྱུར་བར་སྨོན་ཞེས་སྨྲས༌སོ།།
GEN 47:26 དེའི༌ཕྱིར། ཕཱར་ཨོལ་ལ་ལྔ་ཆ་གཅིག་གི་ཁྲལ་འཇལ་བ༌དང༌། མཆོད་དཔོན་གྱི་ས་ཆ་རྒྱལ་པོར་མི་དབང་བ་འདི༌ནི། ཡོ་སེབ་ཀྱིས་ཨེ་ཅིབ་ཡུལ་དུ་གཏན་ལ་ཕབ་པའི་སྒྲིག་ཁྲིམས་ཡིན་ཞིང་ད་ལྟའི་བར་དུ་ཡོད༌དོ།།
GEN 47:27 དེ་ཡང་ཡེས་ར་ཨེལ་གྱི་མི་རྣམས་ཨེ་ཅིབ་ཡུལ་གྱི་གོ་ཤེན་ཡུལ་དུ་བསྡད་ཅིང་གནས་དེར་དབང་བསྒྱུར་བ༌དང༌། དེ་རུ་རིགས་རྒྱུད་མང་དུ་འཕེལ་བར་གྱུར༌ཏོ།།
GEN 47:28 ཡ་ཀོབ་ནི་ཨེ་ཅིབ་ཡུལ་དུ་ལོ་འཁོར་བཅུ་བདུན་ལ་བསྡད་པ་དང་ཁོའི་ཚེ་ཐག་ལོ་བརྒྱ་དང་ཞེ་བདུན་ཡིན༌ལ།
GEN 47:29 ཡེས་ར་ཨེལ་ཚེ་ལས་འདའ༌ཁར། ཁོས་བུ་ཡོ་སེབ་བོས་ཏེ་འདི་སྐད༌དུ། གལ༌ཏེ། བདག་ལ་ཁྱོད་ཀྱི་མིག་མདུན་ནས་ཐུགས་རྗེ་ཐོབ༌ན། ཁྱོད་ཀྱིས་རང་གི་ལག་པ་བདག་གི་བརླ་འོག་ཏུ་འཇོག་པར༌གྱིས། བྱམས་སྙིང་རྗེ་དང་དྲང་བདེན་གྱི་སྒོ་ནས་བདག་ལ་གཅེས་པར༌གྱིས། བདག་གི་བེམ་པོ་ཨེ་ཅིབ་ཡུལ་དུ་དུར་ལ་འཇུག་པར་མི༌བྱའོ།།
GEN 47:30 ང་རང་ཚེ་ལས་འདས༌རྗེས། ཁྱོད་ཀྱིས་བདག་གི་བེམ་པོ་ཨེ་ཅིབ་ཡུལ་ནས་ཁྱེར་ཏེ་མེས་པོ་རྣམས་དང་ལྷན་དུ་དུར་ལ་འཇུག་པར་གྱིས་ཞེས་སྨྲས་པ༌ལ། ཡོ་སེབ་ན༌རེ། བདག་གིས་ཁྱེད་ཀྱི་གསུང་བཞིན་དུ་བསྒྲུབ་ངེས་ཡིན་ཞེས་སྨྲས་པ༌དང༌།
GEN 47:31 ཡེས་ར་ཨེལ་ན༌རེ། འོ༌ན། ཁྱོད་ཀྱིས་བདག་ལ་དམ་བཅའ་འཇོག་པར་གྱིས་ཞེས་སྨྲས་པ༌དང༌། ཡོ་སེབ་ཀྱིས་ཕ་ལ་དམ་བཅའ་བཞག༌ཅིང༌། ཡེས་ར་ཨེལ་གྱིས་མལ་ཁྲིའི་སྔས་མགོ་ནས་གུས་ཕྱག་ཕུལ་ཏོ།།
GEN 48:1 དེ་ཡང་དོན་དེའི་རྗེས་སུ་མི་ཞིག་གིས་ཡོ་སེབ་ལ་འདི༌ལྟར། ཁྱེད་ཀྱི་ཡབ་ལ་སྙུང་གཞི་བྱུང་འདུག་ཅེས་སྨྲས་པ་དང་ཁོས་རང་གི་བུ་མཱ་ན་ཤེ་དང་ཨེ་ཕཱར་ཡིམ་གཉིས་ཁྲིད་ནས་ཕ་ལ་བལྟ་རུ༌སོང༌།
GEN 48:2 དེ་ནས་མི་ཞིག་གིས་ཡ་ཀོབ་ལ་འདི༌ལྟར། ལྟོས༌དང༌། ཁྱེད་ཀྱི་བུ་ཡོ་སེབ་འདི་རུ་སླེབས་བྱུང་ཞེས་སྨྲས་པ༌དང༌། ཡེས་ར་ཨེལ་མལ་ལས་ནན་གྱིས་ཡར་དགྱེ་སྟེ་ཙོག་པུར་བསྡད༌དོ།།
GEN 48:3 ཡ་ཀོབ་ཀྱིས་ཡོ་སེབ་ལ་འདི༌ལྟར། ཀུན་དབང་དཀོན་མཆོག་གིས་ཀ་ན་ཨན་ཡུལ་གྱི་ལོ་ཟི་ནས་བདག་ལ་མངོན་པར་མཛད་པ་དང་བྱིན་རླབས་གནང་སྟེ་འདི་སྐད༌དུ།
GEN 48:4 བདག་གིས་ཁྱོད་ཀྱི་རིགས་རྒྱུད་མང་དུ་སྤེལ་ནས་མི་རིགས་ཆེན་པོ་ཞིག་ཏུ་བསྒྱུར་ངེས༌ཤིང༌། ཁྱོད་ཀྱི་རིགས་རྒྱུད་ཕྱི་མ་རྣམས་ནི་རྟག་ཏུ་ཡུལ་འདིའི་བདག་པོར་མཛད་པར་བྱ་ཞེས་གསུངས༌སོ།།
GEN 48:5 ང་རང་ཨེ་ཅིབ་ཡུལ་དུ་མ་ཡོང་བའི་སྔོན༌དུ། ཁྱོད་ལ་ཨེ་ཅིབ་ཡུལ་དུ་སྐྱེས་པའི་བུ་ཨེ་ཕཱར་ཡིམ་དང་མཱ་ན་ཤེ་གཉིས་ནི་བདག་གི་བུའང་ཡིན༌ཏེ། ངའི་བུ་རུ་བེན་དང་སི་མུ་ཨོན་དང་མཚུངས་པར་བདག་གི་རིགས་རྒྱུད་ཡིན་པའི་ཕྱིར༌རོ།།
GEN 48:6 འོན༌ཀྱང༌། ཁྱོད་ལ་བུ་དེ་གཉིས་ལས་གཞན་དུ་སྐྱེས་པ་ནི་ཁྱོད་ཀྱི་རིགས་རྒྱུད་ཡིན༌ཞིང༌། བུ་གཞན་རྣམས་ལའང་སྤུན་ཨེ་ཕཱར་ཡིམ་དང་མཱ་ན་ཤེ་གཉིས་ལས་ས་སྐལ་འཐོབ་དགོས༌སོ།།
GEN 48:7 བདག་ལ་མཚོན༌ན། ཕཱ་དན་ཡུལ་ནས་ཡོང་བའི་དུས༌སུ། རཱ་ཧེལ་ནི་ཀ་ན་ཨན་ཡུལ་གྱི་ལམ་བར་དུ་ངའི་མིག་མདུན་ནས་ཚེ་ལས་འདས་པ༌དང༌། ཨེབ་རཱད་དང་ལམ་ཐག་ངེས་ཅན་ཞིག་ཡོད༌པས། བདག་གིས་ཁོ་མོའི་བེམ་པོ་ཨེབ་རཱད་ཀྱི་ལམ་འགྲམ་དུ་དུར་ལ་སྦས་པ༌ཡིན། ཨེབ་རཱད་ཅེས་པ་པེད་ལེ་ཧེམ་ཡིན་ཞེས་སྨྲས༌སོ།།
GEN 48:8 དེ་ནས་ཡེས་ར་ཨེལ་གྱིས་ཡོ་སེབ་ཀྱི་བུ་གཉིས་མཐོང་བ་དང་མི་འདི་གཉིས་སུ་ཡིན་ནམ་ཞེས་དྲིས་པ༌ན།
GEN 48:9 ཡོ་སེབ་ན༌རེ། འདི་གཉིས་ནི་དཀོན་མཆོག་གིས་ཡུལ་འདི་ནས་བདག་ལ་གནང་བའི་བུ་ཡིན་ཞེས་ལན་བཏབ་པ༌དང༌། ཡང་ཡེས་ར་ཨེལ་ན༌རེ། ཁྱོད་ཀྱི་བུ་གཉིས་པོ་བདག་གི་གམ་དུ་ཁྲིད་ཤོག༌ཅིག བདག་གིས་ཁོ་གཉིས་ལ་བྱིན་རླབས་གནང་བར་བྱ་ཞེས་སྨྲས༌སོ།།
GEN 48:10 ཡེས་ར་ཨེལ་དགུང་ལོ་མཐོ་ཞིང་མིག་ཟུང་རབ་རིབ་ཏུ་གྱུར་ཡོད་པས་ཅི་ཡང་མ༌མཐོང༌། དེ་ནས་ཡོ་སེབ་ཀྱིས་རང་གི་བུ་གཉིས་པོ་ཕ་ཡི་གམ་དུ་ཁྲིད་ཡོང་བ༌དང༌། ཡེས་ར་ཨེལ་གྱིས་ཡོ་སེབ་ཀྱི་བུ་གཉིས་ལ་འཇུས་ཤིང་འོ་བྱས༌སོ།།
GEN 48:11 ཡེས་ར་ཨེལ་གྱིས་ཡོ་སེབ་ལ་འདི༌ལྟར། ངའི་སེམས་སུ་བདག་ཁྱོད་དང་འཕྲད་མི་ཐུབ་པར་སྙམ༌ཡང༌། དཀོན་མཆོག་གི་ཐུགས་རྗེ་ལས་བདག་གིས་ཁྱོད་ཀྱི་བུ་རྒྱུད་ཀྱང་མཐོང་བྱུང་ཞེས་སྨྲས༌སོ།།
GEN 48:12 ཡོ་སེབ་ཀྱིས་རང་གི་བུ་གཉིས་པོ་ཕ་ཡི་དྲུང་ནས་ཚུར་ཁྲིད༌ཅིང༌། ཁོས་ཕ་ཡི་དྲུང་དུ་མགོ་སྨད་དུ་བསྒུར་ནས་ཕྱག་བཙལ༌ཏོ།།
GEN 48:13 ཡོ་སེབ་ཀྱིས་བུ་གཉིས་ཕ་ཡི་དྲུང་དུ་ཁྲིད་པ༌སྟེ། ལག་པ་གཡས་པས་ཨེ་ཕཱར་ཡིམ་གྱི་ལག་པར་འཇུས་ཤིང་ཡེས་ར་ཨེལ་གྱི་གཡོན་ཕྱོགས་སུ་གཏད་པ༌དང༌། ལག་པ་གཡོན་པས་མཱ་ན་ཤེའི་ལག་པར་འཇུས་ཏེ་ཡེས་ར་ཨེལ་གྱི་གཡས་ཕྱོགས་སུ་གཏད་པ༌རེད།
GEN 48:14 ཡེས་ར་ཨེལ་གྱིས་ལག་པ་གཡས་པ་བརྐྱངས་ཏེ་ཨེ་ཕཱར་ཡིམ་གྱི་མགོ་ལ་བཞག༌གོ །ཨེ་ཕཱར་ཡིམ་ནི་བུ་ཆུང་བ༌ཡིན། ཡང་ཡེས་ར་ཨེལ་གྱིས་ལག་པ་གཡོན་པ་བསྣོལ་ཏེ་མཱ་ན་ཤེའི་མགོ་ལ་བཞག༌གོ །མཱ་ན་ཤེ་ནི་བུ་སྐྱེས་འགོ་ཡིན།
GEN 48:15 ཡེས་ར་ཨེལ་གྱིས་བུ་ཡོ་སེབ་ལ་འདི་ལྟར་བྱིན་རླབས་གནང་བ༌སྟེ། བདག་གི་མེས་པོ་ཨབ་ར་ཧམ་དང་ཡབ་ཆེན་ཨི་སཱག་གིས་ནི་བཀུར་བ༌དང༌།། ཆུང་ངུའི་དུས་ནས་བདག་ལ་གཅེས་ཤིང་སྐྱོང་བ་བླ་ན་མེད་པའི་དཀོན་མཆོག༌གིས།། བདག་གི་དཀའ་སྡུག་ཐམས་ཅད་བསལ་བར་མཛད་ཅིང་མངགས་པའི་ཕོ་ཉ་དེ་ཡིས༌ནི།། བུ་ཆུང་གཉིས་ལ་བྱིན་རླབས་གནང་ཞིང་དེ་གཉིས་བརྒྱུད་ནས་བདག་གི་མིང་འདི༌དང༌།། མེས་པོ་ཨབ་ར་ཧམ་དང་ཨི་སཱག་མིང་བཅས་འཇིག་རྟེན་ཡོངས་སུ་རྒྱས་པར༌ཤོག ། བུ་ཆུང་གཉིས་ཀྱི་རིགས་རྒྱུད་མང་དུ་འཕེལ་ནས་འཇིག་རྟེན་ཀུན་ལ་ཁྱབ་པར༌སྨོན། །ཞེས་སྨྲས༌སོ།།
GEN 48:17 དེ་ནས་ཕ་ཡིས་ལག་པ་གཡས་པ་ཨེ་ཕཱར་ཡིམ་གྱི་མགོ་ལ་བཞག་པའི་དོན་དེ་ཡོ་སེབ་ཀྱིས་མཐོང་ཞིང་ཡིད་མ་དགའ་བར་ཕ་ཡི་ལག་པར་འཇུས་པ༌དང༌། ཕ་ཡི་ལག་པ་བཏེགས་ནས་བུ་མཱ་ན་ཤེའི་མགོ་ལ་འཇོག་པར་བསམས་སོ།།
GEN 48:18 ཡོ་སེབ་ཀྱིས་ཕ་ལ་འདི༌ལྟར། བདག་གི་ཕ༌ལགས། དེ་ལྟར་མ་ཡིན༌ཏེ། འདི་ནི་བུ་སྐྱེས་འགོ་ཡིན། ཁྱེད་ཀྱིས་ལག་པ་གཡས་པ་ཁོའི་མགོ་ལ་འཇོག་པར་མཛོད་ཅེས་སྨྲས༌སོ།།
GEN 48:19 ཁོའི་ཕ་ཡིས་དེ་ཁས་མ་བླངས་པར་འདི༌ལྟར། ངས་རྟོགས༌སོ། །བདག་གི༌བུ། ངས་རྟོགས༌སོ། །མཱ་ན་ཤེ་མི་རིགས་ཤིག་ཏུ་འགྱུར་བར་མ་ཟད། ཁོ་རང་མི་རླབས་ཆེན་ཞིག་ཏུའང་འགྱུར་ངེས་མོད། འོན༌ཀྱང༌། ཁོའི་གཅུང་པོ་ནི་མ་འོངས་པ་ན་ཁོ་ལས་ཀྱང་རླབས་ཆེན་པོར་འགྱུར་བ༌དང༌། ཁོའི་གཅུང་པོའི་རིགས་རྒྱུད་ཀྱང་མི་རིགས་མང་པོ་ཞིག་ཏུ་འགྱུར་ངེས་ཡིན་ཞེས་སྨྲས༌ཤིང༌།
GEN 48:20 ཁོང་གིས་ཉིན་དེར་བུ་གཉིས་ལ་འདི༌ལྟར། མ་འོངས་པ་ན་ཡེས་ར་ཨེལ་མི་རིགས་ཀྱིས་ཁྱོད་གཉིས་ཀྱི་མིང་ལ་བརྟེན་ནས་བྱིན་རླབས་འདི་ལྟར་གནང་བ༌སྟེ། དཀོན་མཆོག་གིས་ཨེ་ཕཱར་ཡིམ་དང་མཱ་ན་ཤེ་བཞིན་དུ་ཁྱོད་ལའང་བྱིན་རླབས་གནང་བར་སྨོན་ཞེས་སྨྲ་བར་ངེས་ཞེས་སྨྲས༌པས། ཨེ་ཕཱར་ཡིམ་ནི་མཱ་ན་ཤེ་ལས་མཐོ་བར་བྱས༌སོ།།
GEN 48:21 དེ་ནས་ཡེས་ར་ཨེལ་གྱིས་ཡོ་སེབ་ལ་འདི༌ལྟར། བདག་ནི་འཆི་ལ༌ཉེ། འོན་ཀྱང་དཀོན་མཆོག་ཁྱོད་རྣམས་དང་ལྷན་དུ་བཞུགས་ངེས༌ཤིང༌། ཁོང་གིས་ཁྱོད་རྣམས་ཁྲིད་ནས་ཁྱོད་ཅག་གི་མེས་པོའི་ཕ་སར་འགྲོ་ངེས༌ཡིན།
GEN 48:22 བདག་གིས་སྔོན་ཆད་མདའ་གཞུ་དང་རལ་གྲིར་བརྟེན་ནས་ཨེ་མོར་མི་རིགས་ཀྱི་ལག་ནས་ཕྲོགས་པའི་ས་ཆ་དེ་དག་སྤུན་གཞན་རྣམས་ལའང་གནང་ཞིང་ཁྱོད་ལ་བགོ་སྐལ་གཅིག་ཇེ་མང་དུ་གནང་བ་ཡིན་ཞེས་སྨྲས༌སོ།།
GEN 49:1 ཡ་ཀོབ་ཀྱིས་རང་གི་བུ་རྣམས་བོས་ཏེ་འདི་སྐད༌དུ། བདག་གིས་མ་འོངས་པར་ཁྱོད་ཅག་ལ་འཕྲད་ངེས་པའི་དོན་རྣམས་སྨྲ་བའི༌ཕྱིར། ཁྱོད་རྣམས་ལྷན་དུ་འཛོམ་པར་གྱིས་ཞེས་སྨྲས་པ༌དང༌། ཡང་འདི་སྐད༌དུ།
GEN 49:2 ཡ་ཀོབ་ང་ཡི་བུ་རྣམས་ལྷན་དུ་འཛོམ་པར༌བྱ།། ཨ་ཕ་ཡེས་ར་ཨེལ་གྱི་གཏམ་ལ་མཉན་པར༌གྱིས།།
GEN 49:3 རུ་བེན་ཁྱོད་ནི་བདག་གི་བུ་ལས་སྐྱེས་འགོ༌སྟེ།། ང་རང་ལུས་སྟོབས་དར་བའི་དུས་སུ་སྐྱེས་པའི༌ཕྱིར།། ཁྱོད་ནི་མཆོག་དང་དབང་དང་ལྡན་པ་ཡིན་མོད༌ཀྱང༌།།
GEN 49:4 ཁྱོད་ནི་ཆུ་ལྟར་རྒྱུགས་པས་གཞན་ལས་མཆོག་གྱུར༌མིན།། ཁྱོད་ནི་རང་གི་ཕ་ཡི་མལ་ཁྲིར་འགོས་པ༌དང༌།། ཁྱོད་ཀྱིས་བདག་གི་གཟིམ་ཁྲི་ཡེ་ནས་རྫོབ་ཕྱིར༌རོ།།
GEN 49:5 སྤུན་ཆུང་སི་མུ་ཨོན་དང་ལེ་ཝི་གཉིས་ཀྱི༌ནི།། རལ་གྲི་ལ་སོགས་གདུག་རྩུབ་སྤྱོད་པའི་མཚོན་ཆ་ཡིན།།
GEN 49:6 བདག་གི་སེམས་ནི་ཁྱོད་ཀྱི་གྲོས་ལ་ཁས་ལེན༌མེད།། བདག་གི་ཡིད་སེམས་དེ་དག་དང་ནི་མཐུན་ཐབས༌མེད།། དེ་དག་ཁྲོ་ཞིང་སྡང་སྟེ་མི་རྣམས་བསད་པ༌དང༌།། དོན་མེད་གླང་ཐུག་བརླ་རྩ་བཅད་ཅིང་གཅོད་ཕྱིར༌རོ།།
GEN 49:7 དེ་རྣམས་ཞེ་སྡང་ཆེ་བས་སྡིགས་དམོད་འཕོག་འོས༌ཤིང༌།། དེ་རྣམས་གདུག་རྩུབ་ཆེ་བས་དམོད་པ་འཕོག་པར༌འགྱུར།། བདག་གིས་དེ་རྣམས་ང་ཡི་རིགས་ནང་འཐོར་བ༌དང༌།། ཡེས་ར་ཨེལ་གྱི་ཡུལ་གྲུ་ཀུན་ཏུ་གཏོར་བར༌བྱ།།
GEN 49:8 ཡ་ཧུ་དཱ་ཁྱོད་བདག་གི༌བུ།། ཁྱོད་ཀྱི་ལག་པས་དགྲ་བོ༌ཡི།། གཉའ་ནས་དམ་དུ་བཟུང་བའི༌ཕྱིར།། སྤུན་གཞན་གྱིས་ནི་ཁྱོད་ལ༌བསྟོད།། ཁྱོད་ལ་ཕ་ཡི་བུ་རྣམས༌ཀྱིས།། མགོ་བོ་བསྒུར་ནས་ཕྱག་འཚལ༌ལོ།།
GEN 49:9 ཡ་ཧུ་དཱ་ཁྱོད་བདག་གི༌བུ།། ཁྱོད་ནི་སེང་ཕྲུག་ཇི་བཞིན༌དུ།། རི་དྭགས་བཟུང་ནས་འགྲོ་བར༌བྱེད།། འགྱིང་བའི་ཚེ་ན་ཕོ་སེང༌དང༌།། སྡོད་པའི་ཚེ་ན་མོ་སེང༌བཞིན།། སུ་ཡིས་ཁྱོད་རང་དཀྲོག་པར༌ཕོད།།
GEN 49:10 ཞི་ལོ་ཞེས་བྱར་གྲགས་པ་ཁོང་ཉིད་ཕེབས་པ༌དང༌།། མི་རིགས་ཀུན་གྱིས་ཁོང་གི་ངག་བཞིན་སྒྲུབ་པའི༌བར།། ཡ་ཧུ་དཱ་ལས་རྒྱལ་པོའི་མཁར་བ་མི་འཕྲོག༌ཅིང༌།། ཁོང་གི་རྐང་པའི་བར་ནས་མཁར་བ་འཆོར་མི༌སྲིད།།
GEN 49:11 ཡ་ཧུ་དཱ་ཡིས་རྒུན་འབྲུམ་ཤིང་ལ་མགྲིན་བཟང༌བཏགས།། མཛེས་ཤིང་མཆོག་གྱུར་རྒུན་འབྲུམ་ཤིང་ལ་བོང་ཕྲུག༌བཏགས།། རྒུན་འབྲུམ་ཆང་ལ་རང་གི་གྱོན་པ་བཀྲུ་བྱེད༌ཅིང༌།། རྒུན་འབྲུམ་ཁུ་བའི་ནང་དུ་གྱོན་གོས་གཙང་མར༌བཀྲུས།།
GEN 49:12 ཁོ་ཡི་མིག་ཟུང་རྒུན་ཆང་གིས་ནི་དམར་པོར༌བསྒྱུར།། ཁ་ཡི་དུང་སོ་འོ་མས་དཀར་པོར་བསྒྱུར་ལགས༌སོ།།
GEN 49:13 ཟེ་བུ་ལུན་ནི་རྒྱ་མཚོའི་འགྲམ་དུ༌གནས།། མཚོ་འགྲམ་དེ་ནི་རྒྱ་མཚོའི་གྲུ་ཁ༌ལགས།། ཁོ་ཡི་མངའ་ཁོངས་ཚི་ཏུན་བར་དུ༌འཕེལ།།
GEN 49:14 ཡེས་སི་ཀཱར་ནི་བོང་བུ་རྒོད་པོ༌བཞིན།། ལུག་རའི་བར་དུ་སོས་དལ་བག་གིས༌ཉལ།།
GEN 49:15 ལྷིང་འཇགས་ཡུལ་དེ་ཤིན་ཏུ་ལེགས་པར༌འདོད།། གནས་ཡུལ་དེ་ནི་མཛེས་ཤིང་སྡུག་པར༌འདོད།། ལུས་པོ་སྨད་དུ་བསྒུར་ནས་ཁྲེས་པོ༌ཁུར།། གཞན་གྱི་གཡོག་ཏུ་གྱུར་པ་ཀྱེ་མ༌ཧོ།།
GEN 49:16 དཱན་ཞེས་བྱ་བས་ཡེས་ར་ཨེལ་གྱི་ཚོ་པ༌བཞིན།། རང་གི་འབངས་མི་ཀུན་ལ་ཁྲིམས་ཐག་གཅོད་པར༌བྱེད།།
GEN 49:17 དཱན་ཞེས་བྱ་བ་ལམ་ཁའི་ལྕེ་གཉིས༌དང༌།། ལམ་དུ་མཆིས་པའི་ལྟོ་འགྲོ་དུག་ཅན༌བཞིན།། བཞོན་རྟའི་རྨིག་པ་ལ་ནི་སོ་བཏབ༌པས།། ཀག་གིས་ལངས་ཏེ་བཞོན་མཁན་ས་ལ༌ལྷུང༌།།
GEN 49:18 བླ་ན་མེད་པའི་དཀོན་མཆོག་ཡ་ཝཱེ༌ལགས།། བདག་གིས་ནམ་ཡང་ཁྱེད་ཀྱིས་སྐྱོབ་པར༌སྒུག །
GEN 49:19 དགྲ་བོ་མྱུར་དུ་སླེབས་ནས་གཱ་རྡུར་རྒོལ་ན༌ཡང༌།། ཁོས་ཀྱང་ལམ་སང་དགྲ་བོར་རྒོལ་ཞིང་ཕ་མཐར་བསྐྲད། །
GEN 49:20 ཨ་ཤེར་ཞེས་པའི་བུ་ཡི་གནས་དེ༌རུ།། འབྲུ་རིགས་ཕུན་སུམ་ཚོགས་པ་ཡོད་པའི༌ཕྱིར།། རྒྱལ་པོ་རྣམས་ཀྱི་ཟས་སུ་འགྱུར་ངེས༌སོ།།
GEN 49:21 ནཱབ་ཐ་ལི་ནི་རྙི་ལས་ཐར་བའི་ཤྭ་མོ༌བཞིན།། ཁོ་ཡིས་སྙན་ཞིང་འཇེབས་པའི་གཏམ་ནི་སྨྲ་བར༌བྱེད།།
GEN 49:22 ཡོ་སེབ་ཞེས་པ་ཤིང་ཏོག་སྨིན་པའི་འབྲས་བུ༌དང༌།། ཆུ་མིག་འགྲམ་དུ་འབྲས་བུ་ཐོགས་པའི་ཡལ་ག༌བཞིན།། དེ་ཡི་ཡལ་ག་བརྐྱངས་ཏེ་གྱང་ལས་བརྒལ་བར༌བྱེད།།
GEN 49:23 མདའ་གཞུ་འཛིན་མཁན་གྱིས་ནི་གློ་བུར༌ཉིད།། ཁོ་ལ་རྒོལ་བར་བྱེད་ཅིང་མདའ་འཕངས༌ཏེ།། ཁོ་ལ་གནོད་པ་བཟོས་ཤིང་བཟོ་བར༌བྱེད།།
GEN 49:24 འོན་ཀྱང་ཡེས་ར་ཨེལ་གྱི་རྫི་བོ༌དང༌།། ཡེས་ར་ཨེལ་གྱི་ཕ་བོང་ཆེན་པོ༌སྟེ།། ཡ་ཀོབ་ཀྱི་ནི་སྟོབས་ལྡན་ཞེས་གྲགས༌པས།། ཡོ་སེབ་ལག་ཏུ་མདའ་གཞུ་དམ་དུ༌བཟུང༌།། ཁོ་ཡི་ལག་ཟུང་བརྟན་ཅིང་ལྡེམ་མྱུར༌ཆེ།།
GEN 49:25 དེ་ཡང་ཁྱོད་ཀྱི་ཕ་ཡི་དཀོན་མཆོག༌གིས།། ཁྱོད་ལ་སྐྱབས་སུ་མཛད་ཅིང་མཛད་ལགས༌ཏེ།། ཀུན་དབང་ལྡན་པ་ཁོང་གིས་ནམ་མཁའ༌དང༌།། ས་གཞིར་ཁྱབ་པའི་བྱིན་རླབས་མཐའ་དག༌དང༌།། མངལ་ལྡན་ནུ་མའི་བྱིན་རླབས་གནང་བར༌འགྱུར།།
GEN 49:26 ཁྱོད་ཀྱི་ཕ་ཡིས་གནང་བའི་བྱིན་རླབས༌ནི།། མེས་པོའི་བྱིན་རླབས་ལས་ཀྱང་བླ་ན༌འཕགས།། དེ་ནི་འཇིག་པ་མེད་པའི་རི་ཀླུང༌དང༌།། མུ་མཐའ་མེད་པའི་མཐའ་མཚམས་གང་དུ༌ཡང༌།། བྱིན་རླབས་དེ་དག་ཁྱོད་ལ་གནང་བར་ཤོག། སྤུན་ཟླའི་ཁྲོད་ནས་རྒྱལ་སྲས་སུ་གྱུར༌པ།། ཁྱོད་ཀྱི་སྤྱི་གཙུག་ལ་ནི་འབབ་གྱུར༌ཅིག།
GEN 49:27 པེན་ཡཱ་མེན་ནི་གདུག་རྩུབ་ཆེ་བའི་སྤྱང་ཀི༌བཞིན།། ཞོགས་པར་རི་དྭགས་བཟུང་སྟེ་བཟའ་བྱེད༌ཅིང༌།། མཚན་མོར་གཞན་ལས་ཕྲོགས་པ་བགོ་བར༌བྱེད། །ཅེས་སྨྲས༌སོ།།
GEN 49:28 མི་དེ་ཐམས་ཅད་ནི་ཡེས་ར་ཨེལ་གྱི་ཚོ་པ་བཅུ་གཉིས་ཡིན༌ལ། དོན་དེ་དག་ནི་ཁོ་རྣམས་ཀྱི་ཕ་ཡིས་ཁོ་རྣམས་ལ་བྱིན་རླབས་གནང་བའི་སྐབས་སུ་སྨྲས་པའི་གཏམ་ཡང་ཡིན༌ཏེ། མི་རང་རང་ལ་བསྟུན་ནས་བྱིན་རླབས་གནང༌བའོ།།
GEN 49:29 དེ་ནས་ཡང་ཡེས་ར་ཨེལ་གྱིས་རང་གི་བུ་རྣམས་ལ་འདི་ལྟར་གདམས༌པ། བདག་ནི་ཅུང་མི་འགོར་བར་རང་གི་མེས་པོ་རྣམས་ཀྱི་དྲུང་དུ་འགྲོའོ། །ཁྱོད་རྣམས་ཀྱིས་བདག་གི་བེམ་པོ་ནི་ཧེ་བི་མི་རིགས་ཀྱི་ཨེབ་རོན་གྱི་ཞིང་སར་ཡོད་པའི་བྲག་ཁུང་དུ་བདག་གི་མེས་པོ་དང་མཉམ་དུ་དུར་ལ་སྦ་བར༌བྱའོ།།
GEN 49:30 བྲག་ཁུང་དེ་ནི་ཀ་ན་ཨན་ཡུལ་གྱི་མཱན་རེའེ་ས་ཆའི་མདུན་ཕྱོགས་ཀྱི་མཱག་ཕེ་ལཱའི་ཞིང་ནང་དུ་ཡོད༌ཅིང༌། བྲག་ཁུང་དེ་དང་ཞིང་ས་དེ་ནི་ཨབ་ར་ཧམ་གྱིས་ཧེ་བི་མི་རིགས་ཀྱི་ཨེབ་རོན་ནས་ཉོས་ཤིང་དུར་ས་བྱས་པ༌ཡིན།
GEN 49:31 བྲག་ཁུང་དེ་རུ་ཨབ་ར་ཧམ་དང་ཁོང་གི་ཆུང་མ་སཱ་ར་གཉིས་ཀྱི་སྐུ་གདུང་དུར་ལ་བཅུག་པ༌དང༌། ཨི་སཱག་དང་ཡུམ་རིབ་ཀཱ་གཉིས་ཀྱི་སྐུ་གདུང་ཡང་བྲག་ཁུང་དེ་རུ་བཅུག༌པའོ། །ངས་རང་གི་ཆུང་མ་ལེ་ཨའི་བེམ་པོའང་གནས་དེ་རུ་དུར་ལ་བཅུག༌གོ །
GEN 49:32 ཞིང་ས་དེ་དང་དེའི་ནང་དུ་ཡོད་པའི་བྲག་ཁུང་ནི་ཧེད་ཀྱི་བུ་རྒྱུད་ལས་ཉོས་པ་ཡིན་ཞེས་སྨྲས༌སོ།།
GEN 49:33 དེ་ལྟར་ཡ་ཀོབ་ཀྱིས་བུ་རྣམས་ལ་ཁ་བསྒོ་གནང༌རྗེས། ཕྱིར་མལ་སར་ལྷུང་སྟེ་ཚེ་ལས་འདས་ཤིང་ཁོང་ཉིད་མེས་པོ་རྣམས་ཀྱི་དྲུང་དུ་ཕྱིན༌ཏོ།།
GEN 50:1 དེ་ནས་ཡོ་སེབ་རང་གི་ཕ་ཡི་གདོང་ལ་སྦར་ཏེ་མྱ་ངན་གྱི་ངང་ནས་ངུས་ཤིང་ཕ་ལ་འོ་བྱས༌སོ།།
GEN 50:2 ཡོ་སེབ་ཀྱིས་ཕ་ཡི་བེམ་པོར་དྲི་སྦྱོར་བྱེད་དགོས་ཚུལ་རང་ལ་ཞབས་ཕྱི་སྒྲུབ་མཁན་ཨམ་ཆིར་བཀའ་གནང་བ༌དང༌། ཨམ་ཆིས་ཀྱང་ཡེས་ར་ཨེལ་གྱི་བེམ་པོར་དྲི་སྦྱོར་བྱས༌པའོ།།
GEN 50:3 ཉིན་བཞི་བཅུའི་རིང་ལ་བེམ་པོར་སྤོས་ཆུ་དང་རྩྭ་སྨན་བྱུགས་ཤིང་རས་ཀྱིས་དཀྲིས་དགོས་པ༌དང༌། ཨེ་ཅིབ་མི་རིགས་ཀྱིས་ཉིན་བདུན་ཅུའི་རིང་ལ་མྱ་ངན་བྱས༌སོ།།
GEN 50:4 དེ་ནས་མྱ་ངན་གྱི་ཉིན་ལོངས་པ་དང་ཡོ་སེབ་ཀྱིས་ཕཱར་ཨོལ་གྱི་ཁྱིམ་མི་རྣམས་ལ་འདི༌ལྟར། གལ༌ཏེ། བདག་ལ་ཁྱོད་རྣམས་ཀྱི་མིག་མདུན་ནས་ཐུགས་རྗེ་ཐོབ༌ན་ཕཱར་ཨོལ་ལ་འདི་ལྟར།
GEN 50:5 བདག་གི་ཕ་ཚེ་ལས་འདའ༌ཁར། ཁོང་གིས་བདག་ལ་འདི་སྐད༌དུ། ང་རང་ད་ལྟ་འཆི་ལ༌ཉེ། ངས་ཀ་ན་ཨན་ཡུལ་དུ་རང་ལ་དུར་ས་བཟོས་ཡོད༌ལ། ཁྱོད་ཀྱིས་ངའི་བེམ་པོ་གནས་དེ་རུ་དུར་ལ་འཇུག་པར་གྱིས་ཞེས་བདག་ལ་དམ་བཅའ་འཇོག་ཏུ་བཅུག་ཡོད༌པས། ད་ལྟ་ཁྱེད་ཀྱིས་ང་རང་ཕ་ཡི་སྐུ་གདུང་དུར་ལ་འཇུག་ཏུ་འགྲོ་བར༌འཚལ། ཕྱིས་སུ་ང་རང་ཕྱིར་ཡོང་ངེས་ཡིན་ཞེས་ཞུ་བར་མཛོད་ཅེས་སྨྲས༌སོ།།
GEN 50:6 ཕཱར་ཨོལ་ན༌རེ། སོང༌དང༌། ཁྱོད་ཀྱི་ཕ་ཡིས་ཁྱོད་ལ་ཇི་ལྟར་དམ་བཅའ་འཇོག་ཏུ་བཅུག་ཡོད་པ༌བཞིན། ཁྱོད་ཀྱིས་ཁོང་གི་བེམ་པོ་དུར་ལ་འཇུག་པར་གྱིས་ཞེས་སྨྲས༌སོ།།
GEN 50:7 དེ་ནས་ཡོ་སེབ་ཡར་ཕ་ཡི་བེམ་པོ་དུར་དུ་འཇུག་པར༌ཆས། ཁོ་དང་མཉམ་དུ་ཕཱར་ཨོལ་གྱི་བློན་པོ༌དང༌། རྒན༌པོ། ཨེ་ཅིབ་རྒྱལ་ཁབ་ཀྱི་རྒན་པོ་བཅས༌དང༌།
GEN 50:8 གཞན༌ཡང༌། ཡོ་སེབ་ཀྱི་ཁྱིམ་མི་ཐམས་ཅད༌དང༌། ཁོའི་སྤུན་རྣམས༌དང༌། ཕ་ཡི་ནང་མི་རྣམས༌དང༌། ཤིང་རྟའི་དམག༌དང༌། སྐྱ་དམག་ཀྱང་སོང་བས་མི་གྲངས་ཤིན་ཏུ༌མང༌། ཁོ་རྣམས་ཀྱི་བུད་མེད༌དང༌། བྱིས༌པ། ར་ལུག༌གི་ཁྱུ། བ་གླང་གི་ཁྱུ་བཅས་གོ་ཤེན་ཡུལ་དུ་ལུས༌སོ།།
GEN 50:10 ཁོ་རྣམས་ཡོར་དན་གཙང་པོའི་ཕ་རོལ་གྱི་ཨ་ཐད་ཅེས་པའི་གཡུལ་ཁར་སླེབས་ཤིང་། མི་རྣམས་མྱ་ངན་གྱི་ངང་ནས་སྐད་གསང་མཐོན་པོས་ངུས་པ༌དང༌། ཡོ་སེབ་ཀྱང་གནས་དེ་ནས་ཉིན་བདུན་རིང་ལ་མྱ་ངན་གྱི་ངང་ནས་ངུས༌སོ།།
GEN 50:11 ཀ་ན་ཨན་མི་རིགས་ཀྱི་ཡུལ་མི་རྣམས་ཀྱིས་ཨ་ཐད་གཡུལ་ཁའི་མྱ་ངན་གྱི་ངུ་སྐད་ཐོས་ཏེ་ན༌རེ། འདི་ནི་ཨེ་ཅིབ་མི་རིགས་ཀྱི་མྱ་ངན་ཆེན་པོ་ཞིག་གོ་ཞེས༌སྨྲས། དེའི༌ཕྱིར། གནས་དེའི་མིང་ལ་ཧ་བེལ་མུས་རཱ་ཡིམ་ཞེས་བཏགས༌ཤིང༌། དེ་ཡོར་དན་གཙང་པོའི་ཤར་ཕྱོགས་སུ་མཆིས༌སོ།།
GEN 50:12 ཡེས་ར་ཨེལ་གྱི་བུ་རྣམས་ཀྱིས་ཕ་ཡི་ཁ་ཆེམས་ལྟར་བསྒྲུབས༌ཤིང༌།
GEN 50:13 ཁོང་གི་བེམ་པོ་ཀ་ན་ཨན་ཡུལ་གྱི་མཱན་རེའེ་ས་ཆའི་མདུན་ཕྱོགས་ཏེ་མཱག་ཕེ་ལཱའི་ཞིང་ནང་དུ་ཡོད་པའི་བྲག་ཁུང་དུ་དུར་ལ༌བཅུག བྲག་ཁུང་དེ་དང་ཞིང་ས་དེ་ནི་ཨབ་ར་ཧམ་གྱིས་ཧེ་བི་མི་རིགས་ཀྱི་ཨེབ་རོན་ལས་ཉོས་ཏེ་དུར་ས་བྱས༌པའོ།།
GEN 50:14 ཡོ་སེབ་ཀྱིས་ཕ་ཡི་བེམ་པོ་དུར་དུ་བཅུག༌རྗེས། རང་གི་སྤུན་དང་དུར་འཇུག་པ་གཞན་རྣམས་དང་མཉམ་དུ་ཨེ་ཅིབ་ཡུལ་དུ་ཕྱིར་ལོག་གོ །
GEN 50:15 དེ་ཡང་ཡོ་སེབ་ཀྱི་སྤུན་རྣམས་ཀྱིས་ཕ་ཚེ་ལས་འདས་པ་མཐོང་ནས་འདི༌ལྟར། ཡོ་སེབ་རང་ཅག་རྣམས་ལ་སྡང་སྲིད༌དེ། སྔོན་ཆད་རང་ཅག་གིས་ཁོ་ལ་གནོད་འཚེ་བྱས་མྱོང༌བས། ཁོས་ད་ལྟ་འཁོན་ལན་སློག་ངེས་ཡིན་ཞེས་སྨྲས་པ༌དང༌།
GEN 50:16 སྤུན་རྣམས་ཀྱིས་མི་ཞིག་ཡོ་སེབ་ཀྱི་དྲུང་དུ་མངགས༌ཏེ། ཕ་ཚེ་ལས་མ་འདས་པའི་སྔོན་ལ་ཁོང་གིས་ངེད་ཅག་ལ་འདི་སྐད༌དུ།
GEN 50:17 ཁྱོད་ཅག་གིས་ཡོ་སེབ་ལ་འདི་ལྟར་སྨྲ་བར༌གྱིས། སྔོན་ཆད་སྤུན་རྣམས་ཀྱིས་ཁྱོད་ལ་གནོད་འཚེ་བྱས༌ཤིང༌། ཁྱོད་ཀྱིས་ཁོ་རྣམས་ཀྱི་སྡིག་ཉེས་ལ་གུ་ཡངས་གཏོང་བར་མཛོད་ཅིག་ཅེས་ཞུ་བ་བྱོས་ཤིག་ཅེས་སྨྲས་མྱོང༌ལ། ད་ལྟ་ཁྱོད་ཀྱིས་ཕ་ཡི་དཀོན་མཆོག་གི་ཞབས་ཕྱི་པ་ངེད་རྣམས་ཀྱི་ཉེས་སྐྱོན་ལ་གུ་ཡངས་གཏོང་བར་མཛོད་ཅིག་ཅེས་ངག་འཕྲིན༌བསྐུར། སྤུན་རྣམས་ཀྱིས་ཡོ་སེབ་ལ་དེ་ལྟར་སྐད་བསྐུར་བས་ཡོ་སེབ་ངུས༌སོ།།
GEN 50:18 དེ་ནས་ཡོ་སེབ་ཀྱི་སྤུན་རྣམས་ཁོའི་དྲུང་དུ་སླེབས་པ་དང་ལུས་པོ་སར་བཏུད་དེ་ན༌རེ། ངེད་ཅག་ཁྱོད་ཀྱི་ཞབས་ཕྱི་པ་ཡིན་ཞེས་སྨྲས༌སོ།།
GEN 50:19 ཡོ་སེབ་ན༌རེ། ཁྱོད་རྣམས་འཇིགས་མི་དགོས༌ཏེ། བདག་གིས་དཀོན་མཆོག་གི་ཚབ་བྱེད་ག་ལ༌ནུས།
GEN 50:20 སྔོན་ཆད་ཁྱོད་ཅག་གིས་བདག་ལ་གནོད་པ་བྱེད་འདོད༌ནའང༌། དཀོན་མཆོག་གིས་ལས་བཟང་པོའི་ཕྱོགས་སུ་དགོངས༌ཏེ། མི་མང་པོ་ཞིག་གི་ཚེ་སྲོག་སྐྱོབ་པའི་ཕྱིར་ད་ལྟའི་རྣམ་པ་འདི་བྱུང་བ༌ཡིན།
GEN 50:21 ད་ལྟ་ཁྱོད་རྣམས་འཇིགས་མི་དགོས༌ཏེ། ངས་ཁྱོད་ཅག་དང་ཁྱོད་རྣམས་ཀྱི་བུད་མེད་དང་བྱིས་པ་བཅས་གསོ་བར་བྱ་ཞེས་སྨྲས༌ཤིང༌། ཡོ་སེབ་ཀྱིས་སྙིང་ཉེ་བའི་གཏམ་གྱིས་སྤུན་རྣམས་ལ་སེམས་གསོ་བྱས༌སོ།།
GEN 50:22 དེ་ཡང་ཡོ་སེབ་དང་རང་གི་ཕ་ཡི་གཉེན་ཉེ་རྣམས་ཨེ་ཅིབ་ཡུལ་དུ་བཞུགས༌ཤིང༌། ཡོ་སེབ་བསྡོམས་པས་ལོ་བརྒྱ་དང་བཅུ་ལ་བཞུགས༌སོ།།
GEN 50:23 ཡོ་སེབ་ཀྱིས་ཨེ་ཕཱར་ཡིམ་གྱི་མི་རབས་གསུམ་པའི་ཚ་བོ་རྣམས་མཐོང་ཐུབ་པར་གྱུར་པ༌དང༌། མཱ་ན་ཤེ་ཡི་བུ་མཱ་ཀིར་ཞེས་བྱ་བའི་བུ་རྣམས་ཀྱང་ཡོ་སེབ་ཀྱི་དྲུང་དུ་སྐྱེས༌པའོ།།
GEN 50:24 དེ་ནས་ཡོ་སེབ་ཀྱིས་རང་གི་སྤུན་རྣམས་ལ་འདི་སྐད༌དུ། བདག་ནི་འཆི་ལ༌ཉེ། འོན་ཀྱང་དཀོན་མཆོག་གིས་ཁྱོད་རྣམས་ལ་གཟིགས་སྐྱོང་གནང་ངེས་པ༌དང༌། ཁྱོད་རྣམས་ཡུལ་འདི་ནས་ལམ་ལ་ཆས་ཏེ། ཁོང་གིས་དེ་སྔར་ཨབ་ར་ཧམ༌དང༌། ཨི༌སཱག ཡ་ཀོབ་བཅས་ལ་གནང་བར་མནའ་བཞེས་པའི་ཡུལ་དེར་འཁྲིད་ངེས་ཡིན་ཞེས་སྨྲས༌པའོ།།
GEN 50:25 ཡང་ཡོ་སེབ་ཀྱིས་ཡེས་ར་ཨེལ་གྱི་བུ་རབས་ཚ་རྒྱུད་རྣམས་ལ་དམ་བཅའ་འཇོག་ཏུ་བཅུག་སྟེ་འདི་སྐད༌དུ། དཀོན་མཆོག་གིས་ཁྱོད་རྣམས་ལ་གཟིགས་སྐྱོང་མཛད་ངེས༌ཤིང༌། ཁྱོད་ཅག་གིས་བདག་གི་རུས་པ་ཡུལ་འདི་ནས་ཡར་འཁྱེར་བར་མཛོད་ཅིག་ཅེས་སྨྲས༌སོ།།
GEN 50:26 དེ་ལྟར་ཡོ་སེབ་དགུང་ལོ་བརྒྱ་དང་བཅུ་ལ་བཞུགས་ཏེ་སྐུ་གཤེགས་པ༌རེད། མི་རྣམས་ཀྱིས་ཁོང་གི་སྐུ་གདུང་ལ་དྲི་སྦྱོར་བྱས་ཏེ་ཨེ་ཅིབ་ཡུལ་ནས་སྤུར་སྒམ་ནང་དུ་བཞག༌གོ ། །།
EXO 1:1 དེ་ཡང་རང་རང་གི་ཁྱིམ་ཚང་དང་བཅས་ཡ་ཀོབ་དང་ལྷན་དུ་ཨེ་ཅིབ་ཡུལ་དུ་འོངས་པའི་ཡེས་ར་ཨེལ་གྱི་བུ་རྣམས་ཀྱི་མིང་ནི་གཤམ་དུ་བཀོད་པ་སྟེ།
EXO 1:2 རུ་བེན་དང་། སི་མུ་ཨོན། ལེ་ཝི། ཡ་ཧུ་དཱ།
EXO 1:3 ཡེས་སི་ཀཱར། ཟེ་བུ་ལུན། པེན་ཡཱ་མེན།
EXO 1:4 དཱན། ནཱབ་ཐ་ལི། གཱ་རྡུ། ཨ་ཤེར་བཅས་སོ། །
EXO 1:5 ཡ་ཀོབ་ནས་བྱུང་བའི་མི་ཐམས་ཅད་ཀྱི་གྲངས་ཀ་ནི་བསྡོམས་པས་བདུན་ཅུ་ཡོད་ཅིང་། ཡོ་སེབ་སྔར་ནས་ཨེ་ཅིབ་ཡུལ་དུ་ཡོད་པ་ཡིན།
EXO 1:6 དེ་ནས་ཡོ་སེབ་དང་ཁོའི་སྤུན་ཐམས་ཅད་དང་མི་རབས་དེའི་མི་མཐའ་དག་ཤི་ཟིན་མོད།
EXO 1:7 འོན་ཀྱང་། ཡེས་ར་ཨེལ་གྱི་བུ་རྣམས་རྒྱུད་དང་ལྡན་པར་གྱུར་ནས་གྲངས་ཀ་ཤིན་ཏུ་མང་པོར་འཕེལ་ཏེ་སྟོབས་ཧ་ཅང་ཆེ་བར་གྱུར་ནས་ཡུལ་གྲུ་དེར་བཀང་ངོ་། །
EXO 1:8 དེ་ནས་ཡོ་སེབ་ལ་རྒྱུས་མི་མངའ་བའི་རྒྱལ་པོ་གསར་པ་ཞིག་བྱུང་ཞིང་། དེས་ཨེ་ཅིབ་ལ་དབང་བསྒྱུར་པ་དང་།
EXO 1:9 དེས་རང་གི་འབངས་མི་རྣམས་ལ། ལྟོས་དང་། ཡེས་ར་ཨེལ་པ་རྣམས་ཀྱི་མི་ཚོགས་རང་ཅག་ལས་མང་ཞིང་སྟོབས་ཀྱང་རྒྱས་པས།
EXO 1:10 ཤོག་དང་། རང་ཅག་གིས་དེ་རྣམས་ལ་གཡོ་སྦྱོར་སྤེལ་བར་བྱའོ། །དེ་ལྟར་མ་བྱས་ན། ཁོ་རྣམས་ད་དུང་འཕེལ་བར་འགྱུར་ཞིང་། ཕྱིས་སུ་དམག་འཁྲུག་འདྲ་བྱུང་ན་དེ་དག་གིས་དགྲ་བོར་གྲོགས་བགྱིས་ནས་རང་ཅག་ལ་རྒོལ་ཏེ་ཡུལ་འདི་དང་འབྲལ་སྲིད་ཅེས་སྨྲས་སོ། །
EXO 1:11 དེའི་ཕྱིར། ཨེ་ཅིབ་པ་རྣམས་ཀྱིས་ཁོ་རྣམས་ལ་ཁྲེས་པོ་ལྕི་མོ་བཀལ་ནས་དྲག་གནོན་ཆེན་པོ་བྱ་ཆེད་ལས་རྒྱབ་པ་རྣམས་བསྐོས་ཤིང་། ཁོ་རྣམས་ཀྱིས་ཕཱར་ཨོལ་ལ་བང་མཛོད་གྲོང་ཁྱེར་ཕི་ཐོམ་དང་རཱ་ཨམ་སེའེ་གཉིས་བརྩིགས་སོ། །
EXO 1:12 འོན་ཀྱང་དེ་རྣམས་ལ་ཇི་ལྟར་དྲག་གནོན་བྱས་ནའང་དེ་ལས་མང་པོར་འཕེལ་ཞིང་ཕྱོགས་ཀུན་ཏུ་ཁྱབ་པས། ཨེ་ཅིབ་པ་རྣམས་ཡེས་ར་ཨེལ་པའི་རྐྱེན་གྱིས་འཇིགས་པ་དང་།
EXO 1:13 ཡེས་ར་ཨེལ་པ་རྣམས་ལ་བཙན་བཀོལ་ནས་ལས་ཀ་བྱེད་དུ་བཅུག་སྟེ།
EXO 1:14 སོ་ཕག་དང་འཇིམ་པ་བཟོ་བའི་ལས་ཀ་ལྕི་མོ་དང་། ཞིང་ལས་སྣ་ཚོགས་བྱེད་དུ་བཅུག་ནས་ཁོ་རྣམས་ཀྱི་འཚོ་བ་སྡུག་ལ་སྦྱར་ཅིང་། ལས་ཀ་ཐམས་ཅད་ཀྱི་ཐད་ནས་ཁོ་རྣམས་ལ་གདུག་རྩུབ་སྤྱད་དོ། །
EXO 1:15 དེ་ནས་ཨེ་ཅིབ་ཀྱི་རྒྱལ་པོས་ཨིབ་རི་པའི་སྐྱེ་གཡོག་མ་ཤིབ་རཱ་དང་ཕུ་ཨ་བྱ་བ་གཉིས་ལ་འདི་ལྟར།
EXO 1:16 ཁྱོད་ཅག་གིས་ཨིབ་རི་པའི་བུད་མེད་རྣམས་ལ་སྐྱེ་གཡོག་བྱེད་པའི་སྐབས་སུ་ཁོ་མོ་ཚོས་བཙའ་ཁྲིའི་སྟེང་ཕྲུ་གུ་བཙའ་དུས་ལྟོས་དང་། བུ་ཡིན་ན་སོད་ཅིག བུ་མོ་ཡིན་ན་འཚོ་བས་ཆོག་ཅེས་བཀའ་བསྒོས།
EXO 1:17 འོན་ཀྱང་སྐྱེ་གཡོག་མ་རྣམས་དཀོན་མཆོག་ལ་གུས་ཤིང་འཇིགས་པས། ཨེ་ཅིབ་ཀྱི་རྒྱལ་པོས་གནང་བའི་བཀའ་བཞིན་དུ་མ་བྱས་པར་བུ་རྣམས་ཀྱི་སྲོག་བསྐྱབས་པ་དང་།
EXO 1:18 ཨེ་ཅིབ་ཀྱི་རྒྱལ་པོས་སྐྱེ་གཡོག་མ་རྣམས་བོས་ནས་འདི་ལྟར་དྲིས་པ་སྟེ། ཁྱོད་ཅག་གིས་བུ་རྣམས་ཀྱི་སྲོག་བསྐྱབས་པ་ཅི་ཡིན་ནམ་ཞེས་པ་ན།
EXO 1:19 སྐྱེ་གཡོག་མ་རྣམས་ཀྱིས་ཕཱར་ཨོལ་ལ། ཨིབ་རི་པའི་བུད་མེད་དང་ཨེ་ཅིབ་ཀྱི་བུད་མེད་རྣམས་མི་འདྲ་སྟེ། ཨིབ་རི་པའི་བུད་མེད་ཀྱི་ལུས་སྟོབས་ཆེ་བས་སྐྱེ་གཡོག་མ་ད་དུང་མ་སླེབས་གོང་དུ་བཙས་ཚར་ཞེས་ཞུས་སོ། །
EXO 1:20 དེའི་ཕྱིར། དཀོན་མཆོག་གིས་སྐྱེ་གཡོག་མ་རྣམས་ལ་བཀའ་དྲིན་མཛད་པ་དང་། ཡེས་ར་ཨེལ་གྱི་མི་རྣམས་ཀྱང་འཕེལ་ཞིང་ཤིན་ཏུ་དར་བར་གྱུར།
EXO 1:21 སྐྱེ་གཡོག་མ་རྣམས་དཀོན་མཆོག་ལ་གུས་ཤིང་འཇིགས་པས་ཁོང་གིས་ཁོ་མོ་རྣམས་ལ་ཁྱིམ་གཞིས་མཛད་དོ། །
EXO 1:22 དེ་ནས་ཕཱར་ཨོལ་གྱིས་རང་གི་འབངས་མི་རྣམས་ལ་འདི་ལྟར། ཨིབ་རི་པའི་བུ་གསར་སྐྱེས་རེ་རེ་ནཱ་ཡོལ་གཙང་པོར་གཡུགས་དང་། བུ་མོ་རྣམས་འཚོ་རུ་ཆུག་ཅེས་བཀའ་བབས་སོ། །
EXO 2:1 དེ་ཡང་ལེ་ཝིའི་རྒྱུད་ཀྱི་མི་ཞིག་སོང་ནས་ཚོ་པ་དེའི་བུ་མོ་ཞིག་ཆུང་མར་བླངས་པ་དང་།
EXO 2:2 བུ་མོ་དེ་མངལ་དང་ལྡན་པར་གྱུར་ནས་བུ་ཞིག་སྐྱེས་ཤིང་། རང་གི་ཕྲུ་གུ་མཛེས་ཤིང་ལྟ་ན་སྡུག་པ་མཐོང་ནས་ཟླ་བ་གསུམ་ལ་སྦས་ནས་བཞག
EXO 2:3 ཕྱིས་སུ་སྦས་ཐབས་མ་བྱུང་བས་ཁོ་མོས་པ་པི་རཱའི་གཟེབ་ཅིག་བླངས་ཏེ་རྒྱ་སྐྱེགས་དང་ཐང་ཆུ་བསྐུས་ཤིང་། ཕྲུ་གུ་དེའི་ནང་དུ་བཞག་ནས་ནཱ་ཡོལ་གཙང་པོ་འགྲམ་གྱི་འདམ་རྩྭའི་གསེབ་ཏུ་བཞག་པ་དང་།
EXO 2:4 བུ་དེའི་གཅེན་མོས་ཁོ་ལ་ཅི་ཞིག་འབྱུང་བར་བལྟ་བའི་ཕྱིར་རྒྱང་རིང་དུ་ལངས་བསྡད་དོ། །
EXO 2:5 དེ་ནས་ཕཱར་ཨོལ་གྱི་སྲས་མོ་ནཱ་ཡོལ་གཙང་པོའི་འགྲམ་ལ་ཁྲུས་བྱེད་དུ་འོངས་པ་དང་། ཁོ་མོའི་གཡོག་མོ་རྣམས་ཆུ་ཁར་སོང་བ་ལ། སྲས་མོས་འདམ་རྩྭའི་གསེབ་ལ་ཡོད་པའི་གཟེབ་དེ་མཐོང་ནས་གཡོག་མོ་ཞིག་ལེན་དུ་བཏང་།
EXO 2:6 ཁོ་མོས་གཟེབ་ཀྱི་ཁ་ཕྱེས་པ་ན་བུ་ཞིག་ཡོད་པ་མཐོང་ཞིང་། ལྟོས་དང་། བུ་དེ་ངུ་བཞིན་ཡོད་པར་སྙིང་རྗེ་སྐྱེས་ཏེ་འདི་ལྟར་སྨྲས་པ། འདི་ནི་ཨིབ་རི་པའི་ཕྲུ་གུ་ཞིག་ཡིན་འདུག་ཅེས་པའོ། །
EXO 2:7 སྐབས་དེར། ཕྲུ་གུའི་གཅེན་མོས་ཕཱར་ཨོལ་གྱི་སྲས་མོ་ལ། ང་རང་སོང་སྟེ་ཁྱེད་ལ་ཨིབ་རི་པའི་བུད་མེད་རྣམས་ལས་ཉེ་བའི་མ་མ་ཞིག་བོས་ཏེ་བུ་འདིར་ནུ་མ་བསྣུན་པར་བྱའམ་ཞེས་ཞུས་པ་ལ།
EXO 2:8 ཕཱར་ཨོལ་གྱི་སྲས་མོས་ཁྱོད་སོང་ཞིག་ཅེས་བཀའ་གནང་བ་དང་། བུ་མོ་སོང་ནས་ཕྲུ་གུའི་ཨ་མ་བོས་ཡོང་ཞིང་།
EXO 2:9 ཕཱར་ཨོལ་གྱི་སྲས་མོས་ཁོ་མོར། ཁྱོད་ཀྱིས་ཕྲུ་གུ་འདི་ཁྱེར་སོང་སྟེ་བདག་གི་དོན་དུ་ཁོ་ལ་ནུ་མ་སྣུན་དང་། ངས་ཁྱོད་ལ་གླ་ཆ་སྟེར་ཞེས་སྨྲས་པ་ན། ཁོ་མོས་ཕྲུ་གུ་ཁྱེར་ནས་ནུ་མ་བསྣུན།
EXO 2:10 དེ་ནས་ཕྲུ་གུ་ནར་སོན་པ་ན་བུད་མེད་ཀྱིས་བུ་དེ་ཕཱར་ཨོལ་གྱི་སྲས་མོའི་རྩར་ཁྲིད་ནས་དེའི་གསོས་བུར་གྱུར་ཅིང་། སྲས་མོས་བྱིས་པའི་མིང་ལ་མོ་ཤེ་ཞེས་བཏགས་པ་སྟེ། བདག་གིས་ཁོ་རང་ཆུ་ལས་བླངས་པའི་ཕྱིར་ཡིན་ཞེས་སྨྲས་སོ། །
EXO 2:11 དེའི་རྗེས་སུ་མོ་ཤེ་ལང་ཚོ་དར་ལ་བབས་པ་ན། ཕྱི་རོལ་ཏུ་རང་གི་སྤུན་ཟླ་རྣམས་ཀྱི་གམ་དུ་སོང་བ་དང་། དེ་དག་གིས་དཀའ་སྡུག་མྱོང་བཞིན་ཡོད་པ་མཐོང་ཞིང་། ཨེ་ཅིབ་པ་ཞིག་གིས་ཁོའི་སྤུན་ཟླ་ཨིབ་རི་པ་ཞིག་ལ་གཅར་རྡུང་བྱེད་པ་མཐོང་ནས།
EXO 2:12 མོ་ཤེ་ཡིས་གཡས་གཡོན་ལ་བལྟས་ཤིང་སུ་ཡང་མ་མཐོང་བས། ཁོས་ཨེ་ཅིབ་པ་དེ་བསད་ནས་བྱེ་མའི་ནང་དུ་སྦས།
EXO 2:13 དེའི་ཕྱི་ཉིན་ཡང་ཁོ་རང་ཕྱི་རོལ་ཏུ་སོང་བ་ན། ལྟོས་དང་། ཨིབ་རི་པ་གཉིས་འཛིང་རེས་བྱེད་ཀྱིན་འདུག་པ་མཐོང་སྟེ། བརྙས་བཅོས་བྱེད་མཁན་དེ་ལ། ཁྱོད་ཀྱིས་ཅིའི་ཕྱིར་རང་གི་སྤུན་ཟླར་རྡུང་ངམ་ཞེས་སྨྲས་པ་ལ།
EXO 2:14 མི་དེ་ན་རེ། སུས་ཁྱོད་རང་ངེད་ཅག་གི་འགོ་དཔོན་ནམ་ཁྲིམས་དཔོན་དུ་བསྐོས་པ་ཡིན་ནམ། ཁྱོད་ཀྱིས་ཨེ་ཅིབ་པ་དེ་བཞིན་དུ་ང་རང་ཡང་གསོད་འདོད་དམ་ཞེས་སྨྲས་པས། མོ་ཤེ་འཇིགས་ནས་དོན་དེ་མི་གཞན་གྱིས་ཀྱང་དངོས་གནས་ཤེས་པ་འདྲ་སྙམ་མོ། །
EXO 2:15 དེ་ནས་ཕཱར་ཨོལ་གྱིས་དོན་དེ་ཐོས་ནས་མོ་ཤེ་གསོད་པར་བསམས་མོད། འོན་ཀྱང་མོ་ཤེ་ནི་ཕཱར་ཨོལ་ལས་བྲོས་ཏེ་མིད༌ཡཱན་ཡུལ་དུ་སོང་ནས་བསྡད་པ་དང་།
EXO 2:16 ཉིན་ཞིག་ཁོ་རང་ཁྲོན་པ་ཞིག་གི་གམ་དུ་སྡོད་དུས། མིད༌ཡཱན་ཡུལ་གྱི་མཆོད་དཔོན་ལ་བུ་མོ་བདུན་ཡོད་པ་རྣམས་ཕ་ཡི་ར་ལུག་གི་ཁྱུ་ལ་ཆུ་ལྡུད་པའི་ཕྱིར་ཆུ་ལེན་དུ་ཡོང་ཞིང་གཞོང་པ་རྣམས་ཆུས་གང་བར་བྱས།
EXO 2:17 དུས་དེར་ལུག་རྫི་རྣམས་ཡོང་སྟེ་ཁོ་མོ་རྣམས་བདས། འོན་ཀྱང༌། མོ་ཤེ་ལངས་ནས་ཁོ་མོ་རྣམས་ལ་རོགས་བྱས་ཏེ་ཁོ་ཚོའི་ར་ལུག་གི་ཁྱུ་ལ་ཆུ་བླུད་དོ། །
EXO 2:18 དེ་ནས་ཁོ་མོ་རྣམས་ཕ་རུའུ་ཨེལ་གྱི་གམ་དུ་འོངས་པ་ན། ཕ་ན་རེ། དེ་རིང་ཁྱོད་རྣམས་འདི་ཙམ་མགྱོགས་མྱུར་ངང་སླེབས་པའི་རྒྱུ་མཚན་ཅི་ཞེས་དྲིས་པ་ལ།
EXO 2:19 ཁོ་མོ་རྣམས་ན་རེ། ཨེ་ཅིབ་པ་ཞིག་གིས་ངེད་རྣམས་རྫི་བོ་སྐོར་ཞིག་གི་ལག་འོག་ནས་བསྐྱབས་པར་མ་ཟད། ད་དུང་ཆུ་བླངས་ནས་ར་ལུག་རྣམས་ལ་བླུད་བྱུང་ཞེས་སྨྲས།
EXO 2:20 དེ་ནས་ཕ་ཡིས་བུ་མོ་རྣམས་ལ། མི་དེ་གང་དུ་ཡོད་དམ། ཅིའི་ཕྱིར་ཁོ་རང་བསྐྱུར་བ་ཡིན་ནམ། ཁྱོད་རྣམས་སོང་ནས་ཁོ་རང་ཟས་ལ་རོལ་བར་བོས་ཤིག་ཅེས་སྨྲས།
EXO 2:21 མོ་ཤེ་ནི་མི་དེ་དང་མཉམ་དུ་གནས་པར་དགའ་ཞིང་། མི་དེས་ཀྱང་རང་གི་བུ་མོ་ཚིབ་ཕའོ་རཱ་བྱ་བ་ཁོ་ལ་ཆུང་མར་གནང་བ་དང་།
EXO 2:22 ཚིབ་ཕའོ་རཱ་ལ་བུ་ཞིག་སྐྱེས་ཤིང་། མོ་ཤེ་ཡིས་བྱིས་པའི་མིང་ལ་གེར་ཤོམ་ཞེས་བཏགས་པ་སྟེ། ང་རང་ཡུལ་གཞན་དུ་བྱེས་པར་གྱུར་ཞེས་སྨྲས་པའི་ཕྱིར་རོ། །
EXO 2:23 དེ་ནས་བགྲང་བྱ་མང་པོ་འདས་པ་ན་ཨེ་ཅིབ་ཀྱི་རྒྱལ་པོ་སྐུ་གྲོངས་ཤིང་། ཡེས་ར་ཨེལ་པ་རྣམས་དཀའ་སྡུག་གིས་མནར་ཏེ་ཤུགས་རིང་འཐེན་ནས་ངུ་འབོད་བྱས་པ་དང་། ཁོ་རྣམས་ཀྱི་སྡུག་ཡུས་ཡར་དཀོན་མཆོག་གི་དྲུང་དུ་སླེབས།
EXO 2:24 དཀོན་མཆོག་གིས་ཁོ་རྣམས་ཀྱི་སྡུག་ཡུས་གསན་ཅིང་། ཨབ་ར་ཧམ་དང་། ཨི་སཱག ཡ་ཀོབ་བཅས་ལ་བཞག་པའི་ཞལ་ཆད་ཐུགས་སུ་དྲན།
EXO 2:25 དཀོན་མཆོག་གིས་ཡེས་ར་ཨེལ་པ་རྣམས་ལ་གཟིགས་སྐྱོང་མཛད་ཅིང་ཁོང་གིས་དེ་རྣམས་ཀྱི་དཀའ་སྡུག་ཀྱང་མཁྱེན་ཏོ། །
EXO 3:1 དེ་ཡང་མོ་ཤེ་ཡིས་མིད༌ཡཱན་ཡུལ་གྱི་མཆོད་དཔོན་ཏེ་རང་གི་སྒྱུག་པོ་ཡི་ཏྲོའི་ར་ལུག་གི་ཁྱུ་འཚོས་པ་དང་། ཉིན་ཞིག་ལ། ར་ལུག་གི་ཁྱུ་དེད་ནས་ཡུལ་དབེན་པའི་ཕ་རོལ་ཏུ་ཆས་ཤིང་། དཀོན་མཆོག་གི་རི་བོ་སྟེ་ཧོ་རེབ་ཅེས་པར་ཕྱིན།
EXO 3:2 དུས་དེར་དཀོན་མཆོག་ཡ་ཝཱེའི་ཕོ་ཉ་ཞིག་ཚེར་ཕུང་དཀྱིལ་གྱི་མེ་ལྕེའི་ཁྲོད་ནས་མོ་ཤེ་ལ་མངོན་པར་གྱུར་ཏོ། །མོ་ཤེ་ཡིས་བལྟས་པ་ན། ཚེར་ཕུང་མེ་ལ་འབར་བཞིན་ཡོད་ནའང་མེས་འཚིག་པར་མ་གྱུར་པ་མཐོང་བས།
EXO 3:3 མོ་ཤེའི་སེམས་ལ་ང་རང་ངོ་མཚཪ་ཆེན་པོ་དེ་ལ་བལྟ་རུ་འགྲོ་དགོས། ཚེར་ཕུང་འདི་མེ་ཡིས་མི་འཚིག་པའི་རྒྱུ་མཚན་ཅི་ཡིན་ནམ་སྙམ་མོ། །
EXO 3:4 དཀོན་མཆོག་ཡ་ཝཱེས་ཁོ་རང་ཚེར་ཕུང་ལ་བལྟ་རུ་འགྲོ་བ་གཟིགས་ཏེ། ཚེར་ཕུང་གི་དཀྱིལ་ནས་མོ་ཤེ་མོ་ཤེ་ཞེས་ཞལ་འབོད་གནང་བ་ལ། མོ་ཤེ་ཡིས་ང་རང་འདི་རུ་ཡོད་ཅེས་ཞུས།
EXO 3:5 དེ་ནས་ཁོང་གིས་འདི་སྐད་དུ། ཉེ་སར་མ་འོང་ཞིག ཁྱོད་རང་ལངས་ནས་འདུག་ས་འདི་ནི་གནས་དམ་པ་ཡིན་པས། ཁྱོད་ཀྱིས་བསིལ་ལྷམ་ཕུད་ཅིག་ཅེས་དང་།
EXO 3:6 ཡང་འདི་སྐད་དུ། བདག་ནི་ཁྱོད་ཀྱི་ཕ་ཡི་དཀོན་མཆོག་དང་། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་ཡིན་ཞེས་གསུངས་པ་ལ། མོ་ཤེ་ཡིས་དཀོན་མཆོག་ལ་བལྟ་བར་འཇིགས་པས་རང་གི་ངོ་གདོང་བཀབ།
EXO 3:7 དེ་ནས་དཀོན་མཆོག་ཡ་ཝཱེས་འདི་སྐད་དུ། བདག་གི་འབངས་མི་རྣམས་ཀྱིས་ཨེ་ཅིབ་ཡུལ་དུ་མྱངས་པའི་དཀའ་སྡུག་ནི་བདག་གིས་དངོས་སུ་མཐོང་ཞིང་། ཁོ་རྣམས་ཀྱིས་ལས་རྒྱབ་པའི་གཉའ་གནོན་དྲག་པོའི་རྐྱེན་གྱིས་སྡུག་ཡུས་བཏོན་པའང་བདག་གིས་ཐོས་ལ། བདག་གིས་སྔར་ནས་དེ་རྣམས་ཀྱི་སྡུག་བསྔལ་ཤེས་པ་ཡིན།
EXO 3:8 ད་ནི་བདག་མར་འོངས་ནས་ཁོ་རྣམས་ཨེ་ཅིབ་པ་རྣམས་ཀྱི་ལག་འོག་ནས་ཐར་བར་བྱེད་ཅིང་། ཡུལ་དེ་ནས་ཡར་ཁྲིད་དེ། མཛེས་ཤིང་ཡངས་ལ་འོ་མ་དང་སྦྲང་རྩི་བཞུར་བའི་ཡུལ་ཏེ། ཀ་ན་ཨན་པ་དང་། ཧེད་པ་དང་། ཨེ་མོར་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ཀྱི་གནས་སུ་བསླེབ་པར་བྱའོ། །
EXO 3:9 ལྟོས་དང་། ཡེས་ར་ཨེལ་པ་རྣམས་ཀྱི་སྡུག་ཡུས་བདག་གི་རྣ་བར་སླེབས་ཤིང་། ངས་ཨེ་ཅིབ་པ་རྣམས་ཀྱིས་ཁོ་རྣམས་ལ་ཇི་ལྟར་བརྙས་བཅོས་བྱས་པའང་མཐོང་བྱུང་བས།
EXO 3:10 ད་ནི་བདག་གིས་ཁྱོད་རང་ཕཱར་ཨོལ་གྱི་མདུན་དུ་མངགས་པར་བྱ་སྟེ། ཁྱོད་ནི་བདག་གི་འབངས་མི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་དུ་སོང་ཞིག་ཅེས་བཀའ་གནང་ངོ་། །
EXO 3:11 འོན་ཀྱང་མོ་ཤེ་ཡིས་དཀོན་མཆོག་ལ། ང་ནི་སུ་ཡིན་ནམ། ཕཱར་ཨོལ་དང་ངོ་འཕྲད་དུ་སོང་ནས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་འོང་ནུས་སམ་ཞེས་ཞུས་པ་ལ།
EXO 3:12 དཀོན་མཆོག་གིས་འདི་སྐད་དུ། ང་རང་ཁྱོད་དང་མཉམ་དུ་འགྲོགས་ངེས་ཤིང་། ཁྱོད་ཀྱིས་འབངས་མི་རྣམས་ཨེ་ཅིབ་ཡུལ་ནས་ཕྱིར་ཁྲིད་འོངས་པའི་རྗེས་སུ། ཁྱོད་རྣམས་ཀྱིས་རི་བོ་འདི་ནས་བདག་ལ་བསྙེན་བཀུར་བྱེད་ངེས་ལ། འདི་ནི་ངས་ཁྱོད་རང་མངགས་པའི་དཔང་རྟགས་ཡིན་ཞེས་བཀའ་གནང་བ་དང་།
EXO 3:13 ཡང་མོ་ཤེ་ཡིས་དཀོན་མཆོག་ལ། ང་རང་ཡེས་ར་ཨེལ་པ་རྣམས་ཀྱི་གམ་དུ་སོང་ནས་དེ་དག་ལ། ཁྱོད་ཅག་གི་ཕ་མེས་ཡང་མེས་ཀྱི་དཀོན་མཆོག་གིས་ང་རང་ཁྱོད་ཅག་གི་གམ་དུ་མངགས་པ་ཡིན་ཞེས་བརྗོད་པར་བྱ་ཞིང་། གལ་ཏེ་ཁོ་རྣམས་ཀྱིས་བདག་ལ་ཁོང་གི་མཚན་ལ་ཅི་ཟེར་ཞེས་དྲིས་ན། ངས་དེ་རྣམས་ལ་ཅི་ཟེར་རམ་ཞེས་ཞུས་པ་ན།
EXO 3:14 ཡང་དཀོན་མཆོག་གིས་མོ་ཤེ་ལ། བདག་ནི་གཏན་དུ་གནས་པ་དེ་ཉིད་ཡིན་ཞེས་གསུངས་པ་དང་། ཡང་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲ་བར་བྱ་སྟེ། གཏན་དུ་བཞུགས་པ་ཁོང་ཉིད་ཀྱིས་ང་རང་ཁྱོད་ཅག་གི་གམ་དུ་མངགས་པ་ཡིན་སྨྲོས་ཤིག་ཅེས་གསུངས་ཤིང་།
EXO 3:15 ཡང་དཀོན་མཆོག་གིས་མོ་ཤེ་ལ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། ཁྱོད་ཅག་གི་ཕ་མེས་ཡང་མེས་ཀྱི་དཀོན་མཆོག་ཡ་ཝཱེ་སྟེ། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་གིས་ང་རང་ཁྱོད་རྣམས་ཀྱི་གམ་དུ་མངགས་པ་ཡིན་ཞེས་པའོ། །ཡ་ཝཱེ་ནི་ཇི་སྲིད་བར་དུ་བདག་གི་མིང་ཡིན་ཞིང་། དུས་རབས་ཀུན་ཏུ་ང་རང་དྲན་པའི་རྟེན་ཡང་ཡིན།
EXO 3:16 ཁྱོད་རང་སོང་ནས་ཡེས་ར་ཨེལ་གྱི་རྒན་པོ་རྣམས་བསྡུས་ཏེ་ཁོ་རྣམས་ལ་འདི་ལྟར་སྨྲོས་དང་། ཁྱོད་ཅག་གི་ཕ་མེས་ཡང་མེས་ཀྱི་དཀོན་མཆོག་ཡ་ཝཱེ་སྟེ། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་བདག་ལ་མངོན་པར་མཛད་ཅིང་འདི་སྐད་དུ། བདག་གིས་དངོས་གནས་ཁྱོད་རྣམས་ལ་ལྟ་སྐྱོང་བྱས་པ་དང་། ཨེ་ཅིབ་ཡུལ་ནས་ཁྱོད་རྣམས་ལ་ཇི་ལྟར་བྱས་པའང་མཐོང་ཞིང་།
EXO 3:17 ཁྱོད་རྣམས་ཨེ་ཅིབ་ཡུལ་གྱི་དཀའ་སྡུག་ལས་ཡར་ཁྲིད་དེ། ཀ་ན་ཨན་པ་དང་། ཧེད་པ་དང་། ཨེ་མོར་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ཀྱི་ཡུལ་ཏེ། འོ་མ་དང་སྦྲང་རྩི་བཞུར་བའི་ཡུལ་དུ་འཁྲིད་པར་བྱ་ཞེས་བདག་གིས་སྨྲས་པ་ཡིན་ཞེས་སྨྲ་བར་གྱིས་དང་།
EXO 3:18 དེ་རྣམས་ཀྱིས་ཁྱོད་ཀྱི་བཀའ་ལ་མཉན་ངེས་ཤིང་། ཁྱོད་དང་ཡེས་ར་ཨེལ་གྱི་རྒན་པོ་རྣམས་ཨེ་ཅིབ་ཀྱི་རྒྱལ་པོའི་མདུན་དུ་སོང་སྟེ་ཁོ་ལ་འདི་ལྟར། ཨིབ་རི་པའི་དཀོན་མཆོག་ཡ་ཝཱེ་ངེད་རྣམས་ལ་ཕྲད་པ་དང་། ད་ནི་ངེད་ཅག་གི་དཀོན་མཆོག་ཡ་ཝཱེ་ལ་མཆོད་པ་འབུལ་བའི་ཕྱིར། ཞག་གསུམ་གྱི་ལམ་ལ་དབེན་སྟོང་དུ་འགྲོ་བར་གནོངས་ཞེས་སྨྲོས་ཤིག
EXO 3:19 འོན་ཀྱང་ཨེ་ཅིབ་རྒྱལ་པོ་ལ་མཐུ་ལྡན་ཕྱག་གིས་བསྐུལ་ཡང་ཁྱོད་རྣམས་འགྲོ་རུ་མི་འཇུག་པ་བདག་གིས་ཤེས་པ་ཡིན།
EXO 3:20 དེའི་ཕྱིར། ངས་ལག་པ་བརྐྱངས་ནས་ཨེ་ཅིབ་པའི་ཁྲོད་དུ་བདག་གི་ངོ་མཚར་བའི་དོན་རྣམས་མཛད་དེ་ཡུལ་དེར་རྒོལ་བར་བྱེད་ཅིང་། དེའི་རྗེས་སུ་ཁོས་ད་གཟོད་ཁྱོད་རྣམས་འགྲོ་རུ་འཇུག་པ་ཡིན།
EXO 3:21 ཁྱོད་རྣམས་ཡུལ་དེ་ནས་འགྲོ་བའི་དུས་སུ་ལག་ཟུང་སྟོང་བར་མི་འགྲོ་བའི་ཕྱིར་དུ། བདག་གིས་ཨེ་ཅིབ་པ་རྣམས་ཀྱི་མདུན་དུ་མི་འདི་རྣམས་ལ་ཐུགས་རྗེ་འཐོབ་པར་བྱ་སྟེ།
EXO 3:22 བུད་མེད་སོ་སོས་རང་གི་ཁྱིམ་མཚེས་དང་། ཁོ་མོའི་ཁྱིམ་དུ་སྡོད་པའི་བུད་མེད་ལས་གསེར་ཆས་དང་དངུལ་ཆས། གྱོན་གོས་དག་སློང་ངེས་ཏེ། རང་གི་བུ་དང་བུ་མོ་རྣམས་ལ་བསྐོན་པའི་ཕྱིར་ཡིན་ལ། དེས་ན་ཁྱོད་ཅག་གིས་ཨེ་ཅིབ་པའི་ནོར་རྫས་ཕྲོགས་པ་ཡིན་ཞེས་གསུངས་སོ། །
EXO 4:1 དེ་ཡང་མོ་ཤེ་ཡིས་འདི་ལྟར་ལན་ཞུས་པ་སྟེ། ཡེས་ར་ཨེལ་པ་རྣམས་ཀྱིས་བདག་ལ་ཡིད་མི་ཆེས་ཤིང་ངའི་གཏམ་ལའང་མཉན་མི་སྲིད་ལ། དཀོན་མཆོག་ཡ་ཝཱེ་ནི་ཁྱོད་ལ་མངོན་པར་མ་མཛད་ཅེས་སྨྲ་ངེས་ཡིན་ཞེས་པ་དང་།
EXO 4:2 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱི་ལག་ཏུ་ཡོད་པ་དེ་ཅི་ཞེས་བཀའ་འདྲི་གནང་བ་ལ། ཁོས་འཁར་བ་ཡིན་ཞེས་ཞུས།
EXO 4:3 ཡང་དཀོན་མཆོག་ཡ་ཝཱེས་འཁར་བ་ས་ལ་ཕོངས་ཤིག་ཅེས་བཀའ་བསྩལ་པ་དང་། མོ་ཤེ་ཡིས་དེ་ས་ལ་འཕངས་པ་ན་སྦྲུལ་ཞིག་ཏུ་གྱུར་པས་ཁོ་བྲོས་པ་རེད།
EXO 4:4 དེ་ནས་དཀོན་མཆོག་ཡ་ཝཱེས་མོ་ཤེ་ལ། ལག་པ་བརྐྱངས་ཏེ་སྦྲུལ་གྱི་མཇུག་མ་ཟུངས་དང། དེ་ནི་ཁྱོད་ཀྱི་ལག་ཏུ་སྔར་བཞིན་འཁར་བ་རུ་འགྱུར་ངེས་ཡིན་ཞེས་གསུངས་ཤིང་། མོ་ཤེ་ཡིས་ལག་པ་བརྐྱངས་ནས་སྦྲུལ་དེ་བཟུང་བ་ལ་དེ་ཁོའི་ལག་ཏུ་ཕྱིར་འཁར་བ་རུ་གྱུར་ཏོ། །
EXO 4:5 ཡང་དཀོན་མཆོག་ཡ་ཝཱེས་འདི་སྐད་དུ། དེའི་རྒྱུ་མཚན་ནི་ཁོ་རྣམས་ཀྱི་ཕ་མེས་ཡང་མེས་ཀྱི་དཀོན་མཆོག་ཡ་ཝཱེ་སྟེ། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་ནི་ཁྱོད་ལ་མངོན་པར་གྱུར་པ་ལ་ཁོ་རྣམས་ཡིད་ཆེས་སུ་འཇུག་པའི་ཕྱིར་ཡིན་ཞེས་གསུངས་སོ། །
EXO 4:6 ཡང་དཀོན་མཆོག་ཡ་ཝཱེས་ཁོ་ལ། ལག་པ་རུམ་དུ་ཆུག་ཅེས་གསུངས་པ་དང་། ཁོས་ཀྱང་ལག་པ་རུམ་དུ་བཅུག་ནས་ཕྱིར་ཕྱུང་བ་ན། བསམ་ཡིད་ལས་འདས་པ་ཞིག་ལ། ལག་པར་མཛེ་ནད་བྱུང་སྟེ་ཁ་བའི་མདོག་ལྟར་དཀར་པོར་གྱུར་པའོ། །
EXO 4:7 ཡང་དཀོན་མཆོག་ཡ་ཝཱེས་འདི་སྐད་དུ། ཡང་ཁྱོད་ཀྱི་ལག་པ་རུམ་དུ་ཆུག་ཅེས་གསུངས་པ་དང་། ཁོས་ཀྱང་ལག་པ་རུམ་དུ་བཅུག་ནས་ཕྱིར་ཕྱུང་བ་ན། བསམ་ཡིད་ལས་འདས་པ་ཞིག་ལ། ལག་པ་སྔར་བཞིན་གྱུར་ཅིང་ལུས་སྟེང་གི་ཤ་དང་གཅིག་འདྲ་བྱུང་ངོ་། །
EXO 4:8 ཡང་དཀོན་མཆོག་གིས་འདི་སྐད་དུ། གལ་སྲིད་དེ་རྣམས་ཀྱིས་ཁྱོད་ཀྱི་བཀའ་ལ་མི་མཉན་པ་དང་། གྲུབ་རྟགས་དང་པོར་ཡིད་མ་ཆེས་ན། ཁོ་རྣམས་གྲུབ་རྟགས་གཉིས་པར་ཡིད་ཆེས་ངེས་ཡིན།
EXO 4:9 འོན་ཀྱང་དེ་རྣམས་གྲུབ་རྟགས་འདི་གཉིས་པོར་ཡིད་མི་ཆེས་ཤིང་ཁྱོད་ཀྱི་བཀའ་ལའང་མི་མཉན་ན། ཁྱོད་ཀྱིས་ནཱ་ཡོལ་གཙང་པོ་ནས་ཆུ་ཉུང་ཙམ་བླངས་ཏེ་སྐམ་ས་རུ་གཏོར་ཅིག ཁྱོད་ཀྱིས་གཙང་པོ་ནས་བླངས་པའི་ཆུ་ནི་སྐམ་ས་རུ་ཁྲག་ཏུ་འགྱུར་ངེས་ཡིན་ཞེས་གསུངས།
EXO 4:10 ཡང་མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར། ཀྱེ་གཙོ་བོ་ལགས། ང་ནི་མ་གཞི་ནས་སྨྲ་བརྗོད་ལ་མཁས་པ་ཞིག་མིན་ཏེ། ཁྱེད་ཀྱིས་རང་གི་ཞབས་ཕྱི་བདག་ལ་བཀའ་གནང་བའི་རྗེས་སུའང་འདི་ལྟར་ཡིན་ལ། ང་ནི་མ་གཞི་ནས་སྨྲ་ལྕེ་རྟུལ་པོ་ཞིག་ཡིན་ཞེས་སྨྲས།
EXO 4:11 ཡང་དཀོན་མཆོག་ཡ་ཝཱེས་ཁོ་ལ་འདི་སྐད་དུ། མི་རྣམས་ཀྱི་ཁ་ནི་སུས་བཟོས་པ་ཡིན་ནམ། ཡང་སུ་ཞིག་གིས་མི་རྣམས་ལྐུགས་པའམ་ཡང་ན་འོན་པ། མིག་གསལ་བའམ་ཡང་ན་ལོང་པ་སོགས་སུ་བྱས་སམ། དེ་ནི་ཡ་ཝཱེ་ང་རང་མ་ཡིན་ནམ།
EXO 4:12 ད་ལྟ་སོང་དང་། བདག་གིས་ཁྱོད་ལ་སྨྲ་ལྕེ་སྦྱིན་ཞིང་ཁྱོད་ཀྱིས་ཅི་ཞིག་སྨྲ་འོས་པ་དེ་སྟོན་ངེས་ཡིན་ཞེས་གསུངས་པ་ལ།
EXO 4:13 མོ་ཤེ་ན་རེ། གཙོ་བོ་ལགས། ཁྱེད་ཀྱིས་སུ་ཞིག་མངག་འདོད་ན་དེ་ཉིད་མངག་པར་བྱའོ་ཞེས་ཞུས་སོ། །
EXO 4:14 དེ་ནས་དཀོན་མཆོག་ཡ་ཝཱེ་ཁོང་ཉིད་མོ་ཤེ་ལ་ཐུགས་ཁྲོས་ཏེ་འདི་སྐད་དུ། ལེ་ཝི་པ་ཨ་རོན་ཁྱོད་ཀྱི་གཅེན་པོ་མ་ཡིན་ནམ། ཁོ་ནི་སྨྲ་བརྗོད་ལ་མཁས་པ་ཞིག་ཡིན་པ་ངས་ཤེས་ཤིང་། ད་ལྟ་ཁོ་རང་ཁྱོད་བསུ་བར་ཡོང་བཞིན་ཡོད་དེ། ཁོས་ཁྱོད་རང་མཐོང་བ་དང་སྙིང་ནས་དགའ་བར་འགྱུར།
EXO 4:15 ཁྱོད་ཀྱིས་གཏམ་དེ་ཨ་རོན་ལ་སྨྲ་དགོས་ཤིང་། བདག་གིས་ཀྱང་ཁྱོད་གཉིས་ལ་སྨྲ་ལྕེ་སྦྱིན་ཏེ། ལས་ཅི་བྱེད་དགོས་པའང་སྟོན་པར་བྱ།
EXO 4:16 ཁོས་ཁྱོད་ཀྱི་ཚབ་ཏུ་འབངས་མི་རྣམས་ལ་གཏམ་སྨྲ་དགོས་ཤིང་། ཁྱོད་ཀྱིས་ཁོ་ནི་རང་གི་ཁ་བཞིན་དུ་བྱེད་པ་དང་། ཁོས་ཁྱོད་ནི་དཀོན་མཆོག་ལྟ་བུར་བྱེད་དགོས།
EXO 4:17 གྲུབ་རྟགས་སྟོན་པའི་ཕྱིར་ཁྱོད་ཀྱིས་འཁར་བ་འདི་ལག་ཏུ་ཟུངས་ཤིག་ཅེས་གསུངས་སོ། །
EXO 4:18 དེ་ནས་མོ་ཤེ་རང་གི་སྒྱུག་པོ་ཡི་ཏྲོའི་དྲུང་དུ་ཕྱིར་ལོག་སྟེ་ཁོ་ལ། ཨེ་ཅིབ་ཡུལ་དུ་ཡོད་པའི་སྤུན་རྣམས་གསོན་མིན་ལ་བལྟ་བའི་ཕྱིར། ང་རང་དེ་དག་གི་གམ་དུ་འགྲོ་རུ་འཇུག་པར་མཛོད་ཅེས་སྨྲས་པ་ལ། ཡི་ཏྲོས་མོ་ཤེ་ལ། ཁྱོད་རང་བདེ་བར་སོང་ཞིག་ཅེས་སྨྲས།
EXO 4:19 དཀོན་མཆོག་ཡ་ཝཱེས་མིད༌ཡཱན་ཡུལ་དུ་མོ་ཤེ་ལ་འདི་སྐད་དུ། ད་ཨེ་ཅིབ་ཡུལ་དུ་ཕྱིར་ལོག་ཅིག་དང་། ཁྱོད་རང་གསོད་འདོད་པའི་མི་ཐམས་ཅད་ཤི་ཟིན་པས་ཁྱོད་ཨེ་ཅིབ་ཡུལ་དུ་ཕྱིར་ལོག་དང་ཞེས་གསུངས་པ་ལ།
EXO 4:20 མོ་ཤེ་ཡིས་རང་གི་ཆུང་མ་དང་བུ་གཉིས་ཁྲིད་ཅིང་། ཁོ་རྣམས་བོང་བུར་བསྐྱོན་ནས་ཨེ་ཅིབ་ཡུལ་དུ་ཕྱིར་ལོག་པ་དང་། ཁོའི་ལག་ཏུ་དཀོན་མཆོག་གི་འཁར་བ་ཐོགས་སོ། །
EXO 4:21 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་ཨེ་ཅིབ་ཡུལ་དུ་ཕྱིར་ལོག་རྗེས། ངས་ཁྱོད་ལ་བསྟན་པའི་དོན་ངོ་མཚར་ཅན་ཐམས་ཅད་ཕཱར་ཨོལ་གྱི་མདུན་དུ་སྟོན་པར་གཟབ་གཟབ་གྱིས། འོན་ཀྱང་བདག་གིས་ཕཱར་ཨོལ་གྱི་སེམས་གྱོང་པོར་བྱས་པས་ཁོས་འབངས་མི་རྣམས་འགྲོ་རུ་འཇུག་མི་སྲིད།
EXO 4:22 དེ་ནས་ཁྱོད་ཀྱིས་ཕཱར་ཨོལ་ལ། དཀོན་མཆོག་ཡ་ཝཱེས་ཡེས་ར་ཨེལ་ནི་བདག་གི་སྲས་ཐོག་མ་ཡིན་ལ།
EXO 4:23 བདག་ལ་བསྙེན་བཀུར་བྱེད་པའི་ཆེད་དུ་བདག་གི་སྲས་འགྲོ་རུ་ཆུག་ཅེས་ངས་ཁྱོད་ལ་སྨྲས་མྱོང་ནའང་། ཁྱོད་ཀྱིས་ཁོ་རང་འགྲོ་རུ་མ་བཅུག་པས། ལྟོས་དང་། ངས་ཁྱོད་ཀྱི་བུ་ཐོག་མ་གསོད་པར་བྱ་གསུངས་ཞེས་སྨྲོས་ཤིག་ཅེས་གསུངས།
EXO 4:24 དེ་ནས་ལམ་ལ་ཞག་སྡོད་བྱེད་པའི་གནས་ཤིག་ཏུ་དཀོན་མཆོག་ཡ་ཝཱེས་མོ་ཤེ་དང་ཕྲད་དེ་ཁོ་རང་གསོད་རྩིས་བྱས་པ་ལ།
EXO 4:25 ཚིབ་ཕའོ་རཱས་མེ་ཆ་ཞིག་བླངས་ནས་རང་གི་བུའི་མཚན་སྐྱི་བཅད་དེ་མོ་ཤེའི་རྐང་པའི་མདུན་དུ་འཕངས་ཏེ་ན་རེ། ཁྱོད་ནི་དངོས་གནས་ངའི་ཁྲག་གི་མག་པ་ཡིན་འདུག་ཅེས་སྨྲས།
EXO 4:26 དེ་ནས་དཀོན་མཆོག་ཡ་ཝཱེས་ད་གཟོད་ཁོ་རང་སྲོག་ཐར་བཏང་ཞིང་། ཚིབ་ཕའོ་རཱས་ཁྱོད་ནི་མཚན་སྐྱི་བཅད་པའི་ཕྱིར་ཁྲག་གི་མག་པ་ཡིན་ཞེས་སྨྲས་སོ། །
EXO 4:27 ཡང་དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ། ཁྱོད་རང་དབེན་སྟོང་དུ་མོ་ཤེ་བསུ་བར་སོང་ཞིག་ཅེས་བཀའ་གནང་བ་དང་། ཨ་རོན་སོང་ནས་དཀོན་མཆོག་གི་རི་བོ་ནས་མོ་ཤེ་དང་ཕྲད་དེ་འགྲམ་པར་འོ་བྱས།
EXO 4:28 དེ་ནས་མོ་ཤེ་ཡིས་དཀོན་མཆོག་ཡ་ཝཱེས་ཁོ་རང་མངགས་ཤིང་རང་ལ་བཀའ་ཅི་གནང་བ་ཐམས་ཅད་དང་། གྲུབ་རྟགས་གང་དག་སྟོན་དགོས་པ་ཐམས་ཅད་ཨ་རོན་ལ་སྨྲས།
EXO 4:29 དེར་མོ་ཤེ་དང་ཨ་རོན་གཉིས་སོང་ནས་ཡེས་ར་ཨེལ་གྱི་རྒན་པོ་ཐམས་ཅད་བསྡུས་ནས།
EXO 4:30 དཀོན་མཆོག་ཡ་ཝཱེས་མོ་ཤེ་ལ་གསུངས་པའི་བཀའ་ཐམས་ཅད་ཨ་རོན་གྱིས་ཐེངས་གཅིག་ལ་སྨྲས་པ་དང་། ཡང་མི་རྣམས་ཀྱི་མིག་འདུན་དུ་གྲུབ་རྟགས་བསྟན་པས།
EXO 4:31 འབངས་མི་རྣམས་ཡིད་ཆེས་ཏེ་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་ཐུགས་བརྩེ་དགོངས་ཤིང་། ཁོ་རྣམས་ཀྱི་སྡུག་བསྔལ་ཡང་གཟིགས་པས། ཁོ་རྣམས་ཀྱིས་མགོ་བོ་བཏུད་ནས་ཕྱག་བཙལ་ཏོ། །
EXO 5:1 དེའི་རྗེས་སུ་མོ་ཤེ་དང་ཨ་རོན་གཉིས་ཕཱར་ཨོལ་གྱི་གམ་དུ་སོང་ནས་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བདག་གི་འབངས་མིས་དབེན་སྟོང་ནས་བདག་ལ་དུས་ཆེན་བསྲུང་བའི་ཕྱིར་དེ་རྣམས་འགྲོ་རུ་ཆུག་ཅེས་གསུངས་བྱུང་སྨྲས་པ་ལ།
EXO 5:2 ཕཱར་ཨོལ་ན་རེ། དཀོན་མཆོག་ཡ༌ཝཱེ་ནི་སུ་ཡིན་ནམ། ངས་ཅིའི་ཕྱིར་ཁོའི་བཀའ་ལ་མཉན་ནས་ཡེས་ར་ཨེལ་པ་རྣམས་འགྲོ་རུ་འཇུག་དགོས་སམ། ངས་ཡ་ཝཱེ་མི་ཤེས་ལ། ཡེས་ར་ཨེལ་པ་རྣམས་ཀྱང་མི་གཏོང་ཞེས་སྨྲས།
EXO 5:3 དེ་ནས་ཁོ་གཉིས་ན་རེ། ཨིབ་རི་པའི་དཀོན་མཆོག་ནི་ངེད་ཅག་ལ་ཕྲད་མྱོང་བ་ཡིན། ཁོང་གིས་རིམས་ནད་དམ་རལ་གྲི་ཡིས་རང་ཅག་མི་འགེམ་པའི་ཕྱིར། ངེད་ཀྱི་དཀོན་མཆོག་ཡ་ཝཱེ་ལ་མཆོད་པ་འབུལ་བར་ཞག་མ་གསུམ་གྱི་ལམ་ལ་དབེན་སྟོང་དུ་འགྲོ་རུ་འཇུག་པར་མཛོད་ཅེས་སྨྲས་པ་ལ།
EXO 5:4 ཨེ་ཅིབ་ཀྱི་རྒྱལ་པོས་འདི་ལྟར། མོ་ཤེ་དང་ཨ་རོན་ཁྱོད་གཉིས་ཀྱིས་ཅིའི་ཕྱིར་མི་དེ་རྣམས་ལ་ལས་བྱོལ་བྱེད་དུ་འཇུག་གམ། ཁྱོད་རྣམས་རང་གི་ལས་ཀ་བྱེད་དུ་སོང་ཞིག་ཅེས་སྨྲས་ཤིང་།
EXO 5:5 ཡང་འདི་ལྟར། ད་ལྟ་ཡུལ་འདིའི་མི་རྣམས་ཀྱི་གྲངས་ཀ་ནི་ཤིན་ཏུ་མང་ནའང་། ཁྱོད་གཉིས་ཀྱིས་དེ་རྣམས་ལ་ལས་ཀ་མི་བྱེད་པར་སྡོད་དུ་འཇུག་གམ་ཞེས་སྨྲས།
EXO 5:6 ཉིན་དེར། ཕཱར་ཨོལ་གྱིས་མི་རྣམས་ཀྱི་ལས་རྒྱབ་པ་དང་ལས་དཔོན་རྣམས་ལ་འདི་ལྟར།
EXO 5:7 ཁྱོད་ཅག་གིས་མི་རྣམས་ལ་སྔར་བཞིན་སོ་ཕག་བཟོ་བར་རྩྭ་མ་སྟེར་ཅིག ཁོ་རྣམས་རང་ཉིད་རྩྭ་འཐུ་རུ་འགྲོ་དགོས།
EXO 5:8 འོན་ཀྱང་མི་རྣམས་ཀྱིས་སྔར་ནས་སོ་ཕག་ཇི་ཙམ་བཟོས་པ་དེ་ཙམ་ཁྱོད་ཅག་གིས་ཁོ་རྣམས་ལ་བཀལ་ནས། ཏོག་ཙམ་ཡང་ཇེ་ཉུང་དུ་མ་གཏོང་ཞིག ཅིའི་ཕྱིར་ཞེ་ན། དེ་དག་ནི་སྒྱིད་ལུག་ཡིན་པས། ངེད་རྣམས་རང་གི་དཀོན་མཆོག་ལ་མཆོད་པ་འབུལ་དུ་འགྲོ་བར་མཛོད་ཅེས་སྐད་ཅོར་རྒྱག་པའི་ཕྱིར་རོ། །
EXO 5:9 ཁྱོད་ཅག་གིས་མི་འདི་དག་གི་ལས་ཚགས་ཇེ་ལྗིད་དུ་བཏང་ནས། ཁོ་རྣམས་ལ་དཀའ་ལས་མྱང་དུ་བཅུག་སྟེ་རྫུན་གཏམ་ལ་མི་མཉན་པར་བྱེད་དགོས་ཞེས་བཀའ་བསྩལ་ཏོ། །
EXO 5:10 དེ་ནས་མི་རྣམས་ཀྱི་ལས་རྒྱབ་པ་དང་ལས་དཔོན་རྣམས་སོང་ནས་མི་རྣམས་ལ་འདི་ལྟར། ཕཱར་ཨོལ་གྱིས་འདི་སྐད་དུ། ངས་ཁྱོད་ཅག་ལ་རྩྭ་ནི་མི་སྟེར།
EXO 5:11 ཁྱོད་རྣམས་རང་རང་གིས་གང་དུ་རྩྭ་རྙེད་ཐུབ་ན་དེ་རུ་བཙལ་དུ་སོང་། འོན་ཀྱང་ཁྱོད་ཅག་གི་ལས་ཀ་ཏོག་ཙམ་ཡང་ཉུང་དུ་གཏོང་མི་རུང་གསུངས་ཞེས་སྨྲས།
EXO 5:12 དེ་ནས་མི་དེ་རྣམས་ཨེ་ཅིབ་ཡུལ་ཀུན་ཏུ་ཐོར་ནས་སོག་མ་བཏུས་ཏེ་རྩྭ་རུ་བྱས་པ་ལ།
EXO 5:13 ལས་རྒྱབ་པ་རྣམས་ཀྱིས་ཚ་འདེད་བྱས་ཏེ་ན་རེ། ཁྱོད་རྣམས་ཀྱིས་ཉིན་རེ་བཞིན་ལས་ཀ་བསྒྲུབས་ཚར་དགོས་ལ། དེ་སྔར་རྩྭ་ཡོད་པའི་དུས་བཞིན་བསྒྲུབ་དགོས་ཞེས་སྨྲས་ཤིང་།
EXO 5:14 ཡང་ཕཱར་ཨོལ་མངའ་འོག་གི་ལས་རྒྱབ་པ་རྣམས་ཀྱིས་སྔར་ཡེས་ར་ཨེལ་པ་རྣམས་ལ་ལས་རྒྱབ་པར་བསྐོས་པའི་ལས་དཔོན་རྣམས་ལ་རྡུང་རྡེག་བྱས་ཏེ་ན་རེ། ཁྱོད་ཅག་གིས་ཁ་སང་དེ་རིང་སྔོན་ཆད་ཀྱི་གྲངས་ཀ་ལྟར་སོ་ཕག་མ་བཟོས་པ་དང་རང་གི་ལས་ཀ་བསྒྲུབས་མ་ཚར་བ་ཅི་ཞེས་སྨྲས་སོ། །
EXO 5:15 དེ་ནས་ཡེས་ར་ཨེལ་པའི་ལས་འཛིན་པ་རྣམས་ཕཱར་ཨོལ་གྱི་དྲུང་དུ་འོངས་ཏེ་སྐད་ཆེན་པོས། ཁྱེད་ཀྱིས་རང་གི་བྲན་གཡོག་རྣམས་ལ་འདི་ལྟར་བྱེད་དོན་ཅི།
EXO 5:16 ཁྱེད་ཀྱི་བྲན་གཡོག་རྣམས་ལ་རྩྭ་མ་བྱིན་ཡང་ལས་རྒྱབ་པས་ངེད་ཅག་ལ་སོ་ཕག་བཟོས་ཤིག་ཅེས་ཡང་ཡང་བསྐུལ་ཞིང་། ལྟོས་དང་། ཁྱེད་ཀྱི་བྲན་གཡོག་རྣམས་ལ་རྡུང་རྡེག་ཀྱང་ཐེབས། དོན་དམ་དུ་དེ་ནི་ཁྱེད་ཀྱི་འབངས་མི་རྣམས་ཀྱི་ཉེས་སྐྱོན་ཡིན་ཞེས་ཞུས་ཀྱང་།
EXO 5:17 ཕཱར་ཨོལ་ན་རེ། ཁྱོད་ཅག་ནི་དངོས་གནས་ལེ་ལོ་ཅན་ཡིན་འདུག དེ་བས་ཁྱོད་རྣམས་ཀྱིས་ངེད་ཅག་དཀོན་མཆོག་ཡ་ཝཱེ་ལ་མཆོད་པ་འབུལ་དུ་འགྲོ་བར་མཛོད་ཅེས་ཟེར་རོ། །
EXO 5:18 ད་ནི་ཁྱོད་རྣམས་ལས་ཀ་བྱེད་དུ་སོང་ཞིག ཁྱོད་ཅག་ལ་རྩྭ་མི་སྟེར་ནའང་སོ་ཕག་ནི་གྲངས་ཀ་ལྟར་སྤྲོད་དགོས་ཞེས་སྨྲས་སོ། །
EXO 5:19 ཡེས་ར་ཨེལ་པའི་ལས་འཛིན་པ་རྣམས་ཀྱིས། ཁྱོད་ཅག་གིས་ཉིན་རེ་བཞིན་སོ་ཕག་བཟོ་བའི་ལས་ཀ་ནི་ཏོག་ཙམ་ཡང་ཉུང་དུ་གཏོང་མི་རུང་ཞེས་པའི་བཀའ་ཐོས་པས། དོན་ངན་ཞིག་དང་ཕྲད་པ་ཤེས་སོ། །
EXO 5:20 ཡང་ཁོ་རྣམས་ཕཱར་ཨོལ་གྱི་དྲུང་ནས་སོང་བ་ལ། མོ་ཤེ་དང་ཨ་རོན་གཉིས་ཀྱིས་ལངས་ནས་སྒུག་བསྡད་ཡོད་པ་དང་ཕྲད་པས།
EXO 5:21 ཁོ་གཉིས་ལ་འདི་ལྟར། ཁྱོད་གཉིས་ཀྱིས་ཕཱར་ཨོལ་དང་དེའི་འཁོར་གཡོག་གི་མདུན་དུ་ངེད་རྣམས་དྲི་ངན་པར་བྱས་ཤིང་། ངེད་ཅག་གསོད་པའི་ཕྱིར་དེ་དག་གི་ལག་ཏུ་རལ་གྲི་བཞག་པས། དཀོན་མཆོག་ཡ་ཝཱེས་ཁྱོད་གཉིས་ལ་དཔྱད་ཞིབ་གནང་ནས་ཤན་འབྱེད་པར་ཤོག་ཅེས་སྨྲས་སོ། །
EXO 5:22 དེ་ནས་མོ་ཤེ་ཕྱིར་དཀོན་མཆོག་ཡ་ཝཱེའི་དྲུང་དུ་ལོག་སྟེ་འདི་ལྟར། ཀྱེ་གཙོ་བོ་ལགས། ཁྱེད་ཀྱིས་ཅིའི་ཕྱིར་མི་འདི་རྣམས་དཀའ་སྡུག་ལ་སྦྱར་བ་ཡིན་ནམ། ཅིའི་ཕྱིར་ང་རང་མངགས་པ་ཡིན་ནམ།
EXO 5:23 ཡང་ང་རང་ཕཱར་ཨོལ་གྱི་གམ་དུ་སོང་སྟེ་ཁྱེད་ཀྱི་མཚན་ལ་བརྟེན་ནས་གཏམ་སྨྲས་པའི་དུས་ནས་བཟུང་། ཁོས་མི་འདི་རྣམས་དཀའ་སྡུག་ལ་སྦྱར་ཞིང་། ཁྱེད་ཀྱིས་ཁོ་རྣམས་སྐྱོབ་པར་གཏན་ནས་མ་མཛད་ཅེས་སྨྲས་སོ། །
EXO 6:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ངས་ཕཱར་ཨོལ་ལ་ཅི་བྱེད་པ་དེ་ཁྱོད་ཀྱིས་ད་ལྟ་མཐོང་བར་འགྱུར། བདག་གི་མཐུ་ལྡན་ལག་པའི་རྐྱེན་གྱིས་ཁོས་ཡེས་ར་ཨེལ་པ་རྣམས་འགྲོ་རུ་འཇུག་པར་མ་ཟད། དེ་རྣམས་ཁོའི་ཡུལ་གྱི་ཕྱི་རུ་སྐྲོད་པར་འགྱུར་ཞེས་གསུངས་ཤིང་།
EXO 6:2 དཀོན་མཆོག་གིས་ཡང་མོ་ཤེ་ལ་འདི་སྐད་དུ། བདག་ནི་ཡ་ཝཱེ་ཡིན་ལ།
EXO 6:3 བདག་ནི་ཀུན་དབང་དཀོན་མཆོག་ཡིན་པ་སྔར་ཨབ་ར་ཧམ་དང་ཨི་སཱག་དང་ཡ་ཀོབ་བཅས་ལ་མངོན་པར་བྱས་པ་ཡིན་མོད། འོན་ཀྱང་བདག་གི་མིང་ཡ་ཝཱེ་ཞེས་པ་དེ་ལས་ངས་རང་ཉིད་ཁོ་རྣམས་ལ་མངོན་པར་མ་བྱས།
EXO 6:4 བདག་གིས་ཁོ་རྣམས་བྱེས་སུ་སྡོད་སའི་ཀ་ན་ཨན་ཡུལ་དེ་ཁོ་རྣམས་ཀྱི་དབང་དུ་གཏོང་བར་བྱེད་པའི་ཁ་ཆད་ཀྱང་དེ་རྣམས་ལ་བཞག་པ་དང་།
EXO 6:5 དེ་མིན་ཨེ་ཅིབ་པས་ཡེས་ར་ཨེལ་པ་རྣམས་ཚེ་གཡོག་ཏུ་བཀོལ་བས། དེ་དག་གིས་བཏོན་པའི་སྡུག་ཡུས་བདག་གིས་ཐོས་ཤིང་། རང་གི་ཁ་ཆད་ཀྱང་དྲན་པ་ཡིན།
EXO 6:6 དེ་བས་ན་ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟརཤོད་དང་། བདག་ནི་ཡ་ཝཱེ་ཡིན་ཏེ། བདག་གིས་ཁྱོད་རྣམས་ཨེ་ཅིབ་པའི་གཉའ་གནོན་འོག་ནས་འདོན་པ་དང་། དེ་དག་གི་ཚེ་གཡོག་བྱེད་པ་ལས་སྒྲོལ་ཞིང་། ཕྱག་བརྐྱངས་ནས་དེ་རྣམས་ལ་ཉེས་ཆད་དྲག་པོ་གཅོད་པའི་སྒོ་ནས་ཁྱོད་ཅག་བླུ་བར་བྱ།
EXO 6:7 བདག་གིས་ཁྱོད་རྣམས་ང་ཡི་འབངས་མི་བྱེད་ཅིང་། བདག་ཀྱང་ཁྱོད་རྣམས་ཀྱི་དཀོན་མཆོག་བྱེད་རྒྱུ་ཡིན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་དང་། ཁྱོད་རྣམས་ཨེ་ཅིབ་པའི་གཉའ་གནོན་འོག་ནས་ཐར་དུ་འཇུག་མཁན་ཡིན་པ་ཁྱོད་རྣམས་ཀྱིས་ཤེས་པར་འགྱུར།
EXO 6:8 བདག་གིས་ཨབ་ར་ཧམ་དང་། ཨི་སཱག་དང་། ཡ་ཀོབ་བཅས་ལ་སྦྱིན་པར་མནའ་བསྐྱལ་ནས་ཁས་བླངས་པའི་ཡུལ་དེར་ཁྱོད་རྣམས་འཁྲིད་པ་དང་། ཡུལ་དེ་ཁྱོད་རྣམས་ལ་ཐོབ་སྐལ་དུ་སྦྱིན་པར་བྱ། བདག་ནི་ཡ་ཝཱེ་ཡིན་ཞེས་སྨྲ་དགོས་པར་གསུངས་སོ། །
EXO 6:9 མོ་ཤེ་ཡིས་བཀའ་དེ་ཡེས་ར་ཨེལ་པ་རྣམས་ལ་སྨྲས་ནའང་། ཁོ་རྣམས་གཉའ་གནོན་དྲག་པོས་གདུང་བས་མོ་ཤེ་ལ་མ་མཉན་ཏོ། །
EXO 6:10 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 6:11 ཁྱོད་སོང་ནས་ཨེ་ཅིབ་རྒྱལ་པོ་ཕཱར་ཨོལ་ལ། ཡེས་ར་ཨེལ་པ་རྣམས་ཁྱོད་ཀྱི་ཡུལ་ནས་འགྲོ་རུ་ཆུག་ཅེས་སྨྲོས་ཤིག་ཅེས་གསུངས་མོད།
EXO 6:12 འོན་ཀྱང་མོ་ཤེ་ཡིས་དཀོན་མཆོག་ཡ་ཝཱེའི་དྲུང་ནས་འདི་ལྟར། གཟིགས་པར་ཞུ། ཡེས་ར་ཨེལ་པ་རྣམས་ཀྱིས་ཀྱང་ང་ལ་མི་མཉན་ན། ཕཱར་ཨོལ་གྱིས་སྨྲ་ལྕེ་རྟུལ་པོ་བདག་ལྟ་བུ་ལ་ཅི་ལྟར་མཉན་སྲིད་དམ་ཞེས་ཞུས།
EXO 6:13 དེ་ནས་དཀོན་མཆོག་ཡ་ཝཱེས་མོ་ཤེ་དང་ཨ་རོན་ལ་གསུང་གླེང་གནང་བ་སྟེ། ཡེས་ར་ཨེལ་པ་རྣམས་དང་ཨེ་ཅིབ་རྒྱལ་པོ་ཕཱར་ཨོལ་གྱི་གམ་དུ་སོང་ནས། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་འཁྲིད་དགོས་པའི་བཀའ་གནང་བའོ། །
EXO 6:14 ཁོ་རྣམས་ཀྱི་ཁྱིམ་རྒྱུད་རེ་རེའི་ཁྱིམ་དཔོན་དག་གི་མིང་ནི་གཤམ་གསལ་ལྟར། ཡེས་ར་ཨེལ་གྱི་སྐྱེས་འགོ་རུ་བེན་གྱི་བུ་རྣམས་ནི་ཧ་ནོག་དང་ཕཱ༌ལུའུ། ཧེས་རོན། ཀར་མའེ་བཅས་ཡིན་ཞིང་། དེ་རྣམས་ནི་རུ་བེན་གྱི་རུས་རྒྱུད་ཡིན།
EXO 6:15 སི་མུ་ཨོན་གྱི་བུ་རྣམས་ནི་ཡཱ་མུ་ཨེལ་དང་ཡཱ༌མེན། ཨོ་ཧད། ཡཱ་ཀིན། ཚོ་ཧར། ཀ་ན་ཨན་བུད་མེད་ཀྱི་བུ་ཤཱ་ཨུལ་བཅས་ཡིན་ཞིང་། དེ་རྣམས་ནི་སི་མུ་ཨོན་གྱི་རུས་རྒྱུད་ཡིན།
EXO 6:16 ལེ་ཝི་ཡི་བུ་རྣམས་ཀྱི་མིང་རྣམས་རང་རང་གི་རིགས་རྒྱུད་བཞིན་བཀོད་པ་གཤམ་གསལ་ལྟར། གེར་ཤོན་དང་ཀོ་ཧད། མཱ་རཱ་རེའེ་བཅས་གསུམ་ཡིན་ཞིང་། ལེ་ཝི་ཡི་ཚེ་ཚད་ནི་ལོ་བརྒྱ་དང་སོ་བདུན་ཡིན།
EXO 6:17 གེར་ཤོན་གྱི་བུ་ནི་རང་རང་གི་རུས་རྒྱུད་བཞིན་དུ་ལིབ་ནིས་དང་ཤིམ་ཨི་གཉིས་ཡིན།
EXO 6:18 ཀོ་ཧད་ཀྱི་བུ་རྣམས་ནི་ཨམ་རམ་དང་ཡེས་ཧར། ཧེབ་རོན། ཨུ་ཟི་ཨེལ་བཅས་ཡིན་ཞིང་། ཀོ་ཧད་ཀྱི་ཚེ་ཚད་ནི་ལོ་བརྒྱ་དང་སོ་གསུམ་ཡིན།
EXO 6:19 མཱ་རཱ་རེའེ་ཡི་བུ་རྣམས་ནི་མཱ་ལི་དང་མུ་ཤི་གཉིས་ཡིན་ཞིང་། དེ་རྣམས་ནི་ལེ་ཝི་ཡི་རུས་རྒྱུད་དེ་རང་རང་གི་རིགས་རྒྱུད་བཞིན་དུ་ཡིན་ནོ། །
EXO 6:20 ཨམ་རམ་གྱིས་རང་གི་ཕ་ཡི་སྲིང་མོ་ཡོ་ཀེ་བེད་ཆུང་མར་བླངས་ཤིང་། དེས་ཁོ་རང་ལ་ཨ་རོན་དང་མོ་ཤེ་གཉིས་བཙས། ཨམ་རམ་གྱི་ཚེ་ཚད་ནི་ལོ་བརྒྱ་དང་སོ་བདུན་ཡིན།
EXO 6:21 ཡེས་ཧར་གྱི་བུ་རྣམས་ནི་ཀོ་རཱག་དང༌ནེ་ཕེག ཟིག་རི་བཅས་ཡིན།
EXO 6:22 ཨུ་ཟི་ཨེལ་གྱི་བུ་རྣམས་ནི་མེ་ཤཱ་ཨེལ་དང་ཨེལ་ཙ་ཕཱན། སིད་རེའེ་བཅས་ཡིན།
EXO 6:23 ཡང་ཨ་རོན་གྱིས་ཨ་མི་ནཱ་དབ་ཀྱི་བུ་མོ་དང་ནཱ་སོན་གྱི་ནུ་མོ་སྟེ་ཨེ་ལི་ཤེ་བཱ་ཆུང་མར་བླངས་ཤིང་། དེས་ཁོ་རང་ལ་བུ་ནཱ་དབ་དང་ཨ་བི་ཧུ། ཨེ་ལི་ཨ་ཟར། ཨི་ཐ་མཱར་བཅས་བཙས།
EXO 6:24 ཀོ་རཱག་གི་བུ་རྣམས་ནི་ཨ་སིར་དང་ཨེལ་ཁ་ནཱ། ཨ་བི་ཨ་སིབ་བཅས་ཡིན་ཞིང་། དེ་རྣམས་ནི་ཀོ་རཱག་པའི་རུས་རྒྱུད་ཡིན།
EXO 6:25 ཡང་ཨ་རོན་གྱི་བུ་ཨེ་ལི་ཨ་ཟར་གྱིས་ཕུ་ཏི་ཨེལ་གྱི་བུ་མོ་རྣམས་ལས་གཅིག་ཆུང་མར་བླངས་ཤིང་། དེས་ཁོ་ལ་ཕི་ནེ་ཧེ་བཙས། དེ་རྣམས་ནི་རུས་རྒྱུད་བཞིན་ལེ་ཝི་པའི་ཁྱིམ་རྒྱུད་རེ་རེའི་ཁྱིམ་དཔོན་ཡིན་ནོ། །
EXO 6:26 སྔར་ནས་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་དཔུང་ཚོགས་རེ་རེ་བཞིན་ཨེ་ཅིབ་ཡུལ་ནས་ཕྱིར་ཁྲིད་ཅིག་ཅེས་པའི་བཀའ་ནི་ཨ་རོན་དང་མོ་ཤེ་འདི་གཉིས་ལ་གནང་བ་ཡིན་ནོ། །
EXO 6:27 ཨེ་ཅིབ་རྒྱལ་པོ་ཕཱར་ཨོལ་ལ་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་པར་འགྱུར་བའི་གཏམ་སྨྲ་མཁན་ནི་མོ་ཤེ་དང་ཨ་རོན་འདི་གཉིས་ཡིན་ནོ། །
EXO 6:28 ཡང་དཀོན་མཆོག་ཡ་ཝཱེས་ཨེ་ཅིབ་ཡུལ་ནས་མོ་ཤེ་ལ་བཀའ་གནང་བའི་ཉིན་མོ་དེར།
EXO 6:29 ཁོང་གིས་འདི་སྐད་དུ། བདག་ནི་ཡ་ཝཱེ་ཡིན། ངས་ཁྱོད་ལ་ཅི་སྨྲ་བ་ཐམས་ཅད་ཁྱོད་ཀྱིས་ཨེ་ཅིབ་རྒྱལ་པོ་ཕཱར་ཨོལ་ལ་སྨྲ་བར་གྱིས་ཞེས་གསུངས་པ་ལ།
EXO 6:30 མོ་ཤེ་ཡིས་དཀོན་མཆོག་ཡ་ཝཱེའི་དྲུང་དུ་འདི་ལྟར། གཟིགས་པར་ཞུ། ང་རང་ནི་སྨྲ་ལྕེ་རྟུལ་པོ་ཡིན་པས། ཕཱར་ཨོལ་གྱིས་བདག་ལ་ཅི་ལྟར་མཉན་སྲིད་དམ་ཞེས་ཞུས་སོ། །
EXO 7:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ལྟོས་དང་། ངས་ཕཱར་ཨོལ་གྱི་མདུན་དུ་ཁྱོད་རང་དཀོན་མཆོག་ལྟ་བུར་བྱས་པ་དང་། ཡང་ཁྱོད་ཀྱི་སྤུན་ཨ་རོན་ནི་ཁྱོད་ཀྱི་ལུང་སྟོན་པ་ཡིན་པར་འགྱུར།
EXO 7:2 ངས་ཁྱོད་ལ་བཀའ་ཅི་གནང་བ་ཐམས་ཅད་ཁྱོད་ཀྱིས་སྨྲ་དགོས་པ་དང་། ཁྱོད་ཀྱི་སྤུན་ཨ་རོན་གྱིས་ཕཱར་ཨོལ་ལ། ཡེས་ར་ཨེལ་པ་རྣམས་ཁོའི་ཡུལ་ནས་འགྲོ་རུ་འཇུག་པའི་གཏམ་དེ་སྨྲ་དགོས།
EXO 7:3 ངས་ཕཱར་ཨོལ་གྱི་སེམས་གྱོང་པོར་བྱེད་པ་དང་། ཨེ་ཅིབ་ཡུལ་ནས་ང་ཡི་གྲུབ་རྟགས་དང་དོན་ངོ་མཚར་ཅན་མང་པོའང་སྟོན་པར་བྱ།
EXO 7:4 འོན་ཀྱང་ཕཱར་ཨོལ་གྱིས་ཁྱོད་ཅག་ལ་མི་མཉན་ཞིང་། བདག་གིས་ལག་པ་བརྐྱངས་ནས་ཨེ་ཅིབ་ཡུལ་ལ་ཉེས་ཆད་དྲག་པོ་གཅོད་ཅིང་། བདག་གི་མི་ཚོགས་སྟེ་ང་ཡི་འབངས་མི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་པར་བྱའོ། །
EXO 7:5 དེ་ནས་ངས་ལག་པ་བརྐྱངས་ནས་ཨེ་ཅིབ་ཡུལ་ལ་རྒོལ་ཞིང་། ཡེས་ར་ཨེལ་པ་རྣམས་དེ་དག་གི་ཁྲོད་ནས་ཕྱིར་འཁྲིད་པའི་དུས་སུ། ཨེ་ཅིབ་པ་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་པས།
EXO 7:6 མོ་ཤེ་དང་ཨ་རོན་གཉིས་ཀྱིས་དེ་ལྟར་བྱས་ཤིང་། དཀོན་མཆོག་ཡ་ཝཱེས་བཀའ་ཇི་ལྟར་བསྩལ་པ་བཞིན་དུ་བྱས་པ་དང་།
EXO 7:7 ཁོ་གཉིས་ཀྱིས་ཕཱར་ཨོལ་ལ་གཏམ་སྨྲ་བའི་དུས་སུ་མོ་ཤེ་ལོ་བརྒྱད་ཅུ་དང་། ཨ་རོན་ལོ་བརྒྱད་ཅུ་གྱ་གསུམ་ཡིན་ནོ། །
EXO 7:8 ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
EXO 7:9 ཕཱར་ཨོལ་གྱིས་ཁྱོད་ཅག་ལ་དོན་ངོ་མཚར་ཅན་ཞིག་སྟོན་པར་གྱིས་ཞེས་སྨྲ་བའི་ཚེ། ཁྱོད་ཀྱིས་ཨ་རོན་ལ། རང་གི་འཁར་བ་ཕཱར་ཨོལ་གྱི་མདུན་དུ་གཡུགས་ཤིག དེ་སྦྲུལ་དུ་འགྱུར་བ་ཡིན་སྨྲོས་ཤིག་ཅེས་གསུངས།
EXO 7:10 དེ་ནས་མོ་ཤེ་དང་ཨ་རོན་གཉིས་ཕཱར་ཨོལ་གྱི་མདུན་དུ་སོང་ནས། དཀོན་མཆོག་ཡ་ཝཱེས་བཀའ་ཇི་ལྟར་གནང་བ་བཞིན་དུ་བྱས་ཏེ། ཨ་རོན་གྱིས་ཕཱར་ཨོལ་འཁོར་དང་བཅས་པའི་མདུན་དུ་འཁར་བ་གཡུགས་པ་ལ་དེ་སྦྲུལ་དུ་གྱུར་པ་དང་།
EXO 7:11 ཕཱར་ཨོལ་གྱིས་མཁས་པ་དང་སྒྱུ་མ་མཁན་དག་བོས་འོངས་ཤིང་། དེ་རྣམས་ནི་ཨེ་ཅིབ་ཡུལ་གྱི་རྫུ་འཕྲུལ་སྟོན་མཁན་ཡིན་ལ། ཁོ་རྣམས་ཀྱིས་ཀྱང་རྫུ་འཕྲུལ་ལ་བརྟེན་ནས་དེ་བཞིན་བྱས་པ་སྟེ།
EXO 7:12 དེ་དག་གིས་རང་རང་གི་འཁར་བ་སར་འཕངས་པ་དང་དེ་སྦྲུལ་དུ་གྱུར་མོད། འོན་ཀྱང་ཨ་རོན་གྱི་འཁར་བས་དེ་དག་གི་འཁར་བ་རྣམས་ཁྱུར་མིད་བཏང་།
EXO 7:13 ཕཱར་ཨོལ་གྱི་སེམས་གྱོང་པོར་གྱུར་ཏེ། དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་མོ་ཤེ་དང་ཨ་རོན་གཉིས་ལ་མ་མཉན་ཏོ། །
EXO 7:14 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཕཱར་ཨོལ་གྱི་སེམས་ཨུ་ཚུགས་ཆེ་ཞིང་མི་རྣམས་འགྲོ་རུ་མི་འཇུག
EXO 7:15 སང་ཉིན་ཞོགས་པར་ཕཱར་ཨོལ་གྱི་མདུན་དུ་སོང་ཞིག ལྟོས་དང་། ཁོ་རང་ཕྱི་རུ་འོངས་ནས་ཆུ་ཁར་འགྲོ་བའི་དུས་སུ། ཁྱོད་རང་ནཱ་ཡོལ་གཙང་པོའི་འགྲམ་དུ་ལངས་བསྡད་ནས་ཁོ་བསུ་དགོས་ཤིང་། སྦྲུལ་དུ་གྱུར་མྱོང་བའི་འཁར་བ་དེ་ལག་ཏུ་ཟུངས་ཤིག
EXO 7:16 དེ་ནས་ཁོ་ལ་འདི་ལྟར་ཤོད་དང་། ཨིབ་རི་པའི་དཀོན་མཆོག་ཡ་ཝཱེས་ང་རང་ཁྱོད་ཀྱི་མདུན་དུ་མངགས་ནས་འདི་སྐད་དུ། བདག་ལ་བསྙེན་བཀུར་བྱེད་པའི་ཆེད་དུ་བདག་གི་འབངས་མི་དབེན་སྟོང་དུ་འགྲོ་རུ་ཆུག་ཅེས་གསུངས་ནའང་། ལྟོས་དང་། ཁྱོད་ཀྱིས་ད་ལྟའི་བར་དུ་མ་མཉན་ཏོ། །
EXO 7:17 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། བདག་གིས་རང་གི་ལག་ཏུ་ཡོད་པའི་འཁར་བས་ནཱ་ཡོལ་གཙང་པོའི་ཆུ་ལ་བརྡེག་ཅིང་ཆུ་ནི་ཁྲག་ཏུ་འགྱུར་བ་དང་། དེར་བརྟེན་ནས་ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་ངེས།
EXO 7:18 ནཱ་ཡོལ་གཙང་པོའི་ཉ་རྣམས་ཤི་ནས་གཙང་པོ་ལའང་དྲི་ངན་བྲོ་བར་འགྱུར་ལ། ཨེ་ཅིབ་པ་རྣམས་དེའི་ཆུ་འཐུང་བར་ཞེན་པ་ལོག་ཡོང་ཞེས་སྨྲ་དགོས་པར་བཀའ་གནང་ངོ་། །
EXO 7:19 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་ལ་འདི་ལྟར་ཤོད་དང་། ཁྱོད་ཀྱིས་རང་གི་འཁར་བ་ལོངས་ལ་ལག་པ་ཨེ་ཅིབ་ཡུལ་གྱི་ཆུ་རྣམས་ཏེ་གཙང་པོ་དང་། གྲོག་ཆུ་དང་། རྫིང་བུ་དང་། ཆུ་འགག་ཐམས་ཅད་བཅས་ཁྲག་ཏུ་འགྱུར་བའི་ཕྱིར་ཆུ་དེ་རྣམས་ཀྱི་ཕྱོགས་སུ་རྐྱོངས་ཤིག དེ་ནས་ཨེ་ཅིབ་ཡུལ་ཀུན་ཏུ་ཁྲག་ཡོད་པར་འགྱུར་ཞིང་། ཐ་ན་ཤིང་གི་ཡོ་བྱད་དང་། རྡོ་ཡི་ཡོ་བྱད་དུའང་ཁྲག་ཡོད་པར་འགྱུར་ངེས་ཞེས་བཤད་དགོས་པར་གསུངས་སོ། །
EXO 7:20 དེ་ནས་མོ་ཤེ་དང་ཨ་རོན་གཉིས་ཀྱིས་དཀོན་མཆོག་ཡ་ཝཱེའི་བཀའ་བཞིན་དུ་བསྒྲུབས་པ་སྟེ། ཨ་རོན་གྱིས་ཕཱར་ཨོལ་འཁོར་དང་བཅས་པའི་མདུན་དུ་འཁར་བ་ཡར་བཀྱགས་ནས་ནཱ་ཡོལ་གཙང་པོའི་ཆུ་ལ་བརྡེགས་པ་དང་། གཙང་པོའི་ཆུ་ཡོངས་རྫོགས་ཁྲག་ཏུ་གྱུར་ཅིང་།
EXO 7:21 ནཱ་ཡོལ་གཙང་པོའི་ཉ་རྣམས་ཤི་བ་དང་། གཙང་པོར་ཡང་དྲི་ངན་བྲོ་བས། ཨེ་ཅིབ་པས་གཙང་པོ་དེའི་ཆུ་འཐུང་མ་ཕོད་ལ། ཨེ་ཅིབ་ཡུལ་ཐམས་ཅད་ལ་ཁྲག་གིས་གང་བའོ། །
EXO 7:22 དེ་ནས་ཨེ་ཅིབ་ཡུལ་གྱི་སྒྱུ་མ་མཁན་རྣམས་ཀྱིས་ཀྱང་རྫུ་འཕྲུལ་ལ་བརྟེན་ནས་དེ་བཞིན་བྱས་པ་དང་། ཕཱར་ཨོལ་གྱི་སེམས་གྱོང་པོར་གྱུར་ཏེ། དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་མོ་ཤེ་དང་ཨ་རོན་གཉིས་ལ་མ་མཉན་པའི་ཁར།
EXO 7:23 ཁོ་རང་ཁ་ཕྱིར་འཁོར་ཏེ་ཕོ་བྲང་དུ་ལོག་ཅིང་། དོན་དེར་དོ་སྣང་ཙམ་ཡང་མ་བྱས་པ་དང་།
EXO 7:24 ཨེ་ཅིབ་པ་ཐམས་ཅད་ཀྱིས་གཙང་པོ་དེའི་ཆུ་འཐུང་མི་ཕོད་པས། འཐུང་ཆུ་འཐོབ་པའི་ཕྱིར་ནཱ་ཡོལ་གཙང་པོའི་འགྲམ་གཉིས་སུ་ས་བརྐོས་ཤིང་།
EXO 7:25 དཀོན་མཆོག་ཡ་ཝཱེས་ནཱ་ཡོལ་གཙང་པོར་བརྡེགས་ནས་ཉིན་བདུན་རྫོགས་སོ། །
EXO 8:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཕཱར་ཨོལ་གྱི་མདུན་དུ་སོང་ནས་དེ་ལ། དཀོན་མཆོག་ཡ་ཝཱེས་འདི་སྐད་དུ། བདག་ལ་བསྙེན་བཀུར་བྱེད་པའི་ཆེད་དུ་བདག་གི་མི་རྣམས་འགྲོ་རུ་ཆུག
EXO 8:2 གལ་ཏེ་ཁྱོད་ཀྱིས་དེ་རྣམས་འགྲོ་བར་མི་འཇུག་ན། ལྟོས་དང་། བདག་གིས་ཁྱོད་ཀྱི་རྒྱལ་ཁམས་ཐམས་ཅད་སྦལ་བར་བརྫི་རུ་འཇུག་རྒྱུ་ཡིན།
EXO 8:3 ནཱ་ཡོལ་གཙང་པོར་སྦལ་བས་གང་བ་དང་། དེ་དག་ཐོན་ནས་ཁྱོད་ཀྱི་ཕོ་བྲང་དང་། གཟིམ་ཁང་དང་། མལ་ཁྲིའི་སྟེང་དང་། ཁྱོད་ཀྱི་འཁོར་གཡོག་རྣམས་ཀྱི་ཁང་པ་དང་། ཁྱོད་ཀྱི་འབངས་མི་རྣམས་ཀྱི་ལུས་སྟེང་དང་། ཁྱོད་ཀྱི་གཡོས་ཐབ་དང་། ཕྱེ་བརྫི་སའི་གཞོང་པ་བཅས་ཀྱི་ནང་དུ་འོང་བར་འགྱུར་ལ།
EXO 8:4 ཡང་ཁྱོད་དང་ཁྱོད་ཀྱི་འབངས་མི་དང་ཁྱོད་ཀྱི་འཁོར་གཡོག་ཐམས་ཅད་ཀྱི་ལུས་སྟེང་དུ་འོང་བར་འགྱུར་ཞེས་སྨྲོས་ཤིག་ཅེས་གསུངས་སོ། །
EXO 8:5 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་ལ། ཁྱོད་ཀྱིས་ལག་གི་འཁར་བ་ནི་གཙང་པོ་དང་། གྲོག་ཆུ་དང་། རྫིང་བུ་རྣམས་ཀྱི་ཕྱོགས་སུ་རྐྱོངས་ལ། སྦལ་བ་རྣམས་ཨེ་ཅིབ་ཡུལ་ལ་ཡོང་དུ་ཆུག་སྨྲོས་ཤིག་ཅེས་གསུངས།
EXO 8:6 དེ་ནས་ཨ་རོན་གྱིས་ལག་པ་ཨེ་ཅིབ་ཡུལ་གྱི་ཆུ་རྣམས་ཀྱི་ཕྱོགས་སུ་བརྐྱངས་པ་ན་སྦལ་བ་ཐོན་ཏེ་ཨེ་ཅིབ་ཡུལ་ཁེབས་པ་དང་།
EXO 8:7 སྒྱུ་མ་མཁན་རྣམས་ཀྱིས་ཀྱང་རྫུ་འཕྲུལ་ལ་བརྟེན་ནས་དེ་བཞིན་བྱས་ཤིང་སྦལ་བ་རྣམས་ཨེ་ཅིབ་ཡུལ་ལ་ཡོང་དུ་བཅུག་གོ །
EXO 8:8 ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་ཏེ་ན་རེ། ཁྱོད་གཉིས་ཀྱིས་དཀོན་མཆོག་ཡ་ཝཱེས་སྦལ་བ་རྣམས་ང་རང་དང་ངའི་འབངས་མི་རྣམས་དང་འབྲལ་བར་མཛད་པའི་ཕྱིར་ཞུ་བ་བྱོས་དང་། བདག་གིས་མི་རྣམས་དཀོན་མཆོག་ཡ་ཝཱེ་ལ་མཆོད་པ་འབུལ་དུ་འགྲོ་རུ་འཇུག་ཅེས་སྨྲས་པ་ལ།
EXO 8:9 མོ་ཤེ་ཡིས་ཕཱར་ཨོལ་ལ་འདི་ལྟར། སྦལ་བ་རྣམས་ཁྱོད་དང་ཁྱོད་ཀྱི་ཁང་པ་རྣམས་དང་བྲལ་ནས་ནཱ་ཡོལ་གཙང་པོ་འབའ་ཞིག་གི་ནང་དུ་ལུས་པའི་ཕྱིར། ངས་ཁྱོད་དང་ཁྱོད་ཀྱི་འཁོར་གཡོག་རྣམས་དང་འབངས་མི་རྣམས་ཀྱི་དོན་དུ་དུས་ནམ་ཞིག་ལ་ཞུ་བ་བྱེད་དགོས་པ་ཁྱོད་ཀྱིས་ང་ལ་སྨྲ་བར་གྱིས་ཞེས་སྨྲས་ཤིང་།
EXO 8:10 ཁོས་སང་ཉིན་ཞེས་སྨྲས་པ་དང་། མོ་ཤེ་ན་རེ། ངེད་ཅག་གི་དཀོན་མཆོག་ཡ་ཝཱེ་དང་འདྲ་བ་གཅིག་ཀྱང་མེད་པ་ཁྱོད་ཀྱིས་ཤེས་པའི་ཕྱིར་ཁྱོད་ཀྱི་གཏམ་བཞིན་གྲུབ་གྱུར་ཅིག
EXO 8:11 སྦལ་བ་རྣམས་ཁྱོད་དང་ཁྱོད་ཀྱི་ཁང་པ་རྣམས་དང་། འཁོར་གཡོག་དང་འབངས་མི་རྣམས་དང་བྲལ་ནས། ནཱ་ཡོལ་གཙང་པོ་འབའ་ཞིག་གི་ནང་དུ་ལུས་པར་འགྱུར་ཞེས་སྨྲས།
EXO 8:12 དེ་ནས་མོ་ཤེ་དང་ཨ་རོན་གཉིས་ཕཱར་ཨོལ་དང་བྲལ་རྗེས། ཕཱར་ཨོལ་ལ་རྙོག་དྲ་བཟོས་པའི་སྦལ་བ་རྣམས་ཀྱི་ཕྱིར་མོ་ཤེ་ཡིས་དཀོན་མཆོག་ཡ་ཝཱེ་ལ་སྐད་ཆེན་པོས་གསོལ་བ་བཏབ་ཅིང་།
EXO 8:13 དཀོན་མཆོག་ཡ་ཝཱེས་མོ་ཤེའི་ཞུ་བ་བཞིན་མཛད་དེ། ཁང་པ་དང་ར་བ་རྣམས་དང་ཞིང་སའི་ནང་དུ་ཡོད་པའི་སྦལ་བ་དག་ཤི་བ་དང་།
EXO 8:14 མི་རྣམས་ཀྱིས་སྦལ་རོ་བསྡུ་རུབ་བྱས་ནས་སྤུངས་པ་ལ་ཡུལ་ཕྱོགས་ཀུན་ཏུ་དྲི་ངན་འཐུལ།
EXO 8:15 འོན་ཀྱང་ཕཱར་ཨོལ་གྱིས་ཆག་སྒོ་ཞི་བ་མཐོང་སྟེ། དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་སེམས་གྱོང་པོར་བྱས་ནས་མོ་ཤེ་དང་ཨ་རོན་གཉིས་ལ་མ་མཉན་ཏོ། །
EXO 8:16 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཨ་རོན་ལ་ཁྱོད་ཀྱིས་རང་གི་འཁར་བ་བརྐྱངས་ནས་ས་སྟེང་གི་རྡུལ་ལ་རྡེགས་ཤིག་དང་། ཨེ་ཅིབ་ཡུལ་ཀུན་ཏུ་རྡུལ་ནི་ཤིག་ལ་འགྱུར་བར་ངེས་ཞེས་སྨྲོས་ཤིག་ཅེས་གསུངས་པ་ལ།
EXO 8:17 ཁོ་གཉིས་ཀྱིས་དེ་བཞིན་དུ་བྱས་ཏེ་ཨ་རོན་གྱིས་ལག་གི་འཁར་བ་བརྐྱངས་ནས་ས་རྡུལ་ལ་བརྡེགས་པ་དང་། མི་དང་དུད་འགྲོའི་སྟེང་དུ་ཤིག་བྱུང་ཞིང་། ཨེ་ཅིབ་ཡུལ་ཐམས་ཅད་ཀྱི་ས་རྡུལ་ཡོངས་རྫོགས་ཤིག་ཏུ་གྱུར།
EXO 8:18 སྒྱུ་མ་མཁན་དག་གིས་ཀྱང་རྫུ་འཕྲུལ་ལ་བརྟེན་ནས་ཤིག་འབྱུང་དུ་འཇུག་བསམ་ཡང་དེ་ལྟར་བྱེད་མ་ནུས་ཤིང་། མི་དང་དུད་འགྲོ་རྣམས་ཀྱི་སྟེང་དུ་ཤིག་ཡོད་དོ། །
EXO 8:19 དེ་ནས་སྒྱུ་མ་མཁན་རྣམས་ཀྱིས་ཕཱར་ཨོལ་ལ། འདི་ནི་དཀོན་མཆོག་གི་ནུས་མཐུ་ ཡིན་འདུག་ཅེས་སྨྲས་ནའང་། ཕཱར་ཨོལ་གྱི་སེམས་གྱོང་པོར་གྱུར་ཏེ་དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་མོ་ཤེ་དང་ཨ་རོན་གཉིས་ལ་མ་མཉན་ཏོ། །
EXO 8:20 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཐོ་རངས་ཡར་ལངས་ཏེ། ཕཱར་ཨོལ་ཆུ་ཁར་འགྲོ་དུས་ཁོའི་མདུན་དུ་སོང་ནས་དེ་ལ་འདི་ལྟར་ཤོད་ཅིག དཀོན་མཆོག་ཡ་ཝཱེས་འདི་སྐད་དུ། ང་ལ་བསྙེན་བཀུར་བྱེད་པའི་ཆེད་དུ་བདག་གི་འབངས་མི་འགྲོ་རུ་ཆུག
EXO 8:21 གལ་ཏེ་ཁྱོད་ཀྱིས་བདག་གི་འབངས་མི་འགྲོ་རུ་མི་འཇུག་ན། ལྟོས་དང་། བདག་གིས་ཁྱོད་དང་ཁྱོད་ཀྱི་འཁོར་གཡོག་དང་ཁྱོད་ཀྱི་འབངས་མི་རྣམས་ཀྱི་སྟེང་དུ་སྦྲང་ནག་གི་ཁྱུ་ཚོགས་གཏོང་ངེས་པ་དང་། ཁྱོད་ཀྱི་ཕོ་བྲང་ནང་དུ་འཛུལ་བར་མ་ཟད། ཨེ་ཅིབ་པ་རྣམས་ཀྱི་ཁང་པ་དང་དེ་དག་གི་སྡོད་གནས་སུའང་སྦྲང་ནག་གིས་གང་བར་འགྱུར།
EXO 8:22 ཡང་ཉིན་དེ་ལ་ངས་རང་གི་འབངས་མི་གནས་པའི་གོ་ཤེན་ཡུལ་ལོགས་སུ་བཀར་ནས། དེ་རུ་སྦྲང་ནག་གི་ཁྱུ་ཚོགས་ཡོད་པར་མི་འགྱུར་ཏེ། བདག་ནི་གནམ་འོག་གི་ཡ་ཝཱེ་ཡིན་པ་ཁྱོད་ལ་ཤེས་སུ་འཇུག་པའི་ཕྱིར་རོ། །
EXO 8:23 བདག་གིས་རང་གི་འབངས་མི་ཁྱོད་ཀྱི་མི་ལས་ལོགས་སུ་བཀར་བ་དང་། སང་ཉིན་གྲུབ་རྟགས་དེ་འབྱུང་བར་འགྱུར་གསུངས་ཞེས་སྨྲོས་ཤིག་ཅེས་གསུངས།
EXO 8:24 དེ་ནས་དཀོན་མཆོག་ཡ་ཝཱེས་དེ་བཞིན་མཛད་དེ། སྦྲང་ནག་གི་ཁྱུ་ཚོགས་ཆེན་པོ་ཕཱར་ཨོལ་གྱི་ཕོ་བྲང་དང་དེའི་འཁོར་གཡོག་རྣམས་ཀྱི་ཁང་པ་རུ་བཏབ་པ་དང་། ཨེ་ཅིབ་ཡུལ་ཐམས་ཅད་སྦྲང་ནག་གི་ཁྱུ་ཚོགས་ཀྱིས་བརླགས་སོ། །
EXO 8:25 དེ་ནས་ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་ཏེ་ན་རེ། ཁྱོད་རྣམས་སོང་ལ་ཡུལ་འདི་ནས་ཁྱོད་ཅག་གི་དཀོན་མཆོག་ལ་མཆོད་པ་ཕུལ་ཞིག་ཅེས་སྨྲས།
EXO 8:26 འོན་ཀྱང་མོ་ཤེ་ཡིས་འདི་ལྟར། དེ་ལྟར་བྱེད་མི་འོས་ཏེ། ངེད་རྣམས་ཀྱིས་ཨེ་ཅིབ་པ་རྣམས་ཞེན་པ་ལོག་པ་གང་དེ་ངེད་ཅག་གི་དཀོན་མཆོག་ཡ་ཝཱེ་ལ་མཆོད་པར་འབུལ་ཡོང་། ཨེ་ཅིབ་པ་རྣམས་ཞེན་པ་ལོག་པ་གང་དེ་ཁོ་ཚོའི་མིག་མདུན་དུ་མཆོད་པར་ཕུལ་ན་དེ་དག་གིས་ངེད་རྣམས་རྡོ་རུབ་གཏོང་བ་མ་ཡིན་ནམ།
EXO 8:27 ངེད་རྣམས་ཉིན་གསུམ་གྱི་ལམ་ལ་དབེན་སྟོང་དུ་སོང་ནས། ངེད་ཅག་གི་དཀོན་མཆོག་ཡ་ཝཱེས་བཀའ་བསྩལ་པ་བཞིན་དུ་ཁོང་ལ་མཆོད་པ་འབུལ་དགོས་ཞེས་སྨྲས།
EXO 8:28 དེ་ནས་ཕཱར་ཨོལ་ན་རེ། ངས་ཁྱོད་ཅག་དབེན་སྟོང་དུ་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་མཆོད་པ་འབུལ་བར་འགྲོ་རུ་འཇུག་མོད། འོན་ཀྱང་ཁྱོད་རྣམས་ཐག་རིང་ལ་མ་འགྲོ་ཞིག ངའི་དོན་དུ་གསོལ་བ་ཐོབས་ཤིག་ཅེས་སྨྲས་པ་ལ།
EXO 8:29 མོ་ཤེ་ཡིས་འདི་ལྟར། ལྟོས་དང་། ང་རང་འདི་ནས་སོང་མ་ཐག་དཀོན་མཆོག་ཡ་ཝཱེ་ལ་གསོལ་བ་འདེབས་པར་བྱ་སྟེ། སང་ཉིན་སྦྲང་ནག་གི་ཁྱུ་ཚོགས་ཕཱར་ཨོལ་དང་ཁོའི་འཁོར་གཡོག་རྣམས་དང་། འབངས་མི་རྣམས་དང་འབྲལ་བར་གྱུར་ཅིག་ཅེས་ཞུ་བ་ཡིན་མོད། འོན་ཀྱང་མི་རྣམས་དཀོན་མཆོག་ཡ་ཝཱེ་ལ་མཆོད་པ་འབུལ་བར་འགྲོ་རུ་མི་འཇུག་པའི་གཡོ་སྒྱུའི་སྦྱོར་བ་ནི་ཕཱར་ཨོལ་གྱིས་ཡང་བསྐྱར་སྤེལ་མི་རུང་ཞེས་སྨྲས་སོ། །
EXO 8:30 དེ་ནས་མོ་ཤེ་ཡིས་ཕཱར་ཨོལ་དང་བྲལ་ནས་དཀོན་མཆོག་ཡ་ཝཱེ་ལ་གསོལ་བ་བཏབ་པ་དང་།
EXO 8:31 དཀོན་མཆོག་ཡ་ཝཱེས་མོ་ཤེ་ཡིས་གསོལ་བ་བཏབ་པ་བཞིན་དུ་མཛད་དེ། སྦྲང་ནག་གི་ཁྱུ་ཚོགས་ཕཱར་ཨོལ་དང་དེའི་འཁོར་གཡོག་རྣམས་དང་། འབངས་མི་རྣམས་དང་བྲལ་བར་མཛད་ནས་གཅིག་ཀྱང་མ་ལུས་སོ། །
EXO 8:32 ཐེངས་དེར་ཕཱར་ཨོལ་གྱིས་ཡང་སེམས་གྱོང་པོར་བྱས་ནས་མི་རྣམས་འགྲོ་རུ་མ་བཅུག་གོ །
EXO 9:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཕཱར་ཨོལ་གྱི་མདུན་དུ་སོང་ནས་ཁོ་ལ་འདི་ལྟར་ཤོད་དང་། ཨིབ་རི་པ་རྣམས་ཀྱི་དཀོན་མཆོག་ཡ་ཝཱེས་འདི་སྐད་དུ། ང་ལ་བསྙེན་བཀུར་བྱེད་པའི་ཆེད་དུ་ངའི་མི་རྣམས་འགྲོ་རུ་ཆུག་ཅེས་གསུངས།
EXO 9:2 གལ་ཏེ་ཁྱོད་ཀྱིས་དེ་དག་ད་དུང་བཀག་ནས་འགྲོ་རུ་མི་འཇུག་ན།
EXO 9:3 ལྟོས་དང་། དཀོན་མཆོག་ཡ་ཝཱེའི་ཕྱག་གིས་ཁྱོད་ཀྱི་ཞིང་ལ་ཡོད་པའི་ཕྱུགས་ཟོག་སྟེ། རྟ་དང་། བོང་བུ་དང་། རྔ་མོང་དང་། བ་གླང་གི་ཁྱུ་དང་། ར་ལུག་གི་ཁྱུ་བཅས་ལ་ནད་ཡམས་ཤིན་ཏུ་ལྕི་མོ་ཞིག་འབྱུང་བར་མཛད།
EXO 9:4 འོན་ཀྱང་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་ཕྱུགས་ཟོག་ནི་ཨེ་ཅིབ་པ་རྣམས་ཀྱི་ཕྱུགས་ཟོག་ལས་ལོགས་སུ་བཀར་ཏེ། ཡེས་ར་ཨེལ་པ་རྣམས་ལ་དབང་བའི་ཕྱུགས་ཟོག་ལས་གཅིག་ཀྱང་འཆི་བར་མི་འགྱུར་བའི་ཕྱིར་ཡིན་ཞེས་སྨྲ་དགོས་པར་གསུངས་སོ། །
EXO 9:5 ཡང་དཀོན་མཆོག་ཡ་ཝཱེས་དུས་བཅད་མཛད་དེ་འདི་སྐད་དུ། སང་ཉིན་ཡ་ཝཱེས་ཡུལ་འདིར་དོན་འདི་བསྒྲུབ་ངེས་ཡིན་ཞེས་གསུངས་པ་དང་།
EXO 9:6 དེའི་ཕྱི་ཉིན་དཀོན་མཆོག་ཡ་ཝཱེས་དོན་དེ་མཛད་ཅིང་། ཨེ་ཅིབ་པའི་ཕྱུགས་ཟོག་ཐམས་ཅད་ཤི་ནའང་། ཡེས་ར་ཨེལ་པ་རྣམས་ཀྱི་ཕྱུགས་ཟོག་ལས་གཅིག་ཀྱང་མ་ཤིའོ། །
EXO 9:7 ཕཱར་ཨོལ་གྱིས་མི་མངགས་ནས་བལྟ་རུ་ཕྱིན་པ་ན། ལྟོས་དང་། ཡེས་ར་ཨེལ་པ་རྣམས་ཀྱི་ཕྱུགས་ཟོག་ལས་གཅིག་ཀྱང་མ་ཤི་བ་མཐོང་མོད། འོན་ཀྱང་ཕཱར་ཨོལ་གྱི་སེམས་གྱོང་པོར་གྱུར་ཏེ་མི་རྣམས་འགྲོ་རུ་མ་བཅུག་གོ །
EXO 9:8 དེ་ནས་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ། སྲེག་ཐབ་ནས་དུ་དྲེག་སྤར་གང་ལོངས་ལ། མོ་ཤེ་ཡིས་ཕཱར་ཨོལ་གྱི་མིག་མདུན་དུ་གནམ་ལ་གཏོར་ཅིག་དང་།
EXO 9:9 དུ་དྲེག་དེ་ནི་ཨེ་ཅིབ་ཡུལ་ཡོངས་སུ་རྡུལ་དུ་འགྱུར་ཞིང་། མི་ཕྱུགས་གཉིས་ཀྱི་ལུས་སྟེང་དུ་གཉན་འབུར་ཆུ་བུར་ཅན་དུ་འགྱུར་འོང་ཞེས་གསུངས་པ་ལ།
EXO 9:10 མོ་ཤེ་དང་ཨ་རོན་གཉིས་ཀྱིས་དུ་དྲེག་བླངས་ནས་ཕཱར་ཨོལ་གྱི་མདུན་དུ་འགྲེང་སྟེ། མོ་ཤེ་ཡིས་དེ་གནམ་ལ་གཏོར་བ་ན། མི་ཕྱུགས་གཉིས་ཀྱི་ལུས་སྟེང་དུ་གཉན་འབུར་ཆུ་བུར་ཅན་དུ་གྱུར།
EXO 9:11 སྒྱུ་མ་མཁན་དེ་དག་དང་ཨེ་ཅིབ་པ་ཐམས་ཅད་ཀྱི་ལུས་སྟེང་དུ་གཉན་འབུར་བྱུང་བས། སྒྱུ་མ་མཁན་དེ་དག་མོ་ཤེའི་མདུན་དུ་ཚུགས་མ་ཐུབ།
EXO 9:12 འོན་ཀྱང་དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་ཅིང་མོ་ཤེ་ལ་གསུངས་པ་བཞིན་དུ་ཕཱར་ཨོལ་གྱིས་མོ་ཤེ་དང་ཨ་རོན་གཉིས་ལ་མ་མཉན་ཏོ། །
EXO 9:13 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་ཐོ་རངས་ཡར་ལངས་ཏེ། ཕཱར་ཨོལ་གྱི་མདུན་དུ་ལངས་བསྡད་ནས་ཁོ་ལ་འདི་ལྟར་ཤོད་ཅིག ཨིབ་རི་པ་རྣམས་ཀྱི་དཀོན་མཆོག་ཡ་ཝཱེས་འདི་སྐད་དུ། བདག་ལ་བསྙེན་བཀུར་བྱེད་པའི་ཆེད་དུ་ངའི་འབངས་མི་འགྲོ་རུ་ཆུག
EXO 9:14 རྒྱུ་མཚན་ནི་ཐེངས་འདིར་བདག་གིས་ཆག་སྒོ་ཐམས་ཅད་ཁྱོད་དང་ཁྱོད་ཀྱི་འཁོར་གཡོག་རྣམས་དང་། ཁྱོད་ཀྱི་འབངས་མི་རྣམས་ཀྱི་སྟེང་དུ་འབབ་པར་བྱ་སྟེ། བདག་དང་འདྲ་བ་ཞིག་གནམ་འོག་ཀུན་ཏུ་མེད་པ་ཁྱོད་ཀྱིས་ཤེས་པར་འགྱུར་བའི་ཕྱིར་རོ། །
EXO 9:15 ད་ལྟ་བདག་གིས་ལག་པ་བརྐྱངས་ཏེ་ནད་ཡམས་ཀྱིས་ཁྱོད་དང་ཁྱོད་ཀྱི་འབངས་མི་རྣམས་ལ་རྒོལ་བ་ཡིན་ན། ཁྱོད་རང་སྔར་ནས་ས་སྟེང་དུ་མེད་པར་གྱུར་པ་ཡིན།
EXO 9:16 དོན་དམ་དུ་བདག་གི་ནུས་མཐུ་ཁྱོད་ལ་མངོན་པ་དང་། བདག་གི་མིང་ནི་གནམ་འོག་ཀུན་ཏུ་བསྒྲག་པའི་ཕྱིར་ཁྱོད་རང་དར་བར་བྱས་པ་ཡིན་མོད།
EXO 9:17 འོན་ཀྱང་ཁྱོད་ཀྱིས་ད་དུང་བདག་གི་འབངས་མི་ལ་རང་རློམ་ཆེན་པོ་བྱས་ནས་ཁོ་ཚོ་འགྲོ་རུ་མི་འཇུག་པ་ཡིན་ནམ།
EXO 9:18 ལྟོས་དང་། སང་ཉིན་གྱི་དུས་འདི་ཙམ་ལ་བདག་གིས་སེར་བ་ཆེན་པོ་ཞིག་འབབ་པར་བྱ་སྟེ། ཨེ་ཅིབ་ཡུལ་ཆགས་པའི་དུས་ནས་བཟུང་སེར་བ་དེ་འདྲ་བབས་མྱོང་མེད།
EXO 9:19 ད་ལྟ་ཁྱོད་ཀྱིས་མི་མངགས་ནས་ཁྱོད་ཀྱི་ཕྱུགས་ཟོག་དང་། ཞིང་ལ་གང་ཡོད་པ་ཐམས་ཅད་ནང་ལ་བསྡུས་ཤིག ཞིང་ལ་བསྐྱུར་ཏེ་ནང་དུ་མ་བསྡུས་པ་མི་ཕྱུགས་གང་ཡིན་རུང་སེར་བ་དེའི་སྟེང་ལ་བབས་ནས་འཆི་བར་འགྱུར་ཞེས་སྨྲ་དགོས་པར་གསུངས་སོ། །
EXO 9:20 ཕཱར་ཨོལ་གྱི་འཁོར་གཡོག་རྣམས་ལས་དཀོན་མཆོག་ཡ་ཝཱེའི་བཀའ་འདི་ལ་འཇིགས་པ་རྣམས་ཀྱིས་རང་གི་གཡོག་པོ་རྣམས་དང་ཕྱུགས་ཟོག་མྱུར་དུ་ཁང་པའི་ནང་ལ་བསྡུས་མོད།
EXO 9:21 འོན་ཀྱང་དཀོན་མཆོག་ཡ་ཝཱེའི་བཀའ་འདི་སེམས་ལ་མ་བཟུང་བ་དག་གིས་གཡོག་པོ་རྣམས་དང་ཕྱུགས་ཟོག་ཞིང་ནང་དུ་བསྐྱུར་བ་རེད།
EXO 9:22 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ལག་པ་ནམ་མཁར་རྐྱོངས་དང་། ཨེ་ཅིབ་ཡུལ་ཐམས་ཅད་དེ། མི་དང་ཕྱུགས་ཟོག་དང་ཞིང་ནང་གི་སྐྱེ་དངོས་ཐམས་ཅད་ཀྱི་སྟེང་དུ་སེར་བ་འབབ་པའི་ཕྱིར་ཡིན་ཞེས་གསུངས་པ་ལ།
EXO 9:23 མོ་ཤེ་ཡིས་རང་གི་འཁར་བ་ནམ་མཁར་བརྐྱངས་པ་དང་། དཀོན་མཆོག་ཡ་ཝཱེས་འབྲུག་སྒྲ་གྲགས་པ་དང་སེར་བ་འབབ་པར་མཛད་དེ། ས་ལ་མེའི་གློག་དམར་འཁྱུག་ཅིང་། དཀོན་མཆོག་ཡ་ཝཱེས་ཨེ་ཅིབ་ཡུལ་དུ་སེར་བ་ཕབ་བོ། །
EXO 9:24 དུས་དེར་སེར་བ་དང་མེའི་གློག་དམར་གཉིས་འདྲེས་ཤིང་ཤིན་ཏུ་དྲག་པོ་ཡིན་ཏེ། ཨེ་ཅིབ་ཡུལ་ཆགས་པའི་དུས་ནས་བཟུང་དེ་ལྟ་བུ་བྱུང་མྱོང་མེད།
EXO 9:25 ཨེ་ཅིབ་ཡུལ་ཐམས་ཅད་དུ། ཞིང་ལ་ཡོད་པའི་མི་ཕྱུགས་གཉིས་ཀ་དང་སྐྱེ་དངོས་ཡོད་ཚད་སེར་བས་བརྡུངས་པ་དང་། ཞིང་གི་ལྗོན་ཤིང་དང་རྩི་ཤིང་མཐའ་དག་ཀྱང་བཅག་པ་དང་།
EXO 9:26 ཡེས་ར་ཨེལ་པ་རྣམས་གནས་པའི་གོ་ཤེན་ཡུལ་འབའ་ཞིག་ཏུ་སེར་བ་མ་བབས་སོ། །
EXO 9:27 དེ་ནས་ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་འོངས་ནས་དེ་གཉིས་ལ་འདི་ལྟར། ད་རེས་ངས་སྡིག་པ་བྱས་ཤིང་། དཀོན་མཆོག་ཡ་ཝཱེ་དྲང་བདེན་ཡིན་ལ། བདག་དང་བདག་གི་འབངས་མི་རྣམས་ནི་ངན་པ་ཡིན་ནོ། །
EXO 9:28 དཀོན་མཆོག་གི་འབྲུག་སྒྲ་དང་སེར་བས་ད་ནི་ཆོག་སྟེ། དཀོན་མཆོག་ཡ་ཝཱེ་ལ་ཞུ་བ་ཕུལ་ཞིག དེ་ནས་བདག་གིས་ཁྱོད་རྣམས་འགྲོ་རུ་འཇུག་སྟེ་འདི་རུ་འདུག་མི་དགོས་ཞེས་སྨྲས།
EXO 9:29 ཡང་མོ་ཤེ་ན་རེ། ང་རང་གྲོང་ཁྱེར་གྱི་ཕྱི་རོལ་ཏུ་སོང་མ་ཐག་ངས་དཀོན་མཆོག་ཡ་ཝཱེའི་ཕྱོགས་སུ་ལག་ཟུང་བརྐྱངས་ནས་གསོལ་བ་འདེབས་པར་བྱ་སྟེ། འབྲུག་སྒྲ་ཆད་ནས་སེར་བ་ཡང་མེད་པར་འགྱུར་ལ། ས་གཞི་ཐམས་ཅད་དཀོན་མཆོག་ཡ་ཝཱེའི་ཡིན་པ་ཁྱོད་ཀྱིས་ཤེས་པར་འགྱུར་བའི་ཕྱིར་ཡིན།
EXO 9:30 འོན་ཀྱང་ཁྱོད་དང་ཁྱོད་ཀྱི་འཁོར་གཡོག་རྣམས་ད་དུང་དཀོན་མཆོག་ཡ་ཝཱེ་ལ་མི་འཇིགས་པ་ངས་ཤེས་པ་ཡིན་ཞེས་སྨྲས་སོ། །
EXO 9:31 དུས་དེར་ནས་ཀྱི་སྙེ་མ་འབུས་ཤིང་སོ་མའི་མེ་ཏོག་ཀྱང་བཞད་ཡོད་པས། སེར་བས་སོ་མ་དང་ནས་གཉིས་བརྡུངས་ནའང་།
EXO 9:32 གྲོ་དང་སོ་བ་ནི་ཕྱིས་སུ་སྨིན་པས་མ་བརྡུངས་སོ། །
EXO 9:33 དེ་ནས་མོ་ཤེ་ནི་ཕཱར་ཨོལ་དང་བྲལ་ནས་གྲོང་ཁྱེར་གྱི་ཕྱི་རོལ་ཏུ་སོང་སྟེ། དཀོན་མཆོག་ཡ་ཝཱེའི་ཕྱོགས་སུ་ལག་ཟུང་བརྐྱངས་ནས་གསོལ་བ་བཏབ་པ་ན། འབྲུག་སྒྲ་དང་སེར་བ་ཆད་ཅིང་། ཆར་བ་ས་ལ་འབབ་མཚམས་ཀྱང་བཞག་པ་རེད།
EXO 9:34 ཕཱར་ཨོལ་གྱིས་ཆར་བ་དང་སེར་བ་དང་འབྲུག་སྒྲ་བཅས་མཚམས་ཆད་པ་མཐོང་ནས་དེ་ལས་ཀྱང་སྡིག་པ་བྱས་ཏེ། ཁོ་དང་ཁོའི་འཁོར་གཡོག་རྣམས་ཀྱིས་སེམས་གྱོང་པོར་བྱས།
EXO 9:35 དེ་ལྟར་ཕཱར་ཨོལ་གྱི་སེམས་གྱོང་པོར་གྱུར་ནས། དཀོན་མཆོག་ཡ་ཝཱེས་མོ་ཤེ་བརྒྱུད་དེ་གསུངས་པ་བཞིན་དུ་ཡེས་ར་ཨེལ་པ་རྣམས་འགྲོ་རུ་མ་བཅུག་གོ །
EXO 10:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་ཕཱར་ཨོལ་གྱི་མདུན་དུ་སོང་ཞིག བདག་གིས་ཁོ་དང་ཁོའི་འཁོར་གཡོག་རྣམས་ཀྱི་སེམས་གྱོང་པོར་བྱས་པའི་ཕྱིར་ཡིན། དེ་ནི་ཅི་ལ་ཞེ་ན། ངས་གྲུབ་རྟགས་དེ་རྣམས་ཁོ་ཚོའི་ཁྲོད་དུ་སྟོན་པ་དང་།
EXO 10:2 བདག་གིས་ཨེ་ཅིབ་པ་རྣམས་ལ་ཇི་ལྟར་འཕྲིན་ལས་མཛད་པ་དང་། དེ་དག་གི་ཁྲོད་དུ་གྲུབ་རྟགས་ཅི་ལྟ་བུ་བསྟན་པ་རྣམས་ཁྱོད་ཀྱིས་རང་རང་གི་བུ་དང་ཚ་བོའི་རྣ་བར་སྨྲ་བ་དང་། ཁྱོད་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་བའི་ཕྱིར་ཡིན་ཞེས་གསུངས་སོ། །
EXO 10:3 དེའི་ཕྱིར་མོ་ཤེ་དང་ཨ་རོན་གཉིས་ཕཱར་ཨོལ་གྱི་མདུན་དུ་སོང་ནས་དེ་ལ། ཨིབ་རི་པ་རྣམས་ཀྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་དུས་ནམ་ཞིག་གི་བར་དུ་ངའི་མདུན་དུ་ཁེངས་སྐྱུང་མི་བྱེད་དམ། བདག་ལ་བསྙེན་བཀུར་བྱེད་པའི་ཆེད་དུ་བདག་གི་འབངས་མི་འགྲོ་རུ་ཆུག
EXO 10:4 གལ་ཏེ་ཁྱོད་ཀྱིས་བདག་གི་འབངས་མི་འགྲོ་རུ་མི་འཇུག་ན། སང་ཉིན་ངས་འབུ་ཆ་ག་པ་ཁྱོད་ཀྱི་ཡུལ་དུ་གཏོང་བར་བྱ་སྟེ།
EXO 10:5 དེ་དག་གིས་ས་ངོས་ཐམས་ཅད་འགེབ་ཅིང་དེ་མི་མཐོང་བར་འགྱུར་ཞིང་། ཁྱོད་ཅག་ལ་སེར་བ་ནས་ལུས་པ་དང་ཞིང་ལ་སྐྱེས་པའི་ལྗོན་ཤིང་ཐམས་ཅད་ཀྱང་བཟའ་བར་འགྱུར།
EXO 10:6 ཡང་ཁྱོད་ཀྱི་ཕོ་བྲང་དང་། ཁྱོད་ཀྱི་འཁོར་གཡོག་ཐམས་ཅད་ཀྱི་ཁང་པ་དང་། ཨེ་ཅིབ་པ་ཀུན་གྱི་ཁང་པ་ལ་འབུ་ཆ་ག་པས་གང་ཡོང་ལ། དེ་ལྟ་བུ་ནི་ཁྱོད་ཀྱི་ཕ་མེས་ཡང་མེས་རྣམས་འཇིག་རྟེན་དུ་སྐྱེས་པའི་དུས་ནས་བཟུང་ད་ལྟའི་བར་དུ་ནམ་ཡང་མཐོང་མ་མྱོང་གསུངས་ཞེས་སྨྲས་པ་དང་། མོ་ཤེ་ཁ་ཕྱིར་འཁོར་ཏེ་ཕཱར་ཨོལ་དང་བྲལ་ནས་སོང་ངོ་། །
EXO 10:7 དེ་ནས་ཕཱར་ཨོལ་གྱི་འཁོར་གཡོག་རྣམས་ཀྱིས་ཁོ་ལ། མི་འདི་དུས་ནམ་ཞིག་གི་བར་དུ་ངེད་ཅག་འཛིན་པའི་རྙི་རུ་འགྱུར་རམ། མི་འདི་རྣམས་ཁོ་རྣམས་ཀྱི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་པའི་ཆེད་དུ་འགྲོ་རུ་ཆུག་དང་། ཨེ་ཅིབ་ཡུལ་བརླགས་ཟིན་པ་ཁྱེད་ཀྱིས་ད་དུང་མི་ཤེས་སམ་ཞེས་ཞུས་པས།
EXO 10:8 མོ་ཤེ་དང་ཨ་རོན་གཉིས་ཕྱིར་ཕཱར་ཨོལ་གྱི་མདུན་དུ་བོས་ནས་དེས་ཁོ་གཉིས་ལ་འདི་ལྟར། ཁྱོད་ཅག་གི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་སོང་ཞིག འོན་ཀྱང་སུ་འགྲོ་བར་བྱའམ་ཞེས་དྲིས་པར།
EXO 10:9 མོ་ཤེ་ན་རེ། དཀོན་མཆོག་ཡ་ཝཱེ་ལ་དུས་ཆེན་བསྲུང་བའི་ཕྱིར་ངེད་རྣམས་རྒན་གཞོན་དང་། བུ་བུ་མོ་རྣམས་མཉམ་དུ་བ་ཁྱུ་དང་ར་ལུག་གི་ཁྱུ་དེད་ནས་འགྲོ་བར་བྱ་ཞེས་སྨྲས།
EXO 10:10 ཡང་ཕཱར་ཨོལ་གྱིས་ཁོ་གཉིས་ལ། དེ་བས་ངས་ཁྱོད་རྣམས་བུད་མེད་དང་ཕྲུ་གུ་བཅས་པ་འགྲོ་རུ་འཇུག་དུས། དཀོན་མཆོག་ཡ་ཝཱེ་ཁྱོད་ཅག་དང་མཉམ་དུ་བཞུགས་ཀྱང་སྲིད། ཁྱོད་ཅག་ལ་དམིགས་ཡུལ་ངན་པ་ཡོད་པས་གཟབ་གཟབ་གྱིས་ཤིག
EXO 10:11 ཐམས་ཅད་སོང་མི་ཆོག་སྟེ། ཁྱོད་ཅག་སྐྱེས་པ་རྣམས་འབའ་ཞིག་སོང་ནས་དཀོན་མཆོག་ཡ་ཝཱེ་ལ་བསྙེན་བཀུར་བྱོས་ཤིག དེ་ནི་ཁྱོད་ཅག་གི་འདོད་པ་ཡིན་པས་སོ་ཞེས་སྨྲས་ཤིང་། ཁོ་གཉིས་ཕཱར་ཨོལ་གྱི་མདུན་ནས་ཕྱིར་བཏོན་ཏོ། །
EXO 10:12 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ལག་པ་ཨེ་ཅིབ་ཡུལ་གྱི་ཕྱོགས་སུ་རྐྱོངས་དང་། འབུ་ཆ་ག་པ་རྣམས་ཨེ་ཅིབ་ཡུལ་དུ་འོངས་ནས་ས་སྟེང་གི་སྐྱེ་དངོས་ཐམས་ཅད་དེ། སེར་ཤུལ་ནས་ལུས་པ་མཐའ་དག་བཟའ་བའི་ཕྱིར་ཡིན་ཞེས་གསུངས་པ་དང་།
EXO 10:13 མོ་ཤེ་ཡིས་འཁར་བ་ཨེ་ཅིབ་ཡུལ་གྱི་ཕྱོགས་སུ་བརྐྱངས་ཤིང་། དཀོན་མཆོག་ཡ་ཝཱེས་ཉིན་མཚན་དེ་ལ་ཤར་རླུང་གཡུགས་པར་མཛད་དེ། ཐོ་རངས་ལ་སླེབས་དུས་ཤར་རླུང་གིས་འབུ་ཆ་ག་པ་རྣམས་ཁུར་ཡོང་ངོ་། །
EXO 10:14 འབུ་ཆ་ག་པ་རྣམས་ཨེ་ཅིབ་ཡུལ་ཀུན་ལ་ཁྱབ་ཡོང་སྟེ། ཡུལ་ཐམས་ཅད་ལ་ཤིན་ཏུ་མང་པོ་བབས། དེ་ལྟ་བུའི་འབུ་ཆ་ག་པ་སྔར་བྱུང་མ་མྱོང་ལ། ཕྱིས་སུའང་འབྱུང་བར་མི་འགྱུར།
EXO 10:15 འབུ་ཆ་ག་པ་ཡིས་ས་ངོས་ཐམས་ཅད་བཀབ་པས་ས་ནི་ནག་པོར་གྱུར་པ་དང་། ཡང་སེར་ཤུལ་ནས་ལུས་པའི་ས་སྟེང་གི་སྐྱེ་དངོས་མཐའ་དག་དང་ལྗོན་ཤིང་གི་འབྲས་བུ་ཐམས་ཅད་ཟོས་ནས། ཨེ་ཅིབ་ཡུལ་ཀུན་གྱི་ལྗོན་ཤིང་དང་ཞིང་ནང་གི་སྐྱེ་དངོས་ལས་སྔོན་པོ་ཅི་ཡང་མ་བསྐྱུར་ཏོ། །
EXO 10:16 དེ་ནས་ཕཱར་ཨོལ་གྱིས་མྱུར་དུ་མོ་ཤེ་དང་ཨ་རོན་གཉིས་བོས་ཏེ་ན་རེ། ངས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། ཁྱོད་གཉིས་ལའང་སྡིག་པ་བྱས་སོང་།
EXO 10:17 ད་ལྟ་ཁྱོད་གཉིས་ལ་ཞུ་བ་བྱེད་དེ། ཐེངས་འདི་ཁོ་ནར་ངའི་སྡིག་པ་ལ་གུ་ཡངས་གནང་བར་མཛོད། ཁྱོད་ཅག་གི་དཀོན་མཆོག་ཡ་ཝཱེས་ང་རང་ད་རེས་འཆི་བ་འདི་ནས་ཐར་བར་མཛད་པའི་ཕྱིར་ཞུ་བ་འབུལ་རོགས་ཞེས་སྨྲས་པ་ལ།
EXO 10:18 མོ་ཤེ་ཡིས་ཕཱར་ཨོལ་དང་བྲལ་ནས་དཀོན་མཆོག་ཡ་ཝཱེ་ལ་གསོལ་བ་བཏབ་ཅིང་།
EXO 10:19 དེ་ནས་དཀོན་མཆོག་ཡ་ཝཱེས་རླུང་ནི་ནུབ་རླུང་དྲག་པོར་བསྒྱུར་ཏེ། འབུ་ཆ་ག་པ་རྣམས་གཡུགས་ཤིང་རྒྱ་མཚོ་དམར་པོའི་ནང་དུ་ཁུར་བ་དང་། ཨེ་ཅིབ་ཡུལ་ཐམས་ཅད་ནས་འབུ་ཆ་ག་པ་གཅིག་ཀྱང་མ་བསྐྱུར་ཏོ། །
EXO 10:20 འོན་ཀྱང་དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་པས། དེས་ཡེས་ར་ཨེལ་པ་རྣམས་འགྲོ་རུ་མ་བཅུག་གོ །
EXO 10:21 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ལག་པ་ནམ་མཁའི་ཕྱོགས་སུ་རྐྱོངས་དང་། རེག་ཀྱང་རེག་ནུས་པའི་མུན་པ་ཞིག་ཨེ་ཅིབ་ཡུལ་ལ་འབྱུང་བའི་ཕྱིར་ཡིན་ཞེས་གསུངས་པ་ལ།
EXO 10:22 མོ་ཤེ་ཡིས་ལག་པ་ནམ་མཁའི་ཕྱོགས་སུ་བརྐྱངས་པས། ཉིན་གསུམ་ལ་ཨེ་ཅིབ་ཡུལ་ཡོངས་སུ་མུན་པ་སྟུག་པོ་ཞིག་བྱུང་།
EXO 10:23 ཉིན་གསུམ་གྱི་རིང་མི་རྣམས་ཀྱིས་ཕན་ཚུན་མཐོང་མ་ནུས་ལ། མི་སུ་ཡང་ལངས་ནས་རང་སར་འབྲལ་མ་ཕོད་དོ། །འོན་ཀྱང་ཡེས་ར་ཨེལ་པ་རྣམས་ཀྱི་སྡོད་ཡུལ་རྣམས་ལ་འོད་ཡོད་པ་རེད།
EXO 10:24 དེ་ནས་ཕཱར་ཨོལ་གྱིས་མོ་ཤེ་བོས་ནས་ཁོ་ལ་འདི་ལྟར། ཁྱོད་ཅག་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་སོང་ཞིག འོན་ཏེ་ཁྱོད་རྣམས་ཀྱི་ར་ལུག་གི་ཁྱུ་དང་བ་ཁྱུ་འདི་རུ་བསྐྱུར་དགོས་པ་དང་། བུད་མེད་དང་ཕྲུ་གུ་རྣམས་ཁྱོད་ཅག་དང་མཉམ་དུ་སོང་ཆོག་ཅེས་སྨྲས་པ་ལ།
EXO 10:25 མོ་ཤེ་ན་རེ། ངེད་རྣམས་ཀྱིས་ངེད་ཅག་གི་དཀོན་མཆོག་ཡ་ཝཱེ་ལ་མཆོད་པ་འབུལ་ཐུབ་པའི་ཕྱིར། ཁྱོད་ཀྱིས་མཆོད་རྫས་དང་སྦྱིན་སྲེག་ཏུ་འབུལ་བྱའི་སེམས་ཅན་ཅིས་ཀྱང་ངེད་ཀྱི་ལག་ཏུ་གཏད་དེ།
EXO 10:26 ངེད་རྣམས་ཀྱི་ཕྱུགས་ཟོག་ཀྱང་ངེས་པར་ངེད་དང་མཉམ་དུ་འགྲོ་དགོས་ཤིང་། ཐ་ན་རྨིག་པ་གཅིག་ཀྱང་མི་བསྐྱུར། ཅིའི་ཕྱིར་ཞེ་ན། དེ་རྣམས་ལས་འགའ་ཤས་བླངས་ཏེ་ངེད་ཅག་གི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དགོས་པའི་ཕྱིར་ཡིན་ལ། ངེད་ཅག་གནས་དེར་མ་སླེབས་པའི་བར་དུ་གང་ཞིག་གིས་དཀོན་མཆོག་ཡ་ཝཱེ་ལ་བསྙེན་བཀུར་ཅི་ཞིག་བྱེད་དགོས་པ་མི་ཤེས་ཞེས་སྨྲས།
EXO 10:27 འོན་ཀྱང་དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་པས། ཁོ་རྣམས་འགྲོ་རུ་འཇུག་མ་འདོད་ཅིང་།
EXO 10:28 ཕཱར་ཨོལ་གྱིས་མོ་ཤེ་ལ་འདི་ལྟར། ཁྱོད་འདི་ནས་ཕར་སོང་ཞིག ཕྱིན་ཆད་ང་དང་འཕྲད་པར་གཟབ་གཟབ་བྱོས། རྒྱུ་མཚན་ནི་ང་དང་འཕྲད་པའི་ཉིན་ལ་ཁྱོད་འཆི་བར་ངེས་པས་སོ་ཞེས་སྨྲས་པར།
EXO 10:29 མོ་ཤེ་ན་རེ། ཁྱོད་ཀྱིས་སྨྲས་པ་བདེན་ནོ། །ང་ནི་ཁྱོད་དང་སླར་ཡང་འཕྲད་མི་སྲིད་ཅེས་སྨྲས་སོ། །
EXO 11:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། བདག་གིས་ད་དུང་ཆག་སྒོ་ཞིག་ཕཱར་ཨོལ་དང་ཨེ་ཅིབ་ཡུལ་དུ་འབྱུང་བར་བྱ། དེའི་རྗེས་སུ་ཁོས་ཁྱོད་རྣམས་ཡུལ་འདི་ནས་འགྲོ་རུ་འཇུག་པར་མ་ཟད། ཁོས་ཁྱོད་རྣམས་འགྲོ་རུ་འཇུག་པའི་དུས་སུ་ཁྱོད་ཅག་ཡོངས་རྫོགས་སྐྲོད་ངེས་ཤིང་།
EXO 11:2 མི་རྣམས་ཀྱི་རྣ་ལམ་དུ། སྐྱེས་ཕོ་མོ་རེ་རེས་རང་རང་གི་ཁྱིམ་མཚེས་ལ་གསེར་དངུལ་གྱི་ཡོ་བྱད་རྣམས་སློང་དགོས་པའི་གཏམ་འཇོག་པར་གྱིས་ཞེས་གསུངས་པ་དང་།
EXO 11:3 དཀོན་མཆོག་ཡ་ཝཱེས་ཨེ་ཅིབ་པའི་མིག་མདུན་དུ་མི་རྣམས་ལ་ཐུགས་རྗེ་ཐོབ་པར་མཛད་ཅིང་། ཡང་མོ་ཤེ་ནི་ཨེ་ཅིབ་ཡུལ་དང་། ཕཱར་ཨོལ་གྱི་འཁོར་གཡོག་རྣམས་དང་འབངས་མི་དག་གི་མིག་མདུན་དུ་ཤིན་ཏུ་ཆེན་པོ་ཡོད་པ་ཡིན་ནོ། །
EXO 11:4 ཡང་མོ་ཤེ་ན་རེ། དཀོན་མཆོག་ཡ་ཝཱེས་འདི་སྐད་དུ། ནམ་ཕྱེད་ཙམ་ལ་ང་རང་ཨེ་ཅིབ་ཡུལ་ཀུན་ཏུ་རྒྱུ་ཞིང་།
EXO 11:5 ཨེ་ཅིབ་ཡུལ་དུ་སྐྱེས་འགོ་ཐམས་ཅད་དེ་ཁྲི་ལ་བཞུགས་པའི་ཕཱར་ཨོལ་ནས་རང་འཐག་ལ་ཡོད་པའི་བྲན་མོའི་བར་དུ་སྐྱེས་འགོ་ཡོད་དོ་ཅོག་དང་། ཕྱུགས་ཕྲུག་འགོ་མ་ཐམས་ཅད་འཆི་ངེས་ཡིན་ལ།
EXO 11:6 ཨེ་ཅིབ་ཡུལ་ཐམས་ཅད་དུ་ངུ་འབོད་ཆེན་པོ་འབྱུང་སྟེ། སྔར་དེ་འདྲ་བྱུང་མ་མྱོང་ལ། ཕྱིས་སུའང་འབྱུང་མི་སྲིད།
EXO 11:7 འོན་ཀྱང་ཡེས་ར་ཨེལ་པ་རྣམས་ཀྱི་ཁྲོད་དུ་མི་ཕྱུགས་གང་ཡིན་ཡང་། ཐ་ན་ཁྱི་ཡིས་ཀྱང་དེ་རྣམས་ལ་ཟུག་མི་ཕོད་ཅེས་གསུངས། དེ་ནི་དཀོན་མཆོག་ཡ་ཝཱེས་ཨེ་ཅིབ་པ་དང་ཡེས་ར་ཨེལ་པ་རྣམས་སོ་སོར་བཀར་བ་ཁྱོད་ཅག་གིས་ཤེས་པའི་ཕྱིར་ཡིན་ལ།
EXO 11:8 ཁྱོད་ཀྱི་འཁོར་གཡོག་འདི་རྣམས་ཐམས་ཅད་བདག་གི་མདུན་དུ་འོངས་ནས་གུས་འདུད་བྱེད་ཅིང་འདི་ལྟར། ཁྱོད་དང་ཁྱོད་ཀྱི་རྗེས་སུ་འབྲངས་པའི་མི་ཐམས་ཅད་འདི་ནས་སོང་ཞིག་ཅེས་སྨྲ་བར་འགྱུར་ཞིང་། དེའི་རྗེས་སུ་ང་རང་འགྲོ་བར་འགྱུར་ཞེས་སྨྲས་པ་དང་། མོ་ཤེ་ཁོང་ཁྲོ་ཆེན་པོ་དང་བཅས་ཕཱར་ཨོལ་དང་བྲལ་ནས་སོང་ངོ་། །
EXO 11:9 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ངས་ཨེ་ཅིབ་ཡུལ་དུ་སྒྲུབ་པའི་དོན་ངོ་མཚར་ཅན་ཇེ་མང་དུ་འཕེལ་བའི་ཕྱིར། ཕཱར་ཨོལ་གྱིས་ཁྱོད་ཀྱི་བཀའ་ལ་མཉན་པར་མི་འགྱུར་ཞེས་གསུངས།
EXO 11:10 མོ་ཤེ་དང་ཨ་རོན་གཉིས་ཀྱིས་ཕཱར་ཨོལ་གྱི་མདུན་དུ་དོན་ངོ་མཚར་ཅན་དེ་ཐམས་ཅད་བསྟན་ནའང་། དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་དེ། ཁོས་ཡེས་ར་ཨེལ་པ་རྣམས་རང་གི་ཡུལ་ནས་འགྲོ་རུ་མ་བཅུག་གོ །
EXO 12:1 ཡང་དཀོན་མཆོག་ཡ་ཝཱེས་ཨེ་ཅིབ་ཡུལ་དུ་མོ་ཤེ་དང་ཨ་རོན་གཉིས་ལ་འདི་སྐད་དུ།
EXO 12:2 ཟླ་འདི་ནི་ཁྱོད་ཅག་གི་ཟླ་དང་པོ་ཡིན་པ་དང་། ལོ་གཅིག་གི་ཐོག་མར་བརྩི་དགོས།
EXO 12:3 ཁྱོད་གཉིས་ཀྱིས་ཡེས་ར་ཨེལ་གྱི་ཚོགས་ཐམས་ཅད་ལ་འདི་ལྟར། ཟླ་འདིའི་ཚེས་བཅུ་པ་ལ་རང་རང་གི་ཕ་ཡི་ཁྱིམ་རྒྱུད་བཞིན་དུ་ཁྱིམ་ཚང་རེ་རེས་ལུ་གུ་ རེ་ལེན་དགོས་ཤིང་།
EXO 12:4 གལ་ཏེ་ལུ་གུ་བཟའ་བ་ལ་ཁྱིམ་མི་ཉུང་ངུ་ཡིན་ན། ཁྱིམ་བདག་གིས་ཉེ་བའི་ཁྱིམ་མཚེས་དང་མཉམ་དུ་ལུ་གུ་གཅིག་ལེན་དགོས་ལ། ཁྱིམ་མི་རེ་རེའི་ཟ་ཚད་བཞིན་དུ་སྔོན་རྩིས་རྒྱག་དགོས།
EXO 12:5 ཁྱོད་ཅག་གི་ལུ་གུ་ནི་ལོ་གཅིག་ཅན་གྱི་ཕོ་ཕྱུགས་སྐྱོན་མེད་པ་ཞིག་ཡིན་དགོས་པ་དང་ལུག་གམ་ར་ཡི་ཁྲོད་གང་ནས་བླངས་ཀྱང་ཆོག
EXO 12:6 ཁྱོད་ཅག་གིས་ཟླ་འདིའི་ཚེས་བཅུ་བཞི་པའི་བར་དུ་བཞག་ནས། ཡེས་ར་ཨེལ་གྱི་ཚོགས་ཐམས་ཅད་ཀྱིས་ས་སྲོས་ཀྱི་དུས་སུ་ལུ་གུ་བཤའ་དགོས།
EXO 12:7 ཡང་ཁྱིམ་ཚང་རེ་རེས་དེའི་ཁྲག་ཉུང་ཙམ་བླངས་ཏེ་ལུ་གུ་བཟའ་སའི་ཁང་པ་དག་གི་སྒོ་འགྲམ་གཉིས་ཀ་དང་ཡ་ཐེམ་ལ་བསྐུ་དགོས།
EXO 12:8 མཚན་མོ་དེར་ལུ་གུའི་ཤ་བཟའ་དགོས་ཏེ། མེ་ལ་བསྲེགས་ནས་སྐྱུར་མེད་བག་ལེབ་དང་སྔོ་ཚོད་ཁ་པོ་དང་ལྷན་དུ་བཟའ་དགོས།
EXO 12:9 རློན་པའམ་ཆུ་ལ་བཙོས་པ་ནི་བཟའ་མི་རུང་སྟེ་མགོ་སུག་གཉིས་ཀ་དང་དེའི་ནང་ཁྲོལ་དང་བཅས་པ་མེ་ལ་བསྲེགས་ནས་བཟའ་དགོས།
EXO 12:10 ཕྱི་ཉིན་ཞོགས་པའི་བར་དུ་ཅི་ཡང་ལུས་སུ་འཇུག་མི་རུང་ལ། གལ་ཏེ་ཞོགས་པའི་བར་དུ་ལུས་ན་དེ་མེར་བསྲེག་དགོས།
EXO 12:11 ཡང་ཟ་སྲོལ་ནི་འདི་ལྟ་སྟེ། ཁྱོད་རྣམས་ཀྱིས་ཐུ་བ་བརྫེས་པ་དང་རྐང་པར་ལྷམ་གྱོན་ཞིང་། འཁར་བ་ལག་ཏུ་བཟུང་ནས་བྲེལ་མྱུར་ངང་བཟའ་དགོས་ལ། དེ་ནི་ཡ་ཝཱེའི་པེ་སག་གི་དུས་ཆེན་ཡིན་ནོ། །
EXO 12:12 མཚན་མོ་དེར་ང་རང་ཨེ་ཅིབ་ཡུལ་དུ་རྒྱུ་ཞིང་། མི་ཕྱུགས་གང་ཡིན་ཡང་ཨེ་ཅིབ་ཡུལ་གྱི་སྐྱེས་འགོ་ཐམས་ཅད་གསོད་པ་དང་། ཨེ་ཅིབ་ཡུལ་གྱི་ལྷ་ཀུན་ལ་ཁྲིམས་ཐག་གཅོད་པར་བྱ། བདག་ནི་ཡ་ཝཱེ་ཡིན།
EXO 12:13 ཁྲག་དེ་ཁྱོད་རྣམས་གནས་སའི་ཁང་པའི་སྟེང་རྟགས་སུ་འགྱུར་ལ། ངས་ཁྲག་དེ་མཐོང་བ་དང་ཕར་བརྒལ་ཞིང་། ཨེ་ཅིབ་ཡུལ་ལ་བརྡུང་བའི་ཚེ། མེད་པར་བཟོ་བའི་ཆག་སྒོ་དེ་ཁྱོད་རྣམས་ལ་འཕོག་པར་མི་འགྱུར་རོ། །
EXO 12:14 ཡང་ཉིན་དེ་ནི་ཁྱོད་ཅག་གི་ཕྱིར་རྗེས་དྲན་དུ་འགྱུར་ཞིང་། དཀོན་མཆོག་ཡ་ཝཱེ་ལ་དུས་ཆེན་ཞིག་རོལ་དགོས་པ་དང་། ཁྱོད་རྣམས་ཀྱིས་མི་རབས་ནས་མི་རབས་བར་ཁྲིམས་སྲོལ་དེ་གཏན་དུ་བསྲུང་དགོས།
EXO 12:15 ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས་ཤིང་། ཉིན་དང་པོར་ཁྱོད་ཅག་གིས་རང་གི་ཁྱིམ་ནས་སྐྱུར་རྩི་ཕྱི་རུ་དོར་ཅིག ཅི་ལ་ཞེ་ན། ཉིན་དང་པོ་ནས་ཉིན་བདུན་པའི་བར་དུ་མི་སུ་ཞིག་གིས་སྐྱུར་རྩི་དང་ལྡན་པ་ཞིག་ཟོས་ན། མི་དེ་ཡེས་ར་ཨེལ་གྱི་ཁྲོད་ནས་འཕུད་དགོས་པའི་ཕྱིར་ཡིན།
EXO 12:16 ཉིན་དང་པོར་ཁྱོད་རྣམས་ལ་འདུ་འཛོམས་དམ་པ་ཡོད་དགོས་ལ། ཉིན་བདུན་པར་ཡང་འདུ་འཛོམས་དམ་པ་ཡོད་དགོས། ཉིན་དེ་གཉིས་ལ་མི་རེ་རེར་མཁོ་བའི་ཁ་ཟས་འབའ་ཞིག་སྟ་གོན་བྱེད་པ་ལས་གཞན། ལས་གང་ཡང་བྱེད་མི་རུང་།
EXO 12:17 ཉིན་དེ་ཉིད་ལ་ངས་ཁྱོད་རྣམས་ཀྱི་དཔུང་སྡེ་ཨེ་ཅིབ་ཡུལ་ནས་ཕྱིར་ཁྲིད་པའི་རྐྱེན་གྱིས། ཁྱོད་རྣམས་ཀྱིས་སྐྱུར་མེད་བག་ལེབ་ཀྱི་དུས་ཆེན་བསྲུང་དགོས་ལ། ཉིན་མོ་དེ་བསྲུང་བ་དང་མི་རབས་ནས་མི་རབས་བར་ཁྲིམས་སྲོལ་དེ་གཏན་དུ་བརྩི་དགོས།
EXO 12:18 ཟླ་དང་པོའི་ཚེས་བཅུ་བཞི་ཉིན་གྱི་དགོང་མོ་ནས་ཟླ་དེའི་ཚེས་ཉེར་གཅིག་ཉིན་གྱི་དགོང་མོའི་བར་དུ་སྐྱུར་མེད་བག་ལེབ་བཟའ་དགོས།
EXO 12:19 ཁྱོད་ཅག་གི་ཁྱིམ་རེ་རེར་ཉིན་བདུན་གྱི་རིང་ལ་སྐྱུར་རྩི་ཡོད་མི་རུང་སྟེ། བྱེས་པའམ་ཡུལ་མི་སུ་ཡིན་ཡང་སྐྱུར་རྩི་ཅན་གང་ཞིག་ཟ་མཁན་དེ་ཡེས་ར་ཨེལ་གྱི་ཚོགས་ནས་འཕུད་དགོས་པའི་ཕྱིར་ཡིན།
EXO 12:20 ཁྱོད་རྣམས་ཀྱིས་སྐྱུར་རྩི་ཅན་གང་ཡིན་ཡང་བཟའ་མི་རུང་ལ། ཁྱོད་ཅག་གང་དུ་གནས་ནའང་སྐྱུར་མེད་བག་ལེབ་བཟའ་དགོས་ཞེས་སྨྲོས་ཤིག་གསུངས་སོ། །
EXO 12:21 དེ་ནས་མོ་ཤེ་ཡིས་ཡེས་ར་ཨེལ་གྱི་རྒན་པོ་རྣམས་བོས་ནས་དེ་དག་ལ། ཁྱོད་རྣམས་ཀྱིས་ཁྱིམ་མི་བཞིན་དུ་ལུ་གུ་བླངས་ནས་པེ་སག་གི་ལུ་གུ་ཤོས་ཞིག
EXO 12:22 ཡང་ཨི་སོབ་རྩྭ་ཤིང་ཕོན་པོ་ཞིག་གཞོང་པ་རུ་ཡོད་པའི་ཁྲག་གི་ནང་དུ་སྦངས་ནས། ཁྲག་དེ་སྒོའི་ཡ་ཐེམ་དང་སྒོ་འགྲམ་གཉིས་ལ་བསྐུ་དགོས་ཤིང་། ཞོགས་པའི་བར་དུ་ཁྱོད་རྣམས་ལས་སུ་ཡང་རང་གི་ཁྱིམ་ནས་སྒོ་རུ་འབུད་མི་རུང་།
EXO 12:23 ཅི་ལ་ཞེ་ན། དཀོན་མཆོག་ཡ་ཝཱེ་ཕྱོགས་ཀུན་ལ་རྒྱུ་ཞིང་ཨེ་ཅིབ་པ་རྣམས་དགུམ་པ་དང་། སྒོའི་ཡ་ཐེམ་དང་སྒོ་འགྲམ་གཉིས་ལ་བསྐུས་པའི་ཁྲག་གཟིགས་པ་ན། ཁོང་ཉིད་སྒོ་དེ་ལས་ཕར་བརྒལ་ཞིང་སྲོག་གཅོད་མཁན་དེ་ཁྱོད་ཅག་གི་ཁང་པའི་ནང་ལ་ཁྱོད་རྣམས་དགུམ་དུ་ཡོང་བར་མི་མཛད་པའི་ཕྱིར་རོ། །
EXO 12:24 ཁྱོད་ཅག་གིས་བཀའ་འདི་བསྲུངས་ཏེ། མི་རབས་ནས་མི་རབས་བར་ཁྲིམས་སྲོལ་དེ་གཏན་དུ་བསྲུང་དགོས།
EXO 12:25 ཡང་ཕྱིས་སུ་ཁྱོད་རྣམས་དཀོན་མཆོག་ཡ་ཝཱེས་ཁྱོད་ཅག་ལ་གནང་བར་ཞལ་གྱིས་བཞེས་པའི་ཡུལ་དུ་སླེབས་དུས། ཁྱོད་ཅག་གིས་ཆོ་ག་དེ་བསྲུང་དགོས།
EXO 12:26 ཁྱོད་ཅག་གི་བུ་ཕྲུག་རྣམས་ཀྱིས་ཆོ་ག་འདིའི་དོན་ཅི་ཡིན་ཞེས་འདྲི་བའི་ཚེ།
EXO 12:27 ཁྱོད་ཅག་གིས་དེ་རྣམས་ལ། འདི་ནི་དཀོན་མཆོག་ཡ་ཝཱེ་ལ་འབུལ་བའི་པེ་སག་གི་མཆོད་པ་དེ་ཡིན། ཁོང་གིས་ཨེ་ཅིབ་པ་རྣམས་ལ་བརྡུངས་པའི་ཚེ། ཨེ་ཅིབ་ཡུལ་དུ་ཡོད་པའི་ཡེས་ར་ཨེལ་པ་རྣམས་ཀྱི་ཁང་པ་རྣམས་ལས་ཕར་བརྒལ་ཏེ་རང་ཅག་གི་ཁྱིམ་ཚང་རེ་རེ་ཐར་བར་མཛད་པ་ཡིན་སྨྲོས་ཤིག་ཅེས་སྨྲས། དེ་ནས་མི་རྣམས་ཀྱིས་མགོ་བོ་བཏུད་ནས་ཕྱག་བཙལ་ཞིང་།
EXO 12:28 དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་བཀའ་ཇི་ལྟར་གནང་བ་ཡིན་ན། ཡེས་ར་ཨེལ་པ་རྣམས་ཀྱིས་དེ་བཞིན་དུ་བྱས་སོ། །
EXO 12:29 ཡང་ནམ་ཕྱེད་ལ་དཀོན་མཆོག་ཡ་ཝཱེས་ཨེ་ཅིབ་ཡུལ་དུ་རྒྱལ་ཁྲི་ལ་སྡོད་པའི་ཕཱར་ཨོལ་གྱི་སྐྱེས་འགོ་ནས་བཙོན་དུ་བཅུག་ཡོད་པའི་བཙོན་པའི་སྐྱེས་འགོའི་བར་དང་། ཕྱུགས་ཕྲུག་འགོ་མ་རྣམས་བཅས་སྐྱེས་འགོ་ཐམས་ཅད་བཀུམས།
EXO 12:30 མཚན་མོ་དེ་ལ་ཕཱར་ཨོལ་དང་དེའི་འཁོར་གཡོག་རྣམས་དང་། ཨེ་ཅིབ་པ་ཐམས་ཅད་ལངས་ནས་ཨེ་ཅིབ་ཡུལ་དུ་ངུ་སྐད་ཆེན་པོ་ཞིག་བྱུང་བ་སྟེ། འཆི་བ་མེད་པའི་ཁྱིམ་ཚང་གཅིག་ཀྱང་མ་ལུས་པའི་ཕྱིར་རོ། །
EXO 12:31 དེ་ནས་མཚན་མོའི་དུས་སུ་ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་ཏེ་ན་རེ། ཁྱོད་གཉིས་དང་ཡེས་ར་ཨེལ་པ་རྣམས་ངའི་འབངས་མིའི་ཁྲོད་ནས་ཆས་ཏེ་སོང་ཞིག ཁྱོད་གཉིས་ཀྱིས་སྨྲས་པ་བཞིན་དུ་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་སོང་ཞིག
EXO 12:32 ཡང་ཁྱོད་ཀྱིས་སྨྲས་པ་བཞིན་དུ་ར་ལུག་གི་ཁྱུ་དང་བ་ཁྱུ་དེད་ནས་སོང་ལ། ང་རང་ལ་ཡང་བྱིན་གྱིས་རློབས་ཤིག་ཅེས་སྨྲས་སོ། །
EXO 12:33 ཨེ་ཅིབ་པ་རྣམས་ཀྱིས་ངེད་ཐམས་ཅད་འཆི་བར་འགྱུར་ཞེས་སྨྲས་པས། ཡེས་ར་ཨེལ་པ་རྣམས་ལ་ནན་གྱིས་བསྐུལ་ཏེ་ཁོ་རྣམས་ཡུལ་དེ་ནས་མྱུར་དུ་ཕྱིར་བཏོན།
EXO 12:34 དེ་ནས་ཁོ་རྣམས་ཀྱིས་ད་དུང་སྐྱུར་རྩི་མ་བཏབ་པའི་བག་ཟན་དང་ཟན་གཞོང་བཅས་གྱོན་གོས་ཀྱིས་བཏུམས་ཏེ་ཕྲག་ལ་ཁུར་ནས་ཁྱེར།
EXO 12:35 ཡེས་ར་ཨེལ་པ་རྣམས་ཀྱིས་མོ་ཤེ་ཡིས་སྨྲས་པ་བཞིན་དུ་བསྒྲུབས་པ་སྟེ། ཨེ་ཅིབ་པ་རྣམས་ལས་གསེར་དངུལ་གྱི་ཡོ་བྱད་དང་གྱོན་གོས་བསླངས་པ་དང་།
EXO 12:36 དཀོན་མཆོག་ཡ་ཝཱེས་ཨེ་ཅིབ་པ་དག་གི་མིག་མདུན་དུ་མི་རྣམས་ལ་ཐུགས་རྗེ་ཐོབ་པར་མཛད་པས། དེ་དག་གིས་ཅི་བསླངས་པ་བཞིན་དུ་ཐོབ་ཅིང་། ཨེ་ཅིབ་པའི་རྒྱུ་ནོར་དག་བཅོམ་ནས་ཁྱེར་ཏོ། །
EXO 12:37 དེ་ནས་ཡེས་ར་ཨེལ་པ་རྣམས་རཱ་ཨམ་སེའེ་ནས་ཆས་ཏེ་སོའུ་ཀོད་ཡུལ་དུ་ཕྱིན་པ་དང་། བུད་མེད་དང་ཕྲུ་གུ་རྣམས་མ་ཐེ་བར། རྐང་པ་བརྒྱབ་ནས་འགྲོ་བའི་སྐྱེས་པའི་མི་གྲངས་ནི་འབུམ་དྲུག་ཙམ་ཡོད།
EXO 12:38 མི་ཚོགས་འདྲེས་མ་ཞིག་དང་ར་ལུག་དང་བ་གླང་གི་ཁྱུ་རྣམས་ཏེ་སྒོ་ཕྱུགས་གྲངས་ལས་འདས་པའང་ཁོ་རྣམས་དང་མཉམ་དུ་སོང་བ་དང་།
EXO 12:39 ཡང་ཁོ་རྣམས་ཀྱིས་ཨེ་ཅིབ་ཡུལ་ནས་ཁྱེར་བའི་བག་ཟན་ནས་སྐྱུར་མེད་བག་ལེབ་བསྲེགས་པ་སྟེ། ཅི་ལ་ཞེ་ན། ཨེ་ཅིབ་ཡུལ་ནས་བཏོན་ཞིང་འགོར་འགྱང་བྱེད་མ་ནུས་པས་བག་ཟན་ལ་སྐྱུར་རྩི་མ་བཅུག་པ་དང་། རང་གི་ཆེད་དུ་བཟའ་བཅའ་ཅི་ཡང་གྲ་སྒྲིག་བྱས་མེད་པའི་ཕྱིར་རོ། །
EXO 12:40 ཡེས་ར་ཨེལ་པ་རྣམས་ཨེ་ཅིབ་ཡུལ་དུ་བསྡོམས་པས་ལོ་ངོ་བཞི་བརྒྱ་སུམ་ཅུར་བསྡད།
EXO 12:41 ཡང་ལོ་བཞི་བརྒྱ་སུམ་ཅུ་ཏག་ཏག་ལོན་པའི་ཉིན་དེ་ལ་དཀོན་མཆོག་ཡ་ཝཱེའི་དཔུང་སྡེ་ཐམས་ཅད་ཨེ་ཅིབ་ཡུལ་ནས་ཕྱིར་ཐོན་ཞིང་།
EXO 12:42 མཚན་མོ་དེ་ནི་དཀོན་མཆོག་ཡ་ཝཱེས་ཁོ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པའི་མཚན་མོ་ཡིན་པས། ཡེས་ར་ཨེལ་པ་རྣམས་དང་དེ་དག་གི་བུ་རབས་ཐམས་ཅད་ཀྱིས་མཚན་མོ་དེ་དཀོན་མཆོག་ཡ་ཝཱེ་ལ་ནན་བརྩི་བྱེད་དགོས་སོ། །
EXO 12:43 ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ། པེ་སག་དུས་ཆེན་གྱི་ཁྲིམས་སྲོལ་ནི་འདི་ལྟར་ཡིན་ཏེ། ཕྱི་ཕྱོགས་པ་སུ་ཡིན་ཡང་ལུ་གུའི་ཤ་བཟའ་མི་རུང་།
EXO 12:44 འོན་ཀྱང་། དངུལ་སྤྲད་ནས་ཉོས་པའི་གཡོག་པོ་ནི་མཚན་སྐྱི་བཅད་པ་ཡིན་ན་དེས་བཟའ་རུང་བ་ཡིན།
EXO 12:45 བྱེས་སུ་སྡོད་པའམ་གླ་པ་སུ་ཡིན་ཡང་དེ་ལས་བཟའ་མི་རུང་།
EXO 12:46 ཅིས་ཀྱང་ཁང་པ་གཅིག་གི་ནང་དུ་བཟའ་དགོས་ཤིང་། ལུ་གུ་དེའི་ཤ་ལས་ཅུང་ཙམ་ཡང་ཁང་པའི་ཕྱི་རུ་འཁྱེར་མི་འོས་ལ། དེའི་རུས་པ་གཅིག་ཀྱང་གཅོག་མི་རུང་།
EXO 12:47 ཡེས་ར་ཨེལ་གྱི་ཚོགས་ཐམས་ཅད་ཀྱིས་ཁྲིམས་སྲོལ་དེ་བསྲུང་དགོས།
EXO 12:48 གལ་ཏེ་བྱེས་པ་ཞིག་ཁྱོད་ཅག་གི་ཁྲོད་དུ་གནས་ཏེ་དཀོན་མཆོག་ཡ་ཝཱེ་ལ་པེ་སག་གི་དུས་ཆེན་བསྲུང་བར་དགའ་ཞིང་། ཁྱིམ་དེའི་སྐྱེས་པ་ཐམས་ཅད་ཀྱི་མཚན་སྐྱི་བཅད་ན། ད་གཟོད་ཡུལ་མི་ལྟར་ཡོང་ནས་དུས་ཆེན་བསྲུང་དུ་འཇུག་རུང་བ་ཡིན། འོན་ཀྱང་། མཚན་སྐྱི་མ་བཅད་པ་དག་གིས་དེ་ལས་བཟའ་མི་འོས།
EXO 12:49 ཡུལ་མི་དང་ཁྱོད་ཅག་གི་ཁྲོད་དུ་གནས་པའི་བྱེས་པ་རྣམས་ལ་ཁྱད་པར་གང་ཡང་མེད་པར་བཀའ་ཁྲིམས་གཅིག་ཡོད་དགོས་ཞེས་གསུངས་སོ། །
EXO 12:50 དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་བཀའ་ཇི་ལྟར་གནང་བ་ཡིན་ན། ཡེས་ར་ཨེལ་པ་ཐམས་ཅད་ཀྱིས་དེ་བཞིན་དུ་བྱས་ཤིང་།
EXO 12:51 ཉིན་དེ་ལ་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཁོ་ཚོའི་དཔུང་སྡེ་བཞིན་དུ་ཨེ་ཅིབ་ཡུལ་ནས་ཕྱི་རུ་ཁྲིད་པར་མཛད་དོ། །
EXO 13:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 13:2 ཡེས་ར་ཨེལ་པ་རྣམས་ཀྱི་ཁྲོད་དུ་སྐྱེས་འགོ་ནི་མི་ཕྱུགས་གང་ཡིན་རུང་དེ་དག་བདག་གི་ཡིན་ཏེ། ཁོ་རྣམས་ཐམས་ཅད་ང་ལ་དམ་པར་གྱིས་ཞེས་གསུངས་སོ། །
EXO 13:3 དེ་ནས་མོ་ཤེ་ཡིས་མི་རྣམས་ལ། ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཐོན་པའི་ཉིན་འདི་རྗེས་སུ་དྲན་པར་གྱིས་ཤིག དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་ཁྱོད་རྣམས་ཡུལ་དེ་ནས་ཕྱི་རུ་ཁྲིད་པས། སྐྱུར་རྩི་ཅན་གང་ཡང་བཟའ་མི་རུང་།
EXO 13:4 ཨ་རྦིབ་ཟླ་བའི་ཉིན་འདི་ལ་ཁྱོད་རྣམས་ཕྱི་རོལ་ཏུ་ཐོན་པ་ཡིན་ནོ། །
EXO 13:5 དཀོན་མཆོག་ཡ་ཝཱེས་ཀ་ན་ཨན་པ་དང་། ཧེད་པ་དང་། ཨེ་མོར་པ་དང་། ཧེ་བི་པ་དང་། ཡེ་བུ་སི་པ་རྣམས་ཀྱི་ཡུལ་ཏེ། འོ་མ་དང་སྦྲང་རྩི་བཞུར་བའི་ཡུལ་དེ་ཁྱོད་ཅག་གི་ཕ་མེས་ཡང་མེས་རྣམས་ལ་མནའ་བཞེས་པ་བཞིན་ཁྱོད་རྣམས་ལ་གནང་ངེས་ཤིང་། ཁོང་གིས་ཁྱོད་རྣམས་དེ་ལ་འཁྲིད་པར་འགྱུར་བ་དང་། དེའི་དུས་སུ་ཟླ་བ་འདི་ལ་ཁྱོད་རྣམས་ཀྱིས་ཁྲིམས་སྲོལ་བསྲུང་དགོས་པ་ནི་འདི་ལྟ་སྟེ།
EXO 13:6 ཉིན་བདུན་གྱི་རིང་ཁྱོད་རྣམས་ཀྱིས་སྐྱུར་མེད་བག་ལེབ་ཟོ་ལ། ཉིན་བདུན་པར་དཀོན་མཆོག་ཡ་ཝཱེ་ལ་དུས་ཆེན་བསྲུང་བར་བྱའོ།
EXO 13:7 ཉིན་བདུན་པོའི་རིང་ལ་སྐྱུར་མེད་བག་ལེབ་བཟའ་དགོས་ཤིང་ཁྱོད་རྣམས་ཀྱི་ཁྲོད་དུ་སྐྱུར་རྩི་ཅན་གང་ཡང་མཐོང་མི་འོས། ཁྱོད་རྣམས་ཀྱི་ཡུལ་ཐམས་ཅད་ནས་ཀྱང་སྐྱུར་རྩི་མཐོང་མི་རུང་།
EXO 13:8 ཡང་ཉིན་དེར་ཁྱོད་རྣམས་ཀྱིས་རང་གི་བུ་ལ། འདི་ནི་ང་རང་ཨེ་ཅིབ་ཡུལ་ནས་ཕྱིར་ཐོན་པའི་སྐབས་སུ་དཀོན་མཆོག་ཡ་ཝཱེས་ང་རང་ལ་དེ་ལྟར་མཛད་པའི་ཕྱིར་ཡིན་ཞེས་སྨྲ་དགོས།
EXO 13:9 དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པའི་རྐྱེན་གྱིས། ཁྲིམས་སྲོལ་འདི་ནི་ཁྱོད་རྣམས་ཀྱི་ལག་པར་བཏབ་པའི་རྟགས་ཐམ་དང་། ཁྱོད་རྣམས་ཀྱི་དཔྲལ་བར་ཡོད་པའི་རྗེས་དྲན་དུ་འགྱུར་ཏེ། དཀོན་མཆོག་ཡ་ཝཱེའི་བཀའ་ཁྲིམས་ནི་དུས་རྒྱུན་ཁྱོད་རྣམས་ཀྱི་ངག་ཏུ་ཡོད་པར་བྱའོ། །
EXO 13:10 དེ་བས་ཁྱོད་རྣམས་ཀྱིས་ཁྲིམས་སྲོལ་འདི་ལོ་རེ་ནས་ལོ་རེ་བཞིན་དུས་ཚོད་ལྟར་བསྲུང་དགོས་སོ། །
EXO 13:11 དཀོན་མཆོག་ཡ་ཝཱེས་དེ་སྔར་ཁྱོད་དང་ཁྱོད་རྣམས་ཀྱི་ཕ་མེས་ཡང་མེས་ལ་མནའ་བཞེས་པ་བཞིན་དུ། མ་འོངས་པར་ཁྱོད་རྣམས་ཀ་ན་ཨན་པའི་ཡུལ་དུ་ཁྲིད་ནས་ཡུལ་དེ་ཁྱོད་ཅག་ལ་གནང་བའི་ཚེ།
EXO 13:12 ཁྱོད་རྣམས་ཀྱིས་སྐྱེས་འགོ་ཀུན་དང་། ཡང་ཁྱོད་རྣམས་ཀྱི་ཕྱུགས་ཕྲུག་འགོ་མ་ཐམས་ཅད་དཀོན་མཆོག་ཡ་ཝཱེ་ལ་འབུལ་དགོས་ལ། ཕོ་ཡིན་པ་རྣམས་དཀོན་མཆོག་ཡ་ཝཱེ་ལ་གཏོགས་པ་ཡིན།
EXO 13:13 འོན་ཀྱང་བོང་ཕྲུག་འགོ་མ་ཐམས་ཅད་ནི་ལུ་གུ་ཞིག་གིས་བླུ་དགོས། ཅི་སྟེ་བླུ་བར་མ་བྱས་ན་དེའི་སྐེ་ཚིགས་རྫོག་ཅིག ཁྱོད་རྣམས་ཀྱི་བུ་སྐྱེས་འགོ་ཐམས་ཅད་བླུ་དགོས།
EXO 13:14 མ་འོངས་པར་ཁྱོད་རྣམས་ཀྱི་བུ་ཡིས་དེའི་དོན་ཅི་ཡིན་པ་ཁྱོད་རྣམས་ལ་འདྲི་བའི་ཚེ། ཁྱོད་ཅག་གིས་དེ་ལ་དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་ངེད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཕྱི་རུ་ཁྲིད་པར་མཛད་ཅིང་།
EXO 13:15 ཕཱར་ཨོལ་གྱི་སེམས་གྱོང་པོ་ཡིན་ཞིང་ངེད་རྣམས་འགྲོ་རུ་མི་འཇུག་པ་ཙམ་བྱས་པའི་སྐབས་སུ། དཀོན་མཆོག་ཡ་ཝཱེས་ཨེ་ཅིབ་ཡུལ་གྱི་སྐྱེས་འགོ་ཐམས་ཅད་དེ་མིའི་སྐྱེས་འགོ་ནས་ཕྱུགས་ཕྲུག་འགོ་མའི་བར་དུ་བཀུམས། དེའི་ཕྱིར་ངས་ཕྱུགས་ཕྲུག་འགོ་མ་ཕོ་ཡིན་པ་ཐམས་ཅད་དཀོན་མཆོག་ཡ་ཝཱེ་ལ་འབུལ། འོན་ཀྱང་བུ་སྐྱེས་འགོ་ཐམས་ཅད་བླུ་བ་ཡིན་ཞེས་སྨྲ་དགོས།
EXO 13:16 དོན་འདི་ནི་ཁྱོད་རྣམས་ཀྱི་ལག་པར་བཏབ་པའི་རྟགས་ཐམ་དང་དཔྲལ་བ་རུ་མཚོན་བྱེད་ཡིན་དགོས་ཏེ། དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་རང་ཅག་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པའི་ཕྱིར་ཡིན་ཞེས་སྨྲས་སོ། །
EXO 13:17 ཡང་ཕཱར་ཨོལ་གྱིས་མི་འགྲོ་རུ་བཅུག་པའི་དུས་སུ། ཕེ་ལེ་ཤེད་ཡུལ་གྱི་ལམ་ཐག་ཉེ་ནའང་དཀོན་མཆོག་གིས་དེ་དག་ཡུལ་དེ་བརྒྱུད་ནས་མ་ཁྲིད་དོ། །ཅིའི་ཕྱིར་ཞེ་ན། ཁོང་གི་ཐུགས་སུ་མི་རྣམས་ཀྱིས་དམག་འཁྲུག་འབྱུང་བ་མཐོང་ན་འགྱོད་ཅིང་ཨེ་ཅིབ་ཡུལ་དུ་ཕྱིར་ལོག་ཉེན་ཆེ་བར་དགོངས་པས་སོ། །
EXO 13:18 དེའི་ཕྱིར། དཀོན་མཆོག་གིས་མི་རྣམས་རྒྱ་མཚོ་དམར་པོའི་འགྲམ་གྱི་དབེན་སྟོང་ལ་ལམ་བསྐོར་ནས་ཁྲིད་པ་དང་། ཡེས་ར་ཨེལ་པ་རྣམས་དམག་ཆས་དང་བཅས་པ་ཨེ་ཅིབ་ཡུལ་ནས་ཡར་སོང་།
EXO 13:19 མོ་ཤེ་ཡིས་ཡོ་སེབ་ཀྱི་རུས་པའང་མཉམ་དུ་ཁྱེར་ཏོ། །གང་ལ་ཟེར་ན། ཡོ་སེབ་ཀྱིས་ཡེས་ར་ཨེལ་པ་རྣམས་ལ་མནའ་སྐྱེལ་དུ་བཅུག་ཅིང་། ཁོ་རྣམས་ལ་འདི་ལྟར། དཀོན་མཆོག་གིས་ཁྱོད་རྣམས་ལ་གཟིགས་སྐྱོང་གནང་བར་འགྱུར། ཁྱོད་ཅག་གིས་ངའི་རུས་པ་འདི་ནས་འཁྱེར་དགོས་ཞེས་བཀའ་གནང་བའི་ཕྱིར་རོ། །
EXO 13:20 དེ་ནས་ཁོ་རྣམས་སོའུ་ཀོད་ཡུལ་ནས་ཆས་ཏེ་དབེན་སྟོང་གི་ལོགས་སུ་ཨེ་ཐཱམ་བྱ་བའི་གནས་སུ་སྒར་བཏབ།
EXO 13:21 དཀོན་མཆོག་ཡ་ཝཱེས་ཉིན་མོའི་དུས་སུ་སྤྲིན་གྱི་ཀ་བ་ཞིག་གི་དབྱིབས་ནས་ཁོ་རྣམས་ལ་ལམ་ཁྲིད་པ་དང༌། མཚན་མོར་མེའི་ཀ་བ་ཞིག་གི་དབྱིབས་ནས་དེ་རྣམས་ལ་འོད་སྤྲོས་ཏེ། ཁོ་རྣམས་ཉིན་མཚན་ཀུན་ཏུ་འགྲོ་ནུས་པར་མཛད།
EXO 13:22 ཉིན་མོར་སྤྲིན་གྱི་ཀ་བ་དང་མཚན་མོར་མེའི་ཀ་བ་ནི་ནམ་ཡིན་ཡང་མི་རྣམས་དང་ཁ་མ་བྲལ་ཏོ། །
EXO 14:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 14:2 ཡེས་ར་ཨེལ་པ་རྣམས་ཕྱིར་ལོག་སྟེ་མིག་དོལ་དང་རྒྱ་མཚོའི་བར་གྱི་ཕི་ཧཱ་ཧི་རོད་བྱ་བའི་མདུན་དུ། པཱ་ཨལ་ཚཱ་ཕོན་ཁ་གཏད་ཀྱི་རྒྱ་མཚོའི་འགྲམ་ལ་སྒར་འདེབས་པའི་བཀའ་སྒོས་ཤིག
EXO 14:3 དེ་ནས་ཕཱར་ཨོལ་གྱི་སེམས་སུ་ཡེས་ར་ཨེལ་པ་རྣམས་ཡུལ་འདི་རུ་མགོ་འཐོམས་ཏེ་དབེན་སྟོང་གིས་དེ་དག་འགོག་བཞིན་འདུག་སྙམ་ངེས།
EXO 14:4 བདག་གིས་ཕཱར་ཨོལ་གྱི་སེམས་གྱོང་པོར་བྱས་ཏེ། ཁོས་དེ་དག་གི་རྗེས་འདེད་པ་དང་། ཕཱར་ཨོལ་དང་དེའི་དམག་དཔུང་དང་བཅས་པ་ལས་བདག་ལ་གཟི་བརྗིད་ལྡན་པར་འགྱུར་ཞིང་། ཨེ་ཅིབ་པ་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་ནས་ཡེས་ར་ཨེལ་པ་རྣམས་ཀྱིས་དེ་བཞིན་དུ་བྱས་སོ། །
EXO 14:5 ཡང་ཨེ་ཅིབ་རྒྱལ་པོར་མི་རྣམས་བྲོས་སོང་ཞེས་གཞན་ཞིག་གིས་སྨྲས་པ་ལ། ཕཱར་ཨོལ་དང་དེའི་འཁོར་གཡོག་རྣམས་མི་རྣམས་ཀྱི་ཕྱོགས་སུ་སེམས་འགྱུར་ནས། ངེད་རྣམས་ལ་གཡོག་བྱེད་པའི་ཡེས་ར་ཨེལ་པ་རྣམས་འགྲོ་རུ་བཅུག་ཅིང་། ངེད་རྣམས་ཀྱིས་དོན་ཅི་འདྲ་བ་བྱས་སམ་ཞེས་སྨྲས་པ་དང་།
EXO 14:6 ཕཱར་ཨོལ་གྱིས་རང་གི་ཤིང་རྟ་སྟ་གོན་བྱས་ཤིང་། དམག་དཔུང་ཁྲིད་ནས་སོང་བ་སྟེ།
EXO 14:7 ཤིང་རྟ་མཆོག་ཏུ་གྱུར་པ་དྲུག་བརྒྱ་དང་། ཨེ་ཅིབ་ཡུལ་གྱི་ཤིང་རྟ་ཇི་ཙམ་ཡོད་པ་ཐམས་ཅད་དང་། དེ་ཐམས་ཅད་ཀྱི་འགོ་དཔོན་རྣམས་མཉམ་དུ་ཁྲིད་དོ། །
EXO 14:8 དཀོན་མཆོག་ཡ་ཝཱེས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་གྱི་སེམས་གྱོང་པོར་མཛད་པས། ཁོ་སྤོབས་པ་ཆེན་པོའི་ངང་ནས་ཕར་འགྲོ་བཞིན་པའི་ཡེས་ར་ཨེལ་པ་རྣམས་ཀྱི་ར་མདར་བརྒྱུགས།
EXO 14:9 དེ་ནས་ཨེ་ཅིབ་པ་རྣམས་ཀྱིས་དེ་དག་གི་རྗེས་དེད་དེ། ཕཱར་ཨོལ་གྱི་རྟ་དང་ཤིང་རྟ་ཐམས་ཅད་དང་། སྐྱ་དམག་རྣམས་དང་། དམག་དཔུང་བཅས་ཕི་ཧཱ་ཧི་རོད་ཀྱི་ཉེ་སར། པཱ་ཨལ་ཚཱ་ཕོན་གྱི་ཁ་གཏད་དུ་རྒྱ་མཚོའི་འགྲམ་ལ་ཡོད་པའི་སྒར་འདེབས་ས་རུ་རྗེས་ཆོད་དོ། །
EXO 14:10 ཕཱར་ཨོལ་ཉེ་བར་སླེབས་པའི་དུས་སུ། ཡེས་ར་ཨེལ་པ་རྣམས་ཀྱིས་ཡར་བལྟས་པ་དང་། ལྟོས་ཤིག ཨེ་ཅིབ་པ་རྣམས་ཀྱིས་རྗེས་དེད་ནས་ཡོང་བཞིན་པ་མཐོང་ནས་ཤིན་ཏུ་འཇིགས་ཏེ་དཀོན་མཆོག་ཡ་ཝཱེ་ལ་ངུ་འབོད་བྱས་པ་དང་།
EXO 14:11 མོ་ཤེ་ལ་འདི་ལྟར། ཨེ་ཅིབ་ཡུལ་དུ་དུར་ས་མེད་པས་ཁྱོད་ཀྱིས་ང་ཚོ་དབེན་སྟོང་ལ་འཆི་བར་ཁྲིད་དམ། ཁྱོད་ཀྱིས་ངེད་རྣམས་ལ་འདི་ལྟར་བྱས་ཏེ་ཨེ་ཅིབ་ཡུལ་ནས་ཕྱིར་ཁྲིད་འོངས་པ་ཅི་ཡིན།
EXO 14:12 ངེད་ཅག་གིས་ཨེ་ཅིབ་ཡུལ་ནས་ཁྱོད་ལ། ངེད་རྣམས་འདིར་བསྐྱུར་ནས་ཨེ་ཅིབ་པ་རྣམས་ལ་གཡོག་བྱེད་དུ་ཆུག་ཅེས་སྨྲས་པ་མ་ཡིན་ནམ། ཅིའི་ཕྱིར་ཞེ་ན། དབེན་སྟོང་དུ་འཆི་བ་ལས་ཨེ་ཅིབ་པ་རྣམས་ལ་གཡོག་བྱས་ན་ལེགས་པའི་ཕྱིར་ཡིན་ཞེས་སྨྲས་སོ། །
EXO 14:13 དེ་ནས་མོ་ཤེ་ཡིས་མི་རྣམས་ལ་འདི་ལྟར། མི་འཇིགས་པར་བརྟན་པོར་སྡོད་ཅིག དཀོན་མཆོག་ཡ་ཝཱེས་དེ་རིང་ཉིན་མོར་ཁྱོད་ཅག་ལ་གནང་ངེས་པའི་ཐར་པ་ལ་ལྟོས་དང་། དེ་རིང་ཉིན་མོར་ཁྱོད་རྣམས་ཀྱིས་མཐོང་བའི་ཨེ་ཅིབ་པ་དེ་དག་ནི་ཕྱིས་སུ་ནམ་ཡང་མཐོང་བར་མི་འགྱུར།
EXO 14:14 ཁྱོད་ཅག་ལྷོད་ལྷོད་གྱིས་དང་། དཀོན་མཆོག་ཡ་ཝཱེས་ཁྱོད་ཅག་གི་དོན་དུ་འཐབ་མོ་མཛད་ངེས་ཡིན་ཞེས་སྨྲས་སོ། །
EXO 14:15 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ང་ལ་ངུ་འབོད་བྱེད་དོན་ཅི། ཡེས་ར་ཨེལ་པ་རྣམས་མདུན་དུ་འགྲོ་བའི་བཀའ་གནོངས་ཤིག
EXO 14:16 ཁྱོད་ཀྱིས་འཁར་བ་ཡར་བཀྱགས་ནས་ལག་པ་རྒྱ་མཚོའི་ཕྱོགས་སུ་རྐྱོངས་ལ་མཚོ་ཁག་གཉིས་སུ་ཕྱེས་ཤིག ཡེས་ར་ཨེལ་པ་རྣམས་རྒྱ་མཚོའི་དཀྱིལ་ནས་སྐམ་སའི་སྟེང་དུ་བགྲོད་པར་འགྱུར།
EXO 14:17 ལྟོས་དང་། ངས་ཨེ་ཅིབ་པ་རྣམས་ཀྱི་སེམས་གྱོང་པོར་བྱས་ཏེ་ཁོ་རྣམས་དེ་དག་གི་རྗེས་དེད་ནས་འགྲོ་བ་དང་། ཕཱར་ཨོལ་དང་དེའི་དམག་དཔུང་དང་། ཤིང་རྟ་དང་སྐྱ་དམག་རྣམས་བརྒྱུད་ནས་བདག་ལ་གཟི་བརྗིད་ལྡན་པར་འགྱུར།
EXO 14:18 ཡང་ཕཱར་ཨོལ་དང་དེའི་ཤིང་རྟ་དང་སྐྱ་དམག་རྣམས་བརྒྱུད་ནས་བདག་ལ་གཟི་བརྗིད་ཐོབ་པའི་ཚེ། ཨེ་ཅིབ་པ་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་སོ། །
EXO 14:19 ཡེས་ར་ཨེལ་གྱི་སྒར་གྱི་སྔོན་ལ་སྐྱོད་པའི་དཀོན་མཆོག་གི་ཕོ་ཉ་ནི་དེ་དག་གི་རྒྱབ་ཏུ་སླེབས་ཤིང་། སྤྲིན་གྱི་ཀ་བ་ཡང་དེ་དག་གི་མདུན་ཕྱོགས་ནས་སོང་སྟེ་རྒྱབ་ཏུ་འགྲེང་ནས་བཞུགས།
EXO 14:20 དེ་ལྟར་ཨེ་ཅིབ་པ་རྣམས་ཀྱི་སྒར་དང་ཡེས་ར་ཨེལ་གྱི་སྒར་གཉིས་ཀྱི་བར་དུ་སྤྲིན་གྱི་ཀ་བ་བཞུགས་ཤིང་། ཕྱོགས་གཅིག་ནི་མུན་ནག་ཡིན་ཡང་ཅིག་ཤོས་སུ་འོད་འཕྲོ་བ་ཡིན་པས། མི་དེ་དག་མཚན་གང་པོར་ཕན་ཚུན་ཉེ་བར་མ་བཅར་ཏོ། །
EXO 14:21 དེ་ནས་མོ་ཤེ་ཡིས་ལག་པ་རྒྱ་མཚོའི་ཕྱོགས་སུ་བརྐྱངས་པ་ན། དཀོན་མཆོག་ཡ་ཝཱེས་མཚན་གང་པོར་ཤར་རླུང་དྲག་པོ་གཡུག་ཏུ་བཅུག་ནས། མཚོ་དེད་ཅིང་སྐམ་སར་མཛད་དེ་ཆུ་ཁག་གཉིས་སུ་ཕྱེས།
EXO 14:22 ཡེས་ར་ཨེལ་པ་རྣམས་རྒྱ་མཚོའི་དཀྱིལ་ནས་སྐམ་སར་འགྲུལ་ཏེ། ཆུ་ནི་གཡས་གཡོན་དུ་ལྕགས་རི་ལྟར་གྲུབ།
EXO 14:23 ཨེ་ཅིབ་པ་རྣམས་ཀྱིས་རྗེས་དེད་ཅིང་། ཕཱར་ཨོལ་གྱི་རྟ་རྣམས་དང་། ཤིང་རྟ། སྐྱ་དམག་བཅས་ཐམས་ཅད་དེ་རྣམས་ཀྱི་རྗེས་དེད་ནས་རྒྱ་མཚོའི་དཀྱིལ་དུ་སོང་།
EXO 14:24 ནམ་ལངས་པའི་དུས་སུ་དཀོན་མཆོག་ཡ་ཝཱེས་མེ་དང་སྤྲིན་གྱི་ཀ་བ་ནས་ཨེ་ཅིབ་པའི་དམག་དཔུང་ལ་གཟིགས་ཏེ་ཁོ་རྣམས་འཁྲུག་པར་མཛད།
EXO 14:25 ཡང་ཁོང་གིས་ཤིང་རྟ་རྣམས་ཀྱི་འཁོར་ལོ་བཏོན་པ་དང་། ཤིང་རྟ་དེ་དག་འདེད་དཀའ་བར་གྱུར་པས། ཨེ་ཅིབ་པ་རྣམས་ན་རེ། དཀོན་མཆོག་ཡ་ཝཱེས་ཁོ་རྣམས་ཀྱི་ཕྱིར་དུ་བདག་ཅག་ལ་རྒོལ་བས། ཡེས་ར་ཨེལ་གྱི་མདུན་ནས་འབྲོ་བར་བྱའོ་ཞེས་སྨྲས་སོ། །
EXO 14:26 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཨེ་ཅིབ་པ་དང་དེ་དག་གི་ཤིང་རྟ་དང་སྐྱ་དམག་རྣམས་ཀྱི་ཐོག་ལ་ཆུ་འབབ་པའི་ཕྱིར། ཁྱོད་ཀྱིས་ལག་པ་རྒྱ་མཚོའི་ཕྱོགས་སུ་རྐྱོངས་ཤིག་ཅེས་གསུངས་པ་ལ།
EXO 14:27 མོ་ཤེ་ཡིས་ལག་པ་རྒྱ་མཚོའི་ཕྱོགས་སུ་བརྐྱངས་ཤིང་། ཐོ་རངས་ཀྱི་དུས་སུ་རྒྱ་མཚོ་ནི་སྔར་དང་འདྲ་བར་གྱུར། ཨེ་ཅིབ་པ་རྣམས་དེའི་ཐད་དུ་བྲོས་པ་ལ། དཀོན་མཆོག་ཡ་ཝཱེས་ཁོ་རྣམས་རྒྱ་མཚོའི་དཀྱིལ་དུ་མགོ་རྟིང་བསློགས་པར་མཛད།
EXO 14:28 དེ་ལྟར་ཆུ་ནི་ཕྱིར་བཞུར་ཏེ་ཤིང་རྟ་དང་སྐྱ་དམག་རྣམས་དང་། ཡེས་ར་ཨེལ་པ་རྣམས་ཀྱི་རྗེས་དེད་ནས་རྒྱ་མཚོའི་ནང་དུ་སོང་བའི་ཕཱར་ཨོལ་གྱི་དམག་དཔུང་ཐམས་ཅད་བསྣུབས་ཤིང་གཅིག་ཀྱང་མ་ལུས་སོ། །
EXO 14:29 འོན་ཀྱང་ཡེས་ར་ཨེལ་པ་རྣམས་རྒྱ་མཚོའི་དཀྱིལ་དུ་སྐམ་སར་འགྲུལ་ཏེ། ཆུ་ནི་དེ་དག་གི་གཡས་གཡོན་དུ་ལྕགས་རི་ལྟར་གྲུབ།
EXO 14:30 ཉིན་མོ་དེར་དཀོན་མཆོག་ཡ་ཝཱེས་དེ་ལྟར་ཡེས་ར་ཨེལ་པ་རྣམས་ཨེ་ཅིབ་པ་དག་གི་ལག་ནས་ཐར་བར་མཛད་ཅིང་། ཡེས་ར་ཨེལ་པ་རྣམས་ཀྱིས་ཨེ་ཅིབ་པ་དག་གི་བེམ་པོ་རྣམས་རྒྱ་མཚོའི་འགྲམ་དུ་ཡོད་པ་མཐོང་།
EXO 14:31 དཀོན་མཆོག་ཡ་ཝཱེས་ཨེ་ཅིབ་པ་རྣམས་ལ་མཛད་པའི་ནུས་མཐུ་ཆེན་པོ་དེ་ཡེས་ར་ཨེལ་པ་རྣམས་ཀྱིས་མཐོང་བ་དང་། དཀོན་མཆོག་ཡ་ཝཱེ་ལ་གུས་ཤིང་འཇིགས་ཏེ། ཁོང་དང་ཁོང་གི་ཞབས་ཕྱི་མོ་ཤེ་ལ་ཡིད་ཆེས་སོ། །
EXO 15:1 དེ་ནས་མོ་ཤེ་དང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་བསྟོད་གླུ་ཕུལ་བ་འདི་ལྟ་སྟེ། བདག་གིས་ཡ་ཝཱེ་ཁོང་ལ་བསྟོད་གླུ་འབུལ། ། ཁོང་ནི་དཔལ་དང་བཅས་ཏེ་རྒྱལ་བར་གྱུར། ། རྟ་དང་དེ་ལ་ཞོན་མཁན་ཁོང་གིས་ནི། ། རྒྱ་མཚོའི་ནང་དུ་གཡུགས་པར་གྱུར་པ་འོ། །
EXO 15:2 ཡ་ཝཱེ་ཁོང་ཉིད་ང་ཡི་སྟོབས་ཤུགས་དང་། ། ཡ་ཝཱེ་ཁོང་ཉིད་ང་ཡི་མགུར་མ་ཡིན། ། ཁོང་ནི་ང་ཡི་སྐྱབས་སུ་གྱུར་པ་ཡིན། ། ང་ཡི་དཀོན་མཆོག་ལགས་པས་ངས་ཁོང་ལ། ། བསྟོད་པ་འབུལ་ལོ་ཁོང་ནི་ངའི་ཕ་ཡི། ། དཀོན་མཆོག་ཀྱང་ནི་ཡིན་པས་བཀུར་བར་བྱ། །
EXO 15:3 ཡ་ཝཱེ་ཁོང་ཉིད་དམག་གི་དཔའ་བོ་དང་། ། ཡ་ཝཱེ་ཞེས་པ་ཁོང་གི་མཚན་ཡང་ལགས། །
EXO 15:4 ཕཱར་ཨོལ་ཞེས་པའི་ཤིང་རྟ་རྣམས་དང་ནི། ། དེ་ཡི་དམག་དཔུང་བཅས་ནི་རྒྱ་མཚོར་གཡུགས། ། དམག་དཔོན་མཆོག་རྣམས་ཀྱང་ནི་ཁོང་ཉིད་ཀྱིས། ། རྒྱ་མཚོ་དམར་པོའི་ནང་ལ་ནུབ་ཏུ་བཅུག །
EXO 15:5 གཏིང་ཟབ་ཆུ་ཡིས་དེ་དག་བསྣུབས་པ་དང་། ། རྡོ་ལྟར་དེ་དག་རྒྱ་མཚོའི་མཐིལ་དུ་ལྷུང་། །
EXO 15:6 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཀྱི་ནི། ། ཕྱག་གཡས་དེ་ལ་མཐུ་མངོན་དཔལ་དང་ལྡན། ། ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཀྱིས་ནི། ། ཕྱག་གཡས་དེ་ཡིས་དགྲ་རྣམས་རྡུལ་དུ་བརླགས། །
EXO 15:7 ཁྱེད་ཀྱིས་བརྗིད་ཉམས་ཆེན་པོ་དང་བཅས་ཏེ། ། ངོ་རྒོལ་བྱེད་མཁན་ཐམས་ཅད་བཟློགས་པ་དང་། ། ཁྱེད་ཀྱིས་རང་གི་ཐུགས་ཁྲོའི་མེ་ཡང་གནང་། ། མེ་དེས་ཁོ་རྣམས་སོག་མ་ལྟར་དུ་བསྲེགས། །
EXO 15:8 ཁྱེད་ཀྱི་ཤངས་ལས་ཐོན་པའི་དབུགས་ཀྱིས་ནི། ། ཆུ་རྣམས་མཉམ་དུ་བསགས་ཤིང་ཆུ་རླབས་དག ། རགས་ལྟར་ལངས་ཏེ་བསྡད་ཅིང་སྡོད་པ་ཡིན། ། རྒྱ་མཚོའི་སྙིང་ནས་ཆུ་རྣམས་གོང་བུར་གྲུབ། །
EXO 15:9 དགྲ་བོ་ན་རེ་ངས་ནི་ཁོ་རྣམས་ཀྱི། ། ར་མདར་བརྒྱུགས་ནས་རྗེས་སུ་ཆོད་པར་བྱ། ། བཅོམ་ནོར་དག་ནི་བགོ་བཤའ་རྒྱག་པར་བྱ། ། ང་རང་དེ་ཚོའི་སྟེང་ནས་རང་གི་ནི། ། འདོད་པ་ཚིམ་པར་འགྱུར་ཞིང་རལ་གྲི་ཕྱུང་། ། དངོས་སུ་དེ་དག་མེད་པར་བྱ་ཞེས་སྨྲ། །
EXO 15:10 ཁྱེད་ཀྱིས་ཞལ་ཕུ་དང་བཅས་རླུང་གཡུགས་མཛད། ། རྒྱ་མཚོས་དེ་དག་བསྣུབས་པར་བྱས་པ་དང་། ། ཞ་ཉེ་ལྟར་དུ་ཆུ་བོའི་ཀླུང་དུ་ནུབ། །
EXO 15:11 ཀྱེ་ཀྱེ་ཡ་ཝཱེ་ལགས་ཀྱེ་ལྷ་རྣམས་ཁྲོད། ། ཁྱེད་དང་འདྲ་བ་སུ་ཡོད་སུ་ཡང་མེད། ། དམ་པའི་ནང་ཡང་ཁྱེད་ལྟར་དཔལ་ལྡན་པ། ། སུ་ཡང་མེད་དེ་བསྟོད་ཅིང་འཇིགས་འོས་ལ། ། ངོ་མཚར་དོན་རྣམས་མཛད་ལ་ཁྱེད་འདྲ་མེད། །
EXO 15:12 ཁྱེད་ཀྱིས་ཕྱག་གཡས་བརྐྱངས་ཚེ་ས་ཡིས་ནི། ། དེ་དག་ཁྱུར་མིད་བཏང་ཞིང་ཁྱེད་ཀྱིས་ནི། །
EXO 15:13 བྱམས་དང་སྙིང་རྗེ་ངང་ནས་བླུས་པ་ཡི། ། མི་རྣམས་ཁྲིད་པར་མཛད་ཅིང་མཐུ་ཡིས་ནི། ། ཉིད་ཀྱི་དམ་པའི་གནས་སུ་དེ་དག་དྲངས། །
EXO 15:14 མི་གཞན་རྣམས་ཀྱིས་གཏམ་དེ་ཐོས་ནས་འདར། ། ཕེ་ལེ་ཤེད་ཀྱི་མི་རྣམས་ཟུག་རྔུས་བཟུང་། །
EXO 15:15 ཨེ་དོམ་དཔོན་རིགས་རྣམས་ནི་ཧོན་འཐོར་ཞིང་། ། མོ་ཨབ་དཔའ་བོ་རྣམས་ཀྱང་འདར་ཞིང་འདར། ། ཀ་ན་ཨན་པ་ཀུན་གྱི་སྙིང་སྟོབས་ཞུམ། །
EXO 15:16 དངངས་སྐྲག་དང་ནི་འཇིགས་སྣང་ཁོ་རྣམས་ཀྱི། ། སྟེང་ལ་བབས་སོང་ཀྱེ་ཀྱེ་ཡ་ཝཱེ་ལགས། ། ཁྱེད་ཀྱི་འབངས་མི་དེ་དག་ཕ་རོལ་ཏུ། ། སླེབས་པའི་བར་དང་ཁྱེད་ཀྱིས་བླུས་པ་ཡི། ། མི་རྣམས་ཕར་རོལ་སླེབས་པའི་བར་དུ་ནི། ། ཁྱེད་ཀྱི་ཕྱག་གི་ནུས་མཐུའི་དབང་གིས་ནི། ། མི་གཞན་རྡོ་བཞིན་གྲགས་འགུལ་མེད་པར་ལུས། །
EXO 15:17 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཉིད་ཀྱི། ། གནས་མཆོག་དེ་ནི་ཁྱེད་ཀྱིས་བཞེངས་པ་དང༌། ། རང་གི་ཕྱག་གིས་བཙུགས་པའི་གནས་མཆོག་དེར། ། མི་རྣམས་ཁྲིད་དེ་ཁྱེད་ཀྱི་ནོར་སྐལ་གྱི། ། རི་ལ་སྡོད་དུ་འཇུག་གོ་ཨེ་མ་རྨད། །
EXO 15:18 ཡ་ཝཱེ་ཁྱེད་ཀྱིས་རྒྱུན་ནས་རྒྱུན་དུ་ནི། ། རྒྱལ་སྲིད་བསྐྱངས་ཤིང་སྐྱོང་བར་འགྱུར་བ་འོ། །ཞེས་པའོ། །
EXO 15:19 ཕཱར་ཨོལ་གྱི་རྟ་དག་དང་། གཞན་ཤིང་རྟ་དང་སྐྱ་དམག་བཅས་རྒྱ་མཚོར་ཆས་ཚེ། དཀོན་མཆོག་ཡ་ཝཱེས་རྒྱ་མཚོའི་ཆུ་རྣམས་དེ་དག་གི་ཐོག་ཏུ་སླར་དྲངས་པ་དང་། ཡེས་ར་ཨེལ་པ་རྣམས་འབའ་ཞིག་རྒྱ་མཚོའི་དཀྱིལ་ནས་སྐམ་སར་འགྲུལ་ཏེ་སོང་ངོ་། །
EXO 15:20 ཡང་ཨ་རོན་གྱི་གཅེན་མོ་སྟེ་ལུང་སྟོན་མ་མིར་ཡམ་གྱིས་ལག་ཏུ་སིལ་རྔ་ཞིག་ཐོགས་ནས། བུད་མེད་ཐམས་ཅད་ཀྱང་ཁོ་མོའི་རྗེས་སུ་འབྲངས་ཏེ་ལག་ཏུ་སིལ་རྔ་ཁྱེར་ནས་སླེབས་ཤིང་བྲོ་འཁྲབ། །
EXO 15:21 མིར་ཡམ་གྱིས་དེ་དག་གི་ལན་དུ། ཡ་ཝཱེ་ཁོང་ནི་དཔལ་བཅས་རྣམ་པར་རྒྱལ། ། ཁོང་ལ་བསྟོད་པའི་གླུ་ནི་ལེན་པར་གྱིས། ། རྟ་དང་དེ་ལ་ཞོན་མཁན་ཁོང་གིས་ནི། ། རྒྱ་མཚོའི་ནང་དུ་གཡུགས་པར་གྱུར་པ་འོ། ། ཞེས་བསྟོད་གླུ་ཕུལ་ཏོ། །
EXO 15:22 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་རྒྱ་མཚོ་དམར་པོ་ནས་ཁྲིད་དེ་མདུན་དུ་བསྐྱོད་ཅིང་། དེ་དག་ཤུར་གྱི་དབེན་སྟོང་དུ་སླེབས་པ་དང་། ཉིན་གསུམ་ལ་དབེན་སྟོང་དུ་འགྲུལ་ནས་ཆུ་མ་ཐོབ།
EXO 15:23 མཱ་ར་བྱ་བའི་གནས་སུ་སླེབས་པ་ན་མཱ་ར་ཡི་ཆུ་ནི་ཁ་ཏིག་ཡིན་པས་འཐུང་མ་ནུས། དེའི་ཕྱིར་ཡུལ་དེའི་མིང་ལ་མཱ་ར་ཞེས་ཟེར།
EXO 15:24 དེར་མི་རྣམས་ཀྱིས་མོ་ཤེ་ལ་སྡུག་ཡུས་བཏོན་ཏེ། ངེད་ཅག་གིས་ཅི་འཐུང་ངམ་ཞེས་སྨྲས།
EXO 15:25 དེ་ནས་མོ་ཤེ་ཡིས་དཀོན་མཆོག་ཡ་ཝཱེ་ལ་ཞུ་འབོད་བྱས་ཤིང་། དཀོན་མཆོག་ཡ་ཝཱེས་ཁོ་ལ་ལྗོན་ཤིང་ཞིག་བསྟན་པ་དང་། ཁོས་དེ་ཆུའི་ནང་དུ་གཡུགས་པ་ན་ཆུ་མངར་མོར་གྱུར། དེར་དཀོན་མཆོག་ཡ་ཝཱེས་དེ་དག་ལ་སྒྲིག་ཁྲིམས་དང་སྲོལ་ཡིག་བཙུགས་ནས་ཁོ་རྣམས་ལ་བརྟགས་ཤིང་གསུངས་པ་ནི།
EXO 15:26 ཁྱོད་ཅག་གིས་གཟབ་གཟབ་ངང་ཁྱོད་ཅག་གི་དཀོན་མཆོག་ཡ་ཝཱེའི་གསུང་སྐད་ལ་མཉན་ཏེ། ཁོང་གི་སྤྱན་སྔར་ལེགས་པོ་གང་ཡིན་དེ་སྤྱོད་ཅིང་། གཟབ་ནན་ངང་ཁོང་གི་བཀའ་རྣམས་ལ་མཉན་པ་དང་། སྒྲིག་ཁྲིམས་ཐམས་ཅད་བསྲུངས་ན། ངས་ཨེ་ཅིབ་པ་རྣམས་ལ་ཕོག་ཏུ་བཅུག་པའི་ནད་ཡམས་གང་ཡང་ཁྱོད་ཅག་ལ་འབྱུང་བར་མི་བྱ་སྟེ། ང་ནི་ཁྱོད་རང་གསོ་མཁན་ཡ་ཝཱེ་ཡིན་པའི་ཕྱིར་རོ་ཞེས་པའོ། །
EXO 15:27 དེ་ནས་ཁོ་རྣམས་ཨེ་ལིམ་ཡུལ་དུ་སླེབས་ཤིང་དེ་རུ་ཆུ་མིག་བཅུ་གཉིས་དང་ཏ་ལའི་ཤིང་བདུན་ཅུ་ཡོད་པ་ཡིན། དེར་ཁོ་རྣམས་ཀྱིས་ཆུ་འགྲམ་དུ་སྒར་བཏབ་བོ། །
EXO 16:1 དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཨེ་ལིམ་ཡུལ་ནས་ཆས་པ་དང་། ཨེ་ཅིབ་ཡུལ་ནས་ཐོན་པའི་ཟླ་གཉིས་པའི་ཚེས་བཅོ་ལྔའི་ཉིན་ཨེ་ལིམ་ཡུལ་དང་རི་བོ་སི་ནཱའི་བར་དུ་ཡོད་པའི་སིན་བྱ་བའི་དབེན་སྟོང་དུ་སླེབས།
EXO 16:2 ཡང་དབེན་སྟོང་ནས་ཡེས་ར་ཨེལ་པའི་མི་ཚོགས་ཐམས་ཅད་ཀྱིས་མོ་ཤེ་དང་ཨ་རོན་གཉིས་ལ་སྡུག་ཡུས་བཏོན་ཏེ།
EXO 16:3 ངེད་ཅག་ཨེ་ཅིབ་ཡུལ་དུ་ཤའི་ཁོག་མའི་རྩར་བསྡད་པ་དང་། གྲོད་ཁོག་འགྲང་བའི་དུས་སུ་དཀོན་མཆོག་ཡ་ཝཱེའི་ཕྱག་ནས་ཤི་བ་ཡིན་ན་ཅི་མ་རུང་། ཁྱོད་གཉིས་ཀྱིས་ངེད་ཅག་གི་ཚོགས་ཐམས་ཅད་བཀྲེས་ལྟོགས་ཀྱིས་འཆི་བའི་ཕྱིར་དབེན་སྟོང་འདིར་ཁྲིད་པ་ཡིན་ཞེས་སྨྲས་སོ། །
EXO 16:4 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ལྟོས་དང་། ཁྱོད་ཅག་གི་ཕྱིར་བདག་གིས་ནམ་མཁའ་ནས་བག་ལེབ་འབབ་པར་བྱ་སྟེ། མི་རྣམས་ཕྱི་རུ་སོང་ནས་ཉིན་རེ་བཞིན་ཉིན་གཅིག་གི་སྐལ་བ་བསྡུ་དགོས་ཏེ། དེ་དག་གིས་ངའི་བཀའ་ཁྲིམས་བཞིན་དུ་བྱའམ་མི་བྱ་ལ་བརྟག་པའི་ཕྱིར་ཡིན།
EXO 16:5 ཡང་ཉིན་དྲུག་པ་ལ་སོ་སོས་བསྡུས་འོངས་པ་དེ་གྲ་སྒྲིག་བྱེད་དགོས་ཤིང་། དེ་ནི་ཉིན་རེར་བསྡུས་པ་ལས་ལྡབ་གཉིས་ཡོད་པར་འགྱུར་ཞེས་གསུངས་སོ། །
EXO 16:6 དེ་ནས་མོ་ཤེ་དང་ཨ་རོན་གཉིས་ཀྱིས་ཡེས་ར་ཨེལ་པ་ཐམས་ཅད་ལ་འདི་ལྟར། ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་མཁན་དཀོན་མཆོག་ཡ་ཝཱེ་ཡིན་པ་ཁྱོད་ཅག་གིས་དགོང་མོའི་དུས་སུ་ཤེས་ཡོང་།
EXO 16:7 དཀོན་མཆོག་ཡ་ཝཱེས་ཁྱོད་རྣམས་ཀྱིས་ཁོང་ལ་སྡུག་ཡུས་འདོན་པ་གསན་པས། ཐོ་རངས་ཁྱོད་ཅག་གིས་ཁོང་གི་གཟི་བརྗིད་མཐོང་བར་འགྱུར། ཁྱོད་ཅག་གིས་ངེད་གཉིས་ལ་སྡུག་ཡུས་འདོན་པ་ངེད་གཉིས་ཅི་ཡིན་ནམ་ཞེས་སྨྲས་པ་དང་།
EXO 16:8 ཡང་མོ་ཤེ་ན་རེ། ཁྱོད་ཅག་གིས་དཀོན་མཆོག་ཡ་ཝཱེ་ལ་སྡུག་ཡུས་བཏོན་པ་ཁོང་གིས་ཐམས་ཅད་གསན་པས། ཁྱོད་ཅག་ལ་དགོང་མོའི་ཁ་ཟས་སུ་ཤ་དང་ཐོ་རངས་སུ་ལྟོ་བ་འགྲང་བའི་བག་ལེབ་གནང་བར་འགྱུར། ངེད་གཉིས་སུ་ཡིན་ནམ། ཁྱོད་ཅག་གིས་ངེད་གཉིས་ལ་སྡུག་ཡུས་འདོན་པ་མ་ཡིན་པར། དཀོན་མཆོག་ཡ་ཝཱེ་ལ་སྡུག་ཡུས་འདོན་པ་ཡིན་ཞེས་སྨྲས་སོ། །
EXO 16:9 དེ་ནས་མོ་ཤེ་ཡིས་ཨ་རོན་ལ། ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ། ཁོང་གིས་ཁྱོད་ཅག་གི་སྡུག་ཡུས་གསན་པའི་ཕྱིར། དཀོན་མཆོག་ཡ་ཝཱེའི་དྲུང་དུ་ཚུར་ཤོག་ཅེས་སྨྲ་བར་གྱིས་ཞེས་སྨྲས།
EXO 16:10 ཨ་རོན་གྱིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་གཏམ་སྨྲ་བའི་ཚེ། དེ་དག་གིས་དབེན་སྟོང་གི་ཕྱོགས་སུ་བལྟས་ཤིང་། ཀྱེ་ཧོ། སྤྲིན་གྱི་ནང་དུ་དཀོན་མཆོག་ཡ་ཝཱེའི་གཟི་བརྗིད་མངོན་པར་གྱུར།
EXO 16:11 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 16:12 བདག་གིས་ཡེས་ར་ཨེལ་པ་རྣམས་ཀྱི་སྡུག་ཡུས་གསན་པ་དང་། ཁྱོད་ཀྱིས་དེ་དག་ལ་འདི་ལྟར། ས་སྲོས་ཀྱི་དུས་སུ་ཁྱོད་ཅག་གིས་ཤ་བཟའ་བ་དང་། ཐོ་རངས་བག་ལེབ་ཀྱིས་འགྲང་བར་འགྱུར་ལ། དེ་ནས་ཁྱོད་རྣམས་ཀྱིས་བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་ཤེས་པར་འགྱུར་ཞེས་སྨྲ་བར་གྱིས་ཞེས་གསུངས་སོ། །
EXO 16:13 དེ་ནས་དགོང་མོ་སྲེག་པ་མང་པོ་ཡོང་ནས་སྒར་ཡོངས་སུ་བཀབ་ཅིང་། ཐོ་རངས་སྒར་གྱི་མཐའ་འཁོར་དུ་ཟིལ་བ་བབས་ཡོད།
EXO 16:14 ཟིལ་བ་དེ་ས་ལ་འཐིམས་པ་དང་། ཀྱེ་ཧོ། དཀར་སྲབ་བ་མོ་ལྟ་བུའི་དངོས་པོ་ཞིག་གིས་དབེན་སྟོང་གི་ངོས་ཡོངས་སུ་བཀབ་ཡོད་ཅིང་།
EXO 16:15 ཡེས་ར་ཨེལ་པ་རྣམས་ཀྱིས་དེ་མཐོང་ནས་ཅི་ཡིན་མ་ཤེས་པར་ཕན་ཚུན་ན་རེ། དེ་ཅི་ཡིན་ནམ་ཞེས་དྲིས། དེ་ནས་མོ་ཤེ་ཡིས་དེ་དག་ལ། འདི་ནི་དཀོན་མཆོག་ཡ་ཝཱེས་ཁྱོད་ཅག་ལ་བཟའ་བར་གནང་བའི་བག་ལེབ་དེ་ཡིན།
EXO 16:16 དཀོན་མཆོག་ཡ་ཝཱེའི་བཀའ་ནི་འདི་ལྟར་ཡིན་ཏེ། རེ་རེས་རང་གི་ཟ་ཚད་སྡུས་ལ། སོ་སོས་རང་གི་གུར་ནང་གི་མི་གྲངས་བཞིན་དུ་མི་རེ་ལ་ཨོ་མཱར་ རེ་ལོངས་ཤིག་ཅེས་སྨྲས།
EXO 16:17 དེ་ནས་ཡེས་ར་ཨེལ་པ་རྣམས་ཀྱིས་དེ་བཞིན་བྱས་ཏེ། ཁ་ཤས་ཀྱིས་མང་པོ་བསྡུས། ཁ་ཤས་ཀྱིས་ཉུང་ངུ་བསྡུས།
EXO 16:18 ཨོ་མཱར་གྱི་ཚད་འཇལ་བ་ན་མང་པོ་བསྡུ་མཁན་དེར་ལྷག་མ་མ་བྱུང་ལ། ཉུང་ངུ་བསྡུ་མཁན་དེར་མི་འདང་བའང་མེད། མི་རེ་རེས་རང་རང་གི་ཟ་ཚད་བཞིན་བསྡུས།
EXO 16:19 མོ་ཤེ་ཡིས་དེ་དག་ལ། མི་སུས་ཀྱང་སང་ཉིན་ཞོགས་པའི་བར་དུ་ལྷག་མ་ཅི་ཡང་ལུས་སུ་བཅུག་མི་ཆོག་ཅེས་སྨྲས་ནའང་།
EXO 16:20 དེ་དག་གིས་མོ་ཤེའི་བཀའ་ལ་མ་མཉན་པར་ཁ་ཅིག་གིས་དེའི་ཕྱི་ཉིན་ཞོགས་པའི་བར་དུ་ལྷག་མ་ལུས་སུ་བཅུག་པས། དེ་ལ་འབུ་བཏབ་ནས་དྲི་ངན་བྱུང་ཞིང་། མོ་ཤེ་ཁོ་རྣམས་ལ་ཁྲོས།
EXO 16:21 ཁོ་རྣམས་ཀྱིས་ཞོགས་པ་རེ་རེར་རང་རང་གི་ཟ་ཚད་བཞིན་བསྡུས་ཤིང་། ཤུལ་དུ་ལྷག་པ་རྣམས་ཉི་མ་དྲོས་པ་དང་བཞུས་པའོ། །
EXO 16:22 ཡང་ཉིན་དྲུག་པ་ལ་ཁོ་རྣམས་ཀྱིས་བག་ལེབ་ལྡབ་གཉིས་ཏེ་མི་རེ་རེར་ཨོ་མཱར་གཉིས་རེ་བསྡུས་པ་དང་། ཚོགས་དཔོན་རྣམས་ཡོང་སྟེ་མོ་ཤེ་ལ་སྨྲས་ཤིང་།
EXO 16:23 མོ་ཤེ་ཡིས་དེ་དག་ལ་འདི་ལྟར། དཀོན་མཆོག་ཡ་ཝཱེའི་བཀའ་ནི་འདི་ལྟར་ཡིན་ཏེ། སང་ཉིན་ནི་བསྲུང་དགོས་པའི་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ཞིང་། དཀོན་མཆོག་ཡ་ཝཱེའི་ཆེད་དུ་ངལ་གསོ་ཡོངས་སུ་རྫོགས་པའི་ཉིན་མོ་ཡིན་པས། ཁྱོད་ཅག་གིས་ཟས་ཅི་བསྲེག་དགོས་པ་རྣམས་སྲེགས་ཤིག བཙོ་དགོས་པ་རྣམས་ཚོས་ཤིག ཅི་ལུས་པ་ཐམས་ཅད་སང་ཉིན་ཞོགས་པའི་བར་ཞོག་ཅིག་ཅེས་སྨྲས་པ་ལ།
EXO 16:24 ཁོ་རྣམས་ཀྱིས་མོ་ཤེ་ཡིས་སྨྲས་པ་བཞིན་དུ་དེའི་ཕྱི་ཉིན་ཞོགས་པའི་བར་དུ་བཞག་པ་དང་། དྲི་ངན་མ་བྱུང་ལ། དེའི་ནང་དུ་འབུ་ཡང་མ་བཏབ།
EXO 16:25 ཡང་མོ་ཤེ་ཡིས་ཁོ་རྣམས་ལ་འདི་ལྟར། དེ་རིང་བག་ལེབ་དེ་ཟོ་ཞིག དེ་རིང་ནི་དཀོན་མཆོག་ཡ་ཝཱེའི་ཆེད་དུ་ངལ་གསོ་བའི་ཉིན་མོ་ཡིན་པས། ཁྱོད་ཅག་གིས་བག་ལེབ་དེ་དག་ཐང་ནས་རྙེད་མི་སྲིད།
EXO 16:26 ཉིན་དྲུག་གི་རིང་ལ་བསྡུས་ཆོག་པ་དང་། ཉིན་བདུན་པ་ནི་ངལ་གསོ་བའི་དུས་ཡིན་པས་ཅི་ཡང་འཐོབ་པར་མི་འགྱུར་ཞེས་སྨྲས།
EXO 16:27 ཉིན་བདུན་པ་ལ་མི་ཚོགས་ཁྲོད་ནས་ཁ་ཤས་བག་ལེབ་བསྡུ་རུ་སོང་ཡང་ཅི་ཡང་མ་ཐོབ།
EXO 16:28 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཅག་གིས་ནམ་ཞིག་གི་བར་དུ་ངའི་བཀའ་དང་ངའི་བཀའ་ཁྲིམས་མི་བསྲུང་བ་ཡིན་ནམ།
EXO 16:29 ལྟོས་དང་། དཀོན་མཆོག་ཡ་ཝཱེས་ཁྱོད་ཅག་ལ་ངལ་གསོ་བའི་ཉིན་དེ་གནང་བས། ཁོང་གིས་ཁྱོད་རྣམས་ལ་ཉིན་དྲུག་པར་ཉིན་གཉིས་ཀྱི་ཁ་ཟས་གནང་ཞིང་། ཉིན་བདུན་པར་མི་རེ་རེ་རང་རང་གི་གནས་སུ་འདུག་དགོས་ལ་སུ་ཡང་ཕྱི་རུ་འགྲོ་མི་ཆོག་ཅེས་གསུངས་པས།
EXO 16:30 མི་ཚོགས་ཀྱིས་ཉིན་བདུན་པར་ངལ་གསོས་སོ། །
EXO 16:31 ཡང་ཡེས་ར་ཨེལ་གྱི་ཁྱིམ་རྒྱུད་ཀྱིས་བག་ལེབ་དེའི་མིང་ལ་མཱན་ནཱ་ཞེས་བཏགས། དེ་ནི་སྔོ་སྨན་འུ་སུ་ལྟར་ཡིན་ཞིང་དཀར་པོ་ཡིན་པ་དང་། དེའི་རོ་ནི་སྦྲང་རྩི་བསྲེས་པའི་གོར་སྲབ་ལྟར་ཡོད།
EXO 16:32 དེ་ནས་མོ་ཤེ་ན་རེ། དཀོན་མཆོག་ཡ་ཝཱེས་བཀའ་འདི་གནང་བ་སྟེ། ཁྱོད་ཅག་གིས་མི་རབས་ཕྱི་མ་རྣམས་ཀྱི་ཕྱིར་མཱན་ནཱ་ཞེས་པ་དེ་ཨོ་མཱར་གང་གཅེས་སྲུང་བྱོས་ཤིག གང་ལ་ཟེར་ན། བདག་གིས་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་དེ་དབེན་སྟོང་དུ་ཁྱོད་ཅག་ལ་ཟས་སུ་བྱིན་པའི་བག་ལེབ་དེ་ཁོ་རྣམས་ཀྱིས་མཐོང་བའི་ཕྱིར་ཡིན་ཞེས་སྨྲས་པ་དང་།
EXO 16:33 མོ་ཤེ་ཡིས་ཨ་རོན་ལ། བུམ་པ་ཞིག་ཁྱེར་ནས་མཱན་ནཱ་ཨོ་མཱར་གང་དེའི་ནང་དུ་ཆུག་དང་། ཁྱོད་ཅག་གི་མི་རབས་ཕྱི་མ་རྣམས་ཀྱི་ཕྱིར་དཀོན་མཆོག་ཡ་ཝཱེའི་དྲུང་དུ་ཞོག་ཅིག་ཅེས་སྨྲས་སོ། །
EXO 16:34 དེ་ནས་དཀོན་མཆོག་ཡ་ཝཱེས་མོ་ཤེ་ལ་བཀའ་གནང་བ་བཞིན་དུ། ཨ་རོན་གྱིས་དེ་ལྟར་བྱས་ཤིང་། གཅེས་སྲུང་བྱེད་པའི་ཕྱིར་མཱན་ནཱ་དེ་དཔང་མཛད་ཤུར་སྒམ་གྱི་མདུན་དུ་བཞག
EXO 16:35 ཡེས་ར་ཨེལ་པ་རྣམས་ཀྱིས་མི་གཞན་བསྡད་ཡོད་པའི་ཡུལ་ཏེ་ཀ་ན་ཨན་ཡུལ་གྱི་ས་མཚམས་སུ་སླེབས་པའི་བར་དུ་ལོ་ངོ་བཞི་བཅུའི་རིང་ལ་མཱན་ནཱ་ཟོས་སོ། །
EXO 16:36 ཨོ་མཱར་གང་ནི་ཨེ་ཕཱའི་བཅུ་ཆ་གཅིག་ཡིན་ནོ། །
EXO 17:1 དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་དཀོན་མཆོག་ཡ་ཝཱེའི་བཀའ་བཞིན་དུ། ས་ཆ་ས་ཆ་བྱས་ནས་སིན་ཟེར་བའི་དབེན་སྟོང་ནས་ཆས་པ་དང་། རཱ་ཕི་དིམ་བྱ་བའི་གནས་ལ་སྒར་བཏབ། འོན་ཀྱང་མི་རྣམས་ལ་འཐུང་ཆུ་མེད་པས།
EXO 17:2 མོ་ཤེ་ལ་ཁ་རྩོད་བྱས་ནས་ངེད་རྣམས་ལ་འཐུང་ཆུ་བླུད་ཅེས་སྨྲས་པར། མོ་ཤེ་ཡིས་དེ་དག་ལ། ཁྱོད་ཅག་གིས་ཅིའི་ཕྱིར་ང་ལ་ཁ་རྩོད་བྱེད་དམ། ཅིའི་ཕྱིར་དཀོན་མཆོག་ཡ་ཝཱེ་ལ་ཚོད་བགམ་བྱེད་དམ་ཞེས་སྨྲས།
EXO 17:3 མི་ཚོགས་དེ་སྐོམ་པས་གདུངས་ཏེ་མོ་ཤེ་ལ་སྡུག་ཡུས་བཏོན་ཞིང་ན་རེ། ཁྱོད་ཀྱིས་ངེད་ཅག་ཨེ་ཅིབ་ཡུལ་ནས་ཡར་ཁྲིད་ཡོང་སྟེ། ངེད་ཅག་དང་ངེད་རྣམས་ཀྱི་བུ་ཕྲུག་དང་། ཕྱུགས་ཟོག་རྣམས་སྐོམ་ནས་འཆི་རུ་འཇུག་དོན་ཅི་ཡིན་ཞེས་སྨྲས་པས།
EXO 17:4 མོ་ཤེ་ཡིས་དཀོན་མཆོག་ཡ་ཝཱེ་ལ་ཞུ་འབོད་བྱས་ཏེ། མི་འདི་རྣམས་ལ་བདག་གིས་ཅི་ཞིག་བྱའམ། དེ་དག་གིས་ང་རང་རྡོ་རུབ་གཏོང་གྲབས་འདུག་ཅེས་ཞུས་པ་ལ།
EXO 17:5 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་མི་རྣམས་ཀྱི་མདུན་ཕྱོགས་ནས་ཕར་སྐྱོད་ཅིག ཡེས་ར་ཨེལ་གྱི་རྒན་པོ་འགའ་ཞིག་ཁྱོད་དང་མཉམ་དུ་ཁྲིད་དང་། ནཱ་ཡོལ་གཙང་པོ་ལ་བརྡེགས་པའི་འཁར་བ་དེ་རང་གི་ལག་ཏུ་ཁྱེར་ལ་སོང་ཞིག
EXO 17:6 ལྟོས་དང་། ང་རང་ཧོ་རེབ་རི་བོའི་བྲག་རྡོ་ཡོད་སར་ཁྱོད་ཀྱི་མདུན་དུ་སྡོད་པར་བྱ་སྟེ། ཁྱོད་ཀྱིས་བྲག་རྡོ་དེ་ལ་རྡུངས་དང་། མི་རྣམས་ཀྱིས་འཐུང་བའི་ཕྱིར་དེ་ལས་ཆུ་འཐོན་ཡོང་ཞེས་གསུངས་པ་དང་། མོ་ཤེ་ཡིས་ཀྱང་ཡེས་ར་ཨེལ་གྱི་རྒན་པོ་རྣམས་ཀྱི་མིག་མདུན་དུ་དེ་བཞིན་བྱས།
EXO 17:7 ཡེས་ར་ཨེལ་པ་རྣམས་ཀྱིས་གནས་དེར་རྩོད་གླེང་སྤེལ་བ་དང་། ཡང་དཀོན་མཆོག་ཡ་ཝཱེ་ལ་ཚོད་བགམས་ཏེ་དཀོན་མཆོག་ཡ་ཝཱེ་ངེད་ཅག་གི་དཀྱིལ་དུ་བཞུགས་སམ་མི་བཞུགས་ཞེས་སྨྲས་པས། མོ་ཤེ་ཡིས་གནས་དེའི་མིང་ལ་མཱ་སཱ་ དང་མེ་རི་བཱ་ཞེས་བཏགས་སོ། །
EXO 17:8 སྐབས་དེར་ཨ་མཱད་ལེག་གི་མི་རྣམས་འོངས་ཏེ། རཱ་ཕི་དིམ་ཡུལ་དུ་ཡེས་ར་ཨེལ་དང་འཐབ་ཅིང་།
EXO 17:9 མོ་ཤེ་ཡིས་ཡོ་ཤུ་ཨ་ལ་ན་རེ། རང་ཅག་གི་ཕྱིར་སྐྱེས་པ་རྣམས་བདམས་ནས་ཨ་མཱད་ལེག་པ་རྣམས་དང་འཐབ་ཏུ་སོང་། སང་ཉིན་བདག་གིས་ལག་ཏུ་དཀོན་མཆོག་གི་འཁར་བ་བཟུང་ནས་རི་བོའི་རྩེ་མོར་ལངས་སྡོད་པར་བྱའོ་ཞེས་སྨྲས་པ་དང་།
EXO 17:10 ཡོ་ཤུ་ཨ་ཡིས་མོ་ཤེའི་བཀའ་བཞིན་བྱས་ཏེ་ཨ་མཱད་ལེག་པ་རྣམས་དང་འཐབ་ཅིང་། མོ་ཤེ་དང་ཨ་རོན་དང་ཧུ་རཱ་བཅས་རི་བོའི་རྩེ་མོར་འགོས།
EXO 17:11 ཡང་འདི་ལྟར་བྱུང་བ་སྟེ། མོ་ཤེ་ཡིས་ནམ་ཞིག་ལ་ལག་པ་ཡར་བཀྱགས་ཚེ་ཡེས་ར་ཨེལ་པ་རྣམས་རྒྱལ་བ་དང་། ནམ་ཞིག་ལ་ལག་པ་མར་བཞག་ཚེ་ཨ་མཱད་ལེག་པ་རྣམས་རྒྱལ་བ་རེད།
EXO 17:12 འོན་ཀྱང་མོ་ཤེའི་ལག་པ་ངལ་བས། ཨ་རོན་དང་ཧུ་རཱ་གཉིས་ཀྱིས་རྡོ་ཞིག་ཁྱེར་འོངས་ཏེ་ཁོའི་འཕོངས་སྟེགས་བྱེད་དུ་བཅུག་པ་དང་ཁོ་དེ་ལ་བསྡད་ཅིང་། དེ་གཉིས་ཀྱིས་གཅིག་གིས་གཡས་དང་གཅིག་གིས་གཡོན་ནས་ཁོའི་ལག་པ་བསྐྱོར་བ་དང་། ཁོའི་ལག་པ་ཉི་མ་ནུབ་པའི་བར་དུ་བརྟན་པོར་ཚུགས།
EXO 17:13 ཡང་ཡོ་ཤུ་ཨ་ཡིས་ཨ་མཱད་ལེག་རྒྱལ་པོ་དང་དེའི་འབངས་མི་རྣམས་རལ་གྲིས་ཕམ་པར་བརྒྱབ།
EXO 17:14 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ངས་ཨ་མཱད་ལེག་གི་མིང་ཡང་གནམ་འོག་ཏུ་རྩ་བ་ནས་གསུབ་པར་བྱ། རྗེས་དྲན་གྱི་ཕྱིར་གཏམ་དེ་ཤོག་སྒྲིལ་སྟེང་བྲིས་ཏེ་ཡོ་ཤུ་ཨའི་རྣ་ལམ་དུ་འཇོག་དགོས་ཞེས་གསུངས་སོ། །
EXO 17:15 མོ་ཤེ་ཡིས་མཆོད་ཁྲི་ཞིག་བཞེངས་ནས་དེའི་མིང་ལ་དཀོན་མཆོག་ཡ་ཝཱེ་བདག་གི་རུ་དར་ཡིན་ཞེས་བཏགས་ཏེ་ན་རེ།
EXO 17:16 དཀོན་མཆོག་ཡ་ཝཱེས་མནའ་བཞེས་པ་ཡིན་པས། ཁོང་གིས་ཨ་མཱད་ལེག་མི་རིགས་ལ་མི་རབས་ནས་མི་རབས་བར་དུ་དཔུང་འཇུག་བྱེད་པར་འགྱུར་ཞེས་སྨྲས་སོ། །
EXO 18:1 ཡང་མིད༌ཡཱན་ཡུལ་གྱི་མཆོད་དཔོན་ཏེ་མོ་ཤེའི་སྒྱུག་པོ་ཡི་ཏྲོ་ཡིས། དཀོན་མཆོག་གིས་མོ་ཤེ་དང་ཉིད་ཀྱི་འབངས་མི་ཡེས་ར་ཨེལ་ལ་ཅི་དང་ཅི་མཛད་པ་ཐམས་ཅད་དེ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པ་ཐོས་ནས།
EXO 18:2 མོ་ཤེའི་ཆུང་མ་ཚིབ་ཕའོ་རཱ་སྟེ་སྔར་མོ་ཤེ་ཡིས་ཕྱིར་ཁྱིམ་ལ་ལོག་ཏུ་བཅུག་པ་དེ་དང་།
EXO 18:3 ཚིབ་ཕའོ་རཱ་ཡི་བུ་གཉིས་ཁྲིད་འོངས་པ་རེད། བུ་གཅིག་གི་མིང་ལ་གེར་ཤོམ་ཞེས་ཟེར་ཏེ། རྒྱུ་མཚན་ནི་སྔར་མོ་ཤེ་ཡིས་ང་རང་ཡུལ་གཞན་དུ་བྱེས་པར་གྱུར་ཞེས་སྨྲས་པས་སོ། །
EXO 18:4 བུ་གཞན་དེའི་མིང་ལ་ཨེ་ལི་ཨེ་བཟིར་ཞེས་ཟེར་ཏེ། ཅི་ལ་ཞེ་ན། སྔར་མོ་ཤེ་ཡིས་བདག་གི་ཕ་ཡི་དཀོན་མཆོག་གིས་ང་ལ་རོགས་རམ་གནང་ཞིང་ཕཱར་ཨོལ་གྱི་རལ་གྲི་ནས་ཐར་བར་མཛད་ཅེས་སྨྲས་པས་སོ། །
EXO 18:5 དེ་ལྟར་མོ་ཤེའི་སྒྱུག་པོ་ཡི་ཏྲོ་ཡིས་མོ་ཤེའི་ཆུང་མ་དང་བུ་གཉིས་ཁྲིད་ནས་དཀོན་མཆོག་གི་རི་བོ་སྟེ། མོ་ཤེ་ཡིས་དབེན་སྟོང་དུ་སྒར་འདེབས་སའི་གནས་ལ་སླེབས་ཤིང་།
EXO 18:6 ཡང་ཁོས་མི་ཞིག་མངགས་ནས་མོ་ཤེ་ལ་འདི་ལྟར། བདག་ནི་ཁྱེད་ཀྱི་སྒྱུག་པོ་ཡི་ཏྲོ་ཡིན་ཞིང་། ཁྱེད་ཀྱི་ཆུང་མ་དང་བུ་གཉིས་ཁྲིད་ནས་ཁྱེད་རང་ཡོད་ས་འདི་རུ་སླེབས་ཡོད་ཅེས་ངག་འཕྲིན་བཏང་བ་ལ།
EXO 18:7 མོ་ཤེ་སྒྱུག་པོ་བསུ་བར་སོང་སྟེ། དེའི་མདུན་དུ་གུས་ཕྱག་ཕུལ་ནས་འོ་ བྱས་པ་དང་། ཕན་ཚུན་ཁམས་འདྲི་ཞུས་ནས་གུར་གྱི་ནང་དུ་ཞུགས།
EXO 18:8 དེ་ནས་མོ་ཤེ་ཡིས་སྒྱུག་པོ་ལ། དཀོན་མཆོག་ཡ་ཝཱེས་ཡེས་ར་ཨེལ་གྱི་དོན་དུ་ཕཱར་ཨོལ་དང་ཨེ་ཅིབ་པ་རྣམས་ལ་ཅི་དང་ཅི་ཞིག་མཛད་པ་ཀུན་དང་། ལམ་དུ་མྱངས་པའི་སྡུག་བསྔལ་ཐམས་ཅད་དང་། དཀོན་མཆོག་ཡ་ཝཱེས་ཁོ་རྣམས་ཅི་ལྟར་བསྐྱབས་པ་བཅས་སྨྲས་སོ། །
EXO 18:9 དཀོན་མཆོག་ཡ་ཝཱེས་ཡེས་ར་ཨེལ་ལ་བཀའ་དྲིན་མཛད་ཅིང་། དེ་དག་ཨེ་ཅིབ་པའི་དབང་ནས་ཐར་བར་མཛད་པས་ཡི་ཏྲོའི་སེམས་ཤིན་ཏུ་དགའ་བ་རེད།
EXO 18:10 ཡང་ཁོ་ན་རེ། དཀོན་མཆོག་ཡ་ཝཱེ་ལ་བསྟོད་པར་ཤོག ཁོང་གིས་ཁྱེད་ཅག་ཨེ་ཅིབ་པ་རྣམས་དང༌ཕཱར་ཨོལ་གྱི་ལག་ནས་ཐར་བར་མཛད་ཅིང་། ཁོང་གིས་མི་འདི་རྣམས་ཨེ་ཅིབ་པ་རྣམས་ཀྱི་ལག་ནས་བསྐྱབས་པ་ཡིན།
EXO 18:11 ལྷ་ཐམས་ཅད་དང་བསྡུར་ན་དཀོན་མཆོག་ཡ་ཝཱེ་ནུས་མཐུ་ཆེ་བ་ངས་ད་ལྟ་ཤེས་ཏེ། ཅི་ལ་ཞེ་ན། དོན་དེའི་ནང་དུ་ཨེ་ཅིབ་པ་རྣམས་ཀྱིས་མི་རྣམས་ལ་ཁེངས་དྲེགས་ཀྱི་སྤྱོད་ཚུལ་བཟུང་བའི་ཕྱིར་ཡིན་ཞེས་སྨྲས།
EXO 18:12 དེ་ནས་མོ་ཤེའི་སྒྱུག་པོ་ཡི་ཏྲོས་དཀོན་མཆོག་ལ་སྦྱིན་སྲེག་ཅིག་དང་དམར་མཆོད་རྣམས་ཕུལ་བ་དང་། ཨ་རོན་ནི་ཡེས་ར་ཨེལ་གྱི་རྒན་པོ་རྣམས་དང་བཅས་ཡོང་ནས་མོ་ཤེའི་སྒྱུག་པོ་དང་མཉམ་དུ་དཀོན་མཆོག་གི་སྤྱན་སྔར་གསོལ་ཚིགས་བཞེས་པར་ཕེབས་སོ། །
EXO 18:13 དེའི་ཕྱི་ཉིན། མོ་ཤེ་མི་རྣམས་ལ་ལེགས་ཉེས་འབྱེད་པར་བཞུགས་ཤིང་། ཞོགས་པ་ནས་དགོང་མོའི་བར་དུ་མི་རྣམས་མོ་ཤེའི་དྲུང་དུ་ལངས་ནས་བསྡད།
EXO 18:14 མོ་ཤེ་ཡིས་མི་རྣམས་ཀྱི་དོན་དུ་ཅི་བྱེད་པ་ཐམས་ཅད་སྒྱུག་པོས་མཐོང་སྟེ་ན་རེ། ཞོགས་པ་ནས་དགོང་མོའི་བར་དུ་མི་རྣམས་ཁྱེད་ཀྱི་དྲུང་དུ་ལངས་ནས་སྡོད་ཅིང་། ཁྱེད་རང་གཅིག་པུ་བཞུགས་ནས་འདུག་དོན་ཅི་ཡིན་ནམ་ཞེས་དྲིས་པ་ལ།
EXO 18:15 མོ་ཤེ་ཡིས་སྒྱུག་པོ་ལ། དེ་ནི་མི་རྣམས་འདིར་འོངས་ནས་དཀོན་མཆོག་ལ་བཀའ་འདྲི་ཞུ་བའི་རྐྱེན་དང༌།
EXO 18:16 ཁོ་རྣམས་ལ་རྩོད་པ་འབྱུང་དུས་ཀྱང་ངའི་གམ་དུ་འོངས་ནས། ངས་མི་དང་མིའི་བར་ལ་ཤན་འབྱེད་པ་དང་། དཀོན་མཆོག་གི་སྒྲིག་ལམ་དང་བཀའ་ཁྲིམས་རྣམས་དེ་དག་ལ་བསླབས་པ་ཡིན་ཞེས་སྨྲས་སོ། །
EXO 18:17 སྒྱུག་པོས་མོ་ཤེ་ལ། ཁྱེད་ཀྱི་བྱེད་ལུགས་དེ་ལེགས་པོ་མི་འདུག
EXO 18:18 ཁྱེད་དང་ཁྱེད་ཀྱི་དྲུང་དུ་འོངས་པའི་མི་རྣམས་ཐང་ཆད་ངེས་ཡིན། དོན་དེ་ནི་ཁྱེད་ཀྱིས་ཐེག་དཀའ་ཞིང་ཁྱེད་གཅིག་པུས་བསྒྲུབ་ཀྱང་མི་ནུས་སོ། །
EXO 18:19 ད་ལྟ་ངའི་གཏམ་ལ་གསན་པར་གྱིས། བདག་གིས་ཁྱེད་ལ་སློབ་སྟོན་བྱེད་དེ། དཀོན་མཆོག་ཁྱེད་དང་མཉམ་དུ་བཞུགས་པར་སྨོན། ཁྱེད་ནི་དཀོན་མཆོག་གི་དྲུང་དུ་འབངས་མིའི་ཚབ་བྱེད་མཁན་ཡིན་ཞིང་། རྩོད་གཞི་རྣམས་དཀོན་མཆོག་གི་དྲུང་དུ་ཕུལ་ཞིག
EXO 18:20 ཁྱེད་ཀྱིས་དེ་དག་ལ་སྒྲིག་ལམ་དང་བཀའ་ཁྲིམས་རྣམས་སློབས་དང་། ཁོ་རྣམས་ལ་འགྲུལ་དགོས་པའི་ལམ་དང་བྱེད་དགོས་པའི་ལས་རྣམས་སྟོན་པར་གྱིས་ཤིག
EXO 18:21 དེ་ནས་ཁྱེད་ཀྱིས་འབངས་མིའི་ཁྲོད་ནས་སྐྱེས་པ་འཇོན་པོ་རྣམས་འདེམས་དགོས་ཏེ། དཀོན་མཆོག་ལ་གུས་ཤིང་འཇིགས་པ་དང་། གཤིས་རྒྱུད་དྲང་བ་དང་། ལྐོག་ནོར་ལ་སྡང་བ་རྣམས་ཚོལ་དང་། དེ་དག་སྟོང་དཔོན་དང་། བརྒྱ་དཔོན་དང་། ལྔ་བཅུ་དཔོན་དང་། བཅུ་དཔོན་བཅས་བྱེད་དུ་ཆུག
EXO 18:22 ཁོ་རྣམས་ཀྱིས་དུས་རྒྱུན་མི་རྣམས་ལ་ལེགས་ཉེས་ཀྱི་ཤན་འབྱེད་དགོས་པ་འདི་ལྟ་སྟེ། དོན་ཆེན་གང་བྱུང་བ་དེ་དག་ཁྱེད་ལ་ཞུ་དགོས་པ་དང་། དོན་ཆུང་རྣམས་རང་རང་གིས་ཐག་གིས་གཅོད་དགོས། དེ་ལྟར་བྱས་ན་ཁྱེད་ཀྱི་ལས་ཚགས་ཇེ་ཡང་དུ་འགྲོ་བ་དང་། ཁོ་རྣམས་ཀྱིས་ཁྱེད་དང་མཉམ་དུ་འགན་འཁུར་བར་འགྱུར།
EXO 18:23 དོན་འདི་དཀོན་མཆོག་གིས་ཁྱེད་ལ་གནང་བའི་བཀའ་ཡིན་པ་དང་ཁྱེད་ཀྱིས་དེ་ལྟར་བྱས་ན། ཁྱེད་ཀྱིས་འགན་ཐེག་སྲིད་ཅིང་། མི་འདི་ཐམས་ཅད་ཀྱང་བདེ་བར་རང་གི་གནས་སུ་འགྲོ་བར་འགྱུར་ཞེས་སྨྲས་སོ། །
EXO 18:24 དེ་ནས་མོ་ཤེ་ཡིས་སྒྱུག་པོའི་ངག་ལ་མཉན་ཏེ། ཁོས་ཅི་སྨྲས་པ་བཞིན་དུ་བྱས།
EXO 18:25 མོ་ཤེ་ཡིས་ཡེས་ར་ཨེལ་པ་དག་ལས་སྐྱེས་པ་འཇོན་པོ་རྣམས་བདམས་ཏེ་འབངས་མིའི་འགོ་དཔོན་དུ་བསྐོས་ཤིང་། སྟོང་དཔོན་དང་། བརྒྱ་དཔོན་དང༌། ལྔ་བཅུ་དཔོན་དང་། བཅུ་དཔོན་བཅས་བྱེད་དུ་བཅུག་པ་དང་།
EXO 18:26 དེ་དག་གིས་རྟག་ཏུ་མི་རྣམས་ལ་ལེགས་ཉེས་ཀྱི་ཤན་འབྱེད་ཅིང་། ཐག་གིས་ཆོད་དཀའ་བ་རྣམས་མོ་ཤེ་ལ་གཏད། འོན་ཀྱང་དོན་ཆུང་རྣམས་རང་རང་གིས་ཐག་གཅོད་བྱེད་དོ། །
EXO 18:27 དེ་ནས་མོ་ཤེ་ཡིས་རང་གི་སྒྱུག་པོར་སྐྱེལ་མ་བྱས་པ་དང་། ཁོ་ཕྱིར་རང་ཡུལ་དུ་ལོག་གོ །
EXO 19:1 དེ་ནས་ཡེས་ར་ཨེལ་པ་རྣམས་ཨེ་ཅིབ་ཡུལ་གྱི་ཕྱི་རུ་ཐོན་པ་ནས་ཟླ་བ་གསུམ་པའི་ཉིན་དེར་སི་ནཱ་བྱ་བའི་དབེན་སྟོང་དུ་སླེབས།
EXO 19:2 ཁོ་རྣམས་རཱ་ཕི་དིམ་ཡུལ་ནས་ཆས་ཏེ་སི་ནཱའི་དབེན་སྟོང་དུ་སླེབས་ནས་དེའི་རི་འདབས་སུ་སྒར་བཏབ།
EXO 19:3 མོ་ཤེ་ཡར་དཀོན་མཆོག་གི་དྲུང་དུ་སོང་བ་ལ། ཁོང་གིས་རི་མགོ་ནས་མོ་ཤེ་ལ་ཞལ་འབོད་གནང་སྟེ་འདི་སྐད་དུ། ཁྱོད་ཀྱིས་ཡ་ཀོབ་ཀྱི་ཁྱིམ་རྒྱུད་ལ་འདི་ལྟར་སྨྲོས་དང་། ཡེས་ར་ཨེལ་པ་རྣམས་ལ་འདི་ལྟར་སྒྲོགས་ཤིག
EXO 19:4 ངས་ཨེ་ཅིབ་པ་རྣམས་ལ་ཅི་ཞིག་བྱས་པ་དང་། ཇི་ལྟར་ཁྱོད་རྣམས་གླག་གི་གཤོག་པའི་སྟེང་འཁུར་བ་བཞིན་ངའི་དྲུང་དུ་ཁྲིད་པ་དེ་ཁྱོད་ཅག་གིས་མཐོང་བ་ཡིན།
EXO 19:5 ད་ལྟ་ཁྱོད་ཅག་གིས་དངོས་གནས་བདག་གི་ངག་ལ་མཉན་པ་དང་བདག་གི་ཁ་ཆད་བསྲུང་བ་ཡིན་ན། མི་ཐམས་ཅད་ལས་ཁྱོད་ཅག་ནི་ངའི་ནོར་བུ་ཁྱད་པར་ཅན་ཞིག་ཡིན་པར་འགྱུར། ཅིའི་ཕྱིར་ཞེ་ན། ས་གཞི་ཐམས་ཅད་བདག་གི་ཡིན་པའི་ཕྱིར་རོ། །
EXO 19:6 ཁྱོད་ཅག་ནི་ངའི་ཕྱིར་མཆོད་དཔོན་གྱི་རྒྱལ་ཁམས་ཤིག་དང་མི་རིགས་དམ་པ་ཞིག་ཏུ་འགྱུར་ཞེས་གཏམ་འདི་དག་ཁྱོད་ཀྱིས་ཡེས་ར་ཨེལ་པ་རྣམས་ལ་སྨྲ་དགོས་པ་དེ་ཡིན་ཞེས་གསུངས་སོ། །
EXO 19:7 དེ་ནས་མོ་ཤེ་ཕྱིར་ལོག་སྟེ་མི་རྣམས་ཀྱི་རྒན་པོ་རྣམས་བོས་ཡོང་ནས། དཀོན་མཆོག་ཡ་ཝཱེས་ཁོ་རང་ལ་གནང་བའི་བཀའ་ཐམས་ཅད་དེ་རྣམས་ལ་སྨྲས།
EXO 19:8 དེའི་ལན་དུ་མི་ཐམས་ཅད་ཀྱིས་མགྲིན་གཅིག་ཏུ་དཀོན་མཆོག་ཡ་ཝཱེས་ཅི་དང་ཅི་གསུངས་པ་བཞིན་དུ་ངེད་རྣམས་ཀྱིས་བསྒྲུབ་པར་བྱ་ཞེས་སྨྲས་ཤིང་། མོ་ཤེ་ཡིས་མི་རྣམས་ཀྱི་གཏམ་དེ་དཀོན་མཆོག་ཡ་ཝཱེ་ལ་ཞུས་སོ། །
EXO 19:9 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཀྱེ་ཧོ། ང་རང་སྤྲིན་སྟུག་པོ་ཞིག་གི་ནང་ཁྱོད་ཀྱི་གམ་དུ་འོང་སྟེ། ཁྱོད་ལ་གཏམ་སྨྲ་བར་འགྱུར་བ་དེ་མི་རྣམས་ཀྱིས་ཀྱང་ཐོས་པ་དང་། ཁྱོད་ལ་རྟག་ཏུ་ཡིད་ཆེས་པའི་ཕྱིར་ཡིན་ཞེས་གསུངས་པ་དང་། མོ་ཤེ་ཡིས་མི་རྣམས་ཀྱི་གཏམ་དེ་དཀོན་མཆོག་ཡ་ཝཱེ་ལ་ཞུས་སོ། །
EXO 19:10 ཡང་དཀོན་མཆོག་ཡ་ཝཱེས་མོ་ཤེ་ལ། ཁྱོད་རང་མི་རྣམས་ཀྱི་གམ་དུ་སོང་ནས་དེ་རིང་དང་སང་ཉིན་ཁོ་རྣམས་དམ་པར་བྱོས་ཤིག་དང་། དེ་དག་ལ་རང་གི་གོས་རྣམས་ཀྱང་བཀྲུ་རུ་ཆུག
EXO 19:11 ཉིན་གསུམ་པར་གྲ་སྒྲིག་བྱས་ཚར་དགོས། གང་ལ་ཟེར་ན། ཉིན་གསུམ་པར་དཀོན་མཆོག་ཡ་ཝཱེ་མི་ཐམས་ཅད་ཀྱི་མིག་མདུན་དུ་རི་བོ་སི་ནཱ་ལ་མར་ཕེབས་རྒྱུ་ཡིན་པས་སོ། །
EXO 19:12 ཁྱོད་ཀྱིས་རི་བོའི་ཕྱོགས་བཞིར་མི་རྣམས་ལ་དབྱེ་མཚམས་ཕྱེས་ནས་འདི་ལྟར། ཁྱོད་ཅག་གིས་གཟབ་གཟབ་བྱེད་དགོས་ཤིང་། རི་ལ་འགོས་པའམ་དེའི་འདབས་ལ་རེག་མི་རུང་སྟེ། སུ་ཞིག་གིས་རི་ལ་རེག་ན་དེ་ཅིས་ཀྱང་གསོད་དགོས།
EXO 19:13 མི་དེ་ལྟ་བུ་ལ་ལག་པས་རེག་མི་རུང་སྟེ་རྡོ་རུབ་གཏོང་བའམ་མདའ་ཡིས་བརྒྱབ་ནས་གསོད་དགོས། དུད་འགྲོའམ་མི་གང་ཡིན་རུང་གསོན་མི་འོས་ཞེས་སྨྲ་བར་གྱིས། རྭ་དུང་གི་སྐད་ཡུན་རིང་དུ་བྱུང་ཚེ་དེ་དག་ད་གཟོད་ཡར་རི་ལ་འོང་ཆོག་པ་ཡིན་ཞེས་གསུངས།
EXO 19:14 དེ་ནས་མོ་ཤེ་རི་ལས་བབས་ཏེ་མི་རྣམས་ཀྱི་གམ་དུ་འོངས་པ་དང་། ཁོ་རྣམས་དམ་པར་བྱས་ཤིང་། དེ་དག་གིས་རང་གི་གོས་རྣམས་བཀྲུས།
EXO 19:15 ཡང་མོ་ཤེ་ཡིས་མི་རྣམས་ལ། ཉིན་གསུམ་པར་གྲ་སྒྲིག་བྱས་ཚར་དགོས། སུ་ཡང་བུད་མེད་དང་འགྲོགས་མི་རུང་ཞེས་སྨྲས་ཤིང་།
EXO 19:16 ཉིན་གསུམ་པའི་ཞོགས་པར། འབྲུག་སྒྲ་ལྡིར་ཞིང་གློག་དམར་འཁྱུགས་པ་དང་རི་ལ་སྤྲིན་སྟུག་པོ་འཐིབས། རྭ་དུང་གི་སྐད་ཤིན་ཏུ་ཆེན་པོ་བྱུང་བས། སྒར་ལ་ཡོད་པའི་མི་ཐམས་ཅད་སྐྲག་ནས་འདར།
EXO 19:17 མོ་ཤེ་ཡིས་མི་རྣམས་སྒར་གྱི་ཕྱི་རོལ་ཏུ་དཀོན་མཆོག་མཇལ་བར་ཁྲིད་ཅིང་། དེ་དག་རི་འདབས་སུ་ལངས་ནས་བསྡད་དོ། །
EXO 19:18 དཀོན་མཆོག་ཡ་ཝཱེ་མེ་དང་བཅས་རི་བོ་སི་ནཱ་ལ་མར་ཕེབས་པས་གནས་ཐམས་ཅད་ལས་དུ་བ་འཕྱུར་བ་དང་། མེ་ཐབ་ཀྱི་དུ་བ་ལྟར་དུ་བ་དེ་གྱེན་ལ་ལངས་ཤིང་། རི་བོ་ཡོངས་རྫོགས་ལྕིག་ལྕིག་ཏུ་འགུལ།
EXO 19:19 དེ་ནས་རྭ་དུང་གི་སྐད་རིམ་བཞིན་ཆེ་རུ་ཕྱིན་པའི་སྐབས་སུ། མོ་ཤེ་ཡིས་གཏམ་ཞུས་ཤིང་དཀོན་མཆོག་གིས་གསུང་སྐད་ཞིག་གིས་ཁོ་ལ་ལན་གསུངས་སོ། །
EXO 19:20 དཀོན་མཆོག་ཡ་ཝཱེ་རི་བོ་སི་ནཱའི་རྩེ་མོར་མར་ཕེབས་ཤིང་། ཁོང་གིས་མོ་ཤེ་རི་མགོར་འོང་བའི་ཞལ་འབོད་གནང་བ་དང་མོ་ཤེ་རི་ལ་འགོས།
EXO 19:21 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་མར་སོང་ནས་མི་རྣམས་ལ་ཉེན་བརྡ་ཐོངས་ཤིག དེ་ལྟར་མ་བྱས་ན། དེ་རྣམས་ཀྱིས་ང་རང་མཐོང་བའི་ཆེད་དུ་བཙན་གྱིས་མཚམས་ལས་བརྒལ་ནས་མི་མང་པོའང་འཆི་བར་ངེས།
EXO 19:22 ཡང་དཀོན་མཆོག་ཡ་ཝཱེའི་ཉེ་སར་འོང་བའི་མཆོད་དཔོན་རྣམས་ཀྱིས་རང་ཉིད་དམ་པར་བྱེད་དགོས་པ་ཡིན། དེ་མིན་ཚེ་དཀོན་མཆོག་ཡ་ཝཱེ་གློ་བུར་ཉིད་ལ་སླེབས་ནས་དེ་རྣམས་གསོད་ཉེན་ཆེ་ཞེས་གསུངས།
EXO 19:23 མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར། མི་རྣམས་རི་བོ་སི་ནཱ་ལ་འགོས་མི་རུང་སྟེ། ཁྱེད་ཀྱིས་རི་འདིའི་ཕྱོགས་བཞིར་དབྱེ་མཚམས་ཕྱེས་ལ་དམ་པར་སྲུངས་ཤིག་ཅེས་བཀའ་གནང་བས་སོ་ཞེས་ཞུས་པ་ལ།
EXO 19:24 དཀོན་མཆོག་ཡ་ཝཱེས་ཁོ་རང་ལ། མར་སོང་དང་། དེ་ནས་ཁྱོད་ཨ་རོན་དང་མཉམ་དུ་ཡར་འོང་བར་གྱིས། འོན་ཀྱང་མཆོད་དཔོན་དང་མི་རྣམས་བདག་གི་མདུན་དུ་འོང་ཕྱིར་བཙན་གྱིས་མཚམས་ལས་བརྒལ་མི་རུང་སྟེ། ཅི་ལ་ཞེ་ན། དེ་ལྟར་བྱས་ན་ང་རང་གློ་བུར་ཉིད་ལ་སླེབས་ནས་དེ་དག་གསོད་ཉེན་ཆེ་ཞེས་གསུངས།
EXO 19:25 དེའི་ཕྱིར་མོ་ཤེ་རི་ལས་བབས་པ་དང་། མི་རྣམས་ཀྱི་གམ་དུ་སོང་ནས་དེ་དག་ལ་སྨྲས་སོ། །
EXO 20:1 དཀོན་མཆོག་གིས་བཀའ་འདི་ཐམས་ཅད་གསུངས་ནས་འདི་སྐད་དུ།
EXO 20:2 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞིང་། ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཁྲིད་མཁན་ཡང་ཡིན་ནོ། །
EXO 20:3 ང་རང་མ་གཏོགས་པའི་དཀོན་མཆོག་གཞན་ཞིག་ཁྱོད་ལ་ཡོད་མི་ཆོག
EXO 20:4 ཁྱོད་ཀྱིས་རང་ཉིད་ལ་སྐུ་འདྲ་དང་། སྟེང་གི་ནམ་མཁའ་འམ། འོག་གི་སའམ། ས་འོག་གི་ཆུ་ལ་ཡོད་པའི་སེམས་ཅན་གྱི་གཟུགས་བརྙན་གང་ཡང་བཟོ་མི་རུང་།
EXO 20:5 དེ་དག་ལ་ཕྱག་མ་འཚལ། བསྙེན་བཀུར་ཡང་མ་བྱེད། གང་ལ་ཟེར་ན། ཁྱོད་ཀྱི་དཀོན་མཆོག་ཡ་ཝཱེ་ང་རང་ནི་ཕྲག་དོག་ཅན་ཞིག་ཡིན་ཏེ། ཕ་རྣམས་ཀྱི་ནག་ཉེས་ཕྱིར་མི་རབས་གསུམ་མམ་བཞིའི་བར་དུ་ང་རང་ལ་སྡང་མཁན་གྱི་བུ་ཕྲུག་རྣམས་ལ་བཀའ་ཆད་གཅོད་མོད།
EXO 20:6 འོན་ཀྱང་ང་རང་གཅེས་སུ་འཛིན་པ་དང་བདག་གི་བཀའ་སྲུང་མཁན་རྣམས་ལ་མི་སྟོང་ཕྲག་གི་བར་དུ་ཐུགས་བརྩེ་བར་བྱེད་དོ། །
EXO 20:7 ཁྱོད་ཀྱི་དཀོན་མཆོག་ཡ་ཝཱེའི་མཚན་གང་བྱུང་དུ་སྤྱོད་མི་རུང་། ཅི་ལ་ཞེ་ན། སུ་ཞིག་གིས་ཁོང་གི་མཚན་གང་བྱུང་དུ་སྤྱད་ན་དཀོན་མཆོག་ཡ་ཝཱེས་མི་དེ་ཉེས་མེད་དུ་རྩི་བར་མི་འགྱུར་རོ། །
EXO 20:8 ངལ་གསོ་བའི་ཉིན་མོ་དྲན་ནས་དེ་དམ་པར་སྲུངས་ཤིག
EXO 20:9 ཉིན་དྲུག་གི་རིང་ལ་འབད་ཅིང་རང་གི་ལས་ཀ་ཚང་མ་སྒྲུབ་རུང་བ་ཡིན།
EXO 20:10 འོན་ཀྱང་ཉིན་བདུན་པ་ནི་ཁྱོད་ཀྱི་དཀོན་མཆོག་ཡ་ཝཱེའི་ངལ་གསོ་བའི་ཉིན་མོ་ཡིན་པས། ཉིན་མོ་དེ་ལ་ཁྱོད་དང་ཁྱོད་ཀྱི་བུ་དང་བུ་མོ། གཡོག་པོ་དང་གཡོག་མོ། སྒོ་ཕྱུགས། རྒྱ་སྒོ་ནང་རོལ་ལ་གནས་པའི་བྱེས་པ་བཅས་ཀྱིས་ལས་ཀ་གང་ཡང་མ་བྱེད་ཅིག
EXO 20:11 ཅིའི་ཕྱིར་ཞེ་ན། ཉིན་དྲུག་གི་རིང་ལ་དཀོན་མཆོག་ཡ་ཝཱེས་ནམ་མཁའ་དང་ས་གཞི་དང་རྒྱ་མཚོ་དང་དེ་དག་གི་ནང་དུ་ཡོད་པ་ཐམས་ཅད་བཀོད་ནས། ཉིན་བདུན་པ་ལ་ངལ་གསོས་པའོ། །དེའི་ཕྱིར་དཀོན་མཆོག་ཡ་ཝཱེས་ངལ་གསོ་བའི་ཉིན་མོ་དེ་ལ་བྱིན་གྱིས་བརླབས་ནས་དམ་པར་མཛད་དོ། །
EXO 20:12 ཁྱོད་ཀྱི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བྱའི་ཡུལ་དེར་ཚེ་ཐག་རིང་པོར་གནས་ཐུབ་པའི་ཕྱིར། རང་གི་ཕ་མ་གཉིས་ལ་བཀུར་སྟི་བྱེད་དགོས།
EXO 20:13 ཁྱོད་ཀྱིས་མི་མ་གསོད།
EXO 20:14 ལོག་གཡེམ་མ་བྱེད།
EXO 20:15 རྐུ་མ་བྱེད།
EXO 20:16 རང་གི་ཁྱིམ་མཚེས་ལ་རྫུན་གྱི་དཔང་པོ་མ་བྱེད།
EXO 20:17 གཞན་གྱི་ཁང་པ་ལ་འདོད་ཧམ་མ་བཅང་། གཞན་གྱི་ཆུང་མ་དང་། གཡོག་པོ་དང་། གཡོག་མོ་དང་། བ་གླང་དང་། བོང་བུ་དང་། དེ་ལྟར་མི་གཞན་གྱི་ཡིན་ཚད་གང་ལའང་ཧམ་པ་བཅང་མི་རུང་ཞེས་གསུངས་སོ། །
EXO 20:18 མི་ཐམས་ཅད་ཀྱིས་འབྲུག་སྒྲ་ལྡིར་བ་དང་གློག་དམར་འཁྱུག་པ། རྭ་དུང་གི་སྐད་དང་རི་ལས་དུ་བ་འཕྱུར་བ་བཅས་མཐོང་བས། ཁོ་རྣམས་སྔངས་འདར་དང་བཅས་རྒྱང་རིང་ནས་ལངས་བསྡད་ཅིང་།
EXO 20:19 མོ་ཤེ་ལ་འདི་ལྟར། ཁྱེད་ཀྱིས་ངེད་ཅག་ལ་གཏམ་སྨྲ་བར་མཛོད་དང་ངེད་ཅག་གིས་མཉན་པར་བྱའོ། །འོན་ཀྱང་ངེད་རྣམས་འཆི་བར་མི་འགྱུར་བའི་ཕྱིར། དཀོན་མཆོག་གིས་ངེད་ཅག་ལ་གསུང་འབྱོན་པར་མི་བྱའོ་ཞེས་སྨྲས།
EXO 20:20 མོ་ཤེ་ཡིས་མི་རྣམས་ལ། མ་འཇིགས་ཤིག རྒྱུ་མཚན་ནི་དཀོན་མཆོག་ཁྱོད་རྣམས་ལ་བརྟག་པར་ཕེབས་པ་སྟེ། ཁྱོད་རྣམས་ཁོང་ལ་གུས་ཤིང་འཇིགས་པ་དང་སྡིག་པའང་མི་བྱེད་པའི་ཕྱིར་ཡིན་ཞེས་སྨྲས།
EXO 20:21 དེ་ལྟར་མི་རྣམས་རྒྱང་རིང་ནས་ལངས་བསྡད་པ་དང་། མོ་ཤེ་དཀོན་མཆོག་བཞུགས་ཡོད་པའི་མུན་པ་སྟུག་པོའི་ཉེ་སར་བཅར་ཏོ། །
EXO 20:22 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། བདག་གིས་ནམ་མཁའི་ཞིང་ཁམས་ནས་ཁྱོད་ཅག་ལ་གཏམ་སྨྲས་པ་ཁྱོད་རྣམས་ཀྱིས་མཐོང་བ་ཡིན།
EXO 20:23 ཁྱོད་ཅག་གིས་ང་ཡི་དོ་ཟླར་ཅི་ཡང་བཟོ་མི་རུང་སྟེ། རང་ཉིད་ཀྱི་ཆེད་དུ་དངུལ་གྱི་སྐུ་བརྙན་ནམ་གསེར་གྱི་སྐུ་བརྙན་གང་ཡང་བཟོ་མི་རུང་།
EXO 20:24 ངའི་ཆེད་དུ་ས་ཡི་མཆོད་ཁྲི་ཞིག་བརྩིག་པར་གྱིས་ལ། དེའི་སྟེང་དུ་ཁྱོད་ཅག་གི་སྦྱིན་སྲེག་དང་། ཞི་བདེའི་མཆོད་པ་རྣམས་དང་། ར་ལུག་དང་བ་གླང་གི་མཆོད་པ་འབུལ་དགོས། ངས་རང་གི་མིང་དྲན་སྐུལ་བྱེད་པའི་གནས་གང་དང་གང་དུ་ང་རང་ཁྱོད་ཅག་གི་གམ་དུ་འོངས་ཏེ་ཁྱོད་ཅག་ལ་བྱིན་རླབས་གནང་བར་འགྱུར།
EXO 20:25 ཡང་གལ་ཏེ་ངའི་ཕྱིར་རྡོ་ཡི་མཆོད་ཁྲི་ཞིག་བརྩིག་པར་བྱེད་ན། མ་བཅོས་པའི་རྡོ་རྣམས་ལས་བརྩིག་པར་གྱིས། རྒྱུ་མཚན་ནི་ཁྱོད་རྣམས་ཀྱིས་དེའི་སྟེང་དུ་བཟོ་བྱེད་བཀོལ་ན་མཆོད་ཁྲི་མི་གཙང་བར་བྱེད་པས་སོ། །
EXO 20:26 ཡང་ཁྱོད་རྣམས་ཀྱི་ཁོག་སྨད་གཅེར་བུར་མི་འབུད་པའི་ཕྱིར། ཁྱོད་རྣམས་ཐེམ་སྐས་ཀྱི་སྟེང་ནས་བདག་གི་མཆོད་ཁྲི་སྟེང་དུ་མ་འབུད་ཅིག་ཅེས་གསུངས་སོ། །
EXO 21:1 ཡང་འདི་སྐད་དུ། ཁྱོད་ཀྱིས་འབངས་མིའི་མདུན་དུ་འཛུགས་དགོས་པའི་ཁྲིམས་སྲོལ་ནི་འདི་ལྟ་སྟེ།
EXO 21:2 ཁྱོད་རྣམས་ཀྱིས་ཨིབ་རི་པའི་བྲན་གཡོག་ཅིག་ཉོས་ཚེ། ཁོས་ལོ་དྲུག་གི་རིང་ལ་གཡོག་བྱེད་དགོས་པ་དང་། ལོ་བདུན་པར་ཁོ་ཚོར་རང་དབང་འཐོབ་འོས་ཏེ་རིན་ཅི་ཡང་སྤྲོད་མི་དགོས་པར་སོང་ཆོག་པ་ཡིན།
EXO 21:3 ཁོ་རང་གཅིག་པུ་ཡོང་བ་ཡིན་ན། གཅིག་པུ་ཕྱིར་སོང་ཆོག་ལ། ཁོ་ཆུང་མ་དང་ལྷན་དུ་ཡོང་བ་ཡིན་ན། ཆུང་མ་ཁོ་དང་མཉམ་དུ་སོང་ཆོག
EXO 21:4 དེའི་བདག་པོས་ཁོ་ལ་ཆུང་མ་ཞིག་སྤྲད་ནས། ཆུང་མ་དེས་ཁོ་ལ་བུའམ་བུ་མོ་བཙས་ན། ཆུང་མ་དང་བུ་ཕྲུག་རྣམས་བདག་པོའི་ཡིན་ཞིང་། ཁོ་རང་གཅིག་པུ་ཕྱིར་འགྲོ་དགོས།
EXO 21:5 གལ་ཏེ་བྲན་གཡོག་གིས་འདི་ལྟར། ངས་རང་གི་བདག་པོ་དང་ཆུང་མ་དང་བུ་ཕྲུག་རྣམས་ལ་གཅེས་ཤིང་། རང་དབང་གིས་ཕྱིར་འགྲོ་བར་མི་འདོད་ཅེས་གསལ་པོར་སྨྲས་ན།
EXO 21:6 ཁོའི་བདག་པོས་མི་དེ་དཀོན་མཆོག་གི་མདུན་དུ་ཁྲིད་པ་དང་། ཡང་སྒོ་མདུན་ནམ་ཡང་ན་སྒོ་འགྲམ་དུ་ཁྲིད་ནས། སྙུང་བུས་དེའི་རྣ་བ་འབིགས་དགོས་པ་དང་། མི་དེས་གཏན་དུ་བདག་པོར་གཡོག་བྱེད་དགོས་སོ། །
EXO 21:7 ཡང་མི་ཞིག་གིས་རང་གི་བུ་མོ་གཡོག་མོ་བྱེད་དུ་བཙོངས་ན། ཁོ་མོ་གཡོག་པོ་རྣམས་ལ་རང་དབང་ཐོབ་པ་བཞིན་སོང་མི་ཆོག
EXO 21:8 བདག་པོས་ཁོ་མོ་རང་གི་ཕྱིར་བདམས་ཀྱང་དེ་ལ་མི་དགའ་ན། ཁོ་མོ་བླུ་རུ་འཇུག་དགོས། ཡང་བདག་པོས་ཁོ་མོ་བསླུས་པའི་རྐྱེན་གྱིས། ཁོ་མོ་ཕྱི་ཕྱོགས་པ་ལ་བཙོང་བའི་དབང་ཆ་དེ་ལ་མེད།
EXO 21:9 གལ་ཏེ་བདག་པོས་རང་གི་བུ་ཡི་ཕྱིར་ཁོ་མོ་བདམས་པ་ཡིན་ན་དེ་ལ་རང་གི་བུ་མོ་ཡིན་པའི་སྲོལ་བཞིན་བྱེད་དགོས།
EXO 21:10 ཡང་ཁོས་བུད་མེད་གཞན་ཞིག་ཆུང་མར་བླངས་ན། བུད་མེད་དེའི་ལྟོ་གོས་དང་གཉིས་སྦྱོར་གྱི་ཐོབ་འབབ་ཅི་ཡིན་ཡང་འཕྲི་མི་རུང་།
EXO 21:11 དོན་འདི་གསུམ་ག་མ་བསྒྲུབས་པ་ཡིན་ན། ཁོ་མོ་བླུ་རིན་མ་འཇལ་བར་སོང་ཆོག་པ་ཡིན་ཞེས་གསུངས་སོ། །
EXO 21:12 ཡང་འདི་སྐད་དུ། སུས་ཀྱང་མི་ཞིག་ལ་བརྡུངས་ནས་བསད་ཚེ། རྡུང་མཁན་དེའི་སྲོག་ཅི་ནས་ཀྱང་གཅོད་དགོས།
EXO 21:13 འོན་ཀྱང་ཁོས་མི་ལ་མ་འཇབ་པར། དཀོན་མཆོག་གིས་མི་དེ་ཁོའི་ལག་ཏུ་གཏད་པ་ཡིན་ན། མི་དེ་འབྲོ་སའི་གནས་ཤིག་བདག་གིས་བཀོད་སྒྲིག་བྱེད་པར་འགྱུར།
EXO 21:14 གལ་ཏེ་མི་ཞིག་གིས་གཡོ་ཐབས་ཀྱིས་མི་གཞན་ཞིག་བསམ་བཞིན་དུ་བསད་ཚེ། ཁོ་རང་བདག་གི་མཆོད་ཁྲིའི་གམ་དུ་སྦས་ན་ཡང་བཟུང་སྟེ་སྲོག་གཅོད་དགོས་སོ། །
EXO 21:15 ཡང་རང་གི་ཕའམ་མ་ལ་རྡུང་མཁན་དེའི་སྲོག་ཅི་ནས་ཀྱང་གཅོད་དགོས།
EXO 21:16 སུས་ཀྱང་མི་གཞན་ཞིག་བཙན་ཁྲིད་བྱས་ནས་བཙོངས་པའམ་ཡང་ན་རང་གི་དབང་འོག་ཏུ་ཉར་ན། ཁོའི་སྲོག་ཅི་ནས་ཀྱང་གཅོད་དགོས།
EXO 21:17 ཡང་རང་གི་ཕའམ་མ་ལ་སྨོན་ལོག་འདེབས་མཁན་དེའི་སྲོག་ཅི་ནས་ཀྱང་གཅོད་དགོས།
EXO 21:18 ཡང་མི་རྣམས་འཛིང་ནས་གཅིག་གིས་གཅིག་ལ་རྡོའམ་ལག་པས་བརྡུངས་པ་དང་། ད་དུང་འཆི་བའི་ཚད་ལ་མ་སླེབས་པར་མལ་སར་ལྷུང་བ་ཙམ་ཡིན་ཞིང་།
EXO 21:19 རྨས་མ་དེ་ཡང་བསྐྱར་ལངས་ནས་འཁར་བར་བརྟེན་ཏེ་ཕྱི་རོལ་ཏུ་འགྲོ་ཐུབ་པ་བྱུང་ཚེ། ཁོ་ལ་རྡུང་མཁན་དེ་ཉེས་མེད་དུ་རྩིས་ཆོག་མོད། འོན་ཀྱང་རྡུང་མཁན་གྱིས་རྨས་ཕོག་པའི་མི་དེའི་ལས་ཀར་དལ་འགོར་བྱས་པའི་གྱོང་གུད་འཚབ་དགོས་ཤིང་ཁོ་རང་སངས་དྲག་བྱེད་དུ་འཇུག་དགོས།
EXO 21:20 ཡང་མི་ཞིག་གིས་རང་གི་བྲན་གཡོག་གམ་ཡང་ན་གཡོག་མོ་ལ་དབྱུག་པས་བརྡུངས་ནས་འཕྲལ་དུ་ཁོའི་ལག་ཏུ་ཤི་ན། དེས་ངེས་པར་ཉེས་ཆད་འཁུར་དགོས།
EXO 21:21 འོན་ཀྱང་ཉིན་གཅིག་གམ་གཉིས་ལ་ད་དུང་གསོན་པོར་གནས་ན། ཁོ་རང་ནི་བདག་པོའི་རྒྱུ་ནོར་ཡིན་པའི་ཕྱིར་ཉེས་ཆད་འཁུར་མི་དགོས།
EXO 21:22 ཡང་མི་གཉིས་འཛིང་རེས་བྱེད་སྐབས་བུད་མེད་མངལ་དང་ལྡན་པ་ཞིག་ལ་ཁེལ་ནས་མངལ་ཤོར་དུ་བཅུག་ནའང་། ཕྱིས་སུ་གནོད་པ་གཞན་མ་བྱུང་ན། གནོད་སྐྱེལ་མཁན་གྱིས་བུད་མེད་དེའི་ཁྱོ་གའི་དགོས་འདོད་དང་། ཁྲིམས་དཔོན་རྣམས་ཀྱི་ཐག་བཅད་པ་བཞིན་འཇལ་དགོས།
EXO 21:23 གནོད་པ་གཞན་བྱུང་ན། དེ་ནས་སྲོག་ལ་སྲོག་ལན་དང་།
EXO 21:24 མིག་ལ་མིག་ལན། སོ་ལ་སོ་ལན། ལག་པ་ལ་ལག་པའི་ལན། རྐང་པ་ལ་རྐང་པའི་ལན།
EXO 21:25 འཚིག་རྨ་ལ་འཚིག་རྨའི་ལན། རྨས་ལ་རྨས་ལན། རྡུང་རྡེག་ལ་རྡུང་རྡེག་གིས་འཇལ་དགོས་སོ། །
EXO 21:26 ཡང་མི་ཞིག་གིས་རང་གི་བྲན་གཡོག་གི་མིག་གམ། ཡང་ན་གཡོག་མོའི་མིག་ལ་བརྒྱབ་ནས་མིག་ཞར་བར་བྱས་ན། མིག་དེའི་ཆེད་དུ་བྲན་གཡོག་དེར་རང་དབང་སྟེར་དགོས།
EXO 21:27 ཡང་ཁོས་རང་གི་བྲན་གཡོག་གི་སོའམ། ཡང་ན་གཡོག་མོའི་སོ་བཅག་ན། སོ་དེའི་ཆེད་དུ་བྲན་གཡོག་དེར་རང་དབང་སྟེར་དགོས་ཞེས་གསུངས་སོ། །
EXO 21:28 ཡང་འདི་སྐད་དུ། གལ་ཏེ་བ་གླང་ཞིག་གིས་སྐྱེས་པའམ་བུད་མེད་ཅིག་ལ་བརྡུངས་ནས་བསད་ན། བ་གླང་དེ་རྡོ་རུབ་བཏང་ནས་གསོད་དགོས། དེའི་ཤ་བཟའ་མི་རུང་། འོན་ཀྱང་གླང་བདག་ལ་ཉེས་པ་མེད།
EXO 21:29 གལ་ཏེ་བ་གླང་དེ་སྔར་ནས་མི་ལ་རྡུང་བར་གོམས་པ་དང་། གཞན་གྱིས་བདག་པོ་ལ་ཉེན་བརྡ་སྤྲད་ཡོད་ཀྱང་། བདག་པོས་དེ་མ་བཏགས་པར་སྐྱེས་པའམ་བུད་མེད་ཅིག་ལ་བརྡུངས་ནས་བསད་པ་ཡིན་ན། དེ་རྡོ་རུབ་བཏང་སྟེ་གསོད་པ་དང་གླང་བདག་ཀྱང་གསོད་དགོས།
EXO 21:30 འོན་ཀྱང་བདག་པོ་ནས་བླུ་རིན་ལེན་པ་ཡིན་ན། ཁོས་དེ་བཞིན་དུ་རང་སྲོག་གི་ཆེད་དུ་བླུ་རིན་འཇལ་དགོས།
EXO 21:31 བ་གླང་གིས་བུ་ཞིག་གམ་ཡང་ན་བུ་མོ་ཞིག་ལ་བརྡུངས་པ་ཡིན་ན། ཁྲིམས་དེ་བཞིན་དུ་བྱེད་དགོས་སོ། །
EXO 21:32 བ་གླང་གིས་བྲན་གཡོག་གམ་ཡང་ན་གཡོག་མོ་ཞིག་ལ་བརྡུངས་ན། དེ་དག་གི་བདག་པོ་ལ་དངུལ་སྲང་སུམ་ཅུ་སྟེར་བ་དང་། བ་གླང་ཡང་རྡོ་རུབ་བཏང་སྟེ་གསོད་དགོས།
EXO 21:33 ཡང་སུ་ཞིག་གིས་དོང་ཁ་ཕྱེས་པའམ། ཡང་ན་དོང་ཞིག་བྲུས་ནས་ཁ་མ་བཀབ་པས་བ་གླང་ངམ་བོང་བུ་ཞིག་དེའི་ནང་དུ་ལྷུང་ན།
EXO 21:34 དོང་གི་བདག་པོས་དེའི་རིན་དུ་ཕྱུགས་བདག་ལ་ཚབ་བཅལ་ནས། ཕྱུགས་ཤི་རོ་ནི་ཁོ་རང་ལ་དབང་དགོས།
EXO 21:35 ཡང་མི་ཞིག་གི་བ་གླང་གིས་གཞན་ཞིག་གི་བ་གླང་ལ་བརྡུངས་ནས་བསད་ན། བ་གླང་གསོན་པོ་དེ་བཙོངས་ནས། དེའི་རིན་ཆ་སྙོམས་སུ་བགོ་བ་དང་། བ་གླང་ཤི་རོ་ཡང་ཆ་སྙོམས་སུ་བགོ་བཤའ་རྒྱག་དགོས།
EXO 21:36 འོན་ཀྱང་བ་གླང་དེ་སྔར་ནས་མི་ལ་རྡུང་བར་གོམས་ནའང་བདག་པོས་དེ་མ་བཏགས་ན། བ་གླང་ལ་བ་གླང་གིས་ཚབ་འཇལ་བ་དང་། བ་གླང་ཤི་རོ་ནི་ཁོ་རང་ལ་དབང་བ་ཡིན་ཞེས་གསུངས་སོ། །
EXO 22:1 ཡང་འདི་སྐད་དུ། མི་ཞིག་གིས་བ་གླང་ངམ་ར་ལུག་ཅིག་བརྐུས་ཏེ་བཤས་པའམ་ཡང་ན་བཙོངས་པ་ཡིན་ན། བ་གླང་གཅིག་བ་གླང་ལྔ་ཡིས་འཚབ་དགོས་ཤིང་། ར་ལུག་གཅིག་ར་ལུག་བཞི་ཡིས་འཚབ་དགོས།
EXO 22:2 མི་ཞིག་གིས་ཆོམ་རྐུན་ཞིག་འཕྲལ་མར་བཟུང་ཞིང་བརྡུངས་ནས་ཤི་བར་གྱུར་ཚེ། དེའི་ཕྱིར་ཁྲག་ལན་ཁྲག་གིས་འཇལ་མི་དགོས།
EXO 22:3 གལ་ཏེ་ཉི་མ་ཤར་བའི་རྗེས་སུ་དོན་དེ་བྱུང་ན་ཁྲག་ལན་འཇལ་དགོས། སྤྱིར་རྐུན་མས་རྒྱུ་ཚབ་འཇལ་དགོས་ཤིང་། ཁོ་ལ་རྒྱུ་ཚབ་འཇལ་རྒྱུ་མེད་ན། ཁོ་རང་ཉིད་བཙོངས་ཏེ་རྒྱུ་ཚབ་བྱེད་དགོས།
EXO 22:4 གལ་ཏེ་ཁོས་བརྐུས་པའི་བ་གླང་ངམ་བོང་བུའམ་ར་ལུག་བཅས་རྐུན་མའི་ལག་ནས་གསོན་པོ་ཡིན་ན། ལྡབ་འགྱུར་གྱིས་འཚབ་དགོས་སོ། །
EXO 22:5 མི་ཞིག་གིས་རང་གི་ཕྱུགས་ཟོག་ནི་ཞིང་ངམ་རྒུན་ཚལ་དུ་འཚོས་ཏེ། རྗེས་སུ་ཕྱུགས་རྣམས་བཏང་ནས་གཞན་གྱི་ཞིང་ཁའང་བཟའ་བར་གྱུར་ན། རང་གི་ཞིང་དང་རྒུན་ཚལ་ནང་གི་མཆོག་ཡིན་པ་དེ་ཁོ་ལ་འཚབ་དགོས།
EXO 22:6 མེ་ཤོར་ནས་ཚེར་མ་བསྲེགས་ཏེ། གཞན་གྱི་མཉམ་དུ་སྤུངས་པའི་ཚར་ཕོན་དང་། གྱེན་ལ་འགྲེང་བའི་འབྲུ་སྙེ་དང་། ཡང་ན་ས་ཞིང་བཅས་ཐམས་ཅད་འཇོམས་པར་བྱས་ཚེ། མེ་གཏོང་མཁན་དེས་སྐྱིན་ཚབ་འཇལ་དགོས་སོ། །
EXO 22:7 མི་ཞིག་གིས་ཁྱིམ་མཚེས་ལ་དངུལ་དང་ཡང་ན་རྒྱུ་རྫས་བཅོལ་བ་དང་དེའི་ཁྱིམ་ནས་རྐུན་མས་ཁྱེར་བ་དང༌། གལ་ཏེ་རྐུན་མ་བཟུང་ན། རྐུན་མ་དེས་ལྡབ་འགྱུར་གྱིས་འཚབ་དགོས།
EXO 22:8 གལ་ཏེ་རྐུན་མ་དེ་ལག་ཏུ་མ་ཚུད་ན། ཁྱིམ་མཚེས་ཀྱིས་རྒྱུ་རྫས་ཁྱེར་མིན་ལ་བལྟ་བའི་ཕྱིར་ཁོ་རང་ཁྲིམས་དཔོན་རྣམས་ཀྱི་དྲུང་དུ་བཅར་དགོས།
EXO 22:9 མི་གཉིས་ཀྱི་གྱོད་དོན་ནི་ཉེས་པ་གང་གི་ཕྱིར་ཡིན་ཡང་། བ་གླང་ངམ་བོང་བུའམ་ར་ལུག་གམ་གོས་སམ། ཡང་ན་བོར་བའི་རྒྱུ་རྫས་གང་ཞིག་གི་ཕྱིར་དུ་མི་ཞིག་གིས་དེ་ནི་བདག་གི་ཡིན་ཞེས་ཟེར་བའི་དོན་གང་ཞིག་བྱུང་ན། རྩོད་པ་བྱུང་བའི་མི་གཉིས་ཀའི་གྱོད་དོན་ཁྲིམས་དཔོན་རྣམས་ཀྱི་དྲུང་དུ་སྙན་འབུལ་ཞུ་དགོས་པ་དང་། ཁྲིམས་དཔོན་རྣམས་ཀྱིས་མི་གང་ལ་ཉེས་ཆད་བཅད་པ་དེས་ཁྱིམ་མཚེས་ལ་ལྡབ་འགྱུར་གྱིས་འཚབ་དགོས།
EXO 22:10 མི་ཞིག་གིས་བོང་བུའམ་བ་གླང་ངམ་ར་ལུག་གམ། ཡང་ན་སྒོ་ཕྱུགས་གཞན་གང་ཡིན་པ་ཁྱིམ་མཚེས་ལ་བཅོལ་ཚེ། དེ་ཤི་བའམ་རྨས་སྐྱོན་བྱུང་བའམ། ཡང་ན་སུས་ཀྱང་མ་མཐོང་བར་གཞན་གྱིས་དེད་ཚེ།
EXO 22:11 དེ་གཉིས་ཀྱི་བར་ལ། ཁྱིམ་མཚེས་ཀྱིས་བཅོལ་མཁན་གྱི་རྒྱུ་རྫས་མ་ཁྱེར་ཞེས་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་དགོས་ཤིང་། བཅོལ་མཁན་གྱིས་ཀྱང་འདྲི་གཅོད་བྱེད་མཚམས་འཇོག་དགོས་པ་དང་། སྐྱིན་ཚབ་ཀྱང་སྤྲོད་མི་དགོས།
EXO 22:12 སྒོ་ཕྱུགས་ནི་འཚོ་མཁན་གྱི་ལག་ནས་རྐུན་མ་ལ་ཤོར་ན། ཁོས་བདག་པོར་སྐྱིན་ཚབ་འཇལ་དགོས།
EXO 22:13 གཅན་གཟན་གྱིས་ཐེར་ཚལ་དུ་དྲལ་བ་ཡིན་ན། དཔང་པོའི་ཕྱིར་དེའི་རོ་ཁྱེར་འོངས་པ་ལས་སྐྱིན་ཚབ་འཇལ་མི་དགོས།
EXO 22:14 ཡང་མི་ཞིག་གིས་ཁྱིམ་མཚེས་ནས་ཅི་ཞིག་གཡོར་བ་ལ། བདག་པོ་ཁོ་དང་མཉམ་དུ་མེད་པའི་ཚེ་དེ་ལ་རྨས་སྐྱོན་བྱུང་བའམ་ཤི་བ་ཡིན་ན། ཅིས་ཀྱང་སྐྱིན་ཚབ་འཇལ་དགོས་ཤིང་།
EXO 22:15 བདག་པོ་དང་མཉམ་དུ་ཡོད་ན་འཚབ་མི་དགོས། གལ་ཏེ་མི་དེས་ཁྱིམ་མཚེས་ནས་གླས་ པ་ཡིན་ན་གླ་ཆའི་ཕྱིར་ཡིན་པས་འཚབ་མི་དགོས་ཞེས་གསུངས་སོ། །
EXO 22:16 ཡང་འདི་སྐད་དུ། མི་ཞིག་གིས་གཉེན་རྟགས་བརྒྱབ་མེད་པའི་ན་ཆུང་བུ་མོ་ཞིག་བསླུས་ནས་དེ་དང་ལུས་འབྲེལ་བྱས་ན། རྒྱུ་བྱིན་ནས་བག་མར་ལེན་དགོས་ཏེ།
EXO 22:17 ཕ་ནི་བུ་མོ་མི་དེ་ལ་སྟེར་བར་ཁྱོན་ནས་མི་དགའ་ན། ན་ཆུང་བུ་མོ་རྣམས་ཀྱི་རྒྱུ་རིན་བཞིན་དུ་དངུལ་འཇལ་དགོས་སོ། །
EXO 22:18 ངན་སྔགས་ཤེས་པའི་བུད་མེད་ཅིག་འཚོ་རུ་མ་འཇུག
EXO 22:19 སུ་ཞིག་གིས་དུད་འགྲོ་ཞིག་དང་འཁྲིག་པ་སྤྱད་ན་དེའི་སྲོག་ཅིས་ཀྱང་གཅོད་དགོས།
EXO 22:20 དཀོན་མཆོག་ཡ་ཝཱེ་གཅིག་པུ་མ་གཏོགས་པར་ལྷ་གང་རུང་ལ་མཆོད་པ་འབུལ་བའི་མི་དེ་ཁྱོན་ནས་མེད་པར་བྱེད་དགོས།
EXO 22:21 ཁྱོད་ཅག་ཀྱང་ཨེ་ཅིབ་ཡུལ་ནས་བྱེས་པ་བྱས་མྱོང་བའི་ཕྱིར། བྱེས་པ་ཞིག་ལ་སྡུག་པོ་མ་གཏོང་། དེར་གནོན་ཤུགས་ཀྱང་སྦྱིན་མི་རུང་།
EXO 22:22 ཡུགས་མོ་དང་དྭ་ཕྲུག་སྡུག་ལ་མ་སྦྱོར་ཅིག
EXO 22:23 གལ་ཏེ་ཁྱོད་རྣམས་ཀྱིས་ཐབས་ཅི་ཞིག་གིས་དེ་དག་སྡུག་ལ་སྦྱར་བས་དེ་དག་གིས་ང་ལ་ཞུ་བ་ཕུལ་ན། བདག་གིས་དེ་རྣམས་ཀྱི་ཞུ་བར་ཅིས་ཀྱང་མཉན་ངེས་ཡིན་ལ།
EXO 22:24 ང་རང་ཁོང་ཁྲོ་རབ་ཏུ་འབར་ཏེ་ཁྱོད་རྣམས་རལ་གྲིས་འཇོམས་པར་བྱེད་པ་དང་། ཁྱོད་ཅག་གི་ཆུང་མ་རྣམས་ཡུགས་མོ་དང་། ཁྱོད་རྣམས་ཀྱི་བུ་ཕྲུག་རྣམས་དྭ་ཕྲུག་ཏུ་གཏོང་བར་འགྱུར་རོ། །
EXO 22:25 ཁྱོད་རྣམས་ཀྱིས་བདག་གི་འབངས་མི་ལས་ཁྱོད་ཅག་དང་མཉམ་དུ་ཡོད་པའི་དབུལ་པོ་རྣམས་ཀྱི་གཅིག་ལ་དངུལ་བསྐྱིས་ན། དེ་ལ་བུན་བདག་གི་ལུགས་བཞིན་མ་བྱེད། དངུལ་བུན་ལེན་མི་རུང་།
EXO 22:26 ཁྱིམ་མཚེས་ཀྱི་གོས་གཏའ་མར་བླངས་ན། ཉི་མ་མ་ནུབ་སྔོན་དུ་དེ་ལ་ཕྱིར་སྤྲོད་དགོས།
EXO 22:27 རྒྱུ་མཚན་ནི་དེ་ལ་གོས་ཁེབས་དང་ལུས་ལ་གྱོན་པ་དེ་ཁོ་ན་ལས་མེད་པས། ཁོས་ཅི་གོན་ནས་གཉིད་ལོག་པར་བྱེད་དམ། ཡང་མི་དེས་ང་ལ་ཞུ་བ་ཕུལ་ན། བདག་ནི་སྙིེང་རྗེ་ཅན་ཡིན་པས་དེ་ལ་མཉན་པར་འགྱུར་རོ། །
EXO 22:28 དཀོན་མཆོག་ལ་སྐུར་བ་མི་འདེབས་པ་དང་རང་གི་ཡུལ་མིའི་དཔོན་པོ་ལའང་སྐུར་བ་མི་འདེབས་པར་བྱའོ། །
EXO 22:29 ཁྱོད་རྣམས་ཀྱིས་རང་གི་ཞིང་ནང་གི་འབྲུ་རིགས་དང་འཚིར་གཞོང་ནང་གི་བཅུད་ཁུ་དེ་བདག་ལ་མཆོད་པར་འབུལ་དགོས་པ་དང་། དེ་ལ་འགོར་འགྱངས་བྱེད་མི་རུང་། ཁྱོད་ཅག་གིས་བུ་རྣམས་ཀྱི་སྐྱེས་འགོ་ཡང་ང་ལ་འབུལ་དགོས།
EXO 22:30 དེ་ལྟར་རང་གི་བ་གླང་དང་ར་ལུག་གི་ཕྱུགས་ཕྲུག་འགོ་མའང་བདག་ལ་འབུལ་དགོས། ཉིན་བདུན་ལ་ཨ་མ་དང་མཉམ་པོར་འདུག་ཏུ་ཆུག་ལ་ཉིན་བརྒྱད་པར་ང་ལ་འབུལ་བར་བྱའོ། །
EXO 22:31 ཁྱོད་རྣམས་ནི་ངའི་ཕྱིར་མི་དམ་པ་རྣམས་ཡིན་དགོས་པས་ན། ཐང་དུ་གཅན་གཟན་གྱིས་ཐེར་ཚལ་དུ་དྲལ་བའི་ཤ་དེ་ཁྱོད་ཅག་གིས་མི་བཟའ་བར་ཁྱི་རྣམས་ཀྱི་མདུན་ལ་གཡུགས་ཤིག་ཅེས་གསུངས་སོ། །
EXO 23:1 ཡང་འདི་སྐད་དུ། ཁྱོད་རྣམས་ཀྱིས་རྫུན་གཏམ་བསྒྲག་པར་མི་བྱའོ། །མི་ངན་དང་ཁ་མཐུན་ཏེ་རྫུན་གྱི་བདེན་དཔང་མ་བྱེད་ཅིག
EXO 23:2 ཁྱོད་ཅག་གིས་མི་ཚོགས་ལ་བསྟུན་ནས་ལས་ངན་པ་བྱེད་མི་རུང་། རྩོད་གཞིའི་ཐད་ནས་མང་ཕྱོགས་སུ་འཐེན་ཞིང་ཁྲིམས་ལོག་པར་བྱ་བའི་ཕྱིར་རྫུན་དཔང་མ་བྱེད།
EXO 23:3 དབུལ་པོ་ཞིག་ལ་ཁྲིམས་གཅོད་སྐབས་སུ་དེ་ལ་ཕྱོགས་རིས་བྱེད་མི་རུང་།
EXO 23:4 ཁྱོད་རྣམས་ནི་དགྲ་ཟླའི་བ་གླང་ངམ་བོང་བུ་འཁྱར་བོ་དག་དང་ཕྲད་ན། དེ་ཅིས་ཀྱང་ཁྲིད་ཡོང་སྟེ་བདག་པོ་ལ་སྤྲོད་དགོས།
EXO 23:5 ཁྱོད་ཅག་ལ་སྡང་བའི་མི་ཞིག་གི་བོང་བུ་དོས་ཀྱིས་མནན་པ་མཐོང་ན། ཁྱོད་རྣམས་ཀྱིས་དེ་མི་བསྐྱུར་བར་ཅིས་ཀྱང་དེའི་བདག་པོ་དང་མཉམ་དུ་དོས་འབོགས་དགོས།
EXO 23:6 ཁྱོད་ཅག་གིས་དབུལ་པོའི་གཏུག་བཤེར་གྱི་ཐད་ནས་དྲང་གཞག་འདོར་མི་རུང་།
EXO 23:7 རྫུན་གྱི་དོན་དང་རིང་དུ་གྱེས་ཤིག ཉེས་མེད་གཞུང་དྲང་ཡིན་པའི་མི་ནི་གསོད་མི་རུང་། ཅིའི་ཕྱིར་ཞེ་ན། ངས་མི་ཉེས་ཅན་ཞིག་གཞུང་དྲང་དུ་རྩི་བར་མི་འགྱུར་བའི་ཕྱིར་རོ། །
EXO 23:8 གསུག་ནོར་གྱིས་མི་བློ་གྲོས་ཅན་གྱི་མིག་ལོང་བར་བྱེད་ཅིང་། མི་དྲང་པོ་རྣམས་ཀྱི་གཏམ་ཡང་གོ་ལྡོག་པར་བྱེད་པས། ཁྱོད་རྣམས་ཀྱིས་གསུག་ནོར་གང་ཡང་མ་ལེན་ཞིག
EXO 23:9 བྱེས་པ་ལ་གཉའ་གནོན་མ་བྱེད་ཅིག ཁྱོད་ཅག་ཀྱང་ཨེ་ཅིབ་ཡུལ་ནས་བྱེས་པ་བྱས་མྱོང་བས། བྱེས་པའི་སྐྱིད་སྡུག་ཁྱོད་ཅག་གིས་ཤེས་པ་ཡིན་ཞེས་གསུངས་སོ། །
EXO 23:10 ཡང་འདི་སྐད་དུ། ལོ་དྲུག་གི་རིང་ལ་ཁྱོད་རྣམས་ཀྱིས་ཞིང་འདེབས་པ་དང་དེའི་ལོ་ཏོག་བསྡུས་ཆོག
EXO 23:11 འོན་ཀྱང་ལོ་བདུན་པ་ལ་ཁྱོད་ཅག་གིས་ཞིང་མི་རྨོ་ལ་བསློག་པར་ཡང་མི་བྱའོ། །དེ་ནས་ཁྱོད་ཅག་གི་མི་རྣམས་ལས་དབུལ་པོ་དག་གིས་དེ་ལས་བཟའ་བ་དང་། ལྷག་མ་རྣམས་ས་སྟེང་གི་དུད་འགྲོ་རྣམས་ཀྱིས་ཟོས་ཆོག་པ་ཡིན། ཁྱོད་ཅག་གི་རྒུན་ཚལ་དང་སྐྱུ་རུ་རའི་སྐྱེད་ཚལ་རྣམས་ཀྱང་ལུགས་དེ་བཞིན་དུ་བྱེད་དགོས།
EXO 23:12 ཉིན་དྲུག་གི་རིང་ལ་ཁྱོད་ཀྱིས་ལས་ཀ་བྱས་ཏེ། ཉིན་བདུན་པར་ངལ་གསོ་དགོས། གང་ལ་ཟེར་ན། ཁྱོད་རྣམས་ཀྱི་བ་གླང་དང་བོང་བུས་ཀྱང་ངལ་གསོ་དགོས་པ་དང་། ཁྱོད་ཅག་གི་གཡོག་མོའི་བུ་དང་བྱེས་པ་ལ་སྟོབས་ཤུགས་གསར་པ་འཐོབ་པའི་ཕྱིར་རོ། །
EXO 23:13 ངས་ཁྱོད་རྣམས་ལ་ཅི་དང་ཅི་སྨྲས་པ་ཐམས་ཅད་གཟབ་གཟབ་ངང་སྲུངས་ཤིག གཞན་པའི་ལྷ་རྣམས་ཀྱི་མིང་མ་ཟློ་ཞིག སོ་སོའི་ཁ་ནས་ཐོས་ཀྱང་མི་རུང་ཞེས་གསུངས་སོ། །
EXO 23:14 ཡང་འདི་སྐད་དུ། ལོ་རེར་ཁྱོད་ཅག་གིས་ལན་གསུམ་དུ་བདག་ལ་དུས་ཆེན་བསྲུང་དགོས་ཏེ།
EXO 23:15 སྐྱུར་མེད་བག་ལེབ་ཀྱི་དུས་ཆེན་འདི་བསྲུང་དགོས། ངས་ཁྱོད་ཅག་ལ་བསྒོས་པ་བཞིན་དུ་ཨ་རྦིབ་ཟླ་བའི་ནང་དུས་བཅད་ལྟར་ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས་ཏེ། རྒྱུ་མཚན་ནི། ཁྱོད་ཅག་སྐབས་དེར་ཨེ་ཅིབ་ཡུལ་ནས་ཐོན་པས་སོ། །སུ་ཡིན་ཡང་ལག་སྟོང་ལ་ངའི་མདུན་དུ་ཡོང་མི་རུང་།
EXO 23:16 དེ་ནས་ཁྱོད་ཅག་གིས་ཞིང་ལ་བཏབ་པའི་ས་བོན་ལས་འབྲས་བུ་ཐོག་མ་བསྡུ་བའི་ཕྱིར་སྟོན་བསྡུ་དུས་ཆེན་གཏོང་དགོས་པ་དང་། ལོ་མཇུག་ལ་ཁྱོད་ཅག་གིས་འབྲུ་རིགས་བསྡུ་ཉར་བྱས་ནས་བསྡུ་ཉར་དུས་ཆེན་གཏོང་དགོས་ཤིང་།
EXO 23:17 ལོ་རེར་ལན་གསུམ་ལ་ཁྱོད་ཅག་གི་སྐྱེས་པ་ཐམས་ཅད་གཙོ་བོ་ཡ་ཝཱེའི་མདུན་དུ་བསླེབ་དགོས།
EXO 23:18 ཁྱོད་ཅག་གིས་བདག་ལ་ཕུལ་བའི་དམར་མཆོད་ཀྱི་ཁྲག་དེ་སྐྱུར་རྩི་ལྡན་པའི་བག་ལེབ་དང་མཉམ་དུ་འབུལ་མི་རུང་ལ། ངའི་དུས་ཆེན་ལ་ཕུལ་བའི་ཚིལ་ནི་ཕྱི་ཉིན་ཞོགས་པའི་བར་དུ་བསྐྱུར་མི་རུང་།
EXO 23:19 ཁྱོད་ཅག་གི་ས་ཞིང་ལས་སྨིན་པའི་འབྲས་བུ་ཐོག་མ་ནི་ཁྱོད་ཅག་གི་དཀོན་མཆོག་ཡ་ཝཱེའི་བཞུགས་གནས་སུ་འབུལ་དགོས། ཁྱོད་ཅག་གིས་རེའུ་ཞིག་དེའི་ཨ་མའི་འོ་མ་ནང་དུ་བཙོ་མི་རུང་ཞེས་གསུངས་སོ། །
EXO 23:20 ཡང་འདི་སྐད་དུ། ལྟོས་དང་། ངས་ཁྱོད་ཅག་གི་སྔོན་དུ་ཕོ་ཉ་ཞིག་གཏོང་བར་བྱ་སྟེ། དེས་ལམ་བར་ནས་ཁྱོད་ཅག་བསྲུང་ཞིང་། ངས་སྟ་གོན་བྱས་པའི་གནས་སུ་འཁྲིད་པར་འགྱུར།
EXO 23:21 ཁྱོད་ཅག་གིས་དེའི་དྲུང་དུ་གཟབ་གཟབ་གྱིས་ཤིག ཁོའི་བཀའ་ལ་ཉོན་ཅིག ཁོ་ལ་རྒྱབ་འགལ་མ་བྱེད་ཅིག ཅི་ཡིན་ཞེ་ན། བདག་གི་མིང་ཁོའི་ནང་དུ་ཡོད་པས། ཁོས་ཁྱོད་རྣམས་ཀྱི་ཉེས་པ་ལ་གུ་ཡངས་གཏོང་བར་མི་འགྱུར་བའི་ཕྱིར་རོ། །
EXO 23:22 ཁྱོད་ཅག་གིས་དངོས་གནས་དེའི་བཀའ་ལ་མཉན་པ་དང་། བདག་གིས་ཇི་སྨྲས་པ་བཞིན་དུ་བྱེད་ན། བདག་གིས་ཁྱོད་ཅག་གི་དགྲ་རྣམས་དགྲ་རུ་འཛིན་ཞིང་། ཁྱོད་ཅག་ལ་རྒོལ་མཁན་རྣམས་ལ་རྒོལ་བར་བྱ།
EXO 23:23 བདག་གི་ཕོ་ཉ་དེ་ཁྱོད་ཅག་གི་མདུན་དུ་བྱོན་ཏེ། ཁྱོད་ཅག་ཨེ་མོར་པ་དང་། ཧེད་པ་དང་། ཕེ་རེ་ཟི་པ་དང་། ཀ་ན་ཨན་པ་དང་། ཧེ་བི་པ་དང་། ཡེ་བུ་སི་པ་རྣམས་ཀྱི་ཡུལ་དུ་འཁྲིད་པ་དང་། བདག་གིས་མི་རིགས་དེ་རྣམས་རྩ་མེད་གཏོང་བར་འགྱུར།
EXO 23:24 ཁྱོད་ཅག་གིས་དེ་དག་གི་སྐུ་བརྙན་རྣམས་ལ་ཕྱག་མ་འཚལ་ཞིག དེ་རྣམས་ལ་བསྙེན་བཀུར་ཡང་མ་བྱེད་ཅིག དེ་དག་གི་བྱེད་ལུགས་བཞིན་དུ་ཡང་མ་སྤྱོད་ཅིག ཁྱོད་ཅག་གིས་དེ་དག་རྡུལ་དུ་བརླག་པ་དང་། དེ་དག་གི་རྡོ་སྐུ་རྣམས་ཀྱང་རྩ་མེད་དུ་གཏོང་བར་གྱིས།
EXO 23:25 ཡང་ཁྱོད་ཅག་གིས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དགོས་ཤིང་། ཁོང་གིས་ཁྱོད་ཅག་གི་ཁ་ཟས་དང་ཆུ་ལ་བྱིན་རླབས་མཛད་པར་འགྱུར་ཞིང་། ཁྱོད་ཅག་གི་ཁྲོད་ནས་ནད་རིགས་ཀྱང་མེད་པར་བྱེད་ངེས་ཡིན།
EXO 23:26 མངལ་ནས་བྱིས་པ་ཤོར་བའམ་མོ་གཤམ་ནི་ཁྱོད་ཅག་གི་ཡུལ་དུ་ཡོད་མི་སྲིད། བདག་གིས་ཁྱོད་ཅག་གི་ཚེ་ཚད་ལོང་བར་བྱའོ། །
EXO 23:27 ཁྱོད་རང་ཡུལ་གང་དུ་སླེབས་ནའང་། བདག་གིས་ཁྱོད་ཅག་གི་མདུན་ནས་ང་ཡི་རྔམ་བརྗིད་སྟོན་ཞིང་ཡུལ་དེའི་མི་ཐམས་ཅད་འཁྲུག་ཏུ་འཇུག་པ་དང་། ཡང་ཁྱོད་ཅག་གི་དགྲ་བོ་ཐམས་ཅད་ཀྱིས་ཁྱོད་ཅག་ལ་རང་རང་གི་རྒྱབ་སྟོན་པར་འགྱུར།
EXO 23:28 ཡང་ངས་ཁྱོད་ཅག་གི་སྔུན་ལ་དུག་སྦྲང་མང་པོ་བཏང་ནས། དེ་དག་གིས་ཧེ་བི་པ་དང་ཀ་ན་ཨན་པ་དང་ཧེད་པ་རྣམས་སྐྲོད་པར་བྱའོ། །
EXO 23:29 ཡུལ་ནི་ས་སྟོང་དུ་ལུས་ཤིང་། ཁྱོད་ཅག་ལ་གནོད་པའི་ས་སྟེང་གི་གཅན་གཟན་རྣམས་འཕེལ་ཉེན་ཡོད་པས། ངས་མི་དེ་དག་ལོ་གཅིག་གི་རིང་ལ་སྐྲོད་པར་མི་བྱ།
EXO 23:30 བདག་གིས་ཁྱོད་ཅག་གི་མི་གྲངས་འཕེལ་ནས་ཡུལ་དེ་བདག་གིར་བཟུང་བའི་བར་དུ་ཁོ་རྣམས་རིམ་བཞིན་སྐྲོད་པར་བྱའོ། །
EXO 23:31 ངས་ཁྱོད་ཅག་གི་མཐའ་རྣམས་སུ་རྒྱ་མཚོ་དམར་པོ་ནས་ཕེ་ལེ་ཤེད་པའི་རྒྱ་མཚོའི་བར་དང་། དབེན་སྟོང་ནས་ཕི་རཱད་ཆུ་བོའི་བར་དུ་མཚམས་ཤིག་ཕྱེ་བར་བྱ། བདག་གིས་ཡུལ་དེའི་མི་རྣམས་ཁྱོད་ཅག་གི་ལག་ཏུ་སྤྲོད་ཅིང་། ཁྱོད་ཅག་གིས་དེ་དག་རང་གི་མདུན་ནས་སྐྲོད་པར་འགྱུར།
EXO 23:32 ཁྱོད་ཅག་གིས་དེ་དག་དང་དེ་དག་གི་ལྷ་རྣམས་ཀྱི་བར་ཁ་ཆད་མ་འཇོག་ཅིག
EXO 23:33 དེ་དག་གིས་ཁྱོད་རྣམས་ལ་ང་དང་འགལ་བའི་སྡིག་པ་བྱེད་དུ་འཇུག་ཉེན་ཡོད་པས། དེ་དག་ཁྱོད་ཅག་གི་ཡུལ་དུ་གནས་པར་མི་འོས་སོ། །གལ་ཏེ་ཁྱོད་ཅག་གིས་དེ་དག་གི་ལྷ་རྣམས་ལ་བསྙེན་བཀུར་བྱེད་ན། དེ་ནི་ཅིས་ཀྱང་ཁྱོད་ཅག་གཟུང་བའི་རྙི་ཞིག་ཏུ་འགྱུར་ངེས་ཡིན་ཞེས་གསུངས་སོ། །
EXO 24:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་དང་ཨ་རོན་དང་ནཱ་དབ་དང་ཨ་བི་ཧུ་དང་ཡེས་ར་ཨེལ་གྱི་རྒན་པོ་བདུན་ཅུ་དཀོན་མཆོག་ཡ་ཝཱེའི་མདུན་དུ་ཡར་ཤོག་དང་། རྒྱང་རིང་ནས་གུས་ཕྱག་ཕུལ་ཞིག
EXO 24:2 འོན་ཀྱང་མོ་ཤེ་གཅིག་པུ་དཀོན་མཆོག་ཡ་ཝཱེའི་ཉེ་སར་བཅར་ཆོག་ཅིང་། གཞན་དག་ཉེ་སར་ཡོང་མི་རུང་ལ། མི་རྣམས་ཀྱང་མོ་ཤེ་དང་མཉམ་དུ་ཡར་འོང་མི་རུང་ཞེས་གསུངས་སོ། །
EXO 24:3 མོ་ཤེ་ཡོང་ནས་དཀོན་མཆོག་ཡ་ཝཱེའི་བཀའ་དང་ཁྲིམས་སྲོལ་ཐམས་ཅད་མི་རྣམས་ལ་སྨྲས་པ་དང་། དེའི་ལན་དུ་མི་ཐམས་ཅད་ཁ་མཐུན་ཏེ་ན་རེ། དཀོན་མཆོག་ཡ་ཝཱེས་བཀའ་ཅི་བསྒོས་པ་བཞིན་དུ་ངེད་ཅག་གིས་བསྒྲུབ་པར་བྱ་ཞེས་སྨྲས།
EXO 24:4 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་བཀའ་ཐམས་ཅད་ཡི་གེར་བཀོད་ཅིང་། ཐོ་རངས་ཡར་ལངས་ཏེ་རི་འདབས་སུ་མཆོད་ཁྲི་ཞིག་བཞེངས་པ་དང་། ཡང་ཡེས་ར་ཨེལ་གྱི་ཚོ་པ་བཅུ་གཉིས་བཞིན་དུ་ཀ་བ་བཅུ་གཉིས་བསྒྲེངས་སོ། །
EXO 24:5 ཡང་ཁོས་ཡེས་ར་ཨེལ་པའི་ཁྲོད་ཀྱི་གཞོན་ནུ་རྣམས་བཏང་བ་དང་། དེ་དག་གིས་སྦྱིན་སྲེག་རྣམས་ཕུལ་ཞིང་། གླང་ཐུག་རྣམས་བསད་ནས་ཞི་བདེའི་མཆོད་པ་རྣམས་དཀོན་མཆོག་ཡ་ཝཱེ་ལ་ཕུལ།
EXO 24:6 མོ་ཤེ་ཡིས་ཁྲག་གི་ཕྱེད་ཀ་གཞོང་པའི་ནང་དུ་བླུགས་ཤིང་། ཕྱེད་ཀ་མཆོད་ཁྲི་ལ་གཏོར་བའོ། །
EXO 24:7 ཡང་ཞལ་ཆད་ཀྱི་གླེགས་བམ་བླངས་ནས་མི་རྣམས་ཀྱི་མདུན་ནས་བཀླགས་པ་དང་། ཁོ་རྣམས་ན་རེ། དཀོན་མཆོག་ཡ་ཝཱེས་བཀའ་ཅི་བསྒོས་པ་བཞིན་དུ་ངེད་ཅག་གིས་བྱེད་པ་དང་། བཀའ་ལ་མཉན་པར་བྱའོ་ཞེས་སྨྲས།
EXO 24:8 དེ་ནས་མོ་ཤེ་ཡིས་ཁྲག་དེ་བླངས་ནས་མི་རྣམས་ལ་གཏོར་ཅིང་འདི་ལྟར། ལྟོས་དང་། འདི་ནི་ཞལ་ཆད་ཀྱི་ཁྲག་ཡིན་ཏེ། དཀོན་མཆོག་ཡ་ཝཱེས་བཀའ་འདི་ཐམས་ཅད་བཞིན་ཁྱོད་རྣམས་ལ་མཛད་ཟིན་པའི་ཞལ་ཆད་ཀྱི་གཞི་འཛིན་ས་ཡིན་ཞེས་སྨྲས་སོ། །
EXO 24:9 དེ་ནས་མོ་ཤེ་དང་ཨ་རོན་དང་ནཱ་དབ་དང་ཨ་བི་ཧུ། དེ་མིན་ཡེས་ར་ཨེལ་གྱི་རྒན་པོ་བདུན་ཅུ་དང་བཅས་པ་ཡར་རི་ལ་འགོས་པ་དང་།
EXO 24:10 ཁོ་རྣམས་ཀྱིས་ཡེས་ར་ཨེལ་གྱི་དཀོན་མཆོག་མཇལ་ཞིང་། ཁོང་གི་ཞབས་འོག་ཏུ་ཨིནྡྲ་ནཱི་ལའི་རྡོ་གཅལ་ཞིག་བཏིངས་ཡོད་པ་དང་མཚུངས་ལ། དེ་ནི་དགུང་ཨ་སྔོན་བཞིན་གསལ་ཞིང་དྭངས་པ་ཞིག་ཡིན་འདུག
EXO 24:11 འོན་ཀྱང་ཁོང་གི་ཕྱག་གིས་ཡེས་ར་ཨེལ་པ་རྣམས་ཀྱི་འགོ་དཔོན་རྣམས་ལ་གནོད་མ་བསྐྱལ་ཞིང་། དེ་དག་གིས་དཀོན་མཆོག་མཇལ་བ་དང་བཟའ་བཏུང་སྤྱད་དོ། །
EXO 24:12 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་མི་རྣམས་ལ་ཁྲིད་སྟོན་བྱེད་པའི་ཆེད་དུ། བདག་གིས་རྡོ་ལེབ་རྣམས་ལ་བྲིས་པའི་བཀའ་ཁྲིམས་དང་བཀའ་ཁྱོད་ལ་གནང་ངེས་ཡིན་པས། ཁྱོད་རང་རི་མགོར་ངའི་དྲུང་དུ་ཤོག་ལ་འདི་གར་སྡོད་ཅིག་ཅེས་གསུངས་པ་ལ།
EXO 24:13 མོ་ཤེ་དང་ཁོའི་ཞབས་ཕྱི་ཡོ་ཤུ་ཨ་གཉིས་ཆས་ཏེ་དཀོན་མཆོག་གི་རི་ལ་འགོས།
EXO 24:14 མོ་ཤེ་ཡིས་རྒན་པོ་རྣམས་ལ་འདི་ལྟར། ངེད་གཉིས་ཕྱིར་ལོག་པའི་བར་དུ་ཁྱོད་ཅག་གིས་འདི་རུ་སྒུག་སྡོད་དང་། ཨ་རོན་དང་ཧུ་རཱ་གཉིས་ཁྱོད་ཅག་དང་མཉམ་དུ་ཡོད་པས། སུ་ལ་གྱོད་གཞི་ཡོད་ན། དེ་གཉིས་ཀྱི་གམ་དུ་འགྲོ་དགོས་ཞེས་བཀའ་གནང་།
EXO 24:15 མོ་ཤེ་རི་ལ་འགོ་སྐབས་རི་ནི་སྤྲིན་གྱིས་གཡོགས་ནས་འདུག
EXO 24:16 དེ་ནས་སི་ནཱ་རི་བོ་ལ་དཀོན་མཆོག་ཡ་ཝཱེའི་གཟི་བརྗིད་བཞུགས་པ་དང་། ཉིན་དྲུག་གི་རིང་ལ་སྤྲིན་གྱིས་རི་བོ་གཡོགས་ཤིང་། ཉིན་བདུན་པར་ཁོང་གིས་སྤྲིན་གྱི་དཀྱིལ་ནས་མོ་ཤེ་ལ་ཞལ་འབོད་གནང་།
EXO 24:17 ཡེས་ར་ཨེལ་པ་རྣམས་ཀྱི་མིག་ལམ་དུ་དཀོན་མཆོག་ཡ་ཝཱེའི་གཟི་བརྗིད་མངོན་པ་ནི་ཡོངས་རྫོགས་རྩ་མེད་གཏོང་བའི་མེ་ལྟར་དུ་རི་རྩེར་ཡོད་དོ། །
EXO 24:18 དེ་ནས་མོ་ཤེ་སྤྲིན་གྱི་དཀྱིལ་དུ་ཞུགས་པ་དང་། རི་ལ་འགོས་ནས་ཉིན་ཞག་བཞི་བཅུའི་རིང་དེར་གནས་སོ། །
EXO 25:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 25:2 ཁྱོད་ཀྱིས་ཡེས་ར་ཨེལ་པ་རྣམས་ལ། བདག་ལ་འབུལ་བ་འབུལ་དགོས་པར་སྨྲོས་ཤིག སེམས་ནས་འབུལ་བ་འབུལ་བར་དགའ་བ་རྣམས་ལས་བདག་ལ་འབུལ་བ་བསྡུ་དགོས།
EXO 25:3 དེ་རྣམས་ལས་བསྡུ་དགོས་པའི་འབུལ་བ་རྣམས་ནི་འདི་ལྟ་སྟེ། གསེར་དང་དངུལ་དང་ལི་དང་།
EXO 25:4 བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུ་དང་། ར་མའི་ཁུལ་རྩིད་དང་།
EXO 25:5 ལུག་ཐུག་གི་པགས་པ་རྒྱ་ཚོས་བརྒྱབ་པ་དང་ཀོ་བ་སྤུས་ལེགས་དང་སེང་ལྡེང་ཤིང་དང་།
EXO 25:6 སྒྲོན་མེའི་ཕྱིར་འཚིར་སྣུམ་དང་། འབྱུག་སྣུམ་དང་དྲི་ཞིམ་བདུག་སྤོས་ཀྱི་ཕྱིར་བསུང་རྫས་རྣམས་དང་།
EXO 25:7 གཟི་དང་རིན་པོ་ཆེ་གཞན་དག་དགོས་པ་སྟེ། མཆོད་དཔོན་གྱི་བེར་ཐུལ་དང་བྲང་རྒྱན་ལ་ཕྲ་རྒྱག་དགོས་པའི་ཕྱིར་རོ། །
EXO 25:8 ཡང་ང་རང་ནི་དེ་དག་གི་དཀྱིལ་དུ་གནས་པའི་ཕྱིར་ཁོ་རྣམས་ཀྱིས་ང་ལ་གནས་མཆོག་ཅིག་བཟོ་དགོས།
EXO 25:9 ངས་ཁྱོད་ལ་སྟོན་པར་འགྱུར་བའི་གུར་མཆོག་གི་དཔེ་དང་། དེའི་ནང་ལ་ཡོད་པའི་ཡོ་བྱད་ཐམས་ཅད་ཀྱི་དཔེ་བཞིན་དུ་བཟོ་དགོས་ཞེས་གསུངས་སོ། །
EXO 25:10 ཡང་འདི་སྐད་དུ། ཁོ་རྣམས་ཀྱིས་སེང་ལྡེང་ཤིང་གིས་ཤུར་སྒམ་ཞིག་བཟོ་དགོས། དེའི་རིང་ཚད་ལ་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད། མཐོ་ཚད་ལ་ཁྲུ་གཅིག་དང་ཕྱེད་ཀའོ། །
EXO 25:11 དེའི་ཕྱི་ནང་གཉིས་གསེར་བཙོ་མས་གཡོགས་ཤིག དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོ་དགོས།
EXO 25:12 ཡང་གསེར་གྱི་ཨ་ལོང་བཞི་བླུགས་ནས་དེའི་སུག་པ་བཞི་ལ་སྦྱོར་དགོས་ཤིང་། ཨ་ལོང་གཉིས་ལོགས་གཅིག་དང་ཨ་ལོང་གཉིས་ལོགས་ཅིག་ཤོས་ལ་སྦྱོར་ཅིག
EXO 25:13 ཡང་སེང་ལྡེང་ཤིང་གིས་རྒྱུག་པ་གཉིས་བཟོས་ནས་དེ་གསེར་གྱིས་གཡོགས་ཤིག
EXO 25:14 ཤུར་སྒམ་དེ་འཁུར་བའི་ཕྱིར་རྒྱུག་པ་གཉིས་ཤུར་སྒམ་གྱི་ལོགས་གཉིས་ཀའི་ཨ་ལོང་རྣམས་ལ་རྒྱུས་ཤིག
EXO 25:15 རྒྱུག་པ་དེ་གཉིས་ཤུར་སྒམ་གྱི་ཨ་ལོང་ནང་དུ་ཡོད་དགོས་ཤིང་དེ་ལས་འདོན་མི་རུང་།
EXO 25:16 ཡང་ངས་ཁྱོད་རང་ལ་གནང་རྒྱུ་ཡིན་པའི་དཔང་པོའི་རྡོ་ལེབ་གཉིས་པོ་ཤུར་སྒམ་གྱི་ནང་དུ་འཇུག་དགོས་སོ། །
EXO 25:17 ཁྱོད་ཀྱིས་གསེར་བཙོ་མས་ཐུགས་རྗེའི་བཞུགས་ཁྲི་ཞིག་བཟོ་དགོས། དེའི་རིང་ཚད་ནི་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད་ཡིན།
EXO 25:18 ཁྱོད་ཀྱིས་ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་གསེར་གྱིས་འབུར་རྡུང་བྱས་པའི་ཀེ་རུབ་ཀྱི་གཟུགས་བརྙན་གཉིས་བཟོས་ཤིག
EXO 25:19 ཀེ་རུབ་གཅིག་སྣེ་མོ་གཅིག་དང་། ཀེ་རུབ་ཅིག་ཤོས་སྣེ་མོ་གཞན་དེ་ལ་བཟོས་ནས། ཀེ་རུབ་གཉིས་ནི་ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་དངོས་པོ་གཅིག་ཏུ་སྦྲེལ་བཟོ་བྱེད་དགོས།
EXO 25:20 ཀེ་རུབ་གཉིས་ཀྱིས་རང་གི་གཤོག་པ་གྱེན་དུ་རྐྱོང་ཞིང་ཐུགས་རྗེའི་བཞུགས་ཁྲི་གཡོགས་པ་དང་། ཀེ་རུབ་གཉིས་ཕན་ཚུན་ལ་གདོང་གཏོད་དགོས་པ་དང་། ཡང་དེ་གཉིས་ཀྱི་ཞལ་ངོ་ནི་བཞུགས་ཁྲི་ལ་འཁོར་དགོས།
EXO 25:21 ཁྱོད་ཀྱིས་ཐུགས་རྗེའི་བཞུགས་ཁྲི་དེ་ཤུར་སྒམ་གྱི་སྟེང་ལ་བཞག་ནས། ཤུར་སྒམ་གྱི་ནང་དུ་ངས་ཁྱོད་ལ་གནང་བར་འགྱུར་བའི་དཔང་པོའི་རྡོ་ལེབ་གཉིས་པོ་འཇུག་པར་བྱའོ། །
EXO 25:22 གནས་དེ་རུ་ང་རང་ཁྱོད་དང་འཕྲད་པར་འགྱུར་བ་དང་། ཐུགས་རྗེའི་བཞུགས་ཁྲིའི་གོང་ཕྱོགས་དང་། དཔང་མཛད་ཤུར་སྒམ་གྱི་སྟེང་ལ་ཡོད་པའི་ཀེ་རུབ་གཉིས་ཀྱི་དཀྱིལ་ཕྱོགས་ཀྱི་བར་ས་དེ་ནས། བདག་གིས་ཁྱོད་ལ་ཡེས་ར་ཨེལ་པ་རྣམས་ལ་སྒྲོག་པའི་བཀའ་ཐམས་ཅད་སྨྲ་བར་འགྱུར་ཞེས་གསུངས་སོ། །
EXO 25:23 ཡང་འདི་སྐད་དུ། ཁྱོད་ཀྱིས་སེང་ལྡེང་ཤིང་གིས་སྒྲོག་ཙེ་ཞིག་བཟོ་དགོས། དེའི་རིང་ཚད་ནི་ཁྲུ་གཉིས་དང་། ཞེང་ཚད་ལ་ཁྲུ་གཅིག མཐོ་ཚད་ཁྲུ་གཅིག་དང་ཕྱེད་ཀའོ། །
EXO 25:24 དེ་གསེར་བཙོ་མས་གཡོགས་པ་དང་། དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས་ཤིག
EXO 25:25 མུ་ཁྱུད་དེའི་འགབ་ཏུ་ཡང་མཐོ་ཚད་ལ་སོར་བཞི་ཅན་གྱི་མཐའ་རྒྱན་ཞིག་བྱོས་དང་། དེའི་སྟེང་དུ་ཡང་གསེར་གྱི་མུ་ཁྱུད་ཅིག་སྦྱོར་ཅིག
EXO 25:26 ཡང་དེ་ལ་གསེར་གྱི་ཨ་ལོང་བཞི་བཟོས་ཏེ། དེའི་གྲུ་བཞིའི་སུག་པ་བཞི་ལ་སྦྱོར་ཅིག
EXO 25:27 ཨ་ལོང་དེ་དག་མཐའ་རྒྱན་གྱི་འཁྲིས་སུ་སྦྱར་ཏེ་སྒྲོག་ཙེ་འཁུར་བའི་ཕྱིར་དེ་དག་ནི་རྒྱུག་པ་རྣམས་ཀྱི་བསྐོན་ས་ཡིན།
EXO 25:28 སྒྲོག་ཙེ་འཁུར་བའི་ཕྱིར་རྒྱུག་པ་དེ་རྣམས་སེང་ལྡེང་ཤིང་གིས་བཟོས་ཏེ་གསེར་གྱིས་གཡོགས་ཤིག
EXO 25:29 སྒྲོག་ཙེ་སྟེང་གི་གཞོང་པ་དང་སྡེར་མ་རྣམས་དང་། བུམ་པ་དང་། སྐྱེམས་མཆོད་འབུལ་བྱེད་ཨུ་ལུ་བཅས་བཟོ་དགོས་ཤིང་། དེ་དག་གསེར་བཙོ་མས་བཟོ་དགོས།
EXO 25:30 ཡང་སྒྲོག་ཙེ་དེའི་སྟེང་ལ་ཁྱོད་ཀྱིས་དུས་གཏན་དུ་ངའི་དྲུང་དུ་སྤྱན་བསྟར་བག་ལེབ་འཇོག་དགོས་ཞེས་གསུངས་སོ། །
EXO 25:31 ཡང་འདི་སྐད་དུ། ཁྱོད་ཀྱིས་སྒྲོན་སྟེགས་ཤིག་གསེར་བཙོ་མས་བཟོ་དགོས་ཏེ། སྒྲོན་སྟེགས་དེ་ནི་འབུར་རྡུང་གིས་བཟོ་དགོས་ཤིང་། དེའི་ཞབས་ར་དང་སྟེགས་རྐང་། སྒྲོན་ཕོར། གང་བུའི་གཟུགས། མེ་ཏོག་གི་དབྱིབས་ཚུགས་བཅས་སྒྲོན་སྟེགས་དང་སྦྲེལ་བཟོ་བྱེད་དགོས།
EXO 25:32 སྒྲོན་སྟེགས་ཀྱི་ལོགས་གཉིས་ནས་གེལ་པ་དྲུག་འཐོན་པར་བྱེད་དགོས་ཏེ། སྒྲོན་སྟེགས་ཀྱི་ལོགས་གཅིག་ནས་གེལ་པ་གསུམ་དང་ལོགས་ཅིག་ཤོས་སུ་གེལ་པ་གསུམ་འཐོན་དགོས།
EXO 25:33 ལོགས་གཉིས་ཀའི་གེལ་པ་རེ་ལ་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་གསུམ་རེ་ཡོད་པ་དང་། སྒྲོན་ཕོར་རེ་རེའི་སྟེགས་རྐང་དུ་གང་བུའི་གཟུགས་ཤིག་དང་། མེ་ཏོག་གཟུགས་ཤིག་བཅས་ཡོད་དགོས། སྒྲོན་སྟེགས་ཀྱི་སྤྱི་སྡོམ་གེལ་པ་དྲུག་པོ་ཕན་ཚུན་ཆ་མཚུངས་པ་ཡིན་དགོས།
EXO 25:34 ཡང་སྒྲོན་སྟེགས་རྐང་པའི་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་བཞི་ལ་གང་བུའི་གཟུགས་ཤིག་དང་མེ་ཏོག་གཟུགས་ཤིག་བཅས་ཡོད་དགོས་པ་དང་།
EXO 25:35 དེའི་གེལ་པ་ཟུང་གཅིག་གི་འོག་ཏུ་གང་བུའི་གཟུགས་ཤིག་དང་། ཡང་དེའི་གེལ་པ་གཞན་ཟུང་གི་འོག་ཏུའང་གང་བུའི་གཟུགས་ཤིག་དང་། ཡང་དེའི་གེལ་པ་གཞན་ཟུང་གི་འོག་ཏུའང་གང་བུའི་གཟུགས་ཤིག་སྟེ། དེ་ལྟར་སྒྲོན་སྟེགས་ལས་བྱུང་བའི་གེལ་པ་དྲུག་པོ་ལ་ཡོད་པར་བྱེད་དགོས་སོ། །
EXO 25:36 གང་བུའི་གཟུགས་རྣམས་དང་གེལ་པ་རྣམས་ནི་མུ་འབྲེལ་དུ་འབུར་རྡུང་བྱས་པའི་གསེར་བཙོ་མས་བཟོ་བར་བྱའོ། །
EXO 25:37 ཡང་དེ་ལ་སྒྲོན་མེ་བདུན་བཟོས་ཤིག དེ་རྣམས་ཀྱི་འོད་མདུན་ཕྱོགས་སུ་འཆར་བའི་ཕྱིར་སྒྲོན་སྟེགས་སྟེང་དུ་ཞོག་ཅིག
EXO 25:38 དེའི་སྡོང་རས་གཅོད་བྱེད་སྐམ་ཆུང་དང་ཀ་ཏོ་ར་རྣམས་གསེར་བཙོ་མས་བཟོ་དགོས།
EXO 25:39 སྒྲོན་སྟེགས་དང་དེའི་ཡོ་བྱད་ཐམས་ཅད་གསེར་བཙོ་མ་རྡོ་ཚད་གཅིག་གིས་བཟོ་དགོས།
EXO 25:40 རི་མགོ་ནས་ཁྱོད་ལ་བསྟན་པའི་དཔེ་བཞིན་དུ་དེ་དག་བཟོ་བ་ལ་གཟབ་གཟབ་གྱིས་ཤིག་ཅེས་གསུངས་སོ། །
EXO 26:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཡོལ་བ་བཅུ་ཡིས་གུར་མཆོག་བཟོ་བར་བྱའོ། །དེའི་རྒྱུ་ནི་སོ་རས་སྲབ་བུ་བསྒྲིམས་པ་ཅན་དང་། བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་གྱི་མདོག་ཅན་བཅས་ཡིན་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་དེ་དག་བཟོ་དགོས།
EXO 26:2 ཡོལ་བ་རེ་རེའི་རིང་ཚད་ལ་ཁྲུ་ཉི་ཤུ་ཉེར་བརྒྱད་དང་། ཞེང་ཚད་ལ་ཁྲུ་བཞི་ཡོད་པར་བྱོས། ཡོལ་བ་ཐམས་ཅད་ཀྱི་ཚད་ནི་གཅིག་ཡིན་དགོས།
EXO 26:3 ཡོལ་བ་ལྔ་ནི་ཕན་ཚུན་འབྲེལ་བར་བྱོས་ལ། ཡོལ་བ་གཞན་ལྔ་པོ་དེ་ཡང་ཕན་ཚུན་འབྲེལ་བར་བྱེད་དགོས།
EXO 26:4 ཡང་མུ་གཅིག་ཏུ་འབྲེལ་བའི་ཡོལ་བ་སྔ་མ་དེའི་སྣེ་མོར་མཐིང་མདོག་གི་སྒྲོག་ལུང་རྣམས་བྱོས་ལ། མུ་གཅིག་ཏུ་འབྲེལ་བའི་ཡོལ་བ་ཕྱི་མ་དེའི་སྣེ་མོ་ལའང་དེ་བཞིན་བྱོས་ཤིག
EXO 26:5 མུ་གཅིག་ཏུ་འབྲེལ་བའི་ཡོལ་བ་སྔ་མར་སྒྲོག་ལུང་ལྔ་བཅུ་བཟོ་བ་དང་། མུ་གཅིག་ཏུ་འབྲེལ་བའི་ཡོལ་བ་ཕྱི་མར་ཡང་སྒྲོག་ལུང་ལྔ་བཅུ་བཟོ་དགོས་ཏེ། སྒྲོག་ལུང་རྣམས་ཆ་རེ་ཁ་སྤྲད་ནས་འཇོག་དགོས།
EXO 26:6 ཡང་གུར་མཆོག་མུ་གཅིག་ཏུ་བསྒྲིལ་བའི་ཕྱིར་གསེར་ཀྱུ་ལྔ་བཅུ་བཟོས་ནས། ཡོལ་བ་རྣམས་གསེར་ཀྱུས་སྦྲེལ་དགོས་སོ། །
EXO 26:7 ཡང་ཁྱོད་ཀྱིས་གུར་མཆོག་གི་ཁེབས་རས་ཀྱི་ཕྱིར་ར་རྩིད་ཀྱི་ཡོལ་བ་བཅུ་གཅིག་བཟོ་དགོས།
EXO 26:8 ཡོལ་བ་རེ་རེའི་རིང་ཚད་ནི་ཁྲུ་སུམ་ཅུ་དང་། ཞེང་ཚད་ལ་ཁྲུ་བཞི་ཡོད་དགོས། ཡོལ་བ་བཅུ་གཅིག་པོའི་ཚད་གཅིག་ཡིན་དགོས།
EXO 26:9 ཡོལ་བ་ལྔ་ནི་གཅིག་ཏུ་སྦྲེལ་དགོས་ཤིང་། ཡོལ་བ་གཞན་དྲུག་པོ་ཡང་གཅིག་ཏུ་སྦྲེལ་བར་གྱིས། ཡོལ་བ་དྲུག་ཅན་དེ་གུར་གྱི་མདུན་ལོགས་སུ་ཉིས་ལྟེབ་བྱོས་ཤིག
EXO 26:10 ཡོལ་བ་སྦྲེལ་མ་ལྔ་ཅན་དེའི་སྣེ་མོར་སྒྲོག་ལུང་ལྔ་བཅུ་དང་། ཡོལ་བ་སྦྲེལ་མ་དྲུག་ཅན་དེའི་སྣེ་མོ་ལའང་སྒྲོག་ལུང་ལྔ་བཅུ་བཟོ་བར་བྱའོ། །
EXO 26:11 ཁྱོད་ཀྱིས་ལི་ཡི་ཀྱུ་ལྔ་བཅུ་བཟོས་ནས། སྒྲོག་ལུང་རྣམས་ལ་བསྐོན་ནས་ཁེབས་རས་ནི་མུ་གཅིག་འཁྱུད་གཅིག་ཡོང་བར་བྱེད་དགོས།
EXO 26:12 གུར་མཆོག་གི་ཡོལ་བ་རྣམས་ནས་ལུས་ཤིང་བསྣར་བའི་ཡོལ་བ་ཕྱེད་ཀ་དེ་གུར་མཆོག་གི་རྒྱབ་ལོགས་སུ་བསྣར་དགོས།
EXO 26:13 གུར་མཆོག་གི་ཡོལ་བ་རྣམས་ཀྱི་རིང་ཚད་ནས་ལུས་པའི་ཆ་དེ་ཁྲུ་གཅིག་ནི་གུར་མཆོག་དེའི་ཕྱོགས་གཅིག་དང་། ཁྲུ་ཅིག་ཤོས་ནི་གུར་མཆོག་གི་ལོགས་གཞན་ལ་བསྣར་ཏེ་འགེབ་དགོས་སོ། །
EXO 26:14 རྒྱ་ཚོས་བརྒྱབ་པའི་ལུག་ཐུག་གི་པགས་པས་ཁེབས་རས་གཡོགས་ཤིག་དང་། དེའི་སྟེང་དུ་ཀོ་བ་སྤུས་ལེགས་རྣམས་ཀྱིས་ཡང་ཁེབས་ཤིག་བཟོ་བར་བྱའོ། །
EXO 26:15 གུར་མཆོག་གི་ཕྱིར་སེང་ལྡེང་ཤིང་གིས་གྱེན་དུ་འགྲེང་བའི་པང་ལེབ་རྣམས་བཟོས་ཤིག
EXO 26:16 པང་ལེབ་རེའི་རིང་ཚད་ནི་ཁྲུ་བཅུ་དང་། ཞེང་ཚད་ནི་ཁྲུ་གཅིག་དང་ཕྱེད་ཀའོ། །
EXO 26:17 པང་ལེབ་གཅིག་དང་གཅིག་འབྲེལ་བའི་ཕྱིར་རེ་རེ་ལ་ཁོང་གཟེར་གཉིས་བྱོས་ཤིག་དང་། གུར་མཆོག་གི་པང་ལེབ་ཐམས་ཅད་དེ་ལྟར་བྱའོ། །
EXO 26:18 གུར་མཆོག་གི་ལྷོ་ཕྱོགས་སུ་པང་ལེབ་ཉི་ཤུ་དང་།
EXO 26:19 པང་ལེབ་ཉི་ཤུ་དེའི་ཞབས་ལ་དངུལ་གྱི་ཞབས་ར་བཞི་བཅུ་བཟོ་དགོས་ལ། པང་ལེབ་རེའི་ཁོང་གཟེར་གཉིས་ལ་ཞབས་ར་ཟུང་རེ་བྱོས་ཤིག
EXO 26:20 གུར་མཆོག་གི་ལོགས་གཞན་ཏེ། བྱང་ཕྱོགས་སུ་ཡང་པང་ལེབ་ཉི་ཤུ་དགོས་སོ། །
EXO 26:21 དེའི་དངུལ་གྱི་ཞབས་ར་བཞི་བཅུ་དང་། པང་ལེབ་རེའི་འོག་ལ་ཞབས་ར་ཟུང་རེ་བྱོས་ཤིག
EXO 26:22 གུར་མཆོག་གི་རྒྱབ་ལོགས་ཏེ་ནུབ་ཕྱོགས་སུ་པང་ལེབ་དྲུག་དང་།
EXO 26:23 གུར་མཆོག་རྒྱབ་ལོགས་ཀྱི་ཟུར་གཉིས་ལ་པང་ལེབ་གཉིས་བཟོ་བར་བྱའོ། །
EXO 26:24 དེ་གཉིས་ཀྱི་འགབ་ལ་པང་ལེབ་ཉིས་གཤིབ་དགོས་ཤིང་། དེའི་གོང་ལའང་པང་ལེབ་གཅིག་གི་སྣེ་ནས་པང་ལེབ་གཞན་ཞིག་གི་བར་དུ་ཨ་ལོང་གཅིག་གིས་སྦྲེལ་བར་བྱ་ཞིང་། དེ་བཞིན་དུ་པང་ལེབ་གཉིས་དེ་ལྟར་ཡོད་དགོས་ཤིང་ཟུར་གཉིས་ཡིན་པར་འགྱུར།
EXO 26:25 དེ་ལྟར་པང་ལེབ་བརྒྱད་དང་། དེ་དག་ལ་དངུལ་གྱི་ཞབས་ར་བཅུ་དྲུག་ཡོད་དགོས་ཏེ། པང་ལེབ་རེ་ལ་ཞབས་ར་གཉིས་བཅས་སོ། །
EXO 26:26 དེ་ནས་སེང་ལྡེང་ཤིང་གིས་འཕྲེད་རྒྱུག་རྣམས་བཟོ་དགོས་ཤིང་། གུར་མཆོག་གི་ལོགས་གཅིག་གི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་།
EXO 26:27 གུར་མཆོག་གི་ལོགས་གཞན་ལ་ཡོད་པའི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་། རྒྱབ་ལོགས་ཏེ་ནུབ་ཕྱོགས་ཀྱི་པང་ལེབ་རྣམས་ཀྱི་ཕྱིར་ཡང་འཕྲེད་རྒྱུག་ལྔ་ཡོད་དགོས།
EXO 26:28 པང་ལེབ་རྣམས་ཀྱི་དཀྱིལ་དུ་ཡོད་པའི་འཕྲེད་རྒྱུག་དག་སྣེ་གཅིག་ནས་སྣེ་གཞན་དུ་སླེབས་པར་བྱེད་དགོས།
EXO 26:29 པང་ལེབ་དེ་དག་གསེར་གྱིས་གཡོགས་ཤིག དེ་དག་གི་འཕྲེད་རྒྱུག་འཛིན་པའི་ཨ་ལོང་རྣམས་གསེར་དུ་བྱོས་ཤིག ཡང་འཕྲེད་རྒྱུག་དག་གསེར་གྱིས་གཡོགས་པར་བྱའོ། །
EXO 26:30 དེ་ལྟར་རི་ནས་ཁྱོད་ལ་བསྟན་པའི་དཔེ་བཞིན་དུ་གུར་མཆོག་ཕུབ་དགོས་སོ། །
EXO 26:31 ཡང་ཁྱོད་ཀྱིས་ཡོལ་བ་ཞིག་བཟོ་བར་བྱའོ། །དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས་ཤིང་། ཡང་དེ་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པར་བྱོས་ཤིག
EXO 26:32 ཡོལ་བ་དེ་ནི་སེང་ལྡེང་ཤིང་གི་ཀ་བ་བཞི་གསེར་གྱིས་གཡོགས་པར་འགེལ་བ་དང་། དེའི་ཀྱུ་རྣམས་གསེར་ཡིན་དགོས་ཏེ། ཀ་བ་རྣམས་དངུལ་གྱི་ཞབས་ར་ལ་བརྟེན་དགོས།
EXO 26:33 ཡོལ་བ་དེ་ཀྱུ་རྣམས་ཀྱི་སྣེ་རུ་དཔྱངས་པ་དང་། ཡོལ་བའི་ནང་ཐད་དུ་དཔང་མཛད་ཤུར་སྒམ་འཇོག་དགོས། དེ་ལྟར་ཡོལ་བ་དེས་ཁྱོད་རྣམས་ལ་གནས་དམ་པ་དང་གནས་དམ་མཆོག་གི་དབྱེ་མཚམས་འབྱེད་པར་འགྱུར་རོ། །
EXO 26:34 གནས་དམ་མཆོག་ནང་གི་དཔང་མཛད་ཤུར་སྒམ་གྱི་སྟེང་དུ་ཐུགས་རྗེའི་བཞུགས་ཁྲི་དེ་ཞོག་ཅིག
EXO 26:35 སྒྲོག་ཙེ་ནི་ཡོལ་བའི་ཕྱི་ལོགས་སུ་གུར་མཆོག་གི་བྱང་ཕྱོགས་དང་། སྒྲོན་སྟེགས་ནི་གུར་མཆོག་གི་ལྷོ་ཕྱོགས་སུ་ཕན་ཚུན་ཁ་སྤྲོད་དུ་འཇོག་དགོས་སོ། །
EXO 26:36 གུར་མཆོག་གི་སྒོ་ལ་སྒོ་ཡོལ་ཞིག་བཟོ་དགོས་ཤིང་། དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས་ལ། འཐག་མཁན་གྱི་ལས་བཞིན་དུ་བཟོ་དགོས།
EXO 26:37 སྒོ་ཡོལ་གྱི་ཕྱིར་སེང་ལྡེང་ཤིང་གི་ཀ་བ་ལྔ་གསེར་གྱིས་གཡོགས་པར་བྱོས་ལ། དེ་དག་གི་ཀྱུ་རྣམས་ཀྱང་གསེར་ཡིན་དགོས་པ་དང་། དེ་དག་གི་ཕྱིར་ཁྱོད་ཀྱིས་ལི་ཡི་ཞབས་ར་ལྔ་བླུགས་ཤིག་ཅེས་གསུངས་སོ། །
EXO 27:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་སེང་ལྡེང་ཤིང་གིས་མཆོད་ཁྲི་ཞིག་བཟོ་དགོས་ཤིང་། དེའི་རིང་ཚད་ལ་ཁྲུ་ལྔ་དང་ཞེང་ཚད་ལ་ཁྲུ་ལྔ་སྟེ་གྲུ་བཞི་མ་ཞིག་དང་། དེའི་མཐོ་ཚད་ལ་ཁྲུ་གསུམ་ཡོད་དགོས།
EXO 27:2 དེའི་ཟུར་བཞི་ལ་རུ་ཐུར་བཞི་བཟོ་དགོས་པ་དང་། རུ་ཐུར་བཞི་ནི་མཆོད་ཁྲི་དང་གཅིག་ཏུ་སྦྲེལ་དགོས་ཤིང་། མཆོད་ཁྲི་ལི་ཡིས་གཡོག་པར་བྱའོ། །
EXO 27:3 ཡང་ཁྱོད་ཀྱིས་ཐལ་བ་འཁྱེར་བའི་ཕྱིར་གཞོང་པ་རྣམས་བཟོ་དགོས་པ་དང་། ཡང་མེ་ཁྱེམ་དང་། མཆོད་སྡེར་དང་ཤ་འཛིན་ཁ་དབྲག་དང་མེ་ཕོར་བཅས་བཟོ་དགོས། ཡོ་བྱད་དེ་ཐམས་ཅད་ལི་ཡིས་བཟོས་ཤིག
EXO 27:4 ཡང་རྒྱུ་ལི་ཡིན་པའི་ཐག་མིག་ཅིག་བཟོས་ཏེ་ཐག་མིག་དེའི་གྲུ་ག་བཞི་ལ་ལི་ཡི་ཨ་ལོང་རེ་བྱའོ། །
EXO 27:5 ཐག་མིག་ནི་མཆོད་ཁྲིའི་མུ་ཁྱུད་ཀྱི་འགབ་ལ་བཅུག་སྟེ་མཆོད་ཁྲིའི་མཐོ་ཚད་ཀྱི་ཕྱེད་ཙམ་ལ་སླེབས་པར་བྱེད་དགོས།
EXO 27:6 མཆོད་ཁྲི་ལ་སེང་ལྡེང་ཤིང་གིས་རྒྱུག་པ་བཟོས་ནས་དེ་གཉིས་ལི་ཡིས་གཡོགས་ཤིག
EXO 27:7 རྒྱུག་པ་ནི་མཆོད་ཁྲིའི་ལོགས་གཉིས་ཀྱི་ཨ་ལོང་རྣམས་སུ་བརྒྱུས་ཤིང་མཆོད་ཁྲི་འཁུར་བའི་ཕྱིར་ཡིན་ལ།
EXO 27:8 ཡང་པང་ལེབ་ཀྱིས་མཆོད་ཁྲི་བཟོ་དགོས་ཤིང་། དེའི་ནང་ནི་སྟོང་པ་ཡིན་པ་དང་། རི་ནས་ཁྱོད་ལ་བསྟན་པ་ཇི་བཞིན་བཟོ་དགོས་ཞེས་གསུངས་སོ། །
EXO 27:9 ཡང་འདི་སྐད་དུ། ཁྱོད་ཀྱིས་གུར་མཆོག་ལ་ཁྱམས་ར་ཞིག་བཟོས་ཤིག དེའི་ལྷོ་ཕྱོགས་ཀྱི་ཁྱམས་ཡོལ་ནི་སོ་རས་སྲབ་བུ་བསྒྲིམས་པ་ཅན་གྱིས་བཟོ་དགོས་ཤིང་། རིང་ཚད་ནི་ཁྲུ་བརྒྱ་ཡིན་དགོས།
EXO 27:10 དེ་ལ་ཀ་བ་ཉི་ཤུ་དང་ལི་ཡི་ཞབས་ར་ཉི་ཤུ་བྱའོ། །ཀ་བའི་ཀྱུ་རྣམས་དང་དེ་དག་གི་ཁ་ཐུར་རྣམས་དངུལ་གྱིས་བཟོ་དགོས།
EXO 27:11 དེ་ལྟར་བྱང་ཕྱོགས་ཀྱི་ཁྱམས་ཡོལ་རྣམས་ཀྱི་རིང་ཚད་ལ་ཁྲུ་བརྒྱ་ཡོད་དགོས་པ་དང་། ཀ་བ་ཉི་ཤུ་དང་དེ་དག་གི་ལི་ཡི་ཞབས་ར་ཉི་ཤུ་དགོས་ཤིང་། ཀ་བའི་ཀྱུ་དང་ཁ་ཐུར་རྣམས་དངུལ་གྱིས་བཟོ་དགོས།
EXO 27:12 ཡང་ཁྱམས་རའི་ནུབ་ཕྱོགས་ཀྱི་ཡོལ་བ་རྣམས་ཀྱི་ཞེང་ཚད་ལ་ཁྲུ་ལྔ་བཅུ་ཡོད་དགོས་ཤིང་། དེ་ལ་ཀ་བ་བཅུ་དང་ཞབས་ར་བཅུ་བཅས་དགོས།
EXO 27:13 ཁྱམས་རའི་ཤར་ཕྱོགས་ཀྱི་ཞེང་ཚད་ལ་ཁྲུ་ལྔ་བཅུ་ཡོད་པར་བྱའོ། །
EXO 27:14 སྒོའི་ལོགས་གཅིག་གི་ཡོལ་བ་ནི་ཁྲུ་བཅོ་ལྔ་དང་། དེ་ལ་ཀ་བ་གསུམ་དང་ཞབས་ར་གསུམ་བཅས་དགོས།
EXO 27:15 སྒོའི་ལོགས་ཅིག་ཤོས་ཀྱི་ཡོལ་བ་ལའང་ཁྲུ་བཅོ་ལྔ་དང་། དེ་ལ་ཀ་བ་གསུམ་དང་། ཞབས་ར་གསུམ་བཅས་དགོས།
EXO 27:16 ཁྱམས་རའི་སྒོ་ཡོལ་གྱི་རིང་ཚད་ནི་ཁྲུ་ཉི་ཤུ་དང་། དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་ཡིན་དགོས་པ་དང་། འཐག་མཁན་གྱི་ལས་བཞིན་དུ་བཟོ་དགོས་ཏེ། དེ་ལ་ཀ་བ་བཞི་དང་ཞབས་ར་བཞི་བཅས་ཡོད་དགོས།
EXO 27:17 ཁྱམས་རའི་ཕྱོགས་བཞིའི་ཀ་བ་ཐམས་ཅད་དངུལ་གྱི་ཁ་ཐུར་གྱིས་སྦྲེལ་དགོས་ཤིང་། དེ་དག་གི་ཀྱུ་རྣམས་དངུལ་གྱིས་བཟོ་བ་དང་དེ་དག་གི་ཞབས་ར་རྣམས་ལི་ཡིས་བཟོ་དགོས།
EXO 27:18 ཁྱམས་རའི་རིང་ཚད་ལ་ཁྲུ་བརྒྱ་དང་། ཞེང་ཚད་ལ་ཁྲུ་ལྔ་བཅུ། མཐོ་ཚད་ལ་ཁྲུ་ལྔ་བཅས་སོ། །དེ་དག་གི་རྒྱུ་ནི་སོ་རས་སྲབ་བུ་བསྒྲིམས་པ་ཅན་ཡིན་དགོས་པ་དང་། ཀ་བའི་ཞབས་ར་རྣམས་ལི་ཡིན་དགོས།
EXO 27:19 གུར་མཆོག་ཏུ་བཀོལ་དགོས་པའི་ཡོ་ཆས་ཐམས་ཅད་དང་། དེའི་ཕུར་བ་ཀུན་དང་། ཁྱམས་རའི་ཕུར་བ་མཐའ་དག་བཅས་ལི་ཡིས་བཟོ་དགོས་ཞེས་གསུངས་སོ། །
EXO 27:20 ཡང་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ། འོད་ཀྱི་ཆེད་དུ་སྐྱུ་རུ་རའི་ཤིང་ལས་བརྡུངས་པའི་སྣུམ་དྭངས་མ་ཁྱོད་ལ་འབུལ་དགོས་པའི་བཀའ་སྒོས་ཤིག དེ་ནི་སྒྲོན་མེ་རྟག་ཏུ་འབར་བའི་ཕྱིར་ཡིན།
EXO 27:21 མཇལ་འཕྲད་གུར་མཆོག་གི་ནང་དུ་ཡོད་པའི་དཔང་མཛད་ཤུར་སྒམ་མདུན་གྱི་ཡོལ་བའི་ཕྱི་ཕྱོགས་སར། ཨ་རོན་དང་དེའི་བུ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་མཚན་མོ་ནས་ཞོགས་པའི་བར་དུ་སྒྲོན་མེ་ལ་ལྟ་སྲུང་བྱེད་དགོས། དེ་ནི་ཡེས་ར་ཨེལ་པ་རྣམས་ཀྱི་ཁྲོད་དུ་མི་རབས་ནས་མི་རབས་བར་གཏན་དུ་གནས་པའི་སྒྲིག་ཁྲིམས་ཤིག་ཏུ་འགྱུར་དགོས་ཞེས་གསུངས་སོ། །
EXO 28:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཡེས་ར་ཨེལ་པ་རྣམས་ཀྱི་ཁྲོད་ནས་ཁྱོད་ཀྱི་ཕུ་བོ་ཨ་རོན་དང་ཁོའི་བུ་རྣམས་ཏེ། ནཱ་དབ་དང་ཨ་བི་ཧུ་དང་ཨེ་ལི་ཨ་ཟར་དང་ཨི་ཐ་མཱར་བཅས་བདག་གི་མཆོད་དཔོན་གྱི་ཞབས་ཕྱི་བྱེད་པར་ཁྱོད་ཀྱི་དྲུང་དུ་འོང་བར་ཆུག་ཅིག
EXO 28:2 ཁྱོད་ཀྱིས་རང་གི་ཕུ་བོ་ཨ་རོན་ལ་འཕགས་གོས་དམ་པ་བརྗིད་ཉམས་དང་མཛེས་སྡུག་ལྡན་པའི་ཕྱིར་བཟོ་དགོས།
EXO 28:3 ཨ་རོན་དམ་པར་བྱེད་པ་དང་ཁོས་ཀྱང་བདག་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར། ཁྱོད་ཀྱིས་ལག་རྩལ་ཡོད་པའི་མི་སྟེ། བདག་གིས་ཤེས་རབ་ཀྱི་སེམས་རྒྱུད་ཀྱིས་ཁེངས་པར་མཛད་པའི་མི་དེ་དག་ལ་ཨ་རོན་ལ་འཕགས་གོས་བཟོ་བའི་བཀའ་སྒོས་ཤིག
EXO 28:4 དེ་དག་གིས་བཟོ་བྱའི་ན་བཟའ་རྣམས་ནི་འདི་དག་ཡིན་ཏེ། བྲང་རྒྱན་དང་བེར་ཐུལ་དང་། གོས་རིང་དང་། ནང་གོས་འབུར་རིས་མ་དང་། ལ་ཐོད་དང་སྐེད་ཆིངས་བཅས་སོ། །དེ་ལྟ་བུའི་ན་བཟའ་དམ་པ་རྣམས་ཁོ་རྣམས་ཀྱིས་ཁྱོད་ཀྱི་ཕུ་བོ་ཨ་རོན་དང་དེའི་བུ་རྣམས་ལ་བཟོ་དགོས་ལ། དེ་ནི་ཁོ་རྣམས་ཀྱིས་བདག་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་ཡིན།
EXO 28:5 དེ་བཟོ་བྱེད་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བཅས་ཡིན་དགོས་ཞེས་གསུངས་སོ། །
EXO 28:6 ཡང་འདི་སྐད་དུ། བེར་ཐུལ་ཡང་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཀྱིས་འཐག་མཁན་ལག་རྩལ་ཅན་གྱི་ལས་བཞིན་དུ་བཟོ་དགོས།
EXO 28:7 དེ་ལ་དཔུང་པའི་ཕྲག་ཁེབས་གཉིས་དགོས་ཤིང་། བེར་ཐུལ་གྱི་ཕྲག་མགོ་གཉིས་ལ་སྦྲེལ་ཞིང་འཆིང་བར་བྱའོ། །
EXO 28:8 ཡང་བེར་ཐུལ་དང་འབྲེལ་བའི་སྐེད་ཆིངས་མཆོར་པོ་ཅན་དེ་ནི་བེར་ཐུལ་གྱི་བཟོ་ཚུལ་དང་གཅིག་མཚུངས་ཡིན་དགོས་ཤིང་། དེའི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས།
EXO 28:9 ཡང་གཟི་གཉིས་ལོངས་ལ། དེའི་ཁར་ཡེས་ར་ཨེལ་གྱི་བུ་རྣམས་ཀྱི་མིང་བརྐོས་ཤིག
EXO 28:10 མིང་དྲུག་ནི་གཟི་གཅིག་གི་སྟེང་ལ་བརྐོ་བར་བྱ་ཞིང་། ཡང་མིང་དྲུག་ནི་གཟི་གཞན་པ་དེའི་སྟེང་དུ་བརྐོ་དགོས། དེ་ཐམས་ཅད་ཁོ་རྣམས་སྐྱེས་པའི་གོ་རིམ་བཞིན་དུ་བྱའོ། །
EXO 28:11 རྡོ་ལ་རྡོ་བཟོས་དམ་ཕྲུག་བརྐོ་བ་བཞིན་དུ་རྡོ་དེ་གཉིས་ཀྱི་སྟེང་དུ་ཡེས་ར་ཨེལ་གྱི་བུ་རྣམས་ཀྱི་མིང་བརྐོས་ཏེ་གསེར་གྱིས་འབུར་ཀོང་གཉིས་བྱའོ། །
EXO 28:12 རྡོ་དེ་གཉིས་བེར་ཐུལ་གྱི་དཔུང་པའི་ཕྲག་ཁེབས་གཉིས་ལ་སྦྱར་ཏེ། རྡོ་དེ་གཉིས་ལ་བརྟེན་ནས་ཡེས་ར་ཨེལ་གྱི་བུ་རྣམས་ལ་རྗེས་དྲན་ཡོད་དགོས། ཨ་རོན་གྱིས་དེ་དག་གི་མིང་རྣམས་རང་གི་ཕྲག་ལ་ཁུར་ནས་དཀོན་མཆོག་ཡ་ཝཱེའི་སྤྱན་སྔར་དྲན་རྟེན་དུ་བྱེད་དགོས།
EXO 28:13 ཁྱོད་ཀྱིས་གསེར་གྱི་འབུར་ཀོང་གཉིས་བཟོ་དགོས་པ་དང་།
EXO 28:14 གསེར་བཙོ་མས་བསླེས་པའི་ཉག་ཐག་གཉིས་བཟོས་ནས། དེ་ནི་གསེར་གྱི་འབུར་ཀོང་གཉིས་ལ་སྦྱོར་ཅིག་ཅེས་གསུངས་སོ། །
EXO 28:15 ཡང་འདི་སྐད་དུ། ཁྱོད་ཀྱིས་བློ་འདོན་པའི་བྲང་རྒྱན་བཟོ་བར་བྱའོ། །དེ་ནི་བཟོ་བ་ལག་རྩལ་ཅན་གྱིས་བྱས་པ་ཡིན་དགོས་པ་དང་བེར་ཐུལ་བཞིན་དུ་བཟོ་དགོས་ལ། དེའི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས།
EXO 28:16 དེ་ནི་ཁ་གང་ཉིས་ལྟེབ་ཅན་དང་། དེའི་རིང་ཚད་ནི་མཐོ་གང་དང་ཞེང་ལ་ཡང་མཐོ་གང་ཡོད་དགོས།
EXO 28:17 དེ་ལ་ཕ་ལམ་ཤུར་ཕྲེང་བཞི་ཡི་ཕྲ་འདེབས་དགོས་པ་སྟེ། ཤུར་ཕྲེང་དང་པོ་ནི་པདྨ་རཱ་ག་དང་། སྤྲིན་རྡོ། མ་རྒད་བཅས་གསུམ་དང་།
EXO 28:18 ཤུར་ཕྲེང་གཉིས་པ་ནི་གཡུ་དང་ཨིནྡྲ་ནཱི་ལ་དང་རྡོ་རྗེ་ཕ་ལམ་བཅས་གསུམ།
EXO 28:19 ཤུར་ཕྲེང་གསུམ་པ་ནི་རྟ་ཀླད་སྨུག་པོ་དང་། ཤེལ་རྡོ་དང་། མུ་མེན་བཅས་གསུམ།
EXO 28:20 ཤུར་ཕྲེང་བཞི་པ་ནི་བཻཌཱུརྱ་ལྗང་སེར་དང་། གཟི་དང་གཡང་ཊི་སྔོན་པོ་བཅས་གསུམ་སྟེ། དེ་དག་ནི་གསེར་གྱི་འབུར་ཀོང་ལ་འདེབས་པར་བྱའོ། །
EXO 28:21 རིན་པོ་ཆེ་དེ་དག་གིས་ཡེས་ར་ཨེལ་གྱི་བུ་རྣམས་ཀྱི་མིང་གི་མཚོན་རྟགས་བྱེད་ཅིང་མིང་ལྟར་བཅུ་གཉིས་ཡོད་དེ། དམ་ཕྲུག་བཞིན་དུ་རིན་པོ་ཆེ་རེ་རེའི་སྟེང་དུ་ཡེས་ར་ཨེལ་གྱི་ཚོ་པ་བཅུ་གཉིས་པོའི་མིང་རེ་རེ་ལྟར་དུ་བརྐོ་བར་བྱའོ། །
EXO 28:22 བྲང་རྒྱན་ལ་གསེར་བཙོ་མས་བསླེས་པའི་ཉག་ཐག་བཟོས་ཤིག
EXO 28:23 བྲང་རྒྱན་གྱི་གྲུ་ག་གཉིས་ལ་གསེར་གྱི་ཨ་ལོང་གཉིས་བཟོས་ཏེ་སྦྱོར་ཅིག་དང་།
EXO 28:24 ཡང་གསེར་གྱི་ཉག་ཐག་དེ་གཉིས་ནི་བྲང་རྒྱན་གྱི་གྲུ་ག་རུ་ཡོད་པའི་ཨ་ལོང་གཉིས་ལ་རྒྱུས་ཤིག
EXO 28:25 དེ་ནས་ཉག་ཐག་གི་སྣེ་གཉིས་འབུར་ཀོང་གཉིས་ལ་བཅུག་སྟེ། བེར་ཐུལ་མདུན་ལོགས་ཀྱི་ཕྲག་ཁེབས་སྟེང་སྦྱོར་དགོས།
EXO 28:26 ཡང་གསེར་གྱི་ཨ་ལོང་གཞན་གཉིས་བཟོས་ནས་བྲང་རྒྱན་གྱི་གྲུ་ག་གཉིས་ལ་སྦྱོར་ཅིག སྦྱོར་ས་དེ་ནི་བྲང་རྒྱན་གྱི་ཟུར་ཁ་ཡིན་ལ་བྲང་རྒྱན་དང་བེར་ཐུལ་གྱི་བར་མཚམས་ཀྱང་ཡིན་ནོ། །
EXO 28:27 ཡང་གསེར་གྱི་ཨ་ལོང་གཉིས་བཟོས་ནས་བེར་ཐུལ་གྱི་དཔུང་པའི་ཕྲག་ཁེབས་གཉིས་ཀྱི་མདུན་ལོགས་ཀྱི་འོག་དང་སྐེད་ཆིངས་མཆོར་པོ་ཅན་གྱི་འབྲེལ་སའི་ཅུང་ཟད་གོང་དུ་ཆུག་ཅིག
EXO 28:28 བྲང་རྒྱན་དེ་བེར་ཐུལ་གྱི་སྐེད་ཆིངས་མཆོར་པོ་ཅན་དང་དམ་དུ་འབྲེལ་བ་དང་བེར་ཐུལ་ལས་མི་འཆོར་བའི་ཕྱིར། བྲང་རྒྱན་གྱི་ཨ་ལོང་དེ་བེར་ཐུལ་གྱི་ཨ་ལོང་ལ་སྡེམ་ཐག་སྔོན་པོ་ཡིས་བསྡམ་དགོས།
EXO 28:29 དེ་ལྟར་ཨ་རོན་གནས་དམ་པར་འགྲོ་བའི་སྐབས་སུ། བློ་འདོན་པའི་བྲང་རྒྱན་ལ་ཡོད་པའི་ཡེས་ར་ཨེལ་གྱི་བུ་རྣམས་ཀྱི་མིང་དག་སྙིང་གི་དྲང་ཐད་དུ་འཛིན་པར་བྱེད་དགོས་ཤིང་། དེ་ནི་དཀོན་མཆོག་ཡ་ཝཱེའི་སྤྱན་སྔར་རྒྱུན་དུ་རྗེས་དྲན་ཡོད་པའི་ཕྱིར་ཡིན།
EXO 28:30 ཡང་ཨུའུ་རིམ་དང་ཐུའུ་མིམ་ཞེས་པའི་རྟགས་རིལ་གཉིས་བློ་འདོན་པའི་བྲང་རྒྱན་གྱི་ནང་དུ་བཅུག་སྟེ། ཨ་རོན་དཀོན་མཆོག་ཡ་ཝཱེའི་སྤྱན་སྔར་འགྲོ་སྐབས་དེ་གཉིས་ཁོའི་སྙིང་གི་དྲང་ཐད་དུ་ཡོད་ཅིང་། ཁོས་རྒྱུན་པར་ཡེས་ར་ཨེལ་པ་རྣམས་ལ་བློ་འདོན་པ་དེ་རང་གི་སྙིང་གི་དྲང་ཐད་དུ་འཁུར་བར་འགྱུར་ཞེས་གསུངས་སོ། །
EXO 28:31 ཡང་འདི་སྐད་དུ། བེར་ཐུལ་འོག་གི་གོས་རིང་ནི་ཁ་དོག་སྔོན་པོས་བཟོ་བར་བྱའོ། །
EXO 28:32 དེའི་སྟོད་དཀྱིལ་དུ་མགོའི་ཕྱིར་ཁུང་བུ་ཞིག་འཇོག་དགོས་ཤིང་། དེའི་མཐའ་འཁོར་ལ་འཐག་བཟོ་བྱས་པའི་གོང་བ་ཞིག་ཀྱང་ཡོད་པར་བྱེད་དགོས་ལ། མི་རལ་བའི་ཕྱིར་གོ་ཁྲབ་ཀྱི་གོང་བ་ལྟར་དུ་བཟོ་དགོས།
EXO 28:33 ཡང་དེའི་གོས་འདབ་ཀྱི་མཐའ་འཁོར་དུ་བལ་སྐུད་མཐིང་ག་དང་རྒྱ་སྨུག མཚལ་དམར་བཅས་ཀྱི་སེ་འབྲུས་བརྒྱན་དགོས་ཤིང་། སེ་འབྲུ་རེ་རེའི་བར་གསེབ་ཏུ་ཡང་གསེར་གྱི་གཡེར་ཁ་རྣམས་འདོགས་དགོས་པ་དང་།
EXO 28:34 གསེར་གྱི་གཡེར་ཁ་གཅིག་དང་སེ་འབྲུ་གཅིག ཡང་གསེར་གྱི་གཡེར་ཁ་གཅིག་དང་སེ་འབྲུ་གཅིག་བཅས་གོས་རིང་གི་འདབ་ཁ་ཐམས་ཅད་ལ་ཡོད་པར་བྱེད་དགོས་ཤིང་།
EXO 28:35 ཨ་རོན་གྱིས་ཞབས་ཕྱི་སྒྲུབ་སྐབས་གོས་དེ་གྱོན་དགོས་ཤིང་། གནས་དམ་པ་རུ་དཀོན་མཆོག་ཡ་ཝཱེའི་སྤྱན་དྲུང་དུ་འགྲོ་བ་དང་ཕྱིར་འོང་སྐབས་ཁོ་རང་མི་འཆི་བའི་ཕྱིར་གོས་དེའི་སྐད་སྒྲ་ཐོས་པར་འགྱུར་ཞེས་གསུངས་སོ། །
EXO 28:36 ཡང་འདི་སྐད་དུ། ཁྱོད་ཀྱིས་གསེར་བཙོ་མའི་བྱང་བུ་ཞིག་བཟོས་ནས་དེའི་སྟེང་ལ་དམ་ཕྲུག་བརྐོ་བ་བཞིན་དུ། དཀོན་མཆོག་ཡ་ཝཱེའི་ཕྱིར་དུ་དམ་པའོ་ཞེས་བརྐོ་བར་བྱའོ། །
EXO 28:37 ཡང་དེ་ལ་རས་སྔོན་པོའི་ཉག་ཐག་ཅིག་སྦྱར་ནས་ལ་ཐོད་དང་སྦྲེལ་བ་དང་། གསེར་གྱི་བྱང་བུ་ནི་ལ་ཐོད་ཀྱི་མདུན་ལོགས་སུ་ཡོད་དགོས།
EXO 28:38 དེ་ལྟར་དེ་ནི་ཨ་རོན་གྱི་དཔྲལ་བར་ཡོད་པ་དང་། ཡེས་ར་ཨེལ་པ་རྣམས་ཀྱིས་མཆོད་པ་དམ་པ་འབུལ་བའི་ཚེ། སྐྱོན་དང་ནོར་བ་གང་ཞིག་ཡོད་ཚེ། དེའི་ཉེས་པ་ཐམས་ཅད་ཨ་རོན་རང་གིས་འཁུར་བ་དང་། དཀོན་མཆོག་ཡ་ཝཱེ་མཆོད་པ་དེ་དག་ལ་ཐུགས་དགྱེས་པའི་ཕྱིར་བྱང་བུ་དེ་གཏན་དུ་ཨ་རོན་གྱི་དཔྲལ་བར་ཡོད་དགོས་སོ། །
EXO 28:39 ཡང་ཁྱོད་ཀྱིས་སོ་རས་སྲབ་བུ་ཡིས་ནང་གོས་འབུར་རིས་མ་འཐག་དགོས་པ་དང་། ཡང་སོ་རས་སྲབ་བུ་ཡིས་ལ་ཐོད་བཟོ་བ་དང་། འཐག་མཁན་གྱི་ལས་བཞིན་དུ་སྐེད་ཆིངས་བཅས་བཟོ་བར་བྱའོ། །
EXO 28:40 ཡང་ཨ་རོན་གྱི་བུ་རྣམས་ལ་ནང་གོས་དང་སྐེད་ཆིངས་དང་པྲོག་ཞུ་རྣམས་བརྗིད་ཉམས་དང་མཛེས་སྡུག་ལྡན་པའི་ཕྱིར་དུ་བཟོས་ཤིག
EXO 28:41 ཁྱོད་ཀྱིས་ན་བཟའ་དེ་རྣམས་རང་གི་ཕུ་བོ་ཨ་རོན་དང་དེའི་བུ་རྣམས་ལ་བསྐོན་དགོས་པ་དང་། དེ་དག་གིས་ང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར། ཁོ་རྣམས་ལ་སྣུམ་གྱིས་བྱུག་པ་དང་། བསྐོས་ནས་དམ་པར་བྱེད་དགོས།
EXO 28:42 ཡང་དེ་དག་གི་ཤ་རྗེན་པ་གཡོག་པའི་ཕྱིར་སོ་རས་ཀྱི་ཨང་ཐུང་རྐེད་པ་ནས་བརླའི་བར་དུ་སླེབས་པ་རྣམས་བཟོས་ཤིག
EXO 28:43 ཨ་རོན་དང་དེའི་བུ་རྣམས་མཇལ་འཕྲད་གུར་མཆོག་ནང་དུ་འཇུག་པའམ། གནས་དམ་པའི་ནང་ནས་ཞབས་ཕྱི་བྱེད་པའི་ཆེད་དུ་མཆོད་ཁྲིའི་དྲུང་དུ་འོང་ཚེ་དེ་དག་གྱོན་དགོས་པ་སྟེ། གལ་སྲིད་དེ་ལྟར་མ་བྱས་ན་ཉེས་སྐྱོན་ཕོག་ནས་འཆི་དགོས་པའི་ཕྱིར་རོ། །སྒྲིག་ཁྲིམས་དེ་ནི་གཏན་དུ་གནས་དགོས་ཏེ་ཨ་རོན་དང་དེའི་བུ་རྒྱུད་རྣམས་ཀྱི་ཕྱིར་དུ་ཡིན་ཞེས་གསུངས་སོ། །
EXO 29:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་དང་ཁོའི་བུ་རྣམས་དམ་པར་འགྱུར་བ་དང་བདག་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་འདི་ལྟར་གྱིས་ཤིག གླང་ཐུག་ཁ་ཆུང་ཞིག་དང་། ལུག་ཐུག་བཙོག་སྐྱོན་མེད་པ་གཉིས་འདེམས་དང་།
EXO 29:2 སྐྱུར་མེད་བག་ལེབ་དང་སྐྱུར་མེད་བག་ལེབ་ལ་འཚིར་སྣུམ་བསྲེས་པ་ཅན་དང་སྐྱུར་མེད་བག་ལེབ་ལ་འཚིར་སྣུམ་གྱིས་བྱུགས་པ་ཅན་བཅས་གྲོ་ཞིབ་ལྡེ་གུ་ཡིས་བཟོ་བར་བྱའོ། །
EXO 29:3 དེ་དག་གཟེབ་ཀྱི་ནང་དུ་བཞག་སྟེ་ཁྱེར་འོང་བ་དང་གླང་ཐུག་དང་ལུག་ཐུག་གཉིས་ཀྱང་དེད་ནས་འོང་དགོས་པ་སྟེ།
EXO 29:4 ཨ་རོན་དང་ཁོའི་བུ་རྣམས་མཇལ་འཕྲད་གུར་མཆོག་གི་སྒོ་འགྲམ་དུ་ཁྲིད་དེ་ཆུས་བཀྲུ་བ་དང་།
EXO 29:5 དེ་ནས་ཨ་རོན་ལ་ནང་གོས་དང་གོས་རིང་དང་བེར་ཐུལ་དང་བྲང་རྒྱན་བཅས་གྱོན་དུ་འཇུག་པ་དང་བེར་ཐུལ་གྱི་སྐེད་ཆིངས་མཆོར་པོ་ཅན་གྱིས་བསྡམ་དགོས་ལ།
EXO 29:6 དེའི་མགོར་ལ་ཐོད་བསྐོན་ཏེ་ལ་ཐོད་ལ་ཅོད་པན་དམ་པ་སྦྱོར་ཅིག
EXO 29:7 དེ་ནས་ཁོའི་མགོ་ལ་འབྱུག་སྣུམ་བླུགས་ནས་བྱུགས་ཤིག
EXO 29:8 ཡང་ཁོའི་བུ་རྣམས་ཁྲིད་ཡོང་ནས་ནང་གོས་བསྐོན་པ་དང་།
EXO 29:9 ཨ་རོན་དང་ཁོའི་བུ་རྣམས་ལ་སྐེད་ཆིངས་བཅིངས་ནས་པྲོག་ཞུ་དཀྲི་དགོས་ཤིང་། དེ་ལྟར་ཁོ་རྣམས་ལ་མཆོད་དཔོན་གྱི་གོ་གནས་ཐོབ་པ་ནི་གཏན་དུ་གནས་པའི་སྒྲིག་ཁྲིམས་ཤིག་ཡིན། ཁྱོད་ཀྱིས་དེ་ལྟར་ཨ་རོན་དང་ཁོའི་བུ་རྣམས་བསྐོ་དགོས་སོ། །
EXO 29:10 ཁྱོད་ཀྱིས་གླང་ཐུག་མཇལ་འཕྲད་གུར་མཆོག་གི་མདུན་སར་འཁྲིད་དགོས་ལ། ཨ་རོན་དང་ཁོའི་བུ་རྣམས་ཀྱིས་སོ་སོའི་ལག་པ་གླང་ཐུག་གི་མགོ་ལ་འཇོག་དགོས།
EXO 29:11 ཡང་དཀོན་མཆོག་ཡ་ཝཱེའི་སྤྱན་སྔ་རུ། མཇལ་འཕྲད་གུར་མཆོག་གི་སྒོ་ཁ་རུ་གླང་ཐུག་ཤོས་ཤིག
EXO 29:12 ཡང་གླང་ཐུག་གི་ཁྲག་ཉུང་ཙམ་བླངས་ནས་ལག་མཛུབ་ཀྱིས་མཆོད་ཁྲིའི་རུ་ཐུར་བཞི་ལ་བསྐུ་དགོས་པ་དང་། དེ་ནས་ཁྲག་ཡོངས་རྫོགས་མཆོད་ཁྲིའི་འགབ་འོག་ཏུ་བླུགས་ཤིག
EXO 29:13 དེ་ནས་ནང་ཁྲོལ་བཏུམས་པའི་ཚིལ་ཐམས་ཅད་དང་མཆིན་པའི་ཐོག་གི་རྩ་རྒྱུས་དང་། མཁལ་མ་གཉིས་ཀ་དང་དེའི་སྟེང་གི་ཚིལ་བཅས་ལོངས་ལ་མཆོད་ཁྲིའི་ཁ་ནས་མེས་སྲེགས་ཤིག
EXO 29:14 ཡང་གླང་ཐུག་གི་ཤ་དང་པགས་པ་དང་ལྕི་བ་བཅས་ནི་སྒར་གྱི་ཕྱི་རོལ་ཏུ་མེས་བསྲེག་དགོས། ཅི་ཡིན་ཞེ་ན། དེ་ནི་སྡིག་བཤགས་མཆོད་པ་ཡིན་ནོ། །
EXO 29:15 ཡང་ལུག་ཐུག་ཅིག་ཁྱོད་ཀྱིས་ཁྲིད་ནས་ཨ་རོན་དང་དེའི་བུ་རྣམས་ཀྱིས་སོ་སོའི་ལག་པ་ལུག་ཐུག་གི་མགོ་ལ་འཇོག་དགོས།
EXO 29:16 ལུག་ཐུག་དེ་བཤས་ནས་དེའི་ཁྲག་ལོངས་ལ་མཆོད་ཁྲིའི་ཕྱོགས་བཞི་རུ་གཏོར་ཅིག
EXO 29:17 ཁྱོད་ཀྱིས་ལུག་ཐུག་གི་ལྷུ་ཚིགས་རེ་རེ་ཆོད་ལ། ནང་ཁྲོལ་དང་རྐང་ལག་དག་བཀྲུས་ནས་ལྷུ་རྣམས་མགོ་དང་མཉམ་དུ་ཞོག་ཅིག
EXO 29:18 ལུག་ཐུག་ཧྲིལ་པོ་མཆོད་ཁྲིའི་ཁར་སྦྱིན་སྲེག་ཏུ་ཕུལ་ཞིག དེ་ནི་དཀོན་མཆོག་ཡ་ཝཱེ་ལ་ཕུལ་བའི་སྦྱིན་སྲེག་དང་། དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་གྱི་མེ་མཆོད་ཡིན་ནོ། །
EXO 29:19 དེ་ནས་ཁྱོད་ཀྱིས་ལུག་ཐུག་ཅིག་བཤས་ཏེ་ཁྲིད་འོངས་ནས། ཨ་རོན་དང་ཁོའི་བུ་རྣམས་ཀྱིས་སོ་སོའི་ལག་པ་དེའི་མགོར་འཇོག་དགོས་པ་དང་།
EXO 29:20 ལུག་ཐུག་དེ་བཤས་ནས། ཁྲག་ཉུང་ཙམ་བླངས་ཏེ་ཨ་རོན་གྱི་རྣ་ཤལ་གཡས་པ་དང་། དེའི་བུ་རྣམས་ཀྱི་རྣ་ཤལ་གཡས་པ་དང་། དེ་དག་གི་གཡས་ལག་གི་མཐེ་བོང་དང་། དེ་དག་གི་རྐང་པ་གཡས་པའི་མཐེབ་ཆེན་བཅས་ལ་བསྐུ་བར་བྱའོ། །ཡང་ཁྲག་དེ་མཆོད་ཁྲིའི་ཕྱོགས་བཞི་ལ་གཏོར་ཅིག
EXO 29:21 ཡང་མཆོད་ཁྲིའི་སྟེང་གི་ཁྲག་ཉུང་ཙམ་དང་འབྱུག་སྣུམ་ཕྲན་བུ་ཙམ་ལོངས་ལ་ཨ་རོན་དང་ཁོའི་གོས་དང་། ཁོ་དང་མཉམ་དུ་ཡོད་པའི་ཁོའི་བུ་རྣམས་དང་དེ་དག་གི་གོས་ཀྱི་སྟེང་ལ་གཏོར་ཅིག དེ་ནས་ཨ་རོན་དང་ཁོའི་གོས་དང་། ཁོའི་བུ་རྣམས་དང་དེ་དག་གི་གོས་དང་བཅས་པ་དམ་པར་འགྱུར་རོ། །
EXO 29:22 དེ་ནས་ལུག་ཐུག་གི་ཚིལ་ཏེ། རྔ་མ་ཚོན་པོ་དང་། ནང་ཁྲོལ་བཏུམས་པའི་ཚིལ་དང་མཆིན་པའི་ཐོག་གི་རྩ་རྒྱུས་དང་། མཁལ་མ་གཉིས་ཀ་དང་དེའི་སྟེང་གི་ཚིལ་དང་། བརླ་རྐང་གཡས་པ་བཅས་ཁྱོད་ཀྱིས་ལོངས་ཤིག དེ་ནི་བསྐོ་བར་བྱེད་པའི་ལུག་ཐུག་ཡིན་པའི་ཕྱིར་རོ། །
EXO 29:23 ཡང་དཀོན་མཆོག་ཡ་ཝཱེའི་སྤྱན་སྔ་རུ་ཡོད་པའི་སྐྱུར་མེད་བག་ལེབ་འཇོག་བྱེད་ཀྱི་གཟེབ་ལས་བག་ལེབ་གཅིག་དང་སྣུམ་གོར་གཅིག་དང་། བག་ལེབ་སྲབ་བུ་གཅིག་བཅས་ལོངས་ལ།
EXO 29:24 རྫས་དེ་ཐམས་ཅད་ཨ་རོན་དང་ཁོའི་བུ་རྣམས་ཀྱི་ལག་ཏུ་བཞག་ནས་གཡོབ་མཆོད་དུ་བྱས་ཏེ་དཀོན་མཆོག་ཡ་ཝཱེའི་སྤྱན་སྔར་ཕར་ཚུར་ལ་གཡོབ་བར་གྱིས།
EXO 29:25 ཡང་རྫས་དེ་དག་ཁོ་ཚོའི་ལག་ནས་ཕྱིར་བླངས་ཏེ་མཆོད་ཁྲིའི་ཁར་ཡོད་པའི་སྦྱིན་སྲེག་གི་སྟེང་དུ། དཀོན་མཆོག་ཡ་ཝཱེའི་སྤྱན་སྔར་དྲི་ཞིམ་གྱི་སྦྱིན་སྲེག་ཏུ་ཕུལ་ཞིག དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཡིན་ནོ། །
EXO 29:26 དེ་ནས་ཁྱོད་ཀྱིས་ཨ་རོན་མཆོད་དཔོན་དུ་བསྐོ་བར་བྱེད་པའི་ལུག་ཐུག་གི་བྲང་ཁོག་དེ་བླངས་ནས་གཡོབ་མཆོད་དུ་བྱས་ཏེ་དཀོན་མཆོག་ཡ་ཝཱེའི་སྤྱན་སྔར་ཕར་ཚུར་གཡོབ་བར་གྱིས། དེ་ནི་ཁྱོད་རང་གི་སྐལ་བ་ཡིན།
EXO 29:27 ཨ་རོན་དང་ཁོའི་བུ་རྣམས་བསྐོ་བར་བྱེད་པའི་ལུག་ཐུག་གི་ཆ་ཤས་ཏེ། ཕར་ཚུར་གཡོབ་བར་བྱེད་པའི་གཡོབ་མཆོད་ཡིན་པའི་བྲང་ཁོག་དང་། འདེགས་པར་བྱེད་པའི་འདེགས་མཆོད་ཡིན་པའི་བརླ་རྐང་གཉིས་ནི་དམ་པར་བྱེད་དགོས་ལ།
EXO 29:28 དེ་གཉིས་ནི་རྟག་ཏུ་ཡེས་ར་ཨེལ་པ་རྣམས་ལས་འབུལ་དགོས་ཤིང་ཨ་རོན་དང་ཁོའི་བུ་རྣམས་ཀྱི་སྐལ་བ་ཡིན་ཏེ། ཅི་ཡིན་ཞེ་ན། དེ་ནི་འདེགས་མཆོད་ཡིན་པས་སོ། །ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་ཞི་བདེའི་མཆོད་པ་ལས་ཨ་རོན་དང་ཁོའི་བུ་རྣམས་ལ་འདེགས་མཆོད་དུ་འབུལ་དགོས་ཏེ། དེ་ནི་དཀོན་མཆོག་ཡ་ཝཱེ་ལ་འབུལ་བའི་འདེགས་མཆོད་ཡིན་ནོ། །
EXO 29:29 ཡང་ཨ་རོན་གྱི་ན་བཟའ་དམ་པ་རྣམས་རང་གི་བུ་རྒྱུད་རྣམས་ལ་འཐོབ་དགོས་ཤིང་། དེ་དག་ལ་སྣུམ་གྱིས་བྱུགས་པ་དང་མཆོད་དཔོན་དུ་བསྐོ་བའི་དུས་སུ་ན་བཟའ་དེ་དག་གྱོན་དགོས་པ་ཡིན།
EXO 29:30 ཨ་རོན་གྱི་བུ་རྣམས་ལས་ཁོའི་ཚབ་ཏུ་མཆོད་དཔོན་བྱེད་པའི་བུ་དེ་ནི། མཇལ་འཕྲད་གུར་མཆོག་གི་ནང་དུ་སོང་སྟེ་གནས་དམ་པ་རུ་ཞབས་ཕྱི་བྱེད་པའི་དུས་སུ། ན་བཟའ་དེ་རྣམས་ཉིན་བདུན་གྱི་རིང་ལ་གྱོན་དགོས་སོ། །
EXO 29:31 ཡང་ཁྱོད་ཀྱིས་མཆོད་དཔོན་དུ་བསྐོ་བར་བྱེད་པའི་ལུག་ཐུག་ལོངས་ལ། དེའི་ཤ་ནི་གནས་མཆོག་ཅིག་ཏུ་བཙོ་དགོས་ཤིང་།
EXO 29:32 ཨ་རོན་དང་དེའི་བུ་རྣམས་ཀྱིས་ལུག་ཐུག་གི་ཤ་དང་གཟེབ་ནང་དུ་ཡོད་པའི་བག་ལེབ་ནི་མཇལ་འཕྲད་གུར་མཆོག་གི་ཕྱི་སྒོ་ཁ་རུ་བཟའ་དགོས།
EXO 29:33 མཆོད་དཔོན་དུ་བསྐོ་བར་བྱེད་པ་དང་དམ་པར་བྱེད་པའི་ཕྱིར་སྡིག་བཤགས་སུ་ཕུལ་བའི་རྫས་ནི་དམ་པ་ཡིན་པས། ཁོ་རྣམས་ཁོ་ན་ལས་མི་གཞན་སུ་ཞིག་གིས་ཀྱང་བཟའ་བར་མི་རུང་།
EXO 29:34 གལ་ཏེ་མཆོད་དཔོན་དུ་བསྐོ་བར་བྱེད་པའི་ཤ་དང་བག་ལེབ་ལས་སང་ཉིན་གྱི་བར་དུ་ལྷག་མ་ལུས་ན། ལྷག་མ་དེ་མེས་བསྲེག་དགོས་ཤིང་། དེ་དམ་པ་ཡིན་པས་བཟའ་བར་མི་རུང་ངོ་། །
EXO 29:35 བདག་གིས་ཁྱོད་ལ་ཅི་དང་ཅི་བསྒོས་པ་བཞིན་ཨ་རོན་དང་དེའི་བུ་རྣམས་ལ་བྱོས་ཤིག ཉིན་བདུན་གྱི་རིང་དུ་བསྐོ་བར་བྱའོ། །
EXO 29:36 ཡང་སྡིག་པ་བཤག་པའི་ཕྱིར་ཁྱོད་ཀྱིས་ཉིན་རེ་བཞིན་གླང་ཐུག་ཅིག་སྡིག་བཤགས་མཆོད་པར་འབུལ་དགོས་ཤིང་། ཡང་མཆོད་ཁྲིའི་ཁར་སྡིག་བཤགས་ཕུལ་ནས་དེ་འདག་པར་བྱའོ། །ཡང་དམ་པར་བྱེད་པའི་ཕྱིར་དེ་ལ་འབྱུག་སྣུམ་གྱིས་བྱུགས་ཤིག
EXO 29:37 ཉིན་བདུན་གྱི་རིང་ལ་མཆོད་ཁྲི་དམ་པར་བྱེད་པའི་ཕྱིར་སྡིག་བཤགས་མཆོད་པ་འབུལ་དགོས་ལ། དེ་ལྟར་མཆོད་ཁྲི་ནི་ཐམས་ཅད་ལས་དམ་པ་ཡིན་དགོས་ཤིང་། སུ་དང་གང་གིས་མཆོད་ཁྲི་ལ་རེག་ན་དེ་དམ་པར་འགྱུར་བའོ། །
EXO 29:38 ཁྱོད་ཀྱིས་མཆོད་ཁྲི་ལ་ཉིན་རེ་བཞིན་དུས་རྒྱུན་དུ་འབུལ་བྱ་ནི་འདི་ལྟ་སྟེ། ལུ་གུ་ལོ་གཅིག་ཅན་གཉིས་འབུལ་དགོས་ཤིང་།
EXO 29:39 ལུ་གུ་གཅིག་ནངས་མོའི་དུས་སུ་འབུལ་དགོས་ལ། ལུ་གུ་ཅིག་ཤོས་ས་སྲོས་ཀྱི་དུས་སུ་འབུལ་དགོས།
EXO 29:40 ཕྱེ་བཟང་པོ་ཨེ་ཕཱ་གང་གི་བཅུ་ཆ་གཅིག་ལ་སྣུམ་བརྡུངས་མ་རྫ་བུམ་གང་གི་བཞི་ཆ་གཅིག་བསྲེས་ནས། ད་དུང་སྐྱེམས་མཆོད་ཀྱི་ཕྱིར་རྒུན་ཆང་རྫ་བུམ་གང་གི་བཞི་ཆ་གཅིག་བཅས་ཁྱོད་ཀྱིས་ལུ་གུ་གཅིག་དང་མཉམ་དུ་མཆོད་པར་འབུལ་དགོས།
EXO 29:41 ཡང་ལུ་གུ་ཅིག་ཤོས་དེ་ས་སྲོས་ཀྱི་དུས་སུ་འབུལ་དགོས་ལ། ནངས་མོའི་དུས་ལྟར་འབྲུ་རིགས་ཀྱི་མཆོད་པ་དང་སྐྱེམས་མཆོད་ཀྱི་ལུགས་ཇི་མ་ཇི་བཞིན་གྱིས། དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་འབུལ་དགོས་ཤིང་།
EXO 29:42 དེ་ནི་ཁྱོད་ཀྱི་བུ་རྒྱུད་རྣམས་ཀྱིས་རྒྱུན་མི་ཆད་པར། དཀོན་མཆོག་ཡ་ཝཱེའི་སྤྱན་སྔ་སྟེ། མཇལ་འཕྲད་གུར་མཆོག་གི་སྒོ་ཁ་རུ་སྦྱིན་སྲེག་འབུལ་དགོས་པ་དེའོ། །གནས་དེར་ངས་ཁྱོད་ལ་གཏམ་སྨྲ་བའི་ཕྱིར་གནས་དེ་རུ་ཁྱོད་རྣམས་དང་འཕྲད་པར་འགྱུར།
EXO 29:43 དེར་ང་རང་ཡེས་ར་ཨེལ་པ་རྣམས་དང་ཕྲད་དེ། མཇལ་འཕྲད་གུར་མཆོག་ང་ཡི་གཟི་བརྗིད་ཀྱིས་དམ་པར་འགྱུར་རོ། །
EXO 29:44 ཡང་བདག་གིས་མཇལ་འཕྲད་གུར་མཆོག་དང་མཆོད་ཁྲི་དམ་པར་བྱའོ། །ཨ་རོན་དང་དེའི་བུ་རྣམས་ཀྱང་བདག་ལ་ཞབས་ཕྱི་བྱེད་པའི་མཆོད་དཔོན་དུ་དམ་པར་བྱའོ། །
EXO 29:45 ཡང་ང་ནི་ཡེས་ར་ཨེལ་པ་རྣམས་ཀྱི་དཀྱིལ་དུ་གནས་ཤིང་། དེ་དག་གི་དཀོན་མཆོག་ཡིན་པར་འགྱུར།
EXO 29:46 ང་རང་དེ་དག་གི་དཀྱིལ་དུ་གནས་པའི་ཆེད་དུ། བདག་ནི་ཁོ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་མཁན་ཡིན་ཞིང་། ཁོ་རྣམས་ཀྱི་དཀོན་མཆོག་ཡ་ཝཱེ་ཡིན་པ་དེ་དག་གིས་ཤེས་པར་འགྱུར་ལ། བདག་ནི་ཁོ་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་གསུངས་སོ། །
EXO 30:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་སེང་ལྡེང་ཤིང་གིས་སྤོས་ཁྲི་ཞིག་འདི་ལྟར་བཟོ་དགོས་ཏེ།
EXO 30:2 དེའི་རིང་ཚད་ལ་ཁྲུ་གཅིག་དང་། ཞེང་ཚད་ལ་ཁྲུ་གཅིག་སྟེ་གྲུ་བཞི་མ་ཞིག་ཡིན་དགོས། ཡང་དེའི་མཐོ་ཚད་ལ་ཁྲུ་གཉིས་དང་། རུ་ཐུར་རྣམས་སྤོས་ཁྲི་དང་དངོས་པོ་གཅིག་ཏུ་སྦྲེལ་བར་བཟོས་ཤིག
EXO 30:3 དེའི་ཐོག་དང་ལོགས་བཞི་དང་རུ་ཐུར་རྣམས་གསེར་བཙོ་མས་གཡོགས་ཤིག དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོ་དགོས།
EXO 30:4 ཡང་གསེར་གྱི་ཨ་ལོང་གཉིས་བཟོ་དགོས་ཏེ་མུ་ཁྱུད་ཀྱི་འོག་ནས་ཁ་གཏད་ཀྱི་ལོགས་གཉིས་ཀར་སྦྱོར་དང་། དེ་ནི་རྒྱུག་པ་གཉིས་བསྐོན་ས་ཡིན་ལ། དེས་སྤོས་ཁྲི་འཁུར་དགོས་པའི་ཕྱིར་རོ། །
EXO 30:5 རྒྱུག་པ་དེ་གཉིས་སེང་ལྡེང་ཤིང་གིས་བཟོས་ལ་གསེར་གྱིས་གཡོགས་ཤིག
EXO 30:6 ཡང་དཔང་མཛད་ཤུར་སྒམ་དང་དེའི་སྟེང་དུ་ཡོད་པའི་ཐུགས་རྗེའི་བཞུགས་ཁྲིའི་མདུན་ས་སྟེ། ང་རང་ཁྱོད་དང་འཕྲད་པའི་གནས་དེའི་ཡོལ་བའི་སྔོན་དུ་སྤོས་ཀྱི་སྒྲོམ་དེ་ཞོག་ཅིག
EXO 30:7 ཞོགས་པ་རེ་རེ་བཞིན་ཨ་རོན་གྱིས་སྒྲོན་མེ་རྣམས་ལ་བདག་བྱེད་པའི་སྐབས་སུ། སྤོས་ཀྱི་སྒྲོམ་དུ་དྲི་ཞིམ་བདུག་སྤོས་བདུག་དགོས།
EXO 30:8 ཁོས་ས་སྲོས་ཀྱི་དུས་སུ་སྒྲོན་མེ་རྣམས་སྒྲོན་པའི་ཚེ། ཡང་སྤོས་བདུག་དགོས་ལ། དེ་ནི་དཀོན་མཆོག་ཡ་ཝཱེའི་སྤྱན་སྔར་ཁྱོད་རྣམས་མི་རབས་ནས་མི་རབས་བར་རྒྱུན་ཆད་མེད་པའི་བདུག་སྤོས་ཡིན་ནོ། །
EXO 30:9 འོན་ཀྱང་སྤོས་ཁྲི་འདིའི་སྟེང་དུ་སྤོས་ཡ་མ་ཟུང་འབུལ་མི་རུང་། ཡང་སྦྱིན་སྲེག་གམ། འབྲུ་རིགས་ཀྱི་མཆོད་པའམ། སྐྱེམས་མཆོད་བཅས་དེ་ལ་འབུལ་མི་རུང་།
EXO 30:10 ཨ་རོན་གྱིས་ལོ་རེར་ཐེངས་གཅིག་ལ་དེའི་རུ་ཐུར་རྣམས་ཀྱི་སྟེང་དུ་སྡིག་པ་བཤགས་པའི་ཆོ་ག་བྱེད་དགོས་ཏེ། ཁྱོད་རྣམས་ཀྱི་མི་རབས་ནས་མི་རབས་བར། ཁོས་སྡིག་བཤགས་མཆོད་པའི་ཁྲག་གིས་དེའི་ཁར་ཆོ་ག་དེ་བྱེད་དགོས་ལ། སྤོས་ཁྲི་དེ་ནི་དཀོན་མཆོག་ཡ་ཝཱེའི་སྤྱན་སྔར་ཀུན་ལས་དམ་པ་ལགས་ཞེས་གསུངས་སོ། །
EXO 30:11 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 30:12 ཁྱོད་ཀྱིས་ཡེས་ར་ཨེལ་པ་རྣམས་ཚང་རྩིས་བྱེད་པའི་ཚེ། དེ་དག་ལ་ཆག་སྒོ་མི་འབྱུང་བའི་ཕྱིར། སྐབས་དེར་ཁོ་ཚོ་མི་རེ་རེས་རང་གི་ཚེ་སྲོག་གི་ཕྱིར་བླུ་རིན་ཞིག་དཀོན་མཆོག་ཡ་ཝཱེ་ལ་འབུལ་དགོས།
EXO 30:13 དེ་དག་གི་འབུལ་བ་ནི་འདི་ལྟར། ཚང་རྩིས་བྱས་པའི་མི་རེས་གནས་མཆོག་གི་སྲང་བཞིན་དུ་དངུལ་སྲང་ཕྱེད་ཀ་འབུལ་དགོས། དངུལ་སྲང་ཕྱེད་ཀ་དེ་ནི་དཀོན་མཆོག་ཡ་ཝཱེ་ལ་ཕུལ་བའི་འབུལ་བ་ཡིན་ཏེ། དངུལ་སྲང་གཅིག་ནི་གཱེ་ར་ ཉི་ཤུ་དང་འདྲ།
EXO 30:14 ཚང་རྩིས་བྱས་པའི་མི་ཐམས་ཅད་ལས། ལོ་ཉི་ཤུ་དང་དེ་ལས་བརྒལ་བ་ཚོས་འབུལ་བ་དེ་དཀོན་མཆོག་ཡ་ཝཱེ་ལ་འབུལ་དགོས།
EXO 30:15 ཁྱོད་ཅག་གིས་ཚེ་སྲོག་བླུ་བའི་ཕྱིར་དཀོན་མཆོག་ཡ་ཝཱེ་ལ་འབུལ་བ་འབུལ་བའི་ཚེ། དངུལ་སྲང་ཕྱེད་ཀ་མ་གཏོགས། མི་ཕྱུག་པོ་ཡིན་ཡང་ལྷག་མ་མི་འབུལ་ལ། མི་དབུལ་པོ་ཡིན་ཡང་ཉུང་དུ་མི་འཕྲི་བར་གྱིས།
EXO 30:16 ཡང་ཡེས་ར་ཨེལ་པ་རྣམས་ལས་བླུ་རིན་དེ་བསྡུས་ནས་མཇལ་འཕྲད་གུར་མཆོག་གི་ཞབས་འདེགས་ཕྱིར་ཞོག་ཅིག དེ་ལྟར་ཁྱོད་རྣམས་ཀྱི་ཚེ་སྲོག་བླུ་བ་དེ་དཀོན་མཆོག་ཡ་ཝཱེའི་སྤྱན་སྔར་ཡེས་ར་ཨེལ་པ་རྣམས་ལ་རྗེས་དྲན་ཡོད་པར་བྱའོ་ཞེས་གསུངས་སོ། །
EXO 30:17 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 30:18 ཁྱོད་རྣམས་བཀྲུ་བའི་ཕྱིར་དུ་ལི་ཡི་གཞོང་པ་ཞིག་དང་དེའི་སྟེགས་བུ་ཞིག་བཟོས་ལ། མཇལ་འཕྲད་གུར་མཆོག་དང་མཆོད་ཁྲིའི་བར་དུ་བཞག་ནས་དེའི་ནང་དུ་ཆུ་བླུགས་ཤིག
EXO 30:19 ཨ་རོན་དང་དེའི་བུ་རྣམས་ཀྱིས་གཞོང་པ་འདིར་ལག་པ་དང་རྐང་པ་བཀྲུ་དགོས།
EXO 30:20 དེ་དག་མཇལ་འཕྲད་གུར་མཆོག་གི་ནང་དུ་འཇུག་པའམ། ཞབས་ཕྱི་བྱེད་དུ་མཆོད་ཁྲི་དང་ཉེ་བར་འོངས་ནས་དཀོན་མཆོག་ཡ་ཝཱེ་ལ་མེ་མཆོད་འབུལ་བའི་ཚེ། འཆི་བར་མི་འགྱུར་བའི་ཕྱིར་ཆུ་དེས་བཀྲུ་དགོས་པ་ཡིན།
EXO 30:21 རང་རང་གི་ལག་པ་དང་རྐང་པ་གཉིས་བཀྲུས་ན་ཁོ་ཚོ་འཆི་བར་མི་འགྱུར་ཞིང་། དེ་ནི་ཨ་རོན་དང་ཁོའི་བུ་རྒྱུད་རྣམས་ཀྱི་མི་རབས་ནས་མི་རབས་བར་གཏན་དུ་གནས་པའི་སྒྲིག་ཁྲིམས་ཤིག་ཏུ་འགྱུར་དགོས་ཞེས་གསུངས་སོ། །
EXO 30:22 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 30:23 ཁྱོད་ཀྱིས་བསུང་རྫས་རྣམས་ཀྱི་མཆོག་སྟེ། རང་བཞིན་གྱིས་གཤེར་བའི་གུ་གུལ་སྲང་ལྔ་བརྒྱ་དང་ཤིང་ཚ་སྲང་ཉིས་བརྒྱ་དང་ལྔ་བཅུ་ལེན་དགོས་ལ། ཡང་སྲང་ཉིས་བརྒྱ་དང་ལྔ་བཅུ་ཡོད་པའི་ཤུ་དག་དང་།
EXO 30:24 གནས་མཆོག་གི་སྲང་བཞིན་དུ་ཁ་ཚི་ཡཱ་སྲང་ལྔ་བརྒྱ་དང་། སྐྱུ་རུ་རའི་འཚིར་སྣུམ་རྫ་བུམ་གང་ལོངས་དང་།
EXO 30:25 རྒྱུ་དེས་འབྱུག་སྣུམ་དམ་པ་བཟོ་དགོས་ཤིང་། དེ་ནི་སྤོས་ཆུ་བཟོ་མཁན་གྱི་ལུགས་བཞིན་དུ་བསྡེབ་པ་སྟེ་འབྱུག་སྣུམ་དམ་པ་ཡིན་དགོས།
EXO 30:26 དེ་ཡིས་མཇལ་འཕྲད་གུར་མཆོག་དང་དཔང་མཛད་ཤུར་སྒམ་དང་།
EXO 30:27 སྒྲོག་ཙེ་དང་དེའི་ཡོ་བྱད་ཐམས་ཅད་དང་། སྒྲོན་སྟེགས་དང་དེའི་ཡོ་བྱད་མཐའ་དག་དང་། དེ་མིན་སྤོས་ཁྲི་དང་།
EXO 30:28 སྦྱིན་སྲེག་གི་མཆོད་ཁྲི་དང་དེའི་ཡོ་བྱད་ཀུན། ཁྲུས་གཞོང་དང་དེའི་སྟེགས་བུ་ལའང་འབྱུག་དགོས།
EXO 30:29 དངོས་པོ་དེ་རྣམས་ནི་ཀུན་ལས་དམ་པར་འགྱུར་བའི་ཕྱིར་དེ་ལྟར་དམ་པར་བྱོས་ཤིག སུ་དང་གང་གིས་དེ་དག་ལ་རེག་ན་དམ་པར་འགྱུར།
EXO 30:30 ཁྱོད་ཀྱིས་ཨ་རོན་དང་དེའི་བུ་རྣམས་ལ་འབྱུག་དགོས་ཤིང་། དེ་དག་གིས་ང་རང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་དམ་པར་བྱོས་ཤིག
EXO 30:31 ཡང་ཁྱོད་ཀྱིས་ཡེས་ར་ཨེལ་པ་རྣམས་ལ་འདི་སྐད་སྨྲོས་ཤིག འདི་ནི་ཁྱོད་ཅག་གི་མི་རབས་ནས་མི་རབས་བར་བདག་གི་ཕྱིར་འབྱུག་སྣུམ་དམ་པ་ཡིན་དགོས།
EXO 30:32 དེ་མི་ཡི་སྟེང་དུ་མི་ལྡུག་པར་གྱིས། ཁྱོད་རྣམས་ཀྱིས་དེ་དང་གཅིག་པའི་སྦྱོར་ལུགས་ཀྱིས་དེ་དང་མཚུངས་པའང་བཟོ་བར་མི་བྱ་སྟེ། ཅི་ཡིན་ཞེ་ན། དེ་ནི་དམ་པ་ཡིན་པས་ཁྱོད་ཅག་གིས་ཀྱང་དེ་དམ་པར་བརྩི་དགོས།
EXO 30:33 སུས་ཀྱང་དེ་དང་འདྲ་བའི་འབྱུག་སྣུམ་གྱི་སྦྱོར་ལུགས་བྱེད་པའམ། དེ་ཡིས་མི་གཞན་ཞིག་ལ་བྱུགས་པ་སོགས་གང་བྱས་ཀྱང་། མི་དེ་རང་གི་མི་རྣམས་ལས་འཕུད་དགོས་ཞེས་པའོ་གསུངས་སོ། །
EXO 30:34 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་བསུང་རྫས་ཏེ། ཐང་སྨན་ཤིང་ཚྭའི་སྣུམ་དང་། དབང་ལག་དང་། གན་ངྷ་ར་ས་དང་སྤོས་དཀར་སླད་མེད་བཅས་མང་ཉུང་མེད་པར་ལོངས་ལ།
EXO 30:35 སྤོས་ཆུ་བཟོ་མཁན་གྱི་ལུགས་བཞིན་དུ་བསྡེབ་པ་དང་། དེ་ལ་ཚྭ་བསྲེས་ནས་སླད་མེད་པ་དང་དམ་པར་མཛད་དེ་སྤོས་བཟོ་བར་བྱའོ། །
EXO 30:36 དེ་ལས་སྤོས་ཁ་ཤས་ཕྱེ་མར་བཏགས་ནས། མཇལ་འཕྲད་གུར་མཆོག་གི་ནང་དུ་དཔང་མཛད་ཤུར་སྒམ་གྱི་མདུན་དུ་ང་རང་ཁྱོད་དང་འཕྲད་སར་ཞོག་ཅིག དེ་ནི་ཁྱོད་ཅག་གི་ཕྱིར་ཀུན་ལས་དམ་པ་ཡིན་དགོས།
EXO 30:37 ཡང་ཁྱོད་ཀྱིས་སྤོས་དེའི་སྦྱོར་ལུགས་བཞིན་དུ་ཁྱོད་ཅག་གི་ཆེད་དུ་སྤོས་བཟོ་མི་རུང་ལ། དཀོན་མཆོག་ཡ་ཝཱེའི་ཕྱིར་དེ་ནི་ཁྱོད་ཀྱིས་དམ་པར་བརྩི་དགོས།
EXO 30:38 སྤོས་དྲིར་བསྣམ་པའི་ཕྱིར་དེ་དང་འདྲ་བ་ཞིག་བཟོ་བའི་མི་སུ་ཡིན་ཡང་རང་གི་མི་རྣམས་ལས་འཕུད་དགོས་ཞེས་གསུངས་སོ། །
EXO 31:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 31:2 ལྟོས་དང་། བདག་གིས་ཡ་ཧུ་དཱ་ཚོ་པ་ནས་ཧུ་རཱའི་བུ་ཨོའུ་རེལ་དེའི་བུ་པི་ཟིད་ཨེལ་གྱི་མིང་ནས་བོས་ཤིང་།
EXO 31:3 ཡང་ངས་ཁོ་ལ་དཀོན་མཆོག་གི་ཐུགས་ཉིད་ཀྱིས་ཁྱབ་པར་བྱས་ཏེ། ཁོ་ལ་ཤེས་རབ་དང་སྤྱང་གྲུང་ལྡན་ཞིང་། བློ་རིག་མངའ་བ་དང་། ལག་རྩལ་སྣ་ཚོགས་བྱང་ཆུབ་པར་བྱས།
EXO 31:4 དེ་ནི་ལག་རྩལ་ཅན་གྱི་ལས་རྣམས་ཇུས་འགོད་བྱེད་པའི་ཆེད་དུ་ཡིན་ལ། གསེར་དངུལ་ལི་གསུམ་གྱི་མགར་བྱེད་པ་དང་།
EXO 31:5 རིན་པོ་ཆེ་དག་བརྐོ་གཏུབ་བྱེད་པ་དང་ཕྲ་རྒྱག་པ། ཤིང་བརྐོ་བ། ལག་རྩལ་སྣ་ཚོགས་ཀྱི་ལས་བྱེད་པའི་ཕྱིར་ཡིན།
EXO 31:6 ཡང་ལྟོས་དང་། ངས་ཁོ་དང་ལྷན་དུ་དཱན་གྱི་ཚོ་པ་ནས་ཨ་ཧི་སཱ་མག་གི་བུ་ཨོ་ཧོ་ལི་ཨབ་བྱ་བ་ཁོའི་ལས་གྲོགས་སུ་བདམས་ཤིང་། ཁྱོད་ལ་སྨྲས་པ་མཐའ་དག་བཟོ་བའི་ཕྱིར། བདག་གིས་བཟོ་བོ་མཁས་པ་ཐམས་ཅད་ལའང་ཤེས་རབ་མངའ་བར་བྱས་ཏེ།
EXO 31:7 མཇལ་འཕྲད་གུར་མཆོག་དང་། དཔང་མཛད་ཤུར་སྒམ་དང་། དེའི་སྟེང་དུ་ཡོད་པའི་ཐུགས་རྗེའི་བཞུགས་ཁྲི་དང་། གུར་མཆོག་གི་དངོས་པོ་ཐམས་ཅད་དང་།
EXO 31:8 སྒྲོག་ཙེ་དང་དེའི་ཡོ་བྱད་རྣམས་དང་། གསེར་བཙོ་མའི་སྒྲོན་སྟེགས་དང་དེའི་ཡོ་བྱད་རྣམས་དང་། སྤོས་ཁྲི་དང་།
EXO 31:9 སྦྱིན་སྲེག་གི་མཆོད་ཁྲི་དང་དེའི་ཡོ་བྱད་ཐམས་ཅད་དང་། ཁྲུས་གཞོང་དང་དེའི་སྟེགས་བུ་དང་།
EXO 31:10 ཐགས་ཞིབ་མོར་བཏགས་པའི་གོས་རྣམས་དང་། མཆོད་དཔོན་ཨ་རོན་གྱི་ན་བཟའ་དམ་པ་རྣམས་དང་ཁོའི་བུ་རྣམས་ཀྱིས་མཆོད་དཔོན་གྱི་ཞབས་ཕྱི་བྱེད་པའི་ན་བཟའ་རྣམས་དང་།
EXO 31:11 འབྱུག་སྣུམ་དང་དྲི་ཞིམ་བདུག་སྤོས་གནས་དམ་པའི་ཕྱིར་སྦྱར་བ་བཅས་ནི་ངས་ཁྱོད་ལ་ཅི་དང་ཅི་བསྒོས་པ་བཞིན་དུ་དེ་དག་གིས་བཟོ་དགོས་ཞེས་གསུངས་སོ། །
EXO 31:12 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
EXO 31:13 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲ་བར་གྱིས། བདག་གི་ངལ་གསོ་བའི་ཉིན་རྣམས་སྲུངས་ཤིག ཅི་ཡིན་ཞེ་ན། བདག་ནི་ཁྱོད་ཅག་དམ་པར་བྱེད་པའི་ཡ་ཝཱེ་ཡིན་པ་ཤེས་ཐུབ་པའི་ཕྱིར། ཉིན་དེ་ནི་ང་དང་ཁྱོད་ཅག་གི་མི་རབས་ནས་མི་རབས་བར་གྱི་རྟགས་ཤིག་ཡིན་ནོ། །
EXO 31:14 ངལ་གསོ་བའི་ཉིན་མོ་ནི་ཁྱོད་ཅག་གི་ཕྱིར་དམ་པ་ཡིན་པས་སྲུངས་ཤིག ཁྲིམས་དེ་མི་རྩི་མཁན་ཐམས་ཅད་སྲོག་དང་འཕྲལ་བར་གྱིས། ཉིན་མོ་དེ་ལ་ལས་ཀ་བྱེད་མཁན་སུ་ཡིན་ཡང་རང་གི་མི་རྣམས་ལས་འཕུད་པར་བྱའོ། །
EXO 31:15 ཉིན་དྲུག་གི་རིང་ལ་ལས་ཀ་བྱེད་ཅིང་ཉིན་བདུན་པ་ནི་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ཏེ། དཀོན་མཆོག་ཡ་ཝཱེའི་ཕྱིར་ངལ་གསོ་བའི་ཉིན་དམ་པ་ཡིན། ངལ་གསོ་བའི་ཉིན་མོར་ལས་ཀ་བྱེད་མཁན་འཆི་དགོས་པ་ཡིན།
EXO 31:16 དེ་བས་ན་ཡེས་ར་ཨེལ་པ་རྣམས་ཀྱིས་ངལ་གསོ་བའི་ཉིན་བསྲུང་དགོས་ཤིང་། དེ་དག་གི་བུ་རྒྱུད་རྣམས་ཀྱིས་ཀྱང་དུས་གཏན་གྱི་ཁ་ཆད་འདི་འགྱུར་བ་མེད་པར་བསྲུང་དགོས།
EXO 31:17 དེ་ནི་ང་དང་ཡེས་ར་ཨེལ་པའི་བར་གྱི་གཏན་དུ་གནས་པའི་རྟགས་ཤིག་ཡིན། ཅིའི་ཕྱིར་ཞེ་ན། ཉིན་དྲུག་གི་རིང་ལ་དཀོན་མཆོག་ཡ་ཝཱེས་ནམ་མཁའ་དང་ས་གཞི་བཀོད་ཅིང་། ཉིན་བདུན་པར་ངལ་གསོ་མཛད་ནས་ཐུགས་དལ་བར་བཞུགས་པ་ཡིན་ཞེས་སྨྲ་དགོས་པར་གསུངས་སོ། །
EXO 31:18 ཡང་ཁོང་གིས་སི་ནཱ་རི་བོར་མོ་ཤེ་ལ་གསུང་གླེང་མཛད་ཟིན་ཏེ། དཔང་པོའི་རྡོ་ལེབ་གཉིས་ཏེ་དཀོན་མཆོག་གི་ཕྱག་མཛུབ་ཀྱིས་ཡི་གེར་བཀོད་པ་ཁོ་ལ་གནང་ངོ་། །
EXO 32:1 ཡང་མོ་ཤེ་ཡིས་རི་ནས་འབབ་པའི་དུས་ཚོད་འགོར་འགྱང་བྱས་པ་མི་རྣམས་ཀྱིས་ཤེས་ཏེ་ཁོ་ཚོ་ཨ་རོན་གྱི་མདུན་དུ་འཛོམས་ནས་འདི་ལྟར། ངེད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་མཁན་མོ་ཤེ་དེ་ལ་ཅི་ཞིག་བྱུང་བ་མི་ཤེས་པས། ད་ལངས་ནས་ངེད་ཅག་ལ་ལམ་སྣ་འདྲེན་པའི་ལྷ་སྐུ་བཟོས་ཤིག་ཅེས་སྨྲས་ཤིང་།
EXO 32:2 ཨ་རོན་ན་རེ། ཁྱོད་ཅག་གིས་རང་གི་ཆུང་མ་དང་བུ་བུ་མོ་དག་གི་གསེར་གྱི་རྣ་ལུང་རྣམས་བླངས་ནས་ངའི་མདུན་དུ་ཁྱེར་ཤོག་ཅིག་ཅེས་སྨྲས་པ་ལ།
EXO 32:3 མི་ཐམས་ཅད་ཀྱིས་གསེར་གྱི་རྣ་ལོང་རྣམས་བླངས་ནས་ཨ་རོན་གྱི་མདུན་དུ་ཁྱེར་འོངས།
EXO 32:4 ཁོས་དེ་དག་གི་ལག་ནས་བླངས་ཤིང་གཟོང་ཁ་བསྐོར་ཏེ་བ་ཕྲུག་གི་སྐུ་བརྙན་ཞིག་བླུགས་པ་དང་། དེ་དག་གིས། ཀྱེ་ཡེས་ར་ཨེལ་པ་རྣམས། འདི་ནི་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་པའི་ལྷ་ལགས་སོ་ཞེས་སྨྲས།
EXO 32:5 ཨ་རོན་གྱིས་དེ་མཐོང་བ་དང་། བ་ཕྲུག་གི་སྐུ་བརྙན་མདུན་དུ་མཆོད་ཁྲི་ཞིག་བརྩིགས་ནས། སང་ཉིན་ནི་དཀོན་མཆོག་ཡ་ཝཱེའི་དུས་ཆེན་ཡིན་ཞེས་བསྒྲགས།
EXO 32:6 དེའི་ཕྱི་ཉིན་ཐོ་རངས་ཁོ་རྣམས་ཡར་ལངས་ནས་སྦྱིན་སྲེག་དང་ཞི་བདེའི་མཆོད་པ་ཕུལ་ཏེ། མར་བསྡད་ནས་བཟའ་བཏུང་ལ་རོལ་བ་དང་ཡར་ལངས་ནས་རྩེད་མོ་རྩེས་སོ། །
EXO 32:7 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་མྱུར་དུ་རི་ལས་བོབས་ཤིག ཁྱོད་ཀྱིས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་མི་རྣམས་ཀྱིས་སྤྱོད་པ་ཐ་ཤལ་བ་བྱས་ཡོད།
EXO 32:8 དེ་དག་གིས་མྱུར་བ་མྱུར་དུ་ངས་བསྟན་པའི་ལམ་དེ་ལོགས་སུ་བཞག་ཅིང་། རང་གི་ཆེད་དུ་བ་ཕྲུག་གི་སྐུ་བླུགས་ནས་དེ་ལ་ཕྱག་བཙལ་བ་དང་མཆོད་པ་ཕུལ་ནས་ན་རེ། ཀྱེ་ཡེས་ར་ཨེལ་པ་རྣམས། འདི་ནི་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་པའི་ལྷ་ལགས་སོ་ཞེས་སྨྲ་བཞིན་འདུག་ཅེས་གསུངས་པ་དང་།
EXO 32:9 ཡང་འདི་སྐད་དུ། བདག་གིས་མི་འདི་རྣམས་ལ་བལྟས་ཤིང་། ཀྱེ་ཧོ། དངོས་གནས་འབངས་གཉའ་རེངས་ཤིག་འདུག
EXO 32:10 དེ་བས་ན་ངའི་ཁོང་ཁྲོ་དེ་དག་གི་ཕྱོགས་སུ་འབར་ནས་དེ་དག་མེད་པར་གཏོང་བའི་ཕྱིར་དུ། ང་ནི་རང་དགར་བསྐྱུར་ཞོག ངས་ཁྱོད་རང་ཁོ་ནའི་བུ་རྒྱུད་ནི་རྒྱལ་ཁབ་ཆེན་པོ་ཞིག་ཏུ་འགྱུར་བར་བྱ་ཞེས་གསུངས་སོ། །
EXO 32:11 དེ་ནས་མོ་ཤེ་ཡིས་རང་གི་དཀོན་མཆོག་ཡ་ཝཱེ་ལ་ནན་གྱིས་ཞུས་པ་ནི། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ནུས་མཐུ་ཆེ་ཞིང་སྟོབས་དང་ལྡན་པའི་ཕྱག་གིས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་རང་གི་འབངས་མི་ལ། ཁྱེད་རང་ཐུགས་རབ་ཏུ་ཁྲོ་བ་ཅི་ཡིན་ནམ།
EXO 32:12 ཅིའི་ཕྱིར་མ་འོངས་པར་ཨེ་ཅིབ་པ་རྣམས་ལ། དཀོན་མཆོག་གིས་དམིགས་ཡུལ་ངན་པ་བཅངས་ནས་ཡེས་ར་ཨེལ་པ་རྣམས་ཕྱི་རུ་ཁྲིད་དེ། རི་བོ་ནས་བསད་དེ་ས་སྟེང་ནས་མེད་པར་མཛད་པའི་ཕྱིར་ཡིན་ཞེས་སྨྲ་རུ་འཇུག་གམ། ཁྱེད་ཀྱི་ཐུགས་ཁྲོ་བའི་མེ་ལྕེ་གཞིལ་བར་མཁྱེན། ཉིད་ཀྱི་འབངས་མི་ལ་གནོད་འཚེ་གཏོང་བར་དགོངས་ཀྱང་ཐུགས་ལ་སྙིང་རྗེ་ཡོད་པར་ཞུ།
EXO 32:13 ཁྱེད་ཀྱི་ཞབས་ཕྱི་རྣམས་ཏེ་ཨབ་ར་ཧམ་དང་། ཨི་སཱག་དང་། ཡེས་ར་ཨེལ་བཅས་ཐུགས་ལ་དྲན་དུ་གསོལ། སྔར་ཁྱེད་ཀྱིས་རང་ཉིད་དཔང་དུ་བཙུགས་ནས་དེ་དག་ལ་འདི་སྐད་དུ། ངས་ཁྱོད་ཅག་གི་བུ་རྒྱུད་ནམ་མཁའི་སྐར་མའི་གྲངས་ཙམ་དུ་སྤེལ་ཏེ། ངས་ཁས་བླངས་པའི་ས་ཐམས་ཅད་ཁྱོད་ཅག་གི་བུ་རྒྱུད་ལ་སྦྱིན་པར་འགྱུར་ཞིང་། ཁོ་རྣམས་ལ་རྟག་ཏུ་གནས་པའི་ནོར་སྐལ་དུ་འཐོབ་པར་ངེས་ཞེས་གསུངས་ཡོད་ཅེས་ཞུས་པས།
EXO 32:14 དཀོན་མཆོག་ཡ་ཝཱེའི་ཐུགས་འགྱུར་ནས་སྔར་གསུངས་པའི་གནོད་འཚེ་དེ་རང་གི་འབངས་མི་ལ་ཕོག་པར་མ་མཛད་དོ། །
EXO 32:15 དེ་ནས་མོ་ཤེ་ཁ་ཕྱིར་འཁོར་ནས་རི་ལས་བབས་ཤིང་། དཔང་པོའི་རྡོ་ལེབ་གཉིས་ལག་ཏུ་ཁྱེར་བ་དང་། དེ་གཉིས་ཀྱི་ངོས་གཉིས་ལ་ཡི་གེ་བྲིས་འདུག་པ་སྟེ་མདུན་རྒྱབ་གཉིས་ལ་ཡི་གེ་བྲིས་ཡོད་ལ།
EXO 32:16 རྡོ་ལེབ་གཉིས་ནི་དཀོན་མཆོག་གིས་བཟོས་པ་དང་། ཡི་གེ་ནི་དཀོན་མཆོག་གིས་རྡོ་ལེབ་གཉིས་སུ་བརྐོས་ནས་བྲིས་ཡོད།
EXO 32:17 ཡང་ཡོ་ཤུ་ཨ་ཡིས་མི་རྣམས་ཀྱིས་སྐད་རྒྱག་པའི་འུར་ཟིང་ཐོས་ཏེ་མོ་ཤེ་ལ། སྒར་གྱི་ནང་དུ་དམག་འཁྲུག་གི་སྐད་སྒྲ་སྒྲོག་གིན་འདུག་ཅེས་པར།
EXO 32:18 མོ་ཤེ་ན་རེ། དེ་ནི་གཡུལ་ལས་རྒྱལ་བ་རྣམས་ཀྱི་སྒྲ་མ་ཡིན་ལ་གཡུལ་ལས་ཕམ་པ་རྣམས་ཀྱི་སྒྲ་ཡང་མ་ཡིན་པར། བདག་གིས་ཐོས་པ་མི་རྣམས་ཀྱིས་གླུ་ལེན་གྱིན་པའི་སྒྲ་རེད་ཅེས་སྨྲས་སོ། །
EXO 32:19 དེ་ནས་མོ་ཤེ་སྒར་དང་ཉེ་བར་སླེབས་ཚེ་བ་ཕྲུག་དེ་དང་ཡང་མི་རྣམས་ཀྱིས་བྲོ་འཁྲབ་པ་མཐོང་ནས། ཁོང་ཁྲོ་རབ་ཏུ་འབར་ཞིང་རྡོ་ལེབ་གཉིས་ལག་ནས་རི་འདབས་སུ་གཡུགས་ཏེ་བཅག་པ་དང་།
EXO 32:20 ཡང་དེ་ཚོས་བཟོས་པའི་བ་ཕྲུག་མེར་བསྲེགས་པ་དང་རྡུལ་དུ་བཏགས་ནས་ཆུར་བཏབ་སྟེ། ཡེས་ར་ཨེལ་པ་རྣམས་ལ་འཐུང་དུ་བཅུག
EXO 32:21 དེ་ནས་མོ་ཤེ་ཡིས་ཨ་རོན་ལ། ཁྱོད་ཀྱིས་མི་འདི་རྣམས་ཀྱི་སྟེང་ལ་སྡིག་པ་ཆེན་པོ་དེ་ལྟ་བུ་ཞིག་འདྲེན་པའི་རྒྱུ་མཚན་ཅི། འབངས་ཀྱིས་ཁྱོད་ལ་ཅི་ཞིག་བྱས་སམ་ཞེས་སྨྲས་པ་ལ།
EXO 32:22 ཨ་རོན་ན་རེ། ང་ཡི་བདག་པོ་ལགས། ཐུགས་རྒྱལ་མི་བཞེངས་པར་ཞུ། འབངས་འདིའི་བློ་ཁ་ངན་པར་ཕྱོགས་ཡོད་པ་ཁྱེད་ཀྱིས་མཁྱེན་གསལ་ལྟར།
EXO 32:23 དེ་དག་གིས་ང་ལ་འདི་ལྟར། ངེད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་མཁན་མོ་ཤེ་དེ་ལ་ཅི་ཞིག་བྱུང་བ་མི་ཤེས་པས། ངེད་ཅག་ལ་ལམ་སྣ་འདྲེན་པའི་ལྷ་སྐུ་བཟོས་ཤིག་ཅེས་སྨྲས་ཤིང་།
EXO 32:24 ཡང་ངས་དེ་དག་ལ། སུ་ལ་གསེར་ཡོད་པ་དེ་བླངས་ནས་ཁྱེར་ཤོག་ཅེས་སྨྲས་པ་དང་། ཁོ་ཚོས་ང་རང་ལ་སྤྲད་ཅིང་། ངས་གསེར་རྣམས་མེ་རུ་གཡུགས་ནས་བ་ཕྲུག་འདི་བྱུང་བ་ཡིན་ཞེས་སྨྲས་སོ། །
EXO 32:25 མོ་ཤེ་ཡིས་མི་རྣམས་ལང་ཤོར་དུ་སོང་བ་མཐོང་བའི་ཚེ། ཨ་རོན་གྱིས་ཁོ་ཚོ་ལང་ཤོར་དུ་འགྲོ་བར་བཅུག་སྟེ། རང་གི་དགྲ་བོ་དག་གི་གད་མོའི་རྒྱུ་རུ་གྱུར་ཡོད་པས།
EXO 32:26 མོ་ཤེ་སྒར་གྱི་སྒོ་ཁ་རུ་འགྲེང་སྟེ། སུ་ཞིག་དཀོན་མཆོག་ཡ་ཝཱེའི་ཕྱོགས་བྱེད་པ་དེ་ཚུར་ཤོག་ཅིག་ཅེས་སྨྲས་པ་ན། ལེ་ཝིའི་བུ་རྒྱུད་ཐམས་ཅད་ཁོའི་དྲུང་དུ་འདུས།
EXO 32:27 ཡང་ཁོས་དེ་དག་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། མི་རེ་རེས་རང་གི་རལ་གྲི་རྐེད་ལ་བཏགས་ནས་སྒར་གྱི་སྒོ་འདི་ནས་སྒོ་དེའི་བར་དུ་ཕར་ཚུར་སོང་ལ། མི་རེ་རེས་རང་གི་སྤུན་དང་། རང་གི་གྲོགས་པོ་དང་། རང་གི་ཁྱིམ་མཚེས་སོད་ཅིག་ཅེས་བཀའ་བསྩལ་པ་ལ།
EXO 32:28 ལེ་ཝིའི་བུ་རྒྱུད་རྣམས་ཀྱིས་མོ་ཤེའི་བཀའ་བཞིན་དུ་བྱས་པས། ཉིན་དེར་མི་རྣམས་ལས་མི་སུམ་སྟོང་བསད།
EXO 32:29 ཡང་མོ་ཤེ་ཡིས་དེ་རྣམས་ལ་འདི་ལྟར། མི་རེ་རེས་རང་གི་བུ་དང་སྤུན་ལ་རྒོལ་བས། དེ་རིང་གི་ཉིན་མོ་ལ་དཀོན་མཆོག་ཡ་ཝཱེའི་ཕྱིར་ཁྱོད་ཅག་གིས་རང་ཉིད་དམ་པར་གྱིས། དེ་ནི་ཉིན་འདིར་ཁྱོད་ཅག་ལ་བྱིན་རླབས་གནང་བར་འགྱུར་བའི་ཕྱིར་ཡིན་ཞེས་སྨྲས་སོ། །
EXO 32:30 དེའི་ཕྱི་ཉིན་མོ་ཤེ་ཡིས་འབངས་མི་རྣམས་ལ། ཁྱོད་ཅག་གིས་སྡིག་པ་ཚབས་ཆེན་བྱས་པས། ང་རང་དཀོན་མཆོག་ཡ་ཝཱེའི་དྲུང་དུ་ཡར་འགྲོ་བར་བྱ་ཞིང་། ངས་ཁྱོད་ཅག་གི་ཕྱིར་སྡིག་བཤགས་བྱེད་ནུས་ཀྱང་སྲིད་ཅེས་སྨྲས།
EXO 32:31 མོ་ཤེ་ཕྱིར་དཀོན་མཆོག་ཡ་ཝཱེའི་དྲུང་དུ་ལོག་ནས་ན་རེ། ཀྱེ། མི་འདི་རྣམས་ཀྱིས་སྡིག་པ་ཚབས་ཆེན་བྱས་ཏེ། རང་ཉིད་ལ་གསེར་གྱི་ལྷ་སྐུ་བཟོས།
EXO 32:32 ཁྱེད་ཀྱིས་དེ་དག་གི་སྡིག་པ་བསལ་བར་མཛོད། ཅི་སྟེ་མི་བསལ་ན། ཁྱེད་ཀྱིས་ཕྱག་གིས་བྲིས་པའི་གླེགས་བམ་ལས་ངའི་མིང་ཡང་གསུབ་པར་མཛོད་ཅེས་ཞུས།
EXO 32:33 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ང་ལ་འགལ་བའི་སྡིག་པ་བྱས་པའི་མི་སུ་ཡིན་ཡང་བདག་གིས་དེའི་མིང་ང་ཡི་གླེགས་བམ་ལས་གསུབ་པར་བྱ།
EXO 32:34 ད་ལྟ་ལམ་དུ་ཆས་ཏེ་ངས་ཁྱོད་ལ་སྨྲས་པའི་གནས་དེར་མི་རྣམས་འཁྲིད་པར་གྱིས། ལྟོས་དང་། བདག་གི་ཕོ་ཉ་ཁྱོད་ཀྱི་མདུན་དུ་འགྲོ་བར་ངེས། འོན་ཀྱང་ངས་ཉེས་ཆད་གཅོད་པའི་དུས་སུ་དེ་དག་གི་སྡིག་པར་ཉེས་ཆད་བཅད་ཡོང་ཞེས་གསུངས།
EXO 32:35 དེ་ནས་མི་རྣམས་ཀྱིས་ཨ་རོན་གྱིས་བཟོས་པའི་བ་ཕྲུག་ལ་བསྙེན་བཀུར་བྱས་པའི་རྐྱེན་གྱིས། དཀོན་མཆོག་ཡ་ཝཱེས་ཁོ་རྣམས་སྲོག་དང་འཕྲལ་བར་མཛད་པའོ། །
EXO 33:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་དང་ཁྱོད་ཀྱིས་ཨེ་ཅིབ་ཡུལ་ནས་ཕྱི་རུ་ཁྲིད་པའི་མི་རྣམས་ནི་འདི་ནས་ཡར་སོང་དང་། ངས་ཨབ་ར་ཧམ་དང་། ཨི་སཱག་དང་། ཡ་ཀོབ་བཅས་ལ་མནའ་བསྐྱལ་ནས་ཁས་བླངས་མྱོང་བའི་ཡུལ་དུ་འགྲོ་བར་གྱིས། སྔར་ངས་དེ་རྣམས་ལ་འདི་ལྟར། ངས་ཡུལ་དེ་ཁྱོད་ཀྱི་བུ་རྒྱུད་ལ་གནང་བར་བྱ་ཞེས་སྨྲས་པའོ། །
EXO 33:2 ངས་ཁྱོད་ཀྱི་མདུན་དུ་ཕོ་ཉ་ཞིག་གཏོང་བར་ངེས་ཏེ། དེས་ཀ་ན་ཨན་པ་དང་ཨེ་མོར་པ་དང་ཧེད་པ་དང་ཕེ་རེ་ཟི་པ་དང་ཧེ་བི་པ་དང་ཡེ་བུ་སི་པ་རྣམས་སྐྲོད་པར་འགྱུར།
EXO 33:3 ཡུལ་གང་ལ་ཞེ་ན། འོ་མ་དང་སྦྲང་རྩི་བཞུར་བའི་ཡུལ་དེ་ལ་འགྲོ་བར་གྱིས། ང་ཁྱོད་རྣམས་དང་མཉམ་དུ་ཡར་འགྲོ་བར་མི་བྱ་སྟེ། ཁྱོད་ཅག་ནི་འབངས་གཉའ་རེངས་ཤིག་ཡིན་པས། ངས་ལམ་བར་དུ་ཁྱོད་ཅག་མེད་པར་བཟོ་ཉེན་ཡོད་ཅེས་གསུངས་སོ། །
EXO 33:4 ཡང་མི་རྣམས་ཀྱིས་སེམས་མུག་བྱེད་ཀྱི་གསུང་དེ་ཐོས་པས་མྱ་ངན་བྱས་ཏེ། རྒྱན་ཆ་བཏགས་པ་མི་གཅིག་ཀྱང་མེད།
EXO 33:5 ཅི་ཡིན་ཞེ་ན། སྔར་དཀོན་མཆོག་ཡ་ཝཱེས་མོ་ཤེ་ལ། ཡེས་ར་ཨེལ་པ་རྣམས་ལ་འདི་སྐད་སྨྲོས་ཤིག ཁྱོད་ཅག་ནི་འབངས་གཉའ་རེངས་ཡིན་པས་ང་རང་སྐད་ཅིག་ཙམ་ལ་ཁྱོད་ཅག་གི་དཀྱིལ་དུ་ཡོང་ནའང་། བདག་གིས་ཁྱོད་ཅག་མེད་པར་བཟོ་ཉེན་ཡོད། དེའི་ཕྱིར་ཁྱོད་ཅག་གིས་རྒྱན་ཆ་འཕུད་དང་། ངས་ཁྱོད་ཅག་ལ་ཅི་བྱེད་དགོས་པ་ཤེས་པར་འགྱུར་ཞེས་གསུངས་པས།
EXO 33:6 ཡེས་ར་ཨེལ་པ་རྣམས་རི་བོ་ཧོ་རེབ་ནས་བུད་པའི་ཚུན་ལ་རྒྱན་ཆ་རྣམས་རྩ་བ་ནས་བླངས་སོ། །
EXO 33:7 ཡང་མོ་ཤེ་ཡིས་རྒྱུན་སྲོལ་བཞིན་སྦྲ་ཞིག་ཁྱེར་ནས་སྒར་གྱི་ཕྱི་རོལ་ཏུ་རྒྱང་ཐག་ཅུང་རིང་བའི་སར་ཕུབ་པ་དང་། དེ་ལ་མཇལ་འཕྲད་གུར་མཆོག་ཅེས་མིང་བཏགས། དཀོན་མཆོག་ཡ་ཝཱེ་དང་མཇལ་བར་དགའ་བའི་མི་རྣམས་རྟག་ཏུ་སྒར་གྱི་ཕྱི་རོལ་ཏུ་ཡོད་པའི་མཇལ་འཕྲད་གུར་མཆོག་ཏུ་སོང་ངོ་། །
EXO 33:8 མོ་ཤེ་ནམ་ཡང་གུར་མཆོག་ཏུ་འགྲོ་བའི་ཚེ་མི་ཐམས་ཅད་རང་རང་གུར་གྱི་སྒོ་ཁར་ལངས་ནས་མོ་ཤེ་ནང་དུ་ཕྱིན་པའི་བར་དུ་སྡོད་པར་བྱེད།
EXO 33:9 ཡང་ནམ་ཞིག་མོ་ཤེ་གུར་ནང་དུ་སོང་ཚེ་སྤྲིན་གྱི་ཀ་བ་འབབ་ཅིང་གུར་གྱི་སྒོ་ཁར་འགྲེང་བ་དང་། དཀོན་མཆོག་ཡ་ཝཱེས་མོ་ཤེ་ལ་གསུང་གླེང་མཛད།
EXO 33:10 མི་ཀུན་གྱིས་དོན་དེ་མཐོང་བ་ན། མི་ཐམས་ཅད་འགྲེང་ཞིང་རེ་རེས་རང་རང་གུར་གྱི་སྒོ་འགྲམ་ནས་གུས་ཕྱག་ཕུལ་ཏོ། །
EXO 33:11 དེ་ལྟར་དཀོན་མཆོག་ཡ་ཝཱེས་མོ་ཤེ་ལ་ཁ་རི་ཁ་ཐུག་ཏུ་གསུང་གླེང་མཛད་ཅིང་། གྲོགས་པོས་གྲོགས་པོ་ལ་གླེང་མོལ་བྱེད་པ་བཞིན་ཡིན། ཡང་ནམ་ཞིག་མོ་ཤེ་སྒར་ལ་ཕྱིར་ལོག་ཚེ། དེའི་གཞོན་ནུ་ཞབས་ཕྱི་སྟེ་ནུན་ཞེས་པའི་བུ་ཡོ་ཤུ་ཨ་གཅིག་པུ་གུར་དང་མ་བྲལ་བར་བསྡད་དོ། །
EXO 33:12 ཡང་མོ་ཤེ་ཡིས་དཀོན་མཆོག་ཡ་ཝཱེ་ལ། གཟིགས་པར་ཞུ། ཁྱེད་ཀྱིས་ང་ལ་མི་འདི་རྣམས་ཡར་ཁྲིད་ཅིག་ཅེས་གསུངས་ཀྱང༌། ཁྱེད་ཀྱིས་སུ་ཞིག་ང་དང་མཉམ་དུ་འགྲོ་བར་མངག་རྒྱུ་ཡིན་པ་བདག་ལ་མ་གསུངས་ཤིང་། ཡང་སྔར་ནས་འདི་སྐད་དུ། ངས་ཁྱོད་ཀྱི་མིང་ནས་ཁྱོད་ངོ་ཤེས་ཤིང་བདག་གི་མིག་ལམ་ནས་ཁྱོད་ལ་སྙིང་རྗེ་ཐོབ་པ་ཡིན་ཞེས་གསུངས་མྱོང་བས།
EXO 33:13 གལ་ཏེ་ཁྱེད་ཀྱི་སྤྱན་སྔར་ང་ལ་ཐུགས་རྗེ་ཐོབ་པ་ཡིན་ན། བདག་ལ་ཁྱེད་ཀྱི་ལམ་སྟོན་པར་མཛོད། དེ་ལྟར་མཛད་ན་ངས་ཁྱེད་རང་ངོ་ཤེས་ཤིང་ཁྱེད་ཀྱི་སྤྱན་སྔར་ཐུགས་རྗེ་འཐོབ་ངེས་ཡིན་ལ། ཡང་མི་རིགས་འདི་ནི་ཁྱེད་ཀྱི་འབངས་མི་ཡིན་པར་གཟིགས་སུ་གསོལ་ཞེས་ཞུས་པ་དང་།
EXO 33:14 ཁོང་གིས་འདི་སྐད་དུ། ང་རང་དངོས་སུ་ཁྱོད་དང་མཉམ་དུ་འགྲོ་ཞིང་ཁྱོད་ལ་ངལ་གསོ་སྟེར་བར་བྱ་ཞེས་གསུངས་སོ། །
EXO 33:15 ཡང་མོ་ཤེ་ཡིས་ཁོང་ལ་འདི་ལྟར། གལ་ཏེ་ཁྱེད་ཉིད་དངོས་སུ་ང་ཚོ་དང་ལྷན་དུ་མི་ཕེབས་ན། ངེད་རྣམས་འདི་ནས་ཡར་ལའང་མི་འཁྲིད་རོགས།
EXO 33:16 ཁྱེད་རང་ངེད་རྣམས་དང་ལྷན་དུ་ཕེབས་ན་མ་གཏོགས། བདག་དང་ཁྱེད་ཀྱི་འབངས་མི་དང་བཅས་པ་ལ་ཁྱེད་ཀྱི་སྤྱན་སྔར་ཐུགས་རྗེ་ཐོབ་པ་ནི་མི་གཞན་དག་གིས་ཅི་ལྟར་ཤེས་ཐུབ་བམ། དེ་ལྟར་ལྷན་དུ་ཕེབས་པ་ན། ད་གཟོད་ས་སྟེང་གི་མི་ཐམས་ཅད་དང་ང་རང་ཐེ་བའི་ཁྱེད་ཀྱི་འབངས་མི་ལ་ཁྱད་པར་ཡོད་པ་ཤེས་པར་འགྱུར་ཞེས་ཞུས་སོ། །
EXO 33:17 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། བདག་གི་མིག་ལམ་ནས་ཁྱོད་ལ་སྙིང་རྗེ་ཐོབ་ཅིང་ངས་ཁྱོད་ཀྱི་མིང་ནས་ཁྱོད་ངོ་ཤེས་པས། ང་རང་ལ་ཞུས་པ་བཞིན་དུ་བདག་གིས་ཀྱང་བྱེད་པར་འགྱུར་ཞེས་གསུངས་པ་དང་།
EXO 33:18 མོ་ཤེ་ཡིས། ཁྱེད་ཀྱི་གཟི་བརྗིད་ང་ལ་སྟོན་པར་མཛོད་ཅེས་ཞུས་ཤིང་།
EXO 33:19 ཁོང་གིས་འདི་སྐད་དུ། བདག་གིས་རང་གི་དྲིན་ཐམས་ཅད་ཁྱོད་ཀྱི་མདུན་དུ་འགྲོ་བར་འཇུག་ཅིང་དཀོན་མཆོག་ཡ་ཝཱེའི་མིང་ཡང་སྒྲོག་པར་བྱ། ངས་སུ་ཞིག་ལ་བརྩེ་བར་བསམ་ན་དེ་ལ་བརྩེ་བར་བྱ། ཡང་སུ་ཞིག་ལ་སྙིང་རྗེ་བར་འདོད་ན་དེ་ལ་སྙིང་རྗེ་བར༌བྱ་ཞེས་གསུངས།
EXO 33:20 ཡང་འདི་སྐད་དུ། ཁྱོད་ཀྱིས་བདག་གི་གདོང་ནི་མཐོང་མི་རུང་སྟེ། ཅིའི་ཕྱིར་ཞེ་ན། བདག་གི་གདོང་མཐོང་བའི་མི་སུ་ཡིན་ཡང་གསོན་པོར་འདུག་མི་ཐུབ་ཅེས་གསུངས་སོ། །
EXO 33:21 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངའི་དྲུང་དུ་གནས་ཤིག་ཡོད་དེ། ཁྱོད་རང་བྲག་དེའི་སྟེང་ལ་འགྲེང་བར་གྱིས།
EXO 33:22 ངའི་གཟི་བརྗིད་ཁྱོད་ཀྱི་མདུན་དུ་ཕར་འགྲོ་བའི་ཚེ། བདག་གིས་ཁྱོད་རང་བྲག་སྲུབས་ཤིག་ཏུ་བཞག་སྟེ། ང་རང་ཕར་བཞུད་པའི་བར་དུ་ངའི་ལག་པས་ཁྱོད་རང་འགེབ་པར་བྱ།
EXO 33:23 དེའི་རྗེས་སུ་ངས་རང་གི་ལག་པ་ཕྱིར་འཐེན་ཚེ་ཁྱོད་ཀྱིས་ངའི་རྒྱབ་མཐོང་བར་འགྱུར་ནའང་། གདོང་ནི་གཏན་ནས་མཐོང་བར་མི་རུང་ཞེས་གསུངས་སོ། །
EXO 34:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་རང་ལ་སྔར་གྱི་རྡོ་ལེབ་དང་འདྲ་བ་གཉིས་བརྐོས་དང་། དེ་སྔོན་བཅག་པའི་རྡོ་ལེབ་སྟེང་གི་ཚིག་རྣམས་བདག་གིས་རྡོ་ལེབ་འདི་གཉིས་ལ་བརྐོ་བར་བྱ།
EXO 34:2 སང་ཉིན་ཐོ་རངས་ཁྱོད་ཀྱིས་སྟ་གོན་བྱས་ཏེ་རི་བོ་སི་ནཱ་རུ་ཡར་ཡོང་སྟེ་རི་རྩེ་ནས་ངའི་དྲུང་དུ་འགྲེང་བར་གྱིས་ཤིག
EXO 34:3 ཁྱོད་དང་མཉམ་དུ་མི་སུ་ཡང་ཡོང་མི་རུང་ལ། རི་དེ་ཡོངས་ལ་མི་སུ་ཡང་ཡོད་མི་རུང་ཞིང་། རི་དེའི་འདབས་སུ་ར་ལུག་གི་ཁྱུ་དང་བ་ཁྱུ་གང་ཡང་འཚོ་མི་རུང་ཞེས་གསུངས་པས།
EXO 34:4 མོ་ཤེ་ཡིས་སྔར་གྱི་རྡོ་ལེབ་གཉིས་དང་འདྲ་བ་བཟོས་ནས་དཀོན་མཆོག་ཡ་ཝཱེས་བཀའ་བསྩལ་པ་བཞིན་དུ་ཐོ་རངས་ཡར་ལངས་ཏེ་རི་བོ་སི་ནཱ་རུ་འགོས་ཤིང་། ལག་ཏུ་རྡོ་ལེབ་གཉིས་ཁྱེར་ཏོ། །
EXO 34:5 དེར་དཀོན་མཆོག་ཡ་ཝཱེ་སྤྲིན་གྱི་ནང་ནས་མར་ཕེབས་ཤིང་། མོ་ཤེ་དང་ལྷན་དུ་འགྲེང་ནས་རང་གི་མཚན་ཡ་ཝཱེ་སྒྲོག་པར་མཛད།
EXO 34:6 དཀོན་མཆོག་ཡ་ཝཱེ་དེའི་མདུན་ནས་ཕར་ཕེབས་པ་དང་འདི་སྐད་དུ། ཡ་ཝཱེ་སྟེ། དཀོན་མཆོག་ཡ་ཝཱེ་ནི་སྙིང་རྗེ་ཆེ་ཞིང་ཐུགས་རྗེ་ཅན་ཡིན་ལ། རང་དགར་ཐུགས་མི་ཁྲོ་ཞིང་བྱམས་བརྩེ་དང་བདེན་པ་ཉིད་རྫོགས་མཐའ་མེད་པ་ལགས་ཏེ།
EXO 34:7 མི་ཁྲི་ཁྲི་འབུམ་འབུམ་ལ་ཐུགས་བརྩེ་བར་བྱེད་ཅིང་ཉེས་པ་དང་ནོར་འཁྲུལ་དང་སྡིག་པ་རྣམས་བསལ་ཞིང་། ཉེས་ཅན་རྣམས་རྩ་བ་ནས་ཉེས་མེད་དུ་མི་བརྩི་ཞིང་། ཕ་རྣམས་ཀྱི་ནག་ཉེས་ཕྱིར་བུ་དང་བུའི་བུ་རྣམས་ལ་མི་རབས་གསུམ་བཞིའི་བར་དུ་ཉེས་ཆད་གཅོད་པ་ལགས་ཞེས་བསྒྲགས་སོ། །
EXO 34:8 དེ་ནས་མོ་ཤེ་ཡིས་མྱུར་དུ་ལུས་སར་བཏུད་ནས་ཕྱག་བཙལ་ཏེ་ན་རེ།
EXO 34:9 ཀྱེ་གཙོ་བོ་ལགས། ང་རང་ལ་ཁྱེད་ཀྱི་སྤྱན་སྔར་ཐུགས་རྗེ་ཐོབ་པ་ཡིན་ན། ཁྱེད་རང་ང་ཚོ་དང་ལྷན་དུ་འགྲོགས་ནས་ཕེབས་སུ་གསོལ། མི་དེ་རྣམས་གཉའ་རེངས་ཡིན་ཡང་། ངེད་ཅག་གི་ཉེས་པ་དང་སྡིག་པ་སེལ་བ་དང་། ངེད་རྣམས་ནི་ཁྱེད་ཀྱི་ནོར་སྐལ་དུ་དགོངས་པར་མཛོད་ཅེས་ཞུས་སོ། །
EXO 34:10 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། བདག་གིས་ཞལ་ཆད་ཅིག་འཇོག་སྟེ། ཁྱོད་ཀྱི་མི་ཐམས་ཅད་ཀྱི་མཐོང་ལམ་དུ་ངས་དོན་ངོ་མཚར་དག་བྱེད་པར་འགྱུར་བ་ནི་ས་གཞི་ཀུན་དང་མི་རིགས་གང་ལའང་བྱས་མ་མྱོང་ཞིང་། ཁྱོད་ཀྱི་མཐའ་འཁོར་དུ་ཡོད་པའི་མི་ཐམས་ཅད་ཀྱིས་དཀོན་མཆོག་ཡ་ཝཱེའི་མཛད་པ་མཐོང་བར་འགྱུར་ལ། བདག་གིས་ཁྱོད་ལ་སྟོན་པར་འགྱུར་བའི་དོན་དེ་དག་དངོས་གནས་འཇིགས་སུ་རུང་བ་ཡིན།
EXO 34:11 ངས་དེ་རིང་གི་ཉིན་མོར་ཁྱོད་ཅག་ལ་བསྒོས་དང་སྒོ་བཞིན་པ་འདི་བསྲུང་དགོས་ཏེ། ལྟོས་དང་། བདག་གིས་ཁྱོད་ཅག་གི་མདུན་ནས་ཨེ་མོར་པ་དང་། ཀ་ན་ཨན་པ་དང་། ཧེད་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་རྣམས་སྐྲོད་པར་འགྱུར།
EXO 34:12 ཁྱོད་ཅག་འགྲོ་བྱའི་ཡུལ་དེའི་མི་རྣམས་ནི་ཁྱོད་ཅག་གི་ཁྲོད་དུ་རྙི་རུ་འགྱུར་ཉེན་ཡོད་པས། དེ་དག་དང་ཁ་ཆད་འཇོག་པ་ལས་གཡོལ་བར་གྱིས་ཤིག
EXO 34:13 དེ་ལས་ལྡོག་སྟེ་ཁྱོད་ཅག་གིས་དེ་དག་གི་མཆོད་ཁྲི་རྣམས་བཤིག་པར་བྱའོ། །ཡང་དེ་ཚོའི་རྡོ་སྐུ་རྣམས་ཀྱང་རྩ་མེད་གཏོང་བར་གྱིས། ལྷ་མོ་ཨ་ཤེ་རཱའི་སྐུ་བརྙན་རྣམས་རྩ་བ་ནས་གཅོད་དགོས།
EXO 34:14 དཀོན་མཆོག་ཡ་ཝཱེ་ཁོང་གི་མཚན་ནི་ཕྲག་དོག་ཅན་ཡིན་ཏེ། ཐུགས་ཀྱང་ཕྲག་དོག་ཅན་ལགས་པས། ལྷ་རྣམས་ལ་ཕྱག་མ་འཚལ་ཞིག
EXO 34:15 དེ་ལྟར་མ་བྱས་ན། ཁྱོད་ཅག་གིས་གནས་དེའི་ཡུལ་མི་དང་ཁ་ཆད་འཇོག་ཉེན་ཡོད་དེ། མི་དེ་དག་གིས་རང་གི་ལྷ་རྣམས་ཀྱི་རྗེས་སུ་ལོག་གཡེམ་བྱེད་པ་དང་། རང་གི་ལྷ་རྣམས་ལ་དམར་མཆོད་འབུལ་བའི་སྐབས་སུ་ཁྱོད་ཅག་མགྲོན་དུ་འབོད་ཅིང་། ཁྱོད་ཅག་གིས་དེ་དག་གི་མཆོད་རྫས་བཟའ་བར་བྱེད་པ་དང་།
EXO 34:16 ཁྱོད་ཅག་གི་བུ་རྣམས་ལ་དེ་དག་གི་བུ་མོ་རྣམས་ལས་བག་མ་བླངས་ན། དེ་དག་གི་བུ་མོ་རྣམས་ཀྱིས་རང་གི་ལྷ་རྣམས་ཀྱི་རྗེས་སུ་ལོག་གཡེམ་བྱེད་ཅིང་ཁྱོད་ཅག་གི་བུ་རྣམས་ལའང་དེ་དག་གི་ལྷ་རྣམས་ཀྱི་རྗེས་སུ་ལོག་གཡེམ་བྱེད་དུ་འཇུག་སྲིད་པ་ཡིན་པས་གཟབ་གཟབ་གྱིས་ཤིག
EXO 34:17 ཁྱོད་ཅག་གིས་རང་གི་ཕྱིར་བླུགས་སྐུ་བཟོ་མི་རུང་ངོ་། །
EXO 34:18 ཡང་སྐྱུར་མེད་བག་ལེབ་ཀྱི་དུས་ཆེན་བསྲུང་དགོས་ཏེ། ཁྱོད་ཅག་ཨ་རྦིབ་ཟླ་བའི་ནང་དུ་ཨེ་ཅིབ་ཡུལ་ནས་ཕྱི་རུ་ཐོན་པའི་ཕྱིར་ཨ་རྦིབ་ཟླ་བའི་དུས་དེར་སླེབས་ཚེ། ངས་ཁྱོད་ཅག་ལ་བསྒོས་པའི་བཀའ་བཞིན་དུ་ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས།
EXO 34:19 ད་དུང་མངལ་ལས་བྱུང་བའི་སྐྱེས་འགོ་ཐམས་ཅད་བདག་གི་ཡིན། ཁྱོད་རྣམས་ཀྱི་ཕྱུགས་ཁྱུ་ཁྲོད་ཀྱི་བ་གླང་དང་ལུག་གང་ཡིན་ཡང་སྐྱེས་འགོ་ཕོ་ཡིན་པ་མཐའ་དག་བདག་གི་ཡིན།
EXO 34:20 བོང་བུའི་བོང་ཕྲུག་འགོ་མ་ནི་ལུ་གུ་ཞིག་གིས་བླུ་དགོས། ཅི་སྟེ་བླུ་བར་མ་བྱས་ན་དེའི་སྐེ་ཚིགས་རྫོག་པར་བྱའོ། །ཁྱོད་ཅག་གི་བུ་སྐྱེས་འགོ་ཐམས་ཅད་བླུ་དགོས་ལ། སུ་ཡིན་ཡང་ལག་པ་སྟོང་བར་ངའི་མདུན་དུ་ཡོང་མི་རུང་ངོ་། །
EXO 34:21 ཉིན་དྲུག་གི་རིང་དུ་ལས་ཀ་བྱོས་ལ་ཉིན་བདུན་པར་ངལ་གསོ་བར་གྱིས། སྟོན་ལས་དང་རྨོ་འདེབས་ཀྱི་སྐབས་སུའང་ངལ་གསོས་ཤིག
EXO 34:22 གྲོ་ཡི་ཐོག་ཕུད་བསྡུ་བའི་སྐབས་སུ་བདུན་ཕྲག་རྣམས་ཀྱི་དུས་ཆེན་བསྲུང་དགོས་ལ། ལོ་མཇུག་གི་བསྡུ་ཉར་དུས་ཆེན་ཡང་བསྲུང་དགོས།
EXO 34:23 ཁྱོད་ཅག་གི་སྐྱེས་པ་ཐམས་ཅད་ཀྱིས་གཙོ་བོ་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་ལོ་རེར་ཐེངས་གསུམ་ལ་མཇལ་དགོས།
EXO 34:24 བདག་གིས་ཁྱོད་ཅག་གི་མདུན་ནས་མི་རིགས་གཞན་རྣམས་བསྐྲད་ནས་ཁྱོད་ཅག་གི་མཐའ་མཚམས་རྒྱས་པར་བྱེད་པས། ཁྱོད་རྣམས་རང་གི་དཀོན་མཆོག་ཡ་ཝཱེའི་དྲུང་དུ་ལོ་རེ་བཞིན་ལན་གསུམ་དུ་འོང་བའི་སྐབས་སུ། མི་སུས་ཀྱང་ཁྱོད་ཅག་ལ་གཏོགས་པའི་ཡུལ་དེ་ཧམ་འཕྲོག་བྱེད་པར་མི་འགྱུར་རོ། །
EXO 34:25 བདག་ལ་དམར་མཆོད་ཀྱི་ཁྲག་དང་སྐྱུར་རྩི་ལྡན་པའི་བག་ལེབ་གཉིས་ལྷན་དུ་འབུལ་མི་རུང་ལ། པེ་སག་དུས་ཆེན་གྱི་མཆོད་པའང་ཕྱི་ཉིན་ཞོགས་པའི་བར་དུ་བསྐྱུར་མི་རུང་།
EXO 34:26 ཁྱོད་ཅག་གིས་ས་ཞིང་ལས་ཐོག་མར་སྨིན་པའི་ལོ་ཏོག་གི་ཕུད་ནི་ཁྱོད་ཅག་གི་དཀོན་མཆོག་ཡ་ཝཱེའི་བཞུགས་གནས་སུ་འབུལ་དགོས་ལ། རེའུ་ཞིག་དེའི་ཨ་མའི་འོ་མ་ནང་དུ་བཙོ་མི་རུང་ཞེས་གསུངས་སོ། །
EXO 34:27 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཚིག་དེ་རྣམས་ཡི་གེར་ཁོད་ཅིག རྒྱུ་མཚན་ནི། བདག་གིས་བཀའ་འདི་ལ་བརྟེན་ནས་ཁྱོད་དང་ཡེས་ར་ཨེལ་པ་རྣམས་ཀྱི་བར་ལ་ཞལ་ཆད་བཞག་པ་ཡིན་ཞེས་གསུངས་སོ། །
EXO 34:28 མོ་ཤེ་ནི་དཀོན་མཆོག་ཡ་ཝཱེའི་དྲུང་དུ་ཉིན་མཚན་བཞི་བཅུའི་རིང་དུ་གནས་ཤིང་ཟས་ཀྱང་མ་སྤྱད་ལ་སྐོམ་ཡང་མ་འཐུང་བ་དང་། དཀོན་མཆོག་ཡ་ཝཱེས་ཞལ་ཆད་ཀྱི་བཀའ་བཅུ་པོ་རྡོ་ལེབ་གཉིས་ལ་ཡི་གེར་བཀོད་དོ། །
EXO 34:29 ཡང་མོ་ཤེ་རི་བོ་སི་ནཱ་ལས་འབབ་པའི་ཚེ། ཁོའི་ལག་ཏུ་དཔང་པོའི་རྡོ་ལེབ་གཉིས་ཡོད་པ་དང་། དཀོན་མཆོག་ཡ་ཝཱེས་ཁོ་ལ་གསུང་གླེང་མཛད་པའི་རྐྱེན་གྱིས་ཁོའི་ངོ་གདོང་ལས་འོད་བཀྱེ་བ་མོ་ཤེ་རང་ཉིད་ཀྱིས་ཀྱང་ཤེས་མེད།
EXO 34:30 ཨ་རོན་དང་ཡེས་ར་ཨེལ་པ་ཐམས་ཅད་ཀྱིས་མོ་ཤེ་ལ་བལྟས་པ་ན། ཀྱེ་ཧོ། ཁོའི་ངོ་གདོང་ལས་འོད་བཀྱེ་བ་མཐོང་བས་དེ་དང་ཉེ་བར་བཅར་མ་ཕོད་དོ། །
EXO 34:31 དེ་ནས་མོ་ཤེ་ཡིས་དེ་དག་བོས་ཤིང་། ཨ་རོན་དང་ཚོགས་དཔོན་ཐམས་ཅད་ཁོའི་ཕྱོགས་སུ་འོངས་པ་དང་། མོ་ཤེ་ཡིས་དེ་དག་ལ་གཏམ་བྱས།
EXO 34:32 དེའི་རྗེས་སུ་ཡེས་ར་ཨེལ་པ་ཐམས་ཅད་ཚུཪ་འོངས་པ་ལ། ཁོས་དཀོན་མཆོག་ཡ་ཝཱེས་རི་བོ་སི་ནཱ་ལས་རང་ལ་ཅི་གསུངས་པ་ཐམས་ཅད་དེ་དག་ལ་ཇི་བཞིན་དུ་བསྒོས་པ་རེད།
EXO 34:33 ཡང་མོ་ཤེ་ཡིས་གཏམ་སྨྲས་ཚར་བ་དང་རང་གི་ངོ་གདོང་ལག་རས་ཤིག་གིས་བཀབ།
EXO 34:34 འོན་ཀྱང་ཁོ་རང་ནམ་ཞིག་དཀོན་མཆོག་ཡ་ཝཱེའི་སྤྱན་སྔར་ཞུ་གླེང་བྱེད་དུ་ནང་ལ་སོང་བའི་ཚེ། ཕྱིར་མ་ཐོན་བར་དུ་རང་གི་གདོང་གི་ལག་རས་བླངས་ཤིང་། རྗེས་སུ་ཡང་ཕྱི་རུ་ཐོན་ནས། དཀོན་མཆོག་ཡ་ཝཱེས་ཁོ་ལ་བཀའ་གནང་བ་བཞིན་དུ་ཡེས་ར་ཨེལ་པ་རྣམས་ལ་གཏམ་བྱས།
EXO 34:35 ཡང་ཡེས་ར་ཨེལ་པ་རྣམས་ཀྱིས་མོ་ཤེའི་ངོ་གདོང་ལས་འོད་བཀྱེ་བ་མཐོང་ཞིང་། ཁོས་ཡང་ལག་རས་ཀྱིས་རང་གི་ངོ་གདོང་བཀབ་པ་དང་། དཀོན་མཆོག་ཡ་ཝཱེ་ལ་ཞུ་གླེང་བྱེད་པའི་ཕྱིར་ནང་དུ་མ་སོང་བར་དུ་དེ་ལྟར་བྱས་སོ། །
EXO 35:1 ཡང་མོ་ཤེ་ཡིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་བསྡུས་ནས་དེ་དག་ལ། དཀོན་མཆོག་ཡ་ཝཱེས་གསུངས་པའི་བཀའ་སྟེ་ཁྱོད་ཅག་གིས་བསྒྲུབ་དགོས་པ་རྣམས་ནི་འདི་ལྟ་སྟེ།
EXO 35:2 ཉིན་དྲུག་གི་རིང་ལ་ལས་ཀ་བྱེད་ཅིང་ཉིན་བདུན་པ་ནི་ཁྱོད་ཚོར་མཚོན་ན་དམ་པ་ཡིན་དགོས་ཤིང་། དཀོན་མཆོག་ཡ་ཝཱེའི་ཕྱིར་ངལ་གསོ་ཡོངས་སུ་རྫོགས་པའི་ཉིན་མོ་ཡང་ཡིན། ཉིན་དེ་ལ་ལས་ཀ་བྱེད་པའི་མི་སུ་ཡིན་ཡང་གསོད་དགོས།
EXO 35:3 ངལ་གསོ་བའི་ཉིན་ལ་ཁྱོད་ཅག་གི་སྡོད་གནས་རྣམས་སུ་མེ་སྦར་མི་རུང་ཞེས་བཀའ་གནང་བ་ཡིན་ནོ། །
EXO 35:4 ཡང་མོ་ཤེ་ཡིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་འདི་ལྟར། དཀོན་མཆོག་ཡ་ཝཱེས་བཀའ་གནང་བ་འདི་ཡིན་ཏེ།
EXO 35:5 ཁྱོད་ཅག་གིས་རང་གི་ཁྲོད་ནས་དཀོན་མཆོག་ཡ་ཝཱེ་ལ་འབུལ་བ་རྣམས་ལོངས་ཤིག འབུལ་འདོད་པ་རྣམས་ཀྱིས་དཀོན་མཆོག་ཡ་ཝཱེ་ལ་འབུལ་བ་འདི་ཕུལ་ཞིག དེ་ནི་གསེར་དང་དངུལ་དང་ལི་བཅས་དང་།
EXO 35:6 བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུ་དང་། ར་མའི་ཁུལ་རྩིད་དང་།
EXO 35:7 ལུག་ཐུག་གི་པགས་པ་རྒྱ་ཚོས་བརྒྱབ་པ་དང་ཀོ་བ་སྤུས་ལེགས་དང་སེང་ལྡེང་ཤིང་དང་།
EXO 35:8 སྒྲོན་མེའི་ཕྱིར་འཚིར་སྣུམ་དང་། འབྱུག་སྣུམ་དང་དྲི་ཞིམ་བདུག་སྤོས་ཀྱི་ཕྱིར་བསུང་རྫས་རྣམས་དང་།
EXO 35:9 གཟི་དང་རིན་པོ་ཆེ་གཞན་དག་དགོས་པ་སྟེ། མཆོད་དཔོན་གྱི་བེར་ཐུལ་དང་བྲང་རྒྱན་ལ་ཕྲ་རྒྱག་དགོས་པའི་ཕྱིར་ཡིན་ནོ། །
EXO 35:10 ཁྱོད་ཅག་གི་ཁྲོད་དུ་སེམས་སུ་ཤེས་རབ་ལྡན་པ་ཐམས་ཅད་འོངས་ནས་དཀོན་མཆོག་ཡ་ཝཱེས་བཀའ་ཅི་བསྩལ་པ་ཐམས་ཅད་བསྒྲུབ་དགོས་ཏེ།
EXO 35:11 གུར་མཆོག་དང་དེའི་གུར་ཀླད་དང་ཐོག་ཁེབས་དང་ཀྱུ་དང་པང་ལེབ་དང་འཕྲེད་རྒྱུག་དང་ཀ་བ་དང་ཞབས་ར་བཅས་དང་།
EXO 35:12 ཤུར་སྒམ་དང་དེའི་རྒྱུག་པ་དང་ཐུགས་རྗེའི་བཞུགས་ཁྲི་དང་དེའི་གཡོག་བྱེད་ཀྱི་ཡོལ་བ་བཅས་དང་།
EXO 35:13 སྒྲོག་ཙེ་དང་དེའི་རྒྱུག་པ་དང་དེ་ལ་གཏོགས་པའི་ཡོ་བྱད་རྣམས་དང་། སྤྱན་བསྟར་བག་ལེབ་དང་།
EXO 35:14 འོད་ཀྱི་ཕྱིར་ཡིན་པའི་སྒྲོན་སྟེགས་དང་དེའི་ཡོ་བྱད་རྣམས་དང་སྒྲོན་མེ་རྣམས་དང་ཡང་སྒྲོན་མེའི་ཕྱིར་འཚིར་སྣུམ་དང་།
EXO 35:15 སྤོས་ཁྲི་དང༌། དེའི་རྒྱུག་པ་གཉིས་བཅས་པ་དང་། འབྱུག་སྣུམ་དང་དྲི་ཞིམ་བདུག་སྤོས་དང་། གུར་མཆོག་གི་སྒོའི་ཕྱིར་དུ་སྒོ་ཡོལ་དང༌།
EXO 35:16 སྦྱིན་སྲེག་གི་མཆོད་ཁྲི་དང་དེ་ལ་གཏོགས་པའི་ལི་ཡི་ཐག་མིག་དང་དེའི་རྒྱུག་པ་གཉིས་དང་དེའི་ཡོ་བྱད་ཐམས་ཅད་དང་དེའི་ཁྲུས་གཞོང་དང་དེའི་སྟེགས་བུ་དང་།
EXO 35:17 ཁྱམས་རའི་ཡོལ་བ་དང་དེའི་ཀ་བ་དང་དེའི་ཞབས་ར་རྣམས་དང༌། ཁྱམས་རའི་སྒོ་ཡོལ་དང་།
EXO 35:18 གུར་མཆོག་གི་ཕུར་བ་དང་ཁྱམས་ཀྱི་ཕུར་བ་དང་དེའི་ཆོན་ཐག་རྣམས་དང་།
EXO 35:19 གནས་དམ་པར་ཞབས་ཕྱི་བྱེད་པའི་ཆེད་དུ་ཐགས་ཞིབ་མོར་བཏགས་པའི་གོས་རྣམས་དང་། མཆོད་དཔོན་ཨ་རོན་གྱི་ན་བཟའ་དམ་པ་རྣམས་དང་། ཁོའི་བུ་རྣམས་ཀྱིས་མཆོད་དཔོན་གྱི་ཞབས་ཕྱི་བྱེད་པའི་ཕྱིར་ན་བཟའ་རྣམས་བཟོ་དགོས་ཞེས་བཀའ་གནང་ངོ་། །
EXO 35:20 དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་མོ་ཤེའི་དྲུང་ནས་སོང་ངོ་། །
EXO 35:21 སེམས་འགུལ་ཐེབས་ནས་འབུལ་འདོད་ཡོད་པ་ཐམས་ཅད་ཚུར་འོངས་ཏེ། མཇལ་འཕྲད་གུར་མཆོག་གི་ལས་དང་དེ་རུ་ཡོད་པའི་ཞབས་འདེགས་དང་ན་བཟའ་དམ་པ་རྣམས་ཀྱི་ཕྱིར་དཀོན་མཆོག་ཡ་ཝཱེ་ལ་འབུལ་བ་རྣམས་ཁྱེར་འོངས་པ་རེད།
EXO 35:22 ཡང་སེམས་ནས་འབུལ་འདོད་ཡོད་པའི་སྐྱེས་པ་དང་བུད་མེད་རྣམས་ཀྱིས་བྲང་རྒྱན་དང་རྣ་ལོང་རྣམས་དང་། སོར་གདུབ་ཐམ་ག་ཅན་དང་ལག་གདུབ་བཅས་གསེར་གྱི་རྫས་སྣ་ཚོགས་ཁྱེར་འོངས་ཤིང་། མི་ཀུན་གྱིས་དཀོན་མཆོག་ཡ་ཝཱེ་ལ་གསེར་གཡོབ་མཆོད་དུ་ཕུལ་བ་རེད།
EXO 35:23 བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུ་དང་། ར་མའི་ཁུལ་རྩིད་དང་། ལུག་ཐུག་གི་པགས་པ་རྒྱ་ཚོས་བརྒྱབ་པ་དང་ཀོ་བ་སྤུས་ལེགས་བཅས་སུ་ལ་ཡོད་པ་དེས་ཁྱེར་འོངས།
EXO 35:24 སུས་ཀྱང་དངུལ་དང་ལི་ཡི་འབུལ་བ་འབུལ་མཁན་ཐམས་ཅད་ཀྱིས་དཀོན་མཆོག་ཡ་ཝཱེ་ལ་འབུལ་བ་བཞིན་ཁྱེར་འོངས་པ་དང་། ཞབས་འདེགས་ཀྱི་ལས་སྣ་ཚོགས་ཀྱི་ཕྱིར་སེང་ལྡེང་ཤིང་ཡོད་པ་ཐམས་ཅད་ཀྱིས་ཀྱང་དེ་ཁྱེར་འོངས།
EXO 35:25 ཡང་བུད་མེད་ཤེས་རབ་ལྡན་པ་རྣམས་ཀྱིས་རང་གི་ལག་པས་བཀལ་བའི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་སོ་རས་སྲབ་བུ་བཅས་ཁྱེར་འོངས།
EXO 35:26 སེམས་འགུལ་ཐེབས་ཤིང་སེམས་སུ་ཤེས་རབ་ལྡན་པའི་བུད་མེད་རྣམས་ཀྱིས་སོ་སོའི་ལག་རྩལ་ལ་བརྟེན་ནས་ར་རྩིད་འཁེལ།
EXO 35:27 ཡང་དཔོན་རིགས་རྣམས་ཀྱིས་མཆོད་དཔོན་གྱི་བེར་ཐུལ་དང་བྲང་རྒྱན་གྱི་ཕྱིར་གཟི་དང་རིན་པོ་ཆེ་དག་ཕྲ་རྒྱག་པར་ཁྱེར་འོངས་པ་དང་།
EXO 35:28 བསུང་རྫས་དང་འཚིར་སྣུམ་ནི་སྒྲོན་མེ་དང་འབྱུག་སྣུམ་དང་དྲི་ཞིམ་བདུག་སྤོས་ཀྱི་ཕྱིར་ཁྱེར་འོངས།
EXO 35:29 དཀོན་མཆོག་ཡ་ཝཱེས་མོ་ཤེ་ལ་བསྒྲུབ་དགོས་པར་བཀའ་གནང་བའི་ལས་ཐམས་ཅད་ཀྱི་ཕྱིར། སེམས་སུ་འབུལ་འདོད་ཡོད་པའི་ཡེས་ར་ཨེལ་པ་རྣམས་ལས་སྐྱེས་པ་དང་བུད་མེད་རེ་རེས་དཀོན་མཆོག་ཡ་ཝཱེ་ལ་ཡིད་མོས་འབུལ་བ་རྣམས་ཁྱེར་འོངས་སོ། །
EXO 35:30 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་ལ་འདི་ལྟར། ལྟོས་དང་། དཀོན་མཆོག་ཡ་ཝཱེས་ཡ་ཧུ་དཱ་ཚོ་པ་ནས་ཧུ་རཱའི་བུ་ཨོའུ་རེལ་དེའི་བུ་པི་ཟིད་ཨེལ་གྱི་མིང་ནས་བོས་ཤིང་།
EXO 35:31 ཡང་ཁོ་ལ་དཀོན་མཆོག་གི་ཐུགས་ཉིད་ཀྱིས་ཁྱབ་པར་མཛད་དེ། ཁོ་ལ་ཤེས་རབ་དང་སྤྱང་གྲུང་ལྡན་ཞིང་། བློ་རིག་མངའ་བ་དང་། ལག་རྩལ་སྣ་ཚོགས་བྱང་ཆུབ་པར་བྱས།
EXO 35:32 དེ་ནི་ལག་རྩལ་གྱི་ལས་རྣམས་ཇུས་འགོད་བྱེད་པར་དམིགས་ཏེ། གསེར་དངུལ་ལི་གསུམ་གྱི་མགར་བྱེད་པ་དང་།
EXO 35:33 རིན་པོ་ཆེ་དག་བརྐོ་གཏུབ་བྱེད་པ་དང་ཕྲ་རྒྱག་པ། ཤིང་བརྐོ་བ། ལག་རྩལ་གྱི་ལས་སྣ་ཚོགས་བྱེད་པའི་ཕྱིར་ཡིན།
EXO 35:34 ཡང་པི་ཟིད་ཨེལ་དང་དཱན་གྱི་ཚོ་པ་ནས་ཨ་ཧི་སཱ་མག་གི་བུ་ཨོ་ཧོ་ལི་ཨབ་གཉིས་ཀ་ལ་མི་གཞན་པར་སློབ་སྟོན་བྱེད་པའི་སེམས་གནང་བ་དང་།
EXO 35:35 ཁོ་གཉིས་ཀྱིས་བརྐོ་བཟོ་དང་ཇུས་འགོད་བྱེད་པ་དང་། ཡང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུའི་འཚེམ་དྲུབས་བྱེད་པ་དང་། ཐགས་འཐག་པ་དང་། ལས་ཀུན་བྱེད་ཅིང་ཇུས་འགོད་བྱེད་པའི་ཕྱིར་དཀོན་མཆོག་ཡ་ཝཱེས་དེ་གཉིས་ཀྱི་སེམས་ལ་རྩལ་གྱིས་ཁྱབ་པར་མཛད་ཅེས་སྨྲས་སོ། །
EXO 36:1 ཡང་མོ་ཤེ་ཡིས་འདི་ལྟར། གནས་མཆོག་བཟོ་བའི་ལས་ཐམས་ཅད་ཇི་ལྟར་བསྒྲུབ་ཤེས་པའི་ཕྱིར། པི་ཟིད་ཨེལ་དང་ཨོ་ཧོ་ལི་ཨབ་དང་མི་ལག་རྩལ་ཅན་ཀུན་ལའང་དཀོན་མཆོག་ཡ་ཝཱེས་ཤེས་རབ་དང་བློ་རིག་གནང་བ་དེ་དག་གིས། དཀོན་མཆོག་ཡ་ཝཱེས་བཀའ་བསྩལ་པ་མཐའ་དག་བཞིན་དུ་བྱེད་དགོས་ཞེས་སྨྲས་སོ། །
EXO 36:2 དེ་ནས་མོ་ཤེ་ཡིས་པི་ཟིད་ཨེལ་དང་ཨོ་ཧོ་ལི་ཨབ་དང་། སེམས་སུ་ཤེས་རབ་ལྡན་པ་སྟེ་དཀོན་མཆོག་ཡ་ཝཱེས་ཤེས་རབ་སེམས་སུ་གནང་བའི་མི་དང་། སེམས་འགུལ་ཐེབས་ནས་ལས་བསྒྲུབ་པར་འོང་འདོད་པ་ཐམས་ཅད་ཚུར་བོས་ནས།
EXO 36:3 གནས་མཆོག་བཟོ་བར་བྱེད་པའི་ལས་རྣམས་ཀྱི་དོན་དུ་ཡེས་ར་ཨེལ་པ་རྣམས་ཀྱིས་ཕུལ་བའི་འབུལ་བ་ཐམས་ཅད་ཁོ་ཚོས་མོ་ཤེ་ནས་བླངས་ཤིང་། ཡེས་ར་ཨེལ་པ་རྣམས་ཀྱིས་ཞོགས་པ་རེར་ད་དུང་ཡིད་མོས་ཀྱི་འབུལ་བ་ཁྱེར་འོངས་པས།
EXO 36:4 གནས་མཆོག་གི་ལས་ཐམས་ཅད་བྱེད་པའི་མི་ལག་རྩལ་ཅན་རེ་རེས་རང་རང་གི་ལས་ཀ་བྱེད་མཚམས་བཞག་སྟེ་འོངས་ནས།
EXO 36:5 མོ་ཤེ་ལ་ན་རེ། དཀོན་མཆོག་ཡ་ཝཱེས་བསྒྲུབ་དགོས་གསུངས་པའི་ལས་ཀྱི་ཕྱིར་མི་རྣམས་ཀྱིས་ཁྱེར་འོངས་པའི་དངོས་པོ་ལྷག་མ་མང་པོ་ཡོད་ཅེས་སྨྲས།
EXO 36:6 དེའི་ཕྱིར་མོ་ཤེ་ཡིས་བཀའ་བསྒོས་ནས་སྒར་ཡོངས་སུ་འདི་ལྟར། ད་ལྟ་སྐྱེས་པ་དང་བུད་མེད་སུ་ཡིན་ཡང་གནས་མཆོག་གི་ཕྱིར་འབུལ་བ་གང་ཡང་འབུལ་བར་མི་བྱའོ་ཞེས་བསྒྲགས་པས། དེ་ལྟར་འབངས་མི་ལ་འབུལ་དུ་མ་བཅུག
EXO 36:7 ལས་ཐམས་ཅད་བསྒྲུབ་དགོས་པའི་རྫས་རྣམས་ཀྱིས་ལོངས་པ་དང་ད་དུང་ལྷག་མ་ཡང་ཡོད་པ་ཡིན་ནོ། །
EXO 36:8 དེ་ནས་ལས་མཁན་གྱི་ཁྲོད་དུ་མི་ལག་རྩལ་ཅན་ཐམས་ཅད་ཀྱིས་ཡོལ་བ་བཅུ་ཡིས་གུར་མཆོག་བཟོས་ཤིང་། དེའི་རྒྱུ་ནི་སོ་རས་སྲབ་བུ་བསྒྲིམས་པ་ཅན་དང་། བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་བཅས་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་དེ་དག་བཟོས་སོ། །
EXO 36:9 ཡོལ་བ་རེ་རེའི་རིང་ཚད་ནི་ཁྲུ་ཉི་ཤུ་ཉེར་བརྒྱད་དང་། ཞེང་ནི་ཁྲུ་བཞི་ཡོད་པར་བྱས། ཡོལ་བ་ཐམས་ཅད་ཀྱི་ཚད་ནི་གཅིག་མཚུངས་ཡིན།
EXO 36:10 ཁོས་ཡོལ་བ་ལྔ་ནི་ཕན་ཚུན་སྦྲེལ་བ་དང་། ཡོལ་བ་གཞན་ལྔ་པོ་དེ་ཡང་ཕན་ཚུན་སྦྲེལ་ཏོ། །
EXO 36:11 ཡང་མུ་གཅིག་ཏུ་འབྲེལ་བའི་ཡོལ་བ་སྔ་མ་དེའི་སྣེ་མོར་ཁོས་མཐིང་མདོག་གི་སྒྲོག་ལུང་རྣམས་བཟོས་ཤིང་། མུ་གཅིག་ཏུ་འབྲེལ་བའི་ཡོལ་བ་ཕྱི་མ་དེའི་སྣེ་མོ་ལའང་ཁོས་དེ་བཞིན་བྱས།
EXO 36:12 ཁོས་མུ་གཅིག་ཏུ་འབྲེལ་བའི་ཡོལ་བ་སྔ་མར་སྒྲོག་ལུང་ལྔ་བཅུ་བཟོས་པ་དང་། མུ་གཅིག་ཏུ་འབྲེལ་བའི་ཡོལ་བ་ཕྱི་མར་ཡང་སྒྲོག་ལུང་ལྔ་བཅུ་བཟོས་ཏེ། སྒྲོག་ལུང་རྣམས་ཆ་རེ་ཁ་སྤྲད་ནས་བཞག
EXO 36:13 ཡང་གུར་མཆོག་མུ་གཅིག་ཏུ་བསྒྲིལ་བའི་ཕྱིར་གསེར་ཀྱུ་ལྔ་བཅུ་བཟོས་ཤིང་། ཡོལ་བ་རྣམས་གསེར་ཀྱུས་སྦྲེལ་ཏོ། །
EXO 36:14 ཡང་གུར་མཆོག་གི་ཁེབས་རས་ཀྱི་ཕྱིར་ཁོས་ར་རྩིད་ཀྱི་ཡོལ་བ་བཅུ་གཅིག་བཟོས་ཤིང་།
EXO 36:15 ཡོལ་བ་རེ་རེའི་རིང་ཚད་ནི་ཁྲུ་སུམ་ཅུ་དང་། ཞེང་ཚད་ནི་ཁྲུ་བཞི་ཡོད་པ་དང་། ཡོལ་བ་བཅུ་གཅིག་པོའི་ཚད་གཅིག་མཚུངས་ཡིན།
EXO 36:16 ཁོས་ཡོལ་བ་ལྔ་ནི་གཅིག་ཏུ་སྦྲེལ་ཞིང་ཡོལ་བ་གཞན་དྲུག་ཀྱང་གཅིག་ཏུ་སྦྲེལ་བ་དང་།
EXO 36:17 ཡོལ་བ་སྦྲེལ་མ་ལྔ་ཅན་དེའི་སྣེ་མོར་སྒྲོག་ལུང་ལྔ་བཅུ་དང་། ཡོལ་བ་སྦྲེལ་མ་དྲུག་ཅན་དེའི་སྣེ་མོར་ཡང་སྒྲོག་ལུང་ལྔ་བཅུ་བཟོས།
EXO 36:18 ཡང་ཁེབས་རས་མུ་གཅིག་འཁྱུད་གཅིག་འོང་བའི་ཕྱིར་ཁོས་ལི་ཡི་ཀྱུ་ལྔ་བཅུ་བཟོས་པ་དང་།
EXO 36:19 རྒྱ་ཚོས་བརྒྱབ་པའི་ལུག་ཐུག་གི་པགས་པས་ཁེབས་རས་གཡོགས་པ་དང་། ཡང་དེའི་སྟེང་དུ་ཀོ་བ་སྤུས་ལེགས་རྣམས་ཀྱིས་ཁེབས་ཤིག་བཟོས་སོ། །
EXO 36:20 དེ་ནས་ཁོས་གུར་མཆོག་གི་ཕྱིར་སེང་ལྡེང་ཤིང་གིས་གྱེན་དུ་འགྲེང་བའི་པང་ལེབ་རྣམས་བཟོས་པ་དང་།
EXO 36:21 པང་ལེབ་རེའི་རིང་ཚད་ནི་ཁྲུ་བཅུ་དང་། ཞེང་ཚད་ནི་ཁྲུ་གཅིག་དང་ཕྱེད་ཀ་ཡིན།
EXO 36:22 པང་ལེབ་གཅིག་དང་གཅིག་འབྲེལ་བའི་ཕྱིར་ཁོས་རེ་རེ་ལ་ཁོང་གཟེར་གཉིས་བཟོས་པ་དང་། གུར་མཆོག་གི་པང་ལེབ་ཐམས་ཅད་དེ་ལྟར་བཟོས།
EXO 36:23 ཁོས་གུར་མཆོག་གི་པང་ལེབ་བཟོས་པ་སྟེ། ལྷོ་ཕྱོགས་སུ་པང་ལེབ་ཉི་ཤུ་བཟོས་པ་དང་།
EXO 36:24 པང་ལེབ་ཉི་ཤུ་དེའི་ཞབས་ལ་དངུལ་གྱི་ཞབས་ར་བཞི་བཅུ་བཟོས་པ་དང་། པང་ལེབ་རེ་ལ་ཁོང་གཟེར་གཉིས་ཀྱི་ཞབས་ར་ཟུང་རེ་བཟོས་སོ། །
EXO 36:25 གུར་མཆོག་གི་ལོགས་གཞན་ཏེ། བྱང་ཕྱོགས་སུ་ཡང་ཁོས་པང་ལེབ་ཉི་ཤུ་བཟོས་པ་དང་།
EXO 36:26 དེའི་དངུལ་གྱི་ཞབས་ར་བཞི་བཅུ་དང་། པང་ལེབ་རེའི་འོག་ལ་ཞབས་ར་ཟུང་རེ་བཟོས།
EXO 36:27 གུར་མཆོག་གི་རྒྱབ་ལོགས་ཏེ་ནུབ་ཕྱོགས་སུ་ཁོས་པང་ལེབ་དྲུག་བཟོས་པ་དང་།
EXO 36:28 གུར་མཆོག་རྒྱབ་ལོགས་ཀྱི་ཟུར་གཉིས་ལ་པང་ལེབ་གཉིས་བཟོས།
EXO 36:29 དེ་གཉིས་ཀྱི་འགབ་ལ་པང་ལེབ་ཉིས་གཤིབ་ཡོད་ཅིང་། དེའི་གོང་ལའང་པང་ལེབ་གཅིག་གི་སྣེ་ནས་པང་ལེབ་གཞན་ཞིག་གི་བར་དུ་ཨ་ལོང་གཅིག་གིས་སྦྲེལ་བ་དང་། དེ་བཞིན་དུ་ཁོས་པང་ལེབ་གཉིས་དེ་ལྟར་ཟུར་གཉིས་ལ་བཟོས།
EXO 36:30 དེ་ལྟར་པང་ལེབ་བརྒྱད་དང་དེ་དག་ལ་དངུལ་གྱི་ཞབས་ར་བཅུ་དྲུག་དང་། པང་ལེབ་རེ་རེ་ལ་ཞབས་ར་གཉིས་བཅས་ཡོད་དོ། །
EXO 36:31 དེ་ནས་ཁོས་སེང་ལྡེང་ཤིང་གིས་འཕྲེད་རྒྱུག་རྣམས་བཟོས་ཏེ། གུར་མཆོག་གི་ལོགས་གཅིག་གི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་།
EXO 36:32 གུར་མཆོག་གི་ལོགས་གཞན་ལ་ཡོད་པའི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་། རྒྱབ་ལོགས་ཏེ་ནུབ་ཕྱོགས་ཀྱི་པང་ལེབ་རྣམས་ཀྱི་ཕྱིར་ཡང་འཕྲེད་རྒྱུག་ལྔ་བཅས་བཟོས།
EXO 36:33 ཡང་ཁོས་པང་ལེབ་རྣམས་ཀྱི་དཀྱིལ་དུ་ཡོད་པའི་འཕྲེད་རྒྱུག་དག་སྣེ་གཅིག་ནས་སྣེ་གཞན་དུ་སླེབས་པར་བྱས་ཤིང་།
EXO 36:34 པང་ལེབ་དེ་དག་ཁོས་གསེར་གྱིས་གཡོགས་པ་དང་། དེ་དག་གི་འཕྲེད་རྒྱུག་འཛིན་པའི་ཨ་ལོང་རྣམས་གསེར་དུ་བྱས་ཤིང་། ཡང་འཕྲེད་རྒྱུག་དག་གསེར་གྱིས་གཡོགས་སོ། །
EXO 36:35 ཡང་ཁོས་ཡོལ་བ་ཞིག་བཟོས་ཤིང་། དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་ཞིང་། ཡང་དེ་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་རྣམས་བཟོས་ཤིང་།
EXO 36:36 ཁོས་ཡོལ་བའི་ཕྱིར་སེང་ལྡེང་ཤིང་གི་ཀ་བ་བཞི་བཟོས་ཤིང་གསེར་གྱིས་གཡོགས་པ་དང་། དེ་དག་གི་ཀྱུ་རྣམས་གསེར་ཡིན་པ་དང་། དེ་དག་གི་ཕྱིར་དངུལ་གྱི་ཞབས་ར་བཞི་བླུགས་སོ། །
EXO 36:37 ཁོས་གུར་མཆོག་གི་སྒོ་ལ་སྒོ་ཡོལ་ཞིག་བཟོས་ཏེ། དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་ཡིན་ཏེ། འཐག་མཁན་གྱི་ལས་བཞིན་དུ་བཟོས།
EXO 36:38 ཡང་ཁོས་ཀ་བ་ལྔ་དང་སོ་སོའི་ཀྱུ་དང་བཅས་བཟོས་ཤིང་། ཀ་མགོ་རྣམས་དང་། ཁ་ཐུར་དག་གསེར་གྱིས་གཡོགས་པ་དང་། དེའི་ཞབས་ར་ལྔ་ནི་ལི་ཡིས་བཟོས་པ་ཡིན་ནོ། །
EXO 37:1 ཡང་པི་ཟིད་ཨེལ་གྱིས་སེང་ལྡེང་ཤིང་གིས་ཤུར་སྒམ་བཟོས་པ་དང་། དེའི་རིང་ཚད་ལ་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད། མཐོ་ཚད་ལ་ཁྲུ་གཅིག་དང་ཕྱེད་ཀའོ། །
EXO 37:2 ཁོས་དེའི་ཕྱི་ནང་གཉིས་གསེར་བཙོ་མས་གཡོགས་པ་དང་། དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས།
EXO 37:3 ཡང་ཁོས་གསེར་གྱི་ཨ་ལོང་བཞི་བླུགས་ནས་དེའི་སུག་པ་བཞི་ལ་སྦྱར་བ་དང་། ཨ་ལོང་གཉིས་ལོགས་གཅིག་དང་ཨ་ལོང་གཞན་གཉིས་པོ་ལོགས་ཅིག་ཤོས་ལ་སྦྱར།
EXO 37:4 ཡང་ཁོས་སེང་ལྡེང་ཤིང་གིས་རྒྱུག་པ་གཉིས་བཟོས་ནས་དེ་གསེར་གྱིས་གཡོགས་པ་དང་།
EXO 37:5 ཤུར་སྒམ་དེ་འཁུར་བའི་ཕྱིར་རྒྱུག་པ་གཉིས་ཤུར་སྒམ་གྱི་ལོགས་གཉིས་ཀའི་ཨ་ལོང་རྣམས་ལ་བརྒྱུས་སོ། །
EXO 37:6 ཡང་ཁོས་གསེར་བཙོ་མས་ཐུགས་རྗེའི་བཞུགས་ཁྲི་བཟོས་ཤིང་དེའི་རིང་ཚད་ནི་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད་ཀའོ། །
EXO 37:7 ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་གསེར་གྱིས་འབུར་རྡུང་བྱས་པའི་ཀེ་རུབ་ཀྱི་གཟུགས་བརྙན་གཉིས་བཟོས་ཤིང་།
EXO 37:8 ཀེ་རུབ་གཅིག་སྣེ་མོ་གཅིག་ལ་བཞག་པ་དང་། ཀེ་རུབ་ཅིག་ཤོས་སྣེ་མོ་གཞན་དེ་ལ་བཞག་སྟེ། ཀེ་རུབ་གཉིས་ནི་ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་དངོས་པོ་གཅིག་ཏུ་སྦྲེལ་བཟོ་བྱས།
EXO 37:9 དེ་གཉིས་ཀྱིས་གཤོག་པ་གྱེན་དུ་བརྐྱངས་ནས་ཐུགས་རྗེའི་བཞུགས་ཁྲི་གཡོགས་ཡོད་པ་དང་། ཕན་ཚུན་ལ་གདོང་གཏད་པ་དང་ཡང་དེ་གཉིས་ཀྱི་ཞལ་ངོ་ནི་བཞུགས་ཁྲི་ལ་འཁོར་ནས་ཡོད་དོ། །
EXO 37:10 ཡང་ཁོས་སེང་ལྡེང་ཤིང་གིས་སྒྲོག་ཙེ་ཞིག་བཟོས་ཤིང་། དེའི་རིང་ཚད་ལ་ཁྲུ་གཉིས། ཞེང་ཚད་ལ་ཁྲུ་གཅིག མཐོ་ཚད་ལ་ཁྲུ་གཅིག་དང་ཕྱེད་ཀ་བཅས་ཡོད།
EXO 37:11 ཁོས་དེ་གསེར་བཙོ་མས་གཡོགས་པ་དང་དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས།
EXO 37:12 ཁོས་མུ་ཁྱུད་དེའི་འགབ་ཏུ་ཡང་མཐོ་ཚད་ལ་སོར་བཞི་ཅན་གྱི་མཐའ་རྒྱན་ཞིག་བཟོས་པ་དང་། དེའི་སྟེང་དུ་ཡང་གསེར་གྱི་མུ་ཁྱུད་ཅིག་སྦྱར།
EXO 37:13 ཡང་དེ་ལ་གསེར་གྱི་ཨ་ལོང་བཞི་བཟོས་ཏེ། དེའི་གྲུ་བཞིའི་སུག་པ་བཞི་ལ་སྦྱར།
EXO 37:14 ཨ་ལོང་དེ་དག་མཐའ་རྒྱན་གྱི་འཁྲིས་སུ་སྦྱར་ཏེ་སྒྲོག་ཙེ་འཁུར་བའི་ཕྱིར་དེ་དག་ནི་རྒྱུག་པ་རྣམས་ཀྱི་བསྐོན་ས་བྱས།
EXO 37:15 སྒྲོག་ཙེ་འཁུར་བའི་ཕྱིར་ཁོས་རྒྱུག་པ་དེ་རྣམས་སེང་ལྡེང་ཤིང་གིས་བཟོས་ཏེ་གསེར་གྱིས་གཡོགས་ཤིང་།
EXO 37:16 སྒྲོག་ཙེ་སྟེང་གི་ཡོ་བྱད་ཐམས་ཅད་དེ། གཞོང་པ་དང་སྡེར་མ་དང་། སྐྱེམས་མཆོད་འབུལ་བྱེད་ཨུ་ལུ་དང་བུམ་པ་བཅས་གསེར་བཙོ་མས་བཟོས་སོ། །
EXO 37:17 ཡང་ཁོས་སྒྲོན་སྟེགས་དེ་གསེར་བཙོ་མས་བཟོས་ཤིང་། སྒྲོན་སྟེགས་དང་དེའི་ཞབས་ར་དང་སྟེགས་རྐང་བཅས་འབུར་རྡུང་གིས་བཟོས་པ་དང་། དེའི་སྒྲོན་ཕོར་དང་། གང་བུའི་གཟུགས་དང་མེ་ཏོག་གི་དབྱིབས་ཚུགས་བཅས་སྒྲོན་སྟེགས་དང་དངོས་པོ་གཅིག་ཏུ་སྦྲེལ་བཟོ་བྱས།
EXO 37:18 སྒྲོན་སྟེགས་ཀྱི་ལོགས་གཉིས་ནས་གེལ་པ་དྲུག་ཐོན་པར་བྱས་ཤིང་། སྒྲོན་སྟེགས་ཀྱི་ལོགས་གཅིག་ནས་གེལ་པ་གསུམ་དང་ལོགས་ཅིག་ཤོས་སུ་གེལ་པ་གསུམ་ཐོན་པར་བྱས།
EXO 37:19 ལོགས་གཉིས་ཀའི་གེལ་པ་རེ་ལ་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་གསུམ་རེ་ཡོད་པ་དང་། སྒྲོན་ཕོར་རེ་རེའི་སྟེགས་རྐང་དུ་གང་བུའི་གཟུགས་ཤིག་དང་། མེ་ཏོག་གཟུགས་ཤིག་བཅས་ཡོད་པར་བྱས། སྒྲོན་སྟེགས་ཀྱི་སྤྱི་སྡོམ་གེལ་པ་དྲུག་པོ་ཕན་ཚུན་ཆ་མཚུངས་པར་བྱས།
EXO 37:20 ཡང་སྒྲོན་སྟེགས་རྐང་པའི་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་བཞི་ལ་གང་བུའི་གཟུགས་ཤིག་དང་མེ་ཏོག་གཟུགས་ཤིག་བཅས་ཡོད་པར་བྱས།
EXO 37:21 དེའི་གེལ་པ་ཟུང་གཅིག་གི་འོག་ཏུ་གང་བུའི་གཟུགས་ཤིག དེའི་གེལ་པ་གཞན་ཟུང་གི་འོག་ཏུའང་གང་བུའི་གཟུགས་ཤིག་སྟེ། དེ་ལྟར་སྒྲོན་སྟེགས་ལས་བྱུང་བའི་གེལ་པ་དྲུག་པོ་ལ་ཡོད་པར་བྱས།
EXO 37:22 གང་བུའི་གཟུགས་རྣམས་དང་གེལ་པ་རྣམས་ནི་མུ་འབྲེལ་དུ་འབུར་རྡུང་བྱས་པའི་གསེར་བཙོ་མས་བཟོས་སོ། །
EXO 37:23 ཡང་ཁོས་དེ་ལ་སྒྲོན་མེ་བདུན་དང་དེའི་སྡོང་རས་གཅོད་བྱེད་སྐམ་ཆུང་དང་ཀ་ཏོ་ར་རྣམས་གསེར་བཙོ་མས་བཟོས།
EXO 37:24 སྒྲོན་སྟེགས་དང་དེའི་ཡོ་བྱད་ཐམས་ཅད་གསེར་བཙོ་མ་རྡོ་ཚད་གཅིག་གིས་བཟོས་སོ། །
EXO 37:25 ཡང་ཁོས་སེང་ལྡེང་ཤིང་གིས་སྤོས་ཁྲི་བཟོས་ཏེ། དེའི་རིང་ཚད་ལ་ཁྲུ་གཅིག་དང་། ཞེང་ཚད་ལ་ཁྲུ་གཅིག་སྟེ་གྲུ་བཞི་མ་ཞིག་ཡིན་ལ། ཡང་དེའི་མཐོ་ཚད་ལ་ཁྲུ་གཉིས་ཡིན་པར་བྱས་ཤིང་། རུ་ཐུར་རྣམས་སྤོས་ཁྲི་དང་དངོས་པོ་གཅིག་ཏུ་སྦྲེལ་བཟོ་བྱས།
EXO 37:26 ཁོས་དེའི་ཐོག་དང་ལོགས་བཞི་དང་རུ་ཐུར་རྣམས་གསེར་བཙོ་མས་གཡོགས་ཏེ། དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས།
EXO 37:27 ཡང་མུ་ཁྱུད་འོག་ནས་ཁ་གཏད་ཀྱི་ལོགས་གཉིས་ཀར་གསེར་གྱི་ཨ་ལོང་གཉིས་བཟོས་པ་དང་། དེ་ནི་རྒྱུག་པ་གཉིས་བསྐོན་ས་བྱས་ཤིང་། སྤོས་ཁྲི་འཁུར་བའི་ཕྱིར་ཡིན།
EXO 37:28 རྒྱུག་པ་དེ་གཉིས་སེང་ལྡེང་ཤིང་གིས་བཟོས་ཏེ་གསེར་གྱིས་གཡོགས་སོ། །
EXO 37:29 ཡང་སྤོས་ཆུ་བཟོ་མཁན་གྱི་ལུགས་བཞིན་དུ། ཁོས་འབྱུག་སྣུམ་དམ་པ་དང་དྲི་ཞིམ་སླད་མེད་ཀྱི་བདུག་སྤོས་ནི་བསུང་རྫས་ནས་བཟོས་སོ། །
EXO 38:1 ཡང་པི་ཟིད་ཨེལ་གྱིས་སེང་ལྡེང་ཤིང་གིས་སྦྱིན་སྲེག་གི་མཆོད་ཁྲི་བཟོས་ཤིང་། དེའི་རིང་ཚད་ནི་ཁྲུ་ལྔ་དང་ཞེང་ཚད་ནི་ཁྲུ་ལྔ་སྟེ་གྲུ་བཞི་མ་ཞིག་ཡིན་ཞིང་། མཐོ་ཚད་ནི་ཁྲུ་གསུམ་ཡིན།
EXO 38:2 དེའི་ཟུར་བཞི་ལ་རུ་ཐུར་བཞི་བཟོས་པ་དང་། རུ་ཐུར་བཞི་ནི་མཆོད་ཁྲི་དང་གཅིག་པར་སྦྲེལ་ཞིང་། མཆོད་ཁྲི་ལི་ཡིས་གཡོགས་པ་རེད།
EXO 38:3 ཡང་ཁོས་མཆོད་ཁྲིའི་གཞོང་པ་རྣམས་དང་མེ་ཁྱེམ་དང་། མཆོད་སྡེར་དང་ཤ་འཛིན་ཁ་དབྲག་དང་མེ་ཕོར་བཅས་བཟོས་ཤིང་། ཡོ་བྱད་དེ་ཐམས་ཅད་ལི་ཡིས་བཟོས།
EXO 38:4 ཡང་རྒྱུ་ལི་ཡིན་པའི་ཐག་མིག་ཅིག་བཟོས་ཏེ། ཐག་མིག་ནི་མཆོད་ཁྲིའི་མུ་ཁྱུད་ཀྱི་འགབ་ལ་བཅུག་ཅིང་། མཆོད་ཁྲིའི་མཐོ་ཚད་ཀྱི་ཕྱེད་ཙམ་ལ་སླེབས་སུ་བཅུག་པ་དང་།
EXO 38:5 ཐག་མིག་དེའི་གྲུ་ག་བཞི་ལ་ལི་ཡི་ཨ་ལོང་རེ་བླུགས་པ་དང་། དེ་དག་ནི་རྒྱུག་པ་གཉིས་བསྐོན་ས་ཡིན་པའི་ཕྱིར་རོ། །
EXO 38:6 ཁོས་སེང་ལྡེང་ཤིང་གིས་རྒྱུག་པ་བཟོས་ནས་དེ་གཉིས་ལི་ཡིས་གཡོགས་པ་དང་།
EXO 38:7 རྒྱུག་པ་ནི་མཆོད་ཁྲིའི་ལོགས་གཉིས་ཀྱི་ཨ་ལོང་རྣམས་སུ་བརྒྱུས་ཤིང་མཆོད་ཁྲི་འཁུར་བའི་ཕྱིར་ཡིན་ལ། ཡང་པང་ལེབ་ཀྱིས་མཆོད་ཁྲི་བཟོས་ཤིང་། དེའི་ནང་སྟོང་པ་ཡིན་ནོ། །
EXO 38:8 ཡང་ཁོས་ལི་ཡི་གཞོང་པ་དང་དེའི་སྟེགས་བུ་བཟོས་ཤིང་། དེ་གཉིས་ནི་མཇལ་འཕྲད་གུར་མཆོག་གི་སྒོ་འགྲམ་ནས་ཞབས་ཕྱི་བྱེད་པའི་བུད་མེད་རྣམས་ཀྱི་མེ་ལོང་གིས་བཟོས་པའོ། །
EXO 38:9 དེ་ནས་ཁོས་ཁྱམས་ར་བཟོས་ཏེ། ལྷོ་ཕྱོགས་ཀྱི་ཁྱམས་ཡོལ་རྣམས་ནི་སོ་རས་སྲབ་བུ་བསྒྲིམས་པ་ཅན་གྱིས་བྱས་ཤིང་། དེའི་རིང་ཚད་ལ་ཁྲུ་བརྒྱ་ཡོད།
EXO 38:10 དེའི་ཀ་བ་ཉི་ཤུ་དང་དེ་དག་གི་ཞབས་ར་ཉི་ཤུ་ནི་ལི་ཡིས་བཟོས་པ་དང་། ཀ་བའི་ཀྱུ་རྣམས་དང་དེ་དག་གི་ཁ་ཐུར་རྣམས་དངུལ་གྱིས་བཟོས།
EXO 38:11 ཡང་བྱང་ཕྱོགས་ཀྱི་ཁྱམས་ཡོལ་རྣམས་ལ་ཡང་རིང་ཚད་ཁྲུ་བརྒྱ་ཡོད་ཅིང་། དེའི་ཀ་བ་ཉི་ཤུ་དང་དེ་དག་གི་ཞབས་ར་ཉི་ཤུ་ལི་ཡིས་བཟོས་པ་དང་། ཀ་བའི་ཀྱུ་དང་ཁ་ཐུར་རྣམས་དངུལ་གྱིས་བཟོས།
EXO 38:12 ཡང་ཁྱམས་རའི་ནུབ་ཕྱོགས་ཀྱི་ཡོལ་བ་རྣམས་ཀྱི་ཞེང་ཚད་ལ་ཁྲུ་ལྔ་བཅུ་ཡོད་ལ། དེར་ཀ་བ་བཅུ་དང་ཞབས་ར་བཅུ་བཟོས་ཤིང་། ཀ་བའི་ཀྱུ་དང་ཁ་ཐུར་རྣམས་དངུལ་གྱིས་བྱས་སོ། །
EXO 38:13 ཤར་ཕྱོགས་ཀྱི་ཁྱམས་ཡོལ་གྱི་ཞེང་ལའང་ཁྲུ་ལྔ་བཅུ་ཡོད་པ་དང་།
EXO 38:14 སྒོའི་ལོགས་གཅིག་གི་ཡོལ་བ་ལ་ཁྲུ་བཅོ་ལྔ་དང་། དེ་ལ་ཀ་བ་གསུམ་དང་ཞབས་ར་གསུམ་ཡོད།
EXO 38:15 དེ་བཞིན་དུ་སྒོའི་ལོགས་ཅིག་ཤོས་དེ་ལའང་དེ་བཞིན་བྱས། ཁྱམས་རའི་སྒོའི་ལོགས་རེ་ལ་ཡོལ་བ་ཁྲུ་བཅོ་ལྔ་དང་། ཀ་བ་གསུམ་དང་། ཞབས་ར་གསུམ་ཡོད།
EXO 38:16 ཁྱམས་ཡོལ་ཐམས་ཅད་ཀྱི་རྒྱུ་ནི་སོ་རས་སྲབ་བུ་བསྒྲིམས་པ་ཅན་ཡིན།
EXO 38:17 ཀ་བ་རྣམས་ཀྱི་ཞབས་ར་རྣམས་ལི་དང་ཀ་བའི་ཀྱུ་རྣམས་དང་ཁ་ཐུར་རྣམས་ནི་དངུལ་དང་། ཀ་མགོ་རྣམས་ཀྱང་དངུལ་གྱིས་གཡོགས་ཤིང་། ཁྱམས་རའི་ཀ་བ་ཐམས་ཅད་ཀྱི་རྒྱུག་པ་རྣམས་ཀྱང་དངུལ་གྱིས་བཟོས་སོ། །
EXO 38:18 ཁྱམས་རའི་སྒོ་ཡོལ་དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་གྱིས་འཐག་མཁན་གྱི་ལས་བཞིན་བྱས་ཤིང་། དེའི་རིང་ཚད་ནི་ཁྲུ་ཉི་ཤུ་དང་མཐོ་ཚད་ལ་ཁྲུ་ལྔ་བཟོས་པ་དང་། མཐོ་ཚད་དེ་ནི་ཁྱམས་ཡོལ་རྣམས་དང་མཐུན།
EXO 38:19 དེའི་ཀ་བ་བཞི་དང་ཞབས་ར་བཞི་ནི་ལི་དང་། ཀ་བའི་ཀྱུ་དང་ཁ་ཐུར་རྣམས་ནི་དངུལ་གྱིས་བཟོས་ཤིང་། ཀ་མགོ་རྣམས་ནི་དངུལ་གྱིས་གཡོགས།
EXO 38:20 གུར་མཆོག་དང་ཁྱམས་རའི་མཐའ་འཁོར་གྱི་ཕུར་བ་ཐམས་ཅད་ལི་ཡིས་བཟོས་སོ། །
EXO 38:21 མོ་ཤེ་ཡིས་བཀའ་གནང་བ་བཞིན་དུ་ལེ་ཝི་པས་ཞབས་འདེགས་སྐོར་ལ་རྩིས་གྲངས་བླངས་ཤིང་། མཆོད་དཔོན་ཨ་རོན་གྱི་བུ་ཨི་ཐ་མཱཪ་གྱིས་རྩིས་ཐོར་བཀོད་པའི་གུར་མཆོག་གམ་དཔང་པོའི་གུར་མཆོག་གི་རྒྱུ་ཆའི་སྡོམ་ནི་འདི་ལྟར་ཏེ།
EXO 38:22 དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་གནང་བ་བཞིན་དུ་བཟོ་མཁན་པི་ཟིད་ཨེལ་ཡིན་ལ། ཁོ་ནི་ཨོའུ་རེལ་གྱི་བུ་ཡིན་ཞིང་། ཨོའུ་རེལ་ནི་ཡ་ཧུ་དཱ་ཚོ་པའི་ཧུ་རཱ་ཡི་བུ་ཡིན་པ་དང་།
EXO 38:23 དཱན་ཚོ་པའི་ཨ་ཧི་སཱ་མག་གི་བུ་ཨོ་ཧོ་ལི་ཨབ་ནི་པི་ཟིད་ཨེལ་གྱི་ལས་གྲོགས་ཡིན་ཞིང་། ཁོ་ནི་བརྐོ་བཟོ་དང་ལས་ཀ་བྱེད་པའི་ལག་རྩལ་ཅན་དང༌། བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུའི་འཐག་བཟོ་པའང་ཡིན་ནོ། །
EXO 38:24 དེ་སྔར་ཕུལ་ཟིན་པའི་གསེར་ཐམས་ཅད་དེ། གནས་མཆོག་བཟོ་བའི་ལས་ཀུན་གྱི་ཕྱིར་གཡོབ་མཆོད་དུ་ཕུལ་བའི་གསེར་ནི་གནས་མཆོག་གི་སྲང་བཞིན་དུ་རྡོ་ཚད་ཉི་ཤུ་ཉེར་དགུ་དང་གསེར་སྲང་བདུན་བརྒྱ་སུམ་ཅུ་ཡིན།
EXO 38:25 མི་ཚོགས་ཀྱི་གྲངས་རྩིས་ལས་བྱུང་བའི་དངུལ་ནི་གནས་མཆོག་གི་སྲང་བཞིན་དུ་རྡོ་ཚད་བརྒྱ་དང་། དངུལ་སྲང་ཆིག་སྟོང་བདུན་བརྒྱ་བདུན་ཅུ་དོན་ལྔ་ཡིན།
EXO 38:26 མི་ཚོགས་ཀྱི་གྲངས་ཀ་རྩིས་པ་ལ་ལོ་ཉི་ཤུ་ཡན་གྱི་སྐྱེས་པའི་གྲངས་ནི་དྲུག་འབུམ་སུམ་སྟོང་ལྔ་བརྒྱ་ལྔ་བཅུ་ཡིན། དེ་རེ་རེ་ནས་དངུལ་ཁྲལ་པེ་ཁཱ་གཅིག་རེ་ཕུལ། པེ་ཁཱའི་ལྗིད་ཚད་ནི་གནས་མཆོག་གི་སྲང་བཞིན་གྱི་དངུལ་སྲང་ཕྱེད་ཀ་དང་འདྲ།
EXO 38:27 དངུལ་རྡོ་ཚད་བརྒྱ་ཡོད་པ་དེ་གནས་མཆོག་གི་ཞབས་ར་དང་ཡོལ་བའི་ཞབས་ར་རྣམས་བླུག་པའི་ཕྱིར་ཡིན་ཏེ། ཞབས་ར་བརྒྱ་ལ་རྡོ་ཚད་བརྒྱ། ཞབས་ར་རེ་ལ་རྡོ་ཚད་གཅིག་བཅས་སོ། །
EXO 38:28 དངུལ་སྲང་ཆིག་སྟོང་བདུན་བརྒྱ་བདུན་ཅུ་དོན་ལྔ་དེ་ཡིས་ཀ་བའི་ཀྱུ་རྣམས་བཟོས་པ་དང་། ཀ་མགོ་རྣམས་གཡོགས་པ་དང་། ད་དུང་ཁ་ཐུར་རྣམས་ཀྱང་བཟོས་སོ། །
EXO 38:29 ཡང་དེ་སྔར་གཡོབ་མཆོད་དུ་ཕུལ་ཟིན་པའི་ལི་སྟེ། རྡོ་ཚད་བདུན་ཅུ་དང་སྲང་ཉིས་སྟོང་བཞི་བརྒྱ་ཡོད།
EXO 38:30 དེ་ལས་མཇལ་འཕྲད་གུར་མཆོག་གི་སྒོའི་ཞབས་ར་རྣམས་དང་། ལི་ཡིན་པའི་མཆོད་ཁྲི་དང་། དེའི་ལི་ཡིན་པའི་ཐག་མིག་དང་མཆོད་ཁྲིའི་ཡོ་བྱད་ཐམས་ཅད་དང་།
EXO 38:31 ཕྱོགས་བཞི་ལ་བསྐོར་ཡོད་པའི་ཁྱམས་རའི་ཞབས་ར་རྣམས་དང་། ཁྱམས་སྒོའི་ཞབས་ར་རྣམས་དང་། གུར་མཆོག་གི་ཕུར་བ་ཐམས་ཅད་དང་ཕྱོགས་བཞི་ལ་བསྐོར་ཡོད་པའི་ཁྱམས་རའི་ཕུར་བ་ཐམས་ཅད་བཅས་བཟོས་སོ། །
EXO 39:1 གནས་དམ་པ་ནས་ཞབས་ཕྱི་བྱེད་པའི་ཕྱིར་པི་ཟིད་ཨེལ་སོགས་ཀྱིས་ཐགས་ཞིབ་མོར་བཏགས་པའི་གོས་རྣམས་བཟོས་པ་ནི། བལ་སྐུད་མཐིང་ག་དང་རྒྱ་སྨུག་དང་མཚལ་དམར་བཅས་ཀྱིས། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་འཕགས་གོས་དམ་པ་རྣམས་ཨ་རོན་གྱི་ཕྱིར་བཟོས་སོ། །
EXO 39:2 ཁོས་བེར་ཐུལ་གྱི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་དང་།
EXO 39:3 དེ་དག་གིས་གསེར་ནི་ལེབ་མོ་སྲབ་བུར་བརྡུངས་ནས་སྐུད་པ་དྲས་ཤིང་། བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བཅས་ཀྱིས་འཐག་མཁན་ལག་རྩལ་ཅན་གྱི་ལས་བཞིན་དུ་ཆ་མཚུངས་པར་སྦྱར།
EXO 39:4 བེར་ཐུལ་ལ་ཡང་དཔུང་པའི་ཕྲག་ཁེབས་གཉིས་བཟོས་ཤིང་། བེར་ཐུལ་གྱི་ཕྲག་མགོ་གཉིས་ལ་སྦྲེལ་ཞིང་འཆིང་བར་བྱས།
EXO 39:5 ཡང་བེར་ཐུལ་དང་འབྲེལ་བའི་སྐེད་ཆིངས་མཆོར་པོ་ཅན་ནི་བེར་ཐུལ་གྱི་བཟོ་ཚུལ་དང་གཅིག་མཚུངས་ཡིན་ཞིང་། དེའི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་ཡིན་ཏེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །
EXO 39:6 ཡང་དེ་དག་གིས་གཟི་གཉིས་སྟ་གོན་བྱས་ནས་གསེར་གྱི་འབུར་ཀོང་གིས་བསྐོར་བ་དང་དམ་ཕྲུག་བརྐོ་བ་བཞིན་དུ་གཟི་གཉིས་ཀྱི་སྟེང་དུ་ཡེས་ར་ཨེལ་གྱི་བུ་རྣམས་ཀྱི་མིང་བརྐོས།
EXO 39:7 རྡོ་དེ་གཉིས་བེར་ཐུལ་གྱི་དཔུང་པའི་ཕྲག་ཁེབས་གཉིས་ལ་སྦྱར་ཅིང་། ཡེས་ར་ཨེལ་གྱི་བུ་རྣམས་ལ་རྗེས་དྲན་བྱེད་པའི་ཕྱིར་རོ། །དེ་ནི་དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །
EXO 39:8 ཡང་པི་ཟིད་ཨེལ་གྱིས་བྲང་རྒྱན་དེ་བཟོས་ལ། དེ་ནི་བཟོ་བ་ལག་རྩལ་ཅན་གྱིས་བྱས་པ་དང་བེར་ཐུལ་གྱི་བཟོ་ཚུལ་བཞིན་དུ་བཟོས། དེ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་གྱིས་བཟོས་ཟིན་ཏོ། །
EXO 39:9 དེ་ནི་གྲུ་བཞི་མ་ཞིག་ཡིན་ལ། རིང་ཚད་ལ་མཐོ་གང་དང་ཞེང་ལ་ཡང་མཐོ་གང་ཡོད་དེ་ཉིས་ལྟེབ་ཡིན།
EXO 39:10 དེ་ལ་ཕ་ལམ་ཤུར་ཕྲེང་བཞིའི་ཕྲ་བཏབ་ཡོད་དེ། ཤུར་ཕྲེང་དང་པོ་ནི་པདྨ་རཱ་ག་དང་། སྤྲིན་རྡོ། མ་རྒད་བཅས་གསུམ་དང་།
EXO 39:11 ཤུར་ཕྲེང་གཉིས་པ་ནི་གཡུ་དང་ཨིནྡྲ་ནཱི་ལ་དང་རྡོ་རྗེ་ཕ་ལམ་བཅས་གསུམ།
EXO 39:12 ཤུར་ཕྲེང་གསུམ་པ་ནི་རྟ་ཀླད་སྨུག་པོ་དང་། ཤེལ་རྡོ་དང་། མུ་མེན་བཅས་གསུམ།
EXO 39:13 ཤུར་ཕྲེང་བཞི་པ་ནི་བཻཌཱུརྱ་ལྗང་སེར་དང་། གཟི་དང་གཡང་ཊི་སྔོན་པོ་བཅས་གསུམ་སྟེ། དེ་དག་ནི་གསེར་གྱི་འབུར་ཀོང་ལ་བཏབ།
EXO 39:14 རིན་པོ་ཆེ་དེ་དག་གིས་ཡེས་ར་ཨེལ་གྱི་བུ་རྣམས་ཀྱི་མིང་གི་མཚོན་རྟགས་བྱེད་ཅིང་མིང་ལྟར་བཅུ་གཉིས་ཡོད་དེ། དམ་ཕྲུག་བཞིན་དུ་རིན་པོ་ཆེ་རེ་རེའི་སྟེང་དུ་ཡེས་ར་ཨེལ་གྱི་ཚོ་པ་བཅུ་གཉིས་པོའི་མིང་རེ་རེ་བཞིན་དུ་བརྐོས་ཟིན་ཏོ། །
EXO 39:15 དེ་དག་གིས་བྲང་རྒྱན་ལ་གསེར་བཙོ་མས་བསླེས་པའི་ཉག་ཐག་བཟོས་ཤིང་།
EXO 39:16 གསེར་གྱི་འབུར་ཀོང་གཉིས་དང་ཨ་ལོང་གཉིས་བཟོས་ཏེ་ཨ་ལོང་གཉིས་བྲང་རྒྱན་གྱི་གྲུ་ག་གཉིས་ལ་སྦྱར།
EXO 39:17 ཡང་གསེར་གྱི་ཉག་ཐག་དེ་གཉིས་ནི་བྲང་རྒྱན་གྱི་གྲུ་ག་རུ་ཡོད་པའི་ཨ་ལོང་གཉིས་ལ་བརྒྱུས་ཡོད་ཅིང་།
EXO 39:18 དེ་ནས་ཉག་ཐག་གི་སྣེ་གཉིས་འབུར་ཀོང་གཉིས་ལ་བཅུག་སྟེ། བེར་ཐུལ་གྱི་དཔུང་པའི་ཕྲག་ཁེབས་ཀྱི་མདུན་ལོགས་ལ་སྦྱར།
EXO 39:19 ཡང་ཁོས་གསེར་གྱི་ཨ་ལོང་གཞན་གཉིས་བཟོས་ནས་བྲང་རྒྱན་གྱི་གྲུ་ག་གཉིས་ལ་སྦྱར་ཅིང་། སྦྱོར་ས་དེ་ནི་བྲང་རྒྱན་གྱི་ཟུར་ཁ་ཡིན་ལ་བྲང་རྒྱན་དང་བེར་ཐུལ་གྱི་བར་མཚམས་ཀྱང་ཡིན།
EXO 39:20 ཡང་ཁོས་གསེར་གྱི་ཨ་ལོང་གཉིས་བཟོས་ནས། བེར་ཐུལ་གྱི་དཔུང་པའི་ཕྲག་ཁེབས་གཉིས་ཀྱི་མདུན་ལོགས་ཀྱི་འོག་དང་སྐེད་ཆིངས་མཆོར་པོ་ཅན་གྱི་འབྲེལ་སའི་ཅུང་ཟད་གོང་དུ་བཅུག་ཅིང་།
EXO 39:21 བྲང་རྒྱན་དེ་བེར་ཐུལ་གྱི་སྐེད་ཆིངས་མཆོར་པོ་ཅན་དང་དམ་དུ་འབྲེལ་བ་དང་བེར་ཐུལ་ལས་མི་འཆོར་བའི་ཕྱིར། བྲང་རྒྱན་གྱི་ཨ་ལོང་དེ་བེར་ཐུལ་གྱི་ཨ་ལོང་ལ་སྡེམ་ཐག་སྔོན་པོ་ཡིས་བསྡམས་ཤིང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །
EXO 39:22 པི་ཟིད་ཨེལ་གྱིས་ཡང་བེར་ཐུལ་འོག་གི་གོས་རིང་ནི་ཁ་དོག་སྔོན་པོས་འཐག་བཟོའི་ལུགས་ལྟར་བྱས་ཤིང་།
EXO 39:23 དེའི་སྟོད་དཀྱིལ་དུ་མགོའི་ཕྱིར་ཁུང་བུ་ཞིག་བཞག་ཅིང་། དེའི་མཐའ་འཁོར་ལ་འཐག་བཟོ་བྱས་པའི་གོང་བ་ཞིག་ཀྱང་བཟོས་ཏེ། མི་རལ་བའི་ཕྱིར་གོ་ཁྲབ་ཀྱི་གོང་བ་ལྟར་དུ་བཟོས།
EXO 39:24 ཡང་དེའི་གོས་འདབ་ཀྱི་མཐའ་འཁོར་དུ་བལ་སྐུད་མཐིང་ག་དང་རྒྱ་སྨུག མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཀྱི་སེ་འབྲུས་བརྒྱན་ཡོད་ཅིང་།
EXO 39:25 གསེར་བཙོ་མས་གཡེར་ཁ་རྣམས་བཟོས་ཤིང་། སེ་འབྲུ་རེ་རེའི་བར་གསེབ་ཏུ་གསེར་གྱི་གཡེར་ཁ་རྣམས་བེར་ཐུལ་གྱི་འདབ་ཟུར་ཐམས་ཅད་ལ་སྦྱར།
EXO 39:26 གཡེར་ཁ་གཅིག་དང་སེ་འབྲུ་གཅིག ཡང་གཡེར་ཁ་གཅིག་དང་སེ་འབྲུ་གཅིག་བཅས་གོས་རིང་གི་འདབ་ཁ་ཐམས་ཅད་ལ་སྦྱར། དཀོན་མཆོག་ལ་ཞབས་ཕྱི་སྒྲུབ་སྐབས་གྱོན་པའི་ཕྱིར་བཟོས་ཏེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །
EXO 39:27 ཡང་དེ་དག་གིས་འཐག་མཁན་གྱི་ལས་བཞིན་དུ་ཨ་རོན་དང་ཁོའི་བུ་རྣམས་ལ་སོ་རས་སྲབ་བུ་ཡིས་ནང་གོས་བཟོས་པ་དང་།
EXO 39:28 ཡང་སོ་རས་ཀྱིས་ལ་ཐོད་དང་པྲོག་ཞུ་མཛེས་སྡུག་ལྡན་པ་རྣམས་བཟོས་པ་དང་། སོ་རས་སྲབ་བུ་བསྒྲིམས་པ་ཅན་གྱིས་ཨང་ཐུང་བཟོས་པ་དང་།
EXO 39:29 སྐེད་ཆིངས་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ནས་འཐག་མཁན་གྱི་ལས་བཞིན་དུ་བཟོས་ཏེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུའོ། །
EXO 39:30 ཡང་དེ་དག་གིས་གསེར་བཙོ་མས་ཅོད་པན་དམ་པའི་བྱང་བུ་བཟོས་ཤིང་། དེའི་སྟེང་ལ་དམ་ཕྲུག་བརྐོ་བ་བཞིན་དུ། དཀོན་མཆོག་ཡ་ཝཱེའི་ཕྱིར་དུ་དམ་པའོ་ཞེས་བརྐོས།
EXO 39:31 ཡང་དེ་ལ་རས་སྔོན་པོའི་ཉག་ཐག་ཅིག་སྦྱར་ནས་གོང་གི་ལ་ཐོད་དང་སྦྲེལ་བ་སྟེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །
EXO 39:32 དེ་དག་གིས་དེ་ལྟར་གུར་མཆོག་སྟེ་མཇལ་འཕྲད་གུར་མཆོག་གི་ཕྱིར་ལས་ཀ་ཐམས་ཅད་རྫོགས་པ་དང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་དང་ཅི་གནང་བ་བཞིན་དུ་ཡེས་ར་ཨེལ་པ་རྣམས་ཀྱིས་བྱས་ཏེ། དེ་ག་བཞིན་དུ་བྱས་སོ། །
EXO 39:33 དེ་ནས་དེ་དག་གིས་མོ་ཤེའི་དྲུང་དུ་གུར་མཆོག་ཁྱེར་འོངས་ནས། གུར་དེ་དང་དེའི་ཡོ་བྱད་ཐམས་ཅད་དེ། དེའི་ཀྱུ་རྣམས་དང་། པང་ལེབ་དང་། འཕྲེད་རྒྱུག་དང་། ཀ་བ་དང་དེའི་ཞབས་ར་དང་།
EXO 39:34 རྒྱ་ཚོས་བརྒྱབ་པའི་ལུག་ཐུག་གི་པགས་པ་ནས་གུར་མཆོག་གི་ཁེབས་རས་དང་། དེའི་སྟེང་དུ་ཀོ་བ་སྤུས་ལེགས་རྣམས་ལས་བྱས་པའི་ཁེབས་དང་། གཡོག་བྱེད་ཀྱི་ཡོལ་བ་དང་།
EXO 39:35 དཔང་མཛད་ཤུར་སྒམ་དང་དེའི་རྒྱུག་པ་རྣམས་དང་། ཐུགས་རྗེའི་བཞུགས་ཁྲི་དང་།
EXO 39:36 སྒྲོག་ཙེ་དང་དེའི་ཡོ་བྱད་ཐམས་ཅད་དང་སྤྱན་བསྟར་བག་ལེབ་དང་།
EXO 39:37 གསེར་བཙོ་མའི་སྒྲོན་སྟེགས་དང་དེ་ལ་གྲལ་བསྒྲིགས་པའི་སྒྲོན་མེ་རྣམས་དང་། དེའི་ཡོ་བྱད་ཐམས་ཅད་དང༌། སྒྲོན་མེའི་ཕྱིར་འཚིར་སྣུམ་དང་།
EXO 39:38 གསེར་གྱི་སྤོས་ཁྲི་དང་། འབྱུག་སྣུམ་དང་དྲི་ཞིམ་བདུག་སྤོས་དང་གུར་མཆོག་གི་སྒོ་ཡོལ་དང་།
EXO 39:39 ལི་ཡི་མཆོད་ཁྲི་དང་དེའི་སྟེང་གི་ལི་ཡི་ཐག་མིག་དང་དེའི་རྒྱུག་པ་རྣམས་དང་དེའི་ཡོ་བྱད་ཐམས་ཅད་དང་། ཁྲུས་གཞོང་དང་དེའི་སྟེགས་བུ་དང་།
EXO 39:40 ཁྱམས་རའི་ཡོལ་བ་རྣམས་དང་དེའི་ཀ་བ་དང་། ཞབས་ར་དང་། ཁྱམས་རའི་སྒོ་ཡོལ་དང་དེའི་ཆོན་ཐག་དང་ཕུར་བ་དང་། གུར་མཆོག་སྟེ་མཇལ་འཕྲད་གུར་མཆོག་གི་ཕྱིར་བཀོལ་སྤྱོད་བྱེད་པའི་ཡོ་བྱད་ཐམས་ཅད་དང་།
EXO 39:41 གནས་དམ་པར་ཞབས་ཕྱི་བྱེད་པའི་ཆེད་དུ་ཐགས་ཞིབ་མོར་བཏགས་པའི་གོས་རྣམས་དང་། མཆོད་དཔོན་ཨ་རོན་གྱི་ན་བཟའ་དམ་པ་རྣམས་དང་། ཁོའི་བུ་རྣམས་ཀྱིས་མཆོད་དཔོན་གྱི་ཞབས་ཕྱི་བྱེད་པའི་ཕྱིར་ན་བཟའ་བཅས་ཁྱེར་ནས་འོངས།
EXO 39:42 དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་དང་ཅི་གནང་བ་བཞིན་དུ་ཡེས་ར་ཨེལ་པ་རྣམས་ཀྱིས་ལས་ཀ་དེ་ཐམས་ཅད་བྱས་སོ། །
EXO 39:43 དེ་ནས་མོ་ཤེ་ཡིས་ལས་ཀ་དེ་ཐམས་ཅད་ལ་བལྟས་ནས། ལྟོས་དང་དཀོན་མཆོག་ཡ་ཝཱེས་བཀའ་ཇི་ལྟར་གནང་བ་བཞིན་དུ་ཁོ་རྣམས་ཀྱིས་དེ་ལྟར་བསྒྲུབས་པས། ཁོས་དེ་དག་ལ་བྱིན་གྱིས་བརླབས་སོ། །
EXO 40:1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་ཅེས་གསུངས་པ་སྟེ།
EXO 40:2 ཟླ་དང་པོའི་ཚེས་གཅིག་ཉིན། ཁྱོད་ཀྱིས་གུར་མཆོག་སྟེ་མཇལ་འཕྲད་གུར་མཆོག་བསྒྲེང་དགོས་ཤིང་།
EXO 40:3 དེའི་ནང་དུ་དཔང་མཛད་ཤུར་སྒམ་བཞག་ནས། སྒམ་དེའི་མདུན་དུ་ཡོལ་བ་དཔྱང་བར་གྱིས་ཤིག
EXO 40:4 ཁྱོད་ཀྱིས་གུར་མཆོག་ཏུ་སྒྲོག་ཙེ་བཞག་སྟེ། དེའི་སྟེང་དུ་རྫས་གང་དགོས་པ་རྣམས་བཤམ་པར་བྱའོ། །སྒྲོན་སྟེགས་ཀྱང་ནང་དུ་ཁྱེར་ལ། དེའི་སྟེང་དུ་སྒྲོན་མེ་རྣམས་སྒྲིགས་ཤིག
EXO 40:5 ཁྱོད་ཀྱིས་གསེར་གྱི་སྤོས་ཁྲི་ནི་དཔང་མཛད་ཤུར་སྒམ་གྱི་མདུན་དུ་ཞོག་དང་། གུར་མཆོག་གི་སྒོ་ཡོལ་ཕོབས་ཤིག
EXO 40:6 ཡང་སྦྱིན་སྲེག་གི་མཆོད་ཁྲི་ནི་གུར་མཆོག་སྟེ་མཇལ་འཕྲད་གུར་མཆོག་གི་སྒོ་ཁ་རུ་ཞོག་ཅིག
EXO 40:7 ཡང་ཁྲུས་གཞོང་ནི་མཇལ་འཕྲད་གུར་མཆོག་དང་མཆོད་ཁྲིའི་བར་ལ་བཞག་ནས། ནང་དུ་ཆུ་བླུགས་ཤིག
EXO 40:8 ཡང་དེའི་མཐའ་བཞི་ལ་ཁྱམས་རས་བསྐོར་བ་དང་། ཁྱམས་རའི་སྒོ་ཡོལ་ཡང་དཔྱང་བར་གྱིས་ཤིག
EXO 40:9 དེ་ནས་གུར་མཆོག་དང་དེའི་ནང་དུ་ཡོད་པའི་ཡོ་བྱད་ཐམས་ཅད་ལ་འབྱུག་སྣུམ་གྱིས་བྱུགས་དང་། དེ་དང་དེའི་ཡོ་བྱད་ཐམས་ཅད་ཀྱང་དམ་པར་བྱོས་ཤིག ཡོངས་སུ་དམ་པར་འགྱུར་བ་ཡིན།
EXO 40:10 སྦྱིན་སྲེག་གི་མཆོད་ཁྲི་དང་དེའི་ཡོ་བྱད་རྣམས་ལ་འབྱུག་སྣུམ་གྱིས་བྱུགས་ནས་མཆོད་ཁྲི་དམ་པར་བྱོས་དང་། མཆོད་ཁྲི་དེ་ཀུན་ལས་དམ་པ་ཡིན་པར་བྱའོ། །
EXO 40:11 ཡང་ཁྲུས་གཞོང་དང་དེའི་སྟེགས་བུ་ལ་འབྱུག་སྣུམ་གྱིས་བྱུགས་ཏེ་དམ་པར་བྱོས་ཤིག
EXO 40:12 ཡང་ཨ་རོན་དང་དེའི་བུ་རྣམས་མཇལ་འཕྲད་གུར་མཆོག་གི་སྒོ་མདུན་དུ་ཁྲིད་ནས། ཁོ་རྣམས་ཆུས་བཀྲུ་དགོས།
EXO 40:13 ཁྱོད་ཀྱིས་ཨ་རོན་ལ་ན་བཟའ་དམ་པ་རྣམས་བསྐོན་ནས། ང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་འབྱུག་སྣུམ་གྱིས་བྱུགས་པ་དང་། ཁོ་རང་དམ་པར་བྱོས་ཤིག
EXO 40:14 ཡང་ཁོའི་བུ་རྣམས་ཀྱང་སྒོ་མདུན་དུ་ཁྲིད་དེ་ནང་གོས་རྣམས་དེ་དག་ལ་སྐོན་ཅིག
EXO 40:15 ཁོ་རང་ཚོས་ཀྱང་ང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར། སོ་སོའི་ཕ་ཨ་རོན་ལ་འབྱུག་སྣུམ་གྱིས་བྱུགས་པ་ལྟར། ཁྱོད་ཀྱིས་ཁོ་ཚོར་འབྱུག་སྣུམ་གྱིས་བྱུག་དགོས་ཤིང༌། དེ་ལྟར་འབྱུག་སྣུམ་བྱུགས་པ་ཡིས་ཁོ་ཚོའི་བུ་རབས་ཚ་རྒྱུད་དུ་མཆོད་དཔོན་གྱི་ལས་ཚན་རྒྱུན་ཆད་མེད་པ་ཞིག་ཏུ་འཇུག་པར་འགྱུར་ངེས་ཞེས་པའོ། །
EXO 40:16 མོ་ཤེ་ཡིས་དེ་བཞིན་དུ་བྱས་ཤིང་ཐམས་ཅད་དཀོན་མཆོག་ཡ་ཝཱེས་ཁོ་ལ་བཀའ་ཇི་ལྟར་གནང་བ་བཞིན་དུ་བསྒྲུབས་སོ། །
EXO 40:17 དེ་ལྟར་ལོ་གཉིས་པའི་ཟླ་དང་པོའི་ཚེས་གཅིག་ཉིན་གུར་མཆོག་དེ་བསྒྲེངས་པའོ། །
EXO 40:18 མོ་ཤེ་ཡིས་གུར་མཆོག་བསྒྲེངས་པ་དང་དེའི་ཞབས་ར་རྣམས་བསྒྲིགས། པང་ལེབ་རྣམས་བསླངས། འཕྲེད་རྒྱུག་རྣམས་བཅུག ཀ་བ་རྣམས་བསྒྲེངས།
EXO 40:19 ཁོས་ཁེབས་རས་ཀྱིས་གུར་མཆོག་གཡོགས་པ་དང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་ཁེབས་གཞན་ཡང་དེའི་སྟེང་དུ་བཏིངས་པ་རེད།
EXO 40:20 དེ་ནས་ཁོས་དཔང་པོའི་རྡོ་ལེབ་གཉིས་བླངས་ནས་ཤུར་སྒམ་གྱི་ནང་དུ་བཞག་སྟེ། རྒྱུག་པ་གཉིས་ཤུར་སྒམ་གྱི་ལོགས་གཉིས་ལ་བརྒྱུས་ནས། ཐུགས་རྗེའི་བཞུགས་ཁྲི་དེ་ཤུར་སྒམ་གྱི་སྟེང་དུ་བཞག
EXO 40:21 ཡང་ཁོས་ཤུར་སྒམ་ནི་གུར་མཆོག་ཏུ་ཁྱེར་ནས། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དཔང་མཛད་ཤུར་སྒམ་མི་མཐོང་བའི་ཕྱིར་དེའི་མདུན་དུ་ཡོལ་བ་དཔྱངས།
EXO 40:22 དེ་ནས་ཁོས་སྒྲོག་ཙེ་དེ་མཇལ་འཕྲད་གུར་མཆོག་ནང་བྱང་ཕྱོགས་སུ་ཡོལ་བའི་ཕྱི་རོལ་ཏུ་བཞག་པ་དང་།
EXO 40:23 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དེའི་སྟེང་དུ་དཀོན་མཆོག་ཡ་ཝཱེའི་ཞལ་ངོར་བག་ལེབ་གྲལ་དུ་བསྒྲིགས་སོ། །
EXO 40:24 དེ་ནས་ཁོས་སྒྲོན་སྟེགས་ནི་མཇལ་འཕྲད་གུར་མཆོག་གི་ལྷོ་ཕྱོགས་སུ་སྒྲོག་ཙེའི་ཐད་དུ་བཞག
EXO 40:25 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་ཁོས་དེའི་སྟེང་དུ་དཀོན་མཆོག་ཡ་ཝཱེའི་ཞལ་ངོར་སྒྲོན་མེ་རྣམས་སྦར་ཏོ། །
EXO 40:26 ཡང་ཁོས་མཇལ་འཕྲད་གུར་མཆོག་ནང་དུ་ཡོལ་བའི་མདུན་དུ་གསེར་གྱི་སྤོས་ཁྲི་དེ་བཞག་ཅིང་།
EXO 40:27 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དེའི་སྟེང་དུ་དྲི་ཞིམ་བདུག་སྤོས་བདུགས།
EXO 40:28 དེ་ནས་ཁོས་གུར་མཆོག་གི་སྒོ་ཡོལ་དེ་ཡང་དཔྱངས་སོ། །
EXO 40:29 གུར་མཆོག་སྟེ་མཇལ་འཕྲད་གུར་མཆོག་གི་སྒོ་མདུན་དུ་ཁོས་སྦྱིན་སྲེག་གི་མཆོད་ཁྲི་དེ་བཞག་ནས། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དེའི་སྟེང་དུ་སྦྱིན་སྲེག་དང་འབྲུ་རིགས་ཀྱི་མཆོད་པ་ཕུལ།
EXO 40:30 ཡང་མཇལ་འཕྲད་གུར་མཆོག་དང་མཆོད་ཁྲིའི་བར་དུ་ཁོས་ཁྲུས་གཞོང་བཞག་ནས་བཀྲུ་བའི་ཕྱིར་དེའི་ནང་དུ་ཆུ་བླུགས་ཤིང་།
EXO 40:31 གཞོང་པ་དེའི་ནང་དུ་མོ་ཤེ་དང་ཨ་རོན་དང་དེའི་བུ་རྣམས་ཀྱིས་རང་གི་རྐང་ལག་བཀྲུས།
EXO 40:32 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ། དེ་དག་ནམ་ཞིག་མཇལ་འཕྲད་གུར་མཆོག་གི་ནང་དུ་འགྲོ་བའམ་མཆོད་ཁྲིའི་དྲུང་དུ་ཡོང་བའི་སྐབས་སུ་བཀྲུས་སོ། །
EXO 40:33 དེ་ནས་ཁོས་གུར་མཆོག་དང་མཆོད་ཁྲིའི་ཕྱོགས་བཞི་ནས་བསྐོར་བའི་ཁྱམས་ར་དེ་བསྒྲེངས་ཤིང་། ཁྱམས་རའི་སྒོ་ཡོལ་དེ་དཔྱངས། དེ་ལྟར་མོ་ཤེ་ཡིས་ལས་ཀ་དེ་བསྒྲུབས་ནས་རྫོགས་སོ། །
EXO 40:34 དེ་ནས་སྤྲིན་གྱིས་མཇལ་འཕྲད་གུར་མཆོག་གཡོགས་པ་དང་དཀོན་མཆོག་ཡ་ཝཱེའི་གཟི་བརྗིད་ཀྱང་གུར་མཆོག་དེར་ཁྱབ།
EXO 40:35 མོ་ཤེ་མཇལ་འཕྲད་གུར་མཆོག་ཏུ་འགྲོ་མ་ནུས་ཏེ། གང་ལ་ཟེར་ན། གུར་མཆོག་སྟེང་དུ་སྤྲིན་ཕུང་བཞུགས་ཤིང་དཀོན་མཆོག་ཡ་ཝཱེའི་གཟི་བརྗིད་ཀྱིས་གུར་མཆོག་ཁྱབ་པའི་ཕྱིར་རོ། །
EXO 40:36 ཡེས་ར་ཨེལ་པ་རྣམས་ཀྱི་བགྲོད་ལམ་ཀུན་ཏུ་འདི་ལྟར་ཡིན་ཏེ། ནམ་ཞིག་སྤྲིན་དེ་གུར་མཆོག་ནས་བཏེགས་པའི་ཚེ། ཁོ་རྣམས་རང་གི་ལམ་དུ་ཆས།
EXO 40:37 སྤྲིན་ཡར་མ་བཏེགས་ཚེ། ཁོ་ཚོ་དེ་མུར་སྡོད་ཅིང་། ནམ་ཞིག་སྤྲིན་བཏེགས་པའི་ཚེ་ཁོ་ཚོ་ཡང་བསྐྱར་ལམ་དུ་ཆས།
EXO 40:38 ཁོ་ཚོའི་བགྲོད་ལམ་ཀུན་ཏུ་དཀོན་མཆོག་ཡ་ཝཱེའི་སྤྲིན་ཕུང་ནི་ཉིན་མོར་གུར་མཆོག་སྟེང་དུ་བཞུགས་པ་དང་། མཚན་མོར་ཡེས་ར་ཨེལ་གྱི་ཁྱིམ་རྒྱུད་ཚང་མའི་མཐོང་ལམ་ལ་སྤྲིན་ནང་དུ་མེ་ཡོད་པ་ཡིན་ནོ།། །།
LEV 1:1 དེ་ཡང་དཀོན་མཆོག་ཡ་ཝཱེས་མཇལ་འཕྲད་གུར་མཆོག་ནས་མོ་ཤེ་ཞལ་འབོད་གནང་སྟེ་འདི་སྐད་དུ།
LEV 1:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་ལས་མི་སུ་ཞིག་གིས་དཀོན་མཆོག་ཡ་ཝཱེ་ལ་སྒོ་ཕྱུགས་ཀྱི་མཆོད་པ་འབུལ་བའི་ཚེ། ཁྱོད་ཀྱི་མཆོད་པ་དེ་བ་ཁྱུ་དང་ར་ལུག་གི་ཁྱུ་ནས་འབུལ་དགོས།
LEV 1:3 གལ་སྲིད་ཁོས་སྦྱིན་སྲེག་ཏུ་འབུལ་བའི་མཆོད་པ་ནི་བ་གླང་ཡིན་ན། གླང་ཐུག་སྐྱོན་གྱིས་མ་གོས་པ་ཞིག་དཀོན་མཆོག་ཡ་ཝཱེའི་སྤྱན་སྔར་ཁོང་གི་ཐུགས་ལ་འབབ་ཕྱིར་མཇལ་འཕྲད་གུར་མཆོག་གི་སྒོ་ཁར་འཁྲིད་དགོས།
LEV 1:4 རང་གི་སྡིག་པ་བཤག་པའི་ཕྱིར། ཁོས་སྦྱིན་སྲེག་ཏུ་འབུལ་བའི་ཕྱུགས་ཟོག་གི་མགོ་ལ་ལག་པ་འཇོག་དགོས། དེ་ལྟར་བྱས་ན་དཀོན་མཆོག་ཡ་ཝཱེའི་ཐུགས་དང་ལྡན་པར་འགྱུར་རོ། །
LEV 1:5 དེ་ནས་ཁོས་དཀོན་མཆོག་ཡ་ཝཱེའི་དྲུང་དུ་གླང་ཁ་ཆུང་དེ་བཤའ་དགོས་ཤིང་། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་ཁྲག་ཁྱེར་འོངས་ཏེ། མཇལ་འཕྲད་གུར་མཆོག་གི་སྒོ་ཁར་ཡོད་པའི་མཆོད་ཁྲིའི་ཕྱོགས་བཞི་རུ་གཏོར་བ་དང་།
LEV 1:6 ཁོས་སྦྱིན་སྲེག་ཏུ་འབུལ་བའི་ཕྱུགས་ཟོག་གི་པགས་པ་བཤུས་ནས་དེའི་ཤ་ལྷུ་ལྷུ་རུ་གཅོད་དགོས།
LEV 1:7 དེ་ནས་མཆོད་དཔོན་ཨ་རོན་གྱི་བུ་རྣམས་ཀྱིས་མཆོད་ཁྲིའི་སྟེང་མེ་སྦར་བ་དང་། མེའི་སྟེང་དུ་བུད་ཤིང་བསྒྲིག་དགོས་སོ། །
LEV 1:8 ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས། ལྷུ་རྣམས་མགོ་དང་ཚིལ་བཅས་མཆོད་ཁྲིའི་སྟེང་མེ་འབར་བའི་བུད་ཤིང་གི་ཐོག་ཏུ་འཇོག་དགོས།
LEV 1:9 སྦྱིན་སྲེག་གི་ནང་ཁྲོལ་དང་རྐང་ལག་རྣམས་ཆུས་གཙང་མར་བཀྲུས་ནས། མཆོད་དཔོན་གྱིས་དེ་ཡོངས་སུ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །
LEV 1:10 གལ་སྲིད་ཁོས་སྦྱིན་སྲེག་ཏུ་འབུལ་བའི་མཆོད་པ་ནི་ར་ལུག་གི་ཁྱུ་གང་ནས་ཡིན་ན། ཕོ་ཕྱུགས་སྐྱོན་གྱི་དྲི་མས་མ་གོས་པ་ཞིག་འབུལ་དགོས།
LEV 1:11 ཁོས་མཆོད་ཁྲིའི་བྱང་ཕྱོགས་སུ་དཀོན་མཆོག་ཡ་ཝཱེའི་དྲུང་དུ་ཕྱུགས་དེ་བཤས་ནས། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས།
LEV 1:12 ཁོས་སྦྱིན་སྲེག་དེའི་ཤ་ལྷུ་ལྷུ་རུ་བཅད་ནས། མཆོད་དཔོན་གྱིས་ལྷུ་རྣམས་མགོ་དང་ཚིལ་བཅས་མཆོད་ཁྲིའི་སྟེང་མེ་འབར་བའི་བུད་ཤིང་གི་ཐོག་ཏུ་འཇོག་དགོས།
LEV 1:13 ནང་ཁྲོལ་དང་རྐང་ལག་རྣམས་ཆུས་གཙང་མར་བཀྲུས་ནས། མཆོད་དཔོན་གྱིས་དེ་ཡོངས་སུ་ཕུལ་ཏེ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །
LEV 1:14 གལ་སྲིད་ཁོས་དཀོན་མཆོག་ཡ་ཝཱེ་ལ་འབུལ་བའི་སྦྱིན་སྲེག་གི་མཆོད་པ་ནི་འདབ་ཆགས་ཡིན་ན། བྱ་ཐི་བའམ་ཕུག་རོན་ཆུང་ངུ་མཆོད་པར་འབུལ་དགོས་པ་དང་།
LEV 1:15 མཆོད་དཔོན་གྱིས་འདབ་ཆགས་མཆོད་ཁྲིའི་རྩར་ཁྱེར་འོངས་ནས་དེའི་སྐེ་གཅུ་བ་དང་མགོ་ཕྲལ་ཏེ་མཆོད་ཁྲིའི་སྟེང་སྦར་བ་དང་། ཁྲག་ནི་མཆོད་ཁྲིའི་ལོགས་སུ་བཞུར་དགོས།
LEV 1:16 ཡང་ཕོ་བ་དང་བྱ་སྒྲོ་རྣམས་བཏོན་ཏེ། མཆོད་ཁྲིའི་ཤར་ཕྱོགས་སུ་ཐལ་བ་འཕོ་སར་གཡུག་དགོས།
LEV 1:17 དེ་ནས་ཁོས་འདབ་ཆགས་ཀྱི་གཤོག་པ་གཉིས་ནས་བཟུང་སྟེ་རྒྱོང་བར་བྱེད་ཀྱང་དུམ་བུར་གཅོད་པར་མི་བྱ་སྟེ། མཆོད་དཔོན་གྱིས་མཆོད་ཁྲིའི་སྟེང་འབར་བའི་བུད་ཤིང་གི་ཐོག་ཏུ་སྦྱིན་སྲེག་གཏོང་དགོས་པ་དང་། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །
LEV 2:1 གལ་སྲིད་མི་ཞིག་གིས་འབྲུ་རིགས་ཀྱི་མཆོད་པ་དཀོན་མཆོག་ཡ་ཝཱེ་ལ་འབུལ་བ་ཡིན་ན། གྲོ་ཞིབ་མཆོད་པར་འབུལ་དགོས་ཤིང་། དེའི་སྟེང་དུ་སྣུམ་ལྡུག་པ་དང་། སྤོས་དཀར་ཡང་དེའི་སྟེང་དུ་བཞག་ནས།
LEV 2:2 ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱི་མདུན་དུ་འཁྱེར་དགོས་ལ། མཆོད་དཔོན་གྱིས་གྲོ་ཞིབ་ཁྱོར་བ་གང་ལེན་པ་དང་། ཡང་སྣུམ་ཅུང་ཙམ་དང་སྤོས་དཀར་ཡོངས་རྫོགས་བླངས་ནས། དྲན་རྟེན་དུ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །
LEV 2:3 འབྲུ་རིགས་ཀྱི་ལྷག་མ་རྣམས་ཨ་རོན་དང་ཁོའི་བུ་རྣམས་ལ་དབང་ཞིང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཀུན་ལས་དམ་པའི་མཆོག་ཡིན་ནོ། །
LEV 2:4 གལ་སྲིད་ཐབ་ལ་བསྲེགས་པའི་འབྲུ་རིགས་མཆོད་པར་འབུལ་བ་ཡིན་ན། གྲོ་ཞིབ་ཀྱི་སྐྱུར་མེད་བག་ལེབ་སྣུམ་བསྲེས་མ་དང་། ཡང་ན་སྐྱུར་མེད་གོར་ལེབ་སྲབ་བུ་སྣུམ་བྱུགས་མ་ཡིན་དགོས།
LEV 2:5 གལ་སྲིད་ཁྱོད་ཀྱིས་ལྕགས་སླང་སྟེང་གི་འབྲུ་རིགས་མཆོད་པར་འབུལ་བ་ཡིན་ན། སྣུམ་བསྲེས་པའི་སྐྱུར་མེད་གྲོ་ཞིབ་ཡིན་དགོས་ལ།
LEV 2:6 དུམ་བུར་བགོས་ནས་དེ་ལ་སྣུམ་ལྡུག་དགོས། དེ་ནི་འབྲུ་རིགས་ཀྱི་མཆོད་པ་ཡིན་ནོ། །
LEV 2:7 གལ་སྲིད་སླ་ངའི་ནང་བསྲེགས་པའི་འབྲུ་རིགས་མཆོད་པར་འབུལ་བ་ཡིན་ན། དེ་ནི་སྣུམ་དང་གྲོ་ཞིབ་ཀྱིས་བཟོ་དགོས།
LEV 2:8 དེ་བཞིན་བཟོས་པའི་འབྲུ་རིགས་ཀྱི་མཆོད་པ་དཀོན་མཆོག་ཡ་ཝཱེའི་དྲུང་དུ་ཁྱེར་ནས་མཆོད་དཔོན་ལ་སྤྲོད་པ་དང་། མཆོད་དཔོན་གྱིས་མཆོད་ཁྲིའི་མདུན་དུ་འཁྱེར་དགོས་སོ། །
LEV 2:9 མཆོད་དཔོན་གྱིས་འབྲུ་རིགས་ཀྱི་མཆོད་པ་ལས་དྲན་རྟེན་གྱི་སྐལ་བླངས་ནས་མཆོད་ཁྲིའི་སྟེང་སྦྱིན་སྲེག་གཏོང་དགོས་ཤིང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །
LEV 2:10 འབྲུ་རིགས་ཀྱི་ལྷག་མ་རྣམས་ཨ་རོན་དང་ཁོའི་བུ་རྣམས་ལ་དབང་ཞིང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཀུན་ལས་དམ་པའི་མཆོག་ཡིན་ནོ། །
LEV 2:11 དཀོན་མཆོག་ཡ་ཝཱེ་ལ་འབུལ་བའི་འབྲུ་རིགས་ཀྱི་མཆོད་པ་གང་ཡིན་ཡང་སྐྱུར་རྩི་འདྲེས་མི་རུང་སྟེ། ཁྱོད་རྣམས་ཀྱིས་སྐྱུར་རྩི་དང་སྦྲང་རྩི་གང་ཡིན་ཡང་དེ་བསྲེགས་ནས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་མི་རུང་ངོ་། །
LEV 2:12 དེ་དག་ཐོག་ཕུད་ཀྱི་མཆོད་པ་རུ་དཀོན་མཆོག་ཡ་ཝཱེ་ལ་ཕུལ་ཆོག་མོད། འོན་ཀྱང་མཆོད་ཁྲིའི་སྟེང་དྲི་ཞིམ་གྱི་མཆོད་པར་འབུལ་མི་རུང་།
LEV 2:13 འབུལ་བའི་འབྲུ་རིགས་ཀྱི་མཆོད་པ་གང་ཡིན་ཡང་དེ་ལ་ཚྭ་འདེབས་དགོས་ཏེ། འབྲུ་རིགས་ཀྱི་མཆོད་པའི་སྟེང་དུ་ཁྱོད་དང་དཀོན་མཆོག་བར་ཞལ་ཆད་བཞག་པའི་ཚྭ་ནི་མེད་མི་རུང་། མཆོད་པ་ཐམས་ཅད་ཀྱི་སྟེང་དུ་ཚྭ་བཏབ་ནས་འབུལ་དགོས་སོ། །
LEV 2:14 གལ་སྲིད་ལོ་ཏོག་གི་ཕུད་དཀོན་མཆོག་ཡ་ཝཱེ་ལ་འབྲུ་རིགས་ཀྱི་མཆོད་པར་འབུལ་བ་ཡིན་ན། མེ་ལ་བསྲེགས་པའི་སྙེ་མ་གསར་ཐོན་ཏེ། རགས་མོར་བཏགས་པའི་འབྲུ་རིགས་གསར་པ་དེ་ཐོག་ཕུད་ཀྱི་འབྲུ་མཆོད་དུ་འབུལ་དགོས།
LEV 2:15 སྣུམ་དང་སྤོས་དཀར་ཡང་དེའི་སྟེང་དུ་འཇོག་དགོས་ལ། དེ་ནི་འབྲུ་རིགས་ཀྱི་མཆོད་པ་ཡིན་ནོ། །
LEV 2:16 ཡང་མཆོད་དཔོན་གྱིས་མཆོད་པ་ལས་དྲན་རྟེན་གྱི་སྐལ་ཏེ། རགས་མོར་བཏགས་པའི་འབྲུ་རིགས་གསར་པ་དང་སྣུམ་ཉུང་ཙམ་རེ་དང་། སྤོས་དཀར་ཡོངས་རྫོགས་བཅས་སྦྱིན་སྲེག་གཏོང་བ་དང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཡིན་ནོ། །
LEV 3:1 གལ་སྲིད་མི་ཞིག་གིས་ཞི་བདེའི་མཆོད་པ་འབུལ་བ་དང་། བ་ཁྱུ་ལས་འབུལ་ན་ཕོ་ཕྱུགས་མོ་ཕྱུགས་གང་ཡིན་ཡང་སྐྱོན་གྱི་དྲི་མས་མ་གོས་པ་ཞིག་དཀོན་མཆོག་ཡ་ཝཱེའི་དྲུང་དུ་འབུལ་དགོས་པ་དང་།
LEV 3:2 ཁོས་མཆོད་པར་འབུལ་བྱའི་ཕྱུགས་ཟོག་དེའི་མགོ་ལ་ལག་པ་བཞག་ནས་མཇལ་འཕྲད་གུར་མཆོག་གི་སྒོ་ཁ་རུ་བཤའ་དགོས་ཤིང་། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས།
LEV 3:3 ཞི་བདེའི་མཆོད་པ་ལས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་དགོས་པ་འདི་ལྟ་སྟེ། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།
LEV 3:4 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་ནི་མཁལ་མ་དང་བཅས་ལེན་པར་བྱའོ། །
LEV 3:5 དེ་ཡང་ཨ་རོན་གྱི་བུ་རྣམས་ཀྱིས་དེ་རྣམས་མཆོད་ཁྲིའི་སྟེང་གི་མེ་དང་བུད་ཤིང་དང་། སྦྱིན་སྲེག་བཅས་ཀྱི་སྟེང་ལ་བཞག་ནས་སྦར་དགོས་ལ། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །
LEV 3:6 ཅི་སྟེ་མི་ཞིག་གིས་དཀོན་མཆོག་ཡ་ཝཱེ་ལ་མཆོད་པའི་ཕྱིར་ཞི་བདེའི་མཆོད་པ་འབུལ་བ་དང་། ར་ལུག་གི་ཁྱུ་ལས་འབུལ་བ་ཡིན་ན་ཕོ་ཕྱུགས་མོ་ཕྱུགས་གང་ཡིན་ཡང་། དེ་ནི་སྐྱོན་གྱི་དྲི་མས་མ་གོས་པ་ཞིག་ཡིན་དགོས།
LEV 3:7 གལ་སྲིད་ཁོས་ལུ་གུ་ཞིག་མཆོད་པར་འབུལ་ན་དེ་དཀོན་མཆོག་ཡ་ཝཱེའི་དྲུང་དུ་འབུལ་དགོས་པ་དང་།
LEV 3:8 མཆོད་པར་འབུལ་བྱའི་ཕྱུགས་ཟོག་གི་མགོ་ལ་ལག་པ་བཞག་ནས་མཇལ་འཕྲད་གུར་མཆོག་གི་མདུན་དུ་བཤའ་དགོས་ཤིང་། ཨ་རོན་གྱི་བུ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས་སོ། །
LEV 3:9 དེ་ནས་ཞི་བདེའི་མཆོད་པ་ལས། ཁོས་ཚིལ་བླངས་ནས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་དགོས་པ་འདི་ལྟ་སྟེ། སྒལ་ཚིགས་ནས་བླངས་པའི་རྔ་མ་ཚོན་པོ་ཧྲིལ་པོ་དང་། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།
LEV 3:10 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་ནི་མཁལ་མ་དང་བཅས་ལེན་དགོས་སོ། །
LEV 3:11 ཡང་མཆོད་དཔོན་གྱིས་དེ་རྣམས་མཆོད་ཁྲིའི་སྟེང་སྦྱིན་སྲེག་གཏོང་དགོས་ལ། དེ་ནི་དཀོན་མཆོག་ཡ་ཝཱེ་ལ་ཞལ་ཟས་སུ་ཕུལ་བའི་མེ་མཆོད་ཡིན་ནོ། །
LEV 3:12 གལ་སྲིད་སུ་ཞིག་གི་མཆོད་པ་ནི་ར་ཞིག་ཡིན་ན། དེ་དཀོན་མཆོག་ཡ་ཝཱེའི་དྲུང་དུ་འབུལ་དགོས་པ་དང་།
LEV 3:13 དེའི་མགོ་ལ་ལག་པ་བཞག་ནས་མཇལ་འཕྲད་གུར་མཆོག་གི་མདུན་དུ་བཤའ་དགོས་པ་དང་། ཨ་རོན་གྱི་བུ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས་སོ། །
LEV 3:14 ཡང་མཆོད་པ་དེ་ལས་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས་པ་འདི་ལྟ་སྟེ། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།
LEV 3:15 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་དེ་མཁལ་མ་དང་བཅས་ལེན་དགོས་སོ། །
LEV 3:16 མཆོད་དཔོན་གྱིས་དེ་དག་དྲི་ཞིམ་མེ་མཆོད་ཀྱི་ཞལ་ཟས་སུ་མཆོད་ཁྲིའི་སྟེང་སྦྱིན་སྲེག་གཏོང་དགོས་ལ། ཚིལ་ཐམས་ཅད་དཀོན་མཆོག་ཡ་ཝཱེའི་ཡིན་ནོ། །
LEV 3:17 ཁྱོད་རྣམས་ཀྱི་སྡོད་གནས་ཐམས་ཅད་དུ་ཚིལ་དང་ཁྲག་གང་ཡིན་ཡང་བཟའ་མི་རུང་ལ། དེ་ནི་ཁྱོད་ཅག་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས་ཞེས་པའོ་གསུངས་སོ། །
LEV 4:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 4:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གལ་སྲིད་སུ་ཞིག་གིས་མ་ཤེས་པར་སྡིག་པ་སྤྱད་ཅིང་། བྱ་བ་གང་རུང་གི་སྟེང་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་དང་འགལ་བའམ།
LEV 4:3 ཡང་ན་སྣུམ་གྱིས་བྱུགས་པའི་མཆོད་དཔོན་གྱིས་སྡིག་པ་བྱས་ནས། མི་རྣམས་ཉེས་པའི་ནང་ལྷུང་དུ་བཅུག་ན། རང་གིས་བྱས་པའི་སྡིག་པའི་དོན་དུ་སྒོ་ཕྱུགས་ལས་གླང་ཐུག་སྐྱོན་མེད་པ་ཞིག་དཀོན་མཆོག་ཡ་ཝཱེ་ལ་སྡིག་བཤགས་མཆོད་པར་འབུལ་དགོས།
LEV 4:4 ཁོས་གླང་ཐུག་དེ་མཇལ་འཕྲད་གུར་མཆོག་གི་སྒོ་ཁར་ཁྲིད་ནས། དཀོན་མཆོག་ཡ་ཝཱེའི་དྲུང་དུ་གླང་ཐུག་གི་མགོ་ལ་ལག་པ་བཞག་ནས་དེ་དཀོན་མཆོག་ཡ་ཝཱེའི་སྤྱན་སྔར་བཤའ་དགོས།
LEV 4:5 སྣུམ་གྱིས་བྱུགས་པའི་མཆོད་དཔོན་གྱིས་གླང་ཐུག་གི་ཁྲག་ཉུང་ཙམ་བླངས་ནས་མཇལ་འཕྲད་གུར་མཆོག་ཏུ་འཁྱེར་འོང་བ་དང་།
LEV 4:6 མཆོད་དཔོན་གྱིས་མཛུབ་མོ་ཁྲག་ནང་བསྒྲེས་ནས། དཀོན་མཆོག་ཡ་ཝཱེའི་སྤྱན་སྔར་དམ་པའི་གནས་ཀྱི་ཡོལ་བར་གཏད་ནས་ལན་བདུན་གཏོར་དགོས།
LEV 4:7 ཡང་ཁྲག་ཉུང་ཙམ་ཞིག་མཇལ་འཕྲད་གུར་མཆོག་གི་ནང་དུ་འབྱུག་དགོས་ཏེ། དཀོན་མཆོག་ཡ་ཝཱེའི་དྲུང་དུ་སྤོས་སྒྲོམ་གྱི་རུ་ཐུར་བཞི་པོར་འབྱུག་དགོས་པ་དང་། དེ་ནས་གླང་ཐུག་གི་ཁྲག་ལྷག་མ་ཡོངས་རྫོགས་མཇལ་འཕྲད་གུར་མཆོག་གི་སྒོ་ཁ་རུ་ཡོད་པའི་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །
LEV 4:8 ཡང་སྡིག་བཤགས་མཆོད་པར་འབུལ་བའི་གླང་ཐུག་དེའི་ཚིལ་ཐམས་ཅད་དེ། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།
LEV 4:9 མཁལ་མ་གཉིས་དང་དེའི་ཚིལ་ཏེ་མཁལ་མའི་ལོགས་གཉིས་ཀྱི་ཚིལ་དང་། མཆིན་པའི་རྩ་རྒྱུས་དེ་མཁལ་མ་དང་བཅས་ལེན་དགོས།
LEV 4:10 དེ་ནི་ཞི་བདེའི་མཆོད་པར་ཕུལ་བའི་གླང་ཐུག་ནས་བླངས་པ་བཞིན་ཡིན་དགོས་ཤིང་། མཆོད་དཔོན་གྱིས་དེ་རྣམས་སྦྱིན་སྲེག་གི་མཆོད་ཁྲིའི་སྟེང་སྦར་དགོས་སོ། །
LEV 4:11 ཡིན་ནའང་གླང་ཐུག་གི་པགས་པ་དང་ཤ་ཐམས་ཅད་དང་། མགོ་དང་བརླ་རྐང་དང་ནང་ཁྲོལ་དང་ལྕི་བ་བཅས་ཏེ།
LEV 4:12 གླང་ཐུག་ཧྲིལ་པོ་སྒར་ཁའི་ཕྱི་རོལ་གྱི་གཙང་ས་སྟེ། ཐལ་བ་འཕོ་སའི་གནས་སུ་ཁྱེར་ནས་བུད་ཤིང་སྟེང་དུ་མེར་བསྲེག་དགོས།
LEV 4:13 གལ་སྲིད་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཀྱིས་མ་ཤེས་པར་ཉེས་སྐྱོན་བཟོས་པ་དང་། བྱ་བ་གང་རུང་གི་སྟེང་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་དང་འགལ་ནས་ཉེས་པ་བསགས་ཡོད་ཅིང་། མི་ཚོགས་ཀྱིས་སྦས་པའི་དོན་དེ་མ་རྟོགས་ན།
LEV 4:14 དེ་རྣམས་ཀྱིས་སྡིག་པ་བསགས་པ་ཤེས་མ་ཐག་སྒོ་ཕྱུགས་ལས་གླང་ཐུག་ཅིག་སྡིག་བཤགས་མཆོད་པར་འབུལ་དགོས་པ་དང་། དེ་མཇལ་འཕྲད་གུར་མཆོག་གི་མདུན་དུ་འཁྲིད་འོང་དགོས་སོ། །
LEV 4:15 མི་ཚོགས་ཀྱི་རྒན་པོ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་གླང་ཐུག་གི་མགོ་ལ་ལག་པ་བཞག་ནས། དེ་དཀོན་མཆོག་ཡ་ཝཱེའི་དྲུང་དུ་བཤའ་དགོས།
LEV 4:16 སྣུམ་གྱིས་བྱུགས་པའི་མཆོད་དཔོན་གྱིས་གླང་ཐུག་གི་ཁྲག་ལས་ཉུང་ཙམ་བླངས་ཏེ་མཇལ་འཕྲད་གུར་མཆོག་ཏུ་འཁྱེར་འོང་དགོས།
LEV 4:17 མཆོད་དཔོན་གྱིས་མཛུབ་མོ་ཁྲག་ནང་བསྒྲེས་ནས་དཀོན་མཆོག་ཡ་ཝཱེའི་སྤྱན་སྔར་ཡོལ་བར་གཏད་དེ་ལན་བདུན་གཏོར་དགོས།
LEV 4:18 ཡང་ཁྲག་ཉུང་ཙམ་ཅིག་མཇལ་འཕྲད་གུར་མཆོག་གི་ནང་དུ་འབྱུག་དགོས་ཏེ། དཀོན་མཆོག་ཡ་ཝཱེའི་དྲུང་དུ་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། དེ་ནས་ཁྲག་ལྷག་མ་ཡོངས་རྫོགས་མཇལ་འཕྲད་གུར་མཆོག་གི་སྒོ་ཁ་རུ་ཡོད་པའི་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །
LEV 4:19 ཁོས་དེའི་ཚིལ་ཐམས་ཅད་བླངས་ནས་མཆོད་ཁྲིའི་སྟེང་སྦྱིན་སྲེག་གཏོང་དགོས།
LEV 4:20 ཁོས་སྡིག་བཤགས་མཆོད་པའི་གླང་ཐུག་དེ་ཇི་ལྟར་ཕུལ་བ་བཞིན་དུ་གླང་ཐུག་འདི་ཡང་དེ་ལྟར་འབུལ་དགོས་ལ། མཆོད་དཔོན་གྱིས་དེ་དག་གི་སྡིག་པ་བཤག་པར་བྱ་ཞིང་དེ་ཚོར་སྡིག་སེལ་འཐོབ་པར་འགྱུར་རོ། །
LEV 4:21 ཡང་ཁོས་གླང་ཐུག་སྒར་ཁའི་ཕྱི་རོལ་ཏུ་ཁྱེར་ནས། གླང་ཐུག་སྔོན་མ་དེ་བཞིན་མེར་བསྲེག་དགོས། དེ་ནི་མི་ཚོགས་ཀྱི་སྡིག་བཤགས་མཆོད་པ་ཡིན་ནོ། །
LEV 4:22 གལ་སྲིད་འགོ་དཔོན་ཞིག་གིས་སྡིག་པ་སྤྱད་ཅིང་། བྱ་བ་གང་རུང་གི་སྟེང་མ་ཤེས་པར་ཁོའི་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་དང་འགལ་ཏེ་ཉེས་པ་བསགས་ན།
LEV 4:23 ཁོས་རང་གིས་སྡིག་པ་བྱས་པ་ཤེས་མ་ཐག ར་ཐུག་སྐྱོན་གྱི་དྲི་མས་མ་གོས་པ་ཞིག་ཁྲིད་འོངས་ནས་མཆོད་པར་འབུལ་དགོས་ཤིང་།
LEV 4:24 ར་ཐུག་གི་མགོར་ལག་པ་བཞག་ནས་དཀོན་མཆོག་ཡ་ཝཱེའི་དྲུང་དུ་སྦྱིན་སྲེག་གི་ཕྱུགས་ཟོག་བཤའ་སའི་གནས་དེར་བཤའ་དགོས་ལ། དེ་ནི་སྡིག་བཤགས་མཆོད་པ་ཡིན་ནོ། །
LEV 4:25 མཆོད་དཔོན་གྱིས་མཛུབ་མོ་སྡིག་བཤགས་མཆོད་པར་ཕུལ་བའི་ཕྱུགས་ཟོག་གི་ཁྲག་ནང་བསྒྲེས་ནས། སྦྱིན་སྲེག་གི་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། དེ་ནས་ཁྲག་ལྷག་མ་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །
LEV 4:26 དེ་ཡང་ཞི་བདེའི་མཆོད་པའི་ཚིལ་དང་འདྲ་བར་དེའི་ཚིལ་ཐམས་ཅད་མཆོད་ཁྲིའི་སྟེང་བསྲེག་དགོས་པ་དང་། མཆོད་དཔོན་གྱིས་ཁོའི་ཕྱིར་དུ་སྡིག་པ་བཤགས་ནས་ཁོ་ལ་སྡིག་སེལ་འཐོབ་པར་འགྱུར་རོ། །
LEV 4:27 གལ་སྲིད་མི་རྣམས་ལས་སུ་ཞིག་གིས་མ་ཤེས་པར་སྡིག་པ་བྱས་ཤིང་། བྱ་བ་གང་རུང་གི་སྟེང་དུ་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་ལ་འགལ་ནས་ཉེས་པ་བསགས་ན།
LEV 4:28 ཁོས་རང་གིས་སྡིག་པ་བྱས་པ་ཤེས་མ་ཐག་རང་བྱས་ཀྱི་སྡིག་པའི་ཕྱིར་དུ་ར་མ་སྐྱོན་མེད་པ་ཞིག་ཁྲིད་ཡོང་སྟེ་མཆོད་པར་འབུལ་དགོས་པ་དང་།
LEV 4:29 སྡིག་བཤགས་མཆོད་པར་འབུལ་བའི་ཕྱུགས་ཟོག་གི་མགོ་ལ་ལག་པ་བཞག་ནས་སྦྱིན་སྲེག་གི་ཕྱུགས་ཟོག་འབུལ་བའི་གནས་སུ་དེ་བཤའ་དགོས།
LEV 4:30 མཆོད་དཔོན་གྱིས་མཛུབ་མོ་ཕྱུགས་ཟོག་གི་ཁྲག་ནང་བསྒྲེས་ཏེ། སྦྱིན་སྲེག་གི་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། ཁྲག་ལྷག་མ་ཡོངས་རྫོགས་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །
LEV 4:31 དེ་ཡང་ཞི་བདེའི་མཆོད་པར་ཕུལ་བའི་ཕྱུགས་ཟོག་གི་ཚིལ་དང་འདྲ་བར་དེའི་ཚིལ་ཐམས་ཅད་ལེན་པ་དང་། མཆོད་དཔོན་གྱིས་ཚིལ་རྣམས་མཆོད་ཁྲིའི་སྟེང་དུ་དཀོན་མཆོག་ཡ་ཝཱེ་ལ་དྲི་ཞིམ་མཆོད་པར་འབུལ་དགོས། མཆོད་དཔོན་གྱིས་ཁོའི་ཕྱིར་དུ་སྡིག་པ་བཤགས་ནས་ཁོ་ལ་སྡིག་སེལ་འཐོབ་པར་འགྱུར་རོ། །
LEV 4:32 གལ་སྲིད་མི་ཞིག་གིས་ལུག་ཅིག་ཁྲིད་འོངས་ཏེ་སྡིག་བཤགས་མཆོད་པར་འབུལ་ན། མོ་ལུག་སྐྱོན་མེད་པ་ཞིག་ཁྲིད་ཡོང་ནས་འབུལ་དགོས།
LEV 4:33 ཁོས་སྡིག་བཤགས་མཆོད་པར་འབུལ་བའི་ཕྱུགས་ཟོག་གི་མགོ་ལ་ལག་པ་བཞག་ནས། སྦྱིན་སྲེག་གི་ཕྱུགས་ཟོག་བཤའ་བའི་གནས་སུ་དེ་བཤས་ནས་སྡིག་བཤགས་མཆོད་པར་འབུལ་དགོས།
LEV 4:34 མཆོད་དཔོན་གྱིས་མཛུབ་མོ་སྡིག་བཤགས་མཆོད་པར་ཕུལ་བའི་ཕྱུགས་ཟོག་གི་ཁྲག་ནང་དུ་བསྒྲེས་ཏེ། སྦྱིན་སྲེག་གི་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། དེ་ནས་ཁྲག་ལྷག་མ་ཡོངས་རྫོགས་མཆོད་ཁྲིའི་ཞབས་རའི་སྟེང་དུ་ལྡུག་དགོས་ལ།
LEV 4:35 ཡང་ཞི་བདེའི་མཆོད་པར་ཕུལ་བའི་ལུག་གི་ཚིལ་དང་འདྲ་བར་དེའི་ཚིལ་ཐམས་ཅད་ལེན་པ་དང་། མཆོད་དཔོན་གྱིས་ཚིལ་རྣམས་དཀོན་མཆོག་ཡ་ཝཱེ་ལ་མཆོད་ཁྲིའི་མེ་མཆོད་ཐོག་ཏུ་སྦྱིན་སྲེག་གཏོང་དགོས། མཆོད་དཔོན་གྱིས་ཁོས་བསགས་པའི་སྡིག་པ་བཤག་པར་བྱ་ཞིང་། ཁོ་ལ་སྡིག་སེལ་འཐོབ་པར་འགྱུར་རོ། །
LEV 5:1 གལ་སྲིད་མི་ཞིག་གིས་སྡིག་པ་བྱས་པ་སྟེ། མནའ་བསྐྱལ་བའི་གཏམ་ཐོས་ཤིང་ཁོ་རང་དཔང་བོ་ཡིན་ནའང་། ཁོས་ཅི་མཐོང་བ་གང་ཤེས་པ་དེ་སྙན་སེང་མ་ཞུས་ན། ངེས་པར་རང་གི་ཆད་པ་འཁུར་དགོས།
LEV 5:2 ཡང་མི་ཞིག་གིས་མི་གཙང་བའི་རྫས་གང་རུང་སྟེ། གཅན་གཟན་མི་གཙང་བའི་རོའམ། སྒོ་ཕྱུགས་མི་གཙང་བའི་རོའམ། ལྟོ་འགྲོ་སེམས་ཅན་མི་གཙང་བའི་རོ་ལ་རེག་པ་གང་ཡིན་ཡང་། མི་དེས་མ་ཤེས་ནའང་མི་གཙང་བ་ཡིན་པས་ཉེས་པ་ཡོད་དོ། །
LEV 5:3 ཡང་ན་ཁོས་མི་ལས་བྱུང་བའི་མི་གཙང་བའི་རྫས་གང་རུང་སྟེ། མི་བཙོག་པར་བྱེད་པའི་མི་གཙང་བའི་རྫས་གང་རུང་ཞིག་ལ་རེག་ན། ཁོས་མ་ཤེས་ནའང་དེ་མི་གཙང་བ་ཡིན་པ་རྟོགས་ན་དེ་ནི་ཉེས་པ་ཡིན།
LEV 5:4 ད་དུང་མི་ཞིག་གིས་ཁ་ནས་ཅི་མི་སྙམ་པར་མནའ་བསྐྱལ་ན། ངན་སེམས་བཟང་སེམས་གང་ཞིག་བཅངས་ནས་བསྐྱལ་ནའང་། དེས་འཛེམ་དོགས་མེད་པར་དོན་གང་ཞིག་གི་སྟེང་ཅི་མི་སྙམ་པར་མནའ་བསྐྱལ་བ་ཡིན་ན། ནམ་ཞིག་ཁོས་ཤེས་མ་ཐག་ཏུ་དེའི་ནང་གི་དོན་ཞིག་གི་སྟེང་ཉེས་པ་ཡོད།
LEV 5:5 ཁོ་ལ་དེའི་ནང་གི་དོན་གང་རུང་ཞིག་གི་སྟེང་ཉེས་པ་ཡོད་ཚེ་སྡིག་པ་མཐོལ་བཤགས་བྱེད་དགོས་ལ།
LEV 5:6 རང་བྱས་ཀྱི་སྡིག་པའི་ཕྱིར་དུ། རང་གི་ཉེས་སེལ་མཆོད་པའི་ཕྱུགས་ཏེ། ལུག་ཁྱུ་ལས་མོ་ལུག་གཅིག་གམ་ཡང་ན་ར་མ་གཅིག་དཀོན་མཆོག་ཡ་ཝཱེ་ལ་སྡིག་བཤགས་མཆོད་པར་འབུལ་དགོས་ཤིང་། མཆོད་དཔོན་གྱིས་ཁོ་རང་གི་སྡིག་པ་བཤག་པར་བྱེད་དོ། །
LEV 5:7 གལ་སྲིད་མི་དེས་ལུ་གུ་གཅིག་འབུལ་མི་ནུས་ན། རང་བྱས་ཀྱི་སྡིག་པའི་ཕྱིར་དུ། བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་དཀོན་མཆོག་ཡ་ཝཱེ་ལ་ཉེས་སེལ་མཆོད་པར་འབུལ་དགོས་ཏེ། གཅིག་ནི་སྡིག་བཤགས་མཆོད་པར་འབུལ་བ་དང་། ཅིག་ཤོས་ནི་སྦྱིན་སྲེག་ཏུ་འབུལ་བར་བྱའོ། །
LEV 5:8 ཁོས་དེ་རྣམས་མཆོད་དཔོན་གྱི་དྲུང་དུ་འཁྱེར་འོང་བ་དང་། མཆོད་དཔོན་གྱིས་ཐོག་མར་སྡིག་བཤགས་མཆོད་པ་འབུལ་བ་སྟེ། འདབ་ཆགས་ཀྱི་སྐེ་གཅུས་ནའང་དེ་གཅོད་པར་མི་བྱ།
LEV 5:9 མཆོད་དཔོན་གྱིས་སྡིག་བཤགས་མཆོད་པའི་འདབ་ཆགས་ཀྱི་ཁྲག་ཉུང་ཙམ་ཞིག་མཆོད་ཁྲིའི་ལོགས་སུ་གཏོར་བ་དང་། ཁྲག་ལྷག་མ་རྣམས་མཆོད་ཁྲིའི་ཞབས་རའི་སྟེང་ལྡུག་དགོས། དེ་ནི་སྡིག་བཤགས་མཆོད་པ་ཡིན་ནོ། །
LEV 5:10 ཡང་ཁོས་སྲོལ་ཡིག་བཞིན་དུ་འདབ་ཆགས་གཞན་པ་དེ་སྦྱིན་སྲེག་ཏུ་འབུལ་དགོས་ཤིང་། མཆོད་དཔོན་གྱིས་མི་དེའི་རང་བྱས་ཀྱི་སྡིག་པ་བཤག་དགོས་ལ། མི་དེར་སྡིག་སེལ་འཐོབ་པར་འགྱུར་རོ། །
LEV 5:11 གལ་སྲིད་ཁོས་བྱ་ཐི་བ་གཉིས་སམ་ཡང་ན་ཕུག་རོན་ཆུང་ངུ་གཉིས་འབུལ་མི་ནུས་ན། རང་བྱས་ཀྱི་སྡིག་པའི་ཕྱིར་དུ་གྲོ་ཞིབ་ཨེ་ཕཱ་གཅིག་གི་བཅུ་ཆ་གཅིག་སྡིག་བཤགས་མཆོད་པར་འབུལ་དགོས། དེའི་སྟེང་སྣུམ་དང་སྤོས་དཀར་གང་ཡང་འཇོག་མི་དགོས། ཅི་ལ་ཞེ་ན། དེ་ནི་སྡིག་བཤགས་མཆོད་པ་ཡིན་པའི་ཕྱིར་རོ། །
LEV 5:12 དེ་ཡང་ཁོས་གྲོ་ཞིབ་དེ་མཆོད་དཔོན་གྱི་དྲུང་དུ་འཁྱེར་འོང་བ་དང་། མཆོད་དཔོན་གྱིས་དེ་ལས་ཁྱོར་བ་གང་དྲན་རྟེན་དུ་བླངས་ནས། མཆོད་ཁྲིའི་སྟེང་དཀོན་མཆོག་ཡ་ཝཱེའི་མེ་མཆོད་ཀྱི་ཁར་སྦྱིན་སྲེག་གཏོང་དགོས་ལ། དེ་ནི་སྡིག་བཤགས་མཆོད་པ་ཡིན།
LEV 5:13 ཡང་ཁོས་དོན་དེ་རྣམས་ཀྱི་ཐད་བསགས་པའི་སྡིག་པ་གང་ཡིན་ནའང་། མཆོད་དཔོན་གྱིས་མི་དེའི་སྡིག་པ་དེ་བཤག་པར་བྱ་ཞིང་དེ་ལ་སྡིག་སེལ་འཐོབ་པར་འགྱུར། དེའི་ལྷག་མ་ནི་འབྲུ་རིགས་ཀྱི་མཆོད་པ་དང་འདྲ་བར་ཡོངས་རྫོགས་མཆོད་དཔོན་ལ་དབང་བར་འགྱུར་ཞེས་བཤད་དགོས་པར་བཀའ་བསྩལ་ཏོ། །
LEV 5:14 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 5:15 གལ་སྲིད་མི་ཞིག་གིས་མ་ཤེས་པར་དཀོན་མཆོག་ཡ་ཝཱེའི་མཆོད་རྫས་དམ་པ་རྣམས་ཀྱི་སྟེང་དུ་སྡིག་པ་བྱས་ནས་ཉེས་པ་བསགས་ན། ལུག་ཁྱུ་ལས་སྐྱོན་མེད་པའི་ལུག་ཐུག་ཅིག་དཀོན་མཆོག་ཡ་ཝཱེ་ལ་ཉེས་སེལ་མཆོད་པ་རུ་འབུལ་བའམ། ཡང་ན་གནས་མཆོག་གི་སྲང་ལྟར་དངུལ་སྲང་གི་ཚོད་རྩིས་བྱས་པའི་རིན་འབབ་བཞིན་དུ་ཉེས་སེལ་མཆོད་པར་འབུལ་དགོས།
LEV 5:16 ཁོས་མཆོད་རྫས་དམ་པའི་ཐད་ནོར་འཛོལ་གང་ཞིག་བཟོས་པར་སྐྱིན་ཚབ་འཇལ་ཆེད་དང་། དེའི་ཁར་ལྔ་ཆ་གཅིག་བསྣན་ཏེ་མཆོད་དཔོན་ལ་སྤྲོད་པ་དང་། མཆོད་དཔོན་གྱིས་ཉེས་པ་སེལ་བྱེད་ལུག་ཐུག་གིས་ཁོའི་སྡིག་པ་བཤག་པར་བྱ་ཞིང་། ཁོ་ལ་སྡིག་སེལ་འཐོབ་པར་འགྱུར་རོ། །
LEV 5:17 གལ་སྲིད་མི་ཞིག་གིས་དོན་གང་རུང་གི་སྟེང་དུ་སྡིག་པ་བྱས་ཤིང་། དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་ལ་འགལ་ན། ཁོས་མ་ཤེས་ནའང་ཉེས་པ་རུ་བརྩི་ཞིང་རང་གི་ཆད་པ་འཁུར་དགོས་པ་ཡིན།
LEV 5:18 ཁོས་ལུག་ཁྱུ་ལས་ལུག་ཐུག་སྐྱོན་མེད་པ་ཞིག་འཁྲིད་ཡོང་བའམ། ཡང་ན་ཁྱོད་ཀྱིས་ཚོད་རྩིས་བྱས་པའི་རིན་འབབ་བཞིན། ཉེས་སེལ་མཆོད་པ་རུ་མཆོད་དཔོན་ལ་འབུལ་བ་དང་། མཆོད་དཔོན་གྱིས་ཁོའི་མ་ཤེས་མ་བསམ་ས་ནས་བྱས་པའི་སྡིག་པ་བཤག་པར་བྱ་ཞིང་། དེ་ལ་སྡིག་སེལ་འཐོབ་པར་འགྱུར་རོ། །
LEV 5:19 དེ་ནི་ཉེས་སེལ་མཆོད་པ་ཡིན་ཏེ། ཁོས་དཀོན་མཆོག་ཡ་ཝཱེའི་དྲུང་དུ་དངོས་སུ་ཉེས་པ་བཟོས་པའི་ཕྱིར་རོ་ཞེས་བཀའ་བསྩལ་ཏོ། །
LEV 6:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 6:2 གལ་སྲིད་མི་ཞིག་གིས་སྡིག་པ་བྱས་ནས་དཀོན་མཆོག་ཡ་ཝཱེ་ལ་འགལ་ཏེ། ཁྱིམ་མཚེས་ཀྱིས་ཁོ་ལ་བཅོལ་བའི་དངོས་པོའམ་གཏའ་མའི་སྟེང་གཡོ་སྒྱུའི་སྦྱོར་བ་སྤེལ་བའམ། འཕྲོག་པ། ཁྱིམ་མཚེས་ལ་བརྙས་བཅོས་བྱེད་པ།
LEV 6:3 བོར་དངོས་རྙེད་ཅིང་གཡོ་སྒྱུའི་སྦྱོར་བ་སྤེལ་ནས་མནའ་རྫུན་མ་སྐྱེལ་བ་དང་། མིས་བྱེད་སྲིད་པའི་ལས་གང་ཅིའི་ཐད་ནས་སྡིག་པ་བྱེད་པ་སྟེ།
LEV 6:4 ཁོས་སྡིག་པ་བྱས་ནས་ཉེས་པ་བསགས་ན། ཕྲོགས་ཏེ་ཁྱེར་བའམ་གཞན་ལ་བརྙས་བཅོས་བྱས་ནས་ཐོབ་པ། ཡང་ན་གཞན་གྱིས་ཁོ་ལ་བཅོལ་བ། ཡང་ན་ཁོས་རྙེད་པའི་བོར་དངོས།
LEV 6:5 ཡང་ན་མནའ་རྫུན་མ་བསྐྱལ་ནས་ཐོབ་པའི་དངོས་པོ་བཅས་གང་ཡིན་ཡང་ཕྱིར་སྤྲོད་དགོས་པ་སྟེ། ཁ་ཚང་ཕྱིར་སྤྲོད་དགོས་པར་མ་ཟད་དེའི་ཁར་ལྔ་ཆ་གཅིག་སྣོན་དགོས། ཁོ་ལ་ཉེས་པ་ཡོད་པ་རྩད་ཆོད་པའི་ཉིན་མོར་ལམ་སང་བདག་པོ་ལ་གུན་གསབ་སྤྲོད་དགོས་སོ། །
LEV 6:6 ཁོས་ལུག་ཁྱུ་ལས་སྐྱོན་མེད་པའི་ལུག་ཐུག་ཅིག་དཀོན་མཆོག་ཡ་ཝཱེ་ལ་ཉེས་སེལ་མཆོད་པ་རུ་འབུལ་དགོས་པའམ། ཡང་ན་ཁྱོད་ཀྱིས་ཚོད་རྩིས་བྱས་པའི་རིན་འབབ་བཞིན་དུ། ཉེས་སེལ་མཆོད་པའི་ཕྱིར་མཆོད་དཔོན་ལ་སྤྲོད་དགོས་ལ།
LEV 6:7 མཆོད་དཔོན་གྱིས་དཀོན་མཆོག་ཡ་ཝཱེའི་དྲུང་དུ་ཁོའི་སྡིག་པ་བཤག་པར་བྱ་ཞིང་། མི་དེས་དོན་གང་ཞིག་བྱས་ནས་ཉེས་པ་བསགས་ནའང་སྡིག་སེལ་འཐོབ་པར་འགྱུར་ཞེས་བཀའ་བསྩལ་ཏོ། །
LEV 6:8 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 6:9 ཁྱོད་ཀྱིས་ཨ་རོན་དང་ཁོའི་བུ་རྣམས་ལ་འདི་ལྟར་སྒོས་ཤིག སྦྱིན་སྲེག་གི་བཀའ་ཁྲིམས་ནི་འདི་ལྟ་སྟེ། སྦྱིན་སྲེག་ཏུ་འབུལ་བའི་མཆོད་པ་ནི་མཆོད་ཁྲིའི་སྟེང་ཞོགས་པའི་བར་དུ་མཚན་གང་པོར་འཇོག་དགོས་པ་དང་། མཆོད་ཁྲིའི་སྟེང་གི་མེ་ནི་ཆད་མེད་དུ་སྦར་དགོས།
LEV 6:10 མཆོད་དཔོན་གྱིས་སོ་རས་སྲབ་བུའི་སྟོད་གོས་དང་སྨད་གོས་ལུས་ལ་གྱོན་ནས། སྦྱིན་སྲེག་གི་མཆོད་ཁྲིའི་སྟེང་ལྷག་པའི་ཐལ་བ་བླངས་ནས་མཆོད་ཁྲིའི་ལོགས་སུ་འཇོག་དགོས་ལ།
LEV 6:11 དེ་ནས་གོས་དེ་རྣམས་ཕུད་ནས་གོས་གཞན་དག་གྱོན་པ་དང་། ཐལ་བ་སྒར་ཁའི་ཕྱི་རོལ་གྱི་གནས་གཙང་སར་འཁྱེར་དགོས།
LEV 6:12 ཡང་མཆོད་ཁྲི་སྟེང་གི་མེ་ནི་ཆད་མེད་དུ་འབར་དགོས་ཤིང་ཞི་མི་རུང་། ཉིན་རེའི་ཞོགས་པར་མཆོད་དཔོན་གྱིས་མཆོད་ཁྲིའི་སྟེང་དུ་བུད་ཤིང་སྦར་བ་དང་། དེའི་སྟེང་ཏུ་སྦྱིན་སྲེག་གི་མཆོད་པ་བཤམས་པར་མ་ཟད། ཞི་བདེའི་མཆོད་པའི་ཕྱུགས་ཟོག་གི་ཚིལ་རྣམས་སྦར་དགོས་སོ། །
LEV 6:13 མཆོད་ཁྲིའི་སྟེང་གི་མེ་ནི་རྒྱུན་ཆད་མེད་པར་འབར་དགོས་ཤིང་ནམ་ཡང་ཞི་མི་རུང་ངོ་། །
LEV 6:14 འབྲུ་རིགས་ཀྱི་མཆོད་པའི་བཀའ་ཁྲིམས་ནི་འདི་ལྟ་སྟེ། ཨ་རོན་གྱི་བུ་རྣམས་ཀྱིས་མཆོད་ཁྲིའི་མདུན་ནས་མཆོད་པ་འདི་དཀོན་མཆོག་ཡ་ཝཱེའི་དྲུང་དུ་འབུལ་དགོས།
LEV 6:15 མཆོད་དཔོན་གྱིས་འབྲུ་རིགས་ལས་གྲོ་ཞིབ་ཁྱོར་བ་གང་ཙམ་ལེན་པ་དང་། སྣུམ་ཉུང་ཙམ་དང་འབྲུ་རིགས་མཆོད་པའི་སྟེང་གི་སྤོས་དཀར་ཐམས་ཅད་བླངས་ནས། དེ་རྣམས་དྲན་རྟེན་གྱི་སྐལ་དུ་མཆོད་ཁྲིའི་སྟེང་སྦར་དགོས་ལ། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མཆོད་པ་ཡིན།
LEV 6:16 ཨ་རོན་དང་ཁོའི་བུ་རྣམས་ཀྱིས་འབྲུ་རིགས་ཀྱི་མཆོད་འཕྲོ་བཟའ་ཞིང་། གནས་དམ་པ་རུ་སྐྱུར་མེད་བག་ལེབ་འདི་བཟའ་དགོས་པ་སྟེ། མཇལ་འཕྲད་གུར་མཆོག་གི་ར་སྐོར་ནང་དུ་བཟའ་དགོས།
LEV 6:17 བསྲེག་གོར་ནང་དུ་སྐྱུར་རྩི་བསྲེ་མི་རུང་སྟེ། དེ་ནི་བདག་ལ་ཕུལ་བའི་མེ་མཆོད་རྣམས་ལས་བདག་གིས་དེ་དག་ལ་སྤྲད་པའི་སྐལ་ཡིན་པ་དང་། སྡིག་བཤགས་མཆོད་པ་དང་ཉེས་སེལ་མཆོད་པ་རྣམས་དང་འདྲ་བར་སྐལ་དེ་ནི་ཀུན་ལས་དམ་པ་ཡིན།
LEV 6:18 ཨ་རོན་གྱི་བུ་རྣམས་ལས་སྐྱེས་པ་ཀུན་གྱིས་དེ་བཟའ་བར་འགྱུར་ཞིང་། རྒྱུ་མཚན་དེ་ནི་མི་རབས་ནས་མི་རབས་བར་ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས། ཁོ་རྣམས་ལ་ནམ་ཡང་འཐོབ་འོས་པའི་སྐལ་ཡིན། མཆོད་པ་འདི་ལ་རེག་མཁན་ཐམས་ཅད་དམ་པར་འགྱུར་ཞེས་སྨྲ་དགོས་པར་བཀའ་བསྩལ་ཏོ། །
LEV 6:19 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 6:20 འདི་ནི་ཨ་རོན་ལ་སྣུམ་གྱིས་བྱུག་པའི་ཉིན་མོ་ཡིན་ལ། ཁོ་དང་ཁོའི་བུ་རྣམས་ཀྱིས་དཀོན་མཆོག་ཡ་ཝཱེ་ལ་འབུལ་དགོས་པའི་མཆོད་པ་ནི་འདི་ལྟ་སྟེ། ཨེ་ཕཱ་ཡི་བཅུ་ཆ་གཅིག་གི་གྲོ་ཞིབ་ནི་དུས་རྒྱུན་འབུལ་བའི་འབྲུ་རིགས་ཀྱི་མཆོད་པ་བཞིན་འབུལ་བ་དང་། དེའི་ཕྱེད་ཀ་ཞོགས་པ་དང་ཕྱེད་ཀ་དགོང་མོ་འབུལ་དགོས་སོ། །
LEV 6:21 དེ་ནི་ལྕགས་སླང་ནང་སྣུམ་བསྲེ་དགོས་ལ། བསྲེ་སྦྱོར་ཡག་པོ་བྱས་རྗེས་བསྲེག་དགོས། འབྲུ་རིགས་ཀྱི་མཆོད་པ་བསྲེགས་ནས་ཚོས་པ་ན་དུམ་བུར་བགོས་ཏེ་དཀོན་མཆོག་ཡ་ཝཱེ་ལ་དྲི་ཞིམ་མཆོད་པར་འབུལ་དགོས་པ་དང་།
LEV 6:22 ཨ་རོན་གྱི་བུ་རྣམས་ལས་མཆོད་དཔོན་དུ་བྱུགས་པ་དེས་འབྲུ་རིགས་ཀྱི་མཆོད་པ་འདི་འབུལ་དགོས་པ་དང་། ཡོངས་རྫོགས་དཀོན་མཆོག་ཡ་ཝཱེ་ལ་སྦྱིན་སྲེག་གཏོང་དགོས་ལ། དེ་ནི་དུས་གཏན་གྱི་བཀའ་ཁྲིམས་ཡིན།
LEV 6:23 མཆོད་དཔོན་གྱིས་འབྲུ་རིགས་ཀྱི་མཆོད་པ་ཡོངས་རྫོགས་ལྷག་ལུས་མེད་པར་བསྲེག་དགོས་པ་ལས་བཟའ་མི་རུང་ཞེས་བཀའ་བསྩལ་ཏོ། །
LEV 6:24 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 6:25 ཁྱོད་ཀྱིས་ཨ་རོན་དང་ཁོའི་བུ་རྣམས་ལ་འདི་ལྟར་སྒོས་ཤིག སྡིག་བཤགས་མཆོད་པའི་བཀའ་ཁྲིམས་ནི་འདི་ལྟ་སྟེ། དཀོན་མཆོག་ཡ་ཝཱེའི་སྤྱན་སྔར་སྦྱིན་སྲེག་གི་ཕྱུགས་ཟོག་བཤའ་སའི་གནས་དེར་སྡིག་བཤགས་མཆོད་པའི་ཕྱུགས་ཟོག་བཤའ་དགོས། དེ་ནི་ཀུན་ལས་དམ་པ་ཡིན་ནོ། །
LEV 6:26 སྡིག་བཤགས་མཆོད་པ་འབུལ་མཁན་མཆོད་དཔོན་གྱིས་འབུལ་བ་དེ་བཟའ་རུང་ལ། གནས་དམ་པ་སྟེ་མཇལ་འཕྲད་གུར་མཆོག་གི་ར་སྐོར་ནང་དུ་བཟའ་དགོས་སོ། །
LEV 6:27 མཆོད་པ་དེའི་ཤ་ལ་རེག་མཁན་ཐམས་ཅད་ནི་དམ་པ་ཡིན་དགོས་པ་དང་། དེའི་ཁྲག་སུའི་གོས་ལ་འགོས་པ་ཡིན་ན། ཁྱོད་ཀྱིས་གནས་དམ་པ་རུ་ཁྲག་འགོས་པའི་གོས་དེ་གཙང་མར་བཀྲུ་དགོས་སོ། །
LEV 6:28 མཆོད་རྫས་དེ་གདུ་བྱེད་ཀྱི་རྫ་སྣོད་གཅོག་དགོས། གལ་སྲིད་དེ་ནི་ལི་སྣོད་ལས་གདུས་པ་ཡིན་ན། དེ་གཙང་མར་དབྱི་དགོས་པ་དང་ཆུ་ཡིས་བཤལ་དགོས།
LEV 6:29 དེ་ནི་ཀུན་ལས་དམ་པ་ཡིན་ལ། མཆོད་དཔོན་རྣམས་ལས་སྐྱེས་པ་གང་ཡིན་གྱིས་བཟའ་རུང་ངོ་། །
LEV 6:30 གལ་སྲིད་སྡིག་བཤགས་མཆོད་པ་གང་རུང་གི་ཁྲག་མཇལ་འཕྲད་གུར་མཆོག་ཏུ་ཁྱེར་འོངས་པ་ཡིན་ན། གནས་དམ་པ་རུ་ཉེས་ཆད་བསལ་བའི་ཕྱིར་ཤ་དེ་བཟའ་མི་རུང་། དེ་ནི་མེ་ལ་བསྲེག་དགོས་སོ། །
LEV 7:1 ཉེས་སེལ་མཆོད་པའི་བཀའ་ཁྲིམས་ནི་འདི་ལྟ་སྟེ། མཆོད་པ་འདི་ནི་ཀུན་ལས་དམ་པ་ཡིན་ནོ། །
LEV 7:2 སྦྱིན་སྲེག་གི་ཕྱུགས་ཟོག་གནས་གང་དུ་བཤས་ན་སྡིག་བཤགས་མཆོད་བྱ་ཡང་གནས་དེ་རུ་བཤའ་དགོས་ལ། དེའི་ཁྲག་ནི་མཆོད་ཁྲིའི་ཕྱོགས་བཞི་རུ་གཏོར་དགོས།
LEV 7:3 མཆོད་དཔོན་གྱིས་དེའི་ཚིལ་ཐམས་ཅད་དེ། རྔ་མ་ཚོན་པོ་དང་། ནང་ཁྲོལ་བཏུམས་པའི་ཚིལ་དང་།
LEV 7:4 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་ནི་མཁལ་མ་དང་བཅས་ལེན་དགོས་པ་དང་།
LEV 7:5 མཆོད་དཔོན་གྱིས་དེ་རྣམས་མཆོད་ཁྲིའི་སྟེང་བསྲེགས་ནས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་དགོས། དེ་ནི་ཉེས་སེལ་མཆོད་པ་ཡིན་ནོ། །
LEV 7:6 མཆོད་དཔོན་རྣམས་ལས་སྐྱེས་པ་གང་ཡིན་གྱིས་དེ་བཟའ་རུང་ཞིང་། དེ་གནས་དམ་པར་བཟའ་དགོས་ལ། ཀུན་ལས་དམ་པ་ཡིན་ནོ། །
LEV 7:7 སྡིག་བཤགས་མཆོད་པ་ཅི་ལྟར་ཡིན་ན་ཉེས་སེལ་མཆོད་པའང་དེ་བཞིན་ཡིན་ལ། དེ་གཉིས་ཀྱི་བཀའ་ཁྲིམས་གཅིག་ཡིན། སྡིག་པ་བཤགས་མཁན་མཆོད་དཔོན་ལ་མཆོད་རྫས་དེ་འཐོབ་པར་འགྱུར།
LEV 7:8 སྦྱིན་སྲེག་འབུལ་བའི་མཆོད་དཔོན་གྱིས་སུ་ཞིག་གི་དོན་དུ་སྦྱིན་སྲེག་བཏང་ནའང་། སྦྱིན་སྲེག་ཏུ་ཕུལ་བའི་ཕྱུགས་ཟོག་གི་པགས་པ་ནི་མཆོད་དཔོན་དེ་ལ་དབང་བ་ཡིན།
LEV 7:9 མེ་ཐབ་ནང་དུ་བསྲེགས་པའམ། སླ་ང་དང་ལྕགས་སླང་ནང་དུ་བཟོས་པའི་འབྲུ་རིགས་ཀྱི་མཆོད་པ་གང་ཡིན་རུང་། ཐམས་ཅད་མཆོད་པ་འབུལ་བའི་མཆོད་དཔོན་ལ་དབང་དགོས།
LEV 7:10 འབྲུ་རིགས་ཀྱི་མཆོད་པ་རྣམས་ལས་སྣུམ་གྱིས་བསྲེ་སྦྱོར་བྱས་པའམ། སྐམ་པོ་ཡིན་པ་གང་ཡིན་རུང་ཐམས་ཅད་ཨ་རོན་གྱི་བུ་རྣམས་ལ་ཁྱད་མེད་དུ་བགོ་དགོས་སོ། །
LEV 7:11 དེ་ཡང་དཀོན་མཆོག་ཡ་ཝཱེ་ལ་འབུལ་བའི་ཞི་བདེའི་མཆོད་པ་རྣམས་ཀྱི་བཀའ་ཁྲིམས་ནི་འདི་ལྟ་སྟེ།
LEV 7:12 གལ་སྲིད་གཏང་རག་གི་མཆོད་པ་འབུལ་ན། སྐྱུར་མེད་བག་ལེབ་སྣུམ་བསྲེས་མ་དང་། ཡང་ན་སྐྱུར་མེད་གོར་ལེབ་སྲབ་བུ་སྣུམ་བྱུགས་མ། གྲོ་ཞིབ་བག་ལེབ་སྣུམ་གྱིས་བསྲེ་སྦྱོར་ཡག་པོ་བྱས་པ་བཅས་གཏང་རག་གི་མཆོད་པ་དང་མཉམ་དུ་འབུལ་དགོས།
LEV 7:13 སྐྱུར་ལྡན་བག་ལེབ་དང་བཅས་གཏང་རག་ཏུ་འབུལ་བའི་ཞི་བདེའི་མཆོད་པ་ནི་མཆོད་པ་དང་མཉམ་དུ་འབུལ་དགོས།
LEV 7:14 ཕུལ་བའི་མཆོད་པ་རྣམས་ལས་བག་ལེབ་གཅིག་རེ་དཀོན་མཆོག་ཡ་ཝཱེ་ལ་འདེགས་མཆོད་དུ་འབུལ་བ་སྟེ། ཞི་བདེའི་མཆོད་པའི་ཕྱུགས་ཟོག་གི་ཁྲག་གཏོར་མཁན་མཆོད་དཔོན་ལ་དབང་དགོས་སོ། །
LEV 7:15 གཏང་རག་ཏུ་ཕུལ་བའི་ཞི་བདེའི་མཆོད་པའི་ཤ་ནི། མཆོད་པར་འབུལ་བའི་ཉིན་དེ་རང་དུ་བཟའ་དགོས་ཏེ། ཞོགས་པའི་བར་དུ་ཅི་ཡང་ལྷག་མི་རུང་།
LEV 7:16 གལ་སྲིད་ཁོའི་མཆོད་པ་ནི་དམ་བཅའ་སྒྲུབ་པའི་མཆོད་པའམ། ཡང་ན་ཡིད་མོས་མཆོད་པ་ཡིན་ན། མཆོད་པར་འབུལ་བའི་ཉིན་དེ་རང་དུ་བཟའ་དགོས་ཤིང་། དེའི་ལྷག་མ་ནི་ཕྱི་ཉིན་ཡང་བཟའ་རུང་བ་ཡིན།
LEV 7:17 མཆོད་ཤ་ལྷག་མ་ནི་ཉིན་གསུམ་པར་མེ་ལ་བསྲེག་དགོས།
LEV 7:18 གལ་སྲིད་ཞི་བདེའི་མཆོད་པར་ཕུལ་བའི་ཤ་རྣམས་ཉིན་གསུམ་པར་ཟོས་ན་དེ་ཐུགས་ལ་ལྡན་པར་མི་འགྱུར་ལ། གང་ཞིག་ཕུལ་བ་དེ་ཡང་མཆོད་པར་མི་བརྩི། མཆོད་པ་དེ་ནི་མི་གཙང་བ་ཡིན་པས་དེ་ཟ་མཁན་གྱིས་རང་གི་ཉེས་པ་འཁུར་དགོས་སོ། །
LEV 7:19 དེ་ཡང་མི་གཙང་བའི་རྫས་ལ་རེག་པའི་ཤ་ནི་བཟའ་མི་རུང་སྟེ་མེ་ལ་བསྲེག་དགོས། ཤ་གཞན་ལ་མཚོན་ན་གཙང་མ་ཡིན་པའི་མི་སུས་ཀྱང་ཤ་དེ་བཟའ་རུང་ངོ་། །
LEV 7:20 འོན་ཀྱང་མི་གཙང་བ་སུ་ཞིག་གིས་གལ་ཏེ་དཀོན་མཆོག་ཡ་ཝཱེ་ལ་ཕུལ་བའི་ཞི་བདེའི་མཆོད་པའི་ཤ་ཟོས་ན། མི་དེ་ནི་རང་གི་མི་མང་ལས་མེད་པར་གཏོང་དགོས།
LEV 7:21 གལ་ཏེ་མི་ཞིག་གིས་མི་ལུས་ཀྱི་མི་གཙང་བའམ་ཕྱུགས་ཟོག་མི་གཙང་བ། ཡང་ན་ཞེ་མེར་བའི་རྫས་མི་གཙང་བ་གང་རུང་ལ་རེག་ནས། ཡང་དཀོན་མཆོག་ཡ་ཝཱེ་ལ་ཕུལ་བའི་ཞི་བདེའི་མཆོད་པའི་ཤ་ཟོས་ན། མི་དེ་ནི་རང་གི་མི་མང་ལས་མེད་པར་གཏོང་བར་བྱ་ཞེས་བཤད་དགོས་པར་བཀའ་གནང་ངོ་། །
LEV 7:22 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 7:23 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གླང་དང་ལུག་དང་ར་བཅས་ཀྱི་ཚིལ་གང་ཡང་ཁྱོད་རྣམས་ཀྱིས་བཟའ་མི་རུང་།
LEV 7:24 རང་བཞིན་གྱིས་ཤི་བའམ་གཅན་གཟན་གྱིས་བསད་པའི་ཕྱུགས་ཟོག་གི་ཚིལ་ནི་གཞན་ཅི་རིགས་སུ་སྤྱད་ཆོག་མོད། འོན་ཀྱང་གཏན་ནས་བཟའ་མི་རུང་ངོ་། །
LEV 7:25 སུ་ཞིག་གིས་དཀོན་མཆོག་ཡ་ཝཱེ་ལ་མེ་མཆོད་དུ་ཕུལ་བའི་ཕྱུགས་ཟོག་གི་ཚིལ་ཟོས་པ་ཡིན་ན། མི་དེ་ནི་རང་གི་མི་མང་ལས་མེད་པར་གཏོང་བར་བྱའོ། །
LEV 7:26 ཁྱོད་རྣམས་ཀྱི་སྡོད་གནས་གང་དུའང་། འདབ་ཆགས་སམ་ཕྱུགས་ཟོག་གི་ཁྲག་གང་ཡིན་ཡང་བཟའ་མི་རུང་།
LEV 7:27 སུ་ཞིག་གིས་ཁྲག་ཟོས་ན། མི་དེ་ནི་རང་གི་མི་མང་ལས་མེད་པར་གཏོང་བར་བྱ་ཞེས་སྨྲ་དགོས་པར་བཀའ་གནང་ངོ་། །
LEV 7:28 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 7:29 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག དཀོན་མཆོག་ཡ་ཝཱེ་ལ་ཞི་བདེའི་མཆོད་པ་འབུལ་མཁན་གྱིས་རང་གི་ཞི་བདེའི་མཆོད་པ་ལས་དཀོན་མཆོག་ཡ་ཝཱེ་ལ་མཆོད་པ་འབུལ་དགོས།
LEV 7:30 མི་དེས་དཀོན་མཆོག་ཡ་ཝཱེ་ལ་འབུལ་བའི་མེ་མཆོད་དངོས་སུ་འཁྱེར་འོང་དགོས་ཏེ། ཚིལ་དང་བྲང་ཁྱེར་འོངས་ནས་བྲང་ནི་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ཏེ་གཡོབ་མཆོད་དུ་འབུལ་དགོས།
LEV 7:31 མཆོད་དཔོན་གྱིས་ཚིལ་རྣམས་མཆོད་ཁྲིའི་སྟེང་བསྲེག་དགོས་ཀྱང་། བྲང་ནི་ཨ་རོན་དང་ཁོའི་བུ་རྣམས་ལ་དབང་བ་ཡིན།
LEV 7:32 ཁྱོད་རྣམས་ཀྱིས་ཞི་བདེའི་མཆོད་པའི་ཕྱུགས་ཟོག་གི་བརླ་གཡས་པ་འདེགས་མཆོད་བྱས་ནས་མཆོད་དཔོན་ལ་འབུལ་དགོས་པ་དང་།
LEV 7:33 ཨ་རོན་གྱི་བུ་རྣམས་ལས་སུ་ཞིག་གིས་ཞི་བདེའི་མཆོད་པའི་ཕྱུགས་ཟོག་གི་ཁྲག་དང་ཚིལ་ཕུལ་ན། དེ་ལ་འཐོབ་འོས་པའི་སྐལ་དུ་བརླ་གཡས་པ་འཐོབ་དགོས།
LEV 7:34 གང་ལ་ཞེ་ན། བདག་གིས་ཡེས་ར་ཨེལ་པ་རྣམས་གྱི་ཞི་བདེའི་མཆོད་པ་ལས་གཡོབ་མཆོད་ཀྱི་བྲང་དང་འདེགས་མཆོད་ཀྱི་བརླ་བླངས་ཏེ། མཆོད་དཔོན་ཨ་རོན་དང་ཁོའི་བུ་རྣམས་ལ་སྤྲད་པ་ཡིན་ལ། དེ་ནི་ཁོ་རྣམས་ལ་ཡེས་ར་ཨེལ་པ་རྣམས་ལས་གཏན་དུ་འཐོབ་འོས་པའི་སྐལ་ཡིན་ཞེས་སྨྲ་དགོས་པར་བཀའ་གནང་ངོ་། །
LEV 7:35 འདི་ནི་དཀོན་མཆོག་ཡ་ཝཱེའི་མེ་མཆོད་ལས་བླངས་པ་དང་། ཨ་རོན་དང་ཁོའི་བུ་རྣམས་ཀྱི་སྐལ་ཡིན་ཏེ། མོ་ཤེ་ཡིས་ཁོ་རྣམས་ཚུར་བོས་ཡོང་ནས། དཀོན་མཆོག་ཡ་ཝཱེ་ལ་མཆོད་དཔོན་གྱི་ལས་འགན་བསྒྲུབས་པའི་ཉིན་དེ་ནས་བཟུང་འགོ་བརྩམས་པའོ། །
LEV 7:36 དེ་ནི་མོ་ཤེ་ཡིས་ཨ་རོན་དང་ཁོའི་བུ་རྣམས་ལ་སྣུམ་གྱིས་བྱུགས་པའི་ཉིན་མོར། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་གནང་དགོས་པའི་བཀའ་གནང་བ་སྟེ། ཁོ་རྣམས་ལ་ཡེས་ར་ཨེལ་པ་རྣམས་ལས་མི་རབས་ནས་མི་རབས་བར་གཏན་དུ་འཐོབ་འོས་པའི་སྐལ་ཡིན།
LEV 7:37 འདི་ནི་སྦྱིན་སྲེག་དང་འབྲུ་རིགས་ཀྱི་མཆོད་པ་དང་། སྡིག་བཤགས་མཆོད་པ། ཉེས་སེལ་མཆོད་པ། བསྐོ་བར་བྱེད་པའི་མཛད་སྒོ། ཞི་བདེའི་མཆོད་པ་བཅས་ཀྱི་བཀའ་ཁྲིམས་ཡིན།
LEV 7:38 དེ་ཐམས་ཅད་ནི་དཀོན་མཆོག་ཡ་ཝཱེས་རི་བོ་སི་ནཱ་རུ་མོ་ཤེ་ལ་བསྩལ་པའི་བཀའ་ཡིན་ལ། ཁོང་གིས་སི་ནཱ་དབེན་སྟོང་དུ་ཡེས་ར་ཨེལ་པ་རྣམས་ལ། དཀོན་མཆོག་ཡ་ཝཱེ་ལ་མཆོད་པ་འབུལ་དགོས་པའི་བཀའ་བསྩལ་པའི་ཉིན་མོར་གསུངས་པའི་བཀའ་ཡང་ཡིན་ནོ། །
LEV 8:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 8:2 ཁྱོད་ཀྱིས་ཨ་རོན་དང་དེའི་བུ་རྣམས་ཁྲིད་ཤོག་དང་། ཡང་འཕགས་གོས་དང་འབྱུག་སྣུམ། སྡིག་བཤགས་མཆོད་པའི་གླང་ཐུག་གཅིག་དང་ལུག་ཐུག་གཉིས། སྐྱུར་མེད་བག་ལེབ་གཟེབ་གང་བཅས་འཁྱེར་འོང་དགོས།
LEV 8:3 ཡང་མི་ཚོགས་ཐམས་ཅད་མཇལ་འཕྲད་གུར་མཆོག་གི་སྒོ་ཁར་སྡུས་ཤིག་ཅེས་བཀའ་བསྩལ་ཏོ། །
LEV 8:4 དེ་ནས་མོ་ཤེ་ཡིས་དཀོན་མཆོག་ཡ་ཝཱེས་བསྩལ་པའི་བཀའ་བཞིན་དུ་བསྒྲུབས་ཏེ། མི་ཚོགས་རྣམས་མཇལ་འཕྲད་གུར་མཆོག་གི་སྒོ་ཁར་བསྡུས་པ་དང་།
LEV 8:5 མོ་ཤེ་ཡིས་མི་ཚོགས་ལ་འདི་ལྟར། འདི་ནི་དཀོན་མཆོག་ཡ་ཝཱེས་བསྒྲུབ་འོས་པར་གསུངས་པའི་དོན་རྣམས་ཡིན་ཞེས་གསུངས།
LEV 8:6 མོ་ཤེ་ཡིས་ཨ་རོན་དང་ཁོའི་བུ་རྣམས་ཁྲིད་འོངས་ཤིང་། དེ་དག་གི་ལུས་ཆུ་ཡིས་བཀྲུས་པ་དང་།
LEV 8:7 དེ་ནས་ཁོ་ལ་ནང་གོས་བསྐོན་ནས་སྐེད་ཆིངས་བཅིངས་པ་དང་གོས་རིང་བསྐོན་ཞིང་། བེར་ཐུལ་ཡང་བསྐོན་ཏེ། སྐ་རགས་སྤུས་དག་གིས་བེར་ཐུལ་དམ་པོར་བསྡམས།
LEV 8:8 ཡང་ཁོས་ཨ་རོན་ལ་བྲང་རྒྱན་ཡང་སྤྲས་པ་དང་། ཨུའུ་རིམ་དང་ཐུའུ་མིམ་ཞེས་པའི་རྟགས་རིལ་གཉིས་བྲང་རྒྱན་གྱི་ནང་དུ་བཅུག
LEV 8:9 དེ་ཡང་དཀོན་མཆོག་ཡ་ཝཱེས་མོ་ཤེ་ལ་བཀའ་བསྩལ་པ་བཞིན་དུ། ཁོས་ཨ་རོན་གྱི་མགོར་ལ་ཐོད་སྤྲས་ཤིང་། ལ་ཐོད་ཀྱི་མདུན་ངོས་སུ་དམ་པའི་ཅོད་པན་ཡིན་པའི་གསེར་གྱི་བྱང་བུ་བཏགས་སོ། །
LEV 8:10 དེ་ནས་མོ་ཤེ་ཡིས་འབྱུག་སྣུམ་གྱིས་གུར་མཆོག་དང་དེའི་ནང་གི་ཡོ་བྱད་ཐམས་ཅད་ལ་བྱུགས་ནས་དེ་རྣམས་དམ་པར་བྱས་པ་དང་།
LEV 8:11 ཡང་མཆོད་ཁྲིའི་སྟེང་འབྱུག་སྣུམ་ལན་བདུན་གཏོར་ནས། མཆོད་ཁྲི་དང་མཆོད་ཁྲིའི་ཡོ་བྱད་ཐམས་ཅད། ཁྲུས་གཞོང་དང་དེའི་སྟེགས་བུ་བཅས་སྣུམ་གྱིས་བྱུགས་ནས་དམ་པར་བྱས་སོ། །
LEV 8:12 ཨ་རོན་གྱི་མགོ་ལ་འབྱུག་སྣུམ་བླུགས་ནས་ཁོ་དམ་པར་བྱས་པ་དང་།
LEV 8:13 མོ་ཤེ་ཡིས་ཨ་རོན་གྱི་བུ་རྣམས་ཚུར་ཁྲིད་ཡོང་སྟེ། ཁོ་རྣམས་ལ་ནང་གོས་བསྐོན་ནས་སྐེད་ཆིངས་བཅིངས་པ་དང་པྲོག་ཞུ་དཀྲིས་ཤིང་། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །
LEV 8:14 དེ་ནས་ཁོས་སྡིག་བཤགས་མཆོད་པའི་གླང་ཐུག་ཁྲིད་འོངས་པ་དང་། ཨ་རོན་དང་ཁོའི་བུ་རྣམས་ཀྱིས་གླང་ཐུག་དེའི་མགོ་ལ་ལག་པ་བཞག་ནས།
LEV 8:15 གླང་ཐུག་བཤས་ཤིང་། མཆོད་ཁྲིའི་སྟེང་སྡིག་པ་བཤག་ཕྱིར། མོ་ཤེ་ཡིས་དེའི་ཁྲག་བླངས་ནས་མཛུབ་མོས་མཆོད་ཁྲིའི་མཐའ་འཁོར་གྱི་རུ་ཐུར་རྣམས་ལ་བྱུགས་ཏེ་མཆོད་ཁྲི་འདག་པར་བྱས། དེ་ནས་ཁྲག་ལྷག་མ་རྣམས་མཆོད་ཁྲིའི་ཞབས་རའི་སྟེང་བླུགས་ནས་མཆོད་ཁྲི་དམ་པར་བྱས་སོ། །
LEV 8:16 ཡང་མོ་ཤེ་ཡིས་ནང་ཁྲོལ་གྱི་ཚིལ་ཐམས་ཅད་དང་མཆིན་པའི་རྩ་རྒྱུས་དང་། མཁལ་མ་གཉིས་ཀ་དང་དེའི་སྟེང་གི་ཚིལ་བཅས་བླངས་ནས་མཆོད་ཁྲིའི་ཁར་བསྲེགས།
LEV 8:17 གླང་ཐུག་གི་པགས་པ་དང་ཤ་དང་ལྕི་བ་བཅས་ནི་སྒར་ཁའི་ཕྱི་རོལ་ཏུ་མེ་ལ་བསྲེགས་པ་དང་། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །
LEV 8:18 ཁོས་སྦྱིན་སྲེག་ཏུ་འབུལ་བའི་ལུག་ཐུག་ཁྲིད་འོངས་ཤིང་། ཨ་རོན་དང་ཁོའི་བུ་རྣམས་ཀྱིས་ལུག་ཐུག་གི་མགོར་ལག་པ་བཞག་ནས།
LEV 8:19 ལུག་ཐུག་བཤས་ཤིང་། མོ་ཤེ་ཡིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་བ་དང་།
LEV 8:20 ལུག་ཐུག་གི་ཤ་ལྷུ་ལྷུ་རུ་བཅད་རྗེས་མགོ་དང་ཤ་དང་ཚིལ་ཐམས་ཅད་བསྲེགས།
LEV 8:21 ཁོས་ནང་ཁྲོལ་དང་རྐང་ལག་རྣམས་ཆུས་བཀྲུས་ཤིང་ལུག་ཐུག་ཧྲིལ་པོ་མཆོད་ཁྲིའི་སྟེང་སྦྱིན་སྲེག་བཏང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་གྱི་མེ་མཆོད་ཡིན་ལ། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །
LEV 8:22 ཡང་ཁོས་བསྐོ་བར་བྱེད་པའི་ལུག་ཐུག་གཉིས་པ་ཁྲིད་འོངས་ཏེ། ཨ་རོན་དང་དེའི་བུ་རྣམས་ཀྱིས་ལུག་ཐུག་གི་མགོ་ལ་ལག་པ་བཞག་ནས།
LEV 8:23 ལུག་ཐུག་བཤས་ཤིང་། མོ་ཤེ་ཡིས་དེའི་ཁྲག་ལས་ཉུང་ཙམ་ཞིག་ཨ་རོན་གྱི་རྣ་ཤལ་གཡས་པ་དང་། ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་ལ་བྱུགས་སོ། །
LEV 8:24 ཡང་ཨ་རོན་གྱི་བུ་རྣམས་ཚུར་ཁྲིད་འོངས་ནས། ཁྲག་ཉུང་ཙམ་ཞིག་དེ་དག་གི་རྣ་ཤལ་གཡས་པ་དང་ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་སུ་བྱུགས་རྗེས། ཁྲག་ལྷག་མ་རྣམས་མཆོད་ཁྲིའི་ཕྱོགས་བཞི་རུ་གཏོར་ཏོ། །
LEV 8:25 ཁོས་ཚིལ་དང་རྔ་མ་ཚོན་པོ་དང་ནང་ཁྲོལ་གྱི་ཚིལ་ཐམས་ཅད་དང་། མཆིན་པའི་རྩ་རྒྱུས་དང་མཁལ་མ་གཉིས་ཀ་དང་དེའི་སྟེང་གི་ཚིལ་དང་། བརླ་གཡས་པ་བཅས་བླངས་ཤིང་།
LEV 8:26 དཀོན་མཆོག་ཡ་ཝཱེའི་དྲུང་ནས་སྐྱུར་མེད་བག་ལེབ་འཇོག་བྱེད་ཀྱི་གཟེབ་ལས་སྐྱུར་མེད་བག་ལེབ་གཅིག་དང་། སྣུམ་གོར་གཅིག་དང་བག་ལེབ་སྲབ་བུ་གཅིག་བཅས་བླངས་ཏེ། དེ་ཐམས་ཅད་ཚིལ་དང་བརླ་གཡས་པའི་སྟེང་དུ་བསྒྲིགས།
LEV 8:27 ཁོས་དེ་ཐམས་ཅད་ཨ་རོན་དང་དེའི་བུ་རྣམས་ཀྱི་ལག་ཏུ་བཞག་སྟེ། དཀོན་མཆོག་ཡ་ཝཱེའི་དྲུང་དུ་གཡོས་ཤིང་གཡོབ་མཆོད་དུ་ཕུལ་ཏོ། །
LEV 8:28 དེ་ནས་མོ་ཤེ་ཡིས་མཆོད་རྫས་དེ་དག་ཁོ་ཚོའི་ལག་ནས་བླངས་ཤིང་། མཆོད་ཁྲི་སྟེང་གི་སྦྱིན་སྲེག་དང་ལྷན་དུ་བསྲེགས། དེ་ནི་བསྐོ་བར་བྱེད་པའི་མཛད་སྒོ་ལས་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན།
LEV 8:29 མོ་ཤེ་ཡིས་ལུག་ཐུག་གི་བྲང་ཁོག་དེ་བླངས་ནས་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་ཕུལ། དེ་ནི་བསྐོ་བར་བྱེད་པའི་ལུག་ཐུག་ལས་མོ་ཤེ་ལ་ཐོབ་པའི་སྐལ་ཡིན་ལ། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །
LEV 8:30 མོ་ཤེ་ཡིས་འབྱུག་སྣུམ་དང་མཆོད་ཁྲིའི་སྟེང་གི་ཁྲག་ཉུང་ཙམ་བླངས་ཏེ། ཨ་རོན་དང་ཁོའི་གོས་དང་ཁོའི་བུ་རྣམས་དང་། ཁོའི་བུ་རྣམས་ཀྱི་གོས་ཀྱི་སྟེང་དུ་གཏོར་ནས་ཨ་རོན་དང་ཁོའི་གོས་དང་། ཁོའི་བུ་རྣམས་དང་དེ་རྣམས་ཀྱི་གོས་བཅས་ཐམས་ཅད་དམ་པར་བྱས་སོ། །
LEV 8:31 མོ་ཤེ་ཡིས་ཨ་རོན་དང་དེའི་བུ་རྣམས་ལ་འདི་ལྟར། ཁྱོད་རྣམས་ཀྱིས་མཇལ་འཕྲད་གུར་མཆོག་གི་སྒོ་ཁ་རུ་ཤ་བཙོས་ཏེ། ཤ་དེ་དང་བསྐོ་བར་བྱེད་པའི་མཛད་སྒོའི་གཟེབ་ནང་གི་བག་ལེབ་བཟའ་དགོས་ཤིང་། ངས་ཁྱོད་རྣམས་ལ་བསྒོས་པ་བཞིན་དུ། འདི་ནི་ཨ་རོན་དང་ཁོའི་བུ་རྣམས་ཀྱིས་བཟའ་དགོས་པ་ཡིན་ཞེས་སྨྲ་བར་གྱིས།
LEV 8:32 ཤ་དང་བག་ལེབ་ལྷག་མ་རྣམས་ཁྱོད་ཚོས་མེ་ལ་བསྲེག་དགོས།
LEV 8:33 ཉིན་བདུན་པོ་དེ་མ་རྫོགས་བར་དུ། ཁྱོད་རྣམས་མཇལ་འཕྲད་གུར་མཆོག་གི་སྒོ་ཕྱི་རུ་འགྲོ་མི་རུང་། གང་ལ་ཞེ་ན། ཁྱོད་རྣམས་ཀྱི་བསྐོ་བར་བྱེད་པའི་མཛད་སྒོའི་ཉིན་མོ་ཚང་དགོས་ལ། ཁྱོད་རྣམས་བསྐོ་བར་ཉིན་བདུན་དགོས་པའི་ཕྱིར་རོ། །
LEV 8:34 དེ་རིང་བྱས་པ་ཐམས་ཅད་ནི་དཀོན་མཆོག་ཡ་ཝཱེས་ཁྱོད་ཅག་གི་སྡིག་པ་བཤག་པའི་ཕྱིར་བསྩལ་པའི་བཀའ་ཡིན་ནོ། །
LEV 8:35 ཉིན་བདུན་པོ་དེར་ཁྱོད་རྣམས་ཉིན་མཚན་ཀུན་ཏུ་མཇལ་འཕྲད་གུར་མཆོག་གི་སྒོ་འགྲམ་དུ་འདུག་དགོས་ལ། འཆི་བར་མི་འགྱུར་བའི་ཕྱིར་དཀོན་མཆོག་ཡ་ཝཱེས་བསྩལ་པའི་བཀའ་རྣམས་བསྲུང་དགོས། གང་ལ་ཞེ་ན། དེ་ནི་བདག་ལ་བསྩལ་པའི་བཀའ་ཡིན་པས་སོ་ཞེས་གསུངས།
LEV 8:36 དེ་བས་ཨ་རོན་དང་ཁོའི་བུ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་བརྒྱུད་ནས་བསྩལ་པའི་བཀའ་བཞིན་དུ་བྱས་སོ། །
LEV 9:1 ཉིན་བརྒྱད་པ་ལ་མོ་ཤེ་ཡིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་གྱི་རྒན་པོ་རྣམས་བོས་ཏེ།
LEV 9:2 ཨ་རོན་ལ་འདི་ལྟར། ཁྱོད་ཀྱིས་སྡིག་བཤགས་མཆོད་པར་སྒོ་ཕྱུགས་ལས་བ་ཕྲུག་ཅིག་དང་། སྦྱིན་སྲེག་གི་ཕྱིར་ལུག་ཐུག་ཅིག་ལེན་དགོས་ལ། དེ་གཉིས་ཀ་སྐྱོན་མེད་པ་ཞིག་ཡིན་དགོས་ཏེ། དཀོན་མཆོག་ཡ་ཝཱེའི་སྤྱན་སྔར་ཕུལ་ཞིག
LEV 9:3 དེ་ནས་ཡེས་ར་ཨེལ་པ་རྣམས་ལ་འདི་ལྟར། ཁྱོད་རྣམས་ཀྱིས་སྡིག་བཤགས་མཆོད་པ་ལ་ར་ཐུག་ཅིག་འཁྲིད་ཡོང་དགོས། སྐྱོན་གཏན་ནས་མེད་པའི་བ་ཕྲུག་དང་ལུ་གུ་ལོ་གཅིག་ཅན་གཉིས་ཀྱང་སྦྱིན་སྲེག་གི་མཆོད་པའི་ཕྱིར་དུ་འཁྲིད་ཡོང་དགོས།
LEV 9:4 ཡང་གླང་ཐུག་ཅིག་དང་ལུག་ཐུག་ཅིག་དམར་མཆོད་ཀྱི་ཆེད་དུ་ཁྲིད་འོངས་ནས་དཀོན་མཆོག་ཡ་ཝཱེའི་སྤྱན་སྔར་ཞི་བདེའི་མཆོད་པ་རུ་བཤམ་པ་དང་། འབྲུ་རིགས་ཀྱི་མཆོད་པ་ལ་སྣུམ་བསྲེས་ནས་འབུལ་དགོས་ཏེ། ཅིའི་ཕྱིར་ཞེ་ན། དེ་རིང་དཀོན་མཆོག་ཡ་ཝཱེ་ཁྱོད་རྣམས་ལ་མངོན་པར་འགྱུར་བའི་ཕྱིར་རོ་ཞེས་སྦྲོན་ཅིག་གསུངས་པས།
LEV 9:5 དེ་ཚོས་མོ་ཤེ་ཡིས་བསྒོས་པ་རྣམས་མཇལ་འཕྲད་གུར་མཆོག་གི་མདུན་དུ་ཁྱེར་འོངས་པ་དང་། མི་ཚོགས་ཐམས་ཅད་ཉེ་སར་བཅར་ནས་དཀོན་མཆོག་ཡ་ཝཱེའི་སྤྱན་སྔར་འགྲེང་ངོ་། །
LEV 9:6 དེར་མོ་ཤེ་ན་རེ། འདི་ནི་དཀོན་མཆོག་ཡ་ཝཱེས་ཁྱོད་རྣམས་ལ་བཀའ་བསྩལ་ཞིང་བསྒྲུབ་འོས་པ་རྣམས་ཡིན་ཏེ། དཀོན་མཆོག་ཡ་ཝཱེའི་གཟི་འོད་ཁྱོད་ཅག་ལ་མངོན་པར་འགྱུར་ཞེས་གསུངས།
LEV 9:7 མོ་ཤེ་ཡིས་ཨ་རོན་ལ། ཁྱོད་རང་མཆོད་ཁྲིའི་མདུན་དུ་བཅར་ནས་ཁྱོད་ཀྱི་སྡིག་བཤགས་མཆོད་པ་དང་སྦྱིན་སྲེག་ཕུལ་ཏེ། རང་ཉིད་དང་མི་རྣམས་ཀྱི་སྡིག་པ་ཤོགས་ཤིག ཡང་མི་རྣམས་ཀྱི་མཆོད་པ་ཕུལ་ཏེ་ཁོ་རྣམས་ཀྱི་སྡིག་པ་ཤོགས་ཤིག ཐམས་ཅད་དཀོན་མཆོག་ཡ་ཝཱེས་བསྩལ་པའི་བཀའ་བཞིན་དུ་ཡིན་ནོ་ཞེས་གསུངས་སོ། །
LEV 9:8 དེ་ནས་ཨ་རོན་མཆོད་ཁྲིའི་དྲུང་དུ་འོངས་ནས་རང་གི་སྡིག་བཤགས་མཆོད་པའི་བ་ཕྲུག་དེ་བཤས་པ་དང་།
LEV 9:9 ཨ་རོན་གྱི་བུ་རྣམས་ཀྱིས་ཁོ་ལ་ཁྲག་ཁྱེར་འོངས་པ་དང་། ཁོས་མཛུབ་མོ་ཁྲག་ནང་བསྒྲེས་ཤིང་མཆོད་ཁྲིའི་རུ་ཐུར་རྣམས་ལ་བསྐུས་པ་དང་། ཁྲག་ལྷག་མ་རྣམས་མཆོད་ཁྲིའི་ཞབས་རའི་སྟེང་དུ་བླུགས་སོ། །
LEV 9:10 ཁོས་སྡིག་བཤགས་མཆོད་པའི་ཚིལ་དང་མཁལ་མ་དང་། མཆིན་པའི་རྩ་རྒྱུས་བཅས་ནི་མཆོད་ཁྲིའི་སྟེང་དུ་བསྲེགས་པ་དང་། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །
LEV 9:11 ཤ་དང་པགས་པ་རྣམས་སྒར་ཁའི་ཕྱི་རོལ་ཏུ་མེ་ལ་བསྲེགས་སོ། །
LEV 9:12 ཨ་རོན་གྱིས་སྦྱིན་སྲེག་ཏུ་འབུལ་བའི་ཕྱུགས་ཟོག་བཤས་རྗེས། ཁོའི་བུ་རྣམས་ཀྱིས་དེའི་ཁྲག་ཁྱེར་འོངས་པ་དང་། ཁོས་ཁྲག་དེ་མཆོད་ཁྲིའི་ཕྱོགས་བཞི་རུ་གཏོར།
LEV 9:13 ཡང་དེ་དག་གིས་སྦྱིན་སྲེག་ཧྲིལ་པོ་ལྷུ་ལྷུ་རུ་བཅད་པ་རྣམས་མགོ་དང་བཅས་ཁྱེར་འོངས་ནས་ཁོ་ལ་སྤྲད་ཅིང་། ཁོས་དེ་མཆོད་ཁྲིའི་སྟེང་བསྲེགས་པ་དང་།
LEV 9:14 ནང་ཁྲོལ་དང་རྐང་ལག་རྣམས་བཀྲུས་ཏེ་མཆོད་ཁྲིའི་སྟེང་གི་སྦྱིན་སྲེག་དང་ལྷན་དུ་བསྲེགས་སོ། །
LEV 9:15 དེ་ནས་མི་ཚོགས་ཀྱི་མཆོད་པ་ཕུལ་བ་སྟེ། ཁོས་མི་ཚོགས་ཀྱི་སྡིག་བཤགས་མཆོད་པར་ཁྲིད་འོངས་པའི་ར་ཐུག་བཤས་ཏེ་སྔར་བཞིན་སྡིག་བཤགས་མཆོད་པར་ཕུལ་ཏོ། །
LEV 9:16 ཡང་ཁྲིམས་སྲོལ་བཞིན་དུ་བསྒྲུབས་ནས་སྦྱིན་སྲེག་ཀྱང་ཕུལ་ཏོ། །
LEV 9:17 ཞོགས་པའི་སྦྱིན་སྲེག་ལས་གཞན་ཁོས་འབྲུ་རིགས་ཀྱི་མཆོད་པ་ཡང་ཕུལ་བ་སྟེ། ལག་པས་ཁྱོར་བ་གང་བླངས་ནས་མཆོད་ཁྲིའི་སྟེང་དུ་བསྲེགས།
LEV 9:18 དེ་ནས་ཨ་རོན་གྱིས་མི་ཚོགས་ཀྱི་ཞི་བདེའི་མཆོད་པ་ཡིན་པའི་གླང་ཐུག་དང་ལུག་ཐུག་བཤས་ཤིང་། ཁོའི་བུ་རྣམས་ཀྱིས་ཁོ་ལ་དེའི་ཁྲག་ཁྱེར་འོངས་པ་དང་། ཁོས་ཁྲག་ནི་མཆོད་ཁྲིའི་ཕྱོགས་བཞི་རུ་གཏོར་བའོ། །
LEV 9:19 དེ་དག་གིས་གླང་ཐུག་དང་ལུག་ཐུག་གི་ཚིལ་དང་། རྔ་མ་ཚོན་པོ་དང་། ནང་ཁྲོལ་བཏུམས་པའི་ཚིལ་དང་། མཁལ་མ་དང་། མཆིན་པའི་རྩ་རྒྱུས་བཅས་ཡོངས་སུ་རྫོགས་པ་དང་།
LEV 9:20 ཚིལ་ནི་དམར་མཆོད་དུ་བཤས་པའི་ཕྱུགས་ཟོག་གི་བྲང་རྣམས་ཀྱི་སྟེང་དུ་བཞག་པ་དང་། ཁོས་ཚིལ་རྣམས་མཆོད་ཁྲིའི་སྟེང་དུ་བསྲེགས།
LEV 9:21 ཨ་རོན་གྱིས་དམར་མཆོད་དུ་བཤས་པའི་ཕྱུགས་ཟོག་གི་བྲང་རྣམས་དང་བརླ་གཡས་པ་དཀོན་མཆོག་ཡ་ཝཱེའི་སྤྱན་སྔར་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་ཕུལ་བ་དང་། དེ་ནི་མོ་ཤེ་ཡིས་བསྒོས་པ་བཞིན་དུ་ཡིན་ནོ། །
LEV 9:22 དེ་ནས་ཨ་རོན་གྱིས་ལག་པ་ཡར་བཏེགས་ནས་མི་རྣམས་ལ་བྱིན་གྱིས་བརླབས་པ་དང་། ཁོས་སྡིག་བཤགས་མཆོད་པ་དང་སྦྱིན་སྲེག ཞི་བདེའི་མཆོད་པ་བཅས་ཕུལ་རྗེས་མར་བབས།
LEV 9:23 མོ་ཤེ་དང་ཨ་རོན་གཉིས་མཇལ་འཕྲད་གུར་མཆོག་གི་ནང་དུ་སོང་ཞིང་། ཕྱི་རོལ་ཏུ་འོངས་ནས་མི་རྣམས་ལ་བྱིན་རླབས་མཛད་པ་ན། དཀོན་མཆོག་ཡ་ཝཱེའི་གཟི་འོད་མི་ཐམས་ཅད་ལ་མངོན་པར་གྱུར་པ་དང་ཆབས་ཅིག
LEV 9:24 དཀོན་མཆོག་ཡ་ཝཱེའི་དྲུང་ནས་མེ་ཞིག་བྱུང་སྟེ། མཆོད་ཁྲིའི་སྟེང་གི་སྦྱིན་སྲེག་དང་ཚིལ་རྣམས་ཡོངས་སུ་བསྲེགས་ཤིང་། མི་ཐམས་ཅད་ཀྱིས་དེ་མཐོང་བ་ན་སྐད་ཆེན་པོ་བརྒྱབ་ནས་ལུས་སར་བཏུད་དོ། །
LEV 10:1 དེ་ཡང་ཨ་རོན་གྱི་བུ་ནཱ་དབ་དང་ཨ་བི་ཧུ་གཉིས་ཀྱིས་རང་གི་སྤོས་ཕོར་ཁྱེར་ནས། དེའི་ནང་དུ་མེ་བཞག་པ་དང་བདུག་སྤོས་ཀྱང་བཏབ་སྟེ། དཀོན་མཆོག་ཡ་ཝཱེས་ཁོ་ཚོར་བཀའ་འཁྲོལ་མེད་པའི་མེ་དཀོན་མཆོག་ཡ་ཝཱེའི་སྤྱན་སྔར་ཕུལ།
LEV 10:2 དེར་དཀོན་མཆོག་ཡ་ཝཱེའི་དྲུང་ནས་མེ་ཞིག་བྱུང་ཞིང་དེ་གཉིས་བསྲེགས་ནས་དཀོན་མཆོག་ཡ་ཝཱེའི་དྲུང་དུ་ཤིའོ། །
LEV 10:3 དེ་ནས་མོ་ཤེ་ཡིས་ཨ་རོན་ལ། དཀོན་མཆོག་ཡ་ཝཱེས་འདི་སྐད་དུ། ངའི་གམ་དུ་བཅར་བ་རྣམས་ཀྱི་ཁྲོད་དུ་ང་རང་དམ་པར་མངོན་པ་དང་། མི་ཐམས་ཅད་ཀྱི་མཐོང་ངོར་བདག་ལ་གཟི་བརྗིད་ལྡན་པར་འགྱུར་ཞེས་བཀའ་བསྩལ་པའོ་ཞེས་གསུངས་པར། ཨ་རོན་གྱིས་ངག་བཅད་དེ་བསྡད་དོ། །
LEV 10:4 མོ་ཤེ་ཡིས་ཨ་རོན་གྱི་ཞང་པོ་ཨུ་ཟི་ཨེལ་གྱི་བུ་མེ་ཤཱ་ཨེལ་དང་ཨེལ་ཙ་ཕཱན་གཉིས་བོས་ནས་ན་རེ། ཚུར་ཤོག་དང་། ཁྱོད་ཀྱི་སྤུན་མཆེད་རྣམས་ཀྱི་བེམ་པོ་གནས་མཆོག་གི་མདུན་ནས་སྒར་ཁའི་ཕྱི་རོལ་ཏུ་ཁྱེར་ཅིག་ཅེས་གསུངས་པ་ན།
LEV 10:5 དེ་གཉིས་ཚུར་འོངས་ནས། མོ་ཤེ་ཡིས་གསུངས་པ་བཞིན་དུ་བེམ་པོ་ནི་གོས་རིང་དང་བཅས་སྒར་ཁའི་ཕྱི་རོལ་ཏུ་ཁྱེར།
LEV 10:6 ཡང་མོ་ཤེ་ཡིས་ཨ་རོན་དང་དེའི་བུ་ཨེ་ལི་ཨ་ཟར་དང་ཨི་ཐ་མཱར་བཅས་ལ། ཁྱོད་ཀྱི་མགོ་ཟིང་ནས་སྐྲ་བཤིག་པར་མི་བྱེད་ལ་གོས་རྣམས་ཀྱང་དྲལ་བར་མ་གྱུར་ཅིག ཅི་ལ་ཞེ་ན། ཁྱོད་འཆི་བར་མི་འགྱུར་བ་དང་དཀོན་མཆོག་ཡ་ཝཱེ་ཁོང་ཉིད་མི་ཚོགས་ཐམས་ཅད་ལ་ཐུགས་ཁྲོ་བར་མི་འགྱུར་བའི་ཕྱིར་རོ། །འོན་ཀྱང་ཁྱོད་ཀྱི་སྤུན་ཟླ་སྟེ་ཡེས་ར་ཨེལ་གྱི་ཁྱིམ་རྒྱུད་ཀུན་གྱིས་དཀོན་མཆོག་ཡ་ཝཱེས་མཛད་པའི་མེ་འདི་ཡི་ཕྱིར་དུ་སྨྲེ་ངག་འདོན་ངེས།
LEV 10:7 ཁྱོད་ཅག་འཆི་བར་མི་འགྱུར་བའི་ཕྱིར་དུ། མཇལ་འཕྲད་གུར་མཆོག་གི་སྒོའི་ཕྱི་རོལ་ཏུ་མ་འགྲོ་ཞིག དཀོན་མཆོག་ཡ་ཝཱེས་བྱུགས་པའི་སྣུམ་ཁྱོད་ཅག་གི་ལུས་སྟེང་དུ་ཡོད་པའི་ཕྱིར་རོ་ཞེས་གསུངས་པས། དེ་དག་གིས་མོ་ཤེའི་བཀའ་བཞིན་དུ་བསྒྲུབས་སོ། །
LEV 10:8 དེ་ཡང་དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ།
LEV 10:9 ཁྱོད་དང་ཁྱོད་ཀྱི་བུ་རྣམས་མཇལ་འཕྲད་གུར་མཆོག་གི་ནང་དུ་འོངས་པའི་ཚེ། འཆི་བར་མི་འགྱུར་བའི་ཕྱིར་དུ་རྒུན་ཆང་དང་ཨ་རག་གང་ཡང་བཏུང་བར་མ་བྱེད་ཅིག དེ་ནི་ཁྱོད་ཅག་གི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན།
LEV 10:10 ཁྱོད་རྣམས་ཀྱིས་དམ་པ་དང་ཐ་ཤལ་གཉིས་དང་། གཙང་དང་མི་གཙང་བའི་དབྱེ་བ་འབྱེད་དགོས་ལ།
LEV 10:11 དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཡེས་ར་ཨེལ་པ་རྣམས་ལ་གསུངས་པའི་སྒྲིག་ཁྲིམས་ཐམས་ཅད་ཁོ་རྣམས་ལ་སློབ་དགོས་ཞེས་བཀའ་བསྩལ་ཏོ། །
LEV 10:12 ཡང་མོ་ཤེ་ཡིས་ཨ་རོན་དང་ཁོའི་གསོན་པོར་ལུས་པའི་བུ་ཨེ་ལི་ཨ་ཟར་དང་ཨི་ཐ་མཱར་གཉིས་ལ་འདི་ལྟར། དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས་འབྲུ་རིགས་ཀྱི་ལྷག་མ་རྣམས་བླངས་ཏེ། མཆོད་ཁྲིའི་ལོགས་སུ་སྐྱུར་མེད་བག་ལེབ་དེ་ཟོ་ཞིག དེ་ནི་ཀུན་ལས་དམ་པ་ཡིན་པའི་ཕྱིར་རོ། །
LEV 10:13 ཁྱོད་རྣམས་ཀྱིས་གནས་དམ་པ་རུ་དེ་བཟའ་དགོས། ཅིའི་ཕྱིར་ཞེ་ན། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས་ཁྱོད་དང་ཁྱོད་ཀྱི་བུ་རྣམས་ལ་འཐོབ་འོས་པའི་སྐལ་ཡིན་ལ། ང་ལ་བསྩལ་པའི་བཀའ་ནི་དེ་བཞིན་ཡིན།
LEV 10:14 གཡོབ་མཆོད་ཀྱི་བྲང་དང་འདེགས་མཆོད་ཀྱི་བརླ་ནི། ཁྱོད་ཀྱིས་རང་གི་བུ་དང་བུ་མོ་རྣམས་དང་མཉམ་དུ་གནས་གཙང་ས་ཞིག་ཏུ་བཟའ་དགོས། དེ་ནི་ཡེས་ར་ཨེལ་པ་རྣམས་ཀྱི་ཞི་བདེའི་མཆོད་པ་ལས་ཁྱོད་ལ་དབང་ཞིང་། ཁྱོད་དང་ཁྱོད་ཀྱི་བུ་རྣམས་ལ་འཐོབ་འོས་པའི་སྐལ་ཡིན་པའི་ཕྱིར་རོ། །
LEV 10:15 ཁོ་རྣམས་ཀྱིས་འདེགས་མཆོད་ཀྱི་བརླ་དང་གཡོབ་མཆོད་ཀྱི་བྲང་། མེ་མཆོད་ཀྱི་ཚིལ་བཅས་ཁྱེར་འོངས་ཏེ། དཀོན་མཆོག་ཡ་ཝཱེའི་སྤྱན་སྔར་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་འབུལ་བར་འགྱུར། འདི་ཐམས་ཅད་ཁྱོད་དང་ཁྱོད་ཀྱི་བུ་རྣམས་ལ་དབང་ཞིང་། དུས་གཏན་དུ་འཐོབ་འོས་པའི་སྐལ་ཡིན་ལ། ཐམས་ཅད་དཀོན་མཆོག་ཡ་ཝཱེས་བསྩལ་པའི་བཀའ་བཞིན་ཡིན་ཞེས་གསུངས་སོ། །
LEV 10:16 དེའི་སྐབས་སུ་མོ་ཤེ་ཡིས་གཟབ་ནན་གྱིས་སྡིག་བཤགས་མཆོད་པའི་ར་ཐུག་བཙལ་བ་ན། ལྟོས་དང་། དེ་ནི་བསྲེགས་ཟིན་པས་ཁོང་ཨ་རོན་གྱི་བུ་གསོན་པོར་ལུས་པ་ཨེ་ལི་ཨ་ཟར་དང་ཨི་ཐ་མཱར་གཉིས་ལ་ཁྲོས་ནས་འདི་ལྟར།
LEV 10:17 ཁྱོད་ཅག་གིས་སྡིག་བཤགས་མཆོད་པ་དེ་གནས་མཆོག་ཏུ་མ་ཟོས་པ་ཅི་ཡིན་ནམ། དེ་ནི་ཀུན་ལས་དམ་པ་ཡིན་ལ། མི་ཚོགས་ཀྱི་ནག་ཉེས་སེལ་ཞིང་། དཀོན་མཆོག་ཡ་ཝཱེའི་ཞབས་དྲུང་དུ་དེ་དག་གི་སྡིག་པ་བཤག་པའི་ཕྱིར་དུ་ཁྱོད་རྣམས་ལ་གནང་བ་ཡིན་ནོ། །
LEV 10:18 ལྟོས་དང་། དམར་མཆོད་དེའི་ཁྲག་ནི་གནས་མཆོག་ཏུ་ཁྱེར་མེད་པས། ཁྱོད་ཅག་གིས་ངའི་བསྒོ་བ་བཞིན་གནས་མཆོག་ཏུ་ཤ་དེ་བཟའ་དགོས་སོ་ཞེས་གསུངས་པ་ལ།
LEV 10:19 ཨ་རོན་གྱིས་མོ་ཤེ་ལ། ལྟོས་དང་། དེ་རིང་དེ་དག་གིས་དཀོན་མཆོག་ཡ་ཝཱེའི་དྲུང་དུ་སྡིག་བཤགས་མཆོད་པ་དང་སྦྱིན་སྲེག་ཕུལ་ནའང་། ང་རང་ཆག་སྒོ་འདི་ལྟ་བུར་ཕྲད་བྱུང་། གལ་སྲིད་དེ་རིང་ངས་སྡིག་བཤགས་མཆོད་པ་འདི་ཟོས་ན། དཀོན་མཆོག་ཡ་ཝཱེའི་སྤྱན་སྔར་འོས་སམ་ཞེས་སྨྲས་ཤིང་།
LEV 10:20 མོ་ཤེ་ཡིས་དེ་ཐོས་པ་དང་ལེགས་པར་དགོངས་སོ། །
LEV 11:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
LEV 11:2 ཁྱོད་ཅག་གིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ས་སྟེང་དུ་ཡོད་པའི་དུད་འགྲོ་ཐམས་ཅད་ལས་བཟའ་རུང་བའི་སྲོག་ཆགས་ནི་འདི་དག་སྟེ།
LEV 11:3 དུད་འགྲོ་རྨིག་པ་གཉིས་སུ་ཁ་འཕྲལ་བའམ། ཡང་ན་རྨིག་སོར་ཁ་འཕྲལ་ཅན་དང་སྐྱུག་ལྡད་བྱེད་པ་རྣམས་བཟའ་རུང་བ་ཡིན།
LEV 11:4 འོན་ཀྱང་། སྐྱུག་ལྡད་བྱེད་པ་དང་ཡང་ན་རྨིག་པ་ཁ་འཕྲལ་ཅན་རྣམས་ལས་བཟའ་མི་རུང་བ་ནི། རྔ་མོང་གིས་སྐྱུག་ལྡད་བྱེད་ཀྱང་རྨིག་པ་ཁ་འཕྲལ་མེད་པས་ཁྱོད་རྣམས་ལ་མཚོན་ན་མི་གཙང་བ་ཡིན་པ་དང་།
LEV 11:5 འཕྱི་བས་སྐྱུག་ལྡད་བྱེད་ཀྱང་རྨིག་པ་ཁ་འཕྲལ་མེད་པས་དེ་ཡང་ཁྱོད་རྣམས་ལ་མཚོན་ན་མི་གཙང་བ་ཡིན།
LEV 11:6 རི་བོང་གིས་སྐྱུག་ལྡད་བྱེད་ནའང་རྨིག་པ་ཁ་འཕྲལ་མེད་པས་ཁྱོད་རྣམས་ལ་མཚོན་ན་མི་གཙང་བ་ཡིན།
LEV 11:7 ཕག་ནི་རྨིག་པ་གཉིས་སུ་ཁ་འཕྲལ་བ་དང་རྨིག་སོར་ཁ་འཕྲལ་ཅན་ཡིན་ནའང་། སྐྱུག་ལྡད་མི་བྱེད་པས་ཁྱོད་རྣམས་ལ་མཚོན་ན་མི་གཙང་བ་ཡིན།
LEV 11:8 དེ་དག་གི་ཤ་ནི་ཁྱོད་ཅག་གིས་མི་བཟའ་བར་གྱིས། དེ་དག་གི་རོ་རྣམས་ལ་ཡང་མི་རེག་པར་གྱིས། དེ་ཐམས་ཅད་ཁྱོད་རྣམས་ལ་མཚོན་ན་མི་གཙང་བ་ཡིན་ནོ། །
LEV 11:9 ཆུར་གནས་ཐམས་ཅད་ལས་བཟའ་རུང་བ་ནི་འདི་དག་སྟེ། རྒྱ་མཚོའམ་གཙང་པོ་གང་རུང་སྟེ་ཆུ་ནང་དུ་གནས་པའི་གཤོག་པ་དང་ཉ་སག་དང་ལྡན་པ་ཐམས་ཅད་བཟའ་རུང་བ་ཡིན།
LEV 11:10 རྒྱ་མཚོ་དང་གཙང་པོ་དང་། ཆུ་ནང་དུ་ནུར་འགྲོས་བྱེད་པའི་སྲོག་ཆགས་ཐམས་ཅད་དེ། ཆུ་ནང་དུ་གནས་པའི་སྲོག་ལྡན་ཐམས་ཅད་ལས་གཤོག་པ་དང་ཉ་སག་མེད་པ་རྣམས་ནི་ཁྱོད་ཅག་གིས་སྐྱུག་བྲོ་བར་བརྩི་དགོས།
LEV 11:11 དེ་དག་ནི་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན་པས། དེ་དག་གི་ཤ་བཟའ་མི་རུང་ལ་རོ་ཡང་སྐྱུག་བྲོ་བར་བརྩི་དགོས།
LEV 11:12 གཤོག་པ་དང་ཉ་སག་དང་མི་ལྡན་པའི་ཆུ་གནས་ཐམས་ཅད་ནི་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན་ནོ། །
LEV 11:13 ཡང་འདབ་ཆགས་ལས་ཁྱོད་ཅག་གིས་སྐྱུག་བྲོ་བར་བརྩི་རུང་བ་དང་། བཟའ་མི་རུང་བར་མ་ཟད་སྐྱུག་བྲོ་བ་རྣམས་ནི་འདི་དག་སྟེ། གླག་དང་བྱ་རྒོད་དང་གོ་བོ་དང་།
LEV 11:14 འོལ་པ་དང་བྱ་ཁྲའི་རིགས་དང་།
LEV 11:15 ཕོ་རོག་གི་རིགས་ཐམས་ཅད་དང་།
LEV 11:16 རྔ་བྱ་དང་སྲིན་བྱ་དང་ཆུ་སྐྱར་དང་ཁྲའི་རིགས་ཐམས་ཅད་དང་།
LEV 11:17 འུག་ཆུང་དང་སོ་བྱ་དང་འུག་རྒན་དང་།
LEV 11:18 འུག་དཀར་དང་འུག་སེར་དང་དུར་བྱ་དང་།
LEV 11:19 ཁྲུང་ཁྲུང་དང་སྐྱར་མོ་རྐང་རིང་གི་རིགས་དང་པུ་ཤུད་དང་ཕ་ཝང་བཅས་ཡིན་ནོ། །
LEV 11:20 རྐང་པ་བཞིས་འགྲུལ་བའི་འབུ་སྲིན་གཤོག་པ་ཅན་ཐམས་ཅད་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན།
LEV 11:21 རྐང་པ་བཞིས་འགྲུལ་བའི་འབུ་སྲིན་གཤོག་པ་ཅན་ཐམས་ཅད་ལས། རྐང་པ་བརླ་ཐོག་ལ་འབྱར་ཡོད་པ་དང་ས་ནས་མཆོང་བ་རྣམས་ཁྱོད་ཅག་གིས་བཟའ་རུང་བ་སྟེ།
LEV 11:22 དེ་དག་ལས་ཁྱོད་རྣམས་ཀྱིས་བཟའ་རུང་བ་ནི་ཆ་ག་པའི་རིགས་དང་འབུ་ཀོ་ཀོའི་རིགས་དང་། འཐབ་འབུའི་རིགས་དང་ཅོག་ཅོག་པའི་རིགས་བཅས་སོ། །
LEV 11:23 འོན་ཀྱང་རྐང་པ་བཞི་ཡོད་པའི་འབུ་སྲིན་གཤོག་པ་ཅན་ཐམས་ཅད་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན་ནོ། །
LEV 11:24 དེ་ཐམས་ཅད་ཀྱིས་ཁྱོད་རྣམས་མི་གཙང་བར་བྱེད་ཅིང་། སུ་ཞིག་གིས་དེ་དག་གི་རོ་ལ་རེག་ན། དགོང་མོའི་བར་དུ་མི་གཙང་བ་ཡིན།
LEV 11:25 ཡང་སུ་ཞིག་གིས་དེ་དག་གི་རོ་ཁྱེར་བ་ཡིན་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།
LEV 11:26 ཕྱུགས་ཟོག་རྨིག་པ་གཉིས་སུ་ཁ་འཕྲལ་ཡང་། རྨིག་སོར་འཕྲལ་མེད་པའམ་ཡང་ན་སྐྱུག་ལྡད་མི་བྱེད་པ་ཐམས་ཅད་ཁྱོད་ཅག་ལ་མཚོན་ན་མི་གཙང་བ་ཡིན། སུ་ཞིག་གིས་དེར་རེག་ན་དེ་ནི་མི་གཙང་བ་ཡིན།
LEV 11:27 རྐང་མཐིལ་གྱིས་འགྲུལ་བ་དང་རྐང་པ་བཞིས་འགྲུལ་བའི་སྲོག་ཆགས་ཐམས་ཅད་ཁྱོད་རྣམས་ལ་མཚོན་ན་མི་གཙང་བ་ཡིན་ལ། སུ་ཞིག་གིས་དེའི་རོ་ལ་རེག་ན་དེ་ནི་དགོང་མོའི་བར་དུ་མི་གཙང་བ་ཡིན་པ་དང་།
LEV 11:28 སུ་ཞིག་གིས་དེ་དག་གི་རོ་ཁྱེར་བ་ཡིན་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན། དེ་དག་ཁྱོད་རྣམས་ལ་མཚོན་ན་མི་གཙང་བ་ཡིན་ནོ། །
LEV 11:29 ས་སྟེང་གི་ལྟོ་འགྲོ་སྲོག་ཆགས་ཁྱུ་དང་ཁྱུ་རྣམས་ལས། ཁྱོད་རྣམས་ལ་མཚོན་ན་མི་གཙང་བ་ནི་འདི་དག་སྟེ། སྲེ་མོང་དང་བྱི་བ་དང་རྩངས་པའི་རིགས་དང་།
LEV 11:30 གྱང་རྨིགས་དང་རྨིགས་པ་ཆེན་པོ། རྩངས་པ་ཁ་རལ་དང་རྩངས་པ་བྱེ་རལ་དང་བླ་མ་རྒལ་ཅིག་བཅས་སོ། །
LEV 11:31 ལྟོ་འགྲོ་སྲོག་ཆགས་དེ་ཐམས་ཅད་ནི་ཁྱོད་རྣམས་ལ་མཚོན་ན་མི་གཙང་བ་ཡིན་ལ། སུ་ཞིག་གིས་དེ་དག་ཤི་རྗེས་རོ་ལ་རེག་ན་དགོང་མོའི་བར་དུ་མི་གཙང་བ་ཡིན།
LEV 11:32 དེ་དག་ལས་ཤི་རོ་གཅིག་དངོས་པོ་གང་རུང་གི་སྟེང་དུ་ལྷུང་ན་དེ་ནི་མི་གཙང་བ་སྟེ། ཤིང་གི་སྣོད་དམ། གོས་སམ། ཀོ་བའམ། རྩྭ་ཕད་དམ། ཡང་ན་ལག་ཆ་གང་ཡིན་ཡང་ཆུ་རུ་སྦང་དགོས་ལ། དགོང་མོའི་བར་དུ་མི་གཙང་ཞིང་དེའི་རྗེས་སུ་ད་གཟོད་གཙང་བ་ཡིན།
LEV 11:33 དེ་དག་ལས་གཅིག་རྫ་སྣོད་དུ་ལྷུང་ན། དེའི་ནང་ཡོད་པ་ཐམས་ཅད་མི་གཙང་བར་གྱུར་ཅིང་། རྫ་སྣོད་དེ་གཅོག་དགོས་སོ། །
LEV 11:34 དེའི་ནང་གི་ཟས་རིགས་གང་ཡིན་ཡང་ཆུ་དེ་འདྲེས་ན་མི་གཙང་བ་ཡིན་ལ། སྣོད་ཆས་ནང་གི་བཏུང་བྱ་ཡང་མི་གཙང་བ་ཡིན།
LEV 11:35 དེ་དག་གི་རོ་ལས་ཆ་ཤས་ཙམ་དངོས་པོ་གང་རུང་གི་སྟེང་དུ་ལྷུང་ནའང་། དངོས་པོ་དེ་ནི་མི་གཙང་བར་གྱུར་པ་དང་། མེ་ཐབ་བམ་ཚ་ཐབ་གང་ཡིན་ཡང་རྡུལ་དུ་བརླག་དགོས། དེ་དག་མི་གཙང་བ་ཡིན་ལ། ཁྱོད་རྣམས་ལ་མཚོན་ནའང་མི་གཙང་བ་ཡིན།
LEV 11:36 འོན་ཀྱང་ཆུ་མིག་དང་རྫིང་བུ་སྟེ་ཆུ་འཁྱིལ་ས་རྣམས་ནི་སྔར་བཞིན་གཙང་མ་ཡིན་གྱི། དེ་དག་གི་རོ་ལ་རེག་པ་རྣམས་ནི་ད་གཟོད་མི་གཙང་བ་ཡིན།
LEV 11:37 གལ་སྲིད་དེ་དག་གི་རོ་ལས་ཆ་ཤས་ཙམ་རྨོ་འདེབས་ཀྱི་ས་བོན་སྟེང་དུ་ལྷུང་ན། ས་བོན་ནི་སྔར་བཞིན་གཙང་མ་ཡིན།
LEV 11:38 ཅི་སྟེ་ས་བོན་དེ་ལ་ཆུ་བརྒྱབ་པ་དང་། དེ་དག་གི་རོ་ལས་ཆ་ཤས་ཙམ་དེའི་སྟེང་དུ་ལྷུང་ན། ས་བོན་དེ་ཁྱོད་རྣམས་ལ་མི་གཙང་བ་ཡིན་ནོ། །
LEV 11:39 གལ་སྲིད་ཁྱོད་རྣམས་ཀྱི་ཁ་ཟས་སུ་རུང་བའི་ཕྱུགས་ཟོག་ལས་གཅིག་ཤི་བ་དང་། སུ་ཞིག་གིས་དེའི་རོ་ལ་རེག་ན་དེ་ནི་དགོང་མོའི་བར་དུ་མི་གཙང་བ་ཡིན།
LEV 11:40 སུ་ཞིག་གིས་སྲོག་ཆགས་ཀྱི་ཤི་རོ་དེ་ཟོས་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན་པ་དང་། སུ་ཞིག་གིས་སྲོག་ཆགས་ཀྱི་ཤི་རོ་དེ་ཁྱེར་བ་ཡིན་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན་ནོ། །
LEV 11:41 ས་སྟེང་གི་ལྟོ་འགྲོ་སྲོག་ཆགས་ཐམས་ཅད་ནི་སྐྱུག་བྲོ་བ་ཡིན་པས་བཟའ་མི་རུང་།
LEV 11:42 ལྟོ་བས་འགྲོ་བའམ་རྐང་ལག་བཞི་པོས་འགྲུལ་བ། ཡང་ན་སུག་མང་གིས་འགྲུལ་བ་བཅས་ས་སྟེང་གི་ལྟོ་འགྲོ་སྲོག་ཆགས་ཐམས་ཅད་ནི་སྐྱུག་བྲོ་བ་ཡིན་པས་བཟའ་མི་རུང་ངོ་། །
LEV 11:43 ཁྱོད་རྣམས་ཀྱིས་ལྟོ་འགྲོ་སྲོག་ཆགས་གང་རུང་གི་རྐྱེན་གྱིས་རང་ཉིད་སྐྱུག་བྲོ་བར་མ་བྱེད་ཅིག ཡང་དེ་དག་གི་རྐྱེན་གྱིས་མི་གཙང་བ་དང་བཙོག་པར་མ་བྱེད་ཅིག
LEV 11:44 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པས་ཁྱོད་རྣམས་ཀྱིས་རང་ཉིད་དམ་པར་བསྒྱུར་དགོས། བདག་ནི་དམ་པ་ཡིན་པའི༌ཕྱིར། ཁྱོད་ཀྱང་དམ་པ་ཡིན་དགོས་ཏེ། ཁྱོད་རྣམས་ཀྱིས་ས་ལ་ལྟོ་བས་འགྲུལ་བའི་ལྟོ་འགྲོ་སྲོག་ཆགས་གང་གི་རྐྱེན་གྱིས་ཀྱང་རང་ཉིད་མི་གཙང་བར་བྱེད་མི་རུང་ངོ་། །
LEV 11:45 བདག་ནི་ཁྱོད་ཅག་གི་དཀོན་མཆོག་བྱེད་པའི་ཆེད་དུ་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་ཡོང་མཁན་དཀོན་མཆོག་ཡ་ཝཱེ་ཡིན་ལ། བདག་ནི་དམ་པ་ཡིན་པའི་ཕྱིར། ཁྱོད་ཀྱང་དམ་པ་ཡིན་དགོས་སོ་ཞེས་བཀའ་བསྩལ་ཏོ། །
LEV 11:46 དེ་ནི་ཕྱུགས་ཟོག་སྟེ་འདབ་ཆགས་དང་ཆུ་ནང་རྒྱུ་བའི་སྲོག་ཆགས་དང་། ས་སྟེང་གི་ལྟོ་འགྲོ་སྲོག་ཆགས་ཐམས་ཅད་ཀྱི་བཀའ་ཁྲིམས་ཡིན་ཏེ།
LEV 11:47 ཁྱོད་རྣམས་ཀྱིས་གཙང་དང་མི་གཙང་བ་དང་། བཟའ་རུང་བ་དང་བཟའ་མི་རུང་བའི་སྲོག་ཆགས་ཀྱི་དབྱེ་བ་རྟོགས་པའི་ཕྱིར་ཡིན་ཞེས་པའོ་གསུངས་སོ། །
LEV 12:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 12:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག བུད་མེད་ཅིག་མངལ་དང་ལྡན་པར་གྱུར་ནས་བུ་བཙས་ན། ཁོ་མོ་ཟླ་མཚན་འབབ་པའི་སྐབས་སུ་མི་གཙང་བ་བཞིན་དུ་ཉིན་བདུན་ལ་མི་གཙང་བ་ཡིན།
LEV 12:3 ཉིན་བརྒྱད་པ་ལ་བུའི་མཚན་སྐྱི་གཅོད་དགོས།
LEV 12:4 བུད་མེད་ལ་ཕྲུ་གུ་སྐྱེས་རྗེས་ཁྲག་ཤོར་བ་གཙང་མར་འགྱུར་བ་ལ་ཉིན་སུམ་ཅུ་སོ་གསུམ་དགོས་ཤིང་། ཁོ་མོ་གཙང་མར་བཟོ་བའི་ཉིན་མོ་རྣམས་མ་རྫོགས་གོང་རྫས་དམ་པར་རེག་པའམ་གནས་མཆོག་ལ་འགྲོ་མི་རུང་།
LEV 12:5 གལ་སྲིད་ཁོ་མོས་བུ་མོ་བཙས་ན། ཁོ་མོ་ཟླ་མཚན་འབབ་པའི་སྐབས་དང་འདྲ་བར་བདུན་ཕྲག་གཉིས་ལ་མི་གཙང་བ་དང་། ཁོ་མོར་ཕྲུ་གུ་སྐྱེས་རྗེས་ཁྲག་ཤོར་བ་གཙང་མར་འགྱུར་བ་ལ་ཉིན་དྲུག་ཅུ་རེ་དྲུག་དགོས་སོ། །
LEV 12:6 གཙང་མར་བཟོ་བའི་ཉིན་ལོངས་རྗེས། བུའམ་བུ་མོ་གང་ཞིག་སྐྱེས་ཀྱང་། ཁོ་མོས་སྦྱིན་སྲེག་གི་ཕྱིར་ལུ་གུ་ལོ་གཅིག་ཅན་ཞིག་དང་། སྡིག་བཤགས་མཆོད་པར་ཕུག་རོན་ཆུང་ངུ་གཅིག་གམ་བྱ་ཐི་བ་ཞིག་མཇལ་འཕྲད་གུར་མཆོག་གི་སྒོ་ཁར་ཁྱེར་འོངས་ཏེ་མཆོད་དཔོན་ལ་སྤྲོད་དགོས།
LEV 12:7 མཆོད་དཔོན་གྱིས་མཆོད་རྫས་དེ་རྣམས་དཀོན་མཆོག་ཡ་ཝཱེའི་དྲུང་དུ་ཕུལ་ནས། བུད་མེད་ཀྱི་སྡིག་པ་བཤག་དགོས། དེ་ལྟར་བྱས་ན་ཁོ་མོ་མངལ་ཁྲག་ལས་གཙང་བར་འགྱུར། དེ་ནི་བུ་དང་བུ་མོ་བཙའ་བའི་བུད་མེད་ཀྱི་བཀའ་ཁྲིམས་ཡིན་ནོ། །
LEV 12:8 གལ་སྲིད་བུད་མེད་ཀྱིས་ལུ་གུ་ཞིག་འབུལ་བར་མི་ནུས་ན། ཁོ་མོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་འོངས་ནས་གཅིག་ནི་སྦྱིན་སྲེག་དང་། ཅིག་ཤོས་ནི་སྡིག་བཤགས་མཆོད་པར་འབུལ་དགོས། མཆོད་དཔོན་གྱིས་ཁོ་མོའི་སྡིག་པ་བཤག་དགོས་ལ་ཁོ་མོ་གཙང་མར་འགྱུར་ཞེས་སྨྲ་དགོས་པར་བཀའ་བསྩལ་ཏོ། །
LEV 13:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
LEV 13:2 གལ་སྲིད་སུ་ཞིག་གི་ལུས་ཀྱི་སྐྱི་མོ་ལ་སྐྲངས་འབུར་རམ་སིབ་རྒྱས་པ། ཡང་ན་ཁྲ་ཐིག་ལྷུང་བ་བཅས་མཛེ་ནད་དུ་འགྱུར་སྲིད་པའི་ནད་ཡམས་བྱུང་ཚེ། མི་དེ་མཆོད་དཔོན་ཨ་རོན་ནམ། ཡང་ན་དེའི་བུ་མཆོད་དཔོན་ཡིན་པ་རྣམས་ལས་གཅིག་གི་དྲུང་དུ་འཁྲིད་དགོས་པ་དང་།
LEV 13:3 མཆོད་དཔོན་གྱིས་དེའི་ལུས་ཀྱི་སྐྱི་མོའི་ནད་རྟགས་ལ་བརྟགས་ནས། ནད་ཡོད་སའི་བ་སྤུ་རྣམས་དཀར་པོར་གྱུར་ཅིང་། ནད་ཡམས་དེ་ལུས་ཀྱི་སྐྱི་མོའི་ནང་དུ་འཐིམ་ཡོད་པ་མཐོང་ན། དེ་ནི་མཛེ་ནད་ཀྱི་རྟགས་ཡིན་པས། མཆོད་དཔོན་གྱིས་བརྟག་དཔྱད་བྱས་རྗེས་མི་དེ་མི་གཙང་བ་ཡིན་པར་བསྒྲག་དགོས།
LEV 13:4 གལ་སྲིད་མི་དེའི་ལུས་ཀྱི་སྐྱི་མོ་ལ་ཁྲ་ཐིག་དཀར་པོ་ཡོད་ཀྱང་དེ་ནི་སྐྱི་མོའི་ནང་དུ་འཐིམ་མེད་པ་དང་། དེའི་སྟེང་གི་བ་སྤུ་རྣམས་ཀྱང་དཀར་པོར་གྱུར་མེད་ན། མཆོད་དཔོན་གྱིས་ནད་པ་དེ་ཉིན་བདུན་ལ་ལོགས་སུ་འགེར་དགོས།
LEV 13:5 ཉིན་བདུན་པར་མཆོད་དཔོན་གྱིས་དེར་བརྟག་དགོས་ཤིང་། ལྟོས་དང་། གལ་སྲིད་མཆོད་དཔོན་གྱིས་ནད་ཡམས་གཟུགས་མ་འགྱུར་བར་གནས་པ་དང་སྐྱི་མོའི་སྟེང་མ་ཁྱབ་པ་མཐོང་ན། མི་དེ་ཡང་ཉིན་བདུན་ལ་ལོགས་སུ་འགེར་དགོས།
LEV 13:6 དེ་ནས་ཉིན་བདུན་པར་མཆོད་དཔོན་གྱིས་དེ་ལ་སླར་ཡང་བརྟག་དགོས་ཤིང་། ལྟོས་དང་། གལ་ཏེ་ནད་ཡམས་ཇེ་ཡང་དུ་སོང་བ་དང་སྐྱི་མོའི་སྟེང་མ་ཁྱབ་པ་མཐོང་ན། མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས། ཅི་ལ་ཟེར་ན། དེ་ནི་རྨ་སྐོགས་ཙམ་ཡིན་པའི་ཕྱིར་རོ། །མི་དེས་རང་གི་གོས་རྣམས་བཀྲུ་དགོས་ལ་དེ་ནས་གཙང་མར་འགྱུར་བ་ཡིན་ནོ། །
LEV 13:7 མི་དེར་མཆོད་དཔོན་གྱིས་བརྟག་དཔྱད་བྱས་ནས་གཙང་མ་ཡིན་པར་བསྒྲགས་རྗེས། གལ་ཏེ་རྔོ་ནི་སྐྱི་མོའི་སྟེང་རྒྱ་ཆེར་ཁྱབ་ན། ཁོས་ཡང་བསྐྱར་མཆོད་དཔོན་ལ་སྟོན་དགོས།
LEV 13:8 ཡང་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། རྔོ་ནི་སྐྱི་མོའི་སྟེང་ཁྱབ་ཡོད་པ་མཐོང་ན། དེ་ནི་མཛེ་ནད་ཡིན་པས་མཆོད་དཔོན་གྱིས་མི་དེ་མི་གཙང་བར་བསྒྲག་དགོས་སོ། །
LEV 13:9 གལ་སྲིད་མི་ཞིག་ལ་མཛེ་ནད་བྱུང་ན་ཁོ་རང་མཆོད་དཔོན་གྱི་དྲུང་དུ་འཁྲིད་དགོས་པ་དང་།
LEV 13:10 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། སྐྱི་མོར་སྐྲངས་འབུར་དཀར་པོ་ཆགས་ནས་བ་སྤུ་དཀར་པོར་གྱུར་པ་དང་། སྐྲངས་འབུར་ནང་དུ་ཤ་གསར་སྐྱེས་པ་མཐོང་ན།
LEV 13:11 དེ་ནི་ཁོའི་ལུས་ཀྱི་སྐྱི་མོར་བྱུང་བའི་གཅོང་ནད་མཛེ་ནད་ཡིན་པས། མཆོད་དཔོན་གྱིས་དེ་ནི་མི་གཙང་བ་ཡིན་པར་ཁྱབ་བསྒྲག་བྱེད་དགོས་པ་དང་། མི་དེ་མི་གཙང་བ་ཡིན་པའི་ཕྱིར་ལོགས་སུ་འགེར་མི་དགོས་སོ། །
LEV 13:12 གལ་སྲིད་མཛེ་ནད་སྐྱི་མོའི་གང་ས་གང་ལ་ཁྱབ་ཅིང་། མཛེ་ནད་བྱུང་བའི་མི་དེའི་སྐྱི་མོ་ཡོངས་ལ་གང་བ་དང་། མཆོད་དཔོན་གྱིས་བལྟས་ནས་མགོ་ནས་རྐང་པའི་བར་དུ་ཁྱབ་པ་ཡིན་ན།
LEV 13:13 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། གལ་སྲིད་ནད་པ་དེའི་ལུས་ཡོངས་ལ་མཛེ་ནད་ཀྱིས་ཁྱབ་ཡོད་ན། མི་དེ་གཙང་མ་ཡིན་པར་ཁྱབ་བསྒྲག་བྱེད་དགོས། ཁོའི་ལུས་ཡོངས་དཀར་པོ་ཆགས་པས་གཙང་མ་ཡིན་པའོ། །
LEV 13:14 འོན་ཀྱང་ཁོའི་ལུས་སྟེང་དུ་ཤ་གསར་པ་སྐྱེས་ན། མི་དེ་ནི་མི་གཙང་བ་ཡིན།
LEV 13:15 མཆོད་དཔོན་གྱིས་ཤ་གསར་པ་སྐྱེས་ཡོད་པ་མཐོང་ན། མི་དེ་ནི་མི་གཙང་བ་ཡིན་པར་ཁྱབ་བསྒྲག་བྱེད་དགོས། ཤ་གསར་པ་སྐྱེས་པ་ནི་མི་གཙང་ཞིང་དེ་ནི་མཛེ་ནད་ཡིན།
LEV 13:16 ཤ་གསར་པ་དེ་དཀར་པོར་གྱུར་ཡོད་ན། ཁོ་རང་མཆོད་དཔོན་གྱི་དྲུང་དུ་བཅར་དགོས་པ་དང་།
LEV 13:17 མཆོད་དཔོན་གྱིས་དེ་ལ་བརྟག་དཔྱད་བྱེད་དགོས། ལྟོས་དང་། ནད་རྟགས་དཀར་པོར་གྱུར་ཡོད་ན། མཆོད་དཔོན་གྱིས་ནད་ཡམས་བྱུང་བའི་མི་དེ་གཙང་མ་ཡིན་པར་བསྒྲག་དགོས་ལ། མི་དེ་གཙང་མར་གྱུར་པའོ། །
LEV 13:18 གལ་སྲིད་སུ་ཞིག་གི་ལུས་ཀྱི་སྐྱི་མོར་རྨ་བུད་ཀྱང་སོས་པ་དང་།
LEV 13:19 རྨ་འབུད་ས་སྐྲངས་ནས་དཀར་པོར་གྱུར་པའམ་ཁྲ་ཐིག་དམར་སྐྱ་ཞིག་བྱུང་ན་མཆོད་དཔོན་ལ་སྟོན་དགོས།
LEV 13:20 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། ནད་རྟགས་སྐྱི་མོ་ནང་འཐིམ་པ་དང་། དེའི་སྟེང་གི་བ་སྤུ་དཀར་པོར་གྱུར་ཡོད་ན། དེ་ནི་མཛེ་ནད་ཀྱིས་རྨ་བརྟོལ་བ་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས་སོ། །
LEV 13:21 མཆོད་དཔོན་གྱིས་དེ་ལ་བརྟག་དཔྱད་བྱས་ནས། ལྟོས་དང་། དེའི་སྟེང་དུ་བ་སྤུ་དཀར་པོ་མེད་ལ། སྐྱི་མོའི་ནང་དུའང་འཐིམ་མེད་པ་དང་། ནད་ཡམས་ཇེ་ཡང་དུ་སོང་ཡོད་ན། མཆོད་དཔོན་གྱིས་མི་དེ་ཉིན་བདུན་ལ་ལོགས་སུ་འགེར་དགོས།
LEV 13:22 གལ་སྲིད་ནད་དེ་སྐྱི་མོའི་སྟེང་རྒྱ་ཆེར་ཁྱབ་ན་དེ་ནི་ནད་ཡམས་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས།
LEV 13:23 འོན་ཀྱང་ཁྲ་ཐིག་དེ་ཁ་མལ་དུ་ཡོད་ཅིང་ཁྱབ་མེད་ན། དེ་ནི་རྨ་ཤུལ་ཡིན་པས་མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་སོ། །
LEV 13:24 ཡང་ལུས་ཀྱི་སྐྱི་མོ་མེས་འཚིགས་ཤིང་རྨ་ཤུལ་དུ་ཤ་གསར་པ་སྐྱེས་པ་དང་ཁྲ་ཐིག་ལྷུང་བ་དམར་སྐྱའམ་དཀར་པོ་གང་ཡིན་ཡང་།
LEV 13:25 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། ཁྲ་ཐིག་སྟེང་གི་བ་སྤུ་དཀར་པོར་གྱུར་པ་དང་ནད་རྟགས་ཀྱང་ཤ་ནང་དུ་འཐིམ་ཡོད་པ་མཐོང་ན་དེ་ནི་མཛེ་ནད་མེས་འཚིག་ཤུལ་དུ་བྱུང་བ་ཡིན་ལ། མཛེ་ནད་ཀྱི་རྟགས་ཡིན་པས་མཆོད་དཔོན་གྱིས་མི་དེ་མི་གཙང་བར་བསྒྲག་དགོས།
LEV 13:26 གལ་སྲིད་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། ཁྲ་ཐིག་སྟེང་བ་སྤུ་དཀར་པོ་མེད་པ་དང་ཤ་ནང་དུའང་འཐིམ་མེད་ལ། ནད་ཡམས་ཀྱང་ཇེ་ཡང་དུ་སོང་ཡོད་པ་མཐོང་ན། མཆོད་དཔོན་གྱིས་མི་དེ་ཉིན་བདུན་ལ་ལོགས་སུ་འགེར་དགོས།
LEV 13:27 ཉིན་བདུན་པར་མཆོད་དཔོན་གྱིས་དེ་ལ་བརྟག་དགོས། གལ་ཏེ་ཁྲ་ཐིག་སྐྱི་མོའི་སྟེང་རྒྱ་ཆེར་ཁྱབ་ཡོད་ན། མཛེ་ནད་ཀྱི་རྟགས་ཡིན་པས་མཆོད་དཔོན་གྱིས་མི་དེ་ནི་མི་གཙང་བར་བསྒྲག་དགོས།
LEV 13:28 ཡང་ཁྲ་ཐིག་ཁ་མལ་དུ་ཡོད་ཅིང་སྐྱི་མོའི་སྟེང་མ་ཁྱབ་པར་ཇེ་ཡང་དུ་སོང་ཡོད་ན། དེ་ནི་འཚིག་ཤུལ་གྱི་སྐྲངས་འབུར་ཡིན་པ་དང་། མེས་འཚིགས་པའི་རྨ་ཤུལ་ཙམ་ཡིན་པས་མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་སོ། །
LEV 13:29 གལ་སྲིད་སྐྱེས་པའམ་བུད་མེད་སུ་ཞིག་གི་མགོ་ལ་ནད་བྱུང་བའམ། ཡང་ན་སྐྱེས་པའི་ཁ་སྤུའི་ནང་ནད་ཡམས་བྱུང་ན།
LEV 13:30 མཆོད་དཔོན་གྱིས་ནད་ཡམས་ལ་བརྟག་དགོས་ཤིང་། ལྟོས་དང་། གལ་སྲིད་ནད་རྟགས་སྐྱི་མོའི་ནང་དུ་འཐིམ་ཡོད་པ་དང་དེའི་སྟེང་གི་བ་སྤུ་ཕྲ་མོ་མདོག་སེར་པོར་མཐོང་ན། དེ་ནི་གཡན་ནད་ཡིན་པ་དང་། མགོའམ་ཁ་སྤུའི་མཛེ་ནད་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས།
LEV 13:31 མཆོད་དཔོན་གྱིས་གཡན་ནད་ལ་བརྟག་དགོས་ཤིང་། ནད་རྟགས་སྐྱི་མོའི་ནང་འཐིམ་མེད་པ་དང་དེའི་སྟེང་དུ་བ་སྤུ་ནག་པོའང་མེད་པ་མཐོང་ན། མཆོད་དཔོན་གྱིས་གཡན་ནད་ཕོག་པའི་མི་དེ་ཉིན་བདུན་ལ་ལོགས་སུ་འགེར་དགོས།
LEV 13:32 ཡང་ཉིན་བདུན་པར་མཆོད་དཔོན་གྱིས་ནད་ཡམས་དེ་ལ་བརྟག་དགོས་ཤིང་། གཡན་ནད་ཁྱབ་མེད་པ་དང་དེའི་སྟེང་དུ་བ་སྤུ་སེར་པོ་ཡང་མེད་ལ། གཡན་ནད་ཀྱི་ནད་རྟགས་ཀྱང་སྐྱི་མོའི་ནང་འཐིམ་མེད་པ་མཐོང་ན།
LEV 13:33 མི་དེས་སྐྲ་དང་ཁ་སྤུ་བཞར་དགོས་མོད། འོན་ཀྱང་གཡན་ནད་ཡོད་ས་བཞར་མི་རུང་ལ། མཆོད་དཔོན་གྱིས་གཡན་ནད་ཕོག་པའི་མི་དེ་སླར་ཡང་ཉིན་བདུན་ལ་ལོགས་སུ་འགེར་དགོས།
LEV 13:34 ཉིན་བདུན་པར་མཆོད་དཔོན་གྱིས་གཡན་ནད་ལ་བརྟག་དགོས་ཤིང་། ལྟོས་དང་། གཡན་ནི་སྐྱི་མོའི་སྟེང་ཁྱབ་མེད་པ་དང་ནད་རྟགས་ཀྱང་སྐྱི་མོའི་ནང་དུ་འཐིམ་མེད་པ་མཐོང་ན། མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་པ་དང་། མི་དེས་རང་གི་གོས་བཀྲུ་དགོས་ལ་དེ་ནས་གཙང་མར་འགྱུར་རོ། །
LEV 13:35 འོན་ཀྱང་ཁོ་རང་གཙང་མ་ཡིན་པར་བསྒྲགས་རྗེས། གཡན་ནད་སྐྱི་མོའི་སྟེང་རྒྱ་ཆེར་ཁྱབ་ན།
LEV 13:36 མཆོད་དཔོན་གྱིས་དེ་ལ་བརྟག་དགོས་ཤིང་། གཡན་ནད་སྐྱི་མོའི་སྟེང་ཁྱབ་ཡོད་པ་མཐོང་ན། མི་དེ་ནི་མི་གཙང་བ་ཡིན་པས་མཆོད་དཔོན་གྱིས་བ་སྤུ་སེར་པོ་བཙལ་དགོས་དོན་མེད།
LEV 13:37 གལ་སྲིད་གཡན་ནད་མཆོད་དཔོན་གྱི་མཐོང་ངོར་འཇགས་ནས་དེའི་སྟེང་དུ་བ་སྤུ་ནག་པོ་སྐྱེས་ཡོད་ན། གཡན་ནད་སོས་པ་དང་མི་དེ་ནི་གཙང་མ་ཡིན་པས། མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་སོ། །
LEV 13:38 སྐྱེས་པའམ་བུད་མེད་སུ་ཡིན་ཡང་། གལ་སྲིད་ལུས་སྟེང་གི་སྐྱི་མོར་ཁྲ་ཐིག་དཀར་པོ་བྱུང་ཡོད་ན།
LEV 13:39 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། སྐྱི་མོའི་ཁྲ་ཐིག་དཀར་པོ་དེ་མོག་པོར་མཐོང་ན། དེ་ནི་རྔོ་ནད་ཀྱིས་སྐྱི་མོ་བརྟོལ་བ་ཡིན་པས་ཁོ་ནི་གཙང་མ་ཡིན་ནོ། །
LEV 13:40 གལ་སྲིད་སུ་ཞིག་གི་སྐྲ་ལྷུང་ནས་སྤྱི་ཐེར་དུ་གྱུར་ན། དེ་ནི་གཙང་མ་ཡིན།
LEV 13:41 གལ་སྲིད་མི་དེའི་སྐྲ་འདབས་ལྷུང་ཞིང་སྤྱི་ཐེར་དུ་གྱུར་པ་ཡིན་ན། དེ་ནི་གཙང་མ་ཡིན།
LEV 13:42 འོན་ཀྱང་སྤྱི་གཙུག་སྤྱི་ཐེར་ཡིན་སའམ་ཐོད་སྐྲ་སྤྱི་ཐེར་ཡིན་སར་ནད་རྟགས་དམར་སྐྱ་ཡིན་ན། དེ་ནི་མཛེ་ནད་ཁོའི་སྤྱི་གཙུག་དང་ཐོད་སྐྲ་ལྷུང་སར་ཁྱབ་པ་ཡིན།
LEV 13:43 ཡང་མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། གལ་སྲིད་སྤྱི་གཙུག་དང་ཐོད་སྐྲ་སྤྱི་ཐེར་ཡིན་སའི་ནད་ཡམས་ཀྱི་སྐྲངས་འབུར་དེ་དམར་སྐྱ་ཡིན་ཞིང་། ལུས་སྟེང་གི་སྐྱི་མོའི་མཛེ་ནད་ལྟར་མཐོང་ན།
LEV 13:44 མི་དེར་མཛེ་ནད་བྱུང་བ་ཡིན་པས་མི་གཙང་བ་ཡིན། དེའི་མགོ་ལ་ནད་ཡམས་བྱུང་བ་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས་སོ། །
LEV 13:45 མཛེ་ནད་བྱུང་བའི་མི་ཡི་གོས་རྣམས་དབྲལ་དགོས་པ་དང་། མགོ་ཟིང་ནས་སྐྲ་བཤིག་ཅིང་། ཡ་ཁ་བཀབ་ནས་མི་གཙང་མི་གཙང་ཞེས་སྐད་ཆེན་པོས་བསྒྲག་དགོས།
LEV 13:46 ནད་ཡམས་ད་དུང་ཁོའི་སྟེང་དུ་ཡོད་པའི་ཚེ། ཁོ་ནི་མི་གཙང་བ་ཡིན་ལ། མི་གཙང་བ་ཡིན་པའི་རྐྱེན་གྱིས་ཁོ་གཅིག་པུར་བསྡད་ནས་སྒར་གྱི་ཕྱི་རོལ་ཏུ་གནས་དགོས་པའོ། །
LEV 13:47 ཡང་གོས་ཤིག་ལ་མཛེ་ནད་འགོས་ཡོད་ན། བལ་ལྭའམ་སོ་རས་ཀྱི་གོས་སམ།
LEV 13:48 སོ་རས་སམ་བལ་གྱི་གཞུང་ངམ་འཕྲེད་ཐིག་གམ། ཀོ་བའམ་ཀོ་བཟོས་དངོས་པོ་གང་དང་གང་ཡང་རུང་།
LEV 13:49 གལ་སྲིད་གོས་སམ་ཀོ་བའམ། གཞུང་ངམ། འཕྲེད་དམ། ཡང་ན་ཀོ་བཟོས་དངོས་པོ་གང་དང་གང་ལ་མདོག་ལྗང་གུའམ་དམར་པོ་ཆགས་ཡོད་ན། དེ་ནི་མཛེ་ནད་བྱུང་བ་ཡིན་པས་མཆོད་དཔོན་ལ་སྟོན་དགོས།
LEV 13:50 ཡང་མཆོད་དཔོན་གྱིས་གཡན་སྤུ་དེ་ལ་བརྟག་ཅིང་། གཡན་སྤུ་སྐྱེས་པའི་དངོས་པོ་ཉིན་བདུན་ལ་ལོགས་སུ་འགེར་དགོས།
LEV 13:51 ཉིན་བདུན་པར་གཡན་སྤུ་ལ་བརྟག་དགོས་ཤིང་། གལ་སྲིད་གཡན་སྤུ་ནི་གོས་ཀྱི་སྟེང་དུ་ཡོད་ན། དེ་གཞུང་ངམ་འཕྲེད་ཐིག་གང་རུང་ངམ། ཡང་ན་བཀོལ་སྤྱོད་བྱེད་པའི་ཀོ་བཟོས་དངོས་པོ་གང་རུང་གི་སྟེང་ཁྱབ་པ་ཡིན་ན། དེ་ནི་མཛེ་ནད་ཁྱབ་པའི་རྟགས་ཡིན་པས་མི་གཙང་བ་ཡིན།
LEV 13:52 གཡན་སྤུ་སྐྱེས་པའི་གོས་ནི་གཞུང་ངམ་འཕྲེད་ཐིག་གམ། བལ་ལམ་སོ་རས་གང་ནས་ཡིན་པ་དང་། ཡང་ན་ཀོ་བཟོས་དངོས་པོ་གང་ཡིན་རུང་ཐམས་ཅད་མེ་ལ་བསྲེག་དགོས་ཏེ། དེ་ནི་མཛེ་ནད་ཁྱབ་པའི་རྟགས་ཅན་ཡིན་པས་མེ་ལ་བསྲེག་དགོས་སོ། །
LEV 13:53 འོན་ཀྱང་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། གཡན་སྤུ་དེ་གོས་ཀྱི་སྟེང་དུ་ཡོད་ཀྱང་། གཞུང་ངམ་འཕྲེད་གང་རུང་ངམ། ཡང་ན་ཀོ་བཟོས་དངོས་པོའི་སྟེང་དུ་ཁྱབ་མེད་ན།
LEV 13:54 མཆོད་དཔོན་གྱིས་གཡན་སྤུ་སྐྱེས་པའི་དངོས་པོ་རྣམས་མི་ལ་བཀྲུ་བར་བཅུག་ནས། སླར་ཡང་ཉིན་བདུན་ལ་ལོགས་སུ་འགེར་དགོས།
LEV 13:55 བཀྲུས་པའི་རྗེས་སུ་མཆོད་དཔོན་གྱིས་བརྟག་དགོས་ཤིང་། ལྟོས་དང་། གཡན་སྤུ་དེ་ཁོའི་མཐོང་ངོར་མདོག་འགྱུར་མེད་ན། གཡན་སྤུ་ཁྱབ་མེད་ནའང་དེ་ནི་མི་གཙང་བ་ཡིན། དེ་ནི་ནད་ཡམས་རུལ་རྟགས་ཅན་ཡིན་པས་མདུན་རྒྱབ་གང་དུ་ཡོད་ནའང་དངོས་པོ་དེ་མེས་བསྲེག་དགོས།
LEV 13:56 ཅི་སྟེ་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། བཀྲུས་པའི་རྗེས་སུ་གཡན་སྤུ་མདོག་ཡལ་བ་མཐོང་ན། ཁོས་གོས་དང་ཀོ་བ་ནས་གཞུང་ངམ་འཕྲེད་དུ་གཡན་སྤུ་སྐྱེས་པའི་རིམ་པ་དབྲལ་དགོས།
LEV 13:57 གལ་སྲིད་གཡན་སྤུ་ཡང་བསྐྱར་གོས་ཀྱི་སྟེང་གཞུང་ངམ་འཕྲེད་ཐིག་གང་རུང་ནས་མངོན་པའམ། ཡང་ན་ཀོ་བཟོས་དངོས་པོ་གང་རུང་གི་སྟེང་ཐོན་ན། དེ་ནི་གཡན་སྤུ་རྙིང་བ་དེ་ཡང་བསྐྱར་སྐྱེས་པ་ཡིན་པས། གཡན་སྤུ་སྐྱེས་པའི་དངོས་པོ་དེ་མེས་བསྲེག་དགོས།
LEV 13:58 འོན་ཀྱང་བཀྲུས་ཟིན་པའི་གོས་ནི་གཞུང་ངམ་འཕྲེད་ཐིག་གམ། ཡང་ན་ཀོ་བཟོས་དངོས་པོ་གང་རུང་གི་གཡན་སྤུ་ཡལ་བ་ཡིན་ན། ད་དུང་ཡང་བསྐྱར་བཀྲུ་དགོས་ལ། དེ་ནས་གོས་དེ་གཙང་མར་གྱུར་པའོ་ཞེས་བཀའ་བསྩལ་ཏོ། །
LEV 13:59 དེ་ནི་གོས་ལ་གཡན་སྤུ་སྐྱེས་པའི་བཀའ་ཁྲིམས་ཡིན་ལ། བལ་ལྭའམ་སོ་རས་གྱི་གོས་སམ། གཞུང་ངམ་འཕྲེད་ཐིག་གང་རུང་ངམ། ཡང་ན་ཀོ་བཟོས་དངོས་པོ་གང་ཡིན་རུང་། ཐམས་ཅད་ཁྲིམས་སྲོལ་འདི་བཞིན་གཙང་མི་གཙང་བསྒྲག་པའོ། །
LEV 14:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 14:2 མཛེ་ནད་ཕོག་པའི་མི་ཞིག་གཙང་མར་གྱུར་སྐབས་ཀྱི་བཀའ་ཁྲིམས་ནི་འདི་ལྟ་སྟེ། མི་དེ་མཆོད་དཔོན་གྱི་མདུན་དུ་འཁྲིད་དགོས་པ་དང་།
LEV 14:3 མཆོད་དཔོན་སྒར་ཁའི་ཕྱི་རོལ་ཏུ་སོང་ནས་མཛེ་ནད་ཅན་དེ་ལ་བརྟག་དགོས་ཤིང་། ལྟོས་དང་། གལ་སྲིད་དེའི་མཛེ་ནད་དྲག་པ་ཡིན་ན།
LEV 14:4 མཆོད་དཔོན་གྱིས་གཙང་མར་བཟོ་དགོས་པའི་མི་དེའི་ཕྱིར་དུ། བྱ་གསོན་པོ་གཙང་མ་གཉིས་དང་ཐང་ཤིང་དང་། སེང་སྐུད་མཚལ་དམར་དང་། ཨི་སོབ་རྩྭ་ཤིང་བཅས་འཁྱེར་འོང་དུ་འཇུག་དགོས།
LEV 14:5 དེ་ནས་མཆོད་དཔོན་གྱིས་རྫ་སྣོད་ནང་གི་ཆུ་དྭངས་མོའི་ཐོག་ཏུ་བྱ་གཅིག་གསོད་དུ་འཇུག་དགོས།
LEV 14:6 བྱ་གསོན་པོ་དེ་ནི་མཆོད་དཔོན་གྱིས་ཐང་ཤིང་དང་། སེང་སྐུད་མཚལ་དམར་དང་། ཨི་སོབ་རྩྭ་ཤིང་བཅས་དང་མཉམ་དུ་ཆུ་གཙང་མའི་སྟེང་དུ་བསད་པའི་བྱ་དེའི་ཁྲག་ནང་དུ་བསྒྲེས་ནས།
LEV 14:7 ཁོས་མཛེ་ནད་གཙང་མར་བཟོ་དགོས་པའི་མི་དེའི་ལུས་སྟེང་དུ་ལན་བདུན་ལ་གཏོར་རྗེས་མི་དེ་གཙང་མ་ཡིན་པར་བསྒྲག་དགོས། དེ་ནས་བྱ་གསོན་པོ་དེ་ཡང་ཐང་ཆེན་དུ་གཏོང་དགོས་སོ། །
LEV 14:8 གཙང་མར་བཟོ་དགོས་པའི་མི་དེས་རང་གི་གོས་རྣམས་བཀྲུ་བ་དང་། སྐྲ་སྤུ་ཐམས་ཅད་བཞར་ནས་ལུས་པོ་ཆུས་བཀྲུས་རྗེས་ཁོ་རང་གཙང་མར་གྱུར་པ་ཡིན་ལ། དེ་ནས་ཁོ་སྒར་ཁའི་ནང་དུ་འོང་ཆོག་ཀྱང་། ཉིན་བདུན་ལ་རང་གི་གུར་གྱི་ཕྱི་རུ་འདུག་དགོས།
LEV 14:9 ཉིན་བདུན་པ་ལ། མི་དེས་རང་གི་སྐྲ་སྤུ་ཐམས་ཅད་དེ། སྐྲ་དང་ཨག་ཚོམ་དང་སྨིན་མ་བཅས་ལུས་ཡོངས་ཀྱི་སྐྲ་སྤུ་ཐམས་ཅད་གཞར་དགོས། དེ་ནས་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུས་རྗེས་གཙང་མར་གྱུར་པའོ། །
LEV 14:10 ཡང་ཉིན་བརྒྱད་པ་ལ། མི་དེས་སྐྱོན་མེད་པའི་ལུ་གུ་ཕོ་ཅན་གཉིས་དང་མོ་ལུག་ལོ་གཅིག་ཅན་གཅིག འབྲུ་རིགས་ཀྱི་མཆོད་པའི་གྲོ་ཞིབ་སྣུམ་བསྲེས་མ་ཨེ་ཕཱ་བཅུ་ཆ་གསུམ་དང་སྣུམ་ལོ་རྒི་ གཅིག་བཅས་འཁྱེར་འོང་དགོས་ལ།
LEV 14:11 གཙང་མར་བཟོ་མཁན་མཆོད་དཔོན་གྱིས། གཙང་མར་བཟོ་དགོས་པའི་མི་དེ་རྫས་དེ་དག་དང་མཉམ་དུ་མཇལ་འཕྲད་གུར་མཆོག་གི་སྒོ་ཁར་དཀོན་མཆོག་ཡ་ཝཱེའི་སྤྱན་སྔར་འཇོག་དགོས།
LEV 14:12 མཆོད་དཔོན་གྱིས་ལུ་གུ་ཕོ་ཞིག་ཉེས་སེལ་མཆོད་པར་འབུལ་དགོས་ཞིང་། ཡང་སྣུམ་ལོ་རྒི་གཅིག་བླངས་ནས་དེ་དག་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ཏེ་གཡོབ་མཆོད་དུ་འབུལ་དགོས།
LEV 14:13 དེ་ནས་ཉེས་སེལ་མཆོད་པ་ནི་སྡིག་བཤགས་མཆོད་པ་ལྟར་མཆོད་དཔོན་ལ་དབང་བ་ཡིན་པས། ལུ་གུ་ཕོ་དེ་སྡིག་བཤགས་མཆོད་པའི་ཕྱུགས་ཟོག་དང་། སྦྱིན་སྲེག་གི་ཕྱུགས་ཟོག་བཤའ་སའི་གནས་ཏེ་གནས་མཆོག་ཏུ་གསོད་དགོས་ལ། དེ་ནི་ཀུན་ལས་དམ་པ་ཡིན་ནོ། །
LEV 14:14 མཆོད་དཔོན་གྱིས་ཉེས་སེལ་མཆོད་པའི་ཁྲག་ཅུང་ཙམ་བླངས་ནས། གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་། ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་སུ་འབྱུག་པར་བྱ་བའོ། །
LEV 14:15 མཆོད་དཔོན་གྱིས་ལོ་རྒི་གཅིག་གི་སྣུམ་དེ་ལས་ཅུང་ཙམ་བླངས་ནས་རང་གི་ལག་གཡོན་པའི་ལག་མཐིལ་དུ་ལྡུག་དགོས་པ་དང་།
LEV 14:16 ལག་གཡས་པའི་མཛུབ་མོ་རང་གི་ལག་གཡོན་པའི་ལག་མཐིལ་དུ་ཡོད་པའི་སྣུམ་གྱི་ནང་དུ་བསྒྲེས་ནས། མཛུབ་མོས་སྣུམ་དེ་དཀོན་མཆོག་ཡ་ཝཱེའི་སྤྱན་སྔར་ལན་བདུན་གཏོར་དགོས་སོ། །
LEV 14:17 དེ་ནས་མཆོད་དཔོན་གྱིས་ལག་མཐིལ་གྱི་སྣུམ་ལྷག་མ་ཅུང་ཙམ་བླངས་ནས་གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་ལག་གཡས་པའི་མཐེ་བོང་དང་། རྐང་པ་གཡས་པའི་མཐེབ་ཆེན་བཅས་སུ་ཉེས་སེལ་མཆོད་པའི་ཁྲག་བྱུགས་སར་འབྱུག་དགོས།
LEV 14:18 མཆོད་དཔོན་གྱིས་ལག་མཐིལ་གྱི་སྣུམ་ལྷག་མ་རྣམས་གཙང་མར་བཟོ་དགོས་པའི་མི་དེའི་མགོར་འབྱུག་པ་དང་། དཀོན་མཆོག་ཡ་ཝཱེའི་སྤྱན་སྔར་མི་དེའི་སྡིག་པ་བཤག་དགོས།
LEV 14:19 ཁོས་སྡིག་བཤགས་མཆོད་པ་ཕུལ་ནས་མི་གཙང་བ་ལས་གཙང་མར་བཟོ་དགོས་པའི་མི་དེའི་སྡིག་པ་བཤགས་རྗེས། སྦྱིན་སྲེག་གི་ཕྱུགས་ཟོག་བཤའ་དགོས།
LEV 14:20 དེ་ནས་མཆོད་དཔོན་གྱིས་སྦྱིན་སྲེག་དང་འབྲུ་མཆོད་རྣམས་མཆོད་ཁྲིའི་སྟེང་འབུལ་བ་དང་། ཁོས་མི་དེའི་སྡིག་པ་བཤག་པར་བྱ་ཞིང་། དེ་ནས་མི་དེ་གཙང་མར་གྱུར་ཏོ། །
LEV 14:21 གལ་སྲིད་མི་དེ་དབུལ་ཞིང་རྒྱུ་ནོར་དེ་ཙམ་མེད་ན། ལུ་གུ་ཕོ་ཞིག་ཉེས་སེལ་མཆོད་པའི་ཕྱིར་འཁྱེར་འོང་བ་དང་། གཡོབ་མཆོད་དུ་ཕུལ་ནས་ཁོའི་སྡིག་པ་བཤག་དགོས། ཡང་འབྲུ་མཆོད་དུ་འབུལ་བའི་གྲོ་ཞིབ་སྣུམ་བསྲེས་མ་བྲེ་ཡི་བཅུ་ཆ་གཅིག་དང་། སྣུམ་ལོ་རྒི་གཅིག་དེ་དང་མཉམ་དུ་འཁྱེར་འོང་དགོས།
LEV 14:22 ཡང་ཁོས་རང་གི་རྒྱུ་ནོར་འཛོམ་ཚོད་ལྟར་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་འོངས་ཏེ། གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་འབུལ་དགོས་སོ། །
LEV 14:23 ཉིན་བརྒྱད་པར། རང་ཉིད་གཙང་མར་འགྱུར་བའི་ཕྱིར་དུ་ཁོས་དེ་དག་དཀོན་མཆོག་ཡ་ཝཱེའི་སྤྱན་སྔར་མཇལ་འཕྲད་གུར་མཆོག་གི་སྒོ་ཁ་རུ་ཁྱེར་ནས་མཆོད་དཔོན་ལ་སྤྲོད་དགོས།
LEV 14:24 མཆོད་དཔོན་གྱིས་ཉེས་སེལ་མཆོད་པའི་ལུ་གུ་དང་། སྣུམ་ལོ་རྒི་གཅིག་པོ་དེ་མཉམ་དུ་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་འབུལ་དགོས།
LEV 14:25 དེ་ནས་ཡང་ཁོས་ཉེས་སེལ་མཆོད་པའི་ལུ་གུ་བཤས་ནས། ཉེས་སེལ་མཆོད་པ་དེའི་ཁྲག་ལས་ཅུང་ཙམ་བླངས་ཏེ། གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་ལག་གཡས་པའི་མཐེ་བོང་། རྐང་པ་གཡས་པའི་མཐེབ་ཆེན་བཅས་ལ་འབྱུག་པར་བྱའོ། །
LEV 14:26 མཆོད་དཔོན་གྱིས་སྣུམ་ཅུང་ཙམ་ཞིག་རང་གི་ལག་གཡོན་པའི་ལག་མཐིལ་དུ་བླུགས་ནས།
LEV 14:27 ལག་གཡས་པའི་མཛུབ་མོས་ལག་གཡོན་པའི་ལག་མཐིལ་དུ་ཡོད་པའི་སྣུམ་དེ་དཀོན་མཆོག་ཡ་ཝཱེའི་སྤྱན་སྔར་ལན་བདུན་གཏོར་དགོས།
LEV 14:28 དེ་ནས་མཆོད་དཔོན་གྱིས་རང་གི་ལག་མཐིལ་གྱི་སྣུམ་ལས་ཅུང་ཙམ་ཞིག་གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་། ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་སུ། ཉེས་སེལ་མཆོད་པའི་ཁྲག་བྱུགས་སར་འབྱུག་དགོས།
LEV 14:29 དཀོན་མཆོག་ཡ་ཝཱེའི་སྤྱན་སྔ་ནས་མི་དེའི་སྡིག་པ་བཤག་ཕྱིར། མཆོད་དཔོན་གྱིས་རང་གི་ལག་མཐིལ་གྱི་སྣུམ་ལྷག་མ་རྣམས་གཙང་མར་བཟོ་དགོས་པའི་མི་དེའི་མགོ་ལ་འབྱུག་དགོས་སོ། །
LEV 14:30 ཡང་མི་དེས་རང་གི་རྒྱུ་ནོར་འཛོམ་ཚོད་ལྟར་བྱ་ཐི་བ་གཉིས་ལས་གཅིག་གམ་ཕུག་རོན་ཆུང་ངུ་གཉིས་ལས་གཅིག་མཆོད་པར་འབུལ་བ་འདི་ལྟ་སྟེ།
LEV 14:31 ཁོས་རང་གི་འཛོམ་ཚོད་ལྟར། བྱ་གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་འབྲུ་མཆོད་དང་ལྷན་ཅིག་འབུལ་དགོས་ལ། དེ་ནས་མཆོད་དཔོན་གྱིས་དཀོན་མཆོག་ཡ་ཝཱེའི་སྤྱན་སྔར་གཙང་མར་བཟོ་དགོས་པའི་མི་དེའི་སྡིག་པ་བཤག་དགོས།
LEV 14:32 དེ་ནི་མཛེ་ནད་བྱུང་ཞིང་རྒྱུ་ནོར་མེད་པ་དག་གཙང་མར་བཟོ་དགོས་པའི་བཀའ་ཁྲིམས་ཡིན་ནོ་ཞེས་བཀའ་བསྩལ་ཏོ། །
LEV 14:33 དེ་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
LEV 14:34 ཁྱོད་ཅག་བདག་གིས་ཁྱོད་རྣམས་ལ་ས་སྐལ་དུ་སྤྲད་པའི་ཀ་ན་ཨན་ཡུལ་དུ་སླེབས་དུས་སུ། བདག་གིས་ཁྱོད་རྣམས་ལ་ས་སྐལ་དུ་སྤྲད་པའི་ཡུལ་དེའི་ཁང་པར་མཛེ་ནད་བྱུང་དུ་བཅུག་ཡོད་ན།
LEV 14:35 ཁང་བདག་སོང་ནས་མཆོད་དཔོན་ལ། ངས་བལྟས་ན་ཁང་པར་གཡན་སྤུ་སྐྱེས་འདུག་ཅེས་སྨྲ་དགོས།
LEV 14:36 མཆོད་དཔོན་ཁང་པའི་ནང་བརྟག་དཔྱད་བྱེད་དུ་མ་ཕྱིན་པའི་སྔོན་ལ། ཁང་པའི་ནང་གི་དངོས་པོ་ཡོད་ཚད་བཙོག་པར་མི་འགྱུར་བའི་ཕྱིར། དེ་དག་ལ་ཁང་པའི་ནང་གི་དངོས་པོ་ཆ་ཚང་སྤོ་རུ་འཇུག་དགོས་ལ། དེའི་རྗེས་སུ་མཆོད་དཔོན་ནང་དུ་སོང་ནས་ཁང་པར་བརྟག་དགོས།
LEV 14:37 ཁོས་གཡན་སྤུ་དེ་ལ་བརྟག་དགོས་ཤིང་། ལྟོས་དང་། ཁང་པའི་རྩིག་ངོས་ཀྱི་གཡན་སྤུ་དེར་མདོག་ལྗང་གུའམ་དམར་པོའི་ཐིག་རིས་ཀོང་ཀོང་ཡོད་ཅིང་། རྟགས་དེ་རྩིག་པའི་ནང་འཐིམ་པ་མཐོང་ན།
LEV 14:38 མཆོད་དཔོན་ཁང་པའི་སྒོ་ཕྱི་རུ་ཐོན་ཏེ། ཁང་པའི་སྒོ་ཉིན་བདུན་ལ་རྒྱག་དགོས།
LEV 14:39 ཉིན་བདུན་པར། མཆོད་དཔོན་ཡང་བསྐྱར་སོང་ནས་བརྟག་དགོས་ཤིང་། ལྟོས་དང་། གལ་སྲིད་གཡན་སྤུ་ཁང་པའི་རྩིག་ངོས་སུ་ཁྱབ་པ་མཐོང་ན།
LEV 14:40 མཆོད་དཔོན་གྱིས་གཡན་སྤུ་སྐྱེས་པའི་རྡོ་རྣམས་ཕྱིར་འདོན་པ་དང་། མཁར་ཕྱིའི་གནས་མི་གཙང་བ་ཞིག་ཏུ་གཡུག་པའི་བཀའ་གནང་དགོས།
LEV 14:41 ཡང་ཁོས་ཁང་པའི་རྩིག་ངོས་བཞི་པོ་འབྲད་དུ་འཇུག་པ་དང་། བྲད་པའི་འཇིམ་པ་རྣམས་མཁར་ཕྱིའི་གནས་མི་གཙང་བ་ཞིག་ལ་ལྡུག་ཏུ་འཇུག་དགོས།
LEV 14:42 དེ་ནས་ཁོ་རྣམས་ཀྱིས་རྡོ་གཞན་དག་རྡོ་ཕྱིར་བཏོན་པ་རྣམས་ཀྱི་ཚབ་ཏུ་འཇོག་པ་དང་། འཇིམ་པ་གཞན་གྱིས་ཁང་པའི་ནང་འབྱུག་དགོས་སོ། །
LEV 14:43 ཁོས་རྡོ་རྣམས་བཏོན་ནས་རྩིག་ངོས་བྲད་པ་དང་། བྱུགས་པའི་རྗེས་སུ་གཡན་སྤུ་ཡང་བསྐྱར་སྐྱེས་ན།
LEV 14:44 མཆོད་དཔོན་ནང་དུ་སོང་ནས་བརྟག་དགོས་པ་དང་། ལྟོས་དང་། གལ་སྲིད་གཡན་སྤུ་ཁང་པའི་ནང་དུ་ཁྱབ་ཡོད་ན། དེ་ནི་ཁང་པ་རུ་གཡན་སྤུ་བསྟུད་མར་སྐྱེས་པ་ཡིན་པས་མི་གཙང་བ་ཡིན་ནོ། །
LEV 14:45 ཁོས་ཁང་པ་བཤིགས་ནས་དེའི་རྡོ་དང་ཤིང་ཆ་དང་། འཇིམ་པ་བཅས་ཐམས་ཅད་མཁར་ཕྱིའི་གནས་མི་གཙང་བ་ཞིག་ཏུ་འཁྱེར་དགོས་པ་དང་།
LEV 14:46 ཁང་པའི་སྒོ་གཏན་པའི་དུས་ཡུན་གང་དང་གང་ལ་དེའི་ནང་དུ་འགྲོ་བའི་མི་ནི་དགོང་མོའི་བར་དུ་མི་གཙང་བ་ཡིན།
LEV 14:47 ཁང་པའི་ནང་དུ་ཉལ་བའི་མི་དེས་གོས་རྣམས་གཙང་མར་བཀྲུ་དགོས་པ་དང་། ཁང་པའི་ནང་དུ་ཁ་ཟས་ཟ་བའི་མི་དེས་ཀྱང་གོས་རྣམས་གཙང་མར་བཀྲུ་དགོས།
LEV 14:48 ཁང་པར་འཇིམ་པ་བྱུགས་རྗེས་སུ། མཆོད་དཔོན་ནང་དུ་སོང་ནས་བརྟག་ཅིང་། ལྟོས་དང་། གཡན་སྤུ་ཁང་པའི་ནང་དུ་ཁྱབ་མེད་ན། གཡན་སྤུ་ཚར་བཅད་པས་ཁང་པ་དེ་གཙང་མ་ཡིན་པར་བསྒྲག་དགོས།
LEV 14:49 ཁོས་ཁང་པར་གཙང་སྦྲ་བྱེད་ཆེད། བྱ་གཉིས་དང་ཐང་ཤིང་དང་སེང་སྐུད་མཚལ་དམར་དང་ཨི་སོབ་རྩྭ་ཤིང་བཅས་ཁྱེར་འོངས་ནས།
LEV 14:50 བྱ་གཅིག་རྫ་སྣོད་ནང་གི་ཆུ་དྭངས་མོའི་ཐོག་ཏུ་གསོད་དགོས་པ་དང་།
LEV 14:51 ཐང་ཤིང་དང་ཨི་སོབ་རྩྭ་ཤིང་དང་། སེང་སྐུད་མཚལ་དམར་དང་། བྱ་གསོན་པོ་བཅས་ཐམས་ཅད་བསད་པའི་བྱ་དེའི་ཁྲག་དང་ཆུ་དྭངས་མོའི་ནང་བསྒྲེས་ནས། ཁང་པ་དེ་ལ་ལན་བདུན་གཏོར་དགོས།
LEV 14:52 དེ་ལྟར་བྱ་ཡི་ཁྲག་དང་ཆུ་དྭངས་མོ་དང་། བྱ་གསོན་པོ་དང་། ཐང་ཤིང་དང་། ཨི་སོབ་རྩྭ་ཤིང་དང་། སེང་སྐུད་མཚལ་དམར་བཅས་ཀྱིས་ཁང་པ་དེར་གཙང་སྦྲ་བྱེད་དགོས།
LEV 14:53 ཁོས་བྱ་གསོན་པོ་དེ་མཁར་ཕྱིའི་ཐང་ཆེན་དུ་གཏོང་བ་དང་། ཁོས་ཁང་པའི་སྡིག་པ་བཤག་དགོས་ཤིང་དེ་ནས་ཁང་པ་གཙང་མར་གྱུར་པའོ་ཞེས་བཀའ་བསྩལ་ཏོ། །
LEV 14:54 དེ་ནི་མཛེ་ནད་དང་གཡན་དང་།
LEV 14:55 གོས་དང་ཁང་པ་རྣམས་ལ་གཡན་སྤུ་སྐྱེས་པ་དང་།
LEV 14:56 སྐྱི་མོར་སྐྲངས་འབུར་དང་སིབ་རྒྱས་པ་དང་། ཁྲ་ཐིག་ལྷུང་བ་བཅས་ཀྱི་ཕྱིར་ཡིན་ལ།
LEV 14:57 དུས་ནམ་ཞིག་ལ་གཙང་བ་དང་དུས་ནམ་ཞིག་ལ་མི་གཙང་བའི་དབྱེ་བ་འབྱེད་བྱེད་ཡིན་ཞིང་། དེ་ནི་མཛེ་ནད་ཀྱི་བཀའ་ཁྲིམས་ཡིན་ནོ། །
LEV 15:1 དེ་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
LEV 15:2 ཁྱོད་གཉིས་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གལ་ཏེ་སྐྱེས་པ་ཞིག་གི་ལུས་སུ་རྣག་ནད་བྱུང་ན། ཁོའི་རྣག་ནད་དེ་ནི་མི་གཙང་བ་ཡིན།
LEV 15:3 ཁོ་རང་འཛིར་ནད་ཀྱི་རྐྱེན་གྱིས་མི་གཙང་བར་གྱུར་པ་ནི་འདི་ལྟ་སྟེ། ལུས་ནས་རྣག་བཞུར་བའམ། ཡང་ན་ལུས་ནས་གཤེར་ཁུ་འཛིར་མཚམས་བཞག་པ་གང་ཡིན་ཡང་། ཁོ་རང་མི་གཙང་བ་ཡིན་ནོ། །
LEV 15:4 རྣག་ནད་བྱུང་བའི་མི་དེ་ཉལ་བའི་མལ་ཁྲི་ཐམས་ཅད་མི་གཙང་བ་དང་། མི་དེ་སྡོད་པའི་དངོས་པོ་གང་ཡིན་ཡང་མི་གཙང་བ་ཡིན།
LEV 15:5 ཡང་མི་དེའི་མལ་ས་ལ་རེག་མཁན་གྱིས་རང་གི་གོས་རྣམས་བཀྲུ་བ་དང་། ལུས་པོ་ཆུའི་ནང་དུ་བཀྲུ་དགོས་ཤིང་དགོང་མོའི་བར་དུ་མི་གཙང་བ་ཡིན།
LEV 15:6 སུ་ཞིག་རྣག་ནད་ཅན་དེ་བསྡད་མྱོང་བའི་དངོས་པོའི་སྟེང་དུ་བསྡད་ན། དེས་རང་གི་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན།
LEV 15:7 སུ་ཞིག་གིས་མི་རྣག་ནད་ཅན་གྱི་ལུས་ལ་རེག་ན། དེས་རང་གི་གོས་རྣམས་བཀྲུ་བ་དང་། ལུས་པོ་ཆུའི་ནང་དུ་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན།
LEV 15:8 ཡང་རྣག་ནད་ཅན་གྱིས་སུ་ཞིག་ལ་མཆིལ་མ་འཕངས་ན། དེས་རང་གི་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུ་དགོས་ཤིང་། དེ་ནི་དགོང་མོའི་བར་དུ་མི་གཙང་བ་ཡིན།
LEV 15:9 རྣག་ནད་ཅན་དེ་ཞོན་པའི་སྒ་གང་དང་གང་ཡིན་རུང་དེ་ནི་མི་གཙང་བ་ཡིན།
LEV 15:10 མི་དེ་བསྡད་མྱོང་བའི་དངོས་པོ་གང་རུང་ལ་རེག་ན། དེ་ནི་དགོང་མོའི་བར་དུ་མི་གཙང་བ་དང་། དངོས་པོ་དེ་དག་ཁྱེར་བ་ཡིན་ན། མི་དེས་རང་གི་གོས་རྣམས་བཀྲུ་བ་དང་། ལུས་པོ་ཆུའི་ནང་དུ་བཀྲུ་དགོས་ཤིང་དགོང་མོའི་བར་དུ་མི་གཙང་བ་ཡིན།
LEV 15:11 ཡང་རྣག་ནད་ཅན་དེས་རང་གི་ལག་པ་ཆུས་མ་བཀྲུས་པར་མི་སུ་ཞིག་ལ་རེག་ན། མི་དེས་རང་གི་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན།
LEV 15:12 རྣག་ནད་ཅན་དེས་རེག་པའི་རྫ་སྣོད་གཅོག་དགོས་པ་དང་། དེས་རེག་པའི་ཤིང་གི་སྣོད་ཐམས་ཅད་ཆུ་ཡིས་བཤལ་དགོས།
LEV 15:13 རྣག་ནད་བྱུང་བའི་མི་དེའི་རྣག་ནད་སོས་པ་ཡིན་ན། དེས་རང་ཉིད་གཙང་མར་བཟོ་བར་ཉིན་བདུན་བརྩིས་ཏེ། རང་གི་གོས་རྣམས་བཀྲུ་བ་དང་། ཆུ་གཙང་མས་ལུས་པོ་བཀྲུས་ན་གཙང་མར་གྱུར་པའོ། །
LEV 15:14 ཡང་ཉིན་བརྒྱད་པ་ལ་ཁོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་ནས་དཀོན་མཆོག་ཡ་ཝཱེའི་དྲུང་དུ་འོངས་ཏེ། མཇལ་འཕྲད་གུར་མཆོག་གི་སྒོ་ཁ་རུ་བྱ་རྣམས་མཆོད་དཔོན་ལ་སྤྲོད་དགོས་པ་དང་།
LEV 15:15 མཆོད་དཔོན་གྱིས་དེ་དག་ལས་བྱ་གཅིག་ནི་སྡིག་བཤགས་མཆོད་པ་དང་ཅིག་ཤོས་ནི་སྦྱིན་སྲེག་ཏུ་འབུལ་དགོས་ཤིང་། ཡང་མི་དེའི་རྣག་ནད་ཀྱི་རྐྱེན་གྱིས་དཀོན་མཆོག་ཡ་ཝཱེའི་སྤྱན་སྔར་དེའི་སྡིག་པ་བཤག་དགོས་སོ། །
LEV 15:16 གལ་སྲིད་སྐྱེས་པ་ཞིག་ནས་ཁུ་བ་ཟགས་ན། དེས་རང་གི་ལུས་ཧྲིལ་པོ་ཆུས་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།
LEV 15:17 གོས་དང་ཀོ་བ་གང་ཡིན་ཡང་ཁུ་བ་འགོས་ན་དེ་ཆུ་ཡིས་བཀྲུ་དགོས་པ་དང་། དགོང་མོའི་བར་དུ་མི་གཙང་བ་ཡིན།
LEV 15:18 བུད་མེད་ནི་གལ་སྲིད་སྐྱེས་པ་ཞིག་ལ་ལུས་འབྲེལ་བྱས་ནས་ཁུ་བ་འགོས་ན། དེ་གཉིས་ཀྱིས་རང་གི་ལུས་ཆུ་ཡིས་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན་ནོ། །
LEV 15:19 བུད་མེད་ལ་ཟླ་མཚན་འབབ་པའི་སྐབས་སུ་ལུས་ནས་ཁྲག་འཛིར་ན། ཉིན་བདུན་གྱི་བར་དུ་མི་གཙང་བ་ཡིན། མི་སུ་ཞིག་གིས་ཁོ་མོར་རེག་ཚེ་དེ་ནི་དགོང་མོའི་བར་དུ་མི་གཙང་བ་ཡིན།
LEV 15:20 ཡང་མི་གཙང་བའི་སྐབས་སུ། བུད་མེད་དེ་ཉལ་བའི་དངོས་པོ་ཐམས་ཅད་མི་གཙང་བ་དང་། གང་གི་སྟེང་དུ་བསྡད་ན་དེ་ཡང་མི་གཙང་བ་ཡིན།
LEV 15:21 སུ་ཞིག་གིས་དེའི་མལ་སར་རེག་ན། དེས་རང་གི་གོས་རྣམས་བཀྲུ་བ་དང་ལུས་པོ་ཆུ་ནང་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།
LEV 15:22 ཡང་སུ་ཞིག་གིས་ཁོ་མོ་བསྡད་པའི་དངོས་པོ་ལ་རེག་ན། རང་གི་གོས་རྣམས་བཀྲུ་བ་དང་ལུས་པོ་ཆུ་ནང་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།
LEV 15:23 མལ་སའམ་མོ་བསྡད་པའི་དངོས་པོ་གང་རུང་ལ་སུ་ཞིག་གིས་རེག་ཚེ། དེ་ནི་དགོང་མོའི་བར་དུ་མི་གཙང་བ་ཡིན།
LEV 15:24 གལ་སྲིད་སྐྱེས་པ་ཞིག་ཁོ་མོར་ལུས་འབྲེལ་བྱས་ནས་ཁོ་མོའི་མི་གཙང་བ་དེ་ཁོ་ལ་འགོས་ན། དེ་ཡང་ཉིན་བདུན་ལ་མི་གཙང་བ་ཡིན་ཏེ། ཁོ་ཉལ་བའི་མལ་ས་ཡང་མི་གཙང་བ་ཡིན་ནོ། །
LEV 15:25 དེ་ཡང་བུད་མེད་ལ་ཟླ་མཚན་འབབ་དུས་བརྒལ་ནས་ཉིན་མང་པོར་ཁྲག་བཞུར་བའམ། ཡང་ན་ཟླ་མཚན་འབབ་དུས་རིང་དྲགས་ན། ཁྲག་འཛིར་བའི་ཉིན་མོ་ཡོངས་ལ་ཁོ་མོ་མི་གཙང་བ་སྟེ། ཟླ་མཚན་འབབ་དུས་ཀྱི་ཉིན་རྣམས་ལ་ཁོ་མོ་མི་གཙང་བ་དང་གཅིག་ཡིན།
LEV 15:26 ཁྲག་འཛིར་བའི་ཉིན་མོ་རྣམས་ལ། ཁོ་མོ་ཉལ་བའི་མལ་ས་དང་། སྡོད་སའི་དངོས་པོ་གང་ཡིན་རུང་ཐམས་ཅད་མི་གཙང་བ་ཡིན་ཏེ། ཟླ་མཚན་འབབ་དུས་མི་གཙང་བ་དང་གཅིག་ཡིན།
LEV 15:27 ཡང་དངོས་པོ་དེ་རྣམས་ལ་རེག་མཁན་ནི་མི་གཙང་བ་ཡིན་པས། དེས་རང་གི་གོས་རྣམས་བཀྲུ་བ་དང་། ལུས་པོ་ཆུས་བཀྲུ་དགོས་ལ་དགོང་མོའི་བར་དུ་མི་གཙང་བ་ཡིན།
LEV 15:28 གལ་སྲིད་ཁོ་མོའི་ཁྲག་འཛིར་བ་ཆད་པ་ཡིན་ན། ཉིན་བདུན་བརྩིས་པའི་རྗེས་སུ་ད་གཟོད་གཙང་མར་གྱུར་པའོ། །
LEV 15:29 ཉིན་བརྒྱད་པ་ལ་ཁོ་མོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་འོངས་ནས། མཇལ་འཕྲད་གུར་མཆོག་གི་སྒོ་ཁ་རུ་མཆོད་དཔོན་ལ་སྤྲོད་དགོས།
LEV 15:30 མཆོད་དཔོན་གྱིས་བྱ་དེ་གཉིས་ལས་གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་འབུལ་དགོས་པ་དང་། བུད་མེད་དེའི་ཁྲག་འཛིར་བའི་མི་གཙང་བ་དེའི་རྐྱེན་གྱིས། དཀོན་མཆོག་ཡ་ཝཱེའི་སྤྱན་སྔར་ཁོ་མོའི་སྡིག་པ་བཤག་དགོས་སོ། །
LEV 15:31 དེ་བས་ཁྱོད་ཅག་གིས་ཡེས་ར་ཨེལ་པ་རྣམས་ཁོ་ཚོའི་མི་གཙང་བ་རྣམས་ལས་ལོགས་སུ་འགེར་དགོས། དེ་ལྟར་མ་བྱས་ཚེ་དེ་དག་གིས་བདག་གི་གུར་མཆོག་ཁོ་ཚོའི་ཁྲོད་དུ་ཡོད་པ་དེ་བཙོག་པར་བྱ་ཞིང་། ཁོ་རང་ཚོའི་མི་གཙང་བ་དེའི་རྐྱེན་གྱིས་འཆི་ཉེན་ཡོད་ཅེས་པའོ་ཞེས་བཀའ་བསྩལ་ཏོ། །
LEV 15:32 དེ་ནི་འཛིར་ནད་ཕོག་པའི་མིའམ་ཁུ་བ་ཟགས་ནས་མི་གཙང་བར་གྱུར་པ་དང་།
LEV 15:33 བུད་མེད་ལ་ཟླ་མཚན་འབབ་པའི་དུས་དང་། སྐྱེས་ཕོ་མོར་རྣག་ནད་བྱུང་བ། བུད་མེད་མི་གཙང་བ་དང་ལུས་འབྲེལ་བྱེད་པའི་སྐྱེས་པ་བཅས་ཀྱི་ཕྱིར་དུ་བཙུགས་པའི་བཀའ་ཁྲིམས་ཡིན་ནོ། །
LEV 16:1 ཨ་རོན་གྱི་བུ་གཉིས་དཀོན་མཆོག་ཡ་ཝཱེའི་ཉེ་དྲུང་དུ་བཅར་ཏེ་ཤི་བའི་རྗེས་སུ། དཀོན་མཆོག་ཡ་ཝཱེས་མོ་ཤེ་ལ་གསུང་གླེང་མཛད་ཅིང་།
LEV 16:2 འདི་སྐད་དུ། ཁྱོད་ཀྱིས་རང་གི་ཕུ་བོ་ཨ་རོན་ལ། ཁོ་རང་མི་འཆི་བའི་ཕྱིར་དུ། དུས་གང་རུང་དུ་གནས་དམ་པའི་ཡོལ་བ་ནང་གི་ཤུར་སྒམ་གྱི་སྟེང་ལ་ཡོད་པའི་ཐུགས་རྗེའི་བཞུགས་ཁྲི་མདུན་དུ་མི་འགྲོ་བར་སྒོས་ཤིག ཅིའི་ཕྱིར་ཞེ་ན། བདག་ནི་ཐུགས་རྗེའི་བཞུགས་ཁྲི་སྟེང་གི་སྤྲིན་གསེབ་ནས་སྣང་བར་འགྱུར་རོ། །
LEV 16:3 ཨ་རོན་གནས་དམ་པ་རུ་འདི་ལྟར་འཛུལ་དགོས་ཏེ། སྡིག་བཤགས་མཆོད་པར་སྒོ་ཕྱུགས་ལས་གླང་ཐུག་ཅིག་དང་། སྦྱིན་སྲེག་ཏུ་ལུག་ཐུག་ཅིག་བཅས་མཉམ་དུ་འཛུལ་དགོས།
LEV 16:4 ཁོས་སོ་རས་སྲབ་བུའི་ཕྱི་གོས་དམ་པ་དང་ནང་གོས་ལུས་ལ་གྱོན་ཏེ། སོ་རས་སྲབ་བུའི་སྐེད་ཆིངས་བཅིང་དགོས་ལ། སོ་རས་སྲབ་བུའི་ལ་ཐོད་ཀྱང་དཀྲི་བར་བྱའོ། །དེ་དག་ནི་ན་བཟའ་དམ་པ་ཡིན་པས། ཁོས་རང་གི་ལུས་ཆུ་ཡིས་བཀྲུས་ནས་དེ་དག་གྱོན་དགོས།
LEV 16:5 ཁོས་ཡེས་ར་ཨེལ་པ་རྣམས་ཀྱི་མི་ཚོགས་ལས་ར་ཕོ་གཉིས་སྡིག་བཤགས་མཆོད་པར་འབུལ་བ་དང་། ལུག་ཐུག་གཅིག་སྦྱིན་སྲེག་ཏུ་འབུལ་བའི་ཕྱིར་ལེན་དགོས་སོ། །
LEV 16:6 ཨ་རོན་གྱིས་ཁོ་རང་གི་སྡིག་བཤགས་མཆོད་པའི་གླང་ཐུག་ཕུལ་ནས། ཁོ་རང་ཉིད་དང་ཁྱིམ་མི་རྣམས་ཀྱི་སྡིག་པ་བཤག་དགོས་ལ།
LEV 16:7 ཡང་ར་ཕོ་གཉིས་པོ་དཀོན་མཆོག་ཡ་ཝཱེའི་དྲུང་དུ་ཁྲིད་འོངས་ཏེ་མཇལ་འཕྲད་གུར་མཆོག་གི་སྒོ་ཁར་འཇོག་དགོས།
LEV 16:8 ཨ་རོན་གྱིས་ར་ཐུག་དེ་གཉིས་ལ་རྒྱན་འཕངས་ནས། གཅིག་ནི་དཀོན་མཆོག་ཡ་ཝཱེ་ལ་དབང་བ་དང་། ཅིག་ཤོས་ནི་ཨ་ཟཱ་ཟེལ་ལ་དབང་བར་བྱེད་དགོས།
LEV 16:9 ཨ་རོན་གྱིས་རྒྱན་བླངས་ནས་དཀོན་མཆོག་ཡ་ཝཱེ་ལ་བབས་པའི་ར་ཐུག་དེ་ཁྲིད་འོངས་ཏེ་སྡིག་བཤགས་མཆོད་པར་འབུལ་བ་དང་།
LEV 16:10 རྒྱན་བླངས་ནས་ཨ་ཟཱ་ཟེལ་ལ་བབས་པའི་ར་ཐུག་དེ་ནི། སྡིག་པ་བཤག་བྱེད་དུ་གསོན་པོར་དཀོན་མཆོག་ཡ་ཝཱེའི་དྲུང་དུ་འཇོག་དགོས་ལ། དེ་ནས་ཨ་ཟཱ་ཟེལ་གྱི་ཕྱོགས་སུ་ཐང་སྟོང་དུ་གཏོང་དགོས་སོ། །
LEV 16:11 ཡང་ཨ་རོན་གྱིས་རང་གི་སྡིག་བཤགས་མཆོད་པའི་གླང་ཐུག་ཕུལ་ནས། ཁོ་རང་ཉིད་དང་ཁྱིམ་མི་རྣམས་ཀྱི་སྡིག་པ་བཤག་དགོས་པ་དང་། ཁོས་རང་གི་སྡིག་བཤགས་མཆོད་པའི་གླང་ཐུག་བཤའ་དགོས།
LEV 16:12 ཁོས་དཀོན་མཆོག་ཡ་ཝཱེའི་མདུན་དྲུང་གི་མཆོད་ཁྲི་ལས་སོལ་མེས་གང་བའི་སྤོས་ཕོར་དང་། བདུག་སྤོས་ཞིབ་བཏགས་ཁྱོར་བ་དོ་བླངས་ནས་ཡོལ་བའི་རྒྱབ་ཏུ་འཁྱེར་འོང་དགོས།
LEV 16:13 མི་དེ་འཆི་བར་མི་འགྱུར་བའི་ཕྱིར་བདུག་སྤོས་དཀོན་མཆོག་ཡ་ཝཱེའི་དྲུང་དུ་མེ་ལ་སྒྲོན་ནས། བདུག་སྤོས་ཀྱི་དུ་སྤྲིན་གྱིས་དཔང་མཛད་ཤུར་སྒམ་གྱི་སྟེང་དུ་ཡོད་པའི་ཐུགས་རྗེའི་བཞུགས་ཁྲི་གཡོག་པར་བྱའོ། །
LEV 16:14 ཁོས་གླང་ཐུག་གི་ཁྲག་ཉུང་ཙམ་བླངས་ནས། མཛུབ་མོས་ཐུགས་རྗེའི་བཞུགས་ཁྲིའི་མདུན་དང་ཤར་ཕྱོགས་སུ་གཏོར་བ་དང་། ཡང་ཐུགས་རྗེའི་བཞུགས་ཁྲིའི་མདུན་དུ་ཁྲག་དེ་མཛུབ་མོས་ལན་བདུན་གཏོར་དགོས།
LEV 16:15 ཁོས་མི་རྣམས་ཀྱི་སྡིག་བཤགས་མཆོད་པར་འབུལ་བའི་ར་ཐུག་བཤས་ནས། དེའི་ཁྲག་ཡོལ་བའི་རྒྱབ་ཏུ་འཁྱེར་འོང་ཞིང་། གླང་ཐུག་གི་ཁྲག་གཏོར་བ་བཞིན་དུ་ཁྲག་འདི་ཡང་ཐུགས་རྗེའི་བཞུགས་ཁྲིའི་སྟེང་དང་དེའི་མདུན་དུ་གཏོར་དགོས།
LEV 16:16 ཡང་ཡེས་ར་ཨེལ་པ་རྣམས་ཀྱི་མི་གཙང་བ་དང་ཉེས་སྐྱོན་ཏེ། ཁོ་རྣམས་ཀྱི་སྡིག་པ་མཐའ་དག་གི་ཕྱིར་དུ། ཁོས་གནས་དམ་པའི་སྡིག་པ་བཤག་དགོས་ལ། ཁོས་དེ་རྣམས་ཀྱི་མི་གཙང་བའི་དབུས་སུ་གནས་པའི་མཇལ་འཕྲད་གུར་མཆོག་གི་ཕྱིར་དུའང་དེ་བཞིན་བྱེད་དགོས།
LEV 16:17 ཁོ་གནས་དམ་པ་རུ་འཛུལ་ནས་སྡིག་པ་བཤགས་པའི་དུས་སུ། ཁོས་རང་ཉིད་དང་ཁྱིམ་མི་རྣམས་དང་། ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཀྱི་སྡིག་པ་བཤགས་ནས་ཕྱི་རོལ་ཏུ་ཐོན་པའི་བར་དུ་མཇལ་འཕྲད་གུར་མཆོག་ཏུ་མི་སུ་ཡང་ཡོད་མི་རུང་།
LEV 16:18 ཁོ་ཕྱི་རོལ་ཏུ་ཐོན་རྗེས་དཀོན་མཆོག་ཡ་ཝཱེའི་མདུན་དྲུང་གི་མཆོད་ཁྲིའི་རྩར་སོང་སྟེ་དེའི་སྡིག་པ་བཤག་དགོས། ཁོས་གླང་ཐུག་གི་ཁྲག་དང་ར་ཐུག་གི་ཁྲག་ལས་ཉུང་ཙམ་བླངས་ནས་མཆོད་ཁྲིའི་ཕྱོགས་བཞི་རུ་ཡོད་པའི་རུ་ཐུར་བཞི་པོར་འབྱུག་དགོས།
LEV 16:19 ཡང་མཛུབ་མོས་དེའི་ཁྲག་མཆོད་ཁྲིའི་སྟེང་ལན་བདུན་ལ་གཏོར་བ་དང་། ཡེས་ར་ཨེལ་པ་རྣམས་མི་གཙང་བ་ལས་གཙང་མ་དང་དམ་པར་བཟོ་དགོས་སོ། །
LEV 16:20 ཡང་ཨ་རོན་གྱིས་གནས་དམ་པ་དང་མཇལ་འཕྲད་གུར་མཆོག མཆོད་ཁྲི་བཅས་ཀྱི་སྡིག་པ་བཤགས་ཚར་རྗེས། ར་ཐུག་གསོན་པོ་དེ་འཁྲིས་སུ་འཁྲིད་འོང་དགོས།
LEV 16:21 ཁོའི་ལག་པ་གཉིས་ཀ་ར་ཐུག་གསོན་པོའི་མགོ་ལ་བཞག་ནས། ཡེས་ར་ཨེལ་པ་རྣམས་ཀྱི་ནག་ཉེས་དང་སྐྱོན་ཐམས་ཅད་དེ། ཁོ་རྣམས་ཀྱི་སྡིག་པ་ཐམས་ཅད་མཐོལ་བཤགས་བྱས་ཏེ། སྡིག་པ་ཐམས་ཅད་ར་ཐུག་གི་མགོ་ལ་བཀལ་ནས། ཆེད་བསྐོས་ཀྱི་མི་ཞིག་གིས་དེ་ཐང་སྟོང་དུ་གཏོང་དགོས།
LEV 16:22 ར་ཐུག་གིས་དེ་ཚོའི་ནག་ཉེས་ཐམས་ཅད་འཁུར་ཞིང་གནས་དབེན་པ་ཞིག་ཏུ་འཁྱེར་དགོས་པས། མི་དེས་ར་ཐུག་ནི་ཐང་སྟོང་དུ་གཏོང་དགོས་སོ། །
LEV 16:23 དེ་ནས་ཨ་རོན་མཇལ་འཕྲད་གུར་མཆོག་གི་ནང་དུ་འཛུལ་ཞིང་། སྔར་གནས་དམ་པ་རུ་འགྲོ་དུས་གྱོན་པའི་སོ་རས་སྲབ་བུའི་གོས་རྣམས་ཕུད་ནས་དེར་འཇོག་པ་དང་།
LEV 16:24 ཡང་གནས་དམ་པ་རུ་ལུས་པོ་ཆུ་ཡིས་བཀྲུས་རྗེས་རང་གི་གོས་རྣམས་གྱོན་ནས་ཕྱི་རུ་འོངས་ཏེ། རང་གི་སྦྱིན་སྲེག་དང་མི་རྣམས་ཀྱི་སྦྱིན་སྲེག་ཕུལ་ནས་རང་ཉིད་དང་མི་རྣམས་ཀྱི་སྡིག་པ་བཤག་དགོས་ལ།
LEV 16:25 སྡིག་བཤགས་མཆོད་པར་ཕུལ་བའི་ཕྱུགས་ཟོག་གི་ཚིལ་རྣམས་མཆོད་ཁྲིའི་སྟེང་བསྲེག་དགོས།
LEV 16:26 ར་ཐུག་ཨ་ཟཱ་ཟེལ་གྱི་ཕྱོགས་སུ་གཏོང་མཁན་གྱི་མི་དེས། རང་གི་གོས་རྣམས་བཀྲུ་བ་དང་ལུས་པོ་ཆུ་ཡིས་བཀྲུས་རྗེས་ད་གཟོད་སྒར་ནང་དུ་འགྲོ་རུང་བ་ཡིན།
LEV 16:27 སྡིག་བཤགས་མཆོད་པའི་གླང་ཐུག་དང་། སྡིག་བཤགས་མཆོད་པའི་ར་ཐུག་གཉིས་ཀྱི་ཁྲག་གནས་དམ་པ་རུ་ཁྱེར་ཏེ་སྡིག་པ་བཤགས་པའི་རྗེས་སུ། གླང་ཐུག་དང་ར་ཐུག་དེ་གཉིས་སྒར་ཁའི་ཕྱི་རོལ་ཏུ་ཁྱེར་ནས། པགས་པ་དང་ཤ་དང་ལྕི་བ་བཅས་ཐམས་ཅད་མེ་ལ་བསྲེག་དགོས།
LEV 16:28 དེ་དག་སྲེག་མཁན་གྱིས་རང་གི་གོས་རྣམས་བཀྲུ་བ་དང་། ལུས་པོ་ཆུ་ཡིས་བཀྲུས་རྗེས་ད་གཟོད་སྒར་ནང་དུ་འགྲོ་རུང་བ་ཡིན་ནོ། །
LEV 16:29 དེ་དག་ཁྱོད་ཅག་གི་དུས་གཏན་གྱི་སྒྲིག་ཁྲིམས་ཡིན་ཏེ། ལོ་རེའི་ཟླ་བ་བདུན་པའི་ཚེས་བཅུ་པར་རང་ཉིད་ཁྱད་གསོད་བྱེད་དགོས་པ་དང་། གཞིས་སུ་སྐྱེས་པའམ་ཁྱོད་ཚོའི་དབུས་སུ་སྡོད་པའི་བྱེས་པ་གང་གིས་ཀྱང་ལས་ཀ་ཅི་ཡང་བྱེད་མི་རུང་།
LEV 16:30 ཅིའི་ཕྱིར་ཞེ་ན། ཉིན་དེ་ཉིད་དུ་ཁོས་ཁྱོད་ཅག་གཙང་མར་བཟོ་ཆེད་སྡིག་པ་བཤགས་པ་ཡིན་པས། དཀོན་མཆོག་ཡ་ཝཱེའི་མདུན་དྲུང་དུ་ཁྱོད་རྣམས་ཀྱི་སྡིག་པ་ཐམས་ཅད་དག་ཅིང་།
LEV 16:31 ཉིན་དེ་ནི་ཁྱོད་རྣམས་ཀྱིས་ངལ་གསོ་ཡོངས་སུ་རྫོགས་པའི་ཉིན་མོ་རུ་བསྲུངས་ནས། རང་ཉིད་ཁྱད་གསོད་བྱེད་དགོས་ལ། དེ་ནི་དུས་གཏན་གྱི་སྒྲིག་ཁྲིམས་ཡིན།
LEV 16:32 སྣུམ་གྱིས་བྱུགས་ཤིང་ཕ་ཡི་ཚབ་ཏུ་ལས་འགན་དམ་པ་འཁུར་མཁན་མཆོད་དཔོན་གྱིས་སོ་རས་ཀྱི་གོས་དམ་པ་རྣམས་གྱོན་ཞིང་སྡིག་པ་བཤགས་པ་སྟེ།
LEV 16:33 གནས་དམ་མཆོག་དང་མཇལ་འཕྲད་གུར་མཆོག མཆོད་ཁྲི་བཅས་ཀྱི་ཕྱིར་སྡིག་པ་བཤགས་པར་མ་ཟད། མཆོད་དཔོན་རྣམས་དང་མི་ཚོགས་ཐམས་ཅད་ཀྱི་ཕྱིར་དུ་ཡང་སྡིག་པ་བཤག་དགོས།
LEV 16:34 ཡེས་ར་ཨེལ་པ་རྣམས་ཀྱི་སྡིག་པ་ཐམས་ཅད་ཀྱི་རྐྱེན་གྱིས། ལོ་རེར་ཐེངས་གཅིག་ལ་དེ་དག་གི་སྡིག་པ་བཤག་དགོས་པས། འདི་ནི་ཁྱོད་རྣམས་ཀྱི་དུས་གཏན་གྱི་སྒྲིག་ཁྲིམས་ཡིན་ནོ་ཞེས་བཀའ་བསྩལ་ཏོ། །དེ་ནས་ཨ་རོན་གྱིས་དཀོན་མཆོག་ཡ་ཝཱེས་མོ་ཤེ་ལ་ཅི་ལྟར་བཀའ་བསྩལ་པ་བཞིན་དུ་བསྒྲུབས་སོ། །
LEV 17:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 17:2 ཁྱོད་ཀྱིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་པ་ཐམས་ཅད་ལ་འདི་ལྟར་སྒོས་ཤིག དཀོན་མཆོག་ཡ་ཝཱེས་བཀའ་གནང་བ་ནི་འདི་ལྟ་སྟེ།
LEV 17:3 ཡེས་ར་ཨེལ་གྱི་ཁྱིམ་རྒྱུད་ལས་སུ་ཞིག་གིས་བ་གླང་ངམ། ལུག་ཐུག་གམ་ར་ཐུག་བཅས་གང་རུང་བཤའ་བ་ཡིན་ན། སྒར་ནང་ངམ་སྒར་ཕྱི་གང་དུ་བཤས་ཀྱང་།
LEV 17:4 གལ་སྲིད་ཕྱུགས་ཟོག་དེ་མཇལ་འཕྲད་གུར་མཆོག་གི་སྒོ་ཁ་རུ། དཀོན་མཆོག་ཡ་ཝཱེའི་གུར་མཆོག་གི་མདུན་དུ་ཁྲིད་འོངས་ཏེ་དཀོན་མཆོག་ཡ་ཝཱེ་ལ་མཆོད་པར་འབུལ་བ་མིན་ན། ཁྲག་བཞུར་བ་དེ་ནི་མི་དེའི་ཉེས་པར་བགྲང་དགོས་ཤིང་། ཁོས་ཁྲག་བཞུར་དུ་བཅུག་པས་མི་དེ་ནི་རང་གི་མི་མང་ལས་མེད་པར་གཏོང་དགོས་ལ།
LEV 17:5 དེ་ནི་ཡེས་ར་ཨེལ་པ་རྣམས་ཀྱིས་ཐང་རྒོད་དུ་བཤའ་བའི་དམར་མཆོད་རྣམས་དཀོན་མཆོག་ཡ་ཝཱེའི་མདུན་དྲུང་སྟེ། མཇལ་འཕྲད་གུར་མཆོག་གི་སྒོ་ཁ་རུ། མཆོད་དཔོན་གྱི་མདུན་དུ་ཁྱེར་འོངས་ནས་དམར་མཆོད་དེ་རྣམས་བཤའ་བ་དང་། དེ་རྣམས་དཀོན་མཆོག་ཡ་ཝཱེར་ཞི་བདེའི་མཆོད་པ་རུ་འབུལ་དགོས་པའི་ཕྱིར་རོ། །
LEV 17:6 མཆོད་དཔོན་གྱིས་མཇལ་འཕྲད་གུར་མཆོག་གི་སྒོ་ཁ་རུ། ཁྲག་ནི་དཀོན་མཆོག་ཡ་ཝཱེའི་མཆོད་ཁྲི་སྟེང་གཏོར་བ་དང་། ཚིལ་ནི་བསྲེགས་ཏེ་དཀོན་མཆོག་ཡ་ཝཱེ་ལ་དྲི་ཞིམ་མཆོད་པ་རུ་འབུལ་དགོས།
LEV 17:7 ཁོ་ཚོས་ད་ནི་རྗེས་སུ་འབྲངས་ཏེ་ལོག་གཡེམ་བྱེད་པའི་ར་ཐུག་གི་རྟེན་རྣམས་ལ་དམར་མཆོད་འབུལ་བར་མི་བྱ་ཞིང་། དེ་ནི་ཁོ་རྣམས་ཀྱི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་ནོ་ཞེས་པའོ། །
LEV 17:8 ཁྱོད་ཀྱིས་དེ་དག་ལ་འདི་ལྟར་སྨྲོས་ཤིག ཡེས་ར་ཨེལ་ཁྱིམ་རྒྱུད་ཀྱི་མི་དང་དེ་དག་ཁྲོད་དུ་གནས་པའི་བྱེས་པ་སུ་དང་གང་ཞིག་གིས་སྦྱིན་སྲེག་དང་མཆོད་རྫས་འབུལ་བ་ཡིན་ཚེ།
LEV 17:9 གལ་སྲིད་མཇལ་འཕྲད་གུར་མཆོག་གི་སྒོ་ཁར་ཁྱེར་འོངས་ཏེ་དཀོན་མཆོག་ཡ་ཝཱེ་ལ་འབུལ་བ་མིན་ན། མི་དེ་ནི་མི་མང་ལས་མེད་པར་གཏོང་དགོས་སོ། །
LEV 17:10 ཡེས་ར་ཨེལ་གྱི་ཁྱིམ་རྒྱུད་དང་དེ་དག་གི་ཁྲོད་དུ་གནས་པའི་བྱེས་པ་སུ་དང་སུ་ཞིག་གིས་ཁྲག་གང་རུང་ཟོས་ན། ཁྲག་ཟ་བའི་མི་དེ་ལ་བདག་གི་གདོང་མདོག་ལོག་ཅིང་རང་གི་མི་མང་ལས་མེད་པར་གཏོང་བར་བྱའོ། །
LEV 17:11 གང་ལ་ཞེ་ན། སྲོག་ཆགས་ཀྱི་ཚེ་སྲོག་ནི་ཁྲག་གི་ནང་དུ་ཡོད་ཅིང་། ཁྲག་ནི་ཚེ་སྲོག་ཡིན་ལ་སྡིག་པ་བཤག་ནུས་པས། མཆོད་ཁྲིའི་སྟེང་ཁྱོད་རྣམས་ཀྱི་ཚེ་སྲོག་གི་ཕྱིར་སྡིག་པ་བཤག་པའི་ཆེད་དུ། བདག་གིས་ཁྲག་ནི་ཁྱོད་རྣམས་ལ་སྤྲད་པ་ཡིན་ནོ། །
LEV 17:12 དེ་བས་ན། བདག་གིས་ཡེས་ར་ཨེལ་པ་རྣམས་ལ་འདི་སྐད་དུ། ཁྱོད་རྣམས་སུ་ཡིན་ཡང་ཁྲག་བཟའ་མི་རུང་ལ། ཁྱོད་ཅག་གི་ཁྲོད་དུ་གནས་པའི་བྱེས་པ་རྣམས་ཀྱིས་ཀྱང་ཁྲག་བཟའ་མི་རུང་ཞེས་སྨྲས་པའོ། །
LEV 17:13 ཡེས་ར་ཨེལ་པ་ཐམས་ཅད་དང་དེ་དག་གི་ཁྲོད་དུ་གནས་པའི་བྱེས་པ་སུ་དང་སུ་ཡིན་ཡང་། བཟའ་རུང་བའི་འདབ་ཆགས་སམ་རི་དྭགས་བརྔོན་པ་ཡིན་ན། དེའི་ཁྲག་བཞུར་དུ་བཅུག་ནས་ས་ཡིས་འགེབ་དགོས་སོ། །
LEV 17:14 གང་ལ་ཞེ་ན། སྲོག་ཆགས་ཐམས་ཅད་ཀྱི་ཚེ་སྲོག་སྟེ། ཁྲག་ནི་དེའི་ཚེ་སྲོག་ཡིན་པས་སོ། །དེའི་ཕྱིར་བདག་གིས་ཡེས་ར་ཨེལ་པ་རྣམས་ལ་འདི་སྐད་དུ། ཁྱོད་ཅག་གིས་སྲོག་ཆགས་གང་ཡིན་ཡང་དེའི་ཁྲག་བཟའ་མི་རུང་སྟེ། སྲོག་ཆགས་ཐམས་ཅད་ཀྱི་ཚེ་སྲོག་ནི་དེའི་ཁྲག་ཡིན་པས་སོ། །ཁྲག་བཟའ་བའི་མི་ཐམས་ཅད་ནི་མེད་པར་གཏོང་ངེས་ཡིན་ཞེས་སྨྲས་པའོ། །
LEV 17:15 དེ་ཡང་གཞིས་སྐྱེས་སམ་བྱེས་པ་སུ་ཡིན་ཡང་། རང་བཞིན་གྱིས་ཤི་བའམ་གཅན་གཟན་གྱིས་བསད་པའི་སྲོག་ཆགས་ཟོས་པ་ཡིན་ན། མི་དེས་རང་གི་གོས་རྣམས་བཀྲུ་བ་དང་། ལུས་པོ་ཆུ་ཡིས་བཀྲུ་དགོས་ཤིང་། དགོང་མོའི་བར་དུ་མི་གཙང་བ་དང་། དེའི་རྗེས་སུ་གཙང་བའོ། །
LEV 17:16 འོན་ཀྱང་ཁོས་གོས་དང་ལུས་པོ་མ་བཀྲུས་ན། རང་གི་ནག་ཉེས་འཁུར་དགོས་ཞེས་བཀའ་བསྩལ་ཏོ། །
LEV 18:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 18:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན།
LEV 18:3 ཁྱོད་རྣམས་སྔར་འདུག་སའི་ཨེ་ཅིབ་ཡུལ་གྱི་མི་རྣམས་ཀྱི་སྤྱོད་པ་བཞིན་དུ་བྱེད་མི་རུང་བ་དང་། བདག་གིས་ཁྱོད་ཅག་ཁྲིད་ནས་འགྲོ་ས་ཀ་ན་ཨན་ཡུལ་གྱི་མི་རྣམས་ཀྱི་སྤྱོད་པ་བཞིན་དུ་ཡང་བྱེད་མི་རུང་ལ། དེ་དག་གི་སྒྲིག་ཁྲིམས་བཞིན་དུ་ཡང་སྤྱོད་མི་རུང་ངོ་། །
LEV 18:4 ཁྱོད་རྣམས་ཀྱིས་བདག་གི་སྲོལ་ཡིག་ལྟར་བྱེད་པ་དང་། བདག་གི་སྒྲིག་ཁྲིམས་རྣམས་བརྩི་སྲུང་བྱེད་དགོས་ཤིང་། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན།
LEV 18:5 བདག་གི་སྒྲིག་ཁྲིམས་དང་སྲོལ་ཡིག་རྣམས་ནན་བསྲུང་བྱས་ན། མི་དེའང་དེ་ལ་བརྟེན་ནས་སྲོག་འཚོ་བར་འགྱུར། བདག་ནི་ཡ་ཝཱེ་ཡིན་ནོ། །
LEV 18:6 སུ་ཡིན་ཡང་རང་གི་གཉེན་ཉེའི་གམ་དུ་བཅར་ནས་དེའི་ཁོག་སྨད་གཅེར་བུར་འཕུད་མི་རུང་། བདག་ནི་ཡ་ཝཱེ་ཡིན་ནོ། །
LEV 18:7 ཁྱོད་ཀྱིས་རང་གི་ཕ་ལ་གཏོགས་པའི་ལུས་པོ་སྟེ་ཁྱོད་ཀྱི་མ་ཡི་ཁོག་སྨད་གཅེར་བུར་འཕུད་མི་རུང་སྟེ། ཁོ་མོ་ནི་ཁྱོད་ཀྱི་མ་ཡིན་པའི་ཕྱིར་དེའི་ཁོག་སྨད་གཅེར་བུར་འཕུད་མི་རུང་ངོ་། །
LEV 18:8 ཁྱོད་ཀྱིས་ཕ་ཡི་ཆུང་མ་གཅེར་བུར་འཕུད་མི་རུང་། མོའི་ལུས་གཅེར་བུ་དེ་ཁྱོད་ཀྱི་ཕ་ལ་གཏོགས་པ་ཡིན་ནོ། །
LEV 18:9 ཁྱོད་ཀྱི་ལྕམ་སྲིང་སྟེ། ཁྱོད་ཀྱི་ཕ་ཡི་བུ་མོ་དང་མ་ཡི་བུ་མོ་ཁྱིམ་ནས་སྐྱེས་པའམ་ཕྱི་ནས་སྐྱེས་པ་གང་ཡིན་ཡང་། དེ་དག་གི་ཁོག་སྨད་གཅེར་བུར་འཕུད་མི་རུང་ངོ་། །
LEV 18:10 ཁྱོད་ཀྱི་བུ་ཡི་བུ་མོའམ་བུ་མོའི་བུ་མོ་ཡི་ཁོག་སྨད་གཅེར་བུར་འཕུད་མི་རུང་སྟེ། ཅི་ལ་ཞེ་ན། དེ་དག་གི་ཁོག་སྨད་གཅེར་བུར་ཕུད་པ་ནི་ཁྱོད་ཀྱི་ངོ་ཚ་ཡིན་ནོ། །
LEV 18:11 ཕ་ཡི་ཆུང་མས་བཙས་པའི་བུ་མོ་ནི་ཁྱོད་ཀྱི་ལྕམ་སྲིང་ཡིན་པས། ཁྱོད་ཀྱིས་ཁོ་མོའི་ཁོག་སྨད་གཅེར་བུར་མ་ཕུད་ཅིག
LEV 18:12 ཁྱོད་ཀྱི་ཕ་ཡི་སྲིང་མོའི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་ཕ་ཡི་ཤ་ཁྲག་ཡིན་པའོ། །
LEV 18:13 ཁྱོད་ཀྱི་མ་ཡི་ལྕམ་སྲིང་གི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་མ་ཡི་ཤ་ཁྲག་ཡིན་པའོ། །
LEV 18:14 ཁྱོད་ཀྱི་ཁུ་བོར་དབང་བའི་ཁོག་སྨད་གཅེར་བུར་འཕུད་པའམ་དེའི་ཆུང་མའི་ཉེ་སར་བཅར་མི་རུང་སྟེ། ཁོ་མོ་ནི་ཁྱོད་ཀྱི་ཨ་ནེ་ཡིན་པའོ། །
LEV 18:15 ཁྱོད་ཀྱི་མནའ་མའི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་བུ་ཡི་ཆུང་མ་ཡིན་པས་དེའི་ཁོག་སྨད་གཅེར་བུར་འཕུད་མི་རུང་།
LEV 18:16 ཁྱོད་ཀྱི་སྤུན་གྱི་ཆུང་མའི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་སྤུན་ལ་དབང་བའི་ཁོག་སྨད་ཡིན་ནོ། །
LEV 18:17 བུད་མེད་ཅིག་དང་དེའི་བུ་མོ་གཉིས་ཀྱི་ཁོག་སྨད་གཅེར་བུར་འཕུད་མི་རུང་ལ། ཡང་དེའི་བུ་ཡི་བུ་མོའམ་བུ་མོའི་བུ་མོ་གཉིས་ཀྱི་ཁོག་སྨད་གཅེར་བུར་འཕུད་མི་རུང་སྟེ། དེ་དག་ནི་ཉེ་འབྲེལ་ཡིན་པ་དང་། དེ་ནི་དོན་ངན་པ་ཡིན་ནོ། །
LEV 18:18 ཁྱོད་ཀྱི་ཆུང་མ་ད་དུང་གསོན་པའི་དུས་སུ། ཁྱོད་ཀྱིས་ཁོ་མོའི་འགྲན་ཟླ་རུ་དེའི་ལྕམ་སྲིང་གཞན་ཞིག་ཆུང་མར་བླངས་ནས། ཁོ་མོའི་ལྕམ་སྲིང་གི་ཁོག་སྨད་གཅེར་བུར་འཕུད་མི་རུང་ངོ་། །
LEV 18:19 ཟླ་མཚན་འབབ་དུས་ཀྱི་བུད་མེད་མི་གཙང་བའི་ཉེ་སར་བཅར་ནས་ཁོ་མོའི་ཁོག་སྨད་གཅེར་བུར་འཕུད་མི་རུང་།
LEV 18:20 ཁྱིམ་མཚེས་ཀྱི་ཆུང་མ་དང་འགྲོགས་ནས་རང་ཉིད་བཙོག་པར་བྱེད་མི་རུང་།
LEV 18:21 ཁྱོད་ཀྱིས་རང་གི་བུ་དང་བུ་མོ་རྣམས་མོ་ལེག་ལ་མེ་མཆོད་དུ་འབུལ་མི་རུང་ལ། ཁྱོད་ཀྱི་དཀོན་མཆོག་གི་མཚན་ཡང་ཁྱད་དུ་གསོད་མི་རུང་སྟེ། བདག་ནི་ཡ་ཝཱེ་ཡིན་ནོ། །
LEV 18:22 བུད་མེད་དང་ལུས་འབྲེལ་བྱེད་པའི་ཚུལ་བཞིན་དུ་སྐྱེས་པ་དང་ལུས་འབྲེལ་བྱེད་མི་རུང་སྟེ། དེ་ནི་སྐྱུག་བྲོ་བའི་བྱ་སྤྱོད་ཡིན།
LEV 18:23 སེམས་ཅན་དུད་འགྲོ་དང་འཁྲིག་པ་སྤྱད་དེ་རང་ཉིད་བཙོག་པར་བྱེད་མི་རུང་ལ། བུད་མེད་ཀྱང་སེམས་ཅན་དུད་འགྲོའི་མདུན་དུ་ལངས་ནས་དེ་དང་འཁྲིག་པ་སྤྱོད་མི་རུང་། དེ་ནི་ཕྱིན་ཅི་ལོག་པ་ཡིན་ནོ། །
LEV 18:24 དོན་འདི་ཐམས་ཅད་ཀྱི་ཐད་ནས་ཁྱོད་རྣམས་ཀྱིས་རང་ཉིད་བཙོག་པར་བྱེད་མི་རུང་སྟེ། ཅི་ལ་ཞེ་ན། བདག་གིས་ཁྱོད་ཅག་གི་མདུན་ནས་ཕར་བསྐྲད་པའི་མི་རྣམས་ཀྱིས་དོན་འདི་མཐའ་དག་གི་ཐད་རང་ཉིད་བཙོག་པར་བཟོས་པའོ། །
LEV 18:25 ཐ་ན་ཡུལ་དེའང་སྦགས་པ་ཡིན་པས་བདག་གིས་ཡུལ་དེའི་ནག་ཉེས་ལ་ཆད་པ་བཅད་ཅིང་། ཡུལ་དེས་རང་གི་ཡུལ་མི་རྣམས་སྐྱུག་པའོ། །
LEV 18:26 འོན་ཀྱང་ཁྱོད་ཅག་གིས་བདག་གི་སྒྲིག་ཁྲིམས་དང་སྲོལ་ཡིག་རྣམས་བསྲུང་དགོས་ཤིང་། གཞིས་སྐྱེས་སམ་ཁྱོད་ཅག་ཁྲོད་དུ་གནས་པའི་བྱེས་པ་རྣམས་སུ་ཡིན་ཡང་། སྐྱུག་བྲོ་བའི་དོན་དེ་ལྟ་བུ་ཅི་ཡང་བྱེད་མི་རུང་།
LEV 18:27 ཁྱོད་ཅག་གི་སྔོན་དུ་ཡུལ་དེར་གནས་པའི་ཡུལ་མི་རྣམས་ཀྱིས་སྐྱུག་བྲོ་བའི་དོན་དེ་ཐམས་ཅད་བྱས་པས་ཡུལ་དེ་སྦགས་པའོ། །
LEV 18:28 ཁྱོད་ཀྱིས་དེ་ལྟར་གནས་དེ་མི་གཙང་བར་བཟོས་ན། ཁྱོད་ཀྱི་སྔོན་དུ་ཡོད་པའི་མི་རྣམས་ཡུལ་གྱིས་སྐྱུག་བྲོ་བར་བཟོས་པ་ལྟར། ཁྱོད་རང་སྐྱུག་བྲོ་བར་མི་འགྱུར་བའི་ཕྱིར་དུའོ། །
LEV 18:29 སུ་ཡིན་ཡང་སྐྱུག་བྲོ་བའི་དོན་དེ་རྣམས་ལས་གཅིག་བྱས་ན། དེ་ནི་མི་མང་ལས་མེད་པར་གཏོང་དགོས།
LEV 18:30 ཁྱོད་རྣམས་ཀྱིས་སྐྱུག་བྲོ་བའི་གོམས་སྲོལ་དེ་དག་ལ་བསྟུན་ནས། ཁྱོད་ཅག་སྔོན་གྱི་མི་རྣམས་ཀྱིས་ཅི་ཞིག་བྱས་པ་བཞིན་སྤྱད་དེ་རང་ཉིད་བཙོག་པར་མི་བྱ་བའི་ཆེད་དུ། བདག་གི་བསྒོ་བ་རྣམས་བསྲུང་དགོས་ཏེ། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞེས་སྨྲ་དགོས་པར་བཀའ་བསྩལ་ཏོ། །
LEV 19:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 19:2 ཁྱོད་ཀྱིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་འདི་ལྟར་ཤོད་དང་། ཁྱོད་ཅག་གི་དཀོན་མཆོག་ཡ་ཝཱེ་བདག་ནི་དམ་པ་ཡིན་པའི་ཕྱིར། ཁྱོད་རྣམས་ཀྱང་དམ་པ་ཡིན་དགོས་སོ། །
LEV 19:3 ཁྱོད་ཅག་མི་རེ་རེས་རང་རང་གི་ཕ་མ་ལ་བསྙེན་བཀུར་བྱེད་དགོས་པ་དང་། བདག་གི་ངལ་གསོ་བའི་ཉིན་མོའང་བསྲུང་དགོས་ལ། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །
LEV 19:4 ལྷ་སྐུ་རྣམས་ཀྱི་ཕྱོགས་སུ་འཁོར་མི་རུང་ལ། རང་ཉིད་ཀྱི་ཕྱིར་དུ་ལྷ་སྐུ་རྣམས་ལྡུག་ཀྱང་མི་རུང་སྟེ། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །
LEV 19:5 དེ་ཡང་ཁྱོད་རྣམས་ཀྱིས་དམར་མཆོད་བཤས་ནས་དཀོན་མཆོག་ཡ་ཝཱེ་ལ་ཞི་བདེའི་མཆོད་པ་འབུལ་བའི་ཚེ། ཁྱོད་རྣམས་ཁོང་གི་ཐུགས་ལ་ལྡན་པ་ཞིག་ཡིན་པའི་ཕྱིར་འབུལ་དགོས་པ་དང་།
LEV 19:6 མཆོད་རྫས་དེ་ནི་མཆོད་པར་ཕུལ་བའི་ཉིན་དེ་རང་དང་དེའི་ཕྱི་ཉིན་བཟའ་དགོས་ལ། ཉིན་གསུམ་པའི་བར་དུ་ལུས་པ་རྣམས་མེ་ཡིས་བསྲེག་དགོས་སོ། །
LEV 19:7 གལ་སྲིད་ཉིན་གསུམ་པར་ཟོས་ན་དེ་ནི་མི་གཙང་དྲི་མས་གོས་པ་ཡིན་པས་ཁོང་གི་ཐུགས་ལ་མི་ལྡན་ཞིང་།
LEV 19:8 སུ་ཞིག་གིས་དེ་ཟོས་ན་དེས་རང་གི་ནག་ཉེས་འཁུར་དགོས་ཏེ། ཁོས་དཀོན་མཆོག་ཡ་ཝཱེའི་རྫས་དམ་པ་བསླད་པའི་རྐྱེན་གྱིས་ཁོ་ནི་མི་མང་ལས་མེད་པར་གཏོང་ངེས་སོ། །
LEV 19:9 ཁྱོད་རྣམས་ཀྱིས་རང་གི་ས་ཞིང་ནས་སྟོན་ཐོག་བསྡུ་བའི་ཚེ། ས་ཞིང་གྲུ་ཟུར་གྱི་ལོ་ཏོག་བསྡུ་མི་འོས་ལ། སར་ལྷུང་བའི་སྙེ་མ་རྣམས་ཀྱང་བཏུ་མི་རུང་།
LEV 19:10 རྒུན་འབྲུམ་ར་བ་ལས་རྒུན་འབྲུམ་ཡོད་ཚད་བཏོག་མི་རུང་ལ། རྒུན་འབྲུམ་ར་བར་ས་ལ་ལྷུང་བའི་རྒུན་འབྲུམ་རྣམས་ཀྱང་བཏུ་མི་འོས་ཏེ། དེ་ནི་དབུལ་པོ་དང་བྱེས་པ་རྣམས་ཀྱི་ཕྱིར་དུ་བསྐྱུར་དགོས། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །
LEV 19:11 ཁྱོད་རྣམས་ཀྱིས་རྐུ་བྱེད་མི་རུང་བ་དང་། མགོ་སྐོར་གཏོང་མི་རུང་ལ། ཕན་ཚུན་ལ་རྫུན་ཡང་སྨྲ་མི་རུང་།
LEV 19:12 བདག་གི་མཚན་དཔང་དུ་བཙུགས་ནས་མནའ་རྫུན་མ་བསྐྱལ་ཏེ་ཁྱོད་ཀྱི་དཀོན་མཆོག་གི་མཚན་ཁྱད་དུ་གསོད་མི་རུང་། བདག་ནི་ཡ་ཝཱེ་ཡིན་ནོ། །
LEV 19:13 ཁྱོད་ཀྱི་ཁྱིམ་མཚེས་ལ་བཙན་གནོན་བྱེད་མི་རུང་ལ། འཕྲོག་བཅོམ་ཡང་བྱེད་མི་རུང་། གླ་པའི་གླ་ཆ་ནི་ཞོགས་པའི་བར་དུ་ཁྱོད་ཀྱི་ལག་ནས་ལུས་མི་རུང་།
LEV 19:14 འོན་པ་ལ་དམོད་མོ་འདེབས་མི་རུང་ལ། ལོང་བའི་མདུན་དུ་བཀག་རྡོ་འཇོག་མི་འོས། ཁྱོད་ནི་རང་གི་དཀོན་མཆོག་ལ་གུས་ཤིང་འཇིགས་དགོས་ཏེ། བདག་ནི་ཡ་ཝཱེ་ཡིན་ནོ། །
LEV 19:15 ཁྲིམས་ལ་གཏུག་སྐབས་དྲང་གཞག་ཡིན་དགོས་ཤིང་། དབུལ་པོར་ཕྱོགས་ལྷུང་བྱེད་མི་རུང་ལ། དབང་ཤུགས་ཅན་གྱི་ཁ་ངོར་ཡང་བལྟ་མི་རུང་སྟེ། ཅི་ནས་ཀྱང་འདྲ་མཉམ་གྱིས་ཁྱོད་ཀྱི་ཁྱིམ་མཚེས་ལ་དྲང་བདེན་བསྐྱང་དགོས།
LEV 19:16 མི་མང་གི་ཁྲོད་དུ་གང་སར་དབྱེན་སྦྱོར་རྩོད་སློང་བྱེད་མི་རུང་ལ། ཁྱིམ་མཚེས་ཀྱི་ཚེ་སྲོག་ལ་གནོད་འཚེ་གཏོང་མི་རུང་སྟེ། བདག་ནི་ཡ་ཝཱེ་ཡིན་ནོ། །
LEV 19:17 ཁྱོད་ཀྱི་སེམས་སུ་རང་གི་སྤུན་ཟླར་སྡང་མི་རུང་། ཁྱོད་ཀྱིས་རང་གི་ཁྱིམ་མཚེས་ཀྱི་རྐྱེན་གྱིས་སྡིག་པ་མི་འབྱུང་བའི་ཕྱིར་དེའི་སྐྱོན་སྟོན་དགོས།
LEV 19:18 འཁོན་ལན་སློག་མི་རུང་ལ། ཁྱོད་རང་གི་མི་རྣམས་ལ་འཁང་ར་ཡང་བྱེད་མི་རུང་ཞིང་། ཁྱོད་ཀྱིས་ཁྱིམ་མཚེས་ལའང་རང་དང་འདྲ་བར་གཅེས་ཤིག བདག་ནི་ཡ་ཝཱེ་ཡིན་ནོ། །
LEV 19:19 ཁྱོད་ཅག་གིས་བདག་གི་སྒྲིག་ཁྲིམས་བརྩི་སྲུང་བྱེད་དགོས་ཏེ། ཁྱོད་ཀྱི་ཕྱུགས་ཟོག་རྣམས་རིགས་མི་གཅིག་པ་དང་འཁྲིག་ཏུ་འཇུག་མི་རུང་བ་དང་། ཞིང་ལ་རིགས་མི་མཚུངས་པའི་ས་བོན་གཉིས་འདེབས་མི་རུང་ལ། རྒྱུ་གཉིས་ལས་གྲུབ་པའི་གྱོན་པ་ཡང་གོན་མི་རུང་ངོ་། །
LEV 19:20 གལ་སྲིད་སྐྱེས་པ་ཞིག་བུད་མེད་ཅིག་ལ་འགྲོགས་ནས་འཁྲིག་པ་སྤྱད་ཅིང་། ཁོ་མོ་ནི་བྲན་མོ་ཡིན་ཞིང་སྐྱེས་པ་གཞན་ལ་གཉེན་རྟགས་བརྒྱབ་ཡོད་པ་དང་། ད་དུང་བླུས་མེད་པའམ་རང་དབང་ཐོབ་མེད་པ་ཡིན་ན། ཉེས་ཆད་གཅོད་འོས་པ་ལས་དེ་གཉིས་གསོད་པར་མི་རིགས། ཅི་ལ་ཞེ་ན། བྲན་མོར་ད་དུང་རང་དབང་ཐོབ་མེད་པའོ། །
LEV 19:21 སྐྱེས་པ་དེས་ཉེས་སེལ་མཆོད་པ་སྟེ་ལུག་ཐུག་ཅིག་དཀོན་མཆོག་ཡ་ཝཱེའི་མདུན་དྲུང་དུ་མཇལ་འཕྲད་གུར་མཆོག་གི་སྒོ་ཁར་འཁྲིད་འོང་དགོས།
LEV 19:22 དེ་ནས་མཆོད་དཔོན་གྱིས་ཉེས་སེལ་མཆོད་པར་ཕུལ་བའི་ལུག་ཐུག་དེས། མི་དེས་བྱས་པའི་སྡིག་པའི་ཆེད་དུ་དཀོན་མཆོག་ཡ་ཝཱེའི་སྤྱན་སྔར་སྡིག་པ་བཤག་དགོས་པ་དང་། དེས་བྱས་པའི་སྡིག་པ་སེལ་བར་ངེས་སོ། །
LEV 19:23 ཁྱོད་རྣམས་ཀཱ་ན་ཨན་ཡུལ་དུ་སླེབས་ཚེ། སིལ་སྡོང་སྣ་ཚོགས་བཙུགས་ནས་དེ་དག་གི་ཤིང་ཏོག་རྣམས་ཟས་སུ་སྤྱོད་མི་རུང་། ལོ་གསུམ་གྱི་ནང་དུ་ཁྱོད་ཅག་གིས་དེ་བཀོལ་མི་རུང་ལ་བཟའ་ཡང་མི་རུང་ངོ་། །
LEV 19:24 འོན་ཀྱང་ལོ་བཞི་པར་ཐོགས་པའི་ཤིང་ཏོག་ནི་ཐམས་ཅད་དམ་པ་ཡིན་ལ། དཀོན་མཆོག་ཡ་ཝཱེ་ལ་བསྟོད་པ་འབུལ་བའི་མཆོད་པ་ཡིན།
LEV 19:25 ལོ་ལྔ་པར་ཁྱོད་ཅག་གི་ཆེད་དུ་སིལ་སྡོང་ལ་ཤིང་ཏོག་མང་པོ་ཐོགས་སུ་བཅུག་ནས། ཁྱོད་རྣམས་ཀྱིས་སྡོང་མགོའི་སིལ་ཏོག་རྣམས་བཟའ་དགོས། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །
LEV 19:26 ཁྱོད་ཚོས་ཁྲག་ཡོད་པའི་ཁ་ཟས་ཅི་ཡང་བཟའ་མི་རུང་ཞིང་། ཁྱོད་ཚོས་མོ་འདེབས་མི་རུང་ལ། སྐར་ལྟས་ལའང་བལྟ་མི་རུང་།
LEV 19:27 ཁྱོད་ཀྱི་སྐྲ་འདབས་བཞར་མི་རུང་བ་དང་། ཨག་ཚོམ་གྱི་མཐའ་ནས་ཀྱང་གཅོད་མི་རུང་།
LEV 19:28 གཤིན་པོའི་ཕྱིར་དུ་རང་གི་ཤ་གཅོད་མི་རུང་ལ། ལུས་སྟེང་དུ་རི་མོ་གཙགས་མི་རུང་། བདག་ནི་ཡ་ཝཱེ་ཡིན་ནོ། །
LEV 19:29 ཁྱོད་ཀྱི་བུ་མོ་སྨད་འཚོང་མ་རུ་བྱས་ནས་སྐྱོན་གྱིས་གོས་པར་བྱེད་མི་རུང་། དེ་ལྟར་བྱས་ན་ཡུལ་འདིས་གཡེམ་སྦྱོར་སྤེལ་ནས་གནས་འདིར་ངན་པས་འགེང་བར་འགྱུར་རོ། །
LEV 19:30 ཁྱོད་རྣམས་ཀྱིས་བདག་གི་ངལ་གསོ་བའི་ཉིན་མོ་རྣམས་བསྲུང་བ་དང་། བདག་གི་གནས་མཆོག་ལ་གུས་ཤིང་འཇིགས་དགོས། བདག་ནི་ཡ་ཝཱེ་ཡིན་ནོ། །
LEV 19:31 ལྷ་པ་རྣམས་ཀྱི་ཕྱོགས་སུ་འཁོར་མི་རུང་ལ། མོ་པ་རྣམས་ལ་ཞུ་ཡང་མི་རུང་སྟེ། ཁྱོད་རང་དེ་དག་གིས་བཙོག་པར་མི་བྱེད་པའི་ཕྱིར་ཡིན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །
LEV 19:32 མགོ་སྐྲ་དཀར་པོར་གྱུར་པའི་མདུན་ནས་ཡར་ལངས་པ་དང་། བགྲེས་པོ་ཚོར་གུས་བཀུར་བྱེད་དགོས། ཁྱོད་ཀྱི་དཀོན་མཆོག་ལ་གུས་ཤིང་འཇིགས་པར་གྱིས། བདག་ནི་ཡ་ཝཱེ་ཡིན་ནོ། །
LEV 19:33 གལ་སྲིད་ཕྱི་རོལ་གྱི་མི་ཞིག་ཁྱོད་ཅག་གི་ཡུལ་ནས་ཁྱོད་དང་མཉམ་དུ་གནས་བཅས་ན་དེ་ལ་ཐུབ་ཚོད་བྱེད་མི་རུང་།
LEV 19:34 ཁྱོད་ཅག་གི་ཡུལ་ནས་བྱེས་སུ་སྡོད་པའི་ཕྱི་མི་ལ། ཁྱོད་རྣམས་ཀྱིས་གཞིས་སྐྱེས་པའི་ལྟ་སྟངས་འཛིན་པར་མ་ཟད། རང་ཉིད་ལ་གཅེས་པ་བཞིན་དེ་ཡང་གཅེས་སུ་འཛིན་དགོས། ཅི་ལ་ཞེ་ན། ཁྱོད་རྣམས་ཀྱང་ཨེ་ཅིབ་ཡུལ་དུ་བྱེས་སུ་བསྡད་མྱོང་བས་སོ། །བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །
LEV 19:35 ཁྱོད་རྣམས་ཀྱིས་ཁྲིམས་ཐག་གཅོད་པའི་སྐབས་སུ། རིང་ཐུང་ཚད་པ་དང་ལྕི་ཡང་འཇལ་བ། ཤོང་ཚད་འཇལ་བ་བཅས་ལ་གཡོ་སྒྱུ་བྱེད་མི་རུང་།
LEV 19:36 ཁྱོད་རྣམས་ཀྱིས་དྲང་གཞག་གི་རྒྱ་སྲང་དང་དྲང་གཞག་གི་རྒྱ་རྡོ་དང་། དྲང་གཞག་གི་ཨེ་ཕཱ་དང་། དྲང་གཞག་གི་རྫ་བུམ་བཅས་བཀོལ་དགོས། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ལ། སྔར་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་ཡིན།
LEV 19:37 ཁྱོད་རྣམས་ཀྱིས་བདག་གི་སྒྲིག་ཁྲིམས་དང་སྲོལ་ཡིག་ཐམས་ཅད་བརྩི་སྲུང་བྱས་ནས་དེ་བཞིན་དུ་སྒྲུབས་ཤིག བདག་ནི་ཡ་ཝཱེ་ཡིན་ནོ་ཞེས་སྨྲ་དགོས་པར་བཀའ་བསྩལ་ཏོ། །
LEV 20:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 20:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར། ཡེས་ར་ཨེལ་པ་དང་ཡེས་ར་ཨེལ་གྱི་ཁྲོད་དུ་བྱེས་སུ་སྡོད་པའི་ཕྱི་མི་སུ་ཡིན་ཡང་། རང་གི་བུ་རྒྱུད་མོ་ལེག་ལ་མཆོད་པར་བྱེད་ན་དེ་ནི་གསོད་དགོས། ཡུལ་མི་རྣམས་ཀྱིས་རྡོ་རུབ་བཏང་ནས་གསོད་དགོས་པ་དང་།
LEV 20:3 མི་དེ་ལ་བདག་གི་གདོང་མདོག་ཀྱང་ལོག་སྟེ་ཁོ་རང་མི་མང་ཁྲོད་ནས་མེད་པར་གཏོང་བར་བྱ། གང་ལ་ཞེ་ན། ཁོས་རང་གི་བུ་རྒྱུད་མོ་ལེག་ལ་ཕུལ་ནས། བདག་གི་གནས་མཆོག་སྦགས་པ་དང་བདག་གི་མཚན་དམ་པ་ཁྱད་དུ་བསད་པའི་ཕྱིར་རོ། །
LEV 20:4 གལ་སྲིད་མི་དེས་བུ་བུ་མོ་རྣམས་མོ་ལེག་ལ་ཕུལ་བ་དང་། ཡུལ་མི་རྣམས་ཀྱིས་དེ་མ་མཐོང་ཁུལ་བྱས་ཏེ་མི་དེ་མི་གསོད་ན།
LEV 20:5 མི་དེ་དང་དེའི་ཁྱིམ་མི་ལ་བདག་གི་གདོང་མདོག་ལོག་ཅིང་། མི་དེ་དང་དེའི་རྗེས་སུ་འབྲངས་ནས་མོ་ལེག་དང་ལོག་གཡེམ་བྱེད་པ་ཐམས་ཅད་མི་མང་ལས་མེད་པར་གཏོང་བར་བྱའོ། །
LEV 20:6 མི་སུ་ཞིག་མོ་པ་དང་ལྷ་པ་རྣམས་ཀྱི་ཕྱོགས་སུ་འཁོར་བ་དང་། དེ་དག་གི་རྗེས་སུ་འབྲངས་ནས་ལོག་གཡེམ་བྱེད་པ་ཡིན་ན། མི་དེ་ལ་བདག་གི་གདོང་མདོག་ལོག་ཅིང་ཁོ་རང་མི་མང་ལས་མེད་པར་གཏོང་བར་བྱའོ། །
LEV 20:7 ཁྱོད་ཅག་གིས་རང་ཉིད་དམ་པར་བྱོས་ལ་དམ་པར་སྒྱུར་ཅིག ཅི་ལ་ཞེ་ན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པའི་ཕྱིར་རོ། །
LEV 20:8 ཁྱོད་ཅག་གིས་བདག་གི་སྒྲིག་ཁྲིམས་བརྩི་སྲུང་བྱས་ནས་དེ་བཞིན་དུ་བྱོས་ཤིག བདག་ནི་ཁྱོད་ཅག་དམ་པར་བཟོ་བའི་དཀོན་མཆོག་ཡ་ཝཱེ་ཡིན།
LEV 20:9 གལ་ཏེ་རང་གི་ཕ་མ་ལ་དམོད་མོ་འདེབས་མཁན་ཡོད་ན་དེ་གསོད་དགོས། སུས་ཕ་མ་ལ་དམོད་མོ་གཏོང་ན། དེའི་སྟེང་ནས་ཁྲག་ལན་འཇལ་དགོས་སོ། །
LEV 20:10 གཞན་གྱི་ཆུང་མ་སྟེ་རང་གི་ཁྱིམ་མཚེས་གྱི་ཆུང་མ་དང་ལོག་གཡེམ་བྱེད་མཁན་སུ་ཡིན་ཡང་། འཆལ་པོ་འཆལ་མོ་གཉིས་ཀ་གསོད་དགོས།
LEV 20:11 སུ་ཞིག་རང་གི་ཕ་ཡི་ཆུང་མ་དང་ལུས་འབྲེལ་བྱེད་པ་སྟེ། རང་གི་ཕ་ཡི་ཁོག་སྨད་གཅེར་བུར་འཕུད་པ་ཡིན་ན། དེ་གཉིས་ཀ་གསོད་དགོས་ལ། དེ་གཉིས་ཀའི་སྟེང་ནས་ཁྲག་ལན་འཇལ་དགོས་པ་ཡིན།
LEV 20:12 སུ་ཞིག་རང་གི་མནའ་མ་དང་ལུས་འབྲེལ་བྱེད་ན་དེ་གཉིས་ཀ་གསོད་དགོས། དེ་དག་གིས་གཉེན་ཚན་བར་འཁྲིག་པ་སྤྱད་པ་ཡིན་པས། ཁོ་ཚོའི་སྟེང་ནས་ཁྲག་ལན་འཇལ་དགོས།
LEV 20:13 སྐྱེས་པ་ཞིག་བུད་མེད་ལ་ལུས་འབྲེལ་བྱེད་པའི་ཚུལ་བཞིན་དུ་ཕོ་དང་ལུས་འབྲེལ་བྱས་ན། དེ་གཉིས་ཀྱིས་སྐྱུག་བྲོ་བའི་ལས་བྱས་པ་ཡིན་པས་གསོད་དགོས། དེ་དག་གི་སྟེང་ནས་ཁྲག་ལན་འཇལ་དགོས།
LEV 20:14 སྐྱེས་པ་ཞིག་གིས་ཆུང་མ་བླངས་པ་དང་། ཆུང་མའི་མ་ཡང་བླངས་ན་དེ་ནི་ལོག་སྤྱོད་ཡིན་པས། མི་དེ་གསུམ་པོ་མེ་ཡིས་བསྲེགས་ནས། ཁྱོད་ཚོའི་ཁྲོད་ནས་ལོག་སྤྱོད་མེད་པར་བཟོ་དགོས།
LEV 20:15 སུ་ཞིག་གིས་ཕྱུགས་ཟོག་རིགས་དང་འཁྲིག་པ་སྤྱད་ན་མི་དེ་གསོད་དགོས་ལ། ཕྱུགས་ཟོག་དེ་ཡང་གསོད་དགོས།
LEV 20:16 བུད་མེད་ཅིག་ཕྱུགས་ཟོག་རིགས་ཀྱི་ཉེ་སར་བཅར་ནས་དེ་དང་འཁྲིག་པ་སྤྱད་ན། ཁྱོད་ཀྱིས་བུད་མེད་དང་ཕྱུགས་ཟོག་གཉིས་ཀ་གསོད་དགོས། དེ་དག་ངེས་པར་གསོད་དགོས་ལ། དེ་དག་གི་སྟེང་ནས་ཁྲག་ལན་འཇལ་དགོས་པའོ། །
LEV 20:17 སུ་ཞིག་གིས་རང་གི་ལྕམ་སྲིང་སྟེ། ཕ་ཡི་བུ་མོའམ་ཡང་ན་མ་ཡི་བུ་མོ་ཆུང་མར་བླངས་ཏེ། ཕན་ཚུན་གྱི་ཁོག་སྨད་མཐོང་བ་ཡིན་ན་དེ་ནི་ངོ་ཚ་དགོས་པའི་དོན་ཡིན་པས། དེ་གཉིས་ཀ་རང་གི་མི་རྣམས་ཀྱི་མཐོང་ངོར་རྩ་མེད་དུ་གཏོང་དགོས། དེས་རང་གི་ལྕམ་སྲིང་གི་ཁོག་སྨད་གཅེར་བུར་འཕུད་པ་ཡིན་པས་ཉེས་པ་འཁུར་དགོས་པའོ། །
LEV 20:18 གལ་ཏེ་སུ་ཞིག་ཟླ་མཚན་འབབ་དུས་ཀྱི་བུད་མེད་དང་ལུས་འབྲེལ་བྱས་ནས། ཁོ་མོའི་ཁོག་སྨད་གཅེར་བུར་འཕུད་པ་དང་། ཁོ་མོའི་ཁྲག་ཁུངས་དམར་རྗེན་དུ་བཏོན་ཏེ། ཁོ་མོས་ཀྱང་རང་གི་ཁྲག་ཁུངས་མངོན་པ་ཡིན་ན། དེ་གཉིས་ཀ་རང་གི་མི་མང་ལས་མེད་པར་གཏོང་དགོས།
LEV 20:19 མ་ཡི་ལྕམ་སྲིང་དང་ཕ་ཡི་ལྕམ་སྲིང་གི་ཁོག་སྨད་གཅེར་བུར་འཕུད་མི་རུང་། དེ་ནི་རང་གི་གཉེན་ཉེ་གཅེར་བུར་འཕུད་པ་ཡིན་པས། ཁོ་ཚོས་རང་གི་ནག་ཉེས་འཁུར་དགོས་སོ། །
LEV 20:20 གལ་ཏེ་སུ་ཞིག་ཁུ་བོའི་ཆུང་མ་དང་ལུས་འབྲེལ་བྱས་ན། དེ་ནི་རང་གི་ཁུ་བོའི་ཁོག་སྨད་གཅེར་བུར་འཕུད་པ་ཡིན་པས། དེ་ཚོས་རང་གི་སྡིག་པ་འཁུར་དགོས་ལ་བུ་ཕྲུག་མེད་པར་འཆི་ངེས་ཡིན།
LEV 20:21 ཡང་སུ་ཞིག་གིས་རང་གི་སྤུན་གྱི་ཆུང་མ་བླངས་ན་དེ་ནི་སྤུན་གྱི་ཁོག་སྨད་གཅེར་བུར་འཕུད་པ་ཡིན་ལ། དེ་ནི་འཆལ་སྤྱོད་ཡིན་པས་ཁོ་ཚོར་བུ་ཕྲུག་མེད་པར་འགྱུར་རོ། །
LEV 20:22 ཁྱོད་ཚོས་བདག་གི་སྒྲིག་ཁྲིམས་དང་སྲོལ་ཡིག་ཐམས་ཅད་སྲུང་བརྩི་བྱས་ནས་དེ་བཞིན་བྱོས་ཤིག དེ་ནས་བདག་གིས་ཁྱོད་རྣམས་ཁྲིད་དེ་གནས་པར་འགྱུར་བའི་ཡུལ་དེས་ཁྱོད་ཅག་སྐྱུག་པར་མི་བྱའོ། །
LEV 20:23 ཁྱོད་རྣམས་ནི་བདག་གིས་ཁྱོད་ཅག་གི་མདུན་ནས་བསྐྲད་པའི་མི་རྣམས་ཀྱི་ལུགས་སྲོལ་གྱི་རྗེས་སུ་འབྲང་མི་རུང་སྟེ། ཅི་ལ་ཞེ་ན། དེ་དག་གིས་དོན་མི་ལེགས་པ་དེ་ཐམས་ཅད་བྱས་པས་བདག་ནི་དེ་དག་ལ་ཞེན་པ་གཏིང་ནས་ལོག་ཡོད།
LEV 20:24 འོན་ཀྱང་བདག་གིས་ཁྱོད་ཚོ་ལ། དེ་དག་གི་ཡུལ་ནི་ཁྱོད་རྣམས་ཀྱིས་རྒྱུན་འཛིན་བྱེད་པ་དང་། བདག་གིས་འོ་མ་དང་སྦྲང་རྩི་བཞུར་བའི་ཡུལ་དེ་ཁྱོད་ཅག་ལ་བགོ་སྐལ་དུ་སྟེར་བར་བྱ་ཞེས་སྨྲས་ཡོད། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་སྟེ། ཁྱོད་རྣམས་མི་ཐམས་ཅད་ལས་སོ་སོར་འགེར་མཁན་དེ་ཡིན་ནོ། །
LEV 20:25 ཁྱོད་རྣམས་ཀྱིས་འདབ་ཆགས་དང་སེམས་ཅན་དུད་འགྲོ་གཙང་མི་གཙང་གི་དབྱེ་བ་འབྱེད་དགོས་པ་དང་། བདག་གིས་མི་གཙང་བར་སོ་སོར་ཕྱེས་པའི་འདབ་ཆགས་དང་སེམས་ཅན་དུད་འགྲོའམ། ཡང་ན་ས་སྟེང་གི་ལྟོ་འགྲོ་སྲོག་ཆགས་གང་དང་གང་གི་རྐྱེན་གྱིས་རང་ཉིད་སྐྱུག་བྲོ་བར་བཟོ་མི་རུང་།
LEV 20:26 ཡ་ཝཱེ་ང་རང་ནི་དམ་པ་ཡིན་པའི་ཕྱིར། ཁྱོད་ཀྱང་བདག་གི་ཆེད་དུ་དམ་པ་ཡིན་དགོས། བདག་གིས་ཁྱོད་ཅག་བདག་གི་ཡིན་པའི་རྐྱེན་གྱིས་མི་ཐམས་ཅད་ལས་སོ་སོར་བཀར་བ་ཡིན་ནོ། །
LEV 20:27 ཡང་མོ་པ་དང་ལྷ་པ་ནི་སྐྱེས་ཕོ་མོ་སུ་ཡིན་ཡང་གསོད་དགོས་ལ། མི་ཡིས་རྡོ་རུབ་བཏང་སྟེ་གསོད་དགོས་པ་དང་། དེ་དག་གི་སྟེང་ནས་ཁྲག་ལན་འཇལ་དགོས་ཞེས་སྨྲོས་ཤིག་ཅེས་བཀའ་བསྩལ་ཏོ། །
LEV 21:1 དེ་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་གྱི་བུ་རྒྱུད་ལས་མཆོད་དཔོན་ཡིན་པ་རྣམས་ལ་འདི་ལྟར་སྨྲོས་ཤིག མཆོད་དཔོན་གྱིས་རང་གི་མི་མང་ཁྲོད་ཀྱི་འདས་པོའི་ཕྱིར་དུ་རང་ཉིད་སྦག་མི་རུང་།
LEV 21:2 དེ་ཡང་རང་གི་རྩ་བའི་གཉེན་ཉེ་སྟེ། ཁོའི་ཕ་མ་དང་། བུ་བུ་མོ་དང་། སྤུན་མཆེད་དང་།
LEV 21:3 ཡང་ན་ད་དུང་གནས་ལ་མ་སོང་བའི་ན་ཆུང་བུ་མོ་སྟེ་ལྕམ་སྲིང་ཡིན་པ་བཅས་ནི་འཕུད་དགོས། དེ་ནི་ཁོའི་ལྕམ་སྲིང་ཡིན་པའི་རྐྱེན་གྱིས་རང་ཉིད་མི་གཙང་བར་བྱས་ཆོག
LEV 21:4 མཆོད་དཔོན་ནི་རང་གི་མི་མང་ཁྲོད་ཀྱི་འགོ་དཔོན་ཡིན་པས། རང་ཉིད་སྦགས་ནས་མི་གཙང་བར་བྱེད་མི་རུང་ངོ་། །
LEV 21:5 མགོ་སྤྱི་ཐེར་དུ་གཏོང་བ་དང་ཨག་ཚོམ་གྱི་སྣེ་མོ་གཅོད་མི་རུང་ལ། རང་ལུས་ཀྱི་ཤ་སྐྱི་གང་ཡང་གཅོད་མི་རུང་།
LEV 21:6 ཁོ་རྣམས་ནི་དཀོན་མཆོག་གི་ཆེད་དུ་དམ་པ་ཡིན་དགོས་ལ། རང་གི་དཀོན་མཆོག་གི་མཚན་ཁྱད་དུ་གསོད་མི་རུང་། དཀོན་མཆོག་ཡ་ཝཱེའི་མེ་མཆོད་དེ་དཀོན་མཆོག་གི་ཞལ་ཟས་ནི་ཁོ་རྣམས་ཀྱིས་འདྲེན་པ་ཡིན་པས། ཁོ་ཚོ་ནི་དམ་པ་ཡིན་དགོས་སོ། །
LEV 21:7 མཆོད་དཔོན་གྱིས་སྨད་འཚོང་མ་དང་ཡང་ན་གཞན་གྱིས་སྦགས་པའི་བུད་མེད་ནི་ཆུང་མར་ལེན་མི་རུང་ལ། ཁྱོ་གས་ཕྱི་ལ་སྤྱུགས་པའི་བུད་མེད་ཀྱང་ཆུང་མར་ལེན་མི་རུང་། ཅི་ལ་ཞེ་ན། ཁོ་ནི་རང་གི་དཀོན་མཆོག་གི་ཆེད་དུ་དམ་པ་ཡིན་པས་སོ། །
LEV 21:8 མཆོད་དཔོན་གྱིས་ཁྱོད་ཀྱི་དཀོན་མཆོག་ལ་ཞལ་ཟས་འདྲེན་པས་ཁྱོད་ཀྱིས་ཁོ་ནི་དམ་པར་བཟོ་དགོས། ཁྱོད་ཀྱིས་མཆོད་དཔོན་དམ་པར་བརྩི་དགོས་ཏེ། ཅིའི་ཕྱིར་ཞེ་ན། བདག་ནི་ཁྱོད་རྣམས་དམ་པར་བཟོ་བའི་དཀོན་མཆོག་ཡ་ཝཱེ་དང་དམ་པ་ཡིན་པའི་ཕྱིར་རོ། །
LEV 21:9 མཆོད་དཔོན་གྱི་བུ་མོ་སྨད་འཚོང་མ་བྱས་ནས་རང་ཉིད་སྦགས་ན། རང་གི་ཕ་བཙོག་པར་བཟོས་པ་ཡིན་པས་ཁོ་མོ་མེས་བསྲེག་དགོས་སོ། །
LEV 21:10 སྤུན་ཟླ་ཚོའི་ཁྲོད་ནས་མཆོད་དཔོན་ཆེན་པོ་བྱེད་པ་སྟེ། མགོ་ལ་འབྱུག་སྣུམ་བླུགས་པ་དང་། ལས་འགན་དམ་པ་རྒྱུན་འཛིན་བྱས་ཤིང་འཕགས་གོས་མནབས་པ་དེས། མགོ་ཟིང་ནས་སྐྲ་བཤིག་པར་མི་བྱེད་པ་དང་གོས་ཀྱང་གཤག་མི་རུང་།
LEV 21:11 བེམ་པོ་གང་ཡིན་ཡང་དེའི་ཉེ་སར་བཅར་མི་རུང་སྟེ། རང་གི་ཕ་མའི་ཆེད་དུ་ཡང་རང་ཉིད་སྦག་མི་རུང་ངོ་། །
LEV 21:12 དཀོན་མཆོག་གི་གནས་མཆོག་འབག་པར་མི་བྱེད་པའི་ཕྱིར་དུ། མཆོད་དཔོན་ཆེན་པོ་གནས་མཆོག་གི་ཕྱི་རུ་འགྲོ་མི་རུང་སྟེ། ཁོའི་ལུས་སྟེང་དུ་དཀོན་མཆོག་གི་འབྱུག་སྣུམ་དམ་པ་ཡོད་པའི་རྐྱེན་གྱིས། དཀོན་མཆོག་གི་གནས་མཆོག་འབག་པར་མི་བྱེད་དེ། གནས་མཆོག་གི་ཕྱི་རུ་འགྲོ་མི་རུང་། བདག་ནི་ཡ་ཝཱེ་ཡིན་ནོ། །
LEV 21:13 ཁོས་ན་ཆུང་བུ་མོ་ཆུང་མར་ལེན་དགོས་ཏེ།
LEV 21:14 མཆོད་དཔོན་ཆེན་པོས་ཡུགས་མོ་དང་ཁྱོ་གས་ཕྱི་ལ་སྤྱུགས་པའི་བུད་མེད་དང་། ཡང་ན་གཞན་གྱིས་སྦགས་པའི་སྨད་འཚོང་མ་བཅས་ནི་ཆུང་མར་ལེན་མི་རུང་། ཁོས་རང་གི་མི་མང་ཁྲོད་ཀྱི་ན་ཆུང་བུ་མོ་འབའ་ཞིག་ཆུང་མར་ལེན་དགོས།
LEV 21:15 ཁོས་རང་གི་མི་རིགས་ཀྱི་ཁྲོད་དུ་རང་གི་བུ་རྒྱུད་བཙོག་པར་བཟོ་མི་རུང་། ཅི་ལ་ཞེ་ན། བདག་ནི་ཁོ་རང་དམ་པར་བཟོ་མཁན་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ།།
LEV 21:16 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 21:17 ཁྱོད་ཀྱིས་ཨ་རོན་ལ་འདི་ལྟར་སྒོས་ཤིག ཁྱོད་ཀྱི་རིགས་རྒྱུད་ལས་མི་རབས་ནས་མི་རབས་བར། དབང་བོ་སྐྱོན་ཅན་སུ་ཡིན་ཡང་ཚུར་འོངས་ནས་སོ་སོའི་དཀོན་མཆོག་ལ་ཞལ་ཟས་འདྲེན་མི་རུང་།
LEV 21:18 ཅི་ལ་ཞེ་ན། དབང་བོ་སྐྱོན་དང་ལྡན་པ་ནི། ལོང་བའམ། ཞ་བོའམ། ཁ་ངོ་སྐྱོན་ཅན་ནམ། ཡན་ལག་གཅིག་རིང་དྲགས་པའམ།
LEV 21:19 རྐང་པའམ་ལག་པར་ཆག་གྲུམ་ཤོར་བའམ།
LEV 21:20 སྒུར་པོ་དང་། མིའུ་ཐུང་དང་། མིག་མཛེར་ཅན་དང་། རྔོའམ་རྨ་སྐོགས་ཅན་དང་། རླིག་འབྲས་བསྣད་པ་བཅས་ནི་ཚུར་འོང་མི་རུང་ངོ་། །
LEV 21:21 མཆོད་དཔོན་ཨ་རོན་གྱི་རིགས་རྒྱུད་ལས་དབང་བོ་སྐྱོན་ཅན་སུ་ཡིན་ཡང་། ཚུར་འོངས་ནས་དཀོན་མཆོག་ཡ་ཝཱེའི་མེ་མཆོད་འབུལ་མི་རུང་། དེའི་དབང་བོར་སྐྱོན་ཡོད་པས་ཚུར་འོངས་ནས་དཀོན་མཆོག་ལ་ཞལ་ཟས་འདྲེན་མི་རུང་ངོ་། །
LEV 21:22 རང་གི་དཀོན་མཆོག་གི་ཞལ་ཟས་ནི་ཀུན་ལས་དམ་པའམ་དམ་པ་གང་ཡིན་ཡང་ཁོས་དེ་ཟོས་ཆོག་མོད།
LEV 21:23 འོན་ཀྱང་། ཁོ་རང་ཡོལ་བའི་མདུན་དུ་འོང་མི་རུང་ལ། མཆོད་ཁྲིའི་ཉེ་སར་ཡང་བཅར་མི་རུང་སྟེ། ཁོའི་དབང་བོར་སྐྱོན་ཡོད་པ་དང་བདག་གི་གནས་མཆོག་མི་སྦག་པའི་ཕྱིར་རོ། །བདག་ནི་དེ་རྣམས་དམ་པར་བཟོ་བའི་དཀོན་མཆོག་ཡ་ཝཱེ་ཡིན་ནོ་ཞེས་པའོ་གསུངས།
LEV 21:24 དེ་བས་མོ་ཤེ་ཡིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་པ་ཐམས་ཅད་ལ་བཀའ་བསྒོས་སོ། །
LEV 22:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 22:2 ཁྱོད་ཀྱིས་ཨ་རོན་དང་དེའི་བུ་རྣམས་ལ་འདི་ལྟར་བསྒོ་བར་གྱིས། ཁྱོད་ཅག་གིས་བདག་གི་མཚན་དམ་པ་ཁྱད་དུ་མི་གསོད་པའི་ཕྱིར། ཡེས་ར་ཨེལ་པ་རྣམས་ཀྱིས་བདག་གི་ཆེད་དུ་དམ་པར་བསྔོས་པའི་རྫས་རྣམས་གཟབ་གཟབ་བྱས་ནས་བསྲུང་དགོས་ལ། བདག་ནི་ཡ་ཝཱེ་ཡིན་ནོ་ཞེས་དང་།
LEV 22:3 ཡང་དེ་དག་ལ་འདི་ལྟར་སྨྲོས་ཤིག ཁྱོད་ཀྱི་རིགས་རྒྱུད་ཀྱི་མི་རབས་ཀུན་ལས་སུ་ཡིན་ཡང་། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་ཆེད་དུ་དམ་པར་བསྔོས་པའི་རྫས་དང་ཉེ་བར་གཅར་མཁན་དེ་མི་གཙང་བ་ཡིན་ན། མི་དེ་ནི་ངའི་སྤྱན་སྔ་ནས་མེད་པར་གཏོང་ངེས་ཡིན། བདག་ནི་ཡ་ཝཱེ་ཡིན་ནོ། །
LEV 22:4 ཨ་རོན་གྱི་བུ་རྒྱུད་ལས་མཛེ་ནད་ཅན་དང་། ཡང་ན་འཛིར་ནད་ཡོད་པ་སུ་ཡིན་ཡང་གཙང་མར་མ་གྱུར་བར་དུ། རྫས་དམ་པ་དག་ལས་བཟའ་མི་རུང་། སུ་ཞིག་གིས་བེམ་པོའི་རྐྱེན་གྱིས་མི་གཙང་བར་གྱུར་པའི་རྫས་དང་ཁུ་བ་ཟགས་པའི་མི་ལ་རེག་པའམ།
LEV 22:5 ཡང་ན་ཁོ་རང་མི་གཙང་བར་བཟོ་བའི་ལྟོ་འགྲོ་སྲོག་ཆགས་སམ་མི་གང་དང་གང་ལ་རེག་པ་ཡིན་ན། མི་དེར་མི་གཙང་བའི་ཆ་གང་ཞིག་ཡོད་ནའང་།
LEV 22:6 དེ་རྣམས་ལ་རེག་པའི་མི་ནི་དགོང་མོའི་བར་དུ་མི་གཙང་བ་ཡིན་ཏེ། ལུས་པོ་ཆུས་མ་བཀྲུས་ན་རྫས་དམ་པ་ལས་བཟའ་མི་རུང་།
LEV 22:7 ཉི་མ་ནུབ་པའི་དུས་སུ་ཁོ་རང་གཙང་མར་འགྱུར་ཞིང་། དེའི་རྗེས་སུ་རྫས་དམ་པ་ལས་བཟའ་རུང་བ་ཡིན། ཅིའི་ཕྱིར་ཞེ་ན། དེ་ནི་ཁོའི་ཁ་ཟས་ཡིན་པའི་ཕྱིར་རོ། །
LEV 22:8 ཡང་རང་ཉིད་མི་སྦག་པའི་ཕྱིར་ཁོས་རང་བཞིན་གྱིས་ཤི་བའམ་གཅན་གཟན་གྱིས་བསད་པའི་ཤ་ནི་བཟའ་མི་རུང་། བདག་ནི་ཡ་ཝཱེ་ཡིན།
LEV 22:9 བདག་གི་བཀའ་རྣམས་ཁྱད་དུ་བསད་པའི་རྐྱེན་གྱིས་རང་གི་སྡིག་པ་ཁུར་ནས་འཆི་བར་མི་འགྱུར་བའི་ཆེད་དུ་བསྲུང་དགོས། བདག་ནི་དེ་དག་དམ་པར་བྱེད་པའི་དཀོན་མཆོག་ཡ་ཝཱེ་ཡིན་པའོ། །
LEV 22:10 དེ་ཡང་ཕྱི་མི་སུ་ཡིན་ཡང་རྫས་དམ་པ་རྣམས་བཟའ་མི་རུང་སྟེ། མཆོད་དཔོན་ཚང་གི་མགྲོན་པོའམ་གླ་པ་སུ་ཡིན་ཡང་རྫས་དམ་པ་ལས་བཟའ་མི་རུང་།
LEV 22:11 གལ་སྲིད་མཆོད་དཔོན་གྱིས་རང་གི་དངུལ་སྤྲད་ནས་ཉོས་པའི་མི་ཡིན་ན་དེས་རྫས་དམ་པ་བཟའ་རུང་བ་དང་། རང་ཁྱིམ་ནས་སྐྱེས་པ་དག་གིས་ཀྱང་དེའི་ཁ་ཟས་ལས་བཟའ་རུང་བ་ཡིན་ནོ། །
LEV 22:12 གལ་སྲིད་མཆོད་དཔོན་གྱི་བུ་མོ་ཕྱི་མི་ཞིག་ལ་གཉེན་བསྒྲིགས་ན། དེས་འདེགས་མཆོད་ཀྱི་རྫས་དམ་པ་བཟའ་མི་རུང་བ་ཡིན།
LEV 22:13 ཅི་སྟེ་མཆོད་དཔོན་གྱི་བུ་མོ་ཡུགས་མོ་རུ་ལུས་པའམ་ཁྱོ་གས་བཟའ་འཐོར་བྱས་ནས། ཕྲུ་གུ་མེད་པར་གཞོན་དུས་དང་འདྲ་བར་ཕ་གཞིས་སུ་ཕྱིར་ལོག་ན། རང་གི་ཕ་ཡི་ཁ་ཟས་ལས་བཟའ་རུང་མོད། འོན་ཀྱང་ཕྱི་མི་སུ་ཡིན་ཡང་དེ་ལས་བཟའ་མི་རུང་ངོ་། །
LEV 22:14 གལ་སྲིད་མི་ཞིག་གིས་མ་ཤེས་པར་རྫས་དམ་པ་ལས་ཟོས་ན། དེས་རྫས་དམ་པའི་ཁར་ལྔ་ཆ་གཅིག་བསྣན་ཏེ་མཆོད་དཔོན་ལ་སྤྲོད་དགོས།
LEV 22:15 ཡང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་རྫས་དམ་པ་ནི་མཆོད་དཔོན་གྱིས་སྦག་མི་རུང་སྟེ།
LEV 22:16 དེ་བཞིན་བྱས་ན་ཁོ་རྣམས་ཀྱིས་རྫས་དམ་པ་ཟོས་ནས་རང་གིས་རང་ལ་ནག་ཉེས་འགེལ་བར་འགྱུར། ཅི་ལ་ཞེ་ན། བདག་ནི་དེ་རྣམས་དམ་པར་བྱེད་པའི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ། །
LEV 22:17 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 22:18 ཁྱོད་ཀྱིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་པ་ཐམས་ཅད་ལ་འདི་ལྟར་སྒོས་ཤིག ཡེས་ར་ཨེལ་གྱི་ཁྱིམ་རྒྱུད་དང་ཡེས་ར་ཨེལ་གྱི་ཁྲོད་དུ་གནས་པའི་བྱེས་པ་རྣམས་ལས་སུ་ཞིག་གིས་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པ་འབུལ་ན། དམ་བཅས་པ་བཞིན་དུ་སྒྲུབ་པའམ་ཡིད་མོས་མཆོད་པ་གང་ཡིན་ཡང་།
LEV 22:19 སྐྱོན་གང་ཡང་མེད་པའི་བ་གླང་ཞིག་གམ། ཡང་ན་ཕོ་ལུག་དང་། ཡང་ན་ར་ཕོ་ཞིག་འབུལ་དགོས་ཤིང་། དེ་ལྟར་བྱས་ན་ཁྱོད་རྣམས་ད་གཟོད་ཁོང་གི་ཐུགས་སུ་ལྡན་པ་ཡིན།
LEV 22:20 སྐྱོན་དང་ལྡན་པ་གང་ཡིན་ཡང་འབུལ་མི་རུང་སྟེ། དེ་ལྟར་བྱས་ན་ཁོང་གི་ཐུགས་སུ་མི་ལྡན་པའི་ཕྱིར་རོ། །
LEV 22:21 གལ་སྲིད་སུ་ཞིག་གིས་དམ་བཅས་པ་བཞིན་དུ་བསྒྲུབ་པའི་ཆེད་དུའམ། ཡིད་མོས་མཆོད་པ་རུ་བ་ཁྱུ་དང་ར་ལུག་གི་ཁྱུ་ནས་དཀོན་མཆོག་ཡ་ཝཱེ་ལ་ཞི་བདེའི་མཆོད་པ་འབུལ་ན། ཁོང་གི་ཐུགས་སུ་ལྡན་པའི་ཕྱིར་མཆོད་པ་དེ་ནི་ནད་མེད་པ་དང་སྐྱོན་གང་ཡང་མེད་པ་ཞིག་ཡིན་དགོས།
LEV 22:22 ལོང་བའམ། ཞ་བོའམ། སུག་རྡུམ་མམ། ཤ་མཛེར་ཅན་དང་རྔོ་ཅན་ནམ། རྨ་ཅན་བཅས་གང་ཡིན་ཡང་དཀོན་མཆོག་ཡ་ཝཱེ་ལ་འབུལ་མི་རུང་སྟེ། མཆོད་ཁྲིའི་སྟེང་དུ་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་བར་མི་རིགས་སོ། །
LEV 22:23 བ་གླང་ངམ་ལུ་གུ་གང་ཡིན་ཡང་། སུག་པ་གཅིག་རིང་དྲགས་པའམ་ཐུང་དྲགས་ན། དེ་ནི་ཡིད་མོས་མཆོད་པ་འབའ་ཞིག་ཏུ་འབུལ་རུང་བ་ཡིན་ལ། དམ་བཅས་པ་བཞིན་དུ་བསྒྲུབ་པའི་ཆེད་དུ་ཡིན་ན་དེ་ནི་ཐུགས་ལ་མི་ལྡན་ནོ། །
LEV 22:24 ཡང་རླིག་འབྲས་བསྣད་པའམ། བརྫིས་པའམ། གཤགས་པའམ། བཅད་པ་སོགས་གང་ཡིན་ཡང་དཀོན་མཆོག་ཡ་ཝཱེ་ལ་འབུལ་མི་རུང་ཞིང་། ཁྱོད་ཅག་གི་ཡུལ་དུ་དེ་ལྟ་བུ་བྱེད་མི་རུང་ངོ་། །
LEV 22:25 ཕྱི་མིའི་ལག་ནས་ཐོབ་པའི་སྲོག་ཆགས་དེའི་རིགས་གང་དང་གང་ཡིན་ཡང་། ཁྱོད་རྣམས་ཀྱི་དཀོན་མཆོག་གི་ཞལ་ཟས་སུ་འབུལ་མི་རུང་། ཅི་ལ་ཞེ་ན། དེ་དག་ལ་ཡན་ལག་མི་ཚང་བ་དང་སྐྱོན་ཡོད་པས། ཁྱོད་རྣམས་ཀྱི་ཕྱིར་དེ་དག་ཐུགས་སུ་ལྡན་པར་མི་འགྱུར་བས་སོ་ཞེས་པའོ་གསུངས་སོ།།
LEV 22:26 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 22:27 བཙས་མ་ཐག་གི་བ་ཕྲུག་དང་། ལུ་གུའམ། རེའུ་བཅས་ནི་ཉིན་བདུན་ལ་མ་དང་མཉམ་དུ་འདུག་དགོས་ལ། ཉིན་བརྒྱད་པ་ནས་བཟུང་སྟེ་མེ་མཆོད་ཀྱི་མཆོད་པ་བྱས་ནས་དཀོན་མཆོག་ཡ་ཝཱེ་ལ་འབུལ་རུང་བ་དང་། དེ་ནི་ཁོང་གི་ཐུགས་སུ་ལྡན་པ་ཡིན།
LEV 22:28 བ་གླང་དང་ར་ལུག་གང་ཡིན་ཡང་། དེ་དང་དེའི་ཕྲུ་གུ་གཉིས་ཉིན་གཅིག་ལ་བཤའ་མི་རུང་བ་དང་།
LEV 22:29 ཁྱོད་རྣམས་ཀྱིས་དམར་མཆོད་བཤས་ནས་དཀོན་མཆོག་ཡ་ཝཱེ་ལ་གཏང་རག་གི་མཆོད་པ་འབུལ་བའི་ཚེ། ཁྱོད་ཅག་གིས་ཁོང་གི་ཐུགས་སུ་ལྡན་པ་ཞིག་འབུལ་དགོས་སོ། །
LEV 22:30 དེ་ནི་ཉིན་དེ་རང་དུ་བཟའ་དགོས་པ་དང་། ཞོགས་པའི་བར་དུ་ཅི་ཡང་ལུས་སུ་འཇུག་མི་རུང་། བདག་ནི་ཡ་ཝཱེ་ཡིན་ནོ། །
LEV 22:31 ཁྱོད་རྣམས་ཀྱིས་བདག་གི་བཀའ་རྣམས་བསྲུངས་ནས་དེ་བཞིན་དུ་བསྒྲུབ་དགོས། བདག་ནི་ཡ་ཝཱེ་ཡིན་ནོ། །
LEV 22:32 བདག་གི་མཚན་དམ་པ་ཁྱད་དུ་མ་གསོད་ཅིག བདག་ནི་ཡེས་ར་ཨེལ་པ་རྣམས་ཀྱི་ཁྲོད་དུ་དམ་པར་བཀུར་ཞིང་། བདག་ནི་ཁྱོད་ཅག་དམ་པར་བཟོ་མཁན་དཀོན་མཆོག་ཡ་ཝཱེ་ཡིན་ལ།
LEV 22:33 ཁྱོད་ཅག་གི་དཀོན་མཆོག་ཡིན་པའི་ཆེད་དུ། ཁྱོད་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་པ་དང་། བདག་ནི་ཡ་ཝཱེ་ཡིན་ནོ་ཞེས་གསུངས་སོ། །
LEV 23:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 23:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གཤམ་དུ་བཀོད་པ་ནི་བདག་གི་དུས་ཆེན་རྣམས་ཏེ། ཁྱོད་རྣམས་ཀྱིས་དམ་པའི་འདུ་འཛོམས་སུ་ཁྱབ་བསྒྲགས་བྱེད་དགོས་པའི་བདག་གི་དུས་ཆེན་རྣམས་ཡིན་ནོ། །
LEV 23:3 ཉིན་དྲུག་གི་རིང་ལ་ལས་ཀ་བྱེད་ཅིང་ཉིན་བདུན་པ་ནི་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ལ། འདུ་འཛོམས་དམ་པ་ཡོད་དགོས་ཏེ་ལས་ཀ་གང་ཡང་བྱེད་མི་རུང་། དེ་ནི་ཁྱོད་རྣམས་ཀྱི་སྡོད་གནས་ཐམས་ཅད་དུ་དཀོན་མཆོག་ཡ་ཝཱེའི་ཕྱིར་བསྲུང་དགོས་པའི་ངལ་གསོ་བའི་ཉིན་མོ་ཡིན་ནོ། །
LEV 23:4 གཤམ་དུ་བཀོད་པ་ནི་ཁྱོད་ཅག་གིས་དུས་ལྟར་འདུ་འཛོམས་དམ་པ་རུ་བསྒྲག་དགོས་པའི་དཀོན་མཆོག་ཡ་ཝཱེའི་དུས་ཆེན་རྣམས་ཡིན་ནོ། །
LEV 23:5 ཟླ་བ་དང་པོའི་ཚེས་བཅུ་བཞི་ཡི་ས་སྲོས་ཀྱི་དུས་ནི་དཀོན་མཆོག་ཡ་ཝཱེའི་པེ་སག་གི་དུས་ཆེན་ཡིན།
LEV 23:6 ཟླ་བ་དེའི་ཚེས་བཅོ་ལྔ་ནི་དཀོན་མཆོག་ཡ་ཝཱེའི་ཕྱིར་སྲུང་བའི་སྐྱུར་མེད་བག་ལེབ་ཀྱི་དུས་ཆེན་ཡིན་ཏེ། ཁྱོད་ཅག་གིས་ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས།
LEV 23:7 ཉིན་དང་པོར་འདུ་འཛོམས་དམ་པ་ཡོད་དགོས་ཤིང་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
LEV 23:8 འོན་ཀྱང་དཀོན་མཆོག་ཡ་ཝཱེ་ལ་ཉིན་བདུན་གྱི་རིང་མེ་མཆོད་འབུལ་དགོས། ཉིན་བདུན་པར་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་ཞེས་པའོ་གསུངས་སོ། །
LEV 23:9 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 23:10 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་བདག་གིས་ཁྱོད་ཅག་ལ་གནང་བའི་ཡུལ་དུ་སླེབས་ནས་ལོ་ཏོག་བསྡུ་བའི་ཚེ། ཐོག་ཕུད་ལོ་ཏོག་གི་ཚར་ཕོན་གཅིག་ཁྱེར་འོངས་ཏེ་མཆོད་དཔོན་ལ་སྤྲོད་དགོས།
LEV 23:11 ཁྱོད་རྣམས་ཁོང་གི་ཐུགས་སུ་ལྡན་པའི་ཕྱིར་དུ། མཆོད་དཔོན་གྱིས་ཚར་ཕོན་དེ་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱེད་ཅིང་། ངལ་གསོ་ཉིན་མོའི་ཕྱི་ཉིན་མཆོད་དཔོན་གྱིས་དེ་གཡོ་བར་བྱེད་དགོས།
LEV 23:12 ཚར་ཕོན་གཡོ་བའི་ཉིན་མོར་ཁྱོད་རྣམས་ཀྱིས་ལོ་གཅིག་ཅན་གྱི་ལུ་གུ་ཕོ་སྐྱོན་མེད་པ་ཞིག་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་འབུལ་དགོས།
LEV 23:13 དེ་དང་མཉམ་དུ་འབུལ་བའི་འབྲུ་མཆོད་ནི་སྣུམ་བསྲེས་གྲོ་ཞིབ་ཨེ་ཕཱ་ཡི་བཅུ་ཆ་གཉིས་ཡིན་ཏེ། དཀོན་མཆོག་ཡ་ཝཱེ་ལ་འབུལ་བའི་དྲི་ཞིམ་མེ་མཆོད་ཡིན་པ་དང་། དེ་དང་མཉམ་དུ་འབུལ་བའི་སྐྱེམས་མཆོད་ནི་རྒུན་ཆང་རྫ་བུམ་གྱི་བཞི་ཆ་གཅིག་ཡིན་ནོ། །
LEV 23:14 བག་ལེབ་དང་འབྲུ་རྔོས་མའམ། སྙེ་མ་གསར་པ་བཅས་གང་ཡིན་ཡང་། ཁྱོད་རྣམས་ཀྱིས་མཆོད་པ་འདི་རྣམས་ཁྱེར་འོངས་ནས་ཁྱོད་ཅག་གི་དཀོན་མཆོག་ལ་འབུལ་བའི་ཉིན་མོའི་བར་དུ་བཟའ་མི་རུང་སྟེ། ཁྱོད་རྣམས་ཀྱི་སྡོད་གནས་ཐམས་ཅད་དུ། འདི་ནི་ཁྱོད་ཅག་གི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས་སོ། །
LEV 23:15 དེ་ཡང་ཁྱོད་རྣམས་ཀྱིས་རང་ཉིད་ཀྱི་ཕྱིར་ངལ་གསོ་ཉིན་མོའི་ཕྱི་ཉིན་ཏེ། འབྲུ་རིགས་ཀྱི་ཚར་ཕོན་དེ་གཡོབ་མཆོད་དུ་ཕུལ་བའི་ཉིན་མོ་དེ་ནས་བཟུང་། ངལ་གསོ་བའི་ཉིན་མོ་བདུན་ཏག་ཏག་བགྲང་དགོས་ལ།
LEV 23:16 ངལ་གསོ་བའི་ཉིན་མོ་ཨང་བདུན་པའི་ཕྱི་ཉིན་ཏེ་བསྡོམས་པས་ཉིན་ལྔ་བཅུ་ཡིན་ལ། ཁྱོད་རྣམས་ཀྱིས་འབྲུ་མཆོད་གསར་པ་ཞིག་དཀོན་མཆོག་ཡ་ཝཱེ་ལ་ཕུལ་ཞིག
LEV 23:17 ཁྱོད་ཅག་གི་སྡོད་གནས་དག་ལས་གྲོ་ཞིབ་བྲེའི་བཅུ་ཆ་གཉིས་བླངས་ཏེ། གཡོབ་མཆོད་ཀྱི་བག་ལེབ་སྐྱུར་མ་གཉིས་བསྲེགས་ནས། དཀོན་མཆོག་ཡ་ཝཱེ་ལ་ཐོག་ཕུད་ཀྱི་ལོ་ཏོག་འབུལ་དགོས།
LEV 23:18 ཡང་ལོ་གཅིག་ཅན་གྱི་ལུ་གུ་ཕོ་སྐྱོན་མེད་པ་བདུན་དང་། སྒོ་ཕྱུགས་ལས་གླང་ཐུག་གཅིག་དང་ལུག་ཐུག་གཉིས་བཅས་བག་ལེབ་དང་མཉམ་དུ་འབུལ་དགོས། དེ་དག་ནི་འབྲུ་མཆོད་དང་སྐྱེམས་མཆོད་མཉམ་དུ་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་འབུལ་བ་དང་། དཀོན་མཆོག་ཡ་ཝཱེ་ལ་དྲི་ཞིམ་མེ་མཆོད་དུ་འབུལ་དགོས།
LEV 23:19 ཡང་ཁྱོད་རྣམས་ཀྱིས་ར་ཕོ་ཞིག་སྡིག་བཤགས་མཆོད་པ་དང་ལོ་གཅིག་ཅན་གྱི་ལུ་གུ་ཕོ་གཉིས་ཞི་བདེའི་མཆོད་པ་རུ་འབུལ་དགོས་པ་དང་།
LEV 23:20 མཆོད་དཔོན་གྱིས་དེ་རྣམས་དང་ལོ་ཏོག་གི་ཕུད་ཀྱིས་བཟོས་པའི་བག་ལེབ། ལུ་གུ་གཉིས་བཅས་མཉམ་དུ་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་འབུལ་དགོས། འདི་རྣམས་ནི་དཀོན་མཆོག་ཡ་ཝཱེའི་རྫས་དམ་པ་ཡིན་པས་མཆོད་དཔོན་ལ་དབང་བ་ཡིན་ནོ། །
LEV 23:21 ཉིན་མོ་དེར་ཁྱོད་ཅག་གིས་འདུ་འཛོམས་དམ་པ་ཡིན་པ་བསྒྲག་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་། ཁྱོད་ཅག་གི་སྡོད་གནས་ཐམས་ཅད་དུ། དེ་ནི་ཁྱོད་རྣམས་ཀྱི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས་སོ། །
LEV 23:22 ཁྱོད་རྣམས་ཀྱིས་རང་རང་གི་ས་ཞིང་ལས་ལོ་ཏོག་བསྡུ་བའི་ཚེ། ས་ཞིང་གི་གྲུ་ཟུར་བར་དུ་ཡོངས་སུ་བསྡུ་མི་རུང་། ལོ་ཏོག་སར་ལྷུང་བ་རྣམས་ཀྱང་བཏུ་མི་རུང་། དེ་ནི་དབུལ་པོ་དང་བྱེས་པ་དག་གི་ཕྱིར་དུ་འཇོག་དགོས། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ། །
LEV 23:23 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 23:24 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཟླ་བ་བདུན་པའི་ཚེས་དང་པོ་ནི་ཁྱོད་རྣམས་ཀྱིས་ངལ་གསོ་ཡོངས་སུ་རྫོགས་པའི་ཉིན་མོ་རུ་བསྲུང་བ་དང་། རྗེས་དྲན་གྱི་དུང་བུས་ནས་འདུ་འཛོམས་དམ་པ་ཡོད་དགོས།
LEV 23:25 རྒྱུན་ལྡན་གྱི་ལས་ཀ་གང་ཡང་བྱེད་མི་རུང་བར་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས་ཞེས་པའོ་གསུངས་སོ། །
LEV 23:26 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 23:27 ཟླ་བ་བདུན་པའི་ཚེས་བཅུ་ནི་སྡིག་པ་བཤགས་པའི་ཉིན་མོ་ཡིན་པས། ཁྱོད་རྣམས་ཀྱིས་འདུ་འཛོམས་དམ་པ་རོལ་ནས་རང་ཉིད་ཁྱད་དུ་གསོད་པ་དང་། དཀོན་མཆོག་ཡ་ཝཱེ་ལ་མེ་མཆོད་འབུལ་དགོས།
LEV 23:28 ཉིན་དེ་ལ་ལས་ཀ་གང་ཡང་བྱེད་མི་རུང་། ཅི་ལ་ཞེ་ན། ཉིན་དེ་ནི་སྡིག་བཤགས་ཉིན་མོ་ཡིན་པས་ཁྱོད་རྣམས་ཀྱིས་དཀོན་མཆོག་ཡ་ཝཱེའི་དྲུང་དུ་སྡིག་པ་བཤག་དགོས་པའི་ཕྱིར་རོ། །
LEV 23:29 ཉིན་དེ་ལ་རང་ཉིད་ཁྱད་དུ་མི་གསོད་པ་ཐམས་ཅད་མི་མང་ཁྲོད་ནས་རྩ་མེད་དུ་གཏོང་ངེས་ཡིན།
LEV 23:30 ཉིན་དེ་ལ་ལས་ཀ་གང་རུང་བྱེད་མཁན་ཐམས་ཅད་ནི་བདག་གིས་རང་གི་མི་མང་ཁྲོད་ནས་འཇོམས་པར་བྱའོ། །
LEV 23:31 ཁྱོད་རྣམས་ཀྱིས་ལས་ཀ་གང་ཡང་བྱེད་མི་རུང་། དེ་ནི་ཁྱོད་ཅག་སྡོད་སའི་ཡུལ་ཐམས་ཅད་དུ། ཁྱོད་རྣམས་ལ་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས།
LEV 23:32 ཉིན་དེ་ནི་ཁྱོད་རྣམས་ཀྱིས་ངལ་གསོ་ཡོངས་སུ་རྫོགས་པའི་ཉིན་མོ་རུ་བསྲུང་བ་དང་། རང་ཉིད་ཁྱད་དུ་གསོད་དགོས། ཟླ་བ་དེའི་ཚེས་དགུ་ཡི་དགོང་མོ་ནས་ཕྱི་ཉིན་དགོང་མོའི་བར་དུ་ངལ་གསོ་བའི་ཉིན་མོ་རུ་བསྲུང་དགོས་ཞེས་གསུངས་སོ། །
LEV 23:33 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 23:34 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཟླ་བ་བདུན་པའི་ཚེས་བཅོ་ལྔ་ནི་སྤྱིལ་བུའི་དུས་ཆེན་ཡིན་པ་དང་། དཀོན་མཆོག་ཡ་ཝཱེའི་ཕྱིར་དུ་ཉིན་བདུན་གྱི་རིང་ལ་དུས་ཆེན་འདིར་རོལ་དགོས།
LEV 23:35 ཉིན་དང་པོར་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
LEV 23:36 ཉིན་བདུན་གྱི་རིང་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས། ཉིན་བརྒྱད་པར་འདུ་འཛོམས་དམ་པ་བསྲུང་བ་དང་། དཀོན་མཆོག་ཡ་ཝཱེ་ལ་མེ་མཆོད་འབུལ་དགོས། དེ་ནི་འདུ་འཛོམས་དམ་ནན་ཡིན་པས་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་ངོ་། །
LEV 23:37 དེ་ནི་དཀོན་མཆོག་ཡ་ཝཱེའི་དུས་ཆེན་རྣམས་ཡིན་ཏེ། ཁྱོད་རྣམས་ཀྱིས་འདུ་འཛོམས་དམ་པར་བསྒྲག་དགོས་པའི་དུས་ཆེན་ཡིན་ཞིང་། མེ་མཆོད་དེ་སྦྱིན་སྲེག་གི་མཆོད་པ་དང་འབྲུ་མཆོད། དམར་མཆོད། སྐྱེམས་མཆོད་རྣམས་ཉིན་རེའི་གཏན་འཁེལ་བཞིན་དཀོན་མཆོག་ཡ་ཝཱེ་ལ་འབུལ་དགོས་པ་ཡིན་ནོ། །
LEV 23:38 གཞན་ཡང་དཀོན་མཆོག་ཡ་ཝཱེ་ལ་ངལ་གསོ་བའི་ཉིན་མོ་དང་། ཁྱོད་ཚོས་དཀོན་མཆོག་ཡ་ཝཱེ་ལ་འབུལ་བའི་མཆོད་རྫས་རྣམས་དང་། དམ་བཅའི་མཆོད་པ་ཐམས་ཅད་དང་། ཡིད་མོས་པའི་མཆོད་པ་ཐམས་ཅད་བཅས་ཡོད་པའོ། །
LEV 23:39 དེ་ལས་གཞན་ཟླ་བ་བདུན་པའི་ཚེས་བཅོ་ལྔ་ཏག་ཏག་སྟེ། ཁྱོད་རྣམས་ཀྱིས་ས་ཞིང་ནས་ལོ་ཏོག་བསྡུས་པའི་རྗེས་སུ། ཉིན་བདུན་རིང་དཀོན་མཆོག་ཡ་ཝཱེའི་དུས་ཆེན་རོལ་དགོས། ཉིན་དང་པོ་དེ་ངལ་གསོ་ཡོངས་སུ་རྫོགས་པའི་ཉིན་མོ་ཡིན་པ་དང་། ཉིན་བརྒྱད་པ་དེ་ཡང་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ནོ། །
LEV 23:40 ཉིན་དང་པོ་ལ། ཁྱོད་རྣམས་ཀྱིས་ཕུལ་དུ་བྱུང་བའི་ལྗོན་ཤིང་གི་འབྲས་བུ་དང་། ཏ་ལའི་ཤིང་གི་ཡལ་ག་དང་། ལྗོན་ཤིང་ལོ་མ་སྟུག་པོ་ཅན་གྱི་ཡལ་ག་དང་། ཆུ་བོ་འགྲམ་གྱི་ལྕང་མའི་ཡལ་ག་བཅས་ཁྱེར་ནས། ཁྱོད་རྣམས་ཀྱིས་རང་གི་དཀོན་མཆོག་ཡ་ཝཱེའི་སྤྱན་སྔར་ཉིན་བདུན་གྱི་རིང་ལ་དགའ་མགུ་ཡི་རང་བྱེད་དགོས།
LEV 23:41 ལོ་རེ་བཞིན་དུ་ཉིན་བདུན་གྱི་རིང་ལ་ཁྱོད་རྣམས་ཀྱིས་དཀོན་མཆོག་ཡ་ཝཱེའི་དུས་ཆེན་རོལ་ཞིག ཁྱོད་ཅག་གིས་ཟླ་བ་བདུན་པར་རོལ་བའི་དུས་ཆེན་དེ་ནི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས།
LEV 23:42 ཁྱོད་རྣམས་སྤྱིལ་བུའི་ནང་དུ་ཉིན་བདུན་ལ་འདུག་དགོས་ཤིང་། ཡེས་ར་ཨེལ་གྱི་གཞིས་སྐྱེས་ཐམས་ཅད་ཀྱང་སྤྱིལ་བུའི་ནང་དུ་འདུག་དགོས་སོ། །
LEV 23:43 གང་ལ་ཞེ་ན། བདག་གིས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པའི་དུས་སུ། དེ་དག་སྤྱིལ་བུའི་ནང་འདུག་ཏུ་བཅུག་པ་དེ་ཁྱོད་རྣམས་ཀྱི་མི་རབས་ནས་མི་རབས་བར་ཤེས་སུ་འཇུག་པའི་ཕྱིར་རོ། །བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ། །
LEV 23:44 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་དུས་ཆེན་དག་ཡེས་ར་ཨེལ་པ་རྣམས་ལ་གསལ་བསྒྲགས་བྱས་སོ། །
LEV 24:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 24:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག འོད་ཀྱི་ཆེད་དུ་སྐྱུ་རུ་ཤིང་ལས་བརྡུངས་པའི་སྣུམ་དྭངས་མ་དེ་འཁྱེར་ཡོང་དགོས། དེ་ནི་སྒྲོན་མེ་རྟག་ཏུ་འབར་བའི་ཕྱིར་ཡིན།
LEV 24:3 མཇལ་འཕྲད་གུར་མཆོག་ནང་གི་དཔང་མཛད་ཤུར་སྒམ་གྱི་ཡོལ་བའི་ཕྱི་ལོགས་སུ། ཨ་རོན་གྱིས་མཚན་མོ་ནས་ཞོགས་པའི་བར་དུ། དཀོན་མཆོག་ཡ་ཝཱེའི་སྤྱན་སྔར་སྒྲོན་མེ་དེར་རྒྱུན་དུ་བདག་བྱེད་དགོས། དེ་ནི་ཁྱོད་རྣམས་ཀྱི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་སུ་ཆགས་དགོས།
LEV 24:4 ཁོས་དཀོན་མཆོག་ཡ་ཝཱེའི་སྤྱན་སྔར་རྟག་ཏུ་གསེར་བཙོ་མའི་སྒྲོན་སྟེགས་སྟེང་གི་སྒྲོན་མེ་ལ་བདག་བྱེད་དགོས་སོ། །
LEV 24:5 དེ་ནས་ཁྱོད་ཀྱིས་གྲོ་ཞིབ་བླངས་ནས་བག་ལེབ་བཅུ་གཉིས་བསྲེག་དགོས་པ་དང་། བག་ལེབ་རེ་རེ་ཨེ་ཕཱ་ཡི་བཅུ་ཆ་གཉིས་རེས་བསྲེག་དགོས།
LEV 24:6 དེ་ནས་བག་ལེབ་དྲུག་རེ་བྱས་ནས་གྲལ་གཉིས་སུ་བསྒྲིགས་ཏེ། དཀོན་མཆོག་ཡ་ཝཱེའི་སྤྱན་སྔར་གསེར་བཙོ་མའི་སྒྲོག་ཙེ་སྟེང་དུ་བཤམ་དགོས་ལ།
LEV 24:7 གྲལ་རེའི་བག་ལེབ་སྟེང་དུ་སྤོས་དཀར་སླད་མེད་གཏོར་བ་དང་། དྲན་རྟེན་བྱས་ནས་དཀོན་མཆོག་ཡ་ཝཱེ་ལ་ཞལ་ཟས་ཀྱི་མེ་མཆོད་དུ་འབུལ་དགོས།
LEV 24:8 ངལ་གསོ་བའི་ཉིན་མོ་རེ་རེ་ལ་ཨ་རོན་གྱིས་དཀོན་མཆོག་ཡ་ཝཱེའི་སྤྱན་སྔར་བག་ལེབ་ཆད་མེད་དུ་བཤམ་དགོས། དེ་ནི་ཡེས་ར་ཨེལ་པ་རྣམས་ཀྱི་དུས་གཏན་གྱི་ཁ་ཆད་ཅིག་ཡིན།
LEV 24:9 བག་ལེབ་དེ་ནི་ཨ་རོན་དང་ཁོའི་བུ་རྣམས་ལ་དབང་བ་དང་། ཁོ་ཚོས་དེ་དག་གནས་དམ་པ་རུ་བཟའ་དགོས། ཅིའི་ཕྱིར་ཞེ་ན། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས་ཀུན་ལས་དམ་པ་ཡིན་པ་དང་། དུས་གཏན་དུ་ཁོང་ལ་དབང་བའི་སྐལ་ཡིན་ཞེས་གསུངས་སོ། །
LEV 24:10 དེ་ཡང་ཡེས་ར་ཨེལ་གྱི་བུད་མེད་ཅིག་ལ་བུ་ཞིག་ཡོད་པ་དེའི་ཕ་ནི་ཨེ་ཅིབ་པ་ཡིན་ལ། ཁོ་རང་ཡེས་ར་ཨེལ་པ་རྣམས་ཀྱི་ཁྲོད་དུ་སོང་ནས། ཡེས་ར་ཨེལ་གྱི་བུད་མེད་ཀྱི་བུ་དེ་དང་ཡེས་ར་ཨེལ་པ་ཞིག་སྒར་ནང་དུ་རྩོད་པ་བྱས་པ་དང་།
LEV 24:11 ཡེས་ར་ཨེལ་གྱི་བུད་མེད་ཀྱི་བུ་ཡིས་མཚན་དམ་པར་དམོད་མོ་དང་བཅས་སྐུར་བ་བཏབ་པས། དེ་དག་གིས་མི་དེ་མོ་ཤེའི་དྲུང་དུ་ཁྲིད། ཁོའི་མ་ཡི་མིང་ལ་ཤེ་ལོ་མིད་ཅེས་བྱ་ཞིང་། དཱན་ཚོ་པའི་དི་པཱ་རེ་བྱ་བའི་བུ་མོ་ཡིན་ནོ། །
LEV 24:12 དཀོན་མཆོག་ཡ་ཝཱེའི་བཀའ་གསལ་པོར་རྟོགས་ཕྱིར་ཁོ་ཚོས་མི་དེ་བཙོན་དུ་བཀག་པའོ། །
LEV 24:13 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 24:14 དམོད་མོ་འདེབས་མཁན་དེ་སྒར་གྱི་ཕྱི་རོལ་ཏུ་ཁྲིད་ཅིག དེ་ཐོས་པའི་མི་ཐམས་ཅད་ཀྱིས་ལག་པ་ཁོའི་མགོ་ལ་བཞག་ནས་མི་ཚོགས་ཧྲིལ་པོས་ཁོ་རང་རྡོ་རུབ་བཏང་ནས་གསོད་དགོས།
LEV 24:15 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག སུ་ཞིག་གིས་རང་གི་དཀོན་མཆོག་ལ་དམོད་པར་བྱས་ན། དེས་རང་གི་སྡིག་པ་འཁུར་དགོས།
LEV 24:16 སུ་ཞིག་གིས་དཀོན་མཆོག་ཡ་ཝཱེའི་མཚན་ལ་སྐུར་བ་བཏབ་ན། དེ་ནི་ཅིས་ཀྱང་སྲོག་དང་འཕྲལ་དགོས་པ་དང་། མི་ཚོགས་ཧྲིལ་པོས་ཁོ་རང་རྡོ་རུབ་བཏང་ནས་གསོད་དགོས། བྱེས་པའམ་གཞིས་སྐྱེས་གང་ཡིན་ཡང་། ཁོས་དམ་པའི་མཚན་ལ་སྐུར་བ་འདེབས་དུས་སྲོག་དང་འཕྲལ་དགོས་སོ། །
LEV 24:17 མི་གསོད་མཁན་ནི་ངེས་པར་སྲོག་དང་འཕྲལ་དགོས།
LEV 24:18 ཕྱུགས་ཟོག་གསོད་མཁན་གྱིས་དེའི་སྐྱིན་ཚབ་ལ་ཕྱུགས་ཟོག་སྤྲད་ནས། སྲོག་ཚབ་སྲོག་གིས་འཇལ་དགོས།
LEV 24:19 སུ་ཞིག་གིས་ཁྱིམ་མཚེས་ལ་གནོད་བསྐྱལ་ན། མི་དེས་བྱས་པ་བཞིན་དུ་ཁོ་ལའང་དེ་ལྟར་བྱེད་དགོས་པ་འདི་ལྟ་སྟེ།
LEV 24:20 བཅགས་པའི་ལན་དུ་བཅགས་པ་དང་། མིག་ལ་མིག་ལན་དང་སོ་ལ་སོ་ལན་འཇལ་དགོས། མི་དེས་ཇི་ལྟར་མི་གཞན་ཞིག་དབང་བོ་སྐྱོན་ཅན་དུ་བཟོས་ན། ཁོ་ལའང་དེ་བཞིན་བྱེད་དགོས།
LEV 24:21 ཕྱུགས་ཟོག་གསོད་མཁན་གྱིས་དེའི་སྐྱིན་ཚབ་ལ་ཕྱུགས་ཟོག་འཇལ་དགོས་པ་དང་། མི་གསོད་མཁན་ལ་སྲོག་ཆད་གཅོད་དགོས།
LEV 24:22 བྱེས་པའམ་གཞིས་སྐྱེས་གང་ཡིན་ཡང་ཁྲིམས་སྲོལ་གཅིག་ཡིན་དགོས། ཅི་ལ་ཞེ་ན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ།།
LEV 24:23 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་ལ་བཀའ་བསྒོས་ཤིང་། ཁོ་རྣམས་ཀྱིས་དམོད་མོ་འདེབས་མཁན་དེ་སྒར་གྱི་ཕྱི་རོལ་ཏུ་ཁྲིད་དེ་རྡོ་རུབ་བཏང་ནས་བསད་དོ། །ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་བསྒྲུབས་པའོ། །
LEV 25:1 དེ་ཡང་དཀོན་མཆོག་ཡ་ཝཱེས་རི་བོ་སི་ནཱའི་སྟེང་དུ་མོ་ཤེ་ལ་འདི་སྐད་དུ།
LEV 25:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་བདག་གིས་ཁྱོད་ཅག་ལ་སྦྱིན་པའི་ཡུལ་དུ་སླེབས་པའི་ཚེ། དཀོན་མཆོག་ཡ་ཝཱེའི་ཕྱིར་དུ་ས་གཞིས་ངལ་གསོ་བྱེད་དགོས།
LEV 25:3 ཁྱོད་རྣམས་ཀྱིས་ལོ་དྲུག་གི་རིང་ཞིང་ལ་ས་བོན་འདེབས་པ་དང་། ལོ་དྲུག་གི་རིང་རྒུན་འབྲུམ་ར་བར་འབྲེག་བཅོས་བྱས་ནས་ས་ཞིང་གི་ལོ་ཏོག་བསྡུ་དགོས།
LEV 25:4 ལོ་བདུན་པར་ས་གཞིས་ངལ་གསོ་ཡོངས་སུ་རྫོགས་པ་བྱས་ཏེ། དཀོན་མཆོག་ཡ་ཝཱེའི་ཕྱིར་ངལ་གསོ་བྱེད་དགོས། ཁྱོད་རྣམས་ཀྱིས་ས་ཞིང་འདེབས་མི་རུང་ལ། རྒུན་འབྲུམ་ར་བར་འབྲེག་བཅོས་ཀྱང་བྱེད་མི་རུང་ངོ་། །
LEV 25:5 རང་བཞིན་དུ་སྐྱེས་པའི་ལོ་ཏོག་བསྡུ་མི་རུང་ལ། འབྲེག་བཅོས་མ་བྱས་པའི་རྒུན་འབྲུམ་ཤིང་གི་རྒུན་འབྲུམ་ཡང་བསྡུ་མི་འོས། ལོ་དེར་ས་གཞིས་ངལ་གསོ་ཡོངས་སུ་རྫོགས་པ་བྱེད་དགོས་སོ། །
LEV 25:6 ངལ་གསོའི་ལོར་ས་ཞིང་ལས་སྐྱེས་པ་དེ་ནི་ཁྱོད་དང་ཁྱོད་ཀྱི་གཡོག་པོ་གཡོག་མོ་དང་། གླ་པ་དང་ཁྱོད་དང་མཉམ་དུ་སྡོད་པའི་བྱེས་པ་བཅས་ཀྱི་ཁ་ཟས་ཡིན།
LEV 25:7 ལོ་ཏོག་ཐམས་ཅད་ནི་ཁྱོད་ཀྱི་ཕྱུགས་ཟོག་དང་ཡུལ་དེར་ཡོད་པའི་རི་དྭགས་ཀྱི་ཁ་ཟས་ཀྱང་ཡིན་ནོ། །
LEV 25:8 ཁྱོད་ཀྱིས་ངལ་གསོའི་ལོ་བདུན་བརྩི་དགོས་པ་སྟེ། ལོ་བདུན་ནི་ཐེངས་བདུན་ཡིན་པས། ཁྱོན་བསྡོམས་ལོ་བཞི་བཅུ་ཞེ་དགུ་ཡིན།
LEV 25:9 ཟླ་བ་བདུན་པའི་ཚེས་བཅུ་པར་ཁྱོད་ཀྱིས་རྭ་དུང་སྐད་ཆེན་པོ་འབུད་དགོས། དེ་ནི་སྡིག་བཤགས་ཉིན་མོ་ཡིན་ལ་ཁྱོད་ཀྱིས་ཡུལ་ཐམས་ཅད་ནས་རྭ་དུང་འབུད་དགོས།
LEV 25:10 ཁྱོད་ཅག་གིས་ལོ་ལྔ་བཅུ་པ་ནི་ལོ་དམ་པ་རུ་བརྩི་བ་དང་། ཡུལ་ཐམས་ཅད་དུ་མི་ཀུན་ལ་རང་དབང་ཡིན་པར་སྒྲོགས་ཤིག དེ་ནི་ཁྱོད་ཅག་གི་དོན་དུ་དགའ་སྟོན་གྱི་ལོ་ཡིན་པས། མི་རེ་རེ་ཕྱིར་ཕ་གཞིས་སུ་ལོག་པ་དང་། མི་རེ་རེ་རང་རང་གི་ཁྱིམ་རྒྱུད་དུ་ལོག་པར་རིགས་སོ། །
LEV 25:11 ལོ་ལྔ་བཅུ་པ་ནི་ཁྱོད་རྣམས་ཀྱི་དགའ་སྟོན་གྱི་ལོ་རུ་བརྩི་དགོས་ལ། ས་ཞིང་འདེབས་མི་རུང་བ་དང་རང་བཞིན་གྱིས་སྐྱེས་པའི་ལོ་ཏོག་བསྡུ་མི་འོས་ལ། འབྲེག་བཅོས་མ་བྱས་པའི་རྒུན་འབྲུམ་ཤིང་གི་རྒུན་འབྲུམ་ཡང་བསྡུ་མི་རུང་།
LEV 25:12 ཅིའི་ཕྱིར་ཞེ་ན། དེ་ནི་དགའ་སྟོན་གྱི་ལོ་སྟེ་ཁྱོད་རྣམས་ཀྱི་ལོ་དམ་པ་ཡིན་ཞིང་། ས་ཞིང་དུ་སྐྱེས་པའི་ལོ་ཏོག་རྣམས་བཟའ་དགོས་པའོ། །
LEV 25:13 དགའ་སྟོན་གྱི་ལོ་འདིར་ཁྱོད་ཚོ་མི་རེ་རེ་ཕ་གཞིས་སུ་ཕྱིར་ལོག་དགོས་པ་དང་།
LEV 25:14 ཁྱོད་ཀྱིས་ཁྱིམ་མཚེས་ལ་གང་ཞིག་བཙོང་བའམ། ཡང་ན་ཁྱིམ་མཚེས་ཀྱི་ལག་ནས་ཅི་ཞིག་ཉོས་ན་ཕན་ཚུན་ལ་མགོ་སྐོར་གཏོང་མི་རུང་།
LEV 25:15 ཁྱོད་ཀྱིས་དགའ་སྟོན་གྱི་ལོ་ནས་བཟུང་སྟེ། ལོ་དེ་དག་གི་གྲངས་བཞིན་དུ་ཁྱིམ་མཚེས་ནས་ཉོ་བ་དང་། ཁོས་ནི་ཐོན་འབབ་ཡོད་པའི་ལོ་གྲངས་བཞིན་དུ་ཁྱོད་ལ་བཙོང་དགོས།
LEV 25:16 ཁོས་ཐོན་འབབ་ཀྱི་གྲངས་ཀ་བཞིན་དུ་ཁྱོད་ལ་བཙོང་བའི་ཕྱིར། ལོ་གྲངས་ཅི་ལྟར་མང་ན་རིན་གོང་དེ་བཞིན་མཐོ་བ་དང་། ལོ་གྲངས་ཅི་ལྟར་ཉུང་ན་རིན་གོང་དེ་བཞིན་དམའ་བ་ཡིན་ནོ། །
LEV 25:17 ཁྱོད་ཚོས་ཕན་ཚུན་ལ་གྱོང་གུད་བཟོ་མི་རུང་། ཁྱོད་ཀྱི་དཀོན་མཆོག་ལ་གུས་ཤིང་འཇིགས་དགོས། ཅི་ལ་ཞེ་ན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པའོ། །
LEV 25:18 ཁྱོད་རྣམས་ཀྱིས་བདག་གི་སྒྲིག་ཁྲིམས་བཞིན་དུ་བྱེད་པ་དང་། བདག་གི་སྲོལ་ཡིག་རྣམས་བསྲུངས་ནས་དེ་བཞིན་དུ་བྱེད་དགོས་ལ། དེ་བཞིན་བྱས་ན་ཡུལ་དེ་རུ་བདེ་བར་གནས་ཐུབ་པ་ཡིན།
LEV 25:19 ས་ཞིང་གིས་འབྲས་བུ་བསྐྱེད་ཅིང་ཁྱོད་རྣམས་ཀྱིས་དེ་ཟོས་ནས་འགྲང་བ་དང་། ཡུལ་དེ་རུ་བདེ་བར་གནས་པར་འགྱུར་རོ། །
LEV 25:20 གལ་སྲིད་ཁྱོད་རྣམས་ཀྱིས། གཟིགས་དང་། ལོ་བདུན་པར་ས་ཞིང་མི་རྨོ་ལ་ལོ་ཏོག་ཀྱང་མི་བསྡུ་བས་ང་ཚོས་ཅི་ཞིག་བཟའ་དགོས་སམ་ཞེས་བརྗོད་ན།
LEV 25:21 ལོ་དྲུག་པར་བདག་གིས་བཀའ་བབས་ཏེ་ཁྱོད་ལ་བྱིན་རླབས་གནང་ནས། ས་ཞིང་གིས་ལོ་གསུམ་གྱི་ལོ་ཏོག་བསྐྱེད་པར་འགྱུར་རོ། །
LEV 25:22 ལོ་བརྒྱད་པར་ཁྱོད་རྣམས་ཀྱིས་ས་ཞིང་རྨོ་དགོས་ལ། འབྲུ་རྙིང་ཡང་བཟའ་དགོས། ལོ་དགུ་པར་ལོ་ཏོག་བསྡུ་བའི་བར་དུ་ཁྱོད་རྣམས་ལ་ད་དུང་འབྲུ་རྙིང་བཟའ་རྒྱུ་ཡོད་པའོ། །
LEV 25:23 ས་ནི་མཐའ་གཅིག་ཏུ་བཙོང་མི་རུང་། ཅི་ལ་ཞེ་ན། ས་ཞིང་ནི་བདག་གི་ཡིན་པའི་ཕྱིར་རོ། །ཁྱོད་ཅག་ནི་ངའི་མདུན་དུ་མགྲོན་པོ་དང་བྱེས་པ་ཡིན་ནོ། །
LEV 25:24 ཁྱོད་ལ་ས་སྐལ་དུ་ཐོབ་པའི་ཡུལ་ཀུན་ཏུ་མི་ལ་ས་བླུ་བའི་དབང་ཡོད་པར་བྱེད་དགོས།
LEV 25:25 ཁྱོད་ཀྱི་སྤུན་ཟླ་དབུལ་པོར་གྱུར་ནས་རང་གི་ནོར་སྐལ་ལས་ཆ་ཤས་བཙོངས་ན། ཁོ་བླུ་མཁན་གྱི་གཉེན་ཉེ་ཡོང་ནས་གང་ཞིག་བཙོངས་པ་དེ་ཕྱིར་བླུ་དགོས།
LEV 25:26 གལ་སྲིད་ཁོ་ལ་བླུ་མཁན་མེད་ན། ཁོ་རང་ལ་རིམ་བཞིན་རྒྱུ་སྟོབས་འཛོམས་ནས་ཕྱིར་བླུ་ཐུབ་པའི་དུས་སུ།
LEV 25:27 ཕར་བཙོངས་པའི་ལོ་ནས་བཟུང་བརྩིས་ཏེ། དེའི་འཕྲོ་ཡི་ལོ་གྲངས་ཀྱི་རིན་གོང་རྣམས་ཉོ་མཁན་ལ་ཕྱིར་སློག་དགོས་ཤིང་། དེ་ནས་རང་གི་ཕ་གཞིས་ལ་ཕྱིར་ལོག་དགོས།
LEV 25:28 གལ་སྲིད་མི་དེའི་ལག་ཏུ་ཕྱིར་བླུ་བའི་རྒྱུ་སྟོབས་མེད་ན། ཕར་བཙོངས་པའི་ས་དེ་ནི་ཉོ་མཁན་གྱི་ལག་ནས་དགའ་སྟོན་གྱི་ལོ་ཡི་བར་དུ་ལུས་ཤིང་། དགའ་སྟོན་གྱི་ལོ་དེར་ས་འཚོང་མཁན་ནི་ཕ་གཞིས་སུ་ཕྱིར་ལོག་དགོས།
LEV 25:29 གལ་སྲིད་མི་ཞིག་གིས་ལྕགས་རིས་བསྐོར་བའི་གྲོང་ཁྱེར་ནང་གི་སྡོད་ཁང་བཙོངས་ན། བཙོངས་པའི་རྗེས་སུ་ལོ་གཅིག་གི་ནང་དུ་ཕྱིར་བླུ་བའི་དབང་ཡོད་ལ། དེ་ནི་ཁོས་ཕྱིར་བླུས་ཆོག་པའི་ལོ་གཅིག་གི་ཚད་ཡིན།
LEV 25:30 གལ་སྲིད་ཁོས་ལོ་ཧྲིལ་པོའི་ནང་ཕྱིར་མ་བླུས་ན། ལྕགས་རིས་བསྐོར་བའི་གྲོང་ཁྱེར་ནང་གི་ཁང་པ་དེ་ནི་མི་རབས་ནས་མི་རབས་བར་དུ་ཉོ་མཁན་ལ་དབང་བ་ཡིན། དགའ་སྟོན་གྱི་ལོ་ལའང་ཕྱིར་སྤྲོད་མི་དགོས།
LEV 25:31 འོན་ཀྱང་ལྕགས་རིས་བསྐོར་མེད་པའི་གྲོང་ཚོའི་ཁང་པ་རྣམས་ནི་གྲོང་གསེབ་ཀྱི་ཞིང་ས་རུ་བརྩིས་ཏེ་ཕྱིར་བླུ་སྲིད་པ་ཡིན་ལ། དགའ་སྟོན་གྱི་ལོ་ལ་ཕྱིར་སྤྲོད་དགོས།
LEV 25:32 ལེ་ཝི་པ་རྣམས་ལ་ས་སྐལ་དུ་ཐོབ་པའི་གྲོང་ཁྱེར་ལ་མཚོན་ན། ལེ་ཝི་པ་ཚོས་ཁོ་རྣམས་ཀྱི་གྲོང་ཁྱེར་དུ་ཡོད་པའི་ཁང་པ་ནི་དུས་ནམ་ཡིན་ཡང་བླུས་ཆོག་པ་ཡིན།
LEV 25:33 གལ་སྲིད་ལེ་ཝི་པ་རྣམས་ཀྱིས་རང་ལ་ས་སྐལ་དུ་ཐོབ་པའི་གྲོང་ཁྱེར་ནས་ཁང་པ་བཙོངས་པ་དང་། ཕྱིར་མ་བླུས་པ་ཡིན་ན། དགའ་སྟོན་གྱི་ལོ་དེར་ཕྱིར་བདག་པོར་སྤྲོད་དགོས། ཅི་ལ་ཞེ་ན། ལེ་ཝི་པ་རྣམས་ཀྱི་གྲོང་ཁྱེར་གྱི་ཁང་པ་རྣམས་ནི། ཡེས་ར་ཨེལ་པ་རྣམས་ཀྱི་ཁྲོད་དུ་ཁོ་ཚོའི་ནོར་སྐལ་ཡིན་པའི་ཕྱིར་རོ། །
LEV 25:34 ཡིན་ནའང་། དེ་དག་གི་གྲོང་ཁྱེར་སོ་སོའི་ཉེ་འཁོར་གྱི་རྩྭ་ས་ནི་ཁོ་ཚོའི་དུས་གཏན་གྱི་ས་སྐལ་ཡིན་པས་བཙོང་མི་རུང་ངོ་། །
LEV 25:35 གལ་སྲིད་ཁྱོད་ཀྱི་སྤུན་ཟླ་རིམ་བཞིན་དབུལ་པོར་གྱུར་ཏེ་ལག་ནས་ཅི་ཡང་མེད་ན། ཁྱོད་ཀྱིས་ཁོ་ལ་རོགས་སྐྱོར་བྱས་ཏེ་ཕྱི་མི་དང་བྱེས་པ་རྣམས་དང་མཚུངས་པར་ཁོ་རང་ཁྱོད་དང་མཉམ་དུ་འཚོ་བར་གྱིས་ཤིག
LEV 25:36 མི་དེ་ལས་སྐྱེད་ཀ་ལེན་མི་རུང་ལ། ཁེ་བཟང་ཡང་ལེན་མི་རུང་། ཁྱོད་ཀྱི་དཀོན་མཆོག་ལ་གུས་ཤིང་འཇིགས་པའི་སྒོ་ནས། ཁྱོད་ཀྱི་སྤུན་ཟླ་ཁྱོད་དང་མཉམ་དུ་འཚོ་བར་བྱེད་དགོས།
LEV 25:37 ཁྱོད་ཀྱིས་སྐྱེད་ཀའི་དོན་དུ་ཁོ་ལ་དངུལ་བསྐྱི་མི་རུང་ལ། ཁེ་བཟང་གི་དོན་དུ་ཟས་རིགས་ཀྱང་བསྐྱི་མི་རུང་།
LEV 25:38 བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ལ། ཀ་ན་ཨན་གྱི་ཡུལ་ཁྱོད་ཅག་ལ་སྦྱིན་པ་དང་ཁྱོད་རྣམས་ཀྱི་དཀོན་མཆོག་ཡིན་པའི་ཕྱིར་དུ། ཁྱོད་ཅག་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་ཡོང་བའོ། །
LEV 25:39 གལ་སྲིད། ཁྱོད་ཀྱི་སྤུན་ཟླ་རིམ་བཞིན་དབུལ་པོར་གྱུར་ནས་རང་ཉིད་ཁྱོད་ལ་བཙོངས་ན། ཁྱོད་ཀྱིས་ཁོ་བྲན་གཡོག་ལྟར་བཀོལ་ནས་ཞབས་ཕྱི་སྒྲུབ་ཏུ་འཇུག་མི་རུང་།
LEV 25:40 ཁོ་རང་ཁྱོད་ཀྱི་རྩར་གླ་པ་དང་མགྲོན་པོ་ལྟར་ཡིན་ཞིང་། དགའ་སྟོན་གྱི་ལོའི་བར་དུ་ཁྱོད་ལ་ཞབས་ཕྱི་བསྒྲུབ་དགོས།
LEV 25:41 དེ་ནས་ཁོ་དང་ཁོའི་བུ་ཕྲུག་རྣམས་ཁྱོད་དང་བྲལ་ནས་མཉམ་དུ་རང་གི་ཁྱིམ་རྒྱུད་དུ་ཕྱིར་ལོག་ཅིང་། རང་གི་ཕ་མེས་ཀྱི་བདག་དབང་ཡུལ་དུ་ཕྱིར་འགྲོའོ། །
LEV 25:42 ཅིའི་ཕྱིར་ཞེ་ན། ཁོ་རྣམས་ནི་བདག་གི་ཞབས་ཕྱི་ཡིན་ལ། བདག་གིས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་པ་ཡིན་པས། དེ་དག་བྲན་གཡོག་ཏུ་བཙོང་མི་རུང་།
LEV 25:43 དེ་དག་ལ་གདུག་རྩུབ་བཀོལ་ནས་དབང་སྒྱུར་མི་རུང་ལ། ཁྱོད་ཀྱི་དཀོན་མཆོག་ལ་གུས་ཤིང་འཇིགས་དགོས་སོ། །
LEV 25:44 དེར་བརྟེན། ཁྱོད་ལ་མཁོ་བའི་གཡོག་པོ་གཡོག་མོ་རྣམས་ནི། ཁྱོད་ཀྱི་མཐའ་འཁོར་དུ་ཡོད་པའི་མི་རྣམས་ལས་ཡོང་བར་རིགས། ཁྱོད་ཅག་གིས་ཁོ་རྣམས་ལས་གཡོག་པོ་གཡོག་མོ་ཉོས་ཆོག་པ་ཡིན།
LEV 25:45 ཁྱོད་ཅག་ཁྲོད་དུ་གནས་པའི་ཕྱི་མི་དང་དེ་དག་གི་ཁྱིམ་མི་སྟེ། ཁྱོད་ཅག་གི་ཡུལ་ནས་སྐྱེས་པ་རྣམས་ཀྱི་ཁྲོད་ནས་མི་ཉོས་ཆོག་པ་ཡིན། དེ་དག་ཁྱོད་རྣམས་ཀྱི་ནོར་སྐལ་ཡིན།
LEV 25:46 ཁྱོད་ཅག་གིས་དེ་དག་ནི་མི་རབས་རྗེས་མའི་བུ་རྒྱུད་རྣམས་ལ་ཤུལ་བཞག་ཏུ་སྤྲད་ནས། དུས་གཏན་དུ་རྒྱུན་འཛིན་བྱས་པའི་ནོར་སྐལ་དུ་བྱས་ཏེ། དེ་དག་བྲན་གཡོག་ཏུ་བཀོལ་བར་རིགས། འོན་ཀྱང་ཁྱོད་ཀྱི་སྤུན་ཟླ་ཡེས་ར་ཨེལ་པ་རྣམས་ལ་མཚོན་ན། ཕན་ཚུན་ལ་གདུག་རྩུབ་བཀོལ་ནས་དབང་སྒྱུར་མི་རུང་ངོ་། །
LEV 25:47 གལ་སྲིད་ཁྱོད་དང་མཉམ་དུ་གནས་པའི་ཕྱི་མིའམ་བྱེས་པ་ཞིག་རིམ་བཞིན་ཕྱུག་པོར་གྱུར་པ་དང་། ཁྱོད་ཀྱི་སྤུན་ཟླ་ཞིག་རིམ་བཞིན་དབུལ་པོར་གྱུར་ཏེ། རང་ཉིད་ཕྱི་མིའམ་བྱེས་པ་དང་། ཡང་ན་ཕྱི་མིའི་ཁྱིམ་རྒྱུད་ལས་ཆད་པའི་བུ་ཞིག་ལ་བཙོངས་པ་ཡིན་ན།
LEV 25:48 བཙོངས་པའི་རྗེས་སུ་རང་ཉིད་ཕྱིར་བླུ་བའི་དབང་ཡོད་དེ། ཁོའི་སྤུན་རྣམས་ལས་གཅིག་གིས་ཁོ་རང་ཕྱིར་བླུ་རུང་བ་ཡིན།
LEV 25:49 ཁོའི་ཁུ་བོ་དང་ཁུ་བོའི་བུ་ཡིས་ཁོ་རང་བླུ་རུང་བ་དང་། ཁོའི་ཁྱིམ་རྒྱུད་ཀྱི་ཉེ་འབྲེལ་གྱིས་ཀྱང་ཁོ་རང་བླུ་རུང་བ་ཡིན། གལ་སྲིད་ཁོ་རང་ཉིད་རིམ་བཞིན་ཕྱུག་པོར་གྱུར་ན་རང་གིས་རང་ཉིད་བླུ་ཡང་རུང་བ་ཡིན།
LEV 25:50 མི་དེས་རང་ཉིད་བཙོངས་པའི་ལོ་ནས་བཟུང་སྟེ། དགའ་སྟོན་གྱི་ལོའི་བར་དུ་ཁོ་རང་ཉོ་མཁན་དང་རྩིས་རྒྱག་དགོས། བཙོངས་པའི་རིན་པ་ནི་ལོ་ཡི་གྲངས་ཀ་སྟེ། གླ་པ་དང་ཉོ་བདག་མཉམ་དུ་ཡོད་པའི་ཉི་མ་ལྟར་བརྩི་དགོས་སོ། །
LEV 25:51 གལ་སྲིད་ལོ་མང་པོ་ལྷག་ཡོད་ན། ལོ་ཡི་གྲངས་ཀ་བཞིན་དུ་ཉོས་པའི་རིན་ལས་ཁོའི་བླུ་རིན་ཕྱིར་སློག་དགོས།
LEV 25:52 དགའ་སྟོན་གྱི་ལོ་བར་དུ་ལོ་འགའ་ཤས་ལས་ལྷག་མེད་ན། ལོའི་གྲངས་ཀ་བཞིན་དུ་ཉོ་བདག་ལ་རྩིས་རྒྱག་པ་དང་། ཁོའི་བླུ་རིན་ཕྱིར་སློག་དགོས་སོ། །
LEV 25:53 ཁོ་རང་ཉོ་བདག་དང་མཉམ་དུ་ལོ་རེ་བཞིན་གླ་བའི་གླ་པ་ལྟར་འདུག་དགོས་ལ། ཉོ་བདག་གིས་ཁྱོད་ཀྱི་མིག་ལམ་ནས་མི་དེར་གདུག་རྩུབ་བཀོལ་ནས་དབང་སྒྱུར་མི་རུང་།
LEV 25:54 གལ་སྲིད་ཁོ་རང་དེ་བཞིན་དུ་བླུ་བར་མ་འོངས་ན། དགའ་སྟོན་གྱི་ལོ་ལ་སླེབས་ཚེ་ཁོའི་བུ་ཕྲུག་རྣམས་དང་མཉམ་དུ་ཕྱིར་འགྲོ་དགོས་སོ། །
LEV 25:55 ཅི་ལ་ཞེ་ན། ཡེས་ར་ཨེལ་པ་རྣམས་ནི་བདག་གི་ཞབས་ཕྱི་ཡིན་ལ། དེ་རྣམས་ནི་བདག་གིས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པའི་ཞབས་ཕྱི་ཡིན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ནོ། །
LEV 26:1 ཁྱོད་རྣམས་ཀྱིས་སྙིང་པོ་མེད་པའི་སྐུ་བརྙན་བཟོ་མི་རུང་ཞིང་། བརྐོས་པའི་སྐུ་འདྲ་དང་ལྷ་རྟེན་བསྒྲེང་མི་རུང་ལ། ཁྱོད་རྣམས་ཀྱི་ཡུལ་དུ་རྡོ་སྐུ་བསྒྲེངས་ནས་དེ་ལ་ཕྱག་ཀྱང་མ་འཚལ། ཅི་ལ་ཞེ་ན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པའོ། །
LEV 26:2 བདག་གི་ངལ་གསོ་བའི་ཉིན་མོ་རྣམས་བསྲུངས་ནས་བདག་གི་གནས་མཆོག་ལ་གུས་ཤིང་འཇིགས་པར་གྱིས་ཤིག བདག་ནི་ཡ་ཝཱེ་ཡིན་ནོ། །
LEV 26:3 གལ་སྲིད་ཁྱོད་རྣམས་ཀྱིས་བདག་གི་སྒྲིག་ཁྲིམས་བཞིན་བསྒྲུབས་པ་དང་། བདག་གི་བཀའ་རྣམས་བསྲུངས་ནས་དེ་བཞིན་དུ་བྱས་ན།
LEV 26:4 བདག་གིས་ཁྱོད་རྣམས་ལ་དུས་ལྟར་ཆར་པ་གནང་སྟེ་ས་གཞི་ནས་ལོ་ཏོག་སྐྱེ་བ་དང་། ཞིང་ཁའི་སྡོང་པོར་ཤིང་ཏོག་འཐོག་པར་བྱའོ། །
LEV 26:5 ཁྱོད་ཚོས་རྒུན་འབྲུམ་བསྡུ་བའི་བར་དུ་གཡུལ་ཁ་གཅོག་པར་འགྱུར་བ་དང་། ས་བོན་འདེབས་པའི་བར་དུ་རྒུན་འབྲུམ་བསྡུ་བར་འགྱུར་ལ། ཟ་མ་ཟོས་ནས་ལྟོ་བ་འགྲང་ཞིང་། ཁྱོད་ཅག་རང་གི་ཡུལ་དུ་བདེ་བར་གནས་པའོ། །
LEV 26:6 བདག་གིས་ཁྱོད་ཚོའི་ཡུལ་དུ་ཞི་བདེ་གནང་ནས་མལ་དུ་ཉལ་བའི་དུས་སུ་ཁྱོད་ལ་འཇིགས་སྐུལ་མཁན་མེད་པར་བྱ། བདག་གིས་ཁྱོད་ཚོའི་ཡུལ་ནས་གཅན་གཟན་གཏུམ་པོ་རྣམས་མེད་པར་བྱེད་ཅིང་། རལ་གྲི་ཅན་རྣམས་ཡུལ་འདི་བརྒྱུད་ནས་འགྲོ་བར་མི་བྱའོ། །
LEV 26:7 ཁྱོད་ཚོས་དགྲ་རྣམས་འདེད་པར་བྱེད་ཅིང་། དེ་དག་ཁྱོད་རྣམས་ཀྱི་རལ་གྲིའི་ཁ་ནས་འགྱེལ་བར་འགྱུར།
LEV 26:8 ཁྱོད་ཚོ་མི་ལྔ་ཡིས་མི་བརྒྱ་འདེད་པ་དང་། ཁྱོད་ཚོ་མི་བརྒྱ་ཡིས་མི་ཆིག་ཁྲི་འདེད་ཅིང་། དགྲ་རྣམས་ཁྱོད་ཀྱི་མདུན་དུ་རལ་གྲིའི་ཁ་ནས་འགྱེལ་བར་འགྱུར་རོ། །
LEV 26:9 བདག་གིས་ཁྱོད་རྣམས་ལ་བདག་སྐྱོང་བྱས་ཏེ་འབྲས་ལྡན་གྱི་རྒྱུད་མང་པོ་འཕེལ་བར་བྱེད་ཅིང་། བདག་གི་ཁ་ཆད་ཀྱང་ཁྱོད་རྣམས་བར་དུ་བརྟན་པར་བྱའོ། །
LEV 26:10 ཁྱོད་ཚོས་གསོག་ཉར་བྱས་པའི་འབྲུ་རྙིང་བཟའ་ཞིང་། ཡང་འབྲུ་གསར་བྱུང་བའི་རྐྱེན་གྱིས་འབྲུ་རྙིང་གཙང་བཤེར་བྱེད་པར་འགྱུར།
LEV 26:11 བདག་གིས་རང་གི་གུར་མཆོག་ཁྱོད་ཚོའི་དཀྱིལ་དུ་འཛུགས་པ་དང་། བདག་གི་སེམས་ནས་ཁྱོད་ཚོར་སྡང་བར་ཡང་མི་བྱའོ། །
LEV 26:12 བདག་ནི་ཁྱོད་ཅག་གི་ཁྲོད་ནས་འགྲོ་འོང་བྱེད་ཅིང་ཁྱོད་ཚོའི་དཀོན་མཆོག་བྱེད་པ་དང་། ཁྱོད་ཅག་ནི་བདག་གི་འབངས་མི་ཡིན་པར་འགྱུར་རོ། །
LEV 26:13 བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པ་དང་། ཁྱོད་རྣམས་ཨེ་ཅིབ་པ་རྣམས་ཀྱི་བྲན་གཡོག་མི་བྱེད་པའི་ཆེད་དུ། བདག་གིས་ཁྱོད་ཚོ་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པ་ཡིན། བདག་གིས་ཁྱོད་རྣམས་ཀྱིས་འཁུར་བའི་གཉའ་ཤིང་བཅགས་ཏེ་ཁྱོད་ཚོ་མགོ་ཡར་དགྱེ་ནས་མདུན་དུ་སྐྱོད་ཐུབ་པར་བྱས་སོ། །
LEV 26:14 འོན་ཀྱང་། ཁྱོད་ཀྱིས་བདག་གི་ངག་ལ་མི་ཉན་ཞིང་། བདག་གི་བཀའ་རྣམས་བརྩི་བར་མི་བྱེད་པ་དང་།
LEV 26:15 བདག་གི་སྒྲིག་ཁྲིམས་རྣམས་དོར་ནས་སེམས་སུ་བདག་གི་སྲོལ་ཡིག་རྣམས་ལ་སུན་སྣང་སྐྱེས་ཤིང་། བཀའ་རྣམས་མི་བརྩི་བར་བདག་གི་ཁ་ཆད་རྒྱབ་ཏུ་བསྐྱུར་ན།
LEV 26:16 བདག་གིས་ཁྱོད་ཅག་ལ་འདི་བཞིན་བྱ་སྟེ། ཁྱོད་ལ་འཇིགས་སྣང་དང་གློ་ནད་དང་ཚ་ནད་བཅས་ཕོག་པར་བྱས་ནས། མིག་ཞར་བ་དང་ལུས་ཟུངས་ཟད་པར་འགྱུར། ཁྱོད་རྣམས་ཀྱིས་དོན་མེད་དུ་ས་བོན་འདེབས་པར་འགྱུར་ཏེ། ཅི་ལ་ཞེ་ན། ཁྱོད་ཚོས་བཏབ་པ་རྣམས་དགྲ་ཡིས་ཡོངས་སུ་བཟའ་བར་འགྱུར་རོ། །
LEV 26:17 ཁྱོད་རྣམས་ལ་བདག་གི་གདོང་མདོག་ལོག་སྟེ། ཁྱོད་རྣམས་དགྲ་བོའི་མདུན་དུ་ཕམ་པར་བྱའོ། །ཁྱོད་ཚོར་སྡང་བའི་མི་རྣམས་ཀྱིས་ཁྱོད་ཅག་དབང་དུ་བསྡུ་བ་དང་། ར་མདར་རྒྱུག་མཁན་མེད་ཀྱང་ཁྱོད་རྣམས་འབྲོ་བར་འགྱུར་རོ། །
LEV 26:18 དེ་ལྟར་བྱུང་རྗེས་ཁྱོད་ཅག་གིས་ད་དུང་བདག་གི་ངག་ལ་མི་ཉན་ན། བདག་གིས་ཁྱོད་རྣམས་ཀྱི་སྡིག་པའི་ཕྱིར་ཁྱོད་ཚོར་ཉེས་ཆད་ལྡབ་བདུན་གཅོད་པར་འགྱུར།
LEV 26:19 བདག་གིས་ཁྱོད་རྣམས་ཀྱི་སྟོབས་ཤུགས་ལས་བྱུང་བའི་ང་རྒྱལ་རྡུལ་དུ་བརླག་པར་བྱེད་པ་དང་། ཁྱོད་རྣམས་ཀྱི་ནམ་མཁའ་ལྕགས་ལྟར་མཁྲེགས་ཤིང་། ཁྱོད་ཚོའི་ས་གཞི་ལི་ལྟར་སྲ་བར་བྱའོ། །
LEV 26:20 ཁྱོད་རྣམས་ཀྱི་རྩོལ་ཤུགས་ངལ་བ་དོན་མེད་དུ་འགྲོ་བ་སྟེ། ཁྱོད་ཅག་གི་ས་ཞིང་གིས་ལོ་ཏོག་མི་བསྐྱེད་ལ། ས་སྟེང་གི་སྡོང་པོས་ཀྱང་ཤིང་ཏོག་མི་བསྐྱེད་པ་ཡིན་ནོ། །
LEV 26:21 གལ་སྲིད། ཁྱོད་ཅག་གི་སྤྱོད་པ་སྤྱོད་སྟངས་བདག་དང་རྒྱབ་འགལ་དུ་སོང་ནས་བདག་གི་ངག་ལ་མཉན་མི་འདོད་ན། བདག་གིས་ཁྱོད་རྣམས་ཀྱི་སྡིག་པ་བཞིན་དུ། ལྡབ་བདུན་གྱིས་ཁྱོད་རྣམས་ལ་ཆད་མེད་དུ་བརྡུང་བ་དང་།
LEV 26:22 བདག་གིས་ས་སྟེང་གི་གཅན་གཟན་རྣམས་ཁྱོད་ཅག་གི་ཁྲོད་དུ་གཏོང་ཞིང་། ཁྱོད་ཅག་གི་བུ་ཕྲུག་རྣམས་འཕྲོག་པ་དང་། ཁྱོད་ཅག་གི་ཕྱུགས་ཟོག་རྣམས་བསད་ནས། ཁྱོད་ཅག་གི་མི་གྲངས་ཇེ་ཉུང་དུ་འགྲོ་ཞིང་སྲང་ལམ་རྣམས་སྟོང་བར་བྱའོ། །
LEV 26:23 དེ་ལྟར་བྱུང་རྗེས་ཁྱོད་རྣམས་ཀྱིས་ད་དུང་ངའི་བསླབ་ཁྲིམས་དང་དུ་བླངས་ནས་བདག་གི་ཕྱོགས་སུ་མི་འཁོར་བར། བདག་དང་རྒྱབ་འགལ་དུ་སོང་ན།
LEV 26:24 བདག་ཀྱང་ཁྱོད་དང་རྒྱབ་འགལ་དུ་འགྲོ་ཞིང་། ཁྱོད་རྣམས་ཀྱི་སྡིག་པའི་ཕྱིར་དུ་ལྡབ་བདུན་གྱིས་ཁྱོད་ཅག་ལ་བརྡུང་བར་བྱའོ། །
LEV 26:25 བདག་གིས་རལ་གྲི་ཁྱོད་རྣམས་ལ་ཕོག་པར་བྱས་ནས་ཁྱོད་ཚོ་ཁ་ཆད་དང་འགལ་བར་ལན་འཇལ་རྒྱུ་ཡིན། ཁྱོད་ཚོ་རང་གི་གྲོང་ཁྱེར་རྣམས་སུ་འདུས་པ་ཡིན་ན། བདག་གིས་ཁྱོད་རྣམས་ཀྱི་དཀྱིལ་དུ་ནད་ཡམས་གཏོང་ཞིང་། ཁྱོད་རྣམས་དགྲ་བོའི་ལག་ཏུ་གཏོད་པར་བྱ།
LEV 26:26 བདག་གིས་ཁྱོད་ཅག་ལ་འབྲུ་རིགས་འཐོབ་མཚམས་ཆད་པར་བྱ་ཞིང་། བུད་མེད་བཅུ་ཡིས་ཐབ་ཀ་གཅིག་ཏུ་ཁྱོད་རྣམས་ལ་བག་ལེབ་བསྲེག་ཅིང་། ལྗིད་ཚད་འཇལ་ནས་ཁྱོད་རྣམས་ལ་སྦྱིན་པ་དང་། ཁྱོད་ཚོས་དེ་ཟོས་ཀྱང་འགྲང་བར་མི་འགྱུར་རོ། །
LEV 26:27 དེ་ལྟར་བྱུང་རྗེས་ཁྱོད་ཚོས་ད་དུང་བདག་གི་ངག་ལ་མི་ཉན་པར་བདག་དང་རྒྱབ་འགལ་དུ་སོང་ན།
LEV 26:28 བདག་ཀྱང་ཁྱོད་ལ་ཁྲོ་ཞིང་རྒྱབ་འགལ་དུ་འགྲོ་བར་བྱ་སྟེ། ཁྱོད་རྣམས་ཀྱི་སྡིག་པའི་ཕྱིར་དུ་ལྡབ་བདུན་གྱིས་ཁྱོད་ཅག་ལ་ཆད་པ་གཅོད་པར་བྱའོ། །
LEV 26:29 ཁྱོད་རྣམས་ཀྱིས་རང་གི་བུ་རྣམས་ཀྱི་ཤ་བཟའ་བ་དང་། རང་གི་བུ་མོ་རྣམས་ཀྱི་ཤ་ཡང་བཟའ་བར་འགྱུར།
LEV 26:30 བདག་གིས་ཁྱོད་རྣམས་ཀྱི་མཐོ་གླིང་རྣམས་བརླག་པ་དང་། སྤོས་ཀྱི་མཆོད་ཁྲི་རྣམས་བཤིགས་ནས། ཁྱོད་ཀྱི་ལྷ་རྟེན་རྣམས་ཀྱི་ཞིག་རོའི་སྟེང་དུ་ཁྱོད་རང་གི་བེམ་པོ་རྣམས་གཡུག་པར་བྱེད་ཅིང་། ངའི་སེམས་སུའང་ཁྱོད་རྣམས་ལ་སྡང་བར་གྱུར་ནས།
LEV 26:31 ཁྱོད་ཅག་གི་གྲོང་ཁྱེར་རྣམས་ཞིག་རལ་དུ་འགྱུར་བ་དང་། ཁྱོད་ཚོའི་གནས་མཆོག་རྣམས་སྟོང་པར་བྱེད་ཅིང་། ཁྱོད་ཚོའི་དྲི་བསུང་ཞིམ་པོ་ལའང་བདག་གིས་སྣོམ་པར་མི་བྱ།
LEV 26:32 བདག་གིས་ཡུལ་འདི་སྟོང་པར་བྱེད་ཅིང་། ཐ་ན་ཡུལ་འདི་བཙན་འཛིན་བྱེད་མཁན་དགྲ་བོ་རྣམས་ཀྱང་ཧ་ལས་པར་འགྱུར་རོ། །
LEV 26:33 བདག་གིས་ཁྱོད་ཅག་ནི་མི་རིགས་སོ་སོའི་ཁྲོད་དུ་གཏོར་བ་དང་། རལ་གྲི་བཏོན་ནས་ཁྱོད་རྣམས་འདེད་པར་འགྱུར་ལ། ཁྱོད་ཅག་གི་ཡུལ་ནི་སྟོང་པར་འགྱུར་བ་དང་། ཁྱོད་ཅག་གི་གྲོང་ཁྱེར་རྣམས་ཞིག་རལ་དུ་འགྱུར་རོ། །
LEV 26:34 ཁྱོད་རྣམས་དགྲ་བོའི་ཡུལ་དུ་གནས་པའི་དུས་སུ། ཁྱོད་ཅག་གི་ཡུལ་ནི་སྟོང་པར་ལུས་པའི་ཉིན་མོ་ནས་ཡང་བསྐྱར་ངལ་གསོ་འཐོབ་པར་འགྱུར་ཞིང་། དེ་ནས་ཡུལ་དེར་ངལ་གསོ་འཐོབ་ཅིང་ཡང་བསྐྱར་ངལ་གསོ་བའི་ཉིན་མོ་རོལ་བར་འགྱུར།
LEV 26:35 སྟོང་པར་ལུས་པའི་ཉིན་མོ་ཀུན་ལ་ཡུལ་དེས་ངལ་གསོ་བར་འགྱུར་ཞིང་། དེ་ནི་ཁྱོད་རྣམས་དེར་སྡོད་པའི་དུས་སུ་ཁྱོད་ཀྱིས་ངལ་གསོ་བའི་ཉིན་མོར་ངལ་མ་གསོས་པས་ཡིན་ནོ། །
LEV 26:36 ཁྱོད་རྣམས་ལས་ཤུལ་དུ་ལུས་པ་རྣམས་ལ་མཚོན་ན། བདག་གིས་དགྲ་བོ་རྣམས་ཀྱི་ཡུལ་དུ་དེ་དག་གི་སེམས་སུ་འཇིགས་སྣང་བསྐྱེད་ཅིང་། ཐ་ན་རླུང་གིས་དེད་པའི་ལོ་མའི་ཤག་སྒྲ་ཡིས་ཀྱང་དེ་རྣམས་འབྲོ་བར་བྱེད། ཁོ་ཚོ་རལ་གྲིའི་ཁ་ནས་འབྲོ་བ་ལྟར་འབྲོ་ཞིང་། ར་མདར་རྒྱུག་མཁན་མེད་ནའང་འགྱེལ་བར་འགྱུར།
LEV 26:37 ར་མདར་རྒྱུག་མཁན་མེད་ནའང་དེ་དག་གིས་ཕན་ཚུན་བསྒྱེལ་ཞིང་། རལ་གྲིའི་ཁ་ནས་འབྲོ་བ་དང་མཚུངས། ཁྱོད་རྣམས་ནི་དགྲ་བོའི་མདུན་དུ་ཚུགས་མི་ཐུབ་བོ། །
LEV 26:38 ཁྱོད་ཅག་མི་རྣམས་ལས་རྩ་མེད་དུ་འགྲོ་ཞིང་། དགྲ་བོའི་ཡུལ་དེས་ཁྱོད་རྣམས་ཁྱུར་མིད་གཏོང་ངོ་། །
LEV 26:39 ཁྱོད་ཅག་ལས་ཤུལ་དུ་ལུས་པ་རྣམས་ནི་རང་གི་ནག་ཉེས་ཀྱི་རྐྱེན་གྱིས་དགྲ་བོ་རྣམས་ཀྱི་ཡུལ་དུ་འཕུང་བར་འགྱུར་བ་དང་། མེས་པོ་རྣམས་ཀྱི་ནག་ཉེས་ཀྱི་རྐྱེན་གྱིས་ཀྱང་འཕུང་བར་འགྱུར་རོ། །
LEV 26:40 དེ་དག་གིས་བདག་ལ་ཡིད་ཆེས་མི་བྱེད་པར་བདག་དང་རྒྱབ་འགལ་བྱས་པས། བདག་ཀྱང་ཁོ་ཚོ་དང་རྒྱབ་འགལ་དུ་འགྲོ་ཞིང་། ཁོ་ཚོ་དགྲ་བོའི་ཡུལ་དུ་འཁྲིད་པ་ཡིན། དེའི་དུས་སུ་ཁོ་རྣམས་ཀྱི་མཚན་སྐྱི་བཅད་མེད་པ་ལྟ་བུའི་སེམས་ཁེངས་སྐྱུང་བྱས་ནས། ཁོ་ཚོས་རང་གི་ནག་ཉེས་ཀྱི་ཆད་པ་ཁུར་ཏེ། རང་རང་གི་ནག་ཉེས་དང་མེས་པོ་རྣམས་ཀྱི་ནག་ཉེས་ཁས་བླངས་ན།
LEV 26:42 བདག་གིས་ང་དང་ཡ་ཀོབ་བར་གྱི་ཁ་ཆད་དང་། ང་དང་ཨི་སཱག་བར་གྱི་ཁ་ཆད་དང་། ང་དང་ཨབ་ར་ཧམ་བར་གྱི་ཁ་ཆད་བཅས་དྲན་པར་བྱེད་ཅིང་། ཡུལ་འདི་ཡང་དྲན་པར་བྱའོ། །
LEV 26:43 དེ་དག་གིས་ཡུལ་ཁམས་ཡོངས་སུ་དོར་བ་དང་། ཁོ་རྣམས་མེད་པས་སྟོང་པར་ལུས་པའི་དུས་སུ། ཡུལ་དེར་ཡང་བསྐྱར་ངལ་གསོ་འཐོབ་དགོས། ཁོ་ཚོས་ནག་ཉེས་ཀྱི་ཆད་པ་དང་དུ་བླངས་པ་སྟེ། དེ་དག་གིས་བདག་གི་སྲོལ་ཡིག་སྤངས་ཤིང་། སེམས་སུ་བདག་གི་སྒྲིག་ཁྲིམས་རྣམས་ལ་སུན་སྣང་སྐྱེས་པའི་ཕྱིར་རོ། །
LEV 26:44 འོན་ཀྱང་དེ་ལྟར་ཡིན་ནའང་། དེ་དག་དགྲ་བོ་རྣམས་ཀྱི་ཡུལ་དུ་ཡོད་པའི་སྐབས་སུ། བདག་གིས་ཁོ་ཚོ་མ་དོར་ཞིང་། ཁོ་རྣམས་ལ་སྡང་ནས་རྩ་མེད་དུའང་མ་བཏང་ལ། བདག་དང་ཁོ་རྣམས་བར་གྱི་ཁ་ཆད་ཀྱང་འདོར་བར་མ་བྱས། ཅི་ལ་ཞེ་ན། བདག་ནི་དེ་རྣམས་ཀྱི་དཀོན་མཆོག་ཡ་ཝཱེ་ཡིན་པའོ། །
LEV 26:45 བདག་ནི་དེ་དག་གི་དཀོན་མཆོག་ཡིན་པའི་ཆེད་དུ་བདག་གིས་མི་རིགས་རྣམས་ཀྱི་མཐོང་ལམ་དུ། དེ་དག་གི་མེས་པོ་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་ནས། ངས་དེ་དག་གི་མེས་པོ་རྣམས་ཀྱི་ཁ་ཆད་དྲན་པར་བྱའོ། །བདག་ནི་ཡ་ཝཱེ་ཡིན་ཞེས་པའོ་གསུངས་སོ།།
LEV 26:46 དེ་དག་ནི་དཀོན་མཆོག་ཡ་ཝཱེས་རི་བོ་སི་ནཱ་རུ་མོ་ཤེ་བརྒྱུད་དེ་ཡེས་ར་ཨེལ་པ་རྣམས་ལ་བཙུགས་པའི་སྒྲིག་ཁྲིམས་དང་། སྲོལ་ཡིག བཀའ་ཁྲིམས་བཅས་ཡིན་ནོ། །
LEV 27:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
LEV 27:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་སྐད་སྒོས་ཤིག སུ་ཞིག་གིས་མི་ཞིག་གི་རིན་ཐང་ལྟར་དཀོན་མཆོག་ཡ་ཝཱེ་ལ་དམ་བཅའ་ཁྱད་པར་བ་ཞིག་འབུལ་ན།
LEV 27:3 ཁྱོད་ཀྱི་ཚོད་རྩིས་ནི། སྐྱེས་པ་ལོ་ཉི་ཤུ་ནས་དྲུག་ཅུའི་བར་དུ་གནས་མཆོག་གི་སྲང་བཞིན་དུ་དངུལ་སྲང་ལྔ་བཅུ་རུ་བརྩི་བར་བྱའོ། །
LEV 27:4 གལ་སྲིད་བུད་མེད་ཡིན་ན། དངུལ་སྲང་སུམ་ཅུ་རུ་རྩིས་ཤིག
LEV 27:5 ལོ་ལྔ་ནས་ཉི་ཤུའི་བར་གྱི་ཕོ་ནི་དངུལ་སྲང་ཉི་ཤུ་དང་། མོ་ནི་དངུལ་སྲང་བཅུ་རུ་བརྩི་དགོས་སོ། །
LEV 27:6 ཟླ་བ་གཅིག་ནས་ལོ་ལྔ་བར་གྱི་བུ་ནི་དངུལ་སྲང་ལྔ་དང་བུ་མོ་ནི་དངུལ་སྲང་གསུམ་དུ་བརྩི་དགོས།
LEV 27:7 ལོ་དྲུག་ཅུའི་ཡན་གྱི་སྐྱེས་པ་ཡིན་ན་དངུལ་སྲང་བཅོ་ལྔ་དང་། བུད་མེད་ཡིན་ན་དངུལ་སྲང་བཅུ་རུ་བརྩི་དགོས།
LEV 27:8 གལ་སྲིད་ཁོ་རང་དབུལ་དྲགས་ཏེ་ཁྱོད་ཀྱི་ཚོད་རྩིས་བཞིན་དུ་བསྒྲུབ་མི་ནུས་ན། མཆོད་དཔོན་གྱི་མདུན་དུ་ཁྲིད་དེ། མཆོད་དཔོན་གྱིས་ཁོ་ལ་ཚོད་རྩིས་བྱེད་ཅིང་། དམ་བཅའ་འཇོག་མཁན་ལག་གི་རྒྱུ་སྟོབས་བཞིན་དུ་མཆོད་དཔོན་གྱིས་ཚོད་རྩིས་བྱེད་དགོས་སོ། །
LEV 27:9 དཀོན་མཆོག་ཡ་ཝཱེ་ལ་འབུལ་བར་དམ་བཅས་པའི་མཆོད་པ་ནི་ཕྱུགས་ཟོག་ཡིན་ན། དཀོན་མཆོག་ཡ་ཝཱེ་ལ་གང་ཞིག་ཕུལ་བ་ཐམས་ཅད་དམ་པ་ཡིན་དགོས།
LEV 27:10 དེ་ནི་བརྗེ་མི་རུང་ལ། གཞན་ཞིག་གིས་ཚབ་ཀྱང་བྱེད་མི་རུང་ཞིང་། བཟང་པོའི་ཚབ་ཏུ་ངན་པའམ། ངན་པའི་ཚབ་ཏུ་བཟང་པོ་གང་ཡང་བརྗེ་མི་རུང་། གལ་སྲིད་ཅིས་ཀྱང་ཕྱུགས་ཟོག་གིས་ཕྱུགས་ཟོག་གཞན་པའི་ཚབ་བྱེད་དགོས་ན། སྔར་དམ་བཅས་པ་དང་ཚབ་ཏུ་ཕུལ་བ་གཉིས་ཀ་དམ་པ་ཡིན་དགོས་སོ། །
LEV 27:11 གལ་སྲིད་ཕྱུགས་ཟོག་དེ་ནི་མི་གཙང་བ་དང་། དཀོན་མཆོག་ཡ་ཝཱེ་ལ་མཆོད་པར་འབུལ་མི་རུང་བ་ཞིག་ཡིན་ན། ཕྱུགས་ཟོག་དེ་མཆོད་དཔོན་གྱི་མདུན་དུ་འཁྲིད་དགོས།
LEV 27:12 མཆོད་དཔོན་གྱིས་ཕྱུགས་ཟོག་གི་བཟང་ངན་ལ་བལྟས་ནས་རིན་གོང་ཚོད་རྩིས་བྱེད་དགོས་ཤིང་། མཆོད་དཔོན་གྱིས་ཚོད་རྩིས་བྱས་པ་དེ་ཁྱོད་ཀྱི་ཚོད་རྩིས་རིན་གོང་ཡིན་ནོ། །
LEV 27:13 གལ་སྲིད་དམ་བཅའ་འཇོག་མཁན་གྱིས་ཅིས་ཀྱང་དེ་བླུ་བར་འདོད་ན། ཁྱོད་ཀྱིས་ཚོད་རྩིས་བྱས་པའི་རིན་གོང་སྟེང་ལྔ་ཆ་གཅིག་སྣོན་དགོས་སོ། །
LEV 27:14 གལ་སྲིད་སུ་ཞིག་གིས་རང་གི་ཁང་པ་དམ་པར་བརྩིས་ཏེ། དཀོན་མཆོག་ཡ་ཝཱེ་ལ་དམ་པར་འབུལ་ན། མཆོད་དཔོན་གྱིས་རིན་གོང་ཚོད་རྩིས་བྱེད་དགོས་ཤིང་། ཁང་པ་བཟང་ངན་གང་ཡིན་ཡང་མཆོད་དཔོན་གྱིས་ཚོད་རྩིས་བྱས་པ་བཞིན་དུ་རིན་གོང་དེ་ཚད་གཞི་རུ་འཛིན་དགོས་སོ། །
LEV 27:15 ཁང་པ་དམ་པར་རྩི་མཁན་གྱིས་རང་གི་ཁང་པ་བླུ་ན། ཁྱོད་ཀྱིས་རིན་རྩིས་པའི་སྟེང་ལ་ལྔ་ཆ་གཅིག་བསྣན་ནས་སྤྲད་ན་ཁང་པ་ད་གཟོད་མི་དེ་ལ་དབང་བར་འགྱུར་རོ། །
LEV 27:16 གལ་སྲིད་མི་ཞིག་གིས་རང་གིས་རྒྱུན་འཛིན་བྱས་པའི་ས་ཞིང་ལས་ཁག་ཅིག་དམ་པར་བརྩིས་ཏེ་དཀོན་མཆོག་ཡ་ཝཱེ་ལ་དམ་པར་ཕུལ་ན། ས་ཞིང་དེའི་ས་བོན་འདེབས་ཚད་བཞིན་དུ་ཚོད་རྩིས་བྱེད་དགོས་པ་འདི་ལྟ་སྟེ། ནས་ཁལ་ གཅིག་གི་ས་བོན་འདེབས་ཐུབ་པའི་ས་ཞིང་ནི་དངུལ་སྲང་ལྔ་བཅུ་ཡིན།
LEV 27:17 ཁོས་དགའ་སྟོན་གྱི་ལོ་ནས་བཟུང་སྟེ། རང་གི་ས་ཞིང་ཞིག་དམ་པར་བརྩིས་ན་ཁྱོད་ཀྱིས་ཚོད་རྩིས་བྱས་པའི་རིན་གོང་ཚད་གཞིར་འཛིན་དགོས།
LEV 27:18 ཅི་སྟེ། ཁོས་དགའ་སྟོན་གྱི་ལོ་ཡི་རྗེས་ནས་ས་ཞིང་དམ་པར་བརྩིས་ན། མཆོད་དཔོན་གྱིས་དུས་དེ་ནས་བཟུང་དགའ་སྟོན་གྱི་ལོ་རྗེས་མའི་བར་གྱི་ལོ་ལྷག་མའི་ལོ་གྲངས་བཞིན་དུ་འདེད་རྩིས་བྱས་ཏེ། ཁྱོད་ཀྱིས་ཚོད་རྩིས་བྱས་པའི་རིན་གོང་ལས་འཐེན་དགོས་སོ། །
LEV 27:19 ས་ཞིང་དམ་པར་རྩི་མཁན་གྱིས་དེ་བླུ་བར་འདོད་ན། ཁྱོད་ཀྱིས་རིན་རྩིས་པའི་སྟེང་ལ་ལྔ་ཆ་གཅིག་བསྣན་ཏེ་སྤྲད་ན་ས་ཞིང་ད་གཟོད་ཁོ་ལ་དབང་བར་བྱས་ཆོག
LEV 27:20 འོན་ཀྱང་མི་དེས་ས་ཞིང་རང་གིས་མ་བླུས་པའམ་མི་གཞན་ཞིག་ལ་བཙོངས་ན། རྗེས་སུ་དེ་བླུ་བར་མི་ནུས་སོ། །
LEV 27:21 དགའ་སྟོན་གྱི་ལོར་ས་ཞིང་དེ་ཉོ་བདག་གི་ལག་ནས་ཕྱིར་ལེན་དུས། དཀོན་མཆོག་ཡ་ཝཱེ་ལ་དམ་པ་ཡིན་པས། ཡོངས་སུ་རྫོགས་པར་ཕུལ་བའི་ས་ཞིང་དང་འདྲ་བར་མཆོད་དཔོན་ལ་དབང་བར་འགྱུར་རོ། །
LEV 27:22 དཀོན་མཆོག་ཡ་ཝཱེ་ལ་དམ་པར་ཕུལ་བའི་ས་ཞིང་ནི་རང་ས་མ་ཡིན་པར་གཞན་ནས་ཉོས་པ་ཡིན་ན།
LEV 27:23 མཆོད་དཔོན་གྱིས་ཁྱོད་ཀྱི་ཚོད་རྩིས་རིན་གོང་བཞིན་དུ། དགའ་སྟོན་གྱི་ལོ་ཡི་བར་དུ་འདེད་རྩིས་བྱེད་པ་དང་། ཉིན་མོ་དེ་ལ་མི་དེས་ཁྱོད་ཀྱིས་ཚོད་རྩིས་བྱས་པའི་རིན་འབབ་དཀོན་མཆོག་ཡ་ཝཱེ་ལ་དམ་པར་འབུལ་དགོས།
LEV 27:24 དགའ་སྟོན་གྱི་ལོར་ས་ཞིང་དེ་འཚོང་བདག་སྟེ་ས་ཞིང་དེ་རྒྱུན་འཛིན་བྱེད་མཁན་ལ་ཕྱིར་སློག་དགོས།
LEV 27:25 ཁྱོད་ཀྱིས་ཚོད་རྩིས་བྱས་པའི་རིན་གོང་ཐམས་ཅད་ནི་གནས་མཆོག་གི་སྲང་བཞིན་དུ་ཡིན་དགོས་ཏེ། དངུལ་སྲང་གཅིག་ལ་གཱེ་ར་ཉི་ཤུ་ཡིན་དགོས།
LEV 27:26 སྐྱེས་འགོ་སྟེ་ཕྱུགས་ཟོག་ཁྲོད་ཀྱི་སྐྱེས་འགོ་རྣམས་ནི་དཀོན་མཆོག་ཡ་ཝཱེའི་ཡིན་པས། མི་སུས་ཀྱང་དེ་ཡང་བསྐྱར་དམ་པར་རྩི་མི་རུང་ལ། བ་གླང་ངམ་ལུག་གང་ཡིན་ཡང་། དེ་ནི་དཀོན་མཆོག་ཡ་ཝཱེའི་ཡིན་ནོ། །
LEV 27:27 ཅི་སྟེ། ཕྱུགས་ཟོག་སྐྱེས་འགོ་ནི་མི་གཙང་བ་ཡིན་ན། ཚོད་རྩིས་བྱས་པའི་རིན་གོང་དང་དེའི་ཁར་ལྔ་ཆ་གཅིག་བསྣན་ནས་དེ་བླུ་དགོས། བླུ་བ་མིན་ན་ཁྱོད་ཀྱི་ཚོད་རྩིས་ཀྱི་རིན་བཞིན་དུ་དེ་བཙོང་དགོས་སོ། །
LEV 27:28 འོན་ཀྱང་། ཡོངས་སུ་རྫོགས་པར་ཕུལ་བ་རྣམས་ཏེ། མི་ཡིས་རང་ལ་གང་ཡོད་པ་ལས་དཀོན་མཆོག་ཡ་ཝཱེ་ལ་གཏན་དུ་འབུལ་འོས་པ་ནི། མིའམ་ཕྱུགས་ཟོག་གམ། ཁོ་ལ་དབང་བའི་ས་ཞིང་བཅས་གང་ཡིན་ཡང་བཙོང་བའམ་ཉོ་བར་མི་རུང་སྟེ། གཏན་དུ་འབུལ་འོས་པ་ཐམས་ཅད་དཀོན་མཆོག་ཡ་ཝཱེ་ལ་ཀུན་ལས་དམ་པ་ཡིན་པའི་ཕྱིར་རོ། །
LEV 27:29 མི་རྣམས་ལས་གཏན་དུ་འབུལ་འོས་པ་ཐམས་ཅད་ནི་བླུ་མི་རུང་བར་སྲོག་གཅོད་དགོས་སོ། །
LEV 27:30 ས་གཞིའི་སྟེང་གི་ཡོད་ཚད་དེ་ས་བོན་དང་སྡོང་མགོའི་ཤིང་ཏོག་གང་ཡིན་ཡང་། དེའི་བཅུ་ཆ་གཅིག་ནི་དཀོན་མཆོག་ཡ་ཝཱེའི་ཡིན་ལ། དཀོན་མཆོག་ཡ་ཝཱེ་ལ་དམ་པ་ཡིན་ནོ། །
LEV 27:31 སུ་ཞིག་གིས་བཅུ་ཆ་གཅིག་དེ་བླུ་བར་འདོད་ན། གཞན་པའི་ལྔ་ཆ་གཅིག་སྣོན་དགོས།
LEV 27:32 བ་གླང་གི་ཁྱུ་དང་ར་ལུག་གི་ཁྱུ་ཐམས་ཅད་ཀྱི་བཅུ་ཆ་གཅིག་སྟེ། ཕྱུགས་རྫིའི་དབྱུག་པའི་འོག་ནས་འགྲོ་བ་ཐམས་ཅད་ལས་ཕྱུགས་བཅུ་པ་ནི་དཀོན་མཆོག་ཡ་ཝཱེ་ལ་དབང་ཞིང་དམ་པ་ཡིན་ནོ། །
LEV 27:33 དེའི་བཟང་ངན་གྱི་དབྱེ་བ་འགེར་མི་རུང་ལ། བརྗེ་ཡང་མི་རུང་སྟེ། གལ་སྲིད་ཅིས་ཀྱང་བརྗེ་དགོས་ན། དེའི་ཚབ་བྱེད་དང་འབུལ་འོས་པའི་ཕྱུགས་ཟོག་གཉིས་ཀ་དམ་པ་ཡིན་པས་བླུ་མི་རུང་ཞེས་པའོ་གསུངས་སོ། །
LEV 27:34 དེ་དག་ནི་དཀོན་མཆོག་ཡ་ཝཱེས་རི་བོ་སི་ནཱ་རུ་ཡེས་ར་ཨེལ་པ་རྣམས་ཀྱི་ཆེད་དུ་མོ་ཤེ་ལ་བསྩལ་པའི་བཀའ་རྣམས་ཡིན་ནོ།། །།
NUM 1:1 དེ་ཡང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་རྗེས་ཀྱི་ལོ་གཉིས་པའི་ཟླ་བ་གཉིས་པའི་ཚེས་དང་པོ་ལ། སི་ནཱ་དབེན་སྟོང་དུ་མཇལ་འཕྲད་གུར་མཆོག་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 1:2 ཡེས་ར་ཨེལ་པའི་མི་ཚོགས་ཐམས་ཅད་ནི་དེ་དག་གི་རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་མི་གྲངས་ལེན་དགོས་པ་སྟེ། སྐྱེས་པ་ཐམས་ཅད་མི་གྲངས་བཞིན་ཐོ་བརྒྱག་དགོས།
NUM 1:3 ཡེས་ར་ཨེལ་མི་རིགས་ཀྱི་ཁྲོད་ནས་སྐྱེས་པ་ལོ་ཉི་ཤུ་ཅན་དང་དེའི་ཡན་ཟིན་པ་དང་། དམག་འཐབ་ལ་ཞུགས་ནུས་པ་ཐམས་ཅད་ནི་ཁྱོད་དང་ཨ་རོན་གཉིས་ཀྱིས་ཁོ་ཚོའི་དམག་ཚོགས་བཞིན་དུ་རྩིས་ལེན་དགོས།
NUM 1:4 ཚོ་པ་རེ་ནས་ཁྱོད་རྣམས་ལ་རོགས་བྱེད་མཁན་མི་གཅིག་རེ་ཡོད་པ་དང་། དེ་དག་རེ་རེ་རང་གི་ཕ་ཁྱིམ་གྱི་འགོ་དཔོན་ཡིན་དགོས།
NUM 1:5 ཁྱོད་རྣམས་ལ་རོགས་བྱེད་མཁན་རྣམས་ཀྱི་མིང་ནི་འདི་ལྟ་སྟེ། རུ་བེན་ཚོ་པ་ནས་ཤེ་དེ་ཨུར་གྱི་བུ་ཨེ་ལི་ཚུར་དང་།
NUM 1:6 སི་མུ་ཨོན་ཚོ་པ་ནས་ཙུ་རེ་ཤད་དཱ་ཨིའི་བུ་ཤེ་ལུ་མེ་ཨེལ་དང་།
NUM 1:7 ཡ་ཧུ་དཱ་ཚོ་པ་ནས་ཨ་མི་ནཱ་དབ་ཀྱི་བུ་ནཱ་སོན་དང་།
NUM 1:8 ཡེས་སི་ཀཱར་ཚོ་པ་ནས་ཙུ་ཨར་གྱི་བུ་ནེ་ཐན་ཨེལ་དང་།
NUM 1:9 ཟེ་བུ་ལུན་ཚོ་པ་ནས་ཧེ་ལོན་གྱི་བུ་ཨེ་ལི་ཨབ་དང་།
NUM 1:10 ཡོ་སེབ་ཀྱི་བུ་རྒྱུད་ཁྲོད་དུ། ཨེ་ཕཱར་ཡིམ་ཚོ་པ་ནས་ཨམ་མེ་ཧུད་ཀྱི་བུ་ཨེ་ལི་ཤ་མཱ་དང་། མཱ་ན་ཤེ་ཚོ་པ་ནས་ཕེ་དཱ་ཚུར་གྱི་བུ་གམ་ལི་ཨེལ་དང་།
NUM 1:11 པེན་ཡཱ་མེན་ཚོ་པ་ནས་གིད་ཨོ་ནཱའི་བུ་ཨ་བི་ཏན་དང་།
NUM 1:12 དཱན་ཚོ་པ་ནས་ཨམ་མེ་ཤད་ད་ཨི་ཡི་བུ་ཨ་ཧི་ཨེ་ཟེར་དང་།
NUM 1:13 ཨ་ཤེར་ཚོ་པ་ནས་ཨོག་རན་གྱི་བུ་ཕཱ་གེ་ཨེལ་དང་།
NUM 1:14 གཱ་རྡུ་ཚོ་པ་ནས་དི་ཨོ་ཨེལ་གྱི་བུ་ཨེལ་ཡཱ་སབ་དང་།
NUM 1:15 ནཱབ་ཐ་ལི་ཚོ་པ་ནས་ཨེ་ནན་གྱི་བུ་ཨ་ཧི་རཱ་བཅས་སོ། །
NUM 1:16 དེ་དག་ནི་མི་ཚོགས་ལས་བདམས་པ་ཡིན་ཞིང་། མེས་པོའི་ཚོ་པ་རྣམས་ཀྱི་འགོ་དཔོན་དང་། ཡེས་ར་ཨེལ་གྱི་སྟོང་དཔོན་རྣམས་ཡིན་ནོ་ཞེས་གསུངས་སོ། །
NUM 1:17 མོ་ཤེ་དང་ཨ་རོན་གཉིས་ཀྱིས་མིང་བཏོན་པའི་མི་དེ་དག་ཁྲིད་པ་དང་།
NUM 1:18 ཟླ་བ་གཉིས་པའི་ཚེས་དང་པོར་མི་ཚོགས་ཐམས་ཅད་བསྡུས་ཤིང་། དེ་དག་གི་རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་ལོ་ཉི་ཤུ་ཅན་དང་དེའི་ཡན་ཟིན་པ་རྣམས་མི་གྲངས་ལྟར་ཐོ་བརྒྱབ་པའོ། །
NUM 1:19 དཀོན་མཆོག་ཡ་ཝཱེས་མོ་ཤེ་ལ་བཀའ་བསྩལ་པ་བཞིན་དུ། ཁོང་གིས་སི་ནཱ་དབེན་སྟོང་ནས་དེ་དག་གི་རྩིས་བླངས་པའོ། །
NUM 1:20 ཡེས་ར་ཨེལ་གྱི་བུ་སྐྱེས་འགོ་རུ་བེན་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་དང་མི་གྲངས་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:21 རུ་བེན་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་དྲུག་སྟོང་ལྔ་བརྒྱའོ། །
NUM 1:22 སི་མུ་ཨོན་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་དང་མི་གྲངས་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:23 སི་མུ་ཨོན་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་དགུ་སྟོང་སུམ་བརྒྱའོ། །
NUM 1:24 གཱ་རྡུ་ཡི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:25 གཱ་རྡུ་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་ལྔ་སྟོང་དྲུག་བརྒྱ་ལྔ་བཅུའོ། །
NUM 1:26 ཡ་ཧུ་དཱའི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:27 ཡ་ཧུ་དཱ་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་བདུན་ཁྲི་བཞི་སྟོང་དྲུག་བརྒྱའོ། །
NUM 1:28 ཡེས་སི་ཀཱར་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:29 ཡེས་སི་ཀཱར་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་བཞི་སྟོང་བཞི་བརྒྱའོ། །
NUM 1:30 ཟེ་བུ་ལུན་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:31 ཟེ་བུ་ལུན་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་བདུན་སྟོང་བཞི་བརྒྱའོ། །
NUM 1:32 ཡོ་སེབ་ཀྱི་བུ་རྣམས་ཏེ། ཨེ་ཕཱར་ཡིམ་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:33 ཨེ་ཕཱར་ཡིམ་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་ལྔ་བརྒྱའོ། །
NUM 1:34 མཱ་ན་ཤེའི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:35 མཱ་ན་ཤེ་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་སུམ་ཁྲི་ཉིས་སྟོང་ཉིས་བརྒྱའོ། །
NUM 1:36 པེན་ཡཱ་མེན་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:37 པེན་ཡཱ་མེན་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་སུམ་ཁྲི་ལྔ་སྟོང་བཞི་བརྒྱའོ། །
NUM 1:38 དཱན་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:39 དཱན་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་དྲུག་ཁྲི་ཉིས་སྟོང་བདུན་བརྒྱའོ། །
NUM 1:40 ཨ་ཤེར་གྱི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:41 ཨ་ཤེར་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་ཆིག་སྟོང་ལྔ་བརྒྱའོ། །
NUM 1:42 ནཱབ་ཐ་ལི་ཡི་བུ་རྒྱུད་དག་གི་བུ་རབས་ཚ་རྒྱུད་ལས། རུས་རྒྱུད་དང་ཕ་ཁྱིམ། སྐྱེས་པ་རེ་རེའི་མིང་གི་གྲངས་ཀ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པ་ཐམས་ཅད་ཐོ་བརྒྱབ་པ་སྟེ།
NUM 1:43 ནཱབ་ཐ་ལི་ཚོ་པ་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་སུམ་སྟོང་བཞི་བརྒྱའོ། །
NUM 1:44 དེ་ནི་མོ་ཤེ་དང་ཨ་རོན། ཡེས་ར་ཨེལ་གྱི་འགོ་དཔོན་བཅུ་གཉིས་ཏེ་ཕ་ཁྱིམ་རེའི་མི་རེ་བཅས་ཀྱིས་རྩིས་བླངས་པའི་མི་གྲངས་ཡིན་པ་སྟེ།
NUM 1:45 ཡེས་ར་ཨེལ་གྱི་ཁྲོད་ཕ་ཁྱིམ་བཞིན་དུ། ལོ་ཉི་ཤུ་ཅན་དང་དེའི་ཡན་གྱི་དམག་འཐབ་ལ་ཞུགས་ནུས་པའི་ཡེས་ར་ཨེལ་པ་ཐམས་ཅད་ཐོ་བརྒྱབ་པ་དང་།
NUM 1:46 རྩིས་བླངས་པའི་མི་གྲངས་ནི་བསྡོམས་པས་དྲུག་འབུམ་སུམ་སྟོང་ལྔ་བརྒྱ་ལྔ་བཅུའོ། །
NUM 1:47 འོན་ཀྱང་། ལེ་ཝི་པ་རྣམས་ཁོ་ཚོའི་ཁྱིམ་རྒྱུད་ཀྱི་ཚོ་པ་བཞིན་དེ་དག་གི་ཁྲོད་དུ་མ་བརྩིས་སོ། །
NUM 1:48 ཅི་ལ་ཟེར་ན། དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 1:49 ལེ་ཝིའི་ཚོ་པ་འབའ་ཞིག་ཁྱོད་ཀྱིས་རྩིས་ལེན་མི་རུང་ལ། དེ་དག་གི་བསྡོམས་གྲངས་ཀྱང་ཡེས་ར་ཨེལ་པ་རྣམས་ཀྱི་ཁྲོད་དུ་བགྲང་མི་རུང་།
NUM 1:50 འོན་ཀྱང་། དཔང་པོའི་གུར་མཆོག་དང་། དེའི་ཡོ་བྱད་ཐམས་ཅད་དང་། དེ་ལ་གཏོགས་པ་ཀུན་ལེ་ཝི་པ་རྣམས་ལ་བདག་གཉེར་བྱེད་དུ་ཆུག དེ་ཚོས་གུར་མཆོག་དང་ཡོ་བྱད་ཐམས་ཅད་འཁུར་ཞིང་དེ་ལ་ཞབས་ཏོག་སྒྲུབ་པ་དང་། གུར་མཆོག་གི་མཐའ་འཁོར་དུ་སྒར་འདེབས་དགོས།
NUM 1:51 གུར་མཆོག་སྤོ་བའི་དུས་སུ་ལེ་ཝི་པ་རྣམས་ཀྱིས་དེ་མར་ཕབ་པ་དང་། གུར་མཆོག་ཕུབ་པའི་དུས་སུ། ལེ་ཝི་པ་རྣམས་ཀྱིས་དེ་ཕུབ་དགོས། གལ་ཏེ་མི་གཞན་སུ་ཞིག་གུར་མཆོག་དང་ཉེ་བར་འོངས་ན་དེ་གསོད་དགོས་སོ། །
NUM 1:52 ཡེས་ར་ཨེལ་པ་རྣམས་ཀྱིས་རང་རང་གི་སྒར་ཁ་དང་རང་རང་གི་རུ་དར་བཞིན་སྒར་འདེབས་དགོས།
NUM 1:53 འོན་ཀྱང་། དཀོན་མཆོག་ཁོང་ཉིད་ཡེས་ར་ཨེལ་གྱི་མི་ཚོགས་ལ་ཐུགས་མི་ཁྲོ་བའི་ཕྱིར་དུ། ལེ་ཝི་པ་རྣམས་ཀྱིས་དཔང་པོའི་གུར་མཆོག་གི་མཐའ་འཁོར་དུ་སྒར་འདེབས་དགོས་པ་དང་། དེ་རྣམས་ཀྱིས་དཔང་པོའི་གུར་མཆོག་སྲུང་བའི་འགན་བསྒྲུབ་དགོས་ཞེས་བཀའ་གནང་ངོ་། །
NUM 1:54 ཡེས་ར་ཨེལ་པ་རྣམས་ཀྱིས་དེ་བཞིན་དུ་བསྒྲུབས་པ་དང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་ལྟར་གནང་བ་བཞིན་ཁོ་རྣམས་ཀྱིས་དེ་ལྟར་བསྒྲུབས་སོ། །
NUM 2:1 དེ་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 2:2 ཡེས་ར་ཨེལ་པ་རྣམས་ཀྱིས་རང་རང་གི་རུ་དར་དང་རང་རང་གི་ཕ་ཁྱིམ་གྱི་དར་ཆེན་འོག་ཏུ་སྒར་འདེབས་དགོས། དེ་རྣམས་ཀྱིས་མཇལ་འཕྲད་གུར་མཆོག་གི་ཕྱོགས་བཞི་རུ་རྒྱང་ཐག་ཅུང་རིང་བའི་གནས་སུ་སྒར་འདེབས་དགོས།
NUM 2:3 ཤར་ཕྱོགས་སྐྱ་རེངས་ཤར་བའི་གནས་སུ་དམག་ཚོགས་བཞིན་དུ་སྒར་འདེབས་མཁན་ནི་ཡ་ཧུ་དཱའི་སྒར་ཁའི་དར་ཆེན་ཡིན་ལ། ཡ་ཧུ་དཱ་པ་རྣམས་ཀྱི་འགོ་དཔོན་ནི་ཨ་མི་ནཱ་དབ་ཀྱི་བུ་ནཱ་སོན་ཡིན་ཞིང་།
NUM 2:4 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་བདུན་ཁྲི་བཞི་སྟོང་དྲུག་བརྒྱའོ། །
NUM 2:5 དེའི་གཞོགས་སུ་སྒར་འདེབས་མཁན་ནི་ཡེས་སི་ཀཱར་ཚོ་པ་ཡིན་པ་དང་། ཡེས་སི་ཀཱར་པ་རྣམས་ཀྱི་འགོ་དཔོན་ནི་ཙུ་ཨར་གྱི་བུ་ནེ་ཐན་ཨེལ་ཡིན་ཞིང་།
NUM 2:6 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་བཞི་སྟོང་བཞི་བརྒྱའོ། །
NUM 2:7 དེ་ནས་ཟེ་བུ་ལུན་གྱི་ཚོ་པ་ཡོད་པ་དང་། ཟེ་བུ་ལུན་པ་རྣམས་ཀྱི་འགོ་དཔོན་ནི་ཧེ་ལོན་གྱི་བུ་ཨེ་ལི་ཨབ་ཡིན་ཞིང་།
NUM 2:8 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་བདུན་སྟོང་བཞི་བརྒྱའོ། །
NUM 2:9 ཡ་ཧུ་དཱའི་སྒར་ནས་དམག་ཚོགས་བཞིན་རྩིས་བླངས་པའི་མི་གྲངས་ནི་བསྡོམས་པས་ཆིག་འབུམ་བརྒྱད་ཁྲི་དྲུག་སྟོང་བཞི་བརྒྱ་ཡིན་ལ། དེ་དག་སྔོན་དུ་ལམ་ལ་ཆས་དགོས་སོ། །
NUM 2:10 ལྷོ་ཕྱོགས་སུ་དམག་ཚོགས་བཞིན་དུ་རུ་བེན་གྱི་སྒར་ཁའི་དར་ཆེན་ཡོད་པ་དང་། རུ་བེན་པ་རྣམས་ཀྱི་འགོ་དཔོན་ནི་ཤེ་དེ་ཨུར་གྱི་བུ་ཨེ་ལི་ཚུར་ཡིན་ཞིང་།
NUM 2:11 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་དྲུག་སྟོང་ལྔ་བརྒྱའོ། །
NUM 2:12 དེའི་གཞོགས་སུ་སྒར་འདེབས་མཁན་ནི་སི་མུ་ཨོན་ཚོ་པ་ཡིན་ལ། སི་མུ་ཨོན་པ་རྣམས་ཀྱི་འགོ་དཔོན་ནི་ཙུ་རེ་ཤད་དཱ་ཨིའི་བུ་ཤེ་ལུ་མེ་ཨེལ་ཡིན་ཞིང་།
NUM 2:13 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་དགུ་སྟོང་སུམ་བརྒྱའོ། །
NUM 2:14 དེ་ནས་གཱ་རྡུ་ཚོ་པ་ཡོད་པ་དང་། གཱ་རྡུ་པ་རྣམས་ཀྱི་འགོ་དཔོན་ནི་དི་ཨོ་ཨེལ་ གྱི་བུ་ཨེལ་ཡཱ་སབ་ཡིན་ཞིང་།
NUM 2:15 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་ལྔ་སྟོང་དྲུག་བརྒྱ་ལྔ་བཅུའོ། །
NUM 2:16 རུ་བེན་གྱི་སྒར་ནས་དམག་ཚོགས་བཞིན་རྩིས་བླངས་པའི་མི་གྲངས་ནི་བསྡོམས་པས་ཆིག་འབུམ་ལྔ་ཁྲི་ཆིག་སྟོང་བཞི་བརྒྱ་ལྔ་བཅུ་ཡིན་ལ། དེ་དག་གྲལ་གཉིས་པ་བྱས་ནས་ལམ་དུ་ཆས་དགོས་སོ། །
NUM 2:17 དེ་ནས་མཇལ་འཕྲད་གུར་མཆོག་དང་ལེ་ཝི་པ་རྣམས་ཀྱི་སྒར་དེ་སྒར་རྣམས་ཀྱི་དཀྱིལ་ནས་མདུན་དུ་བསྐྱོད་དགོས། དེ་དག་གིས་ཇི་ལྟར་སྒར་བཏབ་ན་དེ་ལྟར་ལམ་ལ་ཆས་ཏེ་མདུན་དུ་བསྐྱོད་པ་དང་། སོ་སོའི་རང་གནས་སུ་རང་རང་གི་དར་ཆེན་འོག་ཏུ་ཡོད་དགོས་སོ། །
NUM 2:18 ནུབ་ཕྱོགས་སུ་དམག་ཚོགས་བཞིན་དུ་ཨེ་ཕཱར་ཡིམ་གྱི་སྒར་ཁའི་དར་ཆེན་ཡོད་པ་དང་། ཨེ་ཕཱར་ཡིམ་པ་རྣམས་ཀྱི་འགོ་དཔོན་ཨམ་མེ་ཧུད་ཀྱི་བུ་ཨེ་ལི་ཤ་མཱ་ཡིན་ཞིང་།
NUM 2:19 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་ལྔ་བརྒྱའོ། །
NUM 2:20 དེའི་གཞོགས་སུ་མཱ་ན་ཤེ་ཚོ་པ་ཡོད་པ་དང་། མཱ་ན་ཤེ་པ་རྣམས་ཀྱི་འགོ་དཔོན་ནི་ཕེ་དཱ་ཚུར་གྱི་བུ་གམ་ལི་ཨེལ་ཡིན་ཞིང་།
NUM 2:21 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་སུམ་ཁྲི་ཉིས་སྟོང་ཉིས་བརྒྱའོ། །
NUM 2:22 དེ་ནས་པེན་ཡཱ་མེན་ཚོ་པ་ཡོད་པ་དང་། པེན་ཡཱ་མེན་པ་རྣམས་ཀྱི་འགོ་དཔོན་ནི་གིད་ཨོ་ནཱའི་བུ་ཨ་བི་ཏན་ཡིན་ཞིང་།
NUM 2:23 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་སུམ་ཁྲི་ལྔ་སྟོང་བཞི་བརྒྱའོ། །
NUM 2:24 ཨེ་ཕཱར་ཡིམ་གྱི་སྒར་ནས་དམག་ཚོགས་བཞིན་རྩིས་བླངས་པའི་མི་གྲངས་ནི་བསྡོམས་པས་ཆིག་འབུམ་བརྒྱད་སྟོང་དང་བརྒྱ་ཡིན་ལ། དེ་དག་གྲལ་གསུམ་པ་བྱས་ནས་ལམ་དུ་ཆས་དགོས་སོ། །
NUM 2:25 བྱང་ཕྱོགས་སུ་དམག་ཚོགས་བཞིན་དུ་དཱན་གྱི་སྒར་ཁའི་དར་ཆེན་ཡོད་པ་དང་། དཱན་པ་རྣམས་ཀྱི་འགོ་དཔོན་ནི་ཨམ་མེ་ཤད་ད་ཨི་ཡི་བུ་ཨ་ཧི་ཨེ་ཟེར་ཡིན་ཞིང་།
NUM 2:26 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་དྲུག་ཁྲི་ཉིས་སྟོང་བདུན་བརྒྱའོ། །
NUM 2:27 དེའི་གཞོགས་སུ་སྒར་འདེབས་མཁན་ནི་ཨ་ཤེར་ཚོ་པ་ཡིན་པ་དང་། ཨ་ཤེར་པ་རྣམས་ཀྱི་འགོ་དཔོན་ནི་ཨོག་རན་གྱི་བུ་ཕཱ་གེ་ཨེལ་ཡིན་ཞིང་།
NUM 2:28 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་བཞི་ཁྲི་ཆིག་སྟོང་ལྔ་བརྒྱའོ། །
NUM 2:29 དེ་ནས་ནཱབ་ཐ་ལིའི་ཚོ་པ་ཡོད་པ་དང་། ནཱབ་ཐ་ལི་པ་རྣམས་ཀྱི་འགོ་དཔོན་ནི་ཨེ་ནན་གྱི་བུ་ཨ་ཧི་རཱ་ཡིན་ཞིང་།
NUM 2:30 དེའི་དམག་ཚོགས་ལས་རྩིས་བླངས་པའི་མི་གྲངས་ནི་བསྡོམས་པས་ལྔ་ཁྲི་སུམ་སྟོང་བཞི་བརྒྱའོ། །
NUM 2:31 དཱན་གྱི་སྒར་ནས་རྩིས་བླངས་པའི་མི་གྲངས་ནི་བསྡོམས་པས་ཆིག་འབུམ་ལྔ་ཁྲི་བདུན་སྟོང་དྲུག་བརྒྱ་ཡིན། དེ་དག་གིས་དར་ཆེན་བསྒྲེངས་ནས་མཇུག་ཏུ་ལམ་ལ་ཆས་དགོས་ཞེས་གསུངས་སོ། །
NUM 2:32 དེ་དག་ནི་ཡེས་ར་ཨེལ་པ་རྣམས་རང་རང་གི་ཕ་ཁྱིམ་བཞིན་དུ་རྩིས་བླངས་པའི་མི་གྲངས་ཡིན་པ་དང་། སོ་སོའི་དམག་ཚོགས་བཞིན་སྒར་རྣམས་ལས་རྩིས་བླངས་པའི་མི་གྲངས་ནི་བསྡོམས་པས་དྲུག་འབུམ་སུམ་སྟོང་ལྔ་བརྒྱ་ལྔ་བཅུ་ཡིན་ནོ། །
NUM 2:33 འོན་ཀྱང་དཀོན་མཆོག་ཡ་ཝཱེས་མོ་ཤེ་ལ་བཀའ་བསྩལ་པ་བཞིན་དུ། ལེ་ཝི་པ་རྣམས་ནི་ཡེས་ར་ཨེལ་པ་རྣམས་ཀྱི་ཁྲོད་དུ་མ་བརྩིས་སོ། །
NUM 2:34 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་ལ་བསྒོས་པའི་བཀའ་བཞིན་དུ་བྱས་ཤིང་། དེ་དག་གིས་རང་རང་གི་དར་ཆེན་འོག་ཏུ་སྒར་བཏབ་པ་དང་། མི་རེ་རེ་རང་རང་གི་རུས་རྒྱུད་དང་ཕ་ཁྱིམ་བཞིན་དུ་ལམ་ལ་ཆས་པའོ། །
NUM 3:1 དེ་ཡང་དཀོན་མཆོག་ཡ་ཝཱེས་རི་བོ་སི་ནཱ་རུ་མོ་ཤེ་ལ་གསུང་གླེང་མཛད་པའི་དུས་སུ། ཨ་རོན་དང་མོ་ཤེ་གཉིས་ཀྱི་བུ་རབས་ཚ་རྒྱུད་ནི་འདི་ལྟ་སྟེ།
NUM 3:2 ཨ་རོན་གྱི་བུ་རྣམས་ཀྱི་མིང་ནི་འདི་ལྟར། བུ་སྐྱེས་འགོ་ནཱ་དབ་དང་། ཨ་བི་ཧུ། ཨེ་ལི་ཨ་ཟར། ཨི་ཐ་མཱར་བཅས་སོ། །
NUM 3:3 དེ་ནི་ཨ་རོན་གྱི་བུ་རྣམས་ཀྱི་མིང་སྟེ། དེ་དག་ནི་སྣུམ་གྱིས་བྱུགས་པའི་མཆོད་དཔོན་རྣམས་ཡིན་ལ། མོ་ཤེ་ཡིས་དེ་རྣམས་ཞབས་ཏོག་སྒྲུབ་པའི་མཆོད་དཔོན་དུ་བསྐོས་པ་ཡིན།
NUM 3:4 ནཱ་དབ་དང་ཨ་བི་ཧུ་གཉིས་ཀྱིས་སི་ནཱ་དབེན་སྟོང་དུ་དཀོན་མཆོག་ཡ་ཝཱེའི་སྤྱན་སྔར་བཀའ་འཁྲོལ་མེད་པའི་མེ་ཕུལ་བས་དེ་གཉིས་དཀོན་མཆོག་ཡ་ཝཱེའི་སྤྱན་སྔར་ཤི་བ་དང་བུ་ཡང་མེད་པའོ། །ཨེ་ལི་ཨ་ཟར་དང་ཨི་ཐ་མཱར་གཉིས་ཀྱིས་ཡབ་ཨ་རོན་གྱི་མདུན་དུ་མཆོད་དཔོན་གྱི་འགན་བླངས་སོ། །
NUM 3:5 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 3:6 ཁྱོད་ཀྱིས་ལེ་ཝི་ཚོ་པ་ཚུར་ཁྲིད་ནས། དེ་དག་མཆོད་དཔོན་ཨ་རོན་གྱི་མདུན་དུ་ལངས་ནས་དེ་ལ་ཞབས་ཕྱི་བསྒྲུབ་ཏུ་འཇུག་དགོས།
NUM 3:7 དེ་དག་གིས་ཨ་རོན་དང་ཚོགས་ཡོངས་ཀྱི་ཚབ་ཏུ་མཇལ་འཕྲད་གུར་མཆོག་གི་མདུན་དུ་ལས་འགན་བསྲུང་ཞིང་། གུར་མཆོག་གི་ཕྱིར་ཞབས་ཏོག་བསྒྲུབ་དགོས་ལ།
NUM 3:8 མཇལ་འཕྲད་གུར་མཆོག་གི་ཡོ་བྱད་ཐམས་ཅད་ལ་བདག་གཉེར་བྱེད་པ་དང་། ཡེས་ར་ཨེལ་པ་རྣམས་ཀྱི་ཚབ་ཏུ་ལས་འགན་བསྲུང་ཞིང་། གུར་མཆོག་གི་ཕྱིར་ཞབས་ཏོག་བསྒྲུབ་དགོས་སོ། །
NUM 3:9 ཁྱོད་ཀྱིས་ལེ་ཝི་པ་རྣམས་ཨ་རོན་དང་དེའི་བུ་རྣམས་ལ་སྤྲོད་དགོས། དེ་དག་ནི་ཡེས་ར་ཨེལ་པ་རྣམས་ལས་བདམས་ཏེ་ཡོངས་སུ་ཁོ་ལ་སྤྲོད་དགོས་པ་ཡིན་ནོ། །
NUM 3:10 ཨ་རོན་དང་དེའི་བུ་རྣམས་ལ་མཆོད་དཔོན་གྱི་འགན་བསྲུང་བར་བཅོལ་དགོས། གལ་ཏེ་ཕྱི་མི་སུ་ཞིག་ཉེ་བར་འོངས་ན་དེ་གསོད་དགོས་ཞེས་བཀའ་བསྩལ་ཏོ། །
NUM 3:11 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 3:12 ལྟོས་དང་། བདག་གིས་ཡེས་ར་ཨེལ་པ་རྣམས་ལས་མངལ་དང་པོ་སྟེ་བུ་སྐྱེས་འགོ་རྣམས་ཀྱི་ཚབ་བྱེད་དུ་ལེ་ཝི་པ་རྣམས་བདམས་པ་ཡིན་པས། ལེ་ཝི་པ་རྣམས་བདག་ལ་དབང་བའོ། །
NUM 3:13 ཅིའི་ཕྱིར་ཞེ་ན། སྐྱེས་འགོ་ཐམས་ཅད་ངའི་ཡིན་ཏེ། བདག་གིས་ཨེ་ཅིབ་ཡུལ་ནས་སྐྱེས་འགོ་ཐམས་ཅད་བསད་པའི་ཉིན་དེར། ཡེས་ར་ཨེལ་གྱི་སྐྱེས་འགོ་རྣམས་ནི་མི་ཕྱུགས་གང་ཡིན་ཡང་ངའི་ཕྱིར་དུ་དམ་པར་བྱས་ཡོད། དེ་རྣམས་བདག་ལ་དབང་དགོས། བདག་ནི་ཡ་ཝཱེ་ཡིན་ཞེས་བཀའ་བསྩལ་ཏོ། །
NUM 3:14 དེ་ནས་ཡང་དཀོན་མཆོག་ཡ་ཝཱེས་སི་ནཱ་དབེན་སྟོང་དུ་མོ་ཤེ་ལ་འདི་སྐད་དུ།
NUM 3:15 ཁྱོད་ཀྱིས་ལེ་ཝི་པ་རྣམས་སོ་སོའི་ཕ་ཁྱིམ་དང་རུས་རྒྱུད་བཞིན་དུ་རྩིས་ལེན་དགོས་ཤིང་། ཟླ་བ་གཅིག་ཅན་དང་དེའི་ཡན་གྱི་ཕོ་ཐམས་ཅད་རྩིས་ལེན་དགོས་ཞེས་བཀའ་གནང་ངོ་། །
NUM 3:16 དེ་ནས་མོ་ཤེ་ཡིས་དཀོན་མཆོག་ཡ་ཝཱེས་གནང་བའི་བཀའ་བཞིན་དུ། ལེ་ཝི་པ་རྣམས་རྩིས་བླངས་པ་དང་།
NUM 3:17 ལེ་ཝིའི་བུ་རྣམས་ཀྱི་མིང་ནི། གེར་ཤོན་དང་། ཀོ་ཧད། མཱ་རཱ་རེའེ་བཅས་སོ། །
NUM 3:18 གེར་ཤོན་གྱི་བུ་རྣམས་ཀྱི་མིང་ནི་རང་རང་གི་རུས་རྒྱུད་བཞིན་དུ། ལིབ་ནིས་དང་ཤིམ་ཨི་ཡིན་ནོ། །
NUM 3:19 ཀོ་ཧད་ཀྱི་བུ་རྣམས་ནི་རང་རང་གི་རུས་རྒྱུད་བཞིན་དུ། ཨམ་རམ་དང་། ཡེས་ཧར། ཧེབ་རོན། ཨུ་ཟི་ཨེལ་བཅས་སོ། །
NUM 3:20 མཱ་རཱ་རེའེ་ཡི་བུ་རྣམས་ནི་རང་རང་གི་རུས་རྒྱུད་བཞིན་དུ། མཱ་ལི་དང་མུ་ཤི་ཡིན། འདི་དག་ནི་ཕ་ཁྱིམ་བཞིན་དུ་ཐམས་ཅད་ལེ་ཝི་པའི་རུས་རྒྱུད་ཡིན་ནོ། །
NUM 3:21 གེར་ཤོན་ལ་གཏོགས་པ་ནི་ལིབ་ནིས་པ་རྣམས་ཀྱི་ཁྱིམ་རྒྱུད་དང་ཤིམ་ཨི་པ་རྣམས་ཀྱི་ཁྱིམ་རྒྱུད་ཡིན་ལ། དེ་དག་ནི་གེར་ཤོན་པའི་ཁྱིམ་རྒྱུད་ཡིན།
NUM 3:22 ཟླ་བ་གཅིག་ཅན་དང་དེའི་ཡན་གྱི་ཕོ་ཐམས་ཅད་རྩིས་བླངས་པའི་གྲངས་ཀ་ནི་བསྡོམས་པས་བདུན་སྟོང་ལྔ་བརྒྱའོ། །
NUM 3:23 གེར་ཤོན་པའི་ཁྱིམ་རྒྱུད་ཀྱིས་གུར་མཆོག་གི་རྒྱབ་སྟེ་ནུབ་ཕྱོགས་སུ་སྒར་འདེབས་དགོས།
NUM 3:24 གེར་ཤོན་པའི་ཁྱིམ་རྒྱུད་ཀྱི་འགོ་དཔོན་ནི་ལཱ་ཨེལ་གྱི་བུ་ཨེལ་ཡཱ་སབ་ཡིན་ནོ། །
NUM 3:25 གེར་ཤོན་གྱི་བུ་རྒྱུད་རྣམས་ཀྱི་མཇལ་འཕྲད་གུར་མཆོག་ནང་གི་ལས་འགན་ནི་འདི་ལྟ་སྟེ། གུར་མཆོག་དང་དེའི་ཁེབས་རས་དང་། དེའི་ཐོག་ཁེབས་དང་། མཇལ་འཕྲད་གུར་མཆོག་གི་སྒོ་ཡོལ་དང་།
NUM 3:26 ཁྱམས་རའི་ཁྱམས་ཡོལ་རྣམས་དང་། གུར་མཆོག་དང་མཆོད་ཁྲི་བསྐོར་ནས་ཡོད་པའི་ཁྱམས་རའི་སྒོ་ཡོལ་དང་། ཁྱམས་རའི་ནང་དུ་བཀོལ་བའི་ཆོན་ཐག་བཅས་པ་དང་འབྲེལ་བའི་ལས་ཀ་ཐམས་ཅད་བསྒྲུབ་དགོས་པ་ཡིན་ནོ། །
NUM 3:27 ཀོ་ཧད་ལ་གཏོགས་པ་ནི་ཨམ་རཱམ་གྱི་ཁྱིམ་རྒྱུད་དང་། ཡེས་ཧར་གྱི་ཁྱིམ་རྒྱུད། ཧེབ་རོན་གྱི་ཁྱིམ་རྒྱུད། ཨུ་ཟི་ཨེལ་གྱི་ཁྱིམ་རྒྱུད་བཅས་ཡོད་ལ། དེ་དག་ནི་ཀོ་ཧད་པའི་ཁྱིམ་རྒྱུད་ཡིན།
NUM 3:28 ཟླ་བ་གཅིག་ཅན་དང་དེའི་ཡན་གྱི་ཕོ་ཐམས་ཅད་ཀྱི་གྲངས་ཀ་བཞིན་བསྡོམས་པས་བརྒྱད་སྟོང་དྲུག་བརྒྱ་ཡོད་པ་དང་། དེ་དག་གིས་གནས་མཆོག་སྲུང་བའི་ལས་འགན་བསྒྲུབ་དགོས།
NUM 3:29 ཀོ་ཧད་ཀྱི་བུ་རྒྱུད་རྣམས་ཀྱི་ཁྱིམ་རྒྱུད་ཀྱིས་གུར་མཆོག་གི་ལྷོ་ཕྱོགས་སུ་སྒར་འདེབས་དགོས།
NUM 3:30 ཀོ་ཧད་ཁྱིམ་རྒྱུད་ཀྱི་འགོ་དཔོན་ནི་ཨུ་ཟི་ཨེལ་གྱི་བུ་ཨེ་ལི་ཙ་ཕན་ཡིན།
NUM 3:31 དེ་དག་གི་ལས་འགན་ནི། ཤུར་སྒམ་དང་། སྒྲོག་ཙེ། སྒྲོན་སྟེགས། མཆོད་ཁྲི་གཉིས། གནས་མཆོག་ནང་དུ་བཀོལ་བའི་ཡོ་བྱད། ཡོལ་བ། གུར་མཆོག་ནང་དུ་བཀོལ་བ་ཐམས་ཅད་ལ་བདག་གཉེར་བྱེད་དགོས་པ་ཡིན་ནོ། །
NUM 3:32 མཆོད་དཔོན་ཨ་རོན་གྱི་བུ་ཨེ་ལི་ཨ་ཟར་ནི་ལེ་ཝི་པའི་འགོ་དཔོན་རྣམས་ཀྱི་འགོ་དཔོན་ཡིན་པ་དང་། གནས་མཆོག་སྲུང་བའི་ལས་འགན་སྒྲུབ་མཁན་རྣམས་ལ་ལྟ་ཞིབ་བྱེད་དགོས་པའོ། །
NUM 3:33 མཱ་རཱ་རེའེ་ལ་གཏོགས་པ་ནི་མཱ་ལི་ཡི་ཁྱིམ་རྒྱུད་དང་། མུ་ཤི་ཡི་ཁྱིམ་རྒྱུད་བཅས་ཡོད་ལ། དེ་དག་ནི་མཱ་རཱ་རེའེ་ཡི་ཁྱིམ་རྒྱུད་ཡིན།
NUM 3:34 ཟླ་བ་གཅིག་ཅན་དང་དེའི་ཡན་གྱི་ཕོ་ཐམས་ཅད་རྩིས་བླངས་པའི་གྲངས་ཀ་ནི་བསྡོམས་པས་དྲུག་སྟོང་ཉིས་བརྒྱའོ། །
NUM 3:35 མཱ་རཱ་རེའེ་ཡི་ཁྱིམ་རྒྱུད་གཉིས་ཀྱི་འགོ་དཔོན་ནི་ཨ་བི་ཧ་ཡིལ་གྱི་བུ་ཙུ་རེ་ཨེལ་ཡིན་ལ། དེ་དག་གིས་གུར་མཆོག་གི་བྱང་ཕྱོགས་སུ་སྒར་འདེབས་དགོས།
NUM 3:36 མཱ་རཱ་རེའེ་ཡི་བུ་རྒྱུད་རྣམས་ཀྱི་ལས་འགན་ནི་གུར་མཆོག་གི་པང་ལེབ་དང་། འཕྲེད་རྒྱུག ཀ་བ། ཞབས་ར། དེའི་ཡོ་བྱད་ཐམས་ཅད་བསྲུང་བ་དང་། དེ་དང་འབྲེལ་བའི་ལས་ཀ་ཐམས་ཅད་བསྒྲུབ་པ་དང་།
NUM 3:37 ཁྱམས་རའི་མཐའ་འཁོར་གྱི་ཀ་བ་དང་ཞབས་ར། ཕུར་བ། ཆོན་ཐག་བཅས་བསྲུང་རྒྱུ་དེའོ། །
NUM 3:38 གུར་མཆོག་མདུན་གྱི་ཤར་ཕྱོགས་ཏེ། མཇལ་འཕྲད་གུར་མཆོག་གི་མདུན་དུ་ཤར་ཕྱོགས་སུ་སྒར་འདེབས་མཁན་རྣམས་ནི། མོ་ཤེ་དང་། ཨ་རོན་དང་། ཨ་རོན་གྱི་བུ་རྣམས་ཡིན། དེ་དག་གིས་ཡེས་ར་ཨེལ་པ་རྣམས་ཀྱི་ཚབ་བྱས་ནས་གནས་མཆོག་སྲུང་བའི་འགན་འཁུར་དགོས་པ་དང་། ཕྱི་མི་སུ་ཞིག་ཉེ་བར་འོངས་ན་དེ་གསོད་དགོས་པ་ཡིན་ནོ། །
NUM 3:39 མོ་ཤེ་དང་ཨ་རོན་གཉིས་ཀྱིས་དཀོན་མཆོག་ཡ་ཝཱེའི་བཀའ་བཞིན་དུ། ལེ་ཝི་པ་ཐམས་ཅད་རྩིས་བླངས་པ་དང་། རང་རང་གི་ཁྱིམ་རྒྱུད་བཞིན་དུ་ཟླ་བ་གཅིག་ཅན་དང་དེའི་ཡན་གྱི་ཕོ་རྣམས་རྩིས་བླངས་པའི་གྲངས་ཀ་ནི་བསྡོམས་པས་ཉིས་ཁྲི་ཉིས་སྟོང་ངོ་། །
NUM 3:40 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཡེས་ར་ཨེལ་པ་རྣམས་ལས་སྐྱེས་འགོ་ཐམས་ཅད་དེ། ཟླ་བ་གཅིག་ཅན་དང་དེའི་ཡན་གྱི་ཕོ་རྣམས་རྩིས་བླངས་ནས་མིང་ཐོ་འབྲི་དགོས།
NUM 3:41 བདག་ནི་ཡ་ཝཱེ་ཡིན་ལ། ཁྱོད་ཀྱིས་ལེ་ཝི་པ་རྣམས་ནི་ཡེས་ར་ཨེལ་པ་རྣམས་ཀྱི་སྐྱེས་འགོ་དག་གི་ཚབ་བྱེད་དུ་བདག་ལ་དབང་བར་གྱིས། ལེ་ཝི་པ་རྣམས་ཀྱི་ཕྱུགས་ཟོག་ཀྱང་ཡེས་ར་ཨེལ་པ་རྣམས་ཀྱི་ཕྱུགས་ཟོག་གི་སྐྱེས་འགོ་ཐམས་ཅད་ཀྱི་ཚབ་བྱེད་དུ་བདག་ལ་དབང་བར་གྱིས་ཞེས་གསུངས་སོ། །
NUM 3:42 དེར་བརྟེན་མོ་ཤེ་ཡིས་དཀོན་མཆོག་ཡ་ཝཱེས་ཁོ་ལ་བསྩལ་པའི་བཀའ་བཞིན་དུ། ཡེས་ར་ཨེལ་པ་རྣམས་ལས་སྐྱེས་འགོ་ཐམས་ཅད་རྩིས་བླངས་པ་དང་།
NUM 3:43 མིང་གི་གྲངས་ཀ་བཞིན་དུ་ཟླ་བ་གཅིག་ཅན་དང་དེའི་ཡན་གྱི་ཕོ་སྐྱེས་འགོ་ཐམས་ཅད་རྩིས་བླངས་པ་དང་། བསྡོམས་པས་ཉིས་ཁྲི་ཉིས་སྟོང་ཉིས་བརྒྱ་བདུན་ཅུ་དོན་གསུམ་ཡོད་པའོ། །
NUM 3:44 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 3:45 ཁྱོད་ཀྱིས་ཡེས་ར་ཨེལ་པ་རྣམས་ཀྱི་སྐྱེས་འགོ་ཐམས་ཅད་ཀྱི་ཚབ་ཏུ་ལེ་ཝི་པ་རྣམས་འདེམས་དགོས་པ་དང་། ཡང་ཡེས་ར་ཨེལ་པ་རྣམས་ཀྱི་ཕྱུགས་ཟོག་གི་ཚབ་ཏུ་ལེ་ཝི་པ་རྣམས་ཀྱི་ཕྱུགས་ཟོག་འདེམས་དགོས། ལེ་ཝི་པ་རྣམས་བདག་ལ་དབང་སྟེ། བདག་ནི་ཡ་ཝཱེ་ཡིན་ནོ། །
NUM 3:46 ལེ་ཝི་པའི་བསྡོམས་གྲངས་ལས་བརྒལ་བའི་མི་ཉིས་བརྒྱ་བདུན་ཅུ་དོན་གསུམ་ཏེ། ཡེས་ར་ཨེལ་པ་རྣམས་ཀྱི་བུ་སྐྱེས་འགོ་བླུ་དགོས་པ་རྣམས་ནི།
NUM 3:47 ཁྱོད་ཀྱིས་མི་རེ་ལས་དངུལ་སྲང་ལྔ་རེ་ལོངས་ཤིག གནས་མཆོག་གི་སྲང་བཞིན་དུ་དངུལ་སྲང་རེ་ལ་གཱེ་ར་ཉི་ཤུ་བརྩི་དགོས།
NUM 3:48 ཁྱོད་ཀྱིས་ཚད་ལས་བརྒལ་བའི་མི་གྲངས་ཀྱི་བླུ་རིན་དེ་ཨ་རོན་དང་དེའི་བུ་རྣམས་ལ་སྤྲོད་དགོས་ཞེས་བཀའ་བསྩལ་ཏོ། །
NUM 3:49 དེ་ནས་མོ་ཤེ་ཡིས་ལེ་ཝི་པ་རྣམས་ཀྱིས་བླུས་ནས་ལྷག་པ་རྣམས་ལས་བླུ་རིན་བླངས་པ་དང་།
NUM 3:50 ཡེས་ར་ཨེལ་པ་རྣམས་ཀྱི་སྐྱེས་འགོ་རྣམས་ལས་བསྡུས་པའི་དངུལ་ནི་གནས་མཆོག་གི་སྲང་བཞིན་དུ། བསྡོམས་པས་དངུལ་སྲང་ཆིག་སྟོང་སུམ་བརྒྱ་དྲུག་ཅུ་རེ་ལྔ་ཡོད་པའོ། །
NUM 3:51 མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ། བླུ་རིན་རྣམས་ཨ་རོན་དང་དེའི་བུ་རྣམས་ལ་སྤྲད་ཅིང་། དེ་ནི་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་དུའོ། །
NUM 4:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 4:2 ཁྱོད་ཀྱིས་ལེ་ཝི་པ་རྣམས་ལས་ཀོ་ཧད་ཀྱི་བུ་རྒྱུད་རྣམས་ཀྱི་བསྡོམས་གྲངས་ནི། དེ་དག་གི་ཁྱིམ་རྒྱུད་དང་ཕ་ཁྱིམ་བཞིན་དུ།
NUM 4:3 ལོ་སུམ་ཅུ་ནས་ལོ་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་ཞབས་ཕྱི་སྒྲུབ་མཁན་ཐམས་ཅད་ཐོ་བརྒྱག་དགོས།
NUM 4:4 རྫས་དམ་མཆོག་རྣམས་ལ་བདག་གཉེར་བྱ་རྒྱུ་ནི་ཀོ་ཧད་ཀྱི་བུ་རྒྱུད་རྣམས་ཀྱི་མཇལ་འཕྲད་གུར་མཆོག་ནང་གི་ལས་ཀ་ཡིན་ལ།
NUM 4:5 སྒར་ཆས་པའི་ཚེ་ན། ཨ་རོན་དང་དེའི་བུ་རྣམས་ནང་དུ་སོང་ནས་གནས་དམ་མཆོག་གཡོག་བྱེད་ཀྱི་ཡོལ་བ་མར་བླངས་ཏེ། ཡོལ་བ་དེས་དཔང་མཛད་ཤུར་སྒམ་གཡོག་དགོས།
NUM 4:6 ཡང་ཀོ་བ་སྤུས་ལེགས་ཀྱི་པགས་ཁེབས་ཀྱིས་དེ་གཡོག་པ་དང་། དེའི་སྟེང་དུ་རས་སྔོ་རྐྱང་བཏིངས་རྗེས་རྒྱུག་ཤིང་རྣམས་བརྒྱུ་དགོས།
NUM 4:7 སྤྱན་བསྟར་བག་ལེབ་ཀྱི་སྒྲོག་ཙེའི་སྟེང་དུ་དེ་དག་གིས་རས་སྔོན་པོ་འདིང་དགོས་པ་དང་། དེའི་སྟེང་དུ་གཞོང་པ་དང་སྡེར་མ། སྐྱེམས་མཆོད་འབུལ་བྱེད་ཨུ་ལུ་དང་བུམ་པ་བཅས་བཤམ་དགོས་ལ། ཆད་མེད་བག་ལེབ་ཀྱང་དེའི་སྟེང་དུ་ངེས་པར་ཡོད་དགོས་སོ། །
NUM 4:8 དངོས་པོ་དེ་དག་གི་སྟེང་དུ། རས་མཚལ་མདོག་བཏིངས་ནས་ཀོ་བ་སྤུས་ལེགས་ཀྱི་པགས་ཁེབས་ཀྱིས་གཡོགས་རྗེས་རྒྱུག་ཤིང་རྣམས་བརྒྱུ་དགོས་སོ། །
NUM 4:9 དེ་ནས་རས་སྔོན་པོ་བླངས་ཏེ་འོད་ཀྱི་ཕྱིར་ཡིན་པའི་སྒྲོན་སྟེགས་དང་དེའི་སྟེང་གི་སྒྲོན་མེ་དང་། སྡོང་རས་གཅོད་བྱེད་སྐམ་ཆུང་དང་མེ་ཕོར། སྣུམ་ལྡུག་སྤྱད་ཡོ་བྱད་ཐམས་ཅད་རས་ཀྱིས་གཡོག་པ་དང་།
NUM 4:10 ཡང་སྒྲོན་སྟེགས་དང་དེའི་ཡོ་བྱད་ཐམས་ཅད་ཀོ་བ་སྤུས་ལེགས་ཀྱི་པགས་པས་བཏུམས་ནས་གདང་གི་སྟེང་དུ་འཇོག་དགོས།
NUM 4:11 གསེར་གྱི་མཆོད་ཁྲིའི་སྟེང་དུ་རས་སྔོན་པོ་བཏིངས་ནས་ཀོ་བ་སྤུས་ལེགས་ཀྱི་པགས་པས་གཡོགས་རྗེས། རྒྱུག་ཤིང་རྣམས་བརྒྱུ་དགོས་སོ། །
NUM 4:12 ཡང་གནས་མཆོག་ཏུ་ཞབས་ཕྱི་སྒྲུབ་སྤྱད་ཀྱི་ཡོ་བྱད་ཐམས་ཅད་རས་སྔོན་པོས་བཏུམས་ནས་ཀོ་བ་སྤུས་ལེགས་ཀྱི་པགས་ཁེབས་ཀྱིས་གཡོགས་རྗེས། གདང་གི་སྟེང་དུ་འཇོག་དགོས།
NUM 4:13 དེ་ནས་མཆོད་ཁྲིའི་སྟེང་གི་ཐལ་བ་ཁྱེར་ནས་དེའི་སྟེང་དུ་རས་རྒྱ་སྨུག་འདིང་བ་དང་།
NUM 4:14 ཡང་མཆོད་ཁྲིའི་སྟེང་ཞབས་ཕྱི་སྒྲུབ་སྤྱད་ཀྱི་ཡོ་བྱད་ཐམས་ཅད་དེ། མེ་ཕོར་དང་ཤ་འཛིན་ཁ་དབྲག མེ་ཁྱེམ། མཆོད་སྡེར་བཅས་ནི་དེའི་སྟེང་དུ་བཤམ་དགོས་ཤིང་། དེའི་སྟེང་དུ་ཀོ་བ་སྤུས་ལེགས་ཀྱི་པགས་ཁེབས་ཀྱིས་གཡོགས་རྗེས། རྒྱུག་ཤིང་རྣམས་བརྒྱུ་དགོས་སོ། །
NUM 4:15 སྒར་ཡོངས་སུ་ཆས་པའི་ཚེ་ན། ཨ་རོན་དང་དེའི་བུ་རྣམས་ཀྱིས་གནས་མཆོག་དང་དེའི་ཡོ་བྱད་ཐམས་ཅད་གཡོགས་ཟིན་པའི་རྗེས་སུ། ཀོ་ཧད་ཀྱི་བུ་རྒྱུད་རྣམས་འོངས་ནས་འཁུར་དགོས། འོན་ཀྱང་། ཁོ་རྣམས་འཆི་བར་མི་འགྱུར་བའི་ཕྱིར་དུ་རྫས་དམ་པ་དེ་རྣམས་ལ་རེག་མི་རུང་། མཇལ་འཕྲད་གུར་མཆོག་ནང་གི་རྫས་དེ་དག་ནི་ཀོ་ཧད་ཀྱི་བུ་རྒྱུད་རྣམས་ཀྱིས་འཁུར་དགོས་པ་ཡིན།
NUM 4:16 མཆོད་དཔོན་ཨ་རོན་གྱི་བུ་ཨེ་ལི་ཨ་ཟར་གྱི་ལས་འགན་ནི་འདི་ལྟ་སྟེ། སྒྲོན་མེའི་སྣུམ་དང་དྲི་ཞིམ་བདུག་སྤོས། དུས་རྒྱུན་གྱི་འབྲུ་རིགས་ཀྱི་མཆོད་པ་དང་། འབྱུག་སྣུམ་བཅས་དང་། གུར་མཆོག་ཧྲིལ་པོ་དང་དེའི་ནང་དུ་ཡོད་པ་ཐམས་ཅད་དང་། གནས་མཆོག་དང་དེའི་ཡོ་བྱད་རྣམས་ལ་བདག་གཉེར་བྱ་རྒྱུ་དེའོ་ཞེས་བཀའ་བསྩལ་ཏོ། །
NUM 4:17 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 4:18 ཁྱོད་ཅག་གིས་ཀོ་ཧད་པའི་ཁྱིམ་རྒྱུད་ཀྱི་ཚོ་པ་ཁག་ནི་ལེ་ཝི་པའི་ཁྲོད་ནས་མེད་པར་གཏོང་མི་རུང་།
NUM 4:19 དེ་རྣམས་རྫས་དམ་མཆོག་རྣམས་ཀྱི་དྲུང་དུ་ཉེ་བར་འོང་ཚེ། ཨ་རོན་དང་དེའི་བུ་རྣམས་ནང་དུ་སོང་ནས། དེ་དག་རེ་རེའི་བསྒྲུབ་དགོས་པ་དང་འཁུར་དགོས་པའི་ལས་དོན་གཏན་ཁེལ་བྱེད་དགོས། དེ་དག་འཆི་བར་མི་འགྱུར་ཞིང་གསོན་པོར་གནས་པའི་ཆེད་དུ། དེ་དག་ལ་འདི་ལྟར་བྱེད་དགོས།
NUM 4:20 འོན་ཀྱང་དེ་དག་ཡུད་ཙམ་ལའང་ནང་དུ་སོང་སྟེ་རྫས་དམ་པར་བལྟ་མི་རུང་། བལྟས་ན་ཁོ་རྣམས་འཆི་བར་འགྱུར་ཞེས་བཀའ་བསྩལ་ཏོ། །
NUM 4:21 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 4:22 ཁྱོད་ཀྱིས་གེར་ཤོན་གྱི་བུ་རྒྱུད་རྣམས་ཀྱི་བསྡོམས་གྲངས་ཀྱང་ཐོ་བརྒྱག་དགོས་ཏེ། དེ་དག་གི་ཕ་ཁྱིམ་དང་ཁྱིམ་རྒྱུད་བཞིན་དུ།
NUM 4:23 ལོ་སུམ་ཅུ་ནས་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་ཞབས་ཕྱི་སྒྲུབ་མཁན་ཐམས་ཅད་རྩིས་ལེན་དགོས་སོ། །
NUM 4:24 གེར་ཤོན་པའི་ཁྱིམ་རྒྱུད་རྣམས་ཀྱིས་བསྒྲུབ་བྱའི་དོན་དང་འཁུར་བྱའི་དངོས་པོ་ནི་འདི་ལྟ་སྟེ།
NUM 4:25 དེ་དག་གིས་གུར་མཆོག་གི་ཡོལ་བ་དག་དང་། མཇལ་འཕྲད་གུར་མཆོག་དང་དེའི་ཐོག་ཁེབས། ཡང་དེའི་སྟེང་ལ་གཡོགས་པའི་ཀོ་བ་སྤུས་ལེགས་ཀྱི་པགས་ཁེབས་དང་མཇལ་འཕྲད་གུར་མཆོག་གི་སྒོ་ཡོལ།
NUM 4:26 ཁྱམས་ཡོལ་རྣམས་དང་། གུར་མཆོག་དང་མཆོད་ཁྲི་བསྐོར་བའི་ཁྱམས་རའི་སྒོ་ཡོལ་དང་། ཆོན་ཐག་རྣམས་དང་ཞབས་ཕྱི་སྒྲུབ་སྤྱད་ཡོ་བྱད་ཐམས་ཅད་འཁུར་དགོས་པ་དང་། ཡོ་བྱད་དེ་དག་དང་འབྲེལ་བ་ཐམས་ཅད་ཁོ་རྣམས་ཀྱིས་བསྒྲུབ་དགོས་སོ། །
NUM 4:27 གེར་ཤོན་གྱི་བུ་རྒྱུད་རྣམས་ཀྱི་འགན་འཁུར་ཏེ། ཁོ་རྣམས་ཀྱིས་བསྒྲུབ་དགོས་པ་དང་འཁུར་དགོས་པའི་དོན་ཐམས་ཅད་ནི་ཨ་རོན་དང་དེའི་བུ་རྣམས་ཀྱིས་སྨྲས་པ་བཞིན་དུ་བྱེད་དགོས། དེ་དག་གིས་ཅི་འཁུར་དགོས་པའི་ལས་འགན་ཐམས་ཅད་ཁྱོད་ཀྱིས་སྤྲོད་དགོས་སོ། །
NUM 4:28 འདི་ནི་གེར་ཤོན་གྱི་བུ་རྒྱུད་རྣམས་ཀྱིས་མཇལ་འཕྲད་གུར་མཆོག་ནང་དུ་བསྒྲུབ་དགོས་པའི་ཞབས་ཕྱི་ཡིན་ཏེ། དེ་དག་གི་ལས་འགན་ནི་མཆོད་དཔོན་ཨ་རོན་གྱི་བུ་ཨི་ཐ་མཱར་གྱི་དབང་འོག་ཏུ་ཡོད་པའོ། །
NUM 4:29 མཱ་རཱ་རེའེ་ཡི་བུ་རྒྱུད་རྣམས་ཀྱང་ཁྱོད་ཀྱིས་དེ་དག་གི་རུས་རྒྱུད་དང་ཁྱིམ་རྒྱུད་བཞིན་དུ་རྩིས་ལེན་དགོས་ཤིང་།
NUM 4:30 ལོ་སུམ་ཅུ་ནས་ལོ་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་ཞབས་ཕྱི་སྒྲུབ་མཁན་ཐམས་ཅད་རྩིས་ལེན་དགོས།
NUM 4:31 དེ་དག་གི་མཇལ་འཕྲད་གུར་མཆོག་ནང་གི་ཞབས་ཕྱི་ཐམས་ཅད་དང་ལས་འགན་ཆ་ཚང་སྟེ། གུར་མཆོག་གི་པང་ལེབ་དང་འཕྲེད་རྒྱུག་དང་། ཀ་བ་དང་། ཞབས་ར་དང་།
NUM 4:32 ཁྱམས་ར་མཐའ་འཁོར་གྱི་ཀ་བ་དང་། ཞབས་ར་དང་། ཕུར་བ་དང་། ཆོན་ཐག་དང་། དེ་ལ་གཏོགས་པའི་ལག་ཆ་དང་སྤྱོད་ཆས་ཐམས་ཅད་འཁུར་དགོས་པ་དང་། དེ་དག་གིས་འཁུར་དགོས་པའི་ཡོ་བྱད་རྣམས་ནི་མིང་གིས་བཟུང་ནས་རེ་རེ་བཞིན་གཏན་ཁེལ་བྱེད་དགོས་སོ། །
NUM 4:33 འདི་ནི་མཱ་རཱ་རེའེ་ཡི་བུ་རྒྱུད་རྣམས་ཀྱི་ཁྱིམ་རྒྱུད་ཀྱིས་མཇལ་འཕྲད་གུར་མཆོག་ནང་དུ་བསྒྲུབ་དགོས་པའི་ཞབས་ཕྱི་ཐམས་ཅད་ཡིན་ལ། མཆོད་དཔོན་ཨ་རོན་གྱི་བུ་ཨི་ཐ་མཱར་གྱི་དབང་འོག་ཏུ་ཡོད་པའོ་ཞེས་བཀའ་བསྩལ་ཏོ། །
NUM 4:34 མོ་ཤེ་དང་ཨ་རོན་དང་ཚོགས་པའི་འགོ་དཔོན་རྣམས་ཀྱིས་ཀོ་ཧད་ཀྱི་བུ་རྒྱུད་རྣམས་ཀྱི་གྲངས་ཀ་ནི་དེ་དག་གི་རུས་རྒྱུད་དང་ཕ་ཁྱིམ་བཞིན་དུ།
NUM 4:35 ལོ་སུམ་ཅུ་ནས་ལོ་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་ཞབས་ཕྱི་སྒྲུབ་མཁན་ཐམས་ཅད་རྩིས་བླངས་སོ། །
NUM 4:36 དེ་དག་རུས་རྒྱུད་བཞིན་རྩིས་བླངས་པའི་བསྡོམས་གྲངས་ནི་ཉིས་སྟོང་བདུན་བརྒྱ་ལྔ་བཅུའོ། །
NUM 4:37 འདི་ནི་ཀོ་ཧད་པའི་ཁྱིམ་རྒྱུད་ལས་རྩིས་བླངས་པའི་མི་གྲངས་ཡིན་ལ། མཇལ་འཕྲད་གུར་མཆོག་ནང་དུ་ཞབས་ཕྱི་བྱེད་མཁན་ཐམས་ཅད་ཡིན་པ་དང་། མོ་ཤེ་དང་ཨ་རོན་གཉིས་ཀྱིས་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་རྩིས་བླངས་པ་ཡིན་ནོ། །
NUM 4:38 གེར་ཤོན་གྱི་བུ་རྒྱུད་རྣམས་ལས་དེ་དག་གི་རུས་རྒྱུད་དང་ཕ་ཁྱིམ་བཞིན་དུ་རྩིས་བླངས་པ་སྟེ།
NUM 4:39 ལོ་སུམ་ཅུ་ནས་ལོ་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་ཞབས་ཕྱི་སྒྲུབ་མཁན་ནི།
NUM 4:40 དེ་དག་གི་རུས་རྒྱུད་དང་ཕ་ཁྱིམ་བཞིན་དུ་རྩིས་བླངས་པའི་མི་གྲངས་ཉིས་སྟོང་དྲུག་བརྒྱ་སུམ་ཅུའོ། །
NUM 4:41 དེ་དག་ནི་གེར་ཤོན་གྱི་བུ་རྒྱུད་རྣམས་ཀྱི་ཁྱིམ་རྒྱུད་ལས་རྩིས་བླངས་པའི་མི་གྲངས་ཡིན་ལ། མཇལ་འཕྲད་གུར་མཆོག་ནང་དུ་ཞབས་ཕྱི་བྱེད་མཁན་ཐམས་ཅད་ཡིན་པ་དང་། མོ་ཤེ་དང་ཨ་རོན་གཉིས་ཀྱིས་དཀོན་མཆོག་ཡ་ཝཱེའི་བཀའ་བཞིན་དུ་རྩིས་བླངས་པ་ཡིན་ནོ། །
NUM 4:42 མཱ་རཱ་རེའེ་ཡི་བུ་རྒྱུད་རྣམས་ལས་དེ་དག་གི་རུས་རྒྱུད་དང་ཕ་ཁྱིམ་བཞིན་དུ།
NUM 4:43 ལོ་སུམ་ཅུ་ནས་ལོ་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་ཞབས་ཕྱི་སྒྲུབ་མཁན་ཐམས་ཅད་རྩིས་བླངས་པ་དང་།
NUM 4:44 རུས་རྒྱུད་བཞིན་དུ་རྩིས་བླངས་པ་བསྡོམས་པས་སུམ་སྟོང་ཉིས་བརྒྱའོ། །
NUM 4:45 དེ་དག་ནི་མཱ་རཱ་རེའེ་ཡི་བུ་རྒྱུད་རྣམས་ཀྱི་ཁྱིམ་རྒྱུད་ལས་རྩིས་བླངས་པའི་མི་གྲངས་ཡིན་ཏེ། དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ། མོ་ཤེ་དང་ཨ་རོན་གཉིས་ཀྱིས་རྩིས་བླངས་པ་ཡིན་ནོ། །
NUM 4:46 མོ་ཤེ་དང་ཨ་རོན་དང་། ཡེས་ར་ཨེལ་གྱི་འགོ་དཔོན་རྣམས་ཀྱིས་ལེ་ཝི་པ་རྣམས་དེ་དག་གི་རུས་རྒྱུད་དང་ཁྱིམ་རྒྱུད་བཞིན་དུ་རྩིས་བླངས་པ་ནི།
NUM 4:47 ལོ་སུམ་ཅུ་ནས་ལོ་ལྔ་བཅུ་བར་གྱི་ལས་འགན་ཁུར་ནས་མཇལ་འཕྲད་གུར་མཆོག་ནང་དུ་འཁྱེར་མཁན་རྣམས་ཏེ།
NUM 4:48 དེ་དག་གི་གྲངས་ཀ་ནི་བསྡོམས་པས་བརྒྱད་སྟོང་ལྔ་བརྒྱ་བརྒྱད་ཅུའོ། །
NUM 4:49 དཀོན་མཆོག་ཡ་ཝཱེས་མོ་ཤེ་བརྒྱུད་ནས་བསྩལ་པའི་བཀའ་བཞིན་དུ་དེ་དག་རྩིས་བླངས་པའོ། །མོ་ཤེ་ཡིས་མི་རེ་རེ་བཞིན་རང་རང་གི་བསྒྲུབ་བྱའི་དོན་དང་འཁུར་བྱའི་དངོས་པོ་ལྟར་རྩིས་བླངས་པ་དང་། དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་ཡིན་ནོ། །
NUM 5:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 5:2 ཁྱོད་ཀྱིས་ཡེས་ར་ཨེལ་པ་རྣམས་ལ། མི་མཛེ་ནད་ཅན་དང་། འཛིར་ནད་ཅན་དང་། བེམ་པོ་ལ་རེག་ནས་མི་གཙང་བར་གྱུར་པ་ཐམས་ཅད་སྒར་གྱི་ཕྱི་རོལ་ཏུ་འདོན་པར་བཀའ་སྒོས་ཤིག
NUM 5:3 སྐྱེས་པའམ་བུད་མེད་སུ་ཡིན་ཡང་ཕྱི་རུ་འདོན་པ་དང་། དེ་དག་གིས་རང་གི་སྒར་བཙོག་པར་མི་བྱེད་པའི་ཆེད་དུ། དེ་རྣམས་སྒར་གྱི་ཕྱི་རོལ་ཏུ་འདོན་དགོས་ལ། སྒར་དེ་ནི་བདག་གི་སྡོད་གནས་ཡིན་ཞེས་གསུངས་སོ། །
NUM 5:4 ཡེས་ར་ཨེལ་པ་རྣམས་ཀྱིས་དེ་ལྟར་བྱས་ཤིང་། དེ་དག་སྒར་གྱི་ཕྱི་རོལ་ཏུ་བཏོན་པ་དང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གསུངས་པ་བཞིན། ཡེས་ར་ཨེལ་པ་རྣམས་ཀྱིས་དེ་ལྟར་བྱས་སོ། །
NUM 5:5 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 5:6 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། སྐྱེས་པའམ་བུད་མེད་སུ་ཡིན་ཡང་མི་ཡིས་བྱེད་པའི་སྡིག་པ་སྤྱད་ནས་དཀོན་མཆོག་ཡ་ཝཱེ་ལ་འགལ་བ་ཡིན་ན། མི་དེ་ལ་ཉེས་པ་ཡོད་ཅིང་།
NUM 5:7 མི་དེས་རང་བྱས་ཀྱི་སྡིག་པ་མཐོལ་བཤགས་བགྱི་བ་དང་། མི་ལ་གྱོང་གུད་བཟོས་པ་ལ་སྐྱིན་ཚབ་འཇལ་བར་མ་ཟད། དེའི་ཁར་ལྔ་ཆ་གཅིག་བསྣན་ཏེ་གྱོང་རག་པའི་མི་ལ་སྤྲོད་དགོས།
NUM 5:8 གལ་སྲིད་མི་དེ་ལ་གྱོང་གུད་ཀྱི་སྐྱིན་ཚབ་འཇལ་སའི་གཉེན་ཉེ་མེད་ན། གྱོང་གུད་ཀྱི་སྐྱིན་ཚབ་ནི་དཀོན་མཆོག་ཡ་ཝཱེ་ལ་འཇལ་དགོས་ཤིང་། དེ་ནི་མཆོད་དཔོན་ལ་དབང་བ་དང་། དེའི་ཁར་ད་དུང་སྡིག་བཤགས་བྱེད་པའི་ལུག་ཐུག་ཀྱང་འབུལ་དགོས་སོ། །
NUM 5:9 ཡེས་ར་ཨེལ་པ་རྣམས་ཀྱི་རྫས་དམ་པ་ཐམས་ཅད་ལས་མཆོད་དཔོན་ལ་འདེགས་མཆོད་དུ་ཕུལ་བ་ནི་གང་ཡིན་ཡང་མཆོད་དཔོན་ལ་དབང་དགོས།
NUM 5:10 མི་རེ་རེས་ཕུལ་བའི་རྫས་དམ་པ་རྣམས་མཆོད་དཔོན་ལ་དབང་དགོས། མི་ཡིས་རྫས་གང་ཞིག་མཆོད་དཔོན་ལ་ཕུལ་ན། དེ་ནི་མཆོད་དཔོན་ལ་དབང་བ་ཡིན་ཞེས་བཤད་དགོས་པར་བཀའ་བསྩལ་ཏོ། །
NUM 5:11 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 5:12 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། སུ་དང་སུ་ཡིན་ཡང་གལ་ཏེ་ཁོའི་ཆུང་མས་ཁྱོ་ག་ལ་རྒྱབ་འགལ་བྱས་ནས་རང་གི་ཁྱོ་ག་ལ་བློ་མི་དཀར་བ་དང་།
NUM 5:13 སྐྱེས་པ་ཞིག་ཁོ་མོ་དང་ལུས་འབྲེལ་བྱས་ཏེ། རང་གི་ཁྱོ་ག་ལ་གསང་ནས་རྩད་མ་ཆོད་པ་དང་། ཁོ་མོས་རང་ཉིད་མི་གཙང་བར་བྱས་པ་ལ་བདེན་དཔང་བྱེད་མཁན་སུ་ཡང་མ་བྱུང་ཞིང་། ཉེས་པ་བྱེད་དུས་ཀྱང་གཞན་གྱིས་མ་ཟིན་ནའང་།
NUM 5:14 གལ་སྲིད་ཁོ་མོའི་ཁྱོ་གའི་སེམས་སུ་དོགས་པ་ལངས་ནས་རང་གི་ཆུང་མར་ཐེ་ཚོམ་ཟོས་པ་དང་། ཆུང་མ་དངོས་གནས་མི་གཙང་བར་བྱས་པའམ། ཡང་ན་ཁྱོ་ག་སེམས་སུ་དོགས་པ་ལངས་ནས་རང་གི་ཆུང་མར་ཐེ་ཚོམ་ཟོས་ནའང་ཆུང་མ་མི་གཙང་བར་བྱས་མེད་ན།
NUM 5:15 མི་དེས་རང་གི་ཆུང་མ་མཆོད་དཔོན་གྱི་མདུན་དུ་འཁྲིད་པ་དང་། ཡང་ཁོ་མོའི་ཆེད་དུ་ནས་ཕྱེ་ཨེ་ཕཱ་བཅུ་ཆ་གཅིག་མཆོད་པར་འབུལ་དགོས་ཤིང་། དེའི་སྟེང་དུ་སྣུམ་ལྡུག་མི་རུང་ལ་སྤོས་དཀར་ཡང་སྒྲོན་མི་རིགས་སོ། །ཅིའི་ཕྱིར་ཞེ་ན། དེ་ནི་ཐེ་ཚོམ་གྱི་འབྲུ་མཆོད་དང་། དྲན་པའི་འབྲུ་མཆོད་དེ་ནག་ཉེས་དྲན་པའི་འབྲུ་མཆོད་ཡིན་པས་སོ། །
NUM 5:16 དེ་ནས་མཆོད་དཔོན་གྱིས་བུད་མེད་དེ་འཁྲིས་སུ་ཁྲིད་ནས་དཀོན་མཆོག་ཡ་ཝཱེའི་སྤྱན་སྔར་བསླང་བར་བྱ་ཞིང་།
NUM 5:17 ཆུ་དམ་པ་རྫ་བུམ་ཞིག་ཏུ་ལྡུག་པ་དང་། ཡང་གུར་མཆོག་གི་ས་ནས་ས་རྡུལ་བླངས་ཏེ་ཆུ་ནང་དུ་འདེབས་དགོས།
NUM 5:18 མཆོད་དཔོན་གྱིས་བུད་མེད་དེ་དཀོན་མཆོག་ཡ་ཝཱེའི་སྤྱན་སྔར་བསླངས་ནས་ཁོ་མོའི་སྐྲ་ལྷོད་པ་དང་། དྲན་པའི་འབྲུ་མཆོད་དེ་ཐེ་ཚོམ་གྱི་འབྲུ་མཆོད་ཡིན་པ་དེ་ནི་ཁོ་མོའི་ལག་ཏུ་འཇོག་དགོས། མཆོད་དཔོན་གྱི་ལག་ཏུ་དམོད་མོ་འགུག་པའི་ཆུ་ཁ་མོ་འཛིན་དགོས།
NUM 5:19 མཆོད་དཔོན་གྱིས་བུད་མེད་དེ་ལ་མནའ་སྐྱེལ་དུ་འཇུག་ཅིང་། ཁོ་མོར་འདི་ལྟར། གལ་སྲིད་སྐྱེས་པ་སུ་ཡང་ཁྱོད་དང་ལུས་འབྲེལ་མ་བྱས་པ་དང་། རང་གི་ཁྱོ་ག་ལ་དབང་བའི་དུས་སུ་ཁྱོད་ཀྱིས་ཁྱོ་གར་རྒྱབ་འགལ་བྱས་ནས་རང་ཉིད་མི་གཙང་བར་བྱས་མེད་ན། དམོད་མོ་འགུག་པའི་ཆུ་ཁ་མོ་འདི་ལས་ཐར་བར་གྱུར་ཅིག
NUM 5:20 གལ་ཏེ་ཁྱོད་རང་ཁྱོ་ག་ལ་དབང་བའི་དུས་སུ་ཁྱོ་གར་རྒྱབ་འགལ་བྱས་ནས་རང་ཉིད་མི་གཙང་བར་བྱས་པ་དང་། ཁྱོད་ནི་རང་གི་ཁྱོ་ག་མིན་པའི་སྐྱེས་པ་གཞན་དང་ལུས་འབྲེལ་བྱས་པ་ཡིན་ན་ཞེས་སྨྲ་ཞིང་།
NUM 5:21 མཆོད་དཔོན་གྱིས་བུད་མེད་ལ་མནའ་སྐྱེལ་དུ་བཅུག་ནས་མུ་མཐུད་དུ་ཁོ་མོར་འདི་ལྟར། དཀོན་མཆོག་ཡ་ཝཱེས་ཁྱོད་ཀྱི་བརླ་ནི་རིད་ཅིང་གསུས་པ་སྐྲང་བར་མཛད་པ་དང་། དཀོན་མཆོག་ཡ་ཝཱེས་ཁྱོད་ནི་ཁྱོད་ཀྱི་ཡུལ་མིའི་དཀྱིལ་དུ་དམོད་མོ་དང་མནའ་རུ་འགྱུར་བར་མཛོད་ཅིག
NUM 5:22 དམོད་མོ་འགུག་པའི་ཆུ་འདི་ཁྱོད་ཀྱི་གྲོད་ཁོག་ཏུ་ཞུགས་ཏེ། ཁྱོད་ཀྱི་གསུས་པ་སྐྲང་ཞིང་བརླ་རིད་དུ་འཇུག་པར་མཛོད་ཅིག་ཅེས་སྨྲ་དགོས་ལ། དེ་ནས་བུད་མེད་དེས་ཨ་མེན་ ཨ་མེན་ཞེས་ཞུ་དགོས་སོ། །
NUM 5:23 དེ་ནས་མཆོད་དཔོན་གྱིས་དམོད་མོ་དེ་དག་ཤོག་དྲིལ་སྟེང་དུ་བྲིས་ནས་དེ་ཆུ་ཁ་མོའི་ནང་བཀྲུ་དགོས་ལ།
NUM 5:24 ཡང་བུད་མེད་དེ་ལ་དམོད་མོ་འགུག་པའི་ཆུ་ཁ་མོ་དེ་འཐུང་དུ་བཅུག་ནས། དམོད་མོ་འགུག་པའི་ཆུ་དེ་ཁོ་མོའི་གྲོད་ཁོག་ཏུ་ཞུགས་ཏེ་ན་ཟུག་སློང་བ་ཡིན།
NUM 5:25 མཆོད་དཔོན་གྱིས་བུད་མེད་དེའི་ལག་ནས་ཐེ་ཚོམ་གྱི་འབྲུ་མཆོད་བླངས་ནས། དཀོན་མཆོག་ཡ་ཝཱེའི་སྤྱན་སྔར་འབྲུ་རིགས་ཀྱི་མཆོད་པ་དེ་ཕར་གཡོ་ཚུར་གཡོ་བྱས་རྗེས་མཆོད་ཁྲིའི་སྟེང་དུ་འབུལ་དགོས།
NUM 5:26 མཆོད་དཔོན་གྱིས་འབྲུ་རིགས་ཀྱི་མཆོད་པ་ལས། དྲན་རྟེན་གྱི་མཆོད་པ་ཁྱོར་བ་གང་བླངས་ནས་མཆོད་ཁྲིའི་ཁར་བསྲེག་པ་དང་། དེའི་རྗེས་སུ་ད་གཟོད་བུད་མེད་ལ་ཆུ་དེ་འཐུང་དུ་འཇུག་དགོས་སོ། །
NUM 5:27 ཁོ་མོར་ཆུ་དེ་འཐུང་དུ་བཅུག་རྗེས། གལ་སྲིད་ཁོ་མོས་མི་གཙང་བ་སྤྱད་ཅིང་རང་གི་ཁྱོ་གར་བློ་མི་དཀར་ན། དམོད་མོ་འགུག་པའི་ཆུ་དེ་ཁོ་མོའི་གྲོད་ཁོག་ཏུ་ཞུགས་ནས་ན་ཟུག་སློང་བར་འགྱུར་བ་དང་། ཁོ་མོའི་གསུས་པ་སྐྲང་ཞིང་བརླ་ཡང་རིད་པར་འགྱུར་ལ། བུད་མེད་དེ་ནི་རང་གི་ཡུལ་མིའི་དཀྱིལ་དུ་དམོད་མོ་རུ་འགྱུར་རོ། །
NUM 5:28 གལ་སྲིད་བུད་མེད་དེ་གཞན་གྱིས་མི་གཙང་བར་བྱས་མེད་པ་དང་གཙང་མ་ཡིན་ན། ཁོ་མོར་གནོད་པ་མི་འཕོག་ལ་མངལ་ཡང་སྦྲུམ་པར་འགྱུར་རོ། །
NUM 5:29 འདི་ནི་ཐེ་ཚོམ་སྐོར་གྱི་བཀའ་ཁྲིམས་ཡིན་ཏེ། གལ་སྲིད་ཆུང་མ་ཞིག་གིས་རང་ཉིད་ཁྱོ་གར་དབང་བའི་དུས་སུ་ཁྱོ་ག་ལ་རྒྱབ་འགལ་བྱས་ནས་རང་མི་གཙང་བར་བྱས་པའམ།
NUM 5:30 ཡང་ན་སྐྱེས་པ་ཞིག་གི་སེམས་སུ་དོགས་པ་ལངས་ནས་རང་གི་ཆུང་མར་ཐེ་ཚོམ་ཟོས་ན། ཁོས་བུད་མེད་དེ་དཀོན་མཆོག་ཡ་ཝཱེའི་སྤྱན་སྔར་བསླང་དགོས་པ་དང་། མཆོད་དཔོན་གྱིས་བུད་མེད་དེ་ལ་བཀའ་ཁྲིམས་ཆ་ཚང་བཞིན་དུ་བྱའོ། །
NUM 5:31 ཁྱོ་ག་དེར་ནག་ཉེས་མི་འཕོག་ཅིང་། བུད་མེད་ཀྱིས་རང་གི་ནག་ཉེས་འཁུར་དགོས་ཞེས་བཤད་པར་བཀའ་བསྩལ་ཏོ། །
NUM 6:1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 6:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། སྐྱེས་པའམ་བུད་མེད་སུ་ཡིན་ཡང་གལ་སྲིད་དམ་བཅའ་ཁྱད་པར་ཅན་ཏེ་ནཱ་ཟར་པའི་དམ་བཅའ་བཞག་ཡོད་ན། སྡོམ་པ་བསྲུངས་ནས་དཀོན་མཆོག་ཡ་ཝཱེ་ལ་གཏོགས་དགོས།
NUM 6:3 རྒུན་ཆང་དང་གར་ཆང་གཅོད་དགོས་ཤིང་། རྒུན་ཆང་གིས་བཟོས་པའི་སྐྱུར་ཆུ་དང་གར་ཆང་གིས་བཟོས་པའི་སྐྱུར་ཆུ་གང་ཡང་སྤྱོད་མི་འོས། རྒུན་འབྲུམ་གྱི་བཅུད་ཁུ་གང་ཡང་འཐུང་མི་རུང་ལ། རྒུན་འབྲུམ་གསར་པའམ་སྐམ་པོ་གང་ཡང་བཟའ་མི་འོས་སོ། །
NUM 6:4 སྡོམ་པ་སྲུང་བའི་ཉིན་མོ་དག་ལ། རྒུན་ཤིང་ལས་སྨིན་པའི་འབྲུ་གུའམ་ཤུན་པ་གང་ཡང་བཟའ་མི་རུང་ངོ་། །
NUM 6:5 མི་དེས་དམ་བཅས་ནས་སྡོམ་པ་སྲུང་བའི་ཉིན་མོ་དག་ལ། སྤུ་གྲིས་མགོ་ལ་རེག་མི་རུང་ཞིང་དམ་པ་ཡིན་དགོས་ལ། སྡོམ་པ་བསྲུངས་ནས་དཀོན་མཆོག་ཡ་ཝཱེ་ལ་གཏོགས་པའི་ཉིན་མོ་དེ་དག་རྫོགས་པའི་བར་དུ་མགོའི་སྐྲ་སྐྱེ་རུ་འཇུག་དགོས།
NUM 6:6 སྡོམ་པ་བསྲུངས་ནས་དཀོན་མཆོག་ཡ་ཝཱེ་ལ་གཏོགས་པའི་ཉིན་མོ་དག་ལ་གཤིན་པོའི་བེམ་པོ་དང་ཉེ་བར་བཅར་མི་རུང་ངོ་། །
NUM 6:7 ཁོའི་ཕ་མ་དང་ཕུ་ནུ་མིང་སྲིང་ཤི་བའི་ཚེ། དེ་དག་གི་རྐྱེན་གྱིས་རང་ཉིད་བཙོག་པར་བཟོ་མི་རུང་སྟེ། སྡོམ་པ་བསྲུངས་ནས་དཀོན་མཆོག་ལ་གཏོགས་པའི་རྟགས་ནི་ཁོའི་མགོ་ལ་ཡོད་པའི་ཕྱིར་རོ། །
NUM 6:8 སྡོམ་པ་སྲུང་བའི་ཉིན་མོ་དག་ལ་ཁོ་ནི་དཀོན་མཆོག་ཡ་ཝཱེ་ལ་གཏོགས་ཤིང་དམ་པ་ཡིན།
NUM 6:9 གལ་སྲིད་དེའི་གམ་དུ་མི་ཞིག་གློ་བུར་ཤི་ནས། དེས་ཁོའི་དམ་པར་བསྔོས་པའི་མགོ་མི་གཙང་བར་བཟོས་ན། གཙང་སྦྲ་བྱེད་པའི་ཉིན་མོ་སྟེ། ཉིན་བདུན་པ་ལ་ཁོའི་སྐྲ་གཞར་དགོས།
NUM 6:10 ཉིན་བརྒྱད་པ་ལ་ཁོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་མཇལ་འཕྲད་གུར་མཆོག་གི་སྒོ་ཁར་ཁྱེར་ནས་མཆོད་དཔོན་ལ་སྤྲོད་དགོས།
NUM 6:11 མཆོད་དཔོན་གྱིས་གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་ཕུལ་ནས་གཤིན་པོའི་བེམ་པོའི་རྐྱེན་གྱིས་བཙོག་པར་གྱུར་པའི་སྡིག་པ་བཤག་དགོས་ལ། ཁོས་ཉིན་དེ་ཉིད་དུ་རང་གི་མགོ་དམ་པར་བྱེད་དགོས།
NUM 6:12 སྡོམ་པ་བསྲུངས་ནས་དཀོན་མཆོག་ཡ་ཝཱེ་ལ་གཏོགས་པའི་ཉིན་མོར། ཡང་ལོ་གཅིག་ཅན་གྱི་ལུ་གུ་ཕོ་ཞིག་ཁྱེར་ཡོང་ནས་ཉེས་སེལ་མཆོད་པར་འབུལ་དགོས། འོན་ཀྱང་སྡོམ་པ་མི་གཙང་བར་གྱུར་པའི་རྐྱེན་གྱིས། དེའི་སྔར་གྱི་ཉིན་མོ་རྣམས་རྩི་བར་མི་འགྱུར་རོ། །
NUM 6:13 ནཱ་ཟར་པ་རྣམས་ཀྱི་བཀའ་ཁྲིམས་ནི་འདི་ལྟ་སྟེ། སྡོམ་པ་སྲུང་མཁན་གྱི་ཉིན་མོ་རྣམས་རྫོགས་པའི་ཉིན་ལ། མི་དེ་མཇལ་འཕྲད་གུར་མཆོག་གི་སྒོ་ཁར་འཁྲིད་དགོས་ཤིང་།
NUM 6:14 ཁོས་དཀོན་མཆོག་ཡ་ཝཱེ་ལ་མཆོད་པ་འབུལ་དགོས་ཏེ། སྐྱོན་ཅི་ཡང་མེད་པའི་ལོ་གཅིག་ཅན་གྱི་ལུ་གུ་ཕོ་ཞིག་སྦྱིན་སྲེག་ཏུ་འབུལ་བ་དང་། སྐྱོན་ཅི་ཡང་མེད་པའི་མོ་ལུག་ལོ་གཅིག་ཅན་ཞིག་སྡིག་བཤགས་མཆོད་པར་འབུལ་དགོས། སྐྱོན་ཅི་ཡང་མེད་པའི་ལུག་ཐུག་ཅིག་ཞི་བདེའི་མཆོད་པར་འབུལ་བ་དང་།
NUM 6:15 ཕྱེ་བཟང་པོས་བཟོས་པའི་སྐྱུར་མེད་སྣུམ་བསྲེས་བག་ལེབ་དང་སྐྱུར་མེད་སྣུམ་བྱུགས་བག་ལེབ་སྲབ་མོ་གཟེབ་གང་དང་། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་བཅས་འབུལ་དགོས་སོ། །
NUM 6:16 མཆོད་དཔོན་གྱིས་དཀོན་མཆོག་ཡ་ཝཱེའི་སྤྱན་སྔར་དེ་དག་འབུལ་བ་དང་། སྡིག་བཤགས་མཆོད་པ་དང་སྦྱིན་སྲེག་ཀྱང་འབུལ་དགོས།
NUM 6:17 ཡང་མཆོད་དཔོན་གྱིས་ལུག་ཐུག་དེ་དང་སྐྱུར་མེད་བག་ལེབ་ཀྱི་གཟེབ་དེ་དཀོན་མཆོག་ཡ་ཝཱེ་ལ་ཞི་བདེའི་མཆོད་པར་འབུལ་དགོས་པ་དང་། ཁོས་དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་ཀྱང་འབུལ་བར་བྱའོ། །
NUM 6:18 ནཱ་ཟར་པས་མཇལ་འཕྲད་གུར་མཆོག་གི་སྒོ་ཁར་རང་གི་སྡོམ་པ་སྲུང་བའི་སྐྲ་བཞར་ནས། དེ་ཞི་བདེའི་མཆོད་པ་འོག་ཏུ་ཡོད་པའི་མེ་ཐོག་ཏུ་འཇོག་དགོས།
NUM 6:19 ནཱ་ཟར་པས་རང་གི་སྡོམ་པ་སྲུང་བའི་སྐྲ་བཞར་རྗེས། མཆོད་དཔོན་གྱིས་བཙོས་ཟིན་པའི་ལུག་ཐུག་གི་སོག་པ་གཅིག་དང་། ཡང་གཟེབ་ལས་སྐྱུར་མེད་བག་ལེབ་གཅིག་དང་། སྐྱུར་མེད་བག་ལེབ་སྲབ་མོ་གཅིག་བཅས་བླངས་ཏེ་ནཱ་ཟར་པའི་ལག་ཏུ་འཇོག་དགོས།
NUM 6:20 དེ་ནས་མཆོད་དཔོན་གྱིས་དེ་རྣམས་གཡོབ་མཆོད་དུ་བྱས་ནས་དཀོན་མཆོག་ཡ་ཝཱེའི་སྤྱན་སྔར་ཕར་གཡོ་ཚུར་གཡོ་བྱེད་དགོས་པ་དང་། དེ་རྣམས་གཡོབ་མཆོད་དུ་ཕུལ་བའི་བྲང་ཁོག་དང་འདེགས་མཆོད་དུ་ཕུལ་བའི་བརླ་རྐང་དང་བཅས་ཏེ་མཆོད་དཔོན་ལ་དབང་བའི་རྫས་དམ་པ་ཡིན། དེའི་རྗེས་སུ་ནཱ་ཟར་པས་ད་གཟོད་རྒུན་ཆང་འཐུང་ཆོག་པའོ། །
NUM 6:21 དམ་བཅའ་འཇོག་མཁན་ནཱ་ཟར་པའི་བཀའ་ཁྲིམས་ནི། ནཱ་ཟར་པས་དཀོན་མཆོག་ཡ་ཝཱེ་ལ་ཕུལ་བའི་མཆོད་པ་ནི་ཁོའི་སྡོམ་པ་སྲུང་བའི་དམ་བཅའ་བཞིན་དང་། ཁོའི་ལག་གི་འཛོམས་ཚོད་བཞིན་ཡིན་ཞིང་། ཁོས་ཇི་ལྟར་དམ་བཅས་པ་ཡིན་ན་དེ་ལྟར་སྡོམ་པ་སྲུང་བའི་སྒྲིག་སྲོལ་བཞིན་བསྒྲུབ་དགོས་ཞེས་པ་དེ་ཡིན་ནོ་ཞེས་གསུངས་སོ། །
NUM 6:22 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 6:23 ཁྱོད་ཀྱིས་ཨ་རོན་དང་དེའི་བུ་རྣམས་ལ་འདི་ལྟར། ཁྱོད་ཅག་གིས་ཡེས་ར་ཨེལ་པ་རྣམས་ལ་བྱིན་རླབས་གནང་ནས་དེ་དག་ལ།
NUM 6:24 དཀོན་མཆོག་ཡ་ཝཱེས་ཁྱོད་ལ་བྱིན་རླབས་མཛད་ཅིང་ཁྱོད་རང་བསྲུང་བར་ཤོག
NUM 6:25 དཀོན་མཆོག་ཡ་ཝཱེས་ཉིད་ཀྱི་ཞལ་མདངས་ཁྱོད་ཀྱི་སྟེང་དུ་སྤྲོས་ཏེ། ཁྱོད་ལ་ཐུགས་རྗེ་གནང་བར་ཤོག
NUM 6:26 དཀོན་མཆོག་ཡ་ཝཱེས་ཉིད་ཀྱི་ཞལ་ངོ་ཁྱོད་ལ་བསྟན་ནས་ཁྱོད་ལ་ཞི་བདེ་གནང་བར་ཤོག ཅེས་སྨྲོས་ཤིག
NUM 6:27 ཁོ་རྣམས་ཀྱིས་དེ་བཞིན་ཡེས་ར་ཨེལ་པ་རྣམས་ལ་བདག་གི་མིང་བརྗོད་དགོས་པ་དང་། བདག་གིས་ཀྱང་དེ་དག་ལ་བྱིན་གྱིས་བརླབ་པར་བྱའོ་ཞེས་གསུངས་སོ། །
NUM 7:1 དེ་ཡང་མོ་ཤེ་ཡིས་གུར་མཆོག་བསྒྲེངས་ཚར་བའི་ཉིན་མོ་དེར། དེ་ལ་འབྱུག་སྣུམ་གྱིས་བྱུགས་ཤིང་དམ་པར་བྱས་པ་དང་། དེའི་ནང་གི་ཡོ་བྱད་ཐམས་ཅད་དང་མཆོད་ཁྲི་དང་དེའི་ཡོ་བྱད་མཐའ་དག་ལ་འབྱུག་སྣུམ་གྱིས་བྱུགས་ཤིང་དམ་པར་བྱས།
NUM 7:2 དེ་ནས་ཡེས་ར་ཨེལ་གྱི་འགོ་དཔོན་རྣམས་ཏེ་ཁོ་ཚོའི་ཕ་ཁྱིམ་གྱི་འགོ་པ་ཐམས་ཅད་ཡོང་ནས་ཞལ་འདེབས་ཕུལ་བ་སྟེ། དེ་དག་ནི་ཚོ་པ་ཁག་གི་འགོ་དཔོན་རྣམས་ཡིན་ལ། རྩིས་བླངས་པའི་མི་རྣམས་ལ་དོ་དམ་བྱེད་མཁན་ཡིན་ནོ། །
NUM 7:3 དེ་དག་གིས་རང་རང་གི་འབུལ་བ་རྣམས་དཀོན་མཆོག་ཡ་ཝཱེའི་སྤྱན་སྔར་ཕུལ་བ་འདི་ལྟ་སྟེ། ཁེབས་ཡོད་ཤིང་རྟ་དྲུག་དང་གླང་གོག་བཅུ་གཉིས་ཡོད་ལ། འགོ་དཔོན་གཉིས་རེས་ཤིང་རྟ་རེ་དང་འགོ་དཔོན་རེ་རེས་གླང་གོག་རེ་གུར་མཆོག་གི་མདུན་དུ་ཁྱེར་འོངས་སོ། །
NUM 7:4 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 7:5 མཇལ་འཕྲད་གུར་མཆོག་གི་ལས་དོན་ཐད་བཀོལ་སྤྱོད་བྱེད་པའི་ཕྱིར་དུ། ཁྱོད་ཀྱིས་དེ་དག་བླངས་ནས་ལེ་ཝི་པ་རྣམས་ལ་སྤྲོད་ཅིག མི་རེ་རེའི་ལས་ཚན་བཞིན་དུ་ཁོ་རྣམས་ལ་སྟེར་དགོས་ཞེས་བཀའ་བསྩལ་ཏོ། །
NUM 7:6 དེ་བས་མོ་ཤེ་ཡིས་ཤིང་རྟ་དང་གླང་གོག་རྣམས་བླངས་ནས་ལེ་ཝི་པ་རྣམས་ལ་སྤྲད།
NUM 7:7 ཁོས་གེར་ཤོན་གྱི་བུ་རྒྱུད་རྣམས་ཀྱི་ཞབས་ཕྱིའི་ལས་ཚན་བཞིན་དུ། ཤིང་རྟ་གཉིས་དང་གླང་གོག་བཞི་ཁོ་རྣམས་ལ་སྤྲད་པ་དང་།
NUM 7:8 ཡང་མཱ་རཱ་རེའེ་ཡི་བུ་རྒྱུད་རྣམས་ཀྱི་ཞབས་ཕྱིའི་ལས་ཚན་བཞིན་དུ། ཤིང་རྟ་བཞི་དང་གླང་གོག་བརྒྱད་དེ་རྣམས་ལ་སྤྲད་ཅིང་། དེ་ཐམས་ཅད་ལ་མཆོད་དཔོན་ཨ་རོན་གྱི་བུ་ཨི་ཐ་མཱར་གྱིས་དོ་དམ་བྱེད་པའོ། །
NUM 7:9 འོན་ཀྱང་ཀོ་ཧད་ཀྱི་བུ་རྒྱུད་རྣམས་ཀྱིས་གནས་དམ་པ་རུ་ཞབས་ཕྱི་བྱེད་པ་དང་། རྫས་དམ་པ་རྣམས་ཕྲག་ལ་འཁུར་དགོས་པ་ཡིན་པས། དེ་ཚོར་ཅི་ཡང་མ་སྤྲད་དོ། །
NUM 7:10 མཆོད་ཁྲིར་འབྱུག་སྣུམ་གྱིས་བྱུགས་པའི་ཉིན་མོར། འགོ་དཔོན་རྣམས་ཀྱིས་མཆོད་ཁྲིར་བསྔོས་པའི་མཆོད་རྫས་རྣམས་ཁྱེར་འོངས་ཏེ། དེ་དག་གིས་རང་གི་མཆོད་པ་རྣམས་མཆོད་ཁྲིའི་མདུན་དུ་མཆོད་དོ། །
NUM 7:11 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། འགོ་དཔོན་རྣམས་ཀྱིས་རང་རང་གི་མཆོད་ཁྲིར་བསྔོས་པའི་མཆོད་རྫས་འབུལ་དགོས་ཏེ། ཉིན་རེར་འགོ་དཔོན་གཅིག་གིས་མཆོད་པ་འཁྱེར་འོང་དགོས་ཞེས་བཀའ་བསྩལ་ཏོ། །
NUM 7:12 ཉིན་དང་པོར་མཆོད་པ་འབུལ་མཁན་ནི་ཡ་ཧུ་དཱ་ཚོ་པའི་ཨ་མི་ནཱ་དབ་ཀྱི་བུ་ནཱ་སོན་ཡིན་པ་དང་།
NUM 7:13 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ། དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:14 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:15 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:16 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:17 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཨ་མི་ནཱ་དབ་ཀྱི་བུ་ནཱ་སོན་གྱི་མཆོད་པ་ཡིན་ནོ། །
NUM 7:18 ཉིན་གཉིས་པར་མཆོད་པ་འབུལ་མཁན་ནི་ཡེས་སི་ཀཱར་གྱི་འགོ་དཔོན་ཙུ་ཨར་གྱི་བུ་ནེ་ཐན་ཨེལ་ཡིན་པ་དང་།
NUM 7:19 ཁོས་ཕུལ་བའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:20 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:21 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:22 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:23 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཙུ་ཨར་གྱི་བུ་ནེ་ཐན་ཨེལ་གྱི་མཆོད་པ་ཡིན་ནོ། །
NUM 7:24 ཉིན་གསུམ་པར་མཆོད་པ་འབུལ་མཁན་ནི་ཟེ་བུ་ལུན་གྱི་བུ་རྒྱུད་རྣམས་ཀྱི་འགོ་དཔོན་ཧེ་ལོན་གྱི་བུ་ཨེ་ལི་ཨབ་ཡིན་པ་དང་།
NUM 7:25 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:26 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:27 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:28 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:29 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཧེ་ལོན་གྱི་བུ་ཨེ་ལི་ཨབ་ཀྱི་མཆོད་པ་ཡིན་ནོ། །
NUM 7:30 ཉིན་བཞི་པར་མཆོད་པ་འབུལ་མཁན་ནི་རུ་བེན་གྱི་བུ་རྒྱུད་རྣམས་ཀྱི་འགོ་དཔོན་ཤེ་དེ་ཨུར་གྱི་བུ་ཨེ་ལི་ཚུར་ཡིན་པ་དང་།
NUM 7:31 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:32 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:33 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:34 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:35 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཤེ་དེ་ཨུར་གྱི་བུ་ཨེ་ལི་ཚུར་གྱི་མཆོད་པ་ཡིན་ནོ། །
NUM 7:36 ཉིན་ལྔ་པར་མཆོད་པ་འབུལ་མཁན་ནི་སི་མུ་ཨོན་གྱི་བུ་རྒྱུད་རྣམས་ཀྱི་འགོ་དཔོན་ཙུ་རེ་ཤད་དཱ་ཨིའི་བུ་ཤེ་ལུ་མེ་ཨེལ་ཡིན་པ་དང་།
NUM 7:37 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:38 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:39 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:40 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:41 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཙུ་རེ་ཤད་དཱ་ཨིའི་བུ་ཤེ་ལུ་མེ་ཨེལ་གྱི་མཆོད་པ་ཡིན་ནོ། །
NUM 7:42 ཉིན་དྲུག་པར་མཆོད་པ་འབུལ་མཁན་ནི་གཱ་རྡུ་ཡི་བུ་རྒྱུད་རྣམས་ཀྱི་འགོ་དཔོན་དི་ཨོ་ཨེལ་གྱི་བུ་ཨེལ་ཡཱ་སབ་ཡིན་པ་དང་།
NUM 7:43 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:44 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:45 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:46 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:47 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་དི་ཨོ་ཨེལ་གྱི་བུ་ཨེལ་ཡཱ་སབ་ཀྱི་མཆོད་པ་ཡིན་ནོ། །
NUM 7:48 ཉིན་བདུན་པར་མཆོད་པ་འབུལ་མཁན་ནི་ཨེ་ཕཱར་ཡིམ་གྱི་བུ་རྒྱུད་རྣམས་ཀྱི་འགོ་དཔོན་ཨམ་མེ་ཧུད་ཀྱི་བུ་ཨེ་ལི་ཤ་མཱ་ཡིན་པ་དང་།
NUM 7:49 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:50 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:51 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:52 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:53 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཨམ་མེ་ཧུད་ཀྱི་བུ་ཨེ་ལི་ཤ་མཱའི་མཆོད་པ་ཡིན་ནོ། །
NUM 7:54 ཉིན་བརྒྱད་པར་མཆོད་པ་འབུལ་མཁན་ནི་མཱ་ན་ཤེའི་བུ་རྒྱུད་རྣམས་ཀྱི་འགོ་དཔོན་ཕེ་དཱ་ཚུར་གྱི་བུ་གམ་ལི་ཨེལ་ཡིན་པ་དང་།
NUM 7:55 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:56 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:57 སྦྱིན་སྲེག་གི་ཕྱིར་དུ་གླང་ཐུག་གཅིག་དང་ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:58 སྡིག་བཤགས་མཆོད་པ་རུ་ར་ཕོ་གཅིག་ཡོད།
NUM 7:59 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཕེ་དཱ་ཚུར་གྱི་བུ་གམ་ལི་ཨེལ་གྱི་མཆོད་པ་ཡིན་ནོ། །
NUM 7:60 ཉིན་དགུ་པར་མཆོད་པ་འབུལ་མཁན་ནི་པེན་ཡཱ་མེན་གྱི་བུ་རྒྱུད་རྣམས་ཀྱི་འགོ་དཔོན་གིད་ཨོ་ནཱའི་བུ་ཨ་བི་ཏན་ཡིན་པ་དང་།
NUM 7:61 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:62 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:63 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:64 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:65 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་གིད་ཨོ་ནཱའི་བུ་ཨ་བི་ཏན་གྱི་མཆོད་པ་ཡིན་ནོ། །
NUM 7:66 ཉིན་བཅུ་པར་མཆོད་པ་འབུལ་མཁན་ནི་དཱན་གྱི་བུ་རྒྱུད་རྣམས་ཀྱི་འགོ་དཔོན་ཨམ་མེ་ཤད་ད་ཨི་ཡི་བུ་ཨ་ཧི་ཨེ་ཟེར་ཡིན་པ་དང་།
NUM 7:67 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:68 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:69 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:70 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:71 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཨམ་མེ་ཤད་ད་ཨི་ཡི་བུ་ཨ་ཧི་ཨེ་ཟེར་གྱི་མཆོད་པ་ཡིན་ནོ། །
NUM 7:72 ཉིན་བཅུ་གཅིག་པར་མཆོད་པ་འབུལ་མཁན་ནི་ཨ་ཤེར་གྱི་བུ་རྒྱུད་རྣམས་ཀྱི་འགོ་དཔོན་ཨོག་རན་གྱི་བུ་ཕཱ་གེ་ཨེལ་ཡིན་པ་དང་།
NUM 7:73 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:74 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:75 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:76 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:77 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཨོག་རན་གྱི་བུ་ཕཱ་གེ་ཨེལ་གྱི་མཆོད་པ་ཡིན་ནོ། །
NUM 7:78 ཉིན་བཅུ་གཉིས་པར་མཆོད་པ་འབུལ་མཁན་ནི་ནཱབ་ཐ་ལིའི་བུ་རྒྱུད་རྣམས་ཀྱི་འགོ་དཔོན་ཨེ་ནན་གྱི་བུ་ཨ་ཧི་རཱ་ཡིན་པ་དང་།
NUM 7:79 དེའི་མཆོད་པ་ནི་དངུལ་གྱི་སྡེར་མ་གཅིག་སྟེ་དངུལ་སྲང་བརྒྱ་དང་སུམ་ཅུ་ཡིན་པ་དང་། དངུལ་གྱི་ཕོར་བ་གཅིག་སྟེ་དངུལ་སྲང་བདུན་ཅུ་ཡིན་ལ། ཐམས་ཅད་གནས་མཆོག་གི་སྲང་ལྟར་ཡིན། སྣོད་དེ་གཉིས་ཀ་ཕྱེ་བཟང་པོ་སྣུམ་བསྲེས་མས་གང་བར་བྱས་ནས་འབྲུ་རིགས་ཀྱི་མཆོད་པར་ཕུལ་བའོ། །
NUM 7:80 སྲང་བཅུ་ལས་བརྡུངས་པའི་གསེར་གྱི་སྡེར་མ་གཅིག་དང་དེའི་ནང་དུ་བདུག་སྤོས་གང་བླུགས་ཡོད།
NUM 7:81 སྦྱིན་སྲེག་གི་ཕྱིར་དུ་གླང་ཐུག་གཅིག་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་ཞིག་དང་།
NUM 7:82 སྡིག་བཤགས་མཆོད་པ་རུ་ར་ཕོ་གཅིག་བཅས་ཡོད།
NUM 7:83 ཞི་བདེའི་མཆོད་པའི་ཕྱིར་དུ་གླང་གོག་གཉིས་དང་། ལུག་ཐུག་ལྔ་དང་། ར་ཕོ་ལྔ་དང་། ལོ་གཅིག་ཅན་གྱི་ལུ་གུ་ཕོ་ལྔ་བཅས་ཡོད་ལ། དེ་ནི་ཨེ་ནན་གྱི་བུ་ཨ་ཧི་རཱའི་མཆོད་པ་ཡིན་ནོ། །
NUM 7:84 དེ་རྣམས་ནི་མཆོད་ཁྲིར་འབྱུག་སྣུམ་གྱིས་བྱུག་པའི་ཉིན་མོར། ཡེས་ར་ཨེལ་གྱི་འགོ་དཔོན་རྣམས་ཀྱིས་མཆོད་ཁྲིར་བསྔོས་པའི་མཆོད་པ་སྟེ། བསྡོམས་པས་དངུལ་གྱི་སྡེར་མ་བཅུ་གཉིས་དང་དངུལ་གྱི་ཕོར་བ་བཅུ་གཉིས། གསེར་གྱི་སྡེར་མ་བཅུ་གཉིས་བཅས་སོ། །
NUM 7:85 སྡེར་མ་རེའི་སྲང་ནི་བརྒྱ་དང་སུམ་ཅུ་ཡིན་པ་དང་། ཕོར་བ་རེའི་སྲང་ནི་བདུན་ཅུ་ཡིན་ལ། སྣོད་ཆས་རྣམས་ཀྱི་དངུལ་ཐམས་ཅད་གནས་མཆོག་གི་སྲང་བཞིན་དུ་བསྡོམས་པས་དངུལ་སྲང་ཉིས་སྟོང་བཞི་བརྒྱའོ། །
NUM 7:86 བདུག་སྤོས་ཀྱིས་གང་བའི་གསེར་གྱི་སྡེར་མ་བཅུ་གཉིས་ཏེ། སྡེར་མ་རེའི་སྲང་ནི་གནས་མཆོག་གི་སྲང་བཞིན་དུ་དངུལ་སྲང་བཅུ་ཡིན། སྡེར་མ་རྣམས་ཀྱི་གསེར་ཐམས་ཅད་བསྡོམས་པས་སྲང་བརྒྱ་དང་ཉི་ཤུའོ། །
NUM 7:87 སྦྱིན་སྲེག་གི་ཕྱིར་དུ་ཕུལ་བའི་ཕྱུགས་ནི་བསྡོམས་པས་གླང་ཐུག་བཅུ་གཉིས་དང་། ལུག་ཐུག་བཅུ་གཉིས། ལོ་གཅིག་ཅན་གྱི་ལུ་གུ་ཕོ་བཅུ་གཉིས་དང་དེ་དག་དང་མཉམ་དུ་ཕུལ་བའི་འབྲུ་རིགས་ཀྱི་མཆོད་པ། སྡིག་བཤགས་མཆོད་པ་རུ་ཕུལ་བའི་ར་ཕོ་བཅུ་གཉིས་བཅས་སོ། །
NUM 7:88 ཞི་བདེའི་མཆོད་པར་ཕུལ་བའི་ཕྱུགས་ནི་བསྡོམས་པས་གླང་ཐུག་ཉི་ཤུ་ཉེར་བཞི་དང་། ལུག་ཐུག་དྲུག་ཅུ། ར་ཕོ་དྲུག་ཅུ། ལོ་གཅིག་ཅན་གྱི་ལུ་གུ་ཕོ་དྲུག་ཅུ་བཅས་ཡིན་ལ། དེ་དག་ནི་མཆོད་ཁྲིར་འབྱུག་སྣུམ་གྱིས་བྱུགས་རྗེས་མཆོད་ཁྲིར་བསྔོས་པའི་མཆོད་པ་ཡིན་ནོ། །
NUM 7:89 མོ་ཤེ་དཀོན་མཆོག་ཡ་ཝཱེ་དང་གསུང་གླེང་མཛད་པར་མཇལ་འཕྲད་གུར་མཆོག་ནང་དུ་སོང་བའི་ཚེ། དཔང་མཛད་ཤུར་སྒམ་གྱི་སྟེང་དུ་ཡོད་པའི་ཐུགས་རྗེའི་བཞུགས་ཁྲི་དང་། ཀེ་རུབ་གཉིས་ཀའི་བར་ནས་རང་ལ་གསུང་གླེང་མཛད་པའི་སྒྲ་ཞིག་ཐོས་ཤིང་། དཀོན་མཆོག་ཡ་ཝཱེས་མོ་ཤེ་ལ་བཀའ་བསྩལ་ཏོ། །
NUM 8:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 8:2 ཁྱོད་ཀྱིས་ཨ་རོན་ལ་འདི་ལྟར། ཁྱོད་ཀྱིས་སྒྲོན་མེ་ཤོམ་དུས་སུ། སྒྲོན་མེ་བདུན་པོའི་འོད་ནི་སྒྲོན་སྟེགས་ཀྱི་མདུན་ཕྱོགས་སུ་སྣང་བར་བྱེད་དགོས་སྨྲོས་ཤིག་ཅེས་གསུངས་སོ། །
NUM 8:3 ཨ་རོན་གྱིས་དེ་བཞིན་བྱས་ཏེ། སྒྲོན་མེ་རྣམས་སྒྲོན་སྟེགས་ཀྱི་མདུན་དུ་བཤམས་ཤིང་། དེ་ནི་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་ཡིན་ནོ། །
NUM 8:4 སྒྲོན་སྟེགས་ཀྱི་བཟོ་ཚུལ་ནི་གསེར་བཙོ་མས་རྡུང་བཟོ་བྱས་པ་ཡིན་ཏེ། དེའི་ཞབས་ར་ནས་མེ་ཏོག་གི་བར་དུ་རྡུང་བཟོ་བྱས་ཡོད། དེ་ནི་མོ་ཤེ་ཡིས་དཀོན་མཆོག་ཡ་ཝཱེས་ཁོ་ལ་བསྟན་པའི་མ་དཔེ་བཞིན་དུ་སྒྲོན་སྟེགས་བཟོས་པ་ཡིན་ནོ། །
NUM 8:5 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 8:6 ཁྱོད་ཀྱིས་ཡེས་ར་ཨེལ་པ་རྣམས་ལས་ལེ་ཝི་པ་རྣམས་བདམས་ཏེ་གཙང་མར་བྱོས་ཤིག
NUM 8:7 དེ་དག་འདི་ལྟར་གཙང་མར་བྱེད་དགོས་ཏེ། སྡིག་པ་སེལ་བའི་ཆུ་ནི་ཁོ་ཚོའི་སྟེང་དུ་གཏོར་ཅིག ཡང་དེ་དག་ལ་སྤུ་གྲིས་རང་གི་ལུས་ཧྲིལ་པོའི་སྤུ་གཞར་དུ་འཇུག་པ་དང་། རང་གི་གོས་རྣམས་བཀྲུས་ནས་རང་ཉིད་གཙང་མར་བྱེད་དགོས།
NUM 8:8 དེ་ནས་ཁོ་རྣམས་ལ་གླང་ཐུག་ཅིག་དང་དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་སྟེ་ཕྱེ་བཟང་པོ་སྣུམ་བསྲེས་མ་ལེན་དུ་འཇུག་པ་དང་། ཁྱོད་ཀྱིས་ཀྱང་སྡིག་བཤགས་མཆོད་པ་རུ་གླང་ཐུག་ཅིག་ལེན་དགོས་སོ། །
NUM 8:9 ཁྱོད་ཀྱིས་ལེ་ཝི་པ་རྣམས་མཇལ་འཕྲད་གུར་མཆོག་གི་མདུན་དུ་ཚུར་ཁྲིད་ནས། ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་བསྡུ་དགོས།
NUM 8:10 ཁྱོད་ཀྱིས་ལེ་ཝི་པ་རྣམས་དཀོན་མཆོག་ཡ་ཝཱེའི་སྤྱན་སྔར་ཁྲིད་འོངས་ནས། ཡེས་ར་ཨེལ་པ་རྣམས་ཀྱིས་ཁོ་ཚོའི་སྟེང་ལ་ལག་པ་འཇོག་དགོས།
NUM 8:11 དེ་ནས་ཨ་རོན་གྱིས་ཡེས་ར་ཨེལ་པ་རྣམས་ལས་ལེ་ཝི་པ་རྣམས་དཀོན་མཆོག་ཡ་ཝཱེའི་སྤྱན་སྔར་གཡོབ་མཆོད་དུ་འབུལ་དགོས་ཏེ། དེ་དག་ལ་དཀོན་མཆོག་ཡ་ཝཱེའི་ལས་དོན་བསྒྲུབ་ཏུ་འཇུག་དགོས།
NUM 8:12 ལེ་ཝི་པ་རྣམས་ཀྱིས་གླང་ཐུག་དེ་གཉིས་ཀྱི་མགོ་ལ་ལག་པ་བཞག་སྟེ། གླང་ཐུག་གཅིག་ནི་སྡིག་བཤགས་མཆོད་པ་དང་། གླང་ཐུག་ཅིག་ཤོས་ནི་སྦྱིན་སྲེག་ཏུ་དཀོན་མཆོག་ཡ་ཝཱེ་ལ་ཕུལ་ནས་ལེ་ཝི་པ་རྣམས་ཀྱི་སྡིག་པ་བཤག་དགོས།
NUM 8:13 ཡང་ཁྱོད་ཀྱིས་ལེ་ཝི་པ་རྣམས་ཨ་རོན་དང་དེའི་བུ་རྣམས་ཀྱི་མདུན་དུ་ལངས་སུ་བཅུག་ནས། དེ་རྣམས་དཀོན་མཆོག་ཡ་ཝཱེ་ལ་གཡོབ་མཆོད་དུ་འབུལ་བར་བྱའོ། །
NUM 8:14 དེ་བཞིན་ཁྱོད་ཀྱིས་ལེ་ཝི་པ་རྣམས་ནི་ཡེས་ར་ཨེལ་པ་རྣམས་ལས་ལོགས་སུ་བཀར་ནས། དེ་དག་ང་རང་ལ་དབང་དགོས།
NUM 8:15 དེ་ནས་ལེ་ཝི་པ་རྣམས་མཇལ་འཕྲད་གུར་མཆོག་གི་ཞབས་ཕྱི་བསྒྲུབ་པར་འགྲོ་ཆོག་པ་དང་། ཁྱོད་ཀྱིས་དེ་དག་གཙང་མར་བྱས་ནས་གཡོབ་མཆོད་དུ་འབུལ་དགོས་ཏེ།
NUM 8:16 ལེ་ཝི་པ་རྣམས་ནི་ཡེས་ར་ཨེལ་པ་རྣམས་ལས་ཡོངས་སུ་བདག་ལ་ཕུལ་བ་ཡིན་ཞིང་། ངས་དེ་དག་རང་གི་ཕྱིར་དུ་བདམས་པ་དང་། ཡེས་ར་ཨེལ་པ་རྣམས་ཀྱི་སྐྱེས་འགོ་ཀུན་གྱི་ཚབ་ཡིན་ལ།
NUM 8:17 ཡེས་ར་ཨེལ་པའི་ཁྲོད་ཀྱི་མི་ཕྱུགས་གང་ཡིན་ཡང་སྐྱེས་འགོ་ཐམས་ཅད་བདག་ལ་དབང་བ་སྟེ། བདག་གིས་ཨེ་ཅིབ་ཡུལ་ནས་སྐྱེས་འགོ་ཐམས་ཅད་བསད་པའི་ཉིན་དེར། དེ་དག་རང་གི་ཕྱིར་དུ་དམ་པར་བྱས་ཡོད་པས་སོ། །
NUM 8:18 བདག་གིས་ཡེས་ར་ཨེལ་པའི་ཁྲོད་ཀྱི་སྐྱེས་འགོ་ཐམས་ཅད་ཀྱི་ཚབ་ཏུ་ལེ་ཝི་པ་རྣམས་བདམས་པ་དང་།
NUM 8:19 ཡེས་ར་ཨེལ་པ་རྣམས་ལས་ལེ་ཝི་པ་རྣམས་ཨ་རོན་དང་དེའི་བུ་རྣམས་ལ་སྐྱེས་སུ་ཕུལ་བ་ཡིན། དེ་ནི་ཡེས་ར་ཨེལ་པ་རྣམས་གནས་མཆོག་གི་ཉེ་སར་བཅར་བའི་དུས་སུ་དེ་རྣམས་ལ་ནད་ཡམས་མི་འབྱུང་བའི་ཆེད་དུ། དེ་དག་གིས་མཇལ་འཕྲད་གུར་མཆོག་ནས་ཡེས་ར་ཨེལ་པ་རྣམས་ཀྱི་ཞབས་ཕྱི་བསྒྲུབ་ཅིང་། ཡེས་ར་ཨེལ་པ་རྣམས་ཀྱི་ཕྱིར་དུ་སྡིག་བཤགས་བྱེད་པའི་ཕྱིར་ཡིན་ཞེས་གསུངས་སོ། །
NUM 8:20 དེ་ནས་མོ་ཤེ་དང་ཨ་རོན་དང་། ཡེས་ར་ཨེལ་པ་རྣམས་ཀྱི་མི་ཚོགས་ཡོངས་ཀྱིས་ལེ་ཝི་པ་རྣམས་ལ་དེ་ལྟར་བྱས། དཀོན་མཆོག་ཡ་ཝཱེས་ལེ་ཝི་པ་རྣམས་ལ་དམིགས་ནས་མོ་ཤེ་ལ་བཀའ་ཅི་ལྟར་གནང་བ་ཡིན་ན། ཡེས་ར་ཨེལ་པ་རྣམས་ཀྱིས་དེ་བཞིན་བསྒྲུབས་པའོ། །
NUM 8:21 ལེ་ཝི་པ་རྣམས་ཀྱིས་རང་རང་གཙང་མར་བྱས་ཤིང་གྱོན་གོས་རྣམས་ཀྱང་བཀྲུས། ཨ་རོན་གྱིས་དེ་རྣམས་དཀོན་མཆོག་ཡ་ཝཱེའི་སྤྱན་སྔར་གཡོབ་མཆོད་དུ་ཕུལ་བ་དང་། དེ་དག་གཙང་མར་བཟོ་བའི་ཆེད་དུ་སྡིག་བཤགས་བྱས་སོ། །
NUM 8:22 དེའི་རྗེས་སུ་ལེ་ཝི་པ་རྣམས་ནང་དུ་སོང་སྟེ་ཨ་རོན་དང་དེའི་བུ་རྣམས་ཀྱི་མདུན་དང་། མཇལ་འཕྲད་གུར་མཆོག་ཏུ་ཞབས་ཕྱི་བསྒྲུབས་ཤིང་། དཀོན་མཆོག་ཡ་ཝཱེས་མོ་ཤེ་བརྒྱུད་ནས་ལེ་ཝི་པ་རྣམས་ལ་བཀའ་ཅི་ལྟར་གནང་བ་ཡིན་ན། ཡེས་ར་ཨེལ་པ་རྣམས་ཀྱིས་དེ་དག་ལ་དེ་བཞིན་བྱས་སོ། །
NUM 8:23 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 8:24 ལེ་ཝི་པ་རྣམས་ཀྱི་སྐོར་ནི་འདི་ལྟ་སྟེ། ལོ་ཉེར་ལྔ་དང་དེའི་ཡན་གྱི་མི་སུ་ཡིན་ཡང་ནང་དུ་ཡོང་ནས་མཇལ་འཕྲད་གུར་མཆོག་གི་ཞབས་ཕྱི་བསྒྲུབ་པའི་ལས་གྲལ་དུ་ཞུགས་དགོས།
NUM 8:25 འོན་ཀྱང་། ལོ་ལྔ་བཅུར་སོན་པ་རྣམས་ཀྱིས་ཞབས་ཕྱི་སྒྲུབ་མཚམས་བཞག་ནས་ཞབས་ཕྱི་བསྒྲུབ་མི་དགོས།
NUM 8:26 དེ་ཚོས་མཇལ་འཕྲད་གུར་མཆོག་ནང་དུ་རང་གི་སྤུན་ཟླ་རྣམས་ཀྱིས་རང་འགན་གཙང་སྒྲུབ་བྱེད་པར་མཐུན་རྐྱེན་སྦྱོར་བ་ལས་ཞབས་ཕྱི་བསྒྲུབ་མི་དགོས། ལེ་ཝི་པ་རྣམས་ཀྱི་ལས་འགན་ཐད་ཁྱོད་ཀྱིས་ཁོ་རྣམས་ལ་དེ་བཞིན་བྱེད་འོས་སོ་ཞེས་བཀའ་གནང་ངོ་། །
NUM 9:1 དེ་ཡང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་ཏེ་ལོ་གཉིས་པའི་ཟླ་དང་པོ་ལ། དཀོན་མཆོག་ཡ་ཝཱེས་སི་ནཱ་དབེན་སྟོང་དུ་མོ་ཤེ་ལ་འདི་སྐད་དུ།
NUM 9:2 ཡེས་ར་ཨེལ་པ་རྣམས་ཀྱིས་གཏན་ལ་ཁེལ་བའི་དུས་སུ་པེ་སག་དུས་ཆེན་བསྲུང་དགོས་ཏེ།
NUM 9:3 ཟླ་བ་འདིའི་ཚེས་བཅུ་བཞི་པའི་ཉིན་ས་སྲོས་ཀྱི་དུས་སུ། ཁྱོད་ཅག་གིས་གཏན་ལ་ཁེལ་བའི་དུས་སུ་དུས་ཆེན་དེ་བསྲུང་དགོས་ཤིང་། དུས་ཆེན་དེའི་སྒྲིག་ཁྲིམས་དང་སྲོལ་ཡིག་ཐམས་ཅད་བཞིན་ནོ་ཞེས་བཀའ་གནང་ངོ་། །
NUM 9:4 དེའི་ཕྱིར་མོ་ཤེ་ཡིས་ཡེས་ར་ཨེལ་པ་རྣམས་ལ་པེ་སག་གི་དུས་ཆེན་བསྲུང་བར་བསྒོས་ཤིང་།
NUM 9:5 དེ་དག་གིས་ཟླ་དང་པོའི་ཚེས་བཅུ་བཞིའི་ཉིན་ས་སྲོས་ཀྱི་དུས་སུ། སི་ནཱ་དབེན་སྟོང་དུ་པེ་སག་གི་དུས་ཆེན་བསྲུངས་ཤིང་། དཀོན་མཆོག་ཡ་ཝཱེས་མོ་ཤེ་ལ་ཅི་ལྟར་བཀའ་བསྩལ་པ་བཞིན། ཡེས་ར་ཨེལ་པ་རྣམས་ཀྱིས་དེ་ལྟར་བྱས་སོ། །
NUM 9:6 ཡིན་ནའང་མི་འགའ་ཞིག་གིས་འདས་པོར་རེག་པའི་རྐྱེན་གྱིས་མི་གཙང་བར་གྱུར་ནས། ཉིན་དེར་པེ་སག་གི་དུས་ཆེན་བསྲུང་མ་ནུས་པས། ཁོ་རྣམས་ཉིན་མོ་དེར་མོ་ཤེ་དང་ཨ་རོན་གཉིས་ཀྱི་དྲུང་དུ་ཡོང་བ་དང་།
NUM 9:7 དེ་དག་གིས་མོ་ཤེ་ལ། འདས་པོར་རེག་པའི་རྐྱེན་གྱིས་ངེད་ཅག་མི་གཙང་བར་གྱུར་ནའང་། ཡེས་ར་ཨེལ་པ་རྣམས་དང་མཉམ་དུ་གཏན་ལ་ཁེལ་བའི་དུས་སུ་དཀོན་མཆོག་ཡ་ཝཱེ་ལ་མཆོད་པ་འབུལ་བར་བཀག་པ་ཅི་ཞེས་ཞུས་པ་ན།
NUM 9:8 མོ་ཤེ་ཡིས་དེ་དག་ལ་འདི་ལྟར། ཁྱོད་ཅག་གིས་སྒུགས་དང་། ང་རང་སོང་ནས་དཀོན་མཆོག་ཡ་ཝཱེས་ཁྱོད་ཀྱི་སྐོར་ལ་བཀའ་ཅི་ཞིག་གནང་བར་བལྟའོ་ཞེས་སྨྲས་སོ། །
NUM 9:9 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 9:10 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་ཤིག ཁྱོད་ཅག་དང་ཁྱོད་ཅག་གི་བུ་རབས་ཚ་རྒྱུད་ཁྲོད་དུ། སུ་ཞིག་འདས་པོར་རེག་ནས་མི་གཙང་བར་གྱུར་པའམ། ཡང་ན་རྒྱང་རིང་དུ་གནས་སྐོར་ལ་བསྐྱོད་ཀྱང་། དེས་དཀོན་མཆོག་ཡ་ཝཱེ་ལ་པེ་སག་གི་དུས་ཆེན་བསྲུང་དགོས་ན།
NUM 9:11 དེ་དག་གིས་ཟླ་བ་གཉིས་པའི་ཚེས་བཅུ་བཞིའི་ཉིན་ས་སྲོས་ཀྱི་དུས་སུ་པེ་སག་གི་དུས་ཆེན་བསྲུང་དགོས་ལ། དུས་མཉམ་དུ་སྐྱུར་མེད་བག་ལེབ་དང་སྔོ་ཚོད་ཁ་མོ་བཟའ་དགོས།
NUM 9:12 ཞོགས་པའི་བར་དུ་དེ་ལས་ཅི་ཡང་ལུས་སུ་འཇུག་མི་རུང་། ལུ་གུའི་རུས་པ་རྐང་གཅིག་ཀྱང་གཅོག་མི་རུང་ལ། དེ་དག་གིས་པེ་སག་དུས་ཆེན་གྱི་སྒྲིག་ཁྲིམས་ཐམས་ཅད་བཞིན་དུ་དུས་ཆེན་བསྲུང་དགོས།
NUM 9:13 འོན་ཀྱང་མི་སུ་ཞིག་གཙང་མ་ཡིན་ཞིང་། གནས་སྐོར་གྱི་ལམ་དུ་ཡང་མེད་ཀྱང་པེ་སག་གི་དུས་ཆེན་བསྲུང་བ་སྣང་མེད་དུ་བསྐྱུར་ན། མི་དེས་གཏན་ལ་ཁེལ་བའི་དུས་སུ་དཀོན་མཆོག་ཡ་ཝཱེའི་མཆོད་པ་མ་ཕུལ་བས། མི་དེས་རང་གི་སྡིག་པ་འཁུར་དགོས་ཤིང་རང་གི་མི་ཚོགས་ལས་འཕུད་དགོས།
NUM 9:14 གལ་སྲིད་ཕྱི་མི་ཞིག་ཁྱོད་ཅག་གི་ཁྲོད་དུ་གནས་པ་དང་། དཀོན་མཆོག་ཡ་ཝཱེ་ལ་པེ་སག་གི་དུས་ཆེན་བསྲུང་འདོད་ན། དེས་པེ་སག་གི་སྒྲིག་ཁྲིམས་དང་སྲོལ་ཡིག་བཞིན་དུ་བསྲུང་དགོས་པ་སྟེ། བྱེས་པ་དང་གཞིས་སྐྱེས་གང་ཡིན་ཡང་སྒྲིག་ཁྲིམས་ནི་གཅིག་མཚུངས་ཡིན་དགོས་ཞེས་སྨྲ་བར་བཀའ་བསྩལ་ཏོ། །
NUM 9:15 གུར་མཆོག་སྒྲེང་བའི་ཉིན་མོ་དེར། སྤྲིན་གྱིས་གུར་མཆོག་སྟེ་དཔང་པོའི་གུར་མཆོག་གཡོགས་པ་དང་། མཚན་མོ་ནས་ཞོགས་པའི་བར་དུ་གུར་མཆོག་སྟེང་གི་སྤྲིན་ནི་མེའི་དབྱིབས་དང་མཚུངས་སོ། །
NUM 9:16 དུས་རྟག་ཏུ་དེ་བཞིན་བྱུང་སྟེ། ཉིན་མོར་གུར་མཆོག་སྤྲིན་གྱིས་གཡོགས་ཤིང་། མཚན་མོར་སྤྲིན་ནི་མེའི་དབྱིབས་དང་མཚུངས་པ་ཡིན།
NUM 9:17 ནམ་ཞིག་སྤྲིན་དེ་གུར་མཆོག་ནས་བཏེགས་པའི་ཚེ། ཡེས་ར་ཨེལ་པ་རྣམས་ལམ་དུ་ཆས་ཤིང་། སྤྲིན་གང་དུ་བཞུགས་པ་ཡིན་ན་ཡེས་ར་ཨེལ་པ་རྣམས་ཀྱིས་གནས་དེར་སྒར་བཏབ་པའོ། །
NUM 9:18 ཡེས་ར་ཨེལ་པ་རྣམས་དཀོན་མཆོག་ཡ་ཝཱེའི་བཀའ་བཞིན་ལམ་དུ་ཆས་པ་དང་། ཡང་དཀོན་མཆོག་ཡ་ཝཱེའི་བཀའ་བཞིན་སྒར་བཏབ། སྤྲིན་གུར་མཆོག་གི་སྟེང་དུ་དུས་ཡུན་ཅི་ཙམ་ལ་བཞུགས་པ་ཡིན་ན། ཁོ་རྣམས་ཀྱིས་ཀྱང་དེ་ཙམ་ལ་སྒར་བཏབ་ནས་བསྡད་དོ། །
NUM 9:19 གལ་སྲིད་སྤྲིན་གུར་མཆོག་གི་སྟེང་དུ་ཉིན་མང་པོར་བཞུགས་པའི་ཚེ། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་བཀའ་བརྩིས་ནས་ལམ་དུ་མི་ཆས་པ་ཡིན་ནོ། །
NUM 9:20 སྐབས་འགར་སྤྲིན་ཉིན་ཁ་ཤས་ཙམ་ལ་གུར་མཆོག་གི་སྟེང་དུ་བཞུགས་པ་དང་། དེ་དག་གིས་དཀོན་མཆོག་ཡ་ཝཱེའི་བཀའ་བཞིན་སྒར་བཏབ་ཅིང་། ཡང་དཀོན་མཆོག་ཡ་ཝཱེའི་བཀའ་བཞིན་ལམ་དུ་ཆས་པའོ། །
NUM 9:21 སྐབས་འགར་སྤྲིན་མཚན་མོ་ནས་ཞོགས་པའི་བར་དུ་གནས་པ་དང་། ཞོགས་པར་སྤྲིན་བཏེགས་པ་ཙམ་དུ་ཁོ་རྣམས་ལམ་དུ་ཆས་ཤིང་། སྐབས་འགར་སྤྲིན་ཉིན་མོ་ནས་མཚན་མོའི་བར་དུ་གནས་པ་དང་། སྤྲིན་ཡར་བཏེགས་པའི་ཚེ་དེ་དག་ལམ་དུ་ཆས་པའོ། །
NUM 9:22 དེ་ནི་ཉིན་གཉིས་སམ་ཟླ་བ་གཅིག་གམ་ཡང་ན་ལོ་གཅིག་གི་རིང་། སྤྲིན་གུར་མཆོག་གི་སྟེང་དུ་བཞུགས་པའི་ཚེ། ཡེས་ར་ཨེལ་པ་རྣམས་ཀྱིས་སྒར་བཏབ་ནས་བསྡད་ཅིང་ལམ་དུ་མ་ཆས་པ་དང་། སྤྲིན་ཡར་བཏེགས་པའི་ཚེ་ཁོ་རྣམས་ལམ་དུ་ཆས་སོ། །
NUM 9:23 དེ་རྣམས་ཀྱིས་དཀོན་མཆོག་ཡ་ཝཱེའི་བཀའ་བཞིན་སྒར་བཏབ་པ་དང་། ཡང་དཀོན་མཆོག་ཡ་ཝཱེའི་བཀའ་བཞིན་ལམ་དུ་ཆས་ཤིང་། དེ་དག་གིས་དཀོན་མཆོག་ཡ་ཝཱེའི་བཀའ་སྟེ་ཁོང་གིས་མོ་ཤེ་བརྒྱུད་ནས་གསུངས་པའི་བཀའ་བརྩིས་པའོ། །
NUM 10:1 དེ་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 10:2 ཁྱོད་ཀྱིས་དངུལ་གྱི་དུང་གཉིས་ཐོ་བས་བརྡུངས་ནས་བཟོ་དགོས་པ་དང་། དེ་ནི་མི་ཚོགས་ལ་འབོད་བརྡ་གཏོང་བ་དང་སྒར་ཕབ་ནས་ལམ་ལ་ཆས་སུ་འཇུག་པར་སྤྱད་ཆོག
NUM 10:3 དུང་དེ་གཉིས་ཀ་བུས་ཚེ། མི་ཚོགས་ཡོངས་རྫོགས་ཁྱོད་ཀྱི་གམ་དུ་མཇལ་འཕྲད་གུར་མཆོག་གི་སྒོ་ཁ་རུ་འཛོམ་དགོས།
NUM 10:4 གལ་སྲིད་དུང་གཅིག་ཁོ་ན་བུས་ཚེ། འགོ་དཔོན་རྣམས་ཏེ་ཡེས་ར་ཨེལ་གྱི་སྟོང་དཔོན་ཐམས་ཅད་ཁྱོད་ཀྱི་དྲུང་དུ་འཛོམ་དགོས།
NUM 10:5 ཁྱོད་ཅག་གིས་དུང་སྐད་ཆེན་པོར་བུས་ཚེ། ཤར་ཕྱོགས་སུ་ཡོད་པའི་སྒར་ཐམས་ཅད་ལམ་དུ་ཆས་དགོས།
NUM 10:6 ཁྱོད་ཅག་གིས་དུང་སྐད་ཆེན་པོ་ལན་གཉིས་པར་བུས་པ་ན། ལྷོ་ཕྱོགས་སུ་ཡོད་པའི་སྒར་ཐམས་ཅད་ལམ་དུ་ཆས་དགོས། སྒར་རྣམས་ལམ་ལ་ཆས་པར་དུང་སྐད་ཆེན་པོར་འབུད་དགོས།
NUM 10:7 འོན་ཀྱང་མི་ཚོགས་བསྡུ་བའི་དུས་སུ་ཁྱོད་ཅག་གིས་དུང་འབུད་དགོས་ཀྱང་དེ་སྐད་ཆེན་པོར་འབུད་མི་དགོས།
NUM 10:8 ཨ་རོན་གྱི་བུ་རྒྱུད་དེ་མཆོད་དཔོན་རྣམས་ཀྱིས་དུང་འབུད་དགོས་པ་དང་། དེ་ནི་ཁྱོད་རྣམས་མི་རབས་ནས་མི་རབས་བར་གྱི་དུས་གཏན་གྱི་སྒྲིག་ཁྲིམས་ཡིན་ནོ། །
NUM 10:9 ཁྱོད་ཅག་གིས་ཡུལ་དེར་ཁྱོད་རྣམས་ལ་གཉའ་གནོན་བྱེད་པའི་དགྲ་དང་འཐབ་པའི་སྐབས་སུ། དུང་སྐད་ཆེན་པོར་བུས་དང་། ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེའི་སྤྱན་སྔར་ཐུགས་སུ་དྲན་པ་དང་། ཁྱོད་རྣམས་ཀྱི་དགྲ་དག་ལས་ཀྱང་ཐར་བར་མཛད་པར་འགྱུར།
NUM 10:10 དེ་མིན་ཁྱོད་རྣམས་སྐྱིད་པའི་ཉིན་མོ་དང་གཏན་ལ་ཁེལ་བའི་དུས་ཆེན་རྣམས་དང་། གནམ་གང་བཅས་ཀྱི་དུས་སུ། ཁྱོད་ཅག་གིས་སྦྱིན་སྲེག་དང་ཞི་བདེའི་མཆོད་པ་རྣམས་འབུལ་དུས་སུ་དུང་འབུད་དགོས། དེ་ཐམས་ཅད་ཁྱོད་རྣམས་ཀྱི་དཀོན་མཆོག་གི་སྤྱན་སྔར་ཁྱོད་ཅག་ལ་དྲན་རྟེན་དུ་འགྱུར་ཞིང་། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞེས་གསུངས་སོ། །
NUM 10:11 ལོ་གཉིས་པའི་ཟླ་གཉིས་པའི་ཚེས་ཉི་ཤུ་ཉིན་ལ། སྤྲིན་དཔང་པོའི་གུར་མཆོག་གི་སྟེང་ནས་ཡར་བཏེགས་པའི་དུས་སུ།
NUM 10:12 ཡེས་ར་ཨེལ་པ་རྣམས་སི་ནཱ་དབེན་སྟོང་ནས་ལམ་དུ་ཆས་པ་ན། སྤྲིན་ཕཱ་རན་དབེན་སྟོང་དུ་བཞུགས་སོ། །
NUM 10:13 དེ་ནི་དཀོན་མཆོག་ཡ་ཝཱེས་མོ་ཤེ་བརྒྱུད་ནས་གནང་བའི་བཀའ་བཞིན་དུ་ཁོ་རྣམས་དང་པོར་ལམ་དུ་ཆས་པ་ཡིན།
NUM 10:14 ཡ་ཧུ་དཱ་པ་རྣམས་ཀྱི་སྒར་ཁའི་དར་ཆེན་ནི་རང་གི་དམག་དཔུང་བཞིན་ཐོག་མར་ལམ་དུ་ཆས་པ་དང་། དམག་དཔུང་དེའི་འགོ་གཙོ་ནི་ཨ་མི་ནཱ་དབ་ཀྱི་བུ་ནཱ་སོན་ཡིན་པ་དང་།
NUM 10:15 ཡེས་སི་ཀཱར་ཚོ་པའི་དམག་དཔུང་གི་འགོ་གཙོ་ནི་ཙུ་ཨར་གྱི་བུ་ནེ་ཐན་ཨེལ་ཡིན་ལ།
NUM 10:16 ཟེ་བུ་ལུན་ཚོ་པའི་དམག་དཔུང་གི་འགོ་གཙོ་ནི་ཧེ་ལོན་གྱི་བུ་ཨེ་ལི་ཨབ་ཡིན་ནོ། །
NUM 10:17 གུར་མཆོག་མར་ཕབ་རྗེས། གེར་ཤོན་གྱི་བུ་རྒྱུད་དང་མཱ་རཱ་རེའེ་ཡི་བུ་རྒྱུད་རྣམས་ཀྱིས་གུར་མཆོག་ཁུར་ནས་ལམ་དུ་ཆས་པའོ། །
NUM 10:18 རུ་བེན་གྱི་སྒར་ཁའི་དར་ཆེན་ནི་རང་གི་དམག་དཔུང་བཞིན་ལམ་དུ་ཆས་པ་དང་། དེའི་དམག་དཔུང་གི་འགོ་གཙོ་ནི་ཤེ་དེ་ཨུར་གྱི་བུ་ཨེ་ལི་ཚུར་ཡིན་པ་དང་།
NUM 10:19 སི་མུ་ཨོན་ཚོ་པའི་འགོ་གཙོ་ནི་ཙུ་རེ་ཤད་དཱ་ཨིའི་བུ་ཤེ་ལུ་མེ་ཨེལ་ཡིན་ལ།
NUM 10:20 གཱ་རྡུ་ཚོ་པའི་དམག་དཔུང་གི་འགོ་གཙོ་ནི་དི་ཨོ་ཨེལ་གྱི་བུ་ཨེལ་ཡཱ་སབ་ཡིན་ནོ། །
NUM 10:21 དེ་ནས་ཀོ་ཧད་པ་རྣམས་ཀྱིས་རྫས་དམ་པ་རྣམས་ཁུར་ནས་ལམ་དུ་ཆས་ཤིང་། དེ་དག་མ་འབྱོར་བའི་སྔོན་དུ་སྔར་ཆས་པ་རྣམས་ཀྱིས་གུར་མཆོག་ཕུབ་ཟིན་པའོ། །
NUM 10:22 ཨེ་ཕཱར་ཡིམ་པ་རྣམས་ཀྱི་སྒར་ཁའི་དར་ཆེན་ནི་རང་གི་དམག་དཔུང་བཞིན་ལམ་དུ་ཆས་པ་དང་། དེའི་དམག་དཔུང་གི་འགོ་གཙོ་ནི་ཨམ་མེ་ཧུད་ཀྱི་བུ་ཨེ་ལི་ཤ་མཱ་ཡིན་པ་དང་།
NUM 10:23 མཱ་ན་ཤེ་ཚོ་པའི་དམག་དཔུང་གི་འགོ་གཙོ་ནི་ཕེ་དཱ་ཚུར་གྱི་བུ་གམ་ལི་ཨེལ་ཡིན་ལ།
NUM 10:24 པེན་ཡཱ་མེན་ཚོ་པའི་དམག་དཔུང་གི་འགོ་གཙོ་ནི་གིད་ཨོ་ནཱའི་བུ་ཨ་བི་ཏན་ཡིན་ནོ། །
NUM 10:25 མཇུག་མཐར་དཱན་གྱི་བུ་རྒྱུད་རྣམས་ཀྱི་སྒར་ཁའི་དར་ཆེན་ནི་སྒར་ཐམས་ཅད་ཀྱི་རྒྱབ་སྲུང་བྱས་ནས། རང་གི་དམག་དཔུང་བཞིན་ལམ་དུ་ཆས་པ་དང་། དེའི་དམག་དཔུང་གི་འགོ་གཙོ་ནི་ཨམ་མེ་ཤད་ད་ཨི་ཡི་བུ་ཨ་ཧི་ཨེ་ཟེར་ཡིན་པ་དང་།
NUM 10:26 ཨ་ཤེར་ཚོ་པའི་དམག་དཔུང་གི་འགོ་གཙོ་ནི་ཨོག་རན་གྱི་བུ་ཕཱ་གེ་ཨེལ་ཡིན་ལ།
NUM 10:27 ནཱབ་ཐ་ལི་ཚོ་པའི་དམག་དཔུང་གི་འགོ་གཙོ་ནི་ཨེ་ནན་གྱི་བུ་ཨ་ཧི་རཱ་ཡིན་ནོ། །
NUM 10:28 དེ་ནི་ཡེས་ར་ཨེལ་པ་རྣམས་ལམ་དུ་ཆས་པའི་སྐབས་སུ། རང་རང་གི་དམག་དཔུང་བཞིན་ལམ་དུ་ཆས་པའི་གོ་རིམ་ཡིན་ནོ། །
NUM 10:29 མོ་ཤེ་ཡིས་རང་གི་སྒྱུག་པོ་སྟེ་མིད༌ཡཱན་པ་རུའུ་ཨེལ་གྱི་བུ་ཧོ་པཱབ་ལ་འདི་ལྟར། རང་ཅག་རྣམས་དཀོན་མཆོག་ཡ་ཝཱེས་ངས་ཁྱོད་རྣམས་ལ་གནང་བར་བྱའོ་ཞེས་གསུངས་པའི་ཡུལ་དེར་འགྲོ་བར་བྱ། ད་ལྟ་ཁྱེད་རང་ང་ཚོ་དང་མཉམ་དུ་འགྲོ་བར་ཞུ། ང་ཚོས་ཁྱེད་ལ་དྲིན་གཟོ་བར་བྱ། གང་ལ་ཞེ་ན། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་བདེ་སྐྱིད་ཀྱི་ཞལ་བཞེས་གནང་ཡོད་པས་སོ་ཞེས་སྨྲས་པ་ལ།
NUM 10:30 ཧོ་པཱབ་ན་རེ། ང་རང་མི་འགྲོ། ང་ནི་རང་གི་ཡུལ་དང་གཉེན་ཉེའི་གམ་དུ་འགྲོ་བར་བྱ་ཞེས་སྨྲས་སོ། །
NUM 10:31 དེ་ནས་མོ་ཤེ་ཡིས་འདི་ལྟར། ཁྱེད་རང་ང་ཚོ་དང་མི་འབྲལ་བར་ཞུ། ང་ཚོས་དབེན་སྟོང་དུ་གུར་གང་ནས་ཕུབ་དགོས་པ་ཁྱེད་ཀྱིས་ཤེས་པས། ཁྱེད་ནི་ང་ཚོའི་མིག་ལྟ་བུ་ཡིན།
NUM 10:32 གལ་སྲིད་ཁྱེད་རང་ང་ཚོ་དང་མཉམ་དུ་སོང་ཚེ། ཕྱིས་སུ་དཀོན་མཆོག་ཡ་ཝཱེས་ང་ཚོར་ལེགས་པོ་གང་ཞིག་གནང་བ་ཡིན་ན། ང་ཚོས་ཀྱང་དེ་ཡིས་ཁྱེད་ལ་དྲིན་གཟོ་བར་བྱའོ་ཞེས་སྨྲས་སོ། །
NUM 10:33 ཡེས་ར་ཨེལ་པ་རྣམས་དཀོན་མཆོག་ཡ་ཝཱེའི་རི་ནས་ཆས་ཏེ། ཉིན་གསུམ་གྱི་ལམ་དུ་སོང་བ་དང་། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་ཉིན་གསུམ་གྱི་ལམ་དུ་བསྐྱོད་ཅིང་ཁོ་རྣམས་ལ་ངལ་གསོ་བའི་གནས་ཤིག་བཙལ་ཏོ། །
NUM 10:34 ཁོ་རྣམས་ཀྱིས་སྒར་མར་ཕབ་སྟེ་ལམ་དུ་ཆས་པའི་དུས་སུ། ཉིན་མོ་དཀོན་མཆོག་ཡ་ཝཱེའི་སྤྲིན་ཕུང་ནི་དེ་དག་གི་སྟེང་དུ་བཞུགས་པའོ། །
NUM 10:35 ཤུར་སྒམ་ཆས་པའི་ཚེ་ན། མོ་ཤེ་ཡིས་འདི་ལྟར། ཀྱེ་ཀྱེ་དཀོན་མཆོག་ཡ་ཝཱེ་བཞེངས་སུ་གསོལ། ། ཁྱེད་ཀྱི་དགྲ་རྣམས་ཕྱོགས་བཞིར་འཐོར་བ་དང་། ། ཁྱེད་ལ་སྡང་མཁན་ཁྱེད་དྲུང་འབྲོ་བར་ཤོག ། ཅེས་ཞུས་པ་དང་།
NUM 10:36 ཤུར་སྒམ་བཞུགས་པའི་ཚེ། ཁོས་འདི་ལྟར། ཀྱེ་ཀྱེ་དཀོན་མཆོག་ཡ་ཝཱེ་ཁྱེད་ཉིད་ཡང་བསྐྱར་ཕེབས་པར་ཤོག ། ཡེས་ར་ཨེལ་པ་སྟོང་ཕྲག་མང་པོའི་དཀྱིལ་དུ་ཕེབས་པར་ཞུ། ། ཞེས་ཞུས་སོ། །
NUM 11:1 དེ་ཡང་མི་ཚོགས་ཀྱིས་སྡུག་ཡུས་བཏོན་ཞིང་སྐད་ངན་དཀོན་མཆོག་ཡ་ཝཱེའི་སྙན་ལམ་དུ་སླེབས་པ་དང་། དཀོན་མཆོག་ཡ་ཝཱེས་དེ་གསན་ནས་ཐུགས་ཁྲོས་པར་གྱུར། དཀོན་མཆོག་ཡ་ཝཱེའི་མེ་ནི་དེ་དག་གི་ཁྲོད་དུ་འབར་ཏེ་སྒར་གྱི་མཐའ་རྣམས་འགེམས་པའོ། །
NUM 11:2 མི་ཚོགས་ཀྱིས་མོ་ཤེ་ལ་ཞུ་འབོད་བྱས་པ་དང་། མོ་ཤེ་ཡིས་དཀོན་མཆོག་ཡ་ཝཱེ་ལ་གསོལ་བ་བཏབ་ཅིང་མེ་ཞི་བར་གྱུར་ཏེ།
NUM 11:3 དེ་དག་གི་ཁྲོད་དུ་དཀོན་མཆོག་ཡ་ཝཱེའི་མེ་འབར་བ་ཡིན་པས་ཡུལ་དེའི་མིང་ལ་ཐབ་ཨེ་རཱ་ཞེས་བཏགས་སོ། །
NUM 11:4 དེ་དག་ཁྲོད་ཀྱི་རིགས་རྒྱུད་འདྲེས་མ་རྣམས་ཀྱིས་འདོད་རྔམ་བསྐྱེད་ཅིང་། ཐ་ན་ཡེས་ར་ཨེལ་པ་རྣམས་ཀྱིས་ཀྱང་ངུ་བཞིན་དུ། སུས་ང་ཚོ་ལ་ཁ་ཟས་སུ་ཤ་སྟེར་བར་འགྱུར་རམ།
NUM 11:5 ང་ཚོས་ཨེ་ཅིབ་ཡུལ་དུ་ཉ་དང་། ཁི་ར་དང་། ག་གོན་དང་། རི་སྒོག་དང་། ཙོང་དང་། སྒོག་པ་བཅས་ནི་རིན་མི་དགོས་པར་ཟ་རྒྱུ་ཡོད་པ་དྲན་བྱུང་།
NUM 11:6 ད་ནི་ངེད་རྣམས་ཡི་ག་ཆད་པ་སྟེ། མན་ནཱ་ལས་གཞན་ཅི་ཡང་མཐོང་རྒྱུ་མི་འདུག་ཅེས་སྨྲས་སོ། །
NUM 11:7 མན་ནཱ་དེ་ནི་སྔོ་སྨན་འུ་སུའི་འབྲུ་གུ་ལྟར་ཡིན་ཞིང་། པེ་དེལ་ཡོན་ཞེས་པའི་ཐང་ཆུ་དང་མཚུངས་པའོ། །
NUM 11:8 མི་ཚོགས་མཐའ་འཁོར་དུ་སོང་ནས་མན་ནཱ་བསྡུས་པ་དང་རང་འཐག་གིས་བཏགས་པའམ་གཏུན་ཁུང་དུ་བརྡུངས་ནས། རྫ་ཁོག་ནང་དུ་བཙོས་པའམ་བག་ལེབ་བཟོས་ཤིང་། དེའི་བྲོ་བ་ནི་བག་ལེབ་སྣུམ་བཙོས་དང་འདྲ་ལ།
NUM 11:9 མཚན་མོར་སྒར་གྱི་སྟེང་དུ་ཟིལ་པ་ཆགས་པའི་ཚེ་མན་ནཱ་ཡང་བབས་སོ། །
NUM 11:10 མོ་ཤེ་ཡིས་མི་རྣམས་ཀྱིས་ཁྱིམ་རྒྱུད་སོ་སོའི་གུར་སྒོ་ནས་ངུ་འབོད་བྱེད་པ་ཐོས་ཤིང་། དཀོན་མཆོག་ཡ་ཝཱེ་ཐུགས་རབ་ཏུ་ཁྲོས་པ་དང་། མོ་ཤེ་ཡང་མི་དགའ་བར་གྱུར་ཏོ། །
NUM 11:11 མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར། ཁྱེད་ཀྱིས་ཉིད་ཀྱི་ཞབས་ཕྱི་སྡུག་ལ་སྦྱར་དོན་ཅི། ཁྱེད་ཀྱི་སྤྱན་སྔར་བདག་ལ་ཐུགས་རྗེ་མ་ཐོབ་པ་ཅི། མི་ཚོགས་ཐམས་ཅད་ལ་བདག་སྐྱོང་བྱེད་པའི་ཁུར་པོ་ང་ལ་བཀལ་བ་ཅི།
NUM 11:12 མི་ཚོགས་འདི་ནི་ངའི་མངལ་དུ་སྦྲུམས་ནས་ང་ལས་སྐྱེས་པ་ཡིན་ནམ། ཁྱེད་ཀྱིས་ང་ལ་འདི་སྐད་དུ། བུ་སྙོར་མས་གསོས་པའི་ཕྲུ་གུ་ལྟར་དེ་དག་ངའི་པང་ལ་བཟུང་ནས། ཁྱེད་ཀྱིས་ཁོ་རྣམས་ཀྱི་ཕ་མེས་ལ་གནང་བར་མནའ་བཞེས་པའི་ཡུལ་དེར་ཁྱེར་ཅིག་ཅེས་གསུངས་པ་ཡིན་ནམ།
NUM 11:13 ངས་མི་དེ་ཐམས་ཅད་ཀྱི་ཁ་ཟས་སུ་ཤ་གང་ནས་རྙེད་པར་འགྱུར་རམ། དེ་དག་གིས་ངུ་འབོད་བྱེད་ཀྱིན་ང་ལ་ཁྱོད་ཀྱིས་ང་ཚོར་བཟའ་རྒྱུའི་ཤ་བྱིན་ཅིག་ཅེས་སྨྲའོ། །
NUM 11:14 མི་ཚོགས་འདིར་བདག་སྐྱོང་བྱེད་པའི་འགན་ཁུར་ནི་ལྗིད་དྲགས་པས། ང་གཅིག་པུས་དེ་འཁུར་མི་ནུས་སོ། །
NUM 11:15 ཁྱེད་ཀྱིས་ང་ལ་འདི་ལྟར་མཛད་པ་ཡིན་པས། གལ་སྲིད་ཁྱེད་ཀྱི་སྤྱན་སྔར་བདག་ལ་ཐུགས་རྗེ་ཐོབ་པ་ཡིན་ན། ངས་རང་གི་སྡུག་བསྔལ་མི་མཐོང་བའི་ཆེད་དུ་ཁྱེད་ཀྱིས་དངོས་སུ་ང་རང་གསོད་པར་མཛོད་ཅེས་ཞུས་སོ། །
NUM 11:16 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཡེས་ར་ཨེལ་གྱི་རྒན་པོ་རྣམས་ལས་བདག་ལ་མི་བདུན་ཅུ་སྟེ། ཁྱོད་ཀྱིས་ངོ་ཤེས་པའི་མི་ཚོགས་ཁྲོད་ཀྱི་རྒན་པོ་དང་འགོ་དཔོན་རྣམས་ཁྱོད་དང་མཉམ་དུ་འགྲེང་བར་མཇལ་འཕྲད་གུར་མཆོག་གི་མདུན་དུ་ཁྲིད་ཤོག
NUM 11:17 བདག་ཡུལ་དེར་མར་འོངས་ནས་ཁྱོད་དང་གླེང་མོལ་བྱེད་ཅིང་། ཁྱོད་ཀྱི་སྟེང་དུ་ཡོད་པའི་ཐུགས་ཉིད་ནི་དེ་དག་གི་སྟེང་ལའང་འཇོག་པར་བྱ། མི་ཚོགས་ལ་བདག་སྐྱོང་བྱེད་པའི་འགན་ཁྱོད་གཅིག་པུས་འཁུར་མི་དགོས་པར་དེ་དག་གིས་ཁྱོད་དང་མཉམ་དུ་འཁུར་བར་བྱའོ། །
NUM 11:18 ཁྱོད་ཀྱིས་མི་ཚོགས་ལ་འདི་ལྟར། སང་ཉིན་ཤ་བཟའ་བའི་ཕྱིར་དུ་ཁྱོད་ཅག་གིས་རང་ཉིད་དམ་པར་སྲུངས་ཤིག ཅི་ལ་ཞེ་ན། ཁྱོད་ཅག་གིས་ངུ་འབོད་བྱེད་ཀྱིན་དཀོན་མཆོག་ཡ་ཝཱེའི་སྙན་ལམ་དུ། སུ་ཞིག་གིས་ངེད་རྣམས་ལ་ཤ་སྟེར་རམ། ངེད་རྣམས་ཨེ་ཅིབ་ཡུལ་དུ་ཡོད་དུས་ཅི་འདྲ་སྐྱིད་ཨང་ཞེས་ཞུས་པས། དཀོན་མཆོག་ཡ་ཝཱེས་ཁྱོད་ཅག་ལ་བཟའ་རྒྱུའི་ཤ་གནང་ངེས་ཡིན།
NUM 11:19 དེ་ནི་ཁྱོད་ཅག་གིས་ཉིན་གཅིག་དང་གཉིས་སམ། ཡང་ན་ཉིན་ལྔ་དང་བཅུའམ། ཡང་ན་ཉིན་ཉི་ཤུ་ཙམ་ལ་བཟའ་བ་མ་ཡིན་པར།
NUM 11:20 ཁྱོད་ཅག་གིས་ཟླ་ཧྲིལ་པོ་གཅིག་ལ་བཟའ་བ་དང་། ཤ་ནི་ཁྱོད་ཚོའི་སྣ་ཁུང་ལས་འཐོན་ཞིང་དེ་ལ་ཞེ་མེར་བའི་བར་དུ་བཟའ་བར་འགྱུར། ཅི་ལ་ཞེ་ན། ཁྱོད་ཅག་གིས་ཁྱོད་ཚོའི་དཀྱིལ་དུ་བཞུགས་པའི་དཀོན་མཆོག་ཡ་ཝཱེ་སྣང་མེད་དུ་བསྐྱུར་ཏེ་ཁོང་གི་དྲུང་དུ་ངུ་འབོད་བྱེད་ཀྱིན། ངེད་ཅག་ཅིའི་ཕྱིར་ཨེ་ཅིབ་ཡུལ་ནས་ཐོན་པ་ཡིན་ནམ་ཞེས་སྨྲས་པའི་ཕྱིར་རོ་ཞེས་སྨྲོས་ཤིག་གསུངས་སོ། །
NUM 11:21 དེ་ནས་མོ་ཤེ་ཡིས་འདི་ལྟར། ང་དང་མཉམ་དུ་གནས་པའི་མི་ཚོགས་འདི་ལས་རྐང་ཐང་ལ་སྐྱོད་མཁན་འབུམ་དྲུག་ཡོད་ཀྱང་། ཁྱེད་ཀྱིས་ད་དུང་བདག་གིས་དེ་དག་ལ་ཟླ་གཅིག་གི་རིང་ལ་བཟའ་རྒྱུའི་ཤ་གནང་བར་བྱ་ཞེས་གསུངས་པའོ། །
NUM 11:22 ར་ལུག་གི་ཁྱུ་དང་བ་ཁྱུ་ཐམས་ཅད་བཤས་ན་དེ་དག་གི་བཟའ་རྒྱུར་འདང་བ་ཡིན་ནམ། ཡང་ན་རྒྱ་མཚོ་ནང་གི་ཉ་ཐམས་ཅད་བསྡུས་ན་དེ་དག་གི་བཟའ་རྒྱུར་འདང་བ་ཡིན་ཞེས་ཞུས་ཤིང་།
NUM 11:23 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཡ་ཝཱེའི་ལག་ངར་ཇེ་ཐུང་དུ་སོང་བ་ཡིན་ནམ ། ད་ལྟ་ངས་སྨྲས་པ་བཞིན་དུ་འབྱུང་མིན་ཁྱོད་ཀྱིས་མཐོང་བར་འགྱུར་ཞེས་གསུངས་སོ། །
NUM 11:24 དེ་ནས་མོ་ཤེ་ཕྱི་རོལ་ཏུ་སོང་སྟེ་དཀོན་མཆོག་ཡ་ཝཱེས་གསུངས་པའི་བཀའ་མི་ཚོགས་ལ་སྨྲས་པ་དང་། ཡང་མི་ཚོགས་ཁྲོད་ཀྱི་རྒན་པོ་རྣམས་ལས་མི་བདུན་ཅུ་བསྡུས་ནས་མཇལ་འཕྲད་གུར་མཆོག་གི་མཐའ་འཁོར་ལ་འགྲེང་དུ་བཅུག
NUM 11:25 དེ་ནས་དཀོན་མཆོག་ཡ་ཝཱེ་སྤྲིན་གྱི་ནང་ནས་མར་ཕེབས་ཏེ་མོ་ཤེ་ལ་གསུང་གླེང་མཛད་པ་དང་། ཁོའི་སྟེང་དུ་ཡོད་པའི་ཐུགས་ཉིད་རྒན་པོ་བདུན་ཅུའི་སྟེང་དུ་བཞག་པ་ལ། ཐུགས་ཉིད་དེ་དག་གི་སྟེང་དུ་བཞུགས་པའི་དུས་སུ་དེ་དག་གིས་ལུང་བསྟན་གནང་བ་ཡིན་མོད། འོན་ཀྱང་དེའི་རྗེས་སུ་ཡང་བསྐྱར་ལུང་མ་བསྟན་ཏོ། །
NUM 11:26 སྐབས་དེར་མི་གཉིས་ད་དུང་སྒར་གྱི་ནང་དུ་ལུས་ཡོད་ཅིང་། གཅིག་གི་མིང་ལ་ཨེལ་དཱད་དང་ཅིག་ཤོས་ཀྱི་མིང་ལ་མེ་དཱད་ཟེར་བ་དང་། ཐུགས་ཉིད་ནི་དེ་གཉིས་ཀྱི་སྟེང་དུའང་བཞུགས། དེ་གཉིས་ཀའང་རྒན་པོ་རྣམས་ཀྱི་གྲས་སུ་ཡོད་ན་ཡང་ཁོ་གཉིས་མཇལ་འཕྲད་གུར་མཆོག་ཡོད་སར་མ་སོང་ལ། དེ་ཚོས་སྒར་གྱི་ནང་དུ་ལུང་བསྟན་གནང་།
NUM 11:27 དེ་ནས་གཞོན་ནུ་ཞིག་རྒྱུགས་འོངས་ནས་མོ་ཤེ་ལ། ཨེལ་དཱད་དང་མེ་དཱད་གཉིས་ཀྱིས་སྒར་གྱི་ནང་དུ་ལུང་སྟོན་བཞིན་འདུག་ཅེས་སྨྲས་པ་ལ།
NUM 11:28 མོ་ཤེའི་ཞབས་ཕྱི་དང་ནུན་གྱི་བུ་ཡོ་ཤུ་ཨ་སྟེ་མོ་ཤེ་ཡི་ལག་རོགས་དར་མ་དེ་ན་རེ། ང་ཡི་ཇོ་བོ་མོ་ཤེ་ལགས། ཁྱེད་ཀྱིས་དེ་གཉིས་འགོག་པར་མཛོད་ཅེས་ཞུས་པ་ན།
NUM 11:29 མོ་ཤེ་ཡིས་དེ་ལ། ཁྱོད་ཀྱིས་བདག་གི་ཆེད་དུ་ཕྲག་དོག་བྱེད་དམ། དཀོན་མཆོག་ཡ་ཝཱེའི་མི་ཚོགས་ཐམས་ཅད་ལུང་སྟོན་པ་ཡིན་ན་ཅིས་མི་རུང་། དཀོན་མཆོག་ཡ་ཝཱེས་ཁོང་གི་ཐུགས་ཉིད་ནི་དེ་དག་གི་སྟེང་དུ་གནང་བར་ཤོག་ཅེས་སྨྲས་ཤིང་།
NUM 11:30 དེ་ནས་མོ་ཤེ་དང་ཡེས་ར་ཨེལ་གྱི་རྒན་པོ་རྣམས་སྒར་དུ་ཕྱིར་ལོག་གོ །
NUM 11:31 དཀོན་མཆོག་ཡ་ཝཱེའི་དྲུང་ནས་རླུང་ཞིག་བྱུང་སྟེ། རྒྱ་མཚོའི་ངོས་ནས་སྲེག་པ་ཁུར་འོངས་ཤིང་སྒར་གྱི་ས་ལ་བབས་པ་དང་། སྲེག་པས་སྒར་བསྐོར་ཏེ་ཚུར་ལ་ཉིན་གཅིག་གི་ལམ་ཐག་དང་ཕར་ལ་ཉིན་གཅིག་གི་ལམ་ཐག་ཡོད་ཅིང་། ས་ངོས་ནས་མཐོ་ཚད་ཁྲུ་གཉིས་ཙམ་ལ་སླེབས་པའོ། །
NUM 11:32 མི་ཚོགས་ལངས་ནས་ཉིན་གང་དང་མཚན་གང་། དེའི་ཕྱི་ཉིན་ཉིན་གང་བཅས་ལ་སྲེག་པ་བསྡུས་ཤིང་། ཉུང་མཐའ་ཡང་ཁལ་བཅུ་བསྡུས་ནས་སྒར་གྱི་ཕྱོགས་བཞིར་བཀྲམས།
NUM 11:33 ཤ་ནི་དེ་དག་གི་སོ་བར་དུ་ཡོད་ཅིང་ད་དུང་ལྡད་མ་ཚར་བའི་མཚམས་དེར། དཀོན་མཆོག་ཡ་ཝཱེའི་ཐུགས་ཁྲོ་མི་ཚོགས་ཀྱི་སྟེང་དུ་འབར་ཞིང་། ནད་ཡམས་དྲག་པོས་མི་ཚོགས་ལ་བརྡུངས་པའོ། །
NUM 11:34 དེའི་ཕྱིར་གནས་དེའི་མིང་ལ་ཀིབ་རོད་ཧད་ཐཱ་ཨ་ཝ་ཞེས་བཏགས། གང་ལ་ཞེ་ན། འདོད་རྔམ་བཅངས་པའི་མི་རྣམས་དེ་རུ་དུར་ལ་སྦས་པའི་ཕྱིར་རོ། །
NUM 11:35 དེ་ནས་མི་ཚོགས་ཀིབ་རོད་ཧད་ཐཱ་ཨ་ཝ་ནས་ལམ་དུ་ཆས་ཏེ་ཧ་ཚི་རོད་ཀྱི་ཕྱོགས་སུ་སོང་བ་དང་། ཧ་ཚི་རོད་དུ་བསྡད་དོ། །
NUM 12:1 དེ་ཡང་མོ་ཤེ་ཡིས་གུ་ཤའི་བུད་མེད་ཅིག་ཆུང་མར་བླངས་པས། གུ་ཤའི་བུད་མེད་དེའི་རྐྱེན་གྱིས་མིར་ཡམ་དང་ཨ་རོན་གཉིས་ཀྱིས་ཁོ་ལ་རྒོལ་གཏམ་བཏང་ཞིང་།
NUM 12:2 དེ་གཉིས་ན་རེ། དཀོན་མཆོག་ཡ་ཝཱེས་མོ་ཤེ་ཁོ་ན་བརྒྱུད་ནས་གསུང་གླེང་མཛད་པ་ཡིན་ནམ། ཁོང་གིས་ང་ཚོ་བརྒྱུད་ནས་ཀྱང་གསུང་གླེང་མཛད་པ་མ་ཡིན་ནམ་ཞེས་སྨྲས་པ་དཀོན་མཆོག་ཡ་ཝཱེས་གསན་ཏོ། །
NUM 12:3 ད་ལྟའི་ཆར་ཡང་མོ་ཤེ་ནི་ཤིན་ཏུ་ཁེངས་ཆུང་ཡིན་ཏེ། ས་སྟེང་གི་མི་ཐམས་ཅད་ལས་ཁེངས་ཆུང་ཡིན་ནོ། །
NUM 12:4 གློ་བུར་ཉིད་ལ་དཀོན་མཆོག་ཡ་ཝཱེས་མོ་ཤེ་དང་ཨ་རོན་དང་མིར་ཡམ་བཅས་ལ་འདི་སྐད་དུ། ཁྱོད་གསུམ་པོ་ཕྱི་རུ་ཐོན་ཏེ་མཇལ་འཕྲད་གུར་མཆོག་གི་རྩར་སོང་ཞིག་ཅེས་བཀའ་གནང་བས། ཁོ་གསུམ་པོ་ཕྱི་རོལ་ཏུ་ཐོན།
NUM 12:5 དེའི་ཚེ་དཀོན་མཆོག་ཡ་ཝཱེ་སྤྲིན་གྱི་ཀ་བ་ཞིག་གི་ནང་ནས་མར་ཕེབས་ཏེ་མཇལ་འཕྲད་གུར་མཆོག་གི་སྒོ་ཁར་བཞེངས་བསྡད་པ་དང་། ཨ་རོན་དང་མིར་ཡམ་གཉིས་བོས་པར་མཛད་པས། དེ་གཉིས་ཁོང་གི་ཉེ་སར་ཕྱིན་པ་ལ།
NUM 12:6 ཁོང་གིས་འདི་སྐད་དུ། ད་ཀོ་ཁྱོད་རྣམས་ང་ཡི་གཏམ་ལ་ཉོན། ། ཁྱོད་ཅག་ཁྲོད་དུ་ལུང་སྟོན་ཡོད་གྱུར་ན། ། ཡ་ཝཱེ་བདག་གིས་ཞལ་གཟིགས་བརྒྱུད་དེ་ནི། ། རང་ཉིད་ཁོ་ལ་མངོན་པར་བྱེད་པ་དང་། ། རྨི་ལམ་ཁྲོད་དུ་དེ་ལ་གཏམ་སྨྲ་ངེས། །
NUM 12:7 འོན་ཀྱང་བདག་གི་ཞབས་ཕྱི་མོ་ཤེ་ནི། ། དེ་ལྟར་མིན་གྱི་དེ་ལྟར་ག་ལ་ཡིན། ། ཁོ་ངའི་ཁྱིམ་མི་ཡོངས་སུ་བློ་སེམས་དཀར། །
NUM 12:8 བདག་གིས་ཁོ་ལ་དངོས་སུ་གཏམ་སྨྲ་ཞིང་། ། གབ་ཚིག་རྣམ་པས་མ་ཡིན་མངོན་སུམ་སྨྲ། ། ཁོས་ནི་ཡ་ཝཱེའི་གཟུགས་བརྙན་མཇལ་བ་འོ། ། ཁྱོད་ཅག་ང་ཡི་ཞབས་ཕྱི་མོ་ཤེ་ལ། ། རྒོལ་གཏམ་གཏོང་བར་མི་འཇིགས་རྒྱུ་མཚན་ཅི། ། ཞེས་གསུངས་ཤིང་།
NUM 12:9 དཀོན་མཆོག་ཡ་ཝཱེ་ཁོ་གཉིས་ལ་ཐུགས་ཁྲོས་ཏེ་ཕེབས་སོང་ངོ་། །
NUM 12:10 སྤྲིན་མཇལ་འཕྲད་གུར་མཆོག་གི་སྟེང་ནས་ཡར་དྲངས་པའི་མུ་ལ། ལྟོས་དང་། མིར་ཡམ་ལ་མཛེ་ནད་བྱུང་སྟེ་ཁ་བ་ལྟར་དཀར་པོར་གྱུར་ཅིང་། ཨ་རོན་ཁ་ཕྱིར་འཁོར་ནས་མིར་ཡམ་ལ་བལྟས་པ་དང་། ཀྱེ་ཧོ། ཁོ་མོར་མཛེ་ནད་བྱུང་བ་མཐོང་ངོ་། །
NUM 12:11 དེ་ནས་ཨ་རོན་གྱིས་མོ་ཤེ་ལ། ཇོ་བོ་ལགས། ང་ཚོ་བླུན་པོར་གྱུར་ནས་སྡིག་པ་བྱས་པའི་རྐྱེན་གྱིས་ང་ཚོར་སྡིག་པ་མི་འགེལ་བར་མཛོད་ཅིག
NUM 12:12 ཁྱེད་ཀྱིས་ཁོ་མོ་ཨ་མའི་མངལ་ནས་ཤ་ཕྱེད་ཀ་རུལ་ནས་ཐོན་པ་བཞིན་དང་། ཤི་ཚར་བ་ལྟར་མི་གནང་རོགས་ཞེས་ཞུས་སོ། །
NUM 12:13 དེ་ནས་མོ་ཤེ་ཡིས་དཀོན་མཆོག་ཡ་ཝཱེ་ལ་གསོལ་བ་བཏབ་པ་སྟེ། ཀྱེ་དཀོན་མཆོག་ལགས། ཁྱེད་ཀྱིས་ཁོ་མོ་གསོ་བར་མཛོད་ཅེས་ཞུས་པ་ལ།
NUM 12:14 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། གལ་སྲིད་ཁོ་མོའི་ཕ་ཡིས་དེའི་གདོང་ལ་མཆིལ་མ་གཏོར་ན། ཁོ་མོ་ཉིན་བདུན་གྱི་རིང་ལ་ངོ་ཚར་སྦྱར་བ་མ་ཡིན་ནམ། ད་ནི་ཁོ་མོ་ཉིན་བདུན་གྱི་རིང་ལ་སྒར་གྱི་ཕྱི་རོལ་ཏུ་འགོག་དགོས། དེའི་རྗེས་སུ་ཕྱིར་ཡོང་ཆོག་ཅེས་གསུངས་སོ། །
NUM 12:15 དེ་ནས་མིར་ཡམ་སྒར་གྱི་ཕྱི་རོལ་ཏུ་ཉིན་བདུན་གྱི་རིང་ལ་བཀག་ཅིང་། མིར་ཡམ་ཕྱིར་ཁྲིད་ཡོང་བའི་བར་དུ་མི་ཚོགས་ལམ་དུ་མ་ཆས་སོ། །
NUM 12:16 དེའི་རྗེས་སུ་མི་ཚོགས་ཧ་ཚི་རོད་ནས་ལམ་དུ་ཆས་པ་དང་། ཕཱ་རན་ཞེས་པའི་དབེན་སྟོང་ནས་སྒར་བཏབ་བོ། །
NUM 13:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 13:2 ཁྱོད་ཀྱིས་ངས་ཡེས་ར་ཨེལ་པ་རྣམས་ལ་སྦྱིན་པའི་ཀ་ན་ཨན་ཡུལ་དུ་མྱུལ་མ་ཐོངས་ཤིག ཕ་མེས་རྣམས་ཀྱི་ཚོ་པ་བཞིན་དུ་ཚོ་པ་རེ་ནས་མི་རེ་གཏོང་བ་དང་། རེ་རེ་བཞིན་འགོ་དཔོན་ཡིན་དགོས་ཞེས་བཀའ་གནང་ངོ་། །
NUM 13:3 དེར་བརྟེན་མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ། ཕཱ་རན་དབེན་སྟོང་ནས་ཁོ་རྣམས་བཏང་བ་དང་། དེ་དག་ཐམས་ཅད་ཡེས་ར་ཨེལ་པ་རྣམས་ཀྱི་འགོ་དཔོན་ཡིན་པའོ། །
NUM 13:4 དེ་དག་གི་མིང་ནི་འདི་ལྟ་སྟེ། རུ་བེན་ཚོ་པ་ནས་ཟག་ཀུར་གྱི་བུ་ཤཱ་མུ་ཨ་དང་།
NUM 13:5 སི་མུ་ཨོན་ཚོ་པ་ནས་ཧོ་རིའི་བུ་ཤཱ་ཕད་དང་།
NUM 13:6 ཡ་ཧུ་དཱ་ཚོ་པ་ནས་ཡེ་ཕུན་ནེའི་བུ་ཀཱ་ལེབ་དང་།
NUM 13:7 ཡེས་སི་ཀཱར་ཚོ་པ་ནས་ཡོ་སེབ་ཀྱི་བུ་ཡི་གལ་དང་།
NUM 13:8 ཨེ་ཕཱར་ཡིམ་ཚོ་པ་ནས་ནུན་གྱི་བུ་ཧོ་ཤེ་ཨ་དང་།
NUM 13:9 པེན་ཡཱ་མེན་ཚོ་པ་ནས་རཱ་ཕུའི་བུ་ཕལ་ཏི་དང་།
NUM 13:10 ཟེ་བུ་ལུན་ཚོ་པ་ནས་སོ་དིའི་བུ་གད་དི་ཨེལ་དང་།
NUM 13:11 ཡོ་སེབ་ཚོ་པ་སྟེ་མཱ་ན་ཤེ་ཚོ་པ་ནས་སུ་སེའི་བུ་གད་དི་དང་།
NUM 13:12 དཱན་ཚོ་པ་ནས་གཱ་མལ་ལིའི་བུ་ཨམ་མེ་ཨེལ་དང་།
NUM 13:13 ཨ་ཤེར་ཚོ་པ་ནས་མེའ་ཀཱ་ཨེལ་གྱི་བུ་སེ་ཐུར་དང་།
NUM 13:14 ནཱབ་ཐ་ལི་ཚོ་པ་ནས་ཝོ་ཕེ་སིའི་བུ་ནག་པི་དང་།
NUM 13:15 གཱ་རྡུ་ཚོ་པ་ནས་མ་ཀིའི་བུ་གཱ་ཨུ་ཨེལ་བཅས་སོ། །
NUM 13:16 དེ་དག་ནི་མོ་ཤེ་ཡིས་ཡུལ་དེར་མྱུལ་མར་བཏང་བའི་མི་རྣམས་ཀྱི་མིང་ཡིན། མོ་ཤེ་ཡིས་ནུན་གྱི་བུ་ཧོ་ཤེ་ཨའི་མིང་ལ་ཡོ་ཤུ་ཨ་ཞེས་བཏགས་སོ། །
NUM 13:17 མོ་ཤེ་ཡིས་དེ་རྣམས་ཀ་ན་ཨན་ཡུལ་གྱི་མྱུལ་མར་གཏོང་བའི་སྐབས་སུ། དེ་དག་ལ་འདི་ལྟར། ཁྱོད་ཅག་འདི་ནས་ཡར་ནེ་གུབ་ཡུལ་དུ་འགྲོ་བ་དང་། དེ་ནས་ཡར་རི་ཁུལ་དུ་སོང་ཞིག
NUM 13:18 ཡུལ་དེ་ཇི་ལྟ་བུ་ཡིན་པ་དང་། དེར་གནས་པའི་མི་རྣམས་ཀྱི་སྟོབས་ཀྱི་ཆེ་ཆུང་། མི་ཡི་མང་ཉུང་།
NUM 13:19 དེ་རྣམས་སྡོད་པའི་ཡུལ་ནི་བཟང་ངན་ཅི་ལྟ་བུ་ཡིན་པ། དེ་དག་གནས་པའི་གྲོང་ཁྱེར་རྣམས་སྒར་རམ་བཙན་རྫོང་ཡིན་པ།
NUM 13:20 ས་ཆ་དེ་ནི་ས་བཅུད་འཛོམས་སམ་ས་རྒྱུ་ཞན་པ། དེར་ཤིང་སྡོང་ཡོད་མེད་བཅས་ལ་ལྟོས་ཤིག སྙིང་སྟོབས་ཆེན་པོ་བསྐྱེད་ནས་ཡུལ་དེའི་ཤིང་འབྲས་འགའ་ཤས་ཁྱེར་ཤོག་ཅེས་སྨྲས་ཤིང་། དེ་ནི་རྒུན་འབྲུམ་ཐོག་མར་སྨིན་པའི་དུས་ཡིན་ནོ། །
NUM 13:21 དེ་ནས་ཁོ་རྣམས་ཡར་སོང་སྟེ། ཟིན་ཞེས་པའི་དབེན་སྟོང་ནས་ལེ་པོ་ཧ་མཱད་ཡུལ་གྱི་རེ་ཧོབ་འགག་བར་དུ་ཡུལ་དེར་ལྐོག་ལྟ་བྱས།
NUM 13:22 ཁོ་རྣམས་ཡར་ནེ་གུབ་ཡུལ་དུ་སོང་སྟེ་ཧེབ་རོན་ལ་སླེབས་པ་དང་། ཨ་ནག་གི་བུ་རྒྱུད་དེ་ཨ་ཧི་མན་དང་ཤེ་ཤཱ་ཨི། ཐལ་མ་ཨི་བཅས་ཡུལ་དེར་ཡོད་ཅིང་། ཧེབ་རོན་ནི་ཨེ་ཅིབ་ཡུལ་གྱི་ཚོ་ཨན་ལས་ཀྱང་ལོ་བདུན་གྱི་ཡར་སྔོན་དུ་ཚུགས་པ་ཡིན།
NUM 13:23 དེ་ནས་ཁོ་རྣམས་ཨེ་ཤཱ་ཀོལ་ལུང་པར་སླེབས་པ་དང་། དེར་རྒུན་ཤིང་གི་ཡལ་གར་རྒུན་འབྲུམ་ཆུན་པོ་གཅིག་རང་ཡོད་པ་དེ་བཅད་ནས། མི་གཉིས་ཀྱིས་དེ་གདང་ལ་ཁུར་ནས་ཐོན་ཞིང་། སེ་འབྲུ་དང་སེ་ཡབ་འགའ་ཤས་ཀྱང་ཁྱེར་ཡོང་ངོ་། །
NUM 13:24 ཡེས་ར་ཨེལ་པ་རྣམས་ཀྱིས་ཡུལ་དེ་ནས་བཅད་འོངས་པའི་རྒུན་འབྲུམ་ཆུན་པོ་དེའི་རྐྱེན་གྱིས་གནས་དེའི་མིང་ལ་ཨེ་ཤཱ་ཀོལ་ལུང་པ་ཞེས་བཏགས་སོ། །
NUM 13:25 ཉིན་ཞག་བཞི་བཅུ་སོང་བའི་མཐར། ཁོ་རྣམས་ཀྱིས་ཡུལ་དེར་ལྐོག་ལྟ་བྱས་ཚར་ནས་ཕྱིར་ལོག་པ་དང་།
NUM 13:26 ཁོ་རྣམས་ཕཱ་རན་དབེན་སྟོང་གི་ཀཱ་དེའེ་ཤཱ་ཡུལ་དུ་མོ་ཤེ་དང་། ཨ་རོན་དང་། ཡེས་ར་ཨེལ་པའི་མི་ཚོགས་ཡོངས་ཀྱི་མདུན་དུ་ཡོང་ནས་དེ་དག་ལ་གནས་ཚུལ་བརྗོད་ཅིང་། ཡང་ཡུལ་དེའི་ཤིང་འབྲས་དེ་རྣམས་ལ་བསྟན།
NUM 13:27 དེ་དག་གིས་མོ་ཤེ་ལ་འདི་ལྟར། ངེད་ཅག་ཁྱེད་ཀྱིས་བཏང་བའི་ཡུལ་དེར་ཕྱིན་པ་དང་། དེ་ནི་དངོས་གནས་འོ་མ་དང་སྦྲང་རྩི་བཞུར་བའི་ཡུལ་ཞིག་སྟེ། འདི་ནི་ས་ཆ་དེའི་ཤིང་འབྲས་ཡིན།
NUM 13:28 འོན་ཀྱང་ཡུལ་དེར་གནས་པའི་མི་རྣམས་ནི་སྟོབས་ཆེ་བ་དང་། གྲོང་ཁྱེར་དག་ནི་སྲ་ཞིང་བརྟན་ལ་ཤིན་ཏུ་ཆེན་པོ་འདུག ངེད་ཅག་གིས་དེར་ཨ་ནག་གི་བུ་རྒྱུད་རྣམས་ཀྱང་མཐོང་ངོ་། །
NUM 13:29 དེའི་ནེ་གུབ་ཡུལ་དུ་ཨ་མཱད་ལེག་པ་རྣམས་ཆགས་ཡོད་པ་དང་། ཧེད་པ་དང་ཡེ་བུ་སི་པ་དང་ཨེ་མོར་པ་རྣམས་རི་ཁུལ་དུ་གནས་ཡོད། ཀ་ན་ཨན་པ་རྣམས་རྒྱ་མཚོའི་འགྲམ་དང་ཡོར་དན་གཙང་པོའི་ཕྱོགས་སུ་ཆགས་ཡོད་ཅེས་སྨྲས་སོ། །
NUM 13:30 དེ་ནས་ཀཱ་ལེབ་ཀྱིས་མོ་ཤེའི་མདུན་དུ་མི་ཚོགས་ལྷོད་འཇགས་སུ་ཕབ་སྟེ་ན་རེ། རང་ཅག་ཡུལ་དེ་ལས་ཏན་ཏན་རྣམ་པར་རྒྱལ་ཐུབ་པས་ཡར་འགྲོ་ལ་ཡུལ་དེ་ལེན་པར་བྱ་ཞེས་སྨྲས།
NUM 13:31 འོན་ཀྱང་ཁོ་དང་མཉམ་དུ་སོང་བའི་མི་རྣམས་ན་རེ། ཡུལ་དེའི་མི་རྣམས་རང་ཅག་ལས་སྟོབས་ཆེ་བས། རང་ཅག་ཡར་དེ་དག་ལ་རྒོལ་བར་འགྲོ་མི་ནུས་སོ་ཞེས་སྨྲས།
NUM 13:32 མྱུལ་མ་དེ་དག་གིས་ཁོ་རྣམས་ལྐོག་ལྟ་བྱེད་དུ་ཕྱིན་པའི་ཡུལ་དེའི་སྐོར་ནས་ཡེས་ར་ཨེལ་པ་རྣམས་ལ་གཏམ་ངན་བསྒྲགས་ཏེ་ན་རེ། ངེད་ཅག་སོང་ནས་ལྐོག་ལྟ་བྱས་པའི་ཡུལ་དེ་ནི་དེར་གནས་པའི་མི་རྣམས་རྔམ་ཟ་བྱེད་པའི་ཡུལ་ཞིག་ཡིན་པ་དང་། ངེད་ཅག་གིས་དེར་མཐོང་བའི་མི་ཐམས་ཅད་ནི་གཟུགས་རིང་ཞིང་ཆེའོ། །
NUM 13:33 དེར་ང་ཚོས་ནེ་ཕེ་ལིམ་པ་རྣམས་མཐོང་ཞིང་། ཨ་ནག་གི་བུ་རྒྱུད་ནི་ནེ་ཕེ་ལིམ་པ་རྣམས་ལས་ཆད་པ་ཡིན། ང་ཚོའི་མཐོང་སྣང་ལ་རང་ཉིད་ནི་འབུ་ཆ་ག་པ་ལྟ་བུ་ཡིན་ལ། དེ་དག་གི་མཐོང་སྣང་ལའང་ངེད་རྣམས་དེ་བཞིན་ཡིན་ཞེས་སྨྲས་སོ། །
NUM 14:1 དེའི་དུས་སུ་མི་ཚོགས་ཡོངས་ཀྱིས་སྐད་ཆེན་པོས་འུར་བརྒྱབ་པ་དང་། མཚན་མོ་དེར་མི་ཚོགས་ངུས་སོ། །
NUM 14:2 ཡེས་ར་ཨེལ་པ་ཐམས་ཅད་ཀྱིས་མོ་ཤེ་དང་ཨ་རོན་གཉིས་ལ་འཁང་ར་བྱས་ཤིང་། མི་ཚོགས་ཀུན་གྱིས་ཁོ་གཉིས་ལ་འདི་ལྟར། ཀྱེ་མ། ང་ཚོ་སྔ་མོ་ནས་ཨེ་ཅིབ་ཡུལ་ནས་ཤི་བའམ། ཡང་ན་དབེན་སྟོང་འདི་ནས་ཤི་ན་ལེགས།
NUM 14:3 དཀོན་མཆོག་ཡ་ཝཱེས་ཅིའི་ཕྱིར་ང་ཚོ་ཡུལ་འདིར་ཁྲིད་པ་ཡིན་ནམ། རལ་གྲིའི་ཁ་ནས་འགྱེལ་བའི་ཕྱིར་ཡུལ་འདི་ལ་ཁྲིད་པ་ཡིན་ནམ། ང་ཚོའི་ཆུང་མ་དང་ཕྲུ་གུ་རྣམས་ལ་འཕྲོག་བཅོམ་ཐེབས་པར་འགྱུར། ང་ཚོ་ཕྱིར་ཨེ་ཅིབ་ཡུལ་དུ་སོང་ན་དེ་ལས་བཟང་བ་མིན་ནམ་ཞེས་སྨྲས་ཤིང་།
NUM 14:4 དེ་དག་གིས་ཕན་ཚུན་ལ། རང་ཅག་གིས་འགོ་དཔོན་གཞན་ཞིག་བསྐོས་ནས་ཨེ་ཅིབ་ཡུལ་དུ་ཕྱིར་ལོག་པར་བྱའོ་ཞེས་སྨྲས་སོ། །
NUM 14:5 དེ་ནས་མོ་ཤེ་དང་ཨ་རོན་གཉིས་ཡེས་ར་ཨེལ་པའི་མི་ཚོགས་ཀུན་གྱི་མདུན་དུ་གདོང་སར་བཏུད་ནས་བསྡད་པ་དང་།
NUM 14:6 ཡུལ་དེར་ལྐོག་ལྟ་བྱེད་དུ་ཕྱིན་པ་རྣམས་ཀྱི་གྲས་སུ་ནུན་གྱི་བུ་ཡོ་ཤུ་ཨ་དང་ཡེ་ཕུན་ནེའི་བུ་ཀཱ་ལེབ་གཉིས་ཡོད་པ་དང་། དེ་གཉིས་ཀྱིས་རང་གི་གྱོན་གོས་གཤགས་ནས།
NUM 14:7 ཡེས་ར་ཨེལ་པའི་མི་ཚོགས་ཐམས་ཅད་ལ་འདི་ལྟར། ངེད་ཅག་ལྐོག་ལྟ་བྱེད་དུ་སོང་བའི་ཡུལ་དེ་ནི་ཤིན་ཏུ་ཡག་པོ་འདུག
NUM 14:8 དཀོན་མཆོག་ཡ་ཝཱེ་རང་ཅག་ལ་ཐུགས་མཉེས་པ་ཡིན་ན། རང་ཅག་ཡུལ་དེར་ཁྲིད་ནས་ཡུལ་དེ་རང་ཅག་ལ་གནང་ངེས་ཡིན། ཡུལ་དེ་ནི་འོ་མ་དང་སྦྲང་རྩི་བཞུར་བའི་ཡུལ་ཞིག་ཡིན་ནོ། །
NUM 14:9 ཁྱོད་ཅག་གིས་དཀོན་མཆོག་ཡ་ཝཱེ་ལ་རྒྱབ་འགལ་མ་བྱེད་ཅིག ཡུལ་དེའི་མི་རྣམས་ལ་འཇིགས་པར་ཡང་མི་བྱའོ། །ཅི་ལ་ཟེར་ན། དེ་དག་ནི་རང་ཅག་གི་ཟ་སྐལ་ཡིན། ཁོ་ཚོའི་སྐྱབས་ནི་ཁོ་ཚོ་ལས་བྲལ་ཟིན་པ་དང་། དཀོན་མཆོག་ཡ་ཝཱེ་ཁོང་ཉིད་རང་ཅག་དང་མཉམ་དུ་བཞུགས་པས་དེ་དག་ལ་མ་འཇིགས་ཤིག་ཅེས་སྨྲས་པ་ལ།
NUM 14:10 མི་ཚོགས་ཀུན་གྱིས་དེ་གཉིས་རྡོ་རུབ་བཏང་ནས་གསོད་དགོས་སྨྲས་ཤིང་། དེའི་དུས་སུ་དཀོན་མཆོག་ཡ་ཝཱེའི་གཟི་འོད་ནི་མཇལ་འཕྲད་གུར་མཆོག་ཏུ་ཡེས་ར་ཨེལ་པའི་མི་ཚོགས་ཐམས་ཅད་ལ་མངོན་པ་དང་།
NUM 14:11 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། མི་འདི་དག་གིས་ནམ་དུས་བར་དུ་བདག་ལ་ཁྱད་གསོད་བྱའམ། བདག་གིས་དེ་དག་གི་ཁྲོད་དུ་གྲུབ་རྟགས་ཐམས་ཅད་བསྟན་ན་ཡང་། དེ་དག་གིས་ནམ་དུས་བར་དུ་བདག་ལ་ཡིད་ཆེས་མི་བྱེད་པ་ཡིན་ནམ།
NUM 14:12 བདག་གིས་དེ་དག་ནད་ཡམས་ཀྱིས་བརྡུངས་ནས་མེད་པར་གཏོང་རྒྱུ་ཡིན་པ་དང་། བདག་གིས་ཁྱོད་ནི་མི་རིགས་ཆེན་པོ་དང་དེ་དག་ལས་ཀྱང་སྟོབས་ཤུགས་ལྡན་པ་ཞིག་ཏུ་གཏོང་བར་བྱ་ཞེས་གསུངས་སོ། །
NUM 14:13 དེ་ནས་མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར། ཨེ་ཅིབ་པ་རྣམས་ཀྱིས་དེ་ཐོས་པར་འགྱུར། ཁྱེད་ཀྱིས་ནུས་མཐུ་ཆེན་པོས་མི་འདི་རྣམས་ཁོ་ཚོའི་དཀྱིལ་ནས་འདིར་ཁྲིད་འོངས་པ་དང་།
NUM 14:14 ཨེ་ཅིབ་པ་རྣམས་ཀྱིས་ཀྱང་ཡུལ་དེའི་གཞིས་ཆགས་རྣམས་ལ་སྨྲ་བར་འགྱུར། ཡུལ་དེའི་གཞིས་ཆགས་རྣམས་ཀྱིས་ཀྱང་དཀོན་མཆོག་ཡ་ཝཱེ་ཁྱེད་ཉིད་མི་ཚོགས་འདིའི་དཀྱིལ་དུ་བཞུགས་ཡོད་པ་དང་། དཀོན་མཆོག་ཡ་ཝཱེ་ཁྱེད་ཉིད་མི་ཡི་མིག་ལམ་དུ་མངོན་པར་མཛད་པ། ཁྱེད་ཀྱི་སྤྲིན་ནི་ཁོ་ཚོའི་སྟེང་དུ་བཞུགས་པ། ཉིན་མོར་ཁྱེད་ནི་སྤྲིན་གྱི་ཀ་བའི་ཁྲོད་དང་། མཚན་མོར་མེ་ཡི་ཀ་བའི་ཁྲོད་དུ་ཁོ་ཚོའི་སྔོན་ལ་ཕེབས་པ་བཅས་ཐོས་མྱོང་ཡོད།
NUM 14:15 ད་ལྟ་ཁྱེད་ཀྱིས་མི་འདི་རྣམས་མི་གཅིག་བཞིན་དུ་མེད་པར་མཛད་ན། ཁྱེད་ཀྱི་སྙན་གྲགས་ཐོས་མྱོང་བའི་མི་རིགས་རྣམས་ཀྱིས་གླེང་མོལ་བྱས་ཏེ་འདི་ལྟར།
NUM 14:16 དཀོན་མཆོག་ཡ་ཝཱེས་མི་འདི་རྣམས་ཁོ་ཚོར་མནའ་བཞེས་ཏེ་ཞལ་བཞེས་གནང་བའི་ཡུལ་དུ་ཁྲིད་མ་ནུས་པས་དབེན་སྟོང་དུ་ཁོ་རྣམས་མེད་པར་མཛད་དོ་ཞེས་སྨྲ་ངེས་ཡིན།
NUM 14:17 ད་ནི་གཙོ་བོ་ཁྱེད་ཀྱིས་རང་གི་ནུས་མཐུ་ཆེན་པོ་སྟོན་པར་མཛོད། ཁྱེད་ཀྱིས་དེ་སྔར་འདི་སྐད་དུ།
NUM 14:18 དཀོན་མཆོག་ཡ་ཝཱེ་ནི་རང་དགར་ཐུགས་མི་ཁྲོ་ཞིང་བྱམས་བརྩེ་མཐའ་ཡས་པ་ཡིན། ཁོང་གིས་ཉེས་པ་དང་ནོར་འཁྲུལ་སེལ་བར་མཛད་ནའང་། ཉེས་ཅན་ནི་ཉེས་མེད་དུ་གཏན་ནས་མི་རྩི་བར། ཕ་རྣམས་ཀྱི་ནག་ཉེས་ཕྱིར་བུ་རྒྱུད་རྣམས་ལ་མི་རབས་གསུམ་བཞིའི་བར་དུ་ཉེས་ཆད་གཅོད་པ་ལགས་ཞེས་གསུངས་པ་ལྟར།
NUM 14:19 ཁྱེད་ཀྱི་བྱམས་བརྩེ་ཆེན་པོ་བཞིན་དུ། ཨེ་ཅིབ་ཡུལ་ནས་དེ་རིང་གི་བར་དུ་མི་འདི་དག་ལ་སྡིག་སེལ་གནང་བ་ལྟར། མི་འདི་དག་གི་ཉེས་པ་སེལ་བར་མཛོད་ཅེས་ཞུས་སོ། །
NUM 14:20 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཞུ་བ་བཞིན་དུ་བདག་གིས་དེ་དག་ལ་སྡིག་སེལ་གནང་ངོ་། །
NUM 14:21 འོན་ཀྱང་བདག་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། དཀོན་མཆོག་ཡ་ཝཱེའི་གཟི་བརྗིད་ཀྱིས་ས་གཞི་ཡོངས་སུ་གང་བར་འགྱུར།
NUM 14:22 མི་འདི་ཐམས་ཅད་ཀྱིས་བདག་གི་གཟི་བརྗིད་དང་བདག་གིས་ཨེ་ཅིབ་ཡུལ་དང་དབེན་སྟོང་དུ་བསྟན་པའི་གྲུབ་རྟགས་རྣམས་མཐོང་ན་ཡང་། ལན་བཅུར་བདག་ལ་ཚོད་བགམ་བྱས་ཤིང་བདག་གི་གཏམ་ལ་མ་མཉན།
NUM 14:23 བདག་གིས་དེ་དག་གི་ཕ་མེས་ལ་མནའ་བསྐྱལ་ཏེ་ཁས་བླངས་པའི་ཡུལ་ནི་དེ་དག་གིས་མཐོང་བར་མི་འགྱུར་ལ། བདག་ཁྱད་དུ་གསོད་མཁན་རྣམས་ལས་སུས་ཀྱང་ཡུལ་དེ་མཐོང་བར་མི་འགྱུར་རོ། །
NUM 14:24 འོན་ཀྱང་། ངའི་ཞབས་ཕྱི་ཀཱ་ལེབ་ལ་བསམ་འདུན་གཞན་ཞིག་ཡོད་ཅིང་། སེམས་གཅིག་ལུས་གཅིག་གིས་བདག་གི་རྗེས་སུ་འབྲངས་པ་ཡིན་པས། ངས་ཁོ་རང་ནི་ཁོ་སོང་མྱོང་བའི་ཡུལ་དེར་འཁྲིད་ངེས་ལ། ཁོའི་བུ་རྒྱུད་ལ་ཡུལ་དེ་འཐོབ་པར་འགྱུར་རོ། །
NUM 14:25 ད་ལྟ་ཨ་མཱད་ལེག་པ་དང་ཀ་ན་ཨན་པ་རྣམས་ལུང་པའི་ནང་དུ་གནས་ཡོད། སང་ཉིན་ཁྱོད་རྣམས་ཕྱིར་འཁོར་ཏེ་རྒྱ་མཚོ་དམར་པོའི་ལམ་བརྒྱུད་ནས་དབེན་སྟོང་དུ་སོང་ཞིག་ཅེས་གསུངས་སོ། །
NUM 14:26 དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 14:27 མི་ཚོགས་ངན་པ་འདིས་བདག་ལ་ནམ་དུས་བར་དུ་འཁང་ར་བྱེད་ཡོང་ངམ། ཡེས་ར་ཨེལ་པ་རྣམས་ཀྱིས་བདག་ལ་འཁང་ར་བྱེད་པ་དེ་བདག་གིས་ཐོས་ཡོད།
NUM 14:28 ཁྱོད་ཀྱིས་ཁོ་རྣམས་ལ་འདི་ལྟར་སྨྲོས་ཤིག དཀོན་མཆོག་ཡ་ཝཱེས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ཁྱོད་ཚོས་བདག་གི་རྣ་བར་ཅི་ལྟར་གཏམ་བྱས་པ་བཞིན་བདག་གིས་དེ་ལྟར་བྱའོ། །
NUM 14:29 ཁྱོད་ཅག་གི་བེམ་པོ་རྣམས་དབེན་སྟོང་འདི་རུ་འགྱེལ་ངེས་ཤིང་། ཁྱོད་ཅག་གི་ཁྲོད་དུ་རྩིས་བླངས་ཟིན་པ་སྟེ། ཁྱོད་རྣམས་ཀྱི་གྲངས་ཀ་བཞིན་ལོ་ཉི་ཤུ་ཅན་དང་དེའི་ཡན་གྱི་བདག་ལ་འཁང་ར་བྱས་མྱོང་པ་ཐམས་ཅད་ནི།
NUM 14:30 བདག་གིས་ཁྱོད་རྣམས་འདུག་ཏུ་འཇུག་པར་མནའ་བསྐྱལ་བའི་ཡུལ་དེར་འགྲོ་མི་ཆོག་ལ། ཡེ་ཕུན་ནེ་ཡི་བུ་ཀཱ་ལེབ་དང་ནུན་གྱི་བུ་ཡོ་ཤུ་ཨ་གཉིས་འབའ་ཞིག་ཡུལ་དེ་རུ་ཕྱིན་ཆོག་གོ །
NUM 14:31 འོན་ཀྱང་ཁྱོད་ཅག་གི་བྱིས་པ་རྣམས་ཏེ། ཁྱོད་རྣམས་ཀྱིས་འཕྲོག་བཅོམ་ཐེབས་པར་འགྱུར་ཞེས་སྨྲས་པ་དེ་དག་བདག་གིས་ཡུལ་དེར་འཁྲིད་རྒྱུ་ཡིན་པ་དང་། ཁྱོད་རྣམས་ཀྱིས་སྤངས་པའི་ཡུལ་དེ་ཁོ་ཚོར་འཐོབ་པར་འགྱུར།
NUM 14:32 འོན་ཀྱང་ཁྱོད་ཅག་གི་བེམ་པོ་རྣམས་དབེན་སྟོང་འདི་རུ་འགྱེལ་བར་འགྱུར་རོ། །
NUM 14:33 ཁྱོད་ཅག་གི་བུ་རྣམས་ཀྱིས་ལོ་བཞི་བཅུའི་རིང་ལ་དབེན་སྟོང་དུ་ཕྱུགས་འཚོས་ནས། ཁྱོད་ཅག་གི་བེམ་པོ་རྣམས་དབེན་སྟོང་དུ་རྩ་མེད་དུ་འགྲོ་བའི་བར་ཁོ་ཚོས་ཁྱོད་ཅག་གི་འདོད་ལོག་སྤྱད་པའི་སྡིག་པ་འཁུར་དགོས།
NUM 14:34 ཁྱོད་རྣམས་ཀྱིས་ཡུལ་དེར་ལྐོག་ལྟ་བྱས་པའི་ཉིན་བཞི་བཅུའི་གྲངས་ཀ་བཞིན་དུ། ཉིན་རེ་ལོ་གཅིག་ལ་བརྩིས་ནས་ལོ་བཞི་བཅུའི་རིང་དུ་ཉེས་པ་འཁུར་དགོས། ཅི་ལ་ཟེར་ན། དེ་ནས་ཁྱོད་ཅག་གིས་བདག་གིས་ཅིའི་ཕྱིར་ཁྱོད་རྣམས་ལ་རྒོལ་བ་ཤེས་པར་འགྱུར་ཞེས་པའོ། །
NUM 14:35 ཡ་ཝཱེ་བདག་གིས་དེ་ལྟར་སྨྲས་ཟིན་པ་སྟེ། བདག་གིས་ལྷན་དུ་འཛོམས་ནས་བདག་ལ་ངོ་རྒོལ་བྱེད་པའི་མི་ཚོགས་ངན་པ་འདིར་དེ་ལྟར་བྱེད་ངེས་ལ། ཁོ་རྣམས་དབེན་སྟོང་འདི་རུ་མེད་པར་འགྲོ་ཞིང་། འདི་རུ་འཆི་བར་འགྱུར་ཞེས་གསུངས་སོ། །
NUM 14:36 མོ་ཤེ་ཡིས་ཡུལ་དེར་ལྐོག་ལྟ་བྱེད་པར་བཏང་བའི་མི་དེ་དག་ཕྱིར་འོངས་པ་དང་། ཡུལ་དེའི་སྐོར་གྱི་སྐད་ངན་ཁྱེར་འོངས་པས་མི་ཚོགས་ཐམས་ཅད་ཀྱིས་མོ་ཤེ་ལ་འཁང་ར་བྱས་ཤིང་།
NUM 14:37 ཡུལ་དེའི་སྐོར་གྱི་སྐད་ངན་ཁྱེར་ཡོང་མཁན་རྣམས་དཀོན་མཆོག་ཡ་ཝཱེའི་དྲུང་དུ་གཉན་ནད་ཀྱིས་ཤིའོ། །
NUM 14:38 ཡུལ་དེར་ལྐོག་ལྟ་བྱེད་དུ་སོང་བའི་མི་རྣམས་ལས། ནུན་གྱི་བུ་ཡོ་ཤུ་ཨ་དང་ཡེ་ཕུན་ནེའི་བུ་ཀཱ་ལེབ་གཉིས་ད་དུང་གསོན་པོར་གནས་སོ། །
NUM 14:39 མོ་ཤེ་ཡིས་གཏམ་དེ་རྣམས་ཡེས་ར་ཨེལ་པ་ཐམས་ཅད་ལ་སྨྲས་པ་ན། མི་རྣམས་ཀྱིས་མྱ་ངན་དྲག་པོ་བྱས་པ་དང་།
NUM 14:40 དེའི་ཕྱི་ཉིན་ཞོགས་པར་ཁོ་རྣམས་སྔ་མོ་ནས་ཡར་ལངས་ཏེ་རི་རྩེར་སོང་ནས་འདི་ལྟར། ང་ཚོ་འདི་རུ་ཡོད། ང་ཚོ་དཀོན་མཆོག་ཡ་ཝཱེས་ཞལ་གྱིས་བཞེས་པའི་གནས་དེར་ཡར་འགྲོ་བར་བྱ། ཅི་ལ་ཞེ་ན། ང་ཚོས་སྡིག་པ་བྱས་པས་སོ་ཞེས་སྨྲས།
NUM 14:41 དེ་ནས་མོ་ཤེ་ན་རེ། ཁྱོད་རྣམས་ཡང་བསྐྱར་དཀོན་མཆོག་ཡ་ཝཱེའི་བཀའ་དང་འགལ་བ་ཅི། དོན་དེ་འགྲུབ་པའི་དཔེ་མི་སྲིད།
NUM 14:42 དཀོན་མཆོག་ཡ་ཝཱེ་ཁྱོད་ཚོའི་དཀྱིལ་དུ་མི་བཞུགས་པས། དགྲ་བོའི་ཚོགས་ཀྱིས་ཁྱོད་རྣམས་ཕམ་པར་མི་རྒྱག་པའི་ཕྱིར་དུ་ཡར་མ་འགྲོ་ཞིག
NUM 14:43 གང་ལ་ཟེར་ན། ཨ་མཱད་ལེག་པ་དང་ཀ་ན་ཨན་པ་རྣམས་ཁྱོད་ཚོའི་མདུན་དུ་ཡོད་པས། ཁྱོད་རྣམས་རལ་གྲིའི་ཁ་ནས་འགྱེལ་བར་འགྱུར། ཁྱོད་ཚོ་དཀོན་མཆོག་ཡ་ཝཱེའི་རྗེས་སུ་མ་འབྲངས་པས་དཀོན་མཆོག་ཡ་ཝཱེ་ཁྱོད་རྣམས་དང་མཉམ་དུ་མི་བཞུགས་སོ་ཞེས་སྨྲས།
NUM 14:44 དེ་དག་ཁེངས་དྲེགས་ཆེན་པོས་རི་རྩེར་སོང་ཡང་། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་མོ་ཤེ་ནི་སྒར་དང་མ་བྲལ་ཏོ། །
NUM 14:45 དེ་ནས་རི་དེར་གནས་པའི་ཨ་མཱད་ལེག་པ་དང་ཀ་ན་ཨན་པ་རྣམས་ཐུར་ལ་བབས་ནས། ཁོ་ཚོར་བརྡུངས་ནས་ཧོར་མཱ་བར་དུ་ཕམ་པར་བརྒྱབས་སོ། །
NUM 15:1 དེ་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 15:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར། ཁྱོད་ཚོ་བདག་གིས་ཁྱོད་རྣམས་གཞིས་ཆགས་པའི་ཕྱིར་གནང་བའི་ཡུལ་དུ་ཕྱིན་པའི་ཚེ།
NUM 15:3 བ་ཁྱུ་དང་ར་ལུག་གི་ཁྱུ་ནས་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས་ཤིང་། དེ་ནི་སྦྱིན་སྲེག་གི་མཆོད་པའམ་དམར་མཆོད་གཞན་འབུལ་བ་དང་། དམ་བཅའི་མཆོད་པའམ་ཡིད་མོས་ཀྱི་མཆོད་པ་འབུལ་བ། ཡང་ན་ཁྱོད་ཅག་གི་དུས་ཆེན་རྣམས་ཀྱི་མཆོད་པ་འབུལ་བ་བཅས་གང་ཡིན་ཡང་ཐམས་ཅད་དཀོན་མཆོག་ཡ་ཝཱེ་ལ་དྲི་ཞིམ་གྱི་མཆོད་པར་འབུལ་དགོས།
NUM 15:4 མཆོད་པ་འབུལ་མཁན་གྱིས་ཨེ་ཕཱ་བཅུ་ཆ་གཅིག་གི་ཕྱེ་བཟང་པོ་རྫ་བུམ་གྱི་བཞི་ཆ་གཅིག་གི་སྣུམ་ལ་བསྲེས་པ་ཞིག་དཀོན་མཆོག་ཡ་ཝཱེ་ལ་འབྲུ་རིགས་ཀྱི་མཆོད་པར་འབུལ་དགོས།
NUM 15:5 དེ་མིན་སྦྱིན་སྲེག་གམ་དམར་མཆོད་གཞན་གང་ཡིན་ཡང་། ལུ་གུ་རེའི་ཕྱིར་དུ་ཁྱོད་ཀྱིས་སྐྱེམས་མཆོད་དུ་རྒུན་ཆང་རྫ་བུམ་གྱི་བཞི་ཆ་གཅིག་དེ་དང་མཉམ་དུ་འབུལ་དགོས་པ་དང་།
NUM 15:6 ཡང་ན་ལུག་ཐུག་རེའི་ཕྱིར་དུ་ཁྱོད་ཀྱིས་ཨེ་ཕཱ་བཅུ་ཆ་གཉིས་ཀྱི་ཕྱེ་བཟང་པོ་རྫ་བུམ་གྱི་གསུམ་ཆ་གཅིག་གི་སྣུམ་ལ་བསྲེས་ནས་འབྲུ་རིགས་ཀྱི་མཆོད་པར་འབུལ་དགོས་ལ།
NUM 15:7 ཡང་རྒུན་ཆང་རྫ་བུམ་གྱི་གསུམ་ཆ་གཅིག་སྐྱེམས་མཆོད་དུ་དཀོན་མཆོག་ཡ་ཝཱེ་ལ་དྲི་ཞིམ་གྱི་མཆོད་པར་འབུལ་དགོས་སོ། །
NUM 15:8 གལ་སྲིད་ཁྱོད་ཀྱིས་གླང་ཐུག་ཅིག་གྲ་སྒྲིག་བྱས་ཏེ་དམ་བཅའ་སྒྲུབ་པའམ། ཡང་ན་ཞི་བདེའི་མཆོད་པ་བྱས་ནས་དཀོན་མཆོག་ཡ་ཝཱེ་ལ་སྦྱིན་སྲེག་གམ་དམར་མཆོད་གཞན་འབུལ་ན།
NUM 15:9 ཨེ་ཕཱ་གསུམ་ཆ་གཅིག་གི་ཕྱེ་བཟང་པོ་རྫ་བུམ་ཕྱེད་ཀའི་སྣུམ་ལ་བསྲེས་ནས་གླང་ཐུག་དང་མཉམ་དུ་འབྲུ་རིགས་ཀྱི་མཆོད་པར་འབུལ་བ་དང་།
NUM 15:10 ཡང་རྒུན་ཆང་རྫ་བུམ་ཕྱེད་ཀ་སྐྱེམས་མཆོད་དུ་དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་འབུལ་དགོས།
NUM 15:11 དེ་ལྟར་གླང་ཐུག་གཅིག་གམ། ཡང་ན་ལུག་ཐུག་གཅིག ཡང་ན་ལུ་གུ་ཕོ་གཅིག ཡང་ན་རེའུ་གཅིག་བཅས་འབུལ་ན་ཐམས་ཅད་དེ་བཞིན་བསྒྲུབ་དགོས།
NUM 15:12 ཁྱོད་ཀྱིས་གྲ་སྒྲིག་བྱས་པའི་གྲངས་ཀ་ལྟར། རེ་རེ་དེ་བཞིན་དུ་བསྒྲུབ་དགོས་སོ། །
NUM 15:13 གཞིས་སྐྱེས་ཐམས་ཅད་ཀྱིས་དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་འབུལ་བའི་ཚེ་དེ་བཞིན་དུ་བསྒྲུབ་དགོས།
NUM 15:14 ཕྱི་མི་ཞིག་ཁྱོད་རྣམས་དང་མཉམ་དུ་སྡོད་པའམ། ཡང་ན་སུ་ཞིག་མི་རབས་ནས་མི་རབས་བར་ཁྱོད་རྣམས་ཀྱི་ཁྲོད་དུ་སྡོད་ཅིང་དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་འབུལ་ན། དེས་ནི་ཁྱོད་ཅག་གིས་ཅི་ལྟར་སྒྲུབ་པ་བཞིན་དུ་བསྒྲུབ་དགོས་སོ། །
NUM 15:15 མི་ཚོགས་ལ་མཚོན་ན། ཁྱོད་ཅག་དང་ཡང་ན་ཁྱོད་ཅག་མཉམ་དུ་སྡོད་པའི་ཕྱི་མི་རྣམས་ཀྱི་སྒྲིག་ཁྲིམས་ནི་གཅིག་མཚུངས་ཡིན་ལ། ཁྱོད་ཅག་མི་རབས་ཀུན་གྱི་དུས་གཏན་གྱི་སྒྲིག་ཁྲིམས་ཡིན། དཀོན་མཆོག་ཡ་ཝཱེའི་དྲུང་དུ་ཁྱོད་ཅག་ཅི་ལྟར་ཡིན་ན་བྱེས་པ་རྣམས་ཀྱང་དེ་ལྟར་ཡིན་དགོས།
NUM 15:16 ཁྱོད་ཅག་དང་ཁྱོད་རྣམས་ཀྱི་ཁྲོད་དུ་གནས་པའི་ཕྱི་མི་ལ་བཀའ་ཁྲིམས་དང་སྲོལ་ཡིག་གཅིག་ཡིན་སྨྲོས་ཤིག་ཅེས་གསུངས་སོ། །
NUM 15:17 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 15:18 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་ཤོད་དང་། ཁྱོད་རྣམས་བདག་གིས་ཁྱོད་ཚོ་ཁྲིད་ནས་འགྲོ་བའི་ཡུལ་དེར་སླེབས་ནས།
NUM 15:19 ཡུལ་དེའི་ཟས་ཟ་བའི་དུས་སུ་དཀོན་མཆོག་ཡ་ཝཱེ་ལ་འདེགས་མཆོད་འབུལ་དགོས།
NUM 15:20 ཁྱོད་ཅག་གིས་འབྲུ་ཕུད་ཀྱི་གྲོ་ཕྱེ་ཡིས་བག་ལེབ་ཅིག་འདེགས་མཆོད་དུ་འབུལ་དགོས། དེ་ནི་གཡུལ་ཁའི་འདེགས་མཆོད་འབུལ་བ་ནང་བཞིན་འབུལ་དགོས།
NUM 15:21 ཁྱོད་ཅག་མི་རབས་ཀུན་གྱིས་འབྲུ་ཕུད་ཀྱི་གྲོ་ཕྱེ་ནི་དཀོན་མཆོག་ཡ་ཝཱེ་ལ་འདེགས་མཆོད་དུ་འབུལ་དགོས་སོ། །
NUM 15:22 གལ་སྲིད་ཁྱོད་ཅག་གིས་མ་ཤེས་པར་སྡིག་པ་བྱས་ནས། དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་ཐམས་ཅད་དེ།
NUM 15:23 དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཁྱོད་ཅག་ལ་བཀའ་གནང་བའི་དོན་ཐམས་ཅད། དཀོན་མཆོག་ཡ་ཝཱེས་བཀའ་གནང་བའི་ཉིན་དེ་ནས་བཟུང་ཁྱོད་ཅག་གི་མི་རབས་ནས་མི་རབས་བར་དུ་བསྲུང་མ་ཐུབ་ན།
NUM 15:24 གལ་སྲིད་མ་བསམ་ས་ནས་ནོར་འཛོལ་བྱུང་ཞིང་མི་ཚོགས་ཀྱིས་ཀྱང་མི་ཤེས་ན། མི་ཚོགས་ཡོངས་ཀྱིས་གླང་ཐུག་ཅིག་སྦྱིན་སྲེག་སྟེ། དཀོན་མཆོག་ཡ་ཝཱེ་ལ་དྲི་ཞིམ་གྱི་མཆོད་པར་འབུལ་དགོས་ལ། སྲོལ་ཡིག་ནང་བཞིན་དེའི་འབྲུ་རིགས་ཀྱི་མཆོད་པ་དང་སྐྱེམས་མཆོད་ཀྱང་དེ་དང་མཉམ་དུ་འབུལ་བ་དང་། ཡང་ར་ཕོ་གཅིག་སྡིག་བཤགས་མཆོད་པ་རུ་འབུལ་དགོས་སོ། །
NUM 15:25 མཆོད་དཔོན་གྱིས་ཡེས་ར་ཨེལ་པ་རྣམས་ཀྱི་མི་ཚོགས་ཡོངས་ཀྱི་ཕྱིར་དུ་སྡིག་བཤགས་བྱེད་དགོས་ཤིང་། དེ་དག་ལ་སྡིག་སེལ་འཐོབ་ངེས་ཡིན། ཅི་ལ་ཟེར་ན། དེ་ནི་མ་བསམ་ས་ནས་བཟོས་པའི་སྡིག་པ་ཞིག་ཡིན་པ་དང་། ཡང་དེ་དག་གིས་རང་གི་མ་བསམ་ས་ནས་བཟོས་པའི་སྡིག་པའི་རྐྱེན་གྱིས། མེ་མཆོད་དང་སྡིག་བཤགས་མཆོད་པ་དཀོན་མཆོག་ཡ་ཝཱེའི་དྲུང་དུ་ཕུལ་བས་སོ། །
NUM 15:26 ཡེས་ར་ཨེལ་པ་རྣམས་ཀྱི་མི་ཚོགས་དང་དེའི་ཁྲོད་དུ་གནས་པའི་ཕྱི་མི་རྣམས་ལ་སྡིག་སེལ་འཐོབ་ངེས་ཡིན། ཅི་ལ་ཞེ་ན། མི་ཐམས་ཅད་ཀྱིས་མ་བསམ་ས་ནས་སྡིག་པ་བྱས་པའི་ཕྱིར་རོ། །
NUM 15:27 གལ་སྲིད་མི་ཞིག་གིས་མ་ཤེས་པར་སྡིག་པ་བྱས་ན། དེས་ར་མ་ལོ་གཅིག་ཅན་ཞིག་སྡིག་བཤགས་མཆོད་པར་འབུལ་དགོས།
NUM 15:28 མཆོད་དཔོན་གྱིས་མ་ཤེས་པར་སྡིག་པ་བྱེད་མཁན་དེའི་ཕྱིར་དུ་སྡིག་བཤགས་བྱེད་དགོས་ཏེ། མི་དེས་མ་བསམ་ས་ནས་དཀོན་མཆོག་ཡ་ཝཱེའི་སྤྱན་སྔར་སྡིག་པ་བྱས་པས་སོ། །མཆོད་དཔོན་གྱིས་མི་དེའི་ཕྱིར་སྡིག་བཤགས་བྱེད་ཅིང་མི་དེར་སྡིག་སེལ་འཐོབ་ངེས་ཡིན།
NUM 15:29 མ་བསམ་ས་ནས་སྡིག་པ་བྱེད་མཁན་ནི་ཡེས་ར་ཨེལ་པའི་ཁྲོད་ཀྱི་གཞིས་སྐྱེས་སམ་དེ་དག་གི་ཁྲོད་དུ་གནས་པའི་ཕྱི་མི་གང་ཡིན་ཡང་། ཐམས་ཅད་ལ་བཀའ་ཁྲིམས་གཅིག་ཡིན་དགོས།
NUM 15:30 འོན་ཀྱང་བསམ་གཟས་ནས་སྡིག་པ་བྱེད་མཁན་ནི་གཞིས་སྐྱེས་སམ་བྱེས་པ་གང་ཡིན་ཡང་། དཀོན་མཆོག་ཡ་ཝཱེ་ལ་སྐུར་བ་འདེབས་མཁན་མི་དེ་ནི་རང་གི་མི་མང་ནས་འཕུད་དགོས།
NUM 15:31 མི་དེས་དཀོན་མཆོག་ཡ་ཝཱེའི་བཀའ་ལ་མཐོང་ཆུང་བྱས་ཤིང་། ཁོང་གི་བཀའ་དང་འགལ་བས། མི་དེ་ནི་ངེས་པར་འཕུད་དགོས་ཤིང་། ཁོའི་ཉེས་པ་རང་སྟེང་ལ་སྦྱོར་བར་འགྱུར་ཞེས་སྨྲ་དགོས་པར་གསུངས་སོ། །
NUM 15:32 ཡེས་ར་ཨེལ་པ་རྣམས་དབེན་སྟོང་དུ་གནས་པ་ལ། མི་ཞིག་གིས་ངལ་གསོ་བའི་ཉིན་མོར་བུད་ཤིང་བཏུས་པ་དང་།
NUM 15:33 ཁོས་བུད་ཤིང་འཐུ་བ་མཐོང་མཁན་རྣམས་ཀྱིས་ཁོ་རང་མོ་ཤེ་དང་ཨ་རོན་དང་མི་ཚོགས་ཡོངས་ཀྱི་མདུན་དུ་ཁྲིད་དོ། །
NUM 15:34 མི་དེར་ཅི་བྱེད་དགོས་པ་ཐག་གིས་མ་ཆོད་པས་བཀག་ནས་བཞག་གོ །
NUM 15:35 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། མི་དེ་ངེས་པར་གསོད་དགོས་ཏེ། མི་ཚོགས་ཡོངས་ཀྱིས་སྒར་གྱི་ཕྱི་རོལ་ཏུ་ཁོ་རྡོ་རུབ་བཏང་ནས་གསོད་དགོས་ཞེས་གསུངས་པས།
NUM 15:36 མི་ཚོགས་ཡོངས་ཀྱིས་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་དུ། ཁོ་སྒར་གྱི་ཕྱི་རོལ་ཏུ་ཁྲིད་དེ་རྡོ་རུབ་བཏང་ནས་བསད་དོ། །
NUM 15:37 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 15:38 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་ཤིག ཁོ་ཚོས་མི་རབས་ནས་མི་རབས་བར་དུ་རང་གི་གྱོན་གོས་ཀྱི་སྣེ་མོར་ཙོར་ལོ་འདོགས་དགོས་ལ། ཡང་ཙོར་ལོ་རེའི་སྟེང་དུ་ཐ་གུ་སྔོན་པོ་བཙེམ་དགོས།
NUM 15:39 ཁྱོད་ཚོས་ཙོར་ལོ་མཐོང་མ་ཐག་དཀོན་མཆོག་ཡ་ཝཱེའི་བཀའ་ཐམས་ཅད་དྲན་ཞིང་དེ་བཞིན་དུ་བྱེད་པ་དང་། ཁྱོད་རྣམས་གང་བྱུང་དུ་རྒྱུགས་ནས་ལོག་གཡེམ་སྤྱད་པ་བཞིན་རང་གི་བསམ་ཚུལ་དང་མིག་གི་རྗེས་སུ་མི་འབྲང་བའི་ཕྱིར་དང་།
NUM 15:40 ཁྱོད་རྣམས་ཀྱིས་བདག་གི་བཀའ་ཐམས་ཅད་དྲན་ནས་དེ་བཞིན་བྱེད་པ་དང་། ཡང་ཁྱོད་རྣམས་དཀོན་མཆོག་གི་ཆེད་དུ་དམ་པ་ཡིན་དགོས་སོ། །
NUM 15:41 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ལ། ཁྱོད་ཅག་གི་དཀོན་མཆོག་བྱེད་པའི་ཕྱིར་ཁྱོད་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་པ་ཡིན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ་ཞེས་གསུངས་སོ། །
NUM 16:1 དེ་ཡང་ལེ་ཝིའི་ཡང་ཚ་སྟེ། ཀོ་ཧད་ཀྱི་ཚ་བོ་དང་ཡེས་ཧར་གྱི་བུ་ཀོ་རཱག་དང་། རུ་བེན་གྱི་བུ་རྒྱུད་ལས་ཨེ་ལི་ཨབ་ཀྱི་བུ་དཱ་ཐན་དང་ཨ་བི་རཱམ་གཉིས་དང་། ཕེ་ལེད་ཀྱི་བུ་ཨོན་བཅས་ཀྱིས་མི་ཁྲིད་ནས་འོངས་ཏེ།
NUM 16:2 མོ་ཤེ་ལ་ངོ་རྒོལ་བྱས་པ་དང་། ད་དུང་ཡེས་ར་ཨེལ་པ་རྣམས་ལས་མི་ཉིས་བརྒྱ་ལྔ་བཅུ་སྟེ་མི་ཚོགས་ཀྱི་འགོ་དཔོན་ཡིན་ཞིང་། མི་ཚོགས་ལས་བདམས་པའི་མི་སྙན་གྲགས་ཅན་རྣམས་ཀྱང་ཡོད་དོ། །
NUM 16:3 དེ་དག་མཉམ་དུ་འདུས་ནས་མོ་ཤེ་དང་ཨ་རོན་གཉིས་ལ་ངོ་རྒོལ་བྱས་ཤིང་ཁོ་གཉིས་ལ་འདི་ལྟར། ཁྱོད་གཉིས་ཚད་ལས་བརྒལ་དྲགས། མི་ཚོགས་ཡོངས་ཀྱི་མི་རེ་རེ་དམ་པ་ཡིན་ཞིང་དཀོན་མཆོག་ཡ་ཝཱེ་ཡང་དེ་དག་གི་ཁྲོད་དུ་བཞུགས་ཡོད་པས། ཁྱོད་གཉིས་ཀྱིས་རང་ཉིད་དཀོན་མཆོག་ཡ་ཝཱེའི་མི་ཚོགས་ལས་མཐོན་པོར་བཀུར་བ་ཅི་ཡིན་ནམ་ཞེས་སྨྲས་སོ། །
NUM 16:4 མོ་ཤེ་ཡིས་དེ་ཐོས་ནས་གདོང་ས་རུ་བཏུད་ཅིང་།
NUM 16:5 ཀོ་རཱག་དང་ཁོའི་འགྲོགས་ཡ་རྣམས་ལ་འདི་ལྟར། སང་ཉིན་ཞོགས་པར་དཀོན་མཆོག་ཡ་ཝཱེས་སུ་ཞིག་ཁོང་གི་ཡིན་པ་དང་། སུ་ཞིག་དམ་པ་ཡིན་པ་སྟོན་པར་མཛད་ནས་དེ་ཁོང་གི་འཁྲིས་སུ་འཁྲིད་འོང་ལ། ཡང་སུ་ཞིག་ཁོང་གིས་བདམས་པ་ཡིན་ན་དེ་ཁོང་གི་ཉེ་སར་འདྲེན་པར་འགྱུར།
NUM 16:6 ཁྱོད་ཅག་གིས་འདི་ལྟར་བྱེད་དགོས་ཏེ། ཀོ་རཱག་དང་ཁྱོད་ཀྱི་འགྲོགས་ཡ་རྣམས་ཀྱིས་སྤོས་ཕོར་ཁྱེར་འོངས་ནས།
NUM 16:7 སང་ཉིན་ཁྱོད་ཅག་གིས་དཀོན་མཆོག་ཡ་ཝཱེའི་དྲུང་ནས་དེ་དག་གི་ནང་དུ་མེ་སྦར་བ་དང་དེའི་སྟེང་དུ་སྤོས་ཞོག་ཅིག དཀོན་མཆོག་ཡ་ཝཱེས་སུ་ཞིག་བདམས་ན་དེ་ནི་དམ་པ་ཡིན་པར་འགྱུར། ལེ་ཝི་པ་ཁྱོད་རྣམས་ཚད་ལས་བརྒལ་དྲགས་ཞེས་སྨྲས་སོ། །
NUM 16:8 དེ་ནས་མོ་ཤེ་ཡིས་ཀོ་རཱག་ལ་འདི་ལྟར། ལེ་ཝི་པ་རྣམས་ཀྱིས་ཉོན་ཅིག
NUM 16:9 ཡེས་ར་ཨེལ་གྱི་དཀོན་མཆོག་གིས་ཁྱོད་ཚོ་ཡེས་ར་ཨེལ་པའི་མི་ཚོགས་ལས་ལོགས་སུ་བཀར་ཏེ། ཁྱོད་ཅག་ཁོང་དང་ཉེ་བར་མཛད་ནས། དཀོན་མཆོག་ཡ་ཝཱེའི་གུར་མཆོག་གི་ཞབས་ཕྱི་བྱེད་པ་དང་། མི་ཚོགས་ཀྱི་མདུན་དུ་ལངས་ནས་ཁོ་ཚོའི་དོན་དུ་ཞབས་ཕྱི་སྒྲུབ་པར་མཛད།
NUM 16:10 ཡང་དཀོན་མཆོག་ཡ་ཝཱེས་ཁྱོད་དང་ཁྱོད་ཀྱི་སྤུན་ཟླ་ཐམས་ཅད་དེ། ལེ་ཝིའི་བུ་རྒྱུད་རྣམས་ལྷན་དུ་ཁོང་དང་ཉེ་བར་མཛད་པ་དང་། ཁྱོད་ཅག་གིས་དེ་ནི་དོན་ཆུང་ངུ་ཞིག་ཡིན་པར་འདོད་དམ། ཁྱོད་ཅག་གིས་ད་དུང་མཆོད་དཔོན་གྱི་ལས་འགན་ལ་བསྙེག་གམ།
NUM 16:11 དེའི་ཕྱིར། ཁྱོད་དང་ཁྱོད་ཀྱི་འགྲོགས་ཡ་རྣམས་མཉམ་དུ་འདུས་ཏེ་དཀོན་མཆོག་ཡ་ཝཱེ་ལ་རྒོལ་བའོ། །ཨ་རོན་སུ་ཡིན་ནམ། ཁྱོད་ཅག་གིས་ཁོ་ལ་འཁང་ར་བྱེད་དགོས་དོན་ཅི་ཡོད་ཅེས་སྨྲས་སོ། །
NUM 16:12 དེ་ནས་མོ་ཤེ་ཡིས་ཨེ་ལི་ཨབ་ཀྱི་བུ་དཱ་ཐན་དང་ཨ་བི་རཱམ་གཉིས་འབོད་པར་མི་མངགས་པ་ལ། དེ་གཉིས་ཀྱིས་ངེད་གཉིས་ཡར་མི་འགྲོ།
NUM 16:13 ཁྱོད་ཀྱིས་ངེད་རྣམས་དབེན་སྟོང་དུ་གསོད་པའི་ཕྱིར་དུ་འོ་མ་དང་སྦྲང་རྩི་བཞུར་བའི་ཡུལ་ནས་ཡར་ཁྲིད་འོངས་པ་དང་། དེ་ནི་དོན་ཆུང་ངུ་ཞིག་ཡིན་ནམ། ཁྱོད་ཀྱིས་ད་དུང་རང་ཉིད་རྒྱལ་པོར་བསྐོས་ནས་ངེད་རྣམས་ལ་དབང་བསྒྱུར་དགོས་སམ།
NUM 16:14 དེར་མ་ཟད་ཁྱོད་ཀྱིས་ངེད་རྣམས་འོ་མ་དང་སྦྲང་རྩི་བཞུར་བའི་ཡུལ་དུ་མ་ཁྲིད་ལ། ས་ཞིང་དང་རྒུན་འབྲུམ་ར་བ་དག་ཀྱང་ངེད་རྣམས་ལ་ས་སྐལ་དུ་མ་བྱིན། ཁྱོད་ཀྱིས་མི་འདི་དག་གི་མིག་འདོན་པར་བྱའམ། ངེད་གཉིས་ཡར་མི་འགྲོ་ཞེས་སྨྲས་སོ། །
NUM 16:15 དེ་ནས་མོ་ཤེ་ཤིན་ཏུ་ཁྲོས་ཏེ་དཀོན་མཆོག་ཡ་ཝཱེ་ལ་འདི་ལྟར། ཁྱེད་ཀྱིས་དེ་དག་གི་མཆོད་པ་མི་གཟིགས་པར་མཛོད། ངས་དེ་དག་ལས་བོང་བུ་གཅིག་ཀྱང་བླངས་མེད་ལ། ཁོ་རྣམས་ལས་མི་གཅིག་ལ་ཡང་གནོད་པ་བཏང་མེད་ཅེས་ཞུས་སོ། །
NUM 16:16 མོ་ཤེ་ཡིས་ཀོ་རཱག་ལ་འདི་ལྟར། སང་ཉིན་ཁྱོད་དང་ཁྱོད་ཀྱི་འགྲོགས་ཡ་རྣམས་དང་། དེ་མིན་ཨ་རོན་བཅས་དཀོན་མཆོག་ཡ་ཝཱེའི་དྲུང་དུ་འཛོམ་པར་གྱིས་ཤིག
NUM 16:17 ཁྱོད་ཅག་མི་རེ་རེས་རང་གི་སྤོས་ཕོར་ཁྱེར་ནས་དེ་དག་གི་ནང་དུ་སྤོས་ཞོག་ཅིག མི་རེ་རེས་རང་རང་གི་སྤོས་ཕོར་དཀོན་མཆོག་ཡ་ཝཱེའི་དྲུང་དུ་འཁྱེར་འོང་དགོས་ལ། བསྡོམས་པས་སྤོས་ཕོར་ཉིས་བརྒྱ་ལྔ་བཅུ་ཡིན། ཁྱོད་དང་ཨ་རོན་གཉིས་ཀྱིས་ཀྱང་རང་རང་གི་སྤོས་ཕོར་འཁྱེར་འོང་དགོས་ཞེས་སྨྲས་སོ། །
NUM 16:18 དེ་ནས་ཁོ་རྣམས་མི་རེ་རེས་རང་རང་གི་སྤོས་ཕོར་ཁྱེར་ནས་དེ་དག་གི་སྟེང་དུ་མེ་དང་མེའི་སྟེང་དུ་སྤོས་བཞག་རྗེས། མོ་ཤེ་དང་ཨ་རོན་མཉམ་དུ་མཇལ་འཕྲད་གུར་མཆོག་གི་སྒོ་ཁར་འགྲེང་ངོ་། །
NUM 16:19 ཀོ་རཱག་གིས་མི་ཚོགས་ཡོངས་མོ་ཤེ་དང་ཨ་རོན་གཉིས་ལ་རྒོལ་བར་མཇལ་འཕྲད་གུར་མཆོག་གི་སྒོ་ཁར་བསྡུས་པ་ན། དཀོན་མཆོག་ཡ་ཝཱེའི་གཟི་འོད་མི་ཚོགས་ཡོངས་ལ་མངོན་པར་གྱུར་ཏོ། །
NUM 16:20 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 16:21 བདག་གིས་མི་ཚོགས་འདི་སྐད་ཅིག་ཉིད་ལ་རྩ་ནས་འཇོམས་པའི་ཕྱིར། ཁྱོད་གཉིས་དེ་དག་དང་གྱེས་ཤིག་ཅེས་གསུངས་སོ། །
NUM 16:22 དེ་ནས་མོ་ཤེ་དང་ཨ་རོན་གཉིས་ཀྱིས་གདོང་སར་བཏུད་ནས་འདི་ལྟར། ཀྱེ་དཀོན་མཆོག ལུས་ཅན་ཐམས་ཅད་ཀྱི་སེམས་ཉིད་ཀྱི་དཀོན་མཆོག་ལགས། མི་གཅིག་གིས་སྡིག་པ་བྱས་པས་ཁྱེད་ཉིད་མི་ཚོགས་ཡོངས་ལ་ཐུགས་ཁྲོ་བར་མཛད་དམ་ཞེས་ཞུས་སོ། །
NUM 16:23 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 16:24 ཁྱོད་ཀྱིས་མི་ཚོགས་ལ། ཁྱོད་རྣམས་ཀོ་རཱག་དང་། དཱ་ཐན། ཨ་བི་རཱམ་བཅས་ཀྱི་གུར་དང་འབྲལ་བར་གྱིས་སྨྲོས་ཤིག་ཅེས་གསུངས་སོ། །
NUM 16:25 དེ་ནས་མོ་ཤེ་ཡར་ལངས་ནས་དཱ་ཐན་དང་ཨ་བི་རཱམ་གཉིས་ཀྱི་རྩར་ཕྱིན་པ་དང་། ཡེས་ར་ཨེལ་གྱི་རྒན་པོ་རྣམས་ཀྱང་ཁོང་གི་རྗེས་སུ་འབྲངས་སོ། །
NUM 16:26 དེ་ནས་མོ་ཤེ་ཡིས་མི་ཚོགས་ལ་འདི་ལྟར། ཁྱོད་ཅག་མི་ངན་འདི་དག་གི་གུར་རྣམས་དང་རིང་དུ་འབྲལ་བར་གྱིས། ཁྱོད་རྣམས་དེ་དག་གི་སྡིག་པའི་རྐྱེན་གྱིས་རླུང་གིས་འཁུར་བ་ལྟར་མི་འགྱུར་བའི་སླད། དེ་དག་གི་ཡིན་པ་གང་ལ་ཡང་རེག་པར་མི་བྱའོ་ཞེས་སྨྲས་པ་ལ།
NUM 16:27 མི་ཚོགས་ཀོ་རཱག་དང་དཱ་ཐན་དང་ཨ་བི་རཱམ་བཅས་ཀྱི་གུར་གྱི་ཕྱོགས་བཞིར་བྲལ་ཞིང་། དཱ་ཐན་དང་ཨ་བི་རཱམ་གཉིས་ཀྱིས་རང་གི་ཆུང་མ་རྣམས་དང་བུ་ཕྲུག་དང་ཕྲུ་གུ་བཅས་ཁྲིད་ནས་ཐོན་ཏེ་རང་གི་གུར་རྣམས་ཀྱི་སྒོ་ཁར་འགྲེང་ནས་བསྡད་དོ། །
NUM 16:28 མོ་ཤེ་ཡིས་འདི་ལྟར། དོན་འདི་ཐམས་ཅད་ནི་ངས་རང་གི་བསམ་ཚུལ་བཞིན་དུ་སྒྲུབ་པ་མ་ཡིན་པར། དཀོན་མཆོག་ཡ་ཝཱེས་ང་རང་དོན་འདི་རྣམས་བསྒྲུབ་ཏུ་མངགས་པ་ཁྱོད་ཅག་གིས་འདི་ནས་ཤེས་ཡོང་སྟེ།
NUM 16:29 གལ་སྲིད་མི་འདི་རྣམས་འཆི་བ་ནི་མི་ཐམས་ཅད་ཀྱི་ལུགས་ལྟར་ཡིན་པའམ། ཡང་ན་ཁོ་རྣམས་ཀྱིས་མྱོང་བ་ནི་མི་ཐམས་ཅད་ཀྱིས་མྱོང་བ་བཞིན་དུ་ཡིན་ན། དཀོན་མཆོག་ཡ་ཝཱེས་ང་རང་མངགས་པ་མ་ཡིན་ཏེ།
NUM 16:30 གལ་སྲིད་དཀོན་མཆོག་ཡ་ཝཱེས་དོན་ཞིག་གསར་དུ་བཏོད་ཅིང། ས་གཞིས་རང་གི་ཁ་གདངས་ཏེ་ཁོ་རྣམས་དང་ཁོ་རྣམས་ལ་ཡོད་པ་ཐམས་ཅད་ཁྱུར་མིད་བཏང་ནས་གསོན་པོར་གཤིན་ཡུལ་དུ་ནུབ་ན། དེ་ནས་མི་འདི་དག་གིས་དཀོན་མཆོག་ཡ་ཝཱེ་ལ་སྐུར་བ་བཏབ་པ་ཁྱོད་ཅག་གིས་ཤེས་པར་འགྱུར་རོ་ཞེས་སྨྲས་སོ། །
NUM 16:31 མོ་ཤེ་ཡིས་གཏམ་དེ་ཐམས་ཅད་བརྗོད་ཚར་བ་ན། དེ་རྣམས་ཀྱི་རྐང་འོག་གི་ས་གཞི་གས་ཤིང་།
NUM 16:32 ས་གཞིས་རང་གི་ཁ་གདངས་ནས་དེ་དག་དང་དེ་དག་གི་ཁྱིམ་ཚང་དང་། ཀོ་རཱག་གི་མི་དང་ནོར་རྫས་ཐམས་ཅད་ཁྱུར་མིད་བཏང་ངོ་། །
NUM 16:33 དེ་བཞིན་ཁོ་རྣམས་དང་ཁོ་རྣམས་ལ་དབང་བ་ཐམས་ཅད་གསོན་པོར་གཤིན་ཡུལ་དུ་ནུབ་ཅིང་། ས་གཞིས་ཁོ་རྣམས་བཀབ་སྟེ་མི་ཚོགས་ལས་མེད་པར་གྱུར་ཏོ། །
NUM 16:34 དེ་དག་གི་མཐའ་འཁོར་དུ་ཡོད་པའི་ཡེས་ར་ཨེལ་པ་ཐམས་ཅད་ཀྱིས་དེ་རྣམས་ཀྱི་ངུ་འབོད་ཐོས་ནས་བྲོས་ཤིང་། ས་གཞིས་རང་ཅག་ཀྱང་ཁྱུར་མིད་གཏོང་སྲིད་ཅེས་སྨྲས་སོ། །
NUM 16:35 ཡང་དཀོན་མཆོག་ཡ་ཝཱེའི་ཕྱོགས་ནས་མེ་བྱུང་སྟེ་སྤོས་བསྒྲོན་པའི་མི་ཉིས་བརྒྱ་དང་ལྔ་བཅུ་བཅོམ་པའོ། །
NUM 16:36 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 16:37 ཁྱོད་ཀྱིས་མཆོད་དཔོན་ཨ་རོན་གྱི་བུ་ཨེ་ལི་ཨ་ཟར་ལ་ཁ་བསྒོ་བཏང་ནས། ཁོ་ལ་སྤོས་ཕོར་དེ་དག་མེ་རོའི་ཁྲོད་ནས་ལེན་པ་དང་མེ་ནི་ས་གཞན་ལ་གཏོར་དུ་འཇུག་དགོས། དེ་ནི་སྤོས་ཕོར་རྣམས་དམ་པ་ཡིན་པས་སོ། །
NUM 16:38 སྡིག་པ་བྱས་ནས་རང་སྲོག་བརླག་པ་དེ་རྣམས་ཀྱི་སྤོས་ཕོར་ཁྱོད་ཅག་གིས་ལེབ་མོར་བརྡུངས་ཏེ་མཆོད་ཁྲི་གཡོག་སྤྱད་དུ་བྱེད་དགོས། སྤོས་ཕོར་དེ་དག་ཁོ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་མྱོང་བས་དམ་པ་ཡིན་པར་མ་ཟད། དེ་ནི་ཡེས་ར་ཨེལ་པ་རྣམས་ལ་ཕྱི་འདོམས་ཀྱི་རྟགས་ཤིག་ཡིན་ཞེས་གསུངས་སོ། །
NUM 16:39 དེ་ནས་མཆོད་དཔོན་ཨེ་ལི་ཨ་ཟར་གྱིས་མེས་བསྲེགས་པའི་མི་དེ་དག་གིས་ཕུལ་མྱོང་བའི་ལི་ཡི་སྤོས་ཕོར་རྣམས་བླངས་ནས། ལེབ་མོར་བརྡུང་དུ་བཅུག་སྟེ་མཆོད་ཁྲི་གཡོག་སྤྱད་དུ་བྱས་པ་དང་།
NUM 16:40 ཡེས་ར་ཨེལ་པ་རྣམས་ལ་ཕྱི་འདོམས་ཀྱི་རྟགས་ཤིག་ཏུ་བཞག་ཅིང་། ཨ་རོན་གྱི་རིགས་རྒྱུད་མ་ཡིན་པའི་ཕྱི་མི་སུ་ཡིན་ཡང་དཀོན་མཆོག་ཡ་ཝཱེའི་དྲུང་དུ་ཡོང་ནས་སྤོས་བསྒྲོན་པར་མི་བྱ་སྟེ། ཁོ་རང་ཀོ་རཱག་དང་ཁོའི་འགྲོགས་ཡ་བཞིན་དུ་མི་འགྱུར་བའི་ཕྱིར་ཡིན་ལ། དེ་ནི་དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཨེ་ལི་ཨ་ཟར་ལ་གནང་བའི་བཀའ་བཞིན་ནོ། །
NUM 16:41 དེའི་ཕྱི་ཉིན་ཡེས་ར་ཨེལ་པའི་མི་ཚོགས་ཡོངས་ཀྱིས་མོ་ཤེ་དང་ཨ་རོན་གཉིས་ལ་འཁང་ར་བྱས་ཏེ་ན་རེ། ཁྱོད་གཉིས་ཀྱིས་དཀོན་མཆོག་ཡ་ཝཱེའི་འབངས་མི་བསད་པ་ཡིན་ཞེས་སྨྲས་ཤིང་།
NUM 16:42 མི་ཚོགས་འདུས་ནས་མོ་ཤེ་དང་ཨ་རོན་གཉིས་ལ་རྒོལ་བའི་ཚེ། ཁོ་གཉིས་ཁ་ཕྱིར་འཁོར་ནས་མཇལ་འཕྲད་གུར་མཆོག་གི་ཕྱོགས་སུ་བལྟས་པ་ན། ཀྱེ་མ། མཇལ་འཕྲད་གུར་མཆོག་སྤྲིན་གྱིས་གཡོགས་ཤིང་དཀོན་མཆོག་ཡ་ཝཱེའི་གཟི་འོད་མངོན་པར་གྱུར་ཏོ། །
NUM 16:43 དེ་ནས་མོ་ཤེ་དང་ཨ་རོན་གཉིས་མཇལ་འཕྲད་གུར་མཆོག་གི་མདུན་དུ་སོང་བ་དང་།
NUM 16:44 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 16:45 ཁྱོད་གཉིས་མི་ཚོགས་འདི་དང་འབྲལ་བར་གྱིས་ཤིག བདག་གིས་ཁོ་རྣམས་སྐད་ཅིག་ཉིད་ལ་མེད་པར་བྱའོ་ཞེས་གསུངས་པ་ན། ཁོ་གཉིས་ཀྱིས་གདོང་སར་བཏུད་དོ། །
NUM 16:46 མོ་ཤེ་ཡིས་ཨ་རོན་ལ་འདི་ལྟར། ཁྱོད་ཀྱིས་སྤོས་ཕོར་ལོངས་ལ་མཆོད་ཁྲིའི་སྟེང་གི་མེ་དེའི་ནང་དུ་བླུགས་ཤིག དེའི་སྟེང་དུ་སྤོས་བསྒྲོན་རྗེས་མགྱོགས་པོར་མི་ཚོགས་ཡོད་སར་སོང་ལ། ཁོ་རྣམས་ཀྱི་དོན་དུ་སྡིག་བཤགས་བྱོས་ཤིག གང་ལ་ཟེར་ན། དཀོན་མཆོག་ཡ་ཝཱེ་ཐུགས་རབ་ཏུ་ཁྲོས་ཤིང་། གཉན་ནད་འགོ་ཚུགས་ཟིན་པའི་ཕྱིར་རོ་ཞེས་སྨྲས།
NUM 16:47 དེ་ནས་ཨ་རོན་གྱིས་མོ་ཤེ་ཡིས་བསྒོས་པ་བཞིན་དུ། སྤོས་ཕོར་ཁྱེར་ནས་མི་ཚོགས་ཀྱི་དཀྱིལ་དུ་རྒྱུགས་པ་ལ། ལྟོས་དང་། མི་རྣམས་ཀྱི་ཁྲོད་དུ་དངོས་གནས་གཉན་ནད་བྱུང་འགོ་ཚུགས། དེ་ནས་ཁོས་སྤོས་བསྒྲོན་ཞིང་མི་ཚོགས་ཀྱི་དོན་དུ་སྡིག་བཤགས་བྱས་སོ། །
NUM 16:48 ཁོ་ནི་གཤིན་པོ་དང་གསོན་པོ་གཉིས་ཀྱི་བར་ནས་འགྲེང་པ་ན། གཉན་ནད་མཚམས་ཆད་དོ། །
NUM 16:49 ཀོ་རཱག་གི་དོན་རྐྱེན་དབང་གིས་ཤི་བ་རྣམས་ལས་གཞན་གཉན་ནད་ལས་ཤི་བའི་མི་ནི་ཆིག་ཁྲི་བཞི་སྟོང་བདུན་བརྒྱའོ། །
NUM 16:50 དེ་ནས་ཨ་རོན་ཕྱིར་མཇལ་འཕྲད་གུར་མཆོག་གི་སྒོ་ཁ་རུ་མོ་ཤེའི་རྩར་འབྱོར་བ་ན། གཉན་ནད་མཚམས་ཆད་དོ། །
NUM 17:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 17:2 ཁྱོད་ཀྱིས་ཡེས་ར་ཨེལ་པ་རྣམས་ལ་ཁ་བསྒོ་བྱོས་ལ། ཁོ་རྣམས་ལས་འཁར་བ་ལེན་དགོས་ཏེ། ཕ་ཁྱིམ་བཞིན་དུ་ཚོ་པ་རེ་ནས་འཁར་བ་རེ་ལེན་པ་དང་། ཁོ་རྣམས་ཀྱི་འགོ་དཔོན་ཐམས་ཅད་ནས་རང་རང་གི་ཕ་ཁྱིམ་བཞིན་དུ། བསྡོམས་པས་འཁར་བ་བཅུ་གཉིས་བླངས་ནས་སོ་སོའི་སྟེང་དུ་མི་རེ་རེའི་མིང་འགོད་པར་གྱིས།
NUM 17:3 ཡང་ལེ་ཝིའི་འཁར་བའི་སྟེང་ལ་ཨ་རོན་གྱི་མིང་འབྲི་དགོས། ཅི་ལ་ཞེ་ན། ཕ་ཁྱིམ་བཞིན་དུ་ཚོ་དཔོན་རེ་ལ་འཁར་བ་རེ་ཡོད་དགོས་སོ། །
NUM 17:4 དེ་ནས་ཁྱོད་ཀྱིས་འཁར་བ་དེ་དག་མཇལ་འཕྲད་གུར་མཆོག་ནང་གི་དཔང་མཛད་ཤུར་སྒམ་གྱི་དྲུང་དུ། བདག་ཁྱོད་དང་ཕྲད་པའི་གནས་དེར་འཇོག་དགོས།
NUM 17:5 ངས་འདེམས་སྲིད་པའི་མི་དེའི་འཁར་བ་ལས་མྱུ་གུ་འབུ་བར་འགྱུར། དེ་ནས་ངས་རང་ངོས་ནས་ཡེས་ར་ཨེལ་པ་རྣམས་ཀྱིས་ཁྱོད་ལ་འཁང་ར་བྱེད་པ་མཚམས་འཇོག་ཏུ་འཇུག་ཅེས་གསུངས་སོ། །
NUM 17:6 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་ལ་ཁ་བསྒོ་བཏང་བ་དང་། དེ་དག་གི་འགོ་དཔོན་ཐམས་ཅད་ཀྱིས་འཁར་བ་ཁོ་ལ་སྤྲད་དེ། དེ་དག་གི་ཕ་ཁྱིམ་བཞིན་དུ་འགོ་དཔོན་རེ་ལ་འཁར་བ་གཅིག་རེ་དང་བསྡོམས་པས་འཁར་བ་བཅུ་གཉིས་ཡོད། ཨ་རོན་གྱི་དབྱུག་པའང་དེ་དག་གི་ཁྲོད་དུ་ཡོད་དོ། །
NUM 17:7 མོ་ཤེ་ཡིས་འཁར་བ་དེ་དག་དཔང་པོའི་གུར་མཆོག་ནང་དཀོན་མཆོག་ཡ་ཝཱེའི་དྲུང་དུ་བཞག་གོ །
NUM 17:8 དེའི་ཕྱི་ཉིན་མོ་ཤེ་དཔང་པོའི་གུར་མཆོག་གི་ནང་དུ་སོང་བ་ན། ཀྱེ་ཧོ། ལེ་ཝི་ཁྱིམ་རྒྱུད་ཀྱི་ཨ་རོན་གྱི་འཁར་བ་ལས་མྱུ་གུ་འབུས་ཤིང་གང་བུ་ཐོན་ནས་མེ་ཏོག་བཞད་པ་དང་སྟར་ཀའི་འབྲས་བུ་ཐོགས་ཡོད་པའོ། །
NUM 17:9 དེ་ནས་མོ་ཤེ་ཡིས་འཁར་བ་དེ་ཐམས་ཅད་དཀོན་མཆོག་ཡ་ཝཱེའི་དྲུང་ནས་ཕྱི་རོལ་ཏུ་ཁྱེར་འོངས་ནས་ཡེས་ར་ཨེལ་པ་ཐམས་ཅད་ལ་བསྟན་པ་དང་། ཁོ་རྣམས་ཀྱིས་དེ་མཐོང་ནས་མི་རེ་རེས་རང་རང་གི་འཁར་བ་བླངས་སོ། །
NUM 17:10 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཨ་རོན་གྱི་འཁར་བ་དེ་ཕྱིར་དཔང་མཛད་ཤུར་སྒམ་གྱི་དྲུང་དུ་ཞོག་ཅིག དེ་ནི་རྒྱབ་འགལ་བྱེད་མཁན་རྣམས་ལ་རྟགས་ཤིག་ཡིན་ཞིང་། ཡང་ཁོ་རྣམས་འཆི་བར་མི་འགྱུར་བའི་སླད། ཁྱོད་ཀྱིས་དེ་དག་གིས་ང་ལ་འཁང་ར་བྱེད་པ་མཚམས་འཇོག་ཏུ་འཇུག་དགོས་ཞེས་གསུངས་སོ། །
NUM 17:11 དེ་ནས་མོ་ཤེ་ཡིས་དེ་བཞིན་བྱས་པ་སྟེ། དཀོན་མཆོག་ཡ་ཝཱེས་ཁོ་ལ་ཅི་ལྟར་བཀའ་གནང་བ་ཡིན་ན། ཁོས་ཀྱང་དེ་བཞིན་བསྒྲུབས་སོ། །
NUM 17:12 ཡེས་ར་ཨེལ་པ་རྣམས་ཀྱིས་མོ་ཤེ་ལ། ཀྱེ། ང་ཚོ་འཆི་བར་འགྱུར། ང་ཚོ་མེད་པར་འགྱུར། ང་ཚོ་ཚང་མ་མེད་པར་འགྱུར་རོ། །
NUM 17:13 དཀོན་མཆོག་ཡ་ཝཱེའི་གུར་མཆོག་གི་ཉེ་སར་ཡོང་མཁན་ཐམས་ཅད་འཆི་བར་ངེས། ངེད་ཅག་ཐམས་ཅད་འཆི་དགོས་སམ་ཞེས་སྨྲས་སོ། །
NUM 18:1 དེ་ནས་དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ། ཁྱོད་དང་ཁྱོད་ཀྱི་བུ་རྣམས་དང་ཁྱོད་ཀྱི་ཕ་ཁྱིམ་གྱི་མི་རྣམས་ཀྱིས་ཁྱོད་དང་མཉམ་དུ་གནས་མཆོག་གི་ཉེས་པ་འཁུར་དགོས། ཁྱོད་དང་ཁྱོད་ཀྱི་བུ་རྣམས་ཀྱིས་ཁྱོད་དང་མཉམ་དུ་མཆོད་དཔོན་གྱི་ལས་འགན་དང་འགལ་བའི་ཉེས་པ་འཁུར་བར་བྱའོ། །
NUM 18:2 ཁྱོད་ཀྱིས་རང་གི་གཉེན་རྒྱུད་ལེ་ཝི་ཚོ་པ་སྟེ་ཁྱོད་ཀྱི་ཕ་མེས་ཀྱི་ཚོ་པ་ཁྱོད་དང་མཉམ་དུ་ཁྲིད་ཡོང་ནས། དེ་རྣམས་ཁྱོད་དང་འབྲེལ་བར་མ་ཟད། ཁྱོད་ལ་ཞབས་ཕྱི་བྱེད་དུ་འཇུག་དགོས། འོན་ཀྱང་ཁྱོད་དང་ཁྱོད་ཀྱི་བུ་རྣམས་དཔང་པོའི་གུར་མཆོག་གི་དྲུང་དུ་འདུག་པར་བྱ།
NUM 18:3 དེ་དག་གིས་ཁྱོད་ལ་ཞབས་ཕྱི་བསྒྲུབ་པ་དང་མཇལ་འཕྲད་གུར་མཆོག་ནང་གི་དོན་ཐམས་ཅད་ལ་འགན་འཁུར་དགོས་ཀྱང་། གནས་མཆོག་གི་ཡོ་བྱད་དང་མཆོད་ཁྲིའི་ཉེ་སར་འགྲོ་མི་འོས། དེ་ནི་ཁོ་རྣམས་དང་ཁྱོད་ཅག་ཀུན་པོ་འཆི་བར་མི་འགྱུར་བའི་ཕྱིར་རོ། །
NUM 18:4 ཁོ་རྣམས་ཁྱོད་དང་འབྲེལ་ནས་མཇལ་འཕྲད་གུར་མཆོག་བསྲུང་དགོས་པ་དང་། གུར་མཆོག་གི་ཞབས་ཕྱི་ཐམས་ཅད་བསྒྲུབ་དགོས། ཕྱི་མི་རྣམས་ཁྱོད་ཅག་གི་ཉེ་སར་འོང་མི་རུང་།
NUM 18:5 ཡེས་ར་ཨེལ་པ་རྣམས་ལ་ཁོང་ཁྲོ་མི་ཕོག་པའི་ཕྱིར་དུ། ཁྱོད་ཅག་གིས་གནས་མཆོག་དང་མཆོད་ཁྲི་བསྲུང་དགོས།
NUM 18:6 ལྟོས་དང་། བདག་གིས་ཁྱོད་ཀྱི་གཉེན་རྒྱུད་ལེ་ཝི་པ་རྣམས་ཡེས་ར་ཨེལ་པ་རྣམས་ལས་དངོས་སུ་བདམས་ཏེ། མཇལ་འཕྲད་གུར་མཆོག་གི་ཞབས་ཕྱི་བསྒྲུབ་པའི་ཕྱིར། དཀོན་མཆོག་ཡ་ཝཱེ་ལ་ཕུལ་ཞིང་ཁྱོད་ཅག་ལ་ལེགས་སྐྱེས་སུ་བཏང་བའོ། །
NUM 18:7 ཁྱོད་དང་ཁྱོད་ཀྱི་བུ་རྣམས་ཀྱིས་ཁྱོད་དང་མཉམ་དུ་མཆོད་དཔོན་གྱི་འགན་བསྲུང་དགོས་པ་དང་། མཆོད་ཁྲི་དང་ཡོལ་བའི་ནང་རོལ་གྱི་དོན་ཐམས་ཅད་བསྒྲུབས་ནས་ཞབས་ཕྱི་བྱེད་དགོས། བདག་གིས་མཆོད་དཔོན་གྱི་ལས་འགན་ནི་ཁྱོད་རྣམས་ལ་ཞབས་ཕྱི་བསྒྲུབ་པའི་གནང་སྦྱིན་དུ་སྤྲད་པ་ཡིན་ལ། ཕྱི་མི་ཉེ་བར་འོངས་ན་ངེས་པར་གསོད་དགོས་ཞེས་གསུངས་སོ། །
NUM 18:8 དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ། ལྟོས་དང་། བདག་གིས་རང་ལ་དབང་བའི་འདེགས་མཆོད་དེ། ཡེས་ར་ཨེལ་པ་རྣམས་ཀྱིས་དམ་པར་བྱས་པའི་རྫས་ཐམས་ཅད་ནི་ཁྱོད་དང་ཁྱོད་ཀྱི་བུ་རྒྱུད་རྣམས་ལ་དུས་གཏན་དུ་འཐོབ་འོས་པའི་བགོ་སྐལ་དུ་སྤྲད་པ་ཡིན་ནོ། །
NUM 18:9 ཡེས་ར་ཨེལ་པ་རྣམས་ཀྱིས་བདག་ལ་ཕུལ་བའི་མེ་མ་བརྒྱུད་པའི་མཆོད་པ་ཀུན་ལས་དམ་པ་ཐམས་ཅད་དེ། འབྲུ་རིགས་ཀྱི་མཆོད་པ་དང་སྡིག་བཤགས་མཆོད་པ་དང་། ཉེས་སེལ་མཆོད་པ་བཅས་ནི་ཀུན་ལས་དམ་པའི་རྫས་བྱས་ནས་ཁྱོད་དང་ཁྱོད་ཀྱི་བུ་རྒྱུད་རྣམས་ལ་དབང་བའོ། །
NUM 18:10 ཁྱོད་ཀྱིས་ཀུན་ལས་དམ་པ་ཡིན་པའི་གནས་སུ་དེ་བཟའ་དགོས་ལ། སྐྱེས་པ་ཐམས་ཅད་ཀྱིས་དེ་བཟའ་རུང་བ་ཡིན། ཁྱོད་ཀྱིས་རྫས་དེ་དམ་པར་བརྩི་དགོས།
NUM 18:11 ཡེས་ར་ཨེལ་པ་རྣམས་ཀྱི་ཕྱག་རྟེན་ལས་འདེགས་མཆོད་དང་གཡོབ་མཆོད་ཐམས་ཅད་ནི་ཁྱོད་ཀྱི་ཡིན་ཏེ། ངས་ཁྱོད་དང་ཁྱོད་ཀྱི་བུ་དང་བུ་མོ་རྣམས་ལ་དུས་གཏན་དུ་འཐོབ་འོས་པའི་བགོ་སྐལ་དུ་སྤྲད་པ་དང་། ཁྱོད་ཀྱི་ཁྱིམ་དུ་གཙང་མ་ཡིན་པ་ཐམས་ཅད་ཀྱིས་དེ་བཟའ་རུང་བ་ཡིན།
NUM 18:12 སྣུམ་ཡག་ཤོས་དང་། རྒུན་ཆང་གསར་པ་ཡག་ཤོས་དང་། འབྲུ་རིགས་བཅས་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འབུལ་བའི་སྟོན་ཐོག་རྣམས་ནི་ངས་ཁྱོད་ལ་སྤྲད་པ་ཡིན་ནོ། །
NUM 18:13 ཁོ་རྣམས་ཀྱིས་ཡུལ་ནས་ཁྱེར་འོངས་ཏེ་དཀོན་མཆོག་ཡ་ཝཱེ་ལ་འབུལ་བའི་སྟོན་ཐོག་ཐམས་ཅད་ཁྱོད་ཅག་གི་ཡིན། ཁྱོད་ཀྱི་ཁྱིམ་དུ་གཙང་མ་ཡིན་པ་ཐམས་ཅད་ཀྱིས་དེ་བཟའ་རུང་བ་ཡིན།
NUM 18:14 ཡེས་ར་ཨེལ་པའི་ཁྲོད་ནས་བསྔོས་པ་ཐམས་ཅད་ཀྱང་ཁྱོད་ཀྱི་ཡིན་པར་འགྱུར།
NUM 18:15 ཤ་ཁྲག་གདོས་བཅས་ཀྱི་སྲོག་ལྡན་སྐྱེས་འགོ་རྣམས་ཏེ། ཁོ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བ་ནི་མི་ཕྱུགས་གང་ཡིན་ཡང་ཐམས་ཅད་ཁྱོད་ཀྱི་ཡིན། འོན་ཀྱང་མིའི་རིགས་ཀྱི་སྐྱེས་འགོ་ནི་ཁྱོད་ཀྱིས་ངེས་པར་བླུ་དགོས་ལ། ཕྱུགས་མི་གཙང་བ་རྣམས་ཀྱི་སྐྱེས་འགོ་ཡང་བླུ་དགོས་སོ། །
NUM 18:16 ཡང་དེ་དག་གི་བླུ་རིན་ནི། ཟླ་བ་གཅིག་བརྒལ་རྗེས་ཁྱོད་ཀྱིས་རང་གིས་ཚོད་རྩིས་བྱས་པའི་རིན་དང་། གནས་མཆོག་གི་སྲང་བཞིན་དུ། དངུལ་སྲང་ལྔ་ཡིས་བླུ་དགོས་ཏེ། སྲང་གཅིག་ནི་གཱེ་ར་ཉི་ཤུ་ཡིན།
NUM 18:17 འོན་ཀྱང་བ་གླང་གི་སྐྱེས་འགོའམ། ལུག་གི་སྐྱེས་འགོའམ། ཡང་ན་ར་ཡི་སྐྱེས་འགོ་རྣམས་ནི་དམ་པ་ཡིན་པས་བླུ་མི་རུང་། ཁྱོད་ཀྱིས་དེ་དག་གི་ཁྲག་ནི་མཆོད་ཁྲིའི་སྟེང་དུ་གཏོར་བ་དང་། ཚིལ་ནི་མེ་རུ་བསྲེགས་ནས་དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་འབུལ་དགོས།
NUM 18:18 དེ་དག་གི་ཤ་ཁྱོད་ཀྱི་ཡིན་ཏེ། གཡོབ་མཆོད་ཡིན་པའི་བྲང་ཁོག་དང་བརླ་གཡས་པ་ཁྱོད་ཀྱི་ཡིན་པ་བཞིན་ནོ། །
NUM 18:19 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་རྫས་དམ་པའི་ཁྲོད་ཀྱི་འདེགས་མཆོད་ཐམས་ཅད། ངས་ཁྱོད་དང་ཁྱོད་ཀྱི་བུ་དང་བུ་མོ་རྣམས་ལ་དུས་གཏན་དུ་འཐོབ་འོས་པའི་བགོ་སྐལ་དུ་སྤྲད་པ་ཡིན། དེ་ནི་དཀོན་མཆོག་ཡ་ཝཱེའི་དྲུང་དུ་ཁྱོད་དང་ཁྱོད་ཀྱི་རིགས་རྒྱུད་རྣམས་ཀྱི་དུས་གཏན་གྱི་ཚྭའི་ཞལ་ཆད་ཅིག་ཡིན་ཞེས་གསུངས་སོ། །
NUM 18:20 དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ། ཁྱོད་ལ་ཡེས་ར་ཨེལ་པ་རྣམས་ཀྱི་ཡུལ་དུ་ས་སྐལ་ཡོད་མི་རུང་ལ། དེ་དག་གི་ཁྲོད་དུ་སྐལ་ཡང་ཡོད་མི་རུང་། ཡེས་ར་ཨེལ་པ་རྣམས་ཀྱི་ཁྲོད་དུ་བདག་ནི་ཁྱོད་ཀྱི་ཐོབ་སྐལ་དང་ཁྱོད་ཀྱི་བགོ་སྐལ་ཡིན་ནོ། །
NUM 18:21 ཡང་ལེ་ཝིའི་བུ་རྒྱུད་རྣམས་ལ་བདག་གིས་ཡེས་ར་ཨེལ་པ་རྣམས་ཀྱི་འབུལ་བའི་བཅུ་ཆ་གཅིག་ཐམས་ཅད་ཁོ་ཚོར་དངོས་སུ་བགོ་སྐལ་གྱི་ཚབ་ཏུ་སྤྲད་པ་སྟེ། དེ་དག་གིས་མཇལ་འཕྲད་གུར་མཆོག་གི་ནང་དུ་ཞབས་ཕྱི་བསྒྲུབས་པའི་ཐོབ་ཆ་ཡིན།
NUM 18:22 དུས་ད་ནས་བཟུང་ཡེས་ར་ཨེལ་པ་རྣམས་མཇལ་འཕྲད་གུར་མཆོག་གི་ཉེ་སར་འོང་མི་རུང་། དེ་ནི་སྡིག་པ་ཁུར་ནས་འཆི་བར་མི་འགྱུར་བའི་ཕྱིར་དུའོ། །
NUM 18:23 ལེ་ཝི་པ་རྣམས་ཀྱིས་མཇལ་འཕྲད་གུར་མཆོག་གི་ཞབས་ཕྱི་བསྒྲུབས་ནས་རང་གི་ཉེས་པ་འཁུར་དགོས། དེ་ནི་ཁྱོད་རྣམས་མི་རབས་ནས་མི་རབས་བར་གྱི་དུས་གཏན་གྱི་སྒྲིག་ཁྲིམས་ཡིན། ཡེས་ར་ཨེལ་པ་རྣམས་ཀྱི་ཁྲོད་དུ་དེ་དག་ལ་བགོ་སྐལ་ཡོད་མི་རུང་སྟེ།
NUM 18:24 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་འདེགས་མཆོད་ཀྱི་བཅུ་ཆ་གཅིག་ནི་བདག་གིས་ལེ་ཝི་པ་རྣམས་ལ་བགོ་སྐལ་དུ་སྤྲད་ཡོད། དེ་བས་བདག་གིས་དེ་དག་ལ་ཡེས་ར་ཨེལ་པ་རྣམས་ཀྱི་ཁྲོད་དུ་བགོ་སྐལ་ཡོད་མི་རུང་སྨྲས་པ་ཡིན་ཞེས་གསུངས་སོ། །
NUM 18:25 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 18:26 ཁྱོད་ཀྱིས་ལེ་ཝི་པ་རྣམས་ལ་འདི་ལྟར་སྨྲོས་ཤིག ཁྱོད་ཅག་གིས་ཡེས་ར་ཨེལ་པ་རྣམས་ལས་ངས་ཁྱོད་རྣམས་ལ་ནོར་སྐལ་དུ་སྤྲད་པའི་བཅུ་ཆ་གཅིག་ལེན་པའི་ཚེ། ཁྱོད་ཅག་གིས་དེ་ལས་བཅུ་ཆ་གཅིག་བླངས་ནས་དཀོན་མཆོག་ཡ་ཝཱེ་ལ་འདེགས་མཆོད་དུ་འབུལ་དགོས་ལ།
NUM 18:27 དེ་ནི་ཁྱོད་ཅག་གི་འདེགས་མཆོད་ལ་བརྩི་བ་སྟེ། གཡུལ་ཁའི་ནང་གི་འབྲུ་རིགས་དང་རྒུན་འབྲུམ་འཚིར་གཞོང་ནང་གི་ལྟེམས་ལྟེམས་གང་བའི་རྒུན་ཆང་བཞིན་དུ་ཡིན་ནོ། །
NUM 18:28 དེ་བཞིན་ཁྱོད་ཅག་གིས་ཡེས་ར་ཨེལ་པ་རྣམས་ལས་ཐོབ་པའི་བཅུ་ཆ་གཅིག་དེ་ལས་དཀོན་མཆོག་ཡ་ཝཱེ་ལ་འདེགས་མཆོད་དུ་འབུལ་དགོས་ཤིང་། དཀོན་མཆོག་ཡ་ཝཱེ་ལ་ཕུལ་བའི་འདེགས་མཆོད་དེ་ཁྱོད་ཅག་གིས་མཆོད་དཔོན་ཨ་རོན་ལ་སྤྲོད་དགོས།
NUM 18:29 ཁྱོད་རྣམས་ལ་ཐོབ་པའི་ལེགས་སྐྱེས་ཐམས་ཅད་ལས་ཡག་ཤོས་ནི་དམ་པར་བྱས་ནས་དཀོན་མཆོག་ཡ་ཝཱེ་ལ་འདེགས་མཆོད་དུ་ཕུལ་ཞིག་ཅེས་པའོ། །
NUM 18:30 དེ་བས་ན། ཁྱོད་ཀྱིས་ལེ་ཝི་པ་རྣམས་ལ་འདི་ལྟར་སྨྲོས་ཤིག གལ་སྲིད་ཁྱོད་རྣམས་ཀྱིས་ཡག་ཤོས་དེ་ཕུལ་བ་ཡིན་ན། དེ་ནི་ཁྱོད་རྣམས་ཀྱི་གཡུལ་ཁའི་ནང་གི་འབྲུ་རིགས་དང་རྒུན་འབྲུམ་འཚིར་གཞོང་ནང་གི་རྒུན་ཆང་དུ་བརྩི་བ་ཡིན།
NUM 18:31 ཁྱོད་ཅག་དང་ཁྱོད་ཅག་གི་ནང་མི་རྣམས་ཀྱིས་གནས་གང་དུ་ཡང་ཟོས་ཆོག ཅི་ལ་ཞེ་ན། དེ་ནི་ཁྱོད་ཅག་གི་གླ་ཆ་དང་ཁྱོད་ཅག་གིས་མཇལ་འཕྲད་གུར་མཆོག་ནས་ཞབས་ཕྱི་བསྒྲུབས་པའི་ཐོབ་ཆ་ཡིན་ནོ། །
NUM 18:32 ཁྱོད་ཅག་གིས་ཡག་ཤོས་དེ་ག་དུས་འདེགས་མཆོད་དུ་ཕུལ་བ་ཡིན་ན་སྡིག་པ་འཁུར་མི་དགོས། ཁྱོད་ཅག་འཆི་བར་མི་འགྱུར་བའི་ཕྱིར། ཡེས་ར་ཨེལ་པ་རྣམས་ཀྱི་རྫས་དམ་པ་རྣམས་སྦག་མི་རུང་ཞེས་གསུངས་སོ། །
NUM 19:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 19:2 ཡ་ཝཱེས་གནང་བའི་བཀའ་ཁྲིམས་ཀྱི་སྒྲིག་སྲོལ་ནི་འདི་ལྟ་སྟེ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་བསྒོ་བར་བྱ། བ་དྲུས་མ་དམར་པོ་ལྷད་མེད་སྐྱོན་མེད་གཉའ་ཤིང་འཁུར་མ་མྱོང་བ་ཞིག་ཁྱོད་ཀྱི་རྩར་འཁྲིད་ཡོང་དགོས་ལ།
NUM 19:3 ཁྱོད་ཅག་གིས་བ་གཞོན་དེ་མཆོད་དཔོན་ཨེ་ལི་ཨ་ཟར་ལ་སྤྲོད་དགོས་པ་དང་། ཁོས་བ་གཞོན་སྒར་གྱི་ཕྱི་རོལ་ཏུ་ཁྲིད་ནས་མི་ཞིག་གིས་དེ་ཁོའི་མདུན་དུ་བཤའ་དགོས།
NUM 19:4 དེ་ནས་མཆོད་དཔོན་ཨེ་ལི་ཨ་ཟར་གྱིས་རང་གི་མཛུབ་གུ་ཁྲག་ལ་བསྒྲེས་ནས་མཇལ་འཕྲད་གུར་མཆོག་གི་མདུན་ཕྱོགས་སུ་ལན་བདུན་ལ་གཏོར་དགོས་པ་དང་།
NUM 19:5 དེ་ནས་མི་ཞིག་གིས་བ་དྲུས་མ་དེ་མཆོད་དཔོན་གྱི་མིག་ལམ་དུ་བསྲེག་དགོས། དེའི་པགས་པ་དང་། ཤ་དང་། ཁྲག་དང་། ལྕི་བ་བཅས་ཡོངས་སུ་བསྲེག་དགོས་སོ། །
NUM 19:6 མཆོད་དཔོན་གྱིས་ཐང་ཤིང་དང་། ཨི་སོབ་རྩྭ་ཤིང་དང་། བལ་སྐུད་མཚལ་དམར་བཅས་བླངས་ནས་བ་དྲུས་མ་དེ་འཚིག་བཞིན་པའི་མེའི་ནང་དུ་གཡུག་དགོས།
NUM 19:7 དེ་ནས་མཆོད་དཔོན་གྱིས་རང་གི་གོས་རྣམས་བཀྲུ་བ་དང་། རང་གི་ལུས་པོ་ཆུ་ལ་བཀྲུས་རྗེས་ད་གཟོད་སྒར་དུ་ཡོང་དགོས། འོན་ཀྱང་དགོང་མོའི་བར་དུ་མཆོད་དཔོན་མི་གཙང་བ་ཡིན་ནོ། །
NUM 19:8 བ་གཞོན་མེ་ལ་སྲེག་མཁན་མི་དེས་ཀྱང་རང་གི་གོས་རྣམས་བཀྲུ་བ་དང་རང་གི་ལུས་པོ་ཆུ་ནང་དུ་བཀྲུ་དགོས་ལ། ཁོ་ཡང་དགོང་མོའི་བར་དུ་མི་གཙང་བ་ཡིན།
NUM 19:9 གཙང་མ་ཡིན་པའི་མི་ཞིག་གིས་བ་དྲུས་མ་ཡི་ཐལ་བ་བསྡུས་ཏེ། སྒར་ཁའི་ཕྱི་རོལ་གྱི་གནས་གཙང་ས་ཞིག་ཏུ་འཇོག་པ་དང་། ཡེས་ར་ཨེལ་པའི་མི་ཚོགས་ཀྱི་ཕྱིར་དུ་སྦག་བཙོག་སེལ་བྱེད་ཀྱི་ཆུ་བྱས་ནས་འཇོག་དགོས་ཤིང་། དེ་ནི་སྡིག་པ་སེལ་བྱེད་ཡིན་ནོ། །
NUM 19:10 དེ་ནས་བ་དྲུས་མ་དེའི་ཐལ་བ་བསྡུ་བའི་མི་དེས་རང་གི་གོས་རྣམས་བཀྲུ་བ་དང་། དགོང་མོའི་བར་དུ་མི་གཙང་བ་ཡིན། དེ་ནི་ཡེས་ར་ཨེལ་པ་རྣམས་དང་ཁོ་ཚོའི་ཁྲོད་དུ་གནས་པའི་ཕྱི་མི་རྣམས་ཀྱི་དུས་གཏན་གྱི་སྒྲིག་ཁྲིམས་ཡིན་ནོ། །
NUM 19:11 འདས་པོ་ཞིག་གི་བེམ་པོར་རེག་པའི་མི་སུ་ཡིན་ཡང་། ཉིན་བདུན་གྱི་རིང་ལ་མི་གཙང་བ་ཡིན།
NUM 19:12 མི་དེས་ཉིན་གསུམ་པ་དང་ཉིན་བདུན་པར་སྦག་བཙོག་སེལ་བྱེད་ཀྱི་ཆུ་དེས་རང་ཉིད་གཙང་མར་བཟོ་དགོས་པ་དང་། དེ་ནས་ཁོ་རང་གཙང་མར་འགྱུར། གལ་སྲིད་ཉིན་གསུམ་པ་དང་ཉིན་བདུན་པ་ལ་རང་ཉིད་གཙང་མར་མ་བཟོས་ན། དེ་ནས་ཁོ་གཙང་བར་མི་འགྱུར་རོ། །
NUM 19:13 སུ་ཞིག་གིས་འདས་པོ་ཞིག་གི་བེམ་པོར་རེག་པ་དང་། རང་ཉིད་གཙང་མར་མི་བཟོ་ན། དེས་དཀོན་མཆོག་ཡ་ཝཱེའི་གུར་མཆོག་སྦགས་པ་ཡིན། མི་དེ་ནི་ཡེས་ར་ཨེལ་པའི་ཁྲོད་ནས་འཕུད་དགོས། ཅི་ལ་ཟེར་ན། སྦག་བཙོག་སེལ་བྱེད་ཀྱི་ཆུ་དེ་རང་སྟེང་ལ་མ་གཏོར་བས་མི་གཙང་བ་ཡིན་ཏེ། དེའི་མི་གཙང་བ་ནི་སྔར་བཞིན་ཁོའི་སྟེང་དུ་གནས་ཡོད་པའོ། །
NUM 19:14 གལ་སྲིད་མི་ཞིག་གུར་གྱི་ནང་དུ་ཤི་ཚེ། དེའི་བཀའ་ཁྲིམས་ནི་འདི་ལྟ་སྟེ། གུར་གྱི་ནང་དུ་ཡོང་མཁན་དང་དེའི་ནང་དུ་ཡོད་པ་ཐམས་ཅད་ཉིན་བདུན་གྱི་རིང་ལ་མི་གཙང་བ་ཡིན།
NUM 19:15 ཁ་ཕྱེས་པའི་སྣོད་ཆས་ཏེ་ཁ་གཅོད་བརྒྱབ་མེད་པའི་སྣོད་ཆས་ཚང་མ་མི་གཙང་བ་ཡིན།
NUM 19:16 སུ་ཞིག་གིས་ཞིང་ཁར་རལ་གྲིས་བསད་པའི་མིའམ། རང་བཞིན་གྱིས་ཤི་བའི་བེམ་པོའམ། ཡང་ན་མིའི་རུས་པའམ། ཡང་ན་དུར་ས་བཅས་ལ་རེག་པ་ཡིན་ན་ཉིན་བདུན་གྱི་རིང་ལ་མི་གཙང་བ་ཡིན་ནོ། །
NUM 19:17 གཙང་མ་མིན་པ་དེའི་ཕྱིར་དུ། མེ་རུ་འཚིག་པའི་སྡིག་པ་སེལ་བྱེད་ཀྱི་ཐལ་བ་བླངས་ནས་སྣོད་ཅིག་གི་ནང་དུ་འཇོག་པ་དང་། དེ་ལ་ཆུ་གསར་པ་བླུགས་ནས།
NUM 19:18 དེ་ནས་གཙང་མ་ཡིན་པའི་མི་ཞིག་གིས་ཨི་སོབ་རྩྭ་ཤིང་བླངས་ནས་ཆུ་ནང་དུ་བསྒྲེས་ཏེ། གུར་གྱི་སྟེང་དང་སྣོད་ཆས་ཐམས་ཅད་ཀྱི་སྟེང་དུ་གཏོར་བ་དང་། ཡང་དེར་ཡོད་པའི་མི་རྣམས་ཀྱི་སྟེང་དང་། རུས་པའམ་རལ་གྲིས་བསད་པའམ། རང་བཞིན་གྱིས་ཤི་བའམ། དུར་ས་བཅས་ལ་རེག་པའི་མི་ཡི་སྟེང་དུ་གཏོར་དགོས་སོ། །
NUM 19:19 ཉིན་གསུམ་པ་དང་ཉིན་བདུན་པར་གཙང་མ་ཡིན་པའི་མི་དེས་གཙང་མ་མིན་པའི་མི་ཡི་སྟེང་དུ་ཆུ་གཏོར་དགོས། དེ་བཞིན་ཉིན་བདུན་པ་ལ་མི་དེ་གཙང་མར་བཟོ་བ་དང་། ཁོས་རང་གི་གོས་རྣམས་བཀྲུ་ཞིང་ལུས་པོ་ཆུ་ནང་བཀྲུ་དགོས་ལ། དགོང་མོའི་དུས་སུ་ཁོ་གཙང་མ་ཡིན་ནོ། །
NUM 19:20 འོན་ཀྱང་གཙང་མ་མིན་པའི་མི་དེས་རང་ཉིད་གཙང་མར་མི་བཟོ་ན། མི་དེ་ནི་མི་ཚོགས་ཀྱི་ཁྲོད་ནས་འཕུད་དགོས། ཅི་ལ་ཞེ་ན། ཁོས་དཀོན་མཆོག་ཡ་ཝཱེའི་གནས་མཆོག་སྦགས་པ་དང་། སྦག་བཙོག་སེལ་བྱེད་ཀྱི་ཆུ་ཁོའི་སྟེང་དུ་མ་གཏོར་བས་ཁོ་ནི་མི་གཙང་ངོ་། །
NUM 19:21 དེ་ནི་ཁྱོད་ཅག་གི་དུས་གཏན་གྱི་སྒྲིག་ཁྲིམས་ཡིན། སྦག་བཙོག་སེལ་བྱེད་ཀྱི་ཆུ་གཏོར་བའི་མི་དེས་རང་གི་གོས་རྣམས་བཀྲུ་དགོས་པ་དང་། སྦག་བཙོག་སེལ་བྱེད་ཀྱི་ཆུ་ལ་རེག་པའི་མི་ནི་དགོང་མོའི་བར་དུ་མི་གཙང་བ་ཡིན།
NUM 19:22 གཙང་མ་མིན་པའི་མི་ཡིས་གང་ཞིག་ལ་རེག་པ་ཐམས་ཅད་མི་གཙང་བ་ཡིན་ལ། ཡང་དེ་ལ་རེག་པའི་མི་སུ་ཡིན་ཡང་དགོང་མོའི་བར་དུ་མི་གཙང་བ་ཡིན་ནོ། །
NUM 20:1 ཟླ་བ་དང་པོར་ཡེས་ར་ཨེལ་པའི་མི་ཚོགས་ཡོངས་རྫོགས་ཟིན་ཞེས་པའི་དབེན་སྟོང་དུ་ཕྱིན་ནས་ཀཱ་དེའེ་ཤཱ་རུ་བསྡད། མིར་ཡམ་དེ་རུ་ཚེ་ལས་འདས་ཤིང་ཡུལ་དེ་རུ་དུར་ལ་སྦས་སོ། །
NUM 20:2 དེ་རུ་མི་ཚོགས་ལ་འཐུང་ཆུ་མེད་པས། ཁོ་རྣམས་འདུས་ཏེ་མོ་ཤེ་དང་ཨ་རོན་གཉིས་ལ་རྒོལ་བ་དང་།
NUM 20:3 མི་ཚོགས་ཀྱིས་མོ་ཤེ་ལ་རྩོད་པ་བྱས་ནས་འདི་ལྟར། ང་ཚོའི་སྤུན་ཟླ་རྣམས་དཀོན་མཆོག་ཡ་ཝཱེའི་དྲུང་དུ་ཤི་བའི་ཚེ་ངེད་ཅག་ཀྱང་ཤི་ན་ལེགས་སོ། །
NUM 20:4 ཁྱོད་ཅག་གིས་དཀོན་མཆོག་ཡ་ཝཱེའི་མི་ཚོགས་དབེན་སྟོང་འདི་རུ་ཁྲིད་འོངས་དོན་ཅི། ངེད་རྣམས་དང་ངེད་ཅག་གི་ཕྱུགས་རྣམས་འདི་རུ་འཆི་བའི་ཕྱིར་ཡིན་ནམ།
NUM 20:5 ཁྱོད་ཅག་གིས་ཅིའི་ཕྱིར་ངེད་རྣམས་ཨེ་ཅིབ་ཡུལ་ནས་ཡར་ས་ཆ་ངན་པ་འདིར་ཁྲིད་ཡོང་བ་ཡིན་ནམ། འདི་རུ་འབྲུ་རིགས་དང་སེ་ཡབ་ཤིང་། རྒུན་ཤིང་། སེ་འབྲུ་སྡོང་པོ་བཅས་མེད་ལ། འཐུང་ཆུ་ཡང་མེད་དོ་ཞེས་སྨྲས།
NUM 20:6 དེ་ནས་མོ་ཤེ་དང་ཨ་རོན་གཉིས་མི་ཚོགས་དང་བྲལ་ནས་མཇལ་འཕྲད་གུར་མཆོག་གི་སྒོ་ཁར་སོང་སྟེ་ཕྱག་བཙལ་བ་ན། དཀོན་མཆོག་ཡ་ཝཱེའི་གཟི་འོད་ཁོ་ཚོ་ལ་སྣང་བར་གྱུར་ཏོ། །
NUM 20:7 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 20:8 ཁྱོད་ཀྱིས་འཁར་བ་ཁྱེར་ནས་ཁྱོད་ཀྱི་ཕུ་བོ་ཨ་རོན་དང་མཉམ་དུ་མི་ཚོགས་བསྡུ་བར་གྱིས། དེ་དག་གི་མིག་ལམ་དུ་བྲག་རྡོ་ལ་ཆུ་བཞུར་བར་སྒོས་ཤིག དེ་ནས་ཁྱོད་ཀྱིས་བྲག་རྡོ་ནས་ཆུ་བཏོན་ཏེ་མི་ཚོགས་དང་དེའི་ཕྱུགས་རྣམས་ལ་ཆུ་ལྡུད་པར་འགྱུར་རོ་ཞེས་གསུངས་སོ། །
NUM 20:9 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ། ཁོང་གི་དྲུང་ནས་འཁར་བ་ཁྱེར་ཏེ་སོང་ངོ་། །
NUM 20:10 དེ་ནས་མོ་ཤེ་དང་ཨ་རོན་གཉིས་ཀྱིས་མི་ཚོགས་བྲག་གི་མདུན་དུ་བསྡུས་ནས་ཁོ་རྣམས་ལ་འདི་ལྟར། ངོ་ལོག་པ་ཁྱོད་ཅག་གིས་ཉོན་ཅིག ངེད་གཉིས་ཀྱིས་བྲག་འདི་ནས་ཁྱོད་རྣམས་ལ་ཆུ་འདོན་པར་བྱའམ་ཞེས་སྨྲས་ཤིང་།
NUM 20:11 མོ་ཤེ་ཡིས་ལག་པ་ཡར་བཏེགས་ཏེ། འཁར་བས་བྲག་ལ་ལན་གཉིས་བརྡུངས་པ་ན་ཆུ་མང་པོ་ཐོན། དེ་ནས་མི་ཚོགས་དང་དེའི་ཕྱུགས་རྣམས་ཀྱིས་ཆུ་འཐུངས་སོ། །
NUM 20:12 དེ་ནས་དཀོན་མཆོག་ཡ་ཝཱེ་ཡིས་མོ་ཤེ་དང་ཨ་རོན་གཉིས་ལ་འདི་སྐད་དུ། ཁྱོད་གཉིས་ཀྱིས་བདག་ལ་དད་པ་མ་བྱས་པ་དང་། ཡེས་ར་ཨེལ་པ་རྣམས་ཀྱི་མདུན་དུ་ང་དམ་པར་མ་བཀུར་བའི་རྐྱེན་གྱིས། ཁྱོད་གཉིས་ཀྱིས་མི་ཚོགས་འདི་བདག་གིས་གནང་བར་བྱ་བའི་ཡུལ་དུ་འཁྲིད་པར་མི་འགྱུར་རོ་ཞེས་གསུངས་སོ། །
NUM 20:13 དེ་ནི་མེ་རི་བཱ་ཡུལ་གྱི་ཆུ་རྣམས་ཡིན། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་རྩོད་པ་བྱས་ཤིང་། ཁོང་གིས་དེ་དག་གི་ཁྲོད་དུ་རང་ཉིད་དམ་པ་ཡིན་པ་བསྟན་པའི་ཕྱིར་རོ། །
NUM 20:14 མོ་ཤེ་ཡིས་ཀཱ་དེའེ་ཤཱ་ནས་ཨེ་དོམ་གྱི་རྒྱལ་པོ་ལ་བང་ཆེན་རྣམས་བཏང་སྟེ་ན་རེ། ཁྱེད་ཀྱི་སྤུན་ཟླ་ཡེས་ར་ཨེལ་གྱིས་ཁྱེད་ལ་འདི་ལྟར། ངེད་ཅག་ལ་བྱུང་བའི་དཀའ་སྡུག་ཐམས་ཅད་ཁྱེད་ཀྱིས་ཤེས་ཡོད།
NUM 20:15 ངེད་ཅག་གི་མེས་པོ་རྣམས་མར་ཨེ་ཅིབ་ཡུལ་དུ་སོང་བ་དང་། ངེད་རྣམས་ཨེ་ཅིབ་ཡུལ་ནས་ཡུན་རིང་པོར་བསྡད་ཅིང་། ཨེ་ཅིབ་པ་རྣམས་ཀྱིས་ངེད་ཅག་དང་ངེད་ཅག་གི་མེས་པོ་རྣམས་ལ་དཀའ་ངལ་མང་པོ་སྤྲད།
NUM 20:16 ངེད་ཅག་གིས་དཀོན་མཆོག་ཡ་ཝཱེ་ལ་འོ་དོད་བོས་པ་དང་། ཁོང་གིས་ངེད་རྣམས་ཀྱི་སྐད་གསན་ནས་ཕོ་ཉ་མངགས་ཏེ་ངེད་ཅག་ཨེ་ཅིབ་ཡུལ་ནས་ཁྲིད་ཐོན་པ་ཡིན། ལྟོས་དང་། ད་ལྟ་ངེད་ཅག་ཁྱེད་ཀྱི་མཐའ་མཚམས་སུ་ཡོད་པའི་གྲོང་ཁྱེར་ཀཱ་དེའེ་ཤཱ་རུ་ཡོད།
NUM 20:17 ཁྱེད་ཀྱིས་ངེད་རྣམས་ཁྱེད་ཀྱི་ཡུལ་བརྒྱུད་ནས་འགྲོ་རུ་འཇུག་པར་མཛོད། ངེད་ཅག་ཞིང་ཁ་དང་རྒུན་འབྲུམ་ར་བ་བརྒྱུད་ནས་མི་འགྲོ་ལ། ཁྲོན་པ་རྣམས་ཀྱི་ཆུ་ཡང་མི་འཐུང་། ངེད་རྣམས་རྒྱལ་པོའི་ལམ་ཆེན་ནས་འགྲོ་ཞིང་། ཁྱེད་ཀྱི་ས་མཚམས་ནས་བརྒལ་བའི་བར་དུ་ལམ་གྱི་གཡས་གཡོན་གང་དུའང་གཟུར་བར་མི་བྱ་ཞེས་ཟེར་རོ་ཞེས་སྨྲས་པ་ལ།
NUM 20:18 ཨེ་དོམ་གྱིས་བང་ཆེན་ལ་འདི་ལྟར། ཁྱོད་རྣམས་ངའི་ཡུལ་བརྒྱུད་ནས་འགྲོ་མི་ཆོག གལ་སྲིད་སོང་ན། ངས་རལ་གྲི་ཁྱེར་ནས་ཁྱོད་རྣམས་ལ་འཐབ་པར་སླེབ་ཡོང་ཞེས་སྨྲས།
NUM 20:19 དེ་ནས་ཡེས་ར་ཨེལ་པ་རྣམས་ཀྱིས་ཁོ་ལ། ངེད་ཅག་ལམ་ཆེན་ནས་ཡར་འགྲོ་བ་དང་། ངེད་ཅག་དང་ངེད་ཅག་གི་ཕྱུགས་རྣམས་ཀྱིས་ཁྱེད་ཀྱི་ཆུ་འཐུང་ན་དེ་ལ་རིན་སྤྲོད་ངེས་ཤིང་། ངེད་རྣམས་རྐང་ཐང་ལ་ཡུལ་འདི་བརྒྱུད་ནས་འགྲོ་ཆོག་པར་ཞུ། གཞན་ཅི་ཡང་མི་དགོས་ཞེས་ཞུས་ཀྱང་།
NUM 20:20 ཨེ་དོམ་གྱི་རྒྱལ་པོ་ན་རེ། ཁྱོད་རྣམས་ཡུལ་འདི་བརྒྱུད་ནས་འགྲོ་མི་ཆོག་ཅེས་སྨྲས་ཏེ། མི་མང་པོ་ཁྲིད་ནས་བཙན་ཤུགས་དང་བཅས་ཡེས་ར་ཨེལ་པ་རྣམས་ལ་རྒོལ་བར་ཐོན་ནོ། །
NUM 20:21 དེ་ལྟར་ཨེ་དོམ་གྱིས་ཡེས་ར་ཨེལ་པ་རྣམས་རང་གི་མངའ་ཁོངས་བརྒལ་ནས་འགྲོ་བར་མ་བཅུག་པས། ཡེས་ར་ཨེལ་པ་རྣམས་ཁོ་དང་བྲལ་ནས་སོང་ངོ་། །
NUM 20:22 ཡེས་ར་ཨེལ་པའི་མི་ཚོགས་ཡོངས་ཀཱ་དེའེ་ཤཱ་ནས་ལམ་དུ་ཆས་ཏེ་ཧོར་ཞེས་པའི་རི་བོར་སླེབས་པ་དང་།
NUM 20:23 དཀོན་མཆོག་ཡ་ཝཱེས་ཨེ་དོམ་ཡུལ་གྱི་ས་མཚམས་སུ་ཡོད་པའི་རི་བོ་ཧོར་ཞེས་པར་མོ་ཤེ་དང་ཨ་རོན་གཉིས་ལ་འདི་སྐད་དུ།
NUM 20:24 ཨ་རོན་ནི་རང་གི་མེས་པོ་རྣམས་ཀྱི་དྲུང་དུ་འཛོམ་པར་ངེས། ཁོ་ནི་བདག་གིས་ཡེས་ར་ཨེལ་པ་རྣམས་ལ་སྦྱིན་པའི་ཡུལ་དུ་འཛུལ་བར་མི་འགྱུར། གང་ལ་ཞེ་ན། ཁྱོད་གཉིས་མེ་རི་བཱའི་ཆུ་ཡི་ཐད་ནས་ངའི་བཀའ་དང་འགལ་བའོ། །
NUM 20:25 མོ་ཤེ་ཁྱོད་ཀྱིས་ཨ་རོན་དང་ཁོའི་བུ་ཨེ་ལི་ཨ་ཟར་གཉིས་ཁྲིད་ནས་རི་བོ་ཧོར་དུ་ཡར་སོང་ཞིག
NUM 20:26 ཨ་རོན་གྱི་འཕགས་གོས་རྣམས་ཕུད་ནས་ཁོའི་བུ་ཨེ་ལི་ཨ་ཟར་ལ་སྐོན་ཅིག ཨ་རོན་ནི་རང་གི་མེས་པོ་རྣམས་ཀྱི་དྲུང་དུ་འཛོམས་ནས་གནས་དེར་འཆི་བར་འགྱུར་ཞེས་གསུངས་པ་ལ།
NUM 20:27 མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ་བསྒྲུབས་ཏེ། མི་ཚོགས་ཡོངས་ཀྱི་མཐོང་ངོར་རི་བོ་ཧོར་དུ་ཡར་སོང་ངོ་། །
NUM 20:28 དེ་ནས་མོ་ཤེ་ཡིས་ཨ་རོན་གྱི་འཕགས་གོས་རྣམས་ཕུད་ནས་ཁོའི་བུ་ཨེ་ལི་ཨ་ཟར་ལ་བསྐོན་པ་དང་། ཨ་རོན་རི་རྩེ་དེར་ཚེ་ལས་འདས་རྗེས་མོ་ཤེ་དང་ཨེ་ལི་ཨ་ཟར་གཉིས་རི་ནས་མར་བབས་སོ། །
NUM 20:29 དེ་ནས་མི་ཚོགས་ཡོངས་ཀྱིས་ཨ་རོན་ཚེ་ལས་འདས་པ་མཐོང་རྗེས། ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཨ་རོན་གྱི་དོན་དུ་ཉིན་སུམ་ཅུའི་རིང་ལ་བཤུམས་པའོ། །
NUM 21:1 དེ་ཡང་ནེ་གུབ་ཡུལ་དུ་གནས་པའི་ཨ་རད་ཀྱི་རྒྱལ་པོ་ཀ་ན་ཨན་པ་དེས། ཡེས་ར་ཨེལ་པ་རྣམས་ཨ་ཐཱ་རིམ་གྱི་ལམ་ནས་ཡོང་བ་ཐོས་ཏེ། ཡེས་ར་ཨེལ་པ་རྣམས་ལ་འཐབ་ཅིང་མི་འགའ་ཤས་བཟུང་ནས་ཁྲིད།
NUM 21:2 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་དམ་བཅས་ཏེ་ན་རེ། གལ་སྲིད་ཁྱེད་ཀྱིས་མི་འདི་རྣམས་ངེད་ཅག་གི་ལག་ཏུ་སྤྲོད་པར་མཛད་ན། ངེད་རྣམས་ཀྱིས་དེ་དག་གི་གྲོང་ཁྱེར་རྣམས་མེད་པར་བྱེད་ངེས་ཡིན་ཞེས་ཞུས།
NUM 21:3 དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་ཞུ་བ་གསན་ནས། ཀ་ན་ཨན་པ་རྣམས་དེ་དག་གི་ལག་ཏུ་གཏད་ཅིང་། དེ་དག་གིས་ཀ་ན་ཨན་པ་རྣམས་དང་དེ་ཚོའི་གྲོང་ཁྱེར་རྣམས་རྩ་ནས་བཤིགས་པས། གནས་དེའི་མིང་ལ་ཧོར་མཱ་ཞེས་བཏགས་སོ། །
NUM 21:4 ཡེས་ར་ཨེལ་པ་རྣམས་རི་བོ་ཧོར་ནས་རྒྱ་མཚོ་དམར་པོར་འགྲོ་བའི་ལམ་བརྒྱུད་དེ། ཨེ་དོམ་གྱི་ཡུལ་བསྐོར་ནས་སོང་བ་ལ། ལམ་དེའི་རྐྱེན་གྱིས་མི་རྣམས་སེམས་འཚབས་ཏེ།
NUM 21:5 དཀོན་མཆོག་དང་མོ་ཤེ་གཉིས་ལ་རྒོལ་ཞིང་ན་རེ། ཁྱེད་གཉིས་ཀྱིས་ངེད་རྣམས་ཅིའི་ཕྱིར་ཨེ་ཅིབ་ཡུལ་ནས་ཁྲིད་ཡོང་སྟེ་དབེན་སྟོང་དུ་འཆི་བར་བྱའམ། འདི་རུ་བག་ལེབ་མེད་ལ་ཆུ་ཡང་མེད། ཁ་ཟས་སྐྱོ་བོ་འདི་ལ་ངེད་རྣམས་སྐྱུག་མེར་ལངས་ཞེས་སྨྲས་སོ། །
NUM 21:6 དེ་ནས་དཀོན་མཆོག་ཡ་ཝཱེས་དུག་སྦྲུལ་རྣམས་མི་ཚོགས་ཁྲོད་དུ་བཏང་ཞིང་། སྦྲུལ་གྱིས་ཁོ་རྣམས་ལ་རྨུགས་པས་ཡེས་ར་ཨེལ་པ་མང་པོ་ཤི་བར་གྱུར།
NUM 21:7 དེ་ནས་མི་རྣམས་ཡོང་ནས་མོ་ཤེ་ལ། ངེད་ཅག་གིས་དཀོན་མཆོག་ཡ་ཝཱེ་དང་ཁྱེད་ལ་གཏམ་ངན་གྱིས་རྒོལ་བས་སྡིག་པ་བསགས། དཀོན་མཆོག་ཡ་ཝཱེས་སྦྲུལ་དེ་དག་ངེད་ཅག་དང་འབྲལ་བར་མཛད་པའི་ཕྱིར་ཁྱེད་ཀྱིས་སྨོན་ལམ་འདེབས་རོགས་ཞེས་ཞུས་པ་ན། མོ་ཤེ་ཡིས་མི་རྣམས་ཀྱི་དོན་དུ་སྨོན་ལམ་བཏབ་བོ། །
NUM 21:8 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་དུག་སྦྲུལ་ཞིག་བཟོས་ལ་ཀ་བའི་རྩེ་མོར་སྐྱོན་དང་། སྦྲུལ་གྱིས་རྨུགས་པའི་མི་ཀུན་གྱིས་སྦྲུལ་དེར་བལྟས་མ་ཐག་གསོན་པར་འགྱུར་ཞེས་གསུངས་པས།
NUM 21:9 མོ་ཤེ་ཡིས་ལི་ཡི་སྦྲུལ་ཞིག་བཟོས་ནས་ཀ་བའི་རྩེ་མོར་བསྐྱོན། དེ་ནས་སྦྲུལ་གྱིས་རྨུགས་པའི་མི་སུ་ཡིན་ཡང་ལི་ཡི་སྦྲུལ་དེར་བལྟས་པ་ཙམ་གྱིས་གསོན་པར་གྱུར་ཏོ། །
NUM 21:10 ཡང་ཡེས་ར་ཨེལ་པ་རྣམས་ལམ་དུ་ཆས་པ་དང་། ཨོ་བོད་བྱ་བའི་ཡུལ་ནས་སྒར་བཏབ།
NUM 21:11 ཡང་ཨོ་བོད་ནས་ལམ་དུ་ཞུགས་པ་དང་། མོ་ཨབ་ཕ་རོལ་གྱི་དབེན་སྟོང་དུ་ཡོད་ལ་ཤར་ཕྱོགས་སུ་འཁོར་བའི་ཨི་ཡེ་ཨ་བཱ་རིམ་ཡུལ་དུ་སྒར་བཏབ་བོ། །
NUM 21:12 ཡང་ཁོ་རྣམས་དེ་ནས་ལམ་དུ་ཆས་ཏེ་ཟེ་རེད་ལུང་པར་སྒར་བཏབ་པ་དང་།
NUM 21:13 ཡང་དེ་ནས་ལམ་དུ་ཆས་ཏེ་ཨར་ནོན་ཆུ་བོའི་ཕ་རོལ་ཏུ་སྒར་བཏབ། ཨར་ནོན་ཆུ་བོ་ནི་དབེན་སྟོང་དུ་ཡོད་ཅིང་ཨེ་མོར་པ་རྣམས་ཀྱི་ས་མཚམས་ནས་བཞུར་འོངས་པ་ཡིན། མ་གཞི་ཨར་ནོན་ཆུ་བོ་ནི་མོ་ཨབ་ཀྱི་མཐའ་མཚམས་ཡིན་ལ། མོ་ཨེབ་དང་ཨེ་མོར་པའི་བར་མཚམས་སུ་ཡོད་པའོ། །
NUM 21:14 དེར་བརྟེན་དཀོན་མཆོག་ཡ་ཝཱེའི་དམག་འཁྲུག་གི་ལོ་རྒྱུས་དཔེ་ཆ་རུ། སུབ་ཕཱའི་ཝཱ་ཧེབ་ཨར་ནོན་གྲོག་ཤུར་རྣམས། །
NUM 21:15 གྲོག་མོའི་ཐུར་གསེག་ཨར་ལ་ཐུག་པ་དང་། ། མོ་ཨབ་ས་མཚམས་དང་ནི་ཉེ་བ་འོ། །ཞེས་བཀོད་པའོ། །
NUM 21:16 ཡང་དེ་ནས་ཡེས་ར་ཨེལ་པ་རྣམས་པེར་ཞེས་པའི་ཁྲོན་པ་རུ་སླེབས་ཤིང་། སྔར་དཀོན་མཆོག་ཡ་ཝཱེས་མོ་ཤེ་ལ་མི་ཚོགས་གནས་དེར་སྡུས་ཤིག་དང་། བདག་གིས་དེ་དག་ལ་ཆུ་སྦྱིན་པར་བྱ་ཞེས་གསུངས་པ་ནི་ཁྲོན་པ་དེའི་སྐོར་ཡིན་ནོ། །
NUM 21:17 དེའི་དུས་སུ་ཡེས་ར་ཨེལ་པས་མགུར་འདི་བླངས་པ་སྟེ། ཀྱེ་ཀྱེ་ཁྲོན་པ་ཆུ་འཕྱུར་ཤོག ། ཁྱོད་ཅག་དེ་ལ་གླུ་ལོངས་ཤིག །
NUM 21:18 ཁྲོན་པ་འདི་ནི་འགོ་དཔོན་རྣམས་ཀྱིས་བརྐོས། ། དེ་ནི་དམངས་ཁྲོད་སྐུ་དྲག་རྣམས་ཀྱིས་ནི། ། ཕྱག་འཁར་དང་ནི་འཁར་བས་བསྔོགས་པ་ཡིན། ། ཞེས་པའོ། ། དེ་ནས་ཡེས་ར་ཨེལ་པ་རྣམས་དབེན་སྟོང་ནས་མད་ཐ་ནཱ་རུ་སླེབས་པ་དང་།
NUM 21:19 མད་ཐ་ནཱ་ནས་ནཱ་ཧ་ལི་ཨེལ་དང་། ནཱ་ཧ་ལི་ཨེལ་ནས་པཱ་མོད་དང་།
NUM 21:20 པཱ་མོད་ནས་མོ་ཨབ་ཡུལ་གྱི་ལུང་པ་དང་། ཡང་དབེན་སྟོང་ལ་ཁ་ཐུར་ལྟའི་རི་བོ་ཕིས་གའི་རྩེ་མོར་སླེབས་སོ། །
NUM 21:21 ཡེས་ར་ཨེལ་པས་ཨེ་མོར་པའི་རྒྱལ་པོ་སི་ཧོན་ལ་བང་ཆེན་བཏང་སྟེ་ན་རེ།
NUM 21:22 ཁྱེད་ཀྱིས་ངེད་རྣམས་ཁྱེད་ཀྱི་ཡུལ་བརྒྱུད་དེ་འགྲོ་རུ་འཇུག་པར་མཛོད། ངེད་ཅག་ཞིང་ཁ་དང་རྒུན་འབྲུམ་ར་བར་མི་འགྲོ་ལ། ཁྲོན་པ་དག་གི་ཆུ་ཡང་མི་འཐུང་། ཁྱེད་ཀྱི་ས་མཚམས་ནས་བརྒལ་བའི་བར་དུ་ངེད་རྣམས་རྒྱལ་པོའི་ལམ་ཆེན་ནས་འགྲོ་བར་བྱའོ་ཞེས་སྨྲས་ནའང་།
NUM 21:23 སི་ཧོན་གྱིས་ཡེས་ར་ཨེལ་པ་རྣམས་རང་གི་ས་མཚམས་བརྒལ་ནས་འགྲོ་རུ་འཇུག་པ་ཕར་ཞོག ཁོས་རང་གི་མི་ཐམས་ཅད་བསྡུས་ཏེ་ཡེས་ར་ཨེལ་པ་རྣམས་ལ་འཐབ་ཕྱིར་དབེན་སྟོང་དུ་ཕྱིན་པ་དང་། ཡ་ཧ་ཙཱ་བྱ་བར་སླེབས་ནས་ཡེས་ར་ཨེལ་པ་རྣམས་ལ་དམག་བརྒྱབ་པའོ། །
NUM 21:24 དེ་ནས་ཡེས་ར་ཨེལ་པས་ཁོ་རལ་གྲིས་བསད་ཅིང་། ཨར་ནོན་ནས་ཡཱབ་པོག་དང་། དེ་ནས་ཨམ་མོན་པ་རྣམས་ཀྱི་བར་དུ་ཁོའི་ས་ཆ་རྣམས་བདག་ཏུ་བཟུང་། ཨམ་མོན་པའི་ས་མཚམས་ནི་བརྟན་འཇགས་ཡིན་པའི་ཕྱིར་རོ། །
NUM 21:25 ཡེས་ར་ཨེལ་པས་གྲོང་ཁྱེར་དེ་ཐམས་ཅད་ཕྲོགས་ཤིང་། ཨེ་མོར་པའི་གྲོང་ཁྱེར་སོ་སོ་སྟེ་ཧེ་སི་པོན་བྱ་བ་དང་དེར་གཏོགས་པའི་གྲོང་སྡེ་ཐམས་ཅད་ནས་གཞིས་ཕབ་བོ། །
NUM 21:26 ཧེ་སི་པོན་ནི་ཨེ་མོར་པ་རྣམས་ཀྱི་རྒྱལ་པོ་སི་ཧོན་གྱི་རྒྱལ་ས་ཡིན་པ་དང་། ཁོས་སྔར་མོ་ཨབ་ཀྱི་རྒྱལ་པོ་སྔོན་མར་དམག་བརྒྱབ་ཅིང་དེའི་ལག་ནས་ཨར་ནོན་ཆུ་བོའི་བར་དུ་ས་ཆ་ཐམས་ཅད་ཕྲོགས་པའོ། །
NUM 21:27 དེའི་ཕྱིར་གཏམ་དཔེ་འཆད་མཁན་རྣམས་ཀྱིས་འདི་ལྟར། ཁྱོད་རྣམས་ཧེ་སི་པོན་ལ་ཕེབས། ། སི་ཧོན་རྒྱལ་པོའི་མཁར་སྐྲུན་ཅིག ། མཁར་དེ་བརྟན་པོར་བཟོ་བར་གྱིས། །
NUM 21:28 དེ་ནི་གང་གི་རྐྱེན་གྱིས་ཡིན་ཞེ་ན། ། ཧེ་སི་པོན་ནས་མེ་ཞིག་བྱུང་བ་དང་། ། སི་ཧོན་རྒྱལ་པོའི་མཁར་ནས་མེ་ལྕེ་འཕྱུར། ། མོ་ཨབ་ཡུལ་གྱི་ཨཱར་དང་ཨར་ནོན་གྱི། ། རི་རྒྱུད་གཙོ་བོ་རྣམས་ཀྱང་རྩ་མེད་བཏང་། །
NUM 21:29 ཀྱེ་ཀྱེ་མོ་ཨབ་ཁྱོད་ལ་ཆག་སྒོ་བྱུང་། ། ཀེ་མོ་སི་ཡི་མི་རྣམས་མེད་པར་གྱུར། ། ལྷ་དེས་རང་གི་བུ་རྣམས་འབྲོ་རུ་བཅུག ། རང་གི་བུ་མོ་རྣམས་ནི་བཙོན་པར་བཏང་། ། ཨེ་མོར་རྒྱལ་པོ་སི་ཧོན་ལག་ཏུ་བརྫངས། །
NUM 21:30 ང་ཚོས་མདའ་ཡིས་དེ་རྣམས་བརྒྱབས་པ་དང་། ། དི་བོན་བར་དུ་ཧེ་སི་པོན་ཚར་བཅད། ། ནོ་ཕཱའི་བར་དུ་ང་ཚོས་སྟོངས་སུ་བཅུག ། དེ་ནི་མེ་དེ་བཱ་ཡི་བར་དུ་བསྲིངས། །ཞེས་སྨྲ་བའོ། །
NUM 21:31 དེ་ལྟར་ཡེས་ར་ཨེལ་པ་རྣམས་ཨེ་མོར་པ་རྣམས་ཀྱི་ཡུལ་དུ་བསྡད་དོ། །
NUM 21:32 དེ་ཡང་མོ་ཤེ་ཡིས་ཡཱ་ཟེར་བྱ་བའི་ཡུལ་ལ་མྱུལ་མ་བཏང་བ་དང་། ཡེས་ར་ཨེལ་པ་རྣམས་ཀྱིས་དེའི་གྲོང་སྡེ་རྣམས་བདག་ཏུ་བཟུང་ཞིང་། དེར་གནས་པའི་ཨེ་མོར་པ་རྣམས་གཞན་དུ་བསྐྲད་དོ། །
NUM 21:33 དེ་ནས་ཡེས་ར་ཨེལ་པ་རྣམས་ཁ་ཕྱིར་འཁོར་ནས་པཱ་ཤན་དུ་འགྲོ་བའི་ལམ་དུ་ཞུགས་པ་ན། པཱ་ཤན་གྱི་རྒྱལ་པོ་ཨོག་ཅེས་བྱ་བ་དང་དེའི་མི་ཐམས་ཅད་འོངས་ནས་ཨེ་དྲེ་ཨི་ཡུལ་དུ་ཁོ་རྣམས་ལ་དམག་བརྒྱབ་བོ། །
NUM 21:34 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། བདག་གིས་ཁོ་དང་ཁོའི་མི་ཐམས་ཅད་དང་། ཁོའི་ས་ཆ་བཅས་ཁྱོད་ཀྱི་ལག་ཏུ་གཏད་ཡོད་པས། ཁོ་ལ་མ་འཇིགས་ཤིག ཁྱོད་ཀྱིས་སྔར་ཧེ་སི་པོན་དུ་གནས་པའི་ཨེ་མོར་པའི་རྒྱལ་པོ་སི་ཧོན་ལ་ཅི་ལྟར་བྱས་པ་ཡིན་ན། འདི་ལ་ཡང་དེ་ལྟར་གྱིས་ཤིག་ཅེས་གསུངས་སོ། །
NUM 21:35 དེ་ནས་ཁོ་ཚོས་ཨོག་དང་དེའི་བུ་རྣམས་དང་། དེའི་མི་ཐམས་ཅད་བསད་དེ་གཅིག་ཀྱང་མི་ལུས་པར་བྱས་ནས་དེའི་ས་ཆ་བདག་གིར་བཟུང་ངོ་། །
NUM 22:1 དེ་ཡང་ཡེས་ར་ཨེལ་པ་རྣམས་ལམ་དུ་ཆས་ནས་མོ་ཨབ་སྤང་ལྗོངས་ཏེ། ཡོར་དན་གཙང་པོའི་ཤར་ཕྱོགས་དང་། ཡེ་རུ་ཀོ་ཡི་ཁ་གཏད་དུ་སྒར་བཏབ།
NUM 22:2 ཡེས་ར་ཨེལ་པ་རྣམས་ཀྱིས་ཨེ་མོར་པ་རྣམས་ལ་ཅི་བྱས་པ་ཐམས་ཅད་ཚིབ་ཕོར་གྱི་བུ་པཱ་ལག་གིས་མཐོང་བ་དང་།
NUM 22:3 ཁོ་ཚོར་མི་ཚོགས་མང་པོ་ཡོད་པས་མོ་ཨབ་པ་རྣམས་ཤིན་ཏུ་འཇིགས་པ་དང་། ཡེས་ར་ཨེལ་པ་རྣམས་ཀྱི་རྐྱེན་གྱིས་མོ་ཨབ་པ་རྣམས་དངངས་སྐྲག་ཆེན་པོ་སྐྱེས།
NUM 22:4 མོ་ཨབ་པ་རྣམས་ཀྱིས་མིད་ཡཱན་པའི་རྒན་པོ་རྣམས་ལ། བ་གླང་གིས་ཞིང་ཁའི་རྩྭ་བཟའ་བ་བཞིན་དུ། ད་ལྟ་མི་ཚོགས་འདིས་རང་ཅག་གི་ཉེ་འཁོར་ཐམས་ཅད་བལྡག་པར་འགྱུར་ཞེས་སྨྲས། དེའི་དུས་སུ་ཚིབ་ཕོར་གྱི་བུ་པཱ་ལག་ནི་མོ་ཨབ་ཀྱི་རྒྱལ་པོ་ཡིན་ལ།
NUM 22:5 ཁོས་པེ་ཨོར་གྱི་བུ་པེལ་ཨམ་གྱི་རྩར་བང་ཆེན་བཏང་བ་སྟེ། ཆུ་བོ་ཉེ་འགྲམ་གྱི་ཕེ་ཐོར་ཏེ་ཁོའི་ཡུལ་མི་རྣམས་ཀྱི་ས་ཆར་པེལ་ཨམ་གདན་འདྲེན་བྱེད་དུ་མངགས་ཤིང་ན་རེ། གཟིགས་དང་། མི་རིགས་ཤིག་ཨེ་ཅིབ་ཡུལ་ནས་ཐོན་བྱུང་། ཀྱེ་ཧོ། དེ་དག་ས་གཞི་ཡོངས་སུ་ཁེབས་ཤིང་ད་ལྟ་ངའི་ཁ་གཏད་དུ་བསྡད་ཡོད།
NUM 22:6 མི་རིགས་འདི་ནི་བདག་ལས་སྟོབས་ཆེ་བས། ད་ལྟ་ཁྱེད་རང་ཕེབས་ནས་ངའི་ཆེད་དུ་ཁོ་རྣམས་ལ་དམོད་མོ་འདེབས་རོགས། དེ་ནས་ངས་ཁོ་རྣམས་ཕམ་པར་བརྒྱབ་སྟེ་ཡུལ་འདི་ནས་སྐྲོད་ནུས་ཀྱང་སྲིད། གང་ལ་ཞེ་ན། ཁྱེད་ཀྱིས་སུ་ལ་བྱིན་གྱིས་བརླབས་ན་དེར་བྱིན་རླབས་འཐོབ་ཅིང་། ཁྱེད་ཀྱིས་སུ་ལ་དམོད་མོ་བཏབ་ན་དེར་དམོད་མོ་ཐེབས་པ་ངས་ཤེས་པ་ཡིན་ཞེས་ཞུས་སོ། །
NUM 22:7 མོ་ཨབ་དང་མིད༌ཡཱན་གྱི་རྒན་པོ་རྣམས་ཀྱིས་མོ་འདེབས་པའི་རྔན་པ་ལག་ལ་ཁྱེར་ནས་ཆས་པ་དང་། པེལ་ཨམ་གྱི་རྩར་སླེབས་ནས་པཱ་ལག་གི་གཏམ་ཁོ་ལ་སྨྲས་སོ། །
NUM 22:8 དེ་ནས་པེལ་ཨམ་གྱིས་ཁོ་ཚོར་འདི་ལྟར། དོ་ནུབ་འདི་རུ་ཞག་སྡོད་བྱོས་དང་། དཀོན་མཆོག་ཡ་ཝཱེས་ང་ལ་བཀའ་ཅི་ལྟར་གསུངས་ན་ངས་དེ་བཞིན་དུ་ཁྱོད་ལ་ལན་སྦྱིན་འོང་ཞེས་སྨྲས་པས། མོ་ཨབ་ཀྱི་འགོ་དཔོན་རྣམས་པེལ་ཨམ་དང་མཉམ་དུ་བསྡད།
NUM 22:9 དཀོན་མཆོག་པེལ་ཨམ་གྱི་རྩར་ཕེབས་ཏེ་འདི་སྐད་དུ། ཁྱོད་དང་མཉམ་དུ་ཡོད་པ་འདི་རྣམས་སུ་ཡིན་ནམ་ཞེས་གསུངས་པ་ན།
NUM 22:10 པེལ་ཨམ་གྱིས་དཀོན་མཆོག་ལ། མོ་ཨབ་ཀྱི་རྒྱལ་པོ་སྟེ་ཚིབ་ཕོར་གྱི་བུ་པཱ་ལག་གིས་ངའི་རྩར་བཏང་བའི་མི་རྣམས་ཡིན་ཏེ། ཁོ་རྣམས་ན་རེ།
NUM 22:11 ལྟོས་དང་། ཨེ་ཅིབ་ཡུལ་ནས་ཐོན་པའི་མི་རིགས་ཤིག་གིས་ས་གཞི་ཡོངས་སུ་ཁེབས་འདུག ད་ལྟ་ཁྱོད་རང་ཡོང་ནས་ངའི་ཆེད་དུ་ཁོ་རྣམས་ལ་དམོད་མོ་འདེབས་རོགས། དེ་ནས་ངས་ཁོ་རྣམས་ལས་རྒྱལ་ཁ་བླངས་ཏེ་སྐྲོད་ནུས་ཀྱང་སྲིད་ཅེས་སྨྲས་བྱུང་ཞུས་པ་ལ།
NUM 22:12 དཀོན་མཆོག་གིས་པེལ་ཨམ་ལ་འདི་སྐད་དུ། ཁྱོད་དེ་དག་དང་མཉམ་དུ་འགྲོ་མི་རུང་ལ། ཡང་མི་རིགས་དེ་ནི་བྱིན་རླབས་ཐོབ་པ་ཡིན་པས་དེ་ལ་དམོད་མོ་འདེབས་མི་རུང་ཞེས་གསུངས།
NUM 22:13 དེ་ནས་པེལ་ཨམ་ནངས་སྔ་མོ་ལངས་ནས་པཱ་ལག་གི་འགོ་དཔོན་རྣམས་ལ་ན་རེ། དཀོན་མཆོག་ཡ་ཝཱེས་ང་རང་ཁྱོད་ཅག་དང་མཉམ་དུ་འགྲོ་བར་མི་གནང་བས་ཁྱོད་རྣམས་ཕྱིར་རང་ཡུལ་དུ་སོང་ཞིག་ཅེས་སྨྲས་པ་ལ།
NUM 22:14 མོ་ཨབ་ཀྱི་འགོ་དཔོན་རྣམས་ཡར་ལངས་ཏེ་ཕྱིར་པཱ་ལག་གི་རྩར་ཕྱིན་ནས་ཁོ་ལ། པེལ་ཨམ་ངེད་ཅག་དང་མཉམ་དུ་མི་ཡོང་ངོ་ཞེས་སྨྲས་སོ། །
NUM 22:15 དེ་ནས་པཱ་ལག་གིས་ཡང་བསྐྱར་འགོ་དཔོན་སྔར་ལས་མང་པོ་དང་། དེ་ལས་སྙན་གྲགས་ཆེ་བ་རྣམས་བཏང་བ་དང་།
NUM 22:16 དེ་དག་པེལ་ཨམ་གྱི་དྲུང་དུ་ཕྱིན་ནས་ཁོ་ལ་འདི་ལྟར། ཚིབ་ཕོར་གྱི་བུ་པཱ་ལག་གིས་འདི་ལྟར་སྨྲས་ཏེ། ཁྱེད་རང་ངའི་རྩར་ཕེབས་པར་མི་གཡོལ་རོགས།
NUM 22:17 གང་ལ་ཞེ་ན། ངས་ཁྱེད་ལ་གུས་པ་ཆེན་པོ་འཐོབ་པར་བྱ་ཞིང་། ཁྱེད་ཀྱིས་ཅི་གསུངས་བཞིན་དུ་བསྒྲུབ་པར་བྱ། ཁྱེད་ཀྱིས་ངའི་ཆེད་དུ་མི་རིགས་འདི་ལ་དམོད་མོ་འདེབས་རོགས་ཞེས་ཞུ་བ་ཞུས་སོ། །
NUM 22:18 དེ་ནས་པེལ་ཨམ་གྱིས་པཱ་ལག་གི་འཁོར་གཡོག་རྣམས་ལ་ལན་དུ། པཱ་ལག་གིས་རང་གི་གསེར་དངུལ་ཁང་པ་གང་པོ་དེ་ང་ལ་གནང་ན་ཡང་། ངས་དོན་ཆེ་ཆུང་གང་ཡིན་ཡང་རང་གི་དཀོན་མཆོག་ཡ་ཝཱེའི་བཀའ་བརྒལ་ནས་བསྒྲུབ་མི་ནུས།
NUM 22:19 ཡང་དཀོན་མཆོག་ཡ་ཝཱེས་ང་ལ་ད་དུང་ཅི་ཞིག་གསུང་བ་ཤེས་པའི་ཆེད་དུ། ཁྱོད་ཅག་དོ་ནུབ་ཀྱང་འདི་རུ་སྡོད་ཅིག་ཅེས་སྨྲས་སོ། །
NUM 22:20 མཚན་མོ་དེར་དཀོན་མཆོག་པེལ་ཨམ་གྱི་རྩར་ཕེབས་ནས་འདི་སྐད་དུ། མི་འདི་རྣམས་ཁྱོད་འབོད་དུ་འོངས་པ་ཡིན་པས་ན། ཁྱོད་རང་ལམ་ལ་ཆས་ནས་དེ་དག་དང་མཉམ་དུ་སོང་ཞིག འོན་ཀྱང་ངས་ཁྱོད་ལ་ཅི་སྨྲས་པ་དེ་ཁོ་ན་སྒྲུབས་ཤིག་ཅེས་གསུངས་སོ། །
NUM 22:21 པེལ་ཨམ་ནངས་སྔ་མོར་ལངས་ནས་རང་གི་བོང་བུ་ལ་སྒ་བསྟད་དེ། མོ་ཨབ་ཀྱི་འགོ་དཔོན་རྣམས་དང་མཉམ་དུ་སོང་ངོ་། །
NUM 22:22 ཁོ་རང་སོང་བའི་རྐྱེན་གྱིས་དཀོན་མཆོག་ཐུགས་ཁྲོས་ཤིང་། དཀོན་མཆོག་ཡ་ཝཱེའི་ཕོ་ཉ་ལམ་ནང་དུ་འགྲེང་ནས་ཁོ་རང་བཀག་པ་དང་། དེའི་དུས་སུ་ཁོ་བོང་བུར་ཞོན་ཏེ་ཞབས་ཕྱི་གཉིས་ཀྱང་ཁོ་དང་མཉམ་དུ་བསྐྱོད་པའོ། །
NUM 22:23 དེ་ནས་བོང་བུས་ཕྱག་ཏུ་རལ་གྲི་ཐོགས་པའི་དཀོན་མཆོག་ཡ་ཝཱེའི་ཕོ་ཉ་ལམ་ནང་དུ་འགྲེང་འདུག་པ་མཐོང་བས། ལམ་ལ་བཟུར་ནས་ཞིང་ནང་དུ་སོང་། པེལ་ཨམ་གྱིས་བོང་བུ་ལམ་ལ་བསྒྱུར་ཕྱིར་བརྡེགས་སོ། །
NUM 22:24 དཀོན་མཆོག་ཡ་ཝཱེའི་ཕོ་ཉ་རྒུན་འབྲུམ་ར་བ་རྣམས་ཀྱི་བར་དུ་ཡོད་པའི་ལམ་དོག་མོའི་ནང་དུ་འགྲེང་པ་དང་། ལམ་གྱི་འགྲམ་གཉིས་ཀ་གྱང་ཡིན་ནོ། །
NUM 22:25 བོང་བུས་དཀོན་མཆོག་ཡ་ཝཱེའི་ཕོ་ཉ་མཐོང་བ་དང་གྱང་ལ་གཙུབས་ནས་པེལ་ཨམ་གྱི་རྐང་པ་བཙིར་བས་པེལ་ཨམ་གྱིས་ཡང་བོང་བུ་ལ་བརྡེགས་སོ། །
NUM 22:26 དེ་ནས་དཀོན་མཆོག་ཡ་ཝཱེའི་ཕོ་ཉ་ཡང་སྔོན་ལ་ཅུང་ཙམ་ཕེབས་ནས། འགག་དོག་མོ་གཡས་གཡོན་ལ་འཁོར་ས་མེད་པ་ཞིག་ཏུ་འགྲེང་བསྡད་པ་དང་།
NUM 22:27 བོང་བུས་དཀོན་མཆོག་ཡ་ཝཱེའི་ཕོ་ཉ་མཐོང་སྟེ་པེལ་ཨམ་གྱི་འོག་ཏུ་ཉལ་བ་དང་། པེལ་ཨམ་རབ་ཏུ་ཁྲོས་ནས་དབྱུག་པས་བོང་བུ་ལ་བརྡེགས་པ་ན།
NUM 22:28 དཀོན་མཆོག་ཡ་ཝཱེས་བོང་བུ་ལ་ཁ་གྲགས་པར་མཛད་ཅིང་དེས་པེལ་ཨམ་ལ། ངས་ཁྱོད་ལ་ཅི་བྱས་པ་ཡིན་ནམ། ཁྱོད་ཀྱིས་ང་ལ་ལན་གསུམ་བརྡེགས་སོང་ཞེས་སྨྲས་པ་ན།
NUM 22:29 པེལ་ཨམ་གྱིས་བོང་བུ་ལ་ན་རེ། ཁྱོད་ཀྱིས་ང་རང་རྩེད་སྤྱད་བྱས་པས་ཡིན། ངའི་ལག་ཏུ་རལ་གྲི་ཞིག་ཡོད་པ་ཡིན་ན། ད་ལྟ་ཉིད་ལ་ཁྱོད་གསོད་དོ་ཞེས་སྨྲས།
NUM 22:30 དེ་ནས་བོང་བུས་པེལ་ཨམ་ལ། ང་ནི་ཁྱོད་ཆུང་དུས་ནས་དེ་རིང་བར་དུ་ཞོན་པའི་བོང་བུ་དེ་མ་ཡིན་ནམ། ངས་དུས་ནམ་ཞིག་ཁྱོད་ལ་འདི་ལྟར་བྱས་མྱོང་ངམ་ཞེས་སྨྲས་པ་ན། པེལ་ཨམ་གྱིས་བྱས་མ་མྱོང་ཞེས་སྨྲས་སོ། །
NUM 22:31 དེ་ནས་དཀོན་མཆོག་ཡ་ཝཱེས་པེལ་ཨམ་གྱི་མིག་ཕྱེས་པ་ན། ཁོས་དཀོན་མཆོག་ཡ་ཝཱེའི་ཕོ་ཉ་ལམ་ནང་དུ་འགྲེང་འདུག་པ་དང་། ཕྱག་ཏུ་རལ་གྲི་ཤུབས་ནས་ཐོན་པ་ཞིག་ཡོད་པ་མཐོང་ནས། མགོ་བོ་སྨད་དུ་བསྒུར་ནས་ཕྱག་བཙལ་ཏོ། །
NUM 22:32 དཀོན་མཆོག་ཡ་ཝཱེའི་ཕོ་ཉས་ཁོ་ལ། ཁྱོད་ཀྱིས་ཅིའི་ཕྱིར་རང་གི་བོང་བུ་ལ་ཐེངས་གསུམ་བརྡེགས་པ་ཡིན་ནམ། ལྟོས་དང་། ཁྱོད་ཀྱི་ལམ་ནི་ངའི་མདུན་དུ་ཕྱིན་ཅི་ལོག་པའི་ལམ་ཡིན་པས་ང་རང་ཁྱོད་འགོག་ཏུ་འོངས་པ་ཡིན།
NUM 22:33 བོང་བུས་ང་མཐོང་ནས་ཐེངས་གསུམ་ལ་བཟུར་བ་དང་། གལ་སྲིད་བོང་བུ་ངའི་མདུན་ནས་ཏན་ཏན་མ་བཟུར་པ་ཡིན་ན། ངས་སྔ་མོ་ནས་ཁྱོད་བསད་ཅིང་། བོང་བུ་སྲོག་ཐར་དུ་བཏང་བ་ཡིན་ཞེས་གསུངས་སོ། །
NUM 22:34 དེ་ནས་པེལ་ཨམ་གྱིས་དཀོན་མཆོག་ཡ་ཝཱེའི་ཕོ་ཉ་ལ་འདི་ལྟར། ངས་སྡིག་པ་བྱས་ཟིན། ངས་ཁྱེད་རང་ལམ་ནང་དུ་འགྲེང་ནས་ང་འགོག་པ་མ་ཤེས། ད་ལྟ་ང་རང་འགྲོ་བར་ཁྱེད་མི་མཉེས་ན་ང་ཕྱིར་ལོག་འགྲོ་ཞེས་ཞུས།
NUM 22:35 དཀོན་མཆོག་ཡ་ཝཱེའི་ཕོ་ཉས་པེལ་ཨམ་ལ། ཁྱོད་མི་འདི་དག་དང་མཉམ་དུ་སོང་ཞིག འོན་ཀྱང་ངས་ཁྱོད་ལ་སྨྲས་པའི་གཏམ་འབའ་ཞིག་ལས་གཞན་ཅི་ཡང་སྨྲ་བར་མི་བྱའོ་ཞེས་གསུངས་པས། པེལ་ཨམ་ནི་པཱ་ལག་གི་འགོ་དཔོན་རྣམས་དང་མཉམ་དུ་སོང་ངོ་། །
NUM 22:36 པཱ་ལག་གིས་པེལ་ཨམ་ཡོང་བཞིན་པ་ཐོས་ནས་མོ་ཨབ་ཀྱི་གྲོང་ཁྱེར་དུ་བསུ་བར་སོང་སྟེ། གྲོང་ཁྱེར་དེ་ནི་ཨར་ནོན་ཆུ་བོའི་འགྲམ་དུ་ས་མཚམས་ཀྱི་མཐའ་རུ་ཡོད་པའོ། །
NUM 22:37 པཱ་ལག་གིས་པེལ་ཨམ་ལ། ངས་བྲེལ་མྱུར་ངང་ཁྱེད་ཀྱི་རྩར་མི་བཏང་ནས་ཁྱེད་རང་གདན་དྲངས་པ་མ་ཡིན་ནམ། ཁྱེད་རང་ངའི་རྩར་མ་ཡོང་བ་ཅི་ཡིན་ནམ། ངས་ཁྱེད་ལ་གུས་བརྩི་ཆེན་པོ་འཐོབ་པར་བྱེད་མི་ནུས་སམ་ཞེས་ཞུས་པ་ལ།
NUM 22:38 པེལ་ཨམ་གྱིས་པཱ་ལག་ལ། ལྟོས་དང་། ང་ཁྱོད་ཀྱི་རྩར་སླེབས་ཡོད་པས་ད་ལྟ་ང་ལ་ཅི་ཞིག་སྨྲ་བའི་དབང་ཡོད་དམ། དཀོན་མཆོག་གིས་ངའི་ཁ་ལ་བཀའ་ཅི་ཞིག་གནང་ན་ངས་བཀའ་དེ་སྨྲ་བར་བྱའོ་ཞེས་སྨྲས།
NUM 22:39 དེ་ནས་པེལ་ཨམ་ནི་པཱ་ལག་དང་མཉམ་དུ་སོང་བ་དང་། ཁོ་གཉིས་ཀིར་ཡཱད་ཧུ་ཚོད་བྱ་བར་སླེབས།
NUM 22:40 པཱ་ལག་གིས་བ་གླང་དང་ལུག་རྣམས་མཆོད་པར་ཕུལ་བ་དང་། པེལ་ཨམ་དང་ཁོ་དང་མཉམ་དུ་ཡོད་པའི་འགོ་དཔོན་རྣམས་ལ་དེའི་ཤ་ཡང་ཕུལ་ཏོ། །
NUM 22:41 ཕྱི་ཉིན་ཞོགས་པར་པཱ་ལག་གིས་པེལ་ཨམ་ཁྲིད་ནས་ཡར་པཱ་ཨལ་གྱི་མཐོ་གླིང་དུ་ཕྱིན་ཅིང་། པེལ་ཨམ་གྱིས་དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཀྱི་ཟུར་ཞིག་མཐོང་ངོ་། །
NUM 23:1 དེ་ཡང་པེལ་ཨམ་གྱིས་པཱ་ལག་ལ། ཁྱོད་ཀྱིས་འདི་རུ་ང་ལ་མཆོད་ཁྲི་བདུན་བཟོས་ཤིག བ་གླང་བདུན་དང་ལུག་ཐུག་བདུན་ཡང་ང་ལ་གྲ་སྒྲིག་བྱོས་ཤིག་ཅེས་སྨྲས།
NUM 23:2 པཱ་ལག་གིས་པེལ་ཨམ་གྱིས་བསྒོས་པ་བཞིན་དུ་བྱས་ཤིང་། པཱ་ལག་དང་པེལ་ཨམ་གཉིས་ཀྱིས་མཆོད་ཁྲི་རེ་རེའི་སྟེང་དུ་བ་གླང་རེ་དང་ལུག་ཐུག་རེ་མཆོད་པར་ཕུལ།
NUM 23:3 པེལ་ཨམ་གྱིས་པཱ་ལག་ལ། ཁྱོད་ནི་རང་གི་སྦྱིན་སྲེག་གི་འགྲམ་དུ་སྡོད་ཅིག ང་མདུན་ལ་འགྲོའོ། །དཀོན་མཆོག་ཡ་ཝཱེ་ང་དང་འཕྲད་དུ་ཕེབས་ཡོང་ཡང་སྲིད། ཁོང་གིས་ང་ལ་གང་ཞིག་སྟོན་པར་མཛད་ན་ངས་དེ་ཁྱོད་ལ་སྨྲ་ངེས་ཡིན་ཞེས་སྨྲས་པ་དང་། ཁོ་མཐོ་སྒང་ཞིག་ལ་ཆས་སོ། །
NUM 23:4 དཀོན་མཆོག་པེལ་ཨམ་ལ་ཕྲད་པ་དང་། ཁོས་དཀོན་མཆོག་ལ་འདི་ལྟར། ངས་མཆོད་ཁྲི་བདུན་གྲ་སྒྲིག་བྱས་ཤིང་མཆོད་ཁྲི་རེའི་སྟེང་དུ་བ་གླང་གཅིག་དང་ལུག་ཐུག་གཅིག་རེ་མཆོད་པར་ཕུལ་ཡོད་ཅེས་ཞུས་པ་ན།
NUM 23:5 དཀོན་མཆོག་ཡ་ཝཱེས་པེལ་ཨམ་གྱི་ཁ་ལ་བཀའ་གནང་ཞིང་ཡང་འདི་སྐད་དུ། ཁྱོད་པཱ་ལག་གི་རྩར་ཕྱིར་ལོག་ལ་འདི་ལྟར་སྨྲོས་ཤིག་ཅེས་གསུངས་པས།
NUM 23:6 ཁོ་པཱ་ལག་གི་རྩར་ལོག་པ་ན། ལྟོས་དང་། པཱ་ལག་དང་མོ་ཨབ་ཀྱི་འགོ་དཔོན་ཐམས་ཅད་སྦྱིན་སྲེག་གི་རྩར་འགྲེང་ནས་བསྡད་ཡོད་དོ། །
NUM 23:7 དེ་ནས་པེལ་ཨམ་གྱིས་ཁོ་རང་གི་ལུང་བསྟན་དབྱངས་ལ་གྱེར་ཏེ་འདི་ལྟར། པཱ་ལག་གིས་ནི་ང་རང་ཨ་རམ་ཡུལ་ནས་ཁྲིད། ། མོ་ཨབ་རྒྱལ་པོས་ང་རང་ཤར་ཕྱོགས་རི་ནས་ཁྲིད། ཤོག་དང་ང་ཡི་ཆེད་དུ་ཡ་ཀོབ་ལ་དམོད་ཅིག ། ཤོག་དང་ཡེས་ར་ཨེལ་ལ་སྐྱོན་རྗོད་ཅེས་སྨྲས་སོ། །
NUM 23:8 དཀོན་མཆོག་ཉིད་ཀྱིས་མ་དམད་པ་དེ་ལ། ། ང་ཡིས་དམོད་པ་ཅི་ལྟར་གཏོང་ནུས་སམ། ། ཡ་ཝཱེས་དགག་པ་མ་བརྒྱབ་པ་དེ་ལ། ། ང་ཡིས་དགག་པ་ཅི་ལྟར་རྒྱག་ནུས་སམ། །
NUM 23:9 བདག་གིས་བྲག་གི་རྩེ་མོ་དག་ནས་ཁོ་རྣམས་མཐོང་། ། རི་བོའི་རྩེ་མོ་དག་ནས་ང་ཡིས་ཁོ་ཚོར་བལྟས། ། ཀྱེ་ཧོ་དེ་ནི་མི་རིགས་ཁེར་འདུག་ཅིག་ཡིན་ཞིང་། ། མི་རིགས་གཞན་པའི་ནང་དུ་རང་ཉིད་བགྲང་མི་འདུག །
NUM 23:10 ཡ་ཀོབ་ཁོང་གི་རྡུལ་ཕྲན་སུ་ཡིས་རྩི་ནུས་སམ། ཡེས་ར་ཨེལ་པའི་བཞི་ཆའི་གཅིག་ཀྱང་སུས་བགྲང་ནུས། ། ང་རང་དྲང་པོའི་འཆི་ལུགས་བཞིན་དུ་འཆི་བ་དང་། ། ང་ཡི་ཚེ་མཇུག་དེ་རྣམས་བཞིན་དུ་འགྱུར་བར་ཤོག །ཅེས་སྨྲས་སོ། །
NUM 23:11 པཱ་ལག་གིས་པེལ་ཨམ་ལ་འདི་ལྟར། ཁྱེད་ཀྱིས་ང་ལ་ཅི་བྱས་སམ། ངའི་དགྲ་བོ་རྣམས་ལ་དམོད་མོ་འདེབས་པའི་ཆེད་དུ་ཁྱེད་ཁྲིད་འོངས་པ་ཡིན། ལྟོས་དང་། ཁྱེད་ཀྱིས་ཁོ་རྣམས་ལ་བྱིན་གྱིས་བརླབས་སོ་ཞེས་སྨྲས་པ་ལ།
NUM 23:12 པེལ་ཨམ་གྱིས་དེའི་ལན་དུ། དཀོན་མཆོག་ཡ་ཝཱེས་ངའི་ཁ་རུ་གནང་བ་དེ་ངས་གཟབ་གཟབ་བྱས་ནས་སྨྲ་མི་དགོས་སམ་ཞེས་སྨྲས་སོ། །
NUM 23:13 པཱ་ལག་གིས་པེལ་ཨམ་ལ་ན་རེ། ཁྱེད་རང་ང་དང་མཉམ་དུ་གནས་གཞན་ཞིག་ཏུ་ཕེབས་རོགས། དེ་རུ་ཁྱེད་ཀྱིས་ཁོ་རྣམས་མཐོང་བར་འགྱུར། དེ་དག་ཐམས་ཅད་མཐོང་མི་ནུས་ལ། དེ་དག་གི་མཐའ་མཚམས་ཀྱི་ཁག་ཅིག་མཐོང་བར་འགྱུར། དེ་ནས་ངའི་ཆེད་དུ་ཁྱེད་ཀྱིས་ཁོ་རྣམས་ལ་དམོད་མོ་ཐོངས་ཤིག་ཅེས་ཞུས་པ་དང་།
NUM 23:14 པཱ་ལག་གིས་པེལ་ཨམ་ཁྲིད་ནས་ཚི་པེམ་བྱ་བའི་ཞིང་ལ་སླེབས་ཤིང་། ཡར་ཕིས་གའི་རི་རྩེར་ཁྲིད་པ་དང་དེར་མཆོད་ཁྲི་བདུན་བརྩིགས། མཆོད་ཁྲི་རེའི་སྟེང་དུ་བ་གླང་གཅིག་དང་ལུག་ཐུག་གཅིག་རེ་ཕུལ་ཏོ། །
NUM 23:15 པེལ་ཨམ་གྱིས་པཱ་ལག་ལ། ང་དཀོན་མཆོག་ཡ་ཝཱེ་ལ་མཇལ་དུ་འགྲོ་སྟེ། ཁྱོད་ནི་འདིར་རང་གི་སྦྱིན་སྲེག་གི་རྩར་འགྲེང་ནས་སྡོད་ཅིག་ཅེས་སྨྲས་པ་དང་།
NUM 23:16 དཀོན་མཆོག་ཡ་ཝཱེ་ཁོང་ཉིད་པེལ་ཨམ་དང་ཕྲད་དེ། ཁོང་གིས་དེའི་ཁ་ལ་བཀའ་གནང་ཞིང་འདི་སྐད་དུ། ཁྱོད་པཱ་ལག་གི་རྩར་ཕྱིར་ལོག་ལ་འདི་ལྟར་སྨྲོས་ཤིག་ཅེས་གསུངས།
NUM 23:17 དེ་ནས་པེལ་ཨམ་ནི་པཱ་ལག་གི་རྩར་ཕྱིར་ལོག་པ་ན། ལྟོས་དང་། པཱ་ལག་ནི་རང་གི་སྦྱིན་སྲེག་གི་རྩར་འགྲེང་ནས་བསྡད་ཡོད་པ་དང་། མོ་ཨབ་ཀྱི་འགོ་དཔོན་རྣམས་ཀྱང་ཁོ་དང་མཉམ་དུ་ཡོད་པའོ། །པཱ་ལག་གིས་པེལ་ཨམ་ལ་དཀོན་མཆོག་ཡ་ཝཱེས་ཅི་གསུངས་བྱུང་ཞེས་དྲིས་པ་ན།
NUM 23:18 པེལ་ཨམ་གྱིས་ལུང་བསྟན་དབྱངས་ལ་གྱེར་ཏེ་འདི་ལྟར། ཀྱེ་ཀྱེ་པཱ་ལག་ལོངས་ལ་མཉན་པར་གྱིས། ། ཚིབ་ཕོར་བུ་ཡིས་རྣ་བ་བདག་ལ་གཏོད། །
NUM 23:19 དཀོན་མཆོག་རྫུན་གཏམ་སྨྲ་བའི་མི་མ་ཡིན། ། མིའི་བུ་ནང་བཞིན་ཁོང་ནི་ཐུགས་མི་འགྱོད། ། ཁོང་གིས་བཀའ་གསུང་གནང་སྟེ་མི་མཛད་དམ། ། ཁོང་གིས་ཞལ་བཞེས་གནང་བ་མི་འགྲུབ་བམ། །
NUM 23:20 ལྟོས་དང་བྱིན་རླབས་གནང་བའི་བཀའ་ནི་བདག་ལ་གསུངས། ། ཁོང་གིས་བྱིན་གྱིས་བརླབས་པ་བདག་གིས་བསྒྱུར་མི་ནུས། །
NUM 23:21 ཡ་ཀོབ་ལས་ནི་སྡིག་ཉེས་མཐོང་བ་མེད། ། ཡེས་ར་ཨེལ་ནང་སྤྱོད་ངན་མཐོང་བ་མེད། ། ཡེས་ར་ཨེལ་གྱི་དཀོན་མཆོག་ཡ་ཝཱེ་མཆོག ། ཁོ་རྣམས་མཉམ་དུ་བཞུགས་ཤིང་དེ་དག་ཁྲོད། ། རྒྱལ་པོའི་དགའ་མགུ་རངས་པའི་སྐད་ཅོར་འདུག །
NUM 23:22 ཨེ་ཅིབ་ཡུལ་ནས་ཁྲིད་མཁན་དཀོན་མཆོག་ནི། ། ཁོ་ཚོར་གླང་རྒོད་ཅིག་གི་རྭ་དང་མཚུངས། །
NUM 23:23 ཡ་ཀོབ་ཕྱོགས་སུ་ངན་སྔགས་འདེབས་པ་མེད། ། ཡེས་ར་ཨེལ་གྱི་ཕྱོགས་སུ་མོ་པ་མེད། ། འོས་ཤིང་འཚམ་པའི་དུས་སུ་སླེབས་པའི་ཚེ། ། ཡ་ཀོབ་དང་ནི་ཡེས་ར་ཨེལ་ལ་ནི། ། དཀོན་མཆོག་ཁོང་གིས་དོན་ཆེན་མཛད་ཅེས་བརྗོད། །
NUM 23:24 ཀྱེ་ཧོ་མི་རིགས་དེ་ནི་མོ་སེང་བཞིན། ། འགྱིང་ཞིང་སེང་གེ་ཇི་བཞིན་འགྲེང་ནས་ཡོང་། ། བརྔོན་བྱའི་རི་དྭགས་ཁྱུར་མིད་གཏོང་བ་དང་། ། བསད་པ་དེའི་ཁྲག་འཐུང་བའི་བར་དུ་ནི། ། མར་ལ་ཉལ་བ་གཏན་ནས་དཔེ་མི་སྲིད། །ཅེས་སྨྲས་སོ། །
NUM 23:25 དེ་ནས་པཱ་ལག་གིས་པེལ་ཨམ་ལ། ཁྱེད་ཀྱིས་ཁོ་རྣམས་ལ་དམོད་མོ་ཅི་ཡང་མ་འདེབས། བྱིན་རླབས་ཀྱང་ཅི་ཡང་མ་གནང་ཞེས་སྨྲས་པ་ལ།
NUM 23:26 པེལ་ཨམ་གྱིས་དེའི་ལན་དུ་པཱ་ལག་ལ། དཀོན་མཆོག་ཡ་ཝཱེས་ང་ལ་ཅི་གསུངས་པ་ཐམས་ཅད་ངས་ངེས་པར་དེ་བཞིན་བསྒྲུབ་དགོས་ཞེས་ཁྱོད་ལ་སྨྲས་པ་མ་ཡིན་ནམ་ཞེས་སྨྲས་སོ། །
NUM 23:27 དེ་ནས་པཱ་ལག་གིས་པེལ་ཨམ་ལ། ཕེབས་དང་། ངས་ཁྱེད་རང་ས་ཆ་གཞན་ཞིག་ལ་འཁྲིད་པར་བྱ་སྟེ། དཀོན་མཆོག་ཁྱེད་ལ་ཐུགས་མཉེས་ཀྱང་སྲིད་ལ། ཁྱེད་ཀྱིས་ས་དེ་ནས་ངའི་ཆེད་དུ་ཁོ་རྣམས་ལ་དམོད་མོ་བཏབ་ཆོག་ཅེས་སྨྲས་སོ། །
NUM 23:28 དེ་ནས་པཱ་ལག་གིས་པེལ་ཨམ་དབེན་སྟོང་ལ་ཁ་ཐུར་ལྟའི་ཕེ་ཨོར་རི་རྩེར་ཁྲིད་དོ། །
NUM 23:29 པེལ་ཨམ་གྱིས་པཱ་ལག་ལ། ཁྱོད་ཀྱིས་འདི་ནས་ང་ལ་མཆོད་ཁྲི་བདུན་རྩིགས་ཤིག བ་གླང་བདུན་དང་ལུག་ཐུག་བདུན་ཡང་ང་ལ་གྲ་སྒྲིག་བྱོས་ཤིག་ཅེས་སྨྲས་པ་ན།
NUM 23:30 པཱ་ལག་གིས་པེལ་ཨམ་གྱིས་སྨྲས་པ་བཞིན་དུ་བསྒྲུབས་པ་དང་། མཆོད་ཁྲི་རེའི་སྟེང་དུ་བ་གླང་གཅིག་དང་ལུག་ཐུག་གཅིག་རེ་མཆོད་པར་ཕུལ་ཏོ། །
NUM 24:1 དེ་ཡང་པེལ་ཨམ་གྱིས་ཡེས་ར་ཨེལ་ལ་བྱིན་རླབས་གནང་བར་དཀོན་མཆོག་ཡ་ཝཱེ་ཐུགས་དགྱེས་པ་མཐོང་བས། ཁོ་སྔར་བཞིན་སྔ་ལྟས་འཚོལ་དུ་མ་སོང་བར། དབེན་སྟོང་གི་ཕྱོགས་སུ་གདོང་གཏད་ནས་བསྡད་དོ། །
NUM 24:2 དེ་ནས་པེལ་ཨམ་གྱིས་མིག་རྒྱང་རིང་མོས་བལྟས་པ་ན། ཡེས་ར་ཨེལ་ནི་ཚོ་པ་རེ་རེ་བཞིན་སྒར་བཏབ་ནས་བསྡད་ཡོད་པ་མཐོང་ཞིང་། དཀོན་མཆོག་གི་ཐུགས་ཉིད་ཁོའི་སྟེང་ལ་བབས་པ་དང་།
NUM 24:3 ཁོས་རང་གི་ལུང་བསྟན་དབྱངས་ལ་གྱེར་ནས་འདི་ལྟར། པེ་ཨོར་བུ་སྟེ་པེལ་ཨམ་ཁོ་ན་རེ། ། མིག་རྒྱང་རིང་བའི་མི་ཡིས་འདི་སྐད་སྨྲ། །
NUM 24:4 དཀོན་མཆོག་ཁོང་གི་བཀའ་ནི་ཐོས་པ་དང་། ། ཀུན་དབང་ཉིད་ཀྱི་ཞལ་གཟིགས་མཐོང་བ་འོ། ། ལུས་པོ་ས་རུ་འགྱེལ་ཞིང་མིག་ཟུང་ནི། ། ཕྱེས་པ་དེ་ཡིས་འདི་སྐད་སྨྲ་བར་འགྱུར། །
NUM 24:5 ཀྱེ་ཀྱེ་ཡ་ཀོབ་ཁྱེད་ཀྱི་གུར་རྣམས་ཇི་འདྲའི་མཛེས་པ་ལ། ། ཀྱེ་ཀྱེ་ཡེས་ར་ཨེལ་གྱི་གུར་རྣམས་ཇི་འདྲའི་ཡིད་དུ་འོང་། །
NUM 24:6 དེ་ནི་ལུང་པ་རྒྱང་དུ་བསྲིངས་པ་དང་། ། གཙང་པོའི་འགྲམ་གྱི་སྐྱེད་མོས་ཚལ་དང་འདྲ། ། ཡ་ཝཱེས་བཙུགས་པའི་ཨ་ག་རུ་དེ་དང་། ། ཆུ་བོའི་འགྲམ་གྱི་ཐང་ཤིང་ལ་ནི་མཚུངས། །
NUM 24:7 ཁོང་གི་ཟོ་ལས་ཆུ་ནི་འབབ་པ་དང་། ། ཁོང་གི་བུ་རྒྱུད་ཆུ་མོད་ས་ལ་གནས། ། ཁོང་གི་རྒྱལ་པོ་ཨ་གག་ལས་མཆོག་ཅིང་། ། ཁོང་གི་རྒྱལ་ཁམས་མཐོ་རུ་འཕགས་པར་འགྱུར། །
NUM 24:8 དཀོན་མཆོག་གིས་ཁོང་ཨེ་ཅིབ་ཡུལ་ནས་ཁྲིད། ། གླང་རྒོད་འདྲ་བའི་སྟོབས་ཤུགས་ཁོང་ལ་ལྡན། ། དགྲ་བོའི་མི་རིགས་རྩ་མེད་གཏོང་བ་དང་། ། དེ་ཚོའི་རུས་པ་རྣམས་ནི་གཅོག་བྱེད་ཅིང་། ། མདའ་མོས་དེ་དག་ཡོངས་སུ་འབིགས་པར་འགྱུར། །
NUM 24:9 སེང་གེ་ས་ལ་ཉལ་ཞིང་ཙོག་པུར་སྡོད་པ་དང་། ། མོ་སེང་ཇི་བཞིན་ཉལ་བ་སུ་ཡིས་དཀྲོག་ནུས་སམ། ། ཁྱེད་ལ་བྱིན་རླབས་གནང་མཁན་རྣམས་ལ་བྱིན་རླབས་འཐོབ་པ་དང་། ། ཁྱེད་ལ་དམོད་མོ་འདེབ་མཁན་རྣམས་ལ་དམོད་མོ་ཐེབས་གྱུར་ཅིག ། ཅེས་སྨྲས་སོ། །
NUM 24:10 པཱ་ལག་ནི་པེལ་ཨམ་ལ་ཁྲོས་ནས་ཐལ་མོ་བརྡབས་ཏེ་ན་རེ། ངའི་དགྲ་ཟླ་རྣམས་ལ་དམོད་པ་གཏོང་བའི་ཆེད་དུ་ཁྱེད་བོས་འོངས་པ་ཡིན་མོད། ལྟོས་དང་། ཁྱེད་ཀྱིས་ལན་གསུམ་དུ་དེ་དག་ལ་བྱིན་གྱིས་བརླབས་སོ། །
NUM 24:11 ད་ནི་ཁྱེད་ཉིད་རང་ཡུལ་དུ་ཕྲོས་ཤིག ངས་ཁྱེད་ལ་གུས་པ་ཆེན་པོ་འཐོབ་པར་བྱ་བསམས་ནའང་། དཀོན་མཆོག་ཡ་ཝཱེས་ཁྱེད་ལ་གུས་པ་འཐོབ་པར་མ་མཛད་ཅེས་སྨྲས་པ་ན།
NUM 24:12 པེལ་ཨམ་གྱིས་པཱ་ལག་ལ། ངས་ཁྱོད་ཀྱིས་ངའི་རྩར་བཏང་བའི་བང་ཆེན་རྣམས་ལ།
NUM 24:13 པཱ་ལག་གིས་རང་གི་གསེར་དངུལ་ཁང་པ་གང་པོ་ང་ལ་བྱིན་ན་ཡང་། ངས་དཀོན་མཆོག་ཡ་ཝཱེའི་བཀའ་ལས་བརྒལ་ཏེ་རང་འདོད་ལྟར་བཟང་ངན་གྱི་ལས་གང་ཡང་བྱེད་མི་རུང་། དཀོན་མཆོག་ཡ་ཝཱེས་ཅི་ལྟར་གསུངས་པ་ཡིན་ན་ངས་དེ་ལྟར་བརྗོད་དགོས་ཞེས་སྨྲས་པ་མ་ཡིན་ནམ།
NUM 24:14 ད་ལྟ་ང་ནི་རང་གི་མི་མང་གི་རྩར་འགྲོ་བར་བྱ། ཤོག་དང་། ཕྱིས་སུ་མི་འདི་རྣམས་ཀྱིས་ཁྱོད་ཀྱི་མི་མང་ལ་ཅི་བྱེད་ངེས་པ་ངས་ཁྱོད་ལ་བསླབ་པར་བྱ་ཞེས་སྨྲས་སོ། །
NUM 24:15 དེ་ནས་ཁོས་རང་གི་ལུང་བསྟན་དབྱངས་ལ་གྱེར་ནས་འདི་ལྟར། པེ་ཨོར་བུ་སྟེ་པེལ་ཨམ་ཁོ་ན་རེ། ། མིག་རྒྱང་རིང་བའི་མི་ཡིས་འདི་སྐད་སྨྲ། །
NUM 24:16 དཀོན་མཆོག་ཁོང་གི་བཀའ་ནི་ཐོས་འགྱུར་ཞིང་། ། བླ་མེད་ཉིད་ཀྱི་ཤེས་ཡོན་རྟོགས་པ་དང་། ། ཀུན་དབང་ཉིད་ཀྱི་ཞལ་གཟིགས་མཐོང་བ་དང་། ། ལུས་པོ་ས་རུ་འགྱེལ་ཞིང་མིག་ཟུང་ནི། ། ཕྱེས་པ་དེ་ཡིས་འདི་སྐད་སྨྲ་བར་འགྱུར། །
NUM 24:17 བདག་གིས་ཁོང་ཉིད་མཐོང་ཡང་ད་ལྟ་མིན། ། ང་ཡིས་ཁོང་ཉིད་མཇལ་ཡང་ཉེ་སར་མིན། ། ཡ་ཀོབ་ཁོང་ནས་སྐར་མ་ཞིག་ཐོན་ཞིང་། ། ཡེས་ར་ཨེལ་ལས་ཕྱག་འཁར་ཞིག་དར་ངེས། ། དེ་ཡིས་མོ་ཨབ་ཀྱི་ནི་དཔྲལ་བ་གཏོར། ། སེད་ཐུ་པ་རྣམས་མགོ་བོ་བརྫི་བར་འགྱུར། །
NUM 24:18 དེ་ཡིས་ཨེ་དོམ་རང་གི་དབང་དུ་བསྡུ་བ་དང་། ། དགྲ་བོའི་ཡུལ་ཏེ་སེ་ཨིར་ཡང་ནི་དབང་དུ་བསྡུ། ། ཡེས་ར་ཨེལ་པ་འབའ་ཞིག་སྟོབས་དང་ལྡན་པར་འགྱུར། །
NUM 24:19 དབང་སྒྱུར་པ་ཞིག་ཡ་ཀོབ་ནས་ཐོན་ཞིང་། ། གྲོང་ཁྱེར་ནང་གི་ལྷག་ལུས་རྣམས་འཇོམས་སོ། ། ཞེས་སྨྲས་སོ། །
NUM 24:20 པེལ་ཨམ་གྱིས་ཨ་མཱད་ལེག་མཐོང་སྟེ་རང་གི་ལུང་བསྟན་དབྱངས་ལ་གྱེར་ནས་འདི་ལྟར། ཨ་མཱད་ལེག་ནི་མི་རིགས་རྣམས་ཀྱི་ཐོག་མ་ཡིན། ། འོན་ཀྱང་མཐའ་མར་དེ་ནི་འཇིག་པར་འགྱུར་བ་འོ། །ཞེས་སྨྲས་སོ། །
NUM 24:21 ཡང་པེལ་ཨམ་གྱིས་ཀེ་ནེ་པ་རྣམས་མཐོང་སྟེ་རང་གི་ལུང་བསྟན་དབྱངས་ལ་གྱེར་ནས་འདི་ལྟར། ཁྱོད་ཀྱི་སྡོད་གནས་སྲ་ཞིང་བརྟན་པ་དང་། ། ཁྱོད་ཀྱི་ཚང་ཡང་བྲག་གི་ངོས་སུ་ཡོད། །
NUM 24:22 འོན་ཀྱང་ཀེ་ནེ་མེ་ལ་འབར་བར་འགྱུར། ། ཨ་སུར་གྱིས་ཁྱོད་བཙོན་དུ་ནམ་ཁྲིད་དམ། །ཞེས་སྨྲས་སོ། །
NUM 24:23 པེལ་ཨམ་གྱིས་ཡང་རང་གི་ལུང་བསྟན་དབྱངས་ལ་གྱེར་ནས་འདི་ལྟར། ཀྱེ་ཧོ་དཀོན་མཆོག་ཉིད་ཀྱིས་འདི་ལྟར་མཛད། ། སུ་ཞིག་གསོན་པོར་ལུས་པར་འགྱུར་བ་ཡིན། །
NUM 24:24 ཀི་ཐིམ་ཕྱོགས་ནས་གྲུ་གཟིངས་རྣམས་འོང་ཞིང་། ཨ་སུར་ཨེ་བེར་གཉིས་ལ་མནར་གཅོད་གཏོང་། ། དེ་ནས་ཁོ་ཡང་འཇིག་པར་འགྱུར་བ་འོ། །ཞེས་སྨྲས་སོ། །
NUM 24:25 དེ་ནས་པེལ་ཨམ་ལངས་ནས་རང་ཡུལ་དུ་ལོག་པ་དང་། པཱ་ལག་ཀྱང་རང་གི་ལམ་དུ་ཞུགས་སོ། །
NUM 25:1 དེ་ཡང་ཡེས་ར་ཨེལ་པ་རྣམས་སིད་ཏིམ་ཡུལ་དུ་བསྡད་ཅིང་། མི་ཚོགས་ཀྱིས་མོ་ཨབ་ཀྱི་བུད་མེད་ཚོར་ལོག་གཡེམ་བྱས།
NUM 25:2 བུད་མེད་དེ་དག་གིས་ཡེས་ར་ཨེལ་པ་རྣམས་བོས་ཡོང་ནས་མཉམ་དུ་རང་གི་ལྷ་རྣམས་ལ་མཆོད་པ་འབུལ་དུ་བཅུག་ཅིང་། ཡེས་ར་ཨེལ་པ་རྣམས་ཀྱིས་ཀྱང་བཟའ་བཏུང་སྤྱད་པ་དང་ཁོ་ཚོའི་ལྷ་རྣམས་ལ་ཕྱག་བཙལ་ཏོ། །
NUM 25:3 ཡེས་ར་ཨེལ་པ་རྣམས་ཀྱིས་པཱ་ཨལ་ཕེ་ཨོར་དང་མཉམ་འབྲེལ་བྱས་པས། དཀོན་མཆོག་ཡ་ཝཱེ་ཡེས་ར་ཨེལ་པའི་སྟེང་ཐུགས་ཁྲོས་སོ། །
NUM 25:4 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཡ་ཝཱེའི་ཐུགས་ཁྲོ་ཞི་བར་གྱུར་ནས་ཡེས་ར་ཨེལ་པ་རྣམས་ལ་ཐུགས་རབ་ཏུ་མི་ཁྲོ་བའི་ཕྱིར་དུ། མི་རྣམས་ཀྱི་འགོ་དཔོན་ཐམས་ཅད་བཟུང་སྟེ་ཡ་ཝཱེའི་མདུན་དུ་ཁ་ཉི་མར་གཏད་ནས་དཔྱོངས་ཤིག་ཅེས་གསུངས།
NUM 25:5 དེ་ནས་མོ་ཤེ་ཡིས་ཡེས་ར་ཨེལ་གྱི་ཁྲིམས་དཔོན་རྣམས་ལ་འདི་ལྟར། ཁྱོད་རྣམས་རེ་རེས་པཱ་ཨལ་ཕེ་ཨོར་དང་མཉམ་འབྲེལ་བྱས་པའི་མི་དེ་དག་སོད་ཅིག་ཅེས་སྨྲས་སོ། །
NUM 25:6 དེ་ནས་མོ་ཤེ་དང་ཡེས་ར་ཨེལ་པ་རྣམས་ཀྱི་མི་ཚོགས་ཡོངས་མཇལ་འཕྲད་གུར་མཆོག་གི་སྒོ་ཁར་ངུ་བའི་སྐབས་སུ། ཀྱེ་ཧོ། ཡེས་ར་ཨེལ་པ་རྣམས་ལས་མི་ཞིག་གིས་ཁོ་རྣམས་ཀྱི་མཐོང་སར་མིད༌ཡཱན་པའི་བུད་མེད་ཅིག་རང་གི་སྤུན་རྣམས་ཀྱི་རྩར་ཁྲིད་ནས་སོང་།
NUM 25:7 དེ་ནས་མཆོད་དཔོན་ཨ་རོན་གྱི་ཚ་བོ་སྟེ་ཨེ་ལི་ཨ་ཟར་གྱི་བུ་ཕི་ནེ་ཧེ་ཡིས་དེ་མཐོང་མ་ཐག མི་ཚོགས་ཀྱི་དཀྱིལ་ནས་ལངས་ཏེ་ལག་ཏུ་མདུང་ཞིག་ཐོགས་པ་དང་།
NUM 25:8 ཡེས་ར་ཨེལ་པ་དེའི་རྗེས་འབྲངས་ནས་གུར་ནང་དུ་འཛུལ་ཏེ་ཁོ་དང་བུད་མེད་དེ་གཉིས་ལ་བསྣུན་ནས་ཕུག་པ་དང་། མདུང་ནི་བུད་མེད་དེའི་གྲོད་ཁོག་ནང་ལ་ཟུག དེ་ནས་ཡེས་ར་ཨེལ་པའི་ཁྲོད་དུ་གཉན་ནད་མེད་པར་གྱུར་ཏོ། །
NUM 25:9 སྐབས་དེར་གཉན་ནད་ལས་ཤི་བའི་མི་གྲངས་བསྡོམས་པས་ཉིས་ཁྲི་བཞི་སྟོང་ཡོད་དོ། །
NUM 25:10 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 25:11 མཆོད་དཔོན་ཨ་རོན་གྱི་ཚ་བོ་ཨེ་ལི་ཨ་ཟར་གྱི་བུ་ཕི་ནེ་ཧེ་ཡིས་ཡེས་ར་ཨེལ་པའི་ཁྲོད་དུ་བདག་གི་འཁུར་ཞེན་སེམས་སུ་བཅངས་པས། བདག་གི་ཁོང་ཁྲོ་ཁོ་རྣམས་ཀྱི་སྟེང་ནས་བསྒྱུར། དེས་བདག་ལ་འཁུར་ཞེན་དང་བཅས་ཡེས་ར་ཨེལ་པ་རྣམས་མེད་པར་མི་བཟོ་བར་བྱས།
NUM 25:12 དེའི་ཕྱིར་ཁྱོད་ཀྱིས་འདི་ལྟར། ལྟོས་དང་ད་ལྟ་བདག་གིས་ཞི་བདེའི་ཞལ་ཆད་ཁོ་ལ་སྦྱིན་པར་བྱ་ཞིང་།
NUM 25:13 ཁོ་དང་ཁོའི་རིགས་རྒྱུད་རྣམས་ཀྱིས་དུས་གཏན་དུ་མཆོད་དཔོན་གྱི་ལས་འགན་འཁུར་བའི་ཞལ་ཆད་དུ་འགྱུར་ཏེ། ཅི་ལ་ཞེ་ན། ཁོ་ལ་རང་གི་དཀོན་མཆོག་གི་ཕྱིར་དུ་འཁུར་ཞེན་དང་ལྡན་ཞིང་། ཡེས་ར་ཨེལ་པ་རྣམས་ལ་སྡིག་བཤགས་བྱས་པའི་ཕྱིར་ཡིན་ཞེས་སྨྲོས་ཤིག་གསུངས་སོ། །
NUM 25:14 མིད༌ཡཱན་པའི་བུད་མེད་དེ་དང་མཉམ་དུ་བསད་པའི་ཡེས་ར་ཨེལ་པ་དེའི་མིང་ནི་སཱ་ལུ་བྱ་བའི་བུ་ཟིམ་རེ་ཡིན་པ་དང་། སི་མུ་ཨོན་ཚོ་པའི་ཁྱིམ་རྒྱུད་ཅིག་གི་འགོ་དཔོན་ཡིན།
NUM 25:15 བསད་པར་གྱུར་པའི་མིད༌ཡཱན་པའི་བུད་མེད་དེའི་མིང་ལ་ཀོ་ཟི་པེ་ཟེར་ཞིང་ཙུར་བྱ་བའི་བུ་མོ་ཡིན་ལ། ཙུར་ནི་མིད་ཡཱན་པའི་ཁྱིམ་རྒྱུད་ཅིག་གི་འགོ་དཔོན་ཡིན་ནོ། །
NUM 25:16 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 25:17 ཁྱོད་ཀྱིས་མིད༌ཡཱན་པ་རྣམས་དགྲ་རུ་བཟུང་ནས་དེ་དག་སོད་ཅིག
NUM 25:18 ཅི་ལ་ཞེ་ན། དེ་དག་གིས་ཁྱོད་ལ་བརྙས་བཅོས་བྱས་ནས་ཕེ་ཨོར་གྱི་དོན་དུ། མིད་ཡཱན་པའི་འགོ་དཔོན་གྱི་བུ་མོ་ཀོ་ཟི་པེའི་དོན་གྱི་སྟེང་དུ་གཡོ་སྒྱུའི་སྦྱོར་བ་སྤེལ་ནས་ཁྱོད་རྣམས་ལ་སླུ་བྲིད་བཏང་། དེ་བས་ཀོ་ཟི་པེ་ནི་གཉན་ནད་ཀྱི་ཉིན་མོར་ཕེ་ཨོར་གྱི་དོན་དག་གི་རྐྱེན་གྱིས་བསད་པའོ་ཞེས་གསུངས་སོ། །
NUM 26:1 དེ་ཡང་གཉན་ནད་བྱུང་བའི་རྗེས་སུ་དཀོན་མཆོག་ཡ་ཝཱེས་མོ་ཤེ་དང་མཆོད་དཔོན་ཨ་རོན་གྱི་བུ་ཨེ་ལི་ཨ་ཟར་གཉིས་ལ་འདི་སྐད་དུ།
NUM 26:2 ཁྱོད་རྣམས་ཀྱིས་ཡེས་ར་ཨེལ་པ་རྣམས་ཀྱི་མི་ཚོགས་ལས་ལོ་ཉི་ཤུ་ཅན་དང་དེའི་ཡན་གྱི་འཐབ་མོར་ཞུགས་ཐུབ་པ་རྣམས་ནི་དེ་དག་གི་ཕ་ཁྱིམ་བཞིན་དུ་རྩིས་ལེན་དགོས་ཞེས་གསུངས་སོ། །
NUM 26:3 དེ་ནས་མོ་ཤེ་དང་མཆོད་དཔོན་ཨེ་ལི་ཨ་ཟར་གཉིས་ཀྱིས་མོ་ཨབ་སྤང་ལྗོངས་ཏེ། ཡེ་རུ་ཀོའི་ཁ་གཏད་དུ་ཡོར་དན་གཙང་པོའི་འགྲམ་ནས་དེ་དག་ལ་འདི་ལྟར།
NUM 26:4 དཀོན་མཆོག་ཡ་ཝཱེས་མོ་ཤེ་ལ་བཀའ་གནང་བ་བཞིན་དུ་ལོ་ཉི་ཤུ་ཅན་དང་དེའི་ཡན་གྱི་མི་རྣམས་རྩིས་ལེན་དགོས་ཞེས་སྨྲས་སོ། ། ཨེ་ཅིབ་ཡུལ་ནས་འོངས་པའི་ཡེས་ར་ཨེལ་པ་རྣམས་ནི་འདི་ལྟ་སྟེ།
NUM 26:5 ཡེས་ར་ཨེལ་གྱི་བུ་སྐྱེས་འགོ་རུ་བེན་དང་། རུ་བེན་གྱི་བུ་རྒྱུད་རྣམས་ནི་ཧ་ནོག་ལ་གཏོགས་པ་ཧ་ནོག་པ་རྣམས་ཀྱི་ཁྱིམ་རྒྱུད་དང་། ཕཱ༌ལུའུ་ལ་གཏོགས་པ་ཕཱ་ལུའུ་པ་རྣམས་ཀྱི་ཁྱིམ་རྒྱུད།
NUM 26:6 ཧེས་རོན་ལ་གཏོགས་པ་ཧེས་རོན་པ་རྣམས་ཀྱི་ཁྱིམ་རྒྱུད་དང་། ཀར་མའེ་ལ་གཏོགས་པ་ཀར་མའེ་པ་རྣམས་ཀྱི་ཁྱིམ་རྒྱུད་བཅས་ཡིན་ནོ། །
NUM 26:7 འདི་དག་ནི་རུ་བེན་གྱི་ཁྱིམ་རྒྱུད་ཡིན་པ་དང་། དེ་དག་ནས་རྩིས་བླངས་པ་ནི་བསྡོམས་པས་བཞི་ཁྲི་སུམ་སྟོང་བདུན་བརྒྱ་སུམ་ཅུའོ། །
NUM 26:8 ཕཱ༌ལུའུ་ཡི་བུ་ནི་ཨེ་ལི་ཨབ་ཡིན་ལ།
NUM 26:9 ཨེ་ལི་ཨབ་ཀྱི་བུ་རྣམས་ནི་ནེ་མུ་ཨེལ་དང་། དཱ་ཐན་དང་། ཨ་བི་རཱམ་བཅས་ཡིན། དཱ་ཐན་དང་ཨ་བི་རཱམ་ནི་མ་གཞི་མི་ཚོགས་ཁྲོད་ནས་བདམས་པ་དང་། དེ་གཉིས་དང་ཀོ་རཱག་ཕྱོགས་ཁག་གི་མི་རྣམས་ཀྱིས་ཁ་མཐུན་ནས་མཉམ་དུ་དཀོན་མཆོག་ཡ་ཝཱེ་ལ་ངོ་རྒོལ་བྱས་ཤིང་། མོ་ཤེ་དང་ཨ་རོན་གཉིས་ལའང་ངོ་རྒོལ་བྱས་པའི་དུས་སུ།
NUM 26:10 ས་གཞིས་ཁ་གདངས་ནས་དེ་དག་དང་ཀོ་རཱག་མཉམ་དུ་ཁྱུར་མིད་བཏང་བ་དང་། ཀོ་རཱག་དང་ཁོའི་ཆོས་ཚོགས་ཀྱི་མི་ཐམས་ཅད་ཤི་བར་གྱུར། མེ་ཡིས་མི་ཉིས་བརྒྱ་དང་ལྔ་བཅུ་འགེམས་པའི་དུས་དེ་ནི་ཕྱི་འདོམས་ཀྱི་མེ་ལོང་དུ་གྱུར་ཏོ། །
NUM 26:11 འོན་ཀྱང་ཀོ་རཱག་གི་བུ་རྒྱུད་རྣམས་འཆི་བར་མ་གྱུར་ཏོ། །
NUM 26:12 སི་མུ་ཨོན་གྱི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ། ནེ་མུ་ཨེལ་ལ་གཏོགས་པ་ནེ་མུ་ཨེལ་པ་རྣམས་ཀྱི་ཁྱིམ་རྒྱུད་དང་། ཡཱ་མེན་ལ་གཏོགས་པ་ཡཱ་མེན་པ་རྣམས་ཀྱི་ཁྱིམ་རྒྱུད་དང་། ཡཱ་ཀིན་ལ་གཏོགས་པ་ཡཱ་ཀིན་པ་རྣམས་ཀྱི་ཁྱིམ་རྒྱུད་དང་།
NUM 26:13 ཟེ༌རག་ལ་གཏོགས་པ་ཟེ༌རག་པ་རྣམས་ཀྱི་ཁྱིམ་རྒྱུད་དང་། ཤཱ་ཨུལ་ལ་གཏོགས་པ་ཤཱ་ཨུལ་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:14 འདི་དག་ནི་སི་མུ་ཨོན་གྱི་ཁྱིམ་རྒྱུད་རྣམས་ཡིན་ཏེ་བསྡོམས་པས་ཉིས་ཁྲི་ཉིས་སྟོང་ཉིས་བརྒྱའོ། །
NUM 26:15 གཱ་རྡུའི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ། ཚཱ་ཕོན་ལ་གཏོགས་པ་ཚཱ་ཕོན་པ་རྣམས་ཀྱི་ཁྱིམ་རྒྱུད་དང་། ཧ་གིད་ལ་གཏོགས་པ་ཧ་གིད་པ་རྣམས་ཀྱི་ཁྱིམ་རྒྱུད་དང་། ཤུ་ནེ་ལ་གཏོགས་པ་ཤུ་ནེ་པ་རྣམས་ཀྱི་ཁྱིམ་རྒྱུད་དང་།
NUM 26:16 ཨོ་ཟི་ནེ་ལ་གཏོགས་པ་ཨོ་ཟི་ནེ་པ་རྣམས་ཀྱི་ཁྱིམ་རྒྱུད་དང་། ཨེ་རི་ལ་གཏོགས་པ་ཨེ་རི་པ་རྣམས་ཀྱི་ཁྱིམ་རྒྱུད་དང་།
NUM 26:17 ཨ་རོད་ལ་གཏོགས་པ་ཨ་རོད་པ་རྣམས་ཀྱི་ཁྱིམ་རྒྱུད་དང་། ཨར་ཨེ་ལི་ལ་གཏོགས་པ་ཨར་ཨེ་ལི་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:18 འདི་དག་ནི་གཱ་རྡུ་ཡི་བུ་རྒྱུད་ཀྱི་ཁྱིམ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་རྩིས་བླངས་པ་ཡིན་ལ། བསྡོམས་པས་བཞི་ཁྲི་ལྔ་བརྒྱའོ། །
NUM 26:19 ཡ་ཧུ་དཱའི་བུ་ནི་ཨེར་དང་ཨོ་ནན་གཉིས་ཡིན། ཨེར་དང་ཨོ་ནན་གཉིས་པོ་ཀ་ན་ཨན་ཡུལ་དུ་ཤི་བར་གྱུར་ཏོ། །
NUM 26:20 ཡ་ཧུ་དཱའི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ། ཤེ་ལཱ་ལ་གཏོགས་པ་ཤེ་ལཱ་པ་རྣམས་ཀྱི་ཁྱིམ་རྒྱུད་དང་། ཕེ་རེལ་ཟི་ལ་གཏོགས་པ་ཕེ་རེལ་ཟི་པ་རྣམས་ཀྱི་ཁྱིམ་རྒྱུད་དང་། ཟེ་རག་ལ་གཏོགས་པ་ཟེ་རག་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:21 ཕེ་རེལ་ཟི་ཡི་བུ་རྒྱུད་རྣམས་ལས་ཧེས་རོན་ལ་གཏོགས་པ་ཧེས་རོན་པ་རྣམས་ཀྱི་ཁྱིམ་རྒྱུད་དང་། ཧ་མུལ་ལ་གཏོགས་པ་ཧ་མུལ་པ་རྣམས་ཀྱི་ཁྱིམ་རྒྱུད་ཡིན།
NUM 26:22 འདི་དག་ནི་ཡ་ཧུ་དཱའི་ཁྱིམ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་ཡིན་ལ། བསྡོམས་པས་བདུན་ཁྲི་དྲུག་སྟོང་ལྔ་བརྒྱའོ། །
NUM 26:23 ཡེས་སི་ཀཱར་གྱི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ། ཐོ་ལཱ་ལ་གཏོགས་པ་ཐོ་ལཱ་པ་རྣམས་ཀྱི་ཁྱིམ་རྒྱུད་དང་། ཕུ་བཱ་ལ་གཏོགས་པ་ཕུ་བཱ་པ་རྣམས་ཀྱི་ཁྱིམ་རྒྱུད་དང་།
NUM 26:24 ཡ་ཤུབ་ལ་གཏོགས་པ་ཡ་ཤུབ་པ་རྣམས་ཀྱི་ཁྱིམ་རྒྱུད་དང་། ཤིམ་རོན་ལ་གཏོགས་པ་ཤིམ་རོན་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:25 འདི་དག་ནི་ཡེས་སི་ཀཱར་གྱི་ཁྱིམ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་ཡིན་ལ། བསྡོམས་པས་དྲུག་ཁྲི་བཞི་སྟོང་སུམ་བརྒྱའོ། །
NUM 26:26 ཟེ་བུ་ལུན་གྱི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ། སེ་རཱད་ལ་གཏོགས་པ་སེ་རཱད་པ་རྣམས་ཀྱི་ཁྱིམ་རྒྱུད་དང་། ཨེད་ལོན་ལ་གཏོགས་པ་ཨེད་ལོན་པ་རྣམས་ཀྱི་ཁྱིམ་རྒྱུད་དང་། ཡ་ལཱ་ཨལ་ལ་གཏོགས་པ་ཡ་ལཱ་ཨལ་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:27 འདི་དག་ནི་ཟེ་བུ་ལུན་གྱི་ཁྱིམ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་ཡིན་ལ། བསྡོམས་པས་དྲུག་ཁྲི་ལྔ་བརྒྱའོ། །
NUM 26:28 ཡོ་སེབ་ཀྱི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ་མཱ་ན་ཤེ་དང་ཨེ་ཕཱར་ཡིམ་ཡིན་ནོ། །
NUM 26:29 མཱ་ན་ཤེའི་བུ་རྒྱུད་རྣམས་ནི་མཱ་ཀིར་ལ་གཏོགས་པ་མཱ་ཀིར་པ་རྣམས་ཀྱི་ཁྱིམ་རྒྱུད་དང་། མཱ་ཀིར་ནས་གིལ་ཨད་སྐྱེས་པ་དང་། གིལ་ཨད་ལ་གཏོགས་པ་གིལ་ཨད་པ་རྣམས་ཀྱི་ཁྱིམ་རྒྱུད་ཡིན་ནོ། །
NUM 26:30 གིལ་ཨད་ཀྱི་བུ་རྒྱུད་རྣམས་ནི་འདི་ལྟ་སྟེ། ཨི་ཨེ་ཟིར་ལ་གཏོགས་པ་ཨི་ཨེ་ཟིར་པ་རྣམས་ཀྱི་ཁྱིམ་རྒྱུད་དང་། ཧེ་ལེག་ལ་གཏོགས་པ་ཧེ་ལེག་པ་རྣམས་ཀྱི་ཁྱིམ་རྒྱུད་དང་།
NUM 26:31 ཨ་སི་རི་ཨེལ་ལ་གཏོགས་པ་ཨ་སི་རི་ཨེལ་པ་རྣམས་ཀྱི་ཁྱིམ་རྒྱུད་དང་། ཤེ་ཀེམ་ལ་གཏོགས་པ་ཤེ་ཀེམ་པ་རྣམས་ཀྱི་ཁྱིམ་རྒྱུད་དང་།
NUM 26:32 ཤེ་མི་ད་ལ་གཏོགས་པ་ཤེ་མི་ད་པ་རྣམས་ཀྱི་ཁྱིམ་རྒྱུད་དང་། ཧེ་ཕེར་ལ་གཏོགས་པ་ཧེ་ཕེར་པ་རྣམས་ཀྱི་ཁྱིམ་རྒྱུད་དང་།
NUM 26:33 ཧེ་ཕེར་གྱི་བུ་ཚེ་ལོ་ཕེ་ཧད་ལ་བུ་མེད་ཅིང་བུ་མོ་འབའ་ཞིག་ཡོད་དེ། ཚེ་ལོ་ཕེ་ཧད་ཀྱི་བུ་མོ་རྣམས་ཀྱི་མིང་ནི། མ་ལཱ་དང་། ནོ་ཨ་དང་། ཧོག་ལཱ་དང་། མིལ་ཀཱ་དང་། ཐིར་ཚ་བཅས་ཡིན།
NUM 26:34 འདི་དག་ནི་མཱ་ན་ཤེའི་ཁྱིམ་རྒྱུད་རྣམས་ཡིན་ཏེ། དེ་དག་གི་གྲངས་ཀ་རྩིས་བླངས་པ་ཡིན་ལ། བསྡོམས་པས་ལྔ་ཁྲི་ཉིས་སྟོང་དང་བདུན་བརྒྱའོ། །
NUM 26:35 ཨེ་ཕཱར་ཡིམ་གྱི་བུ་རྒྱུད་རྣམས་ནི་འདི་ལྟ་སྟེ། དེ་དག་གི་ཁྱིམ་རྒྱུད་བཞིན་དུ་ཤུ་ཏེ་ལཱ་ལ་གཏོགས་པ་ཤུ་ཏེ་ལཱ་པ་རྣམས་ཀྱི་ཁྱིམ་རྒྱུད་དང་། པེ་ཀེར་ལ་གཏོགས་པ་པེ་ཀེར་པ་རྣམས་ཀྱི་ཁྱིམ་རྒྱུད་དང་། ཐ་ཧན་ལ་གཏོགས་པ་ཐ་ཧན་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:36 ཤུ་ཏེ་ལཱ་ཡི་བུ་རྒྱུད་དེ་ཨེ་རན་ལ་གཏོགས་པ་ཨེ་རན་པ་རྣམས་ཀྱི་ཁྱིམ་རྒྱུད་ཡིན།
NUM 26:37 འདི་དག་ནི་ཨེ་ཕཱར་ཡིམ་གྱི་བུ་རྒྱུད་ཀྱི་ཁྱིམ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་ཡིན་ལ། བསྡོམས་པས་སུམ་ཁྲི་ཉིས་སྟོང་ལྔ་བརྒྱའོ། །རང་རང་གི་ཁྱིམ་རྒྱུད་བཞིན་དུ་འདི་དག་ནི་ཡོ་སེབ་ཀྱི་བུ་རྒྱུད་རྣམས་ཡིན་ནོ། །
NUM 26:38 པེན་ཡཱ་མེན་གྱི་བུ་རྒྱུད་ནི་དེ་དག་གི་ཁྱིམ་རྒྱུད་བཞིན་དུ། པེ་ལཱ་ལ་གཏོགས་པ་པེ་ལཱ་པ་རྣམས་ཀྱི་ཁྱིམ་རྒྱུད་དང་། ཨ་ཤ༌བེལ་ལ་གཏོགས་པ་ཨ་ཤ༌བེལ་པ་རྣམས་ཀྱི་ཁྱིམ་རྒྱུད་དང་། ཨ་ཧི་རམ་ལ་གཏོགས་པ་ཨ་ཧི་རམ་པ་རྣམས་ཀྱི་ཁྱིམ་རྒྱུད་དང་།
NUM 26:39 ཤེ་ཕུ་ཕམ་ལ་གཏོགས་པ་ཤེ་ཕུ་ཕམ་པ་རྣམས་ཀྱི་ཁྱིམ་རྒྱུད་དང་། ཧུ་ཕམ་ལ་གཏོགས་པ་ཧུ་ཕམ་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:40 པེ་ལཱའི་བུ་རྣམས་ནི་ཨར་དཱ་དང་ནཱ་ཨ་མཱན་ཡིན་ལ། ཨར་དཱ་ལ་གཏོགས་པ་ཨར་དཱ་པ་རྣམས་ཀྱི་ཁྱིམ་རྒྱུད་དང་། ནཱ་ཨ་མཱན་ལ་གཏོགས་པ་ནཱ་ཨ་མཱན་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:41 འདི་དག་ནི་པེན་ཡཱ་མེན་གྱི་བུ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་ཡིན་ལ། བསྡོམས་པས་བཞི་ཁྲི་ལྔ་སྟོང་དྲུག་བརྒྱའོ། །
NUM 26:42 དཱན་གྱི་བུ་རྒྱུད་རྣམས་ནི་འདི་ལྟ་སྟེ། དེ་དག་གི་ཁྱིམ་རྒྱུད་བཞིན་དུ་ཤུ་ཧམ་ལ་གཏོགས་པ་ཤུ་ཧམ་པ་རྣམས་ཀྱི་ཁྱིམ་རྒྱུད་ཡིན། དེ་ནི་དཱན་གྱི་ཁྱིམ་རྒྱུད་དེ་རང་རང་གི་ཁྱིམ་རྒྱུད་བཞིན་དུའོ། །
NUM 26:43 ཤུ་ཧམ་པ་རྣམས་ཀྱི་ཁྱིམ་རྒྱུད་ནས་རྩིས་བླངས་པའི་བསྡོམས་གྲངས་ནི་དྲུག་ཁྲི་བཞི་སྟོང་བཞི་བརྒྱའོ། །
NUM 26:44 ཨ་ཤེར་གྱི་བུ་རྒྱུད་རྣམས་ནི་འདི་ལྟ་སྟེ། དེ་དག་གི་ཁྱིམ་རྒྱུད་བཞིན་དུ་ཡིམ་ནཱ་ལ་གཏོགས་པ་ཡིམ་ནཱ་པ་རྣམས་ཀྱི་ཁྱིམ་རྒྱུད་དང་། ཡེས་བི་ལ་གཏོགས་པ་ཡེས་བི་པ་རྣམས་ཀྱི་ཁྱིམ་རྒྱུད་དང་། པེ་རེ་ཡཱ་ལ་གཏོགས་པ་པེ་རེ་ཡཱ་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:45 པེ་རེ་ཡཱའི་བུ་རྒྱུད་རྣམས་ནི་ཧེ་བེར་ལ་གཏོགས་པ་ཧེ་བེར་པ་རྣམས་ཀྱི་ཁྱིམ་རྒྱུད་དང་། མཱལ་ཀི་ཨེལ་ལ་གཏོགས་པ་མཱལ་ཀི་ཨེལ་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:46 ཨ་ཤེར་གྱི་བུ་མོའི་མིང་ལ་སེ་རཱ་ཞེས་བྱའོ། །
NUM 26:47 འདི་དག་ནི་ཨ་ཤེར་གྱི་བུ་རྒྱུད་ཀྱི་ཁྱིམ་རྒྱུད་རྣམས་ཡིན་ཏེ། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་ཡིན་ལ། བསྡོམས་པས་ལྔ་ཁྲི་སུམ་སྟོང་བཞི་བརྒྱའོ། །
NUM 26:48 ནཱབ་ཐ་ལིའི་བུ་རྒྱུད་རྣམས་ནི་དེ་དག་གི་ཁྱིམ་རྒྱུད་བཞིན་དུ། ཡཱ་སི་ཨེལ་ལ་གཏོགས་པ་ཡཱ་སི་ཨེལ་པ་རྣམས་ཀྱི་ཁྱིམ་རྒྱུད་དང་། གུ་ནེ་ལ་གཏོགས་པ་གུ་ནེ་པ་རྣམས་ཀྱི་ཁྱིམ་རྒྱུད་དང་།
NUM 26:49 ཡེ༌ཚིར་ལ་གཏོགས་པ་ཡེ་ཚིར་པ་རྣམས་ཀྱི་ཁྱིམ་རྒྱུད་དང་། ཤིལ་ལེམ་ལ་གཏོགས་པ་ཤིལ་ལེམ་པ་རྣམས་ཀྱི་ཁྱིམ་རྒྱུད་བཅས་ཡིན།
NUM 26:50 འདི་དག་ནི་ནཱབ་ཐ་ལིའི་ཁྱིམ་རྒྱུད་རྣམས་ཡིན་པ་དང་། དེ་དག་གི་ཁྱིམ་རྒྱུད་བཞིན་དུ་རྩིས་བླངས་པ་བསྡོམས་པས་བཞི་ཁྲི་ལྔ་སྟོང་བཞི་བརྒྱའོ། །
NUM 26:51 དེ་དག་ནི་ཡེས་ར་ཨེལ་པ་རྣམས་ལས་རྩིས་བླངས་པའི་གྲངས་ཀ་སྟེ། བསྡོམས་པས་དྲུག་འབུམ་ཆིག་སྟོང་བདུན་བརྒྱ་སུམ་ཅུའོ། །
NUM 26:52 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 26:53 ཁྱོད་ཀྱིས་མི་རྣམས་ཀྱི་མིང་གི་གྲངས་ཀ་བཞིན་དུ། ཡུལ་དེ་ཁོ་རྣམས་ལ་ས་སྐལ་དུ་བགོ་བཤའ་བརྒྱག་དགོས་པ་དང་།
NUM 26:54 མི་གྲངས་མང་པོ་ཡོད་པ་ལ་ཁྱོད་ཀྱིས་ས་སྐལ་མང་པོ་བགོ་དགོས་པ་དང་། མི་གྲངས་ཉུང་ཉུང་ཡིན་པ་ལ་ཁྱོད་ཀྱིས་ས་སྐལ་ཉུང་ཉུང་བགོ་དགོས། རྩིས་བླངས་པའི་མི་གྲངས་བཞིན་དུ་ཁྱིམ་རྒྱུད་རེ་རེ་ལ་ས་སྐལ་བགོ་དགོས།
NUM 26:55 འོན་ཀྱང་། ཡུལ་ནི་རྒྱན་འཕངས་ནས་བགོ་བཤའ་བརྒྱག་དགོས་ལ། དེ་དག་གིས་རང་རང་གི་ཕ་མེས་རྣམས་ཀྱི་ཚོ་པའི་མིང་བཞིན་དུ་ས་སྐལ་ལེན་དགོས།
NUM 26:56 རྒྱན་བླངས་པ་བཞིན་དུ། མི་གྲངས་མང་ཉུང་ལ་བལྟས་ནས་ས་སྐལ་བགོ་བཤའ་བརྒྱག་དགོས་སོ། །
NUM 26:57 ཁྱིམ་རྒྱུད་བཞིན་རྩིས་གྲངས་བླངས་པའི་ལེ་ཝི་པ་ནི་འདི་ལྟ་སྟེ། གེར་ཤོན་ལ་གཏོགས་པ་གེར་ཤོན་པ་རྣམས་ཀྱི་ཁྱིམ་རྒྱུད་དང་། ཀོ་ཧད་ལ་གཏོགས་པ་ཀོ་ཧད་པ་རྣམས་ཀྱི་ཁྱིམ་རྒྱུད་དང་། མཱ་རཱ་རེའེ་ལ་གཏོགས་པ་མཱ་རཱ་རེའེ་པ་རྣམས་ཀྱི་ཁྱིམ་རྒྱུད་བཅས་ཡིན་ནོ། །
NUM 26:58 འདི་དག་ནི་ལེ་ཝི་ཡི་ཁྱིམ་རྒྱུད་རྣམས་ཏེ། ལིབ་ནིས་པ་རྣམས་ཀྱི་ཁྱིམ་རྒྱུད་དང་། ཧེབ་རོན་པ་རྣམས་ཀྱི་ཁྱིམ་རྒྱུད་དང་། མཱ་ལི་པ་རྣམས་ཀྱི་ཁྱིམ་རྒྱུད་དང་། མུ་ཤི་པ་རྣམས་ཀྱི་ཁྱིམ་རྒྱུད་དང་། ཀོ་རཱག་པ་རྣམས་ཀྱི་ཁྱིམ་རྒྱུད་བཅས་ཡིན་ནོ། །ཀོ་ཧད་ལས་ཨམ་རམ་སྐྱེས་པའོ། །
NUM 26:59 ཨམ་རམ་གྱི་ཆུང་མའི་མིང་ལ་ཡོ་ཀེ་བེད་ཟེར་ཞིང་ལེ་ཝིའི་བུ་མོ་ཡིན་ལ་ཨེ་ཅིབ་ཡུལ་དུ་ལེ་ཝི་ལ་སྐྱེས་ཤིང་། ཁོ་མོས་ཨམ་རམ་ལ་ཨ་རོན་དང་མོ་ཤེ། དེ་གཉིས་ཀྱི་ལྕམ་མོ་མིར་ཡམ་བཅས་བཙས་པའོ། །
NUM 26:60 ཡང་ཨ་རོན་ལས་ནཱ་དབ་དང་། ཨ་བི་ཧུ་དང་། ཨེ་ལི་ཨ་ཟར་དང་། ཨི་ཐ་མཱར་བཅས་སྐྱེས་པ་དང་།
NUM 26:61 ནཱ་དབ་དང་ཨ་བི་ཧུ་གཉིས་ནི་དཀོན་མཆོག་ཡ་ཝཱེ་ལ་བཀའ་འཁྲོལ་མེད་པའི་མེ་ཕུལ་བའི་དུས་སུ་ཤི་བར་གྱུར་ཏོ། །
NUM 26:62 ལེ་ཝི་པ་རྣམས་ལས་ཟླ་བ་གཅིག་དང་དེའི་ཡན་གྱི་ན་ཚོད་ཟིན་པའི་ཕོ་ཐམས་ཅད་རྩིས་བླངས་པ་བསྡོམས་པས་ཉིས་ཁྲི་སུམ་སྟོང་ཡིན། ཁོ་རྣམས་ཡེས་ར་ཨེལ་པ་རྣམས་ཀྱི་ཁྲོད་དུ་རྩིས་མེད་དེ། གང་ལ་ཞེ་ན། ཡེས་ར་ཨེལ་པ་རྣམས་ཀྱི་ཁྲོད་དུ་ཁོ་རྣམས་ལ་ས་སྐལ་མ་ཐོབ་པའི་ཕྱིར་རོ། །
NUM 26:63 དེ་དག་ནི་མོ་ཤེ་དང་མཆོད་དཔོན་ཨེ་ལི་ཨ་ཟར་གཉིས་ཀྱིས་རྩིས་བླངས་པ་རྣམས་ཡིན་ཏེ། དེ་གཉིས་ཀྱིས་མོ་ཨབ་སྤང་ལྗོངས་སུ། ཡེ་རུ་ཀོའི་ཁ་གཏད་དུ་ཡོར་དན་གཙང་པོའི་འགྲམ་ནས་ཡེས་ར་ཨེལ་པ་རྣམས་རྩིས་བླངས་སོ། །
NUM 26:64 དེ་དག་གི་ཁྲོད་དུ་མོ་ཤེ་དང་མཆོད་དཔོན་ཨ་རོན་གཉིས་ཀྱིས་སི་ནཱ་དབེན་སྟོང་དུ་ཡེས་ར་ཨེལ་པ་རྣམས་རྩིས་ལེན་པའི་དུས་སུ་རྩིས་བླངས་པ་ནི་གཅིག་ཀྱང་མེད།
NUM 26:65 ཅི་ལ་ཞེ་ན། དཀོན་མཆོག་ཡ་ཝཱེས་དེ་རྣམས་ཀྱི་སྐོར་ལ་སྔར་འདི་སྐད་དུ། དེ་དག་དབེན་སྟོང་དུ་འཆི་ངེས་ཡིན་ཞེས་གསུངས་མྱོང་བའི་ཕྱིར་རོ། །དེ་རྣམས་ལས་ཡེ་ཕུན་ནེའི་བུ་ཀཱ་ལེབ་དང་ནུན་གྱི་བུ་ཡོ་ཤུ་ཨ་གཉིས་ལས་གཞན་གཅིག་ཀྱང་མ་ལུས་སོ། །
NUM 27:1 དེ་ཡང་ཡོ་སེབ་ཀྱི་བུ་མ་ནཱ་ཤེའི་ཁྱིམ་རྒྱུད་རྣམས་ལས། ཚེ་ལོ་ཕེ་ཧད་ཀྱི་བུ་མོ་རྣམས་དེ་དག་གི་དྲུང་དུ་འོངས་པ་དང་། ཚེ་ལོ་ཕེ་ཧད་ནི་ཧེ་ཕེར་གྱི་བུ་དང་། དེ་ནི་གིལ་ཨད་ཀྱི་བུ། དེ་ནི་མཱ་ཀིར་གྱི་བུ། དེ་ནི་མཱ་ན་ཤེའི་བུའོ། །ཁོའི་བུ་མོ་དེ་རྣམས་ཀྱི་མིང་ནི། མ་ལཱ་དང་། ནོ་ཨ་དང་། ཧོག་ལཱ་དང་། མིལ་ཀཱ་དང་། ཐིར་ཚ་བཅས་སོ། །
NUM 27:2 དེ་དག་མཇལ་འཕྲད་གུར་མཆོག་གི་སྒོ་ཁར། མོ་ཤེ་དང་མཆོད་དཔོན་ཨེ་ལི་ཨ་ཟར་དང་འགོ་དཔོན་རྣམས་དང་། མི་ཚོགས་ཡོངས་ཀྱི་མདུན་དུ་འགྲེང་སྟེ་ན་རེ།
NUM 27:3 ངེད་ཅག་གི་ཕ་ནི་དབེན་སྟོང་དུ་ཤི་བ་དང་། ཁོ་ནི་དཀོན་མཆོག་ཡ་ཝཱེ་ལ་རྒོལ་བར་མཉམ་དུ་འདུས་པའི་མི་རྣམས་ཀྱི་ཁྲོད་དུ་མེད་ལ། ཀོ་རཱག་གི་ཕྱོགས་ཁག་ལའང་མི་གཏོགས། ཁོ་ནི་རང་གི་སྡིག་པའི་དབང་གིས་ཤི་བ་དང་ཁོ་ལ་བུ་ཡང་མེད་དོ། །
NUM 27:4 ངེད་ཅག་གི་ཕ་ལ་བུ་མེད་པའི་རྐྱེན་གྱིས་ཁོའི་མིང་རང་གི་ཁྱིམ་རྒྱུད་ལས་མེད་པར་བཟོས་པ་ཅི་ཡིན་ནམ། ངེད་ཅག་གི་ཕ་ཡི་སྤུན་ཟླ་ཚོའི་ཁྲོད་དུ་ང་ཚོ་ལ་བགོ་སྐལ་གནང་བར་མཛོད་ཅེས་ཞུས།
NUM 27:5 དེ་ནས་མོ་ཤེ་ཡིས་ཁོ་རྣམས་ཀྱི་ཞུ་བ་དཀོན་མཆོག་ཡ་ཝཱེའི་དྲུང་དུ་ཞུས་སོ། །
NUM 27:6 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 27:7 ཚེ་ལོ་ཕེ་ཧད་ཀྱི་བུ་མོ་རྣམས་ཀྱིས་སྨྲས་པ་ལུགས་དང་མཐུན་པ་ཡིན། ཁྱོད་ཀྱིས་དེ་དག་གི་ཕ་ཡི་སྤུན་ཟླའི་ཁྲོད་ནས་དེ་དག་ལ་བགོ་སྐལ་སྤྲོད་དགོས། དེ་དག་གི་ཕ་ཡི་བགོ་སྐལ་ཁོ་ཚོ་ལ་སྤྲོད་དགོས་སོ། །
NUM 27:8 ཡང་ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་ཤིག མི་ཞིག་འཆི་བའི་དུས་སུ་བུ་མེད་པ་ཡིན་ན་མི་དེའི་བགོ་སྐལ་ཁོའི་བུ་མོར་སྤྲོད་དགོས་པ་དང་།
NUM 27:9 ཁོ་ལ་བུ་མོ་མེད་ན་ཁོའི་བགོ་སྐལ་དེའི་སྤུན་ཟླ་རྣམས་ལ་སྤྲོད་པར་བྱའོ། །
NUM 27:10 ཁོ་ལ་སྤུན་ཟླ་ཡང་མེད་ན་ཁོའི་བགོ་སྐལ་དེའི་ཕ་ཡི་སྤུན་རྣམས་ལ་སྤྲོད་དགོས།
NUM 27:11 ཁོའི་ཕ་ལ་སྤུན་ཟླ་མེད་ན་ཁོའི་བགོ་སྐལ་ནི་དེའི་ཁྱིམ་རྒྱུད་ནང་གི་རྩ་བའི་གཉེན་ཉེ་ལ་སྤྲོད་དགོས་ཤིང་། ཁོའི་བགོ་སྐལ་མི་དེར་དབང་བ་ཡིན། དེ་ནི་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་དུ། ཡེས་ར་ཨེལ་པ་རྣམས་ཀྱི་སྒྲིག་ཁྲིམས་དང་སྲོལ་ཡིག་ཡིན་ཞེས་སྨྲ་དགོས་པར་གསུངས་སོ། །
NUM 27:12 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཨ་བཱ་རིམ་གྱི་རི་འདི་ལ་ཡར་འགོས་ནས་བདག་གིས་ཡེས་ར་ཨེལ་པ་རྣམས་ལ་སྤྲད་པའི་ཡུལ་དེར་ལྟོས་ཤིག
NUM 27:13 དེར་བལྟས་པའི་རྗེས་སུ་ཁྱོད་ཀྱང་ཁྱོད་ཀྱི་སྤུན་ཨ་རོན་བཞིན་དུ་རང་གི་རིགས་རྒྱུད་ཁྲོད་དུ་འཛོམ་པར་འགྱུར།
NUM 27:14 ཅི་ལ་ཞེ་ན། ཟིན་བྱ་བའི་དབེན་སྟོང་དུ་མི་ཚོགས་ཀྱིས་ངོ་རྒོལ་བྱས་པའི་དུས་སུ། ཁྱོད་རྣམས་ངའི་བཀའ་དང་འགལ་ཞིང་། ཆུ་འགྲམ་ནས་དེ་དག་གི་མདུན་དུ་ང་དམ་པར་མ་བཀུར་བའི་ཕྱིར་ཡིན་ཞེས་གསུངས། ཆུ་དེ་ནི་ཟིན་བྱ་བའི་དབེན་སྟོང་དུ་ཡོད་ལ། དེ་ནི་ཀཱ་དེའེ་ཤཱ་ཡུལ་གྱི་མེ་རི་བཱའི་ཆུ་རྣམས་ཡིན་ནོ། །
NUM 27:15 མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར།
NUM 27:16 ལུས་ཅན་ཐམས་ཅད་ཀྱི་སེམས་ཉིད་ཀྱི་དཀོན་མཆོག་ཡ་ཝཱེས་མི་ཚོགས་འདི་ལ་བདག་སྐྱོང་བྱེད་མཁན་ཞིག་བསྐོ་བར་མཛོད།
NUM 27:17 ཁོ་ཚོའི་མདུན་དུ་འགྲོ་འོང་བྱེད་པ་དང་། ཁོ་ཚོ་ཁྲིད་ནས་འགྲོ་འོང་བྱེད་མཁན་ཞིག་དགོས། དེ་ནི་དཀོན་མཆོག་ཡ་ཝཱེའི་མི་ཚོགས་རྫི་བོ་མེད་པའི་ལུག་དང་འདྲ་བར་མི་འགྱུར་བའི་ཕྱིར་དུའོ་ཞེས་ཞུས་པ་ལ།
NUM 27:18 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ནུན་གྱི་བུ་ཡོ་ཤུ་ཨ་འདེམས་དགོས་ཏེ། ཁོའི་ནང་དུ་ཐུགས་ཉིད་བཞུགས་ལ། ཁྱོད་ཀྱིས་ཁོའི་ལུས་ལ་ལག་པ་ཞོག་ཅིག
NUM 27:19 ཁོ་ནི་མཆོད་དཔོན་ཨེ་ལི་ཨ་ཟར་དང་མི་ཚོགས་ཐམས་ཅད་ཀྱི་མདུན་ནས་འགྲེང་དུ་ཆུག་ལ། དེ་དག་གི་མཐོང་ངོར་ཁོ་ལ་ལས་འགན་སྤྲོད་ཅིག
NUM 27:20 ཡེས་ར་ཨེལ་པ་རྣམས་ཀྱི་མི་ཚོགས་ཡོངས་ཀྱིས་ཁོའི་བཀའ་ལ་མཉན་པའི་ཕྱིར་དུ། ཁྱོད་ཀྱིས་རང་གི་དབང་ཐང་ཆ་ཤས་ཁོ་ལ་ཐོངས་ཤིག་དང་།
NUM 27:21 ཁོ་རང་མཆོད་དཔོན་ཨེ་ལི་ཨ་ཟར་གྱི་དྲུང་དུ་འགྲེང་ནས་འདུག་པ་དང་། ཨེ་ལི་ཨ་ཟར་གྱིས་ཡོ་ཤུ་ཨའི་ཕྱིར་དཀོན་མཆོག་ཡ་ཝཱེའི་དྲུང་དུ་ཨུའུ་རིམ་ལས་ཐུགས་བརྟག་ཞུ་བར་འགྱུར། ཁོ་དང་ཡེས་ར་ཨེལ་པ་ཐམས་ཅད་དེ། མི་ཚོགས་ཡོངས་ནི་ཨེ་ལི་ཨ་ཟར་གྱི་བཀའ་བཞིན་འགྲོ་འོང་བྱེད་དགོས་ཞེས་གསུངས་སོ། །
NUM 27:22 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ་བསྒྲུབས་པ་དང་། ཁོས་ཡོ་ཤུ་ཨ་ཁྲིད་འོངས་ཏེ་མཆོད་དཔོན་ཨེ་ལི་ཨ་ཟར་དང་མི་ཚོགས་ཡོངས་ཀྱི་མདུན་ནས་འགྲེང་དུ་བཅུག་ཅིང་།
NUM 27:23 ཁོའི་ལུས་ལ་ཕྱག་གླན་པ་དང་། དཀོན་མཆོག་ཡ་ཝཱེས་མོ་ཤེ་བརྒྱུད་ནས་གནང་བའི་བཀའ་བཞིན་དུ་ཁོ་ལ་ལས་འགན་སྤྲད་དོ། །
NUM 28:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 28:2 ཁྱོད་ཀྱིས་ཡེས་ར་ཨེལ་པ་རྣམས་ལ་བཀའ་འདི་ལྟར་སྒོས་ཤིག ཁྱོད་རྣམས་ཀྱིས་ང་ལ་འབུལ་འོས་པའི་མཆོད་པ་སྟེ། ང་ལ་དྲི་ཞིམ་གྱི་མེ་མཆོད་དུ་འབུལ་བའི་ཞལ་ཟས་ནི་དུས་བཅད་ལྟར་གཟབ་གཟབ་བྱས་ནས་ང་ལ་འབུལ་དགོས་ཞེས་པའོ། །
NUM 28:3 ཡང་ཁྱོད་ཀྱིས་དེ་རྣམས་ལ་འདི་ལྟར་སྨྲོས་ཤིག ཁྱོད་ཅག་གིས་དཀོན་མཆོག་ཡ་ཝཱེ་ལ་འབུལ་དགོས་པའི་མེ་མཆོད་ནི་འདི་ལྟ་སྟེ། ཉིན་རེར་སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་གཉིས་རེ་དུས་རྒྱུན་གྱི་སྦྱིན་སྲེག་ཏུ་འབུལ་དགོས་པ་ཡིན།
NUM 28:4 ལུ་གུ་གཅིག་ནི་ཞོགས་པའི་དུས་སུ་འབུལ་བ་དང་། ཅིག་ཤོས་ནི་ས་སྲོས་ཀྱི་དུས་སུ་འབུལ་དགོས།
NUM 28:5 གཞན་ཡང་འབྲུ་རིགས་ཀྱི་མཆོད་པའི་ཕྱིར་དུ་ཕྱེ་བཟང་པོ་ཨེ་ཕཱ་གང་གི་བཅུ་ཆ་གཅིག་ལ་སྣུམ་བརྡུངས་མ་རྫ་བུམ་གང་གི་བཞི་ཆ་གཅིག་བསྲེས་དགོས།
NUM 28:6 དེ་ནི་དུས་རྒྱུན་གྱི་སྦྱིན་སྲེག་ཡིན་ལ། རི་བོ་སི་ནཱ་ནས་གཏན་ལ་ཕབ་པ་སྟེ། དཀོན་མཆོག་ཡ་ཝཱེ་ལ་འབུལ་བའི་དྲི་ཞིམ་གྱི་མེ་མཆོད་ཡིན་ནོ། །
NUM 28:7 ཡང་ལུ་གུ་རེའི་ཕྱིར་དུ་རྒུན་ཆང་རྫ་བུམ་གྱི་བཞི་ཆ་གཅིག་སྐྱེམས་མཆོད་དུ་འབུལ་དགོས། ཁྱོད་ཀྱིས་རྒུན་ཆང་བཙན་པོ་དེ་གནས་དམ་པ་རུ་དཀོན་མཆོག་ཡ་ཝཱེ་ལ་སྐྱེམས་མཆོད་དུ་འབུལ་དགོས་སོ། །
NUM 28:8 ས་སྲོས་ཀྱི་དུས་སུ་ལུ་གུ་ཅིག་ཤོས་དེ་འབུལ་དགོས། ཞོགས་པའི་འབྲུ་རིགས་ཀྱི་མཆོད་པ་དང་། དེ་དང་མཉམ་དུ་འབུལ་བའི་སྐྱེམས་མཆོད་ནང་ལྟར་དྲི་ཞིམ་གྱི་མེ་མཆོད་དུ་དཀོན་མཆོག་ཡ་ཝཱེ་ལ་འབུལ་དགོས་སོ། །
NUM 28:9 དེ་ནས་ངལ་གསོ་བའི་ཉིན་མོར། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་གཉིས་དང་། འབྲུ་རིགས་ཀྱི་མཆོད་པའི་ཕྱིར་དུ་ཨེ་ཕཱ་བཅུ་ཆ་གཉིས་ཀྱི་ཕྱེ་བཟང་པོར་སྣུམ་བསྲེས་ནས། དེ་དང་མཉམ་དུ་འབུལ་བའི་སྐྱེམས་མཆོད་བཅས་འབུལ་དགོས།
NUM 28:10 དེ་ནི་དུས་རྒྱུན་གྱི་སྦྱིན་སྲེག་དང་དེ་དང་མཉམ་དུ་འབུལ་བའི་སྐྱེམས་མཆོད་ཀྱི་ཕན་ཆོད་ནས་ངལ་གསོ་བའི་ཉིན་མོ་རེ་རེར་འབུལ་བའི་སྦྱིན་སྲེག་ཡིན་ནོ། །
NUM 28:11 ཡང་ཟླ་རེའི་ཉིན་དང་པོར་ཁྱོད་ཅག་གིས་དཀོན་མཆོག་ཡ་ཝཱེ་ལ་སྦྱིན་སྲེག་འབུལ་དགོས་ཏེ། གླང་ཐུག་གཉིས་དང་། ལུག་ཐུག་གཅིག་དང་། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བདུན་བཅས་ཡིན།
NUM 28:12 འབྲུ་རིགས་ཀྱི་མཆོད་པ་ལ་གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་གྱི་ཕྱེ་བཟང་པོར་སྣུམ་བསྲེས་ནས་འབུལ་བ་དང་། འབྲུ་རིགས་ཀྱི་མཆོད་པ་ལ་ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་ཀྱི་ཕྱེ་བཟང་པོར་སྣུམ་བསྲེས་ནས་འབུལ་དགོས།
NUM 28:13 འབྲུ་རིགས་ཀྱི་མཆོད་པ་ལ་ལུ་གུ་རེའི་ཕྱིར་དུ་ཨེ་ཕཱ་བཅུ་ཆ་གཅིག་གི་ཕྱེ་བཟང་པོར་སྣུམ་བསྲེས་ནས་འབུལ་དགོས། དེ་ནི་དྲི་ཞིམ་གྱི་སྦྱིན་སྲེག་སྟེ་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཡིན་ནོ། །
NUM 28:14 དེ་དག་གི་སྐྱེམས་མཆོད་ལ། གླང་ཐུག་རེའི་ཕྱིར་དུ་རྒུན་ཆང་རྫ་བུམ་ཕྱེད་ཀ་རེ་དང་། ལུག་ཐུག་རེའི་ཕྱིར་དུ་རྒུན་ཆང་རྫ་བུམ་གྱི་གསུམ་ཆ་གཅིག་རེ། ལུ་གུ་རེའི་ཕྱིར་དུ་རྒུན་ཆང་རྫ་བུམ་གྱི་བཞི་ཆ་གཅིག་རེ་བཅས་འབུལ་དགོས་ཤིང་། དེ་ནི་ཟླ་བ་རེ་རེའི་སྦྱིན་སྲེག་ཡིན་ལ། ལོ་འཁོར་གྱི་ཟླ་བ་རེ་རེར་ཡིན་ནོ། །
NUM 28:15 ཡང་ར་ཕོ་གཅིག་དཀོན་མཆོག་ཡ་ཝཱེ་ལ་སྡིག་བཤགས་མཆོད་པ་རུ་འབུལ་དགོས་ལ། དེ་ནི་དུས་རྒྱུན་གྱི་སྦྱིན་སྲེག་དང་དེ་དང་མཉམ་དུ་འབུལ་བའི་སྐྱེམས་མཆོད་ཀྱི་ཕན་ཆོད་ནས་འབུལ་བར་བྱའོ། །
NUM 28:16 ཟླ་བ་དང་པོའི་ཚེས་བཅུ་བཞི་ཉིན་ནི་དཀོན་མཆོག་ཡ་ཝཱེའི་པེ་སག་གི་དུས་ཆེན་ཡིན་ཏེ།
NUM 28:17 ཟླ་བ་དེའི་ཚེས་བཅོ་ལྔ་ནི་དུས་ཆེན་ཡིན་པས། ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས།
NUM 28:18 ཉིན་དང་པོར་འདུ་འཛོམས་དམ་པ་ཡོད་དགོས་ལ་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
NUM 28:19 འོན་ཀྱང་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་མེ་མཆོད་འབུལ་དགོས་ཏེ། གླང་ཐུག་གཉིས་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་བདུན་བཅས་ཡིན་ལ། དེ་ཐམས་ཅད་སྐྱོན་མེད་པ་ཡིན་དགོས་སོ། །
NUM 28:20 ཡང་དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ལ། གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
NUM 28:21 ལུ་གུ་བདུན་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་འབུལ་དགོས།
NUM 28:22 ཡང་ར་ཕོ་གཅིག་སྡིག་བཤགས་མཆོད་པར་ཕུལ་ནས་ཁྱོད་ཅག་གི་སྡིག་པ་བཤག་དགོས།
NUM 28:23 ཞོགས་པའི་སྦྱིན་སྲེག་སྟེ་དུས་རྒྱུན་གྱི་སྦྱིན་སྲེག་གི་ཕན་ཆོད་ནས་ཁྱོད་ཅག་གིས་དེ་དག་ཀྱང་འབུལ་དགོས།
NUM 28:24 ཁྱོད་ཅག་གིས་ཉིན་རེ་བཞིན་ཉིན་བདུན་གྱི་རིང་ལ་མཆོད་པ་དེ་རྣམས་འབུལ་དགོས་ཏེ། དཀོན་མཆོག་ཡ་ཝཱེ་ལ་ཞལ་ཟས་སུ་དྲི་ཞིམ་གྱི་མེ་མཆོད་དུ་འབུལ་བར་བྱ། དེ་ནི་དུས་རྒྱུན་གྱི་སྦྱིན་སྲེག་དང་དེའི་སྐྱེམས་མཆོད་ཀྱི་ཕན་ཆོད་ནས་འབུལ་བའོ། །
NUM 28:25 ཉིན་བདུན་པར་འདུ་འཛོམས་དམ་པ་ཡོད་དགོས་ལ་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་ངོ་། །
NUM 28:26 ཐོག་ཕུད་ཀྱི་ཉིན་མོ་སྟེ་བདུན་ཕྲག་རྣམས་ཀྱི་དུས་ཆེན་གྱི་ཉིན་དེར། ཁྱོད་ཅག་གིས་དཀོན་མཆོག་ཡ་ཝཱེ་ལ་འབྲུ་རིགས་ཀྱི་མཆོད་པ་གསར་པ་འབུལ་བའི་ཚེ་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
NUM 28:27 འོན་ཀྱང་སྦྱིན་སྲེག་ནི་དཀོན་མཆོག་ཡ་ཝཱེ་ལ་དྲི་ཞིམ་གྱི་མཆོད་པར་འབུལ་དགོས་པ་སྟེ། གླང་ཐུག་གཉིས་དང་། ལུག་ཐུག་གཅིག་དང་། ལོ་གཅིག་ཅན་གྱི་ལུ་གུ་ཕོ་བདུན་བཅས་ཡིན་ལ།
NUM 28:28 དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ཏེ། གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
NUM 28:29 ལུ་གུ་བདུན་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་འབུལ་དགོས།
NUM 28:30 ཡང་ར་ཕོ་གཅིག་ཕུལ་ནས་ཁྱོད་ཅག་གི་སྡིག་པ་བཤག་དགོས།
NUM 28:31 དུས་རྒྱུན་གྱི་སྦྱིན་སྲེག་དང་དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པའི་ཕན་ཆོད་ནས། ཁྱོད་ཅག་གིས་ད་དུང་མཆོད་པ་འདི་དག་དང་དེའི་སྐྱེམས་མཆོད་རྣམས་འབུལ་དགོས་ལ། དེ་རྣམས་སྐྱོན་མེད་པ་ཡིན་དགོས་སོ། །
NUM 29:1 དེ་ཡང་ཟླ་བ་བདུན་པའི་ཉིན་དང་པོར། ཁྱོད་ཅག་ལ་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་། དེ་ནི་ཁྱོད་ཅག་གིས་དུང་འབུད་པའི་ཉིན་མོ་ཡིན་ནོ། །
NUM 29:2 ཁྱོད་ཅག་གིས་སྦྱིན་སྲེག་ནི་དཀོན་མཆོག་ཡ་ཝཱེ་ལ་དྲི་ཞིམ་གྱི་མཆོད་པ་རུ་འབུལ་དགོས་ཏེ། གླང་ཐུག་གཅིག་དང་། ལུག་ཐུག་གཅིག་དང་། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བདུན་བཅས་ཡིན་ནོ། །
NUM 29:3 དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ལ། གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
NUM 29:4 ལུ་གུ་བདུན་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་འབུལ་དགོས།
NUM 29:5 ཡང་ར་ཕོ་གཅིག་སྡིག་བཤགས་མཆོད་པར་ཕུལ་ནས་ཁྱོད་ཅག་གི་སྡིག་པ་བཤག་དགོས།
NUM 29:6 ཚེས་གཅིག་གི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། ཁྲིམས་སྲོལ་ལྟར་དེ་དང་མཉམ་དུ་ཕུལ་བའི་སྐྱེམས་མཆོད་བཅས་ཀྱི་ཕན་ཆོད་ནས། དེ་རྣམས་དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་འབུལ་བར་བྱའོ། །
NUM 29:7 ཟླ་བ་བདུན་པའི་ཚེས་བཅུ་ལ་ཁྱོད་ཅག་གིས་རང་ཉིད་ཁྱད་དུ་བསད་ནས་འདུ་འཛོམས་དམ་པ་རོལ་དགོས་ལ། ལས་ཀ་གང་ཡང་བྱེད་མི་རུང་།
NUM 29:8 འོན་ཀྱང་སྦྱིན་སྲེག་ནི་དཀོན་མཆོག་ཡ་ཝཱེ་ལ་དྲི་ཞིམ་གྱི་མཆོད་པར་འབུལ་དགོས་པ་སྟེ། གླང་ཐུག་གཅིག་དང་། ལུག་ཐུག་གཅིག་དང་། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བདུན་བཅས་ཡིན་ནོ། །
NUM 29:9 དེ་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ལ། གླང་ཐུག་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
NUM 29:10 ལུ་གུ་བདུན་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་འབུལ་དགོས།
NUM 29:11 སྡིག་པའི་ཕྱིར་དུ་ཕུལ་བའི་སྡིག་བཤགས་མཆོད་པ་དང་། དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པ་རུ་འབུལ་དགོས་སོ། །
NUM 29:12 ཡང་ཟླ་བ་བདུན་པའི་ཚེས་བཅོ་ལྔའི་ཉིན་ཁྱོད་ཅག་ལ་འདུ་འཛོམས་དམ་པ་ཡོད་དགོས་ཤིང་། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་ལ། དཀོན་མཆོག་ཡ་ཝཱེའི་ཕྱིར་ཉིན་བདུན་ལ་དུས་ཆེན་གཏོང་དགོས།
NUM 29:13 ཁྱོད་ཅག་གིས་དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་སྦྱིན་སྲེག་འབུལ་དགོས་པ་སྟེ། གླང་ཐུག་བཅུ་གསུམ་དང་། ལུག་ཐུག་གཉིས་དང་། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་སོ། །
NUM 29:14 དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་ནི་ཕྱེ་བཟང་པོ་སྣུམ་བསྲེས་མ་ཡིན་ལ། གླང་ཐུག་བཅུ་གསུམ་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གསུམ་རེ་དང་། ལུག་ཐུག་གཉིས་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཉིས་རེ་དང་།
NUM 29:15 ལུ་གུ་བཅུ་བཞི་པོ་དེ་རེ་རེའི་ཕྱིར་དུ་ཨེ་ཕཱ་བཅུ་ཆ་གཅིག་རེ་འབུལ་དགོས།
NUM 29:16 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:17 ཉིན་གཉིས་པར་གླང་ཐུག་བཅུ་གཉིས་དང། ལུག་ཐུག་གཉིས། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་འབུལ་དགོས་པར་མ་ཟད།
NUM 29:18 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:19 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:20 ཉིན་གསུམ་པར་གླང་ཐུག་བཅུ་གཅིག་དང་། ལུག་ཐུག་གཉིས། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་འབུལ་དགོས་པར་མ་ཟད།
NUM 29:21 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:22 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:23 ཉིན་བཞི་པར་གླང་ཐུག་བཅུ་དང་། ལུག་ཐུག་གཉིས། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་འབུལ་དགོས་པར་མ་ཟད།
NUM 29:24 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:25 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:26 ཉིན་ལྔ་པར་གླང་ཐུག་དགུ་དང་། ལུག་ཐུག་གཉིས། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་འབུལ་དགོས་པར་མ་ཟད།
NUM 29:27 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:28 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:29 ཉིན་དྲུག་པར་གླང་ཐུག་བརྒྱད་དང་། ལུག་ཐུག་གཉིས། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་འབུལ་དགོས་པར་མ་ཟད།
NUM 29:30 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:31 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:32 ཉིན་བདུན་པར་གླང་ཐུག་བདུན་དང་། ལུག་ཐུག་གཉིས། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བཅུ་བཞི་བཅས་འབུལ་དགོས་པར་མ་ཟད།
NUM 29:33 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:34 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:35 ཉིན་བརྒྱད་པར་ཁྱོད་ཅག་ལ་འདུ་འཛོམས་དམ་ནན་ཞིག་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།
NUM 29:36 དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་སྦྱིན་སྲེག་འབུལ་དགོས་པ་སྟེ། གླང་ཐུག་གཅིག་དང་ལུག་ཐུག་གཅིག་དང་། སྐྱོན་མེད་པའི་ལོ་གཅིག་ཅན་གྱི་ལུ་གུ་ཕོ་བདུན་བཅས་འབུལ་དགོས་པར་མ་ཟད།
NUM 29:37 གླང་ཐུག་དང་ལུག་ཐུག་དང་ལུ་གུ་བཅས་ཀྱི་ཕྱིར་དུ་དེ་དག་གི་གྲངས་ཀ་དང་ཁྲིམས་སྲོལ་བཞིན་དུ། དེ་དག་དང་མཉམ་དུ་འབུལ་བའི་འབྲུ་རིགས་ཀྱི་མཆོད་པ་དང་སྐྱེམས་མཆོད་འབུལ་དགོས།
NUM 29:38 དུས་རྒྱུན་གྱི་སྦྱིན་སྲེག་དང་དེའི་འབྲུ་རིགས་ཀྱི་མཆོད་པ་དང་། དེ་དག་གི་སྐྱེམས་མཆོད་བཅས་ཀྱི་ཕན་ཆོད་ནས། ཡང་ར་ཕོ་གཅིག་སྡིག་བཤགས་མཆོད་པར་འབུལ་དགོས་སོ། །
NUM 29:39 མཆོད་པ་འདི་དག་ནི་ཁྱོད་ཅག་གི་དུས་ཆེན་གྱི་སྐབས་སུ་དཀོན་མཆོག་ཡ་ཝཱེ་ལ་འབུལ་དགོས་པ་སྟེ། དམ་བཅའི་མཆོད་པ་དང་ཡིད་མོས་ཀྱི་མཆོད་པ་དང་། སྦྱིན་སྲེག་གི་མཆོད་པ་དང་འབྲུ་རིགས་ཀྱི་མཆོད་པ་དང་། སྐྱེམས་མཆོད་དང་། ཞི་བདེའི་མཆོད་པ་བཅས་ཀྱི་ཕན་ཆོད་ནས་ཕུལ་བ་ཡིན་ཞེས་གསུངས་སོ། །
NUM 29:40 དེ་ནས་མོ་ཤེ་ཡིས་དཀོན་མཆོག་ཡ་ཝཱེས་གནང་བའི་བཀའ་ཐམས་ཅད་དེ་བཞིན་དུ་ཡེས་ར་ཨེལ་པ་རྣམས་ལ་སྨྲས་སོ། །
NUM 30:1 དེ་ཡང་མོ་ཤེ་ཡིས་ཡེས་ར་ཨེལ་པ་རྣམས་ཀྱི་ཚོ་པ་དག་གི་འགོ་དཔོན་རྣམས་ལ་འདི་ལྟར། འདི་ནི་དཀོན་མཆོག་ཡ་ཝཱེས་གནང་བའི་བཀའ་ཡིན་ཏེ།
NUM 30:2 གལ་སྲིད་མི་ཞིག་གིས་དཀོན་མཆོག་ཡ་ཝཱེ་ལ་དམ་བཅའ་འཇོག་པའམ། སྡོམ་པ་ལེན་པར་མནའ་བསྐྱལ་བ་ཡིན་ན། རང་གི་དམ་ཚིག་བསྲུང་དགོས་ལ། རང་གི་ཁ་ནས་ཐོན་པའི་གཏམ་ཐམས་ཅད་བཞིན་དུ་བསྒྲུབ་དགོས་སོ། །
NUM 30:3 བུད་མེད་ན་ཆུང་ཞིག་ད་དུང་རང་གི་ཕ་གཞིས་སུ་ཡོད་པའི་དུས་སུ། དཀོན་མཆོག་ཡ་ཝཱེ་ལ་སྡོམ་པ་ལེན་པར་དམ་བཅས་ཤིང་།
NUM 30:4 ཁོ་མོའི་ཕ་ཡིས་ཁོ་མོས་བཞག་པའི་དམ་བཅའ་དང་སྡོམ་པ་ལེན་པའི་ཚིག་ཐོས་ཀྱང་གང་ཡང་མ་སྨྲས་ན། ཁོ་མོས་བཞག་པའི་དམ་བཅའ་ཐམས་ཅད་དང་སྡོམ་པ་ལེན་པའི་ཚིག་རྣམས་བསྲུང་དགོས།
NUM 30:5 འོན་ཀྱང་ཁོ་མོའི་ཕ་ཡིས་དེ་ཐོས་པའི་ཚེ་ཁོ་མོ་བཀག་པ་ཡིན་ན། ཁོ་མོས་བཞག་པའི་དམ་བཅའ་དང་སྡོམ་པ་ལེན་པའི་ཚིག་རྣམས་བསྲུང་མི་དགོས། ཅི་ལ་ཞེ་ན། ཁོ་མོའི་ཕ་ཡིས་ཁོ་མོ་བཀག་པ་ཡིན་པས། དཀོན་མཆོག་ཡ་ཝཱེས་ཁོ་མོར་དགོངས་ཡངས་མཛད་པར་འགྱུར་རོ། །
NUM 30:6 གལ་སྲིད་ཁོ་མོ་སྐྱེས་པ་ཞིག་ལ་གཉེན་བསྒྲིགས་ཤིང་། དམ་བཅའ་འཇོག་པའམ་སྡོམ་པ་ལེན་པའི་ཚིག་ཁ་ནས་ཤོར་བའི་ཚེ།
NUM 30:7 ཁོ་མོའི་ཁྱོ་གས་དེ་ཐོས་ནའང་ཐོས་པའི་སྐབས་སུ་ཅི་ཡང་མ་སྨྲས་ན། ཁོ་མོས་བཞག་པའི་དམ་བཅའ་དང་སྡོམ་པ་ལེན་པའི་ཚིག་རྣམས་བསྲུང་དགོས་པ་ཡིན།
NUM 30:8 འོན་ཀྱང་ཁོ་མོའི་ཁྱོ་གས་དེ་ཐོས་པའི་ཚེ་ཁོ་མོ་བཀག་པ་ཡིན་ན། ཁོ་མོས་བཞག་པའི་དམ་བཅའ་དང་ཁོ་མོའི་ཁ་ནས་ཤོར་བའི་སྡོམ་པ་ལེན་པའི་ཚིག་རྣམས་བསྲུང་མི་དགོས་པར་བྱས་ནའང་། དཀོན་མཆོག་ཡ་ཝཱེས་ཁོ་མོ་ལ་དགོངས་ཡངས་མཛད་པར་འགྱུར་རོ། །
NUM 30:9 འོན་ཀྱང་ཡུགས་མོའམ་བུད་མེད་བཟའ་ཐོར་བྱས་པ་ཞིག་གིས་བཞག་པའི་དམ་བཅའ་སྟེ། སྡོམ་པ་ལེན་པའི་ཚིག་ནི་ཐམས་ཅད་བསྲུང་དགོས་པ་ཡིན།
NUM 30:10 གལ་སྲིད་ཁོ་མོས་རང་གི་ཁྱོ་གའི་ཁྱིམ་དུ་ཡོད་པའི་དུས་སུ་དམ་བཅའ་བཞག་པའམ་སྡོམ་པ་ལེན་པར་མནའ་བསྐྱལ་བ་དང་།
NUM 30:11 ཁོ་མོའི་ཁྱོ་གས་དེ་ཐོས་ཀྱང་གང་ཡང་མ་སྨྲས་པ་དང་བཀག་ཀྱང་མ་བཀག་ན། ཁོ་མོས་བཞག་པའི་དམ་བཅའ་དང་སྡོམ་པ་ལེན་པའི་ཚིག་ཐམས་ཅད་བསྲུང་དགོས་པ་ཡིན་ནོ། །
NUM 30:12 འོན་ཀྱང་ཁོ་མོའི་ཁྱོ་གས་དེ་རྣམས་ཐོས་པའི་ཉིན་དེར་དེ་གཉིས་ཀ་བསྲུང་མི་དགོས་པར་བྱས་ན། བུད་མེད་ཀྱི་ཁ་ནས་ཐོན་པའི་དམ་བཅའ་དང་སྡོམ་པ་ལེན་པའི་ཚིག་ཐམས་ཅད་བསྲུང་མི་དགོས། ཁོ་མོའི་ཁྱོ་གས་དེ་གཉིས་ཀ་བསྲུང་མི་དགོས་པར་བྱས་པ་དང་། དཀོན་མཆོག་ཡ་ཝཱེས་ཀྱང་ཁོ་མོར་དགོངས་ཡངས་མཛད་པར་འགྱུར་རོ། །
NUM 30:13 བུད་མེད་ཀྱིས་བཞག་པའི་དམ་བཅའ་དང་། རང་ཉིད་ཁྱད་གསོད་ཀྱིས་སྡོམ་པ་ལེན་པའི་མནའ་ཚིག་ཐམས་ཅད་ཁོ་མོའི་ཁྱོ་གས་ངེས་བརྟན་བྱས་ཆོག་ལ་བསྲུང་མི་དགོས་པར་བྱས་ཀྱང་ཆོག་གོ །
NUM 30:14 གལ་སྲིད་ཁོ་མོའི་ཁྱོ་གས་ཉིན་རྒྱུན་གང་ཡང་མ་སྨྲས་ན། དེ་ནི་ཁོ་མོས་བཞག་པའི་དམ་བཅའ་དང་སྡོམ་པ་ལེན་པའི་ཚིག་ཐམས་ཅད་ངེས་བརྟན་བྱས་པ་ཡིན། ཅི་ལ་ཞེ་ན། ཁྱོ་གས་དེ་རྣམས་ཐོས་པའི་ཉིན་ཁོ་མོར་གང་ཡང་མ་སྨྲས་པས་དེ་གཉིས་ཀ་བསྲུང་དགོས་པར་གྱུར་པའོ། །
NUM 30:15 འོན་ཀྱང་ཁྱོ་གས་དེ་རྣམས་ཐོས་ནས་ཡུན་རིང་འགོར་རྗེས་ད་གཟོད་བསྲུང་མི་དགོས་པར་བྱས་ན། ཁོས་ཆུང་མའི་ཉེས་པ་འཁུར་དགོས་ཞེས་གསུངས་པའོ། །
NUM 30:16 འདི་ནི་དཀོན་མཆོག་ཡ་ཝཱེས་མོ་ཤེ་ལ་བསྒོས་པའི་བཀའ་སྟེ། ཁྱོ་ག་དང་ཆུང་མའི་བར་དང་། ཕ་དང་ད་དུང་རང་གི་ཕ་གཞིས་སུ་སྡོད་པའི་ན་ཆུང་བུ་མོ་བར་གྱི་སྒྲིག་ཁྲིམས་ཡིན་ནོ། །
NUM 31:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 31:2 ཡེས་ར་ཨེལ་པ་རྣམས་ཀྱི་དོན་དུ་མིད༌ཡཱན་པ་རྣམས་ལ་དགྲ་ལན་སློགས་ཤིག དེའི་རྗེས་སུ་ཁྱོད་ནི་རང་གི་མེས་པོ་རྣམས་ཀྱི་དྲུང་དུ་འཛོམ་ངེས་ཡིན་ཞེས་གསུངས་སོ། །
NUM 31:3 མོ་ཤེ་ཡིས་མི་ཚོགས་ལ། ཁྱོད་རྣམས་ལས་ཁག་གཅིག་གིས་གོ་མཚོན་སྤྲས་ནས་འཐབ་མོར་ཞུགས་དགོས་པ་དང་། དཀོན་མཆོག་ཡ་ཝཱེའི་དོན་དུ་མིད་ཡཱན་པ་རྣམས་ལ་དགྲ་ལན་འཇལ་བའི་ཕྱིར་དེ་དག་ལ་རྒོལ་བར་བྱའོ། །
NUM 31:4 ཁྱོད་ཅག་གིས་ཡེས་ར་ཨེལ་གྱི་ཚོ་པ་ཐམས་ཅད་ཀྱི་ཚོ་པ་རེ་ནས་མི་ཆིག་སྟོང་རེ་གཡུལ་སར་ཐོངས་ཤིག་ཅེས་སྨྲས་སོ། །
NUM 31:5 དེ་ནས་ཡེས་ར་ཨེལ་པ་སྟོང་ཕྲག་མང་པོའི་ཁྲོད་ཚོ་པ་རེ་ནས་མི་ཆིག་སྟོང་རེ་བདམས་པ་དང་། བསྡོམས་པས་མི་ཆིག་ཁྲི་ཉིས་སྟོང་ཡོད་པ་ཐམས་ཅད་ཀྱིས་གོ་མཚོན་སྤྲས་ནས་འཐབ་མོར་ཞུགས།
NUM 31:6 མོ་ཤེ་ཡིས་ཚོ་པ་རེ་ནས་མི་ཆིག་སྟོང་རེ་དམག་ལ་བཏང་བ་དང་། མཆོད་དཔོན་ཨེ་ལི་ཨ་ཟར་གྱི་བུ་ཕི་ནེ་ཧེ་ཡང་དེ་དག་དང་མཉམ་དུ་མངགས་པ་སྟེ། ཕི་ནེ་ཧེའི་ལག་ཏུ་གནས་མཆོག་གི་སྣོད་ཆས་དང་བརྡ་རྒྱག་བྱེད་ཀྱི་དུང་རྣམས་ཐོགས་ནས་ཆས།
NUM 31:7 ཁོ་རྣམས་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་དུ་སོང་ནས་མིད་ཡཱན་པ་རྣམས་ལ་དམག་འཁྲུག་བརྒྱབ་པ་དང་། སྐྱེས་པ་ཐམས་ཅད་བསད།
NUM 31:8 དེ་དག་གི་ཁར་ད་དུང་ཨེ་ཝི་དང་། རེ་ཀེམ་དང་། ཙུར་དང་། ཧུར་དང་། རེ་པ་བཅས་མིད་ཡཱན་པའི་རྒྱལ་པོ་ལྔ་ཡང་བསད་ཅིང་། པེ་ཨོར་གྱི་བུ་པེལ་ཨམ་ཡང་རལ་གྲིས་བསད་དོ། །
NUM 31:9 ཡེས་ར་ཨེལ་པ་རྣམས་ཀྱིས་མིད་ཡཱན་པའི་བུད་མེད་དང་བྱིས་པ་རྣམས་བདག་གིར་བཟུང་བ་དང་། ཡང་དེ་དག་གི་སྒོ་ཕྱུགས་དང་། ལུག་ཁྱུ་དང་། རྒྱུ་ནོར་བཅས་ཐམས་ཅད་ཕྲོགས་ནས་ཁྱེར་བར་མ་ཟད།
NUM 31:10 དེ་དག་གནས་པའི་གྲོང་ཁྱེར་དང་སྒར་རྣམས་མེ་ཡིས་བསྲེགས་པ་དང་།
NUM 31:11 ཁོ་ཚོས་འཕྲོག་བཅོམ་བྱས་ནས་ཐོན་པའི་མི་དང་སྒོ་ཕྱུགས་ཐམས་ཅད་ཁྱེར་ནས་སོང་།
NUM 31:12 ཁོ་ཚོས་བཙོན་པ་རྣམས་དང་འཕྲོག་བཅོམ་བྱས་པའི་དངོས་པོ་ཐམས་ཅད་ཡོར་དན་གཙང་པོའི་འགྲམ་དང་ཡེ་རུ་ཀོ་ཡི་ཁ་གཏད་དེ། མོ་ཨབ་སྤང་ལྗོངས་སུ་ཡོད་པའི་སྒར་ཁ་དེར་ཁྱེར་ཡོང་ནས། མོ་ཤེ་དང་མཆོད་དཔོན་ཨེ་ལི་ཨ་ཟར་དང་། ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་སྤྲད་དོ། །
NUM 31:13 མོ་ཤེ་དང་མཆོད་དཔོན་ཨེ་ལི་ཨ་ཟར་དང་མི་ཚོགས་ཀྱི་འགོ་དཔོན་རྣམས་སྒར་ཁའི་ཕྱི་རོལ་ཏུ་ཕེབས་ཏེ་ཁོ་ཚོར་བསུ་བ་བྱས།
NUM 31:14 མོ་ཤེ་ནི་གཡུལ་ས་ནས་ཕྱིར་ཐོན་པའི་དམག་དཔོན་ཏེ་སྟོང་དཔོན་དང་བརྒྱ་དཔོན་རྣམས་ལ་ཁྲོས་པར་གྱུར།
NUM 31:15 མོ་ཤེ་ཡིས་ཁོ་རྣམས་ལ་འདི་ལྟར། ཁྱོད་ཅག་གིས་བུད་མེད་འདི་རྣམས་གསོན་པོར་བསྐྱུར་པ་ཡིན་ནམ།
NUM 31:16 ལྟོས་དང་། བུད་མེད་འདི་དག་གིས་པེལ་ཨམ་གྱི་ཇུས་ངན་ལ་བསྟུན་ནས་ཡེས་ར་ཨེལ་པ་རྣམས་ཕེ་ཨོར་གྱི་དོན་རྐྱེན་ཐད་དཀོན་མཆོག་ཡ་ཝཱེ་ལ་འགལ་བར་བྱས་པས། དཀོན་མཆོག་ཡ་ཝཱེའི་མི་ཚོགས་ཀྱི་ཁྲོད་དུ་གཉན་ནད་བྱུང་བ་ཡིན།
NUM 31:17 ད་ལྟ་ཁྱོད་ཅག་གིས་བུ་ཆུང་ཐམས་ཅད་གསོད་དགོས་ལ། སྐྱེས་པ་དང་འགྲོགས་མྱོང་བའི་བུད་མེད་ཐམས་ཅད་ཀྱང་སོད་ཅིག
NUM 31:18 འོན་ཀྱང་། སྐྱེས་པ་དང་མ་འགྲོགས་པའི་གཞོན་ནུ་མ་ཐམས་ཅད་རང་ཉིད་ཀྱི་ཕྱིར་དུ་གསོན་པོར་བསྐྱུར་དགོས་པ་ཡིན།
NUM 31:19 ཁྱོད་ཅག་སྒར་གྱི་ཕྱི་རོལ་ཏུ་ཉིན་བདུན་ལ་སྡོད་དང་། མི་བསད་པའམ་ཤི་བོའི་བེམ་པོར་རེག་པ་སུ་ཡིན་ཡང་། དེས་ཉིན་གསུམ་པ་དང་ཉིན་བདུན་པར་རང་ཉིད་གཙང་མར་བྱེད་དགོས་ལ། ཁྱོད་ཅག་དང་བཙོན་པ་རྣམས་ཀྱིས་ཀྱང་དེ་ལྟར་བྱེད་དགོས།
NUM 31:20 ཁྱོད་ཅག་གིས་གྱོན་གོས་དང་། ཀོ་བས་བཟོས་པ་དང་། ར་རྩིད་ཀྱིས་བཏགས་པ་དང་། ཤིང་གིས་བཟོས་པ་བཅས་ཐམས་ཅད་གཙང་མར་བཟོ་དགོས་ཞེས་གསུངས་སོ། །
NUM 31:21 མཆོད་དཔོན་ཨེ་ལི་ཨ་ཟར་གྱིས་གཡུལ་ནས་ཕྱིར་ལོག་པའི་དམག་མི་རྣམས་ལ་འདི་ལྟར། འདི་ནི་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་ཁྲིམས་ཀྱི་སྒྲིག་སྲོལ་ཡིན་ཏེ།
NUM 31:22 གསེར་དང་། དངུལ་དང་། ལི་དང་། ལྕགས་དང་། ཀྲིན་དང་། ཞ་ཉེ་བཅས་དང་།
NUM 31:23 གཞན་ཡང་མེ་ཡིས་མི་འཚིག་པ་ཐམས་ཅད་ཁྱོད་ཅག་གིས་མེའི་ནང་དུ་འཇུག་ཅིང་གཙང་མར་འགྱུར། ཡིན་ནའང་ད་དུང་སྦག་བཙོག་སེལ་བྱེད་ཀྱི་ཆུ་ཡིས་དེ་རྣམས་གཙང་མར་བཟོ་དགོས། མེ་ཡིས་འཚིག་ནུས་པ་རྣམས་ཁྱོད་ཅག་གིས་ཆུ་ལ་འཇུག་པར་བྱའོ། །
NUM 31:24 ཡང་ཉིན་བདུན་པར་ཁྱོད་ཅག་གིས་རང་གི་གོས་རྣམས་བཀྲུས་ནས་གཙང་མར་འགྱུར་བས། དེའི་རྗེས་སུ་སྒར་ལ་འོང་ཆོག་ཅེས་སྨྲས་སོ། །
NUM 31:25 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 31:26 ཁྱོད་དང་མཆོད་དཔོན་ཨེ་ལི་ཨ་ཟར་དང་། མི་ཚོགས་ཀྱི་ཚོ་དཔོན་རེ་རེ་བཅས་ཀྱིས་ཕྲོགས་འོངས་པའི་མི་དང་སྒོ་ཕྱུགས་རྣམས་ཀྱི་བསྡོམས་གྲངས་རྩིས་ལོངས་ཤིག
NUM 31:27 ཁྱོད་ཀྱིས་འཕྲོག་བཅོམ་བྱས་ནས་ཐོབ་པ་རྣམས་ཁག་གཉིས་སུ་བགོས་ལ། ཕྱེད་ཀ་གཡུལ་འཐབ་ལ་ཞུགས་པའི་དམག་མི་རྣམས་དང་། ཕྱེད་ཀ་མི་ཚོགས་ཡོངས་ལ་སྤྲོད་ཅིག
NUM 31:28 ཡང་ཁྱོད་ཀྱིས་དམག་འཐབ་ལ་སོང་བའི་དམག་མི་རྣམས་ནས་ཐོབ་པ་ནི་མི་དང་། བ་གླང་དང་། བོང་བུ་དང་། ཡང་ན་ར་ལུག་གི་ཁྱུ་བཅས་གང་ཡིན་ཡང་དེ་རྣམས་ལས་ལྔ་བརྒྱའི་ཆ་གཅིག་དཀོན་མཆོག་ཡ་ཝཱེ་ལ་ཁྲལ་རྟེན་དུ་འབུལ་དགོས།
NUM 31:29 ཁྱོད་ཅག་གིས་དེ་དག་གི་ཕྱེད་ཀ་ལས་བླངས་ཏེ་མཆོད་དཔོན་ཨེ་ལི་ཨ་ཟར་ལ་སྤྲད་ནས་དཀོན་མཆོག་ཡ་ཝཱེ་ལ་འདེགས་མཆོད་དུ་འབུལ་དགོས།
NUM 31:30 ཡང་ཡེས་ར་ཨེལ་པ་རྣམས་ཀྱི་ཕྱེད་ཀ་ལས་མི་དང་། བ་གླང་དང་། བོང་བུ་དང་། ར་ལུག་གི་ཁྱུ་དང་། ཡང་ན་སྒོ་ཕྱུགས་སྣ་ཚོགས་བཅས་གང་ཡིན་ཡང་དེ་རྣམས་ལས་ལྔ་བཅུའི་ཆ་གཅིག་བླངས་ཏེ་དཀོན་མཆོག་ཡ་ཝཱེའི་གུར་མཆོག་སྲུང་མཁན་ལེ་ཝི་པ་རྣམས་ལ་སྤྲོད་དགོས་ཞེས་གསུངས་སོ། །
NUM 31:31 དེ་ནས་མོ་ཤེ་དང་མཆོད་དཔོན་ཨེ་ལི་ཨ་ཟར་གཉིས་ཀྱིས་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་བཞིན་དུ་བསྒྲུབས་སོ། །
NUM 31:32 འཕྲོག་ནོར་ཏེ་དམག་མི་རྣམས་ཀྱིས་འཕྲོག་བཅོམ་བྱས་ནས་ཐོབ་པ་ནི་ར་ལུག་དྲུག་འབུམ་བདུན་ཁྲི་ལྔ་སྟོང་དང་།
NUM 31:33 བ་གླང་བདུན་ཁྲི་ཉིས་སྟོང་དང་།
NUM 31:34 བོང་བུ་དྲུག་ཁྲི་ཆིག་སྟོང་དང་།
NUM 31:35 སྐྱེས་པ་དང་ལུས་འབྲེལ་བྱས་མྱོང་མེད་པའི་བུད་མེད་སུམ་ཁྲི་ཉིས་སྟོང་བཅས་སོ། །
NUM 31:36 ཡང་དམག་འཁྲུག་ལ་ཞུགས་པ་རྣམས་ཀྱི་བགོ་སྐལ་ཏེ། ཁོ་རྣམས་ཀྱི་བགོ་སྐལ་ཕྱེད་ཀ་ལས་ར་ལུག་སུམ་འབུམ་སུམ་ཁྲི་བདུན་སྟོང་ལྔ་བརྒྱ་ཡོད་པ་དང་།
NUM 31:37 ར་ལུག་གི་ཁྱུ་དེ་རྣམས་ལས་དྲུག་བརྒྱ་དང་བདུན་ཅུ་དོན་ལྔ་དཀོན་མཆོག་ཡ་ཝཱེ་ལ་ཁྲལ་རྟེན་དུ་ཕུལ།
NUM 31:38 བ་གླང་སུམ་ཁྲི་དྲུག་སྟོང་ཡོད་པ་ལས་བདུན་ཅུ་དོན་གཉིས་དཀོན་མཆོག་ཡ་ཝཱེ་ལ་ཁྲལ་རྟེན་དུ་ཕུལ།
NUM 31:39 བོང་བུ་སུམ་ཁྲི་ལྔ་བརྒྱ་ཡོད་པ་ལས་དྲུག་ཅུ་རེ་གཅིག་དཀོན་མཆོག་ཡ་ཝཱེ་ལ་ཁྲལ་རྟེན་དུ་ཕུལ།
NUM 31:40 མི་ཆིག་ཁྲི་དྲུག་སྟོང་ཡོད་པ་ལས་སུམ་ཅུ་སོ་གཉིས་དཀོན་མཆོག་ཡ་ཝཱེ་ལ་ཁྲལ་རྟེན་དུ་ཕུལ་ཏོ། །
NUM 31:41 མོ་ཤེ་ཡིས་དཀོན་མཆོག་ཡ་ཝཱེས་རང་ཉིད་ལ་གནང་བའི་བཀའ་བཞིན་དུ། དཀོན་མཆོག་ཡ་ཝཱེ་ལ་ཁྲལ་རྟེན་དུ་ཕུལ་བའི་འདེགས་མཆོད་ནི་མཆོད་དཔོན་ཨེ་ལི་ཨ་ཟར་ལ་སྤྲད་དོ། །
NUM 31:42 ཡེས་ར་ཨེལ་པ་རྣམས་ལ་ཐོབ་པའི་བགོ་སྐལ་ཕྱེད་ཀ་སྟེ། མོ་ཤེ་ཡིས་དམག་འཁྲུག་ལ་ཆས་པ་རྣམས་ལས་ཁོ་རྣམས་ལ་བགོས་པ་ནི།
NUM 31:43 མི་ཚོགས་ལ་དབང་བའི་ཕྱེད་ཀ་ལས་ར་ལུག་སུམ་འབུམ་སུམ་ཁྲི་བདུན་སྟོང་ལྔ་བརྒྱ་དང་།
NUM 31:44 བ་གླང་སུམ་ཁྲི་དྲུག་སྟོང་དང་།
NUM 31:45 བོང་བུ་སུམ་ཁྲི་ལྔ་བརྒྱ་དང་།
NUM 31:46 མི་ཆིག་ཁྲི་དྲུག་སྟོང་བཅས་ཡོད།
NUM 31:47 མོ་ཤེ་ཡིས་དཀོན་མཆོག་ཡ་ཝཱེས་རང་ཉིད་ལ་གནང་བའི་བཀའ་བཞིན་དུ། ཡེས་ར་ཨེལ་པ་རྣམས་ལ་དབང་བའི་ཕྱེད་ཀ་ལས། མི་དང་སྒོ་ཕྱུགས་གང་ཡིན་ཡང་དེའི་ལྔ་བཅུའི་ཆ་གཅིག་བླངས་ཏེ། དཀོན་མཆོག་ཡ་ཝཱེའི་གུར་མཆོག་སྲུང་མཁན་ལེ་ཝི་པ་རྣམས་ལ་སྤྲད་དོ། །
NUM 31:48 དམག་དཔུང་རྣམས་ཀྱི་དམག་དཔོན་ཏེ། སྟོང་དཔོན་དང་བརྒྱ་དཔོན་བཅས་པ་མོ་ཤེའི་མདུན་དུ་འོངས་ནས།
NUM 31:49 མོ་ཤེ་ལ་ན་རེ། ཁྱེད་ཀྱི་ཞབས་ཕྱི་ཡིས་ངེད་ཅག་གི་ལག་འོག་ཏུ་ཡོད་པའི་དམག་མི་རྣམས་ཀྱི་གྲངས་ཀ་བླངས་པ་དང་། མི་གཅིག་ཀྱང་མ་ཚང་བ་མེད་དོ། །
NUM 31:50 ད་ལྟ་ངེད་ཅག་གིས་མི་རེ་རེས་རྙེད་པའི་གསེར་གྱི་ཅ་ལག་དང་། དཔུང་རྒྱན། ལག་གདུབ། མཛུབ་དཀྲིས་ཐམ་ག་ཅན། རྣ་རྒྱན། སྐེ་རྒྱན་བཅས་ཐམས་ཅད་དཀོན་མཆོག་ཡ་ཝཱེ་ལ་ཕྱག་རྟེན་དུ་འབུལ་བར་ཁྱེར་ནས་ཐོན་ཡོད་དེ། དཀོན་མཆོག་ཡ་ཝཱེའི་དྲུང་དུ་ངེད་ཅག་རང་རང་གི་སྡིག་པ་བཤག་པའི་ཕྱིར་དུའོ་ཞེས་ཞུས་སོ། །
NUM 31:51 དེ་ནས་མོ་ཤེ་དང་མཆོད་དཔོན་ཨེ་ལི་ཨ་ཟར་གཉིས་ཀྱིས་ཁོ་རྣམས་ཀྱི་གསེར་ཏེ་གསེར་གྱིས་བཟོས་པའི་ཅ་ལག་ཐམས་ཅད་བླངས་སོ། །
NUM 31:52 སྟོང་དཔོན་དང་བརྒྱ་དཔོན་རྣམས་ཀྱིས་དཀོན་མཆོག་ཡ་ཝཱེ་ལ་འདེགས་མཆོད་དུ་ཕུལ་བའི་གསེར་ནི་བསྡོམས་པས་སྲང་ཆིག་ཁྲི་དྲུག་སྟོང་བདུན་བརྒྱ་ལྔ་བཅུ་ཡིན།
NUM 31:53 དམག་མི་རྣམས་ཀྱིས་རང་རང་གི་ཕྱིར་དུ་བཅོམ་ནོར་བླངས་པའོ། །
NUM 31:54 ཡང་མོ་ཤེ་དང་མཆོད་དཔོན་ཨེ་ལི་ཨ་ཟར་གཉིས་ཀྱིས་སྟོང་དཔོན་དང་བརྒྱ་དཔོན་རྣམས་ལས་གསེར་བླངས་ཏེ་མཇལ་འཕྲད་གུར་མཆོག་གི་ནང་དུ་ཁྱེར་ནས། དཀོན་མཆོག་ཡ་ཝཱེའི་དྲུང་དུ་ཡེས་ར་ཨེལ་པ་རྣམས་ཀྱི་དྲན་རྟེན་དུ་ཕུལ་ཏོ། །
NUM 32:1 དེ་ཡང་གཱ་རྡུའི་བུ་རྒྱུད་དང་རུ་བེན་གྱི་བུ་རྒྱུད་རྣམས་ལ་ཕྱུགས་ཁྱུ་ཤིན་ཏུ་མང་པོ་ཡོད་ཅིང་། དེ་དག་གིས་ཡཱ་ཟེར་ཡུལ་དང་གིལ་ཨད་ཡུལ་ནི་ཕྱུགས་འཚོ་ས་ཡག་པོ་ཡིན་པ་མཐོང་ནས།
NUM 32:2 ཁོ་རྣམས་ཡོང་སྟེ་མོ་ཤེ་དང་མཆོད་དཔོན་ཨེ་ལི་ཨ་ཟར་དང་། མི་ཚོགས་ཀྱི་འགོ་དཔོན་རྣམས་ལ་འདི་ལྟར།
NUM 32:3 ཨ་ཏ་རོད་དང་། དི་བོན། ཡཱ་ཟེར། ནིམ་རཱ། ཧེ་སི་པོན། ཨེལ་ཨ་ལེ། སེ་བམ། ནེ་བོ། པེ་ཨོན་བཅས་པ་སྟེ།
NUM 32:4 དཀོན་མཆོག་ཡ་ཝཱེས་ཡེས་ར་ཨེལ་པའི་མི་ཚོགས་ཀྱི་མདུན་ནས་དབང་དུ་བསྡུས་པའི་ཡུལ་དེ་ནི་ཕྱུགས་འཚོ་ས་ཡག་པོ་ཡིན་ལ། ཁྱེད་ཀྱི་ཞབས་ཕྱི་རྣམས་ལ་སྒོ་ཕྱུགས་ཡོད་པ་ཡིན་ཞེས་དང་།
NUM 32:5 ཡང་ཁོ་རྣམས་ན་རེ། གལ་སྲིད་ངེད་རྣམས་ལ་ཁྱེད་ཀྱི་སྤྱན་སྔར་ཐུགས་རྗེ་ཐོབ་ན། ངེད་རྣམས་ཡོར་དན་གཙང་པོའི་ཕ་རོལ་ཏུ་མི་མངགས་པར། ཡུལ་འདི་ཁྱེད་ཀྱི་ཞབས་ཕྱི་ངེད་རྣམས་ལ་བགོ་སྐལ་དུ་གནང་བར་མཛོད་ཅིག་ཅེས་ཞུས་སོ། །
NUM 32:6 མོ་ཤེ་ཡིས་གཱ་རྡུའི་བུ་རྒྱུད་དང་རུ་བེན་གྱི་བུ་རྒྱུད་རྣམས་ལ་འདི་ལྟར། ཁྱོད་ཅག་གི་སྤུན་ཟླ་རྣམས་དམག་འཁྲུག་ལ་འགྲོ་སྐབས། ཁྱོད་ཅག་འདི་རུ་འདུག་པར་བྱའམ།
NUM 32:7 ཁྱོད་རྣམས་ཀྱིས་ཡེས་ར་ཨེལ་པ་རྣམས་ཀྱི་སེམས་ཕམ་པར་བཅུག་ནས། དཀོན་མཆོག་ཡ་ཝཱེས་ཁོ་རྣམས་ལ་གནང་བའི་ཡུལ་དེར་ཕར་མི་འགྲོ་བར་བྱེད་དོན་ཅི་ཡིན་ནམ།
NUM 32:8 སྔར་ངས་ཀཱ་དེའེ་ཤཱ་པར་ནེ་ཨ་ནས་ཁྱོད་ཅག་གི་ཕ་མེས་རྣམས་ཡུལ་དེར་ལྐོག་ལྟ་བྱེད་དུ་མངགས་པའི་ཚེ། ཁོ་རྣམས་ཀྱིས་ཀྱང་འདི་ལྟར་བྱས་ཏེ།
NUM 32:9 ཁོ་རྣམས་ཡར་ཨེ་ཤཱ་ཀོལ་ལུང་པ་རུ་སོང་ཞིང་ཡུལ་དེ་མཐོང་བ་ན། ཡེས་ར་ཨེལ་པ་རྣམས་ཀྱི་སེམས་ཕམ་པར་བཅུག་ནས་དཀོན་མཆོག་ཡ་ཝཱེས་ཁོ་རྣམས་ལ་གནང་བའི་ཡུལ་དེར་མི་འགྲོ་བར་བྱས།
NUM 32:10 ཉིན་མོ་དེར་དཀོན་མཆོག་ཡ་ཝཱེས་ཐུགས་རབ་ཏུ་ཁྲོས་ནས་མནའ་བཞེས་ཏེ་འདི་སྐད་དུ།
NUM 32:11 ཨེ་ཅིབ་ཡུལ་ནས་ཐོན་པའི་མི་ལོ་ཉི་ཤུ་ཅན་དང་དེའི་ཡན་ཟིན་པ་རྣམས་ལས་སུས་ཀྱང་ངས་ཨབ་ར་ཧམ་དང་། ཨི་སཱག་དང་། ཡ་ཀོབ་བཅས་ལ་མནའ་བསྐྱལ་ནས་ཁས་བླངས་པའི་ཡུལ་དེ་མཐོང་བར་མི་འགྱུར། ཅི་ལ་ཞེ་ན་དེ་དག་བློ་གཅིག་སེམས་གཅིག་གིས་ངའི་རྗེས་སུ་མ་འབྲངས་པས་སོ། །
NUM 32:12 ཀེ་ནི་ཟི་པ་ཡེ་ཕུན་ནེའི་བུ་ཀཱ་ལེབ་དང་། ནུན་གྱི་བུ་ཡོ་ཤུ་ཨ་གཉིས་འབའ་ཞིག་གིས་ཡུལ་དེ་མཐོང་བར་འགྱུར་ཏེ། ཁོ་གཉིས་ཀ་བློ་གཅིག་སེམས་གཅིག་གིས་དཀོན་མཆོག་ཡ་ཝཱེའི་རྗེས་སུ་འབྲངས་པས་སོ་ཞེས་གསུངས་པའོ། །
NUM 32:13 ཡང་དཀོན་མཆོག་ཡ་ཝཱེ་ཁོང་ཉིད་ཡེས་ར་ཨེལ་པའི་སྟེང་ཐུགས་རབ་ཏུ་ཁྲོས་ཤིང་། དཀོན་མཆོག་ཡ་ཝཱེའི་སྤྱན་སྔར་ངན་པ་བྱས་པའི་མི་རབས་དེ་ཡོངས་སུ་མེད་པར་འགྱུར་བའི་བར་དུ། ཁོ་རྣམས་དབེན་སྟོང་དུ་ལོ་བཞི་བཅུའི་རིང་འཁྱམ་པར་མཛད་དོ། །
NUM 32:14 ཀྱེ་ཧོ། ཁྱོད་སྡིག་ཅན་གྱི་བུ་རྒྱུད་རྣམས་ཀྱང་ཡོང་ནས་ཁྱོད་ཅག་གི་ཕ་མེས་རྣམས་ཀྱི་ཤུལ་འཛིན་ཞིང་། དཀོན་མཆོག་ཡ་ཝཱེ་ཁོང་ཉིད་ཡེས་ར་ཨེལ་ལ་དེ་ལས་ལྷག་པར་ཐུགས་ཁྲོ་བར་བྱེད་དོ། །
NUM 32:15 གལ་སྲིད་ཁྱོད་རྣམས་ཕར་འཁོར་ནས་ཁོང་གི་རྗེས་སུ་མི་འབྲང་ན། ཁོང་གིས་ཡེས་ར་ཨེལ་པ་རྣམས་ཡང་བསྐྱར་དབེན་སྟོང་དུ་ལུས་པར་མཛད་ཅིང་། ཁྱོད་ཅག་གིས་མི་ཐམས་ཅད་འཇིག་པར་བྱའོ་ཞེས་གསུངས་སོ། །
NUM 32:16 དེ་ནས་ཚོ་པ་གཉིས་ཀའི་མི་རྣམས་མོ་ཤེའི་རྩར་ཡོང་སྟེ་འདི་ལྟར། ངེད་ཅག་གིས་རང་གི་སྒོ་ཕྱུགས་རྣམས་ལ་འདི་ནས་ལུག་ར་བརྩིག་པ་དང་ངེད་ཅག་གི་བུ་ཕྲུག་རྣམས་ལ་མཁར་བཟོ་བར་བྱའོ། །
NUM 32:17 འོན་ཀྱང་ཡེས་ར་ཨེལ་པ་རྣམས་ཁྲིད་ནས་ཁོ་ཚོའི་ཡུལ་དུ་སླེབས་པའི་བར་དུ། ངེད་ཅག་གིས་གོ་མཚོན་སྤྲས་ནས་ཡེས་ར་ཨེལ་པ་རྣམས་ཀྱི་སྔོན་དུ་འགྲོ་བར་གྲ་སྒྲིག་ཚགས་སུ་ཚུད་ཡོད། ཡུལ་འདིའི་ཡུལ་མི་རྣམས་ཀྱི་རྐྱེན་གྱིས་ངེད་ཅག་གི་བུ་ཕྲུག་རྣམས་ལྕགས་རིས་བསྐོར་ཡོད་པའི་མཁར་རྣམས་སུ་གནས་དགོས་པ་ཡིན།
NUM 32:18 ཡེས་ར་ཨེལ་པ་རེ་རེ་ལ་ས་སྐལ་ཐོབ་པའི་བར་དུ། ངེད་ཅག་རང་གི་ཁྱིམ་དུ་ཕྱིར་ལོག་པ་དཔེ་མི་སྲིད།
NUM 32:19 ངེད་ཅག་གི་ས་སྐལ་ནི་ཡོར་དན་གཙང་པོའི་ཤར་ཕྱོགས་སུ་ཡོད་པའི་རྐྱེན་གྱིས། ངེད་ཅག་གིས་དེ་དག་དང་ལྷན་དུ་ཡོར་དན་གཙང་པོའི་ནུབ་ཕྱོགས་སུ་ས་སྐལ་ལེན་པར་མི་བྱའོ་ཞེས་ཞུས་སོ། །
NUM 32:20 དེ་ནས་མོ་ཤེ་ན་རེ། ཁྱོད་ཅག་གིས་དེ་ལྟར་བསྒྲུབས་ནས་དཀོན་མཆོག་ཡ་ཝཱེའི་དྲུང་དུ་དམག་ལ་འགྲོ་ཕྱིར་གོ་མཚོན་སྤྲས་ན།
NUM 32:21 དཀོན་མཆོག་ཡ་ཝཱེས་ཁོང་གི་དགྲ་རྣམས་རང་ཉིད་ཀྱི་དྲུང་ནས་སྐྲོད་པའི་བར་དུ། ཁྱོད་ཅག་གོ་མཚོན་སྤྲས་པ་ཐམས་ཅད་དཀོན་མཆོག་ཡ་ཝཱེའི་དྲུང་དུ་ཡོར་དན་གཙང་པོ་བརྒལ་དགོས་པ་ཡིན།
NUM 32:22 དཀོན་མཆོག་ཡ་ཝཱེའི་སྤྱན་སྔར་ཡུལ་དེ་དབང་དུ་བསྡུས་པའི་རྗེས་སུ་ཁྱོད་ཅག་ད་གཟོད་ཕྱིར་ལོག་པར་བྱ་སྟེ། དེ་ནས་ཁྱོད་ཅག་གིས་དཀོན་མཆོག་ཡ་ཝཱེ་དང་ཡེས་ར་ཨེལ་པའི་དྲུང་དུ་ལས་འགན་བསྒྲུབས་པ་ཡིན་ལ། ཡུལ་འདི་ཡང་དཀོན་མཆོག་ཡ་ཝཱེའི་སྤྱན་སྔར་ཁྱོད་ཅག་ལ་དབང་བ་ཡིན་ནོ། །
NUM 32:23 འོན་ཀྱང་དེ་བཞིན་དུ་མི་བྱེད་ན། ལྟོས་དང་། ཁྱོད་ཚོས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱེད་པར་འགྱུར་ཞིང་། ཁྱོད་ཅག་གི་སྡིག་པས་ཁྱོད་ཅག་འཛིན་པར་འགྱུར་བ་ཤེས་པར་གྱིས་ཤིག
NUM 32:24 ད་ནི་ཁྱོད་ཅག་གིས་རང་གི་ཁ་ནས་གང་བརྗོད་པ་དེ་བཞིན་སྒྲུབས་ཤིག ཁྱོད་ཅག་གི་བུ་ཕྲུག་རྣམས་ལ་མཁར་རྩིགས་ལ། ཁྱོད་ཅག་གི་ལུག་ཁྱུ་ལ་ལུག་ར་བཟོ་བར་གྱིས་ཤིག་ཅེས་གསུངས་སོ། །
NUM 32:25 གཱ་རྡུ་དང་རུ་བེན་གྱི་བུ་རྒྱུད་རྣམས་ཀྱིས་མོ་ཤེ་ལ། ཁྱེད་ཀྱི་ཞབས་ཕྱི་ངེད་རྣམས་ཀྱིས་བདག་པོས་གནང་བའི་བཀའ་བཞིན་བསྒྲུབ་པར་བྱའོ། །
NUM 32:26 ངེད་ཅག་གི་བུ་ཕྲུག་དང་ཆུང་མ་རྣམས་དང་། ལུག་ཁྱུ་དང་སྒོ་ཕྱུགས་བཅས་ནི་གིལ་ཨད་ཀྱི་གྲོང་ཁྱེར་རྣམས་སུ་གནས་དགོས།
NUM 32:27 འོན་ཀྱང་ཁྱེད་ཀྱི་ཞབས་ཕྱི་སྟེ་གོ་མཚོན་སྤྲས་ནས་དམག་འཁྲུག་ལ་ཞུགས་པར་ཆས་ཡོད་པ་རྣམས་ནི། ངའི་བདག་པོའི་བཀའ་བཞིན་དུ་དཀོན་མཆོག་ཡ་ཝཱེའི་དྲུང་ནས་ཕར་དམག་འཁྲུག་ལ་འགྲོ་བར་བྱའོ་ཞེས་ཞུས་སོ། །
NUM 32:28 དེ་ནས་མོ་ཤེ་ཡིས་ཁོ་རྣམས་ཀྱི་དོན་དུ། མཆོད་དཔོན་ཨེ་ལི་ཨ་ཟར་དང་། ནུན་གྱི་བུ་ཡོ་ཤུ་ཨ་དང་། ཡེས་ར་ཨེལ་པའི་ཚོ་པ་ཁག་གི་ཚོ་དཔོན་རྣམས་ལ་འདི་ལྟར།
NUM 32:29 གལ་སྲིད་གཱ་རྡུའི་བུ་རྒྱུད་དང་རུ་བེན་གྱི་བུ་རྒྱུད་རྣམས་གོ་མཚོན་སྤྲས་ནས། དཀོན་མཆོག་ཡ་ཝཱེའི་དྲུང་དུ་དམག་འཁྲུག་ལ་ཞུགས་པར་ཆས་ཡོད་པ་ཐམས་ཅད། ཁྱོད་རྣམས་དང་མཉམ་དུ་ཡོར་དན་གཙང་པོ་བརྒལ་ཞིང་། ཡུལ་དེ་ཁྱོད་ཅག་གི་མདུན་ནས་དབང་དུ་བསྡུས་པ་ཡིན་ན། ཁྱོད་ཅག་གིས་གིལ་ཨད་ཡུལ་ཁོ་རྣམས་ལ་ས་སྐལ་དུ་སྦྱིན་དགོས།
NUM 32:30 གལ་སྲིད་དེ་རྣམས་ཀྱིས་གོ་མཚོན་སྤྲས་ནས་ཁྱོད་ཅག་དང་མཉམ་དུ་ཕར་མི་འགྲོ་ན། དེ་རྣམས་ལ་ཀ་ན་ཨན་ཡུལ་དུ་ཁྱོད་ཅག་གི་ཁྲོད་ནས་བགོ་སྐལ་འཐོབ་པར་འགྱུར་ཞེས་གསུངས།
NUM 32:31 གཱ་རྡུའི་བུ་རྒྱུད་དང་རུ་བེན་གྱི་བུ་རྒྱུད་རྣམས་ཀྱིས་ལན་དུ། དཀོན་མཆོག་ཡ་ཝཱེས་ཁྱེད་ཀྱི་ཞབས་ཕྱི་རྣམས་ལ་ཅི་ལྟར་བསྒོས་པ་ཡིན་ན་ངེད་ཅག་གིས་དེ་བཞིན་བསྒྲུབ་པར་བྱའོ། །
NUM 32:32 ངེད་རྣམས་ཀྱིས་གོ་མཚོན་སྤྲས་ཏེ་དཀོན་མཆོག་ཡ་ཝཱེའི་དྲུང་ནས་ཕར་ཀ་ན་ཨན་ཡུལ་དུ་འགྲོ་བར་བྱ། འོན་ཀྱང་ཡོར་དན་གཙང་པོའི་ཚུ་རོལ་ནི་ངེད་ཅག་ལ་ས་སྐལ་དུ་གནང་དགོས་ཞེས་ཞུས།
NUM 32:33 དེ་ནས་མོ་ཤེ་ཡིས་ཨེ་མོར་པ་རྣམས་ཀྱི་རྒྱལ་པོ་སི་ཧོན་གྱི་རྒྱལ་ཁམས་དང་། པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་དང་དེའི་ཡུལ་རྣམས་དང་། མངའ་འོག་གི་གྲོང་ཁྱེར་རྣམས་དང་དེའི་མཐའ་འཁོར་གྱི་གྲོང་ཁྱེར་ཐམས་ཅད་གཱ་རྡུའི་བུ་རྒྱུད་དང་རུ་བེན་གྱི་བུ་རྒྱུད་རྣམས་དང་། ཡོ་སེབ་ཀྱི་བུ་མཱ་ན་ཤེ་བྱ་བའི་ཚོ་པ་ཕྱེད་ཀ་བཅས་ལ་བཏང་ངོ་། །
NUM 32:34 གཱ་རྡུའི་བུ་རྒྱུད་རྣམས་ཀྱིས་དི་བོན་དང་། ཨ་ཏ་རོད་དང་། ཨ་རོ་ཨེར་དང་།
NUM 32:35 ཨད་རོད་ཤོ་ཕན་དང་། ཡཱ་ཟེར་དང་། ཡོག་པེ་ཧ་དང་།
NUM 32:36 པེད་ནིམ་རཱ་དང་། པེད་ཧ་རན་བཅས་ལྕགས་རི་ཡོད་པའི་མཁར་དང་ལུག་ར་རྣམས་བརྩིགས་སོ། །
NUM 32:37 ཡང་རུ་བེན་གྱི་བུ་རྒྱུད་རྣམས་ཀྱིས་ཧེ་སི་པོན་དང་། ཨེལ་ཨ་ལེ་དང་། ཀིར་ཡ་ཐཱ་ཡེམ་དང་།
NUM 32:38 ནེ་བོ་དང་། པཱ་ཨལ་མེ་ཨོན་དང་། སིབ་མ་བཅས་བརྩིགས་ཤིང་། ཡང་ཁོ་ཚོས་བརྩིགས་པའི་མཁར་རྣམས་ལ་མིང་གཞན་རྣམས་བཏགས་སོ། །
NUM 32:39 མཱ་ན་ཤེ་ཡི་བུ་མཱ་ཀིར་གྱི་བུ་རྒྱུད་རྣམས་གིལ་ཨད་ཡུལ་དུ་སོང་ནས་དེ་བདག་གིར་བཟུང་བ་དང་། གནས་དེ་རུ་སྡོད་པའི་ཨེ་མོར་པ་རྣམས་བསྐྲད་པའོ། །
NUM 32:40 མོ་ཤེ་ཡིས་གིལ་ཨད་ནི་མཱ་ན་ཤེ་ཡི་བུ་མཱ་ཀིར་ལ་གནང་བ་དང་། མཱ་ཀིར་ཡུལ་དེ་རུ་བསྡད་དོ། །
NUM 32:41 མཱ་ན་ཤེའི་བུ་ཡཱ་ཨིར་སོང་ནས་ཨེ་མོར་པའི་གྲོང་སྡེ་རྣམས་བཟུང་ཞིང་དེ་དག་གི་མིང་ལ་ཧ་ཝོད་ཡཱ་ཨིར་ཞེས་བཏགས་སོ། །
NUM 32:42 ནོ་བ་སོང་ནས་ཀེ་ནད་དང་དེའི་གྲོང་སྡེ་རྣམས་བདག་གིར་བཟུང་ཞིང་། རང་གི་མིང་བཞིན་ཀེ་ནད་ལ་ནོ་བ་ཞེས་བཏགས་སོ། །
NUM 33:1 དེ་ཡང་ཡེས་ར་ཨེལ་པ་རྣམས་རང་གི་དཔུང་སྡེ་བཞིན་དུ། མོ་ཤེ་དང་ཨ་རོན་གཉིས་ཀྱི་ཕྱག་འོག་ནས། ཨེ་ཅིབ་ཡུལ་ནས་ཐོན་རྗེས་ཀྱི་བགྲོད་ལམ་ནི་འདི་ལྟར།
NUM 33:2 མོ་ཤེ་ཡིས་དཀོན་མཆོག་ཡ་ཝཱེའི་བཀའ་ལྟར་ཁོ་ཚོའི་འགྲུལ་སྐྱོད་བྱས་པའི་ལམ་ཐག་རེ་རེ་བཞིན་ཟིན་ཐོར་འགོད་པར་བརྩམས། ཁོ་ཚོའི་འགྲུལ་སྐྱོད་ཀྱི་ལམ་ཐག་རྣམས་ནི་འདི་ལྟ་སྟེ།
NUM 33:3 ཟླ་བ་དང་པོའི་ཚེས་བཅོ་ལྔ་པ་སྟེ་པེ་སག་དུས་ཆེན་གྱི་ཉིན་གཉིས་པར། ཡེས་ར་ཨེལ་པ་རྣམས་རཱ་ཨམ་སེའེ་ནས་ལམ་དུ་ཆས་ཤིང་། ཨེ་ཅིབ་པ་ཐམས་ཅད་ཀྱི་མཐོང་ལམ་ནས་དཔའ་སྟོབས་ཆེན་པོས་ཕྱི་རུ་བསྐྱོད་དོ། །
NUM 33:4 དེའི་དུས་སུ་ཨེ་ཅིབ་པ་རྣམས་ཀྱིས་རང་གི་སྐྱེས་འགོ་རྣམས་ཏེ། དཀོན་མཆོག་ཡ་ཝཱེས་ཁོ་རྣམས་ཀྱི་ཁྲོད་དུ་བསད་པ་རྣམས་དུར་ལ་འཇུག་པའི་སྒང་ཡིན་ལ། དཀོན་མཆོག་ཡ་ཝཱེས་དེ་དག་གི་ལྷ་རྣམས་ལ་ཡང་ཁྲིམས་ཆད་བཅད་དོ། །
NUM 33:5 ཡེས་ར་ཨེལ་པ་རྣམས་རཱ་ཨམ་སེའེ་ནས་ལམ་དུ་ཆས་པ་དང་སོའུ་ཀོད་དུ་སྒར་བཏབ།
NUM 33:6 སོའུ་ཀོད་ནས་ལམ་དུ་ཆས་པ་དང་། དབེན་སྟོང་གི་མཚམས་སུ་ཡོད་པའི་ཨེ་ཐཱམ་དུ་སྒར་བཏབ།
NUM 33:7 ཨེ་ཐཱམ་ནས་ལམ་དུ་ཆས་པ་དང་། པཱ་ཨལ་ཚཱ་ཕོན་གྱི་མདུན་དུ་ཡོད་པའི་ཕི་ཧཱ་ཧི་རོད་དུ་འཁོར་ཅིང་། མིག་དོལ་གྱི་ཁ་གཏད་དུ་སྒར་བཏབ།
NUM 33:8 དེ་ནས་ཕི་ཧཱ་ཧི་རོད་ནས་ལམ་དུ་ཆས་པ་དང་། རྒྱ་མཚོ་བརྒྱུད་དེ་དབེན་སྟོང་དུ་སླེབས་ཤིང་། ཨེ་ཐཱམ་དབེན་སྟོང་ནས་ཉིན་གསུམ་གྱི་ལམ་དུ་སོང་བ་དང་། མཱ་ར་ལ་སྒར་བཏབ།
NUM 33:9 མཱ་ར་ནས་ལམ་དུ་ཆས་པ་དང་ཨེ་ལིམ་དུ་སླེབས། ཨེ་ལིམ་དུ་ཆུ་མིག་བཅུ་གཉིས་དང་ཏ་ལའི་ཤིང་བདུན་ཅུ་ཡོད་པས་དེ་རུ་སྒར་བཏབ་བོ། །
NUM 33:10 ཨེ་ལིམ་ནས་ལམ་དུ་ཆས་པ་དང་རྒྱ་མཚོ་དམར་པོའི་འགྲམ་དུ་སྒར་བཏབ།
NUM 33:11 རྒྱ་མཚོ་དམར་པོ་ནས་ལམ་དུ་ཆས་པ་དང་སིན་བྱ་བའི་དབེན་སྟོང་དུ་སྒར་བཏབ།
NUM 33:12 སིན་བྱ་བའི་དབེན་སྟོང་ནས་ལམ་དུ་ཆས་པ་དང་དོབ་ཀཱ་རུ་སྒར་བཏབ།
NUM 33:13 དོབ་ཀཱ་ནས་ལམ་དུ་ཆས་པ་དང་ཨ་ལུས་ཤུ་ལ་སྒར་བཏབ།
NUM 33:14 ཨ་ལུས་ཤུ་ནས་ལམ་དུ་ཆས་པ་དང་རཱ་ཕི་དིམ་ལ་སྒར་བཏབ་ཅིང་། དེ་རུ་མི་ཚོགས་ལ་འཐུང་ཆུ་མེད་པའོ། །
NUM 33:15 རཱ་ཕི་དིམ་ནས་ལམ་དུ་ཆས་པ་དང་སི་ནཱ་ཡི་དབེན་སྟོང་དུ་སྒར་བཏབ།
NUM 33:16 སི་ནཱ་ཡི་དབེན་སྟོང་ནས་ལམ་དུ་ཆས་ཏེ་ཀིབ་རོད་ཧད་ཐཱ་ཨ་ཝ་ལ་སྒར་བཏབ་བོ། །
NUM 33:17 ཀིབ་རོད་ཧད་ཐཱ་ཨ་ཝ་ནས་ལམ་དུ་ཆས་པ་དང་ཧ་ཚི་རོད་དུ་སྒར་བཏབ།
NUM 33:18 ཧ་ཚི་རོད་ནས་ལམ་དུ་ཆས་པ་དང་རིད་མཱ་ལ་སྒར་བཏབ།
NUM 33:19 རིད་མཱ་ནས་ལམ་དུ་ཆས་པ་དང་རིམ་མོན་ཕེ་རེལ་ཟི་ལ་སྒར་བཏབ།
NUM 33:20 རིམ་མོན་ཕེ་རེལ་ཟི་ནས་ལམ་དུ་ཆས་པ་དང་ལིབ་ནཱ་རུ་སྒར་བཏབ།
NUM 33:21 ལིབ་ནཱ་ནས་ལམ་དུ་ཆས་པ་དང་རི་སཱ་ལ་སྒར་བཏབ།
NUM 33:22 རི་སཱ་ནས་ལམ་དུ་ཆས་པ་དང་ཀེ་ཧེ་ལཱ་ཐ་རུ་སྒར་བཏབ།
NUM 33:23 ཀེ་ཧེ་ལཱ་ཐ་ནས་ལམ་དུ་ཆས་པ་དང་ཤེ་ཕེར་རི་བོར་སྒར་བཏབ།
NUM 33:24 ཤེ་ཕེར་རི་བོ་ནས་ལམ་དུ་ཆས་པ་དང་ཧ་ར་དཱ་ལ་སྒར་བཏབ།
NUM 33:25 ཧ་ར་དཱ་ནས་ལམ་དུ་ཆས་པ་དང་མག་ཧེ་ལོད་དུ་སྒར་བཏབ།
NUM 33:26 མག་ཧེ་ལོད་ནས་ལམ་དུ་ཆས་པ་དང་ཐ་ཧད་དུ་སྒར་བཏབ།
NUM 33:27 ཐ་ཧད་ནས་ལམ་དུ་ཆས་པ་དང་ཐཱ་ར་ལ་སྒར་བཏབ།
NUM 33:28 ཐཱ་ར་ནས་ལམ་དུ་ཆས་པ་དང་མིད་ཀཱ་རུ་སྒར་བཏབ།
NUM 33:29 མིད་ཀཱ་ནས་ལམ་དུ་ཆས་པ་དང་ཧ་ཤུ་མོ་ནཱ་རུ་སྒར་བཏབ།
NUM 33:30 ཧ་ཤུ་མོ་ནཱ་ནས་ལམ་དུ་ཆས་པ་དང་མོ་སེ་རོད་དུ་སྒར་བཏབ།
NUM 33:31 མོ་སེ་རོད་ནས་ལམ་དུ་ཆས་པ་དང་པེ་ནེ་ཡཱ་ཨ་ཁན་ལ་སྒར་བཏབ།
NUM 33:32 པེ་ནེ་ཡཱ་ཨ་ཁན་ནས་ལམ་དུ་ཆས་པ་དང་ཧོར་ཧག་གིད་གད་དུ་སྒར་བཏབ།
NUM 33:33 ཧོར་ཧག་གིད་གད་ནས་ལམ་དུ་ཆས་པ་དང་ཡོད་པ་ཐཱ་རུ་སྒར་བཏབ།
NUM 33:34 ཡོད་པ་ཐཱ་ནས་ལམ་དུ་ཆས་པ་དང་ཨབ་རོ་ནཱ་རུ་སྒར་བཏབ།
NUM 33:35 ཨབ་རོ་ནཱ་ནས་ལམ་དུ་ཆས་པ་དང་ཨེ་ཙི་ཡོན་གེ་བེར་ལ་སྒར་བཏབ།
NUM 33:36 ཨེ་ཙི་ཡོན་གེ་བེར་ནས་ལམ་དུ་ཆས་པ་དང་ཟིན་གྱི་དབེན་སྟོང་དུ་སྒར་བཏབ་ཅིང་། དེ་ནི་ཀཱ་དེའེ་ཤཱ་ཡིན་ནོ། །
NUM 33:37 ཀཱ་དེའེ་ཤཱ་ནས་ལམ་དུ་ཆས་པ་དང་ཨེ་དོམ་ཡུལ་ས་མཚམས་ཀྱི་རི་བོ་ཧོར་བྱ་བ་ལ་སྒར་བཏབ་བོ། །
NUM 33:38 ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ལོ་བཞི་བཅུ་པ་དེའི་ཟླ་ལྔ་པའི་ཚེས་དང་པོ་ལ། མཆོད་དཔོན་ཨ་རོན་ནི་དཀོན་མཆོག་ཡ་ཝཱེའི་བཀའ་བཞིན་རི་བོ་ཧོར་ལ་འགོས་ནས་དེར་གྲོངས།
NUM 33:39 ཨ་རོན་རི་བོ་ཧོར་གྱི་སྟེང་དུ་གྲོངས་པའི་དུས་སུ་དགུང་ལོ་བརྒྱ་དང་ཉེར་གསུམ་ཡིན་ནོ། །
NUM 33:40 དེ་ནས་ཀ་ན་ཨན་གྱི་ནེ་གུབ་ཡུལ་དུ་གནས་པའི་རྒྱལ་པོ་ཨ་རད་བྱ་བ་དེས་ཡེས་ར་ཨེལ་པ་རྣམས་འོངས་པ་ཐོས་སོ། །
NUM 33:41 ཡེས་ར་ཨེལ་པ་རྣམས་རི་བོ་ཧོར་ནས་ལམ་དུ་ཆས་པ་དང་ཚལ་མོ་ནཱ་རུ་སྒར་བཏབ།
NUM 33:42 ཚལ་མོ་ནཱ་ནས་ལམ་དུ་ཆས་པ་དང་ཕུའུ་ནོན་དུ་སྒར་བཏབ།
NUM 33:43 ཕུའུ་ནོན་ནས་ལམ་དུ་ཆས་པ་དང་ཨོ་བོད་དུ་སྒར་བཏབ།
NUM 33:44 ཨོ་བོད་ནས་ལམ་དུ་ཆས་པ་དང་མོ་ཨབ་མཐའ་མཚམས་ཀྱི་ཨི་ཡེ་ཨ་བཱ་རིམ་དུ་སྒར་བཏབ།
NUM 33:45 ཨི་ཡིམ་ནས་ལམ་དུ་ཆས་པ་དང་དི་བོན་གཱ་རྡུ་ལ་སྒར་བཏབ།
NUM 33:46 དི་བོན་གཱ་རྡུ་ནས་ལམ་དུ་ཆས་པ་དང་ཨལ་མོན་དིབ་ལཱ་ཐ་ཡིམ་དུ་སྒར་བཏབ།
NUM 33:47 ཨལ་མོན་དིབ་ལཱ་ཐ་ཡིམ་ནས་ལམ་དུ་ཆས་པ་དང་ནེ་བོའི་མདུན་གྱི་ཨ་བཱ་རིམ་རི་བོར་སྒར་བཏབ།
NUM 33:48 ཨ་བཱ་རིམ་རི་བོ་ནས་ལམ་དུ་ཆས་པ་དང་ཡེ་རུ་ཀོའི་ཁ་གཏད་དེ་ཡོར་དན་གཙང་པོའི་འགྲམ་གྱི་མོ་ཨབ་སྤང་ལྗོངས་སུ་སྒར་བཏབ།
NUM 33:49 ཁོ་ཚོས་མོ་ཨབ་སྤང་ལྗོངས་སུ་ཡོར་དན་གཙང་པོའི་འགྲམ་བརྒྱུད་དེ་པེད་ཡེ་ཤི་མོད་ནས་ཨ་བེལ་ཤེ་ཏིམ་བར་དུ་སྒར་བཏབ་བོ། །
NUM 33:50 དེ་ནས་ཡེ་རུ་ཀོ་ཡི་ཁ་གཏད་དེ་ཡོར་དན་གཙང་པོའི་འགྲམ་གྱི་མོ་ཨབ་སྤང་ལྗོངས་སུ་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 33:51 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་ཤིག ཁྱོད་ཅག་ཡོར་དན་གཙང་པོ་བརྒལ་ནས་ཀ་ན་ཨན་ཡུལ་དུ་སླེབས་པའི་ཚེ།
NUM 33:52 ཡུལ་དེར་གནས་པའི་མི་ཐམས་ཅད་ཁྱོད་ཅག་གི་མདུན་ནས་བསྐྲད་དེ། དེ་དག་གི་བརྐོས་པའི་ལྷ་རྟེན་དང་བླུགས་སྐུ་རྣམས་མེད་པར་བྱེད་པ་དང་། དེ་དག་གི་མཐོ་གླིང་རྣམས་བཤིག་པར་གྱིས་ཤིག
NUM 33:53 བདག་གིས་ཡུལ་དེ་ཁྱོད་རྣམས་ལ་ས་སྐལ་དུ་སྤྲད་ཚར་བ་ཡིན་པས། ཁྱོད་ཚོས་ཡུལ་དེ་བདག་གིར་བཟུང་ནས་དེའི་ནང་དུ་གནས་པར་བྱོས།
NUM 33:54 ཁྱོད་ཅག་གིས་ཁྱིམ་རྒྱུད་བཞིན་དུ་རྒྱན་འཕངས་ནས་ཡུལ་དེ་ས་སྐལ་དུ་ལོངས་ཤིག མི་མང་པོ་ཅན་ལ་ས་སྐལ་མང་པོ་སྦྱིན་པ་དང་། མི་ཉུང་ཉུང་ཅན་ལ་ས་སྐལ་ཉུང་ཉུང་སྦྱིན་དགོས། རྒྱན་འཕངས་ནས་ཡུལ་དེ་སུ་ལ་ཐོབ་ན་སུ་ལ་དབང་བར་གྱིས། ཁྱོད་ཅག་གིས་ཕ་མེས་རྣམས་ཀྱི་ཚོ་པ་བཞིན་དུ་ས་སྐལ་ལེན་དགོས་སོ། །
NUM 33:55 འོན་ཀྱང་ཁྱོད་ཅག་གིས་ཡུལ་དེར་གནས་པ་རྣམས་ཁྱོད་ཅག་གི་མདུན་ནས་མི་སྐྲོད་ན། ཤུལ་དུ་བསྐྱུར་བ་རྣམས་ནི་ཁྱོད་ཅག་གི་མིག་ནང་གི་ཚེར་མ་དང་། ཁྱོད་ཅག་གི་རྩིབ་ལོགས་ཀྱི་ཚེར་ཤིང་ཡིན་ལ། ཁྱོད་ཅག་གནས་པའི་ཡུལ་དུ་ཁྱོད་རྣམས་ལ་གནོད་བསྐྱལ་བར་འགྱུར་རོ། །
NUM 33:56 བདག་གིས་དེ་དག་ལ་ཅི་ལྟར་བྱེད་པར་བསམས་པ་ཡིན་ན། ཁྱོད་རྣམས་ལའང་དེ་བཞིན་བྱེད་པར་འགྱུར་ཞེས་སྨྲ་དགོས་པར་གསུངས་སོ། །
NUM 34:1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 34:2 ཁྱོད་ཀྱིས་ཡེས་ར་ཨེལ་པ་རྣམས་ལ་བཀའ་གནང་ནས་འདི་ལྟར་སྨྲོས་ཤིག ཁྱོད་རྣམས་ཀ་ན་ཨན་ཡུལ་དུ་འཛུལ་བའི་ཚེ། ཁྱོད་རྣམས་ལ་ས་སྐལ་དུ་དབང་བའི་ཀ་ན་ཨན་ཡུལ་དང་དེའི་ས་མཚམས་རྣམས་ནི་འདི་ལྟ་སྟེ།
NUM 34:3 ཁྱོད་ཅག་གི་ལྷོ་ཡུལ་ཁག་ནི་ཟིན་གྱི་དབེན་སྟོང་ནས་ཨེ་དོམ་གྱི་ས་མཚམས་ལ་འབྲེལ་བ་དང་། ལྷོ་ཕྱོགས་ཀྱི་ས་མཚམས་ནི་ཚྭ་མཚོའི་ཤར་མཐའ་ནས་བརྩམས་ཏེ།
NUM 34:4 ཁྱོད་ཅག་གི་ས་མཚམས་ནི་ཨག་རབ་པིམ་གྱེན་ངོས་ཀྱི་ལྷོ་ཕྱོགས་སུ་འཁོར་ཞིང་ཟིན་བརྒལ་ནས། ཀཱ་དེའེ་ཤཱ་པར་ནེ་ཨ་ཡི་ལྷོ་ཕྱོགས་སུ་སླེབས་ཤིང་། ཧ་ཚར་ཨད་ཐར་གྱི་ལམ་བརྒྱུད་ནས་ཨ་ཚ་མོན་དུ་གཏུག་པའོ། །
NUM 34:5 ཁྱོད་ཅག་གི་ས་མཚམས་ནི་ཨ་ཚ་མོན་ནས་ཨེ་ཅིབ་ཆུ་བོ་ཡོད་སར་འཁོར་ཞིང་རྒྱ་མཚོ་ལ་ཐུག་པའོ། །
NUM 34:6 ནུབ་ཕྱོགས་ཀྱི་ས་མཚམས་ཐད། ཁྱོད་ཅག་ལ་རྒྱ་མཚོ་ཆེན་པོ་དང་མཚོ་འགྲམ་ཡོད་ལ། དེ་ནི་ཁྱོད་ཅག་གི་ནུབ་ཕྱོགས་ཀྱི་མཐའ་མཚམས་ཡིན་ནོ། །
NUM 34:7 ཁྱོད་ཅག་གི་བྱང་ཕྱོགས་ཀྱི་ས་མཚམས་ནི་འདི་ལྟ་སྟེ། རྒྱ་མཚོ་ཆེན་པོ་ནས་རི་བོ་ཧོར་བར་དུ་རྟགས་རྒྱོབ་ཅིག
NUM 34:8 རི་བོ་ཧོར་ནས་ལེ་པོ་ཧ་མཱད་བར་དུ་རྟགས་རྒྱོབ་དང་། དེའི་ས་མཚམས་ནི་ཚེ་དད་དུ་གཏུག་པར་བྱ།
NUM 34:9 ས་མཚམས་དེ་ནི་ཟིབ་རོན་ལ་བསྲིངས་ནས་ཧ་ཚར་ཨེ་ནན་དུ་སླེབས་པ་དང་། དེ་ནི་ཁྱོད་ཅག་གི་བྱང་ཕྱོགས་ཀྱི་ས་མཚམས་ཡིན་ནོ། །
NUM 34:10 ཁྱོད་ཅག་གི་ཤར་ཕྱོགས་ཀྱི་ས་མཚམས་ལ་ཧ་ཚར་ཨེ་ནན་ནས་ཤེ་ཕམ་བར་དུ་རྟགས་བརྒྱག་དགོས་པ་དང་།
NUM 34:11 དེའི་ས་མཚམས་ནི་ཤེ་ཕམ་ནས་མར་ཨ་ཡིན་གྱི་ཤར་ཕྱོགས་སུ་ཡོད་པའི་རིབ་ལཱ་རུ་བསླེབ་པ་དང་། དེའི་ས་མཚམས་ནི་ཀིན་ནེ་རོད་མཚོའི་ཤར་ཕྱོགས་སུ་གཏུག་པར་བྱ།
NUM 34:12 དེའི་ས་མཚམས་མར་ཡོར་དན་གཙང་པོར་སླེབས་ནས་ཚྭ་མཚོ་ལ་གཏུག་དགོས་པ་དང་། འདི་ནི་ཁྱོད་ཅག་གི་ཡུལ་དང་དེའི་མཐའ་འཁོར་གྱི་ས་མཚམས་རྣམས་ཡིན་ཞེས་པའོ་གསུངས་སོ། །
NUM 34:13 མོ་ཤེ་ཡིས་ཡེས་ར་ཨེལ་པ་རྣམས་ལ་འདི་ལྟར། འདི་ནི་ཁྱོད་ཅག་གིས་རྒྱན་འཕངས་ནས་ལེན་པའི་ས་སྐལ་ཡིན་ཏེ། དཀོན་མཆོག་ཡ་ཝཱེས་ཚོ་པ་དགུ་དང་ཕྱེད་ཀ་ལ་སྦྱིན་དགོས་པའི་བཀའ་གནང་བའོ། །
NUM 34:14 དེ་བས་རུ་བེན་གྱི་བུ་རྒྱུད་རྣམས་ཀྱི་ཚོ་པ་དང་གཱ་རྡུའི་བུ་རྒྱུད་རྣམས་ཀྱི་ཚོ་པར་རང་རང་གི་ཕ་ཁྱིམ་བཞིན་དུ་ས་སྐལ་ཐོབ་པ་དང་། མཱ་ན་ཤེའི་ཚོ་པ་ཕྱེད་ཀར་ཡང་ས་སྐལ་ཐོབ་པ་ཡིན་ནོ། །
NUM 34:15 ཚོ་པ་གཉིས་དང་ཕྱེད་ཀ་དེར་ཡེ་རུ་ཀོའི་ཕ་རོལ་ཏུ། ཡོར་དན་གཙང་པོའི་ཤར་དུ་ཉི་མ་ཤར་ཕྱོགས་ཀྱི་ཡུལ་ནས་ས་སྐལ་ཐོབ་པ་ཡིན་ཞེས་གསུངས་སོ། །
NUM 34:16 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 34:17 འདི་ནི་ཁྱོད་ཅག་ལ་ས་སྐལ་བགོ་མཁན་གྱི་མིང་ཡིན་ཏེ། མཆོད་དཔོན་ཨེ་ལི་ཨ་ཟར་དང་ནུན་གྱི་བུ་ཡོ་ཤུ་ཨ་གཉིས་སོ། །
NUM 34:18 ཡང་ཁྱོད་ཅག་གིས་ཚོ་པ་རེ་ནས་འགོ་དཔོན་རེ་བདམས་ནས་ས་སྐལ་བགོ་རོགས་བྱེད་དགོས།
NUM 34:19 མི་དེ་དག་གི་མིང་ནི་འདི་ལྟ་སྟེ། ཡ་ཧུ་དཱའི་ཚོ་པ་ནས་ཡེ་ཕུན་ནེའི་བུ་ཀཱ་ལེབ་དང་།
NUM 34:20 སི་མུ་ཨོན་གྱི་བུ་རྒྱུད་རྣམས་ཀྱི་ཚོ་པ་ནས་ཨམ་མེ་ཧུད་ཀྱི་བུ་སཱ་མུ་ཨེལ་དང་།
NUM 34:21 པེན་ཡཱ་མེན་གྱི་ཚོ་པ་ནས་ཀེ་སི་ལོན་གྱི་བུ་ཨེ་ལི་དད།
NUM 34:22 དཱན་གྱི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཡོག་ལིའི་བུ་པུག་ཀི།
NUM 34:23 ཡོ་སེབ་ཀྱི་བུ་རྣམས་ལས་མཱ་ན་ཤེའི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཨེ་པོད་ཀྱི་བུ་ཧ་ནེ་ཨེལ།
NUM 34:24 ཨེ་ཕཱར་ཡིམ་གྱི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཤིབ་ཏན་གྱི་བུ་ཀཱ་མུ་ཨེལ།
NUM 34:25 ཟེ་བུ་ལུན་གྱི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཕར་ནཱག་གི་བུ་ཨེ་ལི་ཙ་ཕན།
NUM 34:26 ཡེས་སི་ཀཱར་གྱི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཨ་ཚན་གྱི་བུ་ཕལ་ཏི་ཨེལ།
NUM 34:27 ཨ་ཤེར་གྱི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཤེ་ལོ་མིའི་བུ་ཨ་ཧི་ཧུད།
NUM 34:28 ནཱབ་ཐ་ལིའི་བུ་རྒྱུད་རྣམས་ཀྱི་ཚོ་པ་ནས་འགོ་དཔོན་གཅིག་ཡོད་པ་ཨམ་མེ་ཧུད་ཀྱི་བུ་ཕེ་དཱ་ཨེལ་བཅས་ཡིན།
NUM 34:29 དེ་དག་ནི་དཀོན་མཆོག་ཡ་ཝཱེས་ཀ་ན་ཨན་ཡུལ་དུ་ཡེས་ར་ཨེལ་པ་རྣམས་ལ་ས་སྐལ་བགོ་འགྲེམ་བྱེད་པར་བསྒོས་པ་རྣམས་ཡིན་ཞེས་གསུངས་སོ། །
NUM 35:1 དེ་ཡང་ཡེ་རུ་ཀོའི་ཁ་གཏད་དེ་ཡོར་དན་གཙང་པོའི་འགྲམ་དུ་ཡོད་པའི་མོ་ཨབ་སྤང་ལྗོངས་སུ་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 35:2 ཁྱོད་ཀྱིས་ཡེས་ར་ཨེལ་པ་རྣམས་ལ་སྒོས་ཤིག ཁོ་ཚོས་བདག་ཏུ་བཟུང་བའི་ས་སྐལ་ནས་ལེ་ཝི་པ་རྣམས་ལ་གྲོང་ཁྱེར་འགའ་སྡོད་གནས་སུ་སྦྱིན་དགོས་ལ། གྲོང་ཁྱེར་དེ་དག་གི་ཉེ་འཁོར་གྱི་སྤང་ཐང་དག་ཀྱང་ལེ་ཝི་པ་རྣམས་ལ་སྤྲོད་དགོས།
NUM 35:3 གྲོང་ཁྱེར་དེ་དག་གི་ནང་དུ་ཁོ་རྣམས་འདུག་དགོས་པ་དང་། དེ་དག་གི་ཉེ་འཁོར་སྤང་ཐང་དུ་ཁོ་ཚོའི་བ་གླང་དང་། ལུག་ཁྱུ་དང་། ཕྱུགས་ཟོག་ཐམས་ཅད་འཚོས་ཆོག་པ་ཡིན།
NUM 35:4 ཁྱོད་ཅག་གིས་ལེ་ཝི་པ་རྣམས་ལ་སྤྲོད་པར་བྱ་བའི་གྲོང་ཁྱེར་ཉེ་འཁོར་གྱི་སྤང་ཐང་དག་ནི། གྲོང་ཁྱེར་གྱི་ལྕགས་རི་ནས་ཕྱི་ལོགས་སུ་ཁྲུ་ཆིག་སྟོང་ཚད་དགོས་པ་དང་།
NUM 35:5 ཡང་གྲོང་ཁྱེར་ཕྱི་རོལ་ནས་ཁྱོད་ཅག་གིས་ཤར་ཕྱོགས་སུ་ཁྲུ་ཉིས་སྟོང་དང་། ལྷོ་ཕྱོགས་སུ་ཁྲུ་ཉིས་སྟོང་དང་། ནུབ་ཕྱོགས་སུ་ཁྲུ་ཉིས་སྟོང་དང་། བྱང་ཕྱོགས་སུ་ཁྲུ་ཉིས་སྟོང་བཅས་ཚད་ནས། གྲོང་ཁྱེར་དཀྱིལ་དབུས་སུ་ཡོད་དགོས། གྲོང་ཁྱེར་ཉེ་འཁོར་གྱི་སྤང་ཐང་རྣམས་ཁོ་ཚོར་དབང་བར་བྱེད་དགོས་པའོ། །
NUM 35:6 ཁྱོད་ཅག་གིས་ལེ་ཝི་པ་རྣམས་ལ་སྦྱིན་པར་བྱ་བའི་གྲོང་ཁྱེར་རྣམས་ལས་སྐྱབས་བཅོལ་གྲོང་ཁྱེར་དྲུག་ཡོད་དགོས་ལ། མི་གསོད་མཁན་རྣམས་དེའི་ནང་དུ་བྲོས་ཆོག་པ་ཡིན། གཞན་ད་དུང་གྲོང་ཁྱེར་བཞི་བཅུ་ཞེ་གཉིས་ཁོ་རྣམས་ལ་སྦྱིན་དགོས།
NUM 35:7 དེ་བཞིན་ཁྱོད་ཅག་གིས་ལེ་ཝི་པ་རྣམས་ལ་བསྡོམས་པས་གྲོང་ཁྱེར་བཞི་བཅུ་ཞེ་བརྒྱད་དང་། དེ་དག་གི་ཉེ་འཁོར་སྤང་ཐང་བཅས་པ་སྦྱིན་དགོས།
NUM 35:8 ཡེས་ར་ཨེལ་པ་རྣམས་ཀྱིས་བདག་ཏུ་བཟུང་བའི་ས་སྐལ་དག་ལས། ཁྱོད་ཅག་གིས་ལེ་ཝི་པ་རྣམས་ལ་གྲོང་ཁྱེར་རྣམས་སྦྱིན་དགོས་པ་སྟེ། ཚོ་པ་ཆེན་པོ་རྣམས་ལས་མང་པོ་དང་། ཚོ་པ་ཆུང་ངུ་རྣམས་ལས་ཉུང་ངུ་ཐོངས་ཤིག ཚོ་པ་རེ་རེས་རང་རང་ལ་ཐོབ་པའི་ས་སྐལ་བཞིན་དུ། གྲོང་ཁྱེར་དག་ནས་ལེ་ཝི་པ་རྣམས་ལ་སྦྱིན་པར་བྱའོ་ཞེས་གསུངས་སོ། །
NUM 35:9 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
NUM 35:10 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་ཡོར་དན་གཙང་པོ་བརྒལ་ནས་ཀ་ན་ཨན་ཡུལ་དུ་སླེབས་པའི་ཚེ།
NUM 35:11 ཁྱོད་ཅག་གི་སྐྱབས་བཅོལ་སའི་གྲོང་ཁྱེར་དུ་གྲོང་ཁྱེར་འགའ་འདེམས་དགོས་ལ། རྒྱག་ཉེས་ཤོར་ནས་མི་བསད་པ་དེ་ཡུལ་དེར་བྲོས་ཆོག་པ་ཡིན།
NUM 35:12 གྲོང་ཁྱེར་དེ་དག་ནི་ཁྱོད་ཅག་དགྲ་ཤ་ལེན་མཁན་ལ་གཡོལ་སའི་སྐྱབས་བཅོལ་གྲོང་ཁྱེར་ཡིན་ལ། རྒྱག་ཉེས་ཤོར་ནས་མི་གསོད་མཁན་དེ་མི་ཚོགས་ཀྱི་མདུན་དུ་འགྲེང་སྟེ་ཁྲིམས་ཐག་གཅོད་པའི་བར་དུ་འཆི་བར་མི་འགྱུར་བའོ། །
NUM 35:13 ཁྱོད་ཅག་གིས་གཏན་ལ་ཁེལ་བའི་སྐྱབས་བཅོལ་གྲོང་ཁྱེར་གྱི་གྲངས་ཀ་ནི་དྲུག་ཡིན་ཏེ།
NUM 35:14 ཁྱོད་ཅག་གིས་ཡོར་དན་གཙང་པོའི་ཤར་ཕྱོགས་ནས་གྲོང་ཁྱེར་གསུམ་སྦྱིན་དགོས་ལ། ཀ་ན་ཨན་ཡུལ་ནས་གྲོང་ཁྱེར་གསུམ་སྦྱིན་དགོས། དེ་དག་ནི་སྐྱབས་བཅོལ་གྲོང་ཁྱེར་ཡིན་དགོས་སོ། །
NUM 35:15 གྲོང་ཁྱེར་དྲུག་པོ་དེ་ནི་ཡེས་ར་ཨེལ་པ་རྣམས་དང་། ཕྱི་མི་རྣམས་དང་། དེ་དག་ཁྲོད་དུ་གནས་པའི་བྱེས་པ་རྣམས་ཀྱི་དོན་དུ་སྐྱབས་བཅོལ་གྲོང་ཁྱེར་ཡིན་ལ། རྒྱག་ཉེས་ཤོར་ནས་མི་གསོད་མཁན་ཐམས་ཅད་ཡུལ་དེར་བྲོས་ཆོག་པའོ། །
NUM 35:16 གལ་སྲིད་མི་ཞིག་གིས་ལྕགས་ཆས་ཀྱིས་མི་ལ་བརྡུངས་ནས་མི་དེ་བསད་པ་ཡིན་ན། ཁོས་མི་བསད་པ་ཡིན་པས། མི་གསོད་མཁན་ནི་ངེས་པར་གསོད་དགོས།
NUM 35:17 ཡང་མི་ཞིག་གི་ལག་ཏུ་མི་གསོད་ནུས་པའི་རྡོ་བཟུང་སྟེ་མི་ལ་བརྡུངས་ནས་མི་དེ་བསད་པ་ཡིན་ན། ཁོས་མི་བསད་པ་ཡིན་པས། མི་གསོད་མཁན་ནི་ངེས་པར་གསོད་དགོས།
NUM 35:18 ཡང་མི་ཞིག་གི་ལག་ཏུ་མི་གསོད་ནུས་པའི་ཤིང་ཆས་བཟུང་སྟེ་མི་ལ་བརྡུངས་ནས་མི་དེ་བསད་ན། ཁོས་མི་བསད་པ་ཡིན་པས། མི་གསོད་མཁན་ནི་ངེས་པར་གསོད་དགོས་པའོ། །
NUM 35:19 ཁྲག་ལན་སློག་མཁན་གྱིས་མི་གསོད་མཁན་དེ་དངོས་སུ་གསོད་དགོས་ལ། ལག་དམར་དེ་ལ་ཐུག་མ་ཐག་དེ་གསོད་དགོས་པ་ཡིན།
NUM 35:20 གལ་སྲིད་མི་ཞིག་གིས་སྙིང་ནད་བཅངས་ནས་མི་ས་རུ་སྒྱེལ་བའམ། ཡང་ན་འཇབ་ནས་བསྡད་དེ་མི་ལ་བརྒྱབ་ནས་བསད་པའམ།
NUM 35:21 ཡང་ན་ཞེ་འཁོན་བཟུང་ནས་ལག་པས་མི་ལ་བརྡུངས་ནས་མི་བསད་པ་ཡིན་ན། ཁོས་མི་བསད་པ་ཡིན་པས་རྡུང་མཁན་དེ་ངེས་པར་གསོད་དགོས། ཁྲག་ལན་སློག་མཁན་གྱིས་ལག་དམར་དེ་ལ་ཐུག་མ་ཐག་དེ་གསོད་དགོས་པ་ཡིན་ནོ། །
NUM 35:22 འོན་ཀྱང་མི་ལ་ཞེ་འཁོན་མེད་པར་གློ་བུར་མི་ཞིག་ས་རུ་སྒྱེལ་བའམ། ཡང་ན་སྦ་གསང་མེད་པར་མི་ལ་ཅི་རིགས་ཀྱིས་བརྒྱབ་པའམ།
NUM 35:23 ཡང་ན་མ་མཐོང་བར་མི་གསོད་ནུས་པའི་རྡོ་ཡིས་མི་ལ་བརྒྱབ་ནས་མི་ཞིག་བསད་ཀྱང་། གསོད་མཁན་དེ་དང་མི་དེའི་བར་ཞེ་འཁོན་མེད་པ་དང་མི་དེར་གནོད་སྐྱེལ་བའི་བསམ་པའང་མེད་ན།
NUM 35:24 དེ་ནས་མི་ཚོགས་ཀྱིས་ཁྲིམས་སྲོལ་བཞིན་དུ། མི་གསོད་མཁན་དང་ཁྲག་ལན་སློག་མཁན་གཉིས་ཀྱི་བར་དུ་ཁྲིམས་ཐག་གཅོད་དགོས།
NUM 35:25 མི་ཚོགས་ཀྱིས་མི་གསོད་མཁན་དེ་ཁྲག་ལན་སློག་མཁན་གྱི་ལག་ནས་བསྐྱབས་ཏེ། ཁོ་རང་འབྲོ་སའི་སྐྱབས་བཅོལ་གྲོང་ཁྱེར་དུ་བསྐྱལ་བ་དང་། སྣུམ་དམ་པས་བྱུགས་ཡོད་པའི་མཆོད་དཔོན་ཆེན་པོ་ཤི་བའི་བར་དུ་ཁོ་དེ་རུ་གནས་པར་བྱའོ། །
NUM 35:26 འོན་ཀྱང་མི་གསོད་མཁན་དེ་ཁོ་རང་འབྲོ་སའི་སྐྱབས་བཅོལ་གྲོང་ཁྱེར་མངའ་ཁོངས་ཀྱི་ཕྱི་རུ་ཐོན་པ་དང་།
NUM 35:27 ཁྲག་ལན་སློག་མཁན་གྱིས་ཁོ་རང་སྐྱབས་བཅོལ་གྲོང་ཁྱེར་གྱི་ཕྱི་ནས་རྙེད་དེ་ཁོ་བསད་ན། ཁྲག་ལན་སློག་མཁན་གྱིས་ཁྲག་བཞུར་བའི་ཉེས་པ་བྱས་མེད།
NUM 35:28 ཅི་ལ་ཟེར་ན། མི་གསོད་མཁན་དེ་ནི་མཆོད་དཔོན་ཆེན་པོ་ཤི་བའི་བར་དུ་སྐྱབས་བཅོལ་གྲོང་ཁྱེར་དུ་འདུག་དགོས་པའི་ཕྱིར་ཡིན། མཆོད་དཔོན་ཆེན་པོ་ཤི་བའི་རྗེས་སུ་མི་གསོད་མཁན་དེ་རང་གི་ཡུལ་དུ་ཕྱིར་ལོག་ཆོག་པ་ཡིན།
NUM 35:29 འདི་ནི་ཁྱོད་ཚོའི་སྡོད་གནས་ཐམས་ཅད་དུ་ཁྱོད་ཅག་གི་མི་རབས་ནས་མི་རབས་བར་གྱི་སྒྲིག་ཁྲིམས་དང་སྲོལ་ཡིག་ཡིན་ནོ། །
NUM 35:30 མི་གསོད་མཁན་སུ་ཡིན་རུང་དཔང་པོ་ཁ་ཤས་ཀྱི་བདེན་དཔང་ལ་བརྟེན་ནས་ད་གཟོད་བསད་ཆོག་པ་དང་། གལ་སྲིད་དཔང་པོ་གཅིག་ཁོ་ན་ལས་མེད་ན་མི་དེ་གསོད་པར་མི་བྱའོ། །
NUM 35:31 སྲོག་ཆད་གཅོད་དགོས་པ་སྟེ་བསམ་བཞིན་དུ་མི་གསོད་མཁན་ནི། ཁྱོད་ཅག་གིས་བླུ་རིན་བླངས་ནས་མི་དེའི་སྲོག་བླུ་མི་རུང་སྟེ། དེ་ནི་ངེས་པར་གསོད་དགོས་པས་སོ། །
NUM 35:32 སྐྱབས་བཅོལ་གྲོང་ཁྱེར་དུ་བྲོས་པ་དེར་མཚོན་ནའང་ཁྱོད་ཅག་གིས་དེའི་བླུ་རིན་བླངས་ནས། མཆོད་དཔོན་ཆེན་པོ་མ་ཤི་སྔོན་དུ་རང་ཡུལ་དུ་ལོག་ནས་འདུག་ཏུ་འཇུག་མི་རུང་།
NUM 35:33 དེ་ལྟར་བྱས་ན་ཁྱོད་ཅག་གིས་རང་གི་སྡོད་གནས་མ་སྦགས་པ་སྟེ། གང་ལ་ཞེ་ན། ཁྲག་གིས་གནས་སྦག་པར་བྱེད་པའི་ཕྱིར་རོ། །ས་དེར་མཚོན་ན་མི་གསོད་མཁན་དེའི་ཁྲག་མ་གཏོགས་གཞན་པའི་ཁྲག་གིས་གནས་དེར་སྡིག་བཤགས་བྱེད་མི་རུང་བ་ཡིན།
NUM 35:34 ཡ་ཝཱེ་བདག་ནི་ཡེས་ར་ཨེལ་པ་རྣམས་ཀྱི་དཀྱིལ་དུ་གནས་ཡོད་པས། ཁྱོད་ཅག་གིས་རང་གི་སྡོད་ཡུལ་ཏེ་བདག་གནས་པའི་ཡུལ་ནི་སྦག་མི་རུང་ཞེས་པའོ་གསུངས་སོ། །
NUM 36:1 དེ་ཡང་ཡོ་སེབ་ཀྱི་བུ་རྒྱུད་རྣམས་ཀྱི་ཁྱིམ་རྒྱུད་ནས་མཱ་ན་ཤེའི་ཚ་བོའམ་མཱ་ཀིར་གྱི་བུ་གིལ་ཨད་ཀྱི་བུ་རྒྱུད་རྣམས་ཡོད་པ་དང་། དེ་དག་གི་རིགས་རྒྱུད་ཁྲོད་ཀྱི་འགོ་དཔོན་རྣམས་ནི་མོ་ཤེ་དང་ཡེས་ར་ཨེལ་པའི་ཁྱིམ་རྒྱུད་སོ་སོར་འགོ་པ་བྱེད་པའི་འགོ་དཔོན་རྣམས་ཀྱི་མདུན་དུ་འོངས་ཏེ་ན་རེ།
NUM 36:2 སྔར་དཀོན་མཆོག་ཡ་ཝཱེས་ངའི་བདག་པོ་ལ་རྒྱན་འཕངས་ནས་ཡུལ་དེ་ཡེས་ར་ཨེལ་པ་རྣམས་ལ་ས་སྐལ་དུ་སྦྱིན་པའི་བཀའ་གནང་བ་དང་། ངའི་བདག་པོས་ཀྱང་དཀོན་མཆོག་ཡ་ཝཱེའི་བཀའ་དང་དུ་བླངས་ནས། ངེད་ཅག་གི་སྤུན་ཟླ་ཚེ་ལོ་ཕེ་ཧད་ཀྱི་ས་སྐལ་ནི་ཁོའི་བུ་མོ་རྣམས་ལ་གནང་བར་བྱས།
NUM 36:3 འོན་ཀྱང་། གལ་སྲིད་ཁོ་མོ་རྣམས་ཡེས་ར་ཨེལ་པའི་ཚོ་པ་གཞན་གྱི་མི་ལ་གཉེན་བསྒྲིགས་ན། དེ་དག་གི་ས་སྐལ་ནི་ངེད་ཅག་གི་ཕ་མེས་རྣམས་ཀྱི་ས་སྐལ་ནས་བླངས་ཏེ། དེ་དག་གི་བཟའ་ཟླའི་ཚོ་པའི་ས་སྐལ་སྟེང་འཇོག་དགོས། དེ་ནས་ངེད་ཅག་གིས་རྒྱན་བླངས་ནས་ཐོབ་པའི་ས་སྐལ་ནི་ཤོར་བར་འགྱུར།
NUM 36:4 ཡེས་ར་ཨེལ་པ་རྣམས་ཀྱི་དུང་འབུད་པའི་ལོ་ལ་སླེབས་པའི་ཚེ། ཁོ་མོ་ཚོའི་ས་སྐལ་རྣམས་དེ་དག་གི་བཟའ་ཟླའི་ཚོ་པའི་ས་སྐལ་སྟེང་འཇོག་དགོས་ལ། དེ་ནས་ཁོ་མོ་ཚོའི་ས་སྐལ་ནི་རང་ཅག་གི་ཕ་མེས་རྣམས་ཀྱི་ཚོ་པའི་ས་སྐལ་ནས་ལེན་དགོས་སོ་ཞེས་སྨྲས་སོ། །
NUM 36:5 མོ་ཤེ་ཡིས་དཀོན་མཆོག་ཡ་ཝཱེའི་བཀའ་བཞིན་དུ་ཡེས་ར་ཨེལ་པ་རྣམས་ལ་འདི་ལྟར། ཡོ་སེབ་ཀྱི་ཚོ་པའི་མི་རྣམས་ཀྱིས་སྨྲས་པ་བདེན་ནོ། །
NUM 36:6 ཚེ་ལོ་ཕེ་ཧད་ཀྱི་བུ་མོ་རྣམས་ལ་མཚོན་ན། དཀོན་མཆོག་ཡ་ཝཱེས་གནང་བའི་བཀའ་ནི་འདི་ལྟ་སྟེ། ཁོ་མོ་རྣམས་སུ་ཡི་ཆུང་མ་བྱ་བསམ་ན་དེ་ལྟར་བྱས་ཆོག འོན་ཀྱང་། རང་གི་རིགས་རྒྱུད་དང་རང་གི་ཚོ་པ་ནས་ཁྱོ་ག་བཙལ་དགོས།
NUM 36:7 དེ་ལྟར་བྱས་ན་ཡེས་ར་ཨེལ་པ་རྣམས་ཀྱི་ས་སྐལ་ནི་ཚོ་པ་གཅིག་ནས་ཚོ་པ་གཞན་ལ་སྤྲོད་མི་དགོས། ཡེས་ར་ཨེལ་པ་རེ་རེས་རང་རང་གི་ཕ་མེས་རྣམས་ཀྱི་ཚོ་པའི་ས་སྐལ་འཛིན་སྐྱོང་བྱེད་དགོས་པའི་ཕྱིར་རོ། །
NUM 36:8 ཡེས་ར་ཨེལ་པའི་ཚོ་པ་ལས་ས་སྐལ་ཐོབ་པའི་བུ་མོ་རྣམས་རང་རང་གི་ཕ་མེས་རྣམས་ཀྱི་ཚོ་པར་གཏོགས་པའི་ཁྱིམ་རྒྱུད་ཀྱི་མི་ཞིག་གི་ཆུང་མ་བྱེད་དགོས་ལ། དེ་ནི་ཡེས་ར་ཨེལ་པ་རེ་རེས་རང་རང་གི་ཕ་མེས་ཀྱི་ས་སྐལ་བདག་ཏུ་འཛིན་པའི་ཕྱིར་དང་།
NUM 36:9 དེ་ནས་ཡེས་ར་ཨེལ་པ་རྣམས་ཀྱི་ས་སྐལ་ནི་ཚོ་པ་གཅིག་ནས་ཚོ་པ་གཞན་ལ་སྤྲོད་མི་དགོས་པ་ཡིན། ཅི་ལ་ཞེ་ན། ཡེས་ར་ཨེལ་པ་རྣམས་ཀྱི་ཚོ་པ་རེ་རེས་རང་རང་གི་ས་སྐལ་འཛིན་སྐྱོང་བྱེད་དགོས་པའི་ཕྱིར་རོ་ཞེས་གསུངས་སོ། །
NUM 36:10 དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་ལྟར་གནང་བ་ཡིན་ན། ཚེ་ལོ་ཕེ་ཧད་ཀྱི་བུ་མོ་རྣམས་ཀྱིས་དེ་བཞིན་དུ་བསྒྲུབས་པ་དང་།
NUM 36:11 ཚེ་ལོ་ཕེ་ཧད་ཀྱི་བུ་མོ་མ་ལཱ་དང་། ཐིར་ཚ་དང་། ཧོག་ལཱ་དང་། མིལ་ཀཱ་དང་། ནོ་ཨ་བཅས་རང་གི་ཕ་ཁུའི་བུ་རྣམས་ཀྱི་ཆུང་མར་གྱུར་པའོ། །
NUM 36:12 དེ་དག་ཡོ་སེབ་ཀྱི་བུ་མཱ་ན་ཤེའི་བུ་རྒྱུད་རྣམས་ཀྱི་ཁྱིམ་རྒྱུད་ཀྱི་ཆུང་མ་བྱས་པ་དང་། ཁོ་མོ་ཚོའི་ས་སྐལ་ནི་སྔར་བཞིན་རང་རང་གི་ཕ་ཡི་ཁྱིམ་རྒྱུད་དང་ཚོ་པར་གཏོགས་པའོ། །
NUM 36:13 དེ་དག་ནི་དཀོན་མཆོག་ཡ་ཝཱེས་ཡེ་རུ་ཀོ་ཡི་ཁ་གཏད་དེ་ཡོར་དན་གཙང་པོའི་འགྲམ་དུ་ཡོད་པའི་མོ་ཨབ་སྤང་ལྗོངས་སུ། མོ་ཤེ་བརྒྱུད་ནས་ཡེས་ར་ཨེལ་པ་རྣམས་ལ་གནང་བའི་བཀའ་དང་སྲོལ་ཡིག་རྣམས་ཡིན་ནོ།། །།
DEU 1:1 འདི་ནི་ཡོར་དན་གཙང་པོའི་ཤར་ཕྱོགས་སུ་ཡོད་པའི་དབེན་སྟོང་དུ། སུ་ཕུ་ཡི་ཁ་གཏད་ཀྱི་ཨ་ར་པཱ་བྱ་བ་སྟེ། ཕཱ་རན་དང་། ཐོ་ཕེལ། ལཱ་པན། ཧ་ཚི་རོད། དི་ཟ་ཧཱབ་བཅས་ཀྱི་བར་ལ་ཡོད་པའི་སྤང་ཐང་དུ། མོ་ཤེ་ཡིས་ཡེས་ར་ཨེལ་པ་ཐམས་ཅད་ལ་གསུངས་པའི་གཏམ་ཡིན་ཏེ།
DEU 1:2 ཧོ་རེབ་ནས་ཀཱ་དེའེ་ཤཱ་པར་ནེ་ཨ་ལ་རི་བོ་སེ་ཨིར་བརྒྱུད་ནས་སོང་ན་ཉིན་བཅུ་གཅིག་གི་ལམ་ཐག་ཡོད།
DEU 1:3 དེ་ནི་ཨེ་ཅིབ་ཡུལ་ནས་ཐོན་པའི་ལོ་བཞི་བཅུ་པའི་ཟླ་བཅུ་གཅིག་གི་ཚེས་དང་པོ་ལ། མོ་ཤེ་ཡིས་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་བསྩལ་པའི་བཀའ་ཐམས་ཅད་དེ་བཞིན་བསྒྲགས་སོ། །
DEU 1:4 ཧེ་སི་པོན་དུ་ཡོད་པའི་ཨེ་མོར་པའི་རྒྱལ་པོ་སི་ཧོན་དང་། ཨ་ཤཱ་ཐ་རོད་དང་ཨེ་དྲེ་ཨི་རུ་ཡོད་པའི་པཱ་ཤན་གྱི་རྒྱལ་པོ་ཨོག་གཉིས་ཕམ་པར་བརྒྱབ་རྗེས།
DEU 1:5 མོ་ཤེ་ཡིས་ཡོར་དན་གཙང་པོའི་ཤར་ཕྱོགས་ཀྱི་མོ་ཨབ་ཐང་དུ་བཀའ་ཁྲིམས་འདི་གསལ་པོར་གསུང་འགོ་བརྩམས་ནས་འདི་ལྟར།
DEU 1:6 རང་ཅག་གི་དཀོན་མཆོག་ཡ་ཝཱེས་རི་བོ་ཧོ་རེབ་ནས་འདི་སྐད་དུ། ཁྱོད་ཚོ་རི་བོ་འདིར་ཡུན་རིང་བསྡད་པས།
DEU 1:7 ད་ནི་ཁ་ཕྱོགས་སྒྱུར་ལ་ཨེ་མོར་པའི་རི་ཁུལ་དང་དེའི་ཁྱིམ་མཚེས་རྣམས་ཏེ། ཨ་ར་པཱ་དང་། རི་ཁུལ་དང་། རི་ཀླུང་དང་། ནེ་གུབ་ཡུལ་དང་། རྒྱ་མཚོའི་འགྲམ་རྒྱུད་དང་། ཀ་ན་ཨན་པ་རྣམས་ཀྱི་ཡུལ་དང་། ལེ་པཱ་ནོན་བཅས་ནས་ཆུ་བོ་ཆེན་པོ་སྟེ་ཕི་རཱད་ཆུ་བོ་འགྲམ་རྒྱུད་ཀྱི་ཕྱོགས་སུ་སོང་ཞིག
DEU 1:8 ལྟོས་དང་། བདག་གིས་ཡུལ་དེ་ཁྱོད་རྣམས་ཀྱི་མདུན་དུ་བཞག་ཡོད། དེ་ནི་དཀོན་མཆོག་ཡ་ཝཱེས་ཁྱོད་རྣམས་ཀྱི་ཕ་མེས་ཨབ་ར་ཧམ་དང་ཨི་སཱག ཡ་ཀོབ་བཅས་ལ་ཁོང་རྣམས་དང་ཁོང་རྣམས་ཀྱི་བུ་རབས་ཚ་རྒྱུད་ལ་གནང་བར་མནའ་བཞེས་པ་ཡིན་པས། དེར་སོང་ནས་བདག་པོ་རྒྱོབས་ཤིག་ཅེས་བཀའ་བསྩལ་ཏོ། །
DEU 1:9 དེའི་དུས་སུ་བདག་གིས་ཁྱོད་རྣམས་ལ། ང་གཅིག་པུས་ཁྱོད་ཅག་གི་རྡོག་ཁྲེས་འཁུར་མི་ནུས།
DEU 1:10 ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་མང་པོར་མཛད་པས། ལྟོས་དང་། དེ་རིང་ཁྱོད་ཅག་ནི་ནམ་མཁའི་སྐར་མ་བཞིན་རྒྱས་འདུག
DEU 1:11 ཁྱོད་རྣམས་ཀྱི་ཕ་མེས་ཀྱི་དཀོན་མཆོག་ཡ་ཝཱེས་ཁྱོད་རྣམས་ད་ལྟ་ལས་ཀྱང་ལྡབ་སྟོང་འགྱུར་གྱིས་མང་བར་སྤེལ་ཞིང་། ཡང་ཁོང་གིས་ཁྱོད་རྣམས་ལ་ཞལ་བཞེས་གནང་བ་བཞིན། ཁྱོད་ཅག་ལ་བྱིན་རླབས་གནང་བར་ཤོག
DEU 1:12 ང་གཅིག་པུས་ཁྱོད་རྣམས་ཀྱི་རྡོག་ཁྲེས་དང་འགན་ཁུར། རྩོད་གླེང་བཅས་ནི་ཅི་ལྟར་འཁུར་ནུས་སམ།
DEU 1:13 ཁྱོད་རྣམས་ཀྱིས་རང་རང་གི་ཚོ་པ་བཞིན་མཁས་མཛངས་ལྡན་པ་དང་བློ་གྲོས་ཅན། ཉམས་མྱོང་ཅན་རེ་འདེམས་དགོས་ཤིང་། ངས་དེ་དག་ཁྱོད་རྣམས་ཀྱི་འགོ་དཔོན་དུ་བསྐོས་ཆོག་ཅེས་བསྒོས་པ་དང་།
DEU 1:14 ཁྱོད་ཅག་གིས་བདག་ལ་ཁྱེད་ཀྱིས་བསྒྲུབ་དགོས་པར་གསུངས་པ་དེ་ལེགས་པོ་འདུག་ཅེས་ལན་བཏབ་བོ། །
DEU 1:15 དེ་ནས་ངས་ཁྱོད་ཅག་གི་ཚོ་པ་རྣམས་ཀྱི་འགོ་དཔོན་ཏེ། མཁས་མཛངས་ལྡན་པ་དང་ཉམས་མྱོང་ཅན་རྣམས་བདམས་ནས་ཁྱོད་ཅག་གི་ཚོ་པ་བཞིན་ཁྱོད་རྣམས་ལ་བདག་སྐྱོང་བྱེད་པའི་འགོ་དཔོན་དུ་བསྐོས་པ་དང་། སྟོང་དཔོན་དང་བརྒྱ་དཔོན། ལྔ་བཅུ་དཔོན། བཅུ་དཔོན། ལས་དཔོན་བཅས་ལ་བསྐོས་པ་ཡིན།
DEU 1:16 དེའི་དུས་སུ་ངས་ཁྱོད་ཅག་གི་ཁྲིམས་དཔོན་ལ་འདི་ལྟར་བསྒོས་པ་སྟེ། ཁྱོད་རྣམས་ཀྱིས་སྤུན་ཟླའི་གཏུག་བཤེར་ལ་ཉན་དུས། སྤུན་ཟླས་ཕན་ཚུན་གཏུག་པའམ། ཡང་ན་མཉམ་དུ་གནས་པའི་བྱེས་པའི་བར་གཏུག་བཤེར་བྱས་པ་གང་ཡིན་ཡང་ཁྲིམས་ཐག་དྲང་པོར་གཅོད་དགོས།
DEU 1:17 ཁྲིམས་ཐག་གཅོད་དུས་སུ་ལའང་ཕྱོགས་རིས་འཛིན་མི་རུང་ལ། མི་མཆོག་དམན་སུ་ཡིན་ཡང་དེ་ལ་གཅིག་མཚུངས་ཀྱིས་མཉན་དགོས། ཁྲིམས་ཐག་གཅོད་པ་ནི་དཀོན་མཆོག་ལ་དབང་བས་སུ་ལ་ཡང་འཇིགས་མི་དགོས། ཁྱོད་རྣམས་ཐག་གིས་གཅོད་དཀའ་བའི་གྱོད་དོན་དང་ཕྲད་ཚེ་ངའི་མདུན་དུ་ཁྱེར་ཤོག་དང་ངས་དེར་ཁྲིམས་ཐག་གཅོད་པར་བྱ་ཞེས་སྨྲས་སོ། །
DEU 1:18 དེའི་དུས་སུ་ཁྱོད་ཅག་གིས་བསྒྲུབ་དགོས་པ་ཐམས་ཅད་ངས་ཁྱོད་རྣམས་ལ་བསྒོས་པ་ཡིན་ནོ། །
DEU 1:19 ཡང་རང་རེའི་དཀོན་མཆོག་ཡ་ཝཱེས་བཀའ་གནང་བ་བཞིན་རང་ཅག་རི་བོ་ཧོ་རེབ་ནས་ལམ་དུ་ཆས་ཏེ། ཁྱོད་རྣམས་ཀྱིས་མཐོང་བའི་དབེན་སྟོང་ཆེན་པོ་འཇིགས་སུ་རུང་བ་དེ་བརྒལ་ནས། ཨེ་མོར་པའི་རི་རྒྱུད་ཀྱི་ལམ་དེད་ནས་སོང་ན་ཀཱ་དེའེ་ཤཱ་པར་ནེ་ཨ་རུ་སླེབས་པ་ཡིན།
DEU 1:20 དེ་ནས་བདག་གིས་ཁྱོད་རྣམས་ལ། ཁྱོད་རྣམས་ནི་རང་རེའི་དཀོན་མཆོག་ཡ་ཝཱེས་རང་ཅག་ལ་གནང་བའི་ཨེ་མོར་པའི་རི་རྒྱུད་ལ་སླེབས་བྱུང་།
DEU 1:21 ལྟོས་དང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཡུལ་འདི་ཁྱོད་ཅག་གི་མདུན་དུ་བཤམས་ཤིང་། ཁྱོད་ཅག་གི་ཕ་མེས་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བཀའ་གནང་བ་བཞིན་ཡར་སོང་ལ་ཡུལ་དེ་བདག་གིར་ཟུངས་ཤིག མ་འཇིགས་མ་འཚབ་ཅིག་ཅེས་བསྒོས་པ་ཡིན།
DEU 1:22 དེ་ནས་ཁྱོད་ཅག་ངའི་མདུན་དུ་ཡོང་སྟེ། ང་ཚོས་ཡུལ་དེར་མྱུལ་ཞིབ་བྱ་བར་མི་མངགས་ན། དེས་རང་ཅག་ལམ་གང་དུ་འགྲོ་དགོས་པ་དང་གྲོང་ཁྱེར་གང་དུ་འཛུལ་དགོས་པའི་འཕྲིན་བསྐྱལ་འོང་ཞེས་སྨྲས་པ་དང་།
DEU 1:23 ང་རང་གཏམ་དེ་ལ་ཡིད་འཐད་ནས་ཁྱོད་རྣམས་ལས་མི་བཅུ་གཉིས་ཏེ་ཚོ་པ་རེ་ནས་མི་རེ་བདམས་པ་ཡིན།
DEU 1:24 དེ་དག་རི་ཁུལ་ལ་ཡར་སོང་ནས་ཨེ་ཤཱ་ཀོལ་བྱ་བའི་ཡུལ་བར་དུ་མྱུལ་ཞིབ་བྱས།
DEU 1:25 ཁོ་ཚོས་ཡུལ་དེའི་ཤིང་ཏོག་རྣམས་ཁྱེར་འོངས་ནས་རང་ཅག་ལ་སྤྲད་པ་དང་། དཀོན་མཆོག་ཡ་ཝཱེས་རང་ཅག་ལ་བསྩལ་པའི་ཡུལ་ནི་ཡག་པོ་འདུག་ཅེས་འཕྲིན་བསྐྱལ་ཡོང་ནའང་།
DEU 1:26 ཁྱོད་རྣམས་ཡར་འགྲོ་བར་མ་དགའ་ཞིང་ཁྱོད་ཅག་གིས་དཀོན་མཆོག་ཡ་ཝཱེའི་བཀའ་ལ་ངོ་ལོག་བྱས་པ་ཡིན།
DEU 1:27 ཁྱོད་རྣམས་ཀྱིས་གུར་ནང་དུ་འཁང་ར་བྱས་ཏེ་ན་རེ། དཀོན་མཆོག་ཡ་ཝཱེ་ང་ཚོ་ལ་སྡང་བས་ང་ཚོ་ཨེ་མོར་པའི་ལག་ཏུ་གཏད་ནས་ཚར་གཅོད་པའི་ཕྱིར་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་རེད།
DEU 1:28 ང་ཚོ་གང་དུ་འགྲོའམ། རང་ཅག་གི་སྤུན་ཟླ་ཚོས་རང་རེའི་སེམས་ཤུགས་ཉམས་པར་བྱས་ཏེ་ན་རེ། ཡུལ་དེའི་མི་རྣམས་ནི་རང་ཅག་ལས་ཆེ་ཞིང་གཟུགས་རིང་ལ། དེ་དག་གི་གྲོང་ཁྱེར་རྣམས་ཀྱང་ཆེ་ཞིང་བརྟན་པོ་ཡིན་པ་དང་ལྕགས་རི་གནམ་ལ་ཟུག་ཡོད། ང་ཚོས་ཡུལ་དེ་རུ་ཨ་ནག་རིགས་ཀྱི་བུ་རྒྱུད་རྣམས་ཀྱང་མཐོང་བྱུང་ཟེར་ཞེས་སྨྲས་སོ། །
DEU 1:29 དེ་ནས་བདག་གིས་ཁྱོད་རྣམས་ལ། དེ་དག་ལ་མ་འཇིགས་མ་དངང་ཞིག
DEU 1:30 ཁྱོད་ཅག་གི་དཀོན་མཆོག་ཡ་ཝཱེ་སྟེ་ཁྱོད་རྣམས་ཀྱི་སྔོན་དུ་ཕེབས་པ་ཁོང་གིས། ཨེ་ཅིབ་ཡུལ་ནས་ཁྱོད་ཅག་གི་མཐོང་ངོར་ཁྱོད་ཚོའི་ཆེད་དུ་ཇི་ལྟར་འཐབ་འཛིང་མཛད་པ་བཞིན་དུ་མཛད་ངེས་ཡིན།
DEU 1:31 དེར་མ་ཟད་དབེན་སྟོང་དུའང་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ཇི་ལྟར་ཁྲིད་པ་ཁྱོད་རྣམས་ཀྱིས་མཐོང་ཡོད་དེ། ཕ་ཡིས་རང་གི་བུ་རྒྱབ་ལ་ཁུར་ནས་སྐྱོད་པ་ལྟར། ཁོང་གིས་ཁྱོད་ཅག་ཁྲིད་ནས་གནས་འདིར་སླེབས་པ་ཡིན་ཞེས་སྨྲས་པའོ། །
DEU 1:32 དེ་བཞིན་ཡིན་ནའང་ཁྱོད་རྣམས་ཀྱིས་ད་དུང་ཁྱོད་ཅག་གི་དཀོན་མཆོག་ཡ་ཝཱེ་ལ་ཡིད་ཆེས་མི་བྱེད།
DEU 1:33 ཁྱོད་རྣམས་ལམ་དུ་སྐྱོད་པའི་དུས་སུ་ཁོང་ཁྱོད་ཅག་གི་མདུན་དུ་ཕེབས་ཤིང་ཁྱོད་རྣམས་ལ་སྒར་རྒྱག་སའི་གནས་བཙལ་བ་དང་། མཚན་མོ་མེའི་ཀ་བ་དང་ཉིན་དཀར་སྤྲིན་གྱི་ཚུལ་དུ་ཁྱོད་རྣམས་ལ་ལམ་སྟོན་མཛད་དོ། །
DEU 1:34 དཀོན་མཆོག་ཡ་ཝཱེས་ཁྱོད་རྣམས་ཀྱིས་གཏམ་བཤད་པའི་སྐད་གསན་ནས་ཐུགས་ཁྲོས་ཤིང་མནའ་བཞེས་ཏེ་འདི་སྐད་དུ།
DEU 1:35 མི་རབས་ངན་པ་འདི་ལས་གཅིག་གིས་ཀྱང་བདག་གིས་ཁོ་རྣམས་ཀྱི་ཕ་མེས་ལ་སྦྱིན་པར་མནའ་དང་བཅས་ཁས་བླངས་པའི་ཡུལ་བཟང་པོ་དེ་མཐོང་མི་ནུས།
DEU 1:36 ཡེ་ཕུན་ནེའི་བུ་ཀཱ་ལེབ་གཅིག་པུས་མཐོང་ནུས། ཁོ་རང་རྩེ་གཅིག་གིས་ཡ་ཝཱེ་བདག་གི་རྗེས་སུ་འབྲངས་པས། ཁོས་རྐང་པ་སྤོས་མྱོང་བའི་ཡུལ་ཐམས་ཅད་བདག་གིས་ཁོ་དང་ཁོའི་བུ་རྒྱུད་ལ་སྦྱིན་པར་བྱའོ་ཞེས་གསུངས་སོ། །
DEU 1:37 ཁྱོད་ཅག་གི་རྐྱེན་གྱིས་དཀོན་མཆོག་ཡ་ཝཱེ་ངའི་སྟེང་ལའང་ཐུགས་ཁྲོས་ནས་འདི་སྐད་དུ། ཁྱོད་ཀྱང་ཡུལ་དེར་འགྲོ་མི་ནུས།
DEU 1:38 འོན་ཀྱང་ཁྱོད་ཀྱི་མདུན་དུ་ལངས་ནས་ཁྱོད་ལ་ཞབས་ཕྱི་སྒྲུབ་མཁན་ཏེ་ནུན་གྱི་བུ་ཡོ་ཤུ་ཨ་ནི་ཡུལ་དེར་འགྲོ་དགོས། ཡང་ཁོས་ཡུལ་དེ་ཡེས་ར་ཨེལ་ལ་དབང་བར་བྱེད་པས། ཁྱོད་ཀྱིས་ཁོ་ལ་སྐུལ་འདེད་གཏོང་བར་གྱིས།
DEU 1:39 ཡང་ཁྱོད་ཅག་གི་བྱིས་པ་རྣམས་ཏེ་བཙན་ཁྲིད་བྱས་འགྲོ་སྙམ་པ་དག་དང་། ཁྱོད་ཅག་གི་བུ་དང་བུ་མོ་རྣམས་ཏེ་དེ་རིང་ད་དུང་བཟང་ངན་གྱི་དབྱེ་བ་མི་འཁོར་བ་རྣམས་ཐམས་ཅད་ཡུལ་དེར་འགྲོ་ངེས། ངས་ཡུལ་དེ་ཁོ་རྣམས་ལ་སྦྱིན་པར་བྱ་ཞིང་ཁོ་ཚོས་ཡུལ་དེ་འཛིན་པར་འགྱུར།
DEU 1:40 ཁྱོད་རྣམས་ནི་ཁ་ཕྱིར་འཁོར་ནས་རྒྱ་མཚོ་དམར་པོའི་ལམ་བརྒྱུད་དེ་དབེན་སྟོང་དུ་ཆས་དགོས་ཞེས་གསུངས་སོ། །
DEU 1:41 དེའི་དུས་སུ་ཁྱོད་རྣམས་ཀྱིས་ལན་དུ། ང་ཚོས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་པ་ཡིན། ད་ནི་རང་ཅག་གི་དཀོན་མཆོག་ཡ་ཝཱེའི་བསྒོ་བ་ཐམས་ཅད་བཞིན་ཡར་སོང་ནས་འཐབ་འཛིང་བྱེད་འདོད་ཅེས་སྨྲས་ཏེ། ཁྱོད་རྣམས་ཀྱིས་མཚོན་ཆ་བཏགས་ནས་འཚབ་འཚུབ་ངང་རི་ལ་ཕྱིན་པའོ། །
DEU 1:42 དཀོན་མཆོག་ཡ་ཝཱེས་བདག་ལ་འདི་སྐད་དུ། ཁྱོད་ཀྱིས་ཁོ་རྣམས་ལ་འདི་ལྟར་སྨྲོས་ཤིག ཁྱོད་རྣམས་ཡར་མ་འགྲོ། འཐབ་འཛིང་ཡང་མ་བྱེད། གང་ལ་ཞེ་ན། ང་རང་ཁྱོད་ཅག་གི་དཀྱིལ་དུ་མེད་པས་ཁྱོད་རྣམས་དགྲ་བོའི་མདུན་ནས་ཕམ་པར་འགྱུར་ཉེན་ཡོད་ཅེས་པའོ་ཞེས་གསུངས་སོ། །
DEU 1:43 དེ་ནས་ངས་ཁྱོད་ཅག་ལ་གཏམ་དེ་སྨྲས་ནའང་ཁྱོད་རྣམས་ཀྱིས་མ་མཉན་པར། དཀོན་མཆོག་ཡ་ཝཱེའི་བཀའ་དང་འགལ་ནས་རང་དགར་ཡར་རི་ལ་འགོས་པ་དང་།
DEU 1:44 རི་ལ་གནས་པའི་ཨེ་མོར་པ་རྣམས་ཡོང་ནས་ཁྱོད་རྣམས་ལ་རྒོལ་ཞིང་། ཁྱོད་ཅག་འབུ་སྦྲང་གིས་འདེད་པ་ལྟར་བྱས་པ་དང་། སེ་ཨིར་ནས་ཧོར་མཱའི་བར་དུ་ཁྱོད་རྣམས་ཕམ་པར་བརྒྱབ།
DEU 1:45 དེ་ནས་ཁྱོད་རྣམས་ཕྱིར་ལོག་ནས་དཀོན་མཆོག་ཡ་ཝཱེའི་སྤྱན་དྲུང་དུ་ངུས་ནའང་། དཀོན་མཆོག་ཡ་ཝཱེས་ཁྱོད་རྣམས་ཀྱི་སྐད་ལ་མ་གསན། སྙན་ཡང་མ་གཏད།
DEU 1:46 ཁྱོད་རྣམས་དེ་བཞིན་ཀཱ་དེའེ་ཤཱ་ནས་ཉིན་མང་པོར་ལུས་ཤིང་དེར་གནས་པའོ། །
DEU 2:1 དེ་ནས་དཀོན་མཆོག་ཡ་ཝཱེས་ང་ལ་བསྒོས་པ་ནང་བཞིན། རང་ཅག་ཁ་ཕྱིར་འཁོར་ཏེ་རྒྱ་མཚོ་དམར་པོའི་ལམ་དེད་ནས་དབེན་སྟོང་དུ་ཕྱིན་པ་དང་། རི་བོ་སེ་ཨིར་ནས་ཉིན་མང་པོར་འཁོར་བ་ཡིན།
DEU 2:2 དེ་ནས་དཀོན་མཆོག་ཡ་ཝཱེས་ང་ལ་འདི་སྐད་དུ།
DEU 2:3 ཁྱོད་ཚོས་རི་བོ་འདིར་བསྐོར་བ་བརྒྱབ་ནས་ཉིན་མང་པོ་འགོར་བས་ད་ནི་བྱང་ཕྱོགས་སུ་ལམ་ཁ་སྒྱུར་ལ།
DEU 2:4 ཁྱོད་ཀྱིས་མི་རྣམས་ལ་འདི་ལྟར། ཁྱོད་ཅག་གི་སྤུན་ཟླ་ཨེ་སཱབ་ཀྱི་བུ་རབས་ཚ་རྒྱུད་ནི་སེ་ཨིར་ཡུལ་དུ་གནས་ཤིང་། ད་ལྟ་ཁྱོད་ཅག་ཁོ་རྣམས་ཀྱི་ས་མཚམས་བརྒྱུད་ནས་འགྲོ་དགོས། ཁོ་རྣམས་ཁྱོད་ཅག་ལ་འཇིགས་སྲིད་པས་དོགས་ཟོན་ནན་མོ་བྱོས།
DEU 2:5 ཁོ་རྣམས་ལ་ཁོང་ཁྲོ་མ་སློང་ཞིག བདག་གིས་སེ་ཨིར་རི་རྒྱུད་ནི་ཨེ་སཱབ་ལ་ས་སྐལ་དུ་སྤྲད་ཡོད་པས། དེ་དག་གི་ཡུལ་ལས་ས་རྐང་མཐིལ་ཙམ་ཡང་བདག་གིས་ཁྱོད་རྣམས་ལ་སྤྲོད་པར་མི་བྱའོ། །
DEU 2:6 ཁྱོད་ཅག་གིས་ཁོ་རྣམས་ལ་དངུལ་སྤྲད་དེ་ཁ་ཟས་ཉོས་ནས་བཟའ་དགོས་ལ། ཆུ་ཡང་ཉོས་ནས་འཐུང་དགོས།
DEU 2:7 ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལག་གི་ལས་ཀ་ཐམས་ཅད་ལ་བྱིན་རླབས་མཛད་པ་དང་། ཁྱོད་རྣམས་དབེན་སྟོང་ཆེན་པོ་འདི་ནས་ཇི་ལྟར་སྐྱོད་པའང་ཁོང་གིས་མཁྱེན་ལ། ལོ་ངོ་བཞི་བཅུའི་རིང་དུ་ཁྱོད་ཅག་གི་དཀོན་མཆོག་ཡ་ཝཱེ་ཁྱོད་ཅག་དང་ལྷན་དུ་བཞུགས་ཤིང་། ཁྱོད་ཅག་ལ་མ་འདང་ས་ཅི་ཡང་བྱུང་མེད་ཅེས་བསྒོས་ཤིག་ཅེས་གསུངས་སོ། །
DEU 2:8 དེ་བས་རང་ཅག་སེ་ཨིར་དུ་ཡོད་པའི་རང་ཅག་གི་སྤུན་ཟླ་ཨེ་སཱབ་ཀྱི་བུ་རབས་ཚ་རྒྱུད་རྣམས་བརྒལ་ནས་ཕར་བསྐྱོད་པ་དང་། ཨ་ར་པཱའི་ལམ་དེད་ནས་ཨེ་ལད་དང་ཨེ་ཙི་ཡོན་གེ་བེར་ལ་སླེབས་ཤིང་། དེ་ནས་མོ་ཨབ་ཀྱི་དབེན་སྟོང་ཕྱོགས་སུ་ཆས་སོ། །
DEU 2:9 དཀོན་མཆོག་ཡ་ཝཱེས་ང་ལ། ཁྱོད་ཀྱིས་མོ་ཨབ་པ་རྣམས་དགྲ་རུ་འཛིན་མི་རུང་ལ། ཁོ་རྣམས་དང་འཐབ་འཛིང་ཡང་བྱེད་མི་རུང་། བདག་གིས་ཨར་གྱི་ཡུལ་ནི་ལོད་ཐུའི་བུ་རྒྱུད་ལ་ས་སྐལ་དུ་སྤྲད་པ་ཡིན་པས། ངས་ཁོ་ཚོའི་ཡུལ་ནས་ཁྱོད་ལ་ཅི་ཡང་མི་སྦྱིན།
DEU 2:10 སྔོན་ཆད་ཡུལ་དེར་ཨེ་མཱ་པ་རྣམས་བསྡད་ཡོད་པ་དང་། མི་རིགས་དེ་ནི་མི་གྲངས་མང་ཞིང་གཟུགས་རིང་ལ་ཨ་ནག་པ་དང་མཚུངས་སོ། །
DEU 2:11 དེ་དག་ནི་ཨ་ནག་མི་རིགས་ཀྱི་མི་དང་འདྲ་བར་རེ་པཱ་མི་རིགས་ཡིན་ནའང་། མོ་ཨབ་པ་རྣམས་ཀྱིས་ཁོ་རྣམས་ལ་ཨེ་མཱ་པ་ཞེས་མིང་བཏགས།
DEU 2:12 སྔར་ཧོར་པ་རྣམས་ཀྱང་སེ་ཨིར་དུ་བསྡད་ཡོད་ནའང་། ཨེ་སཱབ་ཀྱི་བུ་རབས་ཚ་རྒྱུད་རྣམས་ཀྱིས་དེ་དག་གི་ས་སྐལ་ཕྲོགས་ཤིང་དེ་རྣམས་ཚར་བཅད་ནས་དེའི་ཤུལ་དུ་བསྡད། དེ་ནི་ཡེས་ར་ཨེལ་གྱིས་དཀོན་མཆོག་ཡ་ཝཱེས་ཁོ་ཚོར་ས་སྐལ་དུ་གནང་བའི་ཡུལ་དུ་བྱས་པ་ནང་བཞིན་ཡིན་ནོ། །
DEU 2:13 དཀོན་མཆོག་ཡ་ཝཱེས་ད་ནི་ཡར་ལོངས་ལ་ཟེ་རེད་གྲོག་རོང་གི་ཕར་ཁ་རུ་སོང་ཞིག་ཅེས་བཀའ་བསྩལ་པས། རང་ཅག་ཟེ་རེད་གྲོག་རོང་བརྒལ་བ་ཡིན།
DEU 2:14 རང་ཅག་ཀཱ་དེའེ་ཤཱ་པར་ནེ་ཨ་དང་བྲལ་ནས་ཟེ་རེད་གྲོག་རོང་བརྒལ་བའི་བར་དུ་ལོ་སུམ་ཅུ་སོ་བརྒྱད་འགོར་བ་དང་། ཡང་དཀོན་མཆོག་ཡ་ཝཱེས་ཁོ་རྣམས་ལ་མནའ་བཞེས་པ་ནང་བཞིན་དུས་རབས་དེའི་དམག་མི་ཐམས་ཅད་སྒར་ཁ་རུ་གཤེགས་པ་ཡིན།
DEU 2:15 དཀོན་མཆོག་ཡ་ཝཱེའི་ཕྱག་གིས་ཁོ་རྣམས་ལ་རྒོལ་ཞིང་སྒར་ཁ་ནས་རྩ་མེད་མཛད་པ་ཡིན།
DEU 2:16 དམག་མི་ཐམས་ཅད་མི་རྣམས་ཀྱི་ཁྲོད་ནས་གཤེགས་པའི་རྗེས་སུ།
DEU 2:17 དཀོན་མཆོག་ཡ་ཝཱེས་ང་ལ་འདི་སྐད་དུ།
DEU 2:18 དེ་རིང་ཁྱོད་མོ་ཨབ་ཀྱི་མངའ་ཁོངས་ཨར་ཞེས་པ་བརྒལ་ནས་འགྲོ་དགོས།
DEU 2:19 ཁྱོད་རང་ཨམ་མོན་པའི་ཉེ་བར་སླེབས་དུས་དེ་དག་དགྲ་རུ་འཛིན་མི་རུང་ལ། ཁོ་རྣམས་ལ་ཁོང་ཁྲོ་ཡང་སློང་མི་རུང་། བདག་གིས་ཡུལ་དེ་ནི་ལོད་ཐུའི་བུ་རྒྱུད་ལ་ས་སྐལ་དུ་སྤྲད་ཡོད་པས། ཨམ་མོན་པའི་ཡུལ་ནི་ཁྱོད་ལ་ས་སྐལ་དུ་སྦྱིན་པར་མི་བྱའོ་ཞེས་གསུངས།
DEU 2:20 ཡུལ་དེ་ཡང་རེ་པཱ་པའི་ཡུལ་དུ་བརྩིས་ཤིང་། སྔར་རེ་པཱ་མི་རིགས་ཡུལ་དེར་གནས་ལ་ཨམ་མོན་པས་ཁོ་རྣམས་ལ་ཟམ་ཟུམ་པ་ཞེས་འབོད་པ་དང་།
DEU 2:21 མི་རིགས་དེ་ནི་ཨ་ནག་མི་རིགས་དང་འདྲ་བར་མི་གྲངས་མང་ཞིང་གཟུགས་པོ་ཆེ་ནའང་། དཀོན་མཆོག་ཡ་ཝཱེས་ཨམ་མོན་པའི་སྔུན་ནས་མི་རིགས་དེ་མེད་པར་མཛད་པས། ཨམ་མོན་པས་དེ་དག་གི་ཡུལ་བདག་གིར་བཟུང་ནས་དེ་རུ་བསྡད།
DEU 2:22 དེ་ནི་སྔར་དཀོན་མཆོག་ཡ་ཝཱེས་སེ་ཨིར་དུ་གནས་པའི་ཨེ་སཱབ་ཀྱི་བུ་རབས་ཚ་རྒྱུད་ལ་ཇི་ལྟར་མཛད་པ་ནང་བཞིན་ཡིན་ཏེ། ཁོང་གིས་ཧོར་མི་རིགས་དེ་དག་གི་སྔུན་ནས་མེད་པར་མཛད་པས། དེ་དག་གིས་ཧོར་པའི་ཡུལ་བདག་གིར་བཟུང་ནས་དེ་རིང་ཉིན་མོའི་བར་དུ་དེར་བསྡད།
DEU 2:23 ཡང་ཨ་ཝི་པ་རྣམས་གཱ་ཟཱའི་ཉེ་འགྲམ་གྱི་གྲོང་ཚོ་རེ་རེར་གཞིས་ཆགས་ཀྱང་། ཀབ་ཐོར་ཡུལ་ནས་ཐོན་པའི་ཀབ་ཐོར་མི་རིགས་ཀྱིས་ཨ་བིད་པ་རྣམས་མེད་པར་བཏང་སྟེ། དེ་དག་གི་ཤུལ་དུ་གཞིས་ཕབ་པའོ། །
DEU 2:24 དཀོན་མཆོག་ཡ་ཝཱེས་ད་ཡར་ལོངས་ལ་ཨར་ནོན་ལུང་པ་བརྒྱུད་ནས་སོང་ཞིག ངས་ཨེ་མོར་པ་སི་ཧོན་ཏེ་ཧེ་སི་པོན་གྱི་རྒྱལ་པོ་དང་ཁོའི་ས་ནི་ཁྱོད་རྣམས་ཀྱི་ལག་ཏུ་གཏད་པ་ཡིན། ཁོ་དང་འཐབ་འཛིང་བྱས་ནས་ཡུལ་དེ་བདག་གིར་ཟུངས་ཤིག
DEU 2:25 དེ་རིང་བདག་གིས་གནམ་འོག་ཀུན་ཏུ་གནས་པའི་མི་རིགས་ཐམས་ཅད་ལ་ཁྱོད་ཀྱི་གནས་ཚུལ་ཐོས་ནས་འཇིགས་ཤིང་སྐྲག་ཏུ་འཇུག་པ་དང་། ཁྱོད་ཀྱི་རྐྱེན་གྱིས་དངངས་ནས་འདར་བར་འགྱུར་ཞེས་བཀའ་བསྩལ་ཏོ། །
DEU 2:26 དེར་ངས་ཀེ་དེ་མོད་དབེན་སྟོང་ནས་ཧེ་སི་པོན་གྱི་རྒྱལ་པོ་སི་ཧོན་གྱི་དྲུང་དུ་བང་ཆེན་བཏང་བ་དང་། ཞི་བདེའི་གཏམ་འདི་ལྟར།
DEU 2:27 ངེད་རྣམས་ཁྱེད་ཀྱི་ཡུལ་བརྒྱུད་ནས་འགྲོ་རུ་ཆུག་དང་། ང་ཚོ་གཞུང་ལམ་གཅིག་པུ་ནས་འགྲོ་བ་ལས་གཡས་གཡོན་གང་དུའང་གཟུར་བར་མི་བྱ།
DEU 2:28 ང་ཚོས་ཁྱེད་ཀྱི་ལག་ནས་ཁ་ཟས་དངུལ་གྱིས་ཉོས་ནས་ཟོས་ཆོག་ལ། ཆུ་ཡང་དངུལ་གྱིས་ཉོས་ནས་འཐུང་ཆོག ངེད་རྣམས་རྐང་ཐང་གིས་ཕར་འགྲོ་བར་གནོངས།
DEU 2:29 ངེད་རྣམས་ཡོར་དན་གཙང་པོ་བརྒལ་ནས་ངེད་ཀྱི་དཀོན་མཆོག་ཡ་ཝཱེས་ངེད་ཅག་ལ་གནང་བའི་ཡུལ་དུ་འབྱོར་རེག་བར་དུ། སེ་ཨིར་དུ་གནས་པའི་ཨེ་སཱབ་ཀྱི་བུ་རྣམས་དང་། ཨར་དུ་གནས་པའི་མོ་ཨབ་པ་རྣམས་ཀྱིས་ངེད་རྣམས་ལ་བྱས་པ་ལྟར་དུ་སྒྲུབས་ཤིག་ཅེས་ཞུས་ནའང་།
DEU 2:30 ཧེ་སི་པོན་གྱི་རྒྱལ་པོ་སི་ཧོན་གྱིས་རང་ཅག་ཁོའི་ཡུལ་བརྒྱུད་ནས་འགྲོ་རུ་མ་བཅུག ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེས་དེ་རིང་ནང་བཞིན་སི་ཧོན་ཁྱོད་ཚོའི་ལག་ཏུ་སྤྲོད་པའི་ཕྱིར། ཁོའི་སེམས་གྱོང་པོ་དང་མཁྲེགས་པོར་མཛད་པ་ཡིན་ནོ། །
DEU 2:31 དཀོན་མཆོག་ཡ་ཝཱེས་ང་ལ་འདི་སྐད་དུ། ལྟོས་དང་། སི་ཧོན་དང་ཁོའི་ཡུལ་ནི་བདག་གིས་ཁྱོད་ལ་སྤྲོད་པར་བརྩམས་པས། ཁོའི་ཡུལ་བདག་གིར་འཛིན་པའི་ཕྱིར་དུ་ཁྱོད་ཀྱིས་དེ་ལེན་པར་རྩོམས་ཤིག་ཅེས་བཀའ་བསྩལ་ཏོ། །
DEU 2:32 དེ་ནས་སི་ཧོན་ནི་རང་གི་མི་ཐམས་ཅད་དང་མཉམ་དུ་ཡོང་ནས་རང་ཅག་ལ་རྒོལ་ཞིང་། ཡ་ཧ་ཙཱ་རུ་རང་ཅག་དང་འཐབ་འཛིང་བྱས།
DEU 2:33 རང་ཅག་གི་དཀོན་མཆོག་ཡ་ཝཱེས་ཁོ་རང་ཅག་ལ་སྤྲད་པས། རང་ཅག་གིས་ཁོ་དང་ཁོའི་བུ་རྒྱུད་དང་མི་ཐམས་ཅད་བསད་པ་ཡིན།
DEU 2:34 སྐབས་དེར་རང་ཅག་གིས་ཁོའི་གྲོང་ཁྱེར་ཐམས་ཅད་དབང་དུ་བསྡུས་པ་དང་། གྲོང་ཁྱེར་རེ་རེའི་སྐྱེས་པ་དང་བུད་མེད་དང་བྱིས་པ་རྣམས་མེད་པར་བཏང་ནས་མི་གཅིག་ཀྱང་ཤུལ་དུ་མ་བསྐྱུར།
DEU 2:35 རང་རང་གི་ཕྱིར་ཕྲོགས་པའི་སྒོ་ཕྱུགས་རྣམས་དང་གྲོང་ཁྱེར་རྣམས་བླངས་ནས་ཐོབ་པའི་བཅོམ་ནོར་འབའ་ཞིག་བསྐྱུར་བ་ཡིན།
DEU 2:36 ཨར་ནོན་གྲོག་རོང་གི་འགྲམ་དུ་ཡོད་པའི་ཨ་རོ་ཨེར་དང་། གཡང་རོང་དུ་ཆགས་པའི་གྲོང་ཁྱེར་ནས་གིལ་ཨད་ཀྱི་བར་དུ་གྲོང་ཁྱེར་ཆེན་པོ་རང་ཅག་གིས་མི་ལོན་པ་གང་ཡང་མེད་ལ། རང་ཅག་གི་དཀོན་མཆོག་ཡ་ཝཱེས་དེ་ཐམས་ཅད་རང་ཅག་ལ་སྤྲད་པ་ཡིན།
DEU 2:37 ཨམ་མོན་པའི་ཡུལ་དང་། ཡཱབ་པོག་ཆུ་བོའི་འགྲམ་རྒྱུད་དང་རི་ཁུལ་གྱི་གྲོང་ཁྱེར་རྣམས་དང་། རང་ཅག་གི་དཀོན་མཆོག་ཡ་ཝཱེས་འགྲོ་མི་རུང་བར་གསུངས་པའི་ཡུལ་རྣམས་ལ་བདག་ཅག་མ་བཅར་ཏོ། །
DEU 3:1 ཕྱིས་སུ་ང་ཚོས་ཁ་ཕྱིར་འཁོར་ཏེ་པཱ་ཤན་གྱི་ལམ་དེད་ནས་ཡར་སོང་བ་ན། པཱ་ཤན་གྱི་རྒྱལ་པོ་ཨོག་གིས་རང་གི་མི་ཐམས་ཅད་ཁྲིད་ནས་ཨེ་དྲེ་ཨི་ས་ཆར་བདག་ཅག་དང་འཐབ་པར་སླེབས།
DEU 3:2 དཀོན་མཆོག་ཡ་ཝཱེས་ང་ལ་འདི་སྐད་དུ། བདག་གིས་ཁོ་དང་ཁོའི་མི་རྣམས་དང་ཡུལ་ཐམས་ཅད་ཁྱོད་ཀྱི་ལག་ཏུ་གཏད་ཡོད་པས་འཇིགས་མི་དགོས། ཅི་ལ་ཞེ་ན། ཁྱོད་ཀྱིས་ཧེ་སི་པོན་དུ་ཡོད་པའི་ཨེ་མོར་པའི་རྒྱལ་པོ་སི་ཧོན་ལ་ཅི་བྱས་པ་ནང་བཞིན་ཁོ་རྣམས་ལའང་དེ་ལྟར་བྱེད་ངེས་ཡིན་ཞེས་གསུངས་སོ། །
DEU 3:3 དེ་ནས་རང་རེའི་དཀོན་མཆོག་ཡ་ཝཱེས་པཱ་ཤན་གྱི་རྒྱལ་པོ་ཨོག་དང་ཁོའི་མི་ཐམས་ཅད་ང་ཚོའི་ལག་ཏུ་སྤྲད་པས། རང་ཅག་གིས་དེ་རྣམས་ལས་གཅིག་ཀྱང་མ་ལུས་པར་རྩ་མེད་བཏང་བ་ཡིན།
DEU 3:4 སྐབས་དེར་རང་ཅག་གིས་ཁོའི་གྲོང་ཁྱེར་ཐམས་ཅད་བླངས་ནས་གཅིག་ཀྱང་ལྷག་མེད་དེ། པཱ་ཤན་གྱི་རྒྱལ་པོ་ཨོག་གི་མངའ་ཁུལ་གྲོང་ཁྱེར་དྲུག་ཅུ་སྟེ། ཨར་གོབ་ཀྱི་ཡུལ་འཁོར་ཐམས་ཅད་བླངས།
DEU 3:5 གྲོང་ཁྱེར་དེ་ཐམས་ཅད་ནི་ལྕགས་རི་མཐོན་པོའི་བཙན་རྫོང་བརྩིགས་ཤིང་། མཁར་སྒོ་དང་སྒོ་གཏན་ཡོད་ལ། ཡང་མཐའ་འཁོར་ལ་མཁར་བརྩིགས་མེད་པའི་གྲོང་ཚོ་མང་པོ་ཡོད།
DEU 3:6 རང་ཅག་གིས་ཧེ་སི་པོན་གྱི་རྒྱལ་པོ་སི་ཧོན་རྩ་མེད་བཏང་བ་ནང་བཞིན་ཁོ་ཚོ་ཡང་མེད་པར་བཏང་ཞིང་། གྲོང་ཁྱེར་སོ་སོའི་སྐྱེས་པ་དང་བུད་མེད་དང་ཕྲུ་གུ་རྣམས་ཀྱང་རྩ་མེད་བཏང་བ་ཡིན།
DEU 3:7 འོན་ཀྱང་གྲོང་ཁྱེར་ནང་གི་སྒོ་ཕྱུགས་དང་བཅོམ་ནོར་ཐམས་ཅད་བླངས་ནས་བདག་གིར་བཟུང་བ་ཡིན་ནོ། །
DEU 3:8 སྐབས་དེར་རང་ཅག་གིས་ཡོར་དན་གཙང་པོའི་ཤར་ཕྱོགས་ཀྱི་ཨེ་མོར་པའི་རྒྱལ་པོ་གཉིས་ཀྱི་ལག་ནས། ཨར་ནོན་གྲོག་རོང་ནས་རི་བོ་ཧེར་མོན་བར་གྱི་ཡུལ་རྣམས་བླངས།
DEU 3:9 ཚི་ཏུན་པ་རྣམས་ཀྱིས་རི་བོ་ཧེར་མོན་ལ་སིར་ཡོན་ཞེས་འབོད་ཀྱང་། ཨེ་མོར་པ་རྣམས་ཀྱིས་དེར་སེ་ནིར་ཞེས་འབོད་པ་ཡིན།
DEU 3:10 དེ་ལྟར་ཐང་གི་གྲོང་ཁྱེར་ཐམས་ཅད་དང་གིལ་ཨད་ཀྱི་ཡུལ་ཀུན། པཱ་ཤན་གྱི་ཡུལ་ཐམས་ཅད། སལ་ཀཱ་དང་ཨེ་དྲེ་ཨིའི་བར་དུ་ཨོག་གི་རྒྱལ་ཁམས་ཐམས་ཅད་རང་ཅག་གིས་བླངས་པ་ཡིན།
DEU 3:11 པཱ་ཤན་གྱི་རྒྱལ་པོ་ཨོག་གཅིག་པུ་རེ་པཱ་མི་རིགས་ཀྱི་ཤུལ་དུ་ལུས། ལྟོས་དང་། ཁོའི་ཉལ་ཁྲི་ལྕགས་ཀྱི་ཉལ་ཁྲི་ཡིན་ཏེ། དེའི་རིང་ཚད་ལ་ཁྲུ་དགུ་དང་ཞེང་ལ་ཁྲུ་བཞི་ཡོད། ཉལ་ཁྲི་དེ་ཨམ་མོན་པ་རྣམས་ཀྱི་ཡུལ་རབ་བཱ་བྱ་བར་ཡོད་དོ། །
DEU 3:12 སྐབས་དེར་རང་ཅག་གིས་ཡུལ་དེ་བདག་གིར་བཟུང་། བདག་གིས་ཨར་ནོན་གྲོག་རོང་འགྲམ་གྱི་ཨ་རོ་ཨེར་ནས་རི་བོ་གིལ་ཨད་ཀྱི་ཕྱེད་ཀ་དང་། དེའི་གྲོང་ཁྱེར་རྣམས་རུ་བེན་པ་དང་གཱ་རྡུ་པ་རྣམས་ལ་སྤྲད་པ་ཡིན།
DEU 3:13 གིལ་ཨད་ཀྱི་ཡུལ་གཞན་རྣམས་དང་རྒྱལ་པོ་ཨོག་གི་མངའ་ཁོངས་ཏེ། པཱ་ཤན་ཡུལ་ཐམས་ཅད་ནི་བདག་གིས་མཱ་ན་ཤེའི་ཚོ་པ་ཕྱེད་ཀར་སྤྲད་པ་ཡིན། ཨར་གོབ་ཀྱི་ཡུལ་ཐམས་ཅད་དེ་པཱ་ཤན་གྱི་ཡུལ་ཐམས་ཅད་ལ་རེ་པཱ་པའི་ཡུལ་ཞེས་བཏགས་སོ། །
DEU 3:14 མཱ་ན་ཤེ་པ་ཡཱ་ཨིར་གྱིས་ཨར་གོབ་ཀྱི་མངའ་ཁུལ་ཐམས་ཅད་དང་། གེ་ཤུར་པའི་ཡུལ་དང་མ་ཨ་ཀཱ་པའི་ས་ཐམས་ཅད་བཟུང་ཞིང་། ད་ལྟའི་བར་དུ་པཱ་ཤན་ཡུལ་ལ་ཧ་ཝོད་ཨིར་ཞེས་རང་གི་རུས་མིང་སྦྱར་ཡོད།
DEU 3:15 ཡང་བདག་གིས་གིལ་ཨད་ནི་མཱ་ཀིར་ལ་སྤྲད་པ་ཡིན།
DEU 3:16 གིལ་ཨད་ནས་ཨར་ནོན་གྲོག་རོང་བར་དུ། གྲོག་རོང་གི་དཀྱིལ་ས་མཚམས་བྱས་ནས་ཨམ་མོན་པའི་མཐའ་མཚམས་ཀྱི་ཡཱབ་པོག་གཙང་པོའི་བར་དུ་རུ་བེན་པ་དང་གཱ་རྡུ་པ་རྣམས་ལ་སྤྲད་ཅིང་།
DEU 3:17 ཡང་ཨ་ར་པཱ་སྟེ། ཤར་ཕྱོགས་ཀྱི་ཨ་ར་པཱ་དང་ཡོར་དན་གཙང་པོ་ས་མཚམས་བྱས་ཏེ་ཀིན་ནེ་རོད་ནས་ཨ་ར་པཱའི་ཚྭ་མཚོ་བར་དང་། ཕིས་གའི་རི་འདབས་ཀྱི་ཤར་རྒྱུད་ནི་ཁོ་རྣམས་ལ་སྤྲད་པའོ། །
DEU 3:18 དེའི་དུས་སུ་ངས་ཁྱོད་ཅག་ལ། ཁྱོད་ཅག་གི་དཀོན་མཆོག་ཡ་ཝཱེས་ཡུལ་འདི་ཁྱོད་རྣམས་ཀྱིས་བདག་གིར་འཛིན་པའི་ཕྱིར་དུ་ཁྱོད་རྣམས་ལ་གནང་ཡོད་པས། ཁྱོད་ཅག་གི་དམག་མི་རྣམས་ཀྱིས་མཚོན་ཆ་སྤྲས་ནས་སོ་སོའི་སྤུན་ཟླ་སྟེ་ཡེས་ར་ཨེལ་པའི་མདུན་ནས་གཙང་པོའི་ཕ་རོལ་ཏུ་བསྐྱོད་དགོས།
DEU 3:19 ཁྱོད་ཅག་གི་ཆུང་མ་དང་བུ་ཕྲུག ཕྱུགས་ཟོག་བཅས་འབའ་ཞིག་བདག་གིས་ཁྱོད་རྣམས་ལ་གནང་བའི་གྲོང་ཁྱེར་དུ་བསྡད་ཆོག ངས་ཁྱོད་རྣམས་ལ་ཕྱུགས་ཟོག་ཧ་ཅང་མང་བ་ཤེས།
DEU 3:20 དཀོན་མཆོག་ཡ་ཝཱེས་ཁྱོད་ཅག་གི་སྤུན་ཟླ་རྣམས་ལའང་ཁྱོད་རྣམས་དང་འདྲ་བར་ངལ་གསོ་གནང་སྟེ། ཁོ་རྣམས་ཀྱིས་ཀྱང་ཁྱོད་ཅག་གི་དཀོན་མཆོག་ཡ་ཝཱེས་ཡོར་དན་གཙང་པོའི་ནུབ་ཕྱོགས་སུ་ཁོ་ཚོར་གནང་བའི་ཡུལ་དེ་བདག་གིར་བཟུང་བའི་རྗེས་སུ། ཁྱོད་རྣམས་ད་གཟོད་བདག་གིས་ཁྱོད་ཅག་མི་རེ་རེར་སྤྲད་པའི་ཡུལ་དུ་ཕྱིར་ལོག་ཆོག་པ་ཡིན་ཞེས་བསྒོས་སོ། །
DEU 3:21 སྐབས་དེར་ངས་ཡོ་ཤུ་ཨ་ལ་འདི་ལྟར་བསྒོས་ཡོད་དེ། ཁྱོད་ཅག་གི་དཀོན་མཆོག་ཡ་ཝཱེས་རྒྱལ་པོ་དེ་གཉིས་ལ་ཅི་ཞིག་མཛད་པ་ཁྱོད་ཀྱིས་དངོས་སུ་མཐོང་ཡོད། ཁོང་གིས་ཁྱོད་འགྲོ་བར་འགྱུར་བའི་རྒྱལ་ཁམས་ཀུན་ལའང་དེ་བཞིན་མཛད་ངེས།
DEU 3:22 ཁྱོད་རྣམས་ཁོ་ཚོར་མི་འཇིགས་པར་གྱིས་ཤིག ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་འཐབ་གྲོགས་མཛད་དོ་ཞེས་པའོ། །
DEU 3:23 སྐབས་དེར་ངས་དཀོན་མཆོག་ཡ་ཝཱེ་ལ་འདི་ལྟར།
DEU 3:24 ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་གྲགས་པ་དང་མཐུ་སྟོབས་ལྡན་པའི་ཕྱག་ནི་ཞབས་ཕྱི་བདག་ལ་སྟོན་པར་བརྩམས་ཤིང་། ཁྱེད་ཀྱི་འཕྲིན་ལས་དང་དོན་ངོ་མཚར་ཅན་གྱི་སྟོབས་ལ་འགྲན་ནུས་པའི་ལྷ་ཞིག་གནམ་ས་གང་དུ་མཆིས་སམ།
DEU 3:25 ཁྱེད་ཀྱིས་ང་རང་ཡོར་དན་གཙང་པོ་བརྒལ་ནས་མཛེས་སྡུག་ལྡན་པའི་ཡུལ་ཏེ། ཡིད་དུ་འོང་བའི་རི་ཁུལ་དང་ལེ་པཱ་ནོན་ལ་བལྟ་རུ་འཇུག་པར་མཛོད་ཅེས་གསོལ་བ་བཏབ་ཀྱང་།
DEU 3:26 ཁྱོད་ཅག་གི་རྐྱེན་གྱིས་དཀོན་མཆོག་ཡ་ཝཱེ་ང་ལ་ཐུགས་ཁྲོས་ནས་ངའི་ཞུ་བར་མ་གསན་ཞིང་། ཁྱོད་ཅག་གི་དཀོན་མཆོག་ཡ་ཝཱེས་ང་ལ། ཁྱོད་ཀྱིས་ཚོད་ཟུངས། ད་ནི་དོན་དེ་བདག་ལ་ཡང་བསྐྱར་མི་གླེང་བར་གྱིས།
DEU 3:27 ཁྱོད་རང་རི་བོ་ཕིས་གའི་རྩེ་ལ་སོང་ནས་དངོས་སུ་ཤར་ལྷོ་ནུབ་བྱང་ལ་ལྟོས་ཤིག ཡིན་ནའང་ཁྱོད་ཡོར་དན་གཙང་པོའི་ཕ་རོལ་ཏུ་འགྲོ་མི་རུང་ངོ་། །
DEU 3:28 ཡོ་ཤུ་ཨ་ཡིས་མི་འདི་རྣམས་ཀྱི་འགོ་ཁྲིད་དེ་གཙང་པོ་བརྒལ་ནས། ཁྱོད་ཀྱིས་མཐོང་བའི་ཡུལ་འདི་ཁོ་རྣམས་ལ་འཐོབ་པར་བྱེད་དགོས་པས། ཁྱོད་ཀྱིས་ཁོ་ལ་བཀའ་བསྒོས་ནས་ཁོ་རང་བརྟན་པོ་བཟོ་བ་དང་ཁོ་ལ་སྐུལ་འདེད་གཏོང་དགོས་ཞེས་བཀའ་བསྩལ་པས།
DEU 3:29 ངེད་ཅག་པེད་ཕེ་ཨོར་བྱ་བའི་ཕར་ཕྱོགས་ཀྱི་ལུང་པ་རུ་ལུས་པ་ཡིན་ནོ། །
DEU 4:1 ཀྱེ་ཡེས་ར་ཨེལ་པ་རྣམས་ཀྱིས་ལྟོས་དང་། དེ་རིང་ཁྱོད་ཅག་གིས་ངས་སྔར་ནས་ཁྱོད་རྣམས་ལ་ཁྲིད་པའི་སྒྲིག་ཁྲིམས་དང་སྲོལ་ཡིག་ལ་མཉན་དགོས། དེ་དག་བསྲུང་བར་གྱིས་དང་ཁྱོད་རྣམས་འཚོ་ཐུབ་ལ། ཁྱོད་ཅག་གི་མེས་པོ་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་ཡུལ་དུ་སོང་ནས་དེར་བདག་པོ་རྒྱག་ནུས་པ་ཡིན།
DEU 4:2 བདག་གིས་ཁྱོད་ཅག་ལ་བསྒོས་པའི་བཀའ་ལ་སྣོན་ཕྲི་གང་ཡང་བྱེད་མི་རུང་། དེ་ནས་ངས་ཁྱོད་ཅག་ལ་བསྒོས་པ་སྟེ་ཁྱོད་རྣམས་ཀྱི་དཀོན་མཆོག་ཡ་ཝཱེས་བསྩལ་པའི་བཀའ་རྣམས་བསྲུང་ནུས་པ་ཡིན།
DEU 4:3 དཀོན་མཆོག་ཡ་ཝཱེས་པཱ་ཨལ་ཕེ་ཨོར་ཡུལ་གྱི་རྐྱེན་གྱིས་ཅི་མཛད་པ་ཁྱོད་ཅག་གིས་དངོས་སུ་མཐོང་བ་དང་། ལྷ་པཱ་ཨལ་ཕེ་ཨོར་གྱི་རྗེས་སུ་འབྲངས་པའི་མི་ཐམས་ཅད་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་གི་ཁྲོད་ནས་མེད་པར་མཛད།
DEU 4:4 ཁྱོད་ཅག་གི་དཀོན་མཆོག་ཡ་ཝཱེ་ལ་འགྱུར་བ་མེད་པར་བརྟེན་པ་ཁྱོད་རྣམས་འབའ་ཞིག་དེ་རིང་ཉིན་མོའི་བར་དུ་གནས་པ་ཡིན་ནོ། །
DEU 4:5 ལྟོས་དང་། བདག་གིས་ང་ཡི་དཀོན་མཆོག་ཡ་ཝཱེས་ང་ལ་བསྒོས་པའི་བཀའ་བཞིན་དུ། སྒྲིག་ཁྲིམས་དང་སྲོལ་ཡིག་རྣམས་ཁྱོད་ཅག་ལ་ཁྲིད་པ་སྟེ། ཁྱོད་རྣམས་སོང་ནས་རང་ལ་དབང་བར་འགྱུར་བའི་ཡུལ་ནས་དེ་ལྟར་བསྒྲུབ་པའི་ཕྱིར་དུའོ། །
DEU 4:6 དེ་བས་ཁྱོད་རྣམས་ཀྱིས་གཟབ་གཟབ་ངང་དེ་རྣམས་བསྲུངས་ནས་བསྒྲུབ་དགོས། ཅི་ལ་ཞེ་ན། མི་རྣམས་ཀྱི་མིག་ལ་དེ་ནི་ཁྱོད་ཅག་གི་ཤེས་རབ་དང་བློ་གྲོས་ཡིན་པས་སོ། །ཁོ་ཚོས་སྒྲིག་ཁྲིམས་འདི་ཐམས་ཅད་ཐོས་ན། མི་རིགས་ཆེན་པོ་འདི་ནི་དངོས་གནས་ཤེས་རབ་ཅན་དང་བློ་གྲོས་ཅན་ཞིག་འདུག་ཅེས་སྨྲ་ངེས་ཡིན།
DEU 4:7 རང་ཅག་གིས་ཞུ་འབོད་བྱེད་ཐེངས་རེར་རང་རེའི་ཉེ་བར་བཞུགས་པའི་རང་ཅག་གི་དཀོན་མཆོག་ཡ་ཝཱེ་བཞིན། མི་རིགས་ཆེན་པོ་གཞན་གང་ལ་ཁོ་ཚོའི་ཉེ་བར་སྡོད་པའི་ལྷ་ཞིག་ཡོད་པ་ཡིན་ནམ།
DEU 4:8 ཡང་མི་རིགས་ཆེན་པོ་གང་ལ་འདི་ལྟ་བུའི་སྒྲིག་ཁྲིམས་དང་སྲོལ་ཡིག་དྲང་བདེན་ཏེ། དེ་རིང་ངས་ཁྱོད་རྣམས་ལ་བསྒྲགས་པའི་བཀའ་ཁྲིམས་འདི་ཐམས་ཅད་ལྟ་བུ་ཡོད་པ་ཡིན་ནམ།
DEU 4:9 ཁྱོད་རྣམས་ཀྱིས་དངོས་སུ་མཐོང་བའི་དོན་རྣམས་མི་བརྗེད་པ་དང་། ཡང་དོན་དེ་རྣམས་ཁྱོད་ཅག་གི་མི་ཚེ་གང་པོར་སེམས་ནས་མི་འབོར་བའི་ཆེད་དུ། སྙིང་རུས་བསྐྱེད་ནས་རང་གི་སེམས་དང་བསམ་པ་རྒྱུན་དུ་བསྲུང་དགོས། ཁྱོད་ཅག་གིས་དོན་དེ་རྣམས་རང་གི་བུ་རབས་ཚ་རྒྱུད་རྣམས་ལ་ཤེས་སུ་འཇུག་དགོས།
DEU 4:10 ཁྱོད་རྣམས་རི་བོ་ཧོ་རེབ་ནས་ཁྱོད་ཅག་གི་དཀོན་མཆོག་ཡ་ཝཱེའི་སྤྱན་སྔར་འགྲེང་བའི་ཉིན་དེར། དཀོན་མཆོག་ཡ་ཝཱེས་ང་ལ་འདི་སྐད་དུ། མི་རྣམས་འདིར་སྡུས་ཤིག དེ་དག་ས་སྟེང་ནས་ནམ་འཚོའི་བར་དུ་བདག་ལ་གུས་ཤིང་འཇིགས་ཤེས་པ་དང་། དེ་དག་གིས་རང་གི་བུ་བུ་མོ་རྣམས་ལའང་ཁྲིད་སྟོན་བྱེད་པའི་ཕྱིར་དུ་ངས་ཁོ་རྣམས་ལ་རང་གི་གཏམ་ལ་མཉན་དུ་འཇུག་གོ་ཞེས་བཀའ་བསྩལ་ཡོད།
DEU 4:11 རི་མགོར་མེ་འབར་ནས་མེ་ལྕེ་དགུང་ལ་འཕྱུར་ཏེ་མུན་པ་དང་སྤྲིན་ནག སྨག་རུམ་སྟུག་པོ་བཅས་ཀྱིས་བསྒྲིབས་པའི་དུས་སུ། ཁྱོད་ཅག་ཉེ་སར་འོངས་ཏེ་རི་འདབས་སུ་ལངས་ཡོད།
DEU 4:12 དཀོན་མཆོག་ཡ་ཝཱེས་མེའི་དཀྱིལ་ནས་ཁྱོད་རྣམས་ལ་བཀའ་བསྩལ་པ་ལ། ཁྱོད་ཅག་གིས་གསུང་སྐད་ཐོས་པ་ཙམ་ལས་སྐུ་གཟུགས་ཅི་ཡང་མཇལ་མ་བྱུང་། གསུང་སྐད་འབའ་ཞིག་བྱུང་ནས།
DEU 4:13 ཁོང་གིས་ཉིད་ཀྱི་ཞལ་ཆད་དེ་ཁྱོད་རྣམས་ལ་བསྲུང་བར་བསྒོས་པའི་བཀའ་ཁྲིམས་བཅུ་པོ་དེ་ཁྱོད་ཅག་ལ་བསྒྲགས་ཤིང་། ཡང་དེ་རྣམས་རྡོ་ལེབ་གཉིས་ཀྱི་སྟེང་དུ་བཀོད་པའོ། །
DEU 4:14 སྐབས་དེར་དཀོན་མཆོག་ཡ་ཝཱེས་ང་ལ། སྒྲིག་ཁྲིམས་དང་སྲོལ་ཡིག་རྣམས་ཁྱོད་ཅག་ལ་འཁྲིད་དགོས་པ་དང་། ཁྱོད་རྣམས་སོང་ནས་བདག་གིར་འཛིན་རྒྱུ་ཡིན་པའི་ཡུལ་དུ་དེ་བཞིན་བསྒྲུབ་དགོས་པའི་བཀའ་བསྩལ་ཡོད་དོ། །
DEU 4:15 དཀོན་མཆོག་ཡ་ཝཱེས་རི་བོ་ཧོ་རེབ་ཀྱི་མེའི་དཀྱིལ་ནས་ཁྱོད་ཅག་ལ་གསུང་གནང་བའི་ཉིན་དེར། ཁྱོད་ཅག་གིས་སྐུ་གཟུགས་གང་ཡང་མཐོང་མེད་པས། ཁྱོད་ཚོས་གཟབ་གཟབ་ངང་རང་ཉིད་བསྲུང་དགོས།
DEU 4:16 དེ་ལྟར་མ་བྱས་ཚེ། ཁྱོད་རྣམས་ཀྱིས་ལོག་སྤྱོད་སྤེལ་ནས་རང་གི་ཕྱིར་དུ་སྐུ་རྟེན་འདྲ་མིན་བཞེང་བ་སྟེ། ཕོ་མོའི་གཟུགས་བརྙན་དང་།
DEU 4:17 ཡང་ན་ས་སྟེང་གི་རི་དྭགས་སྣ་ཚོགས་ཀྱི་སྣང་བརྙན་དང་། ཡང་ན་བར་སྣང་གི་འདབ་ཆགས་གཤོག་པ་ཅན་སྣ་ཚོགས་ཀྱི་སྣང་བརྙན།
DEU 4:18 ཡང་ན་ས་སྟེང་གི་ལྟོ་འགྲོའི་རིགས་སྣ་ཚོགས་ཀྱི་སྣང་བརྙན། ཡང་ན་ས་འོག་གི་ཆུ་ནང་དུ་གནས་པའི་ཉ་ཡི་རིགས་སྣ་ཚོགས་ཀྱི་སྣང་བརྙན་བཅས་གང་རུང་བཟོ་ཉེན་ཡོད།
DEU 4:19 ཡང་ཁྱོད་རྣམས་ཀྱིས་མགོ་ཡར་བཀྱགས་ནས་གནམ་ལ་བལྟས་ཏེ། ཁྱོད་ཅག་གི་དཀོན་མཆོག་ཡ་ཝཱེས་གནམ་འོག་ཀུན་ཏུ་གནས་པའི་མི་ཐམས་ཅད་ལ་ལོངས་སྤྱོད་དུ་བསྩལ་པའི་ཉི་ཟླ་སྐར་གསུམ་སྟེ་ནམ་མཁའི་ཚོགས་ཡོད་དོ་ཅོག་མཐོང་བའི་ཚེ། ཡིད་དབང་ཕྲོགས་ནས་དེ་དག་ལ་ཕྱག་འཚལ་བ་དང་བསྙེན་བཀུར་བྱེད་ཉེན་ཆེ།
DEU 4:20 དཀོན་མཆོག་ཡ་ཝཱེས་ཁྱོད་རྣམས་དེ་རིང་ནང་བཞིན་ཁོང་གི་ནོར་བུ་དང་ཁོང་གི་འབངས་མི་རུ་བདམས་ཏེ། ཁྱོད་ཅག་ལྕགས་འཇུ་བྱེད་མེ་ཐབ་ལྟ་བུའི་ཨེ་ཅིབ་ཡུལ་ནས་བཏོན་ཏེ་ཁྲིད་འོངས་པ་ཡིན་ནོ། །
DEU 4:21 ཡང་ཁྱོད་ཅག་གི་རྐྱེན་གྱིས་དཀོན་མཆོག་ཡ་ཝཱེ་ང་ལ་ཐུགས་ཁྲོས་ཤིང་། ང་ཡོར་དན་གཙང་པོའི་ཕར་ཁ་སྟེ། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་བཟང་པོ་དེར་འགྲོ་མི་ཆོག་པའི་མནའ་བཞེས་པས།
DEU 4:22 ང་ནི་ཡུལ་འདི་ནས་འཆི་དགོས་ཤིང་ཡོར་དན་གཙང་པོའི་ཕ་རོལ་ཏུ་འགྲོ་མི་ནུས། འོན་ཀྱང་ཁྱོད་ཅག་ཕར་སོང་ནས་ཡུལ་བཟང་པོ་དེ་བདག་གིར་ཟུངས་ཤིག
DEU 4:23 ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་ཞལ་ཆད་མི་བརྗེད་པ་དང་། ཁྱོད་ཅག་གི་དཀོན་མཆོག་ཡ་ཝཱེས་དགག་བྱར་བརྩིས་པའི་སྐུ་བརྙན་གྱི་རིགས་གང་ཡང་མི་བཞེང་བའི་ཆེད་དུ་གཟབ་གཟབ་གྱིས་ཤིག
DEU 4:24 ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེ་ནི་ཡོངས་རྫོགས་རྩ་མེད་གཏོང་བའི་མེ་དང་དཀོན་མཆོག་ཕྲག་དོག་ཅན་ཡིན་ནོ། །
DEU 4:25 ཁྱོད་རྣམས་ལ་བུ་རབས་ཚ་རྒྱུད་སྐྱེས་ནས་ཡུལ་དེར་ཡུན་རིང་གནས་ཤིང་རྒས་པའི་ཚེ། ཁྱོད་ཅག་གིས་ལོག་སྤྱོད་སྤེལ་ནས་ལྷ་སྐུ་སྣ་ཚོགས་བཟོས་ཏེ། ཁྱོད་ཅག་གི་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ནས་ཁོང་གི་ཐུགས་དཀྲུགས་ན།
DEU 4:26 ཁྱོད་རྣམས་ཡོར་དན་གཙང་པོའི་ཕ་རོལ་ཏུ་བརྒལ་ནས་བདག་གིར་འཛིན་པའི་ཡུལ་དུ་མགྱོགས་པོར་འཇིག་ཅིང་། ཡུལ་དེར་ཡུན་རིང་གནས་མི་ཐུབ་པར་རྩ་མེད་དུ་འགྲོ་ངེས་པ་ནི་ངས་དེ་རིང་གནམ་ས་གཉིས་དཔང་དུ་བཙུགས་པ་ཡིན།
DEU 4:27 དཀོན་མཆོག་ཡ་ཝཱེས་ཁྱོད་རྣམས་མི་མང་པོའི་ཁྲོད་དུ་གཏོར་ཞིང་། དཀོན་མཆོག་ཡ་ཝཱེས་ཁྱོད་རྣམས་གཏོར་བའི་མི་རིགས་མང་པོའི་ཁྲོད་དུ་ཁྱོད་རྣམས་མི་ཉུང་ངུ་ཙམ་ལས་མི་ལྷག
DEU 4:28 ཡུལ་དེ་རུ་ཁྱོད་རྣམས་ཀྱིས་མིས་བཟོས་པའི་རྡོ་སྐུ་དང་ཤིང་སྐུ་སྟེ་མིག་གིས་མི་མཐོང་ཞིང་རྣ་བས་མི་གོ་བ་དང་། ཟས་སྤྱོད་མི་ནུས་པ། དྲི་མི་ཚོར་བའི་ལྷ་རྣམས་ལ་བསྙེན་བཀུར་བྱེད་ཀྱང་།
DEU 4:29 ཁྱོད་ཅག་གིས་གནས་དེ་རུ་ཁྱོད་ཅག་གི་དཀོན་མཆོག་ཡ་ཝཱེ་འཚོལ་བར་འགྱུར་ཏེ། བློ་གཅིག་སེམས་གཅིག་གིས་ཁོང་ཉིད་བཙལ་ནས་བསྙེགས་ན། ཁྱོད་རྣམས་ཀྱིས་ཁོང་རྙེད་པར་འགྱུར།
DEU 4:30 ཁྱོད་རྣམས་དཀའ་སྡུག་གི་གནས་སུ་ལྷུང་སྟེ་དོན་འདི་ཐམས་ཅད་ཁྱོད་ལ་འབྱུང་བའི་དུས་སུ། མཐའ་མའི་ཉིན་མོ་དེ་དག་ལ་ཁྱོད་རྣམས་ཁྱོད་ཅག་གི་དཀོན་མཆོག་ཡ་ཝཱེའི་ཕྱོགས་སུ་འཁོར་ཞིང་ཁོང་གི་གསུང་སྐད་ཐོས་ངེས་པ་ཡིན།
DEU 4:31 ཅི་ལ་ཞེ་ན། ཁྱོད་ཅག་གི་དཀོན་མཆོག་ཡ་ཝཱེ་ནི་སྙིང་རྗེ་ལྡན་པའི་དཀོན་མཆོག་ལགས་པས། ཁོང་གིས་ཁྱོད་སྤང་བར་མི་བྱ་ཞིང་ཁྱོད་རྩ་མེད་དུའང་མི་གཏོང་། ཁོང་གིས་ཁྱོད་ཀྱི་ཕ་མེས་ལ་མནའ་བཞེས་ནས་ཞལ་ཆད་བཞག་པའང་ཐུགས་ནས་མི་བརྗེད་དོ། །
DEU 4:32 ཁྱོད་རྣམས་ཀྱིས་དྲིས་དང་། ཁྱོད་ཅག་གི་སྔར་འདས་ཟིན་པའི་ཉིན་མོ་དག་ལ། དཀོན་མཆོག་གིས་ས་གཞི་སྟེང་མི་ཐོག་མར་བཀོད་པའི་ཉིན་ནས་བཟུང་། གནམ་གྱི་མཐའ་འདི་ནས་མཐའ་གཞན་པའི་བར་དུ་དོན་ཆེན་པོ་འདི་འདྲ་མཛད་མཁན་སུ་ཞིག་ཡོད། དོན་འདི་འདྲ་ཐོས་མྱོང་བ་སུ་ཞིག་ཡོད།
DEU 4:33 ཁྱོད་རྣམས་ཀྱིས་ཐོས་ཤིང་ད་དུང་གསོན་པོར་གནས་ཐུབ་པ་ནང་བཞིན། དཀོན་མཆོག་གིས་མེའི་དཀྱིལ་ནས་གསུང་གནང་བ་ཐོས་མྱོང་བའི་མི་རིགས་གང་ཞིག་ཡོད།
DEU 4:34 ཁྱོད་ཅག་གི་དཀོན་མཆོག་ཡ་ཝཱེས་ཨེ་ཅིབ་ཡུལ་དུ་ཁྱོད་ཅག་གི་མཐོང་ངོར་གང་དང་གང་མཛད་པ་ནང་བཞིན། ཚོད་བརྟག་དང་གྲུབ་རྟགས། ངོ་མཚར་བའི་དོན། འཐབ་མོ། ནུས་མཐུ་ཆེན་པོའི་ཕྱག་དང་ཕྱི་རུ་བརྐྱངས་པའི་དཔུང་པ། རབ་ཏུ་ཆེ་ཞིང་འཇིགས་སུ་རུང་བའི་དོན་བཅས་ལ་བརྟེན་ནས་རང་གི་ཕྱིར་དུ་མི་རིགས་ཤིག་མི་རིགས་གཞན་ནས་ལེན་ཐུབ་པའི་ལྷ་ཞིག་ཡོད་དམ།
DEU 4:35 དེ་ནི་དཀོན་མཆོག་ཡ་ཝཱེ་ཁོང་ཉིད་དཀོན་མཆོག་གཅིག་པུ་ལགས་ཤིང་། ཁོང་མ་གཏོགས་དཀོན་མཆོག་གཞན་མེད་པ་ཁྱོད་ཅག་ལ་སྟོན་པ་དང་ཁྱོད་རྣམས་ཀྱིས་རྟོགས་པའི་ཕྱིར་ཡིན་ནོ། །
DEU 4:36 དཀོན་མཆོག་ཡ་ཝཱེས་ཁྱོད་རྣམས་ལ་བསླབ་བྱ་གནང་བའི་ཕྱིར་ནམ་མཁའ་ནས་ཁྱོད་ཅག་ལ་ཁོང་གི་གསུང་སྐད་ཐོས་སུ་བཅུག་པ་དང་། ཡང་ས་སྟེང་ནས་ཁོང་གི་མེ་དཔུང་ཁྱོད་ཅག་ལ་བསྟན་ཅིང་མེའི་དཀྱིལ་ནས་བྱུང་བའི་ཁོང་གི་བཀའ་ཁྱོད་ཅག་ལ་ཐོས་སུ་བཅུག
DEU 4:37 ཁོང་གིས་ཁྱོད་རྣམས་ཀྱི་ཕ་མེས་ལ་གཅེས་པས་དེ་དག་གི་བུ་རྒྱུད་ཕྱི་མ་རྣམས་བདམས་ཤིང་། ཁོང་གི་ནུས་མཐུ་ཆེན་པོས་དངོས་སུ་ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་དང་།
DEU 4:38 དེ་ནི་ཁོང་གིས་ཁྱོད་རྣམས་ལས་ཆེ་ཞིང་ཁྱོད་རྣམས་ལས་སྟོབས་ལྡན་པའི་མི་རིགས་རྣམས་ཁྱོད་ཅག་གི་སྔུན་ནས་སྐྲོད་ཅིང་། ཁྱོད་རྣམས་ནང་དུ་ཁྲིད་ནས་ཁོ་ཚོའི་ཡུལ་ནི་དེ་རིང་ནང་བཞིན་ཁྱོད་རྣམས་ལ་ས་སྐལ་དུ་གནང་བའི་ཕྱིར་ཡིན་ནོ། །
DEU 4:39 དེ་བས་ན་གནམ་ས་གཉིས་སུ་དཀོན་མཆོག་ཡ་ཝཱེ་འབའ་ཞིག་དཀོན་མཆོག་ཡིན་ཏེ། ཁོང་ལས་གཞན་དཀོན་མཆོག་མེད་པ་དེ་རིང་ཁྱོད་ཅག་གིས་ཤེས་ནས་ཡིད་ལ་འཛིན་དགོས།
DEU 4:40 ངས་དེ་རིང་ཁྱོད་རྣམས་ལ་བསྒོས་པའི་སྒྲིག་ཁྲིམས་དང་བཀའ་རྒྱ་རྣམས་བསྲུང་བར་གྱིས། དེ་བཞིན་བྱས་ན། ཁྱོད་རྣམས་དང་ཁྱོད་ཅག་གི་བུ་རབས་ཚ་རྒྱུད་རྣམས་བདེ་ཞིང་། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་ཡུལ་དེར་ཡུན་རིང་འཚོ་ཐུབ་ཅེས་བཀའ་བསྩལ་ཏོ། །
DEU 4:41 དེ་ནས་མོ་ཤེ་ཡིས་ཡོར་དན་གཙང་པོའི་ཤར་ཕྱོགས་ནས་གྲོང་ཁྱེར་གསུམ་བདམས་ཏེ།
DEU 4:42 ཞེ་འཁོན་ཅི་ཡང་མེད་པར་མ་བསམ་ས་ནས་ཁྱིམ་མཚེས་ཤིག་བསད་ཚེ། མི་དེ་གྲོང་ཁྱེར་གསུམ་པོ་དེ་ལས་གཅིག་གི་ནང་བྲོས་ན་གསོན་པོར་འདུག་ཐུབ་པ་ཡིན།
DEU 4:43 དབེན་སྟོང་གི་ཐང་དུ་ཡོད་པའི་པེ་ཙེར་ཡུལ་ནི་རུ་བེན་པའི་ཡིན་པ་དང་། གིལ་ཨད་ཀྱི་རཱ་མོད་ནི་གཱ་རྡུ་པའི་ཡིན་ལ། པཱ་ཤན་གྱི་གོ་ལན་ནི་མཱ་ན་ཤེ་པའི་ཡིན་པའོ། །
DEU 4:44 འདི་ནི་མོ་ཤེ་ཡིས་ཡེས་ར་ཨེལ་པ་རྣམས་ཀྱི་མདུན་དུ་བཙུགས་པའི་བཀའ་ཁྲིམས་ཡིན་ཏེ།
DEU 4:45 ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཐོན་རྗེས། མོ་ཤེ་ཡིས་ཁོ་རྣམས་ལ་བསྒོས་པའི་དཔང་ཡིག་དང་། སྒྲིག་ཁྲིམས་དང་། སྲོལ་ཡིག་བཅས་ཡིན།
DEU 4:46 ཡུལ་ནི་ཡོར་དན་གཙང་པོའི་ཤར་ཕྱོགས་དང་། པེད་ཕེ་ཨོར་ཕ་རོལ་གྱི་ལུང་པ་སྟེ། ཧེ་སི་པོན་དུ་གནས་པའི་ཨེ་མོར་པའི་རྒྱལ་པོ་སི་ཧོན་གྱི་ཡུལ་ཡིན་ལ། སི་ཧོན་ནི་མོ་ཤེ་དང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་རྗེས་ཁོ་ཚོས་བསད་པ་ཡིན་ནོ། །
DEU 4:47 ཁོ་རྣམས་ཀྱིས་དེའི་ཡུལ་དང་པཱ་ཤན་གྱི་རྒྱལ་པོ་ཨོག་གི་ཡུལ་ཏེ། ཡོར་དན་གཙང་པོ་ཤར་ཕྱོགས་ཀྱི་ཨེ་མོར་པའི་རྒྱལ་པོ་གཉིས་ཀྱི་ཡུལ་དབང་དུ་བསྡུས།
DEU 4:48 ཡུལ་དེ་ནི་ཨར་ནོན་གྲོག་རོང་འགྲམ་རྒྱུད་ཀྱི་ཨ་རོ་ཨེར་ནས་ཧེར་མོན་བྱ་བའི་རི་བོ་སིར་ཡོན་གྱི་བར་དང་།
DEU 4:49 ཡོར་དན་གཙང་པོ་ཤར་ཕྱོགས་ཀྱི་ཨ་ར་པཱའི་ཐང་ཐམས་ཅད་དང་ཨ་ར་པཱའི་རྒྱ་མཚོའི་བར་ཏེ། ཕིས་གའི་རི་འདབས་བཅས་ཡིན་ནོ། །
DEU 5:1 དེ་ཡང་མོ་ཤེ་ཡིས་ཡེས་ར་ཨེལ་པ་ཐམས་ཅད་བོས་ནས་དེ་དག་ལ་འདི་ལྟར། ཀྱེ་ཡེས་ར་ཨེལ་པ་རྣམས། དེ་རིང་ངས་ཁྱོད་རྣམས་ལ་སྨྲ་བར་བྱེད་པའི་སྒྲིག་ཁྲིམས་དང་། སྲོལ་ཡིག་རྣམས་ལ་མཉན་ནས་དེ་དག་ལེགས་པར་སྦྱངས་ཏེ་གཟབ་གཟབ་ངང་བསྲུང་བར་གྱིས།
DEU 5:2 རང་ཅག་གི་དཀོན་མཆོག་ཡ་ཝཱེས་རི་བོ་ཧོ་རེབ་ནས་རང་ཅག་ལ་ཞལ་ཆད་མཛད་ཡོད།
DEU 5:3 ཞལ་ཆད་དེ་ནི་དཀོན་མཆོག་ཡ་ཝཱེས་རང་ཅག་གི་ཕ་མེས་རྣམས་ལ་མཛད་པ་མ་ཡིན་ཏེ། དེ་རིང་འདི་རུ་གསོན་པོར་གནས་པའི་རང་ཅག་ཀུན་ལ་མཛད་པ་ཡིན།
DEU 5:4 དཀོན་མཆོག་ཡ་ཝཱེས་རི་སྟེང་གི་མེའི་དཀྱིལ་ནས་ཁྱོད་ཅག་ལ་ཁ་རི་ཁ་ཐུག་ཏུ་བཀའ་བསྩལ་ཡོད་དེ།
DEU 5:5 སྐབས་དེར་ང་ནི་དཀོན་མཆོག་ཡ་ཝཱེ་དང་ཁྱོད་རྣམས་ཀྱི་བར་དུ་འགྲེང་ནས་ཁོང་གི་བཀའ་གསུང་ཁྱོད་ཅག་ལ་བསྒྲགས་པ་ཡིན་ཏེ། ཁྱོད་རྣམས་མེ་དེར་འཇིགས་པས་རི་མགོར་མ་འོངས་སོ། །དཀོན་མཆོག་ཡ་ཝཱེས་འདི་སྐད་དུ།
DEU 5:6 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞིང་། ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཁྲིད་མཁན་ཡང་ཡིན་ནོ། །
DEU 5:7 ང་རང་མ་གཏོགས་པའི་དཀོན་མཆོག་གཞན་ཞིག་ཁྱོད་ལ་ཡོད་མི་ཆོག
DEU 5:8 ཁྱོད་ཀྱིས་རང་ཉིད་ལ་སྐུ་འདྲ་དང་། སྟེང་གི་ནམ་མཁའ་འམ། འོག་གི་སའམ། ས་འོག་གི་ཆུ་ལ་ཡོད་པའི་སེམས་ཅན་གྱི་གཟུགས་བརྙན་གང་ཡང་བཟོ་མི་རུང་།
DEU 5:9 དེ་དག་ལ་ཕྱག་མ་འཚལ། བསྙེན་བཀུར་ཡང་བྱེད་མི་རུང་། གང་ལ་ཞེ་ན། ཁྱོད་ཀྱི་དཀོན་མཆོག་ཡ་ཝཱེ་ང་རང་ནི་ཕྲག་དོག་ཅན་ཞིག་ཡིན་ཏེ། ཕ་རྣམས་ཀྱི་ནག་ཉེས་ཕྱིར་མི་རབས་གསུམ་མམ་བཞིའི་བར་དུ་ང་རང་ལ་སྡང་མཁན་གྱི་བུ་ཕྲུག་རྣམས་ལ་བཀའ་ཆད་གཅོད་མོད།
DEU 5:10 འོན་ཀྱང་ང་རང་གཅེས་སུ་འཛིན་པ་དང་བདག་གི་བཀའ་སྲུང་མཁན་རྣམས་ལ་མི་སྟོང་ཕྲག་གི་བར་དུ་ཐུགས་བརྩེ་བར་བྱེད་དོ། །
DEU 5:11 ཁྱོད་ཀྱི་དཀོན་མཆོག་ཡ་ཝཱེའི་མཚན་གང་བྱུང་དུ་སྤྱོད་མི་རུང་། ཅི་ལ་ཞེ་ན། སུ་ཞིག་གིས་ཁོང་གི་མཚན་གང་བྱུང་དུ་སྤྱད་ན་དཀོན་མཆོག་ཡ་ཝཱེས་མི་དེ་ཉེས་མེད་དུ་རྩི་བར་མི་འགྱུར་རོ། །
DEU 5:12 ཁྱོད་ཀྱི་དཀོན་མཆོག་ཡ་ཝཱེས་ཁྱོད་རང་ལ་བསྩལ་པའི་བཀའ་བཞིན་དུ། ངལ་གསོ་བའི་ཉིན་མོ་དམ་པར་སྲུངས་ཤིག
DEU 5:13 ཉིན་དྲུག་གི་རིང་ལ་འབད་ཅིང་རང་གི་ལས་ཀ་ཚང་མ་སྒྲུབ་རུང་བ་ཡིན།
DEU 5:14 འོན་ཀྱང་ཉིན་བདུན་པ་ནི་ཁྱོད་ཀྱི་དཀོན་མཆོག་ཡ་ཝཱེའི་ངལ་གསོ་བའི་ཉིན་མོ་ཡིན་པས། ཉིན་མོ་དེ་ལ་ཁྱོད་དང་ཁྱོད་ཀྱི་བུ་དང་བུ་མོ། གཡོག་པོ་དང་གཡོག་མོ། བ་གླང་དང་བོང་བུ། སྒོ་ཕྱུགས་ཐམས་ཅད། ཁྱོད་ཀྱི་རྒྱ་སྒོ་ནང་རོལ་ལ་གནས་པའི་བྱེས་པ་བཅས་ཀྱིས་ལས་ཀ་གང་ཡང་བྱེད་མི་རུང་སྟེ། ཁྱོད་ཀྱི་གཡོག་པོ་དང་གཡོག་མོ་རྣམས་ཀྱིས་ཀྱང་ཁྱོད་དང་འདྲ་བར་ངལ་གསོ་བྱེད་ཐུབ་པའི་ཕྱིར་རོ། །
DEU 5:15 ཁྱོད་རང་ཨེ་ཅིབ་ཡུལ་ནས་བྲན་གཡོག་བྱས་མྱོང་བ་དང་། ཁྱོད་ཀྱི་དཀོན་མཆོག་ཡ་ཝཱེས་མཐུ་སྟོབས་ཆེན་པོའི་ཕྱག་དང་ཕྱི་རུ་བརྐྱངས་པའི་དཔུང་པ་ཡིས་ཁྱོད་རང་ཡུལ་དེ་ནས་ཕྱི་རུ་ཁྲིད་འོངས་པ་དྲན་དགོས། དེ་བས་ཁྱོད་ཀྱི་དཀོན་མཆོག་ཡ་ཝཱེས་ངལ་གསོ་བའི་ཉིན་མོ་སྲུངས་ཤིག་ཅེས་ཁྱོད་ལ་བཀའ་བསྩལ་ཏོ། །
DEU 5:16 ཁྱོད་ཀྱི་དཀོན་མཆོག་ཡ་ཝཱེས་ཁྱོད་ལ་བཀའ་བསྩལ་པ་བཞིན་དུ། ཚེ་ཐག་རིང་པོར་གནས་ཐུབ་པ་དང་ཁྱོད་ཀྱི་དཀོན་མཆོག་ཡ་ཝཱེས་ཁྱོད་ལ་གནང་བྱའི་ཡུལ་དེ་རུ་བདེ་བར་འཚོ་ཐུབ་པའི་ཕྱིར། ཁྱོད་ཀྱིས་རང་གི་ཕ་མ་གཉིས་ལ་བཀུར་སྟི་བྱེད་དགོས།
DEU 5:17 ཁྱོད་ཀྱིས་མི་མ་གསོད།
DEU 5:18 ལོག་གཡེམ་མ་བྱེད།
DEU 5:19 རྐུ་མ་བྱེད།
DEU 5:20 རང་གི་ཁྱིམ་མཚེས་ལ་རྫུན་གྱི་དཔང་པོ་མ་བྱེད།
DEU 5:21 རང་གི་ཁྱིམ་མཚེས་ཀྱི་ཆུང་མ་ལ་འདོད་ཧམ་མ་བཅང་། ཁྱིམ་མཚེས་ཀྱི་ཁང་པ་དང་ས་ཞིང་། གཡོག་པོ་དང་གཡོག་མོ། བ་གླང་དང་བོང་བུ་བཅས་དང་། ཡང་ན་ཁྱིམ་མཚེས་ཀྱི་ཡིན་ཚད་གང་ལའང་ཧམ་པ་བཅང་མི་རུང་ཞེས་གསུངས་པའོ། །
DEU 5:22 བཀའ་འདི་རྣམས་ནི་དཀོན་མཆོག་ཡ་ཝཱེས་རི་མགོ་ནས་མེ་དང་སྤྲིན་དང་། སྨག་རུམ་སྟུག་པོའི་དབུས་ནས་གསུང་སྐད་ཆེན་པོས་ཁྱོད་མི་ཚོགས་ཐམས་ཅད་ལ་བསྒྲགས་པ་ཡིན། དེ་ལ་ཅི་ཡང་བསྣན་མེད། ཁོང་གིས་བཀའ་དེ་རྣམས་རྡོ་ལེབ་གཉིས་ཀྱི་སྟེང་བཀོད་ནས་ང་ལ་གནང་བྱུང་།
DEU 5:23 སྐབས་དེར་རི་མགོར་མེ་འབར་བ་དང་ལྷན་དུ་ཁྱོད་རྣམས་ཀྱིས་སྨག་རུམ་ནས་གསུང་སྐད་གྲགས་འོངས་པ་ཐོས་ནས། ཁྱོད་ཅག་ཚོ་པ་ཁག་གི་འགོ་དཔོན་ཐམས་ཅད་དང་རྒན་པོ་རྣམས་ངའི་ཉེ་སར་འོངས་ཏེ་ན་རེ།
DEU 5:24 ཀྱེ་མ། བདག་ཅག་གི་དཀོན་མཆོག་ཡ་ཝཱེས་ཁོང་གི་གཟི་བརྗིད་དང་ཆེ་བ་ང་ཚོར་བསྟན་པ་དང་། ང་ཚོས་ཁོང་གི་གསུང་སྐད་མེའི་དཀྱིལ་ནས་གྲགས་འོངས་པ་ཐོས། དཀོན་མཆོག་གིས་མི་ལ་གསུང་མོལ་གནང་བ་དང་མི་ད་དུང་གསོན་པོར་གནས་ཐུབ་པ་དེ་རིང་ངེད་ཅག་གིས་མཐོང་བྱུང་།
DEU 5:25 ད་ནི་མེ་དཔུང་འདིས་ང་ཚོ་རྩ་མེད་གཏོང་ངེས་ཡིན། ང་ཚོ་འཆི་དགོས་དོན་ཅི་ཡོད་དམ། གལ་སྲིད་ང་ཚོས་དཀོན་མཆོག་ཡ་ཝཱེའི་གསུང་སྐད་ཡང་བསྐྱར་ཐོས་ན་ང་ཚོ་འཆི་བར་འགྱུར།
DEU 5:26 ཅི་ལ་ཞེ་ན། ཤ་ཁྲག་གདོས་བཅས་ཀྱི་མི་སུ་ཞིག་གིས་རང་ཅག་དང་འདྲ་བར་གཏན་དུ་གསོན་པོར་བཞུགས་པའི་དཀོན་མཆོག་གི་གསུང་སྐད་མེའི་དཀྱིལ་ནས་གྲགས་འོངས་པ་ཐོས་ནས་ད་དུང་གསོན་པོར་གནས་ཐུབ་བམ།
DEU 5:27 དེ་བས་ཁྱེད་རང་ཉེ་བར་བཅར་ནས་རང་ཅག་གི་དཀོན་མཆོག་ཡ་ཝཱེས་ཅི་ཞིག་གསུང་བར་གསན་པར་མཛོད། དེ་ནས་རང་ཅག་གི་དཀོན་མཆོག་ཡ་ཝཱེས་ཁྱེད་ལ་བཀའ་བསྩལ་པ་ཐམས་ཅད་ང་ཚོར་གསུངས་དང་། ངེད་ཅག་གིས་མཉན་ནས་དེ་བཞིན་དུ་བསྒྲུབ་པར་བྱའོ་ཞེས་སྨྲས་སོ། །
DEU 5:28 དེ་ཡང་ཁྱོད་རྣམས་ཀྱིས་ང་ལ་གླེང་མོལ་བྱེད་པའི་སྐབས་སུ། དཀོན་མཆོག་ཡ་ཝཱེས་ཁྱོད་ཅག་གི་སྐད་སྒྲ་གསན་ནས་ཁོང་གིས་ང་ལ་འདི་སྐད་དུ། མི་འདི་རྣམས་ཀྱིས་ཁྱོད་ལ་སྨྲས་པའི་གཏམ་བདག་གིས་ཐོས་ཡོད། དེ་དག་གིས་སྨྲས་པ་ཐམས་ཅད་ལེགས་པོ་འདུག
DEU 5:29 ཁོ་ཚོས་རྟག་ཏུ་དེ་ལྟ་བུའི་བསམ་པ་བཅངས་ནས་བདག་ལ་གུས་ཤིང་འཇིགས་པ་དང་། བདག་གི་བཀའ་ཐམས་ཅད་བསྲུང་བར་ཤོག དེ་ནས་ཁོ་ཚོའི་བུ་རྒྱུད་རྣམས་དུས་གཏན་དུ་བདེ་བར་འགྱུར།
DEU 5:30 ཁྱོད་སོང་ནས་ཁོ་རྣམས་ལ་གུར་ནང་དུ་ཕྱིར་ལོག་ཅིག་ཅེས་སྒོས་ཤིག
DEU 5:31 འོན་ཀྱང་ཁྱོད་ནི་བདག་གི་མདུན་དུ་སྡོད་ཅིག དེ་ནས་ངས་ཁྱོད་ལ་བཀའ་རྒྱ་དང་སྒྲིག་ཁྲིམས། སྲོལ་ཡིག་བཅས་ཐམས་ཅད་བསླབ་པར་བྱ། ངས་ཁོ་རྣམས་ལ་ས་སྐལ་དུ་སྦྱིན་པའི་ཡུལ་དེ་རུ་ཁོ་ཚོས་དེ་བཞིན་བསྒྲུབ་པའི་ཕྱིར། ཁྱོད་ཀྱིས་ཁོ་ཚོར་དེ་དག་འཁྲིད་དགོས་ཞེས་བཀའ་བསྩལ་བྱུང་།
DEU 5:32 དེའི་ཕྱིར་ཁྱོད་རྣམས་གཡས་གཡོན་གང་ལ་ཡང་མི་གཟུར་བར་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་བསྩལ་པའི་བཀའ་ནང་བཞིན་བརྩི་སྲུང་ནན་མོ་བྱེད་དགོས།
DEU 5:33 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བགྲོད་དགོས་པར་བསྩལ་པའི་ལམ་ཀུན་ཏུ་བསྐྱོད་དགོས། དེ་ལྟར་བྱས་ན། ཁྱོད་རྣམས་འཚོ་ཞིང་བདེ་བར་འགྱུར་ལ། ཁྱོད་རྣམས་རང་གིས་བདག་པོ་རྒྱག་པའི་ཡུལ་དུ་ཡུན་ནས་ཡུན་དུ་གནས་ཐུབ་བོ། །
DEU 6:1 འདི་ནི་ཁྱོད་ཅག་གི་ཆེད་དུ་ཁྱོད་རྣམས་ཀྱི་དཀོན་མཆོག་ཡ་ཝཱེས་ང་ལ་གསུངས་པའི་བཀའ་རྒྱ་དང་། སྒྲིག་ཁྲིམས་དང་། སྲོལ་ཡིག་བཅས་ཡིན་ལ། ཁྱོད་ཅག་གིས་ཕར་ཕྱོགས་ནས་བདག་པོ་རྒྱག་པའི་ཡུལ་དུ་དེ་དག་བསྲུང་དགོས།
DEU 6:2 ཅིའི་ཕྱིར་ཞེ་ན། ཁྱོད་རྣམས་དང་ཁྱོད་རྣམས་ཀྱི་བུ་རབས་ཚ་རྒྱུད་དག་གིས་ནམ་འཚོའི་བར་དུ། ངས་ཁྱོད་ཅག་ལ་བསྒོས་པའི་ཁྱོད་རྣམས་ཀྱི་དཀོན་མཆོག་ཡ་ཝཱེའི་སྒྲིག་ཁྲིམས་ཐམས་ཅད་དང་། བཀའ་རྣམས་བསྲུངས་ནས་ཁོང་ལ་གུས་ཤིང་འཇིགས་པ་ཡིན་ན་ཁྱོད་ཅག་ཚེ་ཐག་རིང་ངོ་། །
DEU 6:3 ཀྱེ་ཡེས་ར་ཨེལ་པ་རྣམས། ཁྱོད་ཅག་གིས་དེ་རྣམས་ཐོས་པ་དང་ཇི་ལྟར་བསྲུང་བར་གཟབ་གཟབ་གྱིས་དང་། ཁྱོད་རྣམས་ཀྱི་ཕ་མེས་ཀྱི་དཀོན་མཆོག་ཡ་ཝཱེས་ཞལ་གྱིས་བཞེས་པ་བཞིན། འོ་མ་དང་སྦྲང་རྩི་བཞུར་བའི་ཡུལ་ནས་སྐྱིད་ལ་རོལ་ཞིང་མི་གྲངས་མང་དུ་འཕེལ་བར་འགྱུར་རོ། །
DEU 6:4 ཀྱེ་ཡེས་ར་ཨེལ་པ་རྣམས་ཀྱིས་ཉོན་ཅིག བདག་ཅག་གི་དཀོན་མཆོག་ཡ་ཝཱེ་ནི་ཡ་ཝཱེ་གཅིག་པུ་ལགས་ཤིང་།
DEU 6:5 ཁྱོད་ཀྱིས་རང་གི་དཀོན་མཆོག་ཡ་ཝཱེ་ལ་བློ་གཅིག་སེམས་གཅིག་དང་སྟོབས་ཤུགས་ཡོད་རྒུས་གཅེས་ཤིག
DEU 6:6 ངས་དེ་རིང་ཁྱོད་ཅག་ལ་བསྒོས་པའི་བཀའ་དེ་རྣམས་སེམས་ལ་ཟུངས་ཤིག
DEU 6:7 ཁྱོད་རྣམས་རང་ཁྱིམ་ནས་འདུག་དུས་དང་ལམ་དུ་འགྲོ་དུས་དང་། མར་ཉལ་དུས་དང་། ཡར་ལངས་དུས་ནམ་ཡིན་ཡང་བཀའ་དེ་རྣམས་ཁྱོད་ཅག་གིས་རང་གི་བུ་དང་བུ་མོ་རྣམས་ལ་གླེང་ནས་ཆད་མེད་དུ་འཁྲིད་དགོས།
DEU 6:8 ཁྱོད་རྣམས་ཀྱིས་བཀའ་དེ་རྣམས་རང་གི་ལག་པར་དཀྲིས་ནས་རྟགས་མཚན་དུ་བྱེད་པ་དང་། དེ་རྣམས་དཔྲལ་བར་དཀྲི་དགོས།
DEU 6:9 ཁྱོད་རྣམས་ཀྱི་ཁང་པའི་སྒོ་འགྲམ་དང་མཁར་སྒོའི་སྟེང་དུའང་འབྲི་དགོས་སོ། །
DEU 6:10 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ཁྲིད་ནས་འགྲོ་ངེས་པའི་ཡུལ་ཏེ། ཁོང་གིས་ཁྱོད་ཅག་གི་ཕ་མེས་ཨབ་ར་ཧམ་དང་ཨི་སཱག ཡ་ཀོབ་བཅས་ལ་ཁྱོད་རྣམས་ལ་གནང་བར་མནའ་བཞེས་ཡོད་པའི་ཡུལ་དེ་རུ་ཁྱོད་རྣམས་ཀྱིས་བརྩིགས་པ་མ་ཡིན་པའི་གྲོང་ཁྱེར་ཆེན་པོ་དང་ཁྱད་མཚར་ཅན་ཡོད་ལ།
DEU 6:11 ཁྱོད་རྣམས་ཀྱིས་བསགས་པ་མ་ཡིན་པའི་རྒྱུ་ནོར་སྣ་ཚོགས་ཀྱིས་གང་བའི་ཁང་པ་དང་། ཁྱོད་རྣམས་ཀྱིས་བརྐོས་པ་མ་ཡིན་པའི་ཁྲོན་པ་དང་། ཁྱོད་རྣམས་ཀྱིས་བཙུགས་པ་མ་ཡིན་པའི་རྒུན་ཚལ་དང་སྐྱུ་རུ་རའི་ལྗོན་ཤིང་རྣམས་ཡོད་ཅིང་། ཁྱོད་རྣམས་ཀྱིས་དེ་དག་ཡིད་ཚིམ་པར་སྤྱད་ཆོག
DEU 6:12 ཁྱོད་ཅག་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཕྱི་རུ་ཁྲིད་ཡོང་མཁན་དཀོན་མཆོག་ཡ་ཝཱེ་ཁོང་ཉིད་མི་བརྗེད་པའི་ཆེད་དུ་ཁྱོད་རྣམས་ཀྱིས་གཟབ་གཟབ་གྱིས་ཤིག
DEU 6:13 ཁྱོད་རྣམས་ཀྱིས་རང་གི་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་དང་། ཁོང་ལ་བསྙེན་བཀུར་བྱེད་ཅིང་། ཁོང་གི་མཚན་ལ་བརྟེན་ནས་མནའ་བསྐྱལ་དགོས་སོ། །
DEU 6:14 ཁྱོད་རྣམས་ཀྱི་མཐའ་འཁོར་དུ་ཡོད་པའི་མི་རིགས་སོ་སོའི་ལྷ་རྣམས་ཀྱི་རྗེས་སུ་འབྲང་མི་རུང་།
DEU 6:15 གང་ལ་ཞེ་ན། ཁྱོད་རྣམས་ཀྱི་ཁྲོད་དུ་བཞུགས་པའི་ཁྱོད་ཅག་གི་དཀོན་མཆོག་ཡ་ཝཱེ་ནི་དཀོན་མཆོག་ཕྲག་དོག་ཅན་ཞིག་ཡིན་ནོ། །དེ་ལྟར་མ་བྱས་ན་ཁོང་ཁྱོད་རྣམས་ལ་ཁྲོས་ནས་ཁྱོད་ཅག་ས་གཞིའི་སྟེང་ནས་མེད་པར་མཛད་ངེས་སོ། །
DEU 6:16 ཁྱོད་ཅག་གིས་མཱ་སཱ་བྱ་བའི་ཡུལ་དུ་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་ཚོད་བགམ་བྱས་པ་ལྟར་ཁོང་ལ་ཚོད་བགམ་མ་བྱེད།
DEU 6:17 ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་བཀའ་རྣམས་དང་དཔང་ཡིག སྒྲིག་ཁྲིམས་བཅས་ནི་བརྟན་པོར་སྲུངས་ཤིག
DEU 6:18 ཁྱོད་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་དྲང་པོ་དང་བཟང་པོ་གང་ཡིན་པ་དེ་བྱེད་དགོས་ལ། དེ་ལྟར་བྱས་ན་ཁྱོད་རྣམས་ཀྱིས་སྐྱིད་ལ་རོལ་ཐུབ་པར་མ་ཟད། དཀོན་མཆོག་ཡ་ཝཱེས་ཁྱོད་རྣམས་ཀྱི་མེས་པོ་རྣམས་ལ་མནའ་དང་བཅས་ཞལ་བཞེས་གནང་བའི་ཡུལ་བཟང་པོ་དེར་སོང་ནས་དེ་བདག་གིར་འཛིན་ཐུབ་པ་དང་།
DEU 6:19 དཀོན་མཆོག་ཡ་ཝཱེས་གསུངས་པ་ནང་བཞིན་ཁྱོད་རྣམས་ཀྱི་དགྲ་བོ་ཐམས་ཅད་ཁྱོད་ཅག་གི་མདུན་ནས་སྐྲོད་པར་བྱའོ། །
DEU 6:20 ཕྱིས་སུ་ཁྱོད་རྣམས་ཀྱི་བུ་ཡིས་རང་ཅག་གི་དཀོན་མཆོག་ཡ་ཝཱེས་བསྒོས་པའི་དཔང་ཡིག་དང་སྒྲིག་ཁྲིམས། སྲོལ་ཡིག་འདི་རྣམས་ཅི་ཡིན་ཞེས་དྲིས་ན།
DEU 6:21 ཁྱོད་རྣམས་ཀྱིས་རང་གི་བུ་ལ། སྔར་རང་ཅག་ཨེ་ཅིབ་ཡུལ་ནས་ཕཱར་ཨོལ་གྱི་བྲན་གཡོག་བྱས་མྱོང་། ཡིན་ནའང་དཀོན་མཆོག་ཡ་ཝཱེའི་མཐུ་སྟོབས་ཆེན་པོའི་ཕྱག་གིས་རང་ཅག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་ཡིན།
DEU 6:22 དཀོན་མཆོག་ཡ་ཝཱེས་རང་ཅག་གི་མིག་ལམ་དུ་ཨེ་ཅིབ་ཡུལ་དང་ཕཱར་ཨོལ་དང་། དེའི་ཁྱིམ་གང་པོར་འཇིགས་སུ་རུང་བའི་གྲུབ་རྟགས་དང་དོན་ངོ་མཚར་ཅན་ཆེན་པོ་བསྟན།
DEU 6:23 ཁོང་གིས་རང་ཅག་ནི་མེས་པོ་རྣམས་ལ་མནའ་དང་བཅས་ཞལ་བཞེས་གནང་བའི་ཡུལ་དུ་ཁྲིད་ནས་དེ་རང་ཅག་ལ་གནང་བའི་ཕྱིར་དུ། རང་ཅག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་ཡིན།
DEU 6:24 ཡང་དེ་རིང་ཉིན་མོ་ལྟར་རང་ཅག་གིས་རྟག་ཏུ་སྐྱིད་ལ་རོལ་ནས་གསོན་པོར་གནས་ཐུབ་པའི་ཕྱིར་དུ། དཀོན་མཆོག་ཡ་ཝཱེས་རང་ཅག་ལ་སྒྲིག་ཁྲིམས་འདི་ཐམས་ཅད་བསྲུང་དགོས་པ་དང་། རང་ཅག་གི་དཀོན་མཆོག་ཡ་ཝཱེ་ལ་གུས་ཤིང་འཇིགས་དགོས་པར་གསུངས་ཡོད།
DEU 6:25 གལ་སྲིད་རང་ཅག་གིས་དཀོན་མཆོག་ཡ་ཝཱེས་གསུངས་པ་ཇི་བཞིན་ཁོང་གི་དྲུང་དུ་བཀའ་ཐམས་ཅད་བསྲུངས་པ་ཡིན་ན། དེ་ནི་རང་ཅག་གི་དྲང་བདེན་ཡིན་ནོ་ཞེས་སྨྲ་བར་བྱའོ། །
DEU 7:1 ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་སོང་ནས་བདག་གིར་འཛིན་པའི་ཡུལ་དེ་ལ་འཁྲིད་པའི་ཚེ། མི་རིགས་མང་པོ་ཞིག་ཁྱོད་རྣམས་ཀྱི་མདུན་ནས་སྐྲོད་པར་འགྱུར། དེ་དག་ནི་ཁྱོད་རྣམས་ལས་གྲངས་ཀ་མང་ཞིང་སྟོབས་ཆེ་བའི་མི་རིགས་བདུན་ཏེ། ཧེད་པ་དང་། གིར་གས་པ་དང་། ཨེ་མོར་པ་དང་། ཀ་ན་ཨན་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ཡིན་ནོ། །
DEU 7:2 ཁྱོད་རྣམས་ཀྱི་དཀོན་མཆོག་ཡ་ཝཱེས་དེ་དག་ཁྱོད་ཅག་གི་ལག་ཏུ་སྤྲད་ནས་ཁྱོད་ཅག་གིས་དེ་དག་ཕམ་པར་རྒྱག་པའི་དུས་སུ། ཁོ་རྣམས་རྩ་མེད་གཏོང་བ་ལས་ཁོ་རྣམས་དང་ཁ་ཆད་འཇོག་མི་རུང་ལ། ཁོ་རྣམས་དྲིན་གྱིས་སྐྱོང་ཡང་མི་རུང་།
DEU 7:3 ཁོ་ཚོ་དང་གཉེན་གྱི་འབྲེལ་བ་ཡང་འཛིན་མི་རུང་སྟེ། ཁྱོད་རྣམས་ཀྱི་བུ་མོ་ཁོ་ཚོའི་བུ་ལ་མནའ་མར་སྟེར་མི་རུང་ལ། ཁོ་ཚོའི་བུ་མོ་ཁྱོད་རྣམས་ཀྱི་བུ་ལ་མནའ་མར་ལེན་ཡང་མི་རུང་ངོ་། །
DEU 7:4 ཅི་ལ་ཞེ་ན། ཁོ་ཚོས་ཁྱོད་རྣམས་ཀྱི་བུ་བདག་དང་ཕྲལ་ནས་གཞན་པའི་ལྷ་རྣམས་ལ་བསྙེན་བཀུར་བྱེད་དུ་འཇུག་ངེས་ཡིན། དེ་ནས་དཀོན་མཆོག་ཡ་ཝཱེ་ཐུགས་ཁྲོས་ཏེ་ཁྱོད་ཅག་མགྱོགས་པོར་མེད་པར་མཛད་ངེས།
DEU 7:5 དེ་བས་ཁྱོད་རྣམས་ཀྱིས་ཁོ་ཚོ་ལ་འདི་ལྟར་བྱེད་དགོས་ཏེ། དེ་དག་གི་མཆོད་ཁྲི་རྣམས་བཤིག་པ་དང་། རྡོ་སྐུ་རྣམས་དུམ་བུར་གཅོག་པ་དང་། ལྷ་མོ་ཨ་ཤེ་རཱའི་སྐུ་བརྙན་རྣམས་གཏུབ་པ་དང་། དེ་དག་གི་བརྐོས་པའི་སྐུ་འདྲ་རྣམས་མེ་ཡིས་བསྲེག་དགོས།
DEU 7:6 ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ས་སྟེང་གི་མི་རིགས་ཐམས་ཅད་ལས། ཁྱོད་རྣམས་ནི་ཉིད་ཀྱི་ནོར་བུ་དང་ཉིད་ཀྱི་འབངས་མི་རུ་བདམས་ཤིང་། ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེ་ལ་མཚོན་ན་འབངས་མི་དམ་པ་ཡིན་ནོ། །
DEU 7:7 དཀོན་མཆོག་ཡ་ཝཱེ་ཁྱོད་རྣམས་ལ་བྱམས་ཤིང་ཁོང་གིས་ཁྱོད་རྣམས་འདེམས་དོན་ནི་ཁྱོད་ཅག་གི་མི་གྲངས་མི་རིགས་གཞན་ལས་མང་བས་མ་ཡིན་ཏེ། དོན་དམ་དུ་ཁྱོད་རྣམས་ཀྱི་མི་གྲངས་ནི་མི་རིགས་གཞན་ལས་ཉུང་བ་ཡིན་ལ།
DEU 7:8 དཀོན་མཆོག་ཡ་ཝཱེས་ཁྱོད་རྣམས་གཅེས་སུ་འཛིན་པ་དང་། ཁོང་གིས་ཁྱོད་ཅག་གི་མེས་པོ་རྣམས་ལ་མནའ་བཞེས་པ་དེ་བསྒྲུབ་པའི་ཕྱིར། ཁོང་གི་མཐུ་སྟོབས་ཆེན་པོའི་ཕྱག་གིས་ཁྱོད་རྣམས་བྲན་དུ་བཀོལ་བའི་གནས་དང་ཨེ་ཅིབ་རྒྱལ་པོ་ཕཱར་ཨོལ་གྱི་ལག་ནས་བསྐྱབས་པ་ཡིན།
DEU 7:9 དེ་བས་ཁྱོད་ཅག་གི་དཀོན་མཆོག་ཡ་ཝཱེ་ནི་དཀོན་མཆོག་ཡིན་པ་དང་། ཡིད་རྟོན་རུང་བའི་དཀོན་མཆོག་ཡིན་པ་ཁྱོད་རྣམས་ཀྱིས་ཤེས་དགོས་ལ། ཁོང་གིས་ཁོང་ལ་མཉེས་པ་དང་ཁོང་གི་བཀའ་རྒྱ་སྲུང་མཁན་རྣམས་ལ། མི་རབས་སྟོང་གི་བར་དུ་ཞལ་ཆད་བསྲུང་ཞིང་བྱམས་བརྩེ་གནང་བ་ཡིན།
DEU 7:10 འོན་ཀྱང་ཁོང་ལ་སྡང་མཁན་རྣམས་ལ་ཁ་རི་ཁ་ཐུག་ཏུ་ཡ་ལན་འཇལ་ཞིང་མེད་པར་གཏོང་བ་དང་། ཁོང་ལ་སྡང་མཁན་རྣམས་ལ་ཁ་རི་ཁ་ཐུག་ཏུ་འགོར་འགྱང་མེད་པར་ཡ་ལན་འཇལ་བ་ཡིན།
DEU 7:11 དེ་བས་ཁྱོད་རྣམས་ཀྱིས་ངས་དེ་རིང་ཁྱོད་ཅག་ལ་བསྒོས་པའི་བཀའ་རྒྱ་དང་སྒྲིག་ཁྲིམས། སྲོལ་ཡིག་རྣམས་གཟབ་གཟབ་ངང་བསྲུང་དགོས་སོ། །
DEU 7:12 ཁྱོད་རྣམས་ཀྱིས་སྲོལ་ཡིག་འདི་རྣམས་ལ་ཉན་ཞིང་བསྲུངས་ནས་དེ་བཞིན་བསྒྲུབས་ན། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ཀྱི་མེས་པོ་རྣམས་ལ་མནའ་བཞེས་པ་བཞིན་ཁྱོད་ཅག་ལ་ཞལ་ཆད་བསྲུངས་ནས་བྱམས་བརྩེ་གནང་ངེས་ཡིན།
DEU 7:13 ཁོང་ཁྱོད་རྣམས་ལ་བྱམས་ཤིང་ཁྱོད་རྣམས་ལ་བྱིན་རླབས་བསྩལ་ནས་ཁྱོད་ཅག་འཕེལ་བར་བྱེད་པ་དང་། ཡང་ཁོང་གིས་ཁྱོད་ཅག་གི་མེས་པོ་རྣམས་ལ་ཁྱོད་ཅག་ལ་གནང་བར་མནའ་བཞེས་པའི་ཡུལ་དེ་རུ། ཁྱོད་རྣམས་ལས་སྐྱེས་པ་དང་། ཁྱོད་ཅག་གི་ས་ཡི་ལོ་ཏོག་ལ་བྱིན་རླབས་གནང་སྟེ། ཁྱོད་རྣམས་ཀྱི་འབྲུ་རིགས་དང་། རྒུན་ཆང་། སྣུམ་གསར་པ། བ་གླང་གི་འཕེལ་ཏོག ར་ལུག་གི་འཕེལ་ཀ་བཅས་མང་དུ་སྤེལ་ངེས་ཡིན།
DEU 7:14 ཁྱོད་རྣམས་ལ་མི་རིགས་ཀུན་ལས་ལྷག་པའི་བྱིན་རླབས་འཐོབ་པ་དང་། ཁྱོད་རྣམས་ཀྱི་སྐྱེས་པ་དང་བུད་མེད་ལ་ཕྲུ་གུ་མི་འཁོར་བ་མེད་ཅིང་། ཕྱུགས་ཟོག་ལ་ཕྱུགས་ཕྲུག་མི་སྐྱེས་པའང་མེད།
DEU 7:15 དཀོན་མཆོག་ཡ་ཝཱེས་ཁྱོད་རྣམས་ཀྱི་ནད་ཐམས་ཅད་བསལ་བར་བྱ་སྟེ། ཁྱོད་རྣམས་ལ་རྒྱུས་ཡོད་པའི་ཨེ་ཅིབ་ཡུལ་གྱི་ནད་ཡམས་དག་ཁྱོད་རྣམས་ལ་འབྱུང་དུ་མི་འཇུག་པར། ནད་དེ་ཐམས་ཅད་ཁྱོད་རྣམས་ལ་སྡང་བ་ཀུན་གྱི་སྟེང་དུ་འགེལ་ངེས།
DEU 7:16 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་སྤྲད་པའི་མི་རིགས་ཐམས་ཅད་ཁྱོད་རྣམས་ཀྱིས་རྩ་མེད་དུ་གཏོང་དགོས། ཁྱོད་རྣམས་ཀྱི་མིག་ལམ་ནས་དེ་དག་ལ་སྙིང་རྗེ་སྒོམ་མི་རུང་། དེ་ཚོའི་ལྷ་རྣམས་ལ་བསྙེན་བཀུར་ཡང་བྱེད་མི་འོས། གང་ལ་ཞེ་ན། དེ་ནི་ཁྱོད་ཅག་བསླུ་བྱེད་ཀྱི་རྙི་རྒྱ་ཡིན་ནོ། །
DEU 7:17 ཁྱོད་རྣམས་ཀྱི་སེམས་སུ་མི་རིགས་འདི་དག་ང་ཚོ་ལས་མང་བས་ངེད་ཅག་གིས་ཁོ་རྣམས་ཇི་ལྟར་སྐྲོད་དགོས་སྙམ་ན་ཡང་།
DEU 7:18 དེ་དག་ལ་འཇིགས་མི་དགོས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཕཱར་ཨོལ་དང་ཨེ་ཅིབ་ཀྱི་ཡུལ་ཐམས་ཅད་ལ་ཇི་ལྟར་མཛད་པ་འབའ་ཞིག་དྲན་དགོས་ཏེ།
DEU 7:19 ཁྱོད་རྣམས་ཀྱིས་དངོས་སུ་མཐོང་བའི་ཚོད་བརྟག་ཆེན་པོ་དང་གྲུབ་རྟགས་དང་། དོན་ངོ་མཚར་ཅན་དང་། མཐུ་སྟོབས་ཆེན་པོའི་ཕྱག་དང་། ཕྱི་རུ་བརྐྱངས་པའི་དཔུང་པ་བཅས་དྲན་དགོས། དེ་ཐམས་ཅད་ནི་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ཕྱི་རུ་ཁྲིད་འོངས་པའི་དུས་སུ་མཛད་པ་ཡིན་ལ། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་འཇིགས་པའི་མི་རིགས་ཐམས་ཅད་ལའང་དེ་བཞིན་མཛད་ངེས།
DEU 7:20 ཁོ་ཚོ་ལས་ཤུལ་དུ་ལུས་ཏེ་སྦས་པ་རྣམས་ཀྱང་ཁྱོད་རྣམས་ཀྱི་མདུན་ནས་མེད་པར་འགྲོ་བའི་བར་དུ། ཁྱོད་རྣམས་ཀྱི་དཀོན་མཆོག་ཡ་ཝཱེས་དེ་དག་གི་དཀྱིལ་ལ་དུག་སྦྲང་མང་པོ་གཏོང་བར་བྱེད་དོ། །
DEU 7:21 དེ་དག་ལ་མ་འཇིགས་ཤིག ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེ་ནི་ཁྱོད་ཅག་གི་ཁྲོད་དུ་བཞུགས་ཤིང་། ཁོང་ནི་དབང་ཆེ་ཞིང་འཇིགས་རུང་བའི་དཀོན་མཆོག་དེ་ཡིན།
DEU 7:22 ཁྱོད་རྣམས་ཀྱི་དཀོན་མཆོག་ཡ་ཝཱེས་མི་རིགས་དེ་དག་ཁྱོད་ཅག་གི་སྔུན་ནས་རིམ་བཞིན་སྐྲོད་པར་མཛད། ཐང་གི་གཅན་གཟན་གཏུམ་པོའི་རིགས་མང་དུ་འཕེལ་ནས་ཁྱོད་རྣམས་ལ་གནོད་བསྐྱལ་ཉེན་ཡོད་པས་ཁྱོད་ཅག་གིས་ཁོ་རྣམས་མགྱོགས་པོར་ཚར་གཅོད་མི་རུང་།
DEU 7:23 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོ་ཚོ་འཇིག་པའི་བར་དུ་ཁོ་རྣམས་ཁྱོད་ཅག་ལ་སྤྲོད་ཅིང་ཁོ་ཚོ་མགོ་འཁོར་དུ་འཇུག་གོ །
DEU 7:24 ཡང་ཁོང་གིས་ཁོ་ཚོའི་རྒྱལ་པོ་རྣམས་ཀྱང་ཁྱོད་ཅག་གི་ལག་ཏུ་སྤྲོད་ཅིང་། ཁྱོད་རྣམས་ཀྱིས་དེ་དག་གི་མིང་གནམ་འོག་ནས་མེད་པར་བཟོ་བ་དང་། དེ་དག་ཚར་གཅོད་པའི་བར་དུ་ཁྱོད་ཅག་གི་མདུན་དུ་ཚུགས་ཐུབ་པའི་མི་གཅིག་ཀྱང་ཡོད་མི་སྲིད།
DEU 7:25 དེ་དག་གི་ལྷ་སྐུ་རྣམས་ཁྱོད་རྣམས་ཀྱིས་མེ་རུ་བསྲེག་དགོས་ཤིང་། ལྷ་སྐུའི་སྟེང་གི་གསེར་དངུལ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཞེ་ལོག་པ་ཡིན་པས། ཁྱོད་ཅག་དེ་ལ་ཧམ་པ་སྐྱེས་ནས་རང་གིས་འཁྱེར་མི་རུང་། ཅི་ལ་ཞེ་ན། དེ་ནི་ཁྱོད་ཅག་བསླུ་བྱེད་ཀྱི་རྙི་རྒྱ་ཡིན།
DEU 7:26 ཡང་ཁྱོད་རྣམས་རྫས་མི་གཙང་བ་དེ་དང་འདྲ་བར་རྩ་མེད་དུ་གཏོང་བྱ་རུ་མི་འགྱུར་བའི་ཕྱིར། དེ་རང་གི་ཁྱིམ་དུ་འཁྱེར་མི་རུང་། དེ་ནི་རྩ་མེད་དུ་གཏོང་འོས་པའི་རྫས་ཡིན་པས་ཁྱོད་ཅག་དེ་ལ་ཤིན་ཏུ་སྡང་ནས་ཞེ་མེར་དགོས་སོ། །
DEU 8:1 ཁྱོད་རྣམས་འཚོ་ཞིང་དར་ངེས་ཡིན་པ་དང་། དཀོན་མཆོག་ཡ་ཝཱེས་ཁྱོད་ཅག་གི་མེས་པོ་རྣམས་ལ་གནང་བར་མནའ་བཞེས་པའི་ཡུལ་དེ་རུ་སོང་ནས་ཡུལ་དེ་བདག་གིར་འཛིན་པར་འགྱུར་བའི་ཕྱིར། ངས་དེ་རིང་ཁྱོད་རྣམས་ལ་བསྒོས་པའི་བཀའ་ཐམས་ཅད་གཟབ་གཟབ་བྱས་ནས་བསྲུང་དགོས་སོ། །
DEU 8:2 ཡང་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་སྙེམ་ཆུང་དུ་མཛད་ནས་ཁྱོད་ཅག་ལ་བརྟག་པ་དང་། ཁྱོད་རྣམས་ཀྱི་སེམས་ཅི་འདྲ་ཡིན་པ་དང་། ཁོང་གི་བཀའ་བརྩི་མི་བརྩི་ཤེས་པའི་ཆེད་དུ། ཁོང་གིས་ལོ་ངོ་བཞི་བཅུའི་རིང་དབེན་སྟོང་ནས་ཇི་ལྟར་ཁྱོད་རྣམས་ལ་ལམ་སྟོན་མཛད་པ་ཐམས་ཅད་དྲན་པར་བྱའོ། །
DEU 8:3 ཁོང་གིས་ཁྱོད་ཅག་སྙེམ་ཆུང་དུ་མཛད་དེ་བཀྲེས་ལྟོགས་མྱོང་དུ་བཅུག་ནས། ཁྱོད་ཅག་དང་ཁྱོད་ཅག་གི་མེས་པོ་རྣམས་ལ་རྒྱུས་མེད་པའི་མཱན་ནཱ་ཁྱོད་ཅག་ལ་ཁ་ཟས་སུ་གནང་སྟེ། མི་ནི་བག་ལེབ་ཁོ་ནར་བརྟེན་ནས་འཚོ་བ་མ་ཡིན་པར། དཀོན་མཆོག་ཡ་ཝཱེའི་ཞལ་ནས་བྱུང་བའི་བཀའ་ཐམས་ཅད་ལ་བརྟེན་ནས་འཚོ་བ་ཡིན་པ་ཁྱོད་རྣམས་ལ་ཤེས་སུ་འཇུག་པའོ། །
DEU 8:4 ལོ་ངོ་བཞི་བཅུའི་རིང་ལ་ཁྱོད་ཅག་གི་གྱོན་གོས་རྣམས་མ་རལ་ཞིང་། རྐང་པ་ཡང་མ་སྐྲངས།
DEU 8:5 དེ་བས་མི་ཡིས་རང་གི་བུ་ལ་གཅུན་པ་བཞིན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་བཅུན་ནས་འོངས་པ་སེམས་ལ་ངེས་དགོས།
DEU 8:6 ཁྱོད་རྣམས་ཀྱིས་རང་གི་དཀོན་མཆོག་ཡ་ཝཱེའི་བཀའ་རྣམས་བསྲུང་དགོས་ལ་ཁོང་གི་ལམ་དུ་བསྐྱོད་དགོས་ཤིང་། ཁོང་ལ་གུས་ཤིང་འཇིགས་པར་བྱའོ། །
DEU 8:7 ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ཡུལ་བཟང་པོ་དེར་ཁྲིད་ནས་འགྲོ་ཞིང་། ཡུལ་དེ་རུ་གཙང་པོ་དང་ཆུ་མིག འཁྱིལ་ཆུ་བཅས་ཡོད་ལ། གྲོག་ལུང་དང་རི་བོ་རྣམས་ལས་ཆུ་བཞུར་བའོ། །
DEU 8:8 ས་ཆ་དེ་རུ་གྲོ་དང་ནས། རྒུན་འབྲུམ་ཤིང་། སེ་ཡབ་དང་སེ་འབྲུ་སྡོང་པོ། སྐྱུ་རུ་རའི་སྣུམ་དང་སྦྲང་རྩི་བཅས་ཡོད་ལ།
DEU 8:9 ཡུལ་དེར་ཁྱོད་རྣམས་ལ་འདང་ངེས་པའི་ཁ་ཟས་སྣ་ཚོགས་ཡོད་ལ་མི་འདང་བ་ཅི་ཡང་མེད། ཡུལ་དེའི་རྡོ་རྣམས་ལྕགས་ཡིན་པ་དང་། རི་བོ་རྣམས་ལས་ཟངས་བསྔོག་ཐུབ།
DEU 8:10 ཁྱོད་ཅག་གི་དཀོན་མཆོག་ཡ་ཝཱེས་ཡུལ་བཟང་པོ་དེ་ཁྱོད་རྣམས་ལ་གནང་བས། ཁྱོད་ཅག་གིས་ཟོས་ནས་འགྲང་ཚེ་ཁོང་ལ་བསྟོད་པ་འབུལ་དགོས་སོ། །
DEU 8:11 ཁྱོད་ཅག་གི་དཀོན་མཆོག་ཡ་ཝཱེ་ནི་ཁྱོད་རྣམས་ཀྱིས་བརྗེད་པར་མི་འགྱུར་བ་དང་། ངས་དེ་རིང་ཁྱོད་རྣམས་ལ་བསྒོས་པའི་བཀའ་རྒྱ་དང་སྲོལ་ཡིག སྒྲིག་ཁྲིམས་རྣམས་བསྲུང་བའི་ཆེད་དུ། ཁྱོད་རྣམས་ཀྱིས་གཟབ་གཟབ་བྱེད་དགོས།
DEU 8:12 དེ་ལྟར་མིན་ཚེ་ཁྱོད་རྣམས་ཀྱིས་ཟོས་ནས་འགྲང་ཞིང་། ཁང་པ་ཡག་པོ་བརྩིགས་ནས་དེའི་ནང་དུ་བསྡད་པ་དང་།
DEU 8:13 ཁྱོད་རྣམས་ཀྱི་བ་ཁྱུ་དང་ར་ལུག་གི་ཁྱུ་འཕེལ་ནས་གསེར་དངུལ་མང་དུ་ཕྱིན་ཏེ། ཁྱོད་རྣམས་ལ་ཡོད་པ་ཐམས་ཅད་འཕེལ་ཞིང་རྒྱས་པའི་དུས་སུ།
DEU 8:14 ཁྱོད་རྣམས་ཀྱི་སེམས་སུ་ང་རྒྱལ་གྱིས་ཁེངས་ནས་ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཕྱི་རུ་ཁྲིད་འོང་མཁན་ཁྱོད་ཅག་གི་དཀོན་མཆོག་ཡ་ཝཱེ་བརྗེད་པར་འགྱུར་ངེས།
DEU 8:15 ཁོང་གིས་ཁྱོད་ཅག་ལ་ལམ་སྟོན་མཛད་དེ་འཇིགས་སུ་རུང་བའི་དབེན་སྟོང་ཆེན་པོ་དེ་བརྒལ་བ་དང་། དེ་རུ་དུག་སྦྲུལ་དང་སྡིག་པ་ར་ཙ་དང་། ཐན་པ་ཆེ་ཞིང་ཆུ་མེད་པའི་གནས་བཅས་ཡོད་ལ། ཁྱོད་རྣམས་ཀྱི་ཆེད་དུ་སྲ་མཁྲེགས་ཀྱི་བྲག་གསེང་ནས་ཆུ་བཏོན་པ་རེད།
DEU 8:16 ཡང་ཁྱོད་ཅག་སྙེམ་ཆུང་དུ་མཛད་ནས་ཁྱོད་རྣམས་ལ་བརྟག་པ་དང་། ཁྱོད་རྣམས་ལ་དུས་གཏན་དུ་བདེ་བ་འཐོབ་པའི་ཆེད་དུ། ཁོང་གིས་དབེན་སྟོང་ནས་ཁྱོད་ཅག་གི་མེས་པོ་རྣམས་ལ་རྒྱུས་མེད་པའི་མཱན་ནཱ་ཁྱོད་ཅག་ལ་ཁ་ཟས་སུ་གནང་བའོ། །
DEU 8:17 དེ་ལྟར་མ་བྱས་ཚེ། ཁྱོད་རྣམས་ཀྱི་སེམས་སུ་ངའི་སྟོབས་དང་ལག་པའི་རྩལ་ལ་བརྟེན་ནས་ང་རང་ཕྱུག་པོ་ཆགས་པ་ཡིན་སྙམ་ཡང་སྲིད།
DEU 8:18 ཁྱོད་ཅག་གི་དཀོན་མཆོག་ཡ་ཝཱེ་ནི་ཁྱོད་རྣམས་ཀྱིས་དྲན་དགོས་ཏེ། ཅི་ལ་ཞེ་ན། ཁོང་གིས་དེ་རིང་མཛད་པ་ནང་བཞིན་ཁྱོད་ཅག་གི་མེས་པོ་རྣམས་ལ་མནའ་བཞེས་ཏེ་མཛད་པའི་ཞལ་ཆད་བརྟན་པོར་བཟོ་བའི་ཆེད་དུ། ཁྱོད་རྣམས་ཕྱུག་པོ་ཆགས་པའི་ནུས་པ་ནི་ཁོང་གིས་གནང་བ་ཡིན་ནོ། །
DEU 8:19 གལ་སྲིད་མ་འོངས་པ་ན་ཁྱོད་རྣམས་ཀྱིས་དངོས་གནས་ཁྱོད་ཅག་གི་དཀོན་མཆོག་ཡ་ཝཱེ་བརྗེད་པར་གྱུར་ཏེ་ལྷ་གཞན་གྱི་རྗེས་སུ་འབྲང་བ་དང་། དེ་དག་ལ་བསྙེན་བཀུར་བྱས་ནས་ཕྱག་བཙལ་ན། ཁྱོད་ཅག་ཡོངས་སུ་འཇིག་པར་འགྱུར་བ་ངས་དེ་རིང་ཁྱོད་རྣམས་ལ་བདེན་དཔང་བྱས་པ་ཡིན།
DEU 8:20 དཀོན་མཆོག་ཡ་ཝཱེས་ཁྱོད་རྣམས་ཀྱི་མདུན་དུ་མི་རིགས་རྣམས་ཅི་ལྟར་མེད་པར་མཛད་ན། ཁྱོད་རྣམས་ཀྱང་དེ་བཞིན་མེད་པར་མཛད་ངེས་ཡིན། ཅི་ལ་ཞེ་ན། ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་བཀའ་མ་བརྩིས་པའི་ཕྱིར་རོ། །
DEU 9:1 ཀྱེ་ཡེས་ར་ཨེལ་པ་རྣམས། ཁྱོད་ཅག་གིས་ཉོན་ཅིག དེ་རིང་ཁྱོད་རྣམས་ཡོར་དན་གཙང་པོའི་ཕ་རོལ་ཏུ་སོང་ནས། ཁྱོད་ཅག་ལས་ཆེ་ཞིང་སྟོབས་དང་ལྡན་པའི་མི་རིགས་རྣམས་ཕྱི་རུ་བསྐྲད་དེ། སྲ་ཞིང་བརྟན་ལ་ནམ་མཁར་ཟུག་པའི་གྲོང་ཁྱེར་རྣམས་བདག་གིར་འཛིན་པར་འགྱུར།
DEU 9:2 སྟོབས་ཆེ་ཞིང་གཟུགས་པོ་རིང་བའི་ཨ་ནག་གི་བུ་རྒྱུད་དེ། མི་གཞན་གྱིས་ཨ་ནག་བུ་རྒྱུད་ཀྱི་མདུན་དུ་སུ་ཞིག་འགྲེང་བར་ནུས་སམ་ཟེར་བ་ཁྱོད་རྣམས་ཀྱིས་ཤེས་ཤིང་ཐོས་པ་རྣམས་དབང་དུ་བསྡུ་དགོས།
DEU 9:3 དེ་བས་དེ་རིང་ཁྱོད་རྣམས་ཀྱིས་ཤེས་དགོས་པ་ཞིག་ལ། ཁྱོད་ཅག་གི་དཀོན་མཆོག་ཡ་ཝཱེ་ནི་ཡོད་ཚད་རྩ་མེད་གཏོང་བའི་མེ་བཞིན་ཁྱོད་རྣམས་ཀྱི་སྔུན་ནས་ཕར་ཕེབས་ཏེ་ཁོ་རྣམས་མེད་པར་མཛད་ཅིང་། ཁོང་གིས་ཁྱོད་རྣམས་ཀྱི་སྔུན་ནས་དེ་དག་འཇོམས་ངེས་ཡིན་ལ། དེ་ནས་དཀོན་མཆོག་ཡ་ཝཱེས་ཁྱོད་རྣམས་ལ་གསུངས་པ་ཇི་བཞིན་ཁྱོད་ཅག་གིས་དེ་དག་དེད་ནས་མྱུར་དུ་མེད་པར་བྱའོ། །
DEU 9:4 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོ་རྣམས་ཁྱོད་ཅག་གི་མདུན་ནས་སྤྱུགས་ཚེ། དཀོན་མཆོག་ཡ་ཝཱེས་ཁོ་རྣམས་ཁྱོད་ཅག་གི་མདུན་ནས་སྤྱུགས་པ་ནི་ཁོ་ཚོའི་སེམས་ངན་པའི་དབང་གིས་ཡིན་གྱི། ཁྱོད་རྣམས་ཀྱི་སེམས་སུ་ང་དྲང་པོ་ཡིན་པའི་རྐྱེན་གྱིས། དཀོན་མཆོག་ཡ་ཝཱེས་བདག་ལ་ཡུལ་འདིའི་བདག་དབང་གནང་བར་གནས་འདིར་ཁྲིད་པ་རེད་ཅེས་བསམ་པར་མི་བྱའོ། །
DEU 9:5 ཁྱོད་ཅག་ཁོ་རྣམས་ཀྱི་ཡུལ་བདག་གིར་འཛིན་པའི་ཕྱིར་དེར་འགྲོ་བ་ནི་ཁྱོད་རྣམས་དྲང་ཞིང་སེམས་ཡག་པས་མ་ཡིན་གྱི། མི་རིགས་དེ་དག་གི་སེམས་ངན་པའི་རྐྱེན་གྱིས། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ཀྱི་མེས་པོ་ཨབ་ར་ཧམ་དང་ཨི་སཱག་དང་། ཡ་ཀོབ་བཅས་ལ་མནའ་དང་བཅས་ཞལ་བཞེས་གནང་ཡོད་པ་བསྒྲུབ་ཆེད། ཁོ་ཚོ་ཁྱོད་རྣམས་ཀྱི་མདུན་ནས་སྤྱུགས་པ་རེད།
DEU 9:6 དེ་བས་ཁྱོད་རྣམས་དྲང་པོ་ཡིན་པའི་རྒྱུ་མཚན་གྱིས་ཁྱོད་ཅག་གི་དཀོན་མཆོག་ཡ་ཝཱེས་ཡུལ་བཟང་པོ་དེ་ཁྱོད་ཅག་ལ་ས་སྐལ་དུ་གནང་བ་མ་ཡིན་པ་ཤེས་པར་གྱིས། དོན་དམ་དུ་ཁྱོད་ཅག་ནི་མི་རིགས་གཉའ་རེངས་ཤིག་ཡིན་ནོ། །
DEU 9:7 ཁྱོད་རྣམས་ཀྱིས་དབེན་སྟོང་ནས་ཁྱོད་ཅག་གི་དཀོན་མཆོག་ཡ་ཝཱེའི་ཐུགས་དཀྲུགས་པ་དེ་བརྗེད་པར་མི་བྱ་བར་དྲན་པར་གྱིས། ཁྱོད་རྣམས་ཨེ་ཅིབ་ཡུལ་ནས་ཐོན་ཏེ་གནས་འདིར་མ་སླེབས་བར་དུ། ཁྱོད་ཅག་གིས་དཀོན་མཆོག་ཡ་ཝཱེ་ལ་ངོ་རྒོལ་བྱས་ཡོད།
DEU 9:8 རི་བོ་ཧོ་རེབ་ནས་ཀྱང་ཁྱོད་རྣམས་ཀྱིས་དཀོན་མཆོག་ཡ་ཝཱེའི་ཐུགས་དཀྲུགས་པ་དང་། དཀོན་མཆོག་ཡ་ཝཱེ་ཐུགས་ཁྲོས་ནས་ཁྱོད་ཅག་མེད་པར་གཏོང་བའི་ཚད་ལ་སླེབས།
DEU 9:9 སྐབས་དེར་ང་རང་དཀོན་མཆོག་ཡ་ཝཱེས་གནང་བའི་ཞལ་ཆད་ཀྱི་རྡོ་ལེབ་གཉིས་ལེན་དུ་རི་ལ་འགོས་པ་དང་། ང་རི་མགོར་ཉིན་མཚན་བཞི་བཅུའི་རིང་ལ་བསྡད་ཀྱང་བག་ལེབ་མ་ཟོས། ཆུ་ཡང་མ་འཐུངས།
DEU 9:10 དཀོན་མཆོག་ཡ་ཝཱེས་རྡོ་ལེབ་གཉིས་ང་ལ་གནང་བ་དང་། དེ་ནི་དཀོན་མཆོག་གི་ཕྱག་མཛུབ་ཀྱིས་བྲིས་པ་ཡིན། རྡོ་ལེབ་ཀྱི་སྟེང་དུ་འདུ་འཛོམས་ཉིན་མོར་དཀོན་མཆོག་ཡ་ཝཱེས་རི་རྩེའི་མེའི་དཀྱིལ་ནས་ཁྱོད་རྣམས་ལ་བསྩལ་པའི་བཀའ་ཐམས་ཅད་བཀོད་ཡོད།
DEU 9:11 ཉིན་མཚན་བཞི་བཅུའི་རྗེས་སུ་དཀོན་མཆོག་ཡ་ཝཱེས་ཞལ་ཆད་ཀྱི་རྡོ་ལེབ་དེ་གཉིས་ང་ལ་གནང་བྱུང་།
DEU 9:12 དེ་ནས་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ལོངས་ལ་མགྱོགས་པོར་མར་སོང་ཞིག ཅི་ལ་ཞེ་ན། ཁྱོད་ཀྱིས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་མི་མང་གིས་ལོག་སྤྱོད་སྤེལ་ཏེ། བདག་གིས་ཁོ་ཚོར་བསྒོས་པའི་ལམ་ནས་མགྱོགས་པོར་ལོག་པར་ཕྱིན་ཏེ་རང་གི་ཆེད་དུ་བླུགས་སྐུ་བཟོས་འདུག་ཅེས་གསུངས་སོ། །
DEU 9:13 དཀོན་མཆོག་ཡ་ཝཱེས་ཡང་ང་ལ་འདི་སྐད་དུ། ཁྱོད་ཀྱིས་ལྟོས་དང་ངས་མི་འདི་རྣམས་དངོས་གནས་མི་གཉའ་རེངས་ཤིག་ཡིན་པར་མཐོང་ངོ་། །
DEU 9:14 ཁྱོད་ཀྱིས་སྐྱུར་དང་། བདག་གིས་དེ་དག་མེད་པར་གཏོང་ཞིང་། དེ་དག་གི་མིང་གནམ་འོག་ནས་མེད་པར་བྱ། ཁྱོད་ནི་ཁོ་ཚོ་ལས་མི་རིགས་སྟོབས་དང་ལྡན་ཞིང་ཆེན་པོ་ཞིག་ཏུ་བྱེད་པར་བྱ་ཞེས་བཀའ་བསྩལ་བྱུང་།
DEU 9:15 དེ་བས་ང་ཕྱིར་འཁོར་ཏེ་རི་ལས་འབབ་དུས་རི་མགོར་མེ་འབར་བཞིན་ཡོད་ལ། ཞལ་ཆད་ཀྱི་རྡོ་ལེབ་གཉིས་ངའི་ལག་ཏུ་ཡོད།
DEU 9:16 དེར་ངས་བལྟས་པ་ལ། ཁྱོད་ཅག་གིས་རང་གི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ནས། རང་གི་ཆེད་དུ་བ་ཕྲུག་ཅིག་གི་སྐུ་བརྙན་བླུགས་ཤིང་། མགྱོགས་པོར་ཁྱོད་ཅག་གི་དཀོན་མཆོག་ཡ་ཝཱེས་དེའི་ནང་འགྲུལ་དགོས་པར་བཀའ་བསྩལ་པའི་ལམ་དང་བྲལ་བ་མཐོང་བྱུང་།
DEU 9:17 དེ་བས་ངས་རྡོ་ལེབ་དེ་གཉིས་བཟུང་སྟེ་ལག་པ་གཉིས་ལས་ཕར་གཡུགས་ཤིང་། ཁྱོད་ཅག་གི་མིག་ལམ་ནས་བཅག་པ་ཡིན།
DEU 9:18 དེ་ནས་ཁྱོད་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ནས་ཁོང་གི་ཐུགས་དཀྲུགས་ཤིང་བསགས་པའི་སྡིག་པ་ཀུན་གྱི་དོན་དུ། ངས་དཀོན་མཆོག་ཡ་ཝཱེའི་དྲུང་དུ་ལུས་སར་བཏུད་ནས་སྔོན་ཆད་ནང་བཞིན་ཉིན་མཚན་བཞི་བཅུའི་རིང་ལ་བག་ལེབ་མ་ཟོས། ཆུ་ཡང་མ་འཐུངས།
DEU 9:19 ཅི་ལ་ཞེ་ན། དཀོན་མཆོག་ཡ་ཝཱེ་ཐུགས་རབ་ཏུ་ཁྲོས་ཏེ་ཁྱོད་ཅག་མེད་པར་གཏོང་རྩིས་བྱས་པ་དང་ང་རང་ཤིན་ཏུ་འཇིགས་པ་ཡིན། འོན་ཀྱང་ཐེངས་དེར་དཀོན་མཆོག་ཡ་ཝཱེས་ཡང་ངའི་ཞུ་བར་གསན་བྱུང་།
DEU 9:20 དཀོན་མཆོག་ཡ་ཝཱེ་ཁོང་ཉིད་ཨ་རོན་ལའང་ཐུགས་ཤིན་ཏུ་ཁྲོས་པས་ཁོ་མེད་པར་གཏོང་རྩིས་བྱས་ཤིང་། དུས་དེར་ངས་ཨ་རོན་གྱི་དོན་དུ་ཡང་སྨོན་ལམ་བཏབ་པ་ཡིན།
DEU 9:21 དེ་ནས་ངས་ཁྱོད་ཅག་གི་སྡིག་པ་སྟེ་ཁྱོད་རྣམས་ཀྱིས་བླུགས་པའི་བ་ཕྲུག་ཁྱེར་ནས། དེ་མེ་ལ་བསྲེགས་ནས་ཚར་བཅད་པ་དང་རྡུལ་དུ་བཏགས་པ་ཡིན། དེའི་རྡུལ་ཐལ་ནི་རི་ལས་འབབ་པའི་ཆུ་ལ་བཏབ་པ་ཡིན་ནོ། །
DEU 9:22 ཡང་ཐབ་ཨེ་རཱ་དང་མཱ་སཱ་དང་། ཀིབ་རོད་ཧད་ཐཱ་ཨ་ཝ་བྱ་བའི་གནས་སུ་ཁྱོད་རྣམས་ཀྱིས་ཡང་དཀོན་མཆོག་ཡ་ཝཱེའི་ཐུགས་དཀྲུགས།
DEU 9:23 དཀོན་མཆོག་ཡ་ཝཱེས་ཁྱོད་ཚོ་ཀཱ་དེའེ་ཤཱ་པར་ནེ་ཨ་ནས་མངགས་པའི་དུས་སུ། ཁྱོད་རྣམས་ཡར་སོང་ནས་ངས་ཁྱོད་ཅག་ལ་ས་སྐལ་དུ་སྦྱིན་པའི་ཡུལ་དེ་ལོངས་ཤིག་ཅེས་བཀའ་བསྩལ་ཡང་། ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེའི་བཀའ་དང་འགལ་ནས་ཁོང་ལ་དད་གུས་མ་བྱས། ཁོང་གི་གསུང་སྐད་ལའང་མ་མཉན།
DEU 9:24 ངས་ཁྱོད་ཚོ་ངོ་ཤེས་པའི་ཉིན་དེ་ནས་བཟུང་ཁྱོད་ཚོས་དཀོན་མཆོག་ཡ་ཝཱེ་ལ་ངོ་ལོག་བྱས་ཡོད་དོ། །
DEU 9:25 དཀོན་མཆོག་ཡ་ཝཱེས་ཁྱོད་རྣམས་མེད་པར་བྱ་གསུངས་པས། བསྡོམས་པས་ཉིན་མཚན་བཞི་བཅུའི་རིང་ལ་ངས་དཀོན་མཆོག་ཡ་ཝཱེའི་སྤྱན་སྔར་ལུས་སར་བཏུད་པ་ཡིན།
DEU 9:26 ངས་དཀོན་མཆོག་ཡ་ཝཱེ་ལ་གསོལ་བ་འདི་ལྟར་བཏབ་པ་སྟེ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་བདག་ཏུ་མཛད་པའི་འབངས་མི་དང་ནོར་སྐལ་ཏེ། ཁྱེད་ཀྱིས་ནུས་མཐུ་ཆེན་པོས་བསྐྱབས་ཤིང་། ཁྱེད་ཀྱི་མཐུ་སྟོབས་ལྡན་པའི་ཕྱག་གིས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་དེ་མེད་པར་མི་མཛད་རོགས།
DEU 9:27 ཁྱེད་ཀྱི་ཞབས་ཕྱི་ཨབ་ར་ཧམ་དང་ཨི་སཱག་དང་། ཡ་ཀོབ་རྣམས་ཐུགས་སུ་དྲན་པར་མཛོད་ཅིག མི་འདི་རྣམས་ཀྱི་གཉའ་རེངས་དང་ངན་རུལ། སྡིག་པ་བཅས་ལ་མི་གཟིགས་པར་མཛོད།
DEU 9:28 དེ་ལྟར་མིན་ཚེ་ཁྱེད་ཀྱིས་ང་ཚོ་ཕྱི་རུ་ཁྲིད་འོངས་སའི་ཡུལ་དེའི་ཡུལ་མི་རྣམས་ཀྱིས་དཀོན་མཆོག་ཡ་ཝཱེས་ཁོ་ཚོ་ཁོང་གིས་ཞལ་གྱིས་བཞེས་པའི་ཡུལ་དུ་འཁྲིད་མ་ནུས་པ་དང་། ཡང་དེ་དག་ལ་སྡང་བའི་རྐྱེན་གྱིས་ཁོང་གིས་དེ་ཚོ་དབེན་སྟོང་ནས་འཆི་རུ་འཇུག་ཕྱིར་ཕྱི་རུ་ཁྲིད་པ་རེད་ཅེས་སྨྲ་བར་འགྱུར།
DEU 9:29 ཁོ་ཚོ་ནི་ཁྱེད་ཀྱི་འབངས་མི་དང་ནོར་སྐལ་ཏེ། ཁྱེད་ཀྱིས་མཐུ་སྟོབས་ཆེན་པོའི་ཕྱག་དང་ཕྱི་རུ་བརྐྱངས་པའི་དཔུང་པ་ཡིས་ཕྱི་རུ་ཁྲིད་འོངས་པ་ཡིན་ཞེས་ཞུས་པ་ཡིན་ཞེས་གསུངས་སོ། །
DEU 10:1 སྐབས་དེར་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་རང་ལ་སྔར་གྱི་རྡོ་ལེབ་དང་འདྲ་བ་གཉིས་བརྐོས་ནས་ངའི་མདུན་དུ་རི་ལ་ཡོང་དགོས། དེ་ནས་ཤིང་གི་ཤུར་སྒམ་ཞིག་ཀྱང་བཟོས་ཤིག
DEU 10:2 བདག་གིས་ཁྱོད་ཀྱིས་བཅག་པའི་རྡོ་ལེབ་སྔ་མ་དེ་གཉིས་ཀྱི་སྟེང་ཡོད་པའི་ཚིག་རྣམས་རྡོ་ལེབ་འདི་གཉིས་ཀྱི་སྟེང་དུ་བརྐོ་བར་བྱ། ཁྱོད་ཀྱིས་དེ་གཉིས་ཤུར་སྒམ་ནང་དུ་འཇོག་དགོས་ཞེས་བཀའ་བསྩལ་བྱུང་།
DEU 10:3 དེ་བས་ངས་སེང་ལྡེང་ཤིང་གི་ཤུར་སྒམ་ཞིག་བཟོས་པ་དང་། སྔོན་མ་ནང་བཞིན་རྡོ་ལེབ་གཉིས་བརྐོས་ཤིང་དེ་གཉིས་ལག་ཏུ་བཟུང་ནས་རི་ལ་འགོས་པ་ཡིན།
DEU 10:4 དཀོན་མཆོག་ཡ་ཝཱེས་སྔར་བཀོད་པ་སྟེ་འདུ་འཛོམས་ཀྱི་ཉིན་མོར་རི་བོའི་མེའི་དཀྱིལ་ནས་ཁྱོད་ཅག་ལ་བསྩལ་པའི་བཀའ་ཁྲིམས་བཅུ་པོ་རྡོ་ལེབ་གཉིས་ཀྱི་སྟེང་དུ་ཡི་གེར་བཀོད་ཅིང་། ཁོང་གིས་རྡོ་ལེབ་དེ་གཉིས་ང་ལ་གནང་བྱུང་།
DEU 10:5 དེ་ནས་ང་ཕྱིར་འཁོར་ནས་རི་ལས་བབས་པ་དང་། རྡོ་ལེབ་གཉིས་ངས་བཟོས་པའི་ཤུར་སྒམ་ནང་བཞག་པ་ཡིན་ལ། དཀོན་མཆོག་ཡ་ཝཱེས་ང་ལ་བཀའ་བསྩལ་པ་ཇི་བཞིན་རྡོ་ལེབ་ད་དུང་དེ་རུ་ཡོད་དོ། །
DEU 10:6 དེ་ཡང་ཡེས་ར་ཨེལ་པ་རྣམས་ཡཱ་ཨ་ཀན་པ་རྣམས་ཀྱི་ཁྲོན་པ་ཞེས་པའི་ཡུལ་ནས་མོ་སེ་རཱ་ལ་སོང་ཞིང་། ཨ་རོན་དེ་རུ་གྲོངས་ནས་དུར་ལ་སྦས་པ་དང་། ཁོའི་བུ་ཨེ་ལི་ཨ་ཟར་གྱིས་ཁོའི་ཚབ་ཏུ་མཆོད་དཔོན་གྱི་ལས་འགན་ཁུར་བའོ། །
DEU 10:7 ཡུལ་དེ་ནས་གུད་གོ་དཱ་དང་། གུད་གོ་དཱ་ནས་འབབ་ཆུ་བཞུར་བའི་ས་སྟེ་ཡོད་པ་ཐཱ་རུ་སོང་།
DEU 10:8 དེའི་དུས་སུ་དཀོན་མཆོག་ཡ་ཝཱེས་ལེ་ཝིའི་ཚོ་པ་ལོགས་སུ་བཀར་ནས་དེ་རིང་གི་བར་དུ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་དུ་བཅུག་ཅིང་། དཀོན་མཆོག་ཡ་ཝཱེའི་སྤྱན་སྔར་ལངས་ནས་ཁོང་ལ་བསྙེན་བཀུར་བྱེད་པ་དང་། ཁོང་གི་མཚན་ལ་བརྟེན་ནས་བྱིན་རླབས་སྩོལ་བར་མཛད་དོ། །
DEU 10:9 དེ་བས་ལེ་ཝི་པ་རྣམས་ལ་རང་གི་སྤུན་ཟླ་རྣམས་དང་འདྲ་བར་བགོ་སྐལ་དང་ནོར་སྐལ་ནི་མེད། ཁྱོད་རྣམས་ཀྱི་དཀོན་མཆོག་ཡ་ཝཱེས་ཞལ་བཞེས་གནང་བ་བཞིན་དཀོན་མཆོག་ཡ་ཝཱེ་ཁོང་ཉིད་དེ་དག་གི་ནོར་སྐལ་ཡིན་པའོ། །
DEU 10:10 ཡང་ང་རང་སྔར་བཞིན་ཉིན་མཚན་བཞི་བཅུའི་རིང་ལ་རི་མགོར་བསྡད་པ་དང་། དཀོན་མཆོག་ཡ་ཝཱེས་སྐབས་དེར་ཡང་བདག་གི་ཞུ་བར་གསན་ནས་ཁྱོད་རྣམས་ཚར་གཅོད་མཛད་པར་ཐུགས་མ་དགྱེས་སོ། །
DEU 10:11 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཡར་ལོངས་ལ་མི་རྣམས་ཀྱི་སྣེ་ཁྲིད་ནས་ལམ་དུ་ཆས་ཤིག ཅི་ལ་ཞེ་ན། བདག་གིས་ཁོ་ཚོའི་མེས་པོ་རྣམས་ལ་ཡུལ་དེ་ཁོ་ཚོར་སྦྱིན་པར་བྱའོ་ཞེས་མནའ་བསྐྱལ་བའི་ཡུལ་དེ་འཐོབ་པའི་ཕྱིར་ཡིན་ནོ་ཞེས་བཀའ་བསྩལ་ཏོ། །
DEU 10:12 ཀྱེ་ཡེས་ར་ཨེལ་པ་རྣམས་ཀྱིས་ལྟོས་དང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ཅི་ཞིག་བསྒྲུབ་ཏུ་འཇུག་འདོད་པ་ཡིན་ནམ། དེ་ནི་ཁྱོད་རྣམས་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་དང་། ཁོང་གི་ཕེབས་ལམ་ཐམས་ཅད་དུ་འགྲུལ་ཞིང་ཁོང་ལ་དགའ་བ་དང་། བློ་གཅིག་སེམས་གཅིག་གིས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་པ་དང་།
DEU 10:13 ཁྱོད་རྣམས་ལ་ཕན་ཐོགས་པའི་ཆེད་དུ་ངས་དེ་རིང་ཁྱོད་ཅག་ལ་བསྒོས་པའི་དཀོན་མཆོག་ཡ་ཝཱེའི་བཀའ་རྒྱ་དང་སྒྲིག་ཁྲིམས་རྣམས་བརྩི་སྲུང་བྱེད་པ་བཅས་ཡིན་ནོ། །
DEU 10:14 ལྟོས་དང་། ནམ་མཁའ་དང་ནམ་མཁའི་དབྱིངས་རྣམས་དང་། ས་གཞི་དང་དེའི་ནང་བཅུད་ཐམས་ཅད་ཁྱོད་རྣམས་ཀྱི་དཀོན་མཆོག་ཡ་ཝཱེའི་ཡིན།
DEU 10:15 འོན་ཀྱང་དཀོན་མཆོག་ཡ་ཝཱེ་ནི་ཁྱོད་རྣམས་ཀྱི་མེས་པོ་འབའ་ཞིག་ལ་ཐུགས་མོས་ཤིང་། ཁོ་རྣམས་ལ་བྱམས་པ་དང་། ཁོང་གིས་དེ་དག་གི་བུ་རྒྱུད་དེ། ཁྱོད་རྣམས་ནི་མི་རིགས་ཐམས་ཅད་ལས་དེ་རིང་ནང་བཞིན་བདམས་པར་མཛད།
DEU 10:16 དེ་བས་ཁྱོད་ཅག་གིས་རང་གི་སེམས་ལ་མཚན་སྐྱི་ཆོད་ཅིག མཇིང་པ་མཁྲེགས་པོ་མ་བྱེད་ཅིག
DEU 10:17 ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེ་ནི་ལྷ་རྣམས་ཀྱི་དཀོན་མཆོག་དང་། གཙོ་བོ་རྣམས་ཀྱི་གཙོ་བོ། ཆེ་ཞིང་མཐུ་སྟོབས་ལྡན་པ་དང་། འཇིགས་སུ་རུང་བ་བཅས་ཀྱི་དཀོན་མཆོག་ཡིན་ལ། ཁོང་ལ་ཕྱོགས་རིས་མེད་པ་དང་ཁོང་གིས་གསུག་ཀྱང་མི་བཞེས།
DEU 10:18 ཁོང་གིས་དྭ་ཕྲུག་དང་ཡུགས་མོ་རྣམས་ལ་དྲང་བདེན་མཛད་ཅིང་། བྱེས་པ་རྣམས་ལ་གཅེས་ཤིང་ལྟོ་གོས་སྤྲོད་པ་ཡིན།
DEU 10:19 རྒྱུ་མཚན་ནི་ཁྱོད་ཅག་ཀྱང་ཨེ་ཅིབ་ཡུལ་དུ་བྱེས་པ་ཡིན་པས་བྱེས་པ་རྣམས་ལ་གཅེས་པར་རིགས།
DEU 10:20 ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་དང་། ཁོང་ལ་བསྙེན་བཀུར་བྱས་ནས་ཁོང་ལ་དམ་པོར་བརྟེན་པ་དང་། ཁོང་གི་མཚན་ལ་བརྟེན་ནས་མནའ་བསྐྱལ་བ་བཅས་བྱེད་དགོས།
DEU 10:21 ཁོང་ནི་ཁྱོད་རྣམས་ཀྱིས་བསྟོད་འོས་པ་དང་ཁྱོད་རྣམས་ཀྱི་དཀོན་མཆོག་ཡིན་ཏེ། ཁྱོད་ཅག་གིས་དངོས་སུ་མཐོང་བའི་ཆེ་ཞིང་འཇིགས་སུ་རུང་བའི་དོན་རྣམས་ཁྱོད་རྣམས་ཀྱི་ཆེད་དུ་མཛད་མཁན་ཡིན།
DEU 10:22 ཁྱོད་ཅག་གི་ཕ་མེས་རྣམས་ཨེ་ཅིབ་ཡུལ་དུ་འགྲོ་དུས་དེ་ཚོའི་མི་གྲངས་ནི་བསྡོམས་པས་བདུན་ཅུ་ཙམ་ཡིན། ད་ལྟ་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་གི་གྲངས་ཀ་ནམ་མཁའི་སྐར་ཚོགས་ལྟར་མཛད་པ་ཡིན་ཞེས་གསུངས་སོ། །
DEU 11:1 དེ་བས་ན་ཁྱོད་རྣམས་རང་གི་དཀོན་མཆོག་ཡ་ཝཱེ་ལ་དགའ་ཞིང་ཁོང་གི་བསྒོ་བ་དང་སྒྲིག་ཁྲིམས། སྲོལ་ཡིག བཀའ་རྒྱ་རྣམས་དུས་རྒྱུན་དུ་བསྲུང་དགོས།
DEU 11:2 དེ་རིང་ཁྱོད་རྣམས་ཀྱིས་ངེས་དགོས་པ་ནི། ངས་ཁྱོད་ཅག་གི་བུ་དང་བུ་མོ་རྣམས་ལ་གཏམ་སྨྲ་བ་མ་ཡིན་ཏེ། དེ་དག་གིས་ཁྱོད་ཅག་གི་དཀོན་མཆོག་ཡ་ཝཱེའི་འདུལ་ཁྲིམས་དང་། ཁོང་གི་ཆེ་ཞིང་མཐུ་སྟོབས་ལྡན་པའི་ཕྱག་དང་ཕྱི་རུ་བརྐྱངས་པའི་དཔུང་པ་དང་།
DEU 11:3 ཁོང་གིས་ཨེ་ཅིབ་ཡུལ་ནས་ཨེ་ཅིབ་ཀྱི་རྒྱལ་པོ་ཕཱར་ཨོལ་དང། དེའི་ཡུལ་ཐམས་ཅད་ལ་གྲུབ་རྟགས་དང་འཕྲིན་ལས་ཇི་ལྟར་མཛད་པ་མ་ཤེས་མ་མཐོང་ལ།
DEU 11:4 ཁོང་གིས་ཨེ་ཅིབ་ཀྱི་དམག་དཔུང་དང་དེའི་རྟ་དང་ཤིང་རྟ་རྣམས་ལ་ཇི་ལྟར་མཛད་པ་སྟེ། དེ་དག་གིས་ཁྱོད་རྣམས་ཀྱི་རྗེས་འདེད་སྐབས་ཁོང་གིས་དེ་དག་རྒྱ་མཚོ་དམར་པོའི་ཆུ་ལ་སྣུབ་ཏུ་བཅུག་ཅིང་། དེ་དག་རྩ་མེད་མཛད་པ་དེ་རིང་བར་དུ་གྲགས་ཡོད།
DEU 11:5 ཡང་ཁྱོད་རྣམས་དབེན་སྟོང་ནས་གནས་འདིར་མ་སླེབས་བར་དུ། ཁོང་གིས་ཁྱོད་རྣམས་ལ་དོན་ཅི་ཞིག་མཛད་པའང་མཐོང་མྱོང་བ་མེད།
DEU 11:6 ཁོང་གིས་རུ་བེན་གྱི་བུ་ཨེ་ལི་ཨབ་ཀྱི་བུ་དཱ་ཐན་དང་ཨ་བི་རཱམ་གཉིས་ལ་ཇི་ལྟར་མཛད་པ་སྟེ། ས་གཞིས་ཁ་གདངས་ནས་དེ་གཉིས་དང་དེ་གཉིས་ཀྱི་ཁྱིམ་མི་དང་། གུར་དང་། དེ་གཉིས་དང་མཉམ་དུ་ཡོད་པའི་སྲོག་ལྡན་ཐམས་ཅད་ཡེས་ར་ཨེལ་གྱི་ཁྲོད་ནས་ཁྱུར་མིད་བཏང་བའང་མཐོང་མྱོང་བ་མེད།
DEU 11:7 དཀོན་མཆོག་ཡ་ཝཱེས་མཛད་པའི་འཕྲིན་ལས་ཆེན་པོ་དེ་ཐམས་ཅད་ཁྱོད་ཅག་གིས་དངོས་སུ་མཐོང་ཡོད་དོ། །
DEU 11:8 དེ་བས་བདག་གིས་དེ་རིང་ཁྱོད་རྣམས་ལ་བསྒོས་པའི་བཀའ་རྒྱ་ཐམས་ཅད་སྲུངས་ཤིག དེ་ནས་ཁྱོད་རྣམས་སྟོབས་དང་ལྡན་པར་གྱུར་ནས་ལོན་པར་འགྱུར་བའི་ཡུལ་དེར་འགྲོ་ཞིང་ཡུལ་དེ་བདག་ཏུ་འཛིན་པ་དང་།
DEU 11:9 ཡང་དཀོན་མཆོག་ཡ་ཝཱེས་ཁྱོད་ཅག་གི་མེས་པོ་རྣམས་ལ་ཁོ་རྣམས་དང་ཁོ་རྣམས་ཀྱི་བུ་རྒྱུད་ལ་སྦྱིན་པར་མནའ་དང་བཅས་ཞལ་བཞེས་གནང་བའི་ཡུལ་ཏེ། འོ་མ་དང་སྦྲང་རྩི་བཞུར་བའི་ཡུལ་དུ་ཁྱོད་རྣམས་འཚོ་ཞིང་ཡུན་རིང་གནས་པར་འགྱུར།
DEU 11:10 ཁྱོད་རྣམས་བདག་གིར་འཛིན་དུ་འགྲོ་བའི་ཡུལ་དེ་ནི་ཁྱོད་ཅག་ཐོན་སའི་ཨེ་ཅིབ་ཡུལ་དང་མི་འདྲ་སྟེ། དེ་རུ་ཁྱོད་རྣམས་ཀྱིས་ས་བོན་གཏོར་རྗེས་ཚལ་ལྡུམ་བཞིན་དུ་རྐང་པས་ཡུར་ཆུ་གཏོང་དགོས་པ་ཡིན་ཡང་།
DEU 11:11 ཁྱོད་རྣམས་ས་སྐལ་དུ་ལེན་པར་འགྲོ་བའི་ཡུལ་ནི་རི་དང་ལུང་པའི་ཡུལ་ཡིན་པ་སྟེ། གནམ་ནས་འབབ་པའི་ཆར་ཆུ་འཐུང་བ་དང་།
DEU 11:12 ཁྱོད་རྣམས་ཀྱི་དཀོན་མཆོག་ཡ་ཝཱེས་གཟིགས་སྐྱོང་གནང་བའི་ཡུལ་ཞིག་ཡིན་ལ། ལོ་མགོ་ནས་ལོ་མཇུག་བར་དུ་ཁྱོད་རྣམས་ཀྱི་དཀོན་མཆོག་ཡ་ཝཱེའི་སྤྱན་གྱིས་ནམ་ཡང་དེ་ལ་གཟིགས་སོ། །
DEU 11:13 གལ་སྲིད་ཁྱོད་ཅག་གིས་ངས་དེ་རིང་ཁྱོད་རྣམས་ལ་བསྒོས་པའི་བཀའ་རྣམས་ལ་རྣ་བ་བླགས་ནས་ཉན་པ་དང་། ཁྱོད་ཅག་གི་དཀོན་མཆོག་ཡ་ཝཱེ་ལ་དགའ་ཞིང་བློ་གཅིག་སེམས་གཅིག་གིས་ཁོང་ལ་བསྙེན་བཀུར་ཕུལ་ན།
DEU 11:14 ཁོང་གིས་སྟོན་དུས་དང་དཔྱིད་དུས་སུ་ཁྱོད་རྣམས་ཀྱི་ཡུལ་ལ་ཆར་ཆུ་འབབ་ཏུ་འཇུག་ཅིང་། ཁྱོད་རྣམས་ཀྱིས་འབྲུ་རིགས་དང་རྒུན་ཆང་གསར་པ་དང་། སྣུམ་གསར་པ་བཅས་བསྡུ་བར་བྱེད།
DEU 11:15 ཡང་ཁོང་གིས་སྤང་ཐང་ལ་ཁྱོད་རྣམས་ཀྱི་སྒོ་ཕྱུགས་ཀྱི་ཕྱིར་རྩྭ་སྐྱེ་རུ་འཇུག་པ་དང་། ཁྱོད་རྣམས་ཀྱིས་བཟའ་ཞིང་མགུ་ཁེངས་པར་བྱེད།
DEU 11:16 ཁྱོད་རྣམས་ཀྱི་སེམས་བསླུ་བར་དོགས་ཟོན་གྱིས་ཤིག ཁྱོད་རྣམས་ལོག་ལམ་དུ་འཁོར་ནས་ལྷ་གཞན་དག་ལ་བསྙེན་བཀུར་བྱས་ཏེ་ཕྱག་བཙལ་ན།
DEU 11:17 དཀོན་མཆོག་ཡ་ཝཱེའི་ཐུགས་ཁྲོ་ཁྱོད་རྣམས་ཀྱི་སྟེང་ལ་འབར་ནས་ཁོང་གིས་ནམ་མཁའི་སྒོ་དགག་ཅིང་ཆར་ཆུ་མི་གནང་ལ། ཞིང་ལ་ལོ་ཏོག་ཀྱང་མི་སྐྱེ། དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་ཡུལ་བཟང་པོ་ནས་ཁྱོད་ཅག་མྱུར་དུ་འཇིག་པར་འགྱུར་རོ། །
DEU 11:18 དེ་བས་བདག་གི་གཏམ་རྣམས་ཁྱོད་ཅག་གི་སེམས་དང་ཡིད་ལ་ཆོངས་ཤིག དེ་རྣམས་རྟགས་ཀྱི་དོད་དུ་ལག་པའི་སྟེང་དང་དཔྲལ་བར་དཀྲི་དགོས།
DEU 11:19 ཡང་ཁྱོད་རྣམས་ཀྱིས་ཁྱིམ་ནས་འདུག་དུས་དང་ལམ་དུ་འགྲོ་དུས་དང་། མར་ཉལ་དུས་དང་ཡར་ལངས་དུས་ནམ་ཡིན་ཡང་དེ་རྣམས་རང་གི་བུ་དང་བུ་མོ་རྣམས་ལ་ཁྲིད་ནས་འཆད་དགོས།
DEU 11:20 བཀའ་དེ་རྣམས་ཁང་པའི་སྒོ་འགྲམ་དང་མཁར་སྒོའི་སྟེང་དུ་ཡང་འབྲི་དགོས།
DEU 11:21 དེ་ནས་དཀོན་མཆོག་ཡ་ཝཱེས་ཁྱོད་ཅག་གི་ཕ་མེས་རྣམས་ལ་གནང་བར་མནའ་བཞེས་པའི་ཡུལ་དུ། ཁྱོད་ཅག་དང་ཁྱོད་ཅག་གི་བུ་རྒྱུད་རྣམས་ཀྱི་ཚེ་འཕེལ་བར་འགྱུར་ཏེ། ས་གཞི་སྟེང་གི་ནམ་མཁའ་གནས་པ་ལྟར་ཡིན་ནོ། །
DEU 11:22 གལ་སྲིད་ངས་ཁྱོད་ཅག་ལ་བསྒོས་པའི་བཀའ་ཐམས་ཅད་ཁྱོད་རྣམས་ཀྱིས་ལེགས་པར་བསྲུངས་ཏེ། ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་དགའ་ཞིང་། ཁོང་གི་ཕེབས་ལམ་ཀུན་ཏུ་འགྲུལ་ནས་ཁོང་ལ་དམ་པོར་བརྟེན་ན།
DEU 11:23 དཀོན་མཆོག་ཡ་ཝཱེས་མི་རིགས་འདི་ཐམས་ཅད་ཁྱོད་རྣམས་ཀྱི་མདུན་ནས་སྤྱུག་ཅིང་། ཁྱོད་རྣམས་ལས་སྟོབས་ཆེ་ཞིང་གྲངས་མང་བའི་མི་རིགས་རྣམས་ཀྱི་ཡུལ་ནི་ཁྱོད་ཅག་གིས་ལེན་པར་འགྱུར།
DEU 11:24 ཁྱོད་རྣམས་ཀྱི་རྐང་པ་སྤོས་པའི་ས་ཆ་ཡོད་ཚད་ཁྱོད་ཅག་གི་ཡིན་པ་དང་། དབེན་སྟོང་ནས་ལེ་པཱ་ནོན་དང་ཕི་རཱད་གཙང་པོ་ནས་ནུབ་མཚོའི་བར་དུ་ཁྱོད་ཅག་གི་ས་མཚམས་ཡིན།
DEU 11:25 མི་གཅིག་ཀྱང་ཁྱོད་རྣམས་ཀྱི་མདུན་ནས་ཚུགས་མི་ཐུབ་སྟེ། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་གསུངས་པ་ནང་བཞིན། ཁོང་གིས་ཁྱོད་རྣམས་ཀྱི་རྐང་པ་སྤོ་སའི་ཡུལ་གྱི་ཡུལ་མི་ཐམས་ཅད་ཁྱོད་རྣམས་ལ་འཇིགས་ཤིང་དངངས་པར་བྱའོ། །
DEU 11:26 ལྟོས་དང་། བདག་གིས་དེ་རིང་ཁྱོད་རྣམས་ཀྱི་མདུན་དུ་བྱིན་རླབས་དང་དམོད་མོ་གཉིས་ཀ་བཤམས་ཡོད།
DEU 11:27 གལ་སྲིད་ཁྱོད་རྣམས་ཀྱིས་ངས་དེ་རིང་ཁྱོད་ཅག་ལ་བསྒོས་པའི་ཁྱོད་ཅག་གི་དཀོན་མཆོག་ཡ་ཝཱེའི་བཀའ་རྒྱ་རྣམས་ལ་མཉན་ན་བྱིན་རླབས་འཐོབ་པ་དང་།
DEU 11:28 གལ་སྲིད་ཁྱོད་ཅག་གིས་རང་གི་དཀོན་མཆོག་ཡ་ཝཱེའི་བཀའ་རྒྱ་རྣམས་ལ་མི་ཉན་པར། དེ་རིང་ངས་ཁྱོད་ཅག་ལ་འགྲུལ་དགོས་པར་བསྒོས་པའི་ལམ་ནས་ལོག་པར་སྐྱོད་ཅིང་། ཁྱོད་རྣམས་ལ་རྒྱུས་མི་མངའ་བའི་ལྷ་གཞན་དག་གི་རྗེས་སུ་འབྲངས་ན་དམོད་མོ་ཕོག་པར་འགྱུར་རོ། །
DEU 11:29 དེ་ཡང་ཁྱོད་རྣམས་ཀྱིས་ཡུལ་དེ་བདག་གིར་འཛིན་པའི་ཆེད་དུ། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་ཡུལ་དེར་འཁྲིད་པའི་དུས་སུ། ཁྱོད་རྣམས་ཀྱིས་རི་བོ་གེ་རི་ཟིམ་ལ་བྱིན་རླབས་བསྒྲག་པ་དང་། རི་བོ་ཨེ་བཱལ་ལ་དམོད་པ་བསྒྲག་དགོས།
DEU 11:30 རི་བོ་དེ་གཉིས་ཀ་ཡོར་དན་གཙང་པོའི་ཕ་རོལ་ཏུ་ཉི་མ་ནུབ་པའི་ཕྱོགས་སུ། གིལ་གལ་ཕར་ཕྱོགས་ཀྱི་ཨ་ར་པཱ་རུ་ཡོད་པའི་ཀ་ན་ཨན་པའི་ཡུལ་དུ། མོར་རེའེ་ཡི་བེ་ཤིང་གི་ཉེ་འགྲམ་དུ་ཡོད་པ་མ་ཡིན་ནམ།
DEU 11:31 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་གྱི་བདག་དབང་ལེན་ཕྱིར། ད་ལྟ་ཁྱོད་རྣམས་ཡོར་དན་གཙང་པོ་བརྒལ་ནས་ཡུལ་དེ་ལེན་དགོས་པ་དང་དེ་རུ་གཞིས་ཕབ་དགོས།
DEU 11:32 དེ་རིང་ངས་ཁྱོད་རྣམས་ཀྱི་མདུན་དུ་བཀོད་པའི་སྒྲིག་ཁྲིམས་དང་སྲོལ་ཡིག་ཐམས་ཅད་གཟབ་གཟབ་ངང་བསྒྲུབ་པར་གྱིས་ཤིག་ཨང་།
DEU 12:1 ཁྱོད་ཅག་གི་ཕ་མེས་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་ལ་ས་སྐལ་དུ་གནང་བའི་ཡུལ་དུ། ཁྱོད་རྣམས་ས་སྟེང་ནས་འཚོ་བའི་ཉིན་མོ་རེ་རེར་བསྲུངས་ནས་བསྒྲུབ་དགོས་པའི་སྒྲིག་ཁྲིམས་དང་སྲོལ་ཡིག་རྣམས་འདི་ལྟ་སྟེ།
DEU 12:2 ཁྱོད་རྣམས་ཀྱིས་བདག་གིར་འཛིན་པའི་ཡུལ་དེའི་ལྷ་རྣམས་ལ་བསྙེན་བཀུར་བྱེད་པའི་གནས་ཐམས་ཅད་དེ། རི་མཐོན་པོ་དང་། རི་སྒང་དང་། ལྗོན་ཤིང་སྔོན་པོ་རེ་རེའི་འོག་བཅས་ཀྱི་གནས་ཐམས་ཅད་རྩ་བ་ནས་མེད་པར་གཏོང་དགོས་ཤིང་།
DEU 12:3 དེ་དག་གི་མཆོད་ཁྲི་རྣམས་བཤིགས་ནས། ལྷ་རྟེན་རྣམས་གཅོག་པ་དང་། ལྷ་མོ་ཨ་ཤེ་རཱ་མེར་བསྲེག་པ། དེ་ཚོའི་རྡོ་སྐུ་རྣམས་གཅོད་པ་དང་ཡུལ་དེ་ནས་དེ་ཚོའི་མིང་རྣམས་བསུབ་དགོས།
DEU 12:4 ཁྱོད་ཅག་གི་དཀོན་མཆོག་ཡ་ཝཱེ་ལ་ཁྱོད་ཅག་གིས་དེ་ལྟར་བསྒྲུབ་མི་རུང་།
DEU 12:5 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་གི་ཚོ་པ་ཁག་ནས་ཁོང་གི་མཚན་འགོད་པར་བདམས་པའི་བཞུགས་གནས་སུ་སོང་སྟེ་ཁོང་ལ་ཞུ་བ་འབུལ་དགོས་ལ།
DEU 12:6 ཁྱོད་རྣམས་ཀྱི་སྦྱིན་སྲེག་དང་མཆོད་རྫས་དང་། བཅུ་ཆ་གཅིག་དང་འདེགས་མཆོད་དང་། དམ་བཅའི་མཆོད་པ་དང་ཡིད་མོས་མཆོད་པ། བ་ཁྱུ་དང་ར་ལུག་གི་ཁྱུ་ཡི་སྐྱེས་འགོ་བཅས་གནས་དེར་འཁྱེར་དགོས།
DEU 12:7 གནས་དེར་ཁྱོད་ཅག་དང་རང་གི་ནང་མི་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་མདུན་ནས་བཟའ་བཏུང་སྤྱོད་པ་དང་། ཁྱོད་རྣམས་ཀྱི་ལག་གི་ལས་ཀ་ཐམས་ཅད་ལ་ཁྱོད་ཅག་གི་དཀོན་མཆོག་ཡ་ཝཱེས་བྱིན་རླབས་མཛད་ནས་སྤྲོ་བར་འགྱུར་རོ། །
DEU 12:8 དེ་རིང་རང་ཅག་མི་རེ་རེས་རང་རང་གི་མིག་མདུན་ནས་གང་ཞིག་ལེགས་པར་སྙམ་པ་དེ་བྱེད་པས། མ་འོངས་པར་ཁྱོད་ཅག་གིས་འདི་བཞིན་བསྒྲུབ་མི་རུང་།
DEU 12:9 ཅི་ལ་ཞེ་ན། ད་ལྟ་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ངལ་གསོ་བའི་ཡུལ་དང་ས་སྐལ་ཡིན་པའི་ཡུལ་དུ་ཁྱོད་རྣམས་ད་དུང་སླེབས་མེད་པ་ཡིན།
DEU 12:10 འོན་ཀྱང་ཁྱོད་རྣམས་ཡོར་དན་གཙང་པོའི་ཕ་རོལ་ཏུ་འབྱོར་ནས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དེར་གཞིས་ཕབ་ཅིང་། ཁོང་གིས་ཁྱོད་རྣམས་བདེ་བར་བཀོད་ནས་མཐའ་འཁོར་གྱི་དགྲ་རྣམས་ལས་བཀྲོལ་བ་དང་། ཁྱོད་བདེ་བར་འཚོ་རུ་བཅུག་ན།
DEU 12:11 དུས་དེར་ཁྱོད་ཅག་གི་དཀོན་མཆོག་ཡ་ཝཱེས་ཉིད་ཀྱི་མཚན་འགོད་པའི་གནས་སུ་བདམས་པའི་ཡུལ་དེར། ངས་ཁྱོད་ཅག་ལ་བསྒོས་པའི་སྦྱིན་སྲེག་དང་མཆོད་རྫས་དང་། བཅུ་ཆ་གཅིག་དང་འདེགས་མཆོད་དང་། ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་འབུལ་བར་དམ་བཅས་པའི་མཆོད་པ་ཆེས་བཟང་པོ་ཐམས་ཅད་འཁྱེར་འོང་དགོས།
DEU 12:12 དེར་ཁྱོད་རྣམས་དང་ཁྱོད་རྣམས་ཀྱི་བུ་དང་བུ་མོ། གཡོག་པོ་དང་གཡོག་མོ། ཁྱོད་རྣམས་ཀྱི་གྲོང་རྡལ་དུ་གནས་པའི་ལེ་ཝི་པ་བཅས་ཐམས་ཅད་ཁྱོད་ཅག་གི་དཀོན་མཆོག་ཡ་ཝཱེའི་དྲུང་དུ་དགའ་བར་འགྱུར་ཏེ། ལེ་ཝི་པ་རྣམས་ལ་ཁྱོད་ཅག་གི་ཁྲོད་དུ་ཐོབ་སྐལ་དང་ནོར་སྐལ་གང་ཡང་མེད་དོ། །
DEU 12:13 ཁྱོད་ཀྱིས་གཟབ་གཟབ་གྱིས་ཤིག རང་གིས་བློར་འབབ་པའི་གནས་གང་རུང་དུ་སྦྱིན་སྲེག་གི་མཆོད་པ་འབུལ་མི་འོས།
DEU 12:14 དཀོན་མཆོག་ཡ་ཝཱེས་ཁྱོད་རྣམས་ཀྱི་ཚོ་པ་ཁག་གི་གཅིག་ནས་བདམས་པའི་ཡུལ་དེར། ཁྱོད་རྣམས་ཀྱི་སྦྱིན་སྲེག་གི་མཆོད་པ་འབུལ་བ་དང་ངས་ཁྱོད་རྣམས་ལ་བསྒོས་པའི་བཀའ་ཐམས་ཅད་གནས་དེ་རུ་བསྒྲུབ་དགོས་སོ། །
DEU 12:15 དེ་ལྟ་ནའང་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་བྱིན་རླབས་བསྩལ་པ་ནང་བཞིན། ཁྱོད་ཅག་གི་གྲོང་རྡལ་སོ་སོར་རང་རང་གི་འདོད་པ་ལྟར་སྲོག་ཆགས་བཤས་ནས་ཤ་བཟའ་རུང་བ་ཡིན། མི་གཙང་མ་དང་གཙང་མ་མིན་པ་ཀུན་གྱིས་དགོ་བ་དང་ཤྭ་བའི་ཤ་ཟ་བ་བཞིན་ཟོས་ཆོག
DEU 12:16 ཁྲག་གཅིག་པུ་བཟའ་མི་རུང་ལ་དེ་ནི་ཆུ་ལྟར་ས་ལ་ལྡུག་དགོས།
DEU 12:17 ཁྱོད་རྣམས་ཀྱི་འབྲུ་རིགས་དང་རྒུན་ཆང་གསར་པ་དང་སྣུམ་གསར་པའི་བཅུ་ཆ་གཅིག་དང་། བ་ཁྱུ་དང་ར་ལུག་གི་ཁྱུ་ཡི་སྐྱེས་འགོ་དང་དམ་བཅའི་མཆོད་པ་ཐམས་ཅད། ཡིད་མོས་མཆོད་པ་དང་འདེགས་མཆོད་བཅས་ནི་གང་ཡིན་ཡང་ཁྱོད་ཅག་གི་གྲོང་རྡལ་དུ་བཟའ་མི་རུང་།
DEU 12:18 དེ་རྣམས་ཁྱོད་ཅག་གི་དཀོན་མཆོག་ཡ་ཝཱེས་བདམས་པའི་ཡུལ་དུ། ཁྱོད་རྣམས་དང་ཁྱོད་རྣམས་ཀྱི་བུ་དང་བུ་མོ། གཡོག་པོ་དང་གཡོག་མོ། ཁྱོད་རྣམས་ཀྱི་གྲོང་རྡལ་དུ་ཡོད་པའི་ལེ་ཝི་པ་བཅས་ཀྱིས་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་བཟའ་དགོས། ཡང་ཁྱོད་རྣམས་ལག་གི་ལས་ཀ་ཐམས་ཅད་ཀྱི་ཕྱིར་ཁྱོད་ཅག་གི་དཀོན་མཆོག་ཡ་ཝཱེའི་དྲུང་དུ་དགའ་བར་གྱུར་ཅིག
DEU 12:19 ཁྱོད་རྣམས་ཀྱིས་གཟབ་གཟབ་བྱས་ནས་རང་གི་ཡུལ་དུ་སྡོད་པའི་རིང་ལ་ལེ་ཝི་པ་རྣམས་སྣང་མེད་དུ་བསྐྱུར་བར་གཏན་ནས་མི་བྱའོ། །
DEU 12:20 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ཞལ་བཞེས་གནང་བ་བཞིན་དུ། ཁྱོད་རྣམས་ཀྱི་མཐའ་མཚམས་རྣམས་རྒྱ་བསྐྱེད་པའི་ཚེ། ཁྱོད་རྣམས་ཀྱི་སེམས་སུ་ཤ་བཟའ་བར་འདོད་ན་ངས་ཤ་བཟའ་འདོད་ཅེས་སྨྲ་དགོས་ལ། དེ་ནས་རང་གི་འདོད་པ་བཞིན་ཤ་བཟའ་རུང་བ་ཡིན།
DEU 12:21 ཁྱོད་རྣམས་ཀྱི་དཀོན་མཆོག་ཡ་ཝཱེས་ཉིད་ཀྱི་མཚན་འགོད་པར་བདམས་པའི་གནས་དེ་ཁྱོད་རྣམས་དང་རྒྱང་ཐག་རིང་དྲགས་ན། ངས་ཁྱོད་རྣམས་ལ་བསྒོས་པའི་བཀའ་བཞིན་དུ། དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་བ་གླང་དང་ར་ལུག་འགའ་བཤས་ཏེ་རང་གི་གྲོང་རྡལ་དུ་འདོད་པ་བཞིན་ཟོས་ཆོག
DEU 12:22 ཁྱོད་རྣམས་ཀྱིས་ཤ་དེ་ཟ་སྐབས་དགོ་བ་དང་ཤྭ་བའི་ཤ་ཟ་བ་བཞིན་དུ་ཟོས་ཆོག་ལ། མི་གཙང་མ་དང་གཙང་མ་མིན་པ་ཀུན་གྱིས་མཉམ་དུ་ཟོས་ཆོག་གོ །
DEU 12:23 འོན་ཀྱང་ཁྱོད་རྣམས་ཀྱི་སེམས་བརྟན་པོར་ཚུགས་དགོས་ཤིང་ཁྲག་གཅིག་པུ་བཟའ་མི་རུང་སྟེ། ཅི་ལ་ཞེ་ན། ཁྲག་ནི་ཚེ་སྲོག་ཡིན་པས་ཤ་དང་ལྷན་དུ་ཚེ་སྲོག་བཟའ་མི་རུང་ངོ་། །
DEU 12:24 ཁྱོད་རྣམས་ཀྱིས་ཁྲག་བཟའ་མི་རུང་ལ་དེ་ནི་ཆུ་ལྟར་ས་ལ་ལྡུག་དགོས།
DEU 12:25 ཁྱོད་རྣམས་ཀྱིས་ཁྲག་བཟའ་མི་རུང་ལ། དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་ན། ཁྱོད་རྣམས་དང་ཁྱོད་ཅག་གི་བུ་རབས་ཚ་རྒྱུད་རྣམས་བདེ་བར་འགྱུར་ངེས།
DEU 12:26 དེ་ལྟ་ནའང་ཁྱོད་རྣམས་ཀྱིས་རང་གི་མཆོད་རྫས་དམ་པ་རྣམས་དང་། དམ་བཅའི་མཆོད་པ་རྣམས་ཁྱེར་ནས་དཀོན་མཆོག་ཡ་ཝཱེས་བདམས་པའི་གནས་སུ་འགྲོ་དགོས་ཤིང་།
DEU 12:27 ཁྱོད་རྣམས་ཀྱི་སྦྱིན་སྲེག་གི་མཆོད་པའི་ཤ་དང་ཁྲག་རྣམས་ཁྱོད་རྣམས་ཀྱི་དཀོན་མཆོག་ཡ་ཝཱེའི་མཆོད་ཁྲི་སྟེང་འབུལ་དགོས། མཆོད་རྫས་ཀྱི་ཁྲག་རྣམས་ཁྱོད་ཅག་གི་དཀོན་མཆོག་ཡ་ཝཱེའི་མཆོད་ཁྲིའི་སྟེང་དུ་ལྡུག་དགོས། ཡིན་ནའང་ཤ་དེ་ཁྱོད་རྣམས་ཀྱིས་ཟོས་ཆོག
DEU 12:28 ཁྱོད་རྣམས་ཀྱིས་ངས་ཁྱོད་ཅག་ལ་བསྒོས་པའི་བཀའ་ཐམས་ཅད་གཟབ་གཟབ་ངང་བསྲུང་བར་གྱིས་ཤིག ཁྱོད་རྣམས་ཀྱི་དཀོན་མཆོག་ཡ་ཝཱེའི་སྤྱན་སྔར་ལེགས་ཤིང་དྲང་པོ་གང་ཡིན་དེ་སྤྱད་ན། ཁྱོད་རྣམས་དང་ཁྱོད་རྣམས་ཀྱི་བུ་རབས་ཚ་རྒྱུད་རྣམས་གཏན་དུ་བདེའོ། །
DEU 12:29 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་སོང་ནས་ཕྱི་རུ་སྐྲོད་པར་འགྱུར་བའི་མི་རིགས་དེ་དག་ཁྱོད་ཅག་གི་མདུན་ནས་མེད་པར་མཛད་རྗེས། ཁྱོད་རྣམས་ལ་དེ་དག་གི་ཡུལ་ཐོབ་ནས་དེ་རུ་གཞིས་ཆགས་ངེས་ཡིན།
DEU 12:30 དེའི་དུས་སུ་ཁྱོད་རྣམས་ཀྱིས་གཟབ་གཟབ་གྱིས་ཤིག དེ་དག་ཁྱོད་རྣམས་ཀྱི་མདུན་ནས་མེད་པར་མཛད་པའི་རྗེས་སུ། དེ་ཚོའི་རྗེས་སུ་འབྲངས་ནས་རྙི་ལ་ཚུད་པར་མི་བྱ་ཞིང་། ཁོ་ཚོའི་ལྷ་རྣམས་ལ་ཞུས་ནས་འདི་ལྟར། མི་རིགས་འདི་དག་གིས་ཇི་ལྟར་ཁོ་ཚོའི་ལྷ་རྣམས་ལ་བསྙེན་བཀུར་བྱས་པ་ཡིན་ན་ང་ཚོས་ཀྱང་དེ་ལྟར་བསྒྲུབ་པར་འགྱུར་རོ་ཞེས་བརྗོད་མི་རུང་།
DEU 12:31 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་དེ་ལྟར་བྱེད་མི་རུང་། ཅི་ལ་ཞེ་ན། དེ་དག་གིས་དཀོན་མཆོག་ཡ་ཝཱེ་སྡང་ཞིང་ཞེ་མེར་བའི་དོན་རྣམས་རང་གི་ལྷ་རྣམས་ལ་བྱས་པ་དང་། ཐ་ན་རང་གི་བུ་དང་བུ་མོ་རྣམས་ཀྱང་མེ་རུ་བསྲེགས་ནས་ཁོ་ཚོའི་ལྷ་རྣམས་ལ་ཕུལ་བའོ། །
DEU 12:32 བདག་གིས་ཁྱོད་རྣམས་ལ་བསྒོས་པའི་བཀའ་གསུང་ཐམས་ཅད་སྲུངས་ལ་སྒྲུབས་ཤིག དེ་ལ་ཁ་སྣོན་དང་ཉུང་འཕྲི་གང་ཡང་བྱེད་མི་རུང་ངོ་། །
DEU 13:1 གལ་སྲིད་ཁྱོད་ཚོའི་ནང་དུ་ལུང་སྟོན་པ་དང་རྨི་ལམ་པ་བྱུང་སྟེ། ཁྱོད་རྣམས་ལ་གྲུབ་རྟགས་དང་དོན་ངོ་མཚར་ཅན་སྟོན་པ་དང་།
DEU 13:2 ཁོས་ཁྱོད་རྣམས་ལ་སྨྲས་པའི་གྲུབ་རྟགས་དང་དོན་ངོ་མཚར་ཅན་དེ་དག་དངོས་སུ་བྱུང་ནས་དེས་ཁྱོད་རྣམས་ལ། རང་ཅག་ཁྱོད་རྣམས་ལ་རྒྱུས་མི་མངའ་བའི་ལྷ་གཞན་དག་གི་རྗེས་སུ་འབྲངས་ནས་དེ་དག་ལ་བསྙེན་བཀུར་བྱེད་པར་བྱ་ཞེས་སྨྲས་ན།
DEU 13:3 ལུང་སྟོན་པ་དང་རྨི་ལམ་པ་དེའི་གཏམ་ལ་ཉན་མི་རུང་། ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་རང་གི་དཀོན་མཆོག་ཡ་ཝཱེ་ལ་བློ་གཅིག་སེམས་གཅིག་གིས་དགའ་འམ་མི་དགའ་ཤེས་པའི་ཕྱིར་ཚོད་བགམ་མཛད་པ་ཡིན།
DEU 13:4 ཁྱོད་ཅག་ནི་ཁྱོད་ཅག་གི་དཀོན་མཆོག་ཡ་ཝཱེའི་རྗེས་སུ་འབྲང་དགོས་པ་དང་། ཁོང་ལ་གུས་ཤིང་འཇིགས་ནས་ཁོང་གི་བཀའ་རྣམས་བསྲུངས་ཏེ་ཁོང་གི་གསུང་སྐད་ལ་ཉན་དགོས་ལ། ཁོང་ལ་བསྙེན་བཀུར་ཕུལ་ནས་ཁོང་ལ་དམ་པོར་བརྟེན་དགོས་སོ། །
DEU 13:5 འོན་ཀྱང་ལུང་སྟོན་པའམ་རྨི་ལམ་པ་དེས་ངོ་ལོག་གི་གཏམ་སྨྲས་ཏེ། ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་ཅིང་བྲན་དུ་བཀོལ་བའི་གནས་ནས་བསྐྱབས་འོངས་པའི་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་ངོ་ལོག་བྱེད་པ་དང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་འགྲུལ་བར་བསྒོས་པའི་ལམ་དང་འབྲལ་དུ་འཇུག་འདོད་པ་ཡིན་པས་མི་དེ་གསོད་དགོས། ཁྱོད་རྣམས་ཀྱི་ཁྲོད་ནས་ངན་པ་རྣམས་དེ་ལྟར་མེད་པར་གཏོང་དགོས་སོ། །
DEU 13:6 གལ་སྲིད་ཁྱོད་རྣམས་ཀྱི་མ་གཅིག་གི་སྤུན་ཟླ་དང་། ཁྱོད་ཅག་གི་བུ་དང་བུ་མོ་དང་། ཁྱོད་རྣམས་ཀྱི་གཅེས་པའི་ཆུང་མ་དང་། ཁྱོད་རྣམས་ཀྱི་སྲོག་དང་འདྲ་བའི་གྲོགས་པོ་སོགས་ཀྱིས་གསང་བའི་སྒོ་ནས་ཁྱོད་ཅག་བསླུས་ཏེ། རང་ཅག་ལྷ་གཞན་དག་ལ་བསྙེན་བཀུར་བྱེད་དུ་འགྲོ་ཞེས་སྨྲ་ཞིང་། དེ་ནི་ཁྱོད་རྣམས་དང་ཁྱོད་ཅག་གི་ཕ་མེས་རྣམས་ལ་རྒྱུས་མི་མངའ་བ་ཞིག་ཡིན་པ་དང་།
DEU 13:7 ཁྱོད་ཅག་གི་མཐའ་འཁོར་གྱི་མི་ཡི་ལྷ་རྣམས་ཏེ། ཁྱོད་རྣམས་དང་ཉེ་བའམ་ཡང་ན་ཁྱོད་རྣམས་དང་ཁ་ཐག་རིང་བའི་ལྷ་རྣམས་དང་། ས་གཞིའི་ཕྱོགས་གཅིག་ནས་ཕྱོགས་གཞན་བར་གྱི་ལྷ་རྣམས་བཅས་གང་ཡིན་ཡང་།
DEU 13:8 ཁྱོད་རྣམས་ཀྱིས་དེ་ལ་མགོ་མི་འདོགས་ཤིང་ཉན་ཡང་མི་འོས་པ་དང་། ཁྱོད་རྣམས་ཀྱི་མིག་ལམ་ནས་དེ་གཅེས་སུ་འཛིན་མི་རུང་ལ་སྙིང་རྗེ་ཡང་བསྐྱེད་མི་རུང་། འགེབ་སྲུང་ཡང་བྱེད་མི་རུང་སྟེ།
DEU 13:9 ཁྱོད་ཀྱིས་ཁོ་ངེས་པར་གསོད་དགོས། རང་གིས་སྔོན་ལ་ལག་འགུལ་བ་དང་། དེ་ནས་མི་ཐམས་ཅད་ཀྱིས་ཀྱང་ལག་འགུལ་ནས་ཁོ་གསོད་དགོས།
DEU 13:10 མི་དེ་རྡོ་རུབ་བཏང་ནས་གསོད་དགོས། ཅི་ལ་ཞེ་ན། དེས་ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པ་དང་བྲན་དུ་བཀོལ་བའི་གནས་ནས་སྐྱོབ་མཁན་ཁྱོད་ཅག་གི་དཀོན་མཆོག་ཡ་ཝཱེ་ནས་ལོག་ལམ་དུ་འདྲེན་འདོད་པ་ཡིན།
DEU 13:11 དེ་ནས་ཡེས་ར་ཨེལ་པ་ཀུན་གྱིས་དེ་ཐོས་པ་དང་འཇིགས་ནས་ཁྱོད་རྣམས་ཀྱི་ཁྲོད་དུ་དེ་འདྲའི་ལས་ངན་པ་ནམ་ཡང་བསྒྲུབ་པར་མི་བྱའོ། །
DEU 13:12 གལ་ཏེ་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་འཚོ་སྡོད་བྱེད་སར་གནང་བའི་གྲོང་ཁྱེར་ཞིག་ལས།
DEU 13:13 ཁྱོད་རྣམས་ཀྱི་དབུས་ནས་མི་ཐ་ཤལ་འགའ་ཐོན་ཏེ། གྲོང་ཁྱེར་དེའི་ཡུལ་མི་རྣམས་ལ་ཁྱོད་ཚོར་རྒྱུས་མི་མངའ་བའི་ལྷ་གཞན་དག་ལ་བསྙེན་བཀུར་བྱེད་དུ་འགྲོ་ཞེས་སྨྲས་ཏེ། མི་རྣམས་ལོག་ལམ་དུ་འདྲེན་པའི་གཏམ་ཐོས་ན།
DEU 13:14 ཁྱོད་རྣམས་ཀྱིས་བརྟག་དཔྱད་ཞིབ་འཇུག་དང་འདྲི་གཅོད་ཞིབ་མོ་བྱེད་དགོས་ལ། གལ་སྲིད་ཁྱོད་ཅག་གི་ཁྲོད་དུ་སྐྱུག་བྲོ་བའི་བྱ་སྤྱོད་དེ་ལྟ་བུ་ཡོད་པ་བདེན་ན།
DEU 13:15 ཁྱོད་རྣམས་ཀྱིས་གྲོང་ཁྱེར་དེ་རུ་སྡོད་པའི་མི་རྣམས་ལ་རལ་གྲིས་བསྣུན་དགོས་ཤིང་། གྲོང་ཁྱེར་དེ་དང་དེ་རུ་ཡོད་པ་ཐམས་ཅད་དང་། ཕྱུགས་ཁྱུ་རྣམས་ཀྱང་རལ་གྲིའི་ཁ་ནས་རྩ་མེད་གཏོང་དགོས་པར་མ་ཟད།
DEU 13:16 གྲོང་ཁྱེར་ནས་འཕྲོག་བཅོམ་བྱས་པའི་རྒྱུ་ནོར་ཐམས་ཅད་གྲོང་ཁྱེར་དེའི་ཐང་ཆེན་དུ་སྤུངས་ནས། གྲོང་ཁྱེར་དང་དེ་ནས་འཕྲོག་བཅོམ་བྱས་པའི་རྒྱུ་ནོར་ཐམས་ཅད་མེར་བསྲེགས་ཏེ་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་འབུལ་དགོས། དེ་ནས་གྲོང་ཁྱེར་དེ་ནི་ནམ་ཡང་ཞིག་རོར་ལུས་ནས་སླར་བརྩིག་པར་མི་བྱའོ། །
DEU 13:17 རྩ་མེད་གཏོང་འོས་པའི་རྫས་གང་ཡང་ཁྱོད་རྣམས་ཀྱི་ལག་ཏུ་བསྐྱུར་མི་རུང་སྟེ། དེ་ནས་ཁྱོད་རྣམས་ཀྱི་དཀོན་མཆོག་ཡ་ཝཱེའི་ཐུགས་ཁྲོ་ཞི་ནས་ཁྱོད་ཅག་ལ་སྙིང་རྗེ་དང་བྱམས་བརྩེ་དགོངས་པ་དང་། ཁྱོད་ཅག་གི་མེས་པོ་ལ་བཞེས་པའི་མནའ་བཞིན་ཁྱོད་རྣམས་འཕེལ་བར་བྱེད།
DEU 13:18 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་གསུང་སྐད་ལ་ཉན་པ་དང་། བདག་གིས་དེ་རིང་ཁྱོད་རྣམས་ལ་བསྒོས་པའི་བཀའ་ཐམས་ཅད་བསྲུངས་ནས། ཁོང་གི་སྤྱན་སྔར་ལེགས་པོ་གང་ཡིན་དེ་སྤྱད་ན་དེ་བཞིན་འབྱུང་ངེས་སོ། །
DEU 14:1 ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེའི་བུ་དང་བུ་མོ་ཡིན་པས། གཤིན་པོའི་དོན་དུ་རང་གི་ལུས་པོ་གཅོད་མི་རུང་ལ། ཁྱོད་ཅག་གི་ཐོད་སྤུ་ཡང་བཞར་མི་རུང་།
DEU 14:2 གང་ལ་ཞེ་ན། ཁྱོད་ཅག་ནི་ཁྱོད་ཅག་གི་དཀོན་མཆོག་ཡ་ཝཱེ་ལ་གཏོགས་པའི་མི་དམ་པ་རྣམས་ཡིན་ཞིང་། ཁོང་གིས་ས་སྟེང་གི་མི་རིགས་ཐམས་ཅད་ལས་ཁྱོད་རྣམས་བདམས་ཏེ་ཁོང་གི་ནོར་བུ་རུ་མཛད་པའོ། །
DEU 14:3 ཁྱོད་རྣམས་ཀྱིས་སྐྱུག་བྲོ་བའི་རྫས་གང་ཡང་བཟའ་མི་རུང་།
DEU 14:4 ཁྱོད་རྣམས་ཀྱིས་བཟའ་རུང་བའི་སྲོག་ཆགས་ནི་འདི་དག་སྟེ། བ་གླང་དང་། ལུག་དང་། ར་དང་།
DEU 14:5 ཤྭ་བ་དང་། དགོ་བ་དང་། ཁ་ཤྭ་དང་། ར་རྒོད་དང་། སྐྱིན་དང་། གཙོད་དང་། གཉན་བཅས་ཡིན་ལ།
DEU 14:6 རི་དྭགས་རྨིག་པ་གཉིས་སུ་ཁ་འཕྲལ་བའམ་རྨིག་སོར་ཁ་འཕྲལ་ཅན་དང་སྐྱུག་ལྡད་བྱེད་པ་རྣམས་བཟའ་རུང་བ་ཡིན།
DEU 14:7 འོན་ཀྱང་སྐྱུག་ལྡད་བྱེད་པའམ་རྨིག་པ་ཁ་འཕྲལ་ཅན་རྣམས་ལས་བཟའ་མི་རུང་བ་ནི། རྔ་མོང་དང་རི་བོང་། འཕྱི་བ་བཅས་ཡིན་ཏེ། ཅི་ལ་ཞེ་ན། དེ་དག་གིས་སྐྱུག་ལྡད་བྱེད་ནའང་རྨིག་པ་ཁ་འཕྲལ་མེད་པས་ཁྱོད་རྣམས་ལ་མཚོན་ན་མི་གཙང་བ་ཡིན།
DEU 14:8 ཡང་ཕག་ནི་རྨིག་པ་ཁ་འཕྲལ་ཅན་ཡིན་ཡང་སྐྱུག་ལྡད་མི་བྱེད་པས་ཁྱོད་རྣམས་ལ་མཚོན་ན་མི་གཙང་བ་ཡིན་ལ། དེ་དག་གི་ཤ་ནི་བཟའ་མི་རུང་། དེ་དག་གི་རོ་རྣམས་ལ་རེག་ཀྱང་མི་རུང་ངོ་། །
DEU 14:9 ཡང་ཆུ་ལ་གནས་པ་ཐམས་ཅད་ལས་ཁྱོད་ཅག་གིས་བཟའ་རུང་བ་ནི་འདི་དག་སྟེ། གཤོག་པ་ཅན་དང་ཉ་སག་ཅན་ཐམས་ཅད་བཟའ་རུང་བ་ཡིན།
DEU 14:10 གཤོག་པ་དང་ཉ་སག་མེད་པ་ཐམས་ཅད་ཁྱོད་ཅག་ལ་མཚོན་ན་མི་གཙང་བ་ཡིན་པས་བཟའ་མི་རུང་ངོ་། །
DEU 14:11 འདབ་ཆགས་གཙང་མ་ཐམས་ཅད་ཁྱོད་ཅག་གིས་བཟའ་རུང་བ་ཡིན།
DEU 14:12 ཁྱོད་རྣམས་ཀྱིས་བཟའ་མི་རུང་བའི་འདབ་ཆགས་ནི་འདི་དག་སྟེ། གླག་དང་བྱ་རྒོད་དང་གོ་བོ་དང་།
DEU 14:13 ནེ་ལེ་དང་། བྱ་ཁྲ་དང་། འོལ་པའི་རིགས་དང་།
DEU 14:14 ཕོ་རོག་གི་རིགས་དང་།
DEU 14:15 རྔ་བྱ་དང་སྲིན་བྱ་དང་། ཆུ་སྐྱར་དང་ཁྲའི་རིགས་དང་།
DEU 14:16 འུག་ཆུང་དང་འུག་རྒན་དང་། འུག་དཀར་དང་།
DEU 14:17 འུག་སེར་དང་དུར་བྱ་དང་། སོ་བྱ་དང་།
DEU 14:18 ཁྲུང་ཁྲུང་དང་སྐྱར་མོ་རྐང་རིང་གི་རིགས་དང་པུ་ཤུད་དང་ཕ་ཝང་བཅས་ཡིན།
DEU 14:19 ཡང་ལྟོ་འགྲོ་འབུ་སྲིན་གཤོག་པ་ཅན་ཐམས་ཅད་ནི་ཁྱོད་ཅག་ལ་མཚོན་ན་མི་གཙང་བ་ཡིན་པས་བཟའ་མི་རུང་།
DEU 14:20 གཤོག་ལྡན་གཙང་མ་ཐམས་ཅད་ཁྱོད་ཅག་གིས་བཟའ་རུང་བའོ། །
DEU 14:21 ཤི་ཤ་གང་ཡིན་ཡང་ཁྱོད་རྣམས་ཀྱིས་བཟའ་མི་རུང་སྟེ། ཁྱོད་རྣམས་ཀྱི་གྲོང་རྡལ་དུ་གནས་པའི་བྱེས་པ་ལ་སྟེར་བའམ། ཕྱི་མི་ཞིག་ལ་བཙོང་དགོས། ཅི་ལ་ཞེ་ན། ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེ་ལ་གཏོགས་པའི་མི་དམ་པ་ཡིན། ར་ཕྲུག་ཅིག་དེའི་ཨ་མའི་འོ་མའི་ནང་དུ་བཙོ་མི་རུང་ངོ་། །
DEU 14:22 ཁྱོད་རྣམས་ཀྱིས་རང་གི་ཞིང་ལས་ལོ་རེར་སྨིན་པའི་ལོ་ཏོག་ཡོངས་ཀྱི་བཅུ་ཆ་གཅིག་འབུལ་དགོས་ལ།
DEU 14:23 ཁྱོད་ཅག་ནམ་ཡང་ཁྱོད་ཅག་གི་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་ཤེས་པའི་ཆེད་དུ། ཁྱོད་རྣམས་ཀྱི་དཀོན་མཆོག་ཡ་ཝཱེའི་མདུན་དྲུང་སྟེ་ཁོང་གིས་ཉིད་ཀྱི་མཚན་འགོད་པར་བདམས་པའི་ཡུལ་དུ། ཁྱོད་རྣམས་ཀྱི་འབྲུ་རིགས་དང་རྒུན་ཆང་གསར་པ་དང་། སྣུམ་གསར་པའི་བཅུ་ཆ་གཅིག་དང་། བ་ཁྱུ་དང་ར་ལུག་གི་ཁྱུ་ཡི་སྐྱེས་འགོ་རྣམས་བཟའ་དགོས།
DEU 14:24 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བྱིན་རླབས་གནང་བའི་ཚེ། གལ་ཏེ་ཁྱོད་རྣམས་ཀྱི་དཀོན་མཆོག་ཡ་ཝཱེས་ཉིད་ཀྱི་མཚན་འགོད་པར་བདམས་པའི་ཡུལ་དེ་ནི་ཁྱོད་ཅག་དང་རྒྱང་ཐག་རིང་དྲགས་ནས་མཆོད་རྫས་རྣམས་ཡུལ་དེར་འཁྱེར་མི་ནུས་ན།
DEU 14:25 བཅུ་ཆ་གཅིག་དེ་ཁྱོད་རྣམས་ཀྱིས་དངུལ་ལ་བརྗེས་ནས། དངུལ་དེ་ལག་ཏུ་བཟུང་ནས་ཁྱོད་རྣམས་ཀྱི་དཀོན་མཆོག་ཡ་ཝཱེས་བདམས་པའི་གནས་དེར་འགྲོ་དགོས།
DEU 14:26 དངུལ་དེ་ཁྱོད་རྣམས་ཀྱི་འདོད་པ་བཞིན་བཀོལ་ཆོག་སྟེ། བ་གླང་དང་ར་ལུག་དང་། རྒུན་ཆང་དང་གར་ཆང་སོགས་ཁྱོད་གང་ལ་དགའ་ན་དེ་ཐམས་ཅད་ཉོས་ཆོག་ལ། ཁྱོད་ཅག་གི་དཀོན་མཆོག་ཡ་ཝཱེའི་སྤྱན་སྔར་ཁྱོད་རྣམས་དང་རང་གི་ནང་མི་ཀུན་གྱིས་བཟའ་བཏུང་ལ་རོལ་ནས་དགའ་བར་འགྱུར།
DEU 14:27 ཁྱོད་རྣམས་ཀྱི་གྲོང་རྡལ་དུ་གནས་པའི་ལེ་ཝི་པ་རྣམས་ལ་ཐོབ་སྐལ་དང་ནོར་སྐལ་མེད་པས་ཁྱོད་ཅག་གིས་སྣང་མེད་དུ་བསྐྱུར་མི་རུང་ངོ་། །
DEU 14:28 ལོ་འཁོར་གསུམ་རེའི་མཇུག་ཏུ། ལོ་དེའི་ཡོང་འབབ་ཀུན་གྱི་བཅུ་ཆ་གཅིག་ཁྱེར་འོངས་ནས་ཁྱོད་རྣམས་ཀྱི་གྲོང་རྡལ་དུ་གསོག་འཇོག་བྱེད་དགོས།
DEU 14:29 དེ་ནས་ཁྱོད་རྣམས་ཀྱི་ཁྲོད་དུ་ཐོབ་སྐལ་དང་ནོར་སྐལ་མེད་པའི་ལེ་ཝི་པ་རྣམས་དང་། ཁྱོད་རྣམས་ཀྱི་གྲོང་རྡལ་དུ་གནས་པའི་བྱེས་པ་རྣམས་དང་། དྭ་ཕྲུག་དང་ཡུགས་མོ་རྣམས་ཡོང་ནས་ཚིམ་པར་ཟོས་ཆོག་ལ། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལག་གི་ལས་ཀ་ཐམས་ཅད་ལ་བྱིན་རླབས་གནང་བར་བྱའོ། །
DEU 15:1 ལོ་བདུན་རེ་རྫོགས་པའི་མཚམས་སུ་ཁྱོད་རྣམས་ཀྱིས་བུ་ལོན་ཆག་ཡང་གཏོང་དགོས།
DEU 15:2 ཆག་ཡང་གཏོང་ཚུལ་ནི་འདི་ལྟར་ཡིན་ཏེ། བུན་བདག་སུ་ཡིན་ཡང་ཁྱིམ་མཚེས་ལ་གང་ཞིག་བསྐྱིས་པ་ཐམས་ཅད་ཆག་ཡང་གཏོང་དགོས། དཀོན་མཆོག་ཡ་ཝཱེའི་ཕྱིར་དུ་ཆག་ཡང་གཏོང་བའི་ལོ་ཡིན་པར་བསྒྲགས་ཡོད་པས། ཁྱིམ་མཚེས་དང་སྤུན་ཟླ་རྣམས་ལ་བུ་ལོན་འདེད་མི་རུང་།
DEU 15:3 གལ་སྲིད་ཕྱི་ཕྱོགས་པ་ལ་བསྐྱིས་པ་ཡིན་ན་བུ་ལོན་དེད་ཆོག་མོད། འོན་ཀྱང་རང་གི་སྤུན་ཟླར་བསྐྱིས་པ་ཡིན་ན། བུ་ལོན་གང་ཡིན་ཡང་ཆག་ཡང་གཏོང་དགོས།
DEU 15:4 ཁྱོད་རྣམས་ཀྱི་ནང་དུ་དབུལ་པོ་གཅིག་ཀྱང་ཡོད་མི་སྲིད། གང་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དེ་རུ་ཁོང་གིས་ཁྱོད་ཅག་ལ་བྱིན་རླབས་ཆེན་པོ་གནང་བར་འགྱུར།
DEU 15:5 གལ་ཏེ་ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་གསུང་སྐད་ལ་ཞིབ་ཏུ་མཉན་པ་དང་། ངས་དེ་རིང་ཁྱོད་རྣམས་ལ་བསྒོས་པའི་བཀའ་རྒྱ་ཐམས་ཅད་བསྲུངས་ནས་བསྒྲུབས་ན།
DEU 15:6 དེ་ཡང་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ཞལ་བཞེས་གནང་བ་ཇི་བཞིན་ཁྱོད་ཅག་ལ་བྱིན་རླབས་གནང་ངེས་ཡིན། ཁྱོད་རྣམས་ཀྱིས་མི་མང་པོར་བུ་ལོན་བཏང་ནའང་། རང་གིས་གཞན་སུ་ལས་ཀྱང་བསྐྱི་མི་དགོས། ཁྱོད་རྣམས་ཀྱིས་མི་མང་པོ་དབང་དུ་བསྒྱུར་ན་ཡང་། དེ་དག་གིས་ཁྱོད་རྣམས་དབང་དུ་བསྡུ་མི་ནུས་སོ། །
DEU 15:7 གལ་སྲིད་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་གྱི་གྲོང་རྡལ་གང་རུང་དུ་ཁྱོད་ཅག་གི་སྤུན་ཟླ་སུ་ཞིག་དབུལ་པོ་ཡིན་ན། སྤུན་ཟླ་དབུལ་པོ་དེ་ལ་ཁྱོད་རྣམས་ཀྱི་སེམས་མཁྲེགས་པོ་བྱེད་མི་རུང་ལ། སེར་སྣ་བྱས་ནས་བསྐྱུར་ཡང་མི་རུང་།
DEU 15:8 ཁྱོད་རྣམས་ཀྱིས་ལག་པ་བརྐྱངས་ཏེ་ཁོ་ལ་ཅི་དགོས་པ་ལྟར་བསྐྱིས་ནས་དགོས་མཁོ་སྐོང་དགོས་སོ། །
DEU 15:9 ཁྱོད་རྣམས་ཀྱིས་གཟབ་གཟབ་བྱེད་དགོས་ཏེ། ཆག་ཡང་གཏོང་བའི་ལོ་བདུན་པ་བསླེབ་ལ་ཉེ་ཞེས་ངན་སེམས་བཅངས་ནས། ཁྱོད་རྣམས་ཀྱིས་རང་གི་སྤུན་ཟླ་དབུལ་པོ་ལ་སྡང་མིག་བགྲད་ནས་ཁོ་ལ་ཅི་ཡང་མི་སྟེར་ན། ཁོས་ཁྱོད་རྣམས་ཀྱི་རྐྱེན་གྱིས་དཀོན་མཆོག་ཡ་ཝཱེ་ལ་འོ་དོད་འབོད་པ་དང་། དེ་ནས་ཁྱོད་རྣམས་སྡིག་པའི་ནང་དུ་ལྷུང་བ་ཡིན།
DEU 15:10 གཏོང་ཕོད་ཆེན་པོས་ཁོ་ལ་སྟེར་དགོས་ཤིང་། སྟེར་བའི་སྐབས་སུ་སྙིང་ནད་བཅང་མི་རུང་། ཅི་ལ་ཞེ་ན། བྱ་བ་དེའི་དོན་དུ་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལག་གི་ལས་ཀ་ཐམས་ཅད་དང་། ཁྱོད་རྣམས་ཀྱི་དོན་བྱ་ཐམས་ཅད་ལ་བྱིན་རླབས་མཛད་པའི་ཕྱིར་རོ། །
DEU 15:11 ཡུལ་འདིར་ནམ་ཡང་དབུལ་ཕོངས་གནས་པར་འགྱུར་བས། ཁྱོད་རྣམས་ཀྱིས་རང་ཡུལ་གྱི་སྤུན་ཟླ་སྐྱོ་བོ་དང་དབུལ་པོ་ཡིན་པ་རྣམས་ལ་གཏོང་ཕོད་ཆེན་པོས་རོགས་སྐྱོར་བྱེད་དགོས་ཞེས་ངས་ཁྱོད་རྣམས་ལ་བཀའ་བསྒོ་བར་བྱའོ། །
DEU 15:12 དེ་ཡང་ཁྱོད་རྣམས་ཀྱི་སྤུན་ཟླ་དེ་ཨིབ་རི་པའི་སྐྱེས་པ་དང་ཡང་ན་ཨིབ་རི་པའི་བུད་མེད་གང་ཡིན་ཡང་། གལ་སྲིད་རང་ལུས་ཁྱོད་རྣམས་ལ་བཙོངས་པ་ཡིན་ན། ལོ་དྲུག་གི་རིང་ཁྱོད་རྣམས་ལ་གཡོག་བྱེད་དགོས། ལོ་བདུན་པར་ཁྱོད་རྣམས་ཀྱིས་དེ་ལ་རང་དབང་སྤྲད་ནས་འགྲོ་རུ་འཇུག་དགོས།
DEU 15:13 ཁྱོད་རྣམས་ཀྱིས་དེ་ལ་རང་དབང་སྤྲོད་པའི་སྐབས་སུ་ལག་སྟོང་དུ་གཏོང་མི་རུང་།
DEU 15:14 ཁྱོད་རྣམས་ཀྱི་ར་ལུག་གི་ཁྱུ་དང་གཡུལ་ཁ། རྒུན་འབྲུམ་འཚིར་གཞོང་བཅས་ནས་དེ་ལ་མཐུན་རྐྱེན་རྒྱས་པར་སྦྱོར་དགོས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བྱིན་གྱིས་བརླབས་པའི་རྒྱུ་ནོར་ལས་ཁོ་ལ་སྐལ་སྟེར་དགོས།
DEU 15:15 ཁྱོད་རྣམས་ཨེ་ཅིབ་ཡུལ་ནས་བྲན་གཡོག་ཡིན་པ་དང་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་བསྐྱབས་འོངས་པ་དྲན་པར་གྱིས། དེ་བས་ངས་དེ་རིང་ཁྱོད་ཅག་ལ་འདི་ལྟར་བསྒོས་པ་ཡིན།
DEU 15:16 གལ་སྲིད་ཁོས་ང་ཁྱེད་དང་འབྲལ་མི་འདོད་ཅེས་སྨྲ་བ་ཡིན་ན། དེ་ནི་ཁོ་ཁྱོད་རྣམས་དང་ཁྱོད་ཅག་གི་ནང་མི་ལ་བརྩེ་འདང་ཡོད་པ་དང་། ཁོ་ཁྱོད་རྣམས་དང་མཉམ་དུ་བསྡད་ན་ཤིན་ཏུ་ལེགས་སོ། །
DEU 15:17 ཁྱོད་རྣམས་ཀྱིས་ཁོ་སྒོ་འགྲམ་ནས་བསླངས་ཏེ་སྙུང་བུས་ཁོའི་རྣ་བ་འབིགས་དགོས་ལ། དེ་ནས་ཁོ་ནི་རྟག་ཏུ་ཁྱོད་རྣམས་ཀྱི་གཡོག་པོ་ཡིན་ཏེ། ཁྱོད་རྣམས་ཀྱི་གཡོག་མོ་ལའང་དེ་བཞིན་བྱེད་དགོས།
DEU 15:18 ཁྱོད་རྣམས་ཀྱིས་ཁོ་ལ་རང་དབང་སྤྲད་ནས་འགྲོ་རུ་འཇུག་དུས་དེ་དཀའ་ལས་ཁག་པོར་མ་བསམ་ཞིག ཅི་ལ་ཞེ་ན། ཁོས་ལོ་དྲུག་གི་རིང་ཁྱོད་རྣམས་ལ་གཡོག་བྱས་པ་དང་གླ་པའི་གླ་ཡོན་ལྡབ་གཉིས་འཐོབ་འོས་པ་ཡིན་པས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་གི་དོན་ཅི་བསྒྲུབ་ལ་བྱིན་རླབས་གནང་བའོ། །
DEU 15:19 ཁྱོད་རྣམས་ཀྱི་བ་ཁྱུ་དང་ར་ལུག་གི་ཁྱུ་ཡི་སྐྱེས་འགོ་ཕོ་ཕྱུགས་ཐམས་ཅད་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་དམ་པར་འབུལ་དགོས་ལ། བ་ཁྱུའི་སྐྱེས་འགོ་ལ་ཞིང་རྨོ་རུ་འཇུག་མི་རུང་ལ། ར་ལུག་གི་ཁྱུ་ཡི་སྐྱེས་འགོའི་བལ་ཡང་འབྲེག་མི་རུང་།
DEU 15:20 ཁྱོད་རྣམས་དང་ཁྱོད་རྣམས་ཀྱི་ནང་མིས་ལོ་རེ་རེ་བཞིན། ཁྱོད་རྣམས་ཀྱི་དཀོན་མཆོག་ཡ་ཝཱེས་བདམས་པའི་ཡུལ་དུ་ཁོང་གི་དྲུང་ནས་སྐྱེས་འགོ་རྣམས་བཟའ་དགོས།
DEU 15:21 གལ་སྲིད་སྐྱེས་འགོ་དེ་ལ་ཞ་འཁུམས་དང་མིག་ལོང་བ་སོགས་ཀྱི་སྐྱོན་ཚབས་ཆེན་གང་དང་གང་ཡོད་ནའང་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་འབུལ་མི་རུང་སྟེ།
DEU 15:22 ཁྱོད་རྣམས་ཀྱི་གྲོང་རྡལ་དུ་བཟའ་རུང་བ་དང་། མི་གཙང་མ་དང་གཙང་མ་མིན་པ་ཀུན་གྱིས་ཁྱད་མེད་དུ། དགོ་བ་དང་ཤྭ་བའི་ཤ་ཟ་བ་ནང་བཞིན་ཟོས་ཆོག་པ་ཡིན།
DEU 15:23 འོན་ཀྱང་དེའི་ཁྲག་བཟའ་མི་རུང་སྟེ། དེ་ནི་ཆུ་ལྟར་ས་ལ་ལྡུག་དགོས་སོ། །
DEU 16:1 ཁྱོད་རྣམས་ཀྱིས་ཨ་རྦིབ་ཟླ་བ་བསྲུངས་ནས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་པེ་སག་གི་དུས་ཆེན་སྲུངས་ཤིག ཅི་ལ་ཞེ་ན། ཨ་རྦིབ་ཟླ་བའི་མཚན་མོ་ཞིག་ལ་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་པའོ། །
DEU 16:2 ཁྱོད་རྣམས་ཀྱིས་དཀོན་མཆོག་ཡ་ཝཱེས་རང་གི་མཚན་འགོད་པར་བདམས་པའི་གནས་སུ། ར་ལུག་དང་བ་གླང་ནས་པེ་སག་གི་དུས་ཆེན་དུ་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་དམར་མཆོད་འབུལ་དགོས།
DEU 16:3 ཁྱོད་རྣམས་ཀྱིས་དམར་མཆོད་དེ་དང་ལྷན་དུ་བག་ལེབ་སྐྱུར་ཅན་བཟའ་མི་རུང་། ཉིན་བདུན་གྱི་རིང་ལ་སྐྱུར་མེད་བག་ལེབ་སྟེ་སྐྱོ་གདུང་གི་བག་ལེབ་བཟའ་དགོས། ཅི་ལ་ཞེ་ན། ཁྱོད་རྣམས་ཨེ་ཅིབ་ཡུལ་ནས་རྟབ་རྟབ་པོར་ཕྱི་ལ་ཐོན་པ་ཡིན་ལ། ཨེ་ཅིབ་ཡུལ་ནས་ཐོན་པའི་ཉིན་མོ་དེ་ཁྱོད་རྣམས་ཀྱི་མི་ཚེའི་ཁྲོད་རྟག་ཏུ་དྲན་དགོས།
DEU 16:4 ཉིན་བདུན་གྱི་རིང་ལ་ཁྱོད་རྣམས་ཀྱི་མངའ་ཁོངས་ཡོངས་སུ་སྐྱུར་རྩི་གང་ཡང་མཐོང་མི་རུང་། ཉིན་དང་པོའི་དགོང་མོར་ཕུལ་བའི་དམར་མཆོད་ཀྱི་ཤ་ནི་ཞོགས་པའི་བར་དུ་ལུས་མི་རུང་།
DEU 16:5 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་གྲོང་རྡལ་གང་དུའང་པེ་སག་གི་དུས་ཆེན་གྱི་དམར་མཆོད་བཤའ་མི་རུང་ལ།
DEU 16:6 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོང་གི་མཚན་འགོད་པར་བདམས་པའི་གནས་འབའ་ཞིག་ཏུ། དགོང་མོ་ཉི་མ་ནུབ་པའི་དུས་ཏེ་ཁྱོད་རྣམས་ཨེ་ཅིབ་ཡུལ་ནས་ཐོན་པའི་དུས་སྐབས་དེར། ཁྱོད་རྣམས་ཀྱིས་པེ་སག་གི་དུས་ཆེན་གྱི་དམར་མཆོད་བཤའ་དགོས།
DEU 16:7 ཤ་དེ་ཁྱོད་རྣམས་ཀྱི་དཀོན་མཆོག་ཡ་ཝཱེས་བདམས་པའི་གནས་དེར་བཙོས་ནས་བཟའ་དགོས་ལ། ཞོགས་པར་ཁྱོད་རྣམས་ད་གཟོད་རང་གི་གུར་དུ་ཕྱིར་འགྲོ་དགོས།
DEU 16:8 ཉིན་དྲུག་གི་རིང་ལ་ཁྱོད་རྣམས་ཀྱིས་སྐྱུར་མེད་བག་ལེབ་བཟའ་དགོས་ཤིང་། ཉིན་བདུན་པར་ཁྱོད་རྣམས་ཀྱི་དཀོན་མཆོག་ཡ་ཝཱེའི་ཕྱིར་དུ་འདུ་འཛོམས་དམ་ནན་ཡོད་དགོས་ཏེ། ཉིན་དེར་ལས་ཀ་གང་ཡང་བྱེད་མི་རུང་ངོ་། །
DEU 16:9 ཁྱོད་རྣམས་ཀྱིས་རང་ཉིད་ཀྱི་ཕྱིར་བདུན་ཕྲག་བདུན་རྩིས་ཤིག འབྲུ་ཞིང་ཟོར་བས་བྲེགས་པའི་ཐོག་མ་ནས་བཟུང་སྟེ། བསྡོམས་པས་བདུན་ཕྲག་བདུན་རྩི་དགོས་ལ།
DEU 16:10 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་ཕྱིར་བདུན་ཕྲག་རྣམས་ཀྱི་དུས་ཆེན་གཏོང་དགོས་ཏེ། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བྱིན་རླབས་གནང་བ་ཇི་བཞིན། རང་ལ་འཛོམས་ཚོད་ཀྱིས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་ཡིད་མོས་མཆོད་པ་ཕུལ་ནས།
DEU 16:11 ཁྱོད་རྣམས་ཀྱི་དཀོན་མཆོག་ཡ་ཝཱེས་རང་གི་མཚན་འགོད་པའི་ཕྱིར་བདམས་པའི་གནས་སུ། ཁྱོད་རྣམས་དང་ཁྱོད་རྣམས་ཀྱི་བུ་དང་བུ་མོ། གཡོག་པོ་དང་གཡོག་མོ། ཁྱོད་རྣམས་ཀྱི་གྲོང་རྡལ་དུ་གནས་པའི་ལེ་ཝི་པ། ཁྱོད་ཅག་ཁྲོད་ཀྱི་བྱེས་པ། དྭ་ཕྲུག་དང་ཡུགས་མོ་བཅས་ཐམས་ཅད་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་དགའ་བར་གྱིས།
DEU 16:12 ཁྱོད་རྣམས་ཀྱིས་རང་ཉིད་ཨེ་ཅིབ་ཡུལ་ནས་བྲན་གཡོག་བྱས་པ་དྲན་དགོས་པ་དང་། སྒྲིག་ཁྲིམས་དེ་རྣམས་ནན་གྱིས་བསྲུང་དགོས་སོ། །
DEU 16:13 ཁྱོད་རྣམས་ཀྱིས་གཡུལ་ཁ་དང་རྒུན་འབྲུམ་འཚིར་གཞོང་ནས་ཐོན་རྫས་བསྡུས་རྗེས། ཉིན་བདུན་གྱི་རིང་ལ་སྤྱིལ་བུའི་དུས་ཆེན་གཏོང་དགོས།
DEU 16:14 དུས་ཆེན་གྱི་སྐབས་སུ་ཁྱོད་རྣམས་དང་ཁྱོད་རྣམས་ཀྱི་བུ་དང་བུ་མོ། གཡོག་པོ་དང་གཡོག་མོ། ཁྱོད་རྣམས་ཀྱི་གྲོང་རྡལ་དུ་གནས་པའི་ལེ་ཝི་པ་དང་བྱེས་པ། དྭ་ཕྲུག་དང་ཡུགས་མོ་བཅས་ཐམས་ཅད་དགའ་བར་གྱིས།
DEU 16:15 ཉིན་བདུན་གྱི་རིང་ལ་དཀོན་མཆོག་ཡ་ཝཱེས་བདམས་པའི་གནས་སུ། ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་དུས་ཆེན་བསྲུང་དགོས་ཏེ། ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་གི་ལོ་ཏོག་ཐམས་ཅད་དང་། ཁྱོད་རྣམས་ལག་གི་ལས་ཀ་ཀུན་ལ་བྱིན་རླབས་གནང་ནས་ཁྱོད་རྣམས་དགའ་བར་འགྱུར་རོ། །
DEU 16:16 ཁྱོད་རྣམས་ཀྱི་སྐྱེས་པ་ཐམས་ཅད་སྐྱུར་མེད་བག་ལེབ་ཀྱི་དུས་ཆེན་དང་། བདུན་ཕྲག་རྣམས་ཀྱི་དུས་ཆེན། སྤྱིལ་བུའི་དུས་ཆེན་བཅས་ཀྱི་སྐབས་སུ་ཁྱོད་རྣམས་ཀྱི་དཀོན་མཆོག་ཡ་ཝཱེས་བདམས་པའི་གནས་དེ་རུ་ལོ་རེར་ཐེངས་གསུམ་ལ་ཁོང་གི་དྲུང་དུ་འཛོམ་དགོས་ཤིང་། ཁོ་ཚོ་ལག་སྟོང་ལ་དཀོན་མཆོག་ཡ་ཝཱེའི་དྲུང་དུ་ཡོང་མི་རུང་།
DEU 16:17 མི་རེ་རེས་རང་རང་གི་འཛོམས་ཚོད་ལྟར། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་བྱིན་རླབས་བཞིན་ཕྱག་རྟེན་འབུལ་དགོས་སོ། །
DEU 16:18 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བར་འགྱུར་བའི་གྲོང་རྡལ་ཐམས་ཅད་དུ། ཁྱོད་རྣམས་ཀྱིས་ཚོ་པ་རེ་རེ་བཞིན་ཁྲིམས་དཔོན་དང་འགོ་དཔོན་བསྐོས་ཤིག དེ་དག་གིས་མི་རྣམས་ལ་ཁྲིམས་ཀྱི་དྲང་གཞག་སྐྱོང་དགོས།
DEU 16:19 ཁྱོད་རྣམས་ཀྱིས་དྲང་པོ་འཁྱོག་པོར་བསྒྱུར་མི་འོས་ལ། མི་ལ་ཕྱོགས་རིས་ཀྱང་འཛིན་མི་རུང་། གསུག་ལེན་མི་རུང་། གང་ལ་ཞེ་ན། གསུག་གིས་མི་བློ་གྲོས་ཅན་གྱི་མིག་ལོང་བར་བྱེད་ཅིང་། མི་དྲང་པོ་རྣམས་ཀྱི་གཏམ་ཡང་གོ་ལྡོག་པར་བྱེད་པ་ཡིན།
DEU 16:20 ཁྱོད་རྣམས་འཚོ་ཐུབ་པ་དང་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དེ་ས་སྐལ་དུ་ལོན་ཐུབ་པའི་ཕྱིར་ཁྱོད་རྣམས་ཀྱིས་དྲང་གཞག་འབའ་ཞིག་སྐྱོང་དགོས་སོ། །
DEU 16:21 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་བརྩིགས་པའི་མཆོད་ཁྲིའི་འགྲམ་དུ་། ཤིང་སྡོང་གི་རིགས་གང་རུང་བཙུགས་ནས་དེས་ཨ་ཤེ་རཱ་བཟོ་མི་རུང་།
DEU 16:22 ཁྱོད་རྣམས་ཀྱི་དཀོན་མཆོག་ཡ་ཝཱེ་སྡང་བའི་ལྷ་རྟེན་ཡང་རང་གི་ཕྱིར་དུ་མ་སྒྲེངས་ཤིག་ཅེས་བསྒོས་སོ། །
DEU 17:1 བ་གླང་དང་ར་ལུག་ཆག་སྐྱོན་ཅན་གང་ཡང་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་འབུལ་མི་རུང་། ཅི་ལ་ཞེ་ན། དེ་ལ་ཁྱོད་རྣམས་ཀྱི་དཀོན་མཆོག་ཡ་ཝཱེ་སྐྱུག་བྲོ་བ་ཡིན་ནོ། །
DEU 17:2 ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་གྲོང་རྡལ་གང་རུང་དུ། ཁྱོད་རྣམས་ཀྱི་ནང་དུ་སྐྱེས་པ་དང་བུད་མེད་གང་ཡིན་ཡང་། སུ་ཞིག་གིས་ཁྱོད་རྣམས་ཀྱི་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ནས་ཁོང་གི་ཞལ་ཆད་དང་འགལ་ཏེ།
DEU 17:3 སོང་སྟེ་ངས་བཀའ་མ་གནང་བའི་ལྷ་གཞན་དག་ལ་བསྙེན་བཀུར་བྱས་ནས་ཕྱག་བཙལ་བ་དང་། ཡང་ན་ཉི་མ་དང་ཟླ་བ། ནམ་མཁའི་ཚོགས་གང་རུང་བཅས་ལ་ཕྱག་བཙལ་ནས།
DEU 17:4 གཏམ་དེ་ཁྱོད་རྣམས་ལ་སྨྲས་ཤིང་ཐོས་ཡོད་ན་དེར་རྩད་གཅོད་ཡག་པོ་བྱེད་དགོས་ལ། སྐྱུག་བྲོ་བའི་བྱ་སྤྱོད་དེ་ཡེས་ར་ཨེལ་གྱི་ནང་དུ་བྱུང་བ་བདེན་ཞིང་དོན་དངོས་ཡིན་ན།
DEU 17:5 བྱ་བ་ངན་པ་དེ་བསྒྲུབས་པའི་སྐྱེས་པའམ་བུད་མེད་དེ་ཁྱོད་རྣམས་ཀྱི་མཁར་སྒོ་རུ་ཁྲིད་ནས་དེར་རྡོ་རུབ་བཏང་ནས་གསོད་དགོས།
DEU 17:6 མི་གཉིས་སམ་གསུམ་གྱིས་བདེན་དཔང་བྱས་ན་ཤི་འོས་པའི་མི་དེ་གསོད་དགོས་ཀྱི། བདེན་དཔང་བྱེད་མཁན་མི་གཅིག་ལས་མེད་ན་མི་དེ་གསོད་མི་རུང་།
DEU 17:7 མི་དེ་གསོད་དུས་དཔང་པོ་རྣམས་ཀྱིས་སྔོན་ལ་ལག་འགུལ་དགོས་ལ། དེའི་རྗེས་སུ་མི་ཀུན་གྱིས་ལག་རུབ་དགོས། དེ་ལྟར་ཁྱོད་རྣམས་ཀྱི་ཁྲོད་ནས་ངན་པ་རྩ་མེད་གཏོང་དགོས་སོ། །
DEU 17:8 གལ་སྲིད་ཁྱོད་རྣམས་ཀྱི་གྲོང་རྡལ་དུ་མི་བསད་པའམ་ཡང་ན་རྩོད་གླེང་དང་ཡང་ན་རྒོལ་རྡུང་སོགས་ཀྱི་དོན་རྐྱེན་བྱུང་སྟེ། ཁྱོད་རྣམས་ཀྱིས་ཐག་གཅོད་ཤིན་ཏུ་དཀའ་བར་གྱུར་ན། ཡར་ལངས་ནས་ཁྱོད་རྣམས་ཀྱི་དཀོན་མཆོག་ཡ་ཝཱེས་བདམས་པའི་གནས་སུ་འགྲོ་དགོས་ལ།
DEU 17:9 ལེ་ཝི་པའི་མཆོད་དཔོན་དང་། སྐབས་དེའི་ཁྲིམས་དཔོན་གྱི་དྲུང་དུ་སོང་ནས་དེ་དག་ལ་བཀའ་འདྲི་ཞུ་དགོས་ཤིང་། ཁོ་ཚོས་ཁྱོད་རྣམས་ལ་གྱོད་གཞི་དེ་ཅི་ལྟར་ཐག་གིས་གཅོད་དགོས་པ་སྟོན་ངེས།
DEU 17:10 ཁྱོད་རྣམས་ཀྱིས་དེ་དག་གིས་དཀོན་མཆོག་ཡ་ཝཱེས་བདམས་པའི་ཡུལ་དེར་ཁྱོད་ཅག་ལ་བསྟན་པའི་བཀའ་བཞིན་བྱེད་དགོས་ཤིང་། དེ་དག་གིས་ཁྱོད་ཅག་ལ་ཅི་དང་ཅི་བསྟན་པ་བཞིན་དུ་གཟབ་གཟབ་ངང་བསྒྲུབ་པར་གྱིས་ཤིག
DEU 17:11 དེ་དག་གིས་ཁྱོད་རྣམས་ལ་བསླབས་པའི་བཀའ་ཁྲིམས་དང་། དེ་དག་གིས་ཁྱོད་རྣམས་ལ་སྨྲས་པའི་ཁྲིམས་གཅོད་བཞིན་དུ་བསྒྲུབ་དགོས། དེ་ཚོས་ཁྱོད་རྣམས་ལ་གནང་བའི་བཀའ་ལས་གཡས་གཡོན་གང་དུའང་གཟུར་མི་རུང་ངོ་། །
DEU 17:12 གལ་སྲིད་ཁྱོད་རྣམས་ཀྱི་དཀོན་མཆོག་ཡ་ཝཱེའི་མདུན་ནས་ཞབས་ཕྱི་སྒྲུབ་པར་འགྲེང་བའི་མཆོད་དཔོན་དང་། ཁྲིམས་འབྱེད་པའི་ཁ་ལ་མི་ཉན་པར་རང་དགར་སྤྱད་པ་སྤྱོད་མཁན་ཡོད་ན་མི་དེ་འཆི་ལམ་དུ་འཇུག་དགོས། དེ་ནས་ཁྱོད་རྣམས་ཀྱིས་ཡེས་ར་ཨེལ་གྱི་ཁྲོད་ནས་ངན་པ་མེད་པར་བྱེད་ནུས་སོ། །
DEU 17:13 མི་ཀུན་གྱིས་དེ་ཐོས་པ་དང་འཇིགས་ནས་སླར་ཡང་རང་དགར་སྤྱད་པ་སྤྱོད་མཁན་ཡོད་པར་མི་འགྱུར་རོ། །
DEU 17:14 ཁྱོད་རྣམས་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་ཡུལ་དུ་སླེབས་ནས་དེ་བདག་གིར་བཟུང་ཞིང་དེར་གཞིས་ཆགས་པའི་དུས་སུ། ཁྱོད་རྣམས་ཀྱིས་ང་ཚོའི་མཐའ་འཁོར་དུ་ཡོད་པའི་མི་རིགས་ཐམས་ཅད་དང་འདྲ་བར། ང་ཚོས་རང་ལ་སྲིད་སྐྱོང་བའི་རྒྱལ་པོ་ཞིག་བསྐོ་བར་བྱའོ་ཞེས་སྨྲ་བ་ཡིན་ན།
DEU 17:15 ཅི་ནས་ཀྱང་ཁྱོད་རྣམས་ཀྱི་དཀོན་མཆོག་ཡ་ཝཱེས་བདམས་པའི་རྒྱལ་པོ་ཞིག་འཇོག་དགོས། རྒྱལ་པོ་དེ་ཁྱོད་རྣམས་ཀྱི་སྤུན་ཟླའི་ཁྲོད་ནས་འཇོག་དགོས། ཁྱོད་རྣམས་ཀྱི་སྤུན་ཟླ་མིན་པའི་ཕྱི་ཕྱོགས་པ་ཞིག་ཁྱོད་ཅག་གི་གོང་ལ་འཇོག་མི་རུང་།
DEU 17:16 རྒྱལ་པོས་རང་གི་ཆེད་དུ་རྟ་མང་པོ་བསྒྲིག་པའམ། རྟ་བསྒྲིག་པའི་དོན་དུ་མི་རྣམས་ཕྱིར་ཨེ་ཅིབ་ཡུལ་ལ་འགྲོ་རུ་བཅུག་མི་ཆོག ཅི་ལ་ཞེ་ན། དཀོན་མཆོག་ཡ་ཝཱེས་ཁྱོད་ཅག་ལ་ཕྱིན་ཆད་ལམ་དེ་ནས་ཕྱིར་ལོག་མི་རུང་ཞེས་བཀའ་གནང་བའི་ཕྱིར་རོ། །
DEU 17:17 ཁོའི་སེམས་ཡ་ཝཱེ་དང་མི་འབྲལ་བའི་ཆེད་དུ་རང་ལ་བཙུན་མོ་མང་པོ་བསྟེན་མི་རུང་ལ། རང་ཉིད་ལ་གསེར་དངུལ་ཧ་ཅང་མང་པོ་ཡང་བསོག་མི་རུང་ངོ་། །
DEU 17:18 ཁོ་རྒྱལ་ཁྲིར་བསྡད་པའི་ཚེ། ལེ་ཝི་ཚོ་པའི་མཆོད་དཔོན་རྣམས་ཀྱི་དྲུང་གི་བཀའ་ཁྲིམས་འདི་རང་གི་ཆེད་དུ་བཤུས་ནས་ཤོག་དྲིལ་བཟོ་དགོས།
DEU 17:19 ཤོག་དྲིལ་དེ་རང་དང་མཉམ་དུ་འཇོག་དགོས་ལ། མི་ཚེ་གང་པོར་བསྒྲག་དགོས། དེ་ནས་རང་གི་དཀོན་མཆོག་ཡ་ཝཱེ་ལ་གུས་ཤིང་འཇིགས་ནས་བཀའ་ཁྲིམས་ཀྱི་མདོ་ཡི་བཀའ་དང་སྒྲིག་ཁྲིམས་ཐམས་ཅད་བསྲུངས་ནས་བསླབ་དགོས།
DEU 17:20 དེ་ལྟར་བྱས་ན་ཁོའི་སེམས་སུ་ང་རྒྱལ་སྐྱེས་ནས་རང་གི་སྤུན་ཟླར་མཐོང་ཆུང་མི་བྱེད་ཅིང་། བཀའ་རྒྱ་འདི་ལས་གཡས་གཡོན་གང་དུའང་མི་གཟུར་བར། ཁོ་དང་ཁོའི་བུ་རབས་ཚ་རྒྱུད་རྣམས་ཡེས་ར་ཨེལ་དུ་རང་གི་རྒྱལ་སྲིད་བསྐྱངས་ནས་ཚེ་ཐག་རིང་བར་འགྱུར་རོ། །
DEU 18:1 ལེ་ཝི་ཚོ་པའི་མཆོད་དཔོན་རྣམས་དང་ལེ་ཝི་ཚོ་པ་ཡོངས་ལ་ཡེས་ར་ཨེལ་གྱི་ཁྲོད་དུ་ཐོབ་སྐལ་དང་ནོར་སྐལ་མེད་པས། ཁོ་རྣམས་ཀྱི་ཟས་སྐལ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་དང་ཁོ་རྣམས་ལ་འཐོབ་འོས་པའི་སྐལ་བཞིན་དུ་བཟའ་དགོས།
DEU 18:2 ལེ་ཝི་པ་རྣམས་ལ་སྤུན་ཟླའི་ཁྲོད་དུ་སྐལ་མེད་དེ། དཀོན་མཆོག་ཡ་ཝཱེས་དེ་དག་ལ་ཞལ་བཞེས་གནང་བ་ཇི་བཞིན། ཁོང་ནི་དེ་དག་གི་ནོར་སྐལ་ཡིན་ནོ། །
DEU 18:3 མཆོད་དཔོན་རྣམས་ལ་མི་མང་ལས་འཐོབ་འོས་པའི་སྐལ་ནི་འདི་ལྟ་སྟེ། མི་ཡིས་བ་གླང་དང་ར་ལུག་གང་ཞིག་སྦྱིན་སྲེག་གི་མཆོད་པར་ཕུལ་ནའང་། དེའི་ལག་ངར་དང་འགྲམ་པ་གཉིས་ཀ་དང་། གྲོད་པུ་བཅས་ནི་མཆོད་དཔོན་ལ་སྐལ་དུ་སྟེར་དགོས།
DEU 18:4 ཁྱོད་རྣམས་ཀྱིས་ཡང་འབྲུ་རིགས་ཀྱི་ཐོག་ཕུད་དང་རྒུན་ཆང་གསར་པ། སྣུམ་གསར་པ། ལུག་བལ་འབྲེག་ཐེངས་དང་པོ་བཅས་ནི་ཁོ་རྣམས་ལ་སྟེར་དགོས།
DEU 18:5 གང་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོ་དང་ཁོའི་བུ་རྒྱུད་རྣམས་ཀྱིས་དཀོན་མཆོག་ཡ་ཝཱེའི་མཚན་ནས་རྟག་ཏུ་བསྙེན་བཀུར་བྱེད་ཆེད། ཁྱོད་རྣམས་ཀྱི་ཚོ་པ་ཁག་ནས་ཁོ་རྣམས་བདམས་པ་ཡིན་ནོ། །
DEU 18:6 གལ་སྲིད་ཡེས་ར་ཨེལ་གྱི་གྲོང་རྡལ་གང་རུང་དུ་གནས་པའི་ལེ་ཝི་པ་ཞིག་དེར་ཁ་བྲལ་ནས། བློ་གཅིག་སེམས་གཅིག་གིས་དཀོན་མཆོག་ཡ་ཝཱེས་བདམས་པའི་ཡུལ་དུ་འོངས་པ་ཡིན་ན།
DEU 18:7 དེ་ནས་མི་དེས་ཡུལ་དེར་དཀོན་མཆོག་ཡ་ཝཱེའི་དྲུང་དུ་འགྲེང་བའི་སྤུན་ཟླ་ལེ་ཝི་པ་རྣམས་དང་མཚུངས་པར། ཁོའི་དཀོན་མཆོག་ཡ་ཝཱེའི་མཚན་ནས་བསྙེན་བཀུར་བྱས་ཆོག་པ་ཡིན།
DEU 18:8 མི་དེར་རང་གི་ཕ་གཞིས་ནས་ཐོབ་པའི་ནོར་སྐལ་ལས་གཞན། ཁོའི་སྤུན་ཟླ་རྣམས་དང་མཉམ་པའི་ཟས་སྐལ་ཡང་འཐོབ་པ་ཡིན་ནོ། །
DEU 18:9 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དུ་སླེབས་ཚེ། ཕྱི་ཕྱོགས་པ་དེ་དག་གི་སྐྱུག་བྲོ་བའི་བྱ་སྤྱོད་རྣམས་བསླབས་ནས་དེའི་རྗེས་སུ་འབྲང་མི་རུང་།
DEU 18:10 ཁྱོད་རྣམས་ཀྱི་ཁྲོད་དུ་མི་སུ་ཡིན་ཡང་རང་གི་བུ་དང་བུ་མོ་མེ་མཆོད་དུ་འབུལ་མི་རུང་ལ། མོ་པ་དང་རྩིས་པ་དང་། ལྟས་མཁན་དང་། སྒྱུ་མ་མཁན་དང་།
DEU 18:11 མཐུ་གཏོང་མཁན་དང་། ལྷ་པ་དང་། གཤིན་འདྲེ་འགུག་མཁན་དང་། གཤིན་མོ་འདེབས་མཁན་བཅས་ཡོད་མི་རུང་།
DEU 18:12 གང་ལ་ཞེ་ན། དེ་བཞིན་བྱེད་མཁན་ལ་དཀོན་མཆོག་ཡ་ཝཱེ་ཞེ་ལོག་པ་ཡིན་ལ། སྐྱུག་བྲོ་བའི་བྱ་སྤྱོད་དེ་དག་གི་ཕྱིར། ཁྱོད་རྣམས་ཀྱི་དཀོན་མཆོག་ཡ་ཝཱེས་དེ་དག་ཁྱོད་རྣམས་ཀྱི་མདུན་ནས་གཞན་དུ་སྤྱུགས་པའོ། །
DEU 18:13 ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེའི་དྲུང་དུ་མི་ཉེས་མེད་ཅིག་ཡིན་དགོས།
DEU 18:14 ཁྱོད་རྣམས་ཀྱིས་སྐྲོད་པར་འགྱུར་བའི་མི་རིགས་དེ་དག་གིས་རྩིས་པ་དང་མོ་པ་རྣམས་ཀྱི་ཁ་ལ་མཉན་ནའང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་དེ་ལྟར་བསྒྲུབ་པའི་དགོངས་པ་གནང་མེད་དོ། །
DEU 18:15 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བདག་དང་འདྲ་བའི་ལུང་སྟོན་པ་ཞིག་ཁྱོད་ཅག་གི་སྤུན་ཟླའི་ཁྲོད་ནས་བཞུགས་པར་མཛད་དེ། ཁྱོད་རྣམས་ཀྱིས་ཁོང་ལ་མཉན་དགོས།
DEU 18:16 དེ་ནི་ཁྱོད་རྣམས་ཀྱིས་རི་བོ་ཧོ་རེབ་ཀྱི་འདུ་འཛོམས་ཉིན་མོར་ཁྱོད་ཅག་གི་དཀོན་མཆོག་ཡ་ཝཱེ་ལ། ང་ཚོ་འཆི་དགོས་པ་མིན་ན། ངའི་དཀོན་མཆོག་ཡ་ཝཱེའི་གསུང་སྐད་ང་ཚོར་ཐོས་སུ་མི་འཇུག་པ་དང་། མེ་ཆེན་པོ་དེ་ཡང་ང་ཚོར་མཐོང་དུ་མི་འཇུག་རོགས་ཞེས་ཞུས་པ་ནང་བཞིན་ཡིན་ནོ། །
DEU 18:17 དཀོན་མཆོག་ཡ་ཝཱེས་ང་ལ་འདི་སྐད་དུ། དེ་དག་གིས་བཤད་པ་རྣམས་བདེན་ནོ། །
DEU 18:18 ངས་དེ་དག་ལ་ཁྱོད་དང་འདྲ་བའི་ལུང་སྟོན་པ་ཞིག་ཁོ་ཚོའི་སྤུན་ཟླའི་ཁྲོད་ནས་བསྐྱངས་ཏེ། ངས་རང་གི་བཀའ་དེའི་ཁ་རུ་འཇོག་ཅིང་། དེས་ངས་བསྒོ་བ་ཐམས་ཅད་དེ་རྣམས་ལ་བརྗོད་པར་བྱའོ། །
DEU 18:19 ཁོས་ངའི་མིང་ནས་བརྗོད་པའི་བཀའ་རྣམས་ལ་སུ་ཞིག་གིས་མ་མཉན་ན། ང་རང་གིས་མི་དེའི་སྡིག་པར་རྩད་གཅོད་ངེས་ཡིན།
DEU 18:20 འོན་ཀྱང་ལུང་སྟོན་པ་ཞིག་གིས་ངས་དེ་ལྟར་སྨྲ་བར་མ་བསྐུལ་ནའང་། ངའི་མིང་ནས་འོལ་ཚོད་ཀྱིས་དེ་ལྟར་སྨྲས་པའམ། ལྷ་གཞན་དག་གི་མིང་ནས་གཏམ་འཆད་པ་ཡིན་ན། ལུང་སྟོན་པ་དེ་འཆི་དགོས་སོ་ཞེས་བཀའ་བསྩལ་ཡོད།
DEU 18:21 ཁྱོད་རྣམས་ཀྱི་སེམས་ནས་དཀོན་མཆོག་ཡ་ཝཱེས་གསུང་མ་མྱོང་བའི་བཀའ་ནི་ངེད་ཅག་གིས་ཅི་ལྟར་རྟོགས་སམ་སྙམ་ན།
DEU 18:22 གལ་སྲིད་ལུང་སྟོན་པ་ཞིག་གིས་དཀོན་མཆོག་ཡ་ཝཱེའི་མིང་ནས་གཏམ་བཤད་ཀྱང་། བཀའ་དེ་དེ་བཞིན་དུ་མི་འབྱུང་བའམ་མི་འགྲུབ་ན། བཀའ་དེ་ནི་དཀོན་མཆོག་ཡ་ཝཱེས་གསུངས་པ་མ་ཡིན་པར། ལུང་སྟོན་པས་རང་འདོད་དུ་སྨྲས་པ་ཡིན་པས། དེ་ལ་ཁྱོད་རྣམས་འཇིགས་མི་དགོས་ཞེས་གསུངས་སོ། །
DEU 19:1 ཁྱོད་རྣམས་ཀྱི་དཀོན་མཆོག་ཡ་ཝཱེས་མི་རིགས་རྣམས་མེད་པར་མཛད་དེ། དེ་དག་གི་ཡུལ་རྣམས་ཁྱོད་ཅག་ལ་སྤྲད་པ་དང་། ཁྱོད་རྣམས་ཀྱིས་ཡུལ་མི་དེ་རྣམས་བསྐྲད་ནས་ཁྱོད་ཅག་དེ་དག་གི་གྲོང་ཁྱེར་རྣམས་དང་ཁང་པ་རྣམས་སུ་བསྡད་པའི་རྗེས་སུ།
DEU 19:2 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དེར། རང་ཉིད་ཀྱི་ཆེད་དུ་གྲོང་ཁྱེར་གསུམ་ལོགས་སུ་འདོན་དགོས།
DEU 19:3 ཁྱོད་རྣམས་ཀྱིས་རང་གི་ཆེད་དུ་བགྲོད་ལམ་གྲ་སྒྲིག་བྱེད་དགོས་པ་དང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དེ་ཁག་གསུམ་དུ་བགོས་ནས། མི་གསོད་ནོར་བྱས་པ་རྣམས་ཡུལ་དེ་དག་ལ་བྲོས་ཆོག་པར་བྱེད་དགོས་སོ། །
DEU 19:4 མི་གསོད་ནོར་བྱས་པ་རྣམས་གྲོང་ཁྱེར་དེ་དག་ལ་བྲོས་ནས་བསྡད་ཆོག་པ་དང་སྒྲིག་ལམ་ནི་འདི་ལྟར། མ་བསམ་ས་ནས་མི་བསད་པ་དང་ཕན་ཚུན་བར་དུ་ཞེ་འཁོན་ཡང་མེད་པ་སྟེ།
DEU 19:5 དཔེར་ན་མི་ཞིག་ཁྱིམ་མཚེས་དང་མཉམ་དུ་ནགས་ལ་ཤིང་གཅོད་དུ་སོང་བ་དང་། ལག་གི་སྟ་རེ་གཡུགས་ནས་ཤིང་གཅོད་སྐབས། སྟ་རེ་ཡུ་བ་ལས་ཤོར་ནས་ཁྱིམ་མཚེས་དེར་ཕོག་ནས་ཤི་ན། མི་དེ་གྲོང་ཁྱེར་དེ་རྣམས་ཀྱི་གཅིག་ལ་བྲོས་ཆོག་ལ། དེ་ནས་རང་སྲོག་ཐར་ཐུབ་པ་ཡིན།
DEU 19:6 དེ་ལྟར་མིན་ཚེ། ཁོ་དང་མི་དེའི་བར་ལ་སྔར་འཁོན་སེམས་མེད་པས་སྲོག་ཁྲིམས་གཅོད་དགོས་པའི་ཉེས་པ་མེད་ཀྱང་། ཁྲག་ལན་འཇལ་མཁན་གྱིས་ཞེ་སྡང་མ་ཞི་བར་དུ་ལག་དམར་གྱི་རྗེས་འདེད་ཅིང་། ལམ་ཐག་རིང་བའི་རྐྱེན་གྱིས་ཁོའི་རྗེས་ཆོད་ནས་སྲོག་གཅོད་སྲིད་པ་ཡིན།
DEU 19:7 དེ་བས་ན་ངས་ཁྱོད་རྣམས་ལ་གྲོང་ཁྱེར་གསུམ་རང་གི་ཆེད་དུ་ལོགས་སུ་འདོན་དགོས་ཞེས་སྨྲས་པའོ། །
DEU 19:8 གལ་སྲིད་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་གི་ཕ་མེས་རྣམས་ལ་བཞེས་པའི་མནའ་བཞིན་དུ། ཁྱོད་ཅག་གི་ས་མཚམས་རྒྱ་བསྐྱེད་ནས་ཕ་མེས་ལ་ཞལ་གྱིས་བཞེས་པའི་ཡུལ་དེ་ཐམས་ཅད་ཁྱོད་རྣམས་ལ་གནང་བ་དང་།
DEU 19:9 ངས་དེ་རིང་ཁྱོད་རྣམས་ལ་བསྒོས་པའི་བཀའ་ཐམས་ཅད་བསྲུངས་ནས་བསྒྲུབས་ཏེ། ཁྱོད་རྣམས་ཀྱི་དཀོན་མཆོག་ཡ་ཝཱེ་གཅེས་སུ་འཛིན་པ་དང་། རྟག་ཏུ་ཁོང་གི་ཕེབས་ལམ་དུ་སྐྱོད་པ་ཡིན་ན། ཁྱོད་རྣམས་ཀྱིས་གྲོང་ཁྱེར་གསུམ་པོ་དེའི་ཁར་གྲོང་ཁྱེར་གཞན་གསུམ་ཡང་བསྣོན་དགོས།
DEU 19:10 དེ་ནས་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་ནས་ཉེས་མེད་ཀྱི་ཁྲག་མི་བཞུར། དེ་ལྟར་མིན་ཚེ་ཉེས་མེད་ཀྱི་ཁྲག་བཞུར་ན་ནག་ཉེས་ཁྱོད་ཅག་གི་སྟེང་ལ་འབབ་པ་ཡིན་ནོ། །
DEU 19:11 འོན་ཀྱང་མི་ཞིག་རང་གི་ཁྱིམ་མཚེས་ལ་སྡང་བ་དང་དེ་ལ་བསྒུགས་བསྡད་དེ། གློ་བུར་ཉིད་ལ་ཁོའི་སྟེང་ལ་ཤོར་ནས་ཁོ་བསད་པ་དང་། དེ་ནས་གྲོང་ཁྱེར་དེ་དག་ལས་གཅིག་ལ་བྲོས་ན།
DEU 19:12 ཁོ་ཐོན་སའི་གྲོང་ཁྱེར་གྱི་རྒན་པོ་རྣམས་ཀྱིས་མི་མངགས་ནས་ཁོ་ས་ཆ་དེ་ནས་ཁྲིད་ཡོང་སྟེ། ཁོ་ཁྲག་ལན་འཇལ་མཁན་གྱི་ལག་ཏུ་སྤྲད་ནས་འཆི་ལམ་དུ་བསྐྱལ་དགོས།
DEU 19:13 ཁྱོད་རྣམས་བདེ་བར་གནས་པའི་ཆེད་དུ། ཁྱོད་རྣམས་ཀྱི་མིག་ལམ་དུ་ཁོ་ལ་སྙིང་རྗེ་བསྐྱེད་མི་རུང་བར། ཉེས་མེད་ཀྱི་ཁྲག་བཞུར་བའི་སྡིག་པ་ནི་ཡེས་ར་ཨེལ་ནས་རྩ་མེད་གཏོང་དགོས་སོ། །
DEU 19:14 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དུ་རང་གི་ཁྱིམ་མཚེས་ཀྱི་ས་རྟགས་བསྣུར་མི་རུང་སྟེ། དེ་ནི་ཕ་མེས་རྣམས་ཀྱིས་བགོས་པའི་ས་མཚམས་ཡིན་ནོ། །
DEU 19:15 མི་ཞིག་གིས་ཉེས་སྐྱོན་གང་ཞིག་བཟོས་པའམ། ཡང་ན་སྡིག་ཉེས་ཅི་ཞིག་བསགས་པ་ཡིན་ན། དེ་ལ་ནག་ཉེས་སམ་སྡིག་པ་བགྲང་བའི་ཚེ། མི་གཉིས་གསུམ་ཞིག་གི་ངག་ལས་བདེན་དཔང་བྱེད་པར་བརྟེན༌ནས་དོན་དག་གཏན་ལ་འབབ་དགོས་པ་ཡིན།
DEU 19:16 གལ་སྲིད་དཔང་པོ་ཞེ་གནག་ཅིག་ལངས་ནས་མི་ཞིག་གིས་དོན་ངན་བསྒྲུབས་པར་ཞུ་གཏུག་བྱས་ན།
DEU 19:17 ཕན་ཚུན་རྩོད་གླེང་བྱེད་མཁན་མི་དེ་གཉིས་ཀ་དཀོན་མཆོག་ཡ་ཝཱེའི་སྤྱན་སྔ་དང་། སྐབས་དེའི་མཆོད་དཔོན་དང་ཁྲིམས་དཔོན་གྱི་དྲུང་དུ་ལང་དགོས།
DEU 19:18 ཁྲིམས་དཔོན་རྣམས་ཀྱིས་འདྲི་རྟོག་ནན་མོ་བྱེད་དགོས་ལ། ལྟོས་དང་། གལ་སྲིད་བདེན་དཔང་བྱེད་མཁན་ནི་དཔང་པོ་རྫུན་མ་ཞིག་ཡིན་པ་དང་། བདེན་དཔང་རྫུན་མས་རང་གི་སྤུན་ཟླ་ལ་ནག་མེད་ཉེས་འགེལ་བྱེད་པ་ཤེས་ན།
DEU 19:19 མི་དེས་རང་གི་སྤུན་ཟླ་ལ་ཅི་བྱ་བསམ་པ་ནང་བཞིན། ཁྱོད་ཅག་གིས་ཁོ་ལའང་དེ་བཞིན་དུ་བྱེད་དགོས་ལ། ཁྱོད་རྣམས་ཀྱི་ཁྲོད་ནས་ངན་པ་རྣམས་དེ་ལྟར་མེད་པར་གཏོང་དགོས་སོ། །
DEU 19:20 གཞན་རྣམས་ཀྱིས་ཀྱང་དོན་དེ་ཐོས་པ་དང་འཇིགས་ནས་ཁྱོད་རྣམས་ཀྱི་ཁྲོད་དུ་དོན་ངན་དེ་ལྟ་བུ་བྱེད་མི་ཕོད་དོ། །
DEU 19:21 ཁྱོད་རྣམས་ཀྱི་མིག་ལམ་དུ་སྙིང་རྗེ་མི་བསྐྱེད་པར་སྲོག་ལ་སྲོག་ལན་དང་། མིག་ལ་མིག་ལན། སོ་ལ་སོ་ལན། ལག་པ་ལ་ལག་པའི་ལན། རྐང་པ་ལ་རྐང་པའི་ལན་འཇལ་དགོས་སོ། །
DEU 20:1 ཁྱོད་རྣམས་ཕྱི་རུ་སོང་ནས་ཁྱོད་ཅག་གི་དགྲ་བོ་རྣམས་ལ་དམག་རྒྱག་པའི་ཚེ། རྟ་དང་ཤིང་རྟ་དང་། དམག་མི་རྣམས་ཁྱོད་ཅག་ལས་མང་བ་མཐོང་ན་དེ་དག་ལ་འཇིགས་མི་དགོས། ཅི་ལ་ཞེ་ན། ཁྱོད་རྣམས་ཨེ་ཅིབ་ཡུལ་ནས་ཡར་ཁྲིད་འོང་མཁན་གྱི་ཁྱོད་ཅག་གི་དཀོན་མཆོག་ཡ་ཝཱེ་ཁྱོད་རྣམས་དང་མཉམ་དུ་བཞུགས་པ་ཡིན།
DEU 20:2 ཁྱོད་རྣམས་གཡུལ་སར་འགྲོ་རན་པའི་ཚེ། མཆོད་དཔོན་ཚུར་འོངས་ནས་མི་ཚོགས་ལ་གཏམ་སྨྲ་དགོས་ཏེ།
DEU 20:3 ཁོ་རྣམས་ལ་འདི་ལྟར། ཀྱེ་ཡེས་ར་ཨེལ་པ་རྣམས་ཁྱོད་ཅག་གིས་ཉོན་དང་། དེ་རིང་ཁྱོད་ཅག་གིས་དགྲ་རྣམས་ལ་དམག་རྒྱག་པར་འགྱུར་ཏེ། ཁྱོད་རྣམས་སེམས་ནས་མ་འཁུམས་མ་འཇིགས་མ་འཚབ་ཅིག དེ་དག་གི་མདུན་ནས་འདར་ཡང་མི་དགོས།
DEU 20:4 ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེ་ཁྱོད་ཅག་དང་མཉམ་དུ་ཕེབས་ནས། ཁྱོད་རྣམས་ཀྱི་དོན་དུ་དགྲ་དང་འཐབ་སྟེ་རྒྱལ་ཁ་གནང་ངེས་ཡིན་ཞེས་སྨྲ་ཞིང་།
DEU 20:5 འགོ་དཔོན་རྣམས་ཀྱིས་མི་ཚོགས་ལ་གཏམ་འདི་ལྟར་སྨྲ་སྟེ། སུ་ཞིག་གིས་ཁང་པ་གསར་པ་བརྩིགས་ནས་ད་དུང་བསྔོས་མེད་པ་ཡིན་ན། མི་དེ་དམག་འཁྲུག་གི་སྐབས་སུ་ཤི་ནས་མི་གཞན་ཞིག་གིས་ཁོའི་ཁང་པ་བསྔོ་བར་མི་བྱ་བའི་ཆེད་དུ་མི་དེ་ཕྱིར་ཁྱིམ་དུ་ལོག་དགོས།
DEU 20:6 ཡང་སུ་ཞིག་གིས་རྒུན་ཚལ་བཙུགས་ནས་ད་དུང་དེའི་ཤིང་ཏོག་མ་སྤྱད་པ་ཡིན་ན། མི་དེ་དམག་འཁྲུག་གི་སྐབས་སུ་ཤི་ནས་མི་གཞན་ཞིག་གིས་དེའི་ཤིང་ཏོག་སྤྱོད་པར་མི་བྱ་བའི་ཆེད་དུ་མི་དེ་ཕྱིར་ཁྱིམ་དུ་ལོག་དགོས།
DEU 20:7 ཡང་སུ་ཞིག་གིས་བུད་མེད་ཅིག་ལ་གཉེན་རྟགས་བརྒྱབ་ཀྱང་ད་དུང་གཉེན་སྒྲིག་བྱས་མེད་པ་ཡིན་ན། མི་དེ་དམག་འཁྲུག་གི་སྐབས་སུ་ཤི་ནས་མི་གཞན་ཞིག་གིས་ཁོ་མོ་ཆུང་མར་མི་ལེན་པའི་ཆེད་དུ་མི་དེ་ཕྱིར་ཁྱིམ་དུ་ལོག་དགོས་ཞེས་པའོ། །
DEU 20:8 ཡང་འགོ་དཔོན་རྣམས་ཀྱིས་མི་ཚོགས་ལ་འདི་ལྟར་སྨྲ་སྟེ། སུ་ཞིག་འཇིགས་ནས་དཔའ་ཞུམ་པ་ཡིན་ན། མི་དེས་རང་ཉིད་དཔའ་ཞུམ་པ་ལྟར་སྤུན་ཟླའི་དཔའ་ཞུམ་པར་མི་བྱ་བའི་ཆེད་དུ་ཕྱིར་ཁྱིམ་དུ་ལོག་དགོས་ཞེས་པའོ། །
DEU 20:9 འགོ་དཔོན་རྣམས་ཀྱིས་མི་ཚོགས་ལ་གཏམ་སྨྲས་ཚར་རྗེས། མི་ཚོགས་ཀྱི་སྣེ་ཁྲིད་མཁན་དམག་དཔོན་རྣམས་བསྐོ་བར་བྱའོ། །
DEU 20:10 ཁྱོད་རྣམས་གྲོང་ཁྱེར་ཞིག་གི་ཉེ་སར་སླེབས་ནས་དེ་ལ་དམག་རྒྱག་པར་རྩོམ་པའི་དུས་སུ། ཐོག་མར་དེ་དང་ཞི་མཐུན་ཡོང་ཐབས་བཙལ་དགོས།
DEU 20:11 གལ་སྲིད་གྲོང་ཁྱེར་དེས་ཁྱོད་རྣམས་ལ་ཞི་བའི་གྲོས་མཐུན་གྱི་སྒོ་མོ་ཕྱེ་བ་ཡིན་ན། གྲོང་ཁྱེར་དེའི་མི་ཐམས་ཅད་ཀྱིས་ཁྱོད་རྣམས་ལ་གཡོག་བྱས་ནས་ཞབས་ཕྱི་བསྒྲུབ་དགོས།
DEU 20:12 གལ་སྲིད་གྲོང་ཁྱེར་དེས་ཁྱོད་རྣམས་ལ་ཞི་མཐུན་མི་བྱེད་པར་རྒོལ་བར་བྱས་ན། དེའི་མཐའ་ནས་སྐོར་ཅིག
DEU 20:13 ཁྱོད་རྣམས་ཀྱི་དཀོན་མཆོག་ཡ་ཝཱེས་གྲོང་ཁྱེར་དེ་ཁྱོད་ཅག་གི་ལག་ཏུ་གཏོད་པའི་ཚེ། དེའི་སྐྱེས་པ་ཐམས་ཅད་ལ་ཁྱོད་རྣམས་ཀྱིས་གྲི་ཁས་བསྣུན་དགོས།
DEU 20:14 བུད་མེད་དང་བྱིས་པ་རྣམས་དང་། ཕྱུགས་ཟོག་བཅས་གྲོང་ཁྱེར་གྱི་བཅོམ་ནོར་ཐམས་ཅད་ནི་ཁྱོད་ཅག་གིས་བླངས་ཆོག ཁྱོད་རྣམས་ཀྱི་དགྲ་ཡི་བཅོམ་ནོར་ཐམས་ཅད་ནི་ཁྱོད་ཅག་གིས་ལོངས་སུ་སྤྱད་ཆོག་སྟེ། ཅི་ལ་ཞེ་ན། དེ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བ་ཡིན་ནོ། །
DEU 20:15 དེ་ལྟར་འདིར་ཡོད་པའི་མི་རིགས་རྣམས་ལ་མི་གཏོགས་པའི་གྲོང་ཁྱེར་རྣམས་ཏེ་ཁྱོད་རྣམས་དང་རྒྱང་ཐག་རིང་བའི་གྲོང་ཁྱེར་རྣམས་ལའང་དེ་བཞིན་བྱེད་དགོས།
DEU 20:16 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་མི་རིགས་འདི་རྣམས་ཀྱི་གྲོང་ཁྱེར་དུ། ཁྱོད་རྣམས་ཀྱིས་དབུགས་ཐོགས་གང་ཡང་གསོན་པོར་བསྐྱུར་མི་རུང་།
DEU 20:17 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བཀའ་བསྒོས་པ་ཇི་བཞིན་ཧེད་པ་དང་། ཨེ་མོར་པ་དང་། ཀ་ན་ཨན་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་རྣམས་ཚར་དུ་གཅོད་དགོས།
DEU 20:18 ཅི་ལ་ཞེ་ན། དེ་དག་གིས་རང་གི་ལྷ་རྣམས་ལ་བྱས་པའི་བྱ་སྤྱོད་སྐྱུག་བྲོ་བ་ཐམས་ཅད་ཁྱོད་རྣམས་ལ་བསླབས་ནས། ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་འགལ་བའི་སྡིག་པ་མི་བྱ་བའི་ཕྱིར་རོ། །
DEU 20:19 ཁྱོད་རྣམས་ཀྱིས་གྲོང་ཁྱེར་ཅིག་གི་མཐའ་བསྐོར་ཏེ་ཡུན་རིང་པོ་འགོར་ནས་དེ་ལེན་པའི་ཕྱིར་འཐབ་འཁྲུག་བརྒྱབ་ན། དེ་རུ་ཡོད་པའི་ཤིང་སྡོང་རྣམས་སྟ་རེས་གཅོད་མི་རུང་། ཅི་ལ་ཞེ་ན། ཁྱོད་རྣམས་ཀྱིས་དེ་དག་ལས་ཁ་ཟས་བླངས་ཆོག་པས་དེ་དག་གཅོད་གཏུབ་བྱེད་མི་འོས། ཞིང་ཁའི་ཤིང་སྡོང་ནི་མི་ཡིན་ནམ། ཁྱོད་རྣམས་ཀྱིས་མི་བསྐོར་བ་ནང་བཞིན་དེའི་མཐའ་ནས་བསྐོར་དགོས་སམ།
DEU 20:20 ཁྱོད་རྣམས་ཀྱིས་ཟས་རིགས་མི་ཐོགས་པ་ཤེས་པའི་ཤིང་སྡོང་འབའ་ཞིག་བརླགས་ནས་བཅད་དེ། ཁྱོད་ཅག་ལ་འཐབ་འཛིང་བྱེད་པའི་གྲོང་ཁྱེར་དེ་མ་ནུབ་བར་དུ་ལྕང་མའི་མཁར་བརྩིག་དགོས་སོ། །
DEU 21:1 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དུ། གལ་སྲིད་མི་ཞིག་བསད་ནས་བེམ་པོ་ཐང་ལ་ལྷུང་ཡོད་པ་རྙེད་ན་ཡང་། དེ་སུས་བསད་པ་མ་ཤེས་ན།
DEU 21:2 ཁྱོད་རྣམས་ཀྱི་རྒན་པོ་རྣམས་དང་ཁྲིམས་དཔོན་རྣམས་ཕྱི་ལ་འོངས་ཏེ། བེམ་པོ་དང་ཉེ་འཁོར་གྲོང་ཁྱེར་རྣམས་བར་གྱི་ལམ་ཐག་བཅལ་ནས།
DEU 21:3 མི་དེའི་བེམ་པོ་དང་ཆེས་ཐག་ཉེ་བའི་གྲོང་ཁྱེར་གང་ཡིན་པར་བལྟ་དགོས་ཤིང་། གྲོང་ཁྱེར་དེའི་རྒན་པོ་རྣམས་ཀྱིས་བ་ཁྱུ་ལས་བ་དྲུས་མ་ལས་ཀ་གང་ཡང་མ་བྱས་པ་དང་། གཉའ་ཤིང་གཏན་ནས་འཁུར་མ་མྱོང་བ་ཞིག་འཁྲིད་འོང་དགོས།
DEU 21:4 གྲོང་ཁྱེར་དེའི་རྒན་པོ་རྣམས་ཀྱིས་བ་དྲུས་མ་དེ་ནི་ནམ་ཡང་རྨོ་འདེབས་མ་བྱས་ལ་ས་བོན་ཡང་མ་བཏབ་པའི་གྲོག་རོང་ཆུ་རྒྱུན་ཅན་ཞིག་ཏུ་ཁྲིད་ནས། གྲོག་རོང་དེ་རུ་བ་དྲུས་མ་དེའི་སྐེ་ཚིགས་གཅུ་དགོས།
DEU 21:5 དེ་ནས་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོང་ཉིད་ལ་བསྙེན་བཀུར་བྱེད་པ་དང་། ཁོང་གི་མཚན་གྱི་སྒོ་ནས་བྱིན་རླབས་གནང་བར་བདམས་པའི་མཆོད་དཔོན་རྣམས་ཏེ་ལེ་ཝི་ཚོ་པའི་བུ་རྣམས་སྔོན་ལ་འོང་བ་དང་། རྩོད་པ་དང་རྒོལ་བ་ཐམས་ཅད་དེ་དག་གི་གཏམ་གྱིས་ཐག་གཅོད་བྱེད་དགོས།
DEU 21:6 གཞན་གྱིས་བསད་པའི་མི་དེ་དང་ཆེས་ཉེ་བའི་གྲོང་ཁྱེར་དེའི་རྒན་པོ་ཐམས་ཅད་ཀྱིས་གྲོག་རོང་ནས་སྐེ་ཚིགས་གཅུས་པའི་བ་དྲུས་མའི་གོང་དུ་ལག་པ་བཀྲུ་དགོས་པ་དང་།
DEU 21:7 དེ་དག་གིས་འདི་ལྟར། ང་ཚོའི་ལག་པས་མི་འདིའི་ཁྲག་བཞུར་དུ་མ་བཅུག་ལ། ང་ཚོའི་མིག་གིས་ཀྱང་དོན་འདི་མ་མཐོང་།
DEU 21:8 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་བླུས་པའི་འབངས་མི་ཡེས་ར་ཨེལ་ལ་གུ་ཡངས་མཛོད་ཅིག ཉེས་མེད་ཀྱི་ཁྲག་བཞུར་བའི་སྡིག་པ་ནི་ཁྱེད་ཀྱི་འབངས་མི་ཡེས་ར་ཨེལ་གྱི་སྟེང་ལ་མི་འགེལ་བར་མཛོད་ཅེས་ཞུས་ན། ཁོ་ཚོའི་ཁྲག་བཞུར་ཏུ་བཅུག་པའི་སྡིག་པ་བསལ་བ་ཡིན་ནོ། །
DEU 21:9 གལ་སྲིད་ཁྱོད་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་དྲང་པོ་གང་ཡིན་དེ་སྤྱད་ན། ཁྱོད་ཅག་གི་ཁྲོད་ནས་ཉེས་མེད་ཀྱི་ཁྲག་བཞུར་བའི་སྡིག་པ་མེད་པར་བྱའོ། །
DEU 21:10 ཁྱོད་རྣམས་ཕྱི་རོལ་ཏུ་སོང་ནས་དགྲ་རྣམས་ལ་འཐབ་པའི་ཚེ། ཁྱོད་རྣམས་ཀྱི་དཀོན་མཆོག་ཡ་ཝཱེས་དེ་དག་ཁྱོད་ཅག་གི་ལག་ཏུ་སྤྲད་ནས། ཁྱོད་རྣམས་ཀྱིས་དེ་དག་བཙོན་དུ་ཁྲིད་པ་དང་།
DEU 21:11 བཙོན་མའི་ཁྲོད་ནས་བུད་མེད་མཛེས་མ་ཞིག་མཐོང་ནས་དེ་ལ་ཡིད་སྨོན་ཤོར་ཏེ་ཆུང་མར་བསུ་འདོད་ན།
DEU 21:12 དེ་ཁྱོད་ཀྱི་ཁྱིམ་དུ་ཁྲིད་ནས། ཁོ་མོས་རང་གི་སྐྲ་བཞར་ཏེ་སེན་མོ་གཅོད་དགོས་ལ།
DEU 21:13 བཙོན་དུ་འཁྲིད་ཡོང་སྐབས་གྱོན་པའི་གོས་ཕུད་ནས། ཟླ་བ་གཅིག་ལ་ཁོ་མོའི་ཕ་མའི་ཆེད་དུ་མྱ་ངན་བྱས་ནས་ཁྱོད་ཀྱི་ཁྱིམ་དུ་འདུག་དགོས། དེའི་རྗེས་སུ་ཁྱོད་རང་ཁོ་མོ་དང་ལུས་འབྲེལ་བྱས་ནས་ཁྱོད་ནི་ཁོ་མོའི་ཁྱོ་ག་དང་། ཁོ་མོ་ཁྱོད་ཀྱི་ཆུང་མ་བྱེད་རུང་བ་ཡིན།
DEU 21:14 གལ་སྲིད་མ་འོངས་པར་ཁྱོད་ནི་ཁོ་མོ་ལ་དགའ་མོས་མེད་ན། ཁོ་མོ་གང་དུ་འགྲོ་འདོད་ན་དེར་འགྲོ་རུ་འཇུག་པ་ལས། ཁྱོད་ཀྱིས་ཁོ་མོར་བརྙས་བཅོས་བྱས་ཟིན་པས། ཁོ་མོ་དངུལ་གྱི་ཕྱིར་དུ་བཙོང་བའམ་གཡོག་མོ་ནང་བཞིན་བྱེད་མི་རུང་ངོ་། །
DEU 21:15 གལ་ཏེ་མི་ཞིག་ལ་ཆུང་མ་གཉིས་ཡོད་ཅིང་། གཅིག་ནི་ཁོས་གཅེས་པ་དང་ཅིག་ཤོས་ནི་ཁོས་མི་གཅེས་པ་ཡིན་ལ། དེ་གཉིས་ལ་བུ་སྐྱེས་ནས་བུ་སྐྱེས་འགོ་དེ་ཁོས་མི་གཅེས་པའི་ཆུང་མ་ལས་སྐྱེས་པ་ཡིན་ན།
DEU 21:16 མི་དེས་རང་གི་བུ་ལ་ནོར་སྐལ་བགོ་བའི་ཉིན་མོར། ཁོས་རང་གིས་གཅེས་པའི་ཆུང་མ་དེའི་བུ་ནི་ཁོས་མི་གཅེས་པའི་ཆུང་མ་དེའི་བུ་སྟེ་བུ་སྐྱེས་འགོ་ཡི་ཚབ་ཏུ་འཇོག་མི་རུང་སྟེ།
DEU 21:17 ཁོས་མི་གཅེས་པའི་ཆུང་མའི་བུ་དེ་སྐྱེས་འགོ་ཡིན་པ་ཁས་བླངས་ནས་རང་གི་རྒྱུ་ནོར་ཐམས་ཅད་ལས་ཉིས་སྐལ་སྟེར་དགོས། ཅི་ལ་ཞེ་ན། དེ་ནི་ཁོ་ལ་ལུས་སྟོབས་རྒྱས་པའི་སྐབས་སུ་ཐོབ་པའི་བུ་སྐྱེས་འགོ་ཡིན་ལ། བུ་སྐྱེས་འགོའི་ནོར་སྐལ་དེ་ཁོའི་ཡིན་ནོ། །
DEU 21:18 གལ་ཏེ་མི་ཞིག་ལ་ཨུ་ཚུགས་ཆེ་ཞིང་ངོ་ལོག་བྱེད་པའི་བུ་ཞིག་སྐྱེས་ནས་ཕ་མའི་ངག་ལ་མི་ཉན་པ་དང་། དེ་དག་གིས་བཅུན་ནའང་ངག་ལ་མི་ཉན་པ་ཞིག་ཡིན་ན།
DEU 21:19 ཁོའི་ཕ་མ་གཉིས་ཀྱིས་རང་གི་བུ་བཟུང་ནས་རང་གི་གྲོང་ཁྱེར་གྱི་རྒན་པོ་ཚོའི་དྲུང་དུ་ཁྲིད་སོང་སྟེ།
DEU 21:20 གྲོང་ཁྱེར་གྱི་རྒན་པོ་རྣམས་ལ། ངེད་ཀྱི་བུ་འདི་ཨུ་ཚུགས་ཆེ་ཞིང་ངོ་ལོག་བྱེད་མཁན་ཞིག་ཡིན་ལ། ངེད་ཀྱི་ངག་ལ་མི་ཉན་པར་ཟས་ལ་རྔམ་ཞིང་ཆང་ལ་དགའ་བའི་མི་ཞིག་ཡིན་ནོ་ཞེས་སྨྲ་དགོས་ཤིང་།
DEU 21:21 དེ་ནས་གྲོང་ཁྱེར་དེའི་མི་ཐམས་ཅད་ཀྱིས་ཁོ་ལ་རྡོ་རུབ་བཏང་ནས་གསོད་དགོས། དེ་ལྟར་ཁྱོད་ཅག་གི་ཁྲོད་ནས་མི་ངན་མེད་པར་བཟོ་དགོས་ལ། ཡེས་ར་ཨེལ་པ་ཐམས་ཅད་ཀྱིས་དེ་ཐོས་ནས་འཇིགས་པར་འགྱུར་རོ། །
DEU 21:22 གལ་ཏེ་མི་ཞིག་གིས་སྲོག་ཁྲིམས་གཅོད་དགོས་པའི་ཉེས་པ་བསགས་ན་དེ་བསད་པའི་རྗེས་སུ། མི་དེ་སྡོང་པོའི་སྟེང་དུ་འགེལ་དགོས།
DEU 21:23 དེའི་བེམ་པོ་ཞག་གང་པོར་སྡོང་པོའི་སྟེང་དུ་བསྐྱུར་མི་འོས་ཏེ། ཉིན་དེར་ངེས་པར་དུར་ལ་འཇུག་དགོས། ཅི་ལ་ཞེ་ན། སྡོང་མགོར་བཀལ་བའི་མི་སུ་ཡིན་ཡང་དཀོན་མཆོག་གིས་དམོད་མོ་བཏབ་པ་ཡིན་ནོ། །དེ་ལྟར་བྱས་ན་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དེ་ཁྱོད་ཅག་གིས་བཙོག་པར་མི་བྱའོ། །
DEU 22:1 ཁྱོད་རྣམས་ཀྱིས་རང་གི་སྤུན་ཟླའི་བ་གླང་ངམ་ར་ལུག་རྣམས་བདག་མེད་དུ་འཁྱམས་པར་མཐོང་ན་དེ་སྣང་མེད་དུ་མི་བསྐྱུར་བར། ངེས་པར་དུ་སྤུན་ཟླའི་རྩར་ཕྱིར་འདེད་དགོས།
DEU 22:2 གལ་སྲིད་སྤུན་ཟླ་དེ་ཁྱོད་རྣམས་དང་རྒྱང་ཐག་རིང་ཞིང་ཁྱོད་རྣམས་ཀྱིས་དེ་ངོ་མི་ཤེས་ན། ཁྱོད་རྣམས་ཀྱིས་ཕྱུགས་དེ་རང་གི་ཁྱིམ་དུ་དེད་ཡོང་ནས་བདག་བྱེད་དགོས་ལ། སྤུན་ཟླས་དེ་བཙལ་ནས་འོང་དུས་དེ་ཁོ་ལ་ཕྱིར་སྤྲོད་དགོས།
DEU 22:3 སྤུན་ཟླའི་བོང་བུ་ལ་ཁྱོད་རྣམས་ཀྱིས་དེ་བཞིན་བྱེད་དགོས་ཤིང་། ཁྱོད་རྣམས་ཀྱི་སྤུན་ཟླས་བོར་ནས་ཁྱོད་ཅག་གིས་རྙེད་པའི་གྱོན་གོས་སོགས་ཅ་ལག་གང་དང་གང་ཡིན་ཡང་དེ་ལྟར་བྱེད་དགོས་ཀྱི་སྣང་མེད་དུ་བསྐྱུར་མི་རུང་།
DEU 22:4 ཁྱོད་རྣམས་ཀྱིས་སྤུན་ཟླའི་བོང་བུ་དང་བ་གླང་རྣམས་ལམ་དུ་འགྱེལ་ཡོད་པ་མཐོང་ན། དེ་སྣང་མེད་དུ་མི་བསྐྱུར་བར་ཁོ་ལ་དེ་དག་ཡར་བསླང་རོགས་བྱེད་དགོས་སོ། །
DEU 22:5 བུད་མེད་ཀྱིས་སྐྱེས་པའི་གོས་མི་གྱོན་པ་དང་། སྐྱེས་པས་ཀྱང་བུད་མེད་ཀྱི་གོས་གྱོན་མི་རུང་། ཅི་ལ་ཞེ་ན། སུས་དེ་ལྟར་བྱེད་པ་ཡིན་ན་དེ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཞེ་ལོག་པའི་བྱ་སྤྱོད་ཡིན་ནོ། །
DEU 22:6 ཁྱོད་རྣམས་ཀྱིས་ལམ་ཁར་སྡོང་མགོ་དང་ཡང་ན་ས་རུ་ཡོད་པའི་བྱ་ཚང་རྙེད་ནས། དེའི་ནང་དུ་བྱ་ཕྲུག་དང་བྱ་སྒོང་ཡོད་པ་དང་། བྱ་མས་བྱ་ཕྲུག་རུམ་པའམ་སྒོ་ང་རུམ་ཡོད་ན། ཁྱོད་རྣམས་ཀྱིས་བྱ་མ་དེ་བྱ་ཕྲུག་དང་མཉམ་དུ་འཁྱེར་མི་རུང་།
DEU 22:7 ཁྱོད་རྣམས་ཀྱིས་བྱ་ཕྲུག་རང་གི་ཆེད་དུ་འཁྱེར་ཆོག འོན་ཀྱང་བྱ་མ་ངེས་པར་གཏོང་དགོས། དེ་ནས་ཁྱོད་རྣམས་བདེ་བར་གནས་ཤིང་ཚེ་ཐག་རིང་བར་འགྱུར་རོ། །
DEU 22:8 ཁྱོད་རྣམས་ཀྱིས་ཁང་པ་གསར་པ་བཟོ་བའི་ཚེ་ཁང་ཐོག་ལ་སྒྲོམ་སྐྱོར་འཇོག་དགོས་ཏེ། མི་ཞིག་ཁྱོད་རྣམས་ཀྱི་ཁང་ཐོག་ནས་མར་ལྷུང་ནས་ཁྱོད་ཅག་གི་ཁང་པ་ལ་ཁྲག་གི་ཉེས་པ་འཁོར་མི་འོང་བའི་ཕྱིར་རོ། །
DEU 22:9 ཁྱོད་རྣམས་ཀྱི་རྒུན་ཚལ་ལ་ས་བོན་རིགས་མི་འདྲ་བ་གཉིས་འདེབས་མི་རུང་། གལ་ཏེ་བཏབ་ན་ཁྱོད་རྣམས་ཀྱི་ལོ་ཏོག་གི་ཡོང་འབབ་དང་། རྒུན་ཚལ་གྱི་འབྲས་བུ་ཀུན་ལད་འགྲོ་བ་ཡིན།
DEU 22:10 ཁྱོད་རྣམས་ཀྱིས་བ་གླང་དང་བོང་བུ་གཉིས་དོར་བྱས་ནས་ཞིང་རྨོ་མི་རུང་ལ།
DEU 22:11 ཁྱོད་རྣམས་ཀྱིས་བལ་དང་སོ་རས་གཉིས་བསྲེས་ནས་བཟོས་པའི་གོས་ཀྱང་གྱོན་མི་རུང་།
DEU 22:12 ཁྱོད་རྣམས་ཀྱིས་རང་གི་ཕྱི་གོས་ཀྱི་མཐའ་བཞི་པོར་ཙོར་ལོ་འདོགས་དགོས་སོ། །
DEU 22:13 གལ་སྲིད་མི་ཞིག་གིས་ཆུང་མ་བླངས་ནས་ཁོ་མོ་དང་ལུས་འབྲེལ་བྱས་པའི་རྗེས་སུ་ཁོ་མོར་སྡང་བར་གྱུར་ཏེ།
DEU 22:14 ངོ་ཚ་ཁྲེལ་མེད་ཀྱི་དོན་རྫུན་བཟོ་བྱས་ནས་ཁོ་མོར་འཕྱས་ཏེ་ཁོ་མོའི་མིང་བརྫད་པ་དང་། ངས་བུད་མེད་འདི་ཆུང་མར་བླངས་ནས་ཁོ་མོ་དང་ལུས་འབྲེལ་བྱེད་དུས་སུ་མོ་རང་མོ་གསར་ཡིན་པའི་བདེན་རྟགས་རྙེད་མ་བྱུང་ཞེས་སྨྲས་ན།
DEU 22:15 གཞོན་ནུ་མ་དེའི་ཕ་མ་གཉིས་ཀྱིས་མོ་རང་མོ་གསར་ཡིན་པའི་བདེན་རྟགས་ཁྱེར་ནས་མཁར་སྒོ་རུ་གྲོང་ཁྱེར་གྱི་རྒན་པོ་རྣམས་ཀྱི་མདུན་དུ་འོངས་ཏེ།
DEU 22:16 གཞོན་ནུ་མའི་ཕ་ཡིས་རྒན་པོ་རྣམས་ལ། ངས་རང་གི་བུ་མོ་མི་འདི་ལ་བག་མར་བཏང་བ་དང་ཁོ་ནི་ཁོ་མོར་སྡང་བར་གྱུར་ཏེ།
DEU 22:17 ངོ་ཚ་ཁྲེལ་མེད་ཀྱི་དོན་རྫུན་བཟོ་བྱས་ནས་ཁོ་མོར་འཕྱས་ཤིང་། ངས་ཁྱོད་ཀྱི་བུ་མོ་ལས་མོ་རང་མོ་གསར་ཡིན་པའི་བདེན་རྟགས་རྙེད་མ་བྱུང་ཞེས་སྨྲས་པའོ། །དོན་དམ་དུ་ངའི་བུ་མོ་མོ་གསར་ཡིན་པའི་བདེན་རྟགས་འདི་རུ་ཡོད་ཅེས་སྨྲས་ཏེ། གྲོང་ཁྱེར་གྱི་རྒན་པོ་རྣམས་ཀྱི་མདུན་དུ་གྱོན་གོས་སར་འདིང་དགོས།
DEU 22:18 དེ་ནས་གྲོང་ཁྱེར་གྱི་རྒན་པོ་རྣམས་ཀྱིས་མི་དེ་བཟུང་འོངས་ནས་ཆད་པ་གཅོད་དགོས་པ་དང་།
DEU 22:19 དངུལ་སྲང་བརྒྱ་ཡི་ཆད་པ་བཀལ་ནས་གཞོན་ནུ་མའི་ཕ་ལ་སྦྱིན་དགོས། ཅི་ལ་ཞེ་ན། མི་དེས་ཡེས་ར་ཨེལ་གྱི་མོ་གསར་ཞིག་གི་མིང་བརྫད་པས་ཡིན། ཡང་གཞོན་ནུ་མ་དེ་ཁོའི་ཆུང་མ་བྱས་ནས་ཚེ་གང་པོར་འཐོར་མི་ཆོག་གོ །
DEU 22:20 འོན་ཀྱང་གཏམ་དེ་བདེན་ཞིང་གཞོན་ནུ་མ་དེར་མོ་གསར་ཡིན་པའི་བདེན་རྟགས་མེད་ན།
DEU 22:21 གཞོན་ནུ་མ་དེ་ཁོ་མོའི་ཕ་གཞིས་ཀྱི་སྒོ་ཁར་འཁྲིད་པ་དང་། གྲོང་ཁྱེར་གྱི་མི་རྣམས་ཀྱིས་ཁོ་མོ་རྡོ་རུབ་བཏང་ནས་གསོད་དགོས། ཅི་ལ་ཞེ་ན། ཁོ་མོས་ཡེས་ར་ཨེལ་གྱི་ཁྲོད་ནས་སྐྱུག་བྲོ་བའི་དོན་བྱས་ཤིང་རང་གི་ཕ་གཞིས་སུ་ལོག་གཡེམ་བྱས་པ་རེད། ཁྱོད་རྣམས་ཀྱི་ཁྲོད་ནས་ངན་པ་རྣམས་དེ་ལྟར་མེད་པར་གཏོང་དགོས་སོ། །
DEU 22:22 གལ་སྲིད་མི་ཞིག་མི་གཞན་པའི་ཆུང་མ་དང་ལུས་འབྲེལ་བྱས་པ་ཤེས་ན། འཆལ་པོ་འཆལ་མོ་དེ་གཉིས་ཀ་གསོད་དགོས་ལ། ཡེས་ར་ཨེལ་ནས་ངན་པ་རྣམས་དེ་ལྟར་མེད་པར་གཏོང་དགོས་སོ། །
DEU 22:23 གལ་སྲིད་གཞོན་ནུ་མ་མོ་གསར་ཡིན་པ་ཞིག་གཞན་ལ་གཉེན་རྟགས་བརྒྱབ་ཡོད་ཀྱང་། སྐྱེས་པ་ཞིག་གྲོང་ཁྱེར་ནས་ཁོ་མོར་ཕྲད་དེ་ཁོ་མོ་དང་ལུས་འབྲེལ་བྱས་ན།
DEU 22:24 ཁྱོད་ཅག་གིས་དེ་གཉིས་ཀ་ཡུལ་དེ་གའི་མཁར་སྒོ་རུ་ཁྲིད་ནས་རྡོ་རུབ་བཏང་སྟེ་གསོད་དགོས། གཞོན་ནུ་མ་དེ་གྲོང་ཁྱེར་དུ་ཡོད་ཀྱང་སྐྱོབ་རོགས་ཞུ་བའི་སྐད་མ་བརྒྱབ་པ་དང་། སྐྱེས་པ་དེས་རང་གི་ཁྱིམ་མཚེས་ཀྱི་ཆུང་མ་བརྫད་པའི་རྐྱེན་གྱིས་ཁོ་གཉིས་འཆི་དགོས་སོ། །ཁྱོད་རྣམས་ཀྱི་ཁྲོད་ནས་ངན་པ་རྣམས་དེ་ལྟར་མེད་པར་གཏོང་དགོས་སོ། །
DEU 22:25 འོན་ཀྱང་མི་ཞིག་ཞིང་ཁ་ནས་གཞན་དང་གཉེན་རྟགས་བརྒྱབ་ཡོད་པའི་གཞོན་ནུ་མ་ཞིག་དང་ཕྲད་དེ། ཁོ་མོ་བཙན་གྱིས་བཟུང་ནས་ཁོ་མོ་དང་ལུས་འབྲེལ་བྱས་ན། ཁོ་མོ་དང་ལུས་འབྲེལ་བྱས་པའི་མི་དེ་གཅིག་པུ་གསོད་དགོས་པ་ཡིན།
DEU 22:26 བུ་མོ་དེས་སྲོག་ཁྲིམས་གཅོད་དགོས་པའི་སྡིག་པ་བྱས་མེད་པས་ཁོ་མོར་ཅི་ཡང་བྱེད་མི་རུང་། དོན་རྐྱེན་འདི་ནི་མི་ཞིག་གིས་གློ་བུར་ཉིད་ལ་ལངས་ནས་ཁྱིམ་མཚེས་ལ་རྒོལ་ཞིང་དེའི་སྲོག་བཅད་པ་དང་འདྲའོ། །
DEU 22:27 ཅི་ལ་ཞེ་ན། མི་དེ་ཞིང་ཁ་ནས་གཞོན་ནུ་མ་དེ་དང་ཕྲད་ཅིང་། གཞན་ལ་གཉེན་རྟགས་བརྒྱབ་ཟིན་པའི་གཞོན་ནུ་མ་དེས་སྐད་བརྒྱབ་ཀྱང་སྐྱོབ་མཁན་མ་བྱུང་བས་ཡིན་ནོ། །
DEU 22:28 གལ་སྲིད་མི་ཞིག་གཞོན་ནུ་མ་མོ་གསར་ཡིན་པ་དང་ད་དུང་གཞན་ལ་གཉེན་རྟགས་བརྒྱབ་མེད་པ་ཞིག་དང་ཕྲད་དེ། བཙན་གྱིས་ཁོ་མོ་དང་ལུས་འབྲེལ་བྱས་པ་གཞན་གྱིས་རྟོགས་ན།
DEU 22:29 དེ་ནས་ཁོ་མོ་དང་ལུས་འབྲེལ་བྱེད་མཁན་གྱིས་གཞོན་ནུ་མའི་ཕ་ལ་དངུལ་སྲང་ལྔ་བཅུ་འཇལ་དགོས། ཁོས་གཞོན་ནུ་མ་དེ་བརྫད་པའི་རྐྱེན་གྱིས་ཁོ་མོ་རང་གི་ཆུང་མར་ལེན་དགོས་ལ་ཚེ་གང་པོར་འཐོར་མི་ཆོག་གོ །
DEU 22:30 མི་ཞིག་གིས་རང་གི་ཕ་ཡི་ཆུང་མ་བསྟེན་མི་རུང་ལ། ཕ་ཡི་སྨད་གོས་ཀྱང་བཤུ་མི་རུང་ངོ་། །
DEU 23:1 སྒོང་རྡོག་ལ་རྨས་སྐྱོན་བྱུང་བ་དང་ཕོ་མཚན་བཅད་པ་རྣམས་ནི་དཀོན་མཆོག་ཡ་ཝཱེའི་འདུ་ཚོགས་ལ་ཞུགས་མི་རུང་།
DEU 23:2 ནལ་ཕྲུག་རྣམས་དཀོན་མཆོག་ཡ་ཝཱེའི་འདུ་ཚོགས་ལ་ཡོང་མི་རུང་ལ། དེའི་མི་རབས་བཅུའི་རིང་གི་བུ་རྒྱུད་རྣམས་ཀྱང་དཀོན་མཆོག་ཡ་ཝཱེའི་འདུ་ཚོགས་ལ་ཞུགས་མི་རུང་།
DEU 23:3 ཨམ་མོན་པའམ་མོ་ཨབ་པ་རྣམས་དཀོན་མཆོག་ཡ་ཝཱེའི་འདུ་ཚོགས་ལ་ཞུགས་མི་རུང་ལ། དེ་དག་གི་མི་རབས་བཅུའི་རིང་གི་བུ་རྒྱུད་རྣམས་ཀྱང་དཀོན་མཆོག་ཡ་ཝཱེའི་འདུ་ཚོགས་ལ་ནམ་ཡང་ཞུགས་མི་རུང་།
DEU 23:4 གང་ལ་ཞེ་ན། ཁྱོད་ཅག་ཨེ་ཅིབ་ཡུལ་ནས་ཕྱི་རོལ་ཏུ་ཐོན་སྐབས། དེ་དག་གིས་བག་ལེབ་དང་ཆུ་ཁུར་ནས་ལམ་ཁར་ཁྱོད་རྣམས་མ་བསུས་པར། ཆུ་བོ་གཉིས་བར་གྱི་མེ་སོ་པོ་ཐེམ་ཡཱ་ཡི་ཕེ་ཐོར་ཞེས་པར་པེ་ཨོར་གྱི་བུ་པེལ་ཨམ་ཁྱོད་རྣམས་ལ་རྒོལ་ནས་དམོད་པར་གླས་པའི་ཕྱིར་རོ། །
DEU 23:5 འོན་ཀྱང་ཁྱོད་རྣམས་ཀྱི་དཀོན་མཆོག་ཡ་ཝཱེས་པེལ་ཨམ་གྱི་གཏམ་ལ་གསན་མི་འདོད་དེ། ཁྱོད་རྣམས་ཀྱི་དཀོན་མཆོག་ཡ་ཝཱེ་ཁྱོད་ཅག་ལ་བརྩེ་བ་ཆེ་བས། ཁོང་གིས་དམོད་མོ་དེ་ཁྱོད་ཅག་ལ་བྱིན་རླབས་སུ་བསྒྱུར།
DEU 23:6 ཁྱོད་རྣམས་ཀྱིས་མི་ཚེ་གང་པོར་དེ་དག་ལ་ཞི་བདེ་དང་བདེ་སྐྱིད་འཚོལ་མི་དགོས་སོ། །
DEU 23:7 ཨེ་དོམ་པ་ནི་ཁྱོད་རྣམས་ཀྱི་སྤུན་ཟླ་ཡིན་པས་དེ་ལ་ཞེན་ལོག་མི་རུང་ལ། ཨེ་ཅིབ་པའི་ཡུལ་དུ་ཁྱོད་རྣམས་བྱེས་པ་ཡིན་པས་ཁོ་རྣམས་ལའང་ཞེན་ལོག་མི་རུང་།
DEU 23:8 དེ་དག་ལས་སྐྱེས་པའི་བུ་རབས་ཚ་རྒྱུད་མི་རབས་གསུམ་པ་དེ་དཀོན་མཆོག་ཡ་ཝཱེའི་འདུ་ཚོགས་སུ་ཞུགས་རུང་བའོ། །
DEU 23:9 ཁྱོད་རྣམས་ཀྱིས་དམག་དྲངས་ནས་དགྲ་རྣམས་ལ་རྒོལ་བར་འགྲོ་བའི་དུས་སུ། རང་ཉིད་དོན་ངན་པ་ཐམས་ཅད་ནས་ཅིས་ཀྱང་བསྲུང་དགོས།
DEU 23:10 གལ་སྲིད་ཁྱོད་ཅག་གི་ཁྲོད་དུ་མི་ཞིག་གིས་མཚན་མོར་རྨི་ལམ་དུ་ཐིག་ལེ་ཤོར་ནས་མི་གཙང་བར་གྱུར་ན། མི་དེ་སྒར་ཁའི་ཕྱི་ལ་འགྲོ་དགོས་ཤིང་། སྒར་ནང་དུ་ཡོང་མི་རུང་།
DEU 23:11 འོན་ཀྱང་ས་སྲོས་ཀྱི་དུས་སུ་མི་དེས་རང་ཉིད་ལ་ཁྲུས་རྒྱག་དགོས་པ་དང་། ཉི་མ་ནུབ་རྗེས་ཁོ་སྒར་ཁ་རུ་ཡོང་ཆོག་གོ །
DEU 23:12 ཁྱོད་རྣམས་ལ་སྒར་ཁའི་ཕྱི་རོལ་ཏུ་གསང་སྤྱོད་ཡོད་དགོས་ཤིང་དེར་སོང་ནས་ཆབ་གསང་ལ་བསྡད་ཆོག
DEU 23:13 ལག་ཆའི་ཁྲོད་དུ་ཁྱོད་རྣམས་ལ་ཁྱེམ་བུ་ཞིག་ཡོད་དགོས་ལ། ཁྱོད་རྣམས་ཀྱིས་ཕྱི་རོལ་ཏུ་བཙོག་པ་བཏང་རྗེས་དེས་ས་བརྐོས་ནས་བཤང་གཅི་འགེབ་དགོས།
DEU 23:14 ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེ་རྟག་ཏུ་ཁྱོད་ཅག་གི་སྒར་ཁའི་དཀྱིལ་ནས་ཕེབས་ཤིང་། ཁྱོད་རྣམས་བསྒྲལ་ནས་ཁྱོད་ཅག་གི་དགྲ་རྣམས་ཁྱོད་ཅག་ལ་སྤྲོད་པར་མཛད་དགོས། ཁོང་གིས་རྫས་མི་གཙང་བ་གང་ཞིག་ཁྱོད་རྣམས་ཀྱི་ཁྲོད་ནས་གཟིགས་པ་ཡིན་ན། ཁྱོད་རྣམས་དང་འབྲལ་བར་འགྱུར་བས་ཁྱོད་ཅག་གི་སྒར་ཁ་ནི་གཙང་མ་ཡིན་དགོས་སོ། །
DEU 23:15 གལ་སྲིད་བྲན་པོ་ཞིག་རང་གི་བདག་པོར་བྲལ་ནས་ཁྱོད་རྣམས་ཀྱི་དྲུང་དུ་བྲོས་འོངས་ན། ཁྱོད་རྣམས་ཀྱིས་ཁོ་རང་བདག་པོ་ལ་ཕྱིར་སྤྲོད་པར་མི་བྱ།
DEU 23:16 མི་དེ་ཁྱོད་རྣམས་དང་མཉམ་དུ་ཁྱོད་ཅག་གི་ཁྲོད་ནས་འདུག་དགོས་ཤིང་། ཁྱོད་རྣམས་ཀྱི་གྲོང་རྡལ་རྣམས་ནས་ཁོ་རང་གང་ལ་དགའ་ན་དེ་འདེམས་སུ་བཅུག་ནས་འཇོག་དགོས། ཁྱོད་རྣམས་ཀྱིས་དེ་ལ་བརྙས་བཅོས་བྱེད་མི་རུང་ངོ་། །
DEU 23:17 ཡེས་ར་ཨེལ་གྱི་བུད་མེད་རྣམས་ལས་མཆོད་གཤོམ་གྱི་ཆོས་རྫུ་སྨད་འཚོང་མ་ཡོད་མི་རུང་ལ། ཡེས་ར་ཨེལ་གྱི་སྐྱེས་པ་རྣམས་ལས་མཆོད་གཤོམ་གྱི་ཆོས་རྫུ་གཞང་འཚོང་ཡང་ཡོད་མི་རུང་།
DEU 23:18 སྨད་འཚོང་མའི་གླ་དངུལ་དང་སྐྱེས་པ་གཞང་འཚོང་གི་གླ་དངུལ་རྣམས་ནི། ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་བཞུགས་གནས་སུ་ཁྱེར་ནས་དམ་བཅའི་མཆོད་པ་ཅི་རིགས་སུ་ཕུལ་མི་ཆོག ཅི་ལ་ཞེ་ན། དེ་གཉིས་པོར་ཁྱོད་རྣམས་ཀྱི་དཀོན་མཆོག་ཡ་ཝཱེ་ཞེ་ལོག་པ་ཡིན་ནོ། །
DEU 23:19 ཁྱོད་རྣམས་ཀྱིས་རང་གི་སྤུན་ཟླར་དངུལ་དང་ཟ་མ། ཡང་ན་སྐྱེད་ཀ་རེག་པའི་རིགས་གང་ཞིག་བསྐྱིས་ནའང་སྐྱེད་ཀ་གང་ཡང་ལེན་མི་རུང་།
DEU 23:20 ཁྱོད་རྣམས་ཀྱིས་ཕྱི་ཕྱོགས་པ་རྣམས་ལས་སྐྱེད་ཀ་བླངས་ཆོག་ཀྱང་། རང་གི་སྤུན་ཟླ་ལས་སྐྱེད་ཀ་ལེན་མི་རུང་། དེ་ནས་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་ནས་བདག་གིར་འཛིན་པའི་ཡུལ་དུ་ཁྱོད་ཀྱི་ལས་ཀ་ཐམས་ཅད་ལ་བྱིན་རླབས་སྩོལ་བར་འགྱུར་རོ། །
DEU 23:21 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་དམ་བཅས་པ་ཡིན་ན། དེ་བསྒྲུབ་པར་འགོར་འགྱངས་བྱེད་མི་རུང་། གང་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་དེ་འདེད་པ་དང་། དེའི་དུས་སུ་ཁྱོད་རྣམས་ལ་སྡིག་པ་ཡོད་པ་ཡིན།
DEU 23:22 འོན་ཀྱང་ཁྱོད་རྣམས་ཀྱིས་དམ་བཅའ་མ་བཞག་ན་ཁྱོད་ཅག་ལ་སྡིག་པ་མེད།
DEU 23:23 རང་གི་ཁ་ནས་གང་ཤོར་བ་དེ་བསྒྲུབ་དགོས། ཁྱོད་རྣམས་ཀྱིས་དངོས་སུ་ཁྱོད་ཅག་གི་དཀོན་མཆོག་ཡ་ཝཱེ་ལ་རང་མོས་ངང་དམ་བཅས་པ་བཞིན། རང་གིས་ཁས་བླངས་པ་དེ་སྒྲུབས་ཤིག
DEU 23:24 ཁྱོད་རྣམས་ཁྱིམ་མཚེས་ཀྱི་རྒུན་ཚལ་ནང་དུ་སོང་ན་ཁྱོད་ཅག་གིས་འདོད་པ་ཚིམ་པའི་བར་དུ་རྒུན་འབྲུམ་ཟོས་ཆོག་མོད། འོན་ཀྱང་སྣོད་ལ་བསྡུ་མི་རུང་།
DEU 23:25 ཁྱོད་རྣམས་ཁྱིམ་མཚེས་ཀྱི་ཞིང་ནང་དུ་སོང་ན། ལག་པས་སྙེ་མ་བཏོགས་ཆོག་ཀྱང་ཁྱིམ་མཚེས་ཀྱི་ཞིང་ནང་དུ་ཟོར་བ་གཡུག་མི་རུང་ངོ་། །
DEU 24:1 མི་ཞིག་གིས་ཆུང་མ་བླངས་ཏེ་གཉེན་བསྒྲིགས་པའི་རྗེས་སུ། ཁོ་མོའི་སྐྱོན་ཞིག་མཐོང་ནས་ཁོ་མོར་མི་དགའ་བར་གྱུར་ན། བཟའ་འཐོར་ཡི་གེ་བྲིས་ནས་ཁོ་མོའི་ལག་ཏུ་བཞག་སྟེ་རང་གི་ཁྱིམ་ནས་འགྲོ་རུ་བཅུག་ཆོག་པ་དང་།
DEU 24:2 ཁོ་མོ་རང་གི་ཁྱོ་གའི་ཁྱིམ་དང་བྲལ་རྗེས་མི་གཞན་ཞིག་གི་ཆུང་མ་བྱས་ཆོག་ལ།
DEU 24:3 གལ་སྲིད་ཁྱོ་ག་ཕྱི་མ་ཡང་ཁོ་མོར་སྡང་ནས་ཁོ་མོར་འཐོར་ཡིག་བྲིས་པ་དང་། ཁོ་མོའི་ལག་ཏུ་བཞག་ནས་རང་གི་ཁྱིམ་ནས་འགྲོ་རུ་འཇུག་པའམ། ཡང་ན་ཁོ་མོ་ཆུང་མར་བླངས་པའི་ཁྱོ་ག་ཕྱི་མ་དེ་ཚེ་ལས་འདས་པ་ཡིན་ན།
DEU 24:4 ཁོ་མོ་འགྲོ་རུ་བཅུག་པའི་ཁྱོ་ག་སྔ་མ་དེས་ཁོ་མོ་བཙོག་པར་བཟོས་རྗེས་ཁོ་མོ་ཡང་བསྐྱར་ཆུང་མར་ལེན་མི་རུང་། ཅི་ལ་ཞེ་ན། དཀོན་མཆོག་ཡ་ཝཱེའི་སྤྱན་སྔར་དེ་ནི་སྐྱུག་བྲོ་བ་ཡིན་ལ། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་ནི་སྡིག་པས་བརྫད་མི་རུང་ངོ་། །
DEU 24:5 མི་ཞིག་གིས་ཆུང་མ་བླངས་མ་ཐག་ཡིན་ན། དམག་ལ་ཞུགས་པའམ་ཡང་ན་དེར་བྱ་བ་གཞན་གང་ཡང་འགེལ་མི་རུང་བར། རང་ཁྱིམ་ནས་ཆུང་མ་དང་མཉམ་དུ་ལོ་གཅིག་རིང་ལ་སྐྱིད་བརྒྱབ་ནས་འདུག་དགོས་སོ། །
DEU 24:6 རང་འཐག་གི་རྡོ་གཉིས་ཀ་དང་ཐ་ན་སྟེང་རྡོ་ཡིན་ཡང་གཏའ་མར་ལེན་མི་རུང་། ཅི་ལ་ཞེ་ན། དེ་ནི་མི་ཡི་ཚེ་སྲོག་གཏའ་མར་བླངས་པའོ། །
DEU 24:7 སུ་ཞིག་གིས་རང་གི་སྤུན་ཟླ་སྟེ། ཡེས་ར་ཨེལ་པ་རྣམས་ལས་གཅིག་བསླུ་ཁྲིད་བྱས་ནས་བྲན་གཡོག་ལྟར་བཀོལ་བའམ། ཡང་ན་ཁོ་བཙོངས་པ་ཡིན་ན། མི་བསླུ་ཁྲིད་བྱེད་མཁན་དེ་གསོད་དགོས། ཁྱོད་རྣམས་ཀྱི་ཁྲོད་ནས་ངན་པ་རྣམས་དེ་ལྟར་མེད་པར་གཏོང་དགོས་སོ། །
DEU 24:8 མཛེ་ནད་ལ་འཛེམས་ནས་དོགས་དགོས། ངས་ལེ་ཝི་པའི་མཆོད་དཔོན་རྣམས་ལ་བསྒོས་པ་ཇི་བཞིན། དེ་དག་གིས་ཁྱོད་ཅག་ལ་ཅི་ལྟར་བསྟན་པ་དེ་ཞིབ་ཏུ་བསྲུངས་ནས་བསྒྲུབ་དགོས།
DEU 24:9 ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཐོན་ཏེ་ལམ་ཁར་ཡོད་དུས་སུ། ཁྱོད་རྣམས་ཀྱི་དཀོན་མཆོག་ཡ་ཝཱེས་མིར་ཡམ་ལ་ཅི་ཞིག་མཛད་པ་དེ་དྲན་པར་གྱིས།
DEU 24:10 ཁྱོད་རྣམས་ཀྱིས་རང་གི་ཁྱིམ་མཚེས་ལ་བུ་ལོན་གཡར་ན། བུ་ལོན་གང་ཞིག་གཡར་ནའང་མི་དེ་ནས་གཏའ་མ་ལེན་ཕྱིར་ཁོའི་ཁྱིམ་དུ་འགྲོ་མི་རུང་།
DEU 24:11 ཁྱོད་རྣམས་ཕྱི་ནས་འདུག་དགོས་ལ། བུ་ལོན་གཡོར་མཁན་གྱིས་གཏའ་མ་ཕྱི་ལ་ཁྱེར་འོངས་ནས་ཁྱོད་ལ་སྟེར་དགོས།
DEU 24:12 གལ་སྲིད་མི་དེ་དབུལ་པོ་ཡིན་ན། ཁྱོད་རྣམས་ཀྱིས་དེའི་གཏའ་མ་ཞག་གིས་བསྐྱུར་མི་རུང་།
DEU 24:13 ཉི་མ་ནུབ་པའི་དུས་སུ་དེའི་གཏའ་མ་ཅིས་ཀྱང་ཁོ་ལ་ཕྱིར་སྤྲོད་དགོས། ཁོས་རང་གི་གོས་བཀབ་ནས་ཉལ་ཆོག་པ་དང་ཁྱོད་ཅག་ལ་བྱིན་རླབས་གནང་ངེས། དེ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་དྲང་བདེན་དུ་འགྱུར་རོ། །
DEU 24:14 དབུལ་ཞིང་ཕོངས་པའི་གླ་པ་ནི་ཁྱོད་རྣམས་ཀྱི་སྤུན་ཟླའམ། ཡང་ན་ཁྱོད་ཅག་གི་གྲོང་རྡལ་རྣམས་སུ་སྡོད་པའི་བྱེས་པ་སུ་ཡིན་ཡང་། དེ་ལ་བརྙས་བཅོས་བྱེད་མི་རུང་།
DEU 24:15 ཉིན་རེའི་གླ་ཆ་ཉིན་རེ་བཞིན་ཉི་མ་མ་ནུབ་གོང་ལ་སྟེར་དགོས། དེ་ལྟར་མིན་ཚེ་མི་དེ་དབུལ་པོ་ཡིན་པས་ཁོའི་སེམས་གླ་ཆར་འཁྲེང་ནས་ཁྱོད་ཅག་ལ་མ་དགའ་བར་དཀོན་མཆོག་ཡ་ཝཱེ་ལ་འོ་དོད་ཞུས་ན། དེ་ནི་ཁྱོད་རྣམས་ཀྱི་སྡིག་པར་འགྱུར་ངེས་སོ། །
DEU 24:16 མི་སོ་སོ་རང་རང་གི་སྡིག་པའི་རྐྱེན་གྱིས་གསོད་པར་འོས་པ་ལས། བུ་ཡི་རྐྱེན་གྱིས་ཕ་གསོད་པའམ། ཕ་ཡི་རྐྱེན་གྱིས་བུ་གསོད་མི་རུང་།
DEU 24:17 བྱེས་པ་དང་དྭ་ཕྲུག་ལ་དྲང་བདེན་ལོག་སྤྱོད་བྱེད་མི་འོས། ཡུགས་མོའི་གྱོན་གོས་གཏའ་མར་ཡང་ལེན་མི་རུང་།
DEU 24:18 ཁྱོད་ཅག་ཨེ་ཅིབ་ཡུལ་ནས་བྲན་གཡོག་ཡིན་དུས། ཁྱོད་རྣམས་ཀྱི་དཀོན་མཆོག་ཡ་ཝཱེས་དེ་ལས་བསྐྱབས་འོངས་པ་དེ་དྲན་པའི་ཆེད་དུ། ངས་ཁྱོད་རྣམས་ལ་འདི་ལྟར་བསྒྲུབ་དགོས་པར་གདམས་པའོ། །
DEU 24:19 ཁྱོད་རྣམས་ཀྱིས་ཞིང་ནས་འབྲུ་རིགས་བསྡུ་བའི་དུས་སུ། ཞིང་ནས་ཚར་ཕོན་ཞིག་ལུས་ན་ཁྱོད་རྣམས་ཕྱིར་དེ་ལེན་དུ་འགྲོ་མི་རུང་། དེ་ནི་བྱེས་པ་དང་དྭ་ཕྲུག ཡུགས་མོ་བཅས་ཀྱི་སྐལ་ཡིན་ལ། དེ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལག་གི་ལས་ཀ་ཐམས་ཅད་ལ་བྱིན་རླབས་མཛད་པའི་ཕྱིར་ཡིན་ནོ། །
DEU 24:20 ཡང་སྐྱུ་རུ་ཤིང་ལས་འབྲས་བུ་ཐོགས་སྐབས། ཡལ་གའི་སྟེང་དུ་ལུས་པ་རྣམས་ཡང་བསྐྱར་ཐོགས་པར་མི་བྱ་ཞིང་དེ་ནི་བྱེས་པ་དང་དྭ་ཕྲུག ཡུགས་མོ་བཅས་ལ་བསྐྱུར་དགོས།
DEU 24:21 ཁྱོད་རྣམས་ཀྱི་རྒུན་ཚལ་ནས་རྒུན་འབྲུམ་བསྡུས་རྗེས་ལུས་པ་རྣམས་ཡང་བསྐྱར་བསྡུ་མི་རུང་། དེ་ནི་བྱེས་པ་དང་དྭ་ཕྲུག ཡུགས་མོ་བཅས་ལ་བསྐྱུར་དགོས།
DEU 24:22 ཁྱོད་རྣམས་ཨེ་ཅིབ་ཡུལ་ནས་བྲན་གཡོག་ཡིན་པ་དེ་དྲན་པའི་ཆེད་དུ། ངས་ཁྱོད་རྣམས་ལ་འདི་ལྟར་བསྒྲུབ་དགོས་པར་གདམས་པའོ། །
DEU 25:1 གལ་ཏེ་མི་རྣམས་ཀྱི་བར་ལ་རྩོད་པ་བྱུང་ན་དེ་དག་ཁྲིམས་རར་འགྲོ་དགོས་ཤིང་། ཁྲིམས་དཔོན་གྱིས་གྱོད་དོན་ཐག་གིས་གཅོད་དུས་དྲང་པོར་བདེན་ལུགས་གནང་བ་དང་ངན་པར་ཉེས་ཆད་གཅོད་དགོས།
DEU 25:2 གལ་སྲིད་ནག་ཉེས་ཅན་ལ་གཅར་རྡུང་འབབ་ན། ཁྲིམས་དཔོན་གྱིས་དེ་ཉལ་དུ་བཅུག་ནས་རང་གི་མིག་ལམ་ནས་ཉེས་པའི་ཚད་བཞིན་དུ། གྲངས་ཀ་ལྟར་ལྕག་ཚན་གཞུ་དགོས།
DEU 25:3 ལྕག་ཚན་བཞི་བཅུ་གཞུ་རུང་བ་ལས་དེ་ལས་མང་བ་གཞུ་མི་རུང་། གལ་སྲིད་ཁྱོད་རྣམས་ཀྱིས་ཁོ་ལ་ལྕག་ཚན་དེ་ལས་མང་བ་གཞུས་ན། ཁྱོད་ཅག་གི་མིག་ལམ་ནས་སྤུན་ཟླ་དེ་ཁྱད་དུ་བསད་པ་ཡིན་ནོ། །
DEU 25:4 གཡུལ་ཁ་གཅོག་པའི་དུས༌སུ་བ་གླང་གི་མཆུ་ཏོ་མ༌སྡོམ།
DEU 25:5 སྤུན་ཟླ་རྣམས་མཉམ་དུ་སྡོད་སྐབས་གཅིག་ལ་བུ་མེད་པར་ཤི་ན། འདས་པོའི་ཆུང་མ་མི་གཞན་པར་གཉེན་སྒྲིག་བྱེད་མི་རུང་། ཁྱོ་གའི་སྤུན་མཆེད་ཀྱིས་ཁོ་མོ་ལ་སྤུན་ཟླའི་འགན་ཁུར་ཏེ། ཁོ་མོ་ཆུང་མར་བླངས་ནས་ཁོ་མོ་དང་ལུས་འབྲེལ་བྱེད་དགོས་པ་དང་།
DEU 25:6 སྤུན་འདས་པོ་དེའི་མིང་ཡེས་ར་ཨེལ་ནས་ནུབ་པར་མི་འགྱུར་བའི་ཕྱིར། ཁོ་མོ་ལས་སྐྱེས་པའི་བུ་སྐྱེས་འགོ་དེ་ཁོའི་སྤུན་འདས་པོའི་མིང་ལ་དབང་དགོས།
DEU 25:7 གལ་སྲིད་མི་དེས་རང་གི་སྤུན་གྱི་ཆུང་མ་ལེན་མི་འདོད་ན། ཁོའི་སྤུན་གྱི་ཆུང་མ་མཁར་སྒོ་རུ་རྒན་པོ་རྣམས་ཀྱི་དྲུང་དུ་སོང་སྟེ། ངའི་ཁྱོ་གའི་སྤུན་གྱིས་ཡེས་ར་ཨེལ་ནས་རང་གི་ཕུ་བོའི་མིང་འཇོག་མི་འདོད་ལ། ངའི་ཁྱོ་གའི་སྤུན་གྱིས་ང་ལ་འགན་འཁུར་མི་འདོད་དོ་ཞེས་སྨྲ་དགོས།
DEU 25:8 དེ་ནས་གྲོང་ཁྱེར་དེའི་རྒན་པོ་རྣམས་ཀྱིས་མི་དེ་བོས་ནས་ཁོ་ལ་གསལ་པོོར་སྨྲ་དགོས་ཤིང་། གལ་སྲིད་དེས་ཨུ་ཚུགས་ཀྱིས་ངས་ཁོ་མོ་ལེན་མི་འདོད་ཟེར་ན།
DEU 25:9 ཁོའི་ཕུ་བོའི་ཆུང་མ་ནི་རྒན་པོ་རྣམས་ཀྱི་མིག་མདུན་ནས་ཁོའི་གམ་དུ་སོང་སྟེ། ཁོའི་རྐང་པ་ལས་ལྷམ་བཤུས་ནས་གདོང་ལ་མཆིལ་མ་བཏབ་སྟེ་ཁོ་ལ། རང་གི་ཕུ་བོའི་རིགས་རྒྱུད་སྐྱོང་བར་མི་དགའ་བའི་མི་ལ་འདི་ལྟར་བྱེད་དགོས་ཞེས་སྡིགས་དགོས།
DEU 25:10 དུས་དེ་ནས་བཟུང་ཡེས་ར་ཨེལ་ནས་མི་དེའི་མིང་ལ་ལྷམ་བཤུས་པའི་ཁྱིམ་རྒྱུད་ཅེས་འབོད་པར་འགྱུར་རོ། །
DEU 25:11 གལ་ཏེ་མི་གཉིས་རྒྱག་རེས་བྱེད་པའི་ཚེ། གཅིག་གི་ཆུང་མས་རང་གི་ཁྱོ་ག་གཞན་པ་དེའི་ལག་ནས་སྐྱོབ་ཆེད་ཚུར་ཡོང་ནས་མི་དེའི་འདོམས་ལ་ལག་པས་འཇུས་ན།
DEU 25:12 ཁྱོད་རྣམས་ཀྱིས་སྙིང་རྗེ་མི་བསྐྱེད་པར་ཁོ་མོའི་ལག་པ་གཅོད་དགོས་སོ། །
DEU 25:13 ཁྱོད་རྣམས་ཀྱིས་སྒྱེ་མོ་ནང་དུ་རྒྱ་རྡོ་ཆེ་ཆུང་གཉིས་མཉམ་དུ་འཇོག་མི་རུང་།
DEU 25:14 ཁྱོད་རྣམས་ཀྱི་ཁྱིམ་དུ་ཚད་འཇལ་ཆས་ཆེ་ཆུང་གཉིས་ཡོད་མི་རུང་།
DEU 25:15 ཁྱོད་རྣམས་ལ་རྒྱ་རྡོ་མཉམ་ཞིང་དྲང་བ་དང་། འཇལ་ཆས་ཚད་ལྡན་དྲང་པོ་ཞིག་ཡོད་དགོས། དེ་འདྲ་ཡོད་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དུ་ཁྱོད་རྣམས་ཡུན་རིང་པོར་འཚོ་ཐུབ།
DEU 25:16 སུ་ཞིག་གིས་གཡོ་སྒྱུའི་སྦྱོར་བ་འདི་དག་སྤེལ་ན། དེ་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཞེ་ལོག་པ་ཡིན་ནོ། །
DEU 25:17 ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཐོན་པའི་ལམ་དུ། ཨ་མཱད་ལེག་པས་ཁྱོད་རྣམས་ལ་ཅི་བྱས་པ་དེ་དྲན་དགོས།
DEU 25:18 དེ་ཚོས་དཀོན་མཆོག་ལ་གུས་ཤིང་འཇིགས་པར་མི་བྱ་ཞིང་། ལམ་བར་དུ་ཁྱོད་རྣམས་ལ་ཇི་ལྟར་ཕྲད་པ་དང་། ཁྱོད་རྣམས་ཐང་ཆད་ནས་དཀའ་ངལ་གྱི་གནས་སུ་ལྷུང་ཡོད་དུས། ཁྱོད་རྣམས་ཀྱི་རྗེས་སུ་ལུས་པ་གཉོད་ཆུང་རྣམས་ལ་རྒོལ་བའོ། །
DEU 25:19 དེ་བས་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་མཐའ་འཁོར་གྱི་དགྲ་ཐམས་ཅད་ལས་བསྐྱབས་ཤིང་། ཁོང་གིས་ཁྱོད་རྣམས་ལ་ས་སྐལ་དུ་གནང་བའི་ཡུལ་དུ་བདེ་བར་གནས་པའི་ཚེ། ཁྱོད་ཀྱིས་ཨ་མཱད་ལེག་མི་རིགས་ཀྱི་མིང་ནི་གནམ་འོག་ནས་ནུབ་པར་བྱེད་དགོས་པ་མ་བརྗེད་ཅིག
DEU 26:1 ཕྱིས་སུ་ཁྱོད་རྣམས་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་ས་སྐལ་དུ་གནང་བའི་ཡུལ་དུ་སླེབས་ཏེ། དེ་བདག་གིར་བཟུང་ནས་དེར་གཞིས་ཆགས་པའི་ཚེ།
DEU 26:2 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་ནས། ས་ལས་སྐྱེས་པའི་ཐོག་ཕུད་འགའ་ཤས་བླངས་ནས་གཟེབ་ཀྱི་ནང་དུ་བཞག་སྟེ། ཁྱོད་རྣམས་ཀྱི་དཀོན་མཆོག་ཡ་ཝཱེས་རང་ཉིད་ཀྱི་མཚན་འགོད་པར་བདམས་པའི་ཡུལ་དེར་འགྲོ་དགོས་ལ།
DEU 26:3 སྐབས་དེའི་མཆོད་དཔོན་གྱི་དྲུང་དུ་སོང་ནས་ཁོ་ལ་འདི་ལྟར། ངས་དེ་རིང་ཁྱེད་ཀྱི་དཀོན་མཆོག་ཡ་ཝཱེ་ལ་ར་སྤྲོད་བྱ་སྟེ། ང་རང་དཀོན་མཆོག་ཡ་ཝཱེས་རང་ཅག་གི་ཕ་མེས་རྣམས་ལ་གནང་བར་མནའ་དང་བཅས་ཞལ་བཞེས་གནང་བའི་ཡུལ་དེར་སླེབས་པ་ཡིན་ཞེས་སྨྲ་དགོས།
DEU 26:4 དེ་ནས་མཆོད་དཔོན་གྱིས་ཁྱོད་རྣམས་ཀྱི་ལག་ནས་གཟེབ་བླངས་ཏེ། ཁྱོད་ཅག་གི་དཀོན་མཆོག་ཡ་ཝཱེའི་མཆོད་ཁྲིའི་མདུན་དུ་འཇོག་དགོས་སོ། །
DEU 26:5 དེ་ནས་ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་དྲུང་ནས་འདི་ལྟར། ང་ཚོའི་ཕ་མེས་ནི་ཨ་རམ་པ་འཁྱམས་པོ་ཞིག་ཡིན། ཁོ་རང་མར་ཨེ་ཅིབ་ཡུལ་དུ་སོང་ནས་དེར་བསྡད་པ་དང་། མི་གྲངས་ཉུང་ཉུང་ཞིག་ལས་མེད་ནའང་ཡུལ་དེ་རུ་མི་རིགས་ཆེན་པོ་སྟོབས་དང་ལྡན་པ། མི་གྲངས་ཀྱང་མང་པོ་ཞིག་ཏུ་གྱུར་པ་རེད།
DEU 26:6 ཨེ་ཅིབ་པ་རྣམས་ཀྱིས་ངེད་ཅག་ལ་ངན་བྱས་ཤིང་གནོད་འཚེ་བཏང་ནས་སྡུག་ལས་བཀལ་བ་དང་།
DEU 26:7 ངེད་ཅག་གིས་ཕ་མེས་ཀྱི་དཀོན་མཆོག་ཡ་ཝཱེའི་ཕྱོགས་སུ་འོ་དོད་བཏོན་པའི་ཚེ། དཀོན་མཆོག་ཡ་ཝཱེས་ངེད་ཅག་གི་ཞུ་འབོད་གསན་ཞིང་། ངེད་ཅག་གི་གོད་ཆག་དང་དཀའ་ལས། གཉའ་གནོན་བཅས་གཟིགས་ནས།
DEU 26:8 དཀོན་མཆོག་ཡ་ཝཱེས་མཐུ་ལྡན་གྱི་ཕྱག་དང་ཕྱི་རུ་བརྐྱངས་པའི་དཔུང་པ། འཇིགས་སུ་རུང་བའི་དོན་ཆེན་པོ་དང་། གྲུབ་རྟགས་དང་དོན་ངོ་མཚར་ཅན་བཅས་ཀྱི་སྒོ་ནས་ངེད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་དང་།
DEU 26:9 ངེད་ཅག་གནས་འདིར་ཁྲིད་འོངས་ནས་འོ་མ་དང་སྦྲང་རྩི་བཞུར་བའི་ཡུལ་འདི་ངེད་ཅག་ལ་གནང་།
DEU 26:10 ཀྱེ་དཀོན་མཆོག་ཡ་ཝཱེ་ལགས། ད་ནི་ཁྱེད་ཀྱིས་གཟིགས་དང་། ང་ཚོས་ཁྱེད་ཀྱིས་ངེད་ཅག་ལ་གནང་བའི་ཡུལ་འདིའི་ས་ལས་སྐྱེས་པའི་ཐོག་ཕུད་རྣམས་ཁྱེད་ལ་ཁྱེར་འོངས་པ་ཡིན་ཞེས་ཞུས་ནས། གཟེབ་ནི་དཀོན་མཆོག་ཡ་ཝཱེའི་དྲུང་དུ་བཞག་སྟེ་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་ཕྱག་འཚལ་དགོས།
DEU 26:11 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་དང་ཁྱོད་ཅག་གི་ཁྱིམ་ལ་གནང་བའི་ཕན་ཆ་ཐམས་ཅད་ཀྱི་ཕྱིར་དུ། ལེ་ཝི་པ་དང་ཁྱོད་རྣམས་ཀྱི་ཁྲོད་དུ་ཡོད་པའི་བྱེས་པ་རྣམས་དང་མཉམ་དུ་སྤྲོ་སྐྱིད་ལ་རོལ་དགོས་སོ། །
DEU 26:12 ཁྱོད་རྣམས་ཀྱིས་བཅུ་ཆ་གཅིག་འབུལ་བའི་ལོ་གསུམ་པར། འབྲས་བུ་ཀུན་གྱི་བཅུ་ཆའི་གཅིག་ཡོངས་སུ་བླངས་ནས་ལེ་ཝི་པ་དང་བྱེས་པ་དང་། དྭ་ཕྲུག་དང་ཡུགས་མོ་རྣམས་ལ་བགོས་ནས། དེ་དག་གིས་ཁྱོད་རྣམས་ཀྱི་གྲོང་རྡལ་དུ་བཟའ་བཏུང་ཚིམ་པར་སྤྱད་རྗེས།
DEU 26:13 ཁྱོད་རྣམས་ཀྱིས་རང་གི་དཀོན་མཆོག་ཡ་ཝཱེའི་དྲུང་ནས་འདི་ལྟར། ང་ཚོས་མཆོད་རྫས་དམ་པ་དེ་རང་ཁྱིམ་ནས་སྤར་ཅིང་། ཁྱེད་ཀྱིས་ངེད་ཅག་ལ་བསྒོས་པའི་བཀའ་རྒྱ་ཐམས་ཅད་ལྟར། དེ་དག་ལེ་ཝི་པ་དང་བྱེས་པ་དང་། དྭ་ཕྲུག་དང་ཡུགས་མོ་རྣམས་ལ་བགོས་པ་ཡིན། ཁྱེད་ཀྱི་བཀའ་དང་འགལ་མེད་ལ་དེ་དག་བརྗེད་ཀྱང་མེད།
DEU 26:14 ང་ཚོས་མྱ་ངན་བྱེད་དུས་སུ་མཆོད་རྫས་དམ་པ་འདི་ཟོས་མེད་ལ། ངེད་རྣམས་གཙང་མ་མིན་དུས་སུ་ང་ཚོས་དེ་སྤར་བ་མིན། དེ་ལས་གང་ཡང་འདས་པོའི་དོན་དུ་སྤྲད་མེད། ང་ཚོས་རང་གི་དཀོན་མཆོག་ཡ་ཝཱེའི་གསུང་སྐད་ལ་མཉན་ནས་ཁྱེད་ཀྱིས་ངེད་རྣམས་ལ་བསྒོས་པ་ཇི་བཞིན་བསྒྲུབས་པ་ཡིན།
DEU 26:15 ཁྱེད་ཀྱི་བཞུགས་གནས་དམ་པ་ནམ་མཁའི་མཐོངས་ནས་གཟིགས་ཏེ། ཁྱེད་ཀྱི་འབངས་མི་ཡེས་ར་ཨེལ་དང་། ཁྱེད་ཀྱིས་ངེད་ཅག་གི་ཕ་མེས་ལ་མནའ་དང་བཅས་ཞལ་བཞེས་གནང་བའི་འོ་མ་དང་སྦྲང་རྩི་བཞུར་བའི་ཡུལ་ལྗོངས་ལ་བྱིན་རླབས་མཛད་དུ་གསོལ་ཞེས་ཞུ་དགོས་སོ། །
DEU 26:16 དེ་རིང་གི་ཉིན་མོ་འདིར་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་སྒྲིག་ཁྲིམས་དང་སྲོལ་ཡིག་དེ་དག་བསྲུང་དགོས་པའི་བཀའ་གནང་ཡོད་པས། ཁྱོད་རྣམས་ཀྱིས་བློ་གཅིག་སེམས་གཅིག་གིས་དེ་དག་བསྲུངས་ནས་བསྒྲུབ་དགོས་པ་ཡིན།
DEU 26:17 དེ་རིང་ཁྱོད་རྣམས་ཀྱིས་དཀོན་མཆོག་ཡ་ཝཱེ་ནི་ཁྱོད་ཅག་གི་དཀོན་མཆོག་ཡིན་པ་ཁས་བླངས་པ་དང་། ཁྱོད་རྣམས་ཁོང་གི་ལམ་དུ་བསྐྱོད་ཅིང་། ཁོང་གི་སྒྲིག་ཁྲིམས་དང་བཀའ་རྒྱ། སྲོལ་ཡིག་བཅས་བསྲུངས་ཏེ། ཁོང་གི་གསུང་སྐད་ལ་མཉན་པར་བྱའོ། །
DEU 26:18 དེ་རིང་དཀོན་མཆོག་ཡ་ཝཱེས་ཁོང་གི་ཞལ་བཞེས་ལྟར་ཁྱོད་ཅག་ནི་ཁོང་གི་འབངས་མི་ཡིན་པར་བསྒྲགས་ཤིང་། ཁྱོད་རྣམས་ཀྱིས་དཀོན་མཆོག་ཡ་ཝཱེའི་བཀའ་རྒྱ་ཐམས་ཅད་བསྲུང་དགོས་ལ།
DEU 26:19 ཁོང་གིས་ཁྱོད་རྣམས་ལ་ཉིད་ཀྱིས་བཀོད་པའི་མི་རིགས་ཐམས་ཅད་ལས་ལྷག་པའི་བསྟོད་བསྔགས་དང་སྙན་གྲགས། བཀུར་བསྟི་བཅས་འཐོབ་པར་བྱ་ཞིང་། ཁོང་གིས་གསུངས་པ་ནང་བཞིན། ཁྱོད་རྣམས་ཁྱོད་ཅག་གི་དཀོན་མཆོག་ཡ་ཝཱེའི་དོན་དུ་དམ་པའི་འབངས་མི་ཡིན་དགོས་སོ། །
DEU 27:1 དེ་ཡང་མོ་ཤེ་དང་ཡེས་ར་ཨེལ་གྱི་རྒན་པོ་རྣམས་ཀྱིས་མི་ཚོགས་ལ་འདི་ལྟར། ངས་དེ་རིང་ཁྱོད་ཅག་ལ་གདམས་པའི་བཀའ་རྒྱ་ཐམས་ཅད་སྲུངས་ཤིག
DEU 27:2 ཁྱོད་རྣམས་ཕྱིས་སུ་ཡོར་དན་གཙང་པོ་བརྒལ་ནས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དུ་སླེབས་པའི་ཉིན་མོར། ཁྱོད་ཅག་གིས་རྡོ་ཆེན་པོ་རྣམས་བརྩིགས་ནས་དེར་དཀར་རྩི་བྱུག་དགོས།
DEU 27:3 ཡང་ཁྱོད་རྣམས་གཙང་པོའི་ཕ་རོལ་ཏུ་བརྒལ་རྗེས་བཀའ་ཁྲིམས་འདིའི་གསུང་ཐམས་ཅད་རྡོ་དེ་དག་གི་སྟེང་ཕྲིས་དང་། དེ་ནས་ཁྱོད་རྣམས་ཀྱི་ཕ་མེས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ཞལ་གྱིས་བཞེས་པ་བཞིན། ཁྱོད་ཅག་གི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་ཏེ་འོ་མ་དང་སྦྲང་རྩི་བཞུར་བའི་ཡུལ་དུ་ཁྱོད་རྣམས་འགྲོ་ཐུབ་པ་ཡིན།
DEU 27:4 དེའི་ཕྱིར་ཕྱིས་སུ་ཁྱོད་རྣམས་ཡོར་དན་གཙང་པོ་བརྒལ་རྗེས། ངས་དེ་རིང་ཁྱོད་ཅག་ལ་ཅི་བསྒོས་པ་ནང་བཞིན་རྡོ་འདི་རྣམས་རི་བོ་ཨེ་བཱལ་དུ་བརྩིགས་ནས་དཀར་རྩི་བྱུག་དགོས།
DEU 27:5 དེ་རུ་ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་རྡོ་ཡི་མཆོད་ཁྲི་ཞིག་བཟོ་དགོས། དེ་ལ་ལྕགས་ཀྱི་ཡོ་བྱད་གང་ཡང་སྤྱོད་མི་རུང་།
DEU 27:6 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་མཆོད་ཁྲི་ནི་བཅད་གཏུབ་བྱས་མེད་པའི་རྡོ་ཡིས་བཟོ་དགོས་ལ། དེའི་ཁར་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པ་རྣམས་འབུལ་དགོས།
DEU 27:7 ཞི་བདེའི་མཆོད་པ་རྣམས་ཀྱང་ཕུལ་ནས་གནས་དེར་བཟའ་དགོས་ཤིང་། ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་ནས་སྤྲོ་སྐྱིད་ལ་རོལ་དགོས།
DEU 27:8 ཁྱོད་རྣམས་ཀྱིས་བཀའ་ཁྲིམས་འདིའི་གསུང་ཐམས་ཅད་རྡོ་རྣམས་ཀྱི་སྟེང་དུ་གསལ་པོོར་འབྲི་དགོས་ཞེས་བསྒོས་སོ། །
DEU 27:9 དེ་ནས་མོ་ཤེ་དང་ལེ་ཝི་ཚོ་པའི་མཆོད་དཔོན་རྣམས་ཀྱིས་ཡེས་ར་ཨེལ་པ་ཐམས་ཅད་ལ། ཀྱེ་ཡེས་ར་ཨེལ་པ་རྣམས། ཁུ་སིམ་མར་སྡོད་ལ་ཉོན་ཅིག དེ་རིང་གི་ཉིན་འདིར་ཁྱོད་རྣམས་ནི་ཁྱོད་ཅག་གི་དཀོན་མཆོག་ཡ་ཝཱེའི་འབངས་མི་རུ་གྱུར་པ་ཡིན་པས།
DEU 27:10 ཁྱོད་རྣམས་ཀྱི་དཀོན་མཆོག་ཡ་ཝཱེའི་གསུང་ལ་ཉན་དགོས་ཤིང་། ངས་དེ་རིང་ཁྱོད་ཅག་ལ་བསྒོས་པའི་ཁོང་གི་བཀའ་རྒྱ་དང་སྒྲིག་ཁྲིམས་རྣམས་སྲུངས་ཤིག་ཅེས་སྨྲས་སོ།།
DEU 27:11 ཉིན་དེར་མོ་ཤེ་ཡིས་མི་རྣམས་ལ་འདི་ལྟར།
DEU 27:12 ཁྱོད་རྣམས་ཡོར་དན་གཙང་པོའི་ཕ་རོལ་ཏུ་བརྒལ་བའི་རྗེས་སུ། སི་མུ་ཨོན་དང་། ལེ་ཝི་དང་། ཡ་ཧུ་དཱ་དང་། ཡེས་སི་ཀཱར་དང་། ཡོ་སེབ་དང་། པེན་ཡཱ་མེན་བཅས་ཚོ་པའི་མི་རྣམས་གེ་རི་ཟིམ་རི་བོར་ལངས་བསྡད་ནས་མི་མང་ལ་བྱིན་རླབས་གནང་དགོས།
DEU 27:13 ཡང་རུ་བེན་དང་། གཱ་རྡུ་དང་། ཨ་ཤེར་དང་། ཟེ་བུ་ལུན་དང་། དཱན་དང་། ནཱབ་ཐ་ལི་བཅས་ཚོ་པའི་མི་རྣམས་ཨེ་བཱལ་རི་བོར་ལངས་བསྡད་ནས་དམོད་ཚིག་བསྒྲག་དགོས།
DEU 27:14 ལེ་ཝི་པ་རྣམས་ཀྱིས་ཡེས་ར་ཨེལ་གྱི་མི་ཐམས་ཅད་ལ་སྐད་ཆེན་པོས་འདི་ལྟར་བསྒྲག་དགོས་ཏེ།
DEU 27:15 མི་ལག་ཤེས་པ་ཞིག་གིས་རང་གི་ལག་པར་བརྟེན་ནས་དཀོན་མཆོག་ཡ་ཝཱེ་ཞེ་ལོག་པའི་སྐུ་བརྙན་དང་བླུགས་སྐུ་བཟོས་ཏེ་གསང་བའི་སྒོ་ནས་དེ་དག་ཡར་བསླངས་ན། མི་དེ་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:16 རང་གི་ཕ་མ་ལ་གུས་ཞབས་མེད་པའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:17 རང་གི་ཁྱིམ་མཚེས་ཀྱི་ས་རྟགས་བསྣུར་བའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:18 མི་ལོང་བ་ཞིག་ལོག་ལམ་དུ་འཁྲིད་མཁན་དེ་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས་སོ།།
DEU 27:19 བྱེས་པ་དང་དྭ་ཕྲུག ཡུགས་མོ་བཅས་ལ་དྲང་བདེན་ལོག་སྤྱོད་བྱེད་པའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:20 སུ་ཞིག་ཕ་ཡི་ཆུང་མ་དང་ལུས་འབྲེལ་བྱས་ན། དེས་རང་གི་ཕ་ཡི་སྨད་གོས་བཤུས་པ་ཡིན་པས་དེ་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:21 དུད་འགྲོ་གང་རུང་དང་འཁྲིག་པ་སྤྱོད་པའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:22 ཕ་གཅིག་མ་གཉིས་དང་ཡང་ན་མ་གཅིག་ཕ་གཉིས་ཀྱི་ལྕམ་སྲིང་དང་ལུས་འབྲེལ་བྱེད་པའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:23 རང་གི་སྒྱུག་མོ་དང་ལུས་འབྲེལ་བྱེད་པའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:24 རང་གི་ཁྱིམ་མཚེས་གསང་སྟབས་ཀྱིས་གསོད་པའི་མི་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:25 གསུག་བླངས་ནས་མི་ཉེས་མེད་ཀྱི་སྲོག་གཅོད་མཁན་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས།
DEU 27:26 སུ་ཞིག་གིས་བཀའ་ཁྲིམས་ཀྱི་གསུང་འདི་དག་ནང་བཞིན་བསྒྲུབས་ནས་བརྟན་པོར་མི་བསྲུང་བ་དེ་ལ་དམོད་པ་ཕོག་གྱུར་ཅིག་ཅེས་པའི་ལན་དུ། མི་ཐམས་ཅད་ཀྱིས་ཨ་མེན་ཞེས་ཞུ་དགོས་སོ།།
DEU 28:1 གལ་སྲིད་ཁྱོད་རྣམས་ཀྱིས་དངོས་གནས་ཁྱོད་ཅག་གི་དཀོན་མཆོག་ཡ་ཝཱེའི་གསུང་ལ་མཉན་ཏེ། ངས་དེ་རིང་ཁྱོད་རྣམས་ལ་བསྒོས་པའི་ཁོང་གི་བཀའ་རྒྱ་ཐམས་ཅད་བསྲུངས་ནས་བསྒྲུབས་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ས་སྟེང་གི་མི་རིགས་ཐམས་ཅད་ལས་ཁྱོད་མཐོ་སར་འཇོག་གོ །
DEU 28:2 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་གསུང་ལ་མཉན་ན། བྱིན་རླབས་འདི་ཐམས་ཅད་ཁྱོད་རྣམས་ལ་འཐོབ་ཅིང་། ཁྱོད་རྣམས་བསྙེག་པར་བྱ།
DEU 28:3 ཁྱོད་རྣམས་ལ་གྲོང་ཁྱེར་ནས་བྱིན་རླབས་འཐོབ་ལ། ས་ཞིང་ནས་ཀྱང་བྱིན་རླབས་འཐོབ།
DEU 28:4 ཁྱོད་རྣམས་ཀྱི་རུས་རྒྱུད་དང་། ཞིང་གི་ལོ་ཏོག་དང་། ཕྱུགས་ཀྱི་རྒྱུད་པ་དང་། བ་གླང་གི་འཕེལ་ཐོག་དང་། ར་ལུག་གི་འཕེལ་ཀ་རྣམས་ལ་བྱིན་རླབས་འཐོབ།
DEU 28:5 ཁྱོད་རྣམས་ཀྱི་གཟེབ་དང་རྫི་གཞོང་ལ་བྱིན་རླབས་འཐོབ།
DEU 28:6 ཁྱོད་རྣམས་ནང་ལ་ཡོང་དུས་དང་ཕྱི་ལ་འགྲོ་དུས་ཀྱང་བྱིན་རླབས་འཐོབ་བོ། །
DEU 28:7 ཡར་ལངས་ནས་ཁྱོད་རྣམས་ལ་རྒོལ་བའི་དགྲ་རྣམས་ནི་དཀོན་མཆོག་ཡ་ཝཱེས་ཁྱོད་ཅག་གི་མདུན་དུ་ཕམ་པར་མཛད་ཅིང་། དེ་དག་ལམ་གཅིག་ནས་ཁྱོད་རྣམས་ལ་རྒོལ་བར་འོངས་ནའང་། ཁྱོད་རྣམས་ཀྱི་མདུན་དུ་ཁོ་ཚོ་ལམ་བདུན་ནས་འབྲོ་བར་འགྱུར།
DEU 28:8 ཁྱོད་རྣམས་ཀྱི་འབྲུ་མཛོད་རྣམས་དང་ཁྱོད་ཅག་གི་ལག་པས་བསྒྲུབས་པ་ཐམས་ཅད་ལ་དཀོན་མཆོག་ཡ་ཝཱེས་བྱིན་རླབས་འབེབ་ཅིང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དུ་ཁོང་གིས་ཁྱོད་ཅག་ལ་བྱིན་རླབས་གནང་ངེས་ཡིན།
DEU 28:9 གལ་སྲིད་ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་བཀའ་རྣམས་བསྲུངས་ཏེ། ཁོང་གི་ཕེབས་ལམ་དུ་བསྐྱོད་པ་ཡིན་ན། ཁོང་གིས་ཁྱོད་ཅག་ལ་ཇི་ལྟར་མནའ་བཞེས་པ་བཞིན། ཁྱོད་རྣམས་ཁོང་གི་འབངས་མི་དམ་པ་རུ་མཛད་ངེས།
DEU 28:10 ཡང་ས་སྟེང་གི་མི་ཐམས་ཅད་ཀྱིས་ཁྱོད་ཅག་ནི་དཀོན་མཆོག་ཡ་ཝཱེའི་མཚན་ལ་གཏོགས་པའི་མི་ཡིན་པ་མཐོང་སྟེ། ཁོ་ཚོ་ཁྱོད་རྣམས་ལ་འཇིགས་པར་འགྱུར།
DEU 28:11 དཀོན་མཆོག་ཡ་ཝཱེས་ཁྱོད་རྣམས་ཀྱི་ཕ་མེས་རྣམས་ལ་མནའ་དང་བཅས་ཞལ་བཞེས་གནང་བའི་ཡུལ་དུ། ཁོང་གིས་ཁྱོད་རྣམས་ཀྱི་རུས་རྒྱུད་དང་ཕྱུགས་ཀྱི་འཕེལ་ཐོག་དང་། ཞིང་གི་ལོ་ཏོག་བཅས་ཐམས་ཅད་རྒྱས་པར་བྱའོ། །
DEU 28:12 དཀོན་མཆོག་ཡ་ཝཱེས་ཁོང་གི་ནམ་མཁའི་གཏེར་མཛོད་ཀྱི་སྒོ་མོ་ཁྱོད་རྣམས་ལ་ཕྱེས་ཏེ། དུས་ལྟར་ཁྱོད་རྣམས་ཀྱི་ཡུལ་དུ་ཆར་ཆུ་འབེབ་པ་དང་། ཁྱོད་རྣམས་ཀྱི་ལག་ནས་སྒྲུབ་པ་ཐམས་ཅད་ལ་བྱིན་རླབས་མཛད་ཅིང་། ཁྱོད་རྣམས་ཀྱིས་མི་རིགས་མང་པོར་བུ་ལོན་བཏང་ནའང་། ཁྱོད་ཅག་གིས་དེ་དག་ནས་བུ་ལོན་གཡར་མི་དགོས།
DEU 28:13 ཁྱོད་རྣམས་ཀྱི་དཀོན་མཆོག་ཡ་ཝཱེའི་བཀའ་རྒྱ་སྟེ་ངས་དེ་རིང་ཁྱོད་ཅག་ལ་བསྒོས་པ་རྣམས་ལ་མཉན་པ་དང་། དེ་བསྲུངས་ནས་བསྒྲུབས་པ་ཡིན་ན། དཀོན་མཆོག་ཡ་ཝཱེས་ཁྱོད་ཅག་དབུ་རུ་མཛད་པ་ལས་མཇུག་མ་རུ་མི་མཛད་ཅིང་། ཁྱོད་རྣམས་གོང་དུ་འཇོག་པ་ལས་ཞོལ་དུ་མི་བསྐྱུར་རོ། །
DEU 28:14 ལྷ་གཞན་དག་གི་རྗེས་སུ་འབྲངས་ནས་དེ་དག་ལ་བསྙེན་བཀུར་མི་བྱ་བའི་ཆེད་དུ། ངས་དེ་རིང་ཁྱོད་ཅག་ལ་བསྒོས་པའི་གཏམ་གང་ལས་ཀྱང་གཡས་སམ་གཡོན་དུ་གཟུར་བར་མི་བྱའོ། །
DEU 28:15 གལ་སྲིད་ཁྱོད་རྣམས་ཀྱི་དཀོན་མཆོག་ཡ་ཝཱེའི་གསུང་ལ་མི་ཉན་ཞིང་། ངས་དེ་རིང་ཁྱོད་རྣམས་ལ་གདམས་པའི་བཀའ་རྒྱ་དང་སྒྲིག་ཁྲིམས་རྣམས་མི་བསྲུང་མི་བསྒྲུབ་ན། དམོད་པ་འདི་ཐམས་ཅད་ཁྱོད་རྣམས་ལ་ཕོག་ཅིང་དེས་ཁྱོད་ཅག་ཟིན་པར་འགྱུར།
DEU 28:16 ཁྱོད་རྣམས་ལ་གྲོང་ཁྱེར་ནས་དམོད་པ་ཕོག་ཅིང་། ས་ཞིང་ནས་ཀྱང་དམོད་པ་ཕོག
DEU 28:17 ཁྱོད་རྣམས་ཀྱི་གཟེབ་དང་རྫི་གཞོང་ལ་དམོད་པ་ཕོག
DEU 28:18 ཁྱོད་རྣམས་ཀྱི་རུས་རྒྱུད་དང་། ཞིང་གི་ལོ་ཏོག་དང་། བ་གླང་གི་འཕེལ་ཐོག་དང་། ར་ལུག་གི་འཕེལ་ཀ་རྣམས་ལ་དམོད་པ་ཕོག
DEU 28:19 ཁྱོད་རྣམས་ནང་ལ་ཡོང་དུས་དམོད་པ་ཕོག་ཅིང་། ཕྱི་ལ་འགྲོ་དུས་ཀྱང་དམོད་པ་ཕོག་གོ །
DEU 28:20 ཁྱོད་རྣམས་ཀྱིས་ལས་ངན་པ་བྱས་ནས་ང་རང་སྤངས་པ་ཡིན་པས། ཁྱོད་རྣམས་མགྱོགས་པོར་ནུབ་ཅིང་མེད་པར་འགྲོ་བའི་བར་དུ། ཁྱོད་རྣམས་ཀྱིས་ལག་ནས་ཅི་བསྒྲུབས་ཀྱང་། དཀོན་མཆོག་ཡ་ཝཱེས་ཁྱོད་ཅག་ལ་དམོད་པ་དང་རྙོག་ཟིང་། བཀའ་བཀྱོན་བཅས་འབེབ་པར་འགྱུར།
DEU 28:21 དཀོན་མཆོག་ཡ་ཝཱེས་ཁྱོད་རྣམས་བདག་གིར་ལེན་པར་འགྲོ་བའི་ཡུལ་དུ་མེད་པར་མཛད་པའི་བར་དུ། ཁྱོད་རྣམས་ལ་ནད་ཡམས་ཆེན་པོ་འབྱུང་བར་བྱ་སྟེ།
DEU 28:22 དཀོན་མཆོག་ཡ་ཝཱེས་ཁྱོད་རྣམས་ལ་གློ་ནད་དང་། ཚ་ནད་དང་། འདར་ནད་དང་། གཉན་ཚད་དང་། འཐབ་འཁྲུག་དང་། ཐན་པ་དང་། གཡའ་སྤུ་བཅས་འབྱུང་དུ་བཅུག་སྟེ། ཁྱོད་ཅག་རྩ་མེད་འགྲོ་བའི་བར་དུ་ནད་རིགས་དེ་དག་གིས་ཁྱོད་རྣམས་འདེད་ངེས་ཡིན།
DEU 28:23 ཁྱོད་རྣམས་ཀྱི་མགོ་ཐོག་གི་ནམ་མཁའ་ནི་ལི་དང་། ཁྱོད་རྣམས་ཀྱི་རྐང་འོག་གི་ས་གཞི་ནི་ལྕགས་ལྟར་འགྱུར།
DEU 28:24 དཀོན་མཆོག་ཡ་ཝཱེས་ཁྱོད་རྣམས་ཀྱི་ཡུལ་གྱི་ཆར་བ་ཐལ་རྡུལ་ལ་བསྒྱུར་ནས། ཁྱོད་རྣམས་མེད་པར་མ་བཏང་བར་དུ་ནམ་མཁའ་ནས་ཁྱོད་རྣམས་ཀྱི་སྟེང་དུ་ས་རྡུལ་འབབ་བོ། །
DEU 28:25 དཀོན་མཆོག་ཡ་ཝཱེས་ཁྱོད་ཅག་དགྲ་རྣམས་ཀྱི་མདུན་དུ་ཕམ་པར་མཛད་ཅིང་། ཁྱོད་རྣམས་ལམ་གཅིག་ནས་དེ་དག་ལ་རྒོལ་བར་སོང་ནའང་། དེ་དག་གི་མདུན་དུ་ཁྱོད་རྣམས་ལམ་བདུན་ནས་འབྲོ་བ་དང་། ས་གཞིའི་རྒྱལ་ཁམས་ཐམས་ཅད་ཁྱོད་རྣམས་ལ་འཇིགས་པར་འགྱུར།
DEU 28:26 ཁྱོད་རྣམས་ཀྱི་བེམ་པོ་ནི་བར་སྣང་གི་འདབ་ཆགས་དང་ས་གཞིའི་གཅན་གཟན་རྣམས་ཀྱི་ཁ་ཟས་བྱེད་ཅིང་། དེ་དག་དཀྲོགས་ནས་བདའ་མཁན་གཅིག་ཀྱང་མེད་དོ། །
DEU 28:27 དཀོན་མཆོག་ཡ་ཝཱེས་ཁྱོད་རྣམས་ལ་ཨེ་ཅིབ་ཡུལ་གྱི་གཉན་ནད་དང་གཞང་འབྲུམ་དང་། པགས་ནད་དང་ཟ་འཕྲུག་སོགས་གསོ་ཐབས་མེད་པའི་ན་ཚ་ཕོག་པར་མཛད།
DEU 28:28 དཀོན་མཆོག་ཡ་ཝཱེས་ཁྱོད་རྣམས་ལ་སྨྱོ་ནད་དང་། ལོང་པ་དང་སྙིང་ཁམས་འཁྲུག་པ་བཅས་ཀྱི་ན་ཚ་ཕོག་པར་མཛད།
DEU 28:29 མི་ལོང་པ་ཞིག་གིས་མུན་ནག་ནང་དུ་ལག་ཉུལ་བྱེད་པ་ཇི་བཞིན། ཁྱོད་རྣམས་ཀྱིས་ཉིན་གུང་གི་སྐབས་སུ་ལག་ཉུལ་བྱེད་ཅིང་། རང་གི་ལམ་ལ་བཀྲ་མི་ཤིས། རྟག་པར་བརྙས་བཅོས་དང་འཕྲོག་བཅོམ་ཐེབས་ངེས་ལ། ཁྱོད་ཅག་སྐྱོབ་མཁན་སུ་ཡང་མེད་དོ། །
DEU 28:30 ཁྱོད་རྣམས་ཀྱིས་བུད་མེད་ཅིག་དང་གཉེན་རྟགས་བརྒྱབ་ནའང་མི་གཞན་གྱིས་དེ་ལ་བཙན་གཡེམ་བྱེད། ཁྱོད་རྣམས་ཀྱིས་ཁང་པ་བརྩིགས་ཀྱང་ཁྱོད་ཅག་དེའི་ནང་དུ་འདུག་མི་ཐུབ། ཁྱོད་རྣམས་ཀྱིས་རྒུན་ཚལ་བཙུགས་ཀྱང་དེའི་འབྲས་བུ་ལོངས་སུ་སྤྱོད་མི་ཐུབ།
DEU 28:31 ཁྱོད་རྣམས་ཀྱི་བ་གླང་ཁྱོད་ཅག་གི་མིག་ལམ་ནས་བཤས་ཀྱང་དེའི་ཤ་བཟའ་མི་ཐུབ། ཁྱོད་རྣམས་ཀྱི་བོང་བུ་ཁྱོད་ཅག་གི་མདུན་ནས་ཕྲོགས་ཏེ་ཁྲིད་ན་ཡང་དེ་ཁྱོད་རྣམས་ལ་ཕྱིར་མི་འཐོབ། ཁྱོད་རྣམས་ཀྱི་ར་ལུག་གི་ཁྱུ་ཁྱོད་ཅག་གི་དགྲ་རྣམས་ལ་སྤྲོད་ཅིང་དེ་སྐྱོབ་མཁན་སུ་ཡང་མེད།
DEU 28:32 ཁྱོད་རྣམས་ཀྱི་བུ་དང་བུ་མོ་རྣམས་མི་རིགས་གཞན་ལ་སྤྲོད་པ་དང་། ཁྱོད་རྣམས་ཀྱིས་ཉིན་རེར་རེ་ལྟོས་བྱས་ནས་མིག་དབང་ཉམས་པའི་ཚད་ལ་སླེབས་ནའང་། ཁྱོད་རྣམས་ཀྱིས་ཁོ་ཚོ་སྐྱོབ་མི་ནུས།
DEU 28:33 ཁྱོད་རྣམས་ཀྱི་ཞིང་གི་ལོ་ཏོག་དང་། ཁྱོད་རྣམས་ཀྱིས་དཀའ་ལས་བརྒྱབ་ནས་ཐོབ་པའི་ཐོན་འབྲས་ཐམས་ཅད་ཁྱོད་ཅག་གིས་མི་ཤེས་པའི་མི་རིགས་ཤིག་གིས་བཟའ་བར་འགྱུར་ཞིང་། ཁྱོད་རྣམས་ལ་དུས་རྒྱུན་བརྙས་བཅོས་དང་བཙན་གནོན་འབའ་ཞིག་འབྱུང་བའོ། །
DEU 28:34 ཁྱོད་རྣམས་ཀྱི་མིག་གིས་གང་ཞིག་མཐོང་བ་ཡིས་ཁྱོད་རྣམས་སྨྱོ་བར་བྱེད།
DEU 28:35 དཀོན་མཆོག་ཡ་ཝཱེས་ཁྱོད་རྣམས་ཀྱི་པུས་མོ་དང་རྐང་པར་གཉན་ནད་དེ། ན་ཟུག་གསོ་ཐབས་མེད་པ་བསྐྱེད་ནས་རྐང་མཐིལ་ནས་སྤྱི་བོའི་བར་ལ་འབྱུང་དུ་འཇུག་གོ །
DEU 28:36 དཀོན་མཆོག་ཡ་ཝཱེས་ཁྱོད་རྣམས་དང་ཁྱོད་ཅག་གིས་རང་གི་ཆེད་དུ་བསྐོས་པའི་རྒྱལ་པོ་ནི་ཁྱོད་རྣམས་དང་ཁྱོད་ཅག་གི་ཕ་མེས་རྣམས་ཀྱིས་ངོ་མི་ཤེས་པའི་མི་རིགས་ཀྱི་རྩར་འཁྲིད་པ་དང་། དེར་ཁྱོད་རྣམས་ཀྱིས་ཤིང་དང་རྡོ་ནས་བཟོས་པའི་ལྷ་གཞན་དག་ལ་བསྙེན་བཀུར་བྱེད་པར་འགྱུར།
DEU 28:37 དཀོན་མཆོག་ཡ་ཝཱེས་ཁྱོད་རྣམས་གནས་གང་དུ་ཁྲིད་ཀྱང་དེའི་མི་ཐམས་ཅད་ཀྱི་ཁྲོད་དུ། ཁྱོད་རྣམས་ནི་སྐྲག་དགོས་ས་དང་། ཁ་དཔེ་དང་ཟུར་ཟ་བྱེད་ཡུལ་དུ་འགྱུར་རོ། །
DEU 28:38 ཁྱོད་རྣམས་ཀྱིས་ཞིང་ལ་ས་བོན་མང་པོ་བཏབ་ཀྱང་། འབུ་ཆ་ག་པས་དེ་ཁྱུར་མིད་གཏོང་བས་ཁྱོད་རྣམས་ཀྱིས་ཉུང་ཙམ་ལས་བསྡུ་མི་ནུས།
DEU 28:39 རྒུན་ཚལ་བཙུགས་ནས་ཉར་ནའང་། འབུ་རྣམས་ཀྱིས་དེ་ཟོས་ཚར་བས་ཁྱོད་རྣམས་ཀྱིས་རྒུན་འབྲུམ་བསྡུ་མི་ནུས་ལ་རྒུན་ཆང་ཡང་འཐུང་མི་ཐུབ།
DEU 28:40 ཁྱོད་རྣམས་ཀྱི་ཡུལ་ཁམས་ཡོངས་སུ་སྐྱུ་རུ་རའི་སྡོང་པོ་ཡོད་ཀྱང་། ཁྱོད་རྣམས་ཀྱི་སྐྱུ་རུ་ར་རྣམས་ས་ལ་ལྷུང་བས་ལུས་ལ་བསྐུ་བའི་སྣུམ་མེད་དོ། །
DEU 28:41 ཁྱོད་རྣམས་ལ་བུ་དང་བུ་མོ་ཡོད་ཀྱང་དེ་དག་གཞན་གྱིས་བཙན་གྱིས་འཁྲིད་པས་ཁྱོད་ཅག་ལ་མི་དབང་།
DEU 28:42 ཁྱོད་རྣམས་ཀྱི་ཤིང་སྡོང་དང་ཁྱོད་རྣམས་ཀྱི་ཞིང་གི་ལོ་ཏོག་ཐམས་ཅད་གནོད་འབུ་ཡིས་བཟའ་བར་འགྱུར།
DEU 28:43 ཁྱོད་རྣམས་ཀྱི་དབུས་སུ་ཡོད་པའི་བྱེས་པ་རྣམས་མཐོན་པོར་གྱུར་ནས་ཁྱོད་ཅག་གི་གོང་ནས་གོང་དུ་འབུད་པ་དང་། ཁྱོད་རྣམས་རྒུད་པར་གྱུར་ནས་ཇེ་དམའ་ནས་ཇེ་དམའ་རུ་འགྲོ།
DEU 28:44 དེ་ཚོས་ཁྱོད་རྣམས་ལ་དངུལ་བསྐྱིས་ནའང་ཁྱོད་རྣམས་ཀྱིས་དེ་དག་ལ་གཡར་མི་ནུས། དེ་དག་ནི་མགོ་དང་ཁྱོད་རྣམས་ནི་མཇུག་མ་ཡིན་ནོ། །
DEU 28:45 དེ་ཡང་ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་གསུང་ལ་མ་མཉན་ཞིང་། ཁོང་གིས་ཁྱོད་རྣམས་ལ་བསྒོས་པའི་བཀའ་རྒྱ་དང་སྒྲིག་ཁྲིམས་རྣམས་མ་བསྲུངས་པས། ཁྱོད་རྣམས་མེད་པར་མ་གྱུར་བར་དུ། དམོད་པ་འདི་ཐམས་ཅད་ཁྱོད་ཅག་གི་སྟེང་དུ་འཁོར་ཞིང་། ཁྱོད་རྣམས་དེད་ནས་འཛིན་ངེས་ཡིན།
DEU 28:46 དམོད་པ་དེ་དག་ནི་ཁྱོད་རྣམས་དང་ཁྱོད་རྣམས་ཀྱི་བུ་རྒྱུད་ལ་དུས་རྟག་ཏུ་རྟགས་མཚན་དང་དོན་ངོ་མཚར་ཅན་དུ་གནས་པར་འགྱུར་རོ། །
DEU 28:47 ཁྱོད་རྣམས་ལ་རྒྱུ་ལོངས་སྤྱོད་ཐམས་ཅད་འབྱོར་བའི་དུས་སུ་དགའ་ཞིང་སྤྲོ་བའི་ངང་ཁྱོད་ཅག་གི་དཀོན་མཆོག་ཡ་ཝཱེ་ལ་བསྙེན་བཀུར་མ་བྱས་པའི་རྐྱེན་གྱིས།
DEU 28:48 ཁྱོད་རྣམས་ཀྱིས་ལྟོགས་སྐོམ་དང་གོས་མེད་གཅེར་བུ། དབུལ་ཕོངས་བཅས་ཀྱི་གནས་སུ། དཀོན་མཆོག་ཡ་ཝཱེས་ཁྱོད་རྣམས་ལ་རྒོལ་བར་མངགས་པའི་ཁྱོད་ཅག་གི་དགྲ་རྣམས་ལ་གཡོག་བྱེད་པ་དང་། དེས་ཁྱོད་རྣམས་མེད་པར་མ་བྱས་བར་དུ། ཁྱོད་རྣམས་ཀྱི་གཉའ་ལ་ལྕགས་ཀྱི་གཉའ་ཤིང་འགེལ་ལོ། །
DEU 28:49 དཀོན་མཆོག་ཡ་ཝཱེས་རྒྱང་ཐག་རིང་བའི་ས་མཐའ་ནས་གླག་ལྟར་འཕུར་ཡོང་ནས་ཁྱོད་རྣམས་ལ་རྒོལ་བའི་མི་རིགས་ཤིག་འཁྲིད་འོང་ངེས་ལ། ཁྱོད་རྣམས་ཀྱིས་མི་རིགས་དེའི་སྐད་མི་གོ་ཞིང་།
DEU 28:50 མི་རིགས་དེའི་གདོང་འཇིགས་སུ་རུང་ཞིང་རྒན་པ་རྣམས་ལ་བཀུར་བ་དང་ན་གཞོན་རྣམས་ལ་སྙིང་རྗེ་མི་བྱེད།
DEU 28:51 དེ་དག་གིས་ཁྱོད་རྣམས་མེད་པར་མ་གྱུར་བར་དུ་ཁྱོད་ཅག་གི་ཕྱུགས་ཀྱི་འཕེལ་ཐོག་དང་ཞིང་གི་ལོ་ཏོག་བཟའ་བ་དང་། ཁྱོད་རྣམས་ཚར་མ་བཅད་བར་དུ། ཁྱོད་རྣམས་ལ་འབྲུ་རིགས་དང་རྒུན་ཆང་གསར་པ་དང་། སྣུམ་གསར་པ་དང་། བ་གླང་གི་འཕེལ་ཐོག་དང་། ར་ལུག་གི་འཕེལ་ཀ་བཅས་ལུས་པར་མི་བྱའོ། །
DEU 28:52 ཁྱོད་རྣམས་ཀྱི་ཡུལ་ཁམས་ཡོངས་སུ་ཁྱོད་ཅག་བརྟེན་སའི་ལྕགས་རི་མཐོ་ཞིང་སྲ་བ་རྣམས་མ་འགྱེལ་བར་དུ། ཁྱོད་རྣམས་ཀྱི་གྲོང་ཁྱེར་ཐམས་ཅད་བསྐོར་ནས་ཡོང་། ཁོ་ཚོས་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་ཡུལ་ཁམས་ཡོངས་ཀྱི་གྲོང་ཁྱེར་མཐའ་དག་བསྐོར་བར་བྱེད།
DEU 28:53 དགྲ་ཡིས་ཁྱོད་རྣམས་མཐའ་ནས་བསྐོར་ཞིང་ཁྱོད་ཅག་སྡུག་ལ་སྦྱོར་བའི་དུས་སུ། ཁྱོད་རྣམས་ཀྱིས་རང་གི་ཤ་རུས་ལས་སྐྱེས་པ་སྟེ་ཁྱོད་ཅག་གི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བའི་བུ་དང་བུ་མོ་རྣམས་ཀྱི་ཤ་བཟའ་བའི་ཚད་ལ་བསླེབ་ངེས་ཡིན།
DEU 28:54 ཁྱོད་ཅག་ཁྲོད་ཀྱི་སྐྱེས་པ་གཤིས་འཇམ་ཉམས་ཞན་རྣམས་ཀྱིས་ཀྱང་རང་གི་སྤུན་ཟླ་དང་གཅེས་པའི་ཆུང་མ། ཤུལ་ལུས་ཀྱི་བུ་ཕྲུག་རྣམས་དགྲ་རུ་འཛིན་པ་དང་།
DEU 28:55 ཁྱོད་ཅག་གི་དགྲ་རྣམས་ཀྱིས་ཁྱོད་ཅག་གྲོང་ཁྱེར་རྣམས་སུ་བསྐོར་ནས་ཁྱོད་རྣམས་སྡུག་ལ་སྦྱོར་བའི་དུས་སུ། ཁོ་ལ་ཅི་ཡང་ལུས་མེད་པས། ཁོས་རང་གི་བུ་ཕྲུག་གི་ཤ་བཟའ་བར་འགྱུར་ཞིང་སུ་ཞིག་ལའང་རང་གི་བུ་ཕྲུག་གི་ཤ་མི་སྟེར།
DEU 28:56 ཁྱོད་ཅག་ཁྲོད་ཀྱི་བུད་མེད་གཤིས་འཇམ་ཉམས་ཞན་རྣམས་ནི། སྔར་ནས་གཤིས་རྒྱུད་འཇམ་ཞིང་ཉམས་ཞན་ཡིན་པས་རྐང་པ་ས་ལ་སྤོ་མི་འདོད་ཀྱང་། ད་ནི་རང་གི་གཅེས་པའི་ཁྱོ་ག་དང་བུ་དང་བུ་མོ་རྣམས་དགྲ་རུ་འཛིན་པར་འགྱུར།
DEU 28:57 ཁྱོད་རྣམས་ཀྱི་དགྲ་རྣམས་ཀྱིས་ཁྱོད་ཅག་གྲོང་ཁྱེར་རྣམས་སུ་བསྐོར་ནས་ཁྱོད་རྣམས་སྡུག་ལ་སྦྱོར་བའི་དུས་སུ། ཁོ་མོར་ཅི་ཡང་མེད་པར་གྱུར་པས། ཁོ་མོས་གསང་བའི་སྒོ་ནས་རང་གི་བརླ་བར་ནས་ལྷུང་བའི་བུ་རོགས་དང་རང་གིས་བཙས་པའི་བུ་ཕྲུག་བཟའ་བར་ངེས་སོ། །
DEU 28:58 གལ་སྲིད་ཁྱོད་རྣམས་ཀྱིས་གླེགས་བམ་འདིར་བཀོད་པའི་བཀའ་ཁྲིམས་ཐམས་ཅད་ནན་སྲུང་མི་བྱེད་པ་དང་། བརྗིད་ཉམས་ཅན་དང་འཇིགས་རྔམ་ཅན་གྱི་མཚན་ཏེ་ཁྱོད་ཅག་གི་དཀོན་མཆོག་ཡ་ཝཱེ་ལ་མི་འཇིགས་མི་གུས་ན།
DEU 28:59 དཀོན་མཆོག་ཡ་ཝཱེས་ཁྱོད་རྣམས་དང་ཁྱོད་ཅག་གི་བུ་རྒྱུད་རྣམས་ལ་ཆག་སྒོ་ཧང་སངས་པ་འབྱུང་བར་བྱ་སྟེ། ཆག་སྒོ་ཆེན་པོས་དུས་གཏན་དུ་མནར་བ་དང་། གཉན་ནད་ངན་པས་དུས་ནམ་ཡང་གཏོང་བར་མི་འགྱུར་རོ། །
DEU 28:60 ཁྱོད་རྣམས་འཇིགས་པའི་ཨེ་ཅིབ་ཡུལ་གྱི་ནད་ཡམས་སྣ་ཚོགས་ཁྱོད་ཅག་ལ་འབྱུང་བར་མཛད་ཅིང་དེ་དག་ཁྱོད་ཅག་ལ་དམ་པོར་འབྱར་བའོ། །
DEU 28:61 ཡང་ཁོང་གིས་ཁྱོད་རྣམས་མ་འཇིག་བར་དུ། བཀའ་ཁྲིམས་ཀྱི་གླེགས་བམ་འདིའི་ནང་བཀོད་མེད་པའི་ནད་ཡམས་དང་ཆག་སྒོ་སྣ་ཚོགས་ཁྱོད་རྣམས་ཀྱི་སྟེང་ལ་འདྲེན་པར་ངེས།
DEU 28:62 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་བཀའ་མ་བརྩིས་པས། སྔར་ཁྱོད་ཅག་གི་མི་གྲངས་ནི་ནམ་མཁའི་སྐར་ཚོགས་དང་འདྲ་ཡང་། ད་ལྟ་ཤུལ་དུ་ལུས་པའི་མི་གྲངས་ནི་ཧ་ཅང་ཉུང་ཉུང་ཡིན།
DEU 28:63 སྔར་དཀོན་མཆོག་ཡ་ཝཱེ་ནི་ཁྱོད་རྣམས་ལ་བཀའ་དྲིན་མཛད་དེ་ཁྱོད་ཅག་རྒྱས་པར་མཛད་པ་ལ་ཇི་ལྟར་ཐུགས་དགྱེས་པ་ནང་བཞིན། ཕྱིས་སུ་ཁོང་ནི་ཁྱོད་རྣམས་ནུབ་ནས་མེད་པར་མཛད་པ་ལའང་དེ་བཞིན་ཐུགས་དགྱེས་པར་ངེས་ཤིང་། ཁྱོད་ཚོ་བདག་གིར་འཛིན་དུ་འགྲོ་བའི་ཡུལ་དུ་རྩ་བ་ནས་འབལ་བར་འགྱུར་རོ། །
DEU 28:64 དེ་ཡང་དཀོན་མཆོག་ཡ་ཝཱེས་ཁྱོད་རྣམས་ས་གཞི་ཆེན་པོའི་མཐའ་གཅིག་ནས་མཐའ་གཞན་བར་དུ། མི་རིགས་ཐམས་ཅད་ཀྱི་ཁྲོད་དུ་གཏོར་བ་དང་། དེ་རུ་ཁྱོད་རྣམས་དང་ཁྱོད་ཅག་གི་ཕ་མེས་རྣམས་ལ་རྒྱུས་མི་མངའ་བའི་ཤིང་དང་རྡོ་ཡིས་བཟོས་པའི་ལྷ་གཞན་དག་ལ་བསྙེན་བཀུར་བྱེད་པར་འགྱུར།
DEU 28:65 མི་རིགས་དེ་དག་གི་ཁྲོད་དུ་ཁྱོད་རྣམས་ཀྱི་སེམས་ལྷོད་ལ་འབབ་མི་ཐུབ་ཅིང་། ཁྱོད་རྣམས་ཀྱི་རྐང་པ་སར་བཞག་ནས་ངལ་གསོ་སའི་གནས་ཀྱང་མི་རྙེད་ལ། དེ་རུ་དཀོན་མཆོག་ཡ་ཝཱེས་ཁྱོད་རྣམས་ལ་འཇིགས་སྣང་གི་སེམས་དང་ཉམས་ཤིང་རྒུད་པའི་མིག་མདངས། རེ་ཐག་ཆད་པའི་བློ་བཅས་གནང་བར་བྱེད།
DEU 28:66 ཁྱོད་རྣམས་ཀྱི་མ་འོངས་པའི་ཚེ་སྲོག་ལ་ངེས་གཏན་མེད་ཅིང་། ཉིན་མཚན་མེད་པར་དངངས་ཏེ་འཚོ་གནས་ངེས་མེད་ཡིན་པ་དང་།
DEU 28:67 ཁྱོད་རྣམས་སེམས་ཀྱི་དངངས་སྐྲག་དང་ཁྱོད་ཅག་མིག་གིས་མཐོང་བའི་སྣང་ཚུལ་གྱི་དབང་གིས། ཞོགས་པའི་དུས་སུ་ཁྱོད་རྣམས་ཀྱིས་ད་ནི་དགོང་མོ་ཡིན་ན་ལེགས་པ་དང་། དགོང་མོའི་དུས་སུ་ཁྱོད་རྣམས་ཀྱིས་ད་ནི་ཞོགས་པ་ཡིན་ན་ལེགས་སོ་ཞེས་བརྗོད་ངེས།
DEU 28:68 ཡང་དཀོན་མཆོག་ཡ་ཝཱེས་ཁྱོད་རྣམས་གྲུ་གཟིངས་ལ་བཞག་ནས་ཕྱིར་ཨེ་ཅིབ་ཡུལ་དུ་བསྐྱལ་ངེས་ཏེ། ངས་དེ་སྔར་ཁྱོད་རྣམས་ལ་ལམ་དེ་ནི་ཁྱོད་ཅག་གིས་སླར་ཡང་མཐོང་བར་མི་འགྱུར་ཞེས་སྨྲས་པ་ཡིན། ཡུལ་དེ་རུ་ཁྱོད་ཅག་གིས་རང་ཉིད་དགྲ་རྣམས་ལ་བྲན་པོ་དང་བྲན་མོ་རུ་བཙོང་བར་འགྱུར་ཡང་། སུས་ཀྱང་ཁྱོད་རྣམས་ཉོ་བར་མི་བྱེད་དོ་ཞེས་སྨྲས་སོ། །
DEU 29:1 འདི་དག་ནི་མོ་ཨབ་ཡུལ་ནས་དཀོན་མཆོག་ཡ་ཝཱེས་མོ་ཤེ་ལ་གནང་བའི་ཡེས་ར་ཨེལ་པ་རྣམས་ལ་མཛད་པའི་ཞལ་ཆད་ཀྱི་བཀའ་སྟེ། རི་བོ་ཧོ་རེབ་ནས་ཁོ་རྣམས་ལ་མཛད་པའི་ཞལ་ཆད་ཀྱི་ཕན་ཆོད་ནས་གནང་བ་ཡིན།
DEU 29:2 མོ་ཤེ་ཡིས་ཡེས་ར་ཨེལ་པ་ཐམས་ཅད་བོས་ནས་དེ་དག་ལ། དཀོན་མཆོག་ཡ་ཝཱེས་ཁྱོད་རྣམས་ཀྱི་མདུན་དུ། ཨེ་ཅིབ་ཡུལ་ནས་ཕཱར་ཨོལ་དང་དེའི་འཁོར་གཡོག་ཐམས་ཅད་དང་། དེའི་ཡུལ་ཀུན་ལ་ཅི་བྱས་པ་དེ་ཁྱོད་ཅག་གིས་དངོས་སུ་མཐོང་ཡོད་དེ།
DEU 29:3 ཁྱོད་རྣམས་ཀྱིས་དངོས་སུ་མཐོང་བའི་ཚོད་བགམ་ཆེན་པོ་དང་། གྲུབ་རྟགས་དང་དོན་ངོ་མཚར་ཅན་དེ་དག་ཡིན་ནོ། །
DEU 29:4 འོན་ཀྱང་དེ་རིང་ཉིན་མོའི་བར་དུ། དཀོན་མཆོག་ཡ་ཝཱེས་ཁྱོད་ཅག་ལ་རྟོགས་པའི་སེམས་དང་། མཐོང་བའི་མིག་དང་། ཐོས་པའི་རྣ་བཅས་ནི་གནང་མེད།
DEU 29:5 ངས་ཁྱོད་ཅག་ལོ་བཞི་བཅུའི་རིང་ལ་དབེན་སྟོང་ནས་ཁྲིད་པའི་དུས་སུ། ཁྱོད་ཅག་གི་ལུས་ཀྱི་གོས་རྣམས་མ་རལ་ཞིང་། ཁྱོད་ཅག་གི་རྐང་པའི་ལྷམ་ཡང་མ་རྙིང་།
DEU 29:6 ཁྱོད་རྣམས་ཀྱིས་བག་ལེབ་མ་ཟོས་ལ་རྒུན་ཆང་དང་གར་ཆང་ཡང་མ་འཐུངས། དེ་ནི་ཁྱོད་ཅག་གིས་ང་རང་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པ་ཤེས་པའི་ཆེད་དུ་ཡིན།
DEU 29:7 ཡང་ཁྱོད་ཅག་གནས་འདིར་སླེབས་པའི་ཚེ། ཧེ་སི་པོན་གྱི་རྒྱལ་པོ་སི་ཧོན་དང་པཱ་ཤན་གྱི་རྒྱལ་པོ་ཨོག་བྱ་བ་གཉིས་རང་ཅག་ལ་གཡུལ་བཤམས་པར་ཚུར་ཐོན་ནའང་། རང་ཅག་གིས་དེ་དག་ཕམ་པར་བརྒྱབ་ཅིང་།
DEU 29:8 དེ་དག་གི་ས་ཆ་བླངས་ཏེ་རུ་བེན་པ་དང་། གཱ་རྡུ་པ་དང་། མཱ་ན་ཤེའི་ཚོ་པ་ཕྱེད་ཀ་བཅས་ལ་ས་སྐལ་དུ་བགོས།
DEU 29:9 དེ་བས་ཁྱོད་ཅག་གིས་སྒྲུབ་པའི་ལས་ཐམས་ཅད་ལེགས་འགྲུབ་འོང་བའི་ཆེད་དུ། ཞལ་ཆད་འདིའི་བཀའ་གསུང་བསྲུངས་ནས་དེ་ཇི་བཞིན་བསྒྲུབ་དགོས་སོ། །
DEU 29:10 དེ་རིང་ཁྱོད་ཅག་ཀུན་པོ་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་ལངས་སྡོད་པ་སྟེ། ཁྱོད་ཅག་གི་འགོ་དཔོན་དང་ཚོ་དཔོན་དང་། རྒན་པོ་དང་། དཔོན་རིགས་དང་། ཡེས་ར་ཨེལ་གྱི་སྐྱེས་པ་བཅས་ཐམས་ཅད་དང་།
DEU 29:11 ཁྱོད་ཅག་གི་བུ་ཕྲུག་དང་ཆུང་མ་དང་། སྒར་ཁའི་བྱེས་པ་སྟེ་ཤིང་གཏུབ་མཁན་ནས་ཆུ་ལེན་མཁན་གྱི་བར་དུ། ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་ལངས་བསྡད་ཡོད་ལ།
DEU 29:12 ཁྱོད་རྣམས་ཀྱི་དཀོན་མཆོག་ཡ་ཝཱེས་དེ་རིང་ཁྱོད་རྣམས་ལ་མཛད་པའི་ཞལ་ཆད་དང་། ཁོང་གིས་ཁྱོད་རྣམས་ལ་མཛད་པའི་དམ་བཅའ་ལ་འཇུག་པ་ཡིན།
DEU 29:13 དེ་ནས་ཁོང་གིས་སྔར་ཁྱོད་རྣམས་ལ་ཇི་ལྟར་གསུངས་པ་དང་། ཁྱོད་ཅག་གི་ཕ་མེས་ཨབ་ར་ཧམ་དང་། ཨི་སཱག་དང་། ཡ་ཀོབ་བཅས་ལ་ཇི་ལྟར་མནའ་བཞེས་པ་ནང་བཞིན། ཁོང་གིས་དེ་རིང་ཁྱོད་ཅག་ནི་ཁོང་གི་འབངས་མི་རུ་གཏན་ལ་འབེབ་པ་དང་། ཁོང་ཁྱོད་རྣམས་ཀྱི་དཀོན་མཆོག་ཡིན་པ་བསྟན་ཆོག་གོ །
DEU 29:14 ངས་ཁྱོད་རྣམས་འབའ་ཞིག་ལ་ཞལ་ཆད་འདི་བཞག་ནས་མནའ་འདི་བསྐྱལ་བ་མིན་ཏེ།
DEU 29:15 དེ་རིང་བདག་ཅག་དང་མཉམ་དུ་རང་རེའི་དཀོན་མཆོག་ཡ་ཝཱེའི་སྤྱན་སྔར་ལངས་སྡོད་པའི་མི་རྣམས་དང་། དེ་རིང་འདི་རུ་རང་ཅག་དང་ལྷན་དུ་མེད་པའི་མི་ཀུན་གྱི་ཆེད་དུ་ཡིན་ནོ། །
DEU 29:16 རང་ཅག་ཨེ་ཅིབ་ཡུལ་ནས་ཇི་ལྟར་བསྡད་པ་དང་། ང་ཚོ་མི་རིགས་རྣམས་བརྒྱུད་ནས་ཇི་ལྟར་ཐོན་པ་ཁྱོད་རྣམས་ལ་གསལ་ལོ། །
DEU 29:17 དེ་དག་གི་སྐྱུག་བྲོ་བའི་རྫས་དང་། ཁོ་ཚོའི་ཁྲོད་དུ་ཡོད་པའི་ཤིང་དང་རྡོ་དང་གསེར་དངུལ་སོགས་ཀྱི་སྐུ་འདྲ་རྣམས་ཁྱོད་ཅག་གིས་མཐོང་ཡོད།
DEU 29:18 དེ་བས་ཁྱོད་ཅག་གི་ཁྲོད་དུ་སྐྱེས་པ་དང་ཡང་ན་བུད་མེད། ཁྱིམ་རྒྱུད་དང་ཡང་ན་ཚོ་པ་གང་ཡིན་ཡང་། དེ་རིང་ང་ཚོའི་དཀོན་མཆོག་ཡ་ཝཱེ་སྤངས་ཏེ། མི་རིགས་དེ་དག་གི་ལྷ་རྣམས་ལ་བསྙེན་བཀུར་བྱེད་མཁན་དང་། ཁྱོད་ཅག་གི་ཁྲོད་དུ་དུག་གི་རྩ་བ་རྒྱས་ནས་དུག་རྩྭ་དང་མཁན་པའི་ཁ་ཏིག་བསྐྱེད་པ་ཡོད་མེད་ལ་བརྟག་དགོས།
DEU 29:19 མི་ཞིག་གིས་དམ་བཅའ་འདི་དག་ཐོས་ཚེ། རང་སེམས་ནས་ཁ་ཕོ་བསྒྲགས་ཏེ། ང་ནི་རང་སེམས་གྱོང་པོའི་རྗེས་སུ་འབྲངས་ནའང་ང་ལ་ཞི་བདེ་ཡོད་བསམ་པ་དེས་མི་བཟང་ངན་གཉིས་ཀ་བརླག་པར་བྱའོ ། །
DEU 29:20 དེ་ལ་དཀོན་མཆོག་ཡ་ཝཱེས་དགོངས་ཡངས་མི་གནང་བར་མ་ཟད། དཀོན་མཆོག་ཡ་ཝཱེའི་ཐུགས་ཁྲོ་དང་འཁུར་ཞེན་ནི་མི་དེའི་སྟེང་དུ་འབབ་ཅིང་། གླེགས་བམ་འདིར་བཀོད་པའི་དམོད་པ་ཐམས་ཅད་ཁོ་ལ་འབྱུང་། དཀོན་མཆོག་ཡ་ཝཱེས་མི་དེའི་མིང་ནི་གནམ་འོག་ནས་གསུབ་པར་འགྱུར།
DEU 29:21 བཀའ་ཁྲིམས་ཀྱི་གླེགས་བམ་འདིར་བཀོད་པའི་ཞལ་ཆད་ཀྱི་དམ་བཅའ་ཡོད་ཚད་ལྟར། དཀོན་མཆོག་ཡ་ཝཱེས་མི་དེ་ཡེས་ར་ཨེལ་གྱི་ཚོ་པ་ཁག་ནས་ལོགས་སུ་བཀར་ཏེ་གོད་ཆག་ཐེབས་པར་མཛད་ངེས་སོ། །
DEU 29:22 དེ་ཡང་མི་རབས་ཕྱི་མ་སྟེ་ཁྱོད་ཅག་གི་རྗེས་སུ་འབྱུང་བའི་བུ་རབས་ཚ་རྒྱུད་རྣམས་དང་། རྒྱང་རིང་ནས་སླེབས་པའི་ཕྱི་མི་ཚོས་ཡུལ་དེའི་ཆག་སྒོ་དང་དཀོན་མཆོག་ཡ་ཝཱེས་ཡུལ་དེར་ཕབ་པའི་ནད་ཡམས་རྣམས་མཐོང་ཞིང་།
DEU 29:23 ཡང་དཀོན་མཆོག་ཡ་ཝཱེ་ཐུགས་ཤིན་ཏུ་ཁྲོས་ཏེ་གཏུམ་པར་གྱུར་ནས་སཱ་དོམ་དང་གཱ་མོ་ར་དང་། ཨད་མཱ་དང་ཚཱ་བོ་ཡིམ་བཅས་རྩ་མེད་མཛད་པ་ནང་བཞིན། གང་སར་མུ་ཟི་དང་ཚྭ་སྙིགས་དང་། མེ་ཕུང་བཅས་ཡོད་པ་དང་། སོན་འདེབས་མི་ནུས་པ་དང་། ལོ་ཏོག་མི་སྐྱེ་བ་དང་། རྩྭ་རྐང་གཅིག་ཀྱང་མི་སྐྱེ་བ་བཅས་མཐོང་ན།
DEU 29:24 དེ་རྣམས་མཐོང་མཁན་དང་མི་རིགས་ཐམས་ཅད་ཀྱིས་དཀོན་མཆོག་ཡ་ཝཱེས་ཡུལ་འདི་ལ་ཅིའི་ཕྱིར་དེ་ལྟར་མཛད་པ་ཡིན་ནམ། ཐུགས་ཁྲོ་ཆེན་པོའི་མེ་དེ་ཅིའི་ཕྱིར་འབར་བ་ཡིན་ནམ་ཞེས་འདྲི་བ་དང་།
DEU 29:25 དེ་ནས་མི་རྣམས་ན་རེ། དེ་དག་གིས་རང་གི་ཕ་མེས་ཀྱི་དཀོན་མཆོག་ཡ་ཝཱེའི་ཞལ་ཆད་དེ། ཁོ་རྣམས་ཨེ་ཅིབ་ཡུལ་ནས་ཕྱི་ལ་ཁྲིད་འོངས་སྐབས་བཞག་པའི་ཞལ་ཆད་སྤངས་ནས།
DEU 29:26 ལྷ་གཞན་དག་ལ་བསྙེན་བཀུར་བྱེད་དུ་སོང་ཞིང་། ཁོ་ཚོས་ངོ་མི་ཤེས་ལ་སོ་སོར་གནང་བ་མ་ཡིན་པའི་ལྷ་རྣམས་ལ་ཕྱག་བཙལ་བའི་རྐྱེན་གྱིས།
DEU 29:27 དཀོན་མཆོག་ཡ་ཝཱེའི་ཐུགས་ཁྲོ་ཡུལ་དེའི་སྟེང་དུ་འབར་ནས། གླེགས་བམ་འདིར་བཀོད་པའི་དམོད་པ་ཐམས་ཅད་ཕབ་པ་རེད།
DEU 29:28 དེ་རིང་ནང་བཞིན། དཀོན་མཆོག་ཡ་ཝཱེས་ཐུགས་ཁྲོ་དྲག་པོ་དང་ཁྲོ་གཏུམ་དང་། ཞེ་སྡང་ཆེན་པོ་དང་བཅས་ཁོ་ཚོ་རང་ཡུལ་ནས་རྩ་མེད་བཟོས་ཏེ་ཡུལ་གཞན་དུ་སྤྱུགས་པའོ་ཞེས་བརྗོད་པར་བྱའོ། །
DEU 29:29 སྦས་པའི་དོན་རྣམས་ནི་རང་རེའི་དཀོན་མཆོག་ཡ་ཝཱེ་ལ་གཏོགས་པ་དང་། མངོན་པར་གསལ་བ་འབའ་ཞིག་དུས་གཏན་དུ་རང་ཅག་དང་རང་ཅག་གི་བུ་རྒྱུད་རྣམས་ཀྱི་ཡིན་ཏེ། རང་ཅག་གིས་བཀའ་ཁྲིམས་འདིའི་བཀའ་ཐམས་ཅད་ཇི་བཞིན་དུ་བསྒྲུབ་དགོས་པའོ། །
DEU 30:1 ངས་ཁྱོད་རྣམས་ཀྱི་མདུན་དུ་བཤམས་པའི་བྱིན་རླབས་དང་དམོད་པ་ཐམས་ཅད་ཁྱོད་རྣམས་ལ་འབྱུང་བའི་དུས་སུ། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་མི་རིགས་གང་གི་ཁྲོད་དུ་སྤྱུགས་ཀྱང་ཁྱོད་རྣམས་ཀྱིས་དེ་སེམས་ལ་འཁོར་འོང་ངེས།
DEU 30:2 ཁྱོད་རྣམས་དང་ཁྱོད་རྣམས་ཀྱི་བུ་རྒྱུད་རྣམས་བློ་གཅིག་སེམས་གཅིག་གིས་ཁྱོད་ཅག་གི་དཀོན་མཆོག་ཡ་ཝཱེའི་ཕྱོགས་སུ་འཁོར་ཏེ། ངས་དེ་རིང་ཁྱོད་རྣམས་ལ་གདམས་པ་ཐམས་ཅད་བཞིན་ཁོང་གི་བཀའ་གསུང་ལ་ཉན་པར་འགྱུར།
DEU 30:3 དེའི་ཚེ་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་བཙན་འཛིན་ལས་ཕྱིར་ཁྲིད་དེ་ཁྱོད་རྣམས་ལ་སྙིང་རྗེ་དགོངས་ནས། ཁོང་གིས་ཁྱོད་རྣམས་གཏོར་སའི་མི་རིགས་ཐམས་ཅད་ཀྱི་ཁྲོད་ནས་ཡང་བསྐྱར་ཕྱིར་བསྡུ་ངེས།
DEU 30:4 ཁྱོད་ས་མཐར་སྤྱུགས་པ་རྣམས་གནམ་མཐའ་གང་དུ་འཐོར་ཡོད་ནའང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་དེ་ནས་ཀྱང་བསྡུས་ཏེ་ཕྱིར་འཁྲིད་འོང་།
DEU 30:5 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ནི་རང་གི་ཕ་མེས་ལ་དབང་བའི་ཡུལ་དུ་ཕྱིར་འཁྲིད་ཅིང་ཁྱོད་རྣམས་ཀྱིས་དེ་བདག་གིར་འཛིན་པ་དང་། ཁོང་གིས་ཁྱོད་རྣམས་དྲིན་གྱིས་བསྐྱངས་ཏེ། ཁྱོད་རྣམས་ཀྱི་ཕ་མེས་ལས་ཀྱང་ཁྱོད་རྣམས་འཕེལ་ཞིང་རྒྱས་པར་མཛད།
DEU 30:6 ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་བློ་གཅིག་སེམས་གཅིག་གིས་གཅེས་ཤིང་ཁྱོད་རྣམས་འཚོ་བའི་ཆེད་དུ། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་དང་ཁྱོད་ཅག་གི་བུ་རྒྱུད་ཀྱི་སེམས་ནང་གི་མི་གཙང་བ་རྣམས་བསལ་ངེས་ཡིན།
DEU 30:7 ཁྱོད་རྣམས་ཀྱི་དཀོན་མཆོག་ཡ་ཝཱེས་དམོད་པ་དེ་ཐམས་ཅད་ནི་ཁྱོད་རྣམས་ཀྱི་དགྲ་རྣམས་དང་ཁྱོད་ཅག་ལ་སྡང་ནས་བཙན་སྐུལ་བྱེད་མཁན་རྣམས་ཀྱི་སྟེང་ལ་འགེལ་ཞིང་།
DEU 30:8 ཁྱོད་རྣམས་ཕྱིར་འཁོར་ནས་དཀོན་མཆོག་ཡ་ཝཱེའི་གསུང་ལ་མཉན་པ་དང་། ངས་དེ་རིང་ཁྱོད་ཅག་ལ་བསྒོས་པའི་ཁོང་གི་བཀའ་ཐམས་ཅད་བསྲུང་བར་འགྱུར།
DEU 30:9 དེ་ནས་ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་གི་ལག་ནས་སྒྲུབ་པའི་ལས་ཀུན་དང་། ཁྱོད་རྣམས་ལས་སྐྱེས་པ་དང་། ཕྱུགས་ཀྱི་འཕེལ་ཐོག་དང་། ཞིང་གི་ཐོན་འབྲས་རྣམས་ཤིན་ཏུ་སྨིན་ཞིང་འཕེལ་བར་མཛད། གང་ལ་ཞེ་ན། དཀོན་མཆོག་ཡ་ཝཱེ་ཁྱོད་རྣམས་ཀྱི་ཕ་མེས་ལ་ཐུགས་དགྱེས་པ་དང་འདྲ་བར། ཁོང་ཕྱིར་འཁོར་ནས་ཁྱོད་རྣམས་ལ་མཉེས་ཤིང་ཁྱོད་རྣམས་ལ་བྱིན་རླབས་འཐོབ་པར་བྱའོ། །
DEU 30:10 གལ་སྲིད་ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་གསུང་ལ་མཉན་ཏེ། བཀའ་ཁྲིམས་འདིའི་གླེགས་བམ་ནང་བཀོད་པའི་བཀའ་རྒྱ་དང་སྒྲིག་ཁྲིམས་རྣམས་བསྲུང་བ་དང་། བློ་གཅིག་སེམས་གཅིག་གིས་ཁྱོད་རྣམས་ཀྱི་དཀོན་མཆོག་ཡ་ཝཱེའི་ཕྱོགས་སུ་འཁོར་བ་ཡིན་ན་དེ་བཞིན་དུ་འབྱུང་ངོ་། །
DEU 30:11 ངས་དེ་རིང་ཁྱོད་རྣམས་ལ་བསྒོས་པའི་བཀའ་རྒྱ་དེ་ནི་ཁྱོད་རྣམས་ལ་ཁག་པོ་ཞིག་མིན་ལ་ཁྱོད་ཅག་དང་རྒྱང་ཐག་རིང་པོའང་མིན།
DEU 30:12 དེ་ནི་ནམ་མཁར་མེད་པས། ཁྱོད་རྣམས་ཀྱིས་ང་ཚོས་བཀའ་དེ་ཐོས་ནས་དེ་བཞིན་བསྒྲུབ་པའི་ཆེད་དུ་སུ་ཞིག་ནམ་མཁར་སོང་ནས་ངེད་ཅག་ལ་འཁྱེར་ཡོང་ངམ་ཞེས་འདྲི་མི་དགོས།
DEU 30:13 དེ་རྒྱ་མཚོའི་ཕ་རོལ་ཏུ་ཡང་མེད་པས། ཁྱོད་རྣམས་ཀྱིས་ང་ཚོས་བཀའ་དེ་ཐོས་ནས་དེ་བཞིན་བསྒྲུབ་པའི་ཆེད་དུ་སུ་ཞིག་རྒྱ་མཚོའི་ཕ་རོལ་ཏུ་སོང་ནས་ངེད་ཅག་ལ་འཁྱེར་ཡོང་ངམ་ཞེས་འདྲི་མི་དགོས།
DEU 30:14 བཀའ་དེ་ནི་ཁྱོད་རྣམས་དང་ཤིན་ཏུ་ཉེ་སྟེ། ཁྱོད་རྣམས་ཀྱི་སྨྲ་སྒོ་དང་ཡ་ཆུང་སེམས་ཀྱི་ནང་དུ་བཞུགས་པས་ཁྱོད་རྣམས་ཀྱིས་དེ་བསྲུངས་ནས་བསྒྲུབ་དགོས་སོ། །
DEU 30:15 ལྟོས་དང་། ངས་དེ་རིང་ཁྱོད་རྣམས་ཀྱི་མདུན་དུ་ཚེ་སྲོག་དང་ཕན་བདེ། འཆི་བ་དང་རྐྱེན་ངན་བཤམས་ཡོད་དེ།
DEU 30:16 ཁྱོད་རྣམས་འཚོ་ཞིང་འཕེལ་བའི་ཆེད་དུ། ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེའི་བཀའ་རྒྱ་སྟེ་ངས་དེ་རིང་ཁྱོད་ཅག་ལ་བསྒོས་པ་རྣམས་ལ་མཉན་ནས། ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་དགའ་ཞིང་ཁོང་གི་ཕེབས་ལམ་དུ་བསྐྱོད་པ་དང་། ཁོང་གི་བཀའ་རྒྱ་དང་སྒྲིག་ཁྲིམས། སྲོལ་ཡིག་བཅས་བསྲུངས་ན། དཀོན་མཆོག་ཡ་ཝཱེས་ཁྱོད་རྣམས་ཕར་སོང་སྟེ་བདག་གིར་འཛིན་པའི་ཡུལ་དུ་ཁྱོད་ཅག་ལ་བྱིན་རླབས་གནང་ངེས་ཡིན།
DEU 30:17 འོན་ཀྱང་ཁྱོད་རྣམས་ཀྱི་སེམས་ལོག་ལམ་ལ་འཕྱན་ནས་བཀའ་མི་བརྩི་བ་དང་། ལྷ་གཞན་དག་ལ་ཕྱག་བཙལ་ནས་བསྙེན་བཀུར་ཕུལ་ན།
DEU 30:18 ངས་དེ་རིང་ཁྱོད་རྣམས་ལ་གཟབ་ནན་གྱིས་སྨྲ་བར་བྱ་སྟེ་ཁྱོད་ཅག་ནུབ་པར་འགྱུར་ཞིང་། ཁྱོད་རྣམས་ཡོར་དན་གཙང་པོ་བརྒལ་ནས་ཕར་སོང་སྟེ་བདག་གིར་འཛིན་པའི་ཡུལ་དེ་རུ་ཁྱོད་རྣམས་ཡུན་རིང་འཚོ་མི་ཐུབ།
DEU 30:19 ངས་དེ་རིང་གནམ་ས་གཉིས་དཔང་དུ་བཙུགས་ཏེ་ཁྱོད་རྣམས་ཀྱི་མདུན་དུ་ཚེ་སྲོག་དང་འཆི་བ། བྱིན་རླབས་དང་དམོད་མོ་བཤམས་ཡོད། དེ་བས་ཁྱོད་རྣམས་དང་ཁྱོད་ཅག་གི་བུ་རྒྱུད་ཀྱི་སྲོག་འཚོ་བའི་ཆེད་དུ་ཚེ་སྲོག་འདེམས་དགོས།
DEU 30:20 ཁྱོད་རྣམས་ཀྱིས་ཁྱོད་ཅག་གི་དཀོན་མཆོག་ཡ་ཝཱེ་ལ་གཅེས་ཤིང་ཁོང་གི་གསུང་སྐད་ལ་མཉན་ནས་ཁོང་ལ་དམ་པོར་བརྟེན་དགོས། ཅི་ལ་ཞེ་ན། ཁོང་ནི་ཁྱོད་ཅག་གི་ཚེ་སྲོག་ཡིན་ལ་ཁོང་གིས་ཁྱོད་ཅག་ཚེ་ཐག་རིང་བར་མཛད་པའོ། །དེ་ལྟར་བྱས་ན་དཀོན་མཆོག་ཡ་ཝཱེས་ཁྱོད་རྣམས་ཀྱི་ཕ་མེས་ཨབ་ར་ཧམ་དང་ཨི་སཱག ཡ་ཀོབ་བཅས་ལ་གནང་བར་མནའ་བཞེས་པའི་ཡུལ་དུ་ཁྱོད་ཅག་གནས་ཐུབ་པ་ཡིན་ཞེས་བཀའ་བསྩལ་ཏོ། །
DEU 31:1 དེར་མོ་ཤེ་སོང་ནས་ཡེས་ར་ཨེལ་པ་ཐམས་ཅད་ལ་བཀའ་འདི་རྣམས་གསུངས་པ་སྟེ།
DEU 31:2 ཁོང་ན་རེ། ད་ནི་ང་རང་ལོ་བརྒྱ་དང་ཉི་ཤུ་ཡིན་པས་སྔར་བཞིན་ཕྱི་ནང་དུ་འགྲོ་འོང་བྱེད་མི་ནུས། དཀོན་མཆོག་ཡ་ཝཱེས་ཀྱང་ང་ལ་ཁྱོད་ཡོར་དན་གཙང་པོའི་ཕ་རོལ་ཏུ་འགྲོ་མི་རུང་ཞེས་བཀའ་གནང་ཡོད།
DEU 31:3 ཁྱོད་རྣམས་ཀྱི་དཀོན་མཆོག་ཡ་ཝཱེས་དངོས་སུ་ཁྱོད་ཅག་ཁྲིད་ནས་ཕར་ཕེབས་ཤིང་། ཁྱོད་ཅག་གི་མདུན་ནས་མི་རིགས་དེ་དག་མེད་པར་མཛད་ནས་ཡུལ་དེ་ཁྱོད་ཅག་ལ་དབང་བར་འགྱུར། དཀོན་མཆོག་ཡ་ཝཱེས་གསུངས་པ་ནང་བཞིན་ཡོ་ཤུ་ཨས་དངོས་སུ་ཁྱོད་ཅག་ཁྲིད་ནས་ཕར་འགྲོ་བ་དང་།
DEU 31:4 དཀོན་མཆོག་ཡ་ཝཱེས་ཨེ་མོར་པ་རྣམས་ཀྱི་རྒྱལ་པོ་སི་ཧོན་དང་ཨོག་གཉིས་ཀ་དང་ཁོ་རྣམས་ཀྱི་རྒྱལ་ཁམས་ཇི་ལྟར་མེད་པར་མཛད་པ་བཞིན། དེ་དག་ལའང་དེ་བཞིན་མཛད་ཡོང་།
DEU 31:5 དཀོན་མཆོག་ཡ་ཝཱེས་དེ་དག་ཁྱོད་རྣམས་ལ་སྤྲོད་ཅིང་། ཁྱོད་ཅག་གིས་དེ་དག་ལ་ངས་ཁྱོད་ཅག་ལ་བསྒོས་པའི་བཀའ་ཐམས་ཅད་བཞིན་དུ་བྱེད་དགོས།
DEU 31:6 ཁྱོད་ཅག་གིས་སྙིང་སྟོབས་དང་དཔའ་སེམས་སྐྱེད་ཅིག དེ་དག་ལ་འཇིགས་ནས་འདར་མི་དགོས། ཁྱོད་རྣམས་ཀྱི་དཀོན་མཆོག་ཡ་ཝཱེ་ནི་ཁྱོད་ཅག་དང་མཉམ་དུ་ཕེབས་པ་ཡིན་པས། ཁོང་གིས་ཁྱོད་རྣམས་སྤང་བར་མི་བྱ་ཞིང་འདོར་ཡང་མི་སྲིད་ཅེས་གསུངས་སོ། །
DEU 31:7 དེ་ཡང་མོ་ཤེ་ཡིས་ཡོ་ཤུ་ཨ་བོས་ནས་ཡེས་ར་ཨེལ་པ་ཐམས་ཅད་ཀྱི་མཐོང་ངོར་ཁོ་ལ་འདི་ལྟར། ཁྱོད་ལ་སྙིང་སྟོབས་དང་དཔའ་སེམས་ལྡན་པར་གྱུར་ཅིག ཅི་ལ་ཞེ་ན། ཁྱོད་ནི་མི་འདི་རྣམས་དང་མཉམ་དུ་དཀོན་མཆོག་ཡ་ཝཱེས་ཁོ་རྣམས་ཀྱི་ཕ་མེས་ལ་གནང་བར་མནའ་བཞེས་པའི་ཡུལ་དུ་འགྲོ་བ་དང་། ཁྱོད་ཀྱིས་ཡུལ་དེ་འདི་དག་གི་ས་སྐལ་དུ་སྦྱིན་དགོས།
DEU 31:8 དཀོན་མཆོག་ཡ་ཝཱེ་དངོས་སུ་ཁྱོད་ཀྱི་སྔོན་དུ་ཕེབས་ནས་ཁོང་ཁྱོད་དང་མཉམ་དུ་བཞུགས་པ་དང་། ཁོང་གིས་ཁྱོད་སྤངས་ནས་འདོར་མི་སྲིད་པས། ཁྱོད་འཇིགས་ནས་དངངས་མི་དགོས་ཞེས་གསུངས་སོ། །
DEU 31:9 དེ་ནས་མོ་ཤེ་ཡིས་བཀའ་ཁྲིམས་འདི་ཡི་གེར་བཀོད་ནས། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་བའི་ལེ་ཝི་ཚོ་པའི་མཆོད་དཔོན་རྣམས་ཀྱི་བུ་རྒྱུད་དང་ཡེས་ར་ཨེལ་གྱི་རྒན་པོ་ཀུན་ལ་སྤྲད་དོ། །
DEU 31:10 མོ་ཤེ་ཡིས་ཁོ་རྣམས་ལ་འདི་ལྟར། ལོ་བདུན་རེའི་མཐར་མཇུག་གི་ལོ་སྟེ། ཆག་ཡང་གཏོང་བའི་དུས་བཅད་ལོ་དང་སྤྱིལ་བུའི་དུས་ཆེན་སྐབས་སུ།
DEU 31:11 ཡེས་ར་ཨེལ་པ་ཐམས་ཅད་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་ཁོང་གིས་བདམས་པའི་གནས་སུ་ཡོང་སྐབས། ཁྱོད་རྣམས་ཀྱིས་བཀའ་ཁྲིམས་འདི་ཡེས་ར་ཨེལ་པ་ཀུན་གྱི་རྣ་ལམ་དུ་འཇོག་དགོས།
DEU 31:12 ཁྱོད་ཅག་གིས་སྐྱེས་པ་དང་བུད་མེད་དང་། བྱིས་པ་དང་། ཁྱོད་རྣམས་ཀྱི་གྲོང་རྡལ་དུ་ཡོད་པའི་བྱེས་པ་བཅས་མི་ཐམས་ཅད་སྡུས་ཤིག དེ་ནས་ཁོ་རྣམས་ཀྱིས་ཐོས་ཤིང་བསླབ་པ་དང་། ཁྱོད་ཅག་གི་དཀོན་མཆོག་ཡ་ཝཱེ་ལ་གུས་ཤིང་འཇིགས་ནས་བཀའ་ཁྲིམས་འདིའི་གསུང་ཐམས་ཅད་གཟབ་གཟབ་ངང་བསྲུངས་ཏེ་བསྒྲུབ་དགོས་ལ།
DEU 31:13 དེ་དག་གི་བུ་ཕྲུག་སྟེ་ད་དུང་བཀའ་ཁྲིམས་འདི་ཅི་ཡང་མི་ཤེས་པ་རྣམས་ཀྱིས་ཐོས་པ་དང་། ཁྱོད་རྣམས་ཡོར་དན་གཙང་པོ་བརྒལ་ནས་བདག་གིར་འཛིན་དུ་འགྲོ་བའི་ཡུལ་དེར་འཚོ་བའི་སྐབས་སུ། ཚེ་གང་པོར་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་གུས་ཤིང་འཇིགས་དགོས་ཚུལ་སློབ་དགོས་ཞེས་གསུངས་སོ། །
DEU 31:14 དེ་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ལྟོས་དང་། ཁྱོད་འཆི་བའི་དུས་ལ་སླེབས་པས་ཡོ་ཤུ་ཨ་བོས་ཤོག ངས་ཁོ་ལ་ལས་འགན་བསྐོ་བའི་ཕྱིར་ཁྱོད་གཉིས་མཇལ་འཕྲད་གུར་མཆོག་ཏུ་ལངས་འདུག་དགོས་ཞེས་བཀའ་གནང་བས། མོ་ཤེ་དང་ཡོ་ཤུ་ཨ་གཉིས་མཇལ་འཕྲད་གུར་མཆོག་ཏུ་སླེབས།
DEU 31:15 དཀོན་མཆོག་ཡ་ཝཱེ་མཇལ་འཕྲད་གུར་མཆོག་ནང་དུ་སྤྲིན་གྱི་ཀ་བའི་ཁྲོད་ནས་མངོན་པར་གྱུར་ཅིང་། སྤྲིན་གྱི་ཀ་བ་དེ་མཇལ་འཕྲད་གུར་མཆོག་གི་སྒོ་ཡི་གོང་རོལ་དུ་བཞུགས་པའོ། །
DEU 31:16 ཡང་དཀོན་མཆོག་ཡ་ཝཱེས་མོ་ཤེ་ལ། ལྟོས་དང་། ཁྱོད་ཕ་མེས་རྣམས་དང་མཉམ་དུ་མིག་བཙུམ་པར་འགྱུར་ཞིང་། མི་འདི་རྣམས་ཡར་ལངས་ནས་ཁོ་རྣམས་འགྲོ་སའི་གནས་དེ་རུ། ཡུལ་དེའི་མི་རྣམས་ཀྱི་ཁྲོད་དུ་བྱེས་པ་དེ་དག་གི་ལྷ་རྣམས་ཀྱི་རྗེས་སུ་འབྲངས་ནས་ལོག་གཡེམ་བྱེད་ཅིང་། བདག་སྤངས་ནས་བདག་གིས་ཁོ་རྣམས་ལ་བཞག་པའི་ཁ་ཆད་དང་འགལ་བར་འགྱུར།
DEU 31:17 ཉིན་མོ་དེར་ང་ཁོ་རྣམས་ལ་ཁོང་ཁྲོ་རབ་ཏུ་འབར་ནས་དེ་དག་སྤངས་ནས་ཁོ་ཚོར་ངའི་གདོང་མི་སྟོན་ལ། ཁོ་རྣམས་གཞན་གྱིས་ཁྱུར་མིད་གཏོང་བར་མ་ཟད། ཆག་སྒོ་དང་དཀའ་སྡུག་མང་པོ་ཁོ་ཚོའི་སྟེང་ལ་འབབ། ཉིན་མོ་དེར་ཁོ་ཚོ་ན་རེ། རང་ཅག་གི་དཀོན་མཆོག་རང་རེའི་ཁྲོད་དུ་མི་བཞུགས་པས། ཆག་སྒོ་འདི་རྣམས་རང་ཅག་གི་སྟེང་དུ་བྱུང་བ་མ་ཡིན་ནམ་ཞེས་སྨྲ་བར་འགྱུར།
DEU 31:18 ཉིན་མོ་དེར་དེ་དག་ལྷ་གཞན་གྱི་ཕྱོགས་སུ་འཁོར་ནས་དོན་ངན་པ་ཐམས་ཅད་བསྒྲུབས་པས། ཁོ་ཚོར་ངའི་གདོང་མི་སྟོན་ཐག་གིས་ཆོད་དོ། །
DEU 31:19 དེ་བས་ད་ནི་མགུར་འདི་བྲིས་ནས་ཡེས་ར་ཨེལ་པ་རྣམས་ལ་བསླབས་ཏེ་ཁོ་ཚོའི་ཁ་ལ་ཞོག་ཅིག མགུར་འདི་ངས་ཡེས་ར་ཨེལ་པ་རྣམས་ལ་རྒོལ་བའི་བདེན་དཔང་དུ་འགྱུར་ངེས།
DEU 31:20 ཅི་ལ་ཞེ་ན། ངས་ཁོ་རྣམས་ཀྱི་ཕ་མེས་ལ་མནའ་དང་བཅས་ཁས་བླངས་པ་ནང་བཞིན། ཁོ་རྣམས་འོ་མ་དང་སྦྲང་རྩི་བཞུར་བའི་ཡུལ་དུ་ཁྲིད་ཅིང་། ཁོ་རྣམས་དེར་འགྲངས་ནས་ཚོན་པོར་ཆགས་རྗེས། ལྷ་གཞན་དག་གི་རྗེས་སུ་འབྲངས་ནས་དེ་དག་ལ་བསྙེན་བཀུར་བྱེད་པ་དང་། ང་སྤངས་ཏེ་ངའི་ཁ་ཆད་དང་འགལ་བར་འགྱུར།
DEU 31:21 དེ་ནས་ཁོ་རྣམས་ལ་ཆག་སྒོ་དང་དཀའ་སྡུག་མང་པོ་འབྱུང་བའི་དུས་སུ། མགུར་འདིས་ཁོ་ཚོའི་མདུན་དུ་བདེན་དཔང་བྱེད་ངེས་ཏེ། ཅི་ལ་ཞེ་ན། མགུར་འདི་ནི་ཁོ་ཚོའི་བུ་རྒྱུད་རྣམས་ཀྱི་ཁ་ནས་བརྗེད་པར་མི་འགྱུར་རོ། །དོན་དམ་དུ་ངས་ད་དུང་ཁོ་རྣམས་ཁྲིད་དེ་ཁོ་ཚོར་མནའ་དང་བཅས་ཁས་བླངས་པའི་ཡུལ་དུ་མ་སླེབས་སྔོན་དུ། དེ་རིང་ཁོ་ཚོའི་བློ་ཁ་གཏད་ཕྱོགས་དེ་ངས་ཤེས་པའི་ཕྱིར་རོ་ཞེས་གསུངས།
DEU 31:22 དེ་ནས་མོ་ཤེ་ཡིས་ཉིན་དེར་མགུར་འདི་བྲིས་ཏེ་ཡེས་ར་ཨེལ་པ་རྣམས་ལ་བསླབས་པའོ། །
DEU 31:23 ཡང་ཡ་ཝཱེས་ནུན་གྱི་བུ་ཡོ་ཤུ་ཨ་ལ་བཀའ་གནང་སྟེ་འདི་སྐད་དུ། ཁྱོད་ལ་སྙིང་སྟོབས་དང་དཔའ་སེམས་ལྡན་པར་གྱུར་ཅིག ཅི་ལ་ཞེ་ན། ཁྱོད་ཀྱིས་ཡེས་ར་ཨེལ་པ་རྣམས་ཁྲིད་ནས་ངས་ཁོ་རྣམས་ལ་མནའ་དང་བཅས་ཁས་བླངས་པའི་ཡུལ་དེར་འགྲོ་དགོས་ཤིང་། ང་རང་ཁྱོད་དང་མཉམ་དུ་ཡོད་ཅེས་གསུངས་སོ། །
DEU 31:24 དེ་ཡང་མོ་ཤེ་ཡིས་བཀའ་ཁྲིམས་འདིའི་གསུང་རྣམས་གླེགས་བམ་ནང་བཀོད་ཚར་བ་ན།
DEU 31:25 མོ་ཤེ་ཡིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་བའི་ལེ་ཝི་པ་རྣམས་ལ་གདམས་དོན།
DEU 31:26 ཁྱོད་ཅག་གིས་བཀའ་ཁྲིམས་ཀྱི་གླེགས་བམ་འདི་ཁྱེར་ནས་ཁྱོད་རྣམས་ཀྱི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁྲིས་སུ་ཞོག་ཅིག དེ་ནི་ཁྱོད་ཅག་ལ་རྒོལ་བའི་བདེན་དཔང་ཡིན།
DEU 31:27 ཅི་ལ་ཞེ་ན། ངས་ཁྱོད་རྣམས་ནི་གྱེན་ལོག་དང་གཉའ་རེངས་ཡིན་པ་ཤེས་སོ། །ལྟོས་དང་། ང་དེ་རིང་ཁྱོད་ཅག་དང་མཉམ་དུ་གསོན་པོར་ཡོད་དུས་ཁྱོད་ཅག་གིས་དཀོན་མཆོག་ཡ་ཝཱེ་ལ་ངོ་ལོག་བྱེད་པས། ང་ཤི་བའི་རྗེས་སུ་ལྟ་ཅི་སྨོས།
DEU 31:28 ཁྱོད་རྣམས་ཀྱིས་ཚོ་པ་ཁག་གི་རྒན་པོ་རྣམས་དང་འགོ་དཔོན་ཐམས་ཅད་ངའི་མདུན་དུ་སྡུས་ཤོག་དང་། ངས་དེ་དག་གི་རྣ་བར་གཏམ་འདི་དག་བཞག་ནས་གནམ་ས་གཉིས་དཔང་པོ་བྱེད་དུ་འབོད་དགོས།
DEU 31:29 ཅི་ལ་ཞེ་ན། ང་ཤི་བའི་རྗེས་སུ་ཁྱོད་རྣམས་ཡོངས་སུ་ཉམས་ཏེ། ངས་ཁྱོད་རྣམས་ལ་གདམས་པའི་ལམ་ནས་གཟུར་བ་དང་། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ནས་ཁྱོད་ཅག་གི་ལག་ནས་སྒྲུབ་པའི་ལས་ཀྱིས་ཁོང་གི་ཐུགས་ཁྲོ་སློང་ངེས་པས། མཐའ་མའི་ཉིན་མོ་དེ་དག་ཏུ་ཁྱོད་རྣམས་ལ་ཆག་སྒོ་འབྱུང་བའོ་ཞེས་གསུངས་སོ། །
DEU 31:30 དེ་ནས་མོ་ཤེ་ཡིས་ཡེས་ར་ཨེལ་གྱི་མི་ཚོགས་ཐམས་ཅད་ཀྱི་རྣ་བར་མགུར་འདིའི་བཀའ་རྣམས་ཆད་ལྷག་མེད་པར་གསུངས་སོ། །
DEU 32:1 ཀྱེ་མ་ནམ་མཁས་རྣ་བ་གཏོད་པར་གྱིས། ། ང་ཡི་སྨྲ་སྒོར་བརྗོད་བྱའི་གཏམ་ཞིག་ཡོད། ། བདག་གི་གཏམ་དེ་ས་ཡིས་ཐོས་གྱུར་ཅིག །
DEU 32:2 བདག་གི་བསླབ་བྱ་ཆར་པ་བཞིན་དུ་འབབ། ། ང་ཡི་སྨྲ་བརྗོད་ཟིལ་བ་བཞིན་དུ་ལྷུང་། ། སྦྲང་ཆར་རྩྭ་སྔོན་སྟེང་དུ་ལྷུང་འདྲ་དང་། ། དྲག་ཆར་སྔོ་ཚོད་སྟེང་དུ་བབས་འདྲ་ཡིན། །
DEU 32:3 བདག་གིས་ཡ་ཝཱེའི་མཚན་སྙན་སྒྲོག་བྱ་ཞིང་། ། རང་རེའི་དཀོན་མཆོག་མཚན་གྱི་ཆེ་བ་བརྗོད། །
DEU 32:4 བྲག་རི་ཡིན་པ་ཁོང་གི་ཕྱག་ལས་རྣམས། ། རྣམ་པར་དག་ཅིང་ཕེབས་ལམ་ཐམས་ཅད་དྲང་། ། ཡིད་རྟོན་རུང་བའི་དཀོན་མཆོག་དྲང་པོ་སྟེ། ། ཉེས་ལྟུང་དྲི་མ་མེད་པ་ཁོང་ཡིན་ནོ། །
DEU 32:5 མི་རབས་འདི་ཡིས་ཁོང་ལ་གཏོར་བརླག་བཟོས། ། ཉེས་སྐྱོན་ཡོད་པས་ཁོང་གི་བུ་ཕྲུག་མིན། ། མི་རབས་འདི་ནི་སྤྱོད་རྩིང་བློ་འཁྱོག་གོ །
DEU 32:6 ཀྱེ་མ་བློ་གྲོས་མེད་པ་བླུན་པོའི་ཚོགས། ། ཡ་ཝཱེའི་བཀའ་དྲིན་དེ་བཞིན་འཇལ་ཡོང་ངམ། ། ཁོང་ནི་ཁྱོད་ཚོ་གསར་བཟོ་གནང་མཁན་གྱི། ། ཡབ་ཆེན་གཅིག་པུ་མིན་ནམ་གོ་མེད་ཚོ། ། ཁོང་གིས་ཁྱོད་རང་བཀོད་ནས་བརྟན་པོར་བཟོས། །
DEU 32:7 འདས་པའི་ཉིན་མོ་དག་ནི་དྲན་པར་གྱིས། ། སྔོན་རབས་མང་པོ་རྣམས་ལ་བསམ་བློ་ཐོངས། ། རང་གི་ཕ་ལ་དྲིས་དང་ཁོ་ཡིས་སྟོན། ། རྒན་པ་རྣམས་ལ་དྲིས་དང་བརྗོད་པར་ངེས། །
DEU 32:8 བླ་མེད་ཉིད་ཀྱིས་མི་རིགས་དེ་རྣམས་ལ། ། རང་རང་ས་སྐལ་གནང་བའི་དུས་སྐབས་དང་། ། མིའི་རིགས་སོ་སོར་བཀར་བའི་དུས་དེ་ལ། ། ཁོང་གིས་ཡེས་ར་ཨེལ་གྱི་མི་གྲངས་བཞིན། ། མི་རིགས་རྣམས་ཀྱི་ས་མཚམས་གཏན་ལ་ཕབ། །
DEU 32:9 ཡ་ཝཱེའི་སྐལ་ནི་ཁོང་གི་འབངས་མི་དང་། ། ཁོང་གི་ནོར་སྐལ་ཡ་ཀོབ་ཡིན་པ་འོ། །
DEU 32:10 ཡ་ཝཱེ་དབེན་སྟོང་ཡུལ་དུ་མི་དེར་ཕྲད། ། ས་རྒོད་ངར་སྐད་སྒྲོག་པའི་ཡུལ་དུ་རྙེད། ། ཁོང་གིས་དེ་ལ་བྱམས་སྐྱོང་མཛད་ནས་ནི། ། རང་གི་སྤྱན་འབྲས་བཞིན་དུ་སྲུང་བར་མཛད། །
DEU 32:11 བྱ་གླག་གིས་ནི་རང་གི་ཚང་དཀྲོགས་ནས། ། ཁྲ་ཕྲུག་གོང་དུ་འཕུར་ལྡིང་བྱེད་པ་བཞིན། ། གཤོག་པ་ཕྱི་ལ་བརྐྱངས་ནས་གཤོག་སྒྲོའི་ཁུད། ། ཁྲ་ཕྲུག་ཁུར་ནས་འགྲོ་བའི་ངང་ཚུལ་བཞིན། །
DEU 32:12 ཡ་ཝཱེ་གཅིག་པུས་ཁོ་ལ་ལམ་ཁྲིད་མཛད། ། གཞན་པའི་ལྷ་ནི་གང་ཡང་ཡོད་མ་ཡིན། །
DEU 32:13 ཁོང་གིས་དེ་ནི་ས་གཞིའི་མཐོ་སར་བསྐྱོན། ། ཞིང་ཁའི་ཐོན་འབྲས་རྣམས་ནི་སྤྱོད་པར་མཛད། ། བྲག་ལས་སྦྲང་རྩི་འཇིབ་པར་མཛད་པ་དང་། ། སྲ་འཐས་བྲག་གི་གསེང་ནས་སྣུམ་གནང་ངོ་། །
DEU 32:14 གླང་གི་ཞོ་དང་ར་ལུག་འོ་མ་དང་། ། ལུ་གུའི་ཚིལ་དང་པཱ་ཤན་ཡུལ་གྱི་ནི། ། ལུག་ཐུག་ར་ཐུག་གྲོ་ཡི་སྙིང་བཅུད་བཅས། ། སྤྱོད་པར་མཛད་ཅིང་རྒུན་འབྲུམ་དམར་པོ་ལས། ། བཟོས་པའི་རྒུན་ཆང་ཁྱོད་ཀྱིས་བཏུངས་པ་འོ། །
DEU 32:15 ཡེ་ཤུ་རུན་ནི་ཚོ་ཞིང་རྡོག་ཐོ་བརྒྱབ། ། ཁྱོད་རང་ཚོ་ཞིང་ཤུགས་ཆེན་རྒྱགས་པ་ཆགས། ། ཁོས་ནི་རང་ཉིད་འགོད་མཁན་དཀོན་མཆོག་སྤངས། ། རང་གི་མགོན་སྐྱབས་བྲག་ལ་འཕྱ་སྨོད་བྱས། །
DEU 32:16 དེ་ཚོས་ལྷ་གཞན་བརྟེན་པས་ཁོང་ལ་འགྲན་སེམས་བསྐྱེད། ། སྐྱུག་བྲོའི་བྱ་སྤྱོད་ཀྱིས་ནི་ཁོང་གི་ཐུགས་ཁྲོ་བསླངས། །
DEU 32:17 དེ་ཚོས་དཀོན་མཆོག་མིན་པའི་གདོན་འདྲེ་སྟེ། ། རང་ལ་རྒྱུས་མེད་ལྷ་ཚོགས་གཞན་པ་དང་། ། ཉེ་རབས་བྱུང་བའི་ལྷ་གསར་མང་པོར་བསྟེན། ། ཁྱོད་ཀྱི་ཕ་མེས་རྣམས་ནི་མི་འཇིགས་པ། ། དེ་འདྲའི་ལྷ་ཡི་རིགས་ལ་མཆོད་པ་ཕུལ། །
DEU 32:18 ཁྱོད་ཀྱིས་བསྐྱེད་ཡུམ་བྲག་ནི་སྣང་མེད་བསྐྱུར། ། ཁྱོད་རང་བསྐྲུན་པའི་དཀོན་མཆོག་བརྗེད་པར་གྱུར། །
DEU 32:19 རང་གི་བུ་དང་བུ་མོས་ཐུགས་ཁྲོ་བསླངས། ། ཡ་ཝཱེས་དེ་དག་གཟིགས་ནས་ཁོ་རྣམས་སྤངས། །
DEU 32:20 དེ་ནས་ཁོང་གིས་འདི་སྐད་གསུངས་པ་སྟེ། ། བདག་གིས་དེ་རྣམས་ལ་ནི་གདོང་མི་སྟོན། ། དེ་ཚོའི་མཇུག་འབྲས་ཅི་ལྟར་འབྱུང་བར་བལྟ། ། དེ་རྣམས་ཚུལ་འཆོས་ཅན་གྱི་མི་རབས་ཤིག ། བློ་གཏད་མེད་པའི་བུ་རྣམས་ཡིན་ཕྱིར་རོ། །
DEU 32:21 དེ་ཚོས་དཀོན་མཆོག་མིན་པའི་ལྷ་ཡིས་ནི། ། བདག་གི་ཕྲག་དོག་བསྐྱེད་ཅིང་དེ་དག་གིས། ། སྟོང་པའི་སྐུ་འདྲ་རྣམས་ཀྱིས་ཁོང་ཁྲོ་བསླངས། ། དེ་བས་བདག་གིས་འབངས་མི་མ་ཡིན་པའི། ། རིགས་ལ་བརྟེན་ནས་ཁོ་ཚོར་ཕྲག་དོག་བསླང་། ། བླུན་རྨོངས་མི་རིགས་རྣམས་ཀྱིས་ཁོང་ཁྲོ་བསླང་། །
DEU 32:22 བདག་གི་ཁོང་ཁྲོའི་མེ་ལྕེ་རབ་ཏུ་འབར། ། གཤིན་པོའི་ཡུལ་གྱི་གཏིང་མཐིལ་འཚིག་པར་མཛད། ། ས་གཞི་དང་ནི་དེ་ཡི་སྐྱེ་དངོས་རྣམས། ། ཡོངས་རྫོགས་རྩ་མེད་གཏོང་བའི་དུས་ལ་སླེབས། ། རི་བོའི་རྩ་བ་དག་ཀྱང་མེ་ལ་འབར། །
DEU 32:23 བདག་གིས་དེ་ཚོའི་སྟེང་ལ་གོད་ཆག་སྤུང་། ། མདའ་མོ་ཐམས་ཅད་ཁོ་ཚོར་ཕོག་པར་བྱ། །
DEU 32:24 མུ་གེའི་རྐྱེན་གྱིས་ཁོ་རྣམས་རྒུད་པར་འགྱུར། ། ཚ་ནད་རིམས་ནད་དྲག་པོས་མེད་པར་བཟོ། ། གཅན་གཟན་དག་གི་མཆེ་བས་རྨུག་བྱེད་ཅིང་། ། ལྟོ་འགྲོ་སྦྲུལ་གྱི་དུག་ནི་ཁོ་ཚོར་ཕོག །
DEU 32:25 ཕྱི་ལ་རལ་གྲི་ནང་དུ་འཇིགས་སྣང་ཡོད། ། དེ་ཡིས་མི་རྣམས་འཇིག་པར་བྱེད་པ་དང་། ། ན་གཞོན་ཕོ་མོ་ཕྲུ་གུ་བགྲེས་སོང་བཅས། ། ཐམས་ཅད་རྩ་ནས་མེད་པར་འགྲོ་བ་འོ། །
DEU 32:26 བདག་གིས་དེ་དག་ཕྱོགས་བཞིར་གཏོར་ནས་ནི། ། མི་ཡི་གྲལ་ནས་གསུབ་དགོས་སྨྲས་ན་ཡང་། །
DEU 32:27 དགྲ་བོས་དཀྲོག་གཏམ་སྤེལ་བར་ང་མི་དགའ། ། ཁོ་ཚོས་གོ་བ་ལོག་ནས་འདི་ལྟར་དུ། ། ཡ་ཝཱེས་དོན་དེ་ཐམས་ཅད་བསྒྲུབས་པ་མིན། ། ང་ཚོའི་ལག་པ་རྣམ་པར་རྒྱལ་ཞེས་བརྗོད། །
DEU 32:28 མི་རིགས་དེ་ལ་གོ་རྟོགས་དབེན་གྱུར་པས། ། ཁོ་ཚོའི་ཁྲོད་དུ་བློ་གྲོས་ཡོད་མ་ཡིན། །
DEU 32:29 གལ་སྲིད་ཁོ་ཚོར་ཤེས་རབ་ལྡན་གྱུར་ན། ། དོན་འདི་རྟོགས་ཤིང་མ་འོངས་འབྱུང་འགྱུར་གྱི། ། རང་གི་མཇུག་འབྲས་ཐག་གིས་ཆོད་པ་ཡིན། །
DEU 32:30 ཁོ་ཚོའི་བྲག་གིས་ཁོ་རྣམས་བཙོངས་པ་དང་། ། ཡ་ཝཱེས་ཁོ་རྣམས་སྤངས་པ་མ་ཡིན་ན། ། ཅི་ལྟར་གཅིག་གིས་གྲངས་ཀ་སྟོང་ཞིག་འདེད། ། ཅི་ལྟར་གཉིས་ཀྱིས་ཁྲི་གཅིག་འབྲོ་རུ་འཇུག །
DEU 32:31 ཁོ་ཚོའི་བྲག་ནི་རང་རེའི་བྲག་ལྟར་མིན། ། ངེད་ཀྱི་དགྲ་བོས་དེ་ནི་ཁས་ལེན་ནོ། །
DEU 32:32 དེ་ཚོའི་རྒུན་ཤིང་སཱ་དོམ་རྒུན་ཤིང་ཡིན། ། གཱ་མོ་ར་ཡི་ས་ཞིང་ནས་བྱུང་ངོ་། ། ཁོ་ཚོའི་རྒུན་འབྲུམ་དུག་གི་རྒུན་འབྲུམ་ཡིན། ། རྒུན་འབྲུམ་ཆུན་པོ་རྣམས་ཀྱི་རོ་ཁ་འོ། །
DEU 32:33 ཁོ་ཚོའི་རྒུན་ཆང་སྦྲུལ་གྱི་དུག་ཡིན་ཞིང་། ། དེ་ནི་དུག་སྦྲུལ་རྣམས་ཀྱི་དུག་ངན་ཡིན། །
DEU 32:34 དེ་ནི་ང་ཡི་མཛོད་དུ་ཉར་མེད་དམ། ། གཏེར་མཛོད་ནང་དུ་ཐེལ་ཙེ་གླན་མེད་དམ། །
DEU 32:35 དེ་དག་རྐང་པ་འདྲེད་པའི་དུས་དེ་ལ། ། བདག་གིས་དགྲ་ཤ་ལེན་ཞིང་ལན་སྤྲོད་དགོས། ། ཁོ་ཚོར་ཆག་སྒོ་འབྱུང་བའི་ཉིན་མོ་སླེབས། ། འབྱུང་འགྱུར་དོན་རྣམས་མྱུར་དུ་ཁོ་ཚོར་འབབ། །
DEU 32:36 ཡ་ཝཱེས་རང་གི་མི་ལ་དཀར་འདོན་གནང་། ། ཁོང་གི་ཞབས་ཕྱིར་སྙིང་རྗེས་གཟིགས་པར་འགྱུར། ། ཡ་ཝཱེས་དེ་དག་སྟོབས་ཤུགས་ཡལ་བ་དང་། ། བྲན་གཡོག་དང་ནི་རང་དབང་ཅན་རྣམས་ལས། ། ཤུལ་དུ་ལུས་པ་གཅིག་ཀྱང་མེད་པ་གཟིགས། །
DEU 32:37 དེ་ནས་ཁོང་གིས་འདི་སྐད་གསུང་བ་སྟེ། ། ཁོ་ཚོའི་ལྷ་རྣམས་ད་ལྟ་གང་དུ་ཡོད། ། ཁོ་ཚོའི་སྐྱབས་གནས་བྲག་རི་གང་དུ་ཡོད། །
DEU 32:38 མཆོད་པའི་ཚིལ་རྣམས་བཟའ་ཞིང་སྐྱེམས་མཆོད་ཀྱི། ། རྒུན་ཆང་འཐུང་མཁན་ལྷ་རྣམས་གང་དུ་མཆིས། ། ཁོ་རྣམས་ལངས་ནས་ཁྱོད་ལ་རོགས་བྱེད་ཅིང་། ། ཁྱོད་རྣམས་བསྲུང་བར་བཅུག་དང་འོས་སོ་ལོ། །
DEU 32:39 ད་ནི་ལྟོས་དང་ང་རང་ཁོང་ཉིད་ཡིན། ། ང་རང་མ་གཏོགས་དཀོན་མཆོག་གཞན་ཞིག་མེད། ། ངས་ནི་གསོད་ཅིང་ངས་ནི་གསོན་དུ་འཇུག ། ངས་ནི་རྨ་ཁ་བཟོ་ཞིང་དྲག་གསོ་བྱེད། ། སུས་ཀྱང་ང་ཡི་ལག་ནས་འཁྱེར་མི་ནུས། །
DEU 32:40 བདག་གིས་ལག་པ་ནམ་མཁའི་ཕྱོགས་དུ་བསྒྲེངས། ། ང་རང་ནམ་ཡང་གསོན་པར་མནའ་བསྐྱལ་ལོ། །
DEU 32:41 བདག་གིས་འོད་འཁྱུག་རལ་གྲི་བརྡར་ནས་ནི། ། ལག་ཏུ་ཉེས་ཆད་གཅོད་པའི་དབང་ཐོགས་དུས། ། དགྲ་བོ་རྣམས་ལ་ཤ་འཁོན་རྩོད་པ་དང་། ། བདག་ལ་སྡང་བ་རྣམས་ལ་ལན་འཇལ་ལོ། །
DEU 32:42 བསད་པའི་མི་དང་བཙོན་པ་རྣམས་ཀྱི་ཁྲག ། བདག་གི་མདའ་མོས་འཐུང་ཞིང་བཟི་བར་འགྱུར། ། ང་ཡི་རལ་གྲིས་ཤ་ནི་བཟའ་འགྱུར་ཏེ། ། དགྲ་བོའི་དཔོན་པོ་རྣམས་ཀྱི་ཤ་བཟའ་འོ། །
DEU 32:43 ཀྱེ་ཀྱེ་མི་རིགས་ཀུན་གྱིས་ཉོན་ཅིག་དང་། ། ཁོང་གི་འབངས་དང་མཉམ་དུ་དགའ་བར་གྱིས། ། ཁོང་གིས་རང་གི་ཞབས་ཕྱིའི་ཁྲག་ལན་རྩོད། ། རང་གི་དགྲ་ལས་དགྲ་ཤ་ལེན་པ་དང་། ། ཁོང་གིས་ཉིད་ཀྱི་ཡུལ་ཁམས་གཙང་མར་མཛད། ། ཉིད་ཀྱི་འབངས་མི་བླུ་བར་འགྱུར་བས་སོ། །ཞེས་གསུངས་པའོ། །
DEU 32:44 དེ་ནས་མོ་ཤེ་དང་ནུན་གྱི་བུ་ཡོ་ཤུ་ཨ་གཉིས་ཀ་ཡོང་ནས་མགུར་དེའི་གསུང་ཐམས་ཅད་མི་རྣམས་ཀྱི་རྣ་བར་བསྒྲགས།
DEU 32:45 མོ་ཤེ་ཡིས་གསུང་དེ་ཐམས་ཅད་ཡེས་ར་ཨེལ་པ་ཀུན་ལ་བསྒྲགས་ཚར་རྗེས།
DEU 32:46 དེ་དག་ལ་འདི་ལྟར། ངས་དེ་རིང་ཁྱོད་རྣམས་ལ་བསླབས་པའི་བཀའ་ཐམས་ཅད་ཡིད་ལ་ཟུངས་ཤིག དེ་ནས་ཁྱོད་རྣམས་ཀྱིས་རང་གི་བུ་རྒྱུད་ལ་བཀའ་ཁྲིམས་འདིའི་བཀའ་ཐམས་ཅད་གཟབ་གཟབ་ངང་བསྒྲུབ་པར་གདམས་ཆོག་པ་ཡིན།
DEU 32:47 གང་ལ་ཞེ་ན། བཀའ་འདི་དག་སྟོང་པ་མ་ཡིན་ཏེ། དེ་ནི་ཁྱོད་རྣམས་ཀྱི་ཚེ་སྲོག་ཡིན། བཀའ་འདི་བརྒྱུད་ནས་ཁྱོད་རྣམས་ཡོར་དན་གཙང་པོའི་ཕ་རོལ་ཏུ་ཕྱིན་ཏེ་བདག་གིར་འཛིན་པའི་ཡུལ་དེར་ཡུན་རིང་པོར་འཚོ་ཐུབ་པ་ཡིན་ཞེས་གསུངས་སོ། །
DEU 32:48 ཉིན་མོ་དེ་ལ་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།
DEU 32:49 ཡེ་རུ་ཀོ་ཡི་དྲང་ཐད་དུ་ཡོད་པའི་མོ་ཨབ་ཡུལ་དུ། ཨ་བཱ་རིམ་རི་རྒྱུད་ཀྱི་རི་བོ་ནེ་བོའི་སྟེང་ལ་འགོས་ཏེ། ངས་ཡེས་ར་ཨེལ་པ་རྣམས་ལ་ས་སྐལ་དུ་སྦྱིན་པའི་ཀ་ན་ཨན་ཡུལ་ལ་ལྟོས་ཤིག
DEU 32:50 ཁྱོད་ཀྱི་སྤུན་ཟླ་ཨ་རོན་རི་བོ་ཧོར་དུ་འདས་ནས་རང་གི་མེས་པོ་རྣམས་དང་མཉམ་དུ་འཛོམས་པ་ཇི་བཞིན། ཁྱོད་ཀྱང་རང་ཉིད་འགོས་པའི་རི་བོ་དེར་འདས་ནས་མེས་པོ་རྣམས་དང་མཉམ་དུ་འཛོམ་ངེས་ཡིན།
DEU 32:51 ཅི་ལ་ཞེ་ན། ཁྱོད་ཅག་གིས་ཟིན་ཞེས་པའི་དབེན་སྟོང་གི་མེ་རི་བཱ་ཀཱ་དེ་སི་བྱ་བའི་ཆུ་འགྲམ་དུ། ཡེས་ར་ཨེལ་པའི་དཀྱིལ་ནས་ང་དང་འགལ་ཞིང་། ཡེས་ར་ཨེལ་པའི་ཁྲོད་དུ་ང་དམ་པར་མ་བརྩིས་པ་ཡིན་ནོ། །
DEU 32:52 དེར་བརྟེན་བདག་གིས་ཡེས་ར་ཨེལ་པ་རྣམས་ལ་སྦྱིན་པའི་ཡུལ་དེ་ཁྱོད་ཀྱིས་རྒྱང་ནས་མཐོང་ན་ཡང་། ཁྱོད་དེར་འགྲོ་མི་ནུས་སོ་ཞེས་བཀའ་བསྩལ་ཏོ། །
DEU 33:1 འདི་ནི་དཀོན་མཆོག་གི་སྐྱེས་བུ་མོ་ཤེ་ཚེ་ལས་མ་འདས་པའི་སྔོན་དུ། ཡེས་ར་ཨེལ་པ་རྣམས་ལ་གནང་བའི་བྱིན་རླབས་ཡིན་ཏེ།
DEU 33:2 ཁོང་གིས་འདི་ལྟར། ཡ་ཝཱེ་རི་བོ་སི་ནཱ་ནས་ཕེབས་ཤིང་། ། སེ་ཨིར་ཡུལ་ནས་ཁོ་ཚོར་འོད་ཟེར་སྤྲོས། ། རི་བོ་ཕཱ་རན་ཕྱོགས་ནས་འོད་དུ་བཀྲམས། ། སྐྱེས་བུ་དམ་པ་ཁྲི་ཕྲག་མཉམ་དུ་ཕེབས། ། མེ་དཔུང་བཀའ་ཁྲིམས་ཕྱག་གཡས་སུ་ཐོགས་སོ། །
DEU 33:3 ཁྱེད་ནི་དངོས་གནས་རང་གི་མི་ལ་བྱམས། ། སྐྱེས་བུ་དམ་པ་ཁྱེད་ཀྱི་ཕྱག་ཏུ་གནས། ། ཁྱེད་ཀྱི་ཞབས་དྲུང་ཁོ་རྣམས་གུས་ཕྱག་འབུལ། ། ཀུན་གྱིས་ཁྱེད་ཀྱི་བཀའ་རྣམས་ཉམས་ལེན་བྱ། །
DEU 33:4 མོ་ཤེས་ང་ཚོར་བཀའ་ཁྲིམས་བསླབས་པ་དང་། ། དེ་ནི་ཡ་ཀོབ་ཚོགས་ཀྱི་ནོར་སྐལ་ཡིན། །
DEU 33:5 དམངས་ཀྱི་འགོ་གཙོ་ཡེས་ར་ཨེལ་པ་ཡི། ། ཚོ་པ་ཁག་དང་མཉམ་དུ་འཛོམས་དུས་སུ། ། ཡ་ཝཱེ་ཡེ་ཤུ་རུན་དུ་རྒྱལ་པོར་བཞུགས། །
DEU 33:6 རུ་བེན་འཚོ་ཞིང་འཆི་བར་མི་འགྱུར་ཞིང་། ། ཁོ་ཡི་མི་གྲངས་ཉུང་དུ་མི་འཕྲི་སྨོན། །ཞེས་གསུངས་སོ། །
DEU 33:7 ཡང་ཡ་ཧུ་དཱའི་སྐོར་ལ་ཁོང་གིས་འདི་ལྟར། ཡ་ཝཱེ་ཡ་ཧུ་དཱ་ཡི་སྐད་ལ་གསོན། ། ཁོ་ནི་རང་གི་མི་རིགས་རྩར་འཁྲིད་རོགས། ། ཁོས་ནི་རང་གི་དོན་དུ་ལག་པས་འཐབ། ། ཁོ་ལ་རོགས་རམ་མཛད་ནས་དགྲ་འགོག་རོགས། །ཞེས་གསུངས་སོ། །
DEU 33:8 ཡང་ལེ་ཝིའི་སྐོར་ལ་ཁོང་གིས་འདི་ལྟར། ཁྱེད་ཀྱི་ཐུའུ་མིམ་དང་ནི་ཨུའུ་རིམ་གཉིས། ། དད་གུས་ཆེ་བའི་ལེ་ཝིར་དབང་བར་མཛོད། ། མཱ་སཱ་ཡུལ་ནས་ཁྱེད་ཀྱིས་ཚོད་བགམ་ཅིང་། ། མེ་རི་བཱ་ཡི་ཆུ་ཁར་རྩོད་གླེང་མཛད། །
DEU 33:9 ལེ་ཝི་པ་ཡིས་ཁྱེད་ཀྱི་བཀའ་བརྩིས་ཤིང་། ། ཁྱེད་ཀྱི་ཞལ་ཆད་བསྲུངས་པའི་དབང་གིས་ནི། ། རང་གི་ཕ་མའི་སྐོར་ལ་འདི་ལྟར་སྨྲས། ། ངེད་ཀྱིས་ཁོང་ཚོར་ལྟ་སྐྱོང་བྱས་པ་མིན། ། རང་གི་སྤུན་ཟླ་རྣམས་ཀྱང་ཁས་མ་བླངས། ། རང་གི་བུ་ཕྲུག་རྣམས་ཀྱང་ངོ་མི་ཤེས། །
DEU 33:10 ཁོ་ཚོས་ཡ་ཀོབ་ལ་ནི་སྲོལ་ཡིག་དང་། ། ཡེས་ར་ཨེལ་ལ་ཁྱེད་ཀྱི་བཀའ་ཁྲིམས་སྟོན། ། ཁོ་ཚོས་ཁྱེད་ཀྱི་དྲུང་དུ་བདུག་སྤོས་འཇོག ། སྦྱིན་སྲེག་ཁ་ཚང་ཁྱེད་ཀྱི་མཆོད་ཁྲིར་འབུལ། །
DEU 33:11 ཀྱེ་ཀྱེ་ཡ་ཝཱེ་ཁྱེད་ཀྱིས་དེའི་ནུས་པར། ། བྱིན་གྱིས་བརླབས་ཤིང་ལག་ནས་སྒྲུབ་པ་ཡི། ། ལས་ཀ་རྣམས་ལ་ཁྱེད་ཐུགས་དགྱེས་པར་མཛོད། ། ལངས་ནས་ཁོ་ཚོར་ངོ་རྒོལ་བྱེད་པ་དང་། ། སྡང་མཁན་རྣམས་ཀྱི་སྐེད་པ་བཅག་ནས་ནི། ། དེ་རྣམས་ཡང་བསྐྱར་ལངས་ཐབས་མེད་པར་མཛོད། །ཅེས་གསུངས་སོ། །
DEU 33:12 ཡང་པེན་ཡཱ་མེན་གྱི་སྐོར་ལ་ཁོང་གིས་འདི་ལྟར། ཡ་ཝཱེས་གཅེས་པ་ཁོང་གི་འཁྲིས་སུ་བདེ་བར་གནས། ། ཁོང་གིས་ཉི་མ་གང་པོར་དེ་ལ་སྐྱབས་མཛད་ཅིང་། ། དེ་ནི་ཁོང་གི་ཕྲག་པ་གཉིས་ཀྱི་དབར་ནས་སྡོད། །ཅེས་གསུངས་སོ། །
DEU 33:13 ཡང་ཡོ་སེབ་ཀྱི་སྐོར་ལ་ཁོང་གིས་འདི་ལྟར། ས་ལ་ཡ་ཝཱེའི་བྱིན་རླབས་འཐོབ་གྱུར་ཅིག ། གནམ་ནས་འབབ་པའི་ལེགས་སྐྱེས་རིན་ཆེན་དང་། ། ས་ཡི་གཏིང་ནས་ཐོན་པའི་ཆུ་མིག་དང་། །
DEU 33:14 ཉི་མས་བསྐྱེད་པའི་འབྲས་བུ་མཆོག་གྱུར་དང་། ། ཟླ་བས་བསྐྱེད་པའི་ཐོན་འབྲས་ཕུལ་བྱུང་ཅན། །
DEU 33:15 གནའ་ཡི་རི་བོའི་རྩི་ཤིང་མཆོག་རྣམས་དང་། ། རྟག་བརྟན་རི་ཡི་ལོ་ཏོག་རྣམས་ཀྱི་ཕུད། །
DEU 33:16 ས་གཞིའི་སྐྱེ་དངོས་མཆོག་དང་ཡོད་དོ་ཅོག ། ཚེར་མའི་གསེང་དུ་བཞུགས་པའི་ཡ་ཝཱེ་ཡི། ། ཐུགས་རྗེ་བཅས་ནི་ཁོ་ལ་འཐོབ་གྱུར་ཅིག ། འདི་དག་ཡོ་སེབ་སྟེང་ལ་འབབ་པར་ཤོག ། སྤུན་ཟླའི་ཁྲོད་དུ་རྒྱལ་སྲས་ཡིན་པ་དེའི། ། སྤྱི་བོར་བྱིན་རླབས་འདི་རྣམས་འཐོབ་གྱུར་ཅིག །
DEU 33:17 ཁོ་ཡི་བརྗིད་ཉམས་གླང་ཐུག་སྐྱེས་འགོ་བཞིན། ། དེ་ཡི་རྭ་ཅོ་གླང་རྒོད་རྭ་དང་མཚུངས། ། ས་མཐའི་བར་དུ་མི་རྣམས་ལ་བསྣུན་ཅིང་། ། དེ་དག་ཨེ་ཕཱར་ཡིམ་གྱི་འབུམ་ཕྲག་དང་། ། དེ་དག་མཱ་ན་ཤེ་ཡི་སྟོང་ཕྲག་ཡིན། །ཞེས་གསུངས་སོ། །
DEU 33:18 ཡང་ཟེ་བུ་ལུན་གྱི་སྐོར་ལ་ཁོང་གིས་འདི་ལྟར། ཟེ་བུ་ལུན་ཁྱོད་ཕྱི་རུ་དགའ་གྱུར་ཅིག ། ཡེས་སི་ཀཱར་ཡང་གུར་ནང་སྤྲོ་བར་གྱིས། །
DEU 33:19 ཁོ་ཚོས་མི་རྣམས་རི་བོར་འབོད་པ་དང་། ། གནས་དེར་དྲང་བདེན་མཆོད་པ་འབུལ་བར་བྱ། ། གང་ལ་ཞེ་ན་ཁོ་ཚོར་རྒྱ་མཚོ་ནས། ། ལོངས་སྤྱོད་འཛད་མཐའ་མེད་པ་འཐོབ་འགྱུར་ཞིང་། ། བྱེ་མའི་སྦས་གཏེར་རྣམས་ཀྱང་རྙེད་ངེས་ཡིན། །ཞེས་གསུངས་སོ། །
DEU 33:20 ཡང་གཱ་རྡུ་ཡི་སྐོར་ལ་ཁོང་གིས་འདི་ལྟར། གཱ་རྡུ་རྒྱ་ཆེར་གཏོང་མཁན་བདེ་བར་ཤོག ། ཁོ་ནི་གཡུ་རལ་ཅན་བཞིན་འཇབ་ནས་འདུག ། དཔུང་པ་དང་ནི་མགོ་ལྤགས་འགོག་པར་བྱེད། །
DEU 33:21 ཁོས་ནི་རང་ལ་ས་ཆ་གང་བཟང་བདམས། ། དམག་དཔོན་སྐལ་ནི་དེ་རུ་ཡོད་ཕྱིར་རོ། ། ཁོ་རང་འགོ་དཔོན་དང་བཅས་སླེབས་འོངས་ནས། ། ཡ་ཝཱེའི་དྲང་བདེན་དང་ནི་སྲོལ་ཡིག་སྟེ། ། ཡེས་ར་ཨེལ་དང་འབྲེལ་བ་ལག་ལེན་འདེབས། །ཞེས་གསུངས་སོ། །
DEU 33:22 ཡང་དཱན་གྱི་སྐོར་ལ་ཁོང་གིས་འདི་ལྟར། དཱན་ནི་སེང་དར་བཞིན་དུ་པཱ་ཤན་ཡུལ་ནས་མཆོང་། །ཞེས་གསུངས་སོ། །
DEU 33:23 ཡང་ནཱབ་ཐ་ལི་ཡི་སྐོར་ལ་འདི་ལྟར། ཀྱེ་ཀྱེ་ནཱབ་ཐ་ལི་ཁྱོད་ཐུགས་རྗེས་ཁྱབ། ། ཡ་ཝཱེའི་བྱིན་རླབས་ཡོངས་སུ་ཐོབ་པ་དང་། ། ནུབ་ལྷོའི་མཚམས་གཉིས་བདག་གིར་འཛིན་པ་ཡིན། །ཞེས་གསུངས་སོ། །
DEU 33:24 ཡང་ཨ་ཤེར་གྱི་སྐོར་ལ་ཁོང་གིས་འདི་ལྟར། ཨ་ཤེར་ཁོ་ལ་ཐོབ་པའི་བྱིན་རླབས་ནི། ། སྤུན་ཟླ་ཐམས་ཅད་ལས་ཀྱང་ལྷག་པར་ཤོག ། རང་གི་སྤུན་ཟླའི་བཀའ་དྲིན་འཐོབ་པ་དང་། ། རང་གི་རྐང་པ་སྣུམ་ལ་སྦང་གྱུར་ཅིག །
DEU 33:25 ཁྱོད་ཀྱི་སྒོ་གཏན་ལི་དང་ལྕགས་ཡིན་ལ། ། ཁྱོད་ཀྱི་ཉི་མ་ཅི་ལྟར་ཡིན་ལགས་ན། ། ཁྱོད་ཀྱི་སྟོབས་ཀྱང་དེ་དང་མཉམ་པ་འོ། །
DEU 33:26 ཀྱེ་ཀྱེ་ཡེ་ཤུ་རུན་གྱི་དཀོན་མཆོག་དང་། ། འདྲ་མཚུངས་ཡིན་པ་སུ་ཡང་ཡོད་མ་ཡིན། ། ཁྱོད་ལ་རོགས་རམ་མཛད་པའི་ཆེད་དུ་ནི། ། ཨ་སྔོན་དགུང་གི་དབྱིངས་ལ་བཅིབས་པ་དང་། ། བརྗིད་ཉམས་དང་བཅས་བར་སྣང་ཁམས་སུ་ལྡིང་། །
DEU 33:27 གཏན་གནས་དཀོན་མཆོག་ཁྱོད་ཀྱི་སྐྱབས་ཡུལ་ཡིན། ། ཁོང་གི་རྟག་བརྟན་དཔུང་པས་ཁྱོད་རང་བསྐྱོར། ། ཁོང་གིས་ཁྱོད་ཀྱི་མདུན་ནས་དགྲ་རྣམས་སྐྲོད། ། མེད་པར་གྱུར་ཅིག་ཅེས་སུ་ཁོང་གིས་གསུངས། །
DEU 33:28 དེ་བས་ཡེས་ར་ཨེལ་ནི་བདེ་བར་འཚོ། ། འབྲུ་དང་རྒུན་ཆང་གསར་པ་ཐོན་པའི་ཡུལ། ། གནམ་ལས་ཟིལ་ཆར་འབབ་པའི་ས་ཆ་རུ། ། ཡ་ཀོབ་རྒྱུད་ཀྱི་རྩ་བ་འབའ་ཞིག་གནས། །
DEU 33:29 ཀྱེ་ཀྱེ་ཡེས་ར་ཨེལ་ཁྱོད་བདེ་བ་ཡིན། ། ཡ་ཝཱེས་སྐྱོབ་པར་མཛད་པའི་མི་དེ་རྣམས། ། ཁྱོད་དང་འདྲ་བ་སུ་ཞིག་ཡོད་ལགས་སམ། ། ཁོང་ནི་ཁྱོད་ལ་གྲོགས་བྱེད་ཕུབ་དེ་ཡིན། ། ཁྱོད་ཀྱི་བརྗིད་ཉམས་ལྡན་པའི་རལ་གྲི་ཡིན། ། ཁྱོད་ཀྱི་དགྲ་ཡིས་ཁྱོད་ལ་མགོ་བོ་སྒུར། ། ཁྱོད་ཀྱིས་དེ་ཡི་སྒལ་བར་རྡོག་བརྫིས་གཏོང་། །ཞེས་གསུངས་པའོ། །
DEU 34:1 དེ་ཡང་མོ་ཤེ་ཁོང་ཉིད་མོ་ཨབ་ཐང་ནས་རི་བོ་ནེ་བོ་སྟེ། ཡེ་རུ་ཀོའི་དྲང་ཐད་དུ་ཡོད་པའི་རི་བོ་ཕིས་གའི་རྩེ་མོར་འགོས་པ་དང་། དཀོན་མཆོག་ཡ་ཝཱེས་ཡུལ་ཐམས་ཅད་ཁོང་ལ་བསྟན་པ་སྟེ། གིལ་ཨད་ནས་དཱན་གྱི་བར་དང་།
DEU 34:2 ནཱབ་ཐ་ལིའི་ཡུལ་ཐམས་ཅད་དང་། ཨེ་ཕཱར་ཡིམ་དང་མཱ་ན་ཤེའི་ཡུལ་དང་། ཡ་ཧུ་དཱའི་ཡུལ་ཐམས་ཅད་ནས་ནུབ་ཀྱི་རྒྱ་མཚོའི་བར་དང་།
DEU 34:3 ནེ་གུབ་ཡུལ་དང་ཐང་སྟེ། ཏ་ལའི་ཤིང་གི་གྲོང་ཁྱེར་ཡེ་རུ་ཀོའི་གཤོངས་ས་ནས་ཚོ་ཨར་ཡུལ་གྱི་བར་དུ་བསྟན་ཞིང་།
DEU 34:4 དཀོན་མཆོག་ཡ་ཝཱེས་ཁོང་ལ་འདི་སྐད་དུ། ཡུལ་དེ་ནི་བདག་གིས་ཨབ་ར་ཧམ་དང་ཨི་སཱག ཡ་ཀོབ་བཅས་ལ་ངས་ཁྱོད་ཀྱི་བུ་རྒྱུད་ལ་སྦྱིན་པར་བྱའོ་ཞེས་མནའ་དང་བཅས་ཁས་བླངས་པའི་ཡུལ་དེ་ཡིན། ད་ནི་ངས་ཁྱོད་ལ་དངོས་སུ་མཐོང་དུ་བཅུག་ནའང་ཁྱོད་དེར་འགྲོ་བར་མི་བྱའོ་ཞེས་གསུངས་སོ། །
DEU 34:5 དེ་ལྟར་དཀོན་མཆོག་ཡ་ཝཱེའི་ཞབས་ཕྱི་མོ་ཤེ་ནི་དཀོན་མཆོག་ཡ་ཝཱེའི་བཀའ་བཞིན་དུ་མོ་ཨབ་ཡུལ་ནས་ཚེ་ལས་འདས།
DEU 34:6 དཀོན་མཆོག་ཡ་ཝཱེས་ཁོང་ཉིད་མོ་ཨབ་ཡུལ་གྱི་པེད་ཕེ་ཨོར་དྲང་ཐད་ཀྱི་ལུང་པ་རུ་དུར་ལ་བཅུག་ཀྱང་། དེ་རིང་ཉིན་མོའི་བར་དུ་ཁོང་གི་དུར་ས་ཤེས་མཁན་སུ་ཡང་མེད།
DEU 34:7 ཡང་མོ་ཤེ་ཚེ་ལས་འདས་པའི་དུས་སུ་དགུང་ལོ་བརྒྱ་དང་ཉི་ཤུར་སོན་ནའང་། མིག་དབང་མ་ཉམས་པ་དང་ལུས་སྟོབས་ཀྱང་རྒུད་མེད།
DEU 34:8 ཡེས་ར་ཨེལ་པ་རྣམས་ཉིན་སུམ་ཅུའི་རིང་ལ་མོ་ཨབ་ཐང་ནས་མོ་ཤེའི་དོན་དུ་བཤུམས་པ་དང་། དེ་ནས་མོ་ཤེའི་ཆེད་དུ་བཤུམས་ཤིང་མྱ་ངན་ཞུ་བའི་ཉིན་རྣམས་རྫོགས་པ་ཡིན་ནོ། །
DEU 34:9 དེ་ཡང་མོ་ཤེ་ཡིས་ནུན་གྱི་བུ་ཡོ་ཤུ་ཨའི་སྟེང་ལ་ཕྱག་བཞག་པས། ཁོང་ནི་ཤེས་རབ་ཀྱི་ཐུགས་ཉིད་ཀྱིས་ཁྱབ་པར་གྱུར་ཅིང་། ཡེས་ར་ཨེལ་པ་རྣམས་ཀྱིས་ཁོང་ལ་མཉན་ནས། དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་ནང་བཞིན་བསྒྲུབས་སོ། །
DEU 34:10 དེའི་རྗེས་སུ་ཡེས་ར་ཨེལ་གྱི་ནང་དུ་མོ་ཤེ་འདྲ་བའི་ལུང་སྟོན་པ་ཞིག་བྱུང་མ་མྱོང་ལ། དཀོན་མཆོག་ཡ་ཝཱེ་ཁ་རི་ཁ་ཐུག་ཏུ་ཁོང་དང་ཕྲད་ཅིང་ཁོང་མཁྱེན་པ་དང་།
DEU 34:11 དཀོན་མཆོག་ཡ་ཝཱེས་ཁོང་ཨེ་ཅིབ་ཡུལ་དུ་མངགས་ཤིང་། ཕཱར་ཨོལ་དང་དེའི་འཁོར་གཡོག་ཐམས་ཅད་དང་། དེའི་ཡུལ་གྲུ་ཀུན་ཏུ་གྲུབ་རྟགས་དང་ངོ་མཚར་བའི་དོན་སྣ་ཚོགས་བསྟན་པ་དང་།
DEU 34:12 ཡང་མོ་ཤེ་ཡིས་ཡེས་ར་ཨེལ་པ་ཐམས་ཅད་ཀྱི་མཐོང་ལམ་དུ་ནུས་མཐུ་ཆེན་པོ་དང་འཇིགས་སུ་རུང་བའི་དོན་ཆེན་མཐའ་དག་མཛད་པའོ།། །།
JOS 1:1 དཀོན་མཆོག་ཡ་ཝཱེའི་ཞབས་ཕྱི་མོ་ཤེ་ཚེ་ལས་འདས་རྗེས། དཀོན་མཆོག་ཡ་ཝཱེས་མོ་ཤེའི་ཕྱག་རོགས་ཏེ་ནུན་གྱི་བུ་ཡོ་ཤུ་ཨ་ལ་འདི་སྐད་དུ།
JOS 1:2 བདག་གི་ཞབས་ཕྱི་མོ་ཤེ་ཚེ་ལས་འདས་པ་དང་། ད་ལྟ་ཁྱོད་རང་ཡར་ལངས་ནས་འབངས་མི་རྣམས་དང་ལྷན་ཅིག་ཏུ་ཡོར་དན་གཙང་པོ་འདི་བརྒལ་ཏེ། བདག་གིས་ཡེས་ར་ཨེལ་པ་རྣམས་ལ་གནང་བར་འགྱུར་བའི་ཡུལ་དེར་འགྲོ་དགོས།
JOS 1:3 བདག་གིས་མོ་ཤེ་ལ་ཅི་ཞིག་ཁས་བླངས་པ་བཞིན་དུ། བདག་གིས་ཁྱོད་རྣམས་ཀྱིས་གོམ་པ་སྤོ་སའི་ཡུལ་ཐམས་ཅད་ཁྱོད་རྣམས་ལ་གནང་བ་ཡིན།
JOS 1:4 དབེན་སྟོང་དང་ལེ་པཱ་ནོན་ནས་གཙང་པོ་ཆེན་པོ་ཕི་རཱད་ཀྱི་བར་དུ། ཧེད་པ་རྣམས་ཀྱི་ཡུལ་ཀུན་དང་རྒྱ་མཚོ་ཆེན་པོའི་ཉི་མ་ནུབ་མཚམས་བར་ཁྱོད་རྣམས་ཀྱི་ཡུལ་ཁམས་སུ་འགྱུར་ངེས་ཡིན།
JOS 1:5 ཁྱོད་ཀྱི་མི་ཚེ་གང་པོར་སུ་ཡིན་ཡང་ཁྱོད་ཀྱི་མདུན་དུ་ཚུགས་ཐུབ་པ་གཅིག་ཀྱང་མེད། བདག་ནི་ཇི་ལྟར་མོ་ཤེ་དང་མཉམ་དུ་གནས་པ་ཡིན་ན་ཁྱོད་དང་མཉམ་དུ་ཡང་དེ་ལྟར་གནས་ངེས་ཡིན། བདག་གིས་ཁྱོད་རང་མི་བསྐྱུར་ལ་འདོར་བར་ཡང་མི་འགྱུར་རོ། །
JOS 1:6 ཁྱོད་ཀྱིས་འབངས་མི་རྣམས་ལ་བདག་གིས་ཁོ་ཚོའི་ཕ་མེས་ལ་གནང་བར་དམ་བཅས་པའི་ཡུལ་དེ་ས་སྐལ་དུ་འཐོབ་པར་བྱེད་ཆེད་སྙིང་སྟོབས་དང་དཔའ་སེམས་ལྡན་པར་གྱུར་ཅིག
JOS 1:7 ཁྱོད་རང་གང་དུ་སོང་ནའང་དོན་ཀུན་བདེ་བླག་ཡོང་བའི་ཕྱིར། ཞུམ་པ་མེད་པར་སྙིང་རུས་བསྐྱེད་ཅིག ངའི་ཞབས་ཕྱི་མོ་ཤེས་ཁྱོད་ལ་བསྒོས་པའི་བཀའ་ཁྲིམས་ཐམས་ཅད་ནན་བརྩི་ལག་བསྟར་བྱས་ནས་གཡས་གཡོན་གང་ལའང་མ་འཛོལ་ཅིག
JOS 1:8 ཁྱོད་ཀྱིས་མདོ་འདིའི་ནང་ཡི་གེར་བཀོད་པའི་བཀའ་ཐམས་ཅད་ནན་བརྩི་ལག་བསྟར་བྱེད་ཆེད། བཀའ་ཁྲིམས་ཀྱི་མདོ་འདི་ཁྱོད་ཀྱི་ངག་དང་མི་འབྲལ་བར་ཉིན་མཚན་མེད་པར་སྒོམས་ཤིག འདི་ལྟར་བྱས་ན། ཁྱོད་ཀྱི་ལམ་ནི་བདེ་བླག་ཡིན་ཞིང་དོན་ཀུན་འགྲུབ་པར་འགྱུར་རོ། །
JOS 1:9 བདག་གིས་ཁྱོད་ལ་མ་བསྒོས་སམ། ཁྱོད་ཀྱིས་ཞུམ་པ་མེད་པར་སྙིང་རུས་བསྐྱེད་དགོས། ཁྱོད་རང་གང་དུ་སོང་ནའང་ཁྱོད་ཀྱི་དཀོན་མཆོག་ཡ་ཝཱེ་ནི་ཁྱོད་དང་མཉམ་དུ་བཞུགས་པས་མ་འཇིགས་མ་འཚབ་ཅིག་ཅེས་གསུངས་སོ། །
JOS 1:10 དེ་ནས་ཡོ་ཤུ་ཨ་ཡིས་འབངས་མིའི་འགོ་དཔོན་དག་ལ་བཀའ་བསྒོས་ཏེ་ན་རེ།
JOS 1:11 ཉིན་གསུམ་གྱི་ནང་དུ་ཁྱོད་རྣམས་ཡོར་དན་གཙང་པོ་བརྒལ་ནས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ས་སྐལ་དུ་གནང་བའི་ཡུལ་དེ་ལེན་པར་འགྲོ་དགོས་པས། ཁྱོད་རྣམས་སྒར་ས་ཡོངས་སུ་འགྲིམས་ནས་འབངས་རྣམས་ལ་ཁ་ཟས་སྟ་གོན་བྱེད་པར་བསྒོ་དགོས་ཞེས་བསྒོས་སོ། །
JOS 1:12 ཡོ་ཤུ་ཨ་ཡིས་རུ་བེན་པ་རྣམས་དང་གཱ་རྡུ་པ་རྣམས། མཱ་ན་ཤེའི་ཚོ་པ་ཕྱེད་ཀའི་མི་རྣམས་བཅས་ལ་ན་རེ།
JOS 1:13 ཁྱོད་རྣམས་ཀྱིས་དཀོན་མཆོག་ཡ་ཝཱེའི་ཞབས་ཕྱི་མོ་ཤེ་ཡིས་ཁྱོད་ཅག་ལ་བསྒོས་པའི་བཀའ་འདིར་ཕྱིར་དྲན་གྱིས་ཤིག ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་ངལ་གསོ་གནང་ཞིང་ཡུལ་འདི་ཡང་གནང་བར་འགྱུར།
JOS 1:14 ཁྱོད་རྣམས་ཀྱི་ཆུང་མ་དང་བུ་ཕྲུག ཕྱུགས་ཟོག་བཅས་ནི་མོ་ཤེས་ཁྱོད་ཅག་ལ་གནང་བའི་ཡུལ་ཏེ་ཡོར་དན་གཙང་པོའི་ཤར་ཕྱོགས་སུ་བསྡད་ཆོག་མོད། འོན་ཀྱང་ཁྱོད་ཚོའི་ཁྲོད་ཀྱི་དཔའ་རྒོད་སྟོབས་ཅན་རྣམས་ཀྱིས་མཚོན་ཆ་ཁྱེར་ཏེ་སྤུན་རྣམས་ཀྱི་སྔོན་དུ་ཕར་སོང་ནས་དེ་དག་ལ་རོགས་བྱེད་དགོས་ཤིང་།
JOS 1:15 དཀོན་མཆོག་ཡ་ཝཱེས་ཁྱོད་རྣམས་དང་འདྲ་བར་ཁྱོད་ཅག་གི་སྤུན་རྣམས་ལའང་ངལ་གསོ་གནང་བར་མ་ཟད། ཁྱོད་ཅག་གི་དཀོན་མཆོག་ཡ་ཝཱེས་ཁོ་རྣམས་ལ་ས་སྐལ་དུ་གནང་བའི་ཡུལ་དེ་ཐོབ་པའི་སྐབས་སུ། ཁྱོད་རྣམས་ད་གཟོད་དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཡོར་དན་གཙང་པོའི་ཤར་ཕྱོགས་སུ་ཁྱོད་རྣམས་ལ་གནང་བ་དང་། ཁྱོད་རྣམས་ལ་ཐོབ་པའི་ཡུལ་དེ་ལེན་དུ་ལོག་ཆོག་ཅེས་སྨྲས།
JOS 1:16 ཁོ་རྣམས་ཀྱིས་ཡོ་ཤུ་ཨ་ལ་དེའི་ལན་དུ། ཁྱེད་ཀྱིས་ཅི་ཞིག་བྱེད་དགོས་པར་བསྒོས་ན་ངེད་ཅག་གིས་དེ་བཞིན་དུ་བྱེད་ཅིང་། ཁྱེད་ཀྱིས་གང་ཞིག་ལ་འགྲོ་བར་མངགས་ན་ངེད་རྣམས་དེ་རུ་འགྲོའོ། །
JOS 1:17 ངེད་རྣམས་ཀྱིས་དོན་ཐམས་ཅད་ཀྱི་ཐད་ཇི་ལྟར་མོ་ཤེའི་བཀའ་ལ་མཉན་པ་ཡིན་ན། ད་ལྟ་དེ་ལྟར་ཁྱེད་ཀྱི་བཀའ་ལ་མཉན་ངེས་ཡིན། ཁྱེད་ཀྱི་དཀོན་མཆོག་ཡ་ཝཱེ་ནི་མོ་ཤེ་མཉམ་དུ་བཞུགས་པ་བཞིན་ཁྱེད་དང་མཉམ་དུ་བཞུགས་པར་སྨོན།
JOS 1:18 སུ་ཡིན་ཡང་ཁྱེད་ཀྱི་བཀའ་ལ་འགལ་ཞིང་ཁྱེད་ཀྱི་གདམས་པ་ལ་མི་མཉན་ན་དེ་ནི་འཆི་ལམ་དུ་འཇུག་དགོས། ཁྱེད་ཀྱིས་ཞུམ་པ་མེད་པར་སྙིང་རུས་བསྐྱེད་ཅིག་ཅེས་ཞུས་སོ། །
JOS 2:1 དེ་འཕྲལ་དུ། ནུན་གྱི་བུ་ཡོ་ཤུ་ཨ་ཡིས་སིད་ཏིམ་ནས་གསང་སྟབས་ཀྱིས་མི་གཉིས་ལྟ་ཉུལ་པར་བཏང་ཞིང་། ཁྱོད་གཉིས་ཡུལ་དེ་དང་ཡེ་རུ་ཀོ་ལ་ལྐོག་ལྟ་བྱེད་དུ་སོང་ཞིག་ཅེས་བསྒོས་པ་དང་། མི་དེ་གཉིས་སོང་ནས་སྨད་འཚོང་མ་རཱ་ཧབ་ཅེས་པའི་ཁྱིམ་དུ་སླེབས་ཤིང་དེར་ཞག་སྡོད་བྱས།
JOS 2:2 དོ་ནུབ་ཡེས་ར་ཨེལ་པའི་མི་འགའ་ཡུལ་འདིར་ལྟ་ཉུལ་བྱེད་དུ་སླེབས་འདུག་ཅེས་མི་ཞིག་གིས་ཡེ་རུ་ཀོའི་རྒྱལ་པོར་ཞུས་པ་ན།
JOS 2:3 ཡེ་རུ་ཀོའི་རྒྱལ་པོས་རཱ་ཧབ་ཀྱི་རྩར་མི་མངགས་ཏེ། ཁྱོད་སར་སླེབས་ཤིང་ཁྱོད་ཚང་ལ་འཛུལ་བའི་མི་དེ་གཉིས་ནི་ཡུལ་ཐམས་ཅད་ལ་ལྟ་ཉུལ་བྱེད་དུ་ཡོང་བ་ཡིན་པས་སྤྲོད་ཅིག་ཅེས་བཀའ་བབས་པ་ལ།
JOS 2:4 བུད་མེད་ཀྱིས་མི་དེ་གཉིས་སྦས་རྗེས་ན་རེ། མི་དེ་གཉིས་དངོས་གནས་ངའི་སར་སླེབས་བྱུང་ཡང་ཁོ་རྣམས་གང་ནས་ཐོན་པ་བདག་གིས་མི་ཤེས་སོ། །
JOS 2:5 མུན་རུབ་ནས་མཁར་སྒོ་རྒྱག་པའི་དུས་ལ་སླེབས་དུས་ཁོ་གཉིས་ཕྱིར་སོང་བ་རེད། གང་དུ་སོང་བ་ནི་བདག་གིས་མི་ཤེས། ད་ལྟ་ཁྱོད་རྣམས་མྱུར་དུ་ར་མདར་བརྒྱུགས་ན་ཁོ་ཚོའི་རྗེས་ཆོད་ངེས་ཡིན་ཞེས་ལན་བཏབ་བོ། །
JOS 2:6 དོན་དངོས་སུ་བུད་མེད་དེས་ཐོག་མར་མི་དེ་གཉིས་ཁང་ཀླད་དུ་ཁྲིད་ནས་ཁོ་རྣམས་དེར་བཏིངས་ཡོད་པའི་སོ་མ་ར་ཙའི་སོག་མའི་གསེང་དུ་སྦས་པ་ཡིན་ནོ། །
JOS 2:7 དེ་ནས་མི་དེ་རྣམས་ཡོར་དན་གཙང་པོའི་རབ་ཁར་ཁོ་གཉིས་ཀྱི་ར་མདར་བརྒྱུགས་པ་དང་། ཁོ་གཉིས་ཀྱི་ར་མདར་རྒྱུག་མཁན་རྣམས་ཕྱི་རུ་སོང་མ་ཐག་མཁར་སྒོ་བརྒྱབ་པ་རེད།
JOS 2:8 ཁོ་གཉིས་ད་དུང་མ་ཉལ་གོང་ལ། བུད་མེད་དེ་ཁང་ཀླད་དུ་ཁོ་གཉིས་ཀྱི་རྩར་ཡོང་སྟེ་ན་རེ།
JOS 2:9 དཀོན་མཆོག་ཡ་ཝཱེས་ཡུལ་འདི་ཁྱོད་རྣམས་ལ་གནང་ཟིན་པ་ཤེས་པར་མ་ཟད། ཁྱོད་རྣམས་ཀྱི་རྐྱེན་གྱིས་ངེད་ཅག་ནི་དངངས་སྐྲག་སྐྱེས་ཤིང་། ཡུལ་འདིའི་མི་ཐམས་ཅད་ཁྱོད་རྣམས་ཀྱི་མདུན་དུ་དཔའ་ཞུམ་པ་ཡིན།
JOS 2:10 ཅི་ལ་ཞེ་ན། ཁྱོད་རྣམས་ཨེ་ཅིབ་ཡུལ་ནས་ཐོན་པའི་དུས་སུ་དཀོན་མཆོག་ཡ་ཝཱེས་ཁྱོད་ཅག་གི་མདུན་དུ་རྒྱ་མཚོ་དམར་པོའི་ཆུ་ནི་ཅི་ལྟར་སྐམ་པར་མཛད་པ་དང་། ཁྱོད་རྣམས་ཀྱིས་ཡོར་དན་གཙང་པོའི་ཤར་ཕྱོགས་སུ་ཡོད་པའི་ཨེ་མོར་པའི་རྒྱལ་པོ་སི་ཧོན་དང་ཨོག་ཅེས་པ་གཉིས་ལ་ཅི་ཞིག་བྱས་པ་སྟེ། དེ་གཉིས་རྩ་མེད་དུ་བཏང་བ་ངེད་ཅག་གིས་ཐོས་པས་སོ། །
JOS 2:11 ངེད་རྣམས་ཀྱིས་དོན་འདི་དག་ཐོས་ཏེ་སེམས་ཀྱི་དཔའ་ཞུམ་པ་དང་། ཁྱོད་ཅག་གི་རྐྱེན་གྱིས་མི་བློ་སྟོབས་ཅན་ནི་གཅིག་ཀྱང་མེད་དོ། །ཁྱོད་རྣམས་ཀྱི་དཀོན་མཆོག་ཡ་ཝཱེ་ནི་སྟེང་གི་ནམ་མཁའ་དང་འོག་གི་ས་གཞིའི་དཀོན་མཆོག་ལགས་སོ། །
JOS 2:12 ད་ནི་བདག་གིས་ཁྱོད་གཉིས་ལ་དྲིན་བཟོས་པས། ཁྱོད་གཉིས་ཀྱིས་དཀོན་མཆོག་ཡ་ཝཱེ་དཔང་དུ་བཙུགས་ནས་བདག་གི་ཕ་གཞིའང་དྲིན་གྱིས་སྐྱོང་རྒྱུ་ཡིན་པའི་དམ་བཅའ་བར་མ་ཟད།
JOS 2:13 བདག་གི་ཕ་མ་དང་ཕུ་ནུ་མིང་སྲིང་། ཁོ་རྣམས་ལ་གཏོགས་པ་ཐམས་ཅད་ཀྱི་སྲོག་སྐྱོབ་པ་དང་། ངེད་རྣམས་འཆི་བ་ལས་ཐར་བར་བྱེད་རྒྱུ་ཡིན་པའི་དངོས་དཔང་ཞིག་ང་ལ་སྤྲོད་པར་མཛོད་ཅེས་ཞུས་པར།
JOS 2:14 མི་དེ་གཉིས་ཀྱིས་ཁོ་མོར་ན་རེ། གལ་ཏེ་ཁྱོད་ཀྱིས་ངེད་གཉིས་ཀྱི་དོན་འདི་ཕྱི་ལ་མ་བསྒྲགས་ན། ངེད་རྣམས་ནི་ཁྱོད་ཅག་གི་ཚབ་ཏུ་འཆི་དགོས་ཀྱང་ཆོག དཀོན་མཆོག་ཡ་ཝཱེས་ཡུལ་འདི་ངེད་ཅག་ལ་གནང་བའི་ཚེ། ངེད་རྣམས་ཀྱིས་བྱམས་བརྩེ་དང་གཞུང་དྲང་གིས་ཁྱོད་ཚོར་ལྟ་སྐྱོང་བྱེད་ངེས་ཡིན་ཞེས་སྨྲས།
JOS 2:15 དེ་ནས། བུད་མེད་དེའི་ཁང་པ་ནི་ལྕགས་རི་དང་འབྲེལ་ཡོད་ཅིང་ཁོ་མོ་ཡང་ལྕགས་རིའི་སྟེང་དུ་གནས་པས། ཁོ་མོས་མི་དེ་གཉིས་སྒེའུ་ཁུང་ནས་ཐག་པས་མར་བཏང་བ་དང་།
JOS 2:16 ཁོ་མོས་དེ་གཉིས་ལ། རྗེས་སྙེག་མཁན་རྣམས་ཁྱོད་ཅག་དང་འཕྲད་ཉེན་ཡོད་པས་ཁྱོད་ཅག་རི་ཁུལ་དུ་སོང་ནས་དེར་ཉིན་གསུམ་ལ་སྦས་ཏེ། རྗེས་སྙེག་མཁན་རྣམས་ཕྱིར་སླེབས་རྗེས་ད་གཟོད་ཁྱོད་ཅག་རང་གི་ལམ་དུ་ཆས་ཤིག་ཅེས་སྨྲས་པ་ལ།
JOS 2:17 དེ་གཉིས་ཀྱིས་ཁོ་མོར། ཁྱོད་ཀྱིས་འདི་ལྟར་བྱེད་དགོས་པ་སྟེ། དེ་ལྟར་མ་བྱས་ཚེ་ཁྱོད་ཀྱིས་ངེད་ཅག་ལ་མནའ་བསྐྱལ་དུ་བཅུག་པ་དེ་ངེད་ཅག་དང་འབྲེལ་བ་མེད།
JOS 2:18 ངེད་རྣམས་ཡུལ་འདིར་སླེབས་ཚེ། ཁྱོད་ཀྱིས་ཐག་སྐུད་མཚལ་མདོག་ཅན་འདི་ངེད་རྣམས་མར་གཏོང་སའི་སྒེའུ་ཁུང་སྟེང་དུ་འདོགས་དགོས་པར་མ་ཟད། ཁྱོད་ཀྱི་ཕ་མ་དང་སྤུན་ཟླ། དེ་མིན་ཁྱོད་ཀྱི་ཕ་གཞིས་ཀྱི་ཁྱིམ་མི་ཐམས་ཅད་ཁྱོད་ཚང་ལ་འཛོམ་པར་བྱེད་དགོས།
JOS 2:19 སུ་ཞིག་ཁྱོད་ཀྱི་ཁྱིམ་ནས་ཕྱིར་བུད་དེ་སྲང་ལམ་དུ་སོང་ན་དེའི་སྡིག་པ་ནི་ཁོ་རང་ཉིད་ཀྱི་མགོར་འབབ་པ་དང་ངེད་ཅག་ལ་འབྲེལ་བ་མེད། ཁྱོད་ཀྱི་ཁྱིམ་དུ་ཡོད་པ་རྣམས་ལ་གལ་ཏེ་སུ་ཞིག་གིས་གནོད་འཚེ་བཏང་ན་དེའི་ཁྲག་བཞུར་བའི་སྡིག་པ་ནི་ངེད་ཅག་གི་མགོར་འབབ་པ་ཡིན།
JOS 2:20 གལ་ཏེ་ཁྱོད་ཀྱིས་ངེད་ཅག་གི་དོན་འདི་ཕྱི་རུ་བསྒྲགས་ན། ཁྱོད་ཀྱིས་ངེད་ཅག་ལ་འཇོག་ཏུ་བཅུག་པའི་དམ་བཅའ་ནི་ངེད་ཅག་དང་འབྲེལ་བ་མེད་ཅེས་སྨྲས་སོ། །
JOS 2:21 ཡང་ཁོ་མོས། ཁྱོད་རྣམས་ཀྱིས་སྨྲས་པ་བཞིན་དུ་གྱུར་ཅིག་ཅེས་སྨྲས་ཤིང་དེ་དག་འགྲོ་རུ་བཅུག་པ་དང་། ཡང་ཐག་སྐུད་མཚལ་མདོག་ཅན་སྒེའུ་ཁུང་སྟེང་དུ་བཏགས་པ་རེད།
JOS 2:22 ཁོ་གཉིས་རི་ཁུལ་དུ་སླེབས་ནས་རྗེས་སྙེག་མཁན་རྣམས་ཕྱིར་འགྲོ་བའི་བར་དུ་དེར་ཉིན་གསུམ་ལ་བསྡད་པ་དང་། རྗེས་སྙེག་མཁན་རྣམས་ཀྱིས་ལམ་ཧྲིལ་པོར་ཁོ་གཉིས་བཙལ་ཡང་མ་རྙེད་དོ། །
JOS 2:23 དེ་ནས་ཁོ་གཉིས་རི་ལས་མར་བབས་ཏེ་ཆུ་བོ་བརྒལ་ནས་ནུན་གྱི་བུ་ཡོ་ཤུ་ཨའི་དྲུང་དུ་སླེབས་ཤིང་། ཁོ་རྣམས་ལ་ཅི་བྱུང་བའི་དོན་ཐམས་ཅད་ཁོང་ལ་བཤད་པ་དང་།
JOS 2:24 ཡང་ཡོ་ཤུ་ཨ་ལ། དཀོན་མཆོག་ཡ་ཝཱེས་དངོས་གནས་ཡུལ་དེ་ཐམས་ཅད་རང་ཅག་ལ་གནང་བ་དང་། ཡུལ་དེའི་མི་ཐམས་ཅད་ནི་ངེད་རྣམས་ཀྱི་མདུན་དུ་དཔའ་ཞུམ་པ་རེད་ཅེས་སྨྲས་སོ། །
JOS 3:1 ཡོ་ཤུ་ཨ་ནི་ཞོགས་པ་སྔ་མོར་ཡར་ལངས་ཏེ་ཡེས་ར་ཨེལ་པ་རྣམས་དང་མཉམ་དུ་སིད་ཏིམ་དང་བྲལ་ནས་ཡོར་དན་གཙང་པོ་རུ་སླེབས་པ་དང་། གཙང་པོ་བརྒལ་བའི་བར་དུ་དེར་བསྡད་དོ། །
JOS 3:2 ཉིན་གསུམ་འགོར་རྗེས་འགོ་དཔོན་རྣམས་སྒར་ས་ཀུན་ཏུ་འགྲིམས་ནས།
JOS 3:3 འབངས་མི་རྣམས་ལ་འདི་ལྟར། ཁྱོད་རྣམས་ཀྱིས་ཁྱོད་ཀྱི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་། ཡང་མཆོད་དཔོན་ཡིན་པའི་ལེ་ཝི་པ་རྣམས་ཀྱིས་དེ་ཁུར་ནས་འགྲོ་བ་མཐོང་དུས་སྡོད་སའི་གནས་དང་བྲལ་ནས་དེའི་རྗེས་སུ་འབྲང་དགོས།
JOS 3:4 འོན་ཀྱང་ཁྱོད་ཅག་དང་ཞལ་ཆད་ཀྱི་ཤུར་སྒམ་གཉིས་ཀྱི་བར་དུ་ཁྲུ་ཉིས་སྟོང་གི་བར་ཐག་ཡོད་དགོས་ལ། ཞལ་ཆད་ཀྱི་ཤུར་སྒམ་དང་ཉེ་བར་མ་གཅར་ཅིག ཅི་ལ་ཞེ་ན། ཁྱོད་རྣམས་སྔར་ལམ་དེར་སྐྱོད་མ་མྱོང་བས་ཁྱོད་ཅག་བགྲོད་པའི་ལམ་དེ་ཤེས་པའི་ཕྱིར་རོ་ཞེས་བཀའ་བསྒོས།
JOS 3:5 ཡོ་ཤུ་ཨ་ཡིས་འབངས་རྣམས་ལ། སང་ཉིན་དཀོན་མཆོག་ཡ་ཝཱེས་ཁྱོད་རྣམས་ཀྱི་ཁྲོད་དུ་དོན་ངོ་མཚར་ཅན་རྣམས་མཛད་རྒྱུ་ཡིན་པས། ཁྱོད་ཅག་གིས་རང་ཉིད་གཙང་མར་བཟོ་དགོས་ཞེས་བཀའ་བསྒོས།
JOS 3:6 ཡང་ཡོ་ཤུ་ཨ་ཡིས་མཆོད་དཔོན་རྣམས་ལ། ཁྱོད་ཅག་གིས་ཞལ་ཆད་ཀྱི་ཤུར་སྒམ་ཁུར་ནས་འབངས་རྣམས་ཀྱི་སྔོན་དུ་སོང་ཞིག་ཅེས་བཀའ་བསྒོས་པ་ལ། ཁོ་རྣམས་ཀྱིས་ཞལ་ཆད་ཀྱི་ཤུར་སྒམ་ཁུར་ནས་འབངས་རྣམས་ཀྱི་སྔོན་ནས་བསྐྱོད་དོ། །
JOS 3:7 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། དུས་དེ་རིང་ནས་བཟུང་ངས་ཁྱོད་རང་ཡེས་ར་ཨེལ་པ་རྣམས་ཀྱི་མིག་སྔར་མཆོག་ཏུ་གྱུར་བར་བྱ་སྟེ། ང་རང་ནི་ཇི་ལྟར་མོ་ཤེ་དང་མཉམ་དུ་ཡོད་པ་དེ་བཞིན་དུ་ཁྱོད་དང་མཉམ་དུའང་ཡོད་པ་ཁོ་རྣམས་ལ་ཤེས་སུ་འཇུག་གོ །
JOS 3:8 ཁྱོད་ཀྱིས་ཞལ་ཆད་ཀྱི་ཤུར་སྒམ་འཁུར་བའི་མཆོད་དཔོན་རྣམས་ལ། ཁྱོད་ཅག་ཡོར་དན་གཙང་པོའི་འགྲམ་དུ་སླེབས་ཚེ། ཡོར་དན་གཙང་པོའི་ཆུ་ནང་དུ་ལངས་ནས་འདུག་དགོས་ཞེས་བསྒོས་ཤིག་ཅེས་གསུངས་སོ། །
JOS 3:9 ཡོ་ཤུ་ཨ་ཡིས་ཡེས་ར་ཨེལ་པ་རྣམས་ལ། ཁྱོད་རྣམས་ཚུར་ཤོག་ལ་ཁྱོད་ཚོའི་དཀོན་མཆོག་ཡ་ཝཱེའི་བཀའ་ལ་ཉོན་ཅིག་ཅེས་སྨྲས་ཤིང་།
JOS 3:10 ཡོ་ཤུ་ཨ་ཡིས། ལྟོས་དང་། ས་གཞི་ཡོངས་ཀྱི་བདག་པོའི་ཞལ་ཆད་ཀྱི་ཤུར་སྒམ་ནི་ཁྱོད་རྣམས་ཀྱི་སྔོན་དུ་འགྲོ་ཞིང་ཡོར་དན་གཙང་པོར་བསླེབ་པ་དང་། དེ་ནས་ཁྱོད་ཅག་གིས་གཏན་དུ་གསོན་པོར་བཞུགས་པའི་དཀོན་མཆོག་ནི་ཁྱོད་ཚོའི་ཁྲོད་དུ་བཞུགས་པར་མ་ཟད། ཁོང་གིས་ཁྱོད་རྣམས་ཀྱི་མདུན་ནས་ཀ་ན་ཨན་པ་དང་། ཧེད་པ། ཧེ་བི་པ། ཕེ་རེ་ཟི་པ། གིར་གས་པ། ཨེ་མོར་པ། ཡེ་བུ་སི་པ་རྣམས་མཐར་སྐྲོད་གཏོང་ངེས་པ་ཤེས་སོ། །
JOS 3:12 ད་ལྟ་ཁྱོད་རྣམས་ཀྱིས་ཡེས་ར་ཨེལ་གྱི་ཚོ་པའི་ཁྲོད་ནས་མི་བཅུ་གཉིས་འདེམས་དགོས་པ་སྟེ། ཚོ་པ་རེ་ནས་མི་རེ་འདེམས་དགོས།
JOS 3:13 ས་གཞི་ཡོངས་ཀྱི་བདག་པོ་སྟེ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཀྱི་རྐང་པ་ཡོར་དན་གཙང་པོའི་ཆུ་ནང་དུ་སྤོས་པ་ན། ཡོར་དན་གཙང་པོའི་ཆུ་སྟེ་ཡར་ནས་མར་འབབ་པའི་ཆུ་ནི་རྒྱུན་ཆད་ཅིང་ཆུ་རགས་སུ་འགྱིང་བར་འགྱུར་ཞེས་སྨྲས།
JOS 3:14 འབངས་མི་རྣམས་གུར་དང་བྲལ་ནས་ཡོར་དན་གཙང་པོ་བརྒལ་དུ་འགྲོ་དུས། ཞལ་ཆད་ཀྱི་ཤུར་སྒམ་འཁུར་བའི་མཆོད་དཔོན་རྣམས་ནི་འབངས་མི་རྣམས་ཀྱི་སྔོན་དུ་བསྐྱོད་དོ། །
JOS 3:15 སྟོན་ཐོག་བསྡུ་བའི་སྐབས་སུ་ཡོར་དན་གཙང་པོའི་ཆུ་ནི་འགྲམ་གཉིས་སུ་རྒྱས་པ་ཡིན་མོད། འོན་ཀྱང་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཡོར་དན་གཙང་པོར་སླེབས་པ་དང་དེ་ཚོའི་རྐང་པ་ཆུའི་ནང་དུ་སྤོས་མ་ཐག
JOS 3:16 ཡར་ནས་མར་འབབ་པའི་ཆུ་ནི་རྒྱང་ཐག་ཧ་ཅང་རིང་སའི་ཟར་ཐན་གྱི་ཉེ་འགྲམ་དུ་ཡོད་པའི་ཨ་དམ་གྲོང་ཁྱེར་དུ་རྒྱུན་ཆད་ཅིང་ཆུ་རགས་སུ་འགྱིངས་པ་དང་། ཨ་ར་པཱ་རུ་བཞུར་བའི་མཚོ་སྟེ་ཚྭ་མཚོ་ཡི་མར་འབབ་པའི་ཆུ་ནི་རྒྱུན་ཆད་པར་གྱུར་པས། འབངས་མི་རྣམས་ཡེ་རུ་ཀོའི་ཁ་གཏད་ནས་ཆུའི་ཕ་རོལ་ཏུ་བརྒལ།
JOS 3:17 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཡོར་དན་གཙང་པོའི་སྐམ་ས་རུ་བརྟན་པོར་ལངས་པ་དང་། མི་ཐམས་ཅད་ཡོར་དན་གཙང་པོ་བརྒལ་བའི་བར་དུ་ཡེས་ར་ཨེལ་པ་ཐམས་ཅད་སྐམ་ས་ནས་ཕ་རོལ་ཏུ་ཕྱིན་ཏོ། །
JOS 4:1 མི་ཐམས་ཅད་ཡོར་དན་གཙང་པོ་བརྒལ་བ་ན། དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ།
JOS 4:2 ཁྱོད་ཀྱིས་འབངས་རྣམས་ལས་མི་བཅུ་གཉིས་འདེམས་དགོས་པ་སྟེ། ཚོ་པ་རེ་ནས་མི་རེ་འདེམས་པ་དང་།
JOS 4:3 ཁོ་རྣམས་ལ་འདི་སྐད་དུ། ཁྱོད་ཚོས་འདིར་ཡོར་དན་གཙང་པོ་ལས་མཆོད་དཔོན་རྣམས་ལངས་སྡོད་ས་ནས་རྡོ་བཅུ་གཉིས་བླངས་ཏེ་འཁྱེར་བ་དང་། དོ་དགོང་ཁྱོད་རྣམས་སྡོད་སའི་གནས་དེར་འཇོག་དགོས་ཞེས་བསྒོ་བར་བྱའོ་ཞེས་གསུངས།
JOS 4:4 དེ་ནས་ཡོ་ཤུ་ཨ་ཡིས་ཁོས་ཡེས་ར་ཨེལ་པ་རྣམས་ཀྱི་ཁྲོད་དུ་ཚོ་པ་རེ་ནས་མི་རེ་སྟ་གོན་བྱས་པའི་མི་བཅུ་གཉིས་པོ་ཐམས་ཅད་བོས་ཡོང་ཞིང་།
JOS 4:5 ཁོ་རྣམས་ལ་ན་རེ། ཁྱོད་རྣམས་ཡོར་དན་གཙང་པོ་བརྒལ་ནས་ཁྱོད་ཅག་གི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་མདུན་ནས་ཕར་འགྲོ་དགོས་ཤིང་། ཡེས་ར་ཨེལ་གྱི་ཚོ་པ་བཅུ་གཉིས་པོའི་གྲངས་ཀ་ལྟར་མི་རེས་རྡོ་རེ་བླངས་ནས་ཕྲག་ལ་ཁུར་ཅིག
JOS 4:6 རྡོ་འདི་རྣམས་ནི་ཁྱོད་ཚོའི་ཁྲོད་དུ་དཔང་རྟགས་བྱས་ཆོག་པ་སྟེ། རྗེས་སུ་ཁྱོད་ཅག་གི་བུ་རྒྱུད་རྣམས་ཀྱིས་རྡོ་འདི་དག་གི་དོན་གང་ཡིན་པར་དྲིས་ན།
JOS 4:7 ཁྱོད་ཅག་གིས་ཁོ་རྣམས་ལ། འདི་ནི་ཡོར་དན་གཙང་པོའི་ཆུ་བོ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་དྲུང་ནས་རྒྱུན་ཆད་པ་དང་། ཞལ་ཆད་ཀྱི་ཤུར་སྒམ་ཡོར་དན་གཙང་པོ་བརྒལ་བའི་དུས་སུ་ཡོར་དན་གཙང་པོའི་ཆུ་རྒྱུན་ཆད་པར་གྱུར་ཅིང་། རྡོ་འདི་རྣམས་ནི་ཡེས་ར་ཨེལ་པ་རྣམས་ཀྱི་དུས་གཏན་གྱི་དྲན་རྟེན་ཡིན་ཞེས་སྨྲོས་ཤིག་ཅེས་སྨྲས་སོ། །
JOS 4:8 དེ་ནས་ཡེས་ར་ཨེལ་པ་རྣམས་ཀྱིས་ཡོ་ཤུ་ཨ་ཡིས་ཇི་ལྟར་བསྒོས་པ་བཞིན་ཡེས་ར་ཨེལ་པ་རྣམས་ཀྱི་ཚོ་པ་དག་གི་གྲངས་ཀ་ལྟར་ཡོར་དན་གཙང་པོ་ལས་རྡོ་བཅུ་གཉིས་བླངས་ཏེ། ཐམས་ཅད་དཀོན་མཆོག་ཡ་ཝཱེས་ཡོ་ཤུ་ཨ་ལ་ཇི་ལྟར་བཀའ་བསྒོས་པ་བཞིན་དུ་བྱས་ཏེ། ཁོ་ཚོས་རྡོ་རྣམས་ཕར་སྡོད་སའི་གནས་སུ་ཁྱེར་ནས་དེར་བཞག་གོ །
JOS 4:9 ཡོ་ཤུ་ཨ་ཡིས་གཞན་ཡང་རྡོ་བཅུ་གཉིས་ཡོར་དན་གཙང་པོ་རུ་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ལངས་སྡོད་སའི་གནས་སུ་བསླངས་པ་དང་། རྡོ་དེ་རྣམས་ད་ལྟའི་བར་དུ་གནས་དེར་ཡོད་དོ། །
JOS 4:10 དཀོན་མཆོག་ཡ་ཝཱེས་ཡོ་ཤུ་ཨ་ལ་འབངས་རྣམས་ལ་བསྒོ་བར་སྐུལ་སློང་མཛད་པ་སྟེ། མོ་ཤེས་ཡོ་ཤུ་ཨ་ལ་བསྒོས་པའི་བཀའ་ཐམས་ཅད་ལྟར་དོན་རྣམས་བསྒྲུབས་ནས་རྫོགས་པའི་བར་དུ། ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཡོར་དན་གཙང་པོ་རུ་ལངས་བསྡད་ཅིང་། དེ་ནས་འབངས་མི་རྣམས་མགྱོགས་མྱུར་ངང་ཆུ་ལས་བརྒལ་ཏོ། །
JOS 4:11 འབངས་མི་ཐམས་ཅད་གཙང་པོ་ལས་བརྒལ་བ་དང་། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་མཆོད་དཔོན་རྣམས་འབངས་མིའི་མདུན་ནས་ཕ་རོལ་ཏུ་ཕྱིན།
JOS 4:12 རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་བཅས་པ་མོ་ཤེས་ཁོ་ཚོར་ཇི་ལྟར་བཀའ་བསྒོས་པ་བཞིན་དུ། གོ་མཚོན་ཁྱེར་ཏེ་ཡེས་ར་ཨེལ་པ་རྣམས་ཀྱི་མདུན་ནས་ཕར་ཕྱིན་པ་དང་།
JOS 4:13 མི་ཁྲི་ཚོ་བཞི་ཙམ་འཐབ་མོ་བྱེད་པར་སྟ་གོན་བྱས་ཏེ་དཀོན་མཆོག་ཡ་ཝཱེའི་དྲུང་ནས་ཕར་སོང་ཞིང་། ཡེ་རུ་ཀོ་ཡི་ཐང་དུ་སླེབས་ནས་གཡུལ་སར་བསྐྱོད་པར་སྒུག་བསྡད་པ་དང་།
JOS 4:14 ཉིན་དེར་དཀོན་མཆོག་ཡ་ཝཱེས་ཡོ་ཤུ་ཨ་ནི་ཡེས་ར་ཨེལ་པ་རྣམས་ཀྱི་མིག་ནང་ལ་མཆོག་ཏུ་གྱུར་བར་མཛད་ཅིང་། འབངས་རྣམས་ཀྱིས་སྔར་མོ་ཤེ་ལ་ཇི་ལྟར་གུས་གུས་ཞུམ་ཞུམ་བྱས་པ་བཞིན་དུ། ཁོའི་མི་ཚེ་གང་པོར་ཁོ་ལ་གུས་གུས་ཞུམ་ཞུམ་བྱས་སོ། །
JOS 4:15 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ།
JOS 4:16 ཁྱོད་ཀྱིས་བཀའ་ཁྲིམས་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཡོར་དན་གཙང་པོ་ནས་ཡར་འོང་བར་བསྒོས་ཤིག་ཅེས་གསུངས་པ་ལ།
JOS 4:17 ཡོ་ཤུ་ཨ་ཡིས་མཆོད་དཔོན་རྣམས་ལ། ཁྱོད་རྣམས་ཡོར་དན་གཙང་པོ་ནས་ཡར་ཤོག་ཅིག་ཅེས་བསྒོས་སོ། །
JOS 4:18 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་མཆོད་དཔོན་རྣམས་ཡོར་དན་གཙང་པོ་ནས་ཡར་ཐོན་ཞིང་རྐང་མཐིལ་སྐམ་སར་སྤོས་མ་ཐག ཡོར་དན་གཙང་པོའི་ཆུ་ནི་སྔར་གནས་སུ་བཞུར་ཅིང་སྔར་བཞིན་འགྲམ་གཉིས་སུ་རྒྱས་སོ། །
JOS 4:19 ཟླ་དང་པོའི་ཚེས་བཅུ་ཉིན་འབངས་རྣམས་ཡོར་དན་གཙང་པོ་ནས་ཡར་ཐོན་ཞིང་། ཡེ་རུ་ཀོ་ཡི་ཤར་ཕྱོགས་ཏེ་གིལ་གལ་ཡུལ་དུ་སྒར་བཏབ།
JOS 4:20 ཡོ་ཤུ་ཨ་ཡིས་ཁོ་རྣམས་ཀྱིས་ཡོར་དན་གཙང་པོ་ནས་བླངས་པའི་རྡོ་བཅུ་གཉིས་པོ་དེ་གིལ་གལ་ཡུལ་དུ་བསླངས་པ་དང་།
JOS 4:21 ཡེས་ར་ཨེལ་པ་རྣམས་ལ། ཕྱིས་སུ་ཁྱོད་ཅག་གི་བུ་རབས་ཚ་རྒྱུད་ཀྱིས་རང་གི་ཕ་ལ་རྡོ་འདི་རྣམས་ཀྱི་དོན་གང་ཡིན་པ་དྲིས་ན།
JOS 4:22 ཁྱོད་ཅག་གིས་ཁོ་ཚོར་སྔར་ཡེས་ར་ཨེལ་པ་རྣམས་སྐམ་ས་བརྒྱུད་ནས་ཡོར་དན་གཙང་པོ་འདི་བརྒལ་བ་ཡིན་ཞེས་སྨྲོས་ཤིག
JOS 4:23 ཅི་ལ་ཞེ་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་སྔར་ངེད་ཅག་གི་སྔོན་དུ་ངེད་རྣམས་ཚུར་སླེབས་པའི་བར་དུ་རྒྱ་མཚོ་དམར་པོའི་ཆུ་སྐམ་པར་མཛད་པ་ཇི་བཞིན་དུ། ཁྱོད་ཅག་གི་སྔོན་དུ་ཁྱོད་རྣམས་ཚུར་སླེབས་པའི་བར་དུ་ཡོར་དན་གཙང་པོའི་ཆུ་སྐམ་པར་མཛད་པ་དང་།
JOS 4:24 དེ་ནི་ས་སྟེང་གི་མི་ཐམས་ཅད་ཀྱིས་དཀོན་མཆོག་ཡ་ཝཱེའི་ཕྱག་ཟུང་ལ་ནུས་མཐུ་ཆེན་པོ་ལྡན་པ་རྟོགས་པར་བྱེད་པ་དང་། ཁྱོད་རྣམས་ཀྱིས་རྒྱུན་ནས་རྒྱུན་དུ་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་གུས་ཤིང་འཇིགས་པར་བྱེད་པའི་ཕྱིར་ཡིན་ཞེས་སྨྲས་སོ། །
JOS 5:1 ཡོར་དན་གཙང་པོའི་ནུབ་ཕྱོགས་ཀྱི་ཨེ་མོར་པའི་རྒྱལ་པོ་རྣམས་དང་མཚོ་འགྲམ་གྱི་ཀ་ན་ཨན་པའི་རྒྱལ་པོ་རྣམས་ཀྱིས་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཕར་སླེབས་པའི་བར་དུ་ཁོ་ཚོའི་སྔོན་དུ་ཡོར་དན་གཙང་པོའི་ཆུ་སྐམ་པར་མཛད་པ་ཐོས་ནས། དེ་དག་གི་སེམས་ནི་ཡེས་ར་ཨེལ་པ་རྣམས་ཀྱི་རྐྱེན་གྱིས་དཔའ་ཞུམ་པ་དང་བློ་སྟོབས་ཉམས་པར་གྱུར།
JOS 5:2 སྐབས་དེར་དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། ཁྱོད་ཀྱིས་མེ་རྡོ་ཡི་གྲི་བཟོས་ནས་ཡེས་ར་ཨེལ་པའི་སྡེ་ཚན་གཉིས་པར་མཚན་སྐྱི་ཆོད་ཅིག་ཅེས་གསུངས་པ་ལ།
JOS 5:3 ཡོ་ཤུ་ཨ་ཡིས་མེ་རྡོ་ཡི་གྲི་བཟོས་ནས་རི་བོ་ཨ་ར་ལོད་དུ་ཡེས་ར་ཨེལ་པ་རྣམས་ལ་མཚན་སྐྱི་བཅད་དོ། །
JOS 5:4 ཡོ་ཤུ་ཨ་ཡིས་ཡེས་ར་ཨེལ་པ་རྣམས་ལ་མཚན་སྐྱི་གཅོད་པའི་རྒྱུ་མཚན་ཅི་ཡིན་ཞེ་ན། ཨེ་ཅིབ་ཡུལ་ནས་ཐོན་པའི་འབངས་རྣམས་ཏེ་འཐབ་མོ་བྱེད་ཐུབ་པའི་སྐྱེས་པ་ཐམས་ཅད་ནི་ཨེ་ཅིབ་ཡུལ་ནས་ཐོན་རྗེས་ཚང་མ་དབེན་སྟོང་གི་ལམ་བར་དུ་ཚེ་ལས་འདས་པ་དང་།
JOS 5:5 ཨེ་ཅིབ་ནས་ཕྱིར་ཐོན་པའི་འབངས་རྣམས་ནི་མཚན་སྐྱི་བཅད་མྱོང་བ་ཡིན་མོད། འོན་ཀྱང་ཨེ་ཅིབ་ཡུལ་ནས་ཐོན་རྗེས་དབེན་སྟོང་གི་ལམ་བར་དུ་སྐྱེས་པའི་མི་རྣམས་ནི་མཚན་སྐྱི་བཅད་མ་མྱོང་བའི་ཕྱིར་རོ། །
JOS 5:6 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་བཀའ་ལ་མ་མཉན་པས། འབངས་མི་སྟེ་ཨེ་ཅིབ་ཡུལ་ནས་ཐོན་པའི་དམག་མི་ཐམས་ཅད་རྩ་མེད་དུ་འགྲོ་བའི་བར་དུ། ཁོ་རྣམས་ལོ་ངོ་བཞི་བཅུའི་རིང་ལ་དབེན་སྟོང་འགྲིམས་པའོ། །དཀོན་མཆོག་ཡ་ཝཱེས་སྔར་ཁོ་རྣམས་ལ། དཀོན་མཆོག་ཡ་ཝཱེས་ཁོ་ཚོའི་ཕ་མེས་རྣམས་ལ་མནའ་བཞེས་ཤིང་རང་ཅག་ལ་གནང་བར་ཞལ་བཞེས་གནང་བའི་ཡུལ་ཏེ་འོ་མ་དང་སྦྲང་རྩི་བཞུར་བའི་ཡུལ་དེ་ནི་ཁོ་ཚོར་མཐོང་དུ་མི་འཇུག་ཅེས་མནའ་བཞེས་པའོ། །
JOS 5:7 ཁོ་རྣམས་ཀྱི་བུ་རབས་ཚ་རྒྱུད་དེ་ཡ་ཝཱེས་ཁོ་ཚོའི་ཚབ་བྱེད་དུ་སྤེལ་བ་རྣམས་ནི་མཚན་སྐྱི་བཅད་མ་མྱོང་བ་དང་། ལམ་བར་དུ་ཁོ་རྣམས་ལ་མཚན་སྐྱི་མ་བཅད་པས་ཡོ་ཤུ་ཨས་ད་ནི་ཁོ་ཚོར་བཅད་དོ། །
JOS 5:8 འབངས་མི་ཐམས་ཅད་ལ་མཚན་སྐྱི་བཅད་ཚར་ཞིང་། རྨ་ཁ་ཡོངས་སུ་སོས་པའི་བར་དུ་སྒར་ས་རུ་རང་རང་གི་སྡོད་སར་གནས་པའོ། །
JOS 5:9 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། དེ་རིང་ངས་ཁྱོད་ཚོའི་སྟེང་གི་ཨེ་ཅིབ་ཡུལ་གྱི་ངོ་ཚ་དེ་བསྒྲིལ་བར་བྱའོ་ཞེས་གསུངས་པས་ཡུལ་དེའི་མིང་ལ་ད་ལྟའི་བར་དུ་གིལ་གལ་ ཞེས་འབོད་པ་ཡིན།
JOS 5:10 ཡེས་ར་ཨེལ་པ་རྣམས་ཀྱིས་གིལ་གལ་ཡུལ་དུ་སྒར་བཏབ་ཅིང་། ཟླ་དང་པོའི་ཚེས་བཅུ་བཞི་ཉིན་གྱི་དགོང་མོར་ཡེ་རུ་ཀོ་ཡི་ཐང་དུ་པེ་སག་གི་དུས་ཆེན་བསྲུངས།
JOS 5:11 པེ་སག་གི་དུས་ཆེན་གྱི་ཕྱི་ཉིན་ཁོ་ཚོས་ཡུལ་དེའི་ཐོན་རྫས་ཟོས་པ་དང་། ཉིན་མོ་དེར་སྐྱུར་མེད་བག་ལེབ་དང་ཡོས་ཟོས་སོ། །
JOS 5:12 ཁོ་རྣམས་ཀྱིས་ཡུལ་དེའི་ཐོན་རྫས་ཟོས་པ་དང་དེའི་ཕྱི་ཉིན་མཱན་ནཱ་ཆད་པ་རེད། དེ་ནས་བཟུང་ཡེས་ར་ཨེལ་པ་རྣམས་ལ་མཱན་ནཱ་མེད་པར་གྱུར་མོད། འོན་ཀྱང་ལོ་དེར་ཁོ་རྣམས་ཀྱིས་ཀ་ན་ཨན་ཡུལ་གྱི་ཐོན་རྫས་ཟོས་པའོ། །
JOS 5:13 ཡོ་ཤུ་ཨས་ནི་ཡེ་རུ་ཀོ་ལ་ཉེ་བའི་སྐབས་སུ་མགོ་ཡར་བཀྱགས་ནས་བལྟས་ཚེ། བསམ་ཡུལ་ལས་འདས་པ་ཞིག་ལ། ལག་ཏུ་ཤུབས་ལས་བཏོན་པའི་གྲི་བཟུང་བའི་སྐྱེས་བུ་ཞིག་ཁ་གཏད་དུ་ལངས་སྡོད་པ་རེད། ཡོ་ཤུ་ཨ་ནི་ཁོང་གི་དྲུང་དུ་སོང་ནས་ན་རེ། ཁྱེད་ནི་ངེད་ཅག་ལ་རོགས་བྱེད་མཁན་ཡིན་ནམ་ཡང་ན་ངེད་ཅག་གི་དགྲ་ཟླར་རོགས་བྱེད་མཁན་ཡིན་ཞེས་དྲིས་པ་ལ།
JOS 5:14 ཁོང་གིས་ལན་དུ། གང་ཡང་མིན་ཏེ། ང་རང་ནི་དཀོན་མཆོག་ཡ་ཝཱེའི་དཔུང་ཚོགས་ཀྱི་དམག་དཔོན་བྱེད་དུ་འོངས་པ་ཡིན་ཞེས་གསུངས་པ་ལ། ཡོ་ཤུ་ཨ་ཡིས་ཁ་སར་གཏད་ནས་ཕྱག་བཙལ་ཞིང་། བདག་གི་གཙོ་བོས་གཡོག་པོ་ལ་བཀའ་ཅི་ཞིག་གནང་ངམ་ཞེས་ཞུས།
JOS 5:15 དཀོན་མཆོག་ཡ་ཝཱེའི་དཔུང་ཚོགས་ཀྱི་དམག་དཔོན་གྱིས་ཡོ་ཤུ་ཨ་ལ་འདི་སྐད་དུ། ཁྱོད་རང་ལངས་ནས་འདུག་ས་འདི་ནི་གནས་དམ་པ་ཡིན་པས། ཁྱོད་ཀྱིས་བསིལ་ལྷམ་ཕུད་ཅིག་ཅེས་གསུངས་པ་ལ། ཡོ་ཤུ་ཨ་ཡིས་དེ་ལྟར་བྱས་སོ། །
JOS 6:1 ཡེས་ར་ཨེལ་པ་རྣམས་ཀྱི་ཕྱིར་ཡེ་རུ་ཀོ་ཡི་མཁར་སྒོ་ནི་བརྟན་པོར་བརྒྱབ་ཅིང་འགྲོ་འོང་བྱེད་མཁན་མེད་པ་རེད།
JOS 6:2 དཀོན་མཆོག་ཡ་ཝཱེས་ཡོ་ཤུ་ཨ་ལ་སྐུལ་སློང་གནང་སྟེ་འདི་སྐད་དུ། ལྟོས་དང་། བདག་གིས་ཡེ་རུ་ཀོ་དང་དེའི་རྒྱལ་པོ། དེ་མིན་དཔའ་བོ་རྩལ་ཅན་ཐམས་ཅད་ཁྱོད་ཀྱི་ལག་ཏུ་སྤྲད་ཟིན་པ་ཡིན།
JOS 6:3 ཁྱོད་ཚོའི་དམག་མི་ཐམས་ཅད་ཀྱིས་མཁར་འདིར་སྐོར་བ་རྒྱག་དགོས་པ་སྟེ། ཉིན་རེར་སྐོར་བ་རེ་རྒྱག་དགོས་པ་དང་། ཉིན་དྲུག་གི་རིང་ལ་དེ་ལྟར་བྱེད་དགོས།
JOS 6:4 མཆོད་དཔོན་བདུན་གྱིས་ལུག་གི་རྭ་དུང་བདུན་ཁྱེར་ནས་ཞལ་ཆད་ཀྱི་ཤུར་སྒམ་གྱི་སྔོན་དུ་བསྐྱོད་དགོས་པ་དང་། ཉིན་བདུན་པར་སླེབས་ཚེ་ཁྱོད་རྣམས་ཀྱིས་མཁར་ལ་སྐོར་བ་བདུན་རྒྱག་དགོས་ཤིང་། མཆོད་དཔོན་གྱིས་ཀྱང་དུང་འབུད་དགོས།
JOS 6:5 ཁོ་ཚོའི་རྭ་དུང་གི་སྐད་རྒྱང་འབུད་བྱེད་པ་དང་། ཁྱོད་རྣམས་ཀྱིས་སྐད་དེ་ཐོས་པ་ན་འབངས་མི་རྣམས་ཀྱིས་སྐད་ཆེན་པོ་རྒྱག་དགོས། དེ་ནས་ལྕགས་རི་བརྡིབ་པར་འགྱུར་ཞིང་མི་རེ་རེ་ཐད་ཀར་མདུན་དུ་སྐྱོད་ཅིག་ཅེས་གསུངས།
JOS 6:6 ནུན་གྱི་བུ་ཡོ་ཤུ་ཨ་ཡིས་མཆོད་དཔོན་རྣམས་བོས་ཡོང་ནས་དེ་དག་ལ། ཁྱོད་རྣམས་ཀྱིས་ཞལ་ཆད་ཀྱི་ཤུར་སྒམ་འཁུར་ལ་ཤོག མཆོད་དཔོན་བདུན་གྱིས་ལུག་གི་རྭ་དུང་བདུན་ཁྱེར་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་སྔོན་དུ་བསྐྱོད་དགོས་ཞེས་བསྒོས་ཤིང་།
JOS 6:7 ཡང་འབངས་མི་རྣམས་ལ། ཁྱོད་རྣམས་སྔོན་དུ་སོང་ནས་མཁར་ལ་སྐོར་བ་རྒྱོབ་ཅིག མཚོན་ཆ་འཛིན་མཁན་རྣམས་ནི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་སྔོན་དུ་བསྐྱོད་དགོས་ཞེས་སྨྲས་སོ། །
JOS 6:8 ཡོ་ཤུ་ཨ་ཡིས་འབངས་མི་རྣམས་ལ་གཏམ་སྨྲས་ཚར་རྗེས། མཆོད་དཔོན་བདུན་གྱིས་ལུག་གི་རྭ་དུང་བདུན་ཁྱེར་ནས་དཀོན་མཆོག་ཡ་ཝཱེའི་མདུན་དུ་དུང་བུས་ཤིང་། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་ཁོ་རྣམས་ཀྱི་རྗེས་ནས་ཕེབས་སོ། །
JOS 6:9 མཚོན་ཆ་འཛིན་མཁན་རྣམས་ནི་རྭ་དུང་འབུད་པའི་མཆོད་དཔོན་རྣམས་ཀྱི་སྔོན་དུ་བསྐྱོད་ཅིང་། རུ་ཁག་རྗེས་མ་ཞལ་ཆད་ཀྱི་ཤུར་སྒམ་གྱི་རྗེས་སུ་འབྲངས་ནས་བསྐྱོད་པ་དང་། མཆོད་དཔོན་རྣམས་ཀྱིས་རྭ་དུང་འབུད་ཀྱིན་བསྐྱོད་དོ། །
JOS 6:10 ཡོ་ཤུ་ཨ་ཡིས་འབངས་མི་རྣམས་ལ། བདག་གིས་ཁྱོད་རྣམས་ལ་སྐད་རྒྱག་པར་བསྒོ་བའི་ཉིན་མོའི་བར་དུ་ཁྱོད་རྣམས་ཀྱིས་སྐད་རྒྱག་མི་རུང་ལ་སྐད་འདོན་ཡང་མི་རུང་། ཐ་ན་སྐད་ཆ་ཚིག་གཅིག་ཀྱང་ཁྱོད་རྣམས་ཀྱི་ངག་ལས་འཆོར་མི་རུང་སྟེ། སྐབས་དེར་སླེབས་ཚེ་ད་གཟོད་སྐད་རྒྱག་དགོས་ཞེས་བསྒོས།
JOS 6:11 དེ་ལྟར་ཁོས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་མཁར་ལ་སྐོར་དུ་བཅུག་པ་དང་། མཁར་ལ་སྐོར་བ་གཅིག་བརྒྱབ་ཅིང་། མི་རྣམས་ཕྱིར་སྒར་ས་རུ་སླེབས་ནས་དེར་ཞག་སྡོད་བྱས།
JOS 6:12 ཡོ་ཤུ་ཨ་ནི་ཞོགས་པ་སྔ་མོར་ཡར་ལངས་པ་དང་། མཆོད་དཔོན་རྣམས་ཀྱིས་ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཁུར་ཏོ། །
JOS 6:13 མཆོད་དཔོན་བདུན་གྱིས་ལུག་གི་རྭ་དུང་བདུན་ཁྱེར་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་སྔོན་དུ་རྭ་དུང་འབུད་ཀྱིན་བསྐྱོད་པ་དང་། མཚོན་ཆ་འཛིན་མཁན་རྣམས་ནི་ཁོ་ཚོའི་སྔོན་དུ་བསྐྱོད་ལ། རུ་ཁག་རྗེས་མ་ནི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་རྗེས་སུ་འབྲངས་ནས་བསྐྱོད་ཅིང་། མཆོད་དཔོན་རྣམས་ཀྱིས་རྭ་དུང་འབུད་ཀྱིན་མདུན་དུ་བསྐྱོད་དོ། །
JOS 6:14 ཉིན་གཉིས་པར་འབངས་རྣམས་ཀྱིས་མཁར་ལ་སྐོར་བ་ཐེངས་གཅིག་བརྒྱབ་ནས་ཕྱིར་སྒར་ས་རུ་ལོག་ཅིང་། ཉིན་དྲུག་གི་རིང་ལ་དེ་ལྟར་བྱས་སོ། །
JOS 6:15 ཉིན་བདུན་པའི་ཞོགས་པར། སྐྱ་རེངས་ཤར་དུས་སུ་ཁོ་རྣམས་ཡར་ལངས་ནས་སྔར་བཞིན་མཁར་ལ་སྐོར་བ་ཐེངས་བདུན་བརྒྱབ། ཉིན་དེ་ཁོ་ནར་མཁར་ལ་སྐོར་བ་ཐེངས་བདུན་བརྒྱབ།
JOS 6:16 ཐེངས་བདུན་པར་སླེབས་ནས་མཆོད་དཔོན་རྣམས་ཀྱིས་རྭ་དུང་འབུད་སྐབས། ཡོ་ཤུ་ཨ་ཡིས་འབངས་མི་རྣམས་ལ། དཀོན་མཆོག་ཡ་ཝཱེས་མཁར་འདི་ཁྱོད་རྣམས་ལ་སྤྲད་ཟིན་པས་སྐད་རྒྱོབ་ཅིག
JOS 6:17 མཁར་འདི་ནི་བསྔོ་དགོས་ཏེ། མཁར་འདི་དང་འདིའི་ནང་དུ་ཡོད་པ་ཐམས་ཅད་དཀོན་མཆོག་ཡ་ཝཱེ་ལ་འབུལ་དགོས། སྨད་འཚོང་མ་རཱ་ཧབ་ཀྱིས་ང་ཚོས་མངགས་པའི་བང་ཆེན་སྦས་པ་ཡིན་པས། ཁོ་མོ་དང་ཁོ་མོའི་ཁྱིམ་དུ་ཡོད་པ་ཐམས་ཅད་ཁོ་ན་གསོན་པོར་གནས་ཆོག་པ་ཡིན།
JOS 6:18 ཁྱོད་རྣམས་ལ་མཚོན་ན། ཁྱོད་རྣམས་ཀྱིས་བསྔོ་བར་འོས་པའི་དངོས་པོ་དེ་བླངས་ནས་ཡེས་ར་ཨེལ་གྱི་སྒར་ཧྲིལ་པོ་ཐག་ཞོར་འབྲེང་འདྲུད་བྱེད་པ་དང་སྒར་ཧྲིལ་པོར་དམོད་མོ་ཐེབས་སུ་འཇུག་ཉེན་ཡོད་པས། གཟབ་གཟབ་གྱིས་ལ་བསྔོ་བར་འོས་པའི་དངོས་པོ་དེ་མ་ལེན་ཞིག
JOS 6:19 གསེར་དངུལ་ལི་ལྕགས་སོགས་ཀྱི་སྣོད་ཆས་ཐམས་ཅད་ནི་དཀོན་མཆོག་ཡ་ཝཱེ་ལ་དམ་པ་ཡིན་ཞིང་ཁོང་གི་དཀོར་མཛོད་དུ་འཇུག་དགོས་ཞེས་བསྒོས་སོ། །
JOS 6:20 དེ་ནས་འབངས་མི་རྣམས་ཀྱིས་སྐད་བརྒྱབ་ཅིང་མཆོད་དཔོན་རྣམས་ཀྱིས་ཀྱང་རྭ་དུང་བུས། འབངས་མི་རྣམས་ཀྱིས་རྭ་དུང་སྐད་ཐོས་པ་དང་སྐད་ཆེན་པོ་བརྒྱབ་པས། མཁར་གྱི་ལྕགས་རི་བརྡིབས་པ་དང་འབངས་རྣམས་ཡར་མཁར་གྱི་ནང་དུ་སོང་ཞིང་། མི་རེ་རེ་ཐད་ཀར་མདུན་དུ་བསྐྱོད་ནས་མཁར་བླངས་པ་དང་།
JOS 6:21 ཡང་མཁར་གྱི་ནང་དུ་ཡོད་པ་ཐམས་ཅད་དེ་ཕོ་མོ་རྒན་གཞོན་དང་། བ་གླང་དང་ལུག བོང་བུ་བཅས་སུ་དང་གང་ཡིན་ཡང་ཐམས་ཅད་གྲི་ཡིས་གཙང་གསོད་བྱས་སོ། །
JOS 6:22 ཡོ་ཤུ་ཨ་ཡིས་ཡུལ་དེར་ལྟ་ཉུལ་བྱེད་མཁན་མི་གཉིས་ལ། ཁྱོད་རྣམས་སྨད་འཚོང་མ་དེའི་ཁྱིམ་དུ་སོང་ནས། ཁྱོད་ཚོས་ཁོ་མོ་ལ་ཇི་ལྟར་དམ་བཅས་པ་བཞིན་དུ། བུད་མེད་དེ་དང་ཁོ་མོའི་ནང་མི་ཐམས་ཅད་དེ་ནས་ཕྱི་རུ་ཁྲིད་ཤོག་ཅེས་བསྒོས་པ་ལ།
JOS 6:23 ལྟ་ཉུལ་བྱེད་མཁན་གཞོན་ནུ་དེ་གཉིས་ནང་དུ་ཕྱིན་ཅིང་། རཱ་ཧབ་དང་ཁོ་མོའི་ཕ་མ། ཕུ་ནུ། ཁོ་མོ་ལ་ཅི་ཞིག་ཡོད་པ་ཐམས་ཅད་དང་། དེར་མ་ཟད་ཁོ་མོའི་ནང་མི་དང་བཅས་ཚང་མ་ཕྱི་རུ་ཁྲིད་ཡོང་ནས་ཡེས་ར་ཨེལ་པའི་སྒར་གྱི་ཕྱི་རོལ་ཏུ་བཀོད་སྒྲིག་བྱས།
JOS 6:24 དེ་ནས་འབངས་རྣམས་ཀྱིས་གསེར་དངུལ་ལི་ལྕགས་སོགས་ཀྱི་སྣོད་ཆས་ཐམས་ཅད་དཀོན་མཆོག་ཡ་ཝཱེའི་གུར་མཆོག་གི་དཀོར་མཛོད་དུ་བཞག་པ་ཕུད། མཁར་དང་དེའི་ནང་དུ་ཡོད་པ་ཐམས་ཅད་མེར་བསྲེགས་པ་རེད།
JOS 6:25 འོན་ཀྱང་སྨད་འཚོང་མ་རཱ་ཧབ་ཀྱིས་ཡོ་ཤུ་ཨ་ཡིས་ཡེ་རུ་ཀོ་ཡུལ་ལ་ལྟ་ཉུལ་བྱེད་དུ་མངགས་པའི་བང་ཆེན་སྦས་པས། ཡོ་ཤུ་ཨ་ཡིས་ཁོ་མོ་དང་ཁོ་མོའི་ཕ་གཞིས། དེ་མིན་ཁོ་མོའི་ནང་མི་ཐམས་ཅད་ཀྱི་སྲོག་བསྐྱབས་ཤིང་། ཁོ་མོ་ཡེས་ར་ཨེལ་པ་རྣམས་ཀྱི་ཁྲོད་དུ་ད་ལྟའི་བར་དུ་འཚོ་བ་ཡིན།
JOS 6:26 སྐབས་དེར་ཡོ་ཤུ་ཨ་ཡིས་མི་རྣམས་ལ་དམ་བཅའ་འཇོག་ཏུ་བཅུག་པ་སྟེ། ཡར་ལངས་ནས་ཡེ་རུ་ཀོ་མཁར་བསྐྱར་འཛུགས་བྱེད་མཁན་ལ་དཀོན་མཆོག་ཡ་ཝཱེའི་དྲུང་དུ་དམོད་མོ་ཐེབས་འོས་ཤིང་། དེས་རྨང་གཞི་འདིང་དུས་སུ་བུ་སྐྱེས་འགོ་འཆོར་བ་དང་། རྒྱལ་སྒོ་འཛུགས་དུས་སུ་བུ་ཆུང་ཤོས་འཆོར་ངེས་ཡིན་ཞེས་པའོ། །
JOS 6:27 དཀོན་མཆོག་ཡ་ཝཱེ་ནི་ཡོ་ཤུ་ཨ་དང་མཉམ་དུ་བཞུགས་ཤིང་། ཡོ་ཤུ་ཨ་ཡི་མཚན་སྙན་གྲགས་ཡུལ་གྲུ་ཀུན་ཏུ་ཁྱབ་བོ། །
JOS 7:1 ཡེས་ར་ཨེལ་པ་རྣམས་ཀྱིས་བསྔོ་བར་འོས་པའི་དངོས་པོའི་སྟེང་ནས་སྡིག་ཉེས་བསགས་པ་སྟེ། ཅི་ལ་ཟེར་ན། ཡ་ཧུ་དཱའི་ཚོ་པ་ནང་གི་ཟེ་རག་གི་ཡང་ཚ་དང་ཟབ་དཱི་ཡི་ཚ་བོ། ཀར་མིའི་བུ་ཨ་ཀན་ཞེས་བྱ་བས་བསྔོ་བར་འོས་པའི་དངོས་པོ་བླངས་པས། དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་པའོ། །
JOS 7:2 སྐབས་དེར་ཡོ་ཤུ་ཨ་ཡིས་ཡེ་རུ་ཀོ་ནས་པེད་ཨེལ་གྱི་ཤར་ཕྱོགས་སུ་པེད་ཨ་ཝེན་དང་ཉེ་བའི་ཨེ་ཡུ་གྲོང་ཁྱེར་དུ་མི་མངགས་ཤིང་། ཁོ་རྣམས་ལ། ཁྱོད་ཚོ་ཡར་སོང་ལ་ཡུལ་དེར་ལྟ་ཉུལ་བྱོས་ཤིག་ཅེས་བཀའ་བསྒོས་པ་དང་། ཁོ་རྣམས་ཡར་སོང་སྟེ་ཨེ་ཡུ་གྲོང་ཁྱེར་ལ་ལྟ་ཉུལ་བྱས།
JOS 7:3 ཁོ་རྣམས་ཡོ་ཤུ་ཨའི་རྩར་ཕྱིར་ལོག་སྟེ་ཁོ་ལ། འབངས་མི་ཐམས་ཅད་ཡར་འགྲོ་མི་དགོས་ཏེ། མི་སྟོང་ཕྲག་གཉིས་གསུམ་ཙམ་ཡར་སོང་ན་ཨེ་ཡུ་གྲོང་ཁྱེར་ལེན་ཐུབ་པ་ཡིན། ཡུལ་དེར་མི་ཉུང་བས་འབངས་མི་ཐམས་ཅད་ལ་དཀའ་ལས་བཟོ་དགོས་དོན་མེད་ཅེས་སྨྲས།
JOS 7:4 དེ་ནས་འབངས་རྣམས་ལས་མི་སྟོང་ཕྲག་གསུམ་ཙམ་ཡར་ཡུལ་དེར་སོང་མོད། འོན་ཀྱང་ཁོ་ཚོ་ཨེ་ཡུ་གྲོང་ཁྱེར་གྱི་མི་རྣམས་ཀྱི་སྔུན་ནས་བྲོས་པའོ། །
JOS 7:5 ཨེ་ཡུ་གྲོང་ཁྱེར་གྱི་མི་ཡིས་ཁོ་རྣམས་ལས་མི་སོ་དྲུག་བསད་པ་དང་། མཁར་སྒོ་ནས་ཤ་བཱ་རིམ་གྱི་བར་དུ་ཁོ་རྣམས་བདས་ཤིང་། ལ་ཐུར་ནས་ཁོ་རྣམས་ཕམ་པར་བརྒྱབ་པས། འབངས་རྣམས་འཇིགས་ནས་དཔའ་ཞུམ་པ་རེད།
JOS 7:6 དེ་ནས་ཡོ་ཤུ་ཨ་ཡིས་གྱོན་གོས་ཕྲལ་ཞིང་། ཁོ་དང་ཡེས་ར་ཨེལ་གྱི་རྒན་པོ་རྣམས་ཀྱིས་མགོ་ལ་ཐལ་བ་གཏོར་ནས་དགོང་མོའི་བར་དུ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་མདུན་དུ་ཁ་སར་བཏུད་ནས་བསྡད།
JOS 7:7 ཡོ་ཤུ་ཨ་ཡིས་སྐྱོ་བ་ལ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཅིའི་ཕྱིར་འབངས་འདི་རྣམས་ཁྲིད་ནས་ཡོར་དན་གཙང་པོ་བརྒལ་བ་དང་ངེད་ཅག་ཨེ་མོར་པ་རྣམས་ཀྱི་ལག་ཏུ་སྤྲད་ནས་ངེད་རྣམས་རྩ་མེད་དུ་འགྲོ་བར་མཛད་པ་ཡིན་ནམ། ངེད་རྣམས་ཡོར་དན་གཙང་པོའི་ཕ་རོལ་ཏུ་བསྡད་པ་ཡིན་ན་ཅི་མ་རུང་།
JOS 7:8 ཀྱེ་གཙོ་བོ་ལགས། ཡེས་ར་ཨེལ་པ་རྣམས་ནི་དགྲ་བོའི་སྔུན་ནས་ཁ་ཕྱིར་འཁོར་ཏེ་བྲོས་པ་ཡིན་པས་ང་ལ་ད་དུང་སྨྲ་རྒྱུ་ཅི་ཞིག་ཡོད་དམ།
JOS 7:9 ཀ་ན་ཨན་གྱི་མི་དང་ཡུལ་འདིའི་མི་རྣམས་ཀྱིས་དོན་དེ་ཐོས་ན་ངེད་རྣམས་བསྐོར་ཞིང་ངེད་ཅག་གི་མིང་ནི་ས་གཞི་ལས་མེད་པར་བཟོ་བར་འགྱུར། སྐབས་དེར་ཁྱེད་ཀྱིས་ཉིད་ཀྱི་མཚན་སྙན་གྱི་ཕྱིར་དུ་ཅི་ཞིག་མཛད་པར་བྱའམ་ཞེས་ཞུས་པ་ལ།
JOS 7:10 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། ཡར་ལོངས་ཤིག ཁྱོད་ཁ་སར་བཏུད་ནས་འདུག་དོན་ཅི་ཡིན་ནམ།
JOS 7:11 ཡེས་ར་ཨེལ་པས་སྡིག་ཉེས་བསགས་པ་དང་། ངས་ཁོ་རྣམས་ལ་བསྒོས་པའི་ཞལ་ཆད་དང་འགལ་ནས་བསྔོ་བར་འོས་པའི་དངོས་པོ་བླངས་པ་རེད། ཡང་རྐུ་བྱས་ནས་གཡོ་སྒྱུ་ཡིས་བསྔོ་བར་འོས་པའི་དངོས་པོ་དེ་ཁོ་རྣམས་ཀྱི་ཅ་ལག་ནང་དུ་བཞག་གོ །
JOS 7:12 དེའི་ཕྱིར། ཡེས་ར་ཨེལ་པ་རྣམས་ནི་དགྲ་བོའི་སྔུན་ནས་ཚུགས་མ་ཐུབ་པ་དང་། ཁོ་རྣམས་རྩ་མེད་དུ་གཏོང་འོས་པར་གྱུར་པས་དགྲ་བོའི་སྔུན་ནས་ཁ་ཕྱིར་འཁོར་ཏེ་བྲོས་པ་ཡིན་ནོ། །གལ་ཏེ་ཁྱོད་རྣམས་ཀྱིས་བསྔོ་བར་འོས་པའི་དངོས་པོ་རྣམས་ཁྱོད་ཅག་གི་ཁྲོད་དུ་མེད་པར་མི་བཟོ་ན། དེང་ཕྱིན་ང་རང་ཁྱོད་རྣམས་དང་མཉམ་དུ་གནས་པར་མི་འགྱུར།
JOS 7:13 ཁྱོད་རང་ཡར་ལངས་ནས་འབངས་རྣམས་ལ་རང་རང་གཙང་མར་བཟོ་རུ་བཅུག་ལ་འདི་ལྟར་སྨྲོས་ཤིག ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ། ཁྱོད་རྣམས་ཀྱི་ཁྲོད་དུ་བསྔོ་བར་འོས་པའི་དངོས་པོ་ཡོད་ཅིང་། གལ་ཏེ་ཁྱོད་རྣམས་ཀྱིས་དེ་མེད་པར་མ་བཟོས་ན་དགྲ་བོའི་སྔུན་ནས་ཚུགས་མི་ཐུབ་པར་གདོན་མི་ཟའོ་ཞེས་གསུངས་པས། སང་ཉིན་གྱི་ཕྱིར་དུ་ཁྱོད་རྣམས་ཀྱིས་རང་རང་གཙང་མར་བཟོ་དགོས་ཞེས་སྨྲ་བར་གྱིས་ཤིག
JOS 7:14 ཞོགས་པ་སླེབས་དུས་ཁྱོད་རྣམས་ཚོ་པ་རེ་རེ་བཞིན་མདུན་སར་འོང་དགོས་པ་སྟེ། ཡ་ཝཱེས་རྒྱན་འཕངས་ནས་བབས་པའི་ཚོ་པ་ནི་རུས་རྒྱུད་རེ་རེ་བཞིན་མདུན་སར་འོང་དགོས་པ་དང་། ཡ་ཝཱེས་རྒྱན་འཕངས་ནས་བབས་པའི་རུས་རྒྱུད་ནི་ཁྱིམ་རྒྱུད་རེ་རེ་བཞིན་མདུན་སར་འོང་དགོས། ཡ་ཝཱེས་རྒྱན་འཕངས་ནས་བབས་པའི་ཁྱིམ་རྒྱུད་ནི་སྐྱེས་པ་རེ་རེ་བཞིན་མདུན་སར་འོང་དགོས།
JOS 7:15 རྒྱན་བབས་པའི་མི་ཡི་ལག་ཏུ་བསྔོ་བར་འོས་པའི་དངོས་པོ་ཡོད་ན། ཁོ་དང་ཁོ་ལ་གཏོགས་པ་ཐམས་ཅད་མེར་བསྲེག་དགོས་པ་སྟེ། ཁོ་རང་ཡ་ཝཱེའི་ཞལ་ཆད་དང་འགལ་ཞིང་ཡང་ཁོས་ཡེས་ར་ཨེལ་གྱི་ཁྲོད་དུ་བླུན་ཧམ་ཆེ་བའི་དོན་བསྒྲུབས་པས་སོ་ཞེས་གསུངས།
JOS 7:16 དེ་ནས་ཡོ་ཤུ་ཨ་ཞོགས་པ་སྔ་མོ་ཡར་ལངས་ཏེ་ཡེས་ར་ཨེལ་གྱི་ཚོ་པ་རེ་རེ་བཞིན་མདུན་སར་འོང་དུ་བཅུག་པ་ལ་ཡ་ཧུ་དཱ་ཚོ་པར་རྒྱན་བབས་པའོ། །
JOS 7:17 ཡང་ཡ་ཧུ་དཱ་རུས་རྒྱུད་མདུན་སར་འོང་དུ་བཅུག་པ་དང་ཟེ་རག་གི་ཁྱིམ་རྒྱུད་ལ་རྒྱན་བབས། ཡང་ཟེ་རག་གི་ཁྱིམ་རྒྱུད་ཀྱི་སྐྱེས་པ་རེ་རེ་བཞིན་མདུན་སར་འོང་དུ་བཅུག་པ་དང་ཟབ་དཱི་ལ་རྒྱན་བབས།
JOS 7:18 ཡང་ཟབ་དཱི་ཡི་ཁྱིམ་རྒྱུད་ཀྱི་སྐྱེས་པ་རེ་རེ་བཞིན་མདུན་སར་འོང་དུ་བཅུག་པ་དང་། ཡ་ཧུ་དཱ་ཚོ་པའི་ཟེ་རག་གི་ཡང་ཚ་དང་ཟབ་དཱི་ཡི་ཚ་བོ། ཀར་མིའི་བུ་ཨ་ཀན་ཞེས་བྱ་བར་རྒྱན་བབས།
JOS 7:19 ཡོ་ཤུ་ཨ་ཡིས་ཨ་ཀན་ལ། ངའི་བུ། ཁྱོད་ཀྱིས་གཟི་བརྗིད་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་ཕུལ་ཞིག ཁོང་གི་མདུན་ནས་མཐོལ་བཤགས་བྱོས་ལ། ཁྱོད་ཀྱིས་ཅི་བྱས་པ་རྣམས་ང་ལ་མ་གསང་བར་སྨྲོས་ཤིག་ཅེས་སྨྲས་པ་ལ།
JOS 7:20 ཨ་ཀན་གྱིས་དེའི་ལན་དུ་ཡོ་ཤུ་ཨ་ལ། ངས་དངོས་གནས་ཡེས་ར་ཨེལ་གྱི་དཀོན་མཆོག་ཡ་ཝཱེ་དང་འགལ་བའི་སྡིག་པ་བྱས་པ་ཡིན། ངས་བྱས་པའི་དོན་ནི་འདི་དང་འདི་ལྟར་ཡིན།
JOS 7:21 ངས་འཕྲོག་བཅོམ་བྱས་པའི་ནོར་རྫས་ཁྲོད་དུ་ཤིན་ཨར་པའི་གྱོན་གོས་ཡག་ཤོས་ཞིག་དང་། དངུལ་སྲང་ཉིས་བརྒྱ། སྲང་ལྔ་བཅུ་ཅན་གྱི་གསེར་ལྕུག་གཅིག་བཅས་མཐོང་བས། ང་རང་དངོས་པོ་དེ་རྣམས་ལ་ཞེན་ཆགས་ནས་ཁྱེར་བ་དང་། ད་ལྟ་ངའི་གུར་ནང་གི་ས་འོག་ཏུ་སྦས་ཡོད་ལ། དངུལ་ནི་གྱོན་གོས་ཀྱི་འོག་ཏུ་ཡོད་ཅེས་སྨྲས་པར།
JOS 7:22 ཡོ་ཤུ་ཨ་ཡིས་ལག་རོགས་མངགས་ཤིང་ཨ་ཀན་གྱི་གུར་ནང་དུ་རྒྱུགས་སོང་བ་ལ། གྱོན་གོས་དེ་དངོས་གནས་ཁོའི་གུར་ནང་དུ་སྦས་ཡོད་པ་དང་། དངུལ་དེའི་འོག་ཏུ་ཡོད་དོ། །
JOS 7:23 དེ་ནས་ཁོ་རྣམས་ཀྱིས་གུར་ལས་བླངས་ཏེ་ཡོ་ཤུ་ཨ་དང་ཡེས་ར་ཨེལ་པ་རྣམས་ཀྱི་རྩར་ཁྱེར་ནས། དཀོན་མཆོག་ཡ་ཝཱེའི་དྲུང་དུ་བཞག
JOS 7:24 ཡོ་ཤུ་ཨ་དང་ཡེས་ར་ཨེལ་པ་རྣམས་ཀྱིས་ཟེ་རག་གི་ཡང་ཚ་ཨ་ཀན་དང་། དངུལ་དེ་དང་། གྱོན་གོས་དེ་དང་། གསེར་ལྕུག་དེ་དང་། དེ་མིན་ཨ་ཀན་གྱི་བུ་ཕྲུག་རྣམས་དང་བ་གླང་། བོང་བུ། ལུག གུར་ལ་སོགས་ཁོ་ལ་གཏོགས་པ་ཐམས་ཅད་དང་བཅས་པ་ཨ་ཀོར་ལུང་པར་ཁྲིད་ཅིང་།
JOS 7:25 ཡོ་ཤུ་ཨ་ཡིས། ཁྱོད་ཀྱིས་ཅིའི་ཕྱིར་ང་ཚོ་སྡུག་ལ་གཏད་པ་ཡིན་ནམ། དེ་རིང་དཀོན་མཆོག་ཡ་ཝཱེས་ཁྱོད་རང་སྡུག་ལ་སྦྱོར་ངེས་ཡིན་ཞེས་སྨྲས་པ་དང་། དེ་ནས་ཡེས་ར་ཨེལ་པ་རྣམས་ཀྱིས་ཁོ་རང་རྡོ་རུབ་བཏང་ནས་བསད་ཅིང་། རྡོ་རྣམས་དེའི་སྟེང་དུ་འཕངས་ནས་ཡང་ཁོ་ལ་གཏོགས་པ་ཐམས་ཅད་མེར་བསྲེགས་པའོ། །
JOS 7:26 མི་རྣམས་ཀྱིས་ཨ་ཀན་གྱི་ལུས་སྟེང་དུ་རྡོ་སྤུང་ཆེན་པོ་བརྒྱབ་པ་ད་ལྟའི་བར་དུ་ལུས། དེ་ནས་དཀོན་མཆོག་ཡ་ཝཱེའི་ཐུགས་ཚུར་འཁོར་ཏེ་ཐུགས་ཁྲོ་ཆེན་པོ་ཞི་བར་གྱུར་ཏོ། །དེའི་ཕྱིར་ཡུལ་དེའི་མིང་ལ་ད་ལྟའི་བར་དུ་ཨ་ཀོར་ ལུང་པ་ཞེས་བྱའོ། །
JOS 8:1 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། མ་འཇིགས་མ་འཚབ་ཅིག དམག་མི་ཐམས་ཅད་ཁྲིད་ནས་ཡར་ཨེ་ཡུ་གྲོང་ཁྱེར་དུ་སོང་དང་། ངས་ཨེ་ཡུ་གྲོང་ཁྱེར་གྱི་རྒྱལ་པོ་དང་དེའི་འབངས་མི་རྣམས་དང་། དེའི་མཁར། དེར་མ་ཟད་དེའི་ས་དང་བཅས་ཡོད་ཚད་ཁྱོད་ཀྱི་ལག་ཏུ་སྤྲད་པ་ཡིན།
JOS 8:2 ཁྱོད་ཀྱིས་ཡེ་རུ་ཀོ་དང་དེའི་རྒྱལ་པོ་ལ་ཇི་བྱས་པ་ལྟར་ཨེ་ཡུ་དང་དེའི་རྒྱལ་པོ་ལའང་དེ་ལྟར་བྱེད་དགོས། ཡིན་ནའང་གྲོང་ཁྱེར་ནས་ཕྲོགས་ཡོང་བའི་ནོར་རྫས་དང་ཕྱུགས་ཟོག་ནི་ཁྱོད་རྣམས་ཀྱིས་རང་རང་གི་བཅོམ་ནོར་དུ་བླངས་ཆོག ཁྱོད་ཀྱིས་གྲོང་ཁྱེར་གྱི་ལྟག་རྒྱབ་ཏུ་འཇབ་དམག་བསྒྲིག་དགོས་ཞེས་གསུངས།
JOS 8:3 དེ་ནས་ཡོ་ཤུ་ཨ་དང་དམག་མི་ཐམས་ཅད་ལངས་ཏེ་ཡར་ཨེ་ཡུ་གྲོང་ཁྱེར་ལ་སོང་། ཡོ་ཤུ་ཨ་ཡིས་དཔའ་རྒོད་སྟོབས་ཅན་ཁྲི་གསུམ་བདམས་ནས་མཚན་མོའི་དུས་སུ་ཁོ་རྣམས་ལམ་དུ་ཆས་པར་མངགས་ཤིང་།
JOS 8:4 དེ་རྣམས་ལ། ཁྱོད་ཚོས་གྲོང་ཁྱེར་གྱི་ལྟག་རྒྱབ་ཏུ་འཇབ་སྒུག་བྱེད་དགོས་ཏེ། གྲོང་ཁྱེར་དང་ཤིན་ཏུ་ཐག་རིང་སར་མི་སྡོད་པར་ཚང་མས་རང་རང་སར་སྟ་གོན་བྱེད་དགོས།
JOS 8:5 ང་དང་ངས་ཁྲིད་པའི་འབངས་རྣམས་གྲོང་ཁྱེར་གྱི་ཕྱོགས་སུ་འགྲོ་ཞིང་། གྲོང་ཁྱེར་ནང་གི་མི་རྣམས་ཀྱིས་སྔར་བཞིན་ཕྱི་རུ་ཡོང་ནས་ངེད་ཅག་ལ་རྒོལ་བའི་སྐབས་སུ། ངེད་རྣམས་ཁོ་ཚོའི་སྔུན་ནས་འབྲོ་བར་བྱ།
JOS 8:6 ང་ཚོས་ཁོ་རྣམས་ལ་སླུ་བྲིད་བྱས་ནས་གྲོང་ཁྱེར་དང་རིང་བའི་བར་དུ་ཁོ་ཚོ་ཕྱི་རུ་ཡོང་ནས་ངེད་རྣམས་ཀྱི་རྗེས་འདེད་ངེས་ཤིང་། ཁོ་ཚོས་མི་འདི་རྣམས་སྔར་བཞིན་ང་ཚོའི་སྔུན་ནས་འབྲོ་བར་འགྱུར་ཞེས་སྨྲ་ངེས་ཡིན་པས། ངེད་རྣམས་ཁོ་ཚོའི་སྔུན་ནས་འབྲོ་བར་བྱ།
JOS 8:7 དེ་ནས་ཁྱོད་རྣམས་འཇབ་སྒུག་བྱེད་ས་ནས་ལངས་ཏེ་གྲོང་ཁྱེར་དེ་འཕྲོག་དགོས། ཅི་ལ་ཟེར་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་གྲོང་ཁྱེར་འདི་ཁྱོད་རྣམས་ཀྱི་ལག་ཏུ་སྤྲོད་ངེས་ཡིན་པས་སོ། །
JOS 8:8 ཁྱོད་རྣམས་ཀྱིས་གྲོང་ཁྱེར་ཕྲོགས་རྗེས་མེ་བསྒྲོན་ནས་གྲོང་ཁྱེར་བསྲེག་དགོས་པ་སྟེ། དཀོན་མཆོག་ཡ་ཝཱེའི་བཀའ་བཞིན་དུ་བྱེད་དགོས། འདི་ནི་བདག་གིས་ཁྱོད་རྣམས་ལ་བསྒོས་པ་ཡིན་ཞེས་བསྒོས།
JOS 8:9 ཡོ་ཤུ་ཨ་ཡིས་ཁོ་རྣམས་འགྲོ་བར་མངགས་པ་དང་། ཁོ་རྣམས་འཇབ་སྒུག་བྱེད་ས་རུ་སོང་ནས་པེད་ཨེལ་དང་ཨེ་ཡུ་གྲོང་ཁྱེར་གཉིས་ཀྱི་བར་དུ་བསྡད་ཅིང་། དེ་ནི་ཨེ་ཡུ་གྲོང་ཁྱེར་གྱི་ནུབ་ཕྱོགས་ཡིན་ནོ། །མཚན་མོ་དེར་ཡོ་ཤུ་ཨ་ནི་འབངས་རྣམས་ཀྱི་ཁྲོད་དུ་ཞག་སྡོད་བྱས།
JOS 8:10 ཡོ་ཤུ་ཨ་ཞོགས་པ་སྔ་མོ་ཡར་ལངས་ཏེ་འབངས་རྣམས་བསྡུས་ནས། ཁོ་དང་ཡེས་ར་ཨེལ་གྱི་རྒན་པོ་རྣམས་ནི་འབངས་རྣམས་ཀྱི་སྔུན་ནས་ཡར་ཨེ་ཡུ་གྲོང་ཁྱེར་དུ་སོང་ངོ་། །
JOS 8:11 འབངས་མི་རྣམས་ཏེ་ཁོས་ཁྲིད་པའི་དམག་མི་ཐམས་ཅད་ཡར་སོང་བ་དང་། ཐད་ཀར་མདུན་དུ་བསྐྱོད་ཅིང་གྲོང་ཁྱེར་གྱི་སྔུན་དུ་ཡོང་ནས་ཨེ་ཡུ་གྲོང་ཁྱེར་གྱི་བྱང་ཕྱོགས་སུ་སྒར་བཏབ། ཡོ་ཤུ་ཨ་དང་ཨེ་ཡུ་གྲོང་ཁྱེར་གཉིས་ཀྱི་བར་དུ་ལུང་པ་ཞིག་ཡོད་པ་ཡིན།
JOS 8:12 ཁོས་མི་ལྔ་སྟོང་ཙམ་བདམས་ནས་དེ་རྣམས་ལ་པེད་ཨེལ་དང་ཨེ་ཡུ་གྲོང་ཁྱེར་གཉིས་ཀྱི་བར་ཏེ་ཨེ་ཡུ་གྲོང་ཁྱེར་གྱི་ནུབ་ཕྱོགས་སུ་འཇབ་སྒུག་བྱེད་དུ་བཅུག
JOS 8:13 དེ་ནས་འབངས་མི་རྣམས་ཏེ་གྲོང་ཁྱེར་བྱང་ཕྱོགས་ཀྱི་དམག་མི་ཡོངས་རྫོགས་དང་གྲོང་ཁྱེར་ནུབ་ཕྱོགས་ཀྱི་འཇབ་དམག་རྣམས་བཀོད་སྒྲིག་བྱས་པ་དང་། མཚན་མོ་དེར་ཡོ་ཤུ་ཨ་ནི་ལུང་པའི་ནང་དུ་སོང་ངོ་། །
JOS 8:14 ཨེ་ཡུ་གྲོང་ཁྱེར་གྱི་རྒྱལ་པོས་གནས་ཚུལ་དེ་མཐོང་ནས་གྲོང་ཁྱེར་ཡོངས་ཀྱི་མི་རྣམས་དང་མཉམ་དུ་ཞོགས་པ་སྔ་མོ་ཡར་ལངས་ཏེ། ཡེས་ར་ཨེལ་པ་དང་འཐབ་པའི་ཕྱིར་དུས་བཅད་ལྟར་ཡ་ལ་པའི་མདུན་སར་ཡོང་མོད། འོན་ཀྱང་རྒྱལ་པོས་གྲོང་ཁྱེར་གྱི་ལྟག་རྒྱབ་ཏུ་འཇབ་དམག་ཡོད་པ་མི་ཤེས་སོ། །
JOS 8:15 ཡོ་ཤུ་ཨ་དང་ཡེས་ར་ཨེལ་པ་རྣམས་ནི་ཁོ་ཚོའི་སྔུན་དུ་ཕམ་པར་བརྫུས་ཤིང་དབེན་སྟོང་ལ་འགྲོ་བའི་ལམ་དུ་བྲོས།
JOS 8:16 གྲོང་ཁྱེར་ནང་གི་མི་རྣམས་མཉམ་དུ་བསྡུས་ནས་ཁོ་ཚོའི་རྗེས་དེད་ཅིང་། ཨེ་ཡུ་གྲོང་ཁྱེར་གྱི་མི་རྣམས་ཀྱིས་ཡོ་ཤུ་ཨའི་རྗེས་འདེད་པའི་སྐབས་སུ་སླུ་བྲིད་འོག་ཏུ་ཚུད་ནས་གྲོང་ཁྱེར་དང་བྲལ་ཏོ། །
JOS 8:17 ཨེ་ཡུ་དང་པེད་ཨེལ་གྲོང་ཁྱེར་ནས་ཕྱི་རུ་ཡོང་སྟེ་ཡེས་ར་ཨེལ་པ་རྣམས་ཀྱི་རྗེས་མི་འདེད་མཁན་གཅིག་ཀྱང་མེད་ལ། མཁར་སྒོ་ཆེར་ཕྱེས་ནས་བསྐྱུར་ཅིང་ཡེས་ར་ཨེལ་པ་རྣམས་ཀྱི་རྗེས་འདེད་དུ་ཕྱིན།
JOS 8:18 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། ཁྱོད་ཀྱིས་ལག་གི་མདུང་ཐུང་ཨེ་ཡུ་གྲོང་ཁྱེར་ཕྱོགས་སུ་རྐྱོངས་ཤིག ཅི་ལ་ཟེར་ན། བདག་གིས་གྲོང་ཁྱེར་དེ་ཁྱོད་ཀྱི་ལག་ཏུ་སྤྲོད་རྒྱུ་ཡིན་པས་སོ་ཞེས་གསུངས་པས། ཡོ་ཤུ་ཨ་ཡིས་ལག་གི་མདུང་ཐུང་གྲོང་ཁྱེར་ཕྱོགས་སུ་བརྐྱངས།
JOS 8:19 ཁོས་ལག་པ་བརྐྱངས་མ་ཐག འཇབ་དམག་རྣམས་འཇབ་སྒུག་བྱེད་ས་ནས་མགྱོགས་པོར་ལངས་ནས་གྲོང་ཁྱེར་ཕྲོགས་པ་དང་། གྲོང་ཁྱེར་ནང་དུ་བརྒྱུགས་ཏེ་མེ་བསྒྲོན་ནས་བསྲེགས་སོ། །
JOS 8:20 ཨེ་ཡུ་གྲོང་ཁྱེར་གྱི་མི་ཡིས་ཁ་ཕྱིར་འཁོར་ནས་བལྟས་པ་ན། བསམ་ཡུལ་ལས་འདས་པ་ཞིག་ལ་གྲོང་ཁྱེར་ལས་དུ་སྨུག་དགུང་ལ་འཕྱུར་བཞིན་ཡོད་པས། ཁོ་རྣམས་སྟོབས་ཟད་ནས་ཕྱོགས་གང་ལའང་འབྲོ་མ་ནུས་སོ། །དབེན་སྟོང་ལ་འབྲོ་བའི་འབངས་རྣམས་ཁ་ཕྱིར་འཁོར་ནས་ཁོ་ཚོའི་རྗེས་འདེད་མཁན་ལ་ཕར་རྒོལ་བྱས།
JOS 8:21 ཡོ་ཤུ་ཨ་དང་ཡེས་ར་ཨེལ་པ་རྣམས་ཀྱིས་འཇབ་དམག་གིས་གྲོང་ཁྱེར་ཕྲོགས་ཟིན་པ་དང་གྲོང་ཁྱེར་ལས་དུ་སྨུག་འཕྱུར་བ་མཐོང་ནས། ཁ་ཕྱིར་འཁོར་ནས་སོང་སྟེ་ཨེ་ཡུ་གྲོང་ཁྱེར་གྱི་མི་རྣམས་ལ་དམག་བརྒྱབ།
JOS 8:22 འཇབ་དམག་རྣམས་ཀྱང་གྲོང་ཁྱེར་ཕྱི་རུ་བུད་དེ་ཨེ་ཡུ་གྲོང་ཁྱེར་གྱི་དམག་མི་ལ་རྒོལ་ལན་སྤྲད་པས། ཨེ་ཡུ་གྲོང་ཁྱེར་གྱི་དམག་མི་རྣམས་ཡེས་ར་ཨེལ་པས་བར་དུ་བཅུག་སྟེ། རྒྱབ་མདུན་གཉིས་སུ་ཡེས་ར་ཨེལ་པ་ཡིན་ནོ། །དེ་ནས་ཡེས་ར་ཨེལ་པ་རྣམས་ཀྱིས་ཁོ་ཚོར་དམག་བརྒྱབ་ནས་བཅོམ་པ་དང་། གཅིག་ཀྱང་མ་བསྐྱུར་ལ་བྲོས་ནས་ཐར་བ་གཅིག་ཀྱང་མེད་དོ། །
JOS 8:23 ཡེས་ར་ཨེལ་པས་ཨེ་ཡུ་གྲོང་ཁྱེར་གྱི་རྒྱལ་པོ་གསོན་པོར་བཟུང་ནས་ཁོ་ཡོ་ཤུ་ཨ་ཡི་རྩར་ཁྲིད་ཡོང་ངོ་། །
JOS 8:24 ཡེས་ར་ཨེལ་པ་རྣམས་ཀྱིས་ཞིང་བར་དང་དབེན་སྟོང་ནས་ཨེ་ཡུ་གྲོང་ཁྱེར་གྱི་རྗེས་འདེད་མཁན་དམག་མི་ཐམས་ཅད་རྩ་མེད་དུ་བཏང་། ཨེ་ཡུ་གྲོང་ཁྱེར་གྱི་དམག་མི་རྣམས་གྲིའི་ཁ་ནས་འགྱེལ་ཞིང་ཡོངས་རྫོགས་རྩ་མེད་དུ་གྱུར་པས། ཡེས་ར་ཨེལ་པ་རྣམས་ཨེ་ཡུ་གྲོང་ཁྱེར་དུ་ཕྱིར་ལོག་ནས་གྲོང་ཁྱེར་ནང་གི་མི་རྣམས་གྲིས་བསད།
JOS 8:25 ཉིན་མོ་དེར་བསད་པའི་མི་ནི་སྐྱེས་ཕོ་མོ་བསྡོམས་པས་ཆིག་ཁྲི་ཉིས་སྟོང་ཡོད་པ་སྟེ། ཨེ་ཡུ་གྲོང་ཁྱེར་གྱི་མི་ཐམས་ཅད་ཡིན་ནོ། །
JOS 8:26 ཡོ་ཤུ་ཨ་ཡིས་ཨེ་ཡུ་གྲོང་ཁྱེར་གྱི་ཡུལ་མི་ཐམས་ཅད་རྩ་མེད་དུ་གཏོང་བའི་བར་དུ་ལག་ནས་ཕྱིར་བརྐྱངས་པའི་མདུང་ཐུང་ཕྱིར་མ་བསྡུས་སོ། །
JOS 8:27 ཡིན་ནའང་གྲོང་ཁྱེར་ནང་གི་ཕྱུགས་ཟོག་དང་ནོར་རྫས་ཁོ་ན་ཡེས་ར་ཨེལ་པ་རྣམས་ཀྱིས་རང་རང་གི་བཅོམ་ནོར་དུ་བླངས་པ་དང་། དཀོན་མཆོག་ཡ་ཝཱེས་ཡོ་ཤུ་ཨ་ལ་བསྒོས་པའི་བཀའ་བཞིན་ཡིན་ནོ། །
JOS 8:28 ཡོ་ཤུ་ཨ་ཡིས་ཨེ་ཡུ་གྲོང་ཁྱེར་མེར་བསྲེགས་ནས་གྲོང་ཁྱེར་ནི་དུས་གཏན་དུ་ད་ལྟའི་བར་དུ་ཞིག་རོ་དང་ས་རྒོད་དུ་ལུས་པ་དང་།
JOS 8:29 ཡང་ཨེ་ཡུ་གྲོང་ཁྱེར་གྱི་རྒྱལ་པོ་སྡོང་མགོར་བཀལ་ནས་དགོང་མོའི་བར་དུ་བཞག ཉི་མ་ནུབ་པའི་སྐབས་སུ་ཡོ་ཤུ་ཨ་ཡིས་མི་ལ་བེམ་པོ་སྡོང་མགོ་ནས་མར་བླངས་ནས་མཁར་སྒོ་ཁར་གཡུག་པར་བསྒོས་ཤིང་། བེམ་པོའི་སྟེང་དུ་རྡོ་བརྩིགས་བརྒྱབ་ནས་ད་ལྟའི་བར་དུ་བཞག་གོ །
JOS 8:30 སྐབས་དེར་ཡོ་ཤུ་ཨ་ཡིས་ཨེ་བཱལ་རི་བོར་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་པ་དང་།
JOS 8:31 མཆོད་ཁྲི་འདི་ནི་ལྕགས་ཆས་ཀྱིས་བརྡུང་མ་མྱོང་བའི་རྡོ་ཧྲིལ་པོས་བརྩིགས་པ་སྟེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཡེས་ར་ཨེལ་པ་རྣམས་ལ་བསྒོས་པའི་བཀའ་བཞིན་དང་། ཏག་ཏག་མོ་ཤེའི་བཀའ་ཁྲིམས་ཀྱི་མདོ་ནང་བཀོད་པ་ལྟར་ཡིན་ནོ། །མི་རྣམས་ཀྱིས་མཆོད་ཁྲི་འདིའི་སྟེང་དུ་དཀོན་མཆོག་ཡ་ཝཱེ་ལ་སྦྱིན་སྲེག་དང་ཞི་བདེའི་མཆོད་པ་ཕུལ།
JOS 8:32 ཡོ་ཤུ་ཨ་ཡིས་ཡུལ་དེར་ཡེས་ར་ཨེལ་པ་རྣམས་ཀྱི་མདུན་ནས་མོ་ཤེས་ཡི་གེར་བཀོད་པའི་བཀའ་ཁྲིམས་རྣམས་རྡོའི་སྟེང་དུ་གཙང་བཤུས་བརྒྱབ་པའོ། །
JOS 8:33 ཡེས་ར་ཨེལ་པ་རྣམས་ཏེ་གཞིས་སྐྱེས་དང་བྱེས་པ། རྒན་པོ་རྣམས། འགོ་དཔོན་རྣམས། དེ་མིན་ཁྲིམས་དཔོན་རྣམས་བཅས་སུ་དང་སུ་ཡིན་ཡང་ཐམས་ཅད་ཞལ་ཆད་ཀྱི་ཤུར་སྒམ་འཁུར་བའི་ལེ་ཝི་པའི་མཆོད་དཔོན་རྣམས་ཀྱི་སྔུན་ནས། ཡེས་ར་ཨེལ་པ་རྣམས་ལ་བྱིན་གྱིས་བརླབ་པའི་ཕྱིར་ཕྱེད་ཀ་གེ་རི་ཟིམ་རི་བོའི་ཕྱོགས་སུ་ཁ་གཏད་ཅིང་། ཕྱེད་ཀ་ཨེ་བཱལ་རི་བོའི་ཕྱོགས་སུ་ཁ་གཏད་ནས་ལངས་བསྡད་ཅིང་། ཏག་ཏག་དཀོན་མཆོག་ཡ་ཝཱེའི་ཞབས་ཕྱི་མོ་ཤེས་དེ་སྔོན་ཇི་ལྟར་བཀའ་བསྒོས་པ་བཞིན་དུ་ཡེས་ར་ཨེལ་གྱི་འབངས་མི་རྣམས་ལ་བྱིན་རླབས་གནང་ངོ་། །
JOS 8:34 དེའི་རྗེས་སུ་ཡོ་ཤུ་ཨ་ཡིས་བཀའ་ཁྲིམས་སྟེང་གི་བྱིན་རླབས་དང་དམོད་མོའི་བཀའ་རྣམས་བཀའ་ཁྲིམས་སྟེང་དུ་ཅི་ཞིག་བཀོད་ཡོད་པ་བཞིན་དུ་ཐམས་ཅད་ཐེངས་གཅིག་ལ་ཁྱབ་བསྒྲགས་བྱས་པ་དང་།
JOS 8:35 མོ་ཤེས་བསྒོས་པའི་བཀའ་ཐམས་ཅད་ཡོ་ཤུ་ཨ་ཡིས་ཡེས་ར་ཨེལ་གྱི་མི་ཚོགས་ཡོངས་དང་བུད་མེད། བྱིས་པ། དེ་མིན་ཁོ་རྣམས་ཁྲོད་དུ་བྱེས་སུ་སྡོད་པའི་ཕྱི་ཕྱོགས་པ་རྣམས་ཀྱི་མདུན་དུ་ཚིག་གཅིག་ཀྱང་མ་ལུས་པར་ཁྱབ་བསྒྲགས་བྱས་སོ། །
JOS 9:1 ཡོར་དན་གཙང་པོའི་ནུབ་ཕྱོགས་སུ་རི་ཁུལ་དང་རི་ཀླུང་། དེ་མིན་ལེ་པཱ་ནོན་རི་བོའི་ཁ་གཏད་དུ་རྒྱ་མཚོ་ཆེན་པོའི་འགྲམ་རྒྱུད་ལ་གནས་པའི་རྒྱལ་པོ་རྣམས་ཏེ། ཧེད་པ་དང་ཨེ་མོར་པ། ཀ་ན་ཨན་པ། ཕེ་རེ་ཟི་པ། ཧེ་བི་པ། ཡེ་བུ་སི་པ་བཅས་ཀྱི་རྒྱལ་པོ་ཀུན་གྱིས་དོན་དེ་ཐོས་པ་དང་།
JOS 9:2 ཚང་མ་མཉམ་དུ་འཛོམས་ནས་སེམས་ཤུགས་གཅིག་སྒྲིལ་གྱིས་ཡོ་ཤུ་ཨ་དང་ཡེས་ར་ཨེལ་པ་རྣམས་ལ་འཐབ་པར་བརྩམས།
JOS 9:3 གིབ་ཡོན་གྱི་མི་རྣམས་ཀྱིས་ཡོ་ཤུ་ཨ་ཡིས་ཡེ་རུ་ཀོ་དང་ཨེ་ཡུ་གྲོང་ཁྱེར་ལ་ཇི་ལྟར་བྱས་པའི་དོན་རྣམས་ཐོས་ནས།
JOS 9:4 གཡོ་སྒྱུས་བང་ཆེན་དུ་བརྫུས་ཏེ་ཁུག་མ་རྙིང་ཧྲུལ་དང་རལ་ཞིང་ལྷན་པ་བརྒྱབ་པའི་རྒུན་ཆང་གི་རྐྱལ་ཁུག་རྙིང་བ་བོང་བུར་བཀལ་ཏེ།
JOS 9:5 ལྷམ་རྙིང་ལྷན་པ་ཅན་ཞིག་རྐང་པར་གྱོན་ཞིང་། གྱོན་གོས་རྙིང་བ་ལུས་ལ་གྱོན་པ་དང་། ཁོ་རྣམས་ཀྱིས་འཁྱེར་བའི་བག་ལེབ་ཚང་མ་སྐམ་ཞིང་སྤུ་སྐྱེས་ཡོད་ལ།
JOS 9:6 ཁོ་རྣམས་གིལ་གལ་དུ་ཡོད་པའི་སྒར་དུ་ཡོ་ཤུ་ཨ་དང་འཕྲད་པར་ཕྱིན་ཅིང་། ཁོ་དང་ཡེས་ར་ཨེལ་གྱི་མི་རྣམས་ལ། ངེད་ཅག་ནི་རྒྱང་རིང་ཡུལ་ནས་འོངས་པ་ཡིན་ལ་ད་ལྟ་ཁྱེད་ཀྱིས་ངེད་རྣམས་ལ་དམ་བཅའ་འཇོག་པར་ཞུ་ཞེས་སྨྲས་པ་ལ།
JOS 9:7 ཡེས་ར་ཨེལ་པ་རྣམས་ཀྱིས་ཧེ་བི་པ་དེ་རྣམས་ལ། ཁྱོད་ཅག་ནི་ངེད་རྣམས་ཀྱི་ཁྲོད་དུ་གནས་པ་ཡིན་པར་དོགས་སོ། །གལ་སྲིད་དེ་ལྟར་ཡིན་ན་ཁྱོད་རྣམས་ལ་དམ་བཅའ་འཇོག་ག་ལ་རུང་ཞེས་སྨྲས།
JOS 9:8 ཁོ་རྣམས་ཀྱིས་ཡོ་ཤུ་ཨ་ལ། ངེད་རྣམས་ནི་ཁྱེད་ཀྱི་གཡོག་པོ་ཡིན་ཞེས་སྨྲས། ཡོ་ཤུ་ཨ་ཡིས་དེ་རྣམས་ལ། ཁྱོད་རྣམས་སུ་ཡིན། གང་ནས་འོངས་པ་ཡིན་ཞེས་དྲིས་པ་ལ།
JOS 9:9 ཁོ་རྣམས་ཀྱིས་ལན་དུ། གཡོག་པོ་རྣམས་རྒྱང་ཐག་རིང་བའི་ཡུལ་ནས་འོངས་པ་ཡིན་ཏེ། རྒྱུ་མཚན་ནི་ཁྱེད་ཀྱི་དཀོན་མཆོག་ཡ་ཝཱེའི་མཚན་སྙན་དང་ཁོང་གིས་ཨེ་ཅིབ་ཡུལ་ནས་མཛད་པའི་དོན་ཐམས་ཅད་དང་།
JOS 9:10 དེར་མ་ཟད་ཁོང་གིས་ཡོར་དན་གཙང་པོའི་ཤར་ཕྱོགས་ཀྱི་ཨེ་མོར་པའི་རྒྱལ་པོ་གཉིས་ཏེ། ཧེ་སི་པོན་གྱི་རྒྱལ་པོ་སི་ཧོན་དང་ཨ་ཤཱ་ཐ་རོད་ལ་གནས་པའི་པཱ་ཤན་གྱི་རྒྱལ་པོ་ཨོག་གཉིས་ལ་ཇི་ལྟར་མཛད་པའི་དོན་ཐམས་ཅད་ཐོས་པས།
JOS 9:11 ངེད་ཅག་གི་རྒན་པོ་རྣམས་དང་རང་གི་ཡུལ་མི་ཐམས་ཅད་ཀྱིས་ངེད་རྣམས་ལ། ཁྱོད་རྣམས་ཀྱིས་ལག་ཏུ་ལམ་བྲོ་ཁྱེར་ཏེ་ཡེས་ར་ཨེལ་པ་རྣམས་བསུ་རུ་སོང་ནས། ཁོང་རྣམས་ལ། ངེད་ཅག་ནི་ཁྱེད་ཀྱི་གཡོག་པོ་ཡིན་པ་དང་ད་ལྟ་ཁྱེད་རྣམས་ཀྱིས་ངེད་ཅག་ལ་དམ་བཅའ་འཇོག་པར་ཞུ་ཞེས་ཞུས་ཤིག་ཅེས་སྨྲས་སོ། །
JOS 9:12 ངེད་རྣམས་ཕྱིར་བུད་དེ་ཁྱེད་རྣམས་ཀྱི་སར་འོང་བའི་ཉིན་མོར་ཁྱིམ་ནས་ཁྱེར་ཡོང་བའི་བག་ལེབ་འདི་ད་དུང་ཚ་མོ་ཡིན་ནའང་། གཟིགས་དང་། ད་ལྟ་སྐམ་ནས་སྤུ་སྐྱེས་པ་ཡིན།
JOS 9:13 རྒུན་ཆང་གི་རྐྱལ་ཁུག་འདི་ངེད་རྣམས་ཀྱིས་རྒུན་ཆང་ལྡུག་པའི་སྐབས་སུ་ད་དུང་གསར་པ་ཡིན་ནའང་། གཟིགས་དང་། ད་ལྟ་གས་རལ་དུ་གྱུར་ཏོ། །ངེད་རྣམས་ཀྱི་གྱོན་གོས་དང་ལྷམ་འདི་ལམ་ཐག་ཧ་ཅང་རིང་བས་གྱོན་ནས་རྙིང་བར་གྱུར་ཏོ་ཞེས་སྨྲས་སོ། །
JOS 9:14 ཡེས་ར་ཨེལ་པ་རྣམས་ཀྱིས་ཁོ་ཚོའི་ཁ་ཟས་ལས་ཉུང་ཙམ་བླངས་ཤིང་དཀོན་མཆོག་ཡ་ཝཱེ་ལ་མ་ཞུས་སོ། །
JOS 9:15 དེ་ནས་ཡོ་ཤུ་ཨས་ཁོ་རྣམས་དང་འདུམ་འགྲིག་བྱས་ཤིང་། ཁོ་རྣམས་ལ་དམ་བཅའ་བཞག་ནས་ཁོ་རྣམས་འཚོ་རུ་བཅུག མི་ཚོགས་ཀྱི་འགོ་དཔོན་རྣམས་ཀྱིས་ཀྱང་ཁོ་ཚོར་མནའ་བཞག་གོ །
JOS 9:16 ཡེས་ར་ཨེལ་པས་ཁོ་རྣམས་དང་དམ་བཅས་པའི་རྗེས་སུ་ཉིན་གསུམ་འགོར་བ་ན་ད་གཟོད་ཁོ་རྣམས་ནི་ཁྱིམ་མཚེས་ཡིན་པ་དང་ཡེས་ར་ཨེལ་པ་རྣམས་ཀྱི་ཁྲོད་དུ་གནས་ཡོད་པ་ཐོས།
JOS 9:17 ཡེས་ར་ཨེལ་པ་རྣམས་ལམ་དུ་ཆས་ཏེ་ཉིན་གསུམ་པར་དེ་རྣམས་ཀྱི་གྲོང་ཁྱེར་ཏེ། གིབ་ཡོན་དང་ཀེ་ཕི་རཱ། པེ་ཨེ་རཱོད། ཀིར་ཡཱད་ཡེ་ཨ་རིམ་བཅས་སུ་སླེབས།
JOS 9:18 མི་ཚོགས་ཀྱི་འགོ་དཔོན་རྣམས་ཀྱིས་ཡེས་ར་ཨེལ་གྱི་དཀོན་མཆོག་ཡ་ཝཱེ་དཔང་དུ་བཙུགས་ནས་ཁོ་ཚོར་མནའ་བསྐྱལ་བ་ཡིན་པས། ཡེས་ར་ཨེལ་པ་རྣམས་ཀྱིས་ཁོ་རྣམས་ལ་དམག་མ་བརྒྱབ་པ་དང་། མི་ཚོགས་ཀུན་གྱིས་འགོ་དཔོན་ལ་སྡུག་ཡུས་བཏོན་པ་རེད།
JOS 9:19 འགོ་དཔོན་རྣམས་ཀྱིས་མི་ཚོགས་ཡོངས་ལ། ངེད་ཅག་གིས་ཡེས་ར་ཨེལ་གྱི་དཀོན་མཆོག་ཡ་ཝཱེ་དཔང་དུ་བཙུགས་ནས་ཁོ་ཚོར་མནའ་བསྐྱལ་ཟིན་པས་ད་ནི་ང་ཚོས་ཁོ་རྣམས་ལ་གནོད་འཚེ་གཏོང་མི་རུང་།
JOS 9:20 ངེད་རྣམས་ཀྱིས་བསྐྱལ་བའི་མནའ་དེའི་རྐྱེན་གྱིས་ཁོང་ཁྲོ་ང་ཚོའི་སྟེང་དུ་མི་འབབ་པའི་ཕྱིར། ངེད་རྣམས་ཀྱིས་ཁོ་ཚོར་འདི་ལྟར་བྱ་འོས་ཏེ། ཁོ་རྣམས་འཚོ་རུ་འཇུག་དགོས་ཞེས་སྨྲས།
JOS 9:21 འགོ་དཔོན་རྣམས་ཀྱིས་ཡང་མི་ཚོགས་ལ་ཁོ་རྣམས་འཚོ་རུ་འཇུག་དགོས་ཞེས་སྨྲས། དེ་ནས་འགོ་དཔོན་རྣམས་ཀྱིས་ཁོ་ཚོར་སྨྲས་པ་བཞིན། ཁོ་རྣམས་མི་ཚོགས་ཡོངས་ལ་འབུད་ཤིང་གཏུབ་མཁན་དང་ཆུ་ལེན་མཁན་དུ་གྱུར་ཏོ། །
JOS 9:22 ཡོ་ཤུ་ཨ་ཡིས་ཁོ་རྣམས་བོས་ཡོང་སྟེ་ན་རེ། ངེད་རྣམས་ནི་ཁྱོད་ཅག་དང་རྒྱང་ཐག་ཧ་ཅང་རིང་ཞེས་མགོ་སྐོར་བཏང་བ་ཅི་ཡིན་ནམ། དོན་དམ་དུ་ཁྱོད་རྣམས་ནི་ང་ཚོའི་ཉེ་སར་གནས་སོ། །
JOS 9:23 ད་ལྟ་ཁྱོད་རྣམས་ལ་དམོད་མོ་ཐེབས་པ་ཡིན། ཁྱོད་རྣམས་ཀྱི་ཁྲོད་དུ་གཡོག་པོ་བྱེད་མཁན་རྒྱུན་མི་ཆད་ཅིང་། ངའི་དཀོན་མཆོག་གི་བཞུགས་གནས་ཀྱི་ཕྱིར་འབུད་ཤིང་གཏུབ་མཁན་དང་ཆུ་ལེན་མཁན་བྱེད་དགོས་ཞེས་སྨྲས།
JOS 9:24 ཁོ་རྣམས་ཀྱིས་ཡོ་ཤུ་ཨ་ལ། ཁྱེད་ཀྱི་དཀོན་མཆོག་ཡ་ཝཱེས་དངོས་གནས་ཁོང་གི་ཞབས་ཕྱི་མོ་ཤེ་ལ་འདི་སྐད་དུ། ཡུལ་འདི་ཐམས་ཅད་ཁྱོད་རྣམས་ལ་གནང་བར་མ་ཟད། ཁྱོད་རྣམས་ཀྱི་མདུན་དུ་ཡུལ་འདིའི་མི་ཐམས་ཅད་རྩ་མེད་དུ་གཏོང་བར་འགྱུར་ཞེས་བཀའ་བསྩལ་པ་མི་ཞིག་གིས་ཁྱེད་ཀྱི་གཡོག་པོ་ལ་བཤད་བྱུང་བས། ངེད་ཅག་ཁྱེད་རྣམས་ཀྱི་རྐྱེན་གྱིས་སྲོག་འཆོར་བར་ཤིན་ཏུ་འཇིགས་ནས་དོན་འདི་བྱས་པ་ཡིན།
JOS 9:25 ད་ལྟ་ངེད་ཅག་ནི་ཁྱེད་ཀྱི་ཕྱག་ཏུ་ཡོད་པ་དང་། ཁྱེད་ཀྱིས་ང་ཚོ་ལ་ཅི་ལྟར་བྱས་ན་ལེགས་ཤིང་འགྲིག་པར་དགོངས་ན་དེ་ལྟར་གྱིས་ཤིག་ཅེས་ཞུས།
JOS 9:26 དེ་ནས་ཡོ་ཤུ་ཨ་ཡིས་ཁོ་རྣམས་ལ་འདི་ལྟར་བྱས་པ་སྟེ། ཁོ་རྣམས་ཡེས་ར་ཨེལ་པ་རྣམས་ཀྱི་ལག་ནས་ཐར་བར་བྱས་ཤིང་ཡེས་ར་ཨེལ་པས་ཁོ་རྣམས་མ་བསད་དོ། །
JOS 9:27 ཉིན་དེར་ཡོ་ཤུ་ཨ་ཡིས་ཁོ་རྣམས་ནི་དཀོན་མཆོག་ཡ་ཝཱེས་འདེམས་རྒྱུ་ཡིན་པའི་ཡུལ་དེར། ད་ལྟའི་བར་དུ་མི་ཚོགས་དང་དཀོན་མཆོག་ཡ་ཝཱེའི་མཆོད་ཁྲིའི་ཕྱིར་འབུད་ཤིང་གཏུབ་མཁན་དང་ཆུ་ལེན་མཁན་བྱེད་དུ་བཅུག་གོ །
JOS 10:1 ཡེ་རུ་སཱ་ལེམ་གྱི་རྒྱལ་པོ་ཨ་དོ་ནི་ཚེ་དེག་གིས། ཡོ་ཤུ་ཨ་ཡིས་ཨེ་ཡུ་གྲོང་ཁྱེར་བཅོམ་ནས་རྩ་མེད་དུ་བཏང་བ་དང་། ཡེ་རུ་ཀོ་དང་དེའི་རྒྱལ་པོ་ལ་ཇི་ལྟར་བྱས་པ་བཞིན་དུ་ཨེ་ཡུ་གྲོང་ཁྱེར་དང་དེའི་རྒྱལ་པོ་ལའང་དེ་ལྟར་བྱས་པ་ཐོས་ཤིང་། གིབ་ཡོན་གྱི་མི་རྣམས་ཀྱིས་ཡེས་ར་ཨེལ་པ་རྣམས་ལ་དམ་བཅས་ནས་ཁོ་ཚོའི་ཁྲོད་དུ་གནས་པ་ཡང་ཐོས་ཏེ།
JOS 10:2 གིབ་ཡོན་ནི་རྒྱལ་ས་ལྟ་བུའི་གྲོང་ཁྱེར་ཆེན་པོ་ཞིག་ཡིན་པ་དང་ཨེ་ཡུ་གྲོང་ཁྱེར་ལས་ཀྱང་ཆེ་བར་མ་ཟད། གྲོང་ཁྱེར་ནང་གི་མི་ཐམས་ཅད་དཔའ་རྒོད་ཡིན་པས་ཡེ་རུ་སཱ་ལེམ་པ་རྣམས་ཤིན་ཏུ་འཇིགས་སོ། །
JOS 10:3 དེའི་ཕྱིར་ཡེ་རུ་སཱ་ལེམ་གྱི་རྒྱལ་པོ་ཨ་དོ་ནི་ཚེ་དེག་གིས་ཧེབ་རོན་གྱི་རྒྱལ་པོ་ཧོ་ཧམ་དང་། ཡར་མུད་ཀྱི་རྒྱལ་པོ་པིར་ཨམ། ལཱ་ཀི་སིའི་རྒྱལ་པོ་ཡ་ཕི་ཨ། ཨེག་ལོན་གྱི་རྒྱལ་པོ་དི་བིར་བཅས་བཞི་པོའི་མདུན་དུ་མི་མངགས་ནས་དེ་རྣམས་ལ་འདི་ལྟར།
JOS 10:4 ང་ཚོས་གིབ་ཡོན་ལ་འཐབ་འཛིང་བྱེད་པའི་ཕྱིར་ཁྱེད་རྣམས་ཡར་ངེད་ཅག་ལ་རོགས་བྱེད་དུ་འོང་བར་མཛོད་ཅིག ཅི་ལ་ཞེ་ན། ཁོ་རྣམས་ཡོ་ཤུ་ཨ་དང་ཡེས་ར་ཨེལ་པ་རྣམས་ལ་འགྲིག་མཐུན་བྱུང་བ་རེད་ཅེས་སྨྲས་པ་དང་།
JOS 10:5 དེ་ནས་ཨེ་མོར་པའི་རྒྱལ་པོ་རྣམས་ཏེ། ཡེ་རུ་སཱ་ལེམ་གྱི་རྒྱལ་པོ་དང་། ཧེབ་རོན་གྱི་རྒྱལ་པོ། ཡར་མུད་ཀྱི་རྒྱལ་པོ། ལཱ་ཀི་སིའི་རྒྱལ་པོ། ཨེག་ལོན་གྱི་རྒྱལ་པོ་བཅས་ལྔ་པོ་འཛོམས་ནས་ཁོ་ཚོའི་དམག་དཔུང་ཐམས་ཅད་ཁྲིད་དེ་ཡར་སོང་ཞིང་། གིབ་ཡོན་གྱི་ཁ་གཏད་དུ་སྒར་བརྒྱབ་ནས་གི་པེ་ཨོན་ལ་དམག་བརྒྱབ།
JOS 10:6 དེར་གིབ་ཡོན་པ་རྣམས་ཀྱིས་གིལ་གལ་ལ་ཡོད་པའི་སྒར་དུ་ཡོ་ཤུ་ཨའི་རྩར་མི་མངགས་ཏེ། རི་ཁུལ་དུ་སྡོད་པའི་ཨེ་མོར་པའི་རྒྱལ་པོ་རྣམས་མཉམ་དུ་འདུས་ནས་ངེད་རྣམས་ལ་དམག་བརྒྱབ་པས། ཁྱེད་ཀྱིས་རང་གི་གཡོག་པོ་རྣམས་མི་བསྐྱུར་བར་མྱུར་བ་མྱུར་དུ་ཡར་ངེད་རྣམས་སྐྱོབ་ཏུ་ཕེབས་ནས། ངེད་རྣམས་ལ་རོགས་རམ་མཛད་པར་ཞུ་ཞེས་སྨྲས།
JOS 10:7 དེ་ནས་ཡོ་ཤུ་ཨ་དང་ཁོའི་དམག་མི་ཐམས་ཅད། དེར་མ་ཟད་ནུས་སྟོབས་ཆེན་པོའི་དཔའ་རྒོད་དང་བཅས་པ་གིལ་གལ་ནས་ཡར་ཕྱིན་པ་དང་།
JOS 10:8 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། བདག་གིས་ཁོ་རྣམས་ཁྱོད་ཀྱི་ལག་ཏུ་སྤྲད་ཟིན་པ་དང་། ཁོ་རྣམས་ཀྱི་ཁྲོད་དུ་ཁྱོད་ཀྱི་མདུན་དུ་ཚུགས་ཐུབ་མཁན་གཅིག་ཀྱང་མེད་པས་ཁོ་ཚོར་མ་འཇིགས་ཤིག་ཅེས་གསུངས་པ་དང།
JOS 10:9 ཡོ་ཤུ་ཨ་མཚན་བརྒལ་ཏེ་གིལ་གལ་ནས་ཡར་ཕྱིན་ཅིང་གློ་བུར་ཉིད་ལ་ཁོ་ཚོའི་རྩར་སླེབས།
JOS 10:10 དཀོན་མཆོག་ཡ་ཝཱེས་ཁོ་རྣམས་ཡེས་ར་ཨེལ་གྱི་མདུན་དུ་མགོ་རྙོག་པར་མཛད། ཡོ་ཤུ་ཨ་ཡིས་གིབ་ཡོན་ནས་ཁོ་རྣམས་ཕམ་པར་བརྒྱབ་པ་དང་། པེད་ཧོ་རོན་གྱི་ལ་ངོས་སུ་ཁོ་རྣམས་ལ་འཐབ་ནས་ཨ་ཟེ་ཀཱ་དང་མག་ཀེ་དཱ་བར་དུ་སླེབས།
JOS 10:11 ཁོ་རྣམས་ཡེས་ར་ཨེལ་པའི་མདུན་ནས་བྲོས་ཤིང་པེད་ཧོ་རོན་ནས་ཐུར་ལ་འབབ་པའི་དུས་སུ། ཨ་ཟེ་ཀཱ་ལ་སླེབས་རག་བར་དུ་དཀོན་མཆོག་ཡ་ཝཱེས་ནམ་མཁའ་ནས་དེ་རྣམས་ཀྱི་སྟེང་དུ་སེར་བ་ཆེན་པོ་ཕབ་ནས་ཁོ་རྣམས་བསད་དོ། །སེར་བས་བསད་པ་ནི་ཡེས་ར་ཨེལ་པ་རྣམས་ཀྱིས་གྲི་ཡིས་བསད་པ་ལས་ཀྱང་མང་ངོ་། །
JOS 10:12 དཀོན་མཆོག་ཡ་ཝཱེས་ཨེ་མོར་པ་རྣམས་ཡེས་ར་ཨེལ་པ་རྣམས་ལ་སྤྲད་པའི་ཉིན་མོར། ཡོ་ཤུ་ཨ་ཡིས་དཀོན་མཆོག་ཡ་ཝཱེ་ལ་སྨོན་ལམ་ཞུས་ཤིང་ཡེས་ར་ཨེལ་པ་རྣམས་ཀྱི་མདུན་དུ་ཇི་སྐད་དུ། ཉི་མ་ཁྱོད་ནི་གིབ་ཡོན་དུ་འདུག་པར་གྱིས། ཟླ་བ་ཁྱོད་ནི་ཨ་ཡཱ་ལོན་ལུང་པར་སྡོད་ཅིག་ཅེས་སྨྲས།
JOS 10:13 དེ་ནས་འབངས་མི་རྣམས་ཀྱིས་དགྲ་བོ་རྣམས་ལ་དགྲ་ཤ་ལེན་པའི་བར་དུ་ཉི་མ་རང་སོར་ལུས་ཤིང་ཟླ་བ་ཡང་བསྡད། དོན་འདི་ནི་ཡ་ཟ་ཨེར་གྱི་མདོ་ནང་དུ་བཀོད་ཡོད་པ་མ་ཡིན་ནམ། ཉི་མ་ནམ་མཁའི་དབུས་སུ་ལུས་ནས་ཉིན་གཅིག་ཙམ་གྱི་རིང་ལ་ལམ་སང་མ་ནུབ་ཏོ། །
JOS 10:14 དཀོན་མཆོག་ཡ་ཝཱེས་མི་ཡི་སྨོན་ལམ་ལ་ཉིན་མོ་དེ་བཞིན་གསན་པ་ནི་དེའི་སྔོན་དུ་བྱུང་མ་མྱོང་ལ་རྗེས་སུ་ཡང་བྱུང་མ་མྱོང་བ་སྟེ། ཅི་ལ་ཟེར་ན། དཀོན་མཆོག་ཡ་ཝཱེས་ཡེས་ར་ཨེལ་གྱི་ཕྱིར་འཐབ་མོ་མཛད་པས་སོ། །
JOS 10:15 ཡོ་ཤུ་ཨ་དང་ཡེས་ར་ཨེལ་པ་རྣམས་ཕྱིར་གིལ་གལ་གྱི་སྒར་དུ་ལོག་པ་དང་།
JOS 10:16 རྒྱལ་པོ་དེ་ལྔ་པོ་བྲོས་སོང་སྟེ་མག་ཀེ་དཱ་བྲག་ཕུག་ནང་དུ་སྦས་སོ། །
JOS 10:17 མི་ཞིག་གིས་ཡོ་ཤུ་ཨ་ལ། རྒྱལ་པོ་དེ་ལྔ་པོ་རྙེད་ཟིན་ལ། ཐམས་ཅད་མག་ཀེ་དཱ་བྲག་ཕུག་ནང་དུ་སྦས་ཡོད་དོ་ཞེས་སྨྲས།
JOS 10:18 ཡོ་ཤུ་ཨ་ཡིས། ཁྱོད་རྣམས་ཀྱིས་རྡོ་ཕ་བོང་འགའ་བྲག་ཕུག་ཁར་བསྒྲིལ་ནས་མི་མངགས་ཏེ་བསྲུང་བར་གྱིས་ཤིག
JOS 10:19 ཡིན་ནའང་ཁྱོད་རྣམས་ཀྱིས་འགོར་འགྱངས་མི་བྱེད་པར་དགྲ་བོའི་ར་མདར་བརྒྱུགས་ཏེ། རྒྱབ་ལོགས་ནས་ཁོ་རྣམས་ལ་རྒོལ་ཏེ་ཁོ་ཚོ་རང་གི་གྲོང་ཁྱེར་ནང་འགྲོ་རུ་མི་འཇུག་པར་གྱིས། ཅི་ལ་ཟེར་ན། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོ་ཚོ་ཁྱོད་ཅག་གི་ལག་ཏུ་སྤྲད་ཟིན་པས་སོ། །
JOS 10:20 ཡོ་ཤུ་ཨ་དང་ཡེས་ར་ཨེལ་པ་རྣམས་ཀྱིས་ཁོ་རྣམས་ཡོངས་སུ་རྩ་མེད་དུ་བཏང་བ་དང་། དེ་དག་ལས་ལུས་པ་ཐམས་ཅད་ལྕགས་རིས་བསྐོར་བའི་གྲོང་ཁྱེར་ནང་དུ་འཛུལ།
JOS 10:21 དེ་ནས་འབངས་མི་རྣམས་བདེ་འཇགས་ངང་མག་ཀེ་དཱ་ཡི་སྒར་དུ་ཡོ་ཤུ་ཨ་ཡོད་སར་ཕྱིར་ལོག་པ་དང་། ཡེས་ར་ཨེལ་པ་རྣམས་ལ་ཚིག་ངན་སྨྲ་ཕོད་མཁན་གཅིག་ཀྱང་མེད་དོ། །
JOS 10:22 ཡོ་ཤུ་ཨ་ཡིས། བྲག་ཕུག་ཁ་ཕྱེས་ལ་རྒྱལ་པོ་དེ་ལྔ་པོ་བྲག་ཕུག་ནས་ཕྱི་རུ་ངའི་མདུན་དུ་ཁྲིད་ཤོག་ཅིག་ཅེས་སྨྲས་པ་ལ།
JOS 10:23 མི་རྣམས་ཀྱིས་དེ་བཞིན་བྱས་ཤིང་། རྒྱལ་པོ་དེ་ལྔ་ནི། ཡེ་རུ་སཱ་ལེམ་གྱི་རྒྱལ་པོ་དང་། ཧེབ་རོན་གྱི་རྒྱལ་པོ། ཡར་མུད་ཀྱི་རྒྱལ་པོ། ལཱ་ཀི་སིའི་རྒྱལ་པོ། ཨེག་ལོན་གྱི་རྒྱལ་པོ་བཅས་བྲག་ཕུག་ནས་ཕྱི་རུ་བླངས་ཏེ་ཡོ་ཤུ་ཨའི་མདུན་དུ་ཁྲིད་འོངས་སོ། །
JOS 10:24 རྒྱལ་པོ་དེ་ལྔ་པོ་ཕྱིར་ཁྲིད་ནས་ཡོ་ཤུ་ཨ་ཡི་མདུན་དུ་སླེབས་པའི་སྐབས་སུ། ཡོ་ཤུ་ཨ་ཡིས་ཡེས་ར་ཨེལ་པའི་མི་རྣམས་བོས་འོངས་ཞིང་། ཁོ་དང་ལྷན་དུ་ཕྱིན་པའི་དམག་དཔོན་དེ་རྣམས་ལ། ཁྱོད་རྣམས་ཚུར་ཤོག་ལ་རྐང་པ་རྒྱལ་པོ་འདི་རྣམས་ཀྱི་སྐེ་ལ་ཞོག་ཅིག་ཅེས་སྨྲས་པ་ན། ཁོ་རྣམས་ཉེ་སར་བཅར་ནས་རྐང་པ་རྒྱལ་པོ་དེ་རྣམས་ཀྱི་སྐེ་ལ་བཞག
JOS 10:25 ཡོ་ཤུ་ཨས་ཁོ་རྣམས་ལ། ཁྱོད་རྣམས་མ་འཇིགས་མ་འཚབ་ཅིག བློ་རྩ་བརྟན་པོས་སྙིང་རུས་བསྐྱེད་དགོས། ཅི་ལ་ཟེར་ན། དཀོན་མཆོག་ཡ་ཝཱེས་ཁྱོད་རྣམས་ཀྱིས་རྒོལ་བར་འགྱུར་བའི་དགྲ་བོ་ཐམས་ཅད་ལ་འདི་ལྟར་མཛད་ངེས་པས་སོ་ཞེས་གསུངས།
JOS 10:26 དེ་རྗེས་ཡོ་ཤུ་ཨ་ཡིས་རྒྱལ་པོ་དེ་ལྔ་པོར་བརྒྱབ་ནས་བསད་པ་དང་ཤིང་སྡོང་ལྔ་ཡི་སྟེང་དུ་བཀལ་ཞིང་། ཁོ་རྣམས་དགོང་མོའི་བར་དུ་ཤིང་སྡོང་སྟེང་བཀལ་ནས་བཞག
JOS 10:27 ཉི་མ་ནུབ་དུས་སུ་ཡོ་ཤུ་ཨ་ཡིས་བཀའ་བསྒོས་པ་དང་། མི་ཡིས་བེམ་པོ་ཤིང་སྡོང་ལས་མར་བླངས་ཤིང་ཁོ་རྣམས་སྦས་མྱོང་བའི་བྲག་ཕུག་ནང་དུ་འཕངས་ཏེ་རྡོ་ཕ་བོང་འགའ་བྲག་ཕུག་ཁར་བཞག་ཅིང་ད་ལྟའི་བར་དུ་ལུས་སོ། །
JOS 10:28 ཉིན་མོ་དེར་ཡོ་ཤུ་ཨ་ཡིས་མ་ཀེ་དཱ་ཕྲོགས་ཤིང་གྲོང་ཁྱེར་ནང་གི་མི་དང་རྒྱལ་པོ་གྲི་ཡིས་བསད་པ་དང་། དེའི་ནང་གི་མི་ཐམས་ཅད་གཅིག་ཀྱང་མ་བསྐྱུར་བར་རྩ་མེད་དུ་བཏང་། ཁོས་སྔོན་ཆད་ཡེ་རུ་ཀོ་ཡི་རྒྱལ་པོ་ལ་ཇི་ལྟར་བྱས་པ་བཞིན་མག་ཀེ་དཱ་ཡི་རྒྱལ་པོ་ལའང་དེ་ལྟར་བྱས་སོ། །
JOS 10:29 ཡོ་ཤུ་ཨ་དང་ཡེས་ར་ཨེལ་པ་རྣམས་མག་ཀེ་དཱ་ནས་ལིབ་ནཱའི་ཕྱོགས་སུ་ཕྱིན་ཅིང་དེ་ལ་དམག་དྲངས་སོ། །
JOS 10:30 དཀོན་མཆོག་ཡ་ཝཱེས་ལིབ་ནཱ་དང་དེའི་རྒྱལ་པོ་ཡང་ཡེས་ར་ཨེལ་པའི་ལག་ཏུ་སྤྲད། ཡོ་ཤུ་ཨ་ཡིས་གྲོང་ཁྱེར་དེ་ལ་དམག་བརྒྱབ་ནས་གྲོང་ཁྱེར་ནང་གི་མི་ཐམས་ཅད་གཅིག་ཀྱང་མ་བསྐྱུར་བར་གྲི་ཡིས་བསད། ཁོས་སྔོན་ཆད་ཡེ་རུ་ཀོ་ཡི་རྒྱལ་པོ་ལ་ཇི་ལྟར་བྱས་པ་བཞིན་ལིབ་ནཱ་ཡི་རྒྱལ་པོ་ལའང་དེ་ལྟར་བྱས་སོ། །
JOS 10:31 ཡོ་ཤུ་ཨ་དང་ཡེས་ར་ཨེལ་པ་རྣམས་ལིབ་ནཱ་ནས་ལཱ་ཀི་སིའི་ཕྱོགས་སུ་ཕྱིན་ཅིང་། ལཱ་ཀི་སིའི་ཁ་གཏད་དུ་སྒར་བཏབ་ནས་གྲོང་ཁྱེར་དེ་ལ་དམག་དྲངས།
JOS 10:32 དཀོན་མཆོག་ཡ་ཝཱེས་ལཱ་ཀི་སི་ནི་ཡེས་ར་ཨེལ་པའི་ལག་ཏུ་སྤྲད་དོ། །ཉིན་གཉིས་པར་ཡོ་ཤུ་ཨ་ཡིས་ལཱ་ཀི་སི་ཕྲོགས་ཤིང་། ཁོས་ལིབ་ནཱ་ལ་ཇི་ལྟར་བྱས་པ་དེ་བཞིན་དུ་གྲོང་ཁྱེར་ལ་དམག་བརྒྱབ་ནས་དེའི་ནང་གི་མི་ཐམས་ཅད་གྲིས་བསད།
JOS 10:33 སྐབས་དེར་གེ་ཟེར་གྱི་རྒྱལ་པོ་ཧོ་རམ་ཡར་ལཱ་ཀི་སི་ལ་རོགས་བྱེད་དུ་འོངས་པ་དང་། ཡོ་ཤུ་ཨ་ཡིས་ཁོ་དང་ཁོའི་འབངས་མི་ཐམས་ཅད་ཕམ་པར་བརྒྱབ་ནས་གཅིག་ཀྱང་མ་བསྐྱུར།
JOS 10:34 ཡོ་ཤུ་ཨ་དང་ཡེས་ར་ཨེལ་པ་རྣམས་ལཱ་ཀི་སི་ནས་ཨེག་ལོན་ཕྱོགས་སུ་ཕྱིན་ཅིང་། ཨེག་ལོན་གྱི་ཁ་གཏད་དུ་སྒར་བཏབ་ནས་གྲོང་ཁྱེར་དེ་ལ་དམག་དྲངས།
JOS 10:35 ཉིན་མོ་དེར་གྲོང་ཁྱེར་ཕྲོགས་ཤིང་གྲོང་ཁྱེར་ལ་དམག་བརྒྱབ་ནས་དེའི་ནང་གི་མི་རྣམས་གྲིས་བསད། ཉིན་མོ་དེར་ཡོ་ཤུ་ཨ་ཡིས་ལཱ་ཀི་སི་ལ་ཇི་ལྟར་བྱས་པ་དེ་བཞིན་དུ་གྲོང་ཁྱེར་ནང་གི་མི་ཐམས་ཅད་རྩ་མེད་དུ་བཏང་།
JOS 10:36 ཡོ་ཤུ་ཨ་དང་ཡེས་ར་ཨེལ་པ་རྣམས་ཨེག་ལོན་ནས་ཧེབ་རོན་ཕྱོགས་སུ་ཕྱིན་ཅིང་གྲོང་ཁྱེར་དེ་ལ་དམག་དྲངས།
JOS 10:37 ཧེབ་རོན་དང་དེ་ལ་གཏོགས་པའི་གྲོང་ཚོ་རྣམས་ཕྲོགས་ཤིང་། གྲོང་ཁྱེར་ལ་དམག་བརྒྱབ་ནས་དེའི་རྒྱལ་པོ་དང་གྲོང་ཁྱེར་ནང་གི་མི་ཐམས་ཅད་གཅིག་ཀྱང་མ་བསྐྱུར་བར་གྲིས་བསད། ཁོས་ཨེག་ལོན་ལ་ཇི་ལྟར་བྱས་པ་དེ་བཞིན་དུ་གྲོང་ཁྱེར་དང་གྲོང་ཁྱེར་ནང་གི་མི་ཐམས་ཅད་རྩ་མེད་དུ་བཏང་།
JOS 10:38 ཡོ་ཤུ་ཨ་དང་ཡེས་ར་ཨེལ་པ་རྣམས་ཕྱིར་དི་བིར་ལ་སླེབས་ཤིང་གྲོང་ཁྱེར་དེ་ལ་དམག་དྲངས།
JOS 10:39 དི་བིར་དང་དེ་ལ་གཏོགས་པའི་གྲོང་ཚོ་རྣམས་ཕྲོགས་ཤིང་། ཡང་དི་བིར་གྱི་རྒྱལ་པོ་གསོན་བཟུང་བྱས་ནས། གྲོང་ཁྱེར་ནང་གི་མི་ཐམས་ཅད་གཅིག་ཀྱང་མ་བསྐྱུར་བར་གྲིས་བསད། ཁོས་སྔར་ཧེབ་རོན་དང་ལིབ་ནཱ། ལིབ་ནཱའི་རྒྱལ་པོ་བཅས་ལ་ཇི་ལྟར་བྱས་པ་དེ་བཞིན་དུ་དི་བིར་དང་དེའི་རྒྱལ་པོ་ལའང་དེ་ལྟར་བྱས་སོ། །
JOS 10:40 དེ་ལྟར། ཡོ་ཤུ་ཨ་ཡིས་ཡུལ་ཐམས་ཅད་དེ་རི་ཁུལ་དང་ནེ་གུབ་ཡུལ། རི་ཀླུང་། རི་ལྡེབས་བཅས་ཀྱི་མི་རྣམས་དང་ཡུལ་དེ་དག་གི་རྒྱལ་པོ་རྣམས་ལ་དམག་བརྒྱབ་ནས་གཅིག་ཀྱང་མ་བསྐྱུར་བ་དང་། ཡེས་ར་ཨེལ་གྱི་དཀོན་མཆོག་ཡ་ཝཱེས་བཀའ་བསྒོས་པ་བཞིན་དབུགས་དང་ལྡན་པ་ཐམས་ཅད་བསད་དོ། །
JOS 10:41 ཡོ་ཤུ་ཨ་ཡིས་ཀཱ་དེའེ་ཤཱ་པར་ནེ་ཨ་ནས་དམག་བརྒྱབ་སྟེ་གཱ་ཟཱ་བར་དུ་སླེབས་ཤིང་། ཡང་གོ་ཤེན་ཡུལ་ཐམས་ཅད་ལ་དམག་བརྒྱབ་སྟེ་གིབ་ཡོན་བར་དུ་སླེབས།
JOS 10:42 ཡེས་ར་ཨེལ་གྱི་དཀོན་མཆོག་ཡ་ཝཱེས་ཡེས་ར་ཨེལ་གྱི་ཕྱིར་འཐབ་མོ་མཛད་པས། ཡོ་ཤུ་ཨ་ཡིས་དམག་འཐབ་གཅིག་གིས་རྒྱལ་པོ་དེ་རྣམས་ཕམ་པར་བརྒྱབ་པར་མ་ཟད་ཁོ་རྣམས་ཀྱི་ཡུལ་ཡང་ཕྲོགས་པ་རེད།
JOS 10:43 དེ་ནས་ཡོ་ཤུ་ཨ་དང་ཡེས་ར་ཨེལ་པ་རྣམས་གིལ་གལ་གྱི་སྒར་དུ་ཕྱིར་ལོག་གོ །
JOS 11:1 ཧ་ཟོར་གྱི་རྒྱལ་པོ་ཡཱ་བིན་གྱིས་དོན་དེ་ཐོས་ནས། མ་དོན་གྱི་རྒྱལ་པོ་ཡོ་པབ་དང་ཤིམ་རོན་གྱི་རྒྱལ་པོ། ཨག་ཤབ་ཀྱི་རྒྱལ་པོ།
JOS 11:2 བྱང་ཕྱོགས་ཀྱི་རི་ཁུལ་དང་ཀིན་ནེ་རོད་ཀྱི་ལྷོ་ཕྱོགས་ཀྱི་ཨ་ར་པཱ་རི་ཀླུང་། དེར་མ་ཟད་ནུབ་ཕྱོགས་ཀྱི་དཱོར་དེའུ་འབུར་བཅས་ཀྱི་རྒྱལ་པོ་རྣམས་ཀྱི་མདུན་དུ་མི་མངགས་པ་དང་།
JOS 11:3 ཡང་ཤར་ནུབ་གཉིས་ཀྱི་ཀ་ན་ཨན་པ་དང་། རི་ཁུལ་གྱི་ཨེ་མོར་པ། ཧེད་པ། ཕེ་རེ་ཟི་པ། ཡེ་བུ་སི་པ། དེར་མ་ཟད་ཧེར་མོན་རི་འདབས་ཀྱི་མཱས་ཟི་ཕཱ་ཡུལ་གྱི་ཧེ་བི་པ་བཅས་ཀྱི་མདུན་དུ་མི་མངགས།
JOS 11:4 རྒྱལ་པོ་དེ་རྣམས་དང་ཁོ་ཚོའི་དམག་དཔུང་ཐམས་ཅད་ཕྱི་རུ་ཡོང་ཞིང་མི་གྲངས་ནི་མཚོ་ཁའི་བྱེ་མ་ལྟར་མང་བར་མ་ཟད། རྟ་དང་ཤིང་རྟ་ཡང་མང་པོ་ཡོད།
JOS 11:5 རྒྱལ་པོ་དེ་རྣམས་གཅིག་ཏུ་འདུས་ནས་མེ་རོམ་ཆུ་འགྲམ་དུ་སླེབས་ཤིང་། ཡེས་ར་ཨེལ་དང་འཐབ་ཕྱིར་མཉམ་དུ་དམག་སྒར་བཏབ།
JOS 11:6 དཀོན་མཆོག་ཡ་ཝཱེས་ཡོ་ཤུ་ཨ་ལ་འདི་སྐད་དུ། ཁྱོད་རང་ཁོ་རྣམས་ལ་མ་འཇིགས་ཤིག སང་ཉིན་ད་ཚོད་བདག་གིས་ཁོ་ཚོ་ཡེས་ར་ཨེལ་པ་རྣམས་ལ་སྤྲད་དེ་ཐམས་ཅད་གསོད་ངེས་ཡིན། ཁྱོད་ཀྱིས་ཁོ་ཚོའི་རྟ་རྣམས་ཀྱི་བརླ་རྩ་བཅད་ནས་ཁོ་ཚོའི་ཤིང་རྟ་རྣམས་མེར་བསྲེག་དགོས་ཞེས་གསུངས།
JOS 11:7 དེ་ནས་ཡོ་ཤུ་ཨ་ཡིས་དམག་མི་ཐམས་ཅད་ཁྲིད་དེ་མེ་རོམ་ཆུ་འགྲམ་ནས་གློ་བུར་ཉིད་དུ་ཁོ་རྣམས་ལ་དམག་བརྒྱབ།
JOS 11:8 དཀོན་མཆོག་ཡ་ཝཱེས་ཁོ་རྣམས་ཡེས་ར་ཨེལ་པའི་ལག་ཏུ་སྤྲད་པ་དང་། ཡེས་ར་ཨེལ་པས་ཁོ་རྣམས་ལ་དམག་བརྒྱབ་ཅིང་བདས་ནས་གྲོང་ཁྱེར་ཆེན་པོ་ཚི་ཏུན་བར་དང་མིས་རེ་ཕཱོད་མ་ཨིམ་གྱི་བར། ཤར་ཕྱོགས་ཀྱི་མི་ཙི་ཕེའི་ལུང་པ་བར་བཅས་སུ་སླེབས་ཤིང་། ཁོ་རྣམས་གཅིག་ཀྱང་མ་བསྐྱུར་ཏོ། །
JOS 11:9 དེ་ནས་ཡོ་ཤུ་ཨ་ཡིས་དཀོན་མཆོག་ཡ་ཝཱེས་ཁོ་ལ་ཅི་ལྟར་བཀའ་བསྒོས་པ་བཞིན་བྱས་ཏེ། ཁོ་ཚོའི་རྟ་ཡི་བརླ་རྩ་བཅད་ནས་ཤིང་རྟ་མེར་བསྲེགས་སོ། །
JOS 11:10 སྐབས་དེར་ཡོ་ཤུ་ཨ་ཕྱིར་ལོག་ནས་ཧ་ཟོར་ཕྲོགས་པ་དང་དེའི་རྒྱལ་པོ་གྲིས་བསད། ཧ་ཟོར་ནི་སྔར་ནས་བཟུང་རྒྱལ་ཁམས་རྣམས་ཀྱི་ཁྲོད་དུ་མགོ་ཡིན་ནོ། །
JOS 11:11 ཡེས་ར་ཨེལ་པས་གྲོང་ཁྱེར་ནང་གི་མི་རྣམས་གྲིས་བསད་ཅིང་ཁོ་རྣམས་རྩ་མེད་དུ་བཏང་། དབུགས་དང་ལྡན་པ་ཐམས་ཅད་གཅིག་ཀྱང་མ་བསྐྱུར་ཏོ། །ཡོ་ཤུ་ཨ་ཡིས་ཡང་ཧ་ཟོར་མེར་བསྲེགས་སོ། །
JOS 11:12 དཀོན་མཆོག་ཡ་ཝཱེའི་ཞབས་ཕྱི་མོ་ཤེས་བཀའ་ཅི་ལྟར་བསྒོས་པ་དེ་བཞིན་དུ། ཡོ་ཤུ་ཨ་ཡིས་རྒྱལ་པོ་དེ་རྣམས་ཀྱི་གྲོང་ཁྱེར་ཐམས་ཅད་ཕྲོགས་ཤིང་། དེའི་ནང་གི་རྒྱལ་པོ་རྣམས་གསོན་བཟུང་བྱས་ཏེ་ཁོ་རྣམས་གྲིས་བརྒྱབ་ནས་བསད་པ་དང་ཐམས་ཅད་རྩ་མེད་དུ་བཏང་ངོ་། །
JOS 11:13 དེའུ་འབུར་སྟེང་དུ་བརྩིགས་པའི་གྲོང་ཁྱེར་རྣམས་ནི། ཧ་ཟོར་ལས་གཞན་ཡེས་ར་ཨེལ་པས་མེར་མ་སྲེག་གོ །ཡོ་ཤུ་ཨ་ཡིས་ཧ་ཟོར་ཁོ་ན་མེར་བསྲེགས་པའོ། །
JOS 11:14 གྲོང་ཁྱེར་དེ་དག་གི་རྒྱུ་ནོར་དང་ཕྱུགས་ཟོག་ཐམས་ཅད་ནི་ཡེས་ར་ཨེལ་པས་རང་རང་གི་བཅོམ་ནོར་དུ་བླངས། ཡིན་ནའང་མི་ཐམས་ཅད་ནི་རྩ་མེད་དུ་གཏོང་བའི་བར་དུ་གྲིས་བརྒྱབ་ནས་བསད་པ་དང་། དབུགས་དང་ལྡན་པ་ཐམས་ཅད་གཅིག་ཀྱང་མ་བསྐྱུར་ཏོ། །
JOS 11:15 དཀོན་མཆོག་ཡ་ཝཱེས་ཁོང་གི་ཞབས་ཕྱི་མོ་ཤེ་ལ་ཅི་ལྟར་བཀའ་བསྒོས་པ་ལྟར་མོ་ཤེས་དེ་བཞིན་དུ་ཡོ་ཤུ་ཨ་ལ་བཀའ་བསྒོས་ཤིང་། ཡོ་ཤུ་ཨ་ཡིས་ཀྱང་དེ་བཞིན་དུ་བྱས་སོ། །དཀོན་མཆོག་ཡ་ཝཱེས་མོ་ཤེ་ལ་ཅི་ལྟར་བཀའ་བསྒོས་པ་ཐམས་ཅད་ནི་ཡོ་ཤུ་ཨ་ཡིས་ལྷོད་གཡེང་དུ་བཏང་ནས་མ་བསྒྲུབས་པ་གཅིག་ཀྱང་མེད་དོ། །
JOS 11:16 ཡོ་ཤུ་ཨ་ཡིས་ཡུལ་དེ་ཐམས་ཅད་དེ་རི་ཁུལ་དང་ནེ་གུབ་ཡུལ་རྣམས། གོ་ཤེན་ཡུལ་ཐམས་ཅད། རི་ཀླུང་། ཨ་ར་པཱ། ཡེས་ར་ཨེལ་གྱི་རི་ཁུལ་དང་དེའི་རི་ཀླུང་།
JOS 11:17 སེ་ཨིར་ལ་ཡར་འགྲོ་སའི་ཧ་ལཱ་རི་བོ་ནས་ཧེར་མོན་རི་འདབས་ཀྱི་ལེ་པཱ་ནོན་ལུང་པའི་པཱ་ཨལ་གཱ་རྡུ་བར་བཅས་ཕྲོགས་པར་མ་ཟད། ཡུལ་དེ་དག་གི་རྒྱལ་པོ་རྣམས་གསོན་བཟུང་བྱས་ཏེ་བརྒྱབ་ནས་བསད།
JOS 11:18 ཡོ་ཤུ་ཨ་དང་རྒྱལ་པོ་དེ་རྣམས་ལོ་ཟླ་མང་པོ་ཞིག་ལ་འཐབ་བོ། །
JOS 11:19 གིབ་ཡོན་གྱི་ཧེ་བི་པ་ལས་གཞན་ཡེས་ར་ཨེལ་པ་དང་འདུམ་འགྲིག་བྱུང་བའི་གྲོང་ཁྱེར་གཅིག་ཀྱང་མེད་པ་སྟེ། ཐམས་ཅད་ཡེས་ར་ཨེལ་པས་འཐབ་མོ་བྱས་ནས་ཕྲོགས་འོངས་པ་ཡིན་ནོ། །
JOS 11:20 རྒྱུ་མཚན་ནི་དཀོན་མཆོག་ཡ་ཝཱེས་མོ་ཤེ་ལ་ཅི་ལྟར་བཀའ་བསྒོས་པ་བཞིན་དུ། ཁོ་རྣམས་རྩ་མེད་དུ་གཏོང་བ་དང་སྙིང་རྗེ་མི་འཐོབ་པའི་ཕྱིར། ཁོ་རྣམས་ཀྱི་སེམས་རྒྱུད་གྱོང་པོར་མཛད་ནས་ཡེས་ར་ཨེལ་པ་དང་འཐབ་པར་འོངས་པ་ནི་དཀོན་མཆོག་ཡ་ཝཱེའི་ཐུགས་དགོངས་ལགས་སོ། །
JOS 11:21 སྐབས་དེར་ཡོ་ཤུ་ཨ་འོངས་ནས་རི་ཁུལ་དང་ཧེབ་རོན། དི་བིར། ཨ་ནབ། ཡ་ཧུ་དཱ་རི་ཁུལ། ཡེས་ར་ཨེལ་རི་ཁུལ་བཅས་སུ་གནས་པའི་ཨ་ནག་གི་བུ་རྒྱུད་ ཐམས་ཅད་མེད་པར་བྱས་ཤིང་། ཡོ་ཤུ་ཨ་ཡིས་ཁོ་རྣམས་དང་ཁོ་ཚོའི་གྲོང་ཁྱེར་རྣམས་མེད་པར་བྱས་སོ། །
JOS 11:22 ཡེས་ར་ཨེལ་པ་རྣམས་ཀྱི་ཡུལ་དུ་ཨ་ནག་པ་གཅིག་ཀྱང་མ་བསྐྱུར་བ་དང་། གཱ་ཟཱ་དང་གཱད། ཨ་སི་དོད་བཅས་འབའ་ཞིག་ཏུ་བསྐྱུར་ནས་ལུས་པ་ཡིན།
JOS 11:23 དེ་ལྟར་ཡོ་ཤུ་ཨ་ཡིས་དཀོན་མཆོག་ཡ་ཝཱེས་མོ་ཤེ་ལ་བསྒོས་པའི་བཀའ་ཐམས་ཅད་ལྟར་ཡུལ་དེ་ཡོངས་སུ་ཕྲོགས་ཤིང་། ཡེས་ར་ཨེལ་ཚོ་པའི་རུས་རྒྱུད་ལྟར་ཁོ་རྣམས་ལ་ས་སྐལ་དུ་བགོས་པ་དང་། ས་གཞི་ཡོངས་སུ་འཐབ་འཁྲུག་ཞི་བར་གྱུར་ཏོ། །
JOS 12:1 འདི་དག་ནི་ཡེས་ར་ཨེལ་པ་རྣམས་ཀྱིས་ཡོར་དན་གཙང་པོའི་ཕ་རོལ་ཏུ་ཉི་མ་ཤར་སའི་ཕྱོགས་སུ་རྒྱལ་པོ་གཉིས་ཕམ་པར་བརྒྱབ་ནས་ཁོ་རྣམས་ཀྱི་ས་བདག་ཏུ་བཟུང་བ་སྟེ། ཨར་ནོན་གྲོག་མོ་ནས་ཧེར་མོན་རི་བོའི་བར་དང་། དེར་མ་ཟད་ཤར་ཕྱོགས་ཀྱི་ཨ་ར་པཱ་ཡུལ་ཐམས་ཅད་ཡིན་ནོ། །
JOS 12:2 རྒྱལ་པོ་དེ་གཉིས་ཀྱི་གཅིག་ནི་ཧེ་སི་པོན་དུ་གནས་པའི་ཨེ་མོར་པའི་རྒྱལ་པོ་སི་ཧོན་ཡིན་ཏེ། ཁོའི་མངའ་འོག་གི་ཡུལ་ནི་ཨར་ནོན་ལུང་པའི་འགྲམ་གྱི་ཨ་རོ་ཨེར་དང་གྲོག་རོང་གི་དབུས་རྒྱུད་དང་། དེ་མིན་གིལ་ཨད་ཀྱི་ཕྱེད་ཀ་ནས་ཨམ་མོན་པའི་ས་མཚམས་ཡིན་པའི་ཡཱབ་པོག་ཆུ་བོ་བར་དང་།
JOS 12:3 ཡོར་དན་གཙང་པོའི་ཤར་ཕྱོགས་ཀྱི་ཨ་ར་པཱ་ནས་ཀིན་ནེ་རོད་ཀྱི་མཚོ་བར་དང་། ཡང་ཨ་ར་པཱའི་མཚོ་སྟེ་ཚྭ་མཚོ་བར། པེད་ཡེ་ཤི་མོད་དུ་འགྲོ་བའི་ལམ་དང་ལྷོ་ཕྱོགས་ནས་ཕིས་ག་རི་འདབས་བར་དུ་ཡིན་ནོ། །
JOS 12:4 ཡང་ཅིག་ཤོས་པཱ་ཤན་གྱི་རྒྱལ་པོ་ཨོག་ཅེས་པ་ཡིན་ཏེ། ཁོ་ནི་རེ་པཱ་པ་མཐའ་མ་ཡིན་ལ། ཨ་ཤཱ་ཐ་རོད་དང་ཨེ་དྲེ་ཨི་རུ་གནས་པ་ཡིན།
JOS 12:5 ཁོའི་མངའ་འོག་གི་ཡུལ་ནི་རི་བོ་ཧེར་མོན་དང་སལ་ཀཱ། པཱ་ཤན་ཡུལ་ཐམས་ཅད་ནས་གེ་ཤུར་པ་དང་མ་ཨ་ཀཱ་པ་རྣམས་ཀྱི་ས་མཚམས་བར་དང་། དེ་མིན་གིལ་ཨད་ཀྱི་ཕྱེད་ཀ་ནས་ཧེ་སི་པོན་གྱི་རྒྱལ་པོ་སི་ཧོན་གྱི་ས་མཚམས་བར་དུ་ཡིན་ནོ། །
JOS 12:6 རྒྱལ་པོ་དེ་གཉིས་ནི་དཀོན་མཆོག་ཡ་ཝཱེའི་ཞབས་ཕྱི་མོ་ཤེ་དང་ཡེས་ར་ཨེལ་པ་རྣམས་ཀྱིས་ཕམ་པར་བརྒྱབ་པ་ཡིན་ལ། དཀོན་མཆོག་ཡ་ཝཱེའི་ཞབས་ཕྱི་མོ་ཤེ་ཡིས་ཁོ་ཚོའི་ཡུལ་རྣམས་རུ་བེན་པ་དང་གཱ་རྡུ་པ་རྣམས་དང་། མཱ་ན་ཤེའི་ཚོ་པ་ཕྱེད་ཀ་ལ་ས་སྐལ་དུ་གནང་བ་ཡིན་ནོ། །
JOS 12:7 ཡོ་ཤུ་ཨ་དང་ཡེས་ར་ཨེལ་པ་རྣམས་ཀྱིས་ཡོར་དན་གཙང་པོའི་ནུབ་ཏུ་རྒྱལ་པོ་རྣམས་ཕམ་པར་བརྒྱབ་པ་དང་། ཁོ་རྣམས་ཀྱི་ཡུལ་ནི་ལེ་པཱ་ནོན་ལུང་པའི་པཱ་ཨལ་གཱ་རྡུ་ནས་སེ་ཨིར་ལ་འགྲོ་བའི་རི་བོ་ཧ་ལཱ་བར་ཡིན། ཡོ་ཤུ་ཨ་ཡིས་ཡེས་ར་ཨེལ་ཚོ་པའི་རུས་རྒྱུད་ལྟར་ཡུལ་དེ་ཁོ་རྣམས་ལ་ས་སྐལ་དུ་བགོས་པ་སྟེ།
JOS 12:8 ཧེད་པ་དང་ཨེ་མོར་པ། ཀ་ན་ཨན་པ། ཕེ་རེ་ཟི་པ། ཧེ་བི་པ། ཡེ་བུ་སི་པ་བཅས་ཀྱི་རི་ཁུལ་དང་རི་ཀླུང་། ཨ་ར་པཱ། རི་ལྡེབས། དབེན་སྟོང་། ནེ་གུབ་ཡུལ་བཅས་ཡིན་ནོ། །
JOS 12:9 རྒྱལ་པོ་རྣམས་ནི་འདི་ལྟ་སྟེ། གཅིག་ནི་ཡེ་རུ་ཀོ་ཡི་རྒྱལ་པོ་དང། གཅིག་ནི་པེད་ཨེལ་ལ་ཉེ་བའི་ཨེ་ཡུ་གྲོང་ཁྱེར་གྱི་རྒྱལ་པོ།
JOS 12:10 གཅིག་ནི་ཡེ་རུ་སཱ་ལེམ་གྱི་རྒྱལ་པོ། གཅིག་ནི་ཧེབ་རོན་གྱི་རྒྱལ་པོ།
JOS 12:11 གཅིག་ནི་ཡར་མུད་ཀྱི་རྒྱལ་པོ། གཅིག་ནི་ལཱ་ཀི་སིའི་རྒྱལ་པོ།
JOS 12:12 གཅིག་ནི་ཨེག་ལོན་གྱི་རྒྱལ་པོ། གཅིག་ནི་གེ་ཟེར་གྱི་རྒྱལ་པོ།
JOS 12:13 གཅིག་ནི་དི་བིར་གྱི་རྒྱལ་པོ། གཅིག་ནི་གེ་དེར་གྱི་རྒྱལ་པོ།
JOS 12:14 གཅིག་ནི་ཧོར་མཱའི་རྒྱལ་པོ། གཅིག་ནི་ཨ་རད་ཀྱི་རྒྱལ་པོ།
JOS 12:15 གཅིག་ནི་ལིབ་ནཱ་ཡི་རྒྱལ་པོ། གཅིག་ནི་ཨ་དུལ་ལཱམ་གྱི་རྒྱལ་པོ།
JOS 12:16 གཅིག་ནི་མག་ཀེ་དཱའི་རྒྱལ་པོ། གཅིག་ནི་པེད་ཨེལ་གྱི་རྒྱལ་པོ།
JOS 12:17 གཅིག་ནི་ཏ་ཕུ་ཨའི་རྒྱལ་པོ། གཅིག་ནི་ཧེ་ཕེར་གྱི་རྒྱལ་པོ།
JOS 12:18 གཅིག་ནི་ཨ་ཕེག་གི་རྒྱལ་པོ། གཅིག་ནི་ལ་ཤཱ་རོན་གྱི་རྒྱལ་པོ།
JOS 12:19 གཅིག་ནི་མ་དོན་གྱི་རྒྱལ་པོ། གཅིག་ནི་ཧ་ཟོར་གྱི་རྒྱལ་པོ།
JOS 12:20 གཅིག་ནི་ཤིམ་རོན་མེ་རོན་གྱི་རྒྱལ་པོ། གཅིག་ནི་ཨག་ཤབ་ཀྱི་རྒྱལ་པོ།
JOS 12:21 གཅིག་ནི་ཐ་ཨ་ནག་གི་རྒྱལ་པོ། གཅིག་ནི་མེ་གིད་དོའི་རྒྱལ་པོ།
JOS 12:22 གཅིག་ནི་ཀེ་དེ་སིའི་རྒྱལ་པོ། གཅིག་ནི་ཀར་མེལ་དང་ཉེ་བའི་ཡོག་ནེ་ཨམ་གྱི་རྒྱལ་པོ།
JOS 12:23 གཅིག་ནི་དཱོར་དེའུ་འབུར་དུ་ཡོད་པའི་དཱོར་གྱི་རྒྱལ་པོ། གཅིག་ནི་གིལ་གལ་དུ་ཡོད་པའི་གོ་ཡིམ་གྱི་རྒྱལ་པོ།
JOS 12:24 གཅིག་ནི་ཐིར་ཚའི་རྒྱལ་པོ་སྟེ་བསྡོམས་པས་རྒྱལ་པོ་སོ་གཅིག་ཡིན་ནོ། །
JOS 13:1 ཡོ་ཤུ་ཨ་ལོ་ན་རྒས་ཤིང་དཀོན་མཆོག་ཡ་ཝཱེས་ཁོ་ལ་འདི་སྐད་དུ། ཁྱོད་རང་ལོ་ན་རྒས་ཤིང་ཚུར་མ་ལོན་པའི་ཡུལ་ད་དུང་མང་པོ་ཡོད་པ་སྟེ།
JOS 13:2 དེ་ནི་ཕེ་ལེ་ཤེད་པའི་ཡུལ་ཐམས་ཅད་དང་གེ་ཤུར་པའི་ཡུལ་ཐམས་ཅད།
JOS 13:3 ཨེ་ཅིབ་ཀྱི་མདུན་དུ་ཡོད་པའི་སི་ཧོར་ཆུ་བོ་ནས་བྱང་ཕྱོགས་སུ་ཨེག་རོན་གྱི་ས་མཚམས་བར་ཏེ། ཀ་ན་ཨན་པ་ལ་གཏོགས་པའི་ཡུལ་དུ་བརྩིས་པ་ཡིན། ཕེ་ལེ་ཤེད་པའི་འགོ་དཔོན་ལྔ་ཡིས་བདག་སྐྱོང་བྱེད་པའི་གཱ་ཟཱ་པ་དང་ཨ་སི་དོད་པ། ཨ་སི་ཀེ་ལོན་པ། གཱད་པ། ཨེག་རོན་པ་བཅས་ཀྱི་ས་དང་། དེར་མ་ཟད་ཨ་ཝི་པའི་ས་ཡང་ཡོད།
JOS 13:4 ཡང་ལྷོ་ཕྱོགས་སུ་ཀ་ན་ཨན་པའི་ཡུལ་ཐམས་ཅད་དང་ཚི་ཏུན་པའི་མེ་ཨ་རཱ་ནས་ཨ་ཕེག་དང་། དེ་ནས་ཨེ་མོར་པའི་ས་མཚམས་བཅས་ཀྱི་བར།
JOS 13:5 ད་དུང་གེ་བལ་པའི་ཡུལ་དང་། དེར་མ་ཟད་ཤར་ཕྱོགས་སུ་ལེ་པཱ་ནོན་ཡོངས་ཏེ། ཧེར་མོན་རི་འདབས་ཀྱི་པཱ་ཨལ་གཱ་རྡུ་ནས་ཧ་མཱད་ཉག་ག་བར་དུ་ཡིན།
JOS 13:6 ལེ་པཱ་ནོན་ནས་མིས་རེ་ཕཱོད་མ་ཨིམ་གྱི་བར་དུ་གནས་པའི་རི་ཁུལ་གྱི་མི་རྣམས་ཏེ་ཚི་ཏུན་པ་ཐམས་ཅད་ནི་བདག་གིས་ཡེས་ར་ཨེལ་པ་རྣམས་ཀྱི་མདུན་ནས་ཕྱིར་སྐྲོད་ངེས་ཡིན། ཁྱོད་ཀྱིས་བདག་གིས་ཅི་ལྟར་བསྒོས་པ་བཞིན་ཡུལ་འདི་རྒྱན་འཕངས་ནས་ཡེས་ར་ཨེལ་པ་རྣམས་ལ་ས་སྐལ་དུ་བགོས་ཤིག
JOS 13:7 ད་ལྟ་ཁྱོད་ཀྱིས་ཡུལ་འདི་ཚོ་པ་དགུ་དང་མཱ་ན་ཤེའི་ཚོ་པ་ཕྱེད་ཀ་ལ་ས་སྐལ་དུ་བགོ་དགོས་ཞེས་གསུངས།
JOS 13:8 མཱ་ན་ཤེའི་ཚོ་པ་ཕྱེད་ཀ་དང་རུ་བེན་པ་དང་གཱ་རྡུ་པ་ཚོ་པ་གཉིས་ལ་ནོར་སྐལ་ཐོབ་ཟིན་པ་སྟེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཡོར་དན་གཙང་པོའི་ཤར་ནས་ཁོ་རྣམས་ལ་གནང་བ་ཡིན་ལ།
JOS 13:9 ཨར་ནོན་གྲོག་མོ་འགྲམ་གྱི་ཨ་རོ་ཨེར་དང་གྲོག་རོང་གི་གྲོང་ཁྱེར། དེར་མ་ཟད་མེ་དེ་བཱ་ཡི་ཐང་ཧྲིལ་པོ་བཅས་ནས་དི་བོན་བར།
JOS 13:10 ཧེ་སི་པོན་ལ་དབང་བྱེད་མཁན་ཨེ་མོར་པའི་རྒྱལ་པོ་སི་ཧོན་གྱི་གྲོང་ཁྱེར་རྣམས་ནས་ཨམ་མོན་པའི་ས་མཚམས་བར་དུ་ཡིན་ལ།
JOS 13:11 ཡང་གེ་ཤུར་པ་དང་མ་ཨ་ཀཱ་པ་རྣམས་ཀྱི་ས་མཚམས་ཏེ་གིལ་ཨད་ཡུལ་དང་། རི་བོ་ཧེར་མོན་ཐམས་ཅད་དང་པཱ་ཤན་ཡུལ་ཧྲིལ་པོ་ནས་སལ་ཀཱ་བར་དུ་ཡིན།
JOS 13:12 ཡང་པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་ཧྲིལ་པོ་བཅས་ཡིན། ཁོ་ནི་ཨ་ཤཱ་ཐ་རོད་དང་ཨེ་དྲེ་ཨི་ཡི་རྒྱལ་པོ་ཡིན་ལ། རེ་པཱ་པ་ལས་ཁོ་རང་རྐྱང་རྐྱང་ལུས་ཤིང་། ཡུལ་འདི་རྣམས་ཀྱི་མི་ཐམས་ཅད་མོ་ཤེས་ཕམ་པར་བརྒྱབ་ནས་མཐར་བསྐྲད་པ་ཡིན་ནོ། །
JOS 13:13 ཡིན་ནའང་ཡེས་ར་ཨེལ་པ་རྣམས་ཀྱིས་གེ་ཤུར་པ་དང་མ་ཨ་ཀཱ་པ་རྣམས་ཕྱིར་མ་བསྐྲད་ཅིང་། མི་དེ་རྣམས་ནི་ད་ལྟའི་བར་དུ་ཡེས་ར་ཨེལ་པ་རྣམས་ཀྱི་ཁྲོད་དུ་གནས་སོ། །
JOS 13:14 ལེ་ཝི་ཚོ་པ་འབའ་ཞིག་ལ་མོ་ཤེས་ས་སྐལ་མ་བགོས་ཏེ། དཀོན་མཆོག་ཡ་ཝཱེས་ཁོ་རྣམས་ལ་ཞལ་བཞེས་གནང་བ་ཇི་བཞིན། ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་ཕུལ་བའི་སྦྱིན་སྲེག་དེ་རྣམས་ཀྱི་ནོར་སྐལ་ཡིན་པའོ། །
JOS 13:15 མོ་ཤེས་རུ་བེན་ཚོ་པའི་རུས་རྒྱུད་ལྟར་དེ་རྣམས་ལ་ནོར་སྐལ་བགོས་པ་སྟེ།
JOS 13:16 ཁོ་རྣམས་ཀྱི་ས་མཚམས་ནི་ཨར་ནོན་གྲོག་མོ་འགྲམ་གྱི་ཨ་རོ་ཨེར་དང་གྲོག་རོང་གི་གྲོང་ཁྱེར། མེ་དེ་བཱ་ཡི་ཐང་ཧྲིལ་པོ།
JOS 13:17 ཧེ་སི་པོན་དང་ཧེ་སི་པོན་ཐང་ལ་གཏོགས་པའི་གྲོང་ཁྱེར་སོ་སོ་སྟེ། དི་བོན་དང་པ་མོད་པཱ་ཨལ། པེད་པཱ་ཨལ་མེ་ཨོན།
JOS 13:18 ཡ་ཙཱ། ཀེ་དེ་མོད། མེ་ཕཱ་ཨད།
JOS 13:19 ཀིར་ཡ་ཐཱ་ཡེམ། སིབ་མ། ལུང་པའི་ནང་དུ་ཡོད་པའི་རི་དེའི་ཚེ་རེད་ཤ་ཧར།
JOS 13:20 པེད་ཕེ་ཨོར། རི་ཕིས་ག་དེའུ་འབུར། པེད་ཡེ་ཤི་མོད་བཅས་དང་།
JOS 13:21 ད་དུང་ཐང་གི་གྲོང་ཁྱེར་སོ་སོ་དང་ཨེ་མོར་པའི་རྒྱལ་པོ་སི་ཧོན་གྱི་རྒྱལ་ཁམས་ཧྲིལ་པོ། སི་ཧོན་ནི་སྔར་ཧེ་སི་པོན་གྱི་རྒྱལ་པོ་ཡིན་ལ། མོ་ཤེས་ཁོ་དང་མིད༌ཡཱན་གྱི་ཚོ་དཔོན་ཨེ་ཝི་དང་རེ་ཀེམ། ཙུར། ཧུར། རེ་པ་བཅས་ཕམ་པར་བརྒྱབ་པ་དང་། དེ་ཐམས་ཅད་ནི་ཡུལ་དེར་གནས་པའི་སི་ཧོན་གྱི་དབང་འོག་ཡིན་ནོ། །
JOS 13:22 སྐབས་དེར་ཡེས་ར་ཨེལ་པ་རྣམས་ཀྱིས་བསད་པའི་གྲས་སུ། པེ་ཨོར་གྱི་བུ་སྒྱུ་མ་མཁན་པེལ་ཨམ་ཡང་གྲིས་བསད་དོ། །
JOS 13:23 རུ་བེན་པའི་ས་མཚམས་ནི་ཡོར་དན་གཙང་པོ་དང་དེར་ཉེ་བའི་ཡུལ་རྣམས་ཡིན། དེ་ནི་རུ་བེན་པ་རྣམས་ལ་རུས་རྒྱུད་བཞིན་ས་སྐལ་དུ་ཐོབ་པའི་གྲོང་ཁྱེར་རྣམས་དང་། གྲོང་ཁྱེར་ལ་གཏོགས་པའི་གྲོང་ཚོ་རྣམས་ཡིན།
JOS 13:24 མོ་ཤེས་གཱ་རྡུ་ཚོ་པའི་རུས་རྒྱུད་ལྟར་དེ་རྣམས་ལ་ནོར་སྐལ་བགོས་པ་སྟེ།
JOS 13:25 ཁོ་རྣམས་ཀྱི་ས་མཚམས་ནི་ཡཱ་ཟེར་དང་གིལ་ཨད་ཀྱི་གྲོང་ཁྱེར་སོ་སོ་དང་ཨམ་མོན་པའི་ཡུལ་ཕྱེད་ནས་རབ་བཱའི་མདུན་དུ་ཡོད་པའི་ཨ་རོ་ཨེར་བར་དང་།
JOS 13:26 ཧེ་སི་པོན་ནས་ར་མད་མི་ཙི་ཕེ་དང་པེ་ཏོ་ནིམ་བར་དང་། ཡང་མཱ་ཧ་ནཱ་ཡིམ་ནས་དེ་པིར་བར་གྱི་ས་མཚམས་དང་།
JOS 13:27 ཧེ་སི་པོན་རྒྱལ་པོ་སི་ཧོན་གྱི་རྒྱལ་ཁམས་ནས་ལུས་པའི་ཡུལ་ཏེ། གྲོག་གཞུང་གི་པེད་ཧ་རམ་དང་པེད་ནིམ་རཱ། སོའུ་ཀོད། ཚ་ཕོན་བཅས་དང་། ཡོར་དན་གཙང་པོ་དང་དེར་ཉེ་བའི་ཡུལ་ནས་ཀིན་ནེ་རོད་མཚོ་མཐའ་བར་དུ་ཐམས་ཅད་ཡོར་དན་གཙང་པོའི་ཤར་ཏུ་གནས་སོ། །
JOS 13:28 དེ་ནི་གཱ་རྡུ་པ་རྣམས་ལ་རུས་རྒྱུད་ལྟར་ནོར་སྐལ་དུ་ཐོབ་པའི་གྲོང་ཁྱེར་རྣམས་དང་དེ་རྣམས་ལ་གཏོགས་པའི་གྲོང་ཚོ་རྣམས་ཡིན་ནོ། །
JOS 13:29 མོ་ཤེས་མཱ་ན་ཤེའི་ཚོ་པ་ཕྱེད་ཀ་ལ་ས་སྐལ་བགོས་པ་སྟེ། མཱ་ན་ཤེའི་ཚོ་པ་ཕྱེད་ཀའི་རུས་རྒྱུད་ལྟར་བགོས་པ་ཡིན་ནོ། །
JOS 13:30 ཁོ་རྣམས་ཀྱི་ས་མཚམས་ནི་མཱ་ཧ་ནཱ་ཡིམ་ནས་པཱ་ཤན་ཡུལ་ཐམས་ཅད་དེ། པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་ཧྲིལ་པོ་དང་། པཱ་ཤན་དུ་ཆགས་པའི་ཡཱ་ཨིར་གྱི་གྲོང་ཁྱེར་ཐམས་ཅད་བསྡོམས་པས་དྲུག་ཅུ་དང་།
JOS 13:31 གིལ་ཨད་ཀྱི་ཕྱེད་ཀ་དང་པཱ་ཤན་གྱི་རྒྱལ་པོ་ཨོག་གི་རྒྱལ་ཁམས་ལ་གཏོགས་པའི་གྲོང་ཁྱེར་ཏེ། ཨ་ཤཱ་ཐ་རོད་དང་ཨེ་དྲེ་ཨི་གཉིས་བཅས་ནི་རུས་རྒྱུད་ལྟར་མཱ་ན་ཤེའི་བུ་མཱ་ཀིར་གྱི་བུ་རྒྱུད་ཕྱེད་ཀར་གནང་བ་ཡིན་ནོ། །
JOS 13:32 དེ་ནི་མོ་ཤེས་ཡོར་དན་གཙང་པོའི་ཤར་ཏུ་ཡེ་རུ་ཀོ་ཡི་མོ་ཨབ་ཐང་ལ་ཁ་གཏད་ནས་ཁོ་རྣམས་ལ་བགོས་པའི་ས་སྐལ་ཡིན།
JOS 13:33 དཀོན་མཆོག་ཡ་ཝཱེས་ལེ་ཝི་པ་རྣམས་ལ་ཞལ་བཞེས་གནང་བ་ཇི་བཞིན། ཡེས་ར་ཨེལ་གྱི་དཀོན་མཆོག་ཡ་ཝཱེ་ནི་ཁོ་རྣམས་ཀྱི་ནོར་སྐལ་ཡིན་པས། མོ་ཤེས་ལེ་ཝིའི་ཚོ་པར་ས་སྐལ་མ་བགོས་པ་ཡིན་ནོ། །
JOS 14:1 ཡེས་ར་ཨེལ་པ་རྣམས་ལ་ཀ་ན་ཨན་ཡུལ་ནས་ཐོབ་པའི་ས་སྐལ་ནི། མཆོད་དཔོན་ཨེ་ལི་ཨ་ཟར་དང་ནུན་གྱི་བུ་ཡོ་ཤུ་ཨ་དང་། དེ་མིན་ཡེས་ར་ཨེལ་གྱི་ཚོ་པ་རེ་རེའི་ཚོ་དཔོན་བཅས་ཀྱིས་ཁོ་རྣམས་ལ་བགོས་པ་འདི་ལྟ་སྟེ།
JOS 14:2 དེ་ནི་དཀོན་མཆོག་ཡ་ཝཱེས་མོ་ཤེ་བརྒྱུད་ནས་བཀའ་བསྒོས་པ་ཇི་བཞིན། ཁོ་ཚོས་ཚོ་པ་དགུ་དང་ཕྱེད་ཀར་རྒྱན་འཕངས་ནས་ས་སྐལ་བགོས་པའོ། །
JOS 14:3 མ་གཞི་མོ་ཤེས་ཡོར་དན་གཙང་པོའི་ཤར་ཏུ་ཚོ་པ་གཉིས་དང་ཕྱེད་ཀ་དེ་ལ་ས་སྐལ་བགོས་པ་ཡིན་ལ། ཁོ་རྣམས་ཀྱི་ཁྲོད་དུ་ལེ་ཝི་པ་རྣམས་ལ་ས་སྐལ་མ་བགོས་སོ། །
JOS 14:4 ཅི་ལ་ཟེར་ན། ཡོ་སེབ་ཀྱི་བུ་རྒྱུད་རྣམས་ནི་མཱ་ན་ཤེ་དང་ཨེ་ཕཱར་ཡིམ་ཚོ་པ་གཉིས་སུ་གྱུར་པས། ལེ་ཝི་པ་རྣམས་ལ་ས་མ་བགོས་མོད། འོན་ཀྱང་ཁོ་རྣམས་གནས་སྡོད་བྱེད་པར་གྲོང་ཁྱེར་གནང་ཞིང་། ཡང་ཁོ་རྣམས་ཀྱི་ཕྱུགས་འཚོ་བ་དང་རྒྱུ་ནོར་འཇོག་པའི་ཕྱིར་གྲོང་ཁྱེར་གྱི་ཉེ་འཁོར་རྣམས་གནང་བའོ། །
JOS 14:5 དཀོན་མཆོག་ཡ་ཝཱེས་མོ་ཤེ་ལ་ཇི་ལྟར་བཀའ་བསྒོས་པ་བཞིན་དུ་ཡེས་ར་ཨེལ་པ་རྣམས་ཀྱིས་དེ་ལྟར་བྱས་ཤིང་ས་བགོས་སོ། །
JOS 14:6 སྐབས་དེར། ཡ་ཧུ་དཱ་པ་རྣམས་གིལ་གལ་དུ་ཡོ་ཤུ་ཨའི་མདུན་དུ་འོངས་པ་དང་། ཀེ་ནི་ཟི་པ་ཡེ་ཕུན་ནེའི་བུ་ཀཱ་ལེབ་ཀྱིས་ཡོ་ཤུ་ཨ་ལ། དཀོན་མཆོག་ཡ་ཝཱེས་ཀཱ་དེའེ་ཤཱ་པར་ནེ་ཨ་རུ་ང་དང་ཁྱེད་གཉིས་ཀྱི་ཕྱིར་དཀོན་མཆོག་གི་སྐྱེས་བུ་མོ་ཤེ་ལ་བཀའ་ཅི་གསུངས་པ་ཐམས་ཅད་ཁྱེད་ཀྱིས་ཤེས་སོ། །
JOS 14:7 དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཀཱ་དེའེ་ཤཱ་པར་ནེ་ཨ་ནས་ང་རང་ཡུལ་འདིར་ལྟ་ཉུལ་བྱེད་དུ་མངགས་པ་དང་། དུས་དེར་ང་རང་ལོ་བཞི་བཅུ་ལོན་ཞིང་ངས་བསམ་ཚུལ་བཞིན་ཁོང་ལ་འཕྲིན་ཞུས་པ་ཡིན་མོད།
JOS 14:8 འོན་ཀྱང་ང་དང་ལྷན་ཅིག་ཏུ་ཡར་ཕྱིན་པའི་སྤུན་ཟླ་རྣམས་ཀྱིས་འབངས་མི་ཚོའི་སེམས་ཀྱི་དཔའ་ཞུམ་པར་བྱས། ཡིན་ནའང་ང་རང་ནི་བློ་གཅིག་སེམས་གཅིག་གིས་ང་ཡི་དཀོན་མཆོག་ཡ་ཝཱེའི་རྗེས་སུ་འབྲངས་སོ། །
JOS 14:9 ཉིན་མོ་དེར་མོ་ཤེས་མནའ་བསྐྱལ་ནས་འདི་སྐད་དུ། ཁྱོད་རང་བློ་གཅིག་སེམས་གཅིག་གིས་ང་ཡི་དཀོན་མཆོག་ཡ་ཝཱེའི་རྗེས་སུ་འབྲངས་པས། ཁྱོད་ཀྱི་གོམ་པ་སྤོས་པའི་ཡུལ་དེ་ནི་དུས་གཏན་དུ་ཁྱོད་དང་ཁྱོད་ཀྱི་བུ་རྒྱུད་ལ་ས་སྐལ་དུ་དབང་ངེས་ཡིན་ཞེས་གསུངས།
JOS 14:10 དཀོན་མཆོག་ཡ་ཝཱེས་མོ་ཤེ་ལ་གསུང་འདི་གནང་བ་ནས་བཟུང་སྟེ། ཁོང་གི་ཞལ་བཞེས་བཞིན་དུ་ང་རང་ལོ་ངོ་བཞི་བཅུ་ཞེ་ལྔའི་རིང་འཚོ་བར་མཛད་ཅིང་། དེའི་དུས་སུ་ཡེས་ར་ཨེལ་པ་རྣམས་ནི་དབེན་སྟོང་དུ་རྒྱུ་བའོ། །ལྟོས་དང་ད་ནི་ང་རང་ལོ་བརྒྱད་ཅུ་གྱ་ལྔར་སོན་པ་ཡིན།
JOS 14:11 ང་ནི་ད་དུང་མོ་ཤེས་ང་རང་མངགས་པའི་ཉིན་མོ་དེ་བཞིན་དུ་གཟུགས་སྟོབས་ཆེ་ཞིང་། འཐབ་མོ་འཐབ་པའམ་འགྲོ་འོང་བྱེད་པ་གང་ཡིན་ཡང་། བདག་གི་སྟོབས་ཤུགས་ནི་སྐབས་དེར་ཅི་ལྟར་ཡིན་ན་ད་ལྟ་ད་དུང་དེ་ལྟར་ཡིན་ནོ། །
JOS 14:12 ཁྱེད་ཀྱིས་དཀོན་མཆོག་ཡ་ཝཱེས་ཉིན་མོ་དེར་ང་ལ་ཞལ་བཞེས་གནང་བའི་རི་ཁུལ་འདི་ང་རང་ལ་གནང་བར་མཛོད། དེར་ཨ་ནག་པ་རྣམས་གནས་པར་མ་ཟད་མཁར་རྣམས་ཆེ་ཞིང་སྲ་བརྟན་ཡིན་པ་ཁྱེད་ཀྱིས་དེ་སྔ་ཐོས་མྱོང་པ་ཡིན། དཀོན་མཆོག་ཡ་ཝཱེ་ནི་ཁོང་གིས་གནང་བའི་ཞལ་བཞེས་བཞིན་ང་དང་མཉམ་དུ་བཞུགས་པས་ངས་ཁོ་རྣམས་ཕྱིར་སྐྲོད་ཀྱང་སྲིད་ཅེས་ཞུས་པས།
JOS 14:13 ཡོ་ཤུ་ཨ་ཡིས་ཡེ་ཕུན་ནེའི་བུ་ཀཱ་ལེབ་ལ་བྱིན་གྱིས་བརླབས་པ་དང་ཧེབ་རོན་ཁོ་ལ་ས་སྐལ་དུ་གནང་ངོ་། །
JOS 14:14 དེའི་ཕྱིར་ཀཱ་ལེབ་བློ་གཅིག་སེམས་གཅིག་གིས་ཡེས་ར་ཨེལ་གྱི་དཀོན་མཆོག་ཡ་ཝཱེའི་རྗེས་སུ་འབྲངས་པ་ཡིན་པས། ཧེབ་རོན་ནི་ད་ལྟའི་བར་དུ་ཀེ་ནི་ཟི་པ་ཡེ་ཕུན་ནེའི་བུ་ཀཱ་ལེབ་ཀྱི་ས་སྐལ་ཡིན་ནོ། །
JOS 14:15 སྔར་ཧེབ་རོན་ལ་ཀིར་ཡཱད་ཨར་པཱ་ཞེས་འབོད་ཅིང་། ཨར་པཱ་ནི་ཨ་ནག་པའི་ཁྲོད་དུ་ཆེས་མཆོག་ཏུ་གྱུར་པ་ཡིན། དེ་ནས་རྒྱལ་ཁམས་བདེ་ཞིང་དམག་འཁྲུག་མེད་པར་གྱུར་ཏོ། །
JOS 15:1 ཡ་ཧུ་དཱ་ཚོ་པར་རུས་རྒྱུད་ལྟར་རྒྱན་འཕངས་ནས་ཐོབ་པའི་ཡུལ་རྣམས་ནི་ལྷོ་མཐའ་རུ་གནས་ཤིང་། ཨེ་དོམ་གྱི་ས་མཚམས་སུ་སླེབས་པ་དང་། ལྷོ་ཕྱོགས་སུ་ཟིན་གྱི་དབེན་སྟོང་བར་དུ་ཡིན།
JOS 15:2 ཁོ་རྣམས་ཀྱི་ལྷོ་མཚམས་ནི་ཚྭ་མཚོའི་མཐའ་སྟེ། ལྷོ་ཕྱོགས་སུ་འཁོར་བའི་མཚོ་ཁུག་ནས།
JOS 15:3 མ་ཨ་ལེ་ཨག་རབ་པིམ་གྱི་ལྷོ་ཕྱོགས་སུ་འདྲེས་ཤིང་། ཟིན་དང་འབྲེལ་བ་དང་། ཀཱ་དེའེ་ཤཱ་པར་ནེ་ཨ་ཡི་ལྷོ་ཕྱོགས་སུ་ཡར་ཕྱིན་ཅིང་། ཡང་ཧེས་རོན་བརྒྱུད་ནས་ཨད་ཐར་དུ་ཡར་ཕྱིན་པ་དང་། བསྐོར་ནས་ཁར་ཁ་ཨ་རུ་སླེབས།
JOS 15:4 ཨ་ཚ་མོན་བརྒྱུད་ནས་ཨེ་ཅིབ་གྲོག་རོང་ལ་འབྲེལ་ཞིང་རྒྱ་མཚོ་ནང་དུ་འདྲེས་ཡོད། དེ་ནི་ཁོ་རྣམས་ཀྱི་ལྷོ་མཚམས་ཡིན་ནོ། །
JOS 15:5 ཤར་མཚམས་ནི་ཚྭ་མཚོའི་ལྷོ་ཕྱོགས་ནས་ཡོར་དན་གཙང་པོའི་ཁ་བར་དུ་ཡིན་པ་དང་། བྱང་མཚམས་ནི་ཡོར་དན་གཙང་པོ་ཁའི་མཚོ་ཁུག་ནས་བཟུང་སྟེ།
JOS 15:6 པེད་ཧོག་ལཱ་རུ་ཡར་པེད་ཨ་ར་པའི་བྱང་ཕྱོགས་སུ་ཕར་ཕྱིན་ཏེ། རུ་བེན་གྱི་བུ་པོ་ཧན་གྱི་བྲག་རྡོ་བར་དུ།
JOS 15:7 ཨ་ཀོར་གྲོག་མོ་ནས་བྱང་ཕྱོགས་སུ་ཡར་དི་བིར་ལ་སླེབས་པ་དང་། ཆུ་བོའི་ལྷོ་རུ་ཡོད་པའི་ཨ་དུམ་མིམ་ལ་ངོས་ཁ་གཏད་ཀྱི་གིལ་གལ་ ཕྱོགས་སུ་འཐེན་ཡོད། ཡང་ཨེན་ཤེ་མེས་ཆུ་མིག་དང་འབྲེལ་ཞིང་ཨེན་རོ་གེལ་དུ་འདྲེས་སོ། །
JOS 15:8 ཡེ་བུ་སི་གྲོང་ཁྱེར་ཏེ་ཡེ་རུ་སཱ་ལེམ་ལྷོ་ཕྱོགས་ཀྱི་ལ་ངོས་བརྒྱུད་ནས་ཡར་པེན་ཧིན་ནོམ་ལུང་པ་ལ་སླེབས་པ་དང་། ཡང་ཡར་ཧིན་ནོམ་ལུང་པའི་ནུབ་ཕྱོགས་ཀྱི་རི་རྩེར་སླེབས་ཤིང་། རེ་པཱ་པའི་ལུང་པའི་བྱང་མཐའི་ས་མཚམས་ཡིན།
JOS 15:9 ཡང་རི་རྩེ་ནས་ནེབ་ཐོ་ཨའི་ཆུ་མགོ་ཡོད་སར་སླེབས་ཤིང་། ཨེབ་རོན་རི་བོའི་གྲོང་ཁྱེར་རྣམས་དང་འབྲེལ། ཡང་བསྐོར་ནས་པཱ་ཨ་ལ་རུ་སླེབས། པཱ་ཨ་ལ་ནི་ཀིར་ཡཱད་ཡེ་ཨ་རིམ་ཡིན།
JOS 15:10 ཡང་པཱ་ཨ་ལ་ནས་ནུབ་ཕྱོགས་སུ་བསྐོར་ཏེ་སེ་ཨིར་རི་བོར་སླེབས་ཤིང་། ཡང་ཡེ་ཨ་རིམ་རི་བོའི་བྱང་ངོས་སུ་འབྲེལ། ཡེ་ཨ་རིམ་ནི་ཀེ་ས་ལོན་ཡིན། ཡང་མར་པེད་ཤེ་མེ་སི་རུ་བབས་ཏེ་ཐིམ་ནཱ་བརྒྱུད་ནས།
JOS 15:11 ས་མཚམས་འདི་ནི་ཨེག་རོན་གྱི་བྱང་ངོས་སུ་འདྲེས་ཤིང་། སེག་རོན་དུ་སླེབས་པ་དང་པཱ་ཨ་ལ་རི་བོར་འབྲེལ། ཡང་ཡབ་ནེ་ཨེལ་དང་འདྲེས་ཤིང་རྒྱ་མཚོའི་བར་དུ་ཡིན་ནོ། །
JOS 15:12 ནུབ་མཚམས་ནི་རྒྱ་མཚོ་ཆེན་པོ་དང་དེའི་ཉེ་འཁོར་ཡིན་ལ། དེ་ནི་ཡ་ཧུ་དཱ་པ་རྣམས་ལ་རུས་རྒྱུད་ལྟར་ཐོབ་པའི་ཕྱོགས་བཞི་ཡི་ས་མཚམས་ཡིན་ནོ། །
JOS 15:13 ཡོ་ཤུ་ཨ་ཡིས་དཀོན་མཆོག་ཡ་ཝཱེས་ཇི་ལྟར་བཀའ་བསྒོས་པ་བཞིན་ཡ་ཧུ་དཱ་པ་རྣམས་ཀྱི་ཡུལ་ཀིར་ཡཱད་ཨར་པཱ་ནི་ཡེ་ཕུན་ནེའི་བུ་ཀཱ་ལེབ་ལ་བགོས། ཨར་པཱ་ནི་ཨ་ནག་པའི་ཕ་མེས་ཡིན་པ་དང་། ཀིར་ཡཱད་ཨར་པཱ་ནི་ཧེབ་རོན་ཞེས་བྱ་བ་ཡིན་ནོ། །
JOS 15:14 དེར་ཀཱ་ལེབ་ཀྱིས་ཨ་ནག་པའི་བུ་རྒྱུད་དེ། ཤེ་ཤཱ་ཨི་དང་ཨ་ཧི་མན། ཐལ་མ་ཨི་བཅས་གསུམ་པོ་དེ་ནས་ཕྱིར་བསྐྲད་པ་དང་།
JOS 15:15 ཡང་དེ་ནས་ཡར་ཕྱིན་ཏེ་དི་བིར་དུ་གནས་པ་རྣམས་ལ་ཕར་རྒོལ་བྱས། དི་བིར་ལ་སྔར་ཀིར་ཡཱད་སེ་ཕེར་ཞེས་འབོད་པ་ཡིན།
JOS 15:16 ཀཱ་ལེབ་ན་རེ། སུ་ཞིག་གིས་ཀིར་ཡཱད་སེ་ཕེར་ལ་དམག་བརྒྱབ་ནས་གྲོང་ཁྱེར་འཕྲོག་ནུས་ན་ངས་རང་གི་བུ་མོ་ཨག་ས་དེའི་ཆུང་མར་སྟེར་བར་བྱ་ཞེས་སྨྲས་པ་དང་།
JOS 15:17 ཀཱ་ལེབ་ཀྱི་སྤུན་ཀེ་ན༌ཟཱ་ཡི་བུ་ཨོད་ནི་ཨེལ་གྱིས་གྲོང་ཁྱེར་དེ་ཕྲོགས་པས། ཀཱ་ལེབ་ཀྱིས་བུ་མོ་ཨག་ས་དེར་ཆུང་མར་བྱིན་ཏོ། །
JOS 15:18 ཨག་ས་བག་མར་གཏོང་བའི་སྐབས་སུ། སྐྱེས་པར་ཁོ་མོའི་ཕ་ལས་ཞིང་ས་ཞིག་སློང་དགོས་པར་བསྐུལ་ཞིང་། ཨག་ས་བོང་བུ་ནས་བབས་མ་ཐག ཀཱ་ལེབ་ཀྱིས་ཁོ་མོར་ཁྱོད་ལ་ཅི་ཞིག་དགོས་སམ་ཞེས་དྲིས་པ་ལ།
JOS 15:19 ཁོ་མོ་ན་རེ། ཁྱེད་ཀྱིས་ང་ལ་བྱིན་རླབས་གནང་བར་མཛོད། ཁྱེད་ཀྱིས་ང་རང་ནེ་གུབ་ཡུལ་དུ་བཀོད་སྒྲིག་མཛད་པས་ང་ལ་ཆུ་མིག་རྣམས་ཀྱང་གནང་བར་མཛོད་ཅེས་ཞུས་པ་དང་། ཁོ་མོའི་ཕ་ཡིས་སྟོད་སྨད་གཉིས་ཀྱི་ཆུ་མིག་རྣམས་ཁོ་མོར་གནང་ངོ་། །
JOS 15:20 འདི་ནི་ཡ་ཧུ་དཱ་ཚོ་པར་རུས་རྒྱུད་ལྟར་ཐོབ་པའི་ས་སྐལ་ཡིན་ཏེ།
JOS 15:21 ཡ་ཧུ་དཱ་ཚོ་པའི་ཨེ་དོམ་གྱི་ས་མཚམས་དང་ཉེ་བའི་ལྷོ་མཐའི་གྲོང་ཁྱེར་རྣམས་ནི་འདི་ལྟ་སྟེ། ཀབ་ཟེ་ཨེལ་དང་ཨེ་དེར། ཡ་གུར།
JOS 15:22 ཁི་ན། དི་མོ་ན། ཨ་ད་ད།
JOS 15:23 ཀེ་དེ་སི། ཧ་ཟོར། ཨིད་ནན།
JOS 15:24 ཟིབ། ཏེ་ལེམ། པེ་ཨ་ལོད།
JOS 15:25 ཧ་ཟོར་ཧ་ད་ཐཱ། ཀེ་རི་ཨོད་ཧེས་རོན་ནམ་ཧ་ཟོར།
JOS 15:26 ཨ་མམ། ཤེ་མ། མོ་ལ་དཱ།
JOS 15:27 ཧ་ཚར་གད་ད། ཧེ་སི་མོན། པེད་ཕེ་ལེད།
JOS 15:28 ཧ་ཚར་ཤུ་ཨལ། པེར་ཤ་བཱ། པེ་སི་ཡོད་ཡཱ།
JOS 15:29 པཱ་ཨ་ལ། ཨི་ཡིམ། ཨེ་ཚེམ།
JOS 15:30 ཨེལ་ཐོ་ལད། ཀེ་སིལ། ཧོར་མཱ།
JOS 15:31 ཙིག་ལག མད་མན་ནཱ། སན་སན་ནཱ།
JOS 15:32 ལེ་པ་ཨོད། ཤིལ་ཧིམ། ཨ་ཡིན། རིམ་མོན་བཅས་བསྡོམས་པས་གྲོང་ཁྱེར་ཉེར་དགུ་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:33 རི་ཀླུང་དུ་ཨེ་སི་ཐ་ཨོལ་དང་ཚོར་ཨ། ཨ་སི་ནཱ།
JOS 15:34 ཟཱ་ནོ་ཨ། ཨེན་གན་ནིམ། ཏ་ཕུ་ཨ། ཨེ་ནམ།
JOS 15:35 ཡར་མུད། ཨ་དུལ་ལཱམ། སོ་ཀོ། ཨ་ཟེ་ཀཱ།
JOS 15:36 ཤ་ཨ་ར་ཡིམ། ཨ་དི་ཐ་ཡིམ། གེ་དེ་ར། གེ་དེ་རོ་ཐ་ཡིམ་བཅས་བསྡོམས་པས་གྲོང་ཁྱེར་བཅུ་བཞི་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:37 ཡང་ཚེ་ནན་དང་ཧ་ད་ཤ། མིག་དལ་གཱ་རྡུ།
JOS 15:38 དི་ལེ་ཨན། མི་ཙི་ཕེ། ཡོག་ཐེ་ཨེལ།
JOS 15:39 ལཱ་ཀི་སི། པོ་ཚཱ་ཀད། ཨེག་ལོན།
JOS 15:40 ཀབ་པོན། ལག་མས། ཀིད་ལིས།
JOS 15:41 གེ་དེ་རོད། པེད་ད་གོན། ན་ཨ་མ། མག་ཀེ་དཱ་བཅས་བསྡོམས་པས་གྲོང་ཁྱེར་བཅུ་དྲུག་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:42 ཡང་ལིབ་ནཱ་དང་ཨེ་ཐེར། ཨ་ཤན།
JOS 15:43 ཡིབ་ཐ། ཨ་སི་ནཱ། ནེ་ཚིབ།
JOS 15:44 ཀེ་ཨི་ལཱ། ཨག་ཟིབ། མཱ་རེ་ཤ་བཅས་བསྡོམས་པས་གྲོང་ཁྱེར་དགུ་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:45 ཡང་ཨེག་རོན་དང་དེར་གཏོགས་པའི་གྲོང་རྡལ་དང་གྲོང་ཚོ་རྣམས།
JOS 15:46 ཨེག་རོན་ནས་རྒྱ་མཚོའི་བར་དུ། ཨ་སི་དོད་ཉེ་འཁོར་གྱི་ཡུལ་ཐམས་ཅད་དང་དེ་རྣམས་ལ་གཏོགས་པའི་གྲོང་ཚོ་རྣམས།
JOS 15:47 ཨ་སི་དོད་དང་དེར་གཏོགས་པའི་གྲོང་རྡལ་དང་གྲོང་ཚོ་རྣམས་དང་། གཱ་ཟཱ་དང་དེར་གཏོགས་པའི་གྲོང་རྡལ་དང་གྲོང་ཚོ་རྣམས། ཨེ་ཅིབ་ཀྱི་གྲོག་རོང་བར་དང་རྒྱ་མཚོ་ཆེན་པོ་དང་དེའི་ཉེ་འཁོར་གྱི་ཡུལ་རྣམས་ཀྱི་བར་དུ་ཡིན།
JOS 15:48 རི་ཁུལ་དུ་ཤཱ་མིར་དང་ཡད་ཏིར། སོ་ཀོ།
JOS 15:49 དན་ན། ཀིར་ཡཱད་སན་ནའམ་དི་བིར།
JOS 15:50 ཨ་ནབ། ཨེ་སི་ཐེ་མོ། ཨ་ནིམ།
JOS 15:51 གོ་ཤེན། ཧོ་ལོན། གེ་ལོ་བཅས་བསྡོམས་པས་གྲོང་ཁྱེར་བཅུ་གཅིག་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:52 ཡང་ཨ་རབ་དང་དུའུ༌མཱ། ཨེ་སཱ་ཨན།
JOS 15:53 ཡ་ནུམ། པེད་ཐ་ཕུ་ཨ། ཨ་ཕེ་ཀ
JOS 15:54 ཧུམ་ཏ། ཀིར་ཡཱད་ཨར་པཱའམ་ཧེབ་རོན། ཚི་ཨོར་བཅས་བསྡོམས་པས་གྲོང་ཁྱེར་དགུ་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:55 ཡང་མཱ་ཨོན་དང་ཀར་མེལ། ཟིབ། ཡུད་ཏ།
JOS 15:56 ཡེ་སི་རེ་ཨེལ། ཡོག་དེ་ཨམ། ཟཱ་ནོ་ཨ།
JOS 15:57 ཀཱ་ཡིན། གིབ་ཨ། ཐིམ་ནཱ་བཅས་བསྡོམས་པས་གྲོང་ཁྱེར་བཅུ་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:58 ཡང་ཧལ་ཧུལ་དང་པེད་ཚུར། གེ་དོར།
JOS 15:59 མ་ཨ་རད། པེད་ཨ་ནོད། ཨེལ་ཐེ་ཁོན་བཅས་བསྡོམས་པས་གྲོང་ཁྱེར་དྲུག་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:60 ཡང་ཀིར་ཡཱད་པཱ་ཨལ་ལམ་ཀིར་ཡཱད་ཡེ་ཨ་རིམ་དང་རབ་པ་སྟེ་བསྡོམས་པས་གྲོང་ཁྱེར་གཉིས་དང་དེ་གཉིས་ལ་གཏོགས་པའི་གྲོང་ཚོ་རྣམས་སོ། །
JOS 15:61 དབེན་སྟོང་དུ་པེད་ཨ་ར་པ་དང་མིད་དིན། སེ་ཀ་ཀ
JOS 15:62 ནིབ་ཤན། ཨིར་ཧ་མེ་ལག ཨེན་གེ་དི་བཅས་བསྡོམས་པས་གྲོང་ཁྱེར་དྲུག་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 15:63 ཡེ་རུ་སཱ་ལེམ་དུ་གནས་པའི་ཡེ་བུ་སི་པ་རྣམས་ནི་ཡ་ཧུ་དཱ་པ་རྣམས་ཀྱིས་ཕྱིར་སྐྲོད་མ་ནུས་པས། ཡེ་བུ་སི་པ་རྣམས་ནི་ད་ལྟའི་བར་དུ་ཡེ་རུ་སཱ་ལེམ་དུ་ཡ་ཧུ་དཱ་པ་རྣམས་དང་ལྷན་ཅིག་ཏུ་གནས་སོ། །
JOS 16:1 ཡོ་སེབ་ཀྱི་བུ་རྒྱུད་ལ་རྒྱན་འཕངས་ནས་ཐོབ་པའི་ཡུལ་ནི་ཡེ་རུ་ཀོ་དང་ཉེ་བའི་ཡོར་དན་གཙང་པོ་ནས། ཡེ་རུ་ཀོ་ཤར་ཕྱོགས་ཀྱི་ཆུའི་ས་མཚམས་ཡིན་ཞིང་། ཡེ་རུ་ཀོ་ནས་ཡར་རི་ཁུལ་གྱི་དབེན་སྟོང་བརྒྱུད་ནས་པེད་ཨེལ་ལ་སླེབས།
JOS 16:2 ཡང་པེད་ཨེལ་ནས་ལོ་ཟི་ཡི་བར་དང་། ཨ་རག་པའི་ས་མཚམས་ལ་འབྲེལ་ཞིང་ཨ་ཏ་རོད་དུ་སླེབས།
JOS 16:3 ཡང་ནུབ་ཕྱོགས་སུ་མར་ཡབ་ལེ་ཏི་པའི་ས་མཚམས་དང་། པེད་ཧོ་རོན་ཞོལ་མ་དང་གེ་ཟེར་གྱི་ས་མཚམས་བར་དུ་སླེབས་ནས་རྒྱ་མཚོ་ནང་དུ་འདྲེས་སོ། །
JOS 16:4 ཡོ་སེབ་ཀྱི་བུ་མཱ་ན་ཤེ་དང་ཨེ་ཕཱར་ཡིམ་གཉིས་ལ་ཁོ་ཚོའི་ས་སྐལ་ཐོབ་པའོ། །
JOS 16:5 ཨེ་ཕཱར་ཡིམ་གྱི་བུ་རྒྱུད་རྣམས་ཀྱི་ས་མཚམས་ནི་རུས་རྒྱུད་ལྟར་ཐོབ་པ་འདི་ལྟ་སྟེ། ཁོ་རྣམས་ཀྱི་ས་སྐལ་གྱི་ཤར་མཚམས་ནི་ཨ་ཏ་རོད་ཨད་དར་ནས་པེད་ཧོ་རོན་གོང་མ་བར་ཡིན།
JOS 16:6 ས་མཚམས་དེ་ནི་རྒྱ་མཚོའི་ནང་དུ་སླེབས་ཤིང་བྱང་གི་མིག་མེ་ཐད་དུ་འདྲེས། ཡང་ཤར་ཕྱོགས་སུ་བསྐོར་ནས་ཏ་ཨ་ནད་ཞི་ལོ་རུ་སླེབས་པ་དང་། ཡང་ཡ་ནོ་ཧ་ཡི་ཤར་ཕྱོགས་སུ་འབྲེལ།
JOS 16:7 ཡ་ནོ་ཧ་ནས་མར་ཨ་ཏ་རོད་དང་ན་ཨ་རད་དུ་སླེབས་ཤིང་། ཡེ་རུ་ཀོར་སླེབས་ནས་ཡོར་དན་གཙང་པོར་འདྲེས།
JOS 16:8 ཏ་ཕུ་ཨ་ནས་ནུབ་ཕྱོགས་སུ་ཁ་ནཱ་གྲོག་རོང་དུ་སླེབས་ཤིང་རྒྱ་མཚོར་འདྲེས། དེ་ནི་ཨེ་ཕཱར་ཡིམ་ཚོ་པར་རུས་རྒྱུད་ལྟར་ཐོབ་པའི་ས་སྐལ་ཡིན་ནོ། །
JOS 16:9 གཞན་མཱ་ན་ཤེ་པ་རྣམས་ཀྱི་ས་སྐལ་ལས་གྲོང་ཁྱེར་དང་གྲོང་ཁྱེར་ལ་གཏོགས་པའི་གྲོང་ཚོ་འགའ་ཤས་ཐོབ་པ་དང་། དེ་ཐམས་ཅད་ནི་ཨེ་ཕཱར་ཡིམ་གྱི་བུ་རྒྱུད་རྣམས་ལ་བགོས་པ་ཡིན་ནོ། །
JOS 16:10 ཁོ་ཚོས་གེ་ཟེར་གྱི་ཀ་ན་ཨན་པ་རྣམས་ཕྱིར་མ་བསྐྲད་ཅིང་། ཀ་ན་ཨན་པ་རྣམས་ད་ལྟའི་བར་དུ་ཨེ་ཕཱར་ཡིམ་པ་རྣམས་ཀྱི་ཁྲོད་དུ་གནས་པ་དང་། ངལ་ལས་བྱེད་མཁན་གཡོག་པོ་རུ་གྱུར་ཏོ། །
JOS 17:1 མཱ་ན་ཤེ་ནི་ཡོ་སེབ་ཀྱི་བུ་སྐྱེས་འགོ་ཡིན་ཞིང་། ཁོའི་ཚོ་པར་རྒྱན་འཕངས་ནས་ཐོབ་པའི་ཡུལ་ནི་འདི་ལྟ་སྟེ། མཱ་ན་ཤེའི་བུ་སྐྱེས་འགོ་སྟེ་གིལ་ཨད་ཀྱི་ཕ་མཱ་ཀིར་ནི་དཔའ་རྒོད་ཡིན་པས་གིལ་ཨད་དང་པཱ་ཤན་ཐོབ།
JOS 17:2 མཱ་ན་ཤེའི་བུ་རྒྱུད་གཞན་རྣམས་ཏེ། ཨ་བི་ཨེ་ཟཱེར་གྱི་བུ་རྒྱུད་དང་ཧེ་ལེག་གི་བུ་རྒྱུད། ཨ་སི་རི་ཨེལ་གྱི་བུ་རྒྱུད། ཤེ་ཀེམ་གྱི་བུ་རྒྱུད། ཧེ་ཕེར་གྱི་བུ་རྒྱུད། ཤེ་མི་ད་ཡི་བུ་རྒྱུད་བཅས་ལ་རུས་རྒྱུད་ལྟར་རྒྱན་འཕངས་ནས་ས་བགོས་པ་དང་། དེ་རྣམས་ནི་རུས་རྒྱུད་ལྟར་ཐམས་ཅད་ཡོ་སེབ་ཀྱི་བུ་མཱ་ན་ཤེ་ནས་མཆེད་པའི་སྐྱེས་པ་དག་ཡིན་ནོ། །
JOS 17:3 མཱ་ན་ཤེའི་གསུམ་ཚ་དང་མཱ་ཀིར་གྱི་ཡང་ཚ། གིལ་ཨད་ཀྱི་ཚ་བོ། ཧེ་ཕེར་གྱི་བུ་ཚེ་ལོ་ཕེ་ཧད་ལ་བུ་མེད་ཅིང་། བུ་མོ་འབའ་ཞིག་ཡོད་པ་དང་། ཁོའི་བུ་མོ་རྣམས་ཀྱི་མིང་ལ་མ་ལཱ་དང་ནོ་ཨ། ཧོག་ལཱ། མིལ་ཀཱ། ཐིར་ཚ་ཞེས་བྱའོ། །
JOS 17:4 དེ་རྣམས་མཆོད་དཔོན་ཨེ་ལི་ཨ་ཟར་དང་ནུན་གྱི་བུ་ཡོ་ཤུ་ཨ། འགོ་དཔོན་རྣམས་བཅས་ཀྱི་དྲུང་དུ་འོངས་ཏེ་ན་རེ། དཀོན་མཆོག་ཡ་ཝཱེས་སྔར་མོ་ཤེ་ལ་ངེད་ཅག་གི་སྤུན་རྣམས་ཀྱི་ཁྲོད་དུ་ང་ཚོ་ལ་ནོར་སྐལ་བགོ་བའི་བཀའ་གནང་ངོ་ཞེས་ཞུས་པ་ལ། ཡོ་ཤུ་ཨ་ཡིས་དཀོན་མཆོག་ཡ་ཝཱེས་ཅི་ལྟར་བཀའ་མཛད་པ་བཞིན་ཕ་ཁུ་རྣམས་ལས་ཁོ་ཚོར་ནོར་སྐལ་བགོས་སོ། །
JOS 17:5 ཡོར་དན་གཙང་པོའི་ཤར་ཕྱོགས་ཀྱི་གིལ་ཨད་དང་པཱ་ཤན་ཡུལ་གཉིས་ལས་གཞན་ད་དུང་ཡུལ་གྱི་ཆ་བཅུ་མཱ་ན་ཤེ་ལ་ཐོབ་པ་སྟེ།
JOS 17:6 ཅི་ལ་ཟེར་ན། མཱ་ན་ཤེའི་ཚ་མོ་རྣམས་ལ་ཁོའི་ཚ་བོ་རྣམས་ཀྱི་ཁྲོད་དུ་ས་སྐལ་ཐོབ་ཟིན་པས་སོ། །གིལ་ཨད་ཡུལ་ནི་མཱ་ན་ཤེའི་བུ་རྒྱུད་གཞན་རྣམས་ལ་དབང་བ་ཡིན།
JOS 17:7 མཱ་ན་ཤེའི་ས་མཚམས་ནི། ཨ་ཤེར་ནས་སི་ཀེམ་གྱི་ཤར་ཕྱོགས་སུ་ཡོད་པའི་མིག་མེ་ཐད་ལ་སླེབས་ཤིང་། ཡང་ལྷོ་ཕྱོགས་སུ་ཨེན་ཐ་པུ་ཨ་པ་རྣམས་ཀྱི་ཡུལ་དུ་སླེབས།
JOS 17:8 ཐ་པུ་ཨ་ཡུལ་ནི་མཱ་ན་ཤེའི་ཡིན་མོད། འོན་ཀྱང་མཱ་ན་ཤེའི་ས་མཚམས་ཀྱི་ཐ་པུ་ཨ་གྲོང་ཁྱེར་ནི་ཨེ་ཕཱར་ཡིམ་གྱི་བུ་རྒྱུད་རྣམས་ཀྱི་ཡིན་ནོ། །
JOS 17:9 དེའི་ས་མཚམས་ནི་ལྷོ་ཕྱོགས་སུ་ཁ་ནཱ་གྲོག་མོའི་བར་དུ་སླེབས་པ་དང་། མཱ་ན་ཤེའི་གྲོང་ཁྱེར་རྣམས་ལས་གྲོང་ཁྱེར་དེ་དག་ནི་ཐམས་ཅད་ཨེ་ཕཱར་ཡིམ་ལ་གཏོགས་པ་ཡིན། མཱ་ན་ཤེའི་ས་མཚམས་ནི་ཆུ་བོའི་བྱང་ཕྱོགས་ནས་རྒྱ་མཚོའི་ནང་དུ་འདྲེས་པའི་བར་དུ་ཡིན།
JOS 17:10 ལྷོ་ཕྱོགས་ཨེ་ཕཱར་ཡིམ་དང་བྱང་ཕྱོགས་མཱ་ན་ཤེའི་ཡིན་པ་དང་རྒྱ་མཚོ་ས་མཚམས་ཡིན་ལ། བྱང་ཕྱོགས་སུ་ཨ་ཤེར་ལ་སླེབས་ཤིང་ཤར་ཕྱོགས་སུ་ཡེས་སི་ཀཱར་དུ་སླེབས།
JOS 17:11 ཡེས་སི་ཀཱར་དང་ཨ་ཤེར་གྱི་མངའ་ཁོངས་སུ་མཱ་ན་ཤེ་ལ་ཐོབ་པ་ནི་འདི་ལྟ་སྟེ། པེད་ཤེ་ཨན་དང་དེར་གཏོགས་པའི་གྲོང་ཚོ་རྣམས་དང་། ཡིབ་ལེ་ཨམ་དང་དེར་གཏོགས་པའི་གྲོང་ཚོ་རྣམས། དཱོར་པ་རྣམས་དང་དཱོར་ལ་གཏོགས་པའི་གྲོང་ཚོ་རྣམས་བཅས་ཡོད་པ་དང་། ཡང་རི་ལ་གནས་པའི་ཡུལ་གསུམ་སྟེ། ཨེན་དོར་པ་དང་དེར་གཏོགས་པའི་གྲོང་ཚོ་རྣམས་དང་། ཐ་ཨ་ནག་པ་དང་ཐ་ཨ་ནག་ལ་གཏོགས་པའི་གྲོང་ཚོ་རྣམས། མེ་གིད་དོ་པ་རྣམས་དང་མེ་གིད་དོ་ལ་གཏོགས་པའི་གྲོང་ཚོ་རྣམས་ཡོད་པའོ། །
JOS 17:12 ཡིན་ནའང་མཱ་ན་ཤེའི་བུ་རྒྱུད་རྣམས་ཀྱིས་གྲོང་ཁྱེར་དེ་དག་གི་ཡུལ་མི་རྣམས་ཕྱིར་སྐྲོད་མ་ཐུབ་པར། ཀ་ན་ཨན་པ་རྣམས་བསམ་བཞིན་དུ་ཡུལ་དེར་གནས་སོ། །
JOS 17:13 ཡེས་ར་ཨེལ་པ་རྣམས་སྟོབས་འབྱོར་རྒྱས་པ་དང་ཀ་ན་ཨན་པ་རྣམས་སྡུག་ལས་ལ་སྦྱར་ཞིང་ཁོ་ཚོ་ཕྱིར་གཙང་སྐྲོད་མ་བྱས་སོ། །
JOS 17:14 ཡོ་སེབ་ཀྱི་བུ་རྒྱུད་ཀྱིས་ཡོ་ཤུ་ཨ་ལ། དཀོན་མཆོག་ཡ་ཝཱེས་ད་ལྟའི་བར་དུ་ངེད་རྣམས་ལ་བྱིན་རླབས་གནང་ཞིང་ང་ཚོའང་རུས་རྒྱུད་ཆེ་ཞིང་མི་མང་པོ་ཡོད་པས། ཁྱེད་ཀྱིས་ཅིའི་ཕྱིར་རྒྱན་གཅིག་འཕངས་ནས་ངེད་ཅག་ལ་ཡུལ་གཅིག་ཁོ་ན་ས་སྐལ་དུ་བགོས་པ་ཡིན་ནམ་ཞེས་སྨྲས་པ་ལ།
JOS 17:15 ཡོ་ཤུ་ཨ་ན་རེ། གལ་ཏེ་ཁྱོད་རྣམས་ཀྱི་རུས་རྒྱུད་ཆེ་ཞིང་མི་མང་བ་དང་། ཨེ་ཕཱར་ཡིམ་གྱི་རི་ཁུལ་དོག་པར་སྙམ་ན། ཡར་ཕེ་རེ་ཟི་པ་དང་རེ་པཱ་པའི་ཡུལ་དུ་ཕྱིན་ཏེ་ནགས་བཅད་ནས་ས་རྒོད་གཏད་ཆོག་ཅེས་སྨྲས།
JOS 17:16 ཡོ་སེབ་ཀྱི་བུ་རྒྱུད་རྣམས་ཀྱིས། རི་ཁུལ་དེར་ངེད་རྣམས་མི་ཤོང་བར་མ་ཟད། ཐང་ལ་གནས་པའི་ཀ་ན་ཨན་པ་རྣམས་ཏེ། པེད་ཤེ་ཨན་དུ་གནས་པ་དང་དེར་གཏོགས་པའི་གྲོང་ཚོ་རྣམས་དང་། ཡེ་སི་རེ་ཨེལ་ཐང་དུ་གནས་པ་ཐམས་ཅད་ལ་ལྕགས་ཀྱི་ཤིང་རྟ་ཡོད་དོ་ཞེས་སྨྲས།
JOS 17:17 ཡོ་ཤུ་ཨ་ཡིས་ཡོ་སེབ་ཀྱི་ཁྱིམ་སྟེ། ཨེ་ཕཱར་ཡིམ་དང་མཱ་ན་ཤེ་པ་རྣམས་ལ་ཇི་སྐད་དུ། ཁྱོད་ནི་རུས་རྒྱུད་ཆེ་ཞིང་མི་མང་བ་དང་། སྟོབས་འབྱོར་རྒྱས་པ་ཡིན་པས་རྒྱན་འཕེན་ཐེངས་གཅིག་གི་ཡུལ་ཙམ་འཐོབ་པར་མི་རུང་སྟེ།
JOS 17:18 རི་ཁུལ་ཡང་ཁྱོད་ལ་དབང་བར་འགྱུར། ནགས་ཚལ་ཡིན་ནའང་ཁྱོད་ཀྱིས་ཤིང་བཅད་ནས་ས་རྒོད་གཏད་ཆོག་པ་དང་། ས་མཐའི་བར་དུ་ཁྱོད་ལ་དབང་ངེས་ཡིན། ཀ་ན་ཨན་པ་རྣམས་ལ་ལྕགས་ཀྱི་ཤིང་རྟ་ཡོད་པ་དང་སྟོབས་འབྱོར་རྒྱས་ནའང་། ཁྱོད་ཀྱིས་ཁོ་རྣམས་ཕྱིར་སྐྲོད་ནུས་པ་ཡིན་ཞེས་སྨྲས་སོ། །
JOS 18:1 ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཞི་ལོ་རུ་འདུས་ཤིང་མཇལ་འཕྲད་གུར་མཆོག་གནས་དེར་བཞེངས་པ་དང་། ཡུལ་དེ་ནི་དབང་དུ་བསྡུས་ཟིན་ཏོ། །
JOS 18:2 ཡེས་ར་ཨེལ་པའི་ཁྲོད་ཀྱི་གཞན་པའི་ཚོ་པ་བདུན་ལ་ད་དུང་ས་སྐལ་མ་བགོས་པ་ཡིན།
JOS 18:3 ཡོ་ཤུ་ཨ་ཡིས་ཡེས་ར་ཨེལ་པ་རྣམས་ལ། ཁྱོད་ཚོའི་མེས་པོ་རྣམས་ཀྱི་དཀོན་མཆོག་སྟེ་དཀོན་མཆོག་ཡ་ཝཱེས་ཁྱོད་ཅག་ལ་གནང་བའི་ཡུལ་དེ་ནི། ཁྱོད་རྣམས་ཀྱིས་འགོར་འགྱངས་བྱས་ནས་བདག་ཏུ་འཛིན་པར་མི་འགྲོ་བར་དུས་ནམ་ཞིག་གི་བར་དུ་སྡོད་དམ།
JOS 18:4 ཁྱོད་རྣམས་ཚོ་པ་རེ་རེས་མི་གསུམ་རེ་འདེམས་པར་གྱིས་ཤིག བདག་གིས་ཁོ་རྣམས་མངག་རྒྱུ་ཡིན་པ་དང་། ཁོ་རྣམས་ལམ་དུ་ཆས་ནས་ཡུལ་དེ་ཐམས་ཅད་རྒྱུ་དགོས་ཤིང་། ཚོ་པ་རེ་རེར་འཐོབ་འོས་པའི་ས་སྐལ་གསལ་པོར་ཡི་གེར་བཀོད་ནས་ངའི་རྩར་ཕྱིར་ལོག་དགོས།
JOS 18:5 ཁོ་རྣམས་ཀྱིས་ཡུལ་ཁག་བདུན་དུ་བགོ་དགོས། ཡ་ཧུ་དཱ་ནི་སྔར་བཞིན་ལྷོ་ཕྱོགས་སུ་ཁོའི་མངའ་ཁོངས་ལ་གནས་དགོས་པ་དང་། ཡོ་སེབ་ཀྱི་ཁྱིམ་ནི་སྔར་བཞིན་བྱང་ཕྱོགས་སུ་ཁོའི་མངའ་ཁོངས་ལ་གནས་དགོས།
JOS 18:6 ཁྱོད་རྣམས་ཀྱིས་ཡུལ་ཁག་བདུན་དུ་བགོས་ནས་གསལ་པོར་ཡི་གེར་བཀོད་དེ་ངའི་རྩར་འཁྱེར་ཤོག་དང་། བདག་གིས་རང་ཅག་གི་དཀོན་མཆོག་ཡ་ཝཱེའི་སྤྱན་སྔར་ཁྱོད་རྣམས་ཀྱི་ཕྱིར་རྒྱན་འཕེན་པར་བྱ།
JOS 18:7 དཀོན་མཆོག་ཡ་ཝཱེ་ལ་མཆོད་དཔོན་གྱི་ལས་འགན་འཁུར་བ་ནི་ལེ་ཝི་པ་རྣམས་ཀྱི་ནོར་སྐལ་ཡིན་པས། ཁོ་ཚོར་ཁྱོད་རྣམས་ཀྱི་ཁྲོད་དུ་སྐལ་མེད་དོ། །གཱ་རྡུའི་ཚོ་པ་དང་རུ་བེན་གྱི་ཚོ་པ། མཱ་ན་ཤེའི་ཚོ་པ་ཕྱེད་ཀ་བཅས་ལ་ཡོར་དན་གཙང་པོའི་ཤར་ཏུ་ས་སྐལ་ཐོབ་ཟིན་པ་སྟེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཁོ་རྣམས་ལ་གནང་བ་ཡིན་ཞེས་སྨྲས་སོ། །
JOS 18:8 ས་ལ་སྐྱ་ཐིག་རྒྱག་མཁན་རྣམས་ལམ་དུ་ཆས་པའི་སྐབས་སུ། ཡོ་ཤུ་ཨ་ཡིས་དེ་རྣམས་ལ། ཁྱོད་རྣམས་ཡུལ་ཀུན་ཏུ་སོང་ལ་ས་བབ་ཡི་གེར་བཀོད་ནས་ངའི་རྩར་ཕྱིར་ཤོག་ཅིག བདག་གིས་ཞི་ལོའི་ཡུལ་འདིར་དཀོན་མཆོག་ཡ་ཝཱེའི་སྤྱན་སྔར་ཁྱོད་རྣམས་ཀྱི་དོན་དུ་རྒྱན་འཕེན་པར་བྱ་ཞེས་གདམས་པ་ལ།
JOS 18:9 ཁོ་རྣམས་སོང་ནས་ཡུལ་ཀུན་ཏུ་རྒྱུ་ཞིང་གྲོང་ཁྱེར་རྣམས་ཁག་བདུན་དུ་བགོས་ནས་འབྲི་དེབ་སྟེང་ཡི་གེར་བཀོད་པ་དང་། ཞི་ལོའི་སྒར་ཏུ་ཡོ་ཤུ་ཨའི་རྩར་ཕྱིར་ལོག
JOS 18:10 དེ་ནས་ཡོ་ཤུ་ཨ་ཡིས་ཞི་ལོ་ནས་དཀོན་མཆོག་ཡ་ཝཱེའི་སྤྱན་སྔར་ཁོ་རྣམས་ཀྱི་དོན་དུ་རྒྱན་འཕངས་པ་དང་། ཡོ་ཤུ་ཨ་ཡིས་ཡུལ་དེར་ཡེས་ར་ཨེལ་པ་རྣམས་ཀྱི་ཚོ་པ་ལྟར་ཁོ་རྣམས་ལ་ས་བགོས་སོ། །
JOS 18:11 པེན་ཡཱ་མེན་གྱི་ཚོ་པར་རུས་རྒྱུད་ལྟར་རྒྱན་འཕངས་ནས་ཐོབ་པའི་ཡུལ་ནི་ཡ་ཧུ་དཱའི་བུ་རྒྱུད་དང་ཡོ་སེབ་ཀྱི་བུ་རྒྱུད་གཉིས་ཀའི་བར་དུ་གནས་སོ། །
JOS 18:12 བྱང་ཕྱོགས་སུ་ཁོ་རྣམས་ཀྱི་ས་མཚམས་ནི་ཡོར་དན་གཙང་པོ་ནས་ཡར་ཡེ་རུ་ཀོ་ཡི་བྱང་ངོས་སུ་བཅར་བ་དང་། ཡང་ནུབ་ཕྱོགས་སུ་རི་ཁུལ་བརྒྱུད་ནས་པེད་ཨ་ཝེན་གྱི་དབེན་སྟོང་བར་དུ་སླེབས།
JOS 18:13 དེ་ནས་ལྷོ་ངོས་སུ་ལོ་ཟི་དང་འབྲེལ་ཞིང་ལོ་ཟི་ལ་བཅར། ལོ་ཟི་ཞེས་པ་ནི་པེད་ཨེལ་ཡིན་ནོ། །ཡང་མར་ཨ་ཏ་རོད་ཨད་དར་ཏེ། པེད་ཧོ་རོན་ཞོལ་མའི་ལྷོ་ཕྱོགས་སུ་གནས་པའི་རི་ལ་ཉེ།
JOS 18:14 དེ་ནས་ནུབ་ཕྱོགས་དང་ཡང་ལྷོ་ཕྱོགས་སུ་འཁོར་ནས། པེད་ཧོ་རོན་ཁ་གཏད་ཀྱི་རི་ནས་ཡ་ཧུ་དཱ་པ་རྣམས་ཀྱི་གྲོང་ཁྱེར་ཀིར་ཡཱད་པཱ་ཨལ་དུ་སླེབས། ཀིར་ཡཱད་པཱ་ཨལ་ནི་ཀིར་ཡཱད་ཡེ་ཨ་རིམ་ཡིན་ལ། དེ་ནི་ནུབ་མཚམས་ཡིན།
JOS 18:15 ལྷོ་མཚམས་ནི་ཀིར་ཡཱད་ཡེ་ཨ་རིམ་གྱི་མཐའ་མཚམས་ནས་ནུབ་ཕྱོགས་སུ་ནེབ་ཐོ་ཨ་ཡི་ཆུ་མགོ་རུ་སླེབས།
JOS 18:16 ཡང་མར་པེན་ཧིན་ནོམ་ལུང་པའི་ཁ་གཏད་རི་བོའི་མཐའ་མཚམས་ཏེ། རེ་པཱ་པའི་ལུང་པའི་བྱང་ཕྱོགས་ཀྱི་རི་ཡིན། ཡང་མར་ཧིན་ནོམ་ལུང་པ་རུ་སླེབས་ཤིང་། ཡེ་བུ་སི་པའི་ལྷོ་ངོས་སུ་བཅར། ཡང་མར་ཨེན་རོ་གེལ་དུ་སླེབས།
JOS 18:17 ཡང་བྱང་ཕྱོགས་སུ་ཨེན་ཤེ་མེས་སུ་འདྲེས་ཤིང་། ཨ་དུམ་མིམ་ལ་ཡི་ཁ་གཏད་དུ་ཡོད་པའི་གིལ་ཨད་ལོད་དུ་སླེབས་པ་དང་། ཡང་མར་རུ་བེན་གྱི་བུ་པོ་ཧན་གྱི་བྲག་རྡོ་རུ་སླེབས།
JOS 18:18 ཡང་པེད་ཨ་ར་པ་ཡི་ཁ་གཏད་དུ་འབྲེལ་ཞིང་བྱང་ངོས་སུ་མར་ཨ་ར་པཱ་རུ་སླེབས།
JOS 18:19 ཡང་པེད་ཧོག་ལཱ་ཡི་བྱང་ངོས་སུ་འབྲེལ་ཞིང་། ཚྭ་མཚོའི་བྱང་ཁུག་སྟེ་ཡོར་དན་གཙང་པོའི་ལྷོ་སྣེ་རུ་འདྲེས། དེ་ནི་ལྷོ་མཚམས་ཡིན།
JOS 18:20 ཤར་མཚམས་ནི་ཡོར་དན་གཙང་པོ་ཡིན། དེ་ནི་པེན་ཡཱ་མེན་གྱི་མི་རྣམས་ལ་རུས་རྒྱུད་ལྟར་ཁོ་ཚོའི་ཕྱོགས་བཞི་ཡི་ས་མཚམས་ལ་བལྟས་ནས་ཐོབ་པའི་ས་སྐལ་ཡིན་པའོ། །
JOS 18:21 པེན་ཡཱ་མེན་གྱི་ཚོ་པར་རུས་རྒྱུད་ལྟར་ཐོབ་པའི་གྲོང་ཁྱེར་ནི་ཡེ་རུ་ཀོ་དང་པེད་ཧོག་ལཱ། ཨེ་མེག་ཁེ་ཚིས།
JOS 18:22 པེད་ཨ་ར་པ། ཚེ་མཱ་ར་ཡིམ། པེད་ཨེལ།
JOS 18:23 ཨབ་ཡིམ། ཕཱ་ར། ཨོབ་རཱ།
JOS 18:24 ཀེ་ཕར་ཨམ་མོ་ནི། ཨོབ་ནི། གེ་བཱ་བཅས་བསྡོམས་པས་གྲོང་ཁྱེར་བཅུ་གཉིས་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 18:25 ཡང་གིབ་ཡོན་དང་། རཱ་མ། པེ་ཨེ་རཱོད།
JOS 18:26 མི་ཙི་ཕེ། ཀེ་ཕི་རཱ། མོ་ཚ།
JOS 18:27 རེ་ཁེམ། ཡིར་ཕེ་ཨེལ། ཐ་ར་ཨ་ལ།
JOS 18:28 ཙེ་ལཱ། ཨེ་ལེབ། ཡེ་བུ་སི། ཡེ་བུ་སི་ནི་ཡེ་རུ་སཱ་ལེམ་ཡིན། གིབ་ཨ། ཀིར་ཡཱད་ཡེ་ཨ་རིམ་བཅས་བསྡོམས་པས་གྲོང་ཁྱེར་བཅུ་བཞི་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །དེ་ནི་པེན་ཡཱ་མེན་པ་རྣམས་ལ་རུས་རྒྱུད་ལྟར་ཐོབ་པའི་ས་སྐལ་ཡིན་ནོ། །
JOS 19:1 སི་མུ་ཨོན་ཚོ་པའི་མི་རྣམས་ཀྱི་ཕྱིར་རུས་རྒྱུད་ལྟར་རྒྱན་ཨང་གཉིས་པ་བླངས། ཁོ་རྣམས་ལ་ཐོབ་པའི་ས་སྐལ་ནི་ཡ་ཧུ་དཱ་པ་རྣམས་ཀྱི་ས་སྐལ་ཁྲོད་དུ་ཡོད་དོ། །
JOS 19:2 ཁོ་རྣམས་ལ་ས་སྐལ་དུ་ཐོབ་པའི་ཡུལ་རྣམས་ནི། པེར་ཤ་བཱ་དང་ཡང་ན་ཤེ་བཱ་ཞེས་བྱ་བ་དང་། མོ་ལ་དཱ།
JOS 19:3 ཧ་ཚར་ཤུ་ཨལ། པ་ལཱ། ཨེ་ཚེམ།
JOS 19:4 ཨེལ་ཐོ་ལད། པེ་ཐུལ། ཧོར་མཱ།
JOS 19:5 ཙིག་ལག པེད་མར་ཀ་བོད། ཧ་ཚར་སུ་སཱ།
JOS 19:6 པེད་ལེ་པ་ཨོད། ཤ་རུ་ཧེན་བཅས་བསྡོམས་པས་གྲོང་ཁྱེར་བཅུ་གསུམ་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 19:7 ཡང་ཨ་ཡིན་དང་། རིམ་མོན། ཨེ་ཐེར། ཨ་ཤན་བཅས་བསྡོམས་པས་གྲོང་ཁྱེར་བཞི་དང་དེ་རྣམས་ལ་གཏོགས་པའི་གྲོང་ཚོ་རྣམས།
JOS 19:8 ད་དུང་གྲོང་ཁྱེར་དེ་དག་གི་ཉེ་འཁོར་གྱི་གྲོང་ཚོ་ཐམས་ཅད་ནས། པཱ་ཨ་ལད་པེ་ཨེར་ཏེ་ནེ་གུབ་ཡུལ་གྱི་ར་མད་བར་དུ་ཡིན། དེ་ནི་རུས་རྒྱུད་ལྟར་སི་མུ་ཨོན་ཚོ་པར་ཐོབ་པའི་ས་སྐལ་ཡིན་ནོ། །
JOS 19:9 སི་མུ་ཨོན་པའི་ས་སྐལ་ནི་ཡ་ཧུ་དཱ་པ་རྣམས་ཀྱི་ས་སྐལ་ལས་ཐོབ་པ་ཡིན། ཡ་ཧུ་དཱ་པའི་ཐོབ་སྐལ་མང་དྲགས་པས་སི་མུ་ཨོན་པ་རྣམས་ལ་ཁོ་ཚོ་ལས་ས་སྐལ་ཐོབ་པ་ཡིན།
JOS 19:10 ཟེ་བུ་ལུན་པ་རྣམས་ཀྱི་ཕྱིར་རུས་རྒྱུད་བཞིན་རྒྱན་ཨང་གསུམ་པ་བླངས་པ་དང་། ཁོ་རྣམས་ཀྱི་ས་མཚམས་ནི་སཱ་རིད་བར་དུ་ཡིན།
JOS 19:11 ནུབ་ཕྱོགས་སུ་ཡར་མ་རེ་ཨ་ལར་ཕྱིན་ནས་དབ་པ་ཤེད་དུ་སླེབས་པ་དང་། ཡང་ཡོག་ནེ་ཨམ་གྱི་སྔོན་དུ་ཡོད་པའི་གྲོག་རོང་ལ་ཐུག
JOS 19:12 ཡང་སཱ་རིད་ནས་ཤར་ཕྱོགས་སུ་ཀིས་ལོད་ཐ་པོར་གྱི་ས་མཚམས་བར་ཉི་མ་ཤར་ཕྱོགས་སུ་འཁོར་བ་དང་། ཡང་ད་བེ་རད་དུ་འདྲེས་ནས་ཡར་ཡ་ཕི་ཨ་རུ་སླེབས།
JOS 19:13 དེ་ནས་ཤར་ཕྱོགས་སུ་གཱད་ཧེ་ཕེར་དང་ཨེད་ཀཱ་ཚིན་ལ་འབྲེལ་ཞིང་། རིམ་མོན་དང་འདྲེས་ཤིང་དེ་ནས་ནེ་ཨ་རུ་མཆེད་དོ། །
JOS 19:14 ཡང་ནེ་ཨའི་བྱང་ཕྱོགས་བསྐོར་ནས་ཧན་ན་ཐོན་ལ་སླེབས་ཤིང་། ཡིབ་ཐ་ཨེལ་ལུང་པ་ལ་འདྲེས་སོ། །
JOS 19:15 ད་དུང་ཀད་ཏད་དང་། ན་ཧ་ལལ། ཤིམ་རོན། ཡིད་ཨ་ལ། པེད་ལེ་ཧེམ་བཅས་བསྡོམས་པས་གྲོང་ཁྱེར་བཅུ་གཉིས་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 19:16 གྲོང་ཁྱེར་འདི་དག་དང་གྲོང་ཁྱེར་ལ་གཏོགས་པའི་གྲོང་ཚོ་རྣམས་ནི་ཟེ་བུ་ལུན་པ་རྣམས་ལ་རུས་རྒྱུད་བཞིན་ཐོབ་པའི་ས་སྐལ་ཡིན་པའོ། །
JOS 19:17 ཡེས་སི་ཀཱར་པ་རྣམས་ཀྱི་ཕྱིར་རུས་རྒྱུད་བཞིན་རྒྱན་ཨང་བཞི་པ་བླངས།
JOS 19:18 ཁོ་རྣམས་ཀྱི་ས་མཚམས་ནི་ཡེ་སི་རེ་ཨེལ་དང་། ཀེ་སུལ་ལོད། ཤུ་ནེམ།
JOS 19:19 ཧ་ཕར་ཡིམ། ཤི་ཡོན། ཨ་ན་ཧ་རད།
JOS 19:20 ར་བིད། ཁིས་ཡོན། ཨེ་བེ་ཚི།
JOS 19:21 རེ་མེད། ཨེན་གན་ནིམ། ཨེན་ཧད་ད། པེད་ཕ་ཚེས་བཅས་སུ་སླེབས་པ་དང་།
JOS 19:22 ཡང་ཐ་པོར་དང་། ཤ་ཧ་ཚི་མ། པེད་ཤེ་མེ་སི་བཅས་དང་། ཡོར་དན་གཙང་པོའི་བར་དུ་སླེབས་པ་སྟེ། བསྡོམས་པས་གྲོང་ཁྱེར་བཅུ་དྲུག་དང་དེ་རྣམས་ལ་གཏོགས་པའི་གྲོང་ཚོ་རྣམས་སོ། །
JOS 19:23 གྲོང་ཁྱེར་འདི་རྣམས་དང་གྲོང་ཁྱེར་ལ་གཏོགས་པའི་གྲོང་ཚོ་རྣམས་ནི་ཡེས་སི་ཀཱར་ཚོ་པར་རུས་རྒྱུད་ལྟར་ཐོབ་པའི་ས་སྐལ་ཡིན་ནོ། །
JOS 19:24 ཨ་ཤེར་ཚོ་པའི་ཕྱིར་རུས་རྒྱུད་ལྟར་རྒྱན་ཨང་ལྔ་པ་བླངས།
JOS 19:25 ཁོ་རྣམས་ཀྱི་ས་མཚམས་ནི་ཧེལ་ཁད་དང་། ཧ་ལི། པེ་ཏེན། ཨག་ཤབ།
JOS 19:26 ཨལ་ལམ་མེ་ལེག ཨམ་ཨད། མེ་ཤེ་ཨལ་བཅས་དང་། ནུབ་ཏུ་ཀར་མེལ་དང་། ཤི་ཧོར་ལིབ་ནད་དུ་སླེབས།
JOS 19:27 ཉི་མ་ཤར་ཕྱོགས་སུ་འཁོར་ནས་པེད་ད་གོན་དང་དེ་ནས་ཟེ་བུ་ལུན་ལ་སླེབས་ཤིང་། བྱང་དུ་ཡིབ་ཐ་ཨེལ་ལུང་པ་དང་། པེད་ཨེ་མེག་དང་ནེ་ཨི་ཨེལ་དུ་སླེབས་པ་དང་། ཀ་པུལ་གྱི་གཡོན་ཕྱོགས་སུ་འདྲེས།
JOS 19:28 ཡང་ཨེབ་རོན་དང་རེ་ཧོབ། ཧམ་མོན། ཁ་ནཱ་བཅས་ནས་ཚི་ཏུན་མཁར་ཆེན་བར་དུ་ཡིན།
JOS 19:29 ས་མཚམས་དེ་བསྐོར་ནས་རཱ་མ་དང་མཁར་བརྟན་པོ་ཐཱར་ལ་སླེབས་པ་དང་། ཡང་བསྐོར་ནས་ཧོ་སཱ་རུ་སླེབས་ཤིང་། ཨག་སིབ་ཀྱི་མངའ་ཁུལ་ལ་ཉེ་ཞིང་རྒྱ་མཚོ་རུ་འདྲེས།
JOS 19:30 ཡང་ཨུམ་མ་དང་ཨ་ཕེག རེ་ཧོབ་བཅས་བསྡོམས་པས་གྲོང་ཁྱེར་ཉེར་གཉིས་དང་དེ་རྣམས་ལ་གཏོགས་པའི་གྲོང་ཚོ་རྣམས་ཡོད།
JOS 19:31 གྲོང་ཁྱེར་འདི་དག་དང་གྲོང་ཁྱེར་ལ་གཏོགས་པའི་གྲོང་ཚོ་རྣམས་ནི་ཨ་ཤེར་ཚོ་པར་རུས་རྒྱུད་ལྟར་ཐོབ་པའི་ས་སྐལ་ཡིན་ནོ། །
JOS 19:32 ནཱབ་ཐ་ལི་པ་རྣམས་ཀྱི་ཕྱིར་རུས་རྒྱུད་བཞིན་རྒྱན་ཨང་དྲུག་པ་བླངས།
JOS 19:33 ཁོ་རྣམས་ཀྱི་ས་སྐལ་གྱི་མཚམས་ནི་ཧེ་ལེབ་དང་ཚ་ཨ་ནན་ནིམ་གྱི་བེ་ཤིང་མོན་ཆ་ར་དང་། ཨ་ད་མི་ནེ་ཁེབ་དང་ཡབ་ནེ་ཨེལ་ནས་ལག་ཁུམ་གྱི་བར་དང་། ཡོར་དན་གཙང་པོར་འདྲེས།
JOS 19:34 ཡང་ནུབ་ཕྱོགས་སུ་འཁོར་ནས་ཨ་སི་ནོད་ཐ་པོར་དུ་སླེབས་པ་དང་། དེ་ནས་ཧུ་ཁོག་ཏུ་འདྲེས། ལྷོ་ཕྱོགས་སུ་ཟེ་བུ་ལུན་དང་ནུབ་ཕྱོགས་སུ་ཨ་ཤེར་ལ་སླེབས། ཡང་ཉི་མ་ཤར་ཕྱོགས་སུ་ཡོར་དན་གཙང་པོ་དང་འབྲེལ་བའི་ཡ་ཧུ་དཱ་རུ་སླེབས།
JOS 19:35 མཁར་བརྟན་པོ་ནི་ཚིད་དིམ་དང་། ཚེར། ཧམ་མད། ར་ཁད། ཀིན་ནེ་རེད།
JOS 19:36 ཨ་ད་མ། རཱ་མ། ཧ་ཟོར།
JOS 19:37 ཀེ་དེ་སི། ཨེ་དྲི་ཨི། ཨེན་ཧ་ཟོར།
JOS 19:38 ཡིར་ཨོན། མི་ག་དལ་ཨེལ། ཧོ་རེམ། པེད་ཨ་ནད། པེད་ཤེ་མེ་སི་བཅས་བསྡོམས་པས་གྲོང་ཁྱེར་བཅུ་དགུ་དང་དེ་རྣམས་ལ་གཏོགས་པའི་གྲོང་ཚོ་རྣམས་ཡིན།
JOS 19:39 གྲོང་ཁྱེར་འདི་དག་དང་གྲོང་ཁྱེར་ལ་གཏོགས་པའི་གྲོང་ཚོ་རྣམས་ནི་ནཱབ་ཐ་ལི་ཚོ་པར་རུས་རྒྱུད་ལྟར་ཐོབ་པའི་ས་སྐལ་ཡིན་ནོ། །
JOS 19:40 དཱན་ཚོ་པའི་ཕྱིར་རུས་རྒྱུད་ལྟར་རྒྱན་ཨང་བདུན་པ་བླངས།
JOS 19:41 ཁོ་རྣམས་ཀྱི་ས་སྐལ་གྱི་མཚམས་ནི་ཚོར་ཨ་དང་། ཨེ་སི་ཐ་ཨོལ། ཨིར་ཤེ་མེས།
JOS 19:42 ཤཱ་ཨ་ལབ་པིན། ཨ་ཡཱ་ལོན། ཡིད་ལ།
JOS 19:43 ཨེ་ལོན། ཐིམ་ནཱ། ཨེག་རོན།
JOS 19:44 ཨེལ་ཐེ་ཁེ། གིབ་བེ་ཏོན། པཱ་ཨ་ལད།
JOS 19:45 ཡེ་ཧུད། པེ་ནེ་པེ་རག གཱད་རིམ་མོན།
JOS 19:46 མེ་ཡར་ཁོན། ར་ཁོན། ཡོ་ཕཱའི་ཁ་གཏད་ཀྱི་ས་མཚམས་བཅས་སོ། །
JOS 19:47 དཱན་གྱི་མི་རྣམས་ཀྱིས་རང་གི་མངའ་ཁོངས་ལ་དབང་སྒྱུར་བྱེད་མ་ཐུབ་པས། ཁོ་རྣམས་ཡར་སོང་ནས་ལེ་ཤེམ་ལ་རྒོལ་ནས་དེ་བླངས་ཤིང་། གྲོང་ཁྱེར་གྱི་མི་རྣམས་ལ་གྲིས་བརྒྱབ་ནས་གྲོང་ཁྱེར་དེ་བླངས་པ་དང་དེའི་ནང་དུ་བསྡད་ནས། ཁོ་ཚོའི་མེས་པོ་དཱན་གྱི་མིང་གིས་ལེ་ཤེམ་ཅེས་པ་དཱན་དུ་བསྒྱུར།
JOS 19:48 གྲོང་ཁྱེར་འདི་དག་དང་གྲོང་ཁྱེར་ལ་གཏོགས་པའི་གྲོང་ཚོ་རྣམས་ནི་དཱན་ཚོ་པར་རུས་རྒྱུད་ལྟར་ཐོབ་པའི་ས་སྐལ་ཡིན་ནོ། །
JOS 19:49 ཡེས་ར་ཨེལ་པ་རྣམས་ཀྱིས་ས་མཚམས་ལྟར་ས་སྐལ་བགོས་ནས་རྫོགས་པ་དང་། ཁོ་ཚོའི་ཁྲོད་དུ་ནུན་གྱི་བུ་ཡོ་ཤུ་ཨ་ལ་ས་སྐལ་སྤྲད་དོ། །
JOS 19:50 དཀོན་མཆོག་ཡ་ཝཱེའི་བཀའ་བཞིན་དུ། ཡོ་ཤུ་ཨ་ལ་འཐོབ་པར་འདོད་པའི་གྲོང་ཁྱེར་ཏེ། ཨེ་ཕཱར་ཡིམ་རི་ཁུལ་གྱི་ཐིམ་ནད་སེ་ར་ཁོ་ལ་སྤྲད་པ་དང་། ཁོས་གྲོང་ཁྱེར་དེ་བརྩིགས་ནས་དེར་བསྡད་དོ། །
JOS 19:51 དེ་ནི་མཆོད་དཔོན་ཨེ་ལི་ཨ་ཟར་དང་ནུན་གྱི་བུ་ཡོ་ཤུ་ཨ་དང་། ཡེས་ར་ཨེལ་གྱི་ཚོ་པ་རེ་རེའི་ཚོ་དཔོན་རྣམས་ཀྱིས་ཞི་ལོ་ནས་མཇལ་འཕྲད་གུར་མཆོག་གི་སྒོ་ཁ་རུ། དཀོན་མཆོག་ཡ་ཝཱེའི་སྤྱན་སྔར་རྒྱན་འཕངས་ནས་བགོས་པའི་ས་སྐལ་ཡིན་ལ། དེ་བཞིན་ཁོ་རྣམས་ཀྱིས་ས་བགོས་ནས་རྫོགས་སོ། །
JOS 20:1 དཀོན་མཆོག་ཡ་ཝཱེས་ཡོ་ཤུ་ཨ་ལ་སྐུལ་སློང་མཛད་ནས་འདི་སྐད་དུ།
JOS 20:2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར། ཁྱོད་ཚོས་བདག་གིས་མོ་ཤེ་བརྒྱུད་ནས་ཁྱོད་རྣམས་ལ་སྐུལ་སློང་བྱས་པ་བཞིན། རང་ཉིད་ལ་སྐྱབས་བཅོལ་སའི་གྲོང་ཁྱེར་རྣམས་འཛུགས་དགོས་པ་དང་།
JOS 20:3 སྟེས་དབང་གིས་མི་གསོད་ནོར་བྱས་པ་རྣམས་དེར་འབྲོ་རུ་འཇུག་དགོས། གྲོང་ཁྱེར་དེ་དག་ཁྱོད་རྣམས་ལ་དགྲ་ཤ་ལེན་མཁན་ལས་སྐྱབས་བཅོལ་སའི་གནས་སུ་བྱས་ཆོག
JOS 20:4 མི་གསོད་མཁན་དེ་གྲོང་ཁྱེར་དེ་རྣམས་ཀྱི་གཅིག་ལ་བྲོས་ནས་མཁར་སྒོ་ཁར་ལངས་སྡོད་ཅིང་། ཁོའི་དོན་དག་གྲོང་ཁྱེར་ནང་གི་རྒན་པོ་རྣམས་ལ་བཤད་དགོས་པ་དང་། དེ་རྣམས་ཀྱིས་ཁོ་གྲོང་ཁྱེར་ནང་དུ་བླངས་ནས་ཁོ་རྣམས་ཀྱི་ཁྲོད་དུ་གཞིས་འཛིན་པའི་ཕྱིར་ཁོ་ལ་གནས་ཤིག་སྤྲོད་དགོས།
JOS 20:5 གལ་ཏེ་དགྲ་ཤ་ལེན་མཁན་ཁོའི་ར་མདར་འོངས་ཚེ། ཁོ་ལ་སྔར་ནས་ཞེ་འཁོན་མེད་པར་མི་གསོད་ནོར་བྱས་པ་ཡིན་པས། རྒན་པོ་རྣམས་ཀྱིས་ཁོ་རང་དགྲ་ཤ་ལེན་མཁན་གྱི་ལག་ཏུ་སྤྲོད་མི་རུང་།
JOS 20:6 མི་གསོད་མཁན་དེ་ཚོགས་མིའི་མདུན་དུ་ལངས་ནས་འདྲི་གཅོད་ལ་མཉན་པའི་བར་དུ་གྲོང་ཁྱེར་དེའི་ནང་འདུག་དགོས་པ་དང་། སྐབས་དེའི་མཆོད་དཔོན་ཆེན་མོ་ཚེ་ལས་འདས་རྗེས་ད་གཟོད་རང་གི་གྲོང་རྡལ་དང་རང་ཁྱིམ་སྟེ་ཁོ་རང་ཕྱི་རུ་བྲོས་འོངས་སའི་གྲོང་རྡལ་དུ་ཕྱིར་ལོག་ཆོག་པ་ཡིན་ཞེས་བསྒོ་བར་གྱིས་ཤིག་ཅེས་གསུངས་སོ། །
JOS 20:7 དེ་ནས་ཡེས་ར་ཨེལ་པས་ནཱབ་ཐ་ལིའི་རི་ཁུལ་ནས་ག་ལིལ་ཡུལ་གྱི་ཀེ་དེ་སི་དང་། ཨེ་ཕཱར་ཡིམ་གྱི་རི་ཁུལ་ནས་སི་ཀེམ། ཡ་ཧུ་དཱའི་རི་ཁུལ་ནས་ཀིར་ཡཱད་ཨར་པཱ་སྟེ་ཧེབ་རོན་བཅས་ལོགས་སུ་བཀར་ཅིང་།
JOS 20:8 ཡང་ཡོར་དན་གཙང་པོའི་ཕྱི་རུ་ཡེ་རུ་ཀོ་ཡི་ཤར་ཏུ། རུ་བེན་ཚོ་པ་ནས་དབེན་སྟོང་གི་ཐང་དུ་པེ་ཙེར་བཙུགས། གཱ་རྡུའི་ཚོ་པ་ནས་གིལ་ཨད་ཀྱི་རཱ་མོད་བཙུགས། མཱ་ན་ཤེའི་ཚོ་པ་ནས་པཱ་ཤན་གྱི་གོ་ལན་བཙུགས།
JOS 20:9 དེ་ཐམས་ཅད་ནི་ཡེས་ར་ཨེལ་པ་རྣམས་དང་ཁོ་ཚོའི་ཁྲོད་བྱེས་སུ་སྡོད་མཁན་ཕྱི་མི་རྣམས་ཀྱིས་ལོགས་སུ་བཀར་བའི་ཡུལ་ཕྱོགས་ཡིན་ཏེ། མི་གསོད་ནོར་བྱས་པ་ཐམས་ཅད་དེར་བྲོས་ནས་དགྲ་ཤ་ལེན་མཁན་གྱི་ལག་ནས་མི་འཆི་བར། ཁོ་རང་ཚོགས་མིའི་མདུན་དུ་ལངས་བསྡད་ནས་འདྲི་གཅོད་ལ་མཉན་པའི་ཕྱིར་རོ། །
JOS 21:1 སྐབས་དེར་ལེ་ཝི་པའི་ཚོ་དཔོན་རྣམས་མཆོད་དཔོན་ཨེ་ལི་ཨ་ཟར་དང་ནུན་གྱི་བུ་ཡོ་ཤུ་ཨ་དང་། ཡེས་ར་ཨེལ་གྱི་ཚོ་པ་རེ་རེའི་ཚོ་དཔོན་རྣམས་ཀྱི་དྲུང་དུ་འོངས་ནས།
JOS 21:2 ཀ་ན་ཨན་ཡུལ་གྱི་ཞི་ལོ་རུ་ཁོ་རྣམས་ལ། སྔར་དཀོན་མཆོག་ཡ་ཝཱེས་མོ་ཤེ་བརྒྱུད་ནས་ངེད་རྣམས་གཞིས་ཆགས་པའི་ཕྱིར་གྲོང་ཁྱེར་གནང་པ་དང་། ང་ཚོའི་ཕྱུགས་འཚོ་བའི་ཕྱིར་གྲོང་ཁྱེར་གྱི་ཉེ་འཁོར་རྣམས་གནང་བའི་བཀའ་བསྒོས་པའོ་ཞེས་ཞུས་པ་ལ།
JOS 21:3 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེས་བཀའ་ཇི་ལྟར་བསྒོས་པ་བཞིན་དུ་རང་ཉིད་ཀྱི་ས་སྐལ་ལས་གཤམ་གསལ་གྱི་གྲོང་ཁྱེར་དང་དེའི་ཉེ་འཁོར་རྣམས་ལེ་ཝི་པར་སྤྲད་པ་སྟེ།
JOS 21:4 ཀོ་ཧད་རུས་རྒྱུད་ཀྱི་ཕྱིར་རྒྱན་འཕངས་པ་དང་། ལེ་ཝི་པའི་མཆོད་དཔོན་ཨ་རོན་གྱི་བུ་རྒྱུད་དེ། ཡ་ཧུ་དཱ་ཚོ་པ་དང་སི་མུ་ཨོན་ཚོ་པ། པེན་ཡཱ་མེན་ཚོ་པ་བཅས་ཀྱི་ས་སྐལ་ལས་རྒྱན་བླངས་པ་ལྟར་གྲོང་ཁྱེར་བཅུ་གསུམ་ཐོབ་པ་ཡིན།
JOS 21:5 ཀོ་ཧད་ཀྱི་བུ་རྒྱུད་གཞན་རྣམས་ལ་ཨེ་ཕཱར་ཡིམ་ཚོ་པ་དང་དཱན་གྱི་ཚོ་པ། མཱ་ན་ཤེའི་ཚོ་པ་ཕྱེད་ཀ་བཅས་ཀྱི་ས་སྐལ་ལས་རྒྱན་བླངས་པ་བཞིན་གྲོང་ཁྱེར་བཅུ་ཐོབ་པ་ཡིན།
JOS 21:6 གེར་ཤོན་གྱི་བུ་རྒྱུད་རྣམས་ལ་ཡེས་སི་ཀཱར་ཚོ་པ་དང་། ཨ་ཤེར་ཚོ་པ། ནཱབ་ཐ་ལི་ཚོ་པ། པཱ་ཤན་དུ་སྡོད་པའི་མཱ་ན་ཤེའི་ཚོ་པ་ཕྱེད་ཀ་བཅས་ཀྱི་ས་སྐལ་ལས་རྒྱན་བླངས་པ་བཞིན་གྲོང་ཁྱེར་བཅུ་གསུམ་ཐོབ་པ་ཡིན།
JOS 21:7 མཱ་རཱ་རེའེ་ཡི་བུ་རྒྱུད་རྣམས་ལ་རུས་རྒྱུད་ལྟར། རུ་བེན་ཚོ་པ་དང་། གཱ་རྡུ་ཚོ་པ། ཟེ་བུ་ལུན་ཚོ་པ་བཅས་ཀྱི་ས་སྐལ་ལས་རྒྱན་བླངས་པ་བཞིན་གྲོང་ཁྱེར་བཅུ་གཉིས་ཐོབ་པ་ཡིན།
JOS 21:8 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཇི་ལྟར་བཀའ་བསྒོས་པ་བཞིན། གྲོང་ཁྱེར་དེ་དག་དང་དེའི་ཉེ་འཁོར་རྣམས་ལེ་ཝི་པ་རྣམས་ལ་བགོས་པའོ། །
JOS 21:9 ཁོ་ཚོས་ཡ་ཧུ་དཱ་ཚོ་པ་དང་སི་མུ་ཨོན་ཚོ་པའི་ས་སྐལ་ལས། གཤམ་གསལ་གྱི་གྲོང་ཁྱེར་རྣམས་ལེ་ཝི་ཚོ་པའི་ཀོ་ཧད་རུས་རྒྱུད་དེ་ཨ་རོན་ཀྱི་བུ་རྒྱུད་རྣམས་ལ་སྤྲད་པ་སྟེ། ཅི་ལ་ཟེར་ན། ཁོ་ཚོའི་ཕྱིར་རྒྱན་བླངས་ནས་སྐལ་དང་པོ་བྱུང་བས་སོ། །
JOS 21:11 ཡ་ཧུ་དཱ་རི་ཁུལ་གྱི་ཀིར་ཡཱད་ཨར་པཱ་དང་ཉེ་འཁོར་གྱི་ཕྱི་རོལ་རྣམས་ཁོ་ཚོར་སྤྲད། ཨར་པཱ་ནི་ཨ་ནག་པའི་ཕ་མེས་ཡིན་པ་དང་། ཀིར་ཡཱད་ཨར་པཱ་ནི་གནའ་བོའི་ཧེབ་རོན་ཞེས་བྱ་བ་ཡིན་ནོ། །
JOS 21:12 གྲོང་ཁྱེར་ལ་གཏོགས་པའི་ས་ཞིང་དང་གྲོང་ཚོ་རྣམས་འབའ་ཞིག་ཡེ་ཕུན་ནེའི་བུ་ཀཱ་ལེབ་ལ་ས་སྐལ་དུ་སྤྲད།
JOS 21:13 ཡེས་ར་ཨེལ་པས་མི་གསོད་ནོར་བྱེད་མཁན་རྣམས་སྐྱབས་བཅོལ་སའི་གྲོང་ཁྱེར་ཧེབ་རོན་དང་། དེར་གཏོགས་པའི་ཉེ་འཁོར་རྣམས་མཆོད་དཔོན་ཨ་རོན་གྱི་བུ་རྒྱུད་ལ་སྤྲད་ཅིང་། ཡང་ཁོ་ཚོར་ལིབ་ནཱ་དང་དེར་གཏོགས་པའི་ཉེ་འཁོར་དང་།
JOS 21:14 ཡད་ཏིར་དང་དེར་གཏོགས་པའི་ཉེ་འཁོར། ཨེ་སི་ཏེ་མོ་ཨ་དང་དེར་གཏོགས་པའི་ཉེ་འཁོར།
JOS 21:15 ཧོ་ལོན་དང་དེར་གཏོགས་པའི་ཉེ་འཁོར། དི་བིར་དང་དེར་གཏོགས་པའི་ཉེ་འཁོར།
JOS 21:16 ཨ་ཡིན་དང་དེར་གཏོགས་པའི་ཉེ་འཁོར། ཡུད་ཏ་དང་དེར་གཏོགས་པའི་ཉེ་འཁོར། པེད་ཤེ་མེ་སི་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་དགུ་སྤྲད་པ་དང་། ཐམས་ཅད་ཚོ་པ་དེ་གཉིས་ལས་བགོས་པ་ཡིན་ནོ། །
JOS 21:17 ཡང་པེན་ཡཱ་མེན་ཚོ་པའི་ས་སྐལ་ལས་ཁོ་རྣམས་ལ་གིབ་ཡོན་དང་དེར་གཏོགས་པའི་ཉེ་འཁོར་དང་། གེ་བཱ་དང་དེར་གཏོགས་པའི་ཉེ་འཁོར།
JOS 21:18 ཨ་ན་ཐོད་དང་དེར་གཏོགས་པའི་ཉེ་འཁོར། ཨལ་མོན་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་སྤྲད།
JOS 21:19 ཨ་རོན་གྱི་མཆོད་དཔོན་ཡིན་པའི་བུ་རྒྱུད་རྣམས་ལ་བསྡོམས་པས་གྲོང་ཁྱེར་བཅུ་གསུམ་དང་དེ་རྣམས་ལ་གཏོགས་པའི་ཉེ་འཁོར་རྣམས་སྤྲད་པ་ཡིན།
JOS 21:20 ལེ་ཝི་ཚོ་པའི་ཁྲོད་ཀོ་ཧད་ཀྱི་རུས་རྒྱུད་དེ། ཀོ་ཧད་ཀྱི་བུ་རྒྱུད་གཞན་རྣམས་ལ་རྒྱན་འཕངས་ནས་ཐོབ་པའི་གྲོང་ཁྱེར་ནི་ཨེ་ཕཱར་ཡིམ་ཚོ་པ་ནས་བགོས་པ་ཡིན་ནོ། །
JOS 21:21 ཡེས་ར་ཨེལ་པས་ཨེ་ཕཱར་ཡིམ་རི་ཁུལ་གྱི་སི་ཀེམ་སྟེ་མི་གསོད་ནོར་བྱེད་མཁན་རྣམས་སྐྱབས་བཅོལ་སའི་གྲོང་ཁྱེར་དང་དེར་གཏོགས་པའི་ཉེ་འཁོར་རྣམས་ཁོ་ཚོར་སྤྲད་ཅིང་། ཡང་གེ་ཟེར་དང་དེའི་ཉེ་འཁོར་དང་།
JOS 21:22 ཀིབ་ཚ་ཡིམ་དང་དེར་གཏོགས་པའི་ཉེ་འཁོར། པེད་ཧོ་རོན་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་ཁོ་རྣམས་ལ་སྤྲད།
JOS 21:23 ཡང་དཱན་ཚོ་པའི་ས་སྐལ་ལས་ཨེལ་ཐེ་ཁེ་དང་དེར་གཏོགས་པའི་ཉེ་འཁོར་དང་། གིབ་བེ་ཏོན་དང་དེར་གཏོགས་པའི་ཉེ་འཁོར།
JOS 21:24 ཨ་ཡཱ་ལོན་དང་དེར་གཏོགས་པའི་ཉེ་འཁོར། གཱད་རིམ་མོན་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་ཁོ་རྣམས་ལ་སྤྲད།
JOS 21:25 ཡང་མཱ་ན་ཤེའི་ཚོ་པ་ཕྱེད་ཀའི་ས་སྐལ་ལས་ཐ་ཨ་ནག་དང་དེར་གཏོགས་པའི་ཉེ་འཁོར་དང་། གཱད་རིམ་མོན་དང་དེར་གཏོགས་པའི་ཉེ་འཁོར་ཏེ་བསྡོམས་པས་གྲོང་ཁྱེར་གཉིས་ཁོ་རྣམས་ལ་སྤྲད།
JOS 21:26 ཀོ་ཧད་ཀྱི་བུ་རྒྱུད་གཞན་རྣམས་ལ་བསྡོམས་པས་གྲོང་ཁྱེར་བཅུ་དང་དེ་རྣམས་ལ་གཏོགས་པའི་ཉེ་འཁོར་རྣམས་ཡོད་དོ། །
JOS 21:27 ཡེས་ར་ཨེལ་པས་ཡང་མཱ་ན་ཤེའི་ཚོ་པ་ཕྱེད་ཀའི་ས་སྐལ་ལས་མི་གསོད་ནོར་བྱེད་མཁན་རྣམས་སྐྱབས་བཅོལ་སའི་གྲོང་ཁྱེར་ཏེ་པཱ་ཤན་གྱི་གོ་ལན་དང་དེར་གཏོགས་པའི་ཉེ་འཁོར་ནི་ལེ་ཝི་ཚོ་པའི་གེར་ཤོན་གྱི་རུས་རྒྱུད་རྣམས་ལ་སྤྲད། ཡང་པེ་ཨེས་ཐེ་ར་གྲོང་ཁྱེར་དང་དེར་གཏོགས་པའི་ཉེ་འཁོར་ཏེ་བསྡོམས་པས་གྲོང་ཁྱེར་གཉིས་ཁོ་རྣམས་ལ་སྤྲད།
JOS 21:28 ཡང་ཡེས་སི་ཀཱར་ཚོ་པའི་ས་སྐལ་ལས་ཁིས་ཡོན་དང་དེར་གཏོགས་པའི་ཉེ་འཁོར་དང་། ད་བེ་རད་དང་དེར་གཏོགས་པའི་ཉེ་འཁོར།
JOS 21:29 ཡར་མུད་དང་དེར་གཏོགས་པའི་ཉེ་འཁོར། ཨེན་གན་ནིམ་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་ཁོ་རྣམས་ལ་སྤྲད།
JOS 21:30 ཡང་ཨ་ཤེར་ཚོ་པའི་ས་སྐལ་ལས་མེ་ཤེ་ཨལ་དང་དེར་གཏོགས་པའི་ཉེ་འཁོར་དང་། ཨབ་དོན་དང་དེར་གཏོགས་པའི་ཉེ་འཁོར།
JOS 21:31 ཧེལ་ཁད་དང་དེར་གཏོགས་པའི་ཉེ་འཁོར། རེ་ཧོབ་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་ཁོ་རྣམས་ལ་སྤྲད།
JOS 21:32 ཡང་ནཱབ་ཐ་ལི་ཚོ་པའི་ས་སྐལ་ལས་ག་ལིལ་གྱི་ཀེ་དེ་སི་སྟེ་མི་གསོད་ནོར་བྱེད་མཁན་རྣམས་སྐྱབས་བཅོལ་སའི་གྲོང་ཁྱེར་དང་དེར་གཏོགས་པའི་ཉེ་འཁོར་ནི་ཁོ་ཚོར་སྤྲད་ཅིང་། ཡང་ཧམ་མོད་དོར་དང་དེར་གཏོགས་པའི་ཉེ་འཁོར་དང་། ཁར་ཐཱན་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་གསུམ་ཁོ་རྣམས་ལ་སྤྲད།
JOS 21:33 གེར་ཤོན་པ་རྣམས་ལ་རུས་རྒྱུད་ལྟར་ཐོབ་པའི་གྲོང་ཁྱེར་ནི་བསྡོམས་པས་བཅུ་གསུམ་དང་དེ་རྣམས་ལ་གཏོགས་པའི་ཉེ་འཁོར་རྣམས་ཡིན།
JOS 21:34 མཱ་རཱ་རེའེ་ཡི་རུས་རྒྱུད་དེ་ལེ་ཝི་པ་གཞན་རྣམས་ལ། ཟེ་བུ་ལུན་ཚོ་པའི་ས་སྐལ་ནས་ཐོབ་པ་ནི། ཡོག་ནེ་ཨམ་དང་དེར་གཏོགས་པའི་ཉེ་འཁོར་དང་། ཁར་ཐ་དང་དེར་གཏོགས་པའི་ཉེ་འཁོར།
JOS 21:35 དིམ་ན་དང་དེར་གཏོགས་པའི་ཉེ་འཁོར། ན་ཧ་ལལ་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་ཡིན།
JOS 21:36 ཡང་རུ་བེན་ཚོ་པའི་ས་སྐལ་ལས་པེ་ཙེར་དང་དེར་གཏོགས་པའི་ཉེ་འཁོར་དང་། ཡ་ཙཱ་དང་དེར་གཏོགས་པའི་ཉེ་འཁོར།
JOS 21:37 ཀེ་དེ་མོད་དང་དེར་གཏོགས་པའི་ཉེ་འཁོར། མེ་ཕཱ་ཨད་དང་དེར་གཏོགས་པའི་ཉེ་འཁོར་བཅས་བསྡོམས་པས་གྲོང་ཁྱེར་བཞི་ཁོ་རྣམས་ལ་སྤྲད།
JOS 21:38 ཡང་གཱ་རྡུ་ཚོ་པའི་ས་སྐལ་ལས་གིལ་ཨད་ཀྱི་རཱ་མོད་དེ་མི་གསོད་ནོར་བྱེད་མཁན་རྣམས་སྐྱབས་བཅོལ་སའི་གྲོང་ཁྱེར་དང་དེར་གཏོགས་པའི་ཉེ་འཁོར་ནི་ཁོ་ཚོར་སྤྲད་ཅིང་། ཡང་མཱ་ཧ་ནཱ་ཡིམ་དང་དེར་གཏོགས་པའི་ཉེ་འཁོར་དང་།
JOS 21:39 ཧེ་སི་པོན་དང་དེར་གཏོགས་པའི་ཉེ་འཁོར། ཡཱ་ཟེར་དང་དེར་གཏོགས་པའི་ཉེ་འཁོར་བཅས་གྲོང་ཁྱེར་བཞི་ཁོ་རྣམས་ལ་སྤྲད།
JOS 21:40 ལེ་ཝི་ཚོ་པའི་མི་གཞན་རྣམས་ཏེ་མཱ་རཱ་རེའེ་ཡི་བུ་རྒྱུད་དག་ལ་རུས་རྒྱུད་ལྟར་རྒྱན་འཕངས་ནས་ཐོབ་པ་ནི་བསྡོམས་པས་གྲོང་ཁྱེར་བཅུ་གཉིས་ཡོད་དོ། །
JOS 21:41 ལེ་ཝི་པ་རྣམས་ལ་ཡེས་ར་ཨེལ་པ་རྣམས་ཀྱི་ས་སྐལ་ལས་ཐོབ་པའི་གྲོང་ཁྱེར་ནི་བསྡོམས་པས་བཞི་བཅུ་ཞེ་བརྒྱད་དང་དེ་དག་ལ་གཏོགས་པའི་ཉེ་འཁོར་རྣམས་ཡིན།
JOS 21:42 གྲོང་ཁྱེར་དེ་ཐམས་ཅད་ཀྱི་ཉེ་འཁོར་དུ་ས་སྟོང་ཡོད་པ་དང་གྲོང་ཁྱེར་རེ་རེ་དེ་བཞིན་ཡིན་ནོ། །
JOS 21:43 དེ་བཞིན་དུ་དཀོན་མཆོག་ཡ་ཝཱེས་སྔར་ཁོ་ཚོའི་མེས་པོ་རྣམས་ལ་མནའ་བཞེས་ཏེ་ཞལ་བཞེས་གནང་བའི་ཡུལ་ཐམས་ཅད་ནི་ཡེས་ར་ཨེལ་པ་རྣམས་ལ་གནང་ཞིང་། ཁོ་རྣམས་ལ་ས་སྐལ་དུ་ཐོབ་ནས་དེ་རུ་གནས་སོ། །
JOS 21:44 དཀོན་མཆོག་ཡ་ཝཱེས་ཁོ་ཚོའི་མེས་པོ་རྣམས་ལ་མནའ་བཞེས་ཏེ་ཞལ་བཞེས་གནང་བའི་བཀའ་ཐམས་ཅད་ལྟར། ཁོ་རྣམས་ཕྱོགས་བཞི་མཚམས་བརྒྱད་ནས་བདེ་བར་བཀོད་དོ། །ཁོ་ཚོའི་དགྲ་བོ་ཐམས་ཅད་ལས་ཁོ་རྣམས་ཀྱི་མདུན་དུ་རང་ཚུགས་ཐུབ་མཁན་གཅིག་ཀྱང་མ་བྱུང་ཞིང་། དཀོན་མཆོག་ཡ་ཝཱེས་དགྲ་བོ་ཐམས་ཅད་ཁོ་རྣམས་ཀྱི་ལག་ཏུ་སྤྲོད་པར་མཛད་དོ། །
JOS 21:45 དཀོན་མཆོག་ཡ་ཝཱེས་ཡེས་ར་ཨེལ་ཁྱིམ་རྒྱུད་ལ་བྱིན་རླབས་གནང་བར་ཞལ་བཞེས་གནང་བའི་བཀའ་ཐམས་ཅད་ལས་མ་འགྲུབ་པ་གཅིག་ཀྱང་མེད་པར། ཐམས་ཅད་དོན་ཐོག་ཏུ་འཁེལ་ཏོ། །
JOS 22:1 སྐབས་དེར་ཡོ་ཤུ་ཨ་ཡིས་རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་བཅས་བོས་འོངས་ཏེ།
JOS 22:2 ཁོ་རྣམས་ལ་ན་རེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཁྱོད་རྣམས་ལ་བཀའ་བསྒོས་པ་ཐམས་ཅད་ཁྱོད་ཚོས་བསྲུངས་པ་དང་། ངས་ཁྱོད་རྣམས་ལ་བསྒོས་པ་ཐམས་ཅད་ཀྱང་ཁྱོད་ཚོས་བསྲུངས་པ་ཡིན།
JOS 22:3 ཉིན་མང་པོ་འདིའི་རིང་ལ་ད་ལྟའི་བར་དུ་ཁྱོད་རྣམས་ཀྱིས་རང་གི་སྤུན་ཟླ་མ་བསྐྱུར་བར་མ་ཟད། ཁྱོད་ཚོའི་དཀོན་མཆོག་ཡ་ཝཱེས་བསྲུང་བར་བསྒོས་པའི་བཀའ་རྣམས་བསྲུངས་པ་ཡིན།
JOS 22:4 ད་ལྟ་ཁྱོད་ཅག་གི་དཀོན་མཆོག་ཡ་ཝཱེས་ཁོང་གི་ཞལ་བཞེས་བཞིན་དུ་ཁྱོད་རྣམས་ཀྱི་སྤུན་ཟླ་རྣམས་བདེ་བར་བཀོད་པས་ད་ནི་ཕྱིར་ཁྱོད་ཅག་གི་གུར་ཏུ་ལོག་ཆོག་པ་སྟེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཡོར་དན་གཙང་པོའི་ཤར་ཏུ་ཁྱོད་རྣམས་ལ་ས་སྐལ་དུ་གནང་བའི་ཡུལ་དུ་སོང་ཆོག་གོ །
JOS 22:5 འོན་ཀྱང་དཀོན་མཆོག་ཡ་ཝཱེའི་ཞབས་ཕྱི་མོ་ཤེས་ཁྱོད་རྣམས་ལ་བསྒོས་པའི་བཀའ་དང་བཀའ་ཁྲིམས་རྣམས་ཏན་ཏིག་གིས་བསྲུང་བར་གཟབ་དགོས་པ་སྟེ། ཁྱོད་རྣམས་ཀྱི་དཀོན་མཆོག་ཡ་ཝཱེ་གཅེས་སུ་འཛིན་དགོས་པ་དང་། ཁོང་གི་ལམ་ཐམས་ཅད་དུ་བསྐྱོད་དགོས་ལ། ཁོང་གི་བཀའ་རྣམས་བསྲུང་བ་དང་ཁོང་ལ་རྩེ་གཅིག་གིས་བརྟེན་ཞིང་། བློ་གཅིག་སེམས་གཅིག་གིས་ཁོང་ལ་ཞབས་ཕྱི་འབུལ་བར་གྱིས་ཤིག་ཅེས་སྨྲས་སོ། །
JOS 22:6 དེ་ནས་ཡོ་ཤུ་ཨ་ཡིས་ཁོ་རྣམས་ལ་བྱིན་གྱིས་བརླབས་ནས་མངགས་པ་དང་། ཁོ་རྣམས་རང་གི་གུར་ཏུ་ཕྱིར་ལོག་པའོ། །
JOS 22:7 མཱ་ན་ཤེའི་ཚོ་པ་ཕྱེད་ལ་མོ་ཤེས་དུས་སྔ་མོ་ནས་པཱ་ཤན་ཡུལ་དུ་ས་སྐལ་བགོས་ཟིན་པ་དང་། ཚོ་པ་ཕྱེད་ཀ་འདི་ལ་ཡོ་ཤུ་ཨ་ཡིས་ཡོར་དན་གཙང་པོའི་ནུབ་ཕྱོགས་སུ་ཁོ་ཚོའི་སྤུན་རྣམས་ལས་ས་སྐལ་བགོས་པའོ། །ཡོ་ཤུ་ཨ་ཡིས་ཁོ་རྣམས་རང་གི་གུར་ཏུ་མངགས་པའི་ཚེ་ཁོ་ཚོར་བྱིན་གྱིས་བརླབས་ནས་འདི་སྐད་དུ།
JOS 22:8 ཁྱོད་རྣམས་ཀྱིས་རྒྱུ་ནོར་མང་པོ་དང་ཕྱུགས་ཁྱུ་ཆེན་པོ། གསེར་དངུལ་ལི་ལྕགས། དེ་མིན་གྱོན་གོས་མང་པོ་བཅས་ཁྱེར་ནས་ཁྱོད་ཚོའི་གུར་ཏུ་ཕྱིར་ལོག་དགོས་ལ། ཁྱོད་ཚོས་དགྲ་བོ་ནས་ཕྲོགས་འོངས་པའི་དངོས་པོ་དག་ནི་སྤུན་ཟླ་རྣམས་ལ་བགོ་དགོས་ཞེས་སྨྲས།
JOS 22:9 དེ་ནས་རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་ཀ་ན་ཨན་གྱི་ཞི་ལོ་ནས་ཆས་ཏེ། ཡེས་ར་ཨེལ་པ་དང་བྲལ་ཞིང་ཁོ་ཚོར་ས་སྐལ་དུ་ཐོབ་པའི་ཡུལ་ཏེ། དཀོན་མཆོག་ཡ་ཝཱེས་མོ་ཤེ་བརྒྱུད་ནས་བཀའ་བསྒོས་པ་ལྟར་ས་སྐལ་དུ་ཐོབ་པའི་གིལ་ཨད་ཡུལ་དུ་ལོག་གོ །
JOS 22:10 རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་ཡོར་དན་གཙང་པོ་འགྲམ་རྒྱུད་ཀྱི་ཀ་ན་ཨན་ཡུལ་དུ་སླེབས་པ་དང་། ཡོར་དན་གཙང་པོ་ནས་མཆོད་ཁྲི་ཞིག་བརྩིགས་ཤིང་། མཆོད་ཁྲི་དེ་ནི་བལྟས་ན་མཐོ་ཞིང་ཆེ་བའོ། །
JOS 22:11 ཡེས་ར་ཨེལ་པ་རྣམས་ཀྱིས་དོན་དེ་ཐོས་ནས་ན་རེ། རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་ཀྱིས་ཡོར་དན་གཙང་པོའི་ཉེ་འགྲམ་དུ། ཀ་ན་ཨན་གྱི་མཐའ་མཚམས་སུ་ཡེས་ར་ཨེལ་པ་རྣམས་ལ་གཏོགས་པའི་ཕྱོགས་སུ་མཆོད་ཁྲི་ཞིག་བརྩིགས་པ་རེད་ཅེས་སྨྲས་པའོ། །
JOS 22:12 ཚོགས་མི་ཡོངས་ཀྱིས་དེ་ཐོས་པ་དང་ཡར་སོང་སྟེ་ཁོ་རྣམས་ལ་འཐབ་ཕྱིར་ཞི་ལོ་རུ་འདུས།
JOS 22:13 ཡེས་ར་ཨེལ་པ་རྣམས་ཀྱིས་མཆོད་དཔོན་ཨེ་ལི་ཨ་ཟར་གྱི་བུ་ཕི་ནེ་ཧེ་གིལ་ཨད་ཡུལ་དུ་རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་ཀྱི་མདུན་དུ་མངགས་ཤིང་།
JOS 22:14 ཡང་ཕི་ནེ་ཧེ་དང་མཉམ་དུ་འགོ་དཔོན་བཅུ་སྟེ། ཡེས་ར་ཨེལ་པའི་ཚོ་པ་རེ་རེའི་ཚོ་དཔོན་རེ་མངགས་པ་དང་། ཐམས་ཅད་ཡེས་ར་ཨེལ་གྱི་རུས་རྒྱུད་རྣམས་ཀྱི་འགོ་གཙོ་ཡིན་ནོ། །
JOS 22:15 ཁོ་རྣམས་གིལ་ཨད་ཡུལ་དུ་སླེབས་ཤིང་རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་དང་ཕྲད་ནས་ཁོ་རྣམས་ལ།
JOS 22:16 དཀོན་མཆོག་ཡ་ཝཱེའི་ཚོགས་མི་ཡོངས་ཀྱིས་འདི་ལྟར། ཁྱོད་རྣམས་དེ་རིང་ཁ་འཁོར་ནས་དཀོན་མཆོག་ཡ་ཝཱེའི་རྗེས་སུ་མི་འབྲང་བ་དང་། ཡེས་ར་ཨེལ་གྱི་དཀོན་མཆོག་དང་འགལ་ཞིང་། རང་གི་དོན་དུ་མཆོད་ཁྲི་ཞིག་བརྩིགས་ནས་དཀོན་མཆོག་ཡ་ཝཱེ་ལ་ངོ་ལོག་བྱེད་པའི་སྡིག་ཉེས་དེ་ཅི་ཡིན་ནམ།
JOS 22:17 སྔོན་ཆད་ཕེ་ཨོར་ནས་བྱས་པའི་སྡིག་ཉེས་དེ་ད་དུང་ཆུང་བ་ཡིན་ནམ། དཀོན་མཆོག་ཡ་ཝཱེའི་ཚོགས་ལ་རིམས་ནད་བྱུང་བ་ཡིན་མོད། འོན་ཀྱང་ང་ཚོས་སྡིག་པ་དེ་ད་ལྟའི་བར་དུ་ད་དུང་སེལ་ཐུབ་མེད་དོ། །
JOS 22:18 ཡིན་ནའང་དེ་རིང་ཁྱོད་རྣམས་ཁ་འཁོར་ནས་དཀོན་མཆོག་ཡ་ཝཱེའི་རྗེས་སུ་མི་འབྲང་བ་ཡིན་ནམ། ཁྱོད་རྣམས་ཀྱིས་དེ་རིང་དཀོན་མཆོག་ཡ་ཝཱེ་ལ་ངོ་ལོག་བྱས་ན། སང་ཉིན་ཁོང་ཉིད་ཡེས་ར་ཨེལ་གྱི་ཚོགས་མི་ཡོངས་ལ་ཐུགས་ཁྲོ་བར་འགྱུར།
JOS 22:19 ཁྱོད་རྣམས་ཀྱིས་རང་ལ་ས་སྐལ་དུ་ཐོབ་པའི་ཡུལ་དེ་མི་གཙང་བར་འདོད་ན། དཀོན་མཆོག་ཡ་ཝཱེའི་ཡུལ་ཏེ་ཁོང་གི་གུར་མཆོག་བཞུགས་སའི་གནས་སུ་ཚུར་འོངས་ནས། ང་ཚོའི་ཁྲོད་དུ་ས་སྐལ་བླངས་ཆོག ཡིན་ནའང་བདག་ཅག་གི་དཀོན་མཆོག་ཡ་ཝཱེའི་མཆོད་ཁྲིའི་ཕན་ཆད་ནས་རང་ཉིད་ལ་མཆོད་ཁྲི་བརྩིགས་ཏེ། དཀོན་མཆོག་ཡ་ཝཱེ་ལ་ངོ་ལོག་བྱེད་མི་རུང་ལ། ངེད་རྣམས་ལའང་ངོ་ལོག་བྱེད་མི་རུང་།
JOS 22:20 སྔོན་ཆད་ཟེ་རག་གི་ཡང་ཚ་ཨ་ཀན་གྱིས་བསྔོ་བར་འོས་པའི་དངོས་པོ་ཐད་བློ་ལོག་པའི་སྡིག་ཉེས་བསགས་ཤིང་། ཡེས་ར་ཨེལ་གྱི་ཚོགས་མི་ཡོངས་ལ་ཐུགས་ཁྲོས་པ་མ་ཡིན་ནམ། ཁོས་བསགས་པའི་སྡིག་ཉེས་ཁྲོད་དུ་ཤི་བ་ནི་ཁོ་རང་འབའ་ཞིག་མ་ཡིན་ནོ་ཞེས་སྨྲའོ་ཞེས་སྨྲས།
JOS 22:21 དེ་ནས་རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་ཀྱིས་ཡེས་ར་ཨེལ་པའི་རུས་རྒྱུད་རྣམས་ཀྱི་འགོ་གཙོ་ལ་དེའི་ལན་དུ།
JOS 22:22 ཀུན་དབང་གི་དཀོན་མཆོག་ཡ་ཝཱེ། ཀུན་དབང་གི་དཀོན་མཆོག་ཡ་ཝཱེས་མཁྱེན་པ་དང་། ཡེས་ར་ཨེལ་པས་ཀྱང་ཤེས་ངེས་ཡིན་ཏེ། གལ་ཏེ་ངེད་རྣམས་ལ་ངོ་ལོག་གི་སེམས་ལྡན་པའམ་ཡང་ན་དཀོན་མཆོག་ཡ་ཝཱེ་དང་འགལ་བ་ཡིན་ན། ཁྱེད་ཀྱིས་དེ་རིང་ངེད་རྣམས་མི་བསྲུང་བར་ཤོག
JOS 22:23 གལ་ཏེ་རང་གི་དོན་དུ་མཆོད་ཁྲི་བརྩིགས་ཤིང་། ཁ་འཁོར་ནས་དཀོན་མཆོག་ཡ་ཝཱེའི་རྗེས་སུ་མི་འབྲང་བའམ་ཡང་ན་སྦྱིན་སྲེག་དང་འབྲུ་མཆོད། ཞི་བདེའི་མཆོད་པ་བཅས་མཆོད་ཁྲི་སྟེང་འབུལ་བའི་ཕྱིར་ཡིན་ན། དཀོན་མཆོག་ཡ་ཝཱེས་སྐུ་དངོས་སུ་ངེད་རྣམས་ཀྱི་སྡིག་པ་འདེད་པར་ཤོག
JOS 22:24 ངེད་ཅག་གིས་རྒྱུ་མཚན་གང་ཡང་མེད་པ་མ་ཡིན་པར་རྐང་བཙུགས་ནས་དེ་ལྟར་བྱས་པ་ཡིན་ཏེ། ཕྱིན་ཆད་ཁྱོད་རྣམས་ཀྱི་བུ་རྒྱུད་ཀྱིས་ངེད་ཅག་གི་བུ་རྒྱུད་ལ་འདི་ལྟར། ཁྱོད་རྣམས་ཡེས་ར་ཨེལ་གྱི་དཀོན་མཆོག་ཡ་ཝཱེ་དང་འབྲེལ་བ་ཅི་ཞིག་ཡོད་དམ།
JOS 22:25 དཀོན་མཆོག་ཡ་ཝཱེས་ཡོར་དན་གཙང་པོ་ནི་ངེད་ཅག་དང་རུ་བེན་པ་དང་གཱ་རྡུ་པའི་ས་མཚམས་སུ་བཙུགས་པ་ཡིན་པས། ཁྱོད་རྣམས་ནི་དཀོན་མཆོག་ཡ་ཝཱེ་དང་འབྲེལ་བ་མེད་དོ་ཞེས་སྨྲ་བར་དོགས་པ་ཡིན་ནོ། །དེ་ལྟར་བྱས་ན་ཁྱོད་རྣམས་ཀྱི་བུ་རྒྱུད་ཀྱིས་ངེད་ཅག་གི་བུ་རྒྱུད་ལ་དཀོན་མཆོག་ཡ་ཝཱེར་གུས་ཤིང་འཇིགས་པར་མ་བྱས་པ་ཡིན།
JOS 22:26 དེའི་ཕྱིར་ངེད་རྣམས་ཀྱིས་འདི་ལྟར། རང་གི་དོན་དུ་མཆོད་ཁྲི་ཞིག་བརྩིག་པར་བྱ་ཞིང་། སྦྱིན་སྲེག་འབུལ་བའི་ཕྱིར་མ་ཡིན་ལ་དམར་མཆོད་འབུལ་བའི་ཕྱིར་དུ་ཡང་མ་ཡིན།
JOS 22:27 དེ་ནི་ཁྱོད་རྣམས་དང་ངེད་ཅག་གི་བར་དང་ཁྱོད་རྣམས་དང་ངེད་ཅག་གི་མི་རབས་རྗེས་མའི་བར་དུ་བདེན་དཔང་བྱེད་པའི་ཆེད་དུ་ཡིན་ཞིང་། དེ་ནས་ངེད་རྣམས་ཀྱིས་ཀྱང་དཀོན་མཆོག་ཡ་ཝཱེའི་སྤྱན་སྔར་སྦྱིན་སྲེག་དང་ཞི་བདེའི་མཆོད་པ། དམར་མཆོད་བཅས་ཕུལ་ནས་ཁོང་ལ་ཞབས་ཏོག་བསྒྲུབ་ཅིང་། ཁྱོད་རྣམས་ཀྱི་བུ་རྒྱུད་ཀྱིས་ཕྱིན་ཆད་ངེད་ཅག་གི་བུ་རྒྱུད་ལ་ཁྱོད་རྣམས་དཀོན་མཆོག་ཡ་ཝཱེ་དང་འབྲེལ་བ་མེད་ཅེས་སྨྲ་རྒྱུ་མེད་དོ་ཞེས་སྨྲས་པ་དང་།
JOS 22:28 ངེད་ཅག་གིས་འདི་ལྟར། ཕྱིན་ཆད་ཁྱོད་རྣམས་ཀྱིས་ངེད་ཅག་གམ་ཡང་ན་ངེད་ཅག་གི་བུ་རྒྱུད་ལ་འདི་ལྟར་སྨྲས་ན། ང་ཚོས་དེའི་ལན་དུ། ཁྱོད་རྣམས་ཀྱིས་ལྟོས་དང་། ངེད་ཅག་གི་མེས་པོ་རྣམས་ཀྱིས་བརྩིགས་པའི་མཆོད་ཁྲི་ནི་དཀོན་མཆོག་ཡ་ཝཱེའི་མཆོད་ཁྲིའི་དབྱིབས་ཡིན་ཞིང་། འདི་ནི་སྦྱིན་སྲེག་འབུལ་བའི་ཕྱིར་མ་ཡིན་ལ་དམར་མཆོད་འབུལ་བའི་ཕྱིར་དུ་ཡང་མ་ཡིན་ཏེ། ཁྱོད་རྣམས་དང་ངེད་ཅག་བར་གྱི་བདེན་དཔང་གི་ཆེད་དུ་ཡིན་ནོ་ཞེས་སྨྲས་ཆོག་གོ་ཞེས་སྨྲས་པ་ཡིན།
JOS 22:29 ངེད་རྣམས་ཀྱིས་བདག་ཅག་གི་དཀོན་མཆོག་ཡ་ཝཱེའི་གུར་མཆོག་མདུན་གྱི་མཆོད་ཁྲིའི་ཕན་ཆད་ནས་སྦྱིན་སྲེག་དང་འབྲུ་མཆོད། དམར་མཆོད་བཅས་འབུལ་བའི་ཕྱིར་མཆོད་ཁྲི་གཞན་ཞིག་བརྩིགས་པ་དང་། དཀོན་མཆོག་ཡ་ཝཱེ་ལ་ངོ་ལོག་བྱས་ནས་དེ་རིང་ཁ་འཁོར་ཏེ་ཁོང་གི་རྗེས་སུ་མི་འབྲང་བའི་བསམ་ཚུལ་འདི་ལྟ་བུ་ནི་ངེད་རྣམས་ལ་གཏན་ནས་མེད་ཅེས་སྨྲས་སོ། །
JOS 22:30 མཆོད་དཔོན་ཕི་ནེ་ཧེ་དང་ལྷན་ཅིག་ཏུ་ཡོད་པའི་འགོ་དཔོན་ཏེ། ཁོང་དང་མཉམ་དུ་འོངས་པའི་ཡེས་ར་ཨེལ་གྱི་འགོ་གཙོ་རྣམས་ཀྱིས་རུ་བེན་པ་དང་གཱ་རྡུ་པ། མཱ་ན་ཤེའི་ཚོ་པ་ཕྱེད་ཀའི་མི་རྣམས་ཀྱིས་སྨྲས་པའི་གཏམ་ཐོས་ནས་དགའ་བར་གྱུར་ཏོ། །
JOS 22:31 མཆོད་དཔོན་ཨེ་ལི་ཨ་ཟར་གྱི་བུ་ཕི་ནེ་ཧེ་ཡིས་རུ་བེན་པ་དང་གཱ་རྡུ་པ། མཱ་ན་ཤེ་པ་བཅས་ལ། ཁྱོད་རྣམས་ཀྱིས་ཁོང་ལ་བློ་ལོག་པའི་སྡིག་ཉེས་འདི་མ་བསགས་པས། དེ་རིང་ང་ཚོས་དཀོན་མཆོག་ཡ་ཝཱེ་ནི་བདག་ཅག་གི་དཀྱིལ་དུ་བཞུགས་པ་ཤེས་སོ། །ད་ལྟ་ཁྱོད་རྣམས་ཀྱིས་ཡེས་ར་ཨེལ་པ་དཀོན་མཆོག་ཡ་ཝཱེའི་ཕྱག་ནས་བསྐྱབས་པ་ཡིན་ནོ་ཞེས་སྨྲས་སོ། །
JOS 22:32 མཆོད་དཔོན་ཨེ་ལི་ཨ་ཟར་གྱི་བུ་ཕི་ནེ་ཧེ་དང་འགོ་དཔོན་རྣམས་རུ་བེན་པ་དང་གཱ་རྡུ་པ་རྣམས་དང་བྲལ་ནས། གིལ་ཨད་ཡུལ་ནས་ཀ་ན་ཨན་ཡུལ་དུ་ཕྱིར་ལོག་ཅིང་། ཡེས་ར་ཨེལ་པ་རྣམས་ཀྱི་རྩར་སླེབས་པ་དང་དོན་དེ་ཁོ་རྣམས་ལ་སྨྲས།
JOS 22:33 ཡེས་ར་ཨེལ་པ་རྣམས་དོན་དེའི་ཕྱིར་དགའ་བར་གྱུར་ནས་དཀོན་མཆོག་ལ་བསྟོད་བསྔགས་ཕུལ་ཞིང་། རུ་བེན་པ་དང་གཱ་རྡུ་པ་རྣམས་ལ་འཐབ་པ་དང་དེ་རྣམས་འཚོ་སྡོད་བྱེད་སའི་གནས་མེད་པར་གཏོང་བའི་ཕྱིར་ཡར་འགྲོ་བའི་གཏམ་ནི་གླེང་མ་མྱོང་ངོ་། །
JOS 22:34 རུ་བེན་པ་དང་གཱ་རྡུ་པ་རྣམས་ཀྱིས་མཆོད་ཁྲིའི་མིང་ལ་དཔང་བོའི་མཆོད་ཁྲི་ཞེས་བཏགས་པ་སྟེ། མཆོད་ཁྲི་འདིས་ང་ཚོའི་བར་དུ་དཀོན་མཆོག་ཡ་ཝཱེ་ནི་དཀོན་མཆོག་ལགས་པར་བདེན་དཔང་བྱེད་དོ་ཞེས་པའི་དོན་ནོ། །
JOS 23:1 དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་བདེ་བར་བཀོད་ཅིང་། མཐའ་འཁོར་གྱི་དགྲ་ཐམས་ཅད་བར་དུ་འཐབ་མོ་མེད་པར་དུས་ཡུན་རིང་པོ་སོང་བ་དང་། ཡོ་ཤུ་ཨ་ལོ་ན་རྒས་པས།
JOS 23:2 ཡེས་ར་ཨེལ་པ་རྣམས་ཀྱི་རྒན་པོ་དང་ཚོ་དཔོན། ཁྲིམས་དཔོན། འགོ་དཔོན་བཅས་ཐམས་ཅད་བོས་འོངས་ནས་ཁོ་རྣམས་ལ་ན་རེ། ང་རང་ལོ་ན་རྒས་ཟིན་ཏེ།
JOS 23:3 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་རྣམས་ཀྱི་ཆེད་དུ་རྒྱལ་ཁམས་འདི་མཐའ་དག་ལ་དོན་གང་ཞིག་མཛད་པ་ཐམས་ཅད་ཁྱོད་ཅག་གིས་དངོས་སུ་མཐོང་བ་སྟེ། ཁྱོད་རྣམས་ཀྱི་ཕྱིར་འཐབ་མཁན་ནི་ཁྱོད་ཅག་གི་དཀོན་མཆོག་ཡ་ཝཱེ་ལགས་པས་སོ། །
JOS 23:4 བདག་གིས་མེད་པར་བཟོས་པ་དང་ཤུལ་དུ་ལུས་པའི་རྒྱལ་ཁམས་སོ་སོ་ནི། ཡོར་དན་གཙང་པོ་ནས་ཉི་མ་ནུབ་མཚམས་ཀྱི་རྒྱ་མཚོ་ཆེན་པོའི་བར་དུ། བདག་གིས་རྒྱན་འཕངས་ནས་ཁྱོད་ཚོའི་ཚོ་པ་རྣམས་ལ་ས་སྐལ་དུ་བགོས་ཟིན་ཏོ། །
JOS 23:5 ཁྱོད་རྣམས་ཀྱི་དཀོན་མཆོག་ཡ་ཝཱེས་ཁོ་ཚོ་ཁྱོད་རྣམས་ཀྱི་མདུན་ནས་ཕྱིར་སྐྲོད་པ་དང་། ཁོ་ཚོ་ཁྱོད་རྣམས་དང་འབྲལ་བར་མཛད་ངེས་པས། ཁྱོད་རྣམས་ཀྱི་དཀོན་མཆོག་ཡ་ཝཱེས་ཇི་ལྟར་ཞལ་བཞེས་གནང་བ་བཞིན་ཁོ་ཚོའི་ཡུལ་རྣམས་ཁྱོད་ཚོ་ལ་ས་སྐལ་དུ་འཐོབ་ངེས་ཡིན།
JOS 23:6 དེའི་ཕྱིར་ཁྱོད་རྣམས་ཀྱིས་དཔའ་སེམས་བསྐྱེད་དེ། ཕྱོགས་འཛོལ་ཅི་ཡང་མེད་པར་མོ་ཤེའི་བཀའ་ཁྲིམས་སུ་བཀོད་པའི་བཀའ་ཐམས་ཅད་བརྩི་སྲུང་ནན་མོ་བྱེད་དགོས།
JOS 23:7 ཁྱོད་ཚོའི་ཁྲོད་དུ་ལུས་པའི་མི་འདི་རྣམས་ལ་འདྲེ་བར་མི་བྱ་ཞིང་། ཁོ་ཚོའི་ལྷ་རྣམས་ཀྱི་མིང་གླེང་མི་རུང་བ་དང་། དེ་དཔང་དུ་བཙུགས་ནས་མནའ་བསྐྱལ་མི་རུང་ལ། དེར་ཞབས་ཏོག་བསྒྲུབ་པ་དང་ཕྱག་འཚལ་བར་ཡང་མི་རུང་ངོ་། །
JOS 23:8 ཁྱོད་རྣམས་ཀྱིས་ད་ལྟའི་བར་དུ་ཇི་ལྟར་བྱས་པ་བཞིན་དུ། ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་རྩེ་གཅིག་གིས་བརྟེན་དགོས་ཏེ།
JOS 23:9 ཅི་ལ་ཟེར་ན། དཀོན་མཆོག་ཡ་ཝཱེས་མི་མང་སྟོབས་དང་ལྡན་པ་རྣམས་ཁྱོད་ཅག་གི་མདུན་ནས་ཕྱིར་བསྐྲད་པ་དང་། ད་ལྟའི་བར་དུ་ཁྱོད་རྣམས་ཀྱི་མདུན་དུ་ཚུགས་ཐུབ་མཁན་གཅིག་ཀྱང་མེད་དོ། །
JOS 23:10 ཁྱོད་རྣམས་ཀྱི་དཀོན་མཆོག་ཡ་ཝཱེས་ཞལ་བཞེས་གནང་བ་བཞིན་དུ་ཁྱོད་རྣམས་ཀྱི་ཕྱིར་འཐབ་མོ་མཛད་པས། ཁྱོད་མི་གཅིག་གིས་མི་སྟོང་བདའ་འདེད་བྱེད་པར་འགྱུར།
JOS 23:11 ཁྱོད་རྣམས་ཀྱིས་ལྷག་ཏུ་གཟབ་གཟབ་ངང་ཁྱོད་ཅག་གི་དཀོན་མཆོག་ཡ་ཝཱེ་གཅེས་སུ་འཛིན་དགོས།
JOS 23:12 གལ་ཏེ་ཁྱོད་རྣམས་ཕར་འཁོར་ནས་ཁྱོད་རྣམས་ཀྱི་ཁྲོད་དུ་ལུས་པའི་མི་འདི་དག་དང་འབྲེལ་ཞིང་ཕན་ཚུན་གཉེན་སྒྲིག་པ་དང་། ཕན་ཚུན་འགྲོ་འོང་བྱས་ན།
JOS 23:13 ཁྱོད་ཚོས་གསལ་པོར་ཤེས་དགོས་པ་ཞིག་ལ། ཁྱོད་ཚོའི་དཀོན་མཆོག་ཡ་ཝཱེས་ཁོ་རྣམས་ཁྱོད་ཚོའི་མདུན་ནས་ཕྱིར་སྐྲོད་པར་མི་འགྱུར་ལ། དེ་ལས་ལྡོག་སྟེ་ཁྱོད་རྣམས་ཡ་ཝཱེས་ཁྱོད་ཅག་ལ་གནང་བའི་ཡུལ་བཟང་པོ་འདི་ནས་མེད་པར་འགྲོ་བའི་བར་དུ། ཁོ་ཚོ་ནི་ཁྱོད་ཅག་གི་དྲ་རྒྱ་དང་རྙི་རྒྱ། རྩིབ་རུས་སྟེང་གི་རྟ་ལྕགས། མིག་ནང་གི་ཚེར་མ་བཅས་སུ་འགྱུར་ངེས་ཡིན།
JOS 23:14 ད་ལྟ་ང་རང་འཇིག་རྟེན་པ་ཀུན་གྱི་འགྲོ་ལུགས་ལྟར་འགྲོ་དགོས་བྱུང་། ཁྱོད་རྣམས་ཀྱི་དཀོན་མཆོག་ཡ་ཝཱེས་ཁྱོད་ཅག་ལ་བྱིན་རླབས་གནང་བའི་ཞལ་བཞེས་ཀྱི་གསུང་ནི། བཀའ་གཅིག་ཀྱང་དོན་མེད་དུ་མ་གྱུར་བར་ཐམས་ཅད་ཁྱོད་ཚོའི་སྟེང་འགྲུབ་པ་དེ་ཁྱོད་ཅག་གིས་ཡིད་སེམས་ཀུན་ནས་ཤེས་སོ། །
JOS 23:15 ཁྱོད་ཅག་གི་དཀོན་མཆོག་ཡ་ཝཱེས་ཞལ་བཞེས་གནང་བའི་བྱིན་རླབས་ཐམས་ཅད་ཇི་ལྟར་ཁྱོད་རྣམས་ལ་ཐོབ་པ་བཞིན། ཁྱོད་རྣམས་རང་གི་དཀོན་མཆོག་ཡ་ཝཱེས་གནང་བའི་ཡུལ་བཟང་པོ་འདི་ནས་མེད་པར་གཏོང་བའི་བར་དུ། དཀོན་མཆོག་ཡ་ཝཱེས་བགེགས་བར་ཆད་སྣ་ཚོགས་ཀྱང་དེ་བཞིན་དུ་ཁྱོད་རྣམས་ཀྱི་སྟེང་དུ་འབྱུང་བར་མཛད་ངེས་ལ།
JOS 23:16 གལ་ཏེ་ཁྱོད་རྣམས་རང་གི་དཀོན་མཆོག་ཡ་ཝཱེས་ཁྱོད་ཚོ་ལ་བསྲུང་བར་བསྒོས་པའི་ཞལ་ཆད་དང་འགལ་ཏེ་ལྷ་གཞན་པར་བསྙེན་བཀུར་བྱས་ནས་དེར་ཕྱག་བཙལ་ན། དཀོན་མཆོག་ཡ་ཝཱེ་ཁྱོད་རྣམས་ལ་ཐུགས་ཁྲོ་ཞིང་ཁྱོད་རྣམས་ཁོང་གིས་གནང་བའི་ཡུལ་བཟང་པོ་ནས་མྱུར་བ་མྱུར་དུ་མེད་པར་མཛད་ངེས་ཡིན་ཞེས་སྨྲས་སོ། །
JOS 24:1 ཡོ་ཤུ་ཨ་ཡིས་ཡེས་ར་ཨེལ་གྱི་ཚོ་པ་ཐམས་ཅད་སི་ཀེམ་དུ་བསྡུས་ཤིང་། ཡེས་ར་ཨེལ་གྱི་རྒན་པོ་དང་ཚོ་དཔོན། ཁྲིམས་དཔོན། དེ་མིན་འགོ་དཔོན་བཅས་བོས་འོངས་པ་དང་། ཁོ་རྣམས་དཀོན་མཆོག་གི་དྲུང་དུ་ལངས་ནས་བསྡད།
JOS 24:2 ཡོ་ཤུ་ཨ་ཡིས་འབངས་རྣམས་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། གནའ་དུས་ཁྱོད་ཅག་གི་མེས་པོ་རྣམས་ཏེ། ཨབ་ར་ཧམ་དང་ནཱ་ཧོར་གྱི་ཕ་ཐ་རཱ་ནི་གཙང་པོའི་ ཕ་རོལ་ཏུ་གནས་ཤིང་ལྷ་གཞན་རྣམས་ལ་བསྙེན་བཀུར་བྱས་པ་དང་།
JOS 24:3 བདག་གིས་ཁྱོད་རྣམས་ཀྱི་མེས་པོ་ཨབ་ར་ཧམ་གཙང་པོའི་ཕ་རོལ་ནས་ཁྲིད་འོངས་ཏེ། ཀ་ན་ཨན་ཡུལ་ཀུན་ལ་འགྲིམ་དུ་བཅུག་ཅིང་། ཡང་ཁོའི་བུ་རྒྱུད་མང་དུ་སྤེལ་ཏེ་ཨི་སཱག་ཁོ་ལ་གནང་བ་ཡིན།
JOS 24:4 ཡང་ཨི་སཱག་ལ་ཡ་ཀོབ་དང་ཨེ་སཱབ་གནང་ནས། སེ་ཨིར་རི་བོ་ཨེ་སཱབ་ལ་ས་སྐལ་དུ་གནང་བ་ཡིན། ཕྱིས་སུ་ཡ་ཀོབ་དང་ཁོའི་བུ་རྒྱུད་རྣམས་ནི་མར་ཨེ་ཅིབ་ཡུལ་དུ་ཕྱིན་པ་ཡིན་ནོ། །
JOS 24:5 བདག་གིས་མོ་ཤེ་དང་ཨ་རོན་གཉིས་མངགས་པར་མ་ཟད། ངས་ཨེ་ཅིབ་ཡུལ་ནས་ཅི་བྱས་པ་བཞིན་དུ་ཨེ་ཅིབ་སྡུག་ལ་སྦྱར་བ་དང་། ཁྱོད་རྣམས་ཕྱིར་ཁྲིད་འོངས་པ་ཡིན།
JOS 24:6 བདག་གིས་ཁྱོད་ཅག་གི་མེས་པོ་རྣམས་ཨེ་ཅིབ་ནས་ཕྱིར་ཁྲིད་འོངས་པ་དང་ཁོ་རྣམས་རྒྱ་མཚོ་རུ་སླེབས། ཨེ་ཅིབ་པ་རྣམས་ཀྱིས་ཤིང་རྟ་དང་སྐྱ་དམག་ཁྲིད་ནས་ཁྱོད་ཚོའི་མེས་པོ་རྣམས་ཀྱི་ར་མདར་བརྒྱུགས་ཤིང་རྒྱ་མཚོ་དམར་པོ་རུ་སླེབས།
JOS 24:7 ཁྱོད་ཅག་གི་མེས་པོ་རྣམས་ཀྱིས་དཀོན་མཆོག་ཡ་ཝཱེ་ལ་སྐྱབས་སུ་ཞུས་པས། ཁོང་གིས་ཁྱོད་རྣམས་དང་ཨེ་ཅིབ་པའི་བར་དུ་མུན་པ་གནང་བ་དང་། ཡང་རྒྱ་མཚོ་ཕྱིར་དྲངས་ནས་ཨེ་ཅིབ་པ་རྣམས་བསྣུབས་པར་མཛད་དོ། །བདག་གིས་ཨེ་ཅིབ་ནས་དོན་ཅི་ཞིག་བྱས་པ་རྣམས་ཁྱོད་ཅག་གིས་དངོས་སུ་མཐོང་ཞིང་། ཁྱོད་རྣམས་དབེན་སྟོང་ནས་ཀྱང་ལོ་ཟླ་མང་པོར་བསྡད་དོ། །
JOS 24:8 ངས་ཁྱོད་རྣམས་ཁྲིད་དེ་ཡོར་དན་གཙང་པོའི་ཤར་ཏུ་ཨེ་མོར་པ་རྣམས་གནས་པའི་ཡུལ་ལ་སླེབས་ཤིང་། ཁོ་ཚོ་ནི་ཁྱོད་རྣམས་དང་འཐབ་པ་ན། ངས་ཁོ་ཚོ་ཁྱོད་རྣམས་ཀྱི་ལག་ཏུ་སྤྲད་པས་ཁོ་ཚོའི་ཡུལ་ནི་ཁྱོད་རྣམས་ལ་ས་སྐལ་དུ་ཐོབ་པ་དང་། ངས་ཁྱོད་རྣམས་ཀྱི་སྔུན་ནས་ཁོ་ཚོ་རྩ་མེད་དུ་བཏང་།
JOS 24:9 སྐབས་དེར། མོ་ཨབ་ཀྱི་རྒྱལ་པོ་ཚིབ་ཕོར་གྱི་བུ་པཱ་ལག་ལངས་ཏེ་ཡེས་ར་ཨེལ་པ་ལ་རྒོལ་བ་དང་། ཁྱོད་རྣམས་ལ་དམོད་མོ་བྱ་ཆེད་མི་མངགས་ནས་པེ་ཨོར་གྱི་བུ་པེལ་ཨམ་བོས་འོངས་ཤིང་།
JOS 24:10 ངས་པེལ་ཨམ་གྱི་གཏམ་ལ་མ་མཉན་པས་ཁོས་དེ་ལས་ལྡོག་སྟེ་ཁྱོད་རྣམས་ལ་ཡང་ཡང་བྱིན་གྱིས་བརླབས་པ་དང་། ངས་ཁྱོད་རྣམས་ཁོའི་ལག་ནས་ཐར་བར་བྱས་སོ། །
JOS 24:11 ཁྱོད་རྣམས་ཡོར་དན་གཙང་པོ་བརྒལ་ནས་ཡེ་རུ་ཀོ་ལ་སླེབས་པ་དང་། ཡེ་རུ་ཀོའི་ཡུལ་མི་དང་ཨེ་མོར་པ། ཕེ་རེ་ཟི་པ། ཀ་ན་ཨན་པ། ཧེད་པ། གིར་གས་པ། ཧེ་བི་པ། ཡེ་བུ་སི་པ་བཅས་ཐམས་ཅད་ཀྱིས་ཁྱོད་ཅག་ལ་དམག་བརྒྱབ་ཅིང་། ངས་ཁོ་ཚོ་ཁྱོད་རྣམས་ཀྱི་ལག་ཏུ་སྤྲད་པ་ཡིན།
JOS 24:12 ངས་དུག་སྦྲང་མང་པོ་ཁྱོད་རྣམས་ཀྱི་སྔུན་ལ་བཏང་ནས། ཨེ་མོར་པའི་རྒྱལ་པོ་གཉིས་ཁྱོད་ཀྱི་གྲི་དང་གཞུ་གཉིས་མ་བཀོལ་བར་ཁྱོད་རྣམས་ཀྱི་སྔུན་ནས་བསྐྲད་པ་ཡིན།
JOS 24:13 ངས་ཁྱོད་རྣམས་ལ་ཁྱོད་ཚོས་དཀའ་བ་སྤྱད་ནས་བསློགས་པ་མིན་པའི་ས་ཞིང་དང་ཁྱོད་ཚོས་བསྐྲུན་པ་མིན་པའི་གྲོང་ཁྱེར་སྤྲད་པ་དང་། ཁྱོད་རྣམས་དེའི་ནང་དུ་སྡོད་ཅིང་ཁྱོད་ཚོས་བཙུགས་པ་མིན་པའི་རྒུན་འབྲུམ་ར་བ་དང་སྐྱུ་རུ་ར་བའི་འབྲས་བུ་ལོངས་སུ་སྤྱོད་ཐུབ་པ་ཡིན་ཞེས་གསུངས་སོ། །
JOS 24:14 ད་ལྟ་ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་གུས་ཤིང་འཇིགས་པར་བྱེད་པ་དང་། སྒོ་ཀུན་ནས་དྲང་བདེན་ངང་ཁོང་ལ་བསྙེན་བཀུར་བྱེད་ཅིང་། ཁྱོད་ཅག་གི་མེས་པོ་རྣམས་ཀྱིས་གཙང་པོའི་ཕ་རོལ་དང་ཨེ་ཅིབ་ཡུལ་ནས་བསྙེན་བཀུར་བྱས་པའི་ལྷ་རྣམས་དོར་ནས་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དགོས།
JOS 24:15 གལ་ཏེ་ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་བསྙེན་བཀུར་བྱེད་པ་ནི་མི་ལེགས་པར་འདོད་ན། ཁྱོད་ཅག་གི་མེས་པོ་རྣམས་ཀྱིས་གཙང་པོའི་ཕ་རོལ་ཏུ་བསྙེན་བཀུར་བྱས་པའི་ལྷའམ་ཁྱོད་རྣམས་སྡོད་སའི་ཡུལ་འདི་ཡི་ཨེ་མོར་པའི་ལྷ་རྣམས་ལས་དེ་རིང་བསྙེན་བཀུར་བྱེད་ཡུལ་འདེམས་ཆོག་པ་ཡིན། ང་དང་ངའི་ཁྱིམ་ལ་མཚོན་ན་ངེད་ཅག་གིས་དཀོན་མཆོག་ཡ་ཝཱེ་ལ་བསྙེན་བཀུར་བྱེད་ངེས་ཡིན་ཞེས་སྨྲས།
JOS 24:16 འབངས་རྣམས་ཀྱིས་དེའི་ལན་དུ། ང་ཚོས་དཀོན་མཆོག་ཡ་ཝཱེ་བསྐྱུར་ནས་ལྷ་གཞན་ལ་བསྙེན་བཀུར་བྱེད་པ་ནི་གཏན་ནས་མི་སྲིད།
JOS 24:17 ཅི་ལ་ཟེར་ན། བདག་ཅག་གི་དཀོན་མཆོག་ཡ་ཝཱེས་སྔར་ང་ཚོ་དང་ང་ཚོའི་མེས་པོ་རྣམས་བྲན་དུ་བཀོལ་བའི་ཨེ་ཅིབ་ཡུལ་ནས་ཕྱིར་ཁྲིད་འོངས་ཤིང་། ང་ཚོའི་མིག་སྔར་གྲུབ་རྟགས་ཆེན་པོ་དེ་རྣམས་མཛད་པ་དང་། བདག་ཅག་འགྲིམ་པའི་ལམ་རྣམས་དང་བརྒྱུད་པའི་རྒྱལ་ཁམས་ཐམས་ཅད་ནས་ང་ཚོ་སྲུང་བར་མཛད་དོ། །
JOS 24:18 ཡང་དཀོན་མཆོག་ཡ་ཝཱེས་ཡུལ་འདིར་གནས་པའི་ཨེ་མོར་པ་ཐམས་ཅད་ང་ཚོའི་སྔུན་ནས་ཕྱིར་བསྐྲད། དེའི་ཕྱིར། དཀོན་མཆོག་ཡ་ཝཱེ་ནི་ང་ཚོའི་དཀོན་མཆོག་ལགས་པས་ང་ཚོས་ཁོང་ལ་བསྙེན་བཀུར་བྱེད་ངེས་ཡིན་ཞེས་སྨྲས།
JOS 24:19 ཡོ་ཤུ་ཨ་ཡིས་འབངས་རྣམས་ལ། ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་བསྙེན་བཀུར་བྱེད་མི་ནུས་ཏེ། ཅི་ལ་ཟེར་ན། ཁོང་ནི་དཀོན་མཆོག་དམ་པ་དང་ཕྲག་དོག་ཅན་ལགས་པས། ཁྱོད་རྣམས་ཀྱི་ཉེས་སྐྱོན་དང་སྡིག་པ་རྣམས་སེལ་བར་མི་འགྱུར།
JOS 24:20 གལ་ཏེ་ཁྱོད་རྣམས་ཀྱིས་དཀོན་མཆོག་ཡ་ཝཱེ་བསྐྱུར་ནས་ཕྱི་རོལ་པའི་ལྷ་རྣམས་ལ་བསྙེན་བཀུར་བྱས་ན། དཀོན་མཆོག་ཡ་ཝཱེས་བྱིན་རླབས་གནང་རྗེས་ཕྱིར་ཁྱོད་རྣམས་ལ་བགེགས་བར་ཆད་མཛད་དེ་ཁྱོད་ཚོ་རྩ་མེད་དུ་གཏོང་ངེས་ཡིན་ཞེས་སྨྲས།
JOS 24:21 འབངས་རྣམས་ཀྱིས་ཡོ་ཤུ་ཨ་ལ་དེའི་ལན་དུ། དེ་ལྟར་མི་བྱ་སྟེ་ངེད་རྣམས་ཀྱིས་དཀོན་མཆོག་ཡ་ཝཱེ་ལ་བསྙེན་བཀུར་འབུལ་ངེས་ཡིན་ཞེས་སྨྲས།
JOS 24:22 ཡོ་ཤུ་ཨ་ཡིས་འབངས་རྣམས་ལ། ཁྱོད་རྣམས་ཀྱིས་དཀོན་མཆོག་ཡ་ཝཱེ་བདམས་ནས་ཁོང་ལ་བསྙེན་བཀུར་བྱེད་རྒྱུ་ཡིན་པས། ཁྱོད་ཚོ་རང་གིས་བདེན་དཔང་བྱོས་ཤིག་ཅེས་སྨྲས་པ་ལ། ཁོ་རྣམས་ན་རེ། ང་ཚོ་བདེན་དཔང་བྱེད་པར་འཐད་པ་ཡིན་ཞེས་སྨྲས།
JOS 24:23 ཡོ་ཤུ་ཨ་ན་རེ། ཁྱོད་ཚོས་ད་ལྟ་ཁྱོད་རྣམས་ཁྲོད་ཀྱི་ཕྱི་རོལ་པའི་ལྷ་རྣམས་སྤངས་ནས། བློ་སེམས་རྩེ་གཅིག་གིས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱོགས་སུ་འཁོར་དགོས་ཞེས་སྨྲས།
JOS 24:24 འབངས་རྣམས་ཀྱིས་ཡོ་ཤུ་ཨ་ལ་དེའི་ལན་དུ། ངེད་རྣམས་ཀྱིས་ང་ཚོའི་དཀོན་མཆོག་ཡ་ཝཱེ་ལ་བསྙེན་བཀུར་ཕུལ་ནས་ཁོང་གི་བཀའ་ལ་མཉན་ངེས་ཡིན་ཞེས་སྨྲས།
JOS 24:25 ཉིན་མོ་དེར་ཡོ་ཤུ་ཨ་ཡིས་འབངས་རྣམས་དང་ཞལ་ཆད་བཞག་ནས། སི་ཀེམ་དུ་ཁོ་རྣམས་ཀྱི་ཕྱིར་སྒྲིག་ཁྲིམས་དང་སྲོལ་ཡིག་བཙུགས།
JOS 24:26 ཡོ་ཤུ་ཨ་ཡིས་བཀའ་དེ་ཐམས་ཅད་དཀོན་མཆོག་གི་བཀའ་ཁྲིམས་ཀྱི་མདོ་རུ་བཀོད་ཅིང་། ཡང་རྡོ་ཆེན་པོ་ཞིག་དཀོན་མཆོག་ཡ་ཝཱེའི་གནས་དམ་པའི་འགྲམ་དུ་བེ་ཤིང་གི་འོག་ཏུ་བསླངས།
JOS 24:27 ཡོ་ཤུ་ཨ་ཡིས་འབངས་རྣམས་ལ། ལྟོས་དང་། རྡོ་འདིས་དཀོན་མཆོག་ཡ་ཝཱེས་ངེད་རྣམས་ལ་བསྒོས་པའི་བཀའ་ཅི་གསུངས་ཐམས་ཅད་ཐོས་པས་ངེད་ཅག་ལ་བདེན་དཔང་བྱེད་ཐུབ་པ་སྟེ། ཁྱོད་རྣམས་ཀྱིས་ཡ་ཝཱེ་ཁྱོད་ཅག་གི་དཀོན་མཆོག་ལ་རྒྱབ་འགལ་མི་བྱེད་པའི་ཆེད་དུ་རྡོ་འདིས་ཁྱོད་རྣམས་ལ་དྲན་སྐུལ་བྱེད་པར་འགྱུར་རོ་ཞེས་སྨྲས་སོ། །
JOS 24:28 དེ་ནས་ཡོ་ཤུ་ཨ་ཡིས་འབངས་མི་རྣམས་རང་རང་གི་ས་སྐལ་དུ་མངགས་སོ། །
JOS 24:29 དོན་དེ་རྣམས་ཀྱི་རྗེས་སུ། དཀོན་མཆོག་ཡ་ཝཱེའི་ཞབས་ཕྱི་ནུན་གྱི་བུ་ཡོ་ཤུ་ཨ་དགུང་ལོ་བརྒྱ་དང་བཅུ་ལོན་ནས་ཚེ་ལས་འདས་པ་དང་།
JOS 24:30 ཡེས་ར་ཨེལ་པས་ཁོང་ནི་ཁོང་གི་ས་སྐལ་གྱི་མངའ་ཁོངས་སུ། གཱ་ཨ་སི་རི་བོའི་བྱང་ཕྱོགས་སུ་ཨེ་ཕཱར་ཡིམ་རི་ཁུལ་གྱི་ཐིམ་ནད་སེ་ར་རུ་དུར་ལ་སྦས།
JOS 24:31 ཡོ་ཤུ་ཨ་གསོན་པའི་དུས་ཐམས་ཅད་དང་ཁོང་ཚེ་ལས་འདས་པའི་རྗེས་སུ། དཀོན་མཆོག་ཡ་ཝཱེས་ཡེས་ར་ཨེལ་པའི་ཕྱིར་དོན་ཅི་རྣམས་མཛད་པ་ཤེས་པའི་རྒན་པོ་རྣམས་ད་དུང་གནས་པའི་དུས་སྐབས་ཡོངས་སུ། ཡེས་ར་ཨེལ་པས་དཀོན་མཆོག་ཡ་ཝཱེ་ལ་བསྙེན་བཀུར་བྱས་སོ། །
JOS 24:32 ཡེས་ར་ཨེལ་པ་རྣམས་ཀྱིས་ཨེ་ཅིབ་ཡུལ་ནས་ཁྱེར་འོངས་པའི་ཡོ་སེབ་ཀྱི་ཀེང་རུས་ནི། སི་ཀེམ་སྟེ་སྔར་ཡ་ཀོབ་ཀྱིས་སི་ཀེམ་གྱི་ཕ་ཧ་མོར་གྱི་བུ་རྒྱུད་རྣམས་ལས་དངུལ་སྲང་བརྒྱ་ཡིས་ཉོས་པའི་ས་དེར་དུར་ལ་སྦས་པ་དང་། དེ་ཡོ་སེབ་ཀྱི་བུ་རྒྱུད་རྣམས་ཀྱི་ས་སྐལ་དུ་གྱུར་ཏོ། །
JOS 24:33 ཨ་རོན་གྱི་བུ་ཨེ་ལི་ཨ་ཟར་ཡང་ཚེ་ལས་འདས་ནས། ཁོའི་བུ་ཕི་ནེ་ཧེ་ལ་ཨེ་ཕཱར་ཡིམ་རི་ཁུལ་དུ་ཐོབ་པའི་རི་མགོར་དུར་དུ་སྦས་སོ།། །།
JDG 1:1 ཡོ་ཤུ་ཨ་ཚེ་ལས་འདས་རྗེས། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འདི་ལྟར་ཞུས་པ་སྟེ། ངེད་རྣམས་ལས་སུ་ཞིག་སྔོན་ལ་ཡར་སོང་སྟེ་ཀ་ན་ཨན་པ་རྣམས་ལ་རྒོལ་ནས་ཁོ་ཚོ་དང་འཐབ་འཛིང་བྱེད་འོས་སམ་ཞེས་པ་ལ།
JDG 1:2 དཀོན་མཆོག་ཡ་ཝཱེས་འདི་སྐད་དུ། ཡ་ཧུ་དཱ་སྔོན་ལ་ཡར་འགྲོ་འོས་ཏེ། ལྟོས་དང་། བདག་གིས་ཡུལ་དེ་ཁོའི་ལག་ཏུ་སྤྲད་ཟིན་ཞེས་གསུངས།
JDG 1:3 ཡ་ཧུ་དཱ་ཡིས་རང་གི་ཕུ་བོ་སི་མུ་ཨོན་ལ། ཀ་ན་ཨན་པ་རྣམས་དང་འཐབ་འཛིང་བྱེད་པའི་ཕྱིར་ཁྱེད་རང་ང་དང་མཉམ་དུ་ངས་རྒྱན་བླངས་ནས་ཐོབ་པའི་ཡུལ་དེར་འགྲོ་རོགས་ཞུ། རྗེས་སུ་ང་རང་ཡང་ཁྱེད་དང་མཉམ་དུ་ཁྱེད་ཀྱིས་རྒྱན་བླངས་ནས་ཐོབ་པའི་ཡུལ་དེར་འགྲོ་བར་བྱ་ཞེས་སྨྲས་པ་ལ། སི་མུ་ཨོན་ཁོ་དང་མཉམ་དུ་ཕྱིན་ཏོ། །
JDG 1:4 དེར་ཡ་ཧུ་དཱ་ཡར་ཕྱིན་པ་དང་དཀོན་མཆོག་ཡ་ཝཱེས་ཀ་ན་ཨན་པ་དང་ཕེ་རེ་ཟི་པ་རྣམས་ཁོ་ཚོའི་ལག་ཏུ་སྤྲད་ཅིང་། ཁོ་ཚོས་པེ་ཟེག་ཏུ་མི་ཁྲི་གཅིག་བསད།
JDG 1:5 ཡང་དེར་ཨ་དོ་ནི་པེ་ཟེག་ལ་ཕྲད་དེ་ཁོ་དང་འཐབ་ནས་ཀ་ན་ཨན་པ་དང་ཕེ་རེ་ཟི་པ་རྣམས་ཕམ་པར་བརྒྱབ།
JDG 1:6 ཨ་དོ་ནི་པེ་ཟེག་བྲོས་པ་དང་། ཁོ་ཚོས་དེའི་རྗེས་དེད་ནས་བཟུང་ཞིང་རྐང་ལག་གཉིས་ཀའི་མཐེ་བོང་བཅད།
JDG 1:7 ཨ་དོ་ནི་པེ་ཟེག་གིས། སྔར་རྒྱལ་པོ་བདུན་ཅུ་ཡོད་ཅིང་དེ་དག་གི་རྐང་ལག་གཉིས་ཀའི་མཐེ་བོང་རྣམས་བཅད་པ་དང་། ངའི་གསོལ་ལྕོག་གི་འོག་ཏུ་ཁ་ཟས་ཙག་ཙིག་འཐུ་བ་ཡིན། ད་ནི་དཀོན་མཆོག་གིས་ངས་ཅི་ཞིག་བྱས་པ་བཞིན་དུ་ང་ལ་ལན་གནང་བྱུང་ཞེས་སྨྲས། དེ་ནས་ཁོ་ཚོས་ཨ་དོ་ནི་པེ་ཟེག་ཁོ་རང་ཡེ་རུ་སཱ་ལེམ་དུ་ཁྲིད་པ་དང་ཁོ་དེ་རུ་ཤིའོ། །
JDG 1:8 ཡ་ཧུ་དཱ་པ་རྣམས་ཀྱིས་ཡེ་རུ་སཱ་ལེམ་ལ་དམག་བརྒྱབ་ནས་གྲོང་ཁྱེར་བླངས་པ་དང་། གྲོང་ཁྱེར་ནང་གི་མི་རྣམས་ལ་རལ་གྲིས་བརྒྱབ་པར་མ་ཟད་གྲོང་ཁྱེར་མེར་བསྲེགས།
JDG 1:9 དེ་ནས་ཡ་ཧུ་དཱ་པ་རྣམས་མར་སོང་སྟེ་རི་ཁུལ་དང་ནེ་གུབ་ཡུལ། རི་ཀླུང་བཅས་སུ་གནས་པའི་ཀ་ན་ཨན་པ་རྣམས་དང་འཐབ་འཛིང་བྱས།
JDG 1:10 ཡ་ཧུ་དཱ་པ་རྣམས་སོང་ནས་ཧེབ་རོན་དུ་གནས་པའི་ཀ་ན་ཨན་པ་རྣམས་ལ་རྒོལ་ཞིང་། ཤེ་ཤཱ་ཨི་དང་ཨ་ཧི་མན། ཐལ་མ་ཨི་བཅས་ཕམ་པར་བརྒྱབ། ཧེབ་རོན་ལ་སྔོན་ཆད་ཀིར་ཡཱད་ཨར་པཱ་ཞེས་བྱའོ། །
JDG 1:11 ཁོ་ཚོ་དེ་ནས་སོང་སྟེ་དི་བིར་དུ་གནས་པ་རྣམས་ལ་ཕར་རྒོལ་བྱས། དི་བིར་ལ་སྔར་ཀིར་ཡཱད་སེ་ཕེར་ཞེས་འབོད་པ་ཡིན།
JDG 1:12 ཀཱ་ལེབ་ཀྱིས། སུ་ཞིག་གིས་ཀིར་ཡཱད་སེ་ཕེར་ལ་དམག་བརྒྱབ་ནས་གྲོང་ཁྱེར་འཕྲོག་ནུས་ན། ངས་རང་གི་བུ་མོ་ཨག་ས་དེའི་ཆུང་མར་སྟེར་བར་བྱ་ཞེས་སྨྲས།
JDG 1:13 ཀཱ་ལེབ་ཀྱི་ནུ་བོ་སྟེ་ཀེ་ན༌ཟཱ་ཡི་བུ་ཨོད་ནི་ཨེལ་གྱིས་གྲོང་ཁྱེར་དེ་ཕྲོགས་པས། ཀཱ་ལེབ་ཀྱིས་བུ་མོ་ཨག་ས་དེར་ཆུང་མར་བྱིན།
JDG 1:14 ཨག་ས་བག་མར་གཏོང་བའི་སྐབས་སུ། སྐྱེས་པར་ཁོ་མོའི་ཕ་ལས་ཞིང་ས་ཞིག་སློང་དགོས་པར་བསྐུལ་ཞིང་། ཨག་ས་བོང་བུ་ནས་བབས་མ་ཐག་ཀཱ་ལེབ་ཀྱིས་ཁོ་མོར། ཁྱོད་ལ་ཅི་ཞིག་དགོས་སམ་ཞེས་དྲིས་པ་ལ།
JDG 1:15 ཁོ་མོས། ཁྱེད་ཀྱིས་ང་ལ་བྱིན་རླབས་གནང་བར་མཛོད། ཁྱེད་ཀྱིས་ང་རང་ནེ་གུབ་ཡུལ་དུ་བཀོད་སྒྲིག་མཛད་པས་ང་ལ་ཆུ་མིག་རྣམས་ཀྱང་གནང་རོགས་ཞུ་ཞེས་ཞུས་པ་དང་། ཀཱ་ལེབ་ཀྱིས་སྟོད་སྨད་གཉིས་ཀྱི་ཆུ་མིག་རྣམས་ཁོ་མོར་གནང་ངོ་། །
JDG 1:16 མོ་ཤེའི་སྒྱུག་པོ་ནི་ཀེ་ནེ་པ་ཡིན་ཞིང་། ཁོའི་བུ་རྒྱུད་རྣམས་ཡ་ཧུ་དཱ་པ་རྣམས་དང་མཉམ་དུ་ཤིང་ཏ་ལའི་གྲོང་ཁྱེར་དང་བྲལ་ནས་ཨ་རད་དང་ཉེ་བའི་ནེ་གུབ་ཡུལ་གྱི་ཡ་ཧུ་དཱའི་དབེན་སྟོང་དུ་སོང་སྟེ་དམངས་ཁྲོད་དུ་བསྡད།
JDG 1:17 ཡ་ཧུ་དཱ་དང་ཁོའི་ཕུ་བོ་སི་མུ་ཨོན་གཉིས་ཀ་མཉམ་དུ་སོང་ནས། ཚེ་པད་དུ་གནས་པའི་ཀ་ན་ཨན་པ་རྣམས་བསད་ཅིང་། གྲོང་ཁྱེར་མེད་པར་བཟོས་པ་དང་། གྲོང་ཁྱེར་དེའི་མིང་ལ་ཧོར་མཱ་ ཞེས་བྱའོ། །
JDG 1:18 ཡ་ཧུ་དཱས་གཱ་ཟཱ་དང་དེའི་མངའ་ཁོངས། ཨ་ཤཱ་ཀེ་ལོན་དང་དེའི་མངའ་ཁོངས། ཨེག་རོན་དང་དེའི་མངའ་ཁོངས་བཅས་ཀྱང་བླངས།
JDG 1:19 དཀོན་མཆོག་ཡ་ཝཱེ་ནི་ཡ་ཧུ་དཱ་དང་མཉམ་དུ་བཞུགས་པས། ཡ་ཧུ་དཱས་རི་ཁུལ་གྱི་མི་རྣམས་ཕར་བསྐྲད་མོད། ཐང་གི་མི་རྣམས་ལ་ལྕགས་ཀྱི་ཤིང་རྟ་ཡོད་པས་དེ་རྣམས་ཕར་སྐྲོད་མ་ནུས་སོ། །
JDG 1:20 ཡ་ཧུ་དཱ་པ་རྣམས་ཀྱིས་མོ་ཤེས་ཇི་ལྟར་གསུངས་པ་ནང་བཞིན་ཧེབ་རོན་ཡུལ་ནི་ཀཱ་ལེབ་ལ་སྤྲད་པ་དང་། ཀཱ་ལེབ་ཀྱིས་དེ་ནས་ཨ་ནག་གི་རིགས་རྒྱུད་གསུམ་ཕར་བསྐྲད།
JDG 1:21 པེན་ཡཱ་མེན་གྱི་མི་རྣམས་ཀྱིས་ཡེ་རུ་སཱ་ལེམ་དུ་གནས་པའི་ཡེ་བུ་སི་པ་རྣམས་ཕར་མ་བསྐྲད་ཅིང་། ད་ལྟའི་བར་དུ་ཡེ་བུ་སི་པ་རྣམས་སྔར་བཞིན་ཡེ་རུ་སཱ་ལེམ་དུ་པེན་ཡཱ་མེན་གྱི་མི་རྣམས་དང་མཉམ་དུ་གནས་སོ། །
JDG 1:22 ཡོ་སེབ་ཀྱི་ཁྱིམ་རྒྱུད་ཡར་སོང་སྟེ་པེད་ཨེལ་ལ་རྒོལ་ཞིང་། དཀོན་མཆོག་ཡ་ཝཱེ་ཁོ་རྣམས་དང་མཉམ་དུ་བཞུགས་སོ། །
JDG 1:23 ཡོ་སེབ་ཁྱིམ་རྒྱུད་ཀྱིས་མི་མངགས་ཏེ་པེད་ཨེལ་ལ་ལྐོག་ཞིབ་བྱེད་དུ་ཕྱིན་པ་དང་། སྔར་གྲོང་ཁྱེར་དེའི་མིང་ལ་ལོ་ཟི་ཞེས་བྱ།
JDG 1:24 ལྟ་ཉུལ་པ་རྣམས་ཀྱིས་མི་ཞིག་གྲོང་ཁྱེར་ནས་ཕྱིར་ཐོན་འོང་བ་མཐོང་སྟེ་མི་དེ་ལ། ཁྱོད་ཀྱིས་གྲོང་ཁྱེར་ནང་དུ་འགྲོ་བའི་ལམ་སྟོན་དང་ངེད་རྣམས་ཀྱིས་ཁྱོད་རང་དྲིན་གྱིས་སྐྱོང་བར་བྱ་ཞེས་སྨྲས་པ་ལ།
JDG 1:25 མི་དེས་གྲོང་ཁྱེར་ནང་དུ་འགྲོ་བའི་ལམ་ཁོ་རྣམས་ལ་བསྟན་ཅིང་། ཁོ་ཚོས་གྲོང་ཁྱེར་ནང་གི་མི་རྣམས་ལ་རལ་གྲིས་བརྒྱབ་མོད། འོན་ཀྱང་མི་དེ་དང་དེའི་ཁྱིམ་མི་ཚང་མ་བཏང་ངོ་། །
JDG 1:26 མི་དེ་ཧེད་པའི་ཡུལ་དུ་ཕྱིན་ཅིང་གྲོང་ཁྱེར་ཞིག་བརྩིགས་ནས་མིང་ལ་ལོ་ཟི་ཞེས་བཏགས་པ་དང་། གྲོང་ཁྱེར་དེའི་མིང་ལ་ད་ལྟའང་དེ་སྐད་འབོད་དོ། །
JDG 1:27 མཱ་ན་ཤེ་ཡིས་པེད་ཤེ་ཨན་དང་དེའི་གྲོང་རྡལ་ལ་གཏོགས་པའི་མི་རྣམས་དང་། ཐ་ཨ་ནག་དང་དེའི་གྲོང་རྡལ་ལ་གཏོགས་པའི་མི་རྣམས། དཱོར་དང་དེའི་གྲོང་རྡལ་ལ་གཏོགས་པའི་མི་རྣམས། ཡིབ་ལེ་ཨམ་དང་དེའི་གྲོང་རྡལ་ལ་གཏོགས་པའི་མི་རྣམས། མེ་གིད་དོ་དང་དེའི་གྲོང་རྡལ་ལ་གཏོགས་པའི་མི་རྣམས་བཅས་ཕར་མ་བསྐྲད་མོད། འོན་ཀྱང་ཀ་ན་ཨན་པ་རྣམས་ཨུ་ཚུགས་ཀྱིས་ཡུལ་དེ་དག་ཏུ་བསྡད།
JDG 1:28 དེ་ལྟར་ཡེས་ར་ཨེལ་སྟོབས་འབྱོར་ལྡན་པར་གྱུར་པའི་ཚེ། ཀ་ན་ཨན་པ་རྣམས་སྡུག་ལས་སུ་སྦྱར་ནའང་དེ་དག་ཡོངས་སུ་མ་བསྐྲད་དོ། །
JDG 1:29 ཨེ་ཕཱར་ཡིམ་གྱིས་གེ་ཟེར་དུ་གནས་པའི་ཀ་ན་ཨན་པ་རྣམས་ཕྱིར་མ་བསྐྲད་པས། ཀ་ན་ཨན་པ་རྣམས་སྔར་བཞིན་ཨེ་ཕཱར་ཡིམ་གྱི་ཁྲོད་དུ་གེ་ཟེར་དུ་གནས་སོ། །
JDG 1:30 ཟེ་བུ་ལུན་གྱིས་ཀིད་རོན་གྱི་མི་རྣམས་དང་ན་ཧ་ལོལ་གྱི་མི་རྣམས་ཕྱིར་མ་བསྐྲད་པས། ཀ་ན་ཨན་པ་རྣམས་སྔར་བཞིན་ཟེ་བུ་ལུན་གྱི་ཁྲོད་དུ་གནས་ཤིང་སྡུག་ལས་བྱེད་མཁན་དུ་གྱུར་ཏོ། །
JDG 1:31 ཨ་ཤེར་གྱིས་ཨག་ཀོ་དང་ཚི་ཏུན་གྱི་མི་རྣམས་དང་། ཨག་ལབ་དང་ཨག་སིབ་ཀྱི་མི་རྣམས། ཧེལ་པཱ་དང་ཨ་པིག རེ་ཧོབ་བཅས་ཀྱི་མི་རྣམས་ཕྱིར་མ་བསྐྲད་པ་དང་།
JDG 1:32 དེ་ནས་ཨ་ཤེར་པ་རྣམས་ཀྱིས་ཡུལ་དེའི་ཀ་ན་ཨན་པ་རྣམས་ཕྱིར་མ་བསྐྲད་པས་ཁོ་རྣམས་ཀྱི་ཁྲོད་དུ་གནས་སོ། །
JDG 1:33 ནཱབ་ཐ་ལི་ཡིས་པེད་ཤེ་མེ་སི་དང་པེད་ཨ་ནད་ཀྱི་མི་རྣམས་ཕྱིར་མ་བསྐྲད་པས། ནཱབ་ཐ་ལི་ཡུལ་དེའི་ཀ་ན་ཨན་པ་རྣམས་ཀྱི་ཁྲོད་དུ་གནས། འོན་ཀྱང་པེད་ཤེ་མེ་སི་དང་པེད་ཨ་ནད་ཀྱི་མི་རྣམས་ཁོ་ཚོར་སྡུག་ལས་བྱེད་མཁན་དུ་གྱུར་ཏོ། །
JDG 1:34 ཨེ་མོར་པ་རྣམས་ཀྱིས་དཱན་གྱི་མི་རྣམས་བཙན་གྱིས་རི་ཁུལ་དུ་དེད་ནས་ཁོ་ཚོ་ཐང་བདེ་ལ་འོང་དུ་མ་བཅུག
JDG 1:35 ཨེ་མོར་པ་རྣམས་ཨུ་ཚུགས་ཀྱིས་ཧེ་རེ་སི་རི་དང་ཨ་ཡཱ་ལོན། ཤཱ་ཨལ་པིམ་བཅས་སུ་བསྡད་མོད། འོན་ཀྱང་ཡོ་སེབ་ཀྱི་བུ་རྒྱུད་ནི་ཁོ་རྣམས་ལས་རྒྱལ་བས་ཁོ་རྣམས་སྡུག་ལས་བྱེད་མཁན་དུ་གྱུར་ཏོ། །
JDG 1:36 ཨེ་མོར་པ་རྣམས་ཀྱི་ས་མཚམས་ནི་ཨག་རབ་པིམ་དང་སེ་ལཱ་ནས་གོང་དུ་ཕྱིན་ཏོ། །
JDG 2:1 དཀོན་མཆོག་ཡ་ཝཱེའི་ཕོ་ཉ་ནི་གིལ་གལ་ནས་ཡར་པོ་ཀིམ་དུ་སླེབས་ཤིང་ཡེས་ར་ཨེལ་པ་རྣམས་ལ། བདག་གིས་ཁྱོད་རྣམས་ཨེ་ཅིབ་ཡུལ་ནས་ཁྲིད་དེ་ཁྱོད་ཅག་གི་མེས་པོ་རྣམས་ལ་མནའ་བསྐྱལ་ནས་ཞལ་བཞེས་གནང་བའི་ཡུལ་འདིར་འོངས་པ་ཡིན། ཡང་ངས་ཁྱོད་རྣམས་དང་བཞག་པའི་ཞལ་ཆད་ནི་ནམ་ཡིན་ཡང་འདོར་བར་མི་བྱ་ཞིང་།
JDG 2:2 ཁྱོད་རྣམས་ཀྱིས་ཀྱང་ཡུལ་འདིའི་མི་རྣམས་དང་ཁ་ཆད་བཞག་མི་ཆོག་ལ། ཁོ་ཚོའི་མཆོད་ཁྲི་བཤིག་དགོས་ཞེས་གསུངས་ནའང་། ཁྱོད་ཚོས་ངའི་བཀའ་ལ་མ་མཉན་པར་འདི་ལྟར་བྱེད་དོན་ཅི་ཡིན་ནམ།
JDG 2:3 དེའི་ཕྱིར་ངས་ཡང་ཁྱོད་ཅག་ལ། བདག་གིས་ཁོ་ཚོ་ནི་ཁྱོད་རྣམས་ཀྱི་མདུན་ནས་ཕྱིར་སྐྲོད་པར་མི་བྱ་སྟེ། ཁོ་ཚོ་ནི་ཁྱོད་རྣམས་ཀྱི་རྩིབ་འོག་གི་ཚེར་མ་ལྟ་བུར་འགྱུར་ངེས་ཤིང་། ཁོ་ཚོའི་ལྷ་རྣམས་ནི་ཁྱོད་ཅག་གི་རྙི་རྒྱ་རུ་འགྱུར་ངེས་ཞེས་སྨྲའོ་ཞེས་གསུངས།
JDG 2:4 དཀོན་མཆོག་ཡ་ཝཱེའི་ཕོ་ཉས་ཡེས་ར་ཨེལ་པ་ཐམས་ཅད་ལ་འདི་ལྟར་སྨྲ་བའི་སྐབས་སུ། འབངས་རྣམས་སྐད་ཆེན་པོས་ངུས་སོ། །
JDG 2:5 དེ་ནས་ཁོ་ཚོས་ཡུལ་དེའི་མིང་ལ་པོ་ཀིམ་ཞེས་བཏགས་པ་དང་། མི་རྣམས་ཀྱིས་གནས་དེར་དཀོན་མཆོག་ཡ་ཝཱེ་ལ་མཆོད་པ་ཕུལ་ཏོ། །
JDG 2:6 ཡོ་ཤུ་ཨ་ཡིས་ཡེས་ར་ཨེལ་གྱི་འབངས་རྣམས་མངགས་པ་དང་། ཁོ་ཚོ་རང་རང་གི་ས་སྐལ་དུ་སོང་ནས་ས་བཟུང་བའོ། །
JDG 2:7 ཡོ་ཤུ་ཨ་གསོན་པའི་དུས་ཀུན་དང་ཡོ་ཤུ་ཨ་ཚེ་ལས་འདས་རྗེས། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་དོན་དུ་མཛད་པའི་དོན་ཆེན་ཐམས་ཅད་མཇལ་བའི་རྒན་པོ་རྣམས་ད་དུང་ཡོད་པའི་དུས་ཡོངས་སུ། འབངས་རྣམས་ཀྱིས་དཀོན་མཆོག་ཡ་ཝཱེ་ལ་བསྙེན་བཀུར་ཞུས་སོ། །
JDG 2:8 དཀོན་མཆོག་ཡ་ཝཱེའི་ཞབས་ཕྱི་སྟེ་ནུན་གྱི་བུ་ཡོ་ཤུ་ཨ་དགུང་ལོ་བརྒྱ་དང་བཅུ་རུ་སོན་ནས་ཚེ་ལས་འདས་པ་དང་།
JDG 2:9 ཡེས་ར་ཨེལ་པས་ཁོང་ནི་ཁོང་གི་ས་སྐལ་གྱི་མངའ་ཁོངས་ཏེ། གཱ་ཨ་སི་རི་བོའི་བྱང་ཕྱོགས་སུ་ཨེ་ཕཱར་ཡིམ་རི་ཁུལ་གྱི་ཐིམ་ནད་ཧེ་རེ་སི་རུ་དུར་ལ་སྦས།
JDG 2:10 དུས་རབས་དེའི་མི་ཐམས་ཅད་ཀྱང་རང་རང་གི་མེས་པོ་རྣམས་ཀྱི་དྲུང་དུ་འཛོམས་པ་དང་། རྗེས་སུ་དུས་རབས་གསར་པའི་མི་རྣམས་བྱུང་ཞིང་དེ་དག་གིས་དཀོན་མཆོག་ཡ་ཝཱེ་མི་ཤེས་ལ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་ཕྱིར་མཛད་པའི་དོན་རྣམས་ཀྱང་མི་ཤེས་སོ། །
JDG 2:11 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། པཱ་ཨལ་རྣམས་ལ་བསྙེན་བཀུར་བྱས་པ་དང་།
JDG 2:12 ཁོ་ཚོ་ཨེ་ཅིབ་ཡུལ་ནས་ཕྱིར་ཁྲིད་མཁན་ཡ་ཝཱེ་སྟེ་ཁོ་ཚོའི་མེས་པོ་རྣམས་ཀྱི་དཀོན་མཆོག་བསྐྱུར་ཏེ། ལྷ་གཞན་པ་སྟེ་ཉེ་འཁོར་གྱི་མི་སྡེ་དག་གི་ལྷ་རྣམས་ལ་ཕྱག་བཙལ་ནས་དཀོན་མཆོག་ཡ་ཝཱེའི་ཐུགས་སེམས་དཀྲུགས་པར་མ་ཟད།
JDG 2:13 དཀོན་མཆོག་ཡ་ཝཱེ་བསྐྱུར་ནས་པཱ་ཨལ་དང་ཨ་ཤཱ་ཏ་རོད་ལ་བསྙེན་བཀུར་བྱས་སོ། །
JDG 2:14 དཀོན་མཆོག་ཡ་ཝཱེ་ཡེས་ར་ཨེལ་པ་རྣམས་ལ་ཐུགས་ཁྲོས་ནས། ཁོ་རྣམས་འཕྲོག་བཅོམ་བྱེད་མཁན་གྱི་ལག་ཏུ་སྤྲད་ནས་དེ་དག་གིས་ཁོ་རྣམས་ལ་འཕྲོག་བཅོམ་བྱས་པ་དང་། ཡང་ཁོ་རྣམས་མཐའ་འཁོར་གྱི་དགྲ་ཟླའི་ལག་ཏུ་སྤྲད་ཅིང་། ཐ་ན་དེ་རྣམས་དགྲ་བོའི་མདུན་དུ་ཚུགས་མ་ཐུབ་བོ། །
JDG 2:15 ཁོ་རྣམས་གང་དུ་སོང་ནའང་དཀོན་མཆོག་ཡ་ཝཱེས་བཀའ་ཇི་ལྟར་གསུངས་པ་དང་ཡང་ཁོང་གིས་ཁོ་རྣམས་ལ་ཇི་ལྟར་མནའ་བཞེས་པ་བཞིན་དུ། བགེགས་བར་ཆད་ཀྱིས་ཁོ་རྣམས་ལ་རྒོལ་བས། ཁོ་ཚོས་དཀའ་སྡུག་ཆེན་པོ་མྱངས།
JDG 2:16 དཀོན་མཆོག་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་རྣམས་བསྐོས་ཤིང་། ཁྲིམས་དཔོན་གྱིས་ཁོ་རྣམས་འཕྲོག་བཅོམ་བྱེད་མཁན་གྱི་ལག་ནས་ཐར་བར་བྱས།
JDG 2:17 ཡིན་ནའང་ཁོ་ཚོས་ཁྲིམས་དཔོན་གྱི་བཀའ་ལ་མི་ཉན་པར་ལྷ་གཞན་གྱི་རྗེས་སུ་འབྲངས་ཏེ་དེར་ཕྱག་བཙལ་ནས་ལོག་གཡེམ་བྱས་པ་དང་། མྱུར་བ་མྱུར་དུ་ཁོ་ཚོའི་མེས་པོ་རྣམས་འགྲིམས་པའི་ལམ་དང་བྲལ་ཏེ། ཁོ་ཚོའི་མེས་པོ་རྣམས་ཀྱིས་དཀོན་མཆོག་ཡ་ཝཱེའི་བཀའ་བརྩི་སྲུང་བྱེད་པ་བཞིན་དུ་མ་ཡིན་ནོ། །
JDG 2:18 དཀོན་མཆོག་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་བསྐོས་ཤིང་དེ་རྣམས་དང་མཉམ་དུ་བཞུགས། ཁྲིམས་དཔོན་རྣམས་འཚོ་བཞུགས་ཡོད་པའི་སྐབས་སུ་དཀོན་མཆོག་ཡ་ཝཱེས་ཁོ་རྣམས་དགྲ་བོའི་ལག་ནས་ཐར་བར་མཛད་པ་སྟེ། ཅི་ལ་ཞེ་ན། ཁོ་རྣམས་ཀྱིས་མནར་གཅོད་དང་གནོད་འཚེ་འོག་ཏུ་སྨྲེ་སྔགས་བཏོན་པས་དཀོན་མཆོག་ཡ་ཝཱེའི་ཐུགས་ལ་སྙིང་རྗེ་འཁྲུངས་པའོ། །
JDG 2:19 དེ་ནས་ཁྲིམས་དཔོན་ཚེ་ལས་འདས་རྗེས་ཁོ་རྣམས་བློ་ཁ་འགྱུར་ནས་ངན་པའི་ལས་བྱས་ཤིང་ཁོ་ཚོའི་མེས་པོ་རྣམས་ལས་ཀྱང་ཐུ་སྟེ། ལྷ་གཞན་རྣམས་ལ་བསྙེན་བཀུར་བྱས་ནས་ཕྱག་བཙལ་ཞིང་། ཨུ་ཚུགས་ཀྱི་སྤྱོད་ཚུལ་ངན་པ་ནམ་ཡང་རྒྱུན་མ་ཆད་དོ། །
JDG 2:20 དེ་ནས་དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ནས་འདི་སྐད་དུ། མི་རིགས་འདིས་བདག་གིས་ཁོ་ཚོའི་མེས་པོ་རྣམས་ལ་བསྲུང་བར་བསྒོས་པའི་ཞལ་ཆད་དང་འགལ་ཞིང་ངའི་བཀའ་ལ་མི་ཉན་པས།
JDG 2:21 ཡོ་ཤུ་ཨ་ཚེ་ལས་འདས་པའི་སྐབས་སུ་ལྷག་པའི་མི་རིགས་གཞན་རྣམས་ད་ནི་བདག་གིས་ཁོ་ཚོའི་སྔུན་ནས་ཕྱིར་སྐྲོད་པར་མི་བྱ་སྟེ།
JDG 2:22 ཅི་ལ་ཞེ་ན། འདི་བརྒྱུད་ནས་ཡེས་ར་ཨེལ་པ་རྣམས་ལ་ཚོད་བགམ་བྱེད་དེ། ཁོ་རྣམས་ཀྱིས་ཁོ་ཚོའི་མེས་པོ་རྣམས་བཞིན་དུ་ངའི་བཀའ་ལ་མཉན་མིན་བལྟ་བར་བྱའོ་ཞེས་གསུངས་སོ། །
JDG 2:23 དེ་ལྟར་དཀོན་མཆོག་ཡ་ཝཱེས་མི་རིགས་དེ་རྣམས་མྱུར་བ་མྱུར་དུ་ཕྱིར་མ་བསྐྲད་པར་བསྐྱུར་ཅིང་། ཡོ་ཤུ་ཨ་ཡི་ལག་ཏུ་ཡང་མ་སྤྲད་དོ། །
JDG 3:1 དཀོན་མཆོག་ཡ་ཝཱེས་མི་རིགས་འདི་རྣམས་བསྐྱུར་བ་ནི། ཀ་ན་ཨན་པ་རྣམས་དང་འཐབ་པའི་དོན་གང་ཡང་མི་ཤེས་པའི་ཡེས་ར་ཨེལ་པ་རྣམས་ལ་ཚོད་བགམ་བྱེད་པ་དང་།
JDG 3:2 ཡེས་ར་ཨེལ་པ་རྣམས་ཀྱི་མི་རབས་ཕྱི་མ་དག་གིས་སྔར་མ་ཤེས་པའི་དམག་འཁྲུག་དེ་ཤེས་པ་དང་སློབ་པར་འཇུག་པའི་ཕྱིར་ཡིན།
JDG 3:3 ཤུལ་དུ་བསྐྱུར་བ་རྣམས་ནི་ཕེ་ལེ་ཤེད་པའི་འགོ་དཔོན་ལྔ་དང་། ཚི་ཏུན་པ་དང་ལེ་པཱ་ནོན་རི་བོར་སྡོད་པའི་ཧེ་བི་པ་རྣམས་འདུས་པའི་ཀ་ན་ཨན་པ་ཐམས་ཅད་ཡིན་ལ། པཱ་ཨལ་ཧེར་མོན་རི་བོ་ནས་ཧ་མཱད་ཀྱི་འཇུག་སྒོའི་བར་དུའོ། །
JDG 3:4 མི་རིགས་འདི་རྣམས་བསྐྱུར་བ་ནི་ཡེས་ར་ཨེལ་པ་རྣམས་ལ་ཚོད་བགམ་བྱེད་པ་དང་། ཁོ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཁོ་ཚོའི་མེས་པོ་རྣམས་ལ་བསྒོས་པའི་བཀའ་ལ་མཉན་མིན་ཤེས་པའི་ཕྱིར་ཡིན།
JDG 3:5 ཡེས་ར་ཨེལ་པ་རྣམས་ཀ་ན་ཨན་པ་དང་ཧེད་པ། ཨེ་མོར་པ། ཕེ་རེ་ཟི་པ། ཧེ་བི་པ། ཡེ་བུ་སི་པ་བཅས་ཀྱི་ཁྲོད་དུ་གནས་ཤིང་།
JDG 3:6 ཁོ་རྣམས་ཀྱི་བུ་མོ་ཆུང་མར་བླངས་ནས། རང་གི་བུ་མོ་རྣམས་ཁོ་ཚོའི་བུ་རྣམས་ལ་མནའ་མར་བྱིན་པར་མ་ཟད། ཁོ་ཚོའི་ལྷ་རྣམས་ལ་བསྙེན་བཀུར་བྱས་སོ། །
JDG 3:7 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པ་དང་། ཁོ་རྣམས་ཀྱི་དཀོན་མཆོག་ཡ་ཝཱེ་བརྗེད་ནས་པཱ་ཨལ་དང་ཨ་ཤེ་རཱ་རྣམས་ལ་བསྙེན་བཀུར་བྱས་པས།
JDG 3:8 དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ཤིང་། ཁོ་རྣམས་ཆུ་བོ་གཉིས་ཀྱི་བར་དུ་ཡོད་པའི་ཨ་རམ་ཡུལ་གྱི་རྒྱལ་པོ་ཀུ་ཤན་རིས་ཨ་ཏ་ཡིམ་གྱི་ལག་ཏུ་སྤྲད་པ་དང་། ཡེས་ར་ཨེལ་པ་རྣམས་ཀྱིས་ཀུ་ཤན་རིས་ཨ་ཏ་ཡིམ་ ལ་ལོ་ངོ་བརྒྱད་ཀྱི་རིང་དུ་གཡོག་བྱས་སོ། །
JDG 3:9 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཞུ་འབོད་བྱས་པ་ན། དཀོན་མཆོག་ཡ་ཝཱེས་ཀཱ་ལེབ་ཀྱི་ནུ་བོ་སྟེ་ཀེ་ན༌ཟཱ་ཡི་བུ་ཨོད་ནི་ཨེལ་ཁོ་རྣམས་སྐྱོབ་མཁན་དུ་བསྐོས་ཤིང་། ཁོས་དེ་རྣམས་བསྐྱབས་པའོ། །
JDG 3:10 དཀོན་མཆོག་ཡ་ཝཱེའི་ཐུགས་ཉིད་ཁོའི་སྟེང་དུ་བབས་པས་ཁོ་རང་ཡེས་ར་ཨེལ་པའི་ཁྲིམས་དཔོན་བྱས་ཤིང་འཐབ་འཁྲུག་རྒྱག་པར་སླེབས། དཀོན་མཆོག་ཡ་ཝཱེས་ཨ་རམ་ཡུལ་གྱི་རྒྱལ་པོ་ཀུ་ཤན་རིས་ཨ་ཏ་ཡིམ་ཁོའི་ལག་ཏུ་སྤྲད་པས་ཁོས་དེ་ཕམ་པར་བརྒྱབ་ཏོ། །
JDG 3:11 དེ་ནས་ཡུལ་དེ་ལོ་ངོ་བཞི་བཅུའི་རིང་ལ་བདེ་བར་གནས་པ་དང་། ཀེ་ན༌ཟཱ་ཡི་བུ་ཨོད་ནི་ཨེལ་ཚེ་ལས་འདས་སོ། །
JDG 3:12 ཡེས་ར་ཨེལ་པ་རྣམས་ཀྱིས་ཡང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས། དཀོན་མཆོག་ཡ་ཝཱེས་མོ་ཨབ་ཀྱི་རྒྱལ་པོ་ཨེག་ལོན་དར་བར་མཛད་ཅིང་ཡེས་ར་ཨེལ་པ་ལ་རྒོལ་ཏོ། །
JDG 3:13 ཨེག་ལོན་གྱིས་ཨམ་མོན་པ་དང་ཨ་མཱད་ལེག་པ་རྣམས་བསྡུས་ནས་ཡེས་ར་ཨེལ་པ་ལ་དམག་བརྒྱབ་སྟེ་ཤིང་ཏ་ལའི་གྲོང་ཁྱེར་བདག་ཏུ་བཟུང་ངོ་། །
JDG 3:14 དེ་ནས་ཡེས་ར་ཨེལ་པ་རྣམས་ཀྱིས་མོ་ཨབ་ཀྱི་རྒྱལ་པོ་ཨེག་ལོན་ལ་ལོ་ངོ་བཅོ་བརྒྱད་རིང་དུ་གཡོག་བྱས།
JDG 3:15 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཞུ་འབོད་བྱས་པ་ན། དཀོན་མཆོག་ཡ་ཝཱེས་པེན་ཡཱ་མེན་པ་གེ་རཱ་ཡི་བུ་ཨེ་ཧུད་ཁོ་རྣམས་སྐྱོབ་མཁན་དུ་བསྐོས་ཤིང་། ཁོ་ནི་གཡོན་ལག་ཅིག་ཡིན། ཡེས་ར་ཨེལ་པ་རྣམས་ཀྱིས་ཁོ་བརྒྱུད་དེ་མོ་ཨབ་ཀྱི་རྒྱལ་པོ་ཨེག་ལོན་ལ་ལག་རྟགས་ཕུལ་ཏོ། །
JDG 3:16 ཨེ་ཧུད་ཀྱིས་རལ་གྲི་ཁ་གཉིས་མ་རིང་ཚད་ཁྲུ་གང་ཡིན་པ་ཞིག་བརྡུངས་ནས་བརླ་གཡས་པའི་གྱོན་གོས་འོག་ཏུ་བཏགས།
JDG 3:17 ཁོས་མོ་ཨབ་ཀྱི་རྒྱལ་པོ་ཨེག་ལོན་ལ་ལག་རྟགས་ཕུལ་ཞིང་། མ་གཞི་ཨེག་ལོན་ནི་ཤིན་ཏུ་ཤ་རྒྱགས་པ་ཞིག་ཡིན་ལ།
JDG 3:18 ཨེ་ཧུད་ཀྱིས་ལག་རྟགས་ཕུལ་ཚར་བ་དང་ལག་རྟགས་འཁུར་མཁན་རྣམས་ལ་སྐྱེལ་མ་བྱས་ཤིང་།
JDG 3:19 རང་ཉིད་གིལ་གལ་ཉེ་འགྲམ་གྱི་སྐུ་འདྲ་རྣམས་ཡོད་ས་ནས་ཕྱིར་ལོག་སྟེ་ན་རེ། ཀྱེ་རྒྱལ་པོ་ལགས། ང་ཁྱེད་ལ་གསང་བ་ཞིག་ཞུ་རྒྱུ་ཡོད་ཅེས་སྨྲས་པ་ལ། རྒྱལ་པོས། ཅུང་ཙམ་སྒུགས་དང་ཞེས་སྨྲས་པ་དང་། གཡས་གཡོན་གྱི་སྐུ་སྲུང་ཐམས་ཅད་ཕྱི་རུ་སོང་ངོ་། །
JDG 3:20 དེ་ནས་རྒྱལ་པོ་གཅིག་པུ་བསིལ་ཁང་ནང་དུ་བསྡད་ཡོད་པ་ལ། ཨེ་ཧུད་ཁོའི་མདུན་དུ་ཡོང་སྟེ་ན་རེ། བདག་གིས་དཀོན་མཆོག་གི་བཀའ་བཞིན་ཁྱེད་ལ་དོན་ཞིག་ཞུ་བར་བྱ་ཞེས་སྨྲས་པས། རྒྱལ་པོ་རང་གི་བཞུགས་ས་ནས་ཡར་ལངས་ཤིང་།
JDG 3:21 ཨེ་ཧུད་ཀྱིས་གཡོན་ལག་བརྐྱངས་ཏེ་བརླ་གཡས་པ་ནས་རལ་གྲི་ཕྱུང་སྟེ་རྒྱལ་པོའི་ཁོག་པའི་ནང་བསྣུན་པ་དང་།
JDG 3:22 གྲིའི་ཡུ་བའང་ཁོག་པའི་ནང་དུ་བསྣུན། རལ་གྲི་ཚིལ་གྱིས་བཏུམས་ཤིང་ཁོས་དེ་རྒྱལ་པོའི་ཁོག་པ་ནས་ཕྱིར་མ་ཕྱུང་བར་མ་ཟད་རྒྱབ་ཀྱང་བརྟོལ་ཏོ། །
JDG 3:23 ཨེ་ཧུད་བར་ཁྱམས་སུ་སླེབས་ནས་བསིལ་ཁང་གི་སྒོ་རྣམས་གཏན་ནས་ཟྭ་བརྒྱབ།
JDG 3:24 ཨེ་ཧུད་ཕྱིར་བུད་རྗེས་རྒྱལ་པོའི་འཁོར་གཡོག་རྣམས་ཡོང་སྟེ། ལྟོས་དང་། བསིལ་ཁང་གི་སྒོ་རྣམས་ཟྭ་བརྒྱབ་ཡོད་པ་མཐོང་ནས། ཁོ་རང་བསིལ་ཁང་གི་ཁང་པ་སྦུག་མའི་ནང་དུ་སྒོ་ལ་བསྡད་ཡོད་པར་ངེས་ཞེས་སྨྲས་པ་དང་།
JDG 3:25 དེ་དག་གིས་སུན་སྣང་སྐྱེས་པའི་བར་དུ་བསྒུགས་ནའང་ད་དུང་བསིལ་ཁང་གི་སྒོ་འབྱེད་རྒྱུ་མེད་པ་མཐོང་ནས་ལྡེ་མིག་བླངས་ཏེ་སྒོ་ཕྱེས་པ་ན། བསམ་ཡུལ་ལས་འདས་པ་ཞིག་ལ་ཁོ་ཚོའི་བདག་པོ་ཚེ་ལས་འདས་ནས་ས་རུ་འགྱེལ་འདུག་གོ །
JDG 3:26 དེ་དག་གིས་འགོར་འགྱངས་བྱེད་པའི་དུས་སུ་ཨེ་ཧུད་ནི་སྐུ་འདྲ་རྣམས་ཡོད་ས་ནས་བརྒལ་ཞིང་སེ་ཨི་རཱ་ཞེས་པར་བྲོས།
JDG 3:27 དེར་སླེབས་པ་དང་ཨེ་ཕཱར་ཡིམ་རི་ཁུལ་དུ་རྭ་དུང་བུས་ཤིང་། ཡེས་ར་ཨེལ་པ་རྣམས་ཁོའི་རྗེས་འབྲངས་ཏེ་རི་ཁུལ་ནས་མར་བབས་པ་དང་ཁོས་མདུན་ནས་ལམ་ཁྲིད་དོ། །
JDG 3:28 ཡང་དེ་རྣམས་ལ་འདི་ལྟར་སྨྲས་པ་སྟེ། བདག་གི་རྗེས་སུ་འབྲང་བར་གྱིས། ཅི་ལ་ཞེ་ན། དཀོན་མཆོག་ཡ་ཝཱེས་ཁྱོད་ཅག་གི་དགྲ་བོ་མོ་ཨབ་པ་རྣམས་ཁྱོད་ཅག་གི་ལག་ཏུ་སྤྲད་ཟིན་པས་སོ་ཞེས་པ་ལ། དེ་རྣམས་ཁོའི་རྗེས་སུ་འབྲངས་ཏེ་མར་སོང་ནས་ཡོར་དན་གཙང་པོའི་རབ་ཁ་བཟུང་ནས་མོ་ཨབ་པ་གཅིག་ཀྱང་དེར་བརྒལ་དུ་མ་བཅུག་གོ །
JDG 3:29 དེའི་དུས་སུ་མོ་ཨབ་པ་ཧ་ལམ་མི་ཁྲི་གཅིག་ཡོད་པ་ཚང་མ་དཔའ་རྒོད་སྟོབས་ཅན་ཡིན་ལ། ཁོ་རྣམས་ཀྱིས་དེ་དག་ལས་གཅིག་ཀྱང་འཆོར་དུ་མ་བཅུག་པར་བསད་པ་དང་།
JDG 3:30 མོ་ཨབ་ནི་དེ་བཞིན་ཡེས་ར་ཨེལ་པས་དབང་འོག་ཏུ་བསྡུས་ཤིང་། བགྲང་བྱ་བརྒྱད་ཅུའི་རིང་ལ་ཡུལ་དེ་བདེ་བར་གནས་སོ། །
JDG 3:31 ཨེ་ཧུད་ཀྱི་རྗེས་སུ་ཨ་ནད་ཀྱི་བུ་ཤམ་གཱར་བྱུང་སྟེ། ཁོས་གླང་ལྕག་གིས་ཕེ་ལེ་ཤེད་པ་མི་དྲུག་བརྒྱ་ལ་བརྡུངས་ནས་བསད་པ་དང་། ཁོས་ཀྱང་ཡེས་ར་ཨེལ་པ་རྣམས་བསྐྱབས་པའོ། །
JDG 4:1 ཨེ་ཧུད་ཚེ་ལས་འདས་རྗེས་ཡེས་ར་ཨེལ་པ་རྣམས་ཀྱིས་ཡང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས།
JDG 4:2 དཀོན་མཆོག་ཡ་ཝཱེས་དེ་དག་ཧ་ཟོར་ཡུལ་དུ་སྲིད་སྐྱོང་མཁན་ཀ་ན་ཨན་གྱི་རྒྱལ་པོ་ཡཱ་བིན་གྱི་ལག་ཏུ་སྤྲད་ཅིང་། དེའི་དམག་དཔོན་ནི་སི་སེ་རཱ་ཡིན་ཞིང་ཕྱི་ཕྱོགས་པའི་ཡུལ་ཧ་རོ་ཤེད་ཅེས་པར་གནས་སོ། །
JDG 4:3 རྒྱལ་པོ་ཡཱ་བིན་ལ་ལྕགས་ཀྱི་ཤིང་རྟ་དགུ་བརྒྱ་ཡོད་ཅིང་། ཁོས་བགྲང་བྱ་ཉི་ཤུའི་རིང་ལ་ཡེས་ར་ཨེལ་པ་རྣམས་ལ་མནར་གཅོད་དྲག་པོ་བཏང་བས། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འོ་དོད་བོས་སོ། །
JDG 4:4 བུད་མེད་ལུང་སྟོན་པ་ཞིག་ཡོད་པའི་མིང་ལ་དི་བོ་རཱ་ཞེས་བྱ་ཞིང་ལབ་པི་དོད་ཀྱི་ཆུང་མ་ཡིན་ལ། དུས་དེར་ཡེས་ར་ཨེལ་གྱི་ཁྲིམས་དཔོན་ལགས་སོ། །
JDG 4:5 ཁོ་མོ་ནི་ཨེ་ཕཱར་ཡིམ་རི་ཁུལ་གྱི་རཱ་མ་དང་པེད་ཨེལ་གྱི་བར་དུ་དི་བོ་རཱའི་ཁ་སུར་ཤིང་ཏ་ལའི་འོག་ཏུ་གནས་པ་དང་། ཡེས་ར་ཨེལ་པ་ཐམས་ཅད་ཁོ་མོའི་རྩར་ཁྲིམས་གཅོད་ལ་མཉན་དུ་གཅར་བའོ། །
JDG 4:6 ཁོ་མོས་མི་མངགས་ཏེ་ནཱབ་ཐ་ལི་ཞེས་པའི་ཀེ་དེ་སི་ནས་ཨ་བི་ནོ་ཨམ་གྱི་བུ་པཱ་རག་བོས་ཡོང་ཞིང་འདི་ལྟར་སྨྲས་པ་སྟེ། ཡེས་ར་ཨེལ་གྱི་དཀོན་མཆོག་ཡ་ཝཱེས་ཁྱོད་ལ་འདི་སྐད་དུ། ནཱབ་ཐ་ལི་པ་དང་ཟེ་བུ་ལུན་པ་མི་ཆིག་ཁྲི་ཁྲིད་ནས་ཐ་པོར་རི་ལ་སོང་དང་།
JDG 4:7 བདག་གིས་ཡཱ་བིན་གྱི་དམག་དཔོན་སི་སེ་རཱ་ཁོའི་ཤིང་རྟ་རྣམས་དང་དམག་མི་ཡོངས་རྫོགས་ཁྲིད་ནས་ཁི་ཤོན་གཙང་པོའི་འགྲམ་དུ་ཁྱོད་རང་ཡོད་སར་ཡོང་དུ་འཇུག་པ་དང་། ཁོ་རང་ཁྱོད་ཀྱི་ལག་ཏུ་སྤྲོད་པར་བྱ་ཞེས་བཀའ་གནང་ངོ་ཞེས་པ་ལ།
JDG 4:8 པཱ་རག་ན་རེ། གལ་ཏེ་ཁྱེད་རང་བདག་དང་མཉམ་དུ་འགྲོ་ན་ང་རང་འགྲོ་བར་བྱ། ཁྱེད་རང་མི་འགྲོ་ན་ང་ཡང་མི་འགྲོ་ཞེས་སྨྲས་སོ། །
JDG 4:9 དི་བོ་རཱ་ཡིས་ལན་དུ། བདག་ནི་ཁྱོད་དང་ལྷན་ཅིག་ཏུ་འགྲོ་བར་བྱེད་མོད། འོན་ཀྱང་དཀོན་མཆོག་ཡ་ཝཱེས་སི་སེ་རཱ་ནི་བུད་མེད་ཅིག་གི་ལག་ཏུ་སྤྲོད་པར་འགྱུར་བས། ཁྱོད་རང་འགྲུལ་བའི་ལམ་དུ་ཁྱོད་ལ་མཚན་སྙན་འཐོབ་པར་མི་འགྱུར་ཞེས་སྨྲས་ཤིང་། དེ་ནས་དི་བོ་རཱ་ཡར་ལངས་ཏེ་པཱ་རག་དང་མཉམ་དུ་ཀེ་དེ་སི་རུ་ཕྱིན་པ་རེད།
JDG 4:10 དེ་ནས་པཱ་རག་གིས་ཟེ་བུ་ལུན་པ་དང་ནཱབ་ཐ་ལི་པ་རྣམས་ཀེ་དེ་སི་རུ་བསྡུས་པ་དང་། མི་ཆིག་ཁྲི་ཁོའི་རྗེས་སུ་འབྲངས་ནས་སོང་ཞིང་། དི་བོ་རཱ་ཡང་ཁོ་དང་ལྷན་ཅིག་ཏུ་ཕྱིན་ཏོ། །
JDG 4:11 མོ་ཤེའི་སྒྱུག་པོ་ཧོ་པཱབ་ཀྱི་བུ་རྒྱུད་དེ། ཀེ་ནེ་པ་ཧེ་བེར་ཞེས་བྱ་བ་སྔར་ཀེ་ནེ་པ་གཞན་རྣམས་དང་བྲལ་ནས། ཀེ་དེ་སི་དང་ཉེ་བའི་ཚ་ཨ་ནན་ནིམ་གྱི་བེ་ཤིང་གི་འགྲམ་དུ་གུར་ཕུབ་པའོ། །
JDG 4:12 དེ་དག་གིས་སི་སེ་རཱ་ལ། ཨ་བི་ནོ་ཨམ་གྱི་བུ་པཱ་རག་ནི་ཡར་ཐ་པོར་རི་ལ་ཕྱིན་ཏོ་ཞེས་སྨྲས་པ་ན།
JDG 4:13 སི་སེ་རཱ་ཡིས་ལྕགས་ཀྱི་ཤིང་རྟ་དགུ་བརྒྱ་བོ་ཡོད་ཚད་དང་ཁོའི་རྗེས་སུ་འབྲང་བའི་དམག་མི་ཡོངས་རྫོགས་བསྡུས་པ་དང་། ཕྱི་ཕྱོགས་པའི་ཡུལ་ཧ་རོ་ཤེད་ནས་ཕྱིར་བུད་དེ་ཁི་ཤོན་གཙང་པོར་སླེབས།
JDG 4:14 དི་བོ་རཱ་ཡིས་པཱ་རག་ལ་འདི་ལྟར་སྨྲས་པ་སྟེ། ཁྱོད་ལོངས་ཤིག འདི་ནི་དཀོན་མཆོག་ཡ་ཝཱེས་སི་སེ་རཱ་ཁྱོད་ཀྱི་ལག་ཏུ་སྤྲོད་པའི་ཉིན་མོ་ཡིན་པས། དཀོན་མཆོག་ཡ་ཝཱེ་ནི་ཁྱོད་ཀྱི་སྔོན་དུ་ཕེབས་པ་མ་ཡིན་ནམ་ཞེས་པ་ལ། པཱ་རག་ཐ་པོར་རི་ལས་མར་བབས་ཤིང་མི་ཆིག་ཁྲི་ཁོའི་རྗེས་སུ་འབྲངས་སོ། །
JDG 4:15 དཀོན་མཆོག་ཡ་ཝཱེས་སི་སེ་རཱ་དང་ཁོའི་ལྕགས་ཀྱི་ཤིང་རྟ་དང་དམག་མི་ཡོངས་རྫོགས་འཇིགས་པར་མཛད་པ་དང་། དེ་རྣམས་པཱ་རག་གི་མདུན་དུ་རལ་གྲིའི་འོག་ནས་འགྱེལ་ཞིང་། སི་སེ་རཱ་འཁོར་ལོ་ལས་བབས་ཏེ་རྐང་ཐང་ལ་བྲོས་བྱོལ་བྱས་པ་ན།
JDG 4:16 པཱ་རག་ནི་ཤིང་རྟ་རྣམས་དང་དམག་དཔུང་གི་ར་མདར་བརྒྱུགས་ནས་ཕྱི་ཕྱོགས་པའི་ཡུལ་ཧ་རོ་ཤེད་ཀྱི་བར་དུ་སླེབས་ཤིང་། སི་སེ་རཱ་ཡི་དམག་མི་ཡོངས་རྫོགས་གྲི་ཁ་ནས་འགྱེལ་ཏེ་གཅིག་ཀྱང་མ་ལུས་སོ། །
JDG 4:17 སི་སེ་རཱ་ཁོ་ན་རྐང་ཐང་ལ་བྲོས་ནས་ཀེ་ནེ་པ་ཧེ་བེར་གྱི་ཆུང་མ་ཡ་ཨེལ་ཞེས་བྱ་བའི་གུར་དུ་སླེབས་པ་སྟེ། ཅི་ལ་ཞེ་ན། ཧ་ཟོར་གྱི་རྒྱལ་པོ་ཡཱ་བིན་དང་ཀེ་ནེ་པ་ཧེ་བེར་གྱི་ཁྱིམ་གཉིས་འགྲིག་མཐུན་ཡིན་པས་སོ། །
JDG 4:18 ཡ་ཨེལ་ཕྱི་རུ་ཐོན་ནས་སི་སེ་རཱ་ལ་བསུ་བ་བྱས་ཏེ་ན་རེ། ང་ཡི་བདག་པོ། འཇིགས་སྣང་མེད་པར་ནང་དུ་ཕེབས་ཤོག་ཅེས་སྨྲས་པ་ལ། སི་སེ་རཱ་ཁོ་མོའི་གུར་གྱི་ནང་དུ་སོང་ཞིང་ཡ་ཨེལ་གྱིས་ཁོ་རང་ཉལ་ཐུལ་གྱིས་བཀབ།
JDG 4:19 སི་སེ་རཱ་ཡིས་ཡ་ཨེལ་ལ། ང་ལ་སྐོམ་པ་བྱུང་བས་ཆུ་ཉུང་ཙམ་གནང་རོགས་ཞེས་ཞུས་པ་ལ། ཡ་ཨེལ་གྱིས་འོ་རྐྱལ་གྱི་ཁ་ཕྱེས་ཏེ་ཁོ་ལ་འོ་མ་བླུགས་ཤིང་། སྔར་བཞིན་ཁོ་རང་བཀབ་ནས་བཞག
JDG 4:20 ཡང་སི་སེ་རཱ་ཡིས་ཡ་ཨེལ་ལ། ཁྱེད་རང་གུར་གྱི་སྒོ་ཁར་ལངས་བསྡད་དེ་སུ་ཞིག་ཡོང་ནས་ཁྱེད་ལ་འདིར་མི་ཡོད་མེད་དྲིས་ན། ཁྱེད་ཀྱིས་མེད་ཅེས་སྨྲོས་ཤིག་ཅེས་སྨྲས་སོ། །
JDG 4:21 དེར་སི་སེ་རཱ་ཐང་ཆད་ནས་གཉིད་སྟུག་པོ་ཁུག་ཅིང་། ཧེ་བེར་གྱི་ཆུང་མ་ཡ་ཨེལ་གྱིས་གུར་གྱི་ཕུར་བ་བླངས་ནས་ལག་ལ་ཐོ་བ་ཐོགས་ཏེ། ཁུ་སིམ་མེར་ཁོའི་རྩར་ཕྱིན་ནས་ཕུར་པ་དེ་ཁོའི་ཟ་འགྲམ་ལ་བརྡབས་ཤིང་ས་ནང་དུ་ཐུག དེ་ནས་སི་སེ་རཱ་ཤིའོ། །
JDG 4:22 ལྟོས་དང་། པཱ་རག་ནི་སི་སེ་རཱ་ཡི་ར་མདར་རྒྱུག་པའི་དུས་སུ། ཡ་ཨེལ་ཕྱི་རུ་ཐོན་ནས་ཁོ་ལ་བསུ་བ་བྱས་ཏེ་ན་རེ། ཤོག་དང་བདག་གིས་ཁྱེད་ཀྱིས་འཚོལ་བའི་མི་དེ་ཁྱེད་ལ་སྟོན་པར་བྱ་ཞེས་སྨྲས་པ་ལ། ཁོ་རང་གུར་གྱི་ནང་དུ་ཕྱིན་ཅིང་། ལྟོས་དང་། སི་སེ་རཱ་ཤི་ནས་སར་འགྱེལ་བ་དང་ཕུར་པ་ད་དུང་ཁོའི་ཟ་འགྲམ་དུ་ཡོད་པ་མཐོང་ངོ་། །
JDG 4:23 ཉིན་མོ་དེར་དཀོན་མཆོག་གིས་ཀ་ན་ཨན་གྱི་རྒྱལ་པོ་ཡཱ་བིན་ནི་ཡེས་ར་ཨེལ་པ་རྣམས་ཀྱི་མདུན་དུ་འདུལ་བར་མཛད་དོ། །
JDG 4:24 དུས་དེ་ནས་བཟུང་ཡེས་ར་ཨེལ་པ་རྣམས་སྟོབས་ཤུགས་རྒྱས་པར་གྱུར་ཅིང་། ཀ་ན་ཨན་གྱི་རྒྱལ་པོ་ཡཱ་བིན་རྩ་མེད་དུ་འགྲོ་བའི་བར་དུ་དེ་ལས་རྒྱལ་བའོ། །
JDG 5:1 ཉིན་མོ་དེར་དི་བོ་རཱ་དང་ཨ་བི་ནོ་ཨམ་གྱི་བུ་པཱ་རག་གཉིས་ཀྱིས་མགུར་བླངས་ནས་འདི་ལྟར།
JDG 5:2 ཡེས་ར་ཨེལ་གྱི་ཁྲོད་དུ་ཁྲིད་མཁན་དམག་དཔོན་མཆིས། །འབངས་མི་རྣམས་ཀྱང་རང་ཉིད་བློས་གཏོང་ལ་ནི་མོས། །ཁྱོད་ཚོས་ཡ་ཝཱེ་ཁོང་ལ་བསྟོད་པ་འབུལ་འོས་སོ། །
JDG 5:3 ཀྱེ་ཀྱེ་གོང་མ་རྒྱལ་པོས་གསན་དགོས་ཏེ། །ཀྱེ་ཀྱེ་རྒྱལ་སྲས་རྣམས་ཀྱིས་རྣ་བ་གཏོད། །ང་ཡིས་ཡ་ཝཱེ་ཁོང་ལ་བསྟོད་དབྱངས་འབུལ། །ཡེས་ར་ཨེལ་གྱི་དཀོན་མཆོག་ཡ་ཝཱེར་བསྟོད། །
JDG 5:4 ཀྱེ་ཀྱེ་ཡ་ཝཱེ་སེ་ཨིར་ནས་ཕེབས་ཤིང་། །ཨེ་དོམ་ཡུལ་ནས་ཞབས་ཀྱིས་བཅགས་པའི་དུས། །ས་འགུལ་གནམ་ཟགས་སྤྲིན་ལས་ཆར་བ་བབས། །
JDG 5:5 ཡ་ཝཱེའི་དྲུང་དུ་རི་ལས་ཆུ་བོ་བབས། །ཡེས་ར་ཨེལ་གྱི་དཀོན་མཆོག་ཡ་ཝཱེ་ཡི། །སྤྱན་སྔར་སི་ནཱ་རི་ལས་ཆུ་རྣམས་བཞུར། །
JDG 5:6 ཨ་ནད་ཅེས་པའི་བུ་སྟེ་ཤམ་གཱར་དུས། །ཡ་ཨེལ་ཉིན་མོར་ལམ་ཆེན་སྟོང་བར་གྱུར། །ལམ་འགྲོ་ཀུན་པོ་ལམ་དེ་བསྐོར་ནས་སྐྱོད། །
JDG 5:7 དི་བོ་རཱ་བདག་ཡེས་ར་ཨེལ་གྱི་ཁྲོད། །ལངས་ནས་མ་རུ་གྱུར་པའི་དུས་ཀྱི་བར། །ཡེས་ར་ཨེལ་ཁྲོད་རྗེ་བོའི་རྒྱུན་ཆད་དོ། །
JDG 5:8 ཡེས་ར་ཨེལ་པས་ལྷ་གསར་རྣམས་བདམས་པས། །དམག་འཁྲུག་དོན་ནི་མཁར་གྱི་སྒོ་ཁར་སླེབས། །ཡེས་ར་ཨེལ་གྱི་འབངས་མི་བཞི་ཁྲིའི་ཁྲོད། །ཕུབ་དང་མདུང་ནི་མིག་གིས་མཐོང་མ་ཐུབ། །
JDG 5:9 ང་ཡི་སེམས་ནི་ཡེས་ར་ཨེལ་གྱི་འབངས་མི་རྣམས་ཀྱི་ཁྲོད། །རང་ཉིད་བློས་གཏོང་མོས་པའི་འགོ་དཔོན་རྣམས་ལ་ཕྱོགས། །ཁྱོད་ཚོས་ཡ་ཝཱེ་ཁོང་ལ་བསྟོད་པར་འོས་སོ་ལོ། །
JDG 5:10 བོང༌དཀར་ཞོན་ཞིང་གོས་ཆེན་གདན་ལ་སྡོད་པ་དང་། །ལམ་དུ་བགྲོད་མཁན་ཁྱོད་ཀྱིས་ཁྱབ་བསྒྲགས་བྱེད་པར་འོས། །
JDG 5:11 ཆུ་ལེན་གནས་ཀྱི་སྐད་ཅོར་མདའ་གཞུའི་སྒྲ་ལས་བརྒལ། །མི་ཡིས་ཡ་ཝཱེ་ཁོང་གི་དྲང་བདེན་འཕྲིན་ལས་ཏེ། །ཡེས་ར་ཨེལ་ལ་བདག་སྐྱོང་གནང་བའི་མཛད་པ་བརྗོད། །དུས་དེར་ཡ་ཝཱེའི་འབངས་རྣམས་མཁར་སྒོར་སླེབས་པ་ཡིན། །
JDG 5:12 ཀྱེ་ཀྱེ་དི་བོ་རཱ་ཁྱེད་ཡར་ལ་ལོངས་ཤིག་དང་། །ཁྱེད་རང་ཡར་ལ་ལངས་ནས་གླུ་ཞིག་ལེན་པར་གྱིས། །ཀྱེ་ཀྱེ་ཨ་བི་ནོ་ཨམ་གྱི་བུ་པཱ་རག་ཁྱེད། །ཁྱེད་རང་ཡར་ལ་ལངས་ནས་དགྲ་རྣམས་འཛིན་འོས་སོ། །
JDG 5:13 དུས་དེར་ལྷག་ལུས་རྗེ་དང་འབངས་རྣམས་ལྷན་ཅིག་མར་ཡོང་སྟེ། །ཡ་ཝཱེ་ཁོང་ཉིད་ཕེབས་ཏེ་བདག་གི་ཆེད་དུ་དཔའ་ལ་རྒོལ། །
JDG 5:14 རྩ་བ་ཨ་མཱད་ལེག་ཅེས་བྱ་བའི་ཡུལ་ཡིན་པའི། །ཨེ་ཕཱར་ཡིམ་གྱི་ཁྲོད་ནས་འོངས་པའི་པེན་ཡཱ་མེན། །འབངས་རྣམས་ཁྲོད་ནས་ཁྱེད་ཀྱི་རྗེས་སུ་འབྲངས་པ་འོ། །མངའ་བདག་རྣམས་ནི་མཱ་ཀིར་ཡུལ་ནས་མར་ལ་སླེབས། །ཁྲིམས་དབྱུག་ཐོགས་ནས་འབངས་མིར་ཞིབ་བཤེར་བྱེད་མཁན་རྣམས། །ཟེ་བུ་ལུན་ཞེས་བྱ་བའི་ཡུལ་ནས་མར་ལ་སླེབས། །
JDG 5:15 ཡེས་སི་ཀཱར་གྱི་འགོ་དཔོན་རྣམས་ནི་དི་བོ་རཱ་དང་མཉམ། །ཡེས་སི་ཀཱར་ནི་ཅི་འདྲ་ཡིན་ན་པཱ་རག་དེ་འདྲ་ཡིན། །ཁོ་རྣམས་པཱ་རག་རྗེས་སུ་འབྲངས་ནས་ལུང་པའི་ནང་དུ་བརྒྱུགས། །རུ་བེན་རུས་རྒྱུད་ལས་ནི་བློ་སྟོབས་ལྡན་པའི་མི་རྣམས་ཡོད། །
JDG 5:16 ཁྱོད་རང་ཅིའི་ཕྱིར་ལུག་རའི་ནང་དུ་སྡོད་པ་ཡིན། །ལུག་ཁྱུ་རྣམས་ལ་འབུད་པའི་གླིང་བུར་ཉན་ནམ་ཅི། །རུ་བེན་རྒྱུད་ལས་བློ་སྟོབས་ལྡན་པའི་མི་རྣམས་ཡོད། །
JDG 5:17 གིལ་ཨད་པ་རྣམས་ཡོར་དན་གཙང་པོའི་ཕར་ལ་གནས། །དཱན་གྱི་མི་རྣམས་གནས་སྐབས་གྲུའི་སྟེང་སྡོད་པ་ཅི། །ཨ་ཤེར་པ་རྣམས་མཚོ་ཁར་ལུས་ཤིང་གྲུ་ཁར་བདེ། །
JDG 5:18 ཟེ་བུ་ལུན་ནི་རང་སྲོག་འབེན་ལ་འཇོག་པའི་མི་ཚོགས་ཡིན། །ནཱབ་ཐ་ལི་ཡང་མཐོ་སྒང་ཡུལ་དུ་དེ་དང་དེ་བཞིན་ཡིན། །
JDG 5:19 རྒྱལ་པོ་ཐམས་ཅད་འོངས་ནས་འཐབ་འཛིང་བྱས་པ་ཡིན། །མེ་གིད་དོ་ཡི་ཆུ་བོ་འགྲམ་དུ་གནས་པ་ཡི། །ཐ་ཨ་ནག་ཏུ་ཀ་ན་ཨན་གྱི་རྒྱལ་རྣམས་འཐབ། །འོན་ཀྱང་འཕྲོག་བཅོམ་བྱས་པའི་དངུལ་ནི་མ་རེག་གོ །
JDG 5:20 སྐར་མའི་ཚོགས་ཀྱིས་ནམ་མཁའི་དབྱིངས་ནས་འཐབ་འཛིང་བྱས། །རང་རང་རྒྱུ་སྐར་ལམ་ནས་སི་སེ་རཱ་ལ་རྒོལ། །
JDG 5:21 གནའ་བོའི་ཁི་ཤོན་གཙང་པོས་དགྲ་བོ་རྩ་ནས་ཁུར། །ང་ཡི་སེམས་ནི་སྟོབས་ཤུགས་དང་བཅས་མདུན་དུ་སྐྱོད། །
JDG 5:22 དེའི་དུས་རྟ་མཆོག་རྒོད་པོ་འཕུར་སྐྱོད་མཆོང་རྒྱུག་བྱེད། །དེ་ཚོའི་རྨིག་པས་ས་ལ་རྡོག་རྫིས་བཏང་བ་ཡིན། །
JDG 5:23 ཡ་ཝཱེ་ཁོང་གི་ཕོ་ཉས་འདི་སྐད་དུ། །མེ་རོས་དང་དེའི་ཡུལ་མི་རྣམས་ལ་ནི། །དམོད་མོ་ངན་པ་ཐོངས་ཞེས་བཀའ་བསྩལ་ཏེ། །ཡ་ཝཱེས་སྟོབས་ལྡན་དགྲ་བོར་རྒོལ་བ་ལ། །དེ་རྣམས་ཁོང་གི་རོགས་སུ་མ་འོང་ཕྱིར། །
JDG 5:24 ཀེ་ནེ་པ་ཡི་ཧེ་བེར་གྱི་ཆུང་མ། །ཡ་ཨེལ་བུད་མེད་ཀུན་ལས་བདེ་བ་ཡིན། །གུར་ལ་སྡོད་པའི་བུད་མེད་ལས་ཀྱང་བདེ། །
JDG 5:25 སི་སེ་རཱ་ཡིས་བཏུང་ཆུ་བསླངས་པ་ལ། །ཡ་ཨེལ་གྱིས་ནི་འོ་མ་སྦྱིན་པ་དང་། །རིན་ཆེན་དཀར་ཡོལ་ནང་དུ་ནུ་ཞོ་སྤྲད། །
JDG 5:26 ཡ་ཨེལ་གཡོན་ལག་ལ་ནི་ཕུར་པ་ཐོགས། །གཡས་ལག་ནང་དུ་བཟོ་བའི་ཐོ་བ་བཟུང་། །སི་སེ་རཱ་ལ་བརྡུངས་ཤིང་མགོ་བོ་རྨས། །དེ་ཡི་ཟ་འགྲམ་གཏོར་ནས་བརྟོལ་བ་ཡིན། །
JDG 5:27 སི་སེ་རཱ་ནི་ཁོ་མོའི་རྐང་འོག་འགྱེལ། །ཁོ་མོའི་རྐང་འོག་ཁ་སྦུབ་ལོག་ནས་འགྱེལ། །གང་དུ་འགྱེལ་བའི་གནས་སུ་ཤི་བ་འོ། །
JDG 5:28 སི་སེ་རཱའི་མས་དཀར་ཁུང་ནས་བལྟས་ཤིང་། །དྲ་མིག་བརྒྱབ་ནས་འོ་དོད་འབོད་བཞིན་དུ། །ཁོ་བོའི་ཤིང་རྟ་ཡུན་རིང་འགོར་བ་ཅི། །རྟ་ཡི་གོམ་སྒྲ་མི་ཐོས་ཅི་ཡིན་ཟེར། །
JDG 5:29 མཁས་མཛངས་བཙུན་མོས་ཁོ་མོར་ལན་བཏབ་ཅིང་། །ཁོ་མོས་ཁེར་ལབ་བྱེད་ཀྱིན་འདི་ལྟར་ཞུས། །
JDG 5:30 ཁོ་ཚོར་བཅོམ་ནོར་ཐོབ་སྟེ་བགོས་པ་འམ། །སྐྱེས་པ་རེ་ལ་བུད་མེད་གཅིག་གམ་གཉིས། །སི་སེ་རཱ་ཡི་ཟ་འོག་གོས་ཆེན་ཏེ། །ཟ་འོག་གཙགས་མའི་བཅོམ་ནོར་མ་ཐོབ་བམ། །ཟ་འོག་གོས་ཆེན་ཕྱི་ནང་ཉིས་གཙགས་མ། །འཛིན་བཟུང་ཐེབས་པར་བསྐོན་པ་མ་ཡིན་ནམ། །
JDG 5:31 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཉིད་ཀྱི། །དགྲ་བོ་ཐམས་ཅད་དེ་བཞིན་མེད་གྱུར་ཅིག །ཁྱེད་ལ་དགའ་བའི་མི་རྣམས་ཉི་མ་བཞིན། །འོད་སྟོང་འབར་བར་གྱུར་ཅིག་ཅེས་པ་འོ། །དེ་བཞིན་བགྲང་བྱ་བཞི་བཅུའི་རིང་ལ་ཡུལ་དེ་བདེ་བར་གནས་སོ། །
JDG 6:1 ཡེས་ར་ཨེལ་པ་རྣམས་ཀྱིས་ཡང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས། དཀོན་མཆོག་ཡ་ཝཱེས་དེ་དག་ལོ་ངོ་བདུན་གྱི་རིང་ལ་མིད༌ཡཱན་པའི་ལག་ཏུ་སྤྲད་ཅིང་།
JDG 6:2 མིད་ཡཱན་པས་ཡེས་ར་ཨེལ་པ་རྣམས་ལ་བཙན་གནོན་བྱས་པ་དང་། ཡང་མིད༌ཡཱན་པའི་རྐྱེན་གྱིས་ཡེས་ར་ཨེལ་པ་རྣམས་ཀྱིས་རི་ཁྲོད་དུ་བྲག་ཕུག་དང་བྲག་ཁུང་། མཁར་རྫོང་བཅས་པ་བཟོས་སོ། །
JDG 6:3 ཡེས་ར་ཨེལ་པ་རྣམས་ཀྱིས་ས་བོན་བཏབ་ཟིན་པའི་དུས་སུ། མིད་ཡཱན་པ་དང་ཨ་མཱད་ལེག་པ། ཤར་ཕྱོགས་པ་ཐམས་ཅད་ཡར་ཁོ་རྣམས་ལ་འཐབ་ཏུ་འོངས་པ་དང་།
JDG 6:4 ཁོ་རྣམས་ཀྱི་ཁ་གཏད་དུ་དམག་སྒར་བཏབ་ནས་གཱ་ཟཱའི་བར་དུ་ལོ་ཏོག་མེད་པར་བཟོས་ཤིང་། ཡེས་ར་ཨེལ་པ་རྣམས་ལ་ཟ་རྒྱུ་དང་བ་གླང་། ལུག བོང་བུ་སོགས་ཅི་ཡང་མ་བསྐྱུར་ཏོ། །
JDG 6:5 རྒྱུ་མཚན་ནི་དེ་རྣམས་ཀྱིས་ཕྱུགས་ཟོག་དེད་ནས་གུར་དང་བཅས་ཡོང་བ་ནི་འབུ་ཆ་ག་པ་ལྟར་མང་ལ། མི་དང་རྔ་མོང་ནི་བགྲང་ལས་འདས་ཤིང་ཐམས་ཅད་ཡོང་སྟེ་ཡུལ་དེ་རྩ་བ་ནས་བརླགས་པའོ། །
JDG 6:6 ཡེས་ར་ཨེལ་པ་རྣམས་མིད་ཡཱན་པའི་རྐྱེན་གྱིས་དབུལ་ཞིང་ཕོངས་པར་གྱུར་པས་དཀོན་མཆོག་ཡ་ཝཱེ་ལ་འོ་དོད་བོས་སོ། །
JDG 6:7 ཡེས་ར་ཨེལ་པ་རྣམས་ཀྱིས་མིད་ཡཱན་པའི་རྐྱེན་གྱིས་དཀོན་མཆོག་ཡ་ཝཱེ་ལ་འོ་དོད་བོས་པས།
JDG 6:8 དཀོན་མཆོག་ཡ་ཝཱེས་ལུང་སྟོན་པ་ཞིག་ཡེས་ར་ཨེལ་པ་རྣམས་ཀྱི་རྩར་མངགས་ཏེ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་སྔར་ཁྱོད་རྣམས་ཨེ་ཅིབ་ཡུལ་ནས་ཡར་ཁྲིད་འོངས་ཤིང་། བྲན་དུ་བཀོལ་བའི་གནས་ནས་ཕྱི་རུ་བཏོན་པ་དང་།
JDG 6:9 ཨེ་ཅིབ་པའི་ལག་དང་ཁྱོད་རྣམས་ལ་གཉའ་གནོན་བྱེད་པ་ཀུན་ལས་བསྐྱབས་ནས་ཐར་དུ་བཅུག དེ་དག་ཁྱོད་རྣམས་ཀྱི་མདུན་ནས་བསྐྲད་ཅིང་ཁོ་རྣམས་ཀྱི་ཡུལ་ཁྱོད་ཅག་ལ་གནང་བ་ཡིན་ཞེས་དང་།
JDG 6:10 ཡང་ཁྱོད་རྣམས་ལ། ང་རང་ཁྱོད་ཅག་གི་དཀོན་མཆོག་ཡ་ཝཱེ་ཡིན། ཁྱོད་རྣམས་ཨེ་མོར་པའི་ཡུལ་དུ་གནས་པ་དང་། ཁོ་ཚོའི་ལྷ་རྣམས་ལ་བསྙེན་བཀུར་བྱེད་མི་རུང་ཞེས་སྨྲས་ནའང་། ཁྱོད་རྣམས་ཀྱིས་ངའི་གཏམ་ལ་མཉན་མ་སོང་ཞེས་གསུངས་ཞེས་སྨྲས་སོ། །
JDG 6:11 དཀོན་མཆོག་ཡ་ཝཱེའི་ཕོ་ཉ་ཨོབ་རཱ་ཡུལ་དུ་སླེབས་ནས། ཨ་བི་ཨེ་ཟེར་པ་ཡོ་ཨ་སི་ཞེས་བྱ་བའི་བེ་ཤིང་འོག་ཏུ་བཞུགས་པ་ལ། ཡོ་ཨ་སིའི་བུ་གིད་ཡོན་གྱིས་མིད་ཡཱན་པ་རྣམས་ལ་སྦས་པའི་ཆེད་དུ་རྒུན་འབྲུམ་འཚིར་གཞོང་ཡོད་སར་གྲོ་རྡུང་བཞིན་བསྡད།
JDG 6:12 དཀོན་མཆོག་ཡ་ཝཱེའི་ཕོ་ཉ་གིད་ཡོན་ལ་མངོན་པར་གྱུར་ཏེ་ཁོ་ལ་འདི་ལྟར་སྨྲས་པ་སྟེ། ཀྱེ་སྙིང་སྟོབས་ཅན་གྱི་དཔའ་རྒོད་ལགས། དཀོན་མཆོག་ཡ་ཝཱེ་ནི་ཁྱོད་དང་མཉམ་དུ་བཞུགས་ཞེས་པ་ལ།
JDG 6:13 གིད་ཡོན་ན་རེ། ཀྱེ་གཙོ་བོ་ལགས། གལ་ཏེ་དཀོན་མཆོག་ཡ་ཝཱེ་ངེད་དང་མཉམ་དུ་བཞུགས་ན། ངེད་རྣམས་དོན་འདི་ཐམས་ཅད་ལ་ཕྲད་དོན་ཅི། ཡང་བདག་ཅག་གི་ཕ་མེས་ཡང་མེས་རྣམས་ཀྱིས་དཀོན་མཆོག་ཡ་ཝཱེས་ངེད་རྣམས་ཨེ་ཅིབ་ཡུལ་ནས་ཡར་ཁྲིད་འོངས་པ་ཡིན་ཞེས་སྨྲས་པ་མ་ཡིན་ནམ། ཁོང་གི་ངོ་མཚར་བའི་འཕྲིན་ལས་རྣམས་གང་དུ་མཆིས་སམ། ད་ནི་ཁོང་གིས་བདག་ཅག་དོར་ནས་མིད་ཡཱན་པའི་ལག་ཏུ་སྤྲད་པ་ཡིན་ཞེས་ཞུས་སོ། །
JDG 6:14 དཀོན་མཆོག་ཡ་ཝཱེས་གིད་ཡོན་ལ་གཟིགས་ཏེ་འདི་སྐད་དུ། ཁྱོད་ཀྱིས་རང་གི་མཐུ་སྟོབས་འདི་ལ་བརྟེན་ནས་མིད་ཡཱན་པའི་ལག་ནས་ཡེས་ར་ཨེལ་པ་རྣམས་སྐྱོབས་ཤིག བདག་གིས་ཁྱོད་རང་མངགས་པ་མ་ཡིན་ནམ་ཞེས་གསུངས་པ་དང་།
JDG 6:15 གིད་ཡོན་ན་རེ། ཀྱེ་གཙོ་བོ་ལགས། བདག་གིས་ཡེས་ར་ཨེལ་པ་རྣམས་ཅི་ལྟར་སྐྱོབ་ནུས་སམ། གཟིགས་དང་། བདག་གི་ཁྱིམ་རྒྱུད་ནི་མཱ་ན་ཤེའི་ཚོ་པའི་ཁྲོད་ཆེས་དབུལ་ཞིང་ཕོངས་པ་དང་། ང་རང་བདག་གི་ཕ་ཁྱིམ་དུ་ཆེས་ཆུང་ཤོས་ཡིན་ཞེས་ཞུས།
JDG 6:16 དཀོན་མཆོག་ཡ་ཝཱེས་ཁོ་ལ་འདི་སྐད་དུ། ང་རང་ཁྱོད་དང་མཉམ་དུ་གནས་པས། ཁྱོད་ཀྱིས་མིད་ཡཱན་པ་རྣམས་མི་གཅིག་དང་འདྲ་བར་ཕམ་པར་རྒྱག་ངེས་ཡིན་ཞེས་གསུངས།
JDG 6:17 གིད་ཡོན་ན་རེ། གལ་ཏེ་ཁྱེད་ཀྱི་སྤྱན་སྔར་ང་རང་ལ་ཐུགས་རྗེ་ཐོབ་པ་ཡིན་ན། ང་ལ་བཀའ་གནང་མཁན་ནི་ཁྱེད་རང་ཡིན་པའི་རྟགས་ཤིག་བདག་ལ་གནང་བར་མཛོད།
JDG 6:18 བདག་གིས་འབུལ་བ་འཁྱེར་ཡོང་སྟེ་ཁྱེད་ཀྱི་དྲུང་དུ་འབུལ་བའི་བར་དུ། ཁྱེད་རང་འདི་དང་མི་འབྲལ་བར་ཞུ་ཞེས་ཞུས་པ་ལ། གཙོ་བོས་འདི་སྐད་དུ། བདག་གིས་ཁྱོད་རང་ཕྱིར་ལོག་པར་སྒུག་ངེས་ཡིན་ཞེས་གསུངས།
JDG 6:19 གིད་ཡོན་སོང་ནས་རེའུ་གཅིག་སྟ་གོན་བྱས་པ་དང་། གྲོ་ཕྱེ་ཨེ་ཕཱ་གང་གིས་སྐྱུར་མེད་བག་ལེབ་བཟོས་ཤིང་། ཤ་སླེ་བོ་ནང་དུ་བཞག་ནས་ཁུ་བ་སྣོད་ཀྱི་ནང་དུ་བླུགས་ཏེ། བེ་ཤིང་འོག་ཏུ་ཁྱེར་ནས་ཕོ་ཉའི་དྲུང་དུ་ཕུལ་ཏོ། །
JDG 6:20 དཀོན་མཆོག་གི་ཕོ་ཉས་གིད་ཡོན་ལ་འདི་སྐད་དུ། ཤ་དང་སྐྱུར་མེད་བག་ལེབ་ཕ་བོང་འདིའི་སྟེང་དུ་བཞག་ནས་ཁུ་བ་བླུགས་ཤིག་ཅེས་གསུངས་པ་ལ། ཁོས་དེ་ལྟར་བྱས་སོ། །
JDG 6:21 དཀོན་མཆོག་ཡ་ཝཱེའི་ཕོ་ཉས་ཕྱག་གི་འཁར་བ་བརྐྱངས་ནས་འཁར་བའི་སྣེ་མོས་ཤ་དང་སྐྱུར་མེད་བག་ལེབ་ལ་རེག་པ་ན། ཕ་བོང་ལས་མེ་འཕྱུར་ཏེ་ཤ་དང་སྐྱུར་མེད་བག་ལེབ་ཡོངས་རྫོགས་རྩ་མེད་བཏང་ཞིང་། དཀོན་མཆོག་ཡ་ཝཱེའི་ཕོ་ཉའང་མི་མཐོང་བར་གྱུར།
JDG 6:22 གིད་ཡོན་གྱིས་ཁོང་ནི་དཀོན་མཆོག་ཡ་ཝཱེའི་ཕོ་ཉ་ཡིན་པ་ཤེས་ཏེ་ན་རེ། ཀྱེ་ཧུད་གཙོ་བོ་ཡ་ཝཱེ། བདག་གིས་དཀོན་མཆོག་ཡ་ཝཱེའི་ཕོ་ཉ་ཁ་རི་ཁ་ཐུག་ཏུ་མཇལ་བྱུང་ཞེས་ཞུས་པ་ལ།
JDG 6:23 དཀོན་མཆོག་ཡ་ཝཱེས་ཁོ་ལ་འདི་སྐད་དུ། ཁྱོད་ཀྱི་སེམས་བདེ་བར་གྱིས་དང་མ་འཇིགས་ཤིག ཁྱོད་རང་འཆི་བར་མི་འགྱུར་ཞེས་གསུངས།
JDG 6:24 དེ་ནས་གིད་ཡོན་གྱིས་དེར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བརྩིགས་པ་དང་མིང་ལ་ཡ་ཝཱེ་ཤཱ་ལོམ་ཞེས་བཏགས་པ་དང་། མཆོད་ཁྲི་དེ་ནི་ད་ལྟའི་བར་དུ་ཨ་བི་ཨེ་ཟེར་པ་རྣམས་ཀྱི་ཨོབ་རཱ་ཞེས་པར་གནས་སོ། །
JDG 6:25 ཡང་མཚན་མོ་དེར་དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། ཁྱོད་ཀྱིས་རང་གི་ཕ་ཡི་བ་གླང་རྣམས་ལས་བ་གླང་གཉིས་པ་སྟེ་ཁ་གང་འཁྲིད་པར་མ་ཟད། ཁྱོད་ཀྱི་ཕ་ཡིས་པཱ་ཨལ་ལ་བརྩིགས་པའི་མཆོད་ཁྲི་བཤིག་ནས་དེའི་འགྲམ་དུ་ཡོད་པའི་ཨ་ཤེ་རཱ་སྟེ་ཤིང་སྐུ་དེ་ཆོད་ཅིག
JDG 6:26 དེ་ནས་བྲག་རི་འདིའི་སྟེང་དུ་ཁྱོད་ཀྱི་དཀོན་མཆོག་ཡ་ཝཱེའི་ཕྱིར་མཆོད་ཁྲི་ཡག་པོ་ཞིག་རྩིགས་ལ། ཁྱོད་ཀྱིས་བཅད་པའི་ཨ་ཤེ་རཱ་སྟེ་ཤིང་སྐུ་བུད་ཤིང་དུ་བྱས་ནས་བ་གླང་གཉིས་པ་དེ་སྦྱིན་སྲེག་གི་མཆོད་པར་ཕུལ་ཞིག་ཅེས་བཀའ་བསྒོས་པས།
JDG 6:27 གིད་ཡོན་གྱིས་རང་གི་གཡོག་པོ་རྣམས་ལས་མི་བཅུ་བདམས་ནས། དཀོན་མཆོག་ཡ་ཝཱེས་ཁོ་ལ་བཀའ་ཇི་ལྟར་བསྒོས་པ་བཞིན་དུ་བྱས། ཡང་ཕ་གཞིས་དང་གྲོང་ཁྱེར་དེའི་མི་རྣམས་ལ་འཇིགས་པས་ཉིན་དཀར་དོན་དེ་བྱེད་མ་ཕོད་པར་མཚན་མོར་བྱས་པའོ། །
JDG 6:28 གྲོང་ཁྱེར་གྱི་མི་རྣམས་ནངས་སྔ་མོ་ཡར་ལངས་ཏེ། ལྟོས་དང་། པཱ་ཨལ་གྱི་མཆོད་ཁྲི་བཤིག་ནས་དེའི་འགྲམ་གྱི་ཨ་ཤེ་རཱ་སྟེ་ཤིང་སྐུ་བཅད་པ་དང་། བ་གླང་གཉིས་པ་གསར་དུ་བརྩིགས་པའི་མཆོད་ཁྲིའི་སྟེང་ཕུལ་ཡོད་པ་མཐོང་ནས།
JDG 6:29 ཕན་ཚུན་ན་རེ། འདི་ནི་སུ་ཞིག་གིས་བྱས་པ་ཡིན་ནམ་ཞེས་སྨྲས་ཤིང་། ཡང་རྩད་བཅད་ནས་དྲིས་རྗེས་འདི་ནི་ཡོ་ཨ་སིའི་བུ་གིད་ཡོན་གྱིས་བྱས་པ་རེད་ཅེས་སྨྲས།
JDG 6:30 གྲོང་ཁྱེར་གྱི་མི་རྣམས་ཀྱིས་ཡོ་ཨ་སི་ལ་འདི་ལྟར་སྨྲས་པ་སྟེ། ཁྱོད་ཀྱི་བུ་ཕྱིར་སྤྲོད་ཅིག་ཁོས་པཱ་ཨལ་གྱི་མཆོད་ཁྲི་བཤིག་ནས་དེའི་འགྲམ་གྱི་ཨ་ཤེ་རཱ་བཅད་པས་ཁོ་ནི་གསོད་རུང་བ་ཡིན་ཞེས་པ་ལ།
JDG 6:31 ཡོ་ཨ་སི་ཡིས་དེར་ལངས་བསྡད་ནས་ཁོ་ལ་རྒོལ་བའི་མི་ཚོགས་ལ་འདི་ལྟར། ཁྱོད་ཅག་གིས་པཱ་ཨལ་གྱི་དོན་དུ་རྩོད་གླེང་བྱེད་པ་ཡིན་ནམ། ཡང་ན་ཁྱོད་ཅག་གིས་དེ་སྐྱོབ་འདོད་པ་ཡིན་ནམ། སུ་ཞིག་གིས་དེའི་དོན་དུ་རྩོད་གླེང་བྱེད་ན་དེ་ནི་ནམ་མ་ལངས་སྔོན་ལ་གསོད་པར་འོས། གལ་ཏེ་པཱ་ཨལ་ལྷ་ཡིན་ན། མི་ཞིག་གིས་ཁོའི་མཆོད་ཁྲི་བཤིག་པ་ཡིན་པས་ཁོ་རང་ལ་རྩོད་གླེང་བྱེད་དུ་ཆུག་ཅེས་སྨྲས།
JDG 6:32 དེའི་ཕྱིར་ཉིན་དེ་ནས་བཟུང་མི་རྣམས་ཀྱིས་གིད་ཡོན་གྱི་མིང་ལ་ཡེ་རུབ་པཱ་ཨལ་ཞེས་བོས་ཤིང་། ཁོས་པཱ་ཨལ་གྱི་མཆོད་ཁྲི་བཤིག་པ་ཡིན་པས་པཱ་ཨལ་ལ་ཁོ་དང་རྩོད་གླེང་བྱེད་དུ་ཆུག་ཅེས་པའི་དོན་ནོ། །
JDG 6:33 དེའི་དུས་སུ་མིད་ཡཱན་པ་དང་ཨ་མཱད་ལེག་པ། ཤར་ཕྱོགས་པ་བཅས་ཀུན་པོ་འདུས་ནས་གཙང་པོ་བརྒལ་ཞིང་། ཡེ་སི་རེ་ཨེལ་གྱི་ཐང་དུ་སྒར་བཏབ།
JDG 6:34 དཀོན་མཆོག་ཡ་ཝཱེའི་ཐུགས་ཉིད་གིད་ཡོན་གྱི་སྟེང་དུ་བབས་པ་དང་ཁོས་རྭ་དུང་བུས་ཤིང་། ཨ་བི་ཨེ་ཟཱེར་པ་རྣམས་ཁོའི་རྗེས་སུ་འབྲངས།
JDG 6:35 ཡང་ཁོས་བང་ཆེན་མངགས་ཏེ་མཱ་ན་ཤེའི་ཡུལ་ཀུན་བརྒྱུད་ཅིང་མཱ་ན་ཤེ་པ་རྣམས་ཀྱང་འདུས་ནས་ཁོའི་རྗེས་སུ་འབྲངས། ཡང་ཨ་ཤེར་དང་ཟེ་བུ་ལུན་དང་། ནཱབ་ཐ་ལི་བཅས་ཀྱི་རྩར་བང་ཆེན་མངགས་ཤིང་། དེ་རྣམས་ཀྱང་ཁོ་རྣམས་དང་འཛོམས་པར་སླེབས་སོ། །
JDG 6:36 གིད་ཡོན་གྱིས་དཀོན་མཆོག་ལ། གལ་ཏེ་ཁྱེད་ཀྱིས་ཅི་གསུངས་པ་བཞིན་དུ་ང་རང་བརྒྱུད་ནས་ཡེས་ར་ཨེལ་པ་རྣམས་སྐྱོབ་པ་ཡིན་ན།
JDG 6:37 གཟིགས་དང་། བདག་གིས་བལ་རྡོག་ཅིག་གཡུལ་ཁ་རུ་འཇོག་པར་བྱ་སྟེ། གལ་ཏེ་བལ་རྡོག་ཁོ་ནའི་སྟེང་དུ་ཟིལ་བ་ཡོད་པ་དང་ཉེ་འཁོར་ཐམས་ཅད་སྐམ་པོར་ལུས་ན། ཁྱེད་ཀྱིས་ཅི་གསུངས་པ་བཞིན་དུ་ང་རང་བརྒྱུད་ནས་ཡེས་ར་ཨེལ་པ་རྣམས་སྐྱོབ་རྒྱུ་ཡིན་པ་བདག་གིས་ཤེས་པར་འགྱུར་ཞེས་ཞུས་སོ། །
JDG 6:38 དེའི་ཕྱི་ཉིན་ཞོགས་པར་གིད་ཡོན་ཡར་ལངས་པ་ལ་དེ་བཞིན་དུ་བྱུང་བ་མཐོང་ཞིང་། བལ་རྡོག་བཙིར་བ་ལ་ཆུ་ཕོར་བ་གང་ཐོན་ནོ། །
JDG 6:39 དེ་ནས་གིད་ཡོན་གྱིས་ཡང་དཀོན་མཆོག་ལ་འདི་ལྟར། བདག་གིས་ཡང་བསྐྱར་བལ་རྡོག་ལས་ཚོད་ལྟ་བྱེད་པར་བྱ་ཞེས་ཡང་ཐེངས་ཤིག་ཞུས་པར་ཁྱེད་རང་དགོངས་པ་མི་ཚོམ་པར་མཁྱེན། བལ་རྡོག་ནི་སྐམ་པོར་ལུས་ནས་ཉེ་འཁོར་ཐམས་ཅད་ལ་ཟིལ་བ་འབབ་པར་ཤོག་ཅེས་ཞུས་ཤིང་།
JDG 6:40 མཚན་མོ་དེར་དཀོན་མཆོག་གིས་ཡང་དེ་བཞིན་མཛད་ཅིང་། བལ་རྡོག་ཁོ་ན་སྐམ་པོར་ལུས་ནས་ཉེ་འཁོར་ཐམས་ཅད་ལ་ཟིལ་བ་བབས་སོ། །
JDG 7:1 ཡེ་རུབ་པཱ་ཨལ་ཞེས་བྱ་བའི་གིད་ཡོན་དང་ཁོའི་རྗེས་སུ་འབྲངས་པ་རྣམས་ནངས་སྔ་མོ་ནས་ཡར་ལངས་ཏེ། ཧ་རོད་ཆུ་མགོའི་རྩར་སྒར་བཏབ། མིད༌ཡཱན་གྱི་དམག་སྒར་ནི་བྱང་ཕྱོགས་ཀྱི་ཐང་དུ་མོ་རེ་རི་བོའི་ཉེ་འདབས་སུ་ཡོད་པ་ཡིན།
JDG 7:2 དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། ཁྱོད་ཀྱི་རྗེས་སུ་འབྲངས་པའི་མི་མང་དྲགས་པས་བདག་གིས་མིད་ཡཱན་པ་རྣམས་ཁོ་ཚོའི་ལག་ཏུ་སྤྲོད་མི་རུང་སྟེ། ཡེས་ར་ཨེལ་པ་རྣམས་ཀྱིས་ང་ལ་འུད་ཤོབ་བྱས་ཏེ། ང་ཚོ་རང་གིས་རང་ཉིད་བསྐྱབས་པ་ཡིན་ཞེས་ཟེར་ཉེན་ཆེ།
JDG 7:3 ཁྱོད་ཀྱིས་ད་ལྟ་མི་འདི་རྣམས་ལ་འདི་ལྟར། འཇིགས་ཤིང་དཔའ་ཞུམ་པ་རྣམས་གིལ་ཨད་རི་དང་བྲལ་ནས་ཕྱིར་ལོག་ཆོག་ཅེས་ཁྱབ་བསྒྲགས་བྱོས་ཤིག་ཅེས་གསུངས་ཤིང་། དེ་ནས་མི་ཉིས་ཁྲི་ཉིས་སྟོང་ཕྱིར་ལོག་ཅིང་ཆིག་ཁྲི་འབའ་ཞིག་ལུས་སོ། །
JDG 7:4 ཡང་དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། མི་ནི་ད་དུང་མང་དྲགས་པས་ཁྱོད་ཀྱིས་དེ་རྣམས་ཆུ་འགྲམ་དུ་ཁྲིད་དང་། བདག་གིས་དེ་རུ་ཁྱོད་ཀྱི་ཕྱིར་ཁོ་རྣམས་ལ་ཚོད་བགམ་བྱེད་པར་བྱ། ངས་སུ་ཞིག་ཁྱོད་དང་མཉམ་དུ་འགྲོ་ཆོག་པར་བསྟན་ན་དེ་ཁྱོད་དང་ལྷན་ཅིག་ཏུ་འགྲོ་བར་རུང་ལ། ངས་སུ་ཞིག་ཁྱོད་དང་མཉམ་དུ་འགྲོ་མི་ཆོག་པར་བསྟན་ན་དེ་ཁྱོད་དང་ལྷན་ཅིག་ཏུ་འགྲོ་བར་མི་རུང་ཞེས་གསུངས་པས།
JDG 7:5 གིད་ཡོན་གྱིས་མི་རྣམས་མར་ཆུ་འགྲམ་དུ་ཁྲིད་པ་དང་། དཀོན་མཆོག་ཡ་ཝཱེས་གིད་ཡོན་ལ། སུ་ཞིག་གིས་ཁྱི་ལྟར་ཆུ་ལྕེ་ཡིས་བལྡགས་ནས་འཐུང་བ་ཡིན་ན་དེ་རྣམས་ལོགས་སུ་ཁོར་དང་། ཡང་སུ་ཞིག་གིས་པུས་མོ་བཙུགས་ནས་ཆུ་འཐུང་བ་རྣམས་ཀྱང་དེ་བཞིན་དུ་ལོགས་སུ་ཁོར་ཅིག་ཅེས་གསུངས་སོ། །
JDG 7:6 དེ་ནས་ཆུ་ལག་མཐིལ་དུ་བླངས་ནས་བལྡགས་ཏེ་འཐུང་མཁན་མི་སུམ་བརྒྱ་བྱུང་བ་དང་། དེའི་འཕྲོ་མ་རྣམས་ཀྱིས་པུས་མོ་བཙུགས་ཏེ་ཆུ་འཐུང་ངོ་། །
JDG 7:7 དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། ཆུ་བལྡགས་ཏེ་འཐུང་བའི་མི་སུམ་བརྒྱ་འདི་བརྒྱུད་ནས་བདག་གིས་ཁྱོད་རྣམས་སྐྱོབ་ཅིང་། མིད་ཡཱན་པ་རྣམས་ཁྱོད་ཀྱི་ལག་ཏུ་སྤྲོད་པར་བྱ། དེའི་འཕྲོ་མ་རྣམས་རང་རང་སར་ལོག་ཆོག་ཅེས་གསུངས་པ་ལ།
JDG 7:8 མི་སུམ་བརྒྱ་བོ་དེས་བྲོ་དང་རྭ་དུང་ཁྱེར་བ་དང་། གིད་ཡོན་གྱིས་དེའི་འཕྲོ་ཡི་ཡེས་ར་ཨེལ་པ་ཐམས་ཅད་རང་རང་གི་གུར་ཡོད་སར་ལོག་ཏུ་བཅུག མི་སུམ་བརྒྱ་བོ་རང་གི་རྩར་བཞག་པ་དང་། མིད༌ཡཱན་གྱི་དམག་སྒར་ནི་ཁོའི་ཉེ་འདབས་ཀྱི་ཐང་དུ་ཡོད་དོ། །
JDG 7:9 མཚན་མོ་དེར་དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། བདག་གིས་ཁོ་རྣམས་ཁྱོད་ཀྱི་ལག་ཏུ་སྤྲད་ཟིན་པས། ཡར་ལོངས་ལ་མར་མིད་ཡཱན་གྱི་དམག་སྒར་དུ་སོང་ཞིག
JDG 7:10 གལ་ཏེ་ཁྱོད་འགྲོ་བར་འཇིགས་ན། ཁྱོད་ཀྱི་གཡོག་པོ་ཕུ་རཱ་ཁྲིད་ནས་དམག་སྒར་དེ་རུ་སོང་དང་།
JDG 7:11 ཁོ་རྣམས་ཀྱིས་ཅི་སྨྲ་བ་ཁྱོད་ཀྱིས་ཐོས་པ་དང་། ཁྱོད་ལ་མར་སོང་ནས་དམག་སྒར་དེར་དཔུང་འཇུག་བྱེད་པའི་སྙིང་སྟོབས་ལྡན་པར་འགྱུར་ཞེས་གསུངས། དེ་ནས་གིད་ཡོན་གྱིས་གཡོག་པོ་ཕུ་རཱ་ཁྲིད་ནས་མར་དམག་སྒར་གྱི་མཐའ་མཚམས་སུ་སོང་ངོ་། །
JDG 7:12 དེར་མིད་ཡཱན་པ་དང་ཨ་མཱད་ལེག་པ། ཤར་ཕྱོགས་པ་ཐམས་ཅད་ཐང་ལ་ཁྱབ་ཅིང་འབུ་ཆ་ག་པ་ལྟར་མང་ལ། དེ་རྣམས་ཀྱི་རྔ་མོང་ནི་མཚོ་འགྲམ་གྱི་བྱེ་མ་ལྟར་བགྲང་ལས་འདས་པའོ། །
JDG 7:13 གིད་ཡོན་དེར་སླེབས་པ་ལ། མི་ཞིག་གིས་རང་གི་གྲོགས་པོར་རྨི་ལམ་བཤད་དེ་འདི་ལྟར་སྨྲས་པ་སྟེ། ལྟོས་དང་། བདག་གིས་རྨི་ལམ་ཞིག་རྨིས་པ་ནི་འདི་ལྟ་སྟེ། སོ་ཕྱེའི་བག་ལེབ་ཅིག་མིད༌ཡཱན་གྱི་དམག་སྒར་དུ་གྲིལ་འོང་ཞིང་། གུར་གྱི་རྩར་སླེབས་ནས་གུར་ལ་ཐོགས་ཏེ་བསྒྱེལ་བ་དང་གུར་གྱི་མགོ་རྟིང་བསློགས་ཞེས་པ་ལ།
JDG 7:14 གྲོགས་པོ་དེ་ན་རེ། འདི་ནི་གཞན་ཞིག་མ་ཡིན་པར་ཡེས་ར་ཨེལ་པ་ཡོ་ཨ་སིའི་བུ་གིད་ཡོན་གྱི་རལ་གྲི་ཡིན་ཏེ། དཀོན་མཆོག་གིས་མིད༌ཡཱན་དང་དམག་མི་ཡོངས་རྫོགས་ཁོའི་ལག་ཏུ་སྤྲད་པ་ཡིན་ཞེས་སྨྲས་སོ། །
JDG 7:15 གིད་ཡོན་གྱིས་རྨི་ལམ་དང་དེའི་དོན་འགྲེལ་ཐོས་ནས་དཀོན་མཆོག་ལ་བསྙེན་བཀུར་ཕུལ་ཞིང་། ཡེས་ར་ཨེལ་པའི་དམག་སྒར་དུ་ཕྱིར་ལོག་སྟེ་འདི་ལྟར། ཡར་ལོངས་དང་། དཀོན་མཆོག་ཡ་ཝཱེས་མིད༌ཡཱན་གྱི་དམག་དཔུང་ཁྱོད་རྣམས་ཀྱི་ལག་ཏུ་སྤྲད་ཟིན་ཞེས་སྨྲས་པའོ། །
JDG 7:16 དེ་ནས་གིད་ཡོན་གྱིས་མི་སུམ་བརྒྱ་ཁག་གསུམ་དུ་བགོས་ནས། མི་རེའི་ལག་ཏུ་རྭ་དུང་རེ་དང་རྫ་ཁོག་སྟོང་བ་རེ་སྤྲད་ཅིང་། རྫ་ཁོག་རེ་རེའི་ནང་དུ་དཔལ་འབར་རེ་བཞག་པ་དང་།
JDG 7:17 དེ་རྣམས་ལ་འདི་ལྟར་སྨྲས་པ་སྟེ། ཁྱོད་རྣམས་ཀྱིས་བདག་གིས་ཅི་བྱེད་པར་ལྟོས་ཤིག ངས་དམག་སྒར་གྱི་རྩར་སླེབས་ནས་ཅི་ལྟར་བྱས་ན་ཁྱོད་ཅག་གིས་ཀྱང་དེ་ལྟར་བྱོས་ཤིག
JDG 7:18 ང་དང་ངའི་རྗེས་སུ་འབྲངས་པ་ཐམས་ཅད་ཀྱིས་རྭ་དུང་འབུད་པའི་དུས་སུ། ཁྱོད་རྣམས་ཀྱིས་ཀྱང་དམག་སྒར་གྱི་ཕྱོགས་བཞི་རུ་རྭ་དུང་འབུད་པ་དང་། དཀོན་མཆོག་ཡ་ཝཱེ་དང་གིད་ཡོན་གྱི་ཕྱིར་ཞེས་འུར་རྒྱོབ་ཅིག་ཅེས་པའོ། །
JDG 7:19 གིད་ཡོན་དང་ཁོའི་རྗེས་སུ་འབྲངས་པའི་མི་བརྒྱ་བོ་དེ་མཚན་མོ་ཐུན་གཉིས་པའི་ཐོག་མར་སོ་སྲུང་བརྗེ་བའི་དུས་སུ་དམག་སྒར་གྱི་རྩར་སླེབས་ནས། རྭ་དུང་བུས་ཤིང་ལག་གི་རྫ་ཁོག་བཅག་གོ །
JDG 7:20 ཁག་གསུམ་པོས་རྭ་དུང་བུས་ཤིང་རྫ་ཁོག་བཅག གཡོན་ལག་ཏུ་དཔལ་འབར་ཐོགས་པ་དང་གཡས་ལག་ཏུ་རྭ་དུང་བཟུང་ནས། དཀོན་མཆོག་ཡ་ཝཱེ་དང་གིད་ཡོན་གྱི་རལ་གྲི་ཞེས་འུར་བརྒྱབ།
JDG 7:21 ཁོ་རྣམས་དམག་སྒར་གྱི་ཕྱོགས་བཞི་རུ་རང་རང་སར་ལངས་བསྡད་པ་ལ་སྒར་ཡོངས་ཀྱི་མི་ཐམས་ཅད་ཡར་རྒྱུག་མར་རྒྱུག་བྱས་ནས་འཁྲུག་ཅིང་། དེ་རྣམས་ཀི་འདེབས་བཞིན་བྲོས་སོ། །
JDG 7:22 མི་སུམ་བརྒྱ་དེས་རྭ་དུང་བུས་པ་དང་། དཀོན་མཆོག་ཡ་ཝཱེས་དམག་སྒར་གྱི་མི་ཐམས་ཅད་ལ་རལ་གྲིས་ཕན་ཚུན་སྣུན་པར་མཛད་ཅིང་། དེ་རྣམས་ཚེ་རེ་རཱ་ཞེས་པའི་པེད་ཤིད་ཏ་དང་། ཏབ་པཱད་ཉེ་འགྲམ་གྱི་ཨ་བེལ་མེ་ཧོ་ལཱའི་བར་དུ་བྲོས་སོ། །
JDG 7:23 དེ་ནས་ཡེས་ར་ཨེལ་པ་རྣམས་ནཱབ་ཐ་ལི་དང་ཨ་ཤེར་དང་། མཱ་ན་ཤེ་བཅས་ཀྱི་ཡུལ་ཐམས་ཅད་ནས་འདུས་ཏེ་མིད་ཡཱན་པ་རྣམས་ཀྱི་ར་མདར་བརྒྱུགས།
JDG 7:24 གིད་ཡོན་གྱིས་ཨེ་ཕཱར་ཡིམ་གྱི་རི་ཁུལ་ཐམས་ཅད་དུ་བང་ཆེན་མངགས་ནས་འདི་ལྟར། ཁྱོད་རྣམས་མར་ཤོག་ལ་མིད་ཡཱན་པར་རྒོལ་ཞིག དེ་དག་གི་སྔོན་ལ་པེད་པཱ་རའི་བར་དུ་ཡོར་དན་གཙང་པོའི་རབ་ཁ་སྲུངས་ཤིག་ཅེས་བསྒོས་པ་ལ། ཨེ་ཕཱར་ཡིམ་གྱི་མི་ཐམས་ཅད་འདུས་ནས་པེད་པཱ་རའི་བར་དུ་ཡོར་དན་གཙང་པོའི་རབ་ཁ་བསྲུངས་པ་དང་།
JDG 7:25 དེ་ཚོས་མིད་ཡཱན་པའི་འགོ་དཔོན་གཉིས་ཟིན་པ་སྟེ་གཅིག་གི་མིང་ལ་ཨོ་རེབ་ཅེས་དང་ཅིག་ཤོས་དེའི་མིང་ལ་ཟེབ་ཅེས་བྱ། ཨོ་རེབ་ནི་ཨོ་རེབ་ཀྱི་ཕ་བོང་སྟེང་དུ་བསད་ཅིང་། ཟེབ་ནི་ཟེབ་ཀྱི་རྒུན་འབྲུམ་འཚིར་གཞོང་ཡོད་སར་བསད་པ་དང་། ཡང་མིད་ཡཱན་པ་རྣམས་བདས་ནས། ཨོ་རེབ་དང་ཟེབ་གཉིས་ཀྱི་མགོ་བོ་ཡོར་དན་གཙང་པོའི་ཕ་རོལ་ཏུ་གིད་ཡོན་ཡོད་སར་ཁྱེར་ཏོ། །
JDG 8:1 དེར་ཨེ་ཕཱར་ཡིམ་པ་རྣམས་ཀྱིས་གིད་ཡོན་ལ་འདི་ལྟར། ཁྱོད་རང་མིད་ཡཱན་པ་རྣམས་ལ་འཐབ་འཛིང་བྱེད་དུ་འགྲོ་དུས་ངེད་ཅག་མ་བོས་ཤིང་། ངེད་ཅག་ལ་འདི་ལྟར་བྱེད་དོན་ཅི་ཞེས་སྨྲས་ནས། དེ་རྣམས་ཀྱིས་གིད་ཡོན་དང་ཁ་རྩོད་དྲག་པོ་བྱས།
JDG 8:2 གིད་ཡོན་གྱིས་དེ་རྣམས་ལ་འདི་ལྟར་སྨྲས་པ་སྟེ། བདག་གིས་ཅི་བྱས་པ་ནི་ཁྱོད་རྣམས་ཀྱིས་བྱས་པར་བསྡུར་ནུས་སམ། ཨེ་ཕཱར་ཡིམ་གྱིས་བཏུས་པའི་རྒུན་འབྲུམ་ལྷག་མ་དེ་ཨ་བི་ཨེ་ཟཱེར་གྱིས་བཏོགས་པའི་རྒུན་འབྲུམ་ལས་ལེགས་པ་མ་ཡིན་ནམ།
JDG 8:3 དཀོན་མཆོག་གིས་མིད་ཡཱན་པའི་འགོ་དཔོན་ཨོ་རེབ་དང་ཟེབ་གཉིས་ཁྱོད་ཅག་གི་ལག་ཏུ་སྤྲད་ཅིང་། བདག་གིས་ཅི་བྱས་པ་ནི་ཁྱོད་རྣམས་ཀྱིས་བྱས་པར་བསྡུར་ནུས་སམ་ཞེས་པའོ། །གིད་ཡོན་གྱིས་དེ་སྐད་སྨྲས་པ་དང་ཨེ་ཕཱར་ཡིམ་པ་རྣམས་ཀྱི་ཁོང་ཁྲོ་ཞི་བར་གྱུར་ཏོ། །
JDG 8:4 གིད་ཡོན་དང་ཁོའི་རྗེས་སུ་འབྲངས་པའི་མི་སུམ་བརྒྱ་བོ་ཡོར་དན་གཙང་པོར་སླེབས་ནས་དེ་བརྒལ་ཞིང་། ཐང་ཆད་ཀྱང་ད་དུང་ར་མདར་བརྒྱུགས།
JDG 8:5 གིད་ཡོན་གྱིས་སོའུ་ཀོད་པ་རྣམས་ལ་འདི་ལྟར་སྨྲས་པ་སྟེ། ངའི་རྗེས་སུ་འབྲངས་པ་རྣམས་ནི་ཐང་ཆད་པས་ཁྱེད་ཀྱིས་ཁོ་ཚོར་བག་ལེབ་གནང་རོགས་ཞུ། ངེད་རྣམས་མིད་ཡཱན་པའི་རྒྱལ་པོ་ཟེ་བཱ་དང་ཚལ་མུན་ནཱ་གཉིས་ཀའི་ར་མདར་རྒྱུག་གིན་ཡོད་ཅེས་པ་ལ།
JDG 8:6 སོའུ་ཀོད་པའི་འགོ་དཔོན་ན་རེ། ཟེ་བཱ་དང་ཚལ་མུན་ནཱ་གཉིས་ཁྱོད་ཀྱི་ལག་ཏུ་ཡོད་པས། ངེད་ཅག་གིས་ཁྱོད་ཀྱི་དམག་ལ་བག་ལེབ་སྟེར་དགོས་པ་ཡིན་ནམ་ཞེས་སྨྲས།
JDG 8:7 གིད་ཡོན་གྱིས་འདི་ལྟར་སྨྲས་པ་སྟེ། དཀོན་མཆོག་ཡ་ཝཱེས་ཟེ་བཱ་དང་ཚལ་མུན་ནཱ་གཉིས་ངའི་ལག་ཏུ་སྤྲད་རྗེས། བདག་གིས་ས་རྒོད་ཀྱི་སྡོང་ཕྲན་ཡལ་ག་དང་ཚེར་མས་ཁྱོད་རྣམས་རྨས་པར་བྱ་ཞེས་པའོ། །
JDG 8:8 གིད་ཡོན་ཡུལ་དེ་ནས་ཡར་ཕཱ་ནེ་ཨེལ་དུ་ཕྱིན་ཅིང་ཡུལ་དེའི་མི་རྣམས་ལའང་དེ་བཞིན་སྨྲས་པ་ལ། ཕཱ་ནེ་ཨེལ་པ་རྣམས་ཀྱིས་ཀྱང་སོའུ་ཀོད་པ་རྣམས་ཀྱིས་ཁོ་ལ་ཇི་ལྟར་ལན་བཏབ་པ་བཞིན་དུ་སྨྲས།
JDG 8:9 ཁོས་ཕཱ་ནེ་ཨེལ་པ་རྣམས་ལ་འདི་ལྟར་སྨྲས་པ་སྟེ། ང་རང་བདེ་བར་ཕྱིར་ལོག་པའི་དུས་སུ། ངས་ལྕོག་མཁར་འདི་བཤིག་པར་བྱ་ཞེས་པའོ། །
JDG 8:10 དེའི་དུས་སུ་ཟེ་བཱ་དང་ཚལ་མུན་ནཱ་གཉིས་ཁོ་ཚོའི་རྗེས་སུ་འབྲངས་པའི་དམག་དཔུང་དང་བཅས་ཐམས་ཅད་ཁ་གོར་དུ་གནས་ཤིང་། ཧ་ལམ་མི་ཆིག་ཁྲི་ལྔ་སྟོང་ཙམ་ཡོད་དེ། ཤར་ཕྱོགས་པའི་དམག་མི་ཡོངས་རྫོགས་ལས་ལུས་པའི་གྲངས་ཀ་ཡིན་ལ། རལ་གྲི་ཐོགས་མཁན་ཧ་ལམ་ཁྲི་བཅུ་གཉིས་བསད་པའོ། །
JDG 8:11 དེ་ནས་གིད་ཡོན་ནི་ནོ་བ་དང་ཡོག་པེ་ཧ་ཡི་ཤར་ཕྱོགས་ནས། གུར་དུ་སྡོད་པ་རྣམས་ཀྱི་ལམ་ཁ་ནས་ཡར་ཕྱིན་ཏེ། མིད་ཡཱན་པའི་དམག་དཔུང་འཇིགས་སྣང་གང་ཡང་མེད་པར་གནས་པས། ཁོས་དེ་རྣམས་ཕམ་པར་བརྒྱབ།
JDG 8:12 ཟེ་བཱ་དང་ཚལ་མུན་ནཱ་གཉིས་བྲོས་ཤིང་། གིད་ཡོན་གྱིས་ཁོ་གཉིས་བདས་ནས། མིད༌ཡཱན་གྱི་རྒྱལ་པོ་ཟེ་བཱ་དང་ཚལ་མུན་ནཱ་གཉིས་བཟུང་ཞིང་། དམག་མི་ཡོངས་རྫོགས་འཇིགས་ནས་འཐོར་དུ་བཅུག
JDG 8:13 ཡོ་ཨ་སིའི་བུ་གིད་ཡོན་ནི་ཧེ་རེ་སི་སྒང་བརྒྱུད་དེ་གཡུལ་ལས་ཕྱིར་ལོག་ཅིང་།
JDG 8:14 སོའུ་ཀོད་པའི་གཞོན་ནུ་ཞིག་བཟུང་སྟེ་ཁོ་ལ་འདི་ལྟར། སོའུ་ཀོད་ཀྱི་འགོ་དཔོན་དང་རྒན་པོ་རྣམས་ནི་སུ་ཡིན་ཞེས་དྲིས་པ་ན། དེས་འགོ་དཔོན་དང་རྒན་པོ་མི་དོན་བདུན་གྱི་མིང་རྣམས་བྲིས།
JDG 8:15 དེ་ནས་གིད་ཡོན་ནི་སོའུ་ཀོད་དུ་སླེབས་ཤིང་དེའི་མི་རྣམས་ལ་འདི་ལྟར། སྔར་ཁྱོད་རྣམས་ཀྱིས་བདག་ལ་འཕྱ་སྨོད་བྱེད་ཀྱིན། ཟེ་བཱ་དང་ཚལ་མུན་ནཱ་གཉིས་ཁྱོད་ཀྱི་ལག་ཏུ་ཡོད་པས། ངེད་ཅག་གིས་ཁྱོད་ཀྱི་རྗེས་སུ་འབྲངས་པའི་ཐང་ཆད་པའི་མི་རྣམས་ལ་བག་ལེབ་སྟེར་དགོས་པ་ཡིན་ནམ་ཞེས་པ་དང་། ད་ནི་ཟེ་བཱ་དང་ཚལ་མུན་ནཱ་གཉིས་འདི་རུ་ཡོད་ཅེས་སྨྲས་ཤིང་།
JDG 8:16 དེ་ནས་དེས་གྲོང་ཁྱེར་དེའི་རྒན་པོ་རྣམས་བཟུང་བ་དང་། ས་རྒོད་ཀྱི་སྡོང་ཕྲན་ཡལ་ག་དང་ཚེར་མས་སོའུ་ཀོད་པ་རྣམས་ལ་ཉེས་རྡུང་བཏང་ངོ་། །
JDG 8:17 ཡང་ཕཱ་ནེ་ཨེལ་གྱི་ལྕོག་མཁར་བཤིག་ནས་གྲོང་ཁྱེར་དེའི་སྐྱེས་པ་རྣམས་བསད་དོ། །
JDG 8:18 དེར་གིད་ཡོན་གྱིས་ཟེ་བཱ་དང་ཚལ་མུན་ནཱ་གཉིས་ལ་འདི་ལྟར། ཁྱོད་ཅག་གིས་ཐ་པོར་རི་བོར་བསད་པའི་མི་ནི་ཅི་འདྲ་འདུག་ཅེས་དྲིས་པ་ལ། ལན་དུ། ཁོ་རྣམས་ཁྱེད་དང་མཚུངས་ཤིང་རེ་རེ་རྒྱལ་སྲས་ལྟ་བུ་འདུག་ཅེས་སྨྲས་པ་དང་།
JDG 8:19 ཡང་གིད་ཡོན་ན་རེ། ཁོ་རྣམས་ནི་ངའི་མ་གཅིག་གི་སྤུན་ཡིན། བདག་གིས་རྒྱུན་ནས་རྒྱུན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་སྟེ། གལ་ཏེ་ཁྱོད་ཅག་གིས་སྔར་ཁོ་རྣམས་ཀྱི་སྲོག་བསྐྱུར་བ་ཡིན་ན། བདག་གིས་ད་ལྟ་ཁྱོད་ཅག་གསོད་པ་མིན་ཞེས་སྨྲས་ཤིང་།
JDG 8:20 ཁོའི་བུ་སྐྱེས་འགོ་ཡེ་ཐེར་ལ། ཁྱོད་ཡར་ལོངས་ལ་ཁོ་རྣམས་སོད་ཅིག་ཅེས་སྨྲས་ནའང་། ཡེ་ཐེར་ནི་ད་དུང་བྱིས་པ་ཡིན་པས་འཇིགས་ནས་རལ་གྲི་ཕྱུང་མ་ཕོད།
JDG 8:21 ཟེ་བཱ་དང་ཚལ་མུན་ནཱ་གཉིས་ན་རེ། ཁྱོད་རང་ཉིད་ལོངས་ལ་ངེད་གཉིས་སོད་ཅིག ཅི་ལ་ཞེ་ན། མི་ཅི་ལྟ་བུ་ཡིན་ན་སྟོབས་ཀྱང་དེ་ལྟར་ཡིན་ཞེས་སྨྲས་པ་དང་། གིད་ཡོན་ཡར་ལངས་ཏེ་ཟེ་བཱ་དང་ཚལ་མུན་ནཱ་གཉིས་བསད་ཅིང་། ཁོ་ཚོའི་རྔ་མོང་རྣམས་ཀྱི་མཇིང་གི་རྒྱན་ཆ་རྣམས་བླངས་སོ། །
JDG 8:22 ཡེས་ར་ཨེལ་པ་རྣམས་ཀྱིས་གིད་ཡོན་ལ། ཁྱེད་ཀྱིས་བདག་ཅག་མིད་ཡཱན་པའི་ལག་ནས་བསྐྱབས་ཏེ་ཐར་དུ་བཅུག་པས། ཁྱེད་དང་ཁྱེད་ཀྱི་བུ་རབས་ཚ་རྒྱུད་ཀྱིས་ངེད་རྣམས་ལ་དབང་སྒྱུར་ཅིག་ཅེས་སྨྲས་པ་ལ།
JDG 8:23 གིད་ཡོན་གྱིས་འདི་ལྟར་སྨྲས་པ་སྟེ། བདག་གིས་ཁྱོད་རྣམས་ལ་དབང་སྒྱུར་བར་མི་བྱ་ཞིང་། བདག་གི་བུ་ཡིས་ཀྱང་ཁྱོད་རྣམས་ལ་དབང་སྒྱུར་བར་མི་བྱ་སྟེ། དཀོན་མཆོག་ཡ་ཝཱེ་གཅིག་པུས་ཁྱོད་རྣམས་ལ་དབང་སྒྱུར་བར་འགྱུར་ཞེས་པ་དང་།
JDG 8:24 ཡང་གིད་ཡོན་གྱིས་དེ་རྣམས་ལ་འདི་ལྟར་སྨྲས་པ་སྟེ། བདག་ལ་ཁྱོད་ཅག་ལ་ཞུ་བའི་དོན་ཞིག་ཡོད་དེ། ཁྱོད་རྣམས་མི་རེ་རེས་ཕྲོགས་འོངས་པའི་རྣ་ཏོག་རྣམས་ང་ལ་སྟེར་རོགས་ཞེས་པ་ན། ༼མ་གཞི་དགྲ་བོ་ནི་ཡེས་མ་ཨེལ་པ་ཡིན་ཞིང་ཀུན་པོས་གསེར་གྱི་རྣ་ཏོག་འདོགས་པ་ཡིན་ནོ། །༽
JDG 8:25 ཡེས་ར་ཨེལ་པ་རྣམས་ཀྱིས་ངེད་ཅག་ཁྱོད་ལ་སྟེར་བར་མོས་པ་ཡིན་ཞེས་སྨྲས་ཤིང་། ཕྱི་གོས་ཤིག་བཏིངས་ནས་མི་རེ་རེས་ཕྲོགས་འོངས་པའི་རྣ་ཏོག་དེའི་སྟེང་དུ་འཕངས་སོ། །
JDG 8:26 གིད་ཡོན་ལ་ཐོབ་པའི་གསེར་གྱི་རྣ་ཏོག་རྣམས་གྱི་ལྗིད་ཚད་ནི་སྲང་ཆིག་སྟོང་བདུན་བརྒྱ་ཡིན་པ་དང་། དེ་མིན་ད་དུང་མིད༌ཡཱན་རྒྱལ་པོ་རྣམས་ཀྱིས་བཏགས་པའི་རྒྱན་ཆ་དང་རྣ་ཏོག གྱོན་པའི་གོས་རྒྱ་སྨུག ད་དུང་རྔ་མོང་མཇིང་གི་གསེར་ཐག་བཅས་ཡོད་དོ། །
JDG 8:27 གིད་ཡོན་གྱིས་བེར་ཐུལ་ཞིག་བཟོས་ནས་རང་གི་གྲོང་ཁྱེར་ཨོབ་རཱ་རུ་བསླངས་ཏེ། ཕྱིས་སུ་ཡེས་ར་ཨེལ་པ་རྣམས་ཀྱིས་བེར་ཐུལ་དེ་ལ་ཕྱག་བཙལ་ནས་ལོག་གཡེམ་བྱས་པས། དེ་ནི་གིད་ཡོན་དང་ཁོའི་ཁྱིམ་རྒྱུད་ཀྱི་རྙི་རུ་གྱུར་ཏོ། །
JDG 8:28 དེ་བཞིན་མིད་ཡཱན་པ་རྣམས་ཡེས་ར་ཨེལ་པ་རྣམས་ཀྱི་མདུན་ནས་བཏུལ་ཞིང་མགོ་ཡར་འདེགས་མ་ཕོད་ལ། གིད་ཡོན་གསོན་པའི་དུས་སུ་བགྲང་བྱ་བཞི་བཅུའི་རིང་ལ་ཡུལ་དེ་བདེ་བར་གནས་སོ། །
JDG 8:29 ཡོ་ཨ་སིའི་བུ་ཡེ་རུབ་པཱ་ཨལ་ཕྱིར་སོང་ནས་རང་གི་ཁྱིམ་དུ་གནས།
JDG 8:30 གིད་ཡོན་ལ་ཆུང་མ་མང་པོ་ཡོད་པས་རང་སྐྱེས་ཀྱི་བུ་བདུན་ཅུ་ཡོད་དོ། །
JDG 8:31 ཁོའི་ཆུན་མ་སི་ཀེམ་དུ་གནས་ཤིང་དེ་ལས་ཀྱང་བུ་ཞིག་སྐྱེས་པ་ལ། གིད་ཡོན་གྱིས་བུ་དེའི་མིང་ལ་ཨ་བི་མེ་ལེག་ཅེས་བཏགས་སོ། །
JDG 8:32 ཡོ་ཨ་སིའི་བུ་གིད་ཡོན་ལོ་ན་རྒས་ཏེ་ཚེ་ལས་འདས་ཤིང་། ཨ་བི་ཨེ་ཟེར་པ་རྣམས་ཀྱི་ཨོབ་རཱ་ཞེས་པའི་ཡུལ་དུ། རང་གི་ཕ་ཡོ་ཨ་སིའི་དུར་དུ་སྦས་སོ། །
JDG 8:33 གིད་ཡོན་ཚེ་ལས་འདས་རྗེས། ཡེས་ར་ཨེལ་པ་རྣམས་ཀྱིས་ཡང་བསྐྱར་པཱ་ཨལ་རྣམས་ཀྱི་རྗེས་སུ་འབྲངས་ཏེ་ལོག་གཡེམ་བྱས་ཤིང་། པཱ་ཨལ་པེ་རིད་རང་གི་ལྷ་ཞིག་ཏུ་བཀུར།
JDG 8:34 ཡེས་ར་ཨེལ་པ་རྣམས་ཀྱིས་ཁོ་རྣམས་ཕྱོགས་བཞིའི་དགྲ་བོ་ཐམས་ཅད་ཀྱི་ལག་ནས་ཐར་བར་མཛད་མཁན་ཏེ། ཁོ་ཚོའི་དཀོན་མཆོག་ཡ་ཝཱེ་མ་དྲན་ལ།
JDG 8:35 ཡང་ཡེ་རུབ་པཱ་ཨལ་ཞེས་བྱ་བའི་གིད་ཡོན་གྱིས་ཁོ་རྣམས་ལ་བྱས་པའི་ལས་བཟང་པོ་ཐམས་ཅད་བཞིན། དེའི་ཁྱིམ་རྒྱུད་དྲིན་གྱིས་མ་བསྐྱངས་སོ། །
JDG 9:1 དེ་ནས་ཡེ་རུབ་པཱ་ཨལ་གྱི་བུ་ཨ་བི་མེ་ལེག་ཅེས་བྱ་བ་སི་ཀེམ་ཡུལ་གྱི་རང་གི་ཨ་ཞང་རྣམས་ཀྱི་རྩར་ཕྱིན་ཏེ། དེ་དག་དང་ཁོའི་ཨ་མའི་ཁྱིམ་རྒྱུད་ལ་འདི་ལྟར་སྨྲས་པ་སྟེ།
JDG 9:2 ཁྱོད་རྣམས་ཀྱིས་སི་ཀེམ་གྱི་འགོ་དཔོན་ཀུན་ལ། ཡེ་རུབ་པཱ་ཨལ་གྱི་བུ་བདུན་ཅུ་བོ་ཚང་མས་ཁྱོད་རྣམས་ལ་དབང་བསྒྱུར་ན་བཟང་ངམ། ཡང་ན་མི་གཅིག་གིས་ཁྱོད་རྣམས་ལ་དབང་བསྒྱུར་ན་བཟང་། ཡང་ང་རང་ཁྱོད་རྣམས་ཀྱི་ཤ་དང་རུས་པའི་གཉེན་ཉེ་ཡིན་པ་ཡིད་ལ་དྲན་དགོས་ཞེས་ཞུ་བར་མཛོད་ཅེས་པ་ལ།
JDG 9:3 ཁོའི་ཨ་ཞང་རྣམས་ཀྱིས་ཁོའི་དོན་དུ་གཏམ་འདི་ཐམས་ཅད་སི་ཀེམ་པ་རྣམས་ལ་སྨྲས་པ་དང་། དེ་དག་གི་སེམས་ནི་ཨ་བི་མེ་ལེག་གི་ཕྱོགས་སུ་འཁོར་ཞིང་། ཁོ་ནི་མ་གཞི་བདག་ཅག་གི་སྤུན་ཡིན་ཞེས་སྨྲས་ནས།
JDG 9:4 དེ་ཚོས་པཱ་ཨལ་པེ་རིད་ཀྱི་མཆོད་ཁང་ནས་དངུལ་སྲང་བདུན་ཅུ་བླངས་ནས་ཨ་བི་མེ་ལེག་ལ་སྤྲད་ཅིང་། ཨ་བི་མེ་ལེག་གིས་དངུལ་དེ་ཡིས་རང་གི་རྗེས་སུ་འབྲང་བའི་ཁྲམ་པ་ཇག་རྐུན་སྐོར་ཞིག་གླས་པའོ། །
JDG 9:5 དེ་ནས་ཁོ་ཨོབ་རཱ་རུ་རང་གི་ཕ་ཡི་ཁྱིམ་དུ་ཕྱིན་ཅིང་། ཁོའི་སྤུན་རྣམས་ཏེ་ཡེ་རུབ་པཱ་ཨལ་གྱི་བུ་བདུན་ཅུ་བོ་ཕ་བོང་གཅིག་གི་སྟེང་བསད་པ་དང་། ཡེ་རུབ་པཱ་ཨལ་གྱི་བུ་ཆུང་བ་ཡོ་ཐམ་ནི་སྦས་བསྡད་པས་དེ་ཁོ་ན་ལུས་སོ། །
JDG 9:6 སི་ཀེམ་པ་དང་པེད་མིལ་ལོས་ཀྱི་མི་རྣམས་མཉམ་དུ་འཛོམས་ཤིང་། སི་ཀེམ་གྱི་བེ་ཤིང་གི་ཀ་བ་ཡོད་སར་ཕྱིན་ཏེ་ཨ་བི་མེ་ལེག་རྒྱལ་པོར་བསྐོས་སོ། །
JDG 9:7 མི་ཞིག་གིས་དོན་དེ་ཡོ་ཐམ་ལ་སྨྲས་པས་ཁོ་རང་གེ་རི་ཟིམ་རི་མགོར་སོང་སྟེ་སྐད་ཆེན་པོས་འདི་ལྟར་སྨྲས་པ་སྟེ། ཀྱེ་སི་ཀེམ་པ་རྣམས། དཀོན་མཆོག་གིས་ཁྱོད་ཅག་ལ་གསན་པའི་ཕྱིར་བདག་ལ་ཉོན་ཅིག
JDG 9:8 དུས་ནམ་ཞིག་གི་ཚེ་ལྗོན་ཤིང་རྣམས་ཀྱིས་ལྗོན་ཤིང་གཅིག་རྒྱལ་པོར་བསྐོས་ནས། ཁོ་རྣམས་ལ་བདག་སྐྱོང་བྱེད་དུ་འཇུག་དགོས་འདོད་དེ། སོང་ནས་སྐྱུ་རུ་ཤིང་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།
JDG 9:9 སྐྱུ་རུ་ཤིང་ན་རེ། བདག་གིས་ལྷ་ལ་བསྙེན་བཀུར་འབུལ་བ་དང་མི་རྣམས་ལ་བཀུར་བྱེད་ཀྱི་སྣུམ་བསྐྱུར་ཏེ། ལྗོན་ཤིང་རྣམས་ཀྱི་རྩེ་མོར་གཡོ་རུང་ངམ་ཞེས་སྨྲས།
JDG 9:10 དེ་ནས་ལྗོན་ཤིང་རྣམས་ཀྱིས་སེ་ཡབ་ཤིང་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།
JDG 9:11 སེ་ཡབ་ཤིང་ན་རེ། བདག་གིས་ཞིམ་མངར་ལྡན་པའི་འབྲས་བུ་བསྐྱེད་པ་སྤངས་ནས་ལྗོན་ཤིང་རྣམས་ཀྱི་རྩེ་མོར་གཡོ་རུང་ངམ་ཞེས་སྨྲས།
JDG 9:12 དེ་ནས་ལྗོན་ཤིང་རྣམས་ཀྱིས་རྒུན་འབྲུམ་ཤིང་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།
JDG 9:13 རྒུན་འབྲུམ་ཤིང་ན་རེ། བདག་གིས་ལྷ་དང་མི་རྣམས་སྤྲོ་བར་བྱེད་པའི་རྒུན་ཆང་གསར་པ་བསྐྱུར་ནས། ལྗོན་ཤིང་རྣམས་ཀྱི་རྩེ་མོར་གཡོ་རུང་ངམ་ཞེས་སྨྲས།
JDG 9:14 དེ་ནས་ལྗོན་ཤིང་རྣམས་ཀྱིས་ཚེར་མ་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།
JDG 9:15 ཚེར་མ་ན་རེ། གལ་ཏེ་ཁྱོད་རྣམས་ཀྱིས་བསམ་པ་རྣམ་དག་གིས་ང་རང་རྒྱལ་པོར་བསྐོས་པ་ཡིན་ན། བདག་གི་གྲིབ་བསིལ་འོག་ཏུ་སྡོད་དགོས། དེ་ལྟར་མིན་ཚེ། ཚེར་མ་ལས་མེ་ཐོན་ཏེ་ལེ་པཱ་ནོན་གྱི་ཐང་ཤིང་རྣམས་འགེམ་པར་ཤོག་ཅེས་སྨྲས་སོ། །
JDG 9:16 ད་ལྟ་ཁྱོད་ཅག་གིས་གཞུང་དྲང་ཟོལ་མེད་ཀྱིས་ཨ་བི་མེ་ལེག་རྒྱལ་པོར་བསྐོས་ཤིང་། གལ་ཏེ་ཡེ་རུབ་པཱ་ཨལ་དང་ཁོའི་ཁྱིམ་རྒྱུད་ལ་བཟང་པོ་བྱས་ཏེ། ཁོ་ཡི་ལག་པས་བཟོས་པ་ལྟར་དེ་ལ་དྲིན་ལན་འཇལ་ན།
JDG 9:17 སྔར་བདག་གི་ཡབ་ཀྱིས་རང་སྲོག་འབེན་ལ་བཞག་ནས་ཁྱོད་ཚོའི་དོན་དུ་འཐབ་ཅིང་། ཁྱོད་རྣམས་བསྐྱབས་ཏེ་མིད་ཡཱན་པའི་ལག་ནས་ཐར་དུ་བཅུག
JDG 9:18 ཡིན་ནའང་ད་ལྟ་ཁྱོད་ཅག་ལངས་ཏེ་ངའི་ཕ་ཡི་ཁྱིམ་རྒྱུད་ལ་རྒོལ་ཞིང་། ཁོའི་བུ་བདུན་ཅུ་བོ་ཕ་བོང་གཅིག་གི་སྟེང་དུ་བསད་པ་དང་། ཡང་ཁོའི་གཡོག་མོ་ལས་སྐྱེས་པའི་བུ་སྟེ་ཨ་བི་མེ་ལེག་ནི་སི་ཀེམ་པའི་རྒྱལ་པོར་བསྐོས་པ་དང་། མ་གཞི་དེ་ནི་ཁྱོད་ཅག་གི་སྤུན་ཡིན་པའོ། །
JDG 9:19 གལ་ཏེ་ཁྱོད་རྣམས་ཀྱིས་ད་ལྟ་ཡེ་རུབ་པཱ་ཨལ་དང་ཁོའི་ཁྱིམ་རྒྱུད་ལ་གཞུང་དྲང་ཟོལ་མེད་ཀྱི་སྤྱོད་སྟངས་འཛིན་ན། ཁྱོད་རྣམས་ཨ་བི་མེ་ལེག་གི་རྐྱེན་གྱིས་དགའ་བར་གྱིས། ཁོ་ཡང་ཁྱོད་རྣམས་ཀྱི་རྐྱེན་གྱིས་སྤྲོ་བར་གྱུར་ཅིག
JDG 9:20 དེ་ལྟར་མིན་ཚེ། ཨ་བི་མེ་ལེག་ནས་མེ་ཞིག་ཐོན་ཏེ་སི་ཀེམ་པ་དང་པེད་མིལ་ལོས་ཀྱི་མི་ཐམས་ཅད་འགེམ་པ་དང་། ཡང་སི་ཀེམ་པ་དང་པེད་མིལ་ལོས་ཀྱི་མི་རྣམས་ལས་མེ་ཞིག་ཐོན་ཏེ་ཨ་བི་མེ་ལེག་འགེམ་པར་གྱུར་ཅིག་ཅེས་པའོ། །
JDG 9:21 ཡོ་ཐམ་ནི་ཁོའི་སྤུན་ཨ་བི་མེ་ལེག་ལ་འཇིགས་ནས་བྲོས་ཤིང་པེར་དུ་སོང་སྟེ་དེར་བསྡད་དོ། །
JDG 9:22 ཨ་བི་མེ་ལེག་གིས་ལོ་གསུམ་གྱི་རིང་ཡེས་ར་ཨེལ་པ་རྣམས་ལ་དབང་བསྒྱུར་ཏོ། །
JDG 9:23 དཀོན་མཆོག་གིས་ཨ་བི་མེ་ལེག་དང་སི་ཀེམ་པའི་བར་ལ་གདོན་འདྲེ་ཞིག་མངགས་པས། སི་ཀེམ་པ་རྣམས་ཀྱིས་ཨ་བི་མེ་ལེག་ལ་གཡོ་སྒྱུ་ཁྲམ་གསུམ་བྱས།
JDG 9:24 ཅི་ལ་ཞེ་ན། ཡེ་རུབ་པཱ་ཨལ་གྱི་བུ་བདུན་ཅུ་བོར་ཐེབས་པའི་གནོད་འཚེ་ཡི་ལན་དེ་ཁོ་རྣམས་ཀྱི་གཅེན་པོ་ཨ་བི་མེ་ལེག་གི་སྟེང་དུ་འབེབ་པ་དང་། ཡང་ཁོ་རྣམས་ཀྱི་ཁྲག་བཞུར་བའི་སྡིག་པ་དེ་ཨ་བི་མེ་ལེག་ལ་རོགས་བྱས་ནས་སྤུན་ཟླ་རྣམས་གསོད་པའི་སི་ཀེམ་པ་རྣམས་ཀྱི་སྟེང་དུ་འབེབ་པའི་ཕྱིར་རོ། །
JDG 9:25 སི་ཀེམ་གྱི་འགོ་དཔོན་རྣམས་ཀྱིས་མི་མངགས་ནས་རི་མགོར་འཇབས་ཤིང་ཨ་བི་མེ་ལེག་ལ་བསྒུགས་པ་དང་། ཁོ་རྣམས་ཡོད་སར་བརྒྱུད་ནས་འགྲོ་མཁན་ཐམས་ཅད་ལ་འཕྲོག་བཅོམ་བྱས་པ་ལ། མི་ཞིག་གིས་དོན་དེ་ཨ་བི་མེ་ལེག་ལ་སྨྲས།
JDG 9:26 ཡང་ཨེ་བེད་ཀྱི་བུ་གཱ་ཨལ་དང་དེའི་སྤུན་རྣམས་སི་ཀེམ་ཡུལ་དུ་སླེབས་པ་དང་། སི་ཀེམ་པ་རྣམས་ཀྱིས་ཁོ་རང་ལ་བློ་གཏད་དོ། །
JDG 9:27 དེ་ནས་སི་ཀེམ་པ་རྣམས་ཞིང་ཁར་སོང་སྟེ་རྒུན་འབྲུམ་ར་བ་ནས་རྒུན་འབྲུམ་བཏོགས་ཏེ་རྒུན་ཆང་བཙིར་ཞིང་གསོལ་སྟོན་བཤམས་པ་དང་། དེ་དག་རང་གི་ལྷ་ཁང་དུ་སོང་ནས་བཟའ་བཏུང་ལོངས་སུ་སྤྱད་ཅིང་ཨ་བི་མེ་ལེག་ལ་དམོད་མོ་བྱས།
JDG 9:28 དེ་ནས་ཨེ་བེད་ཀྱི་བུ་གཱ་ཨལ་ན་རེ། ཨ་བི་མེ་ལེག་ནི་སུ་ཡིན་ནམ། སི་ཀེམ་པ་ནི་སུ་ཡིན་ནམ། བདག་ཅག་གིས་ཁོ་ལ་ཞབས་ཕྱི་བསྒྲུབ་དགོས་དོན་ཅི། ཁོ་ནི་ཡེ་རུབ་པཱ་ཨལ་གྱི་བུ་མ་ཡིན་ནམ། ཟེ་བུལ་ནི་ཁོའི་ལག་རོགས་མ་ཡིན་ནམ། ཁྱོད་རྣམས་ཀྱིས་སི་ཀེམ་གྱི་ཕ་སྟེ་ཧ་མོར་གྱི་བུ་རྒྱུད་ལ་ཞབས་ཕྱི་བསྒྲུབ་ཆོག་ལ། བདག་ཅག་གིས་ཨ་བི་མེ་ལེག་ལ་ཞབས་ཕྱི་བསྒྲུབ་དགོས་དོན་ཅི་ཡོད།
JDG 9:29 མི་འདི་རྣམས་ངའི་དབང་འོག་ཏུ་ཡོད་པ་ཡིན་ན་བདག་གིས་ཨ་བི་མེ་ལེག་མེད་པར་བཟོ་བ་ཡིན་ཞེས་སྨྲས་པ་དང་། ཡང་གཱ་ཨལ་གྱིས་ཨ་བི་མེ་ལེག་ལ་འདི་ལྟར་སྨྲས་པ་སྟེ། ཁྱོད་ཀྱི་དམག་མི་ཇེ་མང་དུ་བཏང་ནས་ཕྱི་རུ་ཤོག་ཅིག་ཅེས་པ་དེ་ཡིན།
JDG 9:30 གྲོང་ཁྱེར་གྱི་འགོ་དཔོན་ཟེ་བུལ་གྱིས་ཨེ་བེད་ཀྱི་བུ་གཱ་ཨལ་གྱི་གཏམ་ཐོས་པ་དང་ཤིན་ཏུ་ཁྲོས་ཤིང་།
JDG 9:31 ལྐོག་ནས་ཨ་བི་མེ་ལེག་གི་རྩར་ཕོ་ཉ་མངགས་ཏེ་ན་རེ། ཨེ་བེད་ཀྱི་བུ་གཱ་ཨལ་དང་ཁོའི་སྤུན་རྣམས་སི་ཀེམ་དུ་སླེབས་ཤིང་། གྲོང་ཁྱེར་གྱི་མི་རྣམས་ལ་ཁྱོད་ལ་རྒོལ་བར་ངན་སྐུལ་བྱེད་ཀྱིན་ཡོད།
JDG 9:32 ད་ནི་ཁྱོད་དང་ཁྱོད་ཀྱི་རྗེས་འབྲང་བ་རྣམས་ཀྱིས་དོ་དགོང་ལོངས་ལ་ཞིང་ཁར་འཇབ་སྒུག་བྱོས་ཤིག
JDG 9:33 ཞོགས་པར་ཉི་རྩེ་བརྒྱབ་མ་ཐག་ཁྱོད་རང་ལངས་ནས་གྲོང་ཁྱེར་ནང་རྒྱུགས་ཤིག ལྟོས་དང་། གཱ་ཨལ་དང་ཁོའི་རྗེས་སུ་འབྲངས་པ་རྣམས་ཕྱི་རུ་ཐོན་ནས་ཁྱོད་ལ་རྒོལ་བའི་དུས་སུ། ཁྱོད་ཀྱིས་ཁོ་རྣམས་ལ་ཅི་བྱེད་ནུས་ན་དེ་ལྟར་བྱོས་ཤིག་ཅེས་སྨྲས་པ་ལ།
JDG 9:34 ཨ་བི་མེ་ལེག་དང་ཁོའི་རྗེས་འབྲང་བ་རྣམས་མཚན་མོར་ལངས་ཏེ་ཁག་བཞི་རུ་བགོས་ཤིང་། སི་ཀེམ་པ་རྣམས་ལ་འཇབ་སྒུག་བྱས།
JDG 9:35 ཨེ་བེད་ཀྱི་བུ་གཱ་ཨལ་ཕྱི་རུ་ཐོན་ནས་མཁར་སྒོ་རུ་ལངས་བསྡད་པ་ལ། ཨ་བི་མེ་ལེག་དང་ཁོའི་རྗེས་སུ་འབྲངས་པ་རྣམས་འཇབ་སྒུག་བྱེད་ས་ནས་ལངས།
JDG 9:36 གཱ་ཨལ་གྱིས་མི་དེ་རྣམས་མཐོང་བ་དང་ཟེ་བུལ་ལ་འདི་ལྟར་སྨྲས་པ་སྟེ། ལྟོས་དང་། མི་རྣམས་རི་མགོ་ནས་མར་ཡོང་བཞིན་ཡོད་ཅེས་པ་ལ། ཟེ་བུལ་ན་རེ། ཁྱོད་ཀྱིས་རི་བོའི་གྲིབ་གཟུགས་མཐོང་ནས་མི་ཡིན་པར་སྙམ་པ་རེད་ཅེས་སྨྲས།
JDG 9:37 ཡང་གཱ་ཨལ་གྱིས་འདི་ལྟར་སྨྲས་པ་སྟེ། ལྟོས་དང་། མི་རྣམས་མཐོ་ས་ནས་མར་ཡོང་བཞིན་ཡོད། ཡང་རུ་ཁག་གཅིག་ནི་མོ་པའི་བེ་ཤིང་གི་ཕྱོགས་ནས་ཡོང་བཞིན་གདའ་ཞེས་པ་ལ།
JDG 9:38 ཟེ་བུལ་ན་རེ། དེ་སྔར་ཁྱོད་ཀྱིས་ཨ་བི་མེ་ལེག་ནི་སུ་ཡིན་ནམ། བདག་ཅག་གིས་ཁོ་ལ་ཞབས་ཕྱི་བསྒྲུབ་དགོས་དོན་ཅི་ཞེས་སྨྲས་ཤིང་། ཁྱོད་ཀྱིས་ཁ་ཕོ་བྱེད་པ་དེ་གང་དུ་ཡོད་དམ། འདི་ནི་ཁྱོད་ཀྱིས་མཐོང་ཆུང་བྱེད་པའི་མི་རྣམས་མ་ཡིན་ནམ། ད་ནི་ཁྱོད་རང་ཕྱི་རུ་སོང་ནས་ཁོ་རྣམས་དང་འཐབ་འཛིང་བྱོས་ཤིག་ཅེས་སྨྲས་པ་ལ།
JDG 9:39 གཱ་ཨལ་གྱིས་སི་ཀེམ་པ་རྣམས་ཁྲིད་དེ་ཕྱི་རུ་སོང་ནས་ཨ་བི་མེ་ལེག་དང་འཐབ་འཛིང་བྱས།
JDG 9:40 ཨ་བི་མེ་ལེག་གིས་གཱ་ཨལ་བདས་པ་ལ། གཱ་ཨལ་ནི་ཁོའི་སྔུན་ནས་མཁར་སྒོའི་བར་དུ་བྲོས་ཤིང་མི་མང་པོ་རྨས་ཏེ་འགྱེལ་ནས་མཁར་སྒོ་རུ་སླེབས།
JDG 9:41 ཨ་བི་མེ་ལེག་ནི་ཨ་རུ་མཱ་ལ་གནས་པ་དང་། ཟེ་བུལ་གྱིས་གཱ་ཨལ་དང་དེའི་སྤུན་རྣམས་ཕྱིར་བསྐྲད་ཅིང་། ཁོ་རྣམས་སི་ཀེམ་ལ་སྡོད་དུ་མ་བཅུག་གོ །
JDG 9:42 དེའི་ཕྱི་ཉིན་མི་རྣམས་ཞིང་ཁར་སླེབས་པ་དང་། མི་ཞིག་གིས་ཨ་བི་མེ་ལེག་ལ་དོན་དེ་སྨྲས་པ་ན།
JDG 9:43 ཁོས་རང་གི་མི་རྣམས་ཁག་གསུམ་དུ་བགོས་ནས་ཞིང་ཁར་འཇབ་སྒུག་བྱས་ཤིང་། སི་ཀེམ་པ་རྣམས་གྲོང་ཁྱེར་ནས་ཕྱིར་ཐོན་པ་མཐོང་ནས་ལངས་ཏེ་ཁོ་རྣམས་དང་འཐབ་པ་ལ།
JDG 9:44 ཨ་བི་མེ་ལེག་དང་ཁོའི་རྗེས་སུ་འབྲངས་པའི་རུ་ཁག་མདུན་དུ་བརྒྱུགས་ནས་མཁར་སྒོ་རུ་ལངས་བསྡད་ཅིང་། གཞན་པའི་རུ་ཁག་གཉིས་ཞིང་ཁར་བརྒྱུགས་ནས་མི་རྣམས་ལ་འཐབ་པའོ། །
JDG 9:45 ཨ་བི་མེ་ལེག་གིས་ཉིན་གང་པོར་གྲོང་ཁྱེར་ལ་དམག་བརྒྱབ་ནས་གྲོང་ཁྱེར་ཕྲོགས་པ་དང་། དེའི་ནང་གི་མི་རྣམས་བསད་ཅིང་གྲོང་ཁྱེར་བཤིག་སྟེ་ཚྭ་གཏོར་བའོ། །
JDG 9:46 སི་ཀེམ་ལྕོག་མཁར་ནང་གི་མི་རྣམས་ཀྱིས་དེ་ཐོས་ནས་ལྷ་པེ་ཨེད་ཐུ་ཡི་ལྷ་ཁང་གི་ས་དོང་ནང་དུ་སྦས།
JDG 9:47 ཡང་མི་ཞིག་གིས་ཨ་བི་མེ་ལེག་ལ་འདི་ལྟར་སྨྲས་པ་སྟེ། སི་ཀེམ་ལྕོག་མཁར་ནང་གི་མི་རྣམས་ཕྱོགས་གཅིག་ཏུ་འཛོམས་འདུག་ཅེས་པས།
JDG 9:48 ཨ་བི་མེ་ལེག་དང་ཁོའི་རྗེས་སུ་འབྲངས་པའི་མི་ཐམས་ཅད་ཙལ་མོན་རི་བོར་འགོས་པ་དང་། ཨ་བི་མེ་ལེག་གིས་ལག་ལ་སྟ་རེ་བཟུང་སྟེ་ཡལ་ག་ཞིག་བཅད་ནས་ཕྲག་ལ་ཁུར་ཞིང་། རང་གི་རྗེས་སུ་འབྲངས་པའི་མི་རྣམས་ལ་འདི་ལྟར་སྨྲས་པ་སྟེ། ཁྱོད་རྣམས་ཀྱིས་བདག་གིས་ཅི་བྱེད་པ་མཐོང་བ་ཇི་བཞིན་མྱུར་བ་མྱུར་དུ་བྱོས་ཤིག་ཅེས་པ་ལ།
JDG 9:49 མི་རྣམས་ཀྱིས་སོ་སོར་ཡལ་ག་རེ་བཅད་ནས་ཨ་བི་མེ་ལེག་གི་རྗེས་སུ་འབྲངས་ཤིང་། ཡལ་ག་རྣམས་ས་དོང་གི་ཐོག་ཏུ་སྤུངས་ནས་ས་དོང་མེར་བསྲེགས་པ་ན། སི་ཀེམ་མཁར་གྱི་སྐྱེས་ཕོ་མོ་ཐམས་ཅད་ཤི་བ་དང་ཁྱོན་བསྡོམས་མི་ཆིག་སྟོང་ཙམ་ཡོད་དོ། །
JDG 9:50 དེ་ནས་ཨ་བི་མེ་ལེག་ནི་ཐེ་བེ་སི་ལ་ཕྱིན་ཏེ། དེའི་སྔུན་ནས་སྒར་བཏབ་ཅིང་གྲོང་ཁྱེར་ལ་དམག་བརྒྱབ་ནས་བླངས།
JDG 9:51 ཡང་གྲོང་ཁྱེར་ནང་དུ་ལྕོག་མཁར་བརྟན་པོ་ཞིག་ཡོད་ཅིང་། གྲོང་ཁྱེར་གྱི་སྐྱེས་ཕོ་མོ་ཐམས་ཅད་ལྕོག་མཁར་གྱི་ནང་དུ་བྲོས་ནས་སྒོ་བརྒྱབ་པ་དང་ལྕོག་མཁར་གྱི་ཀླད་ལ་བུད་དེ་བསྡད།
JDG 9:52 ཨ་བི་མེ་ལེག་ལྕོག་མཁར་གྱི་མདུན་དུ་སླེབས་ནས་འཐབ་ཅིང་མཁར་སྒོའི་ཉེ་སར་བཅར་ཏེ་མེས་བསྲེག་པར་བརྩམས་པ་ལ།
JDG 9:53 བུད་མེད་ཅིག་གིས་རང་ཐག་གི་རྡོ་ཞིག་ཨ་བི་མེ་ལེག་གི་མགོ་ལ་འཕངས་ཏེ་ཁོའི་ཀླད་རུས་གཏོར་བ་དང་།
JDG 9:54 ཁོས་རང་གི་མཚོན་ཆ་འཁུར་བའི་གཞོན་ནུ་མྱུར་དུ་བོས་ནས་དེ་ལ་འདི་ལྟར་སྨྲས་པ་སྟེ། མི་རྣམས་ཀྱིས་ང་ནི་བུད་མེད་ཅིག་གིས་བསད་པ་ཡིན་ཞེས་མི་གླེང་བའི་ཕྱིར། ཁྱོད་ཀྱིས་རལ་གྲི་བཏོན་ནས་ང་རང་སོད་ཅིག་ཅེས་པ་དང་། གཞོན་ནུ་ཡིས་ཁོ་ལ་རལ་གྲིས་བསྣུན་པས་ཁོ་ཚེ་ལས་འདས་སོ། །
JDG 9:55 དེ་ནས་ཡེས་ར་ཨེལ་པ་རྣམས་ཀྱིས་ཨ་བི་མེ་ལེག་ཚེ་ལས་འདས་པ་མཐོང་ནས་རང་རང་གི་གནས་སུ་ལོག་གོ །
JDG 9:56 དེ་བཞིན་དཀོན་མཆོག་གིས་ཨ་བི་མེ་ལེག་གིས་རང་གི་ཕ་ལ་བྱས་པའི་ལས་ངན་པ་སྟེ། སྤུན་བདུན་ཅུ་བོ་བསད་པའི་ངན་ལ་ངན་ལན་འཇལ།
JDG 9:57 སི་ཀེམ་པའི་ལས་ངན་པ་ཐམས་ཅད་ལའང་དཀོན་མཆོག་གིས་ངན་ལན་འཇལ་ཞིང་། ཡེ་རུབ་པཱ་ཨལ་གྱི་བུ་ཡོ་ཐམ་གྱི་དམོད་མོ་རྣམས་དེ་དག་གི་སྟེང་དུ་བབས་པའོ། །
JDG 10:1 དེ་ཡང་ཨ་བི་མེ་ལེག་གི་རྗེས་སུ། ཡེས་སི་ཀཱར་པ་དོ་དོ་ཡི་ཚ་བོ་སྟེ། ཕུ༌བཱ་ཡི་བུ་ཡེས་སི་ཀཱར་པ་ཐོ་ལཱ་ནི་ཡེས་ར་ཨེལ་པ་རྣམས་སྐྱོབ་པར་བྱུང་ཞིང་། ཁོ་རང་ཨེ་ཕཱར་ཡིམ་གྱི་རི་ཁུལ་ཏེ་ཤཱ་མིར་དུ་གནས།
JDG 10:2 ཐོ་ལཱ་ནི་ལོ་ཉེར་གསུམ་རིང་ལ་ཡེས་ར་ཨེལ་གྱི་ཁྲིམས་དཔོན་བྱས་རྗེས་ཚེ་ལས་འདས་ཤིང་ཤཱ་མིར་དུ་དུར་ལ་སྦས་སོ། །
JDG 10:3 ཡང་ཁོའི་རྗེས་སུ་གིལ་ཨད་པ་ཡཱ་ཨིར་བྱུང་ཞིང་། ལོ་ཉེར་གཉིས་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།
JDG 10:4 དེ་ལ་བུ་སུམ་ཅུ་ཡོད་པ་བོང་གསེབ་སུམ་ཅུར་བཞོན་པ་དང་། ཁོ་རྣམས་ལ་གྲོང་ཁྱེར་སུམ་ཅུ་ཡོད་པའི་མིང་ལ་ད་ལྟའི་བར་དུ་ཡཱ་ཨིར་གྱི་གྲོང་ཁྱེར་རྣམས་ཟེར་ཞིང་། དེ་ཐམས་ཅད་གིལ་ཨད་ཡུལ་དུ་ཆགས་སོ། །
JDG 10:5 ཡཱ་ཨིར་ཚེ་ལས་འདས་རྗེས་ཀཱ་མོན་ཡུལ་དུ་དུར་ལ་སྦས་སོ། །
JDG 10:6 ཡང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། པཱ་ཨལ་ལིམ་རྣམས་དང་ཨ་ཤཱ་ཏ་རོད་དང་། དེ་མིན་ཨ་རམ་གྱི་ལྷ་རྣམས་དང་། ཚི་ཏུན་གྱི་ལྷ་རྣམས། མོ་ཨབ་པའི་ལྷ་རྣམས། ཨམ་མོན་པའི་ལྷ་རྣམས། ཕེ་ལེ་ཤེད་པའི་ལྷ་རྣམས་བཅས་ལ་ཞབས་ཏོག་བསྒྲུབས་ཤིང་། དཀོན་མཆོག་ཡ་ཝཱེ་སྤངས་ནས་ཁོང་ལ་ཞབས་ཕྱི་མ་བསྒྲུབས་སོ། །
JDG 10:7 དེ་ནས་དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ཤིང་། ཁོ་རྣམས་ཕེ་ལེ་ཤེད་པ་དང་ཨམ་མོན་པའི་ལག་ཏུ་སྤྲད།
JDG 10:8 དེ་ནས་བཟུང་སྟེ་ལོ་ངོ་བཅོ་བརྒྱད་ཀྱི་རིང་ལ། དེ་དག་གིས་ཡོར་དན་གཙང་པོའི་ཕ་རོལ་གྱི་ཨེ་མོར་པའི་གིལ་ཨད་ཡུལ་ལ་གནས་པའི་ཡེས་ར་ཨེལ་པ་རྣམས་ལ་འཚེ་ཞིང་མནར་གཅོད་བཏང་ངོ་། །
JDG 10:9 ཡང་ཨམ་མོན་པ་རྣམས་ཀྱིས་ཡོར་དན་གཙང་པོ་བརྒལ་ནས་ཡ་ཧུ་དཱ་དང་པེན་ཡཱ་མེན། དེ་མིན་ཨེ་ཕཱར་ཡིམ་གྱི་ཁྱིམ་རྒྱུད་བཅས་ལ་འཐབ་པས། ཡེས་ར་ཨེལ་པ་རྣམས་ལ་སྡུག་བསྔལ་ཆེན་པོ་བྱུང་ངོ་། །
JDG 10:10 དེ་ནས་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འོ་དོད་བོས་ནས་འདི་ལྟར། ངེད་རྣམས་ཀྱིས་ཁྱེད་ལ་འགལ་བའི་སྡིག་པ་བྱས་ཏེ། རང་གི་དཀོན་མཆོག་སྤངས་ནས་པཱ་ཨལ་ལིམ་རྣམས་ལ་ཞབས་ཏོག་བསྒྲུབས་པ་ཡིན་ཞེས་ཞུས་པ་ལ།
JDG 10:11 དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་འདི་སྐད་དུ། ངས་ཁྱོད་རྣམས་ཨེ་ཅིབ་པ་དང་། ཨེ་མོར་པ། ཨམ་མོན་པ། ཕེ་ལེ་ཤེད་པ་རྣམས་ཀྱི་ལག་ནས་ཐར་བར་མ་བྱས་སམ།
JDG 10:12 ཡང་ཚི་ཏུན་པ་དང་ཨ་མཱད་ལེག་པ། མ་ཨོན་པ་རྣམས་ཀྱིས་ཀྱང་ཁྱོད་ཅག་ལ་མནར་གཅོད་བཏང་ཞིང་། ཁྱོད་རྣམས་ཀྱིས་ང་ལ་འོ་དོད་བོས་པས་བདག་གིས་ཁྱོད་རྣམས་དེ་དག་གི་ལག་ནས་ཀྱང་ཐར་དུ་བཅུག་པ་ཡིན།
JDG 10:13 འོན་ཀྱང་ཁྱོད་ཅག་གིས་ང་རང་སྤངས་ཏེ་ལྷ་གཞན་དག་ལ་ཞབས་ཏོག་བསྒྲུབས་པས། ད་ནི་བདག་གིས་ཁྱོད་རྣམས་སྐྱོབ་པར་མི་བྱ་སྟེ།
JDG 10:14 ད་ནི་སོང་ལ་ཁྱོད་ཅག་གིས་བདམས་པའི་ལྷ་རྣམས་ལས་སྐྱབས་ཚོལ་ཞིག ཁྱོད་རྣམས་དཀའ་སྡུག་ལ་འཕྲད་པའི་དུས་སུ་དེ་ལ་ཁྱོད་ཅག་སྐྱོབ་ཏུ་ཆུག་ཅེས་གསུངས།
JDG 10:15 དེ་ནས་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འདི་ལྟར། ངེད་ཅག་གིས་སྡིག་པ་བྱས་པས་ཁྱེད་ཀྱིས་ངེད་རྣམས་ལ་ཐུགས་དགོངས་ཇི་བཞིན་མཛད་རོགས། ཡིན་ནའང་དེ་རིང་ཁྱེད་ཀྱིས་ངེད་རྣམས་སྐྱོབ་པར་མཛོད་ཅེས་ཞུས་ཤིང་།
JDG 10:16 ཡེས་ར་ཨེལ་པ་རྣམས་ཀྱིས་ཕྱི་ཕྱོགས་པའི་ལྷ་རྣམས་ཁོ་ཚོའི་ཁྲོད་ནས་སྤངས་ཏེ་དཀོན་མཆོག་ཡ་ཝཱེ་ལ་ཞབས་ཏོག་བསྒྲུབས། ཡེས་ར་ཨེལ་པ་རྣམས་ཀྱི་དཀའ་སྡུག་གི་ཕྱིར་དཀོན་མཆོག་ཡ་ཝཱེས་དེ་རྣམས་ལ་ཐུགས་ཁྲལ་གནང་ངོ་། །
JDG 10:17 དུས་དེར་ཨམ་མོན་པ་རྣམས་འདུས་ནས་གིལ་ཨད་དུ་སྒར་བཏབ་པ་དང་། ཡེས་ར་ཨེལ་པ་རྣམས་ཀྱང་འདུས་ཏེ་མཱས་ཟི་ཕཱ་རུ་སྒར་བཏབ།
JDG 10:18 དེ་ནས་གིལ་ཨད་པ་དང་འགོ་དཔོན་རྣམས་ཀྱིས་ཕན་ཚུན་ན་རེ། སུ་ཞིག་སྔོན་ལ་ཕྱིན་ཏེ་ཨམ་མོན་པ་རྣམས་ལ་འཐབ་འཛིང་བྱས་ན་དེ་ནི་གིལ་ཨད་ཀྱི་ཡུལ་མི་ཐམས་ཅད་ཀྱི་འགོ་དཔོན་དུ་འགྱུར་ངེས་ཡིན་ཞེས་གྲོས་བྱས་སོ། །
JDG 11:1 གིལ་ཨད་པ་ཡེབ་ཐཱ་ནི་དཔའ་རྒོད་རྩལ་ཅན་ཞིག་ཡིན་ལ། དེ་ནི་གིལ་ཨད་ལས་སྐྱེས་ཤིང་མ་ནི་སྨད་འཚོང་མ་ཞིག་ཡིན།
JDG 11:2 ཡང་གིལ་ཨད་ཀྱི་ཆུང་མས་ཀྱང་དེ་ལ་བུ་འགའ་བཙས་ཤིང་། ཁོའི་ཆུང་མས་བཙས་པའི་བུ་རྣམས་ནར་སོན་པ་དང་ཡེབ་ཐཱ་ཕྱིར་ཕུད་དེ་ན་རེ། ཁྱོད་ནི་སྨད་འཚོང་མའི་བུ་ཡིན་པས་ངེད་ཅག་གི་ཕ་ལས་ནོར་སྐལ་ཐོབ་མི་རུང་ཞེས་སྨྲས་པས།
JDG 11:3 ཡེབ་ཐཱ་རང་གི་སྤུན་རྣམས་ལས་བྲོས་ཏེ་ཏོབ་ཀྱི་ཡུལ་དུ་གནས་པ་དང་། ཇག་རྐུན་འགའ་ཞིག་ཁོའི་གམ་དུ་འདུས་ནས་ཁོའི་རྗེས་སུ་འབྲངས།
JDG 11:4 ཉིན་འགའ་ཡི་རྗེས་སུ་ཨམ་མོན་པས་ཡེས་ར་ཨེལ་ལ་འཐབ་འཛིང་བྱས་ཤིང་།
JDG 11:5 ཨམ་མོན་པས་ཡེས་ར་ཨེལ་ལ་འཐབ་འཛིང་བྱེད་པའི་དུས་སུ། གིལ་ཨད་ཀྱི་རྒན་པོ་རྣམས་ཏོབ་ཀྱི་ཡུལ་དུ་ཡེབ་ཐཱ་འབོད་དུ་སོང་ནས།
JDG 11:6 དེ་ཚོས་ཡེབ་ཐཱ་ལ་འདི་ལྟར། ངེད་ཅག་གིས་ཨམ་མོན་པ་རྣམས་ལ་དམག་བརྒྱག་པའི་ཕྱིར་ཁྱེད་ཡོང་ནས་ངེད་ཅག་གི་དམག་དཔོན་བྱེད་རོགས་ཞེས་ཞུས་པ་ལ།
JDG 11:7 ཡེབ་ཐཱ་ཡིས་གིལ་ཨད་ཀྱི་རྒན་པོ་རྣམས་ལ་འདི་ལྟར། སྔོན་ཆད་ཁྱོད་རྣམས་ང་ལ་སྡང་ཞིང་ང་རང་ཕ་གཞིས་ནས་ཕྱིར་ཕུད་པ་མ་ཡིན་ནམ། ད་ལྟ་ཁྱོད་རྣམས་དཀའ་སྡུག་ལ་ཕྲད་དུས་ཅིའི་ཕྱིར་ངའི་རྩར་ཡོང་ངམ་ཞེས་ལན་བཏབ་པ་དང་།
JDG 11:8 གིལ་ཨད་ཀྱི་རྒན་པོ་རྣམས་ཀྱིས་ཡེབ་ཐཱ་ལ། ངེད་ཅག་ད་ལྟ་ཁྱེད་ཀྱི་དྲུང་དུ་ཡོང་དོན་ནི། ཁྱེད་རང་ངེད་ཅག་དང་མཉམ་དུ་ཕྱིན་ཏེ་ཨམ་མོན་པ་རྣམས་ལ་འཐབ་པའི་ཕྱིར་ཡིན་ལ། ཁྱེད་ནི་གིལ་ཨད་པ་ཐམས་ཅད་ཀྱི་འགོ་དཔོན་དུ་འགྱུར་རོ་ཞེས་ཞུས་ཤིང་།
JDG 11:9 ཡེབ་ཐཱ་ཡིས་གིལ་ཨད་ཀྱི་རྒན་པོ་རྣམས་ལ། ཁྱོད་རྣམས་ཀྱིས་ང་རང་ཨམ་མོན་པ་རྣམས་ལ་འཐབ་པའི་ཕྱིར་ཁྲིད་ནས། དཀོན་མཆོག་ཡ་ཝཱེས་དེ་དག་ངའི་ལག་ཏུ་སྤྲད་པ་ཡིན་ཚེ། ང་རང་ཁྱོད་རྣམས་ཀྱི་འགོ་དཔོན་བྱེད་དམ་ཞེས་ལན་བཏབ་པ་དང་།
JDG 11:10 གིལ་ཨད་ཀྱི་རྒན་པོ་རྣམས་ཀྱིས་ཡེབ་ཐཱ་ལ། དཀོན་མཆོག་ཡ་ཝཱེས་བདག་ཅག་གི་བར་དུ་བདེན་དཔང་མཛད་པ་སྟེ། ངེད་རྣམས་ཀྱིས་ཁྱེད་ཀྱིས་ཅི་སྨྲས་པ་བཞིན་བྱེད་ངེས་ཡིན་ཞེས་ཞུས།
JDG 11:11 དེ་ནས་ཡེབ་ཐཱ་ནི་གིལ་ཨད་ཀྱི་རྒན་པོ་རྣམས་དང་མཉམ་དུ་ཕྱིར་ལོག་ཅིང་། འབངས་རྣམས་ཀྱིས་ཁོ་འགོ་དཔོན་དང་དམག་དཔོན་དུ་བསྐོས་པ་དང་། ཡེབ་ཐཱ་ཡིས་མཱས་ཟི་ཕཱ་རུ་དཀོན་མཆོག་ཡ་ཝཱེའི་དྲུང་དུ་རང་གི་གཏམ་ཐམས་ཅད་གསལ་པོར་ཞུས་སོ། །
JDG 11:12 ཡེབ་ཐཱ་ཡིས་ཨམ་མོན་པ་རྣམས་ཀྱི་རྒྱལ་པོའི་དྲུང་དུ་བང་ཆེན་མངགས་ཏེ་འདི་ལྟར། འུ་གཉིས་བར་དུ་འབྲེལ་བ་ཅི་ཡོད། ཁྱོད་རང་ངའི་ཡུལ་དུ་འོངས་ནས་ང་ལ་རྒོལ་དགོས་པའི་དོན་ཅི་ཡོད་དམ་ཞེས་སྨྲས་པར།
JDG 11:13 ཨམ་མོན་པ་རྣམས་ཀྱི་རྒྱལ་པོས་ཡེབ་ཐཱ་ཡི་བང་ཆེན་ལ་འདི་ལྟར། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ཚེ་ངའི་ཡུལ་ཏེ་ཨར་ནོན་གཙང་པོ་ནས་ཡཱབ་པོག་གཙང་པོ་དང་དེ་ནས་ཡོར་དན་གཙང་པོའི་བར་དུ་བཟུང་བས། ད་ལྟ་ཁྱོད་ཀྱིས་ཡུལ་དེ་རྣམས་ཞི་བདེའི་ངང་ཕྱིར་སྤྲོད་ཅིག་ཅེས་ལན་བཏབ།
JDG 11:14 ཡེབ་ཐཱ་ཡིས་ཡང་ཨམ་མོན་པ་རྣམས་ཀྱི་རྒྱལ་པོའི་དྲུང་དུ་བང་ཆེན་མངགས་ཏེ།
JDG 11:15 ཁོ་ལ་ན་རེ། ཡེབ་ཐཱས་འདི་ལྟར། ཡེས་ར་ཨེལ་པས་མོ་ཨབ་པའི་ཡུལ་དང་ཨམ་མོན་པའི་ཡུལ་རྣམས་བཟུང་མེད་དེ།
JDG 11:16 ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་ཏེ་དབེན་སྟོང་བརྒྱུད་ནས་རྒྱ་མཚོ་དམར་པོ་དང་དེ་ནས་ཀཱ་དེའེ་ཤཱ་རུ་སླེབས་པའི་ཚེ།
JDG 11:17 ཨེ་དོམ་གྱི་རྒྱལ་པོའི་དྲུང་དུ་བང་ཆེན་མངགས་ནས་འདི་ལྟར། ངེད་ཅག་ཁྱེད་ཀྱི་ཡུལ་བརྒྱུད་ནས་འགྲོ་རུ་འཇུག་པར་མཛོད་ཅེས་ཞུས་ནའང་། ཨེ་དོམ་རྒྱལ་པོས་ཆོག་མཆན་མ་གནང་། ཡང་དེ་བཞིན་དུ་མོ་ཨབ་རྒྱལ་པོའི་དྲུང་དུ་བང་ཆེན་མངགས་ནའང་། ཁོ་ཡང་དེར་མ་འཐད་པས། ཡེས་ར་ཨེལ་པ་རྣམས་ཀཱ་དེའེ་ཤཱ་རུ་བསྡད།
JDG 11:18 ཡང་ཁོ་རྣམས་དབེན་སྟོང་བརྒྱུད་དེ་ཨེ་དོམ་དང་མོ་ཨབ་ཀྱི་ཡུལ་བསྐོར་ནས། མོ་ཨབ་ཡུལ་གྱི་ཤར་ཕྱོགས་སུ་སླེབས་ཤིང་ཨར་ནོན་གཙང་པོའི་འགྲམ་དུ་སྒར་བཏབ་པ་དང་། ཨར་ནོན་གཙང་པོ་ནི་མོ་ཨབ་ཀྱི་ས་མཚམས་ཡིན་པས་དེ་དག་མོ་ཨབ་ཀྱི་མངའ་ཁོངས་སུ་མ་ཕྱིན་ཏོ། །
JDG 11:19 དེ་ནས་ཡེས་ར་ཨེལ་པ་རྣམས་ཀྱིས་ཧེ་སི་པོན་གྱི་རྒྱལ་པོ་སྟེ། ཨེ་མོར་པའི་རྒྱལ་པོ་སི་ཧོན་གྱི་དྲུང་དུ་བང་ཆེན་མངགས་ཏེ་དེ་ལ་འདི་ལྟར། ངེད་ཅག་ཁྱེད་ཀྱི་ཡུལ་བརྒྱུད་ནས་རང་གི་གནས་སུ་འགྲོ་རུ་འཇུག་པར་མཛོད་ཅེས་ཞུས་པ་ལ།
JDG 11:20 སི་ཧོན་གྱིས་ཡེས་ར་ཨེལ་པ་རྣམས་ལ་ཡིད་མ་ཆེས་པས། དེ་རྣམས་ཁོའི་མངའ་ཁོངས་བརྒྱུད་ནས་འགྲོ་རུ་མ་བཅུག་པར། རང་གི་མི་རྣམས་བསྡུས་ནས་ཡ་ཙཱ་རུ་སྒར་བཏབ་ཅིང་ཡེས་ར་ཨེལ་པ་རྣམས་ལ་འཐབ་འཛིང་བྱས།
JDG 11:21 དེར་ཡེས་ར་ཨེལ་གྱི་དཀོན་མཆོག་ཡ་ཝཱེས་སི་ཧོན་དང་ཁོའི་མི་ཐམས་ཅད་ཡེས་ར་ཨེལ་པ་རྣམས་ཀྱི་ལག་ཏུ་སྤྲད་པས། ཡེས་ར་ཨེལ་པས་ཁོ་རྣམས་ཕམ་པར་བརྒྱབ་སྟེ་ཨེ་མོར་པའི་ཡུལ་ཐམས་ཅད་བཟུང་བ་སྟེ།
JDG 11:22 དེ་ཚོས་ཨར་ནོན་གཙང་པོ་ནས་ཡཱབ་པོག་བར་དང་། དབེན་སྟོང་ནས་ཡོར་དན་གཙང་པོ་བར་གྱི་ཨེ་མོར་པའི་ཡུལ་ཐམས་ཅད་བཟུང་ངོ་། །
JDG 11:23 ཡེས་ར་ཨེལ་གྱི་དཀོན་མཆོག་ཡ་ཝཱེས་ད་ལྟ་ཁོང་གི་འབངས་མི་ཡེས་ར་ཨེལ་པའི་མདུན་ནས་ཨེ་མོར་པ་རྣམས་ཕྱིར་བསྐྲད་ཀྱང་། ཁྱོད་ཀྱིས་ཁོ་རྣམས་ཀྱི་ཡུལ་ལེན་པ་ཡིན་ནམ།
JDG 11:24 ཁྱོད་ཀྱི་ལྷ་ཀེ་མོ་སི་ཡིས་ཁྱོད་ལ་གནང་བའི་ཡུལ་ནི་ཁྱོད་ལ་ནོར་སྐལ་དུ་ཐོབ་པ་མ་ཡིན་ནམ། ངེད་ཅག་གི་དཀོན་མཆོག་ཡ་ཝཱེས་སུ་ཞིག་ངེད་རྣམས་ཀྱི་མདུན་ནས་ཕྱིར་བསྐྲད་ན། དེའི་ཡུལ་ནི་ངེད་རྣམས་ལ་ཐོབ་པ་ཡིན།
JDG 11:25 ཁྱོད་རང་མོ་ཨབ་ཀྱི་རྒྱལ་པོ་སྟེ་ཚིབ་ཕོར་གྱི་བུ་པཱ་ལག་ལས་ངར་བ་ཡིན་ནམ། དེས་ཡེས་ར་ཨེལ་པ་རྣམས་ལ་རྩོད་གླེང་ངམ་ཡང་ན་འཐབ་འཛིང་བྱས་སམ།
JDG 11:26 ཡེས་ར་ཨེལ་པ་རྣམས་ཧེ་སི་པོན་དང་དེ་ལ་གཏོགས་པའི་གྲོང་རྡལ་རྣམས་དང་། ཨ་རོ་ཨེར་དང་དེ་ལ་གཏོགས་པའི་གྲོང་རྡལ་རྣམས། དེ་མིན་ཨར་ནོན་གཙང་པོའི་འགྲམ་རྒྱུད་ཀྱི་གྲོང་ཁྱེར་ཐམས་ཅད་དུ་གནས་ཤིང་ལོ་ངོ་སུམ་བརྒྱ་འདས་པ་དང་། ལོ་ངོ་སུམ་བརྒྱའི་རིང་ལ་ཁྱོད་ཅག་གིས་ཅིའི་ཕྱིར་ཡུལ་དེ་རྣམས་ཕྱིར་མ་བླངས་པ་ཡིན།
JDG 11:27 མ་གཞི་བདག་གིས་ཁྱོད་ལ་འགལ་བའི་སྡིག་པ་མ་བྱས་ནའང་། ཁྱོད་ཀྱིས་ང་ལ་དམག་བརྒྱབ་ནས་གནོད་བསྐྱལ་བས་ན། དེ་རིང་གི་ཉིན་མོ་འདིར་མི་ལ་ཉེས་ཁྲིམས་གཅོད་པའི་དཀོན་མཆོག་ཡ་ཝཱེ་ཉིད་ཀྱིས་ཡེས་ར་ཨེལ་པ་དང་ཨམ་མོན་པའི་བར་དུ་ལེགས་ཉེས་ཀྱི་དབྱེ་བ་འབྱེད་པར་ཤོག་ཅེས་སྨྲས་ནའང་།
JDG 11:28 ཨམ་མོན་པའི་རྒྱལ་པོས་ཡེབ་ཐཱ་ཡིས་མི་མངགས་ནས་སྨྲས་པའི་གཏམ་ལ་མ་མཉན་ཏོ། །
JDG 11:29 དཀོན་མཆོག་ཡ་ཝཱེའི་ཐུགས་ཉིད་ཡེབ་ཐཱ་ཡི་སྟེང་དུ་བབས་ཤིང་། ཁོ་རང་གིལ་ཨད་དང་མཱ་ན་ཤེ་བརྒྱུད་ནས་གིལ་ཨད་ཀྱི་མཱས་ཟི་ཕཱ་རུ་སླེབས་པ་དང་། ཡང་གིལ་ཨད་ཀྱི་མི་ཙི་ཕེ་ནས་ཨམ་མོན་པ་རྣམས་ཀྱི་ཕྱོགས་སུ་ཕྱིན།
JDG 11:30 དེ་ནས་ཡེབ་ཐཱ་ཡིས་དཀོན་མཆོག་ཡ་ཝཱེ་ལ་དམ་བཅའ་ཕུལ་ནས་འདི་ལྟར། གལ་ཏེ་ཁྱེད་ཀྱིས་ཨམ་མོན་པ་རྣམས་བདག་གི་ལག་ཏུ་སྤྲད་ན།
JDG 11:31 ང་རང་ཨམ་མོན་པ་རྣམས་ལས་བདེ་བར་ཕྱིར་ལོག་པའི་དུས་སུ། བདག་གི་ཁྱིམ་ནས་སུ་ཞིག་སྔོན་ལ་ང་བསུ་བར་ཡོང་ན་དེ་ནི་ཁྱེད་ཀྱི་ཡིན་ཏེ། བདག་གིས་དེ་ནི་སྦྱིན་སྲེག་ཏུ་འབུལ་བར་ངེས་ཞེས་ཞུས་སོ། །
JDG 11:32 དེ་ནས་ཡེབ་ཐཱ་ཁོ་རང་ཨམ་མོན་པ་རྣམས་ལ་འཐབ་འཛིང་བྱེད་དུ་སོང་ཞིང་། དཀོན་མཆོག་ཡ་ཝཱེས་དེ་དག་ཁོའི་ལག་ཏུ་སྤྲད་པས།
JDG 11:33 ཁོས་ཨ་རོ་ཨེར་ནས་མིན་ནིད་བར་དང་དེ་ནས་ཨ་བེལ་ཀེ་ར་མིམ་གྱི་བར་དུ་དེ་དག་རྩ་མེད་བཏང་ཞིང་། གྲོང་ཁྱེར་ཉི་ཤུ་རྒོལ་ནས་བླངས། ཨམ་མོན་པ་རྣམས་དེ་ལྟར་ཡེས་ར་ཨེལ་པ་རྣམས་ཀྱི་མདུན་དུ་བཏུལ་བའོ། །
JDG 11:34 ཡེབ་ཐཱ་ཕྱིར་མཱས་ཟི་ཕཱ་རུ་ལོག་སྟེ་རང་ཡུལ་དུ་སླེབས་པ་ན། བསམ་ཡུལ་ལས་འདས་པ་ཞིག་ལ་ཁོའི་བུ་མོས་སིལ་རྔ་བརྡུངས་ནས་བྲོ་འཁྲབ་ཀྱིན་ཁོ་བསུ་རུ་འོངས་པ་དང་། དེ་ནི་ཁོའི་བུ་མོ་གཅིག་པུ་ཡིན་ཞིང་། དེ་ལས་གཞན་ཁོ་ལ་བུ་དང་བུ་མོ་མེད་དོ། །
JDG 11:35 ཡེབ་ཐཱ་ཡིས་ཁོ་མོ་མཐོང་མ་ཐག་རང་གི་གྱོན་པ་གཤགས་ནས་འདི་ལྟར་སྨྲས་པ་སྟེ། ཀྱེ་ཧོ་བདག་གི་བུ་མོ་ལགས། ངས་དཀོན་མཆོག་ཡ་ཝཱེ་ལ་དམ་བཅའ་བཞག་ཅིང་དེ་ལ་ཟློག་ཐབས་མེད་པས། ཁྱོད་ཀྱིས་ང་རང་སྡུག་བསྔལ་ཆེན་པོ་དང་དཀའ་ལས་ཁག་པོར་གཏད་བྱུང་ཞེས་པ་ལ།
JDG 11:36 ཁོའི་བུ་མོ་ན་རེ། ཀྱེ་ཕ་ལགས། ཁྱེད་ཀྱིས་དཀོན་མཆོག་ཡ་ཝཱེ་ལ་དམ་བཅས་པ་ཡིན་ན། ཁྱེད་ཀྱིས་ཅི་ལྟར་ཁས་བླངས་པ་བཞིན་བདག་ལ་བྱེད་འོས། ཅི་ལ་ཞེ་ན། དཀོན་མཆོག་ཡ་ཝཱེས་ཁྱེད་ཀྱི་དགྲ་བོ་ཨམ་མོན་པ་རྣམས་ཀྱི་སྟེང་ནས་དགྲ་ཤ་བླངས་ཟིན་ཞེས་དང་།
JDG 11:37 ཡང་ཕ་ལ་འདི་ལྟར་ཞུས་པ་སྟེ། ཁྱེད་ཀྱིས་དོན་འདི་གཅིག་པུ་ལ་ཆོག་མཆན་གནང་བར་མཛོད། ང་རང་ད་དུང་ན་ཆུང་བུ་མོ་ཡིན་པའི་རྐྱེན་གྱིས་ང་དང་ངའི་མཛའ་གྲོགས་རྣམས་སོང་ནས་རི་མགོར་མྱ་ངན་བྱེད་པའི་ཆེད་དུ། ཟླ་བ་གཉིས་ཀྱི་དགོངས་པ་གནང་བར་མཛོད་ཅེས་པ་ལ།
JDG 11:38 ཡེབ་ཐཱ་ན་རེ། ཁྱོད་རང་སོང་ཞིག་ཅེས་སྨྲས་ཏེ། བུ་མོ་ཟླ་བ་གཉིས་ཀྱི་རིང་ལ་འགྲོ་རུ་བཅུག་གོ །དེ་ནས་བུ་མོ་རང་གི་མཛའ་གྲོགས་རྣམས་དང་མཉམ་དུ་སོང་ནས་རི་མགོར་ཁོ་མོ་ད་དུང་ན་ཆུང་བུ་མོ་ཡིན་པའི་རྐྱེན་གྱིས་མྱ་ངན་བྱས།
JDG 11:39 ཟླ་བ་གཉིས་ལོངས་པ་དང་ཁོ་མོ་ཕ་ཡི་དྲུང་དུ་ལོག་ཅིང་། ཕ་ཡིས་ཇི་ལྟར་དམ་བཅས་པ་བཞིན་ཁོ་མོར་དེ་ལྟར་བྱས། བུ་མོ་དེ་སྐྱེས་པར་འགྲོགས་མ་མྱོང་ངོ་། ། ཕྱིས་སུ་ཡེས་ར་ཨེལ་པའི་ཁྲོད་དུ་སྲོལ་ཞིག་ཆགས་པ་སྟེ།
JDG 11:40 ཡེས་ར་ཨེལ་པའི་བུད་མེད་རྣམས་ལོ་རེ་བཞིན་སོང་སྟེ་གིལ་ཨད་པ་ཡེབ་ཐཱ་ཡི་བུ་མོའི་དོན་དུ་ཉིན་བཞི་ལ་མྱ་ངན་བྱེད་པ་ཡིན་ནོ། །
JDG 12:1 ཨེ་ཕཱར་ཡིམ་པ་རྣམས་ལྷན་དུ་འདུས་ཏེ་བྱང་ཕྱོགས་སུ་སླེབས་ཤིང་། ཡེབ་ཐཱ་ལ་འདི་ལྟར་སྨྲས་པ་སྟེ། ཁྱོད་རང་ཨམ་མོན་པར་འཐབ་འཛིང་བྱེད་དུ་འགྲོ་དུས། ངེད་ཅག་ཁྱོད་དང་ལྷན་དུ་འགྲོ་ཕྱིར་མི་འབོད་པ་ཅི་ཡིན། ངེད་ཅག་གིས་ཁྱོད་དང་ཁྱོད་ཀྱི་ཁང་པ་མེར་བསྲེག་པར་བྱ་ཞེས་པ་ལ།
JDG 12:2 ཡེབ་ཐཱ་ཡིས་དེའི་ལན་དུ། བདག་དང་བདག་གི་མི་རྣམས་ཨམ་མོན་པ་དང་འཐབ་འཛིང་དྲག་པོ་བྱེད་པའི་དུས་སུ། བདག་གིས་ཁྱོད་རྣམས་བོས་ཀྱང་ཁྱོད་རྣམས་འོངས་ནས་ང་རང་དེ་དག་གི་ལག་ནས་ཐར་བར་མ་བྱས།
JDG 12:3 ངས་ཁྱོད་རྣམས་ང་རང་སྐྱོབ་ཏུ་མི་ཡོང་བ་མཐོང་ནས། རང་སྲོག་འབེན་ལ་བཞག་སྟེ་སོང་ནས་ཨམ་མོན་པ་རྣམས་ལ་འཐབ་འཛིང་བྱས་པ་དང་། དཀོན་མཆོག་ཡ་ཝཱེས་ཁོ་རྣམས་ངའི་ལག་ཏུ་སྤྲད། དེ་རིང་ཁྱོད་རྣམས་ཅིའི་ཕྱིར་འདི་རུ་ང་དང་འཐབ་འཛིང་བྱེད་དུ་འོངས་པ་ཡིན་ནམ་ཞེས་སྨྲས།
JDG 12:4 དེ་ནས་ཡེབ་ཐཱ་ཡིས་གིལ་ཨད་ཀྱི་མི་རྣམས་བསྡུས་ཏེ་ཨེ་ཕཱར་ཡིམ་པ་རྣམས་ལ་འཐབ་འཛིང་བྱས་ཤིང་། གིལ་ཨད་པ་རྣམས་ཀྱིས་ཨེ་ཕཱར་ཡིམ་པ་རྣམས་གསོད་དོན་ནི། དེ་དག་གིས་ཁྱོད་གིལ་ཨད་པ་རྣམས་ནི་ཨེ་ཕཱར་ཡིམ་དང་མཱ་ན་ཤེའི་ཁྲོད་དུ་ཨེ་ཕཱར་ཡིམ་གྱི་བྲོས་བྱོལ་པ་ཙམ་ཡིན་ཞེས་སྨྲས་པའི་ཕྱིར་རོ། །
JDG 12:5 གིལ་ཨད་པ་རྣམས་ཀྱིས་ཡོར་དན་གཙང་པོའི་རབ་ཁ་བསྲུངས་ནས་ཨེ་ཕཱར་ཡིམ་པ་རྣམས་བཀག་པ་དང་། ཨེ་ཕཱར་ཡིམ་པ་ལས་ཕྱིར་བྲོས་པ་རྣམས་ཀྱིས་ང་ཕར་འགྲོ་རུ་འཇུག་རོགས་ཞེས་ཞུ་བའི་ཚེ། གིལ་ཨད་པ་རྣམས་ཀྱིས་དེ་ལ། ཁྱོད་རང་ཨེ་ཕཱར་ཡིམ་པ་ཡིན་ནམ་མིན་ཞེས་དྲིས་ཤིང་། གལ་ཏེ་ཁོས་མིན་ཟེར་ན།
JDG 12:6 དེ་དག་གིས་ཁོ་ལ། ཁྱོད་ཀྱིས་ཤིབ་པོ་ལེད་ཅེས་སྨྲོས་ཤིག་ཅེས་སྨྲས་པ་དང་། ཨེ་ཕཱར་ཡིམ་པས་དེ་གསལ་པོར་སྨྲ་མ་ནུས་པར་སིབ་པོ་ལེད་ཅེས་སྨྲས་པས། གིལ་ཨད་པས་ཁོ་བཟུང་སྟེ་ཡོར་དན་གཙང་པོའི་རབ་ཁ་ནས་བསད་ཅིང་། དུས་དེར་ཨེ་ཕཱར་ཡིམ་པ་མི་བཞི་ཁྲི་ཉིས་སྟོང་བསད་དོ། །
JDG 12:7 ཡེབ་ཐཱ་ལོ་དྲུག་གི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས། དེ་ནས་གིལ་ཨད་པ་ཡེབ་ཐཱ་ཚེ་ལས་འདས་ཤིང་གིལ་ཨད་ཀྱི་གྲོང་ཁྱེར་ཞིག་གི་ནང་དུ་དུར་ལ་སྦས།
JDG 12:8 ཡེབ་ཐཱ་ཡི་རྗེས་སུ། པེད་ལེ་ཧེམ་པ་ཨིབ་ཙན་ནི་ཡེས་ར་ཨེལ་གྱི་ཁྲིམས་དཔོན་བྱས།
JDG 12:9 དེ་ལ་བུ་སུམ་ཅུ་དང་བུ་མོ་སུམ་ཅུ་ཡོད་ཅིང་། ཁོས་བུ་མོ་ཚང་མ་ཕྱི་ལ་མནའ་མར་བྱིན་པ་དང་། རང་གི་བུ་རྣམས་ལ་ཕྱི་ནས་མནའ་མ་སུམ་ཅུ་བླངས། ཁོ་རང་ལོ་བདུན་གྱི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།
JDG 12:10 ཨིབ་ཙན་ཚེ་ལས་འདས་ཏེ་པེད་ལེ་ཧེམ་དུ་དུར་ལ་སྦས་སོ། །
JDG 12:11 ཨིབ་ཙན་གྱི་རྗེས་སུ་ཟེ་བུ་ལུན་པ་ཨེ་ལོན་ནི་ཡེས་ར་ཨེལ་གྱི་ཁྲིམས་དཔོན་བྱས། ཁོ་རང་ལོ་བཅུའི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།
JDG 12:12 ཟེ་བུ་ལུན་པ་ཨེ་ལོན་ཚེ་ལས་འདས་ཤིང་ཟེ་བུ་ལུན་ཡུལ་གྱི་ཨ་ཡཱ་ལོན་དུ་དུར་ལ་སྦས་སོ། །
JDG 12:13 ཨེ་ལོན་གྱི་རྗེས་སུ་ཕི་ར་ཐོན་པ་ཧིལ་ལེལ་གྱི་བུ་ཨབ་དོན་ནི་ཡེས་ར་ཨེལ་གྱི་ཁྲིམས་དཔོན་བྱས།
JDG 12:14 དེ་ལ་བུ་བཞི་བཅུ་དང་ཚ་བོ་སུམ་ཅུ་ཡོད་པ་དང་། དེ་རྣམས་བོང་གསེབ་བདུན་ཅུ་ལ་ཞོན་ཡོད་པ་ཡིན། ཨབ་དོན་ལོ་བརྒྱད་ཀྱི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།
JDG 12:15 ཕི་ར་ཐོན་པ་ཧིལ་ལེལ་གྱི་བུ་ཨབ་དོན་ཚེ་ལས་འདས་ཤིང་། ཨེ་ཕཱར་ཡིམ་ཡུལ་གྱི་པི་ར་ཐོན་ཞེས་པ་སྟེ། ཨ་མཱད་ལེག་པའི་རི་ཁུལ་དུ་དུར་ལ་སྦས་སོ། །
JDG 13:1 ཡང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས། དཀོན་མཆོག་ཡ་ཝཱེས་ཁོ་རྣམས་ལོ་ངོ་བཞི་བཅུའི་རིང་ལ་ཕེ་ལེ་ཤེད་པའི་ལག་ཏུ་སྤྲད་དོ། །
JDG 13:2 དུས་དེར་ཚོར་ཨ་པ་ཞིག་ཡོད་ལ་དཱན་གྱི་ཚོ་པར་གཏོགས་ཤིང་མིང་ལ་མ་ནོ་ཨ་ཞེས་བྱ་བ་དང་། དེའི་ཆུང་མར་མངལ་མི་སྦྲུམ་ལ་ཕྲུ་གུ་སྐྱེས་མི་ཐུབ་བོ། །
JDG 13:3 དཀོན་མཆོག་ཡ་ཝཱེའི་ཕོ་ཉ་ཞིག་བུད་མེད་དེར་མངོན་ཞིང་འདི་སྐད་དུ། ལྟོས་དང་། ཁྱོད་རང་སྔར་ནས་མངལ་མི་སྦྲུམ་ལ་ཕྲུ་གུ་སྐྱེས་རྒྱུ་མེད་ནའང་། ད་ནི་ཁྱོད་ལ་མངལ་སྦྲུམ་ནས་བུ་ཞིག་སྐྱེ་ངེས་ཡིན།
JDG 13:4 དེ་བས་ཁྱོད་ཀྱིས་གཟབ་གཟབ་བྱེད་དགོས་ཏེ། རྒུན་ཆང་དང་ཨ་རག་གར་པོ་གང་ཡང་འཐུང་མི་རུང་ལ། མི་གཙང་བའི་རིགས་ཀྱང་གང་ཡང་བཟའ་མི་རུང་།
JDG 13:5 ལྟོས་དང་། ཁྱོད་ལ་མངལ་སྦྲུམ་ནས་བུ་ཞིག་སྐྱེ་ངེས་ཤིང་། དེའི་མགོ་ལ་སྐྲ་གྲིས་རེག་མི་ཆོག ཅི་ལ་ཞེ་ན། ཕྲུ་གུ་འདི་ནི་སྐྱེས་མ་ཐག་ནས་དཀོན་མཆོག་ལ་གཏོགས་ཤིང་ལོགས་སུ་བཀར་བའི་མི་རུ་འགྱུར་ལ། ཁོས་ཡེས་ར་ཨེལ་པ་རྣམས་བསྐྱབས་ཏེ་ཕེ་ལེ་ཤེད་པ་རྣམས་ཀྱི་ལག་ནས་ཐར་དུ་འཇུག་པར་རྩོམ་པ་ཡིན་ཞེས་གསུངས།
JDG 13:6 དེ་ནས་བུད་མེད་དེ་ཕྱིར་ལོག་ནས་སྐྱེས་པ་ལ་འདི་ལྟར་སྨྲས་པ་སྟེ། དཀོན་མཆོག་གི་སྐྱེས་བུ་ཞིག་ངའི་མདུན་དུ་སླེབས་ཤིང་དེའི་ཞལ་རས་ནི་དཀོན་མཆོག་གི་ཕོ་ཉའི་ཞལ་རས་དང་མཚུངས་ལ་ཤིན་ཏུ་གུས་ཞུམ་བྱེད་འོས་པར་སྣང་། ངས་ཁོང་ཉིད་གང་ནས་འོངས་པ་མ་དྲིས། ཁོང་གིས་ཀྱང་ཉིད་ཀྱི་མཚན་ང་ལ་གསུངས་མ་བྱུང་།
JDG 13:7 ཡིན་ནའང་ཁོང་གིས་བདག་ལ་འདི་སྐད་དུ། ལྟོས་དང་། ཁྱོད་ལ་མངལ་སྦྲུམ་ནས་བུ་ཞིག་སྐྱེ་ངེས་ཡིན། དེ་བས་ཁྱོད་ཀྱིས་རྒུན་ཆང་དང་ཨ་རག་གར་པོ་གང་ཡང་འཐུང་མི་རུང་ལ། མི་གཙང་བའི་རིགས་ཀྱང་གང་ཡང་བཟའ་མི་རུང་། ཅི་ལ་ཞེ་ན། ཕྲུ་གུ་འདི་ནི་སྐྱེས་མ་ཐག་ནས་འཆི་བའི་བར་དུ་དཀོན་མཆོག་ལ་གཏོགས་ཤིང་ལོགས་སུ་བཀར་བའི་མི་རུ་འགྱུར་ཞེས་གསུངས་བྱུང་ཞེས་པ་ལ།
JDG 13:8 མ་ནོ་ཨ་ཡིས་དཀོན་མཆོག་ཡ་ཝཱེ་ལ་ཞུ་བ་ཕུལ་ནས་འདི་ལྟར། ཀྱེ་གཙོ་བོ་ལགས། སྐྱེ་བར་འགྱུར་བའི་ཕྲུ་གུ་དེ་ཅི་ལྟར་སྐྱོང་དགོས་པ་ངེད་ཅག་ལ་མཛུབ་སྟོན་གནང་བའི་ཆེད་དུ། ཁྱེད་ཀྱིས་དཀོན་མཆོག་གི་སྐྱེས་བུ་དེ་ཡང་བསྐྱར་ངེད་ཀྱི་རྩར་མངགས་པར་མཛོད་ཅེས་ཞུས།
JDG 13:9 དེར་དཀོན་མཆོག་གིས་མ་ནོ་ཨ་ཡི་ཞུ་བར་གསན་ཏེ། བུད་མེད་དེ་ཞིང་ཁར་སྡོད་པའི་སྐབས་སུ་དཀོན་མཆོག་གི་ཕོ་ཉ་ཡང་བསྐྱར་ཁོ་མོའི་གམ་དུ་སླེབས། ཡིན་ནའང་ཁོ་མོའི་སྐྱེས་པ་མ་ནོ་ཨ་ཁོ་མོ་དང་མཉམ་དུ་མེད་པ་རེད།
JDG 13:10 བུད་མེད་མྱུར་བ་མྱུར་དུ་བརྒྱུགས་སོང་སྟེ་སྐྱེས་པར་ན་རེ། ལྟོས་དང་། ཉིན་དེར་ངའི་མདུན་དུ་འོངས་པའི་མི་དེ་ཡང་བསྐྱར་ང་ལ་མངོན་བྱུང་ཞེས་སྨྲས་པ་དང་།
JDG 13:11 མ་ནོ་ཨ་ཡར་ལངས་ཏེ་རང་གི་ཆུང་མའི་རྗེས་འབྲངས་ནས་མི་དེའི་དྲུང་དུ་སླེབས་ནས་འདི་ལྟར། བུད་མེད་འདིར་གསུང་གནང་མཁན་ནི་ཁྱེད་རང་ཡིན་ནམ་ཞེས་དྲིས་པ་ལ། ཁོང་གིས་ང་ཡིན་ཞེས་གསུངས།
JDG 13:12 དེ་ནས་མ་ནོ་ཨ་ན་རེ། ཁྱེད་ཀྱི་གསུང་བཞིན་འགྲུབ་པར་ཤོག ངེད་ཅག་གིས་ཕྲུ་གུ་དེ་ཅི་ལྟར་སྐྱོང་དགོས་པ་དང་། ཕྱིས་སུ་ཁོ་རང་ཅི་འདྲ་ཡིན་དགོས་སམ་ཞེས་ཞུས་པ་ལ།
JDG 13:13 དཀོན་མཆོག་ཡ་ཝཱེའི་ཕོ་ཉས་མ་ནོ་ཨ་ལ་འདི་སྐད་དུ། བདག་གིས་བུད་མེད་ལ་སྨྲས་པའི་དོན་ཐམས་ཅད་ཀྱི་ཐད་ཁོ་མོས་གཟབ་གཟབ་བྱེད་དགོས།
JDG 13:14 རྒུན་ཤིང་ལས་ཐོགས་པ་ཐམས་ཅད་བཟའ་མི་རུང་ཞིང་། རྒུན་ཆང་དང་ཨ་རག་གར་པོ་གང་ཡིན་ཡང་འཐུང་མི་རུང་ལ། མི་གཙང་བའི་རིགས་ཀྱང་གང་ཡང་བཟའ་མི་རུང་། ངས་ཅི་བསྒོས་པ་ཐམས་ཅད་ཁོ་མོས་བསྲུང་དགོས་ཞེས་གསུངས།
JDG 13:15 མ་ནོ་ཨ་ཡིས་དཀོན་མཆོག་ཡ་ཝཱེའི་ཕོ་ཉ་ལ་འདི་ལྟར། ངེད་ཅག་གིས་ཁྱེད་ལ་ར་ཕྲུག་ཅིག་སྟ་གོན་བྱེད་པའི་ཕྱིར། ཁྱེད་རང་ཡུད་ཙམ་ལ་བཞུགས་རོགས་ཞེས་ཞུས་པ་དང་།
JDG 13:16 དཀོན་མཆོག་ཡ་ཝཱེའི་ཕོ་ཉས་མ་ནོ་ཨ་ལ་འདི་སྐད་དུ། ཁྱོད་ཀྱིས་ང་རང་བཀག་ནའང་ངས་ཁྱོད་ཀྱི་ཟས་མི་ཟ། གལ་ཏེ་ཁྱོད་ཀྱིས་སྦྱིན་སྲེག་གི་མཆོད་པ་སྟ་གོན་བྱེད་ན་དེ་ནི་དཀོན་མཆོག་ཡ་ཝཱེ་ལ་འབུལ་བར་འོས་ཞེས་གསུངས་པ་སྟེ། མ་གཞི་མ་ནོ་ཨས་དེ་ནི་དཀོན་མཆོག་ཡ་ཝཱེའི་ཕོ་ཉ་ཡིན་པ་མ་ཤེས་སོ། །
JDG 13:17 མ་ནོ་ཨ་ཡིས་དཀོན་མཆོག་ཡ་ཝཱེའི་ཕོ་ཉ་ལ་འདི་ལྟར། ཁྱེད་ཀྱི་གསུང་ལྟར་འགྲུབ་པའི་ཚེ། ངེད་ཅག་གིས་ཁྱེད་ལ་བཀུར་བ་བྱེད་པའི་ཆེད་དུ་ཁྱེད་ཀྱི་མཚན་ང་ལ་གསུང་རོགས་ཞེས་ཞུས་པ་ལ།
JDG 13:18 དཀོན་མཆོག་ཡ་ཝཱེའི་ཕོ་ཉས་ཁོ་ལ་འདི་སྐད་དུ། ཁྱོད་ཀྱིས་ངའི་མིང་འདྲི་དོན་ཅི། ངའི་མིང་ནི་ངོ་མཚར་ཅན་ཞིག་ཡིན་ཞེས་གསུངས།
JDG 13:19 དེ་ནས་མ་ནོ་ཨས་ཕ་བོང་ཞིག་གི་སྟེང་དུ་དཀོན་མཆོག་ཡ་ཝཱེ་ལ་ར་ཕྲུག་ཅིག་དང་འབྲུ་མཆོད་ཕུལ་བ་དང་། ཕོ་ཉས་དོན་ངོ་མཚར་ཅན་མཛད་པར་མ་ནོ་ཨ་དང་ཁོའི་ཆུང་མ་གཉིས་ཀྱིས་དེར་བལྟས་པ་ལ།
JDG 13:20 མཆོད་ཁྲིའི་སྟེང་ནས་མེ་ལྕེ་གྱེན་དུ་འཕྱུར་བ་དང་། དཀོན་མཆོག་ཡ་ཝཱེའི་ཕོ་ཉ་མཆོད་ཁྲི་སྟེང་གི་མེ་ལྕེ་ཁྲོད་ཡར་འཕགས་པ་མཐོང་། མ་ནོ་ཨ་དང་ཁོའི་ཆུང་མ་གཉིས་ཀྱིས་དེ་མཐོང་སྟེ་ཁ་སར་གཏད་ནས་བསྡད།
JDG 13:21 དཀོན་མཆོག་ཡ་ཝཱེའི་ཕོ་ཉ་དེ་མ་ནོ་ཨ་དང་ཁོའི་ཆུང་མ་གཉིས་ལ་ཡང་བསྐྱར་མ་མངོན་ཞིང་། མ་ནོ་ཨས་ད་གཟོད་དེ་ནི་དཀོན་མཆོག་ཡ་ཝཱེའི་ཕོ་ཉ་ཡིན་པ་ཤེས་སོ། །
JDG 13:22 མ་ནོ་ཨས་རང་གི་ཆུང་མར་འདི་ལྟར་སྨྲས་པ་སྟེ། བདག་ཅག་གིས་དཀོན་མཆོག་མཇལ་བས་འཆི་བར་ངེས་ཞེས་པ་ལ།
JDG 13:23 ཁོའི་ཆུང་མ་ན་རེ། གལ་ཏེ་དཀོན་མཆོག་ཡ་ཝཱེས་བདག་ཅག་གསོད་པར་དགོངས་ན། ཁོང་གིས་བདག་ཅག་གི་ལག་ནས་སྦྱིན་སྲེག་གི་མཆོད་པ་དང་འབྲུ་མཆོད་བཞེས་མི་སྲིད་ཅིང་། དོན་འདི་ཐམས་ཅད་བདག་ཅག་ལ་སྟོན་པར་མི་འགྱུར་ལ། དེ་རིང་བཀའ་འདི་རྣམས་བདག་ཅག་ལ་གསུང་བར་ཡང་མི་འགྱུར་ཞེས་སྨྲས།
JDG 13:24 ཕྱིས་སུ་བུད་མེད་དེས་བུ་ཞིག་བཙས་ཤིང་མིང་ལ་སཱམ་སོན་ཞེས་བཏགས། ཕྲུ་གུ་ཆེར་སྐྱེས་པ་དང་དཀོན་མཆོག་ཡ་ཝཱེས་ཁོ་ལ་བྱིན་རླབས་གནང་།
JDG 13:25 ཚོར་ཨ་དང་ཨེ་སི་ཐ་ཨོལ་གྱི་མཚམས་སུ་ཡོད་པའི་མ་ཧ་ནེ་དཱན་དུ་དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་མཛད་དོ། །
JDG 14:1 སཱམ་སོན་ནི་ཐིམ་ནཱ་རུ་ཕྱིན་པ་དང་དེ་རུ་བུ་མོ་ཞིག་མཐོང་ཞིང་། དེ་ནི་ཕེ་ལེ་ཤེད་པའི་བུ་མོ་ཞིག་ཡིན་ནོ། །
JDG 14:2 ཁོ་ཡར་འོངས་ནས་རང་གི་ཕ་མ་གཉིས་ལ་ན་རེ། ངས་ཐིམ་ནཱ་རུ་ཕེ་ལེ་ཤེད་པའི་བུ་མོ་ཞིག་མཐོང་བྱུང་། ད་ལྟ་ཁྱེད་ཀྱིས་དེ་ངའི་ཆུང་མར་ལེན་རོགས་ཞེས་ཞུས་པ་ལ།
JDG 14:3 ཁོའི་ཕ་མས་འདི་ལྟར། ཁྱོད་ཀྱི་སྤུན་མཆེད་ཀྱི་བུ་མོ་རྣམས་དང་ཡང་ན་རང་རེའི་མི་ཀུན་གྱི་ཁྲོད་དུ་བུད་མེད་གཅིག་ཀྱང་མི་འདུག་གམ། ཁྱོད་སོང་སྟེ་མཚན་སྐྱི་མ་བཅད་པའི་ཕེ་ལེ་ཤེད་པ་རྣམས་ལས་ཆུང་མ་ལེན་དགོས་བྱུང་ངམ་ཞེས་སྨྲས་ཤིང་། སཱམ་སོན་གྱིས་རང་གི་ཕ་ལ། བུ་མོ་དེ་ངའི་བློར་བབ་བྱུང་བས་ཁྱེད་ཀྱིས་བུད་མེད་དེ་ང་ལ་ལེན་རོགས་ཞེས་ཞུས།
JDG 14:4 ཁོའི་ཕ་མས་དོན་དེ་ནི་དཀོན་མཆོག་ཡ་ཝཱེ་ནས་བྱུང་ཞིང་ཁོང་གིས་ཕེ་ལེ་ཤེད་པ་རྣམས་དང་འཐབ་འཛིང་བྱེད་པའི་གོ་སྐབས་འཚོལ་བའི་རྐྱེན་གྱིས་ཡིན་པ་མ་ཤེས་པ་རེད། དེའི་དུས་སུ་ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་པ་ལ་དབང་བྱེད་པའོ། །
JDG 14:5 སཱམ་སོན་རང་གི་ཕ་མ་དང་ལྷན་ཅིག་ཏུ་ཐིམ་ནཱ་རུ་ཕྱིན་ཅིང་། ཐིམ་ནཱའི་རྒུན་འབྲུམ་ར་བར་སླེབས་པ་ལ། སེང་གེ་དར་མ་ཞིག་གིས་ཁོ་ལ་ང་རོ་སྒྲོག་པ་མཐོང་།
JDG 14:6 དེ་ནས་དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་དེ། ཁོའི་ལག་ཏུ་མཚོན་ཆ་མེད་ནའང་སེང་གེ་དེ་ནི་ར་ཕྲུག་ཅིག་གཤགས་པ་ལྟར་དུམ་བུར་གཤགས་ཤིང་། ཁོས་དོན་གང་ཞིག་བྱས་པ་དེ་ཕ་མར་མ་བཤད་དོ། །
JDG 14:7 སཱམ་སོན་མར་སོང་ནས་བུ་མོ་དེ་དང་གཏམ་ལབ་ཅིང་ཁོ་མོ་བློར་བབ་པ་རེད།
JDG 14:8 ཉིན་འགའི་རྗེས་སུ་ཡང་བུ་མོ་དེ་ལེན་དུ་མར་ཕྱིན་པ་དང་། ལམ་འགྲམ་དུ་འཁོར་ནས་སེང་གེ་ཤི་རོ་ལ་བལྟ་འདོད་པ་ན། ངོ་མཚར་བ་ཞིག་ལ། སེང་གེ་ཤི་རོ་དེའི་ནང་དུ་བུང་བའི་ཁྱུ་ཚོགས་དང་སྦྲང་རྩི་ཡོད་པ་མཐོང་སྟེ།
JDG 14:9 ཁོས་སྦྲང་རྩི་ལག་མཐིལ་དུ་བླངས་ནས་ཟ་ཞོར་ཕྱིན་པ་དང་། ཕ་མའི་རྩར་སླེབས་ནས་ཁོ་རྣམས་ལ་སྤྲད་པར་ཁོ་ཚོས་ཀྱང་ཟོས། ཡིན་ནའང་ཁོས་སྦྲང་རྩི་དེ་ནི་སེང་གེ་ཤི་རོ་ལས་བླངས་འོངས་པ་མ་བཤད་དོ། །
JDG 14:10 ཁོའི་ཕ་ནི་བུ་མོ་དེར་བལྟ་རུ་མར་ཕྱིན་པ་དང་། སཱམ་སོན་གྱིས་དེར་སྟོན་མོ་བཤམས་པ་སྟེ། རྒྱུ་མཚན་དེ་ནི་སྐབས་དེའི་གཞོན་ནུ་རྣམས་ཀྱི་སྲོལ་ཡིན་ནོ། །
JDG 14:11 མི་རྣམས་ཀྱིས་སཱམ་སོན་མཐོང་བ་དང་ཁོ་ལ་འདུག་གྲོགས་མི་སུམ་ཅུ་ཁྲིད་འོངས་པ་རེད།
JDG 14:12 སཱམ་སོན་གྱིས་དེ་དག་ལ་འདི་ལྟར་སྨྲས་པ་སྟེ། ངས་ཁྱོད་རྣམས་ལ་གབ་ཚིག་ཅིག་བཤད། ཁྱོད་རྣམས་ཀྱིས་སྟོན་མོའི་ཉིན་བདུན་གྱི་རིང་དེ་ཅི་ཡིན་པ་ཤེས་ན་བདག་ལ་ཤོད་ཅིག བདག་གིས་ཁྱོད་རྣམས་ལ་ནང་གོས་སུམ་ཅུ་དང་ཕྱི་གོས་ཁ་ཚང་སུམ་ཅུ་སྟེར་བར་བྱ།
JDG 14:13 གལ་ཏེ་ཁྱོད་རྣམས་ཀྱིས་དེའི་ལན་ང་ལ་བཤད་མ་ཐུབ་ན། ཁྱོད་ཅག་གིས་ང་ལ་ནང་གོས་སུམ་ཅུ་དང་ཕྱི་གོས་ཁ་ཚང་སུམ་ཅུ་སྟེར་དགོས་ཞེས་པ་ལ། དེ་དག་ན་རེ། གབ་ཚིག་ངེད་རྣམས་ལ་བཤད་རོགས་ཞེས་སྨྲས་སོ། །
JDG 14:14 དེ་ནས་སཱམ་སོན་ན་རེ། ཟ་མཁན་ནས་ཟས་ཐོན། སྟོབས་ཅན་ནས་མངར་མོ་ཐོན་ཞེས་སྨྲས་ཤིང་། ཁོ་རྣམས་ཀྱིས་ཉིན་གསུམ་གྱི་རིང་ལ་གབ་ཚིག་གི་ལན་མ་ཤེས་པ་རེད།
JDG 14:15 དེ་ནས་ཉིན་བདུན་པར་ཁོ་རྣམས་ཀྱིས་སཱམ་སོན་གྱི་ཆུང་མར་འདི་ལྟར་སྨྲས་པ་སྟེ། ཁྱོད་ཀྱིས་རང་གི་སྐྱེས་པ་བསླུས་ནས་གབ་ཚིག་གི་ལན་ལ་རྩད་ཆོད་ཅིག དེ་མིན་ཚེ་ངེད་རྣམས་ཀྱིས་ཁྱོད་དང་ཁྱོད་ཀྱི་ཕ་གཞིས་མེར་བསྲེག་པར་བྱ། ཁྱོད་ཅག་གིས་ངེད་རྣམས་འདིར་བོས་འོངས་པ་ནི་ངེད་རྣམས་ཀྱི་ཡོད་ཚད་འཕྲོག་པའི་ཕྱིར་ཡིན་ནམ་ཞེས་པའོ། །
JDG 14:16 དེ་ནས་སཱམ་སོན་གྱི་ཆུང་མ་སྐྱེས་པའི་མདུན་དུ་ངུས་ཤིང་ན་རེ། ཁྱོད་ནི་ང་ལ་སྡང་བ་ལས་དགའ་བ་མ་ཡིན་ཏེ། ཁྱོད་ཀྱིས་ངའི་མི་རྣམས་ལ་གབ་ཚིག་སྨྲས་ཀྱང་དེའི་ལན་བདག་ལ་མི་སྨྲའོ་ཞེས་སྨྲས་པ་ལ། སཱམ་སོན་གྱིས་དེའི་ལན་དུ། ལྟོས་དང་། དེ་ནི་ངས་ཐ་ན་རང་གི་ཕ་མ་ལའང་བཤད་མེད་པས་ཁྱོད་ལ་ཅི་ལྟར་སྨྲ་རུང་ངམ་ཞེས་སྨྲས།
JDG 14:17 སྟོན་མོའི་ཉིན་བདུན་པོར་ཁོ་མོ་སྐྱེས་པའི་མདུན་དུ་ངུས་ཤིང་། ཉིན་བདུན་པར་ཚ་འདྲི་བྱས་པས་ཁོས་ད་གཟོད་གབ་ཚིག་གི་ལན་རང་གི་ཆུང་མར་བཤད་པ་དང་། ཁོའི་ཆུང་མས་གབ་ཚིག་གི་ལན་རང་རིགས་ཀྱི་མི་རྣམས་ལ་བཤད་དོ། །
JDG 14:18 དེ་ནས་ཉིན་བདུན་པར་ཉི་མ་ནུབ་པའི་སྔོན་དུ། གྲོང་ཁྱེར་དེའི་མི་རྣམས་ཀྱིས་སཱམ་སོན་ལ། སྦྲང་རྩི་ལས་ཀྱང་མངར་བ་ཅི་ཞིག་མཆིས། སེང་གེ་ལས་ཀྱང་སྟོབས་ཅན་གང་ཞིག་ཡོད་ཅེས་སྨྲས་པར། སཱམ་སོན་ན་རེ། གལ་ཏེ་ཁྱོད་ཅག་གིས་བདག་གི་བ་གཞོན་གྱིས་ཞིང་རྨོས་པ་མིན་ན་ངའི་གབ་ཚིག་གི་ནང་དོན་ཤེས་མི་སྲིད་ཅེས་སྨྲས།
JDG 14:19 དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་པས། ཁོ་རང་མར་ཨ་ཤཱ་ཀེ་ལོན་དུ་ཕྱིན་ནས་དེར་མི་སུམ་ཅུ་བསད་པ་དང་། དེ་དག་གི་གྱོན་གོས་ཕྲོགས་ཏེ་གབ་ཚིག་གི་ལན་ཤེས་པའི་མི་རྣམས་ལ་སྤྲད། ཡང་ཁོ་རང་ཁྲོས་ནས་ཕ་གཞིས་སུ་ཕྱིན་ཏོ། །
JDG 14:20 སཱམ་སོན་གྱི་ཆུང་མ་ནི་ཁོའི་འདུག་གྲོགས་ཏེ་ཁོའི་མག་རོགས་བྱས་མྱོང་བ་དེར་དབང་བར་གྱུར་ཏོ། །
JDG 15:1 ཉིན་འགའ་ཤས་ཀྱི་རྗེས་སུ་གྲོ་རྔ་བའི་དུས་ལ་སླེབས་པ་ན། སཱམ་སོན་གྱིས་ར་ཕྲུག་ཅིག་ཁྲིད་ནས་རང་གི་ཆུང་མར་བལྟ་རུ་ཕྱིན་པ་དང་འདི་ལྟར་སྨྲས་པ་སྟེ། ང་ཁང་པ་སྦུག་མའི་ནང་རང་གི་ཆུང་མར་འཕྲད་དུ་འགྲོ་བར་བྱ་ཞེས་པ་ལ། ཁོའི་སྒྱུག་པོས་ཁོ་རང་ནང་ལ་འགྲོ་རུ་མ་བཅུག་པར་ན་རེ།
JDG 15:2 ཁྱོད་རང་ཁོ་མོར་ཤིན་ཏུ་སྡང་བར་ངས་སེམས་ཐག་ཆོད་པས། ངས་ཁོ་མོ་ཁྱོད་ཀྱི་གྲོགས་པོར་བྱིན་པ་ཡིན། ཁོ་མོའི་གཅུང་མོ་དེ་ལས་ཀྱང་མཛེས་པ་མ་ཡིན་ནམ། ཁྱོད་ཀྱིས་ཁོ་མོའི་ཚབ་ཏུ་དེ་ལེན་པར་མཛོད་ཅེས་སྨྲས་པ་ལ།
JDG 15:3 སཱམ་སོན་ན་རེ། ཐེངས་འདིར་བདག་གིས་ཕེ་ལེ་ཤེད་པ་རྣམས་ལ་གནོད་བསྐྱལ་ཡང་ཉེས་པ་མེད་ཅེས་སྨྲས།
JDG 15:4 དེར་སཱམ་སོན་སོང་ནས་ཝ་མོ་སུམ་བརྒྱ་བཟུང་འོངས་ཏེ་མཇུག་མ་ཆ་རེ་ཆ་རེ་སྦྲེལ་ཞིང་། མཇུག་མ་གཉིས་ཀྱི་བར་ལ་དཔལ་འབར་རེ་བཏགས།
JDG 15:5 ཁོས་དཔལ་འབར་ལ་མེ་བསྒྲོན་རྗེས་ཝ་མོ་རྣམས་ཕེ་ལེ་ཤེད་པའི་གྲོ་ཞིང་དུ་བཏང་བ་ལ། ཚར་ཕོན་དང་མ་བརྔས་པའི་སྙེ་མ། སྐྱུ་རུ་རའི་ར་བ་བཅས་ཐམས་ཅད་བསྲེགས་སོ། །
JDG 15:6 དེར་ཕེ་ལེ་ཤེད་པ་རྣམས་ཀྱིས་དོན་འདི་ནི་སུ་ཞིག་གིས་བྱས་པ་ཡིན་ནམ་ཞེས་དྲིས་པ་ལ། འགའ་ཤས་ན་རེ། ཐིམ་ནཱ་པའི་མག་པ་སཱམ་སོན་གྱིས་དེ་ལྟར་བྱས། ཅི་ལ་ཞེ་ན། ཁོའི་སྒྱུག་པོས་དེའི་ཆུང་མ་ཁོའི་གྲོགས་ལ་བྱིན་པ་རེད་ཅེས་སྨྲས། དེ་ནས་ཕེ་ལེ་ཤེད་པ་རྣམས་ཡར་སོང་སྟེ་བུད་མེད་དང་དེའི་ཕ་གཉིས་མེར་བསྲེགས་སོ། །
JDG 15:7 དེ་ནས་སཱམ་སོན་གྱིས་དེ་རྣམས་ལ་འདི་ལྟར་སྨྲས་པ་སྟེ། ཁྱོད་ཅག་གིས་དེ་ལྟར་བྱས་པས་བདག་གིས་ཁྱོད་རྣམས་ལས་དགྲ་ཤ་མ་བླངས་བར་དུ་མཚམས་མི་འཇོག་ཅེས་པའོ། །
JDG 15:8 སཱམ་སོན་གྱིས་ཁོ་རྣམས་མང་དུ་བསད་ཅིང་བརླ་དང་དཔྱི་རྣམས་ཀྱང་བཅད་དེ། མར་སོང་ནས་ཨེ་ཏམ་གྱི་བྲག་ཁུང་དུ་བསྡད་དོ། །
JDG 15:9 ཕེ་ལེ་ཤེད་པ་རྣམས་ཡར་སོང་སྟེ་ཡ་ཧུ་དཱ་རུ་སྒར་བཏབ་ཅིང་ལེ་ཧི་རུ་ཁྱབ་པའོ། །
JDG 15:10 དེར་ཡ་ཧུ་དཱ་པ་རྣམས་ན་རེ། ཁྱོད་རྣམས་ཡར་ཡོང་སྟེ་ངེད་ཅག་ལ་རྒོལ་དོན་ཅི་ཞེས་སྨྲས་པ་ལ། དེ་རྣམས་ཀྱིས། ངེད་རྣམས་སཱམ་སོན་བཀྱིག་ཕྱིར་ཡར་འོངས་པ་ཡིན། ཁོས་ངེད་རྣམས་ལ་ཅི་བྱས་པ་ལྟར་ངེད་ཅག་གིས་ཀྱང་ཁོ་ལ་དེ་བཞིན་བྱེད་པར་འགྱུར་ཞེས་སྨྲས།
JDG 15:11 དེ་ནས་ཡ་ཧུ་དཱ་པ་མི་སུམ་སྟོང་མར་ཨེ་ཏམ་གྱི་བྲག་ཁུང་དུ་སོང་སྟེ་སཱམ་སོན་ལ་ན་རེ། ཕེ་ལེ་ཤེད་པ་རྣམས་ཀྱིས་ངེད་ཅག་ལ་དབང་བྱེད་པ་ཁྱོད་ཀྱིས་མི་ཤེས་སམ། ཁྱོད་ཀྱིས་ངེད་རྣམས་ལ་ཅི་བྱས་པ་ཡིན་ནམ་ཞེས་སྨྲས་པ་ལ། ཁོས་འདི་ལྟར། ཁོ་རྣམས་ཀྱིས་བདག་ལ་ཇི་ལྟར་བྱས་ན་བདག་གིས་ཀྱང་ཁོ་རྣམས་ལ་དེ་ལྟར་བྱས་པ་ཡིན་ཞེས་སྨྲས།
JDG 15:12 ཡ་ཧུ་དཱ་པ་རྣམས་ཀྱིས་ཁོ་ལ་འདི་ལྟར་སྨྲས་པ་སྟེ། ངེད་ཅག་ནི་ཁྱོད་རང་བཀྱིགས་ནས་ཕེ་ལེ་ཤེད་པའི་ལག་ཏུ་སྤྲོད་པའི་ཕྱིར་མར་འོངས་པ་ཡིན་ཞེས་པ་ན། སཱམ་སོན་ན་རེ། ཁྱོད་ཅག་རང་གིས་ང་ལ་མི་རྒོལ་བ་མནའ་དང་བཅས་ཁས་ལེན་དགོས་ཞེས་སྨྲས་ཤིང་།
JDG 15:13 དེ་དག་ན་རེ། ངེད་ཅག་གིས་ཁྱོད་རང་བཀྱིགས་ཏེ་ཕེ་ལེ་ཤེད་པ་རྣམས་ཀྱི་ལག་ཏུ་སྤྲོད་པ་ལས་ཁྱོད་རང་མི་གསོད་ཁག་ཐེག་ཡིན་ཞེས་སྨྲས། དེ་ནས་ཁོ་ཚོས་སཱམ་སོན་ནི་ཐག་གསར་གཉིས་ཀྱིས་བཀྱིགས་ཏེ་ཨེ་ཏམ་ནས་ཡར་ཁྲིད་དོ། །
JDG 15:14 སཱམ་སོན་ནི་ལེ་ཧི་རུ་སླེབས་པ་དང་ཕེ་ལེ་ཤེད་པ་རྣམས་ཀྱིས་མདུན་ནས་འུར་བརྒྱབ་ཅིང་། དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་པ་དང་། ཁོའི་དཔུང་པ་བཀྱིག་བྱེད་ཀྱི་ཐག་པ་ནི་མེར་བསྲེགས་པའི་སོ་མ་དང་མཚུངས་ཤིང་། བཀྱིག་ཐག་རྣམས་ཁོའི་ལག་པ་ནས་བྲུལ་ཏོ། །
JDG 15:15 ཁོས་བོང་བུའི་འགྲམ་རུས་རློན་པ་ཞིག་མཐོང་ནས་ལག་པ་བརྐྱངས་ཏེ་བླངས་ཤིང་། དེ་ཡིས་མི་ཆིག་སྟོང་བསད།
JDG 15:16 དེར་སཱམ་སོན་ན་རེ། ངས་བོང་བུའི་འགྲམ་རུས་ཀྱིས་མི་བསད་ནས་སྤུངས་པ་དང་། བོང་བུའི་འགྲམ་རུས་ཀྱིས་མི་ཆིག་སྟོང་བསད་པ་ཡིན་ཞེས་སྨྲས།
JDG 15:17 དེ་ལྟར་སྨྲས་པ་དང་བོང་བུའི་འགྲམ་རུས་དེ་ལག་ནས་ཕར་གཡུགས་ཤིང་། དེ་ནས་གནས་དེའི་མིང་ལ་རཱ་མད་ལེ་ཧི་ ཞེས་ཐོགས་པའོ། །
JDG 15:18 སཱམ་སོན་ཤིན་ཏུ་སྐོམ་པས་དཀོན་མཆོག་ཡ་ཝཱེ་ལ་འདི་ལྟར། ཁྱེད་ཀྱིས་གཡོག་པོའི་ལག་པ་བརྒྱུད་ནས་སྐྱབས་ཆེན་པོ་འདི་ལྟ་བུ་མཛད་པས། བདག་སྐོམས་ནས་འཆི་བ་དང་མཚན་སྐྱི་མ་བཅད་པ་རྣམས་ཀྱི་ལག་ལ་འཆོར་དུ་འཇུག་ག་ལ་རུང་ཞེས་ཞུ་བ་ཕུལ་བ་ལ།
JDG 15:19 དཀོན་མཆོག་གིས་ལེ་ཧི་ཡི་གཤོང་ས་བཀས་པར་མཛད་པས་དེ་ལས་ཆུ་ཐོན་པ་དང་། སཱམ་སོན་གྱིས་དེ་འཐུངས་བས་སླར་ཡང་སེམས་ཤུགས་རྒྱས་པར་གྱུར། ཆུ་མགོ་དེའི་མིང་ལ་ཨེན་ཧག་ཀོ་རེ་ ཞེས་བཏགས་ཤིང་། དེ་ནི་དུས་དེ་རིང་བར་དུ་ལེ་ཧི་རུ་ཡོད་དོ། །
JDG 15:20 ཕེ་ལེ་ཤེད་པ་རྣམས་ཀྱིས་དབང་བྱེད་པའི་དུས་སུ། སཱམ་སོན་ནི་ལོ་ངོ་ཉི་ཤུའི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས་པའོ། །
JDG 16:1 དེ་ནས་སཱམ་སོན་ནི་གཱ་ཟཱ་རུ་སླེབས་ཤིང་དེར་སྨད་འཚོང་མ་ཞིག་མཐོང་ནས་དེ་དང་མཉམ་དུ་བསྡད།
JDG 16:2 མི་ཞིག་གིས་གཱ་ཟཱ་པ་རྣམས་ལ་སཱམ་སོན་འདི་རུ་སླེབས་འདུག་ཅེས་ཞུས་པ་ན། དེ་ཚོས་ཁོ་རང་བསྐོར་ནས་མཚན་གང་པོར་གྲགས་འགུལ་ཅི་ཡང་མེད་པར་མཁར་སྒོ་རུ་འཇབ་སྒུག་བྱས་པ་དང་། ནམ་ལངས་པའི་དུས་སུ་བདག་ཅག་གིས་ཁོ་གསོད་པར་བྱ་ཞེས་སྨྲས།
JDG 16:3 སཱམ་སོན་ཉལ་ནས་ནམ་གུང་ལ་སླེབས་པ་དང་ཡར་ལངས་ཏེ་མཁར་སྒོའི་སྒོ་གླེགས་གཉིས་ཀ་དང་སྒོ་རུ། སྒོ་གཏན་བཅས་ཐམས་ཅད་བླངས་ནས་ཕྲག་ལ་ཁུར་ཏེ་ཧེབ་རོན་མདུན་ཕྱོགས་ཀྱི་རི་རྩེ་ཞིག་ལ་ཁྱེར།
JDG 16:4 དེའི་རྗེས་སུ་སཱམ་སོན་ནི་སོ་རེག་གྲོག་མོ་རུ་མིང་ལ་དི་ལེ་ལཱ་བྱ་བའི་བུད་མེད་ཅིག་ལ་དགའ་བར་གྱུར།
JDG 16:5 ཕེ་ལེ་ཤེད་པའི་འགོ་དཔོན་རྣམས་ཡར་བུད་མེད་དེའི་རྩར་ཕྱིན་ཏེ་ན་རེ། ཁྱོད་ཀྱིས་སཱམ་སོན་བསླུས་ནས་ཁོ་རང་ལ་ཅིའི་ཕྱིར་སྟོབས་ཤུགས་ཆེན་པོ་དེ་འདྲ་ལྡན་པ་དང་། ཐབས་བཀོད་གང་ཞིག་གིས་ངེད་ཅག་ཁོ་ལས་རྒྱལ་ཐུབ་པ་རྩད་ཨེ་ཆོད་བལྟ་རོགས། དེ་ནས་ཁོ་རང་བཀྱིགས་ནས་འདུལ་བར་བྱ། ངེད་ཅག་མི་རེས་ཁྱོད་ལ་དངུལ་སྲང་ཆིག་སྟོང་དང་བརྒྱ་རེ་སྟེར་བར་བྱ་ཞེས་སྨྲས་པས།
JDG 16:6 དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ཁྱོད་ལ་ཅིའི་ཕྱིར་སྟོབས་ཤུགས་ཆེན་པོ་དེ་འདྲ་ལྡན་པ་དང་། ཐབས་བཀོད་གང་ཞིག་གིས་ཁྱོད་རང་བཀྱིགས་ནས་འདུལ་ཐུབ་པ་ང་ལ་སྨྲ་བར་མཛོད་ཅེས་པ་ན།
JDG 16:7 སཱམ་སོན་ན་རེ། གལ་ཏེ་སུ་ཞིག་གིས་འབྲེང་བུ་རློན་པ་བདུན་གྱིས་ང་རང་བཀྱིགས་ན། ང་ནི་སྟོབས་ཉམས་ནས་མི་གཞན་དང་འདྲ་བར་འགྱུར་རོ་ཞེས་སྨྲས།
JDG 16:8 དེ་ནས་ཕེ་ལེ་ཤེད་པའི་འགོ་དཔོན་རྣམས་ཀྱིས་འབྲེང་བུ་རློན་པ་བདུན་ཁྱེར་ཡོང་སྟེ་བུད་མེད་དེར་སྤྲད་ཅིང་། ཁོ་མོས་སཱམ་སོན་ཐག་པས་བཀྱིགས་པ་རེད།
JDG 16:9 སྐབས་དེར་མི་འགའ་ཞིག་གིས་སྔ་མོ་ནས་བུད་མེད་ཀྱི་ཁང་པ་སྦུག་མ་རུ་འཇབ་སྒུག་བྱས་ཡོད་ཅིང་། བུད་མེད་ན་རེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་རང་འཛིན་དུ་འོངས་པ་རེད་ཅེས་སྨྲས་པ་ལ། སཱམ་སོན་གྱིས་གསོ་སྐུད་མེ་ལ་ཐུག་ན་ཆད་འགྲོ་བ་བཞིན་འབྲེང་བུ་རྣམས་བཅད། དེ་ལྟར་མི་རྣམས་ཀྱིས་ཁོའི་སྟོབས་ཤུགས་ཀྱི་འབྱུང་རྩ་མ་ཤེས་སོ། །
JDG 16:10 དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ལྟོས་དང་། ཁྱོད་ཀྱིས་ང་ལ་མགོ་གཡོགས་ཏེ་རྫུན་སྨྲས་པ་རེད། ད་ནི་ཁྱོད་རང་ཐབས་བཀོད་གང་ཞིག་གིས་བཀྱིག་ནུས་པ་ང་ལ་སྨྲ་བར་མཛོད་ཅེས་པར།
JDG 16:11 སཱམ་སོན་ན་རེ། གལ་ཏེ་སུ་ཞིག་གིས་ཐག་པ་གསར་པ་བཀོལ་མ་མྱོང་བ་རྣམས་ཀྱིས་ང་རང་བཀྱིགས་ན། ང་ནི་སྟོབས་ཉམས་ནས་མི་གཞན་དང་འདྲ་བར་འགྱུར་རོ་ཞེས་སྨྲས་པས།
JDG 16:12 དི་ལེ་ལཱ་ཡིས་ཐག་པ་གསར་པས་ཁོ་རང་བཀྱིགས་ནས་འདི་ལྟར་སྨྲས་པ་སྟེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་རང་འཛིན་དུ་འོངས་པ་རེད་ཅེས་པ་དང་། སྐབས་དེར་མི་འགའ་ཞིག་གིས་སྔ་མོ་ནས་ཁང་པ་སྦུག་མ་རུ་འཇབ་སྒུག་བྱས་ཡོད་པ་ལ། སཱམ་སོན་གྱིས་དཔུང་པའི་ཐག་པ་དེ་སྐུད་པ་རྐྱ་གཅིག་གཅོད་པ་བཞིན་དུ་བཅད་པ་རེད།
JDG 16:13 དེ་ནས་དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ཁྱོད་ཀྱིས་ད་དུང་ང་ལ་མགོ་གཡོགས་ཏེ་རྫུན་སྨྲས་པ་རེད། ཐབས་བཀོད་གང་ཞིག་གིས་ཁྱོད་རང་བཀྱིག་ནུས་པ་ང་ལ་སྨྲ་བར་མཛོད་ཅེས་པ་ལ། སཱམ་སོན་ན་རེ། ཁྱོད་ཀྱིས་ངའི་སྐྲ་ལན་གྱི་སྣེ་བདུན་པོ་ཐགས་དང་མཉམ་དུ་བཏགས་པས་ཆོག་ཅེས་སྨྲས་པ་ལ།
JDG 16:14 དི་ལེ་ལཱ་ཡིས་ཁོའི་སྐྲ་ལན་གྱི་སྣེ་མོ་རྣམས་ཐགས་དང་མཉམ་དུ་བཏགས་ཤིང་ཕུར་བས་བརྡབས་ནས་ཁོ་ལ་འདི་ལྟར་སྨྲས་པ་སྟེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་རང་འཛིན་དུ་འོངས་པ་རེད་ཅེས་པ་ན། སཱམ་སོན་གཉིད་ལས་སད་དེ། ཐགས་ཁྲི་སྟེང་གི་ཕུར་བ་དང་ཐགས་བཅས་ཐམས་ཅད་བལ་ཏོ། །
JDG 16:15 དེ་ནས་དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ཁྱོད་ཀྱིས་བདག་ལ་སེམས་མི་སྟེར་བས་ཁྱོད་ང་ལ་དགའ་ཞེས་ཟེར་དོན་ཅི་ཡིན་ནམ། ཁྱོད་ཀྱིས་ཐེངས་གསུམ་དུ་ང་ལ་མགོ་གཡོགས་པ་སྟེ། ཁྱོད་ལ་ཅིའི་ཕྱིར་སྟོབས་ཆེན་པོ་འདི་འདྲ་ཡོད་པ་བདག་ལ་མ་སྨྲས་ཞེས་པའོ། །
JDG 16:16 དི་ལེ་ལཱ་ཡིས་ཉིན་རྒྱུན་ཁོ་ལ་ནན་གྱིས་བསྐུལ་བས། ཁོ་རང་སེམས་འཁྲུགས་ནས་ཐ་ན་འཆི་དགོས་པའི་ཚད་ལ་སླེབས་པ་དང་།
JDG 16:17 སཱམ་སོན་གྱིས་རང་གི་སྙིང་གཏམ་ཡོད་ཚད་ཁོ་མོ་ལ་སྨྲས་ཏེ་ན་རེ། ང་རང་ནི་སྐྱེས་མ་ཐག་ནས་དཀོན་མཆོག་ལ་གཏོགས་ཤིང་ལོགས་སུ་བཀར་བའི་མི་རུ་གྱུར་པ་ཡིན་པས། ངའི་སྐྲ་ལོ་ནི་ནམ་ཡང་སྐྲ་གྲིས་བཞར་མྱོང་མེད། གལ་ཏེ་མི་ཞིག་གིས་ངའི་སྐྲ་ལོ་བཞར་ན་ངའི་སྟོབས་ཤུགས་ང་དང་བྲལ་ནས། ང་རང་སྟོབས་ཉམས་ནས་མི་གཞན་དང་འདྲ་བར་འགྱུར་འགྲོ་ཞེས་སྨྲས།
JDG 16:18 དི་ལེ་ལཱ་ཡིས་ཁོས་སྙིང་གཏམ་ཡོད་ཚད་ཁོ་མོར་སྨྲས་པ་མཐོང་ནས། ཕེ་ལེ་ཤེད་པའི་འགོ་དཔོན་རྣམས་ཀྱི་རྩར་མི་མངགས་ཏེ་ན་རེ། ཁོས་སྙིང་གཏམ་ཡོད་ཚད་བདག་ལ་སྨྲས་ཟིན་པས་ཁྱེད་རྣམས་ཡང་བསྐྱར་ཐེངས་གཅིག་ཡར་ཕེབས་རོགས་ཞེས་སྨྲས་པ་ལ། ཕེ་ལེ་ཤེད་པའི་འགོ་དཔོན་རྣམས་ཀྱིས་ལག་ལ་དངུལ་ཁྱེར་ནས་བུད་མེད་དེའི་རྩར་ཕྱིན།
JDG 16:19 དི་ལེ་ལཱ་ཡིས་སཱམ་སོན་རང་གི་པང་ལ་སྔས་ཏེ་གཉིད་དུ་བཅུག་པ་དང་། མི་ཞིག་བོས་ཡོང་སྟེ་ཁོའི་མགོ་ཡི་སྐྲ་ལན་གྱི་སྣེ་བདུན་པོ་འབྲེག་ཏུ་བཅུག་ཅིང་། དི་ལེ་ལཱ་ཡིས་ཁོ་རང་ངོ་ཚར་སྦྱར་བ་དང་ཁོའི་སྟོབས་ཤུགས་ཁོ་དང་བྲལ་ཏོ། །
JDG 16:20 དེར་ཁོ་མོ་ན་རེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་འཛིན་དུ་འོངས་པ་རེད་ཅེས་སྨྲས་པ་ལ། སཱམ་སོན་གཉིད་ལས་སད་ཅིང་སེམས་སུ། བདག་སྔར་བཞིན་ཕྱི་རོལ་ཏུ་སོང་སྟེ་འཆིང་བ་ལས་ཐར་དགོས་སྙམ་ནའང་། ཁོས་དཀོན་མཆོག་ཡ་ཝཱེ་ནི་ཁོ་དང་བྲལ་ཟིན་པ་མ་ཤེས་སོ། །
JDG 16:21 ཕེ་ལེ་ཤེད་པ་རྣམས་ཀྱིས་ཁོ་རང་བཟུང་སྟེ་མིག་གཉིས་བཏོན་ཅིང་མར་གཱ་ཟཱ་རུ་ཁྲིད་ནས་ལི་སྒྲོག་བརྒྱབ་པ་དང་། ཁོས་བཙོན་ཁང་དུ་རང་འཐག་བསྐོར་ནས་བསྡད།
JDG 16:22 ཡིན་ནའང་ཁོའི་སྐྲ་ནི་བཞར་བའི་རྗེས་སུ་ཡང་བསྐྱར་སྐྱེས་པའོ། །
JDG 16:23 ཕེ་ལེ་ཤེད་པའི་འགོ་དཔོན་རྣམས་དེ་དག་གི་ལྷ་དཱ་གོན་ལ་དམར་མཆོད་རྒྱ་ཆེན་པོ་འབུལ་བ་དང་སྤྲོ་སྤྲོ་གཏོང་བའི་ཕྱིར་འཛོམས་པ་སྟེ། ཁོ་རྣམས་ཀྱིས། བདག་ཅག་གི་ལྷ་ཡིས་དགྲ་བོ་སཱམ་སོན་བདག་ཅག་གི་ལག་ཏུ་སྤྲད་པ་རེད་ཅེས་སྨྲས་སོ། །
JDG 16:24 མི་རྣམས་ཀྱིས་སཱམ་སོན་མཐོང་ནས་ཁོ་ཚོའི་ལྷ་ལ་བསྟོད་བསྔགས་བརྗོད་དེ་འདི་ལྟར་སྨྲས་པ་སྟེ། རང་ཅག་གི་ཡུལ་རྣམས་བརླག་ཅིང་། རང་ཅག་ལས་མི་མང་པོ་གསོད་མཁན་དགྲ་བོ་དེ་ནི་བདག་ཅག་གི་ལྷ་ཡིས་རང་རེའི་ལག་ཏུ་སྤྲད་པ་རེད་ཅེས་པའོ། །
JDG 16:25 ཁོ་རྣམས་ཀྱིས་སྤྲོ་སྐྱིད་ལ་རོལ་བའི་དུས་སུ། སཱམ་སོན་བོས་ཡོང་སྟེ་ངེད་ཅག་གི་མདུན་དུ་ལྟད་མོ་སྟོན་ཅིག་ཅེས་སྨྲས་པ་ལ། ཁོ་ཚོས་སཱམ་སོན་བཙོན་ཁང་ནས་ཕྱིར་ཁྲིད་ཡོང་བ་དང་། ཁོས་མི་རྣམས་ཀྱི་མདུན་དུ་བཞད་གད་བསླངས་ཤིང་། དེ་དག་གིས་ཁོ་རང་ཀ་བ་གཉིས་ཀྱི་བར་ལ་འགྲེང་དུ་བཅུག
JDG 16:26 དེ་ནས་སཱམ་སོན་གྱིས་ཁོའི་ལག་པ་འཛིན་མཁན་བྱིས་པ་དེར་འདི་ལྟར་སྨྲས་པ་སྟེ། ང་རང་ཁང་པ་འདེགས་བྱེད་ཀ་བ་འདིར་བརྟེན་ཕྱིར་དེ་ལ་རེག་ཏུ་འཇུག་རོགས་ཞེས་པའོ། །
JDG 16:27 དུས་དེར་ཁང་པའི་ནང་དུ་སྐྱེས་པ་དང་བུད་མེད་ཀྱིས་གང་ཞིང་། ཕེ་ལེ་ཤེད་པའི་འགོ་དཔོན་ཐམས་ཅད་ཀྱང་དེར་ཡོད་པ་རེད། ཁང་ཐོག་ཏུ་སཱམ་སོན་གྱི་བཞད་གད་ལ་ལྟད་མོ་ལྟ་མཁན་སྐྱེས་ཕོ་མོ་ཧ་ལམ་སུམ་སྟོང་ཡོད་པའོ། །
JDG 16:28 དེ་ནས་སཱམ་སོན་གྱིས་དཀོན་མཆོག་ཡ་ཝཱེ་ལ་འདི་ལྟར། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ང་རང་ཐུགས་ལ་དགོངས་པར་མཛོད། ཀྱེ་དཀོན་མཆོག་ལགས། བདག་གིས་ཕེ་ལེ་ཤེད་པ་རྣམས་ལས་ངའི་མིག་ཟུང་བཏོན་པར་དགྲ་ཤ་ལེན་པའི་ཕྱིར། ཐེངས་འདི་ཁོ་ནར་ཁྱེད་ཀྱིས་ང་ལ་སྟོབས་ཤུགས་གནང་བར་མཛོད་ཅེས་ཞུས་པ་དང་།
JDG 16:29 སཱམ་སོན་གྱིས་ཁང་པའི་དཀྱིལ་དབུས་སུ་ཡོད་པའི་འདེགས་བྱེད་ཀ་བ་དེ་གཉིས་ལ་འཇུས་པ་སྟེ། གཡོན་ལག་གིས་གཅིག་དང་གཡས་ལག་གིས་གཅིག་ལ་འཇུས་ནས་ན་རེ།
JDG 16:30 ང་རང་ཕེ་ལེ་ཤེད་པ་རྣམས་དང་མཉམ་དུ་འཆི་བར་ཤོག་ཅེས་སྨྲས་པ་དང་། སྟོབས་ཤུགས་ཡོད་རྒུས་འཕུལ་རྒྱག་བྱས་པ་ལ། ཁང་པ་བརྡིབས་ནས་འགོ་དཔོན་རྣམས་དང་ཁང་པའི་ནང་གི་མི་ཐམས་ཅད་མནན་པ་རེད། དེ་ལྟར་སཱམ་སོན་གྱིས་ཚེ་ལས་འདའ་བའི་དུས་སུ་བསད་པའི་མི་ནི་ཁོ་གསོན་པའི་དུས་སུ་བསད་པ་ལས་ཀྱང་མང་བའོ། །
JDG 16:31 དེ་ནས་སཱམ་སོན་གྱི་སྤུན་རྣམས་དང་ཁོའི་ཕ་གཞིས་ཐམས་ཅད་མར་ཁོའི་བེམ་པོ་ལེན་དུ་ཕྱིན་པ་དང་། ཁྱེར་ཡོང་ནས་ཚོར་ཨ་དང་ཨེ་སི་ཐ་ཨོལ་གཉིས་ཀྱི་བར་དུ་ཁོའི་ཕ་སྟེ་མ་ནོ་ཨ་ཡི་དུར་ས་རུ་བསྐུངས། ཁོ་ལོ་ངོ་ཉི་ཤུའི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས་པའོ། །
JDG 17:1 ཨེ་ཕཱར་ཡིམ་གྱི་རི་ཁུལ་དུ་མི་ཀཱ་ཞེས་པའི་མི་ཞིག་ཡོད་པ་དང་།
JDG 17:2 དེས་རང་གི་མ་ལ་འདི་ལྟར་སྨྲས་པ་སྟེ། གཞན་གྱིས་ཁྱེད་ནས་ཁྱེར་བའི་དངུལ་སྲང་ཆིག་སྟོང་ཆིག་བརྒྱ་དེའི་ཕྱིར་ཁྱེད་ཀྱིས་དམོད་མོ་བྱས་པ་ངས་ཀྱང་ཐོས་བྱུང་། ལྟོས་དང་། དངུལ་དེ་ངའི་ལག་ཏུ་ཡོད་དེ་ངས་ཁྱེར་བ་ཡིན་ཞེས་པར། ཁོའི་མ་ན་རེ། ཀྱེ་བདག་གི་བུ། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་བར་ཤོག་ཅེས་སྨྲས།
JDG 17:3 མི་ཀཱ་ཡིས་དངུལ་སྲང་ཆིག་སྟོང་དང་བརྒྱ་ཕྱིར་རང་གི་མ་ལ་ཕུལ་བ་ལ། ཁོའི་མ་ན་རེ། སྐུ་ཞིག་བརྐོ་བ་དང་སྐུ་ཞིག་ལྡུག་པའི་ཕྱིར་བདག་གིས་དངུལ་འདི་ཁྱོད་ཀྱི་དོན་དུ་དཀོན་མཆོག་ཡ་ཝཱེ་ལ་འབུལ་བར་བྱ་སྟེ། བདག་གིས་ད་ལྟ་ཁྱོད་ལ་སྤྲོད་པར་བྱ་ཞེས་སྨྲས་སོ། །
JDG 17:4 མི་ཀཱ་ཡིས་དངུལ་དེ་ཕྱིར་རང་གི་མ་ལ་ཕུལ་བ་དང་། ཁོའི་མ་ཡིས་དངུལ་སྲང་ཉིས་བརྒྱ་དངུལ་མགར་ལ་སྤྲད་ཅིང་། སྐུ་ཞིག་བརྐོས་པ་དང་སྐུ་ཞིག་བླུགས་ནས་མི་ཀཱའི་ཁང་པར་བཞག
JDG 17:5 མི་ཀཱ་ལ་ལྷ་ཁང་ཞིག་བྱུང་བ་དང་། བེར་ཐུལ་ཞིག་དང་ཁྱིམ་གྱི་ལྷ་སྐུ་རྣམས་བཟོས་ཏེ་རང་གི་བུ་རྣམས་ལས་གཅིག་མཆོད་དཔོན་དུ་བསྐོས་པའོ། །
JDG 17:6 དེའི་དུས་སུ་ཡེས་ར་ཨེལ་གྱི་ནང་དུ་རྒྱལ་པོ་མེད་ལ། མི་རེ་རེས་གང་འདོད་བཞིན་བྱས་སོ། །
JDG 17:7 ཡ་ཧུ་དཱའི་པེད་ལེ་ཧེམ་དུ་གཞོན་ནུ་ཞིག་ཡོད་པ་ཡ་ཧུ་དཱའི་རིགས་རྒྱུད་ཀྱི་ལེ་ཝི་པ་ཡིན་ལ། ཁོ་ཡུལ་དེར་བྱེས་སུ་བསྡད་ཡོད་པ་དང་།
JDG 17:8 མི་དེ་ཡ་ཧུ་དཱའི་པེད་ལེ་ཧེམ་གྲོང་རྡལ་དང་བྲལ་ནས་འདུག་ས་ཞིག་འཚོལ་བའི་ཕྱིར་སོང་ཞིང་། ལམ་དུ་བགྲོད་པའི་དུས་སུ་ཨེ་ཕཱར་ཡིམ་རི་ཁུལ་གྱི་མི་ཀཱ་ཚང་ལ་སླེབས།
JDG 17:9 མི་ཀཱས་དེ་ལ་འདི་ལྟར། ཁྱོད་རང་གང་ནས་འོངས་པ་ཡིན་ཞེས་དྲིས་པ་ལ། ཁོ་ན་རེ། བདག་ནི་ཡ་ཧུ་དཱའི་པེད་ལེ་ཧེམ་ནས་འོངས་པ་དང་། བདག་ནི་ལེ་ཝི་པ་ཞིག་ཡིན་ལ་འདུག་ས་འཚོལ་བ་ཡིན་ཞེས་སྨྲས་ཤིང་།
JDG 17:10 མི་ཀཱ་ན་རེ། ཁྱེད་རང་བདག་དང་མཉམ་དུ་བསྡད་ཆོག་པ་སྟེ། ངས་ཁྱེད་རང་ཕ་དང་མཆོད་དཔོན་དུ་བཀུར་ཞིང་། ངས་ལོ་རེར་ཁྱེད་ལ་དངུལ་སྲང་བཅུ་དང་། གྱོན་གོས་ཁ་ཚང་གཅིག མི་ཚེ་བསྐྱལ་བའི་ཁ་ཟས་བཅས་འབུལ་བར་བྱ་ཞེས་སྨྲས་པ་ལ། ལེ་ཝི་པ་དེ་ཁོའི་ཁྱིམ་དུ་འཛུལ་བའོ། །
JDG 17:11 ལེ་ཝི་པ་མི་དེ་དང་མཉམ་དུ་སྡོད་པར་དགའ་ཞིང་། ཁོས་གཞོན་ནུ་དེ་རང་གི་བུ་བཞིན་བསྐྱངས་སོ། །
JDG 17:12 མི་ཀཱས་ལེ་ཝི་པའི་གཞོན་ནུ་དེ་མཆོད་དཔོན་དུ་བསྐོས་པ་དང་ཁོ་རང་མི་ཀཱའི་ཁྱིམ་དུ་བསྡད།
JDG 17:13 དེ་ནས་མི་ཀཱ་ན་རེ། ད་ནི་བདག་ལ་ལེ་ཝི་པ་ཞིག་མཆོད་དཔོན་དུ་ཡོད་པས། དཀོན་མཆོག་ཡ་ཝཱེས་བདག་ལ་བྱིན་རླབས་གནང་ངེས་ཡིན་པ་ཤེས་ཞེས་སྨྲས་སོ། །
JDG 18:1 དེའི་དུས་སུ་ཡེས་ར་ཨེལ་གྱི་ཁྲོད་དུ་རྒྱལ་པོ་མེད་པ་དང་། དཱན་གྱི་ཚོ་པས་ད་དུང་སྡོད་སའི་གནས་ཤིག་འཚོལ་བ་སྟེ། དུས་དེ་བར་དུ་ཁོ་རྣམས་ལ་ཡེས་ར་ཨེལ་ཚོ་པའི་ཁྲོད་དུ་ད་དུང་ས་སྐལ་འཐོབ་མེད་པས་སོ། །
JDG 18:2 དེའི་ཕྱིར་དཱན་གྱི་མི་རྣམས་ཀྱིས་ཚོར་ཨ་དང་ཨེ་སི་ཐ་ཨོལ་ནས་རང་གི་ནང་མི་ལས་དཔའ་རྒོད་ལྔ་ཡུལ་དེར་ལྐོག་ཞིབ་བྱེད་པར་བཏང་ནས་ན་རེ། ཁྱོད་རྣམས་ཡུལ་དེར་ལྐོག་ཞིབ་བྱེད་དུ་སོང་ཞེས་སྨྲས། དེ་ནས་ཁོ་རྣམས་ཨེ་ཕཱར་ཡིམ་རི་ཁུལ་དུ་སླེབས་ཤིང་། མི་ཀཱ་ཡི་ཁང་པར་ཕྱིན་ནས་དེར་ཞག་སྡོད་བྱས།
JDG 18:3 ཁོ་རྣམས་མི་ཀཱའི་ཁང་པ་དང་ཉེ་བར་སླེབས་པ་ལ་གཞོན་ནུ་ལེ་ཝི་པ་དེའི་སྐད་གདངས་ཤེས་ཏེ་ནང་དུ་སོང་ནས་ཁོ་ལ་འདི་ལྟར། སུ་ཞིག་གིས་ཁྱོད་འདིར་ཁྲིད་འོངས་པ་ཡིན། ཁྱོད་ཀྱིས་འདིར་ཅི་བྱེད། ཁྱོད་ལ་འདི་ནས་ཅི་ཐོབ་ཅེས་དྲིས་པ་ལ།
JDG 18:4 ཁོ་ན་རེ། མི་ཀཱས་ང་ལ་འདི་ལྟར་བྱས་བྱུང་། ཁོང་གིས་ང་རང་གླས་ནས་ཁོང་གི་མཆོད་དཔོན་དུ་བཞག་པ་ཡིན་ཞེས་སྨྲས་ཤིང་།
JDG 18:5 དེ་དག་གིས་ཁོ་ལ་འདི་ལྟར། ངེད་རྣམས་བགྲོད་པའི་ལམ་འདི་བདེ་བླག་ཡིན་མིན་ཤེས་པའི་ཕྱིར་ཁྱེད་ཀྱིས་དཀོན་མཆོག་ལ་ཞུ་རོགས་ཞེས་ཞུས་པ་ལ།
JDG 18:6 མཆོད་དཔོན་གྱིས་ཁོ་རྣམས་ལ། ཁྱོད་རྣམས་བདེ་བར་ཕྱིན་ཅིག ཁྱོད་རྣམས་དཀོན་མཆོག་ཡ་ཝཱེའི་སྤྱན་སྔར་ལམ་འདིར་བགྲོད་པ་ཡིན་ཞེས་སྨྲས་སོ། །
JDG 18:7 དེ་ནས་མི་ལྔ་པོ་དེ་སོང་ནས་ལཱ་ཨི་སི་ཡུལ་དུ་སླེབས་པ་དང་། ཡུལ་དེའི་མི་རྣམས་ཚི་ཏུན་པ་རྣམས་བདེ་བར་སྡོད་པ་ནང་བཞིན་བག་ཡངས་ཞི་བདེ་ངང་སྡོད་པ་མཐོང་ཞིང་། ཡུལ་དེར་དབང་དུ་སྡུད་མཁན་དང་གནོད་འཚེ་གཏོང་མཁན་མེད་དེ། དེ་རྣམས་ཚི་ཏུན་པ་དང་རྒྱང་ཐག་རིང་ལ་གཞན་དང་འགྲོ་འོང་མེད་པ་རེད།
JDG 18:8 མི་ལྔ་པོ་དེ་ཕྱིར་ཚོར་ཨ་དང་ཨེ་སི་ཐ་ཨོལ་དུ་རང་གི་སྤུན་རྣམས་ཀྱི་སར་འོངས་པ་དང་། སྤུན་རྣམས་ན་རེ། ཁྱོད་རྣམས་ལ་སྨྲ་རྒྱུ་ཅི་ཞིག་ཡོད་ཅེས་དྲིས་པ་ལ།
JDG 18:9 དེ་དག་ན་རེ། ལོངས་དང་བདག་ཅག་ཡར་སོང་ནས་ཁོ་རྣམས་ལ་འཐབ་པར་བྱ། ངེད་རྣམས་ཀྱིས་ཡུལ་དེར་ལྐོག་ཞིབ་བྱས་ཤིང་ཡུལ་དེ་ཤིན་ཏུ་ཡག་པོ་འདུག ཁྱོད་རྣམས་ད་དུང་ས་འདིར་འདུག་གམ། མྱུར་བ་མྱུར་དུ་སོང་ནས་ཡུལ་དེ་ས་སྐལ་དུ་ལེན་པ་ལས་དུས་འགྱངས་བྱེད་མི་རུང་།
JDG 18:10 ཁྱོད་རྣམས་དེར་སླེབས་དུས་བག་ཡངས་ཞི་བདེ་ངང་སྡོད་པའི་མི་རྣམས་མཐོང་ངེས་ཤིང་ས་རྒྱའང་ཆེ་བ་ཡིན། དཀོན་མཆོག་གིས་ཡུལ་དེ་ཁྱོད་རྣམས་ཀྱི་ལག་ཏུ་སྤྲད་ཟིན། ཡུལ་དེར་དངོས་པོ་གང་ཡིན་ཡང་གྱ་ནོམ་པ་ཡོད་ཅིང་མི་ཚང་བ་གཅིག་ཀྱང་མེད་ཅེས་སྨྲས་སོ། །
JDG 18:11 དེ་ནས་དཱན་གྱི་ཁྱིམ་རྒྱུད་ཁྲོད་ཀྱི་མི་དྲུག་བརྒྱ་ཡིས་རང་རང་སར་མཚོན་ཆ་ཁྱེར་ཏེ་ཚོར་ཨ་དང་ཨེ་སི་ཐ་ཨོལ་ནས་ཆས་སོ། །
JDG 18:12 དེ་དག་ཡར་སོང་སྟེ་ཡ་ཧུ་དཱའི་ཀིར་ཡད་ཡེ་ཨ་རིམ་དུ་སླེབས་པ་དང་དེར་སྒར་བཏབ་པས། ཡུལ་དེར་ད་ལྟའི་བར་དུ་མ་ཧ་ནེ་དཱན་ ཞེས་འབོད་པའོ། །ལྟོས་དང་། དེ་ནི་ཀིར་ཡཱད་ཡེ་ཨ་རིམ་གྱི་ནུབ་ཕྱོགས་སུ་ཡོད་དེ།
JDG 18:13 ཁོ་རྣམས་དེ་ནས་ཨེ་ཕཱར་ཡིམ་རི་ཁུལ་དུ་ཕྱིན་ཅིང་མི་ཀཱའི་ཁང་པར་སླེབས།
JDG 18:14 སྔར་ལཱ་ཨི་སི་ཡུལ་ལ་ལྐོག་ཞིབ་བྱེད་མཁན་མི་ལྔ་པོ་དེས་རང་གི་སྤུན་རྣམས་ལ་འདི་ལྟར། ཁང་པ་འདིའི་ནང་དུ་བེར་ཐུལ་ཞིག་དང་ཁྱིམ་གྱི་ལྷ་སྐུ་རྣམས་དང་། དེ་མིན་སྐུ་བརྐོས་མ་དང་སྐུ་བླུགས་མ་ཡོད་པ་ཁྱོད་ཅག་གིས་ཤེས་སམ། ད་ནི་ཁྱོད་ཅག་གིས་ཅི་བྱེད་འོས་པར་བསམ་བློ་གཏོང་དགོས་ཞེས་སྨྲས་ཤིང་།
JDG 18:15 མི་ལྔ་པོ་དེ་མི་ཀཱའི་ཁང་པར་ཕྱིན་ཅིང་། གཞོན་ནུ་ལེ་ཝི་པ་དེའི་ཁང་པར་སླེབས་པ་དང་ཁོ་ལ་འཚམས་འདྲི་ཞུས།
JDG 18:16 དཱན་གྱི་མི་དྲུག་བརྒྱ་བོས་རང་རང་གི་མཚོན་ཆ་བཟུང་ནས་སྒོ་ཁར་འགྲེང་ནས་བསྡད།
JDG 18:17 དེ་ནས་ཡུལ་དེར་ལྐོག་ཞིབ་བྱེད་མཁན་མི་ལྔ་པོ་ནང་དུ་སོང་ནས་སྐུ་བརྐོས་མ་དང་བེར་ཐུལ། ཁྱིམ་གྱི་ལྷ་སྐུ། དེ་མིན་སྐུ་བླུགས་མ་བཅས་ཐམས་ཅད་ཁྱེར། མཆོད་དཔོན་དང་མཚོན་ཆ་ཐོགས་པའི་མི་དྲུག་བརྒྱ་བོ་ལྷན་ཅིག་ཏུ་སྒོ་ཁར་འགྲེང་ནས་བསྡད།
JDG 18:18 མི་ལྔ་པོ་དེ་མི་ཀཱའི་ཁང་པར་ཕྱིན་ཏེ་སྐུ་བརྐོས་མ་དང་བེར་ཐུལ། ཁྱིམ་གྱི་ལྷ་སྐུ། དེ་མིན་སྐུ་བླུགས་མ་བཅས་བླངས་པ་ལ། མཆོད་དཔོན་གྱིས་ཁོ་རྣམས་ལ། ཁྱོད་ཅག་གིས་ཅི་བྱེད་དམ་ཞེས་དྲིས་པ་དང་།
JDG 18:19 ཁོ་རྣམས་ན་རེ། ཁ་མི་གྲགས་པར་ལག་པས་ཁ་བཅད་ནས་ངེད་ཅག་མཉམ་དུ་ཤོག་ཅིག ངེད་རྣམས་ཀྱིས་ཁྱེད་རང་ཕ་དང་མཆོད་དཔོན་དུ་བརྩི་བར་བྱ། ཁྱེད་རང་ཁྱིམ་གཅིག་གི་མཆོད་དཔོན་བྱས་ན་དགའ་འམ་ཡང་ན་ཡེས་ར་ཨེལ་གྱི་རིགས་རྒྱུད་གཅིག་དང་ཚོ་པ་གཅིག་གི་མཆོད་དཔོན་བྱས་ན་ལེགས་ཞེས་སྨྲས་པ་ལ།
JDG 18:20 མཆོད་དཔོན་དགའ་བར་གྱུར་ཏེ་བེར་ཐུལ་དང་ཁྱིམ་གྱི་ལྷ་སྐུ། དེ་མིན་སྐུ་བརྐོས་མ་བཅས་རྣམས་ཁྱེར་ནས་ཁོ་རྣམས་ཀྱི་ཁྲོད་དུ་ཕྱིན།
JDG 18:21 དེ་ནས་ཁོ་རྣམས་ཡུལ་དེར་བྲལ་ཞིང་། བུ་ཕྲུག་དང་ཕྱུགས་ཟོག རྒྱུ་ནོར་བཅས་ཐམས་ཅད་སྔོན་ལ་བཏང་ངོ་། །
JDG 18:22 ཁོ་ཚོ་མི་ཀཱའི་ཁང་པ་དང་རྒྱང་ཐག་རིང་པོར་སླེབས་པ་ལ། མི་ཀཱའི་ཁྱིམ་མཚེས་རྣམས་འདུས་ཏེ་དཱན་གྱི་མི་རྣམས་བདས་ཤིང་།
JDG 18:23 ཁོ་ཚོས་དཱན་གྱི་མི་རྣམས་བོས་པ་ལ། དཱན་གྱི་མི་རྣམས་ཁ་ཕྱིར་འཁོར་ནས་མི་ཀཱ་ལ་འདི་ལྟར། ཁྱོད་ཀྱིས་མི་འདི་འདྲ་མང་པོ་བསྡུས་ཡོང་ནས་ཅི་བྱའམ་ཞེས་དྲིས་པ་ན།
JDG 18:24 མི་ཀཱ་ན་རེ། ཁྱོད་རྣམས་ཀྱིས་ངས་བཟོས་པའི་ལྷ་སྐུ་དང་མཆོད་དཔོན་བཅས་ཐམས་ཅད་ཁྱེར་སོང་བ་དང་། ད་ནི་བདག་ལ་ཅི་ཞིག་ལུས་ཡོད་དམ། ད་དུང་བདག་ལ་ཁྱོད་ཀྱིས་ཅི་བྱའམ་ཞེས་འདྲི་བ་ཅི་ཞེས་སྨྲས་པ་དང་།
JDG 18:25 དཱན་གྱི་མི་རྣམས་ཀྱིས་ཁོ་ལ་འདི་ལྟར་སྨྲས་པ་སྟེ། གདུག་རྩུབ་ཅན་འདི་ཚོས་ཁྱོད་ལ་རྒོལ་ཏེ་ཁྱོད་དང་ཁྱོད་ཀྱི་ཁྱིམ་གང་པོའི་སྲོག་འཆོར་ཉེན་ཡོད་པས། ཁྱོད་ཀྱིས་རང་གི་སྐད་ངེད་རྣམས་ལ་ཐོས་སུ་མ་འཇུག་ཅེས་པའོ། །
JDG 18:26 དཱན་གྱི་མི་རྣམས་སྔར་བཞིན་རང་གི་ལམ་དུ་སྐྱོད་པ་ལ། མི་ཀཱ་ཡིས་དེ་རྣམས་ཀྱི་སྟོབས་ཤུགས་རང་ཉིད་ལས་ཆེ་བ་མཐོང་སྟེ་ཁ་ཕྱིར་འཁོར་ནས་ཡུལ་དུ་ལོག
JDG 18:27 དཱན་གྱི་མི་རྣམས་ཀྱིས་མི་ཀཱས་བཟོས་པའི་ལྷ་སྐུ་དང་དེའི་མཆོད་དཔོན་བཅས་ཐམས་ཅད་ལཱ་ཨི་སི་ཡུལ་དུ་ཁྱེར་བ་དང་། བག་ཡངས་ཞི་བདེ་ངང་སྡོད་པའི་ཡུལ་མི་རྣམས་མཐོང་ནས་དེ་རྣམས་ལ་རལ་གྲིས་བརྒྱབ་ཅིང་། ཡང་གྲོང་ཁྱེར་དེ་མེར་བསྲེགས་པའོ། །
JDG 18:28 གྲོང་ཁྱེར་དེ་ཚི་ཏུན་དང་རྒྱང་ཐག་རིང་བ་དང་གཞན་དང་འགྲོ་འོང་མེད་པས་སྐྱོབ་མཁན་གཅིག་ཀྱང་མ་བྱུང་། གྲོང་ཁྱེར་དེ་ཐང་ཞིག་ཏུ་ཡོད་པ་དང་ཐང་དེ་པེད་རེ་ཧོབ་དང་ཉེ། དཱན་གྱི་མི་རྣམས་ཀྱིས་ཡང་བསྐྱར་དེ་རུ་མཁར་བརྩིགས་ནས་བསྡད་ཅིང་།
JDG 18:29 ཁོ་རྣམས་ཀྱི་ཕ་མེས་ཡེས་ར་ཨེལ་གྱི་བུ་དཱན་གྱི་མིང་ལྟར་གྲོང་ཁྱེར་དེའི་མིང་ལ་དཱན་ཞེས་བཏགས། སྔར་གྲོང་ཁྱེར་དེའི་མིང་ལ་ལཱ་ཨི་སི་ཞེས་བྱའོ། །
JDG 18:30 དཱན་གྱི་མི་རྣམས་ཀྱིས་སྐུ་བརྐོས་མ་དེ་རང་གི་དོན་དུ་བཞག ཡང་ཡུལ་དེར་འཕྲོག་བཅོམ་ཐེབས་པའི་ཉིན་མོའི་བར་དུ། མོ་ཤེའི་ ཚ་བོ་སྟེ་གེར་ཤོམ་གྱི་བུ་ཡོ་ནཱ་ཐན་དང་དེའི་བུ་རབས་ཚ་རྒྱུད་ནི་དཱན་ཚོ་པའི་མཆོད་དཔོན་བྱས་ཤིང་།
JDG 18:31 དཀོན་མཆོག་གི་མཆོད་ཁང་ཞི་ལོ་རུ་ཡོད་པའི་ཉིན་མོ་དག་ལ། དཱན་གྱི་མི་རྣམས་ཀྱིས་རང་གི་དོན་དུ་བཞག་པའི་མི་ཀཱ་ཡིས་བརྐོས་པའི་སྐུ་ཡང་དཱན་དུ་ཡོད་པ་ཡིན་ནོ། །
JDG 19:1 ཡེས་ར་ཨེལ་གྱི་ཁྲོད་དུ་རྒྱལ་པོ་མེད་པའི་དུས་སུ། ཨེ་ཕཱར་ཡིམ་རི་ཁུལ་དུ་བྱེས་སུ་སྡོད་པའི་ལེ་ཝི་པ་ཞིག་གིས་ཡ་ཧུ་དཱའི་པེད་ལེ་ཧེམ་གྱི་བུད་མེད་ཅིག་ཆུན་མར་བླངས་ཤིང་།
JDG 19:2 ཆུན་མ་དེས་ལོག་གཡེམ་བྱས་ཏེ་སྐྱེས་པར་བྲལ་ནས་ཕྱིར་ཡ་ཧུ་དཱའི་པེད་ལེ་ཧེམ་དུ་ཕ་གཞིས་སུ་སླེབས་པ་དང་། ཟླ་བ་བཞིའི་རིང་ལ་དེར་བསྡད།
JDG 19:3 དེ་ནས་ཁོ་མོའི་སྐྱེས་པ་ལངས་ནས་གཡོག་པོ་ཞིག་དང་བོང་བུ་གཉིས་ཁྲིད་དེ་ཁོ་མོའི་རྩར་ཕྱིན་ཅིང་། ཚིག་སྙན་མོས་ཁོ་མོ་ཕྱིར་ལོག་པར་བསྐུལ་བ་ལ། བུད་མེད་ཀྱིས་སྐྱེས་པ་ཁྲིད་ནས་ཕ་གཞིས་སུ་ཕྱིན་ཏེ། མོའི་ཕ་ཡིས་ཁོ་མཐོང་བ་དང་དགའ་དགའ་སྤྲོ་སྤྲོས་བསུ་བ་བྱས།
JDG 19:4 ཁོའི་སྒྱུག་པོ་སྟེ་བུད་མེད་ཀྱི་ཕ་ཡིས་ཁོ་རང་ཉིན་གསུམ་ལ་བཀག་པ་དང་ཁོ་གཉིས་ཀྱིས་དེ་རུ་མཉམ་དུ་བཟའ་བཏུང་ལ་རོལ་ནས་ཞག་སྡོད་བྱས།
JDG 19:5 ཉིན་བཞི་པར་ལེ་ཝི་པ་ནངས་སྔ་མོ་ཡར་ལངས་ནས་འགྲོ་བར་བརྩམས་པ་ལ། བུད་མེད་ཀྱི་ཕ་ཡིས་མག་པར་འདི་ལྟར་སྨྲས་པ་སྟེ། ཁྱོད་ཀྱིས་ཁ་ཟས་ཉུང་ཙམ་ཟོས་ནས་སེམས་ཤུགས་བསྐྱེད་རྗེས་ལམ་དུ་ཆས་དང་ཞེས་པའོ། །
JDG 19:6 དེ་ནས་ཁོ་གཉིས་བསྡད་དེ་མཉམ་དུ་བཟའ་བཏུང་ལ་རོལ་ཅིང་། བུད་མེད་ཀྱི་ཕ་ཡིས་ཁོ་ལ་ན་རེ། ཁྱོད་ད་དུང་ཞག་གཅིག་ལ་བསྡད་ནས་སེམས་དགའ་བར་མཛོད་ཅིག་ཅེས་སྨྲས།
JDG 19:7 ཡང་མི་དེ་ལངས་ནས་འགྲོ་བར་བརྩམས་པ་ལ། ཁོའི་སྒྱུག་པོས་ཁོ་རང་བཙན་གྱིས་བཀག་པས་ཡང་གནས་དེར་ཞག་གཅིག་ལ་བསྡད།
JDG 19:8 ཉིན་ལྔ་པར་ཁོ་རང་ནངས་སྔ་མོ་ཡར་ལངས་ནས་འགྲོ་བར་བརྩམས་པ་ལ། བུད་མེད་ཀྱི་ཕ་ན་རེ། ཁྱོད་ཀྱིས་ཁ་ཟས་ཉུང་ཙམ་ཟོས་ནས་སེམས་ཤུགས་བསྐྱེད་དེ་ཉི་མ་ཕྱི་དྲོ་ལོན་རྗེས་ལམ་དུ་ཆས་པར་མཛོད་ཅེས་སྨྲས་ཤིང་། དེ་ནས་ཁོ་གཉིས་ཀྱིས་མཉམ་དུ་བཟའ་བཏུང་ལ་རོལ་བའོ། །
JDG 19:9 ཡང་མི་དེ་ཁོའི་ཆུན་མ་དང་གཡོག་པོ་མཉམ་དུ་ལངས་ནས་འགྲོ་བར་བརྩམས་པ་ལ། ཁོའི་སྒྱུག་པོ་སྟེ་བུད་མེད་ཀྱི་ཕ་ཡིས་ཁོ་ལ་འདི་ལྟར་སྨྲས་པ་སྟེ། ལྟོས་དང་ཉི་མ་ཕྱི་དྲོ་ལོན་འདུག ཁྱོད་ཡང་ཞག་གཅིག་ལ་འདུག་རོགས། ཉི་མ་ནུབ་ལ་ཉེ་བས་འདིར་བསྡད་ནས་སེམས་དགའ་བར་གྱིས། སང་ཉིན་ནངས་སྔ་མོ་ཡར་ལངས་ནས་ཕྱིར་རང་ཡུལ་དུ་ལོག་ཅིག་ཅེས་པའོ། །
JDG 19:10 མི་དེ་ཡང་ཞག་གཅིག་ལ་སྡོད་མ་འདོད་པར་བོང་བུ་གཉིས་ལ་ཁལ་བཀལ་ཏེ། ཆུན་མ་ཁྲིད་ནས་ཕྱིན་ཅིང་ཡེ་བུ་སིའི་ཁ་ཐུག་ཏུ་སླེབས་པ་སྟེ། ཡེ་བུ་སི་ནི་ཡེ་རུ་སཱ་ལེམ་ཡིན་ནོ། །
JDG 19:11 ཡེ་བུ་སི་དང་ཉེ་བར་སླེབས་དུས་ཉི་མ་ནུབ་ལ་ཉེ། གཡོག་པོས་བདག་པོ་ལ་འདི་ལྟར། ཕེབས་ཤོག་དང་ངེད་ཅག་ཡེ་བུ་སི་པའི་གྲོང་ཁྱེར་དུ་ཞག་སྡོད་བྱས་ན་དགའ་ཞེས་ཞུས་པ་ལ།
JDG 19:12 བདག་པོ་ན་རེ། ངེད་ཅག་ཡེས་ར་ཨེལ་པ་རྣམས་ཀྱི་སྡོད་གནས་མ་ཡིན་པའི་ཕྱི་ཕྱོགས་པའི་གྲོང་ཁྱེར་དུ་འགྲོ་མི་རུང་སྟེ། གིབ་ཨ་རུ་སོང་ན་དགའ་ཞེས་སྨྲས་པ་དང་།
JDG 19:13 ཡང་གཡོག་པོ་ལ་འདི་ལྟར་སྨྲས་པ་སྟེ། ཤོག་དང་། ངེད་ཅག་གིབ་ཨ་ཡུལ་དང་ཡང་ན་རཱ་མའི་གནས་ཤིག་ཏུ་ཞག་སྡོད་བྱས་ཆོག་ཅེས་པའོ། །
JDG 19:14 དེ་ནས་ཁོ་རྣམས་གནས་དེ་ལས་བརྒལ་ཏེ་སོང་ནས་པེན་ཡཱ་མེན་པའི་གིབ་ཨ་དང་ཉེ་བར་སླེབས་དུས། ཉི་མ་ནུབ་ལ་བཞུད་དོ། །
JDG 19:15 ཁོ་རྣམས་གིབ་ཨ་རུ་སོང་ནས་དེར་ཞག་སྡོད་བྱེད་འདོད་ཅིང་། ཁོ་གཉིས་གྲོང་ཁྱེར་གྱི་ཐང་ཆེན་དུ་བསྡད་ཀྱང་ཁྱིམ་དུ་བསུ་མཁན་མ་བྱུང་ངོ་། །
JDG 19:16 ལྟོས་དང་། དགོང་མོར་རྒན་པོ་ཞིག་ཞིང་ཁ་ནས་ལས་མཚམས་བཞག་སྟེ་ཕྱིར་འོངས་པ་དང་། མ་གཞི་ཁོ་ནི་ཨེ་ཕཱར་ཡིམ་རི་ཁུལ་གྱི་ཡིན་ཞིང་གིབ་ཨ་རུ་བྱེས་སུ་སྡོད་པ་ཡིན་མོད། འོན་ཀྱང་ཡུལ་དེའི་མི་རྣམས་ནི་པེན་ཡཱ་མེན་པ་ཡིན་ནོ། །
JDG 19:17 རྒན་པོ་དེས་མགོ་ཡར་བཀྱགས་ནས་བལྟས་པར་ལམ་པ་ཞིག་གྲོང་ཁྱེར་གྱི་ཐང་ཆེན་དུ་སྡོད་པ་མཐོང་ནས་ཁོ་ལ་འདི་ལྟར། ཁྱོད་གང་ནས་འོངས། གང་དུ་འགྲོ་ཞེས་དྲིས་པ་ན།
JDG 19:18 ཁོ་ན་རེ། ངེད་རྣམས་ཡ་ཧུ་དཱའི་པེད་ལེ་ཧེམ་ནས་འོངས་པ་དང་རྒྱང་རིང་གི་ཨེ་ཕཱར་ཡིམ་རི་ཁུལ་ཕྱོགས་སུ་འགྲོའོ། །ང་ནི་མ་གཞི་ཡུལ་དེའི་ཡིན་ཞིང་ཡ་ཧུ་དཱའི་པེད་ལེ་ཧེམ་དུ་ཕྱིན་པ་དང་། ད་ལྟ་ང་རང་དཀོན་མཆོག་ཡ་ཝཱེའི་བཞུགས་གནས་སུ་འགྲོ་བ་ཡིན། འདི་རུ་ང་རང་ཁྱིམ་དུ་བསུ་མཁན་མི་འདུག
JDG 19:19 དོན་དམ་དུ་བདག་ལ་བོང་བུ་གསོ་བྱེད་གཟན་རྩྭ་དང་ཆས་ཡོད་ལ། བདག་དང་བདག་གི་ཆུན་མ་དང་། བདག་གི་གཡོག་པོ་ལའང་བག་ལེབ་དང་རྒུན་ཆང་ཡོད་པས་དགོས་མཁོ་ཅི་ཡང་མེད་ཅེས་སྨྲས་པར།
JDG 19:20 རྒན་པོ་ན་རེ། ཁྱོད་རང་བདེ་བར་སྨོན། ཁྱོད་ཀྱི་དགོས་མཁོ་ཐམས་ཅད་བདག་གིས་བསྐང་བར་བྱ། ཡིན་ནའང་ཐང་ཆེན་དུ་ཞག་སྡོད་བྱེད་མི་རུང་ཞེས་སྨྲས།
JDG 19:21 དེ་ནས་རྒན་པོས་ཁོ་རྣམས་ཁྱིམ་དུ་ཁྲིད་ནས་བོང་བུ་ལ་ཆས་བྱིན་རྗེས། ཁོ་རྣམས་ཀྱིས་རྐང་བ་བཀྲུས་ནས་བཟའ་བཏུང་ལ་རོལ་བའོ། །
JDG 19:22 ཁོ་རྣམས་དགའ་ཞིང་སྤྲོ་བའི་དུས་སུ། ལྟོས་དང་། གྲོང་ཁྱེར་དེའི་ཁྲམ་པ་འགའ་རེས་ཁང་པ་བསྐོར་ཅིང་། ཡང་ཡང་སྒོ་བརྡུངས་ནས་ཁང་བདག་རྒན་པོ་ལ་འདི་ལྟར་སྨྲས་པ་སྟེ། ཁྱོད་ཚང་ལ་འོངས་པའི་མི་དེ་ཕྱི་རོལ་ཏུ་ཁྲིད་ཤོག་ཅིག ངེད་རྣམས་དེ་དང་འགྲོགས་པར་བྱ་ཞེས་པ་ལ།
JDG 19:23 ཁང་བདག་དེ་ཕྱི་རུ་འོངས་ནས་ཁོ་རྣམས་ལ་འདི་ལྟར། བདག་གི་སྤུན་ཟླ་རྣམས། འདི་ལྟར་དོན་ངན་མི་བྱེད་རོགས། མི་དེ་བདག་གི་ཁྱིམ་དུ་འོངས་པས་ཁྱོད་རྣམས་ཀྱིས་དོན་ཁྲེལ་མེད་འདི་འདྲ་མི་བྱེད་རོགས།
JDG 19:24 ལྟོས་དང་། བདག་ལ་བུ་མོ་ཞིག་ཡོད་པ་ད་དུང་ན་ཆུང་ཡིན་པར་མ་ཟད། མི་འདིའི་ཆུན་མ་ཡང་ཡོད་པས་བདག་གིས་ཁོ་མོ་རྣམས་ཕྱི་རུ་ཁྲིད་ཡོང་བར་བྱ་སྟེ། ཁྱོད་ཅག་གིས་ཁོ་མོ་རྣམས་བཏུལ་ནས་ཅི་འདོད་ལྟར་བྱས་ཆོག ཡིན་ནའང་མི་འདི་ལ་དོན་ཁྲེལ་མེད་འདི་འདྲ་མི་བྱེད་རོགས་ཞེས་སྨྲས་ཀྱང་།
JDG 19:25 མི་དེ་རྣམས་ཀྱིས་ཁོའི་གཏམ་ལ་མ་མཉན་པས། མི་དེས་ཁོའི་ཆུན་མ་བཟུང་སྟེ་ཕྱི་རུ་ཁྲིད་ནས་མི་དེ་རྣམས་ལ་སྤྲད་པ་དང་། དེ་རྣམས་ཁོ་མོར་འགྲོགས་ནས་མཚན་གང་པོར་བརྙས་བཅོས་བྱས་ཏེ། ནམ་ལངས་ལ་ཉེ་དུས་ད་གཟོད་ཁོ་མོ་བཏང་ངོ་། །
JDG 19:26 ཞོགས་པའི་དུས་སུ། བུད་མེད་དེ་ཕྱིར་རང་གི་བདག་པོ་སྡོད་དུ་འཇུག་མཁན་མི་དེའི་ཁང་པའི་སྒོ་ཁར་ཡོང་སྟེ་སར་འགྱེལ་ཞིང་། ནམ་ལངས་པའི་བར་དུ་དེར་ལུས་སོ། །
JDG 19:27 ཞོགས་པར་ཁོ་མོའི་བདག་པོ་ལངས་ནས་སྒོ་ཕྱེས་ཏེ་ཕྱི་རོལ་ཏུ་ཕྱིན་ནས་ལམ་ལ་ཆས་སྙམ་པ་ལ། ལྟོས་དང་། བསམ་ཡིད་ལས་འདས་པ་ཞིག་ལ་ཁོའི་ཆུན་མ་སྒོ་ཁར་འགྱེལ་ཞིང་ལག་ཟུང་མ་ཐེམ་སྟེང་བཞག་ཡོད་པའོ། །
JDG 19:28 ཁོས་བུད་མེད་ལ་འདི་ལྟར། ཡར་ལོངས་དང་བདག་ཅག་འགྲོ་བར་བྱ་ཞེས་སྨྲས་ནའང་། བུད་མེད་དེས་ལན་མ་བཏབ། དེར་མི་དེས་ཁོ་མོ་བོང་བུར་བཀལ་ནས་ལམ་ལ་ཆས་ཏེ་རང་ཡུལ་དུ་ལོག
JDG 19:29 ཡང་རང་ཁྱིམ་དུ་སླེབས་པ་དང་དེས་ཆུན་མའི་བེམ་པོ་གྲི་ཡིས་ལྷུ་བཅུ་གཉིས་སུ་བཅད་ཅིང་། མི་མངགས་ནས་ཡེས་ར་ཨེལ་གྱི་མཐའ་མཚམས་བཞི་པོར་འཁྱེར་དུ་བཅུག
JDG 19:30 དེ་མཐོང་བ་ཀུན་ན་རེ། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པ་ནས་ད་ལྟའི་བར་དུ་དོན་འདི་འདྲ་བྱུང་མ་མྱོང་ལ་མཐོང་ཡང་མ་མྱོང་ངོ་། །ད་ལྟ་བསམ་བློ་གཏོང་རན་འདུག ཚང་མས་ཅི་ལྟར་ཐག་གིས་གཅོད་པར་གྲོས་བྱེད་འོས་ཞེས་སྨྲས་སོ། །
JDG 20:1 དེ་ནས་ཡེས་ར་ཨེལ་པ་རྣམས་དཱན་ནས་པེར་ཤ་བཱ་བར་དང་། གིལ་ཨད་ཡུལ་ནས་ཕྱི་རུ་ཐོན་ཏེ་མི་གཅིག་ནང་བཞིན་མཱས་ཟི་ཕཱ་ཞེས་པར་དཀོན་མཆོག་ཡ་ཝཱེའི་དྲུང་དུ་འཛོམས་པ་རེད།
JDG 20:2 ཡེས་ར་ཨེལ་པའི་འགོ་དཔོན་ཏེ་ཚོ་པ་ཁག་གི་དམག་དཔོན་ཚང་མ་དཀོན་མཆོག་གི་འབངས་མི་རྣམས་འཚོགས་པའི་ཁྲོད་དུ་འགྲེང་ནས་བསྡད་ཅིང་། གྲི་ཐོགས་པའི་རྐང་དམག་ཁྱོན་བསྡོམས་འབུམ་བཞི་ཡོད་པའོ། །
JDG 20:3 ཡེས་ར་ཨེལ་པ་རྣམས་ཡར་མཱས་ཟི་ཕཱ་རུ་སླེབས་པ་ནི་པེན་ཡཱ་མེན་པ་ཀུན་གྱིས་ཐོས་སོ། །དེ་ནས་ཡེས་ར་ཨེལ་པ་རྣམས་ན་རེ། ཁྱོད་ཀྱིས་དོན་ངན་དེའི་འབྱུང་རྩ་ངེད་ཅག་ལ་གསལ་པོར་ཤོད་ཅིག་ཅེས་སྨྲས་པ་དང་།
JDG 20:4 ལེ་ཝི་པ་སྟེ། གཞན་གྱིས་བསད་པའི་བུད་མེད་དེའི་སྐྱེས་པ་ན་རེ། བདག་དང་བདག་གི་ཆུན་མ་གཉིས་པེན་ཡཱ་མེན་གྱི་གིབ་ཨ་རུ་སླེབས་ནས་དེར་ཞག་སྡོད་བྱས་པ་དང་།
JDG 20:5 གིབ་ཨ་པའི་འགོ་དཔོན་རྣམས་མཚན་མོར་ལངས་ནས་ངའི་ཁང་པ་བསྐོར་ཞིང་ང་རང་གསོད་འདོད་པ་དང་། ངའི་ཆུན་མའང་བརྙས་བཅོས་བྱས་ནས་བསད།
JDG 20:6 དེ་ནས་བདག་གིས་རང་གི་ཆུན་མའི་བེམ་པོ་ལྷུ་ལྷུ་རུ་བཅད་ཅིང་། མི་མངགས་ཏེ་ཡེས་ར་ཨེལ་གྱི་ས་སྐལ་ཡིན་པའི་ཡུལ་ཐམས་ཅད་ལ་འཁྱེར་དུ་བཅུག་པ་ཡིན། ཅི་ལ་ཞེ་ན། གིབ་ཨ་པ་རྣམས་ཀྱིས་ཡེས་ར་ཨེལ་གྱི་ཁྲོད་དུ་ངོ་ཚ་བའི་དོན་ངན་འདི་འདྲ་བྱས་པས་སོ། །
JDG 20:7 ལྟོས་དང་། ད་ནི་ཁྱོད་ཡེས་ར་ཨེལ་པ་ཐམས་ཅད་ཀྱིས་འདིར་གྲོས་བྱས་ནས་འཆར་གཞི་འགོད་དགོས་སོ་ཞེས་སྨྲས་པ་ལ།
JDG 20:8 མི་ཐམས་ཅད་ཡར་ལངས་ནས་མགྲིན་གཅིག་གིས་འདི་ལྟར། ངེད་རྣམས་ལས་སུ་ཞིག་ཀྱང་རང་གི་གུར་རམ་ཁང་པར་མི་ལོག
JDG 20:9 ད་ལྟ་ངེད་ཅག་གིས་གིབ་ཨ་པ་རྣམས་ལ་འདི་ལྟར་བྱེད་ངེས། རྒྱན་བླངས་པ་ལྟར་སོང་ནས་ཁོ་རྣམས་ལ་འཐབ་པར་བྱ།
JDG 20:10 ངེད་རྣམས་ཀྱིས་ཡེས་ར་ཨེལ་གྱི་ཚོ་པ་རེ་རེ་ནས་མི་བརྒྱ་ལས་བཅུ་དང་། མི་སྟོང་ལས་བརྒྱ། མི་ཁྲི་ལས་སྟོང་བཅས་བདམས་ནས་དམག་མིའི་ཆེད་དུ་རྒྱགས་བསྐྱལ་དགོས་ལ། དེ་ནས་དམག་མི་རྣམས་པེན་ཡཱ་མེན་གྱི་གེ་བཱ་རུ་སླེབས་དུས། གིབ་ཨ་པས་ཡེས་ར་ཨེལ་གྱི་ཁྲོད་དུ་བྱས་པའི་སྐྱུག་བྲོ་བའི་དོན་ཐམས་ཅད་ཀྱི་ཕྱིར་དུ་ལན་འཇལ་ཆོག་པ་ཡིན་ཞེས་སྨྲས་པའོ། །
JDG 20:11 དེ་ནས་ཡེས་ར་ཨེལ་གྱི་མི་རྣམས་ནི་མི་གཅིག་ནང་བཞིན་མཉམ་དུ་འབྲེལ་ཞིང་། གྲོང་ཁྱེར་དེ་ལ་དམག་དྲངས་སོ། །
JDG 20:12 ཡེས་ར་ཨེལ་གྱི་ཚོ་པ་ཁག་གིས་མི་མངགས་ཏེ་པེན་ཡཱ་མེན་ཚོ་པའི་ཁྱིམ་རེ་རེར་སོང་སྟེ་ན་རེ། ཁྱོད་རྣམས་ཀྱི་ཁྲོད་ནས་དོན་ངན་འདི་འདྲ་ཅི་ལྟར་བྱས་སམ།
JDG 20:13 ད་ལྟ་ཁྱོད་ཅག་གིས་གིབ་ཨ་ཡི་ཁྲམ་པ་དེ་དག་ཕྱིར་སྤྲོད་ཅིག ངེད་ཅག་གིས་དེ་རྣམས་བསད་དེ་ཡེས་ར་ཨེལ་གྱི་ཁྲོད་ནས་ངན་པ་ཚར་གཅོད་བྱེད་དགོས་ཞེས་སྨྲས་ཀྱང་། པེན་ཡཱ་མེན་པ་དག་གིས་ཁོ་རྣམས་ཀྱི་སྤུན་ཡེས་ར་ཨེལ་པ་རྣམས་ཀྱི་གཏམ་ལ་མ་མཉན་པ་རེད།
JDG 20:14 པེན་ཡཱ་མེན་པ་རྣམས་ནི་ཡེས་ར་ཨེལ་པ་རྣམས་ལ་འཐབ་འཛིང་བྱེད་པའི་ཕྱིར་དུ་གྲོང་ཁྱེར་སོ་སོ་ནས་ཕྱི་རོལ་ཏུ་ཐོན་ཞིང་གིབ་ཨ་རུ་འདུས་སོ། །
JDG 20:15 ཉིན་དེར་པེན་ཡཱ་མེན་པ་རྣམས་ཀྱིས་གྲོང་ཁྱེར་སོ་སོ་ནས་རལ་གྲི་ཐོགས་མཁན་གྱི་དམག་གྲངས་བླངས་པ་ལ་ཁྱོན་བསྡོམས་མི་ཉིས་ཁྲི་དྲུག་སྟོང་ཡོད་པ་དང་། གཞན་ད་དུང་གིབ་ཨ་པ་རྣམས་ལས་དམག་ཧྲག་བདུན་བརྒྱ་ཡོད་པའོ། །
JDG 20:16 དམག་མི་རྣམས་ཀྱི་ཁྲོད་དུ་བདམས་པའི་དམག་ཧྲག་བདུན་བརྒྱ་ཡོད་པ་ཚང་མ་གཡོན་ལག་ཡིན་པ་དང་། རེ་རེ་འུར་རྡོས་མི་ལ་གཡོ་གཟུར་སྤུ་ཙམ་ཡང་མེད་པར་རྒྱག་ཐུབ་པ་ཡིན་ནོ། །
JDG 20:17 པེན་ཡཱ་མེན་པ་ལས་གཞན་ཡེས་ར་ཨེལ་པའི་རལ་གྲི་ཐོགས་མཁན་གྱི་གྲངས་ཀ་བླངས་པ་ལ་ཁྱོན་བསྡོམས་མི་འབུམ་བཞི་ཡོད་པ་དང་ཐམས་ཅད་དམག་མི་ཡིན་ནོ། །
JDG 20:18 དེ་ནས་ཡེས་ར་ཨེལ་པ་རྣམས་ལངས་ནས་པེད་ཨེལ་དུ་སོང་སྟེ་དཀོན་མཆོག་ལ་འདི་ལྟར། ངེད་རྣམས་ལས་སུ་ཞིག་སྔོན་ལ་སོང་སྟེ་པེན་ཡཱ་མེན་པ་རྣམས་དང་འཐབ་འོས་སམ་ཞེས་ཞུས་པ་ལ། དཀོན་མཆོག་ཡ་ཝཱེས་འདི་སྐད་དུ། ཡ་ཧུ་དཱ་སྔོན་ལ་འགྲོ་འོས་ཞེས་གསུངས་སོ། །
JDG 20:19 དེ་ནས་ཡེས་ར་ཨེལ་པ་རྣམས་ཞོགས་པ་ཡར་ལངས་ནས་གིབ་ཨའི་ཁ་ཐུག་ཏུ་སྒར་བཏབ།
JDG 20:20 ཡེས་ར་ཨེལ་པ་རྣམས་ནི་པེན་ཡཱ་མེན་པ་རྣམས་ལ་འཐབ་ཕྱིར་ཕྱི་རོལ་ཏུ་ཐོན་ཞིང་། ཡེས་ར་ཨེལ་པ་རྣམས་ཀྱིས་གིབ་ཨའི་ཕྱོགས་སུ་ཁོ་ཚོར་ཁ་གཏད་དེ་དམག་བཤམས་སོ། །
JDG 20:21 དེ་ནས་པེན་ཡཱ་མེན་པ་རྣམས་གིབ་ཨ་ནས་ཕྱི་རུ་ཐོན་ཞིང་། ཉིན་དེར་ཡེས་ར་ཨེལ་པ་ཉིས་ཁྲི་ཉིས་སྟོང་གནས་དེ་རུ་བསད་དོ། །
JDG 20:22 ཡེས་ར་ཨེལ་པའི་དམག་མི་རྣམས་ཀྱིས་ཕན་ཚུན་སྙིང་ཕུར་བརྡབས་ནས་སྔར་བཞིན་ཉིན་དང་པོར་དམག་ཤོམ་སར་དམག་བཤམས།
JDG 20:23 དམག་མི་རྣམས་ཤི་བའི་ཉིན་མོ་དེར། ཡེས་ར་ཨེལ་པ་རྣམས་ཡར་སོང་སྟེ་མཚན་མོའི་བར་དུ་དཀོན་མཆོག་ཡ་ཝཱེའི་དྲུང་ནས་ངུ་འབོད་བྱས་ཤིང་། དཀོན་མཆོག་ཡ་ཝཱེ་ལ་འདི་ལྟར། ངེད་རྣམས་ཡང་བསྐྱར་སོང་ནས་རང་གི་སྤུན་པེན་ཡཱ་མེན་དང་འཐབ་འཛིང་བྱེད་རུང་ངམ་ཞེས་ཞུས་པར། དཀོན་མཆོག་ཡ་ཝཱེས་འདི་སྐད་དུ། ཡར་སོང་ནས་ཁོ་རྣམས་དང་འཐབ་ཆོག་ཅེས་གསུངས།
JDG 20:24 དེའི་ཕྱི་ཉིན་ཡེས་ར་ཨེལ་པ་རྣམས་ཡར་སོང་སྟེ་པེན་ཡཱ་མེན་པ་རྣམས་ལ་གཏུགས།
JDG 20:25 པེན་ཡཱ་མེན་པ་རྣམས་ཀྱང་ཉིན་དེར་གིབ་ཨ་ནས་ཕྱི་རུ་ཐོན་ཞིང་། ཡེས་ར་ཨེལ་པ་རྣམས་ཀྱི་གདོང་བསུས་ནས་འཐབ་པ་དང་། ཡང་ཁོ་རྣམས་ལས་མི་ཆིག་ཁྲི་བརྒྱད་སྟོང་གནས་དེེ་རུ་བསད་ཅིང་ཚང་མ་རལ་གྲི་ཐོགས་མཁན་ཡིན་ནོ། །
JDG 20:26 དེ་ནས་ཡེས་ར་ཨེལ་པ་ཐམས་ཅད་ཡར་པེད་ཨེལ་དུ་སོང་ནས། དཀོན་མཆོག་ཡ་ཝཱེའི་དྲུང་དུ་བསྡད་ནས་ངུ་འབོད་བྱས་ཤིང་། ཉིན་དེར་དགོང་མོའི་བར་དུ་སྨྱུང་གནས་བསྲུངས། ཡང་དཀོན་མཆོག་ཡ་ཝཱེའི་དྲུང་དུ་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །
JDG 20:27 ཡང་ཡེས་ར་ཨེལ་པ་རྣམས་ཡར་སོང་ནས་དཀོན་མཆོག་ཡ་ཝཱེ་ལ་ཞུས་པ་དང་། དེའི་དུས་སུ་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་རུ་ཡོད་པ་དང་།
JDG 20:28 དུས་དེར་ཨ་རོན་གྱི་ཚ་བོ་དང་ཨེ་ལི་ཨ་ཟར་གྱི་བུ་ཕི་ནེ་ཧེ་ཞལ་ཆད་ཀྱི་ཤུར་སྒམ་མདུན་དུ་ཀྲོང་ངེར་ལངས་ཤིང་། ཁོ་ཚོས་དཀོན་མཆོག་ཡ་ཝཱེ་ལ་འདི་ལྟར། ངེད་རྣམས་ཡང་བསྐྱར་ཕྱི་རོལ་ཏུ་སོང་ནས་རང་གི་སྤུན་པེན་ཡཱ་མེན་དང་འཐབ་འཛིང་བྱེད་རུང་ངམ། ཡང་ན་མཚམས་འཇོག་འོས་ཞེས་ཞུས་པ་ལ། དཀོན་མཆོག་ཡ་ཝཱེས་འདི་སྐད་དུ། སང་ཉིན་ངས་དེ་དག་ཁྱོད་རྣམས་ཀྱི་ལག་ཏུ་སྤྲོད་རྒྱུ་ཡིན་པས་ཁྱོད་རྣམས་ཡར་འགྲོ་འོས་ཞེས་གསུངས།
JDG 20:29 དེ་ནས་ཡེས་ར་ཨེལ་པས་གིབ་ཨའི་ཕྱོགས་བཞི་རུ་འཇབ་དམག་བཏང་ངོ་། །
JDG 20:30 ཉིན་གསུམ་པར་ཡེས་ར་ཨེལ་པ་རྣམས་ཡང་བསྐྱར་ཡར་སོང་སྟེ་པེན་ཡཱ་མེན་པ་རྣམས་ལ་འཐབ་ཅིང་། སྔར་བཞིན་གིབ་ཨའི་ཕྱོགས་སུ་དམག་བཤམས།
JDG 20:31 པེན་ཡཱ་མེན་པ་རྣམས་ཀྱང་ཕྱི་རུ་ཡོང་སྟེ་དགྲ་བོའི་གདོང་བསུས་པས་གྲོང་ཁྱེར་དང་བྲལ་བའི་གཡོ་འོག་ཏུ་ཚུད། ཞིང་བར་གྱི་བགྲོད་ལམ་གཉིས་ཏེ་གཅིག་ནི་པེད་ཨེལ་ལ་སླེབས་ཤིང་ཅིག་ཤོས་ནི་གིབ་ཨ་རུ་སླེབས་ཡོད་པའི་སྟེང་དུ། ཁོ་ཚོས་སྔར་བཞིན་ཡེས་ར་ཨེལ་པ་སུམ་ཅུ་ཙམ་བསད་དོ། །
JDG 20:32 པེན་ཡཱ་མེན་པ་རྣམས་ཀྱིས་འདི་ལྟར། ཁོ་རྣམས་སྔར་བཞིན་བདག་ཅག་གི་མདུན་དུ་ཕམ་པ་རེད་ཅེས་སྨྲས། ཡིན་ནའང་ཡེས་ར་ཨེལ་པ་རྣམས་ན་རེ། བདག་ཅག་བྲོས་ཏེ་ཁོ་རྣམས་གྲོང་ཁྱེར་ནས་བགྲོད་ལམ་སྟེང་གཡོ་ཁྲིད་བྱས་ན་ཅི་འདྲ་ཞེས་སྨྲས་ཤིང་།
JDG 20:33 ཡེས་ར་ཨེལ་པ་ཐམས་ཅད་ལངས་ཏེ་པཱ་ཨལ་ཐལ་མཱར་དུ་དམག་བཤམས་ཤིང་། ཡེས་ར་ཨེལ་གྱི་འཇབ་དམག་རྣམས་གེ་བཱ་ཞིང་ཁའི་འཇབ་སྒུག་བྱེད་ས་ནས་ཡར་བརྒྱུགས།
JDG 20:34 ཡེས་ར་ཨེལ་པའི་ཁྲོད་ཀྱི་དམག་ཧྲག་ཆིག་ཁྲི་གིབ་ཨའི་ཁ་ཐུག་ཏུ་གདོང་བསུས་ནས་འོངས་པ་དང་། འཐབ་འཛིང་གཏུམ་དྲག་ཧ་ཅང་ཆེ་མོད། འོན་ཀྱང་པེན་ཡཱ་མེན་པ་རྣམས་ཀྱིས་ཆག་སྒོ་ཉེ་བར་སླེབས་པ་མ་ཚོར་རོ། །
JDG 20:35 དཀོན་མཆོག་ཡ་ཝཱེས་པེན་ཡཱ་མེན་པ་རྣམས་ནི་ཡེས་ར་ཨེལ་པའི་མདུན་དུ་ཕམ་པར་མཛད་ཅིང་། ཉིན་དེར་ཡེས་ར་ཨེལ་པས་པེན་ཡཱ་མེན་པ་ཉིས་ཁྲི་ལྔ་སྟོང་ཆིག་བརྒྱ་བསད་ཅིང་ཚང་མ་རལ་གྲི་ཐོགས་མཁན་ཡིན་ནོ། །
JDG 20:36 དེ་ནས་པེན་ཡཱ་མེན་པ་རྣམས་ཀྱིས་རང་ཉིད་ཕམ་པ་ཤེས་སོ། །ད་ནི་ཡེས་ར་ཨེལ་པ་རྣམས་ཀྱིས་གིབ་ཨ་རུ་འཇབ་དམག་བཞག་པར་ཡིད་ཆེས་ཏེ་པེན་ཡཱ་མེན་པ་རྣམས་ཀྱི་མདུན་དུ་ཕམ་ཁུལ་བྱས་ཤིང་།
JDG 20:37 འཇབ་དམག་མྱུར་བ་མྱུར་དུ་གིབ་ཨ་རུ་བརྒྱུགས་ནས་ཁོ་ཚོ་མུ་མཐུད་དུ་མདུན་སྐྱོད་བྱས་ཏེ་གྲོང་ཁྱེར་ཧྲིལ་པོར་རལ་གྲིས་བརྒྱབ།
JDG 20:38 ཡེས་ར་ཨེལ་པ་དང་འཇབ་དམག་བར་ལ་སྔོན་ནས་ཁ་དན་བཞག་ཡོད་པ་སྟེ། གྲོང་ཁྱེར་ནང་མེ་སྦར་ཏེ་དུ་བ་ལང་ལོང་འཕྱུར་བ་རྟགས་བྱེད་པ་དེ་ཡིན།
JDG 20:39 ཡེས་ར་ཨེལ་པ་རྣམས་གཡུལ་ས་ནས་ཕྱིར་འཐེན་བྱེད་པའི་དུས་སུ། པེན་ཡཱ་མེན་པ་རྣམས་ཀྱིས་ལག་འགུལ་ནས་ཡེས་ར་ཨེལ་པ་སུམ་ཅུ་ཙམ་བསད་པས་ན་རེ། ཁོ་རྣམས་སྔར་བཞིན་བདག་ཅག་གིས་ཕམ་པར་བརྒྱབ་ཅེས་སྨྲས།
JDG 20:40 གྲོང་ཁྱེར་ལས་དུ་སྨུག་ཀ་བ་བཞིན་འཕྱུར་བའི་དུས་སུ། པེན་ཡཱ་མེན་པ་རྣམས་ཁ་ཕྱིར་འཁོར་ནས་བལྟས་ཤིང་། ལྟོས་དང་། གྲོང་ཁྱེར་ཡོངས་སུ་དུ་བ་མཁའ་དབྱིངས་སུ་འཕྱུར་ཏོ། །
JDG 20:41 ཡེས་ར་ཨེལ་པ་རྣམས་ཁ་ཕྱིར་འཁོར་ནས་འོངས་ཤིང་། པེན་ཡཱ་མེན་པ་རྣམས་ཀྱིས་ཆག་སྒོ་རང་སྟེང་དུ་སླེབས་པ་མཐོང་ནས་ཤིན་ཏུ་འཚབ་པ་རེད།
JDG 20:42 ཁོ་རྣམས་ཡེས་ར་ཨེལ་པའི་མདུན་ནས་ཁ་ཕྱིར་འཁོར་ཏེ་དབེན་སྟོང་དུ་བྲོས་ཤིང་། ཡེས་ར་ཨེལ་པ་རྣམས་ཀྱིས་ཁོ་རྣམས་འདེད་བཅོམ་བྱས་པ་དང་། གྲོང་ཁྱེར་སོ་སོ་ནས་ཐོན་པ་དག་གིས་ཀྱང་ཁོ་རྣམས་བར་དུ་བླངས་ནས་བསད།
JDG 20:43 ཡེས་ར་ཨེལ་པས་པེན་ཡཱ་མེན་པ་རྣམས་བསྐོར་ནས་དེད་ཅིང་། ཁོ་རྣམས་ངལ་གསོ་ས་སྟེ་ཤར་ཕྱོགས་སུ་གཏད་པའི་གིབ་ཨ་རུ་དེ་དག་རྡོག་པས་བརྫིས་སོ། །
JDG 20:44 པེན་ཡཱ་མེན་པ་རྣམས་ལས་མི་ཆིག་ཁྲི་བརྒྱད་སྟོང་ཤི་བ་དང་ཚང་མ་དཔའ་རྒོད་ཡིན་ནོ། །
JDG 20:45 དེའི་འཕྲོས་མི་རྣམས་ཁ་ཕྱིར་འཁོར་ནས་དབེན་སྟོང་ཕྱོགས་སུ་རིམ་མོན་གྱི་བྲག་ཏུ་བྲོས་པ་ལ། ཡེས་ར་ཨེལ་པས་ལམ་དུ་ཁོ་རྣམས་ལས་མི་ལྔ་སྟོང་བསད་པ་དང་། སྙེ་མ་འཐུ་བ་བཞིན་ཀི་དོན་བར་དུ་དེད་ནས་ཡང་ཁོ་རྣམས་ལས་མི་ཉིས་སྟོང་བསད།
JDG 20:46 ཉིན་དེར་པེན་ཡཱ་མེན་པ་རྣམས་ལས་ཁྱོན་བསྡོམས་མི་ཉིས་ཁྲི་ལྔ་སྟོང་བསད་ཅིང་རལ་གྲི་ཐོགས་པའི་དཔའ་རྒོད་རྐྱང་རྐྱང་ཡིན་ནོ། །
JDG 20:47 ཡིན་ནའང་མི་དྲུག་བརྒྱ་ཏག་ཏག་ལུས་པ་ཁ་ཕྱིར་འཁོར་ནས་དབེན་སྟོང་ཕྱོགས་སུ་བྲོས་ཤིང་རིམ་མོན་གྱི་བྲག་ཏུ་སླེབས་པ་དང་། དེར་ཟླ་བཞིའི་རིང་ལ་བསྡད་དོ། །
JDG 20:48 ཡེས་ར་ཨེལ་པ་རྣམས་ཡང་ཕྱིར་པེན་ཡཱ་མེན་གྱི་ཡུལ་དུ་སོང་སྟེ། གྲོང་ཁྱེར་སོ་སོའི་མི་དང་ཕྱུགས་ཟོག དེ་མིན་གང་ལ་ཕྲད་པ་ཐམས་ཅད་ལ་རལ་གྲིས་བརྒྱབ་ཅིང་། ཡང་གྲོང་ཁྱེར་མཐའ་དག་མེས་བསྲེགས་སོ། །
JDG 21:1 སྔར་ཡེས་ར་ཨེལ་པ་རྣམས་ཀྱིས་མཱས་ཟི་ཕཱ་རུ་འདི་ལྟར། ངེད་རྣམས་ལས་སུ་ཞིག་གིས་ཀྱང་རང་གི་བུ་མོ་པེན་ཡཱ་མེན་པ་རྣམས་ལ་མནའ་མར་མི་སྟེར་ཞེས་མནའ་བསྐྱལ་བ་རེད།
JDG 21:2 ཡེས་ར་ཨེལ་པ་རྣམས་པེད་ཨེལ་དུ་འོངས་ཏེ། དགོང་མོའི་བར་དུ་དཀོན་མཆོག་གི་དྲུང་དུ་བསྡད་ཅིང་སྐད་ཆེན་པོས་ངུ་འབོད་བྱས་ཏེ་ན་རེ།
JDG 21:3 ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ཡེས་ར་ཨེལ་གྱི་ཁྲོད་དུ་ཚོ་པ་གཅིག་ཆད་པའི་དོན་འདི་ཅིའི་ཕྱིར་བྱུང་ངམ་ཞེས་ཞུས་སོ། །
JDG 21:4 དེའི་ཕྱི་ཉིན་འབངས་རྣམས་ནངས་སྔ་མོ་ཡར་ལངས་ནས་དེར་མཆོད་ཁྲི་ཞིག་བརྩིགས་ཤིང་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །
JDG 21:5 ཡེས་ར་ཨེལ་པ་རྣམས་ཕན་ཚུན་ན་རེ། ཡེས་ར་ཨེལ་གྱི་ཚོ་པ་རྣམས་ལས་གང་ཞིག་མི་ཚོགས་དང་བཅས་དཀོན་མཆོག་ཡ་ཝཱེའི་དྲུང་དུ་ཡར་མ་ཡོང་བ་ཡིན་ནམ་ཞེས་སྨྲས། སྔར་ཡེས་ར་ཨེལ་པ་རྣམས་ཀྱིས་མནའ་ཆེན་པོ་ཞིག་བསྐྱལ་བ་སྟེ། ཡར་མཱས་ཟི་ཕཱ་རུ་དཀོན་མཆོག་ཡ་ཝཱེའི་དྲུང་དུ་མི་ཡོང་བ་ཐམས་ཅད་ངེས་པར་གསོད་དགོས་ཞེས་སྨྲས་མྱོང་ངོ་། །
JDG 21:6 ཡེས་ར་ཨེལ་པ་རྣམས་ཀྱིས་རང་གི་སྤུན་པེན་ཡཱ་མེན་ལ་སྙིང་རྗེ་ནས་ན་རེ། ད་ལྟ་ཡེས་ར་ཨེལ་གྱི་ཁྲོད་དུ་ཚོ་པ་གཅིག་ཆད་པ་ཡིན།
JDG 21:7 བདག་ཅག་གིས་དཀོན་མཆོག་ཡ་ཝཱེའི་དྲུང་དུ་མནའ་བསྐྱལ་ནས། རང་ཅག་གི་བུ་མོ་རྣམས་ནི་ཅི་ནས་ཀྱང་པེན་ཡཱ་མེན་པ་རྣམས་ལ་མནའ་མར་མི་བརྫང་ཞེས་སྨྲས་པ་ཡིན་པས། ད་ལྟ་བདག་ཅག་གིས་ཅི་བྱས་ནས་ཁོ་རྣམས་ལས་ཤུལ་དུ་ལུས་པ་རྣམས་ལ་ཆུང་མ་ཡོད་པར་བྱའམ་ཞེས་སྨྲས།
JDG 21:8 ཡང་ཕན་ཚུན་ན་རེ། ཡེས་ར་ཨེལ་གྱི་ཚོ་པ་རྣམས་ལས་སུ་ཞིག་མཱས་ཟི་ཕཱ་རུ་ཡར་དཀོན་མཆོག་ཡ་ཝཱེའི་དྲུང་དུ་མ་འོངས་པ་ཡིན་ནམ་ཞེས་དྲིས་ཤིང་། ལྟོས་དང་། གིལ་ཨད་ཀྱི་ཡཱ་བེ་སི་ནས་མི་གཅིག་ཀྱང་མི་ཚོགས་ཀྱི་ཁྲོད་དུ་མ་འོངས་པ་རྩད་ཆོད་པ་རེད།
JDG 21:9 ཅི་ལ་ཞེ་ན། འབངས་རྣམས་ཀྱི་གྲངས་ཀ་ལེན་པའི་དུས་སུ། གིལ་ཨད་ཀྱི་ཡཱ་བེ་སིའི་མི་རྣམས་ལས་གཅིག་ཀྱང་དེར་མ་རྙེད་དོ། །
JDG 21:10 དེ་ནས་མི་ཚོགས་ཀྱིས་མི་དཔའ་རྩལ་ཅན་ཆིག་ཁྲི་ཉིས་སྟོང་མངགས་ཏེ་ན་རེ། ཁྱོད་རྣམས་སོང་ལ་གིལ་ཨད་ཀྱི་ཡཱ་བེ་སིའི་མི་རྣམས་བུད་མེད་དང་བྱིས་པ་བཅས་ཐམས་ཅད་རལ་གྲིས་སོད་ཅིག
JDG 21:11 ཁྱོད་ཅག་གིས་འདི་ལྟར་བྱེད་དགོས་ཏེ། སྐྱེས་པ་དང་ཡང་སྐྱེས་པར་འགྲོགས་མྱོང་བའི་བུད་མེད་ཐམས་ཅད་ཚར་གཅོད་བྱེད་དགོས་ཞེས་སྨྲས་སོ། །
JDG 21:12 དེ་ནས་ཁོ་རྣམས་ཀྱིས་གིལ་ཨད་ཀྱི་ཡཱ་བེ་སིའི་མི་རྣམས་ལས་མནའ་མར་ཕྱིན་མེད་པའི་ན་ཆུང་བུ་མོ་བཞི་བརྒྱ་རྙེད་ཅིང་། དེ་དག་ཀ་ན་ཨན་ཡུལ་གྱི་ཞི་ལོའི་དམག་སྒར་དུ་ཁྲིད་དོ། །
JDG 21:13 མི་ཚོགས་ཡོངས་ཀྱིས་རིམ་མོན་བྲག་གི་པེན་ཡཱ་མེན་པ་རྣམས་ཀྱི་རྩར་མི་མངགས་ཏེ། དེ་རྣམས་ལ་འགྲིག་མཐུན་ཡོང་བའི་གཏམ་སྨྲས་པ་དང་།
JDG 21:14 དེའི་དུས་སུ་པེན་ཡཱ་མེན་པ་རྣམས་ཕྱིར་ལོག་ཅིང་། ཡེས་ར་ཨེལ་པས་ཡཱ་བེ་སི་གིལ་ཨད་ཀྱི་བུད་མེད་གསོན་པོར་ལུས་པ་རྣམས་དེ་དག་ལ་ཆུང་མར་བྱིན་ནའང་ད་དུང་མ་འདང་ངོ་། །
JDG 21:15 དཀོན་མཆོག་ཡ་ཝཱེས་ཡེས་ར་ཨེལ་གྱི་ནང་དུ་ཚོ་པ་ཞིག་ཆད་པར་མཛད་པས། འབངས་རྣམས་ཀྱིས་པེན་ཡཱ་མེན་པ་རྣམས་ལ་སྙིང་རྗེ་བ་རེད།
JDG 21:16 མི་ཚོགས་ཁྲོད་ཀྱི་རྒན་པོ་རྣམས་ན་རེ། པེན་ཡཱ་མེན་པའི་ཁྲོད་ནས་བུད་མེད་རྣམས་མེད་པར་བྱས་པས། ངེད་ཅག་གིས་ཅི་ལྟར་བྱས་ནས་ཤུལ་དུ་ལུས་པ་དེ་རྣམས་ལ་ཆུང་མ་ཡོད་པར་བྱའམ་ཞེས་སྨྲས་པ་དང་།
JDG 21:17 ཡང་འདི་ལྟར་སྨྲས་པ་སྟེ། ཡེས་ར་ཨེལ་གྱི་ཁྲོད་ནས་ཚོ་པ་ཞིག་མེད་པར་མི་འགྲོ་བའི་ཕྱིར། པེན་ཡཱ་མེན་པ་བྲོས་ནས་ཐར་བ་རྣམས་ལ་ས་སྐལ་ཡོད་ན་འོས།
JDG 21:18 ཡིན་ནའང་ཡེས་ར་ཨེལ་པ་རྣམས་ཀྱིས་སྔར་མནའ་བསྐྱལ་ནས། རང་གི་བུ་མོ་པེན་ཡཱ་མེན་པ་རྣམས་ལ་ཆུང་མར་སྟེར་མཁན་ཡོད་ན་དེ་ལ་དམོད་མོ་ཐེབས་ངེས་ཡིན་ཞེས་སྨྲས་པས། བདག་ཅག་གིས་རང་གི་བུ་མོ་དེ་རྣམས་ལ་ཆུང་མར་སྟེར་མི་རུང་ཞེས་པར།
JDG 21:19 ཡང་ཁོ་རྣམས་ན་རེ། ལེ་བོ་ནཱའི་ལྷོ་ཕྱོགས་དང་། པེད་ཨེལ་གྱི་བྱང་ཕྱོགས། སི་ཀེམ་ལམ་ཆེན་ཤར་ཕྱོགས་ཀྱི་ཞི་ལོ་རུ་ལོ་རེ་བཞིན་དཀོན་མཆོག་ཡ་ཝཱེའི་དུས་ཆེན་ཡོད་ཅེས་སྨྲས་ཤིང་།
JDG 21:20 ཁོ་ཚོས་པེན་ཡཱ་མེན་པ་རྣམས་ལ་འདི་ལྟར། ཁྱོད་རྣམས་སོང་ལ་རྒུན་འབྲུམ་ར་བར་འཇབ་སྒུག་གྱིས་ཤིག
JDG 21:21 ལྟོས་དང་། གལ་ཏེ་ཞི་ལོའི་བུད་མེད་རྣམས་ཕྱི་རུ་ཐོན་ནས་ཞབས་བྲོ་འཁྲབ་པ་མཐོང་ན། རྒུན་འབྲུམ་ར་བ་ནས་ཕྱི་རུ་ཡོང་སྟེ་ཞི་ལོའི་བུད་མེད་རྣམས་ལས་རེ་རེས་ཆུང་མ་རེ་ཕྲོགས་ལ་པེན་ཡཱ་མེན་ཡུལ་དུ་ལོག་ཅིག
JDG 21:22 གལ་ཏེ་ཁོ་མོ་རྣམས་ཀྱི་ཕ་དང་ཡང་ན་སྤུན་རྣམས་ཡོང་ནས་ངེད་རྣམས་དང་ཚིག་རྩོད་བྱས་ན། ངེད་ཅག་གིས། ཁྱེད་རྣམ་པས་ངེད་ཅག་གི་ཆེད་དུ་འདི་རྣམས་ལ་ཐུགས་རྗེས་གཟིགས་རོགས། ཅི་ལ་ཞེ་ན། ངེད་ཅག་གིས་འཐབ་འཛིང་གི་དུས་སུ་ཁོ་རྣམས་ལ་ཆུང་མ་མ་རེག འདི་ནི་བུད་མེད་རྣམས་ཁྱེད་རྣམ་པས་དེ་དག་ལ་བྱིན་པ་མ་ཡིན་པས་ཁྱེད་རྣམ་པ་ཉེས་མེད་ཡིན་ཞེས་སྨྲ་བར་བྱ་ཞེས་བསྐུལ་ཏོ། །
JDG 21:23 དེ་ནས་པེན་ཡཱ་མེན་པ་རྣམས་ཀྱིས་དེ་བཞིན་དུ་བྱས་ཤིང་། ཁོ་རྣམས་ཀྱི་གྲངས་ཀ་བཞིན་ཞབས་བྲོ་འཁྲབ་པའི་བུད་མེད་རྣམས་ལས་ཕྲོགས་ཡོང་སྟེ་ཆུང་མར་བླངས་པ་དང་། རང་གི་ས་སྐལ་དུ་ལོག་སྟེ་ཡང་བསྐྱར་གྲོང་ཁྱེར་རྣམས་བསྐྱར་གསོ་བྱས་ནས་བསྡད།
JDG 21:24 དེའི་དུས་སུ་ཡེས་ར་ཨེལ་པ་རྣམས་ཡུལ་དེར་བྲལ་ནས་ཕྱིར་རང་རང་གི་ཚོ་པ་དང་། རང་རང་གི་རིགས་རྒྱུད། རང་རང་གི་ས་སྐལ་དུ་ལོག
JDG 21:25 སྐབས་དེར་ཡེས་ར་ཨེལ་གྱི་ཁྲོད་དུ་རྒྱལ་པོ་མེད་ལ། མི་རེ་རེས་གང་འདོད་བཞིན་བྱས་སོ།། །།
RUT 1:1 དེ་ཡང་ཁྲིམས་དཔོན་རྣམས་ཀྱིས་སྲིད་སྐྱོང་བའི་དུས་སུ་ཡུལ་དེར་མུ་གེ་བྱུང་ཞིང་། ཡ་ཧུ་དཱ་ས་ཆའི་པེད་ལེ་ཧེམ་གྱི་མི་ཞིག་གིས་རང་གི་ཆུང་མ་དང་བུ་གཉིས་ཁྲིད་ནས་མོ་ཨབ་ཡུལ་དུ་རེ་ཞིག་སྡོད་པར་ཕྱིན་ཏོ། །
RUT 1:2 མི་དེའི་མིང་ལ་ཨེ་ལི་མེ་ལེག་དང་ཆུང་མའི་མིང་ལ་ནཱ་ཨོ་མུ་ཞེས་ཟེར་བ་དང་། ཁོའི་བུ་གཉིས་ལས་གཅིག་གི་མིང་ལ་མཱ་ལིན་དང་ཅིག་ཤོས་ཀྱི་མིང་ལ་ཀིལ་ཡོན་ཟེར་རོ། །ཁོ་རྣམས་ནི་ཡ་ཧུ་དཱ་ས་ཆའི་པེད་ལེ་ཧེམ་གྱི་ཨེབ་རཱད་པ་ཡིན་ལ། མོ་ཨབ་ཡུལ་དུ་སོང་ནས་དེར་གཞིས་ཆགས་སོ། །
RUT 1:3 ཕྱིས་སུ་ནཱ་ཨོ་མུའི་སྐྱེས་པ་ཨེ་ལི་མེ་ལེག་ཚེ་ལས་འདས་ཤིང་ཁོ་མོ་དང་བུ་གཉིས་ལུས་སོ། །
RUT 1:4 བུ་དེ་གཉིས་ཀྱིས་མོ་ཨབ་རིགས་ཀྱི་བུད་མེད་རེ་ཆུང་མར་བླངས་པ་དང་། གཅིག་གི་མིང་ལ་ཨོར་ཕཱ་དང་ཅིག་ཤོས་ཀྱི་མིང་ལ་རུ་ཐི་ཞེས་ཟེར་རོ། །ཁོ་རྣམས་ཡུལ་དེར་མི་ལོ་བཅུ་ཙམ་ལ་གནས་པའི་རྗེས་སུ།
RUT 1:5 མཱ་ལིན་དང་ཀིལ་ཡོན་གཉིས་ཀྱང་ཚེ་ལས་འདས། ནཱ་ཨོ་མུ་ནི་སྐྱེས་པ་མེད་ལ་བུ་གཉིས་ཀྱང་མེད་པར་གཅིག་པུར་ལུས་སོ། །
RUT 1:6 དཀོན་མཆོག་ཡ་ཝཱེས་རང་གི་འབངས་མི་ལ་གཟིགས་སྐྱོང་མཛད་ཅིང་། དེ་དག་ལ་ཁ་ཟས་སྦྱིན་པའི་གནས་ཚུལ་ནི་ནཱ་ཨོ་མུས་མོ་ཨབ་ཡུལ་ནས་ཐོས་པ་དང་། ནཱ་ཨོ་མུ་དང་ཁོ་མོའི་མནའ་མ་གཉིས་ཀྱིས་མོ་ཨབ་ཡུལ་ནས་རང་ཡུལ་དུ་ཕྱིར་ལོག་པར་སྟ་གོན་བྱས།
RUT 1:7 དེ་རྣམས་རང་ཉིད་སྡོད་སའི་ཡུལ་དང་ཁ་བྲལ་ནས་ཡ་ཧུ་དཱའི་ཡུལ་དུ་ཆས་སོ། །
RUT 1:8 དེ་ནས་ནཱ་ཨོ་མུས་རང་གི་མནའ་མ་གཉིས་ལ་འདི་ལྟར་སྨྲས་པ་སྟེ། ཁྱོད་གཉིས་ཀ་རང་རང་གི་མ་ཡི་ཁྱིམ་དུ་ཕྱིར་སོང་ཞིག ཁྱོད་གཉིས་ཀྱིས་གཤིན་པོ་རྣམས་དང་ང་རང་ལ་བཟང་པོ་བྱས་པ་བཞིན་དུ། དཀོན་མཆོག་ཡ་ཝཱེས་ཀྱང་ཁྱོད་གཉིས་དྲིན་གྱིས་སྐྱོང་ཞིང་།
RUT 1:9 རང་རང་གི་སྐྱེས་པ་གསར་པའི་ཁྱིམ་དུ་བདེ་བ་ཉམས་སུ་མྱོང་བར་མཛད་པར་ཤོག་ཅེས་པ་དང་མནའ་མ་གཉིས་ལ་འོ་བྱས་པ་ལ། དེ་གཉིས་ཀྱིས་སྐད་བརྒྱབ་ནས་ངུས་ཤིང་ན་རེ།
RUT 1:10 ངེད་གཉིས་ཁྱེད་དང་ལྷན་ཅིག་ཁྱེད་ཀྱི་རིགས་རྒྱུད་ཀྱི་རྩར་ཕྱིར་ལོག་རྒྱུ་ཡིན་ཞེས་ཞུས་སོ། །
RUT 1:11 འོན་ཀྱང་ནཱ་ཨོ་མུས་འདི་ལྟར་སྨྲས་པ་སྟེ། བདག་གི་བུ་མོ་གཉིས། རང་ཡུལ་དུ་ཕྱིར་ལོག་ཅིག ཁྱོད་གཉིས་ཅིའི་ཕྱིར་བདག་དང་མཉམ་དུ་འགྲོའམ། བདག་གི་མངལ་ནས་ད་དུང་བུ་སྐྱེས་ཏེ་ཁྱོད་གཉིས་ཀྱི་སྐྱེས་པ་བྱེད་ཐུབ་བམ།
RUT 1:12 བདག་གི་བུ་མོ་གཉིས། རང་ཡུལ་དུ་ཕྱིར་ལོག་ཅིག བདག་ནི་ལོ་ན་ཤིན་ཏུ་རྒས་པས་སྐྱེས་པ་གཞན་ཞིག་ཡོད་མི་སྲིད་ལ། གལ་ཏེ་ངས་རང་ཉིད་ལ་རེ་བ་ཡོད་པར་སྙམ་ནས་དོ་དགོང་སྐྱེས་པ་ཞིག་ཡོང་སྟེ་བུ་སྐྱེས་པའི་དབང་དུ་བཏང་ནའང་།
RUT 1:13 ཁྱོད་གཉིས་ཀྱིས་ཁོ་གཉིས་ནར་སོན་པའི་བར་དུ་སྒུག་པར་བྱའམ། གཞན་ལ་གཉེན་སྒྲིག་མི་བྱེད་པར་སྒུག་རྒྱུ་ཡིན་ནམ། བདག་གི་བུ་མོ་གཉིས་དེ་ལྟར་མ་བྱེད་ཅིག དཀོན་མཆོག་ཡ་ཝཱེའི་ཕྱག་གིས་ང་རང་ལ་རྒོལ་བས་ཁྱོད་གཉིས་ལས་བདག་ལ་དཀའ་སྡུག་ཤིན་ཏུ་ཆེའོ་ཞེས་པ་ན།
RUT 1:14 མནའ་མ་གཉིས་ཀ་ཡང་བསྐྱར་སྐད་བརྒྱབ་ནས་ངུས། ཨོར་ཕཱ་ཡིས་སྒྱུག་མོ་ལ་འོ་བྱས་ནས་གྱེས་མཇལ་ཞུས། འོན་ཀྱང་རུ་ཐི་ནི་ནཱ་ཨོ་མུ་ལ་འཐམས་སོ། །
RUT 1:15 སྐབས་དེར་ནཱ་ཨོ་མུ་ཡིས་འདི་ལྟར། ལྟོས་དང་། ཁྱོད་ཀྱི་སྲུ་མོ་ ཕྱིར་རང་གི་མི་རྣམས་དང་རང་གི་ལྷ་རྣམས་ཀྱི་རྩར་ཕྱིན་པས། ཁྱོད་ཀྱང་ཁོ་མོ་དང་མཉམ་དུ་ཕྱིར་ལོག་ཅིག་ཅེས་སྨྲས་སོ། །
RUT 1:16 འོན་ཀྱང་རུ་ཐི་ཡིས་དེའི་ལན་དུ། ཁྱེད་དང་ཁ་བྲལ་ཏེ་ཕྱིར་ལོག་ཅིག་ཅེས་བདག་ལ་སྐུལ་མ་མི་གནང་བར་ཞུའོ། །རྒྱུ་མཚན་ཁྱེད་རང་གང་དུ་སོང་ནའང་། །ང་ཡང་དེ་རུ་འགྲོ་རྒྱུ་ཡིན་པ་དང་། །ཁྱེད་རང་འདུག་སར་ང་ཡང་སྡོད་རྒྱུ་ཡིན། །ཁྱེད་ཀྱི་མི་རིགས་ང་ཡི་མི་རིགས་ཡིན། །ཁྱེད་ཀྱི་དཀོན་མཆོག་ང་ཡི་དཀོན་མཆོག་ལགས། །
RUT 1:17 ཁྱེད་གང་དུ་གྲོངས་ན་ང་ཡང་དེར་འཆི་བ་དང་དུར་ལ་སྦ་བར་བྱའོ། །གལ་ཏེ་འཆི་བ་ལས་གཞན་གང་དང་ཅི་ཞིག་གིས་ང་དང་ཁྱེད་གཉིས་ཁ་བཀར་ན། དཀོན་མཆོག་ཡ་ཝཱེས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་ཞུས་སོ། །
RUT 1:18 རུ་ཐི་ཡིས་ནཱ་ཨོ་མུ་དང་མཉམ་དུ་འགྲོ་བར་སེམས་ཐག་བཅད་པ་ནཱ་ཨོ་མུས་ཤེས་ཏེ་ཁོ་མོར་སྨྲ་མཚམས་བཞག་གོ །
RUT 1:19 དེ་ནས་བུད་མེད་དེ་གཉིས་སོང་སོང་སྟེ་པེད་ལེ་ཧེམ་དུ་སླེབས་པ་དང་གྲོང་རྡལ་གྱི་མི་ཐམས་ཅད་ཧ་ལས་ཤིང་། བུད་མེད་རྣམས་ཀྱིས་འདི་ནི་ནཱ་ཨོ་མུ་ཡིན་སྲིད་དམ་ཞེས་སྨྲས་སོ། །
RUT 1:20 ནཱ་ཨོ་མུས་ཁོ་རྣམས་ལ་འདི་ལྟར། ང་ལ་ནཱ་ཨོ་མུ་ཞེས་མ་འབོད་ཅིག ང་ལ་མཱ་རཱ་ ཞེས་བོས་ཤིག ཅི་ལ་ཟེར་ན། ཀུན་དབང་དཀོན་མཆོག་གིས་ང་རང་དཀའ་སྡུག་ཆེན་པོར་གཏད་པས་སོ། །
RUT 1:21 བདག་ནི་བཟའ་སྐྱིད་ཀྱི་ངང་ནས་ཕྱི་རུ་སོང་བ་ཡིན་མོད། འོན་ཀྱང་དཀོན་མཆོག་ཡ་ཝཱེས་ང་རང་སྟོང་པར་ཕྱིར་ལོག་ཏུ་བཅུག དཀོན་མཆོག་ཡ་ཝཱེས་ང་ལ་མནར་གཅོད་མཛད་ཅིང་ཀུན་དབང་ཁོང་གིས་ང་རང་སྡུག་ལ་སྦྱར་བས། ཁྱོད་རྣམས་ཀྱིས་ཅིའི་ཕྱིར་ད་དུང་བདག་ལ་ནཱ་ཨོ་མུ་ཞེས་འབོད་དམ་ཞེས་སྨྲས་སོ། །
RUT 1:22 དེ་ལྟར་ནཱ་ཨོ་མུ་རང་གི་མནའ་མ་སྟེ་མོ་ཨབ་ཀྱི་རུ་ཐི་དང་མཉམ་དུ་ཕྱིར་པེད་ལེ་ཧེམ་དུ་སླེབས་ཤིང་། དེ་ནི་ནས་འབྲེག་འགོ་ཚུགས་པའི་དུས་ཡིན་ནོ། །
RUT 2:1 དེ་ཡང་ནཱ་ཨོ་མུ་ཡི་སྐྱེས་པ་འདས་པོ་ཨེ་ལི་མེ་ལེག་གི་ཤ་ཉེའི་ཁྲོད་དུ་མིང་ལ་པཱོ་ཨ་ཟི་ཞེས་བྱ་བ་ཞིག་ཡོད་དེ། ཁོ་ནི་སྟོབས་འབྱོར་ཅན་ཞིག་ཡིན་ཞིང་ཨེ་ལི་མེ་ལེག་གི་རུས་རྒྱུད་ཀྱང་ཡིན་ནོ། །
RUT 2:2 ཡང་ནཱ་ཨོ་མུ་ལ། མོ་ཨབ་ཀྱི་བུད་མེད་རུ་ཐི་ན་རེ། ང་རང་ཞིང་ཁར་འགྲོ་རུ་ཆུག་དང་། སུ་ཞིག་གིས་ང་ལ་ཐུགས་རྗེ་བསྐྱེད་ན་ངས་དེའི་རྗེས་སུ་སྙེ་མ་འཐུ་བར་བྱའོ་ཞེས་ཞུས་པ་ལ། ནཱ་ཨོ་མུ་ཡིས་དེའི་ལན་དུ། ངའི་བུ་མོ། སོང་ཞིག་ཅེས་སྨྲས་སོ། །
RUT 2:3 དེ་ནས་རུ་ཐི་ཞིང་ཁར་སོང་སྟེ་ཞིང་འབྲེག་མཁན་རྣམས་ཀྱི་རྗེས་ནས་སྙེ་མ་འཐུ་འགོ་བརྩམས་པ་དང་། ཁོ་མོ་ཏག་ཏག་ཨེ་ལི་མེ་ལེག་གི་ཁྱིམ་རྒྱུད་ཡིན་པའི་པཱོ་ཨ་ཟིའི་ཞིང་ནང་དུ་སླེབས་སོ། །
RUT 2:4 ཡང་ལྟོས་དང་། སྐབས་དེར་པཱོ་ཨ་ཟི་ནི་པེད་ལེ་ཧེམ་ནས་ཕྱིར་སླེབས་མ་ཐག་ཡིན་ལ་ཁོས་ཞིང་འབྲེག་མཁན་རྣམས་ལ་འདི་ལྟར། དཀོན་མཆོག་ཡ་ཝཱེ་ཁྱོད་རྣམས་དང་མཉམ་དུ་བཞུགས་པར་སྨོན་ཞེས་སྨྲས་པ་ལ། ཁོ་ཚོ་ན་རེ། དཀོན་མཆོག་ཡ་ཝཱེས་ཁྱེད་ལ་བྱིན་རླབས་གནང་བར་ཤོག་ཅེས་ཞུས་སོ། །
RUT 2:5 ཡང་པཱོ་ཨ་ཟི་ཡིས་ཞིང་འབྲེག་མཁན་རྣམས་ཀྱི་འགོ་དཔོན་ལ་འདི་ལྟར། གཞོན་ནུ་མ་དེ་ནི་སུ་ཚང་གི་ཡིན་ནམ་ཞེས་དྲིས་པ་ལ།
RUT 2:6 ཞིང་འབྲེག་མཁན་རྣམས་ཀྱི་འགོ་དཔོན་གྱིས། ཁོ་མོ་ནི་ནཱ་ཨོ་མུ་དང་མཉམ་དུ་ཕྱིར་ལོག་པའི་མོ་ཨབ་ཡུལ་གྱི་གཞོན་ནུ་མ་དེ་ཡིན་ལ།
RUT 2:7 ཁོ་མོས་ང་ལ། ང་རང་ཞིང་འབྲེག་མཁན་རྣམས་ཀྱི་རྗེས་སུ་འབྲངས་ཏེ་ཚར་ཕོན་གྱི་ཤུལ་དུ་སྙེ་མ་འཐུ་རུ་འཇུག་རོགས་གནང་ཞེས་ཞུས་པས། ཁང་པའི་ནང་དུ་ཡུད་ཙམ་ལ་ངལ་གསོ་བྱས་པ་ལས་གཞན། ནངས་སྔ་མོ་ནས་ད་ལྟའི་བར་དུ་འདིར་ཡོད་པ་ཡིན་ཞེས་ཞུས་སོ། །
RUT 2:8 དེ་ནས་པཱོ་ཨ་ཟི་ཡིས་རུ་ཐི་ལ་འདི་ལྟར། བདག་གི་བུ་མོ་ལགས། ང་ལ་ཉོན་ཅིག མི་གཞན་གྱི་ཞིང་ནང་དུ་སྙེ་མ་འཐུ་བར་མི་འགྲོ་ཞིང་འདི་ནས་ཁ་ཡང་མི་འབྲལ་བར། རྒྱུན་དུ་ངའི་གཞོན་ནུ་མ་རྣམས་དང་མཉམ་དུ་སྡོད་དང་།
RUT 2:9 ངའི་གཡོག་པོ་རྣམས་ཀྱིས་ཞིང་གང་ཞིག་གི་ནང་དུ་ཞིང་འབྲེག་པ་མཐོང་ན་དེ་རྣམས་ཀྱི་རྗེས་སུ་འབྲོངས་ཤིག ངས་གཡོག་པོ་ཚོར་ཁྱོད་ལ་མི་རེག་པའི་ཕྱིར་བསྒོས་པ་ཡིན། གལ་ཏེ་ཁྱོད་རང་སྐོམ་པའི་ཚེ་གཡོག་པོ་རྣམས་ཀྱིས་ཁུར་ཡོང་བའི་རྫ་སྣོད་ནང་གི་ཆུ་ཐུངས་ཤིག་ཅེས་སྨྲས་སོ། །
RUT 2:10 དེ་ནས་རུ་ཐི་ཡིས་ཁ་སར་གཏད་ནས་ཁོ་ལ་གུས་ཕྱག་ཕུལ་ཞིང་ན་རེ། བདག་ནི་ཕྱི་ཕྱོགས་པ་ཞིག་ཡིན་པས། ཁྱེད་ཀྱིས་ང་ལ་ཐུགས་རྗེ་དང་གཟིགས་སྐྱོང་གནང་བ་ནི་ཅི་ཞིག་ཡིན་ནམ་ཞེས་ཞུས་པ་དང་།
RUT 2:11 པཱོ་ཨ་ཟི་ཡིས་ཁོ་མོར་འདི་ལྟར། ཁྱོད་ཀྱི་སྐྱེས་པ་ཚེ་ལས་འདས་པ་ནས་བཟུང་། ཁྱོད་ཀྱིས་རང་གི་སྒྱུག་མོ་ལ་ཅི་ལྟ་བུའི་ལས་བཟང་པོ་རྣམས་བྱས་པ་དང་། ཕ་མ་གཉིས་དང་རང་ཡུལ་ལ་ཁ་བྲལ་ནས་སྔར་ཆ་རྒྱུས་མེད་པའི་མི་རྣམས་ཀྱི་ཁྲོད་དུ་ཡོང་བའི་སྐོར་གཞན་གྱིས་ང་ལ་སྨྲས་བྱུང་།
RUT 2:12 ཁྱོད་རང་སྐྱབས་བཅོལ་དུ་ཡོང་སའི་ཡེས་ར་ཨེལ་གྱི་དཀོན་མཆོག་ཡ་ཝཱེས། ཁྱོད་ཀྱིས་དོན་གང་ཞིག་བསྒྲུབས་པ་བཞིན་དུ་ཁྱོད་ལ་ཕུན་སུམ་ཚོགས་པའི་གསོལ་རས་སྩོལ་བར་ཤོག་ཅིག་ཅེས་སྨྲས་སོ། །
RUT 2:13 དེ་ནས་རུ་ཐི་ན་རེ། བདག་པོ་ལགས། ང་ནི་ཁྱེད་ཀྱི་གཞོན་ནུ་མ་རྣམས་ཀྱི་གཅིག་ལ་མི་དོ་ནའང་ཁྱེད་ཀྱི་བྱམས་བརྩེ་ལྡན་པའི་གཏམ་གྱིས་བདག་ལ་སེམས་གསོ་གནང་བྱུང་། ཁྱེད་ཀྱིས་མུ་མཐུད་དུ་བདག་ལ་ཐུགས་རྗེའི་སྤྱན་གྱིས་གཟིགས་པར་མཛོད་ཅེས་ཞུས་སོ། །
RUT 2:14 ཁ་ཟས་གསོལ་བའི་དུས་སུ་སླེབས་པ་དང་། པཱོ་ཨ་ཟི་ཡིས་རུ་ཐི་ལ་འདི་ལྟར། ཁྱོད་རང་ཚུར་ཤོག་ལ་བག་ལེབ་རྒུན་ཆང་སྐྱུར་མོའི་ནང་དུ་སྦངས་ཏེ་ཟོ་ཞིག་ཅེས་སྨྲས་པས། རུ་ཐི་ཞིང་འབྲེག་མཁན་རྣམས་ཀྱི་གམ་དུ་བསྡད་ཅིང་། ཁོས་ཁོ་མོ་ལ་ཡོས་སྤྲད་པ་དང་ཁོ་མོས་ཟོས་ནས་འགྲངས་ཤིང་ལྷག་མའང་བྱུང་ངོ་། །
RUT 2:15 ཁོ་མོ་ཡར་ལངས་ཏེ་སྙེ་མ་འཐུ་འགོ་བརྩམས་པ་དང་། པཱོ་ཨ་ཟི་ཡིས་རང་གི་གཡོག་པོ་རྣམས་ལ་འདི་ལྟར། ཁོ་མོར་ཚར་ཕོན་རྣམས་ལས་སྙེ་མ་འཐུ་རུ་འཇུག་པ་ལས་ངོ་ཚར་གཏོད་མི་རུང་།
RUT 2:16 དེར་མ་ཟད་ཚར་ཕོན་རྣམས་ལས་སྙེ་མ་ཕྱིར་ཕྱུང་ནས་ཞིང་ནང་དུ་བསྐྱུར་ཏེ་ཁོ་མོར་འཐུ་རུ་འཇུག་པ་ལས་གཤེ་གཤེ་གཏང་མི་རུང་ཞེས་སྨྲས་སོ། །
RUT 2:17 དེ་ནས་རུ་ཐི་ཡིས་དགོང་མོའི་བར་དུ་ཞིང་ཁ་ནས་སྙེ་མ་བཏུས་ཏེ་བརྡུངས་པ་ལ། ནས་ཨེ་ཕཱ་གང་ཙམ་ཡོད་པས།
RUT 2:18 ཁོ་མོས་དེ་ཁུར་ནས་གྲོང་རྡལ་དུ་སོང་སྟེ་རང་གི་སྒྱུག་མོས་ཀྱང་བཏུས་ཟིན་པའི་འབྲུ་རྣམས་མཐོང་། ཡང་ཁོ་མོས་རང་གི་ཁ་ཟས་ལྷག་མ་དེ་བླངས་ནས་སྒྱུག་མོ་ལ་ཕུལ་ཏོ། །
RUT 2:19 སྒྱུག་མོས་ཁོ་མོ་ལ་འདི་ལྟར། དེ་རིང་ཁྱོད་ཀྱིས་གང་དུ་སྙེ་མ་བཏུས་སམ། ཁྱོད་ཀྱིས་གང་དུ་ལས་ཀ་བྱས་པ་ཡིན་ནམ། ཁྱོད་ལ་གཟིགས་སྐྱོང་མཛད་མཁན་དེར་བྱིན་རླབས་འཐོབ་པར་ཤོག་ཅེས་སྨྲས་པ་ལ། རུ་ཐི་ན་རེ། དེ་རིང་བདག་དང་མཉམ་དུ་ལས་ཀ་བྱེད་པའི་སྐྱེས་པ་དེའི་མིང་ལ་པཱོ་ཨ་ཟི་ཟེར་བ་ཡིན་ནོ་ཞེས་རང་དང་མཉམ་དུ་ལས་ཀ་བྱེད་མཁན་སུ་ཡིན་པའི་སྐོར་སྒྱུག་མོར་སྨྲས་སོ། །
RUT 2:20 ནཱ་ཨོ་མུ་ཡིས་མནའ་མར་འདི་ལྟར། དཀོན་མཆོག་ཡ་ཝཱེས་ཁོ་ལ་བྱིན་རླབས་གནང་བར་ཤོག་ཅིག ཁོང་གིས་གསོན་གཤིན་གཉིས་ཀ་དྲིན་གྱིས་སྐྱོང་བ་ནམ་ཡང་རྒྱུན་མ་ཆད་དོ་ཞེས་སྨྲས་ཤིང་། ཡང་མུ་མཐུད་དུ། པཱོ་ཨ་ཟི་ནི་བདག་ཅག་གི་རུས་རྒྱུད་གཅིག་ཡིན་ལ་རང་རེའི་བླུ་མཁན་ཡང་ཡིན་ནོ་ཞེས་སྨྲས་སོ། །
RUT 2:21 དེ་ནས་མོ་ཨབ་ཀྱི་བུ་མོ་རུ་ཐི་ན་རེ། ཁོས་ཡང་བདག་ལ་འདི་ལྟར། གཡོག་པོ་རྣམས་ཀྱིས་བདག་གི་ཞིང་བྲེགས་ཚར་བའི་བར་དུ། ཁྱོད་རང་གཡོག་པོ་རྣམས་ཀྱི་རྗེས་སུ་འབྲངས་ཏེ་སྙེ་མ་འཐུ་དགོས་ཟེར་ཞེས་སྨྲས་སོ། །
RUT 2:22 ནཱ་ཨོ་མུ་ཡིས་རང་གི་མནའ་མ་རུ་ཐི་ལ་འདི་ལྟར། ངའི་བུ་མོ་ལགས། ཁྱོད་རང་ཁོའི་གཞོན་ནུ་མ་རྣམས་ཀྱི་རྗེས་སུ་འབྲངས་ནས་སོང་ན་ལེགས་ཤིང་། མི་གཞན་གྱི་ཞིང་བར་དུ་ཁྱོད་ལ་གནོད་འཚེ་འཕོག་སྲིད་དོ་ཞེས་སྨྲས་པའོ། །
RUT 2:23 དེ་ནས་རུ་ཐི་ནི་ནམ་རྒྱུན་པཱོ་ཨ་ཟི་ཡི་གཞོན་ནུ་མ་རྣམས་དང་འགྲོགས་ཤིང་། ནས་དང་གྲོ་གཉིས་བྲེགས་ཚར་བའི་བར་དུ་སྙེ་མ་བཏུས་པ་དང་། ཁོ་མོ་སྔར་བཞིན་རང་གི་སྒྱུག་མོ་དང་མཉམ་དུ་གནས་སོ། །
RUT 3:1 ཉིན་ཞིག་སྒྱུག་མོ་ནཱ་ཨོ་མུས་རུ་ཐི་ལ་འདི་ལྟར། ངའི་བུ་མོ་ལགས། བདག་གིས་ཁྱོད་ལ་གནས་ས་ཞིག་བཙལ་ནས་བདེ་སྐྱིད་ལ་རོལ་དུ་འཇུག་མི་ཆོག་གམ།
RUT 3:2 ད་ལྟ་ཁྱོད་དང་ལྷན་དུ་ཡོད་པའི་གཞོན་ནུ་མ་རྣམས་ཀྱི་བདག་པོ་པཱོ་ཨ་ཟི་ནི་བདག་ཅག་གི་ཤ་ཉེ་མ་ཡིན་ནམ། ལྟོས་དང་། ཁོས་དོ་དགོང་གཡུལ་ཁའི་ནང་དུ་ནས་ཕྱར་རྒྱུ་ཡིན་པས།
RUT 3:3 ཁྱོད་ཀྱིས་རང་ལུས་བཀྲུས་ནས་དྲི་ཞིམ་བྱུགས་རྗེས་གྱོན་གོས་ལེགས་ཤོས་གྱོན་ཏེ་མར་གཡུལ་ཁ་རུ་སོང་ཞིག འོན་ཀྱང་པཱོ་ཨ་ཟིས་བཟའ་བཏུང་བྱས་ཚར་བའི་བར་དུ་ཁྱོད་རང་ངོ་ཤེས་པར་མི་བྱའོ། །
RUT 3:4 ཁོ་རང་གཟིམ་པའི་སྐབས་སུ་ཁྱོད་ཀྱིས་ཁོའི་ཉལ་སར་གསལ་པོར་ལྟོས་ལ། ཡང་ཁོའི་གམ་དུ་སོང་ནས་རྐང་མགོའི་མལ་གོས་བཤུས་ཏེ་དེར་ཉལ་ནས་སྡོད་ཅིག ཁོས་ཁྱོད་ཀྱིས་ཅི་ཞིག་བྱེད་དགོས་པའང་སྨྲ་བར་འགྱུར་ཞེས་སྨྲས་ཤིང་།
RUT 3:5 རུ་ཐི་ན་རེ། བདག་གིས་ཁྱེད་ཀྱི་བཀའ་བཞིན་དུ་བསྒྲུབ་པར་བྱའོ་ཞེས་སྨྲས་སོ། །
RUT 3:6 དེ་ནས་རུ་ཐི་མར་གཡུལ་ཁ་རུ་སོང་སྟེ་སྒྱུག་མོས་ཅི་ཞིག་བསྒོས་པ་བཞིན་དུ་བྱས།
RUT 3:7 པཱོ་ཨ་ཟི་ཡིས་བཟའ་བཏུང་ཡིད་ཚིམ་པ་ཞིག་ལོངས་སུ་སྤྱད་རྗེས་ཡིད་སེམས་སྤྲོ་བས་ཁེངས་ཤིང་། ནས་མའི་ཉེ་འདབས་སུ་ཉལ་དུ་སོང་ལ། རུ་ཐི་ནི་གྲགས་འགུལ་ཅི་ཡང་མེད་པར་ཡོང་སྟེ་ཁོའི་རྐང་མགོའི་མལ་གོས་བཤུས་ནས་དེར་ཉལ་ནས་བསྡད་དོ། །
RUT 3:8 ནམ་ཕྱེད་ཙམ་ལ་སླེབས་པ་ན་པཱོ་ཨ་ཟི་གློ་བུར་གཉིད་ལས་སད་ཅིང་གཞོགས་སུ་འཁོར་བ་ལ། ལྟོས་དང་། ཁོས་བུད་མེད་ཅིག་རང་གི་རྐང་བའི་མདུན་དུ་ཉལ་འདུག་པ་ཚོར་བའོ། །
RUT 3:9 དེ་ནས་ཁོས་འདི་ལྟར། ཁྱོད་རང་སུ་ཡིན་ནམ་ཞེས་དྲིས་པ་ན། ཁོ་མོ་ན་རེ། ང་ནི་ཁྱེད་ཀྱི་གཞོན་ནུ་མ་རུ་ཐི་ཡིན་ལགས། ཁྱེད་ནི་བདག་བླུ་མཁན་གཉེན་ཉེ་ཡིན་པས་ཁྱེད་ཀྱིས་ཐུ་བས་བདག་འགེབས་པར་མཛོད་ ཅེས་ཞུས་སོ། །
RUT 3:10 ཡང་པཱོ་ཨ་ཟི་ཡིས་འདི་ལྟར། ངའི་བུ་མོ་ལགས། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་བར་ཤོག ཁྱོད་རང་ན་གཞོན་དབུལ་ཕྱུག་གང་ཡིན་གྱི་རྗེས་སུ་མ་འབྲངས་པས། ཁྱོད་ཀྱི་རྗེས་ཕྱོགས་ཀྱི་བྱམས་བརྩེ་ནི་སྔོན་ཆད་ལས་ལྷག་ཏུ་ཆེན་པོ་ཡིན་ནོ། །
RUT 3:11 ང་ཡི་བུ་མོ་ལགས། ད་ནི་ཁྱོད་རང་མི་འཇིགས་པར་གྱིས། ཁྱོད་ཀྱིས་ཅི་ཞིག་ཞུས་པ་ཐམས་ཅད་བདག་གིས་བསྒྲུབ་པར་བྱའོ། །བདག་གི་གྲོང་རྡལ་གྱི་མི་ཐམས་ཅད་ཀྱིས་ཁྱོད་རང་ནི་བུད་མེད་སྤྱོད་བཟང་ཞིག་ཡིན་པ་ཤེས་སོ། །
RUT 3:12 བདག་ནི་བླུ་མཁན་ཞིག་ཡིན་པ་བདེན་མོད། འོན་ཀྱང་ད་དུང་བདག་ལས་ཀྱང་ཉེ་བའི་བླུ་མཁན་ཞིག་ཡོད་པའོ། །
RUT 3:13 དོ་དགོང་ཁྱོད་རང་འདི་རུ་སྡོད་དང་། སང་ཉིན་ཞོགས་པར་ཁོ་རང་གིས་ཁྱོད་ཀྱི་ཕྱིར་བླུ་མཁན་གྱི་འགན་ཁུར་དང་དུ་བླང་ན་ལེན་དུ་ཆུག འོན་ཀྱང་ཁོ་རང་གིས་དེ་བཞིན་བྱེད་མི་འདོད་ན་བདག་གིས་གཏན་གནས་ཀྱི་དཀོན་མཆོག་ཡ་ཝཱེ་དཔང་དུ་བཙུགས་ནས་བླུ་མཁན་གྱི་འགན་ཁུར་དང་དུ་ལེན་པར་བྱའོ། །ཁྱོད་རང་ཞོགས་པའི་བར་དུ་འདིར་སྡོད་ཅིག་ཅེས་སྨྲས་སོ། །
RUT 3:14 དེ་ནས་རུ་ཐི་ནམ་མ་ལངས་སྔོན་དུ་ཁོའི་རྐང་འདབས་སུ་ལོག་ནས་བསྡད་པ་དང་། མི་ངོ་མི་ཟིན་པའི་དུས་སུ་ཁོ་མོ་ཡར་ལངས་ཤིང་པཱོ་ཨ་ཟི་ཡིས་འདི་ལྟར། བུད་མེད་ཅིག་གཡུལ་ཁའི་ནང་དུ་ཡོང་བ་དེ་མི་སུ་ཞིག་ལའང་ཤེས་སུ་འཇུག་མི་རུང་ཞེས་སྨྲས་སོ། །
RUT 3:15 པཱོ་ཨ་ཟིས་ཡང་འདི་ལྟར། ཁྱོད་ཀྱིས་རང་གི་སྟོད་དཀྲིས་ཐར་ཆོད་ཅིག་ཅེས་སྨྲས་པ་དང་། ཁོ་མོས་དེ་ལྟར་བྱས་ཤིང་པཱོ་ཨ་ཟི་ཡིས་ནས་བྲེ་དྲུག་དེའི་ཁུགས་སུ་བླུགས་ནས་ཁོ་མོའི་ཕྲག་ཏུ་བཞག་པ་ལ་ཁོ་མོ་ཕྱིར་གྲོང་རྡལ་དུ་ལོག་གོ །
RUT 3:16 རུ་ཐི་ཕྱིར་སྒྱུག་མོའི་རྩར་སླེབས་པ་ན། ནཱ་ཨོ་མུ་ཡིས་འདི་ལྟར། ངའི་བུ་མོ་ལགས། གང་འདྲ་ཡིན་ནམ་ཞེས་དྲིས་པ་ལ། རུ་ཐི་ཡིས་པཱོ་ཨ་ཟིས་ཁོ་མོའི་དོན་དུ་ཅི་ཞིག་བྱས་པ་ཐམས་ཅད་སྒྱུག་མོར་སྨྲས་ཤིང་།
RUT 3:17 ཡང་ཁོ་མོ་ན་རེ། ཁོས་བདག་ལ། ཁྱོད་རང་ལག་སྟོང་དུ་ཁྱོད་ཀྱི་སྒྱུག་མོའི་རྩར་འགྲོ་མི་རུང་ཞེས་སྨྲས་ཤིང་བདག་ལ་ནས་བྲེ་དྲུག་གནང་བ་ཡིན་ཞེས་ཞུས།
RUT 3:18 དེ་ནས་ནཱ་ཨོ་མུ་ཡིས་འདི་ལྟར། ངའི་བུ་མོ་ལགས། པཱོ་ཨ་ཟིས་དོན་འདི་དེ་རིང་ཐག་གིས་མ་བཅད་ན་ངལ་གསོ་བར་མི་འགྱུར་བས། དོན་འདི་ཅི་ལྟར་འབྱུང་བ་མ་ཤེས་བར་དུ་བསྒུགས་ནས་སྡོད་ཅིག་ཅེས་སྨྲས་སོ། །
RUT 4:1 དེ་ཡང་པཱོ་ཨ་ཟི་ཡར་མཁར་གྱི་སྒོ་ཁ་རུ་སོང་ནས་སྡོད་སྐབས། ལྟོས་དང་། ཏན་ཏན་ཁོས་སྔོན་དུ་གླེང་མྱོང་བའི་བླུ་མཁན་དེ་སླེབས་པ་དང་ཁེལ། པཱོ་ཨ་ཟི་ཡིས་འདི་ལྟར། བདག་གི་གྲོགས་པོ་ལགས། ཚུར་ཤོག་ལ་འདིར་སྡོད་དང་ཞེས་སྨྲས་པ་ན། མི་དེས་ཀྱང་ཁོའི་ངག་བཞིན་དུ་བྱས་སོ། །
RUT 4:2 ཡང་པཱོ་ཨ་ཟི་ཡིས་གྲོང་རྡལ་དེའི་རྒན་པོ་རྣམས་ལས་མི་བཅུ་བདམས་ནས་དེ་དག་ལ་འདི་ལྟར། ཁྱེད་རྣམ་པ་འདིར་བཞུགས་པར་མཛོད་ཅེས་ཞུས་པ་ལ་ཁོ་རྣམས་ཀྱིས་ཀྱང་དེ་ལྟར་བྱས་སོ། །
RUT 4:3 དེ་ནས་པཱོ་ཨ་ཟི་ཡིས་བླུ་མཁན་དེ་ལ་འདི་ལྟར། མོ་ཨབ་ཡུལ་ནས་ཕྱིར་སླེབས་པའི་ནཱ་ཨོ་མུ་ཡིས་བདག་ཅག་གི་སྤུན་ཟླ་འདས་པོ་ཨེ་ལི་མེ་ལེག་གི་ས་ཞིང་དེ་བཙོང་བར་འདོད་དོ། །
RUT 4:4 བདག་གི་བསམ་ཚུལ་ལ་ས་ཞིང་དེ་ནི་ཁྱེད་ཀྱིས་ཉོ་རུང་བ་དང་། ཁྱེད་ཀྱི་རྗེས་སུ་བདག་ཡིན་ཞིང་། གཞན་དེ་བཞིན་དུ་བྱ་རུང་བ་སུ་ཡང་ཡོད་པ་མ་ཡིན། ཁྱེད་ཀྱིས་འདིར་བཞུགས་པ་རྣམས་དང་བདག་གི་རིགས་རྒྱུད་ཀྱི་རྒན་པོ་རྣམས་ཀྱི་མདུན་དུ་གསལ་བཤད་བྱས་ཆོག་སྟེ། ཁྱེད་ཀྱི་བླུ་བར་དགོངས་ན་བླུས་ཤིག གལ་ཏེ་མི་བླུ་ན་བདག་གིས་ཤེས་པའི་ཕྱིར་བདག་ལ་སྨྲ་བར་མཛོད་ཅེས་སྨྲས་པ་ན། མི་དེ་ན་རེ། ངས་བླུ་བར་བྱའོ་ཞེས་ལན་སྨྲས་སོ། །
RUT 4:5 དེ་ནས་པཱོ་ཨ་ཟི་ཡིས་འདི་ལྟར། ཁྱེད་ཀྱིས་ནཱ་ཨོ་མུ་ནས་ས་ཞིང་དེ་ཉོ་བའི་ཉིན་མོར། གཤིན་པོའི་མིང་ནི་ཁོ་རང་གི་ནོར་སྐལ་སྟེང་རྒྱུན་འཛིན་བྱེད་པའི་ཕྱིར་ཁོའི་ཆུང་མ་སྟེ་མོ་ཨབ་ཡུལ་གྱི་རུ་ཐི་ཡང་ཚུར་རང་གིས་ལེན་འོས་པ་ཡིན་ཞེས་སྨྲས་པའོ། །
RUT 4:6 དེ་ནས་མི་དེ་ན་རེ། དེས་ན་བདག་གི་ནོར་སྐལ་ལ་བར་ཆད་འབྱུང་ཉེན་ཡོད་པས་བདག་གིས་ས་ཞིང་དེ་བླུ་མི་ནུས། ཁྱོད་ཀྱིས་དེ་བླུས་ཤིག ངའི་ཐོབ་སྐལ་དེ་ཁྱོད་རང་གིས་བླུས་ཆོག་ཅེས་སྨྲས་སོ། །
RUT 4:7 སྔོན་ཆད་ཡེས་ར་ཨེལ་དུ་བླུ་བ་དང་ཡང་ན་ཉོ་ཚོང་བྱེད་པའི་དོན་གང་ཞིག་ཐག་གིས་གཅོད་པའི་སྐབས་སུ། གཅིག་གིས་བསིལ་ལྷམ་ཕུད་ནས་གཞན་པ་དེར་སྤྲོད་ཅིང་། ཡེས་ར་ཨེལ་གྱི་མི་ཐམས་ཅད་ཀྱིས་དེ་བདེན་དཔང་གི་གཏའ་མར་བྱེད་པའོ། །
RUT 4:8 དེའི་ཕྱིར། མི་དེས་པཱོ་ཨ་ཟི་ལ་འདི་ལྟར། ཁྱོད་ཀྱིས་རང་ལ་ཉོས་ཤིག་ཅེས་སྨྲས་ནས་ཁོས་རང་གི་བསིལ་ལྷམ་ཕུད་པ་རེད།
RUT 4:9 དེ་ནས་པཱོ་ཨ་ཟི་ཡིས་རྒན་པོ་རྣམས་དང་མི་ཚོགས་ལ་འདི་ལྟར། དེ་རིང་ཁྱེད་རྣམ་པ་ནི་དཔང་པོ་རྣམས་ཡིན་ཏེ། ཨེ་ལི་མེ་ལེག་དང་། ཀིལ་ཡོན། མཱ་ལིན་བཅས་ལ་དབང་བ་ཐམས་ཅད་བདག་གིས་ནཱ་ཨོ་མུ་ཡི་ལག་ནས་བླུས་པ་དང་།
RUT 4:10 ཡང་གཤིན་པོའི་མིང་ནི་ཁོ་རང་གི་ནོར་སྐལ་སྟེང་རྒྱུན་འཛིན་བྱེད་པ་དང་ཁོའི་མིང་ནི་རང་ཁྱིམ་དང་རང་ཡུལ་ནས་ཡལ་བར་མི་འགྱུར་བའི་ཆེད་དུ། འདས་པོ་མཱ་ལིན་གྱི་ཆུང་མ་སྟེ་མོ་ཨབ་པ་རུ་ཐི་ནི་བདག་གིས་ཆུང་མར་བླངས་པ་ཡིན། ཁྱེད་རྣམ་པས་དེ་རིང་བདེན་དཔང་བྱས་ཆོག་ཅེས་སྨྲས།
RUT 4:11 དེ་ནས་མཁར་གྱི་སྒོ་ཁ་རུ་སྡོད་པའི་མི་ཚོགས་དང་རྒན་པོ་བཅས་ཐམས་ཅད་ཀྱིས་འདི་ལྟར། ངེད་རྣམས་དོན་འདིའི་བདེན་དཔང་ཡིན་པ་སྟེ། ། དཀོན་མཆོག་ཡ་ཝཱེས་ཁྱོད་ཀྱི་ཁྱིམ་ནང་དུ། ། ཡོང་བར་འགྱུར་བའི་བུད་མེད་དེ་ཉིད་ནི། ། ཡེས་ར་ཨེལ་གྱི་ཁྱིམ་རྒྱུད་འཛུགས་པ་ཡི། ། རཱ་ཧེལ་ལེ་ཨ་གཉིས་བཞིན་མཛད་གྱུར་ཅིག ། ཁྱོད་རང་ཨེབ་རཱད་ཡུལ་དུ་དོན་འགྲུབ་ཅིང་། ། པེད་ལེ་ཧེམ་དུ་སྙན་གྲགས་རྒྱས་པར་སྨོན། །
RUT 4:12 དཀོན་མཆོག་ཡ་ཝཱེས་གཞོན་ནུ་མ་འདི་བརྒྱུད། ། ཁྱོད་ལ་བུ་རྒྱུད་གནང་སྟེ་ཁྱིམ་གཞིས་ནི། ། ཡ་ཧུ་དཱ་དང་ཐལ་མཱར་ཁོང་གཉིས་ལས། ། སྐྱེས་པའི་བུ་སྟེ་ཕེ་རེལ་ཟི་བྱ་བའི། ། ཁྱིམ་གཞིས་ལྟ་བུ་ཡིན་པར་མཛད་དུ་གསོལ། ། ཞེས་བརྗོད་དོ། །
RUT 4:13 དེ་ནས་པཱོ་ཨ་ཟི་ཡིས་རུ་ཐི་རང་གི་ཆུང་མར་བླངས་ཤིང་ཁོ་མོ་དང་མཉམ་དུ་བསྡད་པ་ལ། དཀོན་མཆོག་ཡ་ཝཱེས་ཁོ་མོར་མངལ་དང་ལྡན་པར་མཛད་ནས་བུ་ཞིག་སྐྱེས།
RUT 4:14 བུད་མེད་རྣམས་ཀྱིས་ནཱ་ཨོ་མུ་ལ་འདི་ལྟར། དཀོན་མཆོག་ཡ་ཝཱེ་ཁོང་ཉིད་བསྟོད་འོས་ཏེ། ། ཁོང་གིས་ཁྱོད་རང་དེ་རིང་ཉིན་མོ་འདིར། ། ཉེ་བའི་བླུ་མཁན་མེད་པར་མ་བསྐྱུར་ཏོ། ། ཕྲུ་གུ་འདི་ནི་ཡེས་ར་ཨེལ་པའི་ཁྲོད། ། སྙན་གྲགས་ཡོངས་སུ་རྒྱས་པའི་སྨོན་འདུན་ཞུ། །
RUT 4:15 འདི་ནི་ཁྱོད་རང་གཅེས་སུ་འཛིན་པ་ཡི། ། མནའ་མ་དེ་ཡིས་བཙས་པའི་བུ་ཡིན་པས། ། ཁོས་ནི་ཁྱོད་ཀྱི་སེམས་ཤུགས་ཆེར་བསྐྱེད་ཅིང་། ། ཁྱོད་རང་རྒས་དུས་སྙོར་སྐྱོང་བྱེད་ངེས་ཡིན། ། འདི་ལྟའི་མནའ་མ་ཁྱོད་ལ་ཡོད་པ་ནི། ། བུ་བདུན་ཡོད་པ་ལས་ཀྱང་ཤིན་ཏུ་ལེགས། ། ཞེས་སྨྲས།
RUT 4:16 དེ་ནས་ནཱ་ཨོ་མུ་ཡིས་ཕྲུ་གུ་པང་དུ་བཟུང་སྟེ་བུ་སྙོར་མ་རུ་གྱུར་ཏོ། །
RUT 4:17 ཁྱིམ་མཚེས་ཀྱི་བུད་མེད་རྣམས་ན་རེ། ནཱ་ཨོ་མུ་ལ་བུ་ཞིག་སྐྱེས་སོ་ཞེས་སྨྲས་པ་དང་ཁོ་རྣམས་ཀྱིས་ཕྲུ་གུ་དེའི་མིང་ལ་ཨོ་བེད་ཅེས་བཏགས། ཨོ་བེད་ནི་ཡེ་སེ་ཞེས་བྱ་བའི་ཡབ་ཡིན་ཞིང་ཡེ་སེ་ནི་དཱ་བིད་ཅེས་པའི་ཡབ་ཡིན་ནོ། །
RUT 4:18 ཕེ་རེལ་ཟིའི་རིགས་རྒྱུད་རྣམས་ནི་གཤམ་གསལ་ལྟར། ཕེ་རེལ་ཟི་ལ་བུ་ཧེས་རོན་ཞེས་བྱ་བ་སྐྱེས་པ་དང་།
RUT 4:19 ཧེས་རོན་ལ་བུ་རཱམ་ཞེས་བྱ་བ་སྐྱེས་པ་དང་། རཱམ་ལ་བུ་ཨ་མི་ནཱ་དབ་ཅེས་བྱ་བ་སྐྱེས་པ་དང་།
RUT 4:20 ཨ་མི་ནཱ་དབ་ལ་བུ་ནཱ་སོན་ཞེས་བྱ་བ་སྐྱེས་པ་དང་། ནཱ་སོན་ལ་བུ་སཱལ་མོན་ཞེས་བྱ་བ་སྐྱེས་པ་དང་།
RUT 4:21 སཱལ་མོན་ལ་བུ་པཱོ་ཨ་ཟི་ཞེས་བྱ་བ་སྐྱེས་པ་དང་། པཱོ་ཨ་ཟི་ལ་བུ་ཨོ་བེད་ཅེས་བྱ་བ་སྐྱེས་པ་དང་།
RUT 4:22 ཨོ་བེད་ལ་བུ་ཡེ་སེ་ཞེས་བྱ་བ་སྐྱེས་པ་དང་། ཡེ་སེ་ལ་བུ་དཱ་བིད་ཅེས་བྱ་བ་སྐྱེས་པ་ལགས་སོ།། །།
1SA 1:1 དེ་ཡང་ཨེ་ཕཱར་ཡིམ་རི་ཁུལ་གྱི་རཱ་མ་ཙུབ་ཅེས་པའི་ཡུལ་དུ་མིང་ལ་ཨེལ་ཁ་ནཱ་ཟེར་བའི་མི་ཞིག་ཡོད་ཅིང་། དེ་ནི་ཡེ་རོ་ཧཱམ་གྱི་བུ་ཡིན། ཡེ་རོ་ཧཱམ་ནི་ཨེ་ལི་ཧུ་ཡི་བུ་ཡིན། ཨེ་ལི་ཧུ་ནི་ཐོ་ཧོའུ་ཡི་བུ་ཡིན། ཐོ་ཧོའུ་ནི་ཙུབ་ཅེ ས་པའི་བུ་ཡིན་ཏེ། ཨེལ་ཁ་ནཱ་ནི་ཨེ་ཕཱར་ཡིམ་ཚོ་པའི་ཡིན་པ་བཅས་སོ། །
1SA 1:2 ཨེལ་ཁ་ནཱ་ལ་ཆུང་མ་གཉིས་ཡོད་ཅིང་། གཅིག་གི་མིང་ལ་ཧན་ནཱ་ཞེས་དང་། གཞན་པའི་མིང་ལ་ཕེན་ནེ་ནཱ་ཞེས་ཟེར། ཕེན་ནེ་ནཱ་ལ་ཕྲུ་གུ་ཡོད་པ་དང་། ཧན་ནཱ་ལ་ཕྲུ་གུ་མེད་དོ། །
1SA 1:3 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་ཕྱག་འཚལ་བ་དང་མཆོད་པ་འབུལ་བའི་ཕྱིར་དུ། ཁོ་རང་ལོ་རེ་བཞིན་རང་གི་གྲོང་ཁྱེར་ནས་ཞི་ལོ་ཡུལ་དུ་ཕྱིན་པ་དང་། དེ་རུ་ཨེ་ལིའི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ནི་དཀོན་མཆོག་ཡ་ཝཱེ་ལ་མཆོད་དཔོན་བྱས་ཡོད་དོ། །
1SA 1:4 མཆོད་པ་འབུལ་བའི་ཉིན་ལ་ཁེལ་བའི་ཚེ། ཨེལ་ཁ་ནཱ་ཡིས་རང་གི་ཆུང་མ་ཕེན་ནེ་ནཱ་དང་དེའི་བུ་བུ་མོ་ཐམས་ཅད་ལ་མཆོད་པ་འབུལ་བྱ་གཏད་དོ། །
1SA 1:5 འོན་ཀྱང་། ཧན་ནཱ་ལ་མི་གཉིས་ཀྱི་སྐལ་གཏད་པ་དང་། དེ་ནི་ཁོས་ཧན་ནཱ་གཅེས་སུ་བཟུང་བའི་ཕྱིར་ཡིན། ཡིན་ནའང་དཀོན་མཆོག་ཡ་ཝཱེས་ཁོ་མོར་མངལ་མི་ཆགས་པར་མཛད།
1SA 1:6 དཀོན་མཆོག་ཡ་ཝཱེས་ཁོ་མོར་མངལ་མི་ཆགས་པར་མཛད་པའི་རྐྱེན་གྱིས། ཕེན་ནེ་ནཱ་ཡིས་ཀྱང་མོ་ལ་བརྙས་པའི་ཆེད་དུ་ཁོང་ཁྲོ་བསླངས།
1SA 1:7 དེ་ནས་ཁོ་མོ་ལོ་རེ་བཞིན་དཀོན་མཆོག་ཡ་ཝཱེའི་བཞུགས་གནས་སུ་འགྲོ་སྐབས་ཕེན་ནེ་ནཱ་ཡིས་ཁོ་མོར་དྲག་ཏུ་བརྙས་པས་ངུས་ཤིང་ཟས་ཀྱང་མ་བསྟེན་པ་རེད།
1SA 1:8 ཡང་ཨེལ་ཁ་ནཱ་ཡིས་ཁོ་མོར། ཀྱེ་ཧན་ནཱ། ཁྱོད་རང་ངུས་ནས་ཟས་མི་བསྟེན་པ་དང་སེམས་སྐྱོ་བ་ཅི་ཡིན་ནམ། ཁྱོད་ལ་བུ་བཅུ་ལས་ཀྱང་ང་རང་ཡོད་པས་མི་བཟང་ངམ་ཞེས་དྲིས་སོ། །
1SA 1:9 ཡང་དེ་དག་གིས་ཞི་ལོ་རུ་བཟའ་བཏུང་སྤྱད་རྗེས་ཧན་ནཱ་ཡར་ལངས་པ་དང་། མཆོད་དཔོན་ཨེ་ལི་ནི་དཀོན་མཆོག་ཡ་ཝཱེའི་གུར་མཆོག་གི་སྒོ་འགྲམ་དུ་འདུག་སྟེགས་ཤིག་གི་སྟེང་བསྡད་ཡོད་པ་ལ།
1SA 1:10 ཧན་ནཱ་སེམས་ཤིན་ཏུ་སྐྱོ་སྟེ་དྲག་ཏུ་ངུས་ཤིང་། དཀོན་མཆོག་ཡ་ཝཱེ་ལ་སྨོན་ལམ་ཞུས་པ་རེད།
1SA 1:11 ཧན་ནཱ་ཡིས་འདི་ལྟར་དམ་བཅས་ཏེ། ཀྱེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས། བདག་ལ་ཐུགས་བརྩེ་བར་དགོངས་ཤིག ཁྱེད་ཀྱི་གཡོག་མོ་བདག་གི་སྡུག་བསྔལ་འདི་ལ་གཟིགས་དང་། གལ་ཏེ་ཁྱེད་ཀྱིས་གཡོག་མོ་བདག་ལ་ཐུགས་མ་གཡེལ་བར་བུ་ཞིག་གནང་ན། བུ་དེ་ནི་ཇི་སྲིད་འཚོ་བའི་བར་དུ་དཀོན་མཆོག་ཡ་ཝཱེ་ཁྱེད་ལ་འབུལ་བར་བྱ་ཞིང་། དེའི་མགོ་ལ་སྐྲ་གྲིས་ཀྱང་ནམ་ཡང་རེག་པར་མི་བྱ་ཞེས་པའོ། །
1SA 1:12 ཁོ་མོས་དཀོན་མཆོག་ཡ་ཝཱེའི་དྲུང་དུ་ཡུན་རིང་པོར་སྨོན་ལམ་བཏབ་པའི་ཚེ། ཨེ་ལིས་བུད་མེད་དེའི་ཁ་ལ་བལྟས།
1SA 1:13 ཧན་ནཱས་སེམས་གཏིང་ནས་སྨོན་ལམ་བཏབ་ཅིང་སྐད་མ་བཏོན་པར་མཆུ་ཏོ་འབའ་ཞིག་འགུལ་བས། ཨེ་ལིས་བུད་མེད་དེ་ནི་ར་བཟི་བར་བསམས།
1SA 1:14 དེའི་ཕྱིར་ཨེ་ལིས་ཁོ་མོར། ཁྱོད་དུས་ནམ་ཞིག་གི་བར་དུ་ར་བཟི་ནས་འདུག་གམ། ཁྱོད་ཀྱིས་ཆང་འཐུང་བར་མི་བྱའོ་ཞེས་བསྐུལ་བ་ན།
1SA 1:15 ཧན་ནཱས་དེའི་ལན་དུ། ཀྱེ་ཇོ་བོ་ལགས། དེ་ལྟར་མ་ཡིན། ངས་རྒུན་ཆང་དང་ཆང་གཞན་གང་ཡང་བཏུང་མེད་ཅིང་། ང་ནི་ཡིད་སེམས་སྐྱོ་བའི་བུད་མེད་ཅིག་ཡིན་པས། སྙིང་ནས་དཀོན་མཆོག་ཡ་ཝཱེ་ལ་སྨོན་ལམ་བཏབ་པ་ཡིན།
1SA 1:16 ཁྱེད་ཀྱི་གཡོག་མོ་ནི་སྤྱོད་པ་ངན་པ་ཞིག་ཡིན་པར་མི་བསམ་རོགས། མི་གཞན་གྱི་བརྙས་བཅོས་ཐེབས་པའི་རྐྱེན་གྱིས་སེམས་འཁྲུག་ཅིང་ཡིད་སྐྱོ་བར་གྱུར་ཏེ་ངག་བསྡམས་ནས་གསོལ་བ་བཏབ་པ་ཡིན་ཞེས་ཞུས།
1SA 1:17 དེའི་ལན་དུ་ཨེ་ལིས། ཁྱོད་རང་བདེ་བདེ་ལྷོད་ལྷོད་ངང་ཕྱིར་སོང་ཞིག ཡེས་ར་ཨེལ་གྱི་དཀོན་མཆོག་གིས་ཁྱོད་ཀྱིས་གསོལ་བ་བཏབ་པ་བཞིན་དུ་མཛད་པར་སྨོན་ཞེས་སྨྲས།
1SA 1:18 ཡང་ཁོ་མོས། ཁྱེད་ཀྱིས་གཡོག་མོ་བདག་ལ་ཐུགས་རྗེས་གཟིགས་རོགས་ཞེས་ཞུས་ནས། བུད་མེད་དེ་རང་གི་ལམ་དུ་ཕྱིན་ཏེ། དེར་བཟའ་བཏུང་སྤྱད་ནས་གདོང་གི་སྡུག་ཉམས་མེད་པར་གྱུར་ཏོ། །
1SA 1:19 ཡང་ཨེལ་ཁ་ནཱ་དང་དེའི་ཁྱིམ་མི་ཐམས་ཅད་ཕྱི་ཉིན་སྔ་མོ་ཡར་ལངས་ཏེ། དཀོན་མཆོག་ཡ་ཝཱེ་ལ་ཕྱག་བཙལ་ནས་ཕྱིར་རཱ་མ་ཡུལ་དུ་རང་གི་ཁྱིམ་ལ་ལོག ཨེལ་ཁ་ནཱ་རང་གི་ཆུང་མ་ཧན་ནཱ་དང་འགྲོགས་ཤིང་དཀོན་མཆོག་ཡ་ཝཱེས་དེ་ཐུགས་སུ་དྲན་ཏོ། །
1SA 1:20 དུས་ལ་བབས་པ་ན། ཧན་ནཱ་མངལ་དང་ལྡན་པར་གྱུར་ནས་བུ་ཞིག་སྐྱེས་པ་དང་། ཁོ་མོས་ཕྲུ་གུ་འདི་དཀོན་མཆོག་ཡ་ཝཱེ་ནས་ཞུས་པ་ཡིན་ཞེས་སྨྲས་པས་དེའི་མིང་ལ་སཱ་མུ་ཨེལ་ཞེས་བཏགས་སོ། །
1SA 1:21 དེ་ནས་དཀོན་མཆོག་ཡ་ཝཱེ་ལ་ལོ་རེའི་མཆོད་པ་འབུལ་བ་དང་དམ་ཚིག་བརྩི་བའི་ཕྱིར། ཨེལ་ཁ་ནཱ་ཡིས་ནང་མི་ཁྲིད་ནས་ཡར་འགྲོ་སྐབས།
1SA 1:22 ཧན་ནཱ་ཡར་མ་སོང་བར་ཁོ་མོས་རང་གི་ཁྱོ་ག་ལ། ཕྲུ་གུ་ལ་ནུ་མ་འགར་བའི་བར་དུ་ང་ཡར་མི་འགྲོ། དེ་ནས་ངས་བུ་འདི་ཁྲིད་ནས་དཀོན་མཆོག་ཡ་ཝཱེའི་དྲུང་དུ་རྒྱུན་དུ་གནས་པའི་ཕྱིར་ཁོང་ལ་འབུལ་བར་བྱ་ཞེས་སྨྲས་པ་དང་།
1SA 1:23 མོའི་ཁྱོ་ག་ཨེལ་ཁ་ནཱ་ཡིས། ཁྱོད་ཀྱི་འདོད་པ་བཞིན་དུ་ནུ་མ་འགར་བའི་བར་དུ་ཁྱིམ་ལ་བསྡད་དེ། དཀོན་མཆོག་ཡ་ཝཱེ་ཁོང་ཉིད་ཀྱིས་བཀའ་གནང་བ་ཐམས་ཅད་བསྒྲུབ་པར་མཛོད་ཅིག་ཅེས་སྨྲས། དེའི་ཕྱིར་ནུ་མ་འགར་བའི་བར་དུ་ཁོ་མ་སྨད་གཉིས་ཁྱིམ་དུ་བསྡད་དོ། །
1SA 1:24 ཡང་ནུ་མ་བཀར་བ་དང་། ཕྲུ་གུ་དང་། གླང་ཐུག་གསུམ་དང་། ཕྱེ་ཨེ་ཕཱ་གང་དང་། རྒུན་ཆང་རྐྱལ་བ་གང་བཅས་དཀོན་མཆོག་ཡ་ཝཱེ་ལ་འབུལ་བའི་ཕྱིར་ཞི་ལོ་གྲོང་ཁྱེར་གྱི་བཞུགས་གནས་སུ་ཁྱེར་ཅིང་། སྐབས་དེར་བུ་དེ་ད་དུང་ལོ་ན་གཞོན་ནོ། །
1SA 1:25 སྐབས་དེར་གླང་ཐུག་གཅིག་བཤས་ནས་ཕྲུ་གུ་ཨེ་ལིའི་མདུན་དུ་ཁྲིད།
1SA 1:26 དེ་ནས་ཧན་ནཱས། ཀྱེ་ང་ཡི་ཇོ་བོ་ལགས། བདག་གིས་ཁྱེད་ཀྱི་མདུན་དུ་དམ་བཅའ་བར་ཕོད་དེ། ང་རང་ནི་སྔོན་ཆད་འདིར་འོངས་ནས་དཀོན་མཆོག་ཡ་ཝཱེ་ལ་སྨོན་ལམ་བཏབ་པའི་བུད་མེད་དེ་ཡིན།
1SA 1:27 ངས་བུ་འདིའི་ཆེད་དུ་སྨོན་ལམ་བཏབ་པ་ཡིན་ཞིང་། ཡང་དཀོན་མཆོག་ཡ་ཝཱེས་ངའི་སྨོན་ལམ་བཞིན་དུ་གནང་བྱུང་།
1SA 1:28 དེའི་ཕྱིར་ངས་ཀྱང་བུ་འདི་ནི་ཇི་སྲིད་འཚོ་བའི་བར་དུ་དཀོན་མཆོག་ཡ་ཝཱེ་ལ་ཕུལ་བ་ཡིན་ཞེས་ཞུས་ཤིང་། དེ་ལྟར་གནས་དེ་རུ་དཀོན་མཆོག་ཡ་ཝཱེ་ལ་བསྟོད་པ་ཕུལ་ཏོ། །
1SA 2:1 དེ་ནས་ཧན་ནཱ་ཡིས་སྨོན་ལམ་བཏབ་ནས་འདི་ལྟར་ཞུས་པ་སྟེ། ཡ་ཝཱེ་ལ་ནི་བདག་གི་སེམས་པ་དགའ། ། ད་དུང་ཁོང་གི་ཕྱིར་དུ་རྭ་གླིང་འབུད། ། ཁོང་གིས་ང་རང་བསྐྱབས་པས་སྤྲོ་བ་འཕེལ། ། དགྲའི་མདུན་བདག་གི་ཁ་སྟབས་མཐོ་བར་མཛད། །
1SA 2:2 ཡ་ཝཱེ་ཁོང་ལས་དམ་པ་གང་ཡང་མེད། ། ཁོང་ལས་གཞན་དུ་ཁོང་དང་འདྲ་བ་མེད། ། བདག་གི་དཀོན་མཆོག་ལྟ་བུའི་བྲག་རི་མེད། །
1SA 2:3 དེའི་ཕྱིར་མི་ཡིས་ང་རྒྱལ་གཏམ་མ་བརྗོད། ། འུར་དང་སྙེམ་པའི་ཚིག་ངན་མི་བཤད་རོགས། ། ཡ་ཝཱེ་ཁོང་ཉིད་ཐམས་ཅད་མཁྱེན་པ་ལགས། ། བྱ་བ་ཐམས་ཅད་གཟིགས་པའི་དཀོན་མཆོག་ལགས། །
1SA 2:4 མི་ཡི་དཔའ་བོ་རྣམས་ཀྱི་གཞུ་ཐག་ཆད། ། ཉམ་ཐག་པ་ལ་སྟོབས་ཀྱི་སྐ་རགས་འཕེན། །
1SA 2:5 སྔོན་ལ་ལོངས་སྤྱོད་ཡོད་པའི་ཕྱུག་པོ་རྣམས། ། རྗེས་སུ་བག་ལེབ་འཚོལ་བའི་གླ་བར་གྱུར། ། སྔོན་ལ་བཀྲེས་སྐོམ་མྱངས་པའི་སྤྲང་པོ་རྣམས། ། རྗེས་སུ་བཅུད་ཟས་བསྟེན་པའི་བདག་པོར་གྱུར། ། མོ་གཤམ་རྣམས་ལ་ཕྲུ་གུ་བདུན་ཙམ་སྐྱེས། ། བུ་མང་རྣམས་ཀྱིས་ཁེར་རྐྱང་མྱང་བར་འགྱུར། །
1SA 2:6 ཡ་ཝཱེ་ཉིད་ཀྱིས་ཚེ་སྲོག་གཅོད་པར་མཛད། ། ཁོང་གིས་ཚེ་སྲོག་གསོན་པར་ཡང་མཛད་དོ། ། ཁོང་གིས་གཤིན་པོའི་གནས་སུ་འཁྲིད་པར་བྱེད། ། ད་དུང་གོང་ནས་གོང་དུ་འཕགས་པར་མཛད། །
1SA 2:7 ཡ་ཝཱེ་ཉིད་ཀྱིས་མི་ནི་དབུལ་པོར་མཛད། ། ཁོང་གིས་མི་ནི་ཕྱུག་པོར་ཡང་མཛད་དོ། ། མཐོན་པོ་རྣམས་ནི་གཉའ་ནས་གནོན་པར་བྱེད། ། དམའ་མོ་རྣམས་ནི་ཟེ་ནས་འཐེན་པར་བྱེད། །
1SA 2:8 དབུལ་འཕོངས་རྣམས་ནི་རྡུལ་གྱི་ཁྲོད་ནས་སློང་། ། དམན་པ་རྣམས་ནི་ཐལ་བའི་གསེབ་ནས་སློང་། ། དེ་ཚོར་དཔལ་དང་འབྱོར་བ་བསྩལ་བྱས་ཏེ། ། རྒྱལ་པོ་རྣམས་ཀྱི་ཁྲི་ལ་འཛེག་པར་བྱེད། ། ས་གཞིའི་ཀ་བ་རྣམས་ནི་ཁོང་ལ་དབང་། ། དེ་ཡི་དབུས་སུ་ཁོང་གིས་ས་གཞི་སྤར། །
1SA 2:9 ཁོང་གིས་དམ་པ་རྣམས་ནི་བསྲུང་བར་མཛད། ། ངན་པ་རྣམས་ནི་མུན་པར་རྫོང་བར་བྱེད། ། རང་གི་སྟོབས་ཀྱིས་སུ་ཡང་རྒྱལ་མི་འགྱུར། །
1SA 2:10 ཡ་ཝཱེ་དགྲ་རུ་འཛིན་པའི་མི་རྣམས་ནི། ། ཆག་ཅིང་དུམ་བུ་ཉིད་དུ་གས་པར་འགྱུར། ། དེ་ཚོའི་ཐོག་ཏུ་འབྲུག་སྐད་ལྡིར་བར་བྱ། ། ས་གཞི་མཐའ་མའི་བར་དུ་འདྲི་གཅོད་བྱ། ། ཁོང་གིས་བསྐོས་པའི་རྒྱལ་པོར་སྟོབས་ཤུགས་སྦྱིན། ། ཁོང་གིས་བྱུགས་པའི་རྭ་གླིང་གྱེན་དུ་བསྒྲེངས། ། ཞེས་པའོ། །
1SA 2:11 དེ་ནས་ཨེལ་ཁ་ནཱ་རང་གི་ཕ་ཡུལ་རཱ་མའི་ཁྱིམ་དུ་ཕྱིན་པ་དང་། སཱ་མུ་ཨེལ་གྱིས་མཆོད་དཔོན་ཨེ་ལིའི་མདུན་དུ་དཀོན་མཆོག་ཡ་ཝཱེ་ལ་བསྙེན་བཀུར་ཞུས་སོ། །
1SA 2:12 ཨེ་ལིའི་བུ་གཉིས་ནི་མི་ངན་པ་ཡིན་ཞིང་། ཁོ་གཉིས་ཀྱིས་དཀོན་མཆོག་ཡ་ཝཱེ་ངོ་མི་ཤེས་སོ། །
1SA 2:13 ཡང་མཆོད་དཔོན་དེ་གཉིས་ཀྱིས་མི་ཚོགས་ལ་འདི་ལྟར་བྱེད་པ་ཡིན་ཏེ། མི་ཞིག་གིས་མཆོད་པ་འབུལ་བ་དང་ཤ་ཚོས་ཀྱིན་ཡོད་པའི་ཚེ། མཆོད་དཔོན་གྱི་ཞབས་ཕྱི་ཡིས་ཚེབ་སོ་གསུམ་ཅན་ཞིག་ཁྱེར་ནས་འོངས་ཏེ།
1SA 2:14 རྫ་སྣོད་དམ་སླ་ངའམ་ཁྲོ་སྣོད་དམ་ཁོག་མའི་ནང་དུ་བཙུགས་ཏེ། ཚེབ་ཀྱིས་ཐོག་མར་བཏོན་པའི་ཤ་ནི་མཆོད་དཔོན་གྱིས་ལེན་ངེས་ཡིན། ཁོ་ཚོས་ཞི་ལོ་རུ་འོངས་པའི་ཡེས་ར་ཨེལ་གྱི་མི་ཐམས་ཅད་ལ་དེ་ལྟར་བྱེད་ཀྱིན་ཡོད་པ་རེད།
1SA 2:15 ཡང་ཚི་ལུ་སྲེག་པའི་སྔོན་དུ་མཆོད་དཔོན་གྱི་ཞབས་ཕྱི་འོངས་ནས་འདི་ལྟར། མཆོད་དཔོན་གྱིས་ཤ་ཞིག་བསྲེག་པའི་ཕྱིར་ཤ་ཞིག་བྱིན་ཅིག མཆོད་དཔོན་ལ་ཤ་བཙོས་མ་མི་དགོས་རློན་པ་དགོས་ཞེས་སྨྲ་ཞིང་།
1SA 2:16 གལ་ཏེ་མཆོད་པ་འབུལ་བཞིན་པའི་མི་དེས། དང་པོར་ཚི་ལུ་སྲེག་པ་དང་། དེ་ནས་ཁྱོད་ཀྱིས་ཅི་འདོད་པ་དེ་འཁྱེར་ཆོག་ཅེས་སྨྲས་ན། དེའི་ལན་དུ་ཞབས་ཕྱི་ཡིས། མིན། ད་ལྟ་རང་བྱིན་ཅིག མི་སྟེར་ན་འཕྲོག་པར་བྱ་ཞེས་ཟེར་རོ། །
1SA 2:17 དེ་ལྟར་གཞོན་ནུ་དེ་གཉིས་ཀྱིས་དཀོན་མཆོག་ཡ་ཝཱེའི་མཆོད་པ་ཁྱད་དུ་བསད་པས། ཁོ་གཉིས་ཀྱི་སྡིག་པ་དཀོན་མཆོག་ཡ་ཝཱེའི་སྤྱན་སྔར་ཆེན་པོར་གྱུར་ཏོ། །
1SA 2:18 སྐབས་དེར་སཱ་མུ་ཨེལ་ནི་ད་དུང་བྱིས་པ་ཞིག་ཡིན་ཏེ། སོ་རས་ཀྱིས་བཟོས་པའི་བེར་ཐུལ་གྱོན་ནས་དཀོན་མཆོག་ཡ་ཝཱེའི་དྲུང་དུ་ཞབས་ཏོག་བསྒྲུབས།
1SA 2:19 ཡང་ཁོའི་མ་ཡིས་ཕྱུ་པ་ཆུང་ངུ་ཞིག་བཟོས་ཏེ། རང་གི་ཁྱོ་ག་དང་མཉམ་དུ་ལོ་རེ་བཞིན་མཆོད་པ་འབུལ་དུ་འོངས་སྐབས་དེ་ཁྱེར་འོང་བ་རེད།
1SA 2:20 དེ་ནས་ཨེ་ལི་ཡིས་ཨེལ་ཁ་ནཱ་དང་དེའི་ཆུང་མ་གཉིས་ལ་བྱིན་རླབས་མཛད་ཅིང་འདི་ལྟར། ཕྲུ་གུ་འདི་དཀོན་མཆོག་ཡ་ཝཱེ་ལ་ཕུལ་བའི་ཚབ་ཏུ་ཁོང་གིས་ཁྱོད་ལ་བུད་མེད་འདི་ནས་རྒྱུད་འཛིན་གནང་བར་གྱུར་ཅིག་ཅེས་བརྗོད་ནས། དེ་དག་རང་རང་གི་གནས་སུ་ཕྱིར་ལོག
1SA 2:21 དཀོན་མཆོག་ཡ་ཝཱེས་ཧན་ནཱ་ལ་ཐུགས་རྗེས་གཟིགས་པས། ཁོ་མོ་ཡང་བསྐྱར་མངལ་དང་ལྡན་པར་གྱུར་ཏེ། རིམ་བཞིན་བུ་གསུམ་དང་བུ་མོ་གཉིས་སྐྱེས་པ་དང་། ཡང་སཱ་མུ་ཨེལ་ནི་དཀོན་མཆོག་ཡ་ཝཱེའི་དྲུང་དུ་འཚར་ལོངས་བྱུང་ངོ་། །
1SA 2:22 ཨེ་ལི་ཤིན་ཏུ་རྒས་ནས། ཁོའི་བུ་གཉིས་ཀྱིས་ཡེས་ར་ཨེལ་གྱི་མི་ཐམས་ཅད་ལ་ཅི་ཞིག་བྱས་པ་དང་། ཁོ་གཉིས་ཡ་ཝཱེའི་མཇལ་འཕྲད་གུར་མཆོག་གི་སྒོ་འགྲམ་དུ་ལས་བྱེད་མཁན་གྱི་བུད་མེད་དང་འགྲོགས་པའི་སྐད་ཆ་ཐོས་པས།
1SA 2:23 ཁོས་དེ་གཉིས་ལ་ཅིའི་ཕྱིར་དེ་ལྟར་བྱེད་དམ། ཁྱོད་གཉིས་ཀྱིས་སྤྱད་པའི་བྱ་བ་ངན་པ་དེ་ངས་མི་ཐམས་ཅད་ནས་ཐོས་བྱུང་།
1SA 2:24 ཀྱེ་བུ། ངས་ཐོས་པའི་དཀོན་མཆོག་ཡ་ཝཱེའི་འབངས་མིའི་ཁྲོད་གྲགས་པའི་གཏམ་དེ་ནི་བཟང་པོ་མ་ཡིན།
1SA 2:25 གལ་ཏེ་མི་ཞིག་གིས་མི་གཞན་ལ་འགལ་བའི་སྡིག་པ་བྱས་ན། དཀོན་མཆོག་གིས་མི་དེ་ལ་ཁྲིམས་ཐག་གཅོད་པ་ཡིན། འོན་ཀྱང་མི་ཞིག་གིས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ན། དེའི་དོན་དུ་སུ་ཞིག་གིས་ཞུ་བ་བྱེད་ཐུབ་བམ་ཞེས་སྨྲས་ནའང་། དེ་གཉིས་ཀྱིས་ཕ་ཡི་བཀའ་ལ་མ་མཉན། གང་ལ་ཞེ་ན། དཀོན་མཆོག་ཡ་ཝཱེས་དེ་གཉིས་འཆི་ལམ་དུ་འཇུག་པར་ཐུགས་ཐག་བཅད་དོ། །
1SA 2:26 ཡང་བུ་ཆུང་སཱ་མུ་ཨེལ་རིམ་བཞིན་ནར་སོན་ཞིང་། དཀོན་མཆོག་ཡ་ཝཱེ་ཁོ་ལ་ཐུགས་མཉེས་པ་དང་། མི་རྣམས་ཀྱང་ཁོ་ལ་དགའ་བར་གྱུར་ཏོ། །
1SA 2:27 ཡང་དཀོན་མཆོག་གི་སྐྱེས་བུ་ཞིག་ཨེ་ལིའི་མདུན་དུ་འོངས་ནས་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཕ་མེས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་གྱི་མདུན་དུ་བྲན་གཡོག་ཡིན་པའི་ཚེ། བདག་ནི་དེ་དག་ལ་དངོས་སུ་མངོན་པ་མ་ཡིན་ནམ།
1SA 2:28 ཡེས་ར་ཨེལ་གྱི་ཚོ་ཁག་རྣམས་ལས་བདག་གིས་མཆོད་དཔོན་ཞིག་བདམས་པ་དང་། ཁོས་མཆོད་ཁྲིའི་སྟེང་དུ་མཆོད་པ་འབུལ་བ་དང་། བདུག་སྤོས་བདུག་པ་དང་། བེར་ཐུལ་གྱོན་པ་བཅས་ཀྱི་ཆེད་དུ་བསྐོས་པ་མ་ཡིན་ནམ། ད་དུང་ཡེས་ར་ཨེལ་པ་ཐམས་ཅད་ཀྱིས་ཕུལ་བའི་སྦྱིན་སྲེག་ནི་ཁྱོད་ཀྱི་ཕ་མེས་ལ་གནང་བ་མ་ཡིན་ནམ།
1SA 2:29 བདག་གི་བཞུགས་གནས་སུ་འབུལ་འོས་པའི་མཆོད་པ་ལ་ཅིའི་ཕྱིར་རྡོག་རྒྱག་གཞུ་ཞིང་སྨད་པ་ཡིན་ནམ། བདག་གི་འབངས་མི་ཡེས་ར་ཨེལ་པས་ང་ལ་ཕུལ་བའི་མཆོད་རྫས་ཀྱི་ཁག་བཟང་ཤོས་དེ་ཡིས་ཁྱོད་རྣམས་ཀྱི་ལུས་རྒྱགས་པར་བྱས་ཤིང་། ཁྱོད་ཀྱིས་བདག་ལས་རང་གི་བུ་ལ་ལྷག་པར་བཀུར་བསྟི་བྱས་པ་ཅི་ཡིན་ནམ།
1SA 2:30 དེའི་ཕྱིར་ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཕ་མེས་ཀྱི་ཁྱིམ་རྒྱུད་དང་ཁྱོད་ཀྱི་བུ་རྒྱུད་རྟག་ཏུ་བདག་གི་མདུན་དུ་བགྲོད་དགོས་ཞེས་སྔོན་ཆད་བཀའ་བསྩལ་ནའང་། ད་ལྟ་དེ་ལྟར་གཏན་ནས་མི་རུང་སྟེ། རྒྱུ་མཚན་ནི། བདག་ལ་བཀུར་བསྟི་བྱེད་པའི་མི་ལ་ངས་ཀྱང་བརྩི་འཇོག་བྱེད་ཅིང་། བདག་ལ་སྨད་པའི་མི་ལ་ངས་ཀྱང་སྣང་ཆུང་བྱའོ། །
1SA 2:31 ཀྱེ་ཧོ་ཁྱོད་ཀྱི་སྟོབས་ཤུགས་དང་ཁྱོད་ཀྱི་ཕ་མེས་ཀྱི་སྟོབས་ཤུགས་གཅོག་པའི་ཉིན་མོ་ཞིག་འོང་བར་འགྱུར། ཁྱོད་ཀྱི་ཁྱིམ་དུ་མི་རྒན་པ་གཅིག་ཀྱང་རྙེད་པར་མི་འགྱུར།
1SA 2:32 ཡ་ཝཱེས་ཡེས་ར་ཨེལ་པ་རྣམས་ལ་ལོངས་སྤྱོད་གནང་བའི་དུས་སུ། ཁྱོད་ཀྱིས་ངའི་བཞུགས་གནས་ཉམས་རྒུད་དུ་འགྲོ་བ་མཐོང་བར་འགྱུར། དེ་ནས་ཁྱོད་ཀྱི་ཁྱིམ་དུ་ནམ་ཡང་མི་རྒན་པ་གཅིག་ཀྱང་རྙེད་པར་མི་འགྱུར།
1SA 2:33 ཁྱོད་ཀྱིས་མི་གང་ཞིག་ངའི་མཆོད་ཁྲི་ནས་འཕྲལ་བར་མི་བྱེད་པ་དེས། ཁྱོད་ཀྱི་མིག་ཞར་བ་དང་ཁྱོད་ཀྱི་སེམས་སྡུག་པར་བྱའོ། །ཡང་ཁྱོད་ཀྱི་རིགས་རྒྱུད་ཐམས་ཅད་ལང་ཚོའི་དཔལ་གྱི་དུས་སུ་འཆི་བར་འགྱུར།
1SA 2:34 ཡང་རྟགས་འདི་ལྟར་འབྱུང་སྟེ། ཁྱོད་ཀྱི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ཀྱི་སྟེང་དུ་འོང་བར་འགྱུར་ལ། དེ་གཉིས་ཀ་ཉིན་གཅིག་ལ་འཆི་བར་འགྱུར་ཞིང་།
1SA 2:35 ཡང་ངས་མཆོད་དཔོན་བརྟན་པོ་ཞིག་བསླང་བར་བྱ་སྟེ། དེས་བདག་གི་དགོངས་པ་བཞིན་དུ་ལས་བྱེད་དོ། །ངས་དེ་ལ་ཁྱིམ་གཞི་བརྟན་པོ་ཞིག་བཙུགས་ནས། མཆོད་དཔོན་དེ་ནི་ནམ་ཡང་ངས་འབྱུག་སྣུམ་གྱིས་བྱུགས་ས་དེའི་མདུན་དུ་མཆོད་པ་འབུལ་དུ་འགྲོ་བར་འགྱུར།
1SA 2:36 ཡང་ཁྱོད་ཀྱི་ཁྱིམ་རྒྱུད་ནས་ལུས་པའི་མི་རྣམས་ནི་མཆོད་དཔོན་དེའི་དྲུང་དུ་འོངས་ཏེ། དོང་ཙེའམ་བག་ལེབ་ཀྱི་དུམ་བུ་ཞིག་རྙེད་པའི་ཕྱིར་ཕྱག་འཚལ་བཞིན་འདི་ལྟར། ངས་བག་ལེབ་ཁམ་གང་བཟའ་བའི་ཕྱིར། མཆོད་དཔོན་གྱི་ལས་འགན་ཞིག་གནང་བར་མཛོད་ཅེས་ཞུ་བར་འགྱུར་ཞེས་གསུངས་སོ། །
1SA 3:1 དེ་ནས་བུ་ཆུང་སཱ་མུ་ཨེལ་གྱིས་ཨེ་ལིའི་མདུན་དུ་ཡ་ཝཱེ་ལ་ཞབས་ཏོག་བསྒྲུབས་ཤིང་། ཉིན་དེ་དག་གི་རིང་ལ་དཀོན་མཆོག་ཡ་ཝཱེའི་བཀའ་ནི་དཀོན་པོ་ཡིན་ཏེ། ལུང་བསྟན་གྱི་ཉམས་སྣང་ཙམ་ཡང་མ་བྱུང་ངོ་། །
1SA 3:2 དེ་ནས་ཉིན་ཞིག་ལ་ཨེ་ལི་རང་གི་མལ་སའི་ནང་ངལ་གསོ་བའི་སྐབས་སུ། ཁོའི་མིག་དབང་ཉམས་ནས་མཐོང་མ་ཐུབ་པ་བྱུང་།
1SA 3:3 དཀོན་མཆོག་ཡ་ཝཱེའི་གུར་མཆོག་གི་ཞལ་ཆད་ཀྱི་ཤུར་སྒམ་ཡོད་ས་རུ། ཁོང་གི་སྒྲོན་མེ་མ་གཟིམ་གོང་ལ་སཱ་མུ་ཨེལ་གནས་དེ་རུ་གཉིད་ལོག་པ་རེད།
1SA 3:4 དཀོན་མཆོག་ཡ་ཝཱེས་སཱ་མུ་ཨེལ་ཞེས་བོས་པས། དེས་ལན་དུ། ང་འདི་རུ་ཡོད་ཅེས་ཞུས་ནས།
1SA 3:5 ཁོ་རང་ཨེ་ལིའི་མདུན་དུ་བརྒྱུགས་ནས་ང་འདི་རུ་ཡོད། ཁྱེད་ཀྱིས་ང་བོས་པ་ཡིན་ནམ་ཞེས་ཞུས་པའི་ལན་དུ་དེ་ན་རེ། ངས་ཁྱོད་རང་མ་བོས། སླར་ཡང་གཉིད་དུ་སོང་ཞིག་ཅེས་བསྐུལ་བས། ཁོ་སོང་སྟེ་གཉིད་ལོག་པ་རེད།
1SA 3:6 དཀོན་མཆོག་ཡ་ཝཱེས་སླར་ཡང་སཱ་མུ་ཨེལ་ཞེས་བོས་པ་ལ། ཡང་སཱ་མུ་ཨེལ་ལངས་ནས་ཨེ་ལིའི་མདུན་དུ་སོང་སྟེ། ང་རང་འདི་རུ་ཡོད་དེ་ཁྱེད་ཀྱིས་ང་བོས་པ་ཡིན་ནམ་ཞེས་ཞུས། དེས་ལན་དུ། ངའི་བུ། བདག་གིས་ཁྱོད་མ་བོས། སླར་ཡང་གཉིད་དུ་སོང་ཞིག་ཅེས་བསྒོས་སོ། །
1SA 3:7 སཱ་མུ་ཨེལ་གྱིས་དེའི་བར་དུ་དཀོན་མཆོག་ཡ་ཝཱེ་ངོ་མ་ཤེས་པར་མ་ཟད། དཀོན་མཆོག་ཡ་ཝཱེའི་བཀའ་ཡང་དེའི་བར་དུ་ཁོ་ལ་མངོན་པར་མ་མཛད་དོ། །
1SA 3:8 ཡང་ལན་གསུམ་པར་དཀོན་མཆོག་ཡ་ཝཱེས་སཱ་མུ་ཨེལ་ཞེས་བོས་པས། ཁོ་རང་ལངས་ནས་ཨེ་ལིའི་མདུན་དུ་སོང་སྟེ། ང་རང་འདི་རུ་ཡོད། ཁྱེད་ཀྱིས་ང་རང་བོས་པ་ཡིན་ནམ་ཞེས་ཞུས། དེ་ནས་ཨེ་ལིས་བུ་ཆུང་འབོད་མཁན་དེ་ནི་དཀོན་མཆོག་ཡ་ཝཱེ་ཡིན་པ་རྟོགས་པ་རེད།
1SA 3:9 དེའི་ཕྱིར་ཨེ་ལིས་སཱ་མུ་ཨེལ་ལ། ད་སོང་ལ་ཉལ་ནས་སྡོད་ཅིག ད་དུང་སྐད་ཅིག་བྱུང་ནས་ཁྱོད་འབོད་ན་འདི་ལྟར། ཀྱེ་དཀོན་མཆོག་ཡ་ཝཱེ་ལགས། གསུང་གནང་བར་མཛོད་དང་། ཁྱེད་ཀྱི་ཞབས་ཕྱིས་མཉན་ཡོད་ཅེས་ཞུས་ཤིག་ཅེས་བསྐུལ་བས། སཱ་མུ་ཨེལ་སོང་སྟེ་རང་གི་མལ་སར་ཉལ་ཏོ། །
1SA 3:10 ཡང་དཀོན་མཆོག་ཡ་ཝཱེ་ཕེབས་འོངས་པ་དང་། སྔོན་ལྟར་སཱ་མུ་ཨེལ། སཱ་མུ་ཨེལ་ཞེས་བོས། དེ་ནས་སཱ་མུ་ཨེལ་གྱིས། གསུང་གནང་བར་མཛོད་དང་ཁྱེད་ཀྱི་ཞབས་ཕྱིས་མཉན་ཡོད་ཅེས་ཞུས།
1SA 3:11 ཡང་དཀོན་མཆོག་ཡ་ཝཱེས་སཱ་མུ་ཨེལ་ལ་འདི་སྐད་དུ། ཉོན་དང་། ངས་ཡེས་ར་ཨེལ་གྱི་ཁྲོད་དུ་བྱ་བ་ཞིག་བྱེད་པར་འགྱུར། བྱ་བ་དེ་ཐོས་པའི་མི་རེ་རེའི་རྣ་བར་ཟུག་རྔུ་ལང་ངེས།
1SA 3:12 དེའི་ཉིན་ལ་ངས་ཨེ་ལི་དང་དེའི་རྒྱུད་ཀྱི་སྐོར་ལ་སྨྲས་པའི་གཏམ་ཐམས་ཅད་ཐོག་མ་ནས་མཐའ་མའི་བར་དུ་བསྒྲུབ་པར་བྱ།
1SA 3:13 གང་ལ་ཞེ་ན། ངས་ཁོ་ལ་སྔར་ཅི་སྨྲས་པ་བཞིན་དུ། ཁོའི་རྒྱུད་ཀྱིས་བྱས་པའི་སྡིག་པ་ཐམས་ཅད་ཀྱི་ཕྱིར་དུས་གཏན་དུ་ཉེས་ཆད་གཅོད་པར་བྱ། དེ་ནི་ཁོས་རང་གི་བུ་གཉིས་ཀྱིས་བྱ་བ་ངན་པ་བྱས་པ་དང་། དམོད་མོ་ཐེབས་འོས་པ་ཤེས་ཀྱང་མ་བཀག་པས་སོ། །
1SA 3:14 དེའི་ཕྱིར་ངས་འདི་ལྟར་མནའ་བསྐྱལ་བ་སྟེ། ཨེ་ལི་དང་དེའི་རྒྱུད་ཀྱི་སྡིག་པ་ནི་མཆོད་པ་དང་སྦྱིན་སྲེག་གིས་ནམ་ཡང་སེལ་བར་མི་འགྱུར་ཞེས་གསུངས་སོ། །
1SA 3:15 ཡང་སཱ་མུ་ཨེལ་ནམ་ལངས་པའི་བར་དུ་ཉལ་བ་དང་། དེ་ནས་དཀོན་མཆོག་ཡ་ཝཱེའི་བཞུགས་གནས་ཀྱི་སྒོ་ཕྱེས་ཤིང་། སཱ་མུ་ཨེལ་ནི་ཨེ་ལི་ལ་ལུང་བསྟན་གྱི་ཉམས་སྣང་དེ་སྨྲ་བར་འཇིགས་པ་རེད།
1SA 3:16 ཨེ་ལི་ཡིས་སཱ་མུ་ཨེལ་ལ། ཀྱེ་སཱ་མུ་ཨེལ། ངའི་བུ་ཞེས་བོས་པའི་ལན་དུ་དེས་ང་རང་འདི་རུ་ཡོད་ཅེས་ཞུས།
1SA 3:17 ཡང་ཨེ་ལི་ཡིས། དཀོན་མཆོག་ཡ་ཝཱེས་ཁྱོད་ལ་གསུངས་པའི་བཀའ་དེ་ཅི་ཡིན་ཤོད་དང་། དེ་ནི་ང་རང་ལ་མི་སྦ་བར་གྱིས། ཁྱོད་ལ་གསུངས་པའི་བཀའ་དེ་ང་ལ་སྦས་ན། དཀོན་མཆོག་གིས་ཁྱོད་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲས་པས།
1SA 3:18 སཱ་མུ་ཨེལ་གྱིས་གསུང་ཐམས་ཅད་ཨེ་ལི་ལ་ཞུས་པ་སྟེ་གང་ཡང་མ་སྦས་སོ། །ཡང་ཨེ་ལི་ཡིས། ཁོང་ནི་དཀོན་མཆོག་ཡ་ཝཱེ་ལགས་པས། ཁོང་གིས་ཉིད་ཀྱི་སྤྱན་སྔར་གང་ལེགས་པ་དེ་མཛད་པར་གྱུར་ཅིག་ཅེས་སྨྲས་སོ། །
1SA 3:19 ཡང་སཱ་མུ་ཨེལ་ནར་སོན་པ་དང་། དཀོན་མཆོག་ཡ་ཝཱེ་ཁོ་དང་མཉམ་དུ་བཞུགས་ཏེ། དཀོན་མཆོག་ཡ་ཝཱེས་ཁོའི་ཚིག་གཅིག་ཀྱང་དོན་མེད་དུ་མ་མཛད་དོ། །
1SA 3:20 ཡང་བྱང་ཕྱོགས་སུ་ཡོད་པའི་དཱན་ནས་ལྷོ་ཕྱོགས་སུ་ཡོད་པའི་པེར་ཤ་བཱ་ཡི་བར་དུ། ཡེས་ར་ཨེལ་པ་ཐམས་ཅད་ཀྱིས་སཱ་མུ་ཨེལ་ནི་དཀོན་མཆོག་ཡ་ཝཱེས་བསྐོས་པའི་ལུང་སྟོན་པ་ཡིན་པ་ཤེས།
1SA 3:21 དཀོན་མཆོག་ཡ་ཝཱེ་སླར་ཡང་ཞི་ལོ་རུ་མངོན་སུམ་དུ་བྱུང་སྟེ། ཉིད་ཀྱི་བཀའ་ཡི་སྒོ་ནས་སཱ་མུ་ཨེལ་ལ་མངོན་པར་མཛད་པ་ཡིན་ནོ། །
1SA 4:1 སཱ་མུ་ཨེལ་གྱིས་རང་གི་བཀའ་ཡེས་ར་ཨེལ་གྱི་ཡུལ་ཀུན་ལ་ཁྱབ་པར་མཛད་ཅིང་། ཡེས་ར་ཨེལ་གྱི་མི་ཐམས་ཅད་ཕེ་ལེ་ཤེད་པ་རྣམས་ལ་དམག་འཐབ་ཏུ་ཆས་ནས། ཨེ་བེན་ཨེ་ཟིར་ཞེས་པའི་ས་ཆ་རུ་གུར་ཕུབ་པ་དང་། ཕེ་ལེ་ཤེད་པ་རྣམས་ཀྱིས་ཨ་ཕེག་ཏུ་གུར་ཕུབ་པ་རེད།
1SA 4:2 ཡང་དེ་དག་གིས་ཡེས་ར་ཨེལ་པ་རྣམས་ལ་དམག་རྒྱག་པའི་ཕྱིར་རུ་བསྒྲིགས་ནས་དམག་བརྒྱབ་པ་དང་། ཡེས་ར་ཨེལ་པ་རྣམས་ཕེ་ལེ་ཤེད་པའི་མདུན་དུ་ཕམ་ཞིང་། དེའི་དམག་དཔུང་ནས་མི་བཞི་སྟོང་ཙམ་གཡུལ་ས་རུ་བསད།
1SA 4:3 དེ་ནས་འབངས་མི་ཐམས་ཅད་དམག་སྒར་ནང་དུ་སླེབས་ཙ་ན། ཡེས་ར་ཨེལ་པའི་རྒན་པོ་རྣམས་ན་རེ། དེ་རིང་དཀོན་མཆོག་ཡ་ཝཱེས་ངེད་རྣམས་ཕེ་ལེ་ཤེད་པའི་མདུན་དུ་ཅིའི་ཕྱིར་ཕམ་པར་མཛད་དམ། ཞི་ལོ་གྲོང་ཁྱེར་དུ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དེ་ལེན་དུ་སོང་ཞིག་དང་། ཁོང་ནི་ངེད་རྣམས་ཀྱི་ཁྲོད་དུ་བཞུགས་པ་ཡིན་ཚེ། ངེད་རྣམས་དགྲ་བོའི་ལག་ནས་ཐར་བར་འགྱུར་ཞེས་སྨྲས།
1SA 4:4 དེའི་ཕྱིར་ཡེས་ར་ཨེལ་པ་རྣམས་ཀྱིས་ཀེ་རུབ་ཀྱི་གོང་དུ་བཞུགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཞི་ལོ་ནས་ལེན་པའི་ཕྱིར་མི་འགའ་ཞིག་མངགས། སྐབས་དེར་ཨེ་ལིའི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ནི་དཀོན་མཆོག་གི་ཞལ་ཆད་ཀྱི་ཤུར་སྒམ་དང་ལྷན་དུ་ཡོད་དོ། །
1SA 4:5 ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དམག་སྒར་དུ་སླེབས་པ་ཙམ་གྱིས། ཡེས་ར་ཨེལ་གྱི་མི་ཐམས་ཅད་ཀྱིས་ས་གཞི་གཡོ་བའི་འབོད་སྒྲ་ཆེན་པོ་བསྒྲགས།
1SA 4:6 ཡང་ཕེ་ལེ་ཤེད་པ་རྣམས་ཀྱིས་འུར་སྒྲ་དེ་ཐོས་པས། ཨིབ་རི་པའི་དམག་སྒར་ནང་དུ་འུར་སྒྲ་ཆེན་པོ་འབྱུང་དོན་ཅི་ཡིན་ཞེས་དྲིས་པ་ལ། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཨིབ་རི་པའི་དམག་སྒར་དུ་སླེབས་ཡོད་པ་ཤེས་སོ། །
1SA 4:7 དེ་ནས་ཕེ་ལེ་ཤེད་པ་རྣམས་འཇིགས་ཤིང་སྐྲག་པར་གྱུར། གང་ལ་ཞེ་ན། དེ་དག་གིས་དཀོན་མཆོག་ནི་དམག་སྒར་དུ་ཕེབས་པ་ཤེས་པས་སོ། །ཡང་ཁོ་རྣམས་ཀྱིས། ང་ཚོར་ཆག་སྒོ་བྱུང་བ་རེད། དོན་འདི་ལྟ་བུ་སྔོན་ཆད་ནམ་ཡང་མ་བྱུང་ངོ་། །
1SA 4:8 ང་ཚོར་ཆག་སྒོ་བྱུང་བ་རེད། སུ་ཞིག་གིས་ལྷ་མཐུ་སྟོབས་ཅན་རྣམས་ཀྱི་ལག་ནས་ང་ཚོ་སྒྲོལ་བར་བྱའམ། སྔོན་ཆད་དབེན་སྟོང་དུ་ཨེ་ཅིབ་པ་རྣམས་གནོད་འཚེ་སྣ་ཚོགས་ཀྱིས་ཕམ་པར་བྱེད་མཁན་ནི་ལྷ་འདི་དག་ཡིན།
1SA 4:9 ང་ཚོ་སྟོབས་ཅན་དུ་གྱུར་ཅིག མི་དཔའ་བོའི་ཚུལ་དུ་གྱུར་ཅིག ཀྱེ་ཕེ་ལེ་ཤེད་པ་རྣམས། སྔར་ཨིབ་རི་པ་རྣམས་ཁྱོད་ཅག་གི་གཡོག་པོ་བྱས་པ་ལྟར། ཁྱོད་ཅག་དེ་དག་གི་གཡོག་པོ་རུ་མི་འགྱུར་བའི་ཕྱིར་སྤོབས་པ་བསྐྱེད་ནས་དམག་རྒྱོབ་ཅིག་ཅེས་བསྐུལ་ཏོ། །
1SA 4:10 དེ་ནས་ཕེ་ལེ་ཤེད་པ་རྣམས་ཀྱིས་དམག་བརྒྱབ་ནས་ཡེས་ར་ཨེལ་པ་རྣམས་ཕམ་སྟེ། མི་རེ་རེ་རང་གི་གུར་དུ་བྲོས་པ་དང་མི་ཤིན་ཏུ་མང་པོ་བསད་ཅིང་། ཡེས་ར་ཨེལ་གྱི་རྐང་དམག་རྣམས་ལས་མི་ཁྲི་གསུམ་དེར་ཤི་བ་རེད།
1SA 4:11 ཡང་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་ཕེ་ལེ་ཤེད་པས་ཕྲོགས་ཤིང་། ཨེ་ལིའི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ཀྱང་བསད་དོ། །
1SA 4:12 དེ་ནས་པེན་ཡཱ་མེན་ཚོ་པའི་མི་ཞིག་དམག་དཔུང་ནས་བྲོས་ཏེ་ཐོན་པ་དང་ཉིན་དེར་ཞི་ལོ་གྲོང་ཁྱེར་དུ་སླེབས། མི་དེའི་གོས་ཧྲུལ་ཞིང་མགོ་ལ་ས་རྡུལ་གྱིས་ཁེངས།
1SA 4:13 མི་དེ་ཞི་ལོ་གྲོང་ཁྱེར་དུ་སླེབས་ཚེ། ཨེ་ལི་ཡིས་དཀོན་མཆོག་གི་ཞལ་ཆད་ཀྱི་ཤུར་སྒམ་ཆེད་དུ་སེམས་ཁུར་བྱས་ཏེ། འདུག་སྟེགས་ཤིག་གི་སྟེང་ལམ་འགྲམ་དུ་བསྒུགས་ནས་བསྡད་པ་ལ། མི་དེ་གྲོང་ཁྱེར་དུ་འོངས་ནས་དོན་ཅི་བྱུང་བ་སྨྲས་པ་ཙམ་གྱིས། གྲོང་ཁྱེར་གྱི་མི་རྣམས་ཀྱིས་མྱ་ངན་གྱི་སྐད་ངན་བཏོན་ནོ། །
1SA 4:14 ཨེ་ལིས་མྱ་ངན་གྱི་སྐད་དེ་ཐོས་པས། སྐད་ངན་ཆེན་པོ་འདིའི་དོན་ཅི་ཡིན་ཞེས་དྲིས་པ་དང་། མི་དེ་རྒྱུག་འོངས་ནས་དོན་ཐམས་ཅད་ཨེ་ལི་ལ་སྨྲས།
1SA 4:15 སྐབས་དེར་ཨེ་ལི་དགུང་ལོ་དགུ་བཅུ་གོ་བརྒྱད་ལ་སོན་ཡོད་པ་དང་། མིག་དབང་ཉམས་ནས་མཐོང་མི་ཐུབ་པ་རེད།
1SA 4:16 མི་དེས་ཨེ་ལི་ལ། ང་ནི་དམག་དཔུང་ནས་འོངས་པ་དང་། དེ་རིང་གཡུལ་ས་ནས་བྲོས་འོངས་པའི་མི་ཞིག་ཡིན་ཞེས་སྨྲས་པས། ཁོས་དེ་ལ། ངའི་བུ། དེ་རུ་ཅི་བྱུང་ངམ་ཞེས་དྲིས་པ་དང་།
1SA 4:17 སྐད་ཆ་ཁྱེར་འོངས་པའི་མི་དེས་ལན་དུ་ན་རེ། ཡེས་ར་ཨེལ་པ་རྣམས་ཕེ་ལེ་ཤེད་པའི་མདུན་ནས་བྲོས་ཏེ་མི་ཤིན་ཏུ་མང་པོ་ཞིག་བསད་ནས། ཁྱོད་ཀྱི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ཀྱང་ཤི་སྟེ། དཀོན་མཆོག་གི་ཞལ་ཆད་ཀྱི་ཤུར་སྒམ་ནི་ཕེ་ལེ་ཤེད་པ་རྣམས་ཀྱིས་ཕྲོགས་སོང་ཞེས་ཞུས་སོ། །
1SA 4:18 མི་དེས་དཀོན་མཆོག་གི་ཞལ་ཆད་ཀྱི་ཤུར་སྒམ་ཕྲོགས་པའི་གཏམ་སྨྲས་པ་ཙམ་གྱིས། ཨེ་ལི་འདུག་སྟེགས་ནས་གན་རྐྱལ་དུ་སྒོ་འགྲམ་དུ་འགྲིལ་བས་སྐེ་ཚིགས་ལོག་ནས་ཤིའོ། །གང་ལ་ཞེ་ན། ཁོ་ལུས་ལྕི་ཞིང་ལོ་ན་རྒས་པས་སོ། །ཁོས་ཡེས་ར་ཨེལ་པ་རྣམས་ལ་ལོ་བཞི་བཅུའི་རིང་དུ་ཁྲིམས་དཔོན་བྱས་སོ། །
1SA 4:19 ཁོའི་མནའ་མ་སྟེ་ཕེ་ནེ་ཧཱའི་ཆུང་མར་མངལ་ཆགས་ཏེ་ཕྲུ་གུ་སྐྱེ་བའི་དུས་ལ་ཉེ། མོས་དཀོན་མཆོག་གི་ཞལ་ཆད་ཀྱི་ཤུར་སྒམ་ཕྲོགས་པ་དང་། ཁྱོ་ག་དང་གྱོས་པོ་གཉིས་ཤི་བའི་གཏམ་ཐོས་པ་ཙམ་གྱིས། ཟུག་གཟེར་བྱུང་སྟེ་ལུས་པོ་བསྒུར་ནས་ཕྲུ་གུ་སྐྱེས་པ་རེད།
1SA 4:20 ཡང་ཁོ་མོ་འཆི་ལ་ཉེ་བའི་དུས་སུ། མོ་དང་ཉེ་བར་ཡོད་པའི་བུད་མེད་རྣམས་ཀྱིས། མ་འཇིགས་ཤིག ཁྱོད་ལ་བུ་ཞིག་སྐྱེས་བྱུང་ཞེས་སྨྲས་ཀྱང་། མོས་ལན་གང་ཡང་མ་བཏབ་སྟེ། གཏམ་དེ་ལ་དོ་སྣང་མ་བྱས་སོ། །
1SA 4:21 ཡང་ཁོ་མོ་ན་རེ། གཟི་བརྗིད་ཐམས་ཅད་ཡེས་ར་ཨེལ་དང་བྲལ་བ་རེད་ཅེས་སྨྲས་ནས། ཕྲུ་གུ་དེའི་མིང་ལ་ཨི་ཁ་རྦོད་ ཅེས་བཏགས། གང་ལ་ཞེ་ན། དཀོན་མཆོག་གི་ཞལ་ཆད་ཀྱི་ཤུར་སྒམ་ཕྲོགས་པ་དང་། ཁྱོ་ག་དང་གྱོས་པོ་གཉིས་ཤི་བས་སོ། །
1SA 4:22 ཡང་ཁོ་མོས། དཀོན་མཆོག་གི་ཞལ་ཆད་ཀྱི་ཤུར་སྒམ་ཕྲོགས་པའི་ཕྱིར། གཟི་བརྗིད་ཡེས་ར་ཨེལ་པ་རྣམས་དང་བྲལ་བ་ཡིན་ཞེས་སྨྲས་སོ། །
1SA 5:1 དེ་ནས་ཕེ་ལེ་ཤེད་པ་རྣམས་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་ཕྲོགས་ནས། ཨེ་བེན་ཨེ་ཟིར་ཡུལ་ནས་ཨ་སི་དོད་གྲོང་ཁྱེར་དུ་ཁྱེར་བ་དང་།
1SA 5:2 ཕེ་ལེ་ཤེད་པ་རྣམས་ཀྱིས་ཞལ་ཆད་ཀྱི་ཤུར་སྒམ་དེ་དཱ་གོན་གྱི་ལྷ་ཁང་དུ་ཁྱེར་ནས་འབག་སྐུ་དེའི་འགྲམ་དུ་བཞག
1SA 5:3 ཡང་ཨ་སི་དོད་པ་རྣམས་ཕྱི་ཉིན་སྔ་མོ་ལངས་པའི་ཚེ། ཀྱེ་ཧོ། དཱ་གོན་གྱི་འབག་སྐུ་ནི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་མདུན་དུ་ས་ལ་ཁ་སྦུབ་ཏུ་འགྲིལ་ནས་ཡོད་པ་དང་། དེ་དག་གིས་དཱ་གོན་ཡར་བསླངས་ནས་ཕྱིར་རང་གནས་སུ་བཞག
1SA 5:4 དེ་ནས་དེ་དག་ཕྱི་ཉིན་སྔ་མོ་ལངས་པའི་ཚེ། ཀྱེ་ཧོ། དཱ་གོན་གྱི་འབག་སྐུ་ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་མདུན་དུ་ས་ལ་ཁ་སྦུབ་ཏུ་འགྲིལ་ནས་ཡོད་པ་དང་། ཡང་དཱ་གོན་གྱི་འབག་སྐུའི་མགོ་དང་ལག་པ་གཉིས་སྒོ་ཐེམ་གྱི་ཁར་ཆག་སྟེ། ཤུལ་དུ་བྱང་ཁོག་འབའ་ཞིག་ལུས་པ་རེད།
1SA 5:5 དེའི་ཕྱིར་དེ་རིང་གི་བར་དུ། ལྷ་ཆེན་དཱ་གོན་གྱི་མཆོད་དཔོན་དང་ཨ་སི་དོད་ལ་ཡོད་པའི་དཱ་གོན་ལྷ་ཁང་དུ་འོང་བའི་མི་སུ་ཡིན་ཡང་ཉིན་དེ་ནས་བཟུང་དཱ་གོན་ལྷ་ཁང་གི་སྒོ་ཐེམ་ལ་འགོམ་པར་མི་བྱེད་དོ། །
1SA 5:6 དཀོན་མཆོག་ཡ་ཝཱེའི་ཕྱག་གིས་ཨ་སི་དོད་པ་རྣམས་ཀྱི་སྟེང་དུ་བཀའ་ཆད་དྲག་པོ་ཕབ་པ་དང་། ཁོང་གིས་ཨ་སི་དོད་པ་དང་དེའི་ས་མཚམས་ཀྱི་བར་དུ་གཞང་འབྲུམ་གྱི་ནད་ བསྩལ་པས།
1SA 5:7 ཨ་སི་དོད་པ་རྣམས་ཀྱིས་གནས་ཚུལ་དེ་ཤེས་ནས་འདི་ལྟར། ཡེས་ར་ཨེལ་པའི་དཀོན་མཆོག་གི་ཞལ་ཆད་ཀྱི་ཤུར་སྒམ་ངེད་རྣམས་ཀྱི་ཁྲོད་དུ་མ་འཇོག་ཅིག ཁོང་གི་ཕྱག་ནི་ངེད་ཅག་དང་ངེད་ཅག་གི་ལྷ་ཆེན་དཱ་གོན་གྱི་སྟེང་དུ་དྲག་པོ་ཡིན་ཞེས་སྨྲས་སོ། །
1SA 5:8 དེའི་ཕྱིར་དེ་དག་གིས་མི་མངགས་ཤིང་། ཕེ་ལེ་ཤེད་པའི་འགོ་དཔོན་རྣམས་དེ་དག་གི་མདུན་དུ་འཛོམས་པ་དང་འདི་ལྟར། ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་ལ་ངེད་རྣམས་ཀྱིས་ཅི་བྱ་ཞེས་དྲིས། དེ་དག་གིས་ལན་དུ། ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་གཱད་གྲོང་ཁྱེར་དུ་ཁྱེར་ཞིག་ཅེས་སྨྲས་པས། དེ་དག་གིས་ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་རུ་ཁྱེར།
1SA 5:9 རྗེས་སུ་དཀོན་མཆོག་ཡ་ཝཱེའི་ཕྱག་ནི་གྲོང་ཁྱེར་དེའི་སྟེང་དུ་ལྕི་བར་གྱུར་ཏེ་འཇིགས་སྐྲག་ཆེན་པོ་བྱུང་བ་དང་། ཁོང་གིས་གྲོང་ཁྱེར་དེའི་མི་ཆེ་ཆུང་ཐམས་ཅད་ལ་གཞང་འབྲུམ་གྱི་ནད་བྱུང་དུ་བཅུག་པ་རེད།
1SA 5:10 དེའི་ཕྱིར། དཀོན་མཆོག་གི་ཞལ་ཆད་ཀྱི་ཤུར་སྒམ་ཨེག་རོན་གྲོང་ཁྱེར་དུ་བསྐྱལ། དཀོན་མཆོག་གི་ཞལ་ཆད་ཀྱི་ཤུར་སྒམ་ཨེག་རོན་གྲོང་ཁྱེར་དུ་སླེབས་པའི་ཚེ། ཨེག་རོན་པ་རྣམས་ཀྱིས་སྐད་ཆེན་པོ་བཏོན་ནས་འདི་ལྟར། ངེད་རྣམས་དང་ངེད་རྣམས་ཀྱི་ཡུལ་མི་ཐམས་ཅད་གསོད་པའི་ཕྱིར་ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་ངེད་རྣམས་ཀྱི་མདུན་དུ་ཁྱེར་ཡོང་བ་རེད་ཅེས་སྨྲས།
1SA 5:11 དེའི་ཕྱིར་དེ་དག་གིས་མི་མངགས་ཏེ། ཕེ་ལེ་ཤེད་པའི་འགོ་དཔོན་རྣམས་བསྡུས་ནས་དེ་དག་ལ་འདི་ལྟར་སྨྲས་པ། བདག་ཅག་དང་བདག་ཅག་གི་བུ་རྒྱུད་མི་གསོད་པའི་ཕྱིར་ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་འདི་ནས་ཁྱེར་ཏེ། ཕྱིར་རང་གནས་སུ་འགྲོ་རུ་ཆུག་ཅེས་པའོ། །སྤྱིར་གྲོང་ཁྱེར་ཐམས་ཅད་ཀྱི་ནང་དུ་འཇིགས་སྐྲག་འཆི་བ་ལ་ཐུག་པ་ཞིག་བྱུང་བ་དང་། དཀོན་མཆོག་གི་ཕྱག་གིས་བཀའ་ཆད་དྲག་པོ་ཕབ་པ་རེད།
1SA 5:12 ཡང་འཆི་བར་མ་གྱུར་པའི་མི་ཐམས་ཅད་ལ་གཞང་འབྲུམ་གྱི་ནད་འགོས་པ་དང་། གྲོང་ཁྱེར་དེའི་ངུ་སྐད་ནི་ནམ་མཁའི་ཞིང་ཁམས་བར་དུ་ཁྱབ་པའོ། །
1SA 6:1 དེ་ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་ཟླ་བདུན་གྱི་རིང་ལ་ཕེ་ལེ་ཤེད་པའི་ཡུལ་དུ་ཡོད་པ་ཡིན།
1SA 6:2 ཕེ་ལེ་ཤེད་པ་རྣམས་ཀྱིས་མཆོད་དཔོན་དང་མོ་པ་དག་བོས་ནས་ཁོ་ཚོ་ལ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ལ་ངེད་རྣམས་ཀྱིས་ཅི་ཞིག་བྱ། རང་གནས་སུ་ཇི་ལྟར་བསྐྱལ་བ་སྟོན་རོགས་ཞེས་སྨྲས།
1SA 6:3 ཡང་མཆོད་དཔོན་དང་མོ་པ་དག་གིས། ཁྱོད་རྣམས་ཀྱིས་ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་བསྐྱལ་བའི་ཚེ། དེ་དང་ལྷན་དུ་དགོངས་དག་གི་མཆོད་པ་ཞིག་ཐོངས་ཤིག དེ་ནས་ཁྱོད་རྣམས་སོས་པར་འགྱུར་ཏེ། ཁོང་གི་ཕྱག་ནི་ཅིའི་ཕྱིར་ཁྱོད་ཅག་གི་སྟེང་ནས་མ་འཐེན་པའང་ཤེས་པར་འགྱུར་ཞེས་སྨྲས་སོ། །
1SA 6:4 ཡང་ཕེ་ལེ་ཤེད་པ་དག་གིས། དགོངས་དག་གི་མཆོད་པ་དེ་ཅི་ཡིན་ནམ་ཞེས་དྲིས་པའི་ལན་དུ་མོ་པ་ཚོ་ན་རེ། ཕེ་ལེ་ཤེད་པའི་འགོ་དཔོན་རྣམས་ཀྱི་གྲངས་ཀ་བཞིན་དུ། གསེར་གྱི་གཞང་འབྲུམ་ལྔ་དང་། གསེར་ནས་བཟོས་པའི་བྱི་བ་ལྔ་ཕུལ་ཞིག གང་ལ་ཞེ་ན། ཁྱོད་རྣམས་དང་ཁྱོད་རྣམས་ཀྱི་འགོ་དཔོན་ལ་ནད་ཡམས་གཅིག་མཚུངས་ཕོག་པའི་ཕྱིར་རོ། །
1SA 6:5 དེའི་ཕྱིར་གཞང་འབྲུམ་གྱི་དཔེ་གཟུགས་དང་ཁྱོད་ཚོའི་ལོ་ཏོག་ལ་གནོད་བྱེད་པའི་བྱི་བའི་དཔེ་གཟུགས་བཟོས་ཏེ། ཡེས་ར་ཨེལ་གྱི་དཀོན་མཆོག་ལ་བསྟོད་པ་ཕུལ་ཞིག དེའི་སྒོ་ནས་ཁོང་ཉིད་ཀྱི་བཀའ་ཆད་ནི་ཁྱོད་རྣམས་དང་། ཁྱོད་རྣམས་ཀྱི་ལྷ་དང་། ཁྱོད་རྣམས་ཀྱི་ཡུལ་ལ་མི་འཕོག་ཀྱང་སྲིད་དོ། །
1SA 6:6 ཨེ་ཅིབ་པ་དང་རྒྱལ་པོ་ཕཱར་ཨོལ་གྱིས་སེམས་གྱོང་པོ་བྱས་པ་ལྟར་ཁྱོད་རྣམས་ཀྱིས་ཅིའི་ཕྱིར་སེམས་གྱོང་པོ་བྱེད་དམ། དཀོན་མཆོག་གིས་འཕྲིན་ལས་ཡ་མཚན་ཅན་མཛད་ནས། ཨེ་ཅིབ་པ་དང་རྒྱལ་པོ་ཕཱར་ཨོལ་གྱིས་ཡེས་ར་ཨེལ་གྱི་མི་རྣམས་འགྲོ་རུ་བཅུག་པ་མ་ཡིན་ནམ། ཁོ་རྣམས་སོང་བ་མ་ཡིན་ནམ།
1SA 6:7 དེའི་ཕྱིར་ཁྱོད་རྣམས་ཀྱིས་ཤིང་རྟ་གསར་པ་ཞིག་བཟོས་ནས། གཉའ་ཤིང་གིས་ད་དུང་མ་མནན་པའི་བ་མོ་འོ་མ་ཅན་གཉིས་ལ་ཤིང་རྟ་བརྒྱབ་ནས། བ་ཕྲུག་རྣམས་ཕྱིར་ཡུལ་དུ་ཁྲིད་ཅིག
1SA 6:8 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་བླངས་ཏེ་ཤིང་རྟ་དེའི་སྟེང་འཇོག་དགོས་པ་དང་། དགོངས་དག་གི་མཆོད་པར་འབུལ་འོས་པའི་གསེར་གྱི་རིན་པོ་ཆེ་རྣམས་ནི་ཟ་མ་ཏོག་ཅིག་གི་ནང་དུ་བསྡུས་ཏེ་ཞལ་ཆད་ཀྱི་ཤུར་སྒམ་གམ་དུ་ཞོག་ལ་འགྲོ་བར་བཅུག་ནས།
1SA 6:9 དེ་ལ་ལྟོས་ཤིག ཤིང་རྟ་དེ་ཡེས་ར་ཨེལ་གྱི་ས་མཚམས་བརྒྱུད་དེ་པེད་ཤེ་མེ་སིའི་ཕྱོགས་སུ་འགྲོ་ན། དཀོན་མཆོག་གིས་ངེད་རྣམས་ལ་གོད་ཆག་ཆེན་པོ་འདི་བྱུང་དུ་བཅུག་པ་ཤེས་དགོས་ཤིང་། གལ་ཏེ་མི་འགྲོ་ན། ཁོང་གི་ཕྱག་གིས་ངེད་རྣམས་ལ་རྡུང་བ་མིན་པར། ངེད་རྣམས་ལ་སྟེས་དབང་གིས་བྱུང་བ་ཞིག་ཡིན་པ་ཅིས་ཀྱང་ངེས་དགོས་ཞེས་སྨྲས་སོ། །
1SA 6:10 དེ་ནས་མི་རྣམས་ཀྱིས་དེ་ལྟར་བྱས་ཏེ། བ་མོ་གཉིས་ཁྲིད་ནས་ཤིང་རྟ་བརྒྱབ་སྟེ་བ་ཕྲུག་རྣམས་ཁྱིམ་དུ་བཀག་པ་དང་།
1SA 6:11 ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་གསེར་ལས་བཟོས་པའི་གཞང་འབྲུམ་དང་བྱི་བའི་དཔེ་གཟུགས་ཡོད་པའི་ཟ་མ་ཏོག་གཉིས་ཤིང་རྟའི་སྟེང་བཞག
1SA 6:12 བ་མོ་དེ་གཉིས་ནི་དྲང་པོར་པེད་ཤེ་མེ་སིའི་ལམ་དུ་ཞུགས་ཤིང་། ངུར་བཞིན་རྒྱ་ལམ་གྱི་ཁར་འགྲུལ་ཏེ་གཡས་གཡོན་གང་དུ་ཡང་མ་འཆོལ་ལོ། །ཕེ་ལེ་ཤེད་པའི་འགོ་དཔོན་རྣམས་བེད་ཤེ་མེ་སི་ཡུལ་གྱི་ས་མཚམས་བར་རྗེས་སུ་ཕྱིན་ཏོ། །
1SA 6:13 ཉིན་དེ་ལ་པེད་ཤེ་མེ་སིའི་མི་རྣམས་ཀྱིས་ཀླུང་ཐང་དུ་སྟོན་ཐོག་རྔ་བཞིན་ཡོད་ཅིང་། ཡར་བལྟས་པ་ན་ཞལ་ཆད་ཀྱི་ཤུར་སྒམ་མཐོང་བས་དགའ་བར་གྱུར།
1SA 6:14 ཤིང་རྟ་དེ་ནི་པེད་ཤེ་མེ་སིའི་ཡོ་ཤུ་ཨ་ཡི་ཞིང་སར་སླེབས་ཏེ། ཕ་བོང་ཆེན་པོ་ཞིག་གི་མདུན་དུ་བསྡད། དེ་ནས་པེད་ཤེ་མེ་སིའི་མི་རྣམས་ཀྱིས་ཤིང་རྟའི་ཤིང་གཤགས་ནས། བ་མོ་དེ་གཉིས་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་ཕུལ་བ་རེད།
1SA 6:15 དོན་དེ་མ་བྱུང་སྔོན་དུ་ལེ་ཝི་པ་རྣམས་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་དེར་ཡོད་པའི་གསེར་གྱི་རིན་པོ་ཆེ་རྣམས་ཟ་མ་ཏོག་ལས་ཕབ་ཅིང་། ཕ་བོང་ཆེན་པོ་དེའི་སྟེང་བཞག་ཡོད། ཉིན་དེ་ལ་པེད་ཤེ་མེ་སིའི་མི་རྣམས་ཀྱིས་ཡ་ཝཱེ་ལ་སྦྱིན་སྲེག་གི་མཆོད་པ་དང་དམར་མཆོད་ཀྱང་ཕུལ།
1SA 6:16 ཕེ་ལེ་ཤེད་པའི་འགོ་དཔོན་ལྔ་ཡིས་གནས་ཚུལ་དེ་མཐོང་ནས་ཉིན་དེར་ཨེག་རོན་དུ་ཕྱིར་ལོག་གོ །
1SA 6:17 ཡང་ཕེ་ལེ་ཤེད་པས་གསེར་གྱི་གཞང་འབྲུམ་གྱི་དཔེ་གཟུགས་ཏེ་དཀོན་མཆོག་ཡ་ཝཱེ་ལ་དགོངས་དག་གི་མཆོད་པར་ཕུལ་བ་ནི། ཨ་སི་དོད་ཅེས་པའི་གྲོང་ཁྱེར་དང་གཱ་ཟཱ་གྲོང་ཁྱེར། ཨ་ཤཱ་ཀེ་ལོན་གྲོང་ཁྱེར། གཱད་གྲོང་ཁྱེར། ཨེག་རོན་གྲོང་ཁྱེར་བཅས་ཀྱི་ཕྱིར་མཆོད་པ་རེ་རེ་ཕུལ།
1SA 6:18 ཡང་གསེར་གྱི་བྱི་བ་ནི་ཕེ་ལེ་ཤེད་པའི་འགོ་དཔོན་ལྔ་ཡིས་བཟུང་བའི་ལྕགས་རིས་བསྐོར་བའི་གྲོང་ཁྱེར་དང་གྲོང་རྡལ་རྣམས་ཀྱི་གྲངས་ཀ་བཞིན་དུ་ཕུལ། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་བཞག་པའི་ཕ་བོང་ཆེན་པོ་དེ་ནི་དེ་རིང་གི་བར་དུ་ཡང་པེད་ཤེ་མེ་སིའི་ཡོ་ཤུ་ཨ་ཡི་ཞིང་ས་རུ་ཡོད་དོ། །
1SA 6:19 དེ་ནས་པེད་ཤེ་མེ་སིའི་མི་རྣམས་ཀྱིས་རང་འདོད་ལྟར་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གྱི་ནང་བལྟས་པས། ཁོང་གིས་མི་བདུན་ཅུ་བསད་པ་རེད། སྐབས་དེར་མི་ཁྲི་ལྔ་ས་དེ་རུ་ཡོད་ཅིང་། དཀོན་མཆོག་ཡ་ཝཱེས་མི་རྣམས་ལ་འདི་ལྟར་གསོད་གཅོད་ཆེན་པོས་བརྡུངས་པས་ཁོ་ཚོས་མྱ་ངན་བྱས།
1SA 6:20 ཡང་པེད་ཤེ་མེ་སིའི་མི་རྣམས་ན་རེ། དཀོན་མཆོག་དམ་པ་ཡ་ཝཱེའི་སྤྱན་སྔར་སུ་ཞིག་གནས་ཐུབ་བམ། ཞལ་ཆད་ཀྱི་ཤུར་སྒམ་ནི་ངེད་ཅག་གི་ཕྱོགས་ནས་སུའི་རྩར་བསྐྱལ་ལམ་ཞེས་ཞུས་པས།
1SA 6:21 པེད་ཤེ་མེ་སིའི་མི་རྣམས་ཀྱིས། ཀིར་ཡཱད་ཡེ་ཨ་རིམ་གྲོང་ཁྱེར་ལ་བང་ཆེན་འགའ་མངགས་ནས་མི་དེ་ཚོར། ཕེ་ལེ་ཤེད་པས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཕྱིར་ཁྱེར་འོངས་འདུག ཁྱོད་ཅག་འོངས་ནས་ཕྱིར་རང་གི་ཡུལ་དུ་ཁྱེར་ཅིག་ཅེས་བསྐུལ་ཏོ། །
1SA 7:1 ཡང་ཀིར་ཡཱད་ཡེ་ཨ་རིམ་པ་རྣམས་འོངས་ཏེ། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཡར་གདན་དྲངས་ནས་རི་ལ་གནས་པའི་ཨ་བི་ནཱ་དབ་ཀྱི་ཁྱིམ་དུ་ཁྱེར་ཏེ། དེའི་བུ་ཨེ་ལི་ཨ་ཟར་ནི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དེ་བསྲུང་ཆེད་དམ་པར་བྱས་སོ། །
1SA 7:2 ཉིན་དེ་ནས་བཟུང་ཞལ་ཆད་ཀྱི་ཤུར་སྒམ་ནི་ཀིར་ཡཱད་ཡེ་ཨ་རིམ་དུ་ཡུན་རིང་ཞིག་ལ་ལུས་ཏེ། ཇི་ཙམ་ཞེ་ན། ལོ་ཉི་ཤུའི་རིང་ལ་དེ་རུ་ལུས། ཡང་ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཀྱིས་དཀོན་མཆོག་ཡ་ཝཱེའི་དྲུང་དུ་མྱ་ངན་བྱས།
1SA 7:3 དེ་ནས་སཱ་མུ་ཨེལ་གྱིས་ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ལ་འདི་ལྟར་སྨྲས་པ་སྟེ། གལ་ཏེ་ཁྱོད་རྣམས་སེམས་གཏིང་ནས་དཀོན་མཆོག་ཡ་ཝཱེའི་དྲུང་དུ་ལོག་འདོད་ན། ཕྱི་ཕྱོགས་ཀྱི་ལྷ་རྣམས་ཀྱི་སྐུ་འདྲ་དང་ལྷ་མོ་ཨ་ཤཱ་ཏ་རོད་ཀྱི་འདྲ་གཟུགས་ཁྱོད་རྣམས་ཀྱི་ཁྲོད་ནས་ཕུད་དེ། སེམས་ཡོངས་སུ་དཀོན་མཆོག་ཡ་ཝཱེ་ལ་འབུལ་ཞིང་། ཁོང་ཉིད་འབའ་ཞིག་ལ་ཞབས་ཏོག་བསྒྲུབས་ན། ཁོང་གིས་ཁྱོད་རྣམས་ཕེ་ལེ་ཤེད་པའི་ལག་ནས་སྒྲོལ་ངེས་ཡིན་ཞེས་པའོ། །
1SA 7:4 དེ་ནས་ཡེས་ར་ཨེལ་པ་རྣམས་ཀྱིས་པཱ་ཨལ་དང་ལྷ་མོ་ཨ་ཤཱ་ཏ་རོད་ཀྱི་འདྲ་གཟུགས་རྣམས་བཏོན་ནས། དཀོན་མཆོག་ཡ་ཝཱེ་འབའ་ཞིག་ལ་བསྙེན་བཀུར་ཞུས་སོ། །
1SA 7:5 ཡང་སཱ་མུ་ཨེལ་གྱིས། ཡེས་ར་ཨེལ་གྱི་མི་ཐམས་ཅད་མཱས་ཟི་ཕཱ་གྲོང་ཁྱེར་ལ་འཛོམ་དུ་ཆུག་དང་། ངས་ཁྱོད་ཅག་གི་དོན་དུ་དཀོན་མཆོག་ཡ་ཝཱེ་ལ་སྨོན་ལམ་འདེབས་པར་བྱ་ཞེས་སྨྲས།
1SA 7:6 དེ་དག་མཱས་ཟི་ཕཱ་གྲོང་ཁྱེར་དུ་འདུས་པ་དང་། ཆུ་བཅུས་ནས་དཀོན་མཆོག་ཡ་ཝཱེའི་དྲུང་དུ་བླུགས། ཉིན་དེ་ལ་སྨྱུང་གནས་བསྲུངས་ཤིང་། དཀོན་མཆོག་ཡ་ཝཱེའི་དྲུང་དུ་ཁོ་རྣམས་ན་རེ། ངེད་རྣམས་ཀྱིས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་པ་ཡིན་ཞེས་ཞུས། དེ་ལྟར་སཱ་མུ་ཨེལ་གྱིས་ཡེས་ར་ཨེལ་པ་རྣམས་ལ་མིལ་ཚི་པཱ་ཞེས་པའི་གྲོང་ཁྱེར་ནས་སྲིད་བྱས་པའོ། །
1SA 7:7 ཡང་ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་པ་དག་མཱས་ཟི་ཕཱ་གྲོང་ཁྱེར་དུ་འཛོམས་ཡོད་པ་ཐོས་པས། ཕེ་ལེ་ཤེད་པའི་འགོ་དཔོན་རྣམས་ཀྱིས་ཡེས་ར་ཨེལ་པ་རྣམས་ཀྱི་ཕྱོགས་སུ་དམག་དྲངས། ཡེས་ར་ཨེལ་པ་རྣམས་ཀྱིས་དོན་དེ་ཐོས་པས་ཕེ་ལེ་ཤེད་པ་ལ་འཇིགས་པར་གྱུར།
1SA 7:8 ཡེས་ར་ཨེལ་པ་རྣམས་ཀྱིས་སཱ་མུ་ཨེལ་ལ། ངེད་ཅག་ཕེ་ལེ་ཤེད་པའི་དབང་འོག་ནས་སྒྲོལ་བའི་ཕྱིར། བདག་ཅག་གི་དཀོན་མཆོག་ཡ་ཝཱེ་ལ་ཞུ་འབོད་མཚམས་མ་གཅོད་ཅིག་ཅེས་ཞུས།
1SA 7:9 དེ་ནས་སཱ་མུ་ཨེལ་གྱིས་ལུ་གུ་འོ་འཐུང་ཞིག་བླངས་ནས། ཡོངས་སུ་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པར་ཕུལ་ཏེ། ཡེས་ར་ཨེལ་པ་རྣམས་ཀྱི་དོན་དུ་དཀོན་མཆོག་ཡ་ཝཱེ་ལ་སྐྱབས་འབོད་བྱས་པས་ཁོང་གིས་དེ་ལ་གསན་ཏོ། །
1SA 7:10 ཡང་སཱ་མུ་ཨེལ་གྱིས་སྦྱིན་སྲེག་འབུལ་བའི་སྐབས་སུ། ཕེ་ལེ་ཤེད་པ་རྣམས་ཡེས་ར་ཨེལ་པ་དག་ལ་དམག་རྒྱག་ཏུ་འོངས། ཉིན་དེ་ལ་དཀོན་མཆོག་ཡ་ཝཱེས་ཕེ་ལེ་ཤེད་པའི་སྟེང་དུ་འབྲུག་སྒྲ་ཆེན་པོ་ལྡིར་དུ་བཅུག་པས། དེ་དག་སྐྲག་ནས་ཡེས་ར་ཨེལ་པ་རྣམས་ཀྱི་མདུན་ནས་ཕམ་པར་གྱུར།
1SA 7:11 ཡེས་ར་ཨེལ་པ་རྣམས་ནི་མཱས་ཟི་ཕཱ་གྲོང་ཁྱེར་ནས་ཐོན་ཏེ། པེད་ཀར་གྲོང་ཚོ་དང་ཉེ་བའི་བར་དུ་ཕེ་ལེ་ཤེད་པའི་རྗེས་སུ་དེད་ནས་ཁོ་ཚོ་བསད་དོ། །
1SA 7:12 ཡང་སཱ་མུ་ཨེལ་གྱིས་རྡོ་ཞིག་བླངས་ནས། མཱས་ཟི་ཕཱ་གྲོང་ཁྱེར་དང་ཤེན་ཞེས་པའི་བྲག་གཡང་གཉིས་ཀྱི་བར་ལ་བཞག་སྟེ། དུས་འདིའི་བར་དུ་དཀོན་མཆོག་ཡ་ཝཱེས་རང་ཅག་ལ་སྐྱབས་མཛད་པ་ཡིན་ཞེས་སྨྲས་ཏེ། རྡོ་དེའི་མིང་ལ་ཨེ་བེན་ཨེ་ཟིར་ ཞེས་བཏགས་སོ། །
1SA 7:13 དེ་ལྟར་ཕེ་ལེ་ཤེད་པ་རྣམས་ཕམ་ནས། དེ་དག་ཡེས་ར་ཨེལ་པ་རྣམས་ཀྱི་ས་ཆར་སླེབས་རྒྱུ་མ་བྱུང་བ་རེད། སཱ་མུ་ཨེལ་གྱི་མི་ཚེ་གང་པོར་དཀོན་མཆོག་ཡ་ཝཱེའི་ཕྱག་གིས་ཕེ་ལེ་ཤེད་པ་རྣམས་བཀག་པར་མཛད།
1SA 7:14 ཕེ་ལེ་ཤེད་པས་བཟུང་བའི་ཡེས་ར་ཨེལ་པ་རྣམས་ཀྱི་གྲོང་ཁྱེར་ཨེག་རོན་ནས་གཱད་ཀྱི་བར་དུ་ཕྱིར་ཡེས་ར་ཨེལ་པ་རྣམས་ལ་དབང་བར་གྱུར། ཁོ་ཚོས་རང་གི་ས་ཆ་ཕེ་ལེ་ཤེད་པའི་དབང་འོག་ནས་བླངས་ཤིང་། ཡང་ཡེས་ར་ཨེལ་པ་རྣམས་དང་ཨེ་མོར་པ་ནི་མཐུན་པར་གྱུར་ཏོ། །
1SA 7:15 སཱ་མུ་ཨེལ་གྱིས་མི་ཚེ་གང་པོར་ཡེས་ར་ཨེལ་པ་ཐམས་ཅད་ལ་སྲིད་ཀྱི་བྱ་བ་བསྒྲུབས།
1SA 7:16 ཁོང་ལོ་རེ་བཞིན་པེད་ཨེལ་དང་གིལ་གལ་དང་མཱས་ཟི་ཕཱ་བཅས་པའི་གྲོང་ཁྱེར་རྣམས་སུ་སོང་སྟེ། གནས་དེ་ཐམས་ཅད་ནས་ཡེས་ར་ཨེལ་པ་རྣམས་ལ་སྲིད་ཀྱི་བྱ་བ་བསྒྲུབས།
1SA 7:17 རཱ་མ་གྲོང་ཁྱེར་དུ་སཱ་མུ་ཨེལ་གྱི་ཁྱིམ་ཡོད་པས། ཁོང་དེར་ལོག་སྟེ་ཡེས་ར་ཨེལ་པ་རྣམས་ལ་སྲིད་བྱས་ཤིང་། དཀོན་མཆོག་ཡ་ཝཱེ་ལ་མཆོད་ཁྲི་ཞིག་བརྩིགས་སོ། །
1SA 8:1 དེ་ནས་སཱ་མུ་ཨེལ་ལོ་ན་རྒས་པའི་ཚེ། རང་གི་བུ་གཉིས་ཡེས་ར་ཨེལ་གྱི་ཁྲིམས་དཔོན་དུ་བསྐོས་པ་དང་།
1SA 8:2 བུ་ཆེ་བའི་མིང་ལ་ཡོ་ཨེལ་ཞེས་དང་། བུ་ཆུང་བའི་མིང་ལ་ཨ་བི་ཡཱ་ཞེས་བྱ་ཞིང་། དེ་གཉིས་ཀྱིས་པེར་ཤ་བཱ་གྲོང་ཁྱེར་དུ་ཁྲིམས་དཔོན་བྱས།
1SA 8:3 ཡང་བུ་དེ་གཉིས་ནི་ཁོའི་ལམ་ལ་མ་འགྲུལ་ཞིང་། ནོར་ལ་བརྣབ་སེམས་ཅན་ཞིག་ཡིན་ཏེ། ལྐོག་ནོར་བླངས་ནས་དྲང་གཞག་ལོག་སྒྲུབ་བྱས།
1SA 8:4 དེ་ནས་ཡེས་ར་ཨེལ་གྱི་རྒན་པོ་ཐམས་ཅད་འཛོམས་ནས་རཱ་མ་གྲོང་ཁྱེར་དུ་སཱ་མུ་ཨེལ་གྱི་དྲུང་དུ་སླེབས་ཏེ།
1SA 8:5 དེ་དག་གིས་ཁོ་ལ། ལྟོས་དང་། ཁྱེད་ནི་ལོ་ན་རྒས་ཤིང་ཁྱེད་ཀྱི་བུ་གཉིས་ནི་ཁྱེད་ཀྱི་ལམ་ལ་མི་འགྲོ་བས། ད་ནི་ངེད་ཅག་ལ་རྒྱལ་ཁབ་གཞན་ཐམས་ཅད་བཞིན་དུ་སྲིད་སྐྱོང་བའི་རྒྱལ་པོ་ཞིག་གནང་བར་མཛོད་ཅེས་ཞུས།
1SA 8:6 དེ་དག་གིས་ངེད་ཅག་ལ་སྲིད་སྐྱོང་བའི་རྒྱལ་པོ་ཞིག་གནང་བར་མཛོད་ཅེས་ཞུས་པས། སཱ་མུ་ཨེལ་གཏམ་དེ་ལ་མི་དགའ་བར་གྱུར་ནས་དཀོན་མཆོག་ཡ་ཝཱེ་ལ་སྨོན་ལམ་བཏབ།
1SA 8:7 དེ་ནས་དཀོན་མཆོག་ཡ་ཝཱེས་སཱ་མུ་ཨེལ་ལ་འདི་སྐད་དུ། མི་རྣམས་ཀྱིས་ཁྱོད་ལ་ཇི་ལྟར་སྨྲས་པ་བཞིན་དུ་སྒྲུབས་ཤིག རྒྱུ་མཚན་ནི། དེ་དག་གིས་ཁྱོད་རང་གཡུགས་པ་མ་ཡིན་པར། ང་རང་རྒྱལ་པོའི་གོ་ས་དེར་མ་བཞག་པར་དོར་བ་ཡིན།
1SA 8:8 བདག་གིས་མི་འདི་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པ་ནས་དེ་རིང་གི་བར་དུ་དེ་དག་གིས་ང་རང་སྤངས་ཏེ་ལྷ་གཞན་རྣམས་བསྟེན་པ་ཡིན། བྱ་བ་དེ་ལྟ་བུ་དེ་དག་གིས་ཁྱོད་ལ་ཡང་བྱེད་ངེས།
1SA 8:9 དེའི་ཕྱིར་མི་རྣམས་ཀྱི་སྐད་ལ་ཉོན་ཅིག འོན་ཀྱང་མ་འོངས་པ་ན་དེ་དག་ལ་སྲིད་བྱེད་པའི་རྒྱལ་པོའི་བྱེད་སྟངས་ཐམས་ཅད་གསལ་པོར་འཆད་དགོས་ལ་ཉེན་བརྡ་ཡང་ཐོངས་ཤིག་ཅེས་གསུངས་སོ། །
1SA 8:10 ཡང་སཱ་མུ་ཨེལ་གྱིས་དཀོན་མཆོག་ཡ་ཝཱེའི་གསུང་ཐམས་ཅད་ནི་རྒྱལ་པོ་དགོས་ཞུ་མཁན་གྱི་མི་རྣམས་ལ་འདི་ལྟར་སྨྲས་པ་སྟེ།
1SA 8:11 ཁྱོད་རྣམས་ལ་སྲིད་བྱེད་པར་འགྱུར་བའི་རྒྱལ་པོ་དག་གི་བྱེད་སྟངས་ནི་འདི་ལྟར་ཡིན། ཁོང་གིས་ཁྱོད་ཅག་གི་བུ་རྣམས་བསྡུས་ནས་རང་གི་ཤིང་རྟ་འདེད་མཁན་ནམ་རྟ་པར་བསྐོས་ཏེ། རྒྱལ་པོའི་སྲོག་སྲུང་བའི་ཆེད་དུ་ཁོང་གི་ཤིང་རྟའི་མདུན་དུ་རྒྱུག་པར་འགྱུར།
1SA 8:12 ཡང་རྒྱལ་པོ་དེ་དག་གིས་མི་སྟོང་རེ་ལ་སྟོང་དཔོན་དང་མི་ལྔ་བཅུ་རེ་ལ་ལྔ་བཅུ་དཔོན་རེ་བསྐོ་བ་དང་། ཁྱོད་ཅག་གི་བུ་རྒྱུད་ཀྱིས་ཁོང་གི་ཞིང་ས་རྨོ་བ་དང་། སྟོན་ཐོག་རྔ་བ་དང་། དམག་ཆས་བཟོ་བ་དང་། ཤིང་རྟའི་ལྷུ་ལག་བཟོ་བར་བྱེད་དོ། །
1SA 8:13 ཡང་ཁོང་གིས་ཁྱོད་ཅག་གི་བུ་མོ་རྣམས་ནི་སྤོས་ཆུ་བཟོ་མཁན་དང་། གསོལ་ཐབ་མཁན་དང་། བག་ལེབ་སྲེག་མཁན་བཅས་སུ་བྱེད་དོ། །
1SA 8:14 ད་དུང་ཁྱོད་རྣམས་ཀྱི་ཞིང་དང་རྒུན་འབྲུམ་ར་བ་དང་སྐྱུ་རུ་རའི་ཚལ་ཤིན་ཏུ་བཟང་པོ་རྣམས་ཕྲོགས་ནས། ཁོང་གི་བློན་པོ་རྣམས་ལ་གཏོང་བར་བྱེད།
1SA 8:15 ཡང་ཁྱོད་རྣམས་ཀྱི་ས་བོན་དང་རྒུན་འབྲུམ་ར་བ་ནས་བཅུ་ཆའི་གཅིག་བླངས་ཏེ། རང་གི་འཁོར་གྱི་ཉུག་རུམ་པ་དང་ཞབས་ཕྱི་པ་རྣམས་ལ་གཏོང་བར་བྱེད།
1SA 8:16 ཡང་ཁྱོད་ཅག་གི་ཞབས་ཕྱི་དང་གཡོག་མོ། བྱད་གཟུགས་ལེགས་པའི་གཞོན་ནུ། བོང་བུ་བཅས་ཕྲོགས་ཏེ་ཁོང་གི་ལས་ཀ་བྱེད་མཁན་དུ་འཇུག་པར་འགྱུར།
1SA 8:17 ཡང་ཁོང་གིས་ཁྱོད་ཚོའི་ར་ལུག་གི་ཁྱུ་ལས་བཅུ་ཆའི་གཅིག་བླངས་ཏེ་ཁྱོད་རྣམས་ནི་ཁོང་གི་གཡོག་པོར་འགྱུར།
1SA 8:18 ཉིན་དེ་ལ་ཁྱོད་རྣམས་ཀྱིས་རང་གིས་བསྐོས་པའི་རྒྱལ་པོའི་ཕྱིར་དུ་ངུ་འབོད་བྱེད་ཅིང་། དཀོན་མཆོག་ཡ་ཝཱེས་ཉིན་དེར་ཁྱོད་རྣམས་ལ་གསན་པར་མི་བྱའོ་ཞེས་སྨྲས་སོ། །
1SA 8:19 སཱ་མུ་ཨེལ་གྱིས་དེ་ལྟར་སྨྲས་ཀྱང་མི་རྣམས་ཀྱིས་ཁོའི་སྐད་ཆ་ལ་མ་མཉན་པར་ན་རེ། ངེད་ཅག་གི་གོང་དུ་རྒྱལ་པོ་ཞིག་ཡོད་པར་དགའ།
1SA 8:20 ངེད་ཅག་ནི་མི་རིགས་གཞན་ཐམས་ཅད་དང་འདྲ་བར་འགྱུར་ཞིང་ངེད་ཅག་ལ་རང་གི་རྒྱལ་པོས་སྲིད་སྐྱོང་བ་དང་། ཁོ་རང་ངེད་ཅག་གི་མདུན་དུ་འགྲོ་ཞིང་ང་ཚོའི་དོན་དུ་དམག་རྒྱག་པར་བྱའོ་ཞེས་སྨྲས།
1SA 8:21 ཡང་སཱ་མུ་ཨེལ་གྱིས་མི་རྣམས་ཀྱི་གཏམ་ཐམས་ཅད་ཐོས་ནས། དཀོན་མཆོག་ཡ་ཝཱེའི་སྙན་ལམ་དུ་ཡང་བསྐྱར་ཞུས་པ་དང་།
1SA 8:22 དཀོན་མཆོག་ཡ་ཝཱེས་སཱ་མུ་ཨེལ་ལ་འདི་སྐད་དུ། ཁོ་ཚོའི་སྐད་ཆར་མཉན་ནས་དེ་དག་ལ་རྒྱལ་པོ་ཞིག་སྐོས་ཤིག་ཅེས་གསུངས་པས། སཱ་མུ་ཨེལ་གྱིས་ཡེས་ར་ཨེལ་པ་རྣམས་ལ། ཁྱོད་ཅག་མི་རེ་རེ་རང་རང་གི་གྲོང་ཁྱེར་དུ་ཕྱིར་ལོག་ཅིག་ཅེས་སྨྲས་སོ། །
1SA 9:1 དེའི་ཚེ་པེན་ཡཱ་མེན་ཚོ་པར་མིང་ལ་ཁི་སི་ཞེས་འབོད་པའི་ཕྱུག་བདག་ཅིག་ཡོད་པ་དང་། དེ་ནི་ཨ་བེ་ཨེལ་གྱི་བུ་དང་། ཨ་བེ་ཨེལ་ནི་ཙེ་རོར་གྱི་བུ། ཙེ་རོར་ནི་པི་ཀོ་རད་ཀྱི་བུ། པི་ཀོ་རད་ནི་པེན་ཡཱ་མེན་པའི་ཨ་ཕེ་ཨག་གི་བུ་བཅས་ཡིན།
1SA 9:2 མིང་ལ་སོ་ལོ་ཞེས་འབོད་པ་ནི་ཁི་སིའི་བུ་ཡིན་པ་དང་། དེ་ནི་གཞོན་ནུ་བྱད་གཟུགས་ལེགས་པ་ཞིག་ཡིན་ཏེ། དེ་ལྟ་བུའི་བྱད་གཟུགས་ལེགས་པའི་མི་ཞིག་ཡེས་ར་ཨེལ་པ་རྣམས་ཀྱི་ཁྲོད་དུ་མེད་ཅིང་། ཁོ་རང་མི་ཐམས་ཅད་ཀྱི་གཟུགས་ལས་མགོ་གཅིག་གིས་མཐོ་བ་ཡིན།
1SA 9:3 ཡང་སོ་ལོ་ཡི་ཕ་ཁི་སིའི་བོང་བུ་རྣམས་བོར་བས། ཁི་སི་ཡིས་རང་གི་བུ་སོ་ལོ་ལ། ཞབས་ཕྱི་རྣམས་ལས་གཅིག་ཁྲིད་དེ་བོང་བུ་རྣམས་བཙལ་དུ་སོང་ཞིག་ཅེས་བསྒོས་པས།
1SA 9:4 དེ་གཉིས་ཨེ་ཕཱར་ཡིམ་རི་བོའི་ཡུལ་དང་ཤཱ་ལི་ཤཱ་ཡུལ་བརྒྱུད་དེ་སོང་ནའང་མ་རྙེད་པ་རེད། དེ་ནས་སཱ་ཨ་ལེམ་ཡུལ་བརྒྱུད་དེ་སོང་བ་ན་བོང་བུ་དེ་རུའང་མེད་པ་དང་། པེན་ཡཱ་མེན་པའི་ཡུལ་བརྒྱུད་དེ་ཕྱིན་ན་ཡང་མ་རྙེད་དོ། །
1SA 9:5 དེ་གཉིས་ཙུབ་ཡུལ་གྱི་བར་དུ་སླེབས་ཙ་ན། སོ་ལོས་ཁོ་དང་མཉམ་དུ་ཡོད་པའི་ཞབས་ཕྱི་ལ། ད་ཤོག་དང་ངེད་གཉིས་ཕྱིར་འགྲོ་བར་བྱ། ཕྱིར་མ་སོང་ན་ཕ་ཡིས་བོང་བུའི་ཆེད་དུ་སེམས་ཁུར་བྱེད་པ་ལས་ལྡོག་སྟེ། ངེད་གཉིས་ཀྱི་ཆེད་དུ་སེམས་ཁུར་བྱེད་པར་འགྱུར་ཞེས་སྨྲས་པ་དང་།
1SA 9:6 ཞབས་ཕྱིས་སོ་ལོ་ལ། གཟིགས་དང་། གྲོང་ཁྱེར་འདི་རུ་དཀོན་མཆོག་གི་སྐྱེས་བུ་ཞིག་བཞུགས། མི་རྣམས་ཀྱིས་དེ་ལ་གུས་བཀུར་བྱེད་ཅིང་། མི་དེས་ཅི་ཞིག་གསུངས་ན་ཡང་བདེན་པར་འགྱུར། ད་ངེད་གཉིས་དེ་རུ་འགྲོ་སྟེ། མི་དེས་ངེད་གཉིས་ལ་འགྲོ་འོས་པའི་ལམ་སྟོན་ཡང་སྲིད་ཅེས་སྨྲས་ཤིང་།
1SA 9:7 སོ་ལོས་རང་གི་ཞབས་ཕྱི་ལ། ལྟོས་དང་། ངེད་གཉིས་དེ་རུ་སོང་ན་མི་དེ་ལ་ཅི་འབུལ་ལམ། ངེད་གཉིས་ཀྱི་སྣོད་ཀྱི་ནང་དུ་ཡོད་པའི་བག་ལེབ་ནི་རྫོགས་ཚར་ལ། དཀོན་མཆོག་གི་སྐྱེས་བུ་དེ་ལ་འབུལ་བའི་ནོར་གཅིག་ཀྱང་མེད། ད་དུང་ངེད་གཉིས་ལ་ཅི་ཡོད་དམ་ཞེས་དྲིས་པས།
1SA 9:8 ཞབས་ཕྱིས་སོ་ལོ་ལ་འདི་ལྟར། གཟིགས་དང་། འདིར་བདག་གི་ལག་ཏུ་དངུལ་སྲང་བཞི་ཆའི་གཅིག་ཡོད། དེ་ནི་ངེད་གཉིས་ལ་འགྲོ་འོས་པའི་ལམ་སྟོན་ཕྱིར་དཀོན་མཆོག་གི་སྐྱེས་བུ་དེ་ལ་འབུལ་བར་བྱ་ཞེས་ལན་ཞུས།
1SA 9:9 སྔོན་ཆད་ཡེས་ར་ཨེལ་པའི་ཁྲོད་དུ་མི་ཞིག་དཀོན་མཆོག་ལ་ཞུ་བ་བྱེད་དུ་འགྲོ་བའི་ཚེ་འདི་ལྟར་སྨྲ་བ་ཡིན་ཏེ། ཤོག་དང་། ངེད་རྣམས་མངོན་ཤེས་པ་དེའི་དྲུང་དུ་འགྲོ་བར་བྱའོ་ཟེར། དེང་གི་ལུང་སྟོན་པ་ཞེས་པར་སྔོན་ཆད་མངོན་ཤེས་པ་ཞེས་འབོད་དོ། །
1SA 9:10 དེ་ནས་སོ་ལོས་རང་གི་ཞབས་ཕྱི་ལ། ཁྱོད་ཀྱིས་སྨྲས་པ་ལེགས་སོ། །ཤོག་དང་། ངེད་གཉིས་འགྲོ་བར་བྱ་ཞེས་སྨྲས་པ་དང་། དེ་ལྟར་ཁོ་གཉིས་དཀོན་མཆོག་གི་སྐྱེས་བུ་བཞུགས་སའི་གྲོང་ཁྱེར་དུ་སོང་ངོ་། །
1SA 9:11 གྲོང་ཁྱེར་དེའི་རི་བོ་ལ་ཡར་འགོས་པ་དང་གཞོན་ནུ་མ་ཆུ་ལེན་པའི་ཕྱིར་ཡོང་བ་རྣམས་དང་ཕྲད་པས། དེ་དག་ལ་མངོན་ཤེས་པ་འདི་རུ་བཞུགས་སམ་ཞེས་དྲིས་པ་ན།
1SA 9:12 དེ་དག་གིས་ལན་དུ། ཁོང་བཞུགས་ཏེ། ལྟོས་ཤིག ཁོང་ནི་ཁྱེད་ཀྱི་མདུན་དུ་བཞུགས་འདུག་སྟེ། མྱུར་དུ་སོང་དང་། དེ་རིང་གནས་མཐོ་ས་རུ་ཡུལ་མི་རྣམས་ཀྱི་ཆེད་དུ་མཆོད་པ་འབུལ་བའི་ཕྱིར་ཁོང་ནི་གྲོང་ཁྱེར་དུ་ཕེབས་སོ། །
1SA 9:13 ཁྱེད་གཉིས་གྲོང་ཁྱེར་དུ་སླེབས་པ་ཙམ་གྱིས། ཁོང་གནས་མཐོ་སར་ཞལ་ཟས་བཞེས་སུ་མ་ཕེབས་སྔོན་ལ་ཁོང་དང་འཕྲད་པར་འགྱུར། མི་ཚོགས་ཀྱིས་ཁོང་མ་ཕེབས་བར་དུ་ཁ་ཟས་བཟའ་མི་འོང་། རྗེས་སུ་ཁོང་གིས་མཆོད་པ་ལ་བྱིན་རླབས་གནང་ན། མགྲོན་དུ་བོས་པ་རྣམས་ཀྱིས་བཟའ་བར་འགྱུར། དེའི་ཕྱིར། དུས་འདི་ཉིད་དུ་ཁོང་དང་མཇལ་བར་སོང་ཞིག་ཅེས་སྨྲས།
1SA 9:14 དེ་ནས་ཁོ་གཉིས་ཡར་གྲོང་ཁྱེར་ནང་འཛུལ་དུས། སཱ་མུ་ཨེལ་ཁོ་གཉིས་ཀྱི་མདུན་ནས་འོང་བཞིན་པ་དང་། གནས་མཐོ་སའི་ཕྱོགས་སུ་འགྲོ་བཞིན་ཡོད་དོ། །
1SA 9:15 སོ་ལོ་མ་སླེབས་པའི་ཉིན་གཅིག་གི་སྔོན་ལ་དཀོན་མཆོག་ཡ་ཝཱེས་སཱ་མུ་ཨེལ་ལ་མཛུབ་སྟོན་གནང་སྟེ་འདི་སྐད་དུ།
1SA 9:16 སང་ཉིན་དུས་ཚོད་འདི་ལ་ངས་ཁྱོད་ཀྱི་མདུན་དུ་པེན་ཡཱ་མེན་ཡུལ་གྱི་མི་ཞིག་མངག་པར་བྱ། བདག་གི་འབངས་མི་ཡེས་ར་ཨེལ་ནི་ཕེ་ལེ་ཤེད་པའི་ལག་ནས་སྒྲོལ་བའི་ཕྱིར་ཁྱོད་ཀྱིས་མི་དེ་འགོ་དཔོན་དུ་བསྐོ་དགོས། བདག་གིས་རང་གི་འབངས་མིར་གཟིགས་སྐྱོང་བྱས་པ་ཡིན། གང་ལ་ཞེ་ན། དེ་དག་གི་ངུ་སྐད་ང་ཡི་མདུན་དུ་སླེབས་པས་སོ་ཞེས་གསུངས་པའོ། །
1SA 9:17 ཡང་སཱ་མུ་ཨེལ་གྱིས་སོ་ལོ་མཐོང་བ་ཙམ་གྱིས། དཀོན་མཆོག་ཡ་ཝཱེས་དེ་ལ། དེ་སྔར་ངས་ཁྱོད་ལ་སྨྲས་པའི་མི་འདི་ཡིན། དེས་ངའི་མི་སྡེ་ལ་སྲིད་སྐྱོང་བར་བྱ་ཞེས་གསུངས་པ་རེད།
1SA 9:18 དེ་ནས་སོ་ལོ་རྒྱལ་སྒོ་ནང་སཱ་མུ་ཨེལ་གྱི་གམ་དུ་འོངས་སྐབས། ཁོ་ན་རེ། མངོན་ཤེས་པའི་ཁང་པ་གང་དུ་ཡོད་པ་ང་ལ་སྟོན་པར་མཛོད་ཅེས་སྨྲས་པ་དང་།
1SA 9:19 སཱ་མུ་ཨེལ་གྱིས་སོ་ལོ་ལ་ལན་དུ། མངོན་ཤེས་པ་དེ་ནི་ང་རང་ཡིན། ཁྱོད་རང་ངའི་སྔོན་དུ་གནས་མཐོ་སར་སོང་ཞིག་དང་། དེ་རིང་ཁྱོད་ཀྱིས་ང་དང་མཉམ་དུ་ཁ་ཟས་བཟའ་བར་འགྱུར། ཞོགས་པ་སྔ་མོ་ངས་ཁྱོད་རང་ལ་སྐྱེལ་མ་བྱེད་དེ། ཁྱོད་ཀྱི་སེམས་ལ་གང་ཡོད་པ་ཁྱོད་ལ་འཆད་པར་བྱ།
1SA 9:20 ཡང་ཁྱོད་ཀྱིས་ཉིན་གསུམ་གྱི་སྔོན་དུ་བོང་བུ་བོར་བ་དེའི་ཕྱིར་སེམས་ཁུར་མ་བྱེད་ཅིག བོང་བུ་དེ་རྣམས་རྙེད་ཟིན། ཡང་ཡེས་ར་ཨེལ་པ་ཐམས་ཅད་ནི་སུའི་ཕྱིར་དགའ་ཟེར་ན། ཁྱོད་དང་ཁྱོད་ཀྱི་ཁྱིམ་རྒྱུད་ཀྱི་ཕྱིར་དགའ་བ་མ་ཡིན་ནམ་ཞེས་སྨྲས་སོ། །
1SA 9:21 སོ་ལོས་དེའི་ལན་དུ། བདག་ནི་ཡེས་ར་ཨེལ་གྱི་ཚོ་པའི་ཁྲོད་དུ་ཐམས་ཅད་ལས་ཆུང་བའི་པེན་ཡཱ་མེན་གྱི་ཚོ་པའི་མི་ཞིག་མ་ཡིན་ནམ། བདག་གི་ཁྱིམ་རྒྱུད་ནི་པེན་ཡཱ་མེན་གྱི་ཚོ་པའི་ཁྲོད་དུ་ཐམས་ཅད་ལས་དམའ་བ་མ་ཡིན་ནམ། ཁྱེད་ཀྱིས་ཅིའི་ཕྱིར་བདག་ལ་གཏམ་དེ་ལྟ་བུ་སྨྲའམ་ཞེས་ཞུས་པས།
1SA 9:22 སཱ་མུ་ཨེལ་གྱིས་སོ་ལོ་དང་དེའི་ཞབས་ཕྱི་གཉིས་ཁྲིད་ནས་གསོལ་ཁང་དུ་སོང་བ་དང་། མགྲོན་དུ་བོས་པ་རྣམས་ཀྱི་ཁྲོད་དུ་གྲལ་མགོ་རུ་སྡོད་དུ་བཅུག དེ་དག་གི་མི་གྲངས་ནི་སུམ་ཅུ་ཙམ་ཡིན་ནོ། །
1SA 9:23 དེ་ནས་སཱ་མུ་ཨེལ་གྱིས་གསོལ་དཔོན་ལ། སྔར་ངས་ཁྱོད་རང་ལ་ཟུར་དུ་ཞོག་ཅིག་ཅེས་སྨྲས་པའི་ཤ་སྐལ་འདི་རུ་ཁྱེར་ཤོག་ཅེས་བསྐུལ་བས།
1SA 9:24 གསོལ་དཔོན་གྱིས་བརླ་རྐང་ལ་སོགས་པའི་ཤ་བླངས་ནས་སོ་ལོའི་མདུན་དུ་བཞག་ཅིང་། ཡང་སཱ་མུ་ཨེལ་ན་རེ། ད་ལྟོས་ཤིག འདི་ནི་ཁྱོད་ལ་བཞག་པ་ཡིན། ད་ལོངས་ལ་ཟོ་ཞིག བདག་གིས་མི་རྣམས་མགྲོན་དུ་བོས་པ་ཡིན་ཞེས་སྨྲས་པའི་དུས་ནས་ད་ལྟའི་བར་དུ་འདི་ནི་ཁྱོད་ཀྱི་ཕྱིར་བཞག་པ་ཡིན་ཞེས་སྨྲས་པས། དེའི་ཉིན་མོར་སོ་ལོས་སཱ་མུ་ཨེལ་དང་མཉམ་དུ་ཁ་ཟས་སྤྱད་དོ། །
1SA 9:25 དེ་ནས་ཁོ་ཚོ་གནས་མཐོ་ས་ནས་གྲོང་ཁྱེར་དུ་བབས་པ་དང་། ཡང་སཱ་མུ་ཨེལ་གྱིས་སོ་ལོ་དང་མཉམ་དུ་ཁང་ཐོག་ནས་གཏམ་བྱས་སོ། །
1SA 9:26 སྐྱ་རེངས་ཀྱི་དུས་སུ་སཱ་མུ་ཨེལ་གྱིས་ཁང་ཐོག་ཏུ་ཉལ་བའི་སོ་ལོ་ལ། ད་ལོངས་ཤིག ངས་ཁྱོད་ལ་སྐྱེལ་མ་བྱེད་ཅེས་སྨྲས་པས། སོ་ལོ་ལངས་ནས་སཱ་མུ་ཨེལ་དང་མཉམ་དུ་ཕྱི་རོལ་ཏུ་སོང་།
1SA 9:27 དེ་གཉིས་གྲོང་ཁྱེར་གྱི་མཐའ་ལ་སླེབས་པའི་ཚེ། སཱ་མུ་ཨེལ་གྱིས་སོ་ལོ་ལ། ཁྱོད་ཀྱིས་ཞབས་ཕྱི་ལ་ངེད་གཉིས་ཀྱི་སྔོན་དུ་སོང་ཞེས་སྐུལ་ཞིག་སྨྲས་པ་དང་། ཡང་སོ་ལོ་ལ་ད་ལྟ་ཁྱོད་རང་ཅུང་ཟད་སྡོད་དང་། ངས་ཁྱོད་ལ་དཀོན་མཆོག་གི་གསུང་ཞིག་འཆད་པར་བྱ་ཞེས་སྨྲས་སོ། །
1SA 10:1 དེ་ནས་སཱ་མུ་ཨེལ་གྱིས་སྣོད་ཅིག་བླངས་ནས་སོ་ལོའི་མགོ་ལ་སྣུམ་བླུགས་ཏེ་འོ་བྱས་ཤིང་སྨྲས་པ། ད་ནི་དཀོན་མཆོག་ཡ་ཝཱེས་ཁྱོད་རང་ཁོང་གི་འབངས་མིའི་རྗེ་དཔོན་དུ་བྱུགས་པར་མཛད་པ་མ་ཡིན་ནམ།
1SA 10:2 དེ་རིང་ཁྱོད་ངའི་མདུན་ནས་ཕྱིན་ཏེ་པེན་ཡཱ་མེན་གྱི་ས་མཚམས་ཀྱི་ཙེལ་ཙེག་ཏུ་སླེབས་ཚེ། རཱ་ཧེལ་གྱི་དུར་སའི་གནས་སུ་མི་གཉིས་དང་འཕྲད་ངེས་ལ། དེ་གཉིས་ཀྱིས་ཁྱོད་ལ་འདི་ལྟར་སྨྲས་འོང་། ཁྱོད་ཀྱིས་བཙལ་བའི་བོང་བུ་རྣམས་རྙེད་ཟིན་ལ། ཁྱོད་ཀྱི་ཕ་ཡིས་བོང་བུའི་ཆེད་དུ་སེམས་ཁུར་མི་བྱེད་པར། རང་གི་བུ་ཡི་ཆེད་དུ་ཅི་ལྟར་བྱའམ་ཞེས་སྨྲ་ཞིང་སེམས་འཚེར་བཞིན་འདུག་ཅེས་པའོ། །
1SA 10:3 ཡང་སཱ་མུ་ཨེལ་གྱིས་འདི་ལྟར། གནས་དེ་ནས་ཁྱོད་རང་ཕར་ཕྱིན་ཏེ་ཐ་པོར་ཡུལ་གྱི་བེ་ཤིང་གི་མདུན་དུ་སླེབས་པ་ཙམ་གྱིས། པེད་ཨེལ་གྲོང་ཁྱེར་གྱི་ཕྱོགས་སུ་དཀོན་མཆོག་ལ་ཞུ་བར་འགྲོ་བའི་མི་གསུམ་དང་འཕྲད་པར་འགྱུར། མི་དེ་གསུམ་ལས་གཅིག་གིས་རེའུ་གསུམ་དང་གཞན་དེས་བག་ལེབ་གསུམ་དང་། གསུམ་པས་རྒུན་ཆང་གི་རྐྱལ་བུ་ཞིག་འཁུར་འོང་བར་བྱ།
1SA 10:4 དེ་དག་གིས་ཁྱོད་ལ་ཁམས་བཟང་ངམ་ཞེས་ཞུས་ནས་བག་ལེབ་གཉིས་འབུལ་བ་དང་། ཁྱོད་ཀྱིས་དེ་དག་གི་ལག་ནས་ལེན་རུང་ངོ་། །
1SA 10:5 དེ་ནས་ཁྱོད་ཕེ་ལེ་ཤེད་པའི་སོ་པ་ཡོད་སའི་དཀོན་མཆོག་གི་རི་མདུན་དུ་སླེབས་ནས་དེ་རུ་གྲོང་ཁྱེར་དུ་འགྲོ་བ་ཙམ་གྱིས། ལུང་སྟོན་པའི་ཚོགས་གནས་མཐོ་ས་ནས་འབབ་པ་ཞིག་དང་འཕྲད་པར་འགྱུར། དེ་དག་གིས་རྒྱུད་མངས་དང་སིལ་རྔ་དང་གླིང་བུ་དང་པི་ཝང་བཅས་འཁྲོལ་ཞིང་ལུང་སྟོན་པར་བྱ།
1SA 10:6 ཡང་དཀོན་མཆོག་ཡ་ཝཱེའི་ཐུགས་ཉིད་དབང་དང་ལྡན་པར་ཁྱོད་ལ་ཁྱབ་ཅིང་། དེ་དག་དང་བཅས་སུ་ལུང་སྟོན་ཞིང་། ཁྱོད་རང་མི་གསར་པ་ཞིག་ཏུ་འགྱུར་འོང་།
1SA 10:7 ཡང་ངས་ཁྱོད་ལ་བསྟན་པའི་རྟགས་དེ་རྣམས་ཐོན་པའི་ཚེ། དཀོན་མཆོག་ཁྱོད་དང་མཉམ་དུ་བཞུགས་པས་ཁྱོད་ལ་བྱུང་བ་བཞིན་བྱོས་ཤིག
1SA 10:8 ཁྱོད་རང་ངའི་སྔོན་དུ་གིལ་གལ་གྲོང་ཁྱེར་དུ་སོང་ཞིག་དང་། ངས་དེ་རུ་སྦྱིན་སྲེག་དང་ཞི་བདེའི་མཆོད་པ་འབུལ་བའི་ཕྱིར་ཁྱོད་ཀྱི་མདུན་དུ་འོང་བར་འགྱུར། ང་རང་ཁྱོད་ཀྱི་མདུན་དུ་མ་སླེབས་བར་དུ་ཉིན་བདུན་ལ་སྒུག་དགོས། དེ་ནས་ཁྱོད་ཀྱིས་ཅི་བྱ་འོས་པ་དེ་ངས་སྟོན་པར་བྱ་ཞེས་སྨྲས་སོ། །
1SA 10:9 དེ་ནས་སོ་ལོ་ཁ་ཕྱིར་འཁོར་ཏེ་སཱ་མུ་ཨེལ་དང་བྲལ་བའི་ཚེ། དཀོན་མཆོག་གིས་ཁོ་ལ་སེམས་གཞན་པ་ཞིག་གནང་བ་དང་། དེའི་ཉིན་མོར་སྔར་བསྟན་པའི་མངོན་རྟགས་ཐམས་ཅད་འགྲུབ་པར་གྱུར།
1SA 10:10 ཡང་སོ་ལོ་གཙོ་འཁོར་གཉིས་རི་མདུན་དུ་སླེབས་པའི་ཚེ་ལུང་སྟོན་པའི་ཚོགས་ཤིག་དང་ཕྲད་དེ། དཀོན་མཆོག་གི་ཐུགས་ཉིད་དེ་ལ་དབང་དང་ལྡན་པར་ཁྱབ་པས། ཁོས་དེ་དག་གི་ཁྲོད་དུ་ལུང་བསྟན་པ་རེད།
1SA 10:11 དེ་ནས་སྔར་ཁོ་རང་ངོ་ཤེས་པའི་མི་རྣམས་ཀྱིས་ཁོས་ལུང་སྟོན་པའི་ཁྲོད་དུ་ལུང་བསྟན་པ་མཐོང་བས། ཕན་ཚུན་ལ། ལྟོས་ཤིག ཁི་སིའི་བུ་ལ་བྱུང་བ་འདི་ཅི་ཡིན། སོ་ལོ་ཡང་ལུང་སྟོན་པའི་ཁྲོད་དུ་ཡོད་དམ་ཞེས་དྲིས་པ་དང་།
1SA 10:12 ཡང་ཡུལ་དེའི་མི་ཞིག་གིས་ལན་དུ། དེ་དག་གི་ཕ་སུ་ཡིན་ནམ་ཞེས་སྨྲས། དེའི་ཕྱིར། སོ་ལོ་ཡང་ལུང་སྟོན་པའི་ཁྲོད་དུ་ཡོད་དམ་ཞེས་པའི་གཏམ་དཔེ་ཞིག་བྱུང་བ་རེད།
1SA 10:13 དེ་ནས་སོ་ལོས་ལུང་བསྟན་ཟིན་ནས་གནས་མཐོ་སར་སླེབས་སོ། །
1SA 10:14 ཡང་སོ་ལོའི་ཁུ་བོས་ཁོ་དང་ཁོའི་ཞབས་ཕྱི་གཉིས་ལ། ཁྱོད་གཉིས་གང་དུ་ཕྱིན་པ་ཡིན་ཞེས་དྲིས་པས། ཁོས་ལན་དུ། ངེད་གཉིས་བོང་བུ་རྣམས་འཚོལ་བར་སོང་བ་ཡིན། བོང་བུ་རྣམས་མ་རྙེད་པས་སཱ་མུ་ཨེལ་གྱི་དྲུང་དུ་བཅར་བ་ཡིན་ཞེས་སྨྲས།
1SA 10:15 སོ་ལོའི་ཁུ་བོས། སཱ་མུ་ཨེལ་གྱིས་ཁྱོད་ལ་ཅི་སྨྲས་པ་དེ་ང་ལ་ཤོད་ཅེས་དྲིས་པས།
1SA 10:16 སོ་ལོས་རང་གི་ཁུ་བོ་ལ། སཱ་མུ་ཨེལ་གྱིས་ང་ཚོར་བོང་བུ་རྣམས་རྙེད་པའི་གཏམ་གསལ་པོར་སྨྲས་བྱུང་ཞེས་སྨྲས་ཀྱང་། རྒྱལ་ཁམས་ཀྱི་དོན་སཱ་མུ་ཨེལ་གྱིས་ཅི་གསུངས་པ་དེ་ནི་མ་བཤད་དོ། །
1SA 10:17 དེའི་རྗེས་སུ་སཱ་མུ་ཨེལ་གྱིས་མི་རྣམས་མཱས་ཟི་ཕཱ་གྲོང་ཁྱེར་དུ་དཀོན་མཆོག་ཡ་ཝཱེའི་དྲུང་དུ་བོས་ནས།
1SA 10:18 ཡེས་ར་ཨེལ་པ་རྣམས་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ངས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་དེ། ཨེ་ཅིབ་པ་དང་ཁྱོད་རྣམས་ལ་གཉའ་གནོན་བྱེད་པའི་རྒྱལ་ཁམས་ཐམས་ཅད་ལས་བསྒྲལ་ཟིན།
1SA 10:19 དེ་རིང་ཁྱོད་རྣམས་ཀྱིས་རང་ཉིད་ཀྱི་དཀོན་མཆོག་སྟེ། སྡུག་བསྔལ་དང་དཀའ་ཚེགས་ཐམས་ཅད་ནས་སྒྲོལ་བར་མཛད་མཁན་དེ་སྤངས་ནས་ཁོང་ལ་འདི་ལྟར་སྨྲས་པ། ངེད་རྣམས་ལ་རྒྱལ་པོ་ཞིག་བསྐོ་བར་མཛོད་ཅིག་ཅེས་པས། ད་ལྟ་ཁྱོད་རྣམས་ནི་ཚོ་པ་དང་ཁྱིམ་རྒྱུད་བཞིན་དུ་དཀོན་མཆོག་ཡ་ཝཱེའི་དྲུང་དུ་འཛོམ་པར་གྱིས་ཞེས་བཀའ་བསྩལ་ཏོ། །
1SA 10:20 དེ་ནས་སཱ་མུ་ཨེལ་གྱིས་ཡེས་ར་ཨེལ་གྱི་ཚོ་པ་ཐམས་ཅད་ཉེ་བར་འཛོམས་སུ་བཅུག་ནས། པེན་ཡཱ་མེན་གྱི་ཚོ་པ་བདམས།
1SA 10:21 པེན་ཡཱ་མེན་གྱི་ཚོ་པ་ནི་དེའི་ཁྱིམ་རྒྱུད་བཞིན་དུ་འོང་བར་བཅུག་ནས། མུལ་ཐི་རུའི་ཁྱིམ་རྒྱུད་བསྐོས། དེ་ནས་ཁི་སིའི་བུ་སོ་ལོ་བསྐོས་ཀྱང་ཁོ་རང་བཙལ་ནས་མ་རྙེད།
1SA 10:22 ཡང་དེ་དག་གིས་དཀོན་མཆོག་ཡ་ཝཱེ་ལ། མི་དེ་འདི་རུ་ཡོད་དམ་ཞེས་ཞུས་པས། དཀོན་མཆོག་ཡ་ཝཱེས། ལྟོས་དང་། ཁོ་ནི་ཅ་ལག་རྣམས་ཀྱི་ཁྲོད་དུ་ཡིབ་འདུག་ཅེས་གསུངས།
1SA 10:23 དེའི་ཕྱིར་མི་རྣམས་བརྒྱུགས་ནས་ཁོ་རང་ཁྲིད་འོངས་པ་དང་། ཁོ་མི་རྣམས་ཀྱི་ཁྲོད་དུ་ལངས་སྐབས་མི་ཐམས་ཅད་ལས་མགོ་གཅིག་གིས་མཐོ་བ་ཡིན།
1SA 10:24 དེ་ནས་སཱ་མུ་ཨེལ་གྱིས་མི་ཐམས་ཅད་ལ། དཀོན་མཆོག་ཡ་ཝཱེས་བསྐོ་བར་མཛད་པ་དེ་ལ་ལྟོས་ཤིག དེ་དང་འདྲ་བ་མི་ཐམས་ཅད་ཀྱི་ཁྲོད་དུ་གཅིག་ཀྱང་མི་འདུག་ཅེས་སྨྲས་པས། མི་ཐམས་ཅད་ཀྱིས་སྐད་ཆེན་པོ་བརྒྱབ་ཅིང་། རྒྱལ་པོ་ཁྲི་ལོར་བརྟན་པར་ཤོག་ཅེས་འབོད་སྒྲ་བསྒྲགས་སོ། །
1SA 10:25 དེ་ནས་སཱ་མུ་ཨེལ་གྱིས་མི་རྣམས་ལ་རྒྱལ་ཁམས་ཀྱི་ཁྲིམས་ལུགས་བརྗོད་དེ་གླེགས་བམ་ཞིག་གི་ནང་དུ་བཀོད་ནས་དཀོན་མཆོག་ཡ་ཝཱེའི་དྲུང་དུ་བཞག ཡང་སཱ་མུ་ཨེལ་གྱིས་མི་ཐམས་ཅད་རང་རང་སོ་སོའི་ཁྱིམ་དུ་ཕྱིར་འགྲོ་རུ་བཅུག
1SA 10:26 ཡང་སོ་ལོ་ནི་གིབ་ཨ་གྲོང་ཚོ་རུ་རང་གི་ཁྱིམ་དུ་ཕྱིན་པ་དང་། ཁོ་དང་མཉམ་དུ་དཀོན་མཆོག་གིས་སེམས་འགུལ་ཐེབས་པར་མཛད་པའི་དཔའ་བོའི་ཚོགས་ཤིག་ཀྱང་ཕྱིན་པ་རེད།
1SA 10:27 འོན་ཀྱང་མི་ངན་ལ་ལས། མི་འདིས་ངེད་རྣམས་ཅི་ལྟར་སྒྲོལ་བར་བྱ་ཞེས་སྨྲས་ཤིང་ཁོ་ལ་སྨད་པ་དང་། འབུལ་བ་གང་ཡང་མ་ཕུལ་ན་ཡང་སོ་ལོ་ཁུ་སིམ་མེར་བཞུགས་སོ། །
1SA 11:1 དེ་ཡང་ཨམ་མོན་པའི་རྒྱལ་པོ་ནཱ་ཧ་སི་འོངས་ནས་གིལ་ཨད་ཡུལ་གྱི་ཡཱ་བེ་སི་གྲོང་ཚོ་ཡི་མདུན་དུ་དམག་སྒར་བཏབ་པ་དང་། གྲོང་ཁྱེར་དེའི་ཡཱ་བེ་སི་པ་རྣམས་ཀྱིས་ནཱ་ཧ་སི་ལ། ངེད་ཅག་དང་མཉམ་དུ་ཁ་ཆད་ཅིག་མཛོད་དང་། ངེད་ཅག་གིས་ཁྱེད་ལ་ཞབས་ཕྱི་བསྒྲུབ་པར་བྱ་ཞེས་ཞུས་པ་དང་།
1SA 11:2 ཨམ་མོན་པ་ནཱ་ཧ་སི་ན་རེ། ཁྱོད་ཅག་མི་རེ་རེའི་མིག་གཡས་པ་དེ་བཏོན་ནས་ཡེས་ར་ཨེལ་པ་ཐམས་ཅད་ལ་བརྙས་བཅོས་བྱེད་དུ་བཅུག་ན། ངས་ཁྱོད་ཅག་དང་མཉམ་དུ་འདི་ལྟ་བུའི་ཁ་ཆད་འཇོག་པར་བྱ་ཞེས་སྨྲས་པས།
1SA 11:3 ཡཱ་བེ་སི་པ་ཡི་རྒན་པོ་རྣམས་ཀྱིས་ངེད་ཅག་གིས་ཡེས་ར་ཨེལ་གྱི་ས་མཚམས་ཐམས་ཅད་ཀྱི་བར་དུ་བང་ཆེན་མངག་པའི་ཕྱིར། ཉིན་བདུན་གྱི་རིང་ལ་གནོད་པ་མི་བྱེད་རོགས། ཉིན་དེའི་བར་དུ་སྲོག་སྐྱོབ་མཁན་གཅིག་ཀྱང་མ་བྱུང་ན། ངེད་ཅག་ཡུལ་ནས་ཐོན་ཏེ་ཁྱེད་ཀྱི་དྲུང་དུ་འོང་བར་བྱ་ཞེས་ཞུས།
1SA 11:4 དེ་ནས་བང་ཆེན་རྣམས་སོ་ལོའི་གྲོང་ཚོ་རྒི་བེ་ཨ་རུ་སླེབས་ཏེ་འབངས་མི་ཐམས་ཅད་ལ་གཏམ་དེ་སྨྲས་པས། ཐམས་ཅད་ཀྱིས་སྐད་ཆེན་པོ་བརྒྱབ་ནས་བཤུམས།
1SA 11:5 སོ་ལོས་ཞིང་ཁ་ནས་བ་གླང་དེད་དེ་འོངས་པ་དང་། ཁོས་མི་རྣམས་ཅིའི་ཕྱིར་ངུ་བ་ཡིན་ཞེས་དྲིས་པར་དེ་དག་གིས་ཁོ་ལ་ཡཱ་བེ་སི་པའི་གཏམ་སྨྲས་པ་རེད།
1SA 11:6 སོ་ལོས་གཏམ་དེ་ཐོས་པའི་ཚེ་དཀོན་མཆོག་གི་ཐུགས་ཉིད་དབང་དང་ལྡན་པ་ཁོ་ལ་བབས་ནས་ཁོང་ཁྲོ་ཤིན་ཏུ་ཆེན་པོ་ལངས།
1SA 11:7 དེ་ནས་ཁོས་བ་གླང་དོར་གཅིག་བཟུང་སྟེ་བསད་ནས་དུམ་བུར་གཏུབས་ཤིང་། བང་ཆེན་གྱིས་ཡེས་ར་ཨེལ་གྱི་ས་མཚམས་བར་དུ་བཀྲམས་ཤིང་འདི་ལྟར་སྨྲས་པ། མི་སུ་ཞིག་སོ་ལོ་དང་སཱ་མུ་ཨེལ་གཉིས་ཀྱི་རྗེས་སུ་མི་འོང་ན། མི་དེའི་བ་གླང་རྣམས་ལ་ཡང་འདི་ལྟར་བྱེད་པར་འགྱུར་ཞེས་པའོ། །དེ་ནས་མི་ཐམས་ཅད་ལ་དཀོན་མཆོག་ཡ་ཝཱེར་འཇིགས་པའི་སེམས་བྱུང་བས་ཀུན་པོ་མི་གཅིག་ལྟར་འོངས་པ་རེད།
1SA 11:8 པེ་ཟེག་གྲོང་ཚོ་རུ་མི་གྲངས་བརྩི་བའི་ཚེ་ཡེས་ར་ཨེལ་པ་འབུམ་གསུམ་དང་ཡ་ཧུ་དཱ་པ་ཁྲི་གསུམ་ཡོད་དོ། །
1SA 11:9 ཡེས་ར་ཨེལ་པ་དང་ཡ་ཧུ་དཱ་པ་གཉིས་ཀྱིས་དེ་རུ་འོངས་པའི་གིལ་ཨད་ཡུལ་གྱི་བང་ཆེན་རྣམས་ལ་ཁྱོད་ཅག་གིས་ཡཱ་བེ་སི་པ་རྣམས་ལ་འདི་ལྟར་ཤོད་ཅིག སང་ཉིན་ཉིན་གུང་སླེབས་ལ་ཉེ་བའི་དུས་སུ་ཁྱོད་རྣམས་སྐྱོབ་པར་འགྱུར་ཞེས་སྨྲས་པ་དང་། བང་ཆེན་རྣམས་ཕྱིན་ཏེ་ཡཱ་བེ་སི་པ་རྣམས་ལ་གཏམ་དེ་སྨྲས་པས་དགའ་བར་གྱུར།
1SA 11:10 དེའི་ཕྱིར་ཡཱ་བེ་སི་པ་རྣམས་ཀྱིས་ཨམ་མོན་པ་རྣམས་ལ། སང་ཉིན་ངེད་ཅག་ཁྱོད་རྣམས་ཀྱི་གམ་དུ་འོང་སྐབས། ཁྱོད་རྣམས་ཀྱི་སེམས་སུ་ཅི་ལྟར་བྱེད་སྙམ་ན་དེ་ལྟར་བྱོས་ཤིག་ཅེས་སྨྲས།
1SA 11:11 ཡང་ཕྱི་ཉིན་སོ་ལོས་འབངས་མི་རྣམས་དམག་དཔུང་གསུམ་དུ་བསྒྲིལ་ཏེ། མཚན་ཐུན་ཕྱི་མའི་དུས་སུ་ཨམ་མོན་པའི་དམག་སྒར་གྱི་དཀྱིལ་དུ་འོངས་ནས་ཉིན་གུང་བར་དུ་ཁོ་རྣམས་དང་དམག་བརྒྱབ་ཅིང་། མ་ཤི་བ་ཐམས་ཅད་ཁ་འཐོར་བས་མི་གཉིས་མཉམ་གཅིག་ཏུ་ལུས་པའང་མེད་དོ། །
1SA 11:12 དེ་ནས་མི་རྣམས་ཀྱིས་སཱ་མུ་ཨེལ་ལ། སོ་ལོས་ངེད་རྣམས་ཀྱི་སྟེང་དུ་སྲིད་བྱེད་རུང་ངམ་ཞེས་ཟེར་བའི་མི་དེ་སུ་ཡིན། མི་དེ་རྣམས་འདི་རུ་འཁྲིད་ཤོག དེ་རྣམས་གསོད་པར་རིགས་ཞེས་སྨྲས།
1SA 11:13 ཡང་སོ་ལོས། དེ་རིང་ཉིན་མོར་དཀོན་མཆོག་ཡ་ཝཱེས་ཡེས་ར་ཨེལ་གྱི་སྲོག་བསྐྱབས་པར་མཛད་པས་མི་གཅིག་ཀྱང་གསོད་མི་རུང་ཞེས་བཀའ་བསྩལ།
1SA 11:14 དེ་ནས་སཱ་མུ་ཨེལ་གྱིས་མི་རྣམས་ལ། ད་ཤོག་དང་། ངེད་རྣམས་གིལ་གལ་གྲོང་ཁྱེར་དུ་སླར་ཡང་རྒྱལ་པོ་ཁས་ལེན་པའི་ཕྱིར་འགྲོ་བར་བྱ་ཞེས་བསྐུལ་བས།
1SA 11:15 མི་ཐམས་ཅད་གིལ་གལ་གྲོང་ཁྱེར་དུ་ཕྱིན་ནས། སོ་ལོ་ནི་དཀོན་མཆོག་ཡ་ཝཱེའི་སྤྱན་སྔར་གིལ་གལ་གྲོང་ཁྱེར་དུ་རྒྱལ་པོར་བསྐོས། དེ་ནས་དེ་དག་གིས་དཀོན་མཆོག་ཡ་ཝཱེའི་དྲུང་དུ་ཞི་བདེའི་མཆོད་པ་ཕུལ་ཞིང་། སོ་ལོ་དང་ཡེས་ར་ཨེལ་གྱི་མི་ཐམས་ཅད་ཤིན་ཏུ་དགའ་བར་གྱུར་ཏོ། །
1SA 12:1 དེ་ཡང་སཱ་མུ་ཨེལ་གྱིས་ཡེས་ར་ཨེལ་པ་ཐམས་ཅད་ལ་འདི་ལྟར། ལྟོས་དང་། ཁྱོད་ཅག་གིས་ང་ལ་ཅི་ཞིག་ཞུས་པ་བཞིན། ངས་ཁྱོད་ཅག་གི་གཏམ་ལ་མཉན་ཅིང་ཁྱོད་ཅག་ལ་རྒྱལ་པོ་ཞིག་བསྐོས་པ་ཡིན།
1SA 12:2 ད་ལྟ་རྒྱལ་པོ་ཁྱོད་ཅག་གི་མདུན་དུ་བཞུགས་ཡོད་ཅིང་། ང་རང་ལོ་ན་རྒས་ཤིང་སྐྲ་ཡང་དཀར་པོར་གྱུར། ངའི་བུ་རྣམས་ཁྱོད་ཅག་གི་ཁྲོད་དུ་གནས་ཏེ། ང་ནི་གཞོན་ནུའི་དུས་ནས་ད་ལྟའི་བར་དུ་ཁྱོད་ཅག་གི་མདུན་དུ་བསྐྱོད་པ་ཡིན།
1SA 12:3 ང་འདི་རུ་ཡོད་དེ་དཀོན་མཆོག་ཡ་ཝཱེ་དང་ཁོང་གི་སྣུམ་གྱིས་བྱུགས་པ་གཉིས་ཀྱི་དྲུང་དུ་ཁྱོད་ཚོས་ང་ལ་དཔང་པོ་བྱོས་ཤིག ངས་སུ་ཞིག་གི་བ་གླང་ངམ་བོང་བུ་ཕྲོགས་པ་ཡིན་ནམ། ངས་སུ་ཞིག་བསླུས་པའམ་མནན་པ་ཡིན་ནམ། ངས་སུ་ཞིག་གི་ལག་ནས་མིག་ལོང་བ་ལྟར་བྱས་ཏེ་ལྐོག་རྔན་བླངས་མྱོང་ངམ། གལ་སྲིད་དེ་ལྟར་ཕྲོགས་པའམ་བསླུས་པ་སོགས་ཡོད་ན་ཕྱིར་སྤྲོད་དགོས་ཞེས་སྨྲས་པ་ལ།
1SA 12:4 དེ་དག་ན་རེ། ཁྱེད་ཀྱིས་བདག་ཅག་བསླུས་ཤིང་མནན་པ་མ་ཡིན་ལ། མི་སུ་ཞིག་གི་ལག་ནས་ཁྱེད་ཀྱིས་གང་ཡང་མ་བླངས་ཞེས་ཞུས་པས།
1SA 12:5 ཡང་དེ་དག་ལ། དེ་རིང་ཉིན་མོར་དཀོན་མཆོག་ཡ་ཝཱེ་དང་ཁོང་གི་སྣུམ་གྱིས་བྱུགས་པ་གཉིས་ཀྱིས་ངའི་ལག་ཏུ་གང་ཡང་མ་རྙེད་པ་ཁྱོད་ཅག་གི་མདུན་དུ་དཔང་པོ་མཛད་པ་ཡིན་ཞེས་སྨྲས་པར། དེ་དག་གིས་ཁོང་ནི་དཔང་པོ་ལགས་ཞེས་སྨྲས།
1SA 12:6 ཡང་སཱ་མུ་ཨེལ་གྱིས་མི་རྣམས་ལ་འདི་ལྟར། མོ་ཤེ་དང་ཨ་རོན་གཉིས་བསྐོས་ཤིང་། ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་མཁན་ནི་དཀོན་མཆོག་ཡ་ཝཱེ་ལགས་སོ། །
1SA 12:7 དེའི་ཕྱིར་འདི་རུ་སྡོད་ཅིག ཁྱོད་རྣམས་དང་ཁྱོད་རྣམས་ཀྱི་མེས་པོའི་དོན་དུ་ཡ་ཝཱེས་མཛད་པའི་འཕྲིན་ལས་བཟང་པོ་ཐམས་ཅད་ངས་ཁྱོད་རྣམས་ལ་དཀོན་མཆོག་ཡ་ཝཱེའི་དྲུང་དུ་སྟོན་པར་བྱ།
1SA 12:8 ཡ་ཀོབ་ཨེ་ཅིབ་ཡུལ་དུ་སླེབས་པའི་ཚེ། ཁྱོད་ཅག་གི་མེས་པོ་རྣམས་ཀྱིས་དཀོན་མཆོག་ཡ་ཝཱེ་ལ་འོ་དོད་ཕུལ་བས། དཀོན་མཆོག་ཡ་ཝཱེས་མེས་པོ་རྣམས་ཨེ་ཅིབ་ཡུལ་ནས་ཕྱི་རུ་འཁྲིད་པའི་ཕྱིར་མོ་ཤེ་དང་ཨ་རོན་གཉིས་བསྐོས་ནས་དེ་དག་ཡུལ་འདི་རུ་གནས་པར་བྱས།
1SA 12:9 ཡང་དེ་དག་གིས་དཀོན་མཆོག་ཡ་ཝཱེ་སྟེ་རང་གི་དཀོན་མཆོག་བརྗེད་པས་ཁོང་གིས་དེ་དག་ཧ་ཟོར་གྱི་དམག་དཔོན་སི་སེ་རཱ་དང་། ཕེ་ལེ་ཤེད་པ་དང་མོ་ཨབ་ཀྱི་རྒྱལ་པོར་བཙོངས་ནས། དེ་དག་གིས་དེ་རྣམས་ལ་དམག་བརྒྱབ།
1SA 12:10 ཡང་དེ་དག་གིས་དཀོན་མཆོག་ཡ་ཝཱེ་ལ་འོ་དོད་འབོད་ཀྱིན་ན་རེ། བདག་ཅག་གིས་དཀོན་མཆོག་ཡ་ཝཱེ་སྤངས་ནས་པཱ་ཨལ་དང་ལྷ་མོ་ཨ་ཤཱ་ཏ་རོད་ཀྱི་ལྷ་སྐུ་རྣམས་ལ་ཕྱག་ཕུལ་བ་ནི་སྡིག་པ་བྱས་པ་ཡིན། ད་ལྟ་ཁྱེད་ཀྱིས་བདག་ཅག་དགྲ་བོའི་ལག་ནས་སྒྲོལ་བར་མཛོད་ཅིག བདག་ཅག་གིས་ཁྱེད་གཅིག་པོ་ལ་བསྙེན་བཀུར་བྱའོ་ཞེས་ཞུས་པས།
1SA 12:11 དཀོན་མཆོག་ཡ་ཝཱེས་ཡེ་རུབ་པཱ་ཨལ་དང་པི་ཏཱན་དང་ཡེབ་ཐཱ་དང་སཱ་མུ་ཨེལ་བཅས་མངགས་ཤིང་། ཁྱོད་ཅག་ཕྱོགས་བཞིའི་དགྲ་བོ་རྣམས་ཀྱི་ལག་ནས་བསྐྱབས་ཏེ་ཁྱོད་རྣམས་ད་གཟོད་བདེ་བར་གནས་ཐུབ་པ་ཡིན།
1SA 12:12 ཡང་ཁྱོད་ཅག་གིས་ཨམ་མོན་པའི་རྒྱལ་པོ་ནཱ་ཧ་སི་འོང་བ་མཐོང་བའི་ཚེ་ཁྱོད་ཅག་གི་དཀོན་མཆོག་ཡ་ཝཱེ་ནི་ཁྱོད་ཅག་གི་རྒྱལ་པོ་ཡིན་ན་ཡང་། ཁྱོད་ཅག་གིས་ང་ལ། དེ་ལྟར་མིན། རྒྱལ་པོ་ཞིག་གིས་བདག་ཅག་ལ་སྲིད་བྱེད་རུང་བ་ཡིན་ཞེས་སྨྲ་བར་བྱས།
1SA 12:13 ཁྱོད་ཅག་གིས་བདམས་པ་དང་དེའི་སྐོར་ང་ལ་ཞུས་པའི་རྒྱལ་པོར་ལྟོས་ཤིག དཀོན་མཆོག་ཡ་ཝཱེས་ཁྱོད་ཅག་ལ་རྒྱལ་པོ་དེ་བསྐོ་བར་གནང་བ་ཡིན།
1SA 12:14 གལ་ཏེ་ཁྱོད་ཅག་དཀོན་མཆོག་ཡ་ཝཱེ་ལ་འཇིགས་ཏེ་ཁོང་ལ་བསྙེན་བཀུར་ཞུས་ཤིང་། ཁོང་གི་བཀའ་ལ་མཉན་ནས་ཁོང་གི་བཀའ་རྒྱ་དང་ནམ་ཡང་མི་འགལ་བ་དང་། ཁྱོད་ཅག་དང་ཁྱོད་ཅག་ལ་སྲིད་བྱེད་པའི་རྒྱལ་པོ་ཡ་ཝཱེ་རང་གི་དཀོན་མཆོག་གི་རྗེས་སུ་འབྲངས་ན་ལེགས་སོ། །
1SA 12:15 གལ་ཏེ་ཁྱོད་ཅག་གིས་དཀོན་མཆོག་ཡ་ཝཱེའི་བཀའ་ལ་མི་མཉན་པར་ཁོང་གི་བཀའ་རྒྱ་དང་འགལ་ན། ཁྱོད་ཅག་གི་ཕ་མེས་ཀྱི་སྟེང་དུ་དཀོན་མཆོག་ཡ་ཝཱེའི་ཕྱག་ལྕི་བར་གྱུར་པ་བཞིན་ཁྱོད་ཅག་གི་སྟེང་དུ་ཡང་ལྕི་བར་འགྱུར་བ་ཡིན།
1SA 12:16 དེའི་ཕྱིར་ད་ལྟ་འདི་རུ་སྡོད་ལ། དཀོན་མཆོག་ཡ་ཝཱེས་ཁྱོད་ཅག་གི་མིག་མདུན་དུ་བྱ་བ་ཆེན་པོ་ཅི་ཞིག་མཛད་འོང་བར་ལྟོས་ཤིག
1SA 12:17 དེ་རིང་གྲོ་རྔ་བའི་ཉིན་མོ་མ་ཡིན་ནམ། ངས་དཀོན་མཆོག་ཡ་ཝཱེའི་མཚན་བརྗོད་ཅིང་ཁོང་གིས་འབྲུག་སྒྲ་དང་ཆར་བ་གནང་བར་འགྱུར། ཁྱོད་ཅག་གིས་དཀོན་མཆོག་ཡ་ཝཱེའི་སྤྱན་སྔར། བདག་ཅག་ལ་རྒྱལ་པོ་ཞིག་གནང་རོགས་ཞེས་ཞུས་པས། སྡིག་པ་ཅི་ལྟར་ཆེན་པོ་བྱས་པའི་ངོ་བོ་རྟོགས་ཤིང་མཐོང་བར་འགྱུར་ཞེས་སྨྲས་སོ། །
1SA 12:18 སཱ་མུ་ཨེལ་གྱིས་དཀོན་མཆོག་ཡ་ཝཱེའི་མཚན་བརྗོད་པ་དང་། དཀོན་མཆོག་ཡ་ཝཱེས་ཉིན་དེ་ལ་འབྲུག་སྒྲ་དང་ཆར་བ་གནང་བས། མི་ཐམས་ཅད་དཀོན་མཆོག་ཡ་ཝཱེ་དང་སཱ་མུ་ཨེལ་གཉིས་ལ་ཤིན་ཏུ་འཇིགས་ཤིང་སྐྲག་པར་གྱུར།
1SA 12:19 ཡང་མི་ཐམས་ཅད་ཀྱིས་སཱ་མུ་ཨེལ་ལ། ངེད་ཅག་གིས་སྔར་སྡིག་པ་མང་པོ་བྱས་ཤིང་། ད་ལྟ་ཡང་རྒྱལ་པོ་ཞིག་བསྐོ་དགོས་པར་ཞུས་པའི་སྡིག་པ་ཤིན་ཏུ་ཆེ་བས། ངེད་ཅག་མི་འཆི་བའི་ཕྱིར་ཁྱེད་ཀྱིས་རང་གི་ཞབས་ཕྱི་པ་རྣམས་ཀྱི་ཆེད་དུ་དཀོན་མཆོག་ཡ་ཝཱེ་ལ་གསོལ་བ་འདེབས་རོགས་ཞེས་ཞུས།
1SA 12:20 ཡང་སཱ་མུ་ཨེལ་གྱིས་མི་རྣམས་ལ་འདི་ལྟར། མ་འཇིགས་ཤིག ཁྱོད་ཅག་གིས་ཉེས་པ་འདི་ཐམས་ཅད་བྱས་ཀྱང་། དཀོན་མཆོག་ཡ་ཝཱེའི་རྗེས་སུ་འབྲང་བ་ལས་ཁ་ཕྱོགས་མི་ནོར་བར་སེམས་ཧྲིལ་པོས་དཀོན་མཆོག་ཡ་ཝཱེ་ལ་བསྙེན་བཀུར་གྱིས་ཤིག
1SA 12:21 དོན་མེད་ཀྱི་རྗེས་སུ་མ་འགྲོ་ཞིག དེ་དག་ནི་ཕན་མེད་ཀྱི་དངོས་པོ་ཡིན་པས་སྐྱོབ་པར་མི་ནུས་སོ། །
1SA 12:22 དཀོན་མཆོག་ཡ་ཝཱེའི་མཚན་ཆེན་པོ་ཡིན་པས་ན་ཁོང་གིས་རང་ཉིད་ཀྱི་འབངས་མི་སྤང་བར་མི་བྱའོ། །གང་ལ་ཞེ་ན། དཀོན་མཆོག་ཡ་ཝཱེ་ནི་ཁྱོད་རྣམས་ཁོང་གི་འབངས་མིར་འདེམས་པར་ཐུགས་མཉེས་པའོ། །
1SA 12:23 བདག་ལ་མཚོན་ན། ཁྱོད་རྣམས་ཀྱི་དོན་དུ་སྨོན་ལམ་འདེབས་པ་རྒྱུན་ཆད་ནས་དཀོན་མཆོག་ཡ་ཝཱེ་ལ་འགལ་བའི་སྡིག་པ་གཏན་ནས་མི་བྱའོ། །ངས་ཁྱོད་ཅག་ལ་ལམ་བཟང་པོ་དང་དྲང་པོ་དེ་སྟོན་པར་བྱ།
1SA 12:24 ཁྱོད་ཅག་ནི་དཀོན་མཆོག་ཡ་ཝཱེ་གཅིག་པོ་ལ་འཇིགས་ཏེ། བདེན་པ་བདེན་དྲང་ངང་སེམས་ཧྲིལ་པོས་ཁོང་ལ་བསྙེན་བཀུར་བྱོས་ཤིག ཁོང་གིས་ཁྱོད་ཅག་གི་དོན་དུ་འཕྲིན་ལས་ཆེན་པོ་རྣམས་མཛད་པ་དེ་དྲན་པར་གྱིས།
1SA 12:25 ཡང་ཁྱོད་ཅག་གིས་ད་དུང་ལས་ངན་པ་བྱེད་ན་ཁྱོད་ཅག་དང་ཁྱོད་ཅག་གི་རྒྱལ་པོ་དེ་ཡང་མེད་པར་འགྱུར་ཞེས་སྨྲས་སོ། །
1SA 13:1 སོ་ལོས་ལོ་གཅིག་ལ་རྒྱལ་སྲིད་བསྐྱངས་པ་དང་ལོ་གཉིས་ཀྱི་རིང་དུ་ཡེས་ར་ཨེལ་ལ་སྲིད་བྱས་ཤིང་།
1SA 13:2 ཁོང་གིས་རང་གི་དོན་དུ་ཡེས་ར་ཨེལ་པ་རྣམས་ལས་མི་སུམ་སྟོང་བདམས་པ་དང་། དེ་རྣམས་ལས་མི་ཉིས་སྟོང་སོ་ལོ་རང་དང་མཉམ་དུ་མིགས་མཱ་སི་གྲོང་རྡལ་དང་པེད་ཨེལ་གྲོང་ཁྱེར་གྱི་རི་ཁུལ་དུ་གནས་ཤིང་། མི་ཆིག་སྟོང་སོ་ལོའི་སྲས་ཡོ་ནཱ་ཐན་དང་མཉམ་དུ་པེན་ཡཱ་མེན་ཡུལ་གྱི་རྒི་བེ་ཨ་གྲོང་ཚོ་རུ་གནས་པ་རེད། དེ་རུ་ལུས་པའི་མི་རྣམས་ནི་རེ་རེ་རང་གི་གུར་དུ་ལོག
1SA 13:3 དེ་ནས་ཡོ་ནཱ་ཐན་གྱིས་ཕེ་ལེ་ཤེད་པའི་སོ་པ་གེ་བཱ་རུ་གནས་པ་རྣམས་བསད་པས། ཕེ་ལེ་ཤེད་པ་རྣམས་ཀྱིས་དེ་ཐོས་པ་རེད། ཡང་སོ་ལོས་ཡུལ་ཐམས་ཅད་དུ་རྭ་དུང་བུས་ཤིང་དོན་ལ་ཨིབ་རི་པ་རྣམས་ལ་ཐོས་སུ་ཆུག་ཅེས་པའོ། །
1SA 13:4 སོ་ལོས་ཕེ་ལེ་ཤེད་པའི་སོ་པ་བསད་པས་ཕེ་ལེ་ཤེད་པ་རྣམས་ཡེས་ར་ཨེལ་ལ་སྡང་བར་གྱུར། དེ་ནས་མི་ཐམས་ཅད་སོ་ལོའི་རྗེས་སུ་འབྲང་བའི་ཕྱིར་གིལ་གལ་ལ་འབོད་འགུགས་བྱས།
1SA 13:5 ཡང་ཕེ་ལེ་ཤེད་པ་རྣམས་ཡེས་ར་ཨེལ་ལ་དམག་བརྒྱག་པར་འཛོམས་པ་སྟེ། ཁོ་རྣམས་ཀྱི་གྲངས་ཀ་ནི། དམག་གི་ཤིང་རྟ་ཁྲི་གསུམ་དང་། རྟ་དམག་སྟོང་དྲུག་དང་། རྐང་དམག་ནི་རྒྱ་མཚོའི་མཐའ་རུ་ཡོད་པའི་བྱེ་མ་དང་འདྲ་བར་གྱུར། དེ་རྣམས་ཡར་འོངས་ནས་པེད་ཨ་ཝེན་གྱི་ཤར་ཕྱོགས་ཏེ་མིགས་མཱ་སི་རུ་གུར་ཕུབ།
1SA 13:6 ཡེས་ར་ཨེལ་གྱི་མི་རྣམས་ཀྱིས་ཉེན་ཁ་འབྱུང་བ་ཤེས་པས། མི་ཐམས་ཅད་བྲག་ཕུག་དང་། ཚེར་ཕུང་དང་། བྲག་དང་། ས་དོང་དང་། ཆུ་རྫིང་ནང་ལ་ཡིབ་ཏུ་སོང་།
1SA 13:7 ཡང་ཨིབ་རི་པའི་ཁྲོད་ནས་འགའ་ཞིག་ཡོར་དན་གཙང་པོ་བརྒྱུད་དེ་གཱ་རྡུ་དང་གིལ་ཨད་ས་ཆར་སོང་སྟེ། སོ་ལོ་ནི་གིལ་གལ་དུ་གནས་ཤིང་མི་ཐམས་ཅད་སྐྲག་ནས་འདར་བཞིན་ཁོང་གི་རྗེས་སུ་འབྲངས།
1SA 13:8 ཡང་སཱ་མུ་ཨེལ་གྱིས་བཀའ་བསྩལ་པ་བཞིན་དུ་སོ་ལོ་ཉིན་བདུན་བར་དུ་དེ་རུ་བསྡད་ནས་སྒུག་པའི་ཚེ། ཁོང་ཉིད་གིལ་གལ་དུ་ད་དུང་མ་ཕེབས་པས་མི་རྣམས་སོ་ལོའི་ཕྱོགས་ནས་སོ་སོར་ཁ་འཐོར་བའི་འགོ་བརྩམས།
1SA 13:9 དེའི་ཕྱིར་སོ་ལོས། སྦྱིན་སྲེག་དང་ཞི་བདེའི་མཆོད་པ་གཉིས་ངའི་མདུན་དུ་ཁུར་ཤོག་ཅེས་བཀའ་བསྒོས་པས་སྦྱིན་སྲེག་གི་མཆོད་པ་ཕུལ་བ་རེད།
1SA 13:10 ཡང་སོ་ལོས་སྦྱིན་སྲེག་ཕུལ་ཚར་མ་ཐག་ཏུ། སཱ་མུ་ཨེལ་ཕེབས་པ་ན་སོ་ལོ་ཁོང་ལ་མཇལ་དུ་སོང་ནས་ཕྱག་བྱས་ཤིང་།
1SA 13:11 དེ་ནས་སཱ་མུ་ཨེལ་གྱིས། ཁྱོད་ཀྱིས་ཅི་བྱས་པ་ཡིན་ཞེས་དྲིས་པས། སོ་ལོས་མི་ཐམས་ཅད་ངའི་ཕྱོགས་ནས་སོ་སོར་ཁ་འཐོར་བའི་འགོ་བརྩམས་པ་དང་། ཁྱེད་ནི་སྔར་བསྟན་པའི་དུས་བཅད་ལྟར་མ་ཕེབས་པར་མ་ཟད། ཕེ་ལེ་ཤེད་པ་རྣམས་མིགས་མཱ་སི་རུ་འཛོམས་ཡོད་པ་རེད།
1SA 13:12 དེའི་ཕྱིར་ངའི་སེམས་སུ། བདག་ཅག་གིས་དཀོན་མཆོག་ཡ་ཝཱེ་ལ་གསོལ་བ་མ་བཏབ་པའི་སྔོན་དུ་ཕེ་ལེ་ཤེད་པ་རྣམས་གིལ་གལ་དུ་བདག་གི་སྟེང་དུ་སླེབས་པར་འགྱུར་སྙམ་པས། བདག་གིས་སྤོབས་པ་བསྐྱེད་ནས་སྦྱིན་སྲེག་ཕུལ་བ་ཡིན་ཞེས་ཞུས།
1SA 13:13 སཱ་མུ་ཨེལ་གྱིས་སོ་ལོ་ལ་ཁྱོད་ཀྱིས་རང་གི་དཀོན་མཆོག་ཡ་ཝཱེས་གནང་བའི་བཀའ་མ་བསྲུངས་ཤིང་གླེན་པའི་ལུགས་སུ་བྱས་པ་རེད། གལ་ཏེ་ཁོང་གི་བཀའ་ཇི་བཞིན་བསྲུངས་པ་ཡིན་ན། དཀོན་མཆོག་ཡ་ཝཱེས་ཁྱོད་ཀྱི་རྒྱལ་སྲིད་ཡེས་ར་ཨེལ་གྱི་ཁྲོད་དུ་རྒྱུན་ནས་རྒྱུན་དུ་བརྟན་པོར་མཛད་མོད། འོན་ཀྱང་ད་ལྟ་ཁྱོད་ཀྱི་རྒྱལ་སྲིད་ཡུན་རིང་གནས་མི་ཐུབ་སྟེ། དཀོན་མཆོག་ཡ་ཝཱེས་ཁོང་ཉིད་ཀྱི་ཐུགས་སུ་འབྱོན་པའི་མི་ཞིག་བཙལ་བར་མཛད་དེ། དེ་དཀོན་མཆོག་ཡ་ཝཱེས་ཁོང་གི་འབངས་མིའི་འགོ་དཔོན་དུ་བསྐོ་བར་མཛད་དོ། །གང་ལ་ཞེ་ན། དཀོན་མཆོག་ཡ་ཝཱེས་ཁྱོད་ལ་གནང་བའི་བཀའ་མ་བསྲུངས་པའི་རྐྱེན་གྱིས་ཡིན་ཞེས་སྨྲས།
1SA 13:15 སཱ་མུ་ཨེལ་ཡར་ལངས་ཏེ་གིལ་གལ་ནས་པེན་ཡཱ་མེན་གྱི་རྒི་བེ་ཨ་རུ་ཕྱིན། དེ་ནས་སོ་ལོས་རང་དང་མཉམ་དུ་ཡོད་པའི་མི་རྣམས་བརྩིས་པར་དྲུག་བརྒྱ་ཙམ་ཡོད་པ་ཡིན་ནོ། །
1SA 13:16 དེ་ནས་སོ་ལོ་དང་དེའི་སྲས་ཡོ་ནཱ་ཐན་དང་། དེ་གཉིས་དང་མཉམ་དུ་ཡོད་པའི་མི་ཐམས་ཅད་པེན་ཡཱ་མེན་གྱི་གེ་བཱ་རུ་གནས་ཏེ། ཕེ་ལེ་ཤེད་པ་རྣམས་ཀྱིས་མིགས་མཱ་སི་རུ་སྒར་བཏབ།
1SA 13:17 དེ་ནས་འཕྲལ་རྒོལ་རུ་ཁག་ཅིག་ཕེ་ལེ་ཤེད་པའི་དམག་སྒར་ལས་ཐོན་ཏེ་རུ་དཔུང་གསུམ་དུ་བྱས། རུ་དཔུང་དང་པོ་ཨོབ་རཱ་རུ་འགྲོ་བའི་ལམ་ལ་ཞུགས་ནས་ཤུ་ཨལ་ཡུལ་ཕྱོགས་སུ་སོང་།
1SA 13:18 རུ་དཔུང་གཉིས་པ་པེད་ཧོ་རོན་གྱི་ལམ་དུ་ཞུགས་པ་དང་། རུ་དཔུང་གསུམ་པ་དབེན་སྟོང་གི་ཕྱོགས་སུ་ལུང་པ་ཙེ་བོ་ཡིམ་ཞེས་པའི་ཁ་གཏད་ཀྱི་ས་མཚམས་ཀྱི་ལམ་དུ་ཞུགས།
1SA 13:19 སྐབས་དེར་ཡེས་ར་ཨེལ་གྱི་ཡུལ་ཐམས་ཅད་དུ་མགར་བ་གཅིག་ཀྱང་མ་རྙེད་དོ། །གང་ལ་ཞེ་ན། ཕེ་ལེ་ཤེད་པས། ཨིབ་རི་པ་རྣམས་གྱིས་རལ་གྲིའམ་མདུང་རྣམས་རང་དོན་དུ་བཟོ་བར་བྱ་བསམ་པའི་ཕྱིར་རོ། །
1SA 13:20 དེའི་ཕྱིར་ཡེས་ར་ཨེལ་པ་རྣམས་ནི་རང་གི་ཐོང་གཤོལ་ལམ། འཇོར་རམ། སྟ་རེའམ། ཟོར་བ་ལ་ཁ་འཕུད་པའི་ཕྱིར་ཕེ་ལེ་ཤེད་པའི་མདུན་དུ་སོང་།
1SA 13:21 དེ་དུས་གཤོལ་ལྕགས་དང་རྒྱ་ཟོར་ལ་རྣོ་བཏོན་པའི་རིན་གོང་ནི་དངུལ་ཞོ་གཅིག་གི་གསུམ་ཆའི་གཉིས་དང་། སྟ་རེ་དང་ཟོར་བ་ལ་རྣོ་བཏོན་པའི་རིན་གོང་ནི་དངུལ་ཞོ་གཅིག་གི་གསུམ་ཆའི་གཅིག་ཡིན།
1SA 13:22 དེའི་ཕྱིར་དམག་བརྒྱབ་པའི་ཉིན་ལ། སོ་ལོ་དང་དེའི་སྲས་ཡོ་ནཱ་ཐན་གཉིས་དང་མཉམ་དུ་ཡོད་པའི་མི་རྣམས་ཀྱི་ལག་ཏུ་རལ་གྲིའམ་མདུང་མེད་པ་དང་། སོ་ལོ་དང་ཁོང་གི་སྲས་ཡོ་ནཱ་ཐན་ཁོ་ནའི་ལག་ཏུ་ཡོད་པ་རེད།
1SA 13:23 དེ་ནས་ཕེ་ལེ་ཤེད་པའི་དམག་ཚོགས་དམག་སྒར་ནས་ཐོན་ཏེ་མིགས་མཱ་སི་རུ་སླེབས་པའོ། །
1SA 14:1 ཉིན་ཞིག་སོ་ལོ་ཡི་སྲས་ཡོ་ནཱ་ཐན་གྱིས་རང་གི་གོ་མཚོན་འཁུར་བའི་གཞོན་ནུ་ལ། ད་ཤོག་དང་། ངེད་གཉིས་ཕ་རོལ་ཏུ་ཕེ་ལེ་ཤེད་པའི་སོ་པའི་རྩར་འགྲོ་བར་བྱ་ཞེས་སྨྲས་ཀྱང་དེ་རང་གི་ཕ་ལ་མ་སྨྲས་པ་རེད།
1SA 14:2 སོ་ལོ་ནི་གིབ་ཨ་ཡི་ས་མཚམས་སུ་མག་རོན་དུ་ཡོད་པའི་སེ་འབྲུ་ཤིང་གི་འོག་ཏུ་བསྡད་དེ། ཁོང་དང་མཉམ་དུ་མི་དྲུག་བརྒྱ་ཡོད་པ་དང་།
1SA 14:3 དེ་རྣམས་ལས་བེར་ཐུལ་གྱོན་པའི་མཆོད་དཔོན་ཨ་ཧི་ཡཱ་བྱ་བ་དེ་ཡོད་ཅིང་། ཨ་ཧི་ཡཱ་ནི་ཨ་ཧི་ཏུབ་ཀྱི་བུ་ཡིན། ཨ་ཧི་ཏུབ་དང་ཨི་ཁ་རྦོད་གཉིས་ནི་ཕེ་ནེ་ཧཱ་ཡི་བུ་ཡིན། ཕེ་ནེ་ཧཱ་ནི་སྔར་ཞི་ལོ་ནས་དཀོན་མཆོག་ཡ་ཝཱེའི་མཆོད་དཔོན་ཡིན་པ་ཨེ་ལི་ཡི་བུ་ཡིན། སོ་ལོ་དང་མཉམ་དུ་ཡོད་པའི་མི་དེ་དག་གིས་ཡོ་ནཱ་ཐན་སོང་བ་མ་ཤེས་སོ། །
1SA 14:4 ཕེ་ལེ་ཤེད་པའི་སོ་པ་རྣམས་ཀྱི་རྩར་འགྲོ་བའི་ཕྱིར་ཡོ་ནཱ་ཐན་འགག་འཕྲང་བརྒལ་ནས་ཕྱིན་ཅིང་། ལོགས་གཉིས་སུ་གཡང་གཟར་ཡོད་པ་དང་། གཅིག་གི་མིང་ལ་འོད་འཕྲོ་བའི་གཡང་གཟར་ཟེར་ལ། གཞན་དེའི་མིང་ལ་གཡང་གཟར་ཚེར་མ་ཅན་ ཞེས་ཟེར།
1SA 14:5 གཡང་གཟར་གཅིག་ནི་བྱང་དུ་མིགས་མཱ་སི་ཡི་ཕྱོགས་སུ་གཏད་ཡོད་པ་དང་། ཅིག་ཤོས་དེ་ལྷོ་རུ་གེ་བཱ་ཡི་ཕྱོགས་སུ་གཏད་ཡོད་པ་ཡིན།
1SA 14:6 དེ་ནས་ཡོ་ནཱ་ཐན་གྱིས་གོ་མཚོན་འཁུར་བའི་གཞོན་ནུ་ལ། ད་ཤོག་དང་། ངེད་གཉིས་ཕ་རོལ་ཏུ་མཚན་སྐྱི་བཅད་མེད་པའི་སོ་པ་རྣམས་ཀྱི་རྩར་འགྲོ་བར་བྱ། དཀོན་མཆོག་ཡ་ཝཱེས་ངེད་ཀྱི་དོན་དུ་འཕྲིན་ལས་མཛད་སྲིད། དཀོན་མཆོག་ཡ་ཝཱེས་མི་མང་པོའམ་འགའ་ཞིག་བརྒྱུད་ནས་སྐྱབས་མཛད་པ་གང་ཡིན་ཡང་འགོག་ཐུབ་མཁན་གཅིག་ཀྱང་མེད་ཅེས་སྨྲས་པས།
1SA 14:7 གོ་མཚོན་འཁུར་བའི་གཞོན་ནུ་དེས་ཁྱེད་ཀྱི་ཐུགས་འདོད་བཞིན་དུ་མཛོད་ཅིག གཟིགས་དང་བདག་ནི་ཁྱེད་དང་སེམས་པ་གཅིག་མཐུན་ངང་མཉམ་དུ་འགྲོ་བར་བྱ་ཞེས་ཞུས།
1SA 14:8 ཡོ་ནཱ་ཐན་གྱིས། ངེད་གཉིས་མི་དེ་རྣམས་ཀྱི་མདུན་དུ་སོང་སྟེ་སུ་ཡིན་པ་སྟོན་པར་བྱ།
1SA 14:9 གལ་ཏེ་དེ་དག་གིས་ང་ཚོ་ཁྱོད་རྣམས་ཡོད་སར་སླེབས་པའི་བར་དུ་སྡོད་ཅིག་ཟེར་ན། ངེད་གཉིས་དེ་དག་གི་མདུན་དུ་མི་འགྲོ་སྟེ་རང་གནས་སུ་སྡོད་པར་བྱ།
1SA 14:10 འོན་ཀྱང་དེ་དག་གིས་ང་ཚོའི་མདུན་དུ་ཤོག་ཅིག་ཟེར་ན། དཀོན་མཆོག་ཡ་ཝཱེས་དེ་དག་ངེད་གཉིས་ཀྱི་ལག་ཏུ་སྤྲོད་པར་འགྱུར་བས་ངེད་གཉིས་ཡར་འགྲོ་དགོས། གང་ལ་ཞེ་ན། གཏམ་དེ་ནི་ངེད་གཉིས་ཀྱི་ཕྱིར་རྟགས་ཤིག་ཡིན་པས་སོ་ཞེས་སྨྲས་སོ། །
1SA 14:11 དེ་ནས་ཁོ་གཉིས་ཀྱིས་ཕེ་ལེ་ཤེད་པའི་སོ་པ་རྣམས་ལ་རང་གི་ལུས་བསྟན་ནས། ཕེ་ལེ་ཤེད་པ་རྣམས་ཀྱིས། ས་ཁུང་དུ་ཡིབ་སྟེ་ཡོད་པའི་ཨིབ་རི་པ་རྣམས་སླེབས་བྱུང་ཞེས་སྨྲས།
1SA 14:12 དེ་ནས་སོ་པ་རྣམས་ཀྱིས་ཡོ་ནཱ་ཐན་དང་དེའི་གོ་མཚོན་འཁུར་བའི་གཞོན་ནུ་གཉིས་ལ། ང་ཚོའི་མདུན་དུ་ཤོག་ཅིག ང་ཚོས་ཁྱོད་གཉིས་ལ་དོན་ཞིག་སྟོན་པར་བྱ་ཞེས་ཟེར་བས། ཡོ་ནཱ་ཐན་གྱིས་གོ་མཚོན་འཁུར་མཁན་ལ། དཀོན་མཆོག་ཡ་ཝཱེས་མི་དེ་ཐམས་ཅད་ཡེས་ར་ཨེལ་གྱི་ལག་ཏུ་གནང་བའི་ཕྱིར་ཁྱོད་ངའི་རྗེས་སུ་འབྲོངས་ཤིག་ཅེས་བསྐུལ།
1SA 14:13 དེ་ནས་ཡོ་ནཱ་ཐན་གོག་ནས་རི་དེའི་གྱེན་དུ་འགོས་པ་དང་། གོ་མཚོན་འཁུར་མཁན་ཁོའི་རྗེས་སུ་འབྲངས་པ་རེད། དེ་ནས་ཕེ་ལེ་ཤེད་པ་རྣམས་ཡོ་ནཱ་ཐན་གྱི་མདུན་དུ་འགྱེལ་ཞིང་། གོ་མཚོན་འཁུར་མཁན་ཀྱིས་ཀྱང་ཁོའི་རྗེས་འབྲངས་ཏེ་ཁོ་ཚོ་བསད།
1SA 14:14 ཡོ་ནཱ་ཐན་དང་ཁོའི་གོ་མཚོན་འཁུར་མཁན་གཉིས་ཀྱིས་ཞིང་ཚིགས་ཕྱེད་ཀ་ཙམ་གྱི་ནང་དུ་བསད་པའི་མི་གྲངས་ནི་ཉི་ཤུ་ཙམ་ཡོད་པ་ཡིན། འདི་ནི་ཁོ་གཉིས་མཉམ་བརྒྱུགས་ཀྱིས་འཐབ་འཁྲུག་བྱས་པ་ཐེངས་དང་པོ་ཡིན་ནོ། །
1SA 14:15 དེ་ནས་དམག་སྒར་དང་ཞིང་ཚིགས་ཀྱི་མི་དང་། མང་ཚོགས་དང་། གཞན་སོ་པ་དང་། ཨར་ཇག་རྣམས་འཇིགས་པར་གྱུར་ཏེ་ས་ཡང་འགུལ་བས་དཀོན་མཆོག་གིས་གནང་བའི་འཇིགས་སྐྲག་དེ་ནི་དྲག་པོར་གྱུར།
1SA 14:16 དེ་ནས་པེན་ཡཱ་མེན་གྱི་རྒི་བེ་ཨ་ནས་སོ་ལོ་ཡི་སོ་པ་རྣམས་ཀྱིས་བལྟས་པར། དམག་ཚོགས་ཁ་ཐོར་ནས་ཕར་ཚུར་བརྒྱུགས་པ་མཐོང་ངོ་། །
1SA 14:17 སོ་ལོས་རང་གི་དྲུང་དུ་ཡོད་པའི་མི་རྣམས་ལ། ད་ནི་མི་རྩིས་ཤིག་དང་། ངེད་རྣམས་ཀྱི་ཕྱོགས་ནས་སུ་ཞིག་སོང་བ་མཐོང་བར་འགྱུར་ཞེས་བཀའ་བསྒོས་པས། ཁོ་ཚོས་མི་རྩིས་བླངས་པ་ན། ཡོ་ནཱ་ཐན་དང་དེའི་གོ་མཚོན་འཁུར་བའི་གཞོན་ནུ་གཉིས་མེད་པ་ཤེས་པ་རེད།
1SA 14:18 དེ་ནས་སོ་ལོས་ཨ་ཧི་ཡཱ་ལ། དཀོན་མཆོག་གི་ཞལ་ཆད་ཀྱི་ཤུར་སྒམ་འདི་རུ་ཁུར་ཤོག་ཅེས་བཀའ་བསྩལ། དེའི་དུས་སུ་དཀོན་མཆོག་གི་ཞལ་ཆད་ཀྱི་ཤུར་སྒམ་ཡེས་ར་ཨེལ་པ་རྣམས་ཀྱི་ཁྲོད་དུ་ཡོད་པ་ཡིན།
1SA 14:19 དེ་ལྟར་མཆོད་དཔོན་ལ་གཏམ་གླེང་བའི་ཚེ། ཕེ་ལེ་ཤེད་པའི་དམག་སྒར་དུ་འུར་སྒྲ་སྔར་ལས་ཇེ་ཆེ་ནས་ཇེ་ཆེར་ཕྱིན་པས། སོ་ལོས་མཆོད་དཔོན་དེ་ལ་ཁྱོད་སྡོད་ཅིག་ཅེས་བཀའ་བསྩལ་ནས།
1SA 14:20 སོ་ལོ་དང་མཉམ་དུ་ཡོད་པ་ཐམས་ཅད་འཛོམས་ཏེ་དམག་རྒྱག་ཏུ་སོང་། དེ་རུ་ཕེ་ལེ་ཤེད་པ་ཐམས་ཅད་ཡོངས་སུ་མགོ་འཐོམ་སྟེ། ཀྱེ་ཧོ། ཁོ་ཚོས་རལ་གྲིས་ཕན་ཚུན་ལ་བསྣུན་པ་རེད།
1SA 14:21 ཡང་སྔོན་ཆད་ཕྱོགས་བཞི་ནས་འོངས་ཏེ་ཕེ་ལེ་ཤེད་པ་དག་གི་རྗེས་སུ་འབྲངས་པའི་ཨིབ་རི་པ་རྣམས་ནི་ད་ལྟ་སོ་ལོ་དང་ཡོ་ནཱ་ཐན་གཉིས་ཀྱི་རྗེས་སུ་འབྲང་བའི་ཡེས་ར་ཨེལ་པའི་ཕྱོགས་སུ་གྱུར།
1SA 14:22 ཡང་ཨེ་ཕཱར་ཡིམ་རི་ཁུལ་དུ་ཡིབ་ནས་སྡོད་པའི་ཡེས་ར་ཨེལ་པ་རྣམས་ཀྱིས་ཕེ་ལེ་ཤེད་པ་ཐམས་ཅད་བྲོས་པ་ཐོས་པས། དེ་དག་གིས་ཀྱང་དམག་བརྒྱབ་ཅིང་ཕེ་ལེ་ཤེད་པའི་ར་མདར་བརྒྱུགས།
1SA 14:23 དེ་ལྟར་དཀོན་མཆོག་ཡ་ཝཱེས་ཡེས་ར་ཨེལ་སྒྲོལ་བར་མཛད་དེ། གསོད་གཅོད་དེ་ནི་པེད་ཨ་ཝེན་གྱི་བར་དུ་བྱུང་ངོ་། །
1SA 14:24 ཉིན་མོ་དེར་ཡེས་ར་ཨེལ་པ་རྣམས་ལ་གཉའ་གནོན་བཏང་སྟེ། སོ་ལོས་དགོང་མོ་རང་གི་དགྲ་བོ་རྣམས་ལ་དགྲ་ཤ་ལེན་པའི་བར་དུ་ཁ་ཟས་སྤྱོད་མཁན་ཡོད་ན་མི་དེར་དམོད་མོ་འབྱུང་ཞེས་མནའ་བསྐྱལ་དུ་བཅུག་པས། མི་རྣམས་ཀྱིས་ཅི་ཡང་མ་ཟོས་སོ། །
1SA 14:25 མི་རྣམས་ནགས་ཚལ་ཞིག་ཏུ་སོང་ཞིང་། དེའི་ས་ཁར་སྦྲང་རྩི་ཡོད་པ་མཐོང་།
1SA 14:26 ཁོ་ཚོས་སྦྲང་རྩི་བཞུར་བ་མཐོང་ན་ཡང་དམ་བཅའ་དེ་ལ་འཇིགས་པས་མི་སུས་ཀྱང་རང་གི་ལག་པས་ཁ་རུ་རེག་མ་ཕོད་པ་རེད།
1SA 14:27 ཡོ་ནཱ་ཐན་གྱིས་རང་གི་ཕ་ཡིས་མི་རྣམས་ལ་མནའ་བསྐྱལ་དུ་བཅུག་པ་མ་ཐོས་པས། རང་གི་ལག་ཏུ་ཡོད་པའི་འཁར་བའི་རྩེ་མོ་སྦྲང་མའི་ཚང་ནང་དུ་བསྒྲེས་ཏེ། རང་གི་ལག་པས་ཁ་རུ་རེག་པ་དང་ཁོའི་མིག་གསལ་པོར་གྱུར་ཏོ། །
1SA 14:28 དེ་ནས་མི་རྣམས་ཀྱི་ཁྲོད་ནས་གཅིག་གིས། མི་ཐམས་ཅད་ངལ་ན་ཡང་ཁྱེད་ཀྱི་ཡབ་ཀྱིས་མི་རྣམས་ལ་མནའ་བསྐྱལ་དུ་བཅུག་ནས་དེ་དག་ལ། དེ་རིང་ཉིན་མོར་ཁ་ཟས་སྤྱོད་པའི་མི་དེར་དམོད་མོ་འབྱུང་སྨྲས་སོ་ཞེས་ཞུས།
1SA 14:29 དེ་ལྟར་ཞུས་པའི་ལན་དུ་ཡོ་ནཱ་ཐན་གྱིས། ངའི་ཕ་ཡིས་ཀུན་ལ་འཚེ་བར་བྱས། ད་ནི་ངས་སྦྲང་རྩི་ཕྲན་བུ་ཞིག་མྱངས་པས་མིག་ཅི་ལྟར་གསལ་པོར་གྱུར་པར་ལྟོས་ཤིག
1SA 14:30 གལ་ཏེ་མི་ཐམས་ཅད་ཀྱིས་དགྲ་བོ་ནས་ཅི་ཞིག་ཕྲོགས་པ་ཟོས་པ་ཡིན་ན། ཕེ་ལེ་ཤེད་པ་ཕམ་པར་གྱུར་པ་ནི་འདི་ལས་ལྷག་པར་འགྱུར་བ་མ་ཡིན་ནམ་ཞེས་སྨྲས་སོ། །
1SA 14:31 ཡེས་ར་ཨེལ་པ་ཐམས་ཅད་ཤིན་ཏུ་ངལ་ཡང་། ཉིན་དེ་ལ་ཕེ་ལེ་ཤེད་པ་རྣམས་མིགས་མཱ་སི་ནས་ཨ་ཡཱ་ལོན་གྱི་བར་དུ་ཕམ་པར་བརྒྱབ་བོ། །
1SA 14:32 དེ་ནས་མཚན་མོར་ཡེས་ར་ཨེལ་པ་རྣམས་ཀྱིས་དེ་དག་གི་བཅོམ་ནོར་ཏེ། ལུག་དང་། བ་གླང་དང་། བ་ཕྲུག་ཁྱེར་ཅིང་དེ་དག་བསད་ནས་ཁྲག་དང་ལྡན་པའི་ཤ་ཟོས་པ་རེད།
1SA 14:33 དེ་ནས་མི་འགའ་ཞིག་གིས་སོ་ལོ་ལ། ལྟོས་དང་། མི་རྣམས་ཀྱིས་ཁྲག་དང་ལྡན་པའི་ཤ་ཟ་ཞིང་། དེ་ནི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱེད་པ་ཡིན་ཞེས་སྨྲས་པས། སོ་ལོས་ཁྱོད་རྣམས་ཀྱིས་གཡོ་ཟོལ་བྱས་པས་རྡོ་རྒན་ཞིག་ངའི་མདུན་དུ་སྒྲིལ་བར་གྱིས་ཞེས་སྨྲས་སོ། །
1SA 14:34 དེ་ནས་སོ་ལོས། ཁྱོད་ཅག་མི་རྣམས་ཀྱི་ཁྲོད་དུ་སོང་ནས་ཁོ་རྣམས་ལ། མི་རེ་རེས་རང་རང་གི་སྒོ་ཕྱུགས་ཁྲིད་དེ་འདི་རུ་བསད་ནས་ཤ་ཟོ་དང་། ཁྲག་དང་ལྡན་པའི་ཤ་ཟོས་ཏེ་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱེད་མི་རུང་ཞེས་བསྐུལ་བར་གྱིས་ཞེས་སྨྲས། དེའི་ཕྱིར་མི་རྣམས་ཀྱིས་རང་གི་སྒོ་ཕྱུགས་ཁྲིད་དེ་མཚན་གྱི་དུས་སུ་དེ་རུ་བསད།
1SA 14:35 དེ་ནས་སོ་ལོས་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བརྩིགས་པ་དང་། དེ་ནི་སོ་ལོས་དཀོན་མཆོག་ཡ་ཝཱེ་ལ་བརྩིགས་པའི་མཆོད་ཁྲི་དང་པོ་ལགས་སོ། །
1SA 14:36 དེ་ནས་སོ་ལོས་མཚན་གྱི་དུས་སུ་ཕེ་ལེ་ཤེད་པའི་རྗེས་དེད་ནས་ཐོ་རངས་བར་དུ་བཅོམ་ན་ལེགས། དེ་དག་ལས་མི་གཅིག་ཀྱང་ཐར་དུ་མ་འཇུག་ཅེས་བསྐུལ་བས། མི་ཐམས་ཅད་གྱིས། ཁྱེད་ཀྱི་སྤྱན་དྲུང་དུ་གང་ཞིག་ལེགས་ན་དེ་བཞིན་དུ་མཛོད་ཅིག་ཅེས་ཞུས་པ་དང་། མཆོད་དཔོན་གྱིས། ཀྱེ། ད་ལྟ་ངེད་རྣམས་དཀོན་མཆོག་གི་དྲུང་དུ་འདུ་བར་བྱ་ཞེས་བསྐུལ་བས།
1SA 14:37 སོ་ལོས་དཀོན་མཆོག་ལ། བདག་ནི་ཕེ་ལེ་ཤེད་པའི་རྗེས་སུ་འདེད་རུང་ངམ། ཁྱེད་ཀྱིས་དེ་དག་ཡེས་ར་ཨེལ་གྱི་ལག་ཏུ་གནང་བར་མཛད་དམ་ཞེས་ཞུས་ཀྱང་། ཉིན་དེ་ལ་གསུང་ལན་གང་ཡང་མ་བྱུང་བ་རེད།
1SA 14:38 དེའི་ཕྱིར་སོ་ལོས། དེ་རིང་གི་སྡིག་པ་ནི་གང་ནས་བྱུང་བར་བལྟས་ཏེ་རྟོགས་པའི་ཕྱིར་མི་རྣམས་ཀྱི་རྗེ་བོ་རྣམས་འདིར་འདུ་བར་གྱིས།
1SA 14:39 བདག་གིས་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་སྐྱབས་མགོན་གཏན་དུ་བཞུགས་པ་ཁོང་ཉིད་དཔང་དུ་བཙུགས་པ་ཡིན། མི་དེ་ནི་ང་རང་གི་བུ་ཡོ་ནཱ་ཐན་ཡིན་པའི་དབང་དུ་བཏང་ན་ཡང་། ཁོ་ངེས་པར་འཆི་དགོས་ཞེས་སྨྲས་ཀྱང་། མི་རྣམས་ཀྱི་ཁྲོད་ནས་གཅིག་གིས་ཀྱང་ཅི་ཡང་མ་ཞུས་སོ། །
1SA 14:40 དེ་ནས་ཁོང་གིས་ཡེས་ར་ཨེལ་པ་ཐམས་ཅད་ལ། ཁྱོད་རྣམས་ཕྱོགས་གཅིག་ཏུ་སྡོད་དང་། ང་ནི་རང་གི་བུ་ཡོ་ནཱ་ཐན་དང་ཕྱོགས་གཅིག་ཏུ་སྡོད་པར་བྱ་ཞེས་སྨྲས་པས། མི་རྣམས་ཀྱིས་སོ་ལོ་ལ། ཁྱེད་ཀྱི་སྤྱན་དྲུང་དུ་གང་ཞིག་ལེགས་ན་དེ་བཞིན་དུ་མཛོད་ཅིག་ཅེས་ཞུས་སོ། །
1SA 14:41 ཡང་སོ་ལོས་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་འདི་ལྟར། ཁྱེད་ཀྱིས་སུ་ཉེས་མེད་ཡིན་པ་སྟོན་པར་མཛོད་ཅིག་ཅེས་ཞུས་པ་དང་། ཡོ་ནཱ་ཐན་དང་སོ་ལོ་གཉིས་ལ་རྒྱན་བབས་ཤིང་ཡེས་ར་ཨེལ་པ་རྣམས་ཐར་ཏོ། །
1SA 14:42 དེ་ནས་སོ་ལོས། ད་ལྟ་ངའི་བུ་ཡོ་ནཱ་ཐན་དང་ང་རང་གཉིས་ཀྱི་བར་དུ་རྒྱན་ཕོངས་ཤིག་སྨྲས་ནས་ཡོ་ནཱ་ཐན་ལ་བབས་པ་རེད།
1SA 14:43 དེ་ནས་སོ་ལོས་ཡོ་ནཱ་ཐན་ལ། ཁྱོད་ཀྱིས་ཅི་བྱས་པ་ང་ལ་ཤོད་ཅིག་ཅེས་སྨྲས་པས། ཡོ་ནཱ་ཐན་གྱིས་ཁོང་ལ། ངས་ནི་རང་གི་ལག་ཏུ་ཡོད་པའི་འཁར་བའི་རྩེ་མོ་ལ་འབྱར་བའི་སྦྲང་རྩི་ནས་ཅུང་ཙམ་མྱངས་པས་ང་འཆི་བར་ངེས་ཞེས་ཞུས་པ་དང་།
1SA 14:44 སོ་ལོས་ཀྱེ་ཡོ་ནཱ་ཐན། ཁྱོད་ནི་འཆི་བར་ངེས། དེ་ལྟར་མ་ཡིན་ཚེ་དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲས།
1SA 14:45 དེའི་ཕྱིར་མི་རྣམས་ཀྱིས་སོ་ལོ་ལ། ཡེས་ར་ཨེལ་ལ་མགོན་སྐྱབས་ཆེན་པོ་མཛད་མཁན་ཡོ་ནཱ་ཐན་ནི་འཆི་བར་འགྱུར་རམ། དཀོན་མཆོག་གིས་དེ་ལྟར་འབྱུང་བར་གནང་ག་ལ་སྲིད། ང་ཚོས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་པ་ཡིན་ཏེ། དེའི་མགོའི་སྐྲ་ཉག་གཅིག་ཀྱང་མི་ལེན་རོགས། ཁོང་གིས་དེ་རིང་ཉིན་མོར་དཀོན་མཆོག་དང་མཉམ་དུ་འཕྲིན་ལས་མཛད་པ་ཡིན་ཞེས་ཞུས་པས། མི་རྣམས་ཀྱིས་ཡོ་ནཱ་ཐན་འཆི་བ་ལས་ཐར་དུ་བཅུག
1SA 14:46 དེ་ནས་སོ་ལོ་ནི་ཕེ་ལེ་ཤེད་པའི་ར་མདར་རྒྱུག་པ་ནས་ལོག་སྟེ་ཕྱིར་ཕྱིན་པ་དང་། ཕེ་ལེ་ཤེད་པ་རྣམས་རང་གི་ཡུལ་དུ་སོང་།
1SA 14:47 དེ་ལྟར་སོ་ལོར་ཡེས་ར་ཨེལ་གྱི་སྲིད་དབང་ཐོབ་སྟེ། ཕྱོགས་བཞི་རུ་གནས་པའི་དགྲ་བོ་མོ་ཨབ་དང་། ཨམ་མོན་པ་རྣམས་དང་། ཨེ་དོམ་དང་། ཙོ་བཱ་ཡི་རྒྱལ་པོ་རྣམས་དང་། ཕེ་ལེ་ཤེད་པ་བཅས་ལ་དམག་དྲངས་ཤིང་གང་དུ་སོང་ན་དེར་ཆད་པ་བཅད་དོ། །
1SA 14:48 ཡང་སོ་ལོས་སྤོབས་པ་བསྐྱེད་ནས་ཨ་མཱད་ལེག་པ་རྣམས་ལས་རྒྱལ་བར་གྱུར་ཏེ། ཡེས་ར་ཨེལ་བཅོམ་མཁན་གྱི་ལག་ནས་བསྒྲལ་ལོ། །
1SA 14:49 སོ་ལོ་ཡི་སྲས་རྣམས་ནི། ཡོ་ནཱ་ཐན་དང་། ཨིས་པོ་ཤེད་ དང་། མལ་ཀི་ཤུ་ཨ་གསུམ་ཡིན། ཡང་ཁོང་གི་སྲས་མོ་གཉིས་ནི། ཆེ་བའི་མིང་ལ་མེ་རཱབ་དང་། ཆུང་བའི་མིང་ལ་མི་ཀལ་བྱའོ། །
1SA 14:50 སོ་ལོ་ཡི་ཆུང་མ་སྟེ་མིང་ལ་ཨ་ཧི་ནོ་ཨམ་ཞེས་བྱ་བ་དེ་ནི་ཨ་ཧི་མཱ་སི་ཡི་བུ་མོ་ཡིན་ལ། དམག་ཚོགས་ཀྱི་འགོ་དཔོན་མིང་ལ་ཨབ་ནེར་ཞེས་བྱ་བ་ནི་སོ་ལོ་ཡི་ཁུ་བོ་ནེར་གྱི་བུ་ཡིན།
1SA 14:51 སོ་ལོ་ཡི་ཕ་ཁི་སི་དང་། ཨབ་ནེར་གྱི་ཕ་ནེར་བྱ་བ་དེ་གཉིས་ཨ་བེ་ཨེལ་ཞེས་པའི་བུ་ཡིན།
1SA 14:52 སོ་ལོ་ཡི་མི་ཚེ་གང་པོར་ཕེ་ལེ་ཤེད་པ་དང་དམག་འཁྲུག་དྲག་པོ་རྒྱག་དགོས་བྱུང་ཞིང་། སོ་ལོས་མི་སྟོབས་ཆེན་དང་ཡང་ན་སྙིང་རུས་ཅན་ཞིག་མཐོང་ན་མི་དེ་རང་དང་མཉམ་དུ་ཁྲིད་པའོ། །
1SA 15:1 དེ་ནས་སཱ་མུ་ཨེལ་གྱིས་སོ་ལོ་ལ། དཀོན་མཆོག་ཡ་ཝཱེས་ང་རང་མངགས་ཏེ་ཁྱོད་ཁོང་གི་འབངས་མི་ཡེས་ར་ཨེལ་གྱི་རྒྱལ་པོར་བསྐོ་བར་བཀའ་གནང་བས། ད་ལྟ་ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
1SA 15:2 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ཚེ། ཨ་མཱད་ལེག་མི་རིགས་ཀྱིས་དེ་ལ་ཆོམ་པོ་ལྟར་བསྒུགས་ཏེ་ཅི་ལྟར་བྱས་པ་དེ་ངས་དྲན་ནོ། །
1SA 15:3 དེའི་ཕྱིར་ཁྱོད་སོང་ནས་ཨ་མཱད་ལེག་པ་ལ་འཐབ་འཛིང་བྱོས་ཤིག སྙིང་རྗེ་མི་བསྐྱེད་པར་དེ་དག་ལ་ཅི་ཡོད་པ་ཐམས་ཅད་མེད་པར་བྱེད་ཅིང་སྐྱེས་པ་དང་བུད་མེད་དང་། ཕྲུ་གུ་འོ་འཐུང་དང་། བ་གླང་དང་ལུག་དང་རྔ་མོང་དང་བོང་བུ་ཐམས་ཅད་སོད་ཅིག་ཅེས་གསུངས་སོ་ཞེས་སྨྲས་པས།
1SA 15:4 སོ་ལོས་མི་རྣམས་ལ་སྐད་བཏང་སྟེ་ཐི་ལཱ་ཨིམ་དུ་བསྡུས་ཤིང་། དེ་དག་གི་གྲངས་ཀ་བརྩིས་པ་ལ་རྐང་དམག་འབུམ་གཉིས་དང་ཡ་ཧུ་དཱ་པ་ཁྲི་ཚོ་གཅིག་ཡོད་དོ། །
1SA 15:5 དེ་ནས་སོ་ལོ་འཁོར་དང་བཅས་པ་ཡོང་ནས་ཨ་མཱད་ལེག་པ་དག་གི་རྒྱལ་ས་རུ་ཕྱིན་ཅིང་ལུང་པ་ཞིག་ནས་འཇབ་སྒུག་བྱས།
1SA 15:6 སོ་ལོས་ཀེ་ནེ་པ་རྣམས་ལ་འདི་ལྟར། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ཚེ་ཁྱོད་རྣམས་ཀྱིས་དེ་དག་ལ་སྙིང་རྗེ་བསྐྱེད་པས། ཁྱོད་རྣམས་ཨ་མཱད་ལེག་པའི་ཁྲོད་ནས་ཤོག་ཅིག གལ་ཏེ་མ་ཐོན་ན་དེ་དག་དང་མཉམ་དུ་མེད་པར་འགྱུར་ཞེས་བསྐུལ་བས་ཀེ་ནེ་པ་རྣམས་ཨ་མཱད་ལེག་པའི་ཁྲོད་ནས་ཐོན་པ་རེད།
1SA 15:7 དེ་ནས་སོ་ལོས་ཨ་མཱད་ལེག་པ་རྣམས་ལ་ཧ་བེ་ལཱ་ནས་ཨེ་ཅིབ་ཡུལ་གྱི་ཤར་ཕྱོགས་ཤུར་ཞེས་པའི་ཡུལ་དུ་འཐབ་འཛིང་བྱས་ཏེ།
1SA 15:8 ཨ་མཱད་ལེག་པའི་རྒྱལ་པོ་ཨ་གག་ཅེས་བྱ་བ་དེ་གསོན་བཟུང་བྱས་ཤིང་མི་ཐམས་ཅད་རལ་གྲིས་མེད་པར་བྱས་མོད།
1SA 15:9 སོ་ལོ་དང་མི་རྣམས་ཀྱིས་ཨ་གག་དང་ལུག་བཟང་པོ་དང་བ་གླང་བཟང་པོ། བ་ཕྲུག་བཟང་པོ། ལུ་གུ་བཟང་པོ་བཅས་ལེགས་པོ་ཐམས་ཅད་མེད་པར་མ་བཏང་ཞིང་། བློར་མི་འབབ་པ་དང་རིན་ཐང་མེད་པ་ཐམས་ཅད་མེད་པར་བྱས།
1SA 15:10 དེའི་ཕྱིར་དཀོན་མཆོག་ཡ་ཝཱེའི་བཀའ་ནི་སཱ་མུ་ཨེལ་ལ་བྱུང་ཞིང་འདི་སྐད་དུ།
1SA 15:11 སོ་ལོ་རྒྱལ་པོར་བསྐོས་པའི་ཕྱིར་ང་རང་འགྱོད་པ་སྐྱེས་ཏེ། ཁོ་ང་དང་བྲལ་ནས་བཀའ་བཞིན་དུ་མི་བསྒྲུབ་པའི་ཕྱིར་རོ་ཞེས་གསུངས་པས། སཱ་མུ་ཨེལ་སེམས་འཁྲུགས་ཏེ་མཚན་གང་པོར་དཀོན་མཆོག་ཡ་ཝཱེ་ལ་སྨོན་ལམ་ཞུས་པ་རེད།
1SA 15:12 ཕྱི་ཉིན་ཞོགས་པར་སཱ་མུ་ཨེལ་ལངས་ནས་སོ་ལོ་དང་འཕྲད་པར་སོང་ཙ་ན། མི་ཞིག་གིས་སཱ་མུ་ཨེལ་ལ། སོ་ལོ་ནི་ཀར་མེལ་དུ་སོང་སྟེ་རང་གི་ཆེད་དུ་རྗེས་དྲན་གྱི་རྡོ་རིང་ཞིག་བཙུགས་ཤིང་ད་ལྟ་ཕར་འགྲུལ་ནས་གིལ་གལ་དུ་སོང་བ་ཡིན་ཞེས་ཞུས།
1SA 15:13 དེ་ནས་སཱ་མུ་ཨེལ་ནི་སོ་ལོ་ཡི་མདུན་དུ་ཕྱིན་པ་ན། སོ་ལོ་ན་རེ། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་ངོ་། །ངས་དཀོན་མཆོག་ཡ་ཝཱེའི་བཀའ་བཞིན་དུ་བསྒྲུབས་པ་ཡིན་ཞུས་པས།
1SA 15:14 སཱ་མུ་ཨེལ་གྱིས་ལུག་དང་བ་གླང་གིས་སྐད་རྒྱག་པའི་སྒྲ་ངའི་རྣ་བས་ཐོས་པ་དེ་ཅི་ཡིན་ཞེས་དྲིས་པའི་ལན་དུ།
1SA 15:15 སོ་ལོ་ན་རེ། ཁོ་རྣམས་ཀྱིས་དེ་དག་ཨ་མཱད་ལེག་པ་ནས་བཟུང་བ་རེད། དེའི་དམིགས་ཡུལ་ནི། ལུག་དང་བ་གླང་ཐམས་ཅད་ལས་ལེགས་པོ་རྣམས་ནི་མི་རྣམས་ཀྱིས་ཁྱོད་ཀྱི་དཀོན་མཆོག་ཡ་ཝཱེ་ལ་མཆོད་པར་འབུལ་འདོད་པ་ཡིན་ཞིང་། གཞན་ཐམས་ཅད་ང་ཚོས་མེད་པར་བྱས་པ་ཡིན་ཞེས་སྨྲས་པས།
1SA 15:16 སཱ་མུ་ཨེལ་གྱིས་སོ་ལོ་ལ། ཁ་རོག་སྡོད་ཅིག མཚན་མོ་འདི་ལ་དཀོན་མཆོག་ཡ་ཝཱེས་ང་ལ་གསུངས་པའི་བཀའ་དེ་འཆད་པར་བྱ་ཞེས་པའི་ལན་དུ་དེ་ཡིས། འཆད་པར་མཛོད་ཅིག་ཅེས་ཞུས་སོ། །
1SA 15:17 དེ་ནས་སཱ་མུ་ཨེལ་གྱིས། ཁྱོད་ཀྱིས་རང་ཉིད་ཆུང་བར་བརྩིས་ནའང་། ཁྱོད་རང་ཡེས་ར་ཨེལ་གྱི་ཚོ་པ་ཁག་གི་འགོ་འདྲེན་དུ་གྱུར་ཏེ། དཀོན་མཆོག་ཡ་ཝཱེས་ཁྱོད་ཡེས་ར་ཨེལ་གྱི་རྒྱལ་པོར་བསྐོས་པར་མཛད་པ་མ་ཡིན་ནམ།
1SA 15:18 དཀོན་མཆོག་ཡ་ཝཱེས་ཁྱོད་ལམ་དུ་མངགས་ཤིང་འདི་སྐད་དུ། ཁྱོད་སོང་ལ་ཨ་མཱད་ལེག་པ་སྡིག་ཅན་དེ་རྣམས་ཁྱོན་ནས་མེད་པར་བྱོས་ཤིག དེ་དག་ཚར་མ་བཅད་བར་དུ་འཐབ་འཛིང་བྱོས་ཤིག་ཅེས་བསྐུལ་ན་ཡང་།
1SA 15:19 ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་མ་མཉན་པར། ནོར་ལ་ཧབ་ཐོབ་བརྒྱབ་ནས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་བྱེད་དོན་ཅི་ཞེས་དྲིས་པ་ལ།
1SA 15:20 སོ་ལོས་སཱ་མུ་ཨེལ་ལ། ཀྱེ་ཧོ། ངས་ནི་དཀོན་མཆོག་ཡ་ཝཱེའི་བཀའ་ལ་མཉན་ཏེ་དཀོན་མཆོག་ཡ་ཝཱེས་མངགས་པའི་ལམ་དུ་འགྲུལ་བ་ཡིན། ཨ་མཱད་ལེག་པའི་རྒྱལ་པོ་ཨ་གག་བཟུང་ནས་ཨ་མཱད་ལེག་པ་ཐམས་ཅད་ཡོངས་སུ་མེད་པར་བྱས་པ་ཡིན།
1SA 15:21 མི་རྣམས་ཀྱིས་ཁོ་ཚོས་ཕྲོགས་པའི་ལུག་དང་བ་གླང་ལེགས་པོ་ཀུན་གིལ་གལ་དུ་ཁྱོད་ཀྱི་དཀོན་མཆོག་ཡ་ཝཱེ་ལ་མཆོད་པར་འབུལ་ངེས་ཞེས་སྨྲས།
1SA 15:22 སཱ་མུ་ཨེལ་ན་རེ། སྦྱིན་སྲེག་དང་ནི་མཆོད་པ་གཉིས་ཀ་ལས། ། ཡ་ཝཱེ་ཁོང་གི་བཀའ་ལ་མཉན་པར་དགའ། ། བཀའ་ལ་ཚུལ་བཞིན་མཉན་པ་དེ་ཉིད་ནི། ། ལུག་ཐུག་ཚིལ་ལས་བཟང་པོ་ཡོད་པ་ལགས། །
1SA 15:23 ངོ་ལོག་སེམས་ནི་མོ་པའི་སྡིག་པ་དང་། ། མི་མཉན་སེམས་ནི་ངན་ཞིང་སྐུ་འདྲར་མཚུངས། ། ཁྱོད་ཀྱིས་ཡ་ཝཱེ་ཁོང་གི་བཀའ་དོར་བས། ། ཁྱོད་ཀྱང་ཁོང་གིས་རྒྱལ་པོ་བྱེད་ལས་དོར། ། ཞེས་སྨྲས་པའི་ལན་དུ།
1SA 15:24 སོ་ལོས་སཱ་མུ་ཨེལ་ལ། བདག་ནི་མི་རྣམས་ལ་འཇིགས་ནས་དེ་དག་གི་གཏམ་ལ་མཉན་པ་དང་། དཀོན་མཆོག་ཡ་ཝཱེའི་བཀའ་དང་ཁྱེད་ཀྱི་གཏམ་ལས་འགལ་ཏེ་སྡིག་པ་བྱས་པ་ཡིན།
1SA 15:25 ད་ལྟ་ཁྱེད་ཀྱིས་བདག་གི་སྡིག་པ་སེལ་བར་མཛོད། བདག་དང་མཉམ་དུ་ཕྱིར་ཤོག་དང་བདག་གིས་དཀོན་མཆོག་ཡ་ཝཱེ་ལ་ཕྱག་འབུལ་བར་བྱ་ཞེས་ཞུས་པས།
1SA 15:26 སཱ་མུ་ཨེལ་གྱིས་སོ་ལོ་ལ། ང་ཁྱོད་དང་མཉམ་དུ་ཕྱིར་མི་འགྲོ་སྟེ་ཁྱོད་ཀྱིས་དཀོན་མཆོག་ཡ་ཝཱེའི་བཀའ་དོར་བས་དཀོན་མཆོག་ཡ་ཝཱེས་ཀྱང་ཁྱོད་ཡེས་ར་ཨེལ་གྱི་རྒྱལ་པོ་བྱེད་དུ་མི་འཇུག་ཅེས་སྨྲས་ནས།
1SA 15:27 སཱ་མུ་ཨེལ་ཁ་ཕྱིར་འཁོར་ནས་འགྲོ་བར་བརྩམས་པ་ལ། སོ་ལོས་ཁོང་གི་གོས་ཀྱི་ཐུ་བ་བཟུང་བས་གོས་རལ་བར་གྱུར།
1SA 15:28 དེ་ནས་སཱ་མུ་ཨེལ་གྱིས་ཁོ་ལ། དཀོན་མཆོག་ཡ་ཝཱེས་དེ་རིང་ཉིན་མོར་ཡེས་ར་ཨེལ་གྱི་རྒྱལ་སྲིད་ཁྱོད་ཀྱི་ལག་ནས་བླངས་ཏེ། རྒྱལ་སྲིད་འདི་ཁྱོད་ལས་བཟང་པོ་ཞིག་ལ་གནང་བར་འགྱུར།
1SA 15:29 ཡེས་ར་ཨེལ་གྱི་ནུས་མཐུ་ཆེན་པོ་ལགས་ཀྱིས་རྫུན་མི་གསུང་ལ། ཐུགས་འགྱོད་ཀྱང་མི་སྐྱེས། གང་ལ་ཞེ་ན། ཁོང་ནི་འགྱོད་པ་སྐྱེས་པའི་མི་དང་འདྲ་བ་མིན་ཞེས་སྨྲས་ཤིང་།
1SA 15:30 ཡང་སོ་ལོ་ན་རེ། བདག་གིས་སྡིག་པ་བྱས་པ་ཡིན། དེ་ལྟ་ནའང་། ད་ལྟ་ཁྱེད་ཀྱིས་བདག་གི་མི་རྣམས་ཀྱི་རྒན་པོ་དང་། ཡེས་ར་ཨེལ་པ་རྣམས་ཀྱི་མདུན་དུ་བདག་ལ་བཀུར་སྟི་མཛད་ཅིང་། བདག་དང་མཉམ་དུ་ལོག་པར་མཛོད། བདག་གིས་ཁྱེད་ཀྱི་དཀོན་མཆོག་ཡ་ཝཱེ་ལ་ཕྱག་འབུལ་བར་བྱ་ཞེས་ཞུས་ནས།
1SA 15:31 སཱ་མུ་ཨེལ་ནི་སོ་ལོའི་རྗེས་སུ་འབྲངས་ཏེ་སོ་ལོས་དཀོན་མཆོག་ཡ་ཝཱེ་ལ་ཕྱག་ཕུལ་ཏོ། །
1SA 15:32 དེ་ནས་སཱ་མུ་ཨེལ་གྱིས། ཨ་མཱད་ལེག་པའི་རྒྱལ་པོ་ཨ་གག་ངའི་མདུན་དུ་ཁྲིད་ཤོག་ཅེས་བཀའ་བསྩལ་པས། ཨ་གག་གིས་སེམས་སུ་འཆི་བའི་སྡུག་བསྔལ་ངེས་པར་རྫོགས་ཟིན་ནོ་ཞེས་སྨྲས་ཤིང་སྤྲོ་དགའི་ངང་དེར་སོང་ངོ་། །
1SA 15:33 ཡང་སཱ་མུ་ཨེལ་གྱིས། ཁྱོད་གྱིས་རལ་གྲིས་བུད་མེད་མང་པོ་ཞིག་ལ་ཕྲུ་གུ་མེད་པར་བྱས་པ་ལྟར། ཁྱོད་ཀྱི་མ་ཡང་ཕྲུ་གུ་མེད་པར་གྱུར་ཅིག་ཅེས་སྨྲས་ནས། སཱ་མུ་ཨེལ་གྱིས་ཨ་གག་ནི་གིལ་གལ་དུ་དཀོན་མཆོག་ཡ་ཝཱེའི་དྲུང་དུ་དུམ་བུར་བཅད་པ་རེད།
1SA 15:34 དེ་ནས་སཱ་མུ་ཨེལ་ནི་རཱ་མ་ཡུལ་དུ་ཕྱིན་ཏེ་སོ་ལོ་ནི་གིབ་ཨ་རུ་རང་གི་ཁྱིམ་དུ་ཡར་སོང་།
1SA 15:35 ཡང་སཱ་མུ་ཨེལ་ཚེ་ལས་འདས་པའི་བར་དུ་སོ་ལོ་ལ་བལྟ་བར་མ་འོངས་ཏེ། སཱ་མུ་ཨེལ་གྱིས་སོ་ལོའི་དོན་དུ་མྱ་ངན་ཆེན་པོ་བྱས་ཤིང་སོ་ལོ་ཡེས་ར་ཨེལ་གྱི་རྒྱལ་པོར་བསྐོས་པའི་ཕྱིར་དཀོན་མཆོག་ཡ་ཝཱེ་ལ་ཡང་ཐུགས་འགྱོད་བྱུང་ངོ་། །
1SA 16:1 དེ་ནས་དཀོན་མཆོག་ཡ་ཝཱེས་སཱ་མུ་ཨེལ་ལ། ཁྱོད་ཀྱིས་སོ་ལོའི་ཕྱིར་ཇི་སྲིད་བར་དུ་མྱ་ངན་བྱའམ། ཡེས་ར་ཨེལ་དུ་རྒྱལ་པོ་མི་བྱེད་པའི་ཕྱིར་ངས་ཁོ་སྤངས་པ་ཡིན། ཁྱོད་ཀྱི་སྣུམ་ལྡུད་སྤྱད་ཀྱི་རྭ་ཅོ་དེ་སྣུམ་གྱིས་འགེང་བར་བྱས་ཏེ་སོང་དང་། ངས་པེད་ལེ་ཧེམ་པ་ཡེ་སེ་ཞེས་བྱ་བའི་བུ་རྣམས་ཀྱི་ཁྲོད་ནས་རྒྱལ་པོ་ཞིག་བསྐོས་པ་ཡིན་པས། ཁྱོད་དེ་རུ་མངག་པར་བྱ་ཞེས་གསུངས།
1SA 16:2 སཱ་མུ་ཨེལ་གྱིས་ང་རང་ཇི་ལྟར་འགྲོའམ། སོ་ལོས་དེ་ཐོས་ན་ང་རང་གསོད་ངེས་ཡིན་ཞེས་ཞུས་པའི་ལན་དུ། དཀོན་མཆོག་ཡ་ཝཱེས་འདི་སྐད་དུ། བ་མོ་ཞིག་ཁྱོད་དང་མཉམ་དུ་འཁྲིད་དགོས་ཤིང་། ང་ནི་ཡ་ཝཱེ་ལ་མཆོད་པ་འབུལ་བའི་ཕྱིར་འོངས་པ་ཡིན་ཞེས་སྨྲོས་ཤིག
1SA 16:3 ཡང་ཡེ་སེ་མཆོད་པ་འབུལ་ས་རུ་བོས་དང་ཁྱོད་ཀྱིས་ཅི་བྱེད་པར་རུང་བ་དེ་ནི་ངས་སྟོན་པར་བྱ་སྟེ། ཡང་ངས་ཁྱོད་ལ་མིང་སྟོན་པ་དེ་ལ་སྣུམ་གྱིས་བྱུགས་ཤིག་ཅེས་གསུངས་པ་དང་།
1SA 16:4 སཱ་མུ་ཨེལ་གྱིས་དེ་བཞིན་དུ་བྱས་ཤིང་། པེད་ལེ་ཧེམ་དུ་སླེབས་པ་ན། གྲོང་རྡལ་དེའི་རྒན་པོ་རྣམས་སྐྲག་སྐྲག་འདར་འདར་ངང་སཱ་མུ་ཨེལ་དང་འཕྲད་དུ་འོངས་ཏེ་ཁྱེད་ཞི་བདེའི་ཆེད་དུ་ཡོང་བ་ཡིན་ནམ་ཞེས་ཞུས་པས།
1SA 16:5 དེས་ང་ནི་ཞི་བདེའི་ཆེད་དུ་དང་དཀོན་མཆོག་ཡ་ཝཱེ་ལ་མཆོད་པ་འབུལ་བར་འོངས་པས། ཁྱོད་རྣམས་ཀྱིས་རང་རང་གི་ལུས་གཙང་མར་བྱོས་ལ་ང་དང་མཉམ་དུ་མཆོད་པ་འབུལ་དུ་ཤོག་ཅིག་ཅེས་བསྐུལ་ནས་ཡེ་སེ་དང་དེའི་བུ་རྣམས་ལ་གཙང་སྦྲ་བྱེད་དུ་བཅུག་ནས་མཆོད་པ་འབུལ་སར་བོས།
1SA 16:6 ཡང་དེ་རྣམས་སླེབས་པ་ཙམ་གྱིས་སཱ་མུ་ཨེལ་གྱིས་ཨེ་ལི་ཨབ་ལ་བལྟས་ཤིང་དཀོན་མཆོག་ཡ་ཝཱེའི་དྲུང་དུ་འབྱུག་པར་རུང་བ་དེ་ནི་ངེས་པར་ཁོ་རང་ཡིན་སྙམ།
1SA 16:7 འོན་ཀྱང་དཀོན་མཆོག་ཡ་ཝཱེས་སཱ་མུ་ཨེལ་ལ་མི་འདིའི་བྱད་བཞིན་ནམ་གཟུགས་ཀྱི་རིང་ཐུང་སོགས་ལ་མ་བལྟ། རྒྱུ་མཚན་ངས་ཁོ་རང་སྤངས་པ་ཡིན་ཏེ། དཀོན་མཆོག་ཡ་ཝཱེས་གཟིགས་པ་ནི་མི་ཀུན་གྱིས་ལྟ་བ་དང་མི་འདྲ་སྟེ། མི་རྣམས་ཀྱིས་ཕྱི་ཚུལ་ལ་བལྟ་ཞིང་དཀོན་མཆོག་ཡ་ཝཱེས་ནང་སེམས་ལ་གཟིགས་པ་ཡིན་ཞེས་གསུངས།
1SA 16:8 དེ་ནས་ཡེ་སེ་ཡིས་ཨ་བི་ནཱ་དབ་བོས་ནས་སཱ་མུ་ཨེལ་གྱི་དྲུང་དུ་འགྲོ་རུ་བཅུག་པ་ལ། དེས་དཀོན་མཆོག་ཡ་ཝཱེས་འདི་ཡང་མ་བསྐོས་ཞེས་སྨྲས་པས།
1SA 16:9 ཡང་ཡེ་སེ་ཡིས་ཤམ་མཱ་བོས་ནས་སཱ་མུ་ཨེལ་གྱི་དྲུང་དུ་འགྲོ་རུ་བཅུག་པ་ལ། དེས་དཀོན་མཆོག་ཡ་ཝཱེས་འདི་ཡང་མ་བསྐོས་ཞེས་སྨྲས་པས།
1SA 16:10 ཡེ་སེ་ཡིས་དེ་ལྟར་སྔ་ཕྱིར་རང་གི་བུ་བདུན་སཱ་མུ་ཨེལ་གྱི་མདུན་དུ་འགྲོ་རུ་བཅུག་ཀྱང་། སཱ་མུ་ཨེལ་གྱིས་ཡེ་སེ་ལ་དཀོན་མཆོག་ཡ་ཝཱེས་འདི་དག་ཀྱང་མ་བསྐོས་ཞེས་སྨྲས།
1SA 16:11 ཡང་སཱ་མུ་ཨེལ་གྱིས་ཡེ་སེ་ལ་ཁྱེད་ཀྱི་བུ་ཚང་མ་འདི་རུ་ཡོད་དམ་ཞེས་དྲིས་པའི་ལན་དུ་དེས། བུ་ཆུང་ཤོས་ད་དུང་ལུས་ཡོད་དེ་ཁོས་ལུག་འཚོ་བཞིན་ཡོད་ཟེར་བས་སཱ་མུ་ཨེལ་གྱིས་ཡེ་སེ་ལ་མི་ཞིག་མངགས་ནས་ཁོ་རང་བོས་དང་། ཁོ་མ་སླེབས་བར་དུ་ངེད་རྣམས་ས་རུ་མི་སྡོད་ཅེས་སྨྲས་པ་བཞིན་དུ།
1SA 16:12 མི་ཞིག་མངགས་ནས་ཁོ་བོས་པ་དང་བུ་དེ་ནི་ངོ་མདངས་དམར་ཞིང་མིག་མཛེས་པ་དང་བྱད་གཟིགས་ལེགས་པ་ཞིག་ཡིན་ལ། དེའི་ཚེ་དཀོན་མཆོག་ཡ་ཝཱེས་འདི་ནི་བདག་གིས་ཆེད་དུ་བསྐོས་པ་དེ་ཡིན་པས་ད་ལྟ་ལངས་ནས་ཁོ་ལ་སྣུམ་གྱིས་བྱུགས་ཤིག་ཅེས་བཀའ་བསྩལ་པས།
1SA 16:13 སཱ་མུ་ཨེལ་གྱིས་སྣུམ་ལྡུད་སྤྱད་ཀྱི་རྭ་ཅོ་དེ་བླངས་ནས་ཁོའི་སྤུན་རྣམས་ཀྱི་ཁྲོད་དུ་ཁོ་ལ་སྣུམ་གྱིས་བྱུགས་པ་དང་། ཉིན་དེ་ནས་བཟུང་དཱ་བིད་ལ་དཀོན་མཆོག་ཡ་ཝཱེའི་ཐུགས་ཉིད་དབང་དང་ལྡན་པར་བབས་པ་དང་། སཱ་མུ་ཨེལ་ལངས་ཏེ་ཕྱིར་རཱ་མ་ཡུལ་དུ་སོང་ངོ་། །
1SA 16:14 ཡང་དཀོན་མཆོག་ཡ་ཝཱེའི་ཐུགས་ཉིད་སོ་ལོའི་ཕྱོགས་ནས་ཕར་བཞུད་དེ་ཁོང་གི་གམ་ནས་བྱུང་བའི་སེམས་ཉིད་ངན་པ་ཞིག་གིས་ཁོ་རང་ལ་ཟིང་ཆ་བཟོས་པས།
1SA 16:15 སོ་ལོའི་བློན་འཁོར་རྣམས་ཀྱིས་ཁོ་ལ་ན་རེ། གཟིགས་དང་། དཀོན་མཆོག་གི་གམ་ནས་ཡོང་བའི་སེམས་ཉིད་ངན་པ་ཞིག་གིས་ཁྱེད་ལ་ཟིང་ཆ་བཟོས་པས།
1SA 16:16 ཀྱེ་ངེད་ཅག་གི་བདག་པོ་ཁྱེད་ཀྱིས་སྐུ་མདུན་དུ་ཡོད་པའི་བློན་འཁོར་རྣམས་ལ། པི་ཝང་དཀྲོལ་བར་མཁས་པའི་མི་ཞིག་འཚོལ་བའི་བཀའ་གནོངས་དང་། སེམས་ཉིད་ངན་པ་དེས་ཁྱེད་རང་ལ་ཟིང་ཆ་བཟོ་བའི་ཚེ་མི་དེས་སྒྲ་སྙན་དཀྲོལ་བ་ཙམ་གྱིས་ཁྱེད་ལ་ཕན་པར་འགྱུར་ཞེས་ཞུས་པས།
1SA 16:17 སོ་ལོས་བློན་འཁོར་རྣམས་ལ་སྒྲ་སྙན་དཀྲོལ་མཁས་པའི་མི་ཞིག་ངའི་ཕྱིར་བཙལ་ཏེ། ངའི་མདུན་དུ་འཁྲིད་ཤོག་ཅེས་སྨྲས་པའི་ལན་དུ་གཞོན་ནུ་རྣམས་ལས་གཅིག་གིས།
1SA 16:18 ཀྱེ་ཧོ་ངས་པེད་ལེ་ཧེམ་པ་ཡེ་སེའི་བུ་ཞིག་མཐོང་བ་ཡིན། དེ་ནི་སྒྲ་སྙན་དཀྲོལ་མཁས་ཤིང་མི་དཔའ་རྩལ་ཅན་དང་གཏམ་ལ་མཁས་པ། བྱད་གཟུགས་ལེགས་པ་བཅས་ཡིན་པར་མ་ཟད། དཀོན་མཆོག་ཡ་ཝཱེ་ཁོ་དང་མཉམ་དུ་བཞུགས་སོ་ཞེས་ཞུས་པ་ལ།
1SA 16:19 སོ་ལོས་ཡེ་སེའི་མདུན་དུ་བང་ཆེན་མངགས་ནས་ཁོ་ལ། ཁྱོད་ཀྱི་བུ་དཱ་བིད་ལུག་རྫི་ཡིན་པ་དེ་ངའི་རྩར་ཐོངས་ཤིག་ཅེས་སྨྲས་པས།
1SA 16:20 ཡེ་སེ་ཡིས་བག་ལེབ་དང་རྒུན་ཆང་སྐྱི་ཁུག་གང་བཀལ་བའི་བོང་བུ་དང་། རེའུ་གཅིག་བཅས་རང་གི་བུ་དཱ་བིད་དང་མཉམ་དུ་སོ་ལོའི་དྲུང་དུ་བསྐྱལ་བ་རེད།
1SA 16:21 དཱ་བིད་ནི་སོ་ལོའི་དྲུང་དུ་སླེབས་པ་དང་དེའི་དྲུང་དུ་ཞབས་ཕྱི་བྱས་ཤིང་། སོ་ལོས་ཁོ་ལ་ཤིན་ཏུ་གཅེས་པས། ཁོ་རང་སོ་ལོའི་གོ་མཚོན་འཁུར་མཁན་དུ་གྱུར།
1SA 16:22 དེ་ནས་སོ་ལོས་ཡེ་སེ་ལ། དཱ་བིད་ལ་ངའི་མདུན་དུ་བཀའ་དྲིན་ཐོབ་པས་ཁོ་རང་ངའི་མདུན་དུ་གནས་སུ་ཆུག་ཅེས་འཕྲིན་བསྐུར།
1SA 16:23 དེ་ནས་དཀོན་མཆོག་གིས་མངགས་པའི་སེམས་ཉིད་དེ་སོ་ལོའི་སྟེང་དུ་འབབ་ཐེངས་རེར་དཱ་བིད་ཀྱིས་པི་ཝང་བླངས་ཏེ་དཀྲོལ་བས། སོ་ལོའི་སེམས་བདེ་བར་བྱེད་པ་ལ་ཕན་ཐོགས་ཏེ་སེམས་ཉིད་ངན་པ་ཁོ་དང་བྲལ་ཏོ། །
1SA 17:1 དེ་ནས་ཕེ་ལེ་ཤེད་པ་རྣམས་ཀྱིས་དམག་རྒྱག་པའི་ཕྱིར་ཡ་ཧུ་དཱ་ལ་གཏོགས་པའི་སོ་གོ་ཞེས་པའི་གྲོང་ཚོ་རུ་དམག་ཚོགས་ཐམས་ཅད་བསྡུས་ནས། སོ་གོ་གྲོང་ཚོ་དང་ཨེ་ཕེ་སི་དམ་མིམ་ཞེས་པའི་ས་ཆའི་ཨ་ཟེ་ཀཱ་གྲོང་ཚོ་གཉིས་ཀྱི་བར་དུ་དམག་སྒར་བཏབ་པ་རེད།
1SA 17:2 སོ་ལོ་དང་ཡེས་ར་ཨེལ་པ་རྣམས་ཀྱང་འཛོམས་ནས། ཨེ་ལཱ་ཡི་ལུང་པ་རུ་དམག་སྒར་བཏབ་སྟེ་ཕེ་ལེ་ཤེད་པ་རྣམས་ལ་གཡུལ་བཤམས་སོ། །
1SA 17:3 ཡང་ཕྱོགས་གཅིག་གི་རི་ལ་ཕེ་ལེ་ཤེད་པ་དང་ཕྱོགས་ཅིག་ཤོས་ཀྱི་རི་ལ་ཡེས་ར་ཨེལ་པ་བསྡད་དེ། དེ་གཉིས་ཀྱི་བར་ལ་ལུང་པ་ཞིག་ཡོད་པ་ཡིན།
1SA 17:4 དེ་ནས་ཕེ་ལེ་ཤེད་པའི་དམག་སྒར་ནས་གཱད་ཡུལ་གྱི་དམག་འཁྲུག་སློང་མཁན་གོལ་ཡད་ཅེས་བྱ་བ་ཐོན་ཞིང་། མི་དེའི་གཟུགས་ཀྱི་རིང་ཚད་ལ་ཁྲུ་དྲུག་དང་མཐོ་གང་ཡོད་པ་དང་།
1SA 17:5 མི་དེའི་མགོ་ལ་ལི་ཡི་རྨོག་དང་། ལུས་ལ་ལི་ཡི་ཁྲབ་གྱོན་ཏེ། ཁྲབ་དེའི་ལྕི་ཚད་ལ་སྲང་ལྔ་སྟོང་ཙམ་ཡོད་པ་རེད།
1SA 17:6 ཁོའི་རྐང་པ་ལ་ལི་ཡི་པུས་ཤུབས་དང་། དཔུང་པ་གཉིས་ཀྱི་བར་ལ་ལི་ཡི་མདུང་ཐུང་ཡོད་པ་ཡིན།
1SA 17:7 ཡང་དེའི་མདུང་རིང་གི་ཡུ་བ་ནི་ཤིན་ཏུ་སྦོམ་སྟེ། དབྱིབས་ནི་བཟོ་འཁོར་གྱི་སྲོག་མདའ་ལྟ་བུ་ཡོད་པ་དང་། མདུང་ལྕེའི་རྣོ་ལྕགས་ཀྱི་ལྗིད་ཚད་ནི་སྲང་དྲུག་བརྒྱ་ཡིན་ཞིང་། མི་དེའི་མདུན་དུ་ཕུབ་འཁུར་མཁན་ཞིག་ཕྱིན་ཏོ། །
1SA 17:8 དེ་ནས་མི་དེ་ལངས་བསྡད་ནས་ཡེས་ར་ཨེལ་གྱི་དམག་ཚོགས་འབོད་ཀྱིན་ན་རེ། ཁྱོད་ཅག་ཕྱི་རུ་འོངས་ནས་དམག་བཤམས་པ་ཅི་ཡིན། ང་ནི་ཕེ་ལེ་ཤེད་པ་དང་། ཁྱོད་ཅག་ནི་སོ་ལོའི་ཞབས་ཕྱི་མ་ཡིན་ནམ། ཁྱོད་རྣམས་ལས་མི་ཞིག་འདེམས་ནས་ངའི་མདུན་ལ་མར་འོང་དུ་ཆུག་ཅིག
1SA 17:9 གལ་ཏེ་ཁོས་ང་དང་འཐབ་ནས་ང་བསད་ན། ང་ཚོ་ཁྱོད་ཅག་གི་གཡོག་པོ་བྱེད་པར་བྱ། གལ་ཏེ་ང་ཁོ་ལས་རྒྱལ་ཏེ་ཁོ་བསད་ན་ཁྱོད་རྣམས་ང་ཚོའི་གཡོག་པོ་བྱེད་པར་འགྱུར་ཞིང་། ཁྱོད་ཚོས་ངེད་ཅག་ལ་ཞབས་ཕྱི་བྱེད་པར་འགྱུར་ཞེས་སྨྲས།
1SA 17:10 ཡང་ཕེ་ལེ་ཤེད་པ་དེ་ན་རེ། དེ་རིང་ངས་ཡེས་ར་ཨེལ་གྱི་དམག་དཔུང་ལ་སྨད་པ་ཡིན། མི་ཞིག་ཐོངས་དང་ཕྱོགས་གཉིས་ཀྱིས་འཐབ་པར་བྱ་ཞེས་སྨྲས་པས།
1SA 17:11 སོ་ལོ་དང་ཡེས་ར་ཨེལ་པ་ཐམས་ཅད་ཀྱིས་གཏམ་དེ་ཐོས་པ་ཙམ་གྱིས་སྙིང་སྟོབས་ཉམས་ཏེ་ཤིན་ཏུ་འཇིགས་སོ། །
1SA 17:12 དཱ་བིད་ནི་ཡ་ཧུ་དཱ་ཡུལ་གྱི་པེད་ལེ་ཧེམ་གྲོང་རྡལ་ནས་ཡིན་པའི་ཨེབ་རཱད་པ་ཡེ་སེ་ཞེས་པ་དེའི་བུ་ཡིན་ལ། ཡེ་སེ་ལ་བུ་བརྒྱད་ཡོད་པ་དང་། སོ་ལོའི་དུས་སུ་ཡེ་སེ་ནི་རྒན་པའི་ཁྲོད་དུ་བརྩིས་སོ། །
1SA 17:13 ཡེ་སེ་ཡི་བུ་ཆེ་བ་གསུམ་ནི་སོ་ལོའི་རྗེས་སུ་དམག་ཏུ་སོང་ཞིང་། དེ་གསུམ་པོ་ལས་བུ་སྐྱེས་འགོའི་མིང་ལ་ཨེ་ལི་ཨབ་དང་། བུ་གཉིས་པའི་མིང་ལ་ཨ་བི་ནཱ་དབ་དང་། བུ་གསུམ་པའི་མིང་ལ་ཤམ་མཱ་ཞེས་ཟེར།
1SA 17:14 དཱ་བིད་ནི་བུ་ཐམས་ཅད་ལས་ཆུང་བ་ཡིན་ཞིང་། ཕུ་བོ་ཆེ་བ་གསུམ་སོ་ལོའི་རྗེས་སུ་ཕྱིན་པ་རེད།
1SA 17:15 དཱ་བིད་སྐབས་རེར་སོ་ལོ་དང་ཁ་བྲལ་ཏེ་པེད་ལེ་ཧེམ་དུ་རང་གི་ཕ་ཡི་ལུག་ཁྱུ་འཚོ་བར་སོང་།
1SA 17:16 ཡང་ཕེ་ལེ་ཤེད་པ་ཁོ་རང་ནངས་དགོང་གཉིས་ཀར་འོངས་ཏེ་ཉིན་བཞི་བཅུའི་བར་དུ་རང་གི་རྩལ་བསྟན་ཏོ། །
1SA 17:17 དེ་ནས་ཡེ་སེ་ཡིས་རང་གི་བུ་དཱ་བིད་ལ་ཁྱོད་རང་དམག་སྒར་དུ་སོང་ཞིག གྲོ་ཡོས་ཨེ་ཕཱ་གཅིག་དང་བག་ལེབ་བཅུ་པོ་འདི་ཁྱེར་ནས་དེ་དག་ཁྱོད་ཀྱི་ཕུ་བོ་རྣམས་ལ་སྤྲོད་ཅིག
1SA 17:18 ཡང་དེ་དག་གི་སྟོང་དཔོན་ལ་འོ་ཐུད་བཅུ་པོ་འདི་ཁྱེར་ཏེ། སྤུན་ཟླ་རྣམས་ཀྱི་གནས་ཚུལ་ལ་བལྟས་ནས་དེ་དག་གི་ཕྱོགས་ནས་རྟགས་ཤིག་འཁྱེར་ཤོག་ཅེས་ཟེར་བའི་སྐབས་སུ།
1SA 17:19 སོ་ལོ་དང་དཱ་བིད་ཀྱི་ཕུ་བོ་གསུམ་པོ་དང་ཡེས་ར་ཨེལ་པ་ཐམས་ཅད་ཕེ་ལེ་ཤེད་པ་རྣམས་དང་འཐབ་ཕྱིར་ཨེ་ལཱ་ཞེས་པའི་ལུང་པར་བསྡད་ཡོད་པ་རེད།
1SA 17:20 དཱ་བིད་ནངས་སྔ་མོ་ལངས་ནས་ལུག་ཁྱུ་ནི་སྲུང་མཁན་ཞིག་ལ་བཅོལ་ཏེ། ཡེ་སེའི་བཀའ་བཞིན་དུ་རྒྱགས་ཆས་ཁུར་ནས་སོང་བ་དང་། དམག་སྒར་དུ་སླེབས་པའི་ཚེ་དམག་ཚོགས་ནི་གཡུལ་ས་རུ་འགྲོ་ཞིང་གད་རྒྱངས་བསྒྲགས་སོ། །
1SA 17:21 ཡེས་ར་ཨེལ་དང་ཕེ་ལེ་ཤེད་པ་གཉིས་ཀྱིས་ཕན་ཚུན་ཁ་གཏད་དུ་དམག་བཤམས་པ་རེད།
1SA 17:22 དེ་ནས་དཱ་བིད་ཀྱིས་རང་གི་རྒྱགས་ནི་སྲུང་དམག་གི་ལག་ཏུ་བཞག་སྟེ། གཡུལ་ས་རུ་བརྒྱུགས་ཤིང་སྤུན་ཟླ་རྣམས་ལ་ཁམས་འདྲི་བྱས་ནས།
1SA 17:23 དེ་དག་དང་མཉམ་དུ་གཏམ་བྱས་པ་ལ། དམག་ཚོགས་ཀྱི་ནང་ནས་གཱད་ཡུལ་གྱི་ཕེ་ལེ་ཤེད་པ་གོལ་ཡད་ཅེས་བྱ་བའི་དམག་འཁྲུག་སློང་མཁན་དེ་ཐོན་ནས་སྔར་བཞིན་གཏམ་སྨྲས་པ་དཱ་བིད་ཀྱིས་ཐོས།
1SA 17:24 ཡང་ཡེས་ར་ཨེལ་པ་རྣམས་ཀྱིས་མི་དེ་མཐོང་བའི་ཚེ་ཤིན་ཏུ་འཇིགས་ཤིང་དེའི་མདུན་ནས་བྲོས་སོ། །
1SA 17:25 དེ་ནས་ཡེས་ར་ཨེལ་པ་རྣམས་ཀྱིས། ཡར་འོང་བའི་མི་དེ་མཐོང་ངམ། མི་དེ་ནི་ཡེས་ར་ཨེལ་ལ་སྨད་པའི་ཕྱིར་འོང་བར་ངེས། སུ་ཞིག་གིས་མི་དེ་བསད་ན། དེ་ལ་རྒྱལ་པོས་རྒྱུ་ནོར་མང་པོ་དང་ཉིད་ཀྱི་སྲས་མོ་གནང་ཞིང་། དེའི་ཕ་ཡི་ཁྱིམ་ལ་ཁྲལ་མི་འཕོག་པར་བྱ་ཞེས་པ་ཐོས་པས།
1SA 17:26 དཱ་བིད་ཀྱིས་རང་གི་གམ་དུ་ཡོད་པའི་མི་དེ་དག་ལ། ཕེ་ལེ་ཤེད་པ་བསད་ནས་ཡེས་ར་ཨེལ་གྱི་ངོ་ཚ་འདི་མེད་པར་གཏོང་མཁན་ལ་ཇི་ལྟར་བྱ་འོས། གཏན་དུ་གསོན་པོར་བཞུགས་པའི་དཀོན་མཆོག་ཁོང་གི་དམག་དཔུང་ལ་སྨད་པའི་ཕེ་ལེ་ཤེད་པ་མཚན་སྐྱི་མ་བཅད་པ་འདི་སུ་ཡིན་ཞེས་སྨྲས་པའི་ལན་དུ།
1SA 17:27 མི་རྣམས་ཀྱིས་སྔར་སྨྲས་པའི་གཏམ་བཞིན་ཁོ་ལ། ཕེ་ལེ་ཤེད་པ་གསོད་པའི་མི་ལ་འདི་དང་འདི་བྱའོ་ཞེས་སྨྲས་སོ། །
1SA 17:28 དཱ་བིད་ཀྱི་ཕུ་བོ་ཨེ་ལི་ཨབ་ཀྱིས་ཁོས་མི་རྣམས་དང་གཏམ་བྱེད་པ་ཐོས་པས། དཱ་བིད་ལ་ཁོང་ཁྲོ་ལངས་ནས། ཁྱོད་ཅིའི་ཕྱིར་མར་འོངས་པ་ཡིན། དབེན་སྟོང་དུ་ཡོད་པའི་ལུག་ཉུང་ཉུང་དེ་སུ་ལ་བཅོལ་ཡོད་དམ། ངས་ཁྱོད་ནི་ང་རྒྱལ་ཆེ་བ་དང་ཁྱོད་ཀྱིས་ངན་སེམས་ཅི་ལྟ་བུ་བཅངས་ཡོད་པ་ཤེས་ཏེ། དམག་འཁྲུག་མཐོང་བའི་ཆེད་དུ་ཁྱོད་མར་འོངས་པ་རེད་ཅེས་སྨྲས།
1SA 17:29 དེའི་ལན་དུ་དཱ་བིད་ཀྱིས། ད་ལྟ་ངས་ཅི་བྱས་སམ། སྐད་ཆ་ཚིག་གཅིག་ཀྱང་བརྗོད་མི་རུང་ངམ་ཞེས་སྨྲས་པ་དང་།
1SA 17:30 དེ་དང་བྲལ་ནས་མི་གཞན་སྐོར་ཞིག་ལ་སྔར་བཞིན་གཏམ་བྱས་པས། དེ་དག་གིས་སྔར་བཞིན་ལན་བཏབ་བོ། །
1SA 17:31 དཱ་བིད་ཀྱིས་སྨྲས་པའི་གཏམ་ཐོས་ནས་དེ་དག་གིས་སོ་ལོ་ལ་ཞུས་པས། དེས་ཁོ་རང་འབོད་པར་མི་ཞིག་མངགས།
1SA 17:32 དེ་ནས་དཱ་བིད་ཀྱིས་སོ་ལོ་ལ། མི་སུ་ཡིན་ཡང་སེམས་མ་ཕམ་ཞིག ཁྱེད་ཀྱི་ཞབས་ཕྱི་ང་རང་དེར་སོང་ནས་ཕེ་ལེ་ཤེད་པ་དེ་དང་འཐབ་པར་བྱ་ཞེས་ཞུས་པས།
1SA 17:33 སོ་ལོས་དཱ་བིད་ལ། ཁྱོད་ཕེ་ལེ་ཤེད་པ་དེ་དང་འཐབ་པའི་ཕྱིར་འགྲོ་མི་ནུས། ཁྱོད་ནི་ལོ་ན་གཞོན་ཞིང་། ཁོ་ནི་ཆུང་ངུ་ནས་དམག་རྩལ་ཅན་ཡིན་ནོ་ཞེས་སྨྲས་ནས།
1SA 17:34 དཱ་བིད་ཀྱིས་སོ་ལོ་ལ། ཁྱེད་ཀྱི་ཞབས་ཕྱི་བདག་གིས་ཕ་ཡི་ལུག་ཁྱུ་སྲུང་བའི་ཚེ། སེང་གེ་དང་དོམ་སོ་སོར་འོངས་ཏེ་ལུག་ཁྱུ་ལས་ལུ་གུ་ཁྱེར་ཐེངས་རེར།
1SA 17:35 བདག་ནི་རྗེས་སུ་དེད་ཅིང་དེར་བརྡུངས་ཏེ་གཅན་གཟན་དེའི་ཁ་ནས་ལུ་གུ་བསྐྱབས་པ་ཡིན། ཡང་གཅན་གཟན་དེ་བདག་གི་མདུན་དུ་ཀེར་གྱིས་ལངས་པས། བདག་གིས་དེའི་ཁ་སྤུ་ནས་བཟུང་ཞིང་བརྡུངས་ནས་བསད་པ་ཡིན།
1SA 17:36 ཁྱེད་ཀྱི་ཞབས་ཕྱི་བདག་གིས་སེང་གེ་དང་དོམ་གཉིས་བསད་པ་ལྟར། མཚན་སྐྱི་མ་བཅད་པའི་ཕེ་ལེ་ཤེད་པ་དེ་ཡང་དེ་དང་འདྲ་བར་འགྱུར། གང་ལ་ཞེ་ན། མི་དེས་གཏན་དུ་གསོན་པོར་བཞུགས་པའི་དཀོན་མཆོག་གི་དམག་དཔུང་ལ་སྨད་པས་སོ་ཞེས་སྨྲས།
1SA 17:37 ཡང་དཱ་བིད་ཀྱིས། དཀོན་མཆོག་ཡ་ཝཱེས་བདག་ནི་སེང་གེ་དང་དོམ་གཉིས་ཀྱི་ལག་ནས་བསྒྲལ་བ་ལྟར། ཕེ་ལེ་ཤེད་པ་འདིའི་ལག་ནས་ཀྱང་སྒྲོལ་བར་འགྱུར་ཞེས་ཞུས་པས། སོ་ལོས་དཱ་བིད་ལ། ད་སོང་ཞིག དཀོན་མཆོག་ཡ་ཝཱེ་ཁྱོད་དང་མཉམ་དུ་བཞུགས་པར་གྱུར་ཅིག་ཅེས་བསྐུལ་ནས།
1SA 17:38 སོ་ལོས་དཱ་བིད་ལ་རང་གི་གོས་བསྐོན་ཏེ། ལི་ཡི་རྨོག་མགོ་ལ་བཞག་ནས་ཁྲབ་ཀྱང་བསྐོན་ཏོ། །
1SA 17:39 དེ་ནས་དཱ་བིད་ཀྱིས་གོས་དེའི་སྟེང་དུ་རལ་གྲི་བཏེགས་ནས་འགྲོ་ཐུབ་མིན་ལ་བལྟས་ཙ་ན། སྔར་ནས་གྱོན་པར་གོམས་མེད་པས། དཱ་བིད་ཀྱིས་སོ་ལོ་ལ། སྔར་ནས་གྱོན་པར་གོམས་མེད་པས་ང་བགྲོད་པར་མི་ནུས་ཞེས་ཞུས་པས་དཱ་བིད་ཀྱིས་དེ་རྣམས་ཕུད་པ་རེད།
1SA 17:40 དེ་ནས་ཁོས་རང་གི་དབྱུག་པ་ལག་པར་བཟུང་ཞིང་། གྲམ་པ་ནས་རྡོ་འཇམ་པོ་ལྔ་བདམས་ཏེ། རང་ལ་ཡོད་པའི་ལུག་རྫིའི་བྲོ་ཁུག་གི་ནང་དུ་བཞག་པ་དང་ལག་ཏུ་འུར་ཆ་བཟུང་སྟེ་ཕེ་ལེ་ཤེད་པ་དང་ཉེ་བར་ཕྱིན།
1SA 17:41 ཕེ་ལེ་ཤེད་པ་ཡང་འོངས་ནས་དཱ་བིད་དང་ཉེ་བར་སླེབས་པ་དང་། ཕུབ་འཁུར་བའི་མི་དེ་ཁོའི་མདུན་དུ་སོང་།
1SA 17:42 ཕེ་ལེ་ཤེད་པས་ཕར་བལྟས་པའི་ཚེ། དཱ་བིད་ནི་བྱད་གཟུགས་ལེགས་ཤིང་ངོ་མདངས་དམར་བའི་གཞོན་ནུ་ཞིག་ཡིན་པ་མཐོང་བས་དེ་ལ་སྨད་པ་བཏང་།
1SA 17:43 དེ་ནས་ཕེ་ལེ་ཤེད་པས་དཱ་བིད་ལ། བེར་ཀ་ཁུར་ནས་ངའི་མདུན་དུ་འོང་དོན་ཅི་ཡིན། ང་ཁྱི་ཡིན་ནམ་ཞེས་སྨྲས་ཤིང་། ཕེ་ལེ་ཤེད་པས་རང་གི་ལྷའི་མིང་བརྗོད་ནས་དཱ་བིད་ལ་དམོད་མོ་བཏབ་པ་རེད།
1SA 17:44 དེ་ནས་ཕེ་ལེ་ཤེད་པས་དཱ་བིད་ལ། ངའི་མདུན་དུ་ཤོག་དང་། ངས་ཁྱོད་ཀྱི་ཤ་ནམ་མཁའི་བྱ་དང་ཐང་གི་གཅན་གཟན་རྣམས་ལ་གཏོང་ངོ་ཞེས་པའི་ལན་དུ།
1SA 17:45 དཱ་བིད་ཀྱིས་ཕེ་ལེ་ཤེད་པ་ལ། ཁྱོད་ནི་རལ་གྲི་དང་མདུང་རིང་ཐུང་ཐོགས་ནས་ངའི་རྩར་འོངས་པ་དང་། ང་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ། ཁྱོད་ཀྱིས་སྨད་པའི་ཡེས་ར་ཨེལ་གྱི་དམག་ཚོགས་ཀྱི་འགོ་འདྲེན་ལགས་པ་དཀོན་མཆོག་གི་མཚན་ལ་བརྟེན་ནས་ཁྱོད་ཀྱི་མདུན་དུ་འོངས་པ་ཡིན།
1SA 17:46 དེ་རིང་ཉིན་མོར་དཀོན་མཆོག་ཡ་ཝཱེས་ཁྱོད་ནི་ངའི་ལག་ཏུ་སྤྲད་པ་སྟེ། ངས་ཁྱོད་བསད་ནས་ཁྱོད་ཀྱི་མགོ་གཅོད་པར་བྱ། ཡང་ཕེ་ལེ་ཤེད་པའི་དམག་ཚོགས་ཀྱི་རོ་ཐམས་ཅད་དེ་རིང་ཉིན་མོར་ནམ་མཁའི་བྱ་དང་ས་གཞིའི་གཅན་གཟན་རྣམས་ལ་གཏོང་བར་བྱ། ཡེས་ར་ཨེལ་གྱི་ནང་དཀོན་མཆོག་ཅིག་ཡོད་པ་ས་གཞི་འདི་ཐམས་ཅད་ལ་མངོན་པར་འགྱུར།
1SA 17:47 ཡང་དཀོན་མཆོག་ཡ་ཝཱེའི་རྒྱལ་ཁ་ནི་རལ་གྲིའམ་མདུང་ལ་རག་མི་ལས་པ་ནི་འདི་རུ་འཛོམས་པའི་མི་ཚོགས་ཐམས་ཅད་ཀྱིས་ཤེས་པར་འགྱུར། འཐབ་འཁྲུག་གི་རྒྱལ་ཁ་འདི་དཀོན་མཆོག་ཡ་ཝཱེའི་ཡིན་པས། ཁོང་གིས་ཁྱོད་རྣམས་ང་ཚོའི་ལག་ཏུ་སྤྲོད་པར་འགྱུར་ཞེས་སྨྲས་པ་དང་།
1SA 17:48 ཕེ་ལེ་ཤེད་པ་ལངས་ནས་ཚུར་འོངས་ཏེ་དཱ་བིད་དང་ཉེ་བར་ཐུག་ལ་ཁད་དུ། དཱ་བིད་མྱུར་བར་ཕར་ཕེ་ལེ་ཤེད་པའི་ཕྱོགས་སུ་ཤོར་ཅིང་གཡུལ་སར་བརྒྱུགས་ནས།
1SA 17:49 རང་གི་བྲོ་ཁུག་ནང་དུ་ལག་པ་བཏང་ཞིང་རྡོ་བ་ཞིག་བླངས་ཏེ་འུར་ཆར་བཞག་སྟེ་བརྒྱབ་ནས་ཕེ་ལེ་ཤེད་པའི་དཔྲལ་བར་ཕོག་ཅིང་། རྡོ་དེ་དཔྲལ་བའི་ནང་དུ་ཟུག་པ་དང་ཕེ་ལེ་ཤེད་པ་ཁ་སྦུབ་ཏུ་འགྱེལ་ཏོ། །
1SA 17:50 དེ་ལྟར་དཱ་བིད་ཀྱིས་འུར་ཆ་དང་རྡོ་ཡིས་བརྒྱབ་ཅིང་ཁོ་རང་ཕེ་ལེ་ཤེད་པ་དེ་ལས་དཔའ་ཞིང་རྟུལ་ཕོད་ཆེ་བས་ཕེ་ལེ་ཤེད་པར་བརྡུངས་ཏེ་བསད་པ་དང་། དཱ་བིད་ཀྱི་ལག་ཏུ་རལ་གྲི་མེད་པ་རེད།
1SA 17:51 དཱ་བིད་རྒྱུག་སོང་ནས་ཕེ་ལེ་ཤེད་པ་དེའི་གམ་དུ་ལངས་ཏེ། དེའི་རལ་གྲི་ཤུབས་ནས་ཕྱུང་ཞིང་དེ་བསད་ནས་མགོ་བཅད། ཕེ་ལེ་ཤེད་པ་རྣམས་ཀྱིས་ཁོ་ཚོའི་གྱད་པ་དེ་ཤི་ཟིན་པ་མཐོང་བས་བྲོས་སོ། །
1SA 17:52 དེ་ནས་ཡེས་ར་ཨེལ་པ་རྣམས་དང་ཡ་ཧུ་དཱ་པ་རྣམས་ལངས་ནས་འབོད་སྐད་བསྒྲགས་ཤིང་། ལུང་པ་ཞིག་ དང་ཨེག་རོན་གྲོང་ཁྱེར་གྱི་རྒྱ་སྒོར་སླེབས་པའི་བར་དུ་ཕེ་ལེ་ཤེད་པའི་རྗེས་དེད། ཕེ་ལེ་ཤེད་པ་སྣད་པོ་རྣམས་ནི་ཤ་ཨ་ར་ཡིམ་ནས་གཱད་དང་ཨེག་རོན་བཅས་ཀྱི་བར་དུ་ལྷུང་ངོ་། །
1SA 17:53 དེ་ནས་ཡེས་ར་ཨེལ་པ་རྣམས་ཕེ་ལེ་ཤེད་པའི་རྗེས་དེད་ནས་ཕྱིར་ལོག་སྟེ། དེ་རྣམས་ཀྱི་དམག་སྒར་ཐམས་ཅད་བཤིག་ཅིང་ནོར་རྫས་ཁྱེར་བ་རེད།
1SA 17:54 དེ་ནས་དཱ་བིད་ཀྱིས་ཕེ་ལེ་ཤེད་པའི་མགོ་བླངས་ཏེ་ཡེ་རུ་སཱ་ལེམ་དུ་ཁྱེར་ཡང་དེའི་གོ་མཚོན་ནི་རང་གི་གུར་དུ་བཞག་གོ །
1SA 17:55 སྔར་སོ་ལོས་དཱ་བིད་ཕེ་ལེ་ཤེད་པ་དང་འགྲན་པའི་ཕྱིར་འགྲོ་བ་མཐོང་བའི་ཚེ། དམག་དཔོན་ཨབ་ནེར་ཞེས་པ་དེ་ལ། ཀྱེ་ཨབ་ནེར། གཞོན་ནུ་དེ་ནི་སུའི་བུ་ཡིན་ཞེས་དྲིས་པའི་ལན་དུ་ཨབ་ནེར་གྱིས། ཀྱེ་རྒྱལ་པོ་ལགས། ངས་ཁྱེད་ཀྱི་མདུན་དུ་དམ་བཅའ་བར་བྱ་སྟེ་ངས་གཏན་ནས་མི་ཤེས་ཞུས་པས།
1SA 17:56 རྒྱལ་པོས་གཞོན་ནུ་དེ་སུའི་བུ་ཡིན་པ་དྲིས་ཤིག་ཅེས་སྨྲས་པས།
1SA 17:57 དཱ་བིད་ཀྱིས་ཕེ་ལེ་ཤེད་པ་བསད་ནས་ཕྱིར་སླེབས་ཤིང་། ཁོའི་ལག་ཏུ་ཕེ་ལེ་ཤེད་པའི་མགོ་བཟུང་ཡོད་ལ། ཨབ་ནེར་གྱིས་དཱ་བིད་ཁྲིད་ནས་སོ་ལོའི་དྲུང་དུ་ཕྱིན།
1SA 17:58 དེ་ནས་སོ་ལོས་ཁོ་ལ། ཀྱེ་གཞོན་ནུ། ཁྱོད་སུའི་བུ་ཡིན་ནམ་ཞེས་པའི་ལན་དུ་དཱ་བིད་ཀྱིས། བདག་ནི་པེད་ལེ་ཧེམ་ནས་ཡིན་པའི་ཁྱེད་ཀྱི་ཞབས་ཕྱི་ཡེ་སེའི་བུ་ཡིན་ཞེས་ཞུས་སོ། །
1SA 18:1 དེ་ཡང་དཱ་བིད་ཀྱིས་སོ་ལོ་དང་གཏམ་སྨྲས་ཚར་བ་ན། སོ་ལོའི་སྲས་ཡོ་ནཱ་ཐན་གྱི་སེམས་ནི་དཱ་བིད་ཀྱི་སེམས་དང་འདྲིས་པ་དང་། ཡོ་ནཱ་ཐན་གྱིས་དཱ་བིད་ལ་རང་གི་སྲོག་དང་འདྲ་བར་བྱམས་པོ་བྱས།
1SA 18:2 ཉིན་དེ་ལ་སོ་ལོས་དཱ་བིད་རང་གི་ཞབས་ཕྱི་པར་བསྐོས་ཏེ་ཕ་གཞིས་སུ་ཕྱིར་ལོག་ཏུ་མ་བཅུག་པ་དང་།
1SA 18:3 ཡོ་ནཱ་ཐན་གྱིས་དཱ་བིད་ལ་རང་དང་འདྲ་བར་བྱམས་པས་ཁོ་དང་མཉམ་དུ་ཁ་ཆད་བཞག་ཅིང་།
1SA 18:4 ཡོ་ནཱ་ཐན་གྱིས་རང་གི་ཕྱི་གོས་དང་གོ་མཚོན་དང་རལ་གྲི་དང་གཞུ་དང་སྐ་རགས་བཅས་དཱ་བིད་ལ་སྤྲད།
1SA 18:5 སོ་ལོས་དཱ་བིད་གང་དུ་མངགས་ཀྱང་ཁོ་དེར་འགྲོ་ཞིང་བྱ་བ་ཐམས་ཅད་འཇོན་པས། སོ་ལོས་དེ་ནི་དམག་དཔུང་གི་འགོ་དཔོན་དུ་བསྐོས་ནས་འབངས་མི་ཐམས་ཅད་དང་སོ་ལོའི་བློན་འཁོར་རྣམས་དེའི་ཕྱིར་ཤིན་ཏུ་དགའ་བར་གྱུར།
1SA 18:6 ཡང་དཱ་བིད་ཀྱིས་ཕེ་ལེ་ཤེད་པ་དེ་བསད་ནས་འཁོར་དང་བཅས་པ་ཕྱིར་ལོག་པའི་ཚེ། རྒྱལ་པོ་སོ་ལོ་བསུ་བའི་ཕྱིར་ཡེས་ར་ཨེལ་གྱི་གྲོང་ཁྱེར་སོ་སོ་ནས་བུད་མེད་རྣམས་དགའ་དགའ་སྤྲོ་སྤྲོའི་ངང་གླུ་ལེན་གར་རྩེད་དང་སིལ་རྔ་བརྡུངས་པ་བཅས་རོལ་ཆ་གཞན་རྣམས་ཁུར་ནས་འོངས་ཏེ།
1SA 18:7 བུད་མེད་རྣམས་ཀྱིས་གར་འཆམ་བཞིན་འདི་ལྟར། སོ་ལོ་ཡིས་བསད་པ་སྟོང་ཕྲག་སྟེ། ། དཱ་བིད་ཀྱིས་བསད་པ་ཁྲི་ཕྲག་གོ ། ཅེས་གླུ་བླངས་སོ། །
1SA 18:8 དེ་ནས་སོ་ལོ་ཤིན་ཏུ་ཁྲོས་ཤིང་གླུ་དེ་ལ་མ་དགའ་བར་དཱ་བིད་ཀྱིས་མི་ཁྲི་ཕྲག་བསད་ཀྱང་ངས་སྟོང་ཕྲག་གཅིག་འབའ་ཞིག་བསད། དེ་བས་ལྷག་པ་ཞིག་ཅི་ལུས་ཏེ་རྒྱལ་སྲིད་འབའ་ཞིག་ལུས་ཞེས་སྨྲས།
1SA 18:9 ཉིན་དེ་ནས་བཟུང་སོ་ལོ་ནི་དཱ་བིད་ལ་ཕྲག་དོག་སྐྱེས་པ་རེད།
1SA 18:10 ཕྱི་ཉིན་ཞོགས་པར་དཀོན་མཆོག་གི་གམ་ནས་བྱུང་བའི་སེམས་ཉིད་ངན་པ་དེ་སོ་ལོའི་སྟེང་དུ་བབས་པས་ཁོས་ཁྱིམ་དུ་གང་བྱུང་སྨྲས། སྐབས་དེར་དཱ་བིད་ཀྱིས་ཉིན་བཞིན་སྒྲ་སྙན་དཀྲོལ་ཞིང་སོ་ལོའི་ལག་ཏུ་མདུང་ཡོད་པ་དང་།
1SA 18:11 སོ་ལོས་མདུང་དེ་གཡུགས་ནས་ངས་དཱ་བིད་གྱང་ངོར་སྦྱོར་བར་བྱ་བསམས་པ་ན། དཱ་བིད་ཐེངས་གཉིས་ལ་གཡོལ་བ་རེད།
1SA 18:12 དཀོན་མཆོག་ཡ་ཝཱེ་ནི་དཱ་བིད་དང་མཉམ་དུ་བཞུགས་ཤིང་སོ་ལོ་དང་ཁ་བྲལ་བས་སོ་ལོ་ཁོ་ལ་འཇིགས་ཏེ།
1SA 18:13 དཱ་བིད་རང་གི་དྲུང་ནས་བཏང་སྟེ་སྟོང་དཔོན་བྱེད་དུ་བཅུག་ཅིང་དེ་ནས་དཱ་བིད་ཀྱིས་མི་ཚོགས་ཁྲོད་དུ་འགྲོ་འོང་བྱས།
1SA 18:14 བྱ་བ་ཐམས་ཅད་ལམ་ལྷོང་བྱུང་། གང་ལ་ཞེ་ན། དཀོན་མཆོག་ཡ་ཝཱེ་ཁོ་དང་མཉམ་དུ་བཞུགས་པས་སོ། །
1SA 18:15 སོ་ལོས་ཁོའི་སྤྱོད་ཚུལ་ལས་ཁོ་ནི་ཤིན་ཏུ་བློ་རིག་ཅན་ཞིག་ཡིན་པ་ཤེས་ཏེ་འཇིགས་པ་རེད།
1SA 18:16 དཱ་བིད་ཀྱིས་ཡེས་ར་ཨེལ་པ་དང་ཡ་ཧུ་དཱ་པ་ཐམས་ཅད་ཁྲོད་དུ་འགྲོ་འོང་བྱས་པས་དེ་དག་གིས་ཁོ་གཅེས་སུ་བཟུང་ངོ་། །
1SA 18:17 དེ་ནས་སོ་ལོས་དཱ་བིད་ལ། ངས་བུ་མོ་ཆེ་བ་མེ་རཱབ་བྱ་བ་ནི་ཁྱོད་ཀྱི་ཆུང་མར་གཏོང་བར་བྱ། ཁྱོད་ནི་ང་ཡི་ཕྱིར་དུ་དཔའ་རྩལ་ཅན་ཡིན་ཏེ། དཀོན་མཆོག་ཡ་ཝཱེའི་དོན་དུ་འཐབ་འཛིང་བྱོས་ཤིག་ཅེས་སྨྲས་ཤིང་། སོ་ལོའི་སེམས་སུ་ང་རང་གི་ལག་པ་ཁོ་ལ་མི་འཕོག་པར་ཕེ་ལེ་ཤེད་པའི་ལག་པ་ཁོ་ལ་འཕོག་པར་གྱུར་ཅིག་ཅེས་དྲན་ནོ། །
1SA 18:18 ཡང་དཱ་བིད་གྱིས་སོ་ལོ་ལ། བདག་གི་གཉེན་དང་བདག་གི་མེས་པོའི་ཁྱིམ་རྒྱུད་ནི་ཡེས་ར་ཨེལ་གྱི་ཁྲོད་དུ་གོ་ཐོབ་ཅན་ཞིག་མིན་པས་བདག་རྒྱལ་པོའི་མག་པར་ཅི་ལྟར་འགྱུར་རམ་ཞེས་ཞུས།
1SA 18:19 ཡང་སོ་ལོའི་སྲས་མོ་མེ་རཱབ་ཅེས་པ་དཱ་བིད་ལ་ཆུང་མར་གཏོང་བའི་དུས་སུ་སླེབས་པའི་ཚེ། སྲས་མོ་དེ་ནི་མེ་ཧོ་ལད་པ་ཨད་རི་ཨེལ་བྱ་བ་དེ་ལ་ཆུང་མར་བཏང་ངོ་། །
1SA 18:20 ཡང་སོ་ལོའི་སྲས་མོ་མི་ཀལ་ནི་དཱ་བིད་ལ་ཆགས་སོ་ཞེས་པའི་གཏམ་སོ་ལོ་ལ་སྨྲས་པས་ཁོ་དགའ་སྟེ།
1SA 18:21 བུ་མོ་དེ་ཁོའི་ཕྱིར་རྙི་ལྟ་བུར་འགྱུར་ཡོང་བསམས་ནས་ཕེ་ལེ་ཤེད་པའི་ལག་པ་ཁོ་ལ་འཕོག་ཕྱིར་བུ་མོ་དེ་ཁོ་ལ་གཏོང་བར་བྱ་བསམས་པས། སོ་ལོས་དཱ་བིད་ལ་དེ་རིང་ཁྱོད་ལན་གཉིས་པར་ངའི་མག་པ་རུ་འགྱུར་ཞེས་སྨྲས་སོ། །
1SA 18:22 སོ་ལོས་རང་གི་བློན་འཁོར་རྣམས་ལ་བཀའ་གནང་སྟེ་ན་རེ། ཁྱོད་ཅག་གིས་ཟུར་དུ་དཱ་བིད་ལ་གཏམ་འདི་ལྟར་བྱོས་ཤིག རྒྱལ་པོ་ཁྱོད་ལ་དགའ་ཞིང་ཁོང་གི་བློན་འཁོར་ཐམས་ཅད་ཀྱང་ཁྱོད་ལ་ཆགས་པས། ད་ལྟ་རྒྱལ་པོའི་མག་པར་གྱུར་ཅིག་ཅེས་ཟེར་རུང་ཞེས་སྨྲས་པ་དང་།
1SA 18:23 སོ་ལོའི་བློན་འཁོར་རྣམས་ཀྱིས་དེ་བཞིན་དུ་དཱ་བིད་ཀྱི་རྣ་བར་གཏམ་རྣམས་སྨྲས་པས། དཱ་བིད་ཀྱིས་ཁྱོད་ཅག་གིས་རྒྱལ་པོའི་མག་པར་འགྱུར་བ་ནི་ལས་སླ་མོ་ཡིན་པར་འདོད་དམ། ང་ནི་དབུལ་ཞིང་མཚན་སྙན་གྲགས་མེད་པ་ཞིག་ཡིན་ཞེས་སྨྲས་ཤིང་།
1SA 18:24 བློན་འཁོར་རྣམས་ཀྱིས་སོ་ལོ་ལ་དཱ་བིད་ཀྱིས་སྨྲས་པ་ལྟར་བཤད་དོ། །
1SA 18:25 སོ་ལོ་ན་རེ། ཁྱོད་ཅག་གིས་དཱ་བིད་ལ་འདི་ལྟར། རྒྱལ་པོ་ནི་རྒྱུ་ནོར་ལ་མི་དགའ་བར་རང་གི་དགྲ་བོ་ལ་ཡ་ལན་སློག་པའི་ཕྱིར་ཕེ་ལེ་ཤེད་པའི་མཚན་སྐྱི་བརྒྱ་ལ་དགའ་བ་རེད་སྨྲོས་ཤིག་ཅེས་སྨྲས། མ་གཞི་སོ་ལོས་དཱ་བིད་ནི་ཕེ་ལེ་ཤེད་པའི་ལག་ནས་འཆི་བར་འགྱུར་རོ་བསམས་པ་རེད།
1SA 18:26 གཏམ་དེ་ནི་བློན་འཁོར་རྣམས་ཀྱིས་དཱ་བིད་ལ་སྨྲས་པས་ཁོ་རྒྱལ་པོའི་མག་པར་འགྱུར་བ་ལ་ཤིན་ཏུ་དགའ་བར་གྱུར། གཏན་འཁེལ་གྱི་ཉིན་མོར་མ་སླེབས་པས།
1SA 18:27 དཱ་བིད་ཁོ་རང་དང་ཁོའི་མི་རྣམས་ལངས་ནས་སོང་བ་དང་ཕེ་ལེ་ཤེད་པ་མི་ཉིས་བརྒྱ་བསད་དེ་ཁོ་ཚོའི་མཚན་སྐྱི་བཅད་ནས། དཱ་བིད་རྒྱལ་པོའི་མག་པར་འགྱུར་ཕྱིར་ཁོས་དེ་རྣམས་ཁ་ཚང་རྒྱལ་པོ་ལ་ཕུལ་ཞིང་། སོ་ལོས་རང་གི་སྲས་མོ་མི་ཀལ་ཞེས་པ་ཁོ་ལ་ཆུང་མར་བཏང་ངོ་། །
1SA 18:28 ཡང་སོ་ལོས་དཀོན་མཆོག་ཡ་ཝཱེ་ནི་དཱ་བིད་དང་མཉམ་དུ་བཞུགས་ཡོད་པ་དང་རང་གི་སྲས་མོ་མི་ཀལ་ཡང་དཱ་བིད་ལ་ཆགས་པ་མཐོང་སྟེ།
1SA 18:29 སོ་ལོ་ལྷག་པར་དཱ་བིད་ལ་འཇིགས་ཏེ་རྟག་ཏུ་དཱ་བིད་ལ་གནོད་པ་བྱས་སོ། །
1SA 18:30 དེ་ནས་ཕེ་ལེ་ཤེད་པའི་རྗེ་བོ་རྣམས་སླེབས་པ་དང་དེ་དག་ནམ་འོངས་ན་ཡང་སོ་ལོའི་བློན་འཁོར་ཐམས་ཅད་དང་བསྡུར་ན་དཱ་བིད་ཀྱིས་བྱ་བ་རྣམས་ལེགས་པོར་བསྒྲུབས་པས། ཁོ་མཚན་སྙན་གྲགས་ཅན་དུ་གྱུར་ཏོ། །
1SA 19:1 དེ་ནས་སོ་ལོས་ཪང་གི་སྲས་ཡོ་ནཱ་ཐན་དང་བློན་འཁོར་ཐམས་ཅད་ལ་དཱ་བིད་གསོད་དགོས་པར་སྨྲས། ཡིན་ནའང་ཡོ་ནཱ་ཐན་ནི་དཱ་བིད་ལ་ཤིན་ཏུ་དགའ་བས།
1SA 19:2 ཡོ་ནཱ་ཐན་གྱིས་དཱ་བིད་ལ་སྨྲས་ཏེ་ན་རེ། ངའི་ཕ་སོ་ལོས་ཁྱོད་གསོད་འདོད་པས། སང་ཉིན་ཞོགས་པར་ཁྱོད་ཀྱིས་དོགས་ཟོན་བྱེད་དགོས་ཤིང་། མིས་མི་ཚོར་བའི་གནས་ཤིག་ཏུ་ཡིབ་པར་གྱིས་དང་།
1SA 19:3 ང་ནི་ཁྱོད་ཡིབ་སའི་ས་སྟོང་དུ་རང་གི་ཕ་ཡི་གཞོགས་སུ་འདུག་ཅིང་། ཕ་དང་མཉམ་དུ་ཁྱོད་ཀྱི་དོན་དུ་གཏམ་བྱེད་པ་དང་། དེ་ནས་ཅི་མཐོང་བ་དེ་ནི་ངས་ཁྱོད་ལ་འཆད་པར་བྱ་ཞེས་སྨྲས།
1SA 19:4 དེ་ནས་ཡོ་ནཱ་ཐན་གྱིས་རང་གི་ཕ་སོ་ལོའི་དྲུང་དུ་དཱ་བིད་ཀྱི་དོན་དུ་གཏམ་བཟང་པོ་སྨྲས་པ་ནི། རྒྱལ་པོས་རང་ཉིད་ཀྱི་ཞབས་ཕྱི་དཱ་བིད་ལ་འགལ་བའི་སྡིག་པ་མི་བྱེད་པར་མཛོད། གང་ལ་ཞེ་ན། ཁོས་ཁྱེད་ལ་འགལ་བའི་སྡིག་པ་གང་ཡང་མ་བྱས་ཤིང་། ཁོས་ཅི་བྱས་ཐམས་ཅད་ཁྱེད་ལ་ཕན་པ་ཡིན།
1SA 19:5 ཁོས་རང་སྲོག་འབེན་ལ་བཞག་ནས་ཕེ་ལེ་ཤེད་པ་དེ་བསད་པར་མ་ཟད། དཀོན་མཆོག་ཡ་ཝཱེས་ཡེས་ར་ཨེལ་པ་ཐམས་ཅད་ཀྱི་དོན་དུ་སྐྱབས་ཆེན་པོ་ཞིག་མཛད་ཅིང་། ཁྱེད་ཀྱིས་དེ་གཟིགས་ནས་དགའ་བར་གྱུར་ཏོ། །ཅིའི་ཕྱིར་མི་ཉེས་མེད་ལ་ཁྲག་བཞུར་དུ་འཇུག་གམ། དཱ་བིད་དོན་མེད་དུ་ཅི་ལ་གསོད་ཅེས་ཞུས་པས།
1SA 19:6 སོ་ལོས་ཡོ་ནཱ་ཐན་གྱི་གཏམ་དེ་ལ་མཉན་ནས། གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ཏེ། དཱ་བིད་མི་གསོད་ཁོ་ཐག་ཡིན་ཞེས་མནའ་བསྐྱལ་བ་རེད།
1SA 19:7 ཡང་ཡོ་ནཱ་ཐན་གྱིས་དཱ་བིད་བོས་ནས་དོན་དེ་ཁོ་ལ་སྨྲས་ཤིང་སོ་ལོའི་དྲུང་དུ་ཁྲིད་ནས། དཱ་བིད་སྔར་བཞིན་སོ་ལོའི་དྲུང་དུ་གནས་སོ། །
1SA 19:8 དེའི་རྗེས་སུ་ཡང་འཐབ་འཁྲུག་ཅིག་བྱུང་བས། དཱ་བིད་སོང་སྟེ་ཕེ་ལེ་ཤེད་པ་རྣམས་ལ་འཐབ་འཛིང་བྱས་ཤིང་། གསོད་གཅོད་དྲག་པོས་བཏུལ་ནས་དེ་དག་ཁོའི་དྲུང་ནས་བྲོས་པ་རེད།
1SA 19:9 ཡང་སོ་ལོས་རང་གི་མདུང་ལག་ཏུ་ཁྱེར་ནས་ཁང་པའི་ནང་བསྡད་ཡོད་པ་ལ། དཀོན་མཆོག་ཡ་ཝཱེའི་གམ་ནས་བྱུང་བའི་སེམས་ཉིད་ངན་པ་སོ་ལོའི་སྟེང་དུ་བབས་ཤིང་དཱ་བིད་ཀྱིས་སྒྲ་སྙན་དཀྲོལ།
1SA 19:10 ཁོས་དཱ་བིད་མདུང་མགོར་བླངས་ཏེ་གྱང་ངོར་སྦྱོར་བའི་གོ་སྐབས་བཙལ་ཡང་། དཱ་བིད་ནི་སོ་ལོའི་དྲུང་ནས་བྱོལ་བ་དང་མདུང་རྩིག་པའི་ནང་ཟུག་ཅིང་། ཡང་མཚན་མོ་དེར་དཱ་བིད་བྲོས་ནས་ཐར་བ་རེད།
1SA 19:11 དེ་ནས་སོ་ལོས་དམག་འགའ་དཱ་བིད་ཀྱི་ཁྱིམ་དུ་མངགས་ཏེ་ཁོ་བསྲུངས་པ་དང་། དེ་ནི་ཕྱི་ཉིན་ཞོགས་པར་ཁོ་གསོད་པའི་ཕྱིར་རོ། །དཱ་བིད་ཀྱི་ཆུང་མ་མི་ཀལ་གྱིས་ཁོ་ལ། མཚན་མོ་འདི་ལ་ཁྱོད་ཀྱིས་རང་གི་སྲོག་སྐྱོབ་པར་མི་བྱེད་ན་སང་ཉིན་གསོད་པར་འགྱུར་ཞེས་སྨྲས་པ་དང་།
1SA 19:12 མི་ཀལ་གྱིས་དཱ་བིད་སྒེའུ་ཁུང་ནས་ཕབ་སྟེ་ཁོ་བྲོས་སོང་བས་སྲོག་ཐར་བའོ། །
1SA 19:13 མི་ཀལ་གྱིས་ཁྱིམ་གྱི་སྐུ་འདྲ་དེ་བླངས་ནས་མལ་སའི་ནང་དུ་བཞག་པ་དང་། ར་སྤུས་བཟོས་པའི་སྔས་འབོལ་ཞིག་དེའི་མགོ་འོག་ཏུ་བཞག་ནས་གྱོན་གོས་ཀྱིས་བཀབ།
1SA 19:14 དེ་ནས་སོ་ལོས་དམག་རྣམས་དཱ་བིད་འཛིན་པར་མངགས་པས། ཆུང་མས་ཁོ་རང་ན་བཞིན་འདུག་ཅེས་སྨྲས།
1SA 19:15 སོ་ལོས་དཱ་བིད་ལ་བལྟ་རུ་ཡང་བསྐྱར་དམག་མངགས་ཤིང་། ངས་དེ་གསོད་པའི་ཕྱིར་ཁོ་མལ་ས་དང་བཅས་ངའི་མདུན་དུ་ཁྱེར་ཤོག་ཅིག་སྨྲས་སོ། །
1SA 19:16 དེ་ནས་དམག་རྣམས་སླེབས་ཏེ་བལྟས་པས། མལ་སའི་ནང་གི་སྐུ་འདྲ་དེའི་མགོ་འོག་ཏུ་ར་སྤུས་བཟོས་པའི་སྔས་འབོལ་ཡོད་པ་ཡིན།
1SA 19:17 དེ་ནས་སོ་ལོས་མི་ཀལ་ལ། ངའི་དགྲ་བོ་དེ་ཐར་བའི་ཕྱིར་ཁྱོད་ཀྱིས་ཁོ་ལམ་དུ་བཅུག་པ་སྟེ། ང་ལ་བསླུ་བྲིད་བཏང་བ་ཅི་ཡིན་ནམ་སྨྲས་པས། མི་ཀལ་གྱིས་ཁོས་ང་ལ། ང་འགྲོ་རུ་ཆུག་དང་། དེ་མིན་ཚེ་ངས་ཁྱོད་གསོད་ངེས་ཟེར་ཞེས་ཞུས་སོ། །
1SA 19:18 ཡང་དཱ་བིད་བྲོས་ཏེ་སྲོག་ཐར་ནས། རཱ་མ་ཡུལ་དུ་སཱ་མུ་ཨེལ་གྱི་དྲུང་དུ་སླེབས་ཏེ་སོ་ལོས་ཁོ་ལ་ཅི་བྱས་པ་ཐམས་ཅད་སྨྲས། དེ་ནས་ཁོ་དང་སཱ་མུ་ཨེལ་གཉིས་ཀ་ནཱ་ཡོད་དུ་སོང་སྟེ་བསྡད་པ་རེད།
1SA 19:19 དེ་ནས་སོ་ལོ་ལ། ཀྱེ་ཧོ། དཱ་བིད་རཱ་མ་ཡུལ་གྱི་ནཱ་ཡོད་དུ་འདུག་ཅེས་པའི་གཏམ་སྨྲས་པས།
1SA 19:20 སོ་ལོས་དཱ་བིད་འཛིན་པའི་ཕྱིར་དམག་མངགས་ཤིང་། མི་དེ་རྣམས་ཀྱིས། ལུང་སྟོན་པའི་ཚོགས་ཀྱིས་ལུང་བསྟན་པ་དང་། དེ་དག་གི་ཁྲོད་དུ་སཱ་མུ་ཨེལ་གྱིས་འགོ་བྱེད་ཀྱིན་ཡོད་པ་མཐོང་བའི་ཚེ། སོ་ལོའི་དམག་རྣམས་ལ་དཀོན་མཆོག་གི་ཐུགས་ཉིད་བབས་པ་དང་ལུང་བསྟན་ཏོ། །
1SA 19:21 བྱུང་ཚུལ་དེ་ནི་སོ་ལོ་ལ་སྨྲས་པས། དམག་གཞན་དག་མངགས་ནས་དེ་དག་གིས་ཀྱང་ལུང་བསྟན་ཞིང་། ལན་གསུམ་པར་སོ་ལོས་དམག་མངགས་པ་དང་དེ་དག་གིས་ཀྱང་ལུང་བསྟན་པ་རེད།
1SA 19:22 དེ་ནས་སོ་ལོ་རང་ཉིད་ཀྱང་རཱ་མ་ཡུལ་དུ་སོང་སྟེ། སེ་གུ་རུ་ཡོད་པའི་ཆུ་དོང་ཆེན་པོའི་རྩར་སླེབས་ནས། སཱ་མུ་ཨེལ་དང་དཱ་བིད་གཉིས་གང་དུ་འདུག་ཅེས་དྲིས་པས། མི་ཞིག་གིས་ལྟོས་དང་དེ་གཉིས་རཱ་མ་ཡུལ་གྱི་ནཱ་ཡོད་དུ་འདུག་ཅེས་ཞུས།
1SA 19:23 དེ་ནས་ཁོ་རང་རཱ་མ་ཡུལ་གྱི་ནཱ་ཡོད་དུ་འགྲོ་བའི་ཚེ། དཀོན་མཆོག་གི་ཐུགས་ཉིད་ཁོ་ལ་བབས་ནས་རཱ་མ་ཡུལ་གྱི་ནཱ་ཡོད་དུ་སླེབས་པའི་བར་དུ་ལུང་བསྟན་ཏེ་སོང་བ་དང་།
1SA 19:24 དེ་ནས་གོས་ཕུད་ནས་སཱ་མུ་ཨེལ་གྱི་དྲུང་དུ་ལུང་བསྟན་ཏེ་ཉིན་ཞག་གཅིག་ལ་གཅེར་བུར་ཉལ་ནས་བསྡད། དེའི་ཕྱིར་མི་ཐམས་ཅད་ཀྱིས་སོ་ལོ་ཡང་ལུང་སྟོན་པའི་ཁྲོད་དུ་འདུག་གམ་ཞེས་སྨྲས་སོ། །
1SA 20:1 དེ་ནས་ཡང་དཱ་བིད་ནི་རཱ་མ་ཡུལ་གྱི་ནཱ་ཡོད་ནས་བྲོས་ཤིང་ཡོ་ནཱ་ཐན་གྱི་དྲུང་དུ་འོངས་ཏེ། ངས་ཅི་བྱས་པ་ཡིན་ནམ། ངའི་སྐྱོན་ཅི་ཡིན་ནམ། ངས་ཁྱེད་ཀྱི་ཕ་ཡི་དྲུང་དུ་སྡིག་ཉེས་ཅི་བྱས་པ་ཡིན། དེས་ངའི་སྲོག་ལ་སྙེག་གོ་ཞེས་སྨྲས་པས།
1SA 20:2 དེས་ནི་དེ་ལྟར་མིན་ཏེ། ཁྱེད་འཆི་བར་མི་འགྱུར། ལྟོས་ཤིག བྱ་བ་ཆེ་ཆུང་གང་ཡིན་ཡང་ང་ལ་མ་བཤད་སྔོན་དུ་ངས་ཕ་ཡིས་མི་བྱའོ། །ཁྱེད་གསོད་འདོད་པའི་བྱ་བ་དེ་ངའི་ཕ་ཡིས་ང་ལ་ཅིའི་ཕྱིར་སྦ་བར་བྱའམ། དེ་ལྟར་མི་འོང་ངོ་ཞེས་སྨྲས།
1SA 20:3 དེ་ནས་དཱ་བིད་ཀྱིས་ཡང་མནའ་བསྐྱལ་ནས་དེ་ལ། ང་ལ་ཁྱེད་ཀྱི་སྙིང་རྗེ་ཐོབ་ཡོད་པ་ཁྱེད་ཀྱི་ཕ་ཡིས་ལེགས་པར་ཤེས་པས། ཡོ་ནཱ་ཐན་གྱི་སེམས་མི་འཁྲུག་པའི་ཕྱིར་དུ་འདི་ནི་ཤེས་སུ་མ་བཅུག་ན་ལེགས་སྙམ་པ་རེད། ངས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་འཛུགས་ཤིང་ཁྱེད་རང་ཡང་དཔང་དུ་བཙུགས་པ་ཡིན་ཏེ། ང་དང་འཆི་བ་གཉིས་ཀྱི་བར་དུ་གོམ་གང་མ་གཏོགས་མེད་ཅེས་པའི་ལན་དུ།
1SA 20:4 ཡོ་ནཱ་ཐན་གྱིས་དཱ་བིད་ལ། ཁྱེད་ཀྱི་སེམས་ནི་གང་ལ་དགའ་ན་ཡང་དེ་ནི་ངས་ཁྱེད་ཀྱི་དོན་དུ་བྱའོ་ཞེས་སྨྲས་པར།
1SA 20:5 དཱ་བིད་ཀྱིས་ཡོ་ནཱ་ཐན་ལ། ཀྱེ་ཧོ། སང་ཉིན་ཚེས་གཅིག་ཡིན་པས། ངས་རྒྱལ་པོ་དང་མཉམ་དུ་ཁ་ཟས་ལ་རོལ་དགོས། ང་ས་སྟོང་དུ་འགྲོ་རུ་ཆུག མཚན་མོ་གསུམ་པའི་བར་དུ་ཡིབ་ནས་འདུག་པར་བྱ།
1SA 20:6 ཁྱེད་ཀྱི་ཕ་ཡིས་ང་བཙལ་ན། ཁྱེད་ཀྱིས་དཱ་བིད་རང་གི་གྲོང་རྡལ་པེད་ལེ་ཧེམ་དུ་འགྲོ་བའི་ཕྱིར་ང་ནས་དགོངས་པ་ཞུས་སོང་། ཁོའི་རྒྱུད་ཀྱིས་དེ་རུ་ལོ་རེའི་མཆོད་པ་འབུལ་བར་བྱེད་ཅེས་སྨྲོས་ཤིག
1SA 20:7 གལ་ཏེ་ཁོང་གིས་ལེགས་སོ་སྨྲས་ན། ཁྱེད་ཀྱི་ཞབས་ཕྱི་བདག་ལ་ཞི་བདེ་འབྱུང་བར་འགྱུར། གལ་ཏེ་ཁོང་ཐུགས་ཁྲོས་ན། བདག་ལ་ལས་ངན་པ་བྱེད་པར་སེམས་ཐག་བཅད་པ་ཁྱེད་ཀྱིས་ཤེས་པར་འགྱུར།
1SA 20:8 ཁྱེད་ཀྱིས་རང་གི་ཞབས་ཕྱི་བདག་ལ་དཀོན་མཆོག་ཡ་ཝཱེའི་དྲུང་དུ་ཁ་ཆད་བཞག་པ་བཞིན་ད་ལྟ་ཡང་བྱམས་སྐྱོང་མཛོད་ཅིག བདག་གི་ནང་དུ་སྡིག་ཉེས་ཡོད་ན་ཁྱེད་ཀྱིས་བདག་སོད་ཅིག བདག་ནི་ཅིའི་ཕྱིར་ཁྱེད་ཀྱི་ཕ་ཡི་དྲུང་དུ་འཁྲིད་པར་བྱའམ་ཞེས་ཞུས་པ་ན།
1SA 20:9 ཡོ་ནཱ་ཐན་གྱིས། དེ་འདྲ་དཔེ་མི་སྲིད། ངའི་ཕ་ཡིས་ཁྱེད་ལ་ངན་བྱེད་ཐག་ཆོད་ཡིན་པ་རྟོགས་ན་ངས་ཁྱེད་ལ་ཅིའི་ཕྱིར་མི་བཤད་སྨྲས་པར།
1SA 20:10 དཱ་བིད་ཀྱིས་ཡོ་ནཱ་ཐན་ལ། གལ་ཏེ་ཁྱེད་ཀྱི་ཕ་ཡིས་ཁྱེད་ལ་ལན་དྲག་པོ་ཞིག་གཏོང་ན་སུས་ང་ལ་སྨྲའམ་ཞེས་ཞུས་པས།
1SA 20:11 ཡོ་ནཱ་ཐན་གྱིས་དཱ་བིད་ལ་ཤོག་དང་ངེད་གཉིས་ས་སྟོང་དེ་རུ་འགྲོ་བར་བྱ་ཞེས་སྨྲས་ནས་ཁོ་གཉིས་དེ་རུ་སོང་།
1SA 20:12 ཡོ་ནཱ་ཐན་གྱིས་དཱ་བིད་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་དཔང་པོ་མཛད་པར་ཤོག སང་ཉིན་ནམ་ཡང་ན་གནངས་ཉིན་ཆུ་ཚོད་འདི་ལ་ངས་རང་གི་ཕ་ཡི་བསམ་ཚུལ་ལ་བརྟག་པར་བྱ་སྟེ། ལྟོས་དང་། གལ་ཏེ་དཱ་བིད་ཁྱེད་ཀྱི་དོན་དུ་བཟང་པོ་ཞིག་འབྱུང་ན། ངས་བང་ཆེན་མངགས་ཏེ་ཁྱེད་ལ་ཅིའི་ཕྱིར་མི་བརྗོད།
1SA 20:13 གལ་ཏེ་ངའི་ཕ་ཡིས་ཁྱེད་ལ་ངན་བྱེད་འདོད་པ་ཡིན་ན། དེ་ངས་ཁྱེད་ལ་ཅིས་ཀྱང་བརྗོད་ཡོང་། ངས་ཁྱེད་རང་བདེ་བར་ཕར་འགྲོ་རུ་བཅུག་ཆོག གལ་ཏེ་དེ་ལྟར་མ་བྱས་ན། དཀོན་མཆོག་ཡ་ཝཱེས་ཡོ་ནཱ་ཐན་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག དེར་མ་ཟད། སྔར་དཀོན་མཆོག་ཡ་ཝཱེ་ནི་ངའི་ཕ་དང་མཉམ་དུ་བཞུགས་པ་ལྟར་ཁྱེད་དང་མཉམ་དུ་བཞུགས་པར་སྨོན།
1SA 20:14 ང་ནི་འཆི་བར་མི་འགྱུར་བའི་ཕྱིར། ང་གསོན་པའི་སྐབས་སུ་ཁྱེད་ཀྱིས་ང་ལ་དཀོན་མཆོག་ཡ་ཝཱེའི་ཐུགས་རྗེ་སྟོན་རོགས།
1SA 20:15 དཀོན་མཆོག་ཡ་ཝཱེས་དཱ་བིད་ཀྱི་དགྲ་བོ་རེ་རེ་ས་གཞི་ནས་མེད་པར་མཛད་པའི་དུས་སུ་ཁྱེད་ཀྱི་སྙིང་རྗེ་ངའི་ཁྱིམ་རྒྱུད་དང་གཏན་ནས་མི་འབྲལ་བར་མཛོད་ཅེས་སྨྲས་ནས།
1SA 20:16 ཡོ་ནཱ་ཐན་གྱིས་དཱ་བིད་ཀྱི་ཁྱིམ་རྒྱུད་བར་ཁ་ཆད་བཞག་ཅིང་། དཀོན་མཆོག་ཡ་ཝཱེས་དཱ་བིད་ཀྱི་དགྲ་བོ་བརྒྱུད་ནས་ཁ་ཆད་དང་འགལ་བའི་ཉེས་པར་ལན་འཇལ་བར་ཤོག་ཅེས་སྨྲས་པ་དང་།
1SA 20:17 ཡོ་ནཱ་ཐན་གྱིས་རང་གི་སྲོག་ལ་གཅེས་པ་བཞིན་དཱ་བིད་ལ་གཅེས་པས། དཱ་བིད་ཀྱིས་ཁོ་ལ་ཡང་བསྐྱར་མནའ་བསྐྱལ་དུ་བཅུག་གོ །
1SA 20:18 དེ་ནས་ཡོ་ནཱ་ཐན་གྱིས་ཁོ་ལ། སང་ཉིན་ཚེས་གཅིག་ཡིན་ཏེ། ཁྱེད་ཀྱི་འདུག་གནས་སྟོང་བ་ཡིན་ན་ཁྱེད་མེད་པ་རྟོགས་པར་འགྱུར།
1SA 20:19 དེ་ནས་ཉིན་གསུམ་པར་ཁྱེད་མྱུར་དུ་སྔར་དོན་རྐྱེན་འབྱུང་བའི་ཉིན་མོར་གང་དུ་ཡིབ་ས་དེར་སོང་སྟེ། ཨེ་ཟེལ་བྱ་བའི་རྡོ་ཕ་བོང་གི་རྩར་སྒུགས་དང་།
1SA 20:20 ངས་འབེན་ལ་འཕེན་པ་ལྟར་ཕ་བོང་དེའི་ཕྱོགས་སུ་མདའ་གསུམ་འཕེན་པར་བྱ།
1SA 20:21 དེ་ནས་ངས་གཞོན་ནུ་ཞིག་མངགས་ནས་དེ་ལ། མདའ་འཚོལ་རོགས་ཟེར་བར་བྱ། གལ་ཏེ་ངས་གཞོན་ནུ་ལ། ལྟོས་དང་། མདའ་ཁྱོད་ཀྱི་རྒྱབ་ཏུ་འདུག ཁྱོད་ཀྱིས་དེ་བླངས་ནས་འཁྱེར་ཤོག་ཅེས་བསྐུལ་ན་ཞི་བདེ་ཡོད་པས་ཁྱེད་འོང་ཆོག གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་ངས་ཁྱེད་ལ་གནོད་པ་ཅི་ཡང་མེད་ཅེས་སྨྲ་བ་ཡིན།
1SA 20:22 གལ་ཏེ་ངས་གཞོན་ནུ་ལ། ལྟོས་དང་། མདའ་ཁྱོད་ཀྱི་མདུན་དུ་འདུག་ཅེས་བསྐུལ་ན། དཀོན་མཆོག་ཡ་ཝཱེས་ཁྱེད་ཡུལ་གཞན་དུ་མངགས་པས་ཁྱེད་སོང་ཞིག
1SA 20:23 ཡང་ང་དང་ཁྱེད་གཉིས་ཀྱིས་གང་སྨྲས་པའི་དཔང་པོར་དཀོན་མཆོག་ཡ་ཝཱེ་ཇི་སྲིད་བར་དུ་བཞུགས་པ་ཡིན་ཞེས་སྨྲས་སོ། །
1SA 20:24 དེ་ནས་དཱ་བིད་ས་སྟོང་དེ་རུ་ཡིབ་ནས་བསྡད་པ་དང་། ཡང་ཚེས་གཅིག་གི་ཉིན་མོ་སླེབས་པའི་ཚེ་རྒྱལ་པོ་གསོལ་སྟོན་དུ་ཕེབས།
1SA 20:25 ཡང་རྒྱལ་པོ་གོམས་སྲོལ་བཞིན་གྱང་རྩར་རང་གི་ཁྲི་སྟེང་ལ་བསྡད་དེ། ཡོ་ནཱ་ཐན་རྒྱལ་པོ་དང་ཁ་གཏད་དུ་ཨབ་ནེར་རྒྱལ་པོའི་གམ་དུ་བསྡད། ཏག་ཏག་དཱ་བིད་ཀྱི་འདུག་གནས་སྟོང་བར་ལུས་པ་རེད།
1SA 20:26 སོ་ལོས་ཁོ་ལ་ཕལ་ཆེར་དོན་ཞིག་བྱུང་བས་མི་གཙང་བར་གྱུར་ཡོད་ངེས་བསམས་པས་ཉིན་དེར་ཅི་ཡང་མ་སྨྲས་སོ། །
1SA 20:27 ཚེས་གཉིས་པར། དཱ་བིད་ཀྱི་འདུག་གནས་ཡང་སྟོང་བ་ཡིན་པས། སོ་ལོས་ཉིད་ཀྱི་སྲས་ཡོ་ནཱ་ཐན་ལ། ཡེ་སེའི་བུ་ནི་ཁ་ཟས་སྤྱོད་དུ་མདང་ཡང་མ་འོངས། དེ་རིང་ཡང་མི་འོང་བ་ཅི་ཡིན་ཞེས་དྲིས་པའི་ལན་དུ།
1SA 20:28 ཡོ་ནཱ་ཐན་གྱིས་སོ་ལོ་ལ། དཱ་བིད་ཀྱིས་པེད་ལེ་ཧེམ་དུ་འགྲོ་བའི་ཕྱིར་ང་ནས་དགོངས་པ་ཞུས་ཤིང་།
1SA 20:29 ཁོས་ང་ལ། ང་འགྲོ་བར་གནོངས་ཤིག ངའི་ནང་མིས་གྲོང་རྡལ་དེ་རུ་མཆོད་པ་འབུལ་བཞིན་ཡོད་པས་ངའི་ཕུ་བོས་དེ་རུ་ཤོག་ཅེས་སྨྲས་བྱུང་། ང་ལ་ཁྱེད་ཀྱི་སྤྱན་དྲུང་དུ་ཐུགས་རྗེ་ཐོབ་པ་ཡིན་ན། ང་དེ་རུ་སོང་སྟེ་རང་གི་སྤུན་རྣམས་ལ་བལྟ་བར་གནོངས་ཤིག་ཅེས་ཞུས་པས། ཁོ་རྒྱལ་པོའི་གསོལ་ལྕོག་གི་གམ་དུ་མ་འོངས་ཞེས་སྨྲས་པ་ན།
1SA 20:30 སོ་ལོ་ནི་ཡོ་ནཱ་ཐན་གྱི་སྟེང་དུ་ཁོང་ཁྲོ་ཆེན་པོ་ལངས་ནས། ཁོས་དེ་ལ་ཀྱེ་ངན་རེངས་ངོ་ལོག་གི་བུད་མེད་ཀྱི་བུ་ཁྱོད། ངོ་ཚ་མེད་པ་ཁྱོད་ཀྱི་མ་དང་འདྲ་པོ་རེད། དེའི་རྐྱེན་གྱིས་ཁྱོད་ཀྱིས་ཡེ་སེ་ཡི་བུ་དེ་བདམས་པ་ངས་མི་ཤེས་སམ།
1SA 20:31 ཡེ་སེའི་བུ་དེ་ནི་ས་གཞི་རུ་ཉིན་གཅིག་ལ་གསོན་ནའང་། ཁྱོད་དང་ཁྱོད་ཀྱི་རྒྱལ་ཁབ་བརྟན་པོར་ལུས་པར་མི་འགྱུར། དེའི་ཕྱིར་བང་ཆེན་ཐོངས་ལ་ཁོ་ངའི་མདུན་དུ་འཁྲིད་ཤོག ཁོ་ནི་ཅི་ནས་ཀྱང་འཆི་འོས་ཞེས་སྨྲས་པའི་ལན་དུ།
1SA 20:32 ཡོ་ནཱ་ཐན་གྱིས་ཉིད་ཀྱི་ཕ་སོ་ལོ་ལ། ཁོ་ཅིའི་ཕྱིར་གསོད་པར་བྱའམ། ཁོས་ཅི་བྱས་སམ་ཞེས་ཞུས་པ་ལ།
1SA 20:33 སོ་ལོས་ཁོ་ལ་བསྣུན་པའི་ཆེད་དུ་མདུང་འཕངས་པས། ཡོ་ནཱ་ཐན་གྱིས་རང་གི་ཕ་ཡིས་དཱ་བིད་གསོད་ངེས་པ་ཤེས།
1SA 20:34 ཡོ་ནཱ་ཐན་ཤིན་ཏུ་ཁྲོས་ཤིང་གསོལ་ལྕོག་ནས་ལངས་ཏེ་ཚེས་གཉིས་པའི་ཉིན་དེར་ཟས་གང་ཡང་མ་སྤྱད་ཅིང་། ཕ་ཡིས་དཱ་བིད་ལ་སྐུར་བ་བཏབ་པའི་ཕྱིར་ཡོ་ནཱ་ཐན་སེམས་སྡུག་གོ །
1SA 20:35 ཡང་ཕྱི་ཉིན་སྔ་མོ་དཱ་བིད་དང་ཁ་ཆད་བཞག་པའི་དུས་ལ་སླེབས་ཙ་ན། ཡོ་ནཱ་ཐན་དང་གཡོག་པོ་གཞོན་ནུ་ཞིག་མཉམ་དུ་ས་སྟོང་དེར་སོང་སྟེ།
1SA 20:36 ཡོ་ནཱ་ཐན་གྱིས་གཞོན་ནུ་དེ་ལ་ཁོས་འཕངས་པའི་མདའ་རྣམས་ཚོལ་ཞིག་ཅེས་བཀའ་གནང་བས། གཞོན་ནུ་བརྒྱུགས་པ་ལ་ཡོ་ནཱ་ཐན་གྱིས་མདའ་ཞིག་ཁོའི་མདུན་དུ་བཏང་།
1SA 20:37 གཞོན་ནུ་དེ་ཡོ་ནཱ་ཐན་གྱིས་འཕངས་པའི་མདའ་ཡི་གནས་སུ་སླེབས་པའི་ཚེ། ཡོ་ནཱ་ཐན་གྱིས་གཞོན་ནུ་དེའི་རྒྱབ་ནས་ན་རེ། མདའ་ནི་ཁྱོད་ཀྱི་མདུན་དུ་མི་འདུག་གམ་ཞེས་བོས།
1SA 20:38 དེ་ནས་ཡང་ཡོ་ནཱ་ཐན་གྱིས་གཞོན་ནུའི་རྒྱབ་ནས་སྐད་བརྒྱབ་སྟེ། ལངས་ནས་མི་འདུག་པར་མྱུར་དུ་སོང་ཞིག་ཅེས་བསྐུལ་བས། གཞོན་ནུ་དེས་མདའ་དེ་བསྡུས་ནས་ཕྱིར་བདག་པོ་ཡོ་ནཱ་ཐན་གྱི་དྲུང་དུ་འོངས་པ་རེད།
1SA 20:39 གཞོན་ནུ་དེས་དོན་ཅི་ཡིན་གང་ཡིན་མ་ཤེས་ཀྱང་ཡོ་ནཱ་ཐན་དང་དཱ་བིད་ཁོ་ནས་ཤེས་སོ། །
1SA 20:40 ཡང་ཡོ་ནཱ་ཐན་གྱིས་རང་གི་ལག་ཆ་གཞོན་ནུ་ལ་བཏང་སྟེ། འདི་ཁྱེར་ལ་གྲོང་ཁྱེར་དུ་སོང་ཞིག་ཅེས་བསྒོས།
1SA 20:41 གཞོན་ནུ་དེ་སོང་མ་ཐག དཱ་བིད་ལྷོ་ཕྱོགས་ཀྱི་གནས་ནས་ཐོན་ཏེ་གདོང་སར་བཏུད་ནས་ལན་གསུམ་ལ་ཕྱག་ཕུལ་ཏོ། །དེ་ནས་མཛའ་གྲོགས་ཕན་ཚུན་ལ་འོ་བྱས་ཤིང་ཕན་ཚུན་གྱི་དོན་དུ་ངུས་པ་དང་དཱ་བིད་ནི་ལྷག་པར་ངུས་སོ། །
1SA 20:42 དེ་ནས་ཡོ་ནཱ་ཐན་གྱིས་དཱ་བིད་ལ། ངེད་གཉིས་ཀྱིས་སྔོན་ཆད་དཀོན་མཆོག་ཡ་ཝཱེའི་མཚན་བརྗོད་ཅིང་། ང་དང་ཁྱེད་གཉིས་བར་དང་། ད་དུང་ངའི་བུ་རྒྱུད་དང་ཁྱེད་ཀྱི་བུ་རྒྱུད་གཉིས་ཀྱི་བར་དུའང་དཀོན་མཆོག་ཡ་ཝཱེ་དུས་རྒྱུན་དུ་དཔང་པོར་བཞུགས་པར་ཤོག་ཅེས་མནའ་བསྐྱལ་ཡོད་པས། ད་ཁྱེད་བདེ་བར་སོང་ཞིག་ཅེས་སྨྲས་ནས། ཁོ་ལངས་ཏེ་སོང་བ་དང་ཡོ་ནཱ་ཐན་ཡང་གྲོང་ཁྱེར་དུ་ཕྱིན་ཏོ། །
1SA 21:1 དེ་ནས་དཱ་བིད་ནོབ་ཅེས་པའི་ས་ཆ་ཡི་མཆོད་དཔོན་ཨ་ཧི་མེ་ལེག་བྱ་བའི་དྲུང་དུ་སླེབས་ནས། ཨ་ཧི་མེ་ལེག་སྐྲག་སྐྲག་འདར་འདར་ངང་དཱ་བིད་དང་འཕྲད་དུ་འོངས་ནས་དེ་ལ། ཁྱེད་གཅིག་པུ་འོངས་ཤིང་མཉམ་དུ་མི་གཅིག་ཀྱང་མེད་པ་ཅི་ཡིན་ནམ་ཞེས་དྲིས་པར།
1SA 21:2 དཱ་བིད་ཀྱིས་མཆོད་དཔོན་ཨ་ཧི་མེ་ལེག་ལ། རྒྱལ་པོས་ལས་ཤིག་བསྒོས་ཏེ་འདི་ལྟར། ངས་ཁྱོད་གང་དུ་མངགས་པ་དང་ལས་ཅི་ཞིག་བསྒོས་པ་མི་སུ་ལ་ཡང་མངོན་པར་མ་བྱེད་ཅིག་ཅེས་བཀའ་གནང་བས། ངས་ནི་གཡོག་པོ་འགའ་གནས་ཤིག་ཏུ་མངགས་པ་ཡིན།
1SA 21:3 ད་ལྟ་ཁྱེད་ཀྱི་ལག་ཏུ་ཅི་ཡོད། བག་ལེབ་ལྔའམ་གང་ཡོད་པ་དེ་ང་ལ་གནང་རོགས་ཞེས་པའི་ལན་དུ།
1SA 21:4 མཆོད་དཔོན་གྱིས་དཱ་བིད་ལ། བག་ལེབ་དཀྱུས་མ་ངའི་ལག་ཏུ་མེད་དེ། འདི་རུ་བག་ལེབ་དམ་པ་ཡོད། གལ་ཏེ་གཡོག་པོ་དག་གིས་རང་རང་གི་ལུས་བུད་མེད་ལས་བསྲུངས་ཡོད་ན་སྤྲད་ཆོག་ཅེས་སྨྲས།
1SA 21:5 དཱ་བིད་ཀྱིས་མཆོད་དཔོན་ལ། ནམ་རྒྱུན་དམག་ལ་ཆས་པའི་སྐབས་བཞིན། ད་རེས་ཀྱང་ངེད་ཅག་བུད་མེད་དང་མ་འགྲོགས་པ་སྟེ། རྒྱུན་ལྡན་གྱི་དུས་སུ་གཡོག་པོ་ཐམས་ཅད་གཙང་མ་ཡིན་ན། དེ་རིང་ནི་སྔར་བས་ཀྱང་གཙང་མ་མ་ཡིན་ནམ་ཞེས་སྨྲས་པས།
1SA 21:6 མཆོད་དཔོན་གྱིས་ཁོ་ལ་བག་ལེབ་དམ་པ་གནང་ངོ་། །གང་ལ་ཞེ་ན། སྤྱན་བསྟར་བག་ལེབ་མ་གཏོགས་མེད་པས་བག་ལེབ་གསར་པ་ཡར་འབུལ་བའི་སྐབས་སུ། དཀོན་མཆོག་ཡ་ཝཱེའི་སྤྱན་དྲུང་ནས་ཕྱིར་བླངས་པའི་བག་ལེབ་རྙིང་པ་དེ་དཱ་བིད་ལ་སྤྲད་དོ། །
1SA 21:7 ཉིན་དེར། སོ་ལོའི་ཞབས་ཕྱི་ཞིག་དེ་རུ་ཡོད་ཅིང་། ཁོ་རང་དཀོན་མཆོག་ཡ་ཝཱེའི་དྲུང་དུ་འདུག་སྟེ། མི་དེའི་མིང་ལ་དོ་ཨེག་ཟེར་ཞིང་ཨེ་དོམ་པ་ཡིན། སོ་ལོའི་ཕྱུགས་རྫི་དག་གི་འགོ་དཔོན་ཡང་ཡིན།
1SA 21:8 ཡང་དཱ་བིད་ཀྱིས་ཨ་ཧི་མེ་ལེག་ལ། ཁྱེད་ཀྱི་ལག་ཏུ་མདུང་ངམ་རལ་གྲི་མེད་དམ། བདག་རྒྱལ་པོའི་ལས་ལ་བྲེལ་མྱུར་ཆེ་བས། འདིར་རལ་གྲིའམ་མཚོན་ཆ་ཅི་ཡང་ཁྱེར་མེད་ཅེས་ཞུས་པས།
1SA 21:9 མཆོད་དཔོན་གྱིས། ཨེ་ལཱ་ཞེས་པའི་ལུང་པའི་ནང་དུ་ཁྱོད་ཀྱིས་བསད་པའི་ཕེ་ལེ་ཤེད་པ་གོལ་ཡད་ཀྱི་རལ་གྲི་ཡོད། དེ་རས་ཀྱིས་བཏུམས་ནས་བེར་ཐུལ་གྱི་རྒྱབ་ཏུ་བཞག་ཡོད། ཁྱོད་ལ་དགོས་ན་ལོངས་ཤིག དེ་མ་གཏོགས་གཞན་གང་ཡང་འདི་རུ་མེད་ཟེར་བས། དཱ་བིད་ཀྱིས། འདི་དང་འདྲ་བ་གཞན་གང་ཡང་མེད་པས་དེ་ང་ལ་གནང་རོགས་ཞེས་ཞུས་སོ། །
1SA 21:10 ཡང་དཱ་བིད་ཉིན་དེར་སོ་ལོ་ལ་གཡོལ་ནས་གཱད་ཀྱི་རྒྱལ་པོ་ཨ་ཀི་སི་ཡི་དྲུང་དུ་ཕྱིན།
1SA 21:11 དེ་ནས་ཨ་ཀི་སི་ཡི་བློན་པོ་རྣམས་ཀྱིས་ཁོང་ལ། མི་འདི་ནི་དཱ་བིད་ཟེར་བ་ཡུལ་དེའི་རྒྱལ་པོ་མ་ཡིན་ནམ། སྔར་ནས་མི་རྣམས་ཀྱིས། སོ་ལོ་ཡིས་བསད་པ་སྟོང་ཕྲག་སྟེ། །དཱ་བིད་ཀྱིས་བསད་པ་ཁྲི་ཕྲག་གོ །ཞེས་གར་རྩེས་ནས་གླུ་ལེན་ཡུལ་དེ་མ་ཡིན་ནམ་ཞེས་ཞུས།
1SA 21:12 དེ་ནས་དཱ་བིད་ཀྱིས་གཏམ་དེ་ཡིད་ལ་བཟུང་སྟེ་གཱད་ཀྱི་རྒྱལ་པོ་ཨ་ཀི་སི་ལ་ཤིན་ཏུ་འཇིགས་པ་དང་།
1SA 21:13 དེ་དག་གི་མིག་ལམ་དུ་ནམ་རྒྱུན་གྱི་སྤྱོད་ལམ་བསྒྱུར་ནས་སྨྱོ་ཁུལ་བྱས་པ་དང་རྒྱལ་སྒོར་གང་བྱུང་དུ་བྲིས་ཤིང་། མཆིལ་མ་སྨ་རའི་སྟེང་ལ་བཞུར་དུ་བཅུག
1SA 21:14 དེ་ནས་ཨ་ཀི་སི་ཡིས་རང་གི་བློན་པོ་རྣམས་ལ། མི་དེ་ནི་སྨྱོན་པ་ཡིན་ཏེ་ཅིའི་ཕྱིར་ངའི་མདུན་དུ་ཁྲིད་འོངས་པ་ཡིན་ནམ།
1SA 21:15 ང་ལ་མི་སྨྱོན་པ་ཉུང་འདུག་གམ། སྨྱོ་རྟགས་སྟོན་ཕྱིར་ཁྱོད་ཅག་གིས་མི་དེ་ངའི་མདུན་དུ་ཁྲིད་འོངས་པ་ཡིན་ནམ། མི་འདི་ངའི་ཁྱིམ་དུ་འཇུག་འོས་སམ་ཞེས་སྨྲས་སོ། །
1SA 22:1 དཱ་བིད་ས་ཆ་དེ་ནས་ཐོན་ཏེ་བྲག་ཕུག་ཨ་དུལ་ལཱམ་ཞེས་བྱ་བ་དེར་བྲོས་ཤིང་། གཏམ་དེ་ཁོའི་སྤུན་རྣམས་དང་ཕ་ཡི་ཁྱིམ་རྒྱུད་ཐམས་ཅད་ཀྱིས་ཐོས་པ་དང་ཁོ་ཚོ་ཡང་དཱ་བིད་ཀྱི་རྩར་ཕྱིན་པ་རེད།
1SA 22:2 ཡང་འཚོ་བ་དཀའ་སྡུག་ཅན་དང་བུ་ལོན་ཅན། སེམས་སྡུག་ཅན་ཐམས་ཅད་དེར་འཛོམས་ནས་ཁོ་དེ་དག་གི་འགོ་དཔོན་དུ་གྱུར་ཅིང་ཁོ་དང་མཉམ་དུ་མི་བཞི་བརྒྱ་ཙམ་ཡོད།
1SA 22:3 ཡང་དཱ་བིད་ཡུལ་དེ་ནས་མོ་ཨབ་ཡུལ་གྱི་མི་ཙི་ཕེ་ཞེས་པའི་གྲོང་ཁྱེར་དུ་སོང་སྟེ། མོ་ཨབ་ཀྱི་རྒྱལ་པོ་ལ་དཀོན་མཆོག་གིས་བདག་ལ་ཅི་མཛད་པ་རྟོགས་པའི་བར་དུ་བདག་གི་ཕ་མ་གཉིས་ཀ་ཁྱེད་ཅག་དང་མཉམ་དུ་གནས་སུ་འཇུག་རོགས་ཞེས་ཞུས།
1SA 22:4 དེ་ནས་དཱ་བིད་ཀྱིས་ཕ་མ་གཉིས་རྒྱལ་པོའི་དྲུང་དུ་ཁྲིད་ནས། ཁོ་རང་རི་རྫོང་དུ་སྡོད་པའི་རིང་དུ་ཕ་མ་གཉིས་ཀྱང་མོ་ཨབ་ཀྱི་རྒྱལ་པོ་དང་མཉམ་དུ་གནས་ཤིང་།
1SA 22:5 ཡང་ལུང་སྟོན་པ་གཱ་རྡུ་ཡིས་དཱ་བིད་ལ། རི་གསེབ་ཏུ་གནས་པར་མ་བྱེད་ཅིག ཁྱོད་ཡ་ཧུ་དཱ་ཡུལ་དུ་འགྲོ་དགོས་ཞེས་བསྐུལ་བས། དཱ་བིད་ལངས་ཏེ་ཧེ་རེད་ཅེས་བྱ་བའི་ནགས་ཁྲོད་དུ་ཕྱིན་ཏོ། །
1SA 22:6 སོ་ལོ་ནི་གིབ་ཨ་ས་ཆའི་རི་རྩེ་ཡི་འོམ་བུ་ཤིང་ཡོད་སར་བསྡད་པ་དང་། ལག་ཏུ་མདུང་ཐོགས་ཤིང་བློན་འཁོར་རྣམས་ཁོའི་མདུན་དུ་འགྲེངས་ནས་བསྡད། ཡང་སོ་ལོས་དཱ་བིད་དང་བཅས་པའི་མི་རྣམས་ཐག་ཉེ་ཞིག་ཏུ་ཡོད་པ་ཐོས་པས།
1SA 22:7 བློན་འཁོར་རྣམས་ལ། ཀྱེ་པེན་ཡཱ་མེན་པ་ཀུན། ཉོན་དང་། ཡེ་སེའི་བུ་དེས་ཁྱོད་ཅག་མི་རེ་རེ་ལ་ཞིང་དང་རྒུན་ཚལ་གཏོང་བར་བྱའམ། ཁྱོད་ཅག་མི་རེ་རེ་སྟོང་དཔོན་དང་བརྒྱ་དཔོན་དུ་འཇོག་པར་བྱའམ།
1SA 22:8 ཁྱོད་ཅག་ཐམས་ཅད་ཀྱིས་ང་ལ་ཅིའི་ཕྱིར་གནག་པ་ཡིན། ངའི་བུ་དང་ཡེ་སེའི་བུ་གཉིས་ཀྱིས་ཁ་ཆད་བྱས་པ་སུ་ཞིག་གིས་ཀྱང་ང་ལ་སྨྲས་མ་སོང་ལ། ངའི་བུ་ཡིས་ཞབས་ཕྱི་དང་ངའི་བར་དཀྲུག་ཤིང་འཕེན་སྐབས་སུའང་དེ་རིང་ནང་བཞིན་སུ་ཞིག་གིས་ཀྱང་ང་ལ་མ་སྨྲས་ཤིང་། སུ་ཞིག་གིས་ཀྱང་ང་ལ་གདུང་སེམས་མཉམ་སྐྱེད་མ་བྱས་ཞེས་སྨྲས།
1SA 22:9 དེ་ནས་ཨེ་དོམ་པ་དོ་ཨེག་བྱ་བ་སོ་ལོ་ཡི་བློན་འཁོར་རྣམས་ཀྱི་ཁྲོད་དུ་འགྲེངས་ནས་ན་རེ། ངས་ནི་ཡེ་སེའི་བུ་དེ་ནོབ་བྱ་བའི་ཡུལ་དུ་ཨ་ཧི་ཏུབ་ཀྱི་བུ་ཨ་ཧི་མེ་ལེག་གི་མདུན་དུ་འགྲོ་བ་མཐོང་བྱུང་།
1SA 22:10 དེ་ནས་ཨ་ཧི་མེ་ལེག་གིས་ཡེ་སེའི་བུ་ཡི་དོན་དུ་དཀོན་མཆོག་ཡ་ཝཱེ་ལ་གསོལ་བ་བཏབ་ཅིང་ཁོ་ལ་རྒྱགས་དང་ཕེ་ལེ་ཤེད་པ་གོལ་ཡད་ཀྱི་རལ་གྲི་ཡང་བཏང་བྱུང་ཞེས་ཞུས་སོ། །
1SA 22:11 དེ་ནས་རྒྱལ་པོས་ཨ་ཧི་ཏུབ་ཀྱི་བུ་སྟེ་མཆོད་དཔོན་ཨ་ཧི་མེ་ལེག་དང་། དེའི་ཕ་ཡི་ཁྱིམ་རྒྱུད་ཐམས་ཅད་དང་ནོབ་ཅེས་པའི་ས་ཆར་གནས་པའི་མཆོད་དཔོན་ཐམས་ཅད་ལ་འབོད་མཁན་མངགས་ཤིང་དེ་དག་རྒྱལ་པོའི་དྲུང་དུ་འོངས་ནས།
1SA 22:12 སོ་ལོས། ཀྱེ་ཨ་ཧི་ཏུབ་ཀྱི་བུ། ཁྱོད་ཀྱིས་ཉོན་ཅིག་ཅེས་བསྐུལ་བར། དེས་ནི། ངའི་བདག་པོ་ལགས། ང་རང་འདི་རུ་ཡོད་ཅེས་ལན་ཞུས།
1SA 22:13 སོ་ལོས་ཁོ་ལ། ཁྱོད་ཀྱིས་ཅིའི་ཕྱིར་ཡེ་སེའི་བུ་དང་ལྐོག་འབྲེལ་བྱས་ནས་ང་ལ་གནག་པ་ཡིན་ནམ། དེ་རིང་ནང་བཞིན་ཁོས་ང་ལ་འཇབ་སྒུག་བྱེད་པའི་ཆེད་དུ། ཁྱོད་ཀྱིས་ཅིའི་ཕྱིར་ཁོ་ལ་བག་ལེབ་དང་རལ་གྲི་བཏང་ནས་ཁོའི་དོན་དུ་དཀོན་མཆོག་ལ་གསོལ་བ་བཏབ་བམ་ཞེས་དྲིས།
1SA 22:14 ཨ་ཧི་མེ་ལེག་གིས་རྒྱལ་པོ་ལ། ཁྱེད་ཀྱི་བློན་འཁོར་རྣམས་ཀྱི་ཁྲོད་དུ་གཡོ་སྒྱུ་མེད་པའི་དཱ་བིད་འདྲ་བ་སུ་ཡང་མེད། ཁོ་ནི་རྒྱལ་པོའི་མག་པ་དང་སྐུ་སྲུང་པའི་འགོ་དཔོན་དང་། ཁྱེད་ཀྱི་བློན་པོའི་ཁྲོད་དུ་བཀུར་སྟི་ཐོབ་པ་ཞིག་མ་ཡིན་ནམ།
1SA 22:15 བདག་གིས་དེ་རིང་ཐེངས་དང་པོར་ཁོའི་དོན་དུ་དཀོན་མཆོག་ལ་གསོལ་བ་བཏབ་པ་ཡིན་ནམ་ཟེར་ན་མ་ཡིན་ནོ། །རྒྱལ་པོས་ཉིད་ཀྱི་མི་སེར་ང་རང་དང་ངའི་ཕ་ཡི་ཁྱིམ་རྒྱུད་ལ་དེ་ལྟ་བུའི་ལས་མ་འགེལ་ཞིག ལས་ཆེ་ཆུང་ཅི་ཡོད་ཀྱང་ཉིད་ཀྱི་ཞབས་ཕྱི་བདག་གིས་གང་ཡང་མི་ཤེས་ཞེས་ཞུས།
1SA 22:16 ལན་དུ་རྒྱལ་པོ་ན་རེ། ཀྱེ་ཨ་ཧི་མེ་ལེག ཁྱོད་དང་ཁྱོད་ཀྱི་ཕ་ཡི་ཁྱིམ་རྒྱུད་ཐམས་ཅད་འཆི་དགོས་ཞེས་སྨྲས་ཤིང་།
1SA 22:17 རྒྱལ་པོས་གཡས་གཡོན་དུ་སྡོད་པའི་སྐུ་སྲུང་པ་རྣམས་ལ། ཁྱོད་ཚོས་འཕྲལ་མར་དཀོན་མཆོག་ཡ་ཝཱེའི་མཆོད་དཔོན་རྣམས་སོད་ཅིག དེ་དག་གིས་དཱ་བིད་ལ་རོགས་བྱས་པར་མ་ཟད། ཁོ་ཚོས་དཱ་བིད་བྲོས་པ་ཤེས་ཀྱང་ང་ལ་འཕྲིན་མ་བཏང་ཞེས་སྨྲས་ཀྱང་། རྒྱལ་པོའི་བློན་འཁོར་རྣམས་ནི་དཀོན་མཆོག་ཡ་ཝཱེའི་མཆོད་དཔོན་རྣམས་གསོད་པའི་ཕྱིར་ལག་པ་བརྐྱང་བར་མ་འཐད་དོ། །
1SA 22:18 དེ་ནས་རྒྱལ་པོས་དོ་ཨེག་ལ། ཁྱོད་ཀྱིས་འཕྲལ་མར་མཆོད་དཔོན་རྣམས་སོད་ཅིག་ཅེས་བཀའ་བསྒོས་པ་ལ། ཨེ་དོམ་པ་དོ་ཨེག་གིས་ཉིན་དེ་ལ་སོ་རས་ཀྱིས་བཟོས་པའི་བེར་ཐུལ་གྱོན་པའི་མི་བརྒྱད་ཅུ་གྱ་ལྔ་བསད་པ་རེད།
1SA 22:19 ཡང་མཆོད་དཔོན་གྱི་གྲོང་ཁྱེར་ནོབ་བྱ་བ་དེ་ནས་སྐྱེས་པ་དང་བུད་མེད། ཕྲུ་གུ་འོ་འཐུང་། བ་གླང་དང་བོང་བུ། ལུག་སོགས་རལ་གྲིས་བསད་དོ། །
1SA 22:20 དེ་ནས་ཨ་ཧི་ཏུབ་ཀྱི་བུ་ཨ་ཧི་མེ་ལེག་གི་བུ་རྣམས་ལས་ཨབ་ཡཱ་ཐར་ཞེས་བྱ་བ་དེ་དཱ་བིད་ཀྱི་མདུན་དུ་བྲོས།
1SA 22:21 ཨབ་ཡཱ་ཐར་གྱིས་སོ་ལོས་དཀོན་མཆོག་ཡ་ཝཱེའི་མཆོད་དཔོན་ཐམས་ཅད་བསད་པའི་དོན་དེ་དཱ་བིད་ལ་སྨྲས་པ་དང་།
1SA 22:22 དཱ་བིད་ཀྱིས་ཨབ་ཡཱ་ཐར་ལ། ངས་ཉིན་མོ་དེར་ཨེ་དོམ་པ་དོ་ཨེག་དེར་ཡོད་པ་མཐོང་ཞིང་། ཁོས་སོ་ལོ་ལ་ཡོངས་སུ་སྨྲ་བར་འགྱུར་བ་ངས་ཤེས། ཁྱོད་ཀྱི་ཕ་ཡི་ཁྱིམ་རྒྱུད་ཐམས་ཅད་ཤི་བའི་རྒྱུ་ནི་ང་ཡིན།
1SA 22:23 ཁྱོད་མ་འཇིགས་ཤིག ང་དང་མཉམ་དུ་སྡོད་ཅིག སུ་ཁྱོད་ཀྱི་སྲོག་ལེན་དུ་ཡོང་ན་དེ་ནི་ངའི་སྲོག་ཀྱང་ལེན་དུ་ཡོང་བས། ངས་ཁྱོད་ཀྱི་སྲོག་བསྲུང་ཐུབ་པར་འགྱུར་ཞེས་སྨྲས་སོ། །
1SA 23:1 དེ་ནས་མི་རྣམས་ཀྱིས་དཱ་བིད་ལ། ཀྱེ་ཧོ། ཕེ་ལེ་ཤེད་པ་རྣམས་ཀྱིས་ཀེ་ཨི་ལཱ་རུ་འཐབ་མོ་བྱེད་པར་མ་ཟད། གཡུལ་ཁ་ཐམས་ཅད་འཕྲོག་གིན་འདུག་ཅེས་ཟེར་བས།
1SA 23:2 དཱ་བིད་ཀྱིས་དཀོན་མཆོག་ཡ་ཝཱེ་ལ་གསོལ་བ་བཏབ་ཅིང་། བདག་ནི་ཕེ་ལེ་ཤེད་པ་འདི་དག་ལ་དམག་རྒྱག་ཏུ་འགྲོ་བར་རུང་ངམ་ཞེས་ཞུས་པ་ན། དཀོན་མཆོག་ཡ་ཝཱེས་ཁྱོད་འགྲོ་རུང་བ་ཡིན། ཕེ་ལེ་ཤེད་པ་རྣམས་མེད་པར་བྱོས་དང་། ཀེ་ཨི་ལཱ་སྐྱོབས་ཤིག་ཅེས་བཀའ་བསྩལ་ཡང་།
1SA 23:3 དཱ་བིད་ཀྱི་མི་རྣམས་ཀྱིས་ཁོ་ལ། ཡ་ཧུ་དཱའི་ཡུལ་འདི་ནས་ཀྱང་བདག་ཅག་འཇིགས་ཤིང་སྐྲག་ན་ཀེ་ཨི་ལཱ་རུ་ཡོད་པའི་ཕེ་ལེ་ཤེད་པའི་དམག་དཔུང་ལ་འཐབ་པར་ལྷག་ཏུ་མི་འཇིགས་སམ་ཞེས་ཞུས་པས།
1SA 23:4 ཡང་དཱ་བིད་ཀྱིས་དཀོན་མཆོག་ཡ་ཝཱེ་ལ་གསོལ་བ་བཏབ་པ་ན། དཀོན་མཆོག་ཡ་ཝཱེས་དེ་ལ་ཀེ་ཨི་ལཱ་རུ་མར་སོང་ཞིག་དང་། ངས་ཕེ་ལེ་ཤེད་པ་རྣམས་ཁྱོད་ཀྱི་ལག་ཏུ་སྤྲོད་པར་བྱ་ཞེས་བཀའ་ལན་གནང་བས།
1SA 23:5 དཱ་བིད་དང་དེའི་མི་རྣམས་ཀེ་ཨི་ལཱ་རུ་སོང་སྟེ། ཕེ་ལེ་ཤེད་པ་དང་དམག་བརྒྱབ་ཅིང་དེ་དག་གི་ཕྱུགས་ཕྲོགས་ནས་གསོད་གཅོད་ཆེན་པོ་ཞིག་གིས་ཕམ་པར་བྱས་ཤིང་། དེ་ལྟར་དཱ་བིད་ཀྱིས་ཀེ་ཨི་ལཱ་པ་རྣམས་བསྐྱབས་པ་རེད།
1SA 23:6 ཡང་ཨ་ཧི་མེ་ལེག་གི་བུ་ཨབ་ཡཱ་ཐར་ནི་བེར་ཐུལ་བཟུང་ནས་ཀེ་ཨི་ལཱ་རུ་བྲོས་ཏེ་དཱ་བིད་ཀྱི་མདུན་དུ་སླེབས་སོ། །
1SA 23:7 སོ་ལོས་དཱ་བིད་ནི་ཀེ་ཨི་ལཱ་རུ་སླེབས་པའི་གཏམ་ཐོས་ནས། ཁོ་ནི་སྒོ་དང་སྒོ་གཏན་ཡོད་པའི་གྲོང་ཁྱེར་དུ་བཀག་པས་དཀོན་མཆོག་གིས་ཁོ་ངའི་ལག་ཏུ་སྤྲད་པ་ཡིན་ཞེས་སྨྲས་ཤིང་།
1SA 23:8 ཀེ་ཨི་ལཱ་རུ་མར་སོང་ནས་དཱ་བིད་དང་ཁོའི་མི་རྣམས་བསྐོར་བའི་ཆེད་དུ་སོ་ལོས་དམག་ཐམས་ཅད་བསྡུས།
1SA 23:9 དེ་ནས་དཱ་བིད་ཀྱིས་སོ་ལོས་ཁོ་ལ་གཡོ་ཐབས་ཀྱིས་གནོད་འཚེ་གཏོང་བ་ཤེས་པ་དང་། མཆོད་དཔོན་ཨབ་ཡཱ་ཐར་ལ་བེར་ཐུལ་འདི་རུ་འཁུར་ཤོག་ཅེས་སྨྲས་ཤིང་།
1SA 23:10 དཱ་བིད་ཀྱིས། ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། སོ་ལོས་ཐབས་ཤེས་བཏོན་ནས་ཀེ་ཨི་ལཱ་རུ་འོང་ཞིང་གྲོང་ཁྱེར་འདི་འཇིག་པར་བྱའོ། །དེ་ནི་བདག་གི་རྐྱེན་གྱིས་ཡིན་ཞེས་བསྒྲགས་སྐད། གཏམ་དེ་དག་ཁྱེད་ཀྱི་ཞབས་ཕྱི་བདག་གིས་ཐོས་པ་ཡིན།
1SA 23:11 ཀེ་ཨི་ལཱ་པ་རྣམས་ཀྱིས་བདག་ཁོའི་ལག་ཏུ་གཏོད་པར་བྱའམ། ཁྱེད་ཀྱི་ཞབས་ཕྱིས་ཐོས་པ་བཞིན་དུ་སོ་ལོ་འདིར་སླེབ་ཡོང་ངམ། ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ཁྱེད་ཀྱི་ཞབས་ཕྱི་བདག་ལ་གསུང་བར་མཛོད་ཅེས་ཞུས་པས། དཀོན་མཆོག་ཡ་ཝཱེས་ཁོ་སླེབ་ཡོང་ཞེས་གསུངས།
1SA 23:12 ཡང་དཱ་བིད་ཀྱིས། ཀེ་ཨི་ལཱ་པ་རྣམས་ཀྱིས་བདག་དང་བདག་གི་མི་རྣམས་སོ་ལོའི་ལག་ཏུ་གཏོད་པར་བྱའམ་ཞེས་ཞུས་པས་དཀོན་མཆོག་ཡ་ཝཱེས་གཏོད་པར་བྱའོ་ཞེས་གསུངས།
1SA 23:13 དེ་ནས་དཱ་བིད་དང་ཁོའི་རྗེས་སུ་འབྲངས་པའི་མི་དྲུག་བརྒྱ་ཙམ་ཡོད་པ་ལངས་ནས། ཀེ་ཨི་ལཱ་ནས་བྲོས་ཏེ་འགྲོ་ཐུབ་ས་དེར་སོང་། སོ་ལོས་དཱ་བིད་ནི་ཀེ་ཨི་ལཱ་ནས་སོང་ཟིན་པའི་གཏམ་ཐོས་པས་བྱ་བ་དེའི་མཚམས་བཞག་གོ །
1SA 23:14 ཡང་དཱ་བིད་དབེན་སྟོང་གི་རི་རྫོང་དེར་བསྡད་ཅིང་བྱེ་ཐང་དང་རི་མང་བའི་ཡུལ་ལུང་ཟིབ་ཅེས་པར་གནས་པ་ལ། སོ་ལོས་ཉིན་རེ་བཞིན་དུ་ཁོ་བཙལ་ཡང་དཀོན་མཆོག་གིས་ཁོ་སོ་ལོའི་ལག་ཏུ་མ་སྤྲད་དོ། །
1SA 23:15 དཱ་བིད་ནི་ཟིབ་བྱ་བའི་བྱེ་ཐང་གི་ཧོ་རེ་ཧྲི་ཡུལ་དུ་གནས་པའི་ཚེ། སོ་ལོ་དེའི་སྲོག་ལེན་དུ་སླེབས་པ་ཤེས་པར་གྱུར།
1SA 23:16 དེ་ནས་སོ་ལོའི་སྲས་ཡོ་ནཱ་ཐན་ལངས་ནས་ཧོ་རེ་ཧྲི་ཡུལ་ལ་དཱ་བིད་ཀྱི་མདུན་དུ་སོང་སྟེ། ཁོ་རང་དཀོན་མཆོག་ལ་བརྟེན་ནས་བརྟན་པོ་ཡོང་བར་བྱས་པ་དང་།
1SA 23:17 ཡང་ཁོས་དེ་ལ། མ་འཇིགས་ཤིག ངའི་ཕ་སོ་ལོའི་ལག་པས་ཁྱེད་ལ་གནག་ཐབས་མེད། ཁྱེད་ནི་ཅིས་ཀྱང་ཡེས་ར་ཨེལ་གྱི་རྒྱལ་པོར་འགྱུར་ཞིང་ང་ནི་ཅིས་ཀྱང་ཁྱེད་ཀྱི་ལག་རོགས་སུ་འགྱུར་ཡོང་། བྱ་བ་དེ་ནི་ངའི་ཕ་ཡིས་ཀྱང་ཤེས་སོ་ཞེས་སྨྲས་པས།
1SA 23:18 དེ་གཉིས་ཀྱིས་དཀོན་མཆོག་ཡ་ཝཱེའི་དྲུང་དུ་ཁ་ཆད་བཞག་ནས་ཡོ་ནཱ་ཐན་རང་གི་ཁྱིམ་དུ་ཕྱིན་པ་དང་དཱ་བིད་སྔར་བཞིན་ཧོ་རེ་ཧྲི་ཡུལ་དུ་གནས་སོ། །
1SA 23:19 དེ་ནས་ཟིབ་པ་རྣམས་གིབ་ཨ་རུ་སོ་ལོའི་མདུན་དུ་སོང་ནས་དེ་ལ། དཱ་བིད་ནི་ཧོ་རེ་ཧྲི་ཡུལ་གྱི་གནས་བཙན་པོ་དང་། ཡེ་ཤི་མོན་གྱི་ལྷོ་ཕྱོགས་སུ་ཡོད་པའི་རི་ཧ་ཀི་ལཱར་ཡིབ་ནས་འདུག
1SA 23:20 དེའི་ཕྱིར། རྒྱལ་པོ་ཁྱེད་ཐུགས་མོས་བཞིན་དུ་མར་ཕེབས་དང་། བདག་ཅག་གིས་ཁོ་རྒྱལ་པོ་ཁྱེད་ཀྱི་ཕྱག་ཏུ་གཏོད་པར་བྱ་ཞེས་ཞུས་པ་ན།
1SA 23:21 རྒྱལ་པོས་དེ་དག་ལ། ཁྱོད་ཚོས་ང་ལ་འདི་ལྟར་རོགས་བྱས་པའི་རྐྱེན་གྱིས་དཀོན་མཆོག་ཡ་ཝཱེས་ཁྱོད་ཅག་ལ་བྱིན་རླབས་གནང་བར་སྨོན།
1SA 23:22 ད་ཁྱོད་ཅག་སོང་ལ་ནན་ཏན་གྱིས་རྩད་ཆོད། ཁོའི་སྡོད་གནས་དང་འགྲོ་འདུག་ལ་བལྟ་ཞིང་། ཡང་སུས་ཁོ་དེ་རུ་མཐོང་བ་དེ་རྟོགས་པར་གྱིས། གང་ལ་ཞེ་ན། ཁོ་རང་གཡོ་སྒྱུ་ཅན་ཞིག་ཡིན་པ་ངས་ཐོས་ཏེ།
1SA 23:23 དེའི་ཕྱིར་ཁོ་རང་སྔར་ཡིབ་ས་ཐམས་ཅད་ལ་གསལ་པོར་ལྟོས་ལ་རྟོགས་པར་གྱིས། དེ་ནས་ཕྱིར་ཤོག་ལ་ངེས་ཐག་ཆོད་པའི་འཕྲིན་བདག་ལ་ཤོད་ཅིག དེ་ནས་ང་རང་ཁྱོད་ཅག་དང་མཉམ་དུ་འགྲོ་བ་དང་། གལ་ཏེ་ཁོ་རང་ད་དུང་ཡུལ་དེ་རུ་ཡོད་ན། ངས་ཁོ་ཡ་ཧུ་དཱ་པ་ཐམས་ཅད་ཀྱི་ནང་ནས་འཚོལ་བར་བྱ་ཞེས་སྨྲས།
1SA 23:24 དེ་ནས་དེ་དག་ལངས་ནས་ཟིབ་ཡུལ་དུ་སོ་ལོ་མ་སོང་སྔོན་ལ་ཆས་ཤིང་། དཱ་བིད་སོགས་མཱ་ཨོན་བྱ་བའི་བྱེ་ཐང་སྟེ་ཡེ་ཤི་མོན་ལྷོ་ཕྱོགས་ཀྱི་ཨ་ར་པཱ་ཞེས་པའི་ས་ཆར་གནས་པ་རེད།
1SA 23:25 སོ་ལོ་དང་དེའི་མི་རྣམས་ཁོ་བཙལ་བར་ཕྱིན་པ་ན། དཱ་བིད་ཀྱིས་ཐོས་པས་ཁོ་བྲག་རྡོ་དེ་རུ་མར་སོང་བ་དང་མཱ་ཨོན་གྱི་བྱེ་ཐང་ལ་གནས་ཤིང་། སོ་ལོས་གཏམ་དེ་ཐོས་ནས་མཱ་ཨོན་གྱི་ཐང་དུ་དཱ་བིད་ཀྱི་རྗེས་དེད་དོ། །
1SA 23:26 དེ་ནས་སོ་ལོ་རིའི་ཚུར་ཕྱོགས་སུ་འགྲོ་བའི་ཚེ། དཱ་བིད་དང་དེའི་མི་རྣམས་རིའི་ཕར་ཕྱོགས་སུ་ཡོད་ཅིང་། དཱ་བིད་འབྲོ་བར་བརྩོན་པ་བྱས་ཀྱང་། སོ་ལོ་དང་དེའི་དམག་དཔུང་གིས་དཱ་བིད་དང་དེའི་མི་རྣམས་ཡོངས་སུ་བསྐོར།
1SA 23:27 དེ་ནས་སོ་ལོའི་དྲུང་དུ་བང་ཆེན་ཞིག་འོངས་ནས་དེ་ལ། ཁྱེད་མྱུར་ཏུ་ཕེབས་ཤོག ཕེ་ལེ་ཤེད་པ་རྣམས་ཀྱིས་ཚུར་རྒོལ་བྱས་བྱུང་ཞེས་འཕྲིན་ཞུས་པས།
1SA 23:28 སོ་ལོ་ནི་དཱ་བིད་ཀྱི་རྗེས་མ་དེད་པར་ཕྱིར་ལོག་སྟེ་ཕེ་ལེ་ཤེད་པའི་གདོང་བསུས་ནས་འཐབ། དེའི་ཕྱིར་བྲག་རྡོ་དེའི་མིང་ལ་ཐར་པའི་བྲག་ཅེས་བཏགས།
1SA 23:29 ཡང་དཱ་བིད་གནས་དེ་ནས་ཐོན་ཏེ་ཨེན་གེ་དི་ཞེས་པའི་བཙན་རྫོང་རྣམས་ལ་གནས་སོ། །
1SA 24:1 དེ་ནས་སོ་ལོ་ནི་ཕེ་ལེ་ཤེད་པ་དག་གི་རྗེས་སུ་དེད་ནས་ཕྱིར་ལོག་པའི་ཚེ། མི་རྣམས་གྱིས་ཁོང་ལ། ལྟོས་དང་དཱ་བིད་ནི་ཨེན་གེ་དི་བྱ་བའི་བྱེ་ཐང་དུ་འདུག་ཅེས་ཞུས་པས།
1SA 24:2 སོ་ལོས་ཡེས་ར་ཨེལ་པ་ཐམས་ཅད་ནས་བདམས་པའི་མི་སྟོང་ཕྲག་གསུམ་ཁྲིད་ཅིང་། དཱ་བིད་དང་དེའི་མི་རྣམས་འཚོལ་བའི་ཕྱིར་གནའ་བའི་བྲག་རྡོ་ཞེས་པར་ཕྱིན་པ་དང་།
1SA 24:3 ལམ་དུ་ཡོད་པའི་ལུག་རར་སླེབས་ཏེ། བྲག་ཕུག་ཅིག་ཡོད་སར་སོ་ལོ་བཙོག་པ་གཏོང་བའི་ཕྱིར་དེའི་ནང་ཕྱིན་པར་དཱ་བིད་སོགས་བྲག་ཕུག་དེའི་སྦུག་ཏུ་བསྡད་ཡོད་པ་རེད།
1SA 24:4 དེ་ནས་དཱ་བིད་ཀྱི་མི་རྣམས་ཀྱིས་ཁོ་ལ། ལྟོས་དང་། དཀོན་མཆོག་ཡ་ཝཱེས་ཁྱོད་ཀྱི་དགྲ་བོ་ཁྱོད་ཀྱི་ལག་ཏུ་སྤྲོད་ཅིང་། ཁྱོད་ཀྱིས་དེ་ལ་ཅི་འདོད་བཞིན་བྱས་ཆོག་ཅེས་གསུངས་པ་དང་། ད་ནི་ཉིན་དེ་སླེབས་བྱུང་ཞེས་སྨྲས་པ་ལ། དཱ་བིད་ལངས་ཏེ་གསང་བའི་སྒོ་ནས་སོ་ལོའི་གོས་ཀྱི་ཐུ་བ་བཅད།
1SA 24:5 ཡང་དེའི་རྗེས་སུ་ལས་དེ་བྱས་པར་དཱ་བིད་ཀྱི་སེམས་ནས་རང་ལ་སྨད་དོ། །
1SA 24:6 དེ་ནས་དཱ་བིད་ཀྱིས་རང་གི་མི་རྣམས་ལ། ངའི་རྗེ་བོ་ནི་དཀོན་མཆོག་ཡ་ཝཱེས་བྱུགས་པ་དེ་ལགས་པས། ངས་ཁོང་གི་ཕྱོགས་སུ་ལག་པ་བརྐྱངས་ནས་ཁོང་ལ་རྒོལ་བར་གཏན་ནས་མི་བྱའོ་ཞེས་སྨྲས་པ་དང་།
1SA 24:7 དཱ་བིད་ཀྱིས་རང་གི་མི་རྣམས་བཀག་སྟེ་སོ་ལོ་ལ་རྒོལ་བར་མ་བྱས་ཤིང་། ཡང་སོ་ལོ་ལངས་ནས་བྲག་ཕུག་ནས་སྒོར་བུད་དེ་རང་གི་ལམ་དུ་ཞུགས་སོ། །
1SA 24:8 དེ་ནས་དཱ་བིད་བྲག་ཕུག་ནས་ཐོན་ཏེ། ཀྱེ་བདག་གི་ཇོ་བོ་བདག་གི་རྒྱལ་པོ་ལགས་ཞེས་སོ་ལོ་བོས་པ་ན། སོ་ལོས་ཕྱི་མིག་བལྟས་ཤིང་དེར་དཱ་བིད་ཀྱིས་མར་བསྒུར་ནས་གདོང་སར་བཏུད་དེ་ཕྱག་བཙལ་བ་རེད།
1SA 24:9 ཡང་དཱ་བིད་ཀྱིས་སོ་ལོ་ལ། མི་རྣམས་ཀྱིས་ཁྱེད་ལ་ཀྱེ་ཧོ་དཱ་བིད་ཀྱིས་རྒྱལ་པོ་ཁྱེད་ལ་གནག་པར་འདོད་ཅེས་པའི་གཏམ་དེ་ལ་ཅིའི་ཕྱིར་གསན་པ་ཡིན་ནམ།
1SA 24:10 ལྟོས་དང་དཀོན་མཆོག་ཡ་ཝཱེས་ཁྱེད་ནི་དེ་རིང་བྲག་ཕུག་ནང་དུ་ངའི་ལག་ལ་སྤྲད་པ་ཁྱེད་ཀྱི་སྤྱན་གྱིས་གཟིགས་པ་ཡིན། མི་འགའ་ཞིག་གིས་ང་ལ་ཁྱེད་སོད་ཅིག་ཟེར་ཡང་ངས་ཁྱེད་རང་མ་བསད། ངས་དེ་དག་ལ་ངའི་རྗེ་བོ་ནི་དཀོན་མཆོག་ཡ་ཝཱེས་བྱུགས་པ་དེ་ལགས་པས། ངའི་ལག་པ་བརྐྱངས་ནས་རང་གི་རྗེ་བོར་གནག་མི་ཕོད་ཅེས་སྨྲས་པ་ཡིན།
1SA 24:11 ངའི་ཡབ་ལགས། ལྟོས་དང་། ངའི་ལག་ཏུ་ཡོད་པའི་གོས་ཀྱི་ཐུ་བ་འདི་ཁྱེད་ཀྱི་གོས་ནས་བཅད་ཀྱང་ཁྱེད་རང་མ་བསད་པས་འདི་ལ་གཟིགས་ཤིང་དེ་རྟོགས་པར་གྱིས། ང་ལ་ངན་དང་ཉེས་པ་ཅི་ཡང་མེད་དེ། ཁྱེད་ཀྱིས་ངའི་སྲོག་ལེན་པར་འདོད་ནའང་ངས་ཁྱེད་ལ་སྡིག་པ་མ་བྱས།
1SA 24:12 དཀོན་མཆོག་ཡ་ཝཱེས་ཁྱེད་དང་ངེད་གཉིས་ཀྱི་བར་ལ་ཤན་འབྱེད་པར་མཛོད་ཅིག དཀོན་མཆོག་ཡ་ཝཱེས་ཁྱེད་ཀྱི་མདུན་ནས་ང་ལ་དཀར་འདོན་པར་མཛོད་ཅིག ངའི་ལག་པས་གཏན་ནས་ཁྱེད་ལ་གནག་མི་སྲིད།
1SA 24:13 སྔ་མ་རྣམས་ཀྱི་གཏམ་དཔེར། ངན་པ་ལས་ངན་པ་འབྱུང་ཟེར་ཡང་ངའི་ལག་པས་ཁྱེད་ལ་གནག་མི་སྲིད།
1SA 24:14 ཡེས་ར་ཨེལ་གྱི་རྒྱལ་པོ་ནི་སུའི་ཕྱིར་དུ་ཐོན་ནམ། ཁྱེད་སུའི་རྗེས་སུ་འདེད་དམ། ཁྱི་ཤི་རོའམ་ཁྱི་ཤིག་ཅིག་གི་རྗེས་སུ་འདེད་དམ།
1SA 24:15 དཀོན་མཆོག་ཡ་ཝཱེས་རང་རེའི་བར་ཁྲིམས་ཐག་གཅོད་ཅིང་ལེགས་ཉེས་འབྱེད་པ་དང་། ཁོང་གིས་གཟིགས་ཏེ་ང་ལ་དཀར་འདོན་པར་མཛད་ནས། ང་ཁྱེད་ཀྱི་ལག་ནས་སྐྱོབ་པར་མཛོད་ཅིག་ཅེས་སྨྲས་སོ། །
1SA 24:16 དེ་ནས་དཱ་བིད་ཀྱིས་སོ་ལོ་ལ་གཏམ་བྱས་ཟིན་པ་ན་སོ་ལོས། ཀྱེ་དཱ་བིད། ངའི་བུ། འདི་ནི་ཁྱོད་ཀྱི་སྐད་ཡིན་ནམ་ཞེས་དྲིས་ཤིང་དྲག་ཏུ་ངུས་པ་རེད།
1SA 24:17 ཡང་ཁོང་གིས་དཱ་བིད་ལ། ཁྱོད་ང་ལས་ལྷག་པར་དྲང་བདེན་ཡིན། ངས་ཁྱོད་ལ་ངན་བྱས་མོད་ཁྱོད་ཀྱིས་ང་ལ་བཟང་བྱས་སོང་།
1SA 24:18 ཁྱོད་ཀྱིས་ང་ལ་ཇི་ལྟ་བུའི་ལས་བཟང་པོ་བྱས་པ་དེ་ནི་ཁྱོད་ཀྱིས་ང་ལ་ཉིན་མོ་འདིར་སྨྲས་ཤིང་། དཀོན་མཆོག་ཡ་ཝཱེས་ང་རང་ཁྱོད་ཀྱི་ལག་ཏུ་སྤྲོད་པར་མཛད་ཀྱང་ཁྱོད་ཀྱིས་ང་མ་བསད་དོ། །
1SA 24:19 གལ་ཏེ་མི་ཞིག་གིས་རང་གི་དགྲ་བོ་རྙེད་ན་ཁོས་དེ་ནི་བདེ་བར་གཏོང་ངམ། དེ་རིང་ཁྱོད་ཀྱིས་ང་ལ་དེ་ལྟར་མ་བྱས་པས་དཀོན་མཆོག་ཡ་ཝཱེས་ཁྱོད་ལ་བཟང་ལན་གནང་བར་ཤོག
1SA 24:20 ཡང་ད་ལྟ་ལྟོས་ཤིག ཁྱོད་ནི་ངེས་པར་རྒྱལ་པོར་འགྱུར་བ་དང་ཡེས་ར་ཨེལ་གྱི་རྒྱལ་སྲིད་ཁྱོད་ཀྱི་ལག་ཏུ་བརྟན་པོར་ཚུགས་པར་འགྱུར།
1SA 24:21 ད་ལྟ་ཁྱོད་ཀྱིས་དཀོན་མཆོག་ཡ་ཝཱེ་དཔང་དུ་བཙུགས་ནས་ངའི་རྗེས་སུ་ངའི་ཁྱིམ་རྒྱུད་མེད་པར་མི་བྱེད་པ་དང་ངའི་ཕ་ཡི་ཁྱིམ་རྒྱུད་ནས་ངའི་མིང་མེད་པར་མི་བྱེད་པའི་མནའ་སྐྱོལ་ཞིག་ཅེས་སྨྲས་པས།
1SA 24:22 དཱ་བིད་ཀྱིས་སོ་ལོ་ལ་མནའ་བསྐྱལ་ཏེ་སོ་ལོ་རང་གི་ཁྱིམ་དུ་ལོག་ཅིང་དཱ་བིད་དང་ཁོའི་མི་རྣམས་རི་རྫོང་ལ་ཕྱིན་ཏོ། །
1SA 25:1 ཡང་སཱ་མུ་ཨེལ་གྲོངས་ནས་ཡེས་ར་ཨེལ་པ་ཐམས་ཅད་འཛོམས་པ་དང་། མྱ་ངན་བྱས་ཤིང་ཁོང་གི་སྐུ་གདུང་རཱ་མ་ཡུལ་དུ་རང་གི་ཁྱིམ་ནས་དུར་དུ་བཅུག ཡང་དཱ་བིད་ལངས་ཏེ་མར་ཕཱ་རན་བྱ་བའི་བྱེ་ཐང་དུ་སོང་།
1SA 25:2 མཱ་ཨོན་ཡུལ་དུ་མི་ཞིག་ཡོད་པ་དང་དེའི་རྒྱུ་ནོར་ཀར་མེལ་ཞེས་བྱ་བའི་ཡུལ་དུ་ཡོད་པ་ཡིན། མི་དེ་ནི་རྒྱུ་འབྱོར་བ་ཤིན་ཏུ་ཆེ་ཞིང་ཁོ་ལ་ལུག་སྟོང་ཕྲག་གསུམ་དང་། ར་སྟོང་ཕྲག་གཅིག་ཡོད་ཅིང་ཀར་མེལ་ཡུལ་དུ་མི་དེས་ལུག་གི་བལ་འབྲེག་པའི་སྒང་ལ།
1SA 25:3 མི་དེའི་མིང་ལ་ནཱ་རྦལ་ཞེས་ཟེར་ཞིང་ཁོ་ནི་ཀཱ་ལེབ་ཀྱི་རྒྱུད་ཡིན་ལ། ཁོའི་ཆུང་མའི་མིང་ལ་ཨ་བི་གཱ་ཡིལ་ཟེར། བུད་མེད་དེ་ནི་བློ་གྲོས་ལྡན་ཞིང་བྱད་གཟུགས་མཛེས་པ་ཞིག་ཡིན། ཁོ་ནི་གཤིས་ཀ་གྱོང་ཞིང་བྱ་སྤྱོད་ངན་པ་ཞིག་གོ །
1SA 25:4 དཱ་བིད་བྱེ་ཐང་དུ་གནས་པའི་ཚེ་ནཱ་རྦལ་གྱིས་རང་གི་ལུག་བལ་འབྲེག་པའི་གཏམ་ཐོས་ནས།
1SA 25:5 འཁོར་གཡོག་བཅུ་མངགས་ནས་དེ་རྣམས་ལ། ཁྱོད་ཅག་ཀར་མེལ་དུ་ནཱ་རྦལ་གྱི་མདུན་དུ་སོང་སྟེ་ཁོ་ལ་ངའི་མིང་བརྗོད་དེ་ཕྱག་བྱོས་ཤིག
1SA 25:6 ད་དུང་འདི་ལྟར། ཁྱེད་རང་ལོ་ནས་ལོར་བདེ་བར་ཤོག ཁྱེད་དང་ཁྱེད་ཀྱི་ཁྱིམ་དང་ཅི་ཡོད་པ་ཐམས་ཅད་ལ་ཞི་བདེ་འབྱུང་བར་ཤོག་ཅིག
1SA 25:7 ད་ལྟ་ཁྱེད་ཚང་གི་བལ་འབྲེག་པའི་སྐད་ཆ་ངས་ཐོས་ཤིང་ཁྱེད་ཀྱི་ལུག་རྫི་རྣམས་ང་ཚོ་དང་མཉམ་དུ་ཀར་མེལ་དུ་སྡོད་པའི་ཚེ། ང་ཚོས་དེ་དག་ལ་བརྙས་བཅོས་ཅི་ཡང་མ་བྱས་པ་དང་། ཁོ་ཚོའི་དངོས་པོ་ཅི་ཡང་མ་སྟོར་བ་ཡིན།
1SA 25:8 ཁྱེད་ཀྱིས་རང་གི་ཞབས་ཕྱི་རྣམས་ལ་དྲིས་ཤིག་དང་། དེ་དག་གིས་ཇི་བཞིན་འཆད་པར་བྱའོ། །དེའི་ཕྱིར་ངའི་ཞབས་ཕྱི་རྣམས་ལ་ཁྱེད་ཀྱི་སྤྱན་དྲུང་དུ་ཐུགས་རྗེ་འཐོབ་པར་གནང་སྟེ། ང་ཚོ་ཉིན་བཟང་ཞིག་ལ་སླེབས་པས་ཁྱེད་ཀྱི་ཕྱག་ཏུ་གང་ཡོད་ན། དེ་ནི་ཁྱེད་ཀྱི་ཞབས་ཕྱི་བདག་ཅག་དང་ཁྱེད་ཀྱི་བུ་དཱ་བིད་ལ་གནང་བར་མཛོད་སྨྲོས་ཤིག་ཅེས་སྨྲས་སོ། །
1SA 25:9 ཡང་དཱ་བིད་ཀྱི་ཞབས་ཕྱི་རྣམས་གནས་དེར་སླེབས་པའི་ཚེ། དེ་དག་གིས་གཏམ་དེ་བཞིན་དུ་དཱ་བིད་ཀྱི་མིང་བརྗོད་ནས་ནཱ་རྦལ་ལ་སྨྲས་པ་དང་ཁ་རོག་བསྡད།
1SA 25:10 དེ་ནས་ནཱ་རྦལ་གྱིས་དཱ་བིད་ཀྱི་ཞབས་ཕྱི་རྣམས་ལ། དཱ་བིད་སུ་ཡིན་ནམ། ཡེ་སེའི་བུ་སུ་ཡིན་ནམ། ད་ལྟ་རང་གི་འགོ་དཔོན་ནས་ཤོར་བའི་ཞབས་ཕྱིའི་གྲངས་འཕེལ་བཞིན་འདུག
1SA 25:11 ཡང་ངས་རང་གི་བག་ལེབ་དང་། ཆུ་དང་། བལ་འབྲེག་མཁན་གྱི་ཕྱིར་ལུག་བཤས་པའི་ཤ་བླངས་ཏེ་གང་ནས་ཡིན་པ་མི་ཤེས་པའི་མི་རྣམས་ལ་གཏོང་བར་བྱའམ་ཞེས་སྨྲས་པ་དང་།
1SA 25:12 དཱ་བིད་ཀྱི་ཞབས་ཕྱི་རྣམས་ཕྱིར་ལོག་ཅིང་རང་གི་ལམ་དུ་ཞུགས་ཏེ་སླེབས་ནས། ཁོང་ལ་གཏམ་དེ་ཐམས་ཅད་སྨྲས་པ་རེད།
1SA 25:13 དེ་ནས་དཱ་བིད་ཀྱིས་རང་གི་མི་རྣམས་ལ། ད་མི་རེ་རེས་རང་རང་གི་རལ་གྲི་སྟ་གོན་བྱོས་ཤིག་ཅེས་སྨྲས་པས་མི་རེ་རེས་རལ་གྲི་བཏགས་པ་དང་། དཱ་བིད་ཀྱིས་ཀྱང་ཉིད་ཀྱི་རལ་གྲི་བཏགས། དཱ་བིད་ཀྱི་རྗེས་སུ་མི་བཞི་བརྒྱ་འབྲངས་པ་དང་། མི་ཉིས་བརྒྱ་ཡིས་དམག་ཆས་བསྲུངས་ནས་བསྡད་དོ། །
1SA 25:14 དེ་ནས་ནཱ་རྦལ་གྱི་ཞབས་ཕྱི་རྣམས་ལས་གཅིག་གིས་ནཱ་རྦལ་གྱི་ཆུང་མ་ཨ་བི་གཱ་ཡིལ་ལ། ལྟོས་དང་། དཱ་བིད་ཀྱིས་བྱེ་ཐང་ནས་བང་ཆེན་འགའ་ཞིག་ངེད་ཀྱི་འགོ་དཔོན་གྱི་དྲུང་དུ་འཚམས་འདྲི་བྱེད་པར་མངགས་མོད། ཁོས་དེ་དག་ལ་སྐུར་བ་བཏབ་པ་རེད།
1SA 25:15 མི་དེ་རྣམས་ངེད་ཅག་ལ་བཟང་པོ་ཡིན་ཏེ། ང་ཚོ་དབེན་སྟོང་དུ་དེ་དག་དང་མཉམ་དུ་གནས་པའི་ཚེ། ང་ཚོ་ལ་བརྙས་བཅོས་གང་ཡང་མ་བྱུང་ཞིང་། ང་ཚོའི་གྲས་ནས་གང་ཡང་མ་སྟོར་བ་ཡིན།
1SA 25:16 ང་ཚོས་དེ་དག་དང་མཉམ་དུ་ལུག་འཚོ་སྐབས། དེ་དག་ཉིན་མཚན་མེད་པར་ང་ཚོ་སྲུང་བའི་རྩིག་པ་ལྟ་བུ་ཡིན་ནོ། །
1SA 25:17 ངེད་ཀྱི་འགོ་དཔོན་དང་དེའི་ཁྱིམ་ཐམས་ཅད་ལ་སྡུག་བསྔལ་འབྱུང་བར་འགྱུར་བ་ཐག་གིས་ཆོད། ཁོ་མི་གདུག་རྩུབ་ཅན་ཡིན་ཏེ། མི་སུས་ཀྱང་ཁོ་ལ་གཏམ་བྱེད་པར་མི་ནུས་པས། ད་ལྟ་ཁྱེད་ཀྱིས་ཅི་བྱས་ན་ལེགས་པར་བསམ་མནོ་བཏང་ནས་རྟོགས་པར་གྱིས་ཤིག་ཅེས་ཞུས་པས།
1SA 25:18 ཨ་བི་གཱ་ཡིལ་གྱིས་མྱུར་དུ་བག་ལེབ་ཉིས་བརྒྱ་དང་། རྒུན་ཆང་རྐྱལ་བ་གཉིས། ལུག་གི་ཤ་ཁོག་ལྔ། ཡོས་བྲེ་ལྔ། རྒུན་འབྲུམ་སྐམ་པོ་ལེབ་མོ་བརྒྱ། སེ་ཡབ་ལེབ་མོ་ཉིས་བརྒྱ་བཅས་ཁྱེར་ཏེ་བོང་བུར་བཀལ་ཞིང་།
1SA 25:19 ཞབས་ཕྱི་རྣམས་ལ། ཁྱོད་ཅག་མདུན་བསུ་རུ་སོང་དང་། ང་ཁྱོད་ཅག་གི་རྗེས་སུ་འོང་བར་འགྱུར་ཞེས་སྨྲས་ཀྱང་། རང་གི་ཁྱོ་ག་ནཱ་རྦལ་ལ་ཅི་ཡང་མ་བཤད་པ་རེད།
1SA 25:20 ཡང་མོ་བོང་བུར་ཞོན་ཏེ་གྲོག་མོའི་ནང་དུ་འབབ་པའི་ཚེ། ཀྱེ་ཧོ། དཱ་བིད་དང་དེའི་མི་རྣམས་ཀྱང་ཁོ་མོའི་མདུན་དུ་མར་འོངས་པས་མོ་དེ་དག་དང་ཕྲད་དོ། །
1SA 25:21 ཡང་དཱ་བིད་ཀྱིས་སྔར་འདི་ལྟར། ངས་མི་འདིའི་ནོར་ཐམས་ཅད་བྱེ་ཐང་དུ་བསྲུངས་ཏེ་ཁོའི་ནོར་ནས་ཅི་ཡང་སྟོར་དུ་མ་བཅུག་པ་ནི་དངོས་གནས་དོན་མེད་རེད། ཁོས་བཟང་ལན་ངན་འཇལ་བྱས་སོང་།
1SA 25:22 སང་ཉིན་སྐྱ་རེངས་ཀྱི་བར་དུ་ཁོའི་མངའ་འོག་གི་མི་ཐམས་ཅད་ལས་སྐྱེས་པ་གཅིག་ཙམ་ལུས་བཅུག་ན། དཀོན་མཆོག་གིས་བདག་ ལ་འདིའམ་འདི་ལས་ལྷག་པ་ཞིག་མཛད་པར་གྱུར་ཅིག་ཅེས་སྨྲས་སོ། །
1SA 25:23 དེ་ནས་ཁོ་མོས་དཱ་བིད་མཐོང་སྟེ་མྱུར་དུ་བོང་བུ་ལས་བབས་ནས། དཱ་བིད་ཀྱི་དྲུང་དུ་རང་གི་གདོང་ས་ལ་བཏུད་དེ།
1SA 25:24 ཁོའི་ཞབས་དྲུང་དུ་ཕྱག་བཙལ་ནས་འདི་ལྟར། ཀྱེ་བདག་གི་ཇོ་བོ། སྐྱོན་དེ་ནི་བདག་གི་ཐོག་ཏུ་འབབ་པར་གྱུར་ཅིག ཡང་ཁྱེད་ཀྱིས་ཉིད་ཀྱི་གཡོག་མོ་བདག་ལ་ཁྱེད་ཀྱི་སྙན་ལམ་དུ་གཏམ་བྱེད་པར་གནོངས་ཤིག དེ་ལས་ཀྱང་ཁྱེད་ཀྱིས་ཉིད་ཀྱི་གཡོག་མོའི་གཏམ་ལ་གསན་རོགས།
1SA 25:25 ཀྱེ་བདག་གི་ཇོ་བོ། མི་ངན་པ་ནཱ་རྦལ་ལ་ཁ་ཡ་མི་བྱེད་པར་མཛོད། ཁོ་ནི་ཁོའི་མིང་ལྟར་གླེན་པ་ཞིག་ཡིན། འོན་ཀྱང་ཁྱེད་ཀྱི་གཡོག་མོ་བདག་གིས་ནི་ཁྱེད་ཀྱིས་མངགས་པའི་ཞབས་ཕྱི་རྣམས་མཐོང་བ་མ་ཡིན།
1SA 25:26 ད་ལྟ་བདག་གི་ཇོ་བོ་ལགས། ཁྱེད་ཀྱིས་དངོས་སུ་དགྲ་ཤ་བླངས་ཏེ་ཁྲག་བཞུར་བའི་ལས་བྱེད་པ་ནི་དཀོན་མཆོག་ཡ་ཝཱེས་འགོག་པར་མཛད་པས། ངས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་འཛུགས་པ་དང་ཁྱེད་རང་ཡང་དཔང་དུ་བཙུགས་པ་ཡིན་ཏེ། ཁྱེད་ཀྱི་དགྲ་བོའམ་ཁྱེད་ལ་གནོད་བསྐྱལ་བའི་མི་ཐམས་ཅད་ནཱ་རྦལ་དང་འདྲ་བར་གྱུར་ཅིག
1SA 25:27 ད་ལྟ་ཁྱེད་ཀྱི་གཡོག་མོས་རང་གི་ཇོ་བོའི་ཕྱིར་ཁྱེར་འོངས་པའི་ཞུ་རྟེན་འདི་ནི་ཉིད་ཀྱི་རྗེས་སུ་འབྲང་བའི་ཞབས་ཕྱི་རྣམས་ལ་གནང་བར་མཛོད་ཅིག
1SA 25:28 ཁྱེད་ཀྱི་གཡོག་མོས་བྱས་པའི་སྡིག་ཉེས་འདི་སེལ་བར་མཛོད་ཅིག ཀྱེ་བདག་གི་ཇོ་བོ་ལགས། ཁྱེད་ནི་དཀོན་མཆོག་ཡ་ཝཱེའི་དམག་འཐབ་ཏུ་འགྲོ་བས། དཀོན་མཆོག་ཡ་ཝཱེས་ངེས་པར་དུ་ཁྱེད་ཀྱི་རྒྱུད་བརྟན་པོར་འཛུགས་པར་འགྱུར་ལ། ཁྱེད་ལས་ཇི་སྲིད་འཚོ་བའི་བར་དུ་མི་ལེགས་པ་ཅི་ཡང་རྙེད་པར་མི་འགྱུར་རོ། །
1SA 25:29 ད་ལྟ་ཁྱེད་ཀྱི་རྗེས་འདེད་མཁན་དང་ཁྱེད་ཀྱི་སྲོག་འཚོལ་བའི་མི་ཞིག་བྱུང་ན་ཡང་། བདག་གི་ཇོ་བོའི་ཚེ་སྲོག་ནི་ཁྱེད་ཀྱི་དཀོན་མཆོག་ཡ་ཝཱེས་བསྲུངས་ཡོད་པ་དང་ཚེ་སྲོག་གི་རིན་ཆེན་གཏེར་མཛོད་དུ་སྦས་པ་ནང་བཞིན་ཡིན་ལ། ཁྱེད་ཀྱི་དགྲ་བོ་རྣམས་ཀྱི་མི་ཚེ་འུར་རྡོ་འཕངས་པ་བཞིན་གཡུག་པར་འགྱུར།
1SA 25:30 ཡང་དཀོན་མཆོག་ཡ་ཝཱེས་བདག་གི་ཇོ་བོ་ལ་གནང་བའི་ཞལ་བཞེས་བཟང་པོ་ཐམས་ཅད་བསྒྲུབས་ནས་ཁྱེད་ཉིད་ཡེས་ར་ཨེལ་གྱི་རྒྱལ་པོར་བསྐོ་བའི་ཚེ།
1SA 25:31 ཉེས་མེད་ཀྱི་ཁྲག་བཞུར་བ་དང་རང་གིས་དགྲ་ཤ་བླངས་པའི་སྡིག་པ་ནི་རང་གི་ཇོ་བོའི་སེམས་སུ་སྐྱོན་ལྟ་བུར་འབྱུང་མི་འགྱུར། རྗེས་སུ་དཀོན་མཆོག་ཡ་ཝཱེས་ཁྱེད་ལ་བྱིན་རླབས་གནང་བའི་ཚེ། ཁྱེད་ཀྱིས་ཉིད་ཀྱི་གཡོག་མོ་དྲན་པར་མཛོད་ཅེས་ཞུས་སོ། །
1SA 25:32 དཱ་བིད་ཀྱིས་ཨ་བི་གཱ་ཡིལ་ལ། ཡེས་ར་ཨེལ་གྱི་དཀོན་མཆོག་ཡ་ཝཱེ་ནི་བསྟོད་འོས་པ་ཡིན་ཏེ། རྒྱུ་མཚན་ནི་དེ་རིང་ཁོང་གིས་ཁྱོད་མངགས་ནས་ང་བསུས་པས་སོ། །
1SA 25:33 ཁྱོད་དང་ཁྱོད་ཀྱི་མཐོང་རྒྱ་ལའང་བསྟོད་པ་འབུལ་འོས་ཏེ། རྒྱུ་མཚན་ནི་ངས་དངོས་སུ་དགྲ་ཤ་ལེན་པ་དང་གཞན་གྱི་ཁྲག་བཞུར་བ་ལ་ཁྱོད་ཀྱིས་བར་བཤོལ་བས་སོ། །
1SA 25:34 ཁྱོད་བརྒྱུགས་ཏེ་ང་དང་འཕྲད་དུ་མ་ཡོང་ཚེ། སྔ་མོ་སྐྱ་རེངས་ཀྱི་དུས་སུ་ནཱ་རྦལ་མངའ་འོག་གི་སྐྱེས་པ་གཅིག་ཀྱང་མི་ལུས་པ་ཡིན་ཏེ། ངས་ཁྱོད་ལ་གནོད་བྱེད་པ་འགོག་པར་མཛད་པའི་གཏན་དུ་བཞུགས་པའི་ཡེས་ར་ཨེལ་གྱི་དཀོན་མཆོག་ཡ་ཝཱེ་དཔང་དུ་འཛུགས་པར་བྱ་ཞེས་སྨྲས།
1SA 25:35 དཱ་བིད་ཀྱིས་ཁོ་མོས་ཁྱེར་འོངས་པའི་ནོར་རྫས་ཐམས་ཅད་བླངས་ནས་དེ་ལ། ཁྱོད་རང་སེམས་ཁྲལ་མེད་པར་རང་གི་ཁྱིམ་དུ་སོང་ཞིག ལྟོས་དང་། ངས་ཁྱོད་ཀྱི་ངོ་སོ་ལ་བལྟས་ཏེ་གཏམ་ལ་མཉན་པ་ཡིན་ཞེས་སྨྲས་སོ། །
1SA 25:36 ཨ་བི་གཱ་ཡིལ་ནི་ནཱ་རྦལ་གྱི་དྲུང་དུ་ལོག་འོང་བའི་ཚེ་རྒྱལ་པོའི་དགའ་སྟོན་དང་འདྲ་བར་ཁོས་རང་གི་ཁྱིམ་ལ་དགའ་སྟོན་བྱས་ཤིང་། ནཱ་རྦལ་ནི་ཤིན་ཏུ་ར་བཟི་བས་སེམས་དགའ་བར་གྱུར། དེའི་ཕྱིར། སྔ་མོ་སྐྱ་རེངས་ཀྱི་བར་དུ་ཨ་བི་གཱ་ཡིལ་གྱིས་ཁོ་ལ་བྱ་བ་ཆེ་ཆུང་གང་ཡང་མ་སྨྲས་པ་རེད།
1SA 25:37 ཞོགས་པའི་དུས་སུ་ནཱ་རྦལ་བཟི་དྭངས་པ་དང་ཁོའི་ཆུང་མས་སྐད་ཆ་ཐམས་ཅད་སྨྲས་པས། ཁོའི་སྙིང་ཁྲག་འགག་ནས་ལུས་པོ་རྡོ་ལྟར་རེངས་པོར་གྱུར།
1SA 25:38 དེ་ནས་ཞག་བཅུ་ཙམ་སོང་བ་དང་དཀོན་མཆོག་ཡ་ཝཱེས་ནཱ་རྦལ་ལ་བརྡུངས་པས་ཁོ་ཤིའོ། །
1SA 25:39 དཱ་བིད་ཀྱིས་ནཱ་རྦལ་ཤི་ཟིན་པའི་གཏམ་ཐོས་ནས་འདི་ལྟར། དཀོན་མཆོག་ཡ་ཝཱེ་ནི་བསྟོད་འོས་པ་ཡིན་ཏེ། ནཱ་རྦལ་གྱི་ལག་ནས་ང་ལ་གནོད་པ་བྱུང་བའི་ཚེ་དཀོན་མཆོག་ཡ་ཝཱེས་ངའི་དོན་དུ་ཁོ་ལ་ཁྲིམས་བཅད་པ་དང་། ཁོང་ཉིད་ཀྱི་ཞབས་ཕྱི་བདག་གིས་སྡིག་པ་བྱེད་པ་འགོག་པར་མཛད། ཁོང་གིས་ནཱ་རྦལ་གྱི་ཉེས་པ་ནཱ་རྦལ་རང་གི་མགོ་ལ་བཞག་ཅེས་སྨྲས་ཤིང་། དཱ་བིད་ཀྱིས་ཨ་བི་གཱ་ཡིལ་རང་གི་ཆུང་མར་ལེན་འདོད་ནས་དེ་དང་གཏམ་བྱེད་དུ་མི་མངགས་པ་རེད།
1SA 25:40 དཱ་བིད་ཀྱི་ཞབས་ཕྱི་རྣམས་ཀར་མེལ་དུ་ཨ་བི་གཱ་ཡིལ་གྱི་མདུན་དུ་སླེབས་ནས་དེ་དག་གིས། ཁྱེད་དཱ་བིད་ཀྱི་ཆུང་མར་འགྱུར་བའི་ཕྱིར་ཁོང་གིས་བདག་ཅག་ཁྱེད་ཀྱི་མདུན་དུ་མངགས་པ་ཡིན་ཞེས་སྨྲས་པ་དང་།
1SA 25:41 ཨ་བི་གཱ་ཡིལ་ལངས་ནས་ལུས་སར་བཏུད་དེ་ཕྱག་བཙལ་ཞིང་ན་རེ། ཁྱེད་ཀྱི་གཡོག་མོ་བདག་ནི་ཇོ་བོའི་ཞབས་ཕྱི་རྣམས་ཀྱི་རྐང་པ་བཀྲུ་བའི་གཡོག་མོ་ཞིག་ཡིན་ཞེས་སྨྲས།
1SA 25:42 ཡང་ཨ་བི་གཱ་ཡིལ་མྱུར་དུ་ལངས་ནས་བོང་བུར་ཞོན་ཏེ་རང་གི་གཡོག་མོ་ལྔ་དང་བཅས་ཏེ་དཱ་བིད་ཀྱི་བང་ཆེན་གྱི་རྗེས་སུ་སོང་ནས་ཁོའི་ཆུང་མར་གྱུར་ཏོ། །
1SA 25:43 དེ་ནས་དཱ་བིད་ཀྱིས་ཡེ་སི་རེ་ཨེལ་ནས་ཨ་ཧི་ནོ་ཨམ་ཡང་བླངས་ནས་དེ་གཉིས་ནི་ཁོའི་ཆུང་མ་ཡིན།
1SA 25:44 ཡང་སོ་ལོས་རང་གི་སྲས་མོ་མི་ཀལ་ཏེ། སྔར་དཱ་བིད་ཀྱི་ཆུང་མ་ཡིན་པ་དེ་ནི་ལཱ་ཨི་སི་ཡི་བུ་ཕཱལ་ཏི་ལ་བག་མར་བཏང་ཞིང་། ཕཱལ་ཏི་ནི་གཱལ་ལིམ་གྲོང་རྡལ་གྱི་མི་ཡིན་ནོ། །
1SA 26:1 དེ་ནས་ཟིབ་པ་རྣམས་གིབ་ཨ་རུ་སོ་ལོའི་དྲུང་དུ་འོངས་ནས། དཱ་བིད་ནི་ཡེ་ཤི་མོན་ཁ་གཏད་དུ་ཡོད་པའི་རི་ཧ་ཀི་ལཱ་དེར་ཡིབ་འདུག་ཅེས་སྨྲས་པས།
1SA 26:2 སོ་ལོ་ལངས་ནས་ཡེས་ར་ཨེལ་པ་རྣམས་ལས་བདམས་པའི་མི་སྟོང་ཕྲག་གསུམ་ཁྲིད་དེ་དཱ་བིད་འཚོལ་བའི་ཕྱིར་ཟིབ་ཀྱི་བྱེ་ཐང་དུ་མར་སོང་བ་རེད།
1SA 26:3 དེ་ནས་སོ་ལོས་ཡེ་ཤི་མོན་ཁ་གཏད་དུ་ཡོད་པའི་རི་ཧ་ཀི་ལཱའི་གམ་གྱི་ལམ་འགྲམ་ལ་དམག་སྒར་བཏབ། དཱ་བིད་བྱེ་ཐང་དུ་གནས་པ་དང་། ཁོས་སོ་ལོ་བྱེ་ཐང་དུ་རང་གི་རྗེས་དེད་ནས་འོངས་པ་མཐོང་བས།
1SA 26:4 དཱ་བིད་ཀྱིས་མྱུལ་མ་མངགས་ཤིང་སོ་ལོ་དངོས་གནས་སླེབས་པ་ཤེས།
1SA 26:5 དེ་ནས་དཱ་བིད་ལངས་ནས་སོ་ལོས་དམག་སྒར་བཏབ་པའི་གནས་སུ་སླེབས་པ་དང་དཱ་བིད་ཀྱིས་སོ་ལོ་ཉལ་སའི་གནས་དང་། སོ་ལོ་ཡི་དམག་དཔོན་ནེར་གྱི་བུ་ཨབ་ནེར་བྱ་བ་དེ་མཐོང་། སོ་ལོ་དམག་སྒར་ལ་ཉལ་ཏེ་དམག་ཚོགས་ཀྱིས་དེའི་མཐའ་འཁོར་ལ་དམག་གུར་ཕུབ་བོ། །
1SA 26:6 དཱ་བིད་ཀྱིས་ཧེད་པ་ཨ་ཧི་མེ་ལེག་དང་ཟེ་རུ་ཡཱ་ཡི་བུ་ཨ་བི་ཤཱ་ཨི་སྟེ་ཡོ་ཨབ་གྱི་ནུ་བོ་ཡིན་པ་དེ་གཉིས་ལ། སུ་ཞིག་ང་དང་མཉམ་དུ་དམག་སྒར་ལ་སོ་ལོའི་གམ་དུ་འགྲོ་ཞེས་དྲིས་པར། ཨ་བི་ཤཱ་ཨི་ཡིས། ང་ཁྱེད་དང་མཉམ་དུ་འགྲོ་ཞེས་ཞུས་ནས།
1SA 26:7 དཱ་བིད་དང་ཨ་བི་ཤཱ་ཨི་གཉིས་མཚན་གྱི་དུས་སུ་དམག་ཚོགས་ཀྱི་དཀྱིལ་དུ་སླེབས་ཏེ། སོ་ལོ་དམག་སྒར་ལ་གཉིད་ནས་བསྡད་ཡོད་ཅིང་ཁོའི་མདུང་ནི་ས་རུ་མགོ་ཡི་ཕྱོགས་སུ་བཙུགས་ཏེ། ཨབ་ནེར་དང་དམག་ཚོགས་ནི་རྒྱལ་པོའི་མཐའ་བསྐོར་ནས་ཉལ་ཡོད་པ་རེད།
1SA 26:8 དེ་ནས་ཨ་བི་ཤཱ་ཨི་ཡིས་དཱ་བིད་ལ། དཀོན་མཆོག་གིས་ཁྱེད་ཀྱི་དགྲ་བོ་ཁྱེད་ཀྱི་ལག་ཏུ་སྤྲད་པས། ད་ལྟ་ང་ལ་ཁོ་གསོད་དུ་ཆུག་ཅིག ངས་ཁོ་མདུང་དང་མཉམ་དུ་ལན་གཅིག་གིས་ས་རུ་འབིགས་པར་བྱ་སྟེ། ལན་གཉིས་པར་རྒྱག་མི་དགོས་ཞེས་སྨྲས་པར།
1SA 26:9 དཱ་བིད་ཀྱིས་ཨ་བི་ཤཱ་ཨི་ལ། ཁོ་མ་གསོད་ཅིག དཀོན་མཆོག་ཡ་ཝཱེས་བྱུགས་པའི་སྟེང་ལག་པ་བརྐྱངས་ན་ཆད་པ་མེད་པར་སུ་ལུས་སམ་ཞེས་དྲིས་པ་དང་།
1SA 26:10 ཡང་དཱ་བིད་ཀྱིས། ངས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་པ་ཡིན་ཏེ། དཀོན་མཆོག་ཡ་ཝཱེས་ཁོ་རང་གསོད་ངེས་པའམ་ཡང་ན་ཁོའི་འཆི་བ་སླེབས་འོང་། ཡང་ན་ཁོ་འཐབ་མོར་སོང་སྟེ་འཆི་བར་འགྱུར།
1SA 26:11 འོན་ཀྱང་དཀོན་མཆོག་ཡ་ཝཱེས་ངའི་ལག་པ་ནི་ཁོང་གིས་བྱུགས་པའི་སྟེང་དུ་རྐྱོང་བ་འགོག་པར་མཛོད་ཅིག ད་ལྟ་ཁྱོད་ཀྱིས་སོ་ལོའི་མགོ་ཡི་ལོགས་སུ་ཡོད་པའི་མདུང་དང་ཆུ་སྣོད་གཉིས་ལོངས་ཤིག་དང་ངེད་གཉིས་འགྲོ་བར་བྱ་སྨྲས་ནས།
1SA 26:12 དཱ་བིད་ཀྱིས་སོ་ལོའི་མགོ་ཡི་ལོགས་ནས་མདུང་དང་ཆུ་སྣོད་བླངས་ཏེ་སོང་། དཀོན་མཆོག་ཡ་ཝཱེས་དེ་དག་ལ་གཉིད་ལྕི་མོ་ཞིག་ཕབ་པས་མི་སུས་ཀྱང་བྱ་བ་དེ་མ་མཐོང་། མི་སུས་ཀྱང་མ་ཤེས། མི་སུ་ཡང་གཉིད་ལས་མ་སད་པར། ཐམས་ཅད་གཉིད་ནས་བསྡད་དོ། །
1SA 26:13 དེ་ནས་དཱ་བིད་ཕྱོགས་གཞན་ཞིག་ཏུ་སོང་སྟེ། རྒྱང་རིང་དུ་ཡོད་པའི་རི་ཞིག་གི་རྩེ་མོར་འགོས་ཤིང་དེ་དག་གི་བར་ཐག་ཤིན་ཏུ་རིང་བ་ཡིན།
1SA 26:14 དེ་ནས་དཱ་བིད་ཀྱིས་དམག་དཔུང་དང་ནེར་གྱི་བུ་ཨབ་ནེར་གཉིས་ཀ་བོས་ནས་འདི་ལྟར། ཀྱེ་ཨབ་ནེར་ཁྱེད་ཀྱིས་ལན་མི་འདེབས་པ་ཅི་ཡིན་ནམ་ཞེས་དྲིས་པ་ན། ཨབ་ནེར་གྱིས་ལན་དུ། རྒྱལ་པོ་འབོད་མཁན་ཁྱོད་སུ་ཡིན་ཞེས་སྨྲས་པར།
1SA 26:15 དཱ་བིད་ཀྱིས་ཨབ་ནེར་ལ། ཁྱེད་ནི་དཔའ་རྒོད་མ་ཡིན་ནམ། ཡེས་ར་ཨེལ་གྱི་ཁྲོད་དུ་ཁྱེད་དང་འདྲ་བ་སུ་ཡོད། འབངས་རྣམས་ཁྲོད་ནས་མི་ཞིག་ཁྱེད་ཀྱི་ཇོ་བོ་སྟེ་རྒྱལ་པོ་གསོད་དུ་འོངས། རྒྱལ་པོ་སྟེ་ཁྱེད་ཀྱི་ཇོ་བོ་ནི་ཁྱེད་ཀྱིས་ཅིའི་ཕྱིར་མ་བསྲུངས་པ་ཡིན།
1SA 26:16 ཁྱེད་ཀྱིས་བྱས་པའི་བྱ་བ་དེ་ནི་བཟང་པོ་མིན་ལ། གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་འདི་ལྟར་སྨྲའོ། །དཀོན་མཆོག་ཡ་ཝཱེས་བྱུགས་པའི་ཁྱེད་ཅག་གི་ཇོ་བོ་དེ་མ་བསྲུངས་པས། ཁྱེད་ཅག་འཆི་འོས་པ་ཡིན། ཡང་རྒྱལ་པོའི་མདུང་དང་མགོའི་ལོགས་སུ་ཡོད་པའི་ཆུ་སྣོད་གང་དུ་ཡོད་པར་ལྟོས་ཤིག་ཅེས་སྨྲས་སོ། །
1SA 26:17 སོ་ལོས་དཱ་བིད་ཀྱི་སྐད་ཤེས་ཏེ། ཀྱེ་ངའི་བུ་དཱ་བིད། འདི་ཁྱོད་ཀྱི་སྐད་ཡིན་ནམ་ཞེས་དྲིས་ནས། དཱ་བིད་ཀྱིས་ཀྱེ་རྒྱལ་པོ་བདག་གི་ཇོ་བོ་ལགས། འདི་ངའི་སྐད་ཡིན་ཏེ།
1SA 26:18 ཇོ་བོ་ཁྱེད་ཀྱིས་རང་གི་ཞབས་ཕྱི་བདག་ཅིའི་ཕྱིར་འདེད་དམ། བདག་གིས་ཅི་བྱས་སམ། བདག་གི་ལག་ནས་བྱ་བ་ངན་པ་ཅི་ཞིག་བྱུང་ངམ།
1SA 26:19 ཀྱེ་རྒྱལ་པོ་བདག་གི་ཇོ་བོ་ལགས། ཁྱེད་ཀྱི་ཞབས་ཕྱི་བདག་གི་གཏམ་ལ་གསན་རོགས། གལ་ཏེ་དཀོན་མཆོག་ཡ་ཝཱེས་ཁྱེད་ལ་ངར་བསླངས་ནས་བདག་ལ་རྒོལ་དུ་བཅུག་པ་ཡིན་ན། ཁོང་ལ་དགྱེས་པའི་མཆོད་པར་གྱུར་ཅིག གལ་ཏེ་མིའི་བུ་རྣམས་ཀྱིས་རྒོལ་དུ་བཅུག་པ་ཡིན་ན། དཀོན་མཆོག་ཡ་ཝཱེའི་དྲུང་དུ་དེ་དག་ལ་དམོད་མོ་ཐེབས་པར་གྱུར་ཅིག དེ་རིང་ཉིན་མོར་བདག་ནི་དཀོན་མཆོག་ཡ་ཝཱེའི་ནོར་སྐལ་མི་འཐོབ་པའི་ཆེད་དུ། དེ་དག་གིས་བདག་ལ་ད་སོང་ནས་ལྷ་གཞན་ལ་ཕྱག་ཕུལ་ཞིག་ཟེར།
1SA 26:20 དེའི་ཕྱིར་དཀོན་མཆོག་ཡ་ཝཱེ་དང་རྒྱང་ཐག་རིང་སར་བདག་གི་ཁྲག་སར་བཞུར་དུ་མི་འཇུག་རོགས། སུ་ཞིག་རི་ལ་བྱ་སྲེག་པ་བརྔོན་དུ་འོངས་པ་ལྟར། ཡེས་ར་ཨེལ་གྱི་རྒྱལ་པོ་ནི་ཁྱི་ཤིག་བཙལ་དུ་འོངས་པ་རེད་ཅེས་ཞུས་སོ། །
1SA 26:21 སོ་ལོས་ངས་སྡིག་པ་བྱས་པ་ཡིན། ཀྱེ་ངའི་བུ་དཱ་བིད་དེ་རིང་ཁྱོད་ཀྱིས་ངའི་ཚེ་སྲོག་རིན་ཐང་ཅན་དུ་བརྩིས་པས། ངས་ཁྱོད་ལ་ཡང་བསྐྱར་གནོད་པར་མི་བྱ། ང་སྨྱོས་ནས་ཤིན་ཏུ་ནོར་བ་ཡིན་ཞེས་སྨྲས།
1SA 26:22 དཱ་བིད་ཀྱིས་ལན་དུ། ཀྱེ། འཁོར་གཡོག་རྣམས་ལས་གཅིག་འདི་རུ་མངགས་ཏེ་རྒྱལ་པོའི་མདུང་ཕྱིར་ཁྱེར་ཅིག
1SA 26:23 དཀོན་མཆོག་ཡ་ཝཱེས་དྲང་པོ་དང་ཟོལ་མེད་ཡིན་པ་དེར་ལན་གནང་བ་ཡིན་ཞིང་དེ་རིང་དཀོན་མཆོག་ཡ་ཝཱེས་ཁྱེད་ངའི་ལག་ཏུ་སྤྲོད་པར་མཛད་ཀྱང་། བདག་ནི་དཀོན་མཆོག་ཡ་ཝཱེས་བྱུགས་པའི་སྟེང་དུ་རང་གི་ལག་པ་རྐྱོང་བར་མ་དགའོ། །
1SA 26:24 ཡང་གཟིགས་དང་། དེ་རིང་ཉིན་མོར་ཁྱེད་ཀྱི་སྲོག་ངའི་མིག་མདུན་དུ་ཇི་ལྟར་རིན་ཐང་ཅན་ཡིན་པ་བཞིན། བདག་གི་སྲོག་ཀྱང་དཀོན་མཆོག་ཡ་ཝཱེའི་སྤྱན་དྲུང་དུ་རིན་ཐང་ཅན་དུ་འགྱུར་བར་མ་ཟད་ཁོང་གིས་བདག་སྡུག་བསྔལ་ཐམས་ཅད་ལས་སྐྱོབ་པར་མཛོད་ཅིག་ཅེས་ཞུས་པས།
1SA 26:25 སོ་ལོས་དཱ་བིད་ལ། ཀྱེ་ངའི་བུ་དཱ་བིད་ཁྱོད་བདེ་བར་གྱུར་ཅིག ཁྱོད་ཀྱིས་ངོ་མཚར་ཆེ་བའི་ལས་བསྒྲུབ་པར་བྱའོ། །ཅིས་ཀྱང་རྒྱལ་བར་འགྱུར་ཞེས་སྨྲས་ནས་དཱ་བིད་རང་གི་ལམ་ལ་ཞུགས་པ་དང་སོ་ལོ་རང་གི་གནས་སུ་ཕྱིར་ལོག་གོ །
1SA 27:1 ཡང་དཱ་བིད་ཀྱི་སེམས་སུ། ཉིན་ཞིག་ང་སོ་ལོའི་ལག་ནས་འཆི་བར་འགྱུར། ང་མྱུར་དུ་ཕེ་ལེ་ཤེད་པའི་ཡུལ་དུ་འབྲོ་བ་ལས་ཐབས་གཞན་གང་ཡང་མི་འདུག དེ་ནས་སོ་ལོ་ནི་ཡེས་ར་ཨེལ་གྱི་ས་མཚམས་ཐམས་ཅད་ལ་འཚོལ་བར་ངལ་བ་དང་ང་རང་ཁོའི་ལག་ནས་ཐར་བར་འགྱུར་བསམས་ཏེ།
1SA 27:2 དཱ་བིད་དང་མཉམ་དུ་ཡོད་པའི་མི་དྲུག་བརྒྱ་ཐོན་ནས་གཱད་ཀྱི་རྒྱལ་པོ་མཱ་ཨོག་གི་བུ་ཨ་ཀི་སི་བྱ་བའི་དྲུང་དུ་ཕྱིན།
1SA 27:3 ཡང་དཱ་བིད་དང་ཁོའི་མི་རྣམས་གཱད་ཅེས་པའི་ཡུལ་དུ་ཨ་ཀི་སི་ཡི་དྲུང་དུ་གནས་པ་དང་དེར་མི་རེ་ལ་ཁྱིམ་རེ་ཡོད་ཅིང་། དཱ་བིད་དང་མཉམ་དུ་ཆུང་མ་གཉིས་པོ་སྟེ། ཡེ་སི་རེ་ཨེལ་གྱི་བུད་མེད་ཨ་ཧི་ནོ་ཨམ་དང་ཀར་མེལ་གྱི་བུད་མེད་དེ་སྔར་ནཱ་རྦལ་གྱི་ཆུང་མ་ཡིན་པ་ཨ་བི་གཱ་ཡིལ་ཞེས་པ་གཉིས་དེར་གནས་པ་རེད།
1SA 27:4 དེ་ནས་སོ་ལོས་དཱ་བིད་ནི་གཱད་ཡུལ་དུ་བྲོས་པའི་སྐད་ཆ་ཐོས་པ་དང་ཁོ་འཚོལ་བ་སྤངས་སོ། །
1SA 27:5 དེ་ནས་དཱ་བིད་ཀྱིས་ཨ་ཀི་སི་ལ་གལ་ཏེ་ང་ལ་ཁྱེད་ཀྱི་སྤྱན་དྲུང་དུ་ཐུགས་རྗེ་ཐོབ་པ་ཡིན་ན། ང་རང་གྲོང་རྡལ་ཞིག་ཏུ་གནས་པའི་ཕྱིར་ས་ཆ་ཞིག་གནང་རོགས། ཉིད་ཀྱི་ཞབས་ཕྱི་བདག་ནི་ཁྱེད་དང་མཉམ་དུ་རྒྱལ་ས་རུ་གནས་དགོས་དོན་ཅི་ཡོད་ཅེས་ཞུས་པས།
1SA 27:6 ཉིན་དེ་ལ་ཨ་ཀི་སི་ཡིས་དཱ་བིད་ལ་ཙིག་ལག་ཅེས་པའི་ས་ཆ་བཏང་བས། དེ་རིང་གི་བར་དུ་ཙིག་ལག་ནི་ཡ་ཧུ་དཱའི་རྒྱལ་པོ་ལ་དབང་བ་ཡིན།
1SA 27:7 དཱ་བིད་ནི་ཕེ་ལེ་ཤེད་པའི་ཡུལ་དུ་ལོ་གཅིག་དང་ཟླ་བཞི་ཡི་རིང་ལ་གནས་པ་ཡིན་ནོ། །
1SA 27:8 ཡང་དཱ་བིད་དང་དེའི་མི་རྣམས་སོང་སྟེ། གེ་ཤུར་པ་དང་གིར་ཟི་པ་དང་ཨ་མཱད་ལེག་པ་སྟེ། མི་རིགས་གསུམ་ལ་དམག་དྲངས་པ་དང་། མི་རིགས་དེ་གསུམ་ནི་ཤུར་ཞེས་པའི་དབེན་སྟོང་བརྒྱུད་ནས་ཨེ་ཅིབ་ཡུལ་བར་གནའ་བོའི་དུས་ནས་གནས་པ་ཡིན།
1SA 27:9 དཱ་བིད་ཀྱིས་ཡུལ་དེར་རྒོལ་ནས་སྐྱེས་པ་དང་བུད་མེད་གཉིས་གསོན་པོར་མ་བཞག་པར་ར་ལུག་དང་བ་གླང་། བོང་བུ་དང་རྔ་མོང་། གོས་སོགས་ཕྲོགས་ནས་ཕྱིར་ལོག་སྟེ་ཨ་ཀི་སི་ཡི་མདུན་དུ་ཕྱིན།
1SA 27:10 དེ་ནས་ཨ་ཀི་སི་ཡིས་དེ་རིང་ཁྱོད་གང་ལ་རྒོལ་དུ་སོང་ངམ་ཞེས་དྲིས་པར། ལན་དུ་དཱ་བིད་ཀྱིས་མཚམས་རེར་ངེད་ཅག་ཡ་ཧུ་དཱ་ཡུལ་གྱི་ནེ་གུབ་ཡུལ་ལ་རྒོལ་དུ་ཕྱིན་པ་ཡིན་ཞེས་དང་། མཚམས་རེར་ངེད་ཅག་ཡིར་ཧིམ་ཨེལ་གྱི་ནེ་གུབ་ཡུལ་ལ་རྒོལ་དུ་ཕྱིན་པ་ཡིན་ཞེས་དང་། ཡང་མཚམས་རེར་ངེད་ཅག་ཀེ་ནེ་པའི་ནེ་གུབ་ཡུལ་ལ་རྒོལ་དུ་ཕྱིན་པ་ཡིན་ཞེས་སྨྲས།
1SA 27:11 དཱ་བིད་ཀྱིས་ཅིའི་ཕྱིར་སྐྱེས་པ་དང་བུད་མེད་རྣམས་གསོན་པོར་མ་བཞག་གམ་ཞེ་ན། དེ་དག་གིས་གཱད་ཡུལ་དུ་དཱ་བིད་ཀྱིས་དེ་ལྟར་བྱས་སོང་ཞེས་དཔང་པོ་མི་བྱེད་པའི་ཕྱིར། ཕེ་ལེ་ཤེད་པའི་ཡུལ་དུ་གནས་པའི་རིང་ལ་ཁོས་རྒྱུན་དུ་དེ་ལྟར་བྱས་པ་རེད།
1SA 27:12 ཡང་ཨ་ཀི་སི་ནི་དཱ་བིད་ཀྱི་གཏམ་ལ་ཡིད་ཆེས་ཏེ་སེམས་སུ། ཁོ་ནི་ཡེས་ར་ཨེལ་གྱི་མི་རྣམས་ཀྱི་མདུན་དུ་ངེས་པར་སྐྱུག་བྲོ་བར་གྱུར་པས་རྒྱུན་དུ་ངའི་ཞབས་ཕྱི་རུ་ལུས་པར་འགྱུར་ཞེས་སྨྲས་སོ། །
1SA 28:1 སྐབས་དེར། ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་དང་དམག་རྒྱག་པའི་ཕྱིར་དམག་ཚོགས་བསྡུ་བའི་ཚེ། ཨ་ཀི་སི་ཡིས་དཱ་བིད་ལ། ཁྱོད་དང་ཁྱོད་ཀྱི་མི་རྣམས་ང་དང་ལྷན་ཅིག་དམག་ཏུ་འགྲོ་དགོས་པ་ངེས་པར་ཤེས་དགོས་ཞེས་སྨྲས་པས།
1SA 28:2 དཱ་བིད་ཀྱིས་ཨ་ཀི་སི་ལ། དེ་ནས་ཁྱེད་ཀྱི་ཞབས་ཕྱི་ཡིས་ཅི་བྱེད་ནུས་པ་ཁྱེད་ཀྱིས་མཁྱེན་པར་འགྱུར་ཞེས་ཞུས་ཤིང་། ཨ་ཀི་སི་ཡིས་དཱ་བིད་ལ། དེའི་ཕྱིར་ཁྱོད་རང་རྒྱུན་དུ་ངའི་སྐུ་སྲུང་པར་བསྐོ་བ་ཡིན་ཞེས་སྨྲས་སོ། །
1SA 28:3 སྔར་སཱ་མུ་ཨེལ་ཚེ་ལས་འདས་པའི་སྐབས་སུ། ཡེས་ར་ཨེལ་པ་ཐམས་ཅད་ཀྱིས་ཁོང་གི་ཕྱིར་མྱ་ངན་བྱས་ནས།　ཁོང་གི་སྐུ་གདུང་ཁོང་ཉིད་ཀྱི་གྲོང་ཁྱེར་རཱ་མ་ཡུལ་དུ་དུར་ལ་བཅུག སོ་ལོས་གཤིན་པོ་འགུག་མཁན་དང་རྫུ་འཕྲུལ་ཅན་དག་ཡུལ་ནས་བཏོན་ཚར་བ་ཡིན།
1SA 28:4 ད་ལྟ་ཕེ་ལེ་ཤེད་པ་རྣམས་འཛོམས་ནས་ཤུ་ནེམ་དུ་འོངས་ཏེ་སྒར་བཏབ། ཡང་སོ་ལོས་ཡེས་ར་ཨེལ་པ་ཐམས་ཅད་བསྡུས་ནས་གིལ་བོ་ཨ་རུ་སྒར་བཏབ་པ་རེད།
1SA 28:5 སོ་ལོས་ཕེ་ལེ་ཤེད་པའི་དམག་དཔུང་མཐོང་བས་སྙིང་འདར་ཞིང་འགུལ།
1SA 28:6 སོ་ལོས་དཀོན་མཆོག་ཡ་ཝཱེ་ལ་གསོལ་བ་བཏབ་ཀྱང་། དཀོན་མཆོག་ཡ་ཝཱེས་ཁོ་ལ་རྨི་ལམ་མམ་ཨུའུ་རིམ་ཞེས་པའི་བརྟག་རིལ་ལམ། ལུང་སྟོན་པ་བཅས་གསུམ་གྱི་སྒོ་ནས་བཀའ་ལན་གང་ཡང་མ་གནང་ངོ་། །
1SA 28:7 དེའི་ཕྱིར་སོ་ལོས་རང་གི་བློན་འཁོར་རྣམས་ལ། ངའི་དོན་དུ་གཤིན་པོ་འགུག་པའི་བུད་མེད་ཅིག་ཚོལ་ཞིག ང་དེའི་མདུན་དུ་སོང་ནས་འདྲི་བར་བྱའོ་ཞེས་སྨྲས་པར། བློན་འཁོར་རྣམས་ཀྱིས། ལྟོས་དང་གཤིན་པོ་འགུག་པའི་བུད་མེད་ཅིག་ཨེན་དོར་གྲོང་ཁྱེར་དུ་གནས་ཞེས་སྨྲས་སོ། །
1SA 28:8 སོ་ལོས་ཆས་གོས་བསྒྱུར་ཏེ་གྱོན་པ་གཞན་ཞིག་གྱོན་ནས་ཁོང་དང་མི་གཉིས་མཉམ་དུ་སོང་སྟེ། མཚན་ལ་བུད་མེད་དེའི་མདུན་དུ་སླེབས་ནས། སོ་ལོས། ཀྱེ། གཤིན་པོ་སུ་ཞིག་གི་མིང་ངས་གླེང་ན། དེ་ངའི་ཆེད་དུ་ཡར་དྲོངས་ཤིག་ཅེས་སྨྲས་པ་དང་།
1SA 28:9 བུད་མེད་དེས་ལན་དུ། ལྟོས་ཤིག སོ་ལོས་གཤིན་པོ་འགུག་མཁན་དང་རྫུ་འཕྲུལ་ཅན་རྣམས་ཡུལ་ནས་ཅི་ལྟར་བཏོན་པ་དེ་ནི་ཁྱོད་ཀྱིས་ཤེས་པ་ཡིན། ང་རང་གསོད་པར་རྒྱ་རྙི་ཅིའི་ཕྱིར་འཛུག་གམ་ཞེས་དྲིས་པས།
1SA 28:10 སོ་ལོས་དཀོན་མཆོག་ཡ་ཝཱེའི་མཚན་གྱི་སྒོ་ནས་མནའ་བསྐྱལ་ཞིང་། གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་པ་ཡིན་ཏེ། བྱ་བ་འདིའི་ཕྱིར་ཁྱོད་ལ་ཆད་པ་མི་གཅོད་ཅེས་སྨྲས་པས།
1SA 28:11 བུད་མེད་དེས། ངས་ཁྱོད་ཀྱི་ཕྱིར་སུ་ཡར་འགུག་པར་བྱའམ་ཞེས་སྨྲས་པར། སོ་ལོས། སཱ་མུ་ཨེལ་ཡར་དྲོངས་ཤིག་ཅེས་སྨྲས་སོ། །
1SA 28:12 དེ་ནས་བུད་མེད་ཀྱིས་སཱ་མུ་ཨེལ་མཐོང་བས་སྐད་ཆེན་པོས་བོས་ཤིང་། བུད་མེད་ཀྱིས་སོ་ལོ་ལ། ཁྱེད་ཀྱིས་ཅིའི་ཕྱིར་ང་རང་བསླུ་བར་བྱེད་དམ། ཁྱེད་ནི་སོ་ལོ་རེད་ཅེས་སྨྲས།
1SA 28:13 དེ་ནས་རྒྱལ་པོ་ན་རེ། མ་འཇིགས་ཤིག ཁྱོད་ཀྱིས་ཅི་མཐོང་ཞེས་དྲིས་པ་དང་། བུད་མེད་ཀྱིས་སོ་ལོ་ལ། ངས་ནི་ལྷ་ཞིག་ས་གཞི་ནས་ཡར་འོང་བ་མཐོང་བྱུང་ཞེས་སྨྲས་པ་དང་།
1SA 28:14 རྒྱལ་པོས་ཁོ་མོར། དེའི་གཟུགས་དབྱིབས་ཇི་ལྟ་བུ་ཞིག་འདུག་ཅེས་དྲིས་པ་དང་། བུད་མེད་ཀྱིས། རྒད་པོ་གོས་རིང་གྱོན་པ་ཞིག་འདུག་ཅེས་སྨྲས་པས། སོ་ལོས་དེ་ནི་སཱ་མུ་ཨེལ་ཡིན་པ་ཤེས་ཏེ། ལུས་པོ་བསྒུར་ནས་གདོང་ས་ལ་བཏུད་དེ་ཕྱག་བཙལ་ཏོ། །
1SA 28:15 དེ་ནས་སཱ་མུ་ཨེལ་གྱིས་སོ་ལོ་ལ། ཁྱོད་ཀྱིས་ང་ཡར་བཀུག་ནས་མི་བདེ་བར་བྱེད་དོན་ཅི་ཞེས་དྲིས་པར། སོ་ལོས། ང་ལ་དཀའ་ལས་ཁག་པོ་ཡོད། ཕེ་ལེ་ཤེད་པས་ང་ལ་དམག་འདྲེན་ཞིང་། དཀོན་མཆོག་ང་དང་བྲལ། ལུང་སྟོན་པ་དང་རྨི་ལམ་གྱི་སྒོ་ནས་ཁོང་གིས་ང་ལ་བཀའ་ལན་གང་ཡང་མ་གནང་བས། ཁྱེད་ཀྱིས་ང་ལ་ཅི་བྱེད་རུང་བ་སྟོན་པའི་ཕྱིར་ངས་ཁྱེད་བོས་པ་ཡིན་ཞེས་ཞུས་སོ། །
1SA 28:16 དེ་ནས་སཱ་མུ་ཨེལ་གྱིས། དཀོན་མཆོག་ཡ་ཝཱེ་ཁྱོད་དང་བྲལ་ནས་ཁྱོད་ཀྱི་དགྲ་བོར་གྱུར་ཡོད་ན། ཁྱོད་ཀྱིས་ང་ལ་འདྲི་དགོས་དོན་ཅི་ཡོད།
1SA 28:17 དཀོན་མཆོག་ཡ་ཝཱེས་ངའི་ཁ་བརྒྱུད་ནས་ཇི་ལྟར་སྨྲས་པ་བཞིན་བསྒྲུབས་པ་སྟེ།　ཁོང་གིས་ཁྱོད་ཀྱི་ལག་ནས་རྒྱལ་སྲིད་བླངས་ཏེ་ཁྱོད་ཀྱི་ཁྱིམ་མཚེས་དཱ་བིད་ལ་གནང་བ་ཡིན།
1SA 28:18 ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་མ་མཉན་ཏེ། ཨ་མཱད་ལེག་པའི་མི་རིགས་ལ་ཁོང་ཁྲོ་སྟོན་པའི་བཀའ་ལྟར་མ་བསྒྲུབས་པས། དེ་རིང་ཉིན་མོར་དཀོན་མཆོག་ཡ་ཝཱེས་ཁྱོད་ལ་དོན་འདི་ཐམས་ཅད་མཛད་དོ། །
1SA 28:19 དེར་མ་ཟད། དཀོན་མཆོག་ཡ་ཝཱེས་ཁྱོད་དང་ཡེས་ར་ཨེལ་པ་རྣམས་ཕེ་ལེ་ཤེད་པའི་ལག་ཏུ་སྤྲོད་པར་འགྱུར་ཞིང་། སང་ཉིན་ཁྱོད་དང་ཁྱོད་ཀྱི་བུ་རྣམས་ང་དང་མཉམ་དུ་གནས་པར་འགྱུར། དཀོན་མཆོག་ཡ་ཝཱེས་ཡེས་ར་ཨེལ་གྱི་དམག་དཔུང་ཕེ་ལེ་ཤེད་པའི་ལག་ཏུ་སྤྲོད་པར་འགྱུར་ཞེས་སྨྲས་སོ། །
1SA 28:20 སོ་ལོ་གློ་བུར་ཉིད་ལ་ལུས་ཧྲིལ་པོ་སར་འགྱེལ་བ་སྟེ། རྒྱུ་མཚན་ནི་ཁོ་རང་སཱ་མུ་ཨེལ་གྱི་སྐད་ཆར་ཤིན་ཏུ་འཇིགས་པ་དང་། ཉིན་གང་དང་མཚན་གང་ལ་ཅི་ཡང་མ་ཟོས་པས་སྟོབས་ཟད་པར་གྱུར་པ་རེད།
1SA 28:21 དེ་ནས་བུད་མེད་དེ་སོ་ལོའི་དྲུང་དུ་འོངས་པ་ན། ཁོ་ཤིན་ཏུ་འཇིགས་པ་མཐོང་བས། བུད་མེད་ཀྱིས། ལྟོས་དང་ཁྱེད་ཀྱི་གཡོག་མོས་ཉིད་ཀྱི་བཀའ་ལ་མཉན་ཏེ་རང་གི་སྲོག་ལའང་མ་འཛེམ་པ་ཡིན།
1SA 28:22 ད་ལྟ་ཁྱེད་ཀྱིས་ཀྱང་ཉིད་ཀྱི་གཡོག་མོའི་གཏམ་ལ་གསན་པར་མཛོད། ངས་ཁྱེད་ཀྱི་སྐུ་མདུན་དུ་བག་ལེབ་དུམ་བུ་ཞིག་འཇོག་པར་གནང་རོགས། རྗེས་སུ་ལམ་དུ་ཞུགས་པའི་ཚེ། ཁྱེད་ལ་སྟོབས་ཤུགས་ཡོད་པའི་ཕྱིར་ད་ལྟ་བཞེས་རོགས་ཞེས་ཞུས་ཀྱང་།
1SA 28:23 ཁོས་མི་འཐད་པའི་ཚུལ་གྱིས་བཟའ་བར་མི་བྱ་ཞེས་སྨྲས། འཁོར་གཡོག་རྣམས་ཀྱིས་བུད་མེད་དང་མཉམ་དུ་ཁོ་ལ་བསྐུལ་མ་བྱས། དེ་ནས་ཁོས་དེ་དག་གི་གཏམ་ལ་མཉན་ཏེ་ལངས་ནས་ཉལ་ཁྲི་སྟེང་དུ་བསྡད།
1SA 28:24 བུད་མེད་དེ་ལ་ཁྱིམ་དུ་བ་ཕྲུག་ཤ་ཤེད་ཅན་ཞིག་ཡོད་པ་མྱུར་དུ་བཤས་ནས་བག་ཕྱེ་བླངས་ཏེ་བརྫིས་ནས་སྐྱུར་མེད་བག་ལེབ་བསྲེགས་ཤིང་།
1SA 28:25 དེ་ནི་སོ་ལོ་དང་ཁོའི་འཁོར་གཡོག་གི་མདུན་དུ་ཁྱེར་འོངས་པ་དང་། དེ་དག་གིས་ཁ་ཟས་སྤྱད་ནས་ལངས་ཏེ་མཚན་མོ་དེ་ལ་སོང་ངོ་། །
1SA 29:1 དེ་ནས་ཕེ་ལེ་ཤེད་པས་རང་གི་དམག་དཔུང་ཐམས་ཅད་ཨ་ཕེག་ཏུ་བསྡུས་པ་དང་། ཡེས་ར་ཨེལ་པ་རྣམས་ཀྱིས་ཀྱང་ཡེ་སི་རེ་ཨེལ་ལ་ཡོད་པའི་ཆུ་མིག་གི་རྩར་དམག་སྒར་བཏབ།
1SA 29:2 ཕེ་ལེ་ཤེད་པའི་རྒྱལ་པོ་རྣམས་ནི་བརྒྱ་ཕྲག་དང་སྟོང་ཕྲག་གི་ཚོགས་དང་བཅས་སུ་འགྲོ་བ་དང་། དཱ་བིད་དང་དེའི་མི་རྣམས་ནི་ཨ་ཀི་སི་དང་མཉམ་དུ་རྗེས་སུ་འབྲངས་པ་རེད།
1SA 29:3 དེ་ནས་ཕེ་ལེ་ཤེད་པའི་དམག་དཔོན་རྣམས་ཀྱིས། ཨིབ་རི་པ་འདི་རྣམས་ཀྱིས་འདི་རུ་ཅི་བྱེད་ཅེས་དྲིས་པ་ན། ཨ་ཀི་སི་ཡིས་ཕེ་ལེ་ཤེད་པའི་དམག་དཔོན་རྣམས་ལ། འདི་ནི་ཡེས་ར་ཨེལ་གྱི་རྒྱལ་པོ་སོ་ལོའི་ཞབས་ཕྱི་དཱ་བིད་མ་ཡིན་ནམ། ཁོ་ཉིན་འདི་དག་དང་ལོ་འདི་དག་གི་རིང་ང་དང་མཉམ་དུ་བསྡད་ན་ཡང་། ཁོ་འདི་རུ་ངའི་མདུན་དུ་སླེབས་པའི་ཉིན་ནས་དེ་རིང་གི་བར་དུ་ངས་ཁོའི་ནང་དུ་སྐྱོན་གང་ཡང་མཐོང་མ་བྱུང་ཞེས་སྨྲས་པ་དང་།
1SA 29:4 ཕེ་ལེ་ཤེད་པའི་དམག་དཔོན་རྣམས་ཨ་ཀི་སི་ལ་ཁྲོས་ནས་ན་རེ། མི་དེ་ཕྱིར་ལོག་ཏུ་ཆུག་ཅིག ཁོ་ནི་ཁྱོད་ཀྱིས་བསྟན་པའི་གནས་སུ་འགྲོ་དགོས། དམག་རྒྱག་པའི་དུས་སུ་ངེད་ཀྱི་དགྲ་བོར་མི་འགྱུར་བའི་ཕྱིར། ཁོ་ནི་ངེད་རྣམས་དང་མཉམ་དུ་དམག་ལ་འགྲོ་བར་མི་འཇུག་རོགས། ཁོ་ནི་རང་གི་འགོ་དཔོན་དང་མཐུན་པར་དགའ་ན། དམག་མི་འདི་རྣམས་ཀྱི་མགོ་གཅོད་པའི་སྒོ་ནས་མཐུན་པར་མི་འགྱུར་རམ།
1SA 29:5 གར་འཆམ་པའི་སྐབས་སུ་མི་རྣམས་ཀྱིས་གླུ་བླངས་ཤིང་། སོ་ལོ་ཡིས་བསད་པ་སྟོང་ཕྲག་སྟེ། །དཱ་བིད་ཀྱིས་བསད་པ་ཁྲི་ཕྲག་ཉིད་ཅེས་ཟེར་བའི་དཱ་བིད་དེ་རང་མ་ཡིན་ནམ་ཞེས་སྨྲས་སོ། །
1SA 29:6 ཨ་ཀི་སི་ཡིས་དཱ་བིད་བོས་ནས་དེ་ལ། ངས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་ཁྱོད་ནི་དྲང་པོ་ཡིན་པ་དང་། ཁྱོད་དམག་ཚོགས་ཀྱི་ཁྲོད་དུ་འགྲོ་འོང་བྱེད་པ་ནི་ངའི་མིག་མདུན་དུ་བཟང་པོ་ཡིན་ཏེ། ཁྱོད་ངའི་གམ་དུ་འོངས་པ་ནས་དེ་རིང་གི་བར་དུ་ངས་ཁྱོད་ཀྱི་ནང་དུ་སྐྱོན་གང་ཡང་མ་མཐོང་ཡང་། རྒྱལ་པོ་རྣམས་ཁྱོད་ལ་མི་དགའ་བ་རེད།
1SA 29:7 ཕེ་ལེ་ཤེད་པའི་རྒྱལ་པོ་རྣམས་མི་ཁྲོ་བའི་ཕྱིར། ཁྱོད་ད་ལྟ་ཕྱིར་ལོག་སྟེ་བདེ་བར་སོང་ཞིག་ཅེས་བསྐུལ་བས།
1SA 29:8 དཱ་བིད་ཀྱིས་ཨ་ཀི་སི་ལ། བདག་གིས་ཅི་བྱས་པ་ཡིན། བདག་ནི་རང་གི་ཇོ་བོ་རྒྱལ་པོའི་དགྲ་རྣམས་ལ་དམག་ཏུ་འགྲོ་བར་མི་གནང་སྟེ། ཉིད་ཀྱི་ཞབས་ཕྱི་བདག་ཁྱེད་ཀྱི་དྲུང་དུ་འོངས་པ་ནས་དེ་རིང་གི་བར་དུ་ཁྱེད་ཀྱིས་བདག་ལས་སྐྱོན་ཅི་མཐོང་བ་ཡིན་ཞེས་དྲིས་པར།
1SA 29:9 ཨ་ཀི་སི་ཡིས་ལན་བཏབ་ནས་དཱ་བིད་ལ། ངས་ཁྱོད་ངའི་མིག་མདུན་དུ་དཀོན་མཆོག་གི་ཕོ་ཉ་དང་འདྲ་བར་བཟང་པོ་ཞིག་ཡིན་པ་ཤེས་ཀྱང་། ཕེ་ལེ་ཤེད་པའི་རྒྱལ་པོ་རྣམས་ཀྱིས་མི་འདི་ངེད་ཅག་དང་མཉམ་དུ་དམག་ཏུ་འགྲོ་མི་ཆོག་ཅེས་སྨྲས་སོ། །
1SA 29:10 དེའི་ཕྱིར་སང་ཉིན་སྔ་མོ་ཁྱོད་དང་ཁྱོད་ཀྱི་བདག་པོའི་ཞབས་ཕྱི་ཁྱོད་དང་མཉམ་དུ་འོངས་པ་རྣམས་ལོངས་དང་། ནངས་སྔ་མོ་ལངས་ནས་སྐྱ་འོད་དང་ལྷན་དུ་སོང་ཞིག་ཅེས་བསྐུལ་བས།
1SA 29:11 དཱ་བིད་དང་དེའི་མི་རྣམས་ཕྱི་ཉིན་སྔ་མོ་ལངས་ཏེ་ཕེ་ལེ་ཤེད་པའི་ཡུལ་དུ་ལོག ཡང་ཕེ་ལེ་ཤེད་པ་རྣམས་ཡེ་སི་རེ་ཨེལ་དུ་ཕྱིན་ཏོ། །
1SA 30:1 དེ་ནས་ཉིན་གསུམ་པར་དཱ་བིད་དང་ཁོའི་མི་རྣམས་ཙིག་ལག་གྲོང་ཁྱེར་དུ་སླེབས་ཤིང་། སྔོན་ཆད་ཨ་མཱད་ལེག་པ་རྣམས་ཀྱིས་ཡ་ཧུ་དཱ་ཡུལ་གྱི་ནེ་གུབ་དང་ཙིག་ལག་ཏུ་དམག་དྲངས་ནས། ཙིག་ལག་གཏོར་ནས་མེ་ལ་བསྲེགས་ཤིང་།
1SA 30:2 གྲོང་ཁྱེར་དེ་རུ་གནས་པའི་བུད་མེད་ཐམས་ཅད་བཟུང་ནས། ཆེ་ཆུང་གཅིག་ཀྱང་མ་བསད་པར་བཟུང་ཞིང་ཁྲིད་ནས་ལམ་དུ་ཞུགས་པ་རེད།
1SA 30:3 དཱ་བིད་དང་དེའི་མི་རྣམས་གྲོང་ཁྱེར་དེར་སླེབས་པའི་སྐབས་སུ། ཀྱེ་ཧོ། གྲོང་ཁྱེར་མེ་ལ་བསྲེགས་ཏེ། དེ་དག་གི་བུད་མེད་རྣམས་དང་། བུ་རྣམས་དང་། བུ་མོ་རྣམས་བཟུང་ནས་བཙོན་དུ་ཁྱེར་བ་མཐོང་ནས།
1SA 30:4 དཱ་བིད་དང་མཉམ་དུ་ཡོད་པའི་མི་རྣམས་ཀྱིས་སྐད་ཆེན་པོ་བཏོན་ནས་སྟོབས་ཟད་པའི་བར་དུ་ངུས།
1SA 30:5 ཡང་དཱ་བིད་ཀྱི་ཆུང་མ་སྟེ། ཡེ་སི་རེ་ཨེལ་གྱི་ཨ་ཧི་ནོ་ཨམ་དང་། སྔར་ཀར་མེལ་པ་ནཱ་རྦལ་གྱི་ཆུང་མ་ཡིན་པའི་ཨ་བི་གཱ་ཡིལ་གཉིས་ཀྱང་བཙོན་དུ་བཟུང་སྟེ་ཁྱེར།
1SA 30:6 མི་དེ་དག་གིས་དཱ་བིད་རྡོ་རུབ་གཏོང་བའི་གཏམ་བྱེད་པས་དཱ་བིད་ཤིན་ཏུ་འཇིགས་ཤིང་། མི་ཐམས་ཅད་ཀྱིས་རང་རང་གི་བུ་དང་བུ་མོའི་ཕྱིར་སེམས་སྡུག་བྱས་ཀྱང་། དཱ་བིད་ཀྱིས་རང་གི་དཀོན་མཆོག་ཡ་ཝཱེར་བརྟེན་ནས་སྤོབས་པ་བསྐྱེད་དོ། །
1SA 30:7 དེ་ནས་དཱ་བིད་ཀྱིས་ཨ་ཧི་མེ་ལེག་གི་བུ་སྟེ་མཆོད་དཔོན་ཨབ་ཡཱ་ཐར་ལ། འདིར་ང་ལ་བེར་ཐུལ་ཁྱེར་ཤོག་ཅེས་ཟེར་བས། ཨབ་ཡཱ་ཐར་གྱིས་དཱ་བིད་ལ་བེར་ཐུལ་ཁུར་འོངས་ནས།
1SA 30:8 དཱ་བིད་ཀྱིས་དཀོན་མཆོག་ཡ་ཝཱེ་ལ་གསོལ་བ་བཏབ་ནས་ཁོང་ལ། བདག་ནི་དམག་དཔུང་འདིའི་ར་མདར་བརྒྱུགས་ན་རྗེས་ཆོད་པར་འགྱུར་རམ་ཞེས་ཞུས་པ་ལ། དཀོན་མཆོག་ཡ་ཝཱེས་བཀའ་ལན་དུ། ཐེད་ཅིག ཁྱོད་ཀྱིས་དེ་དག་གི་རྗེས་ཆོད་དེ་ཐམས་ཅད་སྐྱོབ་པར་འགྱུར་ཞེས་གསུངས་པས།
1SA 30:9 དཱ་བིད་དང་ཁོ་དང་མཉམ་དུ་ཡོད་པའི་མི་དྲུག་བརྒྱ་ཕྱིན་པ་དང་། བེ་སོར་ཞེས་པའི་གྲོག་མོར་སླེབས་ཤིང་དེར་མི་འགའ་ཞིག་རྒྱབ་ཏུ་ལུས།
1SA 30:10 མི་ཉིས་བརྒྱ་ཤིན་ཏུ་ངལ་ནས་བེ་སོར་གྲོག་མོ་བརྒལ་མ་ནུས་པས་རྒྱབ་ཏུ་ལུས་ཤིང་། དཱ་བིད་དང་མི་བཞི་བརྒྱ་བཅས་ར་མདར་ཕྱིན་ཏོ། །
1SA 30:11 དེ་ནས་ཐང་དུ་ཨེ་ཅིབ་པ་ཞིག་དང་ཕྲད་པས་དཱ་བིད་ཀྱི་དྲུང་དུ་ཁྲིད་ཅིང་། མི་དེ་ལ་བག་ལེབ་བཏང་ནས་ཟོས་ཏེ་ཆུ་ཡང་འཐུང་བར་སྤྲད་པ་རེད།
1SA 30:12 དེ་ནས་ཁོ་ལ་སེ་ཡབ་ལེབ་མོ་ཞིག་དང་། རྒུན་འབྲུམ་སྐམ་པོ་ལེབ་མོ་གཉིས་བཏང་ནས་དེ་ཟོས་པ་ན། ཁོ་ལ་ཡང་བསྐྱར་སྟོབས་ཤུགས་རྒྱས་པ་སྟེ། མི་དེས་ཉིན་ཞག་གསུམ་ལ་ཁ་ཟས་མ་སྤྱད་ཆུ་ཡང་མ་འཐུང་བ་ཡིན།
1SA 30:13 དེ་ནས་དཱ་བིད་ཀྱིས་ཁོ་ལ། ཁྱོད་སུའི་མི་ཡིན། གང་ནས་འོངས་ཞེས་དྲིས་པར། མི་དེས། ང་ཨེ་ཅིབ་ཡུལ་གྱི་གཞོན་ནུ་ཡིན་པ་དང་། ཨ་མཱད་ལེག་པ་ཞིག་གི་གཡོག་པོ་ཡིན་ཏེ། ཞག་གསུམ་གྱི་སྔོན་དུ་ང་ན་བས་བདག་པོས་ང་སྤངས་སོ། །
1SA 30:14 ང་ཚོས་ཀེ་རེད་པའི་ནེ་གུབ་དང་ཡ་ཧུ་དཱ་ཡུལ་ལ་གཏོགས་པ་དང་། ཀཱ་ལེབ་ཡུལ་གྱི་ནེ་གུབ་ཏུ་དམག་བརྒྱབ་ནས་ཙིག་ལག་མེ་ལ་བསྲེགས་པ་ཡིན་ཞེས་ཞུས་པར།
1SA 30:15 དཱ་བིད་ཀྱིས་ཁོ་ལ། ཁྱོད་ཀྱིས་ང་རང་དམག་དཔུང་དེའི་རྩར་འཁྲིད་པར་བྱའམ་ཞེས་དྲིས་ཤིང་། མི་དེས། ཁྱེད་ཀྱིས་དཀོན་མཆོག་དཔང་དུ་བཙུགས་ནས་བདག་མི་གསོད་པ་དང་། ངའི་བདག་པོའི་ལག་ཏུ་མི་གཏོང་བའི་མནའ་བཞེས་ཤིག དེ་ལྟར་བྱས་ན་བདག་གིས་ཁྱེད་དམག་དཔུང་དེའི་མདུན་དུ་འཁྲིད་པར་བྱ་ཞེས་ཞུས་སོ། །
1SA 30:16 མི་དེས་དཱ་བིད་མར་ཁྲིད་ནས། ཀྱེ་ཧོ། ཨ་མཱད་ལེག་པ་དེ་དག་ཡུལ་ཐམས་ཅད་དུ་ཐོར་ནས་བཟའ་བཏུང་ལོངས་སུ་སྤྱོད་ཅིང་གར་འཆམ་བཞིན་འདུག་གོ །གང་ལ་ཞེ་ན། དེ་དག་གིས་ཕེ་ལེ་ཤེད་དང་ཡ་ཧུ་དཱ་ཡུལ་གཉིས་ནས་བཅོམ་ནོར་ཆེན་པོ་ཁྱེར་བས་སོ། །
1SA 30:17 དེ་ནས་དཱ་བིད་ཀྱིས་ཐོ་རངས་ནས་བཟུང་ཕྱི་ཉིན་མཚན་མོའི་བར་དུ་དེ་དག་དང་འཐབ་འཛིང་བྱས་ཤིང་། རྔ་མོང་ལ་ཞོན་ཏེ་བྲོས་པའི་གཞོན་ནུ་བཞི་བརྒྱ་མ་གཏོགས་དེ་དག་ལས་གཅིག་ཀྱང་མ་ཐར་རོ། །
1SA 30:18 ཡང་ཨ་མཱད་ལེག་པ་རྣམས་ཀྱིས་ཁྱེར་བ་ཐམས་ཅད་དཱ་བིད་ཀྱིས་ཕྱིར་བླངས་ཏེ། དཱ་བིད་ཀྱིས་རང་གི་ཆུང་མ་གཉིས་ཀྱང་བསྐྱབས་པ་རེད།
1SA 30:19 ཁ་རྒན་གཞོན་དང་། བུ་བུ་མོ་དང་། བཅོམ་ནོར་སོགས་དེ་དག་གིས་ཅི་དང་ཅི་ཁྱེར་བ་ཐམས་ཅད་ཀྱི་ནང་ནས་གང་ཡང་མ་སྟོར་བར། དཱ་བིད་ཀྱིས་ནོར་དེ་ཐམས་ཅད་ཕྱིར་བླངས་པ་དང་།
1SA 30:20 དེ་ནས་དཱ་བིད་ཀྱིས་ར་ལུག་གི་ཁྱུ་དང་བ་ཁྱུ་རྣམས་བླངས་ནས་མི་དེ་དག་གིས་ཁྲིད་དེ་ན་རེ། འདི་ནི་དཱ་བིད་ཀྱི་བཅོམ་ནོར་ཡིན་ཞེས་བརྗོད་དོ། །
1SA 30:21 ཤིན་ཏུ་ངལ་བས་དཱ་བིད་ཀྱི་རྗེས་སུ་འབྲང་བར་མ་ནུས་པའི་མི་ཉིས་བརྒྱ་སྟེ། བེ་སོར་གྲོག་མོའི་འགྲམ་དུ་ལུས་པ་དེ་དག་གི་མདུན་དུ་སླེབས་ཤིང་། དེ་དག་ནི་དཱ་བིད་དང་ཁོང་དང་མཉམ་དུ་ཡོད་པའི་མི་རྣམས་བསུ་བར་འོངས། དཱ་བིད་དེ་དག་དང་ཉེ་བར་སླེབས་པ་དང་ཁམས་འདྲི་བྱས།
1SA 30:22 དེ་ནས་དཱ་བིད་དང་མཉམ་དུ་ཕྱིན་པའི་མི་ངན་རྣམས་ཀྱིས། མི་དེ་དག་ནི་ངེད་ཅག་དང་མཉམ་དུ་མ་ཕྱིན་པས། ངེད་རྣམས་ཀྱིས་ཕྱིར་བླངས་པའི་བཅོམ་ནོར་འདི་ལས་དེ་དག་ལ་ཅི་ཡང་གཏོང་བར་མི་བྱ། དེ་དག་གིས་རང་གི་ཆུང་མ་དང་ཕྲུ་གུ་རྣམས་ཁྲིད་ནས་ཕར་སོང་ཆོག་ཅེས་སྨྲས་ཀྱང་།
1SA 30:23 དཱ་བིད་ཀྱིས། ངའི་སྤུན་ཟླ་རྣམས། དེ་ལྟར་མ་བྱེད་ཅིག དཀོན་མཆོག་ཡ་ཝཱེས་རང་ཅག་ལ་འདི་ཐམས་ཅད་གནང་སྟེ་རང་ཅག་སྲུང་བར་མཛད་ཅིང་། རང་ཅག་གི་སྟེང་དུ་བྱུང་བའི་དམག་དཔུང་འདི་རང་རེའི་ལག་ཏུ་སྤྲད་པས།
1SA 30:24 ཁྱོད་ཅག་གི་གཏམ་ལ་སུས་མཉན་པར་བྱ། དམག་ཏུ་འགྲོ་མཁན་གྱི་ཐོབ་སྐལ་དང་འདྲ་བར་དམག་ཆས་སྲུང་མཁན་རྣམས་ལའང་སྐལ་ཡོད་པར་འགྱུར། ཐམས་ཅད་ལ་སྐལ་འདྲ་བར་འཐོབ་འོང་ཞེས་སྨྲས།
1SA 30:25 ཡང་ཉིན་དེ་ནས་བཟུང་དེ་རིང་གི་བར་དུ་ཁོས་དེ་ནི་ཡེས་ར་ཨེལ་གྱི་ཁྲིམས་དང་ལུགས་སྲོལ་དུ་བཙུགས་སོ། །
1SA 30:26 ཡང་དཱ་བིད་ཙིག་ལག་ཏུ་སླེབས་པ་དང་། བཅོམ་ནོར་གྱི་ཁག་ཅིག་རང་གི་གྲོགས་པོ་ཡིན་པའི་ཡ་ཧུ་དཱ་པའི་རྒན་པོ་རྣམས་ལ་བཏང་ནས་ན་རེ། ལྟོས་དང་། འདི་ནི་དཀོན་མཆོག་ཡ་ཝཱེའི་དགྲ་བོ་ནས་བླངས་པའི་བཅོམ་ནོར་ཏེ། ཁྱེད་ལ་ཕུལ་བའི་ཕྱག་རྟགས་ཡིན་ཞེས་སྨྲས་ཤིང་།
1SA 30:27 ཕྱག་རྟགས་དེ་ནི་པེད་ཨེལ་དང་། ནེ་གུབ་ཡུལ་གྱི་རཱ་མོད་དང་། ཡད་ཏིར་དང་།
1SA 30:28 ཨ་རོ་ཨེར་དང་། སིབ་མོད་དང་། ཨེ་སི་ཏེ་མོ་ཨ་དང་།
1SA 30:29 ར་ཀལ་དང་། ཡིར་ཧིམ་ཨེལ་པའི་གྲོང་ཁྱེར་རྣམས་དང་། ཀེ་ནེ་པའི་གྲོང་ཁྱེར་རྣམས་དང་།
1SA 30:30 ཧོར་མཱ་དང་། པོར་ཨ་སན་དང་། ཨ་ཐག་དང་།
1SA 30:31 ཧེབ་རོན་དང་། སྔར་དཱ་བིད་དང་དེའི་མི་རྣམས་སོང་བའི་གནས་ཐམས་ཅད་དུ་ཕུལ་ཏོ། །
1SA 31:1 དེ་ནས་ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་ལ་དམག་དྲངས་ནས། ཡེས་ར་ཨེལ་པ་རྣམས་ཕེ་ལེ་ཤེད་པའི་མདུན་ནས་བྲོས་ཏེ། མི་མང་པོ་གིལ་བོ་ཨ་རི་བོར་བསད་ནས་ས་རུ་འགྱེལ་བ་རེད།
1SA 31:2 དེ་ནས་ཕེ་ལེ་ཤེད་པ་རྣམས་ཀྱིས་སོ་ལོ་དང་དེའི་སྲས་རྣམས་ཀྱི་རྗེས་དེད་ཅིང་། སོ་ལོའི་སྲས་ཡོ་ནཱ་ཐན་དང་ཨ་བི་ནཱ་དབ། མལ་ཀི་ཤུ་ཨ་བཅས་བསད་པ་རེད།
1SA 31:3 ཡང་སོ་ལོ་ལ་རྒོལ་བའི་འཐབ་མོ་ཤིན་ཏུ་དྲགས་ཤིང་། མདའ་པ་རྣམས་ཀྱིས་ཁོང་ལ་རྒོལ་ནས་ཤིན་ཏུ་རྨས་པ་དང་།
1SA 31:4 སོ་ལོས་རང་གི་གོ་མཚོན་འཁུར་མཁན་ལ། ཁྱོད་ཀྱིས་རལ་གྲི་ཕྱུང་སྟེ་ངའི་ལུས་རྟོལ་ཞིག དེ་ལྟར་མ་བྱས་ཚེ་མཚན་སྐྱི་མ་བཅད་པ་དེ་དག་འོངས་ནས་ང་ལ་རལ་གྲིས་བཙུགས་ཏེ་སྨད་པར་བྱའོ་ཞེས་སྨྲས་ཀྱང་། གོ་མཚོན་འཁུར་མཁན་དེ་ཤིན་ཏུ་འཇིགས་ནས་དེ་ལྟར་མ་བྱས་པས། སོ་ལོས་རལ་གྲི་བླངས་ནས་དེའི་ཁར་ལྕེབས་སོ། །
1SA 31:5 ཡང་གོ་མཚོན་འཁུར་མཁན་གྱིས་སོ་ལོ་གྲོངས་ཟིན་པ་མཐོང་བ་དང་། ཁོ་ཡང་རལ་གྲིའི་ཁར་ལྕེབས་ནས་ཤིའོ། །
1SA 31:6 དེ་ལྟར་སོ་ལོ་དང་ཁོང་གི་སྲས་གསུམ་པོ་དང་། གོ་མཚོན་འཁུར་མཁན་དང་སོ་ལོའི་དམག་མི་ཐམས་ཅད་ཉིན་མོ་དེ་རང་ལ་ལྷན་ཅིག་ཏུ་འདས།
1SA 31:7 ཡང་ལུང་པའི་ཕ་རོལ་དང་ཡོར་དན་གཙང་པོའི་ཕ་རོལ་ཏུ་ཡོད་པའི་ཡེས་ར་ཨེལ་པ་རྣམས་ཀྱིས་ཡེས་ར་ཨེལ་པའི་དམག་རྣམས་བྲོས་པ་དང་། སོ་ལོ་དང་དེའི་སྲས་རྣམས་གྲོངས་པ་མཐོང་བས་རང་རང་གི་གྲོང་ཁྱེར་རྣམས་སྤངས་ནས་བྲོས་ཤིང་། ཕེ་ལེ་ཤེད་པ་རྣམས་འོངས་ནས་དེ་ཚོའི་གྲོང་ཁྱེར་ནང་དུ་བསྡད་དོ། །
1SA 31:8 དེའི་ཕྱི་ཉིན་ཕེ་ལེ་ཤེད་པ་རྣམས་བེམ་པོ་དག་གི་གོས་བཤུ་བར་འོངས་དུས་སུ། སོ་ལོ་དང་དེའི་སྲས་གསུམ་པོ་གིལ་བོ་ཨ་རི་བོར་གྲོངས་ཟིན་པ་མཐོང་བ་དང་།
1SA 31:9 ཁོང་གི་མགོ་བཅད་ནས་གོ་མཚོན་བཤུས་ཏེ། ལྷ་ཁང་དང་ཡུལ་མི་རྣམས་ལ་འཕྲིན་གཏོང་བའི་ཕྱིར་མི་འགའ་ཞིག་ཕེ་ལེ་ཤེད་པའི་ཡུལ་སྐོར་དུ་མངགས།
1SA 31:10 ཡང་ཁོང་གི་གོ་མཚོན་ནི་ལྷ་མོ་ཨ་ཤཱ་ཏ་རོད་ཀྱི་ལྷ་ཁང་དུ་བཞག་ནས་ཁོང་གི་བེམ་པོ་པེད་ཤན་གྱི་གྱང་ངོར་བཀལ།
1SA 31:11 ཕེ་ལེ་ཤེད་པ་རྣམས་ཀྱིས་སོ་ལོ་ལ་ཅི་ལྟར་བྱས་པའི་གཏམ་དེ་གིལ་ཨད་ཡུལ་གྱི་ཡཱ་བེ་སི་གྲོང་ཚོའི་མི་རྣམས་ཀྱིས་ཐོས་པ་ན།
1SA 31:12 དཔའ་རྒོད་ཐམས་ཅད་ལངས་ནས་མཚན་གང་འགྲུལ་ཞིང་སོ་ལོ་དང་ཁོང་གི་སྲས་རྣམས་ཀྱི་བེམ་པོ་པེད་ཤན་གྱི་གྱང་ནས་བླངས་ཏེ་ཡཱ་བེ་སི་རུ་ཁྱེར་ནས་མེ་ལ་ཕུལ་ཏོ། །
1SA 31:13 དེ་ནས་རུས་པ་བླངས་ནས་ཡཱ་བེ་སི་རུ་ཡོད་པའི་འོམ་བུའི་འོག་གི་དུར་ཁུང་དུ་བཙུད་པ་དང་། ཞག་བདུན་གྱི་བར་དུ་སྨྱུང་གནས་ལ་བསྡད་དོ།། །།
2SA 1:1 དེ་ཡང་སོ་ལོ་གྲོངས་རྗེས་དཱ་བིད་ཀྱིས་ཨ་མཱད་ལེག་པ་རྣམས་ཕམ་པར་བརྒྱབ་ནས་ཕྱིར་ལོག་སྐབས། དཱ་བིད་ཉིན་གཉིས་ཀྱི་རིང་ཙིག་ལག་དུ་གནས་སོ། །
2SA 1:2 ལྟོས་དང་། ཉིན་གསུམ་པར། གྱོན་གོས་གཤགས་ཤིང་མགོ་ལ་ས་རྡུལ་གྱིས་གཡོགས་པའི་མི་ཞིག་སོ་ལོའི་དམག་སྒར་ནས་ལོག་འོངས་པ་དང་། དཱ་བིད་ཀྱི་མདུན་དུ་སླེབས་ཏེ་ལུས་སར་བཏུད་ནས་ཕྱག་བཙལ་ཏོ། །
2SA 1:3 དཱ་བིད་ཀྱིས་དེ་ལ་ཁྱོད་གང་ནས་འོངས་པ་ཡིན་ཞེས་དྲིས་པར། མི་དེས་ཡེས་ར་ཨེལ་གྱི་དམག་སྒར་ནས་བྲོས་འོངས་པ་ཡིན་ཞེས་ཞུས་སོ། །
2SA 1:4 ཡང་དཱ་བིད་ཀྱིས་དེ་རུ་ཅི་ཞིག་བྱུང་བ་ང་ལ་ཤོད་ཅིག་ཅེས་སྨྲས་པར་མི་དེས། མི་རྣམས་གཡུལ་ས་ནས་བྲོས་ཤིང་དེ་དག་གི་ཁྲོད་ནས་མི་མང་པོ་སར་འགྱེལ་ནས་ཤི་བར་མ་ཟད། སོ་ལོ་དང་དེའི་སྲས་ཡོ་ནཱ་ཐན་གཉིས་ཀྱང་གྲོངས་སོ་ཞེས་ཞུས་པ་ལ།
2SA 1:5 དཱ་བིད་ཀྱིས་འཕྲིན་སྐྱེལ་མཁན་གཞོན་ནུ་དེ་ལ་ཁྱོད་ཀྱིས་སོ་ལོ་དང་དེའི་སྲས་ཡོ་ནཱ་ཐན་གཉིས་གྲོངས་པ་ཅི་ལྟར་ཤེས་པ་ཡིན་ཞེས་དྲིས་པ་ལ།
2SA 1:6 འཕྲིན་སྐྱེལ་མཁན་གཞོན་ནུ་དེས། རི་བོ་གིལ་བོ་ཨ་རུ་ང་རང་སྟེས་དབང་གིས་སོ་ལོ་དང་ཕྲད་དེ་སོ་ལོ་ནི་རང་གི་མདུང་ལ་བརྟེན་ཅིང་ཤིང་རྟ་དང་སྐྱ་དམག་རྣམས་ཀྱིས་ཁོང་གི་རྗེས་འདེད་པ་མཐོང་ངོ་། །
2SA 1:7 ཡང་ཁོང་གིས་ཕྱི་མིག་བལྟས་ཏེ་བདག་མཐོང་ནས་བོས་པར། བདག་གིས་ང་རང་འདི་རུ་ཡོད་ཞུས་པ་ན།
2SA 1:8 ཁོང་གིས་བདག་ལ་ཁྱོད་སུ་ཡིན་ཞེས་དྲིས་པས། ང་ཨ་མཱད་ལེག་པ་ཡིན་ཞེས་ཞུས།
2SA 1:9 དེ་ནས་ཁོང་གིས་བདག་ལ་ངའི་རྩར་ཤོག་དང་། ང་རང་སོད་ཅིག རྒྱུ་མཚན་བདག་གི་སེམས་ཤིན་ཏུ་སྐྱོ་ནའང་འཆི་བའི་ཐབས་མ་བྱུང་ཞེས་སྨྲས་པའོ། །
2SA 1:10 དེར་བདག་ཁོང་གི་གཞོགས་སུ་ལངས་ནས་ཁོང་བཀྲོངས་པ་ཡིན་ཏེ། གང་ལ་ཞེ་ན་གལ་ཏེ་ཁོང་སར་འགྱེལ་ཚེ་ཁོང་གསོན་མི་ནུས་པ་ངས་ཤེས་པའི་ཕྱིར་ཡིན། ཁོང་གི་དབུ་ལ་ཡོད་པའི་ཅོད་པན་དང་ཕྱག་ལ་ཡོད་པའི་གདུ་བུ་གཉིས་བླངས་ནས་འདི་རུ་བདག་གི་ཇོ་བོའི་དྲུང་དུ་ཁྱེར་འོངས་པ་ཡིན་ཞེས་པའི་འཕྲིན་ཐོས་སོ། །
2SA 1:11 དེ་ནས་དཱ་བིད་ཀྱིས་རང་གི་གོས་བླངས་ནས་གཤགས་ཤིང་ཁོ་དང་ལྷན་དུ་ཡོད་པའི་མི་རྣམས་ཀྱིས་ཀྱང་དེ་བཞིན་བྱས་ཏེ།
2SA 1:12 སོ་ལོ་དང་དེའི་སྲས་ཡོ་ནཱ་ཐན། དཀོན་མཆོག་ཡ་ཝཱེའི་འབངས་མི། ཡེས་ར་ཨེལ་གྱི་ཁྱིམ་རྒྱུད་རྣམས་རལ་གྲིའི་ཁ་ནས་གྲོངས་པས། དཱ་བིད་འཁོར་དང་བཅས་པ་སེམས་སྡུག་ནས་ངུས་ཤིང་དགོང་མོའི་བར་དུ་སྨྱུང་གནས་བསྲུངས་སོ། །
2SA 1:13 ཡང་དཱ་བིད་ཀྱིས་འཕྲིན་སྐྱེལ་མཁན་གཞོན་ནུ་དེ་ལ་ཁྱོད་གང་གི་མི་ཡིན་ཞེས་དྲིས་པར། དེས་བདག་ནི་བྱེས་པ་ཞིག་གི་བུ་སྟེ་ཨ་མཱད་ལེག་པ་ཞིག་ཡིན་ཞུས་ཤིང་།
2SA 1:14 དཱ་བིད་ཀྱིས་འདི་ལྟར། ཁྱོད་རང་ལག་པ་བརྐྱངས་ནས་དཀོན་མཆོག་ཡ་ཝཱེས་བྱུགས་པ་དེ་དགྲོང་བར་མི་འཇིགས་སམ་ཞེས་དྲིས་པ་དང་།
2SA 1:15 དཱ་བིད་ཀྱིས་གཞོན་ནུ་ཞིག་བོས་ཏེ་ཁྱོད་སོང་ལ་མི་དེ་སོད་ཅིག་ཅེས་བཀའ་བསྩལ་པ་ལ། དེས་ཁོ་ལ་བརྡུངས་ནས་བསད་དོ། །
2SA 1:16 དཱ་བིད་ཀྱིས་མི་དེར། ཁྱོད་རང་གི་ཁ་ནས་ངས་དཀོན་མཆོག་ཡ་ཝཱེས་བྱུགས་པ་དེ་བཀྲོངས་པ་ཡིན་ཞེས་དཔང་པོ་བྱས་པས་ཁྱོད་ཀྱི་ཁྲག་ནི་རང་གི་མགོ་ལ་འབབ་དགོས་ ཞེས་སྨྲས་སོ། །
2SA 1:17 ཡང་དཱ་བིད་ཀྱིས་སོ་ལོ་དང་དེའི་སྲས་ཡོ་ནཱ་ཐན་གཉིས་ཀྱི་ཕྱིར་སྐྱོ་གླུ་འདི་བྲིས་ཤིང་།
2SA 1:18 གཞུ་མོ་ཞེས་པའི་མགུར་མ་དེ་ནི་ཡ་ཧུ་དཱ་པ་རྣམས་ཀྱིས་སློབ་དགོས་པར་ཁོང་གིས་བསྐུལ་ཞིང་མགུར་མ་དེ་བདེན་པའི་གླེགས་བམ་ནང་བཀོད་ཡོད་དོ། །
2SA 1:19 ཀྱེ་མ་ཡེས་ར་ཨེལ་ལགས་ཁྱོད་ཚོ་ཡི། །གཟི་བརྗིད་ཅན་ནི་མཐོ་སར་བཀྲོངས་འདུག་སྟེ། །དཔའ་བོ་ཆེན་པོ་དེ་ཉིད་འགྱེལ་བ་ཅི། །
2SA 1:20 ཕེ་ལེ་ཤེད་པའི་མཚན་སྐྱི་མ་བཅད་པའི། །ཚོགས་ལས་བྱུང་བའི་བུ་མོ་རྣམས་ཀྱིས་ནི། །དགའ་མགུ་རང་ཞིང་སྤྲོ་བ་མི་གཏོང་ཕྱིར། །གཱད་ཀྱི་ཡུལ་ལ་སྨྲ་བར་མི་བྱ་འོ། །ཨ་ཤཱ་ཀེ་ལོན་སྲང་དུ་སྐད་མ་རྒྱག །
2SA 1:21 ཀྱེ་མ་གིལ་བོ་ཨ་ཡི་རི་བོ་རྣམས། །ཁྱོད་ལ་ཆར་ཟིལ་འབབ་པར་མ་གྱུར་ཅིག །ཞིང་ལས་མཆོད་རྫས་འཐོན་པར་མ་གྱུར་ཅིག །དཔའ་བོའི་ཕུབ་ནི་དེ་རུ་བརྫད་ཅིང་དོར། །སོ་ལོའི་ཕུབ་ལ་སྣུམ་གྱིས་མ་བྱུགས་ཕྱིར། །
2SA 1:22 བསད་པའི་ཁྲག་དང་དཔའ་བོའི་ཚིལ་བུ་ལས། །ཡོ་ནཱ་ཐན་གྱི་མདའ་གཞུ་ཕྱིར་མ་འཐེན། །སོ་ལོའི་རལ་གྲི་སྟོང་བར་ལོག་མ་སོང་། །
2SA 1:23 སོ་ལོ་དང་ནི་ཡོ་ནཱ་ཐན་ཁོང་གཉིས། །གསོན་དུས་གཞན་གྱིས་བྱམས་ཤིང་བློ་ལ་བབས། །གྲོངས་པའི་སྐབས་སུ་ཕན་ཚུན་བྲལ་མ་གྱུར། །ཁོང་གཉིས་གླག་ལས་མགྱོགས་མྱུར་ལྡན་པ་དང་། །སེང་གེ་ལས་ཀྱང་ངར་ཤུགས་ལྡན་པ་འོ། །
2SA 1:24 ཀྱེ་ཀྱེ་ཡེས་ར་ཨེལ་གྱི་བུད་མེད་རྣམས། །སོ་ལོ་ཁོང་གི་ཕྱིར་དུ་ངུ་བར་གྱིས། །ཁོང་གིས་ཁྱོད་ལ་གྱོན་གོས་རྒྱ་སྨུག་བསྐོན། །ཁྱོད་ཀྱི་ཕྱི་གོས་གསེར་གྱི་རྒྱན་ཆས་བརྒྱན། །
2SA 1:25 དཔའ་བོ་དེ་དག་གཡུལ་སར་ཇི་ལྟར་གཤེགས། །ཡོ་ནཱ་ཐན་ནི་མཐོ་སར་ཇི་ལྟར་བཀྲོངས། །
2SA 1:26 ཀྱེ་ཀྱེ་ང་ཡི་སྤུན་ཟླ་ཡོ་ནཱ་ཐན། །ཁྱོད་ཀྱི་དོན་དུ་ང་ལ་སྡུག་བསྔལ་ཆེ། །ཁྱོད་ལ་ངའི་སེམས་རབ་ཏུ་འཕྲེང་བ་ཡིན། །ཁྱོད་ཀྱིས་ང་ལ་བཅངས་པའི་བརྩེ་བ་ནི། །བུད་མེད་ལས་ཀྱང་ལྷག་པར་ཟབ་པ་འོ། །
2SA 1:27 ཀྱི་ཧུད་དཔའ་བོ་ཇི་ལྟར་གཤེགས་པ་དང་། །དམག་ཆས་རྣམས་ནི་ཇི་ལྟར་ཡལ་བ་ཡིན། །ཞེས་པའོ། །
2SA 2:1 དེའི་རྗེས་སུ་དཱ་བིད་ཀྱིས་དཀོན་མཆོག་ཡ་ཝཱེ་ལ་འདི་ལྟར། བདག་ནི་ཡ་ཧུ་དཱའི་གྲོང་ཁྱེར་དུ་འགྲོ་རུང་ངམ་ཞེས་ཞུས་པར། དཀོན་མཆོག་ཡ་ཝཱེས་དེ་ལ་ཁྱོད་སོང་ཞིག་ཅེས་གསུངས། ཡང་དཱ་བིད་ཀྱིས། བདག་གང་དུ་འགྲོའམ་ཞུས་པ་དང་ཁོང་གིས། ཧེབ་རོན་དུ་སོང་ཞིག་ཅེས་གསུངས་སོ། །
2SA 2:2 དེའི་ཕྱིར་དཱ་བིད་ཀྱིས་རང་གི་ཆུང་མ་གཉིས་ཀ་སྟེ་ཡེ་སི་རེ་ཨེལ་པ་ཨ་ཧི་ནོ་ཨམ་དང་། ཀར་མེལ་པ་ནཱ་རྦལ་གྱི་ཡུགས་མོར་ལུས་པའི་ཆུང་མ་ཨ་བི་གཱ་ཡིལ་བྱ་བ་གཉིས་ཁྲིད་ནས་ཕྱིན་ཏོ། །
2SA 2:3 ཡང་དཱ་བིད་ཀྱིས་རང་གི་དྲུང་དུ་ཡོད་པའི་མི་རྣམས་དང་དེ་དག་གི་ཁྱིམ་མི་རྣམས་ཁྲིད་དེ་ཧེབ་རོན་ཉེ་འདབས་ཀྱི་གྲོང་རྡལ་དག་ཏུ་གནས་སོ། །
2SA 2:4 དེ་ནས་ཡ་ཧུ་དཱ་པ་རྣམས་འོངས་ནས་དཱ་བིད་ནི་ཡ་ཧུ་དཱ་ཁྱིམ་རྒྱུད་ཀྱི་རྒྱལ་པོར་བསྐོས་ཤིང་། ཡང་མི་ཞིག་གིས་དཱ་བིད་ལ་སོ་ལོའི་བེམ་པོ་དུར་དུ་འཇུག་མཁན་ནི་ཡཱ་བེ་སི་གིལ་ཨད་པ་རྣམས་ཡིན་ནོ་ཞེས་སྨྲས་པས།
2SA 2:5 དཱ་བིད་གྱིས་ཡཱ་བེ་སི་གིལ་ཨད་པ་རྣམས་ལ་བང་ཆེན་མངགས་ནས་དེ་དག་ལ་ཁྱོད་ཅག་གིས་རང་གི་ཇོ་བོ་སོ་ལོ་ལ་དྲིན་བསྟན་ཅིང་དུར་དུ་བཅུག་པའི་ཕྱིར། དཀོན་མཆོག་ཡ་ཝཱེས་ཁྱོད་ཅག་ལ་བྱིན་རླབས་གནང་བར་ཤོག
2SA 2:6 ཡང་དེ་ལྟར་བྱས་པས་དཀོན་མཆོག་ཡ་ཝཱེས་ཁྱོད་རྣམས་བྱམས་བརྩེ་དང་དྲང་བདེན་གྱིས་སྐྱོང་བར་མ་ཟད་ངས་ཀྱང་ཁྱོད་རྣམས་ལ་དྲིན་ལན་འཇལ་ལོ། །
2SA 2:7 ད་ལྟ་ཁྱོད་རྣམས་ཀྱི་ཇོ་བོ་སྟེ་སོ་ལོ་གྲོངས་པ་དང་ཡ་ཧུ་དཱའི་ཁྱིམ་རྒྱུད་ཀྱིས་ང་ནི་རྒྱལ་པོར་བསྐོས་པས་ཁྱོད་རྣམས་སྟོབས་ཤུགས་ཅན་དང་སྤོབས་པ་ཅན་དུ་འགྱུར་བར་ཤོག་ཅེས་སྨྲས་སོ། །
2SA 2:8 དེ་ནས་ནེར་གྱི་བུ་སྟེ། སོ་ལོའི་དམག་དཔུང་གི་དམག་དཔོན་ཨབ་ནེར་གྱིས་སྔར་སོ་ལོའི་སྲས་ཨིས་པོ་ཤེད་ཁྲིད་ནས་མཱ་ཧ་ནཱ་ཡིམ་གྱི་ཕ་རོལ་ཏུ་དྲངས་ཏེ།
2SA 2:9 གིལ་ཨད་དང་ཨ་ཤུར་པ་རྣམས་དང་། ཡེ་སི་རེ་ཨེལ་དང་། ཨེ་ཕཱར་ཡིམ་དང་། པེན་ཡཱ་མེན་དང་། ཡེས་ར་ཨེལ་ཡོངས་ཀྱི་རྒྱལ་པོར་བསྐོས་ཤིང་།
2SA 2:10 ཨིས་པོ་ཤེད་བྱ་བ་ཡེས་ར་ཨེལ་གྱི་རྒྱལ་པོར་བསྐོ་བའི་དུས་སུ་ལོ་བཞི་བཅུ་ལོན་ཡོད་དེ། དེས་ལོ་གཉིས་ལ་སྲིད་བསྐྱངས་ནའང་ཡ་ཧུ་དཱའི་ཁྱིམ་རྒྱུད་ནི་དཱ་བིད་ཀྱི་རྗེས་སུ་འབྲངས་སོ། །
2SA 2:11 ཡང་དཱ་བིད་ཀྱིས་ཧེབ་རོན་དུ་ལོ་བདུན་དང་ཟླ་དྲུག་གི་རིང་ལ་ཡ་ཧུ་དཱའི་ཁྱིམ་རྒྱུད་ལ་སྲིད་བསྐྱངས་པའོ། །
2SA 2:12 དེ་ནས་ནེར་གྱི་བུ་ཨབ་ནེར་གྱིས་སོ་ལོའི་སྲས་ཨིས་པོ་ཤེད་འཁོར་དང་བཅས་པ་ཁྲིད་ནས་མཱ་ཧ་ནཱ་ཡིམ་ནས་ཐོན་ཞིང་གིབ་ཡོན་གྲོང་ཁྱེར་དུ་ཕྱིན།
2SA 2:13 ཡང་ཟེ་རུ་ཡཱ་ཡི་བུ་ཡོ་ཨབ་དང་དཱ་བིད་ཀྱི་འཁོར་གཡོག་རྣམས་ཀྱང་ཐོན་ཏེ། གིབ་ཡོན་གྱི་རྫིང་བུའི་འགྲམ་དུ་དེ་དག་དང་ཕྲད་ཅིང་། དཔུང་ཁག་གཅིག་ནི་རྫིང་བུའི་ཚུར་རོལ་དང་གཞན་དེ་རྫིང་བུའི་ཕ་རོལ་ཏུ་བསྡད་དོ། །
2SA 2:14 དེ་ནས་ཨབ་ནེར་གྱིས་ཡོ་ཨབ་ལ། གཞོན་ནུ་རྣམས་ཡར་ལངས་ཏེ་ངེད་ཅག་གི་མདུན་དུ་རྩལ་འགྲན་པར་བཀའ་གནོངས་ཤིག་ཅེས་སྨྲས་པར། ཡོ་ཨབ་ཀྱིས་ལེགས་སོ་དེ་དག་འགྲན་དུ་ཆུག་ཅེས་སྨྲས་ཤིང་།
2SA 2:15 པེན་ཡཱ་མེན་དང་སོ་ལོའི་སྲས་ཨིས་པོ་ཤེད་གཉིས་ཀྱི་ཕྱོགས་ནས་མི་བཅུ་གཉིས་དང་དཱ་བིད་ཀྱི་འཁོར་གཡོག་རྣམས་ལས་མི་བཅུ་གཉིས་རྩིས་བླངས་པ་ལྟར་ཡར་ལངས་ཏེ་ཐོན།
2SA 2:16 དེ་རྣམས་ཀྱིས་རང་རང་གི་འགྲན་ཟླའི་མགོ་བོར་འཇུས་པ་དང་རལ་གྲི་འགྲན་ཟླའི་རྩིབ་གཞོགས་སུ་བཙུགས་པས། དེ་དག་ལྷན་ཅིག་ས་རུ་འགྱེལ་ཏོ། །དེའི་ཕྱིར་གིབ་ཡོན་གྱི་ས་ཆ་དེ་ལ་ཧེལ་ཀད་ཧ་ཙུ་རིམ་ ཞེས་བཏགས་སོ། །
2SA 2:17 དེའི་ཉིན་མོར་དམག་འཁྲུག་ཆེན་པོ་བརྒྱབ་པ་དང་ཨབ་ནེར་དང་ཡེས་ར་ཨེལ་པ་རྣམས་དཱ་བིད་ཀྱི་འཁོར་གཡོག་རྣམས་ཀྱི་མདུན་དུ་ཕམ་པར་གྱུར་ཏོ། །
2SA 2:18 ཡང་ཟེ་རུ་ཡཱ་ཡི་བུ་ཡོ་ཨབ་དང་ཨ་བི་ཤཱ་ཨི་དང་ཨ་སཱ་ཧེལ་གསུམ་དེ་རུ་ཡོད་དེ། ཨ་སཱ་ཧེལ་ནི་རི་དྭགས་དགོ་བ་ལྟར་མྱུར་བའོ། །
2SA 2:19 ཨ་སཱ་ཧེལ་གྱིས་གཡས་གཡོན་གང་ལའང་མ་གཟུར་བར་ཨབ་ནེར་བདས་ཤིང་།
2SA 2:20 ཨབ་ནེར་གྱིས་ཕྱི་མིག་བལྟས་པ་དང་། ཁྱོད་ཨ་སཱ་ཧེལ་ཡིན་ནམ་དྲིས་པར། དེས་ནི་ཡིན་ཞེས་སྨྲས།
2SA 2:21 ཡང་ཨབ་ནེར་གྱིས་དེ་ལ། ཁྱོད་རང་གཡས་གཡོན་གང་རུང་དུ་འཁོར་ནས་གཞོན་ནུ་ནང་གི་གཅིག་བཟུང་སྟེ། དེའི་མཚོན་ཆ་ཕྲོགས་ནས་ཁྱེར་ཞིག་ཅེས་སྨྲས་ཀྱང་། ཨ་སཱ་ཧེལ་ཁོའི་རྗེས་སུ་དེད་ནས་མ་བྲལ་ཏོ། །
2SA 2:22 ཨབ་ནེར་གྱིས་སླར་ཡང་ཨ་སཱ་ཧེལ་ལ། ཁྱོད་ཀྱིས་ངའི་རྗེས་མ་འདེད་ཅིག ངས་ཁྱོད་རང་ཅིའི་ཕྱིར་ས་རུ་བརྡབ་དགོས་སམ། ངས་དེ་ལྟར་བྱས་ཚེ་ཁྱོད་ཀྱི་ཕུ་བོ་ཡོ་ཨབ་ཀྱི་གདོང་ལ་ཅི་ལྟར་བལྟའམ་ཞེས་སྨྲས་ཀྱང་།
2SA 2:23 ཁོ་རང་ཁ་མ་བྲལ་བས་ཨབ་ནེར་གྱིས་མདུང་གི་རྩེ་མོ་དེའི་ཕོ་བར་བཙུགས་པས། མདུང་རྒྱབ་ནས་ཐོན་ཏེ་ཨ་སཱ་ཧེལ་སར་འགྱེལ་ཞིང་གནས་དེ་རུ་ཤིའོ། །ཨ་སཱ་ཧེལ་ཤི་བའི་གནས་སུ་སླེབས་པའི་མི་ཐམས་ཅད་དེར་ལངས་ནས་བསྡད།
2SA 2:24 ཡང་ཡོ་ཨབ་དང་ཨ་བི་ཤཱ་ཨི་གཉིས་ཀྱིས་ཨབ་ནེར་བདས་ཤིང་། གིབ་ཡོན་ཐང་སྟོང་དུ་འགྲོ་བའི་ལམ་དང་། གི་ཨ་ཞེས་པའི་ཁ་གཏད་དུ་ཡོད་པའི་ཨམ་མཱ་རི་བོར་སླེབས་པ་ཙམ་གྱིས་ཉི་མ་ནུབ་པ་རེད།
2SA 2:25 དེར་པེན་ཡཱ་མེན་པ་རྣམས་ཨབ་ནེར་གྱི་རྗེས་སུ་ཕྱོགས་གཅིག་ཏུ་འཛོམས་ནས་དཔུང་གཅིག་ཏུ་བསྒྲིགས་ཏེ་རི་མགོ་ཞིག་ཏུ་ལངས་བསྡད་དོ། །
2SA 2:26 ཡང་ཨབ་ནེར་གྱིས་ཡོ་ཨབ་ལ། རལ་གྲིས་མཚམས་མེད་པར་མི་གསོད་དགོས་སམ། དེའི་མཐའ་མ་ནི་སྡུག་བསྔལ་ཡིན་པ་མི་ཤེས་སམ། ཁྱོད་ཀྱིས་མི་རྣམས་ལ་རང་རང་གི་སྤུན་འདེད་པ་ལས་ཕྱིར་ལོག་པའི་བཀའ་དུས་ནམ་ཞིག་ལ་སྩོལ་ལམ་ཞེས་དྲིས་པར།
2SA 2:27 ཡོ་ཨབ་ཀྱིས། ངས་གཏན་དུ་བཞུགས་པའི་དཀོན་མཆོག་དཔང་དུ་བཙུགས་ནས་མནའ་སྐྱེལ་ཏེ། ཁྱོད་ཀྱིས་རྩལ་འགྲན་པའི་གཏམ་སྨྲས་པ་མིན་ན་མི་རྣམས་ནངས་སྔ་མོ་ནས་ཕྱིར་ལོག་ཚར་ཞིང་། རང་གི་སྤུན་འདེད་པ་སྤང་བའོ་ཞེས་སྨྲས་ཤིང་།
2SA 2:28 དེ་ནས་ཡོ་ཨབ་ཀྱིས་རྭ་དུང་བུས་པ་དང་མི་རྣམས་ལངས་བསྡད་ཅིང་ཡེས་ར་ཨེལ་པ་རྣམས་ཀྱི་རྗེས་སུ་མ་དེད་པ་དང་དམག་ཀྱང་མ་བརྒྱབ་ཏོ། །
2SA 2:29 ཡང་ཨབ་ནེར་དང་དེའི་མི་རྣམས་མཚན་གང་པོར་ཨ་ར་པཱ་བརྒྱུད་དེ་ཕྱིན་པ་དང་། ཡོར་དན་གཙང་པོ་བརྒལ་ནས་བིད་རོན་ཡུལ་ཐམས་ཅད་བརྒྱུད་ནས་ཆས་ཏེ་མཱ་ཧ་ནཱ་ཡིམ་དུ་སླེབས།
2SA 2:30 ཡོ་ཨབ་བྱ་བ་ཨབ་ནེར་བདས་ནས་ཕྱིར་ལོག་པ་དང་མི་ཐམས་ཅད་བསྡུས་པའི་སྐབས་སུ། དཱ་བིད་ཀྱི་འཁོར་གཡོག་རྣམས་ལས་ཨ་སཱ་ཧེལ་ལས་གཞན་ད་དུང་མི་བཅུ་དགུ་མ་ཚང་ངོ་། །
2SA 2:31 དཱ་བིད་ཀྱི་འཁོར་གཡོག་རྣམས་ཀྱིས་པེན་ཡཱ་མེན་པ་དང་ཨབ་ནེར་གྱི་འཁོར་རྣམས་ལས་མི་སུམ་བརྒྱ་དང་དྲུག་ཅུ་བསད་དོ། །
2SA 2:32 དེ་ནས་ཁོ་ཚོས་ཨ་སཱ་ཧེལ་གྱི་བེམ་པོ་ཁྱེར་ནས་པེད་ལེ་ཧེམ་དུ་ཡོད་པའི་རང་གི་ཕ་ཡི་དུར་ཁུང་དུ་བཞག་པ་དང་། ཡང་ཡོ་ཨབ་དང་དེའི་འཁོར་རྣམས་མཚན་གང་པོར་འགྲུལ་ཏེ་སྐྱ་རེངས་ཤར་དུས་ཧེབ་རོན་དུ་སླེབས་སོ། །
2SA 3:1 དེ་ནས་སོ་ལོའི་ཁྱིམ་དང་དཱ་བིད་ཀྱི་ཁྱིམ་གཉིས་བར་དུ་ཡུན་རིང་པོར་དམག་འཁྲུག་བྱུང་བ་དང་། དཱ་བིད་ཀྱི་སྟོབས་ནི་ཇེ་ཆེར་འཕེལ་ཞིང་སོ་ལོའི་ཁྱིམ་ནི་སྟོབས་ཇེ་ཆུང་དུ་གྱུར་ཏེ་ཉམས་སོ། །
2SA 3:2 ཡང་ཧེབ་རོན་དུ་དཱ་བིད་ལ་བུ་རྣམས་སྐྱེས་ཤིང་ཡེ་སི་རེ་ཨེལ་གྱི་ཨ་ཧི་ནོ་ཨམ་ལས་ཆད་པའི་བུ་ཐོག་མ་ཨམ་ནོན་དང་།
2SA 3:3 བུ་གཉིས་པ་ནི་ཀར་མེལ་ཡུལ་གྱི་ནཱ་རྦལ་ཞེས་པའི་འདས་པོ་ཁོའི་ཆུང་མ་ཨ་བི་གཱ་ཡིལ་ལས་ཆད་པའི་ཀིལ་ཨབ་དང་། བུ་གསུམ་པ་ནི་གེ་ཤུར་གྱི་རྒྱལ་པོ་ཏལ་མཱ་ཨི་ཡི་སྲས་མོ་མ་ཨ་ཀཱ་ཞེས་པ་ནས་ཆད་པའི་ཨབ་ཤཱ་ལོམ་དང་།
2SA 3:4 བུ་བཞི་པ་ནི་ཧག་གིད་ལས་ཆད་པའི་ཨ་དོ་ནེ་ཡཱ་ཡིན་པ་དང་། བུ་ལྔ་པ་ནི་ཨ་བི་ཏལ་ལས་ཆད་པའི་ཤེ་ཕད་ཡཱ་ཡིན་པ་དང་།
2SA 3:5 བུ་དྲུག་པ་ནི་དཱ་བིད་ཀྱི་ཆུང་མ་ཨེག་ལཱ་ལས་ཆད་པའི་ཡེད་རེ་ཨམ་སྟེ་འདི་རྣམས་ཧེབ་རོན་དུ་དཱ་བིད་ལ་སྐྱེས་པའི་བུ་རྣམས་ཡིན་ནོ། །
2SA 3:6 ཡང་སོ་ལོ་དང་དཱ་བིད་ཀྱི་ཁྱིམ་གཉིས་འཁྲུག་པའི་སྐབས་སུ། ཨབ་ནེར་བྱ་བ་སོ་ལོའི་ཁྱིམ་དུ་དབང་ཇེ་ཆེ་ནས་ཇེ་ཆེར་གྱུར།
2SA 3:7 སྔར་སོ་ལོ་ལ་ཨ་ཡཱ་ཡི་བུ་མོ་སྟེ་རི་ཚི་ཕཱ་བྱ་བའི་ཆུན་མ་ཞིག་ཡོད་དེ། ཡང་ཨིས་པོ་ཤེད་ཀྱིས་ཨབ་ནེར་ལ། ཁྱོད་ངའི་ཕ་ཡི་ཆུན་མ་དང་འགྲོགས་དོན་ཅི་ཞེས་དྲིས་པ་དང་།
2SA 3:8 ཨིས་པོ་ཤེད་ཀྱི་གཏམ་དེའི་རྐྱེན་གྱིས་ཨབ་ནེར་ཤིན་ཏུ་ཁྲོས་ནས་དེ་ལ། ང་ནི་ཡ་ཧུ་དཱ་རུ་ཁྱི་ཤི་རོ་ཞིག་ཡིན་ནམ། ད་ལྟའི་དུས་འདིར་ང་རང་ཁྱེད་ཀྱི་ཡབ་སོ་ལོའི་ཁྱིམ་མི་སྤུན་ཟླ་དང་མཛའ་གྲོགས་ཐམས་ཅད་ལ་བློ་དཀར་ཞིང་། ཁྱེད་ཀྱང་དཱ་བིད་ཀྱི་ལག་ཏུ་མ་གཏད། འོན་ཀྱང་དེ་རིང་ཁྱེད་ཀྱིས་བུད་མེད་འདིའི་ཆེད་དུ་ང་ལ་སྙད་འདོགས་སམ།
2SA 3:9 གལ་ཏེ་བདག་གིས་དཀོན་མཆོག་ཡ་ཝཱེས་དཱ་བིད་ལ་མནའ་དང་བཅས་ཞལ་བཞེས་གནང་བ་བཞིན་སྤྱད་པ་མིན་ན། དཀོན་མཆོག་གིས་ཨབ་ནེར་ལ་འདིའམ་འདི་ལས་ལྷག་པ་ཞིག་མཛད་པར་ཤོག
2SA 3:10 གང་ཡིན་ཞེ་ན། རྒྱལ་སྲིད་སོ་ལོའི་ཁྱིམ་ལས་ཕྲལ་ཏེ། དཱན་ནས་པེར་ཤ་བཱ་ཡི་བར་དུ་ཡེས་ར་ཨེལ་དང་ཡ་ཧུ་དཱ་གཉིས་ལ་དབང་བསྒྱུར་བར་དཱ་བིད་ཀྱི་རྒྱལ་ཁྲི་བཙུགས་པ་དེའོ་ཞེས་སྨྲས།
2SA 3:11 ཨིས་པོ་ཤེད་ནི་ཨབ་ནེར་ལ་ཤིན་ཏུ་འཇིགས་པས་ལན་ཚིག་གཅིག་ཀྱང་སྨྲ་བར་མ་སྤོབས་སོ། །
2SA 3:12 དེ་ནས་ཨབ་ནེར་གྱིས་དཱ་བིད་ཀྱི་དྲུང་དུ་བང་ཆེན་མངགས་ནས་འདི་ལྟར། ཡུལ་འདི་སུའི་ཡིན་ནམ་ཞེས་དང་། ཡང་ཁྱེད་ཀྱིས་བདག་ལ་ཆད་དོན་མཛོད་ཅིག དེ་ནས་བདག་གིས་ཡེས་ར་ཨེལ་ཐམས་ཅད་ཁྱེད་ཀྱི་ཕྱོགས་སུ་ཁ་བསྒྱུར་བར་རོགས་བྱེད་ངེས་ཡིན་ཞེས་སྨྲས་པ་ལ།
2SA 3:13 དཱ་བིད་ན་རེ། ལེགས་པོ་འདུག བདག་གིས་ཁྱོད་དང་ཆད་དོན་བཞག་ཆོག་མོད། ང་ལ་རེ་བ་གཅིག་ཡོད་པ་ནི། ཁྱོད་རང་ངའི་མདུན་དུ་འོང་བའི་དུས་སུ་ཐོག་མར་སོ་ལོའི་སྲས་མོ་མི་ཀལ་འཁྲིད་ཡོང་དགོས། དེ་ལྟར་མ་བྱས་ན་ཁྱོད་ཀྱིས་ང་རང་མཐོང་བར་མི་འགྱུར་ཞེས་སྨྲས།
2SA 3:14 དེའི་རྗེས་སུ་དཱ་བིད་ཀྱིས་སོ་ལོའི་སྲས་ཨིས་པོ་ཤེད་ཀྱི་མདུན་དུ་ཡང་བསྐྱར་བང་ཆེན་བརྫངས་ནས་དེ་ལ། ཕེ་ལེ་ཤེད་པའི་མཚན་སྐྱི་བརྒྱ་ཕྲག་ཅིག་རིན་པར་སྤྲད་ནས་བག་མར་བླངས་པ་སྟེ། ངའི་ཆུང་མ་མི་ཀལ་ཕྱིར་འོང་དུ་འཇུག་དགོས་ཞེས་སྨྲས་པས།
2SA 3:15 ཨིས་པོ་ཤེད་ཀྱིས་མི་མངགས་ནས་བུད་མེད་དེའི་ཁྱོ་བོ་སྟེ་ལཱ་ཨི་སིའི་བུ་ཕལ་ཏི་ཨེལ་ཞེས་པ་ལས་ཕྲོགས་སོ། །
2SA 3:16 ཡང་མི་ཀལ་གྱི་ཁྱོ་ག་ངུ་བཞིན་མཉམ་དུ་ཕྱིན་ཅིང་ཁོ་མོའི་རྗེས་དེད་ནས་པཱ་ཧུ་རིམ་བར་དུ་སླེབས། དེ་ནས་ཨབ་ནེར་གྱིས་ཁོ་ལ་ཁྱོད་རང་སོང་ཞིག ཕྱིར་ལོག་ཅིག་ཅེས་བསྒོས་པ་དང་ཕལ་ཏི་ཨེལ་ཕྱིར་ལོག་གོ །
2SA 3:17 ཨབ་ནེར་གྱིས་ཡེས་ར་ཨེལ་གྱི་རྒན་པོ་རྣམས་ལ་གཏམ་བྱས་ཏེ་འདི་ལྟར། སྔར་ཁྱོད་རྣམས་ཀྱིས་དཱ་བིད་རང་གི་རྒྱལ་པོ་བྱེད་པར་རེ་ལྟོས་བྱས་པ་ཡིན།
2SA 3:18 སྔར་དཀོན་མཆོག་ཡ་ཝཱེས་དཱ་བིད་ཀྱི་སྐོར་ལ་འདི་སྐད་དུ། བདག་གིས་རང་གི་ཞབས་ཕྱི་དཱ་བིད་བརྒྱུད་ནས་བདག་གི་འབངས་མི་ཡེས་ར་ཨེལ་ནི་ཕེ་ལེ་ཤེད་པ་དང་དེ་དག་གི་དགྲ་བོ་ཡོངས་ཀྱི་ལག་ནས་སྐྱོབ་པར་འགྱུར་ཞེས་གསུངས་པས་ད་ལྟ་དེ་བཞིན་གྲུབ་གྱུར་ཅིག་ཅེས་སྨྲས།
2SA 3:19 ཨབ་ནེར་གྱིས་པེན་ཡཱ་མེན་ལའང་དེ་ལྟར་སྨྲས་སོ། །དེ་ནས་ཨབ་ནེར་ཡང་ཧེབ་རོན་དུ་སོང་སྟེ་ཡེས་ར་ཨེལ་པ་རྣམས་དང་པེན་ཡཱ་མེན་གྱི་ཁྱིམ་ཡོངས་རྫོགས་མོས་མཐུན་ཡིན་པའི་དོན་ཐམས་ཅད་དཱ་བིད་ལ་སྨྲས་སོ། །
2SA 3:20 ཨབ་ནེར་དང་བཅས་མི་ཉི་ཤུ་དཱ་བིད་ཀྱི་དྲུང་དུ་ཧེབ་རོན་དུ་སོང་བ་དང་། དཱ་བིད་ཀྱིས་ཨབ་ནེར་དང་བཅས་པའི་མི་རྣམས་ལ་གསོལ་སྟོན་བཤམས་པ་རེད།
2SA 3:21 དེའི་རྗེས་སུ་ཨབ་ནེར་གྱིས་དཱ་བིད་ལ་འདི་ལྟར། ཁྱེད་དང་ཆད་དོན་འཇོག་པའི་ཕྱིར། ང་རང་ལངས་ནས་སོང་སྟེ་ཡེས་ར་ཨེལ་པ་ཐམས་ཅད་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་འཛོམ་པར་བྱའོ། །དེ་ལྟར་བྱས་ན་ཁྱེད་ཀྱིས་ཉིད་ཀྱི་ཐུགས་དགོངས་བཞིན་དུ་ཐམས་ཅད་ལ་དབང་བསྒྱུར་བར་འགྱུར་རོ་ཞེས་ཞུས་པ་ལ། དཱ་བིད་ཀྱིས་ཨབ་ནེར་ཕྱིར་མངགས་ཤིང་ཁོ་བདེ་བར་ཕྱིན་ཏོ། །
2SA 3:22 དེའི་དུས་སུ་ཡོ་ཨབ་དང་དཱ་བིད་ཀྱི་འཁོར་གཡོག་རྣམས་ཀྱིས་དགྲ་ལ་རྒོལ་ནས་བཅོམ་ནོར་མང་པོ་ཁྱེར་ཏེ་ལོག་འོངས་ཤིང་། སྐབས་དེར་ཨབ་ནེར་ནི་དཱ་བིད་དང་ལྷན་ཅིག་ཧེབ་རོན་དུ་མེད་དེ། གང་ལ་ཞེ་ན། དཱ་བིད་ཀྱིས་ཁོ་རང་བདེ་བར་འགྲོ་རུ་བཅུག་པས་སོ། །
2SA 3:23 དེ་ནས་ཡོ་ཨབ་དང་ཁོའི་རྗེས་སུ་འབྲངས་པའི་དམག་དཔུང་ཐམས་ཅད་སླེབས་པ་ལ། དེ་དག་གིས་ཡོ་ཨབ་ལ་ནེར་གྱི་བུ་ཨབ་ནེར་རྒྱལ་པོའི་དྲུང་དུ་འོངས་པ་དང་། རྒྱལ་པོས་ཁོ་འགྲོ་རུ་བཅུག་ཅིང་ཁོ་རང་བདེ་བར་ཕྱིན་ཚར་ཞེས་སྨྲས་པས།
2SA 3:24 ཡོ་ཨབ་རྒྱལ་པོའི་དྲུང་དུ་སོང་སྟེ་ན་རེ། ཁྱེད་ཀྱིས་ཅི་ཞིག་བྱས་པར་གཟིགས་དང་། ཨབ་ནེར་ཁྱེད་ཀྱི་དྲུང་དུ་སླེབས་ན་དེ་ནི་ཅིའི་ཕྱིར་འགྲོ་རུ་བཅུག་པ་ཡིན་ནམ། ད་ནི་ཁོ་རང་སོང་ཚར།
2SA 3:25 ཁྱེད་རང་ནེར་གྱི་བུ་ཨབ་ནེར་ལ་ཆ་རྒྱུས་ཡོད་ཅིང་། དེ་ནི་ཁྱེད་བསླུ་བ་དང་ཁྱེད་ཀྱི་འགྲོ་འདུག་མཛད་དོན་ཐམས་ཅད་རྟོགས་པའི་ཕྱིར་འདིར་འོངས་པ་ཡིན་ཞེས་སྨྲས་སོ། །
2SA 3:26 ཡོ་ཨབ་ནི་དཱ་བིད་ཀྱི་དྲུང་ནས་ཐོན་པ་ཙམ་གྱིས་ཨབ་ནེར་གྱི་རྗེས་སུ་བང་ཆེན་ར་མདར་མངགས་ཤིང་། དེ་དག་གིས་ཁོ་རང་སི་རཱའི་ཡུལ་གྱི་ཁྲོན་པ་ནས་ཕྱིར་ཁྲིད་འོངས་ནའང་། དཱ་བིད་ཀྱིས་དོན་དེ་ཅི་ཡང་མ་ཤེས་སོ། །
2SA 3:27 ཨབ་ནེར་ནི་ཧེབ་རོན་དུ་ཕྱིར་སླེབས་པའི་ཚེ། ཡོ་ཨབ་ཀྱིས་ཁོ་ལ་གསང་གཏམ་བཤད་པའི་ཚུལ་གྱིས་ཁོ་རང་མཁར་སྒོའི་གྲུ་ག་ཞིག་ཏུ་ཁྲིད་ནས་ཕོ་བ་བརྟོལ་བས་ཁོ་ཤིའོ། །ཡོ་ཨབ་ཀྱིས་དེ་ལྟར་རང་གི་ནུ་བོ་ཨ་སཱ་ཧེལ་ལ་དགྲ་ཤ་བླངས་པ་རེད།
2SA 3:28 དེའི་རྗེས་སུ་དཱ་བིད་ཀྱིས་འཕྲིན་དེ་ཐོས་པ་དང་འདི་ལྟར། ནེར་གྱི་བུ་ཨབ་ནེར་བསད་པའི་དོན་དེའི་ཐད་ནས་བདག་དང་བདག་གི་རྒྱལ་སྲིད་ལ་དཀོན་མཆོག་ཡ་ཝཱེའི་དྲུང་དུ་ནམ་ཡང་ཉེས་པ་མེད་དོ། །
2SA 3:29 ཉེས་པ་དེ་ནི་ཡོ་ཨབ་དང་དེའི་ཕ་གཞིས་ཡོངས་ལ་འབབ་པར་ཤོག་ཅིག ཡང་ཡོ་ཨབ་ཀྱི་ཁྱིམ་ལས་རྣག་འཛིར་བའི་ནད་དང་། མཛེ་ནད་དང་། འཁར་བ་ལ་བརྟེན་པ་དང་། གྲི་སོར་ལྟུང་བ་དང་། ཁ་ཟས་མེད་པ་རྣམས་ནི་ནམ་ཡང་ཆད་པར་མ་གྱུར་ཅིག་ཅེས་གསུངས་སོ། །
2SA 3:30 དེ་ལྟར་ཡོ་ཨབ་དང་དེའི་ནུ་བོ་ཨ་བི་ཤཱ་ཨི་གཉིས་ཀྱིས་ཨབ་ནེར་བསད་དོ། །གང་ལ་ཞེ་ན། དེས་ཁོ་ཚོའི་སྤུན་ཨ་སཱ་ཧེལ་བྱ་བ་གིབ་ཡོན་ཡུལ་དུ་འཐབ་མོར་བསད་པས་སོ། །
2SA 3:31 དེར་དཱ་བིད་ཀྱིས་ཡོ་ཨབ་དང་བཅས་པའི་མི་རྣམས་ལ། རང་གི་གོས་གཤགས་ཏེ་རྩིད་རས་གཡོགས་ཤིག ཨབ་ནེར་གྱི་མདུན་ནས་མྱ་ངན་བྱོས་ཤིག་ཅེས་སྨྲས་ཤིང་ཡང་རྒྱལ་པོ་དཱ་བིད་ཀྱང་ཨབ་ནེར་གྱི་པུར་སྒམ་རྗེས་སུ་ཕྱིན་ཏོ། །
2SA 3:32 དེ་ནས་དེ་དག་གིས་ཨབ་ནེར་བྱ་བ་ཧེབ་རོན་ཡུལ་དུ་དུར་ལ་བཅུག་པ་དང་རྒྱལ་པོ་སྐད་ཆེན་པོས་ཨབ་ནེར་གྱི་དུར་ཁུང་གི་མདུན་དུ་བཤུམས་ཏེ་མི་ཐམས་ཅད་ཀྱང་ངུས་སོ། །
2SA 3:33 རྒྱལ་པོས་ཨབ་ནེར་གྱི་དོན་དུ་མྱ་ངན་བྱས་ནས་འདི་ལྟར། ཨབ་ནེར་ཁྱེད་རང་གྲོངས་པ་ནི། །བླུན་པོ་གྲོངས་པའི་ལུགས་ཡིན་ནམ། །
2SA 3:34 ཁྱེད་ཕྱག་ཐག་པས་མ་བཀྱིགས་ལ། །རྐང་པར་ལྕགས་སྒྲོག་ཀྱང་མ་བརྒྱབ། །ཁྱེད་རང་ཅི་ལྟར་ལྷུང་ཞེ་ན། །མི་ངན་མདུན་དུ་ལྷུང་བ་བཞིན། །ཞེས་གསུངས་པས་མི་རྣམས་ཨབ་ནེར་གྱི་དོན་དུ་ལྷག་པར་ངུས་སོ། །
2SA 3:35 དེ་ནས་ཉི་མ་ད་དུང་མ་ནུབ་པའི་དུས་སུ་མི་རྣམས་འོངས་ནས་དཱ་བིད་ལ་ཁ་ཟས་སྟེར་འདོད་ནའང་དཱ་བིད་ཀྱིས་མནའ་བསྐྱལ་ཞིང་གལ་ཏེ་ངས་ཉི་མ་ནུབ་པའི་སྔོན་དུ་ཟས་གང་ཞིག་ཁ་རག་ན། དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་གསུངས།
2SA 3:36 མི་ཐམས་ཅད་ཀྱིས་དེ་མཐོང་ནས་དགའ་བར་གྱུར་ཅིང་རྒྱལ་པོས་ཅི་བྱས་ཐམས་ཅད་ལ་མི་རྣམས་དགའ་བར་གྱུར་ཏོ། །
2SA 3:37 ཉིན་དེར་མི་ཚོགས་དང་ཡེས་ར་ཨེལ་པ་ཐམས་ཅད་ཀྱིས་ནེར་གྱི་བུ་ཨབ་ནེར་བསད་པ་ནི་རྒྱལ་པོའི་ཐུགས་དགོངས་མིན་པ་ཤེས་པ་རེད།
2SA 3:38 དེ་ནས་རྒྱལ་པོས་ཉིད་ཀྱི་བློན་འཁོར་རྣམས་ལ། དེ་རིང་ཉིན་མོར་ཡེས་ར་ཨེལ་གྱི་ནང་དུ་རྗེ་བོ་དང་སྐྱེས་མཆོག་གྲོངས་པ་ཁྱོད་ཚོས་མི་ཤེས་སམ།
2SA 3:39 བདག་ནི་རྒྱལ་པོར་བྱུགས་ཀྱང་དེ་རིང་ཉིན་མོར་ད་དུང་ཉམས་ཆུང་སྟེ། ཟེ་རུ་ཡཱ་ཡི་བུ་འདི་རྣམས་ནི་ནུས་སྟོབས་རབ་ཏུ་ཆེ་བས་བདག་གིས་ཐུབ་པ་མིན། དཀོན་མཆོག་ཡ་ཝཱེས་ངན་སྤྱོད་མི་ལ་དེའི་ངན་ལན་འཇལ་བར་ཤོག་ཅེས་གསུངས་སོ། །
2SA 4:1 སོ་ལོའི་སྲས་ཨིས་པོ་ཤེད་ཀྱིས་ཨབ་ནེར་ཁོ་རང་ཧེབ་རོན་དུ་གྲོངས་པའི་འཕྲིན་ཐོས་པ་ཙམ་གྱིས། འཇིགས་ནས་སྟོབས་ཉམས་པ་དང་ཡེས་ར་ཨེལ་པ་ཐམས་ཅད་ཀྱང་བག་ཚ་བར་གྱུར་ཏོ། །
2SA 4:2 སོ་ལོའི་སྲས་ལ་འཕྲལ་རྒོལ་རུ་ཁག་གི་བཀོད་འདོམས་དམག་དཔོན་གཉིས་ཡོད་དེ་གཅིག་གི་མིང་ལ་པ་ཨ་ནཱ་དང་གཞན་དེའི་མིང་ལ་རེ་ཁབ་ཅེས་བྱའོ། །དེ་གཉིས་ནི་པེན་ཡཱ་མེན་གྱི་བུ་ལས་པེ་ཨེ་རཱོད་པ་རིམ་མོན་བྱ་བའི་བུ་ཡིན་ཞིང་། པེ་ཨེ་རཱོད་བྱ་བ་པེན་ཡཱ་མེན་གྱི་ཁོངས་སུ་བརྩིས་པ་ཡིན་ནོ། །
2SA 4:3 པེ་ཨེ་རཱོད་པ་རྣམས་ནི་སྔར་གིད་ཏཱ་ཡིམ་ཡུལ་དུ་བྲོས་པ་དང་དེ་རིང་གི་བར་དུ་དེ་རུ་བྱེས་པར་ལུས་སོ། །
2SA 4:4 ཡང་སོ་ལོའི་སྲས་ཡོ་ནཱ་ཐན་ལ་བུ་རྐང་པ་ཞ་བོ་ཅན་ཞིག་ཡོད་དེ། དེའི་མིང་ལ་མེ་ཕི་པོ་ཤེད་ཟེར་ཞིང་། ཡེ་སི་རེ་ཨེལ་ནས་སོ་ལོ་དང་ཡོ་ནཱ་ཐན་གཉིས་གྲོངས་པའི་སྐོར་གྱི་སྐད་སླེབས་པའི་དུས་སུ། བུ་དེ་ལོ་ལྔ་ཡིན་ལ། ཁོའི་མ་མས་བུ་བཟུང་ནས་བྲོས་ཤིང་། ཡང་ཁོ་མོ་རྟབ་རྟབ་པོར་བྲོས་པས་བུ་འགྱེལ་ནས་ཞ་བོར་གྱུར་ཏོ། །
2SA 4:5 དེ་ནས་པེ་ཨེ་རཱོད་པ་རིམ་མོན་གྱི་བུ་སྟེ་རེ་ཁབ་དང་པ་ཨ་ནཱ་གཉིས་ཉིན་གུང་ཚ་བ་ཆེ་བའི་དུས་སུ་ཨིས་པོ་ཤེད་ཀྱི་ཁྱིམ་དུ་ཕྱིན་པ་དང་། དེ་ནི་ཉིན་གུང་ངལ་གསོས་ནས་ཉལ་ཡོད་ཅིང་།
2SA 4:6 རེ་ཁབ་དང་དེའི་སྤུན་པ་ཨ་ནཱ་གཉིས་གྲོ་ལེན་ཁུལ་བྱས་ནས་ཨིས་པོ་ཤེད་ཀྱི་ཁང་པའི་ནང་དུ་འོངས་ཤིང་། ཨིས་པོ་ཤེད་རང་གི་གཟིམ་ཁང་དུ་མལ་ཁྲིའི་སྟེང་ཉལ་ཡོད་པ་ལ། དེ་གཉིས་ཀྱིས་ཁོ་ལ་རལ་གྲི་བཙུགས་ནས་བསད་དེ་མགོ་བཅད་ཅིང་བྲོས་པ་དང་། མཚན་གང་པོར་མགོ་ཁྱེར་ནས་ཨ་ར་པཱ་ཡི་ལམ་དུ་ཞུགས་ཏེ་སོང་།
2SA 4:8 དེ་ནས་ཨིས་པོ་ཤེད་ཀྱི་མགོ་ཧེབ་རོན་དུ་དཱ་བིད་ཀྱི་དྲུང་དུ་ཁྱེར་ནས་རྒྱལ་པོ་ལ་འདི་ལྟར། ཁྱེད་ཀྱི་དགྲ་བོ་སོ་ལོའི་བུ་ཨིས་པོ་ཤེད་ཀྱི་མགོ་འདི་ལ་གཟིགས་དང་། དེས་ནི་སྔར་རྟག་ཏུ་ཁྱེད་ཀྱི་སྲོག་ལ་བརྔམས་པའོ། །དེ་རིང་ཉིན་མོར་དཀོན་མཆོག་ཡ་ཝཱེས་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་སོ་ལོ་དང་དེའི་བུ་རྒྱུད་ལ་ལན་གནང་བ་ཡིན་ཞེས་ཞུས་པ་ལ།
2SA 4:9 དཱ་བིད་ཀྱིས་པེ་ཨེ་རཱོད་པ་རིམ་མོན་གྱི་བུ་རེ་ཁབ་དང་དེའི་སྤུན་པ་ཨ་ནཱ་གཉིས་ལ་འདི་ལྟར། དཀའ་སྡུག་ཀུན་ལས་ངའི་སྲོག་སྐྱོབ་མཁན་དང་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་འཛུགས་པར་བྱ་སྟེ།
2SA 4:10 སྔར་མི་ཞིག་གིས་སོ་ལོ་གྲོངས་སོ་ཞེས་ང་ལ་འཕྲིན་བཟང་སྦྲོན་ནོ་སྙམ་ཞིང་། ངས་མི་དེ་བཟུང་ནས་ཙིག་ལག་ཡུལ་དུ་བསད་པ་དང་། དེ་ནི་ངས་དེ་ལ་འཕྲིན་བཟང་སྦྲོན་པའི་ལན་སྤྲད་པ་ཡིན་ནོ། །
2SA 4:11 མི་ངན་གྱིས་མི་དྲང་བདེན་ཞིག་དེའི་ཁྱིམ་དུ་མལ་ཁྲི་སྟེང་བསད་ན། ངས་དེའི་སྲོག་ལན་ཅིས་ཀྱང་ལེན་པར་བྱ་སྟེ། ཁྱོད་གཉིས་ཀྱང་གསོད་ངེས་ཡིན་ཞེས་གསུངས་ཤིང་།
2SA 4:12 དཱ་བིད་ཀྱིས་རང་གི་གཞོན་ནུ་རྣམས་ལ་བཀའ་བསྩལ་པ་དང་། དེ་དག་གིས་ཁོ་གཉིས་ཀ་བསད་ཅིང་། རྐང་ལག་བཅད་དེ་བེམ་པོ་ཧེབ་རོན་གྱི་རྫིང་བུའི་འགྲམ་དུ་བཀལ། འོན་ཀྱང་ཨིས་པོ་ཤེད་ཀྱི་མགོ་ཁྱེར་ཏེ་ཧེབ་རོན་དུ་ཨབ་ནེར་གྱི་དུར་ལ་བཅུག་གོ །
2SA 5:1 ཡང་དེ་ནས་ཡེས་ར་ཨེལ་པའི་ཚོ་ཁག་ཐམས་ཅད་ཧེབ་རོན་དུ་དཱ་བིད་ཀྱི་དྲུང་དུ་འོངས་ནས་ཁོང་ལ། གཟིགས་དང་བདག་ཅག་ནི་ཁྱེད་ཀྱི་ཤ་དང་རུས་པའི་གཉེན་ཉེ་ཡིན་ནོ། །
2SA 5:2 སྔར་སོ་ལོ་བདག་ཅག་གི་རྒྱལ་པོར་བཞུགས་པའི་ཚེ། ཁྱེད་ནི་ཡེས་ར་ཨེལ་པའི་དམག་དཔུང་གི་འགྲོ་འོང་ལ་སྣེ་ཁྲིད་བྱེད་མཁན་ཡིན། དཀོན་མཆོག་ཡ་ཝཱེས་ཀྱང་ཁྱེད་ལ། ཁྱོད་ཀྱིས་བདག་གི་འབངས་མི་ཡེས་ར་ཨེལ་ལ་བདག་སྐྱོང་བྱས་ནས་དེའི་འགོ་དཔོན་དུ་གྱུར་ཅིག་ཅེས་གསུངས་མྱོང་ངོ་ཞེས་ཞུས།
2SA 5:3 ཡེས་ར་ཨེལ་གྱི་རྒན་པོ་རྣམས་ཧེབ་རོན་དུ་རྒྱལ་པོའི་དྲུང་དུ་འོངས་པ་དང་། རྒྱལ་པོ་དཱ་བིད་ཀྱིས་ཧེབ་རོན་དུ་དཀོན་མཆོག་ཡ་ཝཱེའི་སྤྱན་སྔར་དེ་དག་དང་ཆད་དོན་མཛད་ཅིང་། དེ་དག་གིས་དཱ་བིད་ཡེས་ར་ཨེལ་གྱི་རྒྱལ་པོར་བསྐོ་ཆེད་སྣུམ་གྱིས་བྱུགས།
2SA 5:4 དཱ་བིད་ཀྱིས་རྒྱལ་སྲིད་འཛིན་པའི་ཚེ་ལོ་སུམ་ཅུ་ལོན་ཞིང་ཁོང་གིས་ལོ་བཞི་བཅུའི་རིང་དུ་རྒྱལ་སྲིད་བསྐྱངས།
2SA 5:5 ཁོང་གིས་ཧེབ་རོན་དུ་ཡ་ཧུ་དཱ་ལ་ལོ་བདུན་དང་ཟླ་བ་དྲུག་དང་། ཡང་ཡེ་རུ་སཱ་ལེམ་དུ་ཡེས་ར་ཨེལ་དང་ཡ་ཧུ་དཱ་གཉིས་ལ་ལོ་སུམ་ཅུ་སོ་གསུམ་གྱི་རིང་རྒྱལ་སྲིད་བསྐྱངས་སོ། །
2SA 5:6 ཡང་རྒྱལ་པོ་དང་ཁོང་གི་རྗེས་འབྲང་པ་རྣམས་ཡེ་རུ་སཱ་ལེམ་དུ་སླེབས་ཤིང་། ཡུལ་དེར་གནས་པའི་ཡེ་བུ་སི་པ་རྣམས་ལ་རྒོལ་བར་བསམས་པ་ལ། ཡེ་བུ་སི་པ་རྣམས་ཀྱིས་དཱ་བིད་ལ། ལོང་བ་དང་ཞ་བོ་འདི་རྣམས་ཀྱིས་ཀྱང་ཁྱོད་བཟློག་པར་བྱེད་པས་ཁྱོད་གྲོང་ཁྱེར་འདིའི་ནང་དུ་འོང་མི་ནུས་སོ་ཞེས་སྨྲས་ཤིང་། དེ་དག་གི་སེམས་སུ་དཱ་བིད་ཅི་ནས་ཀྱང་དེར་འོང་མི་ནུས་བསམས་ནའང་།
2SA 5:7 དཱ་བིད་ཀྱིས་ཛ་ཡན་གྱི་བཙན་རྫོང་སྟེ་དཱ་བིད་ཀྱི་གྲོང་ཁྱེར་བླངས་པའོ། །
2SA 5:8 དེའི་ཉིན་དཱ་བིད་ཀྱིས། ཡེ་བུ་སི་པ་རྣམས་ལ་རྒོལ་མཁན་དག་གིས། ཡུར་བ་ནས་ཡར་སོང་སྟེ་དཱ་བིད་སེམས་ནས་སྡང་བའི་ལོང་བ་དང་ཞ་བོ་རྣམས་ལ་རྒོལ་ཞིག་ཅེས་བཀའ་བསྩལ་པས། ལོང་བ་དང་ཞ་བོ་རྣམས་ཕོ་བྲང་ནང་དུ་འོང་མི་རུང་ཞེས་པའི་ངག་རྒྱུན་བྱུང་བའོ། །
2SA 5:9 ཕྱིས་སུ་དཱ་བིད་ནི་བཙན་རྫོང་དེའི་ནང་དུ་བཞུགས་ཤིང་དེའི་མིང་ལ་དཱ་བིད་ཀྱི་གྲོང་ཁྱེར་ཞེས་བཏགས་པ་དང་། ཡང་དཱ་བིད་ཀྱིས་འཛིངས་རགས་ནས་ནང་རོལ་དུ་གྱང་བརྩིགས་པ་རེད།
2SA 5:10 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་དཱ་བིད་དང་མཉམ་དུ་བཞུགས་པས་དཱ་བིད་ཉིན་རེ་བཞིན་དར་ཞིང་རྒྱས་པར་གྱུར།
2SA 5:11 དེ་ནས་ཐཱར་གྱི་རྒྱལ་པོ་ཧི་རཱམ་གྱིས་དཱ་བིད་ཀྱི་དྲུང་དུ་བང་ཆེན་མངགས་པ་དང་། ཡང་ཐང་ཤིང་དང་ཤིང་བཟོ་དང་རྡོ་བཟོ་རྣམས་བརྫངས་ཤིང་དེ་དག་གིས་དཱ་བིད་ལ་ཕོ་བྲང་བཞེངས།
2SA 5:12 དེར་དཱ་བིད་ཀྱིས་དཀོན་མཆོག་ཡ་ཝཱེས་རང་ཉིད་ཡེས་ར་ཨེལ་གྱི་རྒྱལ་པོར་བསྐོས་པ་དང་། ཡང་ཁོང་གི་འབངས་མི་ཡེས་ར་ཨེལ་གྱི་དོན་དུ་ཁོའི་རྒྱལ་སྲིད་དར་བར་མཛད་པ་རྟོགས་སོ། །
2SA 5:13 དཱ་བིད་ཁོང་ཉིད་ཧེབ་རོན་ནས་ཐོན་རྗེས་ཡེ་རུ་སཱ་ལེམ་དུ་ཆུན་མ་དང་བཙུན་མོ་མང་པོ་བཞེས་ཤིང་། སྲས་དང་སྲས་མོའང་ཤིན་ཏུ་མང་པོ་བལྟམས་སོ། །
2SA 5:14 ཡེ་རུ་སཱ་ལེམ་དུ་བལྟམས་པ་རྣམས་ཀྱི་མིང་ནི་འདི་ལྟ་སྟེ། ཤམ་མུ་ཨ་དང་ཤོ་བབ། ནཱ་ཐན། སོ་ལོ་མོན།
2SA 5:15 ཡིབ་ཧར། ཨེ་ལི་ཤུ་ཨ། ནེ་ཕེག ཡཱ་ཕི་ཨ།
2SA 5:16 ཨེ་ལི་ཤཱ་མ། ཨེལ་ཡཱ་ད། ཨེ་ལི་ཕེ་ལེད་བཅས་སོ། །
2SA 5:17 དེ་ནས་ཕེ་ལེ་ཤེད་པ་རྣམས་ཀྱིས་དཱ་བིད་ནི་ཡེས་ར་ཨེལ་གྱི་རྒྱལ་པོར་བྱུགས་པའི་གཏམ་ཐོས་པས། ཐམས་ཅད་དཱ་བིད་འཚོལ་དུ་ཡར་ཕྱིན་པ་དང་། དཱ་བིད་ཀྱིས་དེ་ཐོས་པ་ཙམ་གྱིས་མར་བཙན་རྫོང་དུ་བབས་སོ། །
2SA 5:18 ཕེ་ལེ་ཤེད་པ་རྣམས་འོངས་ནས་རེ་པཱ་པའི་ལུང་པར་ཁྱབ།
2SA 5:19 དེར་དཱ་བིད་ཀྱིས་དཀོན་མཆོག་ཡ་ཝཱེ་ལ། བདག་ཡར་སོང་ནས་ཕེ་ལེ་ཤེད་པ་རྣམས་ལ་རྒོལ་བར་བྱའམ། ཁྱེད་ཀྱིས་དེ་དག་བདག་གི་ལག་ཏུ་གཏོད་པར་མཛད་དམ་ཞུས་པ་ལ། དཀོན་མཆོག་ཡ་ཝཱེས་དཱ་བིད་ལ་འདི་སྐད་དུ། ཡར་སོང་ཞིག་དང་ངས་ཕེ་ལེ་ཤེད་པ་རྣམས་ཁྱོད་ཀྱི་ལག་ཏུ་གཏོད་ངེས་ཡིན་ཞེས་གསུངས་སོ། །
2SA 5:20 དེ་ནས་དཱ་བིད་ནི་པཱ་ཨལ་ཕེ་ར་ཙིམ་དུ་འོངས་པ་དང་། ཁོས་ཕེ་ལེ་ཤེད་པ་རྣམས་དེ་རུ་འཇོམས་པར་བྱས་ཏེ་འདི་ལྟར། ཆུས་རགས་བརྟོལ་བ་ལྟར་དཀོན་མཆོག་ཡ་ཝཱེས་དགྲ་བོ་རྣམས་ངའི་མདུན་དུ་བརྟོལ་བ་ཡིན་ཞེས་སྨྲས་ཤིང་། ཁོང་གིས་ཡུལ་དེའི་མིང་ལ་པཱ་ཨལ་ཕེ་ར་ཙིམ་ཞེས་བཏགས།
2SA 5:21 ཕེ་ལེ་ཤེད་པ་རྣམས་ཀྱིས་རང་གི་སྐུ་འདྲ་རྣམས་དེ་རུ་བསྐྱུར་ཅིང་། དཱ་བིད་དང་ཁོའི་ཞབས་འབྲང་རྣམས་ཀྱིས་དེ་དག་བླངས་ནས་ཁྱེར་ཏོ། །
2SA 5:22 ཕེ་ལེ་ཤེད་པ་རྣམས་སླར་ཡང་ཡར་འོངས་པ་དང་རེ་པཱ་པའི་ལུང་པར་ཁྱབ།
2SA 5:23 དཱ་བིད་ཀྱིས་དཀོན་མཆོག་ཡ་ཝཱེར་ཞུས་པ་ན། ཁོང་གིས་ཁྱོད་ཐད་ཀར་ཡར་མི་འགྲོ་བར། དེ་དག་རྒྱབ་ནས་བསྐོར་ཏེ་སྤོས་ཤིང་གི་ནགས་ཚལ་གྱི་ཁ་གཏད་ནས་དེ་དག་ལ་རྒོལ་ཞིག
2SA 5:24 ཁྱོད་ཀྱིས་སྤོས་ཤིང་གི་རྩེ་ནས་དཔུང་ཚོགས་ཀྱི་གོམ་སྒྲ་ཐོས་པ་ཙམ་གྱིས་ཡར་ལོངས་ཤིག གང་ལ་ཞེ་ན། དུས་དེར་དཀོན་མཆོག་ཡ་ཝཱེ་ཁྱོད་ཀྱི་སྔོན་དུ་གཤེགས་ཏེ། ཕེ་ལེ་ཤེད་པའི་དམག་ཚོགས་ལ་རྒོལ་བ་ཡིན་ནོ་ཞེས་གསུངས།
2SA 5:25 དེ་ནས་དཱ་བིད་ཀྱིས་དཀོན་མཆོག་ཡ་ཝཱེས་བཀའ་བསྩལ་པ་ཇི་བཞིན་བསྒྲུབས་པ་དང་ཕེ་ལེ་ཤེད་པ་རྣམས་གེ་བཱ་ནས་གེ་ཟེར་བར་དུ་བཅོམ་མོ། །
2SA 6:1 ཡང་དཱ་བིད་ཀྱིས་ཡེས་ར་ཨེལ་ལས་བདམས་པའི་མི་ཁྲི་གསུམ་བསྡུས་པ་དང་།
2SA 6:2 དཱ་བིད་དང་མཉམ་དུ་ཡོད་པའི་མི་རྣམས་ཡར་ལངས་ནས་ལམ་ལ་ཆས་ཏེ་དཀོན་མཆོག་གི་ཞལ་ཆད་ཀྱི་ཤུར་སྒམ་ལེན་པར་པཱ་ཨལ་ཡ་ཧུ་དཱ་རུ་སོང་ཞིང་། ཤུར་སྒམ་དེ་ནི་ཀེ་རུབ་ཟུང་གི་གོང་དུ་བཞུགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་ནས་འབོད་པའོ། །
2SA 6:3 ཁོ་ཚོས་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་མཐོ་སྒང་དུ་གནས་པའི་ཨ་བི་ནཱ་དབ་ཀྱི་ཁྱིམ་ནས་བཏོན་པ་དང་། ཤིང་རྟ་གསར་པ་ཞིག་ལ་བསྐྱོན་ནས་ཨ་བི་ནཱ་དབ་ཀྱི་བུ་ཨུ་ཟཱ་དང་ཨ་ཧི་ཨོ་གཉིས་ཀྱིས་ཤིང་རྟ་གསར་པ་དེ་དེད་པ་ཡིན་ནོ། །
2SA 6:4 དཀོན་མཆོག་གི་ཞལ་ཆད་ཀྱི་ཤུར་སྒམ་ཤིང་རྟའི་སྟེང་དུ་ཡོད་པ་དང་། ཨ་ཧི་ཨོ་ཞལ་ཆད་ཀྱི་ཤུར་སྒམ་གྱི་སྔོན་དུ་བསྐྱོད་དོ། །
2SA 6:5 དཱ་བིད་དང་ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཀྱིས་དཀོན་མཆོག་ཡ་ཝཱེའི་དྲུང་དུ་གསོམ་ཤིང་གི་རོལ་ཆས་སྣ་ཚོགས་ཏེ། པི་ཝང་དང་རྒྱུད་མངས། སིལ་རྔ། སྦུག་ཆལ། སིལ་སྙན་བཅས་དཀྲོལ་ཞིང་གར་འཆམས་པའོ། །
2SA 6:6 དེ་དག་ནཱ་ཀོན་གྱི་གཡུལ་ཁར་སླེབས་པའི་ཚེ། བ་གླང་སར་འགྱེལ་ལ་ཁད་བྱས་པས་ཨུ་ཟཱ་ཡིས་ལག་པ་བརྐྱངས་ནས་དཀོན་མཆོག་གི་ཞལ་ཆད་ཀྱི་ཤུར་སྒམ་བསྐྱོར་བ་དང་།
2SA 6:7 དཀོན་མཆོག་ཡ་ཝཱེ་ནི་ཨུ་ཟཱ་ལ་ཐུགས་རབ་ཏུ་ཁྲོས་ཤིང་། ཁོའི་སྤྱོད་ལམ་ནོར་འཁྲུལ་ཅན་དེའི་རྐྱེན་གྱིས་དཀོན་མཆོག་གིས་ཁོ་བསད་པ་དང་། ཁོ་རང་དཀོན་མཆོག་གི་ཞལ་ཆད་ཀྱི་ཤུར་སྒམ་གྱི་གམ་དུ་ཤིའོ། །
2SA 6:8 དཀོན་མཆོག་ཡ་ཝཱེས་གློ་བུར་ཉིད་དུ་ཨུ་ཟཱ་ལ་ཉེས་ཆད་བཅད་པས་དཱ་བིད་རབ་ཏུ་ཁྲོས་ནས་ཡུལ་དེའི་མིང་ལ་ཕེ་རེལ་ཟི་ཨུ་ཟཱ་ཞེས་བཏགས་ཤིང་དེ་རིང་གི་བར་དུ་ལུས།
2SA 6:9 དེའི་ཉིན་ལ་དཱ་བིད་དཀོན་མཆོག་ཡ་ཝཱེ་ལ་འཇིགས་ཏེ་ན་རེ། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་བདག་གི་རྩར་འབྱོན་ག་ལ་རུང་ཞེས་སྨྲས།
2SA 6:10 དེའི་ཕྱིར་དཱ་བིད་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་རང་གི་གྲོང་ཁྱེར་དུ་འཁྱེར་མ་འདོད་པར། དེ་ལས་ལྡོག་སྟེ་གཱད་པ་ཨོ་བེད་ཨེ་དོམ་ཞེས་བྱ་བའི་ཁྱིམ་དུ་ཁྱེར།
2SA 6:11 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཟླ་བ་གསུམ་གྱི་རིང་ལ་གཱད་པ་ཨོ་བེད་ཨེ་དོམ་གྱི་ཁྱིམ་དུ་ལུས་པ་དང་དཀོན་མཆོག་ཡ་ཝཱེས་ཨོ་བེད་ཨེ་དོམ་དང་དེའི་ཁྱིམ་མི་ཐམས་ཅད་ལ་བྱིན་གྱིས་བརླབས་སོ། །
2SA 6:12 དེ་ནས་མི་རྣམས་ཀྱིས་རྒྱལ་པོ་དཱ་བིད་ལ། དཀོན་མཆོག་ཡ་ཝཱེས་ཨོ་བེད་ཨེ་དོམ་གྱི་ཁྱིམ་དང་དེ་ལ་གཏོགས་པ་ཐམས་ཅད་ལ་དཀོན་མཆོག་གི་ཞལ་ཆད་ཀྱི་ཤུར་སྒམ་གྱི་རྐྱེན་གྱིས་བྱིན་གྱིས་བརླབས་པའོ་ཞེས་ཞུས་པས། དཱ་བིད་དགའ་དགའ་སྤྲོ་སྤྲོ་ངང་ལམ་དུ་ཆས་ཤིང་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ཨོ་བེད་ཨེ་དོམ་གྱི་ཁྱིམ་ནས་རང་གི་གྲོང་ཁྱེར་དུ་ཡར་གདན་དྲངས་སོ། །
2SA 6:13 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་རྣམས་ཀྱིས་གོམ་པ་དྲུག་བརྒྱབ་མཚམས་སུ་དཱ་བིད་ཀྱིས་བ་གླང་གཅིག་དང་ཕྱུགས་ཤ་ཤེད་ཅན་གཅིག་མཆོད་པར་ཕུལ་ཏོ། །
2SA 6:14 དཱ་བིད་ཀྱིས་སོ་རས་སྲབ་བུས་བཟོས་པའི་བེར་ཐུལ་གྱོན་པ་དང་སྟོབས་ཤུགས་ཡོད་རྒུ་བཏོན་ནས་དཀོན་མཆོག་ཡ་ཝཱེའི་དྲུང་དུ་གར་འཆམས།
2SA 6:15 དེ་ལྟར་དཱ་བིད་དང་ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཀྱིས་དགའ་སྤྲོའི་འབོད་སྒྲ་བསྒྲགས་ཤིང་རྭ་དུང་བུས་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཡར་གདན་དྲངས་སོ། །
2SA 6:16 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དཱ་བིད་ཀྱི་གྲོང་ཁྱེར་དུ་འབྱོར་བའི་ཚེ། སོ་ལོའི་སྲས་མོ་མི་ཀལ་གྱིས་སྒེའུ་ཁུང་ནས་བལྟས་པ་ན། རྒྱལ་པོ་དཱ་བིད་ཀྱིས་དཀོན་མཆོག་ཡ་ཝཱེའི་དྲུང་དུ་གནམ་ལྡིང་ས་ལྡིང་བྱེད་ཀྱིན་བྲོ་འཁྲབ་པ་མཐོང་བས། སེམས་ནས་ཁོ་ལ་མཐོང་ཆུང་བྱས།
2SA 6:17 དེ་ནས་དེ་དག་གིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནང་དུ་གདན་དྲངས་པ་དང་། དཱ་བིད་ཀྱིས་དེའི་དོན་དུ་ཕུབ་པའི་གུར་མཆོག་གི་ནང་དུ་རང་སར་བཞག་ཅིང་། ཡང་དཱ་བིད་ཀྱིས་དཀོན་མཆོག་ཡ་ཝཱེའི་དྲུང་དུ་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །
2SA 6:18 དཱ་བིད་ཀྱིས་སྦྱིན་སྲེག་དང་ཞི་བདེའི་མཆོད་པ་ཕུལ་རྗེས་སུ། ཁོང་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་ལ་བརྟེན་ནས་མི་ཐམས་ཅད་ལ་བྱིན་རླབས་གནང་ཞིང་།
2SA 6:19 ཡེས་ར་ཨེལ་གྱི་མི་ཐམས་ཅད་དེ་སྐྱེས་ཕོ་མོ་རེ་རེར་བག་ལེབ་རེ་དང་། ཤ་ལེབ་མོ་ རེ་དང་། རྒུན་འབྲུམ་སྐམ་པོ་ལེབ་མོ་རེ་བགོས་ནས་མི་ཐམས་ཅད་རང་རང་གི་ཁྱིམ་དུ་ལོག་པ་རེད།
2SA 6:20 དཱ་བིད་རང་གི་ཁྱིམ་མི་ལ་བྱིན་རླབས་སྩོལ་བའི་ཕྱིར་འོངས་པ་ན། སོ་ལོའི་སྲས་མོ་མི་ཀལ་ནི་དཱ་བིད་དང་འཕྲད་པར་འོངས་ཏེ་ཁོང་ལ། དེ་རིང་ཉིན་མོར་ཡེས་ར་ཨེལ་གྱི་རྒྱལ་པོ་ནི་ཅི་འདྲའི་གཟི་བརྗིད་ལྡན་ཨང་། ཁོང་ཉིད་རང་གི་བློན་འཁོར་གྱི་གཡོག་མོ་རྣམས་ཀྱི་མཐོང་སར་གཅེར་བུར་བུད་ཅིང་། དེ་ནི་མི་ཐ་མལ་བ་ཞིག་གིས་ངོ་ཚ་སྤངས་ནས་གཅེར་བུར་བུད་པ་དང་མཚུངས་སོ་ཞེས་སྨྲས་པར།
2SA 6:21 དཱ་བིད་ཀྱིས་མི་ཀལ་ལ། བདག་གིས་དཀོན་མཆོག་ཡ་ཝཱེའི་སྤྱན་སྔར་དེ་ལྟར་བྱས་པ་ཡིན་ཏེ། དཀོན་མཆོག་ཡ་ཝཱེས་བདག་ནི་ཁོང་གི་འབངས་མི་ཡེས་ར་ཨེལ་གྱི་མངའ་བདག་ཏུ་བསྐོས་ནས་ང་རང་བདམས་ཤིང་། ཁྱོད་ཀྱི་ཕ་དང་ཁྱོད་ཀྱི་ཕ་ཡི་རྒྱུད་ཐམས་ཅད་ལས་མཐོ་བར་མཛད་པས། བདག་གིས་དཀོན་མཆོག་ཡ་ཝཱེའི་སྤྱན་སྔར་ཞབས་བྲོ་འཁྲབ་ཅིང་སྤྲོ་སྐྱིད་གཏོང་ངོ་། །
2SA 6:22 བདག་ནི་འདི་ལས་ཀྱང་ལྷག་པར་དམའ་བར་འགྱུར་བ་དང་། རང་གི་མཐོང་ངོར་དམན་ས་འཛིན་པར་འདོད་དེ། ཡང་ཁྱོད་ཀྱིས་གླེང་བའི་གཡོག་མོ་རྣམས་ཀྱིས་བདག་ལ་བཀུར་བསྟི་བྱེད་པ་ཡིན་ཞེས་སྨྲས་སོ། །
2SA 6:23 སོ་ལོའི་སྲས་མོ་མི་ཀལ་ལ་འཆི་བའི་བར་དུ་ཕྲུ་གུ་མ་སྐྱེས་སོ། །
2SA 7:1 ཡང་དེའི་རྗེས་སུ་དཀོན་མཆོག་ཡ་ཝཱེས་ཕྱོགས་བཞིའི་དགྲ་རྣམས་ཀྱི་བཙན་འཛུལ་བཟློགས་ནས་རྒྱལ་པོ་ཉིད་ཀྱི་ཕོ་བྲང་དུ་ཞི་བར་སྡོད་པའི་ཚེ།
2SA 7:2 རྒྱལ་པོས་ལུང་སྟོན་པ་ནཱ་ཐན་ལ། ལྟོས་དང་། བདག་ནི་ཐང་ཤིང་གི་ཕོ་བྲང་ནང་དུ་སྡོད་པ་དང་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་གུར་གྱི་ནང་དུ་མཆིས་སོ་ཞེས་སྨྲས་པ་ལ།
2SA 7:3 ནཱ་ཐན་གྱིས་རྒྱལ་པོ་ལ། དཀོན་མཆོག་ཡ་ཝཱེ་ཁྱེད་དང་མཉམ་དུ་བཞུགས་པས་ཁྱེད་ཀྱི་ཐུགས་དགོངས་བཞིན་བྱོས་ཤིག་ཅེས་སྨྲས་སོ། །
2SA 7:4 དེའི་མཚན་མོར་དཀོན་མཆོག་ཡ་ཝཱེའི་བཀའ་ནི་ནཱ་ཐན་ལ་བྱུང་ནས་འདི་སྐད་དུ།
2SA 7:5 ཁྱོད་སོང་ནས་བདག་གི་ཞབས་ཕྱི་དཱ་བིད་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་བདག་གནས་སའི་མཆོད་ཁང་ཞིག་བཞེངས་པར་འདོད་དམ།
2SA 7:6 ངས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་ཁྲིད་པའི་ཉིན་ནས་བཟུང་དེ་རིང་གི་བར་དུ། བདག་ནི་མཆོད་ཁང་དུ་གནས་པ་མ་མྱོང་སྟེ། གུར་མཆོག་གཅིག་ནས་གུར་མཆོག་གཞན་ཞིག་ཏུ་སྤར་ནས་གནས་པ་ཡིན།
2SA 7:7 ཡེས་ར་ཨེལ་པ་རྣམས་ཡུལ་གང་དུ་ཕྱིན་ནའང་། བདག་གིས་སྔོན་ཆད་བདག་གི་འབངས་མི་སྐྱོང་བར་བྱོས་ཤིག་ཅེས་བཀའ་གནང་བའི་ཡེས་ར་ཨེལ་གྱི་ཚོ་པ་རྣམས་ཀྱི་འགོ་དཔོན་ སུ་ཞིག་ལ་ཁྱོད་ཅག་གིས་ངའི་དོན་དུ་ཐང་ཤིང་གི་མཆོད་ཁང་མི་བཞེང་བ་ཅི་ཡིན་ཞེས་སྨྲས་མྱོང་ངམ།
2SA 7:8 དེའི་ཕྱིར་ཁྱོད་ཀྱིས་ངའི་ཞབས་ཕྱི་དཱ་བིད་ལ་འདི་སྐད་སྨྲ་དགོས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རང་ལུག་ཁྱུ་འཚོ་སྐྱོང་གི་ལུག་ར་ནས་བླངས་ཏེ། བདག་གི་འབངས་མི་ཡེས་ར་ཨེལ་གྱི་མངའ་བདག་ཏུ་བསྐོས་ཤིང་།
2SA 7:9 ཁྱོད་གང་དུ་སོང་ནའང་ང་རང་ཁྱོད་དང་མཉམ་དུ་གནས། ཡང་དགྲ་བོ་ཐམས་ཅད་ཁྱོད་ཀྱི་མདུན་ནས་རྩ་མེད་དུ་གཏོང་བ་ཡིན་ཏེ། འཇིག་རྟེན་གྱི་མི་སྙན་གྲགས་ཅན་རྣམས་བཞིན་དུ་ངས་ཁྱོད་ཀྱང་མིང་གྲགས་ཅན་དུ་བྱེད་ངེས་ཡིན།
2SA 7:10 བདག་གིས་རང་གི་འབངས་མི་ཡེས་ར་ཨེལ་གྱི་དོན་དུ་ཡུལ་ཞིག་བདམས་ནས་དེ་དག་དེར་འཇོག་པར་བྱ་སྟེ། དེ་དག་རང་གི་གནས་སུ་གཞིས་ཆགས་ཏེ་གཞན་གྱིས་དཀྲུག་པར་མི་འགྱུར་ཞིང་། མི་ངན་རྣམས་ཀྱིས་ཀྱང་སྔར་བྱས་བཞིན་དེ་དག་ལ་འཚེ་བར་མི་འགྱུར་ཏེ།
2SA 7:11 བདག་གིས་རང་གི་འབངས་མི་ཡེས་ར་ཨེལ་ལ་བདག་སྐྱོང་བྱེད་པའི་ཁྲིམས་དཔོན་རྣམས་བསྐོས་པའི་ཉིན་དང་འདྲ་བར་མི་འབྱུང་བ་ཡིན། ངས་ཁྱོད་ཀྱི་དགྲ་བོ་ཐམས་ཅད་ཀྱི་བཙན་འཛུལ་བཟློགས་ནས་ཞི་བར་སྡོད་དུ་འཇུག་གོ །དཀོན་མཆོག་ཡ་ཝཱེས་ཁྱོད་ལ་འདི་སྐད་བསྒྲགས་པ་སྟེ། དཀོན་མཆོག་ཡ་ཝཱེས་དངོས་སུ་ཁྱོད་ལ་ཁྱིམ་རྒྱུད་འཛུགས་པར་བྱའོ། །
2SA 7:12 ཁྱོད་ཀྱི་ཚེ་ལོ་མཐར་ཕྱིན་ཏེ་རང་གི་ཕ་མེས་དང་ལྷན་ཅིག་གཉིད་དུ་ཡུར་བའི་ཚེ་ན། བདག་གིས་ཁྱོད་ལས་སྐྱེས་པའི་བུ་རྒྱུད་བསྐྱེད་ནས་ཁྱོད་ཀྱི་རྒྱུན་འཛིན་པར་མ་ཟད། དེའི་རྒྱལ་སྲིད་བརྟན་པར་བྱའོ། །
2SA 7:13 ཡང་དེས་བདག་གི་མིང་གི་ཕྱིར་མཆོད་ཁང་ཞིག་བཞེང་བར་འགྱུར་ཞིང་། བདག་གིས་དེའི་རྒྱལ་ཁྲི་ཇི་སྲིད་བར་དུ་བརྟན་པར་བྱའོ། །
2SA 7:14 བདག་ནི་ཁོ་ཡི་ཕ་དང་ཁོ་ནི་བདག་གི་བུ་རུ་འགྱུར་ཞིང་གལ་ཏེ་ཁོས་ཉེས་སྐྱོན་བཟོས་ན། ངས་མི་ཡི་ཁྲིམས་དབྱུག་དང་འཇིག་རྟེན་པའི་རྟ་ལྕག་གིས་ཁོ་ལ་ཡོ་བསྲང་བྱེད་དོ། །
2SA 7:15 འོན་ཀྱང་ཁྱོད་ཀྱི་མདུན་ནས་བསྐྲད་པའི་སོ་ལོ་དང་བྲལ་བ་བཞིན་དུ་ངའི་བྱམས་བརྩེ་ནི་ནམ་ཡང་ཁོ་དང་མི་འབྲལ་ལོ། །
2SA 7:16 ཡང་ཁྱོད་ཀྱི་ཁྱིམ་རྒྱུད་དང་རྒྱལ་སྲིད་དུས་རྒྱུན་དུ་བདག་གི་མདུན་དུ་བརྟན་པོར་ཚུགས་ཤིང་ཁྱོད་ཀྱི་རྒྱལ་ཁྲི་ནི་རྒྱུན་ནས་རྒྱུན་དུ་གཡོ་བར་མི་འགྱུར་ཞེས་གསུངས་སོ། །
2SA 7:17 བཀའ་ལུང་དེ་ཐམས་ཅད་དང་ཅི་ལྟར་མངོན་པར་མཛད་པ་བཞིན་དུ་ནཱ་ཐན་གྱིས་དཱ་བིད་ལ་ཞུས་སོ། །
2SA 7:18 དེ་ནས་རྒྱལ་པོ་དཱ་བིད་ནང་དུ་སོང་སྟེ་དཀོན་མཆོག་ཡ་ཝཱེའི་དྲུང་དུ་བསྡད་ནས་ཁོང་ལ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་བདག་ཚད་འདི་ཙམ་གྱི་བར་དུ་ཁྲིད་པར་མཛད་པས། བདག་ནི་སུ་ཡིན་ནམ། བདག་གི་ཁྱིམ་རྒྱུད་ཅི་ལ་བརྩིའམ།
2SA 7:19 འདི་ཡང་ཁྱེད་ཀྱི་སྤྱན་སྔར་བྱ་བ་ཆུང་ངུ་ཞིག་ཡིན་ཏེ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱིའི་ཁྱིམ་རྒྱུད་ཀྱི་མ་འོངས་འབྱུང་འགྱུར་ཐད་ལ་བཀའ་ལུང་གནང་བའོ། །ཀྱེ་གཙོ་བོ་ཡ་ཝཱེ་ལགས། དེ་ནི་མི་རྣམས་དུས་རྒྱུན་འཕྲད་སྲིད་པའི་དོན་ཡིན་ནམ།
2SA 7:20 ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱི་ཅི་འདྲ་ཡིན་པ་མཁྱེན་པས་དཱ་བིད་བདག་ལ་ལྷག་པར་ཞུ་རྒྱུ་ཅི་ཞིག་ཡོད།
2SA 7:21 ཁྱེད་ཀྱིས་ཉིད་ཀྱི་ཞལ་བཞེས་ཀྱི་རྐྱེན་དང་ཐུགས་དགོངས་བཞིན་དོན་ཆེན་པོ་དེ་མཛད་ཅིང་། ཁྱེད་ཀྱི་ཞབས་ཕྱི་ལ་རྟོགས་སུ་འཇུག་པའི་ཕྱིར་ཡིན་ནོ། །
2SA 7:22 ཀྱེ་གཙོ་བོ་ཡ་ཝཱེ་ལགས། དེའི་ཕྱིར་ཁྱེད་ནི་ཆེན་པོ་ལགས། ངེད་རྣམས་ཀྱི་རྣ་བས་ཐོས་པ་ལྟར་ན་ཁྱེད་དང་འདྲ་བ་གང་ཡང་མེད་དེ། ཁྱེད་མ་གཏོགས་དཀོན་མཆོག་གཞན་སུ་ཡང་མེད་དོ། །
2SA 7:23 ས་གཞི་རུ་ཁྱེད་ཀྱི་འབངས་མི་ཡེས་ར་ཨེལ་དང་འདྲ་བའི་མི་རིགས་གཞན་གང་དུ་ཡོད། དེ་ནི་དཀོན་མཆོག་གིས་དངོས་སུ་བླུས་ཤིང་། དེ་རྣམས་ཁྱེད་ཀྱི་མི་རུ་མཛད་པ་དང་། ཁྱེད་ཉིད་ཀྱི་མཚན་གྱི་ཕྱིར་དེ་རྣམས་ལ་དོན་ཆེན་མཛད་ཅིང་། ཁྱེད་ཀྱི་ཡུལ་གྱི་ཕྱིར་འཇིགས་རུང་གི་དོན་རྣམས་མཛད་པ་ཡིན། ཁྱེད་ཀྱི་འབངས་མི་སྟེ་ཁྱེད་ཀྱིས་ཨེ་ཅིབ་ཡུལ་ནས་བླུས་པའི་མི་རྣམས་ཀྱི་མདུན་དུ། མི་རིགས་གཞན་རྣམས་དང་དེ་དག་གི་ལྷ་རྣམས་མཐར་བསྐྲད་དོ། །
2SA 7:24 ཡང་ཁྱེད་ཀྱིས་ཉིད་ཀྱི་འབངས་མི་ཡེས་ར་ཨེལ་ནི་དུས་ནམ་ཡང་ཉིད་ཀྱི་འབངས་མི་རུ་བརྟན་པོར་བཞག་པ་ཡིན་ཞིང་། ཀྱེ་དཀོན་མཆོག་ཡ་ཝཱེ་ལགས་ཁྱེད་ནི་དེ་དག་གི་དཀོན་མཆོག་ཏུ་གྱུར་ཏོ། །
2SA 7:25 ཀྱེ་དཀོན་མཆོག་ཡ་ཝཱེ་ལགས། ད་ནི་ཁྱེད་ཀྱིས་ཉིད་ཀྱི་ཞབས་ཕྱི་དང་དེའི་ཁྱིམ་རྒྱུད་ལ་གནང་བའི་ཞལ་བཞེས་དེ་ནི་ཇི་སྲིད་བར་དུ་བརྟན་པོར་མཛད་ཅིང་། ཅི་གསུངས་བཞིན་དུ་བསྒྲུབ་པར་མཛོད་ཅིག
2SA 7:26 དེ་ནས་ཁྱེད་ཀྱི་མཚན་ནི་རྒྱུན་ནས་རྒྱུན་དུ་རབ་ཏུ་འཕགས་ཤིང་། མི་རྣམས་ཀྱིས་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཡེས་ར་ཨེལ་གྱི་དཀོན་མཆོག་ལགས་སོ་ཞེས་བརྗོད་པར་ཤོག དེ་ནས་ཁྱེད་ཀྱི་ཞབས་ཕྱི་དཱ་བིད་ཀྱི་ཁྱིམ་རྒྱུད་དེ་ཡང་ཁྱེད་ཀྱི་སྤྱན་སྔར་བརྟན་པོར་ཚུགས་ངེས་ཡིན།
2SA 7:27 ཀྱེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ། ཡེས་ར་ཨེལ་གྱི་དཀོན་མཆོག་ལགས། ཁྱེད་ཀྱིས་ཉིད་ཀྱི་ཞབས་ཕྱི་ལ། བདག་གིས་ཁྱོད་ལ་ཁྱིམ་རྒྱུད་འཛུགས་པར་བྱ་ཞེས་མངོན་པར་མཛད་པས། ཞབས་ཕྱི་བདག་ལ་ད་གཟོད་སེམས་ནས་འདི་བཞིན་གསོལ་བ་འདེབས་པའི་སྙིང་སྟོབས་ཡོད་པ་ཡིན།
2SA 7:28 ཀྱེ་གཙོ་བོ་ཡ་ཝཱེ་ལགས། ཁྱེད་ཁོ་ན་དཀོན་མཆོག་ཡིན་ལ། ཁྱེད་ཀྱི་གསུང་ཐམས་ཅད་བདེན་ཞིང་ཡིད་རྟོན་རུང་བ་ཡིན། ཁྱེད་ཀྱིས་ཉིད་ཀྱི་ཞབས་ཕྱི་ལ་གཡང་འདི་དག་གནང་བའི་ཞལ་བཞེས་མཛད་པ་ཡིན།
2SA 7:29 ད་ལྟ་ཁྱེད་ཀྱིས་ཞབས་ཕྱིའི་ཁྱིམ་རྒྱུད་ལ་བྱིན་གྱིས་བརླབས་ནས། དོན་དེ་ནམ་ཡང་ཁྱེད་ཀྱི་མདུན་དུ་གནས་པར་མཛོད། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་སྔར་ཞལ་བཞེས་གནང་བ་བཞིན་ཞབས་ཕྱི་བདག་གི་ཁྱིམ་རྒྱུད་ལ་ཇི་སྲིད་བར་དུ་བྱིན་གྱིས་བརླབ་པར་སྨོན་ཞེས་གསོལ་ཏོ། །
2SA 8:1 དེའི་རྗེས་སུ་དཱ་བིད་ཀྱིས་ཕེ་ལེ་ཤེད་པ་རྣམས་ལ་འཐབ་ནས་བཏུལ་ཞིང་། ཡང་ཁོང་གིས་མེ་ཐེག་ཨམ་མཱ་ཞེས་བྱ་བའི་གྲོང་ཁྱེར་ཕེ་ལེ་ཤེད་པའི་ལག་ནས་བླངས་ཏེ་དབང་དུ་བཅུག
2SA 8:2 ཡང་མོ་ཨབ་པ་རྣམས་ཕམ་པར་བརྒྱབ་ནས་དེ་རྣམས་ས་རུ་བསྙལ་ཏེ། ཐག་པས་ཚད་ཐིག་བླངས་པ་དང་། ཐག་ཚད་གཉིས་ཡོད་པ་རྣམས་བསད་ཅིང་། ཐག་ཚད་གཅིག་ཡོད་པ་རྣམས་ཚེ་ཐར་དུ་བཏང་། དེ་ནས་མོ་ཨབ་པ་རྣམས་དཱ་བིད་ཀྱི་མངའ་འོག་ཏུ་གྱུར་ཏེ་འབུལ་བ་རྣམས་དྲངས་སོ། །
2SA 8:3 ཡང་ཙོ་བཱ་ཡི་རྒྱལ་པོ་རེ་ཧོབ་ཀྱི་བུ་ཧ་དད་ཨི་སེར་ཞེས་པ་ཕི་རཱད་གཙང་པོའི་ཕྱོགས་སུ་རང་གི་དབང་ཤུགས་ཕྱིར་ལེན་པར་འགྲོ་བའི་སྐབས་སུ། དཱ་བིད་ཀྱིས་ཁོ་ལ་དམག་བརྒྱབ་པ་དང་།
2SA 8:4 དཱ་བིད་ཀྱིས་དེ་ལས་སྐྱ་དམག་ཆིག་སྟོང་བདུན་བརྒྱ་དང་རྐང་དམག་ཉིས་ཁྲི་བཟུང་ནས། ཤིང་རྟ་བརྒྱ་འཐེན་པའི་རྟ་མ་གཏོགས་ཤིང་རྟ་འཐེན་པའི་རྟ་ཐམས་ཅད་ཀྱི་སུག་རྒྱུས་བཅད་དོ། །
2SA 8:5 ཡང་དཱ་མེ་སེག་གི་ཨ་རམ་པ་རྣམས་ཙོ་བཱ་ཡི་རྒྱལ་པོ་ཧ་དད་ཨི་སེར་ལ་རོགས་བྱེད་དུ་འོངས་པ་ལ། དཱ་བིད་ཀྱིས་ཨ་རམ་པའི་མི་ཉིས་ཁྲི་ཉིས་སྟོང་བསད་དོ། །
2SA 8:6 དེ་ནས་དཱ་བིད་ཀྱིས་དཱ་མེ་སེག་གི་ཨ་རམ་ཡུལ་དུ་སྲུང་དམག་བཞག་པ་དང་། ཨ་རམ་པ་རྣམས་དཱ་བིད་ཀྱི་བྲན་དུ་གྱུར་ཏེ་འབུལ་བ་རྣམས་དྲངས་ཤིང་། དཱ་བིད་གང་དུ་སོང་ན་ཡང་དཀོན་མཆོག་ཡ་ཝཱེས་དེ་ལ་རྒྱལ་ཁ་གནང་ངོ་། །
2SA 8:7 དཱ་བིད་ཀྱིས་ཧ་དད་ཨི་སེར་གྱི་བློན་འཁོར་རྣམས་ལ་ཡོད་པའི་གསེར་གྱི་ཕུབ་ཐམས་ཅད་ཕྲོགས་ནས་ཡེ་རུ་སཱ་ལེམ་དུ་ཁྱེར།
2SA 8:8 ཡང་ཧ་དད་ཨི་སེར་གྱི་གྲོང་ཁྱེར་པེ་ཏཱ་དང་པེ་རོ་ཐ་ཨི་གཉིས་ནས་རྒྱལ་པོ་དཱ་བིད་ཀྱིས་ལི་དཔག་ཏུ་མེད་པ་ཕྲོགས་སོ། །
2SA 8:9 དེ་ནས་ཧ་མཱད་ཀྱི་རྒྱལ་པོ་ཏོ་ཨི་བྱ་བས་དཱ་བིད་ཀྱིས་ཧ་དད་ཨི་སེར་གྱི་དམག་དཔུང་ཐམས་ཅད་ཕམ་པར་བརྒྱབ་པའི་གཏམ་ཐོས་པ་ཙམ་གྱིས།
2SA 8:10 རང་གི་སྲས་ཡོ་རཱམ་བྱ་བ་དེ་རྒྱལ་པོ་དཱ་བིད་ལ་བདེ་འཚམས་ཞུ་བ་དང་རྟེན་འབྲེལ་ཞུ་བའི་ཆེད་དུ་ཁོང་གི་དྲུང་དུ་མངགས། གང་ལ་ཞེ་ན། ཏོ་ཨི་རྒྱུན་དུ་ཧ་དད་ཨི་སེར་དང་འཐབ་ཅིང་། དཱ་བིད་ཀྱིས་ཧ་དད་ཨི་སེར་ལ་འཐབ་ནས་ཕམ་པར་བརྒྱབ་པས་སོ། །ཡང་ཡོ་རཱམ་གྱི་ལག་ཏུ་དངུལ་གྱི་སྣོད་ཆས་དང་། གསེར་གྱི་སྣོད་ཆས་དང་། ལི་ཡི་སྣོད་ཆས་མང་པོ་ཁྱེར་འོངས་ནས་ཕུལ་ཏོ། །
2SA 8:11 རྒྱལ་པོ་དཱ་བིད་ཀྱིས་སྣོད་ཆས་དེ་དག་ནི་ཁོང་གིས་བཏུལ་བའི་རྒྱལ་ཁམས་ཐམས་ཅད་ནས་རྙེད་པའི་གསེར་དངུལ་དང་མཉམ་དུ་དམ་པར་བརྩིས་ནས་དཀོན་མཆོག་ཡ་ཝཱེ་ལ་ཕུལ་བ་སྟེ།
2SA 8:12 དེ་ནི་ཨ་རམ་དང་། མོ་ཨབ་དང་། ཨམ་མོན་པ་དང་། ཕེ་ལེ་ཤེད་པ་དང་། ཨ་མཱད་ལེག་པ་དང་། ཙོ་བཱ་ཡི་རྒྱལ་པོ་རེ་ཧོབ་ཀྱི་བུ་ཧ་དད་ཨི་སེར་བཅས་ནས་བླངས་པའི་བཅོམ་ནོར་ཡིན་ནོ། །
2SA 8:13 ཡང་དཱ་བིད་ཀྱིས་ཨེ་དོམ་པ་ཆིག་ཁྲི་བརྒྱད་སྟོང་ཚྭའི་ལུང་པར་འགེམས་ནས་ཕྱིར་ལོག་རྗེས་ཁོང་གི་མཚན་སྙན་གྲགས་རྒྱས་པ་རེད།
2SA 8:14 ཡང་དཱ་བིད་ཀྱིས་ཨེ་དོམ་ཡུལ་དུ་སྲུང་དམག་བཞག་སྟེ། ཨེ་དོམ་ཡུལ་ཀུན་ཏུ་སྲུང་དམག་གིས་ཁྱབ་པས། ཨེ་དོམ་པ་རྣམས་དཱ་བིད་ཀྱི་མངའ་འོག་ཏུ་གྱུར། ཡང་དཱ་བིད་ཡུལ་གང་དུ་སོང་ན་ཡང་དཀོན་མཆོག་ཡ་ཝཱེས་ཁོང་ལ་རྒྱལ་ཁ་གནང་ངོ་། །
2SA 8:15 དཱ་བིད་རྒྱལ་པོར་བཞུགས་ནས་ཡེས་ར་ཨེལ་ཐམས་ཅད་ལ་དབང་བསྒྱུར་ཅིང་། མི་ཐམས་ཅད་ལ་འདྲ་མཉམ་དྲང་གཞག་གི་ལྟ་སྟངས་བཟུང་བ་རེད།
2SA 8:16 དམག་ཚོགས་ཀྱི་འགོ་དཔོན་དུ་ཟེ་རུ་ཡཱ་ཡི་བུ་ཡོ་ཨབ་དང་ལོ་རྒྱུས་འགོད་མཁན་དུ་ཨ་ཧི་ལུད་ཀྱི་བུ་ཡེ་ཧོ་ཤ་ཕད།
2SA 8:17 མཆོད་དཔོན་དུ་ཨ་ཧི་ཏུབ་ཀྱི་བུ་ཟཱ་ཏོག་དང་། ཨབ་ཡཱ་ཐར་གྱི་བུ་ཨ་ཧི་མེ་ལེག་གཉིས་དང་། དྲུང་ཡིག་ཏུ་སེ་རཱ་ཡ་དང་།
2SA 8:18 ཀེ་རེད་པ་དང་ཕེ་ལེད་པ་རྣམས་ཀྱི་འགོ་དཔོན་དུ་ཡེ་ཧོ་ཡ་དཱ་ཡི་བུ་པེ་ནཱ་ཡ་དང་། དཱ་བིད་ཀྱི་སྲས་རྣམས་བཀའ་བློན་ དུ་བཞག་གོ །
2SA 9:1 ཡང་དཱ་བིད་ཀྱིས། སོ་ལོའི་ཁྱིམ་དུ་ད་དུང་མི་རེ་ལུས་སམ། ངས་ཡོ་ནཱ་ཐན་གྱི་ཕྱིར་དེ་ནི་བྱམས་བརྩེས་སྐྱོང་བར་བྱ་ཞེས་དྲིས་པར།
2SA 9:2 སོ་ལོའི་ཁྱིམ་དུ་མིང་ལ་ཙི་བཱ་ཞེས་བྱ་བའི་ཞབས་ཕྱི་ཞིག་ཡོད་པ་དཱ་བིད་ཀྱི་དྲུང་དུ་བོས་ཤིང་། རྒྱལ་པོས་དེ་ལ་ཁྱོད་ཙི་བཱ་ཡིན་ནམ་ཞེས་དྲིས་པ་ལ། མི་དེས་ཞབས་ཕྱི་བདག་ཡིན་ནོ་ཞེས་ཞུས་སོ། །
2SA 9:3 ཡང་རྒྱལ་པོས་ཁོ་ལ། སོ་ལོའི་ཁྱིམ་དུ་ད་དུང་མི་ཡོད་དམ། ངས་དཀོན་མཆོག་གི་བྱམས་བརྩེས་དེ་ནི་སྐྱོང་བར་བྱ་ཞེས་གསུངས་པས། ཙི་བཱ་ཡིས་རྒྱལ་པོ་ལ། ད་དུང་ཡོ་ནཱ་ཐན་གྱི་བུ་ཞིག་ཡོད་དེ། རྐང་པ་གཉིས་ཀ་ཞ་བོ་ཡིན་ཞེས་ཞུས།
2SA 9:4 ཡང་རྒྱལ་པོས་ཁོ་ལ། དེ་གང་དུ་ཡོད་དམ་ཞེས་དྲིས་པར་ཙི་བཱ་ཡིས་རྒྱལ་པོ་ལ། ཁོ་ནི་ལོ་རྡེ་བཱར་ཡུལ་དུ་ཨམ་མེ་ཨེལ་གྱི་བུ་མཱ་ཀིར་ཞེས་པའི་ཁྱིམ་དུ་ཡོད་ཅེས་ཞུས།
2SA 9:5 དེ་ནས་རྒྱལ་པོ་དཱ་བིད་ཀྱིས་མི་མངགས་ཤིང་། ཁོ་རང་ལོ་རྡེ་བཱར་ཡུལ་གྱི་ཨམ་མེ་ཨེལ་གྱི་བུ་མཱ་ཀིར་གྱི་ཁྱིམ་ནས་ཁྲིད་འོངས་པ་རེད།
2SA 9:6 ཡང་སོ་ལོའི་ཚ་བོ་སྟེ་ཡོ་ནཱ་ཐན་གྱི་བུ་མེ་ཕི་པོ་ཤེད་བྱ་བ་དེ་དཱ་བིད་ཀྱི་དྲུང་དུ་འོངས་ནས་ཕྱག་བཙལ་ཏོ། །དེར་དཱ་བིད་ཀྱིས་ཀྱེ་མེ་ཕི་པོ་ཤེད་ཅེས་གསུངས་པ་དང་། དེས་ལན་དུ་ཁྱེད་ཀྱི་ཞབས་ཕྱི་འདི་རུ་ཡོད་ཅེས་ཞུས།
2SA 9:7 ཡང་དཱ་བིད་ཀྱིས་དེ་ལ། མ་འཇིགས་ཤིག ཁྱོད་ཀྱི་ཡབ་ཡོ་ནཱ་ཐན་གྱི་རྐྱེན་གྱིས་ངས་ཁྱོད་རང་བྱམས་བརྩེས་བསྐྱང་བར་བྱ་སྟེ། ཁྱོད་ཀྱི་ཕ་མེས་སོ་ལོའི་ས་ཞིང་ཐམས་ཅད་ཁྱོད་ལ་ཟློག་པར་བྱ། ཁྱོད་ཀྱིས་རྒྱུན་དུ་ང་དང་གསོལ་ལྕོག་གཅིག་ལས་ཁ་ཟས་ལོངས་སུ་སྤྱོད་པར་འགྱུར་རོ་ཞེས་གསུངས་པ་དང་།
2SA 9:8 མེ་ཕི་པོ་ཤེད་ཀྱིས་ཕྱག་བཙལ་ཏེ་ཁོང་ལ། ཞབས་ཕྱི་ང་ནི་ཅི་ཡིན་ནམ། ཁྱེད་ཀྱིས་ཁྱི་ཤི་རོ་ལྟ་བུའི་ཞབས་ཕྱི་བདག་ལ་འདི་ལྟར་གཟིགས་སྐྱོང་གནང་བ་ཅི་ཞེས་ཞུས་སོ། །
2SA 9:9 དེ་ནས་རྒྱལ་པོས་སོ་ལོའི་ཞབས་ཕྱི་ཙི་བཱ་བོས་ནས་དེ་ལ། སོ་ལོ་དང་དེའི་ཁྱིམ་དུ་གང་ཡོད་པ་ཐམས་ཅད་ངས་ཁྱོད་ཀྱི་བདག་པོའི་ཚ་བོ་ལ་སྤྲད་པ་ཡིན།
2SA 9:10 ཁྱོད་དང་ཁྱོད་ཀྱི་བུ་དང་། ཁྱོད་ཀྱི་ཞབས་ཕྱི་རྣམས་དང་བཅས་པས་ཁྱོད་ཀྱི་བདག་པོའི་བུ་མེ་ཕི་པོ་ཤེད་ཀྱི་དོན་དུ་ས་ཞིང་འདེབས་དགོས་ཤིང་། སྟོན་ཐོག་ཁོ་ལ་ཁ་ཟས་སུ་འབུལ་དགོས། ཡང་ཁོས་ནི་རྒྱུན་དུ་ང་དང་གསོལ་ལྕོག་གཅིག་ལས་ཁ་ཟས་ལོངས་སུ་སྤྱོད་པར་འགྱུར་རོ་ཞེས་བཀའ་གནང་། ཙི་བཱ་ལ་བུ་བཅོ་ལྔ་དང་ཞབས་ཕྱི་ཉི་ཤུ་ཡོད་པ་ཡིན་ནོ། །
2SA 9:11 དེ་ནས་ཙི་བཱ་ཡིས་རྒྱལ་པོར། ངའི་ཇོ་བོ་དང་ངའི་རྒྱལ་པོ་ཁྱེད་ཀྱིས་ཅི་གསུངས་ཐམས་ཅད་ཞབས་ཕྱི་བདག་གིས་བསྒྲུབ་ངེས་ཡིན་ཞེས་ཞུས་སོ། །ཡང་མེ་ཕི་པོ་ཤེད་ནི་རྒྱལ་པོའི་སྲས་བཞིན་རྒྱལ་པོ་དང་མཉམ་དུ་གསོལ་ལྕོག་གཅིག་ལས་ཁ་ཟས་ལ་རོལ་བའོ། །
2SA 9:12 ཡང་མེ་ཕི་པོ་ཤེད་ལ་མི་ཀཱ་བྱ་བའི་བུ་ཆུང་བ་ཞིག་ཡོད་ཅིང་། ཙི་བཱ་ཡི་ཁྱིམ་དུ་གནས་པ་ཐམས་ཅད་ནི་མེ་ཕི་པོ་ཤེད་ཀྱི་ཞབས་ཕྱི་རུ་གྱུར་ཏོ། །
2SA 9:13 དེ་ལྟར་མེ་ཕི་པོ་ཤེད་ནི་ཡེ་རུ་སཱ་ལེམ་དུ་གནས་ཏེ། རྒྱུན་དུ་རྒྱལ་པོ་དང་གསོལ་ལྕོག་གཅིག་ལས་ཁ་ཟས་ལ་རོལ་བ་དང་། ཁོའི་རྐང་པ་གཉིས་ཀ་ཞ་བོ་ཡིན་ནོ། །
2SA 10:1 ཡང་དེའི་རྗེས་སུ་ཨམ་མོན་པའི་རྒྱལ་པོ་གྲོངས་ནས་ཁོའི་སྲས་ཧ་ནུན་ནི་ཕ་ཡི་རྒྱུན་མཐུད་ནས་རྒྱལ་པོར་གྱུར།
2SA 10:2 དཱ་བིད་ཀྱིས་ནཱ་ཧ་སི་ཡིས་ང་རང་དྲིན་གྱིས་བསྐྱངས་པ་བཞིན་དུ། ངས་ཀྱང་ནཱ་ཧ་སི་ཡི་སྲས་ཧ་ནུན་དྲིན་གྱིས་བསྐྱང་བར་བྱ་ཞེས་གསུངས་ཤིང་། དེའི་ཡབ་ཀྱི་ཆེད་དུ་དེ་ལ་སེམས་གསོ་གཏོང་བར་དཱ་བིད་ཀྱིས་རང་གི་བློན་འཁོར་རྣམས་མངགས་ཤིང་། དཱ་བིད་ཀྱི་བློན་འཁོར་རྣམས་ཨམ་མོན་པའི་ཡུལ་དུ་ཕྱིན་པ་དང་།
2SA 10:3 ཨམ་མོན་པའི་འགོ་དཔོན་རྣམས་ཀྱིས་རང་གི་བདག་པོ་ཧ་ནུན་ལ། དཱ་བིད་ཀྱིས་ཁྱོད་ཅག་གི་སེམས་གསོ་བར་མི་མངགས་པ་དེ་ནི་ཁྱོད་ཅག་གི་ཡབ་ལ་བརྩི་བཀུར་བྱེད་པའི་ཕྱིར་ཡིན་པར་དགོངས་སམ། དཱ་བིད་ཀྱིས་རང་གི་བློན་འཁོར་འདི་དག་ནི་གྲོང་ཁྱེར་འདིར་ལྐོག་ལྟ་དང་ཉུལ་ཞིབ་བྱས་ནས་དབང་བསྒྱུར་བའི་ཕྱིར་བཏང་བ་མ་ཡིན་ནམ་ཞེས་སྨྲས་པས།
2SA 10:4 ཧ་ནུན་གྱིས་དཱ་བིད་ཀྱི་བློན་འཁོར་རྣམས་བཟུང་ནས་སྨ་ར་ཕྱེད་ཀ་བྲེགས་པ་དང་། ཕྱི་གོས་བཅད་ནས་འཕོངས་ཚོས་ཕྱི་རུ་མངོན་ཞིང་དེ་དག་འགྲོ་རུ་བཅུག་གོ །
2SA 10:5 མི་ཞིག་གིས་དོན་དེ་དཱ་བིད་ལ་ཞུས་པ་དང་ཁོང་གིས་དེ་དག་བསུ་མཁན་མངགས་སོ། །གང་ལ་ཞེ་ན། དེ་དག་ཤིན་ཏུ་ངོ་ཚ་བའི་ཕྱིར་རོ། །རྒྱལ་པོས་དེ་དག་ལ་ཁྱོད་ཅག་གི་སྨ་ར་སྐྱེས་པའི་བར་དུ་ཡེ་རུ་ཀོ་རུ་སྒུགས་ལ་དེ་ནས་ཕྱིར་ལོག་ཤོག་ཅེས་བསྒོས།
2SA 10:6 ཡང་ཨམ་མོན་པ་རྣམས་ཀྱིས་དཱ་བིད་ཁོ་རྣམས་ལ་ཤིན་ཏུ་སྡང་བ་ཤེས་པས། པེད་རེ་ཧོབ་ཀྱི་ཨ་རམ་པ་དང་། ཙོ་བཱ་ཡི་ཨ་རམ་པ་གཉིས་ལས་རྐང་དམག་མི་ཁྲི་གཉིས་དང་མ་ཨ་ཀཱ་ཡི་རྒྱལ་པོ་ལས་མི་ཆིག་སྟོང་དང་། ཏོབ་ལས་མི་ཆིག་ཁྲི་ཉིས་སྟོང་བཅས་གླས་པའོ། །
2SA 10:7 དཱ་བིད་ཀྱིས་གཏམ་དེ་ཐོས་ནས་ཡོ་ཨབ་དང་དམག་མི་དཔའ་རྩལ་ཅན་ཐམས་ཅད་མཉམ་དུ་མངགས།
2SA 10:8 ཡང་ཨམ་མོན་པ་རྣམས་ཕྱི་རུ་ཐོན་ནས་མཁར་སྒོའི་མདུན་དུ་དམག་བཀྲམས་པ་དང་། ཙོ་བཱ་དང་རེ་ཧོབ་ཀྱི་ཨ་རམ་པ་དང་། ཏོབ་པ་དང་མ་ཨ་ཀཱ་པ་རྣམས་ཀྱིས་ཀྱང་སོ་སོར་མཁར་ཕྱི་རུ་དམག་བཀྲམས་ནས་བསྡད།
2SA 10:9 ཡོ་ཨབ་ཀྱིས་རང་གི་མདུན་རྒྱབ་གཉིས་སུ་དགྲ་ཡོད་པར་མཐོང་བས། ཡེས་ར་ཨེལ་གྱི་དམག་ཧྲག་ཐམས་ཅད་ལས་ཁག་ཅིག་བདམས་ནས་ཨ་རམ་པ་རྣམས་ལ་འཐབ་པར་དམག་བཀྲམས།
2SA 10:10 ཡང་མི་གཞན་ཐམས་ཅད་རང་གི་གཅུང་པོ་ཨ་བི་ཤཱ་ཨི་ལག་ཏུ་གཏད་ཅིང་། དེ་དག་ཨམ་མོན་པ་རྣམས་ལ་འཐབ་པར་དམག་བཀྲམས།
2SA 10:11 དེར་ཡོ་ཨབ་ཀྱིས་ཨ་བི་ཤཱ་ཨི་ལ། གལ་ཏེ་ཨ་རམ་པ་རྣམས་ང་ལས་སྟོབས་ཆེ་ན། ཁྱོད་ཀྱིས་ང་ལ་རོགས་བྱེད་དགོས་པ་དང་། གལ་ཏེ་ཨམ་མོན་པ་རྣམས་ཁྱོད་ལས་སྟོབས་ཆེ་ན་ང་ཁྱོད་ལ་རོགས་བྱེད་དུ་འོང་།
2SA 10:12 རང་ཅག་གིས་སྙིང་སྟོབས་བསྐྱེད་དགོས། བདག་ཅག་གི་ཡུལ་མི་དང་རང་རེའི་དཀོན་མཆོག་གི་གྲོང་ཁྱེར་རྣམས་ཀྱི་དོན་དུ་སྙིང་སྟོབས་བསྐྱེད་དགོས། དཀོན་མཆོག་ཡ་ཝཱེས་ཁོང་གི་སྤྱན་ལམ་དུ་གང་ཞིག་ལེགས་པ་དེ་མཛད་པར་ཤོག་ཅེས་གདམས་པས།
2SA 10:13 ཡོ་ཨབ་འཁོར་དང་བཅས་པ་རྣམས་སོང་སྟེ་ཨ་རམ་པ་ལ་རྒོལ་བ་དང་། དེ་དག་ཁོའི་མདུན་ནས་བྲོས་སོ། །
2SA 10:14 ཡང་ཨམ་མོན་པ་རྣམས་ཀྱིས་ཨ་རམ་པ་རྣམས་བྲོས་ཟིན་པ་མཐོང་བས། དེ་དག་ཀྱང་ཨ་བི་ཤཱ་ཨིའི་མདུན་ནས་གྲོང་ཁྱེར་དུ་བྲོས། དེ་ནས་ཡོ་ཨབ་ནི་ཨམ་མོན་པ་རྣམས་དང་བྲལ་ནས་ཕྱིར་ཡེ་རུ་སཱ་ལེམ་དུ་ཕྱིན་པ་རེད།
2SA 10:15 ཨ་རམ་པ་རྣམས་ཀྱིས་རང་ཉིད་ཡེས་ར་ཨེལ་གྱི་མདུན་ནས་ཕམ་པར་གྱུར་པ་ཤེས་ཏེ་ཡང་བསྐྱར་ལྷན་དུ་འདུས།
2SA 10:16 ཧ་དད་ཨི་སེར་གྱིས་བང་ཆེན་མངགས་ཤིང་། གཙང་པོའི་ཕ་རོལ་གྱི་ཨ་རམ་པ་རྣམས་སྦྲན་ནས་དེ་དག་ཧེ་ལཱམ་ཡུལ་དུ་སླེབས་པ་དང་། ཧ་དད་ཨི་སེར་གྱི་དམག་དཔོན་ཤོ་བག་བྱ་བ་ཡིས་དེ་དག་ལ་འགོ་ཁྲིད་བྱས།
2SA 10:17 མི་ཞིག་གིས་དོན་དེ་དཱ་བིད་ལ་ཞུས་པ་དང་ཁོང་གིས་ཡེས་ར་ཨེལ་པ་ཐམས་ཅད་བསྡུས་ཤིང་། ཡོར་དན་གཙང་པོ་བརྒལ་ནས་ཧེ་ལཱམ་དུ་སླེབས་ཏེ། ཨ་རམ་པ་རྣམས་ཀྱིས་དཱ་བིད་ལ་འཐབ་པར་དམག་བཀྲམས་པ་དང་དེ་ལ་འཐབ་འཛིང་བྱས་སོ། །
2SA 10:18 ཨ་རམ་པ་རྣམས་ཡེས་ར་ཨེལ་གྱི་མདུན་ནས་བྲོས་ཤིང་དཱ་བིད་ཀྱིས་ཨ་རམ་པའི་ཤིང་རྟ་བདུན་བརྒྱ་དང་སྐྱ་དམག་ཁྲི་བཞི་མེད་པར་བྱས་པ་དང་། ཨ་རམ་པའི་དཔུང་ཚོགས་ཀྱི་དམག་དཔོན་ཤོ་བག་ཀྱང་འགེམས་ནས་ཁོ་དེ་རུ་ཤིའོ། །
2SA 10:19 དེར་ཧ་དད་ཨི་སེར་གྱི་མངའ་འོག་ཏུ་ཡོད་པའི་རྒྱལ་པོ་རྣམས་ཀྱིས་རང་ཉིད་ཡེས་ར་ཨེལ་གྱི་མདུན་ནས་ཕམ་ཟིན་པ་མཐོང་བས། ཡེས་ར་ཨེལ་པ་དང་མཐུན་པར་བྱས་ཤིང་དེའི་གཡོག་ཀྱང་བྱས། དེ་ལྟར་ཨ་རམ་པ་རྣམས་འཇིགས་ནས་ཡང་བསྐྱར་ཨམ་མོན་པ་རྣམས་ལ་རོགས་བྱེད་མ་ཕོད་དོ། །
2SA 11:1 དེ་ནས་ལོ་གཅིག་འགོར་རྗེས་རྒྱལ་པོ་རྣམས་དམག་ལ་སྐྱོད་པའི་དུས་སུ། དཱ་བིད་ཀྱིས་ཡོ་ཨབ་དང་རང་གི་བློན་འཁོར་རྣམས་དང་། ཡེས་ར་ཨེལ་གྱི་དམག་དཔུང་ཐམས་ཅད་དམག་ལ་མངགས་ཤིང་། དེ་དག་གིས་ཨམ་མོན་པ་རྣམས་མེད་པར་བྱས་ནས་རབ་བཱ་དམག་གིས་བསྐོར་བ་དང་། དཱ་བིད་སྔར་བཞིན་ཡེ་རུ་སཱ་ལེམ་དུ་བཞུགས་སོ། །
2SA 11:2 ཡང་ས་སྲོས་ཀྱི་དུས་སུ་དཱ་བིད་མལ་ནས་ལངས་ཏེ་ཕོ་བྲང་གི་ཁང་ཐོག་ནས་འཆམ་འཆམ་དུ་འགྲོ་སྐབས། ཁོང་གིས་འཁྲུད་བྱེད་པའི་བུད་མེད་ཅིག་མཐོང་ཞིང་། བུད་མེད་དེ་ནི་ཤིན་ཏུ་ཡིད་དབང་འཕྲོག་པ་ཞིག་ཡོད་པ་དང་།
2SA 11:3 དཱ་བིད་ཀྱིས་མི་མངགས་ནས་བུད་མེད་དེ་སུ་ཡིན་དྲིས་པ་ལ་མི་ཞིག་གིས། བུད་མེད་དེ་ནི་ཨེ་ལི་ཨམ་གྱི་བུ་མོ་སྟེ། ཧེད་པ་ཨུ་རི་ཡཱ་ཡི་ཆུང་མ་པད་ཤེ་བཱ་མ་ཡིན་ནམ་ཞེས་ཞུས།
2SA 11:4 དེ་ནས་དཱ་བིད་ཀྱིས་མི་མངགས་ནས་བུད་མེད་དེ་ཁྲིད་འོངས་ཤིང་། ཁོ་མོ་དཱ་བིད་ཀྱི་རྩར་སླེབས་པ་དང་དཱ་བིད་མོ་དང་ལུས་འབྲེལ་བྱས་ཏེ། སྐབས་དེ་ནི་ཁོ་མོ་ཟླ་མཚན་ནས་གཙང་མར་གྱུར་པ་ དང་འཁེལ། དེ་ནས་ཁོ་མོ་རང་ཁྱིམ་དུ་ཕྱིར་ལོག་གོ །
2SA 11:5 ཕྱིས་སུ་བུད་མེད་དེ་མངལ་དང་ལྡན་པར་གྱུར་པས་དཱ་བིད་ཀྱི་དྲུང་དུ་མི་མངགས་ནས་བདག་མངལ་དང་ལྡན་ནོ་ཞེས་ཞུས་པ་ལ།
2SA 11:6 དཱ་བིད་ཀྱིས་ཡོ་ཨབ་ཀྱི་མདུན་དུ་མི་མངགས་ནས་འདི་ལྟར། ཧེད་པ་ཨུ་རི་ཡཱ་ངའི་རྩར་ཐོངས་ཤིག་ཅེས་བཀའ་བསྩལ་པས། ཡོ་ཨབ་ཀྱིས་ཨུ་རི་ཡཱ་དཱ་བིད་ཀྱི་དྲུང་དུ་བརྫངས།
2SA 11:7 ཨུ་རི་ཡཱ་ཁོང་གི་དྲུང་དུ་ཕྱིན་ཅིང་ཁོང་གིས་ཡོ་ཨབ་དང་དམག་མི་རྣམས་དང་། གཡུལ་སའི་གནས་ཚུལ་ཅི་འདྲ་ཡིན་པ་དྲིས།
2SA 11:8 ཡང་དཱ་བིད་ཀྱིས་ཨུ་རི་ཡཱ་ལ། དེ་རིང་ཁྱིམ་དུ་སོང་ནས་རྐང་པ་ཁྲུས་ཤིག་ ཅེས་བསྒོས་པར། ཨུ་རི་ཡཱ་རྒྱལ་པོའི་ཕོ་བྲང་ནས་ཐོན་ཞིང་། རྒྱལ་པོས་ཁོ་ལ་ལེགས་སྐྱེས་ཤིག་ཀྱང་གནང་ངོ་། །
2SA 11:9 འོན་ཀྱང་ཨུ་རི་ཡཱ་རང་གི་ཇོ་བོའི་ཞབས་ཕྱི་དང་ལྷན་ཅིག་རྒྱལ་པོའི་ཕོ་བྲང་གི་སྒོ་ཁ་རུ་གཉིད་དེ་རང་ཁྱིམ་དུ་མ་སོང་ངོ་། །
2SA 11:10 དེ་ནས་མི་དེ་དག་གིས་དཱ་བིད་ལ། ཨུ་རི་ཡཱ་མར་རང་ཁྱིམ་དུ་མ་སོང་བ་རེད་ཅེས་ཞུས་པ་དང་། དཱ་བིད་ཀྱིས་ཨུ་རི་ཡཱ་ལ། ཁྱོད་རྒྱང་རིང་ནས་འོངས་པ་མིན་ནམ། ཅིའི་ཕྱིར་མར་རང་ཁྱིམ་དུ་མ་སོང་ངམ་ཞེས་དྲིས་པའི་ལན་དུ།
2SA 11:11 ཨུ་རི་ཡཱས་དཱ་བིད་ལ། ཤུར་སྒམ་དང་ཡེས་ར་ཨེལ་པ་རྣམས་དང་། ཡ་ཧུ་དཱ་པ་ཐམས་ཅད་སྤྱིལ་བུའི་ནང་དུ་གནས་ཤིང་། བདག་གི་འགོ་དཔོན་ཡོ་ཨབ་དང་བདག་གི་ཇོ་བོའི་འཁོར་གཡོག་རྣམས་ཐང་རྒོད་དུ་སྒར་བཏབ་ནས་བསྡད་ཡོད་པས། བདག་ནི་རང་ཁྱིམ་དུ་ལོག་སྟེ་བཟའ་བཏུང་ལ་རོལ་འོས་སམ། ཆུང་མ་དང་མཉམ་དུ་འགྲོགས་རུང་ངམ། བདག་གིས་རྒྱལ་པོ་ཁྱེད་དང་ཁྱེད་ཀྱི་སྐུ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། བདག་གིས་དེ་ལྟ་བུ་གཏན་ནས་བྱ་མི་ཕོད་ཅེས་ཞུས།
2SA 11:12 དེ་ནས་དཱ་བིད་ཀྱིས་ཨུ་རི་ཡཱ་ལ། ཁྱོད་དེ་རིང་ཡང་འདིར་ཞག་སྡོད་གྱིས་ཤིག སང་ཉིན་ངས་ཁྱོད་མངག་པར་བྱ་ཞེས་བཀའ་བསྩལ་ཅིང་། ཨུ་རི་ཡཱ་ཉིན་དེ་དང་དེའི་ཕྱི་ཉིན་ཡེ་རུ་སཱ་ལེམ་དུ་ལུས་སོ། །
2SA 11:13 དེའི་ཕྱི་ཉིན་དཱ་བིད་ཀྱིས་ཨུ་རི་ཡཱ་བོས་པ་དང་། དེས་ཁོང་གི་དྲུང་དུ་བཟའ་བཏུང་ལ་རོལ་ཞིང་ཁོང་གིས་དེ་བཟི་རུ་བཅུག མཚན་མོར་ཁོ་རང་གི་ཇོ་བོའི་ཞབས་ཕྱི་རྣམས་དང་མཉམ་དུ་རང་གི་མལ་སར་གཉིད་ནས་སྔར་བཞིན་རང་ཁྱིམ་དུ་མ་སོང་ངོ་། །
2SA 11:14 དེ་ནས་ཞོགས་པར་དཱ་བིད་ཀྱིས་ཡོ་ཨབ་ལ་འཕྲིན་ཡིག་ཅིག་བྲིས་ཤིང་ཨུ་རི་ཡཱའི་ལག་ཏུ་སྤྲད་ནས་བསྐུར་ཏོ། །
2SA 11:15 འཕྲིན་ཡིག་དེའི་ནང་འདི་ལྟར། འཐབ་འཛིང་ཤིན་ཏུ་ཛ་དྲག་ཆེ་བའི་དུས་སུ་ཨུ་རི་ཡཱ་མདུན་དུ་ཐོངས་ཤིག ཁྱོད་ཅག་དེ་ལས་ཕྱི་སྣུར་བྱས་ནས་ཁོ་རང་རྨས་ཏེ་འཆི་བར་གྱིས་ཞེས་བྲིས་སོ། །
2SA 11:16 སྐབས་དེར་ཡོ་ཨབ་ཀྱིས་གྲོང་ཁྱེར་བསྐོར་ཞིང་། ཁོས་སྲུང་དམག་དཔའ་སྟོབས་ཅན་རྣམས་གནས་གང་དུ་ཡོད་པ་ཤེས་པས། ཨུ་རི་ཡཱ་གནས་དེ་རུ་མངགས་པ་རེད།
2SA 11:17 ཡང་གྲོང་ཁྱེར་གྱི་མི་རྣམས་ཕྱི་རུ་ཐོན་ཏེ་ཡོ་ཨབ་འཁོར་དང་བཅས་པར་འཐབ་ཅིང་། དཱ་བིད་ཀྱི་འཁོར་གཡོག་རྣམས་ལས་འགའ་ཤས་འཆི་བར་གྱུར་པ་དང་། ཧེད་པ་ཨུ་རི་ཡཱ་ཡང་ཤིའོ། །
2SA 11:18 དེར་ཡོ་ཨབ་ཀྱིས་མི་མངགས་ནས་དམག་འཁྲུག་གི་གནས་ཚུལ་ཐམས་ཅད་དཱ་བིད་ལ་ཞུས་ཤིང་།
2SA 11:19 ཡང་བང་ཆེན་དེ་ལ་བཀའ་བསྩལ་ཏེ་འདི་ལྟར། ཁྱོད་ཀྱིས་དམག་འཁྲུག་གི་གནས་ཚུལ་ཐམས་ཅད་རྒྱལ་པོར་ཞུས་རྗེས།
2SA 11:20 གལ་ཏེ་རྒྱལ་པོ་ཐུགས་ཁྲོས་ནས་ཁྱོད་ལ། ཁྱོད་ཅག་གིས་ཅིའི་ཕྱིར་གྲོང་ཁྱེར་དེའི་ཉེ་སར་དམག་འཁྲུག་བརྒྱབ་པ་ཡིན་ནམ། དེ་དག་གིས་མཁར་ཁ་ནས་མདའ་འཕེན་པ་མི་ཤེས་སམ།
2SA 11:21 སྔར་ཡེ་རུབ་བེ་ཤེད་ཀྱི་བུ་ཨ་བི་མེ་ལེག་གསོད་མཁན་དེ་སུ་ཡིན་ནམ། བུད་མེད་ཅིག་གིས་མཁར་ཁ་ནས་ཁོའི་སྟེང་དུ་འཐག་རྡོ་འཕངས་ནས་ཁོ་ཐེ་བེ་སི་ཡུལ་དུ་ཤི་བ་མ་ཡིན་ནམ། ཁྱོད་རྣམས་མཁར་གྱི་ཉེ་སར་བཅར་བ་ཅི་ཞེས་དྲིས་ན། ཁྱོད་ཀྱིས་ཁོང་ལ་ཁྱེད་ཀྱི་ཞབས་ཕྱི་ཧེད་པ་ཨུ་རི་ཡཱ་ཡང་ཚེ་ལས་འདས་སོང་ཞེས་ཞུ་བར་གྱིས་ཞེས་སྨྲས་པ་ལ།
2SA 11:22 བང་ཆེན་སོང་སྟེ་སླེབས་པ་དང་། ཡོ་ཨབ་ཀྱིས་ཁོ་རང་མངགས་ནས་འཕྲིན་ཇི་དང་ཇི་བསྐུར་བ་ཐམས་ཅད་དཱ་བིད་ལ་ཞུས།
2SA 11:23 ཡང་བང་ཆེན་དེས་དཱ་བིད་ལ། མི་དེ་དག་ནི་ངེད་ཅག་ལས་སྟོབས་ཆེ་ཞིང་། ཁོ་རྣམས་ཐང་རྒོད་དུ་སླེབས་ནས་ངེད་ཅག་ལ་འཐབ་པ་དང་། ངེད་ཅག་གིས་དེ་དག་མཁར་སྒོ་རུ་དེད་ནས་སོང་བ་ལ།
2SA 11:24 མདའ་པས་མཁར་ཁ་ནས་ཁྱེད་ཀྱི་ཞབས་ཕྱི་རྣམས་ལ་མདའ་ཡིས་བརྒྱབ་པས། རྒྱལ་པོའི་ཞབས་ཕྱི་འགའ་ཞིག་སྟེ། ཁྱེད་ཀྱི་ཞབས་ཕྱི་ཧེད་པ་ཨུ་རི་ཡཱ་ཡང་བསད་དོ་ཞེས་ཞུས།
2SA 11:25 དེ་ནས་དཱ་བིད་ཀྱིས་བང་ཆེན་དེ་ལ། ཁྱོད་ཀྱིས་ཡོ་ཨབ་ལ་འདི་ལྟར། རལ་གྲིས་མི་སུ་དང་སུ་ཡང་གསོད་ངེས་ལ། བྱ་བ་དེའི་ཕྱིར་དུ་ཁྱོད་རང་སེམས་མི་སྡུག་པར་བྱའོ། །ཁྱོད་ཀྱིས་གྲོང་ཁྱེར་དེར་དམག་འཁྲུག་རྒྱག་ཤུགས་ཆེ་རུ་བཏང་ནས་དེ་རྩ་མེད་དུ་གཏོང་དགོས་ཞེས་ཁོ་ལ་སྐུལ་སློང་གྱིས་ཤིག་ཅེས་གསུངས་སོ། །
2SA 11:26 དེ་ནས་ཨུ་རི་ཡཱ་ཡི་ཆུང་མས་རང་གི་ཁྱོ་ག་ཤི་བའི་གཏམ་ཐོས་པས་རང་གི་ཁྱོ་གའི་དོན་དུ་མྱ་ངན་བྱས།
2SA 11:27 སྡུག་གི་ཉི་མ་རྫོགས་པ་དང་དཱ་བིད་ཀྱིས་མི་མངགས་ཤིང་། བུད་མེད་དེ་རང་གི་ཕོ་བྲང་དུ་བླངས་ནས་དེ་ཁོང་གི་ཆུང་མར་གྱུར་ཏེ་བུ་ཞིག་བཙས་མོད། དཱ་བིད་ཀྱིས་བྱས་པའི་བྱ་བ་དེ་ལ་དཀོན་མཆོག་ཡ་ཝཱེ་ཐུགས་མ་དགྱེས་སོ། །
2SA 12:1 དེ་ནས་དཀོན་མཆོག་ཡ་ཝཱེས་ནཱ་ཐན་བྱ་བ་དཱ་བིད་ཀྱི་མདུན་དུ་མངགས་པ་དང་། ནཱ་ཐན་ཁོའི་རྩར་ཕྱིན་ནས་ཁོང་ལ། གྲོང་ཁྱེར་ཞིག་ཏུ་མི་གཉིས་ཡོད་ཅིང་། གཅིག་ནི་ཕྱུག་པོ་དང་གཞན་དེ་དབུལ་པོ་ཡིན།
2SA 12:2 ཕྱུག་པོ་དེ་ལ་ར་ལུག་དང་བ་གླང་གི་ཁྱུ་ཤིན་ཏུ་མང་པོ་ཡོད་པ་དང་།
2SA 12:3 དབུལ་པོ་དེ་ལ་ཉོས་ནས་གསོས་པའི་ལུ་གུ་མོ་ཆུང་ཆུང་གཅིག་ལས་གཞན་ཅི་ཡང་མེད་པ་ཡིན། ལུ་གུ་དེ་ནི་མི་དེའི་ཁྱིམ་ནས་རང་གི་ཕྲུ་གུ་རྣམས་དང་མཉམ་དུ་འཚར་ལོངས་བྱུང་། ལུ་གུ་དེས་ཁོའི་ཁ་ཟས་སྤྱད་ཅིང་ཕོར་བ་ལས་འཐུང་བ་དང་པང་ནས་ཉལ་ཏེ། མི་དེའི་བུ་མོ་ལྟ་བུ་ཡིན།
2SA 12:4 དེར་མི་ཕྱུག་པོའི་ཁྱིམ་དུ་མགྲོན་པོ་ཞིག་སླེབས་པ་དང་། ཁོས་རང་གི་བ་ཁྱུ་དང་ལུག་ཁྱུ་ནས་གཅིག་བཟུང་སྟེ་རང་གི་རྩར་སླེབས་པའི་མགྲོན་པོ་དེར་མགྲོན་བྱེད་པར་བློས་མ་ཐོངས་པས། མི་དབུལ་པོ་དེའི་ལུ་གུ་མོ་བཟུང་ནས་མགྲོན་པོ་དེར་ཟས་སུ་གཡོས་སོ་ཞེས་སྨྲས་པ་ན།
2SA 12:5 དཱ་བིད་མི་དེ་ལ་རབ་ཏུ་ཁྲོས་ནས་ནཱ་ཐན་ལ། ངས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ལས་དེ་ལྟ་བུ་བྱེད་མཁན་ནི་འཆི་བར་འོས།
2SA 12:6 ཡང་མི་དེས་སྙིང་རྗེ་མེད་པར་ལས་འདི་ལྟ་བུ་བྱས་པས། ལུ་གུ་དེའི་སྐྱིན་ཚབ་ཏུ་ལྡབ་བཞི་འཇལ་དགོས་ཞེས་གསུངས།
2SA 12:7 དེ་ནས་ནཱ་ཐན་གྱིས་དཱ་བིད་ལ། མི་དེ་ཁྱོད་རང་ཡིན་ནོ། །ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ངས་ཁྱོད་ཡེས་ར་ཨེལ་གྱི་རྒྱལ་པོར་བྱུགས་ཏེ་སོ་ལོའི་ལག་ནས་བསྐྱབས་པ་དང་།
2SA 12:8 ངས་ཁྱོད་ཀྱི་བདག་པོའི་ཁང་པ་དང་། བདག་པོའི་ཆེན་ཆུན་རྣམས་ཁྱོད་ལ་གནང་ཞིང་། ཡེས་ར་ཨེལ་དང་ཡ་ཧུ་དཱ་ཁྱིམ་རྒྱུད་གཉིས་ཁྱོད་ལ་སྤྲད་དོ། །གལ་ཏེ་ད་དུང་མི་འདང་ཚེ། ངས་ཁྱོད་ལ་དེ་ལས་ལྷག་པ་སྤྲད་ཆོག་ཆོག་ཡིན།
2SA 12:9 ཁྱོད་ཀྱིས་ཅིའི་ཕྱིར་དཀོན་མཆོག་ཡ་ཝཱེའི་བཀའ་སྣང་མེད་དུ་བཏང་སྟེ། ཁོང་གིས་ངན་པར་གཟིགས་པའི་ལས་སྤྱད་པ་ཡིན་ནམ། ཁྱོད་ཀྱིས་ཧེད་པ་ཨུ་རི་ཡཱ་རལ་གྲིས་བསད་ནས་ཁོའི་ཆུང་མ་རང་གི་ཆུང་མར་བླངས་ཏེ། ཁྱོད་ཀྱིས་ཨམ་མོན་པ་རྣམས་ཀྱི་རལ་གྲིས་ཁོ་བསད་པ་ཡིན།
2SA 12:10 དེའི་ཕྱིར་ད་ནས་བཟུང་ཁྱོད་ཀྱི་ཁྱིམ་དུ་རལ་གྲི་རྒྱུན་ཆད་པར་མི་འགྱུར་རོ། །དེ་ནི་ཁྱོད་ཀྱིས་ང་རང་སྣང་མེད་དུ་བཏང་བར་མ་ཟད། ཧེད་པ་ཨུ་རི་ཡཱ་ཡི་ཆུང་མ་དེ་ཁྱོད་རང་གི་ཆུང་མར་བླངས་པའི་རྐྱེན་གྱིས་སོ་ཞེས་དང་།
2SA 12:11 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་རང་གི་ཁྱིམ་ནས་ཆག་སྒོ་བསླངས་ཏེ་ཁྱོད་ལ་རྒོལ་བར་བྱའོ། །ངས་ཁྱོད་ཀྱི་ཆུང་མ་རྣམས་ཁྱོད་རང་གི་མིག་མདུན་ནས་ཁྱེར་ཏེ་ཁྱོད་ཀྱི་འགྲོགས་ཡ་ལ་གནང་བར་མ་ཟད། དེས་ཉི་མ་ཁ་དཀར་ངོ་དཀར་ལ་ཁྱོད་ཀྱི་ཆུང་མ་རྣམས་དང་ལུས་འབྲེལ་བྱའོ། །
2SA 12:12 ཁྱོད་ཀྱིས་ལྐོག་ནས་དེ་ལྟར་བྱས་ཤིང་། ངས་ཡེས་ར་ཨེལ་གྱི་མདུན་དུ་ཉི་མ་ཁ་དཀར་ངོ་དཀར་ལ་དེ་བཞིན་བྱས་ཏེ་ཁྱོད་ལ་ལན་སློག་པར་བྱ་ཞེས་གསུངས་ཞེས་སྦྲན་པ་དང་།
2SA 12:13 དཱ་བིད་ཀྱིས་ནཱ་ཐན་ལ། བདག་གིས་དཀོན་མཆོག་ཡ་ཝཱེའི་སྤྱན་སྔར་སྡིག་པ་བྱས་པ་ཡིན་ཞེས་ཞུས་པར། ནཱ་ཐན་གྱིས་དཱ་བིད་ལ། དཀོན་མཆོག་ཡ་ཝཱེས་ཁྱོད་ཀྱི་སྡིག་པ་སེལ་བས། ཁྱོད་ནི་འཆི་བར་མི་འགྱུར།
2SA 12:14 འོན་ཀྱང་ཁྱོད་ཀྱིས་ལས་དེ་བྱས་ནས་དཀོན་མཆོག་ཡ་ཝཱེའི་དགྲ་རྣམས་ལ་ཁོང་ལ་སྐུར་བ་འདེབས་པའི་གླགས་སྤྲད་པས། ཁྱོད་ལ་བཙས་པའི་བུ་དེ་འཆི་བར་འགྱུར་རོ་ཞེས་གསུངས།
2SA 12:15 དེ་ནས་ནཱ་ཐན་རང་གི་ཁྱིམ་དུ་བཞུད་ཅིང་། ཨུ་རི་ཡཱ་ཡི་ཆུང་མས་བཙས་པའི་དཱ་བིད་ཀྱི་བུ་དེ་ལ་དཀོན་མཆོག་ཡ་ཝཱེས་བརྡེགས་པ་དང་དེར་ན་ཚ་ལྗིད་མོ་ཕོག་པ་རེད།
2SA 12:16 དཱ་བིད་ཀྱིས་བུ་དེའི་དོན་དུ་དཀོན་མཆོག་ལ་གསོལ་བ་བཏབ་ནས་སྨྱུང་གནས་བསྲུངས་པ་དང་། ཁང་པའི་ནང་དུ་སོང་ནས་མཚན་གང་པོར་ས་རུ་ཉལ་བསྡད་དོ། །
2SA 12:17 དེར་ཁོང་གི་ཞབས་ཕྱི་རྒན་པ་ཞིག་ཁོང་གི་གམ་དུ་ལངས་བསྡད་ནས་ཁོང་ས་ནས་ཡར་སློང་འདོད་ཀྱང་། ཁོང་ཡར་ལངས་མ་འདོད་ལ་དེ་དག་དང་ལྷན་ཅིག་ཏུ་ཁ་ཟས་ཀྱང་མ་སྤྱད་དོ། །
2SA 12:18 དེ་ནས་ཉིན་བདུན་པ་ལ་བུ་དེ་ཤིའོ། །དཱ་བིད་ཀྱི་བློན་འཁོར་རྣམས་ཀྱིས་ཕྲུ་གུ་ཤི་བའི་གཏམ་ཁོང་ལ་ཞུ་བར་མ་ཕོད་དེ། དེ་དག་གིས། ལྟོས་དང་། ཕྲུ་གུ་དེ་གསོན་པོར་ཡོད་པའི་ཚེ་བདག་ཅག་གིས་ཁོང་ལ་གཏམ་བྱས་ཀྱང་ཁོང་གིས་མི་མཉན་པས། ད་ནི་བདག་ཅག་གིས་ཁོང་ལ་བུ་ཤི་ཟིན་ཞེས་ཅི་ལྟར་ཞུ་ཕོད་དམ། ཁོང་གིས་གཞན་ལ་གནོད་བསྐྱལ་ཡང་སྲིད་ཅེས་གཏམ་བྱས་སོ། །
2SA 12:19 དཱ་བིད་ཀྱིས་རང་གི་བློན་འཁོར་རྣམས་ཀྱིས་ཕན་ཚུན་ལ་སྐད་ཆ་ཤབ་ཤུབ་སྨྲ་བ་མཐོང་ནས་བུ་ཤི་ཟིན་པ་ཤེས་ཤིང་། རང་གི་བློན་འཁོར་རྣམས་ལ། བུ་ཤི་ཟིན་ནམ་ཞེས་དྲིས་པ་ལ་དེ་དག་གིས། ཤི་ཟིན་ནོ་ཞེས་ཞུས་སོ། །
2SA 12:20 དེར་དཱ་བིད་ས་ནས་ཡར་ལངས་ཏེ་ཁྲུས་བྱས་ཤིང་སྣུམ་བྱུགས་པ་དང་། ན་བཟའ་བརྗེས་ནས་དཀོན་མཆོག་ཡ་ཝཱེའི་བཞུགས་གནས་སུ་ཕེབས་ཏེ་ཕྱག་ཕུལ་ཏོ། །དེ་ནས་རང་གི་ཁྱིམ་དུ་ལོག་སྟེ་མི་ཡིས་ཁོང་གི་བཀའ་བཞིན་ཁ་ཟས་དྲངས་པ་ལ་ཁོང་གིས་བཞེས་སོ། །
2SA 12:21 དེར་ཁོང་གི་བློན་འཁོར་རྣམས་ཀྱིས་ཁོང་ལ། ཁྱེད་ཀྱིས་མཛད་པ་དེ་ཅི་ལགས། བུ་གསོན་པོར་ཡོད་པའི་ཚེ་ཁྱེད་ཀྱིས་བུ་ཡི་ཕྱིར་དུ་སྨྱུང་གནས་བསྲུངས་ནས་ངུས་པ་དང་། བུ་ཤི་ཟིན་པའི་ཚེ་ན། ཁྱེད་ཡར་བཞེངས་ནས་གསོལ་བ་བཞེས་སོ་ཞེས་ཞུས་པ་ལ།
2SA 12:22 ཁོང་གིས་དེའི་ལན་དུ། ཕྲུ་གུ་ད་དུང་གསོན་པའི་ཚེ་ངས་སྨྱུང་གནས་བསྲུངས་ནས་ངུ་བཞིན་བསྡད་པ་ནི། ངས་སེམས་སུ་དཀོན་མཆོག་ཡ་ཝཱེས་བདག་ལ་སྙིང་རྗེ་དགོངས་ནས་ཕྲུ་གུ་གསོན་པོར་བསྐྱུར་ཡང་སྲིད་སྙམ་པ་ཡིན།
2SA 12:23 ད་ནི་ཕྲུ་གུ་ཤི་ཟིན་པས། བདག་གིས་ཅིའི་ཕྱིར་སྨྱུང་གནས་སྲུང་ངམ། ངས་ཁོ་རང་ཕྱིར་འགུག་ནུས་སམ། ང་ཁོའི་རྩར་འགྲོ་རྒྱུ་ཡིན་མོད། འོན་ཀྱང་ཁོ་ནི་ཕྱིར་ངའི་རྩར་འོང་མི་ནུས་ཞེས་གསུངས་སོ། །
2SA 12:24 དཱ་བིད་ཀྱིས་རང་གི་ཆུང་མ་པད་ཤེ་བཱ་ལ་སེམས་གསོ་བྱས་ཤིང་། ཁོ་མོའི་རྩར་སོང་ནས་མཉམ་དུ་འགྲོགས་པ་ལ། བུད་མེད་དེས་བུ་ཞིག་བཙས་པ་དང་དེའི་མིང་ལ་སོ་ལོ་མོན་ཞེས་བཏགས་སོ། །དཀོན་མཆོག་ཡ་ཝཱེས་ཀྱང་དེ་ལ་གཅེས་པར་གྱུར་ཏེ།
2SA 12:25 ལུང་སྟོན་པ་ནཱ་ཐན་མངགས་ནས་དཀོན་མཆོག་ཡ་ཝཱེའི་བཀའ་བཞིན་དུ། དེའི་མིང་ལ་ཨེ་དིད་ཡཱ་ ཞེས་བཏགས་སོ། །
2SA 12:26 དེའི་དུས་སུ་ཡོ་ཨབ་ཀྱིས་ཨམ་མོན་པའི་གྲོང་ཁྱེར་རབ་བཱ་ལ་དམག་དྲངས་ནས་རྒྱལ་ས་དེ་བཟུང་ངོ་། །
2SA 12:27 དེ་ནས་ཡོ་ཨབ་ཀྱིས་དཱ་བིད་ཀྱི་དྲུང་དུ་བང་ཆེན་མངགས་ནས་ཁོང་ལ། ངས་རབ་བཱ་ལ་དམག་བརྒྱབ་སྟེ་ཆུ་མཛོད་རྣམས་ཀྱང་བླངས་ཟིན་པས།
2SA 12:28 ད་ལྟ་ཁྱེད་ཀྱིས་འབངས་གཞན་དག་བསྡུས་ཤིག སྒར་བཏབ་སྟེ་གྲོང་ཁྱེར་དེ་ལ་རྒོལ་ནས་དེ་ལེན་ཐབས་གྱིས་ཤིག དེ་མིན་ན་གྲོང་ཁྱེར་དེ་ངས་བླངས་པའི་ཚེ། མི་རྣམས་ཀྱིས་ངའི་མིང་དེ་ལ་འདོགས་པར་འགྱུར་རོ་ཞེས་འཕྲིན་བསྐུར་བ་དང་།
2SA 12:29 དཱ་བིད་ཀྱིས་འབངས་ཐམས་ཅད་བསྡུས་ཤིང་རབ་བཱ་ལ་དམག་དྲངས་པ་དང་དེར་རྒོལ་ནས་རྒྱལ་ཁ་བླངས་སོ། །
2SA 12:30 དཱ་བིད་ཀྱིས་ཡུལ་དེའི་རྒྱལ་པོའི་མགོ་ནས་ཅོད་པན་ཕྲོགས། རྒྱལ་པོའི་ཅོད་པན་སྟེང་གི་གསེར་ནི་རྡོ་ཚད་གཅིག་ཡོད་པ་དང་དེའི་སྟེང་ལ་རིན་པོ་ཆེའི་ཕྲ་བཏབ་ཡོད་ལ། མི་རྣམས་ཀྱིས་ཅོད་པན་དེ་དཱ་བིད་ཀྱི་དབུ་ལ་བསྐོན། དཱ་བིད་ཀྱིས་གྲོང་ཁྱེར་དེ་ལས་ད་དུང་བཅོམ་ནོར་དཔག་མེད་ཁྱེར་ཏོ། །
2SA 12:31 ཡང་ཁོང་གིས་གྲོང་ཁྱེར་དེའི་མི་རྣམས་ཕྱི་རུ་ཁྲིད་ནས། དེ་དག་ལ་སོག་ལེ་དང་། ལྕགས་སྤར་དང་། ལྕགས་ཀྱི་སྟ་རེ་བཅས་བཀོལ་དུ་བཅུག་པ་དང་། ཡང་ན་སོ་ཕག་སྲེག་ཁུང་དུ་ལས་ཀ་བྱེད་དུ་བཅུག ཁོང་གིས་ཨམ་མོན་པ་རྣམས་ཀྱི་གྲོང་ཁྱེར་ཐམས་ཅད་ལ་དེ་བཞིན་བྱས་ནས། དཱ་བིད་དང་འབངས་ཐམས་ཅད་ཕྱིར་ཡེ་རུ་སཱ་ལེམ་དུ་ལོག་གོ །
2SA 13:1 དེའི་རྗེས་སུ་དོན་ཞིག་བྱུང་བ་འདི་ལྟ་སྟེ། དཱ་བིད་ཀྱི་བུ་ཨབ་ཤཱ་ལོམ་ལ་སྲིང་མོ་བཞིན་བཟང་མ་ཐལ་མཱར་བྱ་བ་ཞིག་ཡོད་པ་ལ། དཱ་བིད་ཀྱི་བུ་ཨམ་ནོན་གྱི་སེམས་དེ་ལ་འཕྲེང་བར་གྱུར།
2SA 13:2 ཨམ་ནོན་རང་གི་ཕ་གཅིག་མ་མི་གཅིག་པའི་སྲིང་མོ་ཐལ་མཱར་ལ་སེམས་འཕྲེང་བའི་སྡུག་བསྔལ་གྱིས་ན་བར་གྱུར་ཏོ། །ཐལ་མཱར་ནི་ད་དུང་ན་ཆུང་བུ་མོ་ཡིན་པས་ཨམ་ནོན་གྱིས་དེ་ལ་གང་ཞིག་བྱེད་འདོད་ཀྱང་དཀའ་བའི་གནས་སུ་ལྷུང་།
2SA 13:3 ཨམ་ནོན་ལ་མཛའ་གྲོགས་ཤིག་ཡོད་དེ་མིང་ལ་ཡོ་ན་དབ་ཅེས་ཟེར་ཞིང་། དེ་ནི་དཱ་བིད་ཀྱི་གཅེན་པོ་ཤིམ་ཨ་ཡི་བུ་ཡིན་ཏེ་མི་ཤིན་ཏུ་སྤྱང་པོ་ཞིག་ཡིན།
2SA 13:4 དེས་ཨམ་ནོན་ལ། རྒྱལ་སྲས་ལགས། ཁྱེད་རང་ཞོགས་པ་རེ་རེ་བཞིན་རིད་པ་དེ་ཅི་ཡིན། ཁྱེད་ཀྱིས་ང་ལ་སྨྲ་བར་མི་མཛད་དམ་ཞེས་ཞུས་པར། ཨམ་ནོན་ན་རེ། ང་ནི་རང་གི་གཅེན་པོ་ཨབ་ཤཱ་ལོམ་གྱི་སྲིང་མོ་ཐལ་མཱར་ལ་དགའ་བྱུང་ཞེས་སྨྲས།
2SA 13:5 དེར་ཡོ་ན་དབ་ཀྱིས་ཁོ་ལ། ཁྱེད་མལ་སའི་ནང་ཉལ་ཏེ་ན་ཁུལ་གྱིས་ཤིག ཁྱེད་ཀྱི་ཡབ་ཁྱེད་ལ་གཟིགས་པར་འོངས་སྐབས་ཁྱེད་ཀྱིས་ཁོང་ལ། ངའི་སྲིང་མོ་ཐལ་མཱར་འདིར་མངགས་ནས་ང་ལ་ཁ་ཟས་སྟེར་བར་མཛོད་དང་། ཡང་ངས་དངོས་སུ་མཐོང་བ་དང་དེའི་ལག་ནས་ཁ་ཟས་བླངས་ཏེ་བཟའ་བའི་ཕྱིར་མོས་ངའི་མཐོང་སར་ཁ་ཟས་སྟ་གོན་བྱེད་པར་མཛད་རོགས་ཞེས་ཞུས་ཤིག་ཅེས་བསླབས་པ་དང་།
2SA 13:6 ཨམ་ནོན་ཉལ་བསྡད་ནས་ན་རྫུ་བཏབ་ཅིང་། རྒྱལ་པོ་ཁོ་ལ་གཟིགས་པར་འོངས་པའི་ཚེ། ཨམ་ནོན་གྱིས་རྒྱལ་པོ་ལ། ངའི་སྲིང་མོ་ཐལ་མཱར་འདིར་འོང་བར་གནོངས་ཤིག་དང་། དེས་ངའི་མཐོང་ས་རུ་བདག་ལ་བག་ལེབ་གཉིས་བསྲེགས་ན་ངས་དེའི་ལག་ནས་བླངས་ཏེ་བཟའ་བར་བྱ་ཞེས་ཞུས་པར།
2SA 13:7 དཱ་བིད་ཀྱིས་ཕོ་བྲང་ནང་མི་མངགས་ཏེ་ཐལ་མཱར་གྱི་རྩར་སོང་ནས་དེ་ལ། ཁྱོད་རང་གི་ཕུ་བོ་ཨམ་ནོན་གྱི་ཁང་པར་སོང་སྟེ་ཁོ་ལ་ཁ་ཟས་གཡོས་ཤིག་ཅེས་བསྒོས་པས།
2SA 13:8 ཐལ་མཱར་རང་གི་ཕུ་བོ་ཨམ་ནོན་གྱི་ཁང་པར་ཕྱིན་ཏེ་ཁོ་རང་མལ་སར་ཉལ་ཡོད་པ་མཐོང་། དེ་ནས་ཁོ་མོས་ཕྱེ་བླངས་ནས་བརྫིས་ཏེ་ཁོའི་མཐོང་ས་རུ་བག་ལེབ་བསྲེགས་ཤིང་ཚོས་པ་ལ།
2SA 13:9 ཁོ་མོས་སླ་ང་ནས་བག་ལེབ་བླངས་ཏེ་ཨམ་ནོན་ལ་དྲངས་པ་ན་ཁོས་མ་ཟོས་པ་དང་། ཁོ་ན་རེ། མི་ཐམས་ཅད་ངའི་མདུན་ནས་ཕྱི་རུ་སོང་ཞིག་ཅེས་སྨྲས་པར། མི་ཐམས་ཅད་ཁོ་དང་བྲལ་ནས་སོང་།
2SA 13:10 དེར་ཨམ་ནོན་གྱིས་ཐལ་མཱར་ལ། ངས་ཁྱོད་ཀྱི་ལག་ནས་བླངས་ཏེ་བཟའ་ཕྱིར་ཁ་ཟས་གཟིམ་ཁང་དུ་འཁྱེར་ཤོག་སྨྲས་པས། ཐལ་མཱར་གྱིས་རང་གིས་བསྲེགས་པའི་བག་ལེབ་རྣམས་བླངས་ནས། གཟིམ་ཁང་དུ་རང་གི་ཕུ་བོ་ཨམ་ནོན་གྱི་གམ་དུ་སླེབས་ཏེ།
2SA 13:11 མདུན་དུ་བཅར་ནས་ཁོ་ལ་ཁ་ཟས་དྲངས་པའི་ཚེ། ཁོས་མོ་ལ་འཇུས་ནས་ན་རེ། ངའི་སྲིང་མོ། ང་དང་མཉམ་དུ་ཉོལ་ཞིག་ཅེས་སྨྲས་པ་ལ།
2SA 13:12 ཁོ་མོས་ལན་དུ། ཕུ་བོ་ལགས། དེ་ལྟར་བྱེད་མི་རུང་། ང་ལ་བཙན་མི་བཀོལ་རོགས། ཡེས་ར་ཨེལ་གྱི་ནང་དུ་ལས་དེ་ལྟ་བུ་བྱེད་མི་རུང་། ཁྱོད་ཀྱིས་སྐྱུག་བྲོ་བའི་ལས་འདི་མ་བྱེད་ཅིག
2SA 13:13 ཡང་ངས་རང་གི་ངོ་ཚ་ཁུར་ནས་གང་དུ་འགྲོའམ། ཁྱོད་ལ་མཚོན་ནའང་ཡེས་ར་ཨེལ་གྱི་ཁྲོད་དུ་མི་བླུན་རྨོངས་ཤིག་ཏུ་འགྱུར་ངེས་ཡིན། ད་ལྟ་ཁྱོད་ཀྱིས་རྒྱལ་པོ་ལ་ཞུ་བ་ཕུལ་དང་། ཁོང་གིས་ང་ཁྱོད་ལ་གནང་བར་གདོན་མི་ཟ་ཞེས་སྨྲས་ཀྱང་།
2SA 13:14 ཨམ་ནོན་གྱིས་མོའི་གཏམ་ལ་མ་མཉན་པར། ཁོ་ནི་མོ་ལས་ཤུགས་ཆེ་བས་ཁོ་མོར་བཙན་གཡེམ་བྱས་ཤིང་མཉམ་དུ་ཉལ་ཏོ། །
2SA 13:15 དེ་ནས་ཨམ་ནོན་མོ་ལ་ཤིན་ཏུ་སྡང་བ་སྟེ། ཁོ་མོར་སྡང་བའི་སེམས་ནི་སྔར་དེ་ལ་འཕྲེང་བའི་གདུང་བ་ལས་ཀྱང་ཐུ་ཞིང་ཁོ་མོར་ན་རེ། ཁྱོད་ཡར་ལོངས་ལ་ཕར་སོང་ཞིག་ཅེས་སྨྲས་པ་ལ།
2SA 13:16 ཐལ་མཱར་གྱིས་ཨམ་ནོན་ལ། འདི་ལྟར་མི་བྱེད་རོགས། ཁྱོད་ཀྱིས་ང་ཕྱི་རུ་འདོན་པའི་ཉེས་པ་འདི་ནི་ཁྱོད་ཀྱིས་ང་ལ་བྱས་པའི་ཉེས་པ་ལས་ཀྱང་ཚབས་ཆེའོ་ཞེས་སྨྲས་ཀྱང་། ཨམ་ནོན་གྱིས་ཁོ་མོའི་ཚིག་ལ་མ་མཉན་པར།
2SA 13:17 རང་གི་ཞབས་ཕྱི་བོས་ནས་དེ་ལ། བུད་མེད་འདི་ངའི་ཁྱིམ་ནས་བཏོན་ཞིག ཁོ་མོ་ཕྱི་རུ་སོང་མ་ཐག་སྒོ་ལ་སྒོ་གཏན་རྒྱོབ་ཅིག་ཅེས་སྨྲས་སོ། །
2SA 13:18 སྐབས་དེར་ཐལ་མཱར་གྱིས་གོས་ཁྲ་བོ་གྱོན་ཡོད་པ་ཡིན། གང་ལ་ཞེ་ན། རྒྱལ་པོའི་སྲས་མོ་ན་ཆུང་མ་ཡིན་པ་ཐམས་ཅད་ཀྱིས་ཕྱི་གོས་དེ་ལྟ་བུ་གྱོན་པ་ཡིན། ཨམ་ནོན་གྱི་ཞབས་ཕྱི་ཡིས་ཁོ་མོ་ཕྱི་རུ་བཏོན་ཞིང་། ཁོ་མོ་ཕྱི་རུ་སོང་མ་ཐག་ཁོས་སྒོ་ལ་སྒོ་གཏན་བརྒྱབ་པ་རེད།
2SA 13:19 དེར་ཐལ་མཱར་གྱིས་རང་གི་མགོ་ལ་ཐལ་བ་གཏོར་ནས་ལུས་ཀྱི་གོས་ཁྲ་གཤགས་ཏེ། མགོ་ལག་པས་བསྐྱོར་ནས་ངུ་བཞིན་སོང་བ་དང་།
2SA 13:20 ཁོ་མོའི་མིང་པོ་ཨབ་ཤཱ་ལོམ་ན་རེ། ཁྱོད་ཀྱི་ཕུ་བོ་ཨམ་ནོན་ཁྱོད་དང་འགྲོགས་པ་ཡིན་ནམ། ངའི་སྲིང་མོ། ད་གནས་སྐབས་སུ་ཁ་མི་གྲགས་པར་གྱིས། ཁོ་རང་ཁྱོད་ཀྱི་ཕུ་བོ་ཡིན་པས་སེམས་སུ་མ་འཛིན་ཞིག་ཅེས་སྨྲས་ཤིང་། ཐལ་མཱར་ནི་རང་གི་མིང་པོ་ཨབ་ཤཱ་ལོམ་གྱི་ཁྱིམ་ནས་གྲོགས་མེད་ཁེར་རྐྱང་དུ་བསྡད་དོ། །
2SA 13:21 རྒྱལ་པོ་དཱ་བིད་ཀྱིས་དོན་དེ་ཐམས་ཅད་ཐོས་པ་ཙམ་གྱིས་ཐུགས་རབ་ཏུ་ཁྲོས་པར་གྱུར་ཏོ། །
2SA 13:22 ཨབ་ཤཱ་ལོམ་གྱིས་ཨམ་ནོན་ལ་གཏམ་བཟང་ངན་གང་ཡང་མ་ལབ་སྟེ། གང་ལ་ཞེ་ན། དེས་ཁོའི་སྲིང་མོ་ཐལ་མཱར་ལ་བཙན་གཡེམ་བྱས་པས་ཨབ་ཤཱ་ལོམ་ནི་ཨམ་ནོན་ལ་ཤིན་ཏུ་སྡང་ངོ་། །
2SA 13:23 དེ་ནས་ལོ་གཉིས་འགོར་རྗེས། མི་རྣམས་ཀྱིས་ཨེ་ཕཱར་ཡིམ་ཉེ་འདབས་ཀྱི་པཱ་ཨལ་ཧ་ཟོར་ཡུལ་དུ་ཨབ་ཤཱ་ལོམ་གྱི་ལུག་བལ་འབྲེག་སྐབས་ སུ། ཨབ་ཤཱ་ལོམ་གྱིས་རྒྱལ་སྲས་ཐམས་ཅད་དེ་རུ་མགྲོན་དུ་བོས་སོ། །
2SA 13:24 ཡང་ཨབ་ཤཱ་ལོམ་རྒྱལ་པོའི་དྲུང་དུ་ཕྱིན་ཏེ་ཁོང་ལ། གཟིགས་དང་། མི་རྣམས་ཀྱིས་ཁྱེད་ཀྱི་ཞབས་ཕྱིའི་ལུག་བལ་འབྲེག་གིན་ཡོད་པས། རྒྱལ་པོ་འཁོར་དང་བཅས་པ་ཉིད་ཀྱི་ཞབས་ཕྱི་མཉམ་དུ་ཕེབས་ཤིག་ཞུས་ཀྱང་།
2SA 13:25 རྒྱལ་པོས་ཨབ་ཤཱ་ལོམ་ལ། མི་འགྲོ་བར་བྱ་ངའི་བུ། ཁྱོད་ལ་ཚེགས་མི་བྱེད་པའི་ཕྱིར་ཚང་མ་འགྲོ་དགོས་དོན་མེད་ཅེས་སྨྲས། དེས་ཁོང་ལ་ཡང་ཡང་ཞུས་ཀྱང་ཁོང་སྔར་བཞིན་འགྲོ་མ་འདོད་པས་དེ་ལ་བྱིན་རླབས་མཛད་དོ། །
2SA 13:26 དེ་ནས་ཨབ་ཤཱ་ལོམ་གྱིས། གལ་ཏེ་ཁྱེད་མི་ཕེབས་ན། ངའི་ནུ་བོ་ཨམ་ནོན་ང་དང་མཉམ་དུ་མངག་པར་མཛོད་ཅེས་ཞུས་པའི་ལན་དུ་རྒྱལ་པོས། ཁོ་ཁྱོད་དང་མཉམ་དུ་འགྲོ་དགོས་དོན་ཅི་ཞེས་གསུངས་པ་དང་།
2SA 13:27 ཨབ་ཤཱ་ལོམ་གྱིས་རྒྱལ་པོ་ལ་ཡང་ནས་ཡང་དུ་ཞུ་བ་ཞུས་པས་ཁོང་གིས་ཨམ་ནོན་དང་རྒྱལ་སྲས་ཐམས་ཅད་ཁོ་དང་མཉམ་དུ་འགྲོ་བའི་དགོངས་པ་གནང་ངོ་། །
2SA 13:28 དེ་ནས་ཨབ་ཤཱ་ལོམ་གྱིས་རང་གི་འཁོར་གཡོག་རྣམས་ལ། མཉམ་ཞོག་ཅིག ཨམ་ནོན་གྱིས་རྒུན་ཆང་འཐུང་ནས་དགའ་བ་འབུམ་གྱིས་མཉེས་པའི་དུས་སུ་ངས་ཁྱོད་ཅག་ལ། ཨམ་ནོན་ལ་རྒྱོབ་ཅིག་ཅེས་སྨྲས་པ་ཙམ་གྱིས། ཁྱོད་ཅག་གིས་ཨམ་ནོན་གསོད་དགོས་ཏེ། མ་འཇིགས་ཤིག ངས་ཁྱོད་ཅག་ལ་བཀའ་བསྒོས་པ་མ་ཡིན་ནམ། དེ་བས་སྙིང་སྟོབས་དང་དཔའ་ངར་བསྐྱེད་ཅིག་ཅེས་སྨྲས་པར།
2SA 13:29 ཨབ་ཤཱ་ལོམ་གྱི་འཁོར་གཡོག་རྣམས་ཀྱིས་ཁོའི་བསྒོ་བ་བཞིན་དུ་ཨམ་ནོན་ལ་དེ་བཞིན་བྱས་ཤིང་། རྒྱལ་སྲས་ཐམས་ཅད་ལངས་ནས་རང་རང་གི་དྲེའུ་ལ་ཞོན་ཏེ་བྲོས་སོ། །
2SA 13:30 དེ་ནས་ཁོ་རྣམས་ད་དུང་ལམ་བར་དུ་འབྲོ་སྐབས་སུ། ཨབ་ཤཱ་ལོམ་གྱིས་རྒྱལ་སྲས་ཐམས་ཅད་བསད་ནས་གཅིག་ཀྱང་མ་ལུས་སོ་ཞེས་པའི་འཕྲིན་དཱ་བིད་ལ་སླེབས་པ་དང་།
2SA 13:31 རྒྱལ་པོ་ཧར་གྱིས་བཞེངས་ཤིང་། ན་བཟའ་གཤགས་ནས་ས་སྟེང་དུ་ཉལ། ཁོང་གི་བློན་འཁོར་ཐམས་ཅད་ཀྱིས་ཀྱང་ལུས་གོས་གཤགས་ནས་ཁོང་གི་དྲུང་དུ་ལངས་བསྡད་པ་རེད།
2SA 13:32 དེ་ནས་དཱ་བིད་ཀྱི་གཅེན་པོ་ཤིམ་ཨ་ཡི་བུ་ཡོ་ན་དབ་ཀྱིས། ཀྱེ་ཇོ་བོ་ལགས། དེ་དག་གིས་རྒྱལ་སྲས་དར་ལ་བབ་པ་ཐམས་ཅད་བཀུམ་པར་མ་དགོངས་ཤིག ཨམ་ནོན་འབའ་ཞིག་བཀུམ་པའོ། །ཨམ་ནོན་གྱིས་ཨབ་ཤཱ་ལོམ་གྱི་སྲིང་མོ་ཐལ་མཱར་ལ་བཙན་གཡེམ་བྱས་པའི་ཉིན་ནས་བཟུང་། ཨབ་ཤཱ་ལོམ་གྱིས་འདི་ལྟར་བགྱི་བའི་སེམས་ཐག་བཅད་པ་རེད།
2SA 13:33 དེའི་ཕྱིར་བདག་གི་ཇོ་བོ་དང་བདག་གི་རྒྱལ་པོ་ལགས། རྒྱལ་སྲས་ཐམས་ཅད་བཀུམ་པ་རེད་ཅེས་ཁྱེད་ཀྱི་ཐུགས་སུ་མི་དགོངས་པར་མཁྱེན། ཨམ་ནོན་འབའ་ཞིག་བཀུམ་མོ་ཞེས་ཞུས་སོ། །
2SA 13:34 ཨབ་ཤཱ་ལོམ་བྲོས་སོང་ངོ་། །སོ་པ་གཞོན་ནུ་ཡིས་མགོ་ཡར་བཏེགས་ནས་བལྟས་པ་དང་། ལྟོས་ཤིག མི་མང་པོ་ཞིག་རི་ངོས་ཀྱི་ལམ་ནས་ཁོའི་རྗེས་སུ་འོང་བ་མཐོང་ངོ་། །
2SA 13:35 དེར་ཡོ་ན་དབ་ཀྱིས་རྒྱལ་པོ་ལ། གཟིགས་དང་། ཁྱེད་ཀྱི་ཞབས་ཕྱིས་ཞུས་པ་བཞིན་རྒྱལ་སྲས་རྣམས་འབྱོན་ནོ་ཞེས་ཞུས་ཤིང་།
2SA 13:36 དེ་ལྟར་ཞུས་པ་ཙམ་གྱིས། ལྟོས་ཤིག རྒྱལ་སྲས་རྣམས་སླེབས་ནས་སྐད་ཆེན་པོས་བཤུམས། རྒྱལ་པོ་དང་ཁོང་གི་བློན་འཁོར་རྣམས་ཀྱིས་ཀྱང་ངུ་སྐད་ཤིན་ཏུ་ཆེན་པོ་བཏོན་ཏོ། །
2SA 13:37 ཨབ་ཤཱ་ལོམ་བྲོས་ནས་གེ་ཤུར་གྱི་རྒྱལ་པོ་ཨམ་མེ་ཧུད་ཀྱི་སྲས་ཏལ་མཱ་ཨི་བྱ་བའི་དྲུང་དུ་ཕྱིན། དཱ་བིད་ཀྱིས་ཉིན་རེ་བཞིན་ཉིད་ཀྱི་སྲས་ཀྱི་ཕྱིར་མྱ་ངན་བྱས།
2SA 13:38 ཨབ་ཤཱ་ལོམ་བྲོས་ནས་གེ་ཤུར་དུ་ཕྱིན་ཏེ་དེར་ལོ་གསུམ་ལ་བསྡད།
2SA 13:39 ཡང་རྒྱལ་པོ་དཱ་བིད་ཀྱིས་ཨབ་ཤཱ་ལོམ་གསོད་མ་འདོད་དེ། ཨམ་ནོན་གྲོངས་རྗེས་ད་ནི་ཁོང་ལ་སེམས་གསོ་ཐོབ་པའི་ཕྱིར་རོ། །
2SA 14:1 དེ་ཡང་ཟེ་རུ་ཡཱ་ཡི་བུ་ཡོ་ཨབ་ཀྱིས་རྒྱལ་པོའི་སེམས་ནས་ཨབ་ཤཱ་ལོམ་དྲན་པ་ཤེས་པས།
2SA 14:2 ཁོས་ཐེ་ཀོ་ཨ་རུ་མི་མངགས་པ་དང་། དེ་ནས་བུད་མེད་མཁས་པ་ཞིག་བོས་ནས་དེ་ལ། ཁྱོད་ཀྱིས་རང་གི་མགོར་སྡུག་ལྷུང་ཁུལ་བྱས་ཏེ་སྡུག་གོས་གྱོན་ལ། ལུས་ལ་སྣུམ་ཡང་མི་སྐུད་པར། དུས་ཡུན་རིང་པོར་གཤིན་པོའི་དོན་དུ་སྡུག་འཁུར་བའི་བུད་མེད་ལྟ་བུར་བྱས་ཏེ།
2SA 14:3 རྒྱལ་པོའི་དྲུང་དུ་ཕྱིན་ཏེ་ཁོང་ལ་འདི་བཞིན་ཞུ་དགོས་ཞེས་སྨྲས་ནས། ཡོ་ཨབ་ཀྱིས་བུད་མེད་ལ་ཅི་ལྟར་ཞུ་དགོས་པའི་ཚིག་ཐམས་ཅད་སྨྲས་སོ། །
2SA 14:4 དེ་ནས་ཐེ་ཀོ་ཨ་ཡུལ་གྱི་བུད་མེད་རྒྱལ་པོའི་དྲུང་དུ་འོངས་ནས་ཕྱག་བཙལ་ཏེ་ན་རེ། རྒྱལ་པོ་ལགས། ཁྱེད་ཀྱིས་སྐྱབས་མཛོད་ཅིག་ཅེས་ཞུས་པ་དང་།
2SA 14:5 རྒྱལ་པོས་དེ་ལ། ཁྱོད་ལ་ཅི་ཞིག་བྱུང་ཞེས་དྲིས་པའི་ལན་དུ་མོ་ན་རེ། བདག་ནི་ཡུགས་མོ་ཞིག་ཡིན་ཏེ། བདག་གི་ཁྱོ་ག་ཤི་སོང་བ་དང་།
2SA 14:6 ཁྱེད་ཀྱི་གཡོག་མོ་བདག་ལ་བུ་གཉིས་ཡོད་ཅིང་། དེ་གཉིས་ཞིང་ཁར་འཛིངས་པ་དང་བར་འབྱེད་མཁན་གང་ཡང་མེད་པས། གཅིག་གིས་གཞན་དེ་ལ་བརྡུངས་ནས་བསད་དོ། །
2SA 14:7 གཟིགས་དང་། ནང་མི་ཐམས་ཅད་ཁྱེད་ཀྱི་གཡོག་མོའི་དགྲ་རུ་ལངས་ནས་འདི་ལྟར། ཁྱོད་ཀྱིས་རང་གི་སྤུན་ཟླ་གསོད་མཁན་དེ་སྤྲོད་ཤོག སྤུན་བསད་པའི་སྲོག་ལན་དུ་ངེད་རྣམས་ཀྱིས་ཁོ་བསད་ནས་ཕ་ཤུལ་འཛིན་མཁན་མེད་པར་བྱའོ་ཞེས་སྨྲས་སོ། །དེ་ལྟར་ཁོ་ཚོས་བདག་ལ་ལུས་པའི་བུ་གཅིག་པོ་དེ་ཡང་གསོད་ཅིང་། ས་གཞིའི་ངོས་སུ་བདག་གི་ཁྱོ་གའི་མིང་ངམ་གང་ཡང་མི་ལུས་པའི་ཕྱིར་དེ་བཞིན་བྱེད་དོ་ཞེས་ཞུས་པ་དང་།
2SA 14:8 རྒྱལ་པོས་བུད་མེད་ལ། ད་ལྟ་རང་ཁྱིམ་དུ་སོང་ཞིག ངས་ཁྱོད་ཀྱི་དོན་དུ་བཀའ་གནང་བར་བྱ་ཞེས་གསུངས་ཤིང་།
2SA 14:9 ཐེ་ཀོ་ཨ་ཡུལ་གྱི་བུད་མེད་ཀྱིས་རྒྱལ་པོ་ལ། བདག་གི་ཇོ་བོ་དང་བདག་གི་རྒྱལ་པོ་ལགས། ཉེས་སྡིག་ཐམས་ཅད་བདག་དང་བདག་གི་ཕ་རྒྱུད་ལ་འབབ་པར་ཤོག་ཅིག རྒྱལ་པོ་དང་རྒྱལ་ཁྲི་གཉིས་ལ་ཉེས་སྐྱོན་མི་འཕོག་པར་ཤོག་ཅིག་ཅེས་ཞུས་པ་དང་།
2SA 14:10 རྒྱལ་པོས་དེ་ལ། སུ་ཞིག་གིས་ཁྱོད་ལ་ཅི་ཞིག་སྨྲས་ནས་སྡུག་ལ་གཏོད་ན་དེ་ངའི་མདུན་དུ་འཁྲིད་ཤོག་དང་། དེས་ཁྱོད་ལ་ཡང་བསྐྱར་དཀའ་ལས་མི་བཟོའོ་ཞེས་གསུངས་སོ། །
2SA 14:11 དེ་ནས་བུད་མེད་ན་རེ། ཡང་དགྲ་ཤ་ལེན་མཁན་དག་གིས་ངའི་བུ་རྩ་མེད་དུ་མི་གཏོང་བའི་ཕྱིར། རྒྱལ་པོ་ཁྱེད་ཀྱིས་ཉིད་ཀྱི་དཀོན་མཆོག་ཡ་ཝཱེ་དཔང་དུ་བཙུགས་ནས་དམ་བཅའ་བར་མཛོད་ཅེས་ཞུས་པ་ན། རྒྱལ་པོས་འདི་ལྟར། བདག་གིས་གཙོ་བོ་ཡ་ཝཱེ་དཔང་དུ་བཙུགས་ནས་དམ་བཅའ་འཇོག་སྟེ། ཁྱོད་ཀྱི་བུ་ཡི་སྐྲ་ཉག་མ་གཅིག་ཀྱང་སར་ལྷུང་བར་མི་འགྱུར་ཞེས་གསུངས།
2SA 14:12 དེར་བུད་མེད་ཀྱིས། བདག་གི་ཇོ་བོ་དང་བདག་གི་རྒྱལ་པོ་ཁྱེད་ཀྱིས་གཡོག་མོ་བདག་ལ་ཡང་ཚིག་གཅིག་ཞུ་བར་གནོངས་ཤིག་ཅེས་ཞུས་པ་ལ། རྒྱལ་པོས་སྨྲོས་ཤིག་གསུངས་ཤིང་།
2SA 14:13 བུད་མེད་ཀྱིས། རྒྱལ་པོ་ཁྱེད་ཀྱིས་དཀོན་མཆོག་གི་འབངས་མི་ལ་གནོད་བསྐྱལ་བའི་ཐུགས་སེམས་དེ་ལྟ་བུ་ཅིའི་ཕྱིར་བཅངས་པ་ཡིན་ནམ། རྒྱལ་པོས་བྲོས་བྱོལ་དུ་ཕྱིན་པ་དེ་ཕྱིར་འོང་དུ་མ་བཅུག་ན། རྒྱལ་པོས་དེ་བཞིན་གསུངས་པ་ནི་རང་ཉིད་ནོར་བར་ར་སྤྲོད་མཛད་པ་ཡིན་ནོ། །
2SA 14:14 ངེད་ཅག་ཐམས་ཅད་འཆི་བར་ངེས་ཤིང་། དེ་ནི་སར་ཕོ་བའི་ཆུ་སླར་སྡུད་ཐབས་མེད་པ་དང་འདྲའོ། །དཀོན་མཆོག་གིས་མི་ཡི་འཆི་བ་མེད་པར་མི་མཛད་མོད། འོན་ཀྱང་བྲོས་བྱོལ་དུ་ཕྱིན་པ་དེ་ནི་མཐར་བསྐྲད་དེ་ཕྱིར་ལོག་མི་ནུས་པའི་མི་རུ་མི་འགྱུར་བའི་ཕྱིར་ཐབས་མཛད་དོ། །
2SA 14:15 མི་རྣམས་ཀྱིས་བདག་འཇིགས་སུ་བཅུག་པས། ང་རང་ད་ལྟ་བདག་གི་ཇོ་བོ་དང་བདག་གི་རྒྱལ་པོར་གཏམ་འདི་ཞུ་བར་འོངས་པ་ཡིན། ཁྱེད་ཀྱི་གཡོག་མོས། བདག་གིས་རྒྱལ་པོ་ལ་ཞུས་ན་རྒྱལ་པོས་ཉིད་ཀྱི་གཡོག་མོའི་ཞུ་བ་བཞིན་མཛད་ཀྱང་སྲིད།
2SA 14:16 མི་ཡིས་བདག་དང་བདག་གི་བུ་གཉིས་མཉམ་དུ་དཀོན་མཆོག་གི་ནོར་སྐལ་ལས་མེད་པར་བྱེད་འདོད་པ་དང་། རྒྱལ་པོས་འདི་གསན་ནས་གཡོག་མོ་བདག་མི་རྣམས་ཀྱི་ལག་ནས་སྐྱོབ་ངེས་ཡིན་སྙམ་པ་དང་།
2SA 14:17 ཡང་ཁྱེད་ཀྱི་གཡོག་མོས། བདག་གི་ཇོ་བོ་དང་བདག་གི་རྒྱལ་པོའི་གསུང་གིས་ང་ལ་སེམས་གསོ་གནང་བར་ངེས་སྙམ་པ་ཡིན། གང་ལ་ཞེ་ན། བདག་གི་ཇོ་བོ་དང་བདག་གི་རྒྱལ་པོ་ནི་ལེགས་ཉེས་འབྱེད་པའི་ཐད་དཀོན་མཆོག་གི་ཕོ་ཉ་དང་འདྲ་བ་ལགས། ཁྱེད་ཀྱི་དཀོན་མཆོག་ཡ་ཝཱེ་ནི་ཁྱེད་དང་མཉམ་དུ་བཞུགས་པར་ཤོག་ཅེས་ཞུས་པའི་ལན་དུ།
2SA 14:18 རྒྱལ་པོས་བུད་མེད་དེ་ལ། ངས་ཁྱོད་ལ་ཚིག་གཅིག་འདྲི་བར་བྱ་སྟེ། ཁྱོད་ཀྱིས་གསང་བར་མི་བྱའོ་ཞེས་བསྐུལ་བར། བུད་མེད་ཀྱིས། བདག་གི་ཇོ་བོ་དང་བདག་གི་རྒྱལ་པོས་གསུང་བར་མཛོད་ཅེས་ཞུས་ཤིང་།
2SA 14:19 རྒྱལ་པོས། འདི་ཐམས་ཅད་ནི་ཡོ་ཨབ་ཀྱིས་ཁྱོད་ལ་བསྟན་པ་མིན་ནམ་ཞེས་དྲིས་པའི་ལན་དུ་བུད་མེད་ཀྱིས། བདག་གིས་རང་གི་ཇོ་བོ་དང་བདག་གི་རྒྱལ་པོའི་མདུན་དུ་མནའ་སྐྱེལ་ཏེ། བདག་གི་ཇོ་བོ་དང་བདག་གི་རྒྱལ་པོས་གནང་བའི་གསུང་ནི་གཡས་གཡོན་གང་དུའང་གཟུར་མེད། དེ་ནི་ཁྱེད་ཀྱི་ཞབས་ཕྱི་ཡོ་ཨབ་ཀྱིས་བདག་ལ་བསྒོས་ཤིང་། ཚིག་འདི་ཐམས་ཅད་ཁོས་གཡོག་མོ་བདག་གི་སྨྲ་སྒོ་རུ་བཞག་པ་ཡིན།
2SA 14:20 ཁྱེད་ཀྱི་ཞབས་ཕྱི་ཡོ་ཨབ་ཀྱིས་འདི་ལྟར་བྱེད་པ་ནི་གནས་ཚུལ་ཇེ་ལེགས་སུ་གཏོང་བའི་ཆེད་དུ་ཡིན་ཏེ། བདག་གི་ཇོ་བོའི་ཤེས་རབ་ནི་དཀོན་མཆོག་གི་ཕོ་ཉའི་ཤེས་རབ་དང་མཚུངས་ལ། ས་སྟེང་གི་དོན་ཐམས་ཅད་མཁྱེན་ནུས་པའོ་ཞེས་ཞུས་སོ། །
2SA 14:21 དེར་རྒྱལ་པོས་ཡོ་ཨབ་ལ། ལྟོས་ཤིག ངས་དེ་བཞིན་དུ་གནང་བས། སོང་ལ་ཨབ་ཤཱ་ལོམ་འདི་རུ་འཁྲིད་ཤོག་ཅེས་བསྒོས་པ་དང་།
2SA 14:22 ཡོ་ཨབ་ཀྱིས་ལུས་སར་བཏུད་ནས་ཕྱག་བཙལ་ཏེ་རྒྱལ་པོའི་ཆེད་དུ་སྨོན་འདུན་ཞུས་ཤིང་འདི་ལྟར། རྒྱལ་པོས་ཞབས་ཕྱི་བདག་གི་ཞུ་བ་བཞིན་དུ་མཛད་པས། བདག་གི་ཇོ་བོ་དང་བདག་གི་རྒྱལ་པོ་ཁྱེད་ཀྱི་སྤྱན་སྔར་ཐུགས་རྗེ་བརྙེད་པ་ཞབས་ཕྱིས་དེ་རིང་མཐོང་བ་ཡིན་ཞེས་ཞུས་ནས།
2SA 14:23 ཡོ་ཨབ་ཡར་ལངས་ཏེ་གེ་ཤུར་དུ་སོང་ནས་ཨབ་ཤཱ་ལོམ་ཕྱིར་ཡེ་རུ་སཱ་ལེམ་དུ་ཁྲིད་འོངས་ནའང་།
2SA 14:24 རྒྱལ་པོས་ཁོ་ནི་རང་གི་ཁྱིམ་ལ་འགྲོ་རུ་ཆུག་དང་། ངའི་མཐོང་སར་འོང་མི་རིགས་སོ་ཞེས་བཀའ་བསྩལ་པས། ཨབ་ཤཱ་ལོམ་རང་ཁྱིམ་དུ་སོང་ནས་རྒྱལ་པོ་མཇལ་བར་མ་གྱུར་ཏོ། །
2SA 14:25 ཡེས་ར་ཨེལ་ཡུལ་ཐམས་ཅད་དུ་ཨབ་ཤཱ་ལོམ་དང་འདྲ་བའི་སྐྱེས་ཡག་བསྔགས་བརྗོད་བྱ་རུང་བ་གཅིག་ཀྱང་མེད་དེ། དེའི་རྐང་མཐིལ་ནས་སྤྱི་བོའི་བར་དུ་སྐྱོན་གང་ཡང་མེད་པ་ཡིན།
2SA 14:26 ཁོའི་མགོ་ཡི་སྐྲ་ནི་ཧ་ཅང་ལྗིད་དེ། ལོ་རེའི་མཇུག་ཏུ་སྐྲ་ཐེངས་གཅིག་ལ་འབྲེག་པ་དང་། དེའི་སྐྲ་ཡི་ལྗིད་ཚད་ནི་རྒྱལ་པོའི་རྒྱ་མར་ཚད་ན་སྲང་ཉིས་བརྒྱ་ ཡོད་པ་རེད།
2SA 14:27 ཨབ་ཤཱ་ལོམ་ལ་བུ་གསུམ་དང་བུ་མོ་གཅིག་སྐྱེས་པ་དང་། བུ་མོའི་མིང་ལ་ཐལ་མཱར་ ཞེས་བཏགས་ཤིང་དེ་ནི་བུད་མེད་མཛེས་མ་ཞིག་ཡོད་པ་ཡིན།
2SA 14:28 ཨབ་ཤཱ་ལོམ་ལོ་ཧྲིལ་པོ་གཉིས་ལ་ཡེ་རུ་སཱ་ལེམ་དུ་གནས་ཀྱང་རྒྱལ་པོའི་ཞལ་མ་མཇལ་ལོ། །
2SA 14:29 དེ་ནས་ཨབ་ཤཱ་ལོམ་གྱིས་ཡོ་ཨབ་རྒྱལ་པོའི་དྲུང་དུ་མངག་ཆེད་བོས་ཀྱང་། ཡོ་ཨབ་མ་འོངས་པ་དང་། ཐེངས་གཉིས་པར་འབོད་དུ་མངགས་ཀྱང་མ་འོངས་པ་རེད།
2SA 14:30 དེའི་ཕྱིར་ཨབ་ཤཱ་ལོམ་གྱིས་རང་གི་ཞབས་ཕྱི་རྣམས་ལ། ལྟོས་ཤིག ཡོ་ཨབ་ཀྱི་ཞིང་ངའི་ཞིང་གི་འགྲམ་དུ་ཡོད་ཅིང་དེ་རུ་ནས་བཏབ་ཡོད། སོང་ལ་དེ་མེ་རུ་བསྲེག་པར་གྱིས་ཤིག་ཅེས་བསྒོས་པ་དང་། ཨབ་ཤཱ་ལོམ་གྱི་ཞབས་ཕྱི་རྣམས་སོང་ནས་ཞིང་དེ་མེར་བསྲེགས་སོ། །
2SA 14:31 དེར་ཡོ་ཨབ་ཡར་ལངས་ཏེ་ཨབ་ཤཱ་ལོམ་གྱི་ཁྱིམ་དུ་འོངས་ནས་དེ་ལ། ཁྱེད་ཀྱི་ཞབས་ཕྱི་རྣམས་ཀྱིས་ཅིའི་ཕྱིར་ངའི་ཞིང་བསྲེགས་པ་ཡིན་ཞེས་པའི་ལན་དུ།
2SA 14:32 ཨབ་ཤཱ་ལོམ་གྱིས་ཡོ་ཨབ་ལ། ལྟོས་དང་། ངས་མི་མངགས་ནས་ཁྱོད་འདིར་བོས་ཏེ། ཁྱོད་རྒྱལ་པོའི་དྲུང་དུ་མངགས་ནས་ཁོང་ལ། བདག་གེ་ཤུར་ནས་ཕྱིར་འོངས་དོན་ཅི་ཡོད། བདག་སྔར་བཞིན་དེ་རུ་གནས་ན་ལེགས་པ་ཡིན་ཞེས་ཞུ་བའི་ཕྱིར་ཡིན། ད་བདག་ལ་རྒྱལ་པོའི་ཞལ་མཇལ་དུ་གནོངས་ཤིག གལ་ཏེ་བདག་ལ་ཉེས་སྐྱོན་ཡོད་ན་ཁོང་གིས་བདག་སྲོག་དང་འཕྲལ་བར་རུང་ངོ་ཞེས་སྨྲས་པས།
2SA 14:33 ཡོ་ཨབ་རྒྱལ་པོའི་དྲུང་དུ་ཕྱིན་ནས་ཁོང་ལ་ཞུས་པ་དང་རྒྱལ་པོས་ཨབ་ཤཱ་ལོམ་བོས་ཤིང་། དེ་རྒྱལ་པོའི་དྲུང་དུ་འོངས་ནས་ལུས་སར་བཏུད་ཅིང་རྒྱལ་པོས་ཁོ་ལ་འོ་བྱས་སོ། །
2SA 15:1 དེའི་རྗེས་སུ་ཨབ་ཤཱ་ལོམ་གྱིས་རང་གི་དོན་དུ་ཤིང་རྟ་དང་རྟ་རྣམས་གྲ་སྒྲིག་བྱས་ཤིང་། ཡང་མི་ལྔ་བཅུ་མངགས་ཏེ་ཁོའི་མདུན་ནས་རྒྱུག་ཏུ་བཅུག
2SA 15:2 ཨབ་ཤཱ་ལོམ་དུས་རྒྱུན་ནངས་སྔ་མོ་ཡར་ལངས་ནས་མཁར་སྒོའི་ལམ་འགྲམ་དུ་ལངས་བསྡད་ཅིང་། ཡང་སུ་དང་སུ་ཞིག་རྩོད་གཞི་ལ་ཁྲིམས་ཐག་གཅོད་པའི་ཕྱིར་རྒྱལ་པོའི་དྲུང་དུ་འོང་སྐབས་སུ། ཨབ་ཤཱ་ལོམ་གྱིས་མི་དེ་བོས་ནས་དེ་ལ། ཁྱོད་རང་གྲོང་ཁྱེར་གང་ནས་ཡིན་ཞེས་འདྲི་ཞིང་། མི་དེས། ཞབས་ཕྱི་བདག་ནི་ཡེས་ར་ཨེལ་གྱི་ཚོ་པ་ག་གེ་མོའི་ཡིན་ཞེས་ཞུ་བ་དང་།
2SA 15:3 ཨབ་ཤཱ་ལོམ་གྱིས་དེ་ལ། ལྟོས་དང་། ཁྱོད་ཀྱི་གྱོད་དོན་ནི་ལེགས་ཤིང་ལུགས་དང་མཐུན་མོད་ཀྱང་། རྒྱལ་པོས་ཁྱོད་ཀྱི་ཚིག་ལ་མཉན་པར་མི་གང་ཡང་མ་མངགས་པས་ཕངས་པ་ལ་ཞེས་དང་།
2SA 15:4 ཡང་ཨབ་ཤཱ་ལོམ་ན་རེ། གལ་ཏེ་ང་རང་ཡུལ་འདིའི་ཁྲིམས་དཔོན་ཡིན་ན་ཅི་མ་རུང་། དེ་ནས་རྩོད་གཞི་ཡོད་པ་ཐམས་ཅད་ངའི་རྩར་སླེབས་ན། ངས་དྲང་གཞག་ངང་ཁྲིམས་ཐག་གཅོད་པར་བྱ་ཞེས་སྨྲའོ། །
2SA 15:5 ཡང་གལ་ཏེ་སུ་ཞིག་ཨབ་ཤཱ་ལོམ་ལ་ཕྱག་བཙལ་དུ་ཉེ་བར་འོང་སྐབས་སུ། ཁོས་ལག་པ་བརྐྱངས་ནས་མི་དེའི་ལག་པར་འཇུས་ནས་འོ་བྱེད་པའོ། །
2SA 15:6 ཨབ་ཤཱ་ལོམ་གྱིས་རྒྱལ་པོའི་དྲུང་དུ་གཏུག་བཤེར་ལ་འོང་བའི་ཡེས་ར་ཨེལ་པ་ཐམས་ཅད་ལ་དེ་ལྟར་བྱས་ནས་ཡེས་ར་ཨེལ་པ་ཐམས་ཅད་ཀྱི་སེམས་ཕྲོགས་པ་རེད།
2SA 15:7 དེ་ནས་ལོ་བཞི་འགོར་རྗེས་ཨབ་ཤཱ་ལོམ་གྱིས་རྒྱལ་པོ་ལ། བདག་གིས་དཀོན་མཆོག་ཡ་ཝཱེ་ལ་ཁས་བླངས་པ་བཞིན་དུ་བསྒྲུབ་པའི་ཕྱིར་བདག་ཧེབ་རོན་དུ་འགྲོ་བར་གནོངས་ཤིག
2SA 15:8 ཞབས་ཕྱི་བདག་ཨ་རམ་ཡུལ་གྱི་གེ་ཤུར་དུ་གནས་པའི་དུས་སུ། བདག་གིས་འདི་ལྟར་དམ་བཅའ་བཞག་པ་སྟེ། གལ་ཏེ་དཀོན་མཆོག་ཡ་ཝཱེས་བདག་ཕྱིར་ཡེ་རུ་སཱ་ལེམ་དུ་བསྐྱལ་ན། བདག་གིས་དཀོན་མཆོག་ཡ་ཝཱེ་ལ་ཞབས་ཕྱི་བསྒྲུབ་པར་བྱ་ཞེས་ཞུས་པར།
2SA 15:9 རྒྱལ་པོས་དེ་ལ། བདེ་བར་སོང་ཞིག་གསུངས་པ་དང་ཁོ་ལངས་ནས་ལམ་ལ་ཆས་ཏེ་ཧེབ་རོན་དུ་སོང་ངོ་། །
2SA 15:10 དེ་ནས་ཨབ་ཤཱ་ལོམ་གྱིས་ཡེས་ར་ཨེལ་གྱི་ཚོ་པ་ཐམས་ཅད་དུ་གསང་ཉུལ་པ་རྣམས་བཏང་སྟེ་འདི་ལྟར། དུས་ནམ་ཞིག་ལ་ཁྱོད་ཚོས་རྭ་དུང་གི་སྒྲ་ཐོས་ན། ཨབ་ཤཱ་ལོམ་གྱིས་ཧེབ་རོན་དུ་རྒྱལ་སྲིད་སྐྱོང་ངོ་ཞེས་སྨྲ་བར་རིགས་ཞེས་བསྒྲགས་སོ། །
2SA 15:11 ཨབ་ཤཱ་ལོམ་གྱིས་ཡེ་རུ་སཱ་ལེམ་ནས་མི་ཉིས་བརྒྱ་རང་དང་མཉམ་དུ་ཁྲིད་ནས་ཕྱིན་ཏེ། དེ་དག་ནི་ལྷག་བསམ་རྣམ་དག་ཡིན་ཏེ་ཅི་ཡང་མི་ཤེས་སོ། །
2SA 15:12 དེ་ནས་ཨབ་ཤཱ་ལོམ་གྱིས་མཆོད་པ་འབུལ་སྐབས་སུ། མི་མངགས་ཏེ་དཱ་བིད་ཀྱི་བློ་འདོན་མཁན་གེ་ལོ་པ་ཨ་ཧི་ཐོ་ཕེལ་བོས་འོངས་པ་དང་། ཨབ་ཤཱ་ལོམ་གྱི་རྗེས་སུ་འབྲང་མཁན་ཉིན་རེ་བཞིན་འཕེལ་ཏེ་གྱེན་ལོག་གི་ཤུགས་ཆེ་རུ་སོང་ངོ་། །
2SA 15:13 ཡང་མི་ཞིག་དཱ་བིད་ཀྱི་དྲུང་དུ་སླེབས་ནས་ཁོང་ལ། ཡེས་ར་ཨེལ་པ་ཐམས་ཅད་ཀྱི་སེམས་ཨབ་ཤཱ་ལོམ་གྱི་ཕྱོགས་སུ་འཁོར་འདུག་ཅེས་ཞུས་པ་ལ།
2SA 15:14 དཱ་བིད་ཀྱིས་ཡེ་རུ་སཱ་ལེམ་དུ་ཁོང་དང་ལྷན་ཅིག་ཏུ་ཡོད་པའི་བློན་འཁོར་ཐམས་ཅད་ལ། ལོངས་དང་འབྲོའོ། །མ་བྲོས་ན་བདག་ཅག་ཨབ་ཤཱ་ལོམ་གྱི་ལག་ནས་ཐར་ཐབས་མེད། ཁོ་མྱུར་དུ་འོངས་ནས་བདག་ཅག་བཟུང་སྟེ་གནོད་འཚེ་བཏང་ནས། གྲོང་ཁྱེར་ནང་གི་མི་རྣམས་རལ་གྲིས་མི་གསོད་པའི་ཕྱིར་འཕྲལ་དུ་འབྲལ་བར་གྱིས་ཤིག་ཅེས་སྨྲས་ཤིང་།
2SA 15:15 རྒྱལ་པོའི་བློན་འཁོར་རྣམས་ཀྱིས་རྒྱལ་པོ་ལ། གཟིགས་དང་། ཁྱེད་ཀྱི་ཞབས་ཕྱི་རྣམས་ཀྱིས་ཇོ་བོ་རྒྱལ་པོས་ཅི་ལྟར་ཐུགས་ཐག་བཅད་ན་དེ་བཞིན་བྱའོ་ཞེས་ཞུས་སོ། །
2SA 15:16 དེ་ནས་རྒྱལ་པོ་ཕྱི་རོལ་ཏུ་ཕྱིན་པ་དང་། ཁོང་གི་ཁྱིམ་མི་ཐམས་ཅད་ཁོང་གི་རྗེས་སུ་འབྲངས་སོ། །ཡང་རྒྱལ་པོས་ཆུན་མ་བཅུ་ནི་ཕོ་བྲང་བསྲུང་བར་དེ་རུ་བཞག་གོ །
2SA 15:17 རྒྱལ་པོ་ཕྱི་རོལ་ཏུ་ཕྱིན་པ་དང་། མི་ཐམས་ཅད་ཀྱང་ཁོང་གི་རྗེས་སུ་འབྲངས་ཏེ་ཆེས་མཇུག་གི་ཁང་པར་སླེབས་ནས་དེར་ཡུད་ཙམ་བསྡད་པ་དང་།
2SA 15:18 རྒྱལ་པོའི་བློན་འཁོར་ཐམས་ཅད་ཁོང་གི་མདུན་ནས་ཕར་ཕྱིན་པ་དང་། ཡང་ཀེ་རེད་པ་དང་། ཕེ་ལེད་པ་ཐམས་ཅད་དང་། གཱད་ནས་རྒྱལ་པོའི་རྗེས་སུ་འོངས་པའི་གཱད་པ་མི་དྲུག་བརྒྱ་བཅས་ཐམས་ཅད་རྒྱལ་པོའི་མདུན་ནས་ཕར་ཕྱིན་ཏོ། །
2SA 15:19 རྒྱལ་པོས་གཱད་པ་ཨིད་ཏ་ཨི་བྱ་བ་ལ། ཁྱོད་ནི་ཕྱི་ཕྱོགས་པ་ཞིག་དང་རང་ཡུལ་ནས་བྲོས་འོངས་པ་ཡིན་པས་ངེད་རྣམས་དང་མཉམ་དུ་ཅིའི་ཕྱིར་འགྲོའམ། ཁྱོད་རང་ཕྱིར་ལོག་ནས་རྒྱལ་པོ་གསར་པ་དང་མཉམ་དུ་སྡོད་ཅིག
2SA 15:20 ཁྱོད་ནི་ཁ་སང་འདིར་སླེབས་ཤིང་། དེ་རིང་ངས་ཁྱོད་ངེད་རྣམས་དང་མཉམ་དུ་ཡུལ་འཁྱམ་དུ་འཇུག་ག་ལ་རུང་། ང་ནི་ག་ས་གང་དུ་འཁྱམ་པར་འགྱུར་རོ། །ཁྱོད་རང་ཕྱིར་ལོག་ཅིག རང་གི་སྤུན་རྣམས་ཁྲིད་ནས་ཕྱིར་ལོག་ཅིག གཙོ་བོས་བྱམས་བརྩེ་དང་དྲང་བདེན་ངང་ཁྱོད་རང་སྐྱོང་བར་ཤོག་ཅེས་གསུངས་པ་ལ།
2SA 15:21 ཨིད་ཏ་ཨི་ཡིས་ལན་དུ་རྒྱལ་པོ་ལ། བདག་གིས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་རྒྱལ་པོའི་དྲུང་དུ་མནའ་བསྐྱལ་བ་ཡིན་ཏེ། འཆི་གསོན་གང་ལ་ཐུག་ནའང་། ངའི་ཇོ་བོ་དང་ངའི་རྒྱལ་པོ་ཁྱེད་ཉིད་གང་དུ་བཞུགས་ན་ཁྱེད་ཀྱི་ཞབས་ཕྱི་ཡང་དེར་འདུག་པར་དགའོ་ཞེས་ཞུས་པས།
2SA 15:22 དཱ་བིད་ཀྱིས་ཨིད་ཏ་ཨི་ལ། ཕ་རོལ་ཏུ་སོང་ཞིག་གསུངས་ནས། གཱད་པ་ཨིད་ཏ་ཨི་ཡིས་རང་གི་རྗེས་སུ་འབྲང་བའི་མི་དང་བྱིས་པ་ཐམས་ཅད་ཁྲིད་ནས་ཕར་ཕྱིན་ཏོ། །
2SA 15:23 ཡང་འབངས་མི་ཐམས་ཅད་ཕར་འགྲོ་བའི་དུས་སུ། ཡུལ་མི་ཐམས་ཅད་སྐད་ཆེན་པོས་ངུས་ཤིང་། ཡང་རྒྱལ་པོ་ཉིད་ཀྱང་ཀིད་རོན་གྲོག་མོ་བརྒལ་ནས་ཕེབས་པ་དང་། མི་ཐམས་ཅད་དབེན་སྟོང་གི་ལམ་དུ་ཆས་པ་རེད།
2SA 15:24 ཡང་ལྟོས་དང་། ཟཱ་ཏོག་དང་དཀོན་མཆོག་གི་ཞལ་ཆད་ཀྱི་ཤུར་སྒམ་འཁུར་མཁན་ལེ་ཝི་པ་ཐམས་ཅད་དེ་རུ་འོངས་པ་དང་། དེ་དག་གིས་དཀོན་མཆོག་གི་ཞལ་ཆད་ཀྱི་ཤུར་སྒམ་གནས་དེར་བཞག ཨབ་ཡཱ་ཐར་ཡང་ཡར་འོངས་ནས་མི་ཐམས་ཅད་རྒྱལ་ས་ནས་ཐོན་ཏེ་ཕར་ཕྱིན་པའི་བར་དུ་དེར་བཞུགས་སོ། །
2SA 15:25 དེར་རྒྱལ་པོས་ཟཱ་ཏོག་ལ། དཀོན་མཆོག་གི་ཞལ་ཆད་ཀྱི་ཤུར་སྒམ་དེ་སླར་རྒྱལ་ས་རུ་འཁྱེར་ཞིག གལ་ཏེ་དཀོན་མཆོག་ཡ་ཝཱེའི་སྤྱན་སྔར་བདག་ལ་ཐུགས་རྗེ་ཐོབ་ན། ཁོང་གིས་བདག་ཕྱིར་ལོག་པར་མཛད་ཅིང་། ཞལ་ཆད་ཀྱི་ཤུར་སྒམ་དང་ཁོང་གི་བཞུགས་གནས་ཀྱང་བདག་གིས་སླར་ཡང་མཇལ་བར་འགྱུར་རོ། །
2SA 15:26 གལ་ཏེ་ཁོང་གིས། ང་ཁྱོད་ལ་མི་དགའ་ཞེས་གསུངས་ན། ཀྱེ་ཧོ། ང་རང་འདི་རུ་ཡོད་དེ། ཁོང་གི་སྤྱན་སྔར་གང་ལེགས་པར་གཟིགས་པ་བཞིན་བདག་ལ་མཛོད་ཅིག་ཅེས་ཞུས་སོ། །
2SA 15:27 ཡང་རྒྱལ་པོས་མཆོད་དཔོན་ཟཱ་ཏོག་ལ། ཁྱེད་ནི་མངོན་ཤེས་པ་ཞིག་མིན་ནམ། བདེ་བར་རྒྱལ་ས་རུ་ལོག་ཅིག ཡང་ཁྱོད་ཀྱི་བུ་ཨ་ཧི་མཱ་ཨ་སི་དང་། ཨབ་ཡཱ་ཐར་གྱི་བུ་ཡོ་ནཱ་ཐན། ཁྱོད་གཉིས་ཀྱི་བུ་དེ་གཉིས་ཁྱོད་རྣམས་དང་མཉམ་དུ་ཕྱིར་སོང་ཞིག
2SA 15:28 ལྟོས་དང་། ཁྱོད་ཅག་གིས་ང་ལ་ལན་བསྐུར་བའི་བར་དུ་ངས་དབེན་སྟོང་གི་རབ་ཁ་རུ་སྒུག་པར་བྱའོ་ཞེས་བསྐུལ་བས།
2SA 15:29 ཟཱ་ཏོག་དང་ཨབ་ཡཱ་ཐར་གཉིས་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ཕྱིར་ཡེ་རུ་སཱ་ལེམ་དུ་གདན་དྲངས་ནས་དེར་བསྡད་དོ། །
2SA 15:30 དེ་ནས་དཱ་བིད་དབུ་བཏུམས་ནས་ཞབས་རྗེན་པར་སྐྱུ་རུ་རའི་རི་བོར་འགོས་ཤིང་། སྤྱན་ཆབ་བསིལ་བཞིན་འགྲུལ་པ་དང་། ཁོང་གི་རྗེས་སུ་འབྲངས་པའི་མི་ཀུན་གྱིས་ཀྱང་མགོ་བཏུམས་ནས་ངུ་བཞིན་ཡར་འགོས་སོ། །
2SA 15:31 ཡང་མི་ཞིག་གིས་དཱ་བིད་ལ། ཨ་ཧི་ཐོ་ཕེལ་ཡང་འབངས་གྱེན་ལོག་བྱེད་མཁན་མཉམ་དུ་ཨབ་ཤཱ་ལོམ་གྱི་རྗེས་སུ་འབྲང་ཡོད་ཅེས་ཞུས་པར། དཱ་བིད་ན་རེ། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཨ་ཧི་ཐོ་ཕེལ་གྱི་གྲོས་དེ་ནི་བླུན་གྲོས་སུ་འགྱུར་བར་མཛོད་ཅིག་ཅེས་གསོལ་ཏོ། །
2SA 15:32 དེ་ནས་དཱ་བིད་དཀོན་མཆོག་ལ་ཕྱག་འཚལ་ཡུལ་རི་མགོར་སླེབས་པ་ཙམ་གྱིས། ལྟོས་དང་། ཨ་རག་པ་ཧུ་ཤཱ་ཨི་ནི་གྱོན་གོས་གཤགས་ནས་མགོ་ལ་ས་རྡུལ་གཡོགས་ཏེ་ཁོང་བསུ་བར་འོངས་པ་དང་།
2SA 15:33 དཱ་བིད་ཀྱིས་དེ་ལ། ཁྱོད་ང་དང་མཉམ་དུ་སོང་ཚེ་ང་ལ་དཀའ་ལས་བཟོ་ངེས་ཡིན།
2SA 15:34 ཁྱོད་རྒྱལ་ས་རུ་སོང་སྟེ་ཨབ་ཤཱ་ལོམ་ལ། ཀྱེ་རྒྱལ་པོ་ལགས། བདག་ནི་ཁྱེད་ཀྱི་ཞབས་ཕྱི་ཡིན། ང་རང་ཇི་ལྟར་ཁྱེད་ཀྱི་ཡབ་ཀྱི་ཞབས་ཕྱི་ཡིན་པ་བཞིན་ད་ལྟ་ཁྱེད་ཀྱི་ཞབས་ཕྱི་ཡིན་ཞེས་སྨྲས་ན། ཁྱེད་ཀྱིས་ངའི་དོན་དུ་ཨ་ཧི་ཐོ་ཕེལ་གྱི་གྲོས་ངན་བཟློག་སྲིད་དོ། །
2SA 15:35 ཟཱ་ཏོག་དང་ཨབ་ཡཱ་ཐར་མཆོད་དཔོན་གཉིས་ནི་ཁྱོད་དང་མཉམ་དུ་ཡོད་པ་མ་ཡིན་ནམ། ཁྱོད་ཀྱིས་རྒྱལ་པོའི་ཕོ་བྲང་ནས་ཅི་ཐོས་པ་དེ་མཆོད་དཔོན་ཟཱ་ཏོག་དང་ཨབ་ཡཱ་ཐར་གཉིས་ལ་འཆད་དགོས།
2SA 15:36 ལྟོས་དང་། ཟཱ་ཏོག་གི་བུ་ཨ་ཧི་མཱ་ཨ་སི་དང་། ཨབ་ཡཱ་ཐར་གྱི་བུ་ཡོ་ནཱ་ཐན་གཉིས་ཀྱང་ཁོང་རྣམས་མཉམ་དུ་ཡོད་པས། ཁྱོད་ཀྱིས་ཅི་ཐོས་པ་དེ་དག་བརྒྱུད་ནས་ང་ལ་འཕྲིན་བསྐུར་ཞིག་ཅེས་གདམས་པས།
2SA 15:37 དཱ་བིད་ཀྱི་མཛའ་བོ་ཧུ་ཤཱ་ཨི་རྒྱལ་ས་རུ་ཕྱིན་པ་དང་། ཨབ་ཤཱ་ལོམ་ཡང་ཡེ་རུ་སཱ་ལེམ་དུ་སླེབས་སོ། །
2SA 16:1 དཱ་བིད་རི་རྩེ་ལས་བརྒལ་བའི་ཚེ། ལྟོས་དང་། མེ་ཕི་པོ་ཤེད་ཀྱི་གཡོག་པོ་ཙི་བཱ་ཡིས་སྒ་གཏད་པའི་བོང་བུ་གཉིས་ཁྲིད་ནས་དེ་ལ་བག་ལེབ་ཉིས་བརྒྱ་དང་། རྒུན་འབྲུམ་སྐམ་པོ་ལེབ་མོ་བརྒྱ་དང་ཤིང་འབྲས་ལེབ་མོ་བརྒྱ་དང་། རྒུན་ཆང་རྐྱལ་བ་གང་བཅས་བཀལ་ནས་ཁོང་ཉིད་བསུ་བར་འོངས་སོ། །
2SA 16:2 དེར་རྒྱལ་པོས་ཙི་བཱ་ལ། འདི་དག་ཅི་ཡིན་ལགས་ཞེས་དྲིས་པའི་ལན་དུ་ཙི་བཱ་ན་རེ། བོང་བུ་ནི་རྒྱལ་པོའི་ཁྱིམ་མི་རྣམས་ཀྱི་ཞོན་པ་ཡིན་ལ། བག་ལེབ་དང་ཤིང་འབྲས་ལེབ་མོ་རྣམས་ནི་གཞོན་ནུ་རྣམས་ཀྱི་ཁ་ཟས་དང་། རྒུན་ཆང་ནི་དབེན་སྟོང་དུ་ཐང་ཆད་པ་རྣམས་ཀྱི་བཏུང་བྱ་ཡིན་ཞུས་པ་དང་།
2SA 16:3 རྒྱལ་པོས་དེ་ལ། ཁྱོད་ཀྱི་ཇོ་བོའི་བུ་གང་དུ་ཡོད་དམ་ཞེས་དྲིས་པར། ཁོ་ན་རེ། གཟིགས་དང་། ཁོང་གིས་དེ་རིང་ཉིན་མོར་ཡེས་ར་ཨེལ་གྱི་ཁྱིམ་རྒྱུད་ཀྱིས་ངའི་ཡབ་ཀྱི་རྒྱལ་སྲིད་ང་ལ་སླར་སྦྱིན་པར་བྱ་ཞེས་གསུངས་པས། ཁོང་ཉིད་ཡེ་རུ་སཱ་ལེམ་དུ་བཞུགས་པ་ཡིན་ཞེས་ཞུས་ཤིང་།
2SA 16:4 རྒྱལ་པོས་ཙི་བཱ་ལ། ལྟོས་ཤིག མེ་ཕི་པོ་ཤེད་ལ་ཡོད་པ་ཐམས་ཅད་ཁྱོད་ལ་དབང་བར་འགྱུར་རོ་ཞེས་གསུངས་ཤིང་། ཙི་བཱ་ཡིས། ངས་བདག་གི་ཇོ་བོ་དང་བདག་གི་རྒྱལ་པོ་ལ་གུས་ཕྱག་ཕུལ་ཏེ། ཁྱེད་ཀྱི་དྲུང་དུ་བདག་ལ་ཐུགས་རྗེ་འཐོབ་པར་ཤོག་ཅེས་ཞུས་སོ། །
2SA 16:5 དེ་ནས་རྒྱལ་པོ་དཱ་བིད་པཱ་ཧུ་རིམ་དུ་ཕེབས་པའི་ཚེ་ན། སོ་ལོའི་ཁྱིམ་མི་ནང་གི་གེ་རཱ་ཡི་བུ་ཤིམ་ཨི་བྱ་བ་དེ་དམོད་མོ་འདེབས་ཀྱིན་ཐོན་ཏེ།
2SA 16:6 རྒྱལ་པོ་དཱ་བིད་དང་ཁོང་གི་བློན་འཁོར་ཀུན་ལ་རྡོས་བརྒྱབ་ཅིང་། འབངས་རྣམས་དང་དཔའ་བོ་ཐམས་ཅད་ཁོང་གི་གཡས་གཡོན་དུ་ཡོད་པ་ཡིན།
2SA 16:7 ཤིམ་ཨི་ཡིས་དམོད་མོ་བཏབ་ནས་འདི་ལྟར། ཁྲག་གིས་ཚོས་པ་ཁྱོད། ཁྲེལ་མེད་ཁྱོད། མར་སོང་ཞིག མར་སོང་ཞིག
2SA 16:8 ཁྱོད་ཀྱིས་སོ་ལོ་ཁྱིམ་མི་གང་པོ་བཀྲོངས་ཏེ་ཁོང་གི་རྒྱུན་མཐུད་ནས་རྒྱལ་པོར་གྱུར་པ་དང་། དཀོན་མཆོག་ཡ་ཝཱེས་སྡིག་པ་དེ་ཁྱོད་ཀྱི་སྟེང་ལ་བཀལ་ཞིང་། ཁྱོད་ཀྱི་རྒྱལ་སྲིད་ཁྱོད་ཀྱི་བུ་ཨབ་ཤཱ་ལོམ་གྱི་ལག་ཏུ་གཏད་དོ། །ལྟོས་དང་། ཁྱོད་ནི་ལག་དམར་ཡིན་པས་རང་སྡུག་རང་གིས་ཉོས་པ་ཡིན་ཞེས་སྨྲས་སོ། །
2SA 16:9 ཟེ་རུ་ཡཱ་ཡི་བུ་ཨ་བི་ཤཱ་ཨི་ཡིས་རྒྱལ་པོ་ལ། ཁྱི་ཤི་རོ་འདིས་བདག་གི་ཇོ་བོ་དང་བདག་གི་རྒྱལ་པོ་ལ་ཅིའི་ཕྱིར་དམོད་མོ་འདེབས་སམ། བདག་ཕར་སོང་ནས་ཁོའི་མགོ་ལེན་པར་གནང་རོགས་ཞེས་ཞུས་པ་ལ།
2SA 16:10 རྒྱལ་པོས། ཀྱེ་ཟེ་རུ་ཡཱ་ཡི་བུ། ང་རང་ཁྱོད་དང་འབྲེལ་བ་ཅི་ཡོད་དམ། དཀོན་མཆོག་ཡ་ཝཱེས་དེ་ལ། དཱ་བིད་ལ་དམོད་མོ་ཐོབས་ཤིག་ཅེས་གསུངས་པས་ཁོས་འདི་ལྟར་དམོད་པ་ཡིན་ལ། དེས་ན་སུ་ཞིག་གིས་ཁོ་ལ། ཁྱོད་ཀྱིས་འདི་ལྟར་བྱེད་པ་ཅི་ཡིན་ཟེར་ཐུབ་བམ་ཞེས་གསུངས་སོ། །
2SA 16:11 ཡང་དཱ་བིད་ཀྱིས་ཨ་བི་ཤཱ་ཨི་དང་ཉིད་ཀྱི་བློན་འཁོར་ཐམས་ཅད་ལ། ལྟོས་ཤིག ང་རང་གི་བུ་ཡང་ངའི་སྲོག་ལ་རྔམ་པས། པེན་ཡཱ་མེན་པ་འདི་ནི་ལྟ་ཅི་སྨོས། དཀོན་མཆོག་ཡ་ཝཱེས་ཁོ་ལ་བཀའ་བསྩལ་པས་དེར་དམོད་མོ་འདེབས་ན་འདེབས་སུ་ཆུག་དང་།
2SA 16:12 དཀོན་མཆོག་ཡ་ཝཱེས་ངའི་སྡུག་བསྔལ་གཟིགས་ཤིང་། དེ་རིང་ཉིན་མོར་མི་འདིས་དམོད་མོ་བཏབ་པའི་རྐྱེན་གྱིས་ང་ལ་ཐུགས་རྗེས་གཟིགས་ཀྱང་སྲིད་ཅེས་གསུངས་སོ། །
2SA 16:13 ཡང་དཱ་བིད་དང་ཁོང་གི་མི་རྣམས་ལམ་ནས་འགྲུལ་བ་དང་། ཤིམ་ཨི་ནི་དཱ་བིད་དང་ཁ་གཏད་ཀྱི་རི་ངོར་སྐྱོད་ཅིང་། འགྲོ་ཞོར་དུ་དམོད་མོ་བཏབ་པ་དང་། ཡང་ཁོང་ལ་རྡོ་ཡིས་བརྒྱབ་ནས་ས་རྡུལ་འཕྱར།
2SA 16:14 རྒྱལ་པོ་དང་ཁོང་གི་རྗེས་སུ་འབྲངས་པའི་མི་ཐམས་ཅད་དེར་སླེབས་ནས་ཐང་ཆད་དེ་ངལ་གསོས་སོ། །
2SA 16:15 དེ་ནས་ཨབ་ཤཱ་ལོམ་དང་ཡེས་ར་ཨེལ་གྱི་མི་ཐམས་ཅད་ཡེ་རུ་སཱ་ལེམ་དུ་ཕྱིན་ཏེ། ཨ་ཧི་ཐོ་ཕེལ་ཡང་དེ་དང་མཉམ་དུ་ཡོད་པ་ཡིན།
2SA 16:16 ཡང་དཱ་བིད་ཀྱི་མཛའ་བོ་ཨ་རག་པ་ཧུ་ཤཱ་ཨི་བྱ་བ་དེ་ཨབ་ཤཱ་ལོམ་གྱི་དྲུང་དུ་སོང་ནས་དེ་ལ། རྒྱལ་པོ་སྐུ་ཚེ་བརྟན་པར་ཤོག རྒྱལ་པོ་སྐུ་ཚེ་བརྟན་པར་ཤོག་ཅེས་ཞུས་པར།
2SA 16:17 ཨབ་ཤཱ་ལོམ་གྱིས་ཧུ་ཤཱ་ཨི་ལ། ཁྱོད་ཀྱིས་འདི་ལྟར་བྱེད་པ་ནི་གཞུང་དྲང་ངང་རང་གི་མཛའ་བོ་དྲིན་གྱིས་སྐྱོང་བ་ཡིན་ནམ། ཁྱོད་རང་ཅིའི་ཕྱིར་རང་གི་མཛའ་བོ་མཉམ་དུ་མ་སོང་ངམ་ཞེས་དྲིས་ཤིང་།
2SA 16:18 ཧུ་ཤཱ་ཨི་ཡིས་ཨབ་ཤཱ་ལོམ་ལ། དེ་བཞིན་མ་ཡིན། དཀོན་མཆོག་ཡ་ཝཱེ་དང་མི་རྣམས་དང་། ཡེས་ར་ཨེལ་པ་ཡོངས་ཀྱིས་སུ་ཞིག་བདམས་པར་མཛད་ན། བདག་ནི་ཁོང་ལ་གཏོགས་ཤིང་ཁོང་དང་མཉམ་དུ་གནས་པར་འགྱུར།
2SA 16:19 དེར་མ་ཟད། བདག་གིས་སུ་ལ་ཞབས་ཏོག་བསྒྲུབ་འོས་སམ། རྒྱལ་རབས་སྔོན་མའི་སྲས་མ་ཡིན་ནམ། བདག་གིས་ཇི་ལྟར་ཁྱེད་ཀྱི་ཡབ་ལ་ཞབས་ཏོག་བསྒྲུབས་པ་ཡིན་ན་ཁྱེད་ཀྱི་སྐུ་དྲུང་དུའང་དེ་བཞིན་བྱའོ་ཞེས་ཞུས་སོ། །
2SA 16:20 ཨབ་ཤཱ་ལོམ་གྱིས་ཨ་ཧི་ཐོ་ཕེལ་ལ། ད་བདག་ཅག་གིས་གང་འདྲ་བྱེད་དགོས་སམ། ཁྱོད་རྣམས་ཀྱིས་བློ་བཀོད་བཏོན་ཞིག་ཅེས་བསྒོས་པ་ལ།
2SA 16:21 ཨ་ཧི་ཐོ་ཕེལ་གྱིས་ཨབ་ཤཱ་ལོམ་ལ། ཁྱེད་ཀྱི་ཡབ་ཀྱིས་ཕོ་བྲང་བསྲུང་བར་བཞག་པའི་ཆུན་མ་རྣམས་ཀྱི་གམ་དུ་ཕྱིན་དང་། ཁྱེད་ཀྱིས་རང་གི་ཡབ་ཀྱང་རང་ལ་ཞེན་ཁ་ལོག་ཏུ་འཇུག་ཕོད་པ་དེ་ཡེས་ར་ཨེལ་པ་ཐམས་ཅད་ཀྱིས་ཐོས་ན། ཁྱེད་ཀྱི་རྗེས་སུ་འབྲང་བ་ཐམས་ཅད་ཀྱི་སྟོབས་ཤུགས་ཆེ་བར་འགྱུར་འགྲོ་ཞེས་སྨྲས་ནས།
2SA 16:22 དེ་དག་གིས་ཕོ་བྲང་གི་སྟེང་དུ་ཨབ་ཤཱ་ལོམ་གྱི་ཕྱིར་གུར་ཕུབ་ཅིང་། ཁོ་ཡེས་ར་ཨེལ་པ་ཐམས་ཅད་ཀྱི་མཐོང་ས་རུ་རང་གི་ཡབ་ཀྱི་ཆུན་མ་རྣམས་ཀྱི་གམ་དུ་སོང་ངོ་། །
2SA 16:23 དེའི་དུས་སུ་ཨ་ཧི་ཐོ་ཕེལ་གྱིས་བཏོན་པའི་བློ་བཀོད་ནི། མི་ཡིས་དཀོན་མཆོག་ལ་ཐུགས་བརྟག་ཞུས་ནས་ཐོབ་པའི་བཀའ་བཞིན་སྣང་བ་ཡིན་ལ། ཁོས་དཱ་བིད་དང་ཨབ་ཤཱ་ལོམ་གཉིས་ལ་བཏོན་པའི་བློ་བཀོད་ཐམས་ཅད་དེ་བཞིན་ཡིན་ནོ། །
2SA 17:1 ཡང་ཨ་ཧི་ཐོ་ཕེལ་གྱིས་ཨབ་ཤཱ་ལོམ་ལ། བདག་ལ་མི་ཆིག་ཁྲི་ཉིས་སྟོང་གདམ་གསེས་བྱེད་པར་གནོངས་ཤིག དོ་དགོང་ལངས་ནས་དཱ་བིད་ཀྱི་ར་མདར་རྒྱུག་པར་བྱ།
2SA 17:2 ཁོ་རང་ཉམ་ཐག་ནས་སྟོབས་ཞན་པའི་དུས་སུ། བདག་ཁོའི་རྗེས་ཆོད་ནས་ཁོ་སྐྲག་པར་བྱ། ཁོ་དང་མཉམ་དུ་ཡོད་པའི་མི་ཐམས་ཅད་འབྲོ་ངེས་ཤིང་། བདག་གིས་རྒྱལ་པོ་འབའ་ཞིག་གསོད་པར་བྱའོ། །
2SA 17:3 ཡང་བདག་གིས་མི་ཐམས་ཅད་ཁྱེད་ཀྱི་ཕྱོགས་སུ་འགུག་པར་བྱ་སྟེ། ཁྱེད་ཀྱིས་སྙེག་པའི་མི་དེ་ལས་གཞན་ཐམས་ཅད་ཁྱེད་ཕྱོགས་འཁོར་འོང་བའི་དུས་སུ། མི་ཐམས་ཅད་བདེ་ཞིང་འཇགས་པར་འགྱུར་ཞེས་སྨྲས།
2SA 17:4 ཨབ་ཤཱ་ལོམ་དང་ཡེས་ར་ཨེལ་གྱི་རྒན་པོ་རྣམས་གཏམ་དེ་ལ་ཤིན་ཏུ་དགའ་བར་གྱུར་ཏོ། །
2SA 17:5 དེ་ནས་ཨབ་ཤཱ་ལོམ་གྱིས། ཨ་རག་པ་ཧུ་ཤཱ་ཨི་ཡང་འདི་རུ་བོས་ཤོག་དང་། དེས་ཅི་ལྟར་སྨྲ་བ་ལ་ཡང་མཉན་པར་བྱ་ཞེས་བཀའ་བསྩལ།
2SA 17:6 དེ་ནས་ཧུ་ཤཱ་ཨི་ཁོང་ཉིད་ཨབ་ཤཱ་ལོམ་གྱི་དྲུང་དུ་འོངས་པའི་ཚེ། ཨབ་ཤཱ་ལོམ་གྱིས་དེ་ལ། ཨ་ཧི་ཐོ་ཕེལ་གྱིས་འདི་ལྟར་སྨྲས་པས། རང་ཅག་གིས་དེའི་གྲོས་བཞིན་དུ་བྱེད་རུང་ངམ་མི་རུང་། ཁྱོད་ཀྱིས་གཏམ་བྱོས་ཤིག་ཅེས་བསྐུལ་བས།
2SA 17:7 ཧུ་ཤཱ་ཨི་ཡིས་ཨབ་ཤཱ་ལོམ་ལ། ད་རེས་ཨ་ཧི་ཐོ་ཕེལ་གྱིས་བཏོན་པའི་བློ་བཀོད་ནི་མི་ལེགས་ཞེས་དང་།
2SA 17:8 ཡང་ཧུ་ཤཱ་ཨི་ན་རེ། ཁྱེད་ཀྱི་ཕ་དང་དེའི་མི་རྣམས་ནི་དཔའ་རྩལ་ཅན་ཡིན་པ་དང་། རི་ཐང་གི་དོམ་ཕྲུག་ཕྲོགས་ནས་ཁྱེར་བའི་དོམ་དང་འདྲ་བར། དེ་དག་གི་སེམས་ནི་ཞེ་སྡང་གིས་ཁེངས་པ་ཁྱེད་ཀྱིས་ཤེས་སོ། །ཡང་ཁྱེད་ཀྱི་ཕ་ནི་དམག་ཅིག་ཡིན་པས་མི་རྣམས་ཀྱི་ཁྲོད་དུ་གནས་མི་སྲིད།
2SA 17:9 གཟིགས་དང་། ཁོ་ནི་ད་ལྟ་ས་ཁུང་ངམ་གནས་གཞན་ཞིག་ཏུ་ཡིབ་ནས་བསྡད་ཡོད་ཀྱང་སྲིད། གལ་ཏེ་བདག་ཅག་ལས་མི་ཞིག་ཐོག་མར་བསད་པ་ཡིན་ན། དེ་ཐོས་མཁན་རྣམས་ཀྱིས། ཨབ་ཤཱ་ལོམ་གྱི་རྗེས་སུ་འབྲངས་པ་རྣམས་འགེམས་སོ་ཞེས་བརྗོད་པར་འགྱུར།
2SA 17:10 ཁྱེད་ཀྱི་ཕ་ནི་དཔའ་བོ་ཡིན་པ་དང་དེ་དང་མཉམ་དུ་ཡོད་པ་རྣམས་ཀྱང་དཔའ་རྩལ་ཅན་ཡིན་པ་ཡེས་ར་ཨེལ་པ་ཐམས་ཅད་ཀྱིས་ཤེས་པས། སེང་གེ་ལྟ་བུའི་སྙིང་སྟོབས་ཅན་རྣམས་ཀྱི་སེམས་ཀྱང་ཕམ་པར་འགྱུར།
2SA 17:11 དེ་བས་བདག་གི་བྱུས་ལྟར་ན། དཱན་ནས་བཟུང་སྟེ་པེར་ཤ་བཱ་ཡི་བར་དུ། རྒྱ་མཚོའི་འགྲམ་གྱི་བྱེ་མ་བཞིན་མང་བའི་ཡེས་ར་ཨེལ་པ་ཐམས་ཅད་ཁྱེད་ཀྱི་ཕྱོགས་སུ་བསྡུས་ནས། ཁྱེད་ཀྱིས་སྐུ་དངོས་སུ་དེ་རྣམས་ཁྲིད་ནས་འཐབ་མོར་ཞུགས་དགོས།
2SA 17:12 དེ་ལྟར་ཁོ་གང་དུ་སོང་ནའང་། ས་ལ་ཟིལ་བ་འབབ་པ་ལྟར་རང་ཅག་ཁོའི་ཐོག་ཏུ་འབབ་པ་དང་། ཁོ་རང་དང་ཁོའི་མཉམ་དུ་ཡོད་པའི་མི་རྣམས་ལས་གཅིག་ཀྱང་ལུས་པར་མི་འགྱུར།
2SA 17:13 གལ་ཏེ་ཁོ་རང་གྲོང་ཁྱེར་ཞིག་གི་ནང་དུ་ཕྱི་བསྣུར་བྱས་ན། ཡེས་ར་ཨེལ་པ་ཐམས་ཅད་ཀྱིས་ཐག་པ་ཁུར་ནས་གྲོང་ཁྱེར་དེ་རུ་སོང་སྟེ། རང་ཅག་གིས་གྲོང་ཁྱེར་དེ་གྲོག་མོའི་ནང་དུ་དྲུད་ནས་ཐ་ན་རྡོ་ཕྲུག་གཅིག་ཀྱང་མི་ལུས་པར་བྱེད་ངེས་ཡིན་ཞེས་སྨྲས་པ་ན།
2SA 17:14 ཨབ་ཤཱ་ལོམ་དང་ཡེས་ར་ཨེལ་པ་ཐམས་ཅད་ཀྱིས། ཨ་རག་པ་ཧུ་ཤཱ་ཨི་ཡི་ཐབས་ཇུས་ནི་ཨ་ཧི་ཐོ་ཕེལ་གྱི་ཐབས་ཇུས་ལས་ལྷག་པ་ཡིན་ཞེས་སྨྲས་སོ། །གང་ལ་ཞེ་ན། དཀོན་མཆོག་ཡ་ཝཱེས་ཨབ་ཤཱ་ལོམ་གྱི་སྟེང་དུ་བར་ཆད་འབེབ་པའི་ཕྱིར། ཨ་ཧི་ཐོ་ཕེལ་གྱི་ཐབས་བཟང་དེ་མེད་པར་མཛད་པའི་ཐུགས་ཐག་བཅད་པ་ཡིན་ནོ། །
2SA 17:15 དེ་ནས་ཧུ་ཤཱ་ཨི་ཡིས་མཆོད་དཔོན་ཟཱ་ཏོག་དང་ཨབ་ཡཱ་ཐར་གཉིས་ལ། ཨ་ཧི་ཐོ་ཕེལ་གྱིས་ཨབ་ཤཱ་ལོམ་དང་ཡེས་ར་ཨེལ་གྱི་རྒན་པོ་རྣམས་ལ་འདི་དང་དེ་བཞིན་གྲོས་བཏབ་པ་དང་། ངས་ཀྱང་འདི་དང་དེ་བཞིན་གྲོས་བཏབ་པ་ཡིན།
2SA 17:16 ད་ལྟ་ཁྱོད་ཅག་གིས་གང་མྱུར་གྱིས་བང་ཆེན་མངགས་ནས་དཱ་བིད་ལ། དོ་དགོང་དབེན་སྟོང་གི་རབ་ཁ་རུ་མི་བཞུགས་པར་ཅི་ནས་ཀྱང་གཙང་པོའི་ཕ་རོལ་ཏུ་བརྒལ་དགོས། དེ་མིན་ཚེ་རྒྱལ་པོ་དང་ཁོང་གི་རྗེས་འབྲང་ཐམས་ཅད་འགེམ་པར་འགྱུར་རོ་ཞུ་དགོས་ཞེས་གདམས་སོ། །
2SA 17:17 ཡོ་ནཱ་ཐན་དང་ཨ་ཧི་མཱ་ཨ་སི་གཉིས་ཀྱིས་ཨེན་རོ་གེལ་དུ་སྒུག་བསྡད་ཅིང་། གཞན་གྱིས་མཐོང་བར་དོགས་ནས་གྲོང་ཁྱེར་ནང་དུ་འགྲོ་མ་ཕོད་པ་རེད། དེ་ནས་གཡོག་མོ་ཞིག་འོངས་ནས་ཁོ་གཉིས་ལ་གནས་ཚུལ་སྨྲས་པ་ལ། དེ་གཉིས་སོང་སྟེ་རྒྱལ་པོ་དཱ་བིད་ལ་འཕྲིན་བསྐྱལ་ཏོ། །
2SA 17:18 ཡིན་ཡང་གཞོན་ནུ་ཞིག་གིས་ཁོ་གཉིས་མཐོང་བ་དང་སོང་ནས་ཨབ་ཤཱ་ལོམ་ལ་ཞུས་ཤིང་། ཁོ་གཉིས་མྱུར་དུ་སོང་སྟེ་པཱ་ཧུ་རིམ་དུ་མི་ཞིག་གི་ཁྱིམ་ལ་སླེབས་པ་དང་། ར་སྐོར་ནང་དུ་དོང་ཆུ་ཞིག་ཡོད་པ་དེའི་ནང་དུ་བབས།
2SA 17:19 ཡང་ཁྱིམ་དེའི་བུད་མེད་ཀྱིས་ཁ་གཅོད་ཅིག་བླངས་ནས་དོང་ཆུའི་ཁ་བཅད་པ་དང་། དེའི་ཁར་འབྲུ་རིགས་བརྡལ་བས་དོན་དེ་ཕྱི་རུ་མ་ཤོར་བ་རེད།
2SA 17:20 ཨབ་ཤཱ་ལོམ་གྱི་འཁོར་གཡོག་རྣམས་བུད་མེད་དེའི་ཁྱིམ་དུ་འོངས་ནས། ཨ་ཧི་མཱ་ཨ་སི་དང་ཡོ་ནཱ་ཐན་གཉིས་གང་དུ་ཡོད་དམ་ཞེས་དྲིས་པར། བུད་མེད་ཀྱིས། དེ་གཉིས་ཆུ་བོ་བརྒལ་ཚར་རོ་ཞེས་སྨྲས་ཤིང་། དེ་དག་གིས་ཁོ་གཉིས་བཙལ་ཡང་མ་རྙེད་པས་ཕྱིར་ཡེ་རུ་སཱ་ལེམ་དུ་ལོག་གོ །
2SA 17:21 དེ་དག་སོང་རྗེས་ཁོ་གཉིས་དོང་ཆུ་ལས་ཡར་འོངས་ནས་སོང་སྟེ་རྒྱལ་པོ་དཱ་བིད་ལ། ཨ་ཧི་ཐོ་ཕེལ་གྱིས་ཁྱེད་ལ་གནོད་བསྐྱལ་བའི་ཐབས་འདི་བཞིན་བྱས་པས། ཁྱེད་རྣམས་གང་མྱུར་གྱིས་ཡར་ལངས་ནས་གཙང་པོ་བརྒལ་དགོས་ཞེས་ཞུས་པ་ལ།
2SA 17:22 དཱ་བིད་དང་ཁོང་གི་རྗེས་འབྲང་ཐམས་ཅད་ཡར་ལངས་ནས་ཡོར་དན་གཙང་པོ་བརྒལ་ཞིང་། ནམ་ལངས་དུས་གཅིག་ཀྱང་མ་ལུས་པར་ཡོར་དན་གཙང་པོ་བརྒལ་བ་རེད།
2SA 17:23 དེ་ནས་ཨ་ཧི་ཐོ་ཕེལ་གྱིས་རང་གི་ཐབས་ཇུས་ལ་མ་བསྟུན་པ་མཐོང་བས། བོང་བུར་སྒ་བསྟད་ནས་རང་གི་གྲོང་ཁྱེར་དུ་ལོག་སྟེ་ཁྱིམ་དུ་སླེབས་ཙ་ན། ཁོས་དེ་རུ་ཁ་ཆེམས་བཞག་ནས་ལྕེབས་པ་དང་། ཁོའི་བེམ་པོ་ནི་ཁོའི་ཕ་ཡི་དུར་དུ་བསྐུངས་སོ། །
2SA 17:24 དེ་ནས་དཱ་བིད་མཱ་ཧ་ནཱ་ཡིམ་དུ་སླེབས་པ་དང་། ཨབ་ཤཱ་ལོམ་དང་ཁོའི་རྗེས་སུ་འབྲངས་པའི་ཡེས་ར་ཨེལ་པ་ཐམས་ཅད་ཀྱང་ཡོར་དན་གཙང་པོ་བརྒལ་ཏེ་སོང་ངོ་། །
2SA 17:25 དེར་ཨབ་ཤཱ་ལོམ་གྱིས་ཡོ་ཨབ་ཀྱི་ཚབ་ཏུ་ཨ་མ་སཱ་དམག་དཔོན་དུ་བསྐོས་སོ། །ཨ་མ་སཱ་ནི་ཡེས་ར་ཨེལ་པ་ཡེད་རཱ་བྱ་བའི་བུ་ཡིན་ཏེ། ཡེད་རཱ་ནི་ནཱ་ཧ་སིའི་བུ་མོ་ཨ་བི་གཱ་ཡིལ་བྱ་བར་འགྲོགས་མྱོང་བ་ཡིན། ཨ་བི་གཱ་ཡིལ་ནི་ཡོ་ཨབ་ཀྱི་མ་ཟེ་རུ་ཡཱ་ཡི་མིང་སྲིང་ཡིན་ནོ། །
2SA 17:26 ཨབ་ཤཱ་ལོམ་དང་ཡེས་ར་ཨེལ་པ་རྣམས་ཀྱིས་གིལ་ཨད་ཡུལ་དུ་སྒར་བཏབ་བོ། །
2SA 17:27 ཡང་དཱ་བིད་མཱ་ཧ་ནཱ་ཡིམ་དུ་སླེབས་དུས་སུ། ཨམ་མོན་རིགས་ཀྱི་རབ་བཱ་ནས་ཐོན་པའི་ནཱ་ཧ་སིའི་བུ་ཤོ་བི་དང་། ལོ་རྡེ་བཱར་པ་ཨམ་མེ་ཨེལ་གྱི་བུ་མཱ་ཀིར་དང་། རོ་གེ་ལིམ་ནས་ཐོན་པའི་གིལ་ཨད་པ་པཱར་ཟིལ་ལ་ཨི་གསུམ་པོས།
2SA 17:28 མལ་ཆས་དང་གཞོང་པ། རྫ་མ། གྲོ། ནས། བག་ཕྱེ། ཡོས། སྲན་མ། སྲན་དམར། སྲན་ཡོས།
2SA 17:29 སྦྲང་རྩི། མར། ལུག བ་མོའི་འོ་ཕྱུར་བཅས་ཁྱེར་ཡོང་ནས་དཱ་བིད་དང་ཁོང་གི་རྗེས་འབྲང་རྣམས་ཀྱི་ཟས་སུ་དྲངས་ཏེ། དེ་དག་གིས་མི་ཚོགས་ནི་དབེན་སྟོང་དུ་བཀྲེས་སྐོམ་མྱངས་ཤིང་དུབ་པ་ཡིན་ནོ་སྙམ་པས་སོ། །
2SA 18:1 དཱ་བིད་ཀྱིས་ཁོང་གི་རྗེས་སུ་འབྲངས་པའི་མི་ཚོགས་ཀྱི་གྲངས་ཀ་བླངས་ནས། དེ་རྣམས་ཀྱི་སྣེ་ཁྲིད་པར་སྟོང་དཔོན་དང་བརྒྱ་དཔོན་རྣམས་བསྐོས།
2SA 18:2 དཱ་བིད་ཀྱིས་མི་རྣམས་དམག་རྒྱག་ཏུ་མངགས་ཤིང་། སུམ་ཆའི་གཅིག་ཡོ་ཨབ་ཀྱི་ལག་ཏུ་བཏང་། སུམ་ཆའི་གཅིག་ཟེ་རུ་ཡཱ་ཡི་བུ་ཡོ་ཨབ་ཀྱི་ནུ་བོ་ཨ་བི་ཤཱ་ཨི་ཡི་ལག་ཏུ་བཏང་། སུམ་ཆའི་གཅིག་གཱད་པ་ཨིད་ཏ་ཨི་ཡི་ལག་ཏུ་བཏང་ནས། རྒྱལ་པོས་དམག་རྣམས་ལ། ང་ཡང་ཁྱོད་ཅག་དང་མཉམ་དུ་འཐབ་མོར་ཞུགས་ངེས་ཡིན་ཞེས་གསུངས་ཀྱང་།
2SA 18:3 དམག་རྣམས་ན་རེ། ཁྱེད་ནི་འཐབ་མོར་ཞུགས་མི་རུང་། གལ་ཏེ་ངེད་ཅག་བྲོས་ན་དགྲ་བོས་དོ་སྣང་བྱེད་མི་སྲིད་ལ། ཕྱེད་ཀ་གཡུལ་ངོར་ཤི་ནའང་དེ་དག་གིས་དོ་སྣང་བྱེད་མི་སྲིད། ཡིན་ན་ཡང་ད་ལྟ་ཁྱེད་ནི་བདག་ཅག་གི་མི་ཁྲི་ཚོ་གཅིག་དང་འདྲ་བས། ཁྱེད་ཉིད་གྲོང་ཁྱེར་དུ་བཞུགས་ནས་ངེད་རྣམས་ལ་དཔུང་གྲོགས་མཛད་ན་ལེགས་སོ་ཞེས་ཞུས་ཤིང་།
2SA 18:4 རྒྱལ་པོས་དེ་དག་ལ། ཁྱོད་ཅག་གིས་གང་ལེགས་པར་འདོད་ན་ངས་དེ་བཞིན་བྱའོ་ཞེས་གསུངས་ནས། རྒྱལ་པོ་མཁར་སྒོ་རུ་བཞེངས་བསྡད་ཅིང་། དམག་མི་རྣམས་བརྒྱ་ཕྲག་དང་སྟོང་ཕྲག་བྱས་ནས་རིམ་བཞིན་འཐབ་མོ་བྱེད་དུ་ཆས་སོ། །
2SA 18:5 རྒྱལ་པོས་ཡོ་ཨབ་དང་། ཨ་བི་ཤཱ་ཨི་དང་། ཨིད་ཏ་ཨི་གསུམ་ལ་བཀའ་བཀོད་ཅིང་འདི་ལྟར། ཁྱོད་རྣམས་ཀྱིས་ངའི་ཁ་ངོར་བལྟས་ནས་གཞོན་ནུ་ཨབ་ཤཱ་ལོམ་ལ་གུ་ཡངས་ཐོངས་ཤིག་ཅེས་བསྒོས་པ་དང་། རྒྱལ་པོས་ཨབ་ཤཱ་ལོམ་གྱི་དོན་དུ་དམག་དཔོན་ཐམས་ཅད་ལ་བཀའ་གནང་བ་དེ་ནི་དམག་ཐམས་ཅད་ཀྱིས་ཐོས་པར་གྱུར།
2SA 18:6 དེ་ལྟར་དམག་རྣམས་ཐང་དུ་སོང་ནས་ཡེས་ར་ཨེལ་གྱི་གདོང་བསུས་ཏེ་ཨེ་ཕཱར་ཡིམ་གྱི་ནགས་ཚལ་དུ་འཐབ་མོ་བྱུང་ངོ་། །
2SA 18:7 དེ་རུ་ཡེས་ར་ཨེལ་གྱི་མི་རྣམས་དཱ་བིད་ཀྱི་འཁོར་གཡོག་རྣམས་ཀྱི་མདུན་དུ་ཕམ་ནས། ཉིན་མོ་དེ་ལ་མི་མང་པོ་ཤི་བ་སྟེ་བསྡོམས་པས་མི་ཁྲི་གཉིས་ཡོད་དོ། །
2SA 18:8 ཡང་དམག་འཐབ་ནི་ཡུལ་གྲུ་ཀུན་ཏུ་ཁྱབ་པ་དང་། ཉིན་དེར་ནགས་ཚལ་གྱིས་བཀུམ་པའི་དམག་མི་ནི་རལ་གྲིས་བཀུམ་པ་ལས་ཀྱང་ལྷག་པར་མང་ངོ་། །
2SA 18:9 དེ་ནས་ཨབ་ཤཱ་ལོམ་ནི་དཱ་བིད་ཀྱི་འཁོར་གཡོག་རྣམས་དང་ཕྲད་པ་དང་། ཁོ་རང་དྲེའུ་ཞིག་ལ་ཞོན་ནས་བེ་ཤིང་ཆེན་པོ་ཞིག་གི་ཡལ་ག་སྦོམ་པོའི་འོག་ཏུ་སྐྱོད་པ་ལ། ཁོའི་མགོ་བེ་ཤིང་གི་བར་ལ་བཙིར་པ་དང་། ཁོ་རང་བར་སྣང་དུ་དཔྱངས་ཏེ་ཞོན་པ་དྲེའུ་ཁོའི་འོག་ནས་ཤོར་རོ། །
2SA 18:10 མི་ཞིག་གིས་དེ་མཐོང་ནས་ཡོ་ཨབ་ལ། གཟིགས་དང་། ངས་ཨབ་ཤཱ་ལོམ་བེ་ཤིང་སྟེང་དཔྱངས་ཡོད་པ་མཐོང་བ་ཡིན་ཞེས་སྨྲས་པར།
2SA 18:11 ཡོ་ཨབ་ཀྱིས་འཕྲིན་སྐྱེལ་མཁན་དེ་ལ། ལྟོས་དང་། ཁྱོད་ཀྱིས་ཁོ་མཐོང་ན་ཅིའི་ཕྱིར་སྐབས་དེར་ཁོ་བསད་ནས་སར་མི་འཕེན་ནམ། ངས་ཁྱོད་ལ་དངུལ་སྲང་བཅུ་དང་སྐ་རགས་གཅིག་དགའ་རྟགས་སུ་སྟེར་ངེས་ཡིན་ཞེས་སྨྲས་པ་དང་།
2SA 18:12 མི་དེས་ཡོ་ཨབ་ལ། ངའི་ལག་ཏུ་དངུལ་སྲང་སྟོང་གཅིག་ཡོང་ནའང་། ངས་རྒྱལ་སྲས་ཀྱི་ཕྱོགས་སུ་ལག་པ་བརྐྱང་མི་ཕོད། འོ་སྐོལ་ཀུན་གྱི་ཐོས་སར། རྒྱལ་པོས་ཁྱེད་དང་ཨ་བི་ཤཱ་ཨི་དང་ཨིད་ཏ་ཨི་གསུམ་ལ། དོགས་ཟོན་གྱིས་ཤིག གཞོན་ནུ་ཨབ་ཤཱ་ལོམ་ལ་གནོད་པ་མ་བྱེད་ཅིག་ཅེས་བཀའ་གནང་བ་ཡིན།
2SA 18:13 གལ་ཏེ་བདག་གིས་ཁོའི་སྲོག་བཅད་ཚེ། དོན་གང་ཡིན་ཡང་རྒྱལ་པོ་ལ་གསང་མི་ཐུབ་པར་མ་ཟད། ཁྱེད་ཀྱང་རྒྱང་རིང་ནས་ལངས་སྡོད་ངེས་ཡིན་ཞེས་སྨྲས།
2SA 18:14 དེར་ཡོ་ཨབ་ཀྱིས། ངས་ཁྱོད་ཀྱི་རྩར་འདི་ལྟར་དུས་འགྱང་བྱེད་མི་ནུས་ཞེས་སྨྲས་པ་དང་། མདུང་གསུམ་ལག་ཏུ་ཐོགས་ནས་ཨབ་ཤཱ་ལོམ་ད་དུང་བེ་ཤིང་གི་སྟེང་དུ་དཔྱངས་ནས་གསོན་པའི་དུས་སུ་ཁོའི་སྙིང་བརྟོལ་བར་བྱས་སོ། །
2SA 18:15 ཡོ་ཨབ་ཀྱི་གོ་མཚོན་འཁུར་བའི་གཞོན་ནུ་བཅུ་ཡིས་ཨབ་ཤཱ་ལོམ་བསྐོར་ཏེ་ཁོ་ལ་བརྡུངས་ནས་བསད་དོ། །
2SA 18:16 དེ་ནས་ཡོ་ཨབ་ཀྱིས་ཆེད་དུ་རྭ་དུང་བུས་པ་ལ། དམག་མི་རྣམས་ཡེས་ར་ཨེལ་གྱི་ར་མདའ་ནས་ཕྱིར་ལོག་པ་རེད། གང་ལ་ཞེ་ན། ཡོ་ཨབ་ཀྱིས་དམག་མི་རྣམས་བཀག་པའོ། །
2SA 18:17 དེ་ནས་དེ་དག་གིས་ཨབ་ཤཱ་ལོམ་མར་བླངས་པ་དང་། ནགས་གསེབ་ཀྱི་ས་དོང་ཆེན་པོ་ཞིག་གི་ནང་དུ་འཕངས་ནས་དེའི་སྟེང་དུ་རྡོ་སྤུང་ཤིན་ཏུ་ཆེན་པོ་བརྒྱབ། ཡེས་ར་ཨེལ་པ་ཐམས་ཅད་བྲོས་ནས་རང་རང་གི་གུར་དུ་སོང་ངོ་། །
2SA 18:18 ཨབ་ཤཱ་ལོམ་གྱིས་རང་ཉིད་གསོན་པོའི་དུས་སུ་རྒྱལ་པོའི་ལུང་པ་རུ་ཀ་བ་ཞིག་བསླངས་ཏེ། ཁོས་བདག་ལ་དྲན་རྟེན་དུ་རང་གི་མིང་ཐོགས་པའི་བུ་མེད་ཅེས་སྨྲས་ནས། ཀ་བ་དེའི་མིང་ལ་རང་གི་མིང་བཞིན་ཨབ་ཤཱ་ལོམ་གྱི་ཀ་རིང་ཞེས་བཏགས་ཤིང་དེ་རིང་གི་བར་དུ་ལུས་སོ། །
2SA 18:19 དེར་ཟཱ་ཏོག་གི་བུ་ཨ་ཧི་མཱ་ཨ་སི་ཡིས། ད་ང་རང་བརྒྱུགས་སོང་སྟེ་རྒྱལ་པོ་ལ། དཀོན་མཆོག་ཡ་ཝཱེས་རྒྱལ་པོ་ཁོང་ཉིད་དགྲ་བོ་རྣམས་ལས་སྐྱོབ་པར་མཛད་པའི་འཕྲིན་འཁྱེར་རམ་ཞེས་ཞུས་པར།
2SA 18:20 ཡོ་ཨབ་ཀྱིས་དེ་ལ། དེ་རིང་ཉིན་མོར་ཁྱོད་ཀྱིས་འཕྲིན་མ་འཁྱེར་ཞིག ཉིན་མོ་གཞན་ཞིག་ལ་འཕྲིན་འཁྱེར་རུང་། དེ་རིང་རྒྱལ་སྲས་གྲོངས་པས་ཁྱོད་ཀྱིས་འཕྲིན་འཁྱེར་མི་རུང་ཞེས་སྨྲས་སོ། །
2SA 18:21 དེར་ཡོ་ཨབ་ཀྱིས་གུ་ཤ་པ་ཞིག་ལ། ཁྱོད་སོང་སྟེ་ཇི་མཐོང་བ་དེ་རྒྱལ་པོར་ཞུས་ཤིག་ཅེས་བཀའ་བསྩལ་པས། གུ་ཤ་པ་དེས་ཡོ་ཨབ་ལ་ཕྱག་བཙལ་ཏེ་བརྒྱུགས་སོ། །
2SA 18:22 ཟཱ་ཏོག་གི་བུ་ཨ་ཧི་མཱ་ཨ་སི་ཡིས་ཡང་བསྐྱར་ཡོ་ཨབ་ལ། ཅི་བྱུང་ན་བྱུང་། བདག་ནི་གུ་ཤ་པའི་རྗེས་སུ་རྒྱུག་པར་གནོངས་ཤིག་ཅེས་ཞུས་པར། ཡོ་ཨབ་ཀྱིས། ངའི་བུ། ཁྱོད་ཀྱིས་འཕྲིན་འདི་བསྐྱལ་བས་རྔན་པ་ཅི་ཡང་མེད་དེ། ཅིའི་ཕྱིར་རྒྱུག་འདོད་དམ་ཞེས་སྨྲས་ཀྱང་།
2SA 18:23 དེས་ནི་ཅི་བྱུང་ན་བྱུང་། ང་རང་རྒྱུག་དགོས་ཞུས་པས། དེས་རྒྱུག་ཅིག་ཅེས་སྨྲས་པ་དང་། ཡང་ཨ་ཧི་མཱ་ཨ་སི་ཐང་ལམ་ནས་བརྒྱུགས་ཏེ་གུ་ཤ་པའི་སྔོན་དུ་སླེབས་སོ། །
2SA 18:24 དེའི་ཚེ་དཱ་བིད་མཁར་སྒོ་གཉིས་ཀྱི་མཚམས་སུ་བཞུགས་ཡོད་པ་དང་། སོ་པ་ནི་མཁར་སྟེང་དུ་འགོས་ཏེ་མགོ་ཡར་བཏེགས་ནས་བལྟས་པ་ལ། ལྟོས་དང་། མི་གཅིག་རང་བརྒྱུགས་འོང་བ་མཐོང་ངོ་། །
2SA 18:25 སོ་པས་སྐད་ཆེན་པོས་རྒྱལ་པོར་ཞུས་ཤིང་། རྒྱལ་པོས། གལ་ཏེ་མི་གཅིག་འོངས་ན་དེ་ནི་ངག་འཕྲིན་འཁྱེར་མཁན་ཡིན་ཞེས་གསུངས་པ་དང་། མི་དེ་བརྒྱུགས་ནས་ཉེ་བར་སླེབས།
2SA 18:26 སོ་པས་ཡང་མི་ཞིག་བརྒྱུགས་འོང་བ་མཐོང་ནས། མཁར་སྒོ་སྲུང་མཁན་བོས་ཏེ་ན་རེ། ལྟོས་དང་། ཡང་མི་གཅིག་རང་ཚུར་རྒྱུག་གོ་ཞེས་སྨྲས་པར། རྒྱལ་པོས། དེ་ཡང་འཕྲིན་འཁྱེར་མཁན་ཡིན་ཞེས་གསུངས།
2SA 18:27 དེ་ནས་སོ་པས། མི་སྔ་མ་དེའི་རྒྱུག་ཚུལ་ལ་ལྟོས་ན་ཟཱ་ཏོག་གི་བུ་ཨ་ཧི་མཱ་ཨ་སི་ཡིན་པ་འདྲ་ཞེས་སྨྲས་ཤིང་། རྒྱལ་པོས། ཁོ་ནི་མི་བཟང་པོ་ཞིག་ཡིན་ལ་འཕྲིན་བཟང་ཡོད་དོ་ཞེས་གསུངས་སོ། །
2SA 18:28 ཡང་ཨ་ཧི་མཱ་ཨ་སི་ཡིས་འབོད་སྒྲ་བསྒྲགས་ཏེ། བདེ་ལ་བབས་སོ་ཞེས་ཞུས་ཤིང་། ལུས་སར་བཏུད་ནས་རྒྱལ་པོར་ཕྱག་བཙལ་ཏེ་ན་རེ། ཁྱེད་ཀྱི་དཀོན་མཆོག་ཡ་ཝཱེ་ནི་བསྟོད་འོས་པ་ལགས། ཁོང་གིས་བདག་གི་ཇོ་བོ་དང་བདག་གི་རྒྱལ་པོའི་ཕྱོགས་སུ་ལག་པ་བཏེགས་པའི་མི་རྣམས་རྒྱལ་པོར་སྤྲོད་པར་མཛད་དོ་ཞེས་ཞུས་པ་དང་།
2SA 18:29 རྒྱལ་པོས། ན་གཞོན་ཨབ་ཤཱ་ལོམ་བདེའམ་ཞེས་དྲིས་པར། ཨ་ཧི་མཱ་ཨ་སི་ཡིས། ཡོ་ཨབ་ཀྱིས་རྒྱལ་པོའི་ཞབས་ཕྱི་བདག་མངགས་པའི་ཚེ་ན། བདག་གིས་ཟང་ཟིང་ཆེན་པོ་ཞིག་མཐོང་ནའང་དེ་ཅི་ཡིན་ཤེས་མ་སོང་ཞེས་ཞུས།
2SA 18:30 རྒྱལ་པོས། ཁྱོད་ཡར་ལོངས་ལ་ལོགས་སུ་སྡོད་ཅིག་ཅེས་བཀའ་བསྩལ་པས་ཁོ་ཡར་ལངས་ནས་ལོགས་སུ་བསྡད་དོ། །
2SA 18:31 ཡང་ལྟོས་ཤིག གུ་ཤ་པ་དེ་ཡང་སླེབས་ནས། ཀྱེ་བདག་གི་ཇོ་བོ་དང་བདག་གི་རྒྱལ་པོ་ལ་འཕྲིན་ཞིག་ཞུ་རྒྱུ་ཡོད་དེ། དཀོན་མཆོག་ཡ་ཝཱེས་དེ་རིང་ཉིན་མོར་ཡར་ལངས་ནས་ཁྱེད་ལ་རྒོལ་མཁན་ཐམས་ཅད་ལས་ཁྱེད་རང་སྐྱོབ་པར་མཛད་དོ་ཞེས་ཞུས་པར།
2SA 18:32 རྒྱལ་པོས་གུ་ཤ་པ་དེ་ལ། ན་གཞོན་ཨབ་ཤཱ་ལོམ་བདེའམ་ཞེས་དྲིས་པའི་ལན་དུ་གུ་ཤ་པས། བདག་གི་ཇོ་བོ་དང་བདག་གི་རྒྱལ་པོའི་དགྲ་བོ་རྣམས་དང་། སེམས་ངན་དང་བཅས་ཡར་ལངས་ནས་ཁྱེད་ལ་གནོད་སྐྱེལ་མཁན་ཐམས་ཅད་ན་གཞོན་དེ་དང་འདྲ་བར་གྱུར་ཅིག་ཞུས་པས།
2SA 18:33 རྒྱལ་པོ་ཐུགས་རབ་ཏུ་འཁྲུགས་ཏེ་མཁར་སྒོའི་སྟེང་ཁང་དུ་འགོས་ནས། ཀྱེ་ངའི་བུ་ཨབ་ཤཱ་ལོམ། ངའི་བུ། ངའི་བུ་ཨབ་ཤཱ་ལོམ། ང་ནི་ཁྱོད་ཀྱི་ཚབ་ཏུ་ཤི་བ་ཡིན་ན་ཅི་མ་རུང་། ཀྱེ་ཨབ་ཤཱ་ལོམ། ངའི་བུ་ཞེས་ཤིན་ཏུ་ངུས་སོ། །
2SA 19:1 དེ་ནས་མི་ཞིག་གིས་ཡོ་ཨབ་ལ། གཟིགས་དང་། རྒྱལ་པོས་ཨབ་ཤཱ་ལོམ་གྱི་དོན་དུ་ངུ་ཞིང་མྱ་ངན་བྱེད་དོ་ཞེས་སྨྲས།
2SA 19:2 རྒྱལ་པོ་ཉིད་ཀྱི་སྲས་ཀྱི་ཕྱིར་ཐུགས་སྐྱོ་བ་དམག་དཔུང་ཡོངས་ཀྱིས་ཐོས་པས། རྒྱལ་ཁ་ཐོབ་པའི་ཉིན་དེ་ནི་ཁོ་ཚོར་མཚོན་ན་སྡུག་བསྔལ་དུ་གྱུར་ཏོ། །
2SA 19:3 ཉིན་མོ་དེར་དམག་རྣམས་ནི་གཡུལ་ལས་བྲོས་ཤིང་ངོ་གནོང་བའི་དམག་མི་བཞིན་དུ། ལྐོག་ནས་གྲོང་ཁྱེར་དུ་ཞུགས་པ་རེད།
2SA 19:4 རྒྱལ་པོས་ཞལ་ངོ་བཏུམས་ཏེ་སྐད་ཆེན་པོས་ངུས་ཤིང་། ཀྱེ་ངའི་བུ་ཨབ་ཤཱ་ལོམ། ཀྱེ་ཨབ་ཤཱ་ལོམ། ངའི་བུ། ངའི་བུ་ཞེས་བོས་པ་དང་།
2SA 19:5 ཡོ་ཨབ་རྒྱལ་པོའི་དྲུང་དུ་ཕོ་བྲང་ནང་སོང་སྟེ་འདི་ལྟར། དེ་རིང་ཁྱེད་ཀྱིས་ཉིད་ཀྱི་འཁོར་གཡོག་ཐམས་ཅད་ངོ་ཚར་གཏད་པ་ཡིན། དེ་དག་གིས་ཁྱེད་ཀྱི་སྲོག་དང་། ཁྱེད་ཀྱི་སྲས་དང་སྲས་མོའི་སྲོག་དང་། ཁྱེད་ཀྱི་ཆེན་ཆུན་རྣམས་ཀྱི་སྲོག་བསྐྱབས་ཀྱང་།
2SA 19:6 ཁྱེད་ཀྱིས་ཉིད་ལ་འཁོན་པ་རྣམས་ལ་བྱམས་པ་དང་། ཁྱེད་ལ་བརྩེ་བ་རྣམས་ལ་སྡང་བར་མཛད་དོ། །དེ་རིང་ཁྱེད་ཀྱིས་དམག་དཔོན་དང་འཁོར་གཡོག་གཉིས་ཀ་ཐུགས་སུ་མེད་པ་དེ་བསྟན་པ་ཡིན། གལ་ཏེ་ཨབ་ཤཱ་ལོམ་གསོན་ཞིང་། བདག་ཅག་ཐམས་ཅད་ཤི་བ་ཡིན་ན་ཁྱེད་ཐུགས་དགྱེས་པ་དེ་རིང་བདག་གིས་རྟོགས་སོང་།
2SA 19:7 ད་ལྟ་ཁྱེད་རང་ཡར་བཞེངས་ནས་ཕྱི་རུ་ཕེབས་ཏེ་ཁྱེད་ཀྱི་འཁོར་གཡོག་རྣམས་ལ་སེམས་གསོ་གནོངས་ཤིག ངས་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་ཏེ། གལ་ཏེ་ཁྱེད་རང་ཕྱི་རུ་མི་འགྲོ་ན། དོ་དགོང་ཁྱེད་དང་མཉམ་དུ་མི་གཅིག་ཀྱང་འདུག་མི་སྲིད་དེ། གེགས་བར་ཆད་འདི་ནི་ཁྱེད་རང་སྐུ་ན་ཕྲ་མོ་ནས་ད་བར་དུ་ཕྲད་པའི་སྡུག་བསྔལ་ཐམས་ཅད་ལས་ལྷག་པར་ཚབས་ཆེའོ་ཞེས་ཞུས་པས།
2SA 19:8 རྒྱལ་པོ་ཡར་བཞེངས་ནས་མཁར་སྒོར་བཞུགས་པ་ལ། མི་ཐམས་ཅད་ཀྱིས་རྒྱལ་པོ་མཁར་སྒོར་བཞུགས་པ་ཐོས་པས་ཐམས་ཅད་རྒྱལ་པོའི་དྲུང་དུ་འོངས་སོ། །སྐབས་དེར་ཡེས་ར་ཨེལ་པ་རྣམས་བྲོས་ནས་རང་རང་གི་གུར་དུ་ཕྱིན་ཏོ། །
2SA 19:9 ཡང་ཡེས་ར་ཨེལ་གྱི་ཚོ་པ་ཐམས་ཅད་ཀྱི་མི་རྣམས་ཀྱི་ཁྲོད་དུ་རྩོད་གླེང་བྱུང་སྟེ་ན་རེ། རྒྱལ་པོས་བདག་ཅག་ནི་དགྲ་བོ་རྣམས་ཀྱི་ལག་ནས་ཐར་བར་མཛད་པ་དང་། ཕེ་ལེ་ཤེད་པའི་ལག་ནས་ཀྱང་ཐར་བར་མཛད་ཀྱང་། ད་ལྟ་ཨབ་ཤཱ་ལོམ་གྱི་ཕྱིར་རང་རེའི་ཡུལ་འདི་ནས་འབྲོ་དགོས་བྱུང་བ་ཡིན།
2SA 19:10 འོ་སྐོལ་ཚོས་རྒྱལ་པོར་བྱུགས་པའི་ཨབ་ཤཱ་ལོམ་ནི་གཡུལ་ངོར་ཤིའོ། །ད་ལྟ་ཁྱོད་ཚོས་རྒྱལ་པོ་སླར་སྤྱན་འདྲེན་པའི་སྐོར་ཚིག་གཅིག་ཀྱང་མི་ལབ་པ་ཅི་ཞེས་གཏམ་བྱས་སོ། །
2SA 19:11 དེར་རྒྱལ་པོ་དཱ་བིད་ཀྱིས་མཆོད་དཔོན་ཟཱ་ཏོག་དང་ཨབ་ཡཱ་ཐར་གཉིས་ལ་ངག་འཕྲིན་བསྐུར་ནས་འདི་ལྟར། ཁྱོད་གཉིས་ཀྱིས་ཡ་ཧུ་དཱ་ཡི་རྒན་པོ་རྣམས་ལ་འདི་སྐད་སྨྲ་དགོས་ཏེ། རྒྱལ་པོ་ཕྱིར་ཕོ་བྲང་དུ་སྤྱན་འདྲེན་པའི་དོན་གྱི་ཐད་ཁྱོད་རྣམས་གཞན་པའི་རྗེས་སུ་ལུས་པ་ཅི་ཡིན་ནམ། ཡེས་ར་ཨེལ་པ་ཡོངས་ཀྱིས་རྒྱལ་པོ་ཕྱིར་སྤྱན་འདྲེན་པའི་གཏམ་ནི་རྒྱལ་པོའི་དྲུང་དང་རྒྱལ་པོའི་ཕོ་བྲང་དུ་སླེབས་ཚར།
2SA 19:12 ཁྱོད་རྣམས་ངའི་སྤུན་ཟླ་དང་ཤ་རུས་ཡིན་པས། རྒྱལ་པོ་ཕྱིར་སྤྱན་འདྲེན་པར་ཁྱོད་རྣམས་རྗེས་སུ་ལུས་པ་ཅི་ཡིན་ཞེས་དང་།
2SA 19:13 ཡང་ཁྱོད་རྣམས་ཀྱིས་ཨ་མ་སཱ་ལ་འདི་ལྟར། ཁྱོད་ངའི་ཤ་རུས་མ་ཡིན་ནམ། གལ་ཏེ་ངས་ཁྱོད་ནི་ཡོ་ཨབ་ཀྱི་ཚབ་ལ་བདག་གི་དྲུང་ནས་གཏན་དུ་དམག་དཔོན་དུ་མི་བྱེད་ན། དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲ་དགོས་ཞེས་བསྒོས།
2SA 19:14 དེ་ལྟར་ཁོང་གིས་མི་གཅིག་གི་སེམས་བཀུག་པ་ལྟར་ཡ་ཧུ་དཱ་པ་རྣམས་ཀྱི་སེམས་བཀུག་པར་མཛད་ཅིང་། དེ་དག་གིས་རྒྱལ་པོའི་དྲུང་དུ་མི་མངགས་ནས། རྒྱལ་པོ་དང་རྒྱལ་པོའི་བློན་འཁོར་རྣམས་ཕྱིར་ཕེབས་པར་མཛོད་ཅེས་ཞུས་སོ། །
2SA 19:15 དེ་ནས་རྒྱལ་པོ་ཕྱིར་ཕེབས་ནས་ཡོར་དན་གཙང་པོའི་འགྲམ་དུ་སླེབས། ཡ་ཧུ་དཱ་པ་རྣམས་རྒྱལ་པོ་ཡོར་དན་གཙང་པོའི་ཚུར་ཕྱོགས་ལ་བསུ་བར་གིལ་གལ་དུ་སླེབས།
2SA 19:16 ཡང་པེན་ཡཱ་མེན་པ་གེ་རཱ་ཡི་བུ་སྟེ། པཱ་ཧུ་རིམ་ནས་ཐོན་པའི་ཤིམ་ཨི་བྱ་བ་དེ་རྟབ་རྟབ་པོར་ཡ་ཧུ་དཱ་པ་རྣམས་དང་མཉམ་དུ་མར་སོང་ནས་རྒྱལ་པོ་དཱ་བིད་ལ་བསུ་བ་བྱས།
2SA 19:17 ཤིམ་ཨི་དང་མཉམ་དུ་པེན་ཡཱ་མེན་པ་མི་ཆིག་སྟོང་དང་། སོ་ལོ་ཚང་གི་གཡོག་པོ་ཙི་བཱ་དང་དེའི་བུ་བཅོ་ལྔ་དང་ཞབས་ཕྱི་ཉི་ཤུ་བཅས་ཡོད་པ་ཡིན། དེ་དག་བྲེལ་མྱུར་གྱིས་ཡོར་དན་གཙང་པོ་བརྒལ་ཏེ་རྒྱལ་པོའི་དྲུང་དུ་སོང་ཞིང་།
2SA 19:18 མི་རྣམས་རབ་ཁ་བརྒྱུད་ནས་རྒྱལ་པོའི་ཐུགས་དགོངས་བཞིན་རྒྱལ་པོ་དང་ཁོང་གི་ཁྱིམ་མི་རྣམས་གཙང་པོ་བརྒལ་དུ་བཅུག་པ་དང་། དཱ་བིད་ཡོར་དན་གཙང་པོ་བརྒལ་ནས་ཕེབས་པར་བརྩམས་པའི་ཚེ། གེ་རཱ་ཡི་བུ་ཤིམ་ཨི་ཡིས་རྒྱལ་པོའི་དྲུང་དུ་ལུས་སར་བཏུད་ནས་ཕྱག་བཙལ་བ་དང་།
2SA 19:19 རྒྱལ་པོ་ལ་འདི་ལྟར། བདག་གི་ཇོ་བོ་དང་བདག་གི་རྒྱལ་པོ་ཡེ་རུ་སཱ་ལེམ་དང་བྲལ་བའི་ཉིན་མོར་ཞབས་ཕྱི་བདག་གིས་ཉེས་པ་བཟོས་ཟིན། ད་ནི་བདག་གི་ཇོ་བོས་བདག་ལ་ཉེས་པ་མི་འགེལ་བ་དང་། རྒྱལ་པོའི་ཡིད་ལ་མི་དྲན་ཞིང་ཐུགས་སུའང་མི་འཛིན་པར་མཁྱེན།
2SA 19:20 གཟིགས་དང་། ཞབས་ཕྱིས་རང་ལ་སྡིག་ཉེས་ཡོད་པ་ཤེས་བཞིན་དུ། ཡོ་སེབ་ཀྱི་ཁྱིམ་རྒྱུད་ཡོངས་ཀྱི་ཁྲོད་ནས་དེ་རིང་ཉིན་མོར་ང་རང་ཐོག་མར་བདག་གི་ཇོ་བོ་དང་བདག་གི་རྒྱལ་པོ་བསུ་བར་འདིར་འོངས་པ་ཡིན་ཞེས་ཞུས་པ་ལ།
2SA 19:21 ཟེ་རུ་ཡཱ་ཡི་བུ་ཨ་བི་ཤཱ་ཨི་ཡིས་དེའི་ལན་དུ། ཤིམ་ཨི་ཡིས་དཀོན་མཆོག་ཡ་ཝཱེས་བྱུགས་པ་ལ་དམོད་མོ་བཏབ་པས་ཁོ་གསོད་པར་མི་འོས་སམ་ཞེས་སྨྲས་ཤིང་།
2SA 19:22 དཱ་བིད་ཀྱིས། ཟེ་རུ་ཡཱ་ཡི་བུ་རྣམས། ཁྱོད་ཅག་ང་དང་འབྲེལ་བ་ཅི་ཡོད། ཁྱོད་ཅག་གིས་དེ་རིང་ང་ལ་རྒོལ་ལན་སྤྲོད་དམ། དེ་རིང་ཡེས་ར་ཨེལ་གྱི་ཁྲོད་ནས་སུ་ཞིག་གསོད་རུང་ངམ། བདག་གིས་རང་ཉིད་ཡེས་ར་ཨེལ་གྱི་རྒྱལ་པོ་ཡིན་པ་མི་ཤེས་སམ་ཞེས་གསུངས་ནས།
2SA 19:23 རྒྱལ་པོས་ཤིམ་ཨི་ལ། ཁྱོད་འཆི་བར་མི་འགྱུར་རོ་ཞེས་བསྒོས་ཤིང་ཁོ་ལ་མནའ་བསྐྱལ་ཏོ། །
2SA 19:24 དེར་སོ་ལོའི་ཚ་བོ་མེ་ཕི་པོ་ཤེད་ཀྱང་རྒྱལ་པོ་བསུ་བར་འོངས། དེས་རྒྱལ་པོ་ཕྱིན་པའི་ཉིན་ནས་བཟུང་ཁོང་བདེ་བར་ཡེ་རུ་སཱ་ལེམ་དུ་ཕྱིར་ཕེབས་པའི་བར་དུ། རྐང་པ་མ་བཀྲུས་ཤིང་སྨ་ར་མ་བཞར་ལ། གོས་ཀྱང་མ་བཀྲུས་སོ། །
2SA 19:25 ཡང་ཁོ་རང་ཡེ་རུ་སཱ་ལེམ་དུ་རྒྱལ་པོ་བསུ་བར་འོངས་པའི་ཚེ། རྒྱལ་པོས་དེ་ལ། ཀྱེ་མེ་ཕི་པོ་ཤེད། ཁྱོད་ང་དང་མཉམ་དུ་ཅིའི་ཕྱིར་མ་སོང་ངམ་ཞེས་དྲིས་པའི་ལན་དུ།
2SA 19:26 ཁོ་ན་རེ། ཀྱེ་བདག་གི་ཇོ་བོ་དང་བདག་གི་རྒྱལ་པོ་ལགས། བདག་གི་ཞབས་ཕྱིས་ བདག་ལ་མགོ་བསྐོར་བཏང་བ་རེད། ཞབས་ཕྱི་བདག་ནི་ཞ་བོ་ཡིན་པས། ཉིན་དེར་ཞབས་ཕྱི་བདག་གིས་བོང་བུར་སྒ་བསྟད་ནས་རྒྱལ་པོ་མཉམ་དུ་འགྲོ་བར་བསམ་པ་ཡིན་མོད།
2SA 19:27 འོན་ཀྱང་མི་དེས་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་ཞབས་ཕྱིར་སྐུར་འདེབས་བྱས་པ་རེད། བདག་གི་ཇོ་བོ་དང་བདག་གི་རྒྱལ་པོ་ནི་དཀོན་མཆོག་གི་ཕོ་ཉ་དང་འདྲ་བས། ཁྱེད་ཀྱི་སྤྱན་སྔར་གང་ཞིག་ལེགས་ན་དེ་བཞིན་མཛོད་ཅིག
2SA 19:28 བདག་གི་ཕ་རྒྱུད་ཐམས་ཅད་ནི་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་ཤི་འོས་པའི་མི་ལྟ་བུ་ཡིན་ཡང་། རྒྱལ་པོ་ཁྱེད་ཀྱིས་ཞབས་ཕྱི་བདག་ནི་ཁྱེད་ཀྱི་གསོལ་ལྕོག་ལས་ཟས་སྤྱོད་པའི་གྲལ་དུ་བཅུག་པས། ད་ནི་བདག་ལ་རྒྱལ་པོར་འོ་དོད་འབོད་པའི་དབང་ཞིག་གང་དུ་ཡོད་ཅེས་ཞུས་པ་དང་།
2SA 19:29 རྒྱལ་པོས་དེ་ལ། ཁྱོད་ཀྱིས་ད་དུང་རང་གི་དོན་རྣམས་གླེང་བ་དེ་ཅི་ཡིན། ངས་ནི་ཁྱོད་དང་ཙི་བཱ་གཉིས་ཀྱིས་ས་ཞིང་བགོ་བར་བྱོས་ཤིག་ཅེས་བསྒོའོ་ཞེས་གསུངས་ཤིང་།
2SA 19:30 མེ་ཕི་པོ་ཤེད་ཀྱིས་རྒྱལ་པོ་ལ། བདག་གི་ཇོ་བོ་དང་བདག་གི་རྒྱལ་པོ་བདེ་བར་རང་གི་ཕོ་བྲང་དུ་སླེབས་བྱུང་བས། ཐ་ན་ཐམས་ཅད་ཙི་བཱ་ཡིས་ཁྱེར་ཡང་ཆོག་ཅེས་གསོལ་ཏོ། །
2SA 19:31 གཞན་ཡང་གིལ་ཨད་པ་པཱར་ཟིལ་ལ་ཨི་ནི་རོ་གེ་ལིམ་ནས་མར་འོངས་ཤིང་། རྒྱལ་པོ་སྲུང་སྐྱེལ་བགྱི་བའི་ཕྱིར་ཁོང་དང་ལྷན་ཅིག་ཡོར་དན་གཙང་པོ་བརྒལ་བའོ། །
2SA 19:32 པཱར་ཟིལ་ལ་ཨི་ནི་ཤིན་ཏུ་རྒས་ཤིང་ལོ་བརྒྱད་ཅུར་སོན་པ་ཞིག་ཡིན་ཏེ། ཡང་ཁོ་ནི་ཕྱུག་བདག་ཅིག་ཡིན་པས་རྒྱལ་པོ་མཱ་ཧ་ནཱ་ཡིམ་དུ་ལུས་པའི་ཚེ་ཁོས་ཁ་ཟས་བསྐྱལ་ཏོ། །
2SA 19:33 དེར་རྒྱལ་པོས་པཱར་ཟིལ་ལ་ཨི་ལ། ཁྱེད་རང་ང་དང་མཉམ་དུ་ཕར་འགྲོ་དང་། ངས་ཡེ་རུ་སཱ་ལེམ་དུ་རང་གི་རྩར་ཁྱེད་ཉིད་གསོ་སྐྱོང་བྱའོ་ཞེས་གསུངས་ཀྱང་།
2SA 19:34 པཱར་ཟིལ་ལ་ཨི་ཡིས་རྒྱལ་པོ་ལ། ཕྲན་ཆུང་བདག་རྒྱལ་པོ་དང་མཉམ་དུ་ཡེ་རུ་སཱ་ལེམ་ནས་ད་དུང་ལོ་ཅི་ཙམ་ལ་སྡོད་ཐུབ་བམ།
2SA 19:35 དེ་རིང་བདག་ནི་ལོ་བརྒྱད་ཅུ་ལོན་པས། ད་དུང་ཡག་བཙོག་ཤེས་སམ། ད་དུང་བཟའ་བཏུང་གི་བྲོ་བ་མྱོང་ཐུབ་བམ། ད་དུང་གླུ་བ་ཕོ་མོའི་གླུ་སྐད་ཐོས་ནུས་སམ། ཞབས་ཕྱི་བདག་གིས་ངའི་ཇོ་བོ་དང་ངའི་རྒྱལ་པོར་འོ་བརྒྱལ་གཏོད་དགོས་དོན་ཅི་ཡོད།
2SA 19:36 ཞབས་ཕྱི་བདག་གིས་རྒྱལ་པོ་ཁྱེད་ཉིད་ཡོར་དན་གཙང་པོའི་ཕ་རོལ་ཏུ་སྲུང་སྐྱེལ་བྱེད་པ་ནི་བྱ་བ་ཕྲན་བུ་ཞིག་ཡིན་ལ། རྒྱལ་པོས་བདག་ལ་དེ་ལྟ་བུའི་གསོལ་རས་གནང་དགོས་སམ།
2SA 19:37 ཁྱེད་ཀྱིས་ང་རང་ཕྱིར་ལོག་པར་གནོངས་ཤིག དེ་ནས་བདག་རང་གི་གྲོང་ཁྱེར་དུ་ཚེ་ལས་འདས་ཏེ་རང་གི་ཕ་མའི་དུར་ཁུང་དུ་བསྐུང་བར་འགྱུར་རོ། །ཁྱེད་ཀྱི་ཞབས་ཕྱི་ཀིམ་ཧམ་ལ་གཟིགས་དང་། ཁོ་རང་བདག་གི་ཇོ་བོ་དང་བདག་གི་རྒྱལ་པོ་མཉམ་དུ་ཕར་འགྲོ་བར་མཛོད། ཁྱེད་ཀྱི་སྤྱན་སྔར་གང་ལེགས་ན་ཁོ་ལ་དེ་བཞིན་མཛོད་ཅིག་ཅེས་ཞུས་པའི་ལན་དུ།
2SA 19:38 རྒྱལ་པོས། ཀིམ་ཧམ་ནི་ང་དང་མཉམ་དུ་ཕར་སོང་ཆོག་སྟེ། ཁྱེད་ཀྱིས་གང་ལེགས་པར་འདོད་ན་ངས་ཁོ་ལ་དེ་བཞིན་བྱའོ། །ཁྱེད་ཀྱིས་ང་ལ་གང་ཞུས་ཀྱང་ངས་ཁྱེད་ཀྱི་ཕྱིར་བྱའོ་ཞེས་གསུངས་སོ། །
2SA 19:39 མི་ཚོགས་ཐམས་ཅད་ཡོར་དན་གཙང་པོ་བརྒལ་ཟིན་ཏེ། རྒྱལ་པོའང་ཚུར་འབྱོན་པའི་ཚེ། ཁོང་གིས་པཱར་ཟིལ་ལ་ཨི་ལ་འོ་བྱས་ཤིང་ཁོ་ལ་བྱིན་རླབས་མཛད་ནས་དེ་རང་ཡུལ་དུ་ལོག་གོ །
2SA 19:40 དེ་ནས་རྒྱལ་པོ་གཙང་པོ་བརྒལ་ཏེ་གིལ་གལ་དུ་སླེབས་པ་དང་། ཀིམ་ཧམ་ཡང་ཁོང་དང་མཉམ་དུ་སོང་ངོ་། །དེར་ཡ་ཧུ་དཱ་ཡི་མི་ཐམས་ཅད་དང་ཡེས་ར་ཨེལ་གྱི་མི་རྣམས་ཀྱི་ཕྱེད་ཀས་རྒྱལ་པོར་སྐྱེལ་མ་བྱས།
2SA 19:41 ལྟོས་དང་། ཡེས་ར་ཨེལ་པ་ཐམས་ཅད་རྒྱལ་པོའི་དྲུང་དུ་འོངས་ནས་རྒྱལ་པོ་ལ། རང་རེའི་སྤུན་ཟླ་ཡ་ཧུ་དཱ་པ་རྣམས་ཀྱིས་ཅིའི་ཕྱིར་རྒྱལ་པོ་དང་ཁོང་གི་ཁྱིམ་མི་རྣམས་དང་། ཁོང་གི་རྗེས་སུ་འབྲངས་པའི་མི་ཐམས་ཅད་ལ་ལྐོག་ནས་སྐྱེལ་མ་བྱས་ཏེ་ཡོར་དན་གཙང་པོ་བརྒལ་བ་ཡིན་ནམ་ཞེས་ཞུས་པས།
2SA 19:42 ཡ་ཧུ་དཱ་པ་ཐམས་ཅད་ཀྱིས་ཡེས་ར་ཨེལ་པ་རྣམས་ལ། ངེད་རྣམས་རྒྱལ་པོའི་གཉེན་ཉེ་ཡིན་པས་དེ་ལྟར་བྱས་ཏེ། ཁྱོད་རྣམས་ཅིའི་ཕྱིར་དེའི་དོན་དུ་ཁྲོའམ། ངེད་རྣམས་ཀྱིས་རྒྱལ་པོར་བརྟེན་ནས་ཅི་ཞིག་ཟོས་སམ། ཁོང་གིས་ངེད་རྣམས་ལ་གསོལ་རས་གང་ཞིག་གནང་བ་ཡིན་ནམ་ཞེས་ལན་སྨྲས་ཤིང་།
2SA 19:43 ཡེས་ར་ཨེལ་པ་རྣམས་ཀྱིས་ཡ་ཧུ་དཱ་པ་རྣམས་ལ་ལན་དུ། ངེད་རྣམས་ནི་རྒྱལ་པོ་དང་ལྡབ་བཅུ་ ཡིས་ཉེ་ཞིང་། དཱ་བིད་ཀྱི་སྟེང་དུའང་ཁྱོད་ཚོ་ལས་ངེད་རྣམས་ལ་དབང་ཆེ་བ་ཡིན། ཁྱོད་ཚོས་ཅིའི་ཕྱིར་ངེད་རྣམས་ལ་མཐོང་ཆུང་བྱེད་དམ། རྒྱལ་པོ་ཕྱིར་གདན་འདྲེན་ཞུ་བའི་གྲོས་ནི་ཐོག་མར་ངེད་རྣམས་ཀྱིས་བཏབ་པ་མ་ཡིན་ནམ་ཞེས་སྨྲས་ནའང་། ཡ་ཧུ་དཱ་པའི་གཏམ་ནི་ཡེས་ར་ཨེལ་གྱི་གཏམ་ལས་ཀྱང་མཁྲེགས་པར་གྱུར་ཏོ། །
2SA 20:1 དེར་ཏག་ཏག་ཁྲམ་པ་ཞིག་ཡོད་ཅིང་མིང་ལ་ཤེ་བཱ་ཞེས་བྱ་སྟེ། པེན་ཡཱ་མེན་པ་པིག་རེའི་བུ་ཡིན་ལ། དེས་རྭ་དུང་འབུད་ཀྱིན་འདི་ལྟར། བདག་ཅག་ལ་དཱ་བིད་ཀྱི་ནང་དུ་སྐལ་བ་མེད་ཅིང་། ཡེ་སེ་ཡི་བུ་དང་འབྲེལ་བ་མེད་དེ། ཀྱེ་ཡེས་ར་ཨེལ་པ་རྣམས། མི་རེ་རེ་རང་རང་གི་གུར་དུ་སོང་ཞིག་ཅེས་སྨྲས་པས།
2SA 20:2 ཡེས་ར་ཨེལ་པ་ཐམས་ཅད་དཱ་བིད་དང་བྲལ་ནས་པིག་རེའི་བུ་ཤེ་བཱ་ཡི་རྗེས་སུ་འབྲངས། ཡིན་ནའང་ཡ་ཧུ་དཱ་པ་རྣམས་ཡོར་དན་གཙང་པོ་ནས་བཟུང་སྟེ་ཡེ་རུ་སཱ་ལེམ་བར་དུ་རང་གི་རྒྱལ་པོའི་རྗེས་སུ་དམ་པོར་འབྲངས་པ་རེད།
2SA 20:3 རྒྱལ་པོ་དཱ་བིད་ཡེ་རུ་སཱ་ལེམ་དུ་སླེབས་ཤིང་རང་གི་ཕོ་བྲང་དུ་ཕེབས་ནས། སྔར་ཕོ་བྲང་བསྲུང་བར་བཞག་པའི་ཆུན་མ་བཅུ་པོ་བཀག་སྲུང་བྱས། ཁོང་གིས་དེ་དག་འཚོ་སྐྱོང་བྱས་ནའང་དེ་དག་གི་གམ་དུ་མ་ཕྱིན་པ་དང་། དེ་དག་འཆི་བའི་ཉིན་མོ་བར་བཙོན་དུ་ཟུར་བཀག་བྱས་ནས་བཞག་གོ །
2SA 20:4 དེ་ནས་རྒྱལ་པོས་ཨ་མ་སཱ་ལ། ཉིན་གསུམ་གྱི་ནང་དུ་ཡ་ཧུ་དཱ་པ་ཐམས་ཅད་ངའི་དྲུང་དུ་བསྡུས་ཤིག ཁྱོད་རང་ཡང་འདི་རུ་ལོག་དགོས་ཞེས་བཀའ་བསྩལ་པ་དང་།
2SA 20:5 ཨ་མ་སཱ་ནི་ཡ་ཧུ་དཱ་པ་རྣམས་བསྡུ་བར་ཕྱིན་ནའང་། ཁོས་འགོར་འགྱངས་བྱས་ཏེ་རྒྱལ་པོའི་དུས་བཅད་ལས་བརྒལ་བས།
2SA 20:6 དཱ་བིད་ཀྱིས་ཨ་བི་ཤཱ་ཨི་ལ། ད་ལྟ་པིག་རེའི་བུ་ཤེ་བཱ་ཡིས་རང་ཅག་ལ་ཨབ་ཤཱ་ལོམ་ལས་ཀྱང་ལྷག་པར་གནོད་པ་བྱེད་ཉེན་ཆེ་བས། མི་དེ་མཁར་རྫོང་བཙན་པོའི་ནང་དུ་ཞུགས་ཏེ་རང་རེའི་མིག་མདུན་ནས་མ་བྲོས་གོང་དུ། ཁྱོད་ཀྱིས་རང་གི་ཇོ་བོའི་ཞབས་ཕྱི་རྣམས་ཁྲིད་ནས་ཁོའི་ར་མདར་རྒྱུགས་ཤིག་ཅེས་བསྒོས་པ་ལ།
2SA 20:7 ཡོ་ཨབ་ཀྱི་མི་རྣམས་དང་། ཀེ་རེད་པ་དང་། ཕེ་ལེད་པ་དང་། དཔའ་རྩལ་ཅན་ཐམས་ཅད་ཡེ་རུ་སཱ་ལེམ་ནས་ཐོན་ཏེ་པིག་རེའི་བུ་ཤེ་བཱ་ཡི་ར་མདར་བརྒྱུགས་པ་དང་།
2SA 20:8 ཁོ་རྣམས་གིབ་ཡོན་གྱི་ཕ་བོང་ཆེན་པོ་ཡོད་སར་སླེབས་པའི་ཚེ། ཨ་མ་སཱ་ཁོ་རྣམས་བསུ་བར་འོངས་པ་དང་། སྐབས་དེར་ཡོ་ཨབ་ཀྱིས་གོ་ཁྲབ་གྱོན་ནས་རལ་གྲི་བཏགས་པའི་སྐ་རགས་བཅིངས་ཡོད་དེ། རལ་གྲི་ཤུབས་ཀྱི་ནང་དུ་ཡོད་པ་ཡིན། ཡོ་ཨབ་མདུན་དུ་སྐྱོད་པའི་ཚེ་རལ་གྲི་ཤུབས་ནས་ལྷུང་བ་རེད།
2SA 20:9 དེར་ཡོ་ཨབ་ཀྱིས་ཨ་མ་སཱ་ལ། ངའི་སྤུན་མཆེད། ཁྱོད་རང་སྐུ་ཁམས་བདེ་ལགས་སམ་ཞེས་སྨྲས་པ་དང་། ལག་གཡས་པས་ཨ་མ་སཱའི་སྨྲ་ར་ལ་འཐམས་ཏེ་ཁོ་ལ་འོ་བྱེད་རྩིས་བྱས་སོ། །
2SA 20:10 ཨ་མ་སཱ་ཡིས་ཡོ་ཨབ་ཀྱི་ལག་ཏུ་རལ་གྲི་ཡོད་པར་དོགས་ཟོན་མ་བྱས་པས། ཡོ་ཨབ་ཀྱིས་རལ་གྲི་ཡིས་ཁོའི་གྲོད་ཁོག་ལ་བསྣུན་ཐེངས་གཅིག་གིས་ཁོ་རྒྱུ་མ་ས་རུ་བླུགས་ནས་ཤིའོ། །དེ་ནས་ཡོ་ཨབ་དང་ཁོའི་ནུ་བོ་ཨ་བི་ཤཱ་ཨི་གཉིས་ཀྱིས་པིག་རེའི་བུ་ཤེ་བཱ་བདས་སོ། །
2SA 20:11 ཡོ་ཨབ་ཀྱི་གཡོག་པོ་ཞིག་ཨ་མ་སཱ་ཡི་བེམ་པོའི་རྩར་ལངས་བསྡད་དེ་ན་རེ། སུ་ཞིག་ཡོ་ཨབ་ལ་དགའ་བ་དང་དཱ་བིད་ཀྱི་ཕྱོགས་ཡིན་ན། དེ་ནི་ཡོ་ཨབ་ཀྱི་རྗེས་སུ་འབྲང་འོས་པ་ཡིན་ཞེས་བསྐུལ།
2SA 20:12 ཨ་མ་སཱའི་ལུས་ཡོངས་ཁྲག་གིས་བརྫིས་ནས་ལམ་དཀྱིལ་དུ་འགྱེལ་ཡོད་ཅིང་། མི་དེས་དེར་སླེབས་པའི་འབངས་ཐམས་ཅད་ལངས་སྡོད་པ་མཐོང་བས། ཨ་མ་སཱའི་བེམ་པོ་ལམ་ཁ་ནས་ཞིང་ཁར་བསྣུར་ཞིང་སྟེང་དུ་ལྭ་བ་བཀབ་བོ། །
2SA 20:13 བེམ་པོ་ལམ་ཁ་ནས་བསྣུར་བའི་རྗེས་སུ། མི་ཐམས་ཅད་ཡོ་ཨབ་ཀྱི་རྗེས་འབྲངས་ནས་པིག་རེའི་བུ་ཤེ་བཱ་ཡི་ར་མདར་བརྒྱུགས་སོ། །
2SA 20:14 དེ་ནས་ཤེ་བཱ་ནི་ཡེས་ར་ཨེལ་གྱི་ཚོ་ཁག་རེ་རེ་བརྒྱུད་ནས། པེད་མ་ཨ་ཀཱ་ཡི་ཨ་བེལ་བར་དང་པེ་རེ་པའི་མངའ་ཁོངས་ཀུན་ཏུ་སླེབས་པ་དང་། མི་ཐམས་ཅད་འདུས་ནས་ཁོའི་རྗེས་སུ་འབྲངས་པ་རེད།
2SA 20:15 ཡོ་ཨབ་ཀྱི་རྗེས་སུ་འབྲངས་པའི་མི་ཐམས་ཅད་ཨ་བེལ་པེད་མ་ཨ་ཀཱ་རུ་སླེབས་ནས་ཤེ་བཱ་བསྐོར་བ་དང་། གྲོང་ཁྱེར་གྱི་ཁ་གཏད་དུ་ས་རགས་བརྩིགས་ཤིང་ལྕགས་རིའི་ཁ་གཏད་དུ་བསྡད་ནས། ཁོ་རྣམས་ཀྱིས་ལྕགས་རི་རྡིབ་ཏུ་འཇུག་པའི་ཕྱིར་དེར་ཤུགས་ཀྱིས་བརྡབས་པ་རེད།
2SA 20:16 དེའི་ཚེ་བུད་མེད་བློ་གྲོས་དང་ལྡན་པ་ཞིག་གིས་མཁར་ཁ་ནས་བོས་ཏེ། གསན་རོགས་གནང་། གསན་རོགས་གནང་། ཁྱེད་ཅག་གིས་ཡོ་ཨབ་ལ། འདིར་ཉེ་བར་ཤོག་དང་ངས་ཁྱེད་ལ་གཏམ་ཞིག་ཞུ་བར་བྱའོ་ཞེས་ཞུ་བར་མཛོད་ཅེས་སྨྲས་པས།
2SA 20:17 ཡོ་ཨབ་བུད་མེད་དེའི་ཉེ་སར་ཕྱིན་པའི་ཚེ་བུད་མེད་ཀྱིས། ཁྱེད་རང་ཡོ་ཨབ་ལགས་སམ་ཞེས་སྨྲས་པས་ལན་དུ། ཁོས་ང་རང་ཡིན་ཞེས་སྨྲས་སོ། །དེ་ནས་བུད་མེད་ཀྱིས། ཁྱེད་ཀྱིས་གཡོག་མོ་བདག་གི་གཏམ་ལ་གསན་རོགས་ཞེས་ཞུས་པར། ཁོས་ངས་ཉན་ཡོད་ཅེས་སྨྲས་སོ། །
2SA 20:18 ཡང་བུད་མེད་ཀྱིས། གནའ་བོའི་ངག་རྒྱུན་ལ། ཨ་བེལ་དུ་གྲོས་འདྲི་འོས་ཏེ། དེ་རུ་དོན་རྣམས་ཐག་གིས་ཆོད་པ་ཡིན་ཞེས་ཟེར་རོ། །
2SA 20:19 ང་ནི་ཡེས་ར་ཨེལ་པའི་ཁྲོད་དུ་ཞི་བདེ་ལ་དགའ་བ་དང་བློ་དཀར་བ་ཡིན། ད་ལྟ་ཁྱེད་ཀྱིས་ཡེས་ར་ཨེལ་གྱི་མ་ཡུམ་ཡིན་པའི་གྲོང་ཁྱེར་འདི་བརླག་འདོད་པ་སྟེ། ཁྱེད་ཀྱིས་དཀོན་མཆོག་ཡ་ཝཱེའི་ནོར་སྐལ་མེད་པར་བཟོ་བ་དེ་ཅི་ཡིན་ཞེས་ཞུས་པར།
2SA 20:20 ཡོ་ཨབ་ཀྱིས་ལན་དུ། དེ་ལྟར་མིན་ཏེ། ངས་གཏན་ནས་ཁྱུར་མིད་མི་གཏོང་ལ་བརླག་པར་ཡང་མི་བྱེད།
2SA 20:21 གཏམ་ནི་དེ་བཞིན་མ་ཡིན་གྱི། ཨེ་ཕཱར་ཡིམ་རི་ཁུལ་གྱི་པིག་རེའི་བུ་ཤེ་བཱ་བྱ་བ་དེས། ལག་པ་བཏེགས་ནས་རྒྱལ་པོ་དཱ་བིད་ལ་ངོ་རྒོལ་བྱས་པའི་རྐྱེན་ཁོ་ན་ཡིན། ཁྱོད་ཀྱིས་མི་དེ་གཅིག་པུ་ངའི་ལག་ཏུ་སྤྲོད་ན། ང་གྲོང་ཁྱེར་དང་བྲལ་ནས་འགྲོ་ངེས་ཡིན་ཞེས་སྨྲས་པས། བུད་མེད་ཀྱིས་ཡོ་ཨབ་ལ། གཟིགས་དང་། དེའི་མགོ་ནི་ལྕགས་རིའི་སྟེང་ནས་གཡུག་པར་བྱའོ་ཞེས་སྨྲས་ཤིང་།
2SA 20:22 བུད་མེད་དེ་སོང་སྟེ་རང་གི་བློ་གྲོས་ལ་བརྟེན་ནས་མི་ཚོགས་ལ་སྐུལ་མ་བཏང་ཞིང་། དེ་དག་གིས་པིག་རེའི་བུ་ཤེ་བཱ་ཡི་མགོ་བཅད་དེ་ཡོ་ཨབ་ཀྱི་དྲུང་དུ་གཡུགས་པས། དེས་ནི་རྭ་དུང་བུས་པ་ལ་མི་རྣམས་གྲོང་ཁྱེར་དེ་ལས་ཆས་པ་དང་། མི་རེ་རེ་རང་རང་གི་གུར་དུ་སོང་། ཡོ་ཨབ་ཕྱིར་ཡེ་རུ་སཱ་ལེམ་དུ་ལོག་སྟེ་རྒྱལ་པོའི་དྲུང་དུ་ཕྱིན་ཏོ། །
2SA 20:23 ཡོ་ཨབ་ནི་ཡེས་ར་ཨེལ་པའི་དམག་དཔུང་ཐམས་ཅད་ཀྱི་དམག་དཔོན་དང་། ཡེ་ཧོ་ཡ་དཱ་ཡི་བུ་པེ་ནཱ་ཡ་ནི་ཀེ་རེད་པ་དང་ཕེ་ལེད་པའི་དམག་དཔོན་དུ་བསྐོས་ལ།
2SA 20:24 ཨ་དོ་རམ་ནི་སྡུག་ལས་རྒྱག་མཁན་རྣམས་ཀྱི་འགོ་དཔོན་དང་། ཨ་ཧི་ལུད་ཀྱི་བུ་ཡེ་ཧོ་ཤ་ཕད་ནི་ལོ་རྒྱུས་འགོད་མཁན་དུ་བསྐོས་ཏེ།
2SA 20:25 ཤེ་ཝཱ་ནི་དྲུང་ཡིག་དང་། ཟཱ་ཏོག་དང་ཨབ་ཡཱ་ཐར་གཉིས་ནི་མཆོད་དཔོན་དང་།
2SA 20:26 ཡཱ་ཨིར་པ་ཨི་རཱ་ཡང་དཱ་བིད་ཀྱི་མཆོད་དཔོན་དུ་བསྐོས་པའོ། །
2SA 21:1 དཱ་བིད་རྒྱལ་པོར་བཞུགས་དུས་སུ་ལོ་གསུམ་ལ་མུ་གེ་བྱུང་ཞིང་། དཱ་བིད་ཀྱིས་དཀོན་མཆོག་ཡ་ཝཱེ་ལ་ཐུགས་བརྟག་ཞུས་པ་ལ། དཀོན་མཆོག་ཡ་ཝཱེས་འདི་སྐད་དུ། སོ་ལོ་དང་ཁོའི་ཁྱིམ་རྒྱུད་ཀྱིས་གིབ་ཡོན་པ་རྣམས་བསད་ནས་ཁྲག་བཞུར་བའི་སྡིག་པ་བསགས་པའི་རྐྱེན་གྱིས་དེ་ལྟར་བྱུང་ངོ་ཞེས་གསུངས་སོ། །
2SA 21:2 རྒྱལ་པོ་དཱ་བིད་ཀྱིས་གིབ་ཡོན་པ་རྣམས་བོས་ཡོང་སྟེ་ཁོ་རྣམས་ལ་གསུང་མོལ་གནང་། གིབ་ཡོན་པ་ནི་ཡེས་ར་ཨེལ་གྱི་རྒྱུད་མ་ཡིན་གྱི་ཨེ་མོར་པའི་ལྷག་ལུས་རྣམས་ཡིན་ནོ། །ཡེས་ར་ཨེལ་པ་རྣམས་ཀྱིས་དེ་དག་ལ་ཁོ་རྣམས་མི་གསོད་པའི་མནའ་བསྐྱལ་ནའང་། སོ་ལོས་ཡེས་ར་ཨེལ་དང་ཡ་ཧུ་དཱ་པ་རྣམས་ཀྱི་དོན་དུ་བརྩོན་སེམས་བསྐྱེད་ནས་དེ་དག་གསོད་དུ་བསྙེགས་པ་རེད།
2SA 21:3 དཱ་བིད་ཀྱིས་གིབ་ཡོན་པ་རྣམས་ལ་འདི་ལྟར། ཁྱོད་ཅག་གིས་དཀོན་མཆོག་ཡ་ཝཱེའི་ནོར་སྐལ་ལ་བྱིན་གྱིས་བརླབ་པའི་ཕྱིར་ངས་ཁྱོད་ཅག་ལ་ཅི་བྱེད་དགོས་སམ། སྡིག་བཤགས་སུ་ངས་ཅི་གཏོང་བར་བྱའམ་ཞེས་དྲིས་པར།
2SA 21:4 གིབ་ཡོན་པས་ཁོང་ལ། ངེད་རྣམས་ནི་སོ་ལོ་དང་དེའི་ཁྱིམ་གྱི་དོན་དང་གསེར་དངུལ་ལ་འབྲེལ་བ་ཅི་ཡང་མེད། ཡང་ང་ཚོའི་རྐྱེན་གྱིས་ཡེས་ར་ཨེལ་པ་གང་རུང་ཞིག་མི་གསོད་པར་མཛོད་ཅེས་ཞུས་པ་དང་། ཁོང་གིས། ཁྱོད་རྣམས་ཀྱིས་ཅི་ལྟར་སྨྲས་ན་བདག་གིས་དེ་བཞིན་བྱ་ཞེས་གསུངས་ཤིང་།
2SA 21:5 དེ་དག་གིས་རྒྱལ་པོ་ལ། ང་ཚོ་བསད་ནས་རྩ་མེད་དུ་གཏོང་འདོད་མཁན་དང་། ང་ཚོ་ཡེས་ར་ཨེལ་གྱི་ཡུལ་ལ་སྡོད་དུ་མི་འཇུག་མཁན།
2SA 21:6 མི་དེའི་བུ་རབས་ཚ་རྒྱུད་ལས་མི་བདུན་ང་ཚོར་སྤྲོད་ཅིག་དང་། དཀོན་མཆོག་ཡ་ཝཱེས་སོ་ལོ་བདམས་སའི་ཡུལ་ཏེ་གིབ་ཨ་རུ། ང་ཚོས་དེ་དག་དཀོན་མཆོག་ཡ་ཝཱེའི་སྤྱན་སྔར་དཔྱང་བར་བྱའོ་ཞེས་ཞུས་པར། རྒྱལ་པོས། ངས་དེ་བཞིན་གཏོང་བར་བྱ་ཞེས་གསུངས་སོ། །
2SA 21:7 ཡང་དཱ་བིད་དང་སོ་ལོའི་བུ་ཡོ་ནཱ་ཐན་གཉིས་ཀྱི་བར་དུ་དཀོན་མཆོག་ཡ་ཝཱེ་དཔང་དུ་བཙུགས་པའི་མནའ་ཡོད་པས། རྒྱལ་པོས་སོ་ལོའི་ཚ་བོ་དང་ཡོ་ནཱ་ཐན་གྱི་བུ་མེ་ཕི་པོ་ཤེད་གཅེས་སུ་བཟུང་བ་དང་།
2SA 21:8 ཨ་ཡཱ་ཡི་བུ་མོ་རི་ཚི་ཕཱ་ལས་ཆད་པའི་སོ་ལོའི་བུ་ཨར་མོ་ནི་དང་། མེ་ཕི་པོ་ཤེད་ བྱ་བ་གཉིས་དང་། སོ་ལོའི་བུ་མོ་མི་ཀལ་ དང་མེ་ཧོ་ལད་པ་པཱར་ཟིལ་ལ་ཨི་ཡི་བུ་ཨད་རི་ཨེལ་གཉིས་ལ་སྐྱེས་པའི་བུ་ལྔ་ནི།
2SA 21:9 གིབ་ཡོན་པ་རྣམས་ཀྱི་ལག་ཏུ་སྤྲད་ནས། དེ་དག་གིས་ཁོ་རྣམས་རི་མགོར་དཀོན་མཆོག་ཡ་ཝཱེའི་དྲུང་དུ་དཔྱངས་ཏེ། མི་བདུན་པོ་དེ་མཉམ་དུ་ཤི་བ་རེད། ཁོ་ཚོ་བསད་པའི་དུས་ནི་བཙས་མ་བརྔ་བའི་ཉིན་ཐོག་མ་རྣམས་ཏེ། ནས་འབྲེག་འགོ་ཚུགས་པའི་དུས་ཡིན་ནོ། །
2SA 21:10 དེ་ནས་ཨ་ཡཱ་ཡི་བུ་མོ་རི་ཚི་ཕཱ་ཡིས་རྩིད་རས་ཁུར་ཏེ་ཕ་བོང་སྟེང་བཏིངས་ནས་སྤྱིལ་བུ་བཟོས་ཤིང་། བཙས་མ་བརྔ་བའི་དུས་ཀྱི་ཐོག་མ་ནས་གནམ་ལས་ཆར་ཆུ་བེམ་པོའི་སྟེང་གཤོ་བའི་བར་དུ། ཉིན་དཀར་ནམ་མཁའི་བྱ་རྣམས་དང་། མཚན་མོར་ཐང་གི་གཅན་གཟན་རྣམས་འབབ་ཏུ་མ་བཅུག་པར་བེམ་པོ་བསྲུངས་སོ། །
2SA 21:11 ཡང་མི་ཞིག་གིས་སོ་ལོའི་ཆུན་མ་ཨ་ཡཱ་ཡི་བུ་མོ་རི་ཚི་ཕཱ་ཡིས་ཅི་བྱས་པ་དེ་དཱ་བིད་ལ་སྨྲས་པས།
2SA 21:12 དཱ་བིད་སོང་སྟེ་གིལ་ཨད་ཀྱི་ཡཱ་བེ་སི་པ་རྣམས་ནས་སོ་ལོའི་རུས་པ་དང་དེའི་བུ་ཡོ་ནཱ་ཐན་གྱི་རུས་པ་སྤོས་སོ། །སྔར་ཕེ་ལེ་ཤེད་པ་རྣམས་ཀྱིས་གིལ་བོ་ཨ་རུ་སོ་ལོ་བསད་ནས་བེམ་པོ་ནི་པེད་ཤན་གྱི་ཐང་ཆེན་དུ་དཔྱངས་པ་དང་། ཕྱིས་སུ་གིལ་ཡད་ཀྱི་ཡཱ་པིས་པ་རྣམས་ཀྱིས་བེམ་པོ་བརྐུས་པ་ཡིན་ནོ། །
2SA 21:13 དཱ་བིད་ཀྱིས་སོ་ལོ་དང་དེའི་བུ་ཡོ་ནཱ་ཐན་གཉིས་ཀྱི་རུས་པ་རྣམས་གནས་དེ་ནས་ཁྱེར་ཅིང་། དེ་དག་གིས་དཔྱངས་པ་རྣམས་ཀྱི་རུས་པ་ཡང་བསྡུས་སོ། །
2SA 21:14 དེར་ཁོ་རྣམས་ཀྱིས་སོ་ལོ་དང་དེའི་བུ་ཡོ་ནཱ་ཐན་གཉིས་ཀྱི་རུས་པ་རྣམས་པེན་ཡཱ་མེན་གྱི་ས་ཆ་ཙེ་ལཱ་རུ། སོ་ལོའི་ཕ་ཁི་སིའི་དུར་དུ་བསྐུངས་པ་དང་། དེ་རྣམས་ཀྱིས་རྒྱལ་པོས་བཀའ་བསྩལ་པ་ཐམས་ཅད་བསྒྲུབས་པ་དང་། དེ་ནས་དཀོན་མཆོག་གིས་ཡུལ་དེའི་ཞུ་བར་གསན་ཏོ། །
2SA 21:15 ཕེ་ལེ་ཤེད་པ་དང་ཡེས་ར་ཨེལ་པའི་བར་ལ་དམག་འཁྲུག་བྱུང་། དཱ་བིད་ཀྱིས་རང་གི་འཁོར་གཡོག་རྣམས་ཁྲིད་ནས་མར་སོང་སྟེ་ཕེ་ལེ་ཤེད་པ་དང་འཐབ་ཅིང་ཁོང་ཐང་ཆད་པར་གྱུར་ཏོ། །
2SA 21:16 མི་གཟུགས་རིང་གི་བུ་རྒྱུད་རྣམས་ལས་ཡེ་པི་བེ་ནོབ་བྱ་བ་དེས་དཱ་བིད་གསོད་དགོས་པར་སྨྲ་ཞིང་། དེའི་ལི་ཡི་མདུང་རྩེའི་ལྗིད་ཚད་ལ་སྲང་སུམ་བརྒྱ་ཡོད་ལ། རྐེད་པར་རལ་གྲི་གསར་པ་ཞིག་ཀྱང་བཏགས་ཡོད།
2SA 21:17 ཟེ་རུ་ཡཱ་ཡི་བུ་ཨ་བི་ཤཱ་ཨིས་ཁོང་ལ་རོགས་བྱས་ཏེ་ཕེ་ལེ་ཤེད་པར་བརྡུངས་ནས་བསད་དོ། །ཉིན་དེར་དཱ་བིད་ཀྱི་མི་རྣམས་ཀྱིས་མནའ་བསྐྱལ་ནས་ཁོང་ལ། ཡེས་ར་ཨེལ་གྱི་རྒྱུད་མི་ཆད་པའི་ཕྱིར་དེང་ཕྱིན་ཆད་ཁྱེད་ང་ཚོ་དང་མཉམ་དུ་འཐབ་མོར་མི་ཞུགས་པར་མཛོད་ཅེས་ཞུས་སོ། །
2SA 21:18 དེའི་རྗེས་སུ་ཡང་གོབ་ཡུལ་དུ་ཕེ་ལེ་ཤེད་པ་རྣམས་དང་འཐབ་མོ་བྱུང་བ་དང་། ཧུ་ཤཱ་པ་སིབ་བེ་ཀཱ་ཨི་བྱ་བ་དེས་མི་གཟུགས་རིང་གི་བུ་རྒྱུད་རྣམས་ལས་སབ་བྱ་བ་དེ་བསད་དོ། །
2SA 21:19 ཡང་དེ་རྣམས་གོབ་ཡུལ་དུ་སླར་ཡང་ཕེ་ལེ་ཤེད་པ་དང་འཐབ་ཅིང་། པེད་ལེ་ཧེམ་པ་ཡཱ་རེ་ཨོར་གིན་གྱི་བུ་ཨེལ་ཧ་ནན་གྱིས་གཱད་པ་གོལ་ཡད་བྱ་བ་དེ་བསད་པ་དང་། མི་དེའི་མདུང་ནི་འཐག་འཁོར་གྱི་གདུང་མ་ལྟ་བུ་ཡོད་པ་ཡིན།
2SA 21:20 དེ་ནས་ཡང་ཐེངས་ཤིག་ལ་ཁོ་རྣམས་གཱད་ཡུལ་དུ་འཐབ་ཅིང་། དེ་རུ་མི་ཆེན་ཞིག་ཡོད་ཅིང་དེའི་ལག་པ་དང་རྐང་པ་རེ་རེར་མཛུབ་མོ་དྲུག་རེ་ཡོད་པས་ཁྱོན་སྡོམ་མཛུབ་མོ་ཉེར་བཞི་ཡོད་པ་ཡིན། མི་དེ་ཡང་མི་གཟུགས་རིང་གི་རྒྱུད་ཡིན་ནོ། །
2SA 21:21 དེས་ནི་ཡེས་ར་ཨེལ་ལ་སྐུར་བ་བཏབ་པའི་ཚེ། དཱ་བིད་ཀྱི་སྐུ་མཆེད་ཤིམ་ཨི་ཡི་བུ་ཡོ་ནཱ་ཐན་གྱིས་ཁོ་བསད་དོ། །
2SA 21:22 མི་དེ་བཞི་པོ་གཱད་པའི་མི་གཟུགས་རིང་ལས་ཆད་ཅིང་། དཱ་བིད་དང་དེའི་འཁོར་གཡོག་གི་ལག་ནས་ཤིའོ། །
2SA 22:1 དཀོན་མཆོག་ཡ་ཝཱེས་དཱ་བིད་ནི་དེའི་དགྲ་བོ་ཐམས་ཅད་དང་སོ་ལོའི་ལག་ནས་བསྐྱབས་པའི་ཉིན་ལ། ཁོང་གིས་དཀོན་མཆོག་ཡ་ཝཱེའི་དྲུང་དུ་མགུར་མ་འདིའི་ཚིག་རྣམས་ཞུས་པ་སྟེ།
2SA 22:2 ང་ཡི་བྲག་རྡོ་དང་ནི་རི་རྫོང་དང་། །ང་ཡི་སྲོག་སྐྱོབ་ཡ་ཝཱེ་ཁོང་ཉིད་ཡིན། །
2SA 22:3 ང་ཡི་དཀོན་མཆོག་བདག་གི་ཕ་བོང་ལགས། །ཁྱེད་ནི་ང་རང་སྐྱབས་སུ་འགྲོ་ས་ཡིན། །ང་ཡི་ཕུབ་དང་ཐར་པའི་རྭ་དུང་ དང་། །བདག་གི་བཙན་རྫོང་དང་ནི་སྐྱབས་གནས་ལགས། །གདུག་རྩུབ་ཅན་ལས་བསྐྱབས་ནས་ཐར་མཛད་པ། །ཀྱེ་ཀྱེ་ང་ཡི་སྐྱབས་མགོན་ཁྱེད་ཉིད་དོ། །
2SA 22:4 བསྟོད་པར་འོས་པའི་ཡ་ཝཱེ་ང་ཡིས་འབོད། །དེ་ནས་ང་རང་དགྲ་བོ་ཀུན་ལས་ཐར། །
2SA 22:5 འཆི་བའི་རྦ་རླབས་ཀྱིས་ནི་བདག་མཐའ་བསྐོར། །འཇོམས་བྱེད་དྲག་བཞུར་ཆུ་བོས་ང་རང་བསྣུབས། །
2SA 22:6 གཤིན་པོའི་ཡུལ་གྱི་ཐག་པས་བདག་ནི་འཁྲིས། །འཆི་བའི་རྙི་རྒྱ་ང་ཡི་སྟེང་དུ་བབས། །
2SA 22:7 དཀའ་སྡུག་མྱོང་དུས་བདག་གིས་ཡ་ཝཱེ་བོས། །རང་གི་དཀོན་མཆོག་ཉིད་ལ་ཆོ་ངེ་བཏོན། །མཆོད་ཁང་ནང་དུ་བདག་གི་སྐད་གསན་ཅིང་། །བདག་གི་སྨྲེ་སྔགས་ཁོང་གི་སྙན་དུ་ཆུད། །
2SA 22:8 དེའི་དུས་ས་གཞི་འགུལ་ཞིང་འདར་བ་དང་། །ནམ་མཁའི་གཏིང་གཞི་ཀུན་ནས་གཡོས་པ་སྟེ། །ཡ་ཝཱེ་ཁོང་ཉིད་ཁྲོས་པའི་རྐྱེན་ལས་བྱུང་། །
2SA 22:9 ཁོང་གི་ཤངས་ལས་དུ་བ་སྟུག་པོ་འཕྱུར། །ཁོང་གི་ཞལ་ལས་མེ་དཔུང་དྲག་པོ་འབར། །ཐ་ན་སོལ་བ་ཡང་ནི་མེ་ལ་སྦར། །
2SA 22:10 ཁོང་གིས་ནམ་མཁའ་དཔྱངས་ནས་མར་ཕེབས་ཤིང་། །ཁོང་གི་ཞབས་འོག་སྤྲིན་ནག་སྟུག་པོ་འཁྲིགས། །
2SA 22:11 ཁོང་ནི་ཀེ་རུབ་ཅིག་ལ་བཅིབས་ནས་འཕུར། །རླུང་གི་གཤོག་པའི་རྩེ་མོར་མངོན་པར་མཛད། །
2SA 22:12 ཁོང་ནི་སྨག་རུམ་དང་ནི་ཆུ་ཆེན་དང་། །ཆར་སྤྲིན་ནག་པོ་ཕྱོགས་བཞིའི་ཡོལ་བར་མཛད། །
2SA 22:13 ཁོང་ལས་འཁྱུགས་པའི་གློག་དམར་དྲག་པོ་ཡིས། །སོལ་བ་ཡང་ནི་མེ་རུ་སྦར་བ་འོ། །
2SA 22:14 ཡ་ཝཱེས་ནམ་མཁར་འབྲུག་སྒྲ་ལྡིར་བ་དང་། །བླ་ན་མེད་པ་ཉིད་ཀྱིས་གསུང་སྐད་བསྒྲགས། །
2SA 22:15 མདའ་མོ་འཕངས་ནས་དགྲ་རྣམས་ཕྱོགས་བཞིར་གཏོར། །གློག་དམར་འཁྱུགས་ཏེ་ཁོ་རྣམས་བཅོམ་པ་འོ། །
2SA 22:16 ཡ་ཝཱེས་བཀའ་བཀྱོན་གནང་བ་དང་། །ཤངས་ལས་དབུགས་ཤིག་ཐོན་མ་ཐག །རྒྱ་མཚོའི་མཐིལ་ནི་སྣང་བར་གྱུར། །ས་གཞིའི་རྨང་ཡང་ཕྱི་རུ་མངོན། །
2SA 22:17 སྟེང་ནས་ཕྱག་ཟུང་བརྐྱངས་ཏེ་ང་ནི་ཟིན། །གཏིང་ཟབ་ཆུ་ལས་ང་རང་ཡར་དྲངས་སོ། །
2SA 22:18 ཁོང་གིས་ང་ནི་དགྲ་བོ་སྟོབས་ཆེན་དང་། །ང་ལ་སྡང་བ་རྣམས་ལས་བསྐྱབས་པ་སྟེ། །དེ་རྣམས་ང་ལས་སྟོབས་བོ་ཆེ་ཕྱིར་རོ། །
2SA 22:19 ཆག་སྒོའི་ཉིན་མོར་ཁོ་རྣམས་ང་ལ་རུབས། །འོན་ཀྱང་ཡ་ཝཱེ་བདག་གི་སྐྱབས་གནས་ཡིན། །
2SA 22:20 ཁོང་གིས་ང་རང་ས་ཁོད་ཡངས་སར་ཁྲིད། །ཁོང་ནི་བདག་ལ་མཉེས་པས་བདག་ནི་བསྐྱབས། །
2SA 22:21 བདག་གི་དྲང་བདེན་བཞིན་དུ་གསོལ་རས་བསྩལ། །ལག་པ་གཙང་བ་ལྟར་དུ་ཨ་ལན་གནང་། །
2SA 22:22 རྒྱུ་མཚན་བདག་གིས་ཡ་ཝཱེའི་ལམ་རྣམས་བསྲུངས། །ངན་པར་སྤྱད་ནས་དཀོན་མཆོག་བསྐྱུར་པ་མེད། །
2SA 22:23 ཁོང་གི་ཁྲིམས་སྲོལ་ཐམས་ཅད་མདུན་དུ་མཆིས། །ཁོང་གི་སྒྲིག་ཁྲིམས་ནམ་ཡང་སྤངས་པ་མིན། །
2SA 22:24 ཁོང་གི་ཞལ་དྲུང་ང་རང་སྐྱོན་དང་བྲལ། །རང་ཉིད་ཉེས་སྐྱོན་རྣམས་ལས་བསྲུངས་པ་ཡིན། །
2SA 22:25 དེའི་ཕྱིར་ཡ་ཝཱེས་ང་ཡི་དྲང་བདེན་དང་། །ཁོང་གི་སྤྱན་སྔར་ང་རང་གཙང་བ་བཞིན། །དེ་དང་མཐུན་པའི་གསོལ་རས་ང་ལ་གནང་། །
2SA 22:26 བྱམས་བརྩེ་ཅན་ལ་ཁྱེད་ཀྱིས་བྱམས་བརྩེས༌སྐྱོང༌། །ཉེས་མེད་མི་ལ་ཁྱེད་ཀྱིས་ལྷག་བསམ༌མངོན། །
2SA 22:27 དྭངས་གཙང་མི་ལ་ཁྱེད་ཀྱིས་རྣམ་དག་མངོན། །གཡོ་སྒྱུ་ཅན་ལ་ཁྱེད་ཀྱིས་མཁས་མཛངས་སྤྱོད། །
2SA 22:28 ཉམ་ཐག་མི་རྣམས་ཁྱེད་ཀྱིས་སྐྱོབ་པ་དང་། །ཁྱེད་ཀྱི་སྤྱན་གྱིས་རང་མཐོང་ཅན་རྣམས་གཟིགས། །ཁྱེད་ཀྱིས་དེ་རྣམས་སྨད་པར་མཛད་པ་འོ། །
2SA 22:29 ཡ་ཝཱེ་ཁྱེད་ནི་བདག་གི་སྒྲོན་མེ་ལགས། །ཁྱེད་ཀྱིས་བདག་གི་མུན་པར་འོད་ཟེར་སྤྲོས། །
2SA 22:30 ཁྱེད་ལ་བརྟེན་ནས་དགྲ་བོའི་དམག་དཔུང་གཏོར། །དཀོན་མཆོག་མཉམ་དུ་ལྕགས་རིར་རྒྱང་མཆོང་བྱེད། །
2SA 22:31 དཀོན་མཆོག་ཁོང་གི་ལམ་ནི་རྣམ་དག་ཡིན། །ཡ་ཝཱེའི་བཀའ་ནི་དྲི་མ་མེད་པ་ལགས། །སྐྱབས་བཅོལ་རྣམས་ཀྱི་ཕུབ་ནི་ཁོང་ཉིད༌ཡིན། །
2SA 22:32 ཡ་ཝཱེ་མ་གཏོགས་དཀོན་མཆོག་གཞན་སུ་ཡོད། །དཀོན་མཆོག་ལས་གཞན་བྲག་རྡོ་སུ་ཡིན་ནམ། །
2SA 22:33 དཀོན་མཆོག་ཁོང་ཉིད་བདག་གི་བཙན་རྫོང་ལགས། །བདག་གི་སྤྱོད་ལམ་ཕུལ་དུ་བྱུང་བར་མཛད། །
2SA 22:34 ཁོང་གིས་བདག་ལ་ཤྭ་མོའི་བདེ་མྱུར་བསྩལ། །མཐོན་པོའི་གནས་སུ་བརྟན་པོར་ཚུགས་པར་མཛད། །
2SA 22:35 འཐབ་མོ་འགྱེད་ལུགས་བདག་གི་ལག་པར་བསླབ། །དཔུང་པས་ལི་གཞུ་འགུག་ཀྱང་ནུས་པར་མཛད། །
2SA 22:36 ཁྱེད་ཀྱི་ཐར་པའི་ཕུབ་ནི་ང་ལ་གནང་། །བཀའ་ལན་བཟང་པོས་ང་རང་ཆེན་པོར་མཛད། །
2SA 22:37 གོམ་པ་སྤོ་སའི་ལམ་ནི་ཡངས་པར་མཛད། །བདག་གི་རྐང་པ་ནམ་ཡང་འདྲེད་མ་གྱུར། །
2SA 22:38 རང་གི་དགྲ་རྣམས་དེད་ནས་ཚར་དུ་བཅད། །རྩ་མེད་གཏོང་བའི་བར་དུ་ཕྱིར་མ་ལོག །
2SA 22:39 བདག་གིས་དེ་རྣམས་རྩ་མེད་བཏང་ནས་ནི། །དེ་དག་རྨས་ཤིང་ལང་རྒྱུ་མེད་པར་བཟོས། །དེ་རྣམས་ང་ཡི་རྐང་འོག་ས་རུ་འགྱེལ། །
2SA 22:40 འཐབ་ཕྱིར་ང་ལ་སྟོབས་ཀྱི་སྐ་རགས༌བཅིངས། །དགྲ་རུ་ལང་མཁན་ང་ཡི་རྐང་འོག༌བཅུག །
2SA 22:41 དགྲ་རྣམས་ང་ཡི་མདུན་ནས་འབྲོ་མཛད་པས། །ང་ལ་སྡང་བའི་མི་རྣམས་བཅོམ་པ་ཡིན། །
2SA 22:42 དེ་ཚོས་རེ་སྒུག་བྱས་ཀྱང་སྐྱོབ་མཁན་མེད། །ཡ་ཝཱེ་བོས་ཀྱང་ཁོང་གིས་ལན་མ་གསུངས། །
2SA 22:43 རྡུལ་ལྟར་བདག་གིས་དེ་དག་ཕྱེ་མར་བཏགས། །ལམ་གྱི་འདམ་བཞིན་དེ་རྣམས་བརྫིས་ནས་གཡུགས། །
2SA 22:44 འབངས་ཀྱི་རྩོད་གླེང་ལས་བདག་ཐར་བར་མཛད། །མི་རིགས་རྣམས་ཀྱི་མགོན་དུ་ང་རང་བསྲུངས། །རྒྱུས་མེད་མི་སྡེས་ང་ལ་ཞབས་ཕྱི་སྒྲུབ། །
2SA 22:45 ཕྱི་ཕྱོགས་མི་རྣམས་བདག་ལ་མགོ་འདོགས་ཤིང་། །ཐོས་པ་ཙམ་གྱིས་དེ་ཚོས་ང་ལ་མཉན། །
2SA 22:46 ཁོ་རྣམས་ཀུན་པོ་ཉམས་རྒུད་དུ་གྱུར་ཅིང་། །སྐྲག་ནས་འདར་བཞིན་བཙན་རྫོང་དག་ནས་ཐོན། །
2SA 22:47 ཡ་ཝཱེ་ཁོང་ནི་གཏན་དུ་གསོན་པོར་བཞུགས། །བདག་གི་བྲག་རྡོར་བསྟོད་བསྔགས་བརྗོད་པར་ཤོག །དཀོན་མཆོག་ཉིད་དེ་ང་རང་སྐྱོབ་མཁན་གྱི། །བྲག་རྡོ་ཁོང་ལ་བཀུར་བསྟི་འབྱུང་བར་ཤོག །
2SA 22:48 དཀོན་མཆོག་ང་ཡི་དགྲ་ཤ་ལེན་མཁན་ཡིན། །མི་སྡེ་རྣམས་ནི་ང་ཡི་དབང་དུ་བཀོད། །
2SA 22:49 ཁྱེད་ཀྱིས་ང་རང་དགྲ་ལས་ཐར་བར་མཛད། །བདག་གི་དགྲ་ཟླ་རྣམས་ལས་མཐོན་པོར་བཏེགས། །གདུག་རྩུབ་ཅན་ལས་ང་ནི་བསྐྱབས་པ་འོ། །
2SA 22:50 ཀྱེ་ཀྱེ་ཡ་ཝཱེ་དེའི་ཕྱིར་བདག་གིས་ནི། །མི་རིགས་རྣམས་ཀྱི་དཀྱིལ་ནས་ཁྱེད་ལ་བསྔགས། །ཁྱེད་ཀྱི་མཚན་ལ་བསྟོད་པའི་མགུར་མ་འབུལ། །
2SA 22:51 ཡ་ཝཱེས་མཆོག་ཏུ་གྱུར་པའི་ཐར་པ་ནི། །ཁོང་གིས་བསྐོས་པའི་རྒྱལ་པོར་གནང་བ་དང་། །སྣུམ་གྱིས་བྱུགས་པར་བྱམས་བརྩེ་དཔག་མེད་མཛད། །དཱ་བིད་དང་ནི་ཁོང་གི་བུ་རྒྱུད་རྣམས། །རྒྱུན་ནས་རྒྱུན་དུ་བྱམས་བརྩེས་སྐྱོང་བ་འོ། །ཞེས་པའོ། །
2SA 23:1 ཡང་འདི་ནི་དཱ་བིད་ཀྱི་གཏམ་ཕྱི་མ་སྟེ། ཡ་ཀོབ་ཁོང་གི་དཀོན་མཆོག་གིས་བྱུགས་ཤིང་། །གོ་གནས་མཐོན་པོར་སྡོད་པར་མཛད་པའི་མི། །ཡེས་ར་ཨེལ་རྣམས་མཉེས་པའི་གླུ་བ་སྟེ། །ཡེ་སེའི་བུ་སྟེ་དཱ་བིད་འདི་ལྟར་གསུངས། །
2SA 23:2 ཡ་ཝཱེའི་ཐུགས་ཉིད་བདག་བརྒྱུད་གསུང་གླེང་མཛད། །ཁོང་གི་བཀའ་རྣམས་བདག་གི་ངག་ལས་ཐོན། །
2SA 23:3 ཡེས་ར་ཨེལ་གྱི་དཀོན་མཆོག་བཀའ་བྱོན་ཏེ། །ཡེས་ར་ཨེལ་གྱི་བྲག་རྡོས་འདི་སྐད་དུ། །དྲང་གཞག་སྒོ་ནས་བདག་སྐྱོང་བྱེད་པ་དང་། །དཀོན་མཆོག་ཉིད་ལ་འཇིགས་ཤིང་གུས་པའི་ངང་། །རྒྱལ་སྲིད་སྐྱོང་མཁན་དེ་ནི་འདི་འདྲ་སྟེ། །
2SA 23:4 དེ་ནི་ཞོགས་པའི་སྐྱ་རེངས་ཤར་བ་དང་། །གཡའ་དག་དགུང་གི་ཉི་རྩེ་བརྒྱབ་འདྲ་སྟེ། །ཆར་རྗེས་འོད་ཟེར་སྤྲོས་ནས་རྩྭ་སྔོན་སྐྱེད། །
2SA 23:5 བདག་ཁྱིམ་དཀོན་མཆོག་དྲུང་དུ་དེ་བཞིན་ཡིན། །ཁོང་གིས་བདག་ལ་གཏན་གྱི་ཞལ་ཆད་མཛད། །དེ་ནི་ཡོངས་སུ་རྫོགས་ཤིང་བརྟན་བརླིང་ཡིན། །བདག་གི་ཐར་པ་དང་ནི་རེ་སྨོན་རྣམས། །ཁོང་གིས་འགྲུབ་པར་མཛད་པ་མ་ཡིན་ནམ། །
2SA 23:6 འོན་ཀྱང་ཁྲམ་པ་ཐམས་ཅད་ཚེར་མ་བཞིན། །གཡུག་ཅིང་མི་ཡིས་རེག་པར་མི་ནུས་ཏེ། །
2SA 23:7 རེག་འདོད་མི་ཡིས་ལྕགས་དང་མདུང་བཟུང་སྟེ། །དེ་དག་རང་གི་གནས་སུ་བསྲེག་པར་འགྱུར། །ཞེས་པའོ། །
2SA 23:8 དཱ་བིད་ཀྱི་དཔའ་རྒོད་རྣམས་ཀྱི་མིང་ནི་འདི་ལྟ་སྟེ། ཐ་ཀེ་མོན་པ་ཡོ་ཤེབ་པ་ཤེ་བེད་བྱ་བ་དེ་ནི་དཔའ་རྒོད་གསུམ་པོའི་འགོ་དཔོན་ཡིན་ནོ། །ཁོའི་མིང་ལ་ཡེས་པ་ཨལ་ནོ་ཞེས་ཀྱང་བྱ་སྟེ། དེས་གཡུལ་འགྱེད་ཐེངས་གཅིག་གི་ཁྲོད་མི་བརྒྱད་བརྒྱ་བསད་པའོ། །
2SA 23:9 དེའི་འཕྲོར་ཨ་ཧོ་པ་དོ་དོའི་བུ་ཨེ་ལི་ཨ་ཟར་བྱ་བ་ཡིན་ཏེ། དཱ་བིད་ཀྱི་རྗེས་སུ་འབྲངས་པའི་དཔའ་རྒོད་གསུམ་པོ་ནང་གི་གཅིག་ལགས་སོ། །སྔར་ཕེ་ལེ་ཤེད་པ་རྣམས་འཐབ་མོའི་ཕྱིར་འདུས་པ་ལ། དེ་དག་གིས་ཕེ་ལེ་ཤེད་པ་རྣམས་ལ་འགོག་རྒོལ་བྱས་ནས་ཡེས་ར་ཨེལ་པ་རྣམས་གྱེན་དུ་འགྲོ་བའི་ཚེ།
2SA 23:10 མི་དེ་ལངས་ནས་ཐང་ཆད་དེ་ལག་པ་རལ་གྲིར་འབྱར་བའི་བར་དུ་ཕེ་ལེ་ཤེད་པ་རྣམས་ལ་བརྒྱབ་སྟེ། ཉིན་དེར་དཀོན་མཆོག་ཡ་ཝཱེ་ཕྱོགས་ལས་རྣམ་པར་རྒྱལ་བས། མི་རྣམས་ཨེ་ལི་ཨ་ཟར་གྱི་རྗེས་སུ་འབྲངས་ནས་བཅོམ་ནོར་འཕྲོག་པའི་ལས་ཁོ་ནར་བྲེལ་ཏོ། །
2SA 23:11 ཡང་དེའི་འཕྲོར་ཧ་རར་པ་ཨ་གེའི་བུ་ཤམ་མཱ་བྱ་བ་ཡིན་ཏེ། ཐེངས་ཤིག་ཕེ་ལེ་ཤེད་པ་རྣམས་ལེ་ཧི་ཞེས་པའི་ཡུལ་དུ་སྲན་དམར་གྱིས་ཁེངས་པའི་ཞིང་ཞིག་ཏུ་འདུས་ཡོད་པ་ལ། འབངས་རྣམས་ཕེ་ལེ་ཤེད་པའི་མདུན་ནས་བྲོས་སོང་བའི་ཚེ།
2SA 23:12 ཁོ་རང་ཞིང་དེའི་དཀྱིལ་དུ་ལངས་ནས་ཞིང་དེ་བསྲུངས་པ་དང་། ཕེ་ལེ་ཤེད་པ་རྣམས་ཕམ་པར་བརྒྱབ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་རྒྱལ་ཁ་ཆེན་པོ་ཐོབ་པར་མཛད་དོ། །
2SA 23:13 བཙས་མ་བརྔ་འགོ་ཚུགས་པའི་དུས་སུ། འགོ་དཔོན་སུམ་ཅུ་ལས་འདི་གསུམ་པོ་ཨ་དུལ་ལཱམ་བྲག་ཕུག་ཏུ་དཱ་བིད་ཀྱི་དྲུང་དུ་ཕྱིན་པའི་ཚེ། ཕེ་ལེ་ཤེད་པའི་དམག་དཔུང་གིས་རེ་པཱ་པའི་ལུང་པ་རུ་སྒར་བཏབ་བོ། །
2SA 23:14 དེའི་དུས་སུ་དཱ་བིད་ནི་བཙན་རྫོང་ནང་དུ་ཡོད་པ་དང་། ཕེ་ལེ་ཤེད་པའི་འགོག་སྲུང་དམག་དཔུང་པེད་ལེ་ཧེམ་དུ་ཡོད་པ་ཡིན།
2SA 23:15 དེར་དཱ་བིད་ཤིན་ཏུ་སྐོམ་ནས་ན་རེ། ཀྱེ་ཧོ། སུ་ཞིག་གིས་པེད་ལེ་ཧེམ་གྱི་མཁར་སྒོའི་འགྲམ་དུ་ཡོད་པའི་ཁྲོན་པ་ལས་ཆུ་ཁུར་འོངས་ནས་ང་ལ་བླུད་ན་ཅི་མ་རུང་ཞེས་པར།
2SA 23:16 དཔའ་རྒོད་འདི་གསུམ་པོས་ཕེ་ལེ་ཤེད་པའི་དམག་སྒར་བརྒལ་ནས་སོང་སྟེ། པེད་ལེ་ཧེམ་གྱི་མཁར་སྒོའི་འགྲམ་དུ་ཡོད་པའི་ཁྲོན་པ་ལས་ཆུ་བཅུས་ནས་ཁུར་འོངས་ཏེ་དཱ་བིད་ལ་ཕུལ་ནའང་། ཁོང་གིས་དེ་མ་འཐུང་བར་དཀོན་མཆོག་ཡ་ཝཱེའི་དྲུང་དུ་མཆོད་ནས་ན་རེ།
2SA 23:17 ཀྱེ་དཀོན་མཆོག་ཡ་ཝཱེ་ལགས། བདག་གིས་འདི་ལྟ་བུ་གཏན་ནས་མི་བྱེད་དེ། འདི་ནི་མི་དེ་གསུམ་པོས་རང་སྲོག་འབེན་དུ་བཞག་ནས་སོང་བས། འདི་ནི་ཁོ་ཚོའི་ཁྲག་མ་ཡིན་ནམ་ཞེས་ཞུས་ནས། ཁོང་གིས་དེ་ལས་མ་འཐུང་ངོ་། །དཔའ་རྒོད་འདི་གསུམ་པོས་ལས་དེ་ལྟ་བུ་བྱས་སོ། །
2SA 23:18 ཟེ་རུ་ཡཱ་ཡི་བུ་ཨ་བི་ཤཱ་ཨི་སྟེ་ཡོ་ཨབ་ཀྱི་ནུ་བོ་ནི་དཔའ་རྒོད་གསུམ་པོའི་འགོ་དཔོན་ཡིན་ཞིང་། དེས་ནི་མི་སུམ་བརྒྱ་ལ་མདུང་གིས་བརྒྱབ་ནས་བསད་པས་དཔའ་རྒོད་གསུམ་པོའི་ཁྲོད་དུ་མིང་གྲགས་རྒྱས་སོ། །
2SA 23:19 ཁོ་ནི་དཔའ་རྒོད་གསུམ་པོ་དེའི་ཁྲོད་དུ་མིང་གྲགས་ཆེས་ཆེ་བ་ཡིན་པས་འགོ་དཔོན་དུ་གྱུར་ན་ཡང་། དཔའ་རྒོད་སྔོན་མ་གསུམ་པོར་མི་དོའོ། །
2SA 23:20 ཡང་ཡེ་ཧོ་ཡ་དཱ་ཡི་བུ་པེ་ནཱ་ཡ་བྱ་བ་ནི་ཀབ་ཟེ་ཨེལ་ནས་ཐོན་པའི་དཔའ་རྒོད་ཡིན་ཞིང་། སྔར་དོན་ཆེན་རྣམས་བྱས་མྱོང་སྟེ། དེས་ནི་མོ་ཨབ་པ་ཨ་རི་ཨེལ་གྱི་བུ་གཉིས་བསད་པ་དང་། ཡང་ཁ་བ་འབབ་དུས་དོང་ཞིག་ཏུ་སོང་སྟེ་སེང་གེ་ཞིག་བསད་དོ། །
2SA 23:21 ཡང་པེ་ནཱ་ཡ་ཡིས་ཨེ་ཅིབ་པ་སྟོབས་ཅན་ཞིག་བསད་པ་དང་། ཨེ་ཅིབ་པ་དེའི་ལག་ཏུ་མདུང་ཡོད་དེ། ཁོས་དབྱུག་པ་བཟུང་ནས་ཨེ་ཅིབ་པ་དེའི་ཕྱོགས་སུ་མར་སོང་སྟེ། དེ་ལག་ནས་མདུང་ཕྲོགས་ཤིང་མདུང་དེས་མི་དེ་བསད་དོ། །
2SA 23:22 ཡེ་ཧོ་ཡ་དཱ་ཡི་བུ་པེ་ནཱ་ཡས་ལས་དེ་ལྟ་བུ་བྱས་པས། ཁོ་རང་དཔའ་རྒོད་གསུམ་པོའི་ཁྲོད་དུ་མིང་གྲགས་ཅན་དུ་གྱུར་ཏོ། །
2SA 23:23 ཁོ་ནི་དཔའ་རྒོད་སུམ་ཅུ་ལས་མིང་གྲགས་ཆེ་ནའང་། དཔའ་རྒོད་སྔོན་མ་གསུམ་པོར་མི་དོའོ། །དཱ་བིད་ཀྱིས་དེ་ནི་སྐུ་སྲུང་པ་རྣམས་ཀྱི་འགོ་དཔོན་དུ་བཞག
2SA 23:24 དཔའ་རྒོད་སུམ་ཅུའི་གྲས་སུ་ཡོ་ཨབ་ཀྱི་ནུ་བོ་ཨ་སཱ་ཧེལ་བྱ་བ་དང་། པེད་ལེ་ཧེམ་པ་དོ་དོ་ཡི་བུ་ཨེལ་ཧ་ནན་དང་།
2SA 23:25 ཧ་རོད་པ་ཤམ་མཱ་དང་། ཧ་རོད་པ་ཨེ་ལི་ཀཱ་དང་།
2SA 23:26 ཕེ་ལེད་པ་ཧེ་ལེ་ཙི་དང་། ཐེ་ཀོ་ཨ་པ་ཨིག་ཀེ་སི་ཡི་བུ་ཨི་རཱ་དང་།
2SA 23:27 ཨ་ན་ཐོད་པ་ཨ་བི་ཨེ་ཟཱེར་དང་། ཧུ་ཤཱ་པ་མེ་བུན་ན་ཨི་དང་།
2SA 23:28 ཨ་ཧོ་པ་ཙལ་མོན་དང་། ནེ་ཏོ་ཕཱ་པ་མ་ཧ་རཱ་ཨི་དང་།
2SA 23:29 ནེ་ཏོ་ཕཱ་པ་པ་ཨ་ནཱ་ཡི་བུ་ཧེ་ལེབ་དང་། པེན་ཡཱ་མེན་གྱི་བུ་རབས་ཚ་རྒྱུད་དེ་གིབ་ཨ་པ་རི་བཱ་ཨི་ཡི་བུ་ཨིད་ཏ་ཨི།
2SA 23:30 ཕི་ར་ཐོན་པ་པེ་ནཱ་ཡ་དང་། གཱ་ཨ་སི་གྲོག་མོའི་ཧིད་དཱ་ཨི་དང་།
2SA 23:31 ཨ་རཱབ་པ་ཨ་བི་ཨལ་བོན་དང་། བར་ཧུམ་པ་ཨས་མ་ཝེད་དང་།
2SA 23:32 ཤ་ཨལ་བོན་པ་ཨེལ་ཡ་བཱ་དང་། ཡཱ་ཤེན་གྱི་བུ་རྣམས་ཀྱི་ཁྲོད་ནས་ཡོ་ནཱ་ཐན་དང་།
2SA 23:33 ཧ་རར་པ་ཤམ་མཱ་དང་། ཧ་རར་པ་ཤཱ་རར་གྱི་བུ་ཨ་ཧི་ཨམ་དང་།
2SA 23:34 མ་ཨ་ཀཱ་པ་ཨ་ཧས་པ་ཨི་ཡི་བུ་ཨེ་ལི་ཕེ་ལེད་ཤེད་དང་། གེ་ལོ་པ་ཨ་ཧི་ཐོ་ཕེལ་གྱི་བུ་ཨེ་ལི་ཨམ་དང་།
2SA 23:35 ཀར་མེལ་པ་ཧེ་ཚེ་རོ་དང་། ཨར་པཱ་པ་ཕ་ཨ་རཱ་ཨི་དང་།
2SA 23:36 ཙོ་བཱ་པ་ནཱ་ཐན་གྱི་བུ་ཡིག་ཨལ་དང་། གཱ་རྡུ་པ་པཱ་ནི་དང་།
2SA 23:37 ཨམ་མོན་པ་ཙེ་ལེག་དང་། ཟེ་རུ་ཡཱ་ཡི་བུ་ཡོ་ཨབ་ཀྱི་གོ་མཚོན་འཁུར་མཁན་པེ་ཨེ་རཱོད་པ་ན་ཧ་རཱ་ཨི་དང་།
2SA 23:38 ཡེད་རཱ་པ་ཨི་རཱ་དང་། ཡེད་རཱ་པ་ག་རེབ་དང་།
2SA 23:39 ཧེད་པ་ཨུ་རི་ཡཱ་བཅས་བསྡོམས་པས་སུམ་ཅུ་སོ་བདུན་ནོ། །
2SA 24:1 ཡང་དཀོན་མཆོག་ཡ་ཝཱེ་ནི་ཡེས་ར་ཨེལ་གྱི་སྟེང་དུ་ཐུགས་ཁྲོས་པ་དང་། ཁོང་གིས་དཱ་བིད་ཀྱི་སེམས་སུ་དེ་དག་ལ་ཁོང་ཁྲོ་བསྐྱེད་ནས་འདི་སྐད་དུ། སོང་ལ་ཡེས་ར་ཨེལ་དང་ཡ་ཧུ་དཱ་ཡི་མི་གྲངས་ལོངས་ཤིག་ཅེས་སྐུལ་བར་མཛད་དོ། །
2SA 24:2 དེ་ནས་རྒྱལ་པོས་ཁོང་གི་རྗེས་སུ་འབྲངས་པའི་དམག་དཔོན་ཡོ་ཨབ་ལ། ཁྱོད་རང་དཱན་ནས་པེར་ཤ་བཱ་ཡི་བར་ཡེས་ར་ཨེལ་གྱི་ཚོ་ཁག་ཀུན་ཏུ་སོང་ནས། ངས་མི་གྲངས་ཤེས་པའི་ཕྱིར་འབངས་རྣམས་ཀྱི་གྲངས་ཀ་ལོངས་ཤིག་ཅེས་བཀའ་བསྩལ་པ་ལ།
2SA 24:3 ཡོ་ཨབ་ཀྱིས་རྒྱལ་པོ་ལ། ཁྱེད་ཀྱི་དཀོན་མཆོག་ཡ་ཝཱེས་ད་ལྟ་ཡོད་པའི་འབངས་རྣམས་ལྡབ་བརྒྱ་མང་དུ་མཛོད་ཅིག ངའི་ཇོ་བོ་དང་ངའི་རྒྱལ་པོའི་སྤྱན་གྱིས་དེ་གཟིགས་པར་ཤོག་ཅིག འོན་ཀྱང་ངའི་ཇོ་བོ་དང་ངའི་རྒྱལ་པོས་འདི་ལྟར་མཛད་དགོས་དོན་ཅི་ལགས་ཞེས་ཞུས་ཀྱང་།
2SA 24:4 རྒྱལ་པོས་ཡོ་ཨབ་དང་དམག་དཔོན་རྣམས་ལ་བབས་པའི་བཀའ་དེ་མཁྲེགས་འཛིན་བྱས་པས། ཡོ་ཨབ་དང་དམག་དཔོན་རྣམས་རྒྱལ་པོའི་དྲུང་ནས་ཕྱི་རུ་ཐོན་ཏེ་ཡེས་ར་ཨེལ་གྱི་མི་གྲངས་བླངས་པ་རེད།
2SA 24:5 དེ་དག་ཡོར་དན་གཙང་པོ་བརྒལ་ནས། གཱ་རྡུ་ལུང་པ་རུ་ཡོད་པའི་གྲོང་ཁྱེར་གཡས་ཕྱོགས་ཀྱི་ཨ་རོ་ཨེར་དུ། ཡཱ་ཟེར་གྱི་ཁ་གཏད་དུ་གུར་ཕུབ་བོ། །
2SA 24:6 ཁོ་རྣམས་གིལ་ཨད་དང་ཐ་ཏིམ་ཧོད་ཤི་ཡུལ་དུ་སླེབས་ཤིང་། ཡང་དཱན་ཡ་ཨན་དུ་ཕྱིན་པ་དང་། ཚི་ཏུན་ཡུལ་དུ་བསྐོར་ནས་སོང་ངོ་། །
2SA 24:7 དེ་ནས་ཐཱར་བྱ་བའི་བཙན་རྫོང་དང་། ཧེ་བི་པ་དང་ཀ་ན་ཨན་པའི་གྲོང་ཁྱེར་རྣམས་ལ་སླེབས་ནས་ཡང་ཕྱི་རུ་ཐོན་ཞིང་། ཡ་ཧུ་དཱ་ཡི་ལྷོ་ཕྱོགས་ཡུལ་གྱི་པེར་ཤ་བཱ་རུ་སླེབས་སོ། །
2SA 24:8 དེ་དག་ཡུལ་ཀུན་ཏུ་བརྒྱུད་ནས། ཟླ་བ་དགུ་དང་ཉིན་ཞག་ཉི་ཤུ་འགོར་རྗེས་ཕྱིར་ཡེ་རུ་སཱ་ལེམ་དུ་ལོག་གོ །
2SA 24:9 དེར་ཡོ་ཨབ་ཀྱིས་རྒྱལ་པོ་ལ་མི་གྲངས་ཀྱི་ཐོ་ཕུལ་ཏེ། ཡེས་ར་ཨེལ་གྱི་ཁྲོད་དུ་རལ་གྲི་ཐོགས་པའི་དཔའ་བོ་འབུམ་བརྒྱད་དང་། ཡ་ཧུ་དཱའི་ཁྲོད་དུ་འབུམ་ལྔ་ཡོད་པའོ། །
2SA 24:10 མི་གྲངས་བརྩིས་རྗེས། དཱ་བིད་ཀྱི་སེམས་མི་བདེ་བར་གྱུར་ཏེ། དཱ་བིད་ཀྱིས་དཀོན་མཆོག་ཡ་ཝཱེ་ལ། བདག་གིས་ལས་འདི་བྱས་པས་སྡིག་པ་ཤིན་ཏུ་ཆེའོ། །ཀྱེ་དཀོན་མཆོག་ཡ་ཝཱེ་ལགས། བདག་གིས་ཤིན་ཏུ་གླེན་པའི་དོན་བྱས་པས། ད་ལྟ་ཁྱེད་ཀྱིས་ཞབས་ཕྱི་བདག་གི་ཉེས་པ་བསལ་བར་མཛོད་ཅེས་གསོལ་ཏོ། །
2SA 24:11 དཱ་བིད་ཞོགས་པ་ཡར་ལངས་པའི་དུས་སུ། དཱ་བིད་ཀྱི་མངོན་ཤེས་པ་གཱ་རྡུ་བྱ་བའི་ལུང་སྟོན་པ་ལ་དཀོན་མཆོག་ཡ་ཝཱེའི་བཀའ་བྱུང་སྟེ་འདི་སྐད་དུ།
2SA 24:12 སོང་ནས་དཱ་བིད་ལ། དཀོན་མཆོག་ཡ་ཝཱེས་འདི་སྐད་དུ། ངས་ཁྱོད་ཀྱི་མདུན་དུ་གདམ་གསེས་གསུམ་འཇོག་སྟེ། དེའི་ནང་ནས་གཅིག་འདེམས་ཤིག་དང་ངས་ཁྱོད་ལ་དེ་བཞིན་བྱའོ་ཞེས་སྦྲོན་ཞིག་གསུངས་པ་དང་།
2SA 24:13 གཱ་རྡུ་ནི་དཱ་བིད་ཀྱི་དྲུང་དུ་འོངས་ནས་སྦྲན་ཅིང་དེ་ལ། ཁྱོད་ཀྱིས་ལོ་བདུན་གྱི་རིང་རྒྱལ་ཁབ་ཏུ་མུ་གེ་འབྱུང་བར་འདོད་དམ། ཡང་ན་ཟླ་བ་གསུམ་ཀྱི་རིང་དགྲ་བོས་ཁྱོད་འདེད་དགོས་སམ། ཡང་ན་ཁྱོད་ཀྱི་རྒྱལ་ཁབ་ཏུ་ཉིན་གསུམ་ལ་རིམས་ནད་འབྱུང་བར་འདོད་དམ། ད་ནི་བདག་མངག་མཁན་ལ་གཏམ་ལན་ཅི་འཁྱེར་དགོས་པར་བསམ་བློ་ཐོངས་ཤིག་ཅེས་དྲིས་པ་དང་།
2SA 24:14 དཱ་བིད་ཀྱིས་གཱ་རྡུ་ལ། བདག་ནི་ཅི་བྱ་གཏོལ་མེད་དུ་གྱུར། དཀོན་མཆོག་ཡ་ཝཱེ་ལ་ཐུགས་རྗེ་འཛད་མཐའ་མེད་པ་མངའ་བས་ན། མིའི་ལག་པར་ལྷུང་བ་ལས་ཁོང་གི་ཕྱག་ཏུ་ལྷུང་བ་ལེགས་སོ་ཞེས་ཞུས་པས།
2SA 24:15 དཀོན་མཆོག་ཡ་ཝཱེས་ཡེས་ར་ཨེལ་ལ་རིམས་ནད་ཕབ་ཅིང་། ཞོགས་པ་ནས་ཐུགས་ཐག་བཅད་པའི་དུས་ཀྱི་བར་དུ། དཱན་ནས་པེར་ཤ་བཱ་ཡི་བར་དུ་འབངས་རྣམས་ལས་མི་ཁྲི་བདུན་ཚེ་ལས་འདས་སོ། །
2SA 24:16 དེ་ནས་ཕོ་ཉ་དེས་ཡེ་རུ་སཱ་ལེམ་འཇོམས་པར་ཕྱག་བརྐྱངས་པ་དང་། དཀོན་མཆོག་ཡ་ཝཱེ་བར་ཆད་དེའི་ཕྱིར་ཐུགས་འགྱོད་ཅིང་། མི་སྡེ་གསོད་པའི་ཕོ་ཉ་དེ་ལ། ད་ནི་ཆོག་གོ །མཚམས་ཞོག་ཅིག་ཅེས་བཀའ་བསྩལ་ཏོ། །དེའི་ཚེ་དཀོན་མཆོག་ཡ་ཝཱེའི་ཕོ་ཉ་དེ་ནི་ཡེ་བུ་སི་པ་ཨ་རབ་ནཱ་ཡི་གཡུལ་ཁར་ཡོད་པ་ཡིན།
2SA 24:17 དཱ་བིད་ཀྱིས་འབངས་མི་རྣམས་གསོད་པའི་ཕོ་ཉ་དེ་མཇལ་ནས་དཀོན་མཆོག་ཡ་ཝཱེ་ལ་ཞུ་བ་ཕུལ་ཞིང་འདི་ལྟར། གཟིགས་དང་། སྡིག་པ་ནི་བདག་གིས་བྱས་ཏེ། ལས་ངན་པ་བདག་གིས་བྱས་པ་ཡིན། ལུག་ཁྱུ་འདིས་ཅི་བྱས་སམ། བདག་དང་བདག་གི་ཕ་གཞིས་སྟེང་དུ་ཕྱག་འདེགས་པར་མཛོད་ཅེས་ཞུས་སོ། །
2SA 24:18 ཉིན་དེར་གཱ་རྡུ་ནི་དཱ་བིད་ཀྱི་དྲུང་དུ་འོངས་ནས་དེ་ལ། ཡར་ཕེབས་ནས་ཡེ་བུ་སི་པ་ཨ་རབ་ནཱ་ཡི་གཡུལ་ཁ་རུ་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་པར་གྱིས་ཞེས་བསྐུལ་བ་ལ།
2SA 24:19 དཱ་བིད་ཀྱིས་གཱ་རྡུ་ཡིས་བསྒོས་པ་བཞིན་དུ་བྱས་ཤིང་། དཀོན་མཆོག་ཡ་ཝཱེའི་བཀའ་བཞིན་དུ་ཡར་ཕྱིན་ཏོ། །
2SA 24:20 དེར་ཨ་རབ་ནཱ་ཡིས་བལྟས་པ་ལ་རྒྱལ་པོ་འཁོར་དང་བཅས་པ་རང་གི་ཕྱོགས་སུ་འོང་བཞིན་པ་མཐོང་བས། ཨ་རབ་ནཱ་ཕྱི་རུ་ཐོན་ཏེ་ལུས་པོ་སར་བཏུད་ནས་རྒྱལ་པོར་ཕྱག་བཙལ་ཏོ། །
2SA 24:21 ཨ་རབ་ནཱས། ང་ཡི་ཇོ་བོ་དང་ང་ཡི་རྒྱལ་པོ་སྐུ་ཉིད་ཞབས་ཕྱིའི་རྩར་བྱོན་པ་ཅི་ཡིན་ལགས་ཞེས་ཞུས་པས། དཱ་བིད་ཀྱིས། འབངས་རྣམས་ཀྱི་ཁྲོད་དུ་རིམས་ནད་ཆད་པའི་ཕྱིར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེང་བར་ཁྱོད་ཀྱི་གཡུལ་ཁ་ཉོ་རུ་འོངས་པ་ཡིན་ཞེས་གསུངས་པ་དང་།
2SA 24:22 ཨ་རབ་ནཱས་དཱ་བིད་ལ། བདག་གི་ཇོ་བོ་དང་བདག་གི་རྒྱལ་པོ་ལགས། ཁྱེད་ཀྱི་སྤྱན་སྔར་གང་ལེགས་པ་དེ་བླངས་ནས་མཆོད་པར་ཕུལ་ཞིག གཟིགས་དང་། འདིར་སྦྱིན་སྲེག་གི་དོན་དུ་བ་གླང་དང་། བུད་ཤིང་ལ་གཡུལ་ཁ་གཅོག་བྱེད་ཡོ་ཆས་དང་བ་གླང་གི་གཉའ་ཤིང་ཡོད།
2SA 24:23 ཀྱེ་རྒྱལ་པོ་ལགས། ཨ་རབ་ནཱས་དེ་ཐམས་ཅད་རྒྱལ་པོ་ལ་འབུལ་བ་ཡིན་ཞེས་ཞུས་པ་དང་། ཡང་ཁོ་ན་རེ། ཁྱེད་ཀྱི་དཀོན་མཆོག་ཡ་ཝཱེ་ཁྱེད་ལ་ཐུགས་མཉེས་པར་ཤོག་ཅེས་རྒྱལ་པོར་ཞུས་སོ། །
2SA 24:24 རྒྱལ་པོས་ཨ་རབ་ནཱ་ལ། དེ་ལྟར་མིན། དེ་ཐམས་ཅད་ཁྱོད་ལས་རིན་གྱིས་ཉོ་བར་ང་རང་དགའོ། །ངས་རིན་མེད་པར་ཐོབ་པ་དེ་བདག་གི་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་འབུལ་མི་རུང་ཞེས་གསུངས་ནས། དཱ་བིད་ཀྱིས་གཡུལ་ཁ་དེ་དང་བ་གླང་རྣམས་དངུལ་སྲང་ལྔ་བཅུས་ཉོས་སོ། །
2SA 24:25 དེ་ནས་དཱ་བིད་ཀྱིས་དེར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་ནས་སྦྱིན་སྲེག་དང་ཞི་བདེའི་མཆོད་པ་རྣམས་ཕུལ་བ་དང་། དཀོན་མཆོག་ཡ་ཝཱེས་ཡུལ་དེའི་ཞུ་བར་གསན་ཞིང་ཡེས་ར་ཨེལ་གྱི་ཁྲོད་ནས་རིམས་ནད་ཆད་པར་གྱུར་ཏོ།། །།
1KI 1:1 དེ་ཡང་རྒྱལ་པོ་དཱ་བིད་རྒས་ནས་དགུང་ལོ་མཐོ་བའི་དུས་སུ་གོས་མང་པོས་གཡོགས་ཀྱང་དྲོད་མི་ལྡན་པར་གྱུར་པས།
1KI 1:2 ཁོང་གི་བློན་འཁོར་རྣམས་ན་རེ། རང་ཅག་གི་ཇོ་བོ་དང་རྒྱལ་པོ་ལགས་ལ་དྲོད་བསྐྱེད་ཕྱིར་ཁོང་གི་དྲུང་དུ་སྡོད་པ་དང་ཁོང་ལ་ལྟ་སྐྱོང་བྱེད་པ། ཁོང་གི་པང་དུ་ཉལ་བར་ན་ཆུང་བུ་མོ་ཞིག་བཙལ་ན་ལེགས་ཞེས་ཞུས་པ་དང་།
1KI 1:3 དེ་དག་གིས་ཡེས་ར་ཨེལ་གྱི་ཡུལ་འཁོར་ཐམས་ཅད་དུ་གཞོན་ནུ་མ་མཛེས་མ་ཞིག་བཙལ་བཙལ་བའི་མཐར། ཤུ་ནེམ་གྱི་ཨ་བི་ཤག་ཅེས་བྱ་བ་རྙེད་ནས་རྒྱལ་པོའི་དྲུང་དུ་ཁྲིད་དོ། །
1KI 1:4 གཞོན་ནུ་མ་དེ་ནི་བཞིན་རས་ཧ་ཅང་མཛེས་པ་ཞིག་ཡོད་པ་ཡིན། ཁོ་མོས་རྒྱལ་པོར་ལྟ་སྐྱོང་བྱས་ནས་ཞབས་ཕྱི་བསྒྲུབས་ནའང་རྒྱལ་པོས་དེ་དང་ལུས་འབྲེལ་མ་བྱས་སོ། །
1KI 1:5 དེ་ནས་ཧག་གིད་ཀྱི་བུ་ཨ་དོ་ནེ་ཡཱ་ཡིས་རང་མཐོང་ཆེན་པོ་བཅངས་ནས། ང་རང་རྒྱལ་པོར་འགྱུར་འོང་ཞེས་སྨྲས་ཏེ་རང་ལ་ཤིང་རྟ་དང་སྐྱ་དམག ཡང་ཁོའི་སྔོན་དུ་རྒྱུག་པའི་མི་ལྔ་བཅུ་བཅས་གྲ་སྒྲིག་བྱས་སོ། །
1KI 1:6 ཁོའི་ཡབ་ཀྱིས་ནམ་ཡིན་ཡང་ཁོ་ལ་ཁྱོད་ཀྱིས་ཅིའི་ཕྱིར་འདི་འདྲ་བྱས་པ་ཡིན་ནམ་ཞེས་སྐྱོན་འཛུགས་པའི་ཚིག་ཙམ་ཡང་མ་དྲིས་ལ། ཁོ་ཡང་བྱད་གཟུགས་ཧ་ཅང་མཛེས་ལ་ཨབ་ཤཱ་ལོམ་གྱི་རྗེས་སུ་སྐྱེས་པ་ཡིན་ནོ། །
1KI 1:7 ཁོས་ཟེ་རུ་ཡཱ་ཡི་བུ་ཡོ་ཨབ་དང་མཆོད་དཔོན་ཨབ་ཡཱ་ཐར་གཉིས་ལ་གཏམ་བྱས་ཤིང་དེ་གཉིས་ཁོའི་ཕྱོགས་སུ་ཡོང་སྟེ་ཁོ་ལ་རོགས་བྱས་སོ། །
1KI 1:8 འོན་ཀྱང་མཆོད་དཔོན་ཟཱ་ཏོག་དང་། ཡེ་ཧོ་ཡ་དཱའི་བུ་པེ་ནཱ་ཡ། ལུང་སྟོན་པ་ནཱ་ཐན། ཤིམ་ཨི། རེ་ཨི། དཱ་བིད་ཀྱི་དཔའ་བོ་རྣམས་དང་བཅས་པ་ཨ་དོ་ནེ་ཡཱའི་ཕྱོགས་སུ་མ་སོང་ངོ་། །
1KI 1:9 དེ་ནས་ཨ་དོ་ནེ་ཡཱ་ཡིས་ཨེན་རོ་གེལ་ཞེས་པའི་ཆུ་མིག་གི་འགྲམ་དུ་ཡོད་པའི་ཙོལ་ཧེ་ལེད་ཅེས་པའི་ཕ་བོང་གི་རྩར། ལུག་དང་། གླང་ཐུག་དང་། ཕྱུགས་ཤ་ཤེད་ཅན་དག་བཤས་ནས་རང་གི་སྤུན་མཆེད་དེ་རྒྱལ་སྲས་རྣམས་དང་། རྒྱལ་པོའི་བློན་འཁོར་ཡིན་པའི་ཡ་ཧུ་དཱ་པ་ཐམས་ཅད་དེར་མགྲོན་ལ་བོས་ཀྱང་།
1KI 1:10 ལུང་སྟོན་པ་ནཱ་ཐན་དང་། པེ་ནཱ་ཡ་དང་། དཔའ་བོ་རྣམས་དང་། སྐུ་མཆེད་སོ་ལོ་མོན་བཅས་ནི་མ་བོས་སོ། །
1KI 1:11 དེ་ནས་ནཱ་ཐན་གྱིས་སོ་ལོ་མོན་གྱི་མ་ཡུམ་པད་ཤེ་བཱ་ལ་ན་རེ། ཧག་གིད་ཀྱི་བུ་ཨ་དོ་ནེ་ཡཱ་རྒྱལ་པོར་བསྡད་པ་དེ་ཁྱེད་ཀྱིས་མ་ཐོས་སམ། རང་ཅག་གི་ཇོ་བོ་དཱ་བིད་ཀྱིས་དོན་དེ་ད་དུང་ཤེས་མེད་དོ། །
1KI 1:12 ད་ནི་ཚུར་ཤོག་དང་། ཁྱེད་དང་ཁྱེད་ཀྱི་སྲས་སོ་ལོ་མོན་གཉིས་ཀྱི་སྲོག་ཐར་བའི་ཆེད་དུ་ངས་སློབ་སྟོན་བྱའོ། །
1KI 1:13 ཁྱེད་རྒྱལ་པོ་དཱ་བིད་ཀྱི་དྲུང་དུ་ཕྱིན་ཏེ་ཁོང་ལ་འདི་ལྟར་སྨྲོས་ཤིག ཀྱེ་ངའི་ཇོ་བོ་དང་ངའི་རྒྱལ་པོ་ལགས། ཁྱེད་ཀྱིས་སྔོན་ཆད་གཡོག་མོ་ང་ལ་མནའ་བཞེས་ཏེ། ཁྱེད་ཀྱི་བུ་སོ་ལོ་མོན་ངའི་རྗེས་སུ་རྒྱལ་པོར་སྡོད་ཅིང་ཁོ་ནི་ངའི་ཁྲི་ལ་སྡོད་པར་འགྱུར་ཞེས་གསུངས་པ་མ་ཡིན་ནམ། ད་ལྟ་ཨ་དོ་ནེ་ཡཱ་རྒྱལ་པོར་བསྡད་པ་འདི་ཅི་ཡིན་ཞེས་ཞུས་ཤིག
1KI 1:14 ཁྱེད་ཀྱིས་དེ་བཞིན་རྒྱལ་པོ་དང་གཏམ་གླེང་བཞིན་པའི་དུས་སུ་ང་ཡང་ནང་དུ་འོངས་ནས་ཁྱེད་ཀྱི་གཏམ་ལ་དཔང་པོ་བྱའོ་ཞེས་བསྐུལ་ཏོ། །
1KI 1:15 དེ་ནས་པད་ཤེ་བཱ་རྒྱལ་པོའི་གཟིམ་ཆུང་གི་ནང་དུ་སོང་བ་དང་། རྒྱལ་པོ་སྐུ་ན་ཤིན་ཏུ་རྒས་ཤིང་། ཤུ་ནེམ་གྱི་ཨ་བི་ཤག་གིས་རྒྱལ་པོ་ལ་ཞབས་ཕྱི་ཞུ་བཞིན་ཡོད་པ་ཡིན།
1KI 1:16 དེར་པད་ཤེ་བཱས་མགོ་བོ་སྨད་དུ་བསྒུར་ནས་རྒྱལ་པོར་གུས་འདུད་ཞུས་པ་དང་། རྒྱལ་པོས་ཁྱོད་ཀྱིས་ཅི་ཞིག་འདོད་དམ་ཞེས་དྲིས་པ་ན།
1KI 1:17 ཁོ་མོས་རྒྱལ་པོར། ཀྱེ་ངའི་ཇོ་བོ་ལགས། ཁྱེད་ཀྱིས་ཉིད་ཀྱི་དཀོན་མཆོག་ཡ་ཝཱེ་དཔང་དུ་བཙུགས་ནས་ཉིད་ཀྱི་གཡོག་མོ་ང་ལ། ཁྱོད་ཀྱི་བུ་སོ་ལོ་མོན་ངའི་རྗེས་སུ་རྒྱལ་པོར་སྡོད་ཅིང་ཁོ་ནི་ངའི་ཁྲི་ལ་སྡོད་པར་འགྱུར་ཞེས་གསུངས་མོད།
1KI 1:18 གཟིགས་དང་། ད་ནི་ཨ་དོ་ནེ་ཡཱ་རྒྱལ་པོར་བསྡད་ཡོད་ནའང་ངའི་ཇོ་བོ་དང་ངའི་རྒྱལ་པོ་ཁྱེད་ཀྱིས་ད་དུང་དོན་དེ་མི་ཤེས་སོ། །
1KI 1:19 ཁོས་གླང་ཐུག་དང་། ཕྱུགས་ཤ་ཤེད་ཅན། ལུག་བཅས་མང་པོ་བཤས་ནས་རྒྱལ་སྲས་ཐམས་ཅད་དང་མཆོད་དཔོན་ཨབ་ཡཱ་ཐར་དང་དམག་དཔོན་ཡོ་ཨབ་བཅས་མགྲོན་དུ་བོས་ཀྱང་ཁྱེད་ཀྱི་ཞབས་ཕྱི་སོ་ལོ་མོན་མ་བོས་སོ། །
1KI 1:20 ཀྱེ་ངའི་ཇོ་བོ་དང་ངའི་རྒྱལ་པོ་ལགས། ད་ནི་ཁྱེད་ཀྱི་རྗེས་སུ་ཉིད་ཀྱི་རྒྱལ་ཁྲི་ལ་སུ་ཞིག་འགོད་པར་འགྱུར་བ་ཁྱེད་ཀྱིས་གསུང་བ་ལ། ཡེས་ར་ཨེལ་པ་ཐམས་ཅད་ཀྱི་མིག་གིས་ཁྱེད་ལ་བལྟས་ཡོད།
1KI 1:21 དེ་ལྟར་མ་བྱས་ཚེ། ངའི་ཇོ་བོ་དང་ངའི་རྒྱལ་པོ་ཁྱེད་ཉིད་རང་གི་ཡབ་མེས་རྣམས་དང་ལྷན་ཅིག་ཏུ་གཟིམས་པའི་ཚེ། བདག་དང་བདག་གི་བུ་སོ་ལོ་མོན་གཉིས་ནི་ཉེས་ཅན་དུ་བརྩི་བར་འགྱུར་རོ་ཞེས་སྨྲས་སོ། །
1KI 1:22 ཏག་ཏག་ཁོ་མོས་རྒྱལ་པོར་གཏམ་གླེང་བཞིན་པའི་སྐབས་སུ། ལུང་སྟོན་པ་ནཱ་ཐན་ནང་དུ་འོངས་པ་དང་།
1KI 1:23 འཁོར་གཡོག་རྣམས་ཀྱིས་རྒྱལ་པོར་ལུང་སྟོན་པ་ནཱ་ཐན་སླེབས་བྱུང་ཞེས་ཞུས་པ་དང་། ཁོ་ནི་རྒྱལ་པོའི་དྲུང་དུ་ཕྱིན་ནས་ཕྱག་བཙལ་ཏོ། །
1KI 1:24 ནཱ་ཐན་གྱིས། ཀྱེ་ངའི་ཇོ་བོ་དང་ངའི་རྒྱལ་པོ་ལགས། ཁྱེད་ཀྱིས་ཨ་དོ་ནེ་ཡཱ་ངའི་རྗེས་སུ་རྒྱལ་པོར་སྡོད་ཅིང་ཁོ་ངའི་ཁྲི་ལ་འགོད་པར་འགྱུར་རོ་ཞེས་གསུངས་སམ།
1KI 1:25 ཁོས་དེ་རིང་ཉིན་མོ་མར་སོང་སྟེ་གླང་ཐུག་དང་། ཕྱུགས་ཤ་ཤེད་ཅན། ལུག་བཅས་མང་པོ་བཤས་ནས་རྒྱལ་སྲས་ཀུན་དང་། དམག་དཔོན་རྣམས། མཆོད་དཔོན་ཨབ་ཡཱ་ཐར་བཅས་མགྲོན་དུ་བོས་ནས། ལྟོས་དང་། དེ་དག་གིས་ཁོའི་མདུན་དུ་བཟའ་བཏུང་རོལ་ཞིང་། རྒྱལ་པོ་ཨ་དོ་ནེ་ཡཱ་ཁྲི་ལོར་བརྟན་པར་ཤོག་ཅེས་བརྗོད་དོ། །
1KI 1:26 འོན་ཀྱང་ཁྱེད་ཀྱི་ཞབས་ཕྱི་ང་རང་དང་། མཆོད་དཔོན་ཟཱ་ཏོག་དང་། ཡེ་ཧོ་ཡ་དཱའི་བུ་པེ་ནཱ་ཡ་དང་། ཁྱེད་ཀྱི་ཞབས་ཕྱི་སོ་ལོ་མོན་བཅས་ནི་མ་བོས་སོ། །
1KI 1:27 དོན་འདི་ནི་ངའི་ཇོ་བོ་དང་ངའི་རྒྱལ་པོའི་བཀའ་བསྩལ་པ་བཞིན་དུ་བྱུང་བ་ལགས་སམ། ངའི་ཇོ་བོ་དང་ངའི་རྒྱལ་པོའི་རྗེས་སུ་ཉིད་ཀྱི་ཁྲི་ལ་སུ་འགོད་པའི་འཕྲིན་ནི་ཉིད་ཀྱི་ཞབས་ཕྱི་རྣམས་ལ་མ་གསུངས་པ་ཡིན་ནམ་ཞེས་གསོལ་ཏོ། །
1KI 1:28 དེ་ནས་རྒྱལ་པོ་དཱ་བིད་ཀྱིས་པད་ཤེ་བཱ་ངའི་དྲུང་དུ་བོས་ཤིག་ཅེས་ལན་གསུངས་པ་དང་། ཁོ་མོ་རྒྱལ་པོའི་དྲུང་དུ་འོངས་ནས་ཁོང་གི་སྤྱན་སྔར་ལངས་བསྡད་པ་ལ།
1KI 1:29 རྒྱལ་པོས་མནའ་བཞེས་ནས་འདི་ལྟར། བདག་གིས་རང་ཉིད་དཀའ་སྡུག་ཐམས་ཅད་ལས་བསྐྱབས་པའི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན་ཏེ།
1KI 1:30 ངས་དེ་སྔར་ཡེས་ར་ཨེལ་གྱི་དཀོན་མཆོག་ཡ་ཝཱེ་དཔང་དུ་བཙུགས་ནས་ཇི་ལྟར་མནའ་ཁུར་ཅིང་། ཁྱོད་ཀྱི་བུ་སོ་ལོ་མོན་ངའི་རྗེས་སུ་རྒྱལ་པོར་སྡོད་ཅིང་ཁོ་ངའི་ཚབ་ཏུ་ཁྲི་ལ་སྡོད་པར་འགྱུར་རོ་ཞེས་སྨྲས་པ་བཞིན་དུ། ངས་དེ་རིང་གི་ཉིན་མོར་ཡང་དེ་བཞིན་བསྒྲུབ་པར་བྱའོ་ཞེས་གསུངས་པའོ། །
1KI 1:31 དེ་ནས་པད་ཤེ་བཱ་ཡིས་གདོང་སར་གཏད་ནས་རྒྱལ་པོར་གུས་འདུད་ཞུས་ཏེ་ངའི་ཇོ་བོ་དང་ངའི་རྒྱལ་པོ་དཱ་བིད་ཁྲི་ལོར་བརྟན་པར་ཤོག་ཅེས་ཞུས་སོ། །
1KI 1:32 རྒྱལ་པོ་དཱ་བིད་ཀྱིས་མཆོད་དཔོན་ཟཱ་ཏོག་དང་། ལུང་སྟོན་པ་ནཱ་ཐན། ཡེ་ཧོ་ཡ་དཱ་ཡི་བུ་པེ་ནཱ་ཡ་བཅས་བོས་ཤིག་ཅེས་གསུངས་པས་དེ་དག་རྒྱལ་པོའི་དྲུང་དུ་སླེབས་སོ། །
1KI 1:33 རྒྱལ་པོས་དེ་དག་ལ། ཁྱོད་ཅག་གིས་རང་གི་བདག་པོ་ངའི་ཞབས་ཕྱི་གཞན་རྣམས་ཁྲིད་དེ་སོ་ལོ་མོན་ངའི་དྲེལ་ལ་བསྐྱོན་ནས་མར་གེ་ཧོན་ཞེས་པའི་ཆུ་མིག་ཏུ་ཁྲིད་ཅིག
1KI 1:34 གནས་དེར་མཆོད་དཔོན་ཟཱ་ཏོག་དང་ལུང་སྟོན་པ་ནཱ་ཐན་གཉིས་ཀྱིས་ཁོ་ཡེས་ར་ཨེལ་གྱི་རྒྱལ་པོར་འགྱུར་ཆེད་ཁོའི་མགོ་ལ་སྣུམ་གྱིས་འབྱུག་དགོས་ཤིང་། ཁྱོད་ཅག་གིས་རྭ་དུང་ཡང་བུས་ལ། རྒྱལ་པོ་སོ་ལོ་མོན་ཁྲི་ལོར་བརྟན་པར་ཤོག་ཅེས་འབོད་སྒྲ་སྒྲོག་པར་གྱིས།
1KI 1:35 ཡང་དེ་ནས་ཁྱོད་ཅག་ཁོའི་རྗེས་སུ་འབྲངས་ནས་ཡར་འོང་དགོས་ཤིང་། ཁོ་ངའི་ཁྲི་ལ་བཀོད་ནས་ངའི་རྗེས་སུ་རྒྱལ་པོར་སྡོད་དུ་འཇུག་དགོས་ཏེ། ངས་ཁོ་ནི་ཡེས་ར་ཨེལ་དང་ཡ་ཧུ་དཱའི་རྒྱལ་པོར་བསྐོས་པ་ཡིན་ཞེས་གསུངས་སོ། །
1KI 1:36 དེའི་ལན་དུ་ཡེ་ཧོ་ཡ་དཱ་ཡི་བུ་པེ་ནཱ་ཡས་རྒྱལ་པོ་ལ། དེ་ལྟར་འབྱུང་བར་གྱུར་ཅིག ངའི་ཇོ་བོ་དང་ངའི་རྒྱལ་པོའི་དཀོན་མཆོག་ཡ་ཝཱེས་དེ་བཞིན་དུ་གསུང་བར་སྨོན།
1KI 1:37 དཀོན་མཆོག་ཡ་ཝཱེ་ནི་ཇི་ལྟར་ངའི་ཇོ་བོ་དང་ངའི་རྒྱལ་པོ་དང་མཉམ་དུ་བཞུགས་པ་ལྟར། ཁོང་སོ་ལོ་མོན་དང་མཉམ་དུའང་བཞུགས་ཤིང་། ཁོང་གི་རྒྱལ་ཁྲི་ནི་ངའི་ཇོ་བོ་དང་ངའི་རྒྱལ་པོ་དཱ་བིད་ཀྱི་རྒྱལ་ཁྲི་ལས་ཀྱང་ཆེན་པོར་གྱུར་ཅིག་ཅེས་ཞུས་སོ། །
1KI 1:38 དེ་ནས་མཆོད་དཔོན་ཟཱ་ཏོག་དང་། ལུང་སྟོན་པ་ནཱ་ཐན་དང་། ཡེ་ཧོ་ཡ་དཱའི་བུ་པེ་ནཱ་ཡ་དང་། ཀེ་རེད་པ་དང་། ཕེ་ལེད་པ་བཅས་མར་སོང་ནས། རྒྱལ་པོ་དཱ་བིད་ཀྱི་ཆིབས་དྲེལ་ལ་སོ་ལོ་མོན་བསྐྱོན་ནས་གེ་ཧོན་དུ་གདན་དྲངས་སོ། །
1KI 1:39 དེ་ནས་མཆོད་དཔོན་ཟཱ་ཏོག་གིས་གུར་མཆོག་ནས་སྣུམ་ལྡུག་བྱེད་ཀྱི་རྭ་ཅོ་བླངས་ནས་སོ་ལོ་མོན་ལ་སྣུམ་གྱིས་བྱུགས་པ་དང་། དེ་དག་གིས་རྭ་དུང་བུས་ནས་མི་ཐམས་ཅད་ཀྱིས། རྒྱལ་པོ་སོ་ལོ་མོན་ཁྲི་ལོར་བརྟན་པར་ཤོག་ཅེས་འབོད་སྒྲ་བསྒྲགས་སོ། །
1KI 1:40 ཡང་མི་ཐམས་ཅད་ཁོའི་རྗེས་སུ་འབྲངས་ནས་ཡར་སོང་བ་དང་། མི་རྣམས་ཀྱིས་གླིང་བུ་འབུད་བཞིན་དགའ་དགའ་སྤྲོ་སྤྲོ་བྱས་ཤིང་། དེ་དག་གི་ཀི་སྒྲ་ནི་ས་གཞི་འདར་བ་ཙམ་དུ་བྱུང་ངོ་། །
1KI 1:41 ཨ་དོ་ནེ་ཡཱ་དང་ཁོ་དང་ལྷན་ཅིག་ཏུ་ཡོད་པའི་མགྲོན་པོ་རྣམས་ཀྱིས་ཁ་ཟས་སྤྱད་ནས་ཚར་མ་ཐག་ཏུ་ཀི་སྒྲ་དེ་ཐོས་སོ། །ཡང་ཡོ་ཨབ་ཀྱིས་རྭ་དུང་གི་སྒྲ་ཐོས་པ་ཙམ་གྱིས། གྲོང་ཁྱེར་དུ་བྱུང་བའི་འུར་སྒྲ་དེ་ཅི་ཡིན་ནམ་ཞེས་སྨྲས་པ་དང་།
1KI 1:42 ཁོས་དེ་བཞིན་གླེང་བའི་སྐབས་སུ་མཆོད་དཔོན་ཨབ་ཡཱ་ཐར་གྱི་བུ་ཡོ་ནཱ་ཐན་དེར་སླེབས་པ་དང་། ཨ་དོ་ནེ་ཡཱས་དེ་ལ། ནང་དུ་ཤོག་དང་ཁྱོད་ནི་མི་བློ་དཀར་གཞུང་དྲང་ཞིག་ཡིན་པས་གཏམ་བཟང་ཞིག་ཁྱེར་འོང་ཡོད་སྙམ་ཞེས་སྨྲས་པའི་ལན་དུ།
1KI 1:43 ཡོ་ནཱ་ཐན་གྱིས་ཨ་དོ་ནེ་ཡཱ་ལ། གཏམ་བཟང་མི་གདའ། ངེད་ཀྱི་ཇོ་བོ་དང་རྒྱལ་པོ་དཱ་བིད་ཀྱིས་སོ་ལོ་མོན་རྒྱལ་པོར་བསྐོས་འདུག
1KI 1:44 རྒྱལ་པོས་དེ་དང་མཉམ་དུ་མཆོད་དཔོན་ཟཱ་ཏོག་དང་། ལུང་སྟོན་པ་ནཱ་ཐན་དང་། ཡེ་ཧོ་ཡ་དཱའི་བུ་པེ་ནཱ་ཡ་དང་། ཀེ་རེད་པ་དང་། ཕེ་ལེད་པ་བཅས་ཀྱི་མི་ཐམས་ཅད་མངགས་ནས། དེ་དག་གིས་སོ་ལོ་མོན་རྒྱལ་པོའི་ཆིབས་དྲེལ་ལ་བསྐྱོན་ཏོ། །
1KI 1:45 ཡང་མཆོད་དཔོན་ཟཱ་ཏོག་དང་ལུང་སྟོན་པ་ནཱ་ཐན་གཉིས་ཀྱིས་གེ་ཧོན་ནས་ཁོ་སྣུམ་གྱིས་བྱུགས་ཏེ་རྒྱལ་པོར་བསྐོས་པས། མི་རྣམས་ཡུལ་དེ་ནས་དགའ་མགུ་ཡི་རང་ངང་ལམ་ལ་ཆས་པ་དང་གྲོང་ཁྱེར་ནས་འུར་སྒྲ་བྱུང་སྟེ། ཁྱེད་ཀྱིས་ཐོས་པའི་ཀི་སྒྲ་ཡང་དེ་རང་ཡིན་ནོ། །
1KI 1:46 སོ་ལོ་མོན་ནི་རྒྱལ་ཁམས་འདིའི་རྒྱལ་ཁྲིར་བཞུགས་པར་མ་ཟད།
1KI 1:47 རྒྱལ་པོའི་བློན་འཁོར་རྣམས་ཀྱང་འོངས་ནས། ངེད་ཅག་གི་ཇོ་བོ་སྟེ་རྒྱལ་པོ་དཱ་བིད་ལ་རྟེན་འབྲེལ་ཞུས་ཏེ་ན་རེ། ཁྱེད་ཀྱི་དཀོན་མཆོག་གིས་ཁྱེད་ཀྱི་མཚན་ལས་ཀྱང་སོ་ལོ་མོན་གྱི་མཚན་སྙན་གྲགས་རྒྱས་པར་མཛད་ཅིང་། ཁྱེད་ཀྱི་རྒྱལ་ཁྲི་ལས་ཀྱང་ཁོའི་རྒྱལ་ཁྲི་ཆེན་པོར་མཛད་པར་ཤོག་ཅེས་ཞུས་ཤིང་། རྒྱལ་པོས་རང་གི་མལ་ཁྲིའི་སྟེང་དུ་མགོ་བོ་སྨད་དུ་བསྒུར་ནས་གུས་ཕྱག་ཕུལ་བ་དང་།
1KI 1:48 ཡང་རྒྱལ་པོ་ན་རེ། ཡེས་ར་ཨེལ་གྱི་དཀོན་མཆོག་ཡ་ཝཱེ་ནི་བསྟོད་འོས་པ་སྟེ། ཅི་ལ་ཞེ་ན། དེ་རིང་སྐྱེ་བོ་ཞིག་ང་ཡི་རྒྱལ་ཁྲིར་བཀོད་པ་དང་བདག་གིས་དེ་དངོས་སུ་མཐོང་ངོ་ཞེས་གསུངས་ཞེས་སྨྲས་པའོ། །
1KI 1:49 དེ་ནས་ཨ་དོ་ནེ་ཡཱ་དང་མཉམ་དུ་ཡོད་པའི་མགྲོན་པོ་ཐམས་ཅད་འཇིགས་ཏེ་ལངས་ནས་རང་རང་སར་བྲོས་སོ། །
1KI 1:50 ཨ་དོ་ནེ་ཡཱ་ནི་སོ་ལོ་མོན་ལ་འཇིགས་པས་ཡར་ལངས་ཏེ་སོང་ནས་མཆོད་ཁྲིའི་རུ་ཐུར་རྣམས་ལ་འཐམས་སོ། །
1KI 1:51 ཡང་མི་རྣམས་ཀྱིས་སོ་ལོ་མོན་ལ། གཟིགས་དང་ཨ་དོ་ནེ་ཡཱ་ནི་རྒྱལ་པོ་སོ་ལོ་མོན་ལ་འཇིགས་པས་མཆོད་ཁྲིའི་རུ་ཐུར་རྣམས་ལ་འཐམས་ཤིང་། ཁོས་རྒྱལ་པོ་སོ་ལོ་མོན་གྱིས་ང་དེ་རིང་རལ་གྲིས་མི་གསོད་པའི་མནའ་བཞེས་པར་མཁྱེན་ཞེས་ཞུ་བཞིན་འདུག་ཅེས་ཞུས།
1KI 1:52 དེར་སོ་ལོ་མོན་ན་རེ། གལ་ཏེ་ཁོ་རང་མི་བློ་དཀར་གཞུང་དྲང་ཞིག་ཡིན་ན། ཁོའི་སྐྲ་ཉག་མ་གཅིག་ཀྱང་ས་རུ་ལྷུང་བར་མི་འགྱུར། འོན་ཀྱང་ཁོ་ལས་སྤྱོད་ངན་གང་ཞིག་རྙེད་ན་ཁོ་ནི་འཆི་བར་འགྱུར་རོ་ཞེས་སྨྲས།
1KI 1:53 དེ་ནས་རྒྱལ་པོ་སོ་ལོ་མོན་གྱིས་མི་མངགས་ཤིང་། དེ་དག་གིས་ཁོ་མཆོད་ཁྲི་ལས་ཕབ་སྟེ་ཁྲིད་ནས་རྒྱལ་པོའི་དྲུང་དུ་སླེབས་པ་ན། ཁོས་རྒྱལ་པོ་སོ་ལོ་མོན་ལ་མགོ་བསྒུར་ནས་གུས་ཕྱག་ཕུལ་བ་དང་། རྒྱལ་པོ་སོ་ལོ་མོན་གྱིས་དེ་ལ་རང་གི་ཁྱིམ་དུ་སོང་ཞིག་ཅེས་བཀའ་བསྩལ་ཏོ། །
1KI 2:1 དེ་ཡང་དཱ་བིད་སྐུ་གཤེགས་ལ་ཉེ་བའི་སྐབས་སུ་རང་གི་སྲས་སོ་ལོ་མོན་ལ་བཀའ་གནང་བ་སྟེ།
1KI 2:2 བདག་ནི་འཇིག་རྟེན་པ་ཐམས་ཅད་ཀྱི་ལམ་དུ་འགྲོ་བས་ཁྱོད་སྟོབས་དང་ལྡན་པར་བྱས་ཏེ། རང་ཉིད་ཕོ་རབ་ཅིག་ཡིན་པ་སྟོན་ཅིག
1KI 2:3 རང་གི་དཀོན་མཆོག་ཡ་ཝཱེའི་བཀའ་བསྩལ་པ་བཞིན་དུ་བྱོས་དང་། ཁོང་གིས་བསྟན་པའི་ལམ་དུ་འགྲོ་བ་དང་ཁོང་གི་སྒྲིག་ཁྲིམས་དང་། བཀའ་རྒྱ། སྒྲིག་སྲོལ། དཔང་ཡིག་བཅས་མོ་ཤེའི་བཀའ་ཁྲིམས་ ནང་དུ་བཀོད་པ་བཞིན་དུ་སྲུངས་ཤིག་དང་། དེ་ལྟར་བྱས་ན་ཁྱོད་ཀྱིས་ཅི་ཞིག་བསྒྲུབས་ནས་གང་དུ་ཕྱོགས་ནའང་དོན་ཐམས་ཅད་འགྲུབ་པ་དང་།
1KI 2:4 དཀོན་མཆོག་ཡ་ཝཱེས་དཱ་བིད་བདག་ལ། གལ་ཏེ་ཁྱོད་ཀྱི་བུ་རྒྱུད་ཀྱིས་རང་གི་བགྲོད་ལམ་ལ་གཟབ་གཟབ་བྱས་ནས། བློ་གཅིག་སེམས་གཅིག་དང་གཞུང་རྒྱུད་དྲང་པོས་ངའི་ལམ་དུ་འགྲུལ་ན། ཁྱོད་ཀྱི་བུ་རྒྱུད་ནི་ཡེས་ར་ཨེལ་གྱི་རྒྱལ་ཁྲི་ལས་ནམ་ཡང་འབྲལ་བར་མི་འགྱུར་ཞེས་ཁོང་གིས་ཞལ་བཞེས་གནང་བ་དེ་འགྲུབ་པར་མཛད་ངེས་ཡིན།
1KI 2:5 དེར་མ་ཟད་ཟེ་རུ་ཡཱ་ཡི་བུ་ཡོ་ཨབ་ཀྱིས་ང་ལ་ཅི་བྱས་པ་ཁྱོད་ཀྱིས་ཤེས་དགོས་ཏེ། ཁོས་ཡེས་ར་ཨེལ་གྱི་དམག་དཔོན་ཏེ་ནེར་གྱི་བུ་ཨབ་ནེར་དང་། ཡེ་ཐེར་གྱི་བུ་ཨ་མ་སཱ་གཉིས་ལ་ཅི་བྱས་པ་ཁྱོད་ཀྱིས་ཤེས་དགོས། ཁོས་དེ་གཉིས་ཀ་བསད་པ་ དང་། ཞི་འཇགས་ཀྱི་དུས་སུ་དམག་འཁྲུག་གི་སྐབས་དང་མཚུངས་པར་དེ་དག་གི་ཁྲག་བཏོན་ཏེ་ཁོའི་རྐེད་པར་བཅིངས་པའི་སྐ་རགས་དང་། རྐང་པར་གྱོན་པའི་ལྷམ་རྣམས་ལ་འཐབ་མོའི་ཁྲག་འགོས་སུ་བཅུག་པ་ཡིན།
1KI 2:6 དེ་བས་ཁྱོད་ཀྱིས་རང་གི་ཤེས་རབ་ཀྱི་ནུས་ཚོད་བཞིན་དུ་བྱེད་དགོས་ཤིང་ཁོ་རང་མ་རྒས་སྔོན་ལ་གཤིན་ཡུལ་དུ་རྫོངས་ཤིག
1KI 2:7 འོན་ཀྱང་གིལ་ཨད་ཡུལ་གྱི་པཱར་ཟིལ་ལ་ཨིའི་བུ་རྣམས་དྲིན་གྱིས་བསྐྱངས་ནས་ཁྱོད་ཀྱི་གསོལ་ལྕོག་སྟེང་ཁ་ཟས་ལ་རོལ་དུ་འཇུག་དགོས། གང་ལ་ཞེ་ན། སྔར་ཁྱོད་ཀྱི་ཕུ་བོ་ཨབ་ཤཱ་ལོམ་གྱི་རྐྱེན་གྱིས་ང་རང་ཡུལ་གྱར་དུ་ཕྱིན་སྐབས། དེ་དག་གིས་ཁ་ཟས་ཁྱེར་ནས་ང་བསུ་རུ་འོངས་ པའི་ཕྱིར་རོ། །
1KI 2:8 ཡང་ལྟོས་ཤིག པཱ་ཧུ་རིམ་གྱི་པེན་ཡཱ་མེན་པའི་གེ་རཱ་ཡི་བུ་ཤིམ་ཨི་ཞེས་བྱ་བ་ཁྱོད་དང་མཉམ་དུ་ཡོད་ལ། ང་རང་མཱ་ཧ་ནཱ་ཡིམ་དུ་འགྲོ་བའི་དུས་སུ་ཁོས་ང་ལ་འཇིགས་སུ་རུང་བའི་དམོད་མོ་བཏབ ། འོན་ཀྱང་། ཁོ་ཡོར་དན་གཙང་པོའི་འགྲམ་དུ་ང་བསུ་བར་འོངས་པས། ངས་དཀོན་མཆོག་ཡ་ཝཱེ་དཔང་དུ་བཙུགས་ནས་རལ་གྲིས་ཁྱོད་གསོད་པར་མི་བྱའོ་ཞེས་ མནའ་བསྐྱལ་བ་ཡིན་མོད།
1KI 2:9 ད་ནི་ཁྱོད་རང་མི་བློ་གྲོས་ཅན་ཡིན་པས། ཁོ་ལ་ཉེས་པ་མེད་པར་མ་སེམས་ཤིག ཁོ་ལ་ཅི་ལྟར་བྱེད་དགོས་པ་ཁྱོད་ཀྱིས་ཤེས་ཏེ། ཁོ་མགོ་དཀར་པོར་ཁྲག་བཞུར་བཞིན་གཤིན་ཡུལ་དུ་སྐྱོལ་ཅིག་ཅེས་བསྐུལ་ཏོ། །
1KI 2:10 དེ་ནས་དཱ་བིད་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་པ་དང་། དཱ་བིད་ཀྱི་གྲོང་ཁྱེར་དུ་དུར་ལ་སྦས།
1KI 2:11 དཱ་བིད་ལོ་ངོ་བཞི་བཅུའི་རིང་ལ་ཡེས་ར་ཨེལ་གྱི་རྒྱལ་པོར་བཞུགས་པ་སྟེ། ཧེབ་རོན་ཡུལ་དུ་ལོ་བདུན་དང་། ཡེ་རུ་སཱ་ལེམ་དུ་ལོ་སུམ་ཅུ་སོ་གསུམ་ལ་སྲིད་བསྐྱངས་སོ། །
1KI 2:12 དེ་ནས་སོ་ལོ་མོན་རང་གི་ཡབ་དཱ་བིད་ཀྱི་རྒྱལ་ཁྲིར་བཞུགས་ཤིང་། དེའི་རྒྱལ་སྲིད་རབ་ཏུ་བརྟན་པར་གྱུར་ཏོ། །
1KI 2:13 ཡང་ཧག་གིད་ཀྱི་བུ་ཨ་དོ་ནེ་ཡཱ་ནི། སོ་ལོ་མོན་གྱི་མ་ཡུམ་པད་ཤེ་བཱའི་དྲུང་དུ་འོངས་པ་དང་། མོས་དེ་ལ། ཁྱོད་རང་བདེ་བར་འོང་ངམ་ཞེས་དྲིས་པའི་ལན་དུ་ཁོས། ཡིན་ལགས། བདེ་བར་འོང་ངོ་ཞེས་སྨྲས་སོ། །
1KI 2:14 ཡང་ཁོས། ང་ཁྱེད་ལ་ཞུ་རྒྱུ་ཞིག་ཡོད་ཅེས་སྨྲས་པ་ན། མོས་ཁྱོད་ཀྱིས་སྨྲོས་ཤིག་ཅེས་ཟེར་རོ། །
1KI 2:15 དེར་ཁོ་ན་རེ། རྒྱལ་སྲིད་ནི་ངའི་ཡིན་པ་དང་། ཡེས་ར་ཨེལ་པ་ཐམས་ཅད་ཀྱིས་ང་རང་རྒྱལ་པོར་སྡོད་པའི་རེ་བ་བཅངས་པ་ཁྱེད་ཀྱིས་མཁྱེན་ནོ། །འོན་ཀྱང་རྒྱལ་སྲིད་ནི་དེ་ལས་ལྡོག་སྟེ་དཀོན་མཆོག་ཡ་ཝཱེའི་ཐུགས་དགོངས་བཞིན་དུ་ངའི་ནུ་བོར་དབང་ངོ་། །
1KI 2:16 ད་ལྟ་ང་ཁྱེད་ལ་ཞུ་བ་ཞིག་འབུལ་རྒྱུ་ཡོད་པས་ཁྱེད་ཀྱིས་མིན་མི་གསུང་རོགས་ཞེས་ཞུས་པ་ན། ཁོ་མོས་སྨྲོས་ཤིག་ཅེས་པའི་ལན་དུ།
1KI 2:17 ཁོ་ན་རེ། རྒྱལ་པོ་སོ་ལོ་མོན་གྱིས་ཁྱེད་ལ་མིན་མི་གསུང་བས། ཁྱེད་ཀྱིས་ཁོང་ལ་ཤུ་ནེམ་གྱི་ཨ་བི་ཤག་ང་ལ་བག་མར་གནང་བའི་ཞུ་བ་འབུལ་བར་ཐུགས་རྗེས་གཟིགས་ཞེས་ཞུས་པ་ན།
1KI 2:18 པད་ཤེ་བཱས་ཁོ་ལ། ལེགས་སོ། །ངས་ཁྱོད་ཀྱི་དོན་དུ་རྒྱལ་པོར་ཞུ་བར་བྱའོ་ཞེས་སྨྲས།
1KI 2:19 དེ་ནས་པད་ཤེ་བཱ་ནི་ཨ་དོ་ནེ་ཡཱའི་ཆེད་དུ་ཞུ་བ་འབུལ་བར་རྒྱལ་པོ་སོ་ལོ་མོན་གྱི་དྲུང་དུ་ཕྱིན་པ་དང་། རྒྱལ་པོས་ཁོ་མོ་བསུ་བར་བཞེངས་ཏེ་དབུ་བསྒུར་བསྒུར་བྱས་ནས་སླར་ཡང་རྒྱལ་ཁྲིར་བཞུགས་ཤིང་། ཡང་རང་གི་ཡུམ་གྱི་ཕྱིར་བཞུགས་ཁྲི་ཞིག་འཇོག་ཏུ་བཅུག་ནས། ཁོ་མོ་ཁོང་གི་གཡས་སུ་བསྡད་པ་དང་།
1KI 2:20 ཁོ་མོ་ན་རེ། ང་ཁྱེད་ལ་ཞུ་བ་ཆུང་ངུ་ཞིག་འབུལ་རྒྱུ་ཡོད་དེ། ཁྱེད་ཀྱིས་ང་ལ་མིན་མ་གསུང་རོགས་ཞེས་ཞུས་པར། རྒྱལ་པོས་ཁོ་མོར་ངའི་ཡུམ་གྱིས་གསུང་བར་མཛོད། ངས་ཁྱེད་ལ་མིན་མི་ཟེར་ཞུས་པས།
1KI 2:21 ཁོ་མོ་ན་རེ། ཁྱེད་ཀྱི་ཕུ་བོ་ཨ་དོ་ནེ་ཡཱ་ལ་ཤུ་ནེམ་གྱི་ཨ་བི་ཤག་བག་མར་གནོངས་ཤིག་ཅེས་ཞུས་པས།
1KI 2:22 རྒྱལ་པོ་སོ་ལོ་མོན་གྱིས་རང་གི་ཡུམ་ལ་ལན་དུ། ཁྱེད་ཀྱིས་ཨ་དོ་ནེ་ཡཱའི་དོན་དུ་ཤུ་ནེམ་གྱི་ཨ་བི་ཤག་ཞུ་བ་དེ་ཅི་ཡིན་ནམ། ཁོ་ངའི་ཕུ་བོ་ཡིན་ལ། མཆོད་དཔོན་ཨབ་ཡཱ་ཐར་དང་ཟེ་རུ་ཡཱ་ཡི་བུ་ཡོ་ཨབ་གཉིས་ཀྱང་ཁོའི་ཕྱོགས་སུ་ཡོད་པས་ཁྱེད་ཀྱིས་ཁོའི་དོན་དུ་རྒྱལ་སྲིད་ཀྱང་ཞུས་ཆོག་གོ་ཞེས་སྨྲས་པ་དང་།
1KI 2:23 རྒྱལ་པོ་སོ་ལོ་མོན་གྱིས་དཀོན་མཆོག་ཡ་ཝཱེ་དཔང་དུ་བཙུགས་ནས་འདི་ལྟར། གལ་ཏེ་ཨ་དོ་ནེ་ཡཱས་གཏམ་དེ་སྨྲས་པའི་རྐྱེན་གྱིས་རང་སྲོག་འཆོར་བ་མིན་ཚེ། དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག
1KI 2:24 ད་ནི་ངས་རང་གི་རྒྱལ་སྲིད་བརྟན་པོར་འཛུག་མཁན་དང་། ང་རང་ཡབ་དཱ་བིད་ཀྱི་ཁྲི་ལ་བསྐོ་མཁན་དང་། ཞལ་བཞེས་བཞིན་དུ་ང་ལ་རྒྱལ་རབས་གནང་མཁན་གྱི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་སྐྱེལ་ཏེ། དེ་རིང་གི་ཉིན་མོར་ཨ་དོ་ནེ་ཡཱ་སྲོག་དང་འབྲལ་བར་འགྱུར་རོ་ཞེས་མནའ་བསྐྱལ་ཞིང་།
1KI 2:25 རྒྱལ་པོ་སོ་ལོ་མོན་གྱིས་ཡེ་ཧོ་ཡ་དཱའི་བུ་པེ་ནཱ་ཡ་མངགས་པ་དང་དེས་ཨ་དོ་ནེ་ཡཱ་བཀྲོངས་སོ། །
1KI 2:26 དེ་ནས་རྒྱལ་པོས་མཆོད་དཔོན་ཨབ་ཡཱ་ཐར་ལ། ཁྱོད་རང་ཨ་ན་ཐོད་དུ་ཡོད་པའི་རང་གི་གཞིས་གར་སོང་ཞིག ཁྱོད་ནི་གསོད་འོས་པ་ཡིན་མོད། འོན་ཀྱང་ཁྱོད་ཀྱིས་ངའི་ཡབ་དཱ་བིད་ཀྱི་དྲུང་དུ་གཙོ་བོ་ཡ་ཝཱེའི་ཞལ་ཆད་ཀྱི་ཤུར་སྒམ་ཁུར་མྱོང་སྟེ། ཡང་ངའི་ཡབ་དང་ལྷན་ཅིག་ཏུ་སྡུག་བསྔལ་ཐམས་ཅད་མྱངས་པས་དེ་རིང་ངས་ཁྱོད་མི་གསོད་ཅེས་སྨྲས་ཤིང་།
1KI 2:27 སོ་ལོ་མོན་ཀྱིས་ཨབ་ཡཱ་ཐར་དཀོན་མཆོག་ཡ་ཝཱེའི་མཆོད་དཔོན་མི་བྱེད་པའི་ཕྱིར་བསྐྲད་དོ། །གང་ལ་ཞེ་ན། དཀོན་མཆོག་ཡ་ཝཱེས་ཞི་ལོ་རུ་ཨེ་ལིའི་ཁྱིམ་རྒྱུད་ཀྱི་ཕྱིར་གསུངས་པའི་བཀའ་དེ་འགྲུབ་པའི་ཕྱིར་རོ། །
1KI 2:28 སྐད་ཆ་དེ་ཡོ་ཨབ་ཀྱིས་ཐོས་ནས། ཁོ་རང་དཀོན་མཆོག་ཡ་ཝཱེའི་གུར་མཆོག་ཏུ་བྲོས་ཏེ། མཆོད་ཁྲིའི་རུ་ཐུར་རྣམས་ལ་འཐམས་ནས་བསྡད་དོ། །ཡོ་ཨབ་ནི་ཨབ་ཤཱ་ལོམ་ གྱི་ཕྱོགས་མ་བྱས་ཀྱང་། ཨ་དོ་ནེ་ཡཱ་ཡི་ཕྱོགས་བྱས་པ་ཡིན།
1KI 2:29 དེ་ནས་རྒྱལ་པོ་སོ་ལོ་མོན་ལ། ཡོ་ཨབ་ནི་དཀོན་མཆོག་ཡ་ཝཱེའི་གུར་མཆོག་ཏུ་བྲོས་ནས་མཆོད་ཁྲིའི་མདུན་ལོགས་སུ་འདུག་ཅེས་ཞུས་པས། སོ་ལོ་མོན་གྱིས་ཡེ་ཧོ་ཡ་དཱ་ཡི་བུ་པེ་ནཱ་ཡ་ལ། ཁྱོད་སོང་ནས་ཁོ་སོད་ཅིག་ཅེས་བཀའ་བསྩལ་ཏོ། །
1KI 2:30 དེ་བས་པེ་ནཱ་ཡ་ནི་དཀོན་མཆོག་ཡ་ཝཱེའི་གུར་མཆོག་ཏུ་སོང་ནས་ཡོ་ཨབ་ལ། རྒྱལ་པོས་ཕྱི་རུ་ཐོན་ཤོག་གསུངས་ཞེས་སྨྲས་པར། ཁོས་མིན། ང་རང་འདིར་འཆི་དགོས་ཞེས་སྨྲས་པས། པེ་ནཱ་ཡས་ཕྱིར་ལོག་ནས་རྒྱལ་པོ་ལ། ཡོ་ཨབ་ཀྱིས་ང་ལ་འདི་ལྟར་ལན་བཏབ་བོ་ཞེས་ཞུས་པ་ན།
1KI 2:31 རྒྱལ་པོས་དེ་ལ། ཁོས་སྨྲས་པ་བཞིན་དུ་གྱིས་ཤིག ཁོ་བསད་དེ་དུར་དུ་སྦས་ཤིག དེ་ལྟར་བྱས་ན། ཡོ་ཨབ་ཀྱིས་ཉེས་མེད་བསད་པའི་སྡིག་པ་དེ་ང་དང་ངའི་ཡབ་ཀྱི་རྒྱུད་ནས་མེད་པར་འགྱུར་རོ། །
1KI 2:32 ཡོ་ཨབ་ཀྱིས་ཉེས་མེད་བསད་པའི་སྡིག་པ་ནི་དཀོན་མཆོག་ཡ་ཝཱེས་ཁོ་རང་གི་སྟེང་བླུག་པར་འགྱུར། ཅི་ལ་ཟེར་ན། ཡོ་ཨབ་ཀྱིས་རང་ལས་དྲང་ཞིང་བཟང་བའི་མི་གཉིས་བསད་པ་སྟེ། ཡེས་ར་ཨེལ་གྱི་དམག་དཔོན་ནེར་གྱི་བུ་ཨབ་ནེར་དང་། ཡ་ཧུ་དཱའི་དམག་དཔོན་ཡེ་ཐེར་གྱི་བུ་ཨ་མ་སཱ་གཉིས་རལ་གྲིས་བསད་པ་དང་། ངའི་ཡབ་དཱ་བིད་ཀྱིས་དེ་མ་ཤེས་སོ། །
1KI 2:33 དེ་བས་དེ་གཉིས་ཀྱི་ཁྲག་བཞུར་བའི་སྡིག་པ་ནི་ཕྱིར་ཡོ་ཨབ་དང་ཁོའི་བུ་རྒྱུད་རྣམས་ཀྱི་མགོ་ལ་རྟག་ཏུ་འབབ་པར་གྱུར་ཅིག འོན་ཀྱང་དཱ་བིད་དང་ཁོང་གི་བུ་རྒྱུད་དང་ཁྱིམ་གཞིས། ཁོང་གི་རྒྱལ་ཁྲི་བཅས་ལ་དུས་རྒྱུན་དུ་དཀོན་མཆོག་ཡ་ཝཱེ་ནས་ཞི་བདེ་འཐོབ་པར་འགྱུར་ཞེས་སྨྲས་སོ། །
1KI 2:34 དེ་ནས་ཡེ་ཧོ་ཡ་དཱ་ཡི་བུ་པེ་ནཱ་ཡ་ཡར་སོང་སྟེ་ཁོ་ལ་རྒོལ་ནས་བསད་པ་དང་། ཡོ་ཨབ་རང་གི་ཁྱིམ་ཡོད་སའི་དབེན་སྟོང་དུ་དུར་ལ་སྦས་སོ། །
1KI 2:35 རྒྱལ་པོས་ཡོ་ཨབ་ཀྱི་ཤུལ་དུ་ཡེ་ཧོ་ཡ་དཱ་ཡི་བུ་པེ་ནཱ་ཡ་དམག་དཔོན་དུ་བསྐོས་པ་དང་། ཨབ་ཡཱ་ཐར་གྱི་ཤུལ་དུ་མཆོད་དཔོན་ཟཱ་ཏོག་བསྐོས་སོ། །
1KI 2:36 ཡང་རྒྱལ་པོས་མི་མངགས་ཏེ་ཤིམ་ཨི་བོས་ནས་དེ་ལ། ཁྱོད་ཀྱིས་ཡེ་རུ་སཱ་ལེམ་དུ་རང་ཉིད་ལ་ཁང་པ་ཞིག་བརྩིགས་ནས་དེར་སྡོད་ཅིག དེ་ནས་གང་དུའང་མ་འགྲོ་ཞིག
1KI 2:37 ཁྱོད་ཀྱིས་ཤེས་དགོས་པ་ནི། ཁྱོད་རང་ནམ་ཞིག་ལ་ཕྱི་རུ་ཐོན་ནས་ཀིད་རོན་གྲམ་པ་བརྒལ་ན། ཉིན་མོ་དེར་ཁྱོད་རང་འཆི་ངེས་ཡིན། དེ་ནས་ཁྱོད་ཀྱི་ཁྲག་ནི་ཁྱོད་རང་གི་མགོ་རུ་འབབ་པར་འགྱུར་རོ་ཞེས་གསུངས་པའི་ལན་དུ།
1KI 2:38 ཤིམ་ཨི་ཡིས་རྒྱལ་པོ་ལ། གསུང་འདི་ལེགས་སོ། །ངའི་ཇོ་བོ་དང་ངའི་རྒྱལ་པོས་ཇི་ལྟར་གསུངས་པ་ཡིན་ན། ཁྱེད་ཀྱི་ཞབས་ཕྱི་བདག་གིས་དེ་ལྟར་བྱེད་ངེས་ཡིན་ཞེས་སྨྲས་པ་དང་། ཤིམ་ཨི་ཡུན་རིང་ཞིག་ལ་ཡེ་རུ་སཱ་ལེམ་དུ་བསྡད་དོ། །
1KI 2:39 འོན་ཀྱང་ལོ་གསུམ་གྱི་རྗེས་སུ་ཤིམ་ཨི་ཡི་བྲན་གཡོག་རྣམས་ལས་མི་གཉིས་གཱད་ཀྱི་རྒྱལ་པོ་མ་ཨ་ཀཱ་ཡི་བུ་ཨ་ཀི་སིའི་རྩར་བྲོས་ཤིང་། མི་རྣམས་ཀྱིས་ཤིམ་ཨི་ལ། ལྟོས་ཤིག་ཁྱོད་ཀྱི་བྲན་གཡོག་རྣམས་གཱད་ཡུལ་དུ་འདུག་ཅེས་སྨྲས་པ་དང་།
1KI 2:40 ཤིམ་ཨི་ཡར་ལངས་ནས། རང་གི་བོང༌བུ་ལ་སྒ་བསྟད་དེ་གཱད་གྱི་རྒྱལ་པོ་ཨ་ཀི་སིའི་རྩར་རང་གི་བྲན་གཡོག་གཉིས་འཚོལ་དུ་སོང་། ཤིམ་ཨི་དེ་ལྟར་ཕྱིན་ཏེ། གཱད་ཡུལ་ནས་རང་གི་བྲན་གཡོག་གཉིས་ཁྲིད་འོངས་པའོ། །
1KI 2:41 ཤིམ་ཨི་ཁོ་རང་ཡེ་རུ་སཱ་ལེམ་ནས་གཱད་ཡུལ་དུ་སོང་ནས་ཕྱིར་ལོག་པའི་སྐད་ཆ་སོ་ལོ་མོན་ལ་འབྱོར་བ་དང་།
1KI 2:42 རྒྱལ་པོས་མི་མངགས་ཏེ་ཤིམ་ཨི་རང་གི་གམ་དུ་བོས་ནས་དེ་ལ། ངས་ཁྱོད་ལ་དཀོན་མཆོག་ཡ་ཝཱེ་དཔང་དུ་བཙུགས་ཏེ་མནའ་བསྐྱལ་དུ་བཅུག་པར་མ་ཟད། ཁྱོད་ཀྱིས་ཤེས་དགོས་པ་ནི་ཁྱོད་རང་ནམ་ཞིག་ལ་ཕྱི་རུ་ཐོན་ནས་ཡུལ་གཞན་གང་དུ་སོང་ན། ཉིན་མོ་དེར་ཁྱོད་རང་འཆི་ངེས་ཡིན་ཞེས་ནན་གྱིས་མ་བསྐུལ་ལམ། ཡང་ཁྱོད་ཀྱིས་ང་ལ་ལན་དུ་དེ་ལེགས་སོ་ངས་དེ་བཞིན་བྱའོ་ཞེས་སྨྲས་ཀྱང་།
1KI 2:43 ད་ལྟ་ཁྱོད་ཀྱིས་དཀོན་མཆོག་ཡ་ཝཱེ་ལ་བསྐྱལ་བའི་མནའ་དང་། ངས་ཁྱོད་ལ་ཕབ་པའི་བཀའ་དེ་ཅིའི་ཕྱིར་མ་བསྲུངས་པ་ཡིན་ཞེས་སྨྲས་སོ། །
1KI 2:44 ཡང་རྒྱལ་པོས་ཤིམ་ཨི་ལ། ཁྱོད་ཀྱིས་ངའི་ཡབ་དཱ་བིད་ལ་བྱས་པའི་དོན་ངན་ཐམས་ཅད་ཁྱོད་རང་གི་སེམས་ལ་ངེས་པས། དཀོན་མཆོག་ཡ་ཝཱེས་ཁྱོད་ཀྱི་ཉེས་པ་དེ་ནི་ཕྱིར་ཁྱོད་རང་གི་མགོ་ལ་འབེབ་པར་འགྱུར།
1KI 2:45 འོན་ཀྱང་རྒྱལ་པོ་སོ་ལོ་མོན་ལ་བྱིན་རླབས་འཐོབ་ཅིང་། དཱ་བིད་ཀྱི་རྒྱལ་ཁྲི་ནི་དུས་རྒྱུན་དུ་དཀོན་མཆོག་ཡ་ཝཱེའི་དྲུང་དུ་གནས་པར་འགྱུར་རོ་ཞེས་སྨྲས་སོ། །
1KI 2:46 རྒྱལ་པོས་ཡེ་ཧོ་ཡ་དཱའི་བུ་པེ་ནཱ་ཡ་ལ་བཀའ་གནང་བས། དེ་ཕྱི་རོལ་ཏུ་ཐོན་ནས་ཤིམ་ཨི་ལ་རྒོལ་ཏེ་བསད་ཅིང་། དེ་བཞིན་སོ་ལོ་མོན་གྱིས་རྒྱལ་སྲིད་བརྟན་པོར་མཛད་པའོ། །
1KI 3:1 དེ་ནས་སོ་ལོ་མོན་གྱིས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་དང་གཉེན་འབྲེལ་བཙུགས་ཏེ་ཕཱར་ཨོལ་གྱི་སྲས་མོ་ཆུང་མར་བཞེས་ནས། རང་གི་ཕོ་བྲང་དང་། དཀོན་མཆོག་ཡ་ཝཱེའི་མཆོད་ཁང་། ཡེ་རུ་སཱ་ལེམ་གྱི་ཕྱོགས་བཞིའི་མཁར་གྱང་རྣམས་བརྩིགས་ཚར་བའི་བར་དུ་ཁོ་མོ་དཱ་བིད་ཀྱི་གྲོང་ཁྱེར་དུ་ཁྲིད་དོ། །
1KI 3:2 དུས་དེའི་བར་དུ་དཀོན་མཆོག་ཡ་ཝཱེའི་མཚན་གྱི་ཕྱིར་མཆོད་ཁང་ཞིག་ད་དུང་བཞེངས་མེད་པས། མི་རྣམས་ཀྱིས་མཐོ་གླིང་རྣམས་སུ་མཆོད་པ་ཕུལ་བ་ཡིན།
1KI 3:3 སོ་ལོ་མོན་ནི་དཀོན་མཆོག་ཡ་ཝཱེ་ལ་དགའ་ཞིང་། རང་གི་ཡབ་དཱ་བིད་ཀྱི་སྒྲིག་ཁྲིམས་བཞིན་དུ་བསྒྲུབས་མོད། འོན་ཀྱང་ཁོང་གིས་སྔར་བཞིན་མཐོ་གླིང་རྣམས་སུ་སྦྱིན་སྲེག་གི་མཆོད་པའི་ཕྱུགས་རྣམས་བཤས་ནས་མེ་རུ་བསྲེགས་པའོ། །
1KI 3:4 ཡང་གིབ་ཡོན་ཡུལ་དུ་ཆེས་ཆེ་བའི་མཐོ་གླིང་ཡོད་པས། རྒྱལ་པོ་དེར་མཆོད་པ་འབུལ་བར་གཤེགས་ཏེ། སོ་ལོ་མོན་གྱིས་མཆོད་ཁྲི་དེའི་ཁར་སྦྱིན་སྲེག་གི་མཆོད་པ་ཆིག་སྟོང་ཕུལ་ཏོ། །
1KI 3:5 མཚན་མོ་དེར་གིབ་ཡོན་ཡུལ་དུ་དཀོན་མཆོག་ཡ་ཝཱེ་ནི་སོ་ལོ་མོན་གྱི་རྨི་ལམ་དུ་མངོན་པར་གྱུར་ཏེ། དཀོན་མཆོག་གིས་ཁོང་ལ། ཁྱོད་ཀྱིས་ཅི་ཞུས་ཀྱང་བདག་གིས་ཁྱོད་ལ་སྦྱིན་ངེས་ཡིན་ཞེས་གསུངས་པའི་ལན་དུ།
1KI 3:6 སོ་ལོ་མོན་གྱིས། ཁྱེད་རང་གི་ཞབས་ཕྱི་སྟེ། ངའི་ཡབ་དཱ་བིད་ཀྱིས་ཁྱེད་ཀྱི་སྤྱན་སྔར་བློ་དཀར་བ་དང་། དྲང་གཞག་དང་གཞུང་དྲང་གི་སེམས་དང་བཅས་སྤྱོད་པ་སྤྱད་པས། ཁྱེད་ཀྱིས་ཁོང་ལ་བྱམས་བརྩེ་ཆེན་པོས་གཟིགས་སྐྱོང་གནང་བ་ཡིན། ཡང་ཉིན་མོ་འདི་བཞིན་དུ། ཁྱེད་ཀྱིས་ཁོང་ལ་བྱམས་བརྩེ་ཆེན་པོ་གནང་ཞིང་ཁོང་གི་རྒྱལ་ཁྲིར་འགོད་པའི་བུ་ཞིག་གནང་བ་ཡིན་ནོ། །
1KI 3:7 ཀྱེ་བདག་གི་དཀོན་མཆོག་ཡ་ཝཱེ་ལགས། ད་ནི་ཁྱེད་ཀྱིས་རང་གི་ཞབས་ཕྱི་སྟེ། བདག་ནི་ཡབ་དཱ་བིད་ཀྱི་ཚབ་ཏུ་རྒྱལ་པོར་བསྐོས། འོན་ཀྱང་བདག་ནི་ལོ་ན་ཕྲ་བས་ཕྱི་ནང་གི་འགྲོ་ལུགས་ཀྱང་མི་ཤེས།
1KI 3:8 ཡང་ཁྱེད་ཀྱི་ཞབས་ཕྱི་བདག་ནི་ཁྱེད་ཀྱིས་བདམས་པའི་འབངས་མིའི་ཁྲོད་དུ་ཡོད་དེ། འབངས་དེ་ནི་ཤིན་ཏུ་མང་བའི་རྐྱེན་གྱིས་བགྲང་གིས་མི་ལང་བ་ཞིག་ཡིན།
1KI 3:9 དེའི་ཕྱིར་ཁྱེད་ཀྱིས་ཉིད་ཀྱི་ཞབས་ཕྱི་ལ་འབངས་མིའི་སྲིད་སྐྱོང་བ་དང་། ལེགས་ཉེས་ཀྱི་དབྱེ་བ་རྟོགས་པའི་ཕྱིར་དུ། ཤེས་རབ་དང་ལྡན་པའི་སེམས་ཤིག་གནང་རོགས་ཞུ། ཅིའི་ཕྱིར་ཞེ་ན། སུ་ཞིག་གིས་ཁྱེད་ཀྱི་འབངས་མི་འདི་འདྲ་མང་པོར་སྲིད་བྱེད་ནུས་སམ་ཞེས་ཞུས་པ་དང་།
1KI 3:10 སོ་ལོ་མོན་གྱིས་དེ་བཞིན་ཞུས་པ་ལ་གཙོ་བོ་ཐུགས་དགྱེས་སོ། །
1KI 3:11 ཡང་དཀོན་མཆོག་གིས་ཁོ་ལ། ཁྱོད་ཀྱིས་དེ་བཞིན་ཞུས་ཤིང་རང་གི་ཆེད་དུ་ཚེ་ཐག་རིང་པོའམ། རྒྱུ་ནོར་རམ། དགྲ་བོ་རྣམས་ཀྱི་སྲོག་གཅོད་པ་བཅས་ཀྱི་ཕྱིར་ཞུས་པ་མིན་པར། ལེགས་ཉེས་འབྱེད་པའི་ཤེས་རབ་ཀྱི་ཕྱིར་དུ་ཞུས་པས་ན།
1KI 3:12 ངས་ཁྱོད་ཀྱིས་ཞུས་པ་བཞིན་དུ་བསྒྲུབ་པར་བྱ་ཞིང་། ངས་ཁྱོད་ལ་ཤེས་རབ་དང་ཡེ་ཤེས་ཀྱི་སེམས་ཤིག་སྦྱིན་པར་བྱ་སྟེ། ཁྱོད་དང་འདྲ་བ་ཞིག་སྔོན་ཆད་བྱུང་མ་མྱོང་ལ། ཕྱིན་ཆད་ཀྱང་འབྱུང་བར་མི་འགྱུར་རོ། །
1KI 3:13 དེར་མ་ཟད། ཁྱོད་ཀྱིས་མ་ཞུས་པ་དག་ཀྱང་སྦྱིན་པར་བྱ་སྟེ། རྒྱུ་ནོར་དང་བཀུར་སྟི་གཉིས་སྦྱིན་ཞིང་། ཁྱོད་ཀྱི་ཚེ་གང་པོར་རྒྱལ་པོ་གཞན་རྣམས་ཀྱི་ཁྲོད་དུ་ཁྱོད་འདྲ་བ་ཞིག་འབྱུང་བར་མི་འགྱུར་རོ། །
1KI 3:14 གལ་ཏེ་ཁྱོད་ཀྱིས་རང་གི་ཕ་དཱ་བིད་ཀྱིས་ཅི་བྱས་པ་བཞིན་དུ། ངས་བསྟན་པའི་ལམ་ལ་འགྲོ་ཞིང་། ངའི་སྒྲིག་ཁྲིམས་དང་བཀའ་རྒྱ་རྣམས་བསྲུངས་ཚེ། བདག་གིས་ཁྱོད་ཀྱི་ཚེ་ཐག་རིང་བར་བྱའོ་ཞེས་གསུངས་སོ། །
1KI 3:15 དེ་ནས་སོ་ལོ་མོན་གཉིད་ལས་སད་པ་དང་། ཀྱེ་ཧོ། མ་གཞི་དེ་ནི་རྨི་ལམ་ཡིན་ནོ། །དེ་ནས་ཁོ་ཡེ་རུ་སཱ་ལེམ་དུ་ལོག་སྟེ་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་མདུན་དུ་ཡར་ལངས་ཏེ། སྦྱིན་སྲེག་གི་མཆོད་པ་དང་ཞི་བདེའི་མཆོད་པ་ཕུལ་ནས་རང་གི་བློན་འཁོར་རྣམས་ལ་གསོལ་སྟོན་བཤམས་སོ། །
1KI 3:16 ཉིན་ཞིག་ལ་སྨད་འཚོང་མ་གཉིས་རྒྱལ་པོའི་དྲུང་དུ་འོངས་ནས་ལངས་བསྡད་དེ།
1KI 3:17 བུད་མེད་གཅིག་གིས། ཀྱེ་ང་ཡི་བདག་པོ་ལགས། ང་རང་བུད་མེད་འདི་དང་མཉམ་དུ་ཁྱིམ་གཅིག་ལ་གནས་པ་ཡིན། ངེད་གཉིས་མཉམ་དུ་ཁང་པའི་ནང་དུ་ཡོད་དུས་ང་ལ་བུ་ཞིག་སྐྱེས་ཤིང་།
1KI 3:18 དེ་ནས་ཉིན་གསུམ་པར་བུད་མེད་འདི་ལའང་བུ་ཞིག་སྐྱེས་ཏེ། ངེད་གཉིས་མཉམ་དུ་བསྡད་ཡོད་ཅིང་ཁྱིམ་དེར་ངེད་གཉིས་ལས་གཞན་སུ་ཡང་མེད།
1KI 3:19 མཚན་མོར་བུད་མེད་འདི་གཉིད་ལ་ཡུར་བའི་དུས་སུ་རང་གི་བུ་འོག་ཏུ་མནན་པས་བུ་དེ་ཤིའོ། །
1KI 3:20 མཚན་ཕྱེད་དུ་ཁྱེད་ཀྱི་ཞལ་ཏ་མ་བདག་གཉིད་ལ་ཡུར་བའི་སྐབས་དང་བསྟུན་ནས། ཁོ་མོ་ཡར་ལངས་ཏེ་བདག་གི་བུ་རང་གི་པང་ལ་བཞག་ཅིང་། ཁོ་མོའི་བུ་ཤི་རོ་ནི་བདག་གི་པང་དུ་བཞག་གོ །
1KI 3:21 ཕྱི་ཉིན་ཞོགས་པར་ང་རང་བུ་ལ་ནུ་མ་སྣུན་དུ་ཡར་ལངས་པའི་ཚེ་ན། ཀྱེ་ཧོ། ཁོ་ནི་ཤིའོ། །ཉིན་དེའི་ཞོགས་པར་བདག་གིས་ཞིབ་ཏུ་བལྟས་པའི་ཚེ། དེ་ནི་བདག་ལས་སྐྱེས་པའི་བུ་མིན་པ་མཐོང་ངོ་ཞེས་ཞུས་སོ། །
1KI 3:22 དེ་ནས་བུད་མེད་ཅིག་ཤོས་ན་རེ། དེ་འདྲ་གཏན་ནས་མ་ཡིན། གསོན་པོ་འདི་ངའི་བུ་ཡིན་པ་དང་། ཤི་རོ་དེ་ནི་ཁྱོད་ཀྱི་བུ་ཡིན་ཞེས་སྨྲས་ཤིང་། ཡང་བུད་མེད་དེ་ན་རེ། དེ་ལྟར་མིན། ཤི་རོ་དེ་ནི་ཁྱོད་ཀྱི་བུ་ཡིན་ལ། གསོན་པོ་འདི་ངའི་བུ་ཡིན་ནོ་ཞེས་དེ་གཉིས་ཀྱིས་རྒྱལ་པོའི་དྲུང་དུ་རྩོད་གླེང་བྱས་སོ། །
1KI 3:23 དེ་ནས་རྒྱལ་པོས་འདི་ལྟར། བུད་མེད་གཅིག་གིས་ནི། གསོན་པོ་འདི་ངའི་བུ་ཡིན་པ་དང་། ཤི་རོ་དེ་ནི་ཁྱོད་ཀྱི་བུ་ཡིན་ཟེར་ཞིང་། བུད་མེད་གཞན་དེས། དེ་ལྟར་མིན། ཤི་རོ་དེ་ནི་ཁྱོད་ཀྱི་བུ་ཡིན་ལ། གསོན་པོ་འདི་ངའི་བུ་ཡིན་ཟེར་རོ་ཞེས་གསུངས།
1KI 3:24 དེ་ནས་རྒྱལ་པོས། བདག་ལ་རལ་གྲི་ཞིག་ཁྱེར་ཤོག་ཅེས་གསུངས་པ་དང་རྒྱལ་པོའི་དྲུང་དུ་རལ་གྲི་ཞིག་ཁྱེར་འོངས་པ་དང་།
1KI 3:25 རྒྱལ་པོས་ཕྲུ་གུ་གསོན་པོ་འདི་དུམ་བུ་གཉིས་སུ་ཆོད་ལ་ཕྱེད་ཀ་བུད་མེད་འདི་དང་ཕྱེད་ཀ་བུད་མེད་དེ་ལ་བྱིན་ཅིག་ཅེས་བསྒོས་པར།
1KI 3:26 ཕྲུ་གུ་གསོན་པོ་དེའི་མ་ནི་ཕྲུ་གུར་གདུང་སེམས་སྐྱེས་ནས་རྒྱལ་པོ་ལ། ཀྱེ་ང་ཡི་བདག་པོ་ལགས། ཕྲུ་གུ་གསོན་པོ་འདི་ཁོ་མོར་སྟེར་རོགས། ཁོ་ནི་ཅི་ནས་ཀྱང་གསོད་མི་རུང་ཞེས་ཞུས་ན་ཡང་། བུད་མེད་གཞན་དེས་ཕྲུ་གུ་འདི་ཁྱོད་ལ་ཡང་མི་འཐོབ། ང་ལ་ཡང་མི་འཐོབ་པས་ཆོད་ཅིག་ཅེས་སྨྲས་སོ། །
1KI 3:27 དེ་ནས་རྒྱལ་པོས། ཕྲུ་གུ་གསོན་པོ་དེ་བུད་མེད་འདི་ལ་བྱིན་ཅིག་དང་། བུད་མེད་འདི་ནི་དངོས་གནས་ཕྲུ་གུའི་མ་ཡིན་ཏེ། ཕྲུ་གུ་གཏན་ནས་གསོད་མི་རུང་ཞེས་གསུངས་སོ། །
1KI 3:28 ཡང་ཡེས་ར་ཨེལ་པ་ཐམས་ཅད་ཀྱིས་རྒྱལ་པོས་འདུམས་པའི་གྱོད་དོན་དེ་ཐོས་པས་རྒྱལ་པོར་གུས་ཤིང་འཇིགས་སོ། །ཅིའི་ཕྱིར་ཞེ་ན། ལེགས་ཉེས་འབྱེད་པའི་ཕྱིར་དུ་དཀོན་མཆོག་གི་ཡེ་ཤེས་ཁོང་གི་ནང་དུ་གནས་པ་དེ་དག་གིས་མཐོང་བའི་ཕྱིར་རོ། །
1KI 4:1 དེ་ལྟར་སོ་ལོ་མོན་ནི་ཡེས་ར་ཨེལ་ཡོངས་ཀྱི་རྒྱལ་པོར་གྱུར་ཅིང་།
1KI 4:2 ཁོང་གི་མངའ་འོག་ཏུ་ཡོད་པའི་བློན་པོ་རྣམས་འདི་ལྟ་སྟེ། ཟཱ་ཏོག་གི་བུ་ཨ་ཟར་ཡཱ་ནི་མཆོད་དཔོན་དང་།
1KI 4:3 སེ་སཱ་ཡི་བུ་ཨེ་ལི་ཧོ་རེབ་དང་ཨ་ཧི་ཡཱ་གཉིས་ནི་དྲུང་ཡིག་དང་ཨ་ཧི་ལུད་ཀྱི་བུ་ཡེ་ཧོ་ཤ་ཕད་ནི་ལོ་རྒྱུས་འགོད་མཁན་དང་།
1KI 4:4 ཡེ་ཧོ་ཡ་དཱ་ཡི་བུ་པེ་ནཱ་ཡ་ནི་དམག་དཔོན་དང་ཟཱ་ཏོག་དང་ཨབ་ཡཱ་ཐར་གཉིས་ནི་མཆོད་དཔོན་དང་།
1KI 4:5 ནཱ་ཐན་གྱི་བུ་ཨ་ཟར་ཡཱ་དེ་དཔོན་རིགས་རྣམས་ཀྱི་སྤྱི་དཔོན་དང་། རྒྱལ་པོའི་གྲོགས་པོ་ནཱ་ཐན་གྱི་བུ་ཟ་པུད་ནི་འགོ་དཔོན་ཡིན་ནོ། །
1KI 4:6 ཡང་ཕོ་བྲང་གི་ནང་བློན་དུ་ཨ་ཧི་ཤར་དང་ངལ་ལས་པ་རྣམས་ཀྱི་འགོ་དཔོན་ལ་ཨབ་དཱ་ཡི་བུ་ཨ་དོ་ནི་རཱམ་བཞག་གོ །
1KI 4:7 ཡང་སོ་ལོ་མོན་གྱིས་ཡེས་ར་ཨེལ་ཡོངས་ནས་རྒྱལ་པོ་རང་དང་ཁོང་གི་ཕོ་བྲང་ལ་བཟའ་བཏུང་མཁོ་འདོན་བྱེད་མཁན་སྤྱི་དཔོན་བཅུ་གཉིས་བསྐོས་པ་དང་། མི་རེ་རེས་ལོ་འཁོར་རེའི་ཟླ་བ་གཅིག་ལ་མཁོ་འདོན་བྱེད་པ་ཡིན།
1KI 4:8 དེ་དག་གི་མིང་རྣམས་ནི་འདི་ལྟ་སྟེ། པེན་ཧུར་ནི་ཨེ་ཕཱར་ཡིམ་རི་བོའི་ཡུལ་དུ་ཡོད་པ་དང་།
1KI 4:9 པེན་ཏི་ཀིར་གྱི་བུ་ནི། མ་ཀ་ཙི་དང་ཤཱ་ཨལ་པིམ་དང་པེད་ཤེ་མེ་སི་དང་པེད་ཧ་ནན་གྱི་ཨེ་ལོན་ཡུལ་བཅས་སུ་ཡོད་པ་ཡིན།
1KI 4:10 པེན་ཧེ་སེད་ཀྱི་བུ་ནི་ཨ་རུབ་རྦོད་ཡུལ་དུ་ཡོད་ལ། སོ་ཀོ་དང་ཧེ་ཕེར་གྱི་ཡུལ་རྣམས་ཀྱང་ཁོའི་མངའ་ཁོངས་སུ་གཏོགས་སོ། །
1KI 4:11 པེན་ཨ་བི་ནཱ་དབ་ནི་ནཱ་ཕད་དཱོར་གྱི་ཡུལ་ཐམས་ཅད་དུ་ཡོད་པ་དང་ཁོས་སོ་ལོ་མོན་གྱི་སྲས་མོ་ཏ་ཕད་ཆུང་མར་བླངས་པའོ། །
1KI 4:12 ཨ་ཧི་ལུད་ཀྱི་བུ་པ་ཨ་ནཱ་ནི་ཐ་ཨ་ནག་དང་། མེ་གིད་དོ་དང་། ཟར་ཐན་གྱི་ཐག་ཉེ་རུ་ཡོད་པའི་པེད་ཤེ་ཨན་ཡུལ་ཐམས་ཅད་དེ། ཡེ་སི་རེ་ཨེལ་གྱི་ལྷོ་ཕྱོགས་སུ་ཡོད་པའི་པེད་ཤེ་ཨན་ནས་ཨ་བེལ་མེ་ཧོ་ལཱ་དང་ཡོག་མེ་ཨམ་གྱི་ཕར་ཕྱོགས་བར་དུ་ཡོད་པའི་ཡུལ་ཐམས་ཅད་ཡིན་པའོ། །
1KI 4:13 པེན་གེ་བེར་ནི་གིལ་ཨད་ཡུལ་ན་ཡོད་པའི་རཱ་མོད་དུ་ཡོད་པ་དང་། མཱ་ན་ཤེའི་བུ་རྒྱུད་ཡཱ་ཨིར་གྱི་གིལ་ཨད་ཀྱི་གྲོང་རྡལ་རྣམས་དང་། པཱ་ཤན་གྱི་ཨར་གོབ་ཡུལ་གྱི་མཁར་གྱང་དང་ལི་ཡི་སྒོ་གཏན་ཅན་གྱི་གྲོང་ཁྱེར་ཆེན་པོ་དྲུག་ཅུ་དང་བཅས་པ་རྣམས་ནི་ཁོ་ལ་གཏོགས་པའོ། །
1KI 4:14 ཨེད་ཏོ་ཡི་བུ་ཨ་ཧི་ན་དབ་ནི་མཱ་ཧ་ནཱ་ཡིམ་ཡུལ་དུ་ཡོད་པ་དང་།
1KI 4:15 ཨ་ཧི་མ་ཨ་ཙི་ཞེས་བྱ་བ་ནཱབ་ཐ་ལི་རུ་ཡོད་པ་ཡིན་ལ། ཁོས་སོ་ལོ་མོན་གྱི་སྲས་མོ་པཱ་མད་བྱ་བ་ཆུང་མར་བླངས་སོ། །
1KI 4:16 ཧུ་ཤཱ་ཨི་ཡི་བུ་པ་ཨ་ནཱ་ཞེས་བྱ་བ་ཨ་ཤེར་དང་པེ་ཨ་ལོད་ཡུལ་དུ་ཡོད་པ་ཡིན།
1KI 4:17 ཕཱ་རིའུ་ཡི་བུ་ཡེ་ཧོ་ཤ་ཕད་ནི་ཡེས་སི་ཀཱར་ཡུལ་དུ་ཡོད་པ་དང་།
1KI 4:18 ཨེ་ལཱ་ཡི་བུ་ཤིམ་ཨི་ནི་པེན་ཡཱ་མེན་ཡུལ་དུ་ཡོད་པ་ཡིན།
1KI 4:19 ཨུ་རིའི་བུ་གེ་བེར་ནི་གིལ་ཨད་ཡུལ་དུ་ཡོད་པ་ཡིན་ལ། ཨེ་མོར་པའི་རྒྱལ་པོ་སི་ཧོན་དང་པཱ་ཤན་ཡུལ་གྱི་རྒྱལ་པོ་ཨོག་ གི་ཡུལ་རྣམས་དེའི་ཁོངས་སུ་འདུས་ལ། དེ་རུ་ཁོ་ལས་འགོ་དཔོན་གཞན་མེད་དོ། །
1KI 4:20 ཡ་ཧུ་དཱ་པ་དང་ཡེས་ར་ཨེལ་པ་ནི་མི་ཤིན་ཏུ་མང་པོ་ཡོད་ཅིང་། རྒྱ་མཚོ་འགྲམ་གྱི་བྱེ་མ་བཞིན་མང་བ་དང་། བཟའ་བཏུང་སྤྱད་དེ་སྐྱིད་ལ་རོལ་ཏོ། །
1KI 4:21 སོ་ལོ་མོན་གྱིས་ཕི་རཱད་ཆུ་བོ་ནས་ཕེ་ལེ་ཤེད་པའི་ཡུལ་དང་ཨེ་ཅིབ་ཡུལ་གྱི་ས་མཚམས་བར་དུ་དབང་བསྒྱུར་ཅིང་། སོ་ལོ་མོན་གྱི་སྐུ་ཚེ་གང་པོར་རྒྱལ་ཁམས་དེ་དག་གིས་ཁོང་ལ་ཁྲལ་བཅལ་ནས་ཁོང་ལ་ཞབས་ཏོག་བསྒྲུབས་སོ། །
1KI 4:22 ཡང་སོ་ལོ་མོན་གྱི་ཉིན་རེའི་ཁ་ཟས་ནི། གྲོ་ཞིབ་ཁལ་སུམ་ཅུ་དང་བག་ཕྱེ་ཁལ་དྲུག་ཅུ་དང་།
1KI 4:23 གླང་ཤ་ཤེད་ཅན་བཅུ་དང་། རྩྭ་ཐང་གི་གླང་ཉི་ཤུ་དང་། ར་ལུག་བརྒྱ་དང་། དེ་མིན་རི་དྭགས་ཤྭ་བ་དང་། དགོ་བ། ཁ་ཤྭ། ཁྱིམ་བྱ་བཅས་སོ། །
1KI 4:24 ཁོང་གིས་ཕི་རཱད་ཆུ་བོའི་ནུབ་ཕྱོགས་ཀྱི་ཏིབ་སཱ་ནས་གཱ་ཟཱ་ཡོངས་དང་། ཕི་རཱད་ཆུ་བོའི་ནུབ་ཕྱོགས་ཀྱི་རྒྱལ་པོ་རྣམས་ལ་དབང་བསྒྱུར་བས་ཁོང་གི་ཕྱོགས་བཞི་བདེ་བར་གནས་པ་ཡིན།
1KI 4:25 སོ་ལོ་མོན་གྱི་སྐུ་རིང་ལ་དཱན་ནས་པེར་ཤ་བཱ་ཡི་བར་དུ། ཡ་ཧུ་དཱ་པ་དང་ཡེས་ར་ཨེལ་པ་རྣམས་ནི་མི་རེ་རེ་རང་རང་གི་རྒུན་འབྲུམ་སྡོང་པོ་དང་སེ་ཡབ་ཤིང་གི་འོག་ཏུ་བདེ་བར་འཚོ་བའོ། །
1KI 4:26 ཡང་སོ་ལོ་མོན་ལ་ཤིང་རྟ་འདྲུད་པའི་རྟ་བཞི་ཁྲི་དང་། སྐྱ་དམག་ཆིག་ཁྲི་ཉིས་སྟོང་བཅས་ཡོད་པ་ཡིན།
1KI 4:27 སྤྱི་དཔོན་དེ་དག་གིས་རྒྱལ་པོ་སོ་ལོ་མོན་དང་། ཁོང་གི་གསོལ་ལྕོག་སྟེང་དུ་ཟས་ལ་རོལ་བ་རྣམས་ཀྱི་ཆེད་དུ། སོ་སོར་ཟླ་རེ་བཞིན་ཁ་ཟས་ཅི་ཡང་མ་ཆད་པར་དྲངས་སོ། །
1KI 4:28 ཡང་དེ་དག་གིས་རང་རང་གི་ལས་ཁག་བཞིན་དུ། ཤིང་རྟ་འདྲུད་པའི་རྟ་དང་ཆིབས་ཆེན་རྣམས་ལ་ནས་དང་སོག་མ་ནི་གཏན་ལ་ཁེལ་བའི་གནས་སུ་དྲངས་སོ། །
1KI 4:29 ཡང་དཀོན་མཆོག་གིས་སོ་ལོ་མོན་ལ་ཤེས་རབ་དང་ཁྱད་དུ་འཕགས་པའི་བློ་རིག་དང་། ཐུགས་རྒྱ་ཡངས་པ་བཅས་གནང་བ་ནི་རྒྱ་མཚོའི་བྱེ་མ་ལྟར་ཚད་ལས་བརྒལ་ཞིང་བགྲང་གིས་མི་ལང་བ་ཡིན།
1KI 4:30 སོ་ལོ་མོན་གྱི་ཤེས་རབ་ནི་ཤར་ཕྱོགས་པ་ཀུན་གྱི་ཤེས་རབ་ལས་ཕ་མཐར་བརྒལ་ཞིང་ཨེ་ཅིབ་པ་ཚང་མའི་ཤེས་རབ་ལས་ཀྱང་བརྒལ་བ་ཡིན།
1KI 4:31 ཁོང་ནི་མི་ཐམས་ཅད་དང་ཨེས་རག་པ་ཨེ་ཐན་དང་། མ་ཧོལ་གྱི་བུ་རྣམས་ཏེ་ཧེ་མན་དང་། ཁལ་ཀོལ་དང་ཏར་དཱ་བཅས་ལས་ཀྱང་མཁས་པ་ཡིན་པས། ཕྱོགས་བཞིའི་མི་ཐམས་ཅད་ཁྲོད་དུ་ཁོང་གི་མཚན་སྙན་རྒྱས་སོ། །
1KI 4:32 ཁོང་གིས་གསུངས་པའི་ལེགས་བཤད་སྟོང་ཕྲག་གསུམ་དང་ཁོང་གི་མགུར་མའི་གྲངས་ནི་ཆིག་སྟོང་ལྔའོ། །
1KI 4:33 ཁོང་གིས་ལེ་པཱ་ནོན་ཡུལ་གྱི་ཐང་ཤིང་ནས་བཟུང་སྟེ། རྩིག་ངོས་སུ་སྐྱེས་པའི་ཨི་སོབ་རྩྭ་ཤིང་གི་བར་དུ་གསུང་གླེང་མཛད་པ་དང་། ཡང་དུད་འགྲོ་དང་། འདབ་ཆགས་དང་། ལྟོ༌འགྲོ་དང་འབུ་སྲིན་དང་། ཉ་རྣམས་ཀྱི་སྐོར་ཡང་གསུང་གླེང་མཛད་དོ། །
1KI 4:34 གནམ་འོག་གི་རྒྱལ་པོ་ཐམས་ཅད་ཀྱིས་རྒྱལ་པོ་སོ་ལོ་མོན་གྱི་ཤེས་རབ་ཐོས་ནས། ཕྱོགས་སོ་སོ་ནས་རྒྱལ་པོ་སོ་ལོ་མོན་གྱི་ཤེས་རབ་ལྡན་པའི་སྐད་ཆ་ལ་མཉན་པར་མི་མངགས་པའོ། །
1KI 5:1 དེ་ནས་ཐཱར་གྱི་རྒྱལ་པོ་ཧི་རཱམ་གྱིས་ཡེས་ར་ཨེལ་པ་རྣམས་ཀྱིས་སོ་ལོ་མོན་ནི་རང་གི་ཡབ་ཀྱི་ཚབ་ཏུ་རྒྱལ་པོར་བསྐོས་པ་ཐོས་ནས། རང་གི་བློན་འཁོར་རྣམས་སོ་ལོ་མོན་གྱི་དྲུང་དུ་མངགས་སོ། །ཅིའི་ཕྱིར་ཞེ་ན། རྒྱལ་པོ་ཧི་རཱམ་ནི་སྔར་ནས་རྒྱལ་པོ་དཱ་བིད་ལ་དགའ་བས་སོ། །
1KI 5:2 སོ་ལོ་མོན་གྱིས་ཀྱང་ཧི་རཱམ་གྱི་རྩར་མི་མངགས་ནས་འདི་ལྟར།
1KI 5:3 ངའི་ཡབ་དཱ་བིད་ཀྱིས་ཉིད་ཀྱི་དཀོན་མཆོག་ཡ་ཝཱེའི་མཚན་ལ་མཆོད་ཁང་ཞིག་བཞེང་མ་ནུས་ཏེ། གང་ལ་ཞེ་ན། དཀོན་མཆོག་ཡ་ཝཱེས་དགྲ་རྣམས་ཁོང་གི་ཞབས་འོག་ཏུ་འཇུག་པའི་བར་དུ་ཁོང་ལ་ཕྱོགས་བཞི་ནས་དམག་འཁྲུག་བྱུང་བ་ཁྱེད་ཀྱིས་ཀྱང་ཤེས་པས་སོ། །
1KI 5:4 འོན་ཀྱང་ད་ལྟ་བདག་གི་དཀོན་མཆོག་ཡ་ཝཱེས་བདག་གི་ཕྱོགས་བཞི་བདེ་ལ་བཀོད་པས། ང་ལ་དགྲ་དང་བར་ཆད་མེད།
1KI 5:5 དེ་བས་དཀོན་མཆོག་ཡ་ཝཱེས་སྔར་ངའི་ཡབ་དཱ་བིད་ལ་འདི་སྐད་དུ། བདག་གིས་ཁྱོད་ཀྱི་ཚབ་ཏུ་ཁྱོད་ཀྱི་རྒྱལ་ཁྲིར་བསྐོ་བར་འགྱུར་བའི་བུ་དེས་ངའི་མིང་གི་ཕྱིར་མཆོད་ཁང་ཞིག་བཞེང་བར་བྱའོ་ཞེས་གསུངས་པ་བཞིན་དུ། གཟིགས་དང་། ངས་རང་གི་དཀོན་མཆོག་ཡ་ཝཱེའི་མཚན་གྱི་ཕྱིར་མཆོད་ཁང་ཞིག་བཞེང་འདོད་པས།
1KI 5:6 ཁྱེད་ཀྱིས་དེའི་དོན་དུ་ལེ་པཱ་ནོན་ནས་ཐང་ཤིང་གཅོད་པའི་བཀའ་གནོངས་ཤིག ཡང་ངའི་འཁོར་གཡོག་རྣམས་ཀྱིས་ཁྱེད་ཀྱི་འཁོར་གཡོག་རྣམས་དང་མཉམ་དུ་ལས་ཀ་བསྒྲུབ་བོ། །ཁྱེད་ཀྱི་འཁོར་གཡོག་རྣམས་ཀྱི་གླ་ཆ་ནི་ཁྱེད་ཀྱིས་གཏན་ལ་ཁེལ་བ་བཞིན་དུ་ངས་སྟེར་བར་བྱ། ཅིའི་ཕྱིར་ཞེ་ན། ངེད་རྣམས་ཀྱི་ཁྲོད་དུ་ཚི་ཏུན་པ་རྣམས་དང་འདྲ་བར་ཤིང་གཅོད་ཤེས་མཁན་གཅིག་ཀྱང་མེད་པ་ཁྱེད་ཀྱིས་མཁྱེན་ནོ་ཞེས་འཕྲིན་བསྐུར་ཏོ། །
1KI 5:7 ཧི་རཱམ་གྱིས་སོ་ལོ་མོན་གྱི་འཕྲིན་ཐོས་པ་ཙམ་གྱིས་སྤྲོ་བར་གྱུར་ཏེ་འདི་ལྟར། མི་ཚོགས་འདི་འདྲ་ཆེན་པོའི་རྗེ་བོར་འགྱུར་བའི་ཆེད་དུ། དཱ་བིད་ལ་འདི་འདྲའི་སྲས་ཤེས་རབ་ཅན་ཞིག་གནང་བས་ན། དེ་རིང་ཉིན་མོ་དཀོན་མཆོག་ཡ་ཝཱེ་ལ་བསྟོད་ཅིང་བསྔགས་པར་གྱིས་ཞེས་སྨྲས་སོ། །
1KI 5:8 དེ་ནས་ཧི་རཱམ་གྱིས་སོ་ལོ་མོན་ལ་འཕྲིན་ལན་བསྐུར་བ་འདི་ལྟར། ཁྱེད་ཀྱིས་མི་མངགས་ནས་བདག་ལ་བསྐུར་བའི་འཕྲིན་རྣམས་ངས་ཐོས་པ་ཡིན། ཉིད་ཀྱི་ཐུགས་འདོད་ནང་བཞིན་ཐང་ཤིང་དང་གསོམ་ཤིང་གིས་རོགས་བྱེད་དོ། །
1KI 5:9 ངའི་འཁོར་གཡོག་རྣམས་ཀྱིས་ཤིང་རྣམས་ལེ་པཱ་ནོན་ནས་རྒྱ་མཚོའི་འགྲམ་དུ་འབེབ་པར་བྱ། དེ་ནས་བདག་གིས་རྫིངས་བཟོས་ཏེ་ཆུ་ཐོག་བརྒྱུད་ནས་ཁྱེད་ཀྱིས་གཏན་ལ་ཁེལ་བའི་ཡུལ་དུ་བསྐྱལ་བར་བྱའོ། །དེར་བདག་གིས་རྫིངས་རྣམས་གཏོར་བར་བྱ་ཞིང་ཁྱེད་ཀྱིས་ཤིང་རྣམས་ཕར་འཁྱེར་ཆོག ཡང་ཁྱེད་ཀྱིས་ངའི་འདོད་མོས་བཞིན་དུ་བསྒྲུབས་ནས་བདག་གི་ཕོ་བྲང་གི་མི་རྣམས་ལ་འཚོ་ཆས་གནང་བར་མཁྱེན་ཞེས་སྨྲས་སོ། །
1KI 5:10 དེ་ནས་ཧི་རཱམ་གྱིས་སོ་ལོ་མོན་གྱིས་ཅི་འདོད་པ་བཞིན་དུ་ཁོ་ལ་ཐང་ཤིང་དང་གསོམ་ཤིང་བཏང་བ་དང་།
1KI 5:11 སོ་ལོ་མོན་གྱིས་ཀྱང་ཧི་རཱམ་གྱི་ཕོ་བྲང་གི་མི་རྣམས་ཀྱི་འཚོ་ཆས་ལ་གྲོ་ཁལ་ཉིས་ཁྲི་དང་། སྐྱུ་རུ་རའི་ཤིང་ལས་སྣུམ་བརྡུངས་མ་ཁལ་ཉི་ཤུ་བཅས་བཏང་ངོ་། །སོ་ལོ་མོན་གྱིས་ལོ་རེ་བཞིན་ཧི་རཱམ་ལ་དེ་ལྟར་བྱས་སོ། །
1KI 5:12 ཡང་དཀོན་མཆོག་ཡ་ཝཱེས་སོ་ལོ་མོན་ལ་ཞལ་གྱིས་བཞེས་པ་བཞིན་དུ་ཤེས་རབ་གནང་སྟེ། ཧི་རཱམ་དང་སོ་ལོ་མོན་གཉིས་ཀྱི་བར་ལ་ཞི་བདེ་ཡོད་པས། དེ་གཉིས་ཀྱིས་ཕན་ཚུན་བར་ཆིངས་ཡིག་བཞག་གོ །
1KI 5:13 དེ་ནས་སོ་ལོ་མོན་གྱིས་ཡེས་ར་ཨེལ་པ་ཐམས་ཅད་ལས་ངལ་ལས་བྱེད་མཁན་བསྡུས་ཤིང་། ངལ་ལས་བྱེད་མཁན་བསྡོམས་པས་མི་སུམ་ཁྲི་ཡོད་པ་དང་།
1KI 5:14 ཁོང་གིས་དེ་དག་ལས་རེས་བཞིན་དུ་ཟླ་བ་རེར་མི་ཆིག་ཁྲི་རེ་ལེ་པཱ་ནོན་དུ་བཏང་བས། དེ་དག་ལེ་པཱ་ནོན་དུ་ཟླ་གཅིག་དང་། ཁྱིམ་དུ་ཟླ་གཉིས་ལ་བསྡད་པ་དང་། ཨ་དོ་ནི་རཱམ་ནི་ངལ་ལས་པ་དེ་རྣམས་ཀྱི་སྤྱི་དཔོན་ཡིན་ནོ། །
1KI 5:15 སོ་ལོ་མོན་ལ་རྡོག་ཁྲེས་ཁུར་མཁན་མི་བདུན་ཁྲི་དང་། རྡོ་བརྐོ་མཁན་མི་བརྒྱད་ཁྲི་ཡོད་པ་ཡིན་ལ།
1KI 5:16 དེ་མིན་སོ་ལོ་མོན་ལ་ད་དུང་ལས་ཀར་བལྟ་བའི་འགོ་དཔོན་སུམ་སྟོང་སུམ་བརྒྱ་ཡོད་པ་དེ་དག་གིས་ལས་ཀ་བྱེད་མཁན་རྣམས་ལ་ལྟ་རྟོག་བྱེད་པ་ཡིན།
1KI 5:17 རྒྱལ་པོས་བཀའ་གནང་བ་དང་དེ་དག་གིས་རྡོ་ཆེན་པོ་རྩ་ཆེན་རྣམས་བཅད་ཅིང་གཏུབ་ནས། འཇམ་ཤ་བཏོད་པའི་རྡོ་ནི་མཆོད་ཁང་གི་རྨང་གཞི་བྱས་སོ། །
1KI 5:18 སོ་ལོ་མོན་གྱི་ལག་ཤེས་དང་། ཧི་རཱམ་གྱི་ལག་ཤེས། གེ་བལ་ཡུལ་གྱི་མི་རྣམས་བཅས་ཀྱིས་རྡོ་རྣམས་ལ་འཇམ་ཤ་བཏོད་པ་དང་། མཆོད་ཁང་བཞེང་བར་གདུང་མ་དང་རྡོ་རྣམས་གྲ་སྒྲིག་བྱས་སོ། །
1KI 6:1 དེ་ཡང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་ཏེ་ལོ་བཞི་བརྒྱ་དང་བརྒྱད་ཅུ་ལོན་པ་དང་། སོ་ལོ་མོན་གྱིས་ཡེས་ར་ཨེལ་དུ་སྲིད་བསྐྱངས་པའི་ལོ་བཞི་པའི་ཟླ་གཉིས་པའི་དུས་སུ། དཀོན་མཆོག་ཡ་ཝཱེའི་མཆོད་ཁང་བཞེང་བའི་འགོ་ཚུགས་པ་ཡིན་ནོ། །
1KI 6:2 སོ་ལོ་མོན་གྱིས་དཀོན་མཆོག་ཡ་ཝཱེ་ལ་བཞེངས་པའི་མཆོད་ཁང་དེའི་རིང་ཚད་ལ་ཁྲུ་དྲུག་ཅུ་དང་། ཞེང་ལ་ཁྲུ་ཉི་ཤུ་དང་། མཐོ་ཚད་ལ་ཁྲུ་སུམ་ཅུ་ཡོད་དེ།
1KI 6:3 མཆོད་ཁང་མདུན་གྱི་བར་ཁྱམས་ཀྱི་ཞེང་གི་ཆེ་ཆུང་ནི་མཆོད་ཁང་གི་ཞེང་གི་ཆེ་ཆུང་བཞིན་ཁྲུ་ཉི་ཤུ་དང་། དེའི་རིང་ཚད་ནི་མཆོད་ཁང་གི་མདུན་ཕྱོགས་སུ་ཁྲུ་བཅུ་ཡོད་པ་ཞིག་ཡིན་ནོ། །
1KI 6:4 ཡང་མཆོད་ཁང་གི་སྒེའུ་ཁུང་རྣམས་ནི་ཕྱི་དོག་ལ་ནང་ཁོད་ཡངས་པ་ཞིག་མཛད་དེ།
1KI 6:5 ཚོམས་ཁང་དང་ཕུག་ཁང་གཉིས་ཀྱི་མཐའ་བཞི་སྟེ་མཆོད་ཁང་གི་རྩིག་པར་གཏད་དེ་ཁང་ཆུང་རྣམས་བྱས་སོ། །
1KI 6:6 ཁང་ཆུང་འོག་མའི་ཞེང་ལ་ཁྲུ་ལྔ་དང་། བར་མའི་ཞེང་ལ་ཁྲུ་དྲུག གོང་མའི་ཞེང་ལ་ཁྲུ་བདུན་བཅས་ཡོད་པ་ཡིན། ཡང་མཆོད་ཁང་གི་རྩིག་པའི་ཕྱི་ལ་ཕྱོགས་བཞིར་ལས་ཁྲི་བཙུགས་པས། ཀླད་རྒྱུག་དག་གི་སྣེ་མོས་མཆོད་ཁང་མི་བརྟོལ་བར་བྱས།
1KI 6:7 མཆོད་ཁང་དེ་བཞེང་བའི་ཚེ་ན། རྡོ་གཡམ་འདོན་སར་འཇམ་ཤ་བཏོད་པའི་རྡོ་རྣམས་ཀྱིས་བརྩིགས་པ་ཡིན་པས། ཐོ་བའམ། སྟ་རེའམ། ལྕགས་ཀྱི་ལག་ཆ་གཅིག་གི་སྒྲའང་ཐོས་པར་མ་གྱུར་ཏོ། །
1KI 6:8 ཁང་ཆུང་ཞོལ་མའི་སྒོ་ནི་མཆོད་ཁང་གི་གཡས་ཕྱོགས་སུ་བཞག་སྟེ། མི་རྣམས་དུང་འཁྱིལ་དབྱིབས་ཀྱི་སྐས་ཐེམ་ལས་བར་ཁང་དང་། ཡང་བར་ཁང་ནས་ཁང་ཆུང་གསུམ་པ་རུ་འཛེག་ཐུབ་པར་བྱས་སོ། །
1KI 6:9 དེ་བཞིན་ཁོང་གིས་མཆོད་ཁང་བཞེངས་ནས་གྲུབ་པ་དང་། མཆོད་ཁང་གི་གནམ་གཅལ་ནི་ཐང་ཤིང་གི་གདུང་མ་དང་ཤིང་ལེབ་ཀྱིས་གཡོགས་སོ། །
1KI 6:10 ཡང་མཆོད་ཁང་ལ་བརྟེན་ནས་བཞེངས་པའི་ཁང་ཆུང་རེ་རེའི་མཐོ་ཚད་ནི་ཁྲུ་ལྔ་རུ་བྱས་ཤིང་། ཐམས་ཅད་ཐང་ཤིང་གི་གདུང་མས་མཆོད་ཁང་དང་སྦྲེལ་བའོ། །
1KI 6:11 དེ་ནས་དཀོན་མཆོག་ཡ་ཝཱེའི་བཀའ་སོ་ལོ་མོན་ལ་བྱུང་བ་ནི་འདི་ལྟ་སྟེ།
1KI 6:12 ཁྱོད་ཀྱིས་བཞེང་བའི་མཆོད་ཁང་འདི་ནི། གལ་ཏེ་ཁྱོད་ཀྱིས་ངའི་སྒྲིག་ཁྲིམས་བཞིན་དུ་བྱེད་ཅིང་། ངའི་ཁྲིམས་སྲོལ་བཞིན་དུ་སྤྱོད་པ་དང་། ངའི་བཀའ་རྒྱ་ཐམས་ཅད་བསྲུངས་ནས་དེ་བཞིན་བྱེད་ན། ངས་ཁྱོད་ཀྱི་ཕ་དཱ་བིད་ལ་ཁས་བླངས་པའི་ཚིག་དེ་ ཁྱོད་ལའང་བསྒྲུབ་པར་བྱ།
1KI 6:13 ང་རང་ཡེས་ར་ཨེལ་པ་རྣམས་ཀྱི་ཁྲོད་དུ་སྡོད་ཅིང་། རང་གི་འབངས་མི་ཡེས་ར་ཨེལ་པ་རྣམས་བསྐྱུར་བར་མི་བྱའོ་ཞེས་གསུངས་སོ། །
1KI 6:14 དེ་ལྟར་སོ་ལོ་མོན་གྱིས་མཆོད་ཁང་བཞེངས་ནས་འགྲུབ་པར་བྱས་སོ། །
1KI 6:15 ཡང་ཁོང་གིས་མཆོད་ཁང་གི་རྩིག་པའི་ནང་ལོགས་ཀྱི་ངོས་ཧྲིལ་པོ་ཐང་ཤིང་གི་ཤིང་ལེབ་ཀྱིས་གཡོགས་ཤིང་། མཆོད་ཁང་གི་ཐང་ལ་གསོམ་པའི་ཤིང་ལེབ་བཏིངས་པའོ། །
1KI 6:16 ཡང་ཕུག་ལ་ཁྲུ་ཉི་ཤུ་ཅན་གྱི་མཆོད་ཁང་སྦུག་མ་བཞེངས་པ་དང་། ཐང་ཤིང་གི་ཤིང་ལེབ་ཀྱིས་པང་གཅལ་ནས་ཐོག་ཕུབ་བར་དུ་བརྩིགས་ནས་གནས་དམ་མཆོག་ཏུ་གྲུབ་བོ། །
1KI 6:17 མཆོད་ཁང་སྦུག་མའི་མདུན་དུ་ཡོད་པའི་ཚོམས་ཁང་དེའི་རིང་ཚད་ལ་ཁྲུ་བཞི་བཅུ་ཡོད་པར་བྱས་ཏེ།
1KI 6:18 མཆོད་ཁང་ནང་གི་རྩིག་ངོས་ཡོངས་སུ་ཐང་ཤིང་གིས་གཡོགས་ཤིང་། དེའི་སྟེང་ལ་ཀུ་བ་དང་བཀྲ་བའི་མེ་ཏོག་བརྐོས་ཏེ། ཐམས་ཅད་ཐང་ཤིང་གིས་བཟོས་པས། རྡོ་གཅིག་ཀྱང་མི་སྣང་ངོ་། །
1KI 6:19 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཇོག་པའི་ཕྱིར། མཆོད་ཁང་གི་སྦུག་ཏུ་མཆོད་ཁང་སྦུག་མ་བཞེངས་པ་དང་།
1KI 6:20 དེའི་རིང་ཚད་ལ་ཁྲུ་ཉི་ཤུ་དང་། ཞེང་ལ་ཁྲུ་ཉི་ཤུ་དང་། མཐོ་ཚད་ལ་ཁྲུ་ཉི་ཤུ་བཅས་ཡོད་པ་ཡིན། དེའི་ནང་ནི་གསེར་བཙོ་མས་བཏུམས་ཏེ། ཐང་ཤིང་གིས་བཟོས་པའི་མཆོད་ཁྲིའང་གསེར་བཙོ་མས་བཏུམས་པའོ། །
1KI 6:21 སོ་ལོ་མོན་གྱིས་མཆོད་ཁང་གི་ནང་ལོགས་ནི་གསེར་བཙོ་མས་བཏུམས་ཤིང་། མཆོད་ཁང་སྦུག་མའི་ཕྱི་རུ་གསེར་གྱི་ཉག་ཐག་བཟོས་ནས། མཆོད་ཁང་སྦུག་མ་དེ་ཡང་གསེར་གྱིས་བཏུམས་པ་ཡིན་ནོ། །
1KI 6:22 མཆོད་ཁང་ཧྲིལ་པོ་གསེར་གྱིས་གཡོགས་ཏེ། མཆོད་ཁང་སྦུག་མའི་ནང་དུ་ཡོད་པའི་མཆོད་ཁྲི་ཧྲིལ་པོ་ཡང་གསེར་གྱིས་བཏུམས་སོ། །
1KI 6:23 མཆོད་ཁང་སྦུག་མའི་ནང་དུ་ཁོང་གིས་མཐོ་ཚད་ལ་ཁྲུ་བཅུ་ཡོད་པའི་ཀེ་རུབ་གཉིས་སྐྱུ་རུ་རའི་ཤིང་ལས་བཟོས་ཏེ།
1KI 6:24 ཀེ་རུབ་གཅིག་གི་གཤོག་པ་གཅིག་གི་རིང་ཚད་ལ་ཁྲུ་ལྔ་དང་། དེའི་གཤོག་པ་ཅིག་ཤོས་ཀྱི་རིང་ཚད་ལའང་ཁྲུ་ལྔ་སྟེ། གཤོག་པ་གཅིག་གི་སྣེ་མོ་ནས་གཤོག་པ་ཅིག་ཤོས་ཀྱི་སྣེ་མོའི་བར་དུ་ཁྲུ་བཅུ་ཡིན།
1KI 6:25 ཀེ་རུབ་གཞན་དེའི་གཤོག་པ་གཉིས་ཀྱི་རིང་ཚད་ལའང་ཁྲུ་བཅུ་ཡོད་དེ། ཀེ་རུབ་གཉིས་ཀྱི་ཆེ་ཆུང་དང་གཟུགས་དབྱིབས་ནི་གཅིག་མཚུངས་ཡིན།
1KI 6:26 ཀེ་རུབ་གཅིག་གི་མཐོ་ཚད་ལ་ཁྲུ་བཅུ་དང་། གཞན་དེའི་མཐོ་ཚད་ལ་ཡང་ཁྲུ་བཅུ་ཡོད་པ་ཡིན།
1KI 6:27 ཀེ་རུབ་དེ་གཉིས་ནི་མཆོད་ཁང་སྦུག་མའི་ནང་དུ་བཞག་སྟེ། དེ་དག་གི་གཤོག་པ་བརྐྱངས་ཏེ་ཡོད་པས། གཅིག་གི་གཤོག་པས་རྩིག་པའི་ལོགས་གཅིག་དང་། ཀེ་རུབ་གཞན་དེའི་གཤོག་པས་རྩིག་པའི་ལོགས་གཅིག་ལ་རེག་ཅིང་། དེ་གཉིས་ཀྱི་གཤོག་པ་གཞན་གཉིས་ནི་མཆོད་ཁང་གི་དཀྱིལ་དབུས་སུ་ཕན་ཚུན་འབྲེལ་ནས་ཡོད།
1KI 6:28 ཀེ་རུབ་གཉིས་ཀྱང་གསེར་གྱིས་བཏུམས་པའོ། །
1KI 6:29 ཡང་མཆོད་ཁང་སྦུག་མ་དང་ཚོམས་ཁང་གཉིས་ཀྱི་རྩིག་པ་ཐམས་ཅད་ལ་ཀེ་རུབ་དང་། ཏ་ལའི་ཤིང་དང་། བཀྲ་བའི་མེ་ཏོག་རྣམས་བརྐོས་སོ། །
1KI 6:30 མཆོད་ཁང་སྦུག་མ་དང་ཚོམས་ཁང་གཉིས་ཀྱི་པང་གཅལ་ཡང་གསེར་གྱིས་བཏུམས་པ་དང་།
1KI 6:31 མཆོད་ཁང་གི་སྒོ་གླེགས་དང་ཡ་ཐེམ་དང་སྒོ་འགྲམ་ལྔ་བཅས་སྐྱུ་རུ་རའི་ཤིང་ལས་བཟོས་པ་ཡིན།
1KI 6:32 སྒོ་གླེགས་གཉིས་ཀ་སྐྱུ་རུ་རའི་ཤིང་ལས་བཟོས་ཤིང་། དེ་གཉིས་ཀྱི་ཁར་ཀེ་རུབ་དང་། ཏ་ལའི་ཤིང་དང་། བཀྲ་བའི་མེ་ཏོག་རྣམས་ཀྱང་བརྐོས་པ་དང་། ཡང་ཀེ་རུབ་དང་ཏ་ལའི་ཤིང་རྣམས་གསེར་གྱིས་གཡོགས་སོ། །
1KI 6:33 ཡང་ཁོང་གིས་དེ་བཞིན་དུ་ཚོམས་ཁང་གི་སྒོ་ལ་སྐྱུ་རུ་རའི་ཤིང་ལས་སྒོ་འགྲམ་བཞི་བཟོས་སོ། །
1KI 6:34 གསོམ་ཤིང་གིས་བཟོས་པའི་སྒོ་གཉིས་ནི། སྒོ་གླེགས་གཅིག་ལ་ཤིང་ལེབ་ལྟེབ་མ་གཉིས་ཡོད་ཅིང་། སྒོ་གླེགས་ཅིག་ཤོས་ལའང་ཤིང་ལེབ་ལྟེབ་མ་གཉིས་ཡོད།
1KI 6:35 ཡང་དེ་དག་གི་ཁར་ཀེ་རུབ་དང་། ཏ་ལའི་ཤིང་དང་། བཀྲ་བའི་མེ་ཏོག་རྣམས་བརྐོས་པ་དང་། བརྐོས་རིས་རྣམས་གསེར་གྱིས་དམ་པོར་གཡོགས་སོ། །
1KI 6:36 མཆོད་ཁང་གི་ར་སྐོར་ནང་མ་དེ་རྡོ་བརྐོས་མ་སུམ་བརྩེགས་དང་། ཐང་ཤིང་ཁེར་བརྩེགས་ཀྱིས་བྱས་སོ། །
1KI 6:37 སོ་ལོ་མོན་གྱི་སྲིད་ལོ་བཞི་པའི་ཟླ་གཉིས་པའི་དུས་སུ་དཀོན་མཆོག་ཡ་ཝཱེའི་མཆོད་ཁང་གི་རྨང་གཞི་བཏིངས་པ་དང་།
1KI 6:38 ལོ་བཅུ་གཅིག་པའི་ཟླ་བརྒྱད་པའི་དུས་སུ། མཆོད་ཁང་གི་གྲུབ་ཆ་ཀུན་ནི་ཏག་ཏག་དཔེ་བྱད་ཐམས་ཅད་བཞིན་དུ་གྲུབ་པ་སྟེ། སོ་ལོ་མོན་གྱིས་བསྡོམས་པས་བགྲང་བྱ་བདུན་གྱི་རིང་ལ་མཆོད་ཁང་བཞེངས་པའོ། །
1KI 7:1 སོ་ལོ་མོན་གྱིས་ལོ་བཅུ་གསུམ་གྱི་རིང་ལ་ཉིད་ཀྱི་ཕོ་བྲང་ཧྲིལ་པོ་བཞེངས་ནས་གྲུབ་ཅིང་།
1KI 7:2 ལེ་པཱ་ནོན་གྱི་ནགས་ཚལ་ཟེར་བའི་གླིང་ཀ་ཡང་བཞེངས་པ་སྟེ། དེའི་རིང་ཚད་ལ་ཁྲུ་བརྒྱ་དང་། ཞེང་ལ་ཁྲུ་ལྔ་བཅུ་དང་། མཐོ་ཚད་ལ་ཁྲུ་སུམ་ཅུ་ཡོད་དེ། ཐང་ཤིང་གི་ཀ་བ་གྲལ་བཞི་ཡོད་ལ་དེ་དག་གི་སྟེང་དུ་ཐང་ཤིང་གི་གདུང་མ་བཀབ་པ་དང་།
1KI 7:3 གྲལ་རེར་ཀ་བ་བཅོ་ལྔ་རེ་ཡོད་ལ་བསྡོམས་པས་ཀ་བ་བཞི་བཅུ་ཞེ་ལྔ་ཡོད་པ་ཡིན། ཀ་བའི་སྟེང་དུ་ཁང་ཆུང་ཡོད་ཅིང་དེ་རྣམས་ཐང་ཤིང་གི་གདུང་མས་བཀབ་པ་ཡིན།
1KI 7:4 སྒེའུ་ཁུང་གི་སྒྲོམ་ནི་གྲལ་གསུམ་སྟེ། སྒེའུ་ཁུང་དང་སྒེའུ་ཁུང་ཁ་གཏད་དུ་ཡོད་ཅིང་། བསྡོམས་པས་རིམ་པ་གསུམ་ཡོད།
1KI 7:5 སྒོ་དང་སྒེའུ་ཁུང་ཐམས་ཅད་ལ་སྒྲོམ་གྲུ་བཞི་མ་ཡོད་ཅིང་། སྒེའུ་ཁུང་རིམ་པ་གསུམ་ཡོད་པ་དང་སྒེའུ་ཁུང་དང་སྒེའུ་ཁུང་ཁ་གཏད་དུ་ཡོད།
1KI 7:6 ཡང་ཀ་བ་དང་ལྡན་པའི་ཁྱམས་ར་རིང་ཚད་ལ་ཁྲུ་ལྔ་བཅུ་དང་། ཞེང་ལ་ཁྲུ་སུམ་ཅུ་ཡོད་པ་བཟོས་ཤིང་། དེའི་མདུན་དུ་བར་ཁྱམས་ཤིག་ཀྱང་ཡོད་ལ། དེའི་མདུན་ངོས་སུ་ཀ་བ་དང་མདའ་གཡབ་ཡོད།
1KI 7:7 ལེགས་ཉེས་འབྱེད་པའི་ཕྱིར་རྒྱལ་ཁྲི་ཅན་གྱི་ཁྲིམས་ཐག་གཅོད་སའི་ཚོམས་ཁང་ཞིག་བཟོས་ནས། ཁོང་གིས་དེར་ཉེས་ཁྲིམས་གཅོད་པ་དང་། པང་གཅལ་ནས་ཐོག་ཕུབ་བར་དུ་ཐང་ཤིང་གིས་བཀབ་བོ། །
1KI 7:8 སོ་ལོ་མོན་བཞུགས་སའི་གཟིམ་ཆུང་ནི་ཚོམས་ཁང་རྒྱབ་ཀྱི་ར་སྐོར་གཞན་ཞིག་ཏུ་ཡོད་ལ། དེ་ཡང་དེ་བཞིན་དུ་བཟོས། ཡང་ཁོང་གིས་ཆུང་མར་བཞེས་པའི་རྒྱལ་པོ་ཕཱར་ཨོལ་གྱི་སྲས་མོའི་ཕྱིར་དུ་ཚོམས་ཁང་དེ་དང་འདྲ་བའི་གླིང་ཀ་ཞིག་ཀྱང་བཞེངས་སོ། །
1KI 7:9 དེ་ཐམས་ཅད་རྨང་གཞི་ནས་མདའ་གཡབ་དང་། ཕྱི་ར་ནས་མཁར་ར་ཆེན་པོའི་བར་དུ། ཚད་དང་རན་པར་བརྐོས་ཤིང་ཕྱི་ནང་གཉིས་སུ་སོག་ལེས་གཤགས་པའི་རྡོ་རིན་ཐང་ཅན་གྱིས་བཞེངས་སོ། །
1KI 7:10 རྩིག་རྨང་ནི་རྡོ་གཏོས་ཆེན་རིན་ཐང་ཅན་ཏེ། རིང་ཚད་ལ་ཁྲུ་བཅུ་ཅན་དང་ཁྲུ་བརྒྱད་ཅན་གྱིས་བྱས་སོ། །
1KI 7:11 དེའི་སྟེང་དུ་ཚད་དང་རན་པར་བརྐོས་པའི་རྡོ་རིན་ཐང་ཅན་དང་ཐང་ཤིང་ཡོད་དེ།
1KI 7:12 མཁར་ར་ཆེན་པོའི་མཐའ་འཁོར་དུ་གཤགས་བཟོ་བྱས་པའི་རྡོ་རིམ་པ་གསུམ་དང་། ཐང་ཤིང་གི་གདུང་མ་རིམ་པ་གཅིག་ཡོད་ལ། དཀོན་མཆོག་ཡ་ཝཱེའི་མཆོད་ཁང་གི་ཁྱམས་ར་ནང་མ་དང་། མཆོད་ཁང་གི་སྒོ་གཡབ་བཞིན་དུ་བཞེངས་སོ། །
1KI 7:13 དེ་ནས་རྒྱལ་པོ་སོ་ལོ་མོན་གྱིས་ཐཱར་ཞེས་པའི་ཡུལ་ནས་ཧུ་རཱམ་འབོད་དུ་བཏང་ངོ་། །
1KI 7:14 དེ་ནི་ནཱབ་ཐ་ལི་ཞེས་པའི་ཚོ་པའི་ཡུགས་མོ་ཞིག་གི་བུ་ཡིན་ཏེ། ཁོའི་ཕ་ནི་ཐཱར་ཞེས་པའི་ཡུལ་གྱི་མི་སྟེ་ལི་བཟོ་མཁན་ཞིག་ཡིན། ལི་ཡིས་དངོས་པོ་སྣ་ཚོགས་བཟོ་ནུས་པའི་ཤེས་རབ་དང་བློ་གྲོས། ལག་རྩལ་བཅས་ཀྱིས་ཁྱབ་པ་ཞིག་ཡིན། ཁོ་རྒྱལ་པོ་སོ་ལོ་མོན་གྱི་དྲུང་དུ་འོངས་ནས་དེའི་ལས་ཀ་ཐམས་ཅད་བྱས་པའོ། །
1KI 7:15 ཁོས་ལི་ཡིས་ཁྲུ་བཅོ་བརྒྱད་ཅན་གྱི་ཀ་བ་གཉིས་བླུགས་ནས། རེ་རེའི་སྒོར་མཐའ་ཁྲུ་བཅུ་གཉིས་བྱས་སོ། །
1KI 7:16 ཡང་ཁོས་ཀ་བའི་མགོ་ལ་འཇོག་པའི་ཕྱིར། ལི་བླུགས་མའི་ཀ་གཞུ་གཉིས་བཟོས་ཏེ། ཀ་གཞུ་གཅིག་གི་མཐོ་ཚད་ལ་ཁྲུ་ལྔ་དང་། ཀ་གཞུ་ཅིག་ཤོས་དེའི་མཐོ་ཚད་ལ་ཡང་ཁྲུ་ལྔ་ཡོད་པའོ། །
1KI 7:17 ཡང་ཀ་བའི་མགོ་རུ་ཡོད་པའི་ཀ་གཞུ་གཉིས་ཀྱི་ཕྱིར། ཁྲ་མིག་ཅན་གྱི་དྲ་བ་དང་། ཉག་ཐག་ལྷས་མ་བཟོས་ཤིང་། ཀ་གཞུ་གཅིག་ལ་བདུན་དང་། ཀ་གཞུ་ཅིག་ཤོས་དེར་ཡང་བདུན་ཡོད་དོ། །
1KI 7:18 ཁོས་ཡང་སེ་འབྲུ་ཕྲེང་ཤར་གཉིས་བཟོས་ནས་ཀ་བའི་མགོ་དང་ཀ་གཞུའི་དྲ་བར་བསྐོར་ཅིང་། ཀ་གཞུ་གཉིས་ཀ་དེ་བཞིན་ཡིན་ནོ། །
1KI 7:19 ཁྱམས་རའི་ཀ་བ་རྣམས་ཀྱི་རྩེ་མོ་ནི་ཁྲུ་བཞི་ཅན་གྱི་མེ་ཏོག་ཀུ་མུད་ཀྱི་དབྱིབས་ལྟར་བཏོན་ཏེ།
1KI 7:20 ཀ་གཞུ་ནི་ཀ་བ་གཉིས་ཀྱི་ཀླད་དུ་བརྒྱངས་པ་དང་དེ་གཉིས་ཀྱི་འབུར་རིས་སྟེང་དང་དྲ་བའི་འཁྲིས་སུ། སོ་སོར་སེ་འབྲུ་ཕྲེང་ཤར་གཉིས་རེ་ཡོད་ལ་བསྡོམས་པས་སེ་འབྲུ་ཉིས་བརྒྱ་ཡིས་བསྐོར་བར་བྱས་སོ། །
1KI 7:21 དེ་ནས་ཁོས་ཀ་བ་དེ་གཉིས་ཚོམས་ཁང་གི་སྒོ་ཁྱམས་མདུན་དུ་བཙུགས་ཏེ། ཀ་བ་གཅིག་མཆོད་ཁང་གི་གཡས་ཕྱོགས་སུ་བསླངས་ནས་མིང་དུ་ཡཱ་ཀིན་ཞེས་བཏགས་ཤིང་། ཀ་བ་ཅིག་ཤོས་དེ་གཡོན་ཕྱོགས་སུ་བསླངས་ནས་མིང་དུ་པཱོ་ཨ་ཟི་ ཞེས་བཏགས་སོ། །
1KI 7:22 ཀ་བ་གཉིས་ཀྱི་སྟེང་ལ་མེ་ཏོག་ཀུ་མུད་ཀྱི་དབྱིབས་བཏོན་ཏེ། ཀ་བའི་ལས་ཀ་འགྲུབ་པར་བྱས་སོ། །
1KI 7:23 ཡང་ཁོས་ལི་ཡི་རྒྱ་མཚོ་ཆེན་པོ་ཞིག་བཟོས་པ་དེའི་དབྱིབས་ཟླུམ་པོ་ཡིན། ཁའི་ཚངས་ཐིག་ལ་ཁྲུ་བཅུ་དང་། མཐོ་ཚད་ལ་ཁྲུ་ལྔ་དང་། སྒོར་མཐའི་རིང་ཚད་ལ་ཁྲུ་སུམ་ཅུ་དང་།
1KI 7:24 དེའི་སྐེད་ཀྱི་མཐའ་སྐོར་དུ་ཁྲུ་གཅིག་རེར་ཀུ་བའི་རི་མོ་བཅུ་རེ་བྱས་ཏེ་ལི་ཡི་རྒྱ་མཚོ་དེ་བསྐོར་ཏོ། །ལི་ཡི་རྒྱ་མཚོ་བླུགས་བཟོ་བྱེད་སྐབས་སུ་ཀུ་བ་རྣམས་ཕྲེང་ཤར་གཉིས་སུ་བཟོས་པ་ཡིན།
1KI 7:25 ལི་ཡི་རྒྱ་མཚོ་དེ་གླང་བཅུ་གཉིས་ཀྱི་སྟེང་དུ་བཀལ་ཞིང་། གླང་གསུམ་ནི་བྱང་ཕྱོགས་དང་། གླང་གསུམ་ནི་ནུབ་ཕྱོགས་དང་། གླང་གསུམ་ནི་ལྷོ་ཕྱོགས་དང་། གླང་གསུམ་ནི་ཤར་ཕྱོགས་སུ་འཁོར་བར་བྱས། གླང་དེ་དག་གི་ཁོག་སྨད་ནི་ནང་ལ་ཕྱོགས་ཡོད་དོ། །
1KI 7:26 ལི་ཡི་རྒྱ་མཚོའི་སྲབ་མཐུག་ནི་སོར་བཞི་དང་། དེའི་མཐའ་ནི་ཕོར་བའི་མཐའ་འམ་མེ་ཏོག་ཀུ་མུད་དང་མཚུངས་ཏེ། དེའི་ནང་དུ་ཆུ་བེན་ཉིས་སྟོང་ ཤོང་ངོ་། །
1KI 7:27 ཡང་རིང་ཚད་ལ་ཁྲུ་བཞི་དང་། ཞེང་ལ་ཁྲུ་བཞི་དང་། མཐོ་ཚད་ལ་ཁྲུ་གསུམ་ཡོད་པའི་བསྒུལ་བསྐྱོད་སྟེགས་བུ་བཅུ་ལི་ཡིས་བཟོས་ཏེ།
1KI 7:28 ཡང་སྟེགས་བུའི་བཟོ་སྟངས་ནི་འདི་ལྟ་སྟེ། སྟེགས་བུ་རྣམས་ལ་ངོས་བཞི་ཡོད་ཅིང་ཟུར་རེ་རེ་སྒྲོམ་བུ་དང་སྦྲེལ་ཏོ། །
1KI 7:29 སྒྲོམ་བུ་རྣམས་ཀྱི་བར་ལ་ཡོད་པའི་ངོས་རེ་རེར་སེང་གེ་དང་། གླང་དང་། ཀེ་རུབ་བཅས་ཀྱི་གཟུགས་བརྐོས་སོ། །སྒྲོམ་བུ་རྣམས་ཀྱི་སྟེང་དུ་སྟེགས་བུ་ཡོད་ལ། སེང་གེ་དང་གླང་གི་སྟེང་འོག་གཉིས་སུ་མེ་ཏོག་གི་གཟུགས་རིས་ཕབ་ཡོད་པ་ཡིན།
1KI 7:30 ཡང་སྟེགས་བུ་རེ་ལ་ལི་ཡི་འཁོར་ལོ་དང་འཁོར་རྟེན་བཞི་རེ་ཡོད་པ་དང་། སྟེགས་བུ་འོག་གི་སུག་པ་བཞི་པོར་འདེགས་རྐང་བླུགས་མ་ཡོད་པ་དང་། ངོས་རེ་རེར་མེ་ཏོག་གི་གཟུགས་རིས་ཕབ་ཡོད་དོ། །
1KI 7:31 སྟེགས་བུའི་ཁ་ནི་ནང་ནས་མགོ་བར་དུ་ཁྲུ་གང་ཡོད་ཅིང་། དེའི་དབྱིབས་ཟླུམ་པོ་ཡིན་ལ། སྒྲོམ་བུ་སྟེང་གི་སྟེགས་བུ་དེའི་དབྱིབས་ལྟར་ཚངས་ཐིག་ལ་ཁྲུ་གཅིག་དང་ཕྱེད་ཀ་ཡོད། དེའི་ངོས་སུ་བརྐོས་རིས་ཡོད་པ་དང་། སྟེགས་བུའི་ངོས་རྣམས་གྲུ་བཞི་ཡིན་པ་ལས་ཟླུམ་པོ་མིན་ནོ། །
1KI 7:32 ཡང་སྟེགས་བུའི་འཁོར་ལོ་བཞི་པོ་ནི་ངོས་བཞི་པོའི་འོག་ཏུ་ཡོད་པ་དང་། འཁོར་ལོའི་འཁོར་རྟེན་རྣམས་སྟེགས་བུ་དང་མུ་འབྲེལ་དུ་བཟོས་ཏེ། འཁོར་ལོ་རེའི་མཐོ་ཚད་ལ་ཁྲུ་གཅིག་དང་ཕྱེད་ཀ་ཡོད།
1KI 7:33 འཁོར་ལོ་རྣམས་ཀྱི་བཟོ་ལུགས་ནི་ཤིང་རྟའི་འཁོར་ལོའི་བཟོ་ལུགས་དང་འདྲ་སྟེ། དེའི་འཁོར་རྟེན་དང་། འཁོར་རྩིབས་དང་། འཁོར་ལོ་དང་། ལྟེ་བ་རྣམས་ལི་ཡིས་བླུགས་པའོ། །
1KI 7:34 སྟེགས་བུ་རེ་རེའི་ཟུར་བཞི་པོར་འདེགས་རྐང་རེ་ཡོད་པ་དང་། དེ་རྣམས་ནི་སྟེགས་བུ་དང་ལྷན་དུ་བླུགས་པ་ཡིན།
1KI 7:35 ཡང་སྟེགས་བུའི་ཁར་མཐོ་ཚད་ལ་ཁྲུ་ཕྱེད་ཅན་གྱི་ཟླུམ་གོར་ཞིག་ཡོད་པ་དང་། འདེགས་རྐང་དང་ངོས་རྣམས་ཀྱང་སྟེགས་བུ་དང་ལྷན་དུ་བླུགས་པ་ཡིན།
1KI 7:36 འདེགས་རྐང་དང་ངོས་རྣམས་སུ་ཀེ་རུབ་དང་། སེང་གེ་དང་། ཏ་ལའི་ལྗོན་ཤིང་སོགས་ཀྱི་གཟུགས་རིས་བརྐོས་ཤིང་། ཡང་སྟོང་ཆ་རྣམས་སུ་མེ་ཏོག་ཕྲེང་བའི་གཟུགས་ཀྱིས་བསྐོར་ཡོད་དོ། །
1KI 7:37 སྟེགས་བུ་བཅུ་པོའི་བཟོ་ལུགས་དེ་ལྟར་ཡིན་ཞིང་། དེ་ཐམས་ཅད་ཀྱི་བླུག་སྟངས་དང་ཚད་དང་དབྱིབས་སོགས་གྲུབ་ཚུལ་གཅིག་པ་ཡིན།
1KI 7:38 ཡང་ཁོས་ལི་ཡིས་ཁྲུས་གཞོང་བཅུ་བཟོས་ཏེ། ཁྲུས་གཞོང་རེའི་ནང་དུ་ཆུ་བེན་བཞི་བཅུ་ཤོང་ངོ་། །ཁྲུས་གཞོང་རེའི་ཚངས་ཐིག་ཏུ་ཁྲུ་བཞི་དང་། སྟེགས་བུ་བཅུ་ཡི་ཁར་ཁྲུས་གཞོང་རེ་རེ་བཞག་གོ །
1KI 7:39 ཁོས་སྟེགས་བུ་ལྔ་ནི་མཆོད་ཁང་གི་ལྷོ་ཕྱོགས་དང་། སྟེགས་བུ་ལྔ་བྱང་ཕྱོགས་སུ་བཞག་སྟེ། ཡང་ལི་ཡི་རྒྱ་མཚོ་ཆེན་པོ་དེ་མཆོད་ཁང་གི་ལྷོ་ཕྱོགས་ཏེ་ཤར་ལྷོའི་གྲུ་ཟུར་དང་ཉེ་སར་བཞག་གོ །
1KI 7:40 ཡང་ཧུ་རཱམ་གྱིས་གཞོང་བ་དང་། མེ་ཁྱེམ་དང་། ཕོར་བ་རྣམས་བཟོས་ཤིང་། དེ་བཞིན་རྒྱལ་པོ་སོ་ལོ་མོན་ལ་དཀོན་མཆོག་ཡ་ཝཱེའི་མཆོད་ཁང་གི་ཕྱིར་ལས་ཀ་ཐམས་ཅད་འགྲུབ་པར་བྱས་སོ། །
1KI 7:41 དེ་རྣམས་གང་ཡིན་ཞེ་ན། ཀ་བ་གཉིས་དང་དེའི་སྟེང་གི་ཕོར་བའི་དབྱིབས་ཅན་གྱི་ཀ་གཞུ་གཉིས་དང་། ཀ་བ་སྟེང་གི་ཕོར་བའི་དབྱིབས་ཅན་གྱི་ཀ་གཞུ་གཉིས་ཀ་སྒྲིབ་པའི་དྲ་བ་གཉིས་དང་།
1KI 7:42 དྲ་བ་གཉིས་ཀྱི་ཕྱིར་དུ་སེ་འབྲུ་བཞི་བརྒྱ་སྟེ། དྲ་བ་རེ་རེའི་སྟེང་དུ་སེ་འབྲུ་ཕྲེང་ཤར་གཉིས་རེ་ཡོད་ལ། ཀ་བའི་སྟེང་གི་ཕོར་བའི་དབྱིབས་ཅན་གྱི་ཀ་གཞུ་གཉིས་ཀ་བསྒྲིབས་པའོ། །
1KI 7:43 སྟེགས་བུ་བཅུ་དང་སྟེགས་བུ་སྟེང་གི་ལི་ཡི་ཁྲུས་གཞོང་བཅུ།
1KI 7:44 ལི་ཡི་རྒྱ་མཚོ་གཅིག་དང་དེའི་འོག་གི་གླང་བཅུ་གཉིས།
1KI 7:45 སླ་ང་དང་། མེ་ཁྱེམ་དང་། གཞོང་བ་བཅས་སོ། །ཧུ་རཱམ་གྱིས་རྒྱལ་པོ་སོ་ལོ་མོན་ལ་དཀོན་མཆོག་ཡ་ཝཱེའི་མཆོད་ཁང་གི་ཆེད་དུ་བཟོས་པའི་ཡོ་བྱད་ཐམས་ཅད་འོད་འཚེར་བའི་ལི་ཡིས་བྱས་སོ། །
1KI 7:46 རྒྱལ་པོས་དེ་རྣམས་ཡོར་དན་གྱི་བདེ་ཐང་དུ། སོའུ་ཀོད་དང་ཟར་ཐན་གཉིས་ཀྱི་བར་ལ་རྫ་ཀོང་ནང་དུ་བླུགས་པ་ཡིན།
1KI 7:47 ཡོ་བྱད་རྣམས་མང་དྲགས་པའི་རྐྱེན་གྱིས། རྒྱལ་པོ་སོ་ལོ་མོན་གྱིས་ལི་ཡི་ལྗིད་ཚད་ལ་མ་བརྟགས་སོ། །
1KI 7:48 ཡང་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་ནང་གི་ཡོ་བྱད་ཐམས་ཅད་བཟོས་པ་སྟེ། གསེར་གྱི་མཆོད་ཁྲི་དང་། སྤྱན་བསྟར་བག་ལེབ་བཤམ་སའི་གསེར་གྱི་སྒྲོག་ཙེ་དང་།
1KI 7:49 མཆོད་ཁང་སྦུག་མའི་མདུན་དུ་ཡོད་པའི་གསེར་བཙོ་མའི་སྒྲོན་སྟེགས་ནི། གཡས་ཕྱོགས་སུ་ཕྲེང་ཤར་ལྔ་དང་། གཡོན་ཕྱོགས་སུ་ཕྲེང་ཤར་ལྔ། གསེར་གྱི་མེ་ཏོག་གི་དབྱིབས་ཚུགས་རྣམས་དང་སྒྲོན་མེ་རྣམས། སྐམ་ཆུང་རྣམས།
1KI 7:50 གསེར་བཙོ་མའི་དཀར་ཡོལ་རྣམས་དང་། སྡོང་རས་གཅོད་བྱེད་སྐམ་ཆུང་དང་། མེ་ཕོར་དང་། ཁེམ་བུ་དང་། མེ་གཞོང་བཅས་བཟོས་སོ། །མཆོད་ཁང་སྦུག་མའམ་གནས་དམ་མཆོག་གི་སྒོ་རུ་དང་། ཚོམས་ཁང་གི་སྒོ་ལྕིབས་རྣམས་ཀྱང་གསེར་ལས་བཟོས་སོ། །
1KI 7:51 དེ་བཞིན་རྒྱལ་པོ་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་གི་ལས་ཀ་ཐམས་ཅད་བསྒྲུབས་ཚར་བ་དང་། རང་གི་ཡབ་དཱ་བིད་ཀྱིས་དམ་པར་བསྔོས་པའི་གསེར་དངུལ་དང་། སྣོད་ཆས་ཐམས་ཅད་བསྐྱལ་འོངས་ནས་དཀོན་མཆོག་ཡ་ཝཱེའི་མཆོད་ཁང་གི་དཀོར་མཛོད་ནང་དུ་བཅུག་གོ །
1KI 8:1 སྐབས་དེར། སོ་ལོ་མོན་གྱིས་དཱ་བིད་ཀྱི་གྲོང་ཁྱེར་ཏེ་ཛ་ཡན་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཡར་གདན་འདྲེན་པའི་ཕྱིར་དུ། ཡེས་ར་ཨེལ་གྱི་རྒན་པོ་རྣམས་དང་ཚོ་པ་སོ་སོའི་འགོ་དཔོན་རྣམས་དང་། ཁྱིམ་རྒྱུད་སོ་སོའི་འགོ་དཔོན་བཅས་ཐམས་ཅད་ཡེ་རུ་སཱ་ལེམ་དུ་རང་གི་དྲུང་དུ་བསྡུས་ཤིང་།
1KI 8:2 ཨེ་ཐན་ཟླ་བ་སྟེ་ཟླ་བདུན་པའི་དུས་ཆེན་ལ་ཡེས་ར་ཨེལ་པ་ཐམས་ཅད་རྒྱལ་པོ་སོ་ལོ་མོན་གྱི་དྲུང་དུ་འཛོམས།
1KI 8:3 ཡེས་ར་ཨེལ་གྱི་རྒན་པོ་རྣམས་སླེབས་པ་ཙམ་གྱིས་མཆོད་དཔོན་རྣམས་ཀྱིས་ཞལ་ཆད་ཀྱི་ཤུར་སྒམ་ཁུར་ཏེ།
1KI 8:4 མཆོད་དཔོན་དང་ལེ་ཝི་པ་རྣམས་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་མཇལ་འཕྲད་གུར་མཆོག་དང་དེའི་ནང་དུ་ཡོད་པའི་ཡོ་བྱད་དམ་པ་ཐམས་ཅད་ཡར་གདན་དྲངས།
1KI 8:5 རྒྱལ་པོ་སོ་ལོ་མོན་དང་དེར་འཛོམས་པའི་ཡེས་ར་ཨེལ་གྱི་མི་ཚོགས་ཀྱིས་ཞལ་ཆད་ཀྱི་ཤུར་སྒམ་མདུན་དུ་གླང་དང་ལུག་བགྲང་གིས་མི་ལང་བ་མཆོད་པར་ཕུལ་ཏོ། །
1KI 8:6 དེ་ནས་མཆོད་དཔོན་རྣམས་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དེ་མཆོད་ཁང་སྦུག་མ་སྟེ་གནས་དམ་མཆོག་གི་ནང་དུ། ཀེ་རུབ་གཉིས་ཀྱི་གཤོག་པའི་འོག་ཏུ་ཞལ་ཆད་ཀྱི་ཤུར་སྒམ་འཇོག་སའི་གནས་སུ་བཞག
1KI 8:7 ཀེ་རུབ་ཀྱིས་ཞལ་ཆད་ཀྱི་ཤུར་སྒམ་སྟེང་དུ་གཤོག་པ་བརྐྱངས་ནས། ཞལ་ཆད་ཀྱི་ཤུར་སྒམ་དང་དེ་ཁུར་བྱེད་ཀྱི་རྒྱུག་ཤིང་གཡོགས་སོ། །
1KI 8:8 རྒྱུག་ཤིང་དེ་གཉིས་ནི་ཤིན་ཏུ་རིང་བས། མཆོད་ཁང་སྦུག་མའི་མདུན་གྱི་གནས་དམ་པ་ནས་དེ་དག་གི་སྣེ་མོ་མཐོང་ཐུབ་པ་དང་། མཆོད་ཁང་ཕྱི་རོལ་ནས་མཐོང་མི་ཐུབ་ཅིང་། རྒྱུག་ཤིང་དེ་གཉིས་ནི་ད་ལྟའི་བར་དུ་དེར་ཡོད་པ་ཡིན།
1KI 8:9 ཞལ་ཆད་ཀྱི་ཤུར་སྒམ་ནང་དུ་རྡོ་ལེབ་གཉིས་ལས་གཞན་ཅི་ཡང་མེད་དེ། རྡོ་ལེབ་དེ་གཉིས་ནི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་རྗེས་དཀོན་མཆོག་ཡ་ཝཱེས་ཁོ་རྣམས་ལ་ཞལ་ཆད་མཛད་པའི་དུས་སུ། མོ་ཤེ་ཡིས་རི་བོ་ཧོ་རེབ་ཏུ་དེའི་ནང་ལ་བཞག་པ་ཡིན་ནོ། །
1KI 8:10 མཆོད་དཔོན་རྣམས་གནས་དམ་པ་ནས་ཕྱི་རུ་ཐོན་པའི་ཚེ་དཀོན་མཆོག་ཡ་ཝཱེའི་མཆོད་ཁང་སྤྲིན་ཕུང་ཞིག་གིས་ཁྱབ་པར་གྱུར།
1KI 8:11 ཡང་སྤྲིན་ཕུང་དེའི་རྐྱེན་གྱིས་མཆོད་དཔོན་རྣམས་ཡར་ལངས་ནས་ཞབས་ཕྱི་བྱེད་མ་ཕོད་དེ། ཅི་ལ་ཞེ་ན། དཀོན་མཆོག་ཡ་ཝཱེའི་གཟི་བརྗིད་ཀྱིས་མཆོད་ཁང་དེར་ཁྱབ་པས་སོ། །
1KI 8:12 སྐབས་དེར་སོ་ལོ་མོན་ན་རེ། སྔར་དཀོན་མཆོག་ཡ་ཝཱེས་ཁོང་ནི་སྤྲིན་ནག་སྟུག་པོའི་ནང་དུ་གནས་པར་འགྱུར་ཞེས་གསུངས་ཤིང་།
1KI 8:13 ད་ནི་བདག་གིས་ཁྱེད་ལ་མཆོད་ཁང་བརྗིད་ཆགས་ཤིག་བཞེངས་ཏེ། ཁྱེད་དུས་གཏན་དུ་གནས་པའི་བཞུགས་གནས་ཡིན་ནོ་ཞེས་ཞུས་པའོ། །
1KI 8:14 དེ་ནས་རྒྱལ་པོ་ཞལ་ཚུར་འཁོར་ནས་ཡེས་ར་ཨེལ་གྱི་མི་ཚོགས་ལ་བྱིན་རླབས་གནང་བ་དང་དེ་རྣམས་ལངས་ནས་བསྡད།
1KI 8:15 སོ་ལོ་མོན་ན་རེ། ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་བསྟོད་པར་འོས་སོ། །ཁོང་གིས་ངའི་ཡབ་དཱ་བིད་ལ་དངོས་སུ་ཞལ་བཞེས་གནང་བ་གང་ཞིག་ད་ནི་ཁོང་གི་ཕྱག་གིས་བསྒྲུབས་པར་མཛད་པའོ། །ཁོང་གིས་འདི་སྐད་དུ།
1KI 8:16 བདག་གིས་རང་གི་འབངས་མི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་ཉིན་མོ་ནས་བཟུང་། བདག་གི་མིང་དེར་གནས་པའི་ཆེད་དུ་མཆོད་ཁང་ཞིག་བཞེང་བར་ཡེས་ར་ཨེལ་པའི་ཚོ་པ་ཁག་གི་གྲོང་ཁྱེར་རྣམས་ལས་གང་ཡང་མ་འདེམས་མོད། འོན་ཀྱང་བདག་གི་འབངས་མི་ཡེས་ར་ཨེལ་ལ་དབང་སྒྱུར་བའི་ཆེད་དུ་དཱ་བིད་བདམས་པ་ཡིན་ཞེས་གསུངས་སོ། །
1KI 8:17 བདག་གི་ཡབ་དཱ་བིད་ཀྱི་སེམས་སུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཚན་གྱི་ཕྱིར་མཆོད་ཁང་ཞིག་བཞེང་བའི་འདུན་པ་ཡོད་མོད།
1KI 8:18 འོན་ཀྱང་དཀོན་མཆོག་ཡ་ཝཱེས་ངའི་ཡབ་དཱ་བིད་ལ་འདི་སྐད་དུ། ཁྱོད་ཀྱི་སེམས་སུ་བདག་གི་མིང་ལ་མཆོད་ཁང་ཞིག་བཞེང་བའི་འདུན་པ་ཡོད་པ་ནི་ལེགས་སོ། །
1KI 8:19 འོན་ཀྱང་ཁྱོད་རང་གིས་མཆོད་ཁང་དེ་བཞེང་བར་མི་འགྱུར་ཏེ། ཁྱོད་ལས་སྐྱེས་པའི་བུ་ཡིས་བདག་གི་མིང་ལ་མཆོད་ཁང་དེ་བཞེང་བར་འགྱུར་ཞེས་བཀའ་བསྩལ་ཏོ། །
1KI 8:20 ད་ནི་དཀོན་མཆོག་ཡ་ཝཱེས་གསུངས་པའི་བཀའ་ནང་བཞིན་འགྲུབ་པར་མཛད་དེ། བདག་ནི་རང་གི་ཡབ་དཱ་བིད་ཀྱི་ཚབ་ཏུ་ཡེས་ར་ཨེལ་གྱི་རྒྱལ་ཁྲིར་བསྡད་ནས། ཡེས་ར་ཨེལ་གྱི་དཀོན་མཆོག་ཡ་ཝཱེའི་མཚན་ལ་མཆོད་ཁང་འདི་བཞེངས་པ་ཡིན།
1KI 8:21 ཡང་དཀོན་མཆོག་ཡ་ཝཱེས་རང་ཅག་གི་ཕ་མེས་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་སྐབས་སུ་ཁོང་གིས་གནང་བའི་ཞལ་ཆད་ཡོད་པའི་ཤུར་སྒམ་དེའི་ཕྱིར་དུ། བདག་གིས་གནས་ཤིག་གྲ་སྒྲིག་བྱས་པ་ཡིན་ཞེས་སྨྲས་སོ། །
1KI 8:22 དེ་ནས་སོ་ལོ་མོན་ནི་ཡེས་ར་ཨེལ་མི་ཚོགས་ཀྱི་མདུན་དུ་དཀོན་མཆོག་ཡ་ཝཱེའི་མཆོད་ཁྲིའི་དྲུང་དུ་ལངས་ནས་ལག་ཟུང་ནམ་མཁར་བཏེགས་ཏེ།
1KI 8:23 འདི་ལྟར། ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། གནམ་ས་གཉིས་སུ་ཁྱེད་ལྟ་བུའི་དཀོན་མཆོག་སུ་ཡང་མེད། ཁྱེད་ཀྱི་སྤྱན་སྔར་བསམ་པ་རྩེ་གཅིག་གིས་ཁྱེད་ཀྱི་དྲུང་དུ་འགྲུལ་བའི་ཞབས་ཕྱི་རྣམས་ལ་ཁྱེད་ཀྱིས་ཞལ་ཆད་སྲུང་ཞིང་ཐུགས་རྗེས་གཟིགས་པ་ཡིན།
1KI 8:24 ཁྱེད་ཀྱིས་ཉིད་ཀྱི་ཞབས་ཕྱི་སྟེ་བདག་གི་ཡབ་དཱ་བིད་ལ་གནང་བའི་ཞལ་བཞེས་བསྲུངས་ཏེ། ཁྱེད་ཀྱིས་ཅི་གསུངས་བཞིན་དེ་རིང་གི་ཉིན་མོར་ཉིད་ཀྱི་ཕྱག་གིས་བསྒྲུབས་པར་མཛད་དོ། །
1KI 8:25 ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱི་སྟེ་བདག་གི་ཡབ་དཱ་བིད་ལ་ཞལ་བཞེས་གནང་སྟེ་འདི་སྐད་དུ། གལ་ཏེ་ཁྱོད་ཀྱི་བུ་རྒྱུད་ཀྱིས་རང་ཉིད་ཀྱི་ལམ་མ་ནོར་བར་ཁྱོད་ཀྱིས་བདག་གི་མདུན་དུ་ཅི་ལྟར་བྱས་པ་བཞིན་བྱེད་ན། ཁྱོད་ཀྱི་བུ་རྒྱུད་ལས་ཡེས་ར་ཨེལ་གྱི་རྒྱལ་ཁྲིར་སྡོད་མཁན་ནམ་ཡང་མཚམས་མི་ཆད་ཅེས་གསུངས་པ་དེ་ཐུགས་སུ་འཛིན་པར་གསོལ།
1KI 8:26 ཀྱེ་ཡེས་ར་ཨེལ་གྱི་དཀོན་མཆོག་ལགས། ད་ལྟ་ཁྱེད་ཀྱིས་ཉིད་ཀྱི་ཞབས་ཕྱི་སྟེ་བདག་གི་ཡབ་དཱ་བིད་ལ་གནང་བའི་ཞལ་བཞེས་བསྒྲུབ་པར་མཛོད་ཅིག
1KI 8:27 འོན་ཀྱང་དཀོན་མཆོག་ནི་དངོས་སུ་ས་སྟེང་དུ་བཞུགས་པ་ཡིན་ནམ། གཟིགས་དང་། ནམ་མཁའ་དང་ནམ་མཁའི་ཡང་སྟེང་གི་ནམ་མཁར་ཡང་ཁྱེད་མི་ཤོང་བས། བདག་གིས་བཞེངས་པའི་མཆོད་ཁང་འདི་ནི་ལྟ་ཅི་སྨོས།
1KI 8:28 ཀྱེ་ང་ཡི་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱིའི་སྨོན་ལམ་དང་ཞུ་བ་ལ་གསན་པར་མཛོད། དེ་རིང་ཉིན་མོར་ཁྱེད་ཀྱི་དྲུང་དུ་ཞུ་བའི་གསོལ་འདེབས་དང་འོ་དོད་ལ་གསན་དུ་གསོལ།
1KI 8:29 ཁྱེད་ཀྱི་སྤྱན་གྱིས་ཉིན་མཚན་དབྱེར་མེད་དུ་མཆོད་ཁང་འདི་ལ་གཟིགས་པར་མཛོད། ཁྱེད་ཀྱིས་བདག་གི་མིང་ནི་དེ་རུ་གནས་པར་འགྱུར་ཞེས་གསུངས་པའི་གནས་འདི་ལ་གཟིགས་པར་མཛོད། ཁྱེད་ཀྱི་ཞབས་ཕྱིས་གནས་འདིའི་ཕྱོགས་སུ་བཏབ་པའི་གསོལ་འདེབས་ལ་ཡང་གསན་པར་མཛོད།
1KI 8:30 དེ་ཡང་ཁྱེད་ཀྱི་ཞབས་ཕྱི་བདག་དང་ཉིད་ཀྱི་འབངས་མི་ཡེས་ར་ཨེལ་གྱིས་གནས་འདིའི་ཕྱོགས་སུ་གསོལ་བ་འདེབས་པའི་དུས་སུ། ཁྱེད་ཀྱིས་དེ་དག་གི་ཞུ་བར་གསན་དུ་གསོལ། ཁྱེད་ཀྱི་བཞུགས་གནས་ཏེ་ནམ་མཁའི་ཞིང་ཁམས་ནས་གསན་ཞིང་། གསན་པ་ཙམ་གྱིས་སྡིག་པ་བསལ་བར་མཛོད།
1KI 8:31 གལ་ཏེ་མི་ཞིག་གིས་རང་གི་ཁྱིམ་མཚེས་དང་འགལ་བའི་སྡིག་པ་བྱས་ཤིང་། གཞན་ཞིག་གིས་དེ་ལ་མནའ་འཁུར་དུ་འཇུག་པའི་ཕྱིར་མི་དེས་མཆོད་ཁང་འདིར་འོངས་ནས་ཁྱེད་ཀྱི་མཆོད་ཁྲིའི་མདུན་དུ་མནའ་སྐྱེལ་བའི་དུས་སུ།
1KI 8:32 ཁྱེད་ཀྱིས་ནམ་མཁའི་ཞིང་ཁམས་ནས་དེར་གསན་ཏེ་ཞབས་ཕྱི་རྣམས་ལ་ཁྲིམས་ཐག་གཅོད་པར་མཛོད། ངན་པར་ཉེས་ཆད་བཅད་ནས་ཁོའི་ཉེས་པ་ཁོ་རང་གི་མགོ་ལ་འབེབ་པར་མཛོད། ཡང་ཉེས་མེད་ལ་དག་འབུད་མཛད་དེ་ཁོའི་དྲང་བདེན་བཞིན་གསོལ་རས་གནང་རོགས།
1KI 8:33 ཁྱེད་ཀྱི་འབངས་མི་ཡེས་ར་ཨེལ་གྱིས་ཁྱེད་ལ་འགལ་བའི་སྡིག་པ་བྱས་པའི་རྐྱེན་གྱིས་ཕ་རོལ་དགྲ་ཡི་མདུན་དུ་ཕམ་པར་གྱུར་པའི་ཚེ། དེ་དག་ཕྱིར་འཁོར་ནས་ཁྱེད་ཀྱི་ཕྱོགས་སུ་ལོག་ཅིང་ཁྱེད་ཀྱི་མཚན་ཁས་བླངས་ཏེ། མཆོད་ཁང་འདི་རུ་ཁྱེད་ལ་གསོལ་བ་བཏབ་ནས་ཞུ་བ་འབུལ་བའི་དུས་སུ།
1KI 8:34 ཁྱེད་ཀྱིས་ནམ་མཁའི་ཞིང་ཁམས་ནས་དེར་གསན་ཏེ་འབངས་མི་ཡེས་ར་ཨེལ་གྱི་སྡིག་པར་གུ་ཡངས་མཛད་ཅིང་། དེ་དག་གི་ཕ་མེས་རྣམས་ལ་གནང་བའི་ཡུལ་འདིར་ཕྱིར་འཁྲིད་པར་མཛོད།
1KI 8:35 དེ་དག་གིས་ཁྱེད་ལ་འགལ་བའི་སྡིག་པ་བྱས་པའི་རྐྱེན་གྱིས་གནམ་གྱི་སྒོ་འགགས་ནས་ཆར་བ་འབབ་མཚམས་ཆད་པ་དང་། ཁོ་ཚོས་གནས་འདིའི་ཕྱོགས་སུ་སྨོན་ལམ་བཏབ་ནས་ཁྱེད་ཀྱི་མཚན་ཁས་བླངས་ཏེ། ཡང་ཁྱེད་ཀྱིས་ཁོ་རྣམས་སྡུག་ལ་སྦྱར་བས་རང་གི་སྡིག་པའི་ལམ་ནས་སེམས་བསྒྱུར་ན།
1KI 8:36 ཁྱེད་ཀྱིས་ནམ་མཁའི་ཞིང་ཁམས་ནས་གསན་ཏེ། ཁྱེད་ཀྱི་ཞབས་ཕྱི་དང་ཉིད་ཀྱི་འབངས་མི་ཡེས་ར་ཨེལ་པའི་སྡིག་པར་གུ་ཡངས་མཛད་པ་དང་། ཁོ་རྣམས་ལ་བགྲོད་འོས་པའི་ལམ་དྲང་པོ་དེ་སྟོན་ཞིང་། ཁྱེད་ཀྱི་འབངས་མི་ལ་ས་སྐལ་དུ་གནང་བའི་གནས་སུ་ཆར་བ་འབབ་པར་མཛོད་ཅིག
1KI 8:37 གལ་ཏེ་ཡུལ་འདིར་མུ་གེའམ་རིམས་ནད་དམ། སྐམ་རླུང་། གཡའ་སྤུ། ཆ་ག་པ། ཨ་ཚག་ཚག་པ་བཅས་ཡོད་པའམ། ཡང་ན་དགྲ་བོས་ཡུལ་ལྗོངས་བསྐོར་བ་དང་། བར་ཆད་དམ་ནད་ཡམས་ཅི་རིགས་འབྱུང་བའི་ཚེ།
1KI 8:38 མི་ཚོགས་སམ་མི་གང་རུང་སྟེ། ཁྱེད་ཀྱི་འབངས་མི་ཡེས་ར་ཨེལ་གྱིས་རང་གི་སེམས་ཀྱི་གདུང་བ་རྟོགས་ཏེ། མཆོད་ཁང་འདིའི་ཕྱོགས་སུ་ལག་པ་བཏེགས་ནས་སྨོན་ལམ་དང་འོ་དོད་འདོན་ན།
1KI 8:39 ཁྱེད་ཉིད་བཞུགས་སའི་ནམ་མཁའི་ཞིང་ཁམས་ནས་དེར་གསན་ཏེ་སྡིག་པ་བསལ་བར་མཛོད། ཁྱེད་ཀྱིས་མི་རེ་རེའི་སེམས་མཁྱེན་པས་དེའི་སྤྱོད་ལམ་བཞིན་དུ་བསྒྲུབས་ནས་ལན་གནོངས་ཤིག ཅིའི་ཕྱིར་ཞེ་ན། ཁྱེད་ཉིད་གཅིག་པུས་འཇིག་རྟེན་མིའི་རིགས་ཀྱི་སེམས་པ་མཁྱེན་པའི་ཕྱིར་རོ། །
1KI 8:40 དེ་ལྟ་ན་ཁྱེད་ཀྱིས་ངེད་ཅག་གི་ཕ་མེས་རྣམས་ལ་གནང་བའི་ཡུལ་འདིར་ཁོ་རྣམས་ནམ་འཚོའི་བར་དུ་ཁྱེད་ལ་གུས་ཤིང་འཇིགས་པར་འགྱུར།
1KI 8:41 ཡང་ཁྱེད་ཀྱི་འབངས་མི་ཡེས་ར་ཨེལ་ལས་གཞན་པའི་མི་རིགས་ཤིག་ཀྱང་ཡུལ་ཐག་རིང་པོ་ནས་ཁྱེད་ཀྱི་མཚན་གྱི་དབང་གིས་འོངས་ཏེ།
1KI 8:42 ཅི་ལ་ཞེ་ན། དེ་དག་གིས་ཁྱེད་ཀྱི་རབ་ཏུ་འཕགས་པའི་མཚན་དང་། ཁྱེད་ཀྱི་ནུས་མཐུ་ལྡན་པའི་ཕྱག་དང་། ཁྱེད་ཀྱི་ཕྱི་རུ་བརྐྱངས་པའི་དཔུང་བའི་སྐོར་ཐོས་ནས་ཁོ་རྣམས་འོངས་ཏེ་མཆོད་ཁང་འདིའི་ཕྱོགས་སུ་སྨོན་ལམ་འདེབས་པའི་ཚེ།
1KI 8:43 ཁྱེད་ཉིད་བཞུགས་སའི་ནམ་མཁའི་ཞིང་ཁམས་ནས་དེར་གསན་ཏེ། མི་རིགས་གཞན་དེའི་ཞུ་བ་ཐམས་ཅད་བཞིན་དུ་མཛོད་ཅིག དེ་ལྟ་ན་ས་གཞི་འདིའི་མི་རིགས་ཀུན་གྱིས་ཉིད་ཀྱི་འབངས་མི་ཡེས་ར་ཨེལ་བཞིན་དུ་ཁྱེད་ཀྱི་མཚན་རྟོགས་ཤིང་ཁྱེད་ལ་གུས་ཤིང་འཇིགས་པ་དང་། བདག་གིས་བཞེངས་པའི་མཆོད་ཁང་འདི་ནི་ཁྱེད་ཀྱི་མཚན་དང་ལྡན་པ་ཤེས་པར་འགྱུར་རོ། །
1KI 8:44 ཡང་ཁྱེད་ཀྱིས་རང་གི་འབངས་མི་ཡུལ་ཕྱོགས་གང་དུ་མངགས་ཀྱང་ཁོ་རྣམས་ཕྱི་རུ་སོང་སྟེ་སོ་སོའི་དགྲ་བོར་གཡུལ་འགྱེད་ཅིང་། ཁོ་རྣམས་ཀྱིས་ཁྱེད་ཀྱིས་བདམས་པའི་གྲོང་ཁྱེར་དང་བདག་གིས་ཁྱེད་ཀྱི་མཚན་གྱི་དོན་དུ་བཞེངས་པའི་མཆོད་ཁང་འདིའི་ཕྱོགས་སུ་འཁོར་ནས་དཀོན་མཆོག་ཡ་ཝཱེ་ཁྱེད་ལ་སྨོན་ལམ་འདེབས་ན།
1KI 8:45 ཁྱེད་ཀྱིས་ནམ་མཁའ་ནས་དེ་དག་གི་གསོལ་འདེབས་དང་འོ་དོད་ལ་གསན་ཏེ་ཁོ་རྣམས་རྒྱལ་བར་མཛོད་ཅིག
1KI 8:46 གལ་ཏེ་ཁྱེད་ཀྱི་འབངས་མིས་ཁྱེད་ལ་འགལ་བའི་སྡིག་པ་བྱེད་ཅིང་། སྡིག་པ་མི་བྱེད་པའི་མི་ནི་གང་དུའང་མེད་པས། ཁྱེད་ཉིད་ཁོ་རྣམས་ལ་ཐུགས་ཁྲོས་ཏེ་ཁོ་རྣམས་དགྲ་ཡི་ལག་ཏུ་སྤྲད་པ་དང་། དགྲ་བོས་ཁོ་རྣམས་ཐག་ཉེ་རིང་གང་དུ་བཙོན་ལ་ཁྲིད་ནས།
1KI 8:47 ཁོ་ཚོས་བཙོན་དུ་ཡོད་པའི་ཡུལ་ནས་བློ་ཁ་ཚུར་འཁོར་ཏེ། བཙོན་ལ་ཡོད་པའི་ཡུལ་དུ་ཁྱེད་ལ་འདི་ལྟར། ངེད་ཅག་གིས་སྡིག་པ་བྱས་ཤིང་། ངེད་ཅག་གིས་ཉེས་པ་བཟོས་པ་དང་། ངེད་ཅག་གིས་ལས་ངན་པ་བྱས་སོ་ཞེས་ཞུ་བ་ཕུལ་ན།
1KI 8:48 ཁོ་ཚོ་བཙོན་དུ་ཁྲིད་པའི་དགྲ་བོའི་ཡུལ་ནས་བློ་གཅིག་སེམས་གཅིག་གིས་ཁྱེད་ཀྱི་ཕྱོགས་སུ་འཁོར་ཏེ། ཁྱེད་ཀྱིས་ཁོ་ཚོའི་ཕ་མེས་རྣམས་ལ་གནང་བའི་ཡུལ་དང་། ཁྱེད་ཀྱིས་བདམས་པའི་གྲོང་ཁྱེར་དང་། བདག་གིས་ཁྱེད་ཀྱི་མཚན་གྱི་ཕྱིར་བཞེངས་པའི་མཆོད་ཁང་གི་ཕྱོགས་སུ་སྨོན་ལམ་འདེབས་ཚེ།
1KI 8:49 ཁྱེད་ཉིད་བཞུགས་སའི་ནམ་མཁའི་ཞིང་ཁམས་ནས་དེ་དག་གི་གསོལ་འདེབས་དང་ཞུ་བར་གསན་ཏེ། ཁོ་ཚོའི་དོན་དུ་ཁྲིམས་ཐག་གཅོད་པར་མཛོད་ཅིག
1KI 8:50 ཁྱེད་ལ་འགལ་བའི་སྡིག་པ་བྱས་པའི་ཉིད་ཀྱི་འབངས་མི་དང་། ཁྱེད་དང་འགལ་བའི་ལས་ངན་པ་ཐམས་ཅད་ལ་དགོངས་དག་གནང་ནས། ཁོ་ཚོ་བཙོན་དུ་འཁྲིད་མཁན་གྱི་མདུན་དུ་ཁོ་ཚོར་ཐུགས་རྗེས་གཟིགས་པར་མཛོད།
1KI 8:51 ཅིའི་ཕྱིར་ཞེ་ན། ཁོ་རྣམས་ནི་ཁྱེད་ཀྱིས་ཨེ་ཅིབ་ཡུལ་ནས་མེ་ལྕགས་ཞུན་ཐབ་ཀྱི་དཀྱིལ་ནས་བཏོན་ཏེ་ཕྱི་རུ་ཁྲིད་འོངས་པ་དང་། ཁྱེད་ཀྱིས་བདག་ཏུ་མཛད་པའི་འབངས་མི་ལགས་སོ། །
1KI 8:52 ཁྱེད་ཀྱི་སྤྱན་ཟུང་གིས་ཉིད་ཀྱི་ཞབས་ཕྱིའི་ཞུ་བ་དང་། ཉིད་ཀྱི་འབངས་མི་ཡེས་ར་ཨེལ་གྱི་ཞུ་བར་གཟིགས་པར་མཛོད། དེ་དག་གིས་འོ་དོད་ཞུ་བ་ཐམས་ཅད་ལ་ཁྱེད་ཀྱིས་གསན་པར་མཛོད།
1KI 8:53 ཅིའི་ཕྱིར་ཞེ་ན། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་བདག་ཅག་གི་ཕ་མེས་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་འོང་བའི་དུས་སུ། ཉིད་ཀྱི་ཞབས་ཕྱི་མོ་ཤེ་བརྒྱུད་ནས་ཞལ་བཞེས་གནང་བ་བཞིན་དུ། ཁོ་རྣམས་ས་སྟེང་གི་མི་ཀུན་གྱི་ཁྲོད་ནས་ཉིད་ཀྱི་བདག་ཏུ་མཛད་པའི་འབངས་མི་བྱས་པའི་ཕྱིར་རོ་ཞེས་ཞུས་སོ། །
1KI 8:54 དེ་ནས་སོ་ལོ་མོན་གྱིས་མཆོད་ཁྲིའི་མདུན་དུ་པུས་མོ་སར་བཙུགས་ནས་ལག་པ་གནམ་ལ་བརྐྱངས་ཏེ། དཀོན་མཆོག་ཡ་ཝཱེའི་དྲུང་དུ་སྨོན་ལམ་དང་ཞུ་བ་འདི་ཐམས་ཅད་ཕུལ་ནས་རྫོགས་པ་ན།
1KI 8:55 ཁོ་རང་ཡར་ལངས་ནས་དེར་འཛོམས་པའི་ཡེས་ར་ཨེལ་གྱི་མི་ཚོགས་ལ་བྱིན་གྱིས་བརླབས་ཤིང་སྐད་ཆེན་པོས་འདི་ལྟར།
1KI 8:56 དཀོན་མཆོག་ཡ་ཝཱེ་ལ་བསྟོད་ཅིང་བསྔགས་པར་གྱིས། ཁོང་གིས་ཉིད་ཀྱི་ཞབས་ཕྱི་མོ་ཤེ་བརྒྱུད་ནས་མཛད་པའི་ཞལ་བཞེས་བཟང་པོ་ལས་གསུང་གཅིག་ཀྱང་མ་ཆད་པར། ཉིད་ཀྱི་འབངས་མི་ཡེས་ར་ཨེལ་ལ་ངལ་གསོ་གནང་བ་ཡིན།
1KI 8:57 བདག་ཅག་གི་དཀོན་མཆོག་ཡ་ཝཱེ་ནི་རང་ཅག་གི་ཕ་མེས་རྣམས་དང་མཉམ་དུ་བཞུགས་པ་ལྟར་བདག་ཅག་དང་མཉམ་དུ་བཞུགས་པར་ཤོག ཁོང་གིས་བདག་ཅག་མི་འདོར་མི་བསྐྱུར་བར་ཤོག
1KI 8:58 ཡང་བདག་ཅག་ཁོང་གི་སྤྱོད་ལམ་དུ་འགྲུལ་བ་དང་ཕ་མེས་རྣམས་ལ་གནང་བའི་བཀའ་རྒྱ་དང་། སྒྲིག་ཁྲིམས་དང་། ཁྲིམས་སྲོལ་རྣམས་བསྲུང་བའི་ཕྱིར་དུ། ཁོང་གིས་བདག་ཅག་གི་སེམས་ནི་ཉིད་ཀྱི་ཕྱོགས་སུ་བསྒྱུར་བར་གྱུར་ཅིག
1KI 8:59 བདག་གིས་དཀོན་མཆོག་ཡ་ཝཱེའི་སྤྱན་སྔར་ཕུལ་བའི་ཞུ་ཚིག་འདི་རྣམས་ཉིན་མཚན་ཀུན་ཏུ་རང་ཅག་གི་དཀོན་མཆོག་ཡ་ཝཱེ་དང་མི་འབྲལ་བར་གྱུར་ཅིག ཁོང་གིས་ཉིད་ཀྱི་ཞབས་ཕྱི་བདག་དང་ཉིད་ཀྱི་འབངས་མི་ཡེས་ར་ཨེལ་པའི་དོན་དུ་ཉིན་རེ་བཞིན་ཁྲིམས་ཐག་གཅོད་པར་མཛོད་ཅིག
1KI 8:60 ཅིའི་ཕྱིར་ཞེ་ན། ས་སྟེང་གི་མི་ཐམས་ཅད་ཀྱིས་དཀོན་མཆོག་ཡ་ཝཱེ་ནི་དཀོན་མཆོག་ལགས་ཤིང་། ཁོང་མ་གཏོགས་དཀོན་མཆོག་གཞན་སུ་ཡང་མེད་པ་རྟོགས་པའི་ཕྱིར་དུའོ། །
1KI 8:61 དེའི་ཕྱིར་ཁྱོད་ཅག་ཁོང་གི་སྒྲིག་ཁྲིམས་བཞིན་དུ་འགྲུལ་བ་དང་། དེ་རིང་ནང་བཞིན་ཁོང་གི་བཀའ་རྒྱ་རྣམས་བསྲུང་བའི་དོན་དུ། ཁྱོད་ཅག་གི་སེམས་ནི་རང་ཅག་གི་དཀོན་མཆོག་ཡ་ཝཱེ་ལ་ཡོངས་སུ་འབུལ་བར་གྱིས་ཤིག་ཅེས་བསྐུལ་བའོ། །
1KI 8:62 རྒྱལ་པོ་དང་ཁོང་དང་ལྷན་དུ་གནས་པའི་ཡེས་ར་ཨེལ་པ་ཐམས་ཅད་ཀྱིས་དཀོན་མཆོག་ཡ་ཝཱེའི་དྲུང་དུ་མཆོད་པ་ཕུལ་ཞིང་།
1KI 8:63 སོ་ལོ་མོན་གྱིས་གླང་ཉིས་ཁྲི་ཉིས་སྟོང་དང་། ར་ལུག་ཆིག་འབུམ་ཉིས་ཁྲི་དཀོན་མཆོག་ཡ་ཝཱེ་ལ་ཞི་བདེའི་མཆོད་པར་ཕུལ་བ་དང་། རྒྱལ་པོ་དང་ཡེས་ར་ཨེལ་གྱི་མི་ཚོགས་ཀྱིས་དཀོན་མཆོག་ཡ་ཝཱེའི་མཆོད་ཁང་བསྔོ་བའི་མཛད་སྒོ་སྤེལ་ཏོ། །
1KI 8:64 ཉིན་དེར་དཀོན་མཆོག་ཡ་ཝཱེའི་དྲུང་དུ་ཡོད་པའི་ལི་ཡི་མཆོད་ཁྲི་དེ་ཆུང་དྲགས་པས། སྦྱིན་སྲེག་དང་འབྲུ་རིགས་ཀྱི་མཆོད་པ་དང་། ཞི་བདེའི་མཆོད་པའི་ཚིལ་རྣམས་མ་ཤོང་བ་རེད། དེ་ནས་རྒྱལ་པོས་དཀོན་མཆོག་ཡ་ཝཱེའི་མཆོད་ཁང་གི་མདུན་དུ་ཡོད་པའི་ར་སྐོར་གྱི་དཀྱིལ་དབུས་དེ་དམ་པར་བྱས་པ་དང་། གནས་དེར་སྦྱིན་སྲེག་དང་འབྲུ་རིགས་ཀྱི་མཆོད་པ། ཞི་བདེའི་མཆོད་པ་རྣམས་ཀྱི་ཚིལ་བཅས་ཕུལ་ཏོ། །
1KI 8:65 དེའི་དུས་སུ་སོ་ལོ་མོན་དང་ལེ་བོ་ཧ་མཱད་ནས་ཨེ་ཅིབ་ཡུལ་གྱི་གཙང་པོའི་བར་གྱི་ཡེས་ར་ཨེལ་པ་ཐམས་ཅད་ཀྱིས། རང་ཅག་གི་དཀོན་མཆོག་ཡ་ཝཱེའི་སྤྱན་སྔར་བདུན་ཕྲག་གཉིས་ཏེ་ཉི་མ་བཅུ་བཞིའི་རིང་ལ་དགའ་སྟོན་གཟབ་རྒྱས་བྱས།
1KI 8:66 ཉིན་བརྒྱད་པར་རྒྱལ་པོས་མི་ཚོགས་འགྲོ་རུ་བཅུག་པ་ལ། ཁོ་ཚོས་རྒྱལ་པོར་སྨོན་འདུན་ཞུས་ནས་དགའ་དགའ་སྤྲོ་སྤྲོའི་ངང་རང་རང་གི་ཡུལ་དུ་ལོག་གོ །ཁོ་རྣམས་ཀྱིས་དཀོན་མཆོག་ཡ་ཝཱེས་ཉིད་ཀྱི་ཞབས་ཕྱི་དཱ་བིད་དང་། ཁོང་གི་འབངས་མི་ཡེས་ར་ཨེལ་ལ་མཛད་པའི་བཀའ་དྲིན་རྣམས་མཇལ་ཞིང་སེམས་ལ་དགའ་སྤྲོ་སྐྱེས་སོ། །
1KI 9:1 དེ་ཡང་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་། དེ་མིན་བསྒྲུབ་འདོད་པ་ཐམས་ཅད་བསྒྲུབས་ཚར་རྗེས།
1KI 9:2 དཀོན་མཆོག་ཡ་ཝཱེ་སྔོན་ཆད་གིབ་ཡོན་ཡུལ་དུ་སོ་ལོ་མོན་ལ་མངོན་པ་ལྟར། ཐེངས་གཉིས་པར་ཁོང་ལ་མངོན་པ་སྟེ།
1KI 9:3 དཀོན་མཆོག་ཡ་ཝཱེས་ཁོང་ལ་འདི་སྐད་དུ། ཁྱོད་ཀྱིས་བདག་གི་མདུན་དུ་སྨོན་ལམ་བཏབ་པ་དང་ཞུ་བ་ཕུལ་བ་རྣམས་བདག་གིས་ཐོས་བྱུང་། བདག་གི་མིང་མཆོད་ཁང་འདིའི་ནང་རྟག་ཏུ་གནས་པའི་ཕྱིར། ཁྱོད་ཀྱིས་བཞེངས་པའི་མཆོད་ཁང་འདི་བདག་གིས་དམ་པར་བྱས་ཤིང་བདག་གི་མིག་དང་སེམས་གཉིས་རྟག་ཏུ་འདི་རུ་གནས་པར་འགྱུར།
1KI 9:4 ཡང་ཁྱོད་ལ་མཚོན་ན། ཁྱོད་ཀྱི་ཕ་དཱ་བིད་ཀྱིས་གཞུང་རྒྱུད་དྲང་པོ་དང་དྲང་བདེན་གྱི་ངང་ནས་སྤྱད་པ་ལྟར། ཁྱོད་ཀྱིས་ཀྱང་ངའི་མདུན་དུ་དེ་ལྟར་བྱས་ནས། བདག་གིས་ཁྱོད་ལ་བསྒོས་པ་ཐམས་ཅད་དང་མཐུན་པར་སྤྱོད་ཅིང་། བདག་གི་སྒྲིག་ཁྲིམས་དང་ཁྲིམས་སྲོལ་རྣམས་བསྲུངས་ན།
1KI 9:5 བདག་གིས་ཁྱོད་ཀྱི་ཕ་དཱ་བིད་ལ་འདི་ལྟར། ཁྱོད་ཀྱི་བུ་རྒྱུད་ལས་ཡེས་ར་ཨེལ་གྱི་རྒྱལ་ཁྲིར་སྡོད་པའི་རྒྱལ་རྒྱུད་ནམ་ཡང་རྒྱུན་ཆད་པར་མི་འགྱུར་རོ་ཞེས་ཁས་བླངས་པ་བཞིན་དུ། བདག་གིས་ཁྱོད་ཀྱིས་ཡེས་ར་ཨེལ་ལ་དབང་སྒྱུར་བའི་རྒྱལ་ཁྲི་རྟག་ཏུ་བརྟན་པོ་འོང་བར་བྱའོ། །
1KI 9:6 གལ་ཏེ་ཁྱོད་རང་ངམ་ཁྱོད་ཀྱི་བུ་རྒྱུད་རྣམས་ང་དང་ཁ་བྲལ་ནས་བདག་གི་རྗེས་སུ་མི་འབྲང་བ་དང་། བདག་གིས་ཁྱོད་རྣམས་ལ་བསྩལ་བའི་བཀའ་རྒྱ་དང་སྒྲིག་ཁྲིམས་རྣམས་མི་བསྲུང་བར། ལྷ་གཞན་རྣམས་ལ་ཞབས་ཏོག་བསྒྲུབས་ནས་དེ་དག་ལ་བསྙེན་བཀུར་བྱས་ན།
1KI 9:7 བདག་གིས་ཡེས་ར་ཨེལ་པ་རྣམས་ལ་གནང་བའི་ཡུལ་འདི་ནས་ཁོ་ཚོ་མེད་པར་བཟོ་བ་དང་། ཐ་ན་བདག་གི་མིང་གི་ཕྱིར་དམ་པར་བྱས་པའི་མཆོད་ཁང་འདི་ཡང་བདག་གི་མིག་ལམ་ནས་འདོར་བར་བྱ་ཞིང་། ཡེས་ར་ཨེལ་པ་རྣམས་ནི་མི་ཐམས་ཅད་ཀྱི་ནང་དུ་གད་མོའི་གནས་དང་འཕྱ་དམོད་བྱ་ཡུལ་དུ་འགྱུར་རོ། །
1KI 9:8 ཡང་མཆོད་ཁང་འདི་ཞིག་རལ་དུ་འགྱུར་ཞིང་། དེའི་མདུན་ནས་འགྲོ་མཁན་ཐམས་ཅད་ཧ་ལས་ནས་འཕྱ་དགོད་བྱེད་ཀྱིན་དཀོན་མཆོག་ཡ་ཝཱེས་ཡུལ་འདི་དང་མཆོད་ཁང་འདི་ལ་འདི་ལྟར་མཛད་དོན་ཅི་ཡིན་ནམ་ཞེས་སྨྲ་ཞིང་།
1KI 9:9 མི་རྣམས་ཀྱིས་དེའི་ལན་དུ། ཁོ་ཚོས་རང་གི་ཕ་མེས་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་འོང་མཁན་དཀོན་མཆོག་ཡ་ཝཱེ་སྤངས་ཤིང་། ལྷ་རྣམས་ལ་བརྟེན་ནས་དེ་དག་ལ་ཕྱག་བཙལ་བ་དང་ཞབས་ཏོག་བསྒྲུབས་པའི་རྐྱེན་གྱིས། དཀོན་མཆོག་ཡ་ཝཱེས་བར་ཆད་འདི་ཐམས་ཅད་ཁོ་ཚོའི་ཐོག་ཏུ་ཕབ་པ་རེད་ཅེས་སྨྲ་བར་འགྱུར་རོ་ཞེས་གསུངས་སོ། །
1KI 9:10 སོ་ལོ་མོན་གྱིས་བགྲང་བྱ་ཉི་ཤུའི་རིང་ལ་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་གཉིས་ཀ་བཞེངས་པ་དང་།
1KI 9:11 ཐཱར་གྱི་རྒྱལ་པོ་ཧི་རཱམ་གྱིས་སོ་ལོ་མོན་གྱི་འདོད་པ་བཞིན་དུ་ཐང་ཤིང་དང་། གསོམ་པ། གསེར་བཅས་ཀྱིས་ཁོང་ལ་རོགས་བྱས་པས། ཁོང་གིས་ག་ལིལ་ཡུལ་གྱི་གྲོང་ཁྱེར་ཉི་ཤུ་ཧི་རཱམ་ལ་སྤྲད་དོ། །
1KI 9:12 དེ་ནས་ཧི་རཱམ་ནི་ཐཱར་ནས་ཐོན་ཏེ་སོ་ལོ་མོན་གྱིས་སྤྲད་པའི་གྲོང་ཁྱེར་རྣམས་ལ་བལྟས་པའི་ཚེ། དེ་རྣམས་ཁོའི་མིག་ལ་མ་རན་པ་རེད།
1KI 9:13 དེ་བས་ཁོས་འདི་ལྟར། ངའི་མཆེད་གྲོགས་ལགས། འདི་དག་ནི་ཁྱེད་ཀྱིས་ང་ལ་སྤྲད་པའི་གྲོང་ཁྱེར་རྣམས་ཡིན་ནམ་ཞེས་དྲིས་ཤིང་། དེ་དག་གི་མིང་ལ་ཀ་བུལ་ ཞེས་མིང་བཏགས་པ་དེ་རིང་བར་དུ་ལུས་པ་ཡིན།
1KI 9:14 ཧི་རཱམ་གྱིས་སོ་ལོ་མོན་ལ་གསེར་རྡོ་ཚད་ཆིག་བརྒྱ་ཉི་ཤུ་བརྫངས་སོ། །
1KI 9:15 རྒྱལ་པོ་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོ་རང་གི་ཕོ་བྲང་དང་། འཛིངས་རགས་དང་། ཡེ་རུ་སཱ་ལེམ་གྱི་མཁར་གྱང་དང་། ཧ་ཟོར་དང་། མེ་གིད་དོ་དང་། གེ་ཟེར་བཅས་བརྩིག་པར་ངལ་རྩོལ་པ་བསྡུས་པ་འདི་ལྟ་སྟེ།
1KI 9:16 སྔར་ཨེ་ཅིབ་ཀྱི་རྒྱལ་པོ་ཕཱར་ཨོལ་གྱིས་དམག་བཏང་ནས་གེ་ཟེར་བླངས་ཏེ་མེ་ལ་བསྲེགས་པ་དང་། གྲོང་ཁྱེར་དེར་གནས་པའི་ཀ་ན་ཨན་པ་རྣམས་བསད་དེ། སོ་ལོ་མོན་གྱི་བཙུན་མོ་སྟེ་རང་གི་སྲས་མོ་ལ་གྲོང་ཁྱེར་དེ་གསོལ་རས་སུ་བཏང་བས།
1KI 9:17 སོ་ལོ་མོན་གྱིས་གེ་ཟེར་དང་། པེད་ཧོ་རོན་འོག་མ་དང་།
1KI 9:18 པཱ་ཨ་ལད་དང་། ཡ་ཧུ་དཱའི་དབེན་སྟོང་གི་ཐད་མོར་བྱ་བ་དང་།
1KI 9:19 སོ་ལོ་མོན་ལ་མངའ་བའི་བང་མཛོད་ཀྱི་གྲོང་ཁྱེར་དང་། ཤིང་རྟའི་གྲོང་ཁྱེར་དང་། སྐྱ་དམག་གི་གྲོང་ཁྱེར་བཅས་ཐམས་ཅད་དང་། ཡེ་རུ་སཱ་ལེམ་དང་ལེ་པཱ་ནོན་དང་། རང་གི་སྲིད་འོག་གི་ཡུལ་ཀུན་ཏུ་སོ་ལོ་མོན་གྱིས་བརྩིག་འདོད་པ་ཐམས་ཅད་བསྐྱར་གསོ་བགྱིས་པའོ། །
1KI 9:20 ཡང་ཡེས་ར་ཨེལ་པ་མ་ཡིན་པའི་ཨེ་མོར་པ་དང་། ཧེད་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ཀྱི་ལྷག་ལུས་ཐམས་ཅད་དེ།
1KI 9:21 ཡེས་ར་ཨེལ་པ་རྣམས་ཀྱིས་ཁྱོན་ནས་འཇོམ་མ་ནུས་པའི་དེ་དག་གི་བུ་རྒྱུད་རྣམས་ནི། སོ་ལོ་མོན་གྱིས་ངལ་ལས་བྱེད་པའི་བྲན་གཡོག་ཏུ་བསྡུས་པ་དང་། དེ་རིང་གི་བར་དུ་དེ་ལྟར་ཡིན།
1KI 9:22 འོན་ཀྱང་སོ་ལོ་མོན་གྱིས་ཡེས་ར་ཨེལ་པ་རྣམས་ནི་བྲན་གཡོག་བྱེད་དུ་མ་བཅུག་པར་དེ་རྣམས་ནི་དམག་མི་དང་། བློན་འཁོར། དམག་དཔོན། དེད་དཔོན། ཁོང་གི་ཤིང་རྟ་དང་སྐྱ་དམག་རྣམས་ཀྱི་འགོ་དཔོན་བཅས་བྱེད་དུ་བཅུག་གོ །
1KI 9:23 སོ་ལོ་མོན་གྱི་ལས་ཀ་བྱེད་མཁན་དག་གི་གོང་དུ་འགོ་དཔོན་ལྔ་བརྒྱ་ལྔ་བཅུ་ཡོད་ལ། དེ་དག་གིས་ལས་ཀ་བྱེད་པའི་མི་རྣམས་ལ་བལྟས་སོ། །
1KI 9:24 ཕཱར་ཨོལ་གྱི་སྲས་མོ་ནི་དཱ་བིད་ཀྱི་གྲོང་ཁྱེར་ནས་སོ་ལོ་མོན་གྱིས་མོའི་དོན་དུ་བཞེངས་པའི་གླིང་ཀ་རུ་སྤར་རྗེས། སོ་ལོ་མོན་གྱིས་འཛིངས་རགས་བསྐྱར་གསོ་མཛད་དོ། །
1KI 9:25 སོ་ལོ་མོན་གྱིས་དཀོན་མཆོག་ཡ་ཝཱེའི་དོན་དུ་བཞེངས་པའི་མཆོད་ཁྲིའི་ཁར་ལོ་རེར་ཐེངས་གསུམ་ལ་སྦྱིན་སྲེག་དང་ཞི་བདེའི་མཆོད་པ་ཕུལ་ཞིང་། ཡང་དཀོན་མཆོག་ཡ་ཝཱེའི་སྤྱན་སྔར་བདུག་སྤོས་ཀྱང་བདུགས་ཤིང་མཆོད་ཁང་དེ་འགྲུབ་པར་བྱས་སོ། །
1KI 9:26 དེ་ནས་རྒྱལ་པོ་སོ་ལོ་མོན་གྱིས་ཨེ་དོམ་ཡུལ་གྱི་རྒྱ་མཚོ་དམར་པོའི་འགྲམ་ནས་ཨེ་ལོད་དང་ཐག་ཉེ་བའི་ཨེ་ཙི་ཡོན་གེ་བེར་ཞེས་པར་གྲུ་གཟིངས་རྣམས་བཟོས་པའོ། །
1KI 9:27 ཧི་རཱམ་གྱིས་རང་གི་ཞབས་ཕྱི་སྟེ་རྒྱ་མཚོར་རྒྱུས་ཡོད་པའི་གྲུ་པ་རྣམས་སོ་ལོ་མོན་གྱི་ཞབས་ཕྱི་དང་མཉམ་དུ་བཏང་བ་དང་།
1KI 9:28 དེ་དག་ཨོ་ཕིར་བྱ་བར་ཕྱིན་ཏེ། ཡུལ་དེ་ནས་གསེར་རྡོ་ཚད་བཞི་བརྒྱ་ཉི་ཤུ་བླངས་ནས་རྒྱལ་པོ་སོ་ལོ་མོན་གྱི་དྲུང་དུ་བསྐྱལ་ཏོ། །
1KI 10:1 དེ་ནས་ཤེ་བཱ་ཡུལ་གྱི་རྒྱལ་མོས་དཀོན་མཆོག་ཡ་ཝཱེའི་མཚན་ལ་བརྟེན་ནས་བྱུང་བའི་སོ་ལོ་མོན་གྱི་སྙན་གྲགས་ཐོས་ཏེ། དཀའ་གནད་དང་བཅས་ཁོང་ལ་ཚོད་བགམ་བྱེད་དུ་འོངས་པ་སྟེ།
1KI 10:2 འཁོར་གཡོག་ཤིན་ཏུ་མང་པོ་ཁྲིད་ནས། བསུང་རྫས་དང་གསེར་དང་རྡོ་རིགས་ཀྱི་རིན་པོ་ཆེ་བཅས་ཤིན་ཏུ་མང་པོ་རྔ་མོང་ལ་བཀལ་ཏེ་ཡེ་རུ་སཱ་ལེམ་དུ་འོངས་ནས་སོ་ལོ་མོན་གྱི་དྲུང་དུ་ཕྱིན་ཅིང་། སེམས་ནང་གི་དཀའ་གནད་ཐམས་ཅད་ཀྱིས་ཁོང་ལ་ཚོད་བགམ་བྱས་པ་ན།
1KI 10:3 སོ་ལོ་མོན་གྱིས་མོའི་དྲི་བ་ཀུན་ལ་ལན་བཏབ་པ་དང་། དྲི་བ་གང་ལའང་རྒྱལ་པོས་ལན་མ་ཐེབས་པ་ཅི་ཡང་མེད་པས།
1KI 10:4 ཤེ་བཱའི་རྒྱལ་མོས་སོ་ལོ་མོན་གྱི་ཤེས་རབ་ཐམས་ཅད་དང་། ཁོང་གིས་བཞེངས་པའི་ཕོ་བྲང་དང་།
1KI 10:5 གསོལ་ལྕོག་སྟེང་གི་ཁ་ཟས། བློན་པོ་རྣམས་ཀྱི་བཞུགས་གྲལ། ཞབས་ཕྱི་རྣམས་ཀྱི་འགྲེང་ལུགས། དེ་དག་གི་གྱོན་གོས་དང་ཁོང་གི་ཆང་གཉེར་བློན་ཆེན་རྣམས། དཀོན་མཆོག་ཡ་ཝཱེའི་མཆོད་ཁང་དུ་ཕུལ་བའི་སྦྱིན་སྲེག་བཅས་མཐོང་བ་དང་ཤིན་ཏུ་ངོ་མཚར་བར་གྱུར།
1KI 10:6 དེ་ནས་མོས་རྒྱལ་པོ་ལ། ངས་རང་གི་ཡུལ་དུ་ཐོས་པའི་ཁྱེད་ཀྱི་མཛད་པ་དང་ཁྱེད་ཀྱི་ཤེས་རབ་ཐད་ཀྱི་གཏམ་ནི་ཐམས་ཅད་བདེན་འདུག
1KI 10:7 ང་རང་འདིར་འོངས་ཏེ་མིག་གིས་དངོས་སུ་མཐོང་བའི་བར་དུ་གཏམ་དེ་དག་བདེན་པར་མ་བཟུང་བ་ཡིན། ཀྱེ་ཧོ། ངས་ཐོས་པ་ནི་དེའི་ཕྱེད་ཀ་ཙམ་ལའང་སླེབས་མེད། ཁྱེད་ཀྱི་ཤེས་རབ་དང་ལོངས་སྤྱོད་ནི་ངས་ཐོས་པ་ལས་རབ་ཏུ་འཕགས་སོ། །
1KI 10:8 ཁྱེད་ཀྱི་མི་རྣམས་བདེའོ། །རྒྱུན་དུ་ཁྱེད་ཀྱི་དྲུང་དུ་འགྲེངས་ནས་ཁྱེད་ཀྱི་ཤེས་རབ་ཐོས་ཐུབ་པའི་འཁོར་གཡོག་འདི་རྣམས་བདེའོ། །
1KI 10:9 ཁྱེད་ཀྱི་དཀོན་མཆོག་ཡ་ཝཱེ་ལ་བསྟོད་ཅིང་བསྔགས་པར་གྱིས། ཁོང་ཉིད་ཁྱེད་ལ་མཉེས་ཤིང་ཁྱེད་རང་ཡེས་ར་ཨེལ་གྱི་རྒྱལ་ཁྲིར་བཀོད་པ་ཡིན། དཀོན་མཆོག་ཡ་ཝཱེ་ནི་ཡེས་ར་ཨེལ་ལ་རྟག་ཏུ་བྱམས་པས། ཁྱེད་ཀྱིས་ཁྲིམས་དྲང་པོར་གཅོད་པའི་དོན་དུ་ཁོང་གིས་ཁྱེད་ནི་རྒྱལ་པོར་བསྐོས་པ་ལགས་ཞེས་སྨྲས་སོ། །
1KI 10:10 དེ་ནས་ཤེ་བཱ་ཡི་རྒྱལ་མོས་རྒྱལ་པོ་ལ་གསེར་རྡོ་ཚད་ཆིག་བརྒྱ་ཉི་ཤུ་དང་། བསུང་རྫས་དང་རྡོ་རིགས་ཀྱི་རིན་པོ་ཆེ་མང་པོ་ཕུལ་ཏོ། །ཤེ་བཱའི་རྒྱལ་མོས་རྒྱལ་པོ་སོ་ལོ་མོན་ལ་ཕུལ་བའི་བསུང་རྫས་དེ་འདྲའི་འབོར་ཆེན་ནི་ཕྱིས་སུ་གཞན་སུས་ཀྱང་མ་ཕུལ་ཏོ། །
1KI 10:11 དེ་མིན་ཧི་རཱམ་གྱི་གྲུ་རྣམས་ཀྱིས་ཨོ་ཕིར་ཡུལ་གྱི་གསེར་དང་ཙན་དན་གྱི་ཤིང་མང་པོ་དང་། རྡོ་རིགས་ཀྱི་རིན་པོ་ཆེ་བཅས་བཀལ་ནས་སླེབས་པས།
1KI 10:12 རྒྱལ་པོས་དཀོན་མཆོག་ཡ་ཝཱེའི་མཆོད་ཁང་དང་རང་གི་ཕོ་བྲང་གི་ཕྱིར་ཙན་དན་གྱི་རྒྱུག་ཁྲ་རྣམས་བཟོ་རུ་བཅུག་པ་དང་། ཡང་མགུར་ལེན་མཁན་རྣམས་ཀྱི་ཆེད་དུ་པི་ཝང་དང་རྒྱུད་མངས་ཀྱང་བཟོས་སོ། །ཕྱིས་སུ་དེ་འདྲའི་ཙན་དན་གྱི་ཤིང་ནི་ནམ་ཡང་མ་སླེབས་ཏེ། དེ་རིང་གི་བར་དུ་དེ་འདྲ་མཐོང་མྱོང་བའང་མེད་དོ། །
1KI 10:13 རྒྱལ་པོ་སོ་ལོ་མོན་གྱིས་ཤེ་བཱའི་རྒྱལ་མོར་ཁོ་མོའི་འདོད་པ་བཞིན་ཞུས་ཚད་ཀུན་སྤྲད་པར་མ་ཟད། གཏོང་ཕོད་ཆེན་པོས་རྫོང་བ་མང་པོ་བརྫངས་པ་དང་། དེ་ནས་རྒྱལ་མོ་དང་མོའི་བློན་འཁོར་རྣམས་ཕྱིར་རང་ཡུལ་དུ་ལོག་གོ །
1KI 10:14 སོ་ལོ་མོན་ལ་ལོ་རེར་ཐོབ་པའི་གསེར་ནི་རྡོ་ཚད་དྲུག་བརྒྱ་དྲུག་ཅུ་རེ་དྲུག་གོ །
1KI 10:15 དེར་མ་ཟད། ཚོང་པ་རྣམས་དང་ཚོང་འགྲིམ་པའི་དཔྱ་ཁྲལ་དང་། ཨ་རབ་ཀྱི་རྒྱལ་པོ་རྣམས་དང་ཡུལ་དེ་གའི་གྲོང་དཔོན་བཅས་ནས་ཀྱང་ཐོབ་འབབ་ཡོད་པའོ། །
1KI 10:16 རྒྱལ་པོ་སོ་ལོ་མོན་གྱིས་གསེར་ལྗང་རྡུང་གིས་ཕུབ་ཆེན་ཉིས་བརྒྱ་བཟོས་པ་དང་། ཕུབ་རེ་རེར་གསེར་རྒྱ་མ་བཅུ་བཞི་རེ་སོང་ངོ་། །
1KI 10:17 ཡང་ཁོང་གིས་གསེར་ལྗང་རྡུང་གིས་ཕུབ་ཆུང་སུམ་བརྒྱ་བཟོས་པ་དང་། ཕུབ་ཆུང་རེ་རེར་གསེར་མཱེ་ན་ གསུམ་རེ་སོང་། རྒྱལ་པོས་དེ་རྣམས་ལེ་པཱ་ནོན་གླིང་ཀའི་ཕོ་བྲང་དུ་བཞག་གོ །
1KI 10:18 ཡང་རྒྱལ་པོས་བ་སོའི་ཁྲི་ཆེན་པོ་ཞིག་བཟོས་པ་དང་དེ་ནི་གསེར་བཙོ་མས་གཡོགས་སོ། །
1KI 10:19 རྒྱལ་ཁྲི་དེ་ལ་ཐེམ་སྐས་རིམ་པ་དྲུག་དང་རྒྱབ་རྟེན་གྱི་དབུ་གོར་དང་། བཞུགས་སའི་གཡས་གཡོན་གཉིས་ལ་ལག་སྐྱོར་དང་། ལག་སྐྱོར་རེ་རེའི་རྩར་སེང་གེ་རེ་འགྲེངས་ཡོད་པ་ཡིན།
1KI 10:20 ཡང་ཐེམ་སྐས་རིམ་པ་དྲུག་པོའི་གཡས་ཕྱོགས་སུ་སེང་གེ་དྲུག་དང་། གཡོན་ཕྱོགས་སུ་སེང་གེ་དྲུག་བཅས་སེང་གེ་བཅུ་གཉིས་ཡོད་པ་ཡིན། དེ་འདྲ་བ་ཞིག་རྒྱལ་ཁམས་གང་དུ་ཡང་མ་བཟོས་སོ། །
1KI 10:21 རྒྱལ་པོ་སོ་ལོ་མོན་གྱི་སྐྱོགས་ཐམས་ཅད་གསེར་ཡིན་པ་དང་། ལེ་པཱ་ནོན་གླིང་ཀའི་ཕོ་བྲང་ནང་གི་སྣོད་ཆས་ཐམས་ཅད་ཀྱང་གསེར་བཙོ་མས་བཟོས་ཡོད། སོ་ལོ་མོན་གྱི་དུས་སུ་དངུལ་ལ་རིན་ཐང་ཅི་ཡང་མེད་པས། དངུལ་ལས་བཟོས་པ་གཅིག་ཀྱང་མེད་དོ། །
1KI 10:22 ཅིའི་ཕྱིར་ཞེ་ན། རྒྱལ་པོའི་གྲུ་གཟིངས་རྣམས་ཧི་རཱམ་གྱི་གྲུ་དང་མཉམ་དུ་ཐཱར་ཞིས་ལ་བསྐྱོད་པ་དང་། ལོ་གསུམ་རེའི་ནང་དུ་ཐེངས་གཅིག་ལ་ཐཱར་ཞིས་ཀྱི་གྲུ་དག་གིས་གསེར་དང་། དངུལ་དང་། བ་སོ་དང་། སྤྲེའུ་དང་། རྨ་བྱ་སོགས་བསྐྱལ་འོངས་སོ། །
1KI 10:23 རྒྱལ་པོ་སོ་ལོ་མོན་གྱི་འབྱོར་བ་དང་ཤེས་རབ་ནི་ས་གཞིའི་རྒྱལ་པོ་ཐམས་ཅད་ལས་བརྒལ་བ་ཡིན།
1KI 10:24 དཀོན་མཆོག་གིས་སོ་ལོ་མོན་གྱི་སེམས་སུ་གནང་བའི་ཤེས་རབ་ཐོས་པའི་ཕྱིར་དུ། ས་གཞི་ཡོངས་ཀྱི་མི་རྣམས་ཁོང་འཚོལ་དུ་བསྙེགས་སོ། །
1KI 10:25 དེ་དག་རེ་རེས་ཁྱེར་འོངས་པའི་ཕྱག་རྟེན་ལ་དངུལ་ཆས་དང་གསེར་ཆས། གྱོན་གོས། མཚོན་ཆ། བསུང་རྫས། རྟ། དྲེལ་བཅས་ཡོད་ཅིང་། ལོ་ནས་ལོ་ལ་གྲངས་མང་པོ་ཡོད་པ་ཡིན།
1KI 10:26 ཡང་སོ་ལོ་མོན་གྱིས་ཤིང་རྟ་དང་སྐྱ་དམག་བསྡུས་ཏེ། ཁོང་ལ་ཤིང་རྟ་ཆིག་སྟོང་བཞི་བརྒྱ་དང་། སྐྱ་དམག་ཆིག་ཁྲི་ཉིས་སྟོང་ཡོད་ལ། རྒྱལ་པོས་དེ་དག་ཤིང་རྟའི་གྲོང་ཁྱེར་རྣམས་དང་ཡེ་རུ་སཱ་ལེམ་གྲོང་ཁྱེར་དུ་བཞག་པ་སྟེ། ཁོང་དང་མཉམ་དུ་ཡོད་པའོ། །
1KI 10:27 ཡེ་རུ་སཱ་ལེམ་དུ་རྒྱལ་པོས་དངུལ་ནི་རྡོ་ལྟར་མོད་པ་དང་ཐང་ཤིང་ནི་རི་ཀླུང་དུ་སྐྱེས་པའི་འོ་སེ་ཤིང་ལྟར་མོད་པར་མཛད།
1KI 10:28 སོ་ལོ་མོན་གྱི་རྟ་རྣམས་ནི་ཨེ་ཅིབ་དང་ཀི་ཝེ་ཡུལ་ནས་དྲངས་པ་སྟེ། རྒྱལ་པོའི་ཚོང་པ་དག་གིས་ཀི་ཝེ་ཡུལ་ནས་རིན་གོང་ལྟར་ཉོས་འོངས་པ་ཡིན།
1KI 10:29 ཤིང་རྟ་རེ་ལ་དངུལ་སྒོར་དྲུག་བརྒྱ་དང་། རྟ་རེ་ལ་དངུལ་སྒོར་བརྒྱ་དང་ལྔ་བཅུའི་གོང་ཐག་གིས་བཅད་དེ་ཨེ་ཅིབ་ཡུལ་ནས་ཐོན་པ་ཡིན་པས། ཧེད་པའི་རྒྱལ་པོ་རྣམས་དང་ཨ་རམ་པའི་རྒྱལ་པོ་རྣམས་ཀྱིས་ཀྱང་ཚོང་པ་རྣམས་བརྒྱུད་ནས་རྟ་རྣམས་ཉོས་པའོ། །
1KI 11:1 རྒྱལ་པོ་སོ་ལོ་མོན་ནི་ཕཱར་ཨོལ་གྱི་སྲས་མོ་ལ་ཆགས་པར་མ་ཟད། ཕྱི་ཕྱོགས་ཀྱི་བུད་མེད་དེ། མོ་ཨབ་ཀྱི་བུད་མེད་རྣམས་དང་། ཨམ་མོན་གྱི་བུད་མེད་རྣམས། ཨེ་དོམ་གྱི་བུད་མེད་རྣམས། ཚི་ཏུན་གྱི་བུད་མེད་རྣམས། ཧེད་ཀྱི་བུད་མེད་རྣམས་བཅས་ལ་ཡང་ཆགས་པར་གྱུར།
1KI 11:2 མི་རིགས་དེ་རྣམས་ཀྱི་སྐོར་ལ། དཀོན་མཆོག་ཡ་ཝཱེས་སྔར་ཡེས་ར་ཨེལ་པ་རྣམས་ལ། ཁྱོད་ཅག་དེ་དག་དང་འབྲེལ་ནས་གཉེན་སྒྲིག་མ་བྱེད་ཅིག དེ་བཞིན་བྱས་ན་ཁྱོད་ཅག་གི་སེམས་དེ་དག་གི་ལྷའི་ཕྱོགས་སུ་བསླུ་བར་བྱེད་དོ་ཞེས་བཀའ་བསྩལ་ནའང་། སོ་ལོ་མོན་གྱི་སེམས་དེ་དག་ལ་ཤིན་ཏུ་ཆགས་སོ། །
1KI 11:3 ཁོང་ལ་བཙུན་མོ་བདུན་བརྒྱ་ཡོད་པ་ཐམས་ཅད་སྲས་མོ་ཡིན་པ་དང་། ཆུན་མ་སུམ་བརྒྱ་ཡོད་པ་དང་། ཆུང་མ་དེ་རྣམས་ཀྱིས་ཁོའི་སེམས་དཀོན་མཆོག་དང་འབྲལ་དུ་བཅུག་གོ །
1KI 11:4 སོ་ལོ་མོན་སྐུ་ན་བགྲེས་པའི་དུས་སུ། བཙུན་མོ་རྣམས་ཀྱིས་ཁོའི་སེམས་ནི་ཕྱི་པའི་ལྷ་རྣམས་ཀྱི་ཕྱོགས་སུ་བསྒྱུར་བ་དང་། ཁོའི་སེམས་ནི་རང་གི་མེས་པོ་དཱ་བིད་ཀྱི་སེམས་དང་འདྲ་བར་དཀོན་མཆོག་ཡ་ཝཱེ་ལ་ཡོངས་སུ་ཕུལ་མེད་དོ། །
1KI 11:5 སོ་ལོ་མོན་ཁོང་ཉིད་ཚི་ཏུན་པའི་ལྷ་མོ་ཨ་ཤཱ་ཏ་རོད་དང་ཨམ་མོན་པའི་ལྷ་མིལ་ཀོམ་ཞེན་ལོག་དེའི་རྗེས་སུ་འབྲངས་ཏེ།
1KI 11:6 སོ་ལོ་མོན་གྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། རང་གི་ཡབ་དཱ་བིད་དང་འདྲ་བར་དཀོན་མཆོག་ཡ་ཝཱེའི་རྗེས་སུ་རྩེ་གཅིག་གིས་མ་འབྲངས་སོ། །
1KI 11:7 དེ་ནས་སོ་ལོ་མོན་གྱིས་མོ་ཨབ་པའི་ཞེན་པ་ལོག་པའི་ལྷ་ཀེ་མོ་སི་དང་། ཨམ་མོན་པའི་ཞེན་པ་ལོག་པའི་ལྷ་མོ་ལེག་གི་ཆེད་དུ་ཡེ་རུ་སཱ་ལེམ་ཤར་ཕྱོགས་ཀྱི་རི་བོར་མཐོ་གླིང་བརྩིགས་སོ། །
1KI 11:8 ཁོང་གིས་ཕྱི་ཕྱོགས་ཀྱི་བུད་མེད་དེ་རང་གི་བཙུན་མོ་ཐམས་ཅད་ཀྱི་ཕྱིར་དེ་ལྟར་བྱས་པ་དང་། དེ་དག་གིས་རང་གི་ལྷ་རྣམས་ཀྱི་དྲུང་དུ་སྤོས་བདུགས་ནས་མཆོད་པའང་ཕུལ་ཏོ། །
1KI 11:9 དཀོན་མཆོག་ཡ་ཝཱེ་ཐེངས་གཉིས་ལ་ཁོང་ལ་མངོན་ནའང་། ཁོང་གི་སེམས་ཡེས་ར་ཨེལ་གྱི་དཀོན་མཆོག་ཡ་ཝཱེ་ལས་ལོག་ལམ་དུ་འཁོར་བའི་རྐྱེན་གྱིས་དཀོན་མཆོག་ཡ་ཝཱེ་ནི་སོ་ལོ་མོན་ལ་ཐུགས་ཁྲོས་པར་གྱུར་ཏོ། །
1KI 11:10 དཀོན་མཆོག་ཡ་ཝཱེས་དེའི་ཆེད་དུ་སྔར་ཁོང་ལ་ལྷ་གཞན་རྣམས་ཀྱི་རྗེས་སུ་འབྲང་མི་ཆོག་པའི་བཀའ་བསྩལ་ཡོད་ཀྱང་། ཁོང་གིས་བཀའ་དེ་མ་བསྲུངས་པ་ཡིན་ནོ། །
1KI 11:11 དེའི་ཕྱིར་དཀོན་མཆོག་ཡ་ཝཱེས་སོ་ལོ་མོན་ལ་འདི་སྐད་དུ། ཁྱོད་ཀྱིས་དེ་ལྟར་སྤྱད་ཅིང་། བདག་གིས་ཁྱོད་ལ་བསྒོས་པའི་བཀའ་རྒྱ་དང་སྒྲིག་ཁྲིམས་རྣམས་མ་བསྲུངས་པའི་རྐྱེན་གྱིས་ཁྱོད་ཀྱི་རྒྱལ་སྲིད་བླངས་ནས་ཁྱོད་ཀྱི་ཞབས་ཕྱི་ཞིག་ལ་སྦྱིན་པར་བྱའོ། །
1KI 11:12 འོན་ཀྱང་ཁྱོད་ཀྱི་ཕ་དཱ་བིད་ཀྱི་དོན་དུ་བདག་གིས་ཁྱོད་ཀྱི་ཚེ་འདིར་དེ་བཞིན་མི་བྱ་སྟེ། ཁྱོད་ཀྱི་བུའི་ལག་ནས་རྒྱལ་སྲིད་ལེན་པར་བྱའོ། །
1KI 11:13 གཞན་ཡང་རྒྱལ་སྲིད་ཐམས་ཅད་ལེན་པར་མི་བྱ། བདག་གི་ཞབས་ཕྱི་དཱ་བིད་ཀྱི་རྐྱེན་དང་། བདག་གིས་བདམས་པའི་ཡེ་རུ་སཱ་ལེམ་གྱི་རྐྱེན་གྱིས་ཚོ་པ་གཅིག་ཁྱོད་ཀྱི་བུ་ལ་སྦྱིན་པར་བྱའོ་ཞེས་གསུངས་སོ། །
1KI 11:14 དེ་ནས་དཀོན་མཆོག་ཡ་ཝཱེས་ཨེ་དོམ་པ་ཧ་དཱད་བྱ་བ་དེ་སོ་ལོ་མོན་གྱི་དགྲ་རུ་བསླངས་སོ། །དེ་ནི་ཨེ་དོམ་གྱི་རྒྱལ་རྒྱུད་ཡིན།
1KI 11:15 སྔར་དཱ་བིད་ཀྱིས་ཨེ་དོམ་ཕམ་པར་བརྒྱབ་པའི་སྐབས་སུ། དམག་དཔོན་ཡོ་ཨབ་དམག་སར་གྲོངས་པ་རྣམས་དུར་ལ་སྦ་བར་དེ་རུ་ཕྱིན་པའི་ཚེ། ཁོས་ཨེ་དོམ་ཡུལ་གྱི་སྐྱེས་པ་ཐམས་ཅད་བསད།
1KI 11:16 ཨེ་དོམ་གྱི་སྐྱེས་པ་ཐམས་ཅད་ཚར་གཅོད་པའི་བར་དུ། ཡོ་ཨབ་དང་ཡེས་ར་ཨེལ་པ་ཐམས་ཅད་དེར་ཟླ་དྲུག་ལ་བསྡད་དོ། །
1KI 11:17 ཧ་དཱད་ནི་རང་གི་ཕ་ཡི་ཞབས་ཕྱི་ཡིན་པའི་ཨེ་དོམ་པ་ཁ་ཤས་དང་མཉམ་དུ་ཨེ་ཅིབ་ཡུལ་དུ་བྲོས་ཤིང་། དེའི་དུས་སུ་ཧ་དཱད་ནི་བྱིས་པ་ཞིག་ཡིན།
1KI 11:18 དེ་དག་མིད༌ཡཱན་ཡུལ་ནས་ཆས་ཏེ་ཕཱ་རན་དུ་ཕྱིན་པ་དང་། ཡང་ཕཱ་རན་ནས་མི་འགའ་ཞིག་ཁྲིད་ནས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་གྱི་དྲུང་དུ་ཕྱིན་པ་ན། ཕཱར་ཨོལ་གྱིས་ཁོ་ལ་ཁང་པ་དང་ཁ་ཟས་དང་། གཞིས་ཀ་བཅས་སྟེར་བར་བསྒོས་སོ། །
1KI 11:19 ཕཱར་ཨོལ་ནི་ཧ་དཱད་ལ་ཤིན་ཏུ་མོས་ཤིང་ཁོས་རང་གི་བཙུན་མོའི་ནུ་མོ་སྟེ། རྒྱལ་མོ་ཐག་ཕེ་ནེ་ཡི་ནུ་མོ་ཁོ་ལ་ཆུང་མར་བྱིན་ཏོ། །
1KI 11:20 དེ་ནས་ཐག་ཕེ་ནེ་ཡི་ནུ་མོས་ཁོ་ལ་བུ་ཞིག་བཙས་ནས། མིང་དུ་རྒེ་ནུ་བཱད་ཅེས་བཏགས་ཏེ། ཐག་ཕེ་ནེ་ཡིས་དེ་ནི་ཕཱར་ཨོལ་གྱི་ཕོ་བྲང་དུ་བསྐྱངས་པ་དང་། རྒེ་ནུ་བཱད་ནི་ཕཱར་ཨོལ་གྱི་ཕོ་བྲང་དུ་ཕཱར་ཨོལ་གྱི་སྲས་རྣམས་དང་ལྷན་དུ་བསྡད།
1KI 11:21 ཕྱིས་སུ་ཧ་དཱད་ཀྱིས་ཨེ་ཅིབ་ཡུལ་དུ་ཡོད་པའི་ཚེ། དཱ་བིད་ནི་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་པ་དང་། དམག་དཔོན་ཡོ་ཨབ་ཤི་ཟིན་པར་ཐོས་ནས་ཁོས་ཕཱར་ཨོལ་ལ། བདག་རང་གི་ཡུལ་དུ་འགྲོ་བར་དགོངས་པ་གནང་རོགས་ཞེས་ཞུས་པ་ལ།
1KI 11:22 ཕཱར་ཨོལ་གྱིས་ཁོ་ལ། ཁྱོད་ནི་རང་གི་ཡུལ་དུ་འགྲོ་བར་འདོད་དམ། ངའི་རྩར་ཁྱོད་ལ་མི་འདང་བ་ཅི་ཡོད་ཅེས་དྲིས་པའི་ལན་དུ་ཁོ་ན་རེ། མི་འདང་བ་ཅི་ཡང་མེད། འོན་ཀྱང་བདག་སོང་ཆོག་པའི་དགོངས་པ་ཅི་ནས་ཀྱང་གནང་བར་མཛོད་ཅེས་ཞུས་སོ། །
1KI 11:23 ཡང་དཀོན་མཆོག་གིས་ཨེལ་ཡ་དཱ་ཡི་བུ་རེ་ཟོན་བྱ་བ་དེ་ཡང་སོ་ལོ་མོན་གྱི་དགྲ་རུ་བསླངས་པ་དང་། ཁོ་ནི་རང་ཉིད་ཀྱི་བདག་པོ་སྟེ། ཙོ་བཱ་ཡུལ་གྱི་རྒྱལ་པོ་ཧ་དད་ཨི་སེར་གྱི་དྲུང་ནས་བྲོས་སོང་བ་དེ་ཡིན།
1KI 11:24 དཱ་བིད་ཀྱིས་ཙོ་བཱ་པ་རྣམས་ལ་རྒོལ་བའི་དུས་སུ། རེ་ཟོན་གྱིས་རང་ཉིད་ལ་མི་འགའ་ཞིག་བསྡུས་ཏེ། ཁོ་ནི་ཇག་ཚོགས་ཀྱི་འགོ་དཔོན་དུ་གྱུར་ཅིང་། ཁོ་དཱ་མེ་སེག་ཏུ་སོང་ནས་དེ་རུ་གཞིས་ཕབ་པ་དང་དཱ་མེ་སེག་གི་རྒྱལ་པོ་བྱས་སོ། །
1KI 11:25 སོ་ལོ་མོན་གྱི་སྐུ་རིང་ལ་རེ་ཟོན་ནི་ཡེས་ར་ཨེལ་པ་རྣམས་ཀྱི་དགྲ་རུ་ལངས་པ་དང་། ཁོ་ཡེས་ར་ཨེལ་པ་རྣམས་ལ་སྡང་བར་མ་ཟད་ཨ་རམ་པའི་རྒྱལ་པོར་བསྡད། གཞན་ཡང་ཧ་དཱད་ཀྱིས་ཀྱང་རྒྱུན་ཆད་མེད་པར་གནོད་བསྐྱལ་བའོ། །
1KI 11:26 སོ་ལོ་མོན་གྱི་ཞབས་ཕྱིའམ་ནེ་བཱད་ཀྱི་བུ་ཡེ་རོབ་ཨམ་གྱིས་ལག་པ་བཀྱགས་ནས་རྒྱལ་པོར་ངོ་རྒོལ་བྱས་པ་དང་། ཁོ་ནི་ཙེ་རེ་དཱ་ཡུལ་གྱི་ཨེ་ཕཱར་ཡིམ་པ་ཞིག་ཡིན་ཞིང་། ཁོའི་མ་ནི་ཡུགས་མོ་ཞིག་ཡིན་ཏེ་མིང་ལ་ཙེ་རུའུ་ཨ་ཞེས་བྱའོ། །
1KI 11:27 ཁོས་ལག་པ་བཀྱགས་ནས་རྒྱལ་པོར་ངོ་རྒོལ་བྱེད་སྟངས་འདི་ལྟ་སྟེ། སོ་ལོ་མོན་གྱིས་འཛིངས་རགས་བསྐྱར་འཛུགས་བྱེད་དུས་རང་གི་ཡབ་དཱ་བིད་ཀྱི་གྲོང་ཁྱེར་གྱི་ལྕགས་རི་ཞིག་གསོ་བྱས་པ་དང་། །
1KI 11:28 ཡེ་རོབ་ཨམ་ནི་འཇོན་ཐང་ཅན་ཞིག་ཡིན་ལ། གཞོན་ནུ་དེས་བྱ་བ་སྒྲུབ་སྟངས་སོ་ལོ་མོན་གྱིས་མཐོང་ནས། ཁོ་རང་ཡོ་སེབ་ཚང་གི་ལས་ཁག་ཀུན་གྱི་འགོ་དཔོན་དུ་བཅུག་གོ །
1KI 11:29 དེའི་དུས་སུ་ཡེ་རོབ་ཨམ་ནི་ཡེ་རུ་སཱ་ལེམ་ནས་ཕྱི་རོལ་ཏུ་འགྲོ་བའི་ཚེ་ན། ལམ་དུ་ཞི་ལོ་པ་ཨ་ཧི་ཡཱ་བྱ་བའི་ལུང་སྟོན་པ་དེ་དང་ཕྲད། ཨ་ཧི་ཡཱས་གོས་གསར་པ་ཞིག་གྱོན་ཡོད་པ་དང་། ཁོ་གཉིས་གཅིག་པུ་གྲོང་གསེབ་དེར་ཡོད་ལ།
1KI 11:30 ཨ་ཧི་ཡཱས་རང་ལུས་ཀྱི་གོས་གསར་པ་དེ་བཟུང་ནས་བཤགས་པ་དང་དུམ་བུ་བཅུ་གཉིས་སུ་བགོས་ཏེ།
1KI 11:31 ཡེ་རོབ་ཨམ་ལ། དུམ་བུ་བཅུ་ཁྱོད་ཀྱིས་ལོངས་ཤིག ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་སོ་ལོ་མོན་གྱི་རྒྱལ་སྲིད་ཕྲོགས་ནས་ཚོ་པ་བཅུ་ཁྱོད་ལ་སྦྱིན་པར་བྱའོ། །
1KI 11:32 འོན་ཀྱང་བདག་གི་ཞབས་ཕྱི་དཱ་བིད་དང་། ཡེས་ར་ཨེལ་གྱི་ཚོ་པ་ཀུན་ལས་བདམས་པའི་ཡེ་རུ་སཱ་ལེམ་གྱི་ཆེད་དུ། ཚོ་པ་གཅིག་ནི་སོ་ལོ་མོན་ལ་གཏོགས་པར་བྱའོ། །
1KI 11:33 དེ་དག་གིས་བདག་བསྐྱུར་ཏེ། ཚི་ཏུན་པའི་ལྷ་མོ་ཨ་ཤཱ་ཏ་རོད་དང་མོ་ཨབ་པའི་ལྷ་ཀེ་མོ་སི་དང་། ཨམ་མོན་པའི་ལྷ་མིལ་ཀོམ་བཅས་ལ་ཕྱག་བཙལ་ཏེ། ཁོས་རང་གི་ཡབ་དཱ་བིད་དང་འདྲ་བར་བདག་གི་མཐོང་ངོར་ལས་དྲང་པོ་མ་བྱས་ཤིང་། བདག་གི་སྤྱོད་ལམ་དུ་མ་འགྲུལ་ལ། བདག་གི་སྒྲིག་ཁྲིམས་དང་ཁྲིམས་སྲོལ་རྣམས་མ་བསྲུངས་པས་སོ། །
1KI 11:34 འོན་ཀྱང་བདག་གིས་རྒྱལ་སྲིད་ཐམས་ཅད་ཁོའི་ལག་ནས་ལེན་པར་མི་བྱ་སྟེ། བདག་གིས་བདམས་པའི་ཞབས་ཕྱི་དཱ་བིད་ཀྱིས་བདག་གི་བཀའ་རྒྱ་དང་སྒྲིག་ཁྲིམས་རྣམས་བསྲུངས་པའི་རྐྱེན་གྱིས། བདག་གིས་ཁོ་མི་ཚེ་ཧྲིལ་པོར་སྲིད་དབང་འཛིན་དུ་འཇུག་གོ །
1KI 11:35 བདག་གིས་ཁོའི་བུ་ཡི་ལག་ནས་རྒྱལ་སྲིད་བླངས་ཏེ། ཚོ་པ་བཅུ་ཁྱོད་ལ་སྦྱིན་པར་བྱའོ། །
1KI 11:36 བདག་གི་མིང་འཇོག་པར་བདམས་པའི་གྲོང་ཁྱེར་ཏེ་ཡེ་རུ་སཱ་ལེམ་དུ། ངའི་ཞབས་ཕྱི་དཱ་བིད་ཀྱི་སྒྲོན་མེ་དུས་གཏན་དུ་བདག་གི་མདུན་དུ་སྣང་བའི་ཕྱིར། བདག་གིས་ཚོ་པ་གཅིག་ཁོའི་བུ་ལ་སྦྱིན་པར་བྱའོ། །
1KI 11:37 ཡང་བདག་གིས་ཁྱོད་རང་གདམ་པར་བྱ་ཞིང་ཁྱོད་ཀྱིས་སེམས་ཀྱི་འདོད་པ་བཞིན་དུ་སྲིད་བྱེད་པ་དང་། ཡེས་ར་ཨེལ་གྱི་རྒྱལ་པོར་འགྱུར་རོ། །
1KI 11:38 གལ་ཏེ་ཁྱོད་ཀྱིས་ངས་བསྒོ་བ་ཀུན་ལ་མཉན་ནས། ངའི་ཞབས་ཕྱི་དཱ་བིད་ཀྱིས་བྱས་པ་བཞིན་དུ་ངའི་སྤྱོད་ལམ་དུ་འགྲུལ་ཞིང་། བདག་གི་མཐོང་ངོར་ལས་དྲང་པོ་བྱེད་པ་དང་། བདག་གི་སྒྲིག་ཁྲིམས་དང་བཀའ་རྒྱ་རྣམས་བསྲུངས་ན་བདག་ཁྱོད་དང་མཉམ་དུ་གནས་ཤིང་། དཱ་བིད་ཀྱི་ཕྱིར་རྒྱལ་རབས་མཛད་པ་ལྟར་བདག་གིས་ཁྱོད་ལའང་རྒྱལ་རབས་བརྟན་པོ་ཞིག་མཛད་པར་མ་ཟད། ཡེས་ར་ཨེལ་ཡང་ཁྱོད་ལ་སྤྲོད་པར་བྱའོ། །
1KI 11:39 དེ་བས་ན་བདག་གིས་སོ་ལོ་མོན་གྱི་རྐྱེན་གྱིས་དཱ་བིད་ཀྱི་བུ་རྒྱུད་སྡུག་ལ་སྦྱོར་བར་འགྱུར་མོད། འོན་ཀྱང་རྒྱུན་ནས་རྒྱུན་དུ་དེ་བཞིན་མི་བྱ་གསུངས་ཞེས་སྨྲས་སོ། །
1KI 11:40 དེ་ནས་སོ་ལོ་མོན་གྱིས་ཡེ་རོབ་ཨམ་གསོད་ཐབས་བྱས་ཀྱང་ཡེ་རོབ་ཨམ་ཡར་ལངས་ནས། ཨེ་ཅིབ་རྒྱལ་པོ་ཤི་ཤག་གི་དྲུང་དུ་བྲོས་ཤིང་། སོ་ལོ་མོན་ཚེ་ལས་འདས་པའི་བར་དུ་ཨེ་ཅིབ་ཡུལ་ནས་བསྡད་དོ། །
1KI 11:41 ཡང་སོ་ལོ་མོན་གྱི་དོན་གཞན་རྣམས་དང་། ཁོང་གིས་མཛད་པའི་བྱ་བ་ཐམས་ཅད་དང་ཁོའི་ཤེས་རབ་སོགས་ནི། སོ་ལོ་མོན་གྱི་མཛད་རྗེས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 11:42 སོ་ལོ་མོན་གྱིས་ཡེ་རུ་སཱ་ལེམ་དུ་ཡེས་ར་ཨེལ་ཡོངས་ལ་སྲིད་བསྐྱངས་པའི་ལོ་གྲངས་ནི་བཞི་བཅུའོ། །
1KI 11:43 དེ་ནས་སོ་ལོ་མོན་རང་གི་ཕ་མེས་རྣམས་དང་ལྷན་དུ་གཟིམས་པ་དང་། ཡབ་དཱ་བིད་ཀྱི་གྲོང་ཁྱེར་དུ་དུར་ལ་སྦས་སོ། །ཡང་ཁོང་གི་སྲས་རེ་ཧབ་ཨམ་གྱིས་ཁོང་གི་ཚབ་ཏུ་སྲིད་བྱས་པའོ། །
1KI 12:1 དེ་ནས་རེ་ཧབ་ཨམ་ནི་སི་ཀེམ་དུ་ཕྱིན་ཏོ། །ཅིའི་ཕྱིར་ཞེ་ན། ཡེས་ར་ཨེལ་པ་ཐམས་ཅད་ཀྱིས་ཁོང་རྒྱལ་པོར་བསྐོ་བའི་ཆེད་དུ་སི་ཀེམ་དུ་ཕྱིན་པ་རེད།
1KI 12:2 སྐབས་དེར་ནེ་བཱད་ཀྱི་བུ་ཡེ་རོབ་ཨམ་ནི་སྔར་སོ་ལོ་མོན་གྱི་དྲུང་ནས་ཨེ་ཅིབ་ཡུལ་དུ་བྲོས་སོང་སྟེ་གནས་དེར་བསྡད་ཡོད་པ་དང་ཁོས་འཕྲིན་དེ་ཐོས། དེར་ཡེས་ར་ཨེལ་པས་མི་མངགས་ཏེ་ཁོ་བོས་པ་ལ། ཁོ་དང་ཡེས་ར་ཨེལ་པ་ཐམས་ཅད་རེ་ཧབ་ཨམ་གྱི་དྲུང་དུ་འོངས་ནས་ཁོང་ལ་ན་རེ།
1KI 12:4 ཁྱེད་ཀྱི་ཡབ་ཀྱིས་ངེད་ཅག་ལ་གཉའ་ཤིང་ཤིན་ཏུ་ལྕི་མོ་བཀལ་བྱུང་། ད་ལྟ་ཁྱེད་ཀྱིས་ཉིད་ཀྱི་ཡབ་ཀྱིས་ངེད་ཅག་ལ་བཀལ་བའི་ངལ་ལས་དང་གཉའ་ཤིང་ལྕི་མོ་ཇེ་ཡང་དུ་གཏོང་བར་མཛོད་ཅིག དེ་ནས་ངེད་ཅག་གིས་ཁྱེད་ལ་ཞབས་ཕྱི་བསྒྲུབ་པར་བྱ་ཞེས་ཞུས་པ་དང་།
1KI 12:5 རེ་ཧབ་ཨམ་གྱིས་དེ་དག་ལ་ན་རེ། ཁྱོད་རྣམས་སྐབས་སུ་ཕྱིར་སོང་ལ། ཉིན་གསུམ་འགོར་རྗེས་ཕྱིར་ངའི་རྩར་ལོག་ཤོག་ཅེས་སྨྲས་པས་དེ་རྣམས་སོང་ངོ་། །
1KI 12:6 རྒྱལ་པོ་རེ་ཧབ་ཨམ་གྱིས་རང་གི་ཡབ་སོ་ལོ་མོན་བཞུགས་པའི་དུས་སུ་ཁོང་གི་དྲུང་དུ་ཞབས་ཕྱི་སྒྲུབ་མཁན་རྒན་པ་རྣམས་ལ་བློ་དྲིས་ནས་ན་རེ། ངས་མི་རྣམས་ལ་ལན་འདེབས་པར་ཁྱེད་རྣམ་པར་དགོངས་འཆར་ཅི་ཡོད་ཅེས་དྲིས་པར།
1KI 12:7 དེ་དག་གིས་ལན་དུ། གལ་སྲིད་དེ་རིང་ཉིན་མོར་རྒྱལ་པོ་ཁྱེད་རང་མི་འདི་རྣམས་ཀྱི་ཞབས་ཕྱི་བྱས་ནས་ཁོ་རྣམས་ལ་ཞབས་ཕྱི་སྒྲུབ་པ་དང་། གཏམ་བཟང་པོ་སྨྲས་ན། ཁོ་ཚོ་རྒྱུན་ནས་རྒྱུན་དུ་ཁྱེད་ཀྱི་ཞབས་ཕྱི་བྱེད་པར་འགྱུར་ཞེས་ཞུས་མོད།
1KI 12:8 འོན་ཀྱང་རྒྱལ་པོས་རྒན་པ་ཚོའི་བཏོན་པའི་བསམ་འཆར་དང་དུ་མ་བླངས་པར། ཁོ་དང་མཉམ་དུ་ནར་སོན་ཞིང་ཁོའི་མདུན་དུ་ཞབས་ཕྱི་སྒྲུབ་པའི་གཞོན་ནུ་དག་ལ་གྲོས་འདྲི་བྱས་ཏེ།
1KI 12:9 དེ་དག་ལ་ན་རེ། མི་རྣམས་ཀྱིས་བདག་ལ་འདི་ལྟར། ཁྱེད་ཀྱི་ཡབ་ཀྱིས་བདག་ཅག་ལ་བཀལ་བའི་གཉའ་ཤིང་ལྕི་མོ་དེ་ཇེ་ཡང་དུ་གཏོང་བར་མཛོད་ཅིག་ཅེས་ཞུས་པས། ངས་མི་འདི་རྣམས་ལ་ལན་འདེབས་པར་ཁྱོད་རྣམས་ལ་བསམ་ཚུལ་ཅི་ཡོད་ཅེས་དྲིས་པར།
1KI 12:10 ཁོ་དང་མཉམ་དུ་ནར་སོན་པའི་གཞོན་ནུ་དག་གིས་ཁོ་ལ་འདི་ལྟར། མི་རྣམས་ཀྱིས་རྒྱལ་པོ་ལ། ཁྱེད་ཀྱི་ཡབ་ཀྱིས་ངེད་ཅག་ལ་གཉའ་ཤིང་ལྕི་མོ་བཀལ་བྱུང་། ད་ལྟ་ཁྱེད་ཀྱིས་དེ་ཇེ་ཡང་དུ་གཏོང་བར་མཛོད་ཅེས་ཞུས་པར། རྒྱལ་པོས་ཁོ་རྣམས་ལ་འདི་ལྟར། ངའི་ཡབ་ཀྱི་རྐེད་པ་ལས་ངའི་མཐེབ་ཆུང་སྦོམ་པས་ན།
1KI 12:11 ངའི་ཡབ་ཀྱིས་ཁྱོད་ཚོར་གཉའ་ཤིང་ལྕི་མོ་གཅིག་བཀལ་བ་དང་། བདག་གིས་ཁྱོད་ཚོར་དེ་ལས་ལྕི་བའི་གཉའ་ཤིང་འགེལ་ངེས། ངའི་ཡབ་ཀྱིས་ཁྱོད་ཚོར་རྟ་ལྕག་གིས་གཞུས་པ་དང་། ངས་ཁྱོད་ཚོར་སྡིག་པ་ར་ཙ་ཅན་གྱི་ལྕག་གིས་གཞུ་བར་བྱ་ཞེས་པའི་བཀའ་ལན་གནང་བར་མཛོད་ཅེས་སྨྲས་སོ། །
1KI 12:12 ཡང་རྒྱལ་པོས་ཉིན་གསུམ་པར་ངའི་རྩར་ལོག་ཤོག་ཅེས་བསྒོས་པ་ལྟར་དུ། ཡེ་རོབ་ཨམ་དང་མི་ཐམས་ཅད་ཉིན་གསུམ་པར་རེ་ཧབ་ཨམ་གྱི་དྲུང་དུ་འོངས་པ་ལ།
1KI 12:13 རྒྱལ་པོས་དེ་དག་ལ་ལན་རྩུབ་པོ་མཛད་དེ། ཁོང་གིས་རྒན་པ་དག་གི་གཏམ་ལ་མ་མཉན་པར།
1KI 12:14 གཞོན་ནུ་དག་གི་གྲོས་བཞིན་དུ་དེ་དག་ལ་ན་རེ། ངའི་ཡབ་ཀྱིས་ཁྱོད་ཚོར་གཉའ་ཤིང་ལྕི་མོ་བཀལ་བ་དང་། བདག་གིས་ཁྱོད་ཚོར་དེ་ལས་ལྕི་བའི་གཉའ་ཤིང་འགེལ་ངེས། ངའི་ཡབ་ཀྱིས་ཁྱོད་ཚོར་རྟ་ལྕག་གིས་གཞུས་པ་དང་། ངས་ཁྱོད་ཚོར་སྡིག་པ་ར་ཙ་ཅན་གྱི་ལྕག་གིས་གཞུ་བར་བྱ་ཞེས་སྨྲས་སོ། །
1KI 12:15 རྒྱལ་པོས་མི་རྣམས་ཀྱི་ཞུ་བར་མ་མཉན་པ་སྟེ། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་ཞི་ལོ་པ་ཨ་ཧི་ཡཱའི་ངག་བརྒྱུད་ནས་ནེ་བཱད་ཀྱི་བུ་ཡེ་རོབ་ཨམ་ལ་གསུངས་པའི་བཀའ་དེ་འགྲུབ་པའི་ཕྱིར་དུ། འགྱུར་བ་དེ་ནི་དཀོན་མཆོག་ཡ་ཝཱེ་ནས་བྱུང་བ་ཡིན་ནོ། །
1KI 12:16 དེར་ཡེས་ར་ཨེལ་པ་རྣམས་ཀྱིས་རྒྱལ་པོས་ཁོ་རྣམས་ཀྱི་ཞུ་བར་མི་མཉན་པ་མཐོང་བས། རྒྱལ་པོར་ལན་བཟློགས་ཏེ་འདི་ལྟར། ངེད་རྣམས་ལ་དཱ་བིད་ལས་སྐལ་ཅི་ཡོད། ངེད་རྣམས་ལ་ཡེ་སེ་ཡི་བུ་ལས་ནོར་སྐལ་ཅི་ཡང་མེད། ཀྱེ་ཡེས་ར་ཨེལ་པ་རྣམས། རང་རང་གི་ཁྱིམ་དུ་ལོག་ཅིག ཀྱེ་དཱ་བིད་ལགས། ད་ནི་རང་གི་ཁྱིམ་ལ་བདག་སྐྱོང་གྱིས་ཤིག་ཅེས་སྨྲས་ནས་ཡེས་ར་ཨེལ་པ་ཐམས་ཅད་རང་རང་གི་ཁྱིམ་དུ་ལོག
1KI 12:17 རེ་ཧབ་ཨམ་ནི་སྔར་བཞིན་ཡ་ཧུ་དཱའི་གྲོང་ཁྱེར་དག་ཏུ་སྡོད་པའི་ཡེས་ར་ཨེལ་པ་རྣམས་ཀྱི་རྒྱལ་པོར་བྱས།
1KI 12:18 ཡང་རེ་ཧབ་ཨམ་གྱིས་སྡུག་ལས་རྒྱག་མཁན་རྣམས་ལ་ལྟ་སྐུལ་བྱེད་པའི་ཨ་དོ་རམ་མངགས་ནས་སོང་བ་དང་། ཡེས་ར་ཨེལ་པ་རྣམས་ཀྱིས་དེ་རྡོ་རུབ་བཏང་ནས་བསད། དེར་རྒྱལ་པོ་རེ་ཧབ་ཨམ་ནི་རྟབ་རྟབ་པོར་ཤིང་རྟར་བསྡད་ནས་ཡེ་རུ་སཱ་ལེམ་དུ་བྲོས།
1KI 12:19 དེ་བཞིན་ཡེས་ར་ཨེལ་པ་རྣམས་ཀྱིས་དེ་རིང་གི་བར་དུ་དཱ་བིད་ཚང་ལ་ངོ་ལོག་བྱས་པའོ། །
1KI 12:20 དེ་ནས་ཡེས་ར་ཨེལ་པ་ཡོངས་ཀྱིས་ཡེ་རོབ་ཨམ་ཕྱིར་ལོག་པ་ཐོས་ནས། མི་ཚོགས་ཀྱི་མདུན་དུ་འོང་བའི་ཕྱིར་འབོད་མཁན་བཏང་ཞིང་། ཡེས་ར་ཨེལ་པ་ཐམས་ཅད་ཀྱི་རྒྱལ་པོར་བསྐོས་པས། ཡ་ཧུ་དཱའི་ཚོ་པ་ལས་གཞན་དཱ་བིད་ཚང་གི་རྗེས་སུ་འབྲང་མཁན་མེད་དོ། །
1KI 12:21 རེ་ཧབ་ཨམ་ནི་ཡེ་རུ་སཱ་ལེམ་དུ་སླེབས་པ་དང་། ཡེས་ར་ཨེལ་ཁྱིམ་རྒྱུད་དང་འཐབ་ནས་རྒྱལ་སྲིད་ཕྱིར་བླངས་ཏེ་སོ་ལོ་མོན་གྱི་སྲས་རེ་ཧབ་ཨམ་ལ་འཐོབ་པའི་ཕྱིར། ཡ་ཧུ་དཱའི་ཁྱིམ་རྒྱུད་དང་པེན་ཡཱ་མེན་གྱི་ཚོ་པ་ལས་དམག་མི་དཔའ་རྩལ་ཅན་བསྡོམས་པས་མི་ཆིག་འབུམ་བརྒྱད་ཁྲི་བསྡུས་པའོ། །
1KI 12:22 འོན་ཀྱང་དཀོན་མཆོག་གི་སྐྱེས་བུ་ཤེ་མ་ཡཱ་བྱ་བ་ལ་དཀོན་མཆོག་གི་བཀའ་བྱུང་ནས་འདི་སྐད་དུ།
1KI 12:23 ཁྱོད་སོང་ནས་རྒྱལ་པོ་སོ་ལོ་མོན་གྱི་སྲས་ཏེ་ཡ་ཧུ་དཱའི་རྒྱལ་པོ་རེ་ཧབ་ཨམ་དང་། ཡ་ཧུ་དཱ་དང་པེན་ཡཱ་མེན་གྱི་ཁྱིམ་རྒྱུད་ཡོངས་དང་། དེའི་འཕྲོའི་མི་ཐམས་ཅད་ལ་འདི་ལྟར་སྦྲོན་ཅིག
1KI 12:24 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོ་ཡར་སོང་ནས་རང་གི་སྤུན་ཡེས་ར་ཨེལ་པ་རྣམས་ལ་དམག་རྒྱག་མི་རུང་། དོན་འདི་ནི་བདག་ལས་བྱུང་བ་ཡིན་པས། ཁྱོད་རྣམས་རང་རང་གི་ཁྱིམ་དུ་ལོག་ཅིག་གསུངས་ཞེས་སྨྲོས་ཤིག་ཅེས་གསུངས་པ་དང་། དེ་ཚོས་དཀོན་མཆོག་ཡ་ཝཱེའི་བཀའ་ལ་མཉན་ཏེ་ཕྱིར་རང་ཡུལ་དུ་ལོག་པའོ། །
1KI 12:25 དེ་ནས་ཡེ་རོབ་ཨམ་གྱིས་ཨེ་ཕཱར་ཡིམ་རི་བོར་སི་ཀེམ་གྲོང་ཁྱེར་བརྩིགས་ནས་དེར་གཞིས་ཕབ་པ་དང་། ཡང་ཡུལ་དེ་ནས་ཕྱི་རུ་ཐོན་ཏེ་ཕཱ་ནེ་ཨེལ་གྲོང་ཁྱེར་བརྩིགས་སོ། །
1KI 12:26 དེ་ནས་ཡེ་རོབ་ཨམ་གྱི་སེམས་སུ། ད་ལྟ་རྒྱལ་སྲིད་ནི་སྔར་བཞིན་དཱ་བིད་ཀྱི་ཁྱིམ་ལ་དབང་བར་འགྱུར་སྲིད།
1KI 12:27 གལ་ཏེ་མི་འདི་རྣམས་ཡར་ཡེ་རུ་སཱ་ལེམ་དུ་ཡོད་པའི་དཀོན་མཆོག་ཡ་ཝཱེའི་མཆོད་ཁང་ལ་སོང་ནས་མཆོད་པ་ཕུལ་ན། ཁོ་རྣམས་ཀྱི་སེམས་ནི་ཕྱིར་རང་གི་བདག་པོ་སྟེ་ཡ་ཧུ་དཱའི་རྒྱལ་པོ་རེ་ཧབ་ཨམ་གྱི་ཕྱོགས་སུ་འཁོར་ཞིང་བདག་གསོད་པར་འགྱུར་སྙམ་པས།
1KI 12:28 རྒྱལ་པོས་སེམས་ཐག་བཅད་ནས་གསེར་གྱི་བ་ཕྲུག་གཉིས་བཟོས་ཏེ་མི་རྣམས་ལ། ཀྱེ་ཡེས་ར་ཨེལ་པ་རྣམས། ཁྱོད་ཅག་ཡེ་རུ་སཱ་ལེམ་དུ་ཡར་འགྲོ་བར་དཀའ་སྡུག་ཡོད། ལྟོས་དང་། ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་ལྷ་ནི་འདི་རུ་ཡོད་ཅེས་སྨྲས་ནས།
1KI 12:29 ཁོས་བ་ཕྲུག་གཅིག་པེད་ཨེལ་དུ་བཞག་པ་དང་བ་ཕྲུག་ཅིག་ཤོས་དེ་དཱན་ཞེས་པར་བཞག་གོ །
1KI 12:30 ཡེས་ར་ཨེལ་པ་རྣམས་དཱན་ཡུལ་གྱི་གསེར་གྱི་བ་ཕྲུག་ལ་བསྙེན་བཀུར་བྱེད་དུ་ཕྱིན་པས་དེ་ནི་ཁོ་རྣམས་ཀྱི་སྡིག་པའི་རྒྱུ་རུ་གྱུར་ཏོ། །
1KI 12:31 ཡང་ཁོས་མཐོ་གླིང་རྣམས་སུ་མཆོད་ཁང་བཞེངས་པ་དང་། ལེ་ཝི་པ་མ་ཡིན་པའི་སྐྱེ་བོ་ཕལ་བ་རྣམས་མཆོད་དཔོན་དུ་བསྐོས་སོ། །
1KI 12:32 ཡང་ཡེ་རོབ་ཨམ་གྱིས་ཡ་ཧུ་དཱ་ཡི་དུས་ཆེན་དང་འདྲ་བའི་དུས་ཆེན་ཞིག་ཟླ་བརྒྱད་པའི་ཚེས་བཅོ་ལྔ་ལ་བཙུགས་ཤིང་། ཁོ་རང་གིས་མཆོད་ཁྲིའི་སྟེང་སྦྱིན་སྲེག་ཕུལ་ཏོ། །དེ་བཞིན་དུ་པེད་ཨེལ་དུའང་རང་གིས་བཟོས་པའི་བ་ཕྲུག་གཉིས་ཀྱི་མདུན་དུ་དམར་མཆོད་ཕུལ་ཞིང་། ཁོས་པེད་ཨེལ་དུ་བརྩིགས་པའི་མཐོ་གླིང་རྣམས་ཀྱི་ཕྱིར་མཆོད་དཔོན་རྣམས་ཀྱང་བསྐོས་སོ། །
1KI 12:33 ཟླ་བ་བརྒྱད་པའི་ཚེས་བཅོ་ལྔའི་ཉིན་ཏེ། རང་གི་སེམས་ནས་རང་དགར་ཡེས་ར་ཨེལ་གྱི་དུས་ཆེན་དུ་བཙུགས་པའི་ཉིན་མོ་དེ་ལ། པེད་ཨེལ་དུ་ཁོ་རང་གིས་བཞེངས་པའི་མཆོད་ཁྲིའི་ཁར་མཆོད་པ་ཕུལ་ནས་བསང་བཏང་ངོ་། །
1KI 13:1 ཡེ་རོབ་ཨམ་གྱིས་མཆོད་ཁྲིའི་མདུན་དུ་ལངས་ནས་བསང་གཏོང་བའི་སྐབས་སུ། དཀོན་མཆོག་ཡ་ཝཱེའི་བཀའ་བཞིན་དུ་དཀོན་མཆོག་གི་སྐྱེས་བུ་ཞིག་ཡ་ཧུ་དཱ་ནས་པེད་ཨེལ་དུ་སླེབས་པ་དང་།
1KI 13:2 དཀོན་མཆོག་གི་སྐྱེས་བུ་དེས་དཀོན་མཆོག་ཡ་ཝཱེའི་བཀའ་ལ་བརྟེན་ནས་མཆོད་ཁྲི་ལ་སྐད་ཆེན་པོས་འདི་ལྟར། ཀྱེ་མཆོད་ཁྲི། ཀྱེ་མཆོད་ཁྲི། དཀོན་མཆོག་ཡ་ཝཱེས་འདི་སྐད་དུ། ཀྱེ་ཧོ། དཱ་བིད་ཀྱི་ཁྱིམ་རྒྱུད་ལས་ཡོ་ཤི་ཡཱ་ བྱ་བའི་བུ་ཞིག་འཁྲུང་བར་འགྱུར་བ་དང་། ཁོང་གིས་ཁྱོད་ཀྱི་སྟེང་དུ་མཐོ་གླིང་གི་སྤོས་གདུག་མཁན་མཆོད་དཔོན་རྣམས་ནི་མཆོད་པར་འབུལ་ཞིང་ཁྱོད་ཀྱི་སྟེང་དུ་མིའི་རུས་པ་བསྲེག་པར་བྱའོ་ཞེས་གསུངས་སོ་ཞེས་བསྒྲགས་སོ། །
1KI 13:3 ཡང་ཉིན་དེ་ལ་དཀོན་མཆོག་གི་སྐྱེས་བུ་དེས་རྟགས་ཤིག་བསྟན་ནས་འདི་ལྟར། འདི་ནི་དཀོན་མཆོག་ཡ་ཝཱེས་གསུངས་པའི་རྟགས་ཡིན། ཀྱེ་ཧོ། མཆོད་ཁྲི་གས་ནས། དེའི་སྟེང་དུ་ཡོད་པའི་ཐལ་བ་འབོ་བར་འགྱུར་རོ་ ཞེས་སྨྲས་པ་ལ།
1KI 13:4 དཀོན་མཆོག་གི་སྐྱེས་བུ་དེས་པེད་ཨེལ་གྱི་མཆོད་ཁྲི་ལ་བསྒྲགས་པའི་འབོད་ཚིག་དེ་རྒྱལ་པོ་ཡེ་རོབ་ཨམ་གྱིས་ཐོས་པས། ཁོས་མཆོད་ཁྲིའི་སྟེང་ནས་ལག་པ་བརྐྱངས་ཏེ། མི་དེ་ཟུངས་ཤིག་བསྒོས་པ་དང་། ཕྱི་རུ་བརྐྱངས་པའི་ལག་པ་དེ་བསྐམས་པར་གྱུར་ཏེ་རང་གི་ཕྱོགས་སུ་འགུག་མ་ནུས་སོ། །
1KI 13:5 དཀོན་མཆོག་གི་སྐྱེས་བུ་དེས་དཀོན་མཆོག་ཡ་ཝཱེའི་བཀའ་ལ་བརྟེན་ནས་མངོན་པར་ཕྱུང་བའི་རྟགས་ནང་བཞིན། མཆོད་ཁྲི་གས་ནས་ཐལ་བ་འཕོས་སོ། །
1KI 13:6 དེ་ནས་རྒྱལ་པོས་དཀོན་མཆོག་གི་སྐྱེས་བུ་དེ་ལ། ཁྱེད་ཀྱིས་ཕྲན་གྱི་དོན་དུ་རང་གི་དཀོན་མཆོག་ཡ་ཝཱེ་ལ་ཞུ་བ་བྱས་ཏེ། ཕྲན་གྱི་ལག་པ་སླར་གསོ་བའི་ཕྱིར་ངའི་དོན་དུ་སྨོན་ལམ་འདེབས་རོགས་ཞེས་ཞུས་པ་དང་། དཀོན་མཆོག་གི་སྐྱེས་བུ་དེས་དཀོན་མཆོག་ཡ་ཝཱེ་ལ་གསོལ་བ་བཏབ་ནས་རྒྱལ་པོའི་ལག་པ་སླར་སོས་ནས་སྔར་བཞིན་གྱུར་ཏོ། །
1KI 13:7 དེ་ནས་རྒྱལ་པོས་དཀོན་མཆོག་གི་སྐྱེས་བུ་དེ་ལ། ང་དང་མཉམ་དུ་རྒྱལ་པོའི་ཕོ་བྲང་ལ་ཤོག་དང་། ཁ་ཟས་ཉུང་ཙམ་སྤྱད་ནས་ལུས་ལ་སྟོབས་ཤུགས་རྒྱས་པར་མཛོད། ངས་ཁྱེད་ལ་རྔན་པ་ཞིག་ཀྱང་སྦྱིན་ཡོང་ཞེས་སྨྲས་ཀྱང་།
1KI 13:8 དཀོན་མཆོག་གི་སྐྱེས་བུ་དེས་རྒྱལ་པོ་ལ། གལ་ཏེ་ཁྱོད་ཀྱིས་ང་ལ་རང་གི་ཕོ་བྲང་གི་ཕྱེད་ཀ་སྦྱིན་ཡང་ང་རང་ཁྱོད་དང་མཉམ་དུ་མི་འགྲོ། ཡུལ་འདིར་ངས་ཟས་མི་བཟའ་ལ་ཆུ་ཡང་མི་འཐུང་།
1KI 13:9 གང་ལ་ཞེ་ན། དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ཟས་ཀྱང་མ་བཟའ། ཆུ་ཡང་མ་འཐུང་ཞིག ལམ་གང་ནས་ཕྱིན་པ་དེར་ཕྱིར་མ་ལོག་ཅིག་ཅེས་ནན་གྱིས་བསྐུལ་ཏོ་ཞེས་སྨྲས་སོ། །
1KI 13:10 དེ་ནས་དཀོན་མཆོག་གི་སྐྱེས་བུ་ནི་པེད་ཨེལ་དུ་འོངས་པའི་ལམ་ནས་ཕྱིར་མ་ལོག་པར་ལམ་གཞན་དུ་ཞུགས་སོ། །
1KI 13:11 དེའི་དུས་སུ་ལུང་སྟོན་པ་རྒན་པ་ཞིག་པེད་ཨེལ་དུ་བཞུགས་ཡོད་ལ། ཁོང་གི་བུ་རྣམས་འོངས་ནས། དཀོན་མཆོག་གི་སྐྱེས་བུ་ཡིས་ཉིན་དེར་པེད་ཨེལ་ནས་མཛད་པའི་དོན་རྣམས་ཁོང་ལ་ཞུས་ཤིང་། རྒྱལ་པོ་ལ་སྨྲས་པའི་ཚིག་རྣམས་ཀྱང་ཕ་ལ་སྨྲས་སོ། །
1KI 13:12 དེ་ནས་དེ་དག་གི་ཕ་ཡིས་ཁོ་རྣམས་ལ། དཀོན་མཆོག་གི་སྐྱེས་བུ་དེ་ལམ་གང་དུ་ཞུགས་སམ་ཞེས་དྲིས་པས། ཁོང་གི་བུ་རྣམས་ཀྱིས་ཡ་ཧུ་དཱ་ནས་འོངས་པའི་དཀོན་མཆོག་གི་སྐྱེས་བུ་དེ་ལམ་གང་ནས་ལོག་སོང་བ་དེ་བསྟན་པ་རེད།
1KI 13:13 དེར་ཁོང་གིས་རང་གི་བུ་རྣམས་ལ། ངའི་དོན་དུ་བོང་བུར་སྒ་སྟོད་ཅིག་ཅེས་སྨྲས་པ་དང་། དེ་དག་གིས་ཁོང་གི་དོན་དུ་བོང་བུར་སྒ་བསྟད་པ་དང་ཁོ་དེ་ལ་བཞོན་ཏེ།
1KI 13:14 དཀོན་མཆོག་གི་སྐྱེས་བུའི་རྗེས་སུ་སོང་བ་དང་། ཁོང་བེ་ཤིང་གི་འོག་ཏུ་བསྡད་ཡོད་པར་ཕྲད་ཅིང་ཁོང་ལ་ན་རེ། ཁྱེད་རང་ཡ་ཧུ་དཱ་ནས་བྱོན་པའི་དཀོན་མཆོག་གི་སྐྱེས་བུ་དེ་ཡིན་ནམ་ཞེས་དྲིས་པ་ན། ཁོང་གིས་བདག་ནི་དེ་ཡིན་ཞེས་ལན་བཏབ་བོ། །
1KI 13:15 དེ་ནས་ལུང་སྟོན་པ་རྒན་པ་དེས་ཁོང་ལ། ཁྱེད་རང་བདག་དང་མཉམ་དུ་ཁྱིམ་ལ་ཕེབས་ནས་ཁ་ཟས་བཞེས་རོགས་ཞེས་ཞུས་ཀྱང་།
1KI 13:16 ཁོང་ན་རེ། བདག་ཁྱོད་དང་མཉམ་དུ་ཕྱིར་ལོག་པར་མི་འོས། ནང་དུ་ཡང་འགྲོ་མི་འོས། ཡུལ་འདིར་བདག་གིས་ཁྱོད་དང་ལྷན་དུ་ཟས་མི་བཟའ་ལ་ཆུ་ཡང་མི་འཐུང་།
1KI 13:17 གང་ལ་ཞེ་ན། དཀོན་མཆོག་ཡ་ཝཱེས་བདག་ལ་འདི་སྐད་དུ། ཁྱོད་ཀྱིས་དེ་རུ་ཟས་ཀྱང་མ་བཟའ་ཆུ་ཡང་མ་འཐུང་ཞིག ལམ་གང་ནས་ཕྱིན་པ་དེར་ཕྱིར་མ་ལོག་ཅིག་ཅེས་བཀའ་གནང་ངོ་ཞེས་སྨྲས་པར།
1KI 13:18 ལུང་སྟོན་པ་རྒན་པ་དེས་ཁོང་ལ། ང་ཡང་ཁྱེད་དང་འདྲ་བའི་ལུང་སྟོན་པ་ཞིག་ཡིན། ཕོ་ཉ་ཞིག་གིས་དཀོན་མཆོག་ཡ་ཝཱེའི་བཀའ་ལ་བརྟེན་ནས་ང་ལ་འདི་ལྟར། མི་དེས་ཟས་བཟའ་བ་དང་ཆུ་འཐུང་བར་ཁོང་ཁྱོད་དང་མཉམ་དུ་ཁྲིད་ནས་རང་གི་ཁྱིམ་ལ་ལོག་ཅིག་ཅེས་གསུངས་སོ་ཞེས་རྫུན་སྨྲས་སོ། །
1KI 13:19 དེ་བས་དཀོན་མཆོག་གི་སྐྱེས་བུ་ནི་ཁོང་དང་མཉམ་དུ་ཕྱིར་ལོག་ནས། ཁོང་གི་ཁྱིམ་དུ་ཁ་ཟས་སྤྱད་དེ་ཆུ་ཡང་འཐུང་བའོ། །
1KI 13:20 ཁོང་གཉིས་ཀ་གསོལ་ལྕོག་མདུན་དུ་བསྡད་ནས་བཟའ་བཏུང་ལ་རོལ་བཞིན་པའི་སྐབས་སུ། དཀོན་མཆོག་གི་སྐྱེས་བུ་ཕྱིར་ཁྲིད་འོངས་པའི་ལུང་སྟོན་པ་ལ་དཀོན་མཆོག་ཡ་ཝཱེའི་བཀའ་བྱུང་བ་དང་།
1KI 13:21 ཁོང་གིས་ཡ་ཧུ་དཱ་ནས་འོངས་པའི་དཀོན་མཆོག་གི་སྐྱེས་བུ་དེ་ལ་སྐད་ཆེན་པོས། དཀོན་མཆོག་ཡ་ཝཱེས་འདི་སྐད་དུ། ཁྱོད་ནི་དཀོན་མཆོག་ཡ་ཝཱེའི་བཀའ་ལ་འགལ་ཞིང་། ཁྱོད་ཀྱི་དཀོན་མཆོག་ཡ་ཝཱེས་གསུངས་པའི་བཀའ་རྒྱ་ཡང་མ་བསྲུངས་པར།
1KI 13:22 དེ་ལས་ལྡོག་སྟེ་དཀོན་མཆོག་ཡ་ཝཱེས་ཁྱོད་ལ་ཟས་མ་བཟའ་ཆུ་ཡང་མ་འཐུང་ཞེས་བསྒོས་པའི་གནས་འདི་རུ་ཟས་ཀྱང་སྤྱད་ལ་ཆུ་ཡང་འཐུང་བས། ཁྱོད་ཀྱི་བེམ་པོ་ནི་ཁྱོད་ཀྱི་ཕ་མེས་རྣམས་ཀྱི་དུར་ས་རུ་སླེབས་པར་མི་འགྱུར་ཞེས་གསུངས་ཞེས་སྨྲས་སོ། །
1KI 13:23 ཁོང་གིས་ཟས་སྤྱད་དེ་ཆུ་ཡང་འཐུང་ཟིན་པ་དང་། ལུང་སྟོན་པ་རྒན་པ་དེས་རང་གིས་ཕྱིར་ཁྲིད་འོངས་པའི་ལུང་སྟོན་པ་དེའི་དོན་དུ་བོང་བུར་སྒ་བསྟད་ཅིང་།
1KI 13:24 དེ་ནས་ཁོང་ལམ་དུ་ཞུགས་པ་དང་། ལམ་བར་དུ་སེང་གེ་ཞིག་དང་ཕྲད་ནས། དེས་ཁོང་ལ་སོ་བཏབ་ནས་བསད་པས་ཁོང་གི་བེམ་པོ་ལམ་ཁར་འཕངས་ཏེ། བོང་བུ་བེམ་པོའི་རྩར་ཀྲོང་ངེར་བསྡད། སེང་གེ་ཡང་བེམ་པོའི་རྩར་ཙོག་གེར་བསྡད་དོ། །
1KI 13:25 ཀྱེ་ཧོ། དེའི་མཐའ་འཁོར་ནས་མི་རྣམས་ཆས་ཤིང་། བེམ་པོ་ལམ་ཁར་འཕངས་ཏེ། དེའི་རྩར་སེང་གེ་ཞིག་ཙོག་གེར་བསྡད་ཡོད་པ་མཐོང་ནས་མི་དེ་རྣམས་ལུང་སྟོན་པ་རྒན་པ་དེའི་གྲོང་ཁྱེར་དུ་ཕྱིན་ནས་གཏམ་སྨྲས་པས།
1KI 13:26 དཀོན་མཆོག་གི་སྐྱེས་བུ་ལམ་ནས་ཕྱིར་ཁྲིད་འོངས་པའི་ལུང་སྟོན་པ་དེས་གཏམ་དེ་ཐོས་ནས་ན་རེ། དེ་ནི་དཀོན་མཆོག་ཡ་ཝཱེའི་བཀའ་ལ་འགལ་བའི་དཀོན་མཆོག་གི་སྐྱེས་བུ་དེ་ཡིན། དཀོན་མཆོག་ཡ་ཝཱེས་ཁོང་ལ་གསུངས་པའི་བཀའ་བཞིན་དུ། ཁོང་སེང་གེ་ལ་གཏད་པ་དང་། སེང་གེས་ཁོང་རལ་ཏེ་བསད་པ་ལགས་ཞེས་སྨྲས་སོ། །
1KI 13:27 ཡང་ལུང་སྟོན་པ་རྒན་པ་དེས་རང་གི་བུ་རྣམས་ལ། ངའི་དོན་དུ་བོང་བུར་སྒ་སྟོད་ཅིག་ཅེས་སྨྲས་ནས་དེ་དག་གིས་སྒ་བསྟད་དོ། །
1KI 13:28 དེ་ནས་ཁོང་ལམ་དུ་ཆས་པ་དང་། དཀོན་མཆོག་གི་སྐྱེས་བུ་དེའི་བེམ་པོ་ལམ་ཁར་འཕངས་ནས་ཡོད་པ་རྙེད་ཅིང་། བོང་བུ་དང་སེང་གེ་གཉིས་བེམ་པོའི་རྩར་ཀྲོང་ངེར་ལངས་བསྡད་ཡོད་པ་དང་། སེང་གེས་བེམ་པོ་མ་ཟོས་ལ་བོང་བུར་གནོད་ཀྱང་མ་བསྐྱལ་བ་མཐོང་ངོ་། །
1KI 13:29 དཀོན་མཆོག་གི་སྐྱེས་བུ་ལ་མྱ་ངན་བྱས་ཏེ་དུར་ལ་འཇུག་པའི་ཆེད་དུ་ལུང་སྟོན་པ་རྒན་པ་དེས་ཁོང་གི་བེམ་པོ་བླངས་ཏེ་བོང་བུ་ལ་བཀལ་ནས་གྲོང་ཁྱེར་དུ་ཁྱེར་བའོ། །
1KI 13:30 ལུང་སྟོན་པ་རྒན་པ་དེས་ཁོང་གི་བེམ་པོ་རང་གི་དུར་ཁུང་དུ་བཞག་པ་དང་། མི་རྣམས་ཀྱིས་ངེད་ཅག་གི་སྤུན། ཀྱེ་ཧུད་ཅེས་སྨྲས་ཤིང་། ཁོང་གི་ཆེད་དུ་མྱ་ངན་བྱས་སོ། །
1KI 13:31 ཁོང་དུར་ལ་སྦས་རྗེས་ལུང་སྟོན་པ་རྒན་པས་རང་གི་བུ་རྣམས་ལ། ང་ཚེ་ལས་འདས་པའི་ཚེ་ཁྱོད་ཅག་གིས་ང་རང་དཀོན་མཆོག་གི་སྐྱེས་བུ་དེའི་དུར་ཁུང་ལ་སྦོས་ཤིག ངའི་རུས་པ་རྣམས་ཀྱང་ཁོང་གི་རུས་པའི་རྩར་ཞོག་ཅིག
1KI 13:32 ཅིའི་ཕྱིར་ཞེ་ན། པེད་ཨེལ་ཡུལ་གྱི་མཆོད་ཁྲི་དང་། སཱ་མར་ཡ་ཡུལ་གྱི་གྲོང་ཁྱེར་ཐམས་ཅད་དུ་ཡོད་པའི་མཐོ་གླིང་སྟེང་གི་མཆོད་ཁང་རྣམས་ལ་ཁོང་གིས་དཀོན་མཆོག་ཡ་ཝཱེའི་བཀའ་ལྟར་གཏམ་བསྒྲགས་པ་བཞིན་ངེས་པར་འབྱུང་བར་འགྱུར་བའི་ཕྱིར་རོ་ཞེས་སྨྲས་སོ། །
1KI 13:33 དོན་དེའི་རྗེས་སུ་ཡེ་རོབ་ཨམ་གྱིས་རང་གི་སྤྱོད་པ་ངན་པའི་ལམ་མ་སྤངས་ཏེ། སླར་ཡང་སྐྱེ་བོ་ཕལ་བ་རྣམས་མཐོ་གླིང་གི་མཆོད་དཔོན་དུ་བསྐོས་ཤིང་། འདོད་མོས་ཅན་རྣམས་ཁོས་དམ་པར་བྱས་ནས་མཐོ་གླིང་གི་མཆོད་དཔོན་དུ་བསྐོས་སོ། །
1KI 13:34 དོན་དེ་ནི་ཡེ་རོབ་ཨམ་ཁྱིམ་རྒྱུད་ཀྱི་སྡིག་པའི་རྒྱུ་རུ་གྱུར་ནས། དེ་དག་ནི་ས་སྟེང་ནས་མེད་པ་དང་སྟོང་པར་གྱུར་ཏོ། །
1KI 14:1 སྐབས་དེར་ཡེ་རོབ་ཨམ་གྱི་བུ་ཨ་བི་ཡཱ་ཞེས་པ་ན་བར་གྱུར་པ་དང་།
1KI 14:2 ཡེ་རོབ་ཨམ་གྱིས་རང་གི་ཆུང་མ་ལ་ཡར་ལོངས་ཤིག ཁྱོད་ཡེ་རོབ་ཨམ་གྱི་ཆུང་མ་ཡིན་པ་གཞན་ལ་ཤེས་སུ་མི་འཇུག་པའི་ཕྱིར་དུ། རང་གི་གྱོན་ཆས་བསྒྱུར་ཏེ་ཞི་ལོ་གྲོང་ཁྱེར་དུ་སོང་དང་། དེ་རུ་ང་ལ་ཁྱོད་ནི་མི་འདི་རྣམས་ཀྱི་རྒྱལ་པོར་འགྱུར་རོ་ཞེས་གསུངས་པའི་ལུང་སྟོན་པ་ཨ་ཧི་ཡཱ་ཡོད་དེ།
1KI 14:3 ཁྱོད་ཀྱིས་བག་ལེབ་བཅུ་དང་། སྣུམ་འཁུར་འགའ་རེ་དང་། སྦྲང་རྩི་བུམ་པ་གང་བཅས་ཁྱེར་ཏེ་ཁོའི་མདུན་དུ་སོང་དང་། ཁོས་ཕྲུ་གུ་ལ་ཅི་འབྱུང་བར་འགྱུར་བ་དེ་ཁྱོད་ལ་འཆད་པར་འགྱུར་རོ་ཞེས་སྨྲས་པ་ལ།
1KI 14:4 ཡེ་རོབ་ཨམ་གྱི་ཆུང་མས་དེ་བཞིན་བྱས་ཏེ་ཞི་ལོ་རུ་སོང་བ་དང་། ཨ་ཧི་ཡཱའི་ཁྱིམ་དུ་སླེབས་པ་རེད། ཨ་ཧི་ཡཱ་ནི་ལོ་ན་རྒས་པའི་རྐྱེན་གྱིས་མིག་གིས་མཐོང་བར་མ་ནུས།
1KI 14:5 དཀོན་མཆོག་ཡ་ཝཱེས་ཨ་ཧི་ཡཱ་ལ་འདི་སྐད་དུ། ཡེ་རོབ་ཨམ་གྱི་ཆུང་མ་རང་གི་བུ་ལ་བྱུང་བའི་ནད་དེའི་ཆེད་དུ་དོན་ཞིག་འདྲི་བར་ཁྱོད་ཀྱི་རྩར་འོང་གིན་འདུག ཁྱོད་ཀྱིས་མོ་ལ་འདི་བཞིན་དེ་བཞིན་སྨྲོས་ཤིག ཅི་ལ་ཞེ་ན། ཁོ་མོ་ནང་དུ་སླེབས་ཚེ་བུད་མེད་གཞན་ཞིག་ཏུ་བརྫུས་པར་བྱའོ་ཞེས་གསུངས་སོ། །
1KI 14:6 དེ་ནས་ཨ་ཧི་ཡཱས་མོ་སྒོ་འགྲམ་དུ་སླེབས་པའི་གོམ་སྒྲ་ཐོས་པ་ན། ཁོ་ན་རེ། ཡེ་རོབ་ཨམ་གྱི་ཆུང་མ་ནང་དུ་ཤོག་ཅིག ཁྱོད་རང་གཞན་ཞིག་ལ་བརྫུས་དོན་ཅི་ཡིན་ནམ། ང་ཁྱོད་ལ་གཏམ་ངན་ཞིག་སྒྲོག་ཏུ་མངགས་པ་ཡིན།
1KI 14:7 ད་ནི་སོང་ལ་ཡེ་རོབ་ཨམ་ལ་འདི་ལྟར་སྨྲོས་ཤིག ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། བདག་གིས་ཁྱོད་རང་མི་རྣམས་ཀྱི་ཁྲོད་ནས་ཡར་འཐེན་ཏེ། བདག་གི་འབངས་མི་ཡེས་ར་ཨེལ་གྱི་རྒྱལ་པོར་བསྐོས་པ་ཡིན།
1KI 14:8 དཱ་བིད་ཀྱི་རྒྱུད་ལས་རྒྱལ་སྲིད་བླངས་ནས་ཁྱོད་ལ་སྤྲད་ནའང་། ཁྱོད་ནི་བདག་གི་ཞབས་ཕྱི་དཱ་བིད་དང་འདྲ་བར་གྱུར་མ་སོང་། ཁོས་བདག་གི་བཀའ་རྒྱ་རྣམས་བསྲུངས་པ་དང་། རྩེ་གཅིག་གིས་ངའི་རྗེས་སུ་འབྲངས་ཤིང་། བདག་གི་མིག་ལམ་དུ་ལེགས་པོ་གང་ཡིན་དེ་སྤྱད་དོ། །
1KI 14:9 འོན་ཀྱང་ཁྱོད་ཀྱིས་རང་གི་སྔོན་མ་ཐམས་ཅད་ལས་ཀྱང་ལྷག་པར་ལོག་སྤྱོད་བྱས་ཤིང་། ཡང་གཞན་པའི་ལྷ་དང་བླུགས་སྐུ་རྣམས་བཟོས་ཏེ་བདག་ལ་ཁོང་ཁྲོ་བསླངས་པ་དང་བདག་ནི་རྒྱབ་ཏུ་གཡུགས་སོ། །
1KI 14:10 དེ་བས་ན། ལྟོས་དང་། བདག་གིས་ཡེ་རོབ་ཨམ་གྱི་ཁྱིམ་རྒྱུད་ལ་ཆག་སྒོ་འབེབ་བོ། །ཡེ་རོབ་ཨམ་གྱི་ཁྱིམ་རྒྱུད་ལས་སྐྱེས་པ་ ཐམས་ཅད་དེ། ཡེས་ར་ཨེལ་དུ་རང་དབང་ཅན་ནམ་ཡང་ན་རང་དབང་མེད་པ་གང་ཡིན་ཡང་ཚང་མ་ཚར་གཅོད་བྱ་ཞིང་ཐམས་ཅད་རྩ་མེད་འགྲོ་བའི་བར་དུ། ཡེ་རོབ་ཨམ་གྱི་ཁྱིམ་རྒྱུད་ལྷག་མ་རྣམས་ཀྱང་ལྕི་བ་ལྟར་ཕྱག་པར་བྱའོ། །
1KI 14:11 ཡེ་རོབ་ཨམ་ལ་གཏོགས་པའི་མི་རྣམས་ལས་གྲོང་ཁྱེར་དུ་ཤི་བ་རྣམས་ནི་ཁྱིས་འཆའ་བ་དང་། ས་སྟོང་དུ་ཤི་བ་རྣམས་ནི་ནམ་མཁའི་བྱ་ཡིས་བཟའ་བར་འགྱུར་རོ། །ཅིའི་ཕྱིར་ཞེ་ན། དཀོན་མཆོག་ཡ་ཝཱེས་དེ་ལྟར་གསུངས་པའི་ཕྱིར་རོ། །
1KI 14:12 དེ་བས་ཁྱོད་རང་ཡར་ལོངས་ལ་རང་གི་ཁྱིམ་དུ་སོང་ཞིག ཁྱོད་ཀྱི་རྐང་པ་གྲོང་ཁྱེར་གྱི་ནང་དུ་སྤོས་པ་ཙམ་དུ་བུ་ནི་འཆི་བར་འགྱུར་རོ། །
1KI 14:13 ཡང་ཡེས་ར་ཨེལ་ཐམས་ཅད་ཀྱིས་ཁོའི་ཆེད་དུ་མྱ་ངན་བྱེད་ཅིང་ཁོ་དུར་ལ་སྦ་བར་བྱེད་པ་དང་། ཡེས་ར་ཨེལ་གྱི་དཀོན་མཆོག་ཡ་ཝཱེའི་དྲུང་དུ། ཡེ་རོབ་ཨམ་གྱི་ཁྱིམ་ལས་ཁོ་འབའ་ཞིག་གི་ནང་དུ་བཟང་པོ་རྙེད་པས། ཡེ་རོབ་ཨམ་ལ་གཏོགས་པའི་མི་རྣམས་ལས་ཁོ་རང་གཅིག་པུ་དུར་ལ་སྦ་བར་འགྱུར་རོ། །
1KI 14:14 དཀོན་མཆོག་ཡ་ཝཱེས་ཉིད་ཀྱི་ཕྱིར་དུ་ཡེས་ར་ཨེལ་ལ་རྒྱལ་པོ་ཞིག་བསྐོ་བར་བྱ་སྟེ། ཁོས་ཉིན་མོ་དེར་ཡེ་རོབ་ཨམ་གྱི་རིགས་རྒྱུད་མེད་པར་གཏོང་བར་བྱ་ ཞིང་། དུས་དེ་ནི་དེ་རིང་ངམ་ད་ལྟ་ཉིད་དུའོ། །
1KI 14:15 དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་བརྡེགས་ནས་ཁོ་རྣམས་ནི་འདམ་རྩྭ་ཆུའི་ནང་དུ་གཡོ་བ་བཞིན་གཡོ་བར་འགྱུར། དཀོན་མཆོག་ཡ་ཝཱེས་ཡེས་ར་ཨེལ་གྱི་ཕ་མེས་ལ་གནང་བའི་ཡུལ་ཁམས་ཡིད་དུ་འོང་བ་འདི་ནས་ཡེས་ར་ཨེལ་པ་རྣམས་རྩ་ནས་བཏོན་ཏེ། ཕི་རཱད་ཆུ་བོའི་ཕ་རོལ་ཏུ་གཏོར་བར་བྱའོ། །ཅིའི་ཕྱིར་ཞེ་ན། དེ་དག་གིས་ལྷ་མོ་ཨ་ཤེ་རཱ་ཡི་སྐུ་བཟོས་ནས་དཀོན་མཆོག་ཡ་ཝཱེའི་ཐུགས་དཀྲུགས་པའི་ཕྱིར་རོ། །
1KI 14:16 ཡེ་རོབ་ཨམ་རང་གིས་བྱས་པའི་སྡིག་པ་དང་། ཁོས་ཡེས་ར་ཨེལ་ལ་བྱེད་དུ་བཅུག་པའི་སྡིག་པ་ཡི་རྐྱེན་གྱིས་དཀོན་མཆོག་ཡ་ཝཱེས་ཡེས་ར་ཨེལ་སྤང་བར་བྱའོ་ཞེས་སྦྲན་ཏོ། །
1KI 14:17 དེ་ནས་ཡེ་རོབ་ཨམ་གྱི་ཆུང་མ་ཡར་ལངས་ནས་ཕྱིར་ཐིར་ཙ་རུ་ཕྱིན་ཏེ་ཁྱིམ་གྱི་སྒོ་ཐེམ་ལ་སླེབས་མ་ཐག་ཏུ་བུ་དེ་ཤིའོ། །
1KI 14:18 དེར་དཀོན་མཆོག་ཡ་ཝཱེས་ཉིད་ཀྱི་ཞབས་ཕྱི་སྟེ་ལུང་སྟོན་པ་ཨ་ཧི་ཡཱ་བརྒྱུད་ནས་གསུངས་པའི་བཀའ་བཞིན་དུ། ཡེས་ར་ཨེལ་པ་རྣམས་ཀྱི་མི་ཚོགས་ཀྱིས་ཁོ་དུར་ལ་སྦས་ཤིང་ཁོའི་དོན་དུ་མྱ་ངན་བྱས་སོ། །
1KI 14:19 ཡང་ཡེ་རོབ་ཨམ་གྱི་བྱས་རྗེས་གཞན་རྣམས་དང་། ཁོས་ཇི་ལྟར་དམག་བརྒྱབ་ནས་སྲིད་བསྐྱངས་པ་བཅས་ནི། ཡེས་ར་ཨེལ་གྱི་རྒྱལ་རབས་ཀྱི་མདོ་ལ་བཀོད་ཡོད་པ་དང་།
1KI 14:20 ཡེ་རོབ་ཨམ་གྱིས་ལོ་ཉེར་གཉིས་ཀྱི་རིང་ལ་སྲིད་བསྐྱངས་པ་དང་། དེ་ནས་ཁོ་ནི་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་ཤིང་། ཁོའི་བུ་ནཱ་དབ་ཀྱིས་དེའི་ཚབ་ཏུ་སྲིད་བསྐྱངས་པའོ། །
1KI 14:21 ཡང་སོ་ལོ་མོན་གྱི་སྲས་རེ་ཧབ་ཨམ་གྱིས་ཡ་ཧུ་དཱ་ཡུལ་ལ་སྲིད་བྱས་པ་དང་། ཁོ་རང་རྒྱལ་པོར་སྡོད་དུས་ལོ་ཞེ་གཅིག་ཡིན། རེ་ཧབ་ཨམ་གྱིས་ལོ་བཅུ་བདུན་གྱི་རིང་ལ་ཡེ་རུ་སཱ་ལེམ་གྲོང་ཁྱེར་དུ་སྲིད་བསྐྱངས་ཤིང་། ཡེ་རུ་སཱ་ལེམ་གྲོང་ཁྱེར་ནི་དཀོན་མཆོག་ཡ་ཝཱེས་རང་ཉིད་ཀྱི་མཚན་འཇོག་པའི་ཕྱིར་དུ་ཡེས་ར་ཨེལ་གྱི་ཚོ་པ་ཀུན་ལས་བདམས་པ་ཡིན། རེ་ཧབ་ཨམ་གྱི་མ་ནི་ཨམ་མོན་པ་ཡིན་ཞིང་མིང་ལ་ནཱ་མཱ་ཞེས་བྱའོ། །
1KI 14:22 ཡ་ཧུ་དཱ་པས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ཅིང་། དེ་དག་གིས་སྡིག་ཉེས་བསགས་ཏེ་རང་གི་ཕ་མེས་ལས་ཀྱང་ལྷག་པར་ཁོང་གི་ཕྲག་དོག་དང་ཐུགས་ཁྲོ་བསྐྱེད་དོ། །
1KI 14:23 དེ་དག་གིས་རང་གི་ཕྱིར་དུ་མཐོ་གླིང་རེ་རེའི་སྟེང་དང་། ལྗོན་ཤིང་རེ་རེའི་འོག་ཏུ་མཆོད་ཁྲི་རྣམས་བརྩིགས་ཤིང་། རྡོ་སྐུ་དང་ལྷ་མོ་ཨ་ཤེ་རཱའི་སྐུ་རྣམས་བཞེངས་པ་དང་།
1KI 14:24 རྒྱལ་ཁམས་ནང་རོལ་དུ་མཆོད་གཤོམ་གྱི་ཆོས་རྫུ་གཞང་འཚོང་ཡང་ཡོད་དེ། སྔར་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་བཏོན་པའི་མི་རིགས་གཞན་པས་ཅི་བྱས་པ་བཞིན་དུ་ཡ་ཧུ་དཱ་པ་རྣམས་ཀྱིས་སྐྱུག་བྲོ་བའི་ལས་བྱས་སོ། །
1KI 14:25 རྒྱལ་པོ་རེ་ཧབ་ཨམ་གྱི་སྲིད་ལོ་ལྔ་པར། ཨེ་ཅིབ་ཀྱི་རྒྱལ་པོ་ཤི་ཤག་གིས་ཡེ་རུ་སཱ་ལེམ་དུ་དམག་དྲངས་པ་དང་།
1KI 14:26 ཁོས་དཀོན་མཆོག་ཡ་ཝཱེའི་མཆོད་ཁང་གི་དཀོར་མཛོད་དང་། རྒྱལ་པོའི་ཕོ་བྲང་གི་གཏེར་མཛོད་རྣམས་བཅོམ་སྟེ་གང་ཡོད་པ་ཐམས་ཅད་ཁྱེར་བ་དང་། སོ་ལོ་མོན་གྱིས་བཟོས་པའི་གསེར་གྱི་ཕུབ་རྣམས་ཀྱང་ཕྲོགས་ནས་ཁྱེར་བས།
1KI 14:27 རེ་ཧབ་ཨམ་གྱིས་གསེར་ཕུབ་ཀྱི་ཚབ་ཏུ་ལི་ཡི་ཕུབ་བཟོས་ནས། རྒྱལ་པོའི་ཕོ་བྲང་གི་སྐུ་སྲུང་དཔོན་པོ་རྣམས་ཀྱི་ལག་ཏུ་བཅོལ།
1KI 14:28 ཐེངས་རེར་རྒྱལ་པོ་དཀོན་མཆོག་ཡ་ཝཱེའི་མཆོད་ཁང་དུ་འགྲོ་དུས་སུ། སྐུ་སྲུང་པ་རྣམས་འོངས་ནས་ཕུབ་དེ་དག་ཁྱེར་ཅིང་། ཕྱིས་སུ་སླར་སྐུ་སྲུང་པའི་ཁང་པར་འཇོག་པ་ཡིན།
1KI 14:29 རེ་ཧབ་ཨམ་གྱི་བྱས་རྗེས་གཞན་རྣམས་དང་། ཁོས་ཅི་བྱས་པ་ཐམས་ཅད་ཡ་ཧུ་དཱའི་རྒྱལ་རབས་ཀྱི་མདོ་ལ་བཀོད་ཡོད་པ་མ་ཡིན་ནམ།
1KI 14:30 རེ་ཧབ་ཨམ་དང་ཡེ་རོབ་ཨམ་གཉིས་ཀྱི་བར་ལ་ནམ་རྒྱུན་དམག་འཁྲུག་བྱུང་བ་དང་།
1KI 14:31 རེ་ཧབ་ཨམ་ནི་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་ནས་དཱ་བིད་གྲོང་ཁྱེར་དུ་རང་གི་ཕ་མེས་རྣམས་ཀྱི་ཁྲོད་དུ་དུར་ལ་སྦས་པ་དང་། ཁོའི་མ་ནི་ཨམ་མོན་པ་ཡིན་ལ་མིང་དུ་ནཱ་མཱ་ཞེས་ཟེར། ཁོའི་བུ་ཨ་བི་ཡཱས་ ཁོའི་ཚབ་ཏུ་རྒྱལ་སྲིད་བཟུང་ངོ་། །
1KI 15:1 ནེ་བཱད་ཀྱི་བུ་ཡེ་རོབ་ཨམ་གྱི་སྲིད་ལོ་བཅོ་བརྒྱད་པར། ཨ་བི་ཡཱ་ནི་ཡ་ཧུ་དཱའི་རྒྱལ་པོར་བསྡད།
1KI 15:2 ཁོས་ཡེ་རུ་སཱ་ལེམ་དུ་ལོ་གསུམ་གྱི་རིང་ལ་རྒྱལ་སྲིད་བསྐྱངས་པ་དང་། ཁོའི་མ་ཡི་མིང་ལ་མ་ཨ་ཀཱ་ཟེར་ཞིང་མོ་ནི་ཨ་བི་ཤ་ལོམ་གྱི་བུ་མོ་ཡིན།
1KI 15:3 ཨ་བི་ཡཱས་སྔར་རང་གི་ཕ་ཡིས་བྱས་པའི་སྡིག་ཉེས་མཐའ་དག་བྱས་ཏེ། ཁོའི་སེམས་ནི་རང་གི་མེས་པོ་དཱ་བིད་ཀྱི་སེམས་དང་འདྲ་བར་དཀོན་མཆོག་ཡ་ཝཱེ་ལ་ཡོངས་སུ་ཕུལ་མེད་དོ། །
1KI 15:4 འོན་ཀྱང་དཱ་བིད་ཀྱི་རྐྱེན་གྱིས། ཨ་བི་ཡཱའི་དཀོན་མཆོག་ཡ་ཝཱེས་ཡེ་རུ་སཱ་ལེམ་དུ་ཁོ་ལ་སྒྲོན་མེ་གནང་སྟེ། ཁོའི་བུ་ཁོའི་ཚབ་ཏུ་རྒྱལ་པོར་བསྐོས་པ་དང་ཡེ་རུ་སཱ་ལེམ་གྲོང་ཁྱེར་བརྟན་པོར་མཛད་པ་རེད།
1KI 15:5 ཅིའི་ཕྱིར་ཞེ་ན། དཱ་བིད་ཀྱིས་དཀོན་མཆོག་ཡ་ཝཱེའི་སྤྱན་ལམ་དུ་ལེགས་པོ་གང་ཡིན་དེ་སྤྱད་ནས། ཧེད་པ་ཨུ་རི་ཡཱའི་དོན་དེ་སྐོར་ནས་མ་གཏོགས་ཁོང་ནི་ཚེ་གང་པོར་དཀོན་མཆོག་ཡ་ཝཱེའི་བཀའ་གང་ལའང་མ་འགལ་ལོ། །
1KI 15:6 ཨ་བི་ཡཱའི་མི་ཚེ་གང་པོར་རེ་ཧབ་ཨམ་དང་ཡེ་རོབ་ཨམ་གཉིས་ཀྱི་བར་ལ་རྒྱུན་དུ་དམག་འཁྲུག་བྱུང་།
1KI 15:7 ཨ་བི་ཡཱའི་བྱས་རྗེས་གཞན་རྣམས་དང་ཁོས་ཅི་བྱས་པ་ཐམས་ཅད་ནི་ཡ་ཧུ་དཱའི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ། ཨ་བི་ཡཱ་དང་ཡེ་རོབ་ཨམ་གཉིས་ཀྱི་བར་ལའང་རྒྱུན་དུ་དམག་འཁྲུག་བྱུང་བ་ཡིན།
1KI 15:8 དེ་ནས་ཨ་བི་ཡཱ་ནི་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་པ་དང་། ཁོ་དཱ་བིད་ཀྱི་གྲོང་ཁྱེར་དུ་དུར་ལ་སྦས་ཤིང་། ཁོའི་བུ་ཨ་སཱ་ཡིས་ཁོའི་ཚབ་ཏུ་རྒྱལ་སྲིད་བཟུང་བའོ། །
1KI 15:9 ཡེས་ར་ཨེལ་གྱི་རྒྱལ་པོ་ཡེ་རོབ་ཨམ་གྱི་སྲིད་ལོ་ཉི་ཤུ་པར་ཨ་སཱ་ནི་ཡ་ཧུ་དཱའི་རྒྱལ་པོར་བསྡད།
1KI 15:10 ཁོང་གིས་ཡེ་རུ་སཱ་ལེམ་དུ་ལོ་ཞེ་གཅིག་གི་རིང་ལ་རྒྱལ་སྲིད་བསྐྱངས། ཨ་བི་ཤ་ལོམ་གྱི་བུ་མོ་མཱ་ཨ་ཀཱ་བྱ་བ་ནི་ཁོའི་རྨོ་མོ་ཡིན་ནོ། །
1KI 15:11 ཨ་སཱ་ཡིས་རང་གི་ཡབ་མེས་དཱ་བིད་དང་འདྲ་བར་དཀོན་མཆོག་ཡ་ཝཱེའི་སྤྱན་ལམ་དུ་ལེགས་པོ་གང་ཡིན་དེ་སྤྱད་ནས།
1KI 15:12 ཁོང་གིས་མཆོད་གཤོམ་གྱི་ཆོས་རྫུ་གཞང་འཚོང་རྣམས་ཡུལ་དེ་ནས་བཏོན་ཞིང་། ཕ་མེས་རྣམས་ཀྱིས་བཟོས་པའི་སྐུ་འདྲ་ཐམས་ཅད་ཀྱང་མེད་པར་བྱས།
1KI 15:13 དེར་མ་ཟད་རང་གི་རྨོ་མོ་མཱ་ཨ་ཀཱ་ཞེས་པ་རྒྱལ་ཡུམ་གྱི་གོ་ས་ལས་ཕབ། ཅིའི་ཕྱིར་ཞེ་ན། དེས་ཨ་ཤེ་རཱ་ཡི་སྐུ་འཇིགས་སུ་རུང་བ་ཞིག་བཞེངས་པས་སོ། །ཨ་སཱས་སྐུ་འཇིགས་སུ་རུང་བ་དེ་བཅག་ནས་ཀིད་རོན་ཆུ་བོའི་འགྲམ་དུ་མེར་བསྲེགས་སོ། །
1KI 15:14 འོན་ཀྱང་མཐོ་གླིང་རྣམས་ད་དུང་མ་བཤིག་པར་ལུས་མོད། ཨ་སཱས་ཚེ་གང་པོ་དཀོན་མཆོག་ཡ་ཝཱེ་ལ་ཡོངས་སུ་ཕུལ་ཏོ། །
1KI 15:15 ཨ་སཱས་རང་གི་ཕ་ཡིས་དམ་པར་བསྔོས་པ་དང་། རང་གིས་དམ་པར་བསྔོས་པའི་གསེར་དངུལ་དང་། སྣོད་ཆས་ཐམས་ཅད་དཀོན་མཆོག་ཡ་ཝཱེའི་མཆོད་ཁང་ནང་དུ་བཅུག་པ་ཡིན།
1KI 15:16 ཡང་ཨ་སཱ་དང་ཡེས་ར་ཨེལ་གྱི་རྒྱལ་པོ་པཱ་ཤ་གཉིས་ཀྱི་བར་ལ་མི་ཚེ་གང་པོར་དམག་འཁྲུག་བྱུང་ངོ་། །
1KI 15:17 ཡེས་ར་ཨེལ་གྱི་རྒྱལ་པོ་པཱ་ཤ་ཡིས་ཡར་ཡ་ཧུ་དཱ་ལ་དམག་དྲངས་ནས། མི་སུ་ཡིན་ཡང་ཡ་ཧུ་དཱའི་རྒྱལ་པོ་ཨ་སཱའི་དྲུང་དུ་འགྲོ་འོང་བྱེད་པ་གཅོད་པའི་ཕྱིར་དུ། ཁོས་རཱ་མ་བྱ་བ་བརྩིགས་སོ། །
1KI 15:18 དེ་ནས་ཨ་སཱ་ཡིས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་གི་གཏེར་མཛོད་ནས་ལུས་པའི་གསེར་དངུལ་ཕྱུང་སྟེ། རང་གི་ཞབས་ཕྱི་རྣམས་ཀྱི་ལག་ཏུ་སྤྲད་པ་དང་། དེ་རྣམས་དཱ་མེ་སེག་ཏུ་གནས་པའི་ཨ་རམ་གྱི་རྒྱལ་པོ་པེན་ཧ་དཱད་ཀྱི་དྲུང་དུ་བརྫངས། ཡང་དེ་ནི་ཏབ་རིམ་མོན་གྱི་བུ་དང་། ཧེས་ཡོན་གྱི་ཚ་བོ་ཡིན་ནོ། །ཨ་སཱས་འདི་ལྟར།
1KI 15:19 གཟིགས་དང་། ཁྱེད་ཀྱི་ཕ་དང་ངའི་ཕ་གཉིས་ཀྱི་བར་དུ་སྔར་ཆད་དོན་བཞག་ཡོད་པས། འུ་གཉིས་ཀྱིས་ཀྱང་ཆད་དོན་འཇོག་དགོས་ཏེ། ད་ལྟ་ངས་ཁྱེད་ལ་གསེར་དང་དངུལ་ཕྱག་རྟེན་དུ་བསྐུར་བ་ཡིན། ཡེས་ར་ཨེལ་གྱི་རྒྱལ་པོ་པཱ་ཤ་ངའི་མདུན་ནས་འགྲོ་བའི་ཕྱིར། ཁྱེད་ཀྱིས་དེར་བཞག་པའི་ཆད་དོན་དེ་སྤང་བར་མཛོད་ཅིག་ཅེས་སྨྲས་པས།
1KI 15:20 པེན་ཧ་དཱད་ཀྱིས་རྒྱལ་པོ་ཨ་སཱའི་གཏམ་ལ་མཉན་ནས། དམག་དཔོན་རྣམས་ཡེས་ར་ཨེལ་གྱི་གྲོང་ཁྱེར་རྣམས་སུ་བཏང་ནས། དེ་དག་གིས་ཨི་ཡོན་དང་། དཱན་དང་། ཨ་བེལ་པེད་མ་ཨ་ཀཱ་དང་། ཀིན་ནེ་རོད་ཡུལ་ཀུན་དང་། ནཱབ་ཐ་ལི་བཅས་ཡུལ་ཐམས་ཅད་ཕམ་པར་བྱས་སོ། །
1KI 15:21 པཱ་ཤ་ཡིས་གཏམ་དེ་ཐོས་པ་དང་། རཱ་མ་བརྩིག་མཚམས་བཞག་ཅིང་སྔར་བཞིན་ཐིར་ཙ་བྱ་བར་བསྡད་དོ། །
1KI 15:22 དེ་ནས་རྒྱལ་པོ་ཨ་སཱ་ཡིས་ཡ་ཧུ་དཱ་པ་གཅིག་ཀྱང་མ་ལུས་པར་ཀུན་ལ་སྤྱི་བསྒྲགས་བྱས་པ་དང་། དེ་དག་གིས་པཱ་ཤས་རཱ་མ་རྩིག་བྱེད་ཀྱི་རྡོ་དང་གདུང་མ་རྣམས་སྤར་ནས། རྒྱལ་པོ་ཨ་སཱས་རྒྱུ་ཆ་དེ་དག་གིས་པེན་ཡཱ་མེན་ཡུལ་གྱི་གེ་བཱ་དང་མཱས་ཟི་ཕཱ་གཉིས་བརྩིགས་སོ། །
1KI 15:23 ཨ་སཱ་ཡི་བྱས་རྗེས་གཞན་རྣམས་དང་། ཁོང་གི་དཔའ་རྩལ་དང་ཅི་བྱས་པ་ཐམས་ཅད་དང་། ཁོང་གིས་བརྩིགས་པའི་གྲོང་ཁྱེར་བཅས་ནི་ཡ་ཧུ་དཱའི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ། འོན་ཀྱང་ཁོང་ལོ་ན་རྒས་པའི་དུས་སུ་རྐང་པ་ན་བར་གྱུར་ཏོ། །
1KI 15:24 དེ་ནས་ཨ་སཱ་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་པ་དང་། ཁོང་གི་ཡབ་མེས་དཱ་བིད་ཀྱི་གྲོང་ཁྱེར་དུ་རང་གི་ཕ་མེས་རྣམས་ཀྱི་ཁྲོད་དུར་ལ་སྦས། ཁོང་གི་བུ་ཡེ་ཧོ་ཤ་ཕད་ཀྱིས་ཁོང་གི་ཚབ་ཏུ་རྒྱལ་སྲིད་བཟུང་ངོ་། །
1KI 15:25 ཡ་ཧུ་དཱའི་རྒྱལ་པོ་ཨ་སཱ་ཡིས་རྒྱལ་སྲིད་བསྐྱངས་པའི་ལོ་གཉིས་པར། ཡེ་རོབ་ཨམ་གྱི་བུ་ནཱ་དབ་ནི་ཡེས་ར་ཨེལ་གྱི་རྒྱལ་པོར་བསྡད་པ་དང་། ཡེས་ར་ཨེལ་ལ་ལོ་གཉིས་ཀྱི་རིང་ལ་སྲིད་བྱས།
1KI 15:26 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ནས། རང་གི་ཕ་ཡི་ལམ་དུ་འགྲུལ་ཞིང་། ཁོའི་ཕ་ཡིས་ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་སྡིག་པ་དེ་བྱས་སོ། །
1KI 15:27 ཡེས་སི་ཀཱར་གྱི་ཁྱིམ་རྒྱུད་ཀྱི་ཨ་ཧི་ཡཱའི་བུ་པཱ་ཤ་ཡིས་ནཱ་དབ་ལ་ལྐོག་གཤོམ་བྱས་ཏེ། ནཱ་དབ་དང་ཡེས་ར་ཨེལ་པ་རྣམས་ཀྱིས་ཕེ་ལེ་ཤེད་ཡུལ་གྱི་གིབ་བེ་ཏོན་བསྐོར་ནས་དེར་དཔུང་འཇུག་བྱེད་པའི་དུས་སུ། པཱ་ཤ་ཡིས་ནཱ་དབ་ཁོ་རང་གིབ་བེ་ཏོན་དུ་བསད་པ་རེད།
1KI 15:28 དེ་ལྟར་ཡ་ཧུ་དཱའི་རྒྱལ་པོ་ཨ་སཱ་ཡི་སྲིད་ལོ་གསུམ་པར། པཱ་ཤ་ཡིས་ནཱ་དབ་བསད་ནས་ཁོའི་ཚབ་ཏུ་རྒྱལ་སྲིད་བཟུང་ངོ་། །
1KI 15:29 པཱ་ཤ་རྒྱལ་པོར་བསྡད་མ་ཐག་ཏུ། ཡེ་རོབ་ཨམ་གྱི་ཁྱིམ་གང་པོ་བསད་ནས། དཀོན་མཆོག་ཡ་ཝཱེས་ཉིད་ཀྱི་ཞབས་ཕྱི་སྟེ་ཞི་ལོ་པ་ཨ་ཧི་ཡཱ་བརྒྱུད་ནས་གསུངས་པ་བཞིན་དུ། དབུགས་ཡོད་པ་ཐམས་ཅད་ལས་གཅིག་ཀྱང་མ་ལུས་པར་མེད་པར་བཏང་ངོ་། །
1KI 15:30 ཅིའི་ཕྱིར་ཞེ་ན། ཡེ་རོབ་ཨམ་རང་གིས་བྱས་པའི་སྡིག་ཉེས་དང་། ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་སྡིག་པ་དེ་དང་། ཡང་ཁོས་ཡེས་ར་ཨེལ་གྱི་དཀོན་མཆོག་ཡ་ཝཱེ་ཐུགས་ཁྲོ་རུ་བཅུག་པའི་རྐྱེན་གྱིས་བྱུང་བའོ། །
1KI 15:31 ཡང་ནཱ་དབ་ཀྱི་བྱས་རྗེས་གཞན་རྣམས་དང་། ཁོས་ཅི་བྱས་པ་ཐམས་ཅད་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 15:32 ཨ་སཱ་དང་ཡེས་ར་ཨེལ་གྱི་རྒྱལ་པོ་པཱ་ཤ་གཉིས་ཀྱི་བར་ལ་ཚེ་གང་པོར་དམག་འཁྲུག་བྱུང་བ་ཡིན་ནོ། །
1KI 15:33 ཡ་ཧུ་དཱའི་རྒྱལ་པོ་ཨ་སཱ་ཡི་སྲིད་ལོ་གསུམ་པར། ཨ་ཧི་ཡཱ་ཡི་བུ་པཱ་ཤ་ནི་ཐིར་ཙ་རུ་ཡེས་ར་ཨེལ་ཡོངས་ཀྱི་རྒྱལ་པོར་བསྡད་ཅིང་། ལོ་ཉེར་བཞིའི་རིང་དུ་རྒྱལ་སྲིད་བཟུང་བ་དང་།
1KI 15:34 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ནས། ཡེ་རོབ་ཨམ་གྱི་ལམ་དུ་འགྲུལ་ཞིང་། ཡེ་རོབ་ཨམ་གྱིས་ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་སྡིག་པ་དེ་བྱས་སོ། །
1KI 16:1 དེ་ནས་དཀོན་མཆོག་ཡ་ཝཱེའི་བཀའ་ནི་ཧ་ནཱ་ནེ་ཡི་བུ་ཡེ་ཧུ་ཞེས་པ་ལ་བྱུང་སྟེ་པཱ་ཤ་ལ་བཀའ་བཀྱོན་མཛད་ནས་འདི་སྐད་དུ།
1KI 16:2 ངས་ཁྱོད་ཐལ་རྡུལ་ནས་ཡར་བཀྱགས་ཏེ། འབངས་མི་ཡེས་ར་ཨེལ་གྱི་འགོ་དཔོན་བྱེད་དུ་བསྐོས་ནའང་། ཁྱོད་ནི་ཡེ་རོབ་ཨམ་གྱི་སྤྱོད་ལམ་དུ་སོང་ཞིང་བདག་གི་འབངས་མི་ཡེས་ར་ཨེལ་ལ་སྡིག་པ་བྱེད་དུ་བཅུག་ནས། དེ་རྣམས་ཀྱི་སྡིག་ཉེས་ཀྱིས་བདག་ལ་ཁོང་ཁྲོ་བསླངས།
1KI 16:3 ལྟོས་དང་། ངས་པཱ་ཤ་དང་ཁོའི་ཁྱིམ་ཚར་གཅོད་བྱེད་ཅིང་། ཁྱོད་ཀྱི་ཁྱིམ་ནི་ནེ་བཱད་ཀྱི་བུ་ཡེ་རོབ་ཨམ་གྱི་ཁྱིམ་དང་འདྲ་བར་བྱེད་པ་དང་།
1KI 16:4 པཱ་ཤ་ཡི་ཁྱིམ་ལས་སུ་ཞིག་གྲོང་ཁྱེར་དུ་ཤི་ན་དེ་ནི་ཁྱི་ཡིས་འཆའ་བ་དང་། སུ་ཞིག་ཐང་དུ་ཤི་ན་དེ་ནི་ནམ་མཁའི་བྱ་ཡིས་བཟའ་བར་འགྱུར་ཞེས་གསུངས་སོ། །
1KI 16:5 ཡང་པཱ་ཤ་ཡི་བྱས་རྗེས་གཞན་རྣམས་དང་། ཁོས་ཅི་བྱས་པ་དང་། ཁོའི་དཔའ་རྩལ་ཐམས་ཅད་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 16:6 དེ་ནས་པཱ་ཤ་རང་གི་ཕ་མེས་རྣམས་དང་མཉམ་དུ་གཟིམས་པ་དང་། ཐིར་ཙ་རུ་དུར་ལ་སྦས། ཡང་ཁོའི་བུ་ཨེ་ལཱ་ཡིས་ཁོའི་ཚབ་ཏུ་རྒྱལ་སྲིད་བཟུང་ངོ་། །
1KI 16:7 གཞན་ཡང་། ཧ་ནཱ་ནེའི་བུ་སྟེ་ལུང་སྟོན་པ་ཡེ་ཧུ་བརྒྱུད་ནས་དཀོན་མཆོག་ཡ་ཝཱེས་པཱ་ཤ་དང་ཁོའི་ཁྱིམ་གྱི་སྐོར་ལ་བཀའ་གནང་ངོ་། །ཅིའི་ཕྱིར་ཞེ་ན། ཁོས་ཡེ་རོབ་ཨམ་གྱི་ཁྱིམ་དང་འདྲ་བར་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ནས། རང་གི་ལག་པས་བྱས་པའི་ལས་རྣམས་ཀྱིས་དཀོན་མཆོག་ཡ་ཝཱེའི་ཐུགས་དཀྲུགས་པ་དང་། ཡང་ཁོས་ཡེ་རོབ་ཨམ་གྱི་རིགས་རྒྱུད་བསད་པའི་ཕྱིར་རོ། །
1KI 16:8 ཡ་ཧུ་དཱའི་རྒྱལ་པོ་ཨ་སཱ་ཡི་སྲིད་ལོ་ཉེར་དྲུག་པར། པཱ་ཤ་ཡི་བུ་ཨེ་ལཱ་ནི་ཐིར་ཙ་རུ་ལོ་གཉིས་ཀྱི་རིང་ལ་ཡེས་ར་ཨེལ་གྱི་རྒྱལ་པོར་བསྡད།
1KI 16:9 འོན་ཀྱང་ཁོས་ཐིར་ཙའི་ནང་བློན་ཨར་ཙ་ཞེས་པའི་ཁྱིམ་དུ་ཆང་འཐུང་ནས་ར་བཟི་བ་དང་། ཁོའི་ཤིང་རྟ་ཕྱེད་ཀའི་དམག་དཔོན་ཟིམ་རེ་བྱ་བས་ཁོ་ལ་ལྐོག་གཤོམ་བྱས་ཏེ།
1KI 16:10 ཡ་ཧུ་དཱའི་རྒྱལ་པོ་ཨ་སཱའི་སྲིད་ལོ་ཉེར་བདུན་པར། ཟིམ་རེ་ནང་དུ་སོང་སྟེ་ཨེ་ལཱ་ལ་བརྡུངས་ནས་བསད་དེ་ཁོའི་ཚབ་ཏུ་རྒྱལ་སྲིད་བཟུང་ངོ་། །
1KI 16:11 ཟིམ་རེས་རྒྱལ་སྲིད་བཟུང་ནས་རྒྱལ་ཁྲིར་བསྡད་པ་ཙམ་གྱིས་པཱ་ཤ་ཡི་ནང་མི་ཐམས་ཅད་བསད་པ་དང་། ཐ་ན་ཁོའི་གཉེན་ཉེ་དང་གྲོགས་རྣམས་ལས་སྐྱེས་པ་གཅིག་ཀྱང་མ་ལུས་པར་བསད་དོ། །
1KI 16:12 དཀོན་མཆོག་ཡ་ཝཱེས་ལུང་སྟོན་པ་ཡེ་ཧུ་བརྒྱུད་ནས་པཱ་ཤ་ལ་བཀའ་བཀྱོན་མཛད་པའི་གསུང་བཞིན་དུ་ཟིམ་རེ་ཡིས་པཱ་ཤ་ཡི་རྒྱུད་ཐམས་ཅད་མེད་པར་བྱས་སོ། །
1KI 16:13 ཅི་ལ་དེ་ལྟར་བྱུང་ཞེ་ན། པཱ་ཤ་རང་ཉིད་དང་ཁོའི་བུ་ཨེ་ལཱ་ཡིས་བྱས་པའི་སྡིག་ཉེས་ཏེ། ཁོ་ཚོ་རང་གིས་བྱས་པའི་སྡིག་ཉེས་དང་། དེ་དག་གིས་ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་སྡིག་པ་དེ་དག་དང་། སྙིང་པོ་མེད་པའི་སྐུ་འདྲ་རྣམས་ཀྱིས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཐུགས་དཀྲུགས་པའི་ཕྱིར་རོ། །
1KI 16:14 ཨེ་ལཱ་ཡི་བྱས་རྗེས་གཞན་རྣམས་དང་ཁོས་ཅི་བྱས་པ་ཐམས་ཅད་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 16:15 ཡ་ཧུ་དཱའི་རྒྱལ་པོ་ཨ་སཱའི་སྲིད་ལོ་ཉེར་བདུན་པར། ཟིམ་རེ་ནི་ཐིར་ཙ་རུ་ཉིན་ཞག་བདུན་གྱི་རིང་ལ་རྒྱལ་པོར་བསྡད། དེའི་སྐབས་སུ་མི་ཚོགས་ཀྱིས་སྒར་ཕབ་ནས་ཕེ་ལེ་ཤེད་པའི་གྲོང་ཁྱེར་གིབ་བེ་ཏོན་བསྐོར་ནས་དེར་དཔུང་འཇུག་བྱས་སོ། །
1KI 16:16 དེ་ནས་སྒར་ཕབ་པའི་མི་ཚོགས་ཀྱིས། ཟིམ་རེ་ཡིས་ལྐོག་གཤོམ་བྱས་ཏེ་རྒྱལ་པོ་བསད་དོ་ཞེས་པ་ཐོས་པ་ཙམ་གྱིས། ཡེས་ར་ཨེལ་པ་ཐམས་ཅད་ཀྱིས་ཉིན་དེ་རང་ལ་ཁོ་ཚོའི་དམག་སྒར་གྱི་དམག་དཔོན་ཨོམ་རི་བྱ་བ་དེ་ཡེས་ར་ཨེལ་གྱི་རྒྱལ་པོར་བསྐོས་སོ། །
1KI 16:17 ཡང་ཨོམ་རི་ནི་ཡེས་ར་ཨེལ་པ་ཐམས་ཅད་དང་མཉམ་དུ་གིབ་བེ་ཏོན་ནས་ཡར་སོང་སྟེ། ཐིར་ཙ་མཐའ་ནས་བསྐོར་བ་དང་།
1KI 16:18 ཟིམ་རེ་ཡིས་གྲོང་ཁྱེར་དེ་བླངས་པ་མཐོང་ནས་རྒྱལ་པོའི་ཕོ་བྲང་གི་བཙན་རྫོང་དུ་སོང་སྟེ། རྒྱལ་པོའི་ཕོ་བྲང་མེ་ཡིས་བསྲེགས་ནས་རང་ཉིད་མེའི་ནང་དུ་ཤིའོ། །
1KI 16:19 ཅི་ལ་དེ་ལྟར་བྱུང་ཞེ་ན། ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། ཡེ་རོབ་ཨམ་གྱི་ལམ་དུ་འགྲུལ་ནས། དེས་ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་སྡིག་པ་དེའི་རྐྱེན་གྱིས་སོ། །
1KI 16:20 ཟིམ་རེ་ཡི་བྱས་རྗེས་གཞན་རྣམས་དང་། ཁོས་ལྐོག་གཤོམ་བྱས་པའི་དོན་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 16:21 དེ་ནས་ཡེས་ར་ཨེལ་པ་རྣམས་མི་མཐུན་པར་གྱུར་ཏེ་མི་ཚོགས་གཉིས་སུ་གྱེས་པ་དང་། ཕྱེད་ཀ་ནི་གེ་ནཱད་ཀྱི་བུ་ཐེབ་ནེ་རྒྱལ་པོར་བསྐོ་བའི་ཕྱིར་དེའི་རྗེས་སུ་འབྲངས་པ་དང་། ཡང་ཕྱེད་ཀ་ནི་ཨོམ་རིའི་རྗེས་སུ་འབྲངས་སོ། །
1KI 16:22 འོན་ཀྱང་ཨོམ་རིའི་རྗེས་སུ་འབྲངས་པ་རྣམས་ནི་གེ་ནཱད་ཀྱི་བུ་ཐེབ་ནེའི་རྗེས་སུ་འབྲངས་པའི་མི་ཚོགས་ལས་རྒྱལ་བར་གྱུར་ཏེ། ཐེབ་ནེ་སྲོག་དང་བྲལ་བས་ན། ཨོམ་རིས་རྒྱལ་སྲིད་བཟུང་ངོ་། །
1KI 16:23 ཡ་ཧུ་དཱའི་རྒྱལ་པོ་ཨ་སཱ་ཡི་སྲིད་ལོ་སོ་གཅིག་པར། ཨོམ་རི་ཡེས་ར་ཨེལ་གྱི་རྒྱལ་པོར་བསྡད་པ་དང་། ཐིར་ཙ་རུ་ལོ་དྲུག་ལ་རྒྱལ་པོ་བྱས་ཤིང་བསྡོམས་པས་ལོ་བཅུ་གཉིས་རིང་དུ་ཡེས་ར་ཨེལ་ལ་སྲིད་བྱས་སོ། །
1KI 16:24 ཁོས་སཱ་མར་ཡའི་རི་དེ་དངུལ་གྱི་རྡོ་ཚད་གཉིས་ཀྱིས་ས་མཱར་ཞེས་པ་ནས་ཉོས་ཤིང་རི་དེའི་ཁར་གྲོང་ཁྱེར་བརྩིགས་ཏེ། གྲོང་ཁྱེར་དེའི་མིང་ལ་རི་ཡི་བདག་པོ་ས་མཱར་བཞིན་དུ་སཱ་མར་ཡ་ཞེས་བཏགས་སོ། །
1KI 16:25 ཨོམ་རི་ཡིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། ཁོའི་སྔོན་དུ་བྱུང་བའི་རྒྱལ་པོ་ཀུན་ལས་ཀྱང་ཐུའོ། །
1KI 16:26 ཁོས་ནེ་བཱད་ཀྱི་བུ་ཡེ་རོབ་ཨམ་གྱིས་སྤྱད་པའི་སྡིག་ཉེས་ནང་དུ་འགྲུལ་ཏེ། དེས་ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་སྡིག་པ་དེ་བྱས་པ་དང་། དེ་དག་གི་སྙིང་པོ་མེད་པའི་སྐུ་འདྲ་རྣམས་ཀྱིས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཐུགས་དཀྲུགས་པའི་ཕྱིར་རོ། །
1KI 16:27 ཨོམ་རིའི་བྱས་རྗེས་གཞན་རྣམས་དང་། ཁོས་ཅི་བྱས་པ་དང་ཁོས་ངོམས་པའི་དཔའ་རྩལ་ཐམས་ཅད་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 16:28 དེ་ནས་ཨོམ་རི་ནི་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་པ་དང་། སཱ་མར་ཡ་རུ་དུར་ལ་སྦས་ནས་དེའི་བུ་ཨ་ཧབ་ཀྱིས་ཁོའི་ཚབ་ཏུ་རྒྱལ་སྲིད་བཟུང་ངོ་། །
1KI 16:29 ཡ་ཧུ་དཱའི་རྒྱལ་པོ་ཨ་སཱ་ཡི་སྲིད་ལོ་སོ་བརྒྱད་པར། ཨོམ་རི་ཡི་བུ་ཨ་ཧབ་ནི་ཡེས་ར་ཨེལ་གྱི་རྒྱལ་པོར་བསྡད་པ་དང་། སཱ་མར་ཡ་རུ་ཡེས་ར་ཨེལ་ལ་ལོ་ཉེར་གཉིས་ཀྱི་རིང་དུ་སྲིད་བྱས་སོ། །
1KI 16:30 ཨོམ་རིའི་བུ་ཨ་ཧབ་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ནས། ཁོའི་སྔོན་དུ་བྱུང་བའི་རྒྱལ་པོ་ཐམས་ཅད་ལས་ཀྱང་ངན་པ་བྱས་སོ། །
1KI 16:31 ཁོ་རང་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་ཉེས་ནང་དུ་འགྲུལ་ཞིང་དེ་ཅི་ལའང་མི་བརྩི་བར་མ་ཟད། ཚི་ཏུན་པའི་རྒྱལ་པོ་ཨེད་པཱ་ཨལ་གྱི་བུ་མོ་ཡེ་ཟི་བེལ་ཆུང་མར་བླངས་ཤིང་པཱ་ཨལ་ཞེས་པའི་ལྷ་ལ་རིམ་གྲོ་བྱས་ནས་དེར་ཕྱག་བཙལ་ཏོ། །
1KI 16:32 ཁོས་སཱ་མར་ཡ་རུ་པཱ་ཨལ་གྱི་མཆོད་ཁང་བརྩིགས་ནས་དེའི་ནང་དུ་པཱ་ཨལ་ལ་མཆོད་ཁྲི་ཞིག་ཀྱང་བརྩིགས་པ་དང་།
1KI 16:33 ཨ་ཧབ་ཀྱིས་ལྷ་མོ་ཨ་ཤེ་རཱ་ཡི་སྐུ་ཞིག་ཀྱང་བཟོས། ཨ་ཧབ་ཀྱིས་ངན་པ་སྤྱད་ནས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཐུགས་དཀྲུགས་ཤིང་། ཁོའི་སྔོན་དུ་བྱུང་བའི་ཡེས་ར་ཨེལ་གྱི་རྒྱལ་པོ་ཐམས་ཅད་ལས་ཀྱང་ཐུའོ། །
1KI 16:34 ཨ་ཧབ་ཀྱི་དུས་སུ་པེད་ཨེལ་པ་ཧི་ཨེལ་གྱིས་ཡེ་རུ་ཀོ་གྲོང་ཁྱེར་ཡང་བསྐྱར་བརྩིགས་ཏེ། ཁོས་གྲོང་ཁྱེར་གྱི་རྩིག་རྨང་འདིང་དུས་བུ་ཆེ་བ་ཨ་བི་རཱམ་ཤི་བ་དང་། ཡང་མཁར་སྒོ་འཛུགས་དུས་བུ་ཆུང་བ་སི་གེབ་ཤི་བར་གྱུར་ཏོ། །དེ་ནི་དཀོན་མཆོག་ཡ་ཝཱེས་ནུན་གྱི་བུ་ཡོ་ཤུ་ཨ་བརྒྱུད་ནས་གསུངས་པ་བཞིན་དུ་གྲུབ་བོ། །
1KI 17:1 དེ་ཡང་ཐི་ཞི་པ་ཨེ་ལི་ཡཱ་སྟེ། གིལ་ཨད་ཡུལ་གྱི་ཐི་ཞི་ནས་འོངས་པའི་ཨེ་ལི་ཡཱ་བྱ་བས་ཨ་ཧབ་ལ། ངས་རང་གིས་ཞབས་ཏོག་སྒྲུབ་པའི་ཡེས་ར་ཨེལ་གྱི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ངས་གསོལ་བ་བཏབ་པ་མིན་ན་ལོ་འདི་དག་གི་ནང་དུ་ཟིལ་བའམ་ཆར་བ་གང་ཡང་འབབ་པར་མི་འགྱུར་རོ་ཞེས་གསུངས་པ་དང་།
1KI 17:2 དེ་ལ་དཀོན་མཆོག་ཡ་ཝཱེའི་བཀའ་བབས་ནས་འདི་སྐད་དུ།
1KI 17:3 ཁྱོད་རང་འདི་ནས་ཤར་ཕྱོགས་སུ་སོང་ལ། ཡོར་དན་གཙང་པོའི་ཤར་ཕྱོགས་སུ་ཡོད་པའི་ཀེ་རིད་ཆུ་བོའི་འགྲམ་ལ་ཡིབ་ནས་སྡོད་ཅིག
1KI 17:4 ཁྱོད་ཀྱིས་ཆུ་བོ་དེ་ལས་ཆུ་འཐུང་བར་འགྱུར་ཞིང་བདག་གིས་ཕོ་རོག་རྣམས་ལ་ཁྱོད་ལ་ཁ་ཟས་སྟེར་བའི་བཀའ་བསྒོས་ཡོད་ཅེས་གསུངས་པས།
1KI 17:5 ཨེ་ལི་ཡཱ་ནི་དཀོན་མཆོག་ཡ་ཝཱེའི་བཀའ་བཞིན་དུ་ཆས་ཏེ། ཡོར་དན་གཙང་པོའི་ཤར་ཕྱོགས་སུ་ཡོད་པའི་ཀེ་རིད་ཆུ་བོའི་འགྲམ་དུ་སོང་ནས་བསྡད་དོ། །
1KI 17:6 ཕོ་རོག་རྣམས་ཀྱིས་ཞོགས་པ་ཁོང་ལ་བག་ལེབ་དང་ཤ་དྲངས་ཤིང་དགོང་མོ་ཡང་བག་ལེབ་དང་ཤ་དྲངས་པ་དང་། ཁོང་གིས་ཀྱང་ཆུ་བོ་དེའི་ཆུ་འཐུང་བའོ། །
1KI 17:7 ཡང་ཡུལ་དེར་ཆར་མ་བབས་པས། དུས་ཡུན་ངེས་ཅན་ཞིག་གི་རྗེས་སུ་ཆུ་བོ་དེ་བསྐམས་པ་དང་།
1KI 17:8 ཨེ་ལི་ཡཱ་ལ་ཡང་དཀོན་མཆོག་ཡ་ཝཱེའི་བཀའ་བབས་ནས་འདི་སྐད་དུ།
1KI 17:9 ཁྱོད་ཡར་ལོངས་ལ། ཚི་ཏུན་ཡུལ་གྱི་སཱ་རེ་ཕད་དུ་སོང་ནས་དེར་སྡོད་ཅིག དེ་རུ་ཁྱོད་ལ་འཚོ་བ་སྦྱོར་བའི་ཕྱིར་བདག་གིས་ཡུགས་མོ་ཞིག་ལ་བཀའ་བསྒོས་ཡོད་ཅེས་གསུངས་པ་དང་།
1KI 17:10 ཁོང་ཡར་ལངས་ཏེ་སཱ་རེ་ཕད་དུ་ཕྱིན་ཅིང་མཁར་སྒོ་རུ་སླེབས་པའི་ཚེ། ཡུགས་མོ་ཞིག་གིས་དེ་རུ་བུད་ཤིང་བཏུ་བཞིན་ཡོད་པ་དང་། ཁོང་གིས་མོ་བོས་ནས། ཁྱོད་ཀྱིས་སྣོད་ཅིག་གི་ནང་དུ་ང་ལ་ཆུ་ཅུང་ཟད་ཁུར་འོང་རོགས་ཞེས་སྨྲས་པ་དང་།
1KI 17:11 ཁོ་མོ་ཕར་དེ་ལེན་དུ་སོང་བ་ན། ཁོང་གིས་ཡང་མོ་བོས་ནས། ང་ལ་བག་ལེབ་དུམ་བུ་ཞིག་ཀྱང་ཁྱེར་འོང་རོགས་ཞེས་སྨྲས་པ་ན།
1KI 17:12 མོས་ཁོང་ལ། ངས་ཁྱེད་ཀྱི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན། ང་ལ་བག་ལེབ་ནི་མེད། རྫ་མའི་ནང་དུ་ཕྱེ་སྤར་བ་གང་དང་། སྣོད་ཀྱི་ནང་དུ་སྣུམ་ཅུང་ཟད་ཙམ་ལས་མེད་དོ། །གཟིགས་དང་། ངས་བུད་ཤིང་རེ་གཉིས་ཙམ་བཏུས་ཏེ་ཁྱིམ་དུ་སོང་ནས་ང་དང་ངའི་བུ་ལ་ཁ་ཟས་གཡོས་ནས། དེ་ཟོས་རྗེས་འཆི་བར་སྒུག་པ་ཡིན་ཞེས་ཞུས།
1KI 17:13 དེར་ཨེ་ལི་ཡཱས་བུད་མེད་དེ་ལ། མ་འཇིགས་ཤིག སོང་ལ་ཁྱོད་ཀྱིས་སྨྲས་པ་བཞིན་དུ་བྱོས་ཤིག འོན་ཀྱང་ཐོག་མར་བག་ལེབ་ཆུང་ངུ་ཞིག་བསྲེགས་ནས་ང་ལ་ཁྱེར་ཤོག དེ་ནས་ཁྱོད་དང་ཁྱོད་ཀྱི་བུ་ལ་བག་ལེབ་སྲེགས་ཤིག
1KI 17:14 ཅིའི་ཕྱིར་ཞེ་ན། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། དཀོན་མཆོག་ཡ་ཝཱེས་ས་གཞི་རུ་ཆར་བ་གནང་བའི་ཉིན་དེའི་བར་དུ། རྫ་མའི་ཕྱེ་མི་ཚར་ལ། སྣོད་ཀྱི་སྣུམ་ཡང་རྫོགས་པར་མི་འགྱུར་ཞེས་གསུངས་སོ་ཞེས་སྨྲས་པ་དང་།
1KI 17:15 ཁོ་མོ་སོང་ནས་ཨེ་ལི་ཡཱས་བསྒོས་པ་ལྟར་བྱས་ཏེ། མོ་རང་དང་། ཨེ་ལི་ཡཱ་དང་། མོའི་ནང་མི་རྣམས་ཀྱིས་ཉིན་མང་པོར་ཁ་ཟས་སྤྱད་པའོ། །
1KI 17:16 དཀོན་མཆོག་ཡ་ཝཱེའི་བཀའ་སྟེ་ཨེ་ལི་ཡཱའི་ངག་བརྒྱུད་ནས་གསུངས་པ་བཞིན་དུ། རྫ་མའི་ཕྱེ་ནི་མ་ཚར་ལ། སྣོད་ཀྱི་སྣུམ་ཡང་མ་རྫོགས་སོ། །
1KI 17:17 དེའི་རྗེས་སུ་ཁྱིམ་བདག་མ་དེའི་བུ་ལ་ནད་ཅིག་ཕོག་པ་དང་། ནད་ཇེ་སྡུག་ཏུ་སོང་ནས་ཐ་ན་དབུགས་ཀྱང་ཆད།
1KI 17:18 དེ་ནས་བུད་མེད་ཀྱིས་ཨེ་ལི་ཡཱ་ལ། ཀྱེ་དཀོན་མཆོག་གི་སྐྱེས་བུ་ལགས། བདག་ཁྱེད་དང་འབྲེལ་བ་ཅི་ཡོད་དམ། ཁྱེད་ནི་དཀོན་མཆོག་ལ་ངའི་སྡིག་པ་དྲན་དུ་འཇུག་པ་དང་། ངའི་བུ་གསོད་དུ་འོངས་པ་ཡིན་ནམ་ཞེས་ཞུས་པ་ལ།
1KI 17:19 ཨེ་ལི་ཡཱས་ཁོ་མོ་ལ། ཁྱོད་ཀྱི་བུ་ང་ལ་སྤྲོད་ཅིག་ཅེས་སྨྲས་ནས། བུ་དེ་མོའི་པང་ནས་བླངས་ཏེ་ཁོ་རང་སྡོད་སའི་ཐོག་ཁང་གི་གཟིམ་ཁང་དུ་ཁྱེར་ནས་ཪང་གི་མལ་ཁྲི་སྟེང་དུ་བཞག་པ་དང་།
1KI 17:20 ཁོང་གིས་དཀོན་མཆོག་ཡ་ཝཱེ་ལ་འོ་དོད་བོས་ནས། ཀྱེ་བདག་གི་དཀོན་མཆོག་ཡ་ཝཱེ་ལགས། བདག་ལ་གནས་ཚང་གཡར་བའི་ཡུགས་མོ་འདི་ལ་ཡང་ཁྱེད་ཀྱིས་བར་ཆད་གནང་སྟེ། ཁོ་མོའི་བུ་ཤི་རུ་འཇུག་པ་ཡིན་ནམ་ཞེས་གསོལ་ཞིང་།
1KI 17:21 དེ་ནས་ཁོང་གིས་རང་གི་ལུས་པོ་ཕྲུ་གུ་དེའི་སྟེང་དུ་ཐེངས་གསུམ་ལ་བཀབ་སྟེ། དཀོན་མཆོག་ཡ་ཝཱེ་ལ་འོ་དོད་བོས་ནས། ཀྱེ་བདག་གི་དཀོན་མཆོག་ཡ་ཝཱེ་ལགས། ཁྱེད་ཀྱིས་ཕྲུ་གུ་འདིའི་སྲོག་ཡང་བསྐྱར་ཁོ་ལ་གནང་བར་མཛོད་ཅེས་གསོལ་ཏོ། །
1KI 17:22 དཀོན་མཆོག་ཡ་ཝཱེས་ཨེ་ལི་ཡཱ་ཡི་གསོལ་འདེབས་ལ་གསན་པ་དང་། ཕྲུ་གུ་དེ་ལ་ཡང་བསྐྱར་སྲོག་ཐོབ་ནས་གསོན་པར་གྱུར།
1KI 17:23 དེ་ནས་ཨེ་ལི་ཡཱས་ཕྲུ་གུ་དེ་ཐོག་ཁང་གི་གཟིམ་ཁང་ནས་བླངས་ཏེ། ཁྱིམ་དུ་ཁྱེར་ནས་དེའི་མ་ཡི་ལག་ཏུ་སྤྲད་པ་དང་། ཁོང་ན་རེ། ལྟོས་དང་། ཁྱོད་ཀྱི་བུ་གསོན་ནོ་ཞེས་སྨྲས་སོ། །
1KI 17:24 དེ་ནས་བུད་མེད་ཀྱིས་ཨེ་ལི་ཡཱ་ལ། ཁྱེད་རང་དཀོན་མཆོག་གི་སྐྱེས་བུ་ཡིན་པ་དང་། དཀོན་མཆོག་ཡ་ཝཱེས་ཁྱེད་ཀྱི་ངག་བརྒྱུད་ནས་གསུངས་པའི་བཀའ་ནི་བདེན་པ་ཡིན་པ་ངས་རྟོགས་སོ་ཞེས་ཞུས་སོ། །
1KI 18:1 དེ་ནས་ཡུན་རིང་འགོར་བ་དང་ལོ་གསུམ་པར་སླེབས་པའི་ཚེ། ཨེ་ལི་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་སྟེ་འདི་སྐད་དུ། ཁྱོད་རང་ཨ་ཧབ་ཀྱི་མདུན་དུ་སོང་ཞིག་དང་། ངས་ས་གཞི་ལ་ཆར་འབབ་པར་བྱའོ་ཞེས་གསུངས་པས།
1KI 18:2 ཨེ་ལི་ཡཱ་ནི་ཨ་ཧབ་ཀྱི་མདུན་དུ་སོང་བ་དང་། སྐབས་དེར་སཱ་མར་ཡ་རུ་མུ་གེ་ཆེན་པོ་བྱུང་བ་རེད།
1KI 18:3 ཨ་ཧབ་ཀྱིས་རང་གི་ནང་བློན་ཨོ་བད་ཡཱ་བྱ་བ་བོས་ཤིང་། ཨོ་བད་ཡཱ་ནི་དཀོན་མཆོག་ཡ་ཝཱེ་ལ་ཤིན་ཏུ་གུས་ཤིང་འཇིགས་པ་ཞིག་ཡིན་ཏེ།
1KI 18:4 ཡེ་ཟི་བེལ་གྱིས་དཀོན་མཆོག་ཡ་ཝཱེའི་ལུང་སྟོན་པ་རྣམས་གསོད་པའི་ཚེ། ཨོ་བད་ཡཱས་ལུང་སྟོན་པ་བརྒྱ་ཁྲིད་དེ་ལྔ་བཅུ་ལྔ་བཅུ་བྱས་ནས་བྲག་ཁུང་ནང་དུ་སྦས་ཤིང་། དེ་རྣམས་བག་ལེབ་དང་ཆུ་ཡིས་གསོས་སོ། །
1KI 18:5 ཨ་ཧབ་ཀྱིས་ཨོ་བད་ཡཱ་ལ། ཁྱོད་རང་ཡུལ་འདིའི་ཆུ་མིག་དང་ཆུ་བོ་ཡོད་ཚད་དུ་སོང་ལ་ལྟོས་ཤིག རྟ་དྲེལ་རྣམས་ཀྱི་སྲོག་བསྐྱབས་ནས་ཕྱུགས་རྣམས་མེད་པར་མི་འགྱུར་བའི་ཕྱིར་དུ། རང་ཅག་གིས་རྩྭ་སྔོན་རྙེད་ཀྱང་སྲིད་ཅེས་སྨྲས་པས།
1KI 18:6 ཁོ་རྣམས་ཡུལ་ཐམས་ཅད་ལ་ཉུལ་བར་ས་ཕྱོགས་གཉིས་སུ་བགོས་ནས། ཕྱོགས་གཅིག་ཏུ་ཨ་ཧབ་གཅིག་པུ་སོང་བ་དང་། ཕྱོགས་ཅིག་ཤོས་སུ་ཨོ་བད་ཡཱ་གཅིག་པུ་སོང་།
1KI 18:7 དེ་ནས་ཨོ་བད་ཡཱ་ལམ་དུ་སྐྱོད་པའི་ཚེ་ན། ཨེ་ལི་ཡཱ་ཁོ་དང་ཕྲད་ཅིང་། ཨོ་བད་ཡཱས་ཁོང་ངོ་ཟིན་ནས་གདོང་ས་རུ་གཏད་དེ་ན་རེ། ཁྱེད་རང་དངོས་གནས་ང་ཡི་ཇོ་བོ་ཨེ་ལི་ཡཱ་ཡིན་ནམ་ཞེས་ཞུས་པར།
1KI 18:8 ཨེ་ལི་ཡཱ་ཡིས་ལན་དུ་ང་རང་ཡིན། ཁྱོད་སོང་ལ་རང་གི་བདག་པོ་དེར། ཀྱེ་ཧོ་ཨེ་ལི་ཡཱ་འདི་རུ་འདུག་ཅེས་ཤོད་ཅིག་ཅེས་བསྒོས་པ་དང་།
1KI 18:9 ཨོ་བད་ཡཱ་ན་རེ། ངས་ཉེས་པ་ཅི་ཞིག་བྱས་སམ། ཁྱེད་ཀྱིས་ཞབས་ཕྱི་བདག་སྲོག་དང་ཕྲལ་དུ་ཨ་ཧབ་ཀྱི་ལག་ཏུ་སྤྲོད་པར་བྱའམ།
1KI 18:10 ངས་ཁྱེད་ཀྱི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན། མི་རིགས་དང་རྒྱལ་ཁམས་མཐའ་དག་ལས་ངའི་བདག་པོས་ཁྱེད་རང་འཚོལ་དུ་མ་བཏང་ས་གཅིག་ཀྱང་ལུས་མེད། ཡང་མི་རྣམས་ཀྱིས་ཁྱེད་རང་དེ་རུ་མེད་ཅེས་སྨྲས་པ་ཙམ་གྱིས་ཁོས་མི་སྡེ་དང་རྒྱལ་ཁམས་དེ་ལ་ཁྱེད་རང་དངོས་གནས་མ་རྙེད་པའི་མནའ་སྐྱེལ་དུ་བཅུག་པ་ཡིན།
1KI 18:11 ད་ནི་ཁྱེད་ཀྱིས་ང་ལ། ཁྱོད་སོང་ལ་རང་གི་བདག་པོར་ཨེ་ལི་ཡཱ་འདི་རུ་ཡོད་ཅེས་ཤོད་ཅིག་ཅེས་གསུངས་བྱུང་།
1KI 18:12 དེ་ནས་བདག་ཁྱེད་དང་ཁ་བྲལ་མ་ཐག་དཀོན་མཆོག་ཡ་ཝཱེའི་ཐུགས་ཉིད་ཀྱིས་ཁྱེད་ནི་བདག་ལ་རྒྱུས་མེད་པའི་གནས་སུ་འཁྱེར་བར་འགྱུར། ཡང་བདག་སོང་ནས་ཨ་ཧབ་ལ་སྨྲས་ཚེ། ཁོས་ཁྱེད་ཉིད་མ་རྙེད་ན་བདག་གསོད་ངེས་ཡིན། འོན་ཀྱང་ཁྱེད་ཀྱི་ཞབས་ཕྱི་བདག་ནི་ཆུང་དུས་ནས་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་ཞིག་ཡིན་ཏེ།
1KI 18:13 ཡེ་ཟི་བེལ་གྱིས་དཀོན་མཆོག་ཡ་ཝཱེའི་ལུང་སྟོན་པ་རྣམས་འགུམ་པའི་དུས་སུ། ངས་ཇི་ལྟར་དཀོན་མཆོག་ཡ་ཝཱེའི་ལུང་སྟོན་པ་མི་བརྒྱ་ནི་ལྔ་བཅུ་ལྔ་བཅུ་བྱས་ཏེ་བྲག་ཁུང་ནང་དུ་སྦས་ནས། དེ་དག་བག་ལེབ་དང་ཆུ་ཡིས་གསོས་པའི་གཏམ་དེ་ངའི་བདག་པོ་ཁྱེད་ལ་སུས་ཀྱང་མ་སྨྲས་སམ།
1KI 18:14 ད་ལྟ་ཁྱེད་ཀྱིས། ཁྱོད་སོང་ལ་རང་གི་བདག་པོར་ཨེ་ལི་ཡཱ་འདི་རུ་ཡོད་ཅེས་ཤོད་ཅིག་ཅེས་གསུངས། ཁོས་ང་གསོད་པར་འགྱུར་ངེས་ཞེས་ཞུས་པ་ན།
1KI 18:15 ཨེ་ལི་ཡཱ་ན་རེ། ངས་རང་གིས་ཞབས་ཏོག་སྒྲུབ་པ་དང་གཏན་དུ་བཞུགས་པའི་དཀོན་མཆོག་སྟེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན། དེ་རིང་ཉིན་མོར་ང་ཨ་ཧབ་ཀྱི་མདུན་དུ་སླེབས་ངེས་ཡིན་ཞེས་གསུངས་སོ། །
1KI 18:16 དེ་ནས་ཨོ་བད་ཡཱ་ནི་ཨ་ཧབ་ཀྱི་མདུན་དུ་ཕྱིན་ཅིང་དོན་དེ་ཁོ་ལ་སྨྲས་པ་དང་། ཨ་ཧབ་ནི་ཨེ་ལི་ཡཱ་དང་འཕྲད་དུ་འོངས་པ་སྟེ།
1KI 18:17 ཁོས་ཨེ་ལི་ཡཱ་མཐོང་མ་ཐག་ཏུ་ན་རེ། ཡེས་ར་ཨེལ་ལ་གནོད་པ་བྱེད་མཁན་དེ་ཁྱོད་རང་མ་ཡིན་ནམ་ཞེས་སྨྲས་པ་དང་།
1KI 18:18 ཨེ་ལི་ཡཱས་ལན་དུ། ཡེས་ར་ཨེལ་ལ་གནོད་པ་བྱེད་མཁན་ནི་ང་མིན་ཏེ། ཁྱོད་དང་ཁྱོད་ཀྱི་ཕ་མེས་ཀྱི་ཁྱིམ་རྒྱུད་ཡིན་ནོ། །ཁྱོད་ཅག་གིས་དཀོན་མཆོག་ཡ་ཝཱེའི་བཀའ་རྒྱ་རྣམས་སྤངས་ཏེ་པཱ་ཨལ་རྣམས་ཀྱི་རྗེས་སུ་འབྲངས་པས་སོ། །
1KI 18:19 ད་ལྟ་ཁྱོད་ཀྱིས་བང་ཆེན་བཏང་ནས་ཡེས་ར་ཨེལ་པ་ཐམས་ཅད་དང་། པཱ་ཨལ་གྱི་ལུང་སྟོན་པ་བཞི་བརྒྱ་ལྔ་བཅུ་དང་། ཡེ་ཟི་བེལ་གྱི་གསོལ་ལྕོག་ལས་ཁ་ཟས་སྤྱོད་པའི་ལྷ་མོ་ཨ་ཤེ་རཱ་ཡི་ལུང་སྟོན་པ་བཞི་བརྒྱ་བཅས་ནི་ངའི་མདུན་དུ་ཀར་མེལ་རི་བོ་རུ་བསྡུས་ཤོག་ཅེས་སྨྲས་པ་ལ།
1KI 18:20 ཨ་ཧབ་ཀྱིས་བང་ཆེན་བཏང་ནས་ཡེས་ར་ཨེལ་པ་ཐམས་ཅད་དང་ལུང་སྟོན་པ་རྣམས་ཀར་མེལ་རི་བོར་བསྡུས་སོ། །
1KI 18:21 དེར་ཨེ་ལི་ཡཱ་མི་ཐམས་ཅད་ཀྱི་མདུན་དུ་བྱོན་ཏེ་དེ་དག་ལ། ཁྱོད་རྣམས་བློ་གཉིས་འགལ་བྱས་ནས་དུས་ནམ་ཞིག་གི་བར་དུ་སྡོད་པར་བྱའམ། གལ་ཏེ་དཀོན་མཆོག་ཡ་ཝཱེ་ནི་དཀོན་མཆོག་ལགས་ན། ཁྱོད་རྣམས་ཁོང་གི་རྗེས་སུ་འབྲོངས་ཤིག གལ་ཏེ་པཱ་ཨལ་དཀོན་མཆོག་ཡིན་ན། ཁྱོད་རྣམས་དེའི་རྗེས་སུ་འབྲོངས་ཤིག་ཅེས་བསྐུལ་ནའང་། མི་ཚོགས་ཀྱིས་ལན་དུ་ཚིག་གཅིག་ཀྱང་མ་སྨྲས་སོ། །
1KI 18:22 དེ་ནས་ཨེ་ལི་ཡཱས་མི་ཚོགས་ལ། དཀོན་མཆོག་ཡ་ཝཱེའི་ལུང་སྟོན་པ་རྣམས་ལས་ང་རང་གཅིག་པུ་ལས་ལུས་མེད་ཀྱང་། པཱ་ཨལ་གྱི་ལུང་སྟོན་པ་ནི་བཞི་བརྒྱ་དང་ལྔ་བཅུ་ཡོད།
1KI 18:23 ད་ལྟ་ངེད་ཅག་ལ་གླང་ཐུག་གཉིས་བྱིན་ཅིག་དང་། པཱ་ཨལ་གྱི་ལུང་སྟོན་པ་རྣམས་ལ་གླང་ཐུག་གཅིག་འདེམས་སུ་ཆུག་ལ་དེ་དུམ་བུར་བྱས་ཏེ་བུད་ཤིང་གི་སྟེང་ལ་ཞོག་ཅིག འོན་ཀྱང་མེ་མི་གཏོང་བར་གྱིས། བདག་གིས་ཀྱང་གླང་ཐུག་ཅིག་བཤས་ཏེ། བུད་ཤིང་གི་སྟེང་དུ་བཞག་ནས་མེ་གཏོང་བར་མི་བྱ།
1KI 18:24 ཁྱོད་རྣམས་ཀྱིས་ཁྱོད་ཅག་གི་ལྷ་རྣམས་ཀྱི་མིང་ལ་འོ་དོད་བོས་ཤིག བདག་གིས་དཀོན་མཆོག་ཡ་ཝཱེའི་མཚན་ལ་འོ་དོད་འབོད་པར་བྱ། དཀོན་མཆོག་སུ་ཡིས་མེ་ཡི་སྒོ་ནས་ལན་བཏབ་ན་དེ་ནི་དཀོན་མཆོག་ཏུ་འཛིན་པར་བྱའོ་ཞེས་སྨྲས་པ་ལ། མི་ཚོགས་ཀྱིས་ལེགས་སོ་ཞེས་ལན་བཏབ།
1KI 18:25 ཨེ་ལི་ཡཱ་ཡིས་པཱ་ཨལ་གྱི་ལུང་སྟོན་པ་རྣམས་ལ། ཁྱོད་ཅག་མི་མང་པོ་ཡོད་པས་ཁྱོད་ཅག་གིས་རང་གི་ཕྱིར་གླང་ཐུག་ཅིག་འདེམས་པར་གྱིས་ཤིག དེ་གྲ་སྒྲིག་བྱས་རྗེས་རང་གི་ལྷ་ཡི་མིང་ལ་འོ་དོད་བོས་ཤིག འོན་ཀྱང་དེ་ལ་མེ་མི་གཏོང་བར་གྱིས་ཞེས་སྨྲས་པར།
1KI 18:26 དེ་དག་གིས་རང་ལ་སྤྲད་པའི་གླང་ཐུག་དེ་ཁྲིད་འོངས་ནས་གྲ་སྒྲིག་བྱས་ཤིང་། ཞོགས་པ་ནས་ཉིན་གུང་གི་བར་དུ་པཱ་ཨལ་གྱི་མིང་ལ་འོ་དོད་བོས་ནས། ཀྱེ་པཱ་ཨལ། ངེད་ཅག་ལ་གསན་པར་མཛོད་ཅིག་ཅེས་ཞུས་ཀྱང་། སྐད་སྒྲ་ཅི་ཡང་མ་བྱུང་ལ་ལན་ཡང་མ་བྱུང་བས། དེ་དག་གིས་རང་གིས་བཟོས་པའི་མཆོད་ཁྲིའི་མཐའ་སྐོར་ནས་གར་འཆམས་པ་རེད།
1KI 18:27 དེ་ནས་ཉིན་གུང་གི་དུས་སུ་ཨེ་ལི་ཡཱས་དེ་དག་ལ་འཕྱ་བཞིན་དུ། སྐད་ཆེན་པོས་འོ་དོད་བོས་ཤིག ཁོ་ནི་ལྷ་ཞིག་ཡིན་པས། ཐུགས་གཞིགས་ཟབ་མོ་གཏོང་གིན་ཡོད་དམ། བྲེལ་བ་ཆེའམ། བྱེས་སུ་ཡོད་དམ། གཉིད་ལ་ཡུར་བ་དང་གཉིད་ལས་དཀྲོག་དགོས་པ་ཡིན་ནམ་ཞེས་སྨྲས་པས།
1KI 18:28 དེ་དག་གིས་སྐད་ཆེན་པོས་འོ་དོད་བོས་ཤིང་། རང་གི་ལུགས་ལྟར་རང་རང་གི་ལུས་སྟེང་ནས་ཁྲག་བཞུར་བའི་བར་དུ། རང་གིས་རང་ལ་གྲི་དང་མདུང་གིས་གཙགས།
1KI 18:29 ཉིན་གུང་ཡོལ་ནས་དགོང་མོའི་མཆོད་པ་འབུལ་བའི་བར་དུ་ཁོ་ཚོས་སྨྱོ་སྐད་བརྒྱབ་ནས་བསྡད་ཀྱང་། སྐད་སྒྲ་ཅི་ཡང་མ་བྱུང་ལ་ལན་ཡང་མ་བྱུང་། སྣང་འཇོག་བྱེད་མཁན་ཞིག་ཀྱང་མ་བྱུང་ངོ་། །
1KI 18:30 དེ་ནས་ཨེ་ལི་ཡཱས་མི་ཚོགས་ལ། ཁྱོད་རྣམས་ངའི་མདུན་དུ་ཤོག་ཅིག་ཅེས་སྨྲས་པ་ལ། མི་ཚོགས་རྣམས་ཁོའི་མདུན་དུ་འོངས་པ་དང་། ཁོང་གིས་དཀོན་མཆོག་ཡ་ཝཱེའི་མཆོད་ཁྲི་ཞིག་རལ་དུ་གྱུར་པ་དེ་སླར་གསོ་བྱས།
1KI 18:31 དཀོན་མཆོག་ཡ་ཝཱེས་དེ་སྔར་ཡ་ཀོབ་ལ། ཁྱོད་ཀྱི་མིང་ལ་ཡེས་ར་ཨེལ་ཞེས་འབོད་པར་འགྱུར་རོ་ཞེས་བཀའ་གནང་བ་བཞིན་དུ། ཨེ་ལི་ཡཱས་ཡ་ཀོབ་ཀྱི་བུ་རབས་ཚ་རྒྱུད་ཀྱི་ཚོ་པ་རྣམས་ཀྱི་གྲངས་ཀ་བཞིན་དུ་རྡོ་བཅུ་གཉིས་བླངས་པ་དང་།
1KI 18:32 དཀོན་མཆོག་ཡ་ཝཱེའི་མཚན་ལ་བརྟེན་ནས་རྡོ་དེ་རྣམས་ཀྱིས་མཆོད་ཁྲི་ཞིག་བརྩིགས་ཏེ། མཆོད་ཁྲིའི་མཐའ་འཁོར་དུ་འབྲུ་བྲེ་གཉིས་ཤོང་བའི་འོབས་དོང་བྲུས་ཤིང་།
1KI 18:33 བུད་ཤིང་རྣམས་བསྒྲིགས་པ་དང་། ཡང་གླང་ཐུག་དེ་དུམ་བུར་གཏུབ་ནས་བུད་ཤིང་གི་སྟེང་དུ་བཞག་ནས་དེ་དག་ལ། རྫ་བུམ་བཞི་ཆུས་བཀང་བར་བྱས་ནས། སྦྱིན་སྲེག་གི་མཆོད་པ་དང་བུད་ཤིང་རྣམས་ཀྱི་སྟེང་དུ་བླུགས་ཤིག་ཅེས་བསྒོས་སོ། །
1KI 18:34 ཡང་ཁོང་ན་རེ། ལན་གཉིས་པར་དེ་ལྟར་གྱིས་ཤིག་ཅེས་བསྒོས་པར། དེ་དག་གིས་ལན་གཉིས་པར་དེ་ལྟར་བྱས། ཡང་ཁོང་ན་རེ། ལན་གསུམ་པར་དེ་ལྟར་གྱིས་ཤིག་ཅེས་བསྒོས་པར། དེ་དག་གིས་ལན་གསུམ་པར་དེ་ལྟར་བྱས་པ་དང་།
1KI 18:35 མཆོད་ཁྲིའི་མཐའ་འཁོར་དུ་ཆུ་བཞུར་ཅིང་འོབས་དོང་དེ་ཡང་ཆུས་ཁེངས་པར་གྱུར་ཏོ། །
1KI 18:36 དགོང་མོའི་མཆོད་པ་འབུལ་བའི་དུས་སུ། ལུང་སྟོན་པ་ཨེ་ལི་ཡཱ་མདུན་དུ་འོངས་ནས། ཀྱེ་དཀོན་མཆོག་ཡ་ཝཱེ་ལགས། ཨབ་ར་ཧམ་དང་། ཨི་སཱག་དང་། ཡེས་ར་ཨེལ་ཀྱི་དཀོན་མཆོག་ལགས། དེ་རིང་ཉིན་མོར། ཁྱེད་ཉིད་ཡེས་ར་ཨེལ་གྱི་དཀོན་མཆོག་ཡིན་ལ། བདག་ནི་ཁྱེད་ཀྱི་ཞབས་ཕྱི་ཡིན་པ་དང་། ཁྱེད་ཀྱི་བཀའ་བཞིན་དུ་འདི་བཞིན་བྱེད་པ་དེ་མངོན་པར་མཛོད་ཅིག
1KI 18:37 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་བདག་ལ་ལན་གནང་རོགས། བདག་ལ་ལན་གནང་ནས་མི་རིགས་འདི་ལ་ཁྱེད་ནི་དཀོན་མཆོག་ཡ་ཝཱེ་ཡིན་པ་དང་། ཁྱེད་ཀྱིས་མི་འདི་རྣམས་ཀྱི་སེམས་ཕྱིར་འཁོར་དུ་བཅུག་པ་ཁོ་རྣམས་ལ་ཤེས་པར་མཛད་དུ་གསོལ་ཞེས་ཞུས་པ་ལ།
1KI 18:38 དཀོན་མཆོག་ཡ་ཝཱེས་མེ་ཕབ་ནས་སྦྱིན་སྲེག་གི་མཆོད་པ་དང་། བུད་ཤིང་དང་། རྡོ་དང་། ས་བཅས་ཐམས་ཅད་འགེམས་ཏེ། འོབས་དོང་གི་ནང་དུ་ཡོད་པའི་ཆུ་ཡང་ཐག་པར་བྱས་སོ། །
1KI 18:39 མི་ཚོགས་ཀྱིས་དེ་མཐོང་བ་ཙམ་གྱིས་གདོང་ས་རུ་གཏད་དེ། དཀོན་མཆོག་ཡ་ཝཱེ་ནི་དཀོན་མཆོག་གོ །དཀོན་མཆོག་ཡ་ཝཱེ་ནི་དཀོན་མཆོག་གོ་ཞེས་ཞུས་སོ། །
1KI 18:40 དེ་ནས་ཨེ་ལི་ཡཱས་ཁོ་རྣམས་ལ། པཱ་ཨལ་གྱི་ལུང་སྟོན་པ་རྣམས་བཟུང་ལ། དེ་རྣམས་ལས་གཅིག་ཀྱང་འཆོར་དུ་མ་འཇུག་ཅེས་སྨྲས་པར། མི་ཚོགས་ཀྱིས་དེ་རྣམས་བཟུང་བ་དང་། ཨེ་ལི་ཡཱས་དེ་རྣམས་ཁི་ཤོན་ཆུ་བོའི་འགྲམ་དུ་ཁྲིད་ནས་དེ་རུ་བསད་དོ། །
1KI 18:41 ཡང་ཨེ་ལི་ཡཱས་ཨ་ཧབ་ལ། ངས་ཆར་བ་ཆེན་པོའི་སྐད་སྒྲ་ཐོས་པས། ཁྱོད་ཡར་སོང་ལ་བཟའ་བཏུང་སྤྱོད་ཅིག་ཅེས་སྨྲས་པར།
1KI 18:42 ཨ་ཧབ་ཡར་སོང་ནས་བཟའ་བཏུང་སྤྱད་པ་དང་། ཨེ་ལི་ཡཱ་ནི་ཀར་མེལ་རི་བོའི་རྩེ་རུ་འཛེགས་ནས་པུས་མོ་སར་བཙུགས་ཏེ་པུས་མོ་གཉིས་ཀྱི་བར་ལ་མགོ་བཞག་ནས།
1KI 18:43 རང་གི་ཞབས་ཕྱི་ན་རེ། ཁྱོད་ཡར་སོང་ལ་རྒྱ་མཚོའི་ཕྱོགས་སུ་ལྟོས་ཤིག་ཅེས་བསྒོས་པ་དང་། ཁོ་ཡར་སོང་ནས་བལྟས་ཏེ། ཅི་ཡང་མི་འདུག་ཅེས་ཞུས། ཡང་ཨེ་ལི་ཡཱ་ཡིས་ཁྱོད་ཕྱིར་སོང་ལ་ལྟོས་ཤིག་ཅེས་སྨྲས་ཤིང་ཐེངས་བདུན་ལ་དེ་བཞིན་བསྒོས།
1KI 18:44 དེ་ནས་ཐེངས་བདུན་པ་ལ་ཞབས་ཕྱི་ན་རེ། ཀྱེ་ཧོ། ངས་མི་ཡི་ལག་མཐིལ་ལྟ་བུའི་སྤྲིན་ཕུང་ཞིག་རྒྱ་མཚོ་ནས་ཡར་འཕྱུར་བ་མཐོང་བྱུང་ཞེས་ཞུས་པ་དང་། ཨེ་ལི་ཡཱ་ན་རེ། ཁྱོད་ཡར་སོང་ནས་ཨ་ཧབ་ལ། ཤིང་རྟ་གྲ་སྒྲིག་བྱོས་ལ་མར་སོང་ཞིག དེ་ལྟར་མ་བྱས་ཚེ་དྲག་ཆར་གྱིས་ཁྱོད་འགོག་པར་འགྱུར་ཞེས་སྨྲོས་ཤིག་ཅེས་བསྒོས་པའོ། །
1KI 18:45 དེ་ནས་ཡུན་ཙམ་གྱིས་སྤྲིན་དང་རླུང་གིས་ནམ་མཁའ་ནག་པོར་གྱུར་ནས་དྲག་ཆར་བབས་པ་དང་། ཨ་ཧབ་ཤིང་རྟར་བསྡད་དེ་ཡེ་སི་རེ་ཨེལ་དུ་སོང་ཞིང་།
1KI 18:46 དཀོན་མཆོག་ཡ་ཝཱེའི་ནུས་མཐུ་ཨེ་ལི་ཡཱའི་སྟེང་དུ་བབས་པ་དང་། ཁོང་གིས་སྐ་རགས་བཅིངས་ནས་ཨ་ཧབ་ཀྱི་སྔོན་དུ་རྒྱུགས་ཏེ་ཡེ་སི་རེ་ཨེལ་གྱི་བར་དུ་སླེབས་སོ། །
1KI 19:1 དེ་ནས་ཨ་ཧབ་ཀྱིས་ཡེ་ཟི་བེལ་ལ། ཨེ་ལི་ཡཱས་ཅི་བྱས་པ་ཐམས་ཅད་དང་ཇི་ལྟར་ལུང་སྟོན་པ་ཐམས་ཅད་རལ་གྲིས་བསད་པའི་གཏམ་སྨྲས་པ་དང་།
1KI 19:2 ཡེ་ཟི་བེལ་གྱིས་ཨེ་ལི་ཡཱ་ལ་བང་ཆེན་བཏང་ནས། གལ་ཏེ་སང་ཉིན་གྱི་དུས་འདི་ལ། དེ་དག་གི་སྲོག་བཅད་པ་ལྟར་ཁྱོད་ཀྱི་སྲོག་ཀྱང་མ་བཅད་ན། ལྷ་རྣམས་ཀྱིས་ང་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲས།
1KI 19:3 དེར་ཨེ་ལི་ཡཱ་འཇིགས་སྣང་སྐྱེས་ཤིང་ཡར་ལངས་ཏེ་སྲོག་ཐར་བའི་ཆེད་དུ་ཡ་ཧུ་དཱའི་ཁོངས་གཏོགས་པེར་ཤ་བཱ་རུ་ཕྱིན་པ་དང་། རང་གི་ཞབས་ཕྱི་དེར་བཞག་ཅིང་།
1KI 19:4 ཁོང་ནི་དབེན་སྟོང་དུ་ཉིན་གཅིག་གི་ལམ་ལ་སོང་ཞིང་། ཤུག་སྡོང་ ཞིག་གི་འོག་ཏུ་བསྡད་ནས་རང་འཆི་བའི་ཕྱིར་གསོལ་བ་བཏབ་སྟེ། ཀྱེ་དཀོན་མཆོག་ཡ་ཝཱེ་ལགས། ད་ནི་འགྲིག་སོང་། བདག་ནི་བདག་གི་མེས་པོ་རྣམས་ལས་བཟང་པོ་མིན་པས། བདག་གི་སྲོག་བཞེས་སུ་གསོལ་ཞེས་ཞུས་པ་དང་།
1KI 19:5 ཤུག་སྡོང་དེའི་འོག་ཏུ་ཉལ་ནས་གཉིད་དུ་ཡུར་བ་ན། ཀྱེ་ཧོ། ཕོ་ཉ་ཞིག་གིས་ཁོང་ལ་རེག་ནས། ཡར་ལོངས་ལ་ཁ་ཟས་སྤྱོད་པར་གྱིས་ཞེས་བསྒོས་སོ། །
1KI 19:6 དེ་ནས་ཁོང་གིས་བལྟས་པའི་ཚེ། ཀྱེ་ཧོ། རང་གི་མགོའི་འགྲམ་དུ་སོལ་བས་བསྲེགས་པའི་བག་ལེབ་ཅིག་དང་ཆུ་བུམ་པ་གང་ཡོད་པ་མཐོང་ནས། ཁོང་ཡར་ལངས་ཏེ་བཟའ་བཏུང་སྤྱད་རྗེས་ཡང་བསྐྱར་ཉལ་བ་དང་།
1KI 19:7 དཀོན་མཆོག་ཡ་ཝཱེའི་ཕོ་ཉ་ཐེངས་གཉིས་པར་བྱོན་ནས་ཁོང་ལ་རེག་པ་དང་། ཁྱོད་རང་འགྲོ་སའི་ལམ་ཐག་ཤིན་ཏུ་རིང་བས། ཡར་ལོངས་ལ་ཁ་ཟས་སྤྱོད་ཅིག་ཅེས་བསྒོས་པར།
1KI 19:8 ཁོང་ཡར་ལངས་ནས་བཟའ་བཏུང་སྤྱད་ཅིང་ཁ་ཟས་དེའི་སྟོབས་ཀྱིས་ཉིན་ཞག་བཞི་བཅུའི་རིང་ལ་སོང་ནས་དཀོན་མཆོག་གི་རི་བོ་སྟེ་ཧོ་རེབ་རི་བོར་ཕྱིན་ཏོ། །
1KI 19:9 དེར་སླེབས་ནས་ཁོང་བྲག་ཁུང་ཞིག་གི་ནང་དུ་སོང་ནས་དེར་ཞག་སྡོད་བྱས་པ་དང་། དཀོན་མཆོག་ཡ་ཝཱེའི་བཀའ་བྱུང་སྟེ་ཁོང་ལ། ཨེ་ལི་ཡཱ། ཁྱོད་ཀྱིས་འདི་རུ་ཅི་བྱེད་ཀྱིན་ཡོད་ཅེས་དྲིས་པ་ན།
1KI 19:10 ཁོང་ན་རེ། བདག་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཕྱིར་དུ་ཧུར་བརྩོན་བྱེད་ཀྱིན་ཡོད། ཅིའི་ཕྱིར་ཞེ་ན། ཡེས་ར་ཨེལ་པ་རྣམས་ཀྱིས་ཁྱེད་ཀྱི་ཞལ་ཆད་སྤངས་ཏེ་ཁྱེད་ཀྱི་མཆོད་ཁྲི་རྣམས་བཤིགས་པ་དང་། ཁྱེད་ཀྱི་ལུང་སྟོན་པ་རྣམས་རལ་གྲིས་བསད་དོ། །ད་ལྟ་བདག་གཅིག་པུ་ལུས་ཀྱང་། དེ་རྣམས་ཀྱིས་བདག་གི་སྲོག་གཅོད་པར་སྙེག་གིན་འདུག་ཅེས་ཞུས་པ་ལ།
1KI 19:11 དཀོན་མཆོག་ཡ་ཝཱེས་འདི་སྐད་དུ། ཁྱོད་ཕྱི་རུ་ཡོང་ནས་བདག་གི་མདུན་དུ་རི་མགོར་ལོངས་ལ་སྡོད་ཅིག་ཅེས་བསྒོས་པ་དང་། སྐབས་དེར་དཀོན་མཆོག་ཡ་ཝཱེ་ཁོང་གི་མདུན་ནས་ཕར་ཕེབས་པ་ན། དཀོན་མཆོག་ཡ་ཝཱེའི་མདུན་དུ་རླུང་ཆེན་དྲག་པོ་ཞིག་གིས་རི་ཉིལ་ཞིང་རྡོ་གས་ནའང་། དཀོན་མཆོག་ཡ་ཝཱེ་རླུང་གི་ནང་དུ་མ་མཆིས་ལ། རླུང་ཆེན་གྱི་རྗེས་སུ་ས་འགུལ་བྱུང་ཡང་། དཀོན་མཆོག་ཡ་ཝཱེ་ས་འགུལ་གྱི་ནང་དུའང་མ་མཆིས།
1KI 19:12 ས་འགུལ་གྱི་རྗེས་སུ་མེ་བྱུང་ཡང་། དཀོན་མཆོག་ཡ་ཝཱེ་མེའི་ནང་དུའང་མ་མཆིས་ཤིང་། མེའི་རྗེས་སུ་དམའ་ཞིང་འཇམ་པའི་སྐད་སྒྲ་ཞིག་བྱུང་ཞིང་།
1KI 19:13 ཨེ་ལི་ཡཱས་དེ་ཐོས་པ་ཙམ་གྱིས། ཕྱི་གོས་ཀྱིས་རང་གི་གདོང་བཀབ་སྟེ་ཕྱི་རུ་ཐོན་ནས་བྲག་ཁུང་ཁ་རུ་ཀེ་རེར་བསྡད་པ་དང་། གློ་བུར་སྐད་ཅིག་བྱུང་སྟེ་ན་རེ། ཨེ་ལི་ཡཱ། ཁྱོད་ཀྱིས་འདི་རུ་ཅི་བྱེད་ཀྱིན་ཡོད་ཅེས་པའི་ལན་དུ།
1KI 19:14 ཨེ་ལི་ཡཱ་ན་རེ། བདག་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཕྱིར་དུ་ཧུར་བརྩོན་བྱེད་ཀྱིན་ཡོད། ཅིའི་ཕྱིར་ཞེ་ན། ཡེས་ར་ཨེལ་པ་རྣམས་ཀྱིས་ཁྱེད་ཀྱི་ཞལ་ཆད་སྤངས་ཏེ་ཁྱེད་ཀྱི་མཆོད་ཁྲི་རྣམས་བཤིགས་པ་དང་། ཁྱེད་ཀྱི་ལུང་སྟོན་པ་རྣམས་རལ་གྲིས་བསད་དོ། །ད་ལྟ་བདག་གཅིག་པུ་ལུས་ཀྱང་། དེ་རྣམས་ཀྱིས་བདག་གི་སྲོག་གཅོད་པར་སྙེག་གིན་འདུག་ཅེས་ཞུས་པ་ལ།
1KI 19:15 དཀོན་མཆོག་ཡ་ཝཱེས་ཁོང་ལ། ཁྱོད་སོང་དང་། ཁྱོད་རང་ཡོང་སའི་ལམ་དེ་ནས་ཕྱིར་དཱ་མེ་སེག་གི་དབེན་སྟོང་དུ་སོང་ཞིག ཡང་དེར་སླེབས་རྗེས་ཧ་ཟཱ་ཨེལ་ནི་ཨ་རམ་གྱི་རྒྱལ་པོ་དང་།
1KI 19:16 ནིམ་ཤེའི་བུ་ཡེ་ཧུ་ནི་ཡེས་ར་ཨེལ་གྱི་རྒྱལ་པོར་བསྐོ་བར་སྣུམ་གྱིས་བྱུགས་ཤིག ཡང་ཨ་བེལ་མེ་ཧོ་ལཱ་ཡི་ཤ་ཕད་ཀྱི་བུ་ཨེ་ལི་ཤཱ་ནི་ཁྱོད་ཀྱི་ཚབ་ཏུ་ལུང་སྟོན་པར་བསྐོ་བར་སྣུམ་གྱིས་བྱུགས་ཤིག
1KI 19:17 དེ་ནས་ཧ་ཟཱ་ཨེལ་གྱི་རལ་གྲི་ལས་ཐར་བ་རྣམས་ནི་ཡེ་ཧུས་གསོད་ཅིང་། ཡེ་ཧུའི་རལ་གྲི་ལས་ཐར་བ་རྣམས་ནི་ཨེ་ལི་ཤཱས་གསོད་པར་འགྱུར་རོ། །
1KI 19:18 ཡིན་ནའང་བདག་གིས་པཱ་ཨལ་གྱི་མདུན་དུ་པུས་མོ་མ་བཙུགས་པ་དང་། ཁོ་ལ་ཁ་ཡང་མ་བསྐྱལ་བའི་མི་བདུན་སྟོང་ཡེས་ར་ཨེལ་པའི་ཁྲོད་ནས་བསྐྱུར་བ་ཡིན་ཞེས་བཀའ་བསྩལ་བ་དང་།
1KI 19:19 ཨེ་ལི་ཡཱ་དེ་དང་བྲལ་ནས་སོང་པ་ན། ཁོང་ཤ་ཕད་ཀྱི་བུ་ཨེ་ལི་ཤཱ་ཡིས་ཞིང་རྨོ་བཞིན་པ་དང་ཕྲད། དེའི་མདུན་དུ་བ་གླང་དོར་བཅུ་གཉིས་ཡོད་ལ། དེས་བ་གླང་དོར་བཅུ་གཉིས་པ་འདེད་ཀྱིན་ཡོད་པ་དང་། ཨེ་ལི་ཡཱ་ཁོའི་རྩར་བྱོན་ནས་ཁོང་གི་ཕྱི་གོས་དེའི་སྟེང་དུ་བསྐོན་པ་རེད།
1KI 19:20 དེར་ཨེ་ལི་ཤཱ་ཡིས་བ་གླང་རྣམས་བསྐྱུར་ཏེ་ཨེ་ལི་ཡཱའི་རྗེས་སུ་རྒྱུགས་ནས་ཁོང་ལ། བདག་སོང་ནས་རང་གི་ཕ་མ་དང་འོ་བྱས་ཏེ་གྱེས་ཕྱག་འབུལ་བར་བདག་ལ་དགོངས་པ་གནང་རོགས་ཞུ། དེ་ནས་ང་ཁྱེད་ཀྱི་རྗེས་སུ་འབྲང་བར་བྱའོ་ཞེས་ཞུས་པས། ཁོང་གིས་དེ་ལ། ངས་ཁྱོད་ལ་ཅི་བྱས་སམ། ཕྱིར་སོང་ཞིག་ཅེས་གསུངས་པ་དང་།
1KI 19:21 ཨེ་ལི་ཤཱ་ཁོང་གི་དྲུང་ནས་ཕྱིར་ལོག་ཅིང་། བ་གླང་དོར་གཅིག་ཁྲིད་འོངས་ནས་བཤས་ཏེ། ཞིང་རྨོ་ཆས་ཀྱིས་དེ་དག་གི་ཤ་བཙོས་ནས་མི་རྣམས་ལ་སྤྲད་པ་དང་དེ་རྣམས་ཀྱིས་ཟོས་རྗེས། ཁོང་ཡར་ལངས་ནས་ཨེ་ལི་ཡཱའི་རྗེས་སུ་འབྲངས་ཏེ་ཞབས་ཕྱི་བྱས་སོ། །
1KI 20:1 དེ་ནས་ཨ་རམ་གྱི་རྒྱལ་པོ་པེན་ཧ་དཱད་ཀྱིས་རང་གི་དམག་དཔུང་ཡོད་ཚད་བསྡུས་པ་དང་། རྒྱལ་པོ་སུམ་ཅུ་སོ་གཉིས་ཁོ་དང་མཉམ་དུ་ཡོད་ཅིང་། རྟ་དང་ཤིང་རྟ་བཅས་ཡར་སོང་སྟེ་སཱ་མར་ཡ་བསྐོར་ནས་དེར་དམག་བརྒྱབ་བོ། །
1KI 20:2 པེན་ཧ་དཱད་ཀྱིས་གྲོང་ཁྱེར་དེའི་ཡེས་ར་ཨེལ་གྱི་རྒྱལ་པོ་ཨ་ཧབ་ཀྱི་དྲུང་དུ་བང་ཆེན་མངགས་ཏེ་འདི་ལྟར། པེན་ཧ་དཱད་ཀྱིས་ཁྱོད་ལ་ན་རེ།
1KI 20:3 ཁྱོད་ཀྱི་དངུལ་དང་གསེར་ཡོད་ཚད་ངའི་ཡིན་ལ། ཁྱོད་ཀྱི་བཙུན་མོ་རྣམས་དང་དར་ལ་བབས་པའི་བུ་དང་བུ་མོ་རྣམས་ཀྱང་ངའི་ཡིན་གསུངས་ཞེས་སྨྲས་པ་ལ།
1KI 20:4 ཡེས་ར་ཨེལ་གྱི་རྒྱལ་པོས་དེའི་ལན་དུ། ཀྱེ་ངའི་ཇོ་བོ་དང་ངའི་རྒྱལ་པོ་ལགས། ཁྱེད་ཀྱི་བཀའ་བཞིན་དུ་ང་དང་ང་ལ་གཏོགས་པ་ཐམས་ཅད་ཁྱེད་ཀྱི་ཡིན་ཞེས་སྨྲས་པ་དང་།
1KI 20:5 བང་ཆེན་དེ་དག་སླར་འོངས་ནས་ཁོ་ལ། པེན་ཧ་དཱད་ཀྱིས་འདི་ལྟར། བདག་གིས་དེ་སྔར་མི་མངགས་ནས་ཁྱོད་ལ། ཁྱོད་ཀྱིས་རང་གི་དངུལ་དང་གསེར་དང་། བཙུན་མོ་དང་བུ་བུ་མོ་རྣམས་ངའི་ལག་ཏུ་སྤྲོད་ཅིག་ཅེས་འཕྲིན་བསྐུར་བ་ཡིན།
1KI 20:6 སང་ཉིན་དུས་འདི་ཙམ་ལ་ངས་རང་གི་འཁོར་གཡོག་རྣམས་ཁྱོད་ཀྱི་རྩར་གཏོང་བར་བྱ། དེ་དག་གིས་ཁྱོད་ཀྱི་རྒྱལ་པོའི་ཕོ་བྲང་དང་། ཁྱོད་ཀྱི་འཁོར་གཡོག་རྣམས་ཀྱི་ཁྱིམ་ནང་སྔོག་བཤེར་བྱ་ཞིང་། ཁོ་ཚོས་རིན་ཐང་ཆེ་བར་བསམ་པ་ཐམས་ཅད་བླངས་ནས་འཁྱེར་བར་འགྱུར་རོ་གསུངས་ཞེས་སྨྲས།
1KI 20:7 དེར་ཡེས་ར་ཨེལ་གྱི་རྒྱལ་པོས་ཡུལ་དེའི་རྒན་པོ་ཐམས་ཅད་བོས་ནས་དེ་དག་ལ། ཁྱེད་རྣམ་པས་སོམས་ཤིག མི་འདིས་དཀྲུག་ཤིང་འཕེན་པར་ལྟོས་དང་། ཁོས་དེ་སྔར་ངའི་རྩར་མི་མངགས་ནས་ངའི་བཙུན་མོ་རྣམས་དང་བུ་དང་བུ་མོ་རྣམས་དང་། ངའི་དངུལ་དང་གསེར་རྣམས་དགོས་པར་སྨྲས་ནའང་། ངས་ཁོ་ལ་མི་སྟེར་མ་སྨྲས་ཞེས་སྨྲས་པ་ན།
1KI 20:8 རྒན་པོ་རྣམས་དང་མི་ཐམས་ཅད་ཀྱིས་ཁོང་ལ། ཁོའི་གཏམ་ལ་མ་གསན་ལ་ཁོའི་འདོད་ལའང་མ་བསྟུན་ཞེས་ཞུས་པའི་རྐྱེན་གྱིས།
1KI 20:9 ཨ་ཧབ་ཀྱིས་པེན་ཧ་དཱད་ཀྱི་བང་ཆེན་རྣམས་ལ། ཁྱོད་ཅག་གིས་ངའི་ཇོ་བོ་དང་ངའི་རྒྱལ་པོ་ལ་འདི་ལྟར་ཞུས་ཤིག ཁྱེད་ཀྱིས་ཐེངས་དང་པོར་བང་ཆེན་མངགས་ནས་ཉིད་ཀྱི་ཞབས་ཕྱི་བདག་ལ་ཅི་དགོས་གསུངས་པ་ཐམས་ཅད་བདག་གིས་དེ་བཞིན་བྱས་ཆོག འོན་ཀྱང་ཐེངས་འདིའི་རེ་བ་ནི་ངས་བསྐང་མི་ནུས་སོ་ཞེས་སྨྲས་པ་དང་། བང་ཆེན་རྣམས་སོང་ནས་འཕྲིན་དེ་པེན་ཧ་དཱད་ལ་སྤྲད་པར།
1KI 20:10 པེན་ཧ་དཱད་ཀྱིས་ཡང་བང་ཆེན་བཏང་ནས་ཨ་ཧབ་ལ། གལ་ཏེ་སཱ་མར་ཡ་ཡི་ས་རྡུལ་ནི་ངའི་རྗེས་སུ་འབྲངས་པའི་མི་རེ་རེར་སྤར་བ་གང་རེ་འདང་བ་ཡིན་ན། ལྷ་རྣམས་ཀྱིས་ང་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲས་པ་དང་།
1KI 20:11 ཡེས་ར་ཨེལ་གྱི་རྒྱལ་པོས། གོ་ཁྲབ་གྱོན་པའི་མི་ཡིས་གོ་ཁྲབ་ཕུད་མཁན་ལྟར་རློམ་སེམས་མ་སྐྱེད་ཅིག་ཅེས་དེ་ལ་ལན་བཏབ་ཅིང་།
1KI 20:12 སྐབས་དེར་པེན་ཧ་དཱད་ཀྱིས་རྒྱལ་པོ་གཞན་རྣམས་དང་ལྷན་དུ་གུར་ནང་དུ་ཆང་འཐུང་བཞིན་ཡོད་ལ། འཕྲིན་འདི་ཐོས་ནས་འཁོར་གཡོག་རྣམས་ལ། རུ་སྒྲིགས་ལ་ཕར་རྒོལ་ཞིག་ཅེས་བསྒོས་པ་དང་དེ་དག་གིས་རུ་བསྒྲིགས་ནས་གྲོང་ཁྱེར་དེ་ལ་རྒོལ་བའོ། །
1KI 20:13 དེའི་དུས་སུ་ལུང་སྟོན་པ་ཞིག་ཡེས་ར་ཨེལ་གྱི་རྒྱལ་པོ་ཨ་ཧབ་ཀྱི་དྲུང་དུ་འོངས་ནས་ཁོང་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་དཔུང་ཚོགས་ཆེན་པོ་འདི་རྣམས་མཐོང་ངམ། ལྟོས་ཤིག དེ་རིང་བདག་གིས་དེ་རྣམས་ཁྱོད་ཀྱི་ལག་ཏུ་སྤྲོད་ཅིང་། དེ་ནས་ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ་ཞེས་སྨྲས་པ་ལ།
1KI 20:14 ཨ་ཧབ་ཀྱིས་སུ་ཞིག་བརྒྱུད་ནས་འདི་ལྟར་འབྱུང་ངམ་ཞེས་དྲིས་པ་ན། ལུང་སྟོན་པ་ན་རེ། དཀོན་མཆོག་ཡ་ཝཱེས་འདི་སྐད་དུ། ལྗོངས་སོ་སོའི་འགོ་དཔོན་རྣམས་ཀྱི་རྗེས་སུ་འབྲང་བའི་ན་གཞོན་རྣམས་བརྒྱུད་ནས་བསྒྲུབ་ངེས་སོ་ཞེས་གསུངས་པ་དང་། ཡང་ཨ་ཧབ་ན་རེ། འཐབ་མོ་རྩོམ་མཁན་སུ་ཡིན་ནམ་ཞེས་དྲིས་པར། ལུང་སྟོན་པས་ལན་དུ། ཁྱོད་རང་ཡིན་ཞེས་གསུངས་སོ། །
1KI 20:15 དེ་ནས་ཨ་ཧབ་ཀྱིས་ལྗོངས་སོ་སོའི་འགོ་དཔོན་གྱི་རྗེས་སུ་འབྲང་བའི་ན་གཞོན་རྣམས་རྩིས་གྲངས་བླངས་པ་དང་། བསྡོམས་པས་མི་ཉིས་བརྒྱ་དང་སོ་གཉིས་ཡོད། དེའི་རྗེས་སུ་ཡང་ཁོང་གིས་ཡེས་ར་ཨེལ་པའི་ལྷག་ལུས་རྣམས་རྩིས་གྲངས་བླངས་པ་ལ་བསྡོམས་པས་མི་སྟོང་བདུན་དུ་སླེབས་པ་རེད།
1KI 20:16 ཉིན་གུང་ལ་པེན་ཧ་དཱད་དང་ཁོའི་དཔུང་གྲོགས་ཡིན་པའི་རྒྱལ་པོ་སུམ་ཅུ་སོ་གཉིས་ཀྱིས་གུར་ནང་དུ་ཆང་བག་མེད་དུ་འཐུང་བའི་དུས་སུ། དེ་རྣམས་ལམ་དུ་ཆས་པ་དང་།
1KI 20:17 ལྗོངས་རེ་རེའི་འགོ་དཔོན་རྣམས་ཀྱི་རྗེས་སུ་འབྲང་བའི་ན་གཞོན་རྣམས་སྔོན་ལ་སླེབས་པ་དང་། པེན་ཧ་དཱད་ཀྱིས་མྱུལ་ཞིབ་པ་བཏང་བ་དང་དེ་དག་གིས་ཁོ་ལ། སཱ་མར་ཡའི་ཕྱོགས་ནས་མི་རྣམས་སླེབས་བྱུང་ཞེས་སྨྲས།
1KI 20:18 དེར་པེན་ཧ་དཱད་ན་རེ། དེ་རྣམས་ཞི་མཐུན་གྱི་ཆེད་དུ་སླེབས་པ་ཡིན་ན་གསོན་པོར་ཟུངས་ཤིག འཐབ་ཏུ་ཐོན་པ་ཡིན་ནའང་གསོན་པོར་ཟུངས་ཤིག་ཅེས་བསྒོས་སོ། །
1KI 20:19 ལྗོངས་སོ་སོའི་འགོ་དཔོན་རྣམས་ཀྱི་རྗེས་སུ་འབྲང་བའི་ན་གཞོན་རྣམས་གྲོང་ཁྱེར་ནས་ཐོན་ཞིང་། དམག་དཔུང་ཡང་དེ་དག་གི་རྗེས་སུ་སླེབས་པ་དང་།
1KI 20:20 མི་རེ་རེས་རང་རང་གི་འགྲན་ཟླ་རྣམས་བསད་པས། ཨ་རམ་པ་རྣམས་བྲོས་ཤིང་ཡེས་ར་ཨེལ་པ་རྣམས་ཀྱིས་རྗེས་བསྙེགས་ཀྱང་། ཨ་རམ་གྱི་རྒྱལ་པོ་པེན་ཧ་དཱད་ནི་རྟ་ལ་ཞོན་ཏེ་སྐྱ་དམག་སྐོར་ཞིག་དང་མཉམ་དུ་བྲོས་པའོ། །
1KI 20:21 ཡེས་ར་ཨེལ་གྱི་རྒྱལ་པོ་ཡང་དེར་སླེབས་ནས་རྟ་དང་ཤིང་རྟ་རྣམས་ལ་རྒོལ་ཞིང་། གསོད་གཅོད་ཆེན་པོས་ཨ་རམ་པ་རྣམས་ཕམ་པར་བརྒྱབ་བོ། །
1KI 20:22 དེ་ནས་ལུང་སྟོན་པ་དེ་ཡེས་ར་ཨེལ་གྱི་རྒྱལ་པོའི་དྲུང་དུ་འོངས་ནས་ཁོང་ལ། སང་ལོའི་དཔྱིད་དུས་སུ་ཨ་རམ་གྱི་རྒྱལ་པོ་སླར་ཡང་ཁྱེད་ལ་དམག་འདྲེན་དུ་འོང་བས། སོང་ལ་སྟོབས་ཤུགས་འཛོམས་པར་གྱིས་ཤིག རང་གིས་ཅི་བྱེད་དགོས་པར་མཉམ་ཞོག་ཅིག་ཅེས་གསུངས་སོ། །
1KI 20:23 དེ་ནས་ཨ་རམ་གྱི་རྒྱལ་པོའི་འཁོར་གཡོག་རྣམས་ཀྱིས་ཁོ་ལ། ཡེས་ར་ཨེལ་པ་རྣམས་ཀྱི་ལྷ་རྣམས་ནི་རི་བོ་དག་གི་ལྷ་ཡིན་པས། དེ་དག་རང་ཅག་ལས་སྟོབས་ཤུགས་ཆེ་བ་རེད། འོན་ཀྱང་རང་ཅག་གིས་བདེ་ཐང་ནས་དེ་དག་ལ་འཐབ་ན་རྒྱལ་ཁ་ལེན་ཐུབ་ངེས་ཡིན།
1KI 20:24 རྒྱལ་པོ་ཁྱེད་ཀྱིས་འདི་བཞིན་བྱེད་འོས་ཏེ། རྒྱལ་པོ་རྣམས་རང་རང་གི་གོ་ས་ལས་ཕབ་སྟེ། དེ་དག་གི་གོ་ས་རུ་དམག་དཔོན་རྣམས་བསྐོས་ནས།
1KI 20:25 སྟོངས་ཟིན་པའི་དམག་དཔུང་གི་ཚབ་ཏུ་དམག་དཔུང་གསར་པ་ཞིག་དང་། རྟའི་ཚབ་ཏུ་རྟ་དང་ཤིང་རྟའི་ཚབ་ཏུ་ཤིང་རྟ་རྣམས་གཤམ་དགོས། དེ་ནས་རང་ཅག་གིས་བདེ་ཐང་ནས་དེ་དག་ལ་འཐབ་ན། རང་ཅག་དེ་དག་ལས་རྒྱལ་བར་འགྱུར་རོ་ཞེས་ཞུས་པས། ཁོས་དེ་རྣམས་ཀྱི་གཏམ་ལ་མཉན་ནས་དེ་བཞིན་དུ་བྱས་སོ། །
1KI 20:26 དེ་ནས་དཔྱིད་ཀའི་དུས་སུ། པེན་ཧ་དཱད་ཀྱིས་ཨ་རམ་པ་རྣམས་རྩིས་གྲངས་བླངས་ནས་ཡེས་ར་ཨེལ་ལ་འཐབ་པར་ཨ་ཕེག་ཅེས་པར་སོང་ངོ་། །
1KI 20:27 ཡེས་ར་ཨེལ་པ་རྣམས་ཀྱིས་མི་རྩིས་བླངས་ནས་རྒྱགས་མཁོ་སྤྲོད་བྱས་ཏེ། ཨ་རམ་པའི་གདོང་བསུས་ནས་འཐབ་ཏུ་སོང་། ཡེས་ར་ཨེལ་པ་རྣམས་ཀྱིས་དེ་རྣམས་ཀྱི་ཁ་གཏད་དུ་སྒར་ཕབ་པ་དང་རེའུ་ཡི་ཁྱུ་ཆུང་ངུ་གཉིས་དང་མཚུངས་ལ། ཨ་རམ་པས་ཡུལ་དེ་ཁྱབ་ནས་བསྡད་ཡོད་དོ། །
1KI 20:28 དེ་ནས་དཀོན་མཆོག་གི་སྐྱེས་བུ་ཞིག་འོངས་ནས་ཡེས་ར་ཨེལ་གྱི་རྒྱལ་པོ་ལ། དཀོན་མཆོག་ཡ་ཝཱེས་འདི་སྐད་དུ། ཨ་རམ་པས་དཀོན་མཆོག་ཡ་ཝཱེ་ནི་རི་བོ་དག་གི་དཀོན་མཆོག་ཡིན་པ་དང་བདེ་ཐང་གི་དཀོན་མཆོག་མིན་པར་སྨྲ་བས་ན། བདག་གིས་དཔུང་ཚོགས་ཆེན་པོ་འདི་ཐམས་ཅད་ཁྱོད་ཀྱི་ལག་ཏུ་སྤྲད་དོ། །དེ་ནས་ཁྱོད་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་ཞེས་སྨྲས་སོ། །
1KI 20:29 དེ་བཞིན་དུ་ཉིན་ཞག་བདུན་གྱི་རིང་ལ་ཡེས་ར་ཨེལ་པ་དང་ཨ་རམ་པ་གཉིས་ཀྱིས་ཕན་ཚུན་ཁ་གཏད་དུ་དམག་སྒར་ཕབ་ནས་བསྡད་དེ། ཉིན་བདུན་པར་དམག་འཐབ་འགོ་བརྩམས་པ་རེད། ཡེས་ར་ཨེལ་པ་རྣམས་ཀྱིས་ཉིན་གཅིག་གི་ནང་དུ་ཨ་རམ་པའི་རྐང་དམག་འབུམ་གཅིག་བསད་པ་དང་།
1KI 20:30 ཤུལ་དུ་ལུས་པ་རྣམས་ཨ་ཕེག་གྲོང་ཁྱེར་དུ་བྲོས་ནའང་། མཁར་གྱང་ལོག་ནས་ཤུལ་དུ་ལུས་པའི་མི་ཉིས་ཁྲི་བདུན་སྟོང་མནན་ཏེ་ཤིའོ། །པེན་ཧ་དཱད་ཀྱང་གྲོང་ཁྱེར་ནང་དུ་བྲོས་ཏེ་ཁང་བ་སྦུག་མ་ཞིག་ལ་སྦས་ནས་བསྡད་དོ། །
1KI 20:31 དེ་ནས་ཁོའི་འཁོར་གཡོག་རྣམས་ཀྱིས་ཁོ་ལ། གཟིགས་དང་། ཡེས་ར་ཨེལ་ཁྱིམ་རྒྱུད་གྱི་རྒྱལ་པོ་རྣམས་ནི་རྒྱལ་པོ་སྙིང་རྗེ་ཅན་ཡིན་པར་ཐོས་བྱུང་སྟེ། རང་ཅག་གིས་ཁོག་སྨད་དུ་རྩིད་རས་གྱོན་པ་དང་། མགོ་ལ་ཐག་པ་དཀྲིས་ནས་ཡེས་ར་ཨེལ་གྱི་རྒྱལ་པོའི་དྲུང་དུ་སོང་ན། ཁྱེད་རང་སྲོག་ཐར་དུ་གཏོང་ཡང་སྲིད་ཅེས་ཞུས་པས།
1KI 20:32 ཁོ་རྣམས་ཀྱིས་ཁོག་སྨད་དུ་རྩིད་རས་གྱོན་པ་དང་། མགོ་ལ་ཐག་པ་དཀྲིས་ནས་ཡེས་ར་ཨེལ་གྱི་རྒྱལ་པོའི་དྲུང་དུ་ཕྱིན་ཏེ་ཁོང་ལ། ཁྱེད་ཀྱི་ཞབས་ཕྱི་པེན་ཧ་དཱད་ཀྱིས་འདི་ལྟར། ཐུགས་རྗེས་གཟིགས་ཏེ་ང་སྲོག་ཐར་དུ་གཏོང་བར་མཛོད་ཅེས་ཞུའོ་ཞེས་ཞུས་པས། ཨ་ཧབ་ཀྱིས་ལན་དུ། ཁོ་ད་དུང་གསོན་པོར་ཡོད་དམ། ཁོ་ནི་ངའི་སྤུན་མཆེད་ཡིན་ཞེས་སྨྲས་སོ། །
1KI 20:33 མི་དེ་དག་གིས་གཏམ་དེ་ནི་ལྟས་བཟང་ཡིན་པར་སྙམ་ནས་མྱུར་དུ་ཁོང་ལ་ལན་སྤྲད་དེ། པེན་ཧ་དཱད་ནི་སྐུ་ཉིད་ཀྱི་སྐུ་མཆེད་ལགས་སོ་ཞེས་སྨྲས་པ་ལ། ཨ་ཧབ་ན་རེ། ཁྱོད་རྣམས་སོང་ལ་ཁོ་རང་ཁྲིད་ཤོག་ཅེས་སྨྲས་པ་དང་། པེན་ཧ་དཱད་ཁོང་དང་འཕྲད་དུ་འོངས་པ་དང་། ཨ་ཧབ་ཀྱིས་ཁོ་རང་གི་ཤིང་རྟའི་ནང་སྡོད་དུ་བཅུག་གོ །
1KI 20:34 དེ་ནས་པེན་ཧ་དཱད་ཀྱིས་ཨ་ཧབ་ལ། ངའི་ཕ་ཡིས་ཁྱེད་ཀྱི་ཡབ་ལས་ཕྲོགས་པའི་གྲོང་ཁྱེར་ཐམས་ཅད་ངས་ཁྱེད་ལ་ཕྱིར་འབུལ་བར་བྱ། ཡང་ངའི་ཕ་ཡིས་སཱ་མར་ཡ་ཡུལ་དུ་ཚོང་འདུས་ཁྲོམ་ར་བཙུགས་པ་ལྟར། ཁྱེད་ཀྱིས་ཀྱང་དཱ་མེ་སེག་གྲོང་ཁྱེར་དུ་ཚོང་འདུས་ཁྲོམ་ར་ཞིག་འཛུགས་པར་མཛོད་ཅེས་ཞུས་པ་ལ། ཨ་ཧབ་ཀྱིས་ངས་ཁྱོད་ལ་ཁ་ཆད་འདི་ལྟ་བུ་བཞག་ནས་ཁྱོད་འགྲོ་རུ་འཇུག་གོ་ཞེས་སྨྲས་ཤིང་། ཁོང་གིས་ཁ་ཆད་བཞག་པ་དང་པེན་ཧ་དཱད་འགྲོ་རུ་བཅུག་གོ །
1KI 20:35 དེ་ནས་ལུང་སྟོན་པའི་ཐུགས་སྲས་རྣམས་ལས་གཅིག་གིས་དཀོན་མཆོག་ཡ་ཝཱེའི་བཀའ་ནང་བཞིན་ཐུགས་སྲས་གཞན་ཞིག་ལ། ཁྱོད་ཀྱིས་ང་ལ་རྡུངས་ཤིག་ཅེས་སྨྲས་ཀྱང་། དེས་ཁོ་ལ་མི་རྡུང་ངོ་། །
1KI 20:36 དེ་རུ་ཁོས་མི་དེ་ལ། ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་མ་མཉན་པས། ང་དང་བྲལ་མ་ཐག་ཏུ་སེང་གེ་ཞིག་གིས་ཁྱོད་ལ་སོ་བཏབ་ནས་གསོད་པར་འགྱུར་ཞེས་སྨྲས་པ་དང་། མི་དེ་ཁོང་དང་བྲལ་ནས་སོང་མ་ཐག་ཏུ་སེང་གེ་ཞིག་དང་ཕྲད་ནས་ཁོ་བསད་དོ། །
1KI 20:37 ཡང་ལུང་སྟོན་པའི་ཐུགས་སྲས་དེ་མི་གཞན་ཞིག་དང་ཕྲད་ནས་དེ་ལ། ང་ལ་རྡུང་བར་མཛོད་ཅིག་ཅེས་སྨྲས་པ་ལ། མི་དེས་ཁོ་ལ་བརྡུངས་ནས་རྨས་པར་བྱས།
1KI 20:38 དེ་ནས་ལུང་སྟོན་པ་དེ་སོང་ནས་ལམ་ཁར་རྒྱལ་པོར་བསྒུགས་པ་དང་། རང་གི་མིག་ཟུང་ལག་རས་ཀྱིས་བཀབ་ནས་གྱོན་ཆས་བསྒྱུར་ཏོ། །
1KI 20:39 རྒྱལ་པོ་ཁོའི་མདུན་ནས་འགྲོ་བའི་དུས་སུ། ཁོས་སྐད་ཆེན་པོས་རྒྱལ་པོ་བོས་ཏེ། ཁྱེད་ཀྱི་ཞབས་ཕྱི་བདག་འཐབ་མོར་ཞུགས་པ་དང་གཡུལ་འགྱེད་པའི་དུས་སུ། ཀྱེ་ཧོ། དམག་མི་ཞིག་གློ་བུར་ཉིད་ལ་ཁ་ཕྱིར་འཁོར་ནས་བདག་གི་རྩར་མི་ཞིག་ཁྲིད་འོངས་ཏེ་བདག་ལ་མི་འདི་བསྲུང་བར་གྱིས་ཤིག གལ་ཏེ་མི་འདི་བོར་ན་དེའི་སྲོག་ཚབ་ཏུ་ཁྱོད་ཀྱི་སྲོག་འགྲོ་དགོས། དེ་མིན་ན་ཁྱོད་ཀྱིས་དངུལ་རྡོ་ཚད་གཅིག་འཇལ་དགོས་ཞེས་སྨྲས་བྱུང་།
1KI 20:40 དེ་ནས་ཁྱེད་ཀྱི་ཞབས་ཕྱི་བདག་ཡར་མར་གྱི་དོན་མང་པོར་བྲེལ་བས་ན་མི་དེ་བྲོས་སོང་ཞེས་ཞུས་པ་དང་། ཡེས་ར་ཨེལ་གྱི་རྒྱལ་པོས་ཁོ་ལ། ཁྱོད་ཀྱིས་རང་ཉིད་ལ་ཁྲིམས་བཅད་པས། དེ་བཞིན་དུ་ཁྱོད་ལ་ཁྲིམས་གཅོད་པར་བྱའོ་ཞེས་སྨྲས་པ་དང་།
1KI 20:41 ཁོས་མྱུར་དུ་རང་གི་གདོང་ལས་ལག་རས་དེ་ཕུད་པས། ཡེས་ར་ཨེལ་གྱི་རྒྱལ་པོས་ཁོ་ནི་ལུང་སྟོན་པ་ཞིག་ཡིན་པར་ཤེས་སོ། །
1KI 20:42 དེར་ལུང་སྟོན་པས་རྒྱལ་པོ་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་བདག་གིས་རྩ་མེད་གཏོང་དགོས་པའི་མི་རང་གི་ལག་ནས་འགྲོ་རུ་བཅུག་པའི་རྐྱེན་གྱིས། ཁོའི་སྲོག་གི་ཚབ་ཏུ་ཁྱོད་ཀྱི་སྲོག་དང་། ཁོའི་འབངས་ཀྱི་ཚབ་ཏུ་ཁྱོད་ཀྱི་འབངས་འགྲོ་བར་འགྱུར་རོ་ཞེས་བསྒོས་པ་ན།
1KI 20:43 ཡེས་ར་ཨེལ་གྱི་རྒྱལ་པོ་ཡིད་མུག་ཅིང་བློ་མི་བདེ་བར་གྱུར་ནས། ཕྱིར་སཱ་མར་ཡ་རུ་རང་གི་ཕོ་བྲང་དུ་ལོག་གོ །
1KI 21:1 ཡེ་སི་རེ་ཨེལ་པ་ནཱ་རྦོད་བྱ་བ་ལ་ཡེ་སི་རེ་ཨེལ་གྱི་སཱ་མར་ཡའི་རྒྱལ་པོ་ཨ་ཧབ་ཀྱི་ཕོ་བྲང་གི་ཉེ་འགྲམ་དུ་རྒུན་འབྲུམ་ར་བ་ཞིག་ཡོད་པ་ཡིན།
1KI 21:2 ཨ་ཧབ་ཀྱིས་ནཱ་རྦོད་ལ། ཁྱོད་ཀྱི་རྒུན་འབྲུམ་ར་བ་འདི་ངའི་ཕོ་བྲང་གི་ཉེ་འགྲམ་དུ་ཡོད་པས། སྔོ་ཚོད་ར་བ་བྱེད་པར་ང་ལ་བྱིན་ཅིག་དང་། ངས་དེ་ལས་བཟང་བའི་རྒུན་འབྲུམ་ར་བ་ཞིག་ཚབ་ཏུ་སྟེར་བར་བྱ། གལ་ཏེ་ཁྱོད་དགའ་ན་ངས་དེའི་རིན་དུ་དངུལ་སྤྲད་ཀྱང་ཆོག་ཅེས་སྨྲས་ནའང་།
1KI 21:3 ནཱ་རྦོད་ཀྱིས་ཨ་ཧབ་ལ། རང་གི་ཕ་མེས་ཀྱི་ནོར་སྐལ་ཁྱེད་ལ་འབུལ་བ་ནི་དཀོན་མཆོག་ཡ་ཝཱེས་རྩ་བ་ནས་འགོག་པ་ཡིན་ཞེས་ལན་དུ་སྨྲས་སོ། །
1KI 21:4 དེར་ཡེ་སི་རེ་ཨེལ་པ་ནཱ་རྦོད་ཀྱིས་ངས་རང་གི་ཕ་མེས་ཀྱི་ནོར་སྐལ་དེ་ཁྱེད་ལ་སྟེར་བར་མི་བྱའོ་ཞེས་སྨྲས་པའི་རྐྱེན་གྱིས། ཨ་ཧབ་ཁྲོས་ཤིང་སེམས་མ་སྐྱིད་པར་ཕྱིར་ཕོ་བྲང་དུ་ལོག་ནས། མལ་ཁྲིར་ལོག་ནས་ངོ་གནག་སྟེ་ཡི་གའང་ཆད་དོ། །
1KI 21:5 དེ་ནས་ཁོའི་བཙུན་མོ་ཡེ་ཟི་བེལ་ཁོའི་མདུན་དུ་འོངས་ནས་ཁྱེད་སེམས་ཕམ་ནས་ཐ་ན་ཟས་ཀྱང་མི་བཟའ་བ་འདི་ཅི་ཡིན་ཞེས་དྲིས་པ་ན།
1KI 21:6 ཁོས་ལན་དུ། ངས་ཡེ་སི་རེ་ཨེལ་པ་ནཱ་རྦོད་ལ། ཁྱོད་ཀྱི་རྒུན་འབྲུམ་ར་བ་དེ་ང་ལ་ཚོངས་དང་ངས་དངུལ་སྟེར་བར་བྱ། གལ་ཏེ་ཁྱོད་དགའ་ན་ངས་དེའི་ཚབ་ཏུ་རྒུན་འབྲུམ་ར་བ་གཞན་ཞིག་སྟེར་བར་བྱ་ཞེས་སྨྲས་མོད། འོན་ཀྱང་ཁོས་ལན་དུ། ངས་རང་གི་རྒུན་འབྲུམ་ར་བ་དེ་ཁྱོད་ལ་སྟེར་མི་རུང་ཟེར་ཞེས་སྨྲས་པ་ན།
1KI 21:7 ཁོའི་བཙུན་མོ་ཡེ་ཟི་བེལ་གྱིས། ད་ལྟ་ཁྱེད་ནི་ཡེས་ར་ཨེལ་གྱི་རྒྱལ་སྲིད་སྐྱོང་བའི་རྒྱལ་པོ་མ་ཡིན་ནམ། ཡར་ལོངས་ལ་ཁ་ཟས་བཞེས་ཤིག སེམས་དགའ་བར་གྱིས། ཡེ་སི་རེ་ཨེལ་པ་ནཱ་རྦོད་ཀྱི་རྒུན་འབྲུམ་ར་བ་དེ་ངས་ཁྱེད་ལ་སྦྱིན་པར་བྱའོ་ཞེས་སྨྲས་སོ། །
1KI 21:8 དེ་ནས་ཡེ་ཟི་བེལ་གྱིས་ཨ་ཧབ་ཀྱི་མིང་བཀོད་ནས་བཀའ་ཤོག་བྲིས་ཤིང་དེ་ལ་རྒྱལ་པོའི་ཐམ་ཀ་བརྒྱབ་སྟེ། བཀའ་ཤོག་དེ་རྣམས་ནཱ་རྦོད་གྲོང་ཁྱེར་དུ་སྡོད་པའི་རྒན་པོ་དང་སྐུ་དྲག་རྣམས་ལ་བསྐུར་ཏོ། །
1KI 21:9 ཡི་གེ་ནང་དུ་འདི་ལྟར། ཁྱོད་རྣམས་ཀྱིས་སྨྱུང་གནས་བསྲུང་དགོས་པར་སྒྲོགས་ལ། ནཱ་རྦོད་ནི་མི་རྣམས་ཀྱི་ཁྲོད་དུ་གྲལ་མགོ་རུ་ཞོག་ཅིག
1KI 21:10 མི་ངན་གཉིས་ཁོའི་ཁ་གཏད་ནས་སྡོད་དུ་ཆུག་ལ། ཡང་དེ་གཉིས་ལ་འདི་ལྟར། ཁྱོད་ཀྱིས་དཀོན་མཆོག་དང་རྒྱལ་པོ་གཉིས་ལ་སྐུར་བ་བཏབ་པ་ཡིན་ཞེས་བདེན་དཔང་བྱས་ནས་ཁོ་གཏུག་ཏུ་ཆུག དེ་ནས་ཁྱོད་ཚོས་ཁོ་ཕྱི་རུ་དྲུད་ལ་རྡོ་རུབ་བཏང་ནས་སོད་ཅིག་ཅེས་བྲིས་ཡོད་པའོ། །
1KI 21:11 དེར་ནཱ་རྦོད་གྲོང་ཁྱེར་གྱི་མི་རྣམས་ཏེ། ནཱ་རྦོད་དང་མཉམ་དུ་གྲོང་ཁྱེར་གཅིག་ལ་གནས་པའི་རྒན་པོ་དང་སྐུ་དྲག་རྣམས་ཀྱིས་ཡེ་ཟི་བེལ་གྱིས་བསྐུར་བའི་བཀའ་ཤོག་ཏུ་བྲིས་པ་བཞིན་བྱས་ཏེ།
1KI 21:12 མི་རྣམས་ལ་སྨྱུང་གནས་བསྲུང་དགོས་པར་བསྒྲགས་ཤིང་ནཱ་རྦོད་ནི་མི་རྣམས་ཀྱི་ཁྲོད་དུ་གྲལ་མགོར་སྡོད་དུ་བཅུག་གོ །
1KI 21:13 དེ་ནས་མི་ངན་དེ་གཉིས་འོངས་ནས་ཁོའི་ཁ་གཏད་དུ་བསྡད་པ་དང་། མི་ཚོགས་ཀྱི་མདུན་དུ་བདེན་དཔང་བྱས་ཏེ་ནཱ་རྦོད་གཏུག་ནས་ན་རེ། ནཱ་རྦོད་ཀྱིས་དཀོན་མཆོག་དང་རྒྱལ་པོ་གཉིས་ལ་སྐུར་བ་བཏབ་བོ་ཞེས་སྨྲས་པས། མི་ཚོགས་ཀྱིས་ནཱ་རྦོད་གྲོང་ཁྱེར་གྱི་ཕྱི་རོལ་ཏུ་དྲུད་དེ་ཁོ་ལ་རྡོ་རུབ་བཏང་ནས་བསད་དོ། །
1KI 21:14 དེ་ནས་ཁོ་ཚོས་མི་མངགས་ནས་ཡེ་ཟི་བེལ་ལ། ནཱ་རྦོད་ལ་རྡོ་རུབ་བཏང་ནས་བསད་པ་ཡིན་ཞེས་འཕྲིན་བསྐུར་ཏོ། །
1KI 21:15 ཡེ་ཟི་བེལ་གྱིས་ནཱ་རྦོད་རྡོ་རུབ་བཏང་ནས་བསད་པ་ཐོས་པ་ཙམ་གྱིས་ཨ་ཧབ་ལ། ད་ནི་ནཱ་རྦོད་ཤི་ཟིན་ཏེ་གསོན་པོར་མེད་པས། ཡར་ལངས་ནས་སོང་ལ་ཡེ་སི་རེ་ཨེལ་པ་ནཱ་རྦོད་ཀྱིས་དངུལ་བླངས་ནས་ཁྱེད་ལ་མ་བཙོང་པའི་རྒུན་འབྲུམ་ར་བ་དེ་བདག་གིར་ཟུངས་ཤིག་ཅེས་སྨྲས་པ་དང་།
1KI 21:16 ཨ་ཧབ་ཀྱིས་ནཱ་རྦོད་ཤི་བའི་གཏམ་ཐོས་པ་ཙམ་གྱིས། ཡར་ལངས་ནས་ཡེ་སི་རེ་ཨེལ་པ་ནཱ་རྦོད་ཀྱི་རྒུན་འབྲུམ་ར་བ་བདག་གིར་བཟུང་དུ་སོང་ངོ་། །
1KI 21:17 དེའི་དུས་སུ་ཐི་ཞི་པ་ཨེ་ལི་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་སྟེ་འདི་སྐད་དུ།
1KI 21:18 ཁྱོད་ཡར་ལོངས་ལ་སཱ་མར་ཡ་རུ་ཡོད་པའི་ཡེས་ར་ཨེལ་གྱི་རྒྱལ་པོ་ཨ་ཧབ་དང་འཕྲད་དུ་སོང་ཞིག ཉོན་དང་། ཁོ་ནི་ནཱ་རྦོད་ཀྱི་རྒུན་འབྲུམ་ར་བ་བདག་གིར་བཟུང་ཆེད་དེར་ཡོད་པ་ཡིན།
1KI 21:19 ཁྱོད་ཀྱིས་ཁོ་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་མི་བསད་ནས་དེའི་ནོར་སྐལ་ཡང་བདག་གིར་འཛིན་པ་ཡིན་ནམ་ཞེས་གསུངས་ཞེས་སྨྲོས་ཤིག ཡང་ཁོ་ལ། དཀོན་མཆོག་ཡ་ཝཱེས་འདི་སྐད་དུ། ཁྱི་རྣམས་ཀྱིས་ནཱ་རྦོད་ཀྱི་ཁྲག་བལྡགས་པའི་གནས་སུ། དེ་དག་གིས་ཁྱོད་ཀྱི་ཁྲག་ཀྱང་བལྡག་པར་འགྱུར་རོ་གསུངས་ཞེས་སྨྲོས་ཤིག་ཅེས་གསུངས་སོ། །
1KI 21:20 དེ་ནས་ཨ་ཧབ་ཀྱིས་ཨེ་ལི་ཡཱ་ལ། ཀྱེ་ངའི་དགྲ་བོ། ཁྱོད་ཀྱིས་ང་རྙེད་པ་ཡིན་ནམ་ཞེས་དྲིས་པར་ཁོང་གིས་ལན་དུ། ངས་ཁྱོད་རྙེད་པ་ཡིན། ཅིའི་ཕྱིར་ཞེ་ན། ཁྱོད་ཀྱིས་རང་ཉིད་བཙོངས་ནས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས་སོ། །
1KI 21:21 དཀོན་མཆོག་ཡ་ཝཱེས་འདི་སྐད་དུ། ལྟོས་དང་། བདག་གིས་ཁྱོད་ཀྱི་སྟེང་དུ་ཆག་སྒོ་འབེབ་པར་བྱའོ། །ཡེས་ར་ཨེལ་དུ་ཨ་ཧབ་ཀྱི་ཁྱིམ་རྒྱུད་ལས་སྐྱེས་པ་ཐམས་ཅད་དེ། རང་དབང་ཅན་ནམ་ཡང་ན་རང་དབང་མེད་པ་གང་ཡིན་ཡང་ཁྱོད་ཀྱི་བུ་རབས་ཚ་རྒྱུད་རྣམས་ཚར་གཅོད་བྱ་ཞིང་།
1KI 21:22 ཁྱོད་ཀྱི་ཁྱིམ་རྒྱུད་ནི་ནེ་བཱད་ཀྱི་བུ་ཡེ་རོབ་ཨམ་གྱི་ཁྱིམ་རྒྱུད་དང་། ཨ་ཧི་ཡཱ་ཡི་བུ་པཱ་ཤའི་ཁྱིམ་རྒྱུད་རྣམས་དང་འདྲ་བར་བྱའོ། །གང་ལ་ཞེ་ན། ཁྱོད་ཀྱིས་བདག་གི་སེམས་དཀྲུགས་ཤིང་། ཡེས་ར་ཨེལ་པ་རྣམས་སྡིག་པའི་ནང་ལྷུང་དུ་བཅུག་པའི་ཕྱིར་རོ་ཞེས་གསུངས་པ་དང་།
1KI 21:23 ཡང་ཡེ་ཟི་བེལ་གྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ཡེ་སི་རེ་ཨེལ་གྱི་ལྕགས་རིའི་འགྲམ་དུ་ཡེ་ཟི་བེལ་ཁྱི་ཡིས་བཟའ་བར་འགྱུར་ཞིང་།
1KI 21:24 ཨ་ཧབ་ཀྱི་མི་རྣམས་ལས་གྲོང་ཁྱེར་དུ་ཤི་བ་རྣམས་ཁྱིས་འཆའ་ཞིང་། དབེན་སྟོང་དུ་ཤི་བ་རྣམས་ནམ་མཁའི་བྱ་རྣམས་ཀྱིས་བཟའ་བར་འགྱུར་རོ་གསུངས་ཞེས་སྨྲས་སོ། །
1KI 21:25 ཨ་ཧབ་ལྟ་བུའི་མི་ཞིག་སྔར་བྱུང་མ་མྱོང་བ་སྟེ། ཁོ་ནི་རང་གི་ཆུང་མ་ཡེ་ཟི་བེལ་གྱིས་བསླུས་ནས། རང་ཉིད་བཙོངས་ཏེ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་།
1KI 21:26 དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་བསྐྲད་པའི་ཨེ་མོར་པ་དང་འདྲ་བར། སྐུ་འདྲ་རྣམས་ཀྱི་རྗེས་སུ་འབྲངས་ཏེ་གཞི་ནས་སྐྱུག་བྲོ་བའི་སྤྱོད་པ་སྤྱད་དོ། །
1KI 21:27 ཨ་ཧབ་ཀྱིས་བཀའ་དེ་རྣམས་ཐོས་པ་དང་། ཁོས་རང་གི་གྱོན་གོས་གཤགས་ནས་ལུས་ལ་རྩིད་རས་གྱོན་ཏེ་སྨྱུང་གནས་བསྲུངས་པ་དང་། ཐ་ན་རྩིད་རས་སྟེང་དུ་ཉལ་ནས་ཡིད་མུག་བཞིན་འགྲུལ་ཏོ། །
1KI 21:28 དེ་ནས་ཐི་ཞི་པ་ཨེ་ལི་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་སྟེ་འདི་སྐད་དུ།
1KI 21:29 ཨ་ཧབ་ཀྱིས་ངའི་མདུན་དུ་ཇི་ལྟ་བུའི་སྙེམས་ཆུང་བྱེད་པ་ཁྱོད་ཀྱིས་མཐོང་ངམ། ཁོས་ངའི་མདུན་དུ་སྙེམས་ཆུང་བྱེད་པས་ན། ངས་ཁོའི་རིང་ལ་ཆག་སྒོ་འདི་འབེབ་པར་མི་བྱ། འོན་ཀྱང་ཁོའི་བུ་ཡི་རིང་ལ་ཁོའི་ཁྱིམ་དུ་ཆག་སྒོ་དེ་འབེབ་པར་བྱའོ་ཞེས་གསུངས་སོ། །
1KI 22:1 ཨ་རམ་པ་དང་ཡེས་ར་ཨེལ་པ་གཉིས་ཀྱི་བར་ལ་དམག་འཁྲུག་མེད་པར་ལོ་གསུམ་སོང་བ་དང་།
1KI 22:2 ལོ་གསུམ་པར་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་བྱ་བ་ཡེས་ར་ཨེལ་གྱི་རྒྱལ་པོའི་དྲུང་དུ་ཕྱིན།
1KI 22:3 ཡེས་ར་ཨེལ་གྱི་རྒྱལ་པོས་རང་གི་འཁོར་གཡོག་རྣམས་ལ། གིལ་ཨད་ཀྱི་རཱ་མོད་ནི་འོ་སྐོལ་གྱི་ཡིན་པ་ཁྱོད་ཚོས་ཤེས་སམ། དེ་ཨ་རམ་རྒྱལ་པོའི་ལག་ནས་ཕྱིར་མི་ལེན་པར་ཁ་རོག་ལ་སྡོད་རུང་ངམ་ཞེས་སྨྲས་ཤིང་།
1KI 22:4 ཨ་ཧབ་ཀྱིས་ཡེ་ཧོ་ཤ་ཕད་ལ། ཁྱོད་རང་ང་དང་མཉམ་དུ་གིལ་ཨད་ཀྱི་རཱ་མོད་ལ་དམག་རྒྱག་ཏུ་འགྲོའམ་ཞེས་དྲིས་པར། ཡེ་ཧོ་ཤ་ཕད་ཀྱིས་ཡེས་ར་ཨེལ་གྱི་རྒྱལ་པོ་ལ། ཁྱོད་དང་ང་གཉིས་གཅིག་ཡིན་ཏེ། ངའི་འབངས་ཀྱང་ཁྱེད་ཀྱི་འབངས་དང་འདྲ་བ་དང་། ངའི་རྟ་རྣམས་ཀྱང་ཁྱེད་ཀྱི་རྟ་དང་འདྲ་ཞེས་སྨྲས་པ་དང་།
1KI 22:5 ཡེ་ཧོ་ཤ་ཕད་ཀྱིས་ཡང་ཡེས་ར་ཨེལ་གྱི་རྒྱལ་པོ་ལ། ཁྱེད་ཀྱིས་སྔོན་ལ་དཀོན་མཆོག་ཡ་ཝཱེ་ལ་བཀའ་འདྲི་ཞུས་ཤིག་ཅེས་བསྐུལ་ཏོ། །
1KI 22:6 དེ་ནས་ཡེས་ར་ཨེལ་གྱི་རྒྱལ་པོས་ལུང་སྟོན་པ་བཞི་བརྒྱ་ཙམ་བསྡུས་ནས་དེ་དག་ལ། བདག་ནི་གིལ་ཨད་ཀྱི་རཱ་མོད་ལ་འཐབ་ཏུ་སོང་ན་འོས་སམ་མི་འོས། ཡང་ན་ངས་དེར་བཟོད་དགོས་སམ་ཞེས་དྲིས་པ་ལ། དེ་དག་གིས། གཙོ་བོས་ཡུལ་དེ་ནི་རྒྱལ་པོའི་ཕྱག་ཏུ་གནང་འོང་བས་ཡར་ཕེབས་ནས་དམག་བརྒྱབ་ཆོག་ཅེས་སྨྲས་སོ། །
1KI 22:7 དེར་ཡེ་ཧོ་ཤ་ཕད་ཀྱིས། འདིར་དཀོན་མཆོག་ཡ་ཝཱེའི་ལུང་སྟོན་པ་གཞན་ཡང་ཡོད་པ་མ་ཡིན་ནམ། རང་ཅག་གིས་ཁོང་ལ་བཀའ་འདྲི་ཞུས་མི་ཆོག་གམ་ཞེས་སྨྲས་པར།
1KI 22:8 ཡེས་ར་ཨེལ་གྱི་རྒྱལ་པོས་ཡེ་ཧོ་ཤ་ཕད་ལ། ད་དུང་མི་ཞིག་ཡོད་དེ། ཁོ་ནི་ཨིམ་ལཱའི་བུ་མི་ཀ་ཡཱ་བྱ་བ་ཡིན་ནོ། །ང་ཚོས་ཁོ་རང་བརྒྱུད་ནས་དཀོན་མཆོག་ཡ་ཝཱེ་ལ་བཀའ་འདྲི་ཞུས་ཆོག་ཀྱང་། དེས་ང་ལ་གནང་བའི་ལུང་བསྟན་ནི་ནམ་ཡིན་ཡང་གཏམ་ངན་ལས་གཏམ་བཟང་མེད་པས། ང་དེ་ལ་སྡང་ངོ་ཞེས་སྨྲས་པར། ཡེ་ཧོ་ཤ་ཕད་ཀྱིས། རྒྱལ་པོ་ཁྱེད་ཀྱིས་འདི་འདྲ་མ་གསུང་ཞིག་ཅེས་སྨྲས།
1KI 22:9 དེ་ནས་ཡེས་ར་ཨེལ་གྱི་རྒྱལ་པོས་ཉུག་རུམ་པ་ཞིག་བོས་ནས་ན་རེ། མྱུར་དུ་སོང་ལ་ཨིམ་ལཱའི་བུ་མི་ཀ་ཡཱ་ཁྲིད་ཤོག་ཅེས་བསྒོས།
1KI 22:10 དེའི་དུས་སུ་ཡེས་ར་ཨེལ་གྱི་རྒྱལ་པོ་དང་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་གཉིས་རང་རང་གི་ཁྲིར་བཞུགས་ཤིང་། རྒྱལ་པོའི་ན་བཟའ་མནབས་ཏེ་སཱ་མར་ཡའི་མཁར་སྒོ་མདུན་གྱི་ཐང་ཆེན་ཞིག་ཏུ་བཞུགས་པ་དང་། ལུང་སྟོན་པ་ཐམས་ཅད་ཀྱིས་དེ་གཉིས་ཀྱི་དྲུང་ནས་ལུང་སྟོན་གྱིན་ཡོད་དེ།
1KI 22:11 ཀེ་ནཱ་ནའི་བུ་ཚིད་ཀི་ཡཱས་རང་ལ་ལྕགས་ཀྱི་རྭ་ཅོ་འགའ་བཟོས་ཏེ་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ལྕགས་ཀྱི་རྭ་ཅོ་འདི་དག་གིས་ཨ་རམ་པ་རྣམས་ཚར་གཅོད་པའི་བར་དུ་བསྣུན་པར་བྱ་གསུངས་ཞེས་སྨྲས།
1KI 22:12 ལུང་སྟོན་པ་ཐམས་ཅད་ཀྱིས་ཀྱང་དེ་བཞིན་ལུང་བསྟན་ཏེ་ན་རེ། ཁྱེད་རང་ཡར་གིལ་ཨད་ཀྱི་རཱ་མོད་ལ་དམག་རྒྱག་ཏུ་བསྐྱོད་ཅིག་དང་། དཀོན་མཆོག་ཡ་ཝཱེས་གྲོང་ཁྱེར་དེ་རྒྱལ་པོའི་ཕྱག་ཏུ་གཏོད་པར་འགྱུར་བས་རྒྱལ་ཁ་ལོན་ངེས་ཡིན་ཞེས་སྨྲས་སོ། །
1KI 22:13 ཡང་མི་ཀ་ཡཱ་འབོད་དུ་སོང་བའི་བང་ཆེན་གྱིས་ཁོང་ལ། གཟིགས་དང་། ལུང་སྟོན་པ་ཐམས་ཅད་ཁ་མཐུན་ནས་རྒྱལ་པོ་ལ་ལུང་བསྟན་བཟང་པོ་སྨྲ་བ་སྟེ། ཁྱེད་ཀྱིས་ཀྱང་དེ་དག་དང་འདྲ་བར་གཏམ་བཟང་གསུང་བར་མཛོད་ཅེས་ཞུས་པ་ལ།
1KI 22:14 མི་ཀ་ཡཱས་འདི་ལྟར། བདག་གིས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་སྐྱེལ་ཏེ། དཀོན་མཆོག་ཡ་ཝཱེས་ང་ལ་ཅི་གསུངས་ན་བདག་གིས་ཀྱང་དེ་ལྟར་སྨྲ་བར་བྱའོ་ཞེས་སྨྲས་སོ། །
1KI 22:15 དེ་ནས་མི་ཀ་ཡཱ་རྒྱལ་པོའི་དྲུང་དུ་སླེབས་པ་དང་། རྒྱལ་པོས་དེ་ལ། ཀྱེ་མི་ཀ་ཡཱ། རང་ཅག་གིལ་ཨད་ཀྱི་རཱ་མོད་ལ་འཐབ་ཏུ་སོང་ན་འོས་སམ་མི་འོས། ཡང་ན་ངས་དེར་བཟོད་དགོས་སམ་ཞེས་དྲིས་པ་ལ། ཁོང་ན་རེ། དཀོན་མཆོག་ཡ་ཝཱེས་དེ་ནི་རྒྱལ་པོའི་ལག་ཏུ་གནང་བར་ངེས་པས་དམག་རྒྱོབས་དང་རྒྱལ་བར་འགྱུར་རོ་ཞེས་སྨྲས་པ་དང་།
1KI 22:16 རྒྱལ་པོ་ན་རེ། བདག་གིས་ཁྱོད་ལ་མནའ་དུ་འགེལ་བར་བྱས་ན། ཁྱོད་ཀྱིས་ད་གཟོད་དཀོན་མཆོག་ཡ་ཝཱེའི་མཚན་གྱི་སྒོ་ནས་བདག་ལ་བདེན་པ་ཁོ་ན་སྨྲའམ་ཞེས་དྲིས་པར།
1KI 22:17 མི་ཀ་ཡཱ་ན་རེ། བདག་གིས་ཡེས་ར་ཨེལ་པ་ཐམས་ཅད་ནི་རྫི་བོ་མེད་པའི་ལུག་ལྟར་རི་ལ་འཐོར་ཡོད་པ་མཐོང་བ་དང་། དཀོན་མཆོག་ཡ་ཝཱེས་འདི་སྐད་དུ། འདི་རྣམས་ལ་བདག་པོ་གང་ཡང་མེད་པས་ཞི་བདེའི་ངང་རང་རང་གི་ཡུལ་ལ་འགྲོ་རུ་ཆུག་ཅེས་གསུངས་ཞེས་སྨྲས་པ་ན།
1KI 22:18 ཡེས་ར་ཨེལ་གྱི་རྒྱལ་པོས་ཡེ་ཧོ་ཤ་ཕད་ལ། འདིས་ང་ལ་ལུང་བསྟན་ངན་པ་མ་གཏོགས་བཟང་པོ་ཞིག་སྟོན་པར་མི་འགྱུར་ཞེས་ངས་ཁྱེད་ལ་བཤད་པ་མ་ཡིན་ནམ་ཞེས་སྨྲས་སོ། །
1KI 22:19 དེར་མི་ཀ་ཡཱ་ན་རེ། དེ་བས་ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་དང་། དཀོན་མཆོག་ཡ་ཝཱེ་ཁོང་ཉིད་ཀྱི་བཞུགས་ཁྲི་ལ་བཞུགས་པ་དང་། ནམ་མཁའི་དཔུང་ཚོགས་ཐམས་ཅད་ནི་ཁོང་གི་གཡས་གཡོན་དུ་འགྲེང་འདུག་པ་ངས་མཐོང་སྟེ།
1KI 22:20 དཀོན་མཆོག་ཡ་ཝཱེས་འདི་སྐད་དུ། ཨ་ཧབ་ནི་ཡར་གིལ་ཨད་ཀྱི་རཱ་མོད་དུ་སོང་ནས་འགྱེལ་བའི་ཕྱིར་སུས་ཁོ་བསླུ་བར་བྱའམ་ཞེས་གསུངས་པའི་ལན་དུ། འདི་ལྟར་བརྗོད་མཁན་དང་དེ་ལྟར་བརྗོད་མཁན་བྱུང་ངོ་། །
1KI 22:21 དེ་ནས་སེམས་ཉིད་ཅིག་ཐོན་ཞིང་དཀོན་མཆོག་ཡ་ཝཱེའི་དྲུང་དུ་འགྲེངས་ནས་འདི་ལྟར། ངས་ཁོ་བསླུ་བར་བྱ་ཞེས་ཞུས་པར། དཀོན་མཆོག་ཡ་ཝཱེས་ཁོ་ལ་ཇི་ལྟར་བསླུ་བར་བྱའམ་ཞེས་དྲིས་པ་ན།
1KI 22:22 ཁོས་འདི་ལྟར། ང་རང་སོང་ནས་ཨ་ཧབ་ཀྱི་ལུང་སྟོན་པ་ཐམས་ཅད་ཀྱི་ཁ་རུ་རྫུན་སྨྲ་བའི་སེམས་ཉིད་དུ་བྱའོ་ཞེས་ཞུས་པ་དང་། དཀོན་མཆོག་ཡ་ཝཱེས་ཁོ་ལ་འདི་སྐད་དུ། ཁྱོད་ཀྱིས་ཁོ་བསླུས་ནས་དོན་འགྲུབ་པར་འགྱུར་བས་སོང་ལ་དེ་བཞིན་བྱོས་ཤིག་ཅེས་བསྒོས་སོ། །
1KI 22:23 ལྟོས་དང་། དཀོན་མཆོག་ཡ་ཝཱེས་ཁྱོད་ཀྱི་ལུང་སྟོན་པ་འདི་དག་གི་ཁ་རུ་རྫུན་སྨྲ་བའི་སེམས་ཉིད་བཅུག་པར་མ་ཟད། ཁོང་གིས་ཁྱོད་ལ་ཆག་སྒོ་འབེབ་པའི་ཐུགས་ཐག་བཅད་པའོ་ཞེས་སྨྲས་སོ། །
1KI 22:24 དེ་ནས་ཀེ་ནཱ་ནའི་བུ་ཚིད་ཀི་ཡཱ་ཉེ་བར་འོངས་ནས། མི་ཀ་ཡཱ་ལ་འགྲམ་ལྕག་གཞུས་ཏེ་ན་རེ། དཀོན་མཆོག་ཡ་ཝཱེའི་ཐུགས་ཉིད་དེ་ཇི་ལྟར་ང་དང་བྲལ་ནས་ཁྱོད་ལ་གཏམ་བྱས་པ་ཡིན་ནམ་ཞེས་དྲིས་པ་དང་།
1KI 22:25 མི་ཀ་ཡཱ་ན་རེ། ཉོན་ཅིག ཁྱོད་སྦུག་ཁང་དུ་འཛུལ་ནས་ཡིབ་པའི་ཉིན་མོར་དེ་མཐོང་བར་འགྱུར་ཞེས་གསུངས།
1KI 22:26 དེར་ཡེས་ར་ཨེལ་གྱི་རྒྱལ་པོས་འདི་ལྟར། མི་ཀ་ཡཱ་བཟུང་སྟེ་གྲོང་དཔོན་ཨ་མོན་དང་རྒྱལ་སྲས་ཡོ་ཨ་སི་ཡི་རྩར་ཁྲིད་ནས་དེ་དག་ལ།
1KI 22:27 རྒྱལ་པོས་འདི་ལྟར། ང་རང་བདེ་བར་ཕྱིར་སླེབས་པའི་བར་དུ་མི་འདི་བཙོན་ལ་བཅུག་སྟེ། བཟའ་བཏུང་ཉུང་ཙམ་ལས་གང་ཡང་མ་སྟེར་ཞེས་བསྒོས་སོང་སྨྲོས་ཤིག་ཅེས་སྨྲས།
1KI 22:28 མི་ཀ་ཡཱ་ན་རེ། གལ་ཏེ་ཁྱོད་རང་དངོས་གནས་བདེ་བར་ཕྱིར་འོངས་ཐུབ་ན། དཀོན་མཆོག་ཡ་ཝཱེས་ང་བརྒྱུད་དེ་ཅི་ཡང་མ་གསུངས་པ་ཡིན་ཞེས་སྨྲས་པ་དང་། ཡང་མི་ཐམས་ཅད་ཀྱིས་ཉོན་ཅིག་ཅེས་བསྒོས་སོ། །
1KI 22:29 དེ་ནས་ཡེས་ར་ཨེལ་གྱི་རྒྱལ་པོ་དང་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་གཉིས་ཡར་གིལ་ཨད་ཀྱི་རཱ་མོད་དུ་སོང་ནས།
1KI 22:30 ཡེས་ར་ཨེལ་གྱི་རྒྱལ་པོས་ཡེ་ཧོ་ཤ་ཕད་ལ་འདི་ལྟར། ངས་གོས་ཆས་བསྒྱུར་ཏེ་གཡུལ་ལ་ཞུགས་དགོས། ཁྱེད་ཀྱིས་རང་གི་ན་བཟའ་གྱོན་ནས་སྡོད་ཅིག་ཅེས་སྨྲས་ཏེ། ཡེས་ར་ཨེལ་གྱི་རྒྱལ་པོས་གོས་ཆས་བསྒྱུར་ནས་གཡུལ་ལ་ཞུགས་སོ། །
1KI 22:31 ཨ་རམ་གྱི་རྒྱལ་པོས་ཤིང་རྟའི་འགོ་དཔོན་སུམ་ཅུ་སོ་གཉིས་ལ་བཀའ་བབས་ཏེ་ན་རེ། ཡེས་ར་ཨེལ་གྱི་རྒྱལ་པོ་འབའ་ཞིག་ལ་མ་གཏོགས་དམག་ཆེ་ཆུང་གང་ལ་ཡང་མ་འཐབ་ཅིག་ཅེས་བསྒོས་པས།
1KI 22:32 ཤིང་རྟའི་འགོ་དཔོན་ཚོས་ཡེ་ཧོ་ཤ་ཕད་མཐོང་བ་དང་འདི་ནི་ཡེས་ར་ཨེལ་གྱི་རྒྱལ་པོ་ཡིན་སྙམ་ནས་ཁ་ཕྱིར་འཁོར་ནས་ཁོ་ལ་རྒོལ་ཞིང་། ཡེ་ཧོ་ཤ་ཕད་ཀྱིས་སྐད་ཆེན་པོ་བརྒྱབ་པས།
1KI 22:33 ཤིང་རྟའི་འགོ་དཔོན་རྣམས་ཀྱིས་དེ་ནི་ཡེས་ར་ཨེལ་གྱི་རྒྱལ་པོ་མིན་པ་ཤེས་ནས་ཁོ་མ་བདས་པར་ཕྱིར་ལོག་གོ །
1KI 22:34 དེ་ནས་མི་ཞིག་གིས་བྱུང་རྒྱལ་དུ་མདའ་འཕངས་པ་ན། མ་བསམ་ས་ནས་ཡེས་ར་ཨེལ་གྱི་རྒྱལ་པོའི་གོ་ཁྲབ་ཀྱི་མཐུད་མཚམས་སུ་ཕོག་པས། ཁོས་ཤིང་རྟའི་དེད་དཔོན་ལ། ང་རྨས་བྱུང་བས་ཁྱོད་ཀྱིས་ཤིང་རྟ་ཁ་ལོ་སྒྱུར་ལ་ང་གཡུལ་ས་ནས་ཁྲིད་ཅིག་ཅེས་བསྒོས།
1KI 22:35 ཉིན་དེར་དམག་འཐབ་ཛ་དྲག་ཏུ་སོང་སྟེ། མི་ཞིག་གིས་རྒྱལ་པོ་སྐྱོར་ནས་ཤིང་རྟའི་སྟེང་ལངས་ཅི་ཐུབ་བྱས་ཏེ་ཨ་རམ་པ་ལ་འགོག་རྒོལ་བྱས་པ་དང་། དགོང་མོའི་དུས་སུ་རྒྱལ་པོ་ཚེ་ལས་འདས་ཤིང་། ཤིང་རྟའི་མཐིལ་ཞབས་དུ་ཁོའི་ཁྲག་འཛགས་སོ། །
1KI 22:36 ཉི་མ་ནུབ་པའི་དུས་ཙམ་ལ་དམག་སྒར་དུ་བཀའ་བབས་ནས། མི་ཐམས་ཅད་རང་རང་གི་གྲོང་ཁྱེར་དང་རང་རང་གི་ཡུལ་དུ་ལོག་ཅིག་ཅེས་བསྒོས་སོ། །
1KI 22:37 དེ་ལྟར་རྒྱལ་པོ་ཚེ་ལས་འདས་ནས་སཱ་མར་ཡ་རུ་ཁྱེར་ཏེ། དེ་དག་གིས་ཁོང་སཱ་མར་ཡ་རུ་དུར་ལ་སྦས་སོ། །
1KI 22:38 དེ་དག་གིས་སཱ་མར་ཡའི་ཁྲོན་པ་སྟེ་སྨད་འཚོང་མ་རྣམས་ཀྱིས་ཁྲུས་བྱེད་ས་རུ་ཤིང་རྟ་བཀྲུས་ཤིང་། དཀོན་མཆོག་ཡ་ཝཱེས་གསུངས་པ་ལྟར་ཁྱི་རྣམས་ཀྱིས་ཁོའི་ཁྲག་བལྡགས་པའོ། །
1KI 22:39 ཨ་ཧབ་ཀྱི་བྱས་རྗེས་གཞན་རྣམས་དང་ཁོས་ཅི་བྱས་པ་ཐམས་ཅད་དང་། ཁོས་བ་སོས་བཞེངས་པའི་ཕོ་བྲང་དང་། ཁོས་ཞིག་གསོ་བྱས་པའི་གྲོང་ཁྱེར་ཐམས་ཅད་ཀྱི་སྐོར་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 22:40 ཨ་ཧབ་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་པ་དང་། ཁོའི་བུ་ཨ་ཧ་ཟི་ཡཱ་ཡིས་དེའི་ཚབ་ཏུ་རྒྱལ་སྲིད་བཟུང་ངོ་། །
1KI 22:41 ཡེས་ར་ཨེལ་གྱི་རྒྱལ་པོ་ཨ་ཧབ་ཀྱི་སྲིད་ལོ་བཞི་པར། ཨ་སཱ་ཡི་སྲས་ཡེ་ཧོ་ཤ་ཕད་ནི་ཡ་ཧུ་དཱའི་རྒྱལ་པོར་བཞུགས་སོ། །
1KI 22:42 ཡེ་ཧོ་ཤ་ཕད་རྒྱལ་པོར་བཞུགས་དུས་དགུང་ལོ་སོ་ལྔ་ཡིན་པ་དང་། ཡེ་རུ་སཱ་ལེམ་དུ་ལོ་ཉེར་ལྔའི་རིང་ལ་རྒྱལ་སྲིད་བསྐྱངས། ཁོང་གི་ཡུམ་ནི་ཤིལ་ཧིའི་སྲས་མོ་ཨ་ཟུ་བཱ་ཞེས་པ་ཡིན།
1KI 22:43 ཡེ་ཧོ་ཤ་ཕད་ནི་རང་གི་ཡབ་ཨ་སཱ་ཡི་ལམ་གྱི་ནང་དུ་འགྲུལ་ཞིང་དེ་ལས་མ་འཁྱར་བར། དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད། འོན་ཀྱང་མཐོ་གླིང་རྣམས་ད་དུང་མ་བཤིག་པར་བཞག་ཅིང་། མི་རྣམས་ཀྱིས་སྔར་བཞིན་མཐོ་གླིང་རྣམས་སུ་སྦྱིན་སྲེག་གི་མཆོད་པ་ཕུལ་ནས་བསང་ཡང་བཏང་བ་རེད།
1KI 22:44 རྒྱལ་པོ་ཡེ་ཧོ་ཤ་ཕད་དང་ཡེས་ར་ཨེལ་གྱི་རྒྱལ་པོ་གཉིས་ཀྱི་བར་ལ་ཞི་མཐུན་ཡོང་བ་རེད།
1KI 22:45 ཡེ་ཧོ་ཤ་ཕད་ཀྱི་བྱས་རྗེས་གཞན་རྣམས་དང་། ཁོང་གིས་ངོམས་པའི་དཔའ་རྩལ་དང་དམག་ཅི་ལྟར་བརྒྱབ་པ་རྣམས་ནི་ཡ་ཧུ་དཱའི་རྒྱལ་རབས་ཀྱི་མདོ་ཡི་ནང་དུ་བཀོད་ཡོད་པ་མ་ཡིན་ནམ།
1KI 22:46 ཡེ་ཧོ་ཤ་ཕད་ཀྱིས་ཁོང་གི་ཡབ་ཨ་སཱའི་དུས་ནས་ལུས་པའི་མཆོད་གཤོམ་གྱི་ཆོས་རྫུ་གཞང་འཚོང་རྣམས་ཡུལ་ཁོངས་ནས་བསྐྲད་ཅིང་བདས་སོ། །
1KI 22:47 དེའི་དུས་སུ་ཨེ་དོམ་ཡུལ་དུ་རྒྱལ་པོ་གང་ཡང་མེད་དེ། མཁར་དཔོན་ཞིག་གིས་སྲིད་བསྐྱངས་སོ། །
1KI 22:48 ཡེ་ཧོ་ཤ་ཕད་ཀྱིས་ཨོ་ཕིར་ནས་གསེར་འདྲེན་དུ་ཐཱར་ཞིས་གྲུ་གཟིངས་བཟོས་ཀྱང་། གྲུ་རྣམས་ཨེ་ཙི་ཡོན་གེ་བེར་དུ་ཆག་གྲུམ་བྱུང་བས་ཁ་ལོ་བསྒྱུར་མ་ཐུབ་བོ། །
1KI 22:49 དེའི་ཚེ་ཨ་ཧབ་ཀྱི་སྲས་ཨ་ཧ་ཟི་ཡཱས་ཡེ་ཧོ་ཤ་ཕད་ལ། ངའི་ཞབས་ཕྱི་རྣམས་ཀྱང་ཁྱེད་ཀྱི་ཞབས་ཕྱི་དང་མཉམ་དུ་གྲུ་གཟིངས་ལ་བསྡད་ནས་འགྲོ་བར་གནོངས་ཤིག་ཅེས་ཞུས་ཀྱང་། ཡེ་ཧོ་ཤ་ཕད་ཀྱིས་དེ་ལྟར་མ་གནང་ངོ་། །
1KI 22:50 དེ་ནས་ཡེ་ཧོ་ཤ་ཕད་རང་གི་ཕ་མེས་རྣམས་དང་ལྷན་ཅིག་ཏུ་གཟིམས་ནས། ཡབ་མེས་དཱ་བིད་ཀྱི་གྲོང་ཁྱེར་དུ་ཕ་མེས་རྣམས་དང་མཉམ་དུ་དུར་ལ་སྦས་ཤིང་། ཁོང་གི་སྲས་ཡེ་ཧོ་རཱམ་གྱིས་ཁོང་གི་ཚབ་ཏུ་རྒྱལ་སྲིད་བཟུང་ངོ་། །
1KI 22:51 ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱི་སྲིད་ལོ་བཅུ་བདུན་པར། ཨ་ཧབ་ཀྱི་བུ་ཨ་ཧ་ཟི་ཡཱ་ནི་སཱ་མར་ཡ་རུ་རྒྱལ་པོར་བསྡད་ནས་ལོ་གཉིས་ཀྱི་རིང་ལ་ཡེས་ར་ཨེལ་གྱི་རྒྱལ་སྲིད་བསྐྱངས་སོ། །
1KI 22:52 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། རང་གི་ཕ་མ་གཉིས་ཀྱི་སྤྱོད་ལམ་དུ་འགྲུལ་པ་དང་། ནེ་བཱད་ཀྱི་བུ་ཡེ་རོབ་ཨམ་གྱིས་ཡེས་ར་ཨེལ་པ་རྣམས་སྡིག་པར་ལྷུང་དུ་བཅུག་པའི་ལམ་དུའང་འགྲུལ་པའོ། །
1KI 22:53 དེར་མ་ཟད་ཁོས་རང་གི་ཕ་ཡིས་བྱས་པ་ནང་བཞིན་ལྷ་པཱ་ཨལ་ལ་བརྟེན་ཅིང་དེར་ཕྱག་བཙལ་ནས། ཡེས་ར་ཨེལ་གྱི་དཀོན་མཆོག་ཡ་ཝཱེའི་ཐུགས་དཀྲུགས་པའོ།། །།
2KI 1:1 དེ་ཡང་ཨ་ཧབ་ཚེ་ལས་འདས་རྗེས། མོ་ཨབ་པ་རྣམས་ཀྱིས་ཡེས་ར་ཨེལ་ལ་ངོ་ལོག་བྱས་པ་དང་།
2KI 1:2 དེ་ནས་ཨ་ཧ་ཟི་ཡཱ་ཞེས་བྱ་བ་སཱ་མར་ཡ་རུ་ཡོད་པའི་ཁོའི་ཐོག་ཁང་གི་སྒེའུ་ཁུང་ལས་མར་འགྱེལ་ནས་ན་བར་གྱུར་པས། ཨེག་རོན་གྱི་ལྷ་པཱ་ཨལ་ཟེ་བུབ་ ལ། ང་ནི་ནད་འདི་ལས་དྲག་པར་འགྱུར་རམ་མི་འགྱུར་བཀའ་འདྲི་ཞུ་རུ་སོང་ཞིག་ཅེས་སྨྲས་ནས་བང་ཆེན་རྣམས་མངགས་སོ། །
2KI 1:3 དེར་དཀོན་མཆོག་ཡ་ཝཱེའི་ཕོ་ཉས་ཐི་ཞི་ཡུལ་ནས་འོངས་པའི་ཨེ་ལི་ཡཱ་ཞེས་བྱ་བ་ལ་འདི་སྐད་དུ། ཡར་ལོངས་ལ་སཱ་མར་ཡའི་རྒྱལ་པོའི་བང་ཆེན་དང་འཕྲད་དུ་སོང་། དེ་དག་ལ་འདི་ལྟར་ཤོད་ཅིག ཁྱོད་རྣམས་ཨེག་རོན་གྱི་ལྷ་པཱ་ཨལ་ཟེ་བུབ་རྩར་བཀའ་འདྲི་ཞུ་རུ་འགྲོ་བ་དེ་ཅི་ཡིན། ཡེས་ར་ཨེལ་ལ་དཀོན་མཆོག་མེད་པའི་རྐྱེན་ཡིན་ནམ།
2KI 1:4 དེའི་ཕྱིར་དཀོན་མཆོག་ཡ་ཝཱེས་འདི་སྐད་དུ། ཁྱོད་ཡར་འགོས་ཡོད་པའི་མལ་ཁྲི་ལས་མར་འབབ་པར་མི་འགྱུར་ཏེ། ཁྱོད་རང་འཆི་བར་ངེས་པས་སོ་གསུངས་ཞེས་སྨྲོས་ཤིག་ཅེས་གསུངས་པ་ན། ཨེ་ལི་ཡཱ་ལམ་དུ་ཆས་སོ། །
2KI 1:5 ཡང་བང་ཆེན་རྣམས་ཨ་ཧ་ཟི་ཡཱའི་གམ་དུ་ཕྱིར་ལོག་འོངས་པས། རྒྱལ་པོས་དེ་དག་ལ་ཁྱོད་ཚོ་ཕྱིར་འོངས་པ་ཅི་ཡིན་ནམ་ཞེས་དྲིས་པ་ན།
2KI 1:6 དེ་དག་གིས་རྒྱལ་པོ་ལ། མི་ཞིག་ངེད་ཅག་དང་འཕྲད་དུ་འོངས་ནས་ང་ཚོར་ན་རེ། ཁྱོད་ཚོ་མངག་མཁན་རྒྱལ་པོའི་དྲུང་དུ་ཕྱིར་སོང་ནས་ཁོ་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ཨེག་རོན་གྱི་ལྷ་པཱ་ཨལ་ཟེ་བུབ་ལ་བཀའ་འདྲི་ཞུ་རུ་མངགས་པ་དེ་ཅི་ཡིན་ནམ། ཡེས་ར་ཨེལ་ལ་དཀོན་མཆོག་མེད་པས་ཡིན་ནམ། དེའི་ཕྱིར་ཁྱོད་ཡར་འགོས་ཡོད་པའི་མལ་ཁྲི་ལས་མར་འབབ་པར་མི་འགྱུར་ཏེ། ཁྱོད་རང་འཆི་བར་ངེས་པས་སོ་ཞེས་གསུངས་སྨྲོས་ཤིག་ཅེས་གསུངས་བྱུང་ཞེས་ཞུས་སོ། །
2KI 1:7 རྒྱལ་པོས་དེ་དག་ལ། ཁྱོད་ཚོ་ལ་ཕྲད་ནས་གཏམ་བྱས་པའི་མི་ཅི་འདྲ་ཡིན་ནམ་ཞེས་དྲིས་པ་ན།
2KI 1:8 དེ་དག་ན་རེ། ཁོའི་ལུས་ལ་ལྭ་བ་སྤུ་རིང་ཅན་གྱོན་པ་དང་ཀོ་བའི་སྐ་རགས་བཅིངས་འདུག་ཅེས་ཞུས་པ་ལ། ཁོས་དེ་ནི་ཐི་ཞི་པ་ཨེ་ལི་ཡཱ་ཡིན་ཞེས་སྨྲས་སོ། །
2KI 1:9 དེ་ནས་རྒྱལ་པོས་ལྔ་བཅུ་དཔོན་པོ་ཞིག་དང་ཁོའི་ལག་འོག་མི་ལྔ་བཅུ་དང་བཅས་པ་ཨེ་ལི་ཡཱ་ཡི་གམ་དུ་མངགས། དེ་དག་ཁོང་ཡོད་སར་ཕྱིན་པ་ན། ལྟོས་དང་། ཨེ་ལི་ཡཱ་རི་རྩེར་བཞུགས་འདུག་པ་དང་། དེས་ཁོང་ལ། ཀྱེ་དཀོན་མཆོག་གི་སྐྱེས་བུ། རྒྱལ་པོས་ཁྱོད་མར་འབབ་པའི་བཀའ་བསྒོས་སོ་ཞེས་ཞུས་པ་ལ།
2KI 1:10 ཨེ་ལི་ཡཱས་ལྔ་བཅུ་དཔོན་པོ་ལ། ང་རང་དཀོན་མཆོག་གི་སྐྱེས་བུ་ཡིན་ན་ནམ་མཁའ་ནས་མེ་བབས་ཏེ་ཁྱོད་དང་ཁྱོད་ཀྱི་ལག་འོག་ལྔ་བཅུ་པོ་དེ་མེ་ཡིས་འཇོམས་པར་གྱུར་ཅིག་ཅེས་གསུངས་པ་དང་། ནམ་མཁའ་ནས་མེ་བབས་ཏེ་ལྔ་བཅུ་དཔོན་པོ་དང་ཁོའི་ལག་འོག་ལྔ་བཅུ་མེ་ཡིས་བཅོམ་པའོ། །
2KI 1:11 ཡང་རྒྱལ་པོས་ལྔ་བཅུ་དཔོན་པོ་གཞན་ཞིག་དང་ཁོའི་ལག་འོག་མི་ལྔ་བཅུ་དང་བཅས་པ་ཨེ་ལི་ཡཱ་ཡི་གམ་དུ་མངགས་ཤིང་། དེས་ཁོང་ལ། ཀྱེ་དཀོན་མཆོག་གི་སྐྱེས་བུ། རྒྱལ་པོས་ཁྱོད་མྱུར་དུ་མར་འབབ་པའི་བཀའ་བསྒོས་སོ་ཞེས་ཞུས་པ་ལ།
2KI 1:12 ཨེ་ལི་ཡཱས་དེ་རྣམས་ལ་ལན་དུ། ང་རང་དཀོན་མཆོག་གི་སྐྱེས་བུ་ཡིན་ན་ནམ་མཁའ་ནས་མེ་བབས་ཏེ་ཁྱོད་དང་ཁྱོད་ཀྱི་ལག་འོག་ལྔ་བཅུ་པོ་དེ་མེ་ཡིས་འཇོམས་པར་གྱུར་ཅིག་ཅེས་གསུངས་པ་དང་། དཀོན་མཆོག་ནས་བྱུང་བའི་མེ་ནམ་མཁའ་ལས་བབས་ཏེ་ལྔ་བཅུ་དཔོན་པོ་དང་ཁོའི་ལག་འོག་ལྔ་བཅུ་མེ་ཡིས་བཅོམ་པའོ། །
2KI 1:13 ཡང་རྒྱལ་པོས་ལྔ་བཅུ་དཔོན་པོ་གསུམ་པ་དང་ཁོའི་ལག་འོག་ལྔ་བཅུ་དང་བཅས་པ་མངགས་ཤིང་། ལྔ་བཅུ་དཔོན་པོ་གསུམ་པ་དེ་ཡར་སོང་ནས་ཨེ་ལི་ཡཱ་ཡི་མདུན་དུ་པུས་མོ་སར་བཙུགས་ཏེ་ཁོང་ལ་ཞུ་བ་ཕུལ་ནས་ན་རེ། ཀྱེ་དཀོན་མཆོག་གི་སྐྱེས་བུ་ལགས། བདག་གི་སྲོག་དང་ཁྱེད་ཀྱི་ཞབས་ཕྱི་ལྔ་བཅུ་པོ་འདི་རྣམས་ཀྱི་སྲོག་ནི་ཉིད་ཀྱི་སྤྱན་སྔར་གཙིགས་ཆེན་དུ་བརྩི་བར་མཛོད་ཅིག
2KI 1:14 གཟིགས་དང་། སྔར་ནམ་མཁའ་ནས་མེ་བབས་ཏེ། དེ་སྔར་འོངས་པའི་ལྔ་བཅུ་དཔོན་པོ་གཉིས་པོ་དང་དེ་དག་སོ་སོའི་ལག་འོག་ལྔ་བཅུ་དང་བཅས་པ་མེ་ཡིས་བཅོམ་པ་ཡིན། ད་ནི་བདག་གི་སྲོག་འདི་ཁྱེད་ཀྱི་སྤྱན་སྔར་གཙིགས་ཆེན་དུ་བརྩི་བར་མཛོད་ཅེས་གསོལ་ཏོ། །
2KI 1:15 དེ་ཡང་དཀོན་མཆོག་ཡ་ཝཱེའི་ཕོ་ཉས་ཨེ་ལི་ཡཱ་ལ། ཁོ་དང་མཉམ་དུ་མར་སོང་དང་དེ་ལ་མ་འཇིགས་ཤིག་ཅེས་བསྒོས་པས། ཁོང་ཡར་ལངས་ནས་དེ་དང་མཉམ་དུ་རྒྱལ་པོའི་དྲུང་དུ་ཕྱིན།
2KI 1:16 ཨེ་ལི་ཡཱས་རྒྱལ་པོ་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ཨེག་རོན་གྱི་ལྷ་པཱ་ཨལ་ཟེ་བུབ་རྩར་བང་ཆེན་མངགས་ནས་བཀའ་འདྲི་ཞུ་བའི་རྒྱུ་མཚན་ཅི་ཡིན། ཡེས་ར་ཨེལ་ལ་བཀའ་འདྲི་ཞུ་སའི་དཀོན་མཆོག་མེད་པས་ཡིན་ནམ། དེའི་ཕྱིར་ཁྱོད་ཡར་འགོས་ཡོད་པའི་མལ་ཁྲི་ལས་མར་འབབ་པར་མི་འགྱུར་བར་འཆི་ངེས་ཡིན་གསུངས་ཞེས་སྨྲས་སོ། །
2KI 1:17 དེ་ནས་རྒྱལ་པོ་ནི་ཨེ་ལི་ཡཱས་སྦྲན་པའི་དཀོན་མཆོག་ཡ་ཝཱེའི་བཀའ་བཞིན་དུ་ཤི་སྟེ། ཁོ་ལ་སྲས་མེད་པས། ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱི་སྲས་ཡེ་ཧོ་རཱམ་གྱིས་སྲིད་བསྐྱངས་པའི་ལོ་གཉིས་པར། ཨ་ཧ་ཟི་ཡཱ་ཡི་ནུ་བོ་ཡོ་རཱམ་ དེའི་རྒྱུན་མཐུད་ནས་རྒྱལ་པོར་བཞུགས་སོ། །
2KI 1:18 ཨ་ཧ་ཟི་ཡཱའི་ལས་དོན་གཞན་རྣམས་ནི། ཡེས་ར་ཨེལ་པའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 2:1 དཀོན་མཆོག་ཡ་ཝཱེས་ཨེ་ལི་ཡཱ་ནི་རླུང་འཚུབ་བརྒྱུད་ནས་ནམ་མཁའི་ཞིང་ཁམས་སུ་འདྲེན་པའི་ཚེ་ན། ཨེ་ལི་ཡཱ་དང་ཨེ་ལི་ཤཱ་གཉིས་མཉམ་དུ་གིལ་གལ་ནས་ཆས་པའི་ལམ་དུ་ཡོད་པ་དང་།
2KI 2:2 ཨེ་ལི་ཡཱས་ཨེ་ལི་ཤཱ་ལ། དཀོན་མཆོག་ཡ་ཝཱེས་བདག་པེད་ཨེལ་དུ་མངགས་པས། ཁྱོད་རང་འདི་ནས་བཞུགས་རོགས་ཞེས་བསྒོས་ཀྱང་། ཨེ་ལི་ཤཱས་ཁོང་ལ། བདག་གིས་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དང་ཁྱེད་ཀྱི་ཚེ་སྲོག་གཉིས་ཀ་དཔང་དུ་བཙུགས་ནས་མནའ་བསྐྱལ་བ་སྟེ། ང་ནི་ཅིས་ཀྱང་ཁྱེད་དང་འབྲལ་བར་མི་བྱའོ་ཞེས་ཞུས་པས། ཁོང་གཉིས་མར་པེད་ཨེལ་དུ་ཕྱིན་ཏོ། །
2KI 2:3 ཡང་པེད་ཨེལ་དུ་ཡོད་པའི་ལུང་སྟོན་པ་ཚོའི་སློབ་བུ་རྣམས་ཐོན་ཏེ། ཨེ་ལི་ཤཱའི་དྲུང་དུ་འོངས་ནས་ཁོང་ལ། དཀོན་མཆོག་ཡ་ཝཱེས་དེ་རིང་ཁྱེད་ཀྱི་སློབ་དཔོན་ནི་ཁྱེད་ཀྱི་གམ་ནས་འཁྱེར་བར་མཛད་པ་ཤེས་ཡོད་དམ་ཞེས་དྲིས་པར། ཁོང་ན་རེ། ངས་དེ་ཤེས་ཡོད། ཁྱོད་རྣམས་ཁ་རོག་སྡོད་ཅིག་ཅེས་གསུངས་སོ། །
2KI 2:4 དེ་ཡང་ཨེ་ལི་ཡཱས་ཁོང་ལ། ཀྱེ་ཨེ་ལི་ཤཱ། དཀོན་མཆོག་ཡ་ཝཱེས་བདག་ཡེ་རུ་ཀོ་རུ་མངགས་པས། ཁྱོད་རང་འདི་ནས་བཞུགས་རོགས་ཞེས་བསྒོས་ཀྱང་། ཨེ་ལི་ཤཱས་ཁོང་ལ། བདག་གིས་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དང་ཁྱེད་ཀྱི་ཚེ་སྲོག་གཉིས་ཀ་དཔང་དུ་བཙུགས་ནས་མནའ་བསྐྱལ་བ་སྟེ། ང་ནི་ཅིས་ཀྱང་ཁྱེད་དང་འབྲལ་བར་མི་བྱའོ་ཞེས་ཞུས་པས་ཁོང་གཉིས་ཡེ་རུ་ཀོ་རུ་ཕྱིན།
2KI 2:5 ཡེ་རུ་ཀོ་ལ་ཡོད་པའི་ལུང་སྟོན་པ་ཚོའི་སློབ་བུ་རྣམས་ཨེ་ལི་ཤཱའི་དྲུང་དུ་འོངས་ནས་ཁོང་ལ། དཀོན་མཆོག་ཡ་ཝཱེས་དེ་རིང་ཁྱེད་ཀྱི་སློབ་དཔོན་ནི་ཁྱེད་ཀྱི་གམ་ནས་འཁྱེར་བར་མཛད་པ་ཤེས་ཡོད་དམ་ཞེས་དྲིས་པར། ཁོང་ན་རེ། ངས་དེ་ཤེས་ཡོད། ཁྱོད་རྣམས་ཁ་རོག་སྡོད་ཅིག་ཅེས་སྨྲས་སོ། །
2KI 2:6 དེ་ནས་ཡང་ཨེ་ལི་ཡཱས་ཁོང་ལ། དཀོན་མཆོག་ཡ་ཝཱེས་བདག་ཡོར་དན་གཙང་པོར་མངགས་པས། ཁྱོད་རང་འདི་ནས་བཞུགས་རོགས་ཞེས་བསྒོས་ཀྱང་། ཨེ་ལི་ཤཱས་ཁོང་ལ། བདག་གིས་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དང་ཁྱེད་ཀྱི་ཚེ་སྲོག་གཉིས་ཀ་དཔང་དུ་བཙུགས་ནས་མནའ་བསྐྱལ་བ་སྟེ། ང་ནི་ཅིས་ཀྱང་ཁྱེད་དང་འབྲལ་བར་མི་བྱའོ་ཞེས་ཞུས་པས་ཁོང་གཉིས་མཉམ་དུ་ཆས་པ་ལ།
2KI 2:7 ལུང་སྟོན་པ་ཚོའི་སློབ་བུ་རྣམས་ལས་མི་ལྔ་བཅུ་འོངས་ཏེ་ཁོང་གཉིས་དང་རྒྱང་རིང་ནས་ཁ་གཏད་དུ་ལངས་བསྡད་ཅིང་། ཁོང་གཉིས་ནི་ཡོར་དན་གཙང་པོའི་འགྲམ་དུ་ལངས་ནས་བསྡད།
2KI 2:8 ཨེ་ལི་ཡཱས་རང་གི་ཕྱི་གོས་བླངས་ནས་བལྟབས་ཏེ་ཆུ་ལ་བརྒྱབ་པ་ན། ཆུ་དེ་ཡར་མར་ཁག་གཉིས་སུ་གྱེས་སོང་བས་ཁོང་གཉིས་སྐམ་སའི་སྟེང་ནས་ཕ་རོལ་ཏུ་ཕྱིན་ཏོ། །
2KI 2:9 དེར་ཁོང་གཉིས་ཕ་རོལ་ཏུ་ཕྱིན་རྗེས། ཨེ་ལི་ཡཱས་ཨེ་ལི་ཤཱ་ལ། ང་རང་ཁྱོད་དང་ཕྲལ་ནས་ཡར་མ་དྲངས་གོང་དུ་བདག་ལས་ཅི་འདོད་པ་དེ་ཞུ་བར་གྱིས་ཤིག་ཅེས་བསྒོས་པར། ཨེ་ལི་ཤཱ་ན་རེ། ཁྱེད་ཀྱིས་ཉིད་ཀྱི་ཐུགས་ཉིད་ནི་ལྡབ་འགྱུར་གྱིས་ང་ལ་གནང་བར་མཛོད་ཅེས་གསོལ་བ་དང་།
2KI 2:10 ཨེ་ལི་ཡཱས་འདི་སྐད་དུ། ཁྱོད་ཀྱིས་བསྒྲུབ་དཀའ་བའི་དོན་ཞིག་ཞུས་བྱུང་། གལ་ཏེ་ཁྱོད་ཀྱིས་ང་རང་ཁྱོད་དང་འཕྲལ་བ་དེ་མཐོང་བར་གྱུར་ན་དེ་བཞིན་དུ་འཐོབ་པར་འགྱུར་གྱི། གལ་ཏེ་མཐོང་བར་མ་གྱུར་ན། དེ་བཞིན་དུ་འཐོབ་པར་མི་འགྱུར་ཞེས་གསུངས་སོ། །
2KI 2:11 དེ་ནས་ཁོང་གཉིས་གླེང་མོལ་བྱས་ནས་འགྲོ་བཞིན་པའི་སྐབས་སུ། ཀྱེ་ཧོ། མེའི་ཤིང་རྟ་འཁོར་ལོ་དང་མེའི་རྟ་རྣམས་ཀྱིས་ཁོ་གཉིས་སོ་སོར་ཕྲལ་ཏེ། ཨེ་ལི་ཡཱ་ནི་རླུང་འཚུབ་ཁྲོད་དུ་ནམ་མཁའི་ཞིང་ཁམས་སུ་དྲངས་པ་ལ།
2KI 2:12 ཨེ་ལི་ཤཱས་དེ་མཐོང་ནས་སྐད་ཆེན་པོས། ངའི་ཡབ་ལགས། ངའི་ཡབ་ལགས། ཡེས་ར་ཨེལ་གྱི་དམག་འཐབ་ཤིང་རྟ་དང་སྐྱ་དམག་རྣམས་ཞེས་བོས་ན་ཡང་། ཁོས་ནི་ཨེ་ལི་ཡཱ་སླར་མཐོང་བར་མ་གྱུར་པ་དང་། རང་གི་གོས་དུམ་བུ་གཉིས་སུ་གཤགས་སོ། །
2KI 2:13 དེ་ནས་ཁོས་ཨེ་ལི་ཡཱ་ལས་ལྷུང་བའི་ཕྱི་གོས་དེ་བླངས་ནས་ཕྱིར་ལོག་ཅིང་ཡོར་དན་གཙང་པོའི་འགྲམ་དུ་ལངས་བསྡད་པ་དང་།
2KI 2:14 ཨེ་ལི་ཡཱ་ལས་ལྷུང་བའི་ཕྱི་གོས་དེ་ཁྱེར་ནས་ཆུ་ལ་བརྡེགས་ཤིང་། ཨེ་ལི་ཡཱའི་དཀོན་མཆོག་ཡ་ཝཱེ་གང་དུ་བཞུགས་སམ་ཞེས་སྨྲས་པ་དང་ཆུ་ལ་བརྡེགས་པའི་ཚེ། ཆུ་དེ་ཁག་གཉིས་སུ་གྱེས་ནས་ཨེ་ལི་ཤཱ་ཕ་རོལ་ཏུ་ཕྱིན་ཏོ། །
2KI 2:15 དེ་ཡང་ཡེ་རུ་ཀོ་རུ་ཡོད་པའི་ལུང་སྟོན་པའི་སློབ་བུ་རྣམས་ཀྱིས་དེ་ལྟར་འབྱུང་བ་ཕར་ཕྱོགས་ནས་མཐོང་བས། དེ་དག་གིས་ཨེ་ལི་ཡཱའི་ཐུགས་ཉིད་ནི་ཨེ་ལི་ཤཱའི་སྟེང་དུ་བབས་པ་ཡིན་ནོ་ཞེས་སྨྲས་ནས་བསུ་རུ་ཕྱིན་ཏེ་ཁོང་གི་དྲུང་དུ་ལུས་སར་བཏུད་ནས་ཕྱག་འཚལ་བཞིན་ན་རེ།
2KI 2:16 དཀོན་མཆོག་ཡ་ཝཱེའི་ཐུགས་ཉིད་ཀྱིས་ཁྱེད་ཀྱི་སློབ་དཔོན་ཡར་ཁྱེར་ནས་རི་ཞིག་གམ་ལུང་པ་ཞིག་ཏུ་བསྐྱུར་ཡང་སྲིད། གཟིགས་དང་། འདིར་ཁྱེད་ཀྱི་ཞབས་ཕྱིའི་ནང་དུ་མི་སྟོབས་ཅན་ལྔ་བཅུ་ཡོད་པས། དེ་དག་ཁོང་འཚོལ་དུ་འགྲོ་བར་གནོངས་ཤིག་ཅེས་ཞུས་པར། ཁོང་གིས་མི་སུ་ཡང་མ་མངགས་ཤིག་ཅེས་བསྒོས་ཀྱང་།
2KI 2:17 དེ་དག་གིས་ནན་གྱིས་ཞུས་པ་ལ། ཁོང་ངོ་ཟློག་པར་ནོངས་ནས་ཐོངས་ཤིག་ཅེས་བསྒོས་ཤིང་། དེ་དག་གིས་མི་ལྔ་བཅུ་མངགས་པ་དང་། དེ་རྣམས་ཀྱིས་ཉིན་གསུམ་གྱི་རིང་དུ་བཙལ་ཡང་མ་རྙེད་དོ། །
2KI 2:18 དེ་དག་ཕྱིར་ཨེ་ལི་ཤཱའི་གམ་དུ་ལོག་ཅིང་སྐབས་དེར་ཁོང་ཉིད་ད་དུང་ཡེ་རུ་ཀོར་བསྡད་ཡོད་པ་དང་། ཁོང་གིས་དེ་དག་ལ། ངས་ཁྱོད་ཅག་ལ་མ་འགྲོ་ཞེས་སྨྲས་པ་མ་ཡིན་ནམ་ཞེས་གསུངས་སོ། །
2KI 2:19 ཡང་གྲོང་ཁྱེར་དེའི་མི་རྣམས་ཀྱིས་ཨེ་ལི་ཤཱ་ལ། བདག་ཅག་གི་ཇོ་བོ་ལགས། གཟིགས་དང་། བདག་ཅག་གི་ཇོ་བོ་ཁྱེད་ཉིད་ཀྱིས་གཟིགས་པ་ལྟར་གྲོང་ཁྱེར་འདི་ཆགས་སའི་ཡུལ་ནི་ལེགས་ནའང་ཆུ་ངན་པའི་སྟབས་ཀྱིས་ས་ཞིང་དུ་འབྲས་བུ་མི་འབྱུང་ངོ་ཞེས་ཞུས་པ་ན།
2KI 2:20 ཁོང་གིས་འདི་སྐད་དུ། ང་ལ་བུམ་པ་གསར་པ་ཞིག་ཏུ་ཚྭ་བླུགས་ནས་ཁྱེར་ཤོག་ཅེས་བསྒོས་པ་དང་། དེ་དག་གིས་ཁོང་ལ་དེ་བཞིན་ཕུལ་ཏོ། །
2KI 2:21 དེ་ནས་ཁོང་ཕྱི་རོལ་ཏུ་ཆུ་མིག་གི་རྩར་ཕེབས་ནས་དེའི་ནང་དུ་ཚྭ་འདེབས་བཞིན་འདི་སྐད་དུ། དཀོན་མཆོག་ཡ་ཝཱེས་འདི་ལྟར་གསུངས་ཏེ། ངས་ཆུ་འདི་གསོས་པ་ཡིན། འདི་ནས་ཕྱིན་ཆད་མི་འཆི་བའམ་སྟོན་ཐོག་མི་འབྱུང་བར་མི་འགྱུར་ཞེས་གསུངས་པ་དང་།
2KI 2:22 ཨེ་ལི་ཤཱའི་བཀའ་བཞིན་དུ་ཆུ་དེ་སོས་ནས་དེ་རིང་གི་བར་དུ་གནས་སོ། །
2KI 2:23 དེ་ནས་ཨེ་ལི་ཤཱ་ཁོང་ཉིད་པེད་ཨེལ་དུ་ཡར་བྱོན་ཏེ། ཡར་འགྲོ་བའི་ལམ་དུ་གྲོང་ཁྱེར་གྱི་གཞོན་ནུ་འགའ་ཐོན་ནས་ཁོང་ལ་འདི་ལྟར་འཕྱ་སྨོད་བྱས། མགོ་སྤྱི་ཐེར་ཅན་ཁྱོད་ཡར་སོང་ཞིག མགོ་སྤྱི་ཐེར་ཅན་ཁྱོད་ཡར་སོང་ཞིག་ཅེས་སྐད་བརྒྱབ་པས།
2KI 2:24 ཁོང་གིས་ཕྱི་མིག་གིས་དེ་དག་ལ་གཟིགས་ཤིང་དཀོན་མཆོག་ཡ་ཝཱེའི་མཚན་ལ་བརྟེན་ནས་དམོད་པ་བོར་བས། ནགས་ཚལ་ལས་དོམ་མོ་གཉིས་འོངས་ནས་དེ་དག་ཁྲོད་ཀྱི་གཞོན་ནུ་ཞེ་གཉིས་ཧྲལ་བར་བྱས།
2KI 2:25 ཡུལ་དེ་ནས་ཁོང་ཀར་མེལ་རི་བོར་ཕྱིན་པ་དང་། ཡང་དེ་ནས་ཕྱིར་སཱ་མར་ཡ་རུ་ལོག་གོ །
2KI 3:1 དེ་ཡང་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱིས་སྲིད་བསྐྱངས་པའི་ལོ་བཅོ་བརྒྱད་པར། ཨ་ཧབ་ཀྱི་སྲས་ཡོ་རཱམ་བྱ་བ་སཱ་མར་ཡ་རུ་ཡེས་ར་ཨེལ་གྱི་རྒྱལ་པོར་གྱུར་ནས་ལོ་བཅུ་གཉིས་ཀྱི་རིང་དུ་རྒྱལ་སྲིད་བསྐྱངས་སོ། །
2KI 3:2 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ཀྱང་། རང་གི་ཕ་མས་ཅི་བྱས་པའི་ཚད་དེ་འདྲར་མ་སླེབས་པ་སྟེ། རང་གི་ཕ་ཡིས་བཟོས་པའི་པཱ་ཨལ་གྱི་ལྷ་རྟེན་དེ་ཁོས་དོར་བར་བྱས་སོ། །
2KI 3:3 འོན་ཀྱང་ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་ལ་འབྱར་ཏེ། དེ་དང་བྲལ་བར་མ་གྱུར་ཏོ། །
2KI 3:4 ཡང་མོ་ཨབ་ཀྱི་རྒྱལ་པོ་མེ་ཤཱ་ནི་ལུག་འཚོ་བའི་ཕྱུགས་བདག་ཅིག་ཡིན་ཏེ། ཁོས་ཡེས་ར་ཨེལ་གྱི་རྒྱལ་པོ་ལ་ལུ་གུ་འབུམ་གཅིག་དང་། ལུག་ཐུག་འབུམ་གཅིག་བལ་དང་བཅས་པ་འབུལ་བཞིན་ཡོད་པ་ལ།
2KI 3:5 ཨ་ཧབ་ཚེ་ལས་འདས་རྗེས། མོ་ཨབ་པའི་རྒྱལ་པོས་ཡེས་ར་ཨེལ་གྱི་རྒྱལ་པོར་ངོ་ལོག་བྱས་སོ། །
2KI 3:6 ཉིན་དེ་ཉིད་དུ་རྒྱལ་པོ་ཡོ་རཱམ་ནི་སཱ་མར་ཡ་ནས་ཐོན་ཏེ། ཡེས་ར་ཨེལ་པ་ཐམས་ཅད་བསྡུས་ཤིང་དམག་བསྐྱོད་བྱས་པ་དང་།
2KI 3:7 ཁོ་འགྲོ་ཞོར་དུ་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ལ་ངག་འཕྲིན་བསྐུར་བ་འདི་ལྟ་སྟེ། མོ་ཨབ་པའི་རྒྱལ་པོས་ང་ལ་ངོ་ལོག་བྱས་པས། ཁྱོད་བདག་དང་མཉམ་དུ་མོ་ཨབ་ལ་འཐབ་པར་འགྲོའམ་ཞེས་པར། ཡེ་ཧོ་ཤ་ཕད་ན་རེ། ང་ནི་ཡར་འགྲོ་བར་བྱའོ། །ཁྱོད་དང་ང་གཉིས་གཅིག་ཡིན་ཏེ། ངའི་འབངས་ཀྱང་ཁྱེད་ཀྱི་འབངས་དང་འདྲ་ཞིང་། ངའི་རྟ་རྣམས་ཀྱང་ཁྱེད་ཀྱི་རྟ་དང་འདྲ་ཞེས་སྨྲས་སོ། །
2KI 3:8 ཡང་ཡེ་ཧོ་ཤ་ཕད་ཀྱིས། ངེད་ཅག་ལམ་གང་ནས་ཡར་འགྲོའམ་ཞེས་དྲིས་པར། ཡོ་རཱམ་གྱིས། ཨེ་དོམ་ཡུལ་གྱི་ས་སྟོང་བརྒྱུད་ནས་འགྲོ་བར་བྱ་ཞེས་སྨྲས་སོ། །
2KI 3:9 དེ་ནས་ཡེས་ར་ཨེལ་གྱི་རྒྱལ་པོ་དང་། ཡ་ཧུ་དཱའི་རྒྱལ་པོ། ཨེ་དོམ་གྱི་རྒྱལ་པོ་གསུམ་མཉམ་དུ་ཐོན་ཏེ། ཉིན་བདུན་གྱི་རིང་ལ་སྐོར་བསྐྱོད་བྱས་པས་དམག་དཔུང་དང་དེའི་རྗེས་སུ་འབྲངས་པའི་སྒོ་ཕྱུགས་རྣམས་ལ་ཆུ་མེད་པར་གྱུར་ཏོ། །
2KI 3:10 དེ་ནས་ཡེས་ར་ཨེལ་གྱི་རྒྱལ་པོས། ཀྱེ་མ། དོན་དངོས་སུ་དཀོན་མཆོག་ཡ་ཝཱེས་ངེད་རྒྱལ་པོ་གསུམ་པོ་མོ་ཨབ་པའི་ལག་ཏུ་གཏད་པར་ཞལ་གསུང་གནང་བ་ལགས་སོ་ཞེས་སྨྲས་པར།
2KI 3:11 ཡེ་ཧོ་ཤ་ཕད་ཀྱིས། འདིར་དཀོན་མཆོག་ཡ་ཝཱེ་ལ་བཀའ་འདྲི་ཞུ་བར་དཀོན་མཆོག་ཡ་ཝཱེའི་ལུང་སྟོན་པ་ཡོད་པ་མིན་ནམ་ཞེས་པ་ན། ཡེས་ར་ཨེལ་གྱི་རྒྱལ་པོའི་འཁོར་གྱི་ནང་ནས་གཅིག་གིས། ཤ་ཕད་ཀྱི་བུ་ཨེ་ལི་ཤཱ་སྟེ། ཨེ་ལི་ཡཱའི་ལག་པར་ཆུ་ལྡུག་མཁན་དེ་འདི་རུ་འདུག་ཅེས་ཞུས་པ་དང་།
2KI 3:12 ཡེ་ཧོ་ཤ་ཕད་ཀྱིས། དཀོན་མཆོག་ཡ་ཝཱེའི་བཀའ་ནི་ཁོང་དང་ལྷན་དུ་བཞུགས་ཞེས་སྨྲས་པ་ན། ཡེས་ར་ཨེལ་གྱི་རྒྱལ་པོ་དང་ཡེ་ཧོ་ཤ་ཕད། ཨེ་དོམ་གྱི་རྒྱལ་པོ་བཅས་པ་མར་ཁོང་གི་དྲུང་དུ་ཕྱིན་ཏོ། །
2KI 3:13 ཨེ་ལི་ཤཱས་ཡེས་ར་ཨེལ་གྱི་རྒྱལ་པོ་ལ། ང་དང་ཁྱོད་གཉིས་ལ་འབྲེལ་བ་ཅི་ཡོད། ཁྱོད་ཀྱི་ཕ་དང་མ་ཡི་ལུང་སྟོན་པ་རྣམས་ཀྱི་གམ་དུ་སོང་ཞིག་གསུངས་པ་ན། ཡེས་ར་ཨེལ་གྱི་རྒྱལ་པོས། དེ་ལྟར་མི་གསུང་བར་འཚལ། རྒྱུ་མཚན་ནི་དཀོན་མཆོག་ཡ་ཝཱེས་བདག་ཅག་རྒྱལ་པོ་གསུམ་མོ་ཨབ་པའི་ལག་ཏུ་གཏད་པར་ཞལ་གསུང་གནང་ཡོད་ཅེས་ཞུས་ཤིང་།
2KI 3:14 ཨེ་ལི་ཤཱ་ཡིས། ངས་རང་གིས་ཞབས་ཕྱི་སྒྲུབ་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་གཏན་དུ་གསོན་པོར་བཞུགས་པ་ཁོང་ཉིད་དཔང་དུ་བཙུགས་ནས་མནའ་བསྐྱལ་བ་སྟེ། གལ་སྲིད་ངས་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱི་ཞལ་ངོར་བལྟས་པ་མིན་ན། ངས་ཁྱོད་ལ་ཁ་ཡ་བྱེད་པ་ལྟ་ཞོག མིག་གིས་ཀྱང་མི་བལྟ།
2KI 3:15 ད་ནི་རོལ་མོ་དཀྲོལ་མཁན་ཞིག་ངའི་གམ་དུ་ཁྲིད་ཤོག་ཅེས་བསྒོས་པ་དང་། རོལ་མོ་དཀྲོལ་མཁན་དེས་རོལ་མོ་དཀྲོལ་སྐབས་དཀོན་མཆོག་ཡ་ཝཱེའི་ཕྱག་ཁོང་གི་སྟེང་ལ་བབས་པ་དང་།
2KI 3:16 ཁོང་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་ལུང་པ་འདིའི་གང་སར་རྫིང་བུ་བསྐྱིལ་ཏེ་འོབས་དོང་གཤག་དགོས།
2KI 3:17 གང་ལ་ཞེ་ན། དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ཀྱིས་རླུང་གཡུག་པ་མི་མཐོང་ལ། ཆར་འབབ་པའང་མི་མཐོང་མོད། འོན་ཀྱང་ཁྱོད་ཅག་དང་ཁྱོད་ཅག་གི་ཁལ་མ་དང་སྒོ་ཕྱུགས་རྣམས་ལ་འཐུང་ཆུ་ཡོད་པའི་ཕྱིར་ལུང་པ་དེ་ཆུས་ཁེངས་ངེས་ཡིན་ནོ། །
2KI 3:18 འདི་ནི་དཀོན་མཆོག་ཡ་ཝཱེའི་སྤྱན་སྔར་དོན་ཆུང་ཆུང་ཞིག་སྟེ། ཁོང་གིས་མོ་ཨབ་པ་རྣམས་ཀྱང་ཁྱོད་ཅག་གི་ལག་ཏུ་གཏོད་པར་འགྱུར།
2KI 3:19 ཁྱོད་ཚོས་གྲོང་ཁྱེར་བརྟན་པོའི་མཁར་སྒོ་དང་། གྲོང་ཁྱེར་ཡག་པོ་ཐམས་ཅད་གཏོར་བར་བྱ་ཞིང་། ལྗོན་ཤིང་ལྟ་ན་སྡུག་པ་ཐམས་ཅད་གཅོད་པ་དང་། ཆུ་མིག་ཐམས་ཅད་བཀག་ནས་ས་ཞིང་ཡག་པོ་ཐམས་ཅད་རྡོ་སྤུང་རྒྱག་པར་བྱའོ་ཞེས་སྦྲན།
2KI 3:20 དེའི་ཕྱི་ཉིན་ཞོགས་པར་སྦྱིན་སྲེག་གི་མཆོད་པ་འབུལ་དུས་སུ། ལྟོས་དང་། ཨེ་དོམ་གྱི་ཕྱོགས་ནས་ཆུ་འོངས་ཏེ་ཡུལ་དེ་ནི་ཆུས་ཁེངས་པར་གྱུར་ཏོ། །
2KI 3:21 དེ་ནས་མོ་ཨབ་པ་ཀུན་གྱིས་རྒྱལ་པོ་དེ་དག་ཁོ་ཚོ་དང་དམག་འཁྲུག་རྒྱག་ཏུ་ཡར་འོངས་པ་ཐོས་པས། ཁྲབ་རྨོག་གྱོན་ཐུབ་པ་རྒན་གཞོན་གང་ཡིན་ཡང་ཐམས་ཅད་བོས་ནས་ས་མཚམས་སུ་ལངས་པ་དང་།
2KI 3:22 དེའི་ཕྱི་ཉིན་ཞོགས་པར་ཁོ་ཚོ་ཡར་ལངས་དུས། ཉི་མའི་འོད་མདངས་ཆུ་ལ་ཕོག་པ་ན། མོ་ཨབ་པ་རྣམས་ཀྱིས་ཕ་རོལ་ནས་ཆུ་ནི་ཁྲག་ལྟར་དམར་པོ་ཡིན་པ་མཐོང་བས།
2KI 3:23 ཁོ་ཚོས་འདི་ནི་ཁྲག་ཡིན་ཏེ། རྒྱལ་པོ་དེ་རྣམས་ཀྱིས་ནང་འཁྲུག་བརྒྱབ་ནས་ཕན་ཚུན་གསོད་རེས་བྱས་པ་རེད། ཀྱེ་མོ་ཨབ་པ་རྣམས། ད་ནི་འཕྲོག་བཅོམ་བྱེད་དུ་འགྲོ་ཞེས་སྨྲས་པས།
2KI 3:24 དེ་རྣམས་ཡེས་ར་ཨེལ་གྱི་དམག་སྒར་དུ་ཕྱིན་པའི་ཚེ། ཡེས་ར་ཨེལ་པ་རྣམས་ཡར་ལངས་ཏེ་མོ་ཨབ་པ་རྣམས་བསད་པས། མོ་ཨབ་པ་རྣམས་ཁོ་ཚོའི་མདུན་ནས་བྲོས། ཡེས་ར་ཨེལ་པ་རྣམས་ཀྱིས་ཁོ་ཚོར་རྒོལ་ཏེ་བསད་དོ། །
2KI 3:25 དེ་དག་གིས་གྲོང་ཁྱེར་རྣམས་བརླགས་ཤིང་། མི་རེས་ས་ཞིང་ཡག་པོ་ཐམས་ཅད་ལ་རྡོ་འཕངས་པ་དང་ས་ཞིང་རྡོ་ཡིས་བཀང་བར་བྱས། ཡང་ཆུ་མིག་ཐམས་ཅད་བཀག་སྟེ་ལྗོན་ཤིང་ལྟ་ན་སྡུག་པ་ཐམས་ཅད་བཅད། ཀིར་ཧ་རེ་ཤེད་འབའ་ཞིག་གི་རྡོ་ལྷག་ཀྱང་དམག་མི་འུར་རྡོ་ཐོགས་པ་རྣམས་ཀྱིས་དེ་ཡང་མཐའ་ནས་བསྐོར་ཏེ་རྒོལ་བ་རེད།
2KI 3:26 དེ་ནས་མོ་ཨབ་ཀྱི་རྒྱལ་པོས་དམག་འཐབ་ཛ་དྲག་ཡིན་པ་མཐོང་བས། ཨེ་དོམ་གྱི་རྒྱལ་པོའི་ཕྱོགས་སུ་འཕྲལ་རྒོལ་བྱེད་པར་རལ་གྲི་ཐོགས་པའི་མི་བདུན་བརྒྱ་ཁོ་དང་མཉམ་དུ་ཁྲིད་ཀྱང་ཁོ་ཚོས་ཐུབ་པ་མ་བྱུང་།
2KI 3:27 དེ་ནས་ཁོས་རང་གི་རྗེས་སུ་རྒྱལ་པོར་བསྐོ་རྒྱུ་ཡིན་པའི་སྲས་ཐོག་མ་དེ་ལྕགས་རིའི་སྟེང་དུ་སྦྱིན་སྲེག་གི་མཆོད་པར་ཕུལ་བས། ཡེས་ར་ཨེལ་ལ་ཁོང་ཁྲོ་དྲག་པོ་བྱུང་སྟེ་ཁོ་དང་བྲལ་ནས་ཕྱིར་རང་ཡུལ་དུ་ལོག་གོ །
2KI 4:1 དེ་ཡང་ལུང་སྟོན་པའི་སློབ་བུ་གཅིག་གི་ཆུང་མས་ཨེ་ལི་ཤཱའི་དྲུང་དུ་འོ་དོད་དང་བཅས་ཏེ། ཁྱེད་ཀྱི་ཞབས་ཕྱི་སྟེ་བདག་གི་ཁྱོ་བོ་ནི་ཚེ་ལས་འདས་ཤིང་། ཁོ་ནི་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་ཁྱེད་ཀྱིས་ཤེས་ལ། ད་ལྟ་བུན་བདག་ནི་ངའི་བུ་གཉིས་ཁོ་ལ་གཡོག་པོ་བྱེད་ཆེད་འཛིན་དུ་འོང་ངོ་ཞེས་ཞུས་པ་དང་།
2KI 4:2 ཨེ་ལི་ཤཱས་ཁོ་མོར་ངས་ཁྱོད་ཀྱི་དོན་དུ་ཅི་བྱའམ། ཁྱོད་ཀྱི་ཁྱིམ་དུ་ཅི་ཡོད་པ་བདག་ལ་ཤོད་ཅིག་ཅེས་བསྒོས་པས། ཁོ་མོ་ན་རེ། ཞལ་ཏ་མ་ངའི་ཁྱིམ་དུ་སྣུམ་རྫ་བུམ་གང་མ་གཏོགས་གཞན་ཅི་ཡང་མེད་ཅེས་ཞུས་པ་དང་།
2KI 4:3 ཨེ་ལི་ཤཱས། ཁྱོད་རང་ཕྱི་རུ་སོང་སྟེ། ཉེ་འཁོར་གྱི་ཁྱིམ་མཚེས་ཐམས་ཅད་ལས་རང་ཉིད་ལ་སྣོད་སྟོང་པ་གཡོར་དང་། གང་ནུས་ཀྱིས་མང་པོ་གཡོར་ཅིག
2KI 4:4 ཕྱིར་ཁྱིམ་དུ་ལོག་ཚེ་ཁྱོད་དང་ཁྱོད་ཀྱི་བུ་གཉིས་ཀྱིས་སྒོ་གཏན་ནས་སྣོད་ཐམས་ཅད་ཀྱི་ནང་དུ་སྣུམ་བླུགས་ཤིག ཁ་བཀང་རྗེས་འགྲམ་ཞིག་ཏུ་ཞོག་ཅིག་ཅེས་གསུངས།
2KI 4:5 དེ་ནས་ཁོ་མོ་ཁོང་དང་བྲལ་ནས་རང་དང་བུ་གཉིས་ཡོད་སའི་ཁང་སྒོ་གཏན་པ་དང་། ཁོ་མོའི་བུ་གཉིས་ཀྱིས་རྒྱུན་ཆད་མེད་པར་སྣོད་ཁྱེར་འོངས་པ་དང་ཁོ་མོས་དེ་དག་གི་ནང་དུ་སྣུམ་བླུགས་སོ། །
2KI 4:6 སྣོད་རྣམས་ཁ་བཀང་བའི་ཚེ་ཁོ་མོས་བུ་ལ་ད་དུང་སྣོད་ཁྱེར་ཤོག་ཅེས་སྨྲས་པར། བུ་ཡིས་ཁོ་མོར་ད་ནི་སྣོད་མེད་དོ་ཞེས་སྨྲས་པ་དང་སྣུམ་ཡང་ཆད་པར་གྱུར་ཏོ། །
2KI 4:7 དེ་ནས་ཁོ་མོ་སོང་སྟེ་དཀོན་མཆོག་གི་སྐྱེས་བུ་ལ་ཞུས་པ་ན། ཁོང་གིས་ད་སོང་ལ་སྣུམ་བཙོངས་ཏེ་ཁྱོད་ཀྱི་བུ་ལོན་འཇལ་ཡག་བྱོས། ལྷག་མ་དེ་ཁྱོད་དང་ཁྱོད་ཀྱི་བུ་གཉིས་ཀྱི་འཚོ་རྒྱགས་བྱོས་ཤིག་ཅེས་གསུངས་སོ། །
2KI 4:8 ཉིན་ཞིག་ལ་ཨེ་ལི་ཤཱ་ཁོང་ཉིད་ཤུ་ནེམ་བརྒྱུད་ནས་འགྲོ་དུས། དེར་གནས་པའི་བུད་མེད་ཕྱུག་བདག་ཅིག་གིས་ཁོང་ཉིད་གསོལ་བ་བཞེས་པར་ནན་གྱིས་ཞུས་ཤིང་། ཕྱིས་སུ་ཁོང་ལམ་དེ་བརྒྱུད་ནས་འགྲོ་ཐེངས་རེར་ནང་དུ་ཕེབས་ནས་གསོལ་བ་བཞེས་པ་རེད།
2KI 4:9 བུད་མེད་དེས་རང་གི་ཁྱོ་བོ་ལ། ལྟོས་དང་། རྒྱུན་དུ་ངེད་ཅག་གི་ལམ་འདི་བརྒྱུད་ནས་ཕེབས་པ་འདི་ནི་དཀོན་མཆོག་གི་སྐྱེས་བུ་ཞིག་ཡིན་པ་ངས་ཤེས་སོ། །
2KI 4:10 རང་ཅག་གིས་ཁང་སྟེང་ནས་རྩིག་པ་དང་ལྡན་པའི་ཁང་ཆུང་ཞིག་ཕུབ་ན་ལེགས་ཏེ། དེའི་ནང་དུ་ཁོང་ལ་མལ་ཁྲི་དང་། མདུན་ཅོག་དང་། རྐུབ་བཀྱག་དང་། སྒྲོན་མེ་བཅས་འཇོག་པར་བྱའོ། །དེ་ནས་ཁོང་ཉིད་རང་ཅག་གི་གམ་དུ་ཕེབས་པའི་དུས་སུ་དེར་སྐུ་ངལ་གསོས་ཆོག་པ་ཡིན་ཞེས་སྨྲས་སོ། །
2KI 4:11 དེ་ཡང་ཉིན་ཞིག་ལ་ཨེ་ལི་ཤཱ་དེར་ཕེབས་ཤིང་། ཡར་ཁང་མིག་དེའི་ནང་དུ་འཛུལ་ནས་བསྙེས་པ་དང་།
2KI 4:12 རང་གི་ཞབས་ཕྱི་གེ་ཧ་ཟི་ལ། ཤུ་ནེམ་གྱི་བུད་མེད་འདི་རུ་བོས་ཤིག་གསུངས་པར། དེས་ཁོ་མོ་བོས་འོངས་པ་དང་ཁོང་གི་དྲུང་དུ་ལངས་ནས་བསྡད།
2KI 4:13 ཡང་ཁོང་གིས་རང་གི་ཞབས་ཕྱི་ལ། ཁྱོད་ཀྱིས་ཁོ་མོ་ལ། ལྟོས་དང་། ཁྱོད་ཀྱིས་ངེད་ཅག་ལ་ཕན་ཆེན་པོ་བཏགས་པས། བདག་གིས་ཁྱོད་ལ་ཅི་ཞིག་བྱེད་དགོས་སམ། ཁྱོད་ལ་བདག་གིས་ཁྱོད་ཀྱི་ཚབ་ཏུ་རྒྱལ་པོའམ་དམག་དཔོན་ལ་ཞུ་དགོས་པའི་དོན་ཡོད་དམ་ཞེས་དྲིས་ཤིག་བསྒོས་པ་དང་། ཁོ་མོ་ན་རེ། བདག་ནི་རང་གི་མི་རྣམས་ཀྱི་ཁྲོད་དུ་སྡོད་པ་ཡིན་ཞེས་ཞུས་སོ། །
2KI 4:14 དེ་ནས་ཡང་ཁོང་གིས་དེས་ན་བདག་གིས་ཁོ་མོའི་དོན་དུ་ཅི་བྱའམ་ཞེས་གསུངས་པ་ན། གེ་ཧ་ཟིས་ལན་དུ། ཁོ་མོར་བུ་མེད་པ་ནི་དོན་དངོས་ཡིན་པ་དང་ཁྱོ་ག་ཡང་རྒས་ནས་འདུག་ཅེས་ཞུས་པར།
2KI 4:15 ཨེ་ལི་ཤཱས་ཁོ་མོ་བོས་ཤིག་བསྒོས་པས་དེས་ཁོ་མོ་བོས་ཤིང་། ཁོ་མོ་སྒོ་འགྲམ་དུ་ལངས་ནས་བསྡད་པ་ལ།
2KI 4:16 ཨེ་ལི་ཤཱས་དེ་ལ། སང་ལོའི་ད་ཚོད་ཁྱོད་ཀྱི་པང་དུ་བུ་ཞིག་འཁྱུད་པར་འགྱུར་རོ་ཞེས་གསུངས་པ་ན། ཁོ་མོས། ཀྱེ་དཀོན་མཆོག་གི་སྐྱེས་བུ། ཁྱེད་ཀྱིས་ཉིད་ཀྱི་ཞལ་ཏ་མ་བསླུ་བར་མ་མཛད་ཅིག་ཅེས་ཞུས་སོ། །
2KI 4:17 དེ་ནས་ཨེ་ལི་ཤཱས་ཁོ་མོར་ཅི་གསུངས་པ་བཞིན་དུ། བུད་མེད་དེ་མངལ་དང་ལྡན་པར་གྱུར་ཏེ་ཕྱི་ལོའི་དུས་དེར་བུ་ཞིག་བཙས་སོ། །
2KI 4:18 དེ་ཡང་ཕྲུ་གུ་དེ་ནར་སོན་པ་དང་། ཉིན་ཞིག་ལ་རང་གི་ཕ་དང་ཞིང་རྔ་མཁན་རྣམས་ཀྱི་གམ་དུ་སོང་སྟེ།
2KI 4:19 ཁོས་རང་གི་ཕ་ལ། ངའི་མགོ་བོ། ངའི་མགོ་བོ་ཞེས་སྨྲས་པ་ན། ཁོའི་ཕ་ཡིས་ཞབས་ཕྱི་ཞིག་ལ་ཕྲུ་གུ་འདི་རང་གི་མ་ཡི་གམ་དུ་ཁྱེར་ཞིག་བསྒོས་པས།
2KI 4:20 ཞབས་ཕྱི་པས་ཕྲུ་གུ་ཁྱེར་ཏེ་མ་ཡི་གམ་དུ་བསྐྱལ་ཞིང་ཉིན་གུང་བར་དུ་མ་ཡི་པང་དུ་བསྡད་པ་དང་། དེ་ནས་ཕྲུ་གུ་ཚེ་ལས་འདས།
2KI 4:21 ཁོ་མོ་ཡར་སོང་ནས་བུ་དེ་དཀོན་མཆོག་གི་སྐྱེས་བུའི་མལ་ཁྲི་སྟེང་དུ་བཞག་པ་དང་སྒོ་གཏན་ནས་ཕྱིར་ཐོན་ཏེ།
2KI 4:22 རང་གི་ཁྱོ་ག་བོས་ཏེ་ན་རེ། ཁྱེད་ཀྱིས་ཞབས་ཕྱི་ཞིག་དང་བོང་བུ་ཞིག་ང་ལ་གཏོང་རོགས། ང་རང་དཀོན་མཆོག་གི་སྐྱེས་བུའི་དྲུང་དུ་མགྱོགས་པོར་སོང་ནས་ཕྱིར་ལོག་འོང་ཞེས་སྨྲས་པ་ལ།
2KI 4:23 ཁོ་ན་རེ། དེ་རིང་ཚེས་གཅིག་གམ་ངལ་གསོ་བའི་ཉིན་མོ་མིན་པས། ཁྱོད་ཅིའི་ཕྱིར་དེ་རིང་ཁོང་གི་དྲུང་དུ་འགྲོ་འདོད་ཅེས་པ་ན། ཁོ་མོས། ཐམས་ཅད་བདེ་བར་འགྱུར་ཞེས་སྨྲས་སོ། །
2KI 4:24 དེ་ནས་ཁོ་མོས་བོང་བུ་ལ་སྒ་བསྟད་དེ་ཞབས་ཕྱི་དེར། བོང་བུ་དེད་ནས་སོང་ཞིག ངས་ཁྱོད་ལ་བསྒོ་བའི་བར་དུ་ངའི་དོན་དུ་དལ་ལྷོད་མ་གཏོང་ཞིག་ཅེས་བསྒོས་སོ། །
2KI 4:25 དེ་ནས་མོ་ལམ་དུ་ཆས་ཏེ། ཀར་མེལ་རི་བོར་དཀོན་མཆོག་གི་སྐྱེས་བུའི་དྲུང་དུ་ཕྱིན་པ་ལ། དཀོན་མཆོག་གི་སྐྱེས་བུ་ཡིས་རྒྱང་རིང་ནས་ཁོ་མོ་མཐོང་སྟེ་ཞབས་ཕྱི་གེ་ཧ་ཟི་ལ། ལྟོས་དང་། ཕར་ཀ་ན་ཤུ་ནེམ་གྱི་བུད་མེད་དེ་འདུག
2KI 4:26 ད་ལྟ་ཉིད་དུ་བསུ་རུ་རྒྱུགས་ནས་ཁོ་མོ་ལ། ཁྱོད་རང་བདེའམ། ཁྱོད་ཀྱི་ཁྱོ་ག་ཡང་བདེའམ། བུ་ཡང་བདེའམ་ཞེས་དྲིས་ཤོག་གསུངས་པར། ཁོ་མོས་ཐམས་ཅད་བདེ་བར་འདུག་ཅེས་སྨྲས་སོ། །
2KI 4:27 དེ་ནས་ཁོ་མོ་དཀོན་མཆོག་གི་སྐྱེས་བུའི་དྲུང་དུ་རི་ལ་ཕྱིན་པ་དང་། ཁོང་གི་ཞབས་ལ་འཇུས། གེ་ཧ་ཟི་ཚུར་ཡོང་ནས་ཁོ་མོ་ཕར་ཕུད་རྒྱག་བྱེད་རྩིས་བྱས་མོད། འོན་ཀྱང་དཀོན་མཆོག་གི་སྐྱེས་བུས་དེ་ལ། བསྐྱུར་ཞོག ཁོ་མོའི་སེམས་ལ་སྡུག་བསྔལ་ཤིན་ཏུ་ཆེ། དཀོན་མཆོག་ཡ་ཝཱེས་དེ་གསང་ནས་ང་ལ་གསུང་མེད་ཅེས་གསུངས་པ་ན།
2KI 4:28 ཁོ་མོ་ན་རེ། ངས་རང་གི་བདག་པོ་ལ་བུ་ཡི་ཕྱིར་དུ་ཞུ་བ་ཞུས་མྱོང་ངམ། ཡང་ང་རང་བསླུ་བར་མ་མཛད་ཅེས་ངས་ཞུས་པ་མ་ཡིན་ནམ་ཞེས་ཞུས་ཤིང་།
2KI 4:29 དཀོན་མཆོག་གི་སྐྱེས་བུ་ཡིས་གེ་ཧ་ཟི་ལ། སྐ་རགས་སྡོམས་ལ་ ངའི་འཁར་རྒྱུག་ལག་ཏུ་ཐོགས་ནས་སོང་ཞིག མི་སུ་ཞིག་དང་ཕྲད་ནའང་དེར་གུས་ཕྱག་མ་བྱེད། གཞན་གྱིས་ཁྱོད་ལ་གུས་ཚིག་བརྗོད་ནའང་དེ་ལ་ལན་མ་འདེབས། ཕྲུ་གུའི་གདོང་ལ་ངའི་འཁར་རྒྱུག་འདི་ཞོག་ཅིག་ཅེས་བསྒོས་སོ། །
2KI 4:30 ཕྲུ་གུའི་མ་ཡིས། ངས་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དང་ཁྱེད་ཀྱི་ཚེ་སྲོག་གཉིས་ཀ་དཔང་དུ་བཙུགས་ནས་མནའ་བསྐྱལ་ཏེ། ང་རང་ཅི་ནས་ཀྱང་ཁྱེད་དང་འབྲལ་བར་མི་བྱ་ཞེས་ཞུས་པས། དཀོན་མཆོག་གི་སྐྱེས་བུ་ཡར་བཞེངས་ནས་ཁོ་མོའི་རྗེས་སུ་བསྙེགས།
2KI 4:31 གེ་ཧ་ཟི་ནི་སྔོན་དུ་སོང་ནས་ཕྲུ་གུའི་གདོང་ལ་འཁར་རྒྱུག་བཞག་ནའང་། གྲགས་འགུལ་དང་ཚོར་སྣང་ཅི་ཡང་མ་བྱུང་བས། ཁོ་རང་ཕྱིར་ཡོང་སྟེ་ཨེ་ལི་ཤཱའི་གདོང་བསུས་ནས་ཁོང་ལ། ཕྲུ་གུ་ད་དུང་གཉིད་ནས་མ་སད་ཅེས་ཞུས་སོ། །
2KI 4:32 དེ་ནས་ཨེ་ལི་ཤཱ་ཁོང་ཉིད་ཤུ་ནེམ་གྱི་བུད་མེད་དེའི་ཁྱིམ་དུ་ཕེབས་པའི་ཚེ། ཀྱེ་མ། ཕྲུ་གུ་ནི་ཤི་ཟིན་ཏེ་ཁོའི་མལ་ཁྲི་སྟེང་བཞག་ཡོད་པ་རེད།
2KI 4:33 ཁོང་ཉིད་ནང་དུ་སོང་ནས་སྒོ་བརྒྱབ་པ་དང་། ཁོང་དང་ཕྲུ་གུ་གཉིས་འབའ་ཞིག་ནང་དུ་ཡོད་པ་སྟེ། དཀོན་མཆོག་ཡ་ཝཱེ་ལ་གསོལ་བ་བཏབ་ཅིང་།
2KI 4:34 ཡང་ཁོང་མལ་ཁྲི་སྟེང་དུ་ཕྱིན་ཏེ་ཕྲུ་གུ་ལ་འཁྲིལ་ནས་དེའི་ཁ་ལ་རང་གི་ཁ་དང་། དེའི་མིག་ལ་རང་གི་མིག་དང་། དེའི་ལག་པར་རང་གི་ལག་པ་གླན་ཏེ། ཕྲུ་གུའི་སྟེང་དུ་བཀབ་པ་ན་ཕྲུ་གུའི་ལུས་ལ་དྲོད་རྒྱས་སོ། །
2KI 4:35 དེ་ནས་ཁོང་ཕྱིར་ལོག་ནས་ཁྱིམ་དུ་ཕར་འགྲོ་ཚུར་འགྲོ་ཐེངས་གཅིག་བྱས་པ་དང་། སླར་ཡང་མལ་ཁྲིའི་སྟེང་ཡར་འགོས་ནས་ཕྲུ་གུའི་སྟེང་དུ་བཀབ་པ་དང་། ཕྲུ་གུ་དེས་ལན་བདུན་ལ་ཧབ་སྦྲིད་བརྒྱབ་ནས་མིག་ཕྱེས་སོ། །
2KI 4:36 དཀོན་མཆོག་གི་སྐྱེས་བུས་གེ་ཧ་ཟི་བོས་ནས་དེ་ལ། ཤུ་ནེམ་གྱི་བུད་མེད་འདིར་བོས་ཤིག་བསྒོས་པས། དེས་ཁོ་མོ་བོས་པ་དང་ཁོ་མོ་ཁོང་གི་དྲུང་དུ་འོངས་པ་ན། ཁོང་ན་རེ། ཁྱོད་ཀྱི་བུ་ཡར་ལོངས་ཤིག་ཅེས་གསུངས་ཤིང་།
2KI 4:37 ཁོ་མོ་འོངས་ནས་ཁོང་གི་ཞབས་དྲུང་དུ་ལུས་སར་བཏུད་ནས་ཕྱག་བཙལ་རྗེས། རང་གི་བུ་པང་དུ་བླངས་ནས་ཕྱི་རོལ་ཏུ་སོང་ངོ་། །
2KI 4:38 དེ་ནས་ཨེ་ལི་ཤཱ་སླར་ཡང་གིལ་གལ་དུ་སླེབས་པའི་ཚེ། ཡུལ་དེར་མུ་གེ་བྱུང་ཞིང་། ལུང་སྟོན་པའི་སློབ་བུ་རྣམས་ཁོང་གི་མདུན་དུ་བསྡད་ཡོད། ཁོང་གིས་ཉིད་ཀྱི་ཞབས་ཕྱི་ལ་སླ་ང་ཆེན་པོ་མེ་ལ་བསྐྱོན་ནས་ལུང་སྟོན་པའི་སློབ་བུ་རྣམས་ལ་ཁ་ཟས་གཡོས་ཤིག་ཅེས་གསུངས།
2KI 4:39 མི་ཞིག་སྔོ་ཚོད་བཏོག་པའི་ཕྱིར་ས་ཞིང་དུ་སོང་བ་དང་། ཁོས་རི་སྐྱེས་འཁྲི་ཤིང་ཞིག་རྙེད་ནས་དེའི་སྟེང་གི་ཀ་བེད་བཏོགས་ཏེ་གོས་ཀྱི་ཐུ་བའི་ཁུད་དུ་བལྟབས་ནས་ཁུར་འོངས་པ་དང་། དེ་དག་གིས་ཅི་ཡིན་མ་ཤེས་ཀྱང་དེ་གཏུབས་ནས་ཟས་གདུ་བྱེད་ཀྱི་སླ་ངའི་ནང་དུ་བཏབ་ཅིང་།
2KI 4:40 ཕྱིས་སུ་མི་རྣམས་ལ་བླུགས་ཏེ་འཐུང་དུ་བཅུག དེ་དག་གིས་དེ་འཐུང་བཞིན་པའི་སྐབས་སུ། ཚང་མས་ཀྱེ་དཀོན་མཆོག་གི་སྐྱེས་བུ་ལགས། སླ་ངའི་ནང་དུ་འཆི་བར་བྱེད་པའི་དུག་རྫས་འདུག་ཅེས་སྐད་ངན་ཤོར་བས་ཁོ་ཚོས་འཐུང་མ་ཐུབ་བོ། །
2KI 4:41 ཁོང་གིས་ཕྱེ་ཁྱེར་ཤོག་ཅེས་གསུངས་ནས་དེ་སླ་ངའི་ནང་བཏབ་པ་དང་། མི་རྣམས་ལ་བླུད་ཅིག་ཅེས་གསུངས་ཤིང་སླ་ངའི་ནང་དུ་དུག་མེད་པ་ཡིན་ནོ། །
2KI 4:42 དེ་ཡང་པཱ་ཨལ་ཤཱ་ལི་ཤཱ་ཡུལ་ནས་འོངས་པའི་མི་ཞིག་གིས་དཀོན་མཆོག་གི་སྐྱེས་བུ་ལ་ཐོག་མར་སྨིན་པའི་ནས་ཀྱི་བག་ལེབ་ཉི་ཤུ་དང་། ཁུག་མའི་ནང་དུ་སྙེ་མ་གསར་པ་བཅུག་ནས་ཁྱེར་འོངས་པ་ལ། ཨེ་ལི་ཤཱས་མི་དེ་རྣམས་ལ་སྤྲད་ནས་ཟ་རུ་ཆུག་ཅེས་གསུངས་ཤིང་།
2KI 4:43 ཁོང་གི་ཞབས་ཕྱི་ཡིས། ངས་ཁ་ཟས་འདི་ཙམ་མི་བརྒྱའི་མདུན་དུ་ཅི་ལྟར་འཇོག་གམ་ཞུས་པའི་ལན་དུ་དཀོན་མཆོག་གི་སྐྱེས་བུ་ཡིས། མི་རྣམས་ལ་ཟ་རུ་ཆུག རྒྱུ་མཚན་ནི་དཀོན་མཆོག་ཡ་ཝཱེས་འདི་སྐད་དུ། དེ་དག་གིས་ཟོས་ནས་ལྷག་མ་ཡང་ཡོད་པར་འགྱུར་གསུངས་སོ་ཞེས་སྨྲས་པ་ལ།
2KI 4:44 ཞབས་ཕྱིས་མི་རྣམས་ཀྱི་མདུན་དུ་བཞག་པ་དང་དེ་རྣམས་ཀྱིས་ཟོས་པས་དཀོན་མཆོག་ཡ་ཝཱེའི་བཀའ་བཞིན་དུ་ལྷག་མ་ཡང་ཡོད་པར་གྱུར་ཏོ། །
2KI 5:1 དེ་ཡང་ཨ་རམ་རྒྱལ་པོའི་དམག་དཔོན་ནཱ་ཨ་མན་ནི། དཀོན་མཆོག་ཡ་ཝཱེས་ཁོ་བརྒྱུད་ནས་ཨ་རམ་ལ་རྒྱལ་ཁ་གནང་བས། རང་གི་བདག་པོའི་མདུན་དུ་མི་རླབས་ཆེན་ཞིག་ཡིན་ལ་རྩིས་མཐོང་ཆེན་པོ་ཐོབ་བོ། །མི་དེ་དཔའ་བོ་སྟོབས་ཆེན་ཞིག་ཡིན་ཡང་ཁོ་ལ་མཛེ་ནད་བྱུང་ཡོད།
2KI 5:2 དེ་སྔར་ཨ་རམ་པ་རྣམས་སོང་ནས་དཔུང་འཇུག་འཕྲོག་བཅོམ་བྱས་ཏེ། ཡེས་ར་ཨེལ་གྱི་ཡུལ་ནས་བུ་མོ་ཆུང་ཆུང་ཞིག་བཟུང་འོངས་པ་དང་། ཁོ་མོས་ནཱ་ཨ་མན་གྱི་ཆུང་མར་ཞབས་ཕྱི་བསྒྲུབས་པ་རེད།
2KI 5:3 ཁོ་མོས་རང་གི་བདག་མོ་ལ། ང་ཡི་བདག་པོ་འདི་སཱ་མར་ཡ་རུ་བཞུགས་པའི་ལུང་སྟོན་པ་དེའི་དྲུང་དུ་ཕེབས་ན། ཁོང་གིས་ཁོའི་མཛེ་ནད་གསོ་ངེས་ཡིན་ཞེས་སྨྲས།
2KI 5:4 དེ་ནས་ནཱ་ཨ་མན་སོང་ནས་རང་གི་བདག་པོ་ལ། ཡེས་ར་ཨེལ་གྱི་བུ་མོ་དེས་འདི་འདྲ་འདི་འདྲ་ཟེར་གྱི་འདུག་ཅེས་ཞུས་པ་དང་།
2KI 5:5 ཨ་རམ་གྱི་རྒྱལ་པོས་དེ་ལ། ཁྱོད་རང་སོང་ཞིག ངས་ཡེས་ར་ཨེལ་གྱི་རྒྱལ་པོ་ལ་འཕྲིན་ཡིག་ཅིག་སྤྲིང་བར་བྱ་ཞེས་སྨྲས་ཤིང་། ཁོས་དངུལ་རྡོ་ཚད་བཅུ་དང་། གསེར་སྲང་སྟོང་དྲུག་དང་གོས་ཁ་ཚང་བཅུ་བཅས་ལག་ཏུ་ཁྱེར་ནས་ཆས་སོ། །
2KI 5:6 ཁོས་འཕྲིན་ཡིག་དེ་ཡེས་ར་ཨེལ་གྱི་རྒྱལ་པོའི་དྲུང་དུ་བསྐྱལ་བ་དང་། དེའི་ནང་དུ། ད་ལྟ་འཕྲིན་ཡིག་འདི་ཁྱེད་ལ་འཕྲོད་པའི་ཚེ། གཟིགས་དང་། ངའི་ཞབས་ཕྱི་ནཱ་ཨ་མན་གྱི་མཛེ་ནད་གསོ་བའི་ཕྱིར་ཁྱེད་ཀྱི་དྲུང་དུ་མངགས་པ་ཡིན་ཞེས་བྲིས་ཡོད་དོ། །
2KI 5:7 ཡེས་ར་ཨེལ་གྱི་རྒྱལ་པོས་འཕྲིན་ཡིག་དེ་བཀླགས་རྗེས། རང་གི་གོས་གཤགས་ཏེ་འདི་ལྟར། མི་འདིས་མི་ཞིག་གི་མཛེ་ནད་གསོ་བའི་ཕྱིར་ངའི་གམ་དུ་མངགས་པས། ང་ནི་སྲོག་ལེན་པ་དང་སྲོག་སྦྱིན་པའི་དཀོན་མཆོག་ཡིན་ནམ། ཁྱོད་ཚོས་བསམ་བློ་ཐོངས་དང་། ཁོས་ང་ལ་རྒོལ་བའི་གླགས་འཚོལ་བ་ཡིན་ཞེས་སྨྲས་སོ། །
2KI 5:8 དེ་ནས་དཀོན་མཆོག་གི་སྐྱེས་བུ་ཨེ་ལི་ཤཱས་ཡེས་ར་ཨེལ་གྱི་རྒྱལ་པོས་རང་གི་གོས་གཤགས་པ་ཐོས་ནས་མི་མངགས་ཏེ་རྒྱལ་པོ་ལ། ཁྱེད་ཀྱིས་ཉིད་ཀྱི་ན་བཟའ་གཤགས་པ་ཅི་ཡིན། མི་དེ་ངའི་རྩར་འོང་དུ་ཆུག་དང་། དེ་ནས་ཡེས་ར་ཨེལ་གྱི་ཁྲོད་དུ་ལུང་སྟོན་པ་ཞིག་ཡོད་པ་ཁོས་རྟོགས་པར་འགྱུར་ཞེས་འཕྲིན་བསྐུར་བ་དང་།
2KI 5:9 ནཱ་ཨ་མན་ཁོའི་རྟ་རྣམས་དང་། ཁོའི་ཤིང་རྟ་རྣམས་བཅས་འོངས་ནས་ཨེ་ལི་ཤཱའི་ཁང་པའི་སྒོ་ཁར་བསྡད་ཅིང་།
2KI 5:10 ཨེ་ལི་ཤཱས་བང་ཆེན་མངགས་ནས་ཁོ་ལ། ཁྱོད་རང་སོང་ནས་ཡོར་དན་གཙང་པོའི་ནང་དུ་ཐེངས་བདུན་ལ་ཁྲུས་ཤིག དེ་ནས་ཁྱོད་ཀྱི་ལུས་སྔར་མུས་ལྟར་འགྱུར་ཞིང་གཙང་མར་འགྱུར་ངེས་ཞེས་གསུངས་ནའང་།
2KI 5:11 ནཱ་ཨ་མན་ཁྲོས་ནས་སོང་སྟེ། ལྟོས་དང་། བདག་གིས་ཁོང་ཕྱི་རུ་ཐོན་ནས་ལངས་བསྡད་དེ་ཁོང་གི་དཀོན་མཆོག་ཡ་ཝཱེའི་མཚན་ལ་ཞུས་ཏེ། རྨ་ནད་ཡོད་སར་ཕྱག་གཡུག་ནས་མཛེ་ནད་གསོ་བར་བསམ་པ་ཡིན།
2KI 5:12 ཡེས་ར་ཨེལ་གྱི་ཆུ་ཐམས་ཅད་ལས་ཀྱང་དཱ་མེ་སེག་གི་ཨི་ཨ་བ་ནཱ་དང་ཕར་ཕར་གཙང་པོ་གཉིས་ནི་ལྷག་ཏུ་མི་ལེགས་སམ། ང་རང་དེ་དག་གི་ནང་དུ་བཀྲུས་ན་གཙང་མར་མི་འགྱུར་རམ་ཞེས་སྨྲས་ནས། ཕྱིར་འཁོར་ནས་ཁོང་ཁྲོ་དང་བཅས་ཆས་སོ། །
2KI 5:13 འོན་ཀྱང་ཁོའི་ཞབས་ཕྱི་རྣམས་འོངས་ནས་ཁོ་ལ། ཀྱེ་ངའི་ཡབ་ཆེན་ལགས། ཅི་སྟེ་ལུང་སྟོན་པས་ཁྱེད་ལ་དོན་ཆེན་ཞིག་བྱེད་པར་བསྒོས་ན་དེ་བཞིན་དུ་མི་མཛད་དམ། ད་ནི་ཁོང་གིས་ཁྱེད་ལ་ཁྲུས་བྱོས་དང་གཙང་མར་འགྱུར་ངེས་གསུངས་ན་ལྟ་ཅི་སྨོས་ཞེས་ཞུས་པ་དང་།
2KI 5:14 ཁོ་མར་སོང་ནས་དཀོན་མཆོག་གི་སྐྱེས་བུ་ཡིས་བསྒོས་པ་བཞིན། ཡོར་དན་གཙང་པོའི་ནང་དུ་ལན་བདུན་སྦངས་པས། ཁོའི་ལུས་ནི་བྱིས་པའི་ལུས་ལྟར་གཙང་མར་གྱུར་ཏོ། །
2KI 5:15 དེ་ནས་ཁོ་དང་ཞབས་ཕྱི་འཁོར་དང་བཅས་པ་དཀོན་མཆོག་གི་སྐྱེས་བུའི་མདུན་དུ་ཕྱིར་ལོག་ཅིང་ཁོང་གི་དྲུང་དུ་ལངས་བསྡད་དེ། གཟིགས་དང་། ས་གཞི་ཐམས་ཅད་དུ་ཡེས་ར་ཨེལ་གྱི་དཀོན་མཆོག་མ་གཏོགས་མི་བཞུགས་པ་དེ་ནི་ད་ལྟ་ངས་ཤེས་བྱུང་བས། ད་ལྟ་ཁྱེད་ཀྱིས་ཞབས་ཕྱི་བདག་གི་ཕྱག་རྟེན་འདི་བཞེས་སུ་གསོལ་ཞེས་ཞུས་ཀྱང་།
2KI 5:16 ཨེ་ལི་ཤཱས་ལན་དུ། བདག་གིས་རང་གིས་ཞབས་ཕྱི་སྒྲུབ་བཞིན་པ་དང་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་སྐྱེལ་ཏེ། ངས་ཕྱག་རྟེན་ཅི་ཡང་ལེན་པར་མི་བྱ་གསུངས་པ་དང་། ནཱ་ཨ་མན་གྱིས་ལེན་དགོས་པར་ནན་གྱིས་ཞུས་ཀྱང་ཁོང་གིས་མ་བླངས་སོ། །
2KI 5:17 དེ་ནས་ནཱ་ཨ་མན་གྱིས། ཁྱེད་ཀྱིས་ཞབས་ཕྱི་བདག་ལ་དྲེལ་གཉིས་ཀྱིས་ཐེག་པའི་ས་རྡུལ་གནང་བར་མཛོད། ཁྱེད་ཀྱི་ཞབས་ཕྱི་བདག་གིས་ད་ཕྱིན་ཆད་དཀོན་མཆོག་ཡ་ཝཱེ་འབའ་ཞིག་མ་གཏོགས་ལྷ་གཞན་ལ་སྦྱིན་སྲེག་དང་མཆོད་པ་འབུལ་བར་མི་བྱ།
2KI 5:18 འོན་ཀྱང་། དོན་འདི་ལ་ཁྱེད་ཀྱི་ཞབས་ཕྱིར་དཀོན་མཆོག་ཡ་ཝཱེས་དགོངས་དག་གནང་བར་མཛོད། ངའི་བདག་པོ་ནི་རིམ་མཱོན་ལྷ་ཁང་དུ་སོང་སྟེ་ཕྱག་འཚལ་བའི་ཕྱིར། ངའི་ལག་པས་བསྐྱོར་ནས་ཁོས་ཕྱག་འཚལ་བ་ཡིན་པས། བདག་གིས་ཀྱང་རིམ་མཱོན་གྱི་ལྷ་ཁང་དུ་ཕྱག་འཚལ་བ་ཡིན། སྐབས་དེ་ལ་དཀོན་མཆོག་ཡ་ཝཱེས་ཁྱེད་ཀྱི་ཞབས་ཕྱིའི་དོན་འདིར་དགོངས་དག་གནང་བར་མཛོད་ཅེས་ཞུས་པས།
2KI 5:19 ཨེ་ལི་ཤཱས་དེ་ལ། ཞི་བདེའི་ངང་སོང་ཞིག་ཅེས་སྨྲས་པ་ན། ནཱ་ཨ་མན་ཁོང་དང་བྲལ་ཏེ་ལམ་ཐག་ཅུང་ཙམ་ཏུ་ཕྱིན་ཏོ། །
2KI 5:20 དེའི་ཚེ་དཀོན་མཆོག་གི་སྐྱེས་བུ་ཨེ་ལི་ཤཱའི་ཞབས་ཕྱི་གེ་ཧ་ཟིས། ཀྱེ་ཧོ། ཨ་རམ་པ་ནཱ་ཨ་མན་གྱིས་ཅི་ཞིག་ཁྱེར་འོངས་པ་དེ་ངའི་བདག་པོས་མ་བླངས་ནའང་། བདག་གིས་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་སྐྱེལ་ཏེ། ང་ནི་ཁོའི་རྗེས་སུ་རྒྱུགས་ནས་གང་ཞིག་ལེན་པར་བྱ་དགོས་སམ་ཞེས་སྨྲས།
2KI 5:21 དེ་ནས་གེ་ཧ་ཟི་མྱུར་དུ་ནཱ་ཨ་མན་གྱི་རྗེས་སུ་འབྲངས་པ་དང་། ནཱ་ཨ་མན་གྱིས་མི་ཞིག་རྒྱབ་ཕྱོགས་ནས་རྒྱུགས་འོང་བ་མཐོང་སྟེ། དེ་བསུ་བའི་ཕྱིར་ཤིང་རྟ་ལས་བབས་ཤིང་ཐམས་ཅད་བདེའམ་ཞེས་དྲིས་པ་ལ།
2KI 5:22 ཁོས་ལན་དུ། བདེའོ། །ངའི་བདག་པོས་ང་རང་བརྫངས་ཏེ་ཁྱེད་ལ། ལྟོས་དང་། ད་ལྟ་ལུང་སྟོན་པའི་སློབ་བུ་རྣམས་ལས་གཞོན་ནུ་གཉིས་ཨེ་ཕཱར་ཡིམ་གྱི་རི་ནས་ངའི་རྩར་སླེབས་པས། དེ་དག་གི་ཕྱིར་དངུལ་རྡོ་ཚད་གཅིག་དང་གོས་ཁ་ཚང་གཉིས་སྦྱིན་པར་མཛོད་ཅིག་ཅེས་གསུངས་སོ་ཞུས་པས།
2KI 5:23 ནཱ་ཨ་མན་གྱིས། རྡོ་ཚད་གཉིས་ཁྱེར་ཞིག་ཅེས་ཁོ་ལ་ནན་བསྐུལ་བྱས་པ་དང་། དངུལ་རྡོ་ཚད་གཉིས་ཁུག་མ་གཉིས་ཀྱི་ནང་དུ་བཅུག་ཅིང་། གོས་ཁ་ཚང་གཉིས་ཀྱང་ཞབས་ཕྱི་གཉིས་ཀྱི་ལག་ཏུ་སྤྲད་པ་དང་། དེ་དག་གིས་ཁྱེར་ནས་གེ་ཧ་ཟིའི་མདུན་དུ་སོང་།
2KI 5:24 རི་ཁར་སླེབས་པའི་ཚེ། ཁོས་དེ་དག་གི་ལག་ནས་དངོས་པོ་བླངས་ཏེ་ཁྱིམ་ནང་དུ་བཞག་རྗེས། དེ་གཉིས་འགྲོ་རུ་བཅུག་པས་ཕྱིན་ཏོ། །
2KI 5:25 དེ་ནས་ཁོ་སོང་སྟེ་རང་གི་བདག་པོའི་དྲུང་དུ་ལངས་བསྡད་པ་ལ། ཨེ་ལི་ཤཱས་ཁོ་ལ། གེ་ཧ་ཟི། ཁྱོད་རང་གང་ནས་ཡོང་ངམ་ཞེས་དྲིས་པའི་ལན་དུ། ཁོས་ཁྱེད་ཀྱི་ཞབས་ཕྱི་ནི་གང་དུའང་མ་སོང་ཞུས་པས།
2KI 5:26 ཨེ་ལི་ཤཱས་དེ་ལ། མི་དེ་རང་གི་ཤིང་རྟ་ལས་བབས་ཏེ་ཚུར་འཁོར་ནས་ཁྱོད་རང་བསུ་བའི་དུས་སུ། ངའི་སེམས་ཉིད་ནི་ཁྱོད་དང་མཉམ་དུ་མ་སོང་ངམ། ད་ལྟའི་དུས་འདི་ནི་དངུལ་དང་གོས། སྐྱུ་རུ་རའི་ཚལ་དང་རྒུན་ཚལ། ལུག་དང་གླང་། ཞབས་ཕྱི་དང་ཞལ་ཏ་མ་རྣམས་ལེན་པའི་དུས་ཤིག་ཡིན་ནམ།
2KI 5:27 དེའི་ཕྱིར། ནཱ་ཨ་མན་གྱི་མཛེ་ནད་དེ་ཁྱོད་དང་ཁྱོད་ཀྱི་བུ་རྒྱུད་རྣམས་ལ་འབྱར་ནས་ཇི་སྲིད་བར་དུ་ལུས་པར་འགྱུར་རོ་ཞེས་གསུངས་པས། གེ་ཧ་ཟི་ཁོ་རང་ཨེ་ལི་ཤཱ་དང་བྲལ་ནས་འགྲོ་བའི་དུས་སུ་མཛེ་ནད་བྱུང་ཞིང་ཁ་བ་ལྟར་དཀར་པོར་གྱུར་ཏོ། །
2KI 6:1 དེ་ཡང་ལུང་སྟོན་པ་རྣམས་ཀྱི་སློབ་བུ་དག་གིས་ཨེ་ལི་ཤཱ་ལ། གཟིགས་དང་། ཁྱེད་དང་བཅས་པའི་འོ་སྐོལ་གྱི་གཞིས་ཀ་དེ་རང་ཅག་ལ་མཚོན་ན་ཁོད་ཆུང་བས།
2KI 6:2 ཡོར་དན་གཙང་པོར་སོང་སྟེ། མི་རེ་རེས་གདུང་མ་རེ་ཕབ་ནས་གནས་དེར་གཞིས་ཀ་བྱེད་པའི་དགོངས་པ་གནང་རོགས་ཞེས་ཞུས་པ་ན། ཨེ་ལི་ཤཱས་ཁོ་ཚོར་སོང་ཞེས་ལན་བཏབ་བོ། །
2KI 6:3 དེ་ནས་སློབ་བུ་ཞིག་ན་རེ། ཁྱེད་ཀྱང་ཞབས་ཕྱི་རྣམས་དང་ལྷན་དུ་ཕེབས་པར་མཛོད་ཅེས་ཞུས་པར། ཨེ་ལི་ཤཱས་ང་འགྲོ་བར་བྱ་ཞེས་སྨྲས་པ་དང་།
2KI 6:4 ཁོང་དེ་དག་དང་ལྷན་དུ་ཕྱིན་ཏེ་ཡོར་དན་གཙང་པོར་སླེབས་ནས་སྡོང་པོ་བཅད།
2KI 6:5 སློབ་བུ་ཞིག་གིས་གདུང་མ་གཅོད་སྐབས་སྟ་རེའི་མགོ་ཆུའི་ནང་དུ་ལྷུང་ཞིང་། དེས་སྐད་ཆེན་པོས་ཀྱེ་ཧུད་ང་ཡི་བདག་པོ། སྟ་རེ་དེ་ནི་གཡར་མ་ཡིན་ཞེས་འུར་བརྒྱབ་པས།
2KI 6:6 དཀོན་མཆོག་གི་སྐྱེས་བུ་ཡིས་གང་དུ་ལྷུང་ངམ་ཞེས་དྲིས་པ་ན། སློབ་བུ་དེས་སྟ་རེའི་མགོ་ལྷུང་སའི་གནས་དེ་བསྟན་ཅིང་། ཨེ་ལི་ཤཱས་ཤིང་ཕྲན་ཞིག་བཅད་ནས་དེའི་ནང་དུ་བསྐྱུར་མ་ཐག་སྟ་རེའི་མགོ་ཆུ་ཁར་གཡེང་པ་རེད།
2KI 6:7 ཨེ་ལི་ཤཱས་ཁྱོད་རང་གིས་ཡར་ལོངས་ཤིག་ཅེས་གསུངས་པས། མི་དེས་ལག་པ་བརྐྱངས་ནས་སྟ་རེའི་མགོ་ཡར་བླངས་སོ། །
2KI 6:8 ཡང་ཨ་རམ་གྱི་རྒྱལ་པོས་ཡེས་ར་ཨེལ་ལ་དམག་དྲངས་ཤིང་། རང་གི་འཁོར་གཡོག་རྣམས་དང་གྲོས་བཏབ་སྟེ་ན་རེ། ངས་གནས་ཆེ་གེ་མོར་དམག་སྒར་རྒྱག་པར་བྱ་ཞེས་སྨྲས་སོ། །
2KI 6:9 དེའི་ཕྱིར་དཀོན་མཆོག་གི་སྐྱེས་བུ་ཡིས་མི་མངགས་ནས་ཡེས་ར་ཨེལ་གྱི་རྒྱལ་པོ་ལ། དོགས་ཟོན་གྱིས་ཤིག ཨ་རམ་པའི་དམག་ཡུལ་དེ་རུ་མར་འབབ་བཞིན་ཡོད་པས། དེ་བརྒྱུད་ནས་མ་འགྲོ་ཞེས་ངག་འཕྲིན་བསྐུར་ཏོ། །
2KI 6:10 ཡང་ཡེས་ར་ཨེལ་གྱི་རྒྱལ་པོས་དཀོན་མཆོག་གི་སྐྱེས་བུས་ཁོང་ལ་ཉེན་བརྡ་བཏང་ནས་སྨྲས་པའི་གནས་དེར་མི་མངགས་པ་དང་། ཐེངས་གཅིག་གཉིས་ཙམ་མིན་པར་གནས་དེ་ཉེན་སྲུང་བརྒྱབ་བོ། །
2KI 6:11 དོན་དེའི་དབང་གིས། ཨ་རམ་གྱི་རྒྱལ་པོའི་སེམས་ཤིན་ཏུ་འཁྲུགས་ནས་རང་གི་འཁོར་གཡོག་རྣམས་བོས་ཤིང་དེ་དག་ལ་འདི་ལྟར། ངེད་ཅག་གི་ཁྲོད་ནས་ཡེས་ར་ཨེལ་གྱི་རྒྱལ་པོའི་ཕྱོགས་ཡ་དེ་སུ་ཡིན་པ་ང་ལ་མི་སྨྲའམ་ཞེས་སྨྲས་པའི་ལན་དུ།
2KI 6:12 ཁོའི་འཁོར་གཡོག་ཅིག་གིས། ཀྱེ་ངའི་ཇོ་བོ་ངའི་རྒྱལ་པོ་ལགས། དེ་བཞིན་མ་ཡིན། ཁྱེད་ཀྱིས་ཉིད་ཀྱི་གཟིམ་ཁང་ནང་དུ་གླེང་བ་དེ། ཡེས་ར་ཨེལ་དུ་ཡོད་པའི་ལུང་སྟོན་པ་ཨེ་ལི་ཤཱས་ཡེས་ར་ཨེལ་གྱི་རྒྱལ་པོ་ལ་འཆད་དོ་ཞུས་པས།
2KI 6:13 ཁོ་ན་རེ། ཁྱོད་ཅག་སོང་ལ་ཁོ་གང་དུ་འདུག་པར་ལྟོས་དང་། ངས་མི་མངགས་ནས་ཁོ་འཛིན་པར་བྱ་ཞེས་བསྒོས་པ་ན། དེ་དག་གིས། ཀྱེ། ཁོ་ནི་དོའུ་ཐཱན་དུ་འདུག་ཅེས་ཞུས་པ་དང་།
2KI 6:14 ཁོས་རྟ་དང་ཤིང་རྟ་དང་། དམག་འབོར་ཆེན་ཞིག་དང་བཅས་བརྫངས་པ་དང་། དེ་ཚོ་མཚན་མོར་སླེབས་ནས་གྲོང་ཁྱེར་གྱི་མཐའ་བསྐོར་ཏོ། །
2KI 6:15 དེ་ནས་དཀོན་མཆོག་གི་སྐྱེས་བུའི་ཞབས་ཕྱི་དེ་སྔ་མོ་ལངས་ནས་ཕྱི་རོལ་ཏུ་ཐོན་པ་ན། ལྟོས་དང་། དམག་དཔུང་དང་རྟ། ཤིང་རྟ་རྣམས་ཀྱིས་གྲོང་ཁྱེར་བསྐོར་ཡོད་པ་མཐོང་བས། ཁོང་གི་ཞབས་ཕྱིས་ཁོང་ལ། ཀྱེ་ཧུད་ང་ཡི་བདག་པོ་ལགས། ངེད་ཅག་གིས་ཅི་བྱས་ན་ལེགས་སམ་ཞུས་པའི་ལན་དུ།
2KI 6:16 དཀོན་མཆོག་གི་སྐྱེས་བུ་ཡིས། མ་འཇིགས་ཤིག དེ་དག་དང་མཉམ་དུ་ཡོད་པ་རྣམས་ལས་ངེད་ཅག་དང་མཉམ་དུ་ཡོད་པ་མང་ངོ་ཞེས་གསུངས།
2KI 6:17 དེ་ནས་ཨེ་ལི་ཤཱས་སྨོན་ལམ་བཏབ་སྟེ། ཀྱེ་དཀོན་མཆོག་ཡ་ཝཱེ་ལགས། ཁོའི་མིག་གིས་མཐོང་ཐུབ་པའི་ཕྱིར་དུ་མིག་འབྱེད་པར་མཛོད་ཅིག་ཅེས་ཞུས་པས། དཀོན་མཆོག་ཡ་ཝཱེས་ཞབས་ཕྱི་དེའི་མིག་ཕྱེས་པ་དང་ཁོས་བལྟས་པའི་ཚེ། ཀྱེ། ཨེ་ལི་ཤཱའི་མཐའ་འཁོར་གྱི་རི་བོ་དེ་ནི་མེ་རྟ་དང་ཤིང་རྟས་བཀང་ཡོད་པ་མཐོང་ངོ་། །
2KI 6:18 ཡང་ཨ་རམ་པ་རྣམས་ཨེ་ལི་ཤཱའི་ཕྱོགས་སུ་མར་འབབ་པའི་ཚེ་ན། ཨེ་ལི་ཤཱས་དཀོན་མཆོག་ཡ་ཝཱེ་ལ་སྨོན་ལམ་བཏབ་སྟེ། མི་འདི་རྣམས་ཀྱི་མིག་ལ་བསྣུན་ཏེ་ལོང་བར་མཛོད་ཅིག་ཅེས་ཞུས་པས། ཨེ་ལི་ཤཱས་ཞུས་པ་བཞིན་དུ་དཀོན་མཆོག་ཡ་ཝཱེས་དེ་རྣམས་ལོང་བར་མཛད།
2KI 6:19 དེར་ཨེ་ལི་ཤཱས་ཁོ་ཚོ་ལ། འདི་ནི་ལམ་དེ་མིན། གྲོང་ཁྱེར་དེ་ཡང་མིན་པས་ངའི་རྗེས་སུ་ཤོག་དང་། ཁྱོད་ཚོས་འཚོལ་བའི་མི་དེའི་མདུན་དུ་ངས་ཁྱོད་རྣམས་འཁྲིད་པར་བྱའོ་གསུངས་ཏེ་ཁོ་རྣམས་སཱ་མར་ཡ་ རུ་ཁྲིད་དོ། །
2KI 6:20 དེ་ཡང་ཁོ་ཚོ་སཱ་མར་ཡ་རུ་སླེབས་པའི་ཚེ། ཨེ་ལི་ཤཱ་ཡིས། ཀྱེ་དཀོན་མཆོག་ཡ་ཝཱེ་ལགས། འདི་དག་གིས་མཐོང་ཐུབ་པའི་ཕྱིར་མིག་འབྱེད་པར་མཛོད་ཅིག་ཅེས་ཞུས་པ་དང་། དཀོན་མཆོག་ཡ་ཝཱེས་དེ་རྣམས་ཀྱི་མིག་ཕྱེས་པ་ན་དེ་དག་གིས་མཐོང་བར་གྱུར་ཅིང་། ལྟོས་དང་། དེ་རྣམས་སཱ་མར་ཡ་གྲོང་ཁྱེར་དུ་སླེབས་ཡོད་པ་མཐོང་ངོ་། །
2KI 6:21 ཡང་ཡེས་ར་ཨེལ་གྱི་རྒྱལ་པོས་དེ་རྣམས་མཐོང་བ་དང་ཨེ་ལི་ཤཱ་ལ། ཀྱེ་ངའི་ཡབ་ལགས། ངས་འདི་རྣམས་གསོད་ཆོག་གམ་ཞེས་དྲིས་པར།
2KI 6:22 ཨེ་ལི་ཤཱས་ལན་དུ། ཁྱོད་ཀྱིས་འདི་དག་གསོད་མི་རུང་། ཁྱོད་ཀྱིས་རང་གི་རལ་གྲི་དང་མདའ་གཞུ་ལ་བརྟེན་ནས་བཟུང་པ་རྣམས་གསོད་རུང་ངམ། འདི་རྣམས་ཀྱིས་བཟའ་བཏུང་སྤྱོད་པའི་ཕྱིར་ཁོ་ཚོའི་མདུན་དུ་བག་ལེབ་དང་ཆུ་ཞོག་དང་། དེ་ནས་ཁོ་རྣམས་རང་གི་བདག་པོའི་དྲུང་དུ་འགྲོ་རུ་ཆུག་ཅེས་བསྐུལ་བས།
2KI 6:23 རྒྱལ་པོས་དེ་དག་གི་ཕྱིར་གསོལ་སྟོན་ཆེན་པོ་ཞིག་གཡོས་པ་དང་དེ་ཚོས་བཟའ་བཏུང་སྤྱད་པ་ན། ཁོ་ཚོ་འགྲོ་རུ་བཅུག་པ་དང་དེ་རྣམས་རང་གི་བདག་པོའི་དྲུང་དུ་སོང་ཞིང་། དེ་ནས་བཟུང་ཨ་རམ་པ་རྣམས་ཀྱིས་ཡེས་ར་ཨེལ་གྱི་ཡུལ་ཁམས་སུ་དཔུང་འཇུག་ཀྱང་མ་བྱས་སོ། །
2KI 6:24 དེའི་རྗེས་སུ་ཨ་རམ་གྱི་རྒྱལ་པོ་པེན་ཧ་དཱད་ཀྱིས་རང་གི་དམག་མི་མཐའ་དག་བསྡུས་ཤིང་ཡར་སྐྱོད་པ་དང་སཱ་མར་ཡ་དམག་གིས་བསྐོར།
2KI 6:25 དེ་ནས་སཱ་མར་ཡ་རུ་མུ་གེ་ཆེན་པོ་ཞིག་བྱུང་བ་དང་། དགྲའི་དམག་གིས་མུ་མཐུད་དུ་དེ་མཐའ་ནས་བསྐོར་བའི་རྐྱེན་གྱིས་བོང་བུའི་མགོ་ཞིག་དངུལ་སྲང་བརྒྱད་ཅུ་དང་། ཕུག་རོན་གྱི་སྟུག་པ་བྲེ་ བཞི་ཆ་གཅིག་ནི་དངུལ་སྲང་ལྔའི་རིན་ལ་སླེབས་པ་རེད།
2KI 6:26 ཡང་ཡེས་ར་ཨེལ་གྱི་རྒྱལ་པོ་ལྕགས་རིའི་སྟེང་ནས་བརྒལ་བཞིན་པའི་ཚེ་ན། བུད་མེད་ཅིག་གིས་ཁོང་ལ། ཀྱེ་ངའི་བདག་པོ་ངའི་རྒྱལ་པོ་ལགས། ང་རང་སྐྱོབ་པར་མཛོད་ཅེས་ཞུས་པ་ལ།
2KI 6:27 རྒྱལ་པོས་ཁོ་མོ་ལ། གལ་ཏེ་དཀོན་མཆོག་ཡ་ཝཱེས་ཁྱོད་རང་སྐྱོབ་པར་མི་མཛད་ན། ངས་ཁྱོད་རང་གང་ནས་སྐྱོབ་པར་བྱའམ། གཡུལ་ཁའམ་ཡང་ན་རྒུན་འབྲུམ་འཚིར་གཞོང་གང་ནས་སྐྱོབ་པར་བྱའམ་ཞེས་གསུངས།
2KI 6:28 ཡང་རྒྱལ་པོས་ཁོ་མོར་དོན་དམ་དུ་ཁྱོད་ལ་ཅི་བྱུང་ཞེས་དྲིས་པར། ཁོ་མོ་ན་རེ། བུད་མེད་འདིས་ང་ལ། ཁྱོད་ཀྱི་བུ་ཁྲིད་ཤོག་དང་དེ་རིང་རང་ཅག་གིས་ཁོ་ཟ་བར་བྱའོ། །སང་ཉིན་རང་ཅག་གིས་ངའི་བུ་ཟོས་ཆོག་ཟེར་བས།
2KI 6:29 ངེད་ཅག་གིས་ངའི་བུ་དེ་བཙོས་ནས་ཟོས་པ་ཡིན། དེའི་ཕྱི་ཉིན་ངས་ཁོ་མོར། ད་ཁྱོད་ཀྱི་བུ་ཁྲིད་ཤོག་དང་རང་ཅག་གིས་ཁོ་ཟ་བར་བྱའོ་ཞེས་སྨྲས་ནའང་། ཁོ་མོས་རང་གི་བུ་སྦས་ནས་བཞག་ཅེས་ཞུས་སོ། །
2KI 6:30 རྒྱལ་པོས་བུད་མེད་ཀྱི་གཏམ་དེ་ཐོས་པ་དང་། རང་གི་གོས་གཤགས་ཤིང་། སྐབས་དེར་ཁོ་རང་ལྕགས་རིའི་སྟེང་དུ་ཡོད་ཅིང་མི་རྣམས་ཀྱིས་ཁོ་རང་མཐོང་སྟེ། ཀྱེ་ཧོ། ཁོས་གྱོན་པའི་ནང་གོས་ནི་རྩིད་རས་ཡིན་པ་མཐོང་ངོ་། །
2KI 6:31 རྒྱལ་པོ་ན་རེ། གལ་སྲིད་དེ་རིང་ཤ་ཕད་ཀྱི་བུ་ཨེ་ལི་ཤཱའི་མགོ་ནི་ཁོའི་ཕྲག་གོང་ཁར་ལུས་པ་ཡིན་ན། དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲས་སོ། །
2KI 6:32 དེ་ཡང་ཨེ་ལི་ཤཱ་རང་གི་ཁྱིམ་དུ་བཞུགས་ཏེ། རྒན་པོ་རྣམས་ཀྱང་ཁོང་དང་མཉམ་དུ་བསྡད་ཡོད་པ་དང་། རྒྱལ་པོས་རང་གི་འཁོར་མི་ཞིག་མངགས་ཀྱང་། བང་ཆེན་དེ་ཨེ་ལི་ཤཱའི་དྲུང་དུ་མ་སླེབས་གོང་དུ། ཁོང་གིས་རྒན་པོ་རྣམས་ལ། མི་གསོད་མཁན་གྱིས་ངའི་མགོ་གཅོད་པར་མི་ཞིག་མངགས་པ་ཁྱོད་ཚོས་མཐོང་ངམ། ད་ལྟོས་དང་། བང་ཆེན་དེ་སླེབས་མ་ཐག་ཏུ་སྒོ་གཏན་པར་གྱིས། ཁོ་སྒོའི་ཕྱི་རོལ་ཏུ་ཁོགས་ཤིག དེའི་རྒྱབ་ཏུ་ཁོའི་བདག་པོའི་གོམ་སྒྲ་ཡོད་པ་མིན་ནམ་ཞེས་གསུངས་པ་དང་།
2KI 6:33 ཁོང་གིས་རྒན་པོ་རྣམས་ལ་གཏམ་གླེང་སྐབས། ཀྱེ་མ། བང་ཆེན་ཁོང་གི་གམ་དུ་སླེབས་ཤིང་། ལྟོས་དང་། ཆག་སྒོ་འདི་དཀོན་མཆོག་ཡ་ཝཱེ་ནས་བྱུང་། ངས་ཅིའི་ཕྱིར་ད་དུང་དཀོན་མཆོག་ཡ་ཝཱེ་ལ་སྒུག་གམ་ཞེས་སྨྲས་སོ། །
2KI 7:1 དེ་ནས་ཨེ་ལི་ཤཱས། ཁྱོད་ཅག་གིས་དཀོན་མཆོག་ཡ་ཝཱེའི་གསུང་ལ་ཉོན་ཅིག དཀོན་མཆོག་ཡ་ཝཱེས་འདི་སྐད་དུ། སང་ཉིན་དུས་ཚོད་འདི་ཙམ་དུ་སཱ་མར་ཡའི་མཁར་སྒོར་དངུལ་སྲང་གཅིག་ལ་གྲོ་ཞིབ་བྲེ་ གཅིག་དང་། དངུལ་སྲང་གཅིག་ལ་ནས་བྲེ་གཉིས་རེ་བཙོང་བར་འགྱུར་གསུངས་སོ་ཞེས་གསུངས་པ་དང་།
2KI 7:2 རྒྱལ་པོ་བསྐྱོར་བའི་དམག་དཔོན་གྱིས་དཀོན་མཆོག་གི་སྐྱེས་བུ་ལ། ལྟོས་དང་། དཀོན་མཆོག་ཡ་ཝཱེས་ནམ་མཁའི་དཀར་ཁུང་ཕྱེས་པར་མཛད་ཀྱང་དེ་འདྲ་འབྱུང་སྲིད་དམ་ཞེས་སྨྲས་པ་ལ། ཨེ་ལི་ཤཱས། ལྟོས་དང་། ཁྱོད་ཀྱི་མིག་གིས་དེ་མཐོང་ཡང་། དེ་ལས་བཟའ་བར་མི་འགྱུར་ཞེས་གསུངས་སོ། །
2KI 7:3 དེ་ཡང་མཁར་སྒོའི་ཕྱི་རོལ་ཏུ་མཛེ་བོ་བཞི་ཡོད་ཅིང་ཕན་ཚུན་ན་རེ། རང་ཅག་གིས་ཅིའི་ཕྱིར་འདི་རུ་འཆི་བར་སྒུག་སྡོད་པ་ཡིན་ནམ།
2KI 7:4 གལ་ཏེ་རང་ཅག་གྲོང་ཁྱེར་ནང་དུ་འགྲོ་བར་བྱ་ཟེར་ན། གྲོང་ཁྱེར་ནང་དུ་མུ་གེ་བྱུང་ཡོད་པས་རང་ཅག་དེར་འཆི་བར་འགྱུར། གལ་ཏེ་འདིར་བསྡད་ན་ཡང་འཆི་བར་འགྱུར་བས། ད་ནི་རང་ཅག་ཨ་རམ་པའི་དམག་སྒར་དུ་འགྲོ་བར་བྱ། གལ་སྲིད་དེ་དག་གིས་རང་ཅག་སྲོག་ཐར་བཏང་ན་ང་ཚོ་གསོན་པར་འགྱུར། གལ་ཏེ་སྲོག་དང་འཕྲལ་ན་རང་ཅག་འཆི་བར་འགྱུར་ཞེས་སྨྲས་སོ། །
2KI 7:5 ས་སྲོས་ཀྱི་དུས་སུ་ཁོ་ཚོ་ལངས་ནས་ཨ་རམ་པའི་དམག་སྒར་དུ་ཆས་པ་དང་། དེ་དག་ཨ་རམ་པའི་དམག་སྒར་གྱི་མཐའ་མཚམས་སུ་སླེབས་པ་ན། ལྟོས་དང་། དེར་མི་གཅིག་ཀྱང་མི་འདུག
2KI 7:6 ཅི་ལ་ཞེ་ན། གཙོ་བོས་ ཨ་རམ་པ་ལ་ཤིང་རྟའི་སྒྲ་དང་། རྟའི་རྨིག་སྒྲ་དང་། དམག་དཔུང་ཆེན་པོའི་སྒྲ་ཐོས་སུ་བཅུག་པ་ལ། དེ་རྣམས་ཀྱིས་ཕན་ཚུན་ན་རེ། ལྟོས་དང་། ཡེས་ར་ཨེལ་གྱི་རྒྱལ་པོས་ཧེད་པའི་རྒྱལ་པོ་རྣམས་དང་། ཨེ་ཅིབ་ཀྱི་རྒྱལ་པོ་རྣམས་གླས་ནས་རང་ཅག་ལ་རྒོལ་དུ་འོངས་པ་རེད་ཅེས་སྨྲས་ཏེ།
2KI 7:7 མི་དེ་དག་ས་སྲོས་ཀྱི་དུས་སུ་ཡར་ལངས་ནས་བྲོས་ཤིང་། ཁོ་ཚོས་རང་གི་གུར་དང་། རྟ་དང་བོང་བུ་རྣམས་དམག་སྒར་དུ་བཞག་ནས་སྲོག་ཐར་དུ་བྲོས་པ་རེད།
2KI 7:8 དེ་ནས་མཛེ་བོ་དེ་དག་དམག་སྒར་གྱི་མཐའ་མཚམས་སུ་ཕྱིན་པ་དང་། གུར་ཞིག་ཏུ་འཛུལ་ནས་ཟོས་ཤིང་འཐུངས་ཏེ། དེའི་ནང་ནས་གསེར་དངུལ་དང་གོས་སོགས་ཁྱེར་སོང་སྟེ་གཞོགས་ཤིག་ཏུ་སྦས་པ་དང་། ཡང་ཕྱིར་ལོག་ཅིང་གུར་གཞན་ཞིག་ཏུ་འཛུལ་ནས་དངོས་པོ་ཁྱེར་ཏེ་སྦས་སོ། །
2KI 7:9 དེ་ནས་ཁོ་ཚོས་ཕན་ཚུན་ལ། རང་ཅག་གིས་བྱས་པ་འདི་མི་འགྲིག་ལ། དེ་རིང་ནི་འཕྲིན་བཟང་སྒྲོག་པའི་ཉིན་མོ་ཡིན་ནའང་རང་ཅག་གིས་ཅི་ཡང་མ་སྨྲས། ཞོགས་པ་སླེབས་པའི་བར་དུ་སྒུག་བསྡད་ན་རང་ཅག་ལ་ཉེས་ཆད་འཕོག་ངེས་པས། ད་ནི་ཤོག་དང་། རྒྱལ་པོའི་ཕོ་བྲང་དུ་འཕྲིན་བསྐྱལ་བར་བྱ་ཞེས་སྨྲས་ཤིང་།
2KI 7:10 དེ་དག་སོང་ནས་གྲོང་ཁྱེར་གྱི་སྒོ་སྲུང་བོས་ཏེ་ཁོ་རྣམས་ལ། ངེད་ཅག་ཨ་རམ་པའི་དམག་སྒར་དུ་ཕྱིན་པ་ཡིན། ལྟོས་དང་། དེར་མི་ཡང་མི་འདུག་ལ་མི་སྐད་ཀྱང་ཐོས་རྒྱུ་མི་འདུག འོན་ཀྱང་རྟ་དང་བོང་བུ་རྣམས་བཏགས་ནས་འདུག གུར་རྣམས་ཀྱང་རང་གནས་སུ་འདུག་ཅེས་སྨྲས་པ་ན།
2KI 7:11 མཁར་སྒོ་སྲུང་མཁན་རྣམས་ཀྱིས་སྐད་ཅོར་བརྒྱབ་ནས་རྒྱལ་པོའི་ཕོ་བྲང་དུ་འཕྲིན་བསྐྱལ་ཏོ། །
2KI 7:12 དེ་ནས་རྒྱལ་པོ་མཚན་མོར་ཡར་ལངས་ནས་རང་གི་དྲུང་འཁོར་རྣམས་ལ། ཨ་རམ་པས་རང་ཅག་ལ་ཅི་བྱས་པ་དེ་ངས་འཆད་པར་བྱ་སྟེ། རང་ཅག་ལ་མུ་གེ་བྱུང་ཡོད་པ་ཁོ་ཚོར་གསལ་བས། ཁོ་ཚོ་གྲོང་ཁྱེར་ནས་འཐོན་ཚེ། ངེད་ཅག་གིས་དེ་དག་གསོན་པོར་བཟུང་སྟེ་གྲོང་ཁྱེར་ནང་དུ་འགྲོའོ་སྨྲས་ནས། རང་གི་དམག་སྒར་ལས་ཕྱིན་ཏེ་རི་ཐང་དུ་འཇབ་སྒུག་བྱེད་པར་སོང་བ་ཡིན་ཞེས་སྨྲས་པས།
2KI 7:13 ཁོང་གི་དྲུང་འཁོར་རྣམས་ལས་གཅིག་གིས་དེའི་ལན་དུ། གྲོང་ཁྱེར་དུ་ལུས་ཡོད་པའི་རྟ་རྣམས་ལས་རྟ་ལྔ་ཕར་ཐོངས་ཤིག འདི་ལྔ་པོ་ནི་ཤུལ་དུ་ལུས་ནས་འཆི་ལ་ཡོད་པའི་ཡེས་ར་ཨེལ་གྱི་མི་རྣམས་དང་འདྲ་སྟེ། ཐམས་ཅད་ཚེ་ལས་འདས་པའི་ཡེས་ར་ཨེལ་པ་རྣམས་དང་འདྲའོ། །རང་ཅག་གིས་མི་མངགས་ནས་བལྟ་བར་བྱ་ཞེས་ཞུས་པས།
2KI 7:14 དེ་དག་གིས་ཤིང་རྟ་གཉིས་དང་རྟ་བཅས་ཁྲིད་འོངས་ཤིང་། རྒྱལ་པོས་དེ་དག་ཨ་རམ་པའི་དམག་དཔུང་གི་ར་མདར་བཏང་སྟེ། སོང་ལ་ལྟོས་ཤིག་ཅེས་བསྒོས་སོ། །
2KI 7:15 དེ་ནས་ཁོ་ཚོ་དེ་དག་གི་རྗེས་སུ་ཡོར་དན་གཙང་པོའི་བར་དུ་སོང་སྟེ། ལྟོས་དང་། ལམ་ཧྲིལ་པོར་ཨ་རམ་པས་རྟབ་རྟབ་པོར་འཕངས་པའི་གོས་དང་ཡོ་བྱད་ཀྱིས་གང་ཡོད་པ་རེད། དེ་ནས་བང་ཆེན་རྣམས་ཕྱིར་ལོག་ནས་རྒྱལ་པོར་འཕྲིན་ཞུས་སོ། །
2KI 7:16 དེར་མི་རྣམས་ཕྱི་རོལ་ཏུ་ཐོན་ནས་ཨ་རམ་པའི་དམག་སྒར་འཕྲོག་བཅོམ་བྱས་ཏེ། དཀོན་མཆོག་ཡ་ཝཱེས་གསུངས་པ་བཞིན་དུ། དངུལ་སྲང་རེ་ལ་གྲོ་ཞིབ་བྲེ་རེ་དང་། ནས་བྲེ་གཉིས་དངུལ་སྲང་རེ་བྱས་ནས་བཙོངས་པའོ། །
2KI 7:17 ཡང་རྒྱལ་པོས་ཁོ་རང་བསྐྱོར་ཡོད་པའི་དམག་དཔོན་དེ་མཁར་སྒོ་རུ་ཞིབ་བཤེར་བྱེད་པར་བསྐོས་པ་དང་། དཀོན་མཆོག་གི་སྐྱེས་བུ་ཡིས་རྒྱལ་པོ་ཁོང་དང་ཐུག་ཕྲད་དུ་འོངས་དུས་སུ་ཁོ་ལ་གསུངས་པ་བཞིན་དུ། མི་རྣམས་ཀྱིས་དེ་ནི་སྒོ་འགྲམ་དུ་རྡོག་རྫིས་བཏང་བས་ཚེ་ལས་འདས།
2KI 7:18 དེ་ནི་དཀོན་མཆོག་གི་སྐྱེས་བུ་ཡིས་རྒྱལ་པོ་ལ། སང་ཉིན་དུས་ཚོད་འདིར་སཱ་མར་ཡ་ཡི་མཁར་སྒོར་དངུལ་སྲང་རེ་ལ་ནས་བྲེ་གཉིས་རེ་དང་། གྲོ་ཞིབ་བྲེ་གཅིག་དངུལ་སྲང་རེ་ལ་བཙོང་བར་འགྱུར་ཞེས་གསུངས་པ་བཞིན་དུ་གྲུབ་པ་ལ།
2KI 7:19 དམག་དཔོན་གྱིས་དཀོན་མཆོག་གི་སྐྱེས་བུ་ལ་ལན་བཟློག་ཅིང་། དཀོན་མཆོག་ཡ་ཝཱེས་ནམ་མཁའི་དཀར་ཁུང་ཕྱེས་པར་མཛད་ན་ཡང་དེ་འདྲ་འབྱུང་སྲིད་དམ་ཞེས་སྨྲས་པས། དཀོན་མཆོག་གི་སྐྱེས་བུ་ཡིས་ཁོ་ལ། ལྟོས་དང་། ཁྱོད་ཀྱི་མིག་གིས་དེ་མཐོང་ཡང་དེ་ལས་བཟའ་བར་མི་འགྱུར་རོ་ཞེས་གསུངས་པས་ཡིན་ལ།
2KI 7:20 དོན་དེ་དངོས་གནས་ཁོ་ལ་བྱུང་བར་གྱུར་ཏེ། མི་རྣམས་ཀྱིས་ཁོ་སྒོ་འགྲམ་དུ་རྡོག་བརྫིས་བཏང་ནས་ཚེ་ལས་འདས་སོ། །
2KI 8:1 དེ་ཡང་ཨེ་ལི་ཤཱས་སྔར་གསོན་དུ་བཅུག་པའི་བུ་དེའི་ཨ་མ་ལ། དཀོན་མཆོག་ཡ་ཝཱེས་ཡུལ་འདིར་ལོ་བདུན་གྱི་རིང་ལ་མུ་གེ་འབྱུང་བའི་གསུང་བརྡ་བརྒྱབ་ཡོད་པས། ཁྱོད་དང་ཁྱོད་ཀྱི་བཟའ་མི་རྣམས་ཡར་ལོངས་ལ། ཡུལ་འདིར་ཁ་བྲལ་ནས་བྱེས་སུ་སྡོད་ནུས་པའི་ས་ཆ་ཞིག་ཏུ་སྡོད་ཅིག་ཅེས་བསྒོས་པ་དང་།
2KI 8:2 བུད་མེད་དེ་ཡར་ལངས་ནས་དཀོན་མཆོག་གི་སྐྱེས་བུ་ཡིས་བསྒོས་པ་བཞིན་དུ་བྱས་ཤིང་། རང་གི་བཟའ་མི་རྣམས་ཁྲིད་ནས་སོང་བ་དང་། ཕེ་ལེ་ཤེད་པའི་ཡུལ་དུ་ལོ་བདུན་གྱི་རིང་ལ་བསྡད་དོ། །
2KI 8:3 དེ་ཡང་ལོ་བདུན་འགོར་རྗེས་བུད་མེད་དེ་ཕེ་ལེ་ཤེད་པའི་ཡུལ་ནས་ཕྱིར་ལོག་པ་དང་། རང་གི་ཁང་པ་དང་ས་ཞིང་གི་དོན་དུ་འོ་དོད་ཞུ་བར་རྒྱལ་པོའི་དྲུང་དུ་སོང་བ་ན།
2KI 8:4 རྒྱལ་པོས་དཀོན་མཆོག་གི་སྐྱེས་བུའི་ཞབས་ཕྱི་གེ་ཧ་ཟི་དང་གླེང་མོལ་མཛད་ཀྱིན་ཁོ་ལ། ཁྱོད་ཀྱིས་ཨེ་ལི་ཤཱས་མཛད་པའི་དོན་ཆེན་ཐམས་ཅད་ང་ལ་ཤོད་ཅིག་ཅེས་སྨྲས་པར།
2KI 8:5 ཁོས་རྒྱལ་པོ་ལ་ཨེ་ལི་ཤཱས་ཇི་ལྟར་གཤིན་པོ་ཞིག་གསོན་དུ་བཅུག་ཚུལ་དེ་འཆད་པའི་ཚེ། ལྟོས་དང་། སྔར་སྲོག་བསྐྱབས་པའི་བུ་དེའི་མ་ཡིས་རྒྱལ་པོ་ལ་རང་གི་ས་ཞིང་དང་ཁང་པའི་དོན་དུ་འོ་དོད་ཞུས་པས། གེ་ཧ་ཟི་ན་རེ། ཀྱེ་བདག་གི་ཇོ་བོ་བདག་གི་རྒྱལ་པོ་ལགས། བུད་མེད་དེ་ནི་འདི་ཡིན་ཏེ། ཨེ་ལི་ཤཱས་གསོན་དུ་བཅུག་པའི་བུ་ཡང་འདི་རང་ཡིན་ཞེས་ཞུས་པ་དང་།
2KI 8:6 རྒྱལ་པོས་ཀྱང་བུད་མེད་ལ་དྲིས་པ་ན་ཁོ་མོས་ཁོང་ལ་སྨྲས་སོ། །དེ་བས་རྒྱལ་པོས་འགོ་དཔོན་ ཞིག་མངགས་ནས་དེ་ལ་ཁོ་མོའི་ཡིན་ཚད་དང་། ཁོ་མོས་རང་ཡུལ་བསྐྱུར་བའི་ཉིན་ནས་བཟུང་ད་ལྟའི་བར་གྱི་ས་ཞིང་དང་ཐོན་རྫས་བཅས་ཡོད་ཚད་ཁོ་མོར་ཕྱིར་སྤྲོད་ཅིག་ཅེས་བསྒོས་སོ། །
2KI 8:7 ཡང་ཨེ་ལི་ཤཱ་ཁོང་ཉིད་དཱ་མེ་སེག་ལ་ཕྱིན་པ་དང་། ཨ་རམ་གྱི་རྒྱལ་པོ་པེན་ཧ་དཱད་ནད་ཀྱིས་ཟིན་ཡོད་དེ། མི་ཞིག་གིས་ཁོང་ལ། དཀོན་མཆོག་གི་སྐྱེས་བུ་འདིར་ཡོང་ཡོད་ཅེས་ཞུས་པར།
2KI 8:8 རྒྱལ་པོས་ཧ་ཟཱ་ཨེལ་ལ། ཁྱོད་ཀྱིས་རང་གི་ལག་ཏུ་ཞུ་རྟེན་ཞིག་ཁྱེར་ནས་དཀོན་མཆོག་གི་སྐྱེས་བུ་བསུ་རུ་སོང་སྟེ། ང་ནད་འདི་ལས་གསོན་ཐུབ་མིན་དྲིས་ཤིག ཁོང་ལས་དཀོན་མཆོག་ཡ་ཝཱེའི་ཐུགས་བརྟག་ཞུས་ཤིག་ཅེས་བཀའ་གནང་བ་དང་།
2KI 8:9 ཧ་ཟཱ་ཨེལ་བྱ་བ་ཨེ་ལི་ཤཱ་བསུ་རུ་ཕྱིན་ཏེ། ཁོས་དཱ་མེ་སེག་གི་བཟང་ནོར་ཐམས་ཅད་ལས་ཞུ་རྟེན་རྔ་མོང་བཞི་བཅུར་བཀལ་ཏེ་མཉམ་དུ་ཁྱེར་ཅིང་། ཁོང་གི་དྲུང་དུ་ལངས་ཏེ་ན་རེ། ཨ་རམ་གྱི་རྒྱལ་པོ་ཁྱེད་ཀྱི་བུ་པེན་ཧ་དཱད་ཀྱིས་བདག་ཁྱེད་ཀྱི་དྲུང་དུ་མངགས་ཏེ། ང་ནད་འདི་ལས་གསོན་པར་འགྱུར་རམ་ཞེས་འདྲིའོ་ཞུས་པ་ན།
2KI 8:10 ཨེ་ལི་ཤཱས་ལན་དུ། ཁྱོད་སོང་སྟེ་ཁོ་ལ། ཁྱོད་ནི་ཏག་ཏག་གསོན་པར་འགྱུར་ཞེས་སྦྲོན་ཅིག འོན་ཀྱང་ཁོ་ནི་འཆི་བར་ངེས་པ་དེ་དཀོན་མཆོག་ཡ་ཝཱེས་ང་ལ་མངོན་པར་མཛད་དོ་ཞེས་གསུངས་སོ། །
2KI 8:11 ཨེ་ལི་ཤཱས་ཁོ་རང་བག་འཁུམས་ནས་སྡོད་མི་བདེ་བའི་བར་དུ་མིག་ཧུར་རེར་ཁོ་ལ་བལྟས་ཤིང་། དེ་ནས་དཀོན་མཆོག་གི་སྐྱེས་བུ་ཁོང་བཤུམས་པར་གྱུར།
2KI 8:12 དེར་ཧ་ཟཱ་ཨེལ་གྱིས། བདག་གི་ཇོ་བོ་ལགས་ཅི་ལ་བཤུམས་པ་ཡིན་ཞུས་པས། ཁོང་གིས་དེ་ལ། ཅི་ལ་ངུ་ཟེར་ན། ཁྱོད་ཀྱིས་ཡེས་ར་ཨེལ་པ་རྣམས་ལ་སྤྱོད་པར་འགྱུར་བའི་དོན་ངན་རྣམས་ངས་ཤེས་ཟིན་པས་ཡིན། ཁྱོད་ཀྱིས་ཁོ་ཚོའི་གྲོང་ཁྱེར་བརྟན་པོ་རྣམས་མེར་བསྲེགས་ཏེ། དེའི་ན་གཞོན་རྣམས་རལ་གྲིས་གསོད་ཅིང་། དེ་དག་གི་ཕྲུ་གུ་རྣམས་སར་བསྒྱེལ་ནས་གསོད་པ་དང་། སྦྲུམ་མ་རྣམས་ཀྱི་གྲོད་པ་གཤག་པར་འགྱུར་རོ་ཞེས་གསུངས་པ་དང་།
2KI 8:13 ཧ་ཟཱ་ཨེལ་གྱིས། ཁྱེད་ཀྱི་ཞབས་ཕྱི་ཁྱི་ལྟ་བུ་བདག་གིས་དོན་ཆེན་པོ་དེ་ཅི་ལྟར་བྱེད་དམ་ཞུས་པས། ཨེ་ལི་ཤཱས་ལན་དུ། ཁྱོད་རང་ཨ་རམ་གྱི་རྒྱལ་པོར་འགྱུར་བ་ནི་དཀོན་མཆོག་ཡ་ཝཱེས་ང་ལ་བསྟན་བྱུང་གསུངས་སོ། །
2KI 8:14 དེ་ནས་ཁོ་ཨེ་ལི་ཤཱ་དང་བྲལ་ནས་ཕྱིར་རང་གི་བདག་པོའི་རྩར་ཕྱིན་པ་དང་། པེན་ཧ་དཱད་ཀྱིས་ཁོ་ལ། ཨེ་ལི་ཤཱས་ཁྱོད་ལ་ཅི་ཟེར་ཞེས་པར་ཁོ་ན་རེ། ཁོང་གིས་ཁྱེད་ངེས་པར་གསོན་པར་འགྱུར་ཞེས་ང་ལ་བཤད་བྱུང་ཞེས་སྨྲས།
2KI 8:15 དེའི་ཕྱི་ཉིན་ཧ་ཟཱ་ཨེལ་གྱིས་མལ་གོས་མཐུག་པོ་ཞིག་བླངས་ནས་ཆུར་སྦངས་ཏེ་པེན་ཧ་དཱད་ཀྱི་གདོང་ལ་བཀབ་པས། ཁོ་ནི་ཚེ་ལས་འདས་པ་དང་ཧ་ཟཱ་ཨེལ་ཁོའི་ཚབ་ཏུ་རྒྱལ་པོར་གྱུར་ཏོ། །
2KI 8:16 དེ་ཡང་ཡེས་ར་ཨེལ་གྱི་རྒྱལ་པོ་ཨ་ཧབ་ཀྱི་སྲས་ཡོ་རཱམ་གྱིས་སྲིད་བསྐྱངས་པའི་ལོ་ལྔ་པར། ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ད་དུང་བཞུགས་པ་དང་། ཡེ་ཧོ་ཤ་ཕད་ཀྱི་སྲས་ཡེ་ཧོ་རཱམ་རྒྱལ་པོར་བསྡད།
2KI 8:17 ཁོ་རྒྱལ་པོར་སྡོད་དུས་སུ་ལོ་སུམ་ཅུ་སོ་གཉིས་ཡིན་པ་དང་། ཡེ་རུ་སཱ་ལེམ་དུ་ལོ་བརྒྱད་ཀྱི་རིང་ལ་རྒྱལ་སྲིད་བསྐྱངས།
2KI 8:18 ཁོས་ཀྱང་ཨ་ཧབ་ཀྱི་བུ་རྒྱུད་ཀྱིས་སྤྱད་པ་ལྟར་དུ། ཡེས་ར་ཨེལ་གྱི་རྒྱལ་པོ་རྣམས་ཀྱི་ལམ་ལ་འགྲུལ། གང་ལ་ཞེ་ན། ཁོས་ཨ་ཧབ་ཀྱི་བུ་མོ་ཆུང་མར་བླངས་པར་མ་ཟད། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་དོ། །
2KI 8:19 ཡིན་ཡང་དཀོན་མཆོག་ཡ་ཝཱེས་ཉིད་ཀྱི་ཞབས་ཕྱི་དཱ་བིད་ཀྱི་རྐྱེན་གྱིས་ཡ་ཧུ་དཱ་མེད་པར་མཛད་པ་ལ་ཐུགས་མ་མཉེས་སོ། །ཁོང་གིས་དཱ་བིད་ལ་ཞལ་བཞེས་གནང་ཡོད་པ་བཞིན་མཛད་དེ། ཁོང་དང་ཁོང་གི་བུ་རྒྱུད་རྣམས་ལ་དུས་གཏན་དུ་སྒྲོན་མེ་ལྟར་འོད་ཡོད་པར་གནང་བའོ། །
2KI 8:20 ཡེ་ཧོ་རཱམ་རྒྱལ་པོ་ཡིན་པའི་དུས་སུ་ཨེ་དོམ་པ་རྣམས་ཀྱིས་ཡ་ཧུ་དཱའི་མངའ་འོག་ནས་ངོ་ལོག་བྱས་ཤིང་ཁོ་ཚོས་རང་ལ་རྒྱལ་པོ་ཞིག་བསྐོས་སོ། །
2KI 8:21 དེའི་ཕྱིར་ཡེ་ཧོ་རཱམ་ནི་ཤིང་རྟ་ཐམས་ཅད་དང་བཅས་ཙ་ཨིར་དུ་ཕྱིན་ཏེ། ཁོ་མཚན་མོར་ལངས་ནས་ཁོ་རང་དང་ཤིང་རྟའི་དམག་དཔོན་རྣམས་བསྐོར་ནས་ཡོད་པའི་ཨེ་དོམ་པ་རྣམས་འཇོམས་པར་བྱས་ནའང་། ཁོའི་དམག་མི་རྣམས་རང་རང་གི་གུར་དུ་བྲོས།
2KI 8:22 དེ་ལྟར་ཨེ་དོམ་པས་ངོ་ལོག་བྱས་ཏེ། ཡ་ཧུ་དཱའི་མངའ་འོག་ནས་དེ་རིང་བར་དུ་ངོ་ལོག་བྱས་པ་དང་། དུས་དེར་ལིབ་ནཱ་པས་ཀྱང་ངོ་ལོག་བྱས་སོ། །
2KI 8:23 ཡེ་ཧོ་རཱམ་གྱི་དོན་གཞན་དག་དང་། ཁོས་ཅི་བྱས་པ་ཐམས་ཅད་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མིན་ནམ།
2KI 8:24 དེ་ནས་ཡེ་ཧོ་རཱམ་རང་གི་ཕ་མེས་རྣམས་དང་ལྷན་ཅིག་གཟིམས་པ་དང་དཱ་བིད་ཀྱི་གྲོང་ཁྱེར་ནས་དུར་དུ་སྦས། ཁོའི་སྲས་ཨ་ཧ་ཟི་ཡཱ་ཡིས་དེའི་རྒྱུན་མཐུད་ནས་རྒྱལ་སྲིད་བསྐྱངས་སོ། །
2KI 8:25 དེ་ཡང་ཡེས་ར་ཨེལ་གྱི་རྒྱལ་པོ་ཨ་ཧབ་ཀྱི་སྲས་ཡོ་རཱམ་གྱིས་རྒྱལ་སྲིད་བསྐྱངས་པའི་ལོ་བཅུ་གཉིས་པར། ཡ་ཧུ་དཱའི་རྒྱལ་པོ་ཡེ་ཧོ་རཱམ་གྱི་སྲས་ཨ་ཧ་ཟི་ཡཱ་ནི་ཡ་ཧུ་དཱའི་རྒྱལ་པོར་གྱུར་ཏོ། །
2KI 8:26 ཨ་ཧ་ཟི་ཡཱ་ཡིས་རྒྱལ་སྲིད་བཟུང་དུས། ཁོ་ལོ་ཉེར་གཉིས་ལ་སོན་ཡོད་དེ། ཡེ་རུ་སཱ་ལེམ་དུ་ལོ་གཅིག་རིང་རྒྱལ་སྲིད་བསྐྱངས། ཁོའི་ཡུམ་ནི་ཡེས་ར་ཨེལ་གྱི་རྒྱལ་པོ་ཨོམ་རིའི་ཚ་མོ་ ཨ་ཐལ་ཡཱ་བྱ་བའོ། །
2KI 8:27 ཁོ་ནི་ཨ་ཧབ་ཚང་གི་མག་པ་ཡིན་པའི་རྐྱེན་གྱིས། ཁོ་ཡང་ཨ་ཧབ་ཁྱིམ་རྒྱུད་ཀྱི་ལམ་དུ་ཞུགས་ཤིང་། ཨ་ཧབ་ཀྱི་ཁྱིམ་རྒྱུད་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་དོ། །
2KI 8:28 དེ་ནས་ཨ་ཧ་ཟི་ཡཱ་ནི་ཨ་ཧབ་ཀྱི་སྲས་ཡོ་རཱམ་དང་མཉམ་དུ་ཨ་རམ་གྱི་རྒྱལ་པོ་ཧ་ཟཱ་ཨེལ་ལ་དམག་འགྱེད་དུ་གིལ་ཨད་ཀྱི་རཱ་མོད་དུ་སོང་ཞིང་། ཨ་རམ་པས་ཡོ་རཱམ་བསྣད་པ་རེད།
2KI 8:29 ཡང་རྒྱལ་པོ་ཡོ་རཱམ་ནི་ཨ་རམ་གྱི་རྒྱལ་པོ་ཧ་ཟཱ་ཨེལ་དང་གཡུལ་འགྱེད་པའི་དུས་སུ། ཨ་རམ་པས་རཱ་མ་རུ་ཁོ་བསྣད་པའི་རྨ་དེ་གསོ་བར་ཡེ་སི་རེ་ཨེལ་དུ་ཕྱིར་ལོག་པ་དང་། ཡ་ཧུ་དཱའི་རྒྱལ་པོ་ཡེ་ཧོ་རཱམ་གྱི་སྲས་ཨ་ཧ་ཟི་ཡཱ་ནི་ཨ་ཧབ་ཀྱི་སྲས་ཡོ་རཱམ་རྨས་ཡོད་པས། དེ་ལ་བལྟ་རུ་མར་ཡེ་སི་རེ་ཨེལ་དུ་སོང་ངོ་། །
2KI 9:1 དེ་ཡང་ལུང་སྟོན་པ་ཨེ་ལི་ཤཱས་ལུང་སྟོན་པའི་སློབ་བུ་རྣམས་ལས་གཅིག་བོས་ནས་དེ་ལ། རང་གི་སྐ་རགས་སྡོམས་ལ་སྣུམ་གྱི་བུམ་པ་འདི་ལག་ཏུ་ཐོགས་ནས་གིལ་ཨད་ཀྱི་རཱ་མོད་དུ་སོང་ཞིག
2KI 9:2 ཁྱོད་རང་དེར་སླེབས་པའི་ཚེ། ནིམ་ཤིའི་ཚ་བོའམ་ཡེ་ཧོ་ཤ་ཕད་ཀྱི་བུ་ཡེ་ཧུ་བྱ་བ་ཚོལ་ཞིག སོང་ལ་ཁོའི་སྤུན་རྣམས་ཀྱི་ཁྲོད་ནས་བསླངས་ཏེ་གཟིམ་ཁང་སྦུག་མའི་ནང་དུ་ཁོ་ཁྲིད་པར་གྱིས་ཤིག
2KI 9:3 དེ་ནས་སྣུམ་གྱི་བུམ་པ་འདི་བླངས་ནས་ཁོའི་མགོ་ལ་བླུགས་ཏེ་ཁོ་ལ། དཀོན་མཆོག་ཡ་ཝཱེས་འདི་སྐད་དུ། ངས་ཁྱོད་ལ་སྣུམ་གྱིས་བྱུགས་ཏེ་ཡེས་ར་ཨེལ་གྱི་རྒྱལ་པོར་བསྐོས་པ་ཡིན་གསུངས་སོ་ཞེས་སྨྲས་པའི་རྗེས་སུ་སྒོ་ཕྱེས་ནས་ཕྲོས་དང་དུས་འགྱངས་མི་རུང་ཞེས་གདམས་སོ། །
2KI 9:4 དེ་ནས་ལུང་སྟོན་པ་གཞོན་ནུ་ཞབས་ཕྱི་དེ་གིལ་ཨད་ཀྱི་རཱ་མོད་དུ་སོང་བ་དང་།
2KI 9:5 དེར་སླེབས་པའི་ཚེ་ན། ལྟོས་དང་། དམག་དཔོན་རྣམས་དེ་རུ་བསྡད་ཡོད་པ་དང་། ཁོ་ན་རེ། ཀྱེ་དམག་དཔོན། ཁྱེད་ཀྱི་ཆེད་དུ་ང་ལ་འཕྲིན་ཞིག་ཡོད་སྨྲས་པས། ཡེ་ཧུ་ཡིས། ངེད་རྣམས་ལས་འཕྲིན་སུ་ལ་ཡོད་དྲིས་པའི་ལན་དུ་ཁོས། ཀྱེ་དམག་དཔོན། ཁྱེད་ལ་འཕྲིན་ཞིག་ཡོད་ཅེས་ཞུས་པ་དང་།
2KI 9:6 ཡེ་ཧུ་ལངས་ནས་ཁྱིམ་དུ་སོང་བ་དང་ལུང་སྟོན་པའི་སློབ་བུ་ཡིས་ཁོའི་མགོ་ལ་སྣུམ་བླུགས་ནས་ཁོ་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་ཁྱོད་སྣུམ་གྱིས་བྱུགས་ནས་དཀོན་མཆོག་ཡ་ཝཱེའི་འབངས་མི་ཡེས་ར་ཨེལ་གྱི་རྒྱལ་པོར་བསྐོས་པ་ཡིན།
2KI 9:7 ངས་རང་གི་ཞབས་ཕྱི་ལུང་སྟོན་པ་རྣམས་ཀྱི་ཁྲག་དང་། དཀོན་མཆོག་ཡ་ཝཱེའི་ཞབས་ཕྱི་ཐམས་ཅད་ཀྱི་ཁྲག་ལན་དེ་ཡེ་ཟི་བེལ་གྱི་ལག་ནས་ལེན་པའི་ཕྱིར། ཁྱོད་ཀྱིས་རང་གི་བདག་པོ་ཨ་ཧབ་ཀྱི་ཁྱིམ་ལ་བརྡེགས་ནས་མེད་པར་བཟོ་དགོས།
2KI 9:8 ཨ་ཧབ་ཀྱི་ཁྱིམ་རྒྱུད་ཐམས་ཅད་རྩ་མེད་དུ་འགྲོ་བ་སྟེ། ཡེས་ར་ཨེལ་དུ་རང་དབང་ཅན་ནམ་ཡང་ན་རང་དབང་མེད་པ་གང་ཡིན་ཡང་ངས་ཨ་ཧབ་ཀྱི་ཁྱིམ་རྒྱུད་ལས་ཐམས་ཅད་ཚར་གཅོད་བྱ་སྟེ།
2KI 9:9 ངས་ཨ་ཧབ་ཀྱི་ཁྱིམ་རྒྱུད་དེ་ནེ་བཱད་ཀྱི་བུ་ཡེ་རོབ་ཨམ་དང་། ཨ་ཧི་ཡཱ་ཡི་བུ་པཱ་ཤ་ཡི་ཁྱིམ་རྒྱུད་ལྟ་བུར་བྱེད་པར་འགྱུར་ལ།
2KI 9:10 ཡེ་ཟི་བེལ་ནི་ཡེ་སི་རེ་ཨེལ་གྱི་ཞིང་བར་དུ་ཁྱིས་བཟའ་བར་འགྱུར་ཞིང་། དུར་དུ་འཇུག་མཁན་སུ་ཡང་མེད་ཅེས་སྦྲན་ཏེ་སྒོ་ཕྱེས་ནས་བྲོས་སོ། །
2KI 9:11 དེ་ཡང་ཡེ་ཧུ་ཕྱི་རོལ་ཏུ་ཐོན་ཏེ་རང་གི་བདག་པོའི་འཁོར་རྣམས་ཀྱི་མདུན་དུ་འོངས་པ་དང་། དེ་དག་གིས་ཁོ་ལ་ཐམས་ཅད་བདེ་ལེགས་སམ། སྨྱོན་པ་དེ་ཁྱེད་ཀྱི་རྩར་འོངས་པ་ཅི་ཡིན་ཞེས་དྲིས་པར། ཁོས་དེ་དག་ལ། ཁྱེད་ཅག་མི་དེར་ཆ་རྒྱུས་ཡོད་པ་དང་ཁོས་ཅི་བཤད་པའང་ཤེས་སོ་ཞེས་སྨྲས།
2KI 9:12 ཁོ་ཚོས་དེ་ནི་རྫུན་ཡིན་ཏེ། ཁྱོད་ཀྱིས་ངེད་རྣམས་ལ་ཤོད་ཅིག་ཅེས་པ་ན། ཁོས་དེ་དག་ལ། མི་དེས་འདི་ལྟར་སྨྲས་ཏེ་ན་རེ། དཀོན་མཆོག་ཡ་ཝཱེས་འདི་སྐད་དུ། ངས་ཁྱོད་སྣུམ་གྱིས་བྱུགས་ཏེ་ཡེས་ར་ཨེལ་གྱི་རྒྱལ་པོར་བསྐོས་སོ་གསུངས་ཞེས་སྨྲས་སོང་ཞེས་པ་ཙམ་གྱིས།
2KI 9:13 དེ་དག་གིས་མགྱོགས་པོར་རང་གི་གོས་ཕུད་ནས་ཁོའི་རྐང་འོག་གི་ཐེམ་སྐས་སུ་བཏིངས་ཏེ། ད་ནི་ཡེ་ཧུ་རྒྱལ་པོ་ལགས་ཞེས་བསྒྲགས་ནས་རྭ་དུང་བུས་སོ། །
2KI 9:14 དེ་ལྟར་ནིམ་ཤིའི་ཚ་བོའམ་ཡེ་ཧོ་ཤ་ཕད་ཀྱི་བུ་ཡེ་ཧུ་ཡིས་ཡོ་རཱམ་ལ་ལྐོག་ཇུས་བཤམས་པ་རེད། སྔོན་ཆད་ཨ་རམ་གྱི་རྒྱལ་པོ་ཧ་ཟཱ་ཨེལ་གྱི་རྐྱེན་གྱིས་ཡོ་རཱམ་དང་ཡེས་ར་ཨེལ་པ་ཐམས་ཅད་ཀྱིས་གིལ་ཨད་ཀྱི་རཱ་མོད་བསྲུངས་ཡོད་ལ།
2KI 9:15 རྒྱལ་པོ་ཡོ་རཱམ་གྱིས་ཨ་རམ་གྱི་རྒྱལ་པོ་ཧ་ཟཱ་ཨེལ་ལ་གཡུལ་འགྱེད་པའི་དུས་སུ། ཨ་རམ་པས་ཁོ་རྨས་པར་བྱས་པའི་རྨ་དྲག་གསོ་བྱེད་དུ་ཁོ་ཡེ་སི་རེ་ཨེལ་དུ་ཕྱིན་པ་ཡིན། དེ་ནས་ཡེ་ཧུ་ཡིས། གལ་ཏེ་ཁྱེད་ཅག་ཡིད་འཐད་ན་སུ་ཡིན་ཡང་གྲོང་ཁྱེར་འདི་ནས་ཐོན་ཏེ་ཡེ་སི་རེ་ཨེལ་ལ་འཕྲིན་བསྐྱལ་དུ་འབྲོ་བར་མ་འཇུག་ཅེས་སྨྲས་ཤིང་།
2KI 9:16 ཡེ་ཧུ་ཤིང་རྟར་བསྡད་དེ་ཡེ་སི་རེ་ཨེལ་གྱི་ཕྱོགས་སུ་ཕྱིན་པ་སྟེ། གང་ལ་ཞེ་ན། དེར་ཡོ་རཱམ་རྨས་ཕོག་ནས་ཉལ་སར་ལྷུང་ཡོད། ཡ་ཧུ་དཱའི་རྒྱལ་པོ་ཨ་ཧ་ཟི་ཡཱ་ཡང་ཡོ་རཱམ་ལ་མར་བལྟ་རུ་སོང་ངོ་། །
2KI 9:17 ཡང་ཡེ་སི་རེ་ཨེལ་གྱི་མཁར་སྟེང་དུ་སོ་པ་ཞིག་ཀྲོང་ངེར་ཡོད་པ་དེས་ཡེ་ཧུའི་དམག་དཔུང་འོང་བ་མཐོང་བས། ངས་དམག་དཔུང་ཞིག་མཐོང་ངོ་ཞེས་སྦྲན་པའི་ལན་དུ་ཡོ་རཱམ་གྱིས། སྐྱ་དམག་ཅིག་བོས་ལ་ཁོ་རྣམས་བསུ་རུ་མངགས་ནས་བདེ་བར་ཡོད་དམ་དྲིས་ཤིག་བསྒོས་པས།
2KI 9:18 མི་དེ་རྟ་ཞོན་ནས་བསུ་རུ་སོང་སྟེ་ཡེ་ཧུ་ལ། རྒྱལ་པོས་བདེ་བར་ཡོད་དམ་ཞེས་འདྲིའོ་ཞེས་ཞུས་པ་ན། ཡེ་ཧུས་ལན་དུ། བདེ་མིན་ཁྱོད་དང་འབྲེལ་བ་ཅི་ཡོད་དམ། ངའི་རྒྱབ་ཏུ་སོང་ཞིག་ཅེས་སྨྲས་པ་ན། ཡང་སོ་པ་དེ་ན་རེ། བང་ཆེན་ནི་དེའི་དྲུང་དུ་ཕྱིན་ཀྱང་ཚུར་ལོག་མ་སོང་ཞེས་ཞུས་པ་དང་།
2KI 9:19 རྒྱལ་པོས་སྐྱ་དམག་གཞན་ཞིག་མངགས་ནས་དེ་དག་གི་རྩར་ཕྱིན་ཏེ་ན་རེ། རྒྱལ་པོས་བདེ་བར་ཡོད་དམ་ཞེས་འདྲིའོ་ཞེས་པ་དང་། ཡེ་ཧུ་ཡིས། བདེ་མིན་ཁྱོད་དང་འབྲེལ་བ་ཅི་ཡོད་དམ། ངའི་རྒྱབ་ཏུ་སོང་ཞིག་ཅེས་སྨྲས་པ་ན།
2KI 9:20 ཡང་སོ་པ་དེས་མི་དེ་ཁོ་ཚོའི་རྩར་ཕྱིན་ཀྱང་ཚུར་ལོག་མ་སོང་། ཡང་ཤིང་རྟ་འདེད་ལུགས་ལ་ལྟོས་ན་ནིམ་ཤིའི་བུ་ཡེ་ཧུ་ཡིན་པ་འདྲ། ཅི་ལ་ཞེ་ན། ཁོས་སྨྱོན་པ་ལྟར་ཤིང་རྟ་འདེད་པ་ཡིན་ཞེས་ཞུས་སོ། །
2KI 9:21 དེ་ནས་ཡོ་རཱམ་གྱིས་ཤིང་རྟ་གྲ་སྒྲིག་བྱོས་ཤིག་ཅེས་བསྒོས་པར། དེ་ཚོས་ཤིང་རྟ་གྲ་སྒྲིག་བྱས་ཤིང་། ཡེས་ར་ཨེལ་གྱི་རྒྱལ་པོ་ཡོ་རཱམ་དང་། ཡ་ཧུ་དཱའི་རྒྱལ་པོ་ཨ་ཧ་ཟི་ཡཱ་གཉིས་རང་རང་གི་ཤིང་རྟར་བསྡད་དེ་ཡེ་ཧུ་བསུ་རུ་སོང་བ་དང་། ཡེ་སི་རེ་ཨེལ་པ་ནཱ་རྦོད་བྱ་བའི་ས་སྐལ་བར་དུ་ཡེ་ཧུ་དང་ཕྲད་པ་རེད།
2KI 9:22 ཡང་ཡོ་རཱམ་གྱིས་ཡེ་ཧུ་མཐོང་བ་ན་ཁོ་ལ། ཀྱེ་ཡེ་ཧུ། བདེ་བར་ཡོད་དམ་དྲིས་པའི་ལན་དུ་ཡེ་ཧུ་ན་རེ། ཁྱོད་ཀྱི་མ་ཡེ་ཟི་བེལ་གྱི་ལོག་གཡེམ་དང་ངན་སྔགས་ནི་འདི་འདྲ་མང་བས། བདེ་བ་ཞིག་ཡོད་སྲིད་དམ་སྨྲས་པ་དང་།
2KI 9:23 ཡོ་རཱམ་གྱིས་ཤིང་རྟ་ཁ་ཕྱིར་བསྐོར་ནས་བྲོས་ཤིང་ཨ་ཧ་ཟི་ཡཱ་ལ། ཀྱེ་ཨ་ཧ་ཟི་ཡཱ། འདི་རུ་གཡོ་སྒྱུ་འདུག་ཅེས་སྨྲས་པ་ལ།
2KI 9:24 ཡེ་ཧུས་གཞུ་འཐེན་ནས་ཡོ་རཱམ་གྱི་སོག་པ་གཉིས་ཀྱི་མཚམས་སུ་མདའ་འཕངས་པས། མདའ་དེས་ཁོའི་སྙིང་བརྟོལ་ཞིང་ཁོ་ཤིང་རྟའི་སྟེང་དུ་འགྱེལ་ཏོ། །
2KI 9:25 དེ་ནས་ཡེ་ཧུས་རང་གི་དམག་དཔོན་པིད་ཀར་ལ། ཁོ་ཡར་ཁྱེར་ལ་ཡེ་སི་རེ་ཨེལ་པ་ནཱ་རྦོད་ཀྱི་ས་སྐལ་དེའི་ཞིང་ཁར་གཡུགས་ཤིག ང་དང་ཁྱོད་གཉིས་ཀྱིས་ཁོའི་ཕ་ཨ་ཧབ་ཀྱི་རྗེས་འབྲངས་ནས་མཉམ་དུ་རྟ་ཞོན་ཏེ་འགྲོ་དུས་སུ། དཀོན་མཆོག་ཡ་ཝཱེས་ཨ་ཧབ་ཀྱི་སྐོར་ལ་སྔར་འདི་ལྟར་བཀའ་ལུང་གནང་བ་ངའི་ཡིད་ལ་དྲན་པའི་ཕྱིར་ཡིན་ཏེ།
2KI 9:26 དཀོན་མཆོག་ཡ་ཝཱེས་འདི་སྐད་དུ། ཁ་སང་ངས་ནཱ་རྦོད་ཀྱི་ཁྲག་དང་ཁོའི་བུ་རྣམས་ཀྱི་ཁྲག་མཐོང་བར་གྱུར་ཏེ། བདག་གིས་ཁྱོད་ལ་ས་སྐལ་འདིའི་སྟེང་ལན་སྤྲོད་པར་བྱ་ཞེས་བཀའ་བསྒྲགས་ཡོད་པའོ། །ད་ནི་ཁྱོད་ཀྱིས་དཀོན་མཆོག་ཡ་ཝཱེའི་བཀའ་བཞིན་དུ་ཁོ་ཁྱེར་ཏེ་ཞིང་ཁར་གཡུགས་ཤིག་ཅེས་བསྒོས་སོ། །
2KI 9:27 དེ་ཡང་ཡ་ཧུ་དཱའི་རྒྱལ་པོ་ཨ་ཧ་ཟི་ཡཱས་དེ་མཐོང་བའི་ཚེ། པེད་ཧ་ཀན་དུ་འཐེན་པའི་ལམ་ནས་བྲོས་སོང་བ་དང་། ཡེ་ཧུས་ཁོ་བདས་ཏེ་མི་རྣམས་ལ་ཁོ་ཡང་སོད་ཅིག་བསྒོས་པར། དེ་དག་གིས་ཡིབ་ལེ་ཨམ་དང་ཉེ་བའི་གུར་བྱ་བའི་ལ་ངོས་སུ་ཤིང་རྟའི་ནང་དུ་ཁོ་ལ་བསྣུན་ཅིང་། ཁོ་མེ་གིད་དོ་རུ་བྲོས་ནས་དེར་ཚེ་ལས་འདས།
2KI 9:28 དེ་ནས་ཁོའི་བློན་འཁོར་རྣམས་ཀྱིས་ཁོ་ཤིང་རྟའི་ནང་ཡེ་རུ་སཱ་ལེམ་དུ་ཁྱེར་ཏེ། དཱ་བིད་ཀྱི་གྲོང་ཁྱེར་དུ་རང་གི་ཕ་མེས་རྣམས་དང་ལྷན་དུ་ཁོའི་དུར་ཁྲོད་དུ་དུར་འཇུག་བྱས་པའོ། །
2KI 9:29 དེ་ཡང་ཨ་ཧབ་ཀྱི་སྲས་ཡོ་རཱམ་གྱིས་རྒྱལ་སྲིད་བཟུང་བའི་ལོ་བཅུ་གཅིག་པར། ཨ་ཧ་ཟི་ཡཱ་ཡིས་ཡ་ཧུ་དཱའི་རྒྱལ་སྲིད་བཟུང་ངོ་། །
2KI 9:30 དེ་ནས་ཡེ་ཧུ་ནི་ཡེ་སི་རེ་ཨེལ་དུ་ཕྱིན་པའི་ཚེ་ན། ཡེ་ཟི་བེལ་གྱིས་དེ་ཐོས་ནས་མིག་ལ་མིག་རྩི་བསྐུས་ཤིང་སྐྲ་ཤད་ནས་སྒེའུ་ཁུང་ལས་བལྟས་པ་དང་།
2KI 9:31 ཡེ་ཧུ་རྒྱལ་སྒོའི་ནང་དུ་འཛུལ་བ་ཙམ་གྱིས་ཁོ་མོ་ན་རེ། ཀྱེ་ཟིམ་རེ། རང་གི་བདག་པོ་གསོད་མཁན་ཁྱོད་བདེའམ་སྨྲས་པར།
2KI 9:32 ཡེ་ཧུས་སྒེའུ་ཁུང་གི་ཕྱོགས་སུ་མགོ་བཏེགས་ཏེ་ན་རེ། ངའི་ཕྱོགས་སུ་ཡིན། སུ་ཡིན་ཞེས་དྲིས་མ་ཐག ཉུག་རུམ་པ་གཉིས་གསུམ་གྱིས་ཁོ་ལ་བལྟས་པ་ན།
2KI 9:33 ཁོས་དེ་དག་ལ། ཁོ་མོ་མར་གཡུགས་ཤིག་བསྒོས་པར། དེ་དག་གིས་ཁོ་མོ་མར་གཡུགས་ཤིང་རྩིག་ངོས་དང་རྟ་རྣམས་ཀྱི་ཐོག་ཏུ་ཁོ་མོའི་ཁྲག་ཐོར་བ་དང་། ཁོ་རང་གིས་མོ་རྨིག་བརྫིས་སུ་བཏང་བཅུག་གོ །
2KI 9:34 དེ་ནས་ཡེ་ཧུ་ནང་དུ་འཛུལ་ཏེ་བཟའ་བཏུང་སྤྱད་པ་དང་། དེ་དག་ལ། སོང་ལ་དམོད་པ་ཕོག་པའི་བུད་མེད་དེར་བདག་བྱས་ནས་དུར་དུ་སྦ་བར་གྱིས་ཤིག ཅི་ལ་ཞེ་ན། དེ་ཡང་རྒྱལ་པོའི་སྲས་མོ་ཞིག་ཡིན་ནོ་ཞེས་སྨྲས་པས།
2KI 9:35 དེ་དག་ཁོ་མོ་དུར་འཇུག་བྱེད་དུ་སོང་ཡང་། ཁོ་མོའི་ཐོད་སྐོགས་དང་། རྐང་པ་དང་། ལག་མཐིལ་བཅས་མ་གཏོགས་གཞན་ཅི་ཡང་མ་རྙེད་དོ། །
2KI 9:36 དེའི་ཕྱིར་དེ་ཚོ་ཕྱིར་ལོག་ནས་ཁོ་ལ་སྨྲས་པ་དང་། ཁོ་ན་རེ། འདི་ནི་དཀོན་མཆོག་ཡ་ཝཱེས་ཉིད་ཀྱི་ཞབས་ཕྱི་ཐི་ཞི་པ་ཨེ་ལི་ཡཱའི་ངག་ནས་གསུངས་པའི་བཀའ་བཞིན་ཡིན་ཏེ། ཡེ་སི་རེ་ཨེལ་གྱི་ས་སྟེང་དུ་ཡེ་ཟི་བེལ་གྱི་ཤ་ཁྱིས་བཟའ་བར་འགྱུར་བ་དང་།
2KI 9:37 ཡེ་ཟི་བེལ་གྱི་བེམ་པོ་ནི་ཡེ་སི་རེ་ཨེལ་གྱི་ས་སྐལ་དེའི་ཞིང་ནང་གི་ལུད་ལྟ་བུར་འགྱུར་ཞིང་། མི་སུས་ཀྱང་འདི་ནི་ཡེ་ཟི་བེལ་རེད་ཅེས་པའི་ཚིག་ཙམ་ཡང་སྨྲ་བར་མི་འགྱུར་བའི་ཕྱིར་རོ་ཞེས་སྨྲས་སོ། །
2KI 10:1 དེ་ཡང་སཱ་མར་ཡ་རུ་ཨ་ཧབ་ཀྱི་བུ་བདུན་ཅུ་ཡོད་པས། ཡེ་ཧུས་འཕྲིན་ཡིག་བྲིས་ཏེ་སཱ་མར་ཡ་རུ་སྤྲིངས་པ་དང་། ཡེ་སི་རེ་ཨེལ་གྱི་འགོ་དཔོན་རྣམས་དང་། རྒན་པོ་རྣམས་དང་། ཨ་ཧབ་ཀྱི་སྲས་ལ་ལྟ་སྐྱོང་བྱེད་མཁན་རྣམས་ལ་འདི་ལྟར།
2KI 10:2 རང་གི་བདག་པོའི་བུ་རྣམས་ཁྱོད་ཅག་གི་རྩར་ཡོད་པ་དང་། ཁྱོད་རྣམས་ལ་ཤིང་རྟ་དང་རྟ་རྣམས་དང་། ལྕགས་རིས་བསྐོར་བའི་གྲོང་ཁྱེར་དང་། མཚོན་ཆ་བཅས་ཀྱང་ཡོད་པས། ཁྱོད་ཚོར་འཕྲིན་ཡིག་འདི་འབྱོར་འཕྲལ།
2KI 10:3 ཁྱོད་ཅག་གི་བདག་པོའི་བུ་རྣམས་ལས་ལེགས་ཤིང་འོས་པ་ཞིག་བཙལ་ནས་དེའི་ཕ་ཡི་རྒྱལ་ཁྲིར་འཁོད་ཅིག ཡང་ཁྱོད་ཅག་གི་བདག་པོའི་ཁྱིམ་རྒྱུད་ཀྱི་དོན་དུ་འཐབ་མོ་འགྱེད་པར་བྱོས་ཤིག་ཅེས་སྤྲིངས་མོད།
2KI 10:4 འོན་ཀྱང་དེ་རྣམས་རབ་ཏུ་སྐྲག་སྟེ། ལྟོས་དང་། རྒྱལ་པོ་གཉིས་ཀྱང་ཁོའི་མདུན་དུ་ཚུགས་མ་ཐུབ་ན། ངེད་ཅག་ཁོའི་མདུན་དུ་ཇི་ལྟར་འགྲེང་ནུས་སམ་ཞེས་སྨྲས་ནས།
2KI 10:5 ཕོ་བྲང་གི་གཙོ་དཔོན་དང་གྲོང་ཁྱེར་གྱི་སྤྱི་དཔོན། རྒན་པོ་རྣམས། ཨ་ཧབ་ཀྱི་སྲས་ལ་ལྟ་སྐྱོང་བྱེད་མཁན་རྣམས་ཀྱིས་ཡེ་ཧུ་ལ་འཕྲིན་ཡིག་བསྐུར་ཏེ། བདག་ཅག་ཁྱེད་ཀྱི་ཞབས་ཕྱི་ཡིན། ཁྱེད་ཀྱིས་ཅི་དང་ཅི་བསྒོ་བ་ཐམས་ཅད་བསྒྲུབ་པར་བྱ། བདག་ཅག་གིས་གཞན་སུ་ཡང་རྒྱལ་པོར་བསྐོ་བར་མི་བྱ། ཁྱེད་ཀྱི་སྤྱན་ལམ་དུ་ཅི་ལེགས་པ་དེ་མཛོད་ཅིག་ཞུས་པ་ལ།
2KI 10:6 ཡེ་ཧུས་དེ་དག་ལ་འཕྲིན་ཡིག་གཉིས་པ་བྲིས་ནས་འདི་ལྟར། གལ་ཏེ་ཁྱོད་ཅག་ངའི་ཕྱོགས་སུ་འཁོར་ནས་ངའི་སྐད་ལ་མཉན་ན། ཁྱོད་ཅག་གི་བདག་པོའི་བུ་རྣམས་ཀྱི་མགོ་བོ་བཅད་དེ། སང་ཉིན་ད་ཚོད་ངའི་རྩར་ཡེ་སི་རེ་ཨེལ་དུ་ཁྱེར་ཤོག་ཅེས་བསྒོས། དེའི་དུས་སུ་རྒྱལ་པོའི་བུ་བདུན་ཅུ་ནི་གྲོང་ཁྱེར་གྱི་བློན་ཆེན་རྣམས་དང་མཉམ་དུ་ཡོད་ལ། དེ་དག་གིས་ཁོ་རྣམས་ལ་ལྟ་སྐྱོང་བྱེད་པའོ། །
2KI 10:7 འཕྲིན་ཡིག་ལག་ཏུ་འབྱོར་མ་ཐག་དེ་དག་གིས་རྒྱལ་པོའི་བུ་རྣམས་བཟུང་ཞིང་མི་བདུན་ཅུ་བོ་དེ་བསད་ནས་མགོ་བོ་རྣམས་སླེ་པོའི་ནང་དུ་བཅུག་སྟེ། ཡེ་སི་རེ་ཨེལ་དུ་ཡེ་ཧུའི་གམ་དུ་བསྐྱལ།
2KI 10:8 དེ་ནས་བང་ཆེན་ཞིག་འོངས་ཏེ་ཡེ་ཧུ་ལ། རྒྱལ་པོའི་བུ་རྣམས་ཀྱི་མགོ་བོ་འདིར་ཁྱེར་ནས་སླེབས་སོ་ཞེས་འཕྲིན་བསྐྱལ་བ་ལ། ཁོ་ན་རེ། དེ་རྣམས་ཕུང་པོ་གཉིས་སུ་བྱས་ཏེ། གྲོང་ཁྱེར་གྱི་རྒྱ་སྒོའི་འགྲམ་ནས་ཞོགས་པའི་བར་དུ་ཞོག་ཅིག་ཅེས་བསྒོས།
2KI 10:9 དེ་ནས་ཕྱི་ཉིན་ཞོགས་པའི་དུས་སུ་ཡེ་ཧུ་ཕྱི་རོལ་ཏུ་ཐོན་ནས་ལངས་ཏེ་མི་ཐམས་ཅད་ལ། ཁྱོད་ཅག་དྲང་པོ་འདུག ལྟོས་དང་། ངས་རང་གི་བདག་པོ་ལ་ངོ་ལོག་བྱས་ནས་བསད་པ་ཡིན། འོན་ཀྱང་མི་འདི་ཐམས་ཅད་ནི་སུས་བསད་པ་ཡིན་ནམ།
2KI 10:10 དཀོན་མཆོག་ཡ་ཝཱེའི་བཀའ་སྟེ། ཁོང་གིས་ཨ་ཧབ་ཀྱི་ཁྱིམ་རྒྱུད་ལ་གསུངས་པའི་བཀའ་ཐམས་ཅད་སྟོང་པར་མ་ལུས། དཀོན་མཆོག་ཡ་ཝཱེས་ཁོང་ཉིད་ཀྱི་ཞབས་ཕྱི་ཨེ་ལི་ཡཱ་བརྒྱུད་ནས་གསུངས་པ་དེ་བསྒྲུབས་པར་མཛད་ཅེས་སྨྲས་སོ། །
2KI 10:11 དེ་ལྟར་ཡེ་ཧུས་ཨ་ཧབ་ཀྱི་རྒྱུད་འཛིན་ཡེ་སི་རེ་ཨེལ་དུ་ལུས་པ་ཐམས་ཅད་དང་། ཁོའི་བློན་ཆེན་རྣམས་དང་། གྲོགས་པོ་རྣམས་དང་། མཆོད་དཔོན་རྣམས་ལས་གཅིག་ཀྱང་མ་ལུས་པར་སྲོག་དང་ཕྲལ་ཏོ། །
2KI 10:12 དེ་ནས་ཡེ་ཧུ་ལངས་ཏེ་སཱ་མར་ཡ་རུ་ཕྱིན་པ་དང་། བེད་ཨེ་ཀེད་བྱ་བ་ལུག་རྫི་ཡོད་སའི་ལམ་དུ།
2KI 10:13 ཡེ་ཧུ་ནི་ཡ་ཧུ་དཱའི་རྒྱལ་པོ་ཨ་ཧ་ཟི་ཡཱའི་སྤུན་རྣམས་དང་ཕྲད་ཅིང་། ཁྱོད་ཅག་སུ་ཡིན་དྲིས་པ་ན། དེ་དག་གིས་ལན་དུ། བདག་ཅག་ཨ་ཧ་ཟི་ཡཱའི་སྤུན་མཆེད་ཡིན་ཏེ་རྒྱལ་སྲས་རྣམས་དང་རྒྱལ་ཡུམ་གྱི་བུ་རྣམས་ལ་བདེ་འཚམས་ཞུ་རུ་འགྲོའོ་ཞུས་ཤིང་།
2KI 10:14 ཁོས་འདི་དག་གསོན་པོར་ཟུངས་ཤིག་ཅེས་བསྒོས་པར། ཁོའི་ལག་འོག་གི་མི་རྣམས་ཀྱིས་དེ་དག་གསོན་པོར་བཟུང་ནས་མི་བཞི་བཅུ་ཞེ་གཉིས་ལས་གཅིག་ཀྱང་མ་བཏང་བར། པེད་ཨེ་ཀེད་ཀྱི་ས་དོང་གི་འགྲམ་དུ་བསད་དོ། །
2KI 10:15 ཡང་ཡེ་ཧུ་དེ་ནས་ཆས་པ་ན། ཁོ་བསུ་རུ་འོངས་པའི་རེ་ཁབ་ཀྱི་བུ་ཡེ་ཧོ་ན་དབ་དང་ཕྲད་ཅིང་། ཁོས་དེ་ལ་ཁམས་འདྲི་ཞུས་རྗེས། ངའི་སེམས་ཁྱེད་ལ་དྲང་བ་ལྟར་ཁྱེད་ཀྱི་སེམས་ཀྱང་ང་ལ་དྲང་པོ་ཡིན་ནམ་ཞེས་པའི་ལན་དུ། ཡེ་ཧོ་ན་དབ་ཀྱིས་དྲང་པོ་ཡིན་སྨྲས་པ་ན། ཡེ་ཧུ་ན་རེ། དེ་འདྲ་ཡིན་ན་ཁྱོད་ཀྱི་ལག་པ་སྲོངས་ཤིག་ཅེས་པར། དེས་ལག་པ་བསྲིངས་པ་དང་ཡེ་ཧུས་ཁོ་ནི་རང་གི་ཤིང་རྟ་རུ་འཐེན།
2KI 10:16 ཡེ་ཧུ་ན་རེ། ཁྱོད་རང་ང་དང་མཉམ་དུ་འགྲོ་ལ་ངས་དཀོན་མཆོག་ཡ་ཝཱེ་ལ་བཅངས་པའི་ལྷག་སེམས་ལ་ལྟོས་ཤིག་སྨྲས་ཏེ། དེ་ནི་ཁོའི་ཤིང་རྟར་ཁྱེར་ནས་ལྷན་དུ་ཆས་སོ། །
2KI 10:17 དེ་ནས་ཁོ་སཱ་མར་ཡ་རུ་ཕྱིན་པ་དང་། དཀོན་མཆོག་ཡ་ཝཱེས་ཨེ་ལི་ཡཱ་ལ་གསུངས་པ་བཞིན་དུ། ཁོས་སཱ་མར་ཡ་རུ་ཤུལ་དུ་ལུས་པའི་ཨ་ཧབ་ཀྱི་མི་ཐམས་ཅད་བསད་དེ་མེད་པར་བྱས་སོ། །
2KI 10:18 དེ་ནས་ཡེ་ཧུས་མི་ཐམས་ཅད་བསྡུས་ནས་དེ་དག་ལ། ཨ་ཧབ་ཀྱིས་པཱ་ཨལ་ལ་ཉུང་ཙམ་དད་མོས་བྱས་ཀྱང་། ཡེ་ཧུས་དེ་ལས་ལྷག་པར་དད་མོས་བྱའོ། །
2KI 10:19 ད་ལྟ་པཱ་ཨལ་གྱི་ལུང་སྟོན་པ་ཐམས་ཅད་དང་། ཁོ་ལ་ཞབས་ཕྱི་སྒྲུབ་མཁན་ཐམས་ཅད་དང་། ཁོའི་མཆོད་དཔོན་ཐམས་ཅད་གཅིག་ཀྱང་མ་ལུས་པར་ངའི་མདུན་དུ་བོས་ཤིག ངས་པཱ་ཨལ་ལ་མཆོད་པ་ཆེན་པོ་ཞིག་འབུལ་རྒྱུ་ཡིན་པས། སུ་ཞིག་མ་འོངས་ན་གསོན་པོར་ལུས་པར་མི་འགྱུར་རོ་ཞེས་བསྒོས། ཡེ་ཧུས་དེ་ལྟར་གཡོ་སྒྱུའི་སྦྱོར་བ་སྤེལ་བ་ནི་པཱ་ཨལ་ལ་ཞབས་ཕྱི་སྒྲུབ་མཁན་ཐམས་ཅད་མེད་པར་གཏོང་བའི་ཕྱིར་དུ་ཡིན།
2KI 10:20 ཡང་ཡེ་ཧུ་ན་རེ། པཱ་ཨལ་ལ་གུས་པ་བྱེད་དུ་མི་ཀུན་སྡུས་ཤིག་ཅེས་བསྒོས་པས། མི་རྣམས་ཀྱིས་དེ་གསལ་བསྒྲགས་བྱས།
2KI 10:21 ཡེ་ཧུས་ཡེས་ར་ཨེལ་གྱི་ཡུལ་ཀུན་ཏུ་བང་ཆེན་མངགས་པས། པཱ་ཨལ་ལ་ཞབས་ཕྱི་སྒྲུབ་མཁན་ཐམས་ཅད་འོངས་པ་སྟེ། མི་ཡོང་བ་གཅིག་ཀྱང་མེད་ལ། དེ་རྣམས་པཱ་ཨལ་གྱི་མཆོད་ཁང་དུ་འཛུལ་ཏེ། པཱ་ཨལ་གྱི་མཆོད་ཁང་ནི་ཚུར་རོལ་ནས་ཕ་རོལ་བར་དུ་བཀང་བར་གྱུར་ཏོ། །
2KI 10:22 ཡེ་ཧུས་མཆོད་གོས་གཉེར་དཔོན་ལ། པཱ་ཨལ་ལ་ཞབས་ཕྱི་སྒྲུབ་མཁན་ཐམས་ཅད་ཀྱི་དོན་དུ་མཆོད་གོས་ཁྱེར་ཤོག་ཅེས་བསྒོས་པ་དང་། ཁོས་མཆོད་གོས་ཁྱེར་འོངས་ནས་དེ་དག་ལ་བསྐོན་པ་རེད།
2KI 10:23 དེ་ནས་ཡེ་ཧུ་དང་རེ་ཁབ་ཀྱི་བུ་ཡེ་ཧོ་ན་དབ་གཉིས་པཱ་ཨལ་གྱི་མཆོད་ཁང་དུ་འཛུལ་ཏེ། པཱ་ཨལ་གྱི་ཞབས་ཕྱི་རྣམས་ལ། ཞིབ་ཏུ་ལྟོས་དང་། འདིར་ཁྱོད་ཅག་གི་ཁྲོད་དུ་དཀོན་མཆོག་ཡ་ཝཱེའི་ཞབས་ཕྱི་གཅིག་ཀྱང་ཡོད་མི་རུང་སྟེ། པཱ་ཨལ་ལ་ཞབས་ཕྱི་སྒྲུབ་མཁན་འབའ་ཞིག་ཡོད་རུང་བ་ཡིན་ཞེས་བསྒོས།
2KI 10:24 དེ་ནས་མི་རྣམས་དམར་མཆོད་དང་སྦྱིན་སྲེག་འབུལ་བར་ནང་དུ་སོང་བ་དང་། ཡེ་ཧུས་ཕྱི་རོལ་ཏུ་མི་བརྒྱད་ཅུ་བཞག་ནས་དེ་དག་ལ། ཁྱོད་ཅག་གི་ལག་ཏུ་གཏད་པའི་མི་རྣམས་ལས་གཅིག་འབྲོ་རུ་བཅུག་ན། དེའི་ཚབ་ཏུ་སྲོག་ལན་འཇལ་དགོས་ཞེས་སྨྲས་སོ། །
2KI 10:25 དེ་ནས་ཡེ་ཧུས་སྦྱིན་སྲེག་གི་མཆོད་པ་ཕུལ་ཚར་བ་ཙམ་གྱིས། སྲུང་དམག་དང་དམག་དཔོན་རྣམས་ལ། ནང་དུ་འཛུལ་ནས་དེ་དག་སོད་ཅིག གཅིག་ཀྱང་ཕྱི་རོལ་ཏུ་འཐོན་པར་མི་བྱའོ་ཞེས་སྨྲས་པས། སྲུང་དམག་དང་དམག་དཔོན་རྣམས་ཀྱིས་མི་དེ་དག་རལ་གྲིས་བསྣུན་ཏེ། དེ་དག་གི་རོ་རྣམས་ཕྱི་རོལ་ཏུ་འཕངས་པ་དང་པཱ་ཨལ་མཆོད་ཁང་གི་སྦུག་ཏུ་ཕྱིན་ནས།
2KI 10:26 པཱ་ཨལ་མཆོད་ཁང་ལས་རྡོ་སྐུ་རྣམས་བཏོན་ནས་མེ་ལ་བསྲེགས།
2KI 10:27 པཱ་ཨལ་གྱི་ལྷ་རྟེན་བཅག་སྟེ། པཱ་ཨལ་མཆོད་ཁང་བཤིག་ཅིང་དེ་རིང་གི་བར་དུ་གསང་སྤྱོད་བྱས་སོ། །
2KI 10:28 དེ་ལྟར་ཡེ་ཧུས་པཱ་ཨལ་ནི་ཡེས་ར་ཨེལ་གྱི་ཁྲོད་ནས་མེད་པར་བྱས་ཀྱང་།
2KI 10:29 ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་མ་སྤངས་ཏེ། པེད་ཨེལ་དང་དཱན་དུ་ཡོད་པའི་གསེར་གྱི་བ་ཕྲུག་གཉིས་ལས་ཕྱིར་མ་འཁོར་རོ། །
2KI 10:30 དེར་དཀོན་མཆོག་ཡ་ཝཱེས་ཡེ་ཧུ་ལ། ཁྱོད་ཀྱིས་བདག་གི་སྤྱན་སྔར་ལེགས་པོ་གང་ཡིན་དེ་བསྒྲུབས་ཤིང་། ངའི་སེམས་ལ་ཅི་ཡོད་པ་ལྟར་ཨ་ཧབ་ལ་བྱས་པས། མི་རབས་བཞིའི་རིང་དུ་ཁྱོད་ཀྱི་བུ་རྣམས་ཡེས་ར་ཨེལ་གྱི་རྒྱལ་ཁྲིར་འགོད་པར་འགྱུར་ཞེས་གསུངས་ཀྱང་།
2KI 10:31 ཡེ་ཧུས་སེམས་ཧྲིལ་པོས་ཡེས་ར་ཨེལ་གྱི་དཀོན་མཆོག་ཡ་ཝཱེའི་བཀའ་ཁྲིམས་མ་བསྲུངས་ཏེ། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ཡེ་རོབ་ཨམ་གྱི་སྡིག་པ་རྣམས་མ་སྤངས་སོ། །
2KI 10:32 དེའི་ཚེ་དཀོན་མཆོག་ཡ་ཝཱེས་ཡེས་ར་ཨེལ་ཉམས་དམས་སུ་མཛད་ཅིང་། ཧ་ཟཱ་ཨེལ་གྱིས་ཡེས་ར་ཨེལ་གྱི་ས་མཚམས་ཐམས་ཅད་ནས་དེ་དག་ལ་རྒོལ་བ་སྟེ།
2KI 10:33 ཡོར་དན་གཙང་པོའི་ཤར་ཕྱོགས་ནས་གིལ་ཨད་ཀྱི་ཡུལ་ཀུན་དང་། གཱ་རྡུ་པ་དང་རུ་བེན་པ། མཱ་ན་ཤེ་པ་རྣམས་ཀྱི་ཡུལ་དང་། ཨར་ནོན་གྲམ་པ་དང་ཉེ་བའི་ཨ་རོ་ཨེར་ནས་གིལ་ཨད་དང་པཱ་ཤན་བར་དུའོ། །
2KI 10:34 དེ་ཡང་ཡེ་ཧུ་ཡི་དོན་གཞན་རྣམས་དང་ཁོས་ཅི་དང་ཅི་བྱས་པ་ཐམས་ཅད་དང་། ཁོའི་དཔའ་བོའི་མཛད་རྗེས་སོགས་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 10:35 དེ་ནས་ཡེ་ཧུ་རང་གི་ཕ་མེས་རྣམས་ཀྱི་ཁྲོད་དུ་གཟིམས་པ་དང་། དེ་དག་གིས་ཁོ་སཱ་མར་ཡ་རུ་དུར་ལ་སྦས་ཤིང་ཁོའི་སྲས་ཡེ་ཧོ་ཨ་ཧཱ་ཟི་དེའི་རྒྱུན་མཐུད་ནས་རྒྱལ་པོ་བྱས།
2KI 10:36 ཡེ་ཧུས་སཱ་མར་ཡ་རུ་ལོ་ཉེར་བརྒྱད་ཀྱི་རིང་ཡེས་ར་ཨེལ་ལ་རྒྱལ་སྲིད་བསྐྱངས་པའོ། །
2KI 11:1 དེ་ནས་ཨ་ཧ་ཟི་ཡཱ་ཡི་མ་ཨ་ཐལ་ཡཱས་རང་གི་བུ་ཤི་ཟིན་པ་མཐོང་མ་ཐག་ཏུ། ལངས་ནས་རྒྱལ་རྒྱུད་ཐམས་ཅད་བསད་ཀྱང་།
2KI 11:2 རྒྱལ་པོ་ཡེ་ཧོ་རཱམ་གྱི་སྲས་མོ་ཨ་ཧ་ཟི་ཡཱའི་སྲིང་མོ་ཡེ་ཧོ་ཤེ་བ་ཡིས། ཨ་ཧ་ཟི་ཡཱའི་བུ་ཡོ་ཨ་སི་ནི་གསོད་པར་འགྱུར་བའི་རྒྱལ་སྲས་རྣམས་ལས་བརྐུས་ཏེ། ཁོ་དང་ཁོའི་མ་མ་གཉིས་གཟིམ་ཁང་ནང་དུ་བཞག་པ་དང་། དེ་དག་གིས་ཁོ་ཨ་ཐལ་ཡཱ་ལས་སྦས་པའི་རྐྱེན་གྱིས་མ་ཤི་བ་རེད།
2KI 11:3 དེ་ལྟར་ཨ་ཐལ་ཡཱ་ཡིས་ཡུལ་ཁམས་དེ་རུ་རྒྱལ་སྲིད་བསྐྱངས་པ་དང་། ཡོ་ཨ་སི་དང་ཁོའི་མ་མ་གཉིས་ལོ་དྲུག་གི་རིང་དཀོན་མཆོག་ཡ་ཝཱེའི་མཆོད་ཁང་ནང་དུ་སྦས་ནས་བསྡད་དོ། །
2KI 11:4 དེ་ཡང་ལོ་བདུན་པར་ཡེ་ཧོ་ཡ་དཱ་ཡིས་ཀཱ་རེ་པ་རྣམས་དང་། སྲུང་དམག་རྣམས་ཀྱི་བརྒྱ་དཔོན་རྣམས་འབོད་པར་མི་མངགས་པ་དང། དེ་རྣམས་ཁོའི་དྲུང་དུ་དཀོན་མཆོག་ཡ་ཝཱེའི་མཆོད་ཁང་དུ་ཁྲིད་ཅིང་། དེ་དག་བར་དམ་བཅའ་བཞག་ནས་དེ་དག་གིས་དཀོན་མཆོག་ཡ་ཝཱེའི་མཆོད་ཁང་ནང་དུ་མནའ་བསྐྱལ་བ་ན། ཁོས་དེ་དག་ལ་རྒྱལ་སྲས་དེ་བསྟན་ཏོ། །
2KI 11:5 ཡང་ཁོས་དེ་རྣམས་ལ་བཀའ་བསྒོས་ཏེ། ཁྱོད་ཅག་གིས་བྱེད་དགོས་པ་ནི་འདི་ལྟ་སྟེ། ཁྱོད་ཅག་ལས་ངལ་གསོ་བའི་ཉིན་མོར་ལས་རེས་ཡིན་པ་རྣམས་ལས་སུམ་ཆའི་གཅིག་གིས་རྒྱལ་པོའི་ཕོ་བྲང་བསྲུང་དགོས།
2KI 11:6 ཡང་སུམ་ཆའི་གཅིག་ནི་སུར་བྱ་བའི་རྒྱ་སྒོར་སྡོད་དགོས་ལ། སུམ་ཆའི་གཅིག་གིས་སྲུང་དམག་རྣམས་ཀྱི་ལྟག་སྒོ་རུ་བསྡད་ནས་ཕོ་བྲང་སྲུང་རེས་བྱེད་དགོས།
2KI 11:7 ངལ་གསོ་བའི་ཉིན་མོར་ལས་རེས་ལ་མ་བབས་པའི་ཁག་གཉིས་ཀྱིས་རྒྱལ་པོའི་ཕྱིར་དུ་དཀོན་མཆོག་ཡ་ཝཱེའི་མཆོད་ཁང་བསྲུང་བར་གྱིས་ཤིག
2KI 11:8 ཁྱོད་ཅག་གིས་རང་རང་གི་མཚོན་ཆ་ལག་ཏུ་བཟུང་སྟེ་རྒྱལ་པོ་བསྐོར་ནས་སྡོད་དགོས། གཞན་སུ་ཞིག་རང་དགར་དམག་གྲལ་དུ་འཛུལ་འོངས་ན་དེ་གསོད་དགོས་ལ། རྒྱལ་པོ་ཕྱི་ནང་གང་དུ་འགྲོ་དུས་ཀྱང་ཁྱོད་རྣམས་རྒྱལ་པོ་དང་མཉམ་དུ་སྡོད་དགོས་ཞེས་བསྒོས་པའོ། །
2KI 11:9 དེ་ནས་བརྒྱ་དཔོན་རྣམས་ཀྱིས་མཆོད་དཔོན་ཡེ་ཧོ་ཡ་དཱ་ཡི་བཀའ་བཀོད་བཞིན་དུ་བྱས། དེ་དག་གིས་རང་རང་གི་མི་སྟེ། ངལ་གསོ་བའི་ཉིན་མོའི་ལས་རེས་ཡིན་མིན་ཐམས་ཅད་ཁྲིད་ནས་མཆོད་དཔོན་ཡེ་ཧོ་ཡ་དཱ་ཡི་དྲུང་དུ་འོངས་པ་དང་།
2KI 11:10 ཡེ་ཧོ་ཡ་དཱ་ཡིས་དཀོན་མཆོག་ཡ་ཝཱེའི་མཆོད་ཁང་དུ་ཡོད་པའི་རྒྱལ་པོ་དཱ་བིད་ཀྱི་མདུང་དང་ཕུབ་རྣམས་བརྒྱ་དཔོན་རྣམས་ལ་སྤྲད་ཅིང་།
2KI 11:11 སྲུང་དམག་རྣམས་ཀྱིས་རང་རང་གི་མཚོན་ཆ་ལག་ཏུ་བཟུང་སྟེ། མཆོད་ཁང་གི་གཡས་ཕྱོགས་ནས་གཡོན་ཕྱོགས་བར་དུ། མཆོད་ཁྲི་དང་མཆོད་ཁང་གི་ཉེ་འཁྲིས་སུ་རྒྱལ་པོ་བསྐོར་ནས་བསྡད་དོ། །
2KI 11:12 དེ་ནས་ཡེ་ཧོ་ཡ་དཱ་ཡིས་རྒྱལ་སྲས་ཕྱི་རོལ་ཏུ་ཁྲིད་འོངས་ཏེ་ཁོའི་དབུ་ལ་ཅོད་པན་སྤྲས་ནས་དཔང་ཡིག་ཕུལ་བ་དང་། དེ་དག་གིས་རྒྱལ་པོར་མངའ་གསོལ་ཞིང་སྣུམ་གྱིས་བྱུགས་པ་ན། མི་རྣམས་ཀྱིས་ཐལ་མོ་བརྡབས་ཏེ་རྒྱལ་པོ་ཁྲི་ལོར་བརྟན་པར་ཤོག་ཅེས་བསྒྲགས་སོ། །
2KI 11:13 དེ་ནས་ཨ་ཐལ་ཡཱ་ཡིས་སྲུང་དམག་རྣམས་དང་མི་ཚོགས་ཀྱི་ཀི་སྒྲ་ཐོས་པས། དཀོན་མཆོག་ཡ་ཝཱེའི་མཆོད་ཁང་དུ་མི་རྣམས་ཀྱི་རྩར་སོང་སྟེ།
2KI 11:14 ཁོ་མོས་བལྟས་པའི་ཚེ། རྒྱལ་པོ་ནི་ཁྲིམས་བཞིན་དུ་ཀ་བའི་མདུན་དུ་ལངས་སྡོད་པ་དང་། བརྒྱ་དཔོན་རྣམས་དང་། དུང་འབུད་མཁན་རྣམས་རྒྱལ་པོའི་དྲུང་དུ་འགྲེང་ཞིང་། ཡུལ་ཁམས་ཀྱི་མི་ཐམས་ཅད་ཀྱིས་དགའ་ཞིང་དུང་འབུད་པ་མཐོང་བས། ཨ་ཐལ་ཡཱ་ཡིས་རང་གི་གོས་གཤགས་ཏེ་སྐད་ཆེན་པོས། འདིར་གཡོ་སྒྱུ་འདུག འདིར་གཡོ་སྒྱུ་འདུག་ཅེས་བསྒྲགས་པ་ན།
2KI 11:15 མཆོད་དཔོན་ཡེ་ཧོ་ཡ་དཱ་ཡིས་དམག་ཚོགས་ཀྱི་བཀོད་འདོམས་པ་བརྒྱ་དཔོན་རྣམས་ལ་བཀའ་བཏང་ཞིང་། ཁོ་མོ་དམག་ཚོགས་ཀྱི་བར་ནས་ཕྱི་རོལ་ཏུ་ཁྲིད་ཅིག དེའི་རྗེས་སུ་འབྲང་མཁན་རྣམས་ཀྱང་རལ་གྲིས་སོད་ཅིག་ཅེས་བསྒོས་སོ། །ཅི་ལ་ཞེ་ན། མཆོད་དཔོན་གྱིས་དཀོན་མཆོག་ཡ་ཝཱེའི་མཆོད་ཁང་དུ་ཁོ་མོ་གསོད་མི་རུང་ཞེས་བཀའ་བསྩལ་ཏོ། །
2KI 11:16 དེ་བས་ཁོ་ཚོས་ཁོ་མོ་བཟུང་ནས་ཁྱེར་ཅིང་། རྒྱལ་པོའི་ཕོ་བྲང་གི་རྟ་འདེད་སའི་འགྲོ་ལམ་བརྒྱུད་ནས་འགྲོ་དུས་དེར་ཁོ་མོ་སྲོག་དང་ཕྲལ་ཏོ། །
2KI 11:17 དེ་ནས་ཡེ་ཧོ་ཡ་དཱ་ཡིས་མི་རྣམས་ནི་དཀོན་མཆོག་ཡ་ཝཱེའི་འབངས་མིར་འགྱུར་ཕྱིར། དཀོན་མཆོག་ཡ་ཝཱེ་དང་རྒྱལ་པོ་དང་མི་སྡེ་གསུམ་གྱི་བར་ཁ་ཆད་བཞག་པ་དང་། མི་རྣམས་དང་རྒྱལ་པོའི་བར་དུ་ཡང་ཁ་ཆད་བཞག
2KI 11:18 དེ་ནས་ཡུལ་ཁམས་ཀྱི་མི་ཐམས་ཅད་པཱ་ཨལ་གྱི་ལྷ་ཁང་དུ་སོང་ནས་དེ་བརླགས་ཤིང་། དེའི་མཆོད་ཁྲི་དང་སྐུ་འདྲ་རྣམས་ཡོངས་སུ་བཅག པཱ་ཨལ་གྱི་མཆོད་དཔོན་མད་ཐན་ནི་མཆོད་ཁྲི་རྣམས་ཀྱི་མདུན་དུ་བསད། ཡང་མཆོད་དཔོན་ཡེ་ཧོ་ཡ་དཱ་ཡིས་དཀོན་མཆོག་ཡ་ཝཱེའི་མཆོད་ཁང་སྲུང་མཁན་འགོ་དཔོན་ཡང་བསྐོས་པ་དང་།
2KI 11:19 བརྒྱ་དཔོན་རྣམས་དང་ཀཱ་རེ་པ་རྣམས། སྲུང་དམག་རྣམས་དང་ཡུལ་ཁམས་ཀྱི་མི་ཐམས་ཅད་ཁྲིད་ཅིང་། དེ་དག་གིས་རྒྱལ་པོ་ནི་དཀོན་མཆོག་ཡ་ཝཱེའི་མཆོད་ཁང་ནས་མར་ཁྲིད་པ་དང་། སྲུང་དམག་གི་སྒོ་བརྒྱུད་ནས་རྒྱལ་པོའི་ཕོ་བྲང་དུ་གདན་དྲངས་ཤིང་། དེ་ལྟར་ཡོ་ཨ་སི་ནི་རྒྱལ་པོ་རྣམས་ཀྱི་ཁྲི་ལ་བསྡད།
2KI 11:20 ཡུལ་ཁམས་ཀྱི་མི་རྣམས་དགའ་མགུར་ལོངས་སྤྱད་ཅིང་། ཨ་ཐལ་ཡཱ་རྒྱལ་པོའི་ཕོ་བྲང་ནས་རལ་གྲིས་བཀུམས་རྗེས་གྲོང་ཁྱེར་དེ་ལྷིངས་འཇགས་སུ་གྱུར་ཏོ། །
2KI 11:21 ཡོ་ཨ་སི་ཡིས་རྒྱལ་སྲིད་སྐྱོང་དུས་ཁོ་ལོ་བདུན་ཡིན་ནོ། །
2KI 12:1 དེ་ཡང་ཡེ་ཧུས་རྒྱལ་སྲིད་བསྐྱངས་པའི་ལོ་བདུན་པར། ཡོ་ཨ་སི་རྒྱལ་པོར་གྱུར་ཏེ་ལོ་བཞི་བཅུའི་རིང་ཡེ་རུ་སཱ་ལེམ་དུ་རྒྱལ་སྲིད་བསྐྱངས། ཁོའི་ཡུམ་གྱི་མིང་ལ་ཙིབ་ཡཱ་ཟེར་ཏེ་པེར་ཤ་བཱ་ཞེས་པའི་གྲོང་ཁྱེར་གྱི་མི་ཡིན་ནོ། །
2KI 12:2 མཆོད་དཔོན་ཡེ་ཧོ་ཡ་དཱ་ཡིས་མཛུབ་ཁྲིད་གནང་བའི་ཉིན་དག་ལ། ཡོ་ཨ་སི་ཡིས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་དོ། །
2KI 12:3 འོན་ཀྱང་མཐོ་གླིང་རྣམས་བརླག་པར་མ་གྱུར་པས། མི་རྣམས་ཀྱིས་སྔར་བཞིན་མཐོ་གླིང་གི་སྟེང་དུ་མཆོད་པ་ཕུལ་ནས་བསང་བཏང་བ་ཡིན་ནོ། །
2KI 12:4 དེ་ནས་ཡོ་ཨ་སི་ཡིས་མཆོད་དཔོན་རྣམས་ལ། དཀོན་མཆོག་ཡ་ཝཱེའི་མཆོད་ཁང་དུ་དམ་པར་ཕུལ་བའི་དངུལ་ཐམས་ཅད་དེ། མི་རེ་རེས་ཁྲལ་དུ་འཇལ་བའི་དངུལ་དང་། མི་རེ་ལ་དཔྱ་ཁྲལ་དུ་ཕོག་པའི་དངུལ་དང་། སེམས་ལ་སྐུལ་སློང་ཐེབས་ཏེ་རང་མོས་ཀྱིས་དཀོན་མཆོག་ཡ་ཝཱེའི་མཆོད་ཁང་ལ་ཕུལ་བའི་དངུལ་ཚང་མ།
2KI 12:5 ཁྱོད་མཆོད་དཔོན་རྣམས་ཀྱིས་རང་ལ་ཞལ་འདེབས་འབུལ་མཁན་དག་ལས་བླངས་ཏེ། མཆོད་ཁང་གང་དུ་ཞིག་རལ་དུ་སོང་ཡོད་ན་དེར་ཞིག་གསོ་བྱེད་པར་སྤྱོད་ཅིག་ཅེས་བསྒོས་སོ། །
2KI 12:6 འོན་ཀྱང་རྒྱལ་པོ་ཡོ་ཨ་སི་ཡིས་སྲིད་བསྐྱངས་ནས་ལོ་ཉེར་གསུམ་པ་ལ་སླེབས་པའི་དུས་སུ། མཆོད་དཔོན་རྣམས་ཀྱིས་མཆོད་ཁང་ཞིག་རལ་དུ་སོང་ཡོད་ས་རྣམས་ད་དུང་ཞིག་གསོ་མ་བྱས་པ་རེད།
2KI 12:7 དེ་བས་རྒྱལ་པོ་ཡོ་ཨ་སི་ཡིས་མཆོད་དཔོན་ཡེ་ཧོ་ཡ་དཱ་དང་། མཆོད་དཔོན་གཞན་རྣམས་བོས་ནས་དེ་དག་ལ། ཁྱོད་ཚོས་ཅིའི་ཕྱིར་མཆོད་ཁང་ཞིག་རལ་དུ་སོང་ཡོད་ས་རྣམས་ཞིག་གསོ་མ་བྱས་སམ། ད་ནི་རང་གིས་ཞལ་འདེབས་འབུལ་མཁན་ནས་དངུལ་མི་ལེན་པར། བླངས་ཟིན་པ་རྣམས་མཆོད་ཁང་ཞིག་རལ་དུ་སོང་ཡོད་ས་རྣམས་ཞིག་གསོ་བྱེད་པར་ཐོངས་ཤིག་ཅེས་བསྒོས་པ་ལ།
2KI 12:8 མཆོད་དཔོན་རྣམས་ཀྱིས་མི་རྣམས་ལས་དངུལ་མི་ལེན་པ་དང་། མཆོད་ཁང་ཡང་ཞིག་གསོ་མི་བྱེད་པ་ཁས་བླངས་སོ། །
2KI 12:9 དེ་ནས་མཆོད་དཔོན་ཡེ་ཧོ་ཡ་དཱ་ཡིས་སྒྲོམ་བུ་ཞིག་ཁྱེར་འོངས་ཤིང་། དེའི་སྟེང་དུ་བུ་ག་བཏོད་ནས་དཀོན་མཆོག་ཡ་ཝཱེའི་མཆོད་ཁང་དུ་འོང་སའི་གཡས་ཕྱོགས་ཀྱི་མཆོད་ཁྲིའི་འགྲམ་དུ་བཞག མཆོད་དཔོན་སྒོ་སྲུང་ཚོས་དཀོན་མཆོག་ཡ་ཝཱེའི་མཆོད་ཁང་དུ་ཕུལ་བའི་དངུལ་ཚང་མ་དེའི་ནང་དུ་བཅུག
2KI 12:10 ཡང་དེ་དག་གིས་སྒྲོམ་བུ་ནང་གི་དངུལ་ཇེ་མང་ཡིན་པ་མཐོང་བའི་ཚེ་ན། རྒྱལ་པོའི་དྲུང་ཡིག་དང་མཆོད་དཔོན་ཆེན་པོ་བཅས་ཡར་འོངས་ཤིང་། དཀོན་མཆོག་ཡ་ཝཱེའི་མཆོད་ཁང་ནས་རྙེད་པའི་དངུལ་རྣམས་བརྩིས་ནས་སྒྱེ་མོ་ནང་དུ་བཅུག་པ་དང་།
2KI 12:11 དངུལ་དེ་རྣམས་སྲང་ལ་བཏེགས་ནས་དཀོན་མཆོག་ཡ་ཝཱེའི་མཆོད་ཁང་བསྐྱར་བཞེངས་བྱེད་མཁན་ཚོའི་ལས་དཔོན་གྱི་ལག་ཏུ་སྤྲད་པ་དང་། དེ་དག་གིས་དཀོན་མཆོག་ཡ་ཝཱེའི་མཆོད་ཁང་གི་ཤིང་བཟོ་དང་རྩིག་བཟོ་དང་།
2KI 12:12 འཇིམ་བཟོ་དང་རྡོ་བཟོ་བཅས་རྣམས་ལ་གླ་ཆ་སྤྲད་ཅིང་། དཀོན་མཆོག་ཡ་ཝཱེའི་མཆོད་ཁང་ཞིག་རལ་དུ་སོང་ཡོད་ས་རྣམས་ཞིག་གསོ་བྱེད་པའི་ཕྱིར་དུ་གདུང་མ་དང་འཇམ་ཤ་བཏོད་པའི་རྡོ་ཉོ་བྱེད་དང་། མཆོད་ཁང་ཞིག་གསོ་བྱེད་པའི་འགྲོ་སོང་དུ་བཏང་བ་རེད།
2KI 12:13 འོན་ཀྱང་དཀོན་མཆོག་ཡ་ཝཱེའི་མཆོད་ཁང་དུ་ཕུལ་བའི་དངུལ་དེ་ལས་ནི། དཀོན་མཆོག་ཡ་ཝཱེའི་མཆོད་ཁང་གི་ཆེད་དུ་དངུལ་སྐྱོགས་དང་ཅེམ་ཙེ། ཕོར་བ་དང་དུང་། གསེར་རམ་དངུལ་གྱི་སྣོད་ཆས་གང་ཡང་མ་བཟོས་པ་ཡིན།
2KI 12:14 དངུལ་དེ་ལས་བཟོ་རྣམས་ལ་སྤྲད་ནས་དེ་དག་གིས་དངུལ་དེ་དཀོན་མཆོག་ཡ་ཝཱེའི་མཆོད་ཁང་ཞིག་རལ་དུ་སོང་ཡོད་ས་རྣམས་ཞིག་གསོ་བྱེད་པར་བཀོལ་བ་དང་།
2KI 12:15 ལས་མི་དེ་དག་གིས་གཞུང་དྲང་སྒོས་དོན་བསྒྲུབས་པའི་རྐྱེན་གྱིས་དེ་དག་ལ་སྤྲོད་རྒྱུར་དངུལ་གཏད་ཡོད་པ་རྣམས་རྩིས་མ་བརྒྱབ་པ་རེད།
2KI 12:16 འོན་ཀྱང་ཉེས་སེལ་མཆོད་པ་དང་སྡིག་བཤགས་མཆོད་པའི་དངུལ་ནི་དཀོན་མཆོག་ཡ་ཝཱེའི་མཆོད་ཁང་དུ་མ་བླངས་ཏེ། དེ་ནི་མཆོད་དཔོན་རྣམས་ལ་གཏོགས་སོ། །
2KI 12:17 དེའི་ཚེ། ཨ་རམ་གྱི་རྒྱལ་པོ་ཧ་ཟཱ་ཨེལ་ཡར་འོངས་ཤིང་གཱད་ཅེས་པར་དམག་འཁྲུག་བརྒྱབ་ནས་བདག་ཏུ་བཟུང་། ཡང་ཧ་ཟཱ་ཨེལ་གྱིས་ཡར་འོངས་ནས་ཡེ་རུ་སཱ་ལེམ་ལ་དམག་འཁྲུག་རྒྱག་པའི་སེམས་ཐག་བཅད་པ་དང་།
2KI 12:18 ཡ་ཧུ་དཱའི་རྒྱལ་པོ་ཡོ་ཨ་སི་ཡིས་རང་གི་མེས་པོ་སྟེ། ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་དང་ཡེ་ཧོ་རཱམ། ཨ་ཧ་ཟི་ཡཱ་གསུམ་གྱིས་བསྔོས་པའི་རྫས་དམ་པ་རྣམས་དང་རང་གིས་བསྔོས་པའི་རྫས་དམ་པ། དཀོན་མཆོག་ཡ་ཝཱེའི་མཆོད་ཁང་གི་དཀོར་མཛོད་དང་། རྒྱལ་པོའི་ཕོ་བྲང་དུ་ཡོད་པའི་གསེར་ཐམས་ཅད་བླངས་ནས་ཨ་རམ་གྱི་རྒྱལ་པོ་ཧ་ཟཱ་ཨེལ་ལ་ཕུལ་བ་ན། ཧ་ཟཱ་ཨེལ་ནི་ཡེ་རུ་སཱ་ལེམ་དང་བྲལ་ནས་སོང་ངོ་། །
2KI 12:19 དེ་ཡང་ཡོ་ཨ་སི་ཡི་དོན་གཞན་རྣམས་དང་། ཁོས་ཅི་བྱས་པ་ཐམས་ཅད་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 12:20 ཡོ་ཨ་སི་ཡི་འཁོར་གཡོག་རྣམས་ལངས་ནས་ལྐོག་ཇུས་བྱས་ཏེ། ཁོ་རང་མར་སིལ་ལཱ་རུ་སླེབས་པའི་ལམ་དུ་མིལ་ལོའི་ཁང་པ་རུ་བསྣུན་ནས་བསད།
2KI 12:21 ཁོའི་འཁོར་གཡོག་ནང་གི་ཤིམ་ཨད་ཀྱི་བུ་ཡོ་ཟཱ་བད་དང་། ཤོ་མེར་གྱི་བུ་ཡེ་ཧོ་ཟཱ་བད་གཉིས་ཀྱིས་ཡོ་ཨ་སི་ལ་བསྣུན་པས་ཤི་བ་དང་། ཁོ་དཱ་བིད་ཀྱི་གྲོང་ཁྱེར་དུ་ཁོའི་མེས་པོ་རྣམས་དང་ལྷན་དུ་དུར་ལ་སྦས་ཤིང་། ཁོའི་སྲས་ཨ་མཱ་ཙི་ཡ་ཡིས་དེའི་རྒྱུན་མཐུད་ནས་རྒྱལ་སྲིད་བཟུང་ངོ་། །
2KI 13:1 དེ་ཡང་ཡ་ཧུ་དཱའི་རྒྱལ་པོ་ཨ་ཧ་ཟི་ཡཱའི་སྲས་ཡོ་ཨ་སི་ཡིས་རྒྱལ་སྲིད་བཟུང་ནས་ལོ་ཉེར་གསུམ་པར། ཡེ་ཧུའི་སྲས་ཡེ་ཧོ་ཨ་ཧཱ་ཟི་བྱ་བ་དེས་སཱ་མར་ཡ་རུ་ཡེས་ར་ཨེལ་གྱི་རྒྱལ་སྲིད་ལོ་བཅུ་བདུན་ལ་བསྐྱངས།
2KI 13:2 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པའི་རྗེས་སུ་འབྲངས་ཤིང་། དེ་རྣམས་ལས་བྱོལ་བར་མ་གྱུར་ཏོ། །
2KI 13:3 དེ་བས་དཀོན་མཆོག་ཡ་ཝཱེའི་ཐུགས་ཁྲོ་ཡེས་ར་ཨེལ་པའི་ཐོག་ཏུ་བབས་ཏེ། ཁོང་གིས་དེ་རྣམས་རྒྱུན་དུ་ཨ་རམ་གྱི་རྒྱལ་པོ་ཧ་ཟཱ་ཨེལ་དང་དེའི་བུ་པེན་ཧ་དཱད་ཀྱི་ལག་ཏུ་གཏད།
2KI 13:4 དེ་ནས་ཡེ་ཧོ་ཨ་ཧཱ་ཟི་ཡིས་དཀོན་མཆོག་ཡ་ཝཱེ་ལ་གདོང་ཕྱོགས་ཏེ་ཞུ་འབོད་བྱས་པར་ཁོང་གིས་གསན་པར་མཛད། ཅིའི་ཕྱིར་ཞེ་ན། ཁོང་གིས་ཡེས་ར་ཨེལ་ལ་ཐེབས་པའི་མནར་གཅོད་དེ། ཨ་རམ་གྱི་རྒྱལ་པོས་དེ་རྣམས་ཇི་ལྟར་སྡུག་ལ་སྦྱར་བའི་མནར་གཅོད་དེ་གཟིགས་སོ། །
2KI 13:5 དེ་བས་དཀོན་མཆོག་ཡ་ཝཱེས་ཡེས་ར་ཨེལ་ལ་སྐྱབས་མགོན་ཞིག་གནང་ནས་ཨ་རམ་པའི་ལག་ནས་བསྐྱབས་པ་དང་། ཡེས་ར་ཨེལ་པ་རྣམས་སྔར་བཞིན་རང་རང་གི་གུར་དུ་གནས་སོ། །
2KI 13:6 འོན་ཀྱང་དེ་རྣམས་ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ཡེ་རོབ་ཨམ་པའི་ཁྱིམ་གྱི་སྡིག་པ་རྣམས་ལས་མ་བྱོལ་བར་དེའི་ནང་དུ་འགྲུལ་ཞིང་། སཱ་མར་ཡ་རུ་ཨ་ཤེ་རཱ་ནི་ད་དུང་བསླངས་ཡོད་པ་རེད།
2KI 13:7 ཡང་ཨ་རམ་གྱི་རྒྱལ་པོས་དེ་རྣམས་མེད་པར་བཟོས་ཏེ་གཡུལ་ཁའི་རྡུལ་ལྟར་བརྫིས་པའི་རྐྱེན་གྱིས། དམག་སྡེ་ལས་ཡེ་ཧོ་ཨ་ཧཱ་ཟི་ལ་སྐྱ་དམག་ལྔ་བཅུ་དང་། ཤིང་རྟ་བཅུ་དང་། རྐང་དམག་སྟོང་ཕྲག་བཅུ་མ་གཏོགས་ལུས་སུ་མ་བཅུག་གོ །
2KI 13:8 ཡེ་ཧོ་ཨ་ཧཱ་ཟིའི་དོན་གཞན་རྣམས་དང་ཁོས་ཅི་དང་ཅི་བྱས་པ་ཐམས་ཅད། ཁོའི་དཔའ་བོའི་མཛད་རྗེས་བཅས་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 13:9 ཡེ་ཧོ་ཨ་ཧཱ་ཟི་རང་གི་ཕ་མེས་ཀྱི་ཁྲོད་དུ་གཟིམས་ནས་སཱ་མར་ཡ་རུ་དུར་ལ་སྦས་པ་དང་། ཁོའི་སྲས་ཡེ་ཧོ་ཨ་སི་ནི་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 13:10 ཡ་ཧུ་དཱའི་རྒྱལ་པོ་ཡོ་ཨ་སི་ཡིས་རྒྱལ་སྲིད་བསྐྱངས་པའི་ལོ་སོ་བདུན་པར། ཡེ་ཧོ་ཨ་ཧཱ་ཟི་ཡི་སྲས་ཡེ་ཧོ་ཨ་སི་བྱ་བ་སཱ་མར་ཡ་རུ་ཡེས་ར་ཨེལ་གྱི་རྒྱལ་པོ་བྱས་ཏེ། ལོ་བཅུ་དྲུག་གི་རིང་ལ་རྒྱལ་སྲིད་བསྐྱངས།
2KI 13:11 ཁོས་ཀྱང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་པ་དང་། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་གྱི་བུ་ཡེ་རོབ་ཨམ་གྱི་སྡིག་པ་རྣམས་ལས་ཕྱིར་མ་བཟློགས་པར། ཁོ་སྡིག་པ་དེའི་ནང་དུ་འགྲུལ་ཏོ། །
2KI 13:12 ཡང་ཡོ་ཨ་སི་ཡི་དོན་གཞན་རྣམས་དང་ཁོས་ཅི་དང་ཅི་བྱས་པ་ཐམས་ཅད། ཡ་ཧུ་དཱའི་རྒྱལ་པོ་ཨ་མཱ་ཙི་ཡ་དང་དམག་འཁྲུག་བརྒྱབ་པའི་དཔའ་བོའི་མཛད་རྗེས་བཅས་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 13:13 ཡེ་ཧོ་ཨ་སི་རང་གི་མེས་པོའི་ཁྲོད་དུ་གཟིམས་པ་དང་། ཡེ་རོབ་ཨམ་ནི་ཁོའི་རྒྱལ་ཁྲིར་བཀོད་ཅིང་། ཡེ་ཧོ་ཨ་སི་ནི་སཱ་མར་ཡ་རུ་ཡེས་ར་ཨེལ་གྱི་རྒྱལ་པོ་རྣམས་ཀྱི་ཁྲོད་དུ་དུར་ལ་སྦས་སོ། །
2KI 13:14 དེའི་དུས་སུ་ཨེ་ལི་ཤཱ་ལ་ཁོང་འཆི་བར་འཇུག་པའི་སྙུང་གཞི་བྱུང་བས། ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཁོང་གི་དྲུང་དུ་མར་འོངས་ནས་ཁོང་གི་ཞལ་ངོར་བཤུམས་ཤིང་། ངའི་ཡབ་ལགས། ངའི་ཡབ་ལགས། ཡེས་ར་ཨེལ་གྱི་དམག་འཐབ་ཤིང་རྟ་དང་སྐྱ་དམག་རྣམས་ཞེས་ཞུས་པ་ལ།
2KI 13:15 ཨེ་ལི་ཤཱས་དེ་ལ། མདའ་གཞུ་ཁྱེར་ཤོག་ཅེས་བསྒོས་ཤིང་། ཁོས་མདའ་གཞུ་ལག་ཏུ་བླངས་པ་དང་།
2KI 13:16 ཁོང་གིས་ཡེས་ར་ཨེལ་གྱི་རྒྱལ་པོ་ལ། ཁྱོད་ཀྱི་ལག་པས་གཞུ་སྐྱིལ་ཞིག་ཅེས་པ་ན་། རྒྱལ་པོས་གཞུ་བསྐྱིལ་བ་དང་ཨེ་ལི་ཤཱས་རང་གི་ལག་པ་ཡང་རྒྱལ་པོའི་ལག་པའི་སྟེང་བཞག་སྟེ།
2KI 13:17 ཤར་ཕྱོགས་ཀྱི་དཀར་ཁུང་ཕྱེས་ཤིག་གསུངས་པ་དང་ཁོས་དེ་ཕྱེས་པ་ན། ཨེ་ལི་ཤཱས་མདའ་ཕོངས་ཤིག་ཅེས་བསྒོས་པ་དང་ཁོས་མདའ་འཕངས། དེར་ཨེ་ལི་ཤཱ་ཡིས། འདི་ནི་དཀོན་མཆོག་ཡ་ཝཱེའི་རྒྱལ་ཁའི་མདའ་མོ་ཡིན་ཏེ། ཨ་རམ་པ་ལས་རྒྱལ་བའི་མདའ་མོ་ཡིན་པས་ན། ཨ་རམ་པ་ཚར་མ་བཅད་བར་དུ། ཁྱེད་ཀྱིས་ཨ་ཕེག་ཏུ་དེ་རྣམས་གསོད་པར་བྱའོ་ཞེས་གསུངས་སོ། །
2KI 13:18 ཡང་ཁོང་གིས། མདའ་ཁྱེར་ཤོག་གསུངས་ནས་ཁོས་མདའ་རྣམས་ཁྱེར་ཡོང་ཞིང་། ཁོང་གིས་ཡེས་ར་ཨེལ་གྱི་རྒྱལ་པོ་ལ། མདའ་ཡིས་ས་ལ་རྒྱོབས་ཤིག་བསྒོས་པར། ཁོས་ས་ལ་ཐེངས་གསུམ་བརྒྱབ་ནས་ཡར་ལངས་པ་དང་།
2KI 13:19 དཀོན་མཆོག་གི་སྐྱེས་བུ་ཁྲོས་ནས་ཁོ་ལ། ཁྱོད་ཀྱིས་ཐེངས་ལྔ་ནས་དྲུག་ལ་བརྒྱབ་ན། ཨ་རམ་པ་རྣམས་ཕམ་པར་བརྒྱབ་ནས་རྩ་མེད་གཏོང་ཐུབ་མོད། འོན་ཀྱང་ད་ནི་ཁྱོད་རང་ཨ་རམ་པ་ལས་ཐེངས་གསུམ་མ་གཏོགས་རྒྱལ་བར་མི་འགྱུར་ཞེས་གསུངས་སོ། །
2KI 13:20 དེ་ནས་ཨེ་ལི་ཤཱ་སྐུ་གཤེགས་པ་དང་དུར་དུ་བཅུག་གོ །མོ་ཨབ་པའི་ཤོག་ཁག་ལོ་རེའི་དཔྱིད་ཀ་ཡུལ་དེར་བཙན་རྒོལ་བྱེད་དུ་འོངས་པ་དང་།
2KI 13:21 མི་འགའ་ཡིས་གཤིན་པོ་དུར་དུ་སྦས་པའི་དུས་སུ། ལྟོས་དང་། ཇག་དཔུང་ཞིག་མཐོང་བས། བེམ་པོ་དེ་ཨེ་ལི་ཤཱའི་དུར་སར་གཡུགས་པ་དང་། བེམ་པོ་དེ་ཨེ་ལི་ཤཱའི་གདུང་རུས་ལ་ཐུག་པ་ན། དེ་ནི་གསོན་པོར་གྱུར་ཏེ་ཡར་ལངས་སོ། །
2KI 13:22 དེ་ཡང་ཨ་རམ་པའི་རྒྱལ་པོ་ཧ་ཟཱ་ཨེལ་གྱིས་ཡེ་ཧོ་ཨ་ཧཱ་ཟི་ཡིས་རྒྱལ་སྲིད་སྐྱོང་བའི་སྐུ་ཚེ་ཧྲིལ་པོར་ཡེས་ར་ཨེལ་ལ་མནར་གཅོད་བྱས་མོད།
2KI 13:23 འོན་ཀྱང་དཀོན་མཆོག་ཡ་ཝཱེས་དེ་དག་ལ་ཐུགས་རྗེ་གནང་ཞིང་སྙིང་རྗེ་དགོངས་པ་དང་། གཟིགས་སྐྱོང་མཛད་པ་སྟེ། ཁོང་གིས་ཨབ་ར་ཧམ་དང་ཨི་སཱག ཡ་ཀོབ་བཅས་ལ་ཞལ་ཆད་གནང་ཡོད་པས། དེ་རྣམས་མེད་པར་མཛད་པ་དང་ཁོང་ཉིད་ཀྱི་ཞལ་དྲུང་ནས་འདོར་བར་ད་ལྟའི་བར་དུ་ཐུགས་མ་དགྱེས་སོ། །
2KI 13:24 དེ་ནས་ཨ་རམ་གྱི་རྒྱལ་པོ་ཧ་ཟཱ་ཨེལ་ཚེ་ལས་འདས་པ་དང་། ཁོའི་སྲས་པེན་ཧ་དཱད་ཀྱིས་དེའི་རྒྱུན་མཐུད་ནས་རྒྱལ་སྲིད་བསྐྱངས།
2KI 13:25 དེར་ཡེ་ཧོ་ཨ་ཧཱ་ཟི་ཡི་སྲས་ཡེ་ཧོ་ཨ་སི་ཡིས། ཧ་ཟཱ་ཨེལ་གྱི་བུ་པེན་ཧ་དཱད་ཀྱི་ལག་ནས་ཁོའི་ཡབ་ཡེ་ཧོ་ཨ་ཧཱ་ཟི་ལ་དམག་འཁྲུག་བརྒྱབ་སྟེ་ཕྲོགས་པའི་གྲོང་ཁྱེར་རྣམས་ཕྱིར་བླངས། ཡེ་ཧོ་ཨ་སི་ཡིས་པེན་ཧ་དཱད་ལན་གསུམ་དུ་ཕམ་པར་བརྒྱབ་ནས་ཡེས་ར་ཨེལ་གྱི་གྲོང་ཁྱེར་རྣམས་ཕྱིར་བླངས་སོ། །
2KI 14:1 དེ་ཡང་ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་ཧཱ་ཟི་ཡི་སྲས་ཡེ་ཧོ་ཨ་སི་ཡི་སྲིད་ལོ་གཉིས་པར། ཡ་ཧུ་དཱའི་རྒྱལ་པོ་ཡོ་ཨ་སི་ཡི་སྲས་ཨ་མཱ་ཙི་ཡས་རྒྱལ་སྲིད་བཟུང་།
2KI 14:2 ཁོས་རྒྱལ་སྲིད་འཛིན་དུས་ལོ་ཉེར་ལྔ་ཡིན་པ་དང་། ཡེ་རུ་སཱ་ལེམ་དུ་ལོ་ཉེར་དགུའི་རིང་ལ་རྒྱལ་སྲིད་བསྐྱངས། ཁོང་གི་ཡུམ་གྱི་མིང་ལ་ཡེ་ཧོ་ཨད་དིན་ཞེས་ཟེར། མོ་ནི་ཡེ་རུ་སཱ་ལེམ་གྱི་མི་ཡིན་ནོ། །
2KI 14:3 ཁོས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་སྤྱད་པ་དང་། རང་གི་མེས་པོ་དཱ་བིད་ལྟར་དུ་མ་བྱས་ཀྱང་སྒོ་ཀུན་ནས་རང་གི་ཡབ་ཡོ་ཨ་སི་ཡིས་བསྒྲུབས་པ་ལྟར་བྱས་མོད།
2KI 14:4 འོན་ཀྱང་མཐོ་གླིང་རྣམས་མེད་པར་མ་བཟོས་པར། མི་རྣམས་ཀྱིས་སྔར་བཞིན་མཐོ་གླིང་རྣམས་སུ་མཆོད་པ་ཕུལ་ནས་བསང་བཏང་བ་ཡིན།
2KI 14:5 དེ་ཡང་ཁོའི་ཕྱག་ཏུ་རྒྱལ་སྲིད་བརྟན་པོར་ཆགས་མ་ཐག་ཏུ། ཁོའི་ཡབ་རྒྱལ་པོར་སྣུན་མཁན་གྱི་འཁོར་གཡོག་རྣམས་བསད་པ་དང་།
2KI 14:6 མོ་ཤེའི་བཀའ་ཁྲིམས་ཀྱི་མདོ་ཡི་ནང་དུ་བཀོད་པའི་དཀོན་མཆོག་ཡ་ཝཱེའི་གསུང་ནི་འདི་ལྟ་སྟེ། བུ་རྣམས་ཀྱི་རྐྱེན་གྱིས་ཕ་དང་། ཕ་ཡི་རྐྱེན་གྱིས་བུ་རྣམས་གསོད་པར་མི་བྱ་བར། མི་རེ་རེ་རང་རང་གི་སྡིག་པའི་ཕྱིར་དུ་གསོད་པར་རིགས་སོ་ཞེས་གདམས་པ་བཞིན་དུ་ཁོས་མི་གསོད་མཁན་དག་གི་བུ་རྣམས་མ་བསད་དོ། །
2KI 14:7 ཁོས་ཚྭའི་ལུང་པ་རུ་ཨེ་དོམ་པ་སྟོང་ཕྲག་བཅུ་བསད་ནས་སེ་ལཱ་དམག་འཁྲུག་གིས་བླངས་པ་དང་། དེ་ཡི་མིང་ལ་ཡོག་ཐི་ཨེལ་ཞེས་བཏགས་ནས་དེ་རིང་གི་བར་དུ་ལུས་སོ། །
2KI 14:8 དེ་ནས་ཨ་མཱ་ཙི་ཡ་ཡིས་ཡེ་ཧུའི་ཚ་བོའམ། ཡེ་ཧོ་ཨ་ཧཱ་ཟི་ཡི་སྲས་ཡེ་ཧོ་ཨ་སི་བྱ་བ་ཡེས་ར་ཨེལ་གྱི་རྒྱལ་པོའི་དྲུང་དུ་བང་ཆེན་མངགས་ནས་དེ་ལ། ཤོག་དང་། ངེད་གཉིས་གཡུལ་སར་འཕྲད་པར་བྱ་ཞེས་སྦྲན་པ་དང་།
2KI 14:9 ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡིས་ཡ་ཧུ་དཱའི་རྒྱལ་པོ་ཨ་མཱ་ཙི་ཡ་ལ་འཕྲིན་ལན་སྤྲིངས་ཏེ་ན་རེ། ལེ་པཱ་ནོན་གྱི་ཚེར་སྡོང་གིས་ལེ་པཱ་ནོན་གྱི་ཐང་ཤིང་ལ། ཁྱོད་ཀྱི་བུ་མོ་དེ་ངའི་བུ་ལ་མནའ་མར་ཐོངས་ཤིག་ཅེས་འཕྲིན་བསྐུར་ཞིང་། ཕྱིས་སུ་ལེ་པཱ་ནོན་དུ་ཡོད་པའི་རི་དྭགས་ཤིག་ཚེར་སྡོང་གི་སྟེང་དུ་འགྲུལ་ནས་དེ་རྐང་པས་བརྫིས་སོ། །
2KI 14:10 ཁྱོད་ཀྱིས་ཨེ་དོམ་པ་འཇོམས་པས་ཁྱོད་ཀྱི་སེམས་སུ་ཁེངས་དྲེགས་སྐྱེས་པ་བདེན། རང་བསྟོད་བྱོས་ལ་རང་ཁྱིམ་དུ་བདེ་བར་སྡོད་ཅིག ཅིའི་ཕྱིར་ཆག་སྒོ་བསླངས་ནས་རང་ཉིད་རྩ་མེད་གཏོང་ཞིང་། ཡ་ཧུ་དཱ་ཡང་ཁྱོད་དང་ལྷན་ཅིག་རྩ་མེད་གཏོང་ངམ་ཞེས་སྨྲས་སོ། །
2KI 14:11 འོན་ཀྱང་ཨ་མཱ་ཙི་ཡས་དེ་ལ་མ་མཉན་པས། ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡར་འོངས་པ་དང་། ཡ་ཧུ་དཱར་གཏོགས་པའི་པེད་ཤེ་མེ་སི་བྱ་བའི་ཡུལ་དུ་ཡ་ཧུ་དཱའི་རྒྱལ་པོ་ཨ་མཱ་ཙི་ཡ་དང་ཕྲད།
2KI 14:12 ཡ་ཧུ་དཱ་ནི་ཡེས་ར་ཨེལ་གྱིས་ཕམ་པར་བརྒྱབ་པས་ཕྱིར་རང་རང་གི་གུར་དུ་བྲོས་སོ། །
2KI 14:13 ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡིས་ཨ་ཧ་ཟི་ཡཱའི་ཚ་བོའམ། ཡོ་ཨ་སི་ཡི་སྲས་ཏེ་ཡ་ཧུ་དཱའི་རྒྱལ་པོ་ཨ་མཱ་ཙི་ཡ་བྱ་བ་པེད་ཤེ་མེ་སི་རུ་འཛིན་བཟུང་བྱས་པ་དང་། ཡེས་ར་ཨེལ་གྱི་རྒྱལ་པོ་ཡེ་རུ་སཱ་ལེམ་དུ་སླེབས་ནས་ཨེ་ཕཱར་ཡིམ་གྱི་རྒྱ་སྒོ་ནས་གྲུ་གའི་རྒྱ་སྒོའི་བར་དུ། རིང་ཚད་ལ་ཁྲུ་བཞི་བརྒྱ་ཡོད་པའི་ཡེ་རུ་སཱ་ལེམ་གྱི་ལྕགས་རི་དེ་བཤིགས་སོ། །
2KI 14:14 ཡང་ཁོས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོའི་གཏེར་མཛོད་ཀྱི་ནང་དུ་རྙེད་པའི་གསེར་དངུལ་ཐམས་ཅད་དང་། ཡོ་བྱད་ཡོད་དོ་ཅོག་ཁྱེར་ཞིང་། མི་གཏའ་མར་ཁྲིད་ནས་སཱ་མར་ཡ་རུ་ཕྱིར་ལོག་གོ །
2KI 14:15 ཡེ་ཧོ་ཨ་སི་ཡིས་དོན་གཞན་ཅི་དང་ཅི་བྱས་པ་དང་། དེའི་དཔའ་བོའི་མཛད་རྗེས་རྣམས་དང་། ཡ་ཧུ་དཱའི་རྒྱལ་པོ་ཨ་མཱ་ཙི་ཡ་དང་ཇི་ལྟར་དམག་འཁྲུག་བརྒྱབ་པ་བཅས་ཐམས་ཅད་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 14:16 ཡེ་ཧོ་ཨ་སི་རང་གི་ཕ་མེས་ཀྱི་ཁྲོད་དུ་གཟིམས་པ་དང་། སཱ་མར་ཡ་རུ་ཡེས་ར་ཨེལ་གྱི་རྒྱལ་པོ་རྣམས་ཀྱི་ཁྲོད་དུ་དུར་ལ་སྦས། ཁོའི་སྲས་ཡེ་རོབ་ཨམ་གྱིས་དེའི་རྒྱུན་མཐུད་ནས་རྒྱལ་སྲིད་བཟུང་ངོ་། །
2KI 14:17 དེ་ཡང་ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་ཧཱ་ཟི་ཡི་སྲས་ཡེ་ཧོ་ཨ་སི་ཚེ་ལས་འདས་རྗེས། ཡ་ཧུ་དཱའི་རྒྱལ་པོ་ཡོ་ཨ་སི་ཡི་སྲས་ཨ་མཱ་ཙི་ཡ་ཡང་ལོ་བཅོ་ལྔ་ལ་གསོན་པ་རེད།
2KI 14:18 ཨ་མཱ་ཙི་ཡ་ཡི་དོན་གཞན་རྣམས་ནི། ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 14:19 མི་རྣམས་ཀྱིས་ཡེ་རུ་སཱ་ལེམ་དུ་ཁོ་ལ་ངོ་ལོག་བྱས་པས། ཁོ་ནི་ལཱ་ཀི་སི་རུ་བྲོས་ཤིང་། དེ་དག་གིས་ཁོའི་རྗེས་སུ་ལཱ་ཀི་སི་རུ་མི་མངགས་ནས་ཁོ་དེར་བསད་པ་དང་།
2KI 14:20 ཁོའི་བེམ་པོ་རྟའི་རྒྱབ་ཏུ་བཀལ་ནས་ཁྱེར་འོངས་ཏེ། ཡེ་རུ་སཱ་ལེམ་གྱི་དཱ་བིད་ཀྱི་གྲོང་ཁྱེར་དུ་ཁོའི་ཕ་མེས་རྣམས་ཀྱི་ཁྲོད་དུ་དུར་ལ་སྦས།
2KI 14:21 དེ་ནས་ཡ་ཧུ་དཱའི་འབངས་ཡོངས་ཀྱིས་ལོ་བཅུ་དྲུག་ལོན་པའི་ཨ་ཟར་ཡཱ་བྱ་བ་དེ་ཁྲིད་ནས་ཁོའི་ཡབ་ཨ་མཱ་ཙི་ཡ་ཡི་རྒྱུན་མཐུད་ནས་རྒྱལ་པོར་བསྐོས།
2KI 14:22 ཁོས་ཨེ་ལད་བྱ་བའི་གྲོང་ཁྱེར་བཙུགས་པ་དང་། རྒྱལ་པོ་ཨ་མཱ་ཙི་ཡ་རང་གི་ཕ་མེས་རྣམས་ཀྱི་ཁྲོད་དུ་གཟིམས་རྗེས་སུ། གྲོང་ཁྱེར་དེ་ཡ་ཧུ་དཱ་ལ་ཕྱིར་བསྐོར་ཏོ། །
2KI 14:23 དེ་ཡང་ཡ་ཧུ་དཱའི་རྒྱལ་པོ་ཡོ་ཨ་སི་ཡི་སྲས་ཨ་མཱ་ཙི་ཡས་རྒྱལ་སྲིད་བསྐྱངས་པའི་ལོ་བཅོ་ལྔ་པར། ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡི་སྲས་ཡེ་རོབ་ཨམ་གྱིས་སཱ་མར་ཡ་རུ་རྒྱལ་སྲིད་བཟུང་ཞིང་ལོ་ཞེ་གཅིག་གི་རིང་དུ་རྒྱལ་སྲིད་བསྐྱངས།
2KI 14:24 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་ཐམས་ཅད་ལས་མ་བྲལ་ཏོ། །
2KI 14:25 ཁོས་ལེ་པོ་ཧ་མཱད་ནས་བཟུང་སྟེ། ཨ་ར་པཱ་ཞེས་པའི་རྒྱ་མཚོའི་བར་དུ་ཡེས་ར་ཨེལ་ཡུལ་གྱི་ས་མཚམས་རྣམས་ཕྱིར་བླངས། དེ་ནི་ཡེས་ར་ཨེལ་གྱི་དཀོན་མཆོག་ཡ་ཝཱེས་ཁོང་གི་ཞབས་ཕྱི་སྟེ་གཱད་ཧེ་ཕེར་གྱི་ཨ་མི་ཐཱ་ཨི་ཡི་བུ་ལུང་སྟོན་པ་ཡོ་ནཱའི་ངག་ནས་གསུངས་པ་བཞིན་ནོ། །
2KI 14:26 དེ་ཅི་ལ་ཞེ་ན། དཀོན་མཆོག་ཡ་ཝཱེས་ཡེས་ར་ཨེལ་གྱི་སྡུག་བསྔལ་ཆེན་པོ་གཟིགས་པ་དང་། དེ་རྣམས་ཀྱི་ཁྲོད་ནས་བཀག་བསྐྱིལ་ཐེབས་པ་དང་རང་དབང་ཅན་ཐམས་ཅད་མེད་པར་གྱུར་ཅིང་། ཡེས་ར་ཨེལ་ལ་རོགས་བྱེད་མཁན་གཅིག་ཀྱང་མ་བྱུང་ངོ་། །
2KI 14:27 དཀོན་མཆོག་ཡ་ཝཱེས་གནམ་འོག་ནས་ཡེས་ར་ཨེལ་གྱི་མིང་རྟགས་མེད་པར་བྱེད་པའི་ཐུགས་ཐག་མ་བཅད་པས། ཁོང་གིས་དེ་རྣམས་ཡེ་ཧོ་ཨ་སི་ཡི་སྲས་ཡེ་རོབ་ཨམ་གྱི་ལག་བརྒྱུད་ནས་ཐར་བར་མཛད་དོ། །
2KI 14:28 ཡེ་རོབ་ཨམ་གྱི་དོན་གཞན་རྣམས་དང་ཁོས་ཅི་བྱས་པ་ཐམས་ཅད་དང་། ཇི་ལྟར་འཐབ་འཁྲུག་བརྒྱབ་པའི་དཔའ་བོའི་མཛད་རྗེས་དང་། དཱ་མེ་སེག་དང་སྔར་ཡ་ཧུ་དཱར་གཏོགས་པའི་ཧ་མཱད་གཉིས་ཡེས་ར་ཨེལ་གྱི་དོན་དུ་ཕྱིར་བླངས་པ་བཅས་ནི། ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 14:29 ཡེ་རོབ་ཨམ་རང་གི་ཕ་མེས་ཏེ་ཡེས་ར་ཨེལ་གྱི་རྒྱལ་པོ་རྣམས་ཀྱི་ཁྲོད་དུ་གཟིམས་པར་གྱུར། ཡང་ཁོའི་སྲས་ཟཱ་ཀར་ཡ་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 15:1 དེ་ཡང་ཡེས་ར་ཨེལ་གྱི་རྒྱལ་པོ་ཡེ་རོབ་ཨམ་གྱིས་རྒྱལ་སྲིད་བསྐྱངས་པའི་ལོ་ཉེར་བདུན་པར། ཡ་ཧུ་དཱའི་རྒྱལ་པོ་ཨ་མཱ་ཙི་ཡ་ཡི་སྲས་ཨ་ཟར་ཡཱས་རྒྱལ་སྲིད་བཟུང་།
2KI 15:2 ཁོང་རྒྱལ་སར་བསྐོ་དུས་ལོ་བཅུ་དྲུག་ཡིན་པ་དང་། ཁོང་གིས་ཡེ་རུ་སཱ་ལེམ་དུ་ལོ་ལྔ་བཅུ་ང་གཉིས་རིང་རྒྱལ་སྲིད་བསྐྱངས། ཁོང་གི་ཡུམ་གྱི་མིང་ལ་ཡེ་ཀོལ་ཡཱ་ཟེར་ཞིང་། མོ་ནི་ཡེ་རུ་སཱ་ལེམ་གྱི་མི་ཡིན་ནོ། །
2KI 15:3 ཁོང་གིས་རང་གི་ཡབ་ཨ་མཱ་ཙི་ཡའི་བྱ་སྤྱོད་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་ཀྱང་།
2KI 15:4 མཐོ་གླིང་རྣམས་མ་བཤིག་པས། མི་རྣམས་ཀྱིས་སྔར་བཞིན་མཐོ་གླིང་གི་སྟེང་དུ་མཆོད་པ་ཕུལ་ནས་བསང་བཏང་བ་རེད།
2KI 15:5 དེ་ནས་དཀོན་མཆོག་ཡ་ཝཱེས་རྒྱལ་པོ་ལ་བརྡེགས་པས་ཁོང་ནི་འཆི་བའི་བར་དུ་མཛེ་ནད་བྱུང་ནས་ལུས་ཏེ། ཟུར་དུ་ཁང་པ་ཞིག་གི་ནང་བསྡད་པ་དང་། རྒྱལ་པོའི་སྲས་ཡོ་ཐམ་ནི་ཕོ་བྲང་གི་བདག་པོ་ཡིན་པས་ཡུལ་དེའི་འབངས་རྣམས་ལ་བདག་སྐྱོང་བྱས་སོ། །
2KI 15:6 ཡང་ཨ་ཟར་ཡཱའི་དོན་གཞན་རྣམས་དང་། ཁོང་གིས་ཅི་བྱས་པ་ཐམས་ཅད་ནི་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 15:7 ཨ་ཟར་ཡཱ་རང་གི་ཕ་མེས་དང་ལྷན་ཅིག་ཏུ་གཟིམས་པ་དང་། དཱ་བིད་ཀྱི་གྲོང་ཁྱེར་དུ་ཁོའི་ཕ་མེས་རྣམས་ཀྱི་ཁྲོད་དུ་དུར་ལ་སྦས། ཁོའི་སྲས་ཡོ་ཐམ་ནི་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 15:8 ཡ་ཧུ་དཱའི་རྒྱལ་པོ་ཨ་ཟར་ཡཱས་སྲིད་བསྐྱངས་པའི་ལོ་སོ་བརྒྱད་པར། ཡེ་རོབ་ཨམ་གྱི་སྲས་ཟཱ་ཀར་ཡས་སཱ་མར་ཡ་རུ་ཡེས་ར་ཨེལ་ལ་ཟླ་བ་དྲུག་གི་རིང་དུ་རྒྱལ་སྲིད་བསྐྱངས།
2KI 15:9 ཁོས་རང་གི་ཕ་མེས་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་རྣམས་ལས་མ་བྱོལ་ཏོ། །
2KI 15:10 དེ་ནས་ཡཱ་བེ་སིའི་བུ་ཤལ་ལུམ་གྱིས་ཁོ་ལ་གཡོ་ཐབས་ཀྱིས་ངོ་ལོག་བྱས་ཏེ། འབངས་ཀྱི་མདུན་དུ་ཁོར་བསྣུན་ཅིང་བསད་དེ་ཁོའི་རྒྱུན་མཐུད་ནས་རྒྱལ་སྲིད་བཟུང་།
2KI 15:11 དེ་ཡང་ཟཱ་ཀར་ཡའི་དོན་གཞན་རྣམས་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་དེ།
2KI 15:12 སྔར་དཀོན་མཆོག་ཡ་ཝཱེས་ཡེ་ཧུ་ལ་གསུངས་པའི་བཀའ་བཞིན་དུ། མི་རབས་བཞིའི་རིང་དུ་ཁྱོད་ཀྱི་བུ་རྒྱུད་རྣམས་ཡེས་ར་ཨེལ་གྱི་རྒྱལ་ཁྲིར་འགོད་པར་འགྱུར་ཞེས་གསུངས་པ་ལྟར་འགྲུབ་པར་གྱུར་ཏོ། །
2KI 15:13 དེ་ཡང་ཡ་ཧུ་དཱའི་རྒྱལ་པོ་ཨུ་ཟི་ཡཱས་རྒྱལ་སྲིད་བཟུང་ནས་ལོ་སོ་དགུ་པ་ལ། ཡཱ་བེ་སིའི་བུ་ཤལ་ལུམ་གྱིས་རྒྱལ་སྲིད་བཟུང་། ཁོས་ནི་སཱ་མར་ཡ་རུ་ཟླ་བ་གཅིག་གི་རིང་དུ་རྒྱལ་སྲིད་བསྐྱངས།
2KI 15:14 དེ་ནས་གཱ་དི་ཡི་བུ་མེ་ན་ཧེམ་བྱ་བ་ཐིར་ཙ་ནས་ཡར་ཐོན་ཏེ་སཱ་མར་ཡ་རུ་ཕྱིན་པ་དང་། དེར་ཡཱ་བེ་སིའི་བུ་ཤལ་ལུམ་ལ་བསྣུན་ཅིང་བསད་དེ་ཁོའི་ཚབ་ཏུ་རྒྱལ་སྲིད་བཟུང་ངོ་། །
2KI 15:15 ཤལ་ལུམ་གྱི་དོན་གཞན་རྣམས་དང་། ཁོས་བཤམས་པའི་ལྐོག་ཇུས་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་དོ། །
2KI 15:16 དེའི་ཚེ་ན། དེ་དག་གིས་མེ་ན་ཧེམ་ལ་མཁར་སྒོ་མ་ཕྱེས་པས་ཁོས་ཏིབ་སཱ་དང་ཡུལ་དེར་ཡོད་པ་ཐམས་ཅད་དང་། ཐིར་ཙའི་ས་མཚམས་ཀྱི་བར་དུ་གཏོར་བཅོམ་བྱས་ཤིང་། དེའི་མི་རྣམས་ལ་བསྣུན་ཅིང་ཡུལ་དེའི་བུད་མེད་སྦྲུམ་མ་ཐམས་ཅད་ཀྱི་གྲོད་པ་གཤགས་སོ། །
2KI 15:17 དེ་ཡང་ཡ་ཧུ་དཱའི་རྒྱལ་པོ་ཨ་ཟར་ཡཱས་རྒྱལ་སྲིད་བསྐྱངས་པའི་ལོ་སོ་དགུ་པར། གཱ་དི་ཡི་བུ་མེ་ན་ཧེམ་ནི་ཡེས་ར་ཨེལ་གྱི་རྒྱལ་པོར་གྱུར་ནས་སཱ་མར་ཡ་རུ་ལོ་བཅུའི་རིང་དུ་རྒྱལ་སྲིད་བསྐྱངས།
2KI 15:18 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། ཚེ་གང་པོར་ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་ལས་མ་བྲལ་ཏོ། །
2KI 15:19 ཨ་སུར་གྱི་རྒྱལ་པོ་ཕོལ་བྱ་བ་ཡུལ་དེར་རྒོལ་བར་འོངས་པ་དང་། མེ་ན་ཧེམ་གྱིས་རང་གི་རྒྱལ་སྲིད་བརྟན་པོ་ཡོང་བར་རོགས་རམ་འཐོབ་ཕྱིར་ཕྱག་རྟེན་ལ་དངུལ་གྱི་རྡོ་ཚད་སྟོང་ཕྲག་གཅིག་ཕུལ་བ་དང་།
2KI 15:20 མེ་ན་ཧེམ་གྱིས་དེ་ཨ་སུར་གྱི་རྒྱལ་པོ་ལ་འབུལ་བའི་ཕྱིར། ཡེས་ར་ཨེལ་དུ་ཡོད་པའི་ཕྱུག་པོ་ཐམས་ཅད་ལས་དངུལ་སྲང་ལྔ་བཅུ་རེ་བཙན་གྱིས་བསྡུས་པས། ཨ་སུར་གྱི་རྒྱལ་པོ་ནི་ཡུལ་དེར་མ་བསྡད་པར་ཕྱིར་ལོག
2KI 15:21 ཡང་མེ་ན་ཧེམ་གྱི་དོན་གཞན་རྣམས་དང་། ཁོས་ཅི་བྱས་པ་ཐམས་ཅད་ཡེས་ར་ཨེལ་གྱི་རྒྱལ་པོའི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 15:22 དེ་ནས་མེ་ན་ཧེམ་རང་གི་ཕ་མེས་དང་ལྷན་ཅིག་ཏུ་གཟིམས་པ་དང་། ཁོའི་སྲས་ཕེ་ཀཱ་ཡ་ཡིས་དེའི་རྒྱུན་མཐུད་ནས་རྒྱལ་སྲིད་བཟུང་ངོ་། །
2KI 15:23 ཡང་ཡ་ཧུ་དཱའི་རྒྱལ་པོ་ཨ་ཟར་ཡཱས་རྒྱལ་སྲིད་བསྐྱངས་པའི་ལོ་ལྔ་བཅུ་པར། མེ་ན་ཧེམ་གྱི་སྲས་ཕེ་ཀཱ་ཡ་ནི་ཡེས་ར་ཨེལ་གྱི་རྒྱལ་པོར་གྱུར་ནས་ཁོས་སཱ་མར་ཡ་རུ་ལོ་གཉིས་ཀྱི་རིང་དུ་རྒྱལ་སྲིད་བསྐྱངས།
2KI 15:24 ཁོས་ཀྱང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་རྣམས་ལས་མ་བྲལ་ཏོ། །
2KI 15:25 ཡང་ཁོའི་དམག་དཔོན་རེ་མལ་ཡཱ་ཡི་བུ་ཕེ་ཀཱ་ཡིས་ཁོ་ལ་གཡོ་ཐབས་ཀྱིས་ངོ་ལོག་བྱས་ཏེ། ཨར་གོབ་དང་ཨར་ཡེ། དེ་མིན་གིལ་ཨད་པ་མི་ལྔ་བཅུ་དང་བཅས་པ་སོང་ནས་སཱ་མར་ཡ་རུ་རྒྱལ་པོའི་ཕོ་བྲང་གི་མཁར་རྫོང་དུ་ཁོ་བསད་པ་དང་། ཕེ་ཀཱ་ཡིས་ཁོའི་ཚབ་ཏུ་རྒྱལ་སྲིད་བཟུང་།
2KI 15:26 ཡང་ཕེ་ཀཱ་ཡ་ཡི་དོན་གཞན་རྣམས་དང་ཁོས་ཅི་བྱས་པ་ཐམས་ཅད། ཡེས་ར་ཨེལ་གྱི་རྒྱལ་པོའི་ལོ་རབས་ནང་དུ་བཀོད་ཡོད་དོ། །
2KI 15:27 ཡ་ཧུ་དཱའི་རྒྱལ་པོ་ཨ་ཟར་ཡཱས་རྒྱལ་སྲིད་བསྐྱངས་པའི་ལོ་ལྔ་བཅུ་ང་གཉིས་པར། རེ་མལ་ཡཱའི་བུ་ཕེ་ཀཱ་ནི་སཱ་མར་ཡ་རུ་ཡེས་ར་ཨེལ་གྱི་རྒྱལ་པོར་གྱུར་ནས་ཁོས་ལོ་ཉི་ཤུའི་རིང་དུ་རྒྱལ་སྲིད་བསྐྱངས།
2KI 15:28 ཁོས་ཀྱང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ། ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱི་སྡིག་པ་ལས་བྲལ་བར་མ་གྱུར་ཏོ། །
2KI 15:29 དེ་ཡང་ཡེས་ར་ཨེལ་གྱི་རྒྱལ་པོ་ཕེ་ཀཱའི་དུས་སུ། ཨ་སུར་གྱི་རྒྱལ་པོ་ཐིག་ལད་ཕིལ་ཨེ་སེར་བྱ་བ་དེ་འོངས་ནས་ཨི་ཡོན་དང་། ཨ་བེལ་པེད་མ་ཨ་ཀཱ་དང་། ཡཱ་ནོ་ཨ་དང་། ཀེ་དེ་སི་དང་། ཧ་ཟོར་དང་། གིལ་ཨད་དང་། ག་ལིལ་དང་། ནཱབ་ཐ་ལིའི་ཡུལ་ཐམས་ཅད་བཟུང་སྟེ། མི་རྣམས་ཨ་སུར་ཡུལ་དུ་བཙན་ཁྲིད་བྱས།
2KI 15:30 དེ་ནས་ཨེ་ལཱའི་བུ་ཧོ་ཤེ་ཨས་རེ་མལ་ཡཱའི་བུ་ཕེ་ཀཱ་ལ་ལྐོག་ཇུས་བཤམས་ཤིང་། ཁོ་ལ་བསྣུན་ཏེ་བསད་པ་དང་། ཁོས་དེའི་ཚབ་ཏུ་རྒྱལ་སྲིད་བཟུང་། དེ་ནི་ཨུ་ཟི་ཡཱའི་སྲས་ཡོ་ཐམ་གྱིས་རྒྱལ་སྲིད་བསྐྱངས་པའི་ལོ་ཉི་ཤུ་པར་བྱུང་བ་ཡིན་ནོ། །
2KI 15:31 ཡང་ཕེ་ཀཱ་ཡི་དོན་གཞན་རྣམས་དང་། ཁོས་ཅི་བྱས་པ་ཐམས་ཅད་ནི་ཡེས་ར་ཨེལ་གྱི་རྒྱལ་པོའི་ལོ་རབས་ཀྱི་མདོ་ཡི་ནང་དུ་བཀོད་ཡོད་དོ། །
2KI 15:32 དེ་ཡང་ཡེས་ར་ཨེལ་གྱི་རྒྱལ་པོ་རེ་མལ་ཡཱའི་སྲས་ཕེ་ཀཱ་ཡིས་རྒྱལ་སྲིད་བསྐྱངས་པའི་ལོ་གཉིས་པར། ཨུ་ཟི་ཡཱའི་སྲས་ཡོ་ཐམ་བྱ་བ་ཡ་ཧུ་དཱའི་རྒྱལ་པོར་གྱུར་ཏོ། །
2KI 15:33 རྒྱལ་སྲིད་བཟུང་དུས་ཁོ་ནི་ལོ་ཉེར་ལྔ་ཡིན་པ་དང་། ལོ་བཅུ་དྲུག་གི་རིང་ལ་ཡེ་རུ་སཱ་ལེམ་དུ་རྒྱལ་སྲིད་བསྐྱངས་པ་དང་། ཟཱ་ཏོག་གི་སྲས་མོ་ཡེ་རུ་ཤཱ་བྱ་བ་ནི་ཁོའི་ཡུམ་ཡིན་ནོ། །
2KI 15:34 ཁོས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་རྣམས་སྤྱད་དེ། རང་གི་ཡབ་ཨུ་ཟི་ཡཱས་བསྒྲུབས་པ་བཞིན་དུ་བྱས་ཀྱང་།
2KI 15:35 མཐོ་གླིང་རྣམས་མ་བཤིགས་པས། མི་རྣམས་ཀྱིས་སྔར་བཞིན་མཐོ་གླིང་གི་སྟེང་དུ་མཆོད་པ་ཕུལ་ནས་བསང་བཏང་བ་དང་། ཁོས་དཀོན་མཆོག་ཡ་ཝཱེའི་མཆོད་ཁང་ལ་སྟེང་སྒོ་ཞིག་བརྩིགས་སོ། །
2KI 15:36 ཡོ་ཐམ་གྱི་དོན་གཞན་རྣམས་དང་། ཁོས་ཅི་བྱས་པ་ཐམས་ཅད་ཡ་ཧུ་དཱའི་རྒྱལ་པོའི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 15:37 དེའི་དུས་སུ་དཀོན་མཆོག་ཡ་ཝཱེས་ཨ་རམ་གྱི་རྒྱལ་པོ་རེ་ཙིན་དང་། རེ་མལ་ཡཱའི་བུ་ཕེ་ཀཱ་གཉིས་ཡ་ཧུ་དཱ་ལ་གཡུལ་འགྱེད་པར་མངགས་འགོ་བརྩམས་ཤིང་།
2KI 15:38 ཡོ་ཐམ་རང་གི་ཕ་མེས་ཀྱི་ཁྲོད་དུ་གཟིམས་པ་དང་། ཁོའི་མེས་པོ་དཱ་བིད་ཀྱི་གྲོང་ཁྱེར་དུ་རང་གི་ཕ་མེས་རྣམས་དང་མཉམ་དུ་དུར་ལ་སྦས། ཁོའི་སྲས་ཨ་ཧ་ཟཱ་ནི་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 16:1 དེ་ཡང་རེ་མལ་ཡཱའི་སྲས་ཕེ་ཀཱ་ཡིས་རྒྱལ་སྲིད་བསྐྱངས་པའི་ལོ་བཅུ་བདུན་པར། ཡ་ཧུ་དཱའི་རྒྱལ་པོ་ཡོ་ཐམ་གྱི་སྲས་ཨ་ཧ་ཟཱ་རྒྱལ་པོར་གྱུར།
2KI 16:2 ཁོས་རྒྱལ་སྲིད་བཟུང་དུས་ལོ་ཉི་ཤུ་ཡིན་ཏེ་ཡེ་རུ་སཱ་ལེམ་དུ་ལོ་བཅུ་དྲུག་གི་རིང་ལ་རྒྱལ་སྲིད་བསྐྱངས་ནའང་། ཁོས་ཡབ་མེས་དཱ་བིད་ལྟར་རང་གི་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་མ་སྤྱད་པར།
2KI 16:3 ཁོ་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལམ་ནང་འགྲུལ་ཞིང་། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་ཕྱི་རུ་ཕྱུང་བ་དང་མི་རྣམས་ཀྱིས་བརྙས་བཅོས་བྱས་པ་བཞིན་དུ། ཁོས་ཐ་ན་རང་གི་བུ་ཡང་མེ་དཀྱིལ་དུ་སྦྱིན་སྲེག་བྱས་པར་མ་ཟད།
2KI 16:4 མཐོ་གླིང་དང་རིའི་སྟེང་དང་། ལྗོན་ཤིང་རེ་རེའི་འོག་ཏུ་མཆོད་པ་ཕུལ་ཏེ་བསང་བཏང་བ་རེད།
2KI 16:5 སྐབས་དེར་ཨ་རམ་གྱི་རྒྱལ་པོ་རེ་ཙིན་དང་། ཡེས་ར་ཨེལ་གྱི་རྒྱལ་པོ་རེ་མལ་ཡཱ་ཡི་བུ་ཕེ་ཀཱ་གཉིས་ཡེ་རུ་སཱ་ལེམ་དུ་དམག་འཁྲུག་རྒྱག་ཏུ་ཡར་འོངས་པ་དང་། ཨ་ཧ་ཟཱ་དམག་གིས་བསྐོར་ནའང་དེ་དབང་དུ་བསྡུ་མ་ནུས་སོ། །
2KI 16:6 དེའི་ཚེ་ན། ཨ་རམ་གྱི་རྒྱལ་པོ་རེ་ཙིན་གྱིས་ཨེ་ལིད་ཕྱིར་བླངས་ནས་ཨ་རམ་དུ་བསྲེས་པ་དང་། ཨེ་ལད་ནས་ཡ་ཧུ་དཱ་པ་རྣམས་བཏོན་ཏེ། ཨེ་དོམ་པ་རྣམས་ཨེ་ལད་དུ་འོངས་ནས་ད་ལྟའི་བར་དུ་དེར་གནས་སོ། །
2KI 16:7 དེ་ནས་ཨ་ཧ་ཟཱ་ཡིས་ཨ་སུར་གྱི་རྒྱལ་པོ་ཐིག་ལད་ཕིལ་ཨེ་སེར་ལ་བང་ཆེན་མངགས་ཏེ་ཁོ་ལ། བདག་ནི་ཁྱེད་ཀྱི་ཞབས་ཕྱི་དང་བུ་ཡིན་ཞིང་། ཁྱེད་རང་ཡར་བྱོན་ཏེ་བདག་ལ་བཙན་རྒོལ་བྱེད་བཞིན་པའི་ཨ་རམ་གྱི་རྒྱལ་པོ་དང་། ཡེས་ར་ཨེལ་གྱི་རྒྱལ་པོའི་ལག་ནས་བདག་སྐྱོབ་པར་མཛོད་ཅིག་ཅེས་ཞུས་ཤིང་།
2KI 16:8 ཡང་ཨ་ཧ་ཟཱ་ཡིས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་གཏེར་མཛོད་དུ་ཡོད་པའི་གསེར་དངུལ་བཅས་བླངས་ཏེ་ཨ་སུར་གྱི་རྒྱལ་པོ་ལ་ཞུ་རྟེན་དུ་ཕུལ།
2KI 16:9 ཨ་སུར་གྱི་རྒྱལ་པོས་ཁོ་ལ་ཁས་བླངས་ཤིང་། ཨ་སུར་གྱི་རྒྱལ་པོ་དཱ་མེ་སེག་ལ་ཡར་སོང་ནས་ཡུལ་དེ་བཟུང་བ་དང་མི་རྣམས་ཀིར་བྱ་བའི་ཡུལ་དུ་བཙན་ཁྲིད་བྱས་ཤིང་རེ་ཙིན་ཡང་བསད་དོ། །
2KI 16:10 དེ་ནས་རྒྱལ་པོ་ཨ་ཧ་ཟཱ་ནི་དཱ་མེ་སེག་ལ་ཨ་སུར་གྱི་རྒྱལ་པོ་ཐིག་ལད་ཕིལ་ཨེ་སེར་དང་འཕྲད་དུ་སོང་སྟེ། དཱ་མེ་སེག་ཏུ་ཡོད་པའི་མཆོད་ཁྲི་དེ་མཐོང་བས། རྒྱལ་པོ་ཨ་ཧ་ཟཱ་ཡིས་མཆོད་ཁྲི་དེའི་དཔེ་རིས་དང་། སྒྲིག་གཞི། རྩིག་སྟངས་བཅས་གསལ་པོ་མཆོད་དཔོན་ཨུ་རི་ཡཱ་ལ་བརྫངས།
2KI 16:11 དེ་ནས་མཆོད་དཔོན་ཨུ་རི་ཡཱས། རྒྱལ་པོ་ཨ་ཧ་ཟཱ་ཡིས་དཱ་མེ་སེག་ནས་བརྫངས་པ་ཀུན་གྱི་མ་དཔེ་ཇི་བཞིན་མཆོད་ཁྲི་ཞིག་བརྩིགས་ཤིང་། རྒྱལ་པོ་ཨ་ཧ་ཟཱ་ནི་དཱ་མེ་སེག་ནས་ཕྱིར་ལོག་པའི་བར་དུ་འགྲུབ་པར་བཅུག་གོ །
2KI 16:12 དེ་ནས་རྒྱལ་པོ་དཱ་མེ་སེག་ནས་ཕྱིར་སླེབས་ཏེ་མཆོད་ཁྲི་མཐོང་ཞིང་། རྒྱལ་པོ་མཆོད་ཁྲི་དེའི་འགྲམ་དུ་སོང་ནས་དེའི་ཐོག་ཏུ་ཡར་འགོས་པ་དང་།
2KI 16:13 རང་གི་དོན་དུ་སྦྱིན་སྲེག་དང་འབྲུ་རིགས་ཀྱི་མཆོད་པ་ཕུལ་ཞིང་རང་གི་སྐྱེམས་མཆོད་བཏང་། ཞི་བདེའི་མཆོད་པ་རྣམས་ཀྱི་ཁྲག་ནི་མཆོད་ཁྲིའི་ཁར་གཏོར།
2KI 16:14 ཁོས་དཀོན་མཆོག་ཡ་ཝཱེའི་དྲུང་དུ་ཡོད་པའི་ལི་ཡི་མཆོད་ཁྲི་དེ་མཆོད་ཁང་གི་མདུན་ལོགས་སམ། མཆོད་ཁྲི་ཆེན་པོ་དང་དཀོན་མཆོག་ཡ་ཝཱེའི་མཆོད་ཁང་གི་བར་ནས་གནས་སྤར་ཏེ། མཆོད་ཁྲི་གསར་པ་དེའི་བྱང་ཕྱོགས་སུ་གཏད་དོ། །
2KI 16:15 དེ་ནས་རྒྱལ་པོ་ཨ་ཧ་ཟཱ་ཡིས་མཆོད་དཔོན་ཨུ་རི་ཡཱ་ལ་བཀའ་བསྩལ་ཏེ་ན་རེ། མཆོད་ཁྲི་ཆེན་པོ་འདིའི་སྟེང་དུ་ཞོགས་པའི་སྦྱིན་སྲེག་གི་མཆོད་པ་དང་ས་སྲོས་ཀྱི་འབྲུ་རིགས་ཀྱི་མཆོད་པ། རྒྱལ་པོའི་སྦྱིན་སྲེག་གི་མཆོད་པ་དང་ཁོའི་འབྲུ་རིགས་ཀྱི་མཆོད་པ། ཡུལ་མི་ཐམས་ཅད་ཀྱི་སྦྱིན་སྲེག་གི་མཆོད་པ་དང་དེ་རྣམས་ཀྱི་འབྲུ་རིགས་ཀྱི་མཆོད་པ་རྣམས་བསྲེག་དགོས་པ་དང་། ཡང་སྐྱེམས་མཆོད་རྣམས་དང་སྦྱིན་སྲེག་གི་མཆོད་པའི་ཁྲག་དང་། གཞན་དམར་མཆོད་ཀྱི་ཁྲག་ཐམས་ཅད་ནི་དེའི་ཁར་གཏོར་ཅིག འོན་ཀྱང་ལི་ཡི་མཆོད་ཁྲི་ལ་ངས་དཀོན་མཆོག་ནས་འཚོལ་ཞིབ་བྱའོ་ཞེས་སྨྲས་པས།
2KI 16:16 མཆོད་དཔོན་ཨུ་རི་ཡཱས་རྒྱལ་པོ་ཨ་ཧ་ཟཱ་ཡིས་བསྩལ་པའི་བཀའ་བཞིན་དུ་བསྒྲུབས་སོ། །
2KI 16:17 དེ་ཡང་རྒྱལ་པོ་ཨ་ཧ་ཟཱ་ཡིས་འཁོར་ལྡན་སྟེགས་བུ་རྣམས་ཀྱི་ཟུར་རྒྱན་བཅད་དེ། དེའི་ཐོག་ཏུ་ཡོད་པའི་འཁྲུད་གཞོང་རྣམས་ཕྱིར་བཏོན་པ་དང་། རྒྱ་མཚོ་བྱ་བ་ནི་དེའི་འོག་ཏུ་ཡོད་པའི་ལི་ཡི་གླང་རྣམས་ཀྱི་ཁ་ནས་ཕབ་སྟེ་རྡོ་ལེབ་ཀྱི་ཁར་བཞག་གོ །
2KI 16:18 ཡང་ཨ་སུར་གྱི་རྒྱལ་པོའི་རྐྱེན་གྱིས་ངལ་གསོ་བའི་ཉིན་མོའི་ཕྱིར་མཆོད་ཁང་ནང་དུ་བརྩིགས་པའི་གནམ་ཁེབས་ཀྱི་བཀོད་པ་དང་། རྒྱལ་པོ་ཕྱི་ནས་ཐོན་སའི་བགྲོད་ལམ་གཉིས་ནི་དཀོན་མཆོག་ཡ་ཝཱེའི་མཆོད་ཁང་ནས་གནས་སྤར་ཏོ། །
2KI 16:19 དེ་ཡང་ཨ་ཧ་ཟཱ་ཡི་དོན་གཞན་རྣམས་དང་། ཁོས་ཅི་བྱས་པ་ཐམས་ཅད་ནི་ཡ་ཧུ་དཱའི་རྒྱལ་པོའི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 16:20 ཨ་ཧ་ཟཱ་ནི་རང་གི་ཕ་མེས་དང་ལྷན་ཅིག་ཏུ་གཟིམས་པ་དང་། དཱ་བིད་ཀྱི་གྲོང་ཁྱེར་དུ་ཕ་མེས་རྣམས་དང་ལྷན་དུ་དུར་ལ་སྦས། ཁོའི་སྲས་ཧི་ཟི་ཀི་ཡཱ་ནི་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 17:1 དེ་ཡང་ཡ་ཧུ་དཱའི་རྒྱལ་པོ་ཨ་ཧ་ཟཱ་ཡིས་རྒྱལ་སྲིད་བསྐྱངས་པའི་ལོ་བཅུ་གཉིས་པར། ཨེ་ལཱ་ཡི་སྲས་ཧོ་ཤེ་ཨ་བྱ་བ་དེས་སཱ་མར་ཡ་རུ་ལོ་དགུའི་རིང་དུ་ཡེས་ར་ཨེལ་གྱི་རྒྱལ་སྲིད་བསྐྱངས།
2KI 17:2 ཁོས་ཀྱང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཀྱང་། ཁོའི་སྔོན་དུ་བྱུང་བའི་ཡེས་ར་ཨེལ་གྱི་རྒྱལ་པོ་རྣམས་ལྟར་མ་བྱས་སོ། །
2KI 17:3 ཨ་སུར་གྱི་རྒྱལ་པོ་ཤལ་མན་ཨེ་སེར་ནི་ཁོ་ལ་རྒོལ་དུ་ཡར་འོངས་པ་དང་། ཧོ་ཤེ་ཨ་ནི་དེའི་མངའ་འོག་ཏུ་གྱུར་ནས་ཁོ་ལ་དཔྱ་ཁྲལ་བཅལ་ཏོ། །
2KI 17:4 ཕྱིས་སུ་ཨ་སུར་གྱི་རྒྱལ་པོས་ཧོ་ཤེ་ཨ་ཡི་གཡོ་ཐབས་རྙེད། ཅིའི་ཕྱིར་ཞེ་ན། དེས་ཨེ་ཅིབ་ཀྱི་རྒྱལ་པོ་སོ་ཞེས་པར་བང་ཆེན་མངགས་ཏེ། ཨ་སུར་གྱི་རྒྱལ་པོར་ལོ་རེ་བཞིན་དུ་དཔྱ་ཁྲལ་མ་ཕུལ་བས་ཨ་སུར་གྱི་རྒྱལ་པོས་ཁོ་བཟུང་ནས་བཙོན་དུ་བཅུག་གོ །
2KI 17:5 དེ་ནས་ཨ་སུར་གྱི་རྒྱལ་པོ་ཡར་འོངས་ཏེ་ཡུལ་ཁམས་ཐམས་ཅད་ལ་བཙན་འཛུལ་བྱས་པ་དང་། ཡར་སཱ་མར་ཡ་རུ་སོང་ནས་ལོ་གསུམ་གྱི་རིང་ལ་ཡུལ་དེ་དམག་གིས་བསྐོར་ཏོ། །
2KI 17:6 ཧོ་ཤེ་ཨ་ཡིས་རྒྱལ་སྲིད་བསྐྱངས་པའི་ལོ་དགུ་པར། ཨ་སུར་གྱི་རྒྱལ་པོས་སཱ་མར་ཡ་བླངས་ཤིང་ཡེས་ར་ཨེལ་པ་རྣམས་ཨ་སུར་ཡུལ་དུ་བཙན་ཁྲིད་བྱས་ཏེ། ཧ་ལཱ་དང་གོ་ཟན་ཡུལ་གྱི་ཆུ་བོ་ཧ་བོར་དང་། མཱ་ཏི་པ་རྣམས་ཀྱི་གྲོང་ཁྱེར་རྣམས་སུ་སྡོད་དུ་བཅུག་གོ །
2KI 17:7 དེ་ཅིའི་ཕྱིར་ཞེ་ན། ཡེས་ར་ཨེལ་པ་རྣམས་ཀྱིས་ཨེ་ཅིབ་ཀྱི་ཡུལ་དང་། ཨེ་ཅིབ་རྒྱལ་པོ་ཕཱར་ཨོལ་གྱི་ལག་འོག་ནས་ཐར་དུ་བཅུག་པའི་རང་གི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཏེ། ལྷ་གཞན་རྣམས་ལ་ཞེད་པར་གྱུར་པས་སོ། །
2KI 17:8 དེ་དག་ནི་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་མཐར་བསྐྲད་པའི་མི་རྣམས་ཀྱི་གོམས་སྲོལ་དང་། ཡེས་ར་ཨེལ་གྱི་རྒྱལ་པོ་རྣམས་ཀྱི་ལུགས་སྲོལ་བཞིན་དུ་འགྲུལ་པ་རེད།
2KI 17:9 དེ་ལྟར་ཡེས་ར་ཨེལ་གྱི་བུ་རྒྱུད་ཀྱིས་གསང་བའི་ངང་ནས་ཁོ་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་མི་འོས་པའི་ལས་བྱས་ཏེ། བྱ་རའི་ལྕོག་མཁར་ནས་གྲོང་ཁྱེར་བརྟན་པོའི་བར་དུ་རང་གི་ཕྱིར་ཁོ་ཚོའི་གྲོང་རྡལ་ཐམས་ཅད་དུ་མཐོ་གླིང་བརྩིགས་པ་དང་།
2KI 17:10 ཡང་རི་མཐོན་པོ་རྣམས་ཀྱི་རྩེ་མོ་དང་། ལྗོན་ཤིང་སྔོན་པོ་ཀུན་གྱི་འོག་ཏུ་ལྷ་རྟེན་དང་ཨ་ཤེ་རཱ་བཙུགས་སོ། །
2KI 17:11 དཀོན་མཆོག་ཡ་ཝཱེས་དེ་རྣམས་ཀྱི་མདུན་ནས་མཐར་བསྐྲད་པའི་མི་རྣམས་ཀྱི་ལུགས་སྲོལ་ལྟར། དེ་རྣམས་ཀྱིས་ཀྱང་མཐོ་གླིང་ཐམས་ཅད་ཀྱི་སྟེང་དུ་བསང་བཏང་བ་དང་། དཀོན་མཆོག་ཡ་ཝཱེའི་ཐུགས་དཀྲུགས་པའི་དོན་ངན་པ་བྱས་སོ། །
2KI 17:12 དཀོན་མཆོག་ཡ་ཝཱེས་སྔར་དེ་དག་ལ་ཁྱོད་ཅག་གིས་དེ་འདྲ་མ་བྱེད་ཅིག་ཅེས་གསུངས་ཀྱང་། དེ་དག་གིས་སྐུ་འདྲ་བསྟེན་ཅིང་དེར་ཞབས་ཏོག་བསྒྲུབས་སོ། །
2KI 17:13 དེ་ཡང་དཀོན་མཆོག་ཡ་ཝཱེས་ལུང་སྟོན་པ་དང་མངོན་ཤེས་པ་ཐམས་ཅད་བརྒྱུད་ནས་ཡེས་ར་ཨེལ་པ་རྣམས་དང་ཡ་ཧུ་དཱ་པ་རྣམས་ལ་ཉེན་བརྡ་བཏང་ཞིང་འདི་སྐད་དུ། ཁྱོད་ཅག་གི་ལམ་ངན་པ་རྣམས་སྤོངས་ཤིག ངས་ཁྱོད་རྣམས་ཀྱི་མེས་པོ་ལ་གནང་བའི་བཀའ་རྒྱ་དང་བཀའ་ཁྲིམས་དང་། བདག་གི་སྒྲིག་ཁྲིམས་ཐམས་ཅད་བཞིན་དུ། རང་གི་ཞབས་ཕྱི་ལུང་སྟོན་པ་རྣམས་བརྒྱུད་ནས་ཁྱོད་ཅག་ལ་བསྒྲགས་པའི་དོན་རྣམས་བསྲུང་བར་བྱོས་ཤིག་ཅེས་གསུངས་མོད།
2KI 17:14 འོན་ཀྱང་ཁོ་ཚོས་མ་མཉན་པར། ཁོ་ཚོའི་ཕ་མེས་དང་འདྲ་བར་རང་གི་དཀོན་མཆོག་ཡ་ཝཱེ་ལ་ཡིད་མ་མོས་པར་གཉའ་རེངས་བྱས་སོ། །
2KI 17:15 ཡང་ཁོང་གིས་དེ་དག་གི་མེས་པོ་རྣམས་ལ་མཛད་པའི་ཞལ་ཆད་དང་བཀའ་ཁྲིམས། དེ་དག་ལ་མཛད་པའི་ཉེན་བརྡ་བཅས་སྤངས་ནས། དོན་མེད་ཀྱི་སྐུ་འདྲའི་རྗེས་སུ་འབྲངས་པས་སྙིང་པོ་མེད་པར་གྱུར། དཀོན་མཆོག་ཡ་ཝཱེས་དེ་དག་ལ། ཕྱི་རོལ་པ་རྣམས་ཀྱི་རྗེས་སུ་མི་འབྲང་བར་གྱིས་ཞེས་བསྒོས་ཀྱང་། དེ་དག་ནི་རང་གི་མཐའ་འཁོར་དུ་ཡོད་པའི་ཕྱི་རོལ་པ་རྣམས་ཀྱི་རྗེས་སུ་འབྲངས།
2KI 17:16 ཁོ་ཚོས་དེ་ལྟར་རང་གི་དཀོན་མཆོག་ཡ་ཝཱེའི་བཀའ་རྒྱ་ཐམས་ཅད་སྤངས་ཏེ། རང་གི་ཕྱིར་དུ་ཟངས་ཀྱི་བླུགས་སྐུ་བ་ཕྲུག་གཉིས་བཟོས་པ་དང་། ཨ་ཤེ་རཱ་ཡང་བརྩིགས་ནས་ནམ་མཁའི་སྐར་ཚོགས་ཐམས་ཅད་ལ་ཕྱག་བཙལ་ཞིང་པཱ་ཨལ་བསྟེན་ཏོ། །
2KI 17:17 ཡང་དེ་དག་གིས་རང་གི་བུ་དང་བུ་མོ་མེའི་དཀྱིལ་དུ་སྦྱིན་སྲེག་བཏང་ནས་མོ་བཏབ་སྟེ་རྫུ་འཕྲུལ་བསྟན་ཅིང་། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ནས་རང་ཉིད་བཙོངས་པ་དང་ཁོང་ཐུགས་ཁྲོ་བར་བྱས།
2KI 17:18 དེའི་རྐྱེན་གྱིས་དཀོན་མཆོག་ཡ་ཝཱེ་ཁོང་ཉིད་ཡེས་ར་ཨེལ་ལ་ཐུགས་རབ་ཏུ་ཁྲོས་ཏེ། དེ་དག་ཁོང་གི་སྤྱན་སྔ་ནས་ཕར་བསྐྲད་པས། ཡ་ཧུ་དཱའི་ཚོ་པ་མ་གཏོགས་གཞན་གང་ཡང་མ་ལུས་སོ། །
2KI 17:19 དེ་ཡང་ཡ་ཧུ་དཱ་པས་ཀྱང་རང་གི་དཀོན་མཆོག་ཡ་ཝཱེའི་བཀའ་རྒྱ་རྣམས་མ་བསྲུངས་པར། ཡེས་ར་ཨེལ་གྱིས་བྱས་པའི་ལུགས་སྲོལ་བཞིན་དུ་འགྲུལ།
2KI 17:20 དེ་ནས་དཀོན་མཆོག་ཡ་ཝཱེས་ཡེས་ར་ཨེལ་གྱི་བུ་རྒྱུད་ཐམས་ཅད་སྤངས་ནས་མནར་གཅོད་མྱང་དུ་བཅུག་སྟེ། ཉིད་ཀྱི་སྤྱན་སྔ་ནས་མ་དོར་བར་དུ་ཇག་ཚོགས་ཀྱི་ལག་ཏུ་གཏད་དོ། །
2KI 17:21 དེ་ཡང་ཁོང་གིས་དཱ་བིད་ཀྱི་གདུང་རྒྱུད་ནས་ཡེས་ར་ཨེལ་ཕྲལ་བར་མཛད་པའི་རྗེས་སུ། དེ་དག་གིས་ནེ་བཱད་ཀྱི་བུ་ཡེ་རོབ་ཨམ་རྒྱལ་པོར་བསྐོས་པ་དང་། ཡེ་རོབ་ཨམ་གྱིས་ཡེས་ར་ཨེལ་པ་རྣམས་དཀོན་མཆོག་ཡ་ཝཱེའི་རྗེས་སུ་འབྲང་དུ་མ་བཅུག་པར་སྡིག་པ་ཆེན་པོ་བྱེད་དུ་བཅུག
2KI 17:22 ཡེས་ར་ཨེལ་པ་རྣམས་ནི་ཡེ་རོབ་ཨམ་གྱིས་བྱས་པའི་སྡིག་པ་ཐམས་ཅད་ཀྱི་ལམ་དུ་འགྲུལ་ཞིང་། དེ་དག་ལས་མ་བྱོལ་བ་དང་།
2KI 17:23 མཇུག་མཐར་དཀོན་མཆོག་ཡ་ཝཱེས་ཉིད་ཀྱི་ཞབས་ཕྱི་ལུང་སྟོན་པ་ཐམས་ཅད་བརྒྱུད་ནས་གསུངས་པ་བཞིན་དུ། ཡེས་ར་ཨེལ་པ་རྣམས་ཉིད་ཀྱི་སྤྱན་སྔ་ནས་ཕྱི་རུ་བསྐྲད། ཡེས་ར་ཨེལ་པ་རྣམས་རང་ཡུལ་ནས་ཨ་སུར་ཡུལ་དུ་ད་ལྟའི་བར་བཙན་བྱོལ་དུ་བསྐྱལ་ཏོ། །
2KI 17:24 དེ་ནས་ཨ་སུར་གྱི་རྒྱལ་པོས་པཱ་པེལ་ལོན་དང་། ཀུ་ཐཱ་དང་། ཨ་ཝཱ་དང་། ཧ་མཱད་དང་། སེ་ཕར་ཝ་ཨིམ་གྱི་མི་རྣམས་ཁྲིད་དེ། ཡེས་ར་ཨེལ་གྱི་མི་སྡེའི་ཚབ་ཏུ་སཱ་མར་ཡའི་གྲོང་ཁྱེར་རྣམས་སུ་བཞག་པས། དེ་དག་ལ་སཱ་མར་ཡ་བགོ་སྐལ་དུ་ཐོབ་ཅིང་དེ་གའི་གྲོང་ཁྱེར་དག་ཏུ་གཞིས་ཕབ།
2KI 17:25 ཁོ་ཚོ་ཐོག་མར་གནས་དེར་སྡོད་སྐབས་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་མེད་པས། དཀོན་མཆོག་ཡ་ཝཱེས་དེ་རྣམས་ཀྱི་ཁྲོད་དུ་སེང་གེ་བཏང་ནས་ཁོ་ཚོ་ལས་མི་ཁ་ཤས་ཀྱི་སྲོག་བཅད་དོ། །
2KI 17:26 དེ་ནས་ཁོ་ཚོས་ཨ་སུར་གྱི་རྒྱལ་པོ་ལ། ཁྱེད་ཀྱིས་སཱ་མར་ཡའི་གྲོང་ཁྱེར་དུ་བཙན་ཁྲིད་བྱས་ནས་བཞག་པའི་མི་སྡེ་རྣམས་ཀྱིས་ཡུལ་དེའི་དཀོན་མཆོག་གི་ཁྲིམས་སྲོལ་མ་ཤེས་སྟབས། ཁོང་གིས་དེ་དག་གི་ཁྲོད་དུ་སེང་གེ་བཏང་། ལྟོས་དང་། མི་དེ་ཚོས་དཀོན་མཆོག་གི་ཁྲིམས་སྲོལ་མ་ཤེས་པའི་རྐྱེན་གྱིས་སེང་གེས་དེ་དག་གི་སྲོག་བཅད་དོ་ཞེས་སྨྲས་པས།
2KI 17:27 ཨ་སུར་གྱི་རྒྱལ་པོས་བཀའ་གནང་སྟེ་ན་རེ། ཁྱོད་རྣམས་ཀྱིས་ཡུལ་དེ་ནས་བཙན་ཁྲིད་བྱས་འོངས་པའི་མཆོད་དཔོན་རྣམས་ལས་གཅིག་ཕྱིར་ཁྲིད་ཅིག ཁོང་གནས་དེར་བསྡད་ནས་དེ་རྣམས་ལ་ཡུལ་དེའི་དཀོན་མཆོག་གི་ཁྲིམས་སྲོལ་སློབ་དགོས་ཞེས་བསྒོས།
2KI 17:28 དེ་ནས་སཱ་མར་ཡ་ནས་བཙན་ཁྲིད་བྱས་འོངས་པའི་མཆོད་དཔོན་རྣམས་ལས་གཅིག་ཕྱིར་ལོག་ནས་པེད་ཨེལ་དུ་གཞིས་ཕབ་སྟེ། ཁོང་གིས་དེ་དག་ལ་དཀོན་མཆོག་ཡ་ཝཱེ་ལ་ཅི་ལྟར་གུས་ཤིང་འཇིགས་པར་བྱེད་དགོས་ཚུལ་བསླབས་སོ། །
2KI 17:29 འོན་ཀྱང་རིགས་རྒྱུད་རེ་རེས་རང་ཉིད་ལ་ལྷ་སྐུ་རྣམས་བཞེངས་ཏེ་སཱ་མར་ཡ་པས་བརྩིགས་པའི་མཐོ་གླིང་གི་ལྷ་ཁང་དག་ཏུ་བཞག་ཅིང་། རིགས་རྒྱུད་རེ་རེས་རང་ཉིད་གནས་པའི་གྲོང་ཁྱེར་གྱི་ནང་དུ་དེ་ལྟར་བྱས།
2KI 17:30 པཱ་པེལ༌པ་རྣམས་ཀྱིས་སོའུ་ཀོད་བེ་ནོད་བྱ་བའི་སྐུ་འདྲ་དང་། ཀུད་པ་རྣམས་ཀྱིས་ནེར་གལ་བྱ་བའི་སྐུ་འདྲ་དང་། ཧ་མཱད་པ་རྣམས་ཀྱིས་ཨ་ཤི་མཱ་བྱ་བའི་སྐུ་འདྲ་དང་།
2KI 17:31 ཨ་ཝཱ་པ་རྣམས་ཀྱིས་ནིབ་ཧ་ཟི་དང་ཐཱར་ཐག་བྱ་བའི་སྐུ་འདྲ་བཅས་བཟོས་ཤིང་། སེ་ཕར་ཝི་པས་སེ་ཕར་ཝ་ཨིམ་གྱི་ལྷ་ཨད་རམ་མེ་ལེག་དང་ཨ་ནམ་མེ་ལེག་བྱ་བ་གཉིས་ཀྱི་ཆེད་དུ་རང་གི་བུ་རྣམས་མེའི་ནང་དུ་བསྲེགས་སོ། །
2KI 17:32 དེ་རྣམས་ཀྱང་དཀོན་མཆོག་ཡ་ཝཱེ་ལ་སྐྲག་པས། རང་གི་ནང་ནས་མཐོ་གླིང་རྣམས་སུ་མཆོད་དཔོན་བསྐོས་པ་དང་། མཐོ་གླིང་དག་གི་ལྷ་ཁང་ནང་དུ་མི་རྣམས་ཀྱི་ཆེད་དུ་ཕྱག་ལས་གནང་།
2KI 17:33 ཁོ་ཚོ་དཀོན་མཆོག་ཡ་ཝཱེ་ལ་སྐྲག་ནའང་། དེ་དག་གིས་རང་རང་རིགས་རྒྱུད་གང་ནས་བཙན་ཁྲིད་བྱས་འོངས་པའི་ལུགས་སྲོལ་གང་དེའི་ལྷ་རྣམས་ལ་ཞབས་ཕྱི་བསྒྲུབས་པའོ། །
2KI 17:34 ཁོ་ཚོས་ད་ལྟའི་བར་དུ་སྔོན་གྱི་ལུགས་སྲོལ་བཞིན་བྱས་ཤིང་། དཀོན་མཆོག་ཡ་ཝཱེ་ལ་གུས་ཤིང་འཇིགས་པར་ཡང་མ་བྱས་ལ། དཀོན་མཆོག་ཡ་ཝཱེས་ཡེས་ར་ཨེལ་ཞེས་བཏགས་པའི་ཡ་ཀོབ་ཀྱི་བུ་རྒྱུད་རྣམས་ལ་གནང་བའི་བཀའ་ཁྲིམས་དང་། སྒྲིག་ཁྲིམས་དང་། སྲོལ་ཡིག་དང་། བཀའ་རྒྱ་རྣམས་ཀྱང་མ་བསྲུངས་སོ། །
2KI 17:35 དཀོན་མཆོག་ཡ་ཝཱེས་དེ་རྣམས་ལ་ཞལ་ཆད་མཛད་ཅིང་བཀའ་གནང་སྟེ་འདི་སྐད་དུ། ཁྱོད་ཅག་ལྷ་གཞན་རྣམས་ལ་སྐྲག་མི་དགོས། དེ་དག་ལ་ཕྱག་མ་འཚལ། ཞབས་ཕྱི་མ་བསྒྲུབ། མཆོད་པ་ཡང་འབུལ་བར་མི་བྱའོ། །
2KI 17:36 འོན་ཀྱང་། མཐུ་སྟོབས་ཆེན་པོའི་ཕྱག་བརྐྱངས་ཏེ་ཁྱོད་ཅག་ཨེ་ཅིབ་ཡུལ་ནས་ཁྲིད་མཁན་དཀོན་མཆོག་ཡ་ཝཱེ་ལ་ནི། ཁྱོད་རྣམས་གུས་ཤིང་འཇིགས་པ་དང་། ཁོང་ལ་ཕྱག་བཙལ་ནས་མཆོད་པ་འབུལ་འོས་ལ།
2KI 17:37 ཁོང་གིས་ཁྱོད་ཅག་གི་དོན་དུ་ཡི་གེར་བཀོད་པའི་སྒྲིག་ཁྲིམས་དང་། སྲོལ་ཡིག་དང་། བཀའ་ཁྲིམས་དང་། བཀའ་རྒྱ་དེ་རྣམས་དུས་ནམ་ཡང་སྒྲུབས་ལ་སྲུངས་ཤིག ལྷ་གཞན་ལ་མ་འཇིགས་ཤིག
2KI 17:38 བདག་གིས་ཁྱོད་ཅག་ལ་མཛད་པའི་ཞལ་ཆད་དེ་བརྗེད་པར་མི་བྱའོ། །ལྷ་གཞན་རྣམས་ལའང་འཇིགས་པར་མ་བྱེད་ཅིག
2KI 17:39 འོན་ཀྱང་རང་གི་དཀོན་མཆོག་ཡ་ཝཱེ་ལ་གུས་ཤིང་འཇིགས་པར་གྱིས་ཤིག ཁོང་གིས་ཁྱོད་ཅག་དགྲ་ཐམས་ཅད་ཀྱི་ལག་ནས་སྐྱོབ་པར་འགྱུར་རོ་ཞེས་གསུངས་མོད།
2KI 17:40 འོན་ཀྱང་དེ་དག་གིས་མ་མཉན་པར་སྔར་བཞིན་རང་རང་གི་ཐོག་མའི་ལུགས་སྲོལ་ལྟར་བྱས་པའོ། །
2KI 17:41 དེར་མི་རིགས་འདི་དག་ནི་དཀོན་མཆོག་ཡ་ཝཱེ་ལ་གུས་ཤིང་འཇིགས་ནའང་། ཁོ་ཚོས་རང་གི་སྐུ་འདྲ་ལའང་ཞབས་ཕྱི་བསྒྲུབས། དེ་དག་གི་བུ་རབས་ཚ་རྒྱུད་རྣམས་ཀྱིས་ཀྱང་དེ་རིང་གི་བར་དུ་ཁོ་ཚོའི་ཕ་མེས་རྣམས་དང་མཚུངས་པར་བྱས་སོ། །
2KI 18:1 དེ་ཡང་ཡེས་ར་ཨེལ་གྱི་རྒྱལ་པོ་ཨེ་ལཱའི་སྲས་ཧོ་ཤེ་ཨ་ཡིས་རྒྱལ་སྲིད་བསྐྱངས་པའི་ལོ་གསུམ་པར། ཡ་ཧུ་དཱའི་རྒྱལ་པོ་ཨ་ཧ་ཟཱ་ཡི་བུ་ཧི་ཟི་ཀི་ཡཱས་རྒྱལ་སྲིད་བཟུང་།
2KI 18:2 ཁོས་རྒྱལ་སྲིད་བཟུང་དུས་ཁོ་ལོ་ཉེར་ལྔ་ཡིན་པ་དང་། ལོ་ཉེར་དགུའི་རིང་ལ་ཡེ་རུ་སཱ་ལེམ་དུ་རྒྱལ་སྲིད་བསྐྱངས། ཟཱ་ཀར་ཡའི་བུ་མོ་ཨ་བི་བྱ་བ་ནི་ཁོའི་ཡུམ་མོ། །
2KI 18:3 ཁོས་རང་གི་ཡབ་མེས་དཱ་བིད་ཀྱིས་གང་མཛད་པ་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་སྤྱད་དེ།
2KI 18:4 མཐོ་གླིང་རྣམས་བརླགས། རྡོ་སྐུ་རྣམས་བཅག་ཅིང་ཨ་ཤེ་རཱ་རྣམས་བཅད། མོ་ཤེ་ཡིས་བཟོས་པའི་ལི་ཡི་སྦྲུལ་དེ་ཡང་དུམ་བུར་བཅག་གོ །ཅི་ལ་ཞེ་ན། ཡེས་ར་ཨེལ་པ་རྣམས་ཀྱིས་དུས་དེའི་བར་དུ་དེ་ལ་བསང་བཏང་ཞིང་། དེའི་མིང་ལ་ནེ་ཧུ་ཤཱ་ཏན་ཞེས་བཏགས་སོ། །
2KI 18:5 ཁོ་ནི་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་བརྟེན་ཞིང་། ཁོའི་སྔ་རྗེས་སུ་ཡ་ཧུ་དཱའི་རྒྱལ་པོ་ཐམས་ཅད་ཀྱི་ནང་ནས་ཁོ་ལྟ་བུ་གཅིག་ཀྱང་མ་བྱུང་ངོ་། །
2KI 18:6 ཁོས་དཀོན་མཆོག་ཡ་ཝཱེ་དམ་དུ་འཆིང་བ་དང་། ཁོང་གི་ཕྱི་བཞིན་འབྲངས་པ་ལས་མ་བྱོལ་ཏེ། དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་རྒྱ་ཐམས་ཅད་བསྲུངས་སོ། །
2KI 18:7 དཀོན་མཆོག་ཡ་ཝཱེ་ཁོ་དང་མཉམ་དུ་བཞུགས་པས། ཁོ་ནི་གར་སོང་ཐམས་ཅད་དུ་དོན་འགྲུབ་པ་དང་། ཨ་སུར་གྱི་རྒྱལ་པོ་ལ་ངོ་ལོག་བྱས་ནས་དེའི་གཡོག་པོ་མ་བྱས་སོ། །
2KI 18:8 ཡང་ཁོས་གཱ་ཟཱ་དང་། དེའི་ས་མཚམས་དག་གི་བར་དུའམ། བྱ་རའི་ལྕོག་མཁར་ནས་གྲོང་ཁྱེར་བརྟན་པོའི་བར་དུ་ཕེ་ལེ་ཤེད་པ་རྣམས་ཕམ་པར་བརྒྱབ་བོ། །
2KI 18:9 དེ་ཡང་རྒྱལ་པོ་ཧི་ཟི་ཀི་ཡཱའི་སྲིད་ལོ་བཞི་པའམ། ཡེས་ར་ཨེལ་གྱི་རྒྱལ་པོ་ཨེ་ལཱ་ཡི་སྲས་ཧོ་ཤེ་ཨ་ཡིས་རྒྱལ་སྲིད་བསྐྱངས་པའི་ལོ་བདུན་པར། ཨ་སུར་གྱི་རྒྱལ་པོ་ཤལ་མན་ཨེ་སེར་ཡར་སཱ་མར་ཡ་རུ་འོངས་ནས་གྲོང་ཁྱེར་དེའི་མཐའ་བསྐོར་བ་དང་།
2KI 18:10 ལོ་གསུམ་གྱི་རྗེས་སུ་དེ་དག་གིས་སཱ་མར་ཡ་བླངས་པ་སྟེ། ཧི་ཟི་ཀི་ཡཱས་རྒྱལ་སྲིད་བསྐྱངས་ནས་ལོ་དྲུག་པའམ། ཡེས་ར་ཨེལ་གྱི་རྒྱལ་པོ་ཧོ་ཤེ་ཨ་ཡི་སྲིད་ལོ་དགུ་པར་སཱ་མར་ཡ་བླངས།
2KI 18:11 ཨ་སུར་གྱི་རྒྱལ་པོས་ཡེས་ར་ཨེལ་པ་རྣམས་ཨ་སུར་ཡུལ་དུ་བཙན་ཁྲིད་བྱས་པ་དང་། དེ་རྣམས་ཧ་ལཱ་དང་། གོ་ཟན་ཡུལ་གྱི་ཧ་བོར་གཙང་པོ་དང་། མཱ་ཏི་པའི་གྲོང་ཁྱེར་སོ་སོར་བཞག་གོ །
2KI 18:12 དེའི་རྒྱུ་རྐྱེན་ནི། དེ་ཚོས་རང་གི་དཀོན་མཆོག་ཡ་ཝཱེའི་གསུང་ལ་མ་མཉན་པར་ཁོང་གི་ཞལ་ཆད་དང་འགལ་ཞིང་། དཀོན་མཆོག་ཡ་ཝཱེའི་ཞབས་ཕྱི་མོ་ཤེ་ཡིས་བསྒོས་པ་ཐམས་ཅད་ལ་མ་མཉན་པ་དང་དེ་བཞིན་མ་བསྒྲུབས་པས་ཡིན་ནོ། །
2KI 18:13 ཡང་རྒྱལ་པོ་ཧི་ཟི་ཀི་ཡཱས་རྒྱལ་སྲིད་བཟུང་ནས་ལོ་བཅུ་བཞི་པར། ཨ་སུར་གྱི་རྒྱལ་པོ་སེན་ན་ཧེ་རིབ་ཀྱིས་ཡ་ཧུ་དཱའི་གྲོང་ཁྱེར་ལྕགས་རིས་བསྐོར་ཡོད་པ་ཐམས་ཅད་ལ་དཔུང་འཇུག་བྱས་ནས་བླངས་པ་དང་།
2KI 18:14 ཡ་ཧུ་དཱའི་རྒྱལ་པོ་ཧི་ཟི་ཀི་ཡཱས་ལཱ་ཀི་སི་བྱ་བར་ཨ་སུར་གྱི་རྒྱལ་པོར་བང་ཆེན་མངགས་ཏེ་ཁོ་ལ། བདག་གིས་སྡིག་པ་བྱས་ཡོད། བདག་དང་འབྲལ་བར་མཛོད། དེ་ལྟར་བྱས་ན་ཁྱེད་ཀྱིས་བདག་ལ་ཅི་དང་ཅི་བཀལ་ཡང་འཁུར་ངེས་ཡིན་ཞེས་ཞུས་པས། ཨ་སུར་གྱི་རྒྱལ་པོས་ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་ལ་དངུལ་རྡོ་ཚད་སུམ་བརྒྱ་དང་གསེར་རྡོ་ཚད་སུམ་ཅུ་བཀལ་ཏོ། །
2KI 18:15 དེ་ནས་ཧི་ཟི་ཀི་ཡཱས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོའི་ནོར་མཛོད་རྣམས་ལས་རྙེད་པའི་དངུལ་ཐམས་ཅད་ཁོ་ལ་སྤྲད།
2KI 18:16 དེའི་དུས་སུ་ཧི་ཟི་ཀི་ཡཱས་ནི། སྔར་ཡ་ཧུ་དཱའི་རྒྱལ་པོ་ཧི་ཟི་ཀི་ཡཱས་དཀོན་མཆོག་ཡ་ཝཱེའི་མཆོད་ཁང་གི་སྒོ་དང་སྒོ་ཆེན་རྣམས་བཏུམས་ཡོད་པའི་གསེར་རྣམས་བཀོག་ནས་ཨ་སུར་གྱི་རྒྱལ་པོར་ཕུལ་ཏོ། །
2KI 18:17 དེ་ནས་ཨ་སུར་གྱི་རྒྱལ་པོས་ལཱ་ཀི་སི་ནས་ཏར་ཏན་དང་། རབ་སཱ་རེ་ཟི་དང་། རབ་ཤཱ་ཀེ་གསུམ་ནི་དམག་དཔུང་འབོར་ཆེན་དང་བཅས་ཡེ་རུ་སཱ་ལེམ་དུ་རྒྱལ་པོ་ཧི་ཟི་ཀི་ཡཱའི་དྲུང་དུ་བརྫངས་ཏེ། དེ་དག་ཡར་ཕྱིན་ཅིང་ཡེ་རུ་སཱ་ལེམ་དུ་སླེབས་པའི་ཚེ། གོས་འཁྲུད་མཁན་གྱི་ཞིང་ཁའི་ལམ་དུ་ཡོད་པའི་རྫིང་བུ་གོང་མའི་ཆུ་ཡུར་འགྲམ་དུ་ལངས་ནས་བསྡད།
2KI 18:18 རྒྱལ་པོ་བོས་པ་ན། ཧིལ་ཀི་ཡཱའི་བུ་སྟེ་རྒྱལ་པོའི་ཕོ་བྲང་གི་ནང་བློན་ཨེལ་ཡ་ཀིམ་དང་། དྲུང་ཡིག་ཤེབ་ནཱ་དང་། ཨ་སབ་ཀྱི་བུ་སྟེ་ལོ་རྒྱུས་འགོད་མཁན་ཡོ་ཨག་བཅས་དེ་དག་གི་མདུན་དུ་འོངས་སོ། །
2KI 18:19 དེར་རབ་ཤཱ་ཀེས་དེ་དག་ལ། ཁྱོད་ཅག་གིས་ཧི་ཟི་ཀི་ཡཱ་ལ་སྦྲོན་ཅིག རྒྱལ་པོ་ཆེན་པོ་ཨ་སུར་གྱི་རྒྱལ་པོས་འདི་སྐད་གསུངས། ཁྱོད་ཀྱིས་བློ་བཅོལ་བའི་འགོག་སྲུང་དེ་ཅི་ཡིན།
2KI 18:20 ཁྱོད་ཀྱིས་གཡུལ་འགྱེད་པའི་བློ་བཀོད་དང་སྟོབས་ཤུགས་ཡོད་ཅེས་པ་ནི་སྟོང་བཤད་ཙམ་ཡིན་ལ། ད་ལྟ་ཁྱོད་ཀྱིས་སུ་ལ་བརྟེན་ནས་བདག་ལ་ངོ་ལོག་བྱེད་དམ།
2KI 18:21 ལྟོས་དང་། ཁྱོད་ཀྱིས་འདམ་རྩྭའི་དབྱུག་པ་ཆག་པོ་སྟེ་ཨེ་ཅིབ་ལ་བློ་བཅོལ་བ་རེད། སུ་ཞིག་དེ་ལ་བརྟེན་ན་དེ་ནི་ཁོའི་ལག་པར་ཟུག་ནས་འབུག་པར་བྱེད། ཨེ་ཅིབ་ཀྱི་རྒྱལ་པོ་ཕཱར་ཨོལ་གྱིས་རང་ལ་བློ་གཏད་བཅོལ་མཁན་ཐམས་ཅད་ལ་དེ་བཞིན་བྱེད་དོ། །
2KI 18:22 ཡང་གལ་ཏེ་ཁྱོད་ཀྱིས་ང་ལ། ངེད་ཅག་ནི་རང་གི་དཀོན་མཆོག་ཡ་ཝཱེ་ལ་བརྟེན་པ་ཡིན་ཟེར་ན། ཧི་ཟི་ཀི་ཡཱས་དཀོན་མཆོག་ཡ་ཝཱེའི་མཐོ་གླིང་དང་མཆོད་ཁྲི་རྣམས་བཤིགས་ནས། ཡ་ཧུ་དཱ་པ་དང་ཡེ་རུ་སཱ་ལེམ་གྱི་མི་རྣམས་ལ། ཁྱོད་ཅག་གིས་ཡེ་རུ་སཱ་ལེམ་གྱི་མཆོད་ཁྲི་འདིའི་མདུན་དུ་བསྙེན་བཀུར་ཞུ་དགོས་ཞེས་བསྒོས་པ་མ་ཡིན་ནམ།
2KI 18:23 ད་ལྟ་ཁྱོད་ཀྱིས་ངའི་བདག་པོ་ཨ་སུར་གྱི་རྒྱལ་པོ་དང་གྲོས་མཐུན་འཇོག་པར་ཞུ། གལ་ཏེ་ཁྱོད་ཀྱིས་ཞོན་པ་ཉིས་སྟོང་མངག་ནུས་ན། ངས་ཁྱོད་ལ་དམག་རྟ་སྟོང་ཕྲག་གཉིས་སྟེར་བར་བྱའོ། །
2KI 18:24 ཁྱོད་ཀྱིས་ཤིང་རྟ་དང་སྐྱ་དམག་རྣམས་ཀྱི་ཕྱིར་ཨེ་ཅིབ་ཀྱི་རྒྱལ་པོར་བློ་བཅོལ་ཡང་། ངའི་བདག་པོའི་འཁོར་འབངས་ཆུང་ཤོས་གཅིག་གི་ངོ་གདོང་དེ་ཡང་ཇི་ལྟར་བཟློག་ནུས་སམ།
2KI 18:25 ད་ལྟ་ང་ནི་དཀོན་མཆོག་ཡ་ཝཱེའི་བཀའ་འཁྲོལ་མེད་པར་ས་ཆ་འདི་འཇིག་པར་བྱེད་དུ་ཡར་འོངས་པ་ཡིན་ནམ། དཀོན་མཆོག་ཡ་ཝཱེས་བདག་ལ་ཡུལ་དེར་ཡར་སོང་ལ་དེ་མེད་པར་བྱོས་ཤིག་གསུངས་ཞེས་པའོ་ཞེས་སྨྲས་སོ། །
2KI 18:26 དེ་ནས་ཧིལ་ཀི་ཡཱ་ཡི་བུ་ཨེལ་ཡ་ཀིམ་དང་། ཤེབ་ནཱ་དང་། ཡོ་ཨག་བཅས་ཀྱིས་རབ་ཤཱ་ཀེ་ལ་ན་རེ། ང་ཚོས་ཨ་རམ་པའི་སྐད་ཤེས་པས་ཁྱོད་ཀྱི་ཞབས་ཕྱི་ཚོར་ཨ་རམ་པའི་སྐད་སྨྲ་བར་མཛོད་ཅིག ལྕགས་རིའི་སྟེང་གི་མི་རྣམས་ཀྱིས་ཡ་ཧུ་དཱའི་སྐད་གོ་བས་དེ་མི་གསུང་རོགས་ཞེས་ཞུས་མོད།
2KI 18:27 འོན་ཀྱང་རབ་ཤཱ་ཀེ་ན་རེ། ང་ཡི་བདག་པོས་ཁྱོད་ཀྱི་བདག་པོ་དང་ཁྱོད་ཁོ་ནར་གཏམ་འདི་དག་སྨྲ་བའི་ཕྱིར་ང་འདིར་མངགས་པ་ཡིན་ནམ། ཁོང་གིས་ལྕགས་རིའི་སྟེང་སྡོད་པའི་མི་རྣམས་ཏེ། ཁྱོད་དང་མཉམ་དུ་རང་གི་སྐྱག་པ་ཟ་ཞིང་རང་གི་གཅིན་པ་འཐུང་བ་རྣམས་ལའང་སྨྲ་བའི་ཕྱིར་བདག་མངགས་པ་མ་ཡིན་ནམ་ཞེས་སྨྲས་སོ། །
2KI 18:28 དེར་རབ་ཤཱ་ཀེ་ཡར་ལངས་ནས་སྐད་ཆེན་པོས་ཡ་ཧུ་དཱའི་སྐད་དུ། རྒྱལ་པོ་ཆེན་པོ་ཨ་སུར་གྱི་རྒྱལ་པོའི་བཀའ་ལ་ཉོན་ཅིག
2KI 18:29 རྒྱལ་པོས་འདི་སྐད་གསུངས་ཏེ། ཧི་ཟི་ཀི་ཡཱས་ཁྱོད་ཅག་ངའི་ལག་ནས་ཐར་བར་བྱ་མི་ནུས་པས། ཁྱོད་ཅག་ཁོའི་གཡོ་འོག་ཏུ་མ་ཚུད་ཅིག
2KI 18:30 ཡང་ཧི་ཟི་ཀི་ཡཱས་ཁྱོད་ཅག་དཀོན་མཆོག་ཡ་ཝཱེར་བརྟེན་དགོས་པའི་ཐད། དཀོན་མཆོག་ཡ་ཝཱེས་ང་ཚོ་སྐྱོབ་ངེས་ཤིང་། གྲོང་ཁྱེར་འདིའང་ཨ་སུར་གྱི་རྒྱལ་པོའི་ལག་ཏུ་གཏོད་པར་མི་བྱའོ་ཞེས་པའི་ཚིག་ལ་མ་མཉན་ཅིག
2KI 18:31 ཧི་ཟི་ཀི་ཡཱའི་གཏམ་ལ་མཉན་མི་རུང་། རྒྱུ་མཚན་ནི་ཨ་སུར་གྱི་རྒྱལ་པོས་འདི་སྐད་གསུངས་ཏེ། ཁྱོད་ཅག་བདག་དང་མཐུན་པོ་ཡོང་ཆེད་ཕྱི་རུ་ཤོག་དང་། ཁྱོད་ཚོ་མི་རེ་རེས་རང་རང་གི་རྒུན་ཤིང་དང་། སེ་ཡབ་ཤིང་གི་འབྲས་བུ་བཟའ་ཞིང་། རང་རང་གི་ཁྲོན་པའི་ཆུ་འཐུང་བར་འགྱུར།
2KI 18:32 ཁྱོད་རྣམས་གསོན་པོར་ལུས་ཤིང་མི་འཆི་བའི་ཕྱིར་དུ། རྗེས་སུ་ང་འོངས་ནས་ཁྱོད་རྣམས་ནི་ཁྱོད་ཅག་གི་ཡུལ་ཁམས་ལྟ་བུའི་ཡུལ་ཁམས་ཤིག་ཏུ་འཁྲིད་པར་བྱ་སྟེ། ཡུལ་དེར་འབྲུ་དང་རྒུན་ཆང་། བག་ལེབ་དང་རྒུན་ཚལ། སྐྱུ་རུ་ཤིང་དང་སྦྲང་རྩི་བཅས་ཡོད་པ་ཡིན། ཧི་ཟི་ཀི་ཡཱས། ངེད་ཅག་དཀོན་མཆོག་ཡ་ཝཱེས་སྐྱོབ་ངེས་ཡིན་ཞེས་སྨྲ་ཞིང་ཁྱོད་ཅག་ལོག་ལམ་དུ་འཁྲིད་པས་དེར་མ་མཉན་ཅིག
2KI 18:33 རྒྱལ་ཁམས་སོ་སོའི་ལྷ་རྣམས་ལས་སུ་ཞིག་གིས་དངོས་གནས་རང་གི་ཡུལ་ཨ་སུར་གྱི་རྒྱལ་པོའི་ལག་ནས་བསྐྱབས་པ་ཡིན་ནམ།
2KI 18:34 ཧ་མཱད་དང་ཨར་ཕད་ཀྱི་ལྷ་རྣམས་གང་དུ་ཡོད་དམ། སེ་ཕར་ཝ་ཨིམ་དང་ཧེ་ནཱ། ཨི་ཝཱ་བཅས་ཀྱི་ལྷ་རྣམས་གང་དུ་ཡོད་དམ། དེ་དག་གིས་ངའི་ལག་ནས་སཱ་མར་ཡ་བསྐྱབས་ཡོད་དམ།
2KI 18:35 ཡུལ་དེ་དག་གི་ལྷ་རྣམས་ལས་སུ་ཞིག་གིས་རང་གི་ས་ཆ་ངའི་ལག་ནས་བླངས་པ་ཡིན་ནམ། དཀོན་མཆོག་ཡ་ཝཱེས་ངའི་ལག་ནས་ཡེ་རུ་སཱ་ལེམ་སྐྱོབ་ནུས་སམ་ཞེས་སྨྲས་སོ། །
2KI 18:36 འོན་ཀྱང་། རྒྱལ་པོས་དེ་དག་ལ་ལན་མ་འདེབས་ཤིག་ཅེས་བཀའ་བསྒོས་ཡོད་པས། མི་དེ་དག་ཁ་རོག་གེར་བསྡད་ཅིང་། ཁོ་ལ་ཚིག་ལན་གཅིག་ཀྱང་མ་སྨྲས་སོ། །
2KI 18:37 དེ་ནས་ཧིལ་ཀི་ཡཱའི་བུ་སྟེ་རྒྱལ་པོའི་ཕོ་བྲང་གི་ནང་བློན་ཨེལ་ཡ་ཀིམ་དང་། དྲུང་ཡིག་ཤེབ་ནཱ་དང་། ཨ་སབ་ཀྱི་བུ་སྟེ་ལོ་རྒྱུས་འགོད་མཁན་ཡོ་ཨག་བཅས་ཀྱིས་རང་རང་གི་གྱོན་གོས་གཤགས་ཏེ། ཧི་ཟི་ཀི་ཡཱའི་དྲུང་དུ་འོངས་ནས་རབ་ཤཱ་ཀེའི་གཏམ་རྣམས་ཁོང་ལ་ཞུས་སོ། །
2KI 19:1 དེ་ཡང་རྒྱལ་པོ་ཧི་ཟི་ཀི་ཡཱས་དེ་ཐོས་པ་ཙམ་གྱིས་རང་གི་ན་བཟའ་གཤགས་ནས་ལུས་པོར་རྩིད་རས་གཡོགས་ཏེ། དཀོན་མཆོག་ཡ་ཝཱེའི་མཆོད་ཁང་དུ་ཕྱིན།
2KI 19:2 ཡང་ཕོ་བྲང་གི་ནང་བློན་ཨེལ་ཡ་ཀིམ་དང་། དྲུང་ཡིག་ཤེབ་ནཱ་དང་མཆོད་དཔོན་རྣམས་ལས་རྒན་པོ་བཅས་རྩིད་རས་ཀྱིས་གཡོགས་ཏེ། ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱའི་དྲུང་དུ་མངགས།
2KI 19:3 དེ་དག་གིས་ཁོང་ལ། ཧི་ཟི་ཀི་ཡཱ་ན་རེ། དེ་རིང་ནི་སྡུག་བསྔལ་ཆེ་ཞིང་ཉེས་ཆད་ཕོག་པ་དང་། བརྙས་བཅོས་ཐེབས་པའི་ཉིན་མོ་ཡིན། དེ་ནི་བུ་བཙའ་རན་ལ་སླེབས་ནའང་བཙའ་བའི་སྟོབས་ཟད་པ་དང་འདྲའོ། །
2KI 19:4 ཁྱེད་ཀྱི་དཀོན་མཆོག་ཡ་ཝཱེས་རབ་ཤཱ་ཀེའི་གཏམ་ཐམས་ཅད་གསན་ཡོད་ཀྱང་སྲིད་དེ། མི་དེ་ནི་ཁོའི་བདག་པོ་ཨ་སུར་གྱི་རྒྱལ་པོས་གཏན་དུ་གསོན་པོར་བཞུགས་པའི་དཀོན་མཆོག་ལ་སྨོད་ཅིང་སྐུར་བ་འདེབས་པའི་དོན་དུ་འདིར་མངགས་པ་ཡིན། ཁྱེད་ཀྱི་དཀོན་མཆོག་ཡ་ཝཱེས་གསན་པའི་ཚིག་རྣམས་ཀྱི་རྐྱེན་གྱིས་ཉེས་ཆད་གཏོང་བར་བྱ། དེ་བས་ན། ཁྱེད་ཀྱིས་ཤུལ་དུ་ལུས་ཡོད་པ་རྣམས་ཀྱི་དོན་དུ་གསོལ་བ་འདེབས་རོགས་ཟེར་ཞེས་སྦྲན་ཏོ། །
2KI 19:5 དེ་ནས་རྒྱལ་པོ་ཧི་ཟི་ཀི་ཡཱའི་འཁོར་གཡོག་རྣམས་ཡེ་ཤ་ཡཱའི་དྲུང་དུ་སླེབས་པའི་ཚེ།
2KI 19:6 ཡེ་ཤ་ཡཱས་དེ་དག་ལ། ཁྱོད་ཅག་གི་བདག་པོ་ལ་འདི་ལྟར་སྦྲོན་ཅིག དཀོན་མཆོག་ཡ་ཝཱེས་འདི་སྐད་དུ། ཨ་སུར་རྒྱལ་པོའི་འཁོར་གཡོག་རྣམས་ཀྱིས་བདག་ལ་སྐུར་བ་བཏབ་པའི་གཏམ་ཁྱོད་ཀྱིས་ཐོས་ཀྱང་། དེ་ལ་མ་འཇིགས་ཤིག
2KI 19:7 ལྟོས་དང་། བདག་གིས་ཁོའི་ནང་དུ་སེམས་ཉིད་ཅིག་འཇོག་པ་དང་། ཁོས་འཆལ་གཏམ་ཞིག་ཐོས་ནས་རང་ཡུལ་དུ་ལོག་པར་འགྱུར་བ་དང་། ངས་ཁོ་ནི་རང་གི་ཡུལ་དུ་རལ་གྲིའི་ཁ་ནས་འཆི་བར་བྱེད་ངེས་གསུངས་ཞེས་ཞུས་སོ། །
2KI 19:8 ཡང་རབ་ཤཱ་ཀེས་ཨ་སུར་གྱི་རྒྱལ་པོ་ལཱ་ཀི་སི་ནས་ཆས་ཟིན་པར་ཐོས་པས། ཁོ་ཕྱིར་ལོག་པ་ན། ཨ་སུར་གྱི་རྒྱལ་པོས་ལིབ་ནཱ་དང་དམག་འཐབ་བྱེད་བཞིན་པ་དང་ཕྲད་དོ། །
2KI 19:9 ཨ་སུར་གྱི་རྒྱལ་པོས། ལྟོས་དང་། ཁོ་རང་ཁྱེད་ལ་དམག་འཐབ་ཏུ་འོངས་སོ་ཞེས་པའི་གུ་ཤ་ཡི་རྒྱལ་པོ་ཐིར་ཧ་ཀཱའི་སྐོར་ཐོས་པས། ཁོས་ཧི་ཟི་ཀི་ཡཱའི་རྩར་བང་ཆེན་མངགས་ནས་དེ་དག་ལ།
2KI 19:10 ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་ལ་འདི་ལྟར། ཁྱོད་ཀྱིས་བློ་བཅོལ་བའི་དཀོན་མཆོག་གིས་ཡེ་རུ་སཱ་ལེམ་ནི་ཨ་སུར་གྱི་རྒྱལ་པོའི་ལག་ཏུ་ཚུད་པར་མི་འགྱུར་ཞེས་ཁྱོད་རང་བསླུ་བར་མ་གྱུར་ཅིག
2KI 19:11 ལྟོས་དང་། ཨ་སུར་གྱི་རྒྱལ་པོ་རྣམས་ཀྱིས་ཡུལ་ཡོད་དོ་ཅོག་ལ་ཅི་བྱས་པ་དང་། ཐམས་ཅད་རྩ་ནས་བརླགས་པ་དེ་ཁྱོད་ཀྱིས་ཐོས་པས། ཁྱོད་རང་ཅི་ལྟར་ཐར་ནུས་སམ།
2KI 19:12 ངའི་ཡབ་མེས་ཀྱིས་ཚར་བཅད་པའི་གོ་ཟན་དང་། ཧཱ་རན་དང་། རེ་ཙེབ་དང་། ཐེ་ལཱ་སར་དུ་ཡོད་པའི་ཨེ་དེན་གྱི་བུ་རྒྱུད་དང་བཅས་པའི་མི་རིགས་སོ་སོའི་ལྷ་རྣམས་ཀྱིས་དེ་དག་བསྐྱབས་སམ།
2KI 19:13 ཧ་མཱད་ཀྱི་རྒྱལ་པོ་དང་ཨར་ཕད་ཀྱི་རྒྱལ་པོ། སེ་ཕར་ཝ་ཨིམ་གྲོང་ཁྱེར་དང་ཧེ་ནཱ། ཨི་ཝཱ་བཅས་ཀྱི་རྒྱལ་པོ་རྣམས་གང་དུ་ཡོད་དམ་ཞེས་སྨྲོས་ཤིག་ཅེས་སྨྲས་སོ། །
2KI 19:14 དེ་ཡང་ཧི་ཟི་ཀི་ཡཱས་བང་ཆེན་རྣམས་ཀྱི་ལག་ནས་འབྱོར་བའི་འཕྲིན་ཡིག་དེ་བཀླགས་རྗེས། ཡར་དཀོན་མཆོག་ཡ་ཝཱེའི་མཆོད་ཁང་དུ་སོང་ནས་དཀོན་མཆོག་ཡ་ཝཱེའི་སྤྱན་སྔར་འཕྲིན་ཡིག་ཁ་ཕྱེས་ནས་བཞག་གོ །
2KI 19:15 དེ་ཡང་ཧི་ཟི་ཀི་ཡཱས་དཀོན་མཆོག་ཡ་ཝཱེའི་དྲུང་དུ་གསོལ་བ་བཏབ་ཅིང་འདི་སྐད་དུ། ཀྱེ་དཀོན་མཆོག་ཡ་ཝཱེ་ལགས། ཡེས་ར་ཨེལ་གྱི་དཀོན་མཆོག ཀེ་རུབ་རྣམས་ཀྱི་གོང་དུ་བཞུགས་པ་ལགས། ཁྱེད་གཅིག་པུ་ས་གཞིའི་རྒྱལ་ཁམས་ཐམས་ཅད་ཀྱི་དཀོན་མཆོག་ལགས་ཤིང་། ཁྱེད་ཀྱིས་གནམ་ས་གཉིས་བཀོད་པ་ཡིན།
2KI 19:16 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་སྙན་དབང་གཏད་ནས་གསན་དུ་གསོལ། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་སྤྱན་ཟུང་ཕྱེས་ནས་གཟིགས་པར་མཛོད། སེན་ན་ཧེ་རིབ་ཀྱིས་གཏན་དུ་གསོན་པོར་བཞུགས་པའི་དཀོན་མཆོག་ལ་སྐུར་བ་བཏབ་པའི་དོན་དུ་འཕྲིན་བསྐུར་བའི་གཏམ་རྣམས་ལ་གསན་དུ་གསོལ།
2KI 19:17 ཀྱེ་དཀོན་མཆོག་ཡ་ཝཱེ་ལགས། ཨ་སུར་གྱི་རྒྱལ་པོ་རྣམས་ཀྱིས་མི་རིགས་དེ་རྣམས་དང་། དེ་དག་གི་ས་ཆ་ཀུན་རྡུལ་དུ་བརླགས་པ་ནི་བདེན་ཏེ།
2KI 19:18 དེ་དག་གི་ལྷ་རྣམས་མེ་ལ་གཡུགས། ཅི་ལ་ཞེ་ན། དེ་དག་ནི་དཀོན་མཆོག་མ་ཡིན་པར་མིའི་ལག་བཟོས་ཀྱི་ཤིང་སྐུ་དང་རྡོ་སྐུ་ཡིན་པས། ཁོ་ཚོས་དེ་དག་མེད་པར་བཏང་བ་རེད།
2KI 19:19 ཀྱེ་བདག་ཅག་གི་དཀོན་མཆོག་ཡ་ཝཱེ་ལགས། ས་གཞིའི་རྒྱལ་ཁམས་ཐམས་ཅད་ཀྱིས་ཡ་ཝཱེ་ཁྱེད་གཅིག་པུ་ནི་དཀོན་མཆོག་ཡིན་པ་རྟོགས་པའི་ཆེད་དུ། ད་ལྟ་བདག་ཅག་ཁོའི་ལག་ནས་སྐྱོབ་པར་མཛོད་ཅེས་གསོལ་ཏོ། །
2KI 19:20 དེ་ནས་ཨ་མོ་ཟིའི་བུ་ཡེ་ཤ་ཡཱས་ཧི་ཟི་ཀི་ཡཱ་ལ་འཕྲིན་བསྐུར་ཏེ་ན་རེ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས། ཁྱོད་ཀྱིས་ང་ལ་ཨ་སུར་གྱི་རྒྱལ་པོ་སེན་ན་ཧེ་རིབ་སྐོར་གྱི་གསོལ་བ་བཏབ་པ་དེ་ངས་གསན་བྱུང་ཞེས་པའོ། །
2KI 19:21 དཀོན་མཆོག་ཡ་ཝཱེས་དེ་ལ་རྒོལ་ལན་གསུངས་པ་འདི་ལྟར། ཛ་ཡན་བུ་མོ་ན་ཆུང་མས་ཁྱོད་ལ་བརྙས་ཤིང་ཁྲེལ་རྒོད་བྱས། ཡེ་རུ་སཱ་ལེམ་གྱི་བུ་མོས་ཁྱོད་ཀྱི་རྒྱབ་ནས་མགོ་བོ་གཡུག་གོ །
2KI 19:22 ཁྱོད་ཀྱིས་སུ་ལ་དམའ་འབེབས་བྱས་ཤིང་སྐུར་བ་བཏབ་པ་ཡིན་ནམ། ཁྱོད་ཀྱིས་ཀི་སྒྲ་བསྒྲགས་ནས་སུ་ལ་རྒོལ་བ་ཡིན་ནམ། མིག་ཟུང་མཐོན་པོར་བཏེགས་ནས་སུ་ལ་ང་རྒྱལ་བསྐྱེད་དམ། ཡེས་ར་ཨེལ་གྱི་དམ་པ་ཉིད་ལ་རྒོལ་བ་ཡིན་ནོ། །
2KI 19:23 ཁྱོད་ཀྱིས་རང་གི་བང་ཆེན་བརྒྱུད་ནས་གཙོ་བོར་འཕྱ་སྨོད་བྱེད་བཞིན་ན་རེ། ང་ནི་རང་གི་ཤིང་རྟའི་དཔུང་ཚོགས་དང་མཉམ་དུ། རི་བོ་མཐོན་པོ་དག་གི་རྩེ་ལ་འགོས་ཤིང་། རྒྱང་ཐག་རིང་བའི་ལེ་པཱ་ནོན་གྱི་བར་དུ་སླེབས་པ་དང་། དེ་རུ་ཡོད་པའི་ཐང་ཤིང་རིང་པོ་དང་། གསོམ་ཤིང་ལེགས་པོ་རྣམས་བཅད་པ་ཡིན། ནགས་ཚལ་སྟུག་པོ་བརྒྱུད་ནས་རྒྱང་ཐག་རིང་བའི་ཞག་མལ་གཏོང་ས་དེར་ཞུགས་པའོ། །
2KI 19:24 ངས་དོང་ཆུ་བྲུས་ཏེ་ཡུལ་གཞན་པའི་བཏུང་ཆུ་འཐུང་ཞིང་། རང་གི་རྐང་མཐིལ་གྱིས་ཨེ་ཅིབ་ཀྱི་ཆུ་ཀླུང་ཐམས་ཅད་སྐེམ་དུ་བཅུག་ཅེས་སྨྲས་སོ། །
2KI 19:25 དཀོན་མཆོག་ཡ་ཝཱེས་འདི་སྐད་དུ། བདག་གིས་གནའ་ནས་བཀོད་སྒྲིག་བྱས་ཤིང་། སྔོན་ནས་འཆར་བཀོད་བཟོས་ཡོད་པ་ཁྱོད་ཀྱིས་མ་ཐོས་སམ། ད་ནི་བདག་གིས་ཁྱོད་ཀྱི་ལྕགས་རིས་བསྐོར་བའི་གྲོང་ཁྱེར་རྣམས་བཤིགས་ནས་ས་རོར་བསྒྱུར་བ་དེ་བདག་གིས་བསྒྲུབས་པ་ཡིན།
2KI 19:26 ཡུལ་དེར་གནས་པའི་མི་རྣམས་སྟོབས་ཤུགས་ཟད་དེ། དཔའ་ཞུམ་པ་དང་ཁ་སྐྱེངས་པར་གྱུར་ཏོ། ། དེ་དག་ནི་རི་ཐང་གི་རྩྭ་སྔོན་དང་སྔོ་ཚོད་སྙི་མོ་དང་། ཁང་ཐོག་གི་རྩྭ་བཞིན་དུ་ད་དུང་མ་སྐྱེས་སྔོན་ལ་རྙིད་པ་ལྟ་བུ་ཡིན་ནོ། །
2KI 19:27 ཁྱོད་རང་མར་སྡོད་པ་དང་། ཁྱོད་རང་ཕྱི་ནང་དུ་འགྲོ་འོང་བྱེད་པ། ཁྱོད་རང་ང་ལ་རབ་ཏུ་ཁྲོས་པ་བཅས་ཐམས་ཅད་བདག་གིས་རྟོགས་ཡོད་དོ། །
2KI 19:28 དེར་བརྟེན། ཁྱོད་རང་ང་ལ་རབ་ཏུ་ཁྲོས་ཤིང་། ཁྱོད་ཀྱི་ཁེངས་དྲེགས་ཀྱི་གཏམ་དེ་ངའི་རྣ་ལམ་དུ་ཆུད་བྱུང་བས། ངས་རང་གི་ལྕགས་ཀྱུ་ཁྱོད་ཀྱི་སྣ་རུ་བསྐོན་པ་དང་། རང་གི་སྲབ་ཁྱོད་ཀྱི་མཆུ་ཏོར་བསྐོན་ནས། ཁྱོད་འོངས་པའི་ལམ་དེ་ནས་ཕྱིར་ལྡོག་པར་བྱའོ། །
2KI 19:29 དེ་ཡང་རྟགས་འདི་ནི་ཁྱོད་ཀྱི་ཕྱིར་དུ་ཡིན་ཏེ། ལོ་འདིར་ཁྱོད་ཀྱིས་རང་བཞིན་དུ་སྐྱེས་པ་དེ་བཟའ་བར་འགྱུར། ལོ་གཉིས་པར་ཅི་སྨིན་པ་དེ་བཟའ་བར་འགྱུར། ཡང་ལོ་གསུམ་པར་ཁྱོད་ཅག་གིས་ཞིང་རྨོ་ཞིང་བརྔ་བ་སྟེ། རྒུན་ཚལ་བཙུགས་པ་དེའི་འབྲས་བུ་བཟའ་བར་འགྱུར་རོ། །
2KI 19:30 ཡ་ཧུ་དཱའི་ཁྱིམ་རྒྱུད་ལས་སྐྱབས་རྙེད་པའི་ལྷག་མ་དེ་ནི། སླར་ཡང་མར་རྩ་བ་ཟུག་ཅིང་སྟེང་དུ་འབྲས་བུ་འབྱུང་བར་འགྱུར་ངེས།
2KI 19:31 ཅིའི་ཕྱིར་ཞེ་ན། ལྷག་མ་རྣམས་ཡེ་རུ་སཱ་ལེམ་ནས་ཕྱི་རུ་ཐོན་ཞིང་། སྲོག་ཐར་བ་རྣམས་རི་བོ་ཛ་ཡན་ནས་ཕྱི་ལ་སླེབ་པར་འགྱུར། དཀོན་མཆོག་ཡ་ཝཱེའི་ཐུགས་འཁྲེན་གྱིས་དེ་ལྟར་མཛད་པར་བྱའོ་ཞེས་གསུངས་སོ། །
2KI 19:32 དེའི་ཕྱིར་དཀོན་མཆོག་ཡ་ཝཱེས་ཨ་སུར་རྒྱལ་པོའི་སྐོར་ལ་འདི་སྐད་དུ། ཁོ་རང་གྲོང་ཁྱེར་འདིར་འོང་བར་མི་འགྱུར་ཞིང་། དེ་གར་མདའ་ཡང་འཕེན་པར་མི་འགྱུར། ཕུབ་ཐོགས་ནས་དེའི་ཕྱོགས་སུ་འོང་བར་མི་འགྱུར་ལ། དེའི་མཐའ་ལ་འཐབ་ར་ཡང་བརྩིག་པར་མི་འགྱུར།
2KI 19:33 ཁོ་སྔར་འོངས་པའི་ལམ་དེ་ནས་ཕྱིར་ལོག་འགྲོ་བ་དང་། གྲོང་ཁྱེར་དེའི་ནང་དུ་འོང་བར་མི་འགྱུར་བ་ནི་དཀོན་མཆོག་ཡ་ཝཱེས་གསུངས་སོ། །
2KI 19:34 ང་དང་ངའི་ཞབས་ཕྱི་དཱ་བིད་ཀྱི་དོན་དུ། ངས་གྲོང་ཁྱེར་འདི་སྐྱོབ་པའི་ཕྱིར་སྲུང་བར་བྱ་ཞེས་པའོ་ཞེས་སྨྲས་སོ། །
2KI 19:35 དེ་ཡང་མཚན་མོ་དེར་དཀོན་མཆོག་ཡ་ཝཱེའི་ཕོ་ཉ་ཐོན་ཏེ། ཨ་སུར་པའི་དམག་སྒར་ལས་མི་ཆིག་འབུམ་བརྒྱད་ཁྲི་ལྔ་སྟོང་བསད་པ་དང་། མི་རྣམས་ཐོ་རངས་མལ་ལས་ལངས་དུས། ཀྱེ་ཧོ། བམ་རོས་གང་སར་ཁྱབ་པའོ། །
2KI 19:36 དེ་ནས་ཨ་སུར་གྱི་རྒྱལ་པོ་སེན་ན་ཧེ་རིབ་ནི་ཕྱིར་ཐོན་ཏེ་འགྲུལ་བཞུད་བྱས་ཤིང་ཡུལ་དུ་ཆིབས་ཁ་བསྒྱུར་པ་དང་ནིན་ཝེ་ནས་བསྡད་དོ། །
2KI 19:37 ཡང་ཉིན་ཞིག་ཁོས་རང་གི་ལྷ་ནིས་རོག་གི་ལྷ་ཁང་དུ་ཕྱག་འཚལ་བའི་ཚེ། དེའི་བུ་ཨད་རམ་མེ་ལེག་དང་སཱར་ཨེ་ཚེར་གཉིས་ཀྱིས་ཁོ་རལ་གྲིས་བསད་ནས་ཨ་ར་རད་ཡུལ་དུ་བྲོས་པ་དང་། དེ་ནས་ཁོའི་བུ་ཨེ་སར་ཧད་ཏོན་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 20:1 དུས་དེར་ཧི་ཟི་ཀི་ཡཱ་ལ་ནད་ལྗིད་མོ་ཞིག་ཕོག་སྟེ་འཆི་ལ་ཉེ་བ་དང་། ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱ་ཁོའི་དྲུང་དུ་འོངས་ཏེ་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་གསོན་མི་ཐུབ་པར་འཆི་བར་འགྱུར་བས། ཁྱོད་ཀྱིས་རང་གི་ཁྱིམ་ལ་བཀོད་སྒྲིག་ལེགས་པོ་གྱིས་ཤིག་གསུངས་ཞེས་སྨྲས་པ་ན།
2KI 20:2 ཧི་ཟི་ཀི་ཡཱས་རང་གི་ངོ་གདོང་རྩིག་པའི་ཕྱོགས་སུ་འཁོར་ཏེ། དཀོན་མཆོག་ཡ་ཝཱེ་ལ་སྨོན་ལམ་བཏབ་ནས་ན་རེ།
2KI 20:3 ཀྱེ་དཀོན་མཆོག་ཡ་ཝཱེ་ལགས། ང་རང་ཁྱེད་ཀྱི་སྤྱན་སྔར་བློ་དཀར་བ་དང་བསམ་པ་ལྷད་མེད་ཀྱིས་འགྲུལ་ཞིང་། ཁྱེད་ཀྱི་སྤྱན་སྔར་ལེགས་པོ་གང་ཡིན་དེ་བསྒྲུབས་པ་ཁྱེད་ཀྱིས་ཐུགས་སུ་དྲན་པར་མཛོད་ཅེས་ཞུས་ཏེ་དྲག་ཏུ་ངུས་སོ། །
2KI 20:4 ཡེ་ཤ་ཡཱ་ཚོམས་དཀྱིལ་ནས་ཁ་མ་བྲལ་གོང་དུ། ཁོ་ལ་དཀོན་མཆོག་ཡ་ཝཱེའི་བཀའ་བྱུང་ནས་འདི་སྐད་དུ།
2KI 20:5 ཁྱོད་ཕྱིར་སོང་ནས་བདག་གི་འབངས་མིའི་འགོ་དཔོན་ཧི་ཟི་ཀི་ཡཱ་ལ། ཁྱོད་ཀྱི་ཡབ་མེས་དཱ་བིད་ཀྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་ཁྱོད་ཀྱི་གསོལ་འདེབས་ཐོས་པ་ཡིན། ཁྱོད་ཀྱི་མཆི་མའང་མཐོང་བ་ཡིན། ལྟོས་དང་། བདག་གིས་ཁྱོད་ཀྱི་ནད་གསོ་བར་བྱེད་ཅིང་། ཉིན་གསུམ་པར་ཁྱོད་རང་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་འགྱུར།
2KI 20:6 བདག་གིས་ཁྱོད་ཀྱི་ཚེ་ཚད་ལ་ལོ་བཅོ་ལྔ་སྣོན་པར་བྱའོ། །ཡང་བདག་གིས་ཁྱོད་དང་གྲོང་ཁྱེར་འདི་ཨ་སུར་གྱི་རྒྱལ་པོའི་ལག་ནས་སྐྱོབ་ཅིང་། བདག་དང་བདག་གི་ཞབས་ཕྱི་དཱ་བིད་ཀྱི་དོན་དུ་གྲོང་ཁྱེར་འདི་བསྲུང་བར་བྱ་གསུངས་ཞེས་སྨྲོས་ཤིག་གསུངས་སོ། །
2KI 20:7 དེ་ཡང་ཡེ་ཤ་ཡཱ་ཡིས་སེ་ཡབ་ལེབ་མོ་ཞིག་ཁྱེར་ཤོག་ཅེས་བསྒོས་པར། དེ་དག་གིས་བླངས་ནས་ཤ་འབུར་གྱི་ཁར་བསླན་པས་ཁོ་གསོན་པར་གྱུར་ཏོ། །
2KI 20:8 དེར་ཧི་ཟི་ཀི་ཡཱས་ཡེ་ཤ་ཡཱ་ལ་འདི་ལྟར། དཀོན་མཆོག་ཡ་ཝཱེས་ངའི་ནད་གསོ་བར་འགྱུར་བ་དང་། ཉིན་གསུམ་པར་ང་རང་ཡར་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་རྟགས་མཚན་ཅི་ཡོད་དམ་ཞེས་ཞུས་པ་ལ།
2KI 20:9 ཡེ་ཤ་ཡཱ་ཡིས་འདི་སྐད་དུ། དཀོན་མཆོག་ཡ་ཝཱེས་ཅི་གསུངས་པ་དེ་མཛད་པར་ཁོང་གིས་རྟགས་འདི་གནང་བ་སྟེ། གྲིབ་མ་གོམ་པ་བཅུ་མདུན་དུ་འགྲོ་བའམ། ཡང་ན་གོམ་པ་བཅུ་རྒྱབ་ཏུ་ལོག་པ་ལས་གང་འདོད་དམ་ཞེས་གསུངས་ཤིང་།
2KI 20:10 ཧི་ཟི་ཀི་ཡཱས་ལན་དུ། གྲིབ་མ་གོམ་པ་བཅུ་མདུན་དུ་འགྲོ་བ་ནི་སླ་བས་དེ་མི་འདོད། གྲིབ་མ་གོམ་པ་བཅུ་རྒྱབ་ཏུ་ལོག་དགོས་ཞེས་སྨྲས་པས།
2KI 20:11 ལུང་སྟོན་པ་ཡེ་ཤ་ཡཱས་དཀོན་མཆོག་ཡ་ཝཱེ་ལ་གསོལ་བ་བཏབ་པ་དང་། ཁོང་གིས་ཨ་ཧ་ཟཱ་ཡི་དུས་ཚོད་འཇལ་ཆས་སྟེང་གི་གྲིབ་མ་དེ་ནི་གོམ་པ་བཅུ་རྒྱབ་ཏུ་ཟློག་པར་མཛད་དོ། །
2KI 20:12 དེའི་དུས་སུ། པཱ་པེལ་ལོན་གྱི་རྒྱལ་པོ་པལ་ཨ་དན་གྱི་བུ་སྟེ། མེ་རོ་དག་པལ་ཨ་དན་གྱིས་ཧི་ཟི་ཀི་ཡཱ་ལ་སྙུང་གཞི་བྱུང་བ་ཐོས་ནས། ཁོས་འཕྲིན་ཡིག་དང་ཕྱག་རྟེན་བསྐུར་ཏོ། །
2KI 20:13 ཧི་ཟི་ཀི་ཡཱས་བང་ཆེན་གྱི་གཏམ་ལ་མཉན་པ་དང་། རང་གི་གཏེར་མཛོད་ཀྱི་གསེར་དངུལ་དང་། སྤོས་དང་སྤོས་ཆུ་རིན་ཐང་ཅན། མཚོན་ཆའི་མཛོད་དང་། གཏེར་མཛོད་ནང་དུ་ཅི་ཡོད་པ་ཐམས་ཅད་དེ་དག་ལ་བསྟན་ཏོ། །ཧི་ཟི་ཀི་ཡཱས་ཁོའི་ཕོ་བྲང་དང་ཁོའི་རྒྱལ་ཁམས་ཡོངས་སུ་ནོར་རྫས་གང་ཡོད་ཐམས་ཅད་ལས་དེ་དག་ལ་མ་བསྟན་པ་གང་ཡང་མེད་དོ། །
2KI 20:14 དེ་ནས་ལུང་སྟོན་པ་ཡེ་ཤ་ཡཱ་རྒྱལ་པོ་ཧི་ཟི་ཀི་ཡཱའི་དྲུང་དུ་འོངས་ནས་ཁོ་ལ། མི་འདི་དག་གིས་ཅི་ཟེར། ཁྱེད་ཀྱི་དྲུང་དུ་ཡུལ་གང་ནས་འོངས་ཞེས་དྲིས་པར། ཧི་ཟི་ཀི་ཡཱས། དེ་དག་ནི་རྒྱང་ཐག་རིང་བའི་པཱ་པེལ་ལོན་ཡུལ་ནས་འོངས་པ་རེད་ཅེས་སྨྲས་པ་དང་།
2KI 20:15 ཡེ་ཤ་ཡཱ་ཡིས་དེ་དག་གིས་ཁྱོད་ཀྱི་ཕོ་བྲང་ནས་ཅི་མཐོང་བ་ཡིན་ནམ་ཞེས་དྲིས་པའི་ལན་དུ། ཧི་ཟི་ཀི་ཡཱས་དེ་དག་གིས་ངའི་ཕོ་བྲང་དུ་ཅི་ཡོད་པ་ཐམས་ཅད་མཐོང་བ་ཡིན་ཏེ། དེ་དག་ལ་མ་བསྟན་པའི་ནོར་རྫས་གང་ཡང་ངའི་གཏེར་མཛོད་ནང་ལུས་མེད་ཅེས་སྨྲས་སོ། །
2KI 20:16 དེར་ཡེ་ཤ་ཡཱས་ཧི་ཟི་ཀི་ཡཱ་ལ། དཀོན་མཆོག་ཡ་ཝཱེའི་བཀའ་ལ་ཉོན་ཅིག
2KI 20:17 ལྟོས་དང་། ཁྱོད་ཀྱི་ཕོ་བྲང་དུ་ཡོད་པ་ཐམས་ཅད་དང་། ཁྱོད་ཀྱི་ཕ་མེས་རྣམས་ཀྱིས་དེ་རིང་གི་བར་དུ་བསགས་པ་ཐམས་ཅད་ཅི་ཡང་མ་ལུས་པར་པཱ་པེལ་ལོན་དུ་འཁྱེར་བའི་དུས་ཤིག་སླེབས་འོང་ཞེས་དཀོན་མཆོག་ཡ་ཝཱེས་གསུངས།
2KI 20:18 ཡང་ཁྱོད་ལས་མཆེད་ཅིང་ཁྱོད་ལས་སྐྱེས་པའི་བུ་རྒྱུད་རྣམས་ལས་ཁ་ཅིག་བཙོན་དུ་ཁྲིད་ནས་པཱ་པེལ་ལོན་རྒྱལ་པོའི་ཕོ་བྲང་དུ་ཉུག་རུམ་པར་འགྱུར་རོ་ཞེས་སྨྲས་པ་ན།
2KI 20:19 ཧི་ཟི་ཀི་ཡཱས་ཡེ་ཤ་ཡཱ་ལ། ཁྱོད་ཀྱིས་གསུངས་པའི་དཀོན་མཆོག་ཡ་ཝཱེའི་གསུང་ནི་ལེགས་སོ་ཞེས་སྨྲས་པ་དང་། ཁོའི་སེམས་སུ་ངའི་ཉིན་མོ་རྣམས་ཞི་བདེ་དང་བརྟན་འཇགས་ཡོད་པ་མིན་ནམ་སྙམ་མོ། །
2KI 20:20 ཡང་ཧི་ཟི་ཀི་ཡཱའི་དོན་གཞན་རྣམས་དང་ཁོའི་དཔའ་བོའི་མཛད་རྗེས་དང་། ཁོས་ཇི་ལྟར་ཆུ་རྫིང་དང་སྦུག་ལམ་བཟོས་ནས་གྲོང་ཁྱེར་དུ་ཆུ་དྲངས་པ་རྣམས་ནི་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 20:21 ཧི་ཟི་ཀི་ཡཱ་རང་གི་ཡབ་མེས་དང་ལྷན་ཅིག་ཏུ་གཟིམས་པ་དང་། ཁོའི་སྲས་མཱ་ན་ཤེ་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 21:1 དེ་ཡང་མཱ་ན་ཤེ་ཡིས་རྒྱལ་སྲིད་བཟུང་དུས་ཁོ་ལོ་བཅུ་གཉིས་ལ་སོན་ཡོད་དེ། ཁོས་ལོ་ལྔ་བཅུ་ང་ལྔའི་རིང་ལ་ཡེ་རུ་སཱ་ལེམ་དུ་རྒྱལ་སྲིད་བསྐྱངས་པ་དང་། ཁོའི་ཡུམ་གྱི་མིང་ལ་ཧབ་ཚི་བཱ་ཞེས་ཟེར་རོ། །
2KI 21:2 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། དཀོན་མཆོག་ཡ་ཝཱེས་ཡེས་ར་ཨེལ་གྱི་མདུན་ནས་སྐྲོད་པར་མཛད་པའི་མི་རིགས་རྣམས་ཀྱིས་སྤྱད་པའི་སྐྱུག་བྲོ་བའི་དོན་རྣམས་སྤྱད་ཅིང་།
2KI 21:3 རང་གི་ཡབ་ཧི་ཟི་ཀི་ཡཱས་བཤིགས་པའི་མཐོ་གླིང་རྣམས་ཡང་བསྐྱར་བརྩིགས་ཏེ། ཡེས་ར་ཨེལ་གྱི་རྒྱལ་པོ་ཨ་ཧབ་ཀྱིས་བགྱིས་པ་ལྟར་དུ་པཱ་ཨལ་གྱི་ཕྱིར་མཆོད་ཁྲི་བཞེངས་པ་དང་། ཨ་ཤེ་རཱ་ཡང་བཟོས་ཤིང་ནམ་མཁའི་སྐར་ཚོགས་ཐམས་ཅད་ལ་ཕྱག་བཙལ་ནས་ཞབས་ཕྱི་བསྒྲུབས།
2KI 21:4 ཁོས་དཀོན་མཆོག་ཡ་ཝཱེའི་མཆོད་ཁང་ནང་དུ་མཆོད་ཁྲི་རྣམས་བཞེངས་པ་སྟེ། དཀོན་མཆོག་ཡ་ཝཱེས་སྔར་མཆོད་ཁང་དེ་བསྟན་ནས་འདི་སྐད་དུ། བདག་གིས་ཡེ་རུ་སཱ་ལེམ་དུ་རང་གི་མཚན་གནས་པར་བྱ་ཞེས་གསུངས་པའོ། །
2KI 21:5 ཡང་ཁོས་དཀོན་མཆོག་ཡ་ཝཱེའི་མཆོད་ཁང་གི་ཁྱམས་ར་གཉིས་ཀྱི་ནང་དུ་ནམ་མཁའི་སྐར་ཚོགས་ཀུན་གྱི་ཆེད་དུ་མཆོད་ཁྲི་རྣམས་བཞེངས།
2KI 21:6 ཁོས་རང་གི་བུ་མེ་མཆོད་དུ་ཕུལ་བ་དང་། རྩིས་པ་དང་མོ་པ་ལས་རྟགས་མཚན་ཞུས་ཤིང་། ལྷ་པ་དང་གཤིན་འདྲེ་འགུག་མཁན་རྣམས་བསྟེན་ནས་དཀོན་མཆོག་ཡ་ཝཱེའི་སྤྱན་སྔར་ངན་པའི་དོན་རྣམས་སྤྱད་དེ་ཁོང་ཐུགས་ཁྲོ་བར་བྱས།
2KI 21:7 ཡང་ཁོ་རང་གིས་བཟོས་པའི་ཨ་ཤེ་རཱ་ཡི་ལྷ་སྐུ་དེ་མཆོད་ཁང་དུ་བཞག དཀོན་མཆོག་ཡ་ཝཱེས་སྔར་དཱ་བིད་དང་ཁོའི་བུ་སོ་ལོ་མོན་གཉིས་ལ། བདག་གིས་མཆོད་ཁང་འདི་དང་ཡེས་ར་ཨེལ་གྱི་སྡེ་ཐམས་ཅད་ལས་བདམས་པའི་ཡེ་རུ་སཱ་ལེམ་དུ་རང་གི་མཚན་ནི་དུས་རྟག་ཏུ་འཇོག་པར་བྱའོ། །
2KI 21:8 ཡེས་ར་ཨེལ་པ་རྣམས་ཀྱིས་བདག་གིས་བསྩལ་པའི་བཀའ་ཐམས་ཅད་དེ། བདག་གི་ཞབས་ཕྱི་མོ་ཤེ་ཡིས་ཁོ་ཚོར་བསྟན་པའི་བཀའ་ཁྲིམས་ཐམས་ཅད་བསྲུངས་ན། བདག་གིས་ཁོ་རྣམས་ཀྱི་རྐང་པ་ནི་ངས་ཁོ་ཚོའི་ཕ་མེས་ལ་གནང་བའི་ཡུལ་ཁམས་ནས་འཁྱར་དུ་མི་འཇུག་ཅེས་གསུངས་མོད།
2KI 21:9 འོན་ཀྱང་དེ་དག་གིས་མ་མཉན་པ་དང་། མཱ་ན་ཤེ་ཡིས་དེ་དག་ལོག་ལམ་དུ་ཁྲིད་ནས་དོན་ངན་སྤྱད་པས། དཀོན་མཆོག་ཡ་ཝཱེས་ཡེས་ར་ཨེལ་གྱི་མདུན་ནས་མེད་པར་མཛད་པའི་མི་རྣམས་ལས་ཀྱང་ཐུའོ། །
2KI 21:10 དེ་བས་ན། དཀོན་མཆོག་ཡ་ཝཱེས་ཁོང་ཉིད་ཀྱི་ཞབས་ཕྱི་ལུང་སྟོན་པའི་ངག་ནས་འདི་སྐད་དུ།
2KI 21:11 ཡ་ཧུ་དཱའི་རྒྱལ་པོ་མཱ་ན་ཤེ་ཡིས་སྐྱུག་བྲོ་བའི་དོན་འདི་རྣམས་བྱས་པ་ནི། ཁོའི་སྔོན་དུ་ཡོད་པའི་ཨེ་མོར་པ་རྣམས་ཀྱིས་སྤྱད་པའི་ངན་པ་ལས་ཀྱང་ཐུ་ལ། ཁོས་ལྷ་སྐུ་བསྟེན་པ་དང་མཉམ་དུ་ཡ་ཧུ་དཱ་ལ་ཡང་སྡིག་པ་བྱེད་དུ་བཅུག་པ་ཡིན།
2KI 21:12 དེའི་ཕྱིར་ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། བདག་གིས་ཡེ་རུ་སཱ་ལེམ་དང་ཡ་ཧུ་དཱ་རུ་ཆག་སྒོ་འབྱུང་བར་བྱེད་ཅིང་། སུ་ཞིག་གི་རྣ་བས་ཐོས་ན་རྣ་བ་གཉིས་ལ་ཟུག་རྔུ་བསྐྱེད་དོ། །
2KI 21:13 བདག་གིས་ཡེ་རུ་སཱ་ལེམ་གྱི་ཐོག་ཏུ་སཱ་མར་ཡའི་ཐིག་སྐུད་དང་ཨ་ཧབ་ཀྱི་ཁང་པའི་དཔྱང་རྡོ་བཀོལ་ནས་མེད་པར་བྱ་སྟེ། མི་ཞིག་གིས་སྡེར་མ་ཞིག་ཕྱིས་ནས་མར་སྐོར་བ་ལྟར། བདག་གིས་ཡེ་རུ་སཱ་ལེམ་ཡང་དབྱི་བར་བྱའོ། །
2KI 21:14 བདག་གིས་རང་ཉིད་ཀྱི་ནོར་སྐལ་ལས་ལྷག་ལུས་རྣམས་སྤངས་ནས་ཁོ་ཚོའི་དགྲ་བོའི་ལག་ཏུ་གཏོད་པ་དང་། ཁོ་རྣམས་རང་གི་དགྲ་བོའི་བཅོམ་ནོར་དང་དམག་ཐོབ་དངོས་རྫས་སུ་འགྱུར་ངེས།
2KI 21:15 ཅིའི་ཕྱིར་ཞེ་ན། དེ་དག་གི་མེས་པོ་རྣམས་ཨེ་ཅིབ་ཡུལ་ནས་ཐོན་པའི་ཉིན་མོ་ནས་དེ་རིང་གི་བར་དུ། དེ་དག་གིས་བདག་གི་མིག་མདུན་ནས་ངན་པ་གང་ཡིན་དེ་སྤྱད་ཅིང་། བདག་ཁྲོ་བར་བྱས་པ་ཡིན་གསུངས་ཞེས་གསུངས་སོ། །
2KI 21:16 དེ་ཡང་མཱ་ན་ཤེ་ཡིས་ཡ་ཧུ་དཱ་ལ་སྡིག་པ་བྱེད་དུ་བཅུག་ཅིང་། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་པའི་སྟེང་དུ། ཡེ་རུ་སཱ་ལེམ་གྱི་མགོ་ནས་མཇུག་བར་དུ་ཉེས་མེད་མང་པོའི་ཁྲག་བཞུར་དུ་བཅུག་གོ །
2KI 21:17 མཱ་ན་ཤེའི་དོན་གཞན་རྣམས་དང་ཁོས་ཅི་བྱས་པ་ཐམས་ཅད་དང་། ཁོས་བྱས་པའི་སྡིག་པ་ཐམས་ཅད་ནི་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 21:18 དེ་ནས་མཱ་ན་ཤེ་རང་གི་ཕ་མེས་ཀྱི་ཁྲོད་དུ་གཟིམས་པ་དང་། ཁོའི་ཕོ་བྲང་གི་སྐྱེད་མོས་ཚལ་ཨུ་ཟཱ་ཞེས་པར་དུར་ལ་སྦས་ཤིང་། ཁོའི་བུ་ཨ་མོན་བྱ་བ་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 21:19 དེ་ཡང་ཨ་མོན་གྱིས་རྒྱལ་སྲིད་བཟུང་བའི་དུས་སུ་ཁོ་ལོ་ཉེར་གཉིས་ཡིན་ཏེ། ཁོས་ཡེ་རུ་སཱ་ལེམ་དུ་ལོ་གཉིས་ཀྱི་རིང་ལ་རྒྱལ་སྲིད་བསྐྱངས། དེའི་ཡུམ་མེ་ཤུལ་ལེ་མིད་བྱ་བ་ནི་ཡོག་པཱ་རྡལ་གྱི་ཧ་རུ་ཟིའི་བུ་མོ་ཡིན་ནོ། །
2KI 21:20 ཁོས་ཀྱང་རང་གི་ཕ་མཱ་ན་ཤེ་ཡིས་བྱས་པ་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ཅིང་།
2KI 21:21 རང་གི་ཕ་འགྲུལ་བའི་ལམ་ཐམས་ཅད་ཀྱི་ནང་དུ་འགྲུལ་ཞིང་། ཁོའི་ཕ་ཡིས་བསྟེན་པའི་ལྷ་སྐུ་རྣམས་ལ་ཞབས་ཕྱི་བསྒྲུབས་ནས་ཕྱག་བཙལ་བ་དང་།
2KI 21:22 ཁོས་རང་གི་ཡབ་མེས་ཀྱི་དཀོན་མཆོག་ཡ་ཝཱེ་སྤངས་ནས་དཀོན་མཆོག་ཡ་ཝཱེའི་ལམ་དུ་མ་འགྲུལ་ཏོ། །
2KI 21:23 དེ་ནས་ཨ་མོན་གྱི་འཁོར་གཡོག་རྣམས་ཀྱིས་ཁོ་ལ་ལྐོག་ཇུས་བཤམས་ནས་རྒྱལ་པོ་ཁོ་རང་གི་ཕོ་བྲང་དུ་བསད།
2KI 21:24 འོན་ཀྱང་། ཡུལ་དེའི་མངའ་འབངས་ཀྱིས་རྒྱལ་པོ་ཨ་མོན་ལ་ལྐོག་ཇུས་ཤོམ་མཁན་ཐམས་ཅད་བསད་པ་དང་། ཁོང་གི་བུ་ཡོ་ཤི་ཡཱ་དེའི་རྒྱུན་མཐུད་ནས་རྒྱལ་པོར་བསྐོས་སོ། །
2KI 21:25 ཨ་མོན་གྱིས་བྱས་པའི་དོན་གཞན་རྣམས་ནི་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 21:26 ཁོ་རང་ནི་ཨུ་ཟཱ་ཞེས་པའི་སྐྱེད་ཚལ་ནང་རང་གི་དུར་ཁུང་དུ་སྦས་པ་དང་། ཁོའི་བུ་ཡོ་ཤི་ཡཱ་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 22:1 དེ་ཡང་ཡོ་ཤི་ཡཱ་རྒྱལ་པོར་གྱུར་དུས་སུ་ལོ་བརྒྱད་ཙམ་ཡིན་ཏེ། ཁོས་ཡེ་རུ་སཱ་ལེམ་དུ་ལོ་སོ་གཅིག་གི་རིང་ལ་རྒྱལ་སྲིད་བསྐྱངས། དེའི་ཡུམ་གྱི་མིང་ལ་ཡེ་དི་དཱ་ཟེར་ཞིང་། དེ་ནི་པོ་ཚཱ་ཀད་ཡི་ཨ་ད་ཡཱའི་བུ་མོ་ཡིན།
2KI 22:2 ཁོས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་པ་དང་། རང་གི་ཡབ་མེས་དཱ་བིད་ཀྱི་ལམ་ཐམས་ཅད་ནང་འགྲུལ་ཞིང་། གཡས་གཡོན་གང་དུའང་མ་གཟུར་ཏོ། །
2KI 22:3 དེ་ནས་རྒྱལ་པོ་ཡོ་ཤི་ཡཱས་སྲིད་བསྐྱངས་པའི་ལོ་བཅོ་བརྒྱད་པར། རྒྱལ་པོས་མཱེ་ཤུལ་ལིམ་གྱི་ཚ་བོའམ། ཨ་ཙལ་ཡཱ་ཧོའི་བུ་ཤཱ་ཕན་བྱ་བའི་དྲུང་ཡིག་དེ་དཀོན་མཆོག་ཡ་ཝཱེའི་མཆོད་ཁང་དུ་བརྫངས་ནས་དེ་ལ།
2KI 22:4 མཆོད་དཔོན་ཆེན་པོ་ཧིལ་ཀི་ཡཱ་ཡི་དྲུང་དུ་ཡར་སོང་ནས་དེ་ལ། དཀོན་མཆོག་ཡ་ཝཱེའི་མཆོད་ཁང་དུ་ཕུལ་བའི་དངུལ་ཏེ་སྒོ་སྲུང་གིས་མི་རྣམས་ལས་བསྡུས་པ་བསྡོམས་རྩིས་རྒྱག་ཏུ་བཅུག་ལ།
2KI 22:5 དཀོན་མཆོག་ཡ་ཝཱེའི་མཆོད་ཁང་གི་ལས་དཔོན་གྱི་ལག་ཏུ་ཐོངས་ཤིག ཡང་དེ་དག་གིས་དཀོན་མཆོག་ཡ་ཝཱེའི་མཆོད་ཁང་གི་གས་ཆག་ཞིག་གསོ་བྱེད་པའི་ལས་བཟོ་རྣམས་ལ་སྟེར་བར་རིགས།
2KI 22:6 མཆོད་ཁང་གི་གས་ཆག་ཞིག་གསོ་བྱེད་དུ་ལག་ཤེས་པ་རྣམས་དང་། རྩིག་བཟོ་དང་། རྡོ་བཟོ་རྣམས་ཀྱི་ཕྱིར་དང་། གདུང་མ་དང་འཇམ་ཤ་བཏོད་པའི་རྡོ་རྣམས་ཉོ་བའི་ཕྱིར་རོ། །
2KI 22:7 དེ་དག་གི་ལག་ཏུ་གཏད་པའི་དངུལ་གྱི་རྩིས་གྲངས་ལེན་པར་མ་བྱེད་ཅིག གང་ལ་ཞེ་ན། དེ་དག་གིས་བློ་དྲང་པོས་ལས་ཀ་བྱེད་པ་ཡིན་ནོ་ཞེས་གསུངས་སོ། །
2KI 22:8 དེ་ནས་མཆོད་དཔོན་ཆེན་པོ་ཧིལ་ཀི་ཡཱས་དྲུང་ཡིག་ཤཱ་ཕན་ལ། བདག་གིས་དཀོན་མཆོག་ཡ་ཝཱེའི་མཆོད་ཁང་ལས་བཀའ་ཁྲིམས་ཀྱི་དཔེ་ཆ་འདི་རྙེད་བྱུང་ཞེས་སྨྲས་ཤིང་། ཧིལ་ཀི་ཡཱས་དཔེ་ཆ་དེ་ཤཱ་ཕན་ལ་སྤྲད་པ་དང་། ཤཱ་ཕན་གྱིས་དེ་བཀླགས་སོ། །
2KI 22:9 དེ་ནས་དྲུང་ཡིག་ཤཱ་ཕན་རྒྱལ་པོའི་དྲུང་དུ་ཡོང་ནས་ཁོ་ལ་གཏམ་རྣམས་ཕྱིར་སྨྲས་ཏེ། མཆོད་ཁང་དུ་ཡོད་པའི་དངུལ་རྣམས་ཁྱེད་ཀྱི་ཞབས་ཕྱི་ཚོས་བསྡུས་ནས་དཀོན་མཆོག་ཡ་ཝཱེའི་མཆོད་ཁང་གི་ལས་དཔོན་གྱི་ལག་ཏུ་གཏད་དོ་ཞེས་ཞུས་པ་དང་།
2KI 22:10 དྲུང་ཡིག་ཤཱ་ཕན་གྱིས་ཡང་རྒྱལ་པོ་ལ། མཆོད་དཔོན་ཧིལ་ཀི་ཡཱས་ང་ལ་ཤོག་དྲིལ་ཞིག་གནང་བྱུང་ཞུས་ནས། ཁོས་དེ་ནི་རྒྱལ་པོའི་དྲུང་དུ་བཀླགས་སོ། །
2KI 22:11 དེ་ཡང་རྒྱལ་པོས་བཀའ་ཁྲིམས་ཀྱི་དཔེ་ཆ་ལས་གསུངས་པ་རྣམས་ཐོས་པ་ཙམ་གྱིས། རང་གི་གོས་གཤགས་པ་དང་།
2KI 22:12 རྒྱལ་པོས་མཆོད་དཔོན་ཧིལ་ཀི་ཡཱ་དང་ཤཱ་ཕན་གྱི་བུ་ཨ་ཧི་ཀམ། མི་ཀཱ་ཡའི་བུ་ཨག་པོར་དང་དྲུང་ཡིག་ཤཱ་ཕན། རྒྱལ་པོའི་ཞབས་ཕྱི་ཨ་སཱ་ཡ་བཅས་ལ་འདི་ལྟར།
2KI 22:13 ང་དང་མི་ཐམས་ཅད་དང་ཡ་ཧུ་དཱ་ཡོངས་ཀྱི་ཕྱིར་དུ། ཁྱོད་ཅག་སོང་ལ་རྙེད་པའི་དཔེ་ཆ་འདིའི་གསུང་རྣམས་ཀྱི་སྐོར་དཀོན་མཆོག་ཡ་ཝཱེ་ལས་ཐུགས་བརྟག་ཞུས་ཤིག ཅི་ལ་ཟེར་ན། བདག་ཅག་གི་ཕ་མེས་ཀྱིས་རྣ་བ་མ་བླགས་ཏེ། དཔེ་ཆ་འདིར་གསུངས་པ་བཞིན་དུ་མ་བྱས་པའི་རྐྱེན་གྱིས། དཀོན་མཆོག་ཡ་ཝཱེ་ཁོང་ཉིད་བདག་ཅག་གི་སྟེང་དུ་ཐུགས་རབ་ཏུ་ཁྲོས་པ་རེད་ཅེས་བསྒོས་སོ། །
2KI 22:14 དེ་ནས་མཆོད་དཔོན་ཧིལ་ཀི་ཡཱ་དང་། ཨ་ཧི་ཀམ་དང་། ཨག་པོར་དང་ཤཱ་ཕན་དང་ཨ་སཱ་ཡ་བཅས་ནི། གོས་དཔོན་ཡིན་པའི་ཧར་ཧཱ་ཟིའི་བུ་ཐིག་ཝ་ཡི་བུ་ཤལ་ལུམ་གྱི་ཆུང་མ་ལུང་སྟོན་པ་ཧུལ་དཱ་ཞེས་པའི་དྲུང་དུ་སོང་ནས་དེ་ལ་གཏམ་བྱས། དེའི་དུས་སུ་ཁོ་མོ་ནི་ཡེ་རུ་སཱ་ལེམ་གྱི་གྲོང་ཁྱེར་ཁག་གཉིས་པའི་ནང་བསྡད་ཡོད་པ་ཡིན།
2KI 22:15 དེ་ནས་ཁོ་མོས་དེ་དག་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་ངའི་རྩར་མངགས་མཁན་དེ་ལ་འདི་ལྟར་སྦྲོན་ཅིག
2KI 22:16 དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ཡ་ཧུ་དཱའི་རྒྱལ་པོས་དཔེ་ཆ་དེའི་ནང་བཀླགས་པའི་གསུང་ཐམས་ཅད་བཞིན་དུ། བདག་གིས་གནས་འདི་དང་གནས་འདི་རུ་སྡོད་པ་དག་གི་སྟེང་དུ་ཆག་སྒོ་གཏོང་བར་བྱ་སྟེ།
2KI 22:17 ཅིའི་ཕྱིར་ཞེ་ན། དེ་དག་གིས་བདག་སྤངས་ཏེ་ལྷ་གཞན་དག་ལ་བསང་བཏང་བ་དང་། དེ་དག་གི་ལག་པས་བྱས་ཚད་ཀུན་གྱིས་བདག་ཁྲོ་བར་བྱས་པས། བདག་གི་ཁོང་ཁྲོ་གནས་འདི་རུ་འབར་ཞིང་ཞི་བར་མི་འགྱུར།
2KI 22:18 དཀོན་མཆོག་ཡ་ཝཱེ་ནས་ཐུགས་བརྟག་ཞུ་བར་ཁྱོད་ཅག་མངགས་མཁན་ཡ་ཧུ་དཱའི་རྒྱལ་པོ་ལ་འདི་ལྟར་ཤོད་ཅིག ཁྱོད་ཀྱིས་ཐོས་པའི་བཀའ་ཡི་སྐོར་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ།
2KI 22:19 བདག་གིས་གནས་འདི་དང་། གནས་འདིར་སྡོད་པ་རྣམས་སྟོངས་ཤིང་དམོད་པ་འཕོག་མཁན་དུ་འགྱུར་བར་ངེས་སྨྲས་པ་དེ་ཁྱོད་ཀྱིས་ཐོས་ཚེ། ཁྱོད་ཀྱི་སེམས་སྙི་མོར་གྱུར་པ་དང་། དཀོན་མཆོག་ཡ་ཝཱེའི་སྤྱན་སྔར་སྙེམས་ཆུང་བྱས་ཤིང་བདག་གི་མདུན་དུ་རང་གི་གོས་གཤགས་ནས་ངུས་པ་ནི་ངས་ཐོས་པ་ཡིན་ཞེས་དཀོན་མཆོག་ཡ་ཝཱེས་བཀའ་ཁྱབ་གནང་ངོ་། །
2KI 22:20 དེའི་ཕྱིར། ལྟོས་དང་། བདག་གིས་ཁྱོད་ནི་རང་གི་ཕ་མེས་ཀྱི་ཁྲོད་དུ་བསྡུ་བར་བྱ་སྟེ། ཞི་བདེའི་ངང་རང་གི་དུར་ལ་འཇུག་པར་འགྱུར་གྱི། བདག་གིས་གནས་འདིར་འབེབ་པར་བྱ་བའི་ཆག་སྒོ་ཐམས་ཅད་ཁྱོད་ཀྱི་མིག་གིས་མཐོང་བར་མི་འགྱུར་ཞེས་གསུངས་ཞེས་པའི་བཀའ་དེ་ཁོ་ཚོས་རྒྱལ་པོར་བསྐྱལ་ཏོ། །
2KI 23:1 དེ་ནས་རྒྱལ་པོས་བང་ཆེན་མངགས་ཏེ་ཡ་ཧུ་དཱ་དང་། ཡེ་རུ་སཱ་ལེམ་གྱི་རྒན་པོ་ཚང་མ་ཁོང་གི་དྲུང་དུ་བསྡུས་སོ། །
2KI 23:2 རྒྱལ་པོ་དཀོན་མཆོག་ཡ་ཝཱེའི་མཆོད་ཁང་དུ་ཡར་ཕྱིན་པ་དང་། ཁོང་དང་མཉམ་དུ་ཡ་ཧུ་དཱའི་མི་ཐམས་ཅད་དང་། ཡེ་རུ་སཱ་ལེམ་གྱི་གཞིས་སྡོད་པ་ཀུན། མཆོད་དཔོན་དང་ལུང་སྟོན་པ་རྣམས། མི་སྡེའི་མཆོག་དམན་ཐམས་ཅད་དེར་སོང་སྟེ། དཀོན་མཆོག་ཡ་ཝཱེའི་མཆོད་ཁང་དུ་རྙེད་པའི་ཞལ་ཆད་ཀྱི་མདོའི་ནང་གསུངས་པ་ཐམས་ཅད་རྒྱལ་པོས་དེ་དག་གི་རྣ་ལམ་དུ་བཀླགས་སོ། །
2KI 23:3 ཡང་རྒྱལ་པོ་ཀ་བའི་མདུན་དུ་ལངས་ནས། བློ་གཅིག་སེམས་གཅིག་གིས་དཀོན་མཆོག་ཡ་ཝཱེའི་རྗེས་སུ་འབྲང་བ་དང་། ཁོང་གི་བཀའ་རྣམས་དང་དཔང་ཡིག སྒྲིག་ཁྲིམས་རྣམས་བསྲུངས་ནས་མདོ་དེའི་ནང་དུ་བཀོད་པའི་ཞལ་ཆད་ཀྱི་གསུང་བཞིན་བསྒྲུབ་པའི་ཕྱིར་དུ། དཀོན་མཆོག་ཡ་ཝཱེའི་སྤྱན་སྔར་དམ་བཅའ་བཞག་པ་ལ། མི་ཚང་མ་ཞལ་ཆད་ལ་བརྟེན་པར་གྱུར་ཏོ། །
2KI 23:4 དེ་ནས་རྒྱལ་པོས་མཆོད་དཔོན་ཆེན་པོ་ཧིལ་ཀི་ཡཱ་དང་། མཆོད་དཔོན་རིམ་པ་གཉིས་པ་རྣམས་དང་སྒོ་སྲུང་རྣམས་ལ། པཱ་ཨལ་དང་ཨ་ཤེ་རཱ། ནམ་མཁའི་སྐར་ཚོགས་བཅས་ཀྱི་དོན་དུ་བཟོས་པའི་ཡོ་བྱད་ཐམས་ཅད་དཀོན་མཆོག་ཡ་ཝཱེའི་མཆོད་ཁང་ནས་ཕྱི་རོལ་ཏུ་འདོན་པ་དང་། ཡེ་རུ་སཱ་ལེམ་ཕྱི་རོལ་གྱི་ཀིད་རོན་ལུང་པའི་ས་ཞིང་དུ་བསྲེག་པར་བསྒོས་ཤིང་། དེའི་ཐལ་བ་ནི་པེད་ཨེལ་དུ་བསྐྱལ་ཏོ། །
2KI 23:5 ཡ་ཧུ་དཱའི་རྒྱལ་པོ་རྣམས་ཀྱིས་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་སོ་སོར་བརྩིགས་པའི་མཐོ་གླིང་རྣམས་དང་། ཡེ་རུ་སཱ་ལེམ་མཐའ་འཁོར་དུ་བསང་བཏང་ནས་སྐུ་འདྲ་བསྟེན་མཁན་གྱི་མཆོད་དཔོན་ལ་བསྐོས་པ་རྣམས་དང་། ཡང་པཱ་ཨལ་དང་། ཉི་མ་དང་། ཟླ་བ་དང་། རྒྱུ་སྐར་དང་། ནམ་མཁའི་སྐར་ཚོགས་ཐམས་ཅད་ལ་བསང་གཏོང་མཁན་རྣམས་ཀྱང་ཡོ་ཤི་ཡཱས་མེད་པར་བཟོས་སོ། །
2KI 23:6 ཡང་ཁོང་གིས་དཀོན་མཆོག་ཡ་ཝཱེའི་མཆོད་ཁང་ནས་ཨ་ཤེ་རཱ་དེ་ཡེ་རུ་སཱ་ལེམ་ཕྱི་རོལ་གྱི་ཀིད་རོན་གྲོག་ཆུའི་འགྲམ་དུ་ཕྱུང་སྟེ། ཀིད་རོན་དུ་བསྲེགས་ཤིང་བརྫིས་ནས་ཕྱེ་མར་བཏགས་པ་དང་། ཕྱེ་མ་དེ་མི་རྣམས་ཀྱི་དུར་ཁྲོད་དུ་གཏོར་བ་རེད།
2KI 23:7 ཁོང་གིས་དཀོན་མཆོག་ཡ་ཝཱེའི་མཆོད་ཁང་དུ་ཡོད་པའི་མཆོད་གཤོམ་གྱི་ཆོས་རྫུ་གཞང་འཚོང་རྣམས་ཀྱི་ཁང་པ་བཤིགས་པ་དང་། དེ་ནི་བུད་མེད་རྣམས་ཀྱིས་ཨ་ཤེ་རཱའི་དོན་དུ་རས་གོས་འཐག་ས་ཡིན་ནོ། །
2KI 23:8 ཡང་ཁོང་གིས་ཡ་ཧུ་དཱའི་གྲོང་ཁྱེར་རྣམས་ལས་མཆོད་དཔོན་ཐམས་ཅད་བསྡུས་ནས། གེ་བཱ་ནས་པེར་ཤ་བཱ་ཡི་བར་དུ་མཆོད་དཔོན་རྣམས་ཀྱིས་བསང་གཏོང་སའི་མཐོ་གླིང་རྣམས་མི་གཙང་བར་བྱས་པ་དང་། གྲོང་ཁྱེར་གྱི་རྒྱ་སྒོའི་གཡོན་ཕྱོགས་སུ་གྲོང་དཔོན་ཡོ་ཤུ་ཨ་ཡི་སྒོ་འགག་ཏུ་ཡོད་པའི་མཐོ་གླིང་རྣམས་ཀྱང་མར་བཤིགས་སོ། །
2KI 23:9 དོན་དམ་དུ། མཐོ་གླིང་གི་མཆོད་དཔོན་རྣམས་ནི་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་མཆོད་ཁྲིའི་དྲུང་དུ་མི་འོངས་ཀྱང་། དེ་དག་གིས་སྤུན་རྣམས་དང་ལྷན་དུ་སྐྱུར་མེད་བག་ལེབ་ཟོས་པ་ཡིན།
2KI 23:10 མི་སུས་ཀྱང་རང་གི་བུ་དང་བུ་མོ་རྣམས་མོ་ལེག་གི་ཕྱིར་མེ་ནང་དུ་སྦྱིན་སྲེག་མི་གཏོང་བའི་དོན་དུ། ཁོང་གིས་པེན་ཧིན་ནོམ་ལུང་པའི་ཐོ་ཕེད་ཀྱང་མི་གཙང་བར་བྱས་སོ། །
2KI 23:11 ཡང་ཁོང་གིས་དཀོན་མཆོག་ཡ་ཝཱེའི་མཆོད་ཁང་ནང་དུ་འཛུལ་སའི་སྒོ་མདུན་དུ། ཉུག་རུམ་པ་ནཱ་ཐན་མེ་ལེག་གི་ར་སྐོར་ནང་གི་གཟིམ་ཆུང་གི་ཉེ་སར་ཡོད་པའི་རྟ་ཡི་སྐུ་འདྲ་རྣམས་ཏེ། ཡ་ཧུ་དཱའི་རྒྱལ་པོ་རྣམས་ཀྱིས་ཉི་མ་ལ་ཕུལ་བ་རྣམས་མེད་པར་བྱས་ཤིང་། ཉི་མར་ཕུལ་བའི་ཤིང་རྟ་རྣམས་ཀྱང་མེ་རུ་བསྲེགས་སོ། །
2KI 23:12 ཡང་ཁོང་གིས་ཡ་ཧུ་དཱའི་རྒྱལ་པོ་རྣམས་ཀྱིས་ཨ་ཧ་ཟཱ་ཡི་གཟིམ་ཁང་གི་མཁར་སྟེང་དུ་བཟོས་པའི་མཆོད་ཁྲི་དང་། མཱ་ན་ཤེ་ཡིས་དཀོན་མཆོག་ཡ་ཝཱེའི་མཆོད་ཁང་གི་ར་སྐོར་གཉིས་ཀྱི་ནང་བཞེངས་པའི་མཆོད་ཁྲི་རྣམས་རྡུལ་དུ་བརླགས་ཏེ། དེ་དག་གི་ཐལ་བ་ཀིད་རོན་གྲོག་ཆུའི་ནང་དུ་བཏབ།
2KI 23:13 ཡང་ཡེ་རུ་སཱ་ལེམ་གྱི་ཤར་ཕྱོགས་དང་། ཞིག་རལ་དུ་གྱུར་པའི་རི་བོའི་ལྷོ་ཕྱོགས་སུ་ཡོད་པའི་མཐོ་གླིང་རྣམས་ཏེ། ཡེས་ར་ཨེལ་གྱི་རྒྱལ་པོ་སོ་ལོ་མོན་གྱིས་ཚི་ཏུན་པའི་སྐྱུག་བྲོ་བའི་ཨ་ཤཱ་ཏ་རོད་དང་། མོ་ཨབ་པའི་སྐྱུག་བྲོ་བའི་ཀེ་མོ་སི་དང་། ཨམ་མོན་པའི་སྐྱུག་བྲོ་བའི་མིལ་ཀོམ་བཅས་ཀྱི་ཕྱིར་བཞེངས་པའི་མཐོ་གླིང་རྣམས་རྒྱལ་པོས་མི་གཙང་བར་བྱས་པ་དང་།
2KI 23:14 ཡང་ཁོང་གིས་རྡོ་སྐུ་རྣམས་དུམ་བུར་བཅགས་པ་དང་ཨ་ཤེ་རཱ་རྣམས་སོ་སོར་བཅད་ཅིང་། ཡུལ་དེར་མི་ཤི་རོའི་རུས་པས་བཀང་བར་བྱས་སོ། །
2KI 23:15 དེར་མ་ཟད། ཐ་ན་པེད་ཨེལ་གྱི་མཆོད་ཁྲི་དང་ཡེས་ར་ཨེལ་ལ་སྡིག་པ་བྱེད་དུ་བཅུག་པའི་ནེ་བཱད་ཀྱི་བུ་ཡེ་རོབ་ཨམ་གྱིས་བརྩིགས་པའི་མཐོ་གླིང་མར་བཤིགས་ནས་མེ་རུ་བསྲེགས་པ་དང་། འཐག་ནས་རྡུལ་དུ་བརླགས་ཤིང་། ཨ་ཤེ་རཱ་ཡང་མེ་རུ་བསྲེགས་སོ། །
2KI 23:16 དེར་ཡོ་ཤི་ཡཱ་ཕྱིར་འཁོར་བ་ན། རི་ལ་ཡོད་པའི་དུར་ཁུང་རྣམས་མཐོང་བ་དང་། དུར་ཁུང་དེ་དག་ལས་རུས་པ་འདོན་དུ་བཅུག་སྟེ། སྔར་དཀོན་མཆོག་གི་སྐྱེས་བུས་ཁྱབ་བསྒྲགས་བྱས་པའི་དཀོན་མཆོག་ཡ་ཝཱེའི་གསུང་བཞིན་དུ། རུས་པ་རྣམས་མཆོད་ཁྲིའི་སྟེང་དུ་བསྲེགས་ནས་མཆོད་ཁྲི་མི་གཙང་བར་བྱས།
2KI 23:17 དེ་ནས་ཡོ་ཤི་ཡཱ་ཡིས། ངས་མཐོང་བའི་རྡོ་རིང་དེ་ཅི་ཡིན་ཞེས་དྲིས་པ་ན། ལན་དུ་གྲོང་ཁྱེར་གྱི་མི་ཚོས། འདི་ནི་སྔར་ཡ་ཧུ་དཱ་ནས་ཐོན་ཏེ། ཁྱེད་ཀྱིས་པེད་ཨེལ་གྱི་མཆོད་ཁྲི་ལ་མཛད་པའི་དོན་འདི་དག་གསལ་བསྒྲགས་བྱས་པའི་དཀོན་མཆོག་གི་སྐྱེས་བུའི་དུར་ས་དེ་རེད་ཞུས་པས།
2KI 23:18 ཁོང་གིས། དེ་བསྐྱུར་དང་། སུ་ལའང་ཁོའི་རུས་པར་རེག་ཏུ་མ་འཇུག་ཅེས་བསྒོས་པར། མི་རྣམས་ཀྱིས་དེའི་གདུང་རུས་དང་སཱ་མར་ཡ་ནས་ཐོན་པའི་ལུང་སྟོན་པ་དེའི་གདུང་རུས་ལ་མ་རེག་གོ །
2KI 23:19 དེ་ཡང་ཡེས་ར་ཨེལ་གྱི་རྒྱལ་པོ་རྣམས་ཀྱིས་སཱ་མར་ཡའི་གྲོང་ཁྱེར་རྣམས་སུ་བརྩིགས་ནས་དཀོན་མཆོག་ཡ་ཝཱེའི་ཐུགས་ཁྲོ་བསླངས་པའི་མཐོ་གླིང་གི་ལྷ་ཁང་ཐམས་ཅད་ཡོ་ཤི་ཡཱས་བརླགས་ནས། པེད་ཨེལ་དུ་བྱས་པ་བཞིན་དུ་དེ་དག་ལའང་དེ་ལྟར་བྱས།
2KI 23:20 དེར་ཡོད་པའི་མཐོ་གླིང་རྣམས་ཀྱི་མཆོད་དཔོན་ཀུན་མཆོད་ཁྲིའི་ཁར་སྦྱིན་སྲེག་བཏང་ཞིང་། དེའི་སྟེང་དུ་མི་ཡི་རུས་པ་བསྲེགས་པ་དང་། དེ་ནས་ཁོ་ཡེ་རུ་སཱ་ལེམ་དུ་ཕྱིར་ལོག་གོ །
2KI 23:21 དེ་ནས་རྒྱལ་པོས་འབངས་རྣམས་ལ་བཀའ་བསྩལ་ཏེ་འདི་སྐད་དུ། ཞལ་ཆད་ཀྱི་མདོ་འདིའི་ནང་དུ་བཀོད་པ་བཞིན་དུ། ཁྱོད་ཅག་གི་དཀོན་མཆོག་ཡ་ཝཱེའི་དོན་དུ་པེ་སག་གི་དུས་ཆེན་སྲུངས་ཤིག་ཅེས་བསྒོས།
2KI 23:22 ཡེས་ར་ཨེལ་གྱི་ཁྲིམས་ཐག་གཅོད་པའི་ཁྲིམས་དཔོན་རྣམས་ཀྱི་དུས་ནས་བཟུང་སྟེ། ཡེས་ར་ཨེལ་གྱི་རྒྱལ་པོ་དང་ཡ་ཧུ་དཱའི་རྒྱལ་པོ་རྣམས་ཀྱི་དུས་སྐབས་བར་དུ། འདི་འདྲའི་པེ་སག་གི་དུས་ཆེན་ཞིག་ནམ་ཡང་སྲུང་བ་མེད་དོ། །
2KI 23:23 འོན་ཀྱང་། རྒྱལ་པོ་ཡོ་ཤི་ཡཱ་ཡིས་སྲིད་བཟུང་བའི་ལོ་བཅོ་བརྒྱད་པར་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་དོན་དུ་པེ་སག་གི་དུས་ཆེན་འདི་བསྲུངས་པ་རེད།
2KI 23:24 དེར་མ་ཟད། ཡ་ཧུ་དཱ་དང་ཡེ་རུ་སཱ་ལེམ་གྱི་ཡུལ་དུ་ཡོད་པའི་གདོན་འདྲེ་འགུག་མཁན་དང་མོ་འདེབས་མཁན། ལྷ་སྐུ། འདྲ་སྐུ། དེ་མིན་སྐྱུག་བྲོ་བ་ཐམས་ཅད་ནི་ཡོ་ཤི་ཡཱས་མེད་པར་བཟོས། ཅིའི་ཕྱིར་ཞེ་ན། མཆོད་དཔོན་ཧིལ་ཀི་ཡཱས་དཀོན་མཆོག་ཡ་ཝཱེའི་མཆོད་ཁང་དུ་རྙེད་པའི་མདོ་ནང་བཀོད་པའི་བཀའ་ཁྲིམས་ཀྱི་གསུང་རྣམས་བསྒྲུབ་པའི་ཕྱིར་དུའོ། །
2KI 23:25 ཡང་ཁོང་དང་འདྲ་བར་མོ་ཤེའི་བཀའ་ཁྲིམས་ཐམས་ཅད་དང་བསྟུན་ཏེ། རང་གི་སེམས་ཧྲིལ་པོ་དང་ཡིད་ཧྲིལ་པོ། སྟོབས་ཧྲིལ་པོ་བཅས་ཀྱིས་དཀོན་མཆོག་ཡ་ཝཱེའི་ཕྱོགས་སུ་འཁོར་མཁན་གྱི་རྒྱལ་པོ་ཞིག་སྔར་མ་བྱུང་ལ། ཕྱིས་སུ་ཡང་ཁོང་ལྟ་བུ་ཞིག་མ་ཐོན་ནོ། །
2KI 23:26 འོན་ཀྱང་མཱ་ན་ཤེ་ཡིས་ངན་པ་སྣ་ཚོགས་སྤྱད་དེ་དཀོན་མཆོག་ཡ་ཝཱེའི་ཐུགས་ཁྲོ་བསླངས་པའི་རྐྱེན་གྱིས། དཀོན་མཆོག་ཡ་ཝཱེས་ཡ་ཧུ་དཱའི་སྟེང་དུ་འབར་བའི་ཐུགས་ཁྲོ་ཆེན་པོ་ཕྱིར་མ་སློག་པ་དང་།
2KI 23:27 དཀོན་མཆོག་ཡ་ཝཱེས་འདི་སྐད་དུ། བདག་གིས་ཡེས་ར་ཨེལ་དོར་བ་ལྟར། ཡ་ཧུ་དཱ་ཡང་ངའི་མདུན་ནས་འདོར་ཞིང་། བདག་གིས་བདམས་པའི་ཡེ་རུ་སཱ་ལེམ་གྲོང་ཁྱེར་འདི་དང་། ངའི་མཚན་དེ་རུ་འཇོག་པར་བྱ་གསུངས་པའི་མཆོད་ཁང་འདིའང་འདོར་བར་བྱའོ་ཞེས་གསུངས་སོ། །
2KI 23:28 དེ་ཡང་ཡོ་ཤི་ཡཱ་ཡི་དོན་གཞན་དག་དང་། ཁོས་ཅི་བྱས་པ་ཐམས་ཅད་ཡ་ཧུ་དཱའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 23:29 ཡོ་ཤི་ཡཱ་ཡི་སྐུ་རིང་དུ་ཨེ་ཅིབ་ཀྱི་རྒྱལ་པོ་ཕཱར་ཨོལ་ནེ་ཀོ་བྱ་བ་དེ་ཕི་རཱད་ཆུ་བོའི་ཕྱོགས་སུ་ཨ་སུར་གྱི་རྒྱལ་པོ་དང་འཕྲད་དུ་སོང་བ་དང་། རྒྱལ་པོ་ཡོ་ཤི་ཡཱ་ནི་ཁོ་དང་འཐབ་ཏུ་ཕྱིན་པ་ན། ཕཱར་ཨོལ་གྱིས་ཁོ་མཐོང་བ་ཙམ་གྱིས་མེ་གིད་དོ་རུ་བསད་དོ། །
2KI 23:30 དེ་ནས་ཁོའི་འཁོར་རྣམས་ཀྱིས་སྤུར་ཤིང་རྟའི་ནང་དུ་བཞག་སྟེ་མེ་གིད་དོ་ནས་ཡེ་རུ་སཱ་ལེམ་དུ་དྲངས་ཤིང་། དེ་ཁོ་རང་གི་སྤུར་ཁང་དུ་དུར་ལ་སྦས་སོ། །དེ་ནས་འབངས་རྣམས་ཀྱིས་ཡོ་ཤི་ཡཱའི་བུ་ཡེ་ཧོ་ཨ་ཧཱ་ཟི་ཕྱུང་ནས་སྣུམ་གྱིས་བྱུགས་ཏེ་ཁོའི་ཡབ་ཀྱི་རྒྱུན་མཐུད་ནས་རྒྱལ་པོར་བསྐོས་སོ། །
2KI 23:31 དེ་ཡང་ཡེ་ཧོ་ཨ་ཧཱ་ཟི་རྒྱལ་ཁྲིར་བཞུགས་པའི་དུས་སུ་ལོ་ཉེར་གསུམ་ཡིན་པ་དང་ཡེ་རུ་སཱ་ལེམ་དུ་ཟླ་བ་གསུམ་གྱི་རིང་ལ་རྒྱལ་སྲིད་བསྐྱངས། ཁོའི་ཡུམ་ནི་ལིབ་ནཱ་ནས་ཡིན་པའི་ཡེ་རེམ་ཡཱའི་བུ་མོ་ཧ་མུ་ཏལ་བྱ་བ་ཡིན་ནོ། །
2KI 23:32 ཁོས་རང་གི་ཡབ་མེས་རྣམས་ཀྱིས་སྤྱད་པ་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་དོ། །
2KI 23:33 ཕཱར་ཨོལ་ནེ་ཀོ་ཡིས་ཧ་མཱད་ཡུལ་དུ་ཡོད་པའི་རིབ་ལཱ་རུ་ཁོ་བཙོན་དུ་བཅུག་པ་དང་། ཁོས་ཡེ་རུ་སཱ་ལེམ་དུ་རྒྱལ་སྲིད་སྐྱོང་མི་ཐུབ་པར་བྱས། ཡང་ཡ་ཧུ་དཱ་ལ་དངུལ་རྡོ་ཚད་བརྒྱ་དང་གསེར་རྡོ་ཚད་གཅིག་གི་ཆད་པ་བཅད་དོ། །
2KI 23:34 ཡང་ཕཱར་ཨོལ་ནེ་ཀོ་ཡིས་ཡོ་ཤི་ཡཱའི་བུ་ཨེལ་ཡ་ཀིམ་ནི་ཁོའི་ཡབ་ཡོ་ཤི་ཡཱའི་རྒྱུན་མཐུད་ནས་རྒྱལ་པོར་བཀོད་ཅིང་། ཁོའི་མིང་བརྗེས་ནས་ཡེ་ཧོ་ཡཱ་ཀིམ་ཞེས་བཏགས། ཡེ་ཧོ་ཨ་ཧཱ་ཟི་བཟུང་ནས་ཨེ་ཅིབ་ཏུ་ཁྲིད་ཅིང་ཁོ་རང་དེར་ཚེ་ལས་འདས།
2KI 23:35 ཡེ་ཧོ་ཡཱ་ཀིམ་གྱིས་ཕཱར་ཨོལ་ལ་གསེར་དངུལ་བསྐྱལ་ཏེ། ཕཱར་ཨོལ་གྱི་བཀའ་བཞིན་དུ་དངུལ་སྤྲོད་པར་རྒྱལ་ཁམས་ཡོངས་ནས་དཔྱ་ཁྲལ་བསྡུས་ཤིང་། ཕཱར་ཨོལ་ནེ་ཀོ་ལ་སྤྲོད་པའི་ཆེད་དུ་འབངས་མི་རེ་རེར་འཕོག་པ་བཞིན་དུ་གསེར་དང་དངུལ་བླངས་སོ། །
2KI 23:36 དེ་ཡང་ཡེ་ཧོ་ཡཱ་ཀིམ་རྒྱལ་ཁྲིར་བཞུགས་པའི་དུས་སུ་ལོ་ཉེར་ལྔ་ཡིན་ཏེ། ལོ་བཅུ་གཅིག་གི་རིང་ལ་ཡེ་རུ་སཱ་ལེམ་དུ་རྒྱལ་སྲིད་བསྐྱངས། རུ་མཱ་པ་ཕེ་ད་ཡཱའི་བུ་མོ་ཟེ་བི་དཱ་བྱ་བ་ནི་ཁོའི་ཡུམ་མོ། །
2KI 23:37 ཁོས་ཀྱང་རང་གི་ཡབ་མེས་རྣམས་ཀྱིས་སྤྱད་པ་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་དོ། །
2KI 24:1 དེ་ཡང་ཡེ་ཧོ་ཡཱ་ཀིམ་གྱི་དུས་སུ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ཡར་འོངས་ཏེ། ཡེ་ཧོ་ཡཱ་ཀིམ་ལོ་གསུམ་གྱི་རིང་ལ་ཁོའི་མངའ་འོག་ཏུ་བཅུག དེ་ནས་ཁོས་དེ་ལ་ངོ་ལོག་བྱས།
2KI 24:2 དཀོན་མཆོག་ཡ་ཝཱེས་ཁོང་གི་ཞབས་ཕྱི་ལུང་སྟོན་པ་རྣམས་བརྒྱུད་ནས་གསུངས་པ་བཞིན་དུ། ཁོང་གིས་ཡ་ཧུ་དཱ་པ་རྣམས་ཚར་གཅོད་བྱེད་ཆེད། ཀལ་དི་པའི་དམག་དཔུང་དང་ཨ་རམ་པའི་དམག་དཔུང་དང་། མོ་ཨབ་པའི་དམག་དཔུང་དང་། ཨམ་མོན་པའི་དམག་དཔུང་རྣམས་ཡ་ཧུ་དཱ་རུ་མངགས་སོ། །
2KI 24:3 དོན་དམ་དུ་མཱ་ན་ཤེ་ཡིས་བྱས་པའི་སྡིག་ཉེས་ཐམས་ཅད་ཀྱི་རྐྱེན་གྱིས། དཀོན་མཆོག་ཡ་ཝཱེའི་བཀའ་བཞིན་དུ། ཁོང་གི་སྤྱན་སྔ་ནས་དེ་རྣམས་འདོར་བའི་ཕྱིར་ཡ་ཧུ་དཱའི་སྟེང་དུ་དེ་ལྟར་བྱུང་བར་མ་ཟད།
2KI 24:4 ཡང་མཱ་ན་ཤེས་ཉེས་མེད་ཀྱི་ཁྲག་བཞུར་དུ་བཅུག་སྟེ། ཡེ་རུ་སཱ་ལེམ་ཉེས་མེད་ཀྱི་ཁྲག་གིས་བསྐངས་ཕྱིར་དཀོན་མཆོག་ཡ་ཝཱེ་དེ་བཤགས་པར་ཐུགས་མ་དགྱེས་སོ། །
2KI 24:5 དེ་ཡང་ཡེ་ཧོ་ཡཱ་ཀིམ་གྱི་དོན་གཞན་དང་། ཁོས་ཅི་བྱས་པ་ཐམས་ཅད་ནི་ཡ་ཧུ་དཱ་པའི་རྒྱལ་པོ་རྣམས་ཀྱི་ལོ་རབས་ནང་དུ་བཀོད་ཡོད་པ་མ་ཡིན་ནམ།
2KI 24:6 ཡེ་ཧོ་ཡཱ་ཀིམ་རང་གི་ཕ་མེས་དང་ལྷན་ཅིག་ཏུ་གཟིམས་པ་དང་། ཁོའི་བུ་ཡེ་ཧོ་ཡཱ་ཀིན་ནི་དེའི་རྒྱུན་མཐུད་ནས་རྒྱལ་པོར་གྱུར་ཏོ། །
2KI 24:7 དེ་ནས་པཱ་པེལ་ལོན་གྱི་རྒྱལ་པོས་ཨེ་ཅིབ་ཆུ་བོ་ནས་ཕི་རཱད་ཆུ་བོའི་བར་དུ། ཨེ་ཅིབ་རྒྱལ་པོ་ལ་གཏོགས་པ་ཐམས་ཅད་བླངས་པས། ཨེ་ཅིབ་ཀྱི་རྒྱལ་པོ་རང་གི་ཡུལ་ནས་ཡང་བསྐྱར་ཕྱི་རོལ་ཏུ་མ་ཡོང་ངོ་། །
2KI 24:8 དེ་ཡང་ཡེ་ཧོ་ཡཱ་ཀིན་གྱིས་རྒྱལ་སྲིད་བཟུང་དུས་ཁོ་ལོ་བཅོ་བརྒྱད་ཡིན་པ་དང་། ཡེ་རུ་སཱ་ལེམ་དུ་ཟླ་བ་གསུམ་གྱི་རིང་ལ་རྒྱལ་སྲིད་བསྐྱངས། ཡེ་རུ་སཱ་ལེམ་གྱི་ཨེལ་ནཱ་ཐན་གྱི་བུ་མོ་ནེ་ཧོ་ཤུ་ཐཱ་བྱ་བ་ནི་ཁོའི་ཡུམ་མོ། །
2KI 24:9 ཁོས་ཀྱང་རང་གི་ཡབ་མེས་ཀྱིས་གང་སྤྱད་པ་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་དོ། །
2KI 24:10 དེའི་ཚེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་འཁོར་གཡོག་རྣམས་ཡེ་རུ་སཱ་ལེམ་དུ་ཡར་སོང་སྟེ་གྲོང་ཁྱེར་དམག་གིས་བསྐོར་བ་དང་།
2KI 24:11 ནེ་བོ་ཀད་ནེ་ཙར་གྱི་འཁོར་གཡོག་རྣམས་ཀྱིས་གྲོང་ཁྱེར་སྐོར་བའི་དུས་སུ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དངོས་སུ་གྲོང་ཁྱེར་དེར་འོངས།
2KI 24:12 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་དང་ཁོའི་ཡུམ། འཁོར་གཡོག་རྣམས། སྐུ་དྲག་རྣམས། ཉུག་རུམ་པ་བཅས་ཐོན་ནས་པཱ་པེལ་ལོན་གྱི་རྒྱལ་པོར་མགོ་བཏགས་པས། པཱ་པེལ་ལོན་གྱི་རྒྱལ་པོས་སྲིད་བྱས་པའི་ལོ་བརྒྱད་པར་ཁོ་འཛིན་བཟུང་བྱས་ཤིང་།
2KI 24:13 དཀོན་མཆོག་ཡ་ཝཱེས་གསུངས་པ་བཞིན་དུ། ཁོས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོའི་ཕོ་བྲང་གི་གཏེར་ཐམས་ཅད་བཏོན་ཏེ། ཡེས་ར་ཨེལ་གྱི་རྒྱལ་པོ་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་གི་དོན་དུ་བཟོས་པའི་གསེར་གྱི་ཡོ་བྱད་ཐམས་ཅད་དུམ་བུར་བཅག་པ་དང་།
2KI 24:14 ཡང་ཁོས་ཡེ་རུ་སཱ་ལེམ་པ་ཚང་མ་དང་། སྐུ་དྲག་ཐམས་ཅད་དང་། དམག་གི་དཔའ་བོ་མཐའ་དག་དང་བཅས་བསྡོམས་པས་མི་སྟོང་ཕྲག་བཅུ་དང་། དེར་མ་ཟད་ལས་བཟོ་དང་མགར་བ་ཐམས་ཅད་བཙན་ཁྲིད་བྱས་ཤིང་། ཡུལ་གྱི་དབུལ་ཕོངས་རྣམས་མ་གཏོགས་དེར་སུ་ཡང་ལུས་སུ་མ་བཅུག་གོ །
2KI 24:15 ཡང་ཁོས་ཡེ་ཧོ་ཡཱ་ཀིན་དང་། རྒྱལ་པོའི་ཡུམ་དང་རྒྱལ་པོའི་ལྕམ་རྣམས། ཉུག་རུམ་པ་རྣམས་དང་ཡུལ་གྱི་སྐུ་དྲག་རྣམས་ཡེ་རུ་སཱ་ལེམ་ནས་པཱ་པེལ་ལོན་དུ་བཙན་ཁྲིད་བྱས།
2KI 24:16 དེར་མ་ཟད་དམག་མི་སྟོང་ཕྲག་བདུན་དང་། ལས་བཟོ་དང་མགར་པ་སྟོང་ཕྲག་གཅིག་བཅས་ཡོད་པ་ཐམས་ཅད་དམག་འགྱེད་ཀྱི་དཔའ་རྒོད་ཡིན་ལ། པཱ་པེལ་ལོན་གྱི་རྒྱལ་པོས་དེ་རྣམས་བཟུང་ནས་པཱ་པེལ་ལོན་དུ་ཁྲིད་དོ། །
2KI 24:17 དེ་ནས་པཱ་པེལ་ལོན་གྱི་རྒྱལ་པོས་ཡེ་ཧོ་ཡཱ་ཀིན་གྱི་ཁུ་བོ་མད་ཐན་ཡཱ་ནི་ཁོའི་ཚབ་ཏུ་རྒྱལ་པོར་བསྐོས་ཤིང་མིང་བརྗེས་ནས་ཚིད་ཀི་ཡཱ་ཞེས་བཏགས་སོ། །
2KI 24:18 དེ་ཡང་ཚིད་ཀི་ཡཱ་རྒྱལ་པོར་བཞུགས་དུས་ལོ་ཉེར་གཅིག་ལ་སོན་ཡོད་དེ། ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས། ལིབ་ནཱ་པ་ཡེ་རེམ་ཡཱའི་བུ་མོ་ཧ་མུ་ཏལ་བྱ་བ་ནི་ཁོའི་ཡུམ་མོ། །
2KI 24:19 ཁོས་ཀྱང་ཡེ་ཧོ་ཡཱ་ཀིམ་གྱིས་གང་སྤྱད་པ་ལྟར་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད།
2KI 24:20 ཅིའི་ཕྱིར་ཞེ་ན། དཀོན་མཆོག་ཡ་ཝཱེ་ཁོང་ཉིད་ཡེ་རུ་སཱ་ལེམ་དང་ཡ་ཧུ་དཱ་ལ་ཐུགས་ཁྲོས་ཤིང་། ཁོང་གིས་དེ་དག་ཁོང་གི་དྲུང་ནས་ཕར་བསྐྲད་པ་དང་། ཕྱིས་སུ་ཚིད་ཀི་ཡཱ་ཡིས་པཱ་པེལ་ལོན་གྱི་རྒྱལ་པོ་ལ་ངོ་ལོག་བྱས་སོ། །
2KI 25:1 ཡང་ཟཱ་ཏི་ཁི་ཡཱས་རྒྱལ་སྲིད་བཟུང་ནས་ལོ་དགུ་པའི་ཟླ་བ་བཅུ་པའི་ཚེས་བཅུ་ཉིན། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ནི་རང་གི་དམག་དཔུང་དང་བཅས་ཡེ་རུ་སཱ་ལེམ་ལ་འོངས་པ་དང་། མཁར་ཕྱི་རུ་དམག་སྒར་བརྒྱབ་ཅིང་ས་རགས་བརྩིགས་ནས་མཐའ་བསྐོར་ཏོ། །
2KI 25:2 རྒྱལ་པོ་ཚིད་ཀི་ཡཱའི་སྲིད་ལོ་བཅུ་གཅིག་པའི་བར་དུ་གྲོང་ཁྱེར་དམག་གིས་བསྐོར།
2KI 25:3 ཟླ་བཞི་པའི་ཚེས་དགུ་ཉིན་གྲོང་ཁྱེར་ནང་དུ་མུ་གེ་བྱུང་བ་ཤིན་ཏུ་ཚབས་ཆེ་ཞིང་། ཐ་ན་ཡུལ་མི་རྣམས་ལ་ཁ་ཟས་ཀྱང་མེད་པར་གྱུར།
2KI 25:4 དེ་ནས་གྲོང་ཁྱེར་གཏོར་བཅོམ་བཏང་སྟེ། དམག་མི་ཐམས་ཅད་རྒྱལ་པོའི་ལྡུམ་རའི་མདུན་དུ་ཡོད་པའི་ལྕགས་རི་གཉིས་བར་གྱི་རྒྱ་སྒོའི་ལམ་ནས་བྲོས། འོན་ཀྱང་། ཀལ་དི་པ་རྣམས་ཀྱིས་གྲོང་ཁྱེར་བསྐོར་ཡོད་པས། ཁོ་ཚོ་ཨ་ར་པཱའི་ལམ་ནས་སོང་ངོ་། །
2KI 25:5 དེར་ཀལ་དི་པའི་དམག་དཔུང་གིས་རྒྱལ་པོ་བདས་ནས་ཡེ་རུ་ཀོའི་ཐང་ནས་བཟུང་བ་དང་། ཁོའི་དམག་མི་ཐམས་ཅད་ཁོ་ལས་ཕྱོགས་སུ་གྱེས་པ་རེད།
2KI 25:6 ཀལ་དི་པའི་དམག་དཔུང་གིས་རྒྱལ་པོ་བཟུང་ནས་པཱ་པེལ་ལོན་རྒྱལ་པོའི་དྲུང་དུ་རིབ་ལཱ་རུ་ཡར་འགྲོ་རུ་བཅུག་ནས་དེ་རྣམས་ཀྱིས་ཁོ་ལ་ཁྲིམས་ཐག་བཅད།
2KI 25:7 ཡང་ཚིད་ཀི་ཡཱའི་བུ་རྣམས་ཡབ་ཀྱི་མིག་མདུན་དུ་བསད་ཅིང་། ཚིད་ཀི་ཡཱའི་མིག་གཉིས་ལོང་བར་བྱས་ཏེ་ལི་ཡི་ཐག་པས་བཅིངས་ནས་པཱ་པེལ་ལོན་དུ་ཁྱེར་ཏོ། །
2KI 25:8 དེ་ཡང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་རྒྱལ་སྲིད་བཟུང་བའི་ལོ་བཅུ་དགུ་པའི་ཟླ་ལྔ་པའི་ཚེས་བདུན་ཉིན། པཱ་པེལ་ལོན་གྱི་རྒྱལ་པོའི་བློན་ཆེན་ཏེ་སྐུ་སྲུང་དཔོན་པོ་ནེ་བོ་ཟར་ཨ་དན་བྱ་བ་ཡེ་རུ་སཱ་ལེམ་དུ་འོངས་པ་དང་།
2KI 25:9 ཁོས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོའི་ཕོ་བྲང་དང་། ཡེ་རུ་སཱ་ལེམ་གྱི་ཁང་པ་ཐམས་ཅད་དང་ཁང་བརྩེགས་ཐམས་ཅད་མེར་བསྲེགས་ཤིང་།
2KI 25:10 སྐུ་སྲུང་དཔོན་པོ་དང་མཉམ་དུ་ཡོད་པའི་ཀལ་དི་པའི་དམག་དཔུང་ཀུན་གྱིས་ཡེ་རུ་སཱ་ལེམ་གྱི་མཐའ་བཞི་བསྐོར་བའི་ལྕགས་རི་རྣམས་བརླགས་སོ། །
2KI 25:11 གྲོང་ཁྱེར་གྱི་ནང་དུ་ལུས་པའི་མི་རྣམས་དང་པཱ་པེལ་ལོན་རྒྱལ་པོར་མགོ་བཏགས་པ་རྣམས། དེ་མིན་ཡུལ་མི་ལྷག་ལུས་དང་བཅས་པ་སྐུ་སྲུང་དཔོན་པོ་ནེ་བོ་ཟར་ཨ་དན་གྱིས་བཙན་ཁྲིད་བྱས།
2KI 25:12 ཡིན་ནའང་སྐུ་སྲུང་དམག་དཔོན་གྱིས་ཡུལ་དེའི་དབུལ་པོ་དབུལ་རྐྱང་རྣམས་བསྐྱུར་ནས། དེ་རྣམས་ལ་རྒུན་འབྲུམ་ར་བ་ལེགས་བཅོས་བྱེད་པ་དང་ཞིང་རྨོ་རུ་བཅུག
2KI 25:13 དེ་ཡང་དཀོན་མཆོག་ཡ་ཝཱེའི་མཆོད་ཁང་དུ་ཡོད་པའི་ལི་ཡི་ཀ་བ་རྣམས་དང་། དཀོན་མཆོག་ཡ་ཝཱེའི་མཆོད་ཁང་ནང་ཡོད་པའི་སྟེགས་བུ་རྣམས། ལི་ཡི་རྒྱ་མཚོ་ཞེས་པའི་འཁྲུད་གཞོང་བཅས་ནི་ཀལ་དི་པས་དུམ་བུར་བཅག་ནས་ལི་རྣམས་པཱ་པེལ་ལོན་དུ་ཁྱེར།
2KI 25:14 དེར་ཡོད་པའི་སྣོད་དང་། མེ་ཁྱེམ། ཅེམ་ཙེ། སྡེར་མ་བཅས་དེར་བསྙེན་བཀུར་འབུལ་བྱའི་ལི་ཡི་མཆོད་ཆས་ཐམས་ཅད་ཁྱེར་ཞིང་།
2KI 25:15 མེ་ཕོར་དང་གཞོང་པ་ནི་གསེར་དངུལ་གང་ཡིན་ཐམས་ཅད་སྐུ་སྲུང་དཔོན་པོས་ཁྱེར་ཏོ། །
2KI 25:16 སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་གི་དོན་དུ་བཟོས་པའི་ཀ་བ་གཉིས་དང་། རྒྱ་མཚོ་ཞེས་པའི་འཁྲུད་གཞོང་གཅིག་དང་ཁྲི་རྣམས། ལི་ཡི་ཡོ་བྱད་ཐམས་ཅད་རིན་ཐང་གཞལ་དུ་མེད་པའོ། །
2KI 25:17 ཀ་བ་གཅིག་གི་མཐོ་ཚད་ལ་ཁྲུ་བཅོ་བརྒྱད་དང་། དེའི་སྟེང་དུ་ཡོད་པའི་ཀ་གཞུ་ཡང་ལི་ཡིན་ཏེ། ཀ་གཞུ་དེའི་མཐོ་ཚད་ལ་ཁྲུ་གསུམ་ཡོད་པ་ཡིན། ཀ་གཞུ་དེའི་དཀྱིལ་འཁོར་དུ་ཡོད་པའི་དྲ་བ་དྲ་ཕྱེད་དང་སེ་འབྲུ་ཀུན་ཡང་ལི་ཡིས་བཟོས་ཡོད། ཀ་བ་གཉིས་པ་ལ་ཡང་དེ་འདྲའི་དྲ་བ་དྲ་ཕྱེད་ཡོད་པ་ཡིན་ནོ། །
2KI 25:18 སྐུ་སྲུང་དམག་དཔོན་གྱིས་མཆོད་དཔོན་ཆེན་པོ་སེ་ར་ཡཱ་དང་། མཆོད་དཔོན་གཉིས་པ་ཟེ་ཕན་ཡཱ་དང་། སྒོ་སྲུང་མི་གསུམ་བཅས་བཙན་ཁྲིད་བྱས།
2KI 25:19 ཡང་གྲོང་ཁྱེར་ནས་དམག་མིའི་བཀོད་འདོམས་པ་ཞིག་དང་། གྲོང་ཁྱེར་དུ་རྒྱལ་པོའི་སློབ་སྟོན་པ་མི་ལྔ་དང་། ཡུལ་མིའི་དམག་དཔོན་གྱི་དྲུང་ཡིག་པ་རྣམས་དང་། དེ་མིན་གྲོང་ཁྱེར་ནང་རྙེད་པའི་མི་རྣམས་ལས་སྐྱེས་པ་དྲུག་ཅུ་བཅས་བཙན་ཁྲིད་བྱས།
2KI 25:20 སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་དེ་དག་བཟུང་ནས་རིབ་ལཱ་རུ་པཱ་པེལ་ལོན་གྱི་རྒྱལ་པོའི་དྲུང་དུ་ཁྲིད།
2KI 25:21 ཧ་མཱད་ཡུལ་གྱི་རིབ་ལཱ་བྱ་བར་པཱ་པེལ་ལོན་རྒྱལ་པོས་དེ་དག་ལ་བསྣུན་ནས་བསད་པ་དང་། དེ་ལྟར་ཡ་ཧུ་དཱ་པ་རྣམས་རང་གི་ཡུལ་ནས་བཙན་གྱིས་གཞན་དུ་བཏང་ངོ་། །
2KI 25:22 ཡ་ཧུ་དཱའི་ཡུལ་དུ་ལུས་པའི་མི་རྣམས་ཏེ་པཱ་པེལ་ལོན་རྒྱལ་པོ་ནེ་བོ་ཀད་ནེ་ཙར་གྱིས་བསྐྱུར་བ་རྣམས་ལ། པཱ་པེལ་ལོན་རྒྱལ་པོས་ཤཱ་ཕན་གྱི་ཚ་བོའམ་ཨ་ཧི་ཀམ་གྱི་བུ་གེ་དལ་ཡཱ་བྱ་བ་སྤྱི་དཔོན་དུ་བསྐོས་སོ། །
2KI 25:23 དེ་ནས་དམག་དཔོན་ཐམས་ཅད་དང་དེ་དག་གི་དམག་མི་དག་གིས་པཱ་པེལ་ལོན་རྒྱལ་པོས་གེ་དལ་ཡཱ་སྤྱི་དཔོན་དུ་བསྐོ་མངགས་བྱས་པ་ཐོས་རྗེས་སུ། ནེ་ཐན་ཡཱའི་བུ་ཡེས་མ་ཨེལ་དང་། ཀཱ་རེ་ཨའི་བུ་ཡོ་ཧ་ནན་དང་། ནེ་ཏོ་ཕཱ་པ་ཐན་ཧུ་མེད་ཀྱི་བུ་སེ་ར་ཡཱ་དང་། མ་ཨ་ཀཱ་པའི་བུ་ཡ་ཨ་ཟན་ཡཱ་བཅས་རང་གི་དམག་མི་རྣམས་དང་མཉམ་དུ་མཱས་ཟི་ཕཱ་རུ་གེ་དལ་ཡཱའི་དྲུང་དུ་འོངས་པ་དང་།
2KI 25:24 གེ་དལ་ཡཱས་དེ་དག་དང་དེ་དག་གི་དམག་མི་རྣམས་ལ་མནའ་བསྐྱལ་ནས་འདི་ལྟར། ཀལ་དི་པའི་ཞབས་ཕྱི་བྱེད་པར་མ་སྐྲག་ཅིག ཡུལ་འདིར་བསྡད་ནས་པཱ་པེལ་ལོན་རྒྱལ་པོར་ཞབས་ཕྱི་བསྒྲུབས་ན་ཁྱོད་ཅག་ལེགས་པར་འགྱུར་འོང་ཞེས་སྨྲས་སོ། །
2KI 25:25 འོན་ཀྱང་། ཟླ་བདུན་པར་རྒྱལ་རྒྱུད་ཡིན་པ་ཨེ་ལི་ཤཱ་མའི་ཚ་བོའམ་ནེ་ཐན་ཡཱའི་བུ་ཡེས་མ་ཨེལ་གྱིས་མི་བཅུ་ཁྲིད་འོངས་ཏེ། གེ་དལ་ཡཱ་དང་། མཱས་ཟི་ཕཱ་རུ་ཁོའི་དྲུང་དུ་ཡོད་པའི་ཡ་ཧུ་དཱ་པ་དང་ཀལ་དི་པ་རྣམས་ལ་བསྣུན་ནས་བསད།
2KI 25:26 དེ་ནས་མི་ཆེ་ཆུང་ཀུན་དང་དམག་དཔོན་རྣམས་ཀལ་དི་པ་ལ་འཇིགས་པར་གྱུར་པས། དེ་དག་ལངས་ནས་ཨེ་ཅིབ་ཡུལ་དུ་བྲོས་སོ། །
2KI 25:27 དེ་ཡང་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙན་ཁྲིད་བྱས་ནས་ལོ་སོ་བདུན་པའི་ཟླ་བ་བཅུ་གཉིས་པའི་ཚེས་ཉེར་བདུན་ཉིན་ལ། པཱ་པེལ་ལོན་རྒྱལ་པོ་ཨེ་ཝིལ་མེ་རོ་དག་གིས་རྒྱལ་སྲིད་བཟུང་བའི་ལོ་དང་པོར། ཁོས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙོན་ལས་ཕྱུང་སྟེ་གོ་ས་ཆེན་པོ་གནང་བ་དང་།
2KI 25:28 ཡང་ཁོ་ལ་བརྩེ་བའི་གཏམ་སྨྲས་ཤིང་། ཁོའི་གོ་ས་ནི་ཁོང་དང་མཉམ་དུ་པཱ་པེལ་ལོན་དུ་ཡོད་པའི་རྒྱལ་པོ་རྣམས་ལས་མཐོ་བར་བྱས་པ་དང་།
2KI 25:29 ཡང་ཡེ་ཧོ་ཡཱ་ཀིན་གྱི་བཙོན་གྱི་གོས་རྣམས་བརྗེས་ཏེ། ཁོ་རང་ལ་ཚེ་གང་པོར་ཉིན་རེ་བཞིན་རྒྱལ་པོའི་དྲུང་དུ་ཁ་ཟས་སྤྱོད་དུ་བཅུག
2KI 25:30 ཡང་ཁོའི་ཚེ་གང་པོར་ཉིན་རེའི་དགོས་མཁོ་ལྟར་རྒྱལ་པོས་ཆད་མེད་དུ་ཁོ་ལ་གནང་བའོ།། །།
1CH 1:1 ཨ་དམ་ལས་སེད་ཐུ་མཆེད་པ་དང་། སེད་ཐུ་ལས་ཨེ་ནོ་ཤཱ་མཆེད།
1CH 1:2 ཨེ་ནོ་ཤཱ་ལས་ཀེ་ནན་མཆེད་པ་དང་། ཀེ་ནན་ལས་མཱ་ཧ་ལ་ཨེལ་མཆེད། མཱ་ཧ་ལ་ཨེལ་ལས་ཡཱ་རཱད་མཆེད།
1CH 1:3 ཡཱ་རཱད་ལས་ཧ་ནོག་མཆེད་པ་དང་། ཧ་ནོག་ལས་མཱ་ཐུ་ཤ་ལཱ་མཆེད། མཱ་ཐུ་ཤ་ལཱ་ལས་ལཱ་མེག་མཆེད།
1CH 1:4 ལཱ་མེག་ལས་ནོ་ཨ་མཆེད་པ་དང་། ནོ་ཨ་ལས་ཤེམ་དང་། ཧཱམ། ཡ་ཕེད་བཅས་མཆེད་དོ། །
1CH 1:5 ཡ་ཕེད་ཀྱི་བུ་རྣམས་ནི་གོ་མེར་དང་། མ་གཱོག མཱ་ཏི། ཡཱ་ཝན། ཐུ་བཱལ། མེ་ཤེག ཐི་རཱ་བཅས་སོ། །
1CH 1:6 གོ་མེར་གྱི་བུ་རྣམས་ནི་ཨ་ཤ་ཀེ་ནཱ་དང་། རི་ཕད། ཐོ་གར་མཱ་བཅས་སོ། །
1CH 1:7 ཡཱ་ཝན་གྱི་བུ་རྣམས་ནི་ཨི་ལི་ཤཱ་དང་། ཐཱར་ཞིས། ཀི་ཐིམ། དོའུ་དཱ་ནིམ་བཅས་སོ། །
1CH 1:8 ཧཱམ་གྱི་བུ་རྣམས་ནི་གུ་ཤ་དང་། མུས་རཱ་ཡིམ། ཕུ༌ཏཱ། ཀ་ན་ཨན་བཅས་སོ། །
1CH 1:9 གུ་ཤ་ཡི་བུ་རྣམས་ནི་སེ་བཱ་དང་། ཧ་བེ་ལཱ། སཱབ་ཐ། རཱ་ཨེ་མཱ། སཱབ་ཐེ་ཀཱ་བཅས་སོ། །རཱ་ཨེ་མཱའི་བུ་ནི། ཤེ་བཱ་དང་དི་དན་ཞེས་བྱ༌བའོ། །
1CH 1:10 ཡང་གུ་ཤ་ལས་ནིམ་རོད་མཆེད་པ་དང་། ཁོ་ནི་འཇིག་རྟེན་གྱི་དཔའ་རྒོད་ཐོག༌མ་ཡིན་ནོ། །
1CH 1:11 མུས་རཱ་ཡིམ་ལས་ལུ་དཱ་པ་དང་། ཨ་ནཱམ་པ། ལེ་ཧ་པ། ནཱབ་ཐུ་པ།
1CH 1:12 ཕཱད་རུའུ་པ། ཀཱ་སི་ལི་པ། ཀབ་ཐོར་པ་བཅས་མཆེད་པ་དང་། ཕེ་ལེ་ཤེད་པ་ནི་ཀཱ་སི་ལི་པ་ལས་བྱུང་བའོ། །
1CH 1:13 ཀ་ན་ཨན་ལས་བུ་སྐྱེས་འགོ་ཚི་ཏུན་དང་། ཡང་ཧེད་དང་།
1CH 1:14 ཡེ་བུ་སི་པ། ཨེ་མོར་པ། གིར་གས་པ།
1CH 1:15 ཧེ་བི་པ། ཨར་ཀི་པ། སི་ནེ་པ།
1CH 1:16 ཨར་ཝཱ་དིའུ་པ། ཚཱ་མཱ་རེའེ་པ། ཧ་མཱད་པ་བཅས་མཆེད་དོ། །
1CH 1:17 ཤེམ་གྱི་བུ་རྣམས་ནི་ཨེ་ལཱམ་དང་། ཨ༌ཤུར། ཨར་པག་ཤད། ལུ་ཏི། ཨ་རམ། ཨུ་ཟཱ། ཧུལ། གེ་ཐེར། མེ་ཤེག་ བཅས་སོ། །
1CH 1:18 ཨར་པག་ཤད་ལས་ཤེ་ལཱ་མཆེད་པ་དང་། ཤེ་ལཱ་ལས་ཨེ་བེར་མཆེད་དོ། །
1CH 1:19 ཨེ་བེར་ལས་བུ་གཉིས་མཆེད་པ་དང་། གཅིག་ལ་ཕེ་ལེག་ ཅེས་བྱ་སྟེ། རྒྱུ་མཚན་ནི་དེའི་དུས་སུ་མི་རྣམས་ཡུལ་སོ་སོར་ཁ་འཐོར་དུ་བསྡད་པའི་ཕྱིར་རོ། །ཁོའི་ནུ་བོའི་མིང་ལ་ཡོག་ཏན་ཞེས་བྱའོ། །
1CH 1:20 ཡོག་ཏན་ལས་ཨལ་མོ་དཱད་དང་། ཤེ་ལཱ༌ཕཱ། ཧ་ཚཱར་མ་ཝེད། ཡཱ་ར།
1CH 1:21 ཧ་དོ་རམ། ཨུ་ཟཱལ། དིག་ལཱ།
1CH 1:22 ཨེ་བཱལ། ཨ་བི་མཱ་ཨེལ། ཤེ་བཱ།
1CH 1:23 ཨོ་ཕིར། ཧ་བེ་ལཱ། ཡོ་བཱབ་བཅས་མཆེད་པ་དང་། དེ་ཐམས་ཅད་ཡོག་ཏན་གྱི་བུ་རྣམས་སོ། །
1CH 1:24 ཤེམ་ལས་ཨར་པག་ཤད་མཆེད་པ་དང་། ཨར་པག་ཤད་ལས་ཤེ་ལཱ་མཆེད།
1CH 1:25 ཤེ་ལཱ་ལས་ཨེ་བེར་མཆེད་པ་དང་། ཨེ་བེར་ལས་ཕེ་ལེག་མཆེད། ཕེ་ལེག་ལས་རེའེ་ཨུ་མཆེད།
1CH 1:26 རེའེ་ཨུ་ལས་སེ་རུག་མཆེད་པ་དང་། སེ་རུག་ལས་ནཱ་ཧོར་མཆེད། ནཱ་ཧོར་ལས་ཐ་རཱ་མཆེད།
1CH 1:27 ཐ་རཱ་ལས་ཨབ་རམ་མཆེད་ལ། ཨབ་རམ་ནི་ཨབ་ར་ཧམ་ཡིན་ནོ། །
1CH 1:28 ཨབ་ར་ཧམ་གྱི་བུ་རྣམས་ནི་ཨི་སཱག་དང་ཡེས་མ་ཨེལ་ཡིན་ནོ། །
1CH 1:29 ཁོ་རྣམས་ཀྱི་རིགས་རྒྱུད་ནི་འདི་ལྟ་སྟེ། ཡེས་མ་ཨེལ་གྱི་བུ་སྐྱེས་འགོ་ནི་ནཱ་བ་ཨོད་ཡིན་པ་དང་། དེའི་འཕྲོ་ཡི་བུ་རྣམས་ནི་ཀེ༌དཱར་དང་། ཨད་པཱ༌ཨེལ། མིབ༌སཱམ།
1CH 1:30 མུས་མཱ། དུའུ༌མཱ། མཱ་ས། ཧ༌དཱད། ཐེ་མཱ།
1CH 1:31 ཡཱ༌ཐར། ནཱ་ཕིས། ཀད་མཱ་བཅས་སོ། །དེ་ཐམས་ཅད་ནི་ཡེས་མ་ཨེལ་གྱི་བུ་ཡིན་ནོ། །
1CH 1:32 ཨབ་ར་ཧམ་གྱི་ཆུན་མ་ཀེ་ཏི་རཱ་བྱ་བ་ལས་མཆེད་པའི་བུ་རྣམས་ནི་ཟིམ་རན་དང་། ཡོག་ཤན། མཱ་དན། མིད༌ཡཱན། ཡེས་པག ཤུ་ཨག་བཅས་ཡིན་ལ། ཡོག་ཤན་གྱི་བུ་རྣམས་ནི་ཤེ་བཱ་དང་དི་དན་ཡིན་ནོ། །
1CH 1:33 མིད༌ཡཱན་གྱི་བུ་རྣམས་ནི། ཨེ་ཕཱ་དང་། ཨེ་ཕེར། ཧ༌ནོག ཨ་བི་དཱ། ཨེལ་དཱ་ཨ་བཅས་སོ། །དེ་ཐམས་ཅད་ནི་ཀེ་ཏི་རཱ་ཡི་བུ་རབས་ཚ་རྒྱུད་ཡིན་ནོ། །
1CH 1:34 ཨབ་ར་ཧམ་ལས་ཨི་སཱག་མཆེད་པ་དང་། ཨི་སཱག་གི་བུ་ནི་ཨེ་སཱབ་དང་ཡེས་ར་ཨེལ་གཉིས་ཡིན་ནོ། །
1CH 1:35 ཨེ་སཱབ་ཀྱི་བུ་རྣམས་ནི་ཨེ་ལི་ཕཱ་ཟི་དང་། རུའུ་ཨེལ། ཡེ་ཨུ་སི། ཡཱ་ཨེ༌ལཱམ། ཀོ་རཱག་བཅས་སོ། །
1CH 1:36 ཨེ་ལི་ཕཱ་ཟི་ཡི་བུ་རྣམས་ནི་ཐེ་མཱན་དང་། ཨོ་མཱར། ཚཱ༌ཕི། གཱ་ཐམ། ཀེ་ནཱ་ཟཱ། ཐིམ་ནཱ། ཨ་མཱད་ལེག་བཅས་སོ། །
1CH 1:37 རུའུ་ཨེལ་གྱི་བུ་རྣམས་ནི་ནཱ་ཧད་དང་། ཟེ༌རག ཤམ་མཱ། མེ་སཱ་བཅས་སོ། །
1CH 1:38 སེ་ཨིར་གྱི་བུ་རྣམས་ནི་ལོད་ཐན་དང་། ཤོ་བཱལ། ཚིབ་ཨོན། ཨ་ནཱ། དི༌ཤོན། ཨེ་བཟིར། དི་ཞན་བཅས་སོ། །
1CH 1:39 ལོད་ཐན་གྱི་བུ་ནི་ཧོ་རི་དང་ཧོ་མམ་ཞེས་པ་གཉིས་ཡིན་ཞིང་། ལོད་ཐན་གྱི་སྲིང་མོ་ནི་ཐིམ་ནཱ་བྱ་བའོ། །
1CH 1:40 ཤོ་བཱལ་གྱི་བུ་རྣམས་ནི་ཨལ་ཡན་དང་། མཱ་ན༌ཧད། ཨེ་བཱལ། ཤེ་ཕི། ཨོ་ནཱམ་བཅས་ཡིན། ཚིབ་ཨོན་གྱི་བུ་ནི་ཨ་ཡཱ་དང་ཨ་ནཱ་གཉིས་སོ། །
1CH 1:41 ཨ་ནཱ་ཡི་བུ་ནི་དི༌ཤོན་དང་། དི་ཤོན་གྱི་བུ་རྣམས་ནི་ཧམ་རན་དང་། ཨེས་པཱན། ཡེད༌རཱན། ཀཱ་རཱན་བཅས་སོ། །
1CH 1:42 ཨེ་བཟིར་གྱི་བུ་ནི་པིལ་ཧན་དང་། ཟ་ཨ་ཝན། ཡཱ་ཨ་ཀན་བཅས་ཡིན་ལ། དི་ཞན་གྱི་བུ་ནི་ཨུ་ཟཱ་དང་ཨ་རན་ནོ། །
1CH 1:43 ཡེས་ར་ཨེལ་པ་རྣམས་ལ་རྒྱལ་པོ་གང་གིས་ཀྱང་སྲིད་མ་བསྐྱངས་པའི་སྔོན་དུ། ཨེ་དོམ་ཡུལ་གྱི་རྒྱལ་པོ་རྣམས་འདི་ལྟར། པཱ་ཨོར་གྱི་བུ་པེ་ལཱ་སྟེ་ཁོའི་རྒྱལ་སའི་མིང་ལ་དིན་ཧ་བཱ་ཞེས་བྱའོ། །
1CH 1:44 པེ་ལཱ་ཚེ་ལས་འདས་པ་དང་། པོ་ཚ་རཱ་གྲོང་ཁྱེར་གྱི་ཟེ་རག་གི་བུ་ཡོ་བཱབ་ནི་ཁོའི་རྒྱུན་མཐུད་ནས་རྒྱལ་པོར་བཞུགས་སོ། །
1CH 1:45 ཡོ་བཱབ་ཚེ་ལས་འདས་པ་དང་། ཐེ་མཱན་ཡུལ་གྱི་ཧུ་སཱམ་ནི་ཁོའི་རྒྱུན་མཐུད་ནས་རྒྱལ་པོར་བཞུགས་སོ། །
1CH 1:46 ཧུ་སཱམ་ཚེ་ལས་འདས་པ་དང་། པཱ་དད་ཀྱི་བུ་ཧ་དཱད་ནི་ཁོའི་རྒྱུན་མཐུད་ནས་རྒྱལ་པོར་བཞུགས་ཤིང་། ཧ་དཱད་ནི་མོ་ཨབ་ཀྱི་ཐང་དུ་མིད༌ཡཱན་མི་རིགས་འཇོམས་མཁན་དེ་ཡིན་ལ། ཁོའི་རྒྱལ་སའི་མིང་ལ་ཨ་ཝིད་ཅེས་བྱའོ། །
1CH 1:47 ཧ་དཱད་ཚེ་ལས་འདས་པ་དང་། མཱས་རེ་ཁཱ་ཡུལ་གྱི་སམ་ལཱ་ནི་ཁོའི་རྒྱུན་མཐུད་ནས་རྒྱལ་པོར་བཞུགས་སོ། །
1CH 1:48 སམ་ལཱ་ཚེ་ལས་འདས་པ་དང་། ཆུ་བོའི་འགྲམ་དུ་ཡོད་པའི་རེའེ་ཧོ་པེད་ཡུལ་གྱི་སོ་ལོ་ནི་ཁོའི་རྒྱུན་མཐུད་ནས་རྒྱལ་པོར་བཞུགས་སོ། །
1CH 1:49 སོ་ལོ་ཚེ་ལས་འདས་པ་དང་། ཨག་པོར་གྱི་བུ་པཱ་ཨལ་ཧ་ནན་ནི་ཁོའི་རྒྱུན་མཐུད་ནས་རྒྱལ་པོར་བཞུགས་སོ། །
1CH 1:50 པཱ་ཨལ་ཧ་ནན་ཚེ་ལས་འདས་པ་དང་། ཧ་དཱད་ནི་ཁོའི་རྒྱུན་མཐུད་ནས་རྒྱལ་པོར་བཞུགས་སོ། །ཁོའི་རྒྱལ་སའི་མིང་ལ་ཕཱ་ཨི་ཞེས་བྱའོ། །ཁོའི་ཆུང་མའི་མིང་ལ་མཱ་ཧེ་ཐབ་ཨེལ་ཞེས་བྱ་ཞིང་ཁོ་མོ་ནི་མེ་སཱ་ཧབ་ཀྱི་ཚ་མོ་དང་། མཱད་རཱད་ཀྱི་བུ་མོ་ཡིན་ནོ། །
1CH 1:51 ཧ་དཱད་ཚེ་ལས་འདས་སོ། །ཨེ་དོམ་པའི་ཚོ་དཔོན་རྣམས་ནི་འདི་ལྟ་སྟེ། ཐིམ་ནཱ་དང་། ཨལ༌ཝཱ། ཡཱ་ཐེད།
1CH 1:52 ཨོ་ཧོ་ལི་བཱ༌མཱ། ཨེ༌ལཱ། ཕི་ནོན།
1CH 1:53 ཀེ་ནཱ༌ཟཱ། ཐེ་མཱན། མིབ༌ཚཱར།
1CH 1:54 མག་དི་ཨེལ། ཨི་རཱམ་བཅས་ཡིན་པ་དང་། དེ་ཐམས་ཅད་ནི་ཨེ་དོམ་གྱི་ཚོ་དཔོན་ཡིན་ནོ། །
1CH 2:1 ཡེས་ར་ཨེལ་གྱི་བུ་རྣམས་ནི་རུ་བེན་དང་། སི་མུ་ཨོན། ལེ་ཝི། ཡ་ཧུ་དཱ། ཡེས་སི་ཀཱར། ཟེ་བུ་ལུན།
1CH 2:2 དཱན། ཡོ་སེབ། པེན་ཡཱ་མེན། ནཱབ་ཐ་ལི། གཱ་རྡུ། ཨ་ཤེར་བཅས་སོ། །
1CH 2:3 ཡ་ཧུ་དཱའི་བུ་རྣམས་ནི་ཨེར་དང་། ཨོ་ནན། ཤེ་ལཱ་བཅས་སོ། །བུ་དེ་གསུམ་ནི་ཀ་ན་ཨན་པ་པད་ཤུ་ཨ་བྱ་བའི་བུ་མོ་ལས་མཆེད་པ་དང་། ཡ་ཧུ་དཱའི་བུ་སྐྱེས་འགོ་ཨེར་བྱ་བ་ནི་དཀོན་མཆོག་ཡ་ཝཱེའི་སྤྱན་སྔར་ངན་པར་སྣང་བས། དཀོན་མཆོག་ཡ་ཝཱེས་དེ་འཆི་བར་མཛད་དོ། །
1CH 2:4 ཡ་ཧུ་དཱའི་མནའ་མ་ཐལ་མཱར་ལས་ཡ་ཧུ་དཱ་ལ་ཕེ་རེལ་ཟི་དང་ཟེ་རག་མཆེད་པ་དང་། ཡ་ཧུ་དཱ་ལ་བསྡོམས་པས་བུ་ལྔ་ཡོད་དོ། །
1CH 2:5 ཕེ་རེལ་ཟིའི་བུ་ནི་ཧེས་རོན་དང་ཧ་མུལ་གཉིས་ཀ་ཡིན།
1CH 2:6 ཟེ་རག་གི་བུ་རྣམས་ནི་ཟིམ་རི་དང་། ཨེ་ཐན། ཧེ་མཱན། ཀལ་ཀོལ། ད་རཱ་བཅས་ལྔའོ། །
1CH 2:7 ཀར་མིའི་བུ་རྣམས་ནི་ཨ་ཁན་སོགས་ཡིན་ལ། ཨ་ཁན་གྱིས་དགག་བྱའི་རྫས་ཀྱི་ཐད་སྡིག་པ་བྱས་པས། ཡེས་ར་ཨེལ་པ་རྣམས་སྡུག་ལ་སྦྱར།
1CH 2:8 ཨེ་ཐན་གྱི་བུ་ནི་ཨ་ཟར་ཡཱ་ཡིན་ནོ། །
1CH 2:9 ཧེས་རོན་ལས་མཆེད་པའི་བུ་རྣམས་ནི་ཡེ་ར་མེ་ཨེལ་དང་། རཱམ། ཀེ་ལུ་བ་ཨི་བཅས་སོ། །
1CH 2:10 རཱམ་ལས་ཨ་མི་ནཱ་དབ་མཆེད་ཅིང་། ཨ་མི་ནཱ་དབ་ལས་ནཱ་སོན་མཆེད་པ་དང་། ནཱ་སོན་ནི་ཡ་ཧུ་དཱ་པ་རྣམས་ཀྱི་འགོ་དཔོན་ཡིན།
1CH 2:11 ནཱ་སོན་ལས་སཱལ་མོན་དང་། སཱལ་མོན་ལས་པཱོ་ཨ་ཟི་མཆེད།
1CH 2:12 པཱོ་ཨ་ཟི་ལས་ཨོ་བེད་དང་། ཨོ་བེད་ལས་ཡེ་སེ་མཆེད།
1CH 2:13 ཡེ་སེ་ལས་བུ་སྐྱེས་འགོ་ཨེ་ལི་ཨབ་དང་། བུ་གཉིས་པ་ཨ་བི་ནཱ་དབ། བུ་གསུམ་པ་ཤིམ་ཡཱ།
1CH 2:14 བུ་བཞི་པ་ནེ་ཐན་ཨེལ། བུ་ལྔ་པ་རད་ད་ཡི།
1CH 2:15 བུ་དྲུག་པ་ཨོ་ཙེམ། བུ་བདུན་པ་དཱ་བིད་བཅས་མཆེད།
1CH 2:16 དེ་དག་གི་ལྕམ་སྲིང་ནི་ཟེ་རུ་ཡཱ་དང་ཨ་བི་ག་ཡིལ་གཉིས་ཡིན་ནོ། །ཟེ་རུ་ཡཱ་ཡི་བུ་རྣམས་ནི་ཨ་བི་ཤཱ་ཨི་དང་། ཡོ་ཨབ། ཨ་སཱ་ཧེལ་བཅས་བསྡོམས་པས་གསུམ་མོ། །
1CH 2:17 ཨ་བི་ག་ཡིལ་ལས་ཨ་མ་སཱ་མཆེད་པ་དང་། ཨ་མ་སཱ་ཡི་ཕ་ནི་ཡེས་མ་ཨེལ་པ་ཡེ་ཐེར་བྱ་བ་ཡིན་ནོ། །
1CH 2:18 ཧེས་རོན་གྱི་བུ་ཀཱ་ལེབ་དང་ཁོའི་ཆུང་མ་ཨ་ཟུ་བཱ་གཉིས་ལས་བུ་རྣམས་མཆེད་ཅིང་། ཡང་ཡེ་རི་ཨོད་བྱ་བ་ལས་ཀྱང་བུ་རྣམས་མཆེད་དོ། །ཨ་ཟུ་བཱ་ཡི་བུ་རྣམས་ནི་ཡེ་ཤེར་དང་། ཤོ་བབ། ཨར་དོན་བཅས་ཡིན།
1CH 2:19 ཨ་ཟུ་བཱ་ཚེ་ལས་འདས་པ་དང་། ཀཱ་ལེབ་ཀྱིས་ཡང་ཨེབ་རཱད་ཆུང་མར་བླངས་ཤིང་། ཨེབ་རཱད་ཀྱིས་ཁོ་ལ་ཧུ་རཱ་བཙས།
1CH 2:20 ཧུ་རཱ་ལས་ཨོའུ་རེལ་དང་། ཨོའུ་རེལ་ལས་པི་ཟིད་ཨེལ་མཆེད།
1CH 2:21 དེའི་རྗེས་སུ་ཧེས་རོན་ལོ་དྲུག་ཅུ་ལོན་པ་དང་། ཁོས་གིལ་ཨད་ཀྱི་ཕ་སྟེ་མཱ་ཀིར་གྱི་བུ་མོ་ཆུང་མར་བླངས་ནས་ཁོ་མོར་འགྲོགས་ཤིང་། མོས་ཁོ་ལ་སེ་གུབ་བཙས་སོ། །
1CH 2:22 སེ་གུབ་ལས་ཡཱ་ཨིར་མཆེད་པ་དང་། ཡཱ་ཨིར་ལ་གིལ་ཨད་ཡུལ་དུ་གྲོང་ཁྱེར་ཉེར་གསུམ་ཡོད་པ་ཡིན།
1CH 2:23 གེ་ཤུར་པ་དང་ཨཱ་རམ་པ་རྣམས་ཀྱིས་ཁོ་རྣམས་ལས་ཡཱ་ཨིར་གྱི་གྲོང་རྡལ་རྣམས་དང་། ཀེ་ནད་དང་དེ་ལ་གཏོགས་པའི་གྲོང་ཚོ་བསྡོམས་པས་དྲུག་ཅུ་བླངས་ཤིང་། དེ་ཐམས་ཅད་ནི་གིལ་ཨད་ཀྱི་ཕ་མཱ་ཀིར་གྱི་བུ་རབས་ཚ་རྒྱུད་རྣམས་ཡིན་ནོ། །
1CH 2:24 ཧེས་རོན་ནི་ཀཱ་ལེབ་ཨེབ་རཱད་ཡུལ་དུ་ཚེ་ལས་འདས་ཤིང་། ཁོའི་ཆུང་མ་ཨ་བི་ཡཱ་བྱ་བས་ཁོ་ལ་ཐེ་ཀོ་ཨ་ཡི་ཕ་སྟེ་ཨ་སི་ཧུར་བཙས་པའོ། །
1CH 2:25 ཧེས་རོན་གྱི་བུ་སྐྱེས་འགོ་ཡེ་ར་མེ་ཨེལ་གྱི་བུ་རྣམས་ནི་བུ་སྐྱེས་འགོ་རཱམ་དང་། ཡང་པུ་ནཱ་དང་། ཨོ་རེན། ཨོ་ཙེམ། ཨ་ཧི་ཡཱ་བཅས་ཡིན།
1CH 2:26 ཡེ་ར་མེ་ཨེལ་ལ་ཡང་ཆུང་མ་གཞན་ཞིག་ཡོད་པའི་མིང་ལ་ཨ་ཏ་རཱ་ཞེས་བྱ་སྟེ། ཁོ་མོ་ནི་ཨོ་ནཱམ་གྱི་མ་ཡིན།
1CH 2:27 ཡེ་ར་མེ་ཨེལ་གྱི་བུ་སྐྱེས་འགོ་རཱམ་གྱི་བུ་རྣམས་ནི་མཱ་ཨ་ཟི་དང་། ཡཱ་མེན། ཨེ་ཀེར་བཅས་སོ། །
1CH 2:28 ཨོ་ནཱམ་གྱི་བུ་རྣམས་ནི་ཤམ་མཱ་ཨི་དང་ཡཱ་ད་ཡིན། ཤམ་མཱ་ཨི་ཡི་བུ་རྣམས་ནི་ནཱ་དབ་དང་ཨ་བི་ཤུར་ཡིན་ནོ། །
1CH 2:29 ཨ་བི་ཤུར་གྱི་ཆུང་མའི་མིང་ལ་ཨ་བི་ཧ་ཡིལ་ཟེར་ཞིང་། དེ་ཡིས་ཁོ་ལ་ཨ་བཱན་དང་མོ་ལིད་བཙས་པའོ། །
1CH 2:30 ནཱ་དབ་ཀྱི་བུ་རྣམས་ནི་སེ་ལེད་དང་ཨབ་ཕཱ་ཡིམ་ཡིན། སེ་ལེད་ནི་བུ་མེད་པར་ཚེ་ལས་འདས་སོ། །
1CH 2:31 ཨབ་ཕཱ་ཡིམ་གྱི་བུ་ནི་ཡི་ཤི་དང་། ཡི་ཤིའི་བུ་ནི་ཤེ་ཤན་དང་། ཤེ་ཤན་གྱི་བུ་ནི་ཨ་ཧ་ལཱ་ཨི་ཡིན་ནོ། །
1CH 2:32 ཤམ་མཱ་ཨི་ཡི་སྤུན་ཡཱ་ད་ཡི་བུ་རྣམས་ནི་ཡེ་ཐེར་དང་ཡོ་ནཱ་ཐན་ཡིན། ཡེ་ཐེར་ནི་བུ་མེད་པར་ཚེ་ལས་འདས་སོ། །
1CH 2:33 ཡོ་ནཱ་ཐན་གྱི་བུ་རྣམས་ནི་ཕེ་ལེད་དང་ཟཱ་བཱ་ཡིན་ལ། དེ་ཐམས་ཅད་ནི་ཡེ་ར་མེ་ཨེལ་གྱི་བུ་རབས་ཚ་རྒྱུད་དོ། །
1CH 2:34 ཤེ་ཤན་ལ་བུ་མེད་པར་བུ་མོ་འབའ་ཞིག་ཡོད་པ་ཡིན། ཤེ་ཤན་ལ་ཨེ་ཅིབ་པའི་ཞབས་ཕྱི་ཞིག་ཡོད་པའི་མིང་ལ་ཡར་ཧ་ཟེར།
1CH 2:35 ཤེ་ཤན་གྱིས་རང་གི་བུ་མོ་ཞབས་ཕྱི་ཡར་ཧ་ལ་ཆུང་མར་བྱིན་པ་དང་། མོས་ཡར་ཧ་ལ་བུ་ཨད་ཏ་ཨི་བཙས།
1CH 2:36 ཡང་ཨད་ཏ་ཨི་ལས་ནཱ་ཐན་དང་། ནཱ་ཐན་ལས་ཟཱ་བད་དང་།
1CH 2:37 ཟཱ་བད་ལས་ཨེབ་ལལ་དང་། ཨེབ་ལལ་ལས་ཨོ་བེད་དང་།
1CH 2:38 ཨོ་བེད་ལས་ཡེ་ཧུ་དང་། ཡེ་ཧུ་ལས་ཨ་ཟར་ཡཱ་དང་།
1CH 2:39 ཨ་ཟར་ཡཱ་ལས་ཧེ་ལེ་ཙི་དང་། ཧེ་ལེ་ཙི་ལས་ཨེལ་ཨ་སཱ་དང་།
1CH 2:40 ཨེལ་ཨ་སཱ་ལས་སི་སེ་མཱ་ཨི་དང་། སི་སེ་མཱ་ཨི་ལས་ཤལ་ལུམ་དང་།
1CH 2:41 ཤལ་ལུམ་ལས་ཡེ་ཀམ་ཡཱ་དང་། ཡེ་ཀམ་ཡཱ་ལས་ཨེ་ལི་ཤ་མཱ་མཆེད་དོ། །
1CH 2:42 ཡེ་ར་མེ་ཨེལ་གྱི་སྤུན་ཀཱ་ལེབ་ཀྱི་བུ་རབས་ཚ་རྒྱུད་ནི་འདི་ལྟ་སྟེ། བུ་སྐྱེས་འགོ་མེ་ཤཱ་ཡིན་ལ། མེ་ཤཱ་ནི་ཟིབ་ཀྱི་ཕ་ཡིན། ཡང་ཟིབ་ཀྱི་བུ་ནི་མཱ་རེ་ཤཱ་ཡིན་ལ་དེ་ནི་ཧེབ་རོན་གྱི་ཕ་ཡིན།
1CH 2:43 ཧེབ་རོན་གྱི་བུ་རྣམས་ནི་ཀོ་རཱག་དང་། ཏབ་ཕུ་ཨ། རེ་ཀེམ། ཤེ་མཱ་བཅས་སོ། །
1CH 2:44 ཤེ་མཱ་ལས་ར་ཧམ་མཆེད་པ་དང་དེ་ནི་ཡོར་ཀེ་ཨམ་གྱི་ཕ་ཡིན། རེ་ཀེམ་ལས་ཤམ་མཱ་ཨི་མཆེད་དོ། །
1CH 2:45 ཤམ་མཱ་ཨི་ཡི་བུ་ནི་མཱ་ཨོན་ཡིན་ལ། མཱ་ཨོན་ནི་པེད་ཚུར་གྱི་ཕའོ། །
1CH 2:46 ཀཱ་ལེབ་ཀྱི་ཆུན་མ་ཨེ་ཕཱ་བྱ་བ་ལས་ཧཱ་རན་དང་། མོ་ཟི། གཱ་ཟེ་སི་བཅས་མཆེད་པ་དང་། ཧཱ་རན་ལས་གཱ་ཟེ་སི་མཆེད་དོ། །
1CH 2:47 ཡཱ་ད་ཨི་ཡི་བུ་རྣམས་ནི་རེ་གེམ་དང་། ཡོ་ཐམ། གི་ཤན། ཕེ་ལེད། ཨེ་ཕཱ། ཤཱ་ཨབ་བཅས་ཡིན།
1CH 2:48 ཀཱ་ལེབ་ཀྱི་ཆུན་མ་མ་ཨ་ཀཱ་བྱ་བ་ལས་ཤེ་བེར་དང་། ཐིར་ཧ་ནཱ་མཆེད་པ་དང་།
1CH 2:49 ཡང་མད་མན་ནཱ་ཡི་ཕ་ཤཱ་ཨབ་དང་། མག་པེ་ནཱ་ཡི་ཕ་དང་གི་བེ་ཨ་ཡི་ཕ་ཤེ་ཝ་བཅས་མཆེད་པ་དང་། ཀཱ་ལེབ་ཀྱི་བུ་མོ་ནི་ཨག་ས་ཡིན།
1CH 2:50 དེ་ཐམས་ཅད་ནི་ཀཱ་ལེབ་ཀྱི་བུ་རབས་ཚ་རྒྱུད་ཡིན། ཨེབ་རཱད་ཀྱི་བུ་སྐྱེས་འགོ་ཧུ་རཱ་ཡི་བུ་རྣམས་ནི་ཀིར་ཡཱད་ཡེ་ཨ་རིམ་གྱི་ཕ་ཤོ་བལ་དང་།
1CH 2:51 པེད་ལེ་ཧེམ་གྱི་ཕ་སལ་མཱ་དང་། པེད་ག་དེར་གྱི་ཕ་ཧ་རེབ་བཅས་ཡིན།
1CH 2:52 ཀིར་ཡཱད་ཡེ་ཨ་རིམ་གྱི་ཕ་ཤོ་བལ་གྱི་བུ་རབས་ཚ་རྒྱུད་ནི་ཧ་རོ་ཨེ་དང་། མེ་ནི་ཧོད་པའི་ཕྱེད་ཀ་ཡིན་ནོ། །
1CH 2:53 ཀིར་ཡཱད་ཡེ་ཨ་རིམ་གྱི་ཁྱིམ་རྒྱུད་རྣམས་ནི་ཡེད་རཱ་པ་དང་། ཕུ༌ཏཱ་པ། ཤུ་མཱ་པ། མིས་ར་པ་བཅས་ཡིན། ཡང་ཁྱིམ་རྒྱུད་འདི་རྣམས་ལས་ཙོ་རཱ་པ་དང་ཨེ་སི་ཏ་ཨོལ་པ་རྣམས་བྱུང་ངོ་། །
1CH 2:54 སལ་མཱའི་བུ་རབས་ཚ་རྒྱུད་ནི་པེད་ལེ་ཧེམ་པ་དང་། ནེ་ཏོ་ཕཱ་པ། ཨད་རོད་པེད་ཡོ་ཨབ་པ། མཱ་ན་ཧད་པའི་ཕྱེད་ཀ་དང་། ཙོ་རཱ་པ་བཅས་ཡིན།
1CH 2:55 ཡ་པེ་ཙཱ་རུ་གནས་པའི་དྲུང་ཡིག་པ་རྣམས་ཀྱི་ཁྱིམ་རྒྱུད་ནི་ཐི་རཱ་པ་དང་། ཤི་མེ་ཨ་པ། སུ་ཀད་པ་བཅས་ཡིན་ལ། དེ་ཐམས་ཅད་ནི་རེ་ཁབ་ཀྱི་མེས་པོ་ཧམ་མད་ལས་མཆེད་པའི་ཀེ་ནེ་པ་རྣམས་ཡིན་ནོ། །
1CH 3:1 ཧེབ་རོན་དུ་སྐྱེས་པའི་དཱ་བིད་ཀྱི་བུ་རྣམས་ནི། བུ་སྐྱེས་འགོ་ཨམ་ནོན་བྱ་བ་ནི་ཡེ་སི་རེ་ཨེལ་པ་ཨ་ཧི་ནོ་ཨམ་ལས་མཆེད་པ་དང་། བུ་གཉིས་པ་དཱ་ནི་ཨེལ་བྱ་བ་ནི་ཀར་མེལ་པ་ཨ་བི་གཱ་ཡིལ་ལས་མཆེད།
1CH 3:2 བུ་གསུམ་པ་ཨབ་ཤཱ་ལོམ་ནི་གེ་ཤུར་གྱི་རྒྱལ་པོ་ཏལ་མཱ་ཨི་ཡི་སྲས་མོ་མ་ཨ་ཀཱ་ལས་མཆེད། བུ་བཞི་པ་ཨ་དོ་ནེ་ཡཱ་ནི་ཧག་གིད་ལས་མཆེད།
1CH 3:3 བུ་ལྔ་པ་ཤེ་ཕད་ཡཱ་ནི་ཨ་བི་ཏལ་ལས་མཆེད། བུ་དྲུག་པ་ཡེད་རེ་ཨམ་ནི་དཱ་བིད་ཀྱི་ཆུང་མ་ཨེག་ལཱ་ལས་མཆེད་དོ། །
1CH 3:4 བུ་དེ་དྲུག་པོ་ནི་ཧེབ་རོན་དུ་དཱ་བིད་ལས་མཆེད་ཅིང་། དཱ་བིད་ནི་ཧེབ་རོན་དུ་ལོ་བདུན་དང་ཟླ་བ་དྲུག་ལ་རྒྱལ་པོར་བཞུགས་པ་དང་། ཡེ་རུ་སཱ་ལེམ་དུ་ལོ་སུམ་ཅུ་སོ་གསུམ་ལ་རྒྱལ་པོར་བཞུགས་སོ། །
1CH 3:5 ཡེ་རུ་སཱ་ལེམ་དུ་དཱ་བིད་ལས་མཆེད་པའི་བུ་རྣམས་ནི་ཤི་མེ་ཨ་དང་། ཤོ་བབ། ནཱ་ཐན། སོ་ལོ་མོན་བཅས་ཡིན་ལ། བུ་དེ་བཞི་པོ་ནི་ཨམ་མེ་ཨེལ་གྱི་བུ་མོ་པད་ཤུ་ཨ་ལས་མཆེད་པའོ། །
1CH 3:6 ཡང་ཡིབ་ཧར་དང་། ཨེ་ལི་ཤཱ་མ། ཨེ་ལི་ཕེ་ལེད།
1CH 3:7 ནོ་གཱ ནེ་ཕེག ཡཱ་ཕི་ཨ།
1CH 3:8 ཨེ་ལི་ཤཱ་མ། ཨེལ་ཡཱ་ད། ཨེ་ལི་ཕེ་ལེད་བཅས་བསྡོམས་པས་དགུ་ཡོད་ཅིང་།
1CH 3:9 དེ་ཐམས་ཅད་དཱ་བིད་ཀྱི་བུ་ཡིན་ལ། དེ་མིན་ཁོ་རྣམས་ཀྱི་སྲིང་མོ་ཐལ་མཱར་དང་། བཙུན་མོ་རྣམས་ལས་མཆེད་པའི་བུ་རྣམས་ཀྱང་ཡོད་དོ། །
1CH 3:10 སོ་ལོ་མོན་གྱི་བུ་ནི་རེ་ཧབ་ཨམ་དང་། རེ་ཧབ་ཨམ་གྱི་བུ་ནི་ཨ་བི་ཡཱ། ཨ་བི་ཡཱ་ཡི་བུ་ནི་ཨ་སཱ། ཨ་སཱ་ཡི་བུ་ནི་ཡེ་ཧོ་ཤ་ཕད།
1CH 3:11 ཡེ་ཧོ་ཤ་ཕད་ཀྱི་བུ་ནི་ཡེ་ཧོ་རཱམ་དང་། ཡེ་ཧོ་རཱམ་གྱི་བུ་ནི་ཨ་ཧ་ཟི་ཡཱ་དང་། ཨ་ཧ་ཟི་ཡཱ་ཡི་བུ་ནི་ཡོ་ཨ་སི་ཡིན།
1CH 3:12 ཡོ་ཨ་སིའི་བུ་ནི་ཨ་མཱ་ཙི་ཡ་དང་། ཨ་མཱ་ཙི་ཡ་ཡི་བུ་ནི་ཨ་ཟར་ཡཱ་དང་། ཨ་ཟར་ཡཱ་ཡི་བུ་ནི་ཡོ་ཐམ་ཡིན།
1CH 3:13 ཡོ་ཐམ་གྱི་བུ་ནི་ཨ་ཧ་ཟཱ་དང་། ཨ་ཧ་ཟཱའི་བུ་ནི་ཧི་ཟི་ཀི་ཡཱ་དང་། ཧི་ཟི་ཀི་ཡཱ་ཡི་བུ་ནི་མཱ་ན་ཤེ་ཡིན།
1CH 3:14 མཱ་ན་ཤེའི་བུ་ནི་ཨ་མོན་དང་། ཨ་མོན་གྱི་བུ་ནི་ཡོ་ཤི་ཡཱ་ཡིན་ནོ། །
1CH 3:15 ཡོ་ཤི་ཡཱའི་བུ་རྣམས་ནི། བུ་སྐྱེས་འགོ་ཡོ་ཧ་ནན་དང་། བུ་གཉིས་པ་ཡེ་ཧོ་ཡཱ་ཀིམ། བུ་གསུམ་པ་ཚིད་ཀི་ཡཱ། བུ་བཞི་པ་ཤལ་ལུམ་བཅས་ཡིན།
1CH 3:16 ཡེ་ཧོ་ཡཱ་ཀིམ་གྱི་བུ་རྣམས་ནི་ཡེ་ཀོན་ཡཱ་དང་ཚིད་ཀི་ཡཱ་ཡིན་ནོ། །
1CH 3:17 བཙོན་དུ་ཁྲིད་པའི་ཡེ་ཀོན་ཡཱ་ཡི་བུ་རྣམས་ནི་འདི་ལྟ་སྟེ། ཞིད་ཨལ་ཐེ་ཨེལ་དང་།
1CH 3:18 མལ་ཀི་རཱམ། ཕེ་ད་ཡཱ། ཤེན་ཨ་ཟར། ཡེ་ཀམ་ཡཱ། ཧོ་ཤ་མཱ། ནེ་དབ་ཡཱ་བཅས་སོ། །
1CH 3:19 ཕེ་ད་ཡཱའི་བུ་རྣམས་ནི་ཟེ་རུ་པཱ་པེལ་དང་ཤིམ་ཨི་ཡིན། ཟེ་རུ་པཱ་པེལ་གྱི་བུ་རྣམས་ནི་མཱེ་ཤུལ་ལིམ་དང་ཧ་ནན་ཡཱ་ཡིན། ཡང་ཤེ་ལོ་མིད་ནི་དེ་དག་གི་སྲིང་མོ་ཡིན་ནོ། །
1CH 3:20 དེར་མ་ཟད། ཧ་ཤུ་བཱ་དང་། ཨོ་ཧེལ། པེ་རེག་ཡཱ། ཧ་སད་ཡཱ། ཡུ་ཤབ་ཧེ་སེད་བཅས་བསྡོམས་པས་ལྔ་ཡོད་དོ། །
1CH 3:21 ཧ་ནན་ཡཱའི་བུ་རྣམས་ནི་ཕེ་ལེད་ཡཱ་དང་ཡེ་ཤ་ཡཱ་ཡིན་ལ། དེར་མ་ཟད་རེ་ཕཱ་ཡའི་བུ་རྣམས་དང་། ཨར་ནན་གྱི་བུ་རྣམས། ཨོ་བད་ཡཱའི་བུ་རྣམས། ཤེ་ཀན་ཡཱའི་བུ་རྣམས་ཀྱང་ཡོད་དོ། །
1CH 3:22 ཤེ་ཀན་ཡཱའི་བུ་རབས་ཚ་རྒྱུད་ནི་འདི་ལྟ་སྟེ། ཤེ་ཀན་ཡཱའི་བུ་ནི་ཤེ་མཱ་ཡའོ། །ཤེ་མཱ་ཡའི་བུ་ནི་ཧད་ཏུ་སི་དང་། ཡིག་ཨལ། པཱ་རི་ཡ། ནེ་ཨར་ཡཱ། ཤཱ་ཕད་བཅས་བསྡོམས་པས་དྲུག་གོ །
1CH 3:23 ནེ་ཨར་ཡཱའི་བུ་རྣམས་ནི་ཨེལ་ཡོ་ཨེ་ནཱ་ཨི་དང་། ཧི་ཟི་ཀི་ཡཱ། ཨས་རི་ཀམ་བཅས་བསྡོམས་པས་གསུམ་མོ། །
1CH 3:24 ཨེལ་ཡོ་ཨེ་ནཱ་ཨི་ཡི་བུ་རྣམས་ནི་ཧོ་དབ་ཡཱ་དང་། ཨེལ་ཡཱ་ཤིབ། ཕེ་ལཱ་ཡ། ཨག་ཀུབ། ཡོ་ཧ་ནན། དི་ལཱ་ཡ། ཨ་ནཱ་ནི་བཅས་བསྡོམས་པས་བདུན་ནོ། །
1CH 4:1 ཡ་ཧུ་དཱའི་བུ་ནི་ཕེ་རེལ་ཟི་དང་། ཧེས་རོན། ཀར་མི། ཧུ་རཱ། ཤོ་བལ་བཅས་སོ། །
1CH 4:2 ཡང་ཤོ་བལ་གྱི་བུ་རེ་ཨ་ཡཱ་ལས་ཡ་ཧད་མཆེད་པ་དང་། ཡ་ཧད་ལས་ཨ་ཧུ་མ་ཨི་དང་ལཱ་ཧད་མཆེད། དེ་དག་ནི་ཙོ་རཱ་པའི་ཁྱིམ་རྒྱུད་ཡིན།
1CH 4:3 ཨེ་ཏམ་གྱི་བུ་ནི་ཡེ་སི་རེ་ཨེལ་དང་། ཡིས་མཱ། ཨིད་པ་སི་བཅས་ཡིན་ལ། དེ་དག་གི་སྲིང་མོའི་མིང་ལ་ཧ་ཙེ་ལེག་ཕོ་ནི་ཞེས་བྱའོ། །
1CH 4:4 གེ་དོར་གྱི་ཕ་ནི་ཕེ་ནུ་ཨེལ་ཡིན། ཧུ་ཤཱ་ཡི་ཕ་ནི་ཨེ་ཟེར་ཡིན། དེ་ཐམས་ཅད་ནི་པེད་ལེ་ཧེམ་གྱི་ཕ་ཨེབ་རཱད་ཀྱི་བུ་སྐྱེས་འགོ་ཧུ་རཱ་ལས་མཆེད་དོ། །
1CH 4:5 ཐེ་ཀོ་ཨ་ཡི་ཕ་ཨ་སི་ཧུར་ལ་ཆུང་མ་གཉིས་ཡོད་དེ། ཧེ་ལཱ་དང་ནཱ་ཨ་རཱ་བྱ་བ་གཉིས་ཡིན།
1CH 4:6 ནཱ་ཨ་རཱ་ཡིས་ཨ་སི་ཧུར་ལ་ཨ་ཧུ་སཱམ་དང་། ཧེ་ཕེར། ཐེ་མེ་ནི། ཨ་ཧསཱ་ཏ་རི་བཅས་བཙས། དེ་ཐམས་ཅད་ནི་ནཱ་ཨ་རཱ་ཡི་བུ་རྣམས་ཡིན།
1CH 4:7 ཧེ་ལཱ་ཡི་བུ་ནི་ཙེ་རེད་དང་། ཙོ་ཧར། ཨེད་ནན་བཅས་ཡིན།
1CH 4:8 ཀོ་ཙཱ་ལས་ཨ་ནུབ་དང་། ཙོ་བེ་བཱ། ཧ་རུམ་གྱི་བུ་ཨ་ཧར་ཧེལ་གྱི་ཁྱིམ་རྒྱུད་རྣམས་མཆེད་དོ། །
1CH 4:9 ཡ་པེ་ཙཱ་ནི་ཁོ་རང་གི་སྤུན་རྣམས་ལས་བཀུར་འོས་པ་ཡིན་ཏེ། དེའི་མ་ཡིས་ཁོའི་མིང་ལ་ཡ་པེ་ཙཱ་ཞེས་བཏགས་པ་སྟེ། དོན་ནི་ཁོ་བཙའ་བའི་དུས་སུ་ཟུག་གཟེར་ཆེན་པོ་མྱངས་ཞེས་པའོ། །
1CH 4:10 ཡ་པེ་ཙཱ་ཡིས་ཡེས་ར་ཨེལ་གྱི་དཀོན་མཆོག་ལ། ཁྱེད་ཀྱིས་བདག་ལ་བྱིན་རླབས་གནང་བར་མཛོད། བདག་གི་མཐའ་མཚམས་རྒྱ་བསྐྱེད་དེ། ཁྱེད་ཀྱི་ཕྱག་ནི་དུས་ནམ་ཡང་བདག་དང་ལྷན་དུ་བཞུགས་པ་དང་། ང་རང་གནོད་འཚེ་དང་མི་འཕྲད་ཅིང་དཀའ་སྡུག་མི་མྱོང་བའི་ཕྱིར་བསྲུང་བར་མཛོད་ཅིག་ཅེས་ཞུ་བ་ཕུལ་བས། དཀོན་མཆོག་གིས་ཁོའི་ཞུ་བར་གསན་ཏོ། །
1CH 4:11 ཤུ་ཧ་ཡི་སྤུན་ཀེ་ལུབ་ནས་མེ་ཧིར་མཆེད། མེ་ཧིར་ནི་ཨེ་སི་ཏོན་གྱི་ཕ་ཡིན།
1CH 4:12 ཨེ་སི་ཏོན་ལས་པེད་ར་ཕཱ་དང་ཕཱ་སེ་ཨ། ཨིར་ན་ཧ་སི་ཡི་ཕ་ཐེ་ཧིན་ནཱ་བཅས་མཆེད་པ་དང་། དེ་ཐམས་ཅད་ནི་རེ་ཀཱ་པ་ཡིན་ནོ། །
1CH 4:13 ཀེ་ན༌ཟཱ་ཡི་བུ་ནི་ཨོད་ནི་ཨེལ་དང་སེ་ར་ཡཱ་ཡིན། ཨོད་ནི་ཨེལ་གྱི་བུ་རྣམས་ནི་ཧ་ཐད་དང་མེ་ཨོ་ནོ་ཐ་ཨི་ཡིན།
1CH 4:14 མེ་ཨོ་ནོ་ཐ་ཨི་ལས་ཨོབ་རཱ་མཆེད་པ་དང་། སེ་ར་ཡཱ་ལས་གེ་ཧ་ར་ཤིམ་པའི་མེས་པོ་ཡོ་ཨབ་མཆེད། དེ་དག་ནི་ལག་ཤེས་པ་ཡིན་ནོ། །
1CH 4:15 ཡེ་ཕུན་ནེ་ཡི་བུ་ནི་ཀཱ་ལེབ་དང་། ཀཱ་ལེབ་ཀྱི་བུ་ནི་ཨི་རུ་དང་། ཨེ་ལཱ། ནཱ་ཨམ་བཅས་ཡིན་ལ། ཨེ་ལཱ་ཡི་བུ་ནི་ཀེ་ནཱ༌ཟཱ་ཡིན་ནོ། །
1CH 4:16 ཨེ་ཧལ་ལེལ་ཨེལ་གྱི་བུ་ནི་ཟིབ་དང་ཟི་ཕཱ། ཐི་རེ་ཡཱ། ཨ་སར་ཨེལ་བཅས་སོ། །
1CH 4:17 ཨེ་ཛ་རཱ་ཡི་བུ་ནི་ཡེ་ཐེར་དང་། མེ་རེད། ཨེ་ཕེར། ཡ་ལོན་བཅས་ཡིན། མེ་རེད་ཀྱིས་ཕཱར་ཨོལ་གྱི་སྲས་མོ་པིད་ཡཱ་བྱ་བ་ཆུང་མར་བླངས་ཤིང་། པིད་ཡཱ་ཡིས་མིར་ཡམ་དང་། ཤམ་མཱ་ཨི། ཨེ་སི་ཏེ་མོ་ཨ་ཡི་མེས་པོ་ཡི་སི་པཱ་བཅས་བཙས་སོ། །
1CH 4:18 མེ་རེད་ཀྱི་ཡ་ཧུ་དཱ་པའི་ཆུང་མ་ལས་གེ་དོར་གྱི་ཕ་ཡཱ་རཱད་དང་། སོ་ཀོ་ཡི་ཕ་ཧེ་བེར། ཟཱ་ནོ་ཨ་ཡི་ཕ་ཡེ་ཀུ་ཐི་ཨེལ་བཅས་མཆེད་དོ། །
1CH 4:19 ཧོ་དི་ཡཱ་ཡི་ཆུང་མའམ་ནཱ་ཧམ་གྱི་སྲིང་མོའི་བུ་ནི། གར་མེ་པ་ཀེ་ཨི་ལཱ་ཡི་ཕ་དང་། མ་ཨ་ཀཱ་པ་ཨེ་སི་ཏེ་མོ་ཨ་ཡི་ཕ་ཡིན།
1CH 4:20 ཤི་མོན་གྱི་བུ་ནི་ཨམ་ནོན་དང་། རིན་ནཱ། པེན་ཧ་ནན། ཐི་ལོན་བཅས་ཡིན། ཡི་ཤི་ཡི་བུ་ནི་ཟོ་ཧེད་དང་། པེན་ཟོ་ཧེད་ཡིན།
1CH 4:21 ཡ་ཧུ་དཱའི་བུ་ནི་ཤེ་ལཱ་ཡིན་ཞིང་། ཤེ་ལཱ་ཡི་བུ་ནི་ལེ་ཀཱ་ཡི་ཕ་ཨེར་བྱ་བ་དང་། མཱ་རེ་ཤ་ཡི་ཕ་ལ་ཨ་དཱ་དང་། པེད་ཨ་སི་བེ་ཨ་རུ་གནས་པའི་སོ་རས་སྲབ་བུ་འཐག་མཁན་གྱི་ཁྱིམ་རྒྱུད་བཅས་ཡིན།
1CH 4:22 དེར་མ་ཟད། ཡོ་ཀིམ་དང་། ཀོ་ཟེ་བཱ་ཡི་མི་རྣམས། ཡོ་ཨ་སི། སཱ་རབ་བཅས་ཡོད་པ་དང་། དེ་དག་གིས་སྔར་མོ་ཨབ་ཡུལ་ལ་དབང་བསྒྱུར་ཅིང་། ད་དུང་ཡ་ཧྲོའུ་པེ་ལེ་ཧེམ་ཡང་ཡོད་པའོ། །འདི་ཐམས་ཅད་ནི་གནའ་བོའི་ལོ་རྒྱུས་ཡིན།
1CH 4:23 དེ་ཐམས་ཅད་རྫ་བཟོ་ཡིན་ལ། ནེ་ཏ་ཨིམ་དང་གེ་དེ་རཱ་ཡི་ཡུལ་མི་ཡིན། དེ་དག་རྒྱལ་པོ་བཞུགས་སར་བསྡད་ནས་རྒྱལ་པོའི་ཕྱིར་ལས་ཀ་བྱེད་པའོ། །
1CH 4:24 སི་མུ་ཨོན་གྱི་བུ་ནི་ནེ་མུ་ཨེལ་དང་། ཡཱ་མེན། ཡ་རིབ། ཟེ༌རག ཤཱ་ཨུལ་བཅས་ཡིན།
1CH 4:25 སོ་ལོའི་བུ་ནི་ཤཱལ་ལུམ་དང་། ཤཱལ་ལུམ་གྱི་བུ་ནི་མིབ་སཱམ། མིབ་སཱམ་གྱི་བུ་ནི་མུས༌མཱ་ཡིན།
1CH 4:26 མུས༌མཱ་ཡི་བུ་རབས་ཚ་རྒྱུད་ནི་འདི་ལྟ་སྟེ། མུས་མཱ་ཡི་བུ་ནི་ཧམ་མུ་ཨེལ་དང་། ཧམ་མུ་ཨེལ་གྱི་བུ་ནི་ཟག་ཀུར། ཟག་ཀུར་གྱི་བུ་ནི་ཤིམ་ཨི་ཡིན།
1CH 4:27 ཤིམ་ཨི་ལ་བུ་བཅུ་དྲུག་དང་བུ་མོ་དྲུག་ཡོད་ཀྱང་། ཁོའི་སྤུན་རྣམས་ལ་བུ་དང་བུ་མོ་མང་པོ་མེད་དེ། ཁོ་རྣམས་ཀྱི་ཁྱིམ་རྒྱུད་སོ་སོ་ལ་ཡ་ཧུ་དཱ་པའི་བུ་རབས་ཚ་རྒྱུད་ལྟར་མང་པོ་མ་འཕེལ་ཏོ། །
1CH 4:28 ཁོ་རྣམས་ནི་པེར་ཤ་བཱ་དང་། མོ་ལ་དཱ། ཧ་ཚར་ཤུ་ཨལ།
1CH 4:29 པེལ་ཧ། ཨེ་ཚེམ། ཐོ་ལད།
1CH 4:30 པེ་ཐུ་ཨེལ། ཧོར་མཱ། ཙིག་ལག
1CH 4:31 པེད་མར་ཀ་བོད། ཧ་ཚཱར་སུ་སིམ། པེད་བི་རི། ཤཱ་ཨ་ར་ཡིམ་བཅས་སུ་གནས་ཤིང་། དཱ་བིད་རྒྱལ་པོར་བཞུགས་པའི་བར་དུ་གྲོང་ཁྱེར་དེ་དག་ནི་ཁོ་རྣམས་ལ་གཏོགས་ཤིང་།
1CH 4:32 ཡང་ཉེ་འཁོར་གྱི་གྲོང་ཚོ་ནི། ཨེ་ཏམ་དང་། ཨ་ཡིན། རིམ་མོན། ཏོ་ཀེན། ཨ་ཤན་བཅས་བསྡོམས་པས་གྲོང་རྡལ་ལྔ་དང་།
1CH 4:33 གྲོང་རྡལ་དེ་དག་མཐའ་སྐོར་གྱི་གྲོང་ཚོ་ཐམས་ཅད་ནས་པཱ་ཨལ་བར་དུ་ཡིན་ལ། དེ་ནི་དེ་དག་སྡོད་སའི་གནས་ཡིན། ཁོ་རྣམས་ལ་རང་རང་གི་ཁྱིམ་རབས་ཀྱང་ཡོད་པ་ཡིན་ནོ། །
1CH 4:34 ཡང་མེ་ཤོ་བབ་དང་། ཡམ་ལེག ཨ་མཱ་ཙི་ཡའི་བུ་ཡོ་ཤཱ་དང་།
1CH 4:35 ཡོ་ཨེལ། ཡོ་ཤིབ་ཡཱའི་བུ་ཡེ་ཧུ་ཡང་ཡོད་ཅིང་། ཡོ་ཤིབ་ཡཱ་ནི་སེ་ར་ཡཱའི་བུ་དང་། སེ་ར་ཡཱ་ནི་ཨ་སི་ཨེལ་གྱི་བུ་ཡིན་པའོ། །
1CH 4:36 ཡང་ཨེལ་ཡོ་ཨེ་ན་ཨི་དང་། ཡ་ཨ་ཀོ་བཱ། ཡེ་ཤོ་ཧ་ཡཱ། ཨ་སཱ་ཡ། ཨ་དི་ཨེལ། ཡེ་སི་མི་ཨེལ། པེ་ནཱ་ཡ་བཅས་ཡོད།
1CH 4:37 ཟི་ཟཱ་ནི་ཤི་ཕི་ཡི་བུ་དང་། ཤི་ཕི་ནི་ཨལ་ལོན་གྱི་བུ་ཡིན། ཨལ་ལོན་ནི་ཡེ་དཱ་ཡའི་བུ་ཡིན། ཡེ་དཱ་ཡ་ནི་ཤིམ་རིའི་བུ་ཡིན། ཤིམ་རི་ནི་ཤེ་མཱ་ཡའི་བུ་ཡིན་ནོ། །
1CH 4:38 གོང་དུ་བཀོད་པའི་མིང་རྣམས་ནི་ཁྱིམ་རྒྱུད་སོ་སོའི་འགོ་དཔོན་ཡིན་ཏེ། དེ་དག་གི་ཁྱིམ་རྒྱུད་ཐམས་ཅད་ཤིན་ཏུ་དར་བའོ། །
1CH 4:39 དེ་དག་གེ་དོར་གྱི་མཐའ་འཁོབ་ཏུ་ལུང་པའི་ཤར་ཕྱོགས་བར་དུ་ཕྱིན་ཏེ་ར་ལུག་གི་ཁྱུ་འཚོ་སའི་རྩྭ་ས་བཙལ་ཞིང་།
1CH 4:40 ས་བཅུད་འཛོམས་ཤིང་ཡིད་དུ་འོང་བའི་རྩྭ་ས་རྙེད་པ་སྟེ། ཡུལ་དེ་ནི་ཡངས་ཤིང་ལྷིང་འཇགས་ཡིན་ལ། སྔར་ཧཱམ་གྱི་མི་རྣམས་ཡུལ་དེར་བསྡད་པའོ། །
1CH 4:41 གོང་དུ་མིང་བཀོད་པའི་མི་རྣམས་ཀྱིས་ཡ་ཧུ་དཱའི་རྒྱལ་པོ་ཧི་ཟི་ཀི་ཡཱའི་དུས་སུ། ཧཱམ་གྱི་མི་རྣམས་ཀྱི་གུར་རྣམས་དང་ཡུལ་དེའི་མེ་ཨུན་པ་ཐམས་ཅད་ལ་རྒོལ་ཞིང་། ཁོ་རྣམས་ཚར་བཅད་པ་དང་། དེ་རིང་གི་ཉིན་མོའི་བར་དུ་དེ་དག་གི་ཡུལ་དུ་བསྡད་པ་སྟེ། རྒྱུ་མཚན་ནི་ཡུལ་དེར་ར་ལུག་གི་ཁྱུ་འཚོ་སའི་རྩྭ་ས་ཡོད་པས་སོ། །
1CH 4:42 སི་མུ་ཨོན་པ་དེ་རྣམས་ལས་མི་ལྔ་བརྒྱ་ནི་སེ་ཨིར་རི་བོར་ཕྱིན་པ་དང་། དེ་དག་གི་སྣེ་ཁྲིད་མཁན་ནི་ཡི་ཤིའི་བུ་ཕེ་ལད་ཡཱ་དང་། ནེ་ཨར་ཡཱ། རེ་ཕཱ་ཡ། ཨུ་ཟི་ཨེལ་བཅས་ཡིན་པ་དང་།
1CH 4:43 དེ་དག་གིས་ཤུལ་དུ་ལུས་པའི་ཨ་མཱད་ལེག་པ་རྣམས་བསད་ནས་དེ་རིང་གི་ཉིན་མོའི་བར་དུ་ཡུལ་དེར་གནས་སོ། །
1CH 5:1 ཡེས་ར་ཨེལ་གྱི་བུ་སྐྱེས་འགོ་རུ་བེན་གྱི་བུ་ནི་འདི་ལྟ་སྟེ། རུ་བེན་ནི་བུ་སྐྱེས་འགོ་ཡིན་ནའང་ཁོས་རང་གི་ཕ་ཡི་མལ་ཁྲི་བརྫད་པས། ཁོའི་བུ་སྐྱེས་འགོའི་ཐོབ་ཐང་ནི་ཡེས་ར་ཨེལ་གྱི་བུ་ཡོ་སེབ་ཀྱི་བུ་ལ་དབང་བར་གྱུར་ཏོ། །དེ་བས་ཁྱིམ་རབས་བཞིན་དུ་ཁོ་རང་བུ་སྐྱེས་འགོར་བརྩིས་མེད།
1CH 5:2 ཡ་ཧུ་དཱ་ནི་རང་གི་སྤུན་རྣམས་ཀྱི་ཁྲོད་དུ་སྟོབས་འབྱོར་ཆེས་ཆེ་བ་ཡིན་ཞིང་རྒྱལ་པོའང་ཁོ་ནས་བྱུང་མོད། འོན་ཀྱང་བུ་སྐྱེས་འགོའི་ཐོབ་ཐང་ཡོ་སེབ་ལ་དབང་བའོ། །
1CH 5:3 ཡེས་ར་ཨེལ་གྱི་བུ་སྐྱེས་འགོ་རུ་བེན་གྱི་བུ་ནི་ཧ་ནོག་དང་། ཕཱ༌ལུའུ། ཧེས༌རོན། ཀར་མའེ་བཅས་སོ། །
1CH 5:4 ཡོ་ཨེལ་གྱི་བུ་རབས་ཚ་རྒྱུད་ནི་འདི་ལྟ་སྟེ། ཡོ་ཨེལ་གྱི་བུ་ཤེ་མཱ་ཡ་དང་། ཤེ་མཱ་ཡ་ཡི་བུ་གོག གོག་གི་བུ་ཤིམ་ཨི།
1CH 5:5 ཤིམ་ཨི་ཡི་བུ་མི་ཀཱ མི་ཀཱའི་བུ་རེ་ཨ་ཡཱ། རེ་ཨ་ཡཱའི་བུ་པཱ་ཨལ།
1CH 5:6 པཱ་ཨལ་གྱི་བུ་པེ་ཨེ་རཱ་བཅས་ཡིན་ལ། པེ་ཨེ་རཱ་ནི་རུ་བེན་ཚོ་པའི་འགོ་དཔོན་ཡིན་པ་དང་། ཨ་སུར་གྱི་རྒྱལ་པོ་ཏིལ་གད་པིལ་ནེ་བཟིར་གྱིས་བཙན་ཁྲིད་བྱས་སོ། །
1CH 5:7 དེའི་སྤུན་རྣམས་ལས་རུས་རྒྱུད་དང་ཁྱིམ་རབས་བཞིན་འགོ་དཔོན་ཡིན་པ་འདི་ལྟ་སྟེ། ཡེ་ཨི་ཨེལ་དང་། ཟཱ་ཀར་ཡ། པེ་ལཱ་བཅས་སོ། །
1CH 5:8 པེ་ལཱ་ནི་ཨ་ཟཱ་སིའི་བུ་དང་། ཨ་ཟཱ་སི་ནི་ཤེ་མཱ་ཡི་བུ། ཤེ་མཱ་ནི་ཡོ་ཨེལ་གྱི་བུ་ཡིན་ལ། ཡོ་ཨེལ་ནི་ཨ་རོ་ཨེར་བྱ་བའི་ཡུལ་དུ་གནས་ཤིང་། ནེ་བོ་དང་པཱ་ཨལ་མེ་ཨོན་གྱི་བར་དུ་སླེབས་སོ། །
1CH 5:9 དེ་དག་གི་ཕྱུགས་རྣམས་གིལ་ཨད་ཡུལ་དུ་འཕེལ་བས། ཁོ་རང་ཤར་ཕྱོགས་སུ་གནས་སྤར་ཏེ། ཕི་རཱད་ཆུ་བོའི་ཚུར་རོལ་གྱི་དབེན་སྟོང་གི་མཐའ་མཚམས་བར་དུ་མཆེད་པ་ཡིན།
1CH 5:10 སོ་ལོའི་དུས་སུ་དེ་དག་གིས་ཧ་གར་པ་རྣམས་ལ་དམག་བརྒྱབ་ནས། ཧ་གར་པ་རྣམས་དེ་དག་གི་ལག་ནས་འགྱེལ་ཞིང་། དེ་དག་གིལ་ཨད་ཤར་ཕྱོགས་ཀྱི་ཡུལ་ཐམས་ཅད་དུ་ཧ་གར་པའི་གུར་རྣམས་སུ་བསྡད་དོ། །
1CH 5:11 གཱ་རྡུའི་བུ་རབས་ཚ་རྒྱུད་རྣམས་ནི་རུ་བེན་གྱི་ཁ་གཏད་དུ། པཱ་ཤན་ཡུལ་དུ་གནས་ཤིང་སལ་ཀཱའི་བར་དུ་མཆེད་པ་སྟེ།
1CH 5:12 པཱ་ཤན་ཡུལ་དུ་གནས་པ་ནི་ཚོ་དཔོན་ཡོ་ཨེལ་དང་། ཚོ་དཔོན་གཉིས་པ་ཤཱ་ཕམ་དང་། ད་དུང་ཡ་ནཱ་ཨི་དང་ཤཱ་ཕད་བཅས་ཡོད་པའོ། །
1CH 5:13 དེ་དག་དང་ཁྱིམ་རྒྱུད་གཅིག་གི་སྤུན་རྣམས་ནི་མེའ་ཀཱ་ཨེལ་དང་། མཱེ་ཤུལ་ལིམ། ཤེ་བཱ། ཡོ་ར་ཨི། ཡཱ་ཀན། ཟི་ཡཱ། ཨེ་བེར་བཅས་བསྡོམས་པས་བདུན་ནོ། །
1CH 5:14 དེ་ཐམས་ཅད་ཨ་བི་ཧ་ཡིལ་གྱི་བུ་ཡིན་ཏེ། ཨ་བི་ཧ་ཡིལ་ནི་ཧུ་རིའི་བུ་དང་། ཧུ་རི་ནི་ཡ་རོ་ཨ་ཡི་བུ། ཡ་རོ་ཨ་ནི་གིལ་ཨད་ཀྱི་བུ། གིལ་ཨད་ནི་མེའ་ཀཱ་ཨེལ་གྱི་བུ། མེའ་ཀཱ་ཨེལ་ནི་ཡེ་ཤི་ཤ་ཨིའི་བུ། ཡེ་ཤི་ཤ་ཨི་ནི་ཡཱ་དོ་ཡི་བུ། ཡཱ་དོ་ནི་པུ་ཟཱ་ཡི་བུའོ། །
1CH 5:15 ད་དུང་གུ༌ནེ་ཡི་ཚ་བོ་དང་ཨབ་དི་ཨེལ་གྱི་བུ་ཨ་ཧི་ཡོད་ཅིང་ཁོ་ནི་དེ་དག་གི་ཁྱིམ་རྒྱུད་ཀྱི་འགོ་དཔོན་ཡིན།
1CH 5:16 དེ་དག་ནི་གིལ་ཨད་དང་པཱ་ཤན། པཱ་ཤན་ལ་གཏོགས་པའི་གྲོང་ཚོ་རྣམས་དང་། ཤཱ་རོན་གྱི་རྩྭ་ས་ཡོངས་སུ་གནས་ཤིང་། མཐའ་འཁོབ་ཀྱི་ས་མཚམས་བར་དུ་སླེབས་སོ། །
1CH 5:17 ཡ་ཧུ་དཱའི་རྒྱལ་པོ་ཡོ་ཐམ་དང་ཡེས་ར་ཨེལ་གྱི་རྒྱལ་པོ་ཡེ་རོབ་ཨམ་གྱི་དུས་སུ། དེ་ཐམས་ཅད་ཁྱིམ་རབས་སུ་བཀོད་པའོ། །
1CH 5:18 རུ་བེན་གྱི་ཚོ་པ་དང་། གཱ་རྡུའི་ཚོ་པ། མཱ་ན་ཤེའི་ཚོ་པ་ཕྱེད་ཀ་བཅས་ཀྱི་མི་རྣམས་ནི་དམག་མི་དཔའ་རྩལ་ཅན་ཡིན་ལ། དེ་རྣམས་ལས་ཕུབ་དང་རལ་གྲི་ཐེག་པ་དང་། གཞུ་འཐེན་པ་དང་མདའ་འཕེན་ནུས་པ། དམག་ལ་བསྐྱོད་ནས་འཐབ་མཁས་པ་བཅས་བསྡོམས་པས་བཞི་ཁྲི་བཞི་སྟོང་བདུན་བརྒྱ་དྲུག་ཅུ་མཆིས་སོ། །
1CH 5:19 དེ་རྣམས་ཀྱིས་ཧ་གར་པ་དང་། ཡཱ༌ཐར་པ། ནཱ་ཕིས་པ། ནོ་དབ་པ་རྣམས་ལ་དམག་བརྒྱབ་པ་དང་།
1CH 5:20 དམག་རྒྱག་པའི་སྐབས་སུ་དེ་རྣམས་ལ་དཀོན་མཆོག་གི་རོགས་རམ་ཐོབ་ནས། ཧ་གར་པ་དང་དེར་མནའ་འབྲེལ་བྱེད་མཁན་ཐམས་ཅད་ཁོ་རྣམས་ཀྱི་ལག་ཏུ་སྤྲད་པ་སྟེ། རྒྱུ་མཚན་ནི་དེ་རྣམས་ཀྱིས་གཡུལ་ངོར་དཀོན་མཆོག་ལ་ཞུ་བ་ཕུལ་ཞིང་ཁོང་ལ་བརྟེན་པས། ཁོང་གིས་དེ་རྣམས་ཀྱི་ཞུ་བར་གསན་ཏོ། །
1CH 5:21 ཡང་དེ་རྣམས་ཀྱིས་དགྲ་བོའི་ཕྱུགས་རྣམས་ཕྲོགས་པ་སྟེ། རྔ་མོང་ཁྲི་ལྔ་དང་། ར་ལུག་འབུམ་གཉིས་དང་ཁྲི་ལྔ། བོང་བུ་སྟོང་གཉིས་བཅས་དང་། ད་དུང་མི་འབུམ་གཅིག་བཅས་པའོ། །
1CH 5:22 དམག་འཐབ་དེ་ནི་དཀོན་མཆོག་ནས་བྱུང་བས་དགྲ་མང་པོ་བསད་པའོ། །དེ་རྣམས་བཙོན་དུ་ཁྲིད་པའི་བར་དུ་ཧ་གར་པའི་ཡུལ་ལ་གནས་སོ། །
1CH 5:23 མཱ་ན་ཤེའི་ཚོ་པ་ཕྱེད་ཀའི་མི་རྣམས་ཡུལ་དེར་གནས་ཤིང་། པཱ་ཤན་ཡུལ་ནས་པཱ་ཨལ་ཧེར་མོན་དང་། སེ་ནིར། ཧེར་མོན་རི་བོ་བཅས་ཀྱི་བར་དུ་མཆེད་པ་དང་། ཁོ་རྣམས་ཀྱི་མི་གྲངས་མང་བའོ། །
1CH 5:24 དེ་དག་གི་ཁྱིམ་རྒྱུད་སོ་སོའི་འགོ་དཔོན་རྣམས་ནི་འདི་ལྟ་སྟེ། ཨེ་ཕེར་དང་། ཡི་ཤི། ཨེ་ལི་ཨེལ། ཨས་རི་ཨེལ། ཡེ་རེམ་ཡཱ། ཧོ་དབ་ཡཱ། ཡཱ་དི་ཨེལ་བཅས་སོ། །དེ་ཐམས་ཅད་ནི་དམག་མི་དཔའ་རྩལ་ཅན་དང་། མཚན་སྙན་གྲགས་ཅན། ཁྱིམ་རྒྱུད་ཀྱི་འགོ་དཔོན་བཅས་ཡིན་ནོ། །
1CH 5:25 འོན་ཀྱང་དེ་རྣམས་རང་གི་ཕ་མེས་ཡང་མེས་ཀྱི་དཀོན་མཆོག་དང་འགལ་ནས། ཡུལ་དེ་གའི་མི་རྣམས་ཀྱི་ལྷ་རྣམས་ཀྱི་རྗེས་སུ་འབྲངས་ནས་ལོག་གཡེམ་བྱེད་ཅིང་། ཡུལ་དེའི་མི་རྣམས་ནི་སྔར་དཀོན་མཆོག་གིས་དེ་དག་གི་མདུན་ནས་མེད་པར་མཛད་པ་ཡིན་ནོ། །
1CH 5:26 དེའི་ཕྱིར། ཡེས་ར་ཨེལ་གྱི་དཀོན་མཆོག་གིས་ཨ་སུར་རྒྱལ་པོ་ཕུལ་ཞེས་བྱ་བ་སྟེ། ཨ་སུར་རྒྱལ་པོ་ཏིལ་གད་པིལ་ནེ་བཟིར་གྱི་སེམས་བསྐུལ་ནས། རུ་བེན་གྱི་ཚོ་པ་དང་། གཱ་རྡུའི་ཚོ་པ། མཱ་ན་ཤེའི་ཚོ་པ་ཕྱེད་ཀ་བཅས་བཟུང་ནས། དེ་རྣམས་ཧ་ལཱ་དང་། ཧ་བོར། ཧ་རཱ། གོ་ཟན་གཙང་པོའི་འགྲམ་བཅས་སུ་ཁྲིད་པ་དང་། དེ་རིང་གི་བར་དུ་ཡུལ་དེར་གནས་སོ། །
1CH 6:1 ལེ་ཝིའི་བུ་ནི་གེར་ཤོན་དང་། ཀོ་ཧད། མཱ་རཱ་རེའེ་བཅས་ཡིན།
1CH 6:2 ཀོ་ཧད་ཀྱི་བུ་རྣམས་ནི་ཨམ་རམ་དང་། ཡེས་ཧར། ཧེབ་རོན། ཨུ་ཟི་ཨེལ་བཅས་ཡིན།
1CH 6:3 ཨམ་རམ་གྱི་བུ་དང་བུ་མོ་ནི་ཨ་རོན་དང་། མོ་ཤེ། མིར་ཡམ་བཅས་ཡིན། ཨ་རོན་གྱི་བུ་ནི་ནཱ་དབ་དང་། ཨ་བི་ཧུ། ཨེ་ལི་ཨ་ཟར། ཨི་ཐ་མཱར་བཅས་ཡིན།
1CH 6:4 ཨེ་ལི་ཨ་ཟར་ལས་ཕི་ནེ་ཧེ་དང་། ཕི་ནེ་ཧེ་ལས་ཨ་བི་ཤུ་ཨ་མཆེད།
1CH 6:5 ཨ་བི་ཤུ་ཨ་ལས་པུག་ཀི་དང་། པུག་ཀི་ལས་ཨུ་ཟི་མཆེད།
1CH 6:6 ཨུ་ཟི་ལས་ཟེ་རཱ་ཡཱ་དང་། ཟེ་རཱ་ཡཱ་ལས་མེ་ར་ཡོད་མཆེད།
1CH 6:7 མེ་ར་ཡོད་ལས་ཨ་མར་ཡཱ་དང་། ཨ་མར་ཡཱ་ལས་ཨ་ཧི་ཏུབ་མཆེད།
1CH 6:8 ཨ་ཧི་ཏུབ་ལས་ཟཱ་ཏོག་དང་། ཟཱ་ཏོག་ལས་ཨ་ཧི་མཱ་ཨ་སི་མཆེད།
1CH 6:9 ཨ་ཧི་མཱ་ཨ་སི་ལས་ཨ་ཟར་ཡཱ་དང་། ཨ་ཟར་ཡཱ་ལས་ཡོ་ཧ་ནན་མཆེད།
1CH 6:10 ཡོ་ཧ་ནན་ལས་ཨ་ཟར་ཡཱ་མཆེད། ཨ་ཟར་ཡཱ་ནི་སོ་ལོ་མོན་གྱིས་བཞེངས་པའི་ཡེ་རུ་སཱ་ལེམ་གྱི་མཆོད་ཁང་དུ་མཆོད་དཔོན་བྱས་པ་ཡིན།
1CH 6:11 ཨ་ཟར་ཡཱ་ལས་ཨ་མར་ཡཱ་དང་། ཨ་མར་ཡཱ་ལས་ཨ་ཧི་ཏུབ་མཆེད།
1CH 6:12 ཨ་ཧི་ཏུབ་ལས་ཟཱ་ཏོག་དང་། ཟཱ་ཏོག་ལས་ཤལ་ལུམ་མཆེད།
1CH 6:13 ཤལ་ལུམ་ལས་ཧིལ་ཀི་ཡཱ་དང་། ཧིལ་ཀི་ཡཱ་ལས་ཨ་ཟར་ཡཱ་མཆེད།
1CH 6:14 ཨ་ཟར་ཡཱ་ལས་སེ་ར་ཡཱ་དང་། སེ་ར་ཡཱ་ལས་ཡེ་ཧོ་ཙ་དག་མཆེད།
1CH 6:15 དཀོན་མཆོག་ཡ་ཝཱེས་ཡ་ཧུ་དཱ་དང་ཡེ་རུ་སཱ་ལེམ་གཉིས་ནི་ནེ་བོ་ཀད་ནེ་ཙར་བརྒྱུད་ནས་མཐར་སྤྱུག་པའི་ཚེ་ན། ཡེ་ཧོ་ཙ་དག་ཀྱང་བཙན་གྱིས་ཁྲིད་པ་ཡིན།
1CH 6:16 ལེ་ཝིའི་བུ་ནི་གེར་ཤོན་དང་། ཀོ་ཧད། མཱ་རཱ་རེའེ་བཅས་ཡིན་ཞིང་།
1CH 6:17 གེར་ཤོན་གྱི་བུ་ཡི་མིང་ལ་ལིབ་ནིས་དང་ཤིམ་ཨི་ཞེས་བྱའོ། །
1CH 6:18 ཀོ་ཧད་ཀྱི་བུ་རྣམས་ནི་ཨམ་རམ་དང་། ཡེས་ཧར། ཧེབ་རོན། ཨུ་ཟི་ཨེལ་བཅས་ཡིན།
1CH 6:19 མཱ་རཱ་རེའེ་ཡི་བུ་ནི་མཱ་ལི་དང་མུ་ཤི་ཡིན། གོང་གི་འདི་དག་ནི་ལེ་ཝི་པའི་རུས་རྒྱུད་སོ་སོའི་ཁྱིམ་རྒྱུད་རྣམས་ཡིན་ནོ། །
1CH 6:20 གེར་ཤོན་གྱི་བུ་རབས་ཚ་རྒྱུད་ནི་འདི་ལྟ་སྟེ། གེར་ཤོན་གྱི་བུ་ནི་ལིབ་ནིས་དང་། ལིབ་ནིས་ཀྱི་བུ་ནི་ཡ་ཧད། ཡ་ཧད་ཀྱི་བུ་ནི་ཟིམ་མཱ།
1CH 6:21 ཟིམ་མཱའི་བུ་ནི་ཡོ་ཨག ཡོ་ཨག་གི་བུ་ནི་ཨིད་དོ། ཨིད་དོའི་བུ་ནི་ཟེ་རག ཟེ༌རག་གི་བུ་ནི་ཡེ་ཨ་ཐེ་ར་ཨི་ཡིན་ནོ། །
1CH 6:22 ཀོ་ཧད་ཀྱི་བུ་རབས་ཚ་རྒྱུད་ནི་འདི་ལྟ་སྟེ། ཀོ་ཧད་ཀྱི་བུ་ནི་ཨ་མི་ནཱ་དབ་དང་། ཨ་མི་ནཱ་དབ་ཀྱི་བུ་ནི་ཀོ་རཱག ཀོ་རཱག་གི་བུ་ནི་ཨ་སིར།
1CH 6:23 ཨ་སིར་གྱི་བུ་ནི་ཨེལ་ཁ་ནཱ། ཨེལ་ཁ་ནཱའི་བུ་ནི་ཨེ་བི་ཡ་སབ། ཨེ་བི་ཡ་སབ་ཀྱི་བུ་ནི་ཨ་སིར།
1CH 6:24 ཨ་སིར་གྱི་བུ་ནི་ཐ་ཧད། ཐ་ཧད་ཀྱི་བུ་ནི་ཨུ་རི་ཨེལ། ཨུ་རི་ཨེལ་གྱི་བུ་ནི་ཨུ་ཟི་ཡཱ། ཨུ་ཟི་ཡཱའི་བུ་ནི་ཤ་ཨུལ་ཡིན་པའོ། །
1CH 6:25 ཨེལ་ཁ་ནཱ་ཡི་བུ་ནི་ཨ་མ་སཱ་ཨི་དང་ཨ་ཧི་མོད་ཡིན།
1CH 6:26 ཨ་ཧི་མོད་ཀྱི་བུ་ནི་ཨེལ་ཁ་ནཱ་ཡིན་ལ། ཨེལ་ཁ་ནཱའི་བུ་ནི་ཟོ་ཕཱ་ཨི། ཟོ་ཕཱ་ཨི་ཡི་བུ་ནི་ནཱ་ཧད་ཡིན།
1CH 6:27 ནཱ་ཧད་ཀྱི་བུ་ནི་ཨེ་ལི་ཨབ། ཨེ་ལི་ཨབ་ཀྱི་བུ་ནི་ཡེ་རོ་ཧམ། ཡེ་རོ་ཧམ་གྱི་བུ་ནི་ཨེལ་ཁ་ནཱ། ཨེལ་ཁ་ནཱའི་བུ་ནི་སཱ་མུ་ཨེལ་ཡིན་ནོ། །
1CH 6:28 སཱ་མུ་ཨེལ་གྱི་བུ་རབས་ཚ་རྒྱུད་ནི་འདི་ལྟ་སྟེ། བུ་སྐྱེས་འགོ་ཡོ་ཨེལ་དང་བུ་གཉིས་པ་ཨ་བི་ཡཱ་ཡིན།
1CH 6:29 མཱ་རཱ་རེའེ་ཡི་བུ་རབས་ཚ་རྒྱུད་ནི་འདི་ལྟ་སྟེ། མཱ་རཱ་རེའེ་ཡི་བུ་ནི་མཱ་ལི། མཱ་ལིའི་བུ་ནི་ལུབ་ནིས། ལུབ་ནིས་ཀྱི་བུ་ནི་ཤིམ་ཨི། ཤིམ་ཨི་ཡི་བུ་ནི་ཨུ་ཟཱ།
1CH 6:30 ཨུ་ཟཱའི་བུ་ནི་ཤི་མེ་ཨ། ཤི་མེ་ཨ་ཡི་བུ་ནི་ཧག་གི་ཡཱ། ཧག་གི་ཡཱ་ཡི་བུ་ནི་ཨ་ས་ཡཱ་ཡིན་པའོ། །
1CH 6:31 ཞལ་ཆད་ཀྱི་ཤུར་སྒམ་གདན་ཆགས་པའི་རྗེས་སུ། དཱ་བིད་ཀྱིས་དཀོན་མཆོག་ཡ་ཝཱེའི་བཞུགས་གནས་སུ་མགུར་བླངས་ནས་ཞབས་ཕྱི་བྱེད་པར་བསྐོས་པ་འདི་དག་ཡིན་ཏེ།
1CH 6:32 སོ་ལོ་མོན་གྱིས་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་མཆོད་ཁང་བཞེང་བའི་བར་དུ། ཁོ་ཚོས་ལས་ཚན་བཞིན་དུ་མཇལ་འཕྲད་གུར་མཆོག་གི་གནས་ཀྱི་མདུན་དུ་མགུར་ལེན་པའི་ཞབས་ཏོག་བསྒྲུབས་ཤིང་། ལས་རེས་བཞིན་དུ་རང་རང་གི་ལས་འགན་ཁུར་བའོ། །
1CH 6:33 ལས་འགན་འཁུར་མཁན་རྣམས་དང་ཁོ་རྣམས་ཀྱི་བུ་རབས་ཚ་རྒྱུད་ནི་འདི་ལྟ་སྟེ། ཀོ་ཧད་པའི་བུ་རབས་ཚ་རྒྱུད་ཀྱི་ཁྲོད་དུ་མགུར་ལེན་མཁན་ཧེ་མཱན་ཡོད་ཅིང་། ཧེ་མཱན་ནི་ཡོ་ཨེལ་གྱི་བུ་ཡིན་པ་དང་། ཡོ་ཨེལ་ནི་སཱ་མུ་ཨེལ་གྱི་བུ་ཡིན།
1CH 6:34 སཱ་མུ་ཨེལ་ནི་ཨེལ་ཁ་ནཱའི་བུ་ཡིན་པ་དང་། ཨེལ་ཁ་ནཱ་ནི་ཡེ་རོ་ཧམ་གྱི་བུ་ཡིན་ཞིང་། ཡེ་རོ་ཧམ་ནི་ཨེ་ལི་ཨེལ་གྱི་བུ་ཡིན་ལ། ཨེ་ལི་ཨེལ་ནི་ཐོ་ཨ་ཡི་བུ་ཡིན་ནོ། །
1CH 6:35 ཐོ་ཨ་ནི་ཙུབ་ཀྱི་བུ་ཡིན་པ་དང་། ཙུབ་ནི་ཨེལ་ཁ་ནཱའི་བུ་ཡིན་ཞིང་། ཨེལ་ཁ་ནཱ་ནི་མ་ཧད་ཀྱི་བུ་ཡིན་ལ། མ་ཧད་ནི་ཨ་མ་སཱ་ཨི་ཡི་བུ་ཡིན་ནོ། །
1CH 6:36 ཨ་མ་ས་ཨི་ནི་ཨེལ་ཁ་ནཱའི་བུ་ཡིན་པ་དང་། ཨེལ་ཁ་ནཱ་ནི་ཡོ་ཨེལ་གྱི་བུ་ཡིན་ཞིང་། ཡོ་ཨེལ་ནི་ཨ་ཟར་ཡཱའི་བུ་ཡིན་ལ། ཨ་ཟར་ཡཱ་ནི་ཙེ་ཕན་ཡཱའི་བུ་ཡིན་ནོ། །
1CH 6:37 ཙེ་ཕན་ཡཱ་ནི་ཐ་ཧད་ཀྱི་བུ་ཡིན་པ་དང་། ཐ་ཧད་ནི་ཨ་སིར་གྱི་བུ་ཡིན་ཞིང་། ཨ་སིར་ནི་ཨེ་བི་ཡ་སབ་ཀྱི་བུ་ཡིན་ལ། ཨེ་བི་ཡ་སབ་ནི་ཀོ་རཱག་གི་བུ་ཡིན་ནོ། །
1CH 6:38 ཀོ་རཱག་ནི་ཡེས་ཧར་གྱི་བུ་ཡིན་པ་དང་། ཡེས་ཧར་ནི་ཀོ་ཧད་ཀྱི་བུ་ཡིན་ཞིང་། ཀོ་ཧད་ནི་ལེ་ཝིའི་བུ་ཡིན་ལ། ལེ་ཝི་ནི་ཡེས་ར་ཨེལ་གྱི་བུ་ཡིན་ནོ། །
1CH 6:39 ཡང་ཧེ་མཱན་གྱི་སྤུན་ཨ་སབ་སྟེ། ཧེ་མཱན་གྱི་གཡས་སུ་འགྲེང་སྟེ་ལས་འགན་སྒྲུབ་པའི་ཨ་སབ་ནི་པེ་རེག་ཡཱའི་བུ་ཡིན་ལ། པེ་རེག་ཡཱ་ནི་ཤི་མེ་ཨ་ཡི་བུ་ཡིན།
1CH 6:40 ཤི་མེ་ཨ་ནི་མེའ་ཀཱ་ཨེལ་གྱི་བུ་ཡིན་པ་དང་། མེའ་ཀཱ་ཨེལ་ནི་པ་ཨ་སེ་ཡཱ་ཡི་བུ་ཡིན་ལ། པ་ཨ་སེ་ཡཱ་ནི་མལ་ཀི་ཡཱའི་བུ་ཡིན་ནོ། །
1CH 6:41 མལ་ཀི་ཡཱ་ནི་ཨེད་ནི་ཡི་བུ་ཡིན་པ་དང་། ཨེད་ནི་ནི་ཟེ༌རག་གི་བུ་ཡིན་ལ། ཟེ༌རག་ནི་ཨ་དཱ་ཡའི་བུ་ཡིན་ནོ། །
1CH 6:42 ཨ་དཱ་ཡ་ནི་ཨེ་ཐན་གྱི་བུ་ཡིན་པ་དང་། ཨེ་ཐན་ནི་ཟིམ་མཱ་ཡི་བུ་ཡིན་ལ། ཟིམ་མཱ་ནི་ཤིམ་ཨི་ཡི་བུ་ཡིན་ནོ། །
1CH 6:43 ཤིམ་ཨི་ནི་ཡ་ཧད་ཀྱི་བུ་ཡིན་པ་དང་། ཡ་ཧད་ནི་གེར་ཤོན་གྱི་བུ་ཡིན་ལ། གེར་ཤོན་ནི་ལེ་ཝིའི་བུ་ཡིན་ནོ། །
1CH 6:44 ཡང་ཧེ་མཱན་དང་ཨ་སབ་ཀྱི་སྤུན་མཱ་རཱ་རེའེ་ཡི་བུ་རབས་ཚ་རྒྱུད་དེ། ཁོ་རྣམས་ཀྱི་གཡོན་དུ་ལས་འགན་སྒྲུབ་མཁན་ཨེ་ཐན་ཡོད་ཅིང་། ཨེ་ཐན་ནི་ཀི་ཤིའི་བུ་ཡིན་པ་དང་། ཀི་ཤི་ནི་ཨབ་དིའི་བུ་ཡིན་ལ། ཨབ་དི་ནི་མལ་ལུག་གི་བུ་ཡིན།
1CH 6:45 མལ་ལུག་ནི་ཧ་ཤབ་ཡཱ་ཡི་བུ་ཡིན་པ་དང་། ཧ་ཤབ་ཡཱ་ནི་ཨ་མཱ་ཙི་ཡའི་བུ་ཡིན་ལ། ཨ་མཱ་ཙི་ཡ་ནི་ཧིལ་ཀི་ཡཱའི་བུ་ཡིན།
1CH 6:46 ཧིལ་ཀི་ཡཱ་ནི་ཨམ་ཟིའི་བུ་ཡིན་པ་དང་། ཨམ་ཟི་ནི་པཱ་ནིའི་བུ་ཡིན་ལ། པཱ་ནི་ནི་ཤེ་མེར་གྱི་བུ་ཡིན།
1CH 6:47 ཤེ་མེར་ནི་མཱ་ལིའི་བུ་ཡིན་པ་དང་། མཱ་ལི་ནི་མུ་ཤིའི་བུ་ཡིན་ཞིང་། མུ་ཤི་ནི་མཱ་རཱ་རེའེ་ཡི་བུ་ཡིན་ལ། མཱ་རཱ་རེའེ་ནི་ལེ་ཝིའི་བུ་ཡིན་ནོ། །
1CH 6:48 དེ་དག་གི་གཉེན་ཉེ་ལེ་ཝི་པ་རྣམས་ནི་དཀོན་མཆོག་གི་བཞུགས་གནས་ཡིན་པའི་གུར་མཆོག་ནང་དུ་ཞབས་ཏོག་ཐམས་ཅད་བསྒྲུབ་པར་བསྐོས་པའོ། །
1CH 6:49 དཀོན་མཆོག་གི་ཞབས་ཕྱི་མོ་ཤེས་བཀའ་བསྩལ་པ་བཞིན་དུ། ཨ་རོན་དང་དེའི་བུ་རབས་ཚ་རྒྱུད་རྣམས་ཀྱིས་སྦྱིན་སྲེག་གི་མཆོད་ཁྲི་དང་། སྤོས་ཁྲིའི་ཁར་མཆོད་པ་འབུལ་ཞིང་སྤོས་བསྒྲོན་པ་དང་། གནས་དམ་མཆོག་གི་ཞབས་ཏོག་ཐམས་ཅད་བསྒྲུབས་ནས། ཡེས་ར་ཨེལ་པ་རྣམས་ཀྱི་དོན་དུ་སྡིག་བཤགས་བྱེད་པ་ཡིན་ནོ། །
1CH 6:50 ཨ་རོན་གྱི་བུ་རབས་ཚ་རྒྱུད་རྣམས་ནི་འདི་ལྟ་སྟེ། ཨ་རོན་གྱི་བུ་ནི་ཨེ་ལི་ཨ་ཟར་ཡིན་པ་དང་། ཨེ་ལི་ཨ་ཟར་གྱི་བུ་ནི་ཕི་ནེ་ཧེ་དང་། ཕི་ནེ་ཧེ་ཡི་བུ་ནི་ཨ་བི་ཤུ་ཨ་ཡིན།
1CH 6:51 ཨ་བི་ཤུ་ཨ་ཡི་བུ་ནི་པུག་ཀི་ཡིན་པ་དང་། པུག་ཀིའི་བུ་ནི་ཨུ་ཟི་ཡིན་ལ། ཨུ་ཟིའི་བུ་ནི་ཟེ་རཱ་ཡཱ་ཡིན།
1CH 6:52 ཟེ་རཱ་ཡཱ་ཡི་བུ་ནི་མེ་ར་ཡོད་ཡིན་པ་དང་། མེ་ར་ཡོད་ཀྱི་བུ་ནི་ཨ་མར་ཡཱ་ཡིན་ལ། ཨ་མར་ཡཱའི་བུ་ནི་ཨ་ཧི་ཏུབ་ཡིན།
1CH 6:53 ཨ་ཧི་ཏུབ་ཀྱི་བུ་ནི་ཟཱ་ཏོག་ཡིན་པ་དང་། ཟཱ་ཏོག་གི་བུ་ནི་ཨ་ཧི་མཱ་ཨ་སི་ཡིན་ནོ། །
1CH 6:54 ཡང་ཁོ་རྣམས་ཀྱི་མངའ་ཁོངས་སུ་ཁོ་རྣམས་སྒར་ས་བཞིན་གནས་པའི་ཡུལ་རྣམས་ནི་འདི་ལྟར། ཀོ་ཧད་པའི་ཁྲོད་ཨ་རོན་གྱི་བུ་རབས་ཚ་རྒྱུད་ཀྱིས་རྒྱན་བླངས་ནས་ཐོབ་པ་ཡིན་ཏེ།
1CH 6:55 ཡེས་ར་ཨེལ་པ་རྣམས་ཀྱིས་ཡ་ཧུ་དཱའི་ཡུལ་གྱི་ཧེབ་རོན་དང་དེའི་མཐའ་འཁོར་གྱི་རྩྭ་ས་དག་ཁོ་རྣམས་ལ་སྤྲད་ཀྱང་།
1CH 6:56 གྲོང་ཁྱེར་དེའི་ཞིང་ས་དང་དེར་གཏོགས་པའི་གྲོང་ཚོ་རྣམས་ནི་ཡེ་ཕུན་ནེའི་བུ་ཀཱ་ལེབ་ལ་སྤྲད་པའོ། །
1CH 6:57 ཡེས་ར་ཨེལ་པ་རྣམས་ཀྱིས་སྐྱབས་བཅོལ་གྲོང་ཁྱེར་ཏེ་ཧེབ་རོན་ནི་ཨ་རོན་གྱི་བུ་རབས་ཚ་རྒྱུད་རྣམས་ལ་སྤྲད་པ་དང་། ཡང་ལིབ་ནཱ་དང་དེའི་རྩྭ་ས་དང་། ཡད་ཏིར་དང་དེའི་རྩྭ་ས། ཨེ་སི་ཏེ་མོ་ཨ་དང་དེའི་རྩྭ་ས།
1CH 6:58 ཧི་ལོན་དང་དེའི་རྩྭ་ས། དི་བིར་དང་དེའི་རྩྭ་ས།
1CH 6:59 ཨ་ཤན་དང་དེའི་རྩྭ་ས། པེད་ཤེ་མེ་སི་དང་དེའི་རྩྭ་ས་བཅས་ཀྱང་ཡོད་དོ། །
1CH 6:60 ཡང་པེན་ཡཱ་མེན་ཚོ་པ་ལས། གེ་བཱ་དང་དེའི་རྩྭ་ས་དང་། ཨལ་ལེ་མེད་དང་དེའི་རྩྭ་ས། ཨ་ན་ཐོད་དང་དེའི་རྩྭ་ས་བཅས་ཀྱང་ཨ་རོན་གྱི་བུ་རབས་ཚ་རྒྱུད་རྣམས་ལ་སྤྲད་པ་དང་། དེ་དག་གི་རིགས་རྒྱུད་སོ་སོར་བསྡོམས་པས་གྲོང་ཁྱེར་བཅུ་གསུམ་ཐོབ་པ་ཡིན།
1CH 6:61 ཡང་ཀོ་ཧད་པའི་ཁྱིམ་རྒྱུད་ལྷག་ལུས་རྣམས་ཀྱི་བུ་རབས་ཚ་རྒྱུད་རྣམས་ལ་རྒྱན་འཕངས་པ་དང་། མཱ་ན་ཤེའི་ཚོ་པ་ཕྱེད་ཀ་ལས་གྲོང་ཁྱེར་བཅུ་ཐོབ་བོ། །
1CH 6:62 ཡང་གེར་ཤོན་གྱི་བུ་རབས་ཚ་རྒྱུད་རྣམས་ལ་རང་གི་ཁྱིམ་རྒྱུད་བཞིན་དུ། ཡེས་སི་ཀཱར་གྱི་ཚོ་པ་དང་། ཨ་ཤེར་གྱི་ཚོ་པ། ནཱབ་ཐ་ལིའི་ཚོ་པ། པཱ་ཤན་ལ་གནས་པའི་མཱ་ན་ཤེའི་ཚོ་པ་བཅས་ལས་གྲོང་ཁྱེར་བཅུ་གསུམ་ཐོབ་བོ། །
1CH 6:63 ཡང་མཱ་རཱ་རེའེ་ཡི་བུ་རབས་ཚ་རྒྱུད་རྣམས་ལ་རྒྱན་འཕངས་ནས། རང་གི་ཁྱིམ་རྒྱུད་བཞིན་དུ། རུ་བེན་གྱི་ཚོ་པ་དང་། གཱ་རྡུའི་ཚོ་པ། ཟེ་བུ་ལུན་གྱི་ཚོ་པ་བཅས་ལས་གྲོང་ཁྱེར་བཅུ་གཉིས་ཐོབ་བོ། །
1CH 6:64 ཡེས་ར་ཨེལ་པ་རྣམས་ཀྱིས་གྲོང་ཁྱེར་དེ་དག་དང་དེའི་རྩྭ་ས་བཅས་ནི་ལེ་ཝི་པ་རྣམས་ལ་བགོས་པ་དང་།
1CH 6:65 ཡང་ཡ་ཧུ་དཱའི་ཚོ་པ་དང་། སི་མུ་ཨོན་གྱི་ཚོ་པ་དང་། པེན་ཡཱ་མེན་གྱི་ཚོ་པ་བཅས་ལས་རྒྱན་བླངས་ནས་གོང་གི་མིང་བརྗོད་ཟིན་པའི་གྲོང་ཁྱེར་ཡང་དེ་རྣམས་ལ་སྤྲད།
1CH 6:66 ཡང་ཀོ་ཧད་ཀྱི་བུ་རབས་ཚ་རྒྱུད་དག་གི་ཁྱིམ་རྒྱུད་ཁྲོད་ཀྱི་འགའ་ཤས་ལ་ཨེ་ཕཱར་ཡིམ་གྱི་ཚོ་པ་ལས་ཀྱང་དེ་དག་མངའ་འོག་གི་གྲོང་ཁྱེར་རྣམས་ཐོབ་བོ། །
1CH 6:67 ཡེས་ར་ཨེལ་པ་རྣམས་ཀྱིས་ཡང་སྐྱབས་བཅོལ་གྲོང་ཁྱེར་ཏེ། ཨེ་ཕཱར་ཡིམ་གྱི་རི་ཁུལ་གྱི་སི་ཀེམ་དང་དེའི་རྩྭ་ས་རྣམས་དེ་དག་ལ་སྤྲད་པ་དང་། ཡང་གེ་ཟེར་དང་དེའི་རྩྭ་ས་རྣམས་དང་།
1CH 6:68 ཡོག་མེ་ཨམ་དང་དེའི་རྩྭ་ས་རྣམས་དང་། པེད་ཧོ་རོན་དང་དེའི་རྩྭ་ས་རྣམས་དང་།
1CH 6:69 ཨ་ཡཱ་ལོན་དང་དེའི་རྩྭ་ས་རྣམས་དང་། གཱད་རིམ་མོན་དང་དེའི་རྩྭ་ས་རྣམས་ཀྱང་ཡོད་དོ། །
1CH 6:70 ཡེས་ར་ཨེལ་པ་རྣམས་ཀྱིས་ཡང་མཱ་ན་ཤེའི་ཚོ་པ་ཕྱེད་ཀ་ལས། ཨ་ནེར་དང་དེའི་རྩྭ་ས་རྣམས་དང་། པིལ་ཨམ་དང་དེའི་རྩྭ་ས་རྣམས་ནི་ཀོ་ཧད་པའི་ཁྱིམ་རྒྱུད་འཕྲོ་མ་རྣམས་ལ་སྤྲད་དོ། །
1CH 6:71 ཡང་མཱ་ན་ཤེའི་ཚོ་པ་ཕྱེད་ཀའི་ཁྱིམ་རྒྱུད་ལས། པཱ་ཤན་གྱི་གོ་ལན་དང་དེའི་རྩྭ་ས་རྣམས་དང་། ཨ་ཤཱ་ཐ་རོད་དང་དེའི་རྩྭ་ས་རྣམས་གེར་ཤོན་གྱི་བུ་རབས་ཚ་རྒྱུད་ལ་སྤྲད་དོ། །
1CH 6:72 ཡང་ཡེས་སི་ཀཱར་གྱི་ཚོ་པ་ལས། ཀེ་དེ་སི་དང་དེའི་རྩྭ་ས་རྣམས་དང་། ད་བེ་རད་དང་དེའི་རྩྭ་ས་རྣམས་དང་།
1CH 6:73 རཱ་མོད་དང་དེའི་རྩྭ་ས་རྣམས་དང་། ཨ་ནེམ་དང་དེའི་རྩྭ་ས་རྣམས་དང་།
1CH 6:74 ཨ་ཤེར་གྱི་ཚོ་པ་ལས། མ་ཤལ་དང་དེའི་རྩྭ་ས་རྣམས་དང་། ཨབ་དོན་དང་དེའི་རྩྭ་ས་རྣམས་དང་།
1CH 6:75 ཧུ་ཀོག་དང་དེའི་རྩྭ་ས་རྣམས་དང་། རེ་ཧོབ་དང་དེའི་རྩྭ་ས་རྣམས་དང་།
1CH 6:76 ནཱབ་ཐ་ལིའི་ཚོ་པ་ལས། ག་ལིལ་ཡུལ་ལ་གཏོགས་པའི་ཀེ་དེ་སི་དང་དེའི་རྩྭ་ས་རྣམས་དང་། ཧམ་མོན་དང་དེའི་རྩྭ་ས་རྣམས་དང་། ཀིར་ཡ་ཏ་ཨིམ་དང་དེའི་རྩྭ་ས་རྣམས་ཐོབ་བོ། །
1CH 6:77 ཟེ་བུ་ལུན་གྱི་ཚོ་པ་ལས། རིམ་མོ་ནོ་དང་དེའི་རྩྭ་ས་རྣམས་དང་། ཐ་པོར་དང་དེའི་རྩྭ་ས་རྣམས་མཱ་རཱ་རེའེ་ཡི་བུ་རྒྱུད་ལྷག་ལུས་རྣམས་ལ་སྤྲད་པ་དང་།
1CH 6:78 ཡང་ཡོར་དན་གཙང་པོའི་ཕ་རོལ་ཏུ། ཡེ་རུ་ཀོ་ཡི་དྲང་ཐད་དེ་ཡོར་དན་གཙང་པོའི་ཤར་ཕྱོགས་སུ། རུ་བེན་གྱི་ཚོ་པ་ལས་དབེན་སྟོང་དུ་ཡོད་པའི་པེ་ཙེར་དང་དེའི་རྩྭ་ས་རྣམས་དང་། ཡ་ཙཱ་དང་དེའི་རྩྭ་ས་རྣམས་དང་།
1CH 6:79 ཀེ་དེ་མོད་དང་དེའི་རྩྭ་ས་རྣམས་དང་། མེ་ཕཱ་ཨད་དང་དེའི་རྩྭ་ས་རྣམས་དང་།
1CH 6:80 གཱ་རྡུའི་ཚོ་པ་ལས། གིལ་ཨད་ཀྱི་རཱ་མོད་དང་དེའི་རྩྭ་ས་རྣམས་དང་། མཱ་ཧ་ནཱ་ཡིམ་དང་དེའི་རྩྭ་ས་རྣམས་དང་།
1CH 6:81 ཧེ་སི་པོན་དང་དེའི་རྩྭ་ས་རྣམས་དང་། ཡཱ་ཟེར་དང་དེའི་རྩྭ་ས་རྣམས་ཐོབ་བོ། །
1CH 7:1 ཡེས་སི་ཀཱར་གྱི་བུ་ནི་ཐོ་ལཱ་དང་ཕུ༌བཱ། ཡ་ཤུབ། ཤིམ་རོན་བཅས་བསྡོམས་པས་བཞིའོ། །
1CH 7:2 ཐོ་ལཱའི་བུ་ནི་ཨུ་ཟི་དང་རེ་ཕཱ་ཡ། ཡེ་རི་ཨེལ། ཡ་མ་ཨི། ཡིབ་སམ། སཱ་མུ་ཨེལ་བཅས་ཡིན་ལ། དེ་ཐམས་ཅད་ནི་ཐོ་ལཱ་ཁྱིམ་རྒྱུད་ཀྱི་འགོ་དཔོན་ཡིན་པ་དང་། ཁོ་རྣམས་ཀྱི་མི་རབས་དེའི་དམག་མི་དཔའ་རྩལ་ཅན་རྣམས་ཡིན། དཱ་བིད་ཀྱི་དུས་སུ་སླེབས་པ་ན་དེ་དག་གི་མི་གྲངས་བསྡོམས་པས་ཉིས་ཁྲི་ཉིས་སྟོང་དྲུག་བརྒྱ་ཡོད།
1CH 7:3 ཡང་ཨུ་ཟིའི་བུ་ནི་ཡིས་རག་ཡཱ་ཡིན་ལ། ཡིས་རག་ཡཱའི་བུ་ནི་མེའ་ཀཱ་ཨེལ་དང་ཨོ་བད་ཡཱ། ཡོ་ཨེལ། ཡིས་ཤི་ཡཱ་བཅས་བསྡོམས་པས་ལྔ་ཡོད། དེ་ཐམས་ཅད་ཁྱིམ་རྒྱུད་སོ་སོའི་འགོ་དཔོན་ཡིན་ནོ། །
1CH 7:4 ད་དུང་དེ་དག་གི་ཁྲོད་དུ་རང་རང་གི་རུས་རྒྱུད་དང་ཁྱིམ་རྒྱུད་བཞིན་དུ། དམག་འཐབ་ལ་ཞུགས་ནུས་པའི་དམག་དཔུང་མི་སུམ་ཁྲི་དྲུག་སྟོང་ཡོད་ཅིང་། གང་ལ་ཞེ་ན། དེ་རྣམས་ལ་ཆུང་མ་དང་བུ་ཧ་ཅང་མང་པོ་ཡོད་པས་སོ། །
1CH 7:5 དེ་དག་གི་སྤུན་རྣམས་ནི་ཡེས་སི་ཀཱར་གྱི་རིགས་རྒྱུད་ཐམས་ཅད་ཀྱི་ཁྲོད་དུ་དམག་མི་དཔའ་རྩལ་ཅན་ཡིན་ལ། ཁྱིམ་རབས་བཞིན་ཐོ་བརྒྱབ་པ་བསྡོམས་པས་བརྒྱད་ཁྲི་བདུན་སྟོང་ཡོད་དོ། །
1CH 7:6 པེན་ཡཱ་མེན་གྱི་བུ་ནི་པེ་ལཱ་དང་པེ༌ཀེར། ཡེ་དི་ཡཱ་ཨེལ་བཅས་བསྡོམས་པས་གསུམ་མོ། །
1CH 7:7 པེ་ལཱ་ཡི་བུ་ནི་ཨེ་ཙེ་བོན་དང་ཨུ་ཟི། ཨུ་ཟི་ཨེལ། ཡེ་རི་མོད། ཨི་རི་བཅས་བསྡོམས་པས་ལྔའོ། །དེ་ཐམས་ཅད་ཁྱིམ་རྒྱུད་སོ་སོའི་འགོ་དཔོན་དང་དམག་མི་དཔའ་རྩལ་ཅན་རྣམས་ཡིན་ལ། ཁྱིམ་རབས་བཞིན་ཐོ་བརྒྱབ་པ་བསྡོམས་པས་མི་ཉིས་ཁྲི་ཉིས་སྟོང་སོ་བཞི་ཡོད་དོ། །
1CH 7:8 པེ༌ཀེར་གྱི་བུ་ནི་ཟེ་མི་རཱ་དང་ཡོ་ཨ་སི། ཨེ་ལི་ཨེ་བཟིར། ཨེལ་ཡོ་ཨེ་ན་ཨི། ཨོམ་རི། ཡེ་རེ་མོད། ཨ་བི་ཡཱ། ཨ་ན་ཐོད། ཨ་ལེ་མེད་བཅས་ཡིན་ལ། དེ་ཐམས་ཅད་ནི་པེ་ཀེར་གྱི་བུའོ། །
1CH 7:9 དེ་ཐམས་ཅད་ནི་ཁྱིམ་རྒྱུད་སོ་སོའི་འགོ་དཔོན་དང་དམག་མི་དཔའ་རྩལ་ཅན་རྣམས་ཡིན་ལ། ཁྱིམ་རབས་བཞིན་ཐོ་བརྒྱབ་པ་བསྡོམས་པས་མི་ཉིས་ཁྲི་ཉིས་བརྒྱ་ཡོད་དོ། །
1CH 7:10 ཡེ་དི་ཡཱ་ཨེལ་གྱི་བུ་ནི་པིལ་ཧན་ཡིན་ལ། པིལ་ཧན་གྱི་བུ་ནི་ཡེ་ཨུ་སི་དང་པེན་ཡཱ་མེན། ཡེ་ཧུད། ཀེ་ན་ཨ་ནཱ། ཟེ་ཐན། ཐཱར་ཞིས། ཨ་ཧི་ཤ་ཧར་བཅས་ཡིན་ལ།
1CH 7:11 དེ་ཐམས་ཅད་ནི་ཡེ་དི་ཡཱ་ཨེལ་གྱི་བུ་ཡིན་པ་དང་། ཁྱིམ་རྒྱུད་སོ་སོའི་འགོ་དཔོན་དང་དམག་མི་དཔའ་རྩལ་ཅན་རྣམས་ཡིན་ལ། དམག་འཐབ་ལ་ཞུགས་ནུས་པ་བསྡོམས་པས་མི་ཆིག་ཁྲི་བདུན་སྟོང་ཉིས་བརྒྱ་ཡོད་དོ། །
1CH 7:12 ཡང་ཨིར་གྱི་བུ་ཤུབ་ཕིམ་དང་ཧུ༌ཕིམ་གཉིས་དང་། ཨ་ཧེར་གྱི་བུ་ཧུ་ཤིམ་བཅས་ཡོད་དོ། །
1CH 7:13 ཡང་ནཱབ་ཐ་ལིའི་བུ་ནི་ཡ་ཙི་ཨེལ་དང་གུ༌ནེ། ཡེ༌ཚིར། ཤལ་ལུམ་བཅས་ཡིན་ལ། དེ་ཐམས་ཅད་ནི་པིལ་ཧའི་བུ་རབས་ཚ་རྒྱུད་དོ། །
1CH 7:14 མཱ་ན་ཤེའི་བུ་ཨ་སི་རི་ཨེལ་ནི་ཁོའི་ཆུན་མ་ཨ་རམ་པའི་བུད་མེད་ལས་སྐྱེས་ཤིང་། མོས་གིལ་ཨད་ཀྱི་ཕ་མཱ་ཀིར་ཞེས་པའང་བཙས་པའོ། །
1CH 7:15 མཱ་ཀིར་གྱིས་ཆུང་མ་ཞིག་བླངས་པ་ནི་ཧུ༌ཕིམ་དང་ཤུབ་ཕིམ་གཉིས་ཀྱི་སྲིང་མོ་ཡིན་ཞིང་མིང་ལ་མ་ཨ་ཀཱ་ཞེས་བྱའོ། །མཱ་ན་ཤེའི་བུ་གཉིས་པའི་མིང་ལ་ཚེ་ལོ་ཕེ་ཧད་ཅེས་བྱ་སྟེ་ཚེ་ལོ་ཕེ་ཧད་ལ་བུ་མོ་འགའ་ལས་མ་སྐྱེས་སོ། །
1CH 7:16 མཱ་ཀིར་གྱི་ཆུང་མ་མ་ཨ་ཀཱ་ལ་བུ་ཞིག་སྐྱེས་ཏེ། མོས་དེའི་མིང་ལ་ཕེ་རེ་སི་ཞེས་བཏགས་ཤིང་། དེའི་ནུ་བོའི་མིང་ལ་ཤེ་རེ་སི་ཞེས་བྱའོ། །ཤེ་རེ་སིའི་བུ་ནི་ཨུ་ལམ་དང་རཱ་ཀེམ་ཡིན་ནོ། །
1CH 7:17 ཨུ་ལམ་གྱི་བུ་ནི་པེ་དན་ཡིན་ལ། དེ་ཐམས་ཅད་གིལ་ཨད་ཀྱི་བུ་རབས་ཚ་རྒྱུད་ཡིན་པ་དང་། གིལ་ཨད་ནི་མཱ་ཀིར་གྱི་བུ་ཡིན་ལ། མཱ་ཀིར་ནི་མཱ་ན་ཤེའི་བུའོ། །
1CH 7:18 ཡང་གིལ་ཨད་ཀྱི་སྲིང་མོ་ཧམ་མོ་ལེ་ཁེད་ལས་ཨི་སི་ཧོད་དང་ཨ་བི་ཨེ་ཟཱེར། མཱ་ལཱ་བཅས་སྐྱེས་སོ། །
1CH 7:19 ཤེ་མི་ད་ཡི་བུ་ནི་ཨ་ཧ་ཡན་དང་ཤེ་ཀེམ། ལིག་ཧི། ཨ་ནི་ཡམ་བཅས་ཡིན་ནོ། །
1CH 7:20 ཨེ་ཕཱར་ཡིམ་གྱི་བུ་ནི་ཤུ་ཏེ་ལཱ་ཡིན་པ་དང་། ཤུ་ཏེ་ལཱ་ཡི་བུ་ནི་པེ་རེད་ཡིན་ལ། པེ་རེད་ཀྱི་བུ་ནི་ཐ་ཧད་དང་། ཐ་ཧད་ཀྱི་བུ་ནི་ཨེལ་ཨ་ཐ་དང་། ཨེལ་ཨ་ཐ་ཡི་བུ་ནི་ཐ་ཧད་ཡིན།
1CH 7:21 ཐ་ཧད་ཀྱི་བུ་ནི་ཟཱ་བད་ཡིན་པ་དང་། ཟཱ་བད་ཀྱི་བུ་ནི་ཤུ་ཏེ་ལཱ་ཡིན་ནོ། །ཨེ་ཕཱར་ཡིམ་ གྱི་བུ་ཨེ་ཟེར་དང་ཨེལ་ཨད་གཉིས་མར་སོང་ནས་གཱད་པའི་ཕྱུགས་ཟོག་ཕྲོགས་པས། ཡུལ་དེའི་གཞིས་སྐྱེས་གཱད་པ་རྣམས་ཀྱིས་བསད་པ་ཡིན།
1CH 7:22 དེ་དག་གི་ཕ་ཨེ་ཕཱར་ཡིམ་གྱིས་ཉིན་མང་པོར་མྱ་ངན་བྱས་པ་དང་། དེའི་སྤུན་རྣམས་འོངས་ནས་ཁོ་ལ་སེམས་གསོ་བྱས་པའོ། །
1CH 7:23 དེ་ནས་ཨེ་ཕཱར་ཡིམ་རང་གི་ཆུང་མ་དང་འགྲོགས་ནས་མོ་མངལ་དང་ལྡན་པར་གྱུར་ཏེ་བུ་ཞིག་བཙས་པ་ལ། ཨེ་ཕཱར་ཡིམ་གྱིས་བུ་ཡི་མིང་ལ་པེ་རེ་ཡཱ་ཞེས་བཏགས་པ་སྟེ། ཅི་ལ་ཞེ་ན། ཁོའི་ཁྱིམ་དུ་རྐྱེན་ངན་བྱུང་བའི་ཕྱིར་རོ། །
1CH 7:24 ཁོའི་བུ་མོ་ནི་ཤེ་ཨེ་རཱ་ཡིན་ལ། པེད་ཧོ་རོན་གོང་འོག་དང་། ཨུ་ཟེན་ཤེ་ཨེ་རཱ་བཅས་རྩིག་མཁན་ཡིན་ནོ། །
1CH 7:25 པེ་རེ་ཡཱ་ཡི་བུ་ནི་རེ་ཕཱ་དང་རེ་ཤེབ་ཡིན་ལ། རེ་ཤེབ་ཀྱི་བུ་ནི་ཏེ་ལཱ་དང་། ཏེ་ལཱའི་བུ་ནི་ཐ་ཧན་ཡིན།
1CH 7:26 ཐ་ཧན་གྱི་བུ་ནི་ལཱ་དན་ཡིན་ལ། ལཱ་དན་གྱི་བུ་ནི་ཨམ་མེ་ཧུད་ཡིན་པ་དང་། ཨམ་མེ་ཧུད་ཀྱི་བུ་ནི་ཨེ་ལི་ཤ་མཱ་ཡིན།
1CH 7:27 ཨེ་ལི་ཤ་མཱའི་བུ་ནི་ནུན་ཡིན་པ་དང་། ནུན་གྱི་བུ་ནི་ཡོ་ཤུ་ཨ་ཡིན་ནོ། །
1CH 7:28 ཨེ་ཕཱར་ཡིམ་པའི་ཡུལ་དང་སྡོད་གནས་ནི་པེད་ཨེལ་དང་དེའི་གྲོང་ཚོ་རྣམས་དང་། ཤར་དུ་ན་ཨ་རན་དང་། ནུབ་ཏུ་གེ་ཟེར་དང་དེའི་གྲོང་ཚོ་རྣམས་དང་། སི་ཀེམ་དང་དེའི་གྲོང་ཚོ་རྣམས་དང་། ཨ་ཡཱ་དང་དེའི་གྲོང་ཚོ་རྣམས་ཡིན་ལ།
1CH 7:29 ད་དུང་མཱ་ན་ཤེ་ཚོ་པའི་ས་མཚམས་དང་ཉེ་སར། པེད་ཤེ་ཨན་དང་དེའི་གྲོང་ཚོ་རྣམས་དང་། ཐ་ཨ་ནག་དང་དེའི་གྲོང་ཚོ་རྣམས་དང་། མེ་གིད་དོ་དང་དེའི་གྲོང་ཚོ་རྣམས་དང་། དཱོར་དང་དེའི་གྲོང་ཚོ་རྣམས་ཡོད་པའོ། །ཡེས་ར་ཨེལ་གྱི་བུ་ཡོ་སེབ་ཀྱི་བུ་རབས་ཚ་རྒྱུད་རྣམས་ཡུལ་དེ་རྣམས་སུ་བསྡད་པ་ཡིན་ནོ། །
1CH 7:30 ཨ་ཤེར་གྱི་བུ་ནི་ཡིམ་ནཱ་དང་ཡེས་བཱ། ཡེས་བི། པེ་རེ་ཡཱ་བཅས་ཡིན་ལ། ད་དུང་དེ་དག་གི་སྲིང་མོ་སེ་རཱ་ཡང་ཡོད།
1CH 7:31 པེ་རེ་ཡཱའི་བུ་ནི་ཧེ་བེར་དང་མཱལ་ཀི་ཨེལ་ཡིན་ལ། མཱལ་ཀི་ཨེལ་ནི་པིར་ཟ་ཡིད་ཀྱི་ཕའོ། །
1CH 7:32 ཧེ་བེར་ལས་ཡབ་ལེད་དང་ཤོ་མེར། ཧོ་ཐམ། དེ་དག་གི་སྲིང་མོ་ཤུ་ཨ་བཅས་མཆེད་པའོ། །
1CH 7:33 ཡབ་ལེད་ཀྱི་བུ་ནི་ཕཱ་སག་དང་པིམ་ཧལ། ཨ་ཤ་ཝད་བཅས་ཡིན་ལ། དེ་དག་ནི་ཡབ་ལེད་ཀྱི་བུ་ཡིན་ནོ། །
1CH 7:34 ཤེ་མེར་གྱི་བུ་ནི་ཨ་ཧི་དང་རོ་གཱ། ཡེ་ཧུབ་བཱ། ཨ་རམ་བཅས་ཡིན།
1CH 7:35 ཤེ་མེར་གྱི་སྤུན་ཧེ་ལེམ་གྱི་བུ་ནི་ཙོ་ཕཱ་དང་ཡིམ་ནཱ། ཤེ་ལེ་སི། ཨ་མལ་བཅས་ཡིན།
1CH 7:36 ཙོ་ཕཱ་ཡི་བུ་ནི་སུ་ཨ་དང་ཧར་ནེ་ཕེར། ཤུ་ཨལ། པེ་རི། ཡིམ་རཱ།
1CH 7:37 པེ་ཙེར། ཧོད། ཤམ་མཱ། ཤིལ་ཤུ། ཡིད་རཱན། པེ་ཨེ་རཱ་བཅས་ཡིན་ནོ། །
1CH 7:38 ཡེ་ཐེར་གྱི་བུ་ནི་ཡེ་ཕུན་ནེ་དང་ཕི་སི་ཕཱ། ཨ་རཱ་བཅས་ཡིན།
1CH 7:39 ཡུལ་ལཱའི་བུ་ནི་ཨ་རཱ་དང་ཧན་ནི་ཨེལ། རི་ཟི་ཡཱ་བཅས་ཡིན་ནོ། །
1CH 7:40 དེ་ཐམས་ཅད་ནི་ཨ་ཤེར་གྱི་བུ་རབས་ཚ་རྒྱུད་དེ། ཁོ་ཚོའི་ཁྱིམ་རྒྱུད་སོ་སོའི་འགོ་དཔོན་དང་དམག་མི་ཕུལ་བྱུང་དཔའ་རྩལ་ཅན་དང་། འགོ་དཔོན་རྣམས་ཀྱི་གཙོ་བོར་གྱུར་པ་ཡིན། ཁྱིམ་རབས་བཞིན་ཐོ་བརྒྱབ་པའི་མི་གྲངས་ཏེ། དམག་འཐབ་ལ་ཞུགས་ནུས་པ་བསྡོམས་པས་མི་ཉིས་ཁྲི་དྲུག་སྟོང་ཡོད་པའོ། །
1CH 8:1 ཡང་པེན་ཡཱ་མེན་ལས་བུ་སྐྱེས་འགོ་པེ་ལཱ་དང་། བུ་གཉིས་པ་ཨ་ཤ༌བེལ། བུ་གསུམ་པ་ཨ་ཧ་རཱ།
1CH 8:2 བུ་བཞི་པ་ནོ་ཧཱ། བུ་ལྔ་པ་ར་ཕཱ་བཅས་མཆེད་དོ། །
1CH 8:3 ཡང་པེ་ལཱ་ཡི་བུ་ནི་ཨད་དར་དང་། གེ་རཱ། ཨ་བི་ཧུད།
1CH 8:4 ཨ་བི་ཤུ་ཨ། ནཱ་ཨ༌མཱན། ཨ་ཧོ་ཨ།
1CH 8:5 གེ་རཱ། ཤེ་ཕུ་ཕན། ཧུ་རཱམ་བཅས་སོ། །
1CH 8:6 ཡང་འདི་རྣམས་ནི་ཨེ་ཧུད་ཀྱི་བུ་རབས་ཚ་རྒྱུད་རྣམས་ཡིན་ཏེ། ཁོ་རྣམས་ནི་གེ་བཱ་རུ་གཞིས་ཆགས་པའི་ཁྱིམ་རྒྱུད་སོ་སོའི་འགོ་དཔོན་ཡིན་ལ། སྔར་མཱ་ན་ཧད་དུ་སྤྱུགས་པའོ། །
1CH 8:7 ཨེ་ཧུད་ཀྱི་བུ་ནི་ནཱ་ཨ༌མཱན་དང་། ཨ་ཧི་ཡཱ། གེ་རཱ་བཅས་ཡིན་ལ། གེ་རཱ་ཡིས་ཁོ་རྣམས་སྤྱུགས་པ་ཡིན་ནོ། །དེ་ལས་ཨུ་ཟཱ་དང་ཨ་ཧི་ཧུད་མཆེད་དོ། །
1CH 8:8 ཡང་ཤཱ་ཧ་ར་ཨིམ་གྱིས་རང་གི་ཆུང་མ་ཧུ་ཤིམ་དང་པཱ་ཨ་ར་གཉིས་དོར་རྗེས། མོ་ཨབ་ཡུལ་དུ་བུ་རྣམས་སྐྱེས་སོ། །
1CH 8:9 དེའི་ཆུང་མ་ཧོ་དེ་སི་ལས་ཡོ་བཱབ་དང་། ཙིབ་ཡཱ། མེ་ཤཱ། མཱལ་ཀམ།
1CH 8:10 ཡེ་ཨུ་ཟི། སག་ཡཱ། མིར་མཱ་བཅས་མཆེད་དེ། དེའི་བུ་འདི་ཐམས་ཅད་ནི་ཁྱིམ་རྒྱུད་དག་གི་འགོ་དཔོན་ཡིན།
1CH 8:11 ཧུ་ཤིམ་ལས་ཁོ་ལ་ཨ་བི་ཏུབ་དང་ཨེལ་ཕཱ་ཨལ་གཉིས་མཆེད་དེ།
1CH 8:12 ཨེལ་ཕཱ་ཨལ་གྱི་བུ་ནི་ཨེ་བེར་དང་། མེ་ཤཱམ། ཤེ་མེད་བཅས་ཡིན་ལ། ཤེ་མེད་ཀྱིས་ཨོ་ནོ་དང་ལོད་གཉིས་དང་། གྲོང་ཁྱེར་དེ་གཉིས་ཀའི་གྲོང་ཚོ་རྣམས་བརྩིགས་སོ། །
1CH 8:13 ད་དུང་པེ་རེ་ཡཱ་དང་ཤེ་མཱ་གཉིས་ཀྱང་ཡོད་ལ། ཁོ་རྣམས་ནི་ཨ་ཡཱ་ལོན་དུ་གཞིས་ཆགས་པའི་ཁྱིམ་རྒྱུད་སོ་སོའི་འགོ་དཔོན་ཡིན་ཞིང་། དེ་གཉིས་ཀྱིས་གཱད་པ་རྣམས་ཕྱིར་བསྐྲད་པ་ཡིན།
1CH 8:14 ཡང་པེ་རེ་ཡཱ་ཡི་བུ་ནི་ཨ་ཧི་ཡོ་དང་། ཤཱ་ཤག ཡེ་རེ་མོད།
1CH 8:15 ཟེ་བད་ཡཱ། ཨ་རད། ཨེ་དེར།
1CH 8:16 མེའ་ཀཱ་ཨེལ། ཡིས་ཕཱ། ཡོ་ཧ་བཅས་ཡིན་ནོ། །
1CH 8:17 ཡང་ཨེལ་ཕཱ་ཨལ་གྱི་བུ་ནི་ཟེ་བད་ཡཱ་དང་། མཱེ་ཤུལ་ལིམ། ཧི་སི་ཀི། ཧེ་བེར།
1CH 8:18 ཡིས་མེ་ར་ཨི། ཡི་ཟ་ལི་ཡཱ། ཡོ་བཱབ་བཅས་སོ། །
1CH 8:19 ཤིམ་ཨི་ཡི་བུ་ནི་ཡཱ་ཀིམ་དང་། ཟིག་རི། ཟབ་དི།
1CH 8:20 ཨེ་ལི་ཨེ་ན་ཨི། ཙིལ་ལེ་ཐ་ཨི། ཨེ་ལི་ཨེལ།
1CH 8:21 ཨ་དཱ་ཡ། པེ་ར་ཡཱ། ཤིམ་རད་བཅས་སོ། །
1CH 8:22 ཤཱ་ཤག་གི་བུ་ནི་ཡིས་པན་དང་། ཨེ་བེར། ཨེ་ལི་ཨལ།
1CH 8:23 ཨབ་དོན། ཟིག་རི། ཧ་ནན།
1CH 8:24 ཧ་ནན་ཡཱ། ཨེ་ལཱམ། ཨན་ཐོ་ཐི་ཡཱ།
1CH 8:25 ཡིབ་དེ་ཡཱ། ཕེ་ནུ་ཨེལ་བཅས་སོ། །
1CH 8:26 ཡེ་རོ་ཧམ་གྱི་བུ་ནི་ཤམ་ཤེ་ར་ཨི་དང་། ཤེ་ཧར་ཡཱ། ཨ་ཐལ་ཡཱ།
1CH 8:27 ཡ་ཨ་རེ་ཤི་ཡཱ། ཨེ་ལི་ཡཱ། ཟིག་རི་བཅས་སོ། །
1CH 8:28 དེ་རྣམས་ནི་ཁྱིམ་རབས་བཞིན་དུ་ཐམས་ཅད་རང་རང་གི་ཁྱིམ་རྒྱུད་སོ་སོའི་འགོ་དཔོན་ཡིན་པ་དང་། ཡེ་རུ་སཱ་ལེམ་དུ་གནས་པའི་འགོ་དཔོན་རྣམས་ཡིན་ནོ། །
1CH 8:29 ཡང་གིབ་ཡོན་ཡུལ་དུ་སྡོད་པ་ནི་གིབ་ཡོན་གྱི་ཕ་ཡེ་ཨི་ཨེལ་ཡོད་པ་དང་། དེའི་ཆུང་མའི་མིང་ལ་མ་ཨ་ཀཱ་ཟེར་རོ། །
1CH 8:30 དེའི་བུ་སྐྱེས་འགོ་ནི་ཨབ་དོན་ཡིན་ལ། དེ་ནས་ཙུར་དང་། ཁི་སི། པཱ་ཨལ། ནཱ་དབ།
1CH 8:31 གེ་དོར། ཨ་ཧི་ཡོ། ཟེ་ཀེར། མིག་ལོད་བཅས་ཡིན་ནོ། །
1CH 8:32 ཡང་མིག་ལོད་ལས་ཤི་མེ་ཨ་མཆེད་དེ། དེ་དག་ཀྱང་རང་གི་གཉེན་ཉེ་དང་མཉམ་དུ་ཡེ་རུ་སཱ་ལེམ་ལ་གནས་ཤིང་། ཕན་ཚུན་ཉེ་བར་གནས་པའོ། །
1CH 8:33 ནེར་ལས་ཁི་སི་མཆེད། ཁི་སི་ལས་སོ་ལོ་དང་། སོ་ལོ་ལས་ཡོ་ནཱ་ཐན་དང་། མལ་ཀི་ཤུ་ཨ། ཨ་བི་ནཱ་དབ། ཨིས་པོ་ཤེད་བཅས་མཆེད་དོ། །
1CH 8:34 ཡོ་ནཱ་ཐན་གྱི་བུ་ནི་མེ་ཕི་པོ་ཤེད་ཡིན་ལ། མེ་ཕི་པོ་ཤེད་ལས་མི་ཀཱ་མཆེད་དོ། །
1CH 8:35 མི་ཀཱ་ཡི་བུ་ནི་ཕི་ཐོན་དང་། མེ་ལེག ཐ་རེ་ཨ། ཨ་ཧ་ཟཱ་བཅས་ཡིན་ནོ། །
1CH 8:36 ཨ་ཧ་ཟཱ་ལས་ཡེ་ཧོ་ཨ་དད་མཆེད་ཅིང་། ཡེ་ཧོ་ཨ་དད་ལས་ཨ་ལེ་མེད་དང་། ཨས་མ་ཝེད། ཟིམ་རེ་བཅས་མཆེད་པ་དང་། ཟིམ་རེ་ལས་མོ་ཟི་མཆེད་དོ། །
1CH 8:37 མོ་ཟི་ལས་པི་ནེ་ཨ་མཆེད་པ་དང་། པི་ནེ་ཨ་ཡི་བུ་ནི་ར་ཕཱ་ཡིན་ལ། ར་ཕཱའི་བུ་ནི་ཨེལ་ཨ་སཱ་ཡིན། ཨེལ་ཨ་སཱའི་བུ་ནི་ཨ་ཙེལ་ཡིན།
1CH 8:38 ཡང་ཨ་ཙེལ་ལ་བུ་དྲུག་ཡོད་དེ། དེ་དག་གི་མིང་ནི་ཨས་རི་ཀམ་དང་། པོ་ཀེ་རུ། ཡེས་མ་ཨེལ། ཤེ་ཨར་ཡཱ། ཨོ་བད་ཡཱ། ཧ་ནན་བཅས་ཡིན་ལ། དེ་ཐམས་ཅད་ནི་ཨ་ཙེལ་གྱི་བུ་ཡིན་ནོ། །
1CH 8:39 ཡང་ཨ་ཙེལ་གྱི་ནུ་བོ་ཨེ་ཤེག་གི་བུ་རྣམས་ནི། བུ་སྐྱེས་འགོ་ཨུ་ལམ་དང་། བུ་གཉིས་པ་ཡེ་ཨུ་སི། བུ་གསུམ་པ་ཨེ་ལི་ཕེ་ལེད་བཅས་སོ། །
1CH 8:40 ཨུ་ལམ་གྱི་བུ་ཐམས་ཅད་དམག་མི་དཔའ་བོ་མདའ་རྩལ་ཅན་ཡིན། དེ་དག་ལ་བུ་རབས་ཚ་རྒྱུད་མང་ཞིང་བསྡོམས་པས་བརྒྱ་དང་ལྔ་བཅུ་ཡོད་ལ། དེ་ཐམས་ཅད་པེན་ཡཱ་མེན་ཚོ་པའི་ཡིན་ནོ། །
1CH 9:1 ཡེས་ར་ཨེལ་པ་ཐམས་ཅད་ནི་ཁྱིམ་རབས་བཞིན་ཐོ་བརྒྱབ་ཡོད་ཅིང་། ལྟོས་དང་། དེ་ཐམས་ཅད་ཡེས་ར་ཨེལ་གྱི་རྒྱལ་པོའི་རྒྱལ་རབས་ནང་དུ་བཀོད་ཡོད། ཡ་ཧུ་དཱ་པ་རྣམས་ནི་དད་ལོག་གི་རྐྱེན་གྱིས་པཱ་པེལ་ལོན་དུ་བཙན་ཁྲིད་བྱས་པ་ཡིན།
1CH 9:2 ཐོག་མར་ཕྱིར་ཐོན་ཏེ་རང་གི་ས་སྐལ་དང་རང་གི་གྲོང་ཁྱེར་དུ་གནས་པ་རྣམས་ནི་ཡེས་ར་ཨེལ་པ་དང་། མཆོད་དཔོན་རྣམས་དང་། ལེ་ཝི་པ་རྣམས་དང་། མཆོད་གཡོག་པ་བཅས་ཡིན།
1CH 9:3 ཡེ་རུ་སཱ་ལེམ་དུ་སྡོད་པ་ནི་ཡ་ཧུ་དཱའི་ཚོ་པ་དང་། པེན་ཡཱ་མེན་གྱི་ཚོ་པ། ཨེ་ཕཱར་ཡིམ་གྱི་ཚོ་པ། མཱ་ན་ཤེའི་ཚོ་པ་བཅས་ནས་ཐོན་པའི་མི་རྣམས་ཡིན་ནོ། །
1CH 9:4 ཡང་ཡ་ཧུ་དཱའི་བུ་ཕེ་རེལ་ཟིའི་བུ་རབས་ཚ་རྒྱུད་ཁྲོད་དུ་ཨུ་ཐ་ཨི་བྱ་བ་ཡོད་དེ། ཨུ་ཐ་ཨི་ནི་ཨམ་མེ་ཧུད་ཀྱི་བུ་ཡིན་ལ། ཨམ་མེ་ཧུད་ནི་ཨོམ་རིའི་བུ། ཨོམ་རི་ནི་ཨིམ་རིའི་བུ། ཨིམ་རི་ནི་པཱ་ནིའི་བུའོ། །
1CH 9:5 ཡང་ཞི་ལོ་པའི་ཁྲོད་དུ་བུ་སྐྱེས་འགོ་ཨ་ས་ཡཱ་དང་དེའི་བུ་རྣམས་ཡོད་ལ།
1CH 9:6 ཟེ་རག་གི་བུ་རབས་ཚ་རྒྱུད་རྣམས་ལས་ཡེ་ཨུ་ཨེལ་དང་དེའི་གཉེན་ཉེ་རྣམས་བསྡོམས་པས་དྲུག་བརྒྱ་དགུ་བཅུ་ཡོད།
1CH 9:7 པེན་ཡཱ་མེན་གྱི་བུ་རབས་ཚ་རྒྱུད་ལས་ཧ་སེ་ནུ་ཨའི་ཡང་ཚ་དང་ཧོ་དབ་ཡཱའི་ཚ་བོ་སྟེ། མཱེ་ཤུལ་ལིམ་གྱི་བུ་སལ་ལུ་ཡོད་དོ། །
1CH 9:8 ཡང་ཡེ་རོ་ཧམ་གྱི་བུ་ཡིབ་ནེ་ཡཱ་དང་། མིག་རིའི་ཚ་བོ་སྟེ་ཨུ་ཟིའི་བུ་ཨེ་ལཱ་བྱ་བ་དང་། ཡིབ་ནེ་ཡཱ་ཡི་ཡང་ཚའམ་རུའུ་ཨེལ་གྱི་ཚ་བོ་སྟེ། ཤེ་ཕད་ཡཱའི་བུ་མཱེ་ཤུལ་ལིམ་ཡོད་པ་དང་།
1CH 9:9 ཡང་ཁོ་ཚོའི་གཉེན་ཉེ་རྣམས་ཏེ། དེ་དག་གི་ཁྱིམ་རབས་བཞིན་ཐོ་བརྒྱབ་པ་བསྡོམས་པས་དགུ་བརྒྱ་དང་ལྔ་བཅུ་ང་དྲུག་ཡོད་དེ། དེ་ཐམས་ཅད་ནི་ཁོ་རྣམས་ཀྱི་ཁྱིམ་རྒྱུད་སོ་སོའི་འགོ་དཔོན་ཡིན་ནོ། །
1CH 9:10 ཡང་མཆོད་དཔོན་གྱི་ཁྲོད་དུ་ཡེ་དཱ་ཡ་དང་། ཡེ་ཧོ་ཡ་རིབ། ཡཱ་ཀིན།
1CH 9:11 ད་དུང་དཀོན་མཆོག་གི་མཆོད་ཁང་ལ་བདག་གཉེར་བྱེད་པའི་ཨ་ཟར་ཡཱ་བཅས་ཡོད། ཨ་ཟར་ཡཱ་ནི་ཧིལ་ཀི་ཡཱའི་བུ་དང་། ཧིལ་ཀི་ཡཱ་ནི་མཱེ་ཤུལ་ལིམ་གྱི་བུ། མཱེ་ཤུལ་ལིམ་ནི་ཟཱ་ཏོག་གི་བུ། ཟཱ་ཏོག་ནི་མེ་ར་ཡོད་ཀྱི་བུ། མེ་ར་ཡོད་ནི་ཨ་ཧི་ཏུབ་ཀྱི་བུའོ། །
1CH 9:12 ད་དུང་མལ་ཀི་ཡཱའི་ཡང་ཚ་སྟེ། ཕཱ་ཤུར་གྱི་ཚ་བོའམ་ཡེ་རོ་ཧམ་གྱི་བུ་ཨ་དཱ་ཡ་དང་། ཨ་དི་ཨེལ་གྱི་བུ་མ་ཨ་སཱ་ཨི་ཡང་ཡོད། ཨ་དི་ཨེལ་ནི་ཡ་ཟེ་རཱའི་བུ་དང་། ཡ་ཟེ་རཱ་ནི་མཱེ་ཤུལ་ལིམ་གྱི་བུ་དང་། མཱེ་ཤུལ་ལིམ་ནི་མེ་ཤིལ་ལེ་མིད་ཀྱི་བུ་དང་། མེ་ཤིལ་ལེ་མིད་ནི་ཨིམ་མེར་གྱི་བུའོ། །
1CH 9:13 ཡང་དེ་དག་གི་གཉེན་ཉེ་རྣམས་ཏེ་ཁོ་ཚོའི་ཁྱིམ་རྒྱུད་ཀྱི་འགོ་དཔོན་རྣམས་བསྡོམས་པས་མི་ཆིག་སྟོང་བདུན་བརྒྱ་དྲུག་ཅུ་ཡོད་ལ། དེ་ཐམས་ཅད་ནི་དཀོན་མཆོག་གི་མཆོད་ཁང་ལ་བདག་གཉེར་བྱེད་མཁས་པའི་འཇོན་ཐང་ཅན་ཡིན་ནོ། །
1CH 9:14 ཡང་ལེ་ཝི་ཚོ་པའི་མཱ་རཱ་རེའེ་ཡི་བུ་རབས་ཚ་རྒྱུད་ཁྲོད་དུ། ཧ་ཤབ་ཡཱའི་ཡང་ཚ་སྟེ། ཨས་རི་ཀམ་གྱི་ཚ་བོའམ་ཧ་ཤུབ་ཀྱི་བུ་ཤེ་མཱ་ཡ་དང་།
1CH 9:15 ཡང་པག་བག་ཀར་དང་། ཧེ་རེ་སི། ག་ལལ། ཨ་སབ་ཀྱི་ཡང་ཚ་སྟེ། ཟིག་རིའི་ཚ་བོའམ་མི་ཀཱའི་བུ་མད་ཐན་ཡཱ།
1CH 9:16 ཡང་ཡེ་དུ་ཐུན་གྱི་ཡང་ཚ་སྟེ། ག་ལལ་གྱི་ཚ་བོའམ་ཤེ་མཱ་ཡའི་བུ་ཨོ་བད་ཡཱ་དང་། ཡང་ཨེལ་ཁ་ནཱའི་ཚ་བོ་སྟེ། ཨ་སཱའི་བུ་པེ་རེག་ཡཱ་བཅས་པ་ཡོད་ལ། དེ་ཐམས་ཅད་ནེ་ཏོ་ཕཱ་པའི་གྲོང་ཚོ་རུ་གནས་པ་ཡིན།
1CH 9:17 ཡང་སྒོ་སྲུང་ནི་ཤལ་ལུམ་དང་། ཨག་ཀུབ་དང་། ཏལ་མོན་དང་། ཨ་ཧི་མན་དང་དེ་དག་གི་གཉེན་ཉེ་རྣམས་ཡོད་དེ། ཤལ་ལུམ་ནི་དེ་དག་གི་འགོ་དཔོན་ཡིན།
1CH 9:18 དེ་དག་ནི་ད་ལྟ་ད་དུང་རྒྱལ་པོའི་ཤར་སྒོ་སྲུང་མཁན་ཡིན་ཞིང་། སྔར་དེ་དག་ནི་ལེ་ཝི་པའི་སྒར་གྱི་སྒོ་སྲུང་བྱས་མྱོང་།
1CH 9:19 ཡང་ཀོ་རེད་ཀྱི་ཡང་ཚ་སྟེ། ཨེ་བི་ཡ་སབ་ཀྱི་ཚ་བོའམ་ཀོ་རེད་ཀྱི་བུ་ཤལ་ལུམ་དང་། དེའི་གཉེན་ཉེ་ཀོ་རཱག་པ་རྣམས་ཀྱིས་ལས་འགན་འཁུར་ཞིང་མཇལ་འཕྲད་གུར་མཆོག་སྲུང་བ་ཡིན། དེ་དག་གི་ཕ་མེས་རྣམས་ཀྱིས་སྔར་དཀོན་མཆོག་ཡ་ཝཱེའི་སྒར་ལ་བདག་གཉེར་བྱས་ནས་སྒོ་བསྲུངས་པའོ། །
1CH 9:20 སྔར་ཨེ་ལི་ཨ་ཟར་གྱི་བུ་ཕི་ནེ་ཧེ་དེ་དག་གི་འགོ་དཔོན་བྱས་མྱོང་ལ། དཀོན་མཆོག་ཡ་ཝཱེ་ཡང་ཁོ་དང་མཉམ་དུ་བཞུགས་པའོ། །
1CH 9:21 ཡང་མེ་ཤེ་ལེམ་ཡཱའི་བུ་ཟཱ་ཀར་ཡ་ནི་མཇལ་འཕྲད་གུར་མཆོག་གི་སྒོ་སྲུང་ཡིན་ཞིང་།
1CH 9:22 སྒོ་སྲུང་དུ་བདམས་པའི་མི་ནི་བསྡོམས་པས་ཉིས་བརྒྱ་དང་བཅུ་གཉིས་ཡོད་པ་དང་། དེ་རྣམས་རང་རང་གི་གྲོང་སྡེ་རུ་ཁྱིམ་རབས་བཞིན་ཐོ་བརྒྱབ་ཅིང་། ཁོ་རྣམས་ནི་དཱ་བིད་དང་ལུང་སྟོན་པ་སཱ་མུ་ཨེལ་གཉིས་ཀྱིས་ལས་འགན་འཁུར་དུ་བསྐོས་པ་ཡིན།
1CH 9:23 དེ་དག་དང་དེ་དག་གི་བུ་རབས་ཚ་རྒྱུད་རྣམས་ཀྱིས་ལས་རེས་བཞིན་དཀོན་མཆོག་ཡ་ཝཱེའི་བཞུགས་གནས་ཀྱི་སྒོ་སྟེ། མཇལ་འཕྲད་གུར་མཆོག་གི་སྒོ་སྲུང་ཡིན།
1CH 9:24 ཤར་ལྷོ་ནུབ་བྱང་ཕྱོགས་བཞི་རུ་སྲུང་མཁན་ཡོད་དེ།
1CH 9:25 ཡང་དེ་དག་གི་གཉེན་ཉེ་སྟེ་ཁོ་ཚོའི་གྲོང་ཚོ་རུ་སྡོད་པ་རྣམས་ཉིན་བདུན་རེར་ཁོ་ཚོ་དང་རེས་སྐོར་དུ་འོངས།
1CH 9:26 མཆོད་ཁང་གི་སྒོ་བཞི་པོའི་སྒོ་སྲུང་འགོ་དཔོན་ཐམས་ཅད་ལེ་ཝི་པ་ཡིན་ཞིང་། མངགས་བཅོལ་ལྟར་དཀོན་མཆོག་གི་མཆོད་ཁང་གི་ཁང་མིག་དང་དཀོར་མཛོད་རྣམས་སྲུང་མཁན་ཡིན་ནོ། །
1CH 9:27 ཡང་ཁོ་རྣམས་ཀྱིས་ལྟ་སྲུང་གི་འགན་འཁུར་བར་མ་ཟད་ཉིན་རེའི་ཞོགས་པར་སྒོ་འབྱེད་དགོས་པས། ཁོ་རྣམས་དཀོན་མཆོག་གི་མཆོད་ཁང་གི་ཕྱོགས་བཞི་རུ་སྡོད་པའོ། །
1CH 9:28 ལེ་ཝི་པའི་ཁྲོད་དུ་འགའ་ཞིག་གིས་སྣོད་ཆས་ལ་བདག་གཉེར་བྱེད་པ་དང་། གྲངས་ཀ་བཞིན་ཕྱི་ལ་འཁྱེར་བ་དང་། ཡང་གྲངས་ཀ་བཞིན་ནང་ལ་འཁྱེར་འོང་དགོས་སོ། །
1CH 9:29 ཡང་ཁོ་རྣམས་ལས་འགའ་ཞིག་གིས་མངགས་བཅོལ་ལྟར་ཡོ་བྱད་དང་། གནས་དམ་པའི་སྣོད་ཆས་ཐམས་ཅད་དང་། གྲོ་ཞིབ་དང་རྒུན་ཆང་དང་། སྣུམ་དང་། སྤོས་དཀར་དང་། བསུང་རྫས་སྤེལ་མ་བཅས་ལ་བདག་གཉེར་བྱེད་པ་ཡིན།
1CH 9:30 མཆོད་དཔོན་གྱི་བུ་རབས་ཚ་རྒྱུད་ལས་འགའ་ཞིག་གིས་བསུང་རྫས་ཀྱིས་བྱུགས་རྫས་བཟོ་བ་ཡིན།
1CH 9:31 ལེ་ཝི་པ་མད་ཐིད་ཡཱ་ནི་ཀོ་རཱག་པ་ཤལ་ལུམ་གྱི་བུ་སྐྱེས་འགོ་ཡིན་ཏེ། དེའི་ལས་འགན་ནི་སླ་ངའི་ནང་བག་ལེབ་བསྲེག་པར་བདག་གཉེར་བྱེད་པ་ཡིན།
1CH 9:32 དེ་དག་གི་གཉེན་ཉེ་ཀོ་ཧད་པའི་བུ་རབས་ཚ་རྒྱུད་ལས། སྤྱན་བསྟར་བག་ལེབ་ལ་བདག་གཉེར་བྱེད་མཁན་ཡོད་དེ། ངལ་གསོ་བའི་ཉིན་མོ་རེ་རེར་བག་ལེབ་སྟ་གོན་བྱེད་པ་ཡིན།
1CH 9:33 འདི་རྣམས་ནི་མགུར་ལེན་མཁན་ཏེ་ལེ་ཝིའི་ཁྱིམ་རྒྱུད་སོ་སོའི་འགོ་དཔོན་ཡིན་ལ། མཆོད་ཁང་གི་ར་བའི་ཁང་མིག་ནང་དུ་སྡོད་ཅིང་། ཉིན་མཚན་མེད་པར་མཆོད་ཁང་གི་ནང་དུ་ལས་ཀ་བྱེད་པ་ལས་གཞན་གང་ཡང་མི་བྱེད་དོ། །
1CH 9:34 དེ་ཐམས་ཅད་ནི་ལེ་ཝིའི་ཁྱིམ་རྒྱུད་སོ་སོའི་འགོ་དཔོན་ཡིན་ཞིང་། ཁོ་རྣམས་ཀྱི་ཁྱིམ་རབས་བཞིན་ཐམས་ཅད་འགོ་དཔོན་ཡིན་ལ། ཐམས་ཅད་ཡེ་རུ་སཱ་ལེམ་དུ་སྡོད་པའོ། །
1CH 9:35 གིབ་ཡོན་དུ་སྡོད་པ་ནི་གིབ་ཡོན་གྱི་ཕ་ཡེ་ཨི་ཨེལ་ཡོད་ལ། དེའི་ཆུང་མའི་མིང་ལ་མ་ཨ་ཀཱ་ཟེར།
1CH 9:36 དེའི་བུ་སྐྱེས་འགོ་ནི་ཨབ་དོན་ཡིན་པ་དང་། དེའི་ཞོལ་དུ་ཙུར་དང་། ཁི་སི། པཱ་ཨལ། ནེར། ནཱ་དབ།
1CH 9:37 གེ་དོར། ཨ་ཧི་ཡོ། ཟཱ་ཀར་ཡ། མིག་ལོད་བཅས་ཡོད།
1CH 9:38 ཡང་མིག་ལོད་ལས་ཤི་མེ་ཨམ་མཆེད་པ་དང་། དེ་དག་ཀྱང་དེ་དག་གི་གཉེན་ཉེ་མཉམ་དུ་ཡེ་རུ་སཱ་ལེམ་དུ་བསྡད་པ་དང་རང་གི་གཉེན་ཉེ་དང་ཉེ་བར་གནས་པའོ། །
1CH 9:39 ནེར་ལས་ཁི་སི་མཆེད། ཁི་སི་ལས་སོ་ལོ་མཆེད། སོ་ལོ་ལས་ཡོ་ནཱ་ཐན་དང་། མལ་ཀི་ཤུ་ཨ། ཨ་བི་ནཱ་དབ། ཨིས་པོ་ཤེད་བཅས་མཆེད།
1CH 9:40 ཡོ་ནཱ་ཐན་གྱི་བུ་ནི་མེ་ཕི་པོ་ཤེད་ཡིན་པ་དང་། མེ་ཕི་པོ་ཤེད་ལས་མི་ཀཱ་མཆེད།
1CH 9:41 མི་ཀཱ་ཡི་བུ་ནི་ཕི་ཐོན་དང་། མེ་ལེག ཐ་རེ་ཨ། ཨ་ཧ་ཟཱ་བཅས་ཡིན།
1CH 9:42 ཨ་ཧ་ཟཱ་ལས་ཡ་རཱ་མཆེད། ཡ་རཱ་ལས་ཨ་ལེ་མེད་དང་། ཨས་མ་ཝེད། ཟིམ་རེ་བཅས་མཆེད། ཟིམ་རེ་ལས་མོ་ཟི་མཆེད།
1CH 9:43 མོ་ཟི་ལས་པི་ནེ་ཨ་མཆེད། པི་ནེ་ཨའི་བུ་ནི་རེ་ཕཱ་ཡ་ཡིན་ལ། རེ་ཕཱ་ཡའི་བུ་ནི་ཨེལ་ཨ་སཱ་དང་། ཨེལ་ཨ་སཱའི་བུ་ནི་ཨ་ཙེལ་ཡིན།
1CH 9:44 ཨ་ཙེལ་ལ་བུ་དྲུག་ཡོད་ཅིང་དེ་ཚོའི་མིང་ནི་ཨས་རི་ཀམ་དང་། པོ་ཀེ་རུ། ཡེས་མ་ཨེལ། ཤེ་ཨར་ཡཱ། ཨོ་བད་ཡཱ། ཧ་ནན་བཅས་ཡིན། འདི་ཐམས་ཅད་ཨ་ཙེལ་གྱི་བུ་ཡིན་ནོ། །
1CH 10:1 ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་པ་ལ་དམག་བརྒྱབ་ནས། ཡེས་ར་ཨེལ་པ་རྣམས་ཕེ་ལེ་ཤེད་པའི་མདུན་ནས་བྲོས་ཏེ། མི་མང་པོ་གིལ་བོ་ཨ་རི་བོར་འགྱེལ་ཏོ། །
1CH 10:2 ཕེ་ལེ་ཤེད་པ་རྣམས་ཀྱིས་སོ་ལོ་དང་དེའི་སྲས་རྣམས་ཀྱི་རྗེས་དེད་ཅིང་། སོ་ལོའི་སྲས་ཡོ་ནཱ་ཐན་དང་ཨ་བི་ནཱ་དབ། མལ་ཀི་ཤུ་ཨ་བཅས་བསད་དོ། །
1CH 10:3 སོ་ལོ་ལ་རྒོལ་པའི་འཐབ་མོ་ཤིན་ཏུ་དྲགས་ཤིང་། མདའ་པས་སོ་ལོ་མཐོང་ནས་ཁོ་ལ་མདའ་ཡིས་བརྒྱབ་ནས་རྨས་པར་གྱུར་ཏོ། །
1CH 10:4 དེ་ནས་སོ་ལོས་རང་གི་གོ་མཚོན་འཁུར་མཁན་ལ། ཁྱོད་ཀྱིས་རལ་གྲི་ཕྱུང་སྟེ་ངའི་ལུས་རྟོལ་ཅིག དེ་ལྟར་མ་བྱས་ཚེ། མཚན་སྐྱི་མ་བཅད་པ་དེ་དག་འོངས་ནས་ང་ལ་རལ་གྲིས་བསྣུན་ཏེ་སྨད་པར་བྱའོ་ཞེས་སྨྲས་ཀྱང་། གོ་མཚོན་འཁུར་མཁན་དེ་ཤིན་ཏུ་འཇིགས་ནས་དེ་ལྟར་མ་བྱས་པས། སོ་ལོས་རལ་གྲི་བླངས་ནས་དེའི་ཁར་ལྕེབས་སོ། །
1CH 10:5 གོ་མཚོན་འཁུར་མཁན་གྱིས་སོ་ལོ་གྲོངས་ཟིན་པ་མཐོང་བ་དང་། ཁོ་ཡང་རལ་གྲིའི་ཁར་ལྕེབས་ནས་ཤིའོ། །
1CH 10:6 དེ་ལྟར་སོ་ལོ་དང་ཁོང་གི་སྲས་གསུམ་དང་། ཁྱིམ་མི་ཐམས་ཅད་མཉམ་དུ་ཤི་བའོ། །
1CH 10:7 ལུང་པར་སྡོད་པའི་ཡེས་ར་ཨེལ་གྱི་མི་ཐམས་ཅད་ཀྱིས་ཡེས་ར་ཨེལ་གྱི་དམག་རྣམས་བྲོས་པ་དང་། སོ་ལོ་དང་ཁོང་གི་སྲས་རྣམས་གྲོངས་པ་མཐོང་བས་རང་གི་གྲོང་ཁྱེར་རྣམས་དོར་ནས་བྲོས་ཤིང་། ཕེ་ལེ་ཤེད་པ་རྣམས་འོངས་ནས་དེ་ཚོའི་གྲོང་ཁྱེར་ནང་དུ་བསྡད།
1CH 10:8 དེའི་ཕྱི་ཉིན་ཕེ་ལེ་ཤེད་པ་རྣམས་བེམ་པོ་དག་གི་གོས་བཤུ་བར་འོངས་དུས་སུ། སོ་ལོ་དང་དེའི་སྲས་རྣམས་གིལ་བོ་ཨ་རི་བོར་གྲོངས་ཟིན་པ་མཐོང་བ་དང་།
1CH 10:9 དེ་ཚོས་ཁོང་གི་དམག་ཆས་བཤུས་ཤིང་། ཁོང་གི་མགོ་བླངས་ནས་གོ་ཁྲབ་བཤུས་ཏེ། ཕེ་ལེ་ཤེད་པའི་ཡུལ་ཕྱོགས་ཀུན་ཏུ་མི་མངགས་ནས་དེ་ཚོའི་ལྷ་སྐུ་དང་འབངས་མི་ལ་འཕྲིན་བསྐུར་ཏོ། །
1CH 10:10 དེ་ཚོས་སོ་ལོའི་གོ་ཁྲབ་དེ་རང་གི་ལྷ་ཁང་དུ་བཞག་པ་དང་། ཁོང་གི་མགོ་ནི་དཱ་གོན་གྱི་ལྷ་ཁང་དུ་དཔྱངས།
1CH 10:11 གིལ་ཨད་ཡཱ་བེ་སི་པ་རྣམས་ཀྱིས་ཕེ་ལེ་ཤེད་པས་སོ་ལོ་ལ་ཅི་བྱས་པ་ཐོས་ནས།
1CH 10:12 དཔའ་རྒོད་ཐམས་ཅད་ཡར་སོང་ནས་སོ་ལོའི་སྤུར་དང་། ཁོང་གི་སྲས་རྣམས་ཀྱི་བེམ་པོར་བདག་བྱས་ནས་ཡཱ་བེ་སི་རུ་ཁྱེར་འོངས་ཤིང་། ཁོང་རྣམས་ཀྱི་རུས་པ་ཡཱ་བེ་སིའི་བེ་ཤིང་འོག་ཏུ་བསྐུངས་ནས་ཉིན་བདུན་ལ་སྨྱུང་གནས་བསྲུངས་པའོ། །
1CH 10:13 སོ་ལོས་དཀོན་མཆོག་ཡ་ཝཱེ་ལ་དད་ལོག་བྱས་པས་ཁོ་རང་ཤི་བ་སྟེ། ཁོས་དཀོན་མཆོག་ཡ་ཝཱེའི་གསུང་ལ་མ་མཉན་པ་དང་། བུད་མེད་ནག་ཆོས་མ་ནས་བརྟག་པ་ཞུས་པ་ལས།
1CH 10:14 དཀོན་མཆོག་ཡ་ཝཱེ་ལ་མ་ཞུས་པས། དཀོན་མཆོག་ཡ་ཝཱེས་ཁོ་རང་གསོད་པར་མཛད་དེ། རྒྱལ་ཁྲི་ཡེ་སེའི་བུ་དཱ་བིད་ལ་གནང་ངོ་། །
1CH 11:1 དེའི་དུས་སུ་ཡེས་ར་ཨེལ་པ་ཐམས་ཅད་ཧེབ་རོན་དུ་དཱ་བིད་ཀྱི་དྲུང་དུ་འདུས་ནས་འདི་ལྟར། གཟིགས་དང་། བདག་ཅག་ནི་ཁྱེད་ཀྱི་ཤ་དང་རུས་པའི་གཉེན་ཉེ་ཡིན་ཏེ།
1CH 11:2 སྔར་སོ་ལོ་རྒྱལ་པོར་བཞུགས་དུས་སུ། ཁྱེད་ནི་ཡེས་ར་ཨེལ་པའི་དམག་དཔུང་གི་འགྲོ་འོང་ལ་སྣེ་ཁྲིད་བྱེད་མཁན་ཡིན། ཡང་ཁྱེད་ཀྱི་དཀོན་མཆོག་ཡ་ཝཱེས་ཁྱེད་ལ། ཁྱོད་ཀྱིས་བདག་གི་འབངས་མི་ཡེས་ར་ཨེལ་པར་བདག་སྐྱོང་བྱེད་ཅིང་། ཡེས་ར་ཨེལ་པའི་འགོ་དཔོན་དུ་འགྱུར་དགོས་ཞེས་གསུངས་པ་ཡིན་ཞེས་ཞུས་པ་དང་།
1CH 11:3 དེ་ནས་ཡེས་ར་ཨེལ་གྱི་རྒན་པོ་རྣམས་ཧེབ་རོན་དུ་རྒྱལ་པོའི་དྲུང་དུ་འོངས་པ་དང་། རྒྱལ་པོ་དཱ་བིད་ཀྱིས་ཧེབ་རོན་དུ་དཀོན་མཆོག་ཡ་ཝཱེའི་སྤྱན་སྔར་དེ་དག་དང་ཆད་དོན་བཞག་པ་དང་། དཀོན་མཆོག་ཡ་ཝཱེས་སཱ་མུ་ཨེལ་བརྒྱུད་ནས་གསུངས་པ་བཞིན་དུ། དཱ་བིད་ནི་ཡེས་ར་ཨེལ་གྱི་རྒྱལ་པོར་བསྐོ་ཆེད་སྣུམ་གྱིས་བྱུགས་སོ། །
1CH 11:4 དཱ་བིད་དང་ཡེས་ར་ཨེལ་པ་ཐམས་ཅད་ཡེ་རུ་སཱ་ལེམ་སྟེ་ཡེ་བུ་སི་རུ་ཕྱིན་པ་དང་། དུས་དེར་ཡུལ་དེའི་ཡུལ་མི་སྟེ་ཡེ་བུ་སི་པ་རྣམས་དེར་གནས་པ་ཡིན།
1CH 11:5 ཡེ་བུ་སི་ཡི་ཡུལ་མི་རྣམས་ཀྱིས་དཱ་བིད་ལ་འདི་ལྟར། ཁྱོད་གྲོང་ཁྱེར་འདིའི་ནང་དུ་འོང་མི་ནུས་ཞེས་སྨྲས་མོད། དཱ་བིད་ཀྱིས་ཛ་ཡན་གྱི་བཙན་རྫོང་བཟུང་བ་སྟེ། ཛ་ཡན་ནི་དཱ་བིད་ཀྱི་གྲོང་ཁྱེར་དུ་འབོད་པ་དེ་ཡིན་ནོ། །
1CH 11:6 དཱ་བིད་ན་རེ། སུ་ཞིག་གིས་སྔོན་ལ་ཡེ་བུ་སི་པ་རྣམས་དང་འཐབ་ན། དེ་ནི་དམག་སྤྱི་ཆེན་མོར་བྱའོ་ཞེས་བསྒོས་པས། ཟེ་རུ་ཡཱ་ཡི་བུ་ཡོ་ཨབ་བྱ་བ་ཐོག་མར་སྔོན་དུ་ཕྱིན་པས་ཁོ་འགོ་དཔོན་དུ་གྱུར་ཏོ། །
1CH 11:7 དཱ་བིད་ནི་བཙན་རྫོང་དེའི་ནང་དུ་བཞུགས་པའི་རྐྱེན་གྱིས། དེའི་མིང་ལ་དཱ་བིད་ཀྱི་གྲོང་ཁྱེར་ཞེས་བཏགས་སོ། །
1CH 11:8 ཡང་དཱ་བིད་ཀྱིས་འཛིངས་རགས་ཀྱི་ཕྱོགས་བཞི་ནས་མཁར་གྱང་བརྩིགས་པ་དང་། ཁག་ལྷག་མ་རྣམས་ཡོ་ཨབ་ཀྱིས་བརྩིགས་པ་ཡིན་ནོ། །
1CH 11:9 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་དཱ་བིད་དང་མཉམ་དུ་བཞུགས་པས། དཱ་བིད་ཉིན་རེ་བཞིན་དར་ཞིང་རྒྱས་པར་གྱུར་ཏོ། །
1CH 11:10 དཱ་བིད་ཀྱི་དཔའ་རྒོད་རྣམས་ཀྱི་འགོ་དཔོན་དག་ནི་འདི་ལྟ་སྟེ། དེ་དག་གིས་ཁོང་ལ་རྒྱབ་རོགས་ཆེན་པོ་བྱས་ནས་རྒྱལ་ས་བླངས་པ་དང་། ཡང་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་གསུངས་པ་བཞིན་དུ། ཡེས་ར་ཨེལ་པ་རྣམས་དང་མཉམ་དུ་ཁོང་རྒྱལ་པོར་བསྐོས་པའོ། །
1CH 11:11 དཱ་བིད་ཀྱི་དཔའ་རྒོད་དག་གི་གྲངས་ཀ་ནི་འདི་ལྟ་སྟེ། ཧག་མོན་གྱི་བུ་ཡ་ཤོ་བེ་ཨམ་བྱ་བ་དེ་ནི་དཔའ་རྒོད་སུམ་ཅུའི་ འགོ་དཔོན་ཡིན་ཏེ། སྔར་མདུང་བསྐོར་ནས་འཐབ་ཐེངས་གཅིག་ལ་སྐྱེས་པ་སུམ་བརྒྱ་བསད་པ་ཡིན།
1CH 11:12 དེ་ནས་ཨ་ཧོ་པ་དོ་དོ་ཡི་བུ་ཨེ་ལི་ཨ་ཟར་ཡིན་ལ། དེ་ནི་དཔའ་རྒོད་གསུམ་པོ་ནང་གི་གཅིག་སྟེ།
1CH 11:13 ཁོ་ནི་སྔར་དཱ་བིད་དང་མཉམ་དུ་ཕཱ་སི་དམ་མིམ་དུ་ཕྱིན་པ་དང་། དེར་ཕེ་ལེ་ཤེད་པ་རྣམས་འཐབ་ཏུ་འདུས་ཡོད་པ་ཡིན། ཡང་གནས་དེར་ནས་ཀྱིས་ཁེངས་པའི་ཞིང་ཞིག་ཡོད་དེ། མི་རྣམས་ཕེ་ལེ་ཤེད་པའི་མདུན་ནས་བྲོས་པ་དང་།
1CH 11:14 ཁོ་རྣམས་ཞིང་དེའི་དཀྱིལ་དུ་ལངས་ནས་ཞིང་དེ་བསྲུངས་པ་དང་ཕེ་ལེ་ཤེད་པ་རྣམས་ཕམ་པར་བརྒྱབ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་བསྐྱབས་ཤིང་ཁོ་རྣམས་ལ་རྒྱལ་ཁ་ཆེན་པོ་ཐོབ་པར་མཛད་དོ། །
1CH 11:15 ཡང་འགོ་དཔོན་སུམ་ཅུ་ལས་གསུམ་ནི་ཨ་དུལ་ལཱམ་བྲག་ཕུག་ཉེ་འགྲམ་གྱི་ཕ་བོང་རྩར་དཱ་བིད་ཀྱི་དྲུང་དུ་ཕྱིན་པ་དང་། ཕེ་ལེ་ཤེད་པའི་དམག་དཔུང་གིས་རེ་པཱ་པའི་ལུང་པ་རུ་སྒར་བཏབ་བོ། །
1CH 11:16 དེའི་དུས་སུ་དཱ་བིད་ནི་བཙན་རྫོང་ནང་དུ་ཡོད་པ་དང་། ཕེ་ལེ་ཤེད་པའི་འགོག་སྲུང་དམག་དཔུང་པེད་ལེ་ཧེམ་དུ་ཡོད་པ་ཡིན།
1CH 11:17 དེར་དཱ་བིད་ཤིན་ཏུ་སྐོམ་ནས་ན་རེ། ཀྱེ་ཧོ། སུ་ཞིག་གིས་པེད་ལེ་ཧེམ་གྱི་མཁར་སྒོའི་འགྲམ་གྱི་ཁྲོན་པ་ལས་ཆུ་ཁུར་འོངས་ནས་ང་ལ་བླུད་ན་ཅི་མ་རུང་ཞེས་པར།
1CH 11:18 དཔའ་རྒོད་འདི་གསུམ་པོས་ཕེ་ལེ་ཤེད་པའི་དམག་སྒར་བརྒལ་ནས་སོང་སྟེ། པེད་ལེ་ཧེམ་གྱི་མཁར་སྒོའི་འགྲམ་གྱི་ཁྲོན་པ་ལས་ཆུ་བཅུས་ནས་ཁུར་འོངས་ཏེ་དཱ་བིད་ལ་ཕུལ་ནའང་། ཁོང་གིས་དེ་མ་འཐུང་བར་དཀོན་མཆོག་ཡ་ཝཱེའི་དྲུང་དུ་མཆོད་དེ་ན་རེ།
1CH 11:19 ང་ཡི་དཀོན་མཆོག་གི་དྲུང་དུ་ངས་འདི་འདྲའི་ལས་གཏན་ནས་བྱེད་མི་རུང་། ཆུ་འདི་ནི་མི་དེ་དག་གིས་རང་སྲོག་ལ་མ་འཛེམ་པར་ཁྱེར་འོངས་པ་ཡིན་པས། ངས་རང་སྲོག་ལ་མི་འཛེམ་པ་འདི་དག་གི་ཁྲག་འཐུང་ག་ལ་རུང་ཞེས་ཞུས་ཤིང་། དཱ་བིད་ཀྱིས་ཆུ་དེ་མ་འཐུང་ངོ་། །དེ་ནི་དཔའ་རྒོད་དེ་གསུམ་པོས་བྱས་པའི་ལས་ཡིན་ནོ། །
1CH 11:20 ཡོ་ཨབ་ཀྱི་ནུ་བོ་ཨ་བི་ཤཱ་ཨི་ནི་དཔའ་རྒོད་གསུམ་པོའི་འགོ་དཔོན་ཡིན་ཏེ། སྔར་དེ་ཡིས་མི་སུམ་བརྒྱ་ལ་མདུང་གིས་བརྒྱབ་ནས་བསད་པས། དཔའ་རྒོད་གསུམ་པོའི་ནང་དུ་མིང་ལ་གྲགས་སོ། །
1CH 11:21 ཁོ་ནི་དཔའ་རྒོད་གསུམ་པོའི་ཁྲོད་དུ་ཆེས་མཆོག་ཏུ་གྱུར་པ་ཡིན་པས་དེ་དག་གི་འགོ་དཔོན་དུ་གྱུར་མོད། འོན་ཀྱང་དཔའ་རྒོད་སྔ་མ་གསུམ་པོར་མི་དོའོ། །
1CH 11:22 ཡང་ཡེ་ཧོ་ཡ་དཱའི་བུ་པེ་ནཱ་ཡ་ཞེས་པ་ནི་ཀབ་ཟེ་ཨེལ་ནས་ཐོན་པའི་དཔའ་རྒོད་ཡིན་པ་སྟེ། སྔར་དོན་ཆེན་པོ་བསྒྲུབས་ཏེ། ཁོས་མོ་ཨབ་པ་ཨ་རི་ཨེལ་གྱི་བུ་གཉིས་བསད་པ་དང་། ཡང་ཁ་བ་འབབ་པའི་ཉིན་མོར་ས་དོང་ནང་དུ་བབས་ནས་སེང་གེ་ཞིག་ཀྱང་བསད་པ་ཡིན།
1CH 11:23 ཡང་དེས་ཨེ་ཅིབ་པ་གཟུགས་པོའི་རིང་ཚད་ལ་ཁྲུ་ལྔ་ཡོད་པ་ཞིག་ཀྱང་བསད། ཨེ་ཅིབ་པ་དེའི་ལག་ཏུ་ཐགས་འཐག་བྱེད་ཀྱི་འཁོར་བརྟེན་ལྟ་བུའི་མདུང་བཟུང་ནའང་། པེ་ནཱ་ཡས་དབྱུག་པ་ཞིག་བཟུང་ནས་དེ་ལ་རྒོལ་དུ་སོང་ཞིང་། ཨེ་ཅིབ་པའི་ལག་ནས་མདུང་ཕྲོགས་ཏེ། མདུང་དེས་ཁོ་བསད་པའོ། །
1CH 11:24 འདི་ནི་ཡེ་ཧོ་ཡ་དཱའི་བུ་པེ་ནཱ་ཡ་ཡིས་བྱས་པའི་ལས་ཡིན་ལ། དེ་དཔའ་རྒོད་གསུམ་པོའི་ཁྲོད་དུ་མིང་ལ་གྲགས་སོ། །
1CH 11:25 ཁོ་ནི་དཔའ་རྒོད་སུམ་ཅུ་དེ་ལས་མིང་ཆེ་ཡང་དཔའ་རྒོད་སྔ་མ་གསུམ་པོར་མི་དོའོ། །དཱ་བིད་ཀྱིས་དེ་ནི་སྐུ་སྲུང་པ་དག་གི་འགོ་དཔོན་དུ་བསྐོས་པ་ཡིན།
1CH 11:26 དམག་དཔུང་གི་དཔའ་རྒོད་རྣམས་ནི། ཡོ་ཨབ་ཀྱི་ནུ་བོ་ཨ་སཱ་ཧེལ་དང་། པེད་ལེ་ཧེམ་པ་དོ་དོའི་བུ་ཨེལ་ཧ་ནན།
1CH 11:27 ཧ་རོར་པ་ཤམ་མོད། ཕེ་ལོན་པ་ཧེ་ལེ་ཙི།
1CH 11:28 ཐེ་ཀོ་ཨ་པ་ཨིག་ཀེ་སིའི་བུ་ཨི་རཱ། ཨ་ན་ཐོད་པ་ཨ་བི་ཨེ་ཟཱེར།
1CH 11:29 ཧུ་ཤཱ་པ་སིབ་བེ་ཀཱ་ཨི། ཨ་ཧོ་པ་ཨི་ལཱ་ཨི།
1CH 11:30 ནེ་ཏོ་ཕཱ་པ་མ་ཧ་རཱ་ཨི། ནེ་ཏོ་ཕཱ་པ་པ་ཨ་ནཱ་ཡི་བུ་ཧེ་ལེད།
1CH 11:31 པེན་ཡཱ་མེན་གྱི་བུ་རབས་ཚ་རྒྱུད་དེ་གིབ་ཨ་པ་རི་བཱ་ཨི་ཡི་བུ་ཨི་ཐ་ཨི། ཕི་ར་ཐོན་པ་པེ་ནཱ་ཡ།
1CH 11:32 གཱ་ཨ་སི་གྲོག་མོའི་ཧུ་ར་ཨི། ཨ་རཱབ་པ་ཨ་བི་ཨེལ།
1CH 11:33 པ་ཧ་རུམ་པ་ཨས་མ་ཝེད། ཤ་ཨལ་བོན་པ་ཨེལ་ཡ་བཱ།
1CH 11:34 གི་ཟོན་པ་ཧ་ཤེམ་གྱི་བུ་རྣམས་དང་། ཧ་རར་པ་ཤཱ་གེ་ཡི་བུ་ཡོ་ནཱ་ཐན།
1CH 11:35 ཧ་རར་པ་སཱ་ཀར་གྱི་བུ་ཨ་ཧི་ཨམ། ཨུར་གྱི་བུ་ཨེ་ལི་ཕལ།
1CH 11:36 མེ་ཀེ་རཱ་པ་ཧེ་ཕེར། ཕེ་ལོན་པ་ཨ་ཧི་ཡཱ།
1CH 11:37 ཀར་མེལ་པ་ཧེ་ཙི་རོ། ཨེ་སི་པཱ་ཨི་ཡི་བུ་ན་ཨ་རཱ་ཨི།
1CH 11:38 ནཱ་ཐན་གྱི་སྤུན་ཡོ་ཨེལ། ཧག་རིའི་བུ་མིབ་ཧར།
1CH 11:39 ཨམ་མོན་པ་ཙེ་ལེག པེ་རོད་པ་ན་ཧ་རཱ་ཨི་སྟེ། ན་ཧ་རཱ་ཨི་ནི་ཟེ་རུ་ཡཱ་ཡི་བུ་ཡོ་ཨབ་ཀྱི་གོ་མཚོན་འཁུར་མཁན་ཡིན་པ་དང་།
1CH 11:40 ཡེད་རཱ་པ་ཨི་རཱ་དང་། ཡེད་རཱ་པ་ག་རེབ།
1CH 11:41 ཧེད་པ་ཨུ་རི་ཡཱ། ཨ་ཧ་ལཱ་ཨིའི་བུ་ཟཱ་བད།
1CH 11:42 རུ་བེན་ཚོ་པའི་ཤི་ཟཱ་ཡི་བུ་ཨ་དི་ནཱ་སྟེ། ཁོ་ནི་རུ་བེན་ཚོ་པའི་འགོ་དཔོན་ཞིག་ཡིན་ལ་རྗེས་འབྲང་པ་མི་སུམ་ཅུ་ཡོད་པ་ཡིན།
1CH 11:43 མ་ཨ་ཀཱ་ཡི་བུ་ཧ་ནན། མིད་ནི་པ་ཡོ་ཤ་ཕད།
1CH 11:44 ཨ་ཤ་ཐེ་རཱ་པ་ཨུ་ཟི་ཡཱ། ཨ་རོ་ཨེར་པ་ཧོ་ཐམ་གྱི་བུ་ཤ་མཱ་དང་ཡེ་ཨི་ཨེལ།
1CH 11:45 ཐི་ཙཱ་པ་ཤིམ་རིའི་བུ་ཡེ་དི་ཡཱ་ཨེལ་དང་། དེའི་སྤུན་ཡོ་ཧ།
1CH 11:46 མཱ་ཧབ་པ་ཨེ་ལི་ཨེལ། ཨེལ་ན་ཨམ་གྱི་བུ་ཡེ་རི་བ་ཨི། ཡོ་ཤབ་ཡཱ། མོ་ཨབ་པ་ཡེད་མཱ།
1CH 11:47 ཨེ་ལི་ཨེལ། ཨོ་བེད། མེ་ཙོ་བ་ཡཱ་པ་ཡ་ཨ་སི་ཨེལ་དང་བཅས་པའོ། །
1CH 12:1 དེ་ཡང་ཁི་སིའི་བུ་སོ་ལོའི་རྐྱེན་ཀྱིས་དཱ་བིད་ནི་ཙིག་ལག་ཏུ་ཡིབ་ནས་སྡོད་པའི་ཚེ། མི་འདི་རྣམས་དཱ་བིད་ཀྱི་རྩར་འོངས་པ་དང་། ཐམས་ཅད་དཔའ་བོ་ཡིན་ལ་འཐབ་མོའི་ཁྲོད་དུ་དཱ་བིད་ལ་རོགས་བྱས་སོ། །
1CH 12:2 དེ་རྣམས་ལ་མདའ་གཞུ་ཡོད་ཅིང་། ལག་པ་གཡས་གཡོན་གཉིས་ཀས་འུར་རྡོ་དང་མདའ་འཕེན་ནུས་པ་སྟེ། དེ་དག་ནི་པེན་ཡཱ་མེན་གྱི་ཚོ་བར་གཏོགས་ཤིང་སོ་ལོའི་གཉེན་ཉེ་ཡིན་ནོ། །
1CH 12:3 དེ་དག་གི་འགོ་དཔོན་ནི་ཨ་ཧི་ཨེ་ཟེར་དང་ཡོ་ཨ་སི་གཉིས་ཡིན་ཏེ། དེ་གཉིས་ནི་གིབ་ཨ་པ་ཤེ་མཱ་ཨ་ཡི་བུ་ཡིན། ད་དུང་ཨས་མ་ཝེད་ཀྱི་བུ་ཡེ་ཟི་ཨེལ་དང་། ཕེ་ལེད། པེ་རཱ་ཀ ཨ་ན་ཐོད་པ་ཡེ་ཧུ།
1CH 12:4 གིབ་ཡོན་པ་ཡིས་མ་ཡཱ་བཅས་ཡོད་ཅིང་། ཁོ་ནི་མི་སུམ་ཅུའི་ཁྲོད་ཀྱི་དཔའ་བོ་ཡིན་པར་མ་ཟད། མི་སུམ་ཅུ་བོ་དེའི་འགོ་དཔོན་ཡང་ཡིན། ཡང་ཡེ་རེམ་ཡཱ་དང་། ཡ་ཧ་ཟི་ཨེལ། ཡོ་ཧ་ནན། གེ་དེ་རཱ་པ་ཡོ་ཟཱ་བད།
1CH 12:5 ཨེལ་ཨུ་ཟཱ་ཨི། ཡེ་རི་མོད། པེ་ཨལ་ཡཱ། ཤེ་མར་ཡཱ། ཧ་རོབ་པ་ཤེ་ཕད་ཡཱ།
1CH 12:6 ཀོ་རཱག་པ་ཨེལ་ཁ་ནཱ། ཡིས་ཤི་ཡཱ། ཨ་ཟར་ཨེལ། ཡོ་ཨེ་ཟེར། ཡ་ཤོ་བེ་ཨམ།
1CH 12:7 གེ་དོར་པ་ཡེ་རོ་ཧམ་གྱི་བུ་ཡོ་ཨེ་ལཱ་དང་། ཟེ་བད་ཡཱ་བཅས་ཡོད་དོ། །
1CH 12:8 གཱ་རྡུའི་ཚོ་པ་ལས་མི་ཁ་ཤས་དབེན་སྟོང་གི་རི་རྫོང་དུ་དཱ་བིད་ལ་རྒྱབ་བརྟེན་བཅོལ་དུ་སོང་ཞིང་། དེ་ཐམས་ཅད་དཔའ་རྩལ་ཆེ་ལ་འཐབ་མོ་འགྱེད་པར་མཁས་པ། ཕུབ་དང་མདུང་སྤྱོད་ཤེས་པ་བཅས་ཡིན་ལ། དེ་ཚོའི་གདོང་ནི་སེང་གེ་བཞིན་དང་། རྒྱུགས་ན་རི་མགོའི་དགོ་བ་ལྟར་མྱུར་བ་ཡིན།
1CH 12:9 དང་པོ་ནི་ཨེ་ཟེར་དང་། གཉིས་པ་ཨོ་བད་ཡཱ། གསུམ་པ་ཨེ་ལི་ཨབ།
1CH 12:10 བཞི་པ་མི་སི་མན་ནཱ། ལྔ་པ་ཡེ་རེམ་ཡཱ།
1CH 12:11 དྲུག་པ་ཨད་ཏ་ཨི། བདུན་པ་ཨེ་ལི་ཨེལ།
1CH 12:12 བརྒྱད་པ་ཡོ་ཧ་ནན། དགུ་པ་ཨེལ་ཟཱ་བད།
1CH 12:13 བཅུ་པ་ཡེ་རེམ་ཡཱ། བཅུ་གཅིག་པ་མག་པན་ནཱ་ཨི་བཅས་ཡིན་ནོ། །
1CH 12:14 དེ་ཐམས་ཅད་ནི་གཱ་རྡུ་ཚོ་པའི་དམག་དཔོན་ཡིན་ཏེ། ཆུང་ཤོས་ཀྱིས་མི་བརྒྱ་ཁོག་པ་དང་། ཆེ་ཤོས་ཀྱིས་མི་སྟོང་ཁོག་པའོ། །
1CH 12:15 ཟླ་དང་པོར་ཡོར་དན་གཙང་པོའི་འགྲམ་གཉིས་ལ་ཆུ་འཕེལ་དུས་ཁོ་ཚོ་ཕ་རོལ་ཏུ་བརྒལ་ནས། ལུང་པར་གནས་པ་རྣམས་སྐྲག་ནས་ཤར་ནུབ་གང་སར་བྲོས་སོ། །
1CH 12:16 པེན་ཡཱ་མེན་དང་ཡ་ཧུ་དཱའི་བུ་རྒྱུད་ལས་ཀྱང་མི་ཁ་ཤས་རི་རྫོང་དུ་དཱ་བིད་ལ་རྒྱབ་བརྟེན་བཅོལ་དུ་འོངས་པ་དང་།
1CH 12:17 དཱ་བིད་དེ་དག་བསུ་རུ་ཐོན་ནས་དེ་དག་ལ་ན་རེ། གལ་ཏེ་ཁྱོད་ཅག་ནི་ཞི་བདེ་ངང་ང་ལ་རོགས་བྱེད་དུ་འདིར་འོངས་པ་ཡིན་ན། ངས་ཁྱོད་ཅག་དང་མནའ་འབྲེལ་འཛུགས་པར་འགྱུར། ཡིན་ཡང་ཁྱོད་ཚོས་ཉེས་མེད་ང་རང་དགྲའི་ལག་ཏུ་གཏོད་ཕྱིར་འོངས་པ་ཡིན་ན། རང་ཅག་གི་ཕ་མེས་ཀྱི་དཀོན་མཆོག་གིས་དེ་གཟིགས་ཤིང་ཉེས་ཆད་གཅོད་པར་ཤོག་ཅིག་ཅེས་སྨྲས་པ་ན།
1CH 12:18 སྐབས་དེར་དཀོན་མཆོག་གི་ཐུགས་ཉིད་ནི་དཔའ་བོ་སུམ་ཅུའི་འགོ་དཔོན་ཨ་མ་སཱ་ཨིའི་སྟེང་བབས་པ་དང་ཁོ་ན་རེ། ཀྱེ་དཱ་བིད་ལགས། ངེད་ཅག་ཁྱེད་ལ་དབང་བ་ཡིན། ཡེ་སེའི་སྲས་ལགས། ངེད་ཅག་ཁྱེད་ཀྱི་རྗེས་སུ་འབྲང་བར་འོངས་པ་ཡིན། ཁྱེད་རང་བདེ་བར་ཤོག ཁྱེད་ཀྱི་དཀོན་མཆོག་གིས་ཁྱེད་ལ་རོགས་རམ་མཛད་པས། ཁྱེད་ལ་རོགས་རམ་བྱེད་མཁན་དག་ཀྱང་བདེ་བར་གྱུར་ཅིག་ཅེས་སྨྲས་པ་ན། དཱ་བིད་ཀྱིས་དེ་དག་ནང་དུ་བསུས་ཏེ་དམག་དཔོན་དུ་བསྐོས་སོ། །
1CH 12:19 སྔར་དཱ་བིད་ནི་ཕེ་ལེ་ཤེད་པ་དང་མཉམ་དུ་སོ་ལོ་དང་དམག་རྒྱག་ཏུ་སོང་དུས། མཱ་ན་ཤེ་ཚོ་པའི་མི་འགའ་ཞིག་དཱ་བིད་ལ་རྒྱབ་བརྟེན་བཅོལ་དུ་འོངས། ཡིན་ནའང་དེ་ཚོས་ཕེ་ལེ་ཤེད་པར་རོགས་རམ་མ་བྱས། གང་ལ་ཞེ་ན། ཕེ་ལེ་ཤེད་པའི་འགོ་དཔོན་རྣམས་གྲོས་བྱས་ནས་ཁོང་ཕྱིར་ལོག་ཏུ་བཅུག་སྟེ་ན་རེ། དཱ་བིད་ཀྱིས་རང་ཅག་གི་མགོ་བླངས་ནས་ཁོའི་བདག་པོ་སོ་ལོའི་ཕྱོགས་སུ་འགྲོ་ཉེན་ཆེ་ཞེས་སྨྲས་སོ། །
1CH 12:20 ཡང་དཱ་བིད་ནི་ཙིག་ལག་ཏུ་ཕྱིར་ལོག་པ་ན། མཱ་ན་ཤེ་ཚོ་པའི་ཨད་ནཱ་དང་། ཡོ་ཟཱ་བད། ཡེ་དི་ཡཱ་ཨེལ། མེའ་ཀཱ་ཨེལ། ཡོ་ཟཱ་བད། ཨེ་ལི་ཧུ། ཙིལ་ལེ་ཐ་ཨི་བཅས་ཁོང་ལ་རྒྱབ་བརྟེན་བཅོལ་དུ་འོངས་པ་དང་། དེ་ཐམས་ཅད་ནི་མཱ་ན་ཤེའི་ཚོ་པ་ནང་གི་སྟོང་དཔོན་ཡིན་ནོ། །
1CH 12:21 དེ་དག་གིས་དཱ་བིད་ལ་རོགས་བྱས་ནས་ཁོང་དང་མཉམ་དུ་ཇག་རྐུན་ལ་འཐབ་ཅིང་། ཐམས་ཅད་དམག་མི་དཔའ་རྩལ་ཅན་དང་དམག་དཔུང་གི་འགོ་དཔོན་ཡིན་ནོ། །
1CH 12:22 དུས་དེར་དཱ་བིད་ལ་རྒྱབ་བརྟེན་བཅོལ་ནས་དཔུང་གྲོགས་བྱེད་མཁན་ཉིན་རེ་བཞིན་འོངས་པས། དཀོན་མཆོག་གི་དམག་དཔུང་དང་འདྲ་བའི་དམག་དཔུང་ཆེན་པོ་ཞིག་ཏུ་གྱུར་ཏོ། །
1CH 12:23 ཡང་དཀོན་མཆོག་ཡ་ཝཱེའི་གསུང་བཞིན་དུ་སོ་ལོའི་རྒྱལ་ཁྲི་དཱ་བིད་ལ་སྤྲོད་པའི་ཕྱིར། དམག་འཐབ་ལ་ཞུགས་གྲབས་ཡོད་པའི་འགོ་དཔོན་རྣམས་ཧེབ་རོན་དུ་དཱ་བིད་ཀྱི་དྲུང་དུ་འོངས་པ་དང་ཁོ་ཚོའི་མི་གྲངས་ནི་འདི་ལྟ་སྟེ།
1CH 12:24 ཡ་ཧུ་དཱ་ཚོ་པའི་བུ་རབས་ཚ་རྒྱུད་ལས་ཕུབ་དང་མདུང་ཐོགས་མཁན་བསྡོམས་པས་དྲུག་སྟོང་བརྒྱད་བརྒྱ་ཡོད་པ་དང་། ཐམས་ཅད་དམག་འཐབ་ལ་ཞུགས་གྲབས་ཡོད་དོ། །
1CH 12:25 སི་མུ་ཨོན་ཚོ་པའི་བུ་རབས་ཚ་རྒྱུད་ལས་དམག་འཐབ་ལ་ཞུགས་ནུས་པའི་དམག་མི་དཔའ་རྩལ་ཅན་བསྡོམས་པས་བདུན་སྟོང་བརྒྱ་ཡོད།
1CH 12:26 ལེ་ཝི་ཚོ་པའི་བུ་རབས་ཚ་རྒྱུད་ལས་བསྡོམས་པས་བཞི་སྟོང་དྲུག་བརྒྱ་ཡོད།
1CH 12:27 ཡེ་ཧོ་ཡ་དཱ་ནི་ཨ་རོན་པ་རྣམས་ཀྱི་འགོ་དཔོན་ཡིན་ལ་ཁོའི་རྗེས་སུ་འབྲངས་པ་བསྡོམས་པས་སུམ་སྟོང་བདུན་བརྒྱ་ཡོད།
1CH 12:28 ན་གཞོན་དམག་མི་དཔའ་རྩལ་ཅན་ཟཱ་ཏོག་དང་། ཁོའི་ཁྱིམ་རྒྱུད་ཀྱི་དམག་དཔོན་ཉེར་གཉིས་ཀྱང་ཡོད་དོ། །
1CH 12:29 པེན་ཡཱ་མེན་ཚོ་པའི་བུ་རབས་ཚ་རྒྱུད་ཁྲོད་སོ་ལོའི་གཉེན་ཉེ་ཡང་མི་སུམ་སྟོང་ཡོད་པ་དང་། ཁོ་རྣམས་ལས་མང་ཤོས་ནི་ད་ལྟའི་བར་དུ་སོ་ལོའི་ཁྱིམ་རྒྱུད་ཀྱི་ཕྱོགས་ཡིན།
1CH 12:30 ཨེ་ཕཱར་ཡིམ་ཚོ་པའི་བུ་རབས་ཚ་རྒྱུད་ཁྲོད་རང་གི་ཁྱིམ་རྒྱུད་དུ་མིང་གྲགས་ཆེ་བའི་དམག་མི་དཔའ་རྩལ་ཅན་བསྡོམས་པས་ཉིས་ཁྲི་བརྒྱད་བརྒྱ་ཡོད།
1CH 12:31 མཱ་ན་ཤེའི་ཚོ་པ་ཕྱེད་ཀ་ལས་མིང་ཐོ་བཀོད་པ་བསྡོམས་པས་ཆིག་ཁྲི་བརྒྱད་སྟོང་ཡོད་པ་དང་། ཐམས་ཅད་དཱ་བིད་རྒྱལ་པོར་བསྐོ་རུ་འོངས་སོ། །
1CH 12:32 ཡང་ཡེས་སི་ཀཱར་ཚོ་པའི་བུ་རབས་ཚ་རྒྱུད་ལས་དུས་སྐབས་ཤེས་མཁན་དང་། ཡེས་ར་ཨེལ་གྱིས་གང་བྱེད་རུང་བ་ཤེས་མཁན་བསྡོམས་པས་འགོ་དཔོན་ཉིས་བརྒྱ་ཡོད་པ་དང་། དེ་དག་གི་གཉེན་ཉེ་ཐམས་ཅད་ཀྱིས་དེ་དག་གི་བཀའ་ལ་ཉན་པ་ཡིན།
1CH 12:33 ཟེ་བུ་ལུན་ཚོ་པའི་བུ་རབས་ཚ་རྒྱུད་ལས་ཕྱི་ལ་སོང་ནས་དམག་འཐབ་ལ་ཞུགས་ནུས་པ་དང་། མཚོན་ཆ་སྣ་ཚོགས་སྤྱོད་ཐུབ་པ། རྩེ་གཅིག་གིས་དམག་ལ་ཐོན་པ་བསྡོམས་པས་ཁྲི་ལྔ་ཡོད།
1CH 12:34 ཡང་ནཱབ་ཐ་ལི་ཚོ་པའི་བུ་རབས་ཚ་རྒྱུད་ལས་དམག་དཔོན་ཆིག་སྟོང་ཡོད་ལ། དེ་དག་གི་རྗེས་སུ་འབྲངས་ཤིང་ཕུབ་དང་མདུང་ཐོགས་མཁན་བསྡོམས་པས་སུམ་ཁྲི་བདུན་སྟོང་ཡོད།
1CH 12:35 དཱན་ཚོ་པའི་བུ་རབས་ཚ་རྒྱུད་ལས་དམག་འཐབ་ལ་ཞུགས་ནུས་པ་བསྡོམས་པས་ཉིས་ཁྲི་བརྒྱད་སྟོང་དྲུག་བརྒྱ་ཡོད།
1CH 12:36 ཨ་ཤེར་ཚོ་པའི་བུ་རབས་ཚ་རྒྱུད་ལས་གཡུལ་ངོར་སོང་ནས་དམག་འཐབ་ལ་ཞུགས་ནུས་པ་བསྡོམས་པས་ཁྲི་བཞི་ཡོད།
1CH 12:37 ཡང་ཡོར་དན་གཙང་པོའི་ཤར་ཕྱོགས་ཀྱི་རུ་བེན་གྱི་ཚོ་པ་དང་། གཱ་རྡུའི་ཚོ་པ། མཱ་ན་ཤེའི་ཚོ་པ་ཕྱེད་ཀ་བཅས་ལས་མཚོན་ཆ་རིགས་སྣ་ཚོགས་ཐོགས་པ་བསྡོམས་པས་ཆིག་འབུམ་ཉིས་ཁྲི་ཡོད།
1CH 12:38 གོང་གི་དམག་མི་ཐམས་ཅད་རུ་བསྒྲིགས་ཏེ་བློ་སེམས་རྩེ་གཅིག་གིས་དཱ་བིད་ནི་ཡེས་ར་ཨེལ་གྱི་རྒྱལ་པོར་བསྐོ་བར་ཧེབ་རོན་དུ་འོངས་པ་དང་། ཡེས་ར་ཨེལ་པ་གཞན་ཀུན་ཡང་དཱ་བིད་རྒྱལ་པོར་བསྐོ་བར་བློ་སེམས་རྩེ་གཅིག་ཡིན་ནོ། །
1CH 12:39 དེ་དག་ཉིན་ཞག་གསུམ་གྱི་རིང་ལ་དཱ་བིད་དང་ལྷན་ཅིག་བཟའ་བཏུང་རོལ་ནས་བསྡད་པ་ཡིན་ཏེ། དེ་དག་གི་གཉེན་ཉེ་རྣམས་ཀྱིས་དེ་དག་གི་ཆེད་དུ་ཁ་ཟས་གཡོས་པའི་ཕྱིར་རོ། །
1CH 12:40 དེ་དག་གི་ཉེ་སར་ཡོད་པའི་ཡེས་སི་ཀཱར་དང་། ཟེ་བུ་ལུན། ནཱབ་ཐ་ལི་བཅས་ཚོ་པའི་མི་རྣམས་ཀྱིས་བག་ལེབ་དང་། སེ་ཡབ་ལེབ་མོ་དང་། རྒུན་འབྲུམ་སྐམ་པོ་ལེབ་མོ་དང་། རྒུན་ཆང་དང་། སྣུམ་བཅས་ཁ་ཟས་མང་པོ་བོང་བུ་དང་རྔ་མོང་། དྲེལ། བ་གླང་བཅས་ལ་བཀལ་ནས་བསྐྱལ་འོངས་པ་དང་། ཡང་བ་གླང་དང་ར་ལུག་མོད་པོ་ཁྲིད་འོངས་པ་སྟེ། ཡེས་ར་ཨེལ་ཡུལ་ཡོངས་ལ་དགའ་སྤྲོས་ཁེངས་པས་སོ། །
1CH 13:1 དཱ་བིད་ཀྱིས་སྟོང་དཔོན་དང་བརྒྱ་དཔོན་དང་། འགོ་དཔོན་ཀུན་ལ་གྲོས་བྱས་ནས།
1CH 13:2 ཡེས་ར་ཨེལ་གྱི་མི་ཚོགས་ཐམས་ཅད་ལ་ན་རེ། གལ་ཏེ་ཁྱོད་ཅག་གིས་ལེགས་པར་འདོད་ཅིང་། དོན་འདི་ནི་རང་ཅག་གི་དཀོན་མཆོག་ཡ་ཝཱེའི་ཐུགས་དགོངས་ལྟར་ཡིན་པར་བསམས་ན། རང་ཅག་གིས་ཡུལ་སོ་སོར་མི་མངགས་ཏེ། ཡེས་ར་ཨེལ་གྱི་ཡུལ་ཀུན་ཏུ་ལུས་ཡོད་པའི་སྤུན་རྣམས་དང་། རྩྭ་ར་ཅན་གྱི་གྲོང་ཁྱེར་རྣམས་སུ་སྡོད་པའི་མཆོད་དཔོན་རྣམས་དང་། ལེ་ཝི་པ་རྣམས་བཅས་ངེད་ཅག་གི་རྩར་བསྡུ་བར་བྱའོ། །
1CH 13:3 རང་ཅག་གིས་རང་རེའི་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ཡང་འདི་རུ་ཕྱིར་འདྲེན་པར་བྱ། ཅིའི་ཕྱིར་ཞེ་ན། སོ་ལོའི་དུས་སུ་རང་ཅག་གིས་ཞལ་ཆད་ཀྱི་ཤུར་སྒམ་དྲུང་དུ་དཀོན་མཆོག་ལ་མ་ཞུས་སོ་ཞེས་སྨྲས་པར།
1CH 13:4 མི་ཐམས་ཅད་ཀྱིས་དེ་འགྲིག་པར་བསམས་པས། མི་ཚོགས་ཡོངས་དེ་བཞིན་བྱེད་པར་འཐད་པའོ། །
1CH 13:5 དེ་ནས་དཱ་བིད་ཀྱིས་དཀོན་མཆོག་གི་ཤུར་སྒམ་དེ་ཀིར་ཡཱད་ཡེ་ཨ་རིམ་ནས་ཕྱིར་གདན་འདྲེན་ཞུ་བའི་ཕྱིར། ཨེ་ཅིབ་ཀྱི་ཤི་ཧོར་གཙང་པོ་ ནས་ཧ་མཱད་ལ་འགྲོ་སའི་བར་དུ་ཡེས་ར་ཨེལ་པ་ཡོད་དོ་ཅོག་བསྡུས་ཤིང་།
1CH 13:6 དཱ་བིད་དང་ཡེས་ར་ཨེལ་པ་ཐམས་ཅད་པཱ་ཨ་ལ་བྱ་བ་སྟེ་ཡ་ཧུ་དཱའི་ཀིར་ཡཱད་ཡེ་ཨ་རིམ་ལ་སླེབས་ཤིང་། དེ་ནས་ཀེ་རུབ་རྣམས་ཀྱི་དབུས་སུ་བཞུགས་པའི་དཀོན་མཆོག་ཡ་ཝཱེའི་མཚན་ནས་འབོད་པའི་དཀོན་མཆོག་གི་ཤུར་སྒམ་དེ་གདན་འདྲེན་པར་ཕྱིན་ནས།
1CH 13:7 དེ་དག་གིས་དཀོན་མཆོག་གི་ཤུར་སྒམ་ནི་ཨ་བི་ནཱ་དབ་ཀྱི་ཁྱིམ་ནས་ཕྱུང་སྟེ། ཤིང་རྟ་གསར་པ་ཞིག་ལ་བསྐྱོན་ནས་ཨུ་ཟཱ་དང་ཨ་ཧི་ཨོ་གཉིས་ཀྱིས་ཤིང་རྟ་དེད་པ་རེད།
1CH 13:8 དཱ་བིད་དང་ཡེས་ར་ཨེལ་པ་ཐམས་ཅད་ཀྱིས་དཀོན་མཆོག་གི་སྤྱན་སྔར་སྟོབས་ཤུགས་ཡོངས་ཀྱིས་མགུར་ལེན་བཞིན། པི་ཝང་དང་། རྒྱུད་མངས་དང་། སིལ་རྔ་དང་། སིལ་སྙན་བཅས་དཀྲོལ་ནས་དུང་འབུད་ཀྱིན་དགའ་སྟོན་ལ་རོལ་ཏེ།
1CH 13:9 ཀི་དོན་གཡུལ་ཁ་རུ་སླེབས་དུས་སུ། བ་གླང་རྣམས་རྐང་འདྲེད་ཤོར་བས། ཨུ་ཟཱས་ལག་པ་བརྐྱངས་ནས་ཞལ་ཆད་ཀྱི་ཤུར་སྒམ་ལ་འཇུས་པ་དང་།
1CH 13:10 ཨུ་ཟཱས་ལག་པ་བརྐྱངས་ནས་ཞལ་ཆད་ཀྱི་ཤུར་སྒམ་ལ་རེག་པས། དཀོན་མཆོག་ཡ་ཝཱེ་ཨུ་ཟཱའི་སྟེང་ཐུགས་ཁྲོས་ནས་ཁོ་བཀུམ་པ་དང་ཁོ་གནས་དེ་རུ་དཀོན་མཆོག་གི་སྤྱན་སྔར་ཤི་བར་གྱུར་ཏོ། །
1CH 13:11 དཀོན་མཆོག་ཡ་ཝཱེས་གློ་བུར་ཉིད་དུ་ཨུ་ཟཱ་ལ་ཉེས་ཆད་བཅད་པའི་རྐྱེན་གྱིས་དཱ་བིད་ཤིན་ཏུ་མ་དགའ་བར་ས་ཆ་དེའི་མིང་ལ་ཕེ་རེལ་ཟི་ཨུ་ཟཱ་ཞེས་བཏགས་ནས་དེ་རིང་གི་བར་དུ་ལུས་སོ། །
1CH 13:12 ཉིན་མོ་དེར་དཱ་བིད་ནི་དཀོན་མཆོག་ལ་འཇིགས་ནས་འདི་ལྟར། ངས་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ངའི་རྩར་གདན་འདྲེན་ག་ལ་རུང་ཞེས་སྨྲས་པ་དང་།
1CH 13:13 དེ་ནས་དཱ་བིད་ཀྱིས་ཞལ་ཆད་ཀྱི་ཤུར་སྒམ་དེ་དཱ་བིད་ཀྱི་གྲོང་ཁྱེར་དུ་མ་དྲངས་པར། དེ་ལས་བཟློགས་ཏེ་གཱད་པ་ཨོ་བེད་ཨེ་དོམ་གྱི་ཁྱིམ་དུ་གདན་དྲངས་སོ། །
1CH 13:14 དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ཨོ་བེད་ཨེ་དོམ་གྱི་ཁྱིམ་དུ་ཟླ་བ་གསུམ་ལ་ལུས་ཤིང་། དཀོན་མཆོག་ཡ་ཝཱེས་ཨོ་བེད་ཨེ་དོམ་གྱི་ཁྱིམ་དང་དེ་ལ་གཏོགས་པ་ཐམས་ཅད་ལ་བྱིན་གྱིས་བརླབས་སོ། །
1CH 14:1 དེ་ནས་ཐཱར་གྱི་རྒྱལ་པོ་ཧི་རཱམ་གྱིས་དཱ་བིད་ཀྱི་དྲུང་དུ་བང་ཆེན་རྣམས་མངགས་ཤིང་། དཱ་བིད་ལ་ཕོ་བྲང་ཞིག་བཞེང་བའི་དོན་དུ་ཐང་ཤིང་དང་རྡོ་བཟོ། ཤིང་བཟོ་བཅས་བསྐྱལ་ཡོང་།
1CH 14:2 དེར་དཱ་བིད་ཀྱིས་དཀོན་མཆོག་ཡ་ཝཱེས་རང་ཉིད་ཡེས་ར་ཨེལ་གྱི་རྒྱལ་པོར་བསྐོས་པ་དང་། ཡང་ཁོང་གི་འབངས་མི་ཡེས་ར་ཨེལ་གྱི་དོན་དུ་ཁོང་གི་རྒྱལ་སྲིད་དར་བར་མཛད་པ་རྟོགས་སོ། །
1CH 14:3 དཱ་བིད་ཀྱིས་ཡེ་རུ་སཱ་ལེམ་དུ་ཡང་བཙུན་མོ་མང་དུ་བཞེས་ནས། སྲས་དང་སྲས་མོ་རྣམས་འཁྲུངས་པ་སྟེ།
1CH 14:4 འདི་རྣམས་ནི་ཡེ་རུ་སཱ་ལེམ་དུ་འཁྲུངས་པའི་བུ་ཕྲུག་རྣམས་ཀྱི་མིང་སྟེ། ཤམ་མུ་ཨ་དང་ཤོ་བབ། ནཱ་ཐན། སོ་ལོ་མོན།
1CH 14:5 ཡིབ་ཧར། ཨེ་ལི་ཤུ་ཨ། ཨེལ་ཕེ་ལེད།
1CH 14:6 ནོ་གཱ། ནེ་ཕེག ཡཱ་ཕི་ཨ།
1CH 14:7 ཨེ་ལི་ཤ་མཱ། པེ་ཨེལ་ཡ་དཱ། ཨེ་ལི་ཕེ་ལེད་བཅས་སོ། །
1CH 14:8 ཕེ་ལེ་ཤེད་པ་རྣམས་ཀྱིས་དཱ་བིད་ནི་ཡེས་ར་ཨེལ་གྱི་རྒྱལ་པོར་བྱུགས་པ་ཐོས་ནས་ཡོངས་རྫོགས་དཱ་བིད་བཙལ་དུ་ཡར་ཕྱིན་པ་ལ། དཱ་བིད་ཀྱིས་དེ་ཐོས་པ་ཙམ་གྱིས་དེ་རྣམས་ལ་རྒོལ་ལན་སྤྲོད་དུ་སོང་ངོ་། །
1CH 14:9 ཕེ་ལེ་ཤེད་པ་རྣམས་འོངས་ནས་རེ་པཱ་པའི་ལུང་པར་དཔུང་འཇུག་བྱས།
1CH 14:10 དཱ་བིད་ཀྱིས་དཀོན་མཆོག་ལ་འདི་ལྟར། ང་རང་ཕེ་ལེ་ཤེད་པ་རྣམས་ལ་ཡར་རྒོལ་དུ་འགྲོ་བར་བྱའམ། ཁྱེད་ཀྱིས་དེ་རྣམས་བདག་གི་ལག་ཏུ་གཏོད་དམ་ཞུས་པས། དཀོན་མཆོག་ཡ་ཝཱེས་དེ་ལ་འདི་སྐད་དུ། ཁྱོད་རང་ཡར་སོང་དང་བདག་གིས་དེ་རྣམས་ཁྱོད་ཀྱི་ལག་ཏུ་གཏོད་པར་བྱ་ཞེས་གསུངས་སོ། །
1CH 14:11 ཕེ་ལེ་ཤེད་པ་རྣམས་ཡར་པཱ་ཨལ་ཕེ་ར་ཙིམ་དུ་སླེབས་པ་དང་། དེར་དཱ་བིད་ཀྱིས་ཁོ་རྣམས་ཕམ་པར་བརྒྱབ་ཅིང་། དཱ་བིད་ན་རེ། ཆུ་ཡིས་ཆུ་རགས་ཁུར་བ་ལྟར་དུ་དཀོན་མཆོག་གིས་ང་རང་བརྒྱུད་ནས་དགྲ་བོ་རྣམས་ཕམ་པར་བརྒྱབ་བོ་ཞེས་སྨྲས་ཏེ། ས་ཆ་དེའི་མིང་ལ་པཱ་ཨལ་ཕེ་ར་ཙིམ་ཞེས་བཏགས་སོ། །
1CH 14:12 ཕེ་ལེ་ཤེད་པ་རྣམས་ཀྱིས་ལྷ་སྐུ་རྣམས་དེ་རུ་དོར་བས། དཱ་བིད་ཀྱིས་མི་རྣམས་ལ་དེ་དག་མེར་བསྲེག་པའི་བཀའ་བབས་སོ། །
1CH 14:13 དེ་ནས་ཕེ་ལེ་ཤེད་པ་རྣམས་ཀྱིས་སླར་ཡང་ལུང་པ་དེར་དཔུང་འཇུག་བྱས་པ་དང་།
1CH 14:14 དཱ་བིད་ཀྱིས་ཡང་དཀོན་མཆོག་ལ་ཞུས་པ་ན། དཀོན་མཆོག་གིས་ཁོང་ལ་འདི་སྐད་དུ། ཁྱོད་དེ་དག་གི་ར་མདའ་ལ་ཡར་མི་འགྲོ་བར། དེ་དག་རྒྱབ་ནས་བསྐོར་ཏེ་སྤོས་ཤིང་གི་ནགས་ཚལ་གྱི་ཁ་གཏད་ནས་དེ་དག་ལ་རྒོལ་ཞིག
1CH 14:15 ཁྱོད་ཀྱིས་སྤོས་ཤིང་གི་རྩེ་ནས་དཔུང་ཚོགས་ཀྱི་གོམ་སྒྲ་ཐོས་པ་ཙམ་གྱིས་གཡུལ་འཐབ་ལ་ཆས་ཤིག ཅི་ལ་ཞེ་ན། དུས་དེར་དཀོན་མཆོག་ཁྱོད་ཀྱི་སྔོན་དུ་གཤེགས་ཏེ་ཕེ་ལེ་ཤེད་པའི་དམག་ཚོགས་ལ་རྒོལ་བ་ཡིན་ནོ་ཞེས་གསུངས་པར།
1CH 14:16 དཱ་བིད་ཀྱིས་དཀོན་མཆོག་གི་བཀའ་བཞིན་དུ་བྱས་ཏེ། གིབ་ཡོན་ནས་གེ་ཟེར་གྱི་བར་དུ་ཕེ་ལེ་ཤེད་པའི་དམག་ཚོགས་བསད།
1CH 14:17 དེ་ནས་དཱ་བིད་ཀྱི་མིང་ཡུལ་ཕྱོགས་ཀུན་ཏུ་གྲགས་ཤིང་། དཀོན་མཆོག་ཡ་ཝཱེས་མི་ཐམས་ཅད་དཱ་བིད་ལ་འཇིགས་པར་མཛད་དོ། །
1CH 15:1 དཱ་བིད་ཀྱིས་དཱ་བིད་གྲོང་ཁྱེར་དུ་རང་ཉིད་ལ་ཕོ་བྲང་རྣམས་བརྩིགས་ཤིང་། ཡང་དཀོན་མཆོག་གི་ཞལ་ཆད་ཀྱི་ཤུར་སྒམ་ཕྱིར་གནས་ཤིག་སྟ་གོན་བྱས་ནས་གུར་ཞིག་ཀྱང་ཕུབ་བོ། །
1CH 15:2 དུས་དེར་དཱ་བིད་ན་རེ། དཀོན་མཆོག་ཡ་ཝཱེས་ལེ་ཝི་པ་རྣམས་ནི་དཀོན་མཆོག་གི་ཞལ་ཆད་ཀྱི་ཤུར་སྒམ་འཁུར་བ་དང་། དུས་རྟག་ཏུ་ཁོང་ལ་ཞབས་ཏོག་བསྒྲུབ་པར་བདམས་པས། དེ་རྣམས་མ་གཏོགས་གཞན་སུས་ཀྱང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མི་རུང་ཞེས་བསྒོས།
1CH 15:3 དེ་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དཱ་བིད་ཀྱིས་སྟ་གོན་བྱས་པའི་གནས་སུ་གདན་འདྲེན་པར། དཱ་བིད་ཀྱིས་ཡེས་ར་ཨེལ་པ་རྣམས་ཡེ་རུ་སཱ་ལེམ་དུ་བསྡུས་པ་དང་།
1CH 15:4 དཱ་བིད་ཀྱིས་ཨ་རོན་གྱི་བུ་རྒྱུད་དང་ལེ་ཝི་པ་རྣམས་ཀྱང་བསྡུས་པ་སྟེ།
1CH 15:5 ཀོ་ཧད་ཀྱི་བུ་རྒྱུད་ལས་འགོ་དཔོན་ཨུ་རི་ཨེལ་དང་དེའི་གཉེན་ཉེ་བརྒྱ་དང་ཉི་ཤུ།
1CH 15:6 མཱ་རཱ་རེའེ་ཡི་བུ་རྒྱུད་ལས་འགོ་དཔོན་ཨ་ས་ཡཱ་དང་དེའི་གཉེན་ཉེ་ཉིས་བརྒྱ་དང་ཉི་ཤུ།
1CH 15:7 གེར་ཤོན་གྱི་བུ་རྒྱུད་ལས་འགོ་དཔོན་ཡོ་ཨེལ་དང་དེའི་གཉེན་ཉེ་བརྒྱ་དང་སུམ་ཅུ།
1CH 15:8 ཨེ་ལི་ཙ་ཕན་གྱི་བུ་རྒྱུད་ལས་འགོ་དཔོན་ཤེ་མ་ཡཱ་དང་དེའི་གཉེན་ཉེ་ཉིས་བརྒྱ།
1CH 15:9 ཧེབ་རོན་གྱི་བུ་རྒྱུད་ལས་འགོ་དཔོན་ཨེ་ལི་ཨེལ་དང་དེའི་གཉེན་ཉེ་བརྒྱད་ཅུ།
1CH 15:10 ཨུ་ཟི་ཨེལ་གྱི་བུ་རྒྱུད་ལས་འགོ་དཔོན་ཨ་མི་ནཱ་དབ་དང་དེའི་གཉེན་ཉེ་བརྒྱ་དང་བཅུ་གཉིས་བཅས་སོ། །
1CH 15:11 དེ་ནས་དཱ་བིད་ཀྱིས་ཟཱ་ཏོག་དང་ཨབ་ཡཱ་ཐར་མཆོད་དཔོན་གཉིས་པོ་དང་། ལེ་ཝི་པ་རྣམས་ལས་ཨུ་རི་ཨེལ་དང་ཨ་ས་ཡཱ། ཡོ་ཨེལ། ཤེ་མ་ཡཱ། ཨེ་ལི་ཨེལ། ཨ་མི་ནཱ་དབ་བཅས་བོས་ནས།
1CH 15:12 དེ་དག་ལ་ན་རེ། ཁྱེད་རྣམས་ནི་ལེ་ཝི་པའི་ཁྱིམ་རྒྱུད་སོ་སོའི་འགོ་དཔོན་ཡིན་པས། ཁྱེད་ཅག་དང་ཁྱེད་ཅག་གི་གཉེན་ཉེ་རྣམས་ཀྱིས་རང་ཉིད་དམ་པར་གྱིས་ཤིག གང་ལ་ཞེ་ན། ཡེས་ར་ཨེལ་གྱི་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དེ་ངས་སྟ་གོན་བྱས་པའི་གནས་སུ་གདན་འདྲེན་པའི་ཕྱིར་ཡིན།
1CH 15:13 སྔར་ཁྱེད་ཅག་མེད་པ་དང་ངེད་རྣམས་ཀྱིས་རང་ཅག་གི་དཀོན་མཆོག་ཡ་ཝཱེ་ལ་ལུགས་སྲོལ་བཞིན་མ་ཞུས་པས། ཁོང་ངེད་ཅག་ལ་རབ་ཏུ་ཁྲོས་སོ་ཞེས་སྨྲས་པ་དང་།
1CH 15:14 མཆོད་དཔོན་དང་ལེ་ཝི་པ་རྣམས་ཀྱིས་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གི་ཞལ་ཆད་ཀྱི་ཤུར་སྒམ་གདན་འདྲེན་དུ་རང་ཉིད་དམ་པར་བྱས་སོ། །
1CH 15:15 ལེ་ཝི་ཚོ་པའི་བུ་རྒྱུད་རྣམས་ཀྱིས་དཀོན་མཆོག་ཡ་ཝཱེའི་བཀའ་སྟེ་མོ་ཤེ་ལ་བསྒོས་པ་བཞིན་དུ། གདང་རྒྱུས་ནས་ཕྲག་པས་ཁུར།
1CH 15:16 དཱ་བིད་ཀྱིས་ལེ་ཝི་པའི་འགོ་དཔོན་དག་ལ། ཁོ་ཚོའི་གཉེན་ཉེ་རྣམས་མངགས་ནས་རོལ་ཆས་རྒྱུད་མངས་དང་། པི་ཝང་དང་། སྦུག་ཆལ་རྣམས་བརྡུངས་ནས་དགའ་དགའ་སྤྲོ་སྤྲོས་གླུ་ལེན་གར་རྩེད་བྱེད་དགོས་པར་བསྒོས།
1CH 15:17 དེ་ནས་ལེ་ཝི་པ་དག་གིས་ཡོ་ཨེལ་གྱི་བུ་ཧེ་མཱན་དང་། དེའི་གཉེན་ཉེ་ལས་པེ་རེག་ཡཱའི་བུ་ཨ་སབ་དང་། ཡང་དེ་དག་གི་གཉེན་ཉེ་མཱ་རཱ་རེའེ་ཡི་བུ་རྒྱུད་ཁྲོད་ཀྱི་ཀུ་ཤ་ཡཱའི་བུ་ཨེ་ཐན་བཅས་མངགས་པ་དང་།
1CH 15:18 དེ་དག་དང་མཉམ་དུ་ད་དུང་སྐོར་ཚོགས་གཉིས་པའང་ཡོད་དེ། ཁོ་རྣམས་ཀྱི་གཉེན་ཉེ་ཟཱ་ཀར་ཡ་དང་། པེན། ཡ་ཨ་ཟི་ཨེལ། ཤེ་མི་ར་མོད། ཡེ་ཧི་ཨེལ། ཨུན་ནི། ཨེ་ལི་ཨབ། པེ་ནཱ་ཡ། མ་ཨ་སེ་ཡཱ། མད་ཐིད་ཡཱ། ཨེ་ལི་ཕེ་ལེ་ཧུ། མིག་ནེ་ཡཱ། དེ་མིན་སྒོ་སྲུང་མཁན་ཨོ་བེད་ཨེ་དོམ་དང་། ཡེ་ཨི་ཨེལ་བཅས་སོ། །
1CH 15:19 ཡང་མགུར་ལེན་མཁན་ཧེ་མཱན་དང་། ཨ་སབ། ཨེ་ཐན་བཅས་ཀྱིས་ལི་ཡི་སྦུག་ཆལ་བརྡུངས་ནས་སྐད་ཆེན་པོ་འདོན་པ་དང་།
1CH 15:20 ཟཱ་ཀར་ཡ་དང་། ཨ་ཟི་ཨེལ། ཤེ་མི་ར་མོད། ཡེ་ཧི་ཨེལ། ཨུན་ནི། ཨེ་ལི་ཨབ། མ་ཨ་སེ་ཡཱ། པེ་ནཱ་ཡ་བཅས་ཀྱིས་རྒྱུད་མངས་བརྡུངས་ནས་སྐྱེས་མའི་སྒྲ་གདངས་མཐོན་པོ་བཞིན་ལེན་པ་དང་།
1CH 15:21 མད་ཐིད་ཡཱ་དང་། ཨེ་ལི་ཕེ་ལེ་ཧུ། མིག་ནེ་ཡཱ། ཨོ་བེད་ཨེ་དོམ། ཡེ་ཨི་ཨེལ། ཨ་ཟཱ་སི་ཡ་བཅས་ཀྱིས་པི་ཝང་བརྡུངས་ནས་སྐྱེས་པའི་སྒྲ་གདངས་དམའ་མོ་བཞིན་ལེན་དགོས་པའོ། །
1CH 15:22 ལེ་ཝི་ཚོ་པའི་འགོ་དཔོན་ཀེ་ནན་ཡཱ་བྱ་བ་ནི་བསྟོད་དབྱངས་ལེན་པའི་དབུ་མཛད་ཡིན་ཞིང་། དེའི་ཕྱོགས་ལ་རབ་ཏུ་མཁས་པས་དབྱངས་ཇི་ལྟར་ལེན་པ་བསླབས་པའོ། །
1CH 15:23 པེ་རེག་ཡཱ་དང་ཨེལ་ཁ་ནཱ་གཉིས་ཞལ་ཆད་ཀྱི་ཤུར་སྒམ་སྲུང་མཁན་ཡིན་ལ།
1CH 15:24 ཤེ་བན་ཡཱ་དང་། ཡོ་ཤ་ཕད། ནེ་ཐན་ཨེལ། ཨ་མ་སཱ་ཨི། ཟཱ་ཀར་ཡ། པེ་ནཱ་ཡ། ཨེ་ལི་ཨེ་བཟིར་བྱ་བའི་མཆོད་དཔོན་རྣམས་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་དྲུང་དུ་དུང་བུས་པ་དང་། ཨོ་བེད་ཨེ་དོམ་དང་ཡེ་ཧི་ཡཱ་གཉིས་ཀྱང་ཞལ་ཆད་ཀྱི་ཤུར་སྒམ་སྲུང་མཁན་ཡིན་ནོ། །
1CH 15:25 དེ་ནས་དཱ་བིད་དང་ཡེས་ར་ཨེལ་གྱི་རྒན་པོ་རྣམས་དང་། སྟོང་དཔོན་རྣམས་མཉམ་དུ་ཆས་ཏེ་དགའ་དགའ་སྤྲོ་སྤྲོའི་ངང་ཨོ་བེད་ཨེ་དོམ་གྱི་ཁྱིམ་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་གདན་དྲངས་ནས་འོངས།
1CH 15:26 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་ལེ་ཝི་པ་རྣམས་ལ་དཀོན་མཆོག་གིས་མགོན་སྐྱབས་མཛད་པ་དང་། དེ་དག་གིས་བ་གླང་བདུན་དང་ལུག་ཐུག་བདུན་མཆོད་པར་ཕུལ་ཏོ། །
1CH 15:27 དཱ་བིད་དང་ཞལ་ཆད་ཀྱི་ཤུར་སྒམ་འཁུར་བའི་ལེ་ཝི་པ་རྣམས་དང་། མགུར་ལེན་མཁན་དག་དང་། དབུ་མཛད་ཀེ་ནན་ཡཱ་བཅས་ཀྱིས་སོ་རས་སྲབ་བུའི་གོས་གྱོན་ཞིང་། དཱ་བིད་ཀྱིས་དེ་ལས་གཞན་སོ་རས་སྲབ་བུའི་བེར་ཐུལ་ཞིག་གྱོན་པའོ། །
1CH 15:28 དེ་ལྟར་ཡེས་ར་ཨེལ་པ་ཐམས་ཅད་ཀྱིས་དགའ་བའི་ཀི་སྒྲ་བསྒྲགས་པ་དང་། རྭ་དུང་དང་དུང་བུས་ཤིང་། སྦུག་ཆལ་དང་རྒྱུད་མངས། པི་ཝང་བཅས་ཀྱི་སྒྲ་ཆེན་པོ་དང་བཅས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དེ་ཡར་གདན་དྲངས་སོ། །
1CH 15:29 ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དེ་དཱ་བིད་ཀྱི་གྲོང་ཁྱེར་དུ་སླེབས་པའི་ཚེ། སོ་ལོའི་སྲས་མོ་མི་ཀལ་གྱིས་སྒེའུ་ཁུང་ནས་མར་བལྟས་པ་དང་། རྒྱལ་པོ་དཱ་བིད་ཀྱིས་ཞབས་བྲོ་འཁྲབ་ཀྱིན་རྩེད་མོ་རྩེ་བ་མཐོང་ནས། སེམས་ནས་ཁོང་ལ་སྨད་པའོ། །
1CH 16:1 ཁོ་རྣམས་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་ནང་ལ་གདན་དྲངས་ཏེ། དཱ་བིད་ཀྱིས་དེའི་དོན་དུ་ཕུབ་པའི་མཇལ་འཕྲད་གུར་མཆོག་གི་དབུས་སུ་བཞག་ནས། དཀོན་མཆོག་གི་སྤྱན་སྔར་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །
1CH 16:2 དཱ་བིད་ཀྱིས་སྦྱིན་སྲེག་དང་ཞི་བདེའི་མཆོད་པ་རྣམས་ཕུལ་རྗེས། ཁོང་གིས་དཀོན་མཆོག་ཡ་ཝཱེའི་མཚན་ལ་བརྟེན་ནས་མི་རྣམས་ལ་བྱིན་རླབས་གནང་ཞིང་།
1CH 16:3 ཡང་ཡེས་ར་ཨེལ་གྱི་སྐྱེས་ཕོ་མོ་ཐམས་ཅད་ལ་བག་ལེབ་རེ་དང་། རྒྱ་རི་རེ་དང་། རྒུན་འབྲུམ་སྐམ་པོ་ལེབ་མོ་རེ་སྤྲད་དོ། །
1CH 16:4 དཱ་བིད་ཀྱིས་ལེ་ཝི་པ་འགའ་ཞིག་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དྲུང་དུ་ཞབས་ཏོག་བསྒྲུབ་པ་དང་། ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་བསྟོད་དབྱངས་ལེན་པ་དང་གཏང་རག་འབུལ་བ། བསྟོད་བསྔགས་བརྗོད་པ་བཅས་སུ་མངགས་སོ། །
1CH 16:5 དེའི་འགོ་ཁྲིད་མཁན་ནི་ཨ་སབ་དང་། དེ་ནས་ཟཱ་ཀར་ཡ་དང་། ཡེ་ཨི་ཨེལ། ཤེ་མི་ར་མོད། ཡེ་ཧི་ཨེལ། མད་ཐིད་ཡཱ། ཨེ་ལི་ཨབ། པེ་ནཱ་ཡ། ཨོ་བེད་ཨེ་དོམ། ཡེ་ཨི་ཨེལ་བཅས་ཡོད་ལ། ཁོ་རྣམས་ཀྱིས་རྒྱུད་མངས་དང་པི་ཝང་བརྡུང་བ་དང་། ཨ་སབ་ཀྱིས་སྦུག་ཆལ་སྒྲ་ཆེན་པོར་བརྡུང་དགོས་ལ།
1CH 16:6 མཆོད་དཔོན་པེ་ནཱ་ཡ་དང་ཡ་ཧ་ཟི་ཨེལ་གཉིས་ཀྱིས་རྒྱུན་དུ་དཀོན་མཆོག་གི་ཞལ་ཆད་ཀྱི་ཤུར་སྒམ་དྲུང་དུ་དུང་འབུད་དགོས་པའོ། །
1CH 16:7 ཉིན་དེར་དཱ་བིད་ཀྱིས་ཨ་སབ་དང་དེའི་གཉེན་ཉེ་རྣམས་དཀོན་མཆོག་ཡ་ཝཱེ་ལ་གསུང་མགུར་གྱིས་གཏང་རག་འབུལ་བར་ཐོག་མར་གཏན་ལ་ཕབ་ཅིང་འདི་ལྟར།
1CH 16:8 ཁྱོད་ཚོས་ཡ་ཝཱེའི་མཚན་ནི་བརྗོད་ཅིང་གཏང་རག་ཕུལ། ། མི་རྣམས་ཀུན་གྱི་ཁྲོད་དུ་ཁོང་གི་འཕྲིན་ལས་བརྗོད། །
1CH 16:9 ཁོང་ལ་མགུར་གླུ་ལེན་བཞིན་བསྟོད་བསྔགས་ཕུལ། ། ཁོང་གི་ངོ་མཚར་མཛད་པ་ཐམས་ཅད་བརྗོད། །
1CH 16:10 ཁོང་གི་དམ་པའི་མཚན་ལ་བསྟོད་བསྔགས་བརྗོད། ། ཡ་ཝཱེ་འཚོལ་མཁན་སེམས་ནང་དགའ་བར་ཤོག །
1CH 16:11 ཡ་ཝཱེ་ཁོང་དང་ཁོང་གི་མཐུ་སྟོབས་དང་། ། ཁོང་གི་ཞལ་རས་རྒྱུན་དུ་བཙལ་བར་གྱིས། །
1CH 16:12 ཁོང་གི་ཞབས་ཕྱི་ཡེས་ར་ཨེལ་གྱི་རྒྱུད། ། ཁོང་གིས་བདམས་པའི་ཡ་ཀོབ་བུ་རྒྱུད་ཀྱེ། ། ཁྱོད་ཚོས་ཁོང་གི་ངོ་མཚར་ཅན་གྱི་མཛད་པ་དང་། ། ཁོང་གི་གྲུབ་རྟགས་དང་ནི་ཁྲིམས་གཅོད་གསུང་རྣམས་དྲོན། །
1CH 16:14 ཁོང་ནི་ང་ཚོའི་དཀོན་མཆོག་ཡ་ཝཱེ་ཡིན། ། ས་གཞི་ཡོངས་སུ་ཁོང་གི་ཁྲིམས་གཅོད་ཡོད། །
1CH 16:15 ཁོང་གི་ཞལ་ཆད་གཏན་དུ་ཐུགས་སུ་འཇགས། ། ཁོང་གི་བཀའ་རྣམས་མི་རབས་སྟོང་ལ་གནས། །
1CH 16:16 ཁོང་གིས་ཨབ་ར་ཧམ་ལ་མཛད་པའི་ཞལ་ཆད་དང་། ། ཁོང་གིས་ཨི་སཱག་ལ་ནི་བཞེས་པའི་དབུ་མནའ་ནི། །
1CH 16:17 ཁོང་གིས་ཡ་ཀོབ་ལ་ནི་སྒྲིག་ཁྲིམས་བཙུགས། ། ཡེས་ར་ཨེལ་ལ་གཏན་གྱི་ཞལ་ཆད་མཛད། །
1CH 16:18 བདག་གིས་ཀ་ན་ཨན་གྱི་ཡུལ་དེ་ནི། ། ཁྱོད་ལ་གནང་ཞིང་ཁྱོད་ཀྱི་ས་སྐལ་ཡིན། །
1CH 16:19 སྐབས་དེར་ཁྱོད་རྣམས་མི་གྲངས་ཉུང་བ་དང་། ། ཡུལ་དེར་བྱེས་སུ་སྡོད་པ་ཡིན་ཞེས་གསུངས། །
1CH 16:20 དེ་རྣམས་མི་རིགས་གཅིག་ནས་གཅིག་བརྒྱུད་ཅིང་། ། རྒྱལ་ཁམས་གཅིག་ནས་གཅིག་ལ་ཉུལ་ནས་བསྡད། །
1CH 16:21 དེ་ཚོར་གཉའ་གནོན་སུ་ལའང་བྱེད་མ་གནང་། ། ཁོ་ཚོའི་ཆེད་དུ་རྒྱལ་པོར་བཀའ་བཀྱོན་མཛད། །
1CH 16:22 ཁོ་བོས་བྱུགས་པ་རྣམས་ལ་མི་རེག༌ཅིང༌། །ལུང་སྟོན་རྣམས་ལ་གནོད་པ་མ་བསྐྱལ་གསུངས། །
1CH 16:23 ཡུལ་ཕྱོགས་ཀུན་གྱིས་ཡ་ཝཱེར་བསྟོད་དབྱངས་ཕུལ། ། ཁོང་གི་ཐར་པ་ཉིན་རེ་བཞིན་སྒྲོགས་ཤིག །
1CH 16:24 མི་རིགས་ཡོངས་ལ་ཁོང་གི་གཟི་བརྗིད་བསྒྲག་པར༌གྱིས། ། མི་རྣམས་ཡོངས་ལ་ཁོང་གི་ངོ་མཚར་འཕྲིན་ལས༌སྒྲོགས། །
1CH 16:25 གང་ལ་ཞེ་ན་ཡ་ཝཱེ་ཁྱད་དུ་འཕགས། ། བསྟོད་བསྔགས་རབ་ཏུ་ཆེན་པོ་འོས་སོ་ལོ། ། ཁོང་ནི་ལྷ་ཚོགས་ཀུན་ལས་རིང་དུ་བརྒལ། ། ཁོང་ལ་གུས་ཤིང་འཇིགས་པ་འོས་སོ་ལོ། །
1CH 16:26 མི་མང་ཀུན་གྱི་ལྷ་སྐུ་སྟོང་བ་ཡིན། ། ཡ་ཝཱེ་ཁོ་ནས་ནམ་མཁའི་དབྱིངས་རྣམས་མཛད། །
1CH 16:27 ཁོང་གི་སྤྱན་སྔར་གཟི་དཔལ་བརྗིད་ཉམས་མངའ། ། ཁོང་གི་བཞུགས་སར་མཐུ་དང་དགའ་སྤྲོ་ལྡན། །
1CH 16:28 ཀྱེ་ཀྱེ་རིགས་རྒྱུད་རྣམས་ཀྱི་ཁྱིམ་རྒྱུད་དག ། གཟི་བརྗིད་ནུས་མཐུ་ཡ་ཝཱེར་ཕུལ་ཞིག་དང་། །
1CH 16:29 ཡ་ཝཱེའི་མཚན་གྱི་གཟི་བརྗིད་ཁོང་ལ་རྗོད། ། མཆོད་པ་འཁུར་ལ་ཁོང་གི་སྤྱན་སྔར་ཤོག ། དམ་པའི་ཟིལ་གྱིས་ཡ་ཝཱེར་ཕྱག་འཚལ་གྱིས། །
1CH 16:30 ས་གཞི་ཡོངས་ནི་ཁོང་གི་དྲུང་དུ་གཡོ་བར་བྱོས། ། ས་གཞི་མི་གཡོ་ཕྱིར་དུ་ཁོང་གིས་བརྟན་པོར་མཛད། །
1CH 16:31 ནམ་མཁའ་དགའ་ཞིང་ས་གཞི་མགུ་བར་ཤོག ། མི་མང་རྣམས་ཀྱིས་མི་རིགས་དག་གི་ཁྲོད། ། ཡ་ཝཱེ་རྒྱལ་པོར་བཞུགས་ཞེས་སྨྲ་གྱུར་ཅིག །
1CH 16:32 རྒྱ་མཚོ་དང་ནི་དེའི་ནང་ཅི་ཡོད་པ། ། ང་རོའི་སྐད་སྒྲ་སིང་སིང་བསྒྲག་ཅིག༌གུ ། ས་ཞིང་དང་ནི་དེའི་ཁར་ཅི་ཡོད་པ། ། ཐམས་ཅད་དགའ་ཞིང་སྤྲོ་བར་གྱིས་ཤིག་ཨང་། །
1CH 16:33 ཡ་ཝཱེ་ས་གཞིར་ཁྲིམས་ཐག་གཅོད་པར་འབྱོན། ། དེའི་ཕྱིར་ནགས་ཀྱི་སྡོང་པོ་རྣམས་ཀྱིས་ནི། ། ཡ་ཝཱེའི་དྲུང་དུ་མགུར་གླུ་ལེན་པར་འགྱུར། །
1CH 16:34 ཡ་ཝཱེ་ལེགས་པས་ཁོང་ལ་གཏང་རག༌ཕུལ། ། ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས། །
1CH 16:35 ཁྱོད་ཚོས་འདི་ལྟར་ཞུ་བར་གྱིས་ཤིག་ཨང་། ། ཀྱེ་ཀྱེ་ངེད་རྣམས་སྐྱོབ་པའི་དཀོན་མཆོག་ལགས། ། ཁྱེད་ཀྱིས་ངེད་རྣམས་བསྐྱབས་ནས་བསྡུ་བར་མཛོད། ། མི་རིགས་ཀུན་ནས་ངེད་རྣམས་སྐྱོབ་པར་མཛོད། ། དེ་ནས་ང་ཚོས་ཁྱེད་མཚན་དམ་པ་ལ། ། བཀའ་དྲིན་ཞུ་ཞིང་བསྟོད་པ་དཔལ་དུ་བརྩི། །
1CH 16:36 ཡེས་ར་ཨེལ་གྱི་དཀོན་མཆོག་ཡ་ཝཱེ་ནི། ། རྒྱུན་ནས་རྒྱུན་དུ་བསྟོད་པར་འོས་སོ་ལོ། ། ཞེས་གསུངས་པ་དང་། མི་ཐམས་ཅད་ཀྱིས་ཨ་མེན་ཞེས་སྨྲས་ཤིང་དཀོན་མཆོག་ཡ་ཝཱེ་ལ་བསྟོད་བསྔགས་ཕུལ་ཏོ། །
1CH 16:37 དེ་ནས་དཱ་བིད་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དྲུང་དུ་ཨ་སབ་དང་དེའི་གཉེན་ཉེ་རྣམས་བཞག་ཅིང་། ཉིན་རེ་བཞིན་རྒྱུན་ཆད་མེད་པར་སྒྲུབ་དགོས་པའི་ཞབས་ཏོག་བསྒྲུབས།
1CH 16:38 ཡང་ཨོ་བེད་ཨེ་དོམ་དང་དེའི་གཉེན་ཉེ་དྲུག་ཅུ་རེ་བརྒྱད་དང་། ཡེ་དུ་ཐུན་གྱི་བུ་ཨོ་བེད་ཨེ་དོམ་དང་ཧོ་སཱ་བཅས་ནི་སྒོ་སྲུང་དུ་བཞག
1CH 16:39 ཡང་མཆོད་དཔོན་ཟཱ་ཏོག་དང་དེའི་གཉེན་ཉེ་མཆོད་དཔོན་ཡིན་པ་རྣམས་གིབ་ཡོན་གྱི་མཐོ་གླིང་དུ་དཀོན་མཆོག་ཡ་ཝཱེའི་གུར་མཆོག་དྲུང་དུ་བཞག་ཅིང་།
1CH 16:40 ཉིན་རེར་ནངས་དགོང་གཉིས་ལ་སྦྱིན་སྲེག་གི་མཆོད་ཁྲི་སྟེང་དུ། རྒྱུན་ཆད་མེད་པར་དཀོན་མཆོག་ཡ་ཝཱེ་ལ་སྦྱིན་སྲེག་ཕུལ་བ་དང་། དེ་ཐམས་ཅད་ནི་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་བསྒོས་པའི་བཀའ་ཁྲིམས་ཀྱི་མདོ་ཡི་ནང་དུ་བཀོད་པ་བཞིན་ཡིན་ནོ། །
1CH 16:41 དེ་དག་དང་མཉམ་དུ་ཧེ་མཱན་དང་། ཡེ་དུ་ཐུན་དང་། གཞན་བདམས་ནས་མིང་ཐོན་པ་བཅས་ཐམས་ཅད་དཀོན་མཆོག་ཡ་ཝཱེ་ལ་བཀའ་དྲིན་ཞུ་བར་བཞག་པ་སྟེ། ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས་པས་སོ། །
1CH 16:42 ཧེ་མཱན་དང་ཡེ་དུ་ཐུན་གཉིས་ཀྱིས་དེ་དག་དང་མཉམ་དུ་དུང་འབུད་པ་དང་སྦུག་ཆལ་བརྡུང་བ་དང་། རོལ་ཆས་སྣ་ཚོགས་ཀྱིས་དཀོན་མཆོག་ལ་སྐད་ཆེན་པོས་བསྟོད་དབྱངས་འབུལ་དགོས་ལ། ཡེ་དུ་ཐུན་གྱི་བུ་རབས་ཚ་རྒྱུད་རྣམས་སྒོ་སྲུང་དུ་བཞག་གོ །
1CH 16:43 དེ་ནས་མི་ཐམས་ཅད་རང་རང་གི་ཁྱིམ་དུ་ལོག་པ་དང་། དཱ་བིད་ཀྱང་རང་གི་ཁྱིམ་མི་རྣམས་ལ་བྱིན་གྱིས་རླབས་པར་ཕེབས་སོ། །
1CH 17:1 དཱ་བིད་རང་གི་ཕོ་བྲང་ནང་དུ་བསྡད་པའི་རྗེས་སུ། ཁོང་གིས་ལུང་སྟོན་པ་ནཱ་ཐན་ལ་ན་རེ། ལྟོས་དང་། ང་ནི་ཐང་ཤིང་གིས་བཟོས་པའི་ཕོ་བྲང་དུ་སྡོད་མོད། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་གུར་གྱི་ནང་དུ་མཆིས་སོ་ཞེས་སྨྲས་པར།
1CH 17:2 ནཱ་ཐན་གྱིས་དཱ་བིད་ལ་ན་རེ། དཀོན་མཆོག་ཁྱེད་དང་མཉམ་དུ་བཞུགས་པས། ཁྱེད་ཀྱི་ཐུགས་དགོངས་བཞིན་བྱོས་ཤིག་ཅེས་སྨྲས་ཤིང་།
1CH 17:3 མཚན་མོ་དེར་དཀོན་མཆོག་གི་བཀའ་ནཱ་ཐན་ལ་བྱུང་ནས་འདི་སྐད་དུ།
1CH 17:4 ཁྱོད་སོང་ནས་བདག་གི་ཞབས་ཕྱི་དཱ་བིད་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་བདག་གནས་སའི་མཆོད་ཁང་བཞེང་མི་རུང་།
1CH 17:5 གང་ལ་ཞེ་ན། བདག་གིས་ཡེས་ར་ཨེལ་པ་རྣམས་ཡར་ཁྲིད་འོངས་པའི་ཉིན་ནས་དེ་རིང་བར་དུ་བདག་ནི་མཆོད་ཁང་དུ་གནས་མ་མྱོང་སྟེ། བདག་ནི་གུར་མཆོག་གཅིག་ནས་གུར་མཆོག་གཞན་ཞིག་ལ་སྤར་ནས་གནས་པ་ཡིན།
1CH 17:6 བདག་ནི་ཡེས་ར་ཨེལ་པ་རྣམས་དང་ལྷན་ཅིག་ཏུ་གང་སར་རྒྱུ་རུང་། ངས་རང་གི་མི་རྣམས་འཚོ་སྐྱོང་བྱེད་པར་བཀའ་བསྒོས་པའི་ཁྲིམས་དཔོན་སུ་ལ་ཡང་། ཁྱོད་ཚོས་ངའི་དོན་དུ་ཐང་ཤིང་གི་མཆོད་ཁང་མི་བཞེང་བ་ཅི་ཡིན་ཞེས་སྨྲས་མྱོང་ངམ་གསུངས་ཞེས་སྨྲོས་ཤིག
1CH 17:7 ད་ལྟ་ཁྱོད་ཀྱིས་བདག་གི་ཞབས་ཕྱི་དཱ་བིད་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་འགོ་དཔོན་དུ་གྱུར་ནས་བདག་གི་འབངས་མི་ཡེས་ར་ཨེལ་ལ་བདག་སྐྱོང་བྱེད་པའི་ཕྱིར། ངས་ཁྱོད་རང་ལུག་ར་ནས་ཕྱི་རུ་བླངས་པ་དང་ལུག་ཁྱུའི་རྗེས་སུ་མི་འདེད་པར་བྱས།
1CH 17:8 ཁྱོད་གང་ལ་སོང་ཡང་ང་རང་ཁྱོད་དང་མཉམ་དུ་གནས་ཏེ། དགྲ་བོ་ཐམས་ཅད་ཁྱོད་ཀྱི་མདུན་ནས་མེད་པར་གཏོང་ཞིང་། ས་སྟེང་གི་མི་རླབས་ཆེན་དག་གི་མཚན་སྙན་དང་འདྲ་བར་ངས་ཁྱོད་ཀྱི་མཚན་སྙན་གྲགས་རྒྱས་པར་བྱའོ། །
1CH 17:9 ཡང་ངས་རང་གི་འབངས་མི་ཡེས་ར་ཨེལ་པ་རྣམས་ཀྱི་དོན་དུ་ས་ཆ་ཞིག་བདམས་ནས། ཁོ་རྣམས་དེར་ཚུགས་སུ་འཇུག་པ་དང་། ཁོ་རྣམས་རང་གནས་སུ་སྡོད་ཅིང་གཞན་གྱི་བར་ཆད་མི་འཕོག་ལ། བུ་རྒྱུད་ངན་པ་རྣམས་ཀྱིས་ཀྱང་སྔར་བཞིན་དེ་དག་ལ་འཚེ་བར་མི་འགྱུར་ཞིང་།
1CH 17:10 བདག་གིས་རང་གི་འབངས་མི་ཡེས་ར་ཨེལ་ལ་ཁྲིམས་དཔོན་བསྐོས་པའི་དུས་དང་འདྲ་བར་ཡང་མི་འགྱུར། བདག་གིས་ཁྱོད་ཀྱི་དགྲ་ཐམས་ཅད་འདུལ་བར་མ་ཟད་ངས་ཁྱོད་ལ་སྨྲ་བར་བྱ་སྟེ། དཀོན་མཆོག་ཡ་ཝཱེ་བདག་གིས་ཁྱོད་ཀྱི་དོན་དུ་ཁྱིམ་རྒྱུད་འཛུགས་པར་འགྱུར་རོ། །
1CH 17:11 ཁྱོད་རང་ཚེ་ལོ་མཐར་ཕྱིན་ཏེ་རང་གི་མེས་པོ་རྣམས་ཀྱི་གྲས་སུ་ཚུད་པའི་དུས་སུ། བདག་གིས་ཁྱོད་ཀྱི་བུ་རྒྱུད་རྣམས་ལས་གཅིག་ཡར་འདེགས་ཤིང་ཁྱོད་ཀྱི་རྗེས་སྐྱོང་བར་བྱ་སྟེ། དེའི་རྒྱལ་སྲིད་བརྟན་པར་བྱའོ། །
1CH 17:12 དེས་བདག་ལ་མཆོད་ཁང་ཞིག་བཞེང་བ་དང་། བདག་གིས་དེའི་རྒྱལ་ཁྲི་ཇི་སྲིད་བར་དུ་བརྟན་པར་བྱའོ། །
1CH 17:13 བདག་ནི་ཁོ་ཡི་ཕ་དང་ཁོ་ནི་བདག་གི་བུ་རུ་འགྱུར་ཏེ། བདག་གིས་རང་གི་བྱམས་བརྩེ་ནི་ཁྱོད་ཀྱི་གོང་མ་དང་འབྲལ་དུ་བཅུག་པ་བཞིན་དུ་ནམ་ཡང་དེ་དང་འབྲལ་བར་མི་བྱའོ། །
1CH 17:14 བདག་གིས་དེ་ནི་ཇི་སྲིད་བར་དུ་ངའི་ཁྱིམ་རྒྱུད་དང་རྒྱལ་སྲིད་བསྐྱང་བར་འཇོག་ཅིང་། དེའི་རྒྱལ་ཁྲི་ནི་རྟག་ཏུ་བརྟན་པར་འགྱུར་རོ་གསུངས་ཞེས་སྨྲོས་ཤིག་ཅེས་གསུངས་སོ། །
1CH 17:15 ནཱ་ཐན་གྱིས་བཀའ་དེ་དང་ཁོས་ཅི་མཐོང་བ་ཐམས་ཅད་ཇི་བཞིན་དུ་དཱ་བིད་ལ་སྨྲས་པའོ། །
1CH 17:16 དེ་ནས་རྒྱལ་པོ་དཱ་བིད་ནང་ལ་སོང་ནས་དཀོན་མཆོག་ཡ་ཝཱེའི་དྲུང་དུ་བསྡད་དེ་འདི་ལྟར། ཀྱེ་དཀོན་མཆོག་ཡ་ཝཱེ་ལགས། བདག་ནི་སུ་ཡིན་ནམ། བདག་གི་ཁྱིམ་རྒྱུད་ནི་ཅི་ཡིན་ནམ། ཁྱེད་ཀྱིས་ད་དུང་བདག་འདི་ཙམ་གྱི་བར་དུ་བསྐྱངས་པའོ། །
1CH 17:17 ཀྱེ་དཀོན་མཆོག་ལགས། དོན་འདི་ཁྱེད་ཀྱི་གཟིགས་ངོར་ཆུང་བར་སྣང་ཞིང་། ཁྱེད་ཀྱིས་ཉིད་ཀྱི་ཞབས་ཕྱིའི་ཁྱིམ་རྒྱུད་ཀྱི་མ་འོངས་འབྱུང་འགྱུར་ཐད་བཀའ་ལུང་གནང་བའོ། །ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་བདག་ནི་མི་མཆོག་ཏུ་གྱུར་པ་ཞིག་གི་ཚད་དུ་བཞག་གོ །
1CH 17:18 ཁྱེད་ཀྱིས་ཉིད་ཀྱི་ཞབས་ཕྱི་ལ་བཀུར་སྟི་བསྩལ་བར་ངས་ཁྱེད་ལ་ད་དུང་ཅི་ཞིག་ཞུ་བར་བྱའམ། ཁྱེད་ཀྱིས་ཉིད་ཀྱི་ཞབས་ཕྱི་མཁྱེན་ནོ། །
1CH 17:19 ཀྱེ་དཀོན་མཆོག་ཡ་ཝཱེ་ལགས། ཉིད་ཀྱི་ཞབས་ཕྱིའི་དོན་དུ་ཁྱེད་ཀྱི་ཐུགས་དགོངས་བཞིན་དུ། ཁྱེད་ཀྱིས་འཕྲིན་ལས་ཆེན་པོ་དེ་རྣམས་མཛད་ཅིང་ཡང་དོན་ཆེན་དེ་ཐམས་ཅད་མི་རྣམས་ལ་མངོན་པ་ཡིན་ནོ། །
1CH 17:20 ཀྱེ་དཀོན་མཆོག་ཡ་ཝཱེ་ལགས། ངེད་རྣམས་ཀྱི་རྣ་བས་ཐོས་པ་བཞིན་དུ་ཁྱེད་ལ་འགྲན་ཟླ་སུ་ཡང་མེད། ཁྱེད་མ་གཏོགས་དཀོན་མཆོག་གཞན་སུ་ཡང་མེད།
1CH 17:21 ས་སྟེང་དུ་མི་རིགས་གང་ཞིག་ཁྱེད་ཀྱི་འབངས་མི་ཡེས་ར་ཨེལ་ལ་དོའམ། དཀོན་མཆོག་གིས་དངོས་སུ་ཁོ་རྣམས་བསྐྱབས་ཤིང་ཉིད་ཀྱི་འབངས་མིར་མཛད་པ་དང་། ཡང་དཀོན་མཆོག་གིས་ཨེ་ཅིབ་ཡུལ་ནས་བླུས་པའི་མི་རྣམས་ཀྱི་མདུན་དུ་མི་གཞན་རྣམས་བསྐྲད་ཅིང་། དོན་ཆེན་འཇིགས་རུང་རྣམས་ཀྱིས་ཉིད་ཀྱི་མཚན་ཚུགས་པར་མཛད་དོ། །
1CH 17:22 ཁྱེད་ཀྱིས་ཉིད་ཀྱི་འབངས་མི་ཡེས་ར་ཨེལ་ནི་ཇི་སྲིད་བར་དུ་ཉིད་ཀྱི་མི་རུ་མཛད། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱང་དེ་དག་གི་དཀོན་མཆོག་ཏུ་གྱུར་པ་ཡིན།
1CH 17:23 ཀྱེ་དཀོན་མཆོག་ཡ་ཝཱེ་ལགས། ད་ནི་ཁྱེད་ཀྱིས་ཉིད་ཀྱི་ཞབས་ཕྱི་དང་དེའི་ཁྱིམ་རྒྱུད་ལ་གནང་བའི་ཞལ་བཞེས་དེ་ནི་ཇི་སྲིད་བར་དུ་བརྟན་པོར་མཛད་ཅིང་། ཅི་གསུངས་བཞིན་དུ་བསྒྲུབ་པར་མཛོད་ཅིག
1CH 17:24 ཁྱེད་ཀྱི་མཚན་ནི་རྟག་ཏུ་བརྟན་ཞིང་རབ་ཏུ་འཕགས་པ་དང་། མི་ཐམས་ཅད་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཡེས་ར་ཨེལ་གྱི་དཀོན་མཆོག་ཡིན་པ་དང་། དངོས་གནས་ཡེས་ར་ཨེལ་གྱི་དཀོན་མཆོག་ལགས་སོ་ཞེས་བརྗོད་པར་ཤོག དེ་ནས་ཁྱེད་ཀྱི་ཞབས་ཕྱི་དཱ་བིད་ཀྱི་ཁྱིམ་རྒྱུད་དེ་ཡང་ཁྱེད་ཀྱི་སྤྱན་སྔར་བརྟན་པོར་ཚུགས་པའོ། །
1CH 17:25 ཀྱེ་བདག་གི་དཀོན་མཆོག་ལགས། ཁྱེད་ཀྱིས་ཉིད་ཀྱི་ཞབས་ཕྱི་ལ། ཁྱེད་ཀྱིས་ཁོ་བོའི་དོན་དུ་ཁྱིམ་རྒྱུད་འཛུགས་པར་བྱའོ་ཞེས་མངོན་པར་མཛད་པས། ཞབས་ཕྱི་བདག་ལ་ད་གཟོད་སེམས་ནས་འདི་བཞིན་གསོལ་བ་འདེབས་པའི་སྙིང་སྟོབས་ཡོད་པ་ཡིན།
1CH 17:26 ཀྱེ་དཀོན་མཆོག་ཡ་ཝཱེ་ལགས། ཁྱེད་ཁོ་ན་དཀོན་མཆོག་ཡིན་ལ། ཁྱེད་ཀྱིས་དེ་སྔར་ཉིད་ཀྱི་ཞབས་ཕྱི་ལ་གཡང་འདི་དག་གནང་བར་ཁས་བླངས་པ་ཡིན།
1CH 17:27 ད་ནི་ཉིད་ཀྱི་ཞབས་ཕྱིའི་ཁྱིམ་ལ་བྱིན་རླབས་གནང་ནས་དེ་ནི་དུས་རྒྱུན་དུ་ཁྱེད་ཀྱི་སྤྱན་སྔར་གནས་པར་མཛོད་ཅིག ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱིའི་ཁྱིམ་རྒྱུད་ལ་བྱིན་རླབས་གནང་བ་ཡིན་པས། དེ་ལ་ཇི་སྲིད་བར་དུ་བྱིན་རླབས་འཐོབ་པར་འགྱུར་རོ་ཞེས་ཞུས་སོ། །
1CH 18:1 དེའི་རྗེས་སུ་དཱ་བིད་ཀྱིས་ཕེ་ལེ་ཤེད་པ་རྣམས་དང་འཐབ་ནས་དེ་རྣམས་དབང་དུ་བསྡུས་པ་དང་། གཱད་དང་དེའི་གྲོང་ཚོ་དག་ཕེ་ལེ་ཤེད་པའི་ལག་ནས་བླངས།
1CH 18:2 ཡང་མོ་ཨབ་པ་རྣམས་ཕམ་པར་བརྒྱབ་ནས། མོ་ཨབ་པ་རྣམས་དཱ་བིད་ཀྱི་མངའ་འོག་ཏུ་གྱུར་ཏེ་འབུལ་བ་རྣམས་དྲངས་སོ། །
1CH 18:3 ཡང་ཙོ་བཱ་ཡི་རྒྱལ་པོ་ཧ་དད་ཨི་སེར་ཞེས་པ་ཕི་རཱད་ཆུ་བོའི་ཕྱོགས་སུ་རང་གི་རྒྱལ་སྲིད་བརྟན་པོར་འཛུགས་པར་འགྲོ་སྐབས་སུ། དཱ་བིད་ཀྱིས་དེ་ཡང་ཧ་མཱད་ཡུལ་གྱི་བར་དུ་དམག་བརྒྱབ་པ་དང་།
1CH 18:4 དཱ་བིད་ཀྱིས་དེ་ལས་ཤིང་རྟ་ཆིག་སྟོང་དང་། སྐྱ་དམག་བདུན་སྟོང་དང་། རྐང་དམག་ཉིས་ཁྲི་བཅས་ཕྲོགས་ཏེ། ཤིང་རྟ་ཐམས་ཅད་ཀྱི་རྟ་ཡི་རྐང་རྒྱུས་བཅད་དེ་ཤིང་རྟ་བརྒྱ་ཡི་རྟ་འབའ་ཞིག་བཞག་གོ །
1CH 18:5 དཱ་མེ་སེག་གི་ཨ་རམ་པ་རྣམས་ཙོ་བཱ་ཡི་རྒྱལ་པོ་ཧ་དད་ཨི་སེར་ལ་རོགས་བྱེད་དུ་འོངས་པ་ལ། དཱ་བིད་ཀྱིས་ཨ་རམ་པའི་མི་ཉིས་ཁྲི་ཉིས་སྟོང་བསད་དོ། །
1CH 18:6 དེ་ནས་དཱ་བིད་ཀྱིས་དཱ་མེ་སེག་གི་ཨ་རམ་ཡུལ་དུ་སྲུང་དམག་བཞག་པ་དང་། ཨ་རམ་པ་རྣམས་དཱ་བིད་ཀྱི་མངའ་འོག་ཏུ་གྱུར་ཏེ་འབུལ་བ་རྣམས་དྲངས་ཤིང་། དཱ་བིད་གང་དུ་སོང་ན་ཡང་དཀོན་མཆོག་ཡ་ཝཱེས་དེ་ལ་རྒྱལ་ཁ་གནང་ངོ་། །
1CH 18:7 དཱ་བིད་ཀྱིས་ཧ་དད་ཨི་སེར་གྱི་བློན་འཁོར་རྣམས་ལ་ཡོད་པའི་གསེར་གྱི་ཕུབ་ཐམས་ཅད་ཕྲོགས་ནས་ཡེ་རུ་སཱ་ལེམ་དུ་ཁྱེར།
1CH 18:8 ཡང་དཱ་བིད་ཀྱིས་ཧ་དད་ཨི་སེར་གྱི་གྲོང་ཁྱེར་ཏིབ་ཧད་དང་ཀུན་བྱ་བ་གཉིས་ལས་ལི་དཔག་མེད་ཕྲོགས་པ་དང་། སོ་ལོ་མོན་གྱིས་ཕྱིས་སུ་ལི་དེ་དག་གིས་རྒྱ་མཚོ་དང་ཀ་བ། ཡོ་བྱད་བཅས་བཟོས་པའོ། །
1CH 18:9 ཧ་མཱད་ཀྱི་རྒྱལ་པོ་ཐོ་ཨུ་ཞེས་པ་དེས། དཱ་བིད་ཀྱིས་ཙོ་བཱ་ཡི་རྒྱལ་པོ་ཧ་དད་ཨི་སེར་གྱི་དམག་དཔུང་ཐམས་ཅད་ཕམ་པར་བརྒྱབ་པ་ཐོས་པས།
1CH 18:10 དེས་རང་གི་སྲས་ཧ་དོ་རམ་བྱ་བ་དེ་རྒྱལ་པོ་དཱ་བིད་ཀྱི་དྲུང་དུ་ཁོང་ལ་ཁམས་འདྲི་དང་ཤིས་པ་བརྗོད་དུ་བཏང་ངོ་། །ཅི་ལ་ཞེ་ན། དཱ་བིད་ཀྱིས་ཧ་དད་ཨི་སེར་ལ་དམག་བརྒྱབ་ནས་དེ་ཕམ་པར་བྱས་པས་སོ། །མ་གཞི་ཐོ་ཨུ་དང་ཧ་དད་ཨི་སེར་གཉིས་ཀྱི་བར་ལ་དུས་རྒྱུན་དུ་འཐབ་མོ་ཡོད་པ་རེད། ཧ་དོ་རམ་གྱིས་གསེར་དང་དངུལ་དང་ལི་བཅས་ཀྱི་སྣོད་ཆས་སྣ་ཚོགས་བསྐྱལ་ནས་འོངས།
1CH 18:11 རྒྱལ་པོ་དཱ་བིད་ཀྱིས་སྣོད་ཆས་དེ་རྣམས་དང་ཡང་རྒྱལ་ཁམས་སོ་སོ་སྟེ་ཨེ་དོམ་དང་། མོ་ཨབ། ཨམ་མོན་པ། ཕེ་ལེ་ཤེད་པ། ཨ་མཱད་ལེག་པ་བཅས་ལས་ཕྲོགས་པའི་གསེར་དངུལ་ཐམས་ཅད་དམ་པར་བྱས་ནས་དཀོན་མཆོག་ཡ་ཝཱེ་ལ་ཕུལ་ཏོ། །
1CH 18:12 ཡང་ཟེ་རུ་ཡཱ་ཡི་བུ་ཨ་བི་ཤཱ་ཨི་ཡིས་ཚྭའི་ལུང་པ་རུ་ཨེ་དོམ་པ་ཆིག་ཁྲི་བརྒྱད་སྟོང་བསད་པ་དང་།
1CH 18:13 དེ་ནས་དཱ་བིད་ཀྱིས་ཨེ་དོམ་ཡུལ་དུ་སྲུང་དམག་བཞག་སྟེ། ཨེ་དོམ་ཡུལ་སྲུང་དམག་གིས་ཁྱབ་པས། ཨེ་དོམ་པ་རྣམས་དཱ་བིད་ཀྱི་མངའ་འོག་ཏུ་གྱུར། ཡང་དཱ་བིད་ཡུལ་གང་དུ་སོང་ན་ཡང་དཀོན་མཆོག་ཡ་ཝཱེས་ཁོང་ལ་རྒྱལ་ཁ་གནང་ངོ་། །
1CH 18:14 དཱ་བིད་ཀྱིས་ཡེས་ར་ཨེལ་ཡུལ་ཐམས་ཅད་ལ་མངའ་མཛད་དེ། རང་གི་མི་མང་ཡོངས་ལ་འདྲ་མཉམ་དྲང་གཞག་གི་ལྟ་སྟངས་བཟུང་བའོ། །
1CH 18:15 དམག་ཚོགས་ཀྱི་འགོ་དཔོན་དུ་ཟེ་རུ་ཡཱ་ཡི་བུ་ཡོ་ཨབ་དང་ལོ་རྒྱུས་འགོད་མཁན་དུ་ཨ་ཧི་ལུད་ཀྱི་བུ་ཡེ་ཧོ་ཤ་ཕད།
1CH 18:16 ཨ་ཧི་ཏུབ་ཀྱི་བུ་ཟཱ་ཏོག་དང་ཨབ་ཡཱ་ཐར་གྱི་བུ་ཨ་བི་མེ་ལེག་ནི་མཆོད་དཔོན་དང་། ཤབ་ཤཱ་ནི་དྲུང་ཡིག་དང་།
1CH 18:17 ཡེ་ཧོ་ཡ་དཱ་ཡི་བུ་པེ་ནཱ་ཡ་ནི་ཀེ་རེད་པ་དང་ཕེ་ལེད་པ་རྣམས་ཀྱི་འགོ་དཔོན་དང་། དཱ་བིད་ཀྱི་སྲས་རྣམས་རྒྱལ་པོའི་གཡས་གཡོན་དུ་བཀའ་བློན་དུ་བཞག་གོ །
1CH 19:1 དེའི་རྗེས་སུ་ཨམ་མོན་པའི་རྒྱལ་པོ་ནཱ་ཧ་སི་ཚེ་ལས་འདས་པ་དང་། ཁོའི་སྲས་ཧ་ནུན་ནི་ཕ་ཡི་རྒྱུན་མཐུད་ནས་རྒྱལ་པོར་གྱུར།
1CH 19:2 དེར་དཱ་བིད་ན་རེ། ཧ་ནུན་གྱི་ཡབ་ཀྱིས་སྔར་ང་རང་དྲིན་གྱིས་བསྐྱངས་པས། ངས་ནཱ་ཧ་སི་ཡི་སྲས་ཧ་ནུན་ལ་ཡང་དྲིན་གཟོ་བར་བྱའོ་གསུངས་ནས། དཱ་བིད་ཀྱིས་དེའི་ཡབ་གྲོངས་པ་ལ་སེམས་གསོ་བྱེད་དུ་རང་གི་བང་ཆེན་མངགས། དཱ་བིད་ཀྱི་འཁོར་གཡོག་རྣམས་ཨམ་མོན་པའི་མངའ་ཁོངས་སུ་སླེབས་ཤིང་ཧ་ནུན་ལ་སེམས་གསོ་བྱེད་དུ་སོང་ཙ་ན།
1CH 19:3 ཨམ་མོན་པའི་འགོ་དཔོན་རྣམས་ཀྱིས་ཧ་ནུན་ལ་འདི་ལྟར། དཱ་བིད་ཀྱིས་ཁྱེད་ལ་སེམས་གསོ་བྱེད་མཁན་མངགས་པ་འདི་ནི་ཁྱེད་ཀྱི་ཡབ་ལ་གུས་བཀུར་བྱེད་པ་ཡིན་འདོད་དམ། ཁོའི་འཁོར་གཡོག་དག་ཡུལ་འདིར་ལྟ་ཉུལ་བྱེད་པ་དང་། ཡུལ་འདི་འཇོམས་པ། ཡུལ་འདིར་མྱུལ་ཞིབ་བྱེད་པ་བཅས་སུ་མངགས་པ་མ་ཡིན་ནམ་ཞེས་སྨྲས་པས།
1CH 19:4 ཧ་ནུན་གྱིས་དཱ་བིད་ཀྱི་འཁོར་གཡོག་རྣམས་བཟུང་ནས་སྨ་ར་བྲེགས་ཤིང་། ཕྱི་གོས་བཅད་ནས་འཕོངས་ཚོས་ཕྱི་རུ་མངོན་ཞིང་དེ་དག་འགྲོ་རུ་བཅུག་གོ །
1CH 19:5 དེར་མི་ཞིག་སོང་ནས་དཱ་བིད་ལ་མི་དེ་ཚོ་ཕྲད་པའི་དོན་རྣམས་བཤད་པ་དང་། ཁོང་གིས་བང་ཆེན་རྣམས་དེ་དག་བསུ་རུ་མངགས་སོ། །ཡང་དེ་དག་རབ་ཏུ་ངོ་ཚ་བར་གྱུར་པས། རྒྱལ་པོས་དེ་ཚོར་ན་རེ། ཁྱོད་ཅག་གི་སྨ་ར་སྐྱེ་བའི་བར་དུ་ཡེ་རུ་ཀོ་རུ་སྒུག་སྡོད་ལ་དེ་ནས་ཤོག་ཅིག་ཅེས་བསྒོས་སོ། །
1CH 19:6 ཡང་ཨམ་མོན་པ་རྣམས་ཀྱིས་དཱ་བིད་ཁོ་ཚོ་ལ་ཞེ་སྡང་ལངས་པ་རྟོགས་ནས། ཧ་ནུན་དང་ཨམ་མོན་པ་རྣམས་ཀྱིས་མེ་སོ་པོ་ཐེམ་ཡཱ་དང་། ཨ་རམ་གྱི་མ་ཨ་ཀཱ་དང་། ཙོ་བཱ་བཅས་ལས་ཤིང་རྟ་དང་སྐྱ་དམག་རྣམས་གླ་བའི་ཕྱིར་དངུལ་རྡོ་ཚད་ཆིག་སྟོང་བསྐུར་ནས།
1CH 19:7 དེ་དག་གིས་ཤིང་རྟ་སུམ་ཁྲི་ཉིས་སྟོང་དང་། ཡང་མ་ཨ་ཀཱ་ཡི་རྒྱལ་པོ་དང་དེའི་དམག་དཔུང་བཅས་གླས་ཤིང་། དེ་ཐམས་ཅད་འོངས་ནས་མེ་དེ་བཱ་ཡི་མདུན་དུ་སྒར་བཏབ་པ་དང་། ཨམ་མོན་པ་རྣམས་ཀྱང་རང་རང་གི་གྲོང་ཁྱེར་ནས་ཕྱོགས་གཅིག་ཏུ་འདུས་ཏེ་འཐབ་ཏུ་འོངས།
1CH 19:8 དཱ་བིད་ཀྱིས་གཏམ་དེ་ཐོས་ནས། ཡོ་ཨབ་དང་དམག་མི་དཔའ་རྩལ་ཅན་ཐམས་ཅད་མངགས་པ་ལ།
1CH 19:9 ཨམ་མོན་པ་རྣམས་ཕྱི་རུ་ཐོན་ནས་མཁར་སྒོའི་མདུན་དུ་དམག་བཤམས་པ་དང་། དེར་དཔུང་གྲོགས་སུ་འོངས་པའི་རྒྱལ་པོ་རྣམས་ཀྱིས་ཀྱང་སོ་སོར་མཁར་ཕྱི་རུ་དམག་བཀྲམས་ནས་བསྡད།
1CH 19:10 ཡོ་ཨབ་ཀྱིས་རང་གི་མདུན་རྒྱབ་གཉིས་པོར་དགྲ་བོ་ཡོད་པ་མཐོང་ནས། ཡེས་ར་ཨེལ་གྱི་དམག་མི་དཔའ་རྩལ་ཅན་ཐམས་ཅད་ལས་སྐོར་ཞིག་བདམས་ཏེ་ཨ་རམ་པར་འཐབ་ཏུ་དམག་བཤམས་པའོ། །
1CH 19:11 ཁོས་དམག་གཞན་དག་རང་གི་གཅུང་པོ་ཨ་བི་ཤཱ་ཨི་ཡི་ལག་ཏུ་གཏད་ནས། ཨམ་མོན་པར་འཐབ་ཏུ་དམག་བཤམ་དུ་བཅུག
1CH 19:12 ཡོ་ཨབ་ཀྱིས་ཨ་བི་ཤཱ་ཨི་ལ་ན་རེ། གལ་ཏེ་ཨ་རམ་པ་ང་ལས་དྲག་ན་ཁྱོད་ང་ལ་རོགས་བྱེད་དུ་ཤོག གལ་ཏེ་ཨམ་མོན་པ་ཁྱོད་ལས་དྲག་ན་ང་ཁྱོད་ལ་རོགས་བྱེད་དུ་འོང་།
1CH 19:13 རང་ཅག་གིས་སྙིང་སྟོབས་བསྐྱེད་དགོས། བདག་ཅག་གི་ཡུལ་མི་དང་རང་རེའི་དཀོན་མཆོག་གི་གྲོང་ཁྱེར་རྣམས་ཀྱི་དོན་དུ་སྙིང་སྟོབས་བསྐྱེད་དགོས། དཀོན་མཆོག་ཡ་ཝཱེའི་སྤྱན་ལམ་དུ་གང་ཞིག་ལེགས་པ་དེ་སྒྲུབས་པར་ཤོག་ཅེས་གདམས་པས།
1CH 19:14 ཡོ་ཨབ་འཁོར་དང་བཅས་པ་རྣམས་སོང་སྟེ་ཨ་རམ་པ་ལ་རྒོལ་བ་དང་། དེ་དག་ཁོའི་མདུན་ནས་བྲོས་སོ། །
1CH 19:15 ཡང་ཨམ་མོན་པ་དག་གིས་ཨ་རམ་པ་རྣམས་བྲོས་སོང་བ་མཐོང་བས། དེ་དག་ཀྱང་ཡོ་ཨབ་ཀྱི་གཅུང་པོ་ཨ་བི་ཤཱ་ཨིའི་མདུན་ནས་བྲོས་ཏེ་གྲོང་ཁྱེར་ནང་དུ་འཛུལ་ཞིང་། དེ་ནས་ཡོ་ཨབ་ནི་ཡེ་རུ་སཱ་ལེམ་དུ་ཕྱིར་ལོག་གོ །
1CH 19:16 ཨ་རམ་པ་རྣམས་ཀྱིས་ཡེས་ར་ཨེལ་གྱི་མདུན་དུ་རང་ཕམ་པ་མཐོང་ནས། བང་ཆེན་མངགས་ནས་གཙང་པོའི་ཕ་རོལ་ཏུ་ཡོད་པའི་ཨ་རམ་པ་རྣམས་སྤར་འོངས་ཏེ། ཧ་དད་ཨི་སེར་གྱི་དམག་དཔོན་ཤོ་ཕག་བྱ་བས་དེ་དག་ལ་འགོ་ཁྲིད་བྱས།
1CH 19:17 མི་ཞིག་གིས་དོན་དེ་དཱ་བིད་ལ་ཞུས་པས། ཁོང་གིས་ཡེས་ར་ཨེལ་པ་ཐམས་ཅད་བསྡུས་ནས་ཡོར་དན་གཙང་བོའི་ཕ་རོལ་ཏུ་ཨ་རམ་པའི་རྩར་ཕྱིན་ཅིང་དེ་རྣམས་ལ་དམག་བཤམས། ཁོང་གིས་ཨ་རམ་པ་ལ་འཐབ་ཏུ་དམག་བཤམས་པ་ལ། ཨ་རམ་པས་ཁོང་དང་འཐབ།
1CH 19:18 ཨ་རམ་པ་རྣམས་ཡེས་ར་ཨེལ་གྱི་མདུན་ནས་བྲོས་སོང་བས། དཱ་བིད་ཀྱིས་ཨ་རམ་པའི་ཤིང་རྟ་བདུན་སྟོང་སྟེང་གི་སྐྱ་དམག་དང་རྐང་དམག་བཞི་ཁྲི་བསད་པ་དང་། ཨ་རམ་པའི་དམག་དཔོན་ཤོ་ཕག་ཀྱང་བསད་དོ། །
1CH 19:19 དེར་ཧ་དད་ཨི་སེར་གྱི་འཁོར་གཡོག་རྣམས་ཀྱིས་ཡེས་ར་ཨེལ་གྱི་མདུན་དུ་རང་ཕམ་པ་མཐོང་ནས། དཱ་བིད་དང་འདུམ་ཐབས་བྱས་ཏེ་ཁོང་གི་མངའ་འོག་ཏུ་གྱུར་པ་དང་། དེ་ནས་ཨ་རམ་པ་རྣམས་ཀྱིས་ཡང་བསྐྱར་ཨམ་མོན་པ་ལ་རོགས་བྱེད་མ་ཕོད་དོ། །
1CH 20:1 ཡང་ལོ་གཅིག་ཕར་འདས་པ་ལ། རྒྱལ་པོ་རྣམས་དམག་ལ་སྐྱོད་པའི་དུས་སུ་སླེབས་པ་དང་། ཡོ་ཨབ་ཀྱིས་དམག་དཔུང་ཁྲིད་ནས་ཨམ་མོན་པའི་ཡུལ་བརླག་རྗེས་རབ་བཱ་དམག་གིས་བསྐོར་ནས་བསྡད། དུས་དེར་དཱ་བིད་ཡེ་རུ་སཱ་ལེམ་དུ་བཞུགས་ཏེ། ཡོ་ཨབ་ཀྱིས་རབ་བཱར་རྒོལ་ནས་གྲོང་ཁྱེར་བཤིག
1CH 20:2 དཱ་བིད་ཀྱིས་ཡུལ་དེའི་རྒྱལ་པོའི་མགོ་ནས་ཅོད་པན་ཕྲོགས། རྒྱལ་པོའི་ཅོད་པན་སྟེང་གི་གསེར་ནི་རྡོ་ཚད་གཅིག་ཡོད་པ་དང་། དེའི་སྟེང་ལ་རིན་པོ་ཆེའི་ཕྲ་བཏབ་ཡོད། མི་ཞིག་གིས་དེ་དཱ་བིད་ཀྱི་དབུ་ལ་བསྐོན། དཱ་བིད་ཀྱིས་གྲོང་ཁྱེར་དེ་ལས་རྒྱུ་ནོར་དཔག་མེད་ཕྲོགས་ཤིང་།
1CH 20:3 ཁོང་གིས་གྲོང་ཁྱེར་དེའི་ནང་དུ་ཡོད་པའི་མི་རྣམས་ཕྱི་རོལ་ཏུ་ཁྲིད་ནས་དེ་རྣམས་ལ་སོག་ལེ་དང་། ལྕགས་ཁྱེམ། སྟ་རེ་བཅས་བཀོལ་ནས་ལས་ཀ་བྱེད་དུ་བཅུག་པ་དང་། དཱ་བིད་ཀྱིས་ཨམ་མོན་གྱི་གྲོང་ཁྱེར་སོ་སོའི་མི་ཐམས་ཅད་ལ་དེ་ལྟར་བྱས། དེ་ནས་དཱ་བིད་དང་མི་རྣམས་ཡེ་རུ་སཱ་ལེམ་དུ་ལོག་པ་རེད།
1CH 20:4 དེའི་རྗེས་སུ་ཡེས་ར་ཨེལ་པ་རྣམས་གེ་ཟེར་དུ་ཕེ་ལེ་ཤེད་པ་རྣམས་དང་འཐབ་ཅིང་། དུས་དེར་ཧུ་ཤཱ་པ་སིབ་བེ་ཀཱ་ཨི་བྱ་བ་དེས་མི་གཟུགས་རིང་གི་རིགས་རྒྱུད་ལས་སིབ་པཱ་ཨི་བྱ་བ་དེ་བསད་ནས་ཕེ་ལེ་ཤེད་པ་རྣམས་བཏུལ་ལོ། །
1CH 20:5 དེའི་རྗེས་སུ་ཡེས་ར་ཨེལ་པ་རྣམས་དང་ཕེ་ལེ་ཤེད་པའི་བར་ཡང་བསྐྱར་འཐབ་མོ་བྱུང་ནས། ཡཱ་ཨིར་གྱི་བུ་ཨེལ་ཧ་ནན་གྱིས་དེར་གཱད་པ་གོལ་ཡད་ཀྱི་ནུ་བོ་ལཱ་མི་བྱ་བ་སྟེ་ལག་པར་ཐགས་འཐག་བྱེད་ཀྱི་འཁོར་བརྟེན་ལྟ་བུའི་མདུང་ཐོགས་ཡོད་པ་དེ་བསད་དོ། །
1CH 20:6 དེ་ནས་ཡང་གཱད་ཡུལ་དུ་འཐབ་མོ་ཞིག་བྱུང་ནས། དེ་རུ་གཟུགས་ཤིན་ཏུ་ཆེ་བའི་མི་ཞིག་ཡོད་པ་ལ། རྐང་ལག་རེ་རེར་མཛུབ་མོ་དྲུག་རེ་ཡོད་པས། བསྡོམས་པས་མཛུབ་མོ་ཉེར་བཞི་ཡོད་པ་ཡིན། དེ་ཡང་མི་གཟུགས་རིང་གི་རིགས་རྒྱུད་ཡིན་ཏེ།
1CH 20:7 དེས་ཡེས་ར་ཨེལ་ལ་འཕྱ་དམོད་བྱས་པས་དཱ་བིད་ཀྱི་སྐུ་མཆེད་ཤི་མེ་ཨ་ཡི་བུ་ཡོ་ནཱ་ཐན་གྱིས་ཁོ་བསད་དོ། །
1CH 20:8 དེ་རྣམས་ནི་གཱད་ཀྱི་མི་གཟུགས་རིང་གི་རིགས་རྒྱུད་ལས་ཆད་པ་ཡིན་ལ། ཐམས་ཅད་དཱ་བིད་དང་ཁོང་གི་འཁོར་གཡོག་གི་ལག་ནས་ཤི་བར་གྱུར་ཏོ། །
1CH 21:1 དེ་ནས་བདུད་སཱ་ཏན་གྱིས་ཡེས་ར་ཨེལ་གྱི་དགྲ་རུ་ལངས་ནས། དཱ་བིད་ལ་ཡེས་ར་ཨེལ་པའི་མི་གྲངས་ལེན་པར་ངན་སྐུལ་བྱས་པས།
1CH 21:2 དཱ་བིད་ཀྱིས་ཡོ་ཨབ་དང་མི་རྣམས་ཀྱི་འགོ་དཔོན་རྣམས་ལ་ན་རེ། ཁྱོད་ཅག་སོང་ལ་དཱན་ནས་པེར་ཤ་བཱའི་བར་དུ་ཡེས་ར་ཨེལ་པའི་མི་གྲངས་ལོངས་ཤིག དེ་ནས་ཕྱིར་ཤོག་ལ་ཁོ་རྣམས་ཀྱི་མི་གྲངས་ང་ལ་ཤོད་ཅིག་ཅེས་སྨྲས་པ་དང་།
1CH 21:3 ཡོ་ཨབ་ན་རེ། དཀོན་མཆོག་ཡ་ཝཱེས་ཉིད་ཀྱི་འབངས་མི་ད་ལྟ་ཡོད་པ་ལས་ལྡབ་བརྒྱ་ཡིས་མང་དུ་འཕེལ་བར་མཛོད་ཅིག ཀྱེ་བདག་གི་ཇོ་བོ་དང་བདག་གི་རྒྱལ་པོ་ལགས། དེ་ཐམས་ཅད་ངའི་གཙོ་བོའི་ཞབས་ཕྱི་མ་ཡིན་ནམ། ངའི་གཙོ་བོས་དེ་ལྟར་བྱས་ནས་ཡེས་ར་ཨེལ་པ་རྣམས་སྡིག་པའི་ནང་དུ་ལྷུང་བར་བྱེད་དོན་ཅི་ཡིན་ནམ་ཞེས་ཞུས་མོད།
1CH 21:4 འོན་ཀྱང་རྒྱལ་པོས་རང་གི་བཀའ་མཁྲེགས་འཛིན་བྱས་པས་ཡོ་ཨབ་ཀྱིས་དེ་བཟློག་མ་ནུས་པར། ཁོ་ཕྱི་རུ་སོང་སྟེ་ཡེས་ར་ཨེལ་ཡུལ་ཀུན་བརྒྱུད་ནས་ཕྱིར་ཡེ་རུ་སཱ་ལེམ་དུ་ལོག་གོ །
1CH 21:5 ཡོ་ཨབ་ཀྱིས་མི་མང་གི་གྲངས་ཀ་བླངས་པའི་མི་གྲངས་ཀྱི་ཐོ་དཱ་བིད་ལ་ཕུལ་ཏེ། ཡེས་ར་ཨེལ་ཀུན་ཏུ་རལ་གྲི་འཛིན་ཐུབ་པའི་སྐྱེས་པ་བསྡོམས་པས་འབུམ་བཅུ་གཅིག་དང་། ཡ་ཧུ་དཱ་རུ་རལ་གྲི་འཛིན་ཐུབ་པའི་སྐྱེས་པ་འབུམ་བཞི་དང་ཁྲི་བདུན་ཡོད་པ་རེད།
1CH 21:6 འོན་ཀྱང་ཡོ་ཨབ་རྒྱལ་པོའི་བཀའ་འདི་ལ་ཞེན་ཁ་ལོག་པས། ཁོས་ལེ་ཝི་པ་དང་པེན་ཡཱ་མེན་པའི་མི་གྲངས་དེ་དག་གི་ཁྲོད་དུ་མ་བརྩིས་སོ། །
1CH 21:7 ཡང་དཀོན་མཆོག་དོན་འདི་ལ་ཐུགས་མ་མཉེས་པས། ཁོང་གིས་ཡེས་ར་ཨེལ་ལ་གནོད་འཚེ་བཏང་ངོ་། །
1CH 21:8 དེ་ནས་དཱ་བིད་ཀྱིས་དཀོན་མཆོག་ལ་འདི་ལྟར། བདག་གིས་དོན་འདི་བྱས་པས་སྡིག་པ་ཆེན་པོ་བསགས་པ་དང་། བདག་གིས་ཤིན་ཏུ་གླེན་པའི་དོན་བྱས་པས། ཁྱེད་ཀྱི་ཞབས་ཕྱིའི་སྡིག་ཉེས་བསལ་བར་མཛོད་ཅེས་གསོལ་ཏོ། །
1CH 21:9 དེ་ནས་དཀོན་མཆོག་ཡ་ཝཱེས་དཱ་བིད་ཀྱི་མངོན་ཤེས་པ་གཱ་རྡུ་ལ་འདི་སྐད་དུ།
1CH 21:10 ཁྱོད་སོང་ནས་དཱ་བིད་ལ་དཀོན་མཆོག་ཡ་ཝཱེས་ཁྱོད་ལ་འདི་སྐད་དུ། ངས་ཁྱོད་ལ་དོན་གསུམ་འདོན་ཏེ་ཁྱོད་ཀྱིས་དེ་རྣམས་ལས་གཅིག་འདེམས་ཤིག་དང་། ངས་དེ་བཞིན་དུ་ཁྱོད་ལ་བྱའོ་ཞེས་སྨྲོས་ཤིག་ཅེས་གསུངས་པ་དང་།
1CH 21:11 གཱ་རྡུ་ནི་དཱ་བིད་ཀྱི་དྲུང་དུ་འོངས་ནས་ཁོང་ལ་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་འདེམས་ཤིག
1CH 21:12 ལོ་གསུམ་གྱི་མུ་གེའམ། ཡང་ན་ཟླ་བ་གསུམ་གྱི་རིང་ལ་ཁྱོད་རང་གི་དགྲ་བོའི་མདུན་ནས་འབྲོ་ཞིང་དེ་རྣམས་ཀྱི་རལ་གྲིས་ཁྱོད་རང་འདེད་པའམ། ཡང་ན་ཉིན་ཞག་གསུམ་ལ་ཡུལ་འདིར་རིམས་ནད་འབྱུང་བ་དང་། དཀོན་མཆོག་ཡ་ཝཱེའི་ཕོ་ཉས་ཡེས་ར་ཨེལ་གྱི་ཡུལ་ཕྱོགས་ཀུན་ཏུ་ཚར་གཅོད་བྱེད་པ་བཅས་ལས་གང་འདོད་དམ་ཞེས་གསུངས། ད་ང་རང་མངགས་མཁན་ལ་ཞུ་ལན་གང་ཞིག་འབུལ་བར་ཁྱོད་ཀྱིས་བསམ་བློ་ཐོངས་ཤིག་བསྒོས་པ་དང་།
1CH 21:13 དཱ་བིད་ཀྱིས་གཱ་རྡུ་ལ་ན་རེ། བདག་ཅི་བྱ་གཏོལ་མེད་དུ་གྱུར་ཏེ། དཀོན་མཆོག་ཡ་ཝཱེ་ལ་ཐུགས་རྗེ་འཛད་མཐའ་མེད་པ་མངའ་བས་ན་ང་རང་མི་ཡི་ལག་ཏུ་མི་ལྷུང་བར་ཁོང་གི་ཕྱག་ནང་ལྷུང་བར་དགའོ་ཞེས་ཞུས་པ་དང་།
1CH 21:14 དཀོན་མཆོག་ཡ་ཝཱེས་ཡེས་ར་ཨེལ་གྱི་སྟེང་དུ་རིམས་ནད་ཕབ་ནས། ཡེས་ར་ཨེལ་པ་ལས་མི་ཁྲི་བདུན་ཚེ་ལས་འདས་སོ། །
1CH 21:15 ཡང་དཀོན་མཆོག་གིས་ཕོ་ཉ་ཞིག་ཡེ་རུ་སཱ་ལེམ་ཚར་གཅོད་བྱེད་དུ་མངགས་ནས། དེས་ཚར་གཅོད་བྱེད་པར་བརྩམས་པ་ལ། དཀོན་མཆོག་ཡ་ཝཱེས་གཟིགས་ནས་བར་ཆད་དེའི་ཕྱིར་ཐུགས་འགྱོད་ཅིང་། ཚར་གཅོད་བྱེད་མཁན་ཕོ་ཉ་དེ་ལ་འདི་སྐད་དུ། ད་ཆོག་སོང་། མཚམས་ཞོག་ཅིག་ཅེས་བསྒོས་སོ། །དེའི་ཚེ་དཀོན་མཆོག་ཡ་ཝཱེའི་ཕོ་ཉ་ནི་ཡེ་བུ་སི་པ་ཨོར་ནན་གྱི་གཡུལ་ཁའི་ཉེ་འགྲམ་དུ་འགྲེང་བསྡད་ཡོད་པ་ཡིན།
1CH 21:16 དཱ་བིད་ཀྱིས་མགོ་ཡར་བཏེགས་པ་ལ། དཀོན་མཆོག་ཡ་ཝཱེའི་ཕོ་ཉ་དེ་གནམ་ས་གཉིས་ཀྱི་བར་དུ་ལག་ལ་ཤུབས་ནས་ཕྱུང་བའི་རལ་གྲི་ཐོགས་ཤིང་། ཡེ་རུ་སཱ་ལེམ་ཕྱོགས་སུ་བརྐྱངས་ནས་འགྲེང་ཡོད་པ་མཐོང་བ་དང་། དཱ་བིད་དང་ཡེས་ར་ཨེལ་གྱི་རྒན་པོ་རྣམས་ཀྱིས་རྩིད་རས་གྱོན་ནས་ཕྱག་བཙལ་ཏེ།
1CH 21:17 དཱ་བིད་ཀྱིས་དཀོན་མཆོག་ལ། མིའི་གྲངས་ཀ་ལེན་པར་བསྒོ་མཁན་བདག་མ་ཡིན་ནམ། ངས་སྡིག་པ་བྱས་ནས་དོན་ངན་ཆེན་པོ་འདི་བསྒྲུབས་པའོ། །ལུག་ཁྱུ་འདིས་ཅི་བྱས་སམ། ཀྱེ་བདག་གི་དཀོན་མཆོག་ཡ་ཝཱེ་ལགས། ཁྱེད་ཀྱི་ཕྱག་གིས་བདག་དང་བདག་གི་ཁྱིམ་རྒྱུད་ལ་རྒོལ་བར་མཛད་དུ་གསོལ། ཁྱེད་ཀྱི་འབངས་མིའི་སྟེང་ལ་རིམས་ནད་འབེབ་མི་རུང་ཞེས་ཞུས་སོ། །
1CH 21:18 དེ་ནས་དཀོན་མཆོག་ཡ་ཝཱེའི་ཕོ་ཉས་གཱ་རྡུ་མངགས་ནས་དཱ་བིད་ལ། ཡར་ཡེ་བུ་སི་པ་ཨོར་ནན་གྱི་གཡུལ་ཁ་རུ་སོང་སྟེ་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེང་དགོས་ཞེས་བསྒོས་པ་དང་།
1CH 21:19 དཱ་བིད་ནི་གཱ་རྡུས་དཀོན་མཆོག་ཡ་ཝཱེའི་མཚན་ལ་བརྟེན་ནས་ཅི་གསུངས་པ་བཞིན་དུ་ཡར་སོང་བ་དང་།
1CH 21:20 དུས་དེར་ཨོར་ནན་གྱིས་གྲོ་ཡི་སྙེ་མ་རྡུང་བཞིན་ཡོད་པ་དང་ཁ་ཕྱིར་འཁོར་ནས་བལྟས་པ་ལ་ཕོ་ཉ་དེ་མཐོང་བ་དང་། རང་གི་བུ་བཞི་པོ་དང་མཉམ་དུ་ཡིབ།
1CH 21:21 དཱ་བིད་ཨོར་ནན་གྱི་རྩར་སླེབས་པ་དང་ཨོར་ནན་གྱིས་ཁོང་མཐོང་ནས་གཡུལ་ཁ་ནས་ཐོན་ཏེ། དཱ་བིད་ལ་ཕྱག་བཙལ་ཏོ། །
1CH 21:22 དེར་དཱ་བིད་ཀྱིས་ཨོར་ནན་ལ་ན་རེ། ངས་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བརྩིག་པའི་ཕྱིར་གཡུལ་ཁའི་ས་འདི་ང་ལ་སྟེར་བར་མཛོད། དེ་ནས་མི་རྣམས་ཀྱི་རིམས་ནད་འགོག་ཐུབ་བོ། །ཁྱོད་ཀྱིས་རིན་ཁ་ཚང་བརྩིས་ནས་ང་ལ་སྟེར་བར་མཛོད་ཅེས་སྨྲས།
1CH 21:23 ཨོར་ནན་གྱིས་དཱ་བིད་ལ་ལན་དུ། ཁྱེད་ཀྱིས་བཞེས་ཤིག ངའི་ཇོ་བོ་དང་ངའི་རྒྱལ་པོའི་གཟིགས་ངོར་གང་ལེགས་ན་དེ་བཞིན་མཛོད་ཅིག ཁྱེད་ཀྱིས་གཟིགས་དང་། ངས་བ་གླང་རྣམས་སྦྱིན་སྲེག་གི་ཕྱིར་དང་། གཡུལ་ཁ་གཅོག་བྱེད་ཡོ་ཆས་རྣམས་བུད་ཤིང་དུ་བྱེད་པ་དང་། གྲོ་ནི་འབྲུ་རིགས་ཀྱི་མཆོད་པའི་ཕྱིར་ཐམས་ཅད་ཁྱེད་ལ་འབུལ་ལོ་ཞུས་པར།
1CH 21:24 རྒྱལ་པོ་དཱ་བིད་ཀྱིས་ཨོར་ནན་ལ་འདི་ལྟར། དེ་ལྟར་མི་བྱ། ངས་དེ་ལ་རིན་ཁ་ཚང་བཅལ་ནས་ཉོ་ངེས་ཡིན། ངས་ཁྱོད་ཀྱི་དངོས་པོ་བླངས་ནས་དཀོན་མཆོག་ཡ་ཝཱེ་ལ་འབུལ་མི་རུང་ལ། ངས་རིན་མ་སྤྲད་པའི་སྦྱིན་སྲེག་ཀྱང་འབུལ་མི་རུང་ཞེས་སྨྲས་ནས།
1CH 21:25 དཱ་བིད་ཀྱིས་གསེར་སྲང་དྲུག་བརྒྱ་བཅལ་ནས་ཨོར་ནན་ལ་སྤྲད་ཅིང་ས་དེ་ཉོས་པ་དང་།
1CH 21:26 ཁོང་གིས་དེར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་ནས་སྦྱིན་སྲེག་དང་ཞི་བདེའི་མཆོད་པ་ཕུལ་ཞིང་། དཀོན་མཆོག་ཡ་ཝཱེ་ལ་གསོལ་བ་བཏབ་པ་ལ་དཀོན་མཆོག་ཡ་ཝཱེས་བཀའ་ལན་གནང་སྟེ། ནམ་མཁའ་ནས་སྦྱིན་སྲེག་གི་མཆོད་ཁྲིའི་སྟེང་མེ་ཕབ་པའོ། །
1CH 21:27 དེར་དཀོན་མཆོག་ཡ་ཝཱེས་ཕོ་ཉ་དེ་ལ་བཀའ་བསྩལ་ནས། ཕོ་ཉ་དེས་རལ་གྲི་ཤུབས་ཀྱི་ནང་དུ་བཅུག་གོ །
1CH 21:28 དེའི་དུས་སུ་དཱ་བིད་ཀྱིས་དཀོན་མཆོག་ཡ་ཝཱེས་ཡེ་བུ་སི་པ་ཨོར་ནན་གྱི་གཡུལ་ཁ་རུ་རང་ལ་བཀའ་ལན་གནང་བ་མཐོང་ནས་དེ་རུ་མཆོད་པ་ཕུལ།
1CH 21:29 མོ་ཤེས་དབེན་སྟོང་དུ་བཟོས་པའི་དཀོན་མཆོག་ཡ་ཝཱེའི་གུར་མཆོག་དང་སྦྱིན་སྲེག་གི་མཆོད་ཁྲི་ནི་དེའི་དུས་སུ་གིབ་ཡོན་གྱི་མཐོ་གླིང་དུ་ཡོད་པ་ཡིན།
1CH 21:30 འོན་ཀྱང་དཱ་བིད་དཀོན་མཆོག་ཡ་ཝཱེའི་ཕོ་ཉ་དེའི་རལ་གྲིར་འཇིགས་པས། ཡར་དཀོན་མཆོག་ལ་བཀའ་འདྲི་ཞུ་རུ་འགྲོ་མ་སྤོབས་སོ། །
1CH 22:1 དཱ་བིད་ན་རེ། འདི་ནི་དཀོན་མཆོག་ཡ་ཝཱེའི་མཆོད་ཁང་དང་། ཡེས་ར་ཨེལ་གྱི་སྦྱིན་སྲེག་གི་མཆོད་ཁྲི་རུ་འགྱུར་རོ་ཞེས་སྨྲས།
1CH 22:2 དཱ་བིད་ཀྱིས་ཡེས་ར་ཨེལ་ཡུལ་དུ་ཡོད་པའི་རིགས་རྒྱུད་གཞན་པའི་མི་རྣམས་བསྡུ་བར་བསྒོས་ཤིང་། ཡང་དཀོན་མཆོག་གི་མཆོད་ཁང་བཞེང་བའི་ཕྱིར་རྡོ་བཟོ་མངགས་ནས་རྡོ་རྐོ་རུ་བཅུག
1CH 22:3 ཡང་དཱ་བིད་ཀྱིས་སྒོ་རྣམས་ཀྱི་འཛེར་མ་དང་འཁོར་མིག་གི་ཕྱིར་དུ་ལྕགས་ཤིན་ཏུ་མང་པོ་དང་། ལི་གྲངས་མེད་བཤམས་ནས་བཞག
1CH 22:4 ཐཱར་པ་དང་ཚི་ཏུན་པ་རྣམས་ཀྱིས་དཱ་བིད་ལ་ཐང་ཤིང་མང་དུ་དྲངས་པས། ཐང་ཤིང་བགྲང་གིས་མི་ལང་བ་བཤམས་ནས་བཞག་གོ །
1CH 22:5 དེར་དཱ་བིད་ཀྱིས་སེམས་སུ་འདི་ལྟར། ངའི་བུ་སོ་ལོ་མོན་ད་དུང་ལོ་ན་ཕྲ་ཞིང་ཤེས་རྒྱ་ཡང་ཆུང་བས། དཀོན་མཆོག་ཡ་ཝཱེའི་དོན་དུ་བཞེང་བྱའི་མཆོད་ཁང་དེ་ནི་བརྗིད་ཉམས་ཆེ་ཞིང་འོད་སྟོང་འབར་བ་ཞིག་ཡིན་པ་དང་། དེའི་གཟི་དཔལ་ཡུལ་གྲུ་ཀུན་ཏུ་གྲགས་དགོས། དེའི་ཕྱིར་ངས་མཆོད་ཁང་འདིའི་ཆེད་དུ་རྒྱུ་ཆ་སྟ་གོན་བྱའོ་སྙམ་ནས། དཱ་བིད་མ་གྲོངས་གོང་དུ་སྟ་གོན་རྒྱ་ཆེན་པོ་མཛད་དོ། །
1CH 22:6 དེ་ནས་དཱ་བིད་ཀྱིས་རང་གི་སྲས་སོ་ལོ་མོན་བོས་ནས། ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་མཆོད་ཁང་ཞིག་བཞེང་དགོས་པའི་བཀའ་བསྩལ་ཏེ།
1CH 22:7 དཱ་བིད་ཀྱིས་སོ་ལོ་མོན་ལ་འདི་ལྟར། ངའི་བུ། བདག་གི་སེམས་སུ་ངའི་དཀོན་མཆོག་ཡ་ཝཱེའི་མཚན་གྱི་ཕྱིར་མཆོད་ཁང་ཞིག་བཞེང་བའི་འདུན་པ་ཡོད་ནའང་།
1CH 22:8 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ། ཁྱོད་ཀྱིས་མི་མང་པོའི་ཁྲག་ཕོས་ནས་དམག་འཐབ་མང་པོ་བརྒྱབ། ཁྱོད་ཀྱིས་ངའི་མདུན་དུ་ས་གཞིའི་སྟེང་མི་མང་པོའི་ཁྲག་ཕོས་པ་ཡིན་པས། ཁྱོད་ཀྱིས་ངའི་མིང་གི་ཕྱིར་མཆོད་ཁང་བརྩིག་མི་རུང་།
1CH 22:9 ལྟོས་དང་། ཁྱོད་ལས་བུ་ཞིག་སྐྱེས་པར་འགྱུར་ལ། ཁོ་ནི་མི་ཞི་འཇམ་ཞིག་ཡིན་པ་དང་། ཁོའི་ཕྱོགས་བཞིའི་དགྲ་བོ་ཐམས་ཅད་ངས་ཁོ་དང་འཆམ་པོ་འོང་བར་བྱ་ཞིང་། ཁོའི་མིང་ལ་སོ་ལོ་མོན་ ཞེས་འབོད་ལ། ཁོ་རྒྱལ་པོར་བཞུགས་པའི་དུས་སུ་ངས་ཡེས་ར་ཨེལ་ལ་དུས་བདེ་ཞོད་འཇགས་གནང་བར་བྱ།
1CH 22:10 ཁོས་ངའི་མིང་གི་ཕྱིར་མཆོད་ཁང་ཞིག་བརྩིག་པར་འགྱུར་ལ། ཁོ་བདག་གི་སྲས་དང་ང་ཁོའི་ཡབ་ཏུ་འགྱུར་ཏེ། ངས་དེའི་རྒྱལ་ཁྲི་བརྟན་པར་བྱས་ནས་ཁོའི་བུ་རྒྱུད་རྣམས་ཀྱིས་ཇི་སྲིད་བར་དུ་ཡེས་ར་ཨེལ་གྱི་རྒྱལ་སྲིད་བསྐྱང་བར་བྱའོ་ཞེས་གསུངས་པས།
1CH 22:11 ངའི་བུ། ད་ནི་དཀོན་མཆོག་ཡ་ཝཱེ་ཁྱོད་དང་མཉམ་དུ་བཞུགས་ཤིང་ཁྱོད་ཀྱི་དོན་རྣམས་འགྲུབ་པར་ཤོག ཡང་ཁོང་གིས་ཁྱོད་ལ་ཞལ་བཞེས་གནང་བ་ལྟར་ཁྱོད་ཀྱི་དཀོན་མཆོག་ཡ་ཝཱེའི་མཆོད་ཁང་བཞེང་བར་གྱིས་ཤིག
1CH 22:12 ཁྱོད་ཀྱིས་ཡེས་ར་ཨེལ་གྱི་རྒྱལ་སྲིད་སྐྱོང་བའི་དུས་སུ། རང་གི་དཀོན་མཆོག་ཡ་ཝཱེའི་བཀའ་ཁྲིམས་བསྲུང་བའི་དོན་དུ། དཀོན་མཆོག་ཡ་ཝཱེས་ཁྱོད་ལ་བློ་དང་ཤེས་རབ་གནང་བར་ཤོག
1CH 22:13 གལ་ཏེ་ཁྱོད་ཀྱིས་དཀོན་མཆོག་ཡ་ཝཱེས་ཡེས་ར་ཨེལ་གྱི་དོན་དུ་མོ་ཤེ་ལ་བསྒོས་པའི་སྒྲིག་ཁྲིམས་དང་སྲོལ་ཡིག་ནན་གྱིས་བསྲུངས་ན། ཁྱོད་ཀྱི་བསམ་དོན་འགྲུབ་པར་འགྱུར། ཁྱོད་ནི་བློ་བརྟན་རྟུལ་ཕོད་ཡིན་དགོས་ལ། མ་འཇིགས་མ་འཚབ་ཅིག
1CH 22:14 ལྟོས་དང་། ངས་དཀའ་ལས་ཆེན་པོ་བརྒྱབ་ནས་དཀོན་མཆོག་ཡ་ཝཱེའི་མཆོད་ཁང་གི་ཕྱིར་གསེར་རྡོ་ཚད་འབུམ་ཕྲག་གཅིག་དང་། དངུལ་རྡོ་ཚད་འབུམ་ཕྲག་བཅུ་དང་། ལི་དང་ལྕགས་དཔག་ཏུ་མེད་པ་དང་། ཡང་ཤིང་དང་རྡོ་སོགས་ཚགས་སུ་ཆུད་ཡོད་པའི་ཁར་ཁྱོད་ཀྱིས་ཁ་སྣོན་བརྒྱབ་ཆོག
1CH 22:15 དེར་མ་ཟད་ཁྱོད་ལ་ལག་ཤེས་པའང་ཤིན་ཏུ་མང་པོ་ཡོད་དེ། རྡོ་རྐོ་མཁན་དང་། རྡོ་བཟོ་དང་། ཤིང་བཟོ་བཅས་ལས་སྣ་ཚོགས་ལ་མཁས་པའི་ལག་ཤེས་པ་མང་པོ་ཡོད་ལ།
1CH 22:16 ཡང་གསེར་མགར་དང་དངུལ་མགར། ལི་མགར། ལྕགས་མགར་བཅས་ནི་བགྲང་གིས་མི་ལང་བ་ཡོད་པས། ཡར་ལོངས་ལ་ལས་ཀ་བྱོས་དང་། དཀོན་མཆོག་ཡ་ཝཱེ་ཁྱོད་དང་མཉམ་དུ་བཞུགས་པར་ཤོག་ཅེས་གསུངས།
1CH 22:17 དཱ་བིད་ཀྱིས་ཡེས་ར་ཨེལ་གྱི་འགོ་དཔོན་ཀུན་ལ་རང་གི་སྲས་སོ་ལོ་མོན་ལ་ལས་གྲོགས་བྱེད་དགོས་པའི་བཀའ་བསྩལ་ཏེ་ན་རེ།
1CH 22:18 ཁྱོད་རྣམས་ཀྱི་དཀོན་མཆོག་ཡ་ཝཱེ་ནི་ཁྱོད་རྣམས་དང་མཉམ་དུ་བཞུགས་པ་མ་ཡིན་ནམ། ཁོང་གིས་ཁྱོད་རྣམས་ཀྱི་ཕྱོགས་བཞི་བདེ་ལ་བཀོད་པ་མ་ཡིན་ནམ། ཅིའི་ཕྱིར་ཞེ་ན། ཁོང་གིས་ཡུལ་འདིའི་ཡུལ་མི་རྣམས་ངའི་ལག་ཏུ་གཏད་ཏེ། ཡུལ་འདི་ནི་དཀོན་མཆོག་ཡ་ཝཱེ་དང་ཁོང་གི་འབངས་མིའི་མདུན་དུ་བཏུལ་བ་ཡིན་ནོ། །
1CH 22:19 ད་ནི་ཁྱོད་རྣམས་ཀྱིས་སེམས་ཐག་བཅད་ནས་རང་གི་དཀོན་མཆོག་ཡ་ཝཱེ་འཚོལ་ཞིག དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དང་། དཀོན་མཆོག་གི་སྣོད་ཆས་དམ་པ་རྣམས་དཀོན་མཆོག་ཡ་ཝཱེའི་མཚན་གྱི་ཕྱིར་བཞེངས་པའི་མཆོད་ཁང་གི་ནང་དུ་འཇོག་པའི་དོན་དུ། ཁྱོད་རྣམས་ལངས་ནས་དཀོན་མཆོག་ཡ་ཝཱེའི་གནས་དམ་པ་བརྩིག་དགོས་ཞེས་བསྒོས་སོ། །
1CH 23:1 དེ་ནས་དཱ་བིད་ལོ་ན་བགྲེས་ཤིང་ཚེ་ལོ་མཐར་ཕྱིན་པའི་དུས་སུ། རང་གི་བུ་སོ་ལོ་མོན་ཡེས་ར་ཨེལ་གྱི་རྒྱལ་པོར་བསྐོས་སོ། །
1CH 23:2 ཡང་དཱ་བིད་ཀྱིས་ཡེས་ར་ཨེལ་གྱི་འགོ་དཔོན་རྣམས་དང་། མཆོད་དཔོན་རྣམས་དང་ལེ་ཝི་པ་བཅས་ཚང་མ་བསྡུས་ནས།
1CH 23:3 ལེ་ཝི་པ་ལོ་སུམ་ཅུ་ལོན་པ་རྣམས་རྩིས་བླངས་པ་དང་། བསྡོམས་རྩིས་བྱས་པ་ལྟར་ན་ཁོ་ཚོའི་སྐྱེས་པ་རྣམས་ཀྱི་གྲངས་ཀ་སུམ་ཁྲི་བརྒྱད་སྟོང་ཡོད་ཅིང་།
1CH 23:4 དེ་དག་ལས་དཀོན་མཆོག་ཡ་ཝཱེའི་མཆོད་ཁང་ལ་བདག་གཉེར་བྱེད་མཁན་མི་ཉིས་ཁྲི་བཞི་སྟོང་དང་། འགོ་དཔོན་དང་ཁྲིམས་དཔོན་མི་དྲུག་སྟོང་དང་།
1CH 23:5 ཡང་སྒོ་སྲུང་མི་བཞི་སྟོང་དང་། དཱ་བིད་ ཀྱིས་བཟོས་པའི་རོལ་ཆས་ཀྱིས་དཀོན་མཆོག་ཡ་ཝཱེ་ལ་བསྟོད་དབྱངས་འབུལ་མཁན་མི་བཞི་སྟོང་བཅས་ཡོད།
1CH 23:6 དཱ་བིད་ཀྱིས་ལེ་ཝིའི་བུ་གེར་ཤོན་དང་། ཀོ་ཧད་དང་། མཱ་རཱ་རེའེ་ཡི་བུ་རྒྱུད་རྣམས་ལ་ལས་ཚན་བགོས་སོ། །
1CH 23:7 གེར་ཤོན་ལ་གཏོགས་པ་ལཱ་དན་དང་ཤིམ་ཨི་ཡོད་ཅིང་།
1CH 23:8 ལཱ་དན་གྱི་བུ་སྐྱེས་འགོ་ནི་ཡེ་ཧི་ཨེལ་དང་། ད་དུང་ཟེ་ཐམ་དང་ཡོ་ཨེལ་བཅས་བསྡོམས་པས་གསུམ་ཡོད།
1CH 23:9 ཤིམ་ཨི་ཡི་བུ་ནི་ཤེ་ལོ་མོད་དང་། ཧ་ཟི་ཨེལ། ཧཱ་རན་བཅས་བསྡོམས་པས་གསུམ་ཡོད་ལ། དེ་རྣམས་ནི་ལཱ་དན་ཁྱིམ་རྒྱུད་ཀྱི་འགོ་དཔོན་རྣམས་ཡིན།
1CH 23:10 ཤིམ་ཨི་ཡི་བུ་ནི་ཡ་ཧད་དང་། ཟི་ནཱ། ཡེ་ཨུ་སི། པེ་རེ་ཡཱ་བཅས་ཡིན་ལ། དེ་བཞི་པོ་ནི་ཤིམ་ཨི་ཡི་བུའོ། །
1CH 23:11 ཡ་ཧད་ནི་བུ་སྐྱེས་འགོ་དང་། ཟི་ཟཱ་བུ་གཉིས་པ་ཡིན་ལ། ཡེ་ཨུ་སི་དང་པེ་རེ་ཡཱ་གཉིས་ལ་བུ་རབས་ཚ་རྒྱུད་ཉུང་བས། དེ་གཉིས་པོ་ཁྱིམ་རྒྱུད་གཅིག་ཏུ་བརྩིས་ནས་ལས་ཚན་གཅིག་ཏུ་བྱས་སོ། །
1CH 23:12 ཀོ་ཧད་ཀྱི་བུ་ནི་ཨམ་རམ་དང་། ཡེས་ཧར། ཧེབ་རོན། ཨུ་ཟི་ཨེལ་བཅས་བསྡོམས་པས་བཞི་ཡིན།
1CH 23:13 ཨམ་རམ་གྱི་བུ་ནི་ཨ་རོན་དང་མོ་ཤེ་ཡིན་ལ། ཨ་རོན་དང་དེའི་བུ་རྒྱུད་རྣམས་གཏན་དུ་ལོགས་སུ་བཀར་ནས་རྫས་རབ་ཏུ་དམ་པ་རྣམས་འབུལ་ཞིང་། དཀོན་མཆོག་ཡ་ཝཱེའི་དྲུང་དུ་སྤོས་བདུག་པ་དང་། ཁོང་ལ་ཞབས་ཕྱི་བསྒྲུབ་པ་དང་། ཁོང་གི་མཚན་ལ་བརྟེན་ནས་ཇི་སྲིད་བར་དུ་བྱིན་རླབས་གཏོང་བའོ། །
1CH 23:14 དཀོན་མཆོག་གི་སྐྱེས་བུ་མོ་ཤེ་ལ་མཚོན་ན། ཁོང་གི་བུ་རབས་ཚ་རྒྱུད་རྣམས་ནི་ལེ་ཝི་ཚོ་པའི་ཁོངས་སུ་བརྩིས་སོ། །
1CH 23:15 མོ་ཤེའི་བུ་ནི་གེར་ཤོམ་དང་ཨེ་ལི་ཨེ་བཟིར་ཡིན།
1CH 23:16 གེར་ཤོམ་གྱི་བུ་སྐྱེས་འགོ་ནི་ཤེ་བུ་ཨེལ་ཡིན།
1CH 23:17 ཨེ་ལི་ཨེ་བཟིར་གྱི་བུ་སྐྱེས་འགོ་ནི་རེ་ཧབ་ཡཱ་ཡིན། ཨེ་ལི་ཨེ་བཟིར་ལ་བུ་གཞན་མེད་ནའང་རེ་ཧབ་ཡཱ་ལ་བུ་ཤིན་ཏུ་མང་པོ་ཡོད་པ་ཡིན།
1CH 23:18 ཡེས་ཧར་གྱི་བུ་སྐྱེས་འགོ་ནི་ཤེ་ལོ་མིད་ཡིན།
1CH 23:19 ཧེབ་རོན་གྱི་བུ་སྐྱེས་འགོ་ནི་ཡེ་རི་ཡཱ་དང་། བུ་གཉིས་པ་ཨ་མར་ཡཱ། བུ་གསུམ་པ་ཡ་ཧ་ཟི་ཨེལ། བུ་བཞི་པ་ཡེ་ཀཱ་མེ་ཨམ་བཅས་ཡིན།
1CH 23:20 ཨུ་ཟི་ཨེལ་གྱི་བུ་སྐྱེས་འགོ་ནི་མི་ཀཱ་དང་། བུ་གཉིས་པ་ཡིས་ཤི་ཡཱ་ཡིན།
1CH 23:21 མཱ་རཱ་རེའེ་ཡི་བུ་ནི་མཱ་ལི་དང་མུ་ཤི་ཡིན། མཱ་ལིའི་བུ་ནི་ཨེ་ལི་ཨ་ཟར་དང་ཁི་སི་ཡིན།
1CH 23:22 ཡང་ཨེ་ལི་ཨ་ཟར་ཚེ་ལས་འདས་པ་དང་། བུ་མོ་འབའ་ཞིག་ལས་བུ་མེད་པའོ། །དེ་དག་དང་གཉེན་ཉེ་ཁི་སིའི་བུ་རྣམས་ཀྱིས་དེ་རྣམས་མནའ་མར་བླངས།
1CH 23:23 མུ་ཤིའི་བུ་ནི་མཱ་ལི་དང་། ཨེ་དེར། ཡེ་རེ་མོད་བཅས་བསྡོམས་པས་གསུམ་ཡིན་ནོ། །
1CH 23:24 དེ་རྣམས་ནི་ལེ་ཝིའི་བུ་རབས་ཚ་རྒྱུད་རྣམས་ཡིན་ལ། དེ་དག་གི་ཁྱིམ་རྒྱུད་བཞིན་དུ་ཁྱིམ་རྒྱུད་རེ་རེའི་འགོ་དཔོན་རྣམས་ནི། སྐྱེས་པ་རྣམས་ཀྱི་མིང་གི་གྲངས་ཀ་བཞིན་རྩིས་བླངས་པ་དང་། ལོ་ཉི་ཤུའམ་དེའི་ཡན་ལ་སླེབས་པ་ཐམས་ཅད་དཀོན་མཆོག་ཡ་ཝཱེའི་མཆོད་ཁང་གི་བདག་གཉེར་པ་ཡིན།
1CH 23:25 ཅིའི་ཕྱིར་ཞེ་ན། སྔར་དཱ་བིད་ཀྱིས་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་ཉིད་ཀྱི་འབངས་མི་བདེ་ལ་བཀོད་པ་དང་། ཁོང་ཉིད་གཏན་དུ་ཡེ་རུ་སཱ་ལེམ་དུ་བཞུགས་པར་འགྱུར།
1CH 23:26 ལེ་ཝི་པ་རྣམས་ཀྱིས་ཕྱིན་ཆད་གུར་མཆོག་དང་ཞབས་ཕྱི་སྒྲུབ་བྱེད་སྣོད་ཆས་རྣམས་འཁུར་མི་དགོས་ཞེས་གསུངས་པས་སོ། །
1CH 23:27 དཱ་བིད་ཀྱི་ཞལ་ཆེམས་བཞིན་དུ་ལེ་ཝི་པ་རྣམས་ལོ་ཉི་ཤུའམ་དེའི་ཡན་ལ་སླེབས་པ་རྣམས་རྩིས་བླངས་པའོ། །
1CH 23:28 དེ་དག་གི་ལས་འགན་ནི་ཨ་རོན་གྱི་བུ་རབས་ཚ་རྒྱུད་རྣམས་ལ་རོགས་བྱས་ནས་དཀོན་མཆོག་ཡ་ཝཱེའི་མཆོད་ཁང་ལ་བདག་གཉེར་བྱེད་པ་དང་། ཁྱམས་ར་དང་ལོགས་ཁང་རྣམས་ལ་བལྟ་བ་དང་། མཆོད་རྫས་དམ་པ་ལ་བྱི་དོར་བྱེད་པ་དང་། དཀོན་མཆོག་གི་མཆོད་ཁང་ལ་བདག་གཉེར་བྱེད་པ་བཅས་དང་།
1CH 23:29 ཡང་སྤྱན་བསྟར་བག་ལེབ་དང་། འབྲུ་མཆོད་ཀྱི་གྲོ་ཞིབ་དང་། ཡང་ན་སྐྱུར་མེད་བག་སྲབ་དང་། ཡང་ན་བསྲེགས་གོར་དང་། ཡང་ན་སྣུམ་འཁུར་བཅས་ལ་བདག་གཉེར་བྱེད་པ་དང་། ཚད་འཇལ་བྱེད་ཡོ་བྱད་སྣ་ཚོགས་ལ་བདག་བྱེད་དགོས་པ་དང་།
1CH 23:30 ཉིན་རེའི་ནངས་དགོང་ཡར་འགྲེང་ནས་དཀོན་མཆོག་ཡ་ཝཱེ་ལ་གཏང་རག་དང་བསྟོད་པ་འབུལ་བ་དང་།
1CH 23:31 ངལ་གསོ་བའི་ཉིན་མོ་དང་། ཟླ་རེའི་ཚེས་གཅིག་དང་གཏན་ལ་ཁེལ་བའི་དུས་ཆེན་གྱི་དུས་སུ་གྲངས་ཀ་ལྟར་སྒྲིག་སྲོལ་བཞིན་དུ། སྦྱིན་སྲེག་གི་མཆོད་པ་རྣམས་མཚམས་མེད་པར་དཀོན་མཆོག་ཡ་ཝཱེའི་དྲུང་དུ་འབུལ་དགོས་ལ།
1CH 23:32 མཇལ་འཕྲད་གུར་མཆོག་དང་གནས་དམ་པ་བསྲུང་བ་དང་། ཡང་དཀོན་མཆོག་ཡ་ཝཱེའི་མཆོད་ཁང་དུ་ཞབས་ཕྱི་སྒྲུབ་པའི་རང་གི་གཉེན་ཉེ་སྟེ་ཨ་རོན་གྱི་བུ་རབས་ཚ་རྒྱུད་རྣམས་ལ་ལྟ་སྐྱོང་བྱེད་དགོས་པའོ། །
1CH 24:1 ཡང་ཨ་རོན་གྱི་བུ་རབས་ཚ་རྒྱུད་རྣམས་ཀྱི་ལས་ཚན་ནི་འདི་ལྟ་སྟེ། ཨ་རོན་གྱི་བུ་ནི་ནཱ་དབ་དང་། ཨ་བི་ཧུ། ཨེ་ལི་ཨ་ཟར། ཨི་ཐ་མཱར་བཅས་ཡིན།
1CH 24:2 ནཱ་དབ་དང་ཨ་བི་ཧུ་ནི་རང་གི་ཕ་ཡི་སྔོན་དུ་ཚེ་ལས་འདས་ཤིང་བུ་ཡང་མེད་པས། ཨེ་ལི་ཨ་ཟར་དང་ཨི་ཐ་མཱར་གཉིས་མཆོད་དཔོན་བྱས་པ་ཡིན།
1CH 24:3 དེ་ནས་དཱ་བིད་དང་ཨེ་ལི་ཨ་ཟར་གྱི་བུ་རྒྱུད་ལས་ཟཱ་ཏོག་དང་། ཨི་ཐ་མཱར་གྱི་བུ་རྒྱུད་ལས་ཨ་ཧི་མེ་ལེག་བཅས་ཀྱིས་ཁོ་ཚོའི་གཉེན་ཉེ་རྣམས་ཀྱི་འོས་འགན་བཞིན་ལས་ཚན་བགོས་པའོ། །
1CH 24:4 ཕྱིས་སུ་ཨེ་ལི་ཨ་ཟར་གྱི་བུ་རྒྱུད་ཁྲོད་དུ་ཨི་ཐ་མཱར་གྱི་བུ་རྒྱུད་ལས་ཀྱང་འགོ་དཔོན་མང་པོ་ཡོད་པ་ཤེས་ཏེ། ཁོ་རྣམས་ཀྱི་ལས་ཚན་བགོས། ཨེ་ལི་ཨ་ཟར་གྱི་བུ་རྒྱུད་ལས་ཁོ་ཚོའི་ཁྱིམ་རྒྱུད་བཞིན་དུ་འགོ་དཔོན་བཅུ་དྲུག་དང་། ཨི་ཐ་མཱར་གྱི་བུ་རྒྱུད་ལས་ཁོ་ཚོའི་ཁྱིམ་རྒྱུད་བཞིན་དུ་འགོ་དཔོན་བརྒྱད་ཡོད་པའོ། །
1CH 24:5 ཡང་གནས་དམ་པ་དང་དཀོན་མཆོག་གི་དྲུང་དུ་འགོ་དཔོན་བྱེད་པ་ནི་ཨེ་ལི་ཨ་ཟར་གྱི་བུ་རབས་ཚ་རྒྱུད་དང་། ཨི་ཐ་མཱར་གྱི་བུ་རབས་ཚ་རྒྱུད་གཉིས་ཀའི་ཁྲོད་དུ་ཡོད་པས། ཁོ་ཚོས་རྒྱན་བླངས་ནས་ཁོ་རྣམས་ཆ་སྙོམས་ཀྱིས་བགོས་པའོ། །
1CH 24:6 དྲུང་ཡིག་སྟེ་ལེ་ཝི་པ་ནེ་ཐན་ཨེལ་གྱི་བུ་ཤེ་མ་ཡཱས་རྒྱལ་པོ་དང་། འགོ་དཔོན་རྣམས་དང་། མཆོད་དཔོན་ཟཱ་ཏོག་དང་། ཨབ་ཡཱ་ཐར་གྱི་བུ་ཨ་ཧི་མེ་ལེག་དང་། མཆོད་དཔོན་རྣམས་ཀྱི་ཁྱིམ་རྒྱུད་དང་། ལེ་ཝི་པའི་ཁྱིམ་རྒྱུད་ཀྱི་འགོ་དཔོན་རྣམས་ཀྱི་མདུན་དུ། དེ་དག་གི་མིང་ཡི་གེར་བཀོད་པ་སྟེ། ཨེ་ལི་ཨ་ཟར་གྱི་བུ་རབས་ཚ་རྒྱུད་ལས་ཁྱིམ་རྒྱུད་གཅིག་བདམས་པ་དང་། ཨི་ཐ་མཱར་གྱི་བུ་རབས་ཚ་རྒྱུད་ལས་ཀྱང་ཁྱིམ་རྒྱུད་གཅིག་བདམས་པ་ཡིན།
1CH 24:7 དེ་ནས་རྒྱན་དང་པོ་ཡེ་ཧོ་ཡ་རིབ་ལ་བབས་པ་དང་། གཉིས་པ་ཡེ་དཱ་ཡ་དང་།
1CH 24:8 གསུམ་པ་ཧ་རིམ་དང་། བཞི་པ་སེ་ཨོ་རིམ་དང་།
1CH 24:9 ལྔ་པ་མལ་ཀི་ཡཱ་དང་། དྲུག་པ་མི་ཡ་མིན་དང་།
1CH 24:10 བདུན་པ་ཧག་ཀོས་དང་། བརྒྱད་པ་ཨ་བི་ཡཱ་དང་།
1CH 24:11 དགུ་པ་ཡེ་ཤུ་ཨ་དང་། བཅུ་པ་ཤེ་ཀན་ཡཱ་དང་།
1CH 24:12 བཅུ་གཅིག་པ་ཨེལ་ཡཱ་ཤིབ་དང་། བཅུ་གཉིས་པ་ཡཱ་ཀིམ་དང་།
1CH 24:13 བཅུ་གསུམ་པ་ཧུབ་ཕཱ་དང་། བཅུ་བཞི་པ་ཡེ་ཤེ་བེ་ཨབ་དང་།
1CH 24:14 བཅོ་ལྔ་པ་པིལ་གཱ་དང་། བཅུ་དྲུག་པ་ཨིམ་མེར་དང་།
1CH 24:15 བཅུ་བདུན་པ་ཧེ་ཟིར་དང་། བཅོ་བརྒྱད་པ་ཧབ་པི་ཙེ་ཟི་དང་།
1CH 24:16 བཅུ་དགུ་པ་ཕེ་ཐཱ་ཡ་དང་། ཉི་ཤུ་པ་ཡེ་ཧེ་ཀེལ་དང་།
1CH 24:17 ཉེར་གཅིག་པ་ཡཱ་ཀིན་དང་། ཉེར་གཉིས་པ་གཱ་མུལ་དང་།
1CH 24:18 ཉེར་གསུམ་པ་དི་ལཱ་ཡ་དང་། ཉེར་བཞི་པ་མ་ཨ་ཟི་ཡཱ་ལ་བབས་པའོ། །
1CH 24:19 ཡེས་ར་ཨེལ་གྱི་དཀོན་མཆོག་ཡ་ཝཱེས་དེ་དག་གི་ཕ་མེས་ཨ་རོན་ལ་བཀའ་བསྩལ་པའི་སྒྲིག་སྲོལ་བཞིན་དུ། དེ་དག་རེ་རེ་རང་གི་ལས་རེས་བཞིན་དུ་དཀོན་མཆོག་ཡ་ཝཱེའི་མཆོད་ཁང་ལ་ཞབས་ཕྱི་བྱེད་དུ་འོངས་པའོ། །
1CH 24:20 ལེ་ཝི་པའི་བུ་རྒྱུད་གཞན་དག་ནི། ཨམ་རམ་གྱི་བུ་རྒྱུད་ལས་ཤུ་བཱ་ཨེལ་དང་། ཤུ་བཱ་ཨེལ་གྱི་བུ་རྒྱུད་ལས་ཡེ་དེ་ཡཱའོ། །
1CH 24:21 རེ་ཧབ་ཡཱ་ལ་མཚོན་ན། རེ་ཧབ་ཡཱའི་བུ་རྣམས་ལས་བུ་སྐྱེས་འགོ་ཡིས་ཤི་ཡཱ་ཡིན་པ་དང་།
1CH 24:22 ཡེས་ཧར་གྱི་བུ་རྣམས་ལས་ཤེ་ལོ་མོད་དང་ཤེ་ལོ་མོད་ཀྱི་བུ་རྣམས་ལས་ཡ་ཧད་ཡོད།
1CH 24:23 ཧེབ་རོན་གྱི་བུ་རྣམས་ནི་བུ་སྐྱེས་འགོ་ཡེ་རི་ཡཱ་དང་། བུ་གཉིས་པ་ཨ་མར་ཡཱ། བུ་གསུམ་པ་ཡ་ཧ་ཟི་ཨེལ། བུ་བཞི་པ་ཡེ་ཀཱ་མེ་ཨམ་བཅས་ཡིན།
1CH 24:24 ཨུ་ཟི་ཨེལ་གྱི་བུ་རྣམས་ལས་མི་ཀཱ་ཡོད་པ་དང་། མི་ཀཱའི་བུ་རྣམས་ལས་ཤཱ་མིར་ཡོད།
1CH 24:25 མི་ཀཱའི་སྤུན་ནི་ཨིས་ཤི་ཡཱ་ཡིན་ལ། ཨིས་ཤི་ཡཱ་ཡི་བུ་རྣམས་ལས་ཟཱ་ཀར་ཡ་ཡོད།
1CH 24:26 མཱ་རཱ་རེའེ་ཡི་བུ་ནི་མཱ་ལི་དང་མུ་ཤི། ཡ་ཨ་ཟི་ཡཱ་བཅས་ཡིན་ལ། ཡ་ཨ་ཟི་ཡཱའི་བུ་ནི་བེ་ནོའོ། །
1CH 24:27 མཱ་རཱ་རེའེ་ཡི་བུ་རྣམས་ལས་ཡ་ཨ་ཟི་ཡཱའི་བུ་བེ་ནོ་དང་། ཤོ་ཧམ། ཟག་ཀུར། ཨིབ་རི་བཅས་ཡོད།
1CH 24:28 མཱ་ལི་ཡི་བུ་ནི་ཨེ་ལི་ཨ་ཟར་ཡིན་པ་དང་། ཨེ་ལི་ཨ་ཟར་ལ་བུ་མ་སྐྱེས་སོ། །
1CH 24:29 ཁི་སི་ལ་མཚོན་ན། ཁི་སིའི་བུ་རྣམས་ལས་ཡེ་ར་མེ་ཨེལ་ཡོད།
1CH 24:30 མུ་ཤིའི་བུ་ནི་མཱ་ལི་དང་། ཨེ་དེར། ཡེ་རི་མོད་བཅས་ཡིན། དེ་རྣམས་ནི་ལེ་ཝི་པའི་བུ་རྒྱུད་ཡིན་ལ། ཁོ་ཚོའི་ཁྱིམ་རྒྱུད་བཞིན་དུ་ཐོ་བརྒྱབ་པའོ། །
1CH 24:31 དེ་རྣམས་ཀྱིས་ཀྱང་རང་གི་གཉེན་ཉེ་ཨ་རོན་གྱི་བུ་རྒྱུད་ལྟར་དུ་རྒྱལ་པོ་དཱ་བིད་དང་། ཟཱ་ཏོག་དང་། ཨ་ཧི་མེ་ལེག་དང་། མཆོད་དཔོན་དང་ལེ་ཝི་པའི་ཁྱིམ་རྒྱུད་ཀྱི་འགོ་དཔོན་རྣམས་ཀྱི་མདུན་དུ་རྒྱན་བླངས་པ་སྟེ། ཁྱིམ་རྒྱུད་རེ་རེའི་འགོ་དཔོན་དང་ཁོ་ཚོའི་སྤུན་ན་གཞོན་ཀུན་གྱིས་རྒྱན་བླངས་པ་ཡིན་ནོ། །
1CH 25:1 དེ་ནས་དཱ་བིད་དང་འགོ་དཔོན་དག་གིས་ཨ་སབ་དང་ཧེ་མཱན། ཡེ་དུ་ཐུན་བཅས་ཀྱི་བུ་རབས་ཚ་རྒྱུད་ལ་ལས་འགན་བགོས་ཤིང་། ཁོ་རྣམས་ལ་པི་ཝང་དང་རྒྱུད་མངས། སྦུག་ཆལ་བཅས་ཀྱིས་ལུང་སྟོན་དུ་བཅུག དེ་དག་གི་ལས་འགན་འཁུར་མཁན་གྱི་མི་གྲངས་ནི།
1CH 25:2 ཨ་སབ་ཀྱི་བུ་རྣམས་ལས་ཟག་ཀུར་དང་། ཡོ་སེབ། ནེ་ཐན་ཡཱ། ཨ་སར་ཨེ་ལཱ་བཅས་ཡོད་ཅིང་། ཨ་སབ་ཀྱི་བུ་རྣམས་ལ་ཨ་སབ་ཀྱིས་བཀོད་འདོམས་བྱེད་པ་དང་། རྒྱལ་པོའི་བཀའ་བཞིན་དུ་ལུང་བསྟན་སྨྲ་བ་ཡིན།
1CH 25:3 ཡེ་དུ་ཐུན་ལ་མཚོན་ན། ཁོའི་བུ་རྣམས་ལས་གེ་དལ་ཡཱ་དང་། ཟེ་རི། ཡེ་ཤ་ཡཱ། ཤིམ་ཨི། ཧ་ཤབ་ཡཱ། མད་ཐིད་ཡཱ་བཅས་བསྡོམས་པས་མི་དྲུག་ཡོད་ཅིང་ཐམས་ཅད་ལ་རང་གི་ཕ་ཡེ་དུ་ཐུན་གྱིས་བཀོད་འདོམས་བྱེད་པ་དང་། ཡེ་དུ་ཐུན་གྱིས་པི་ཝང་གིས་ལུང་བསྟན་སྨྲ་ཞིང་། དཀོན་མཆོག་ཡ་ཝཱེ་ལ་བཀའ་དྲིན་ཞུ་བ་དང་བསྟོད་བསྔགས་བརྗོད་པ་ཡིན།
1CH 25:4 ཧེ་མཱན་ལ་མཚོན་ན། ཁོའི་བུ་རྣམས་ལས་པུག་ཀི་ཡཱ་དང་། མད་ཐན་ཡཱ། ཨུ་ཟི་ཨེལ། ཤེ་བུ་ཨེལ། ཡེ་རི་མོད། ཧ་ནན་ཡཱ། ཧ་ནཱ་ནེ། ཨེ་ལི་ཨ་ཐཱ། གིད་ཏལ་ཏི། རོ་མམ་ཏི་ཨེ་ཟེར། ཡོས་པེ་ཀ་ཤཱ། མལ་ལོ་ཐི། ཧོ་ཐིར། མཱ་ཧ་ཟི་ཨོད་བཅས་ཡོད་ལ།
1CH 25:5 འདི་རྣམས་ནི་ཧེ་མཱན་གྱི་བུ་ཡིན་ལ། ཧེ་མཱན་ནི་རྒྱལ་པོའི་མངོན་ཤེས་པ་ཡིན་ཞིང་། དཀོན་མཆོག་གི་བཀའ་བཞིན་རྭ་དུང་མཐོན་པོར་ འདེགས་པ་ཡིན། དཀོན་མཆོག་གིས་ཧེ་མཱན་ལ་བུ་བཅུ་བཞི་དང་བུ་མོ་གསུམ་གནང་ངོ་། །
1CH 25:6 དེ་ཐམས་ཅད་ལ་རང་རང་གི་ཕ་ཡིས་བཀོད་འདོམས་བྱེད་ཅིང་། དཀོན་མཆོག་ཡ་ཝཱེའི་མཆོད་ཁང་དུ་བསྟོད་དབྱངས་འབུལ་བ་དང་། སྦུག་ཆལ་དང་རྒྱུད་མངས། པི་ཝང་བཅས་ཀྱིས་དཀོན་མཆོག་གི་མཆོད་ཁང་དུ་ཞབས་ཕྱི་བྱེད་པ་ཡིན་ལ། ཨ་སབ་དང་ཡེ་དུ་ཐུན། ཧེ་མཱན་བཅས་ལ་རྒྱལ་པོས་བཀོད་འདོམས་བྱེད་པའོ། །
1CH 25:7 དེ་དག་དང་དེ་དག་གི་གཉེན་ཉེ་རྣམས་ལ་དཀོན་མཆོག་ཡ་ཝཱེར་བསྟོད་དབྱངས་འབུལ་བའི་ཐད་སྦྱོང་བརྡར་ཡག་པོ་ཐོབ་པ་དང་། མགུར་ལེན་པར་བྱང་ཆ་ཡོད་པ་མི་ཉིས་བརྒྱ་དང་གྱ་བརྒྱད་ཡོད་པ་ཡིན།
1CH 25:8 དེ་དག་གིས་རྒན་གཞོན་དང་དགེ་སློབ་ཀྱི་དབྱེ་བ་མ་ཕྱེ་བར། ཀུན་གྱིས་མཉམ་དུ་རྒྱན་བླངས་ནས་ལས་རེས་བགོས་པ་རེད།
1CH 25:9 དེ་ནས་རྒྱན་དང་པོ་ཨ་སབ་ཀྱི་བུ་ཡོ་སེབ་ལ་བབས་པ་དང་། གཉིས་པ་གེ་དལ་ཡཱ་དང་། དེའི་སྤུན་དང་བུ་བཅས་བསྡོམས་པས་མི་བཅུ་གཉིས་དང་།
1CH 25:10 གསུམ་པ་ཟག་ཀུར་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:11 བཞི་པ་ཡི་ཙི་རི་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:12 ལྔ་པ་ནེ་ཐན་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:13 དྲུག་པ་པུག་ཀི་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:14 བདུན་པ་ཡེ་ཤ་རེ་ལཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:15 བརྒྱད་པ་ཡེ་ཤ་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:16 དགུ་པ་མད་ཐན་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:17 བཅུ་པ་ཤིམ་ཨི་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:18 བཅུ་གཅིག་པ་ཨ་ཟར་ཨེལ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:19 བཅུ་གཉིས་པ་ཧ་ཤབ་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:20 བཅུ་གསུམ་པ་ཤུ་བཱ་ཨེལ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:21 བཅུ་བཞི་པ་མད་ཐིད་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:22 བཅོ་ལྔ་པ་ཡེ་རེ་མོད་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:23 བཅུ་དྲུག་པ་ཧ་ནན་ཡཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:24 བཅུ་བདུན་པ་ཡོས་པེ་ཀ་ཤཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:25 བཅོ་བརྒྱད་པ་ཧ་ནཱ་ནེ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:26 བཅུ་དགུ་པ་མལ་ལོ་ཐི་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:27 ཉི་ཤུ་པ་ཨེ་ལི་ཨ་ཐཱ་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:28 ཉེར་གཅིག་པ་ཧོ་ཐིར་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:29 ཉེར་གཉིས་པ་གིད་ཏལ་ཏི་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:30 ཉེར་གསུམ་པ་མཱ་ཧ་ཟི་ཨོད་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་དང་།
1CH 25:31 ཉེར་བཞི་པ་རོ་མམ་ཏི་ཨེ་ཟེར་དང་། དེའི་བུ་དང་སྤུན་བཅས་བསྡོམས་པས་མི་བཅུ་གཉིས་བཅས་ལ་བབས་པའོ། །
1CH 26:1 སྒོ་སྲུང་རྣམས་ཀྱི་ལས་ཚན་ནི། ཀོ་རཱག་པ་ཨ་སབ་ཀྱི་བུ་རབས་ཚ་རྒྱུད་ལས་ཀོ་རེད་ཀྱི་བུ་མེ་ཤེ་ལེམ་ཡཱ་ཡོད་པ་དང་།
1CH 26:2 ཡང་མེ་ཤེ་ལེམ་ཡཱ་ལ་བུ་འགའ་ཡོད་པ་སྟེ། བུ་སྐྱེས་འགོ་ཟཱ་ཀར་ཡ་དང་། བུ་གཉིས་པ་ཡེ་དི་ཡཱ་ཨེལ། བུ་གསུམ་པ་ཟེ་བད་ཡཱ། བུ་བཞི་པ་ཡད་ནི་ཨེལ།
1CH 26:3 བུ་ལྔ་པ་ཨེ་ལཱམ། བུ་དྲུག་པ་ཡེ་ཧོ་ཧ་ནན། བུ་བདུན་པ་ཨེ་ལི་ཧོ་ཨེ་ན་ཨི་བཅས་སོ། །
1CH 26:4 ཨོ་བེད་ཨེ་དོམ་ལ་བུ་འགའ་ཡོད་པ་སྟེ། བུ་སྐྱེས་འགོ་ཤེ་མཱ་ཡ། བུ་གཉིས་པ་ཡེ་ཧོ་ཟ་བད། བུ་གསུམ་པ་ཡོ་ཨག བུ་བཞི་པ་སཱ་ཀར། བུ་ལྔ་པ་ནེ་ཐན་ཨེལ།
1CH 26:5 བུ་དྲུག་པ་ཨམ་མེ་ཨེལ། བུ་བདུན་པ་ཡེས་སི་ཀཱར། བུ་བརྒྱད་པ་ཕེ་ཨུལ་ལེ་ཐ་ཨི་བཅས་ཡིན་ལ། དཀོན་མཆོག་གིས་དངོས་གནས་ཨོ་བེད་ཨེ་དོམ་ལ་བྱིན་རླབས་གནང་བའོ། །
1CH 26:6 དེའི་བུ་ཤེ་མཱ་ཡ་ལས་ཀྱང་བུ་འགའ་མཆེད་ཡོད་པ་སྟེ། དེ་རྣམས་ནི་དམག་མི་དཔའ་རྩལ་ཅན་ཡིན་པས། ཐམས་ཅད་རང་རང་གི་ཁྱིམ་རྒྱུད་ཀྱི་འགོ་དཔོན་བྱས་པ་ཡིན།
1CH 26:7 ཤེ་མཱ་ཡའི་བུ་རྣམས་ནི་ཨོད་ནི་དང་རེ་ཕཱ་ཨེལ། ཨོ་བེད། ཨེལ་ཟཱ་བད་བཅས་ཡིན་ལ། ཨེལ་ཟཱ་བད་ཀྱི་སྤུན་ཨེ་ལི་ཧུ་དང་ཤེ་མག་ཡཱ་ནི་དཔའ་རྩལ་ཅན་ཡིན།
1CH 26:8 དེ་ཐམས་ཅད་ནི་ཨོ་བེད་ཨེ་དོམ་གྱི་བུ་རབས་ཚ་རྒྱུད་ཡིན་ལ། དེ་དག་དང་དེ་དག་གི་བུ་དང་སྤུན་རྣམས་ནི་ལས་ཀ་སྒྲུབ་ནུས་པ་ཡིན་ཏེ། ཨོ་བེད་ཨེ་དོམ་གྱི་བུ་རྒྱུད་བསྡོམས་པས་མི་དྲུག་ཅུ་རེ་གཉིས་ཡོད་དོ། །
1CH 26:9 མེ་ཤེ་ལེམ་ཡཱ་ལ་བུ་དང་སྤུན་ཡོད་ཅིང་། ཐམས་ཅད་དཔའ་རྩལ་ཅན་ཡིན་ཏེ་བསྡོམས་པས་མི་བཅོ་བརྒྱད་ཡོད་པ་ཡིན།
1CH 26:10 ཡང་མཱ་རཱ་རེའེ་ཡི་བུ་རབས་ཚ་རྒྱུད་ལས་ཧོ་སཱ་ལ་ཡང་བུ་འགའ་ཡོད་དེ། བུ་སྐྱེས་འགོ་ཤིམ་རི་ནི་མ་གཞི་སྐྱེས་འགོ་མིན་ན་ཡང་། ཁོའི་ཕ་ཡིས་ཁོ་འགོ་བར་བྱས་པ་ཡིན།
1CH 26:11 བུ་གཉིས་པ་ཧིལ་ཀི་ཡཱ་དང་། བུ་གསུམ་པ་ཏེ་བལ་ཡཱ། བུ་བཞི་པ་ཟཱ་ཀར་ཡ་བཅས་ཡིན། ཧོ་སཱའི་བུ་དང་སྤུན་ཐམས་ཅད་བསྡོམས་པས་མི་བཅུ་གསུམ་ཡོད་པ་ཡིན།
1CH 26:12 འདི་རྣམས་ནི་སྒོ་སྲུང་བའི་ལས་ཚན་ཡིན་ལ། འགོ་དཔོན་དང་དེ་དག་གི་གཉེན་ཉེ་སུ་ཡིན་ཡང་ཀུན་གྱིས་དཀོན་མཆོག་ཡ་ཝཱེའི་མཆོད་ཁང་དུ་ལས་རེས་བཞིན་ཞབས་ཕྱི་བསྒྲུབས་པ་ཡིན།
1CH 26:13 དེ་དག་གིས་རྒན་གཞོན་སུ་ཡིན་ཡང་སྒོ་རེ་རེ་བསྲུང་བར་རང་རང་གི་ཁྱིམ་རྒྱུད་བཞིན་དུ་རྒྱན་བླངས་པ་སྟེ།
1CH 26:14 ཤར་སྒོ་སྲུང་བའི་རྒྱན་ནི་ཤེ་ལེམ་ཡཱ་ལ་བབས། དེའི་བུ་ཟཱ་ཀར་ཡ་ནི་གྲོས་ལ་མཁས་པ་ཞིག་ཡིན་ཞིང་། ཁོ་རྣམས་ཀྱིས་ཟཱ་ཀར་ཡའི་དོན་དུ་རྒྱན་བླངས་པ་ལ་དེར་བྱང་སྒོ་སྲུང་བའི་རྒྱན་བབས།
1CH 26:15 ཨོ་བེད་ཨེ་དོམ་གྱིས་ལྷོ་སྒོ་བསྲུང་བ་དང་། དེའི་བུ་རྣམས་ཀྱིས་མཛོད་ཁང་བསྲུང་དགོས་བྱུང་བ་རེད།
1CH 26:16 ཤུབ་ཕིམ་དང་ཧོ་སཱ་གཉིས་ཀྱིས་ནུབ་སྒོ་དང་གྱེན་དུ་འཛེག་པའི་ལམ་གྱི་ཤལ་ལེ་ཁེད་སྒོ་བསྲུང་དགོས་པ་དང་། སྒོ་སྲུང་རྣམས་ཕན་ཚུན་ཁ་གཏད་ནས་བསྡད།
1CH 26:17 ཤར་སྒོ་སྲུང་མཁན་ལེ་ཝི་པ་མི་དྲུག་ཡོད་པ་དང་། བྱང་སྒོ་སྲུང་མཁན་ཉིན་རེར་མི་བཞི་དང་། ལྷོ་སྒོ་སྲུང་མཁན་ཉིན་རེར་མི་བཞི་ཡོད་ལ། མཛོད་ཁང་སྲུང་མཁན་མི་གཉིས་རེ་ཡོད་པའོ། །
1CH 26:18 ཡང་ནུབ་ཕྱོགས་ཀྱི་བར་ཁྱམས་སུ་མི་བཞི་ལམ་ཆེན་ཁ་རུ་ཡོད་པ་དང་། བར་ཁྱམས་སུ་མི་གཉིས་ཡོད་པའོ། །
1CH 26:19 འདི་རྣམས་ནི་ཀོ་རཱག་པའི་བུ་རྒྱུད་དང་མཱ་རཱ་རེའེ་ཡི་བུ་རྒྱུད་གཉིས་ཀྱི་སྒོ་སྲུང་རྣམས་ཀྱི་ལས་ཚན་ཡིན་ནོ། །
1CH 26:20 ཡང་དེ་དག་གི་གཉེན་ཉེ་ལེ་ཝི་པ་གཞན་རྣམས་ནི་དཀོན་མཆོག་གི་མཆོད་ཁང་གི་དཀོར་མཛོད་རྣམས་དང་རྫས་དམ་པའི་གཏེར་མཛོད་དག་གི་གཉེར་པ་ཡིན།
1CH 26:21 གེར་ཤོན་ཁྱིམ་རྒྱུད་ཀྱི་ལཱ་དན་ལ་གཏོགས་པའི་བུ་རྒྱུད་ལས་འགོ་དཔོན་བྱེད་པ་ནི། གེར་ཤོན་ཁྱིམ་རྒྱུད་ཀྱི་ལཱ་དན་ལ་གཏོགས་པའི་བུ་རྒྱུད་ཡེ་ཧི་ཨེ་ལི་ཡིན།
1CH 26:22 ཡེ་ཧི་ཨེ་ལི་ཡི་བུ་ཟེ་ཐམ་དང་དེའི་ནུ་བོ་ཡོ་ཨེལ་གཉིས་ཀྱིས་དཀོན་མཆོག་ཡ་ཝཱེའི་མཆོད་ཁང་གི་དཀོར་མཛོད་ལ་བདག་གཉེར་བྱེད་པ་ཡིན།
1CH 26:23 ཡང་ཨམ་རཱམ་ཁྱིམ་རྒྱུད་དང་། ཡེས་ཧར་ཁྱིམ་རྒྱུད། ཧེབ་རོན་ཁྱིམ་རྒྱུད། ཨུ་ཟི་ཨེལ་གྱི་ཁྱིམ་རྒྱུད་བཅས་ལ་རང་རང་གི་ལས་གནས་ཡོད།
1CH 26:24 མོ་ཤེའི་ཚ་བོ་སྟེ་གེར་ཤོམ་གྱི་བུ་ཤེ་བུ་ཨེལ་ནི་དཀོར་མཛོད་ཀྱི་སྤྱི་གཉེར་ཡིན།
1CH 26:25 ཡང་ཤེ་བུ་ཨེལ་གྱི་སྤུན་ཨེ་ལི་ཨེ་བཟིར་ཡིན་ལ། ཨེ་ལི་ཨེ་བཟིར་གྱི་བུ་ནི་རེ་ཧབ་ཡཱ་དང་། རེ་ཧབ་ཡཱའི་བུ་ནི་ཡེ་ཤཱ་ཡ་དང་། ཡེ་ཤཱ་ཡའི་བུ་ནི་ཡོ་རཱམ་དང་། ཡོ་རཱམ་གྱི་བུ་ནི་ཟིག་རི་དང་། ཟིག་རིའི་བུ་ནི་ཤེ་ལོ་མོད་ཡིན་པའོ། །
1CH 26:26 ཤེ་ལོ་མོད་དང་དེའི་སྤུན་རྣམས་ཀྱིས་བང་མཛོད་ནང་གི་རྫས་དམ་པ་ཐམས་ཅད་དེ། རྒྱལ་པོ་དཱ་བིད་དང་། ཁྱིམ་རྒྱུད་རྣམས་ཀྱི་འགོ་དཔོན་དང་། སྟོང་དཔོན་དང་བརྒྱ་དཔོན། དམག་དཔོན་བཅས་ཀྱིས་བསྔོས་པའི་རྫས་དམ་པ་ཐམས་ཅད་ལ་བདག་གཉེར་བྱེད་པ་ཡིན།
1CH 26:27 དེ་དག་གིས་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བའི་ཕྱིར་དུ། འཐབ་མོའི་བཅོམ་ནོར་དམ་པར་བྱས་པ་ཡིན།
1CH 26:28 མངོན་ཤེས་པ་སཱ་མུ་ཨེལ་དང་། ཁི་སིའི་བུ་སོ་ལོ་དང་། ནེར་གྱི་བུ་ཨབ་ནེར་དང་། ཟེ་རུ་ཡཱ་ཡི་བུ་ཡོ་ཨབ་བཅས་ཀྱིས་དམ་པར་བྱས་པ་ཐམས་ཅད་དང་། དམ་པར་བྱས་པའི་རྫས་ཐམས་ཅད་ཤེ་ལོ་མོད་དང་དེའི་སྤུན་དག་གི་ལག་ཏུ་བཅོལ་བ་ཡིན།
1CH 26:29 ཡེས་ཧར་ཁྱིམ་རྒྱུད་ལས་ཀེ་ནན་ཡཱ་དང་དེའི་བུ་རྣམས་ཀྱིས་མཆོད་ཁང་གི་ཕྱི་རུ་འགོ་དཔོན་དང་ཁྲིམས་དཔོན་བྱས་ཏེ། ཡེས་ར་ཨེལ་པ་རྣམས་ལ་བདག་སྐྱོང་བྱེད་པ་ཡིན།
1CH 26:30 ཡང་ཧེབ་རོན་ཁྱིམ་རྒྱུད་ལས་ཧ་ཤབ་ཡཱ་དང་དེའི་གཉེན་ཉེ་རྣམས་བསྡོམས་པས་མི་ཆིག་སྟོང་བདུན་བརྒྱ་ཡོད་དེ། ཐམས་ཅད་དཔའ་རྩལ་ཅན་ཡིན་ལ། དེ་དག་གིས་ཡོར་དན་གཙང་པོའི་ནུབ་ཕྱོགས་ཀྱི་ཡེས་ར་ཨེལ་གྱི་ཡུལ་རྣམས་སུ་དཀོན་མཆོག་ཡ་ཝཱེའི་ལས་ཐམས་ཅད་དང་རྒྱལ་པོའི་ལས་འགན་རྣམས་སྒྲུབ་པ་ཡིན།
1CH 26:31 ཧེབ་རོན་ཁྱིམ་རྒྱུད་ལས་ཡེ་རི་ཡཱ་བྱ་བ་ནི་འགོ་དཔོན་ཡིན་ཏེ། ཁོ་ཚོའི་ཁྱིམ་རྒྱུད་ཀྱི་ཁྱིམ་རབས་བཞིན་ཧེབ་རོན་ཁྱིམ་རྒྱུད་ཀྱི་འགོ་དཔོན་དུ་གྱུར་པ་ཡིན། དཱ་བིད་ཀྱིས་སྲིད་སྐྱོང་བའི་ལོ་བཞི་བཅུ་པར་བརྟག་དཔྱད་བྱས་པ་དང་། གིལ་ཨད་ཀྱི་ཡཱ་ཟེར་བྱ་བར་ཁྱིམ་རྒྱུད་དེ་ལས་དཔའ་བོ་མཐུ་སྟོབས་ཅན་རྙེད་ནས།
1CH 26:32 ཡེ་རི་ཡཱ་ལ་གཉེན་ཉེ་དུ་ཉིས་སྟོང་བདུན་བརྒྱ་ཡོད་ཅིང་ཐམས་ཅད་དཔའ་རྩལ་ཅན་དང་ཁྱིམ་རྒྱུད་སོ་སོའི་འགོ་དཔོན་ཡིན་ལ། རྒྱལ་པོ་དཱ་བིད་ཀྱིས་ཁོ་རྣམས་ནི་རུ་བེན་གྱི་ཚོ་པ་དང་། གཱ་རྡུའི་ཚོ་པ་དང་། མཱ་ན་ཤེའི་ཚོ་པ་ཕྱེད་ཀ་བཅས་ཀྱི་དཀོན་མཆོག་དང་རྒྱལ་པོར་འབྲེལ་བའི་བྱ་བ་ཐམས་ཅད་ལ་བདག་གཉེར་བྱེད་པར་བསྐོས་སོ། །
1CH 27:1 ཡང་ཡེས་ར་ཨེལ་པ་རྣམས་ཀྱི་ཁྱིམ་རྒྱུད་སོ་སོའི་འགོ་དཔོན་དང་། སྟོང་དཔོན། བརྒྱ་དཔོན། རྒྱལ་པོར་ཞབས་ཕྱི་སྒྲུབ་པའི་དམག་དཔོན་ཐམས་ཅད་ལ་ཁོ་ཚོའི་གྲངས་ཀ་བཞིན་ལས་ཚན་བགོས་ཤིང་། ལོ་རེར་ཟླ་རེ་བཞིན་དུ་རེས་སྐོར་བ་དང་། ལས་ཚན་རེའི་ནང་དུ་མི་ཉིས་ཁྲི་བཞི་སྟོང་ཡོད།
1CH 27:2 ཟླ་དང་པོའི་ལས་ཚན་དང་པོ་ལ་ཟབ་དི་ཨེལ་གྱི་བུ་ཡ་ཤོ་བེ་ཨམ་གྱིས་འགན་ཁུར་བ་དང་། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:3 ཁོ་ནི་ཕེ་རེལ་ཟིའི་བུ་རྒྱུད་ནང་གི་འགོ་དཔོན་ཡིན་ཏེ། ཟླ་དང་པོའི་ལས་ཚན་དེའི་དམག་དཔོན་ཐམས་ཅད་ལ་བཀོད་འདོམས་བྱེད་པ་ཡིན།
1CH 27:4 ཟླ་གཉིས་པའི་ལས་ཚན་དེ་ལ་ཨ་ཧོ་པ་དོ་ད་ཨི་ཡིས་འགན་ཁུར་བ་དང་། ཁོའི་ལས་ཚན་དེ་ལ་ད་དུང་འགོ་དཔོན་གཞོན་པ་མིག་ལོད་ཀྱང་ཡོད་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:5 ཟླ་གསུམ་པའི་ལས་ཚན་གསུམ་པའི་དམག་དཔོན་ནི་མཆོད་དཔོན་ཆེན་པོ་ཡེ་ཧོ་ཡ་དཱའི་བུ་པེ་ནཱ་ཡ་ཡིན་ཏེ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:6 པེ་ནཱ་ཡ་དེ་ནི་མི་དཔའ་རྩལ་ཅན་སུམ་ཅུ་བོའི་ཡ་གྱལ་ཡིན་ལ། མི་སུམ་ཅུ་བོ་དེར་བདག་སྐྱོང་བྱེད་མཁན་ཡིན། ཁོའི་ལས་ཚན་ལ་ད་དུང་ཁོའི་བུ་ཨམ་མི་ཟཱ་བད་ཀྱང་ཡོད།
1CH 27:7 ཟླ་བཞི་པའི་ལས་ཚན་བཞི་པའི་དམག་དཔོན་ནི་ཡོ་ཨབ་ཀྱི་ནུ་བོ་ཨ་སཱ་ཧེལ་ཡིན་ལ། ཁོའི་རྒྱུན་སྐྱོང་མཁན་ནི་ཁོའི་བུ་ཟེ་བད་ཡཱ་ཡིན། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:8 ཟླ་ལྔ་པའི་ལས་ཚན་ལྔ་པའི་དམག་དཔོན་ནི་ཡེས་རཱ་པ་ཤམ་ཧུད་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:9 ཟླ་དྲུག་པའི་ལས་ཚན་དྲུག་པའི་དམག་དཔོན་ནི་ཐེ་ཀོ་ཨ་པ་ཨིག་ཀེ་སིའི་བུ་ཨི་རཱ་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:10 ཟླ་བདུན་པའི་ལས་ཚན་བདུན་པའི་དམག་དཔོན་ནི་ཨེ་ཕཱར་ཡིམ་གྱི་བུ་རྒྱུད་ཁྲོད་ཀྱི་ཕེ་ལོན་པ་ཧེ་ལེ་ཙི་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:11 ཟླ་བརྒྱད་པའི་ལས་ཚན་བརྒྱད་པའི་དམག་དཔོན་ནི་ཟེ་རག་ཁྱིམ་རྒྱུད་ཀྱི་ཧུ་ཤཱ་པ་སིབ་བེ་ཀཱ་ཨི་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:12 ཟླ་དགུ་པའི་ལས་ཚན་དགུ་པའི་དམག་དཔོན་ནི་པེན་ཡཱ་མེན་པའི་ཨ་ན་ཐོད་པ་ཨ་བི་ཨེ་ཟཱེར་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:13 ཟླ་བཅུ་པའི་ལས་ཚན་བཅུ་པའི་དམག་དཔོན་ནི་ཟེ་རག་ཁྱིམ་རྒྱུད་ཀྱི་ནེ་ཏོ་ཕཱ་པ་མ་ཧ་རཱ་ཨི་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:14 ཟླ་བཅུ་གཅིག་པའི་ལས་ཚན་བཅུ་གཅིག་པའི་དམག་དཔོན་ནི་ཨེ་ཕཱར་ཡིམ་གྱི་བུ་རྒྱུད་ཁྲོད་ཀྱི་ཕི་ར་ཐོན་པ་པེ་ནཱ་ཡ་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད།
1CH 27:15 ཟླ་བཅུ་གཉིས་པའི་ལས་ཚན་བཅུ་གཉིས་པའི་དམག་དཔོན་ནི་ཨོད་ནི་ཨེལ་ཁྱིམ་རྒྱུད་ཀྱི་ནེ་ཏོ་ཕཱ་པ་ཧེལ་ད་ཨི་ཡིན་ལ། ཁོའི་ལས་ཚན་ལ་མི་ཉིས་ཁྲི་བཞི་སྟོང་ཡོད་དོ། །
1CH 27:16 ཡེས་ར་ཨེལ་གྱི་ཚོ་པ་སོ་སོའི་འགོ་དཔོན་དག་ནི་འདི་ལྟ་སྟེ། རུ་བེན་ཚོ་པའི་འགོ་དཔོན་ནི་ཟིག་རིའི་བུ་ཨེ་ལི་ཨེ་བཟིར་ཡིན་ལ། སི་མུ་ཨོན་ཚོ་པའི་འགོ་དཔོན་ནི་མ་ཨ་ཀཱའི་བུ་ཤེ་ཕད་ཡཱ་ཡིན།
1CH 27:17 ལེ་ཝི་ཚོ་པའི་འགོ་དཔོན་ནི་ཀེ་མུ་ཨེལ་གྱི་བུ་ཧ་ཤབ་ཡཱ་ཡིན། ཨ་རོན་བུ་རྒྱུད་ཀྱི་འགོ་དཔོན་ནི་ཟཱ་ཏོག་ཡིན།
1CH 27:18 ཡ་ཧུ་དཱ་ཚོ་པའི་འགོ་དཔོན་ནི་དཱ་བིད་ཀྱི་སྐུ་མཆེད་ཨེ་ལི་ཧུ་ཡིན། ཡེས་སི་ཀཱར་ཚོ་པའི་འགོ་དཔོན་ནི་མེའ་ཀཱ་ཨེལ་གྱི་བུ་ཨོམ་རི་ཡིན།
1CH 27:19 ཟེ་བུ་ལུན་ཚོ་པའི་འགོ་དཔོན་ནི་ཨོ་བད་ཡཱའི་བུ་ཡིས་མཱ་ཡ་ཡིན། ནཱབ་ཐ་ལི་ཚོ་པའི་འགོ་དཔོན་ནི་ཨས་རི་ཨེལ་གྱི་བུ་ཡེ་རི་མོད་ཡིན།
1CH 27:20 ཨེ་ཕཱར་ཡིམ་ཚོ་པའི་འགོ་དཔོན་ནི་ཨ་ཟཱ་སི་ཡའི་བུ་ཧོ་ཤེ་ཡཱ་ཡིན། མཱ་ན་ཤེའི་ཚོ་པ་ཕྱེད་ཀའི་འགོ་དཔོན་ནི་ཕེ་ད་ཡཱའི་བུ་ཡོ་ཨེལ་ཡིན།
1CH 27:21 གིལ་ཨད་ཡུལ་གྱི་མཱ་ན་ཤེའི་ཚོ་པ་ཕྱེད་ཀ་དེའི་འགོ་དཔོན་ནི་ཟཱ་ཀར་ཡའི་བུ་ཨིད་དོ་ཡིན། པེན་ཡཱ་མེན་ཚོ་པའི་འགོ་དཔོན་ནི་ཨབ་ནེར་གྱི་བུ་ཡ་ཨ་སི་ཨེལ་ཡིན།
1CH 27:22 དཱན་ཚོ་པའི་འགོ་དཔོན་ནི་ཡེ་རོ་ཧམ་གྱི་བུ་ཨ་ཟར་ཨེལ་ཡིན། དེ་ཐམས་ཅད་ཡེས་ར་ཨེལ་གྱི་ཚོ་པ་ཁག་གི་འགོ་དཔོན་རྣམས་སོ། །
1CH 27:23 དཀོན་མཆོག་ཡ་ཝཱེས་ཡེས་ར་ཨེལ་པའི་གྲངས་ཀ་ནི་གནམ་གྱི་སྐར་མ་བཞིན་རྒྱས་པར་བྱའོ་ཞེས་གསུངས་པའི་རྐྱེན་གྱིས། དཱ་བིད་ཀྱིས་ལོ་ཉི་ཤུའི་མན་གྱི་ཡེས་ར་ཨེལ་པ་རྣམས་མ་བརྩིས་སོ། །
1CH 27:24 ཟེ་རུ་ཡཱའི་བུ་ཡོ་ཨབ་ཀྱིས་མི་རྩིས་ལེན་འགོ་བརྩམས་ཀྱང་དེས་བརྩིས་མ་ཚར་ཞིང་། ཡ་ཝཱེའི་ཐུགས་ཁྲོ་ནི་ཡེས་ར་ཨེལ་གྱི་སྟེང་དུ་ཕོག་བྱུང་བས། ཡེས་ར་ཨེལ་གྱི་མི་གྲངས་ནི་རྒྱལ་པོ་དཱ་བིད་ཀྱི་རྒྱལ་རབས་ནང་དུ་བཀོད་མེད་དོ། །
1CH 27:25 རྒྱལ་པོའི་བང་མཛོད་ལ་བདག་གཉེར་བྱེད་མཁན་ནི་ཨ་དི་ཨེལ་གྱི་བུ་ཨས་མ་ཝེད་ཡིན་པ་དང་། མཐའ་ཁུལ་དང་གྲོང་ཁྱེར་དང་། གྲོང་རྡལ་དང་། སོ་ལྟ་ཁང་བཅས་སུ་ཡོད་པའི་མཛོད་ཁང་དག་ལ་བདག་གཉེར་བྱེད་མཁན་ཨུ་ཟི་ཡཱ་ཡི་བུ་ཡོ་ནཱ་ཐན་ཡོད་པ་ཡིན།
1CH 27:26 ཞིང་རྨོ་བའི་སོ་ནམ་གྱི་ལས་ཀ་བྱེད་པ་རྣམས་ལ་བདག་གཉེར་བྱེད་མཁན་ནི་ཀེ་ལུབ་གྱི་བུ་ཨེས་རི་ཡིན།
1CH 27:27 རྒུན་ཚལ་ལ་བདག་གཉེར་བྱེད་མཁན་ནི་རཱ་མ་པ་ཤིམ་ཨི་ཡིན་པ་དང་། རྒུན་ཚལ་གྱི་སྟོན་ཐོག་དང་རྒུན་ཆང་གི་མཛོད་ལ་བདག་གཉེར་བྱེད་མཁན་ནི་ཤེ་ཕམ་པ་ཟབ་དི་ཡིན།
1CH 27:28 རི་ཀླུང་དུ་ཡོད་པའི་སྐྱུ་རུ་ཤིང་དང་འོ་སེ་ཤིང་ལ་བདག་གཉེར་བྱེད་མཁན་ནི་གེ་དེར་གྱི་པཱ་ཨལ་ཧ་ནན་ཡིན་པ་དང་། སྣུམ་གྱི་མཛོད་ལ་བདག་གཉེར་བྱེད་མཁན་ནི་ཡོ་ཨ་སི་ཡིན།
1CH 27:29 ཤཱ་རོན་དུ་འཚོ་བའི་བ་ཁྱུ་རྣམས་ལ་བདག་གཉེར་བྱེད་མཁན་ནི་ཤཱ་རོན་པ་ཤིད་ར་ཨི་དང་། ལུང་པའི་བ་ཁྱུ་རྣམས་ལ་བདག་གཉེར་བྱེད་མཁན་ནི་ཨད་ལཱ་ཨི་ཡི་བུ་ཤཱ་ཕད་ཡིན།
1CH 27:30 རྔ་མོང་རྣམས་ལ་བདག་གཉེར་བྱེད་མཁན་ནི་ཡེས་མ་ཨེལ་པ་ཨོ་བིལ་ཡིན་པ་དང་། བོང་བུ་རྣམས་ལ་བདག་གཉེར་བྱེད་མཁན་ནི་མེ་རོ་ནོད་པ་ཡེ་དེ་ཡཱ་ཡིན།
1CH 27:31 ར་ལུག་གི་ཁྱུ་རྣམས་ལ་བདག་གཉེར་བྱེད་མཁན་ནི་ཧ་གར་པ་ཡ་ཟིས་ཡིན། དེ་ཐམས་ཅད་ནི་རྒྱལ་པོ་དཱ་བིད་ཀྱི་རྒྱུ་ནོར་ལ་བདག་གཉེར་བྱེད་མཁན་འགོ་དཔོན་རྣམས་ཡིན་ནོ། །
1CH 27:32 དཱ་བིད་ཀྱི་ཁུ་བོ་ཡོ་ནཱ་ཐན་ནི་གྲོས་དཔོན་ཞིག་ཡིན་ལ། བློ་ལ་མཁས་པ་དང་དྲུང་ཡིག་ཅིག་ཀྱང་ཡིན། ཁོང་དང་ཧག་མོན་གྱི་བུ་ཡེ་ཧི་ཨེལ་བྱ་བ་གཉིས་ནི་རྒྱལ་སྲས་རྣམས་ཀྱི་བཤེས་གཉེན་ཡིན།
1CH 27:33 ཨ་ཧི་ཐོ་ཕེལ་ཡང་རྒྱལ་པོའི་གྲོས་དཔོན་ཡིན། ཨ་རག་པ་ཧུ་ཤཱ་ཨི་ནི་རྒྱལ་པོའི་མཆེད་གྲོགས་ཡིན།
1CH 27:34 ཨ་ཧི་ཐོ་ཕེལ་གྱི་རྗེས་སུ་པེ་ནཱ་ཡའི་བུ་ཡེ་ཧོ་ཡ་དཱ་དང་ཨབ་ཡཱ་ཐར་གཉིས་གྲོས་དཔོན་བྱས་པ་དང་། ཡོ་ཨབ་ནི་རྒྱལ་པོའི་དམག་དཔོན་ཆེན་པོར་བྱས་པ་ཡིན་ནོ། །
1CH 28:1 དེ་ནས་དཱ་བིད་ཀྱིས་ཡེས་ར་ཨེལ་གྱི་འགོ་དཔོན་ཐམས་ཅད་དེ། ཚོ་པ་ཁག་གི་འགོ་དཔོན་དང་། རེས་སྐོར་ནས་རྒྱལ་པོར་ཞབས་ཏོག་སྒྲུབ་པའི་རུ་དཔོན་དང་། སྟོང་དཔོན། བརྒྱ་དཔོན། རྒྱལ་པོ་དང་རྒྱལ་སྲས་རྣམས་ཀྱི་ནོར་རྫས་དང་ཕྱུགས་ཐམས་ཅད་ལ་བདག་གཉེར་བྱེད་པའི་ཕྱག་མཛོད་རྣམས་དང་། ཉུག་རུམ་པ། མཐུ་སྟོབས་ཅན། དམག་མི་དཔའ་རྩལ་ཅན་ཐམས་ཅད་ཡེ་རུ་སཱ་ལེམ་དུ་བསྡུས་ཏེ།
1CH 28:2 རྒྱལ་པོ་དཱ་བིད་ཡར་བཞེངས་ནས་ན་རེ། ངའི་སྤུན་དང་ངའི་མི་རྣམས། ཁྱོད་ཅག་གིས་ངའི་གཏམ་ལ་ཉོན་དང་། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཇོག་སའི་བསྟི་གནས་ཤིག་བཞེངས་ཏེ། རང་ཅག་གི་དཀོན་མཆོག་གི་ཞབས་སྟེགས་སུ་འགོད་པའི་འདུན་པ་ངའི་སེམས་སུ་བྱུང་ནས། མཆོད་ཁང་བཞེང་བའི་ཕྱིར་ཐམས་ཅད་བཤམས་མོད།
1CH 28:3 འོན་ཀྱང་དཀོན་མཆོག་གིས་བདག་ལ་འདི་སྐད་དུ། ཁྱོད་ནི་དམག་མི་ཞིག་ཡིན་ལ་མི་བསད་ནས་ཁྲག་ཕོས་པས། ངའི་མིང་གི་ཕྱིར་ཁྱོད་ཀྱིས་མཆོད་ཁང་བརྩིག་མི་རུང་ཞེས་གསུངས་སོ། །
1CH 28:4 ཡིན་ནའང་ཡེས་ར་ཨེལ་གྱི་དཀོན་མཆོག་ཡ་ཝཱེས་ངའི་ཡབ་ཀྱི་ཁྱིམ་རྒྱུད་ཡོངས་ནས་ང་རང་ཇི་སྲིད་བར་དུ་ཡེས་ར་ཨེལ་གྱི་རྒྱལ་པོར་བདམས་པར་མཛད། ཅིའི་ཕྱིར་ཞེ་ན། ཁོང་གིས་ཡ་ཧུ་དཱ་ནི་འགོ་དཔོན་དུ་བདམས་པ་དང་། ཡ་ཧུ་དཱའི་ཁྱིམ་རྒྱུད་ལས་ངའི་ཕ་གཞིས་བདམས་ཤིང་། ངའི་ཡབ་ཀྱི་བུ་རྣམས་ལས་ཁོང་ནི་ང་ལ་ཐུགས་མཉེས་པས་ང་རང་ཡེས་ར་ཨེལ་ཡོངས་ཀྱི་རྒྱལ་པོར་བསྐོས་པའོ། །
1CH 28:5 དཀོན་མཆོག་ཡ་ཝཱེས་ང་ལ་བུ་མང་པོ་གནང་ཞིང་། ངའི་བུ་རྣམས་ལས་ཡེས་ར་ཨེལ་ལ་རྒྱལ་སྲིད་བྱེད་དུ་དཀོན་མཆོག་ཡ་ཝཱེའི་རྒྱལ་ཁམས་ཀྱི་རྒྱལ་ཁྲིར་བཞུགས་པ་ལ་ངའི་བུ་སོ་ལོ་མོན་བདམས་པ་ཡིན།
1CH 28:6 ཁོང་གིས་བདག་ལ་འདི་སྐད་དུ། ཁྱོད་ཀྱི་བུ་སོ་ལོ་མོན་གྱིས་ངའི་མཆོད་ཁང་དང་ཁྱམས་ར་རྣམས་བརྩིག་པར་འགྱུར། ཅིའི་ཕྱིར་ཞེ་ན། བདག་གིས་དེ་ནི་ངའི་བུ་རུ་འགྱུར་བར་བདམས་པ་དང་། ང་ཡང་དེའི་ཕ་རུ་འགྱུར་བས་སོ། །
1CH 28:7 གལ་སྲིད་ཁོས་ད་ལྟ་བཞིན་དུ་བློ་བརྟན་འགྱུར་མེད་ངང་ངའི་བཀའ་རྒྱ་དང་སྒྲིག་ཁྲིམས་རྣམས་བསྲུང་བར་བྱེད་ན། ངས་ཀྱང་ཇི་སྲིད་བར་དུ་ཁོའི་རྒྱལ་སྲིད་བརྟན་པར་བྱའོ་གསུངས་བྱུང་།
1CH 28:8 དེའི་ཕྱིར་ད་ལྟ་དཀོན་མཆོག་ཡ་ཝཱེའི་མི་ཚོགས་ཡེས་ར་ཨེལ་ཡོངས་ཀྱི་མཐོང་ངོར། ང་ཚོའི་དཀོན་མཆོག་གིས་ཀྱང་གསན་སར། ཡུལ་སྐྱིད་པོ་འདི་ཁྱོད་རྣམས་ལ་དབང་བར་མ་ཟད། ཁྱོད་ཅག་གི་རྗེས་སུ་ཁྱོད་ཅག་གི་བུ་རྒྱུད་ལ་ཡང་གཏན་དུ་ས་སྐལ་དུ་ལུས་པའི་ཕྱིར། རང་གི་དཀོན་མཆོག་ཡ་ཝཱེའི་བཀའ་རྒྱ་ཐམས་ཅད་བསྲུང་བ་དང་དེ་བཙལ་དགོས།
1CH 28:9 ངའི་བུ་སོ་ལོ་མོན་ཁྱོད་ལ་མཚོན་ན། ཁྱོད་ཀྱིས་རང་གི་ཕ་ཡི་དཀོན་མཆོག་ངོ་ཟིན་པར་གྱིས། བློ་གཅིག་སེམས་གཅིག་གིས་དགའ་མོས་ངང་ཁོང་ལ་ཞབས་ཏོག་སྒྲུབས་ཤིག ཅིའི་ཕྱིར་ཞེ་ན། དཀོན་མཆོག་ཡ་ཝཱེས་མི་ཀུན་གྱི་སེམས་ལ་ཞིབ་དཔྱོད་མཛད་ཅིང་། བསམ་ཚུལ་ཡོད་ཚད་མཁྱེན་པས་ཁྱོད་ཀྱིས་ཁོང་བཙལ་ན་རྙེད་པར་འགྱུར་ཏེ། ཁྱོད་ཀྱིས་ཁོང་སྤངས་ན་ཁོང་གིས་ཁྱོད་དུས་རྒྱུན་དུ་འདོར་བར་འགྱུར་བས།
1CH 28:10 དོགས་ཟོན་གྱིས་ཤིག གནས་དམ་པའི་ཕྱིར་མཆོད་ཁང་ཞིག་བཞེང་བར་དཀོན་མཆོག་ཡ་ཝཱེས་ཁྱོད་རང་བདམས་པ་ཡིན་པས། སྙིང་སྟོབས་བསྐྱེད་ནས་དེ་ལས་ཤིག་ཅེས་གདམས་པའོ། །
1CH 28:11 དཱ་བིད་ཀྱིས་མཆོད་ཁང་གི་བར་ཁྱམས་དང་། ཁང་མིག བང་མཛོད། སྟེང་ཁང་། ནང་གི་ཁང་མིག ཐུགས་རྗེའི་བཞུགས་ཁྲི་འཇོག་སའི་གནས་དམ་པ་བཅས་ཀྱི་དཔེ་རིས་ཐམས་ཅད་རང་གི་སྲས་སོ་ལོ་མོན་ལ་སྤྲད་ཅིང་།
1CH 28:12 ཡང་ཁོང་གི་ཐུགས་ལ་ཡོད་པའི་དཔེ་རིས་ཐམས་ཅད་དེ་དཀོན་མཆོག་ཡ་ཝཱེའི་མཆོད་ཁང་གི་ར་སྐོར་དང་། མཐའ་འཁོར་གྱི་ཁང་མིག་རྣམས་དང་། དཀོན་མཆོག་གི་མཆོད་ཁང་གི་དཀོར་མཛོད་དང་། རྫས་དམ་པ་རྣམས་ཀྱི་གཏེར་མཛོད་བཅས་ཀྱི་དཔེ་རིས་ཁོ་ལ་བསྟན་པ་དང་།
1CH 28:13 ཡང་མཆོད་དཔོན་དང་ལེ་ཝི་པ་རྣམས་ཀྱི་ལས་ཚན་དང་། དཀོན་མཆོག་ཡ་ཝཱེའི་མཆོད་ཁང་གི་ཞབས་ཕྱིའི་ལས་འགན་སྣ་ཚོགས་དང་། དཀོན་མཆོག་ཡ་ཝཱེའི་མཆོད་ཁང་ལ་མཁོ་བའི་སྣོད་ཆས་མཐའ་དག་ཁོ་ལ་བསྟན།
1CH 28:14 ཡང་དཱ་བིད་ཀྱིས་གསེར་ག་ཚད་ཀྱིས་ཞབས་ཕྱིའི་རིགས་སྣ་ཚོགས་ལ་མཁོ་བའི་གསེར་ཆས་བཟོ་དགོས་པ་དང་། དངུལ་ཆས་སོ་སོ་དངུལ་ག་ཚད་ཀྱིས་བཟོ་དགོས་པ་དང་།
1CH 28:15 གསེར་ག་ཚད་ཀྱིས་གསེར་གྱི་སྒྲོན་སྟེགས་རྣམས་དང་སྒྲོན་སྟེགས་སྟེང་གི་གསེར་གྱི་སྒྲོན་མེ་རྣམས་བཟོ་དགོས་པ་དང་། གསེར་ག་ཚད་ཀྱིས་སྒྲོན་སྟེགས་རེ་རེ་དང་སྒྲོན་སྟེགས་སྟེང་གི་གསེར་གྱི་སྒྲོན་མེ་རེ་རེ་བཟོ་དགོས་པ་དང་། དངུལ་ག་ཚད་ཀྱིས་དངུལ་གྱི་སྒྲོན་སྟེགས་དང་སྒྲོན་སྟེགས་སྟེང་གི་དངུལ་གྱི་སྒྲོན་མེ་རྣམས་བཟོ་དགོས་པ་དང་། དངུལ་གྱི་སྒྲོན་སྟེགས་རེ་རེ་དང་སྒྲོན་སྟེགས་སྟེང་གི་དངུལ་གྱི་སྒྲོན་མེ་རེ་རེ་ནི་དངུལ་ག་ཚད་ཀྱིས་བཟོ་དགོས་པ་བསྟན་ཞིང་། དེ་ཐམས་ཅད་ནི་སྒྲོན་སྟེགས་རེ་རེའི་སྤྱོད་ཡུལ་བཞིན་ཡིན་ནོ། །
1CH 28:16 ཡང་གསེར་ག་ཚད་ཀྱིས་སྤྱན་བསྟར་བག་ལེབ་ཀྱི་ཅོག་ཙེ་བཟོ་དགོས་པ་དང་། དངུལ་ག་ཚད་ཀྱིས་དངུལ་གྱི་ཅོག་ཙེ་བཟོ་དགོས་པ་དང་།
1CH 28:17 གསེར་བཙོ་མ་ག་ཚད་ཀྱིས་ཤ་འཛིན་དང་། མཆོད་སྡེར། བུམ་པ་བཅས་བཟོ་དགོས་པ་དང་། གསེར་ག་ཚད་ཀྱིས་གསེར་ཏིང་བཟོ་དགོས་པ་དང་། ཏིང་ཕོར་རེ་རེའི་ལྗིད་ཚད་ག་འདྲ་ཡིན་དགོས་པ། དངུལ་ག་ཚད་ཀྱིས་དངུལ་ཏིང་བཟོ་དགོས་པ་དང་། ཏིང་ཕོར་རེ་རེའི་ལྗིད་ཚད་ག་འདྲ་ཡིན་དགོས་པ་དང་།
1CH 28:18 གསེར་བཙོ་མ་ག་ཚད་ཀྱིས་སྤོས་ཁྲི་བཟོ་དགོས་པ་དང་། ཡང་ཤིང་རྟ་དང་མཚུངས་ཤིང་གཤོག་པ་བརྐྱངས་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འགེབས་པའི་གསེར་གྱི་ཀེ་རུབ་བཟོ་དགོས་པ་བཅས་བསྟན་ནོ། །
1CH 28:19 ཡང་དཱ་བིད་ཀྱིས་འདི་ལྟར། འདི་ཐམས་ཅད་ནི་ལས་ཀ་མཐའ་དག་གི་དཔེ་རིས་ཡིན་ལ། དཀོན་མཆོག་ཡ་ཝཱེས་ཁོང་ཉིད་ཀྱི་ཕྱག་གིས་བདག་ལ་དཔེ་རིས་བཀོད་ཅིང་ཤེས་པར་མཛད་པའོ་ཞེས་གསུངས་པ་དང་།
1CH 28:20 ཡང་དཱ་བིད་ཀྱིས་རང་གི་སྲས་སོ་ལོ་མོན་ལ་འདི་ལྟར། ཁྱོད་ཀྱིས་བློ་བརྟན་པོས་སྙིང་སྟོབས་བསྐྱེད་ནས་དེ་སྒྲུབས་དང་། མ་འཇིགས་མ་འཚབ་ཅིག ང་ཡི་དཀོན་མཆོག་ཡ་ཝཱེ་ནི་ཁྱོད་དང་མཉམ་དུ་བཞུགས་པས་སོ། །དཀོན་མཆོག་ཡ་ཝཱེའི་མཆོད་ཁང་གི་ལས་ཀ་ཐམས་ཅད་རྫོགས་པའི་བར་དུ། ཁོང་གིས་ཁྱོད་མི་བསྐྱུར་མི་འདོར་རོ། །
1CH 28:21 ཡང་ལྟོས་དང་། མཆོད་དཔོན་དང་ལེ་ཝི་པའི་ལས་ཚན་རྣམས་ཀྱིས་དཀོན་མཆོག་གི་མཆོད་ཁང་གི་ཞབས་ཏོག་ཐམས་ཅད་བསྒྲུབ་པ་དང་། ཡང་ལག་ཤེས་པ་སོ་སོས་ལས་རིགས་སྣ་ཚོགས་ཐད་དགའ་མོས་ངང་ཁྱོད་ལ་རོགས་འདེགས་བྱེད་པར་མ་ཟད། འགོ་དཔོན་རྣམས་དང་མི་ཡོད་དོ་ཅོག་གིས་ཀྱང་ཁྱོད་ཀྱི་བཀའ་ལ་མཉན་པ་ཡིན་ཞེས་གདམས་སོ། །
1CH 29:1 རྒྱལ་པོ་དཱ་བིད་ཀྱིས་མི་ཚོགས་ཐམས་ཅད་ལ་འདི་ལྟར། ངའི་བུ་སོ་ལོ་མོན་ནི་དཀོན་མཆོག་གིས་བདམས་པ་དང་། ཁོ་རང་ལོ་ན་ཕྲ་ཞིང་ཤེས་རྒྱ་ཆུང་ཡང་ལས་ཀ་འདི་ནི་ཧ་ཅང་ཆེ་བ་སྟེ། མཆོད་ཁང་འདི་ནི་མི་ཡི་དོན་དུ་མ་ཡིན་ལ། དཀོན་མཆོག་ཡ་ཝཱེའི་དོན་དུ་ཡིན་པས་སོ། །
1CH 29:2 དཀོན་མཆོག་གི་མཆོད་ཁང་གི་དོན་དུ་ངས་རང་གི་ནུས་པ་ཡོད་ཚད་བཏོན་ནས། གསེར་ཆས་ཀྱི་ཕྱིར་དུ་གསེར་དང་། དངུལ་ཆས་ཀྱི་ཕྱིར་དུ་དངུལ་དང་། ལི་ཆས་ཀྱི་ཕྱིར་དུ་ལི་དང་། ལྕགས་ཆས་ཀྱི་ཕྱིར་དུ་ལྕགས་དང་། ཤིང་ཆས་ཀྱི་ཕྱིར་དུ་ཤིང་དང་། རྟ་ཀླད་དམར་པོ་དང་། ཕྲ་འདེབ་པར་རྡོ་རྗེ་ཕ་ལམ་དང་། ཚོན་རྡོ་དང་། རྡོ་བ་རིན་པོ་ཆེའི་རིགས་སྣ་ཚོགས་དང་། རྡོ་ཀ་མ་རུ་བཅས་མོད་པོ་བཤམས་པ་ཡིན།
1CH 29:3 དེར་མ་ཟད་ང་རང་དཀོན་མཆོག་གི་མཆོད་ཁང་ལ་ཤིན་ཏུ་དགའ་བས། མཆོད་ཁང་དམ་པ་དེའི་དོན་དུ་བཤམས་པ་ཐམས་ཅད་ཀྱི་ཁར། ངས་རང་གིས་བསགས་པའི་གསེར་དངུལ་ཡང་དཀོན་མཆོག་གི་མཆོད་ཁང་གི་ཕྱིར་ཕུལ་བ་སྟེ།
1CH 29:4 མཆོད་ཁང་ནང་གི་རྩིག་པ་རྣམས་ལ་བྱུག་པའི་ཕྱིར་དུ་ཨོ་ཕིར་གྱི་གསེར་རྡོ་ཚད་སུམ་སྟོང་དང་། དངུལ་རྐྱང་རྡོ་ཚད་བདུན་སྟོང་ཕུལ་ཡོད་དོ། །
1CH 29:5 ཡང་གསེར་ནི་གསེར་ཆས་ཀྱི་ཕྱིར་དང་། དངུལ་ནི་དངུལ་ཆས་ཀྱི་ཕྱིར་དང་། ལག་ཤེས་པ་རྣམས་བརྒྱུད་ནས་བཟོ་རྒྱུའི་བཟོ་ལས་ཀུན་གྱི་ཕྱིར་ཡིན་ཏེ། དེ་རིང་སུ་ཞིག་གིས་རང་ཉིད་དཀོན་མཆོག་ཡ་ཝཱེ་ལ་འབུལ་བར་འདོད་དམ་ཞེས་དྲིས་པས།
1CH 29:6 ཁྱིམ་རྒྱུད་སོ་སོའི་འགོ་དཔོན་དང་། ཡེས་ར་ཨེལ་གྱི་ཚོ་པ་ཁག་གི་ཚོ་དཔོན་དང་། སྟོང་དཔོན། བརྒྱ་དཔོན། རྒྱལ་པོའི་ལས་དོན་གཉེར་མཁན་གྱི་འགོ་དཔོན་ཐམས་ཅད་ཀྱིས་དགའ་མོས་ངང་ཕུལ་ཏེ།
1CH 29:7 དེ་ཐམས་ཅད་ཀྱིས་དཀོན་མཆོག་གི་མཆོད་ཁང་གི་ལས་ཀའི་ཕྱིར་གསེར་རྡོ་ཚད་ལྔ་སྟོང་དང་། གསེར་གྱི་དོང་ཙེ་ཆིག་ཁྲི། དངུལ་རྡོ་ཚད་ཆིག་ཁྲི། ལི་རྡོ་ཚད་ཆིག་ཁྲི་བརྒྱད་སྟོང་། ལྕགས་རྡོ་ཚད་ཆིག་འབུམ་བཅས་ཕུལ་ཞིང་།
1CH 29:8 ཡང་རིན་པོ་ཆེ་ཡོད་པ་དག་གིས་གེར་ཤོན་པ་ཡེ་ཧི་ཨེལ་བརྒྱུད་ནས་དཀོན་མཆོག་ཡ་ཝཱེའི་མཆོད་ཁང་གི་དཀོར་མཛོད་དུ་ཕུལ་ཏོ། །
1CH 29:9 མི་འདི་རྣམས་ཀྱིས་རང་མོས་ངང་ཕུལ་བས་མི་ཐམས་ཅད་དགའ་བ་སྟེ། ཅི་ལ་ཞེ་ན། ཁོ་རྣམས་ཀྱིས་བློ་གཅིག་སེམས་གཅིག་གིས་དགའ་མོས་ངང་དཀོན་མཆོག་ཡ་ཝཱེ་ལ་ཕུལ་བའོ། །རྒྱལ་པོ་དཱ་བིད་ཀྱང་རབ་ཏུ་དགའ་བར་གྱུར་ཏོ། །
1CH 29:10 དེ་ནས་དཱ་བིད་ཀྱིས་མི་ཚོགས་ཡོངས་ཀྱི་མདུན་དུ་དཀོན་མཆོག་ཡ་ཝཱེ་ལ་བསྟོད་ཅིང་འདི་ལྟར། བདག་ཅག་གི་ཡབ་མེས་ཡེས་ར་ཨེལ་གྱི་དཀོན་མཆོག་ཡ་ཝཱེ་ནི་རྒྱུན་ནས་རྒྱུན་དུ་བསྟོད་འོས་པ་ཡིན།
1CH 29:11 ཀྱེ་དཀོན་མཆོག་ཡ་ཝཱེ་ལགས། མཆོག་གྱུར་དང་ནུས་མཐུ། གཟི་བརྗིད། རྒྱལ་ཁ། བརྗིད་ཉམས་བཅས་ཐམས་ཅད་ཁྱེད་ཀྱི་ཡིན། ཅི་ལ་ཞེ་ན། གནམ་ས་གཉིས་ལ་ཅི་ཡོད་པ་ཐམས་ཅད་ཁྱེད་ཀྱི་ཡིན་ནོ། །ཀྱེ་དཀོན་མཆོག་ཡ་ཝཱེ་ལགས། རྒྱལ་སྲིད་ནི་ཁྱེད་ཀྱི་ཡིན། ཁྱེད་ནི་བླ་ན་མེད་པ་ཉིད་དང་ཐམས་ཅད་ལས་མཐོ་བ་ཡིན།
1CH 29:12 ཕུན་ཚོགས་དང་བཀུར་སྟི་ཁྱེད་ལས་བྱུང་ཞིང་། ཁྱེད་ཀྱིས་ཡོད་ཚད་ལ་སྲིད་མཛད་དེ། ཁྱེད་ཀྱི་ཕྱག་ཏུ་མཐུ་སྟོབས་དང་དབང་ཐང་མངའ། ཁྱེད་ཀྱི་ཕྱག་གིས་མི་ལ་བཀུར་སྟི་དང་སྟོབས་ཤུགས་གནང་བ་ཡིན།
1CH 29:13 ཀྱེ་ངེད་ཅག་གི་དཀོན་མཆོག་ལགས། ད་ནི་ངེད་ཅག་གིས་ཁྱེད་ལ་བསྟོད་པ་འབུལ། ཁྱེད་ཀྱི་གཟི་བརྗིད་ལྡན་པའི་མཚན་ལ་བསྟོད་བསྔགས་བརྗོད།
1CH 29:14 འདི་ལྟར་དགའ་མོས་ངང་འབུལ་བ་འབུལ་ཐུབ་པས་ང་ནི་སུ་ཡིན་ནམ། ངའི་མི་མང་ཡང་ཅི་ཡིན་ནམ། ཅི་ལ་ཞེ་ན། དངོས་པོ་ཐམས་ཅད་ཁྱེད་ནས་བྱུང་ཞིང་། ངེད་ཅག་གིས་ཁྱེད་ཀྱི་ཕྱག་ནས་གང་ཞིག་ཐོབ་པ་དེ་ཁྱེད་ལ་ཕུལ་བ་ཡིན།
1CH 29:15 ངེད་ཅག་ནི་རང་གི་ཕ་མེས་དང་འདྲ་བར་ཁྱེད་ཀྱི་དྲུང་དུ་མགྲོན་པོ་དང་ཕྱི་མི་ཡིན་ལ། ངེད་ཅག་གི་ས་གཞི་སྟེང་གི་མི་ཚེ་ནི་གྲིབ་གཟུགས་དང་འདྲ་བར་རེ་བ་ཅི་ཡང་མེད།
1CH 29:16 ཀྱེ་ངེད་ཅག་གི་དཀོན་མཆོག་ཡ་ཝཱེ་ལགས། ངེད་ཅག་གིས་བཤམས་པའི་ནོར་རྫས་འདི་ཐམས་ཅད་ནི་ཁྱེད་ཀྱི་མཚན་དམ་པའི་ཆེད་དུ་མཆོད་ཁང་ཞིག་བཞེང་བའི་ཕྱིར་ཡིན་ལ། ཐམས་ཅད་ཁྱེད་ནས་བྱུང་ཞིང་ཚང་མ་ཁྱེད་ལ་དབང་བ་ཡིན།
1CH 29:17 ཀྱེ་ང་ཡི་དཀོན་མཆོག་ལགས། ཁྱེད་ཀྱིས་མི་སེམས་ལ་ཞིབ་དཔྱོད་མཛད་དེ་དྲང་པོ་ལ་ཐུགས་མཉེས་པ་ངས་ཤེས་ཏེ། ངས་བློ་སེམས་དྲང་པོས་དགའ་མོས་ངང་འདི་ཐམས་ཅད་ཕུལ་བ་ཡིན། ཡང་འདིར་འཛོམས་པའི་ཁྱེད་ཀྱི་འབངས་མིས་ཀྱང་དགའ་མོས་ངང་ཁྱེད་ལ་འབུལ་བ་མཐོང་བས་ང་རང་རབ་ཏུ་དགའོ། །
1CH 29:18 ཀྱེ་ངའི་མེས་པོ་ཨབ་ར་ཧམ་དང་། ཨི་སཱག་དང་། ཡེས་ར་ཨེལ་བཅས་ཀྱི་དཀོན་མཆོག་ཡ་ཝཱེ་ལགས། ཁྱེད་ཀྱིས་མི་འདི་རྣམས་ཀྱི་སེམས་སུ་དུས་རྒྱུན་དུ་འདུན་པ་དང་བསམ་པ་འདི་འཇོག་པར་མཛོད། དེ་དག་གི་སེམས་ཁྱེད་ཀྱི་ཕྱོགས་སུ་བརྟན་པར་མཛོད།
1CH 29:19 ཡང་ངའི་བུ་སོ་ལོ་མོན་གྱིས་ཁྱེད་ཀྱི་བཀའ་རྒྱ་དང་དཔང་ཡིག སྒྲིག་ཁྲིམས་བཅས་ཐམས་ཅད་བསྲུང་བ་དང་། དོན་འདི་ཐམས་ཅད་འགྲུབ་པར་བྱེད་ཅིང་། ངས་བཤམས་པ་ཐམས་ཅད་ཀྱིས་མཆོད་ཁང་དེ་བཞེང་བའི་ཕྱིར་དུ། ཁོ་ལ་བསམ་པ་རྩེ་གཅིག་གནང་བར་མཛོད་ཅིག་ཅེས་གསོལ་བ་བཏབ་པའོ། །
1CH 29:20 དཱ་བིད་ཀྱིས་མི་ཚོགས་ཡོངས་ལ་འདི་ལྟར། ཁྱོད་རྣམས་ཀྱིས་རང་གི་དཀོན་མཆོག་ཡ་ཝཱེ་ལ་བསྟོད་པ་འབུལ་འོས་སོ་ཞེས་གསུངས་པ་ལ། མི་ཚོགས་ཡོངས་ཀྱིས་རང་གི་ཡབ་མེས་ཀྱི་དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་ཅིང་། མགོ་བསྒུར་ཏེ་ཡ་ཝཱེ་དང་རྒྱལ་པོ་གཉིས་ལ་ཕྱག་བཙལ་ཏོ། །
1CH 29:21 ཉིན་དང་པོར་ཁོ་རྣམས་ཀྱིས་དཀོན་མཆོག་ཡ་ཝཱེ་ལ་མཆོད་པ་ཕུལ་ཞིང་། དེའི་ཕྱི་ཉིན་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པར་བ་གླང་ཆིག་སྟོང་དང་། ལུག་ཐུག་ཆིག་སྟོང་། ལུ་གུ་ཆིག་སྟོང་བཅས་དང། དེ་དག་དང་མཉམ་དུ་འབུལ་བའི་སྐྱེམས་མཆོད་ཕུལ་ཞིང་། ཡང་ཡེས་ར་ཨེལ་པ་ཀུན་གྱི་ཕྱིར་མཆོད་པ་རྒྱ་ཆེན་པོ་ཞིག་ཕུལ་ཏོ། །
1CH 29:22 ཉིན་མོ་དེ་ལ་མི་ཚོགས་རབ་ཏུ་དགའ་ཞིང་དཀོན་མཆོག་ཡ་ཝཱེའི་དྲུང་དུ་བཟའ་བཏུང་ལ་རོལ། ཡང་ཁོ་རྣམས་ཀྱིས་དཱ་བིད་ཀྱི་སྲས་སོ་ལོ་མོན་ཡང་བསྐྱར་རྒྱལ་པོར་བསྐོས་པ་དང་། དཀོན་མཆོག་ཡ་ཝཱེའི་དྲུང་དུ་ཁོ་རང་དབང་སྒྱུར་མཁན་དུ་བྱུགས་པ་དང་། ཟཱ་ཏོག་མཆོད་དཔོན་དུ་བྱུགས་སོ། །
1CH 29:23 དེ་ལྟར་སོ་ལོ་མོན་ནི་དཀོན་མཆོག་ཡ་ཝཱེས་གནང་བའི་རྒྱལ་ཁྲིར་བཞུགས་ཤིང་རང་གི་ཡབ་དཱ་བིད་ཀྱི་ཚབ་ཏུ་རྒྱལ་པོར་བཞུགས། དོན་ཀུན་ལྷུན་གྱིས་གྲུབ་ཅིང་ཡེས་ར་ཨེལ་པ་ཀུན་གྱིས་ཁོང་གི་བཀའ་ལ་མཉན་པའོ། །
1CH 29:24 འགོ་དཔོན་དང་དཔའ་བོ་ཐམས་ཅད་དང་། རྒྱལ་པོ་དཱ་བིད་ཀྱི་སྲས་ཀུན་གྱིས་རྒྱལ་པོ་སོ་ལོ་མོན་གྱི་བཀའ་ལ་མཉན་ཏོ། །
1CH 29:25 ཡང་དཀོན་མཆོག་ཡ་ཝཱེས་ཡེས་ར་ཨེལ་པ་ཡོངས་ཀྱི་མཐོང་ངོར་སོ་ལོ་མོན་རབ་ཏུ་ཆེ་བར་མཛད་ཅིང་། ཁོང་ལ་རྒྱལ་པོའི་རྔམ་བརྗིད་བསྩལ་པ་ནི་ཁོང་གི་ཡར་སྔོན་གྱི་ཡེས་ར་ཨེལ་གྱི་རྒྱལ་པོ་ཐམས་ཅད་ལས་ཀྱང་ལྷག་པའོ། །
1CH 29:26 དེ་ཡང་ཡེ་སེའི་བུ་དཱ་བིད་ནི་ཡེས་ར་ཨེལ་ཐམས་ཅད་ཀྱི་རྒྱལ་པོར་བཞུགས་པ་དང་།
1CH 29:27 ཁོང་གིས་བསྡོམས་པས་ལོ་བཞི་བཅུའི་རིང་ཡེས་ར་ཨེལ་ལ་རྒྱལ་སྲིད་བསྐྱངས་པ་སྟེ། ཧེབ་རོན་དུ་ལོ་བདུན་དང་ཡེ་རུ་སཱ་ལེམ་དུ་ལོ་སུམ་ཅུ་སོ་གསུམ་ལ་སྲིད་བསྐྱངས་པ་ཡིན་ནོ། །
1CH 29:28 དེ་ནས་ཁོང་ལོ་ན་བགྲེས་ཤིང་ཚེ་ལོ་མཐར་ཕྱིན་པ་དང་། ནོར་དང་བཀུར་སྟིས་ཆོག་པར་གྱུར་ནས་སྐུ་གཤེགས་ཏེ། ཁོང་གི་སྲས་སོ་ལོ་མོན་གྱིས་ཁོང་གི་རྒྱུན་མཐུད་ནས་རྒྱལ་སྲིད་བསྐྱངས་སོ། །
1CH 29:29 རྒྱལ་པོ་དཱ་བིད་ཀྱི་མཛད་པ་སྔ་ཕྱི་རྣམས་ནི་མངོན་ཤེས་པ་སཱ་མུ་ཨེལ་གྱི་གླེགས་བམ་དང་། ལུང་སྟོན་པ་ནཱ་ཐན་གྱི་གླེགས་བམ་དང་། མངོན་ཤེས་པ་གཱ་རྡུ་ཡི་གླེགས་བམ་ནང་དུ་ཡི་གེར་བཀོད་ཡོད།
1CH 29:30 ཡང་ཁོང་གིས་བསྐྱངས་པའི་རྒྱལ་སྲིད་དང་། དཔའ་མཛངས་ལྡན་པའི་མཛད་རྗེས་རྣམས་དང་། ཁོང་རང་སྟེང་དང་ཡེས་ར་ཨེལ་དང་ཡུལ་སོ་སོའི་རྒྱལ་ཁམས་ཁག་ཏུ་བྱུང་བའི་བྱ་བ་རྣམས་ཀྱང་བཀོད་ཡོད་དོ།། །།
2CH 1:1 དེ་ཡང་དཱ་བིད་ཀྱི་སྲས་སོ་ལོ་མོན་གྱིས་རང་ཉིད་ཀྱི་རྒྱལ་སྲིད་བརྟན་པོར་མཛད་ཅིང་། ཁོའི་དཀོན་མཆོག་ཡ་ཝཱེ་ནི་ཁོ་དང་མཉམ་དུ་བཞུགས་པ་དང་། སོ་ལོ་མོན་མཆོག་ཏུ་གྱུར་བར་མཛད།
2CH 1:2 དེ་ནས་སོ་ལོ་མོན་གྱིས་ཡེས་ར་ཨེལ་ཡོངས་ཏེ། སྟོང་དཔོན་དང་བརྒྱ་དཔོན། ཁྲིམས་དཔོན། ཡེས་ར་ཨེལ་གྱི་འགོ་དཔོན་སོ་སོ་དང་ཁྱིམ་རྒྱུད་ཡོངས་ཀྱི་འགོ་དཔོན་རྣམས་ལ་བཀའ་ཕབ་ཅིང་།
2CH 1:3 སོ་ལོ་མོན་གྱིས་མི་ཚོགས་ཐམས་ཅད་གིབ་ཡོན་གྱི་མཐོ་གླིང་དུ་ཁྲིད་པ་རེད། ཅིའི་ཕྱིར་ཞེ་ན། དཀོན་མཆོག་ཡ་ཝཱེའི་ཞབས་ཕྱི་མོ་ཤེ་ཡིས་དབེན་སྟོང་དུ་བཟོས་པའི་དཀོན་མཆོག་གི་མཇལ་འཕྲད་གུར་མཆོག་ནི་གནས་དེར་ཡོད་པས་སོ། །
2CH 1:4 འོན་ཀྱང་དཱ་བིད་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་ཀིར་ཡཱད་ཡེ་ཨ་རིམ་ནས་ཡར་གདན་དྲངས་ཏེ་སྟ་གོན་བྱས་པའི་གནས་སུ་བཞག གང་ལ་ཞེ་ན། ཁོང་གིས་ཡེ་རུ་སཱ་ལེམ་ནས་དེའི་ཕྱིར་དུ་གུར་ཞིག་ཕུབ་ཡོད་པས་སོ། །
2CH 1:5 གཞན་ཡང་། ཧུ་རཱའི་ཚ་བོ་སྟེ་ཨོའུ་རེལ་གྱི་བུ་པི་ཟིད་ཨེལ་གྱིས་བཟོས་པའི་ལི་ཡི་མཆོད་ཁྲི་དེ་ཡང་གིབ་ཡོན་གྱི་དཀོན་མཆོག་ཡ་ཝཱེའི་གུར་མཆོག་གི་དྲུང་དུ་བཞག་ཡོད་ལ། སོ་ལོ་མོན་དང་མི་ཚོགས་རྣམས་གནས་དེར་གསོལ་བ་འདེབས་སུ་ཕྱིན།
2CH 1:6 སོ་ལོ་མོན་ནི་ཡར་དཀོན་མཆོག་ཡ་ཝཱེའི་མཇལ་འཕྲད་གུར་མཆོག་དྲུང་གི་ལི་ཡི་མཆོད་ཁྲིའི་རྩར་སོང་ནས། མཆོད་ཁྲིའི་སྟེང་དུ་ཕྱུགས་ཆིག་སྟོང་སྦྱིན་སྲེག་གི་མཆོད་པར་ཕུལ།
2CH 1:7 མཚན་མོ་དེར་དཀོན་མཆོག་ཉིད་ནི་སོ་ལོ་མོན་ལ་མངོན་པར་གྱུར་ནས་འདི་སྐད་དུ། ཁྱོད་ཀྱིས་ཅི་ཞུས་ཀྱང་བདག་གིས་ཁྱོད་ལ་སྦྱིན་ངེས་ཡིན་ཞེས་གསུངས་པ་ལ།
2CH 1:8 སོ་ལོ་མོན་གྱིས་དཀོན་མཆོག་ལ། ཁྱེད་ཀྱིས་ངའི་ཕ་དཱ་བིད་ལ་བྱམས་བརྩེ་ཆེན་པོ་གནང་སྟེ། ང་རང་ཁོང་གི་ཚབ་ཏུ་རྒྱལ་པོར་མཛད་བྱུང་།
2CH 1:9 ཀྱེ་དཀོན་མཆོག་ཡ་ཝཱེ་ལགས། ད་ལྟ་ཁྱེད་ཀྱིས་བདག་གི་ཕ་དཱ་བིད་ལ་ཞལ་བཞེས་གནང་བ་དེ་འགྲུབ་པར་མཛོད་ཅིག ཅི་ལ་ཞེ་ན། ཁྱེད་ཀྱིས་ང་རང་རྒྱལ་པོར་བསྐོས་ཤིང་ས་སྟེང་གི་རྡུལ་ཕྲན་ལྟར་མང་བའི་མི་འདི་རྣམས་ལ་དབང་སྒྱུར་དུ་མཛད་པས་སོ། །
2CH 1:10 ད་ནི་ཁྱེད་ཀྱིས་བདག་ལ་ཤེས་རབ་དང་ཤེས་ཡོན་གནང་ནས་བདག་གིས་མི་འདི་རྣམས་ལ་སྣེ་ཁྲིད་བྱེད་ཐུབ་པར་མཛོད་ཅིག དེ་ལྟར་མ་བྱས་ཚེ་སུ་ཞིག་གིས་ཁྱེད་ཀྱི་མི་འདི་འདྲ་མང་པོར་བདག་སྐྱོང་བྱེད་ནུས་སམ་ཞེས་ཞུས་པ་དང་།
2CH 1:11 དཀོན་མཆོག་གིས་སོ་ལོ་མོན་ལ་འདི་སྐད་དུ། ཁྱོད་ལ་བསམ་འདུན་འདི་ལྟ་བུ་ཡོད་པ་སྟེ། འབྱོར་ཕྱུག་དང་རྒྱུ་ནོར། བཀུར་བསྟི་བཅས་ཀྱི་ཕྱིར་མ་ཞུས་ལ། རང་གི་དགྲ་ཡི་སྲོག་གཅོད་པར་ཡང་མ་ཞུས་ཏེ། ཚེ་ཐག་རིང་པོའི་ཕྱིར་ཡང་མ་ཞུས་པར། བདག་གི་འབངས་མི་སྟེ་ངས་ཁྱོད་རང་རྒྱལ་པོར་བསྐོས་ནས་དབང་སྒྱུར་དགོས་པའི་མི་རྣམས་ལ་བདག་སྐྱོང་བྱེད་པའི་ཆེད་དུ་ཤེས་རབ་དང་ཤེས་ཡོན་ཞུས་པས།
2CH 1:12 ངས་ཁྱོད་ལ་ཤེས་རབ་དང་ཤེས་ཡོན་སྦྱིན་པར་མ་ཟད། འབྱོར་ཕྱུག་དང་རྒྱུ་ནོར། བཀུར་བསྟི་བཅས་ཀྱང་སྦྱིན་པར་བྱ། ཁྱོད་ཀྱི་སྔོན་རོལ་གྱི་རྒྱལ་པོ་གང་ལ་ཡང་དེ་འདྲ་མེད་པ་དང་། ཁྱོད་ཀྱི་རྗེས་ཕྱོགས་སུ་ཡང་དེ་འདྲ་འབྱོར་བར་མི་འགྱུར་ཞེས་གསུངས།
2CH 1:13 དེ་ནས་སོ་ལོ་མོན་ནི་གིབ་ཡོན་གྱི་མཐོ་གླིང་གི་མཇལ་འཕྲད་གུར་མཆོག་གི་དྲུང་ནས་ཕྱིར་ཡེ་རུ་སཱ་ལེམ་དུ་ལོག་སྟེ། ཡེས་ར་ཨེལ་ལ་དབང་བསྒྱུར་བའོ། །
2CH 1:14 ཡང་སོ་ལོ་མོན་གྱིས་ཤིང་རྟ་དང་སྐྱ་དམག་རྣམས་བསྡུས་པ་སྟེ། ཁོང་ལ་ཤིང་རྟ་ཆིག་སྟོང་བཞི་བརྒྱ་དང་། སྐྱ་དམག་ཆིག་ཁྲི་ཉིས་སྟོང་ཡོད་པ་ཡིན། ཁོང་གིས་དེ་རྣམས་ཤིང་རྟའི་གྲོང་ཁྱེར་རྣམས་དང་ཡེ་རུ་སཱ་ལེམ་དུ་རྒྱལ་པོའི་དྲུང་དུ་བཞག
2CH 1:15 རྒྱལ་པོས་ཡེ་རུ་སཱ་ལེམ་དུ་གསེར་དངུལ་ནི་རྡོ་ལྟར་མོད་པ་དང་། ཐང་ཤིང་ནི་རི་ཀླུང་དུ་སྐྱེས་པའི་འོ་སེ་ཤིང་ལྟར་མོད་པར་མཛད།
2CH 1:16 སོ་ལོ་མོན་གྱི་རྟ་རྣམས་ནི་ཨེ་ཅིབ་དང་ཀི་ཝེ་ཡུལ་ནས་དྲངས་པ་སྟེ། རྒྱལ་པོའི་ཚོང་པ་དག་གིས་ཀི་ཝེ་ཡུལ་ནས་རིན་གོང་ལྟར་ཉོས་འོངས་པ་ཡིན།
2CH 1:17 དེ་དག་གིས་ཨེ་ཅིབ་ཡུལ་ནས་ཉོས་པའི་ཤིང་རྟ་དག་གི་རིན་ནི་རེ་རེར་དངུལ་སྲང་དྲུག་བརྒྱ་ཡིན་པ་དང་། རྟ་རེ་རེར་དངུལ་སྲང་བརྒྱ་དང་ལྔ་བཅུ་ཡིན། ཧེད་པའི་རྒྱལ་པོ་དང་ཨ་རམ་པའི་རྒྱལ་པོ་རྣམས་ཀྱི་ཤིང་རྟ་དང་རྟ་རྣམས་ཀྱང་དེ་བཞིན་དུ་ཚོང་པ་དེ་རྣམས་བརྒྱུད་ནས་ཉོས་འོངས་པའོ། །
2CH 2:1 དེ་ནས་སོ་ལོ་མོན་གྱིས་དཀོན་མཆོག་ཡ་ཝཱེའི་མཚན་གྱི་ཕྱིར་དུ་མཆོད་ཁང་ཞིག་དང་། རང་གི་ཕྱིར་དུ་ཕོ་བྲང་ཞིག་བཞེང་བར་བཀས་བཅད་པ་དང་།
2CH 2:2 སོ་ལོ་མོན་གྱིས་ཁུར་པོ་འཁུར་མཁན་ཁྲི་བདུན་དང་། རི་ཁུལ་དུ་རྡོ་བཟོ་མཁན་ཁྲི་བརྒྱད་དང་། ལས་དཔོན་མི་སུམ་སྟོང་དྲུག་བརྒྱ་བཅས་བདམས་མངག་བྱས།
2CH 2:3 ཡང་སོ་ལོ་མོན་གྱིས་མི་མངགས་ཏེ་ཐཱར་གྱི་རྒྱལ་པོ་ཧི་རཱམ་ལ་ན་རེ། ཁྱེད་ཀྱིས་ཇི་ལྟར་ངའི་ཕ་དཱ་བིད་ལ་ཕོ་བྲང་ཞིག་བཞེང་བར་ཐང་ཤིང་བསྐུར་བ་བཞིན་དུ། ང་ལའང་དེ་བཞིན་བསྐུར་བར་མཛོད་ཅིག
2CH 2:4 གཟིགས་དང་། ངས་རང་གི་དཀོན་མཆོག་ཡ་ཝཱེའི་མཚན་གྱི་ཕྱིར་མཆོད་ཁང་ཞིག་བཞེངས་ནས། དམ་པར་བྱས་ནས་ཁོང་ལ་ཕུལ་ཏེ། ཁོང་གི་དྲུང་དུ་དྲི་བསུང་གི་སྤོས་བདུག་པ་དང་། རྟག་ཏུ་སྤྱན་བསྟར་བག་ལེབ་བཤམ་པ་དང་། ཉིན་རེའི་ནངས་དགོང་དང་ངལ་གསོ་བའི་ཉིན། ཚེས་གཅིག ད་དུང་བདག་ཅག་གི་དཀོན་མཆོག་ཡ་ཝཱེས་གཏན་ལ་ཕབ་པའི་དུས་ཆེན་རྣམས་སུ་སྦྱིན་སྲེག་གི་མཆོད་པ་འབུལ་རྒྱུ་ཡིན། འདི་ནི་ཡེས་ར་ཨེལ་པའི་དུས་གཏན་གྱི་རྒྱུན་སྲོལ་ཡིན།
2CH 2:5 བདག་ཅག་གི་དཀོན་མཆོག་ནི་ལྷ་ཐམས་ཅད་ལས་མཆོག་ཏུ་གྱུར་པ་ཡིན་པས། ངས་བཞེང་བར་འགྱུར་བའི་མཆོད་ཁང་འདི་ཡང་ཤིན་ཏུ་རྒྱ་ཆེའོ། །
2CH 2:6 འོན་ཀྱང་ནམ་མཁའ་དང་ནམ་མཁའི་ཡང་སྟེང་གི་ནམ་མཁའ་ལའང་ཁོང་ཉིད་ཤོང་མི་ནུས་པས། སུ་ཞིག་གིས་ཁོང་གི་ཕྱིར་མཆོད་ཁང་བཞེང་ནུས་སམ། བདག་ནི་སུ་ཡིན་ནམ། ཁོང་གི་དྲུང་དུ་སྤོས་བདུག་པ་ལས་ངས་ཁོང་ལ་མཆོད་ཁང་ནི་བཞེང་ག་ལ་ནུས།
2CH 2:7 དེ་བས་ད་ལྟ་ཁྱེད་ཀྱིས་ངའི་དྲུང་དུ་གསེར་དངུལ་ལི་ལྕགས་བཅས་དང་། ཁ་དོག་རྒྱ་སྨུག་དང་། མཚལ་ཁ། མཐིང་ག་བཅས་ཀྱི་སྐུད་པ་བཀོལ་མཁས་པ་དང་། བརྐོ་བཟོའི་ལས་ལ་བྱང་བའི་མི་ཞིག་ཐོངས་ཤིག དེ་ནི་ངའི་ཕ་དཱ་བིད་ཀྱིས་ཡ་ཧུ་དཱ་དང་ཡེ་རུ་སཱ་ལེམ་དུ་བསྡུས་པའི་ལག་ཤེས་པ་རྣམས་དང་ལྷན་ཅིག་ཏུ་ལས་ཀ་བྱེད་པའི་ཕྱིར་ཡིན་ནོ། །
2CH 2:8 ཡང་ཁྱེད་ཀྱིས་ལེ་པཱ་ནོན་ནས་བདག་ལ་ཐང་ཤིང་དང་གསོམ་ཤིང་། ཙན་དན་གྱི་གདུང་མ་བསྐུར་བར་མཛོད། གང་ལ་ཞེ་ན། ཁྱེད་ཀྱི་ཞབས་ཕྱི་རྣམས་ནི་ལེ་པཱ་ནོན་གྱི་གདུང་མ་གཅོད་ཤེས་མཁན་ཡིན་པ་བདག་གིས་ཤེས་པས་ཕྱིར་རོ། །ཡང་གཟིགས་དང་། ངའི་ཞབས་ཕྱི་རྣམས་ཀྱིས་ཁྱེད་ཀྱི་ཞབས་ཕྱི་དག་ལ་རོགས་བྱེད་པར་བྱ།
2CH 2:9 ངས་བཞེང་བར་བྱ་བའི་མཆོད་ཁང་འདི་ནི་ཁྱད་མཚར་ཅན་དང་རྒྱ་ཆེ་བ་ཞིག་ཡིན་པས། ངའི་ཕྱིར་གདུང་མ་མོད་པོ་བཤམ་པར་གྱིས་ཤིག
2CH 2:10 གཟིགས་དང་། ངས་ཁྱེད་ཀྱི་ཞབས་ཕྱི་སྟེ་གདུང་མ་གཅོད་མཁན་རྣམས་ལ་གྲོ་ཕྱེ་ཁལ་ཉིས་ཁྲི་དང་། ནས་ཁལ་ཉིས་ཁྲི་དང་། རྒུན་ཆང་ཆུ་བེན་ཉིས་ཁྲི་དང་། སྣུམ་ཆུ་བེན་ཉིས་ཁྲི་བཅས་སྦྱིན་པར་བྱ་ཞེས་སྨྲས་པ་ལ།
2CH 2:11 ཐཱར་གྱི་རྒྱལ་པོ་ཧི་རཱམ་གྱིས་སོ་ལོ་མོན་ལ་ཡིག་ལན་སྤྲིངས་ཏེ་ན་རེ། དཀོན་མཆོག་ཡ་ཝཱེས་ཉིད་ཀྱི་འབངས་མི་ལ་བྱམས་པས་ཁྱེད་ཉིད་དེ་དག་གི་རྒྱལ་པོར་བསྐོས་པའོ་ཞེས་དང་།
2CH 2:12 ཡང་ཧི་རཱམ་ན་རེ། ཡེས་ར་ཨེལ་གྱི་དཀོན་མཆོག་ཡ་ཝཱེ་སྟེ་གནམ་ས་འགོད་མཁན་ཁོང་ནི་བསྟོད་འོས་སོ། །ཁོང་གིས་རྒྱལ་པོ་དཱ་བིད་ལ་ཤེས་རབ་ལྡན་པའི་སྲས་ཤིག་གནང་བ་སྟེ། མཛངས་ཤིང་མཐོང་རྒྱ་ཡངས་ལ། དེས་དཀོན་མཆོག་ཡ་ཝཱེ་ལ་མཆོད་ཁང་དང་རང་ཉིད་ལ་རྒྱལ་པོའི་ཕོ་བྲང་བཞེང་ནུས་པ་ཡིན།
2CH 2:13 ད་ལྟ་ངས་བློ་རིག་ལྡན་པའི་མི་ལག་རྩལ་ཅན་ཞིག་དེར་མངགས་པར་བྱ་སྟེ། ཁོའི་མིང་ལ་ཧུ་རཱམ་ཨ་བེ་ཟེར་ཞིང་ལག་ཤེས་པ་ཡིན་ཏེ།
2CH 2:14 ཁོ་ནི་དཱན་ཚོ་པའི་བུད་མེད་ཅིག་གི་བུ་ཡིན་ལ། ཕ་ནི་ཐཱར་པ་ཞིག་ཡིན། མི་དེ་ནི་གསེར་དངུལ་ལི་ལྕགས་དང་། རྡོ་དང་ཤིང་། ཁ་དོག་རྒྱ་སྨུག་དང་། མཐིང་ག་དང་། མཚལ་ཁ་བཅས་ཀྱི་སྐུད་པ་དང་། སོ་རས་སྲབ་བུ་བཅས་ཀྱིས་ལས་ཀ་བྱེད་པར་བྱང་ཡོད་པ་དང་། རྐོ་བཟོའི་རིགས་སྣ་ཚོགས་ལ་མཁས་པར་མ་ཟད། དཔེ་རིས་འགོད་པའི་ཐབས་ལའང་མཁས་ཏེ། ཁྱེད་ཀྱི་ལག་ཤེས་པ་དང་ངའི་ཇོ་བོ་སྟེ་ཁྱེད་ཀྱི་ཡབ་དཱ་བིད་ཀྱི་ལག་ཤེས་པ་རྣམས་དང་མཉམ་དུ་ལས་ཀ་ཡོད་ཚད་བྱེད་ནུས་པ་ཡིན།
2CH 2:15 ད་ནི་ངའི་ཇོ་བོ་ཁྱེད་ཀྱིས་གསུངས་པ་བཞིན་དུ་གྲོ་དང་ནས། རྒུན་ཆང་། སྣུམ་བཅས་ཞབས་ཕྱི་རྣམས་ཀྱི་ཆེད་དུ་བསྐུར་བར་མཛོད་ཅིག
2CH 2:16 ངེད་རྣམས་ཀྱིས་ཁྱེད་ཀྱི་དགོས་མཁོ་ལྟར་ལེ་པཱ་ནོན་ནས་ཤིང་བཅད་དེ་གྲུ་རུ་བསྡམས་ནས། རྒྱ་མཚོའི་སྟེང་ནས་ཁྱེད་ཀྱི་དྲུང་དུ་ཡོ་ཕཱ་རུ་བསྐུར་བར་བྱ་སྟེ། དེ་ནས་ཁྱེད་ཀྱིས་ཡར་ཡེ་རུ་སཱ་ལེམ་དུ་དྲངས་ཆོག་པ་ཡིན་ཞེས་སྨྲས་པ་དང་།
2CH 2:17 དེ་ནས་སོ་ལོ་མོན་གྱིས་རང་གི་ཡབ་དཱ་བིད་ཀྱིས་རྩིས་བླངས་པའི་མི་གྲངས་ལྟར། ཡང་ཡེས་ར་ཨེལ་ཡུལ་ཁམས་སུ་ཡོད་པའི་བྱེས་པ་རྣམས་བརྩིས་པ་ལ། བསྡོམས་པས་མི་ཆིག་འབུམ་ལྔ་ཁྲི་སུམ་སྟོང་དྲུག་བརྒྱ་ཡོད་པའོ། །
2CH 2:18 དེར་ཁོང་གིས་དེ་རྣམས་ལས་ཁུར་པོ་འཁུར་མཁན་ཁྲི་བདུན་དང་། རི་ཁུལ་དུ་རྡོ་བཟོ་མཁན་ཁྲི་བརྒྱད་དང་། ལས་དཔོན་མི་སུམ་སྟོང་དྲུག་བརྒྱ་ལས་ཀར་ལྟ་རྟོག་བྱེད་མཁན་དུ་བཞག
2CH 3:1 དེ་ནས་སོ་ལོ་མོན་གྱིས་ཡེ་རུ་སཱ་ལེམ་དུ། ཁོང་གི་ཡབ་དཱ་བིད་ལ་དཀོན་མཆོག་ཡ་ཝཱེ་སྣང་བར་གྱུར་པའི་མོ་རེའེ་ཡཱ་རི་བོའི་རི་མགོ་སྟེ། དཱ་བིད་ཀྱིས་ཡེ་བུ་སི་པ་ཨོར་ནན་གྱི་གཡུལ་ཁ་རུ་བཤམས་པའི་གནས་སུ་དཀོན་མཆོག་ཡ་ཝཱེའི་མཆོད་ཁང་བཞེང་འགོ་བརྩམས།
2CH 3:2 སོ་ལོ་མོན་གྱིས་རྒྱལ་སྲིད་བསྐྱངས་པའི་ལོ་བཞི་པའི་ཟླ་བ་གཉིས་པའི་ཚེས་གཉིས་པར་མཆོད་ཁང་བཞེང་འགོ་བརྩམས་ཏེ།
2CH 3:3 སོ་ལོ་མོན་གྱིས་དཀོན་མཆོག་གི་མཆོད་ཁང་གི་རྨང་བཏིངས་པ་ནི་འདི་ལྟ་སྟེ། གནའ་བོའི་འཇལ་ཚད་བཞིན་དུ་རིང་ཚད་ལ་ཁྲུ་དྲུག་ཅུ་དང་ཞེང་ལ་ཁྲུ་ཉི་ཤུ།
2CH 3:4 མཆོད་ཁང་མདུན་གྱི་བར་ཁྱམས་ཀྱི་རིང་ཚད་ནི་མཆོད་ཁང་གི་ཞེང་ལྟར་ཁྲུ་ཉི་ཤུ་དང་། མཐོ་ཚད་ལ་ཁྲུ་བརྒྱ་དང་ཉི་ཤུ་བཅས་ཡིན་ལ། ནང་གི་རྩིག་ངོས་གསེར་བཙོ་མས་གཡོགས་ཏེ།
2CH 3:5 ཚོམས་ཆེན་གྱི་རྩིག་ངོས་ཡོངས་ལ་གསོམ་ཤིང་གི་ཤིང་ལེབ་བཀབ་སྟེ་གསེར་བཙོ་མས་གཡོགས་ནས། དེའི་སྟེང་དུ་ཤིང་ཏ་ལ་དང་ཉག་ཐག་བརྐོས་ཡོད།
2CH 3:6 ཡང་མཆོད་ཁང་གི་རྩིག་ངོས་ལ་རིན་པོ་ཆེ་སྣ་ཚོགས་ཀྱིས་བརྒྱན་ཏེ་ཤིན་ཏུ་མཛེས་ལ། གསེར་དེ་དག་ནི་པར་ཝ་ཡིམ་གྱི་གསེར་ཡིན།
2CH 3:7 ཚོམས་ཆེན་དང་མཆོད་ཁང་གི་ཀ་བ་དང་སྒོ་ཐེམ། རྩིག་པ། སྒོ་གླེགས་བཅས་ཡོད་ཚད་གསེར་གྱིས་བཏུམས་པར་མ་ཟད། རྩིག་ངོས་སུ་ཀེ་རུབ་ཀྱང་བརྐོས་ཡོད།
2CH 3:8 ཡང་ཁོང་གིས་གནས་དམ་མཆོག་བཞེངས་ཏེ། དེའི་རིང་ཚད་ནི་མཆོད་ཁང་གི་ཞེང་ལྟར་ཁྲུ་ཉི་ཤུ་དང་། ཞེང་ལ་ཡང་ཁྲུ་ཉི་ཤུ་ཡིན། ཡང་ནང་གི་རྩིག་ངོས་ནི་གསེར་བཙོ་མ་རྡོ་ཚད་དྲུག་བརྒྱ་ཡིས་གཡོགས།
2CH 3:9 གསེར་གྱི་འཛེར་མའི་ལྗིད་ཚད་ནི་སྲང་ལྔ་བཅུ་སྟེ། ཐོག་ཁང་རྣམས་ཀྱང་གསེར་གྱིས་གཡོགས།
2CH 3:10 གནས་དམ་མཆོག་གི་ནང་དུ་ཀེ་རུབ་གཉིས་བརྐོས་ཏེ་གསེར་གྱིས་བཏུམས།
2CH 3:11 ཀེ་རུབ་གཉིས་པོའི་གཤོག་པའི་རིང་ཚད་ལ་བསྡོམས་པས་ཁྲུ་ཉི་ཤུ་སྟེ། ཀེ་རུབ་གཅིག་གི་གཤོག་པ་ཡ་གཅིག་གི་རིང་ཚད་ལ་ཁྲུ་ལྔ་ཡོད་པ་དང་མཆོད་ཁང་གི་རྩིག་པར་ཐུག་ཅིང་། གཤོག་པ་ཅིག་ཤོས་དེའི་རིང་ཚད་ལའང་ཁྲུ་ལྔ་ཡོད་པ་དང་ཀེ་རུབ་གཞན་དེའི་གཤོག་པར་ཐུག་ཡོད།
2CH 3:12 ཀེ་རུབ་གཞན་དེའི་གཤོག་པ་ཡ་གཅིག་གི་རིང་ཚད་ལའང་ཁྲུ་ལྔ་ཡོད་པ་དང་མཆོད་ཁང་གི་རྩིག་པར་ཐུག་ཅིང་། གཤོག་པ་ཅིག་ཤོས་དེའི་རིང་ཚད་ལ་ཁྲུ་ལྔ་ཡོད་པ་དང་ཀེ་རུབ་སྔོན་མའི་གཤོག་པར་ཐུག་ཡོད།
2CH 3:13 ཀེ་རུབ་དེ་གཉིས་ཀྱི་གཤོག་པ་གཉིས་ཀ་བརྐྱངས་ན་རིང་ཚད་ལ་བསྡོམས་པས་ཁྲུ་ཉི་ཤུ་ཡོད་ཅིང་། ཀེ་རུབ་དེ་གཉིས་ཀ་མཆོད་ཁང་གི་ནང་ལ་འཁོར་ནས་བཞེངས་འདུག་པའོ། །
2CH 3:14 ཡང་སོ་ལོ་མོན་གྱིས་ཁ་དོག་མཐིང་ག་དང་། རྒྱ་སྨུག མཚལ་ཁ་བཅས་ཀྱི་སྐུད་པ་དང་། སོ་རས་སྲབ་བུ་བཅས་ཀྱིས་ཡོལ་བ་ཞིག་བཟོས་ནས་དེའི་སྟེང་ལ་ཀེ་རུབ་ཀྱི་གཟུགས་བརྙན་གཙགས་འདུག
2CH 3:15 ཡང་མཆོད་ཁང་གི་མདུན་དུ་ཀ་བ་གཉིས་བཞེངས་ཏེ། མཐོ་ཚད་ལ་ཁྲུ་སོ་ལྔ་ཡོད་པ་དང་། ཀ་བ་རེ་རེའི་སྟེང་གི་ཀ་གཞུའི་མཐོ་ཚད་ལ་ཁྲུ་ལྔ་ཡོད་དོ། །
2CH 3:16 ཡང་མགུལ་རྒྱན་དང་མཚུངས་པའི་ཉག་ཐག་བཟོས་ཏེ་ཀ་བའི་མགོ་ལ་བཏགས་པ་དང་། སེ་འབྲུ་བརྒྱ་བཟོས་ཏེ་ཉག་ཐག་སྟེང་དུ་བཞག
2CH 3:17 ཁོང་གིས་ཀ་བ་དེ་གཉིས་མཆོད་ཁང་གི་མདུན་དུ་གཅིག་ནི་གཡས་ཕྱོགས་དང་ཅིག་ཤོས་ནི་གཡོན་ཕྱོགས་སུ་བསླངས་ཏེ། གཡས་ཕྱོགས་སུ་ཡོད་པའི་མིང་ལ་ཡཱ་ཀིན་ དང་གཡོན་ཕྱོགས་སུ་ཡོད་པའི་མིང་ལ་པཱོ་ཨ་ཟི་ཞེས་བཏགས་སོ། །
2CH 4:1 གཞན་ཡང་སོ་ལོ་མོན་གྱིས་རིང་ཚད་དང་ཞེང་ལ་ཁྲུ་ཉི་ཤུ་ཡོད་པ་དང་། མཐོ་ཚད་ལ་ཁྲུ་བཅུ་ཡོད་པའི་ལི་ཡི་མཆོད་ཁྲི་ཞིག་བཟོས་པ་དང་།
2CH 4:2 ཡང་ལི་ཡི་རྒྱ་མཚོ་བླུགས་མ་ཞིག་བཟོས་པ་སྟེ། དབྱིབས་ནི་ཟླུམ་པོ་ཡིན་ཞིང་ཚངས་ཐིག་ལ་ཁྲུ་བཅུ་ཡོད་པ་དང་། མཐོ་ཚད་ལ་ཁྲུ་ལྔ་ཡོད་ལ། སྒོར་མཐའ་ནི་ཁྲུ་སུམ་ཅུ་ཡིན་པའོ། །
2CH 4:3 ལི་ཡི་རྒྱ་མཚོ་བླུགས་མའི་འོག་གི་ཕྱོགས་བཞི་རུ་གླང་གི་གཟུགས་བརྙན་ལྟ་བུའི་རྒྱན་རིས་ཁྲུ་བཅུ་ཅན་ཡོད་དེ། གླང་བླུགས་མ་དེས་རྒྱ་མཚོ་བསྐོར་ནས་ཡོད་པ་དང་། གླང་རྣམས་གྲལ་གཉིས་སུ་བགོས་ཤིང་རྒྱ་མཚོ་དང་མཉམ་དུ་བླུགས་པ་ཡིན།
2CH 4:4 ལི་ཡི་རྒྱ་མཚོ་དེ་ནི་གླང་བཅུ་གཉིས་ཀྱི་ཐོག་ཏུ་བཀལ་ཏེ། གླང་གསུམ་ནི་བྱང་ཕྱོགས་དང་། གླང་གསུམ་ནི་ནུབ་ཕྱོགས་དང་། གླང་གསུམ་ནི་ལྷོ་ཕྱོགས་དང་། གླང་གསུམ་ནི་ཤར་ཕྱོགས་སུ་འཁོར་ཡོད་དེ། དེ་དག་གི་སྟེང་དུ་རྒྱ་མཚོ་བཀལ་ཞིང་། དེ་དག་གི་ཁོག་སྨད་ནང་དུ་གཏད་ཡོད།
2CH 4:5 ལི་ཡི་རྒྱ་མཚོ་བླུགས་མ་དེའི་སྲབ་མཐུག་ནི་སོར་བཞི་དང་། མཐའ་ནི་ཕོར་བའི་མཐའ་བཞིན་དང་། དབྱིབས་ནི་མེ་ཏོག་ཀུ་མུད་ལྟར་བཟོས་ཤིང་། དེའི་ནང་དུ་ཆུ་བེན་སུམ་སྟོང་ཆུད་པ་ཡིན་ནོ། །
2CH 4:6 ཡང་ཁོང་གིས་ཁྲུས་གཞོང་བཅུ་བཟོས་ཏེ། རྫས་རྣམས་བཀྲུ་བར་རྒྱ་མཚོའི་གཡས་ཕྱོགས་སུ་ལྔ་དང་། གཡོན་ཕྱོགས་སུ་ལྔ་བཞག་ཅིང་། སྦྱིན་སྲེག་ཏུ་འབུལ་བའི་མཆོད་རྫས་རྣམས་ཁྲུས་གཞོང་གི་ནང་དུ་བཀྲུ་དགོས་མོད། འོན་ཀྱང་ལི་ཡི་རྒྱ་མཚོ་བླུགས་མ་དེ་ནི་མཆོད་དཔོན་རྣམས་ཀྱིས་འཁྲུད་བྱེད་པའི་ཕྱིར་བཟོས་པ་ཡིན།
2CH 4:7 ཡང་གཏན་ལ་ཁེལ་བའི་དཔེ་གཟུགས་བཞིན་གསེར་གྱི་སྒྲོན་སྟེགས་བཅུ་བཟོས་ཏེ། མཆོད་ཁང་ནང་དུ་ལྔ་ནི་གཡས་ཕྱོགས་དང་། ལྔ་ནི་གཡོན་ཕྱོགས་སུ་བཞག་པའོ། །
2CH 4:8 ཡང་སྒྲོག་ཙེ་བཅུ་བཟོས་ཏེ་མཆོད་ཁང་གི་ནང་དུ་ལྔ་ནི་གཡས་ཕྱོགས་དང་། ལྔ་ནི་གཡོན་ཕྱོགས་སུ་བཞག ཡང་གསེར་ཕོར་བརྒྱ་བཟོས།
2CH 4:9 ཡང་མཆོད་དཔོན་གྱི་ཁྱམས་ར་དང་ཁྱམས་ར་ཆེན་པོ། ཁྱམས་ར་ཆེན་པོའི་སྒོ་བཅས་བཟོས་ནས། སྒོ་རྣམས་ལི་ཡིས་བཏུམས།
2CH 4:10 ཡང་ལི་ཡི་རྒྱ་མཚོ་བླུགས་མ་དེ་མཆོད་ཁང་གི་གཡས་ཕྱོགས་ཏེ་ཤར་ལྷོའི་ཕྱོགས་སུ་བཞག
2CH 4:11 ཧུ་རཱམ་གྱིས་ཡང་སླ་ང་དང་མེ་ཁྱེམ། ཕོར་བ་རྣམས་བཟོས་ཏེ། ཁོས་རྒྱལ་པོ་སོ་ལོ་མོན་གྱི་ཕྱིར་དཀོན་མཆོག་གི་མཆོད་ཁང་གི་ལས་ཀ་རྣམས་ཡོངས་སུ་བསྒྲུབས་ཚར་བ་སྟེ།
2CH 4:12 ཀ་བ་གཉིས་དང་དེའི་སྟེང་གི་ཕོར་བའི་དབྱིབས་ཅན་གྱི་ཀ་གཞུ་གཉིས་དང་། ཀ་སྟེང་གི་ཕོར་བའི་དབྱིབས་ཅན་གྱི་ཀ་གཞུ་གཉིས་ཀ་སྒྲིབ་པའི་དྲ་བ་གཉིས་དང་།
2CH 4:13 སེ་འབྲུ་བཞི་བརྒྱ་བཟོས་ནས་དྲ་བ་གཉིས་ཀྱི་སྟེང་དུ་བཞག་ཅིང་། དྲ་བ་རེ་རེའི་སྟེང་དུ་སེ་འབྲུ་གྲལ་གཉིས་རེ་ཡོད་ལ། ཀ་སྟེང་གི་ཕོར་བའི་དབྱིབས་ཅན་གྱི་ཀ་གཞུ་གཉིས་ཀ་བསྒྲིབས་པའོ། །
2CH 4:14 ཡང་སྟེགས་བུ་དང་སྟེགས་བུ་སྟེང་གི་ཁྲུས་གཞོང་དང་།
2CH 4:15 དེ་མིན་ལི་ཡི་རྒྱ་མཚོ་བླུགས་མ་ཞིག་དང་དེའི་འོག་གི་ལི་ཡི་གླང་བཅུ་གཉིས་དང་།
2CH 4:16 སླ་ང་དང་མེ་ཁྱེམ། ཤ་འཛིན་བཅས་འབྲེལ་ཡོད་ཀྱི་ཡོ་བྱད་ཐམས་ཅད་བཟོས་པ་རེད། ཧུ་རཱམ་ཨ་བེ་ཡིས་རྒྱལ་པོ་སོ་ལོ་མོན་ལ་དཀོན་མཆོག་ཡ་ཝཱེའི་མཆོད་ཁང་གི་ཆེད་དུ་བཟོས་པའི་ཡོ་བྱད་ཐམས་ཅད་འོད་འཚེར་བའི་ལི་ཡིས་བྱས་སོ། །
2CH 4:17 རྒྱལ་པོས་དེ་རྣམས་ཡོར་དན་གྱི་བདེ་ཐང་དུ་སོའུ་ཀོད་དང་ཙེ་རེ་དཱའི་བར་ལ་རྫ་ཀོང་ནང་དུ་བླུགས་པ་ཡིན།
2CH 4:18 སོ་ལོ་མོན་གྱིས་བཟོས་པའི་ཡོ་བྱད་དེ་ཐམས་ཅད་ནི་དཔག་ཏུ་མེད་ཅིང་། ལི་ཡི་ལྗིད་ཚད་ནི་བརྗོད་ཀྱིས་མི་ལང་བ་ཞིག་ཡིན།
2CH 4:19 སོ་ལོ་མོན་གྱིས་ཡང་དཀོན་མཆོག་གི་མཆོད་ཁང་ནང་གི་ཡོ་བྱད་ཐམས་ཅད་བཟོས་པ་སྟེ། གསེར་གྱི་མཆོད་ཁྲི་དང་། སྤྱན་བསྟར་བག་ལེབ་བཤམ་སའི་སྒྲོག་ཙེ་དང་།
2CH 4:20 གསེར་བཙོ་མས་བཟོས་པའི་སྒྲོན་སྟེགས་དང་སྒྲོན་མེ་རྣམས་ནི་སྒྲིག་སྲོལ་བཞིན་མཆོད་ཁང་སྦུག་མའི་སྒོ་མདུན་དུ་སྒྲོན་པ་ཡིན།
2CH 4:21 དེ་མིན་གང་བུ་དང་སྒྲོན་མེ། སྐམ་ཆུང་བཅས་ནི་གསེར་བཙོ་མས་བཟོས།
2CH 4:22 སྐམ་པ་དང་གཞོང་བ། སྡེར་མ། མེ་ཕོར་བཅས་ཀྱང་གསེར་བཙོ་མས་བཟོས་ཤིང་། མཆོད་ཁང་གི་སྒོ་སྟེ་གནས་དམ་མཆོག་ནང་དུ་འགྲོ་སའི་སྒོ་དང་། ཚོམས་ཆེན་གྱི་སྒོ་རྣམས་ཀྱང་གསེར་གྱིས་བཟོས་པ་ཡིན་ནོ། །
2CH 5:1 སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་གི་ལས་ཀ་ཡོད་ཚད་བསྒྲུབས་ཚར་རྗེས། ཡབ་དཱ་བིད་ཀྱིས་དམ་པར་བྱས་པའི་གསེར་དངུལ་དང་ཡོ་བྱད་ཐམས་ཅད་དྲངས་ནས་དཀོན་མཆོག་གི་མཆོད་ཁང་གི་དཀོར་མཛོད་དུ་བཞག
2CH 5:2 དེ་ནས་སོ་ལོ་མོན་གྱིས་དཱ་བིད་ཀྱི་གྲོང་ཁྱེར་ཏེ་ཛ་ཡན་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཡར་གདན་འདྲེན་པའི་ཕྱིར་དུ། ཡེས་ར་ཨེལ་གྱི་རྒན་པོ་དང་ཚོ་པ་སོ་སོའི་འགོ་དཔོན། ཁྱིམ་རྒྱུད་སོ་སོའི་འགོ་དཔོན་བཅས་ཡེ་རུ་སཱ་ལེམ་དུ་བསྡུས་པ་དང་།
2CH 5:3 ཟླ་བདུན་པའི་དུས་ཆེན་ལ་ཡེས་ར་ཨེལ་གྱི་མི་ཐམས་ཅད་རྒྱལ་པོའི་དྲུང་དུ་འདུས་སོ། །
2CH 5:4 ཡེས་ར་ཨེལ་གྱི་རྒན་པོ་རྣམས་སླེབས་པ་ཙམ་གྱིས། ལེ་ཝི་པ་དག་གིས་ཞལ་ཆད་ཀྱི་ཤུར་སྒམ་ཁུར་ཏེ།
2CH 5:5 མཆོད་དཔོན་དང་ལེ་ཝི་པ་རྣམས་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་དང་། མཇལ་འཕྲད་གུར་མཆོག་དང་དེའི་ནང་དུ་ཡོད་པའི་ཡོ་བྱད་དམ་པ་ཐམས་ཅད་ཡར་གདན་དྲངས་པ་རེད།
2CH 5:6 རྒྱལ་པོ་སོ་ལོ་མོན་དང་དེར་འཛོམས་པའི་ཡེས་ར་ཨེལ་གྱི་མི་ཚོགས་ཀྱིས་ཞལ་ཆད་ཀྱི་ཤུར་སྒམ་མདུན་དུ་ལུག་དང་བ་གླང་གི་མཆོད་པ་བགྲང་གིས་མི་ལང་བ་ཕུལ་ཏོ། །
2CH 5:7 ཡང་མཆོད་དཔོན་རྣམས་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་མཆོད་ཁང་སྦུག་མ་སྟེ་གནས་དམ་མཆོག་གི་ནང་དུ། ཀེ་རུབ་གཉིས་ཀྱི་གཤོག་པའི་འོག་ཏུ་ཞལ་ཆད་ཀྱི་ཤུར་སྒམ་འཇོག་སའི་གནས་སུ་བཞག
2CH 5:8 ཀེ་རུབ་ཀྱིས་ཞལ་ཆད་ཀྱི་ཤུར་སྒམ་སྟེང་དུ་གཤོག་པ་བརྐྱངས་ནས། ཞལ་ཆད་ཀྱི་ཤུར་སྒམ་དང་དེ་འཁུར་བྱེད་ཀྱི་རྒྱུག་ཤིང་གཡོགས་པའོ། །
2CH 5:9 རྒྱུག་ཤིང་དེ་གཉིས་ནི་ཤིན་ཏུ་རིང་བས། མཆོད་ཁང་སྦུག་མའི་མདུན་ནས་དེ་དག་གི་སྣེ་མོ་མཐོང་ཐུབ་པ་དང་། མཆོད་ཁང་ཕྱི་རོལ་ནས་མཐོང་མི་ཐུབ་ཅིང་། རྒྱུག་ཤིང་དེ་གཉིས་ནི་ད་ལྟའི་བར་དུ་དེར་ཡོད་པ་ཡིན།
2CH 5:10 ཞལ་ཆད་ཀྱི་ཤུར་སྒམ་ནང་དུ་རྡོ་ལེབ་གཉིས་ལས་གཞན་ཅི་ཡང་མེད་དེ། རྡོ་ལེབ་དེ་གཉིས་ནི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་རྗེས་དཀོན་མཆོག་ཡ་ཝཱེས་ཁོ་རྣམས་ལ་ཞལ་ཆད་མཛད་པའི་དུས་སུ། མོ་ཤེ་ཡིས་རི་བོ་ཧོ་རེབ་ཏུ་དེའི་ནང་ལ་བཞག་པ་ཡིན་ནོ། །
2CH 5:11 དེར་ཡོད་པའི་མཆོད་དཔོན་རྣམས་ཀྱིས་ཁོ་ཚོའི་ལས་རེས་གང་ཡིན་ཡང་རང་ཉིད་དམ་པར་བྱས་ཤིང་།
2CH 5:12 མགུར་ལེན་མཁན་ལེ་ཝི་པ་ཐམས་ཅད་དེ་ཨ་སབ་དང་། ཧེ་མཱན་དང་། ཡེ་དུ་ཐུན་བཅས་དང་། དེ་དག་གི་བུ་དང་ཉེ་འབྲེལ་རྣམས་ཀྱིས་སོ་རས་སྲབ་བུའི་གོས་གྱོན་ནས། མཆོད་ཁྲིའི་ཤར་ཕྱོགས་སུ་ལངས་ཏེ་སྦུག་ཆལ་དང་། རྒྱུད་མངས་དང་། པི་ཝང་བཅས་བརྡུངས་ཤིང་། དེ་དག་དང་མཉམ་དུ་དུང་འབུད་པའི་མཆོད་དཔོན་ད་དུང་བརྒྱ་དང་ཉི་ཤུ་ཡོད།
2CH 5:13 དུང་འབུད་མཁན་དང་མགུར་ལེན་མཁན་རྣམས་ཀྱིས་མཉམ་དུ་སྐད་གཅིག་གིས་དཀོན་མཆོག་ཡ་ཝཱེ་ལ་བསྟོད་ཅིང་ཁོང་ལ་གཏང་རག་ཕུལ། ཁོ་རྣམས་ཀྱིས་དུང་དང་། སྦུག་ཆལ་དང་། རོལ་ཆས་སྣ་ཚོགས་ཀྱི་སྐད་ཆེན་པོས་དཀོན་མཆོག་ཡ་ཝཱེ་ལ་བསྟོད་བསྔགས་ཕུལ་ཏེ། དཀོན་མཆོག་ཡ་ཝཱེ་ནི་བཟང་པོ་ཡིན། ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས་ཞེས་བརྗོད་དོ། །དེ་ནས་མཆོད་དཔོན་རྣམས་གནས་དམ་པ་ལས་ཕྱི་རུ་ཐོན་དུས་སུ། དཀོན་མཆོག་ཡ་ཝཱེའི་མཆོད་ཁང་གི་ནང་དུ་སྤྲིན་ཕུང་ཞིག་གིས་ཁེངས་པར་གྱུར།
2CH 5:14 ཡང་སྤྲིན་ཕུང་དེའི་རྐྱེན་གྱིས་མཆོད་དཔོན་རྣམས་ཡར་ལངས་ནས་ཞབས་ཕྱི་བྱེད་མ་ཕོད་དེ། ཅི་ལ་ཞེ་ན། དཀོན་མཆོག་ཡ་ཝཱེའི་གཟི་བརྗིད་ཀྱིས་དཀོན་མཆོག་གི་མཆོད་ཁང་དེར་གང་བས་སོ། །
2CH 6:1 སྐབས་དེར་སོ་ལོ་མོན་ན་རེ། སྔར་དཀོན་མཆོག་ཡ་ཝཱེས་ཁོང་ནི་སྤྲིན་ནག་སྟུག་པོའི་ནང་དུ་གནས་པར་འགྱུར་ཞེས་གསུངས་ཤིང་།
2CH 6:2 བདག་གིས་ཁྱེད་ལ་མཆོད་ཁང་བརྗིད་ཆགས་ཤིག་བཞེངས་ཏེ། ཁྱེད་དུས་གཏན་དུ་གནས་པའི་བཞུགས་གནས་ཡིན་ནོ་ཞུས་ནས།
2CH 6:3 རྒྱལ་པོས་ཞལ་ཕྱིར་འཁོར་ཏེ་ཡེས་ར་ཨེལ་གྱི་མི་ཚོགས་ལ་བྱིན་རླབས་གནང་བ་དང་མི་ཚོགས་ཡོངས་རྫོགས་ལངས་ནས་བསྡད།
2CH 6:4 སོ་ལོ་མོན་ན་རེ། ཡེས་ར་ཨེལ་གྱི་དཀོན་མཆོག་ཡ་ཝཱེ་ནི་བསྟོད་པར་འོས་སོ། །ཅི་ལ་ཞེ་ན། ཁོང་གིས་ངའི་ཕ་དཱ་བིད་ལ་དངོས་སུ་ཞལ་བཞེས་གནང་བ་གང་ཞིག་ཕྱག་གིས་བསྒྲུབས་པས་སོ། །ཁོང་གིས་འདི་སྐད་དུ།
2CH 6:5 བདག་གིས་རང་གི་འབངས་མི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་ཉིན་མོ་དེ་ནས་བཟུང་། བདག་གི་མིང་དེར་གནས་པའི་ཆེད་དུ་མཆོད་ཁང་ཞིག་བཞེང་བར་ཡེས་ར་ཨེལ་གྱི་ཚོ་པ་ཁག་ནས་གྲོང་ཁྱེར་གང་ཡང་མ་འདེམས། ཡང་བདག་གི་འབངས་མི་ཡེས་ར་ཨེལ་ལ་དབང་སྒྱུར་བའི་ཆེད་དུ་སྐྱེ་བོ་གང་ཡང་འགོ་དཔོན་དུ་མ་འདེམས།
2CH 6:6 ཡིན་ཡང་བདག་གིས་རང་གི་མིང་དེར་གནས་པའི་ཆེད་དུ་ཡེ་རུ་སཱ་ལེམ་དང་། རང་གི་འབངས་མི་ཡེས་ར་ཨེལ་ལ་དབང་སྒྱུར་བའི་ཆེད་དུ་དཱ་བིད་འགོ་དཔོན་དུ་བདམས་པ་ཡིན་ཞེས་གསུངས་པས།
2CH 6:7 ངའི་ཕ་དཱ་བིད་ཀྱི་སེམས་སུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཚན་གྱི་ཕྱིར་མཆོད་ཁང་ཞིག་བཞེང་བའི་འདུན་པ་ཡོད་མོད།
2CH 6:8 འོན་ཀྱང་དཀོན་མཆོག་ཡ་ཝཱེས་ངའི་ཡབ་དཱ་བིད་ལ་འདི་སྐད་དུ་། ཁྱོད་ཀྱི་སེམས་སུ་བདག་གི་མིང་ལ་མཆོད་ཁང་ཞིག་བཞེང་བའི་འདུན་པ་ཡོད་པ་ནི་ལེགས་སོ། །
2CH 6:9 འོན་ཀྱང་ཁྱོད་ཀྱིས་མཆོད་ཁང་བཞེང་བར་མི་བྱའོ། །ཁྱོད་ཀྱི་བུ་སྟེ་ཁྱོད་ལས་སྐྱེས་པའི་བུ་ཡིས་ངའི་མིང་གི་ཕྱིར་མཆོད་ཁང་བཞེང་བར་འགྱུར་ཞེས་གསུངས་སོ། །
2CH 6:10 ད་ནི་དཀོན་མཆོག་ཡ་ཝཱེས་གསུངས་པའི་བཀའ་ནང་བཞིན་འགྲུབ་པར་མཛད་དེ། བདག་ནི་རང་གི་ཡབ་དཱ་བིད་ཀྱི་ཚབ་ཏུ་ཡེས་ར་ཨེལ་གྱི་རྒྱལ་ཁྲིར་བསྡད་ནས། ཡེས་ར་ཨེལ་གྱི་དཀོན་མཆོག་ཡ་ཝཱེའི་མཚན་ལ་མཆོད་ཁང་འདི་བརྩིགས་པ་ཡིན།
2CH 6:11 ཡང་ངས་ཞལ་ཆད་ཀྱི་ཤུར་སྒམ་མཆོད་ཁང་གི་ནང་དུ་བཞག་ཅིང་། དེའི་ནང་དུ་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་མཛད་པའི་ཞལ་ཆད་བཞུགས་པ་ཡིན་ཞེས་སྨྲས་སོ། །
2CH 6:12 དེ་ནས་སོ་ལོ་མོན་ནི་ཡེས་ར་ཨེལ་གྱི་མི་ཚོགས་མདུན་དུ་དཀོན་མཆོག་ཡ་ཝཱེའི་མཆོད་ཁྲིའི་དྲུང་དུ་ལངས་ནས་ལག་ཟུང་བརྐྱངས་པའོ། །
2CH 6:13 སྔར་སོ་ལོ་མོན་གྱིས་ལི་ཡི་སྟེགས་བུ་ཞིག་བཞེངས་པ་སྟེ། རིང་ཚད་ལ་ཁྲུ་ལྔ་དང་ཞེང་ལ་ཁྲུ་ལྔ། མཐོ་ཚད་ལ་ཁྲུ་གསུམ་བཅས་ཡོད་པ་དེ་ཕྱིའི་ར་སྐོར་དཀྱིལ་དུ་བཞག་ནས། ཁོང་དེའི་སྟེང་དུ་ལངས་བསྡད་པ་དང་། དེ་ནས་ཡེས་ར་ཨེལ་མི་ཚོགས་ཀྱི་མདུན་དུ་པུས་མོ་སར་བཙུགས་ནས་ནམ་མཁའི་ཕྱོགས་སུ་ལག་ཟུང་བརྐྱངས་ཏེ་ན་རེ།
2CH 6:14 ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། གནམ་ས་གཉིས་སུ་ཁྱེད་ལྟ་བུའི་དཀོན་མཆོག་སུ་ཡང་མེད། ཁྱེད་ཀྱིས་བསམ་པ་རྩེ་གཅིག་གིས་ཁྱེད་ཀྱི་དྲུང་དུ་འགྲུལ་བའི་ཞབས་ཕྱི་རྣམས་ལ་ཞལ་ཆད་སྲུང་ཞིང་ཐུགས་རྗེས་གཟིགས་པ་ཡིན།
2CH 6:15 ཁྱེད་ཀྱིས་ཉིད་ཀྱི་ཞབས་ཕྱི་སྟེ་བདག་གི་ཕ་དཱ་བིད་ལ་གནང་བའི་ཞལ་བཞེས་ཐམས་ཅད་བསྲུངས་པ་དང་། ཁྱེད་ཀྱིས་ཞལ་ནས་གསུངས་ཤིང་ཕྱག་གིས་དེ་རིང་གི་ཉིན་མོ་བཞིན་མཛད་པ་ཡིན།
2CH 6:16 ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱི་སྟེ་བདག་གི་ཕ་དཱ་བིད་ལ་ཞལ་བཞེས་གནང་སྟེ་འདི་སྐད་དུ། ཇི་སྟེ་ཁྱོད་ཀྱི་བུ་རྒྱུད་ཀྱིས་བདག་གི་བཀའ་ཁྲིམས་བསྲུངས་ནས་རང་གི་སྤྱོད་སྟངས་ལ་གཟབ་གཟབ་བྱེད་པ་སྟེ། ཁྱོད་ཀྱིས་ངའི་མདུན་དུ་ཇི་ལྟར་བྱས་པ་བཞིན་བྱེད་ན། ངའི་མདུན་དུ་ཡེས་ར་ཨེལ་གྱི་རྒྱལ་ཁྲིར་སྡོད་མཁན་ནམ་ཡང་རྒྱུན་ཆད་པར་མི་འགྱུར་ཞེས་གསུངས་པ་ཡིན། ད་ནི་ཁྱེད་ཀྱིས་དེ་བཞིན་མཛོད་ཅིག
2CH 6:17 ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ད་ནི་ཁྱེད་ཀྱིས་ཉིད་ཀྱི་ཞབས་ཕྱི་དཱ་བིད་ལ་གནང་བའི་ཞལ་བཞེས་འགྲུབ་པར་མཛོད་ཅིག
2CH 6:18 དཀོན་མཆོག་ཉིད་དངོས་གནས་མི་དང་མཉམ་དུ་ས་གཞིར་བཞུགས་པར་འགྱུར་རམ། གཟིགས་དང་། ནམ་མཁའ་དང་ནམ་མཁའི་ཡང་སྟེང་གི་ནམ་མཁའ་རུ་ཡང་ཁྱེད་མི་ཤོང་བས། བདག་གིས་བཞེངས་པའི་མཆོད་ཁང་འདིར་ལྟ་ཅི་སྨོས།
2CH 6:19 ཀྱེ་ང་ཡི་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱིའི་སྨོན་ལམ་དང་ཞུ་བ་ལ་གསན་པར་མཛོད། ཁྱེད་ཀྱི་དྲུང་དུ་ཞུ་བའི་གསོལ་འདེབས་དང་འོ་དོད་ལ་གསན་དུ་གསོལ།
2CH 6:20 ཡང་ཁྱེད་ཀྱི་སྤྱན་གྱིས་ཉིན་མཚན་མེད་པར་མཆོད་ཁང་འདི་ལ་གཟིགས་རོགས་གནང་། ཁྱེད་ཀྱི་མཚན་གྱི་ཕྱིར་བཞེངས་པའི་བཞུགས་གནས་འདིར་གཟིགས་རོགས། ཁྱེད་ཀྱི་ཞབས་ཕྱིས་གནས་འདིར་བཏབ་པའི་གསོལ་འདེབས་ལ་ཡང་གསན་པར་མཛོད་ཅིག
2CH 6:21 ཡང་ཁྱེད་ཀྱི་ཞབས་ཕྱི་དང་ཁྱེད་ཀྱི་འབངས་མི་ཡེས་ར་ཨེལ་གྱི་ཞུ་བ་སྟེ། ཁོ་རྣམས་ཀྱིས་གནས་འདི་ཕྱོགས་སུ་བཏབ་པའི་སྨོན་ལམ་ལ་གསན་པར་མཛོད། ཁྱེད་ཀྱིས་ཉིད་ཀྱི་བཞུགས་གནས་ཏེ་ནམ་མཁའ་ནས་གསན་པར་མཛོད། ཡང་གསན་པ་ཙམ་གྱིས་སྡིག་པ་བསལ་བར་མཛོད་ཅིག
2CH 6:22 གལ་ཏེ་མི་ཞིག་གིས་རང་གི་ཁྱིམ་མཚེས་དང་འགལ་བའི་སྡིག་པ་བྱས་ཤིང་། གཞན་ཞིག་གིས་དེ་ལ་མནའ་འཁུར་དུ་འཇུག་པའི་ཕྱིར་མི་དེས་མཆོད་ཁང་འདིར་འོངས་ནས་ཁྱེད་ཀྱི་མཆོད་ཁྲིའི་མདུན་དུ་མནའ་སྐྱེལ་བའི་དུས་སུ།
2CH 6:23 ཁྱེད་ཀྱིས་ནམ་མཁའི་ཞིང་ཁམས་ནས་དེར་གསན་ཏེ་ཞབས་ཕྱི་རྣམས་ལ་ཁྲིམས་ཐག་གཅོད་པར་མཛོད། ངན་པར་ཉེས་ཆད་བཅད་ནས་ཁོའི་ཉེས་པ་ཁོ་རང་གི་མགོ་ལ་འབེབ་པར་མཛོད། ཡང་ཉེས་མེད་ལ་དག་འབུད་མཛད་དེ་ཁོའི་དྲང་བདེན་བཞིན་གསོལ་རས་གནང་རོགས།
2CH 6:24 ཡང་གལ་ཏེ་ཁྱེད་ཀྱི་འབངས་མི་ཡེས་ར་ཨེལ་གྱིས་ཁྱེད་ལ་ཉེས་པ་བསགས་ནས་དགྲའི་མདུན་དུ་ཕམ་ཡང་། ཕྱིས་སུ་ཁྱེད་ཀྱི་ཕྱོགས་སུ་སེམས་བསྒྱུར་ནས་ཁྱེད་ཀྱི་མཚན་ཁས་བླངས་ཏེ། མཆོད་ཁང་འདིར་ཁྱེད་ཀྱི་དྲུང་དུ་སྨོན་ལམ་འདེབས་ཤིང་འོ་དོད་འདོན་ན།
2CH 6:25 ཁྱེད་ཀྱིས་ནམ་མཁའ་ནས་དེར་གསན་པ་དང་ཉིད་ཀྱི་འབངས་མི་ཡེས་ར་ཨེལ་གྱི་སྡིག་པ་སེལ་ནས། ཁྱེད་ཀྱིས་ཁོ་རྣམས་དང་ཁོ་རྣམས་ཀྱི་ཕ་མེས་ལ་གནང་བའི་ཡུལ་དུ་ཕྱིར་འཁྲིད་པར་མཛོད་ཅིག
2CH 6:26 ཡང་ཁྱེད་ཀྱི་འབངས་མིས་ཁྱེད་ལ་ཉེས་པ་བསགས་པའི་རྐྱེན་གྱིས། ཁྱེད་ཀྱིས་ཁོ་རྣམས་ལ་ཉེས་ཆད་བཅད་དེ་ནམ་མཁའ་འགགས་ཤིང་ཆར་བ་མི་འབབ་པར་མཛད་པའི་ཚེ། གལ་སྲིད་དེ་དག་གིས་གནས་འདིར་གསོལ་བ་བཏབ་ནས་ཁྱེད་ཀྱི་མཚན་ཁས་བླངས་ཏེ་རང་གི་སྡིག་པ་སྤངས་ན།
2CH 6:27 ཁྱེད་ཀྱིས་ནམ་མཁའི་ཞིང་ཁམས་ནས་གསན་ཏེ། ཁྱེད་ཀྱི་ཞབས་ཕྱི་དང་ཉིད་ཀྱི་འབངས་མི་ཡེས་ར་ཨེལ་པའི་སྡིག་པར་གུ་ཡངས་མཛད་པ་དང་། ཁོ་རྣམས་ལ་བགྲོད་འོས་པའི་ལམ་དྲང་པོ་དེ་སྟོན་ཞིང་། ཁྱེད་ཀྱི་འབངས་མི་ལ་ས་སྐལ་དུ་གནང་བའི་གནས་སུ་ཆར་བ་འབབ་པར་མཛོད་ཅིག
2CH 6:28 གལ་ཏེ་ཡུལ་འདིར་མུ་གེའམ་རིམས་ནད་དམ། སྐམ་རླུང་། གཡའ་སྤུ། ཆ་ག་པ། ཨ་ཚག་ཚག་པ་བཅས་ཡོད་པའམ། ཡང་ན་དགྲ་བོས་ཡུལ་ལྗོངས་བསྐོར་ནས་བར་ཆད་དམ་ནད་ཡམས་ཅི་རིགས་འབྱུང་བའི་ཚེ།
2CH 6:29 ཁྱེད་ཀྱི་འབངས་མི་ཡེས་ར་ཨེལ་ལས་མི་གང་ཞིག་དང་ཡང་ན་ཀུན་གྱིས་རང་གི་ཆག་སྒོ་དང་དཀའ་སྡུག་ཤེས་ནས། མཆོད་ཁང་འདིའི་ཕྱོགས་སུ་ལག་པ་བརྐྱངས་ཏེ་གསོལ་བ་བཏབ་ནས་ཞུ་བ་ཕུལ་ན།
2CH 6:30 ཁྱེད་ཉིད་བཞུགས་སའི་ནམ་མཁའི་ཞིང་ཁམས་ནས་དེར་གསན་ཏེ་སྡིག་པ་བསལ་བར་མཛོད། ཁྱེད་ཀྱིས་མི་རེ་རེའི་སེམས་མཁྱེན་པས་ན་དེའི་སྤྱོད་ལམ་བཞིན་དུ་བསྒྲུབས་ནས་ལན་གནང་བར་མཛོད། ཅིའི་ཕྱིར་ཞེ་ན། ཁྱེད་ཉིད་གཅིག་པུས་འཇིག་རྟེན་མིའི་རིགས་ཀྱི་སེམས་པ་མཁྱེན་པའི་ཕྱིར་རོ། །
2CH 6:31 ཁྱེད་ཀྱིས་ངེད་ཅག་གི་ཕ་མེས་ལ་གནང་བའི་ཡུལ་དུ་ཁོ་རྣམས་ཚེ་གང་པོར་ཁྱེད་ལ་གུས་ཤིང་འཇིགས་པ་དང་། ཁྱེད་ཀྱི་ལམ་ནང་འགྲུལ་བར་མཛོད།
2CH 6:32 ཡང་ཁྱེད་ཀྱི་འབངས་མི་ཡེས་ར་ཨེལ་ལ་མི་གཏོགས་པའི་ཕྱི་རོལ་པ་རྣམས་ཁྱེད་ཀྱི་མཚན་སྙན་དང་། ནུས་མཐུ་ལྡན་པའི་ཕྱག་དང་། ཕྱི་རུ་བརྐྱངས་པའི་དཔུང་པའི་རྐྱེན་གྱིས་རྒྱང་རིང་ནས་ཐོན་ཏེ། མཆོད་ཁང་འདིའི་ཕྱོགས་སུ་སྨོན་ལམ་བཏབ་ན།
2CH 6:33 ཁྱེད་ཀྱིས་ཉིད་ཀྱི་བཞུགས་གནས་ནམ་མཁའ་ནས་དེར་གསན་ཏེ། ཕྱི་རོལ་པ་དེས་ཁྱེད་ལ་ཅི་ཞུས་པ་ཐམས་ཅད་བསྒྲུབ་པར་མཛད་ཅིང་། ས་གཞིའི་སྟེང་གི་མི་ཐམས་ཅད་ཀྱིས་ཁྱེད་ཀྱི་མཚན་རྟོགས་ཤིང་། ཁྱེད་ཀྱི་འབངས་མི་ཡེས་ར་ཨེལ་བཞིན་དུ་ཁྱེད་ལ་གུས་ཤིང་འཇིགས་པ་དང་། ཡང་ངས་བཞེངས་པའི་མཆོད་ཁང་འདི་ནི་ཁྱེད་ཀྱི་མཚན་ལ་གཏོགས་པའི་བཞུགས་གནས་ཡིན་པ་ཤེས་པར་མཛོད།
2CH 6:34 ཡང་གལ་ཏེ་ཁྱེད་ཀྱི་འབངས་མི་ནི་ཁྱེད་ཀྱིས་མངགས་པའི་ལམ་དུ་དགྲ་བོར་དམག་འགྱེད་ནས། ཁྱེད་ཀྱིས་བདམས་པའི་གྲོང་ཁྱེར་འདིའི་ཕྱོགས་དང་། ངས་ཁྱེད་ཀྱི་མཚན་གྱི་ཕྱིར་བཞེངས་པའི་མཆོད་ཁང་འདིའི་ཕྱོགས་སུ་ཁྱེད་ལ་གསོལ་བ་བཏབ་ན།
2CH 6:35 ཁྱེད་ཀྱིས་ནམ་མཁའ་ནས་དེ་དག་གི་གསོལ་འདེབས་དང་འོ་དོད་ལ་གསན་ཏེ་ཁོ་རྣམས་རྒྱལ་བར་མཛོད་ཅིག
2CH 6:36 འཇིག་རྟེན་དུ་སྡིག་པ་མི་བྱེད་པ་སུ་ཡང་མེད་པས། གལ་ཏེ་ཁྱེད་ཀྱི་འབངས་མིས་ཁྱེད་ལ་སྡིག་པ་བྱས་པ་དང་། ཁྱེད་ཐུགས་ཁྲོས་ནས་དེ་དག་དགྲའི་ལག་ཏུ་གཏད་དེ། དགྲ་བོས་དེ་དག་ཡུལ་ཉེ་རིང་གང་དུ་བཙན་ཁྲིད་བྱས་ཤིང་།
2CH 6:37 དེ་དག་གིས་བཙན་ཁྲིད་བྱས་ནས་སོང་བའི་ཡུལ་དེར་བློ་ཁ་ཚུར་འཁོར་ནས། བཙན་ཁྲིད་བྱས་པའི་ཡུལ་དུ་འགྱོད་བཤགས་དང་བཅས་ཁྱེད་ལ་འདི་ལྟར། ངེད་ཅག་གིས་སྡིག་པ་བྱས་ཤིང་། ངེད་ཅག་གིས་ཉེས་པ་བཟོས་པ་དང་། ངེད་ཅག་གིས་ལས་ངན་པ་བྱས་པ་ཡིན་ཞེས་ཞུ་བ་ཕུལ་ནས་གསོལ་བ་འདེབས་པ་དང་།
2CH 6:38 ཡང་དེ་དག་བཙན་ཁྲིད་བྱས་ནས་སོང་བའི་ཡུལ་དུ་བློ་གཅིག་སེམས་གཅིག་གིས་ཁྱེད་ཀྱི་ཕྱོགས་སུ་འཁོར་ཞིང། རང་གི་ཡུལ་ཏེ་ཁྱེད་ཀྱིས་དེ་དག་གི་ཕ་མེས་ལ་གནང་བའི་ཡུལ་དང་། ཁྱེད་ཀྱིས་བདམས་པའི་གྲོང་ཁྱེར་དང་། ངས་ཁྱེད་ཀྱི་མཚན་གྱི་ཕྱིར་བཞེངས་པའི་མཆོད་ཁང་འདིའི་ཕྱོགས་སུ་སྨོན་ལམ་བཏབ་ན།
2CH 6:39 ཁྱེད་ཀྱིས་ཉིད་ཀྱི་བཞུགས་གནས་ཏེ་ནམ་མཁའ་ནས་དེ་དག་གི་གསོལ་འདེབས་དང་འོ་དོད་ལ་གསན་པ་དང་། དེ་དག་ལ་བདེན་ལུགས་གནང་ནས་ཁྱེད་ལ་ཉེས་པ་བསགས་པའི་མི་མང་གི་སྡིག་ཉེས་བསལ་བར་མཛོད་ཅིག
2CH 6:40 ཀྱེ་བདག་གི་དཀོན་མཆོག་ལགས། ད་ནི་ཁྱེད་ཀྱིས་སྤྱན་ཟུང་འབྱེད་པ་དང་། ཁྱེད་ཀྱི་སྙན་གྱིས་ཡུལ་འདིར་ཕུལ་བའི་གསོལ་འདེབས་ལ་གསན་པར་ཞུ།
2CH 6:41 ཀྱེ་དཀོན་མཆོག་ཡ་ཝཱེ་ལགས། ད་ནི་ཁྱེད་ཉིད་ཡར་བཞེང་བར་ཞུ། ཁྱེད་དང་ཉིད་ཀྱི་མཐུ་སྟོབས་ལྡན་པའི་ཞལ་ཆད་ཀྱི་ཤུར་སྒམ་ནི་ཁྱེད་ཉིད་སྐུ་ངལ་གསོ་བའི་བཞུགས་གནས་ལ་ཕེབས་སུ་གསོལ། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱི་མཆོད་དཔོན་རྣམས་ཀྱིས་ཐར་པའི་གོས་གྱོན་ཞིང་། ཁྱེད་ཀྱི་འབངས་མི་དམ་པ་རྣམས་ཉིད་ཀྱི་བྱིན་རླབས་ཁྲོད་དགའ་ཞིང་སྤྲོ་བར་གྱུར་ཅིག
2CH 6:42 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་བྱུགས་པའི་མི་ཡི་ངོ་མ༌བཟློག ཉིད་ཀྱི་ཞབས་ཕྱི་དཱ་བིད་ལ་ཞལ་བཞེས་གནང་བའི་བྱམས་བརྩེ་ནི་ཁྱེད་ཀྱི་ཐུགས་སུ་དྲན་དུ་གསོལ་ཞེས་གསོལ་བ་བཏབ་བོ། །
2CH 7:1 སོ་ལོ་མོན་གྱིས་གསོལ་བ་བཏབ་ཚར་མ་ཐག ནམ་མཁའ་ནས་མེ་བབས་ཏེ་སྦྱིན་སྲེག་དང་མཆོད་པ་རྣམས་ཡོངས་སུ་བསྲེགས་ཤིང་། དཀོན་མཆོག་ཡ་ཝཱེའི་གཟི་འོད་མཆོད་ཁང་དེར་ཁྱབ་པའོ། །
2CH 7:2 དཀོན་མཆོག་ཡ་ཝཱེའི་གཟི་འོད་མཆོད་ཁང་དེར་ཁྱབ་པའི་སྟབས་ཀྱིས་མཆོད་དཔོན་རྣམས་དཀོན་མཆོག་ཡ་ཝཱེའི་མཆོད་ཁང་དུ་འགྲོ་མ་ནུས་སོ། །
2CH 7:3 ཡེས་ར་ཨེལ་མི་ཚོགས་ཀྱིས་མེ་འབབ་པ་དང་དཀོན་མཆོག་ཡ་ཝཱེའི་གཟི་འོད་མཆོད་ཁང་སྟེང་དུ་བཞུགས་པ་མཐོང་བ་ཙམ་གྱིས། རྡོ་གཅལ་སྟེང་པུས་མོ་སར་བཙུགས་ནས་ཕྱག་བཙལ་ཏེ། དཀོན་མཆོག་ཡ་ཝཱེ་ལ་བསྙེན་བཀུར་དང་གཏང་རག་ཕུལ་ཏེ་ན་རེ། དཀོན་མཆོག་ཡ་ཝཱེ་ནི་བཟང་པོ་ཡིན་ལ། ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས་ཞེས་ཞུས་སོ། །
2CH 7:4 རྒྱལ་པོ་དང་མི་ཐམས་ཅད་ཀྱིས་དཀོན་མཆོག་ཡ་ཝཱེའི་དྲུང་དུ་མཆོད་པ་ཕུལ།
2CH 7:5 རྒྱལ་པོ་སོ་ལོ་མོན་གྱིས་གླང་ཉིས་ཁྲི་ཉིས་སྟོང་དང་ར་ལུག་ཆིག་འབུམ་ཉིས་ཁྲི་དཀོན་མཆོག་གི་མཆོད་ཁང་དུ་མཆོད་པར་ཕུལ། དེ་བཞིན་རྒྱལ་པོ་དང་མི་ཐམས་ཅད་ཀྱིས་དཀོན་མཆོག་གི་མཆོད་ཁང་བསྔོ་བའི་མཛད་སྒོ་སྤེལ།
2CH 7:6 ཡང་མཆོད་དཔོན་རྣམས་རང་རང་གི་ལས་གནས་སྟེང་ལངས་བསྡད་པ་དང་། ལེ་ཝི་པ་རྣམས་ཀྱང་སྔར་དཱ་བིད་ཀྱིས་དཀོན་མཆོག་ཡ་ཝཱེ་ལ་བསྟོད་དབྱངས་འབུལ་བར་བཟོས་པའི་རོལ་ཆས་རྣམས་ཏེ། ཁོ་རྣམས་བརྒྱུད་ནས་དཀོན་མཆོག་ཡ་ཝཱེའི་བྱམས་བརྩེ་རྒྱུན་ནས་རྒྱུན་དུ་གནས་ཞེས་དཀོན་མཆོག་ཡ་ཝཱེ་ལ་གཏང་རག་འབུལ་བའི་དུས་སུ་བཀོལ་བ་རྣམས་ཐོགས་ནས་ལངས་བསྡད་པ་དང་། མཆོད་དཔོན་རྣམས་ཀྱིས་མི་ཚོགས་ཀྱི་མདུན་དུ་རྒྱ་གླིང་བུས་པ་དང་། ཡེས་ར་ཨེལ་པ་ཐམས་ཅད་ལངས་ནས་བསྡད།
2CH 7:7 སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་མདུན་གྱི་ར་སྐོར་གྱི་དཀྱིལ་དབུས་དེ་དམ་པར་མཛད་ནས། སྦྱིན་སྲེག་དང་ཞི་བདེའི་མཆོད་པ་རྣམས་ཀྱི་ཚིལ་དེར་ཕུལ། ཅིའི་ཕྱིར་ཞེ་ན། སོ་ལོ་མོན་གྱིས་བཟོས་པའི་ལི་ཡི་མཆོད་ཁྲིའི་སྟེང་དུ་སྦྱིན་སྲེག་དང་འབྲུ་རིགས་ཀྱི་མཆོད་པ། མཆོད་པའི་ཚིལ་རྣམས་མ་ཤོང་བས་སོ། །
2CH 7:8 སྐབས་དེར། སོ་ལོ་མོན་གྱིས་ཉིན་བདུན་ལ་དུས་ཆེན་བཏང་བ་དང་། ཧ་མཱད་ནས་ཨེ་ཅིབ་གཙང་པོ་བར་གྱི་ཡེས་ར་ཨེལ་པ་ཐམས་ཅད་ཀྱང་ཁོང་དང་མཉམ་དུ་ཚོགས་རྒྱ་ཆེན་པོ་ཞིག་གྲུབ།
2CH 7:9 ཁོ་རྣམས་ཀྱིས་མཆོད་ཁྲི་བསྔོ་བའི་མཛད་སྒོ་ཉིན་བདུན་ལ་སྤེལ་ཞིང་དུས་ཆེན་ཉིན་བདུན་ལ་བཏང་བ་དང་། ཉིན་བརྒྱད་པར་འདུ་འཛོམས་དམ་ནན་བསྡུས་སོ། །
2CH 7:10 ཟླ་བདུན་པའི་ཚེས་ཉེར་གསུམ་ཉིན་རྒྱལ་པོས་མི་རྣམས་རང་རང་གི་ཡུལ་ལ་འགྲོ་རུ་བཅུག ཁོ་རྣམས་ཀྱིས་དཀོན་མཆོག་ཡ་ཝཱེས་དཱ་བིད་དང་། སོ་ལོ་མོན་དང་། ཉིད་ཀྱི་འབངས་མི་ཡེས་ར་ཨེལ་བཅས་ལ་གནང་བའི་ཐུགས་རྗེ་མཇལ་བས་སེམས་པ་དགའ་ཞིང་སྤྲོ་བར་གྱུར་ཏོ། །
2CH 7:11 དེ་ལྟར་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་བཞེངས་ནས་ཚར་བ་དང་། དཀོན་མཆོག་ཡ་ཝཱེའི་མཆོད་ཁང་གི་ནང་དང་ཡང་ན་སོ་ལོ་མོན་གྱི་ཕོ་བྲང་ནང་དུ་ཁོང་གི་སེམས་སུ་ཅི་ལྟར་བྱེད་འདོད་པ་བཞིན་ཐམས་ཅད་ལེགས་འགྲུབ་བྱུང་བ་རེད།
2CH 7:12 མཚན་མོའི་དུས་སུ་དཀོན་མཆོག་ཡ་ཝཱེ་ཁོང་ཉིད་སོ་ལོ་མོན་ལ་མངོན་པར་གྱུར་ནས་འདི་སྐད་དུ། བདག་གིས་ཁྱོད་ཀྱི་སྨོན་ལམ་ལ་མཉན་ནས་རང་གི་ཆེད་དུ་གནས་འདི་མཆོད་པ་འབུལ་ཡུལ་དུ་བདམས་པ་ཡིན།
2CH 7:13 གལ་ཏེ་བདག་གིས་གནམ་བཀག་ནས་ཆར་བ་མི་འབབ་པ་དང་། ཡང་ན་ཆ་ག་པ་ལ་ཡུལ་འདིའི་ལོ་ཏོག་ཁྱུར་མིད་གཏོང་བའི་བཀའ་འགོད་པ། ཡང་ན་བདག་གིས་རང་གི་འབངས་མིའི་ཁྲོད་དུ་རིམས་ནད་གཏོང་བ་བཅས་བྱས་ན།
2CH 7:14 གལ་ཏེ་བདག་གི་མིང་གིས་འབོད་པའི་འབངས་མི་འདིས་ཁེངས་སྐྱུང་གིས་གསོལ་བ་འདེབས་པ་དང་། བདག་གི་ངོ་གདོང་འཚོལ་ཞིང་སྤྱོད་ངན་ཀུན་ལས་ལོག་འོངས་ན། བདག་གིས་ནམ་མཁའ་ནས་མཉན་ཏེ་ཁོ་རྣམས་ཀྱི་སྡིག་པ་བསལ་ཞིང་ཁོ་རྣམས་ཀྱི་ཡུལ་ཁམས་གསོ་བར་བྱ།
2CH 7:15 ད་ནི་བདག་གིས་མིག་ཟུང་འབྱེད་ཅིང་རྣ་བས་གནས་འདི་ནས་བཏབ་པའི་སྨོན་ལམ་ལ་མཉན་པར་བྱའོ། །
2CH 7:16 ད་ནི་ངའི་མིང་མཆོད་ཁང་འདིའི་ནང་གཏན་དུ་གནས་པའི་ཕྱིར་དུ། བདག་གིས་མཆོད་ཁང་འདི་བདམས་ཤིང་དམ་པར་བྱས་པ་ཡིན་ལ། བདག་གི་མིག་དང་སེམས་གཉིས་ཀྱང་དུས་རྟག་ཏུ་འདིར་གནས་པར་འགྱུར་རོ། །
2CH 7:17 ཡང་ཁྱོད་ལ་མཚོན་ན། ཇི་སྟེ་ཁྱོད་ཀྱིས་རང་གི་ཕ་དཱ་བིད་ཀྱིས་ཇི་ལྟར་བྱས་པ་བཞིན་ངའི་མདུན་དུ་སྤྱད་པ་སྤྱོད་ཅིང་། བདག་གིས་ཁྱོད་ལ་གནང་བའི་བཀའ་ཐམས་ཅད་བསྲུང་བ་དང་། བདག་གི་སྒྲིག་ཁྲིམས་དང་སྲོལ་ཡིག་རྣམས་དམ་པོར་བརྩིས་ན།
2CH 7:18 བདག་གིས་ཁྱོད་ཀྱི་ཕ་དཱ་བིད་ལ་བཞག་པའི་ཞལ་ཆད་དེ། ཁྱོད་ཀྱི་བུ་རྒྱུད་ལས་རྒྱལ་པོར་བསྡད་དེ་ཡེས་ར་ཨེལ་ལ་དབང་སྒྱུར་མཁན་ནམ་ཡང་རྒྱུན་ཆད་པར་མི་འགྱུར་ཞེས་སྨྲས་པ་བཞིན་དུ། བདག་གིས་ཁྱོད་ཀྱི་རྒྱལ་སྲིད་བརྟན་པོར་མཛད་ངེས།
2CH 7:19 ཡིན་ནའང་གལ་ཏེ་ཁྱོད་རྣམས་བདག་དང་བྲལ་ནས། བདག་གིས་ཁྱོད་རྣམས་ཀྱི་མདུན་དུ་བཞག་པའི་སྒྲིག་ཁྲིམས་དང་བཀའ་རྒྱ་རྣམས་སྤངས་ཏེ། ཕར་སོང་ནས་ལྷ་གཞན་དག་ལ་ཞབས་ཕྱི་བྱས་ཏེ་ཕྱག་བཙལ་ན།
2CH 7:20 བདག་གིས་ཡེས་ར་ཨེལ་པ་རྣམས་ལ་གནང་བའི་ཡུལ་ལས་ཁོ་ཚོ་རྩ་ནས་འདོན་པར་མ་ཟད། བདག་གིས་རང་གི་མིང་གི་ཕྱིར་དམ་པར་བྱས་པའི་མཆོད་ཁང་འདི་ཡང་རང་གི་མིག་མདུན་ནས་དོར་ཏེ། མཆོད་ཁང་འདི་ནི་མི་ཀུན་གྱི་ཁྲོད་དུ་གད་མོའི་གནས་དང་འཕྱ་སྨོད་བྱེད་ཡུལ་དུ་བསྒྱུར་ངེས་ཡིན།
2CH 7:21 མཆོད་ཁང་འདི་ནི་གཟི་བརྗིད་ལྡན་པ་ཞིག་ཡིན་ནའང་། མ་འོངས་པ་ན་འདིར་བརྒྱུད་ནས་འགྲོ་བའི་མི་རྣམས་ཧ་ལས་ཏེ་འདི་ལྟར། དཀོན་མཆོག་ཡ་ཝཱེས་ཡུལ་ཁམས་འདི་དང་མཆོད་ཁང་འདི་ལ་འདི་བཞིན་མཛད་དོན་ཅི་ཡིན་ནམ་ཞེས་སྨྲ་བ་དང་།
2CH 7:22 མི་རྣམས་ཀྱིས་དེའི་ལན་དུ། ཡུལ་འདིའི་མི་རྣམས་ཀྱིས་རང་གི་ཕ་མེས་ཀྱི་དཀོན་མཆོག་ཡ་ཝཱེ་སྟེ། ཁོ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་འོང་མཁན་དཀོན་མཆོག་སྤངས་ནས། ལྷ་གཞན་དག་ལ་བརྟེན་ཞིང་དེ་དག་ལ་ཕྱག་བཙལ་ཏེ་ཞབས་ཕྱི་བྱས་པས། དཀོན་མཆོག་ཡ་ཝཱེས་དེ་རྣམས་ཀྱི་སྟེང་དུ་ཆག་སྒོ་འདི་ཐམས་ཅད་ཕབ་པ་ཡིན་ཞེས་སྨྲ་བར་འགྱུར་ཞེས་གསུངས་སོ། །
2CH 8:1 སོ་ལོ་མོན་གྱིས་བགྲང་བྱ་ཉི་ཤུའི་རིང་ལ་དཀོན་མཆོག་ཡ་ཝཱེའི་མཆོད་ཁང་དང་རང་གི་ཕོ་བྲང་བཞེངས་ཟིན་པའི་མཐར།
2CH 8:2 སོ་ལོ་མོན་གྱིས་ཧི་རཱམ་བྱ་བས་ཁོང་ལ་ཕུལ་བའི་གྲོང་ཁྱེར་རྣམས་བསྐྱར་འཛུགས་བྱས་ནས། ཡེས་ར་ཨེལ་པ་རྣམས་དེ་རུ་གནས་སུ་བཅུག
2CH 8:3 དེ་ནས་སོ་ལོ་མོན་ནི་ཧ་མཱད་ཙོ་བཱ་རུ་སོང་ནས་ས་དེ་བླངས་པ་དང་།
2CH 8:4 ཡང་དབེན་སྟོང་གི་ཐད་མོར་དང་། ཁོང་གིས་ཧ་མཱད་དུ་བསྐྲུན་པའི་བང་མཛོད་ཀྱི་གྲོང་ཁྱེར་ཐམས་ཅད་བརྩིགས།
2CH 8:5 ཡང་ཁོང་གིས་པེད་ཧོ་རོན་གོང་མ་དང་པེད་ཧོ་རོན་ཞོལ་མ་གཉིས་ཀ་བརྩིགས་ནས་དེ་རྣམས་ལྕགས་རི་དང་རྒྱ་སྒོ་དང་། སྒོ་གཏན་བཅས་དང་ལྡན་པའི་འགོག་སྲུང་གྲོང་ཁྱེར་དུ་གྱུར་པ་ཡིན།
2CH 8:6 ཡང་པཱ་ཨ་ལད་དང་སོ་ལོ་མོན་ལ་གཏོགས་པའི་བང་མཛོད་ཀྱི་གྲོང་ཁྱེར་རྣམས་དང་། ཤིང་རྟ་འཇོག་སའི་གྲོང་ཁྱེར་རྣམས་དང་། སྐྱ་དམག་བཅའ་སྡོད་བྱེད་སའི་གྲོང་ཁྱེར་རྣམས་དང་། སོ་ལོ་མོན་གྱིས་ཡེ་རུ་སཱ་ལེམ་དང་། ལེ་པཱ་ནོན་དང་། རང་གི་དབང་འོག་གི་ཡུལ་ཀུན་ནས་གང་དང་གང་བརྩིག་འདོད་པ་ཐམས་ཅད་བརྩིགས་པའོ། །
2CH 8:7 ཡེས་ར་ཨེལ་པ་མིན་པའི་ཧེད་པ་དང་། ཨེ་མོར་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ལས་ལུས་པའི་མི་རྣམས་ལ་མཚོན་ན།
2CH 8:8 དེ་དག་གི་བུ་རྒྱུད་རྣམས་སྔར་བཞིན་ཡུལ་དེར་ལུས་ཤིང་། ཡེས་ར་ཨེལ་པ་རྣམས་ཀྱིས་དེ་རྣམས་རྩ་མེད་དུ་མ་བཏང་ངོ་། །སོ་ལོ་མོན་གྱིས་དེ་རྣམས་བསྡུས་ནས་དེ་རིང་ཉིན་མོའི་བར་དུ་སྡུག་ལས་ཀྱི་གཡོག་ལ་བཀོལ་བ་ཡིན་ནོ། །
2CH 8:9 སོ་ལོ་མོན་གྱིས་ཡེས་ར་ཨེལ་པ་རྣམས་འབའ་ཞིག་རང་གི་ལས་ཀའི་ཕྱིར་དུ་གཡོག་ལ་མ་བཀོལ་བར། དེ་རྣམས་ཁོང་གི་དམག་མི་དང་། དམག་དཔོན་དང་། ཤིང་རྟ་དང་སྐྱ་དམག་གི་འགོ་དཔོན་དུ་བསྐོས།
2CH 8:10 རྒྱལ་པོ་སོ་ལོ་མོན་ལ་ལས་བཟོ་པ་རྣམས་ལ་ལྟ་སྐུལ་བྱེད་མཁན་འགོ་དཔོན་ཉིས་བརྒྱ་ལྔ་བཅུ་ཡོད་པ་ཡིན།
2CH 8:11 སོ་ལོ་མོན་གྱིས་ཕཱར་ཨོལ་གྱི་སྲས་མོ་དེ་ནི་དཱ་བིད་ཀྱི་གྲོང་ཁྱེར་ནས་བཏོན་ཏེ། མོའི་ཆེད་དུ་བརྩིགས་པའི་ཕོ་བྲང་གི་ནང་དུ་ཁྲིད། གང་ལ་ཞེ་ན། སོ་ལོ་མོན་ན་རེ། ངའི་ཆུང་མ་ནི་ཡེས་ར་ཨེལ་གྱི་རྒྱལ་པོ་དཱ་བིད་ཀྱི་ཕོ་བྲང་དུ་སྡོད་མི་རུང་སྟེ། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་སླེབས་པའི་གནས་དེ་ནི་དམ་པ་ཡིན་པས་སོ་ཞེས་སྨྲས་སོ། །
2CH 8:12 སྐབས་དེར། སོ་ལོ་མོན་གྱིས་བར་ཁྱམས་ཀྱི་མདུན་དུ་བཞེངས་པའི་དཀོན་མཆོག་ཡ་ཝཱེའི་མཆོད་ཁྲིའི་སྟེང་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པ་རྣམས་ཕུལ་ཏེ།
2CH 8:13 ཡང་མོ་ཤེའི་བསྒོས་པ་བཞིན་དུ་ངལ་གསོ་བའི་ཉིན་དང་། ཚེས་གཅིག་དང་། ལོ་རེའི་དམིགས་བསལ་གྱི་དུས་ཆེན་གསུམ་སྟེ། སྐྱུར་མེད་བག་ལེབ་ཀྱི་དུས་ཆེན་དང་། བདུན་ཕྲག་རྣམས་ཀྱི་དུས་ཆེན་དང་། སྤྱིལ་བུའི་དུས་ཆེན་བཅས་ལ་ཉིན་རེར་འབུལ་འོས་པའི་མཆོད་པ་ཕུལ་ཏོ། །
2CH 8:14 ཡང་ཁོང་གིས་ཡབ་དཱ་བིད་ཀྱིས་གཏན་ལ་ཁེལ་བ་བཞིན་དུ། མཆོད་དཔོན་རྣམས་ལ་ཞབས་ཏོག་སྒྲུབ་པའི་ལས་རེས་མཛད་པ་དང་། ལེ་ཝི་པ་རྣམས་མངགས་ནས་རང་རང་གི་ལས་འགན་སྒྲུབ་པ་དང་ཡ་ཝཱེ་ལ་བསྟོད་བསྔགས་བརྗོད་ཅིང་། མཆོད་དཔོན་དག་གི་མདུན་དུ་ཉིན་རེར་བྱེད་དགོས་པའི་ལས་ཁག་བཞིན་ཞབས་ཏོག་སྒྲུབ་ཏུ་བཅུག ཡང་སྒོ་སྲུང་རྣམས་མངགས་ནས་རང་རང་གི་ལས་རེས་བཞིན་དུ་རྒྱ་སྒོ་རེ་རེ་སྲུང་བར་བཅུག གང་ལ་ཞེ་ན། དེ་ནི་དཀོན་མཆོག་གི་སྐྱེས་བུ་དཱ་བིད་ཀྱིས་བསྩལ་བའི་བཀའ་ཡིན་པས་སོ། །
2CH 8:15 རྒྱལ་པོས་མཆོད་དཔོན་དང་ལེ་ཝི་པ་རྣམས་ལ་བསྒོས་པའི་ལས་དོན་གང་དང་གང་ཡིན་ཡང་། དཀོར་མཛོད་དང་འབྲེལ་བའི་ལས་དོན་ཡིན་ནའང་ཁོ་རྣམས་བཀའ་ལས་མ་གཡོལ་ཏོ། །
2CH 8:16 དེ་ལྟར་དཀོན་མཆོག་ཡ་ཝཱེའི་མཆོད་ཁང་གི་རྨང་གཞི་བཏིངས་པའི་ཉིན་ནས་དེ་འགྲུབ་པའི་བར་དུ། སོ་ལོ་མོན་གྱི་བཟོ་ལས་མཐའ་དག་བདེ་བླག་ངང་བྱས་པས། དཀོན་མཆོག་ཡ་ཝཱེའི་མཆོད་ཁང་ཡོངས་སུ་འགྲུབ་པའོ། །
2CH 8:17 དེ་ནས་སོ་ལོ་མོན་ནི་ཨེ་དོམ་ཡུལ་དུ་རྒྱ་མཚོའི་ཉེ་འགྲམ་ལ་ཡོད་པའི་ཨེ་ཙི་ཡོན་གེ་བེར་དང་ཨེ་ལོད་དུ་ཕྱིན་ཅིང་།
2CH 8:18 ཧི་རཱམ་གྱིས་རང་གི་བློན་འཁོར་མངགས་ནས་ཁོང་ལ་གྲུ་གཟིངས་དང་མཚོ་འགྲུལ་ལ་གོམས་པའི་ཞབས་ཕྱི་རྣམས་བརྫངས་ནས། དེ་དག་སོ་ལོ་མོན་གྱི་ཞབས་ཕྱི་དང་མཉམ་དུ་ཨོ་ཕིར་ལ་སོང་སྟེ། དེར་གསེར་གྱི་རྡོ་ཚད་བཞི་བརྒྱ་ལྔ་བཅུ་ཐོབ་པ་རྒྱལ་པོ་སོ་ལོ་མོན་གྱི་དྲུང་དུ་དྲངས་སོ། །
2CH 9:1 དེ་ནས་ཤེ་བཱ་ཡི་རྒྱལ་མོས་སོ་ལོ་མོན་གྱི་སྙན་གྲགས་ཐོས་ནས། དཀའ་གནད་ཀྱིས་སོ་ལོ་མོན་ལ་ཚོད་བགམ་བྱེད་དགོས་བསམས་ནས་ཡེ་རུ་སཱ་ལེམ་དུ་འོངས། མོར་རྗེས་འབྲང་མང་པོ་ཡོད་པ་དང་། ཡང་བསུང་རྫས་དང་། གསེར་མང་པོ་དང་། རིན་པོ་ཆེ་རྣམས་རྔ་མོང་ལ་བཀལ་ནས་འོངས་པ་དང་། མོ་རང་སོ་ལོ་མོན་ཡོད་སར་སླེབས་ཏེ་སེམས་སུ་ཅི་ཡོད་པ་ཐམས་ཅད་ཁོང་ལ་སྨྲས།
2CH 9:2 སོ་ལོ་མོན་གྱིས་མོའི་དྲི་བ་ཐམས་ཅད་ལ་ལན་བཏབ་ཅིང་། ཁོང་གིས་དོན་མི་རྟོགས་པ་དང་ལན་འདེབས་མི་ནུས་པ་གཅིག་ཀྱང་མེད་དོ། །
2CH 9:3 ཤེ་བཱ་ཡི་རྒྱལ་མོས་སོ་ལོ་མོན་གྱི་ཤེས་རབ་དང་ཁོང་གིས་བཞེངས་པའི་ཕོ་བྲང་དང་།
2CH 9:4 ཁོང་གི་གསོལ་ལྕོག་སྟེང་གི་ཁ་ཟས་དང་། བློན་པོ་རྣམས་ཀྱི་བཞུགས་གྲལ་དང་། ཞབས་ཕྱི་རྣམས་ཀྱི་ཞབས་ཏོག་དང་དེ་དག་གི་གྱོན་གོས་དང་། ཆང་གཉེར་བློན་ཆེན་དང་དེ་དག་གི་གྱོན་གོས་དང་། སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་དུ་ཕུལ་བའི་སྦྱིན་སྲེག་བཅས་མཐོང་བ་དང་ཤིན་ཏུ་ངོ་མཚར་བར་གྱུར།
2CH 9:5 དེ་ནས་མོས་རྒྱལ་པོ་ལ། ངས་རང་གི་ཡུལ་དུ་ཐོས་པའི་ཁྱེད་ཀྱི་མཛད་པ་དང་ཁྱེད་ཀྱི་ཤེས་རབ་ཐད་ཀྱི་གཏམ་ནི་ཐམས་ཅད་བདེན་འདུག
2CH 9:6 ང་རང་སྔོན་ཆད་གཏམ་དེ་དག་ལ་ཡིད་མ་ཆེས། འོན་ཀྱང་ང་འདིར་སླེབས་ནས་དངོས་སུ་མཐོང་བས། ད་གཟོད་ཁྱེད་ཀྱི་ཤེས་རབ་རླབས་ཆེ་ཞིང་མི་ཡིས་སྨྲས་པ་ནི་དེའི་ཕྱེད་ཀ་ཙམ་ལ་ཡང་སླེབས་མེད་པ་རྟོགས་བྱུང་། ཁྱེད་རང་མཇལ་བ་ནི་ཁྱེད་ཀྱི་སྙན་གྲགས་ཐོས་པ་ལས་དངོས་གནས་ལྷག་པའོ། །
2CH 9:7 ཁྱེད་ཀྱི་འཁོར་གཡོག་རྣམས་བདེའོ། །ཁྱེད་ཀྱི་བློན་པོ་རྣམས་བདེའོ། །ཅི་ལ་ཞེ་ན། ཁོ་རྣམས་དུས་རྒྱུན་དུ་ཁྱེད་ཀྱི་དྲུང་དུ་ལངས་བསྡད་ནས་ཁྱེད་ཀྱི་ཤེས་རབ་ལ་མཉན་ཐུབ་པའོ། །
2CH 9:8 ཁྱེད་ཀྱི་དཀོན་མཆོག་ཡ་ཝཱེ་ནི་བསྟོད་བསྔགས་བརྗོད་འོས་པ་ཡིན་ཏེ། ཁོང་ཁྱེད་ལ་མཉེས་པས་ཁྱེད་རང་ཁོང་གི་རྒྱལ་ཁྲིར་བཀོད་ཅིང་། ཁྱེད་ནི་ཡ་ཝཱེ་སྟེ་ཁྱེད་ཀྱི་དཀོན་མཆོག་གི་ཕྱིར་དུ་རྒྱལ་པོར་བསྐོས། ཁྱེད་ཀྱི་དཀོན་མཆོག་གིས་ཡེས་ར་ཨེལ་པ་རྣམས་ལ་བྱམས་ཤིང་ཁོ་རྣམས་རྒྱུན་ནས་རྒྱུན་དུ་བརྟན་པོར་མཛད་པའི་ཕྱིར་དུ། དྲང་གཞག་དང་དྲང་བདེན་སྐྱོང་བར་ཁྱེད་རང་དེ་དག་གི་རྒྱལ་པོར་བསྐོས་པ་ཡིན་ཞེས་བརྗོད་ནས།
2CH 9:9 ཤེ་བཱ་ཡི་རྒྱལ་མོས་རྒྱལ་པོ་སོ་ལོ་མོན་ལ་གསེར་རྡོ་ཚད་བརྒྱ་དང་ཉི་ཤུ་དང་། བྲོ་སྨན་མོད་པོ་དང་རིན་པོ་ཆེ་མང་པོ་ཕུལ། ཤེ་བཱ་ཡི་རྒྱལ་མོས་རྒྱལ་པོ་སོ་ལོ་མོན་ལ་ཕུལ་བའི་བྲོ་སྨན་སྤུས་ལེགས་དེ་འདྲ་སྔར་ཡོད་མ་མྱོང་བ་ཞིག་ཡིན་ནོ། །
2CH 9:10 ཧི་རཱམ་དང་སོ་ལོ་མོན་གྱི་ཞབས་ཕྱི་དག་གིས་ཨོ་ཕིར་ནས་གསེར་དང་། ཙན་དན་གྱི་གདུང་མ་དང་། རིན་པོ་ཆེ་རྣམས་དྲངས་འོངས་པ་དང་།
2CH 9:11 རྒྱལ་པོས་ཙན་དན་ཤིང་གིས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་གི་ཕྱིར་དུ་ཐེམ་སྐས་ལས་པ་དང་། ཡང་མགུར་ལེན་མཁན་རྣམས་ཀྱི་ཕྱིར་པི་ཝང་དང་རྒྱུད་མངས་བཟོ་རུ་བཅུག་སྟེ། དེ་ལྟ་བུ་རྣམས་སྔར་ཡ་ཧུ་དཱ་ཡུལ་དུ་མཐོང་མྱོང་བ་མེད་དོ། །
2CH 9:12 རྒྱལ་པོ་སོ་ལོ་མོན་གྱིས་ཤེ་བཱ་ཡི་རྒྱལ་མོས་ཁོང་ལ་ཅི་ཕུལ་བ་བཞིན་དུ་ཕྱིར་ཕྱག་རྟེན་ཕུལ་ཞིང་། ཡང་དེའི་ཁར་རྒྱལ་མོའི་འདོད་པ་བཞིན་ཅི་དང་ཅི་ཞུས་པ་ཐམས་ཅད་མོ་ལ་ཕུལ་ནས། རྒྱལ་མོ་འཁོར་དང་བཅས་པ་ཕྱིར་རང་ཡུལ་དུ་ལོག་གོ །
2CH 9:13 ཡང་རྒྱལ་པོ་སོ་ལོ་མོན་ལ་ལོ་རེར་ཐོབ་པའི་གསེར་གྱི་ལྗིད་ཚད་ནི་རྡོ་ཚད་དྲུག་བརྒྱ་དང་དྲུག་ཅུ་རེ་དྲུག་ཡིན་ལ།
2CH 9:14 གཞན་ཡང་ཚོང་པ་དང་ཚོང་འགྲིམ་པ་དག་གིས་ཕུལ་བ་དང་། ཨ་རབ་ཡུལ་གྱི་རྒྱལ་པོ་རྣམས་དང་རང་རྒྱལ་གྱི་སྤྱི་དཔོན་རྣམས་ཀྱིས་ཀྱང་སོ་ལོ་མོན་ལ་གསེར་དངུལ་ཕུལ་བ་ཡིན།
2CH 9:15 རྒྱལ་པོ་སོ་ལོ་མོན་གྱིས་གསེར་བརྡུངས་མས་ཕུབ་ཆེན་ཉིས་བརྒྱ་བཟོས་ཤིང་། ཕུབ་ཆེན་རེ་ལ་གསེར་སྲང་དྲུག་བརྒྱ་རེ་སོང་།
2CH 9:16 ཡང་གསེར་བརྡུངས་མས་ཕུབ་ཆུང་སུམ་བརྒྱ་བཟོས་ཤིང་། ཕུབ་ཆུང་རེ་ལ་གསེར་སྲང་སུམ་བརྒྱ་རེ་སོང་། རྒྱལ་པོས་ཕུབ་དེ་དག་ནི་ལེ་པཱ་ནོན་གླིང་གའི་ཕོ་བྲང་དུ་བཞག
2CH 9:17 རྒྱལ་པོས་བ་སོས་བཞུགས་ཁྲི་ཆེན་པོ་ཞིག་བཟོས་ནས་དེ་གསེར་བཙོ་མས་གཡོགས།
2CH 9:18 བཞུགས་ཁྲི་དེ་ལ་ཐེམ་སྐས་དྲུག་ཡོད་ཅིང་། གསེར་གྱི་ཞབས་སྟེགས་ཤིག་ཁྲི་ལ་སྦྱར་ཏེ་ཡོད། ཡང་བཞུགས་སའི་ཕྱོགས་གཉིས་སུ་ལག་སྐྱོར་ཡོད་ལ། ལག་སྐྱོར་རེའི་འགྲམ་དུ་སེང་གེ་རེ་ལངས་ཡོད་དོ། །
2CH 9:19 ཡང་ཐེམ་སྐས་རིམ་པ་དྲུག་པོའི་གཡས་ཕྱོགས་སུ་སེང་གེ་དྲུག་དང་། གཡོན་ཕྱོགས་སུ་སེང་གེ་དྲུག་བཅས་སེང་གེ་བཅུ་གཉིས་ཡོད་པ་ཡིན། དེ་འདྲ་བ་ཞིག་རྒྱལ་ཁམས་གང་དུ་ཡང་མ་བཟོས་སོ། །
2CH 9:20 ཡང་རྒྱལ་པོ་སོ་ལོ་མོན་གྱི་སྐྱོགས་ཐམས་ཅད་གསེར་གྱིས་བཟོས་པ་དང་། ལེ་པཱ་ནོན་གླིང་གའི་ཕོ་བྲང་ནང་གི་ཡོ་བྱད་མཐའ་དག་གསེར་བཙོ་མས་བཟོས་པ་ཡིན། སོ་ལོ་མོན་གྱི་སྐུ་རིང་དུ་དངུལ་ལ་རིན་ཐང་ཅི་ཡང་མེད་དོ། །
2CH 9:21 གང་ལ་ཞེ་ན། རྒྱལ་པོའི་གྲུ་གཟིངས་རྣམས་ཧི་རཱམ་གྱི་ཞབས་ཕྱི་དག་དང་ལྷན་དུ་ཐཱར་ཞིས་ལ་འགྲོ་བ་དང་། ཐཱར་ཞིས་ལ་ཕྱིན་པའི་གྲུ་གཟིངས་རྣམས་ལོ་གསུམ་རེའི་ནང་དུ་གསེར་དང་། དངུལ་དང་། བ་སོ་དང་། སྤྲེའུ་དང་། རྨ་བྱ་བཅས་བཀལ་ནས་ཐེངས་གཅིག་ལ་ཕྱིར་སླེབས་པ་ཡིན།
2CH 9:22 རྒྱལ་པོ་སོ་ལོ་མོན་གྱི་འབྱོར་བ་དང་ཤེས་རབ་ནི་ས་གཞིའི་རྒྱལ་པོ་ཐམས་ཅད་ལས་བརྒལ་བ་ཡིན།
2CH 9:23 དཀོན་མཆོག་གིས་སོ་ལོ་མོན་ལ་གནང་བའི་ཤེས་རབ་ཐོས་པའི་ཕྱིར་དུ། ས་གཞིའི་རྒྱལ་པོ་ཐམས་ཅད་ཁོང་གི་ཞལ་མཇལ་དུ་བསྙེགས་པ་ཡིན།
2CH 9:24 དེ་དག་རེ་རེས་ཁྱེར་འོངས་པའི་ཕྱག་རྟེན་ལ་དངུལ་ཆས་དང་གསེར་ཆས། གྱོན་གོས། མཚོན་ཆ། བསུང་རྫས། རྟ། དྲེལ་བཅས་ཡོད་ཅིང་། ལོ་ནས་ལོ་ལ་གྲངས་མང་པོ་ཡོད་པ་ཡིན།
2CH 9:25 སོ་ལོ་མོན་ལ་རྟ་ར་བཞི་སྟོང་གི་རྟ་དང་ཤིང་རྟ་ཡོད་པ་དང་། ད་དུང་བཞོན་རྟ་ཆིག་ཁྲི་ཉིས་སྟོང་ཡོད་ལ། ཁོང་གིས་དེ་རྣམས་ཤིང་རྟའི་གྲོང་ཁྱེར་དང་ཡེ་རུ་སཱ་ལེམ་དུ་རྒྱལ་པོ་བཞུགས་སར་བཞག
2CH 9:26 སོ་ལོ་མོན་གྱིས་ཕི་རཱད་ཆུ་བོ་ནས་ཕེ་ལེ་ཤེད་མི་རིགས་ཀྱི་ཡུལ་དང་། དེ་ནས་ཨེ་ཅིབ་ཡུལ་གྱི་ས་མཚམས་བར་དུ་རྒྱལ་པོ་ཐམས་ཅད་ལ་དབང་སྒྱུར་ཏོ། །
2CH 9:27 རྒྱལ་པོས་ཡེ་རུ་སཱ་ལེམ་ལ་དངུལ་ནི་རྡོ་བཞིན་དང་། ཐང་ཤིང་ནི་རི་ཀླུང་དུ་སྐྱེས་པའི་འོ་སེ་ཤིང་ལྟར་མོད་པར་མཛད།
2CH 9:28 མི་རྣམས་ཀྱིས་ཨེ་ཅིབ་དང་ཡུལ་སོ་སོ་ནས་སོ་ལོ་མོན་གྱི་ཕྱིར་རྟ་རྣམས་དྲངས་པའོ། །
2CH 9:29 སོ་ལོ་མོན་གྱི་མཛད་རྗེས་གཞན་རྣམས་འགོ་ནས་མཇུག་བར་དུ་ལུང་སྟོན་པ་ནཱ་ཐན་གྱི་གསུང་འབུམ་དང་། ཞི་ལོ་པ་ཨ་ཧི་ཡཱ་ཡི་ལུང་བསྟན་དང་། མངོན་ཤེས་པ་ཨིད་དོ་ཡིས་ནེ་བཱད་ཀྱི་བུ་ཡེ་རོབ་ཨམ་གྱི་སྐོར་གླེང་བའི་མངོན་པའི་མདོ་བཅས་སུ་བཀོད་ཡོད་པ་མ་ཡིན་ནམ།
2CH 9:30 སོ་ལོ་མོན་གྱིས་ཡེ་རུ་སཱ་ལེམ་དུ་ཡེས་ར་ཨེལ་ཡོངས་ལ་ལོ་བཞི་བཅུའི་རིང་རྒྱལ་སྲིད་བསྐྱངས།
2CH 9:31 སོ་ལོ་མོན་ནི་ཉིད་ཀྱི་ཕ་མེས་དང་མཉམ་དུ་གཟིམས་ནས། ཁོང་གི་ཡབ་དཱ་བིད་ཀྱི་གྲོང་ཁྱེར་དུ་དུར་ལ་སྦས། དེ་ནས་ཁོང་གི་སྲས་རེ་ཧབ་ཨམ་ཁོང་གི་ཚབ་ཏུ་རྒྱལ་པོར་གྱུར་ཏོ། །
2CH 10:1 དེ་ནས་རེ་ཧབ་ཨམ་ནི་སི་ཀེམ་དུ་ཕྱིན། ཅིའི་ཕྱིར་ཞེ་ན། ཡེས་ར་ཨེལ་པ་ཐམས་ཅད་ཁོང་རྒྱལ་པོར་བསྐོ་བའི་ཆེད་དུ་སི་ཀེམ་དུ་ཕྱིན་པ་རེད།
2CH 10:2 སྐབས་དེར་ནེ་བཱད་ཀྱི་བུ་ཡེ་རོབ་ཨམ་ནི་སྔར་སོ་ལོ་མོན་གྱི་དྲུང་ནས་ཨེ་ཅིབ་ཡུལ་དུ་བྲོས་སོང་སྟེ་གནས་དེར་བསྡད་ཡོད་པ་དང་། ཁོས་འཕྲིན་དེ་ཐོས་པ་དང་ཨེ་ཅིབ་ཡུལ་ནས་ཕྱིར་ལོག
2CH 10:3 དེ་ནས་ཡེས་ར་ཨེལ་པས་མི་མངགས་ཏེ་ཁོ་རང་བོས་པ་ལ། ཁོ་དང་ཡེས་ར་ཨེལ་པ་ཐམས་ཅད་རེ་ཧབ་ཨམ་གྱི་དྲུང་དུ་འོངས་ནས་ཁོང་ལ་ན་རེ།
2CH 10:4 ཁྱེད་ཀྱི་ཡབ་ཀྱིས་ངེད་ཅག་ལ་གཉའ་ཤིང་ཤིན་ཏུ་ལྕི་མོ་བཀལ་བྱུང་། ད་ལྟ་ཁྱེད་ཀྱིས་ཉིད་ཀྱི་ཡབ་ཀྱིས་ངེད་ཅག་ལ་བཀལ་བའི་ངལ་ལས་དང་གཉའ་ཤིང་ལྕི་མོ་ཇེ་ཡང་དུ་གཏོང་བར་མཛོད་ཅིག དེ་ནས་ངེད་ཅག་གིས་ཁྱེད་ལ་ཞབས་ཕྱི་བསྒྲུབ་པར་བྱ་ཞེས་ཞུས་པ་དང་།
2CH 10:5 རེ་ཧབ་ཨམ་གྱིས་དེ་དག་ལ་ན་རེ། ཉིན་གསུམ་འགོར་རྗེས་ངའི་རྩར་ཕྱིར་ལོག་ཤོག་ཅེས་སྨྲས་པས། མི་རྣམས་སོང་ངོ་། །
2CH 10:6 རྒྱལ་པོ་རེ་ཧབ་ཨམ་གྱིས་རང་གི་ཡབ་སོ་ལོ་མོན་བཞུགས་པའི་དུས་སུ་ཁོང་གི་དྲུང་དུ་ཞབས་ཕྱི་སྒྲུབ་མཁན་རྒན་པ་ཚོ་དང་བགྲོས་ནས་དེ་དག་ལ་ན་རེ། ངས་མི་རྣམས་ལ་ལན་འདེབས་པར་ཁྱེད་རྣམ་པར་དགོངས་འཆར་ཅི་ཡོད་ཅེས་དྲིས་པའི་ལན་དུ།
2CH 10:7 དེ་དག་གིས་ཁོང་ལ་འདི་ལྟར། གལ་ཏེ་རྒྱལ་པོ་ཁྱེད་ཀྱིས་མི་འདི་རྣམས་དྲིན་གྱིས་བསྐྱངས་ཏེ་ཁོ་རྣམས་དགའ་རུ་བཅུག་ནས་གཏམ་བཟང་པོ་སྨྲས་ན། དེ་ཚོ་རྒྱུན་ནས་རྒྱུན་དུ་ཁྱེད་ཀྱི་ཞབས་ཕྱི་བྱེད་པར་འགྱུར་ཞེས་ཞུས་མོད།
2CH 10:8 འོན་ཀྱང་རྒྱལ་པོས་རྒན་པ་ཚོའི་བསམ་འཆར་དེ་དང་དུ་མ་བླངས་པར། ཁོང་དང་མཉམ་དུ་ནར་སོན་ཞིང་ཁོང་གི་དྲུང་དུ་ཞབས་ཕྱི་སྒྲུབ་པའི་གཞོན་ནུ་དག་དང་བགྲོས་ནས།
2CH 10:9 དེ་དག་ལ་ན་རེ། མི་འདི་རྣམས་ཀྱིས་བདག་ལ་འདི་ལྟར། ཁྱེད་ཀྱི་ཡབ་ཀྱིས་ངེད་ཅག་ལ་བཀལ་བའི་གཉའ་ཤིང་ལྕི་མོ་དེ་ཇེ་ཡང་དུ་གཏོང་བར་མཛོད་ཅིག་ཅེས་ཞུས་པས། ངས་མི་འདི་རྣམས་ལ་ལན་འདེབས་པར་ཁྱོད་རྣམས་ལ་བསམ་ཚུལ་ཅི་ཡོད་ཅེས་དྲིས་པར།
2CH 10:10 ཁོང་དང་མཉམ་དུ་ནར་སོན་པའི་གཞོན་ནུ་དག་གིས་ཁོང་ལ་འདི་ལྟར། མི་འདི་རྣམས་ཀྱིས་རྒྱལ་པོ་ཁྱེད་ལ། ཁྱེད་ཀྱི་ཡབ་ཀྱིས་ངེད་ཅག་ལ་གཉའ་ཤིང་ཤིན་ཏུ་ལྕི་མོ་བཀལ་བྱུང་། ད་ལྟ་ཁྱེད་ཀྱིས་དེ་ཇེ་ཡང་དུ་གཏོང་བར་མཛོད་ཅེས་ཞུས་པར། ཁྱེད་ཀྱིས་ཁོ་རྣམས་ལ་འདི་ལྟར། ངའི་ཡབ་ཀྱི་རྐེད་པ་ལས་ངའི་མཐེབ་ཆུང་སྦོམ་པོ་ཡིན་པས།
2CH 10:11 ངའི་ཡབ་ཀྱིས་ཁྱོད་ཚོར་གཉའ་ཤིང་ལྕི་མོ་བཀལ་བ་དང་། བདག་གིས་ཁྱོད་ཚོར་དེ་ལས་ལྕི་བའི་གཉའ་ཤིང་འགེལ་ངེས། ངའི་ཡབ་ཀྱིས་ཁྱོད་ཚོར་རྟ་ལྕག་གིས་གཞུས་པ་དང་། ངས་ཁྱོད་ཚོར་སྡིག་པ་ར་ཙ་ཅན་གྱི་རྟ་ལྕག་གིས་གཞུ་བར་བྱ་ཞེས་ལན་ཐོབས་ཤིག་ཅེས་སྨྲས་སོ། །
2CH 10:12 ཡང་རེ་ཧབ་ཨམ་གྱིས་ཉིན་གསུམ་པར་ངའི་རྩར་ཕྱིར་ལོག་ཤོག་ཅེས་བསྒོས་པ་ལྟར་དུ། ཡེ་རོབ་ཨམ་དང་མི་ཐམས་ཅད་ཉིན་གསུམ་པར་རྒྱལ་པོའི་དྲུང་དུ་འོངས་པ་ལ།
2CH 10:13 རྒྱལ་པོ་རེ་ཧབ་ཨམ་གྱིས་དེ་དག་ལ་ལན་རྩུབ་པོ་མཛད་དེ། ཁོང་གིས་རྒན་པ་དག་གི་གཏམ་ལ་མ་མཉན་པར།
2CH 10:14 གཞོན་ནུ་དག་གི་གྲོས་བཞིན་དུ་དེ་དག་ལ་ན་རེ། ངས་ཡབ་ཀྱིས་ཁྱོད་ཚོར་གཉའ་ཤིང་ལྕི་མོ་བཀལ་བ་དང་། བདག་གིས་ཁྱོད་ཚོར་དེ་ལས་ལྕི་བའི་གཉའ་ཤིང་འགེལ་ངེས། ངའི་ཡབ་ཀྱིས་ཁྱོད་ཚོར་རྟ་ལྕག་གིས་གཞུས་པ་དང་། ངས་ཁྱོད་ཚོར་སྡིག་པ་ར་ཙ་ཅན་གྱི་རྟ་ལྕག་གིས་གཞུ་བར་བྱ་ཞེས་སྨྲས་སོ། །
2CH 10:15 རྒྱལ་པོས་མི་རྣམས་ཀྱི་ཞུ་བར་མ་གསན་པ་སྟེ། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་ཞི་ལོ་པ་ཨ་ཧི་ཡཱའི་ངག་བརྒྱུད་ནས་ནེ་བཱད་ཀྱི་བུ་ཡེ་རོབ་ཨམ་ལ་གསུངས་པའི་བཀའ་དེ་འགྲུབ་པའི་ཕྱིར་དུ། དོན་དེ་ནི་དཀོན་མཆོག་ནས་བྱུང་བ་ཡིན་ནོ། །
2CH 10:16 དེར་ཡེས་ར་ཨེལ་པ་རྣམས་ཀྱིས་རྒྱལ་པོས་ཁོ་རྣམས་ཀྱི་ཞུ་བར་མི་གསན་པ་མཐོང་བས། རྒྱལ་པོ་ལ་ལན་བཟློགས་ཏེ་འདི་ལྟར། ངེད་རྣམས་ལ་དཱ་བིད་ལས་སྐལ་ཅི་ཡོད། ངེད་རྣམས་ལ་ཡེ་སེ་ཡི་བུ་ལས་ནོར་སྐལ་ཅི་ཡང་མེད། ཀྱེ་ཡེས་ར་ཨེལ་པ་རྣམས། རང་རང་གི་ཁྱིམ་དུ་ལོག་ཅིག ཀྱེ་དཱ་བིད་ལགས། ད་ནི་རང་གི་ཁྱིམ་ལ་བདག་སྐྱོང་གྱིས་ཤིག་ཅེས་སྨྲས་ནས་ཡེས་ར་ཨེལ་པ་ཐམས་ཅད་རང་རང་གི་ཁྱིམ་དུ་ལོག
2CH 10:17 རེ་ཧབ་ཨམ་ནི་སྔར་བཞིན་ཡ་ཧུ་དཱའི་གྲོང་ཁྱེར་དག་ཏུ་སྡོད་པའི་ཡེས་ར་ཨེལ་པ་རྣམས་ཀྱི་རྒྱལ་པོར་བསྡད།
2CH 10:18 ཡང་རེ་ཧབ་ཨམ་གྱིས་སྡུག་ལས་རྒྱག་པའི་བྲན་གཡོག་རྣམས་ལ་ལྟ་སྐུལ་བྱེད་པའི་ཧ་དོ་རམ་མངགས་ནས་སོང་བ་དང་། ཡེས་ར་ཨེལ་པ་རྣམས་ཀྱིས་དེ་རྡོ་རུབ་བཏང་ནས་བསད། དེར་རྒྱལ་པོ་རེ་ཧབ་ཨམ་ནི་རྟབ་རྟབ་པོར་ཤིང་རྟར་བསྡད་ནས་ཡེ་རུ་སཱ་ལེམ་དུ་བྲོས།
2CH 10:19 དེ་བཞིན་ཡེས་ར་ཨེལ་པ་རྣམས་ཀྱིས་དེ་རིང་གི་བར་དུ་དཱ་བིད་ཚང་ལ་ངོ་ལོག་བྱས་པའོ། །
2CH 11:1 དེ་ནས་རེ་ཧབ་ཨམ་ཕྱིར་ཡེ་རུ་སཱ་ལེམ་དུ་ལོག་ནས་ཡ་ཧུ་དཱ་དང་པེན་ཡཱ་མེན་གྱི་ཁྱིམ་རྒྱུད་བསྡུས་པ་སྟེ། བསྡོམས་པས་མི་ཆིག་འབུམ་བརྒྱད་ཁྲི་ཡོད་པ་ཐམས་ཅད་དམག་མི་དཔའ་རྩལ་ཅན་ཡིན་ལ། ཡེས་ར་ཨེལ་དང་འཐབ་ནས་རྒྱལ་སྲིད་ཕྱིར་བླངས་ཏེ་རང་ལ་འཐོབ་པའི་ཕྱིར་རོ། །
2CH 11:2 ཡིན་ཡང་དཀོན་མཆོག་གི་སྐྱེས་བུ་ཤེ་མ་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་ནས་འདི་སྐད་དུ།
2CH 11:3 ཁྱོད་སོང་ནས་སོ་ལོ་མོན་གྱི་སྲས་ཏེ་ཡ་ཧུ་དཱའི་རྒྱལ་པོ་རེ་ཧབ་ཨམ་དང་། ཡ་ཧུ་དཱ་དང་པེན་ཡཱ་མེན་དུ་སྡོད་པའི་ཡེས་ར་ཨེལ་པ་ཐམས་ཅད་ལ་འདི་ལྟར་སྨྲོས་ཤིག
2CH 11:4 ཡ་ཝཱེས་འདི་སྐད་དུ། ཁྱོད་ཚོ་ཡར་སོང་ནས་རང་གི་སྤུན་ཟླ་དང་དམག་རྒྱག་མི་རུང་། དོན་འདི་ནི་བདག་ལས་བྱུང་བ་ཡིན་པས། ཁྱོད་རྣམས་རང་རང་གི་ཁྱིམ་དུ་ལོག་ཅིག་གསུངས་ཞེས་སྨྲོས་ཤིག་ཅེས་གསུངས་པ་དང་། དེ་ཚོས་དཀོན་མཆོག་ཡ་ཝཱེའི་བཀའ་ལ་མཉན་ཏེ་ཡེ་རོབ་ཨམ་ལ་འཐབ་ཏུ་མ་སོང་ངོ་། །
2CH 11:5 རེ་ཧབ་ཨམ་ཁོང་ཉིད་ཡེ་རུ་སཱ་ལེམ་དུ་བཞུགས་ཤིང་ཡ་ཧུ་དཱ་ཡུལ་དུ་འགོག་སྲུང་གྲོང་ཁྱེར་མང་པོ་བརྩིགས་པ་སྟེ།
2CH 11:6 ཁོང་གིས་པེད་ལེ་ཧེམ་དང་ཨེ་ཏམ་དང་། ཐེ་ཀོ་ཨ་དང་།
2CH 11:7 པེད་ཚུར་དང་། སོ་ཀོ་དང་། ཨ་དུལ་ལཱམ་དང་།
2CH 11:8 གཱད་དང་། མཱ་རེ་ཤ་དང་། ཟིབ་དང་།
2CH 11:9 ཨ་དོ་རཱ་ཡིམ་དང་། ལཱ་ཀི་སི་དང་། ཨ་ཟེ་ཀཱ་དང་།
2CH 11:10 ཚོར་ཨ་དང་། ཨ་ཡཱ་ལོན་དང་། ཧེབ་རོན་བཅས་བརྩིགས་ཏེ། དེ་ཐམས་ཅད་ནི་ཡ་ཧུ་དཱ་དང་པེན་ཡཱ་མེན་གྱི་འགོག་སྲུང་གྲོང་ཁྱེར་ཡིན་ནོ། །
2CH 11:11 ཡང་རེ་ཧབ་ཨམ་གྱིས་འགོག་སྲུང་གྲོང་ཁྱེར་དེ་རྣམས་བརྟན་པོར་བྱས་ཤིང་། དེ་དག་གི་ནང་དུ་དམག་དཔོན་བཞག་པ་དང་། རྒྱགས་ཆས་དང་སྣུམ། རྒུན་ཆང་བཅས་གྲ་སྒྲིག་བྱས་པ་རེད།
2CH 11:12 གྲོང་ཁྱེར་སོ་སོའི་ནང་དུ་ཕུབ་ཆེན་དང་མདུང་གྲ་སྒྲིག་བྱས་ནས་གྲོང་ཁྱེར་རབ་ཏུ་བརྟན་པོར་བྱས། དེ་བཞིན་ཡ་ཧུ་དཱ་དང་པེན་ཡཱ་མེན་གཉིས་ལ་ཁོང་གིས་དབང་སྒྱུར་བའོ། །
2CH 11:13 ཡེས་ར་ཨེལ་ཡོངས་ཀྱི་མཆོད་དཔོན་དང་ལེ་ཝི་པ་རྣམས་ཡུལ་སོ་སོ་ནས་རེ་ཧབ་ཨམ་གྱི་ཕྱོགས་སུ་འོངས་པ་དང་།
2CH 11:14 ཡེ་རོབ་ཨམ་དང་དེའི་བུ་རྣམས་ཀྱིས་ལེ་ཝི་པ་རྣམས་ལ་དཀོན་མཆོག་ཡ་ཝཱེའི་དྲུང་དུ་མཆོད་དཔོན་གྱི་ཞབས་ཏོག་བྱེད་དུ་མ་བཅུག་པར་ཕྱིར་བཏོན་པས། དེ་དག་གིས་རང་གི་རྩྭ་ར་དང་ནོར་སྐལ་སྤངས་ཏེ་ཡ་ཧུ་དཱ་དང་ཡེ་རུ་སཱ་ལེམ་དུ་འོངས།
2CH 11:15 ཡེ་རོབ་ཨམ་གྱིས་མཐོ་གླིང་དང་། ར་ཕོའི་རྟེན་དང་། ཁོས་བཟོས་པའི་བ་ཕྲུག་རྣམས་ཀྱི་ཕྱིར་མཆོད་དཔོན་བཞག་པ་དང་།
2CH 11:16 ཡེས་ར་ཨེལ་གྱི་ཚོ་པ་ཁག་ལས་སེམས་བསམ་པས་ཡེས་ར་ཨེལ་གྱི་དཀོན་མཆོག་ཡ་ཝཱེ་བཙལ་འདོད་པ་རྣམས་ནི། ལེ་ཝི་པའི་རྗེས་སུ་འབྲངས་ནས་ཡེ་རུ་སཱ་ལེམ་དུ་ཡ་ཝཱེ་སྟེ་རང་གི་ཕ་མེས་ཀྱི་དཀོན་མཆོག་ལ་མཆོད་པ་འབུལ་དུ་འོངས།
2CH 11:17 དེ་བཞིན་ཁོ་རྣམས་ཀྱིས་ཡ་ཧུ་དཱའི་རྒྱལ་སྲིད་ཤུགས་ཆེ་རུ་བཏང་ཞིང་། སོ་ལོ་མོན་གྱི་སྲས་རེ་ཧབ་ཨམ་ལོ་གསུམ་གྱི་རིང་ལ་ཤིན་ཏུ་དར་བར་བྱས། ཅིའི་ཕྱིར་ཞེ་ན། ལོ་གསུམ་པོ་དེའི་རིང་ལ་ཁོ་རྣམས་དཱ་བིད་དང་སོ་ལོ་མོན་གྱི་ལམ་དུ་འབྲངས་སོ། །
2CH 11:18 རེ་ཧབ་ཨམ་གྱིས་དཱ་བིད་ཀྱི་སྲས་ཡེ་རི་མོད་ཀྱི་སྲས་མོ་མཱ་ཧ་ལད་བྱ་བ་ཁབ་ཏུ་བཞེས། ཡང་མོ་ནི་ཡེ་སེ་ཡི་སྲས་ཨེ་ལི་ཨབ་ཀྱི་སྲས་མོ་ཨ་བི་ཧ་ཡིལ་གྱི་སྲས་མོ་ཡིན་ནོ། །
2CH 11:19 མཱ་ཧ་ལད་ལས་རེ་ཧབ་ཨམ་ལ་སྲས་འགའ་ཞིག་འཁྲུངས་པ་ནི། ཡེ་ཨུ་སི་དང་། ཤེ་མར་ཡཱ་དང་། ཟཱ་ཧམ་བཅས་སོ། །
2CH 11:20 དེའི་རྗེས་སུ་རེ་ཧབ་ཨམ་གྱིས་ཡང་ཨབ་ཤ་ལོམ་གྱི་བུ་མོ་མ་ཨ་ཀཱ་བླངས་པ་དང་། དེ་ལས་ཁོང་ལ་སྲས་ཨ་བི་ཡཱ་དང་། ཨད་ཐ་ཨི་དང་། ཟི་ཟཱ་དང་། ཤེ་ལོ་མིད་བཅས་འཁྲུངས།
2CH 11:21 རེ་ཧབ་ཨམ་ལ་ཆུང་མ་བཅོ་བརྒྱད་དང་ཆུན་མ་དྲུག་ཅུ་ཡོད་དེ། དེ་རྣམས་ལས་སྲས་ཉེར་བརྒྱད་དང་སྲས་མོ་དྲུག་ཅུ་འཁྲུངས། ཁོང་གིས་ཨབ་ཤ་ལོམ་གྱི་སྲས་མོ་མ་ཨ་ཀཱ་ནི་ཆུང་མ་དང་ཆུན་མ་གཞན་རྣམས་ལས་གཅེས་སུ་བཟུང་པ་ཡིན།
2CH 11:22 རེ་ཧབ་ཨམ་གྱིས་མ་ཨ་ཀཱའི་སྲས་ཨ་བི་ཡཱ་བྱ་བ་དེ་རྒྱལ་ཁྲིར་འགོད་འདོད་པས། དེ་ཁོའི་སྤུན་རྣམས་ཀྱི་འགོ་དཔོན་བྱེད་ཆེད་རྒྱལ་སྲས་སུ་བཞག་ནས།
2CH 11:23 རེ་ཧབ་ཨམ་གྱིས་ཤེས་རབ་ལྡན་པའི་སྒོ་ནས་རང་གི་སྲས་རྣམས་ཡ་ཧུ་དཱ་དང་པེན་ཡཱ་མེན་གྱི་འགོག་སྲུང་གྲོང་ཁྱེར་སོ་སོར་བཞག་ནས། དེ་དག་ལ་རྒྱགས་ཆས་མོད་པོ་བཏང་ཞིང་ཆུང་མའང་མང་པོ་བླངས་པའོ། །
2CH 12:1 རེ་ཧབ་ཨམ་གྱི་རྒྱལ་སྲིད་བརྟན་པོར་གྱུར་ཅིང་དར་བའི་ཚེ་ཁོང་གིས་དཀོན་མཆོག་ཡ་ཝཱེའི་བཀའ་ཁྲིམས་སྤངས་ཏེ། ཡེས་ར་ཨེལ་པ་ཐམས་ཅད་ཀྱང་ཁོང་གི་རྗེས་སུ་འབྲངས།
2CH 12:2 རྒྱལ་པོ་རེ་ཧབ་ཨམ་གྱི་སྲིད་ལོ་ལྔ་པར། ཨེ་ཅིབ་ཀྱི་རྒྱལ་པོ་ཤི་ཤག་གིས་ཡེ་རུ་སཱ་ལེམ་ལ་དམག་དྲངས། གང་ལ་ཞེ་ན། དེ་དག་གིས་དཀོན་མཆོག་ཡ་ཝཱེ་ལ་ཉེས་པ་བསགས་པས་སོ། །
2CH 12:3 ཤི་ཤག་གིས་ཤིང་རྟ་ཆིག་སྟོང་ཉིས་བརྒྱ་དང་སྐྱ་དམག་ཁྲི་དྲུག་ཁྲིད་འོངས་པ་དང་། ད་དུང་ཁོ་དང་མཉམ་དུ་ཨེ་ཅིབ་ནས་ཐོན་པའི་ལེབ་ཡཱ་པ་དང་། སུག་ཀི་པ་དང་། གུ་ཤ་པའི་མི་ནི་བགྲང་གིས་མི་ལང་བ་ཡོད་ལ།
2CH 12:4 ཁོས་ཡ་ཧུ་དཱའི་མངའ་ཁོངས་ཀྱི་འགོག་སྲུང་གྲོང་ཁྱེར་རྣམས་བླངས་ཏེ་ཡེ་རུ་སཱ་ལེམ་དུ་འོངས།
2CH 12:5 དུས་དེར་ཡ་ཧུ་དཱའི་འགོ་དཔོན་རྣམས་ཤི་ཤག་གི་རྐྱེན་གྱིས་ཡེ་རུ་སཱ་ལེམ་དུ་འདུས་པ་དང་། ལུང་སྟོན་པ་ཤེ་མ་ཡཱ་ཁོང་ཉིད་རེ་ཧབ་ཨམ་དང་འགོ་དཔོན་རྣམས་ལ་འཕྲད་དུ་འོངས་ཏེ་ཁོ་རྣམས་ལ་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་བདག་སྤངས་པས་བདག་གིས་ཀྱང་ཁྱོད་ཚོ་སྤངས་ཏེ་ཤི་ཤག་གི་ལག་ཏུ་སྤྲད་པ་ཡིན་གསུངས་ཞེས་གསུངས་པ་ལ།
2CH 12:6 ཡེས་ར་ཨེལ་གྱི་འགོ་དཔོན་རྣམས་དང་རྒྱལ་པོས་ཁེངས་སྐྱུང་གིས་ན་རེ། དཀོན་མཆོག་ཡ་ཝཱེ་ནི་དྲང་བདེན་ཡིན་ནོ་ཞེས་ཞུས་སོ། །
2CH 12:7 ཡང་དཀོན་མཆོག་ཡ་ཝཱེས་དེ་དག་གིས་ཁེངས་སྐྱུང་བྱེད་པ་གཟིགས་ནས་ཤེ་མ་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་ནས་འདི་སྐད་དུ། དེ་དག་གིས་ཁེངས་སྐྱུང་བྱས་པས་ངས་དེ་དག་མེད་པར་མི་བྱ་བར་གནས་སྐབས་ཙམ་ལ་སྐྱོབ་པར་བྱ། ངས་ཤི་ཤག་བརྒྱུད་ནས་རང་གི་ཁོང་ཁྲོ་ཡེ་རུ་སཱ་ལེམ་གྱི་སྟེང་དུ་མི་འབེབ་བོ། །
2CH 12:8 འོན་ཀྱང་དེ་ཚོས་ང་ལ་ཞབས་ཕྱི་སྒྲུབ་པ་དང་སའི་རྒྱལ་པོ་རྣམས་ལ་གཡོག་བྱེད་པའི་དབྱེ་བ་རྟོགས་པའི་ཆེད་དུ། ངས་དེ་དག་ཤི་ཤག་གི་བྲན་གཡོག་ཏུ་བསྒྱུར་བར་བྱ་ཞེས་གསུངས།
2CH 12:9 ཨེ་ཅིབ་ཀྱི་རྒྱལ་པོ་ཤི་ཤག་གིས་ཡེ་རུ་སཱ་ལེམ་ལ་དམག་བརྒྱབ་ནས། དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་ནང་གི་རིན་པོ་ཆེ་ཐམས་ཅད་བཅོམས་ནས་ཁྱེར་བ་དང་། སོ་ལོ་མོན་གྱིས་བཟོས་པའི་གསེར་གྱི་ཕུབ་རྣམས་ཀྱང་ཕྲོགས་ནས་ཁྱེར།
2CH 12:10 དེ་ནས་རྒྱལ་པོ་རེ་ཧབ་ཨམ་གྱིས་གསེར་ཕུབ་ཀྱི་ཚབ་ཏུ་ལི་ཡི་ཕུབ་བཟོས་ནས། རྒྱལ་པོའི་ཕོ་བྲང་གི་སྒོ་སྲུང་འགོ་དཔོན་ལག་ཏུ་གཏད་དེ་བཞག
2CH 12:11 ཐེངས་རེར་རྒྱལ་པོ་དཀོན་མཆོག་ཡ་ཝཱེའི་མཆོད་ཁང་དུ་འགྲོ་དུས་སུ། སྐུ་སྲུང་པ་རྣམས་འོངས་ནས་ཕུབ་དེ་དག་འཁྱེར་ཞིང་། ཕྱིས་སུ་སླར་སྐུ་སྲུང་པའི་ཁང་པར་འཇོག་པ་ཡིན།
2CH 12:12 རྒྱལ་པོས་ཁེངས་སྐྱུང་བྱས་པས་དཀོན་མཆོག་ཡ་ཝཱེའི་ཐུགས་ཁྲོ་ཞི་བར་གྱུར་ནས་ཁོང་རྩ་མེད་དུ་མ་མཛད་དེ། ཡ་ཧུ་དཱའི་ནང་དུ་ད་དུང་དོན་བཟང་པོ་ཡོད་པ་ཡིན་ནོ། །
2CH 12:13 རྒྱལ་པོ་རེ་ཧབ་ཨམ་ནི་ཡེ་རུ་སཱ་ལེམ་དུ་རིམ་བཞིན་དར་ཞིང་མུ་མཐུད་དུ་རྒྱལ་པོར་བཞུགས། ཁོང་རྒྱལ་པོར་བཞུགས་དུས་སུ་དགུང་ལོ་བཞི་བཅུ་ཞེ་གཅིག་ཡིན་པ་དང་། དཀོན་མཆོག་ཡ་ཝཱེས་ཉིད་ཀྱི་མཚན་འཇོག་པའི་དོན་དུ་ཡེས་ར་ཨེལ་གྱི་ཚོ་པ་ཁག་ནས་བདམས་པའི་གྲོང་ཁྱེར་ཡེ་རུ་སཱ་ལེམ་དུ་ལོ་བཅུ་བདུན་རིང་ལ་རྒྱལ་སྲིད་བསྐྱངས། ཁོང་གི་ཡུམ་ནི་ཨམ་མོན་པ་ནཱ་མཱ་བྱ་བ་དེ་ཡིན་ནོ། །
2CH 12:14 རེ་ཧབ་ཨམ་གྱིས་སེམས་གཏིང་ནས་དཀོན་མཆོག་ཡ་ཝཱེ་མ་བཙལ་བས་བྱ་བ་ངན་པ་སྤྱད་པ་རེད།
2CH 12:15 རེ་ཧབ་ཨམ་གྱི་མཛད་རྗེས་རྣམས་འགོ་ནས་མཇུག་བར་དུ་ལུང་སྟོན་པ་ཤེ་མ་ཡཱ་དང་། མངོན་ཤེས་པ་ཨིད་དོའི་གསུང་འབུམ་ནང་དུ་བཀོད་ཡོད་པ་མ་ཡིན་ནམ། རེ་ཧབ་ཨམ་དང་ཡེ་རོབ་ཨམ་གཉིས་ནི་ནམ་རྒྱུན་དམག་བརྒྱབ་པ་ཡིན།
2CH 12:16 རེ་ཧབ་ཨམ་ནི་རང་གི་ཕ་མེས་དང་མཉམ་དུ་གཟིམས་ནས་དཱ་བིད་ཀྱི་གྲོང་ཁྱེར་དུ་དུར་ལ་སྦས། ཁོང་གི་སྲས་ཨ་བི་ཡཱ་ཁོང་གི་ཚབ་ཏུ་རྒྱལ་པོར་གྱུར་ཏོ། །
2CH 13:1 རྒྱལ་པོ་ཡེ་རོབ་ཨམ་གྱིས་རྒྱལ་སྲིད་བསྐྱངས་པའི་ལོ་བཅོ་བརྒྱད་པར། ཨ་བི་ཡཱ་ནི་ཡ་ཧུ་དཱའི་རྒྱལ་པོར་བཞུགས།
2CH 13:2 ཁོང་གིས་ཡེ་རུ་སཱ་ལེམ་དུ་ལོ་གསུམ་ལ་རྒྱལ་སྲིད་བསྐྱངས་པ་དང་། ཁོང་གི་ཡུམ་ནི་གིབ་ཨ་པ་ཨུ་རི་ཨེལ་གྱི་སྲས་མོ་མི་ཀ་ཡཱ་བྱ་བ་དེ་ཡིན། ཨ་བི་ཡཱ་དང་ཡེ་རོབ་ཨམ་གཉིས་ཀྱི་བར་ལ་རྒྱུན་དུ་དམག་འཁྲུག་བྱུང་།
2CH 13:3 ཐེངས་ཤིག་ལ་ཨ་བི་ཡཱས་དམག་མི་དཔའ་རྩལ་ཅན་འབུམ་བཞི་ཁྲིད་ནས་གཡུལ་འགྱེད་རྩིས་བྱས་ཤིང་། ཡེ་རོབ་ཨམ་གྱིས་ཀྱང་དམག་མི་དཔའ་རྩལ་ཅན་འབུམ་བརྒྱད་ཁྲིད་དེ་དམག་བཀྲམས་ནས་ཨ་བི་ཡཱ་ལ་རྒོལ།
2CH 13:4 དེ་ནས་ཨ་བི་ཡཱ་ཡིས་ཨེ་ཕཱར་ཡིམ་གྱི་ཚེ་མཱ་ར་ཡིམ་རི་མགོར་ལངས་བསྡད་ནས་ན་རེ། ཡེ་རོབ་ཨམ་ཁྱོད་དང་ཡེས་ར་ཨེལ་པ་ཀུན་གྱིས་ང་ལ་ཉོན་དང་།
2CH 13:5 ཡེས་ར་ཨེལ་གྱི་དཀོན་མཆོག་ཡ་ཝཱེས་ལན་ཚྭའི་ཞལ་ཆད་མཛད་དེ། ཡེས་ར་ཨེལ་གྱི་རྒྱལ་སྲིད་དེ་རྒྱུན་ནས་རྒྱུན་དུ་དཱ་བིད་དང་ཁོང་གི་བུ་རྒྱུད་རྣམས་ལ་གནང་བ་ནི་ཁྱོད་ཚོས་མི་ཤེས་སམ།
2CH 13:6 འོན་ཀྱང་དཱ་བིད་ཀྱི་སྲས་སོ་ལོ་མོན་གྱི་ཞབས་ཕྱི་ནེ་བཱད་ཀྱི་བུ་ཡེ་རོབ་ཨམ་ཡར་ལངས་ཏེ་རང་གི་ཇོ་བོ་ལ་ངོ་ལོག་བྱས་ཤིང་།
2CH 13:7 ཁྲེལ་མེད་ཇག་རྐུན་འགའ་ཤས་འདུས་ནས་ཁོའི་རྗེས་སུ་འབྲངས་ཏེ། སོ་ལོ་མོན་གྱི་བུ་རེ་ཧབ་ཨམ་ལ་བཙན་གྱིས་འགོག་རྒོལ་བྱས། སྐབས་དེར་རེ་ཧབ་ཨམ་ནི་ན་སོ་ཕྲ་ལ་སྙིང་སྟོབས་ཆུང་བས་དེ་དག་ལ་འགོག་རྒོལ་བྱེད་མ་ནུས།
2CH 13:8 ད་ལྟ་ཁྱོད་ཚོས་དཱ་བིད་ཀྱི་བུ་རྒྱུད་ཀྱི་ལག་ཏུ་ཡོད་པའི་དཀོན་མཆོག་ཡ་ཝཱེའི་རྒྱལ་སྲིད་དེ་ལ་ངོ་རྒོལ་བྱེད་འདོད་པ་སྟེ། ཁྱོད་ཅག་ལ་མི་གྲངས་མང་ཞིང་། ཡེ་རོབ་ཨམ་གྱིས་ཁྱོད་ཚོར་ལྷ་རྟེན་དུ་བཟོས་པའི་གསེར་གྱི་བ་ཕྲུག་ཀྱང་ཁྱོད་ཅག་དང་མཉམ་དུ་ཡོད་པས་སོ། །
2CH 13:9 ཁྱོད་ཚོས་དཀོན་མཆོག་ཡ་ཝཱེའི་མཆོད་དཔོན་ཏེ་ཨ་རོན་གྱི་བུ་རྒྱུད་དང་ལེ་ཝི་པ་རྣམས་ཕྱིར་བསྐྲད་པ་མ་ཡིན་ནམ། ཁྱོད་ཚོས་འཇིག་རྟེན་ཕྱི་རོལ་པ་རྣམས་ཀྱི་ལུགས་ལྟར་རང་གི་ཆེད་དུ་མཆོད་དཔོན་བསྐོས་པ་མ་ཡིན་ནམ། སུ་ཞིག་གིས་ཀྱང་བ་གླང་གཅིག་དང་ལུག་ཐུག་བདུན་ཁྱེར་འོངས་ནས་རང་ཉིད་དམ་པར་བྱས་ན་དཀོན་མཆོག་རྫུན་མ་དེ་དག་གི་མཆོད་དཔོན་བྱེད་ཐུབ་པ་མ་ཡིན་ནམ།
2CH 13:10 ངེད་ཅག་ལ་མཚོན་ན། དཀོན་མཆོག་ཡ་ཝཱེ་ཁོང་ཉིད་ངེད་ཅག་གི་དཀོན་མཆོག་ཡིན་ལ། ངེད་ཅག་གིས་ཁོང་མ་སྤངས་ཏེ། ངེད་ཅག་ལ་དཀོན་མཆོག་ཡ་ཝཱེར་ཞབས་ཕྱི་བྱེད་མཁན་མཆོད་དཔོན་ཡོད་དེ། ཐམས་ཅད་ཨ་རོན་གྱི་བུ་རྒྱུད་ཡིན་པར་མ་ཟད། ལེ་ཝི་པ་རྣམས་ཀྱིས་རང་རང་གི་ལས་འགན་ཁུར་བ་ཡིན།
2CH 13:11 དེ་དག་གིས་ཉིན་རེའི་ནངས་དགོང་གཉིས་སུ་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པ་འབུལ་བ་དང་དྲི་བསུང་གི་སྤོས་བདུག་ཅིང་། ཡང་སྒྲོག་ཙེ་དམ་པའི་སྟེང་སྤྱན་བསྟར་བག་ལེབ་བཤམ་པ་དང་། ཉིན་རེའི་དགོང་མོར་གསེར་གྱི་སྒྲོན་སྟེགས་སྟེང་གི་སྒྲོན་མེ་རྣམས་སྒྲོན་པ་ཡིན། ངེད་ཅག་གིས་རང་གི་དཀོན་མཆོག་ཡ་ཝཱེའི་བཀའ་རྣམས་བསྲུངས་མོད། འོན་ཀྱང་ཁྱོད་རྣམས་ཀྱིས་ཁོང་སྤངས་པ་ཡིན་ནོ། །
2CH 13:12 ལྟོས་ཤིག དཀོན་མཆོག་ནི་ངེད་ཅག་དང་མཉམ་དུ་བཞུགས་ཤིང་ཁོང་གིས་ངེད་རྣམས་ལ་སྣེ་ཁྲིད་མཛད་པ་ཡིན། ཁོང་གི་མཆོད་དཔོན་རྣམས་ཀྱིས་དུང་བཟུང་ནས་ཁྱོད་ཅག་གི་ཕྱོགས་སུ་སྐད་ཆེན་པོར་འབུད་པའོ། །ཀྱེ་ཡེས་ར་ཨེལ་པ་རྣམས། ཁྱོད་རྣམས་ཀྱིས་རང་གི་ཕ་མེས་ཀྱི་དཀོན་མཆོག་ཡ་ཝཱེ་ལ་མ་རྒོལ་ཞིག གང་ལ་ཞེ་ན། ཁྱོད་རྣམས་ཁོང་ལས་རྒྱལ་བར་དཔེ་མི་སྲིད་དོ་ཞེས་གསུངས།
2CH 13:13 ཡིན་ཡང་ཡེ་རོབ་ཨམ་གྱིས་ཡ་ཧུ་དཱ་པའི་རྒྱབ་ཏུ་འཇབ་དམག་བཏང་བ་ན། ཡ་ཧུ་དཱ་པའི་མདུན་དུ་ཡེས་ར་ཨེལ་པ་རྣམས་ཡོད་པ་དང་། ཡ་ཧུ་དཱ་པའི་རྒྱབ་ཏུ་འཇབ་དམག་རྣམས་ཡོད་ལ།
2CH 13:14 ཡ་ཧུ་དཱ་པས་ཁ་ཕྱིར་འཁོར་ནས་བལྟས་པ་དང་རང་གི་མདུན་རྒྱབ་གཉིས་སུ་དགྲ་ཡོད་པ་མཐོང་ནས། དཀོན་མཆོག་ཡ་ཝཱེ་ལ་འོ་དོད་བོས་ཤིང་མཆོད་དཔོན་རྣམས་ཀྱིས་དུང་བུས།
2CH 13:15 དེ་ནས་ཡ་ཧུ་དཱ་པ་རྣམས་ཀྱིས་སྐད་ཆེན་པོས་ཀི་བཏབ་ཅིང་། ཡ་ཧུ་དཱ་པ་རྣམས་ཀྱིས་སྐད་ཆེན་པོས་ཀི་བཏབ་པ་ལ། དཀོན་མཆོག་གིས་ཡེ་རོབ་ཨམ་དང་ཡེས་ར་ཨེལ་པ་རྣམས་ཨ་བི་ཡཱ་དང་ཡ་ཧུ་དཱའི་མདུན་ནས་ཕམ་ཅིང་འབྲོ་བར་མཛད་དོ། །
2CH 13:16 ཡེས་ར་ཨེལ་པ་རྣམས་ཡ་ཧུ་དཱའི་མདུན་ནས་བྲོས་ཤིང་། དཀོན་མཆོག་གིས་དེ་རྣམས་ཡ་ཧུ་དཱ་པའི་ལག་ཏུ་གཏད།
2CH 13:17 དེ་ནས་ཨ་བི་ཡཱ་དང་ཁོང་གི་མི་རྣམས་ཀྱིས་ཡེས་ར་ཨེལ་པ་མང་པོ་བསད་དེ། ཡེས་ར་ཨེལ་གྱི་ཁྲོད་དུ་དམག་མི་དཔའ་རྩལ་ཅན་ཁྲི་ལྔ་བཅུ་ཤིའོ། །
2CH 13:18 དེའི་དུས་སུ་ཡ་ཧུ་དཱ་པ་རྣམས་ཀྱིས་རང་གི་ཕ་མེས་ཀྱི་དཀོན་མཆོག་ཡ་ཝཱེ་ལ་བརྟེན་པས་རྒྱལ་བྱུང་སྟེ། ཡེས་ར་ཨེལ་པ་རྣམས་བཏུལ་བ་རེད།
2CH 13:19 ཨ་བི་ཡཱས་ཡེ་རོབ་ཨམ་བདས་ནས་ཁོའི་གྲོང་ཁྱེར་འགའ་ཤས་བླངས་པ་སྟེ། པེད་ཨེལ་དང་དེའི་གྲོང་ཚོ་རྣམས་དང་། ཡེ་ཤཱ་ན་དང་དེའི་གྲོང་ཚོ་རྣམས་དང་། ཨེབ་རོན་དང་དེའི་གྲོང་ཚོ་རྣམས་སོ། །
2CH 13:20 ཨ་བི་ཡཱའི་སྐུ་རིང་དུ་ཡེ་རོབ་ཨམ་ལ་ཡང་བསྐྱར་སྟོབས་འབྱོར་མ་རྒྱས་ཤིང་། དཀོན་མཆོག་ཡ་ཝཱེས་དེ་ལ་བརྡུངས་པས་ཤིའོ། །
2CH 13:21 ཡིན་ཡང་ཨ་བི་ཡཱ་ལ་སྟོབས་འབྱོར་རྒྱས་ནས་ཆུང་མ་བཅུ་བཞི་བླངས་ཏེ། སྲས་ཉེར་གཉིས་དང་སྲས་མོ་བཅུ་དྲུག་འཁྲུངས།
2CH 13:22 ཨ་བི་ཡཱའི་མཛད་རྗེས་གཞན་རྣམས་དང་ཁོང་གི་གཏམ་སྤྱོད་རྣམས་ནི་ལུང་སྟོན་པ་ཨིད་དོའི་རྣམ་ཐར་ནང་དུ་བཀོད་ཡོད་དོ། །
2CH 14:1 ཨ་བི་ཡཱ་རང་གི་ཕ་མེས་དང་ལྷན་ཅིག་གཟིམས་པ་དང་དཱ་བིད་ཀྱི་གྲོང་ཁྱེར་དུ་དུར་ལ་སྦས། ཁོང་གི་སྲས་ཨ་སཱ་ཁོང་གི་ཚབ་ཏུ་རྒྱལ་པོར་གྱུར། ཁོང་གི་སྐུ་རིང་ལ་ལོ་བཅུའི་རིང་ཡུལ་དེར་དུས་བདེ་བར་གྱུར།
2CH 14:2 ཨ་སཱ་ཡིས་རང་གི་དཀོན་མཆོག་ཡ་ཝཱེའི་སྤྱན་དྲུང་དུ་གང་ཞིག་ལེགས་ཤིང་བདེན་པ་དེ་སྤྱད་ནས།
2CH 14:3 ཕྱི་རོལ་པའི་མཆོད་ཁྲི་དང་མཐོ་གླིང་རྣམས་མེད་པར་བཟོས་ཤིང་། རྡོ་སྐུ་རྣམས་བཅག་པ་དང་ཨ་ཤེ་རཱའི་ཀ་བ་ རྣམས་བཅད་དེ།
2CH 14:4 ཡ་ཧུ་དཱ་པ་རྣམས་ལ་རང་གི་ཕ་མེས་ཀྱི་དཀོན་མཆོག་ཡ་ཝཱེ་འཚོལ་བ་དང་། ཁོང་གི་བཀའ་ཁྲིམས་དང་བཀའ་རྒྱ་རྣམས་བསྲུང་དགོས་པའི་བཀའ་བསྩལ།
2CH 14:5 ཡང་ཡ་ཧུ་དཱའི་གྲོང་ཁྱེར་སོ་སོ་ནས་མཐོ་གླིང་དང་སྤོས་ཁྲི་རྣམས་མེད་པར་བྱས་པ་དང་། དེའི་དུས་སུ་རྒྱལ་ཁམས་ཡོངས་ཁོང་གི་དབང་འོག་ཏུ་དུས་བདེ་བར་གྱུར།
2CH 14:6 ཁོང་གིས་ཡ་ཧུ་དཱ་རུ་འགོག་སྲུང་གྲོང་ཁྱེར་འགའ་ཡང་བརྩིགས། གང་ལ་ཞེ་ན། རྒྱལ་ཁབ་དེ་དུས་བདེ་ཞིང་ལོ་མང་པོར་དམག་འཁྲུག་མ་བྱུང་བ་དང་། དཀོན་མཆོག་ཡ་ཝཱེས་ཁོང་བདེ་ལ་བཀོད་པས་སོ། །
2CH 14:7 དེ་ནས་ཁོང་གིས་ཡ་ཧུ་དཱ་པ་རྣམས་ལ་འདི་ལྟར། རང་ཅག་གིས་གྲོང་ཁྱེར་འདི་རྣམས་བརྩིག་དགོས་ལ། དེའི་ཕྱོགས་བཞི་རུ་ལྕགས་རི་བསྐོར་ནས་མཁར་ལྕོག་བཟོ་བ་དང་། མཁར་སྒོ་འཛུགས་པ། སྒོ་གཏན་འཛུགས་པར་བྱ་དགོས། རང་ཅག་གིས་རང་གི་དཀོན་མཆོག་ཡ་ཝཱེ་བཙལ་བས། ཡུལ་འདི་ད་དུང་རང་ཅག་ལ་གཏོགས་པ་དང་། རང་ཅག་གིས་ཁོང་བཙལ་བས་ཁོང་གིས་རང་ཅག་ཕྱོགས་ཀུན་ནས་བདེ་ལ་བཀོད་པའོ་ཞེས་གསུངས་ཤིང་། དེ་དག་གིས་བརྩིགས་ཏེ་དོན་ཀུན་འགྲུབ་པར་གྱུར།
2CH 14:8 ཨ་སཱའི་དམག་དཔུང་ལ་ཕུབ་ཆེན་དང་མདུང་ཐོགས་མཁན་ཡ་ཧུ་དཱ་པ་བསྡོམས་པས་ཁྲི་སུམ་ཅུ་ཡོད་པ་དང་། ཕུབ་ཆུང་ཐོགས་པ་དང་གཞུ་འཐེན་མཁན་པེན་ཡཱ་མེན་པ་བསྡོམས་པས་ཁྲི་ཉེར་བརྒྱད་ཡོད་ལ། དེ་ཐམས་ཅད་ནི་དམག་མི་དཔའ་རྩལ་ཅན་ཡིན་ནོ། །
2CH 14:9 དེའི་དུས་སུ་གུ་ཤ་པ་ཟེ་རག་གིས་དམག་མི་ཁྲི་བརྒྱ་དང་ཤིང་རྟ་སུམ་བརྒྱ་ཁྲིད་ནས་ཡ་ཧུ་དཱ་པ་རྣམས་ལ་འཐབ་པའི་ཕྱིར་མཱ་རེ་ཤ་རུ་འོངས་པ་དང་།
2CH 14:10 ཨ་སཱ་དེའི་ཕྱོགས་སུ་ཆས་ཏེ། མཱ་རེ་ཤའི་ཙེ་ཕཱ་ཏ་བྱ་བའི་ལུང་པ་རུ་ཕན་ཚུན་དམག་བཀྲམས།
2CH 14:11 ཨ་སཱ་ཡིས་རང་གི་དཀོན་མཆོག་ཡ་ཝཱེ་ལ་གསོལ་བ་བཏབ་ནས་འདི་ལྟར། ཀྱེ་དཀོན་མཆོག་ཡ་ཝཱེ་ལགས། སྟོབས་ཆུང་རྣམས་ལ་རོགས་རམ་གནང་ནས་མཐུ་ལྡན་དག་ལས་རྒྱལ་བར་མཛད་མཁན་ནི་ཁྱེད་ལས་གཞན་མེད། ཀྱེ་ཡ་ཝཱེ་ངེད་ཅག་གི་དཀོན་མཆོག་ལགས། ཁྱེད་ཀྱིས་ངེད་ཅག་ལ་རོགས་རམ་གནང་བར་མཛོད། གང་ལ་ཞེ་ན། ངེད་རྣམས་ཁྱེད་ལ་བརྟེན་ཞིང་ཁྱེད་ཀྱི་མཚན་བརྗོད་བཞིན་དམག་དཔུང་འདི་ལ་འཐབ་ཏུ་འགྲོ་བས། ཀྱེ་ཡ་ཝཱེ་ཁྱེད་ནི་ངེད་ཅག་གི་དཀོན་མཆོག་ཡིན་ལ། འགྲོ་བ་མིའི་རིགས་ཁྱེད་ལས་རྒྱལ་བར་མི་འཇུག་པར་མཛོད་ཅེས་ཞུས་པས།
2CH 14:12 དཀོན་མཆོག་ཡ་ཝཱེས་ཨ་སཱ་དང་ཡ་ཧུ་དཱ་པའི་མདུན་དུ་གུ་ཤ་པ་རྣམས་ཕམ་པར་མཛད་ནས་དེ་རྣམས་བྲོས་སོ། །
2CH 14:13 ཨ་སཱ་དང་ཁོང་གི་རྗེས་སུ་འབྲངས་པའི་མི་རྣམས་ཀྱིས་དེ་དག་གེ་རཱར་བར་དུ་བདས། གུ་ཤ་པ་རྣམས་དཀོན་མཆོག་ཡ་ཝཱེ་དང་ཁོང་གི་དམག་དཔུང་གི་དྲུང་དུ་ཕམ་པས། ཁོ་རྣམས་ལས་ཤིན་ཏུ་མང་པོ་བསད་ནས་ཡང་བསྐྱར་སྟོབས་ཤུགས་རྒྱས་མ་ནུས། ཡ་ཧུ་དཱ་པ་རྣམས་ཀྱིས་བཅོམ་ནོར་ཤིན་ཏུ་མང་པོ་ཕྲོགས།
2CH 14:14 ཡང་དེ་དག་གིས་གེ་རཱར་མཐའ་འཁོར་གྱི་གྲོང་ཚོ་ཡོངས་རྫོགས་བཅོམ་པ་སྟེ། རྒྱུ་མཚན་ནི་གྲོང་ཚོ་སོ་སོའི་མི་རྣམས་དཀོན་མཆོག་ཡ་ཝཱེ་ལ་འཇིགས་པས་སོ། །ཡང་གྲོང་ཚོ་ནང་གི་རྒྱུ་ནོར་དཔག་ཏུ་མེད་པས་ཡ་ཧུ་དཱ་པ་རྣམས་ཀྱིས་གྲོང་ཚོ་སོ་སོ་ཡོངས་སུ་ཕྲོགས།
2CH 14:15 དེར་མ་ཟད་ཁོ་རྣམས་ཀྱིས་ཕྱུགས་ར་རྣམས་ཀྱང་བཤིགས་ནས་ལུག་དང་རྔ་མོང་མོད་པོ་ཁྲིད་དེ་ཕྱིར་ཡེ་རུ་སཱ་ལེམ་དུ་ལོག་གོ །
2CH 15:1 དེ་ནས་ཨོ་དེད་ཀྱི་བུ་ཨ་ཟར་ཡཱ་ལ་དཀོན་མཆོག་གི་ཐུགས་ཉིད་བབས་པ་དང་།
2CH 15:2 ཁོ་ཨ་སཱ་བསུ་རུ་སོང་ནས་ན་རེ། ཀྱེ་ཨ་སཱ་དང་ཡ་ཧུ་དཱ། པེན་ཡཱ་མེན་པ་ཐམས་ཅད་ཀྱིས་བདག་ལ་ཉོན་དང་། ཁྱོད་ཅག་དཀོན་མཆོག་ཡ་ཝཱེའི་རྗེས་སུ་འབྲངས་ན་ཁོང་ཡང་ཁྱོད་དང་མཉམ་དུ་བཞུགས་ཏེ། གལ་ཏེ་ཁྱོད་ཚོས་ཁོང་བཙལ་ན་རྙེད་པར་འགྱུར་ལ། ཁྱོད་ཚོས་ཁོང་སྤངས་ན། ཁོང་གིས་ཀྱང་ཁྱོད་ཅག་སྤང་བར་འགྱུར།
2CH 15:3 ཡེས་ར་ཨེལ་པ་རྣམས་བདེན་པའི་དཀོན་མཆོག་དང་བྲལ་ཏེ། བསླབ་བྱ་གནང་མཁན་གྱི་མཆོད་དཔོན་དང་བཀའ་ཁྲིམས་མེད་པར་དུས་ཡུན་རིང་པོ་འགོར་ན་ཡང་།
2CH 15:4 དེ་ཚོས་དཀའ་སྡུག་དང་ཕྲད་པའི་དུས་སུ་སེམས་བསྒྱུར་ནས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱོགས་སུ་ལོག་འོངས་ནས་ཁོང་བཙལ་བ་ལ་ཁོང་རྙེད་པ་ཡིན།
2CH 15:5 དེའི་ཚེ་ཕྱི་རུ་འགྲོ་བ་དང་ནང་དུ་འོང་མཁན་གཉིས་པོར་ཞི་བདེ་མེད་དེ། ཅི་ལ་ཞེ་ན། རྒྱལ་ཁམས་སོ་སོའི་ཡུལ་མི་ཐམས་ཅད་ལ་ཟིང་འཁྲུག་ལངས་པས་སོ། །
2CH 15:6 དཀོན་མཆོག་གིས་བར་ཆད་སྣ་ཚོགས་ཀྱིས་ཁོ་རྣམས་འཁྲུག་པར་མཛད་པས། རྒྱལ་ཁམས་འདིས་རྒྱལ་ཁམས་གཞན་མེད་པར་གཏོང་བ་དང་། གྲོང་ཁྱེར་འདིས་གྲོང་ཁྱེར་གཞན་མེད་པར་གཏོང་བ་ཡིན།
2CH 15:7 འོན་ཀྱང་ཁྱོད་ཚོས་སྤོབས་པ་བསྐྱེད་ནས་དཔའ་ཞུམ་པར་མི་བྱའོ། །རྒྱུ་མཚན་ཁྱོད་ཅག་གི་སྤྱོད་པ་ལ་རྔན་པ་ཐོབ་པར་འགྱུར་ངེས་ཡིན་ཞེས་གདམས་སོ། །
2CH 15:8 ཨ་སཱ་ཡིས་གཏམ་དེ་རྣམས་དང་ཨོ་དེད་ཀྱི་བུ་སྟེ་ལུང་སྟོན་པ་ཨ་ཟར་ཡཱ་ཡི་ལུང་བསྟན་ཐོས་ནས། ཁོང་ལ་དཔའ་འཛོམས་ཏེ། ཡ་ཧུ་དཱ་དང་པེན་ཡཱ་མེན་གྱི་ཡུལ་ཐམས་ཅད་དང་། ཨེ་ཕཱར་ཡིམ་རི་ཁུལ་ནས་བླངས་པའི་གྲོང་ཁྱེར་ཐམས་ཅད་ནས་སྐུ་འདྲ་ཞེན་ལོག་རྣམས་མེད་པར་བཟོས་ཤིང་། ཡང་དཀོན་མཆོག་ཡ་ཝཱེའི་མཆོད་ཁང་གི་ཁྱམས་རའི་མདུན་དུ་དཀོན་མཆོག་ཡ་ཝཱེའི་མཆོད་ཁྲི་བསྐྱར་བཞེངས་བྱས་སོ། །
2CH 15:9 ཡང་ཁོང་གིས་ཡ་ཧུ་དཱ་པ་དང་པེན་ཡཱ་མེན་པ་ཐམས་ཅད་དང་། དེ་རྣམས་ཀྱི་ཁྲོད་དུ་བྱེས་སུ་སྡོད་པའི་ཨེ་ཕཱར་ཡིམ་པ་དང་མཱ་ན་ཤེ་པ་དང་སི་མུ་ཨོན་པ་རྣམས་བསྡུས། ཡེས་ར་ཨེལ་པ་རྣམས་ཀྱིས་ཨ་སཱ་ཡི་དཀོན་མཆོག་ཡ་ཝཱེ་ཁོང་དང་མཉམ་དུ་བཞུགས་པ་མཐོང་སྟེ། མི་ཤིན་ཏུ་མང་པོ་ཨ་སཱའི་ཕྱོགས་སུ་འཛོམས་པ་ཡིན།
2CH 15:10 ཨ་སཱ་ཡིས་རྒྱལ་སྲིད་བསྐྱངས་པའི་ལོ་བཅོ་ལྔ་པའི་ཟླ་གསུམ་པ་ལ་དེ་རྣམས་ཡེ་རུ་སཱ་ལེམ་དུ་འཛོམས།
2CH 15:11 ཉིན་དེར་དེ་དག་གིས་ཕྲོགས་འོངས་པའི་བཅོམ་ནོར་ལས་གླང་བདུན་བརྒྱ་དང་། ར་ལུག་བདུན་སྟོང་དཀོན་མཆོག་ཡ་ཝཱེ་ལ་མཆོད་པར་ཕུལ་ནས།
2CH 15:12 དེ་དག་གིས་བློ་གཅིག་སེམས་གཅིག་གིས་རང་གི་ཕ་མེས་ཀྱི་དཀོན་མཆོག་ཡ་ཝཱེ་འཚོལ་བར་དམ་བཅས་པ་དང་།
2CH 15:13 ཡེས་ར་ཨེལ་གྱི་དཀོན་མཆོག་ཡ་ཝཱེ་ཁོང་ཉིད་མི་འཚོལ་མཁན་རྣམས་ནི། ཕོ་མོ་རྒན་གཞོན་སུ་ཡིན་ཡང་གསོད་རྒྱུ་བྱས་ནས།
2CH 15:14 སྐད་ཆེན་པོས་ཀི་སྒྲ་བསྒྲགས་ཤིང་། དུང་དང་རྭ་དུང་འབུད་བཞིན་དཀོན་མཆོག་ཡ་ཝཱེའི་དྲུང་དུ་མནའ་བསྐྱལ་ཏེ།
2CH 15:15 ལྷག་བསམ་ཟོལ་མེད་ཀྱིས་མནའ་བསྐྱལ་བས་ཡ་ཧུ་དཱ་པ་མཐའ་དག་མནའ་དེའི་ཕྱིར་དགའ་བར་གྱུར་པ་དང་། རྩེ་གཅིག་གིས་དཀོན་མཆོག་ཡ་ཝཱེ་བཙལ་བས་ཁོང་རྙེད་ཅིང་། ཁོང་གིས་དེ་རྣམས་ཕྱོགས་བཞི་ནས་བདེ་ལ་བཀོད་པའོ། །
2CH 15:16 དེ་ནས་རྒྱལ་པོ་ཨ་སཱས་ཀྱང་རང་གི་རྨོ་མོ་མཱ་ཨ་ཀཱ་ཞེས་པ་རྒྱལ་ཡུམ་གྱི་གོ་ས་ལས་ཕབ། ཅིའི་ཕྱིར་ཞེ་ན། དེས་ཨ་ཤེ་རཱ་ཡི་སྐུ་ཞེན་ལོག་ཅན་ཞིག་བཞེངས་པས་སོ། །ཨ་སཱས་སྐུ་དེ་བཅག་ནས་རྡུལ་དུ་བརླག་སྟེ་ཀིད་རོན་ཆུ་བོའི་འགྲམ་ནས་མེར་བསྲེགས་སོ། །
2CH 15:17 འོན་ཀྱང་ཡེས་ར་ཨེལ་གྱི་ནང་དུ་མཐོ་གླིང་རྣམས་ད་དུང་མ་བཤིག་པར་ལུས་མོད། ཨ་སཱའི་སེམས་སུ་ཚེ་གང་པོར་ཡ་ཝཱེ་ལ་བློ་དཀར་བ་ཡིན།
2CH 15:18 ཨ་སཱས་རང་གི་ཕ་ཡིས་དམ་པར་བསྔོས་པ་དང་། རང་གིས་དམ་པར་བསྔོས་པའི་གསེར་དངུལ་དང་། མཆོད་རྫས་ཐམས་ཅད་དཀོན་མཆོག་གི་མཆོད་ཁང་ནང་དུ་བཅུག་པ་ཡིན།
2CH 15:19 དུས་དེ་ནས་བཟུང་ཨ་སཱས་རྒྱལ་སྲིད་བསྐྱངས་པའི་ལོ་སོ་ལྔའི་བར་དུ་དམག་འཁྲུག་མ་བྱུང་ངོ་། །
2CH 16:1 ཨ་སཱས་རྒྱལ་སྲིད་བསྐྱངས་པའི་ལོ་སོ་དྲུག་པར། ཡེས་ར་ཨེལ་གྱི་རྒྱལ་པོ་པཱ་ཤ་ཡིས་ཡར་ཡ་ཧུ་དཱ་ལ་དམག་དྲངས་ནས། ཡ་ཧུ་དཱའི་རྒྱལ་པོ་ཨ་སཱའི་དྲུང་དུ་མི་གང་ཡང་འགྲོ་འོང་གི་འགྲུལ་སྐྱོད་མི་བྱེད་པའི་ཕྱིར་རཱ་མ་བྱ་བ་བརྩིགས།
2CH 16:2 དེ་ནས་ཨ་སཱས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་གི་གཏེར་མཛོད་ནས་གསེར་དངུལ་ཕྱུང་སྟེ། དཱ་མེ་སེག་ཏུ་གནས་པའི་ཨ་རམ་གྱི་རྒྱལ་པོ་པེན་ཧ་དཱད་ལ་བསྐུར་ནས་འདི་ལྟར།
2CH 16:3 ངའི་ཕ་དང་ཁྱེད་ཀྱི་ཕ་གཉིས་ཀྱི་བར་དུ་སྔར་ཆད་དོན་བཞག་ཡོད་པས། འུ་གཉིས་ཀྱིས་ཀྱང་ཆད་དོན་འཇོག་དགོས་ཏེ། ད་ལྟ་ངས་ཁྱེད་ལ་གསེར་དང་དངུལ་བསྐུར་བ་ཡིན། ཡེས་ར་ཨེལ་གྱི་རྒྱལ་པོ་པཱ་ཤ་ངའི་མདུན་ནས་འགྲོ་བའི་ཕྱིར། ཁྱེད་ཀྱིས་དེ་དང་བཞག་པའི་ཆད་དོན་དེ་སྤང་བར་མཛོད་ཅིག་ཅེས་སྨྲས་པ་དང་།
2CH 16:4 པེན་ཧ་དཱད་ཀྱིས་རྒྱལ་པོ་ཨ་སཱའི་གཏམ་ལ་མཉན་ཏེ། རང་གི་དམག་དཔུང་སོ་སོའི་དམག་དཔོན་རྣམས་ཡེས་ར་ཨེལ་གྱི་གྲོང་ཁྱེར་རྣམས་ལ་རྒོལ་བར་བཏང་ནས། དེ་དག་གིས་ཨི་ཡོན་དང་། དཱན་དང་། ཨ་བེལ་མཱ་ཡིམ་བཅས་དང་། ནཱབ་ཐ་ལི་ཡི་གཏེར་མཛོད་ཡིན་པའི་གྲོང་ཁྱེར་ཐམས་ཅད་དབང་དུ་བསྡུས་པ་རེད།
2CH 16:5 པཱ་ཤས་གཏམ་དེ་ཐོས་པ་ཙམ་གྱིས། རཱ་མ་བརྩིག་མཚམས་བཞག་པ་དང་། ཨར་ལས་ཐམས་ཅད་མཚམས་བཞག
2CH 16:6 དེ་ནས་རྒྱལ་པོ་ཨ་སཱས་ཡ་ཧུ་དཱའི་མི་ཐམས་ཅད་ཁྲིད་དེ། པཱ་ཤས་རཱ་མ་བརྩིག་བྱེད་ཀྱི་རྡོ་དང་གདུང་མ་རྣམས་སྤར་ནས། དེས་གེ་བཱ་དང་མཱས་ཟི་ཕཱ་གཉིས་བརྩིགས་སོ། །
2CH 16:7 དེའི་དུས་སུ་མངོན་ཤེས་པ་ཧ་ནཱ་ནེ་ཞེས་པ་ཡ་ཧུ་དཱའི་རྒྱལ་པོ་ཨ་སཱའི་དྲུང་དུ་འོངས་ཏེ་ན་རེ། ཁྱོད་རང་ཨ་རམ་རྒྱལ་པོར་བརྟེན་ནས་རང་གི་དཀོན་མཆོག་ཡ་ཝཱེ་ལ་མ་བརྟེན་པའི་རྐྱེན་གྱིས། ཨ་རམ་རྒྱལ་པོའི་དམག་དཔུང་དེ་ཁྱོད་ལས་ཐར་བ་ཡིན།
2CH 16:8 གུ་ཤ་པ་དང་ལེབ་ཡཱ་པའི་དམག་དཔུང་ནི་རབ་ཏུ་སྟོབས་ཆེན་མ་ཡིན་ནམ། ཁོ་ཚོར་ཤིང་རྟ་དང་སྐྱ་དམག་ཤིན་ཏུ་མང་བ་མ་ཡིན་ནམ། ཁྱོད་རང་དཀོན་མཆོག་ཡ་ཝཱེ་ལ་བརྟེན་པས། ཁོང་གིས་དེ་རྣམས་ཁྱོད་ཀྱི་ལག་ཏུ་གཏད་པ་ཡིན།
2CH 16:9 གང་ལ་ཞེ་ན། དཀོན་མཆོག་ཡ་ཝཱེའི་སྤྱན་གྱིས་ས་གཞི་ཡོངས་ལ་གཟིགས་ཏེ། ཁོང་གི་ཕྱོགས་ལ་བློ་གཅིག་སེམས་གཅིག་ཡིན་པ་རྣམས་ནི་ཁོང་གིས་ནུས་མཐུ་ཆེན་པོས་སྐྱོར་བ་ཡིན། ཁྱོད་ཀྱིས་དེ་བཞིན་བྱས་པ་ནི་གླེན་པ་ཤ་སྟག་ཡིན་ལ། ཕྱིན་ཆད་ཁྱོད་ལ་དམག་འཁྲུག་རྒྱུན་མི་ཆད་ཅེས་སྨྲས་པ་དང་།
2CH 16:10 ཨ་སཱ་ནི་མངོན་ཤེས་པ་དེ་ལ་ཁྲོས་ཤིང་། དོན་དེའི་རྐྱེན་གྱིས་ཨ་སཱ་རབ་ཏུ་ཁྲོས་པས་ཁོང་བཙོན་དུ་བཅུག་པ་དང་། སྐབས་དེར་ཨ་སཱས་འབངས་མི་ཁ་ཤས་ལ་ཡང་གཉའ་གནོན་བྱས་སོ། །
2CH 16:11 ཨ་སཱའི་མཛད་རྗེས་རྣམས་འགོ་ནས་མཇུག་བར་དུ་ཐམས་ཅད་ཡ་ཧུ་དཱ་དང་ཡེས་ར་ཨེལ་གྱི་རྒྱལ་པོའི་རྒྱལ་རབས་ཀྱི་མདོ་རུ་ཡི་གེར་བཀོད་ཡོད་དོ། །
2CH 16:12 ཡང་ཨ་སཱས་རྒྱལ་སྲིད་བསྐྱངས་པའི་ལོ་སོ་དགུ་པར། ཁོང་གི་རྐང་པ་ན་ཞིང་ནད་ཤིན་ཏུ་ཚབས་ཆེན་ཡིན་ནའང་ཁོང་གིས་ན་ཚ་བྱུང་བའི་དུས་སུའང་དཀོན་མཆོག་ཡ་ཝཱེ་མ་བཙལ་བར་སྨན་པ་འབའ་ཞིག་བཙལ།
2CH 16:13 ཁོང་གིས་ལོ་ཞེ་གཅིག་ལ་རྒྱལ་སྲིད་བསྐྱངས་ནས་ཚེ་ལས་འདས་པ་དང་། ཁོང་ཕ་མེས་རྣམས་དང་ལྷན་ཅིག་གཟིམས་པ་དང་།
2CH 16:14 དེ་དག་གིས་ཁོང་ནི་དཱ་བིད་ཀྱི་གྲོང་ཁྱེར་དུ་ཁོང་གིས་རང་གི་ཕྱིར་བརྐོས་པའི་དུར་ཁུང་ནང་དུ་སྦས་ཏེ། སྤོས་སྦྱོར་བ་རྣམས་ཀྱིས་སྦྱར་བའི་དྲི་ཞིམ་དང་སྤོས་རིགས་སྣ་འཛོམས་ཀྱིས་བཀང་བའི་ཁྱོགས་ཤིང་སྟེང་དུ་བཞག་ནས། ཡང་ཁོང་གི་ཕྱིར་མེ་ཆེན་པོ་བཏང་བའོ། །
2CH 17:1 ཨ་སཱའི་སྲས་ཡེ་ཧོ་ཤ་ཕད་ནི་ཁོའི་ཚབ་ཏུ་རྒྱལ་པོར་བཞུགས་ཏེ། ཡེས་ར་ཨེལ་པ་ལ་རྒོལ་ཉེན་ཟོན་དུ་རང་གི་སྟོབས་བརྟས་པར་བྱས་ནས།
2CH 17:2 ཁོང་གིས་ཡ་ཧུ་དཱའི་འགོག་སྲུང་གྲོང་ཁྱེར་ཚང་མའི་ནང་དུ་དམག་མི་བཞག་ཅིང་། ཡང་ཡ་ཧུ་དཱ་ཡུལ་དང་ཡབ་ཨ་སཱས་བླངས་པའི་ཨེ་ཕཱར་ཡིམ་གྱི་གྲོང་ཁྱེར་ཀུན་ལ་སྲུང་དམག་བཞག
2CH 17:3 ཡེ་ཧོ་ཤ་ཕད་རང་གི་ཡབ་མེས་དཱ་བིད་དང་ཐོག་འགྲུལ་བའི་ལམ་ནང་འགྲུལ་ཞིང་། པཱ་ཨལ་རྣམས་མ་བཙལ་བས། དཀོན་མཆོག་ཡ་ཝཱེ་ཁོང་དང་མཉམ་དུ་བཞུགས།
2CH 17:4 ཁོང་གིས་རང་གི་ཡབ་ཀྱི་དཀོན་མཆོག་འབའ་ཞིག་བཙལ་ཏེ། ཁོང་གི་བཀའ་ཁྲིམས་རྣམས་བསྲུངས་ཤིང་། ཡེས་ར་ཨེལ་པ་རྣམས་ཀྱི་སྤྱོད་པའི་རྗེས་སུ་མ་འབྲངས་པས།
2CH 17:5 དཀོན་མཆོག་ཡ་ཝཱེས་ཁོང་གིས་སྐྱོང་བའི་རྒྱལ་སྲིད་བརྟན་པོར་མཛད་དེ། ཡ་ཧུ་དཱ་ཡུལ་སོ་སོས་ཁོང་ལ་ཕྱག་རྟེན་ཕུལ་བས། ཡེ་ཧོ་ཤ་ཕད་ནི་ནོར་དང་གཟི་བརྗིད་ལྡན་པར་གྱུར་ཏོ། །
2CH 17:6 ཡང་ཁོང་གིས་དཔའ་སེམས་བསྐྱེད་ནས་དཀོན་མཆོག་ཡ་ཝཱེའི་གཤེགས་ལམ་གྱི་ནང་དུ་འགྲུལ་བར་མ་ཟད། ཡ་ཧུ་དཱ་ཡུལ་ནས་མཐོ་གླིང་དང་ཨ་ཤེ་རཱ་རྣམས་ཚར་བཅད་དོ། །
2CH 17:7 ཁོང་གིས་རྒྱལ་སྲིད་བསྐྱངས་པའི་ལོ་གསུམ་པར། རང་གི་བློན་ཆེན་རྣམས་ལས་པེན་ཧ་ཨིལ་དང་། ཨོ་བད་ཡཱ། ཟཱ་ཀར་ཡ། ནེ་ཐན་ཨེལ། མི་ཀ་ཡཱ་བཅས་ཡ་ཧུ་དཱའི་གྲོང་ཁྱེར་རྣམས་ལ་བསླབ་བྱ་གནང་བར་བཏང་ཞིང་།
2CH 17:8 དེ་དག་དང་མཉམ་དུ་ད་དུང་ལེ་ཝི་པ་ལས་ཤེ་མ་ཡཱ་དང་། ནེ་ཐན་ཡཱ། ཟེ་པད་ཡཱ། ཨ་སཱ་ཧེལ། ཤེ་མི་ར་མོད། ཡེ་ཧོ་ན་ཐཱན། ཨ་དོ་ནི་ཡཱ། ཏོ་བི་ཡཱ། ཏོབ་ཨ་དོ་ནི་ཡཱ་བཅས་ཀྱང་སོང་ཞིང་། མཆོད་དཔོན་ཨེ་ལི་ཤ་མ་དང་ཡེ་ཧོ་རཱམ་གཉིས་ཀྱང་བརྫངས།
2CH 17:9 དེ་དག་གིས་དཀོན་མཆོག་ཡ་ཝཱེའི་བཀའ་ཁྲིམས་ཀྱི་མདོ་རྣམས་ཁྱེར་ཅིང་ཡ་ཧུ་དཱ་རུ་བསླབ་བྱ་གནང་བ་དང་། ཡ་ཧུ་དཱའི་གྲོང་ཁྱེར་ཀུན་ཏུ་རྒྱུ་ནས་མི་ཀུན་ལ་ཆོས་བསྟན།
2CH 17:10 དེར་ཡ་ཧུ་དཱའི་མཐའ་འཁོར་གྱི་རྒྱལ་ཁམས་ཐམས་ཅད་ནི་དཀོན་མཆོག་ཡ་ཝཱེ་ལ་འཇིགས་ཏེ། ཡེ་ཧོ་ཤ་ཕད་ལ་འཐབ་མ་ནུས་པ་རེད།
2CH 17:11 ཕེ་ལེ་ཤེད་པ་རྣམས་ལས་འགའ་ཞིག་གིས་ཡེ་ཧོ་ཤ་ཕད་ལ་ཕྱག་རྟགས་དང་དངུལ་ཁྲལ་ཕུལ་བ་དང་། ཨ་རབ་པས་ཀྱང་ཁོང་ལ་ལུག་ཐུག་བདུན་སྟོང་བདུན་བརྒྱ་དང་། ར་ཐུག་བདུན་སྟོང་བདུན་བརྒྱ་ཕུལ་བའོ། །
2CH 17:12 དེ་ནས་ཡེ་ཧོ་ཤ་ཕད་ལྷག་པར་དར་ནས་རབ་ཏུ་ཆེན་པོར་གྱུར་པ་དང་། ཡ་ཧུ་དཱའི་ནང་དུ་མཁར་དང་བང་མཛོད་ཀྱི་གྲོང་ཁྱེར་རྣམས་བརྩིགས་ཏེ།
2CH 17:13 ཡ་ཧུ་དཱའི་གྲོང་ཁྱེར་རྣམས་སུ་དངོས་ཟོག་འབོར་ཆེན་བསགས་པ་དང་། ཡེ་རུ་སཱ་ལེམ་དུའང་ཁོང་གི་དམག་མི་དཔའ་རྩལ་ཅན་མང་པོ་ཡོད་དོ། །
2CH 17:14 ཡང་ཁྱིམ་རྒྱུད་བཞིན་དུ་དེ་རྣམས་ཀྱི་གྲངས་ཀ་ནི་འདི་ལྟ་སྟེ། ཡ་ཧུ་དཱ་ཚོ་པའི་སྟོང་དཔོན་རྣམས་ལས། དམག་དཔོན་ཨད་ནཱ་དང་མཉམ་དུ་དམག་མི་དཔའ་རྩལ་ཅན་ཁྲི་སུམ་ཅུ་དང་།
2CH 17:15 དེ་ནས་སྟོང་དཔོན་ཡེ་ཧོ་ཧ་ནན་ཏེ། དེ་དང་མཉམ་དུ་མི་ཁྲི་ཉེར་བརྒྱད་ཡོད་དོ། །
2CH 17:16 ཡང་དེ་ནས་ཟིག་རིའི་བུ་ཨ་མས་ཡཱ་ཡོད་དེ། ཁོ་ནི་རང་མོས་ཀྱིས་དཀོན་མཆོག་ཡ་ཝཱེའི་དོན་དུ་ལས་བྱེད་དུ་ཞུགས་པའི་མི་ཞིག་ཡིན་པ་དང་། ཁོ་དང་མཉམ་དུ་དམག་མི་དཔའ་རྩལ་ཅན་ཁྲི་ཉི་ཤུ་ཡོད་པ་ཡིན།
2CH 17:17 པེན་ཡཱ་མེན་ཚོ་པ་ལས་དམག་མི་དཔའ་རྩལ་ཅན་ཨེལ་ཡ་དཱ་ཡོད་དེ། ཁོ་དང་མཉམ་དུ་མདའ་གཞུ་དང་ཕུབ་སྤྲད་པ་མི་འབུམ་གཉིས་ཡོད་པ་ཡིན།
2CH 17:18 དེ་ནས་ཡེ་ཧོ་ཟཱ་བད་ཡོད་དེ། ཁོ་དང་མཉམ་དུ་དམག་ལ་འགྲོ་ཆོག་པ་ཁྲི་བཅོ་བརྒྱད་ཡོད་པ་ཡིན།
2CH 17:19 དེ་ཐམས་ཅད་ནི་རྒྱལ་པོར་ཞབས་ཕྱི་བྱེད་མཁན་ཡིན་ལ། རྒྱལ་པོས་ཡ་ཧུ་དཱ་ཡུལ་ཀུན་གྱི་འགོག་སྲུང་གྲོང་ཁྱེར་རྣམས་སུ་བཞག་པ་རྣམས་འདིའི་ནང་དུ་བརྩིས་མེད་དོ། །
2CH 18:1 ཡེ་ཧོ་ཤ་ཕད་ལ་རྒྱུ་ནོར་དང་གཟི་བརྗིད་ཆེན་པོ་ལྡན་པར་གྱུར་ཅིང་ཨ་ཧབ་དང་གཉེན་འབྲེལ་བྱས་ཏེ།
2CH 18:2 ལོ་ཁ་ཤས་ཀྱི་རྗེས་སུ་ཁོང་ཉིད་སཱ་མར་ཡ་རུ་ཨ་ཧབ་ཀྱི་དྲུང་དུ་ཕྱིན་པ་དང་། ཨ་ཧབ་ཀྱིས་ཁོང་དང་ཁོང་མཉམ་དུ་ཡོད་པའི་མི་རྣམས་ཀྱི་དོན་དུ་ལུག་དང་གླང་མང་པོ་བཤས་ཏེ། ཡང་ཁོ་དང་མཉམ་དུ་སོང་ནས་གིལ་ཨད་ཀྱི་རཱ་མོད་ལ་དམག་རྒྱག་པའི་ཕྱིར་བསྐུལ་ཏོ། །
2CH 18:3 ཡེས་ར་ཨེལ་གྱི་རྒྱལ་པོ་ཨ་ཧབ་ཀྱིས་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ལ་ན་རེ། ཁྱེད་རང་ང་དང་མཉམ་དུ་གིལ་ཨད་ཀྱི་རཱ་མོད་ལ་དམག་རྒྱག་ཏུ་འགྲོའམ་ཞེས་དྲིས་པར། ཁོང་གིས་དེའི་ལན་དུ། འུ་གཉིས་བར་ལ་ཁྱོད་དང་ང་ཞེས་འགེར་རྒྱུ་མེད་དེ། ངའི་མི་རྣམས་ཁྱེད་ཀྱི་མི་ཡིན་པས། བདག་གིས་ཁྱེད་དང་མཉམ་དུ་དམག་རྒྱག་པར་བྱའོ་ཞེས་སྨྲས།
2CH 18:4 ཡེ་ཧོ་ཤ་ཕད་ཀྱིས་ཡང་ཡེས་ར་ཨེལ་གྱི་རྒྱལ་པོ་ལ། ཁྱེད་ཀྱིས་སྔོན་ལ་དཀོན་མཆོག་ཡ་ཝཱེ་ལ་བཀའ་འདྲི་ཞུས་ཤིག་ཅེས་བསྐུལ་ཏོ། །
2CH 18:5 ཡེས་ར་ཨེལ་གྱི་རྒྱལ་པོས་ལུང་སྟོན་པ་བཞི་བརྒྱ་བསྡུས་ནས་དེ་དག་ལ་ན་རེ། རང་ཅག་གིལ་ཨད་ཀྱི་རཱ་མོད་ལ་དམག་རྒྱག་ཏུ་འགྲོ་རུང་ངམ་མི་རུང་ཞེས་དྲིས་པ་དང་། དེ་དག་གིས། ཁྱེད་རང་ཡར་ཕེབས་ཤིག དཀོན་མཆོག་གིས་ཡུལ་དེའི་རྒྱལ་པོ་ཁྱེད་ཀྱི་ཕྱག་ཏུ་སྩོལ་བར་འགྱུར་ཞེས་སྨྲས།
2CH 18:6 དེར་ཡེ་ཧོ་ཤ་ཕད་ཀྱིས། འདིར་དཀོན་མཆོག་ཡ་ཝཱེའི་ལུང་སྟོན་པ་གཞན་ཡང་ཡོད་པ་མ་ཡིན་ནམ། རང་ཅག་གིས་ཁོང་ལ་བཀའ་འདྲི་ཞུས་ན་ཅིས་མི་ཆོག་ཅེས་སྨྲས་པར།
2CH 18:7 ཡེས་ར་ཨེལ་གྱི་རྒྱལ་པོས་ཡེ་ཧོ་ཤ་ཕད་ལ་ན་རེ། ད་དུང་མི་ཞིག་ཡོད་དེ། ཁོ་ནི་ཨིམ་ལཱའི་བུ་མི་ཀ་ཡཱ་བྱ་བ་ཡིན་ནོ། །ང་ཚོས་ཁོ་རང་བརྒྱུད་ནས་དཀོན་མཆོག་ཡ་ཝཱེའི་ཐུགས་བརྟག་ཞུ་ནུས་ཀྱང་། དེས་ང་ལ་གནང་བའི་ལུང་བསྟན་ནི་ནམ་ཡིན་ཡང་གཏམ་ངན་ལས་གཏམ་བཟང་མེད་པས། ང་དེ་ལ་སྡང་ངོ་ཞེས་སྨྲས་པར། ཡེ་ཧོ་ཤ་ཕད་ན་རེ། རྒྱལ་པོ་ཁྱེད་ཀྱིས་འདི་འདྲ་མི་གསུང་རོགས་ཞེས་སྨྲས།
2CH 18:8 དེ་ནས་ཡེས་ར་ཨེལ་གྱི་རྒྱལ་པོས་ཉུག་རུམ་པ་ཞིག་བོས་ནས་ན་རེ། མྱུར་དུ་སོང་ལ་ཨིམ་ལཱའི་བུ་མི་ཀ་ཡཱ་ཁྲིད་ཤོག་ཅེས་བསྒོས།
2CH 18:9 དེའི་དུས་སུ་ཡེས་ར་ཨེལ་གྱི་རྒྱལ་པོ་དང་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་གཉིས་པོས་རང་གི་ན་བཟའ་མནབས་ཏེ། སཱ་མར་ཡའི་མཁར་སྒོ་མདུན་གྱི་ཐང་ཆེན་དུ་རང་རང་གི་ཁྲི་ལ་བཞུགས་ཤིང་། ལུང་སྟོན་པ་ཐམས་ཅད་ཀྱིས་དེ་གཉིས་ཀྱི་དྲུང་ནས་ལུང་སྟོན་བཞིན་ཡོད་དེ།
2CH 18:10 ཀེ་ནཱ་ནའི་བུ་ཚིད་ཀི་ཡཱས་རང་གི་ཕྱིར་ལྕགས་ཀྱི་རྭ་ཅོ་འགའ་བཟོས་ཏེ་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ལྕགས་ཀྱི་རྭ་ཅོ་འདི་དག་གིས་ཨ་རམ་པ་རྣམས་ཚར་གཅོད་པའི་བར་དུ་བསྣུན་པར་བྱ་གསུངས་ཞེས་སྨྲས།
2CH 18:11 དེ་བཞིན་དུ་ལུང་སྟོན་པ་ཐམས་ཅད་ཀྱིས་ཀྱང་ལུང་བསྟན་ཏེ་ན་རེ། ཁྱེད་རང་ཡར་གིལ་ཨད་ཀྱི་རཱ་མོད་ལ་དམག་རྒྱག་ཏུ་བསྐྱོད་ཅིག་དང་། རྒྱལ་ཁ་ལོན་པར་འགྱུར་ཏེ། དཀོན་མཆོག་ཡ་ཝཱེས་གྲོང་ཁྱེར་དེ་རྒྱལ་པོའི་ཕྱག་ཏུ་གཏོད་པར་འགྱུར་བས་སོ་ཞེས་སྨྲས་སོ། །
2CH 18:12 ཡང་མི་ཀ་ཡཱ་འབོད་དུ་སོང་བའི་བང་ཆེན་དེས་ཁོང་ལ་ན་རེ། གཟིགས་དང་། ལུང་སྟོན་པ་ཐམས་ཅད་ཁ་མཐུན་ནས་རྒྱལ་པོ་ལ་ལུང་བསྟན་བཟང་པོ་སྨྲ་བ་སྟེ། ཁྱེད་ཀྱིས་ཀྱང་དེ་དག་དང་འདྲ་བར་གཏམ་བཟང་གསུང་བར་མཛོད་ཅེས་ཞུས་པ་ལ།
2CH 18:13 མི་ཀ་ཡཱས་འདི་ལྟར། བདག་གིས་གཏན་དུ་གནས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་སྐྱེལ་ཏེ། ངའི་དཀོན་མཆོག་གིས་ཅི་གསུངས་ན་བདག་གིས་དེ་ལྟར་སྨྲ་བར་འགྱུར་ཞེས་སྨྲས།
2CH 18:14 མི་ཀ་ཡཱ་རྒྱལ་པོའི་དྲུང་དུ་སླེབས་པའི་ཚེ་ན། རྒྱལ་པོས་དེ་ལ། ཀྱེ་མི་ཀ་ཡཱ། ངེད་ཅག་གིལ་ཨད་ཀྱི་རཱ་མོད་ལ་དམག་རྒྱག་ཏུ་འགྲོ་རུང་ངམ་མི་རུང་ཞེས་དྲིས་པ་དང་། ཁོང་གིས་འདི་ལྟར། ཡར་སོང་དང་རྒྱལ་ཁ་ལོན་ངེས་ཡིན། ཁོ་རྣམས་ཁྱེད་ཅག་གི་ལག་ཏུ་སྤྲོད་པར་འགྱུར་ཞེས་སྨྲས་པ་ལ།
2CH 18:15 རྒྱལ་པོ་ན་རེ། བདག་གིས་ཁྱོད་ལ་མནའ་དུ་འགེལ་བར་བྱས་ན། ཁྱོད་ཀྱིས་ད་གཟོད་དཀོན་མཆོག་ཡ་ཝཱེའི་མཚན་གྱི་སྒོ་ནས་བདག་ལ་བདེན་པ་ཁོ་ན་སྨྲའམ་ཞེས་དྲིས་པར།
2CH 18:16 མི་ཀ་ཡཱ་ན་རེ། བདག་གིས་ཡེས་ར་ཨེལ་པ་ཐམས་ཅད་ནི་རྫི་བོ་མེད་པའི་ལུག་ལྟར་རི་ལ་འཐོར་ཡོད་པ་མཐོང་བ་དང་། དཀོན་མཆོག་ཡ་ཝཱེས་འདི་སྐད་དུ། འདི་རྣམས་ལ་བདག་པོ་གང་ཡང་མེད་པས་ཞི་བདེའི་ངང་རང་རང་གི་ཡུལ་ལ་འགྲོ་རུ་ཆུག་ཅེས་གསུངས་ཞེས་སྨྲས་པ་ན།
2CH 18:17 ཡེས་ར་ཨེལ་གྱི་རྒྱལ་པོས་ཡེ་ཧོ་ཤ་ཕད་ལ། འདིས་ང་ལ་ལུང་བསྟན་ངན་པ་མ་གཏོགས་བཟང་པོ་ཞིག་སྟོན་པར་མི་འགྱུར་ཞེས་ངས་ཁྱེད་ལ་བཤད་པ་མ་ཡིན་ནམ་ཞེས་སྨྲས་པ་ན།
2CH 18:18 དེར་མི་ཀ་ཡཱ་ན་རེ། དེ་བས་ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་དང་། དཀོན་མཆོག་ཡ་ཝཱེ་ཁོང་ཉིད་ཀྱི་བཞུགས་ཁྲི་ལ་བཞུགས་པ་དང་། ནམ་མཁའི་དཔུང་ཚོགས་ཐམས་ཅད་ནི་ཁོང་གི་གཡས་གཡོན་དུ་འགྲེང་འདུག་པ་ངས་མཐོང་བྱུང་།
2CH 18:19 དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་གྱི་རྒྱལ་པོ་ཨ་ཧབ་ནི་ཡར་གིལ་ཨད་ཀྱི་རཱ་མོད་དུ་སོང་ནས་འགྱེལ་བའི་ཕྱིར་སུས་ཁོ་བསླུ་བར་བྱའམ་ཞེས་གསུངས་པའི་ལན་དུ། འདི་ལྟར་བརྗོད་མཁན་དང་དེ་ལྟར་བརྗོད་མཁན་བྱུང་ངོ་། །
2CH 18:20 དེ་ནས་སེམས་ཉིད་ཅིག་ཐོན་ཞིང་དཀོན་མཆོག་ཡ་ཝཱེའི་དྲུང་དུ་འགྲེངས་ནས་འདི་ལྟར། ངས་ཁོ་བསླུ་བར་བྱ་ཞེས་ཞུས་པར། དཀོན་མཆོག་ཡ་ཝཱེས་ཁོ་ལ་ཅི་ལྟར་བསླུ་བར་བྱའམ་ཞེས་དྲིས་པ་ན།
2CH 18:21 དེས་འདི་སྐད་དུ། ང་རང་སོང་ནས་ཁོའི་ལུང་སྟོན་པ་ཐམས་ཅད་ཀྱི་ཁ་རུ་རྫུན་སྨྲ་བའི་སེམས་ཉིད་དུ་བྱའོ་ཞེས་ཞུས་པ་དང་། དཀོན་མཆོག་ཡ་ཝཱེས་དེ་ལ་འདི་སྐད་དུ། ཁྱོད་ཀྱིས་ཁོ་བསླུས་ནས་དོན་འགྲུབ་པར་འགྱུར་བས་སོང་ལ་དེ་བཞིན་དུ་བྱོས་ཤིག་ཅེས་བསྒོས་སོ། །
2CH 18:22 ད་ནི་ལྟོས་ཤིག དཀོན་མཆོག་ཡ་ཝཱེས་ཁྱོད་ཀྱི་ལུང་སྟོན་པ་འདི་དག་གི་ཁ་རུ་རྫུན་སྨྲ་བའི་སེམས་ཉིད་བཅུག་པར་མ་ཟད། ཁོང་གིས་ཁྱོད་ལ་ཆག་སྒོ་འབྱུང་བ་ཁྱབ་བསྒྲགས་མཛད་པའོ་ཞེས་སྨྲས་པ་དང་།
2CH 18:23 དེ་ནས་ཀེ་ནཱ་ནའི་བུ་ཚིད་ཀི་ཡཱ་ཉེ་བར་འོངས་ནས་མི་ཀ་ཡཱ་ལ་འགྲམ་ལྕག་གཞུས་ཏེ་ན་རེ། དཀོན་མཆོག་ཡ་ཝཱེའི་ཐུགས་ཉིད་དེ་ཅི་ལྟར་ང་དང་བྲལ་ནས་ཁྱོད་ལ་གཏམ་བྱས་པ་ཡིན་ནམ་ཞེས་དྲིས་པ་ལ།
2CH 18:24 མི་ཀ་ཡཱ་ན་རེ། ཁྱོད་སྦུག་ཁང་དུ་འཛུལ་ནས་ཡིབ་པའི་ཉིན་མོར་དེ་མཐོང་བར་འགྱུར་ཞེས་གསུངས།
2CH 18:25 དེར་ཡེས་ར་ཨེལ་གྱི་རྒྱལ་པོས་འདི་ལྟར། མི་ཀ་ཡཱ་བཟུང་སྟེ་གྲོང་དཔོན་ཨ་མོན་དང་རྒྱལ་སྲས་ཡོ་ཨ་སི་ཡི་རྩར་ཁྲིད་ནས་དེ་དག་ལ།
2CH 18:26 རྒྱལ་པོས་འདི་ལྟར། ང་བདེ་བར་ཕྱིར་སླེབས་པའི་བར་དུ་མི་འདི་བཙོན་ལ་བཅུག་སྟེ། བཟའ་བཏུང་ཉུང་ཙམ་ལས་གང་ཡང་མ་སྟེར་བསྒོས་སོང་ཞེས་སྨྲོས་ཤིག་ཅེས་སྨྲས།
2CH 18:27 མི་ཀ་ཡཱ་ན་རེ། གལ་ཏེ་ཁྱོད་རང་དངོས་གནས་བདེ་བར་ཕྱིར་འོངས་ཐུབ་ན། དཀོན་མཆོག་ཡ་ཝཱེས་ང་བརྒྱུད་དེ་ཅི་ཡང་མ་གསུངས་པ་ཡིན་ཞེས་སྨྲས་པ་དང་། ཡང་མི་ཐམས་ཅད་ཀྱིས་ཉོན་ཅིག་ཅེས་བསྒོས་སོ། །
2CH 18:28 དེ་ནས་ཡེས་ར་ཨེལ་གྱི་རྒྱལ་པོ་དང་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་གཉིས་ཡར་གིལ་ཨད་ཀྱི་རཱ་མོད་དུ་སོང་ནས།
2CH 18:29 ཡེས་ར་ཨེལ་གྱི་རྒྱལ་པོས་ཡེ་ཧོ་ཤ་ཕད་ལ་ན་རེ། ངས་གོས་ཆས་བསྒྱུར་ཏེ་གཡུལ་ལ་ཞུགས་དགོས། ཁྱེད་ཀྱིས་རང་གི་ན་བཟའ་གྱོན་ནས་སྡོད་ཅིག་སྨྲས་ཏེ། ཡེས་ར་ཨེལ་གྱི་རྒྱལ་པོས་གོས་ཆས་བསྒྱུར་ཏེ་ཁོ་རྣམས་གཡུལ་ལ་ཞུགས།
2CH 18:30 དེར་ཨ་རམ་གྱི་རྒྱལ་པོས་ཤིང་རྟའི་འགོ་དཔོན་དག་ལ་བཀའ་བབས་ཏེ་ན་རེ། ཡེས་ར་ཨེལ་གྱི་རྒྱལ་པོ་འབའ་ཞིག་མ་གཏོགས་དམག་ཆེ་ཆུང་གང་ལའང་མ་འཐབ་ཅིག་ཅེས་བསྒོས་པས།
2CH 18:31 ཤིང་རྟའི་འགོ་དཔོན་ཚོས་ཡེ་ཧོ་ཤ་ཕད་མཐོང་བ་དང་། འདི་ནི་ཡེས་ར་ཨེལ་གྱི་རྒྱལ་པོ་ཡིན་སྙམ་ནས་ཁ་ཕྱིར་འཁོར་ནས་ཁོང་ལ་རྒོལ་ཞིང་། ཡེ་ཧོ་ཤ་ཕད་ཀྱིས་འོ་དོད་བོས་པ་དང་། དཀོན་མཆོག་ཡ་ཝཱེས་དེ་ལ་སྐྱབས་མཛད་དེ། དཀོན་མཆོག་གིས་དགྲ་རྣམས་ཁོང་གི་མདུན་ནས་བཟློགས།
2CH 18:32 ཤིང་རྟའི་འགོ་དཔོན་ཚོས་དེ་ནི་ཡེས་ར་ཨེལ་གྱི་རྒྱལ་པོ་མིན་པ་ཤེས་ནས། ཁོང་མ་བདས་པར་ཕྱིར་ལོག་པ་རེད།
2CH 18:33 དེ་ནས་མི་ཞིག་གིས་མདའ་འཕངས་པ་ལ་མ་བསམ་ས་ནས་ཡེས་ར་ཨེལ་གྱི་རྒྱལ་པོའི་གོ་ཁྲབ་ཀྱི་མཐུད་མཚམས་སུ་ཕོག་པ་དང་། རྒྱལ་པོས་རང་གི་རྟ་པ་ལ་ན་རེ། ང་རྨས་བྱུང་བས་ཁྱོད་ཀྱིས་ཤིང་རྟ་ཁ་ལོ་སྒྱུར་དང་། ང་རང་གཡུལ་ས་ནས་ཁྲིད་ཅིག་ཅེས་བསྒོས།
2CH 18:34 ཉིན་དེར་དམག་འཐབ་ཛ་དྲག་ཏུ་སོང་སྟེ། ཡེས་ར་ཨེལ་གྱི་རྒྱལ་པོ་དགོང་མོའི་བར་དུ་ཤིང་རྟའི་སྟེང་ལངས་ཅི་ཐུབ་བྱས་ཏེ་ཨ་རམ་པ་ལ་འགོག་རྒོལ་བྱས་པ་དང་། ཉི་མ་ནུབ་དུས་ཙམ་ལ་རྒྱལ་པོ་ཚེ་ལས་འདས་སོ། །
2CH 19:1 དེ་ནས་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་བདེ་བར་ཡེ་རུ་སཱ་ལེམ་གྱི་རང་གི་ཕོ་བྲང་དུ་ཕྱིར་སླེབས་པ་དང་།
2CH 19:2 ཧ་ནཱ་ནེའི་བུ་མངོན་ཤེས་པ་ཡེ་ཧུ་ཁོང་བསུ་རུ་འོངས་ནས། རྒྱལ་པོ་ཡེ་ཧོ་ཤ་ཕད་ལ་འདི་ལྟར། ཁྱོད་མི་ངན་གྱི་གྲོགས་བྱེད་ཅིང་དཀོན་མཆོག་ཡ་ཝཱེར་སྡང་མཁན་ལ་དགའ་བ་ཅི་ཡིན་ནམ། དེའི་ཕྱིར་དཀོན་མཆོག་ཡ་ཝཱེའི་ཐུགས་ཁྲོ་ཁྱོད་ཀྱི་ཐོག་ཏུ་བབས་སོ། །
2CH 19:3 འོན་ཀྱང་ཁྱོད་ཀྱིས་ཡུལ་འདི་ནས་ཨ་ཤེ་རཱ་རྣམས་ཚར་བཅད་དེ། དཀོན་མཆོག་བཙལ་བའི་སེམས་ཐག་བཅད་པའི་དབང་གིས། ཁྱོད་ལས་ད་དུང་བཟང་ཆ་རྙེད་ནུས་ཞེས་གདམས།
2CH 19:4 ཡེ་ཧོ་ཤ་ཕད་ནི་ཡེ་རུ་སཱ་ལེམ་དུ་གནས་དུས། ཡང་ཁོང་པེར་ཤ་བཱ་ནས་ཨེ་ཕཱར་ཡིམ་གྱི་རི་ཁུལ་དུ་མི་རྣམས་ཀྱི་ཁྲོད་དུ་ཕྱིན་ཏེ། འབངས་རྣམས་རང་གི་ཕ་མེས་ཀྱི་དཀོན་མཆོག་ཡ་ཝཱེའི་ཕྱོགས་སུ་ཕྱིར་ཁྲིད་འོངས་པ་དང་།
2CH 19:5 ཡང་ཁོང་གིས་ཡ་ཧུ་དཱའི་འགོག་སྲུང་གྲོང་ཁྱེར་ཐམས་ཅད་ཀྱི་ནང་དུ་ཁྲིམས་དཔོན་བཞག་ནས།
2CH 19:6 ཁོང་གིས་ཁྲིམས་དཔོན་རྣམས་ལ་ན་རེ། ཁྱོད་ཚོས་ཅི་ཞིག་བྱས་ཀྱང་དོགས་ཟོན་གྱིས་ཤིག ཅིའི་ཕྱིར་ཞེ་ན། ཁྱོད་ཀྱིས་དཀོན་མཆོག་ཡ་ཝཱེའི་དོན་དུ་ཁྲིམས་གཅོད་པ་ལས་མི་རྣམས་ཀྱི་ཆེད་དུ་ཁྲིམས་གཅོད་པ་མ་ཡིན་ཏེ། ཁྲིམས་གཅོད་དུས་ཀྱང་ཡ་ཝཱེ་ཁྱོད་རྣམས་དང་མཉམ་དུ་བཞུགས་པ་ཡིན།
2CH 19:7 ད་ནི་ཁྱོད་ཅག་དཀོན་མཆོག་ཡ་ཝཱེ་ལ་གུས་ཤིང་འཇིགས་པར་གྱུར་ཅིག བྱ་བ་ཐམས་ཅད་ཀྱི་ནང་དུ་དོགས་ཟོན་གྱིས་ཤིག ཅི་ལ་ཞེ་ན། རང་ཅག་གི་དཀོན་མཆོག་ཡ་ཝཱེས་དྲང་བདེན་གྱི་ལས་སྒྲུབ་པ་དང་མི་ཡི་ཁ་ངོར་མི་བལྟ། གསུག་ཀྱང་མི་ལེན་ནོ་ཞེས་སྨྲས་སོ། །
2CH 19:8 ཡེ་ཧོ་ཤ་ཕད་ཀྱིས་ཡང་ཡེ་རུ་སཱ་ལེམ་དུ་ལེ་ཝི་པ་དང་མཆོད་དཔོན། ཡེས་ར་ཨེལ་གྱི་ཁྱིམ་རྒྱུད་སོ་སོའི་འགོ་དཔོན་རྣམས་ལས། དཀོན་མཆོག་ཡ་ཝཱེའི་ཕྱིར་དཔྱད་ཁྲ་གཏོང་བ་དང་། ཡེ་རུ་སཱ་ལེམ་གྱི་འབངས་མིའི་ཆེད་དུ་ཁྲིམས་གཅོད་པར་མི་འགའ་རེ་བསྐོས་པ་ཡིན་ནོ། །
2CH 19:9 ཡང་ཁོང་གིས་དེ་རྣམས་ལ་བཀའ་བསྩལ་ནས་ན་རེ། ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་གུས་ཤིང་འཇིགས་པའི་སེམས་བཅངས་ནས་བློ་དཀར་བ་དང་སེམས་ཧྲིལ་པོས་དོན་རྣམས་སྒྲུབས་ཤིག
2CH 19:10 ཁྱོད་ཚོའི་གྲོང་ཁྱེར་སོ་སོར་གནས་པའི་སྤུན་ཟླ་རྣམས་ཀྱིས་ཁྱོད་ཅག་གི་མདུན་དུ་ཁྱེར་ཡོང་བའི་གྱོད་གཞི་ཐམས་ཅད་ནི། ཁྲག་བཞུར་བའི་དོན་རྐྱེན་ནམ། ཡང་ན་བཀའ་ཁྲིམས་དང་བཀའ་རྒྱ། ཁྲིམས་སྲོལ། སྲོལ་ཡིག་བཅས་དང་འབྲེལ་བའི་གྱོད་གཞི་གང་ཡིན་ཡང་། དེ་དག་གིས་དཀོན་མཆོག་ཡ་ཝཱེའི་དྲུང་དུ་ཉེས་པ་མི་བྱེད་པ་དང་། ཁྱོད་རྣམས་དང་ཁྱོད་རྣམས་ཀྱི་སྤུན་གྱི་སྟེང་དུ་ཁོང་གི་ཐུགས་ཁྲོ་མི་འབབ་པའི་ཆེད་དུ། དེ་དག་ལ་ཉེན་བརྡ་ཐོངས་ཤིག དེ་ལྟར་བྱས་ན་ཁྱོད་ཅག་ལ་སྡིག་པ་མེད་དོ། །
2CH 19:11 དཀོན་མཆོག་ཡ་ཝཱེ་ལ་གཏོགས་པའི་བྱ་བ་ཐམས་ཅད་ཀྱི་ཕྱིར་མཆོད་དཔོན་ཆེན་པོ་ཨ་མར་ཡཱ་ཡིས་ཁྱོད་ཚོའི་ཆེད་དུ་ཐག་གཅོད་བྱེད་པ་དང་། རྒྱལ་པོར་གཏོགས་པའི་བྱ་བ་ཐམས་ཅད་ཀྱི་ཕྱིར་ཡ་ཧུ་དཱའི་ཁྱིམ་རྒྱུད་ཀྱི་འགོ་དཔོན་ཡེས་མ་ཨེལ་གྱི་བུ་ཟེ་པད་ཡཱ་ཡིས་ཁྱོད་ཚོའི་ཆེད་དུ་ཐག་གཅོད་བྱེད་པ་ཡིན། ཡང་ལེ་ཝི་པ་དག་ནི་ཁྱོད་ཅག་གི་མདུན་དུ་ཡོད་པའི་ལས་སྣེ་པའོ། །ཁྱོད་ཚོས་སྙིང་སྟོབས་བསྐྱེད་དེ་དོན་རྣམས་སྒྲུབས་ཤིག དཀོན་མཆོག་ཡ་ཝཱེ་ནི་མི་བཟང་པོ་དང་མཉམ་དུ་བཞུགས་ངེས་ཡིན་ཞེས་གསུངས་སོ། །
2CH 20:1 དེའི་རྗེས་སུ་མོ་ཨབ་པ་དང་ཨམ་མོན་པ་ནི། མེ་ཨུན་པ་རྣམས་དང་མཉམ་དུ་ཡེ་ཧོ་ཤ་ཕད་ལ་དམག་རྒྱག་ཏུ་འོངས་པ་དང་།
2CH 20:2 མི་ཞིག་འོངས་ནས་ཡེ་ཧོ་ཤ་ཕད་ལ་ན་རེ། རྒྱ་མཚོའི་ཕ་རོལ་ཏེ་ཨེ་དོམ་པའི་ཕྱོགས་ནས་དམག་ཚོགས་ཆེན་པོ་ཞིག་ཁྱེད་ལ་རྒོལ་དུ་འོང་གིན་འདུག གཟིགས་དང་། ད་ལྟ་དེ་རྣམས་ཧ་ཚོན་ཐལ་མཱར་ཏེ། ཨེན་གེ་དི་ལ་སླེབས་ཟིན་ཞེས་སྨྲས་པ་དང་།
2CH 20:3 ཡེ་ཧོ་ཤ་ཕད་འཇིགས་ཏེ། དཀོན་མཆོག་ཡ་ཝཱེ་འཚོལ་བར་སེམས་ཐག་བཅད་ནས། སྨྱུང་གནས་སྲུང་རྒྱུའི་དོན་ཡ་ཧུ་དཱ་ཡོངས་ལ་བསྒྲགས།
2CH 20:4 དེ་ནས་ཡ་ཧུ་དཱ་པ་ཐམས་ཅད་དཀོན་མཆོག་ཡ་ཝཱེ་ལ་སྐྱབས་ཞུ་བའི་ཆེད་དུ་འདུས་ཏེ། ཡ་ཧུ་དཱའི་གྲོང་ཁྱེར་སོ་སོ་ནས་དཀོན་མཆོག་ཡ་ཝཱེ་འཚོལ་དུ་འོངས་པ་རེད།
2CH 20:5 ཡེ་ཧོ་ཤ་ཕད་ཀྱིས་དཀོན་མཆོག་ཡ་ཝཱེའི་མཆོད་ཁང་གི་ར་སྐོར་གསར་པའི་མདུན་དུ། ཡ་ཧུ་དཱ་དང་ཡེ་རུ་སཱ་ལེམ་གྱི་མི་ཚོགས་དཀྱིལ་དུ་ལངས་ནས་ན་རེ།
2CH 20:6 ཀྱེ་ངེད་ཅག་གི་ཕ་མེས་ཀྱི་དཀོན་མཆོག་ཡ་ཝཱེ་ལགས། ཁྱེད་ནི་ནམ་མཁའ་རུ་བཞུགས་པའི་དཀོན་མཆོག་མ་ཡིན་ནམ། ཁྱེད་ནི་མི་རིགས་སོ་སོ་དང་རྒྱལ་ཁམས་མཐའ་དག་གི་མངའ་བདག་མ་ཡིན་ནམ། ཁྱེད་ཀྱི་ཕྱག་ཏུ་དབང་དང་མཐུ་མངའ་བས། སུས་ཀྱང་ཁྱེད་ལ་འགྲན་མི་ནུས།
2CH 20:7 ངེད་ཅག་གི་དཀོན་མཆོག་ལགས། སྔར་ཁྱེད་ཀྱིས་ཉིད་ཀྱི་འབངས་མི་ཡེས་ར་ཨེལ་གྱི་མདུན་ནས་ཡུལ་ཁམས་འདིའི་ཡུལ་མི་ཐམས་ཅད་བསྐྲད་དེ། ཁྱེད་ཀྱི་མཛའ་བོ་ཨབ་ར་ཧམ་གྱི་བུ་རྒྱུད་ལ་ཡུལ་ཁམས་འདི་དུས་གཏན་གྱི་ནོར་སྐལ་དུ་གནང་བ་མ་ཡིན་ནམ།
2CH 20:8 ཁོ་རྣམས་འདིར་གནས་ཤིང་། ཡང་ཁྱེད་ཀྱི་མཚན་གྱི་ཕྱིར་དམ་པའི་གནས་ཤིག་བཞེངས་ཏེ་ན་རེ།
2CH 20:9 གལ་ཏེ་ངེད་ཅག་ལ་རལ་གྲིའམ། ཉེས་ཆད་དམ། རིམས་ནད་དམ། མུ་གེ་ལ་སོགས་པའི་རྐྱེན་ངན་གང་རུང་འབྱུང་བ་དང་། དཀའ་སྡུག་གི་དུས་སུ་ངེད་ཅག་མཆོད་ཁང་འདི་དང་ཁྱེད་ཀྱི་དྲུང་དུ་ལངས་བསྡད་ནས་ཁྱེད་ལ་འོ་དོད་བོས་ན། ཁྱེད་ཀྱིས་གསན་ནས་སྐྱོབ་པར་འགྱུར་ཏེ། ཁྱེད་ཀྱི་མཚན་ནི་མཆོད་ཁང་འདིར་བཞུགས་པས་སོ་ཞེས་སྨྲས་སོ། །
2CH 20:10 ད་ལྟ་འདི་རུ་ཨམ་མོན་པ་དང་མོ་ཨབ་པ་དང་། རི་སེ་ཨིར་པ་བཅས་ཡོད་ལ། སྔར་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་དུས་སུ། ཁྱེད་ཀྱིས་ཁོ་རྣམས་དེ་དག་གི་ཡུལ་དུ་འགྲོ་རུ་མ་གནང་། དེའི་དུས་སུ་ཡེས་ར་ཨེལ་པ་རྣམས་ཁོ་ཚོ་དང་བྲལ་ནས་ཁོ་ཚོ་མེད་པར་མ་བྱས།
2CH 20:11 ད་ནི་ཁྱེད་ཀྱིས་གཟིགས་དང་། ཁོ་ཚོས་ང་ཚོར་འདི་ལྟར་ལན་འཇལ་བ་སྟེ། ཁོ་རྣམས་འོངས་ནས་ངེད་རྣམས་ཁྱེད་ཀྱིས་ས་སྐལ་དུ་གནང་བའི་ཡུལ་ལས་སྐྲོད་པར་འདོད་དོ། །
2CH 20:12 ཀྱེ་ངེད་ཅག་གི་དཀོན་མཆོག་ལགས། ཁྱེད་ཀྱིས་དེ་དག་ལ་ཁྲིམས་ཆད་མི་གཅོད་དམ། ཅི་ལ་ཞེ་ན། ངེད་ཅག་ལ་འཐབ་ཏུ་འོངས་པའི་དམག་དཔུང་ཆེན་པོ་འདི་དང་འགྲན་པའི་སྟོབས་མེད་དེ། ཅི་བྱེད་དགོས་པའང་མི་ཤེས་པས། ཁྱེད་ཁོ་ནར་རེ་ལྟོས་བྱེད་པ་ཡིན་ཞེས་ཞུས།
2CH 20:13 དེའི་ཚེ་ཡ་ཧུ་དཱ་པ་ཐམས་ཅད་དེ་ཐ་ན་ཁོ་རྣམས་ཀྱི་ཕྲུ་གུ་དང་ཆུང་མ། བུ་དང་བུ་མོ་བཅས་ཀྱང་དཀོན་མཆོག་ཡ་ཝཱེའི་སྤྱན་སྔར་ལངས་བསྡད་པ་ཡིན།
2CH 20:14 དེ་ནས་དཀོན་མཆོག་ཡ་ཝཱེའི་ཐུགས་ཉིད་ནི་མི་ཚོགས་ཁྲོད་དུ་ལེ་ཝི་པ་ཨ་སབ་ཀྱི་བུ་རྒྱུད་ཡཱ་ཧ་ཟི་ཨེལ་ལ་བབས་ཤིང་། དེ་ནི་མད་ཐན་ཡཱའི་གསུམ་ཚ་དང་ཡེ་ཨི་ཨེལ་གྱི་ཡང་ཚ་སྟེ། པེ་ནཱ་ཡའི་ཚ་བོ་དང་ཟཱ་ཀར་ཡའི་བུ་ཡིན་ནོ། །
2CH 20:15 དེར་ཡེ་ཧ་ཟི་ཨེལ་ན་རེ། ཀྱེ་ཡ་ཧུ་དཱ་པ་ཐམས་ཅད་དང་ཡེ་རུ་སཱ་ལེམ་གྱི་འབངས་རྣམས་དང་རྒྱལ་པོ་ཡེ་ཧོ་ཤ་ཕད་ལགས། ཁྱེད་རྣམས་ཀྱིས་གསན་པར་མཛོད། དཀོན་མཆོག་ཡ་ཝཱེས་ཁྱེད་ཚོ་ལ་འདི་སྐད་དུ། དམག་འཁྲུག་གི་རྒྱལ་ཁ་ནི་ཁྱོད་རྣམས་ལ་རག་མི་ལས་ཏེ་དཀོན་མཆོག་ལ་རག་ལས་པས། དམག་དཔུང་ཆེན་པོ་འདིའི་རྐྱེན་གྱིས་མ་འཇིགས་མ་ཚབས་ཤིག
2CH 20:16 སང་ཉིན་ཁྱོད་ཅག་དེ་དག་དང་འཐབ་ཏུ་མར་བོབས་ཤིག་དང་། ལྟོས་དང་། དེ་དག་ཙི་སིའི་ལ་ངོས་སུ་ཡར་འཛེགས་ནས་འོང་ངེས། ཡེ་རུ་ཨེལ་དབེན་སྟོང་གི་ཤར་ཕྱོགས་སུ་ལུང་པའི་ཁར་ཁྱོད་ཅག་དེ་དག་དང་འཕྲད་པར་འགྱུར།
2CH 20:17 ཀྱེ་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས། ཐེངས་འདིར་ཁྱོད་ཅག་དེ་དག་དང་མི་འཐབ་པར་གཡུལ་ས་བསྲུངས་ནས་ལངས་བསྡད་དེ། དཀོན་མཆོག་ཡ་ཝཱེས་ཁྱོད་ཚོ་སྐྱོབ་ལུགས་ལ་ལྟོས་ཤིག ཁྱོད་རྣམས་མ་འཇིགས་མ་ཚབས་ཤིག དཀོན་མཆོག་ཡ་ཝཱེ་ཁྱོད་ཅག་དང་མཉམ་དུ་བཞུགས་པས། སང་ཉིན་དེ་རྣམས་ཀྱི་གདོང་བསུ་བར་སོང་ཞིག་ཅེས་གསུངས་སོ་ཞེས་བསྒོས་པ་དང་།
2CH 20:18 ཡེ་ཧོ་ཤ་ཕད་ཀྱིས་གདོང་སར་གཏད་ནས་ཕྱག་བཙལ་བ་དང་། ཡ་ཧུ་དཱ་པ་རྣམས་དང་ཡེ་རུ་སཱ་ལེམ་པ་ཐམས་ཅད་ཀྱིས་ཀྱང་དཀོན་མཆོག་ཡ་ཝཱེའི་དྲུང་དུ་ཕྱག་བཙལ་ནས་ཁོང་ལ་བསྙེན་བཀུར་ཞུས་སོ། །
2CH 20:19 དེ་ནས་ལེ་ཝི་པ་ཀོ་ཧད་པའི་བུ་རྒྱུད་རྣམས་དང་ཀོ་རཱག་པའི་བུ་རྒྱུད་རྣམས་ཡར་ལངས་ནས་སྐད་ཆེན་པོས་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་བསྟོད་བསྔགས་ཕུལ་ཏོ། །
2CH 20:20 དེའི་ཕྱི་ཉིན་ཞོགས་པར་ཁོ་རྣམས་སྔ་མོར་ལངས་ནས། ཐེ་ཀོ་ཨ་ཡི་དབེན་སྟོང་དུ་ཕྱིན་ཏེ། དེ་དག་ཆས་དུས་སུ་ཡེ་ཧོ་ཤ་ཕད་ཡར་ལངས་ཏེ་ན་རེ། ཀྱེ་ཡ་ཧུ་དཱ་པ་རྣམས་དང་ཡེ་རུ་སཱ་ལེམ་པ་རྣམས། ཁྱོད་ཚོས་བདག་ལ་ཉོན་དང་། ཁྱོད་ཅག་གི་དཀོན་མཆོག་ཡ་ཝཱེ་ལ་དད་པར་གྱིས་ཤིག་དང་། ཁྱོད་རྣམས་བརྟན་པོར་ཚུགས་པར་འགྱུར། ཁོང་གི་ལུང་སྟོན་པ་ལ་ཡིད་ཆེས་བྱོས་ཤིག ཁྱོད་ཅག་གི་དོན་ཀུན་འགྲུབ་པར་འགྱུར་ཞེས་སྨྲས་ནས།
2CH 20:21 ཡེ་ཧོ་ཤ་ཕད་དང་ཡུལ་མི་རྣམས་གྲོས་བྱས་པ་དང་། དཀོན་མཆོག་ཡ་ཝཱེ་ལ་བསྟོད་དབྱངས་འབུལ་མཁན་རྣམས་བསྐོས་ནས་ཆོས་གོས་དམ་པ་བསྐོན་ཏེ། དམག་ཚོགས་ཀྱི་མདུན་དུ་སོང་ནས་དཀོན་མཆོག་ཡ་ཝཱེ་ལ་བསྟོད་ཅིང་ན་རེ། དཀོན་མཆོག་ཡ་ཝཱེའི་བྱམས་བརྩེ་རྒྱུན་ནས་རྒྱུན་དུ་གནས་པས་ཁྱོད་ཚོས་ཁོང་ལ་བསྟོད་པར་འོས་ཞེས་བསྐུལ།
2CH 20:22 དེ་དག་གིས་བསྟོད་དབྱངས་འབུལ་འགོ་བརྩམས་པ་ཙམ་གྱིས། དཀོན་མཆོག་ཡ་ཝཱེས་འཇབ་དམག་རྣམས་མངགས་ཏེ་ཡ་ཧུ་དཱ་ལ་འཐབ་ཏུ་འོངས་པའི་ཨམ་མོན་པ་དང་། མོ་ཨབ་པ་དང་། རི་སེ་ཨིར་པ་རྣམས་གསོད་པར་མཛད་པ་ལ་དེ་དག་ཕམ་པར་བརྒྱབ་པའོ། །
2CH 20:23 ཡང་ཨམ་མོན་པ་དང་མོ་ཨབ་པ་རྣམས་ལངས་ནས་སེ་ཨིར་རི་བོའི་ཡུལ་མི་རྣམས་ལ་རྒོལ་ཞིང་དེ་རྣམས་ཡོངས་སུ་ཚར་བཅད་པ་དང་། སེ་ཨིར་རི་བོའི་ཡུལ་མི་རྣམས་ཚར་བཅད་རྗེས་དེ་དག་གིས་ཕན་ཚུན་གསོད་རེས་བྱས།
2CH 20:24 དེ་ནས་ཡ་ཧུ་དཱ་པ་རྣམས་དབེན་སྟོང་དུ་སོ་པའི་མཁར་ལ་སླེབས་ཤིང་དམག་དཔུང་ཆེན་པོ་དེ་ལ་བལྟས་པ་ན། ལྟོས་དང་། མི་རོས་ས་སྟེང་ཁེབས་འདུག་པ་མཐོང་སྟེ་གཅིག་ཀྱང་མ་ཐར་རོ། །
2CH 20:25 ཡེ་ཧོ་ཤ་ཕད་དང་ཁོང་གི་མི་རྣམས་དེ་དག་གི་རྒྱུ་ནོར་འཕྲོག་ཏུ་འོངས་པ་ལ། མི་རོའི་ཁྲོད་དུ་རྒྱུ་ནོར་དང་གྱོན་གོས། རིན་པོ་ཆེ་བཅས་ཧ་ཅང་མང་པོ་ཡོད་པ་མཐོང་ཞིང་། ཁོ་རྣམས་ཀྱིས་དེ་ཡོད་ཚད་བླངས་ནས་རང་གི་བྱས་པ་དང་། བཅོམ་ནོར་ཤིན་ཏུ་མང་བས་འཁྱེར་མི་ཐུབ་པ་ཙམ་བྱུང་ལ་ཡང་ཉིན་གསུམ་གྱི་རིང་ལ་བསྡུས།
2CH 20:26 དེ་ནས་ཉིན་བཞི་པར་དེ་རྣམས་པེ་ར་ཀ་ལུང་པ་རུ་འཛོམས་ཏེ། དེར་དཀོན་མཆོག་ཡ་ཝཱེ་ལ་བསྟོད་དབྱངས་ཕུལ་བའི་རྐྱེན་གྱིས། ས་ཆ་དེའི་མིང་ལ་དེ་རིང་གི་བར་དུ་པེ་ར་ཀ་ལུང་པ་ཟེར།
2CH 20:27 དེ་ནས་ཡེ་ཧོ་ཤ་ཕད་ཀྱི་སྣེ་ཁྲིད་འོག་ཏུ་ཡ་ཧུ་དཱ་པ་དང་ཡེ་རུ་སཱ་ལེམ་པ་ཐམས་ཅད་དགའ་མགུའི་ངང་ཡེ་རུ་སཱ་ལེམ་དུ་ལོག་སྟེ། དཀོན་མཆོག་ཡ་ཝཱེས་དེ་དག་དགྲ་ལས་རྒྱལ་བར་མཛད་པའི་རྐྱེན་གྱིས་ཤིན་ཏུ་དགའ་བར་གྱུར།
2CH 20:28 དེ་དག་གིས་རྒྱུད་མངས་དང་པི་ཝང་དང་། དུང་བཅས་ཁྱེར་ནས་ཡེ་རུ་སཱ་ལེམ་དུ་སླེབས་ཏེ། དཀོན་མཆོག་ཡ་ཝཱེའི་མཆོད་ཁང་དུ་སོང་།
2CH 20:29 ཡང་དཀོན་མཆོག་ཡ་ཝཱེས་ཡེས་ར་ཨེལ་གྱི་དགྲ་རྣམས་ལ་འཐབ་ནས་ཕམ་པར་མཛད་པའི་གཏམ་དེ་རྒྱལ་ཁམས་ཐམས་ཅད་ཀྱིས་ཐོས་ནས། དེ་རྣམས་དཀོན་མཆོག་ལ་ཤིན་ཏུ་འཇིགས་པར་གྱུར།
2CH 20:30 དེ་ལྟར་ཡེ་ཧོ་ཤ་ཕད་ཀྱི་དཀོན་མཆོག་གིས་ཁོང་གི་ཕྱོགས་བཞི་བདེ་ལ་བཀོད་པས། ཁོང་གི་རྒྱལ་ཁམས་བདེ་བར་གནས་སོ། །
2CH 20:31 ཡང་ཡེ་ཧོ་ཤ་ཕད་ཡ་ཧུ་དཱའི་རྒྱལ་པོར་བཞུགས་དུས་དགུང་ལོ་སོ་ལྔ་ཡིན་པ་དང་། ཡེ་རུ་སཱ་ལེམ་དུ་ལོ་ཉེར་ལྔའི་རིང་ལ་རྒྱལ་སྲིད་བསྐྱངས། ཁོང་གི་ཡུམ་ནི་ཤིལ་ཧིའི་སྲས་མོ་ཨ་ཟུ་བཱ་ཞེས་པ་ཡིན།
2CH 20:32 ཡེ་ཧོ་ཤ་ཕད་ནི་རང་གི་ཡབ་ཨ་སཱའི་ལམ་གྱི་ནང་དུ་འགྲུལ་ཞིང་དེ་ལས་མ་འཁྱར་བར། དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་དོ། །
2CH 20:33 འོན་ཀྱང་མཐོ་གླིང་རྣམས་ད་དུང་མ་བཤིག་པར་བཞག་ཅིང་། མི་རྣམས་ད་དུང་རང་གི་ཕ་མེས་ཀྱི་དཀོན་མཆོག་གི་ཕྱོགས་སུ་སེམས་མ་འཁོར།
2CH 20:34 ཡེ་ཧོ་ཤ་ཕད་ཀྱི་མཛད་རྗེས་གཞན་རྣམས་འགོ་ནས་མཇུག་བར་དུ་ཐམས་ཅད་ཧ་ནཱ་ནེའི་བུ་ཡེ་ཧུས་ཡི་གེར་བཀོད་པའི་གཏམ་སྤྱོད་ཀྱི་མདོ་དེའི་ནང་དུ་བཀོད་ཡོད་ལ། ཡང་གཏམ་སྤྱོད་ཀྱི་མདོ་དེ་ནི་ཡེས་ར་ཨེལ་གྱི་རྒྱལ་རབས་ཀྱི་མདོ་ནང་དུ་བཀོད་ཡོད།
2CH 20:35 ཕྱིས་སུ་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱིས་ཡེས་ར་ཨེལ་གྱི་རྒྱལ་པོ་སྡིག་སྤྱོད་ཅན་ཨ་ཧ་ཟི་ཡཱ་དང་མཉམ་འབྲེལ་བྱས།
2CH 20:36 ཁོ་གཉིས་ཀྱིས་ཐཱར་ཞིས་ལ་འགྲོ་བའི་ཆེད་དུ་ཨེ་ཙི་ཡོན་གེ་བེར་དུ་གྲུ་གཟིངས་བཟོས།
2CH 20:37 དེའི་དུས་སུ་མཱ་རེ་ཤ་པ་དོ་དཱ་ཝའི་བུ་ཨེ་ལི་ཨེ་བཟིར་གྱིས་ཡེ་ཧོ་ཤ་ཕད་ལ་ལུང་བསྟན་ཏེ་ན་རེ། ཁྱོད་ཨ་ཧ་ཟི་ཡཱ་དང་མཉམ་འབྲེལ་བྱས་པས་ན། དཀོན་མཆོག་ཡ་ཝཱེས་ཁྱོད་ཀྱིས་བཟོས་པའི་གྲུ་གཟིངས་རྣམས་གཏོར་བར་འགྱུར་ཞེས་སྦྲན་པ་དང་། ཕྱིས་སུ་གྲུ་དེ་དག་དངོས་གནས་གཏོར་བ་དང་ཐཱར་ཞིས་སུ་འགྲོ་མ་ནུས་སོ། །
2CH 21:1 ཡང་ཡེ་ཧོ་ཤ་ཕད་རང་གི་ཕ་མེས་དང་མཉམ་དུ་གཟིམས་པ་དང་། དཱ་བིད་ཀྱི་གྲོང་ཁྱེར་དུ་ཕ་མེས་ཀྱི་ཁྲོད་དུ་དུར་ལ་སྦས་ནས། ཁོའི་སྲས་ཡེ་ཧོ་རཱམ་ཁོའི་ཚབ་ཏུ་རྒྱལ་པོར་གྱུར།
2CH 21:2 ཡེ་ཧོ་རཱམ་ལ་སྤུན་འགའ་ཡོད་དེ། དེ་རྣམས་ནི་ཡེ་ཧོ་ཤ་ཕད་ཀྱི་སྲས་ཏེ་ཨ་ཟར་ཡཱ་དང་། ཡེ་ཧི་ཨེལ། ཟཱ་ཀར་ཡ། ཨ་ཟར་ཡཱ་ཧུ། མེའ་ཀཱ་ཨེལ། ཤེ་ཕད་ཡཱ་བཅས་པ་སྟེ། འདི་ཐམས་ཅད་ནི་ཡ་ཧུ་དཱའི་རྒྱལ་པོ་ཡེ་ཧོ་ཤ་ཕད་ཀྱི་སྲས་རྣམས་ཡིན།
2CH 21:3 དེ་དག་གི་ཕ་ཡིས་དེ་རྣམས་ལ་ཡ་ཧུ་དཱ་ཡུལ་གྱི་འགོག་སྲུང་གྲོང་ཁྱེར་དག་དང་བཅས་སུ་གསེར་དངུལ་དང་། རིན་པོ་ཆེ་མང་པོ་ལེགས་སྐྱེས་སུ་སྤྲད་ཅིང་། ཡེ་ཧོ་རཱམ་ནི་སྐྱེས་འགོ་ཡིན་སྟབས་རྒྱལ་སྲིད་དེ་ལ་སྤྲད།
2CH 21:4 ཡེ་ཧོ་རཱམ་གྱིས་རང་གི་ཕ་ཡི་རྒྱལ་སྲིད་བསྐྱངས་ཏེ་སྟོབས་ཤུགས་ཆེ་རུ་ཕྱིན་པ་དང་། རང་གི་ནུ་བོ་ཐམས་ཅད་རལ་གྲིས་བསད་པར་མ་ཟད། ཡེས་ར་ཨེལ་གྱི་འགོ་དཔོན་འགའ་ཡང་བསད།
2CH 21:5 ཡེ་ཧོ་རཱམ་རྒྱལ་པོར་སྡོད་དུས་སུ་ལོ་སོ་གཉིས་ཡིན་ལ། ཡེ་རུ་སཱ་ལེམ་དུ་ལོ་བརྒྱད་ཀྱི་རིང་ལ་རྒྱལ་སྲིད་བསྐྱངས།
2CH 21:6 དེས་ཨ་ཧབ་ཀྱི་བུ་མོ་ཆུང་མར་བླངས་པས། ཨ་ཧབ་ཀྱི་རྒྱུད་དང་འདྲ་བར་ཡེས་ར་ཨེལ་གྱི་རྒྱལ་པོ་རྣམས་ཀྱི་ལམ་དུ་འགྲུལ་ཏེ། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དོ། །
2CH 21:7 ཡིན་ཡང་དཀོན་མཆོག་ཡ་ཝཱེས་དཱ་བིད་ལ་ཞལ་ཆད་མཛད་པས་དེའི་ཁྱིམ་རྒྱུད་མེད་པར་མཛད་མ་འདོད་པར། ཁོང་གིས་ཞལ་བཞེས་གནང་བ་ལྟར་དཱ་བིད་དང་ཁོང་གི་བུ་རབས་ཚ་རྒྱུད་རྣམས་ལ་དུས་གཏན་དུ་སྒྲོན་མེའི་འོད་ཟེར་གནང་བའོ། །
2CH 21:8 ཡེ་ཧོ་རཱམ་གྱིས་རྒྱལ་སྲིད་སྐྱོང་བའི་དུས་སུ་ཨེ་དོམ་པ་རྣམས་ཀྱིས་ངོ་ལོག་བྱས་ཤིང་། ཡ་ཧུ་དཱའི་ལག་ནས་ཐར་ཏེ་རང་གིས་རྒྱལ་པོ་ཞིག་བསྐོས་པ་ལ།
2CH 21:9 ཡེ་ཧོ་རཱམ་གྱིས་རང་གི་དམག་དཔོན་དང་ཤིང་རྟ་ཐམས་ཅད་ཁྲིད་ནས་ཐོན་པ་དང་། མཚན་མོར་ལངས་ཏེ་རང་ཉིད་བསྐོར་ཡོད་པའི་ཨེ་དོམ་པ་དང་། དེ་དག་གི་ཤིང་རྟའི་འགོ་དཔོན་རྣམས་ཕམ་པར་བརྒྱབ།
2CH 21:10 དུས་དེ་ནས་བཟུང་ཨེ་དོམ་པ་རྣམས་ཀྱིས་ངོ་ལོག་བྱས་ནས་དེ་རིང་གི་བར་དུ་ཡ་ཧུ་དཱའི་ལག་ནས་ཐར་ཞིང་། དུས་དེ་ལ་ལིབ་ནཱ་པ་རྣམས་ཀྱིས་ཀྱང་ངོ་ལོག་བྱས། ཅིའི་ཕྱིར་ཞེ་ན། ཡེ་ཧོ་རཱམ་གྱིས་རང་གི་ཕ་མེས་ཀྱི་དཀོན་མཆོག་ཡ་ཝཱེ་སྤངས་པས་སོ། །
2CH 21:11 ཡང་ཁོས་ཡ་ཧུ་དཱའི་རི་རྣམས་ཀྱི་སྟེང་དུ་མཐོ་གླིང་བརྩིགས་ཏེ། ཡེ་རུ་སཱ་ལེམ་གྱི་ཡུལ་མི་དག་ལ་ལོག་གཡེམ་བྱེད་དུ་བཅུག་ནས་ཡ་ཧུ་དཱ་པ་རྣམས་བསླུས་པ་རེད།
2CH 21:12 དེའི་ཚེ་ལུང་སྟོན་པ་ཨེ་ལི་ཡཱས་ཡེ་ཧོ་རཱམ་ལ་འཕྲིན་ཡིག་སྤྲིངས་ཏེ་འདི་ལྟར། ཁྱོད་ཀྱི་མེས་པོ་དཱ་བིད་ཀྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ནི་རང་གི་ཕ་ཡེ་ཧོ་ཤ་ཕད་ཀྱི་ལམ་དང་། ཡ་ཧུ་དཱའི་རྒྱལ་པོ་ཨ་སཱའི་ལམ་གྱི་ནང་དུ་མི་འགྲུལ་བར།
2CH 21:13 ཡེས་ར་ཨེལ་གྱི་རྒྱལ་པོ་རྣམས་ཀྱི་ལམ་དུ་འགྲུལ་ནས་ཨ་ཧབ་ཀྱི་བུ་རྒྱུད་ཀྱིས་འདོད་ལོག་སྤྱད་པ་ལྟར། ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་ལ་ཡང་ལོག་གཡེམ་བྱེད་དུ་བཅུག་ཅིང་། ཁྱོད་ལས་བཟང་བའི་རང་གི་ཕ་རྒྱུད་ཀྱི་སྤུན་རྣམས་ཀྱང་བསད་པས།
2CH 21:14 ལྟོས་དང་། དཀོན་མཆོག་ཡ་ཝཱེས་ཁྱོད་ཀྱི་འབངས་མི་དང་། ཁྱོད་ཀྱི་ཆུང་མ་རྣམས་དང་བུ་ཕྲུག་རྣམས། དེ་མིན་ཁྱོད་ཀྱི་རྒྱུ་ནོར་ཐམས་ཅད་ལ་བར་ཆད་ཆེན་པོས་རྡེག་པར་འགྱུར།
2CH 21:15 ཡང་ཁྱོད་ལ་རྒྱུ་ནད་ཤིན་ཏུ་ཚབས་ཆེན་ཕོག་ནས། ནད་དེ་ཉིན་རེ་བཞིན་ཇེ་སྡུག་ཏུ་སོང་སྟེ་རྒྱུ་མ་ལུག་པར་འགྱུར་གསུངས་ཞེས་གསུངས་སོ། །
2CH 21:16 ཕྱིས་སུ་ཕེ་ལེ་ཤེད་པ་དང་གུ་ཤ་པའི་ཉེ་འཁོར་དུ་ཡོད་པའི་ཨ་རབ་པ་རྣམས་ཡེ་ཧོ་རཱམ་ལ་འཐབ་ཏུ་དཀོན་མཆོག་ཡ་ཝཱེས་ཀུན་ནས་བསླངས།
2CH 21:17 དེ་རྣམས་ཀྱིས་ཡ་ཧུ་དཱ་རུ་དམག་དྲངས་ནས། མངའ་ཁོངས་སུ་བཙན་འཛུལ་བྱས་ཏེ་ཕོ་བྲང་ནང་གི་རྒྱུ་ནོར་ཐམས་ཅད་ཕྲོགས་པ་དང་། དེའི་བུ་རྣམས་དང་ཆུང་མ་ཐམས་ཅད་ཀྱང་བཙན་ཁྲིད་བྱས་ཤིང་། བུ་རྣམས་ཀྱི་ཐ་ཆུང་ཨ་ཧ་ཟི་ཡཱ་མ་གཏོགས་བུ་གཞན་གཅིག་ཀྱང་མ་བསྐྱུར་ཏོ། །
2CH 21:18 དེའི་རྗེས་སུ་དཀོན་མཆོག་ཡ་ཝཱེས་ཡེ་ཧོ་རཱམ་ལ་བརྡེགས་ནས་དེའི་རྒྱུ་མར་ནད་གསོ་ཐབས་མེད་པ་བྱུང་བར་མཛད།
2CH 21:19 ཁོ་ཡུན་རིང་པོར་ན་སྟེ། ལོ་གཉིས་འཁོར་བ་ན་རྒྱུ་མ་ལུག་པ་དང་ནད་ཀྱིས་ཤི་བ་རེད། ཁོའི་མི་རྣམས་ཀྱིས་ཕ་མེས་ཀྱི་ཕྱིར་མེ་སྦར་བ་ལྟར་ཁོའི་ཕྱིར་མེ་མ་སྦར་བ་རེད།
2CH 21:20 ཡེ་ཧོ་རཱམ་རྒྱལ་པོར་སྡོད་དུས་སུ་ལོ་སོ་གཉིས་ཡིན་ཏེ། ཡེ་རུ་སཱ་ལེམ་དུ་ལོ་བརྒྱད་ལ་རྒྱལ་སྲིད་བསྐྱངས། ཚེ་ལས་འདས་པའི་དུས་སུ་ཁོའི་དོན་དུ་མྱ་ངན་བྱེད་མཁན་མེད་པ་དང་། མི་རྣམས་ཀྱིས་ཁོ་རང་དཱ་བིད་ཀྱི་གྲོང་ཁྱེར་དུ་དུར་ལ་སྦས་ནའང་རྒྱལ་པོ་དག་གི་དུར་ཁྲོད་དུ་མ་སྦས་སོ། །
2CH 22:1 དེ་ནས་ཡེ་རུ་སཱ་ལེམ་པ་རྣམས་ཀྱིས་ཡེ་ཧོ་རཱམ་གྱི་བུ་ཐ་ཆུང་ཨ་ཧ་ཟི་ཡཱ་ཁོའི་ཚབ་ཏུ་རྒྱལ་པོར་བཞག་པ་རེད། གང་ལ་ཞེ་ན། དེའི་ཕུ་བོ་ཐམས་ཅད་ནི་ཨ་རབ་པ་དང་ལྷན་ཅིག་ཏུ་དམག་སྒར་ལ་དཔུང་འཇུག་བྱེད་དུ་འོངས་པ་དག་གིས་བསད་པའི་རྐྱེན་གྱིས། ཡ་ཧུ་དཱའི་རྒྱལ་པོ་ཡེ་ཧོ་རཱམ་གྱི་བུ་ཨ་ཧ་ཟི་ཡཱ་རྒྱལ་པོར་བསྡད་པ་རེད།
2CH 22:2 ཨ་ཧ་ཟི་ཡཱ་ཡིས་རྒྱལ་སྲིད་བཟུང་དུས་ཁོ་ལོ་ཉེར་གཉིས་ལ་སོན་ཡོད་དེ། ཡེ་རུ་སཱ་ལེམ་དུ་ལོ་གཅིག་རིང་རྒྱལ་སྲིད་བསྐྱངས། ཁོའི་ཡུམ་ནི་ཨོམ་རིའི་ཚ་མོ་ ཨ་ཐལ་ཡཱ་བྱ་བའོ། །
2CH 22:3 ཨ་ཧ་ཟི་ཡཱ་ཡི་ཡུམ་གྱིས་ཁོ་ལ་ངན་པ་སྤྱོད་པར་བསྐུལ་བའི་རྐྱེན་གྱིས། ཁོ་ཡང་ཨ་ཧབ་ཁྱིམ་རྒྱུད་ཀྱི་ལམ་དུ་ཞུགས།
2CH 22:4 དེ་ལྟར་ཁོས་ཨ་ཧབ་ཀྱི་ཁྱིམ་རྒྱུད་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད། གང་ལ་ཞེ་ན། ཁོའི་ཕ་ཚེ་ལས་འདས་རྗེས། དེ་དག་གིས་ཁོ་རང་མེད་པར་འགྲོ་བའི་ཕྱིར་ཁོ་ལ་གྲོས་ངན་བཏབ་པ་རེད།
2CH 22:5 ཁོས་དེ་དག་གི་གྲོས་ངན་དང་བསྟུན་ནས། ཡེས་ར་ཨེལ་གྱི་རྒྱལ་པོ་ཨ་ཧབ་ཀྱི་སྲས་ཡོ་རཱམ་དང་མཉམ་དུ་ཨ་རམ་གྱི་རྒྱལ་པོ་ཧ་ཟཱ་ཨེལ་དང་འཐབ་ཏུ་གིལ་ཨད་ཀྱི་རཱ་མོད་དུ་ཕྱིན། དེར་ཨ་རམ་པས་ཡོ་རཱམ་རྨས་པ་རེད།
2CH 22:6 དེར་ཡོ་རཱམ་ནི་རཱ་མ་དུ་ཨ་རམ་གྱི་རྒྱལ་པོ་ཧ་ཟཱ་ཨེལ་དང་འཐབ་པའི་དུས་སུ་ཕོགས་པའི་རྨ་ཁར་སྨན་བཅོས་བྱེད་དུ་ཡེ་སི་རེ་ཨེལ་དུ་ལོག་འོངས་པ་ལ། ཡ་ཧུ་དཱའི་རྒྱལ་པོ་ཡེ་ཧོ་རཱམ་གྱི་སྲས་ཨ་ཧ་ཟི་ཡཱ་ནི་ཨ་ཧབ་ཀྱི་སྲས་ཡོ་རཱམ་ལ་རྨས་ཕོག་པས་ན་ཁོ་ལ་བལྟ་རུ་ཡེ་སི་རེ་ཨེལ་ལ་ཕྱིན་པ་རེད།
2CH 22:7 ཨ་ཧ་ཟི་ཡཱ་ཁོ་རང་ཡོ་རཱམ་ལ་བལྟ་རུ་ཕྱིན་པ་དང་འཆི་བར་གྱུར་ཅིང་དེ་ནི་དཀོན་མཆོག་ལས་བྱུང་། ཅིའི་ཕྱིར་ཞེ་ན། ཁོ་རང་ཡོ་རཱམ་གྱི་རྩར་སླེབས་པ་དང་། ཡོ་རཱམ་དང་མཉམ་དུ་སོང་ནས་ནིམ་ཤིའི་ཚ་བོ་ཡེ་ཧུ་བསུ་བ་རེད། ཡེ་ཧུ་ཞེས་པ་འདི་ནི་ཨ་ཧབ་ཀྱི་ཁྱིམ་རྒྱུད་ཚར་གཅོད་པའི་ཕྱིར་དཀོན་མཆོག་ཡ་ཝཱེས་སྣུམ་གྱིས་བྱུགས་པའོ། །
2CH 22:8 ཡེ་ཧུས་ཨ་ཧབ་ཀྱི་ཁྱིམ་རྒྱུད་ལ་ཉེས་ཆད་གཅོད་པའི་དུས་སུ། ཡ་ཧུ་དཱའི་འགོ་དཔོན་རྣམས་དང་ཨ་ཧ་ཟི་ཡཱའི་ཚ་བོ་དག་ལ་ཕྲད་ཅིང་། དེ་ཐམས་ཅད་ཨ་ཧ་ཟི་ཡཱ་ལ་ཞབས་ཏོག་སྒྲུབ་མཁན་ཡིན་ལ། ཡེ་ཧུས་དེ་ཐམས་ཅད་ཀྱི་སྲོག་བཅད།
2CH 22:9 ཡེ་ཧུ་ཡིས་ཨ་ཧ་ཟི་ཡཱ་བཙལ་བ་དང་། ཨ་ཧ་ཟི་ཡཱ་ནི་སཱ་མར་ཡ་རུ་ཡིབ་ནས་བསྡད་ཀྱང་། མི་རྣམས་ཀྱིས་ཁོ་བཟུང་ནས་ཡེ་ཧུའི་དྲུང་དུ་ཁྲིད་ཅིང་ཁོ་བསད་དེ་དུར་དུ་སྦས་སོ། །ཅིའི་ཕྱིར་ཞེ་ན། དེ་དག་གིས་འདི་ནི་ཡེ་ཧོ་ཤ་ཕད་ཀྱི་བུ་རྒྱུད་ཡིན་ལ། ཡེ་ཧོ་ཤ་ཕད་ནི་སེམས་ཧྲིལ་པོས་དཀོན་མཆོག་ཡ་ཝཱེ་འཚོལ་མཁན་ཡིན་ཞེས་སྨྲས་པས་སོ། །ཨ་ཧ་ཟི་ཡཱ་ཁྱིམ་རྒྱུད་ལས་རྒྱལ་སྲིད་འཛིན་ཐུབ་པ་གང་ཡང་མ་རྙེད་དོ། །
2CH 22:10 དེར་ཨ་ཧ་ཟི་ཡཱའི་མ་ཡུམ་ཨ་ཐལ་ཡཱ་ཡིས་རང་གི་བུ་ཤི་ཟིན་པ་མཐོང་བ་དང་། ལངས་ནས་ཡ་ཧུ་དཱ་ཁྱིམ་རྒྱུད་ཀྱི་རྒྱལ་སྲས་ཐམས་ཅད་བསད།
2CH 22:11 འོན་ཀྱང་རྒྱལ་པོའི་སྲས་མོ་ཡོ་ཤ་བེ་ཨད་ཀྱིས་ཨ་ཧ་ཟི་ཡཱའི་སྲས་ཡོ་ཨ་སི་བྱ་བ་དེ་གསོད་པར་འགྱུར་བའི་རྒྱལ་སྲས་ཁྲོད་ནས་བརྐུས་ཁྱེར་ཏེ། ཁོ་དང་ཁོའི་མ་མ་གཉིས་པོ་གཟིམས་ཆུང་ཞིག་གི་ནང་དུ་སྦས། ཡེ་ཧོ་རཱམ་རྒྱལ་པོའི་སྲས་མོ་ཡོ་ཤ་བེ་ཨད་ནི་མཆོད་དཔོན་ཡེ་ཧོ་ཡ་དཱའི་ཆུང་མ་ཡིན་ནོ། །ཡང་མོ་ནི་ཨ་ཧ་ཟི་ཡཱ་ཡི་གཅུང་མོ་ཡིན་པས། ཡོ་ཨ་སི་ནི་ཨ་ཐལ་ཡཱ་ཡིས་མི་གསོད་པའི་ཕྱིར་སྦས་ཏེ་བཞག་པའོ། །
2CH 22:12 ཡོ་ཨ་སི་དེ་རྣམས་དང་མཉམ་དུ་དཀོན་མཆོག་གི་མཆོད་ཁང་ནང་དུ་ལོ་དྲུག་ལ་ཡིབ་ནས་བསྡད། སྐབས་དེར་ཨ་ཐལ་ཡཱས་ཡ་ཧུ་དཱ་རུ་རྒྱལ་སྲིད་བསྐྱངས་པ་ཡིན།
2CH 23:1 ལོ་བདུན་པར་ཡེ་ཧོ་ཡ་དཱས་བརྩོན་པ་ཆེར་བསྐྱེད་ནས་བརྒྱ་དཔོན་རྣམས་ཏེ་ཡེ་རོ་ཧམ་གྱི་བུ་ཨ་ཟར་ཡཱ་དང་། ཡེ་ཧོ་ཧ་ནན་གྱི་བུ་ཡེས་མ་ཨེལ་དང་། ཨོ་བེད་ཀྱི་བུ་ཨ་ཟར་ཡཱ་དང་། ཨ་དཱ་ཡའི་བུ་མ་ཨ་སེ་ཡཱ་དང་། ཟིག་རིའི་བུ་ཨེ་ལི་ཤ་ཕད་བཅས་བོས་འོངས་ནས་ཁོ་རྣམས་ལ་ཆད་དོན་བཞག་པ་དང་།
2CH 23:2 ཁོ་རྣམས་ཡ་ཧུ་དཱ་ཡུལ་ཡོངས་ལ་ཕྱིན་ནས། ཡ་ཧུ་དཱའི་གྲོང་ཁྱེར་སོ་སོ་ནས་ལེ་ཝི་པ་དང་། ཡེས་ར་ཨེལ་གྱི་ཁྱིམ་རྒྱུད་ཀྱི་འགོ་དཔོན་རྣམས་བསྡུས་པ་དང་། དེ་དག་ཡེ་རུ་སཱ་ལེམ་དུ་འདུས་ནས།
2CH 23:3 མི་ཚོགས་ཀུན་གྱིས་དཀོན་མཆོག་གི་མཆོད་ཁང་ནས་རྒྱལ་པོ་དང་ཆད་དོན་བཞག་ཅིང་། དེར་ཡེ་ཧོ་ཡ་དཱས་འདི་ལྟར། ལྟོས་ཤིག དཀོན་མཆོག་ཡ་ཝཱེས་དཱ་བིད་ཀྱི་བུ་རྒྱུད་རྣམས་ལ་ཞལ་བཞེས་གནང་བ་བཞིན་དུ། རྒྱལ་པོའི་སྲས་ནི་རྒྱལ་པོར་སྡོད་དགོས་པས།
2CH 23:4 ཁྱོད་རྣམས་ཀྱིས་འདི་བཞིན་བྱེད་དགོས་ཏེ། ཁྱོད་རྣམས་ལས་ངལ་གསོ་བའི་ཉིན་མོར་འདིར་ལས་རེས་སུ་འོངས་པའི་མཆོད་དཔོན་དང་ལེ་ཝི་པའི་སུམ་ཆའི་གཅིག་གིས་སྒོ་སྲུངས་ཤིག
2CH 23:5 སུམ་ཆའི་གཅིག་ཕོ་བྲང་དུ་སྡོད་ཅིག ཡང་སུམ་ཆའི་གཅིག་དེ་རྨང་སྒོར་སྡོད་ཅིག མི་ཐམས་ཅད་དཀོན་མཆོག་ཡ་ཝཱེའི་མཆོད་ཁང་གི་ར་སྐོར་ནང་དུ་འདུ་བར་གྱིས།
2CH 23:6 མཆོད་དཔོན་དང་ཞབས་ཏོག་སྒྲུབ་པའི་ལེ་ཝི་པ་རྣམས་མ་གཏོགས་གཞན་སུ་ཡང་དཀོན་མཆོག་ཡ་ཝཱེའི་མཆོད་ཁང་ནང་དུ་འགྲོ་མི་རུང་། དེ་རྣམས་དམ་པ་ཡིན་པས་དེ་རྣམས་འབའ་ཞིག་ནང་དུ་འགྲོ་འོས། མི་ཀུན་གྱིས་དཀོན་མཆོག་ཡ་ཝཱེའི་བཀའ་བསྲུང་དགོས།
2CH 23:7 ཡང་ལེ་ཝི་པ་རྣམས་ཀྱིས་རང་རང་གི་མཚོན་ཆ་ལག་ཏུ་ཐོགས་ཏེ་ཕྱོགས་བཞི་ནས་རྒྱལ་པོ་བསྲུང་དགོས་ཏེ། གཞན་སུ་ཞིག་རང་དགར་མཆོད་ཁང་ནང་དུ་འོངས་ན་དེ་གསོད་དགོས། རྒྱལ་པོ་ཕྱི་ནང་གང་དུ་འགྲོ་སྐབས་སུ་ཁྱོད་ཅག་རྒྱལ་པོ་དང་མཉམ་དུ་སྡོད་དགོས་ཞེས་བསྒོས་པ་དང་།
2CH 23:8 ལེ་ཝི་པ་དང་ཡ་ཧུ་དཱ་པ་ཀུན་གྱིས་མཆོད་དཔོན་ཡེ་ཧོ་ཡ་དཱའི་གསུང་ལྟར་བསྒྲུབས་ཏེ། ཁོ་ཚོ་མི་རེ་རེས་ངལ་གསོ་བའི་ཉིན་མོར་ཞབས་ཏོག་སྒྲུབ་པ་དང་ཡང་ན་ངལ་གསོ་བའི་ཉིན་མོར་ལས་མཚམས་འཇོག་པའི་མི་ཁྲིད་ནས་སླེབས་པ་སྟེ། རྒྱུ་མཚན་ནི་ཡེ་ཧོ་ཡ་དཱས་སྡེ་ཚན་གང་ལའང་ལས་མཚམས་འཇོག་ཏུ་མ་བཅུག་པའི་ཕྱིར་རོ། །
2CH 23:9 དེ་ནས་མཆོད་དཔོན་ཡེ་ཧོ་ཡ་དཱས་དཀོན་མཆོག་གི་མཆོད་ཁང་དུ་ཡོད་པའི་དཱ་བིད་ཀྱི་མདུང་དང་། ཕུབ་ཆེ་ཆུང་རྣམས་ཀྱང་བརྒྱ་དཔོན་རྣམས་ལ་སྤྲད་ཅིང་།
2CH 23:10 ཡང་མི་རྣམས་ལ་མཚོན་ཆ་འཛིན་དུ་བཅུག་ནས་རྒྱལ་པོའི་མཐའ་འཁོར་དུ། མཆོད་ཁང་གི་གཡས་ཕྱོགས་ནས་གཡོན་ཕྱོགས་ཀྱི་བར་དུ། མཆོད་ཁྲི་དང་མཆོད་ཁང་གི་ཕྱོགས་བཞི་རུ་བཞག་གོ །
2CH 23:11 དེ་ནས་ཁོ་རྣམས་ཀྱིས་ཡོ་ཨ་སི་ཕྱི་རོལ་ཏུ་ཁྲིད་འོངས་ནས། ཁོང་གི་དབུ་ལ་ཅོད་པན་གསོལ། ཡང་ཁོང་ལ་བཀའ་ཁྲིམས་བཤུས་མ་ཞིག་ཕུལ་ནས་ཁོང་རྒྱལ་པོར་བསྐོས་ཤིང་། ཡེ་ཧོ་ཡ་དཱ་དང་དེའི་བུ་རྣམས་ཀྱིས་ཁོང་ལ་སྣུམ་གྱིས་བྱུགས་ནས། རྒྱལ་པོ་ཁྲི་ལོར་བརྟན་པར་ཤོག་ཅེས་འབོད་སྐད་བསྒྲགས་སོ། །
2CH 23:12 དེའི་ཚེ་ཨ་ཐལ་ཡཱ་ཡིས་མི་རྣམས་འུར་ནས་རྒྱུགས་པ་དང་རྒྱལ་པོར་བསྟོད་པའི་སྐད་སྒྲ་ཐོས་ནས། དཀོན་མཆོག་ཡ་ཝཱེའི་མཆོད་ཁང་དུ་མི་རྣམས་ཀྱི་དྲུང་ལ་སླེབས་ནས།
2CH 23:13 མོས་བལྟས་པ་ལ། རྒྱལ་པོ་ནི་མཆོད་ཁང་སྒོ་མདུན་གྱི་ཀ་བའི་རྩར་བཞེངས་འདུག་པ་དང་། འགོ་དཔོན་རྣམས་དང་དུང་འབུད་མཁན་རྣམས་རྒྱལ་པོའི་མཐའ་འཁོར་དུ་ཡོད་པ་དང་། ཡུལ་མི་ཀུན་པོས་དགའ་མགུ་ཡི་རང་གིས་དུང་འབུད་པ་དང་། མགུར་ལེན་མཁན་རྣམས་ཀྱིས་རོལ་ཆས་སྣ་ཚོགས་ཐོགས་ཏེ་མི་རྣམས་ཀྱིས་བསྟོད་དབྱངས་འབུལ་བར་དབུ་མཛད་པ་མཐོང་ནས། མོས་གོས་ཧྲལ་ཏེ། ནང་དགྲ་ལངས། ནང་དགྲ་ལངས་ཞེས་བོས་པ་དང་།
2CH 23:14 མཆོད་དཔོན་ཡེ་ཧོ་ཡ་དཱ་ཡིས་དམག་ཚོགས་ཀྱི་བཀོད་འདོམས་པ་བརྒྱ་དཔོན་རྣམས་ལ་བཀའ་བཏང་ཞིང་། ཁོ་མོ་དམག་ཚོགས་ཀྱི་བར་ནས་ཕྱི་རོལ་ཏུ་ཁྲིད་ཅིག དེའི་རྗེས་སུ་འབྲང་མཁན་རྣམས་ཀྱང་རལ་གྲིས་སོད་ཅིག་ཅེས་བསྒོས་སོ། །ཅི་ལ་ཞེ་ན། མཆོད་དཔོན་གྱིས་དཀོན་མཆོག་ཡ་ཝཱེའི་མཆོད་ཁང་དུ་ཁོ་མོ་གསོད་མི་རུང་ཞེས་བཀའ་བསྩལ་ཏོ། །
2CH 23:15 དེ་ནས་མོ་རྒྱལ་པོའི་ཕོ་བྲང་གི་རྟ་སྒོ་རུ་སླེབས་པ་ཙམ་གྱིས་དམག་མི་རྣམས་ཀྱིས་མོ་བཟུང་ནས་དེར་བསད་དོ། །
2CH 23:16 ཡང་ཡེ་ཧོ་ཡ་དཱས་མི་ཐམས་ཅད་དང་རྒྱལ་པོ་ལ་ཁོ་རྣམས་ནམ་ཡང་དཀོན་མཆོག་ཡ་ཝཱེའི་འབངས་མི་བྱེད་པའི་ཆད་དོན་བཞག
2CH 23:17 དེ་ནས་མི་ཐམས་ཅད་པཱ་ཨལ་གྱི་ལྷ་ཁང་དུ་སོང་ནས་དེ་བཤིགས་པ་དང་། དེའི་མཆོད་ཁྲི་རྣམས་དང་སྐུ་རྣམས་སིལ་བུར་བཅག་སྟེ། པཱ་ཨལ་གྱི་མཆོད་དཔོན་མད་ཐན་ཞེས་པ་མཆོད་ཁྲི་རྣམས་ཀྱི་མདུན་དུ་བསད།
2CH 23:18 ཡང་ཡེ་ཧོ་ཡ་དཱས་དཀོན་མཆོག་ཡ་ཝཱེའི་མཆོད་ཁང་བསྲུང་བའི་ཁག་ནི་ལེ་ཝི་ཚོ་པའི་མཆོད་དཔོན་རྣམས་ཀྱི་ལག་ཏུ་གཏད་པ་སྟེ། དེ་དག་ནི་མོ་ཤེའི་བཀའ་ཁྲིམས་ལ་བྲིས་པ་ལྟར། དཱ་བིད་ཀྱིས་དཀོན་མཆོག་ཡ་ཝཱེའི་མཆོད་ཁང་དུ་སྦྱིན་སྲེག་གི་མཆོད་པ་འབུལ་བའི་ཕྱིར་བསྐོས་པ་དང་། ཡང་དཱ་བིད་ཀྱིས་བསྒོས་པ་ལྟར་དགའ་ཞིང་མགུར་ལེན་པ་ཡིན་ནོ། །
2CH 23:19 ཡང་ཁོང་གིས་དཀོན་མཆོག་ཡ་ཝཱེའི་མཆོད་ཁང་གི་སྒོ་རྣམས་བསྲུང་བར་སྒོ་སྲུང་རྣམས་བཞག་པ་སྟེ། མི་གཙང་པ་སུ་ཡིན་ཡང་ནང་དུ་འཛུལ་མི་ཆོག་གོ །
2CH 23:20 དེ་ནས་ཁོང་གིས་བརྒྱ་དཔོན་དང་། སྐུ་དྲག་དང་། མི་རྣམས་ཀྱི་འགོ་དཔོན་དང་། ཡུལ་མི་མཐའ་དག་ཁྲིད་ནས། དཀོན་མཆོག་ཡ་ཝཱེའི་མཆོད་ཁང་ལས་རྒྱལ་པོ་བཏོན་ཏེ། སྒོ་གོང་མ་བརྒྱུད་ནས་ཕོ་བྲང་དུ་ཕྱིན་པ་དང་རྒྱལ་པོའི་ཁྲི་སར་བཀོད་དོ། །
2CH 23:21 ཡུལ་ཁམས་ཀྱི་མི་རྣམས་དགའ་མགུར་ལོངས་སྤྱད་ཅིང་། ཨ་ཐལ་ཡཱ་རལ་གྲིས་བཀུམས་རྗེས་གྲོང་ཁྱེར་དེ་ལྷིངས་འཇགས་སུ་གྱུར་ཏོ། །
2CH 24:1 ཡོ་ཨ་སི་རྒྱལ་པོར་བཞུགས་དུས་སུ་དགུང་ལོ་བདུན་ཡིན་པ་དང་། ཡེ་རུ་སཱ་ལེམ་དུ་ལོ་བཞི་བཅུའི་རིང་ལ་རྒྱལ་སྲིད་བསྐྱངས། དེའི་ཡུམ་གྱི་མིང་ལ་ཙིབ་ཡཱ་ཟེར་ཏེ་པེར་ཤ་བཱ་ཞེས་པའི་གྲོང་ཁྱེར་གྱི་མི་ཡིན་ནོ། །
2CH 24:2 མཆོད་དཔོན་ཡེ་ཧོ་ཡ་དཱའི་ཉིན་མོ་རྣམས་ལ། ཡོ་ཨ་སི་ཡིས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་པ་ཡིན།
2CH 24:3 ཡེ་ཧོ་ཡ་དཱས་དེ་ལ་བཙུན་མོ་གཉིས་བླངས་པ་དང་སྲས་དང་སྲས་མོ་རྣམས་འཁྲུངས།
2CH 24:4 དེའི་རྗེས་སུ་ཡོ་ཨ་སི་ཡིས་དཀོན་མཆོག་ཡ་ཝཱེའི་མཆོད་ཁང་ཞིག་གསོ་བྱེད་འདོད་ནས།
2CH 24:5 མཆོད་དཔོན་དང་ལེ་ཝི་པ་རྣམས་བསྡུས་ནས་དེ་དག་ལ་ན་རེ། ཁྱོད་རྣམས་ཡ་ཧུ་དཱའི་གྲོང་ཁྱེར་ཀུན་ཏུ་སོང་ལ། ཡེས་ར་ཨེལ་གྱི་དཀོན་མཆོག་གི་མཆོད་ཁང་ལོ་རེ་བཞིན་ཞིག་གསོ་བྱེད་དུ་དེ་རྣམས་ལས་དངུལ་བསྡུས་ཤིག ལས་ཀ་འདི་གང་མྱུར་སྒོས་སྒྲུབས་ཤིག་ཅེས་བསྒོས་ན་ཡང་། ལེ་ཝི་པས་མྱུར་དུ་མ་བསྒྲུབས་པ་དང་།
2CH 24:6 རྒྱལ་པོས་མཆོད་དཔོན་ཡེ་ཧོ་ཡ་དཱ་བོས་ནས་ན་རེ། དཀོན་མཆོག་ཡ་ཝཱེའི་ཞབས་ཕྱི་མོ་ཤེ་དང་ཡེས་ར་ཨེལ་ཚོགས་སྤྱིས་དཔང་པོའི་གུར་མཆོག་གི་ཕྱིར་གཏན་ལ་ཁེལ་བའི་ཁྲལ་དེ་ནི། ཡ་ཧུ་དཱ་དང་ཡེ་རུ་སཱ་ལེམ་ནས་བསྡུ་བར་ཁྱོད་ཀྱིས་ལེ་ཝི་པ་རྣམས་ལ་ཅིའི་ཕྱིར་མ་བསྒོས་སམ་ཞེས་དྲིས་སོ། །
2CH 24:7 ཅིའི་ཕྱིར་ཞེ་ན། བུད་མེད་ངན་པ་ཨ་ཐལ་ཡཱའི་བུ་རྣམས་སྔར་དཀོན་མཆོག་གི་མཆོད་ཁང་ནང་དུ་བཙན་གྱིས་འཛུལ་ནས། དེའི་ནང་གི་རྫས་དམ་པ་ཐམས་ཅད་ཀྱིས་པཱ་ཨལ་ལ་གསོལ་མཆོད་ཕུལ་བ་རེད།
2CH 24:8 དེའི་ཕྱིར་དེ་དག་གིས་རྒྱལ་པོའི་བཀའ་བཞིན་དུ་སྒྲོམ་ཞིག་བཟོས་ནས། དཀོན་མཆོག་ཡ་ཝཱེའི་མཆོད་ཁང་གི་སྒོའི་ཕྱི་རོལ་ཏུ་བཞག་ཅིང་།
2CH 24:9 ཡང་དཀོན་མཆོག་གི་ཞབས་ཕྱི་མོ་ཤེས་དབེན་སྟོང་དུ་ཡེས་ར་ཨེལ་ལ་བཀལ་བའི་ཁྲལ་དེ་ཁྱེར་འོངས་ནས་དཀོན་མཆོག་ཡ་ཝཱེ་ལ་འབུལ་བའི་ཕྱིར། ཡ་ཧུ་དཱ་དང་ཡེ་རུ་སཱ་ལེམ་དུ་བརྡ་ཁྱབ་བཏང་བ་དང་།
2CH 24:10 འགོ་དཔོན་རྣམས་དང་མི་ཡོངས་ཀྱིས་དགའ་དགའ་སྤྲོ་སྤྲོའི་ངང་དངུལ་ཁྱེར་འོངས་ནས་སྒྲོམ་དེ་གང་བའི་བར་དུ་ཕུལ་ཏོ། །
2CH 24:11 ཡང་དངུལ་གྱི་སྒྲོམ་དེ་ལེ་ཝི་པས་ཁྱེར་ནས་རྒྱལ་པོའི་ལས་སྣེ་པའི་རྩར་སླེབས་དུས་སུ། དེའི་ནང་དུ་དངུལ་མང་པོ་ཡོད་པ་མཐོང་སྟེ། རྒྱལ་པོའི་དྲུང་ཡིག་དང་། མཆོད་དཔོན་ཆེན་པོའི་ཞིབ་དཔྱོད་པ་འོངས་ནས་སྒྲོམ་དེ་སྟོང་བར་ཕུད་པ་དང་། ཡང་ཕྱིར་རང་གནས་སུ་བཞག ཉིན་རེ་བཞིན་དེ་ལྟར་བྱས་ནས། དངུལ་ཤིན་ཏུ་མང་པོ་བསྡུས་པ་རེད།
2CH 24:12 རྒྱལ་པོ་དང་ཡེ་ཧོ་ཡ་དཱ་གཉིས་ཀྱིས་དངུལ་དེ་དག་དཀོན་མཆོག་ཡ་ཝཱེའི་མཆོད་ཁང་དུ་ཞབས་ཏོག་སྒྲུབ་མཁན་རྣམས་ལ་སྤྲད་ནས། དེ་དག་གིས་དཀོན་མཆོག་ཡ་ཝཱེའི་མཆོད་ཁང་ཞིག་གསོ་བྱེད་ཆེད་རྡོ་བཟོ་དང་ཤིང་བཟོ་གླས་པ་དང་། དཀོན་མཆོག་ཡ་ཝཱེའི་མཆོད་ཁང་ཞིག་གསོ་བྱེད་པའི་ལྕགས་བཟོ་དང་ལི་བཟོ་ཡང་གླས་པ་ཡིན།
2CH 24:13 དེ་ལྟར་ལག་ཤེས་པ་རྣམས་ཀྱིས་ལས་ཀ་བྱས་ཏེ་ཞིག་གསོའི་ཨར་ལས་རིམ་བཞིན་གྲུབ་ཅིང་། དཀོན་མཆོག་གི་མཆོད་ཁང་ནི་སྔོན་ཆད་བཞིན་ཞིག་གསོ་བྱས་པར་མ་ཟད་ཧ་ཅང་བརྟན་པོར་གྱུར་ཏོ། །
2CH 24:14 ཡང་དེ་དག་གིས་ལས་ཀ་བསྒྲུབས་ཚར་རྗེས། དངུལ་འཕྲོ་མ་རྣམས་རྒྱལ་པོ་དང་ཡེ་ཧོ་ཡ་དཱ་གཉིས་ལ་སྤྲད་པ་དང་། དེ་ལས་དཀོན་མཆོག་ཡ་ཝཱེའི་མཆོད་ཁང་ནང་གི་ཡོ་བྱད་དང་། ཞབས་ཏོག་སྒྲུབ་བྱེད་དང་མཆོད་པ་འབུལ་བྱེད་ཡོ་བྱད་དང་། སྡེར་མ་དང་། གསེར་དངུལ་གྱི་ཡོ་བྱད་སྣ་ཚོགས་བཅས་བཟོས་ནས། ཡེ་ཧོ་ཡ་དཱའི་སྐུ་རིང་དུ་དེ་དག་གིས་རྒྱུན་ཆད་མེད་པར་དཀོན་མཆོག་ཡ་ཝཱེའི་མཆོད་ཁང་ནང་དུ་སྦྱིན་སྲེག་གི་མཆོད་པ་ཕུལ་བ་ཡིན།
2CH 24:15 ཡེ་ཧོ་ཡ་དཱ་བགྲེས་ནས་ཚེ་ལོ་མཐར་ཕྱིན་ཏེ་ཚེ་ལས་འདས་ཤིང་། ཁོང་ཚེ་ལས་འདས་པའི་དུས་སུ་དགུང་ལོ་བརྒྱ་དང་སུམ་ཅུ་ཡིན་ནོ། །
2CH 24:16 ཁོང་གིས་དཀོན་མཆོག་དང་ཁོང་གི་མཆོད་ཁང་གཉིས་ཀྱི་ཕྱིར། ཡེས་ར་ཨེལ་གྱི་ནང་དུ་ལས་བཟང་པོ་བྱས་པའི་ཕྱིར་དུ། མི་རྣམས་ཀྱིས་ཁོང་དཱ་བིད་ཀྱི་གྲོང་ཁྱེར་དུ་རྒྱལ་པོ་རྣམས་ཀྱི་ཁྲོད་དུ་དུར་ལ་སྦས་སོ། །
2CH 24:17 ཡང་ཡེ་ཧོ་ཡ་དཱ་ཚེ་ལས་འདས་པའི་རྗེས་སུ། ཡ་ཧུ་དཱ་ཡི་འགོ་དཔོན་རྣམས་རྒྱལ་པོ་ཡོ་ཨ་སི་ལ་མཇལ་དུ་འོངས་པ་ལ། རྒྱལ་པོས་དེ་དག་གི་གཏམ་ལ་མཉན་ཏེ།
2CH 24:18 དེ་དག་གིས་རང་གི་ཕ་མེས་ཀྱི་དཀོན་མཆོག་ཡ་ཝཱེའི་མཆོད་ཁང་བསྐྱུར་ནས། ཨ་ཤེ་རཱ་དང་སྐུ་འདྲ་རྣམས་ལ་ཞབས་ཏོག་བསྒྲུབས་པ་དང་། སྡིག་པ་དེའི་རྐྱེན་གྱིས་ཡ་ཧུ་དཱ་དང་ཡེ་རུ་སཱ་ལེམ་ལ་དཀོན་མཆོག་གི་ཐུགས་ཁྲོ་ཕོག་པ་རེད།
2CH 24:19 ཡིན་ཡང་ཁོ་རྣམས་ཡང་བསྐྱར་དཀོན་མཆོག་ཡ་ཝཱེའི་ཕྱོགས་སུ་འཁོར་བའི་ཆེད་དུ། དཀོན་མཆོག་གིས་དེ་དག་གི་རྩར་ལུང་སྟོན་པ་རྣམས་བཏང་ནས། དེ་རྣམས་ཀྱིས་དེ་དག་ལ་ཉེན་བརྡ་བཏང་ཡང་མཉན་པར་མ་དགའོ། །
2CH 24:20 དུས་དེར་དཀོན་མཆོག་གི་ཐུགས་ཉིད་ནི་མཆོད་དཔོན་ཡེ་ཧོ་ཡ་དཱའི་བུ་ཟཱ་ཀར་ཡ་ཡི་སྟེང་ལ་བབས་ཤིང་། ཁོ་ནི་མཐོ་སར་ལངས་ཏེ་མི་རྣམས་ལ་ན་རེ། དཀོན་མཆོག་གིས་འདི་སྐད་དུ། ཁྱོད་ཅག་དཀོན་མཆོག་ཡ་ཝཱེའི་བཀའ་ལ་འགལ་ནས་བྱ་བ་ལམ་འགྲོ་ཡོང་བར་མི་བྱེད་དོན་ཅི་ཡིན་ནམ། ཁྱོད་ཚོས་དཀོན་མཆོག་ཡ་ཝཱེ་སྤངས་པས་ཁོང་གིས་ཀྱང་ཁྱོད་ཚོ་སྤངས་པ་ཡིན་གསུངས་ཞེས་གསུངས་པ་ལ།
2CH 24:21 མི་རྣམས་ཀྱིས་ཟཱ་ཀར་ཡ་གསོད་པར་ཇུས་ངན་བཤམས་ནས། དཀོན་མཆོག་ཡ་ཝཱེའི་མཆོད་ཁང་གི་ར་སྐོར་དུ་རྒྱལ་པོའི་བཀའ་བཞིན་དུ་དེར་རྡོ་ཡིས་བརྒྱབ་སྟེ་བསད་དོ། །
2CH 24:22 དེ་ལྟར་རྒྱལ་པོ་ཡོ་ཨ་སི་ཡིས་ཟཱ་ཀར་ཡའི་ཕ་ཡེ་ཧོ་ཡ་དཱས་རང་ལ་བཅངས་པའི་བྱམས་བརྩེ་མ་དྲན་པར་དེའི་བུ་བསད་པས། ཟཱ་ཀར་ཡ་འཆི་བའི་དུས་སུ་ན་རེ། དཀོན་མཆོག་ཡ་ཝཱེས་གཟིགས་ཤིང་ལན་འཇལ་བར་མཛོད་ཅིག་ཅེས་ཞུས།
2CH 24:23 ལོ་སར་གྱི་རྗེས་སུ་ཨ་རམ་གྱི་དམག་ཚོགས་ཡར་འོངས་ཏེ་ཡོ་ཨ་སི་ལ་དམག་དྲངས་ནས། ཡ་ཧུ་དཱ་དང་ཡེ་རུ་སཱ་ལེམ་ལ་བཙན་འཛུལ་བྱས་ཤིང་། མི་རྣམས་ཀྱི་འགོ་དཔོན་རྣམས་བསད་དེ། དེ་དག་གི་བཅོམ་ནོར་ཐམས་ཅད་དཱ་མེ་སེག་གི་རྒྱལ་པོའི་མདུན་དུ་བསྐྱལ་ཏོ། །
2CH 24:24 ཨ་རམ་པའི་དམག་དཔུང་ལ་དམག་མི་ཉུང་ན་ཡང་། དཀོན་མཆོག་ཡ་ཝཱེས་དེ་དག་གི་ལག་ཏུ་དམག་ཚོགས་རབ་ཏུ་ཆེན་པོ་ཞིག་གཏད་པ་སྟེ། གང་ལ་ཞེ་ན། ཡ་ཧུ་དཱ་པས་རང་གི་ཕ་མེས་ཀྱི་དཀོན་མཆོག་ཡ་ཝཱེ་སྤངས་པས། དེ་དག་གིས་ཡོ་ཨ་སི་ལ་ཉེས་ཆད་བཅད།
2CH 24:25 ཨ་རམ་པ་རྣམས་ཡོ་ཨ་སི་དང་འབྲལ་དུས་སུ་ཁོང་ལ་རྨས་ལྗིད་མོ་ཕོག་ཡོད་པ་དང་། ཁོང་གི་འཁོར་གཡོག་རྣམས་ཀྱིས་ཁོང་གསོད་པར་ཇུས་ངན་བཤམས་པ་སྟེ། རྒྱུ་མཚན་ཁོང་གིས་མཆོད་དཔོན་ཡེ་ཧོ་ཡ་དཱའི་བུ་བསད་པའི་རྐྱེན་གྱིས་དེ་རྣམས་ཀྱིས་དགྲ་ཤ་ལེན་པའི་ཕྱིར་ཡིན་ལ། དེ་ནི་རང་གི་མལ་སར་བསད་ནས་ཤི། དེ་དག་གིས་ཁོང་དཱ་བིད་ཀྱི་གྲོང་ཁྱེར་དུ་དུར་ལ་སྦས་ནའང་། རྒྱལ་པོ་རྣམས་ཀྱི་དུར་ཁྲོད་ནང་དུ་མ་སྦས་སོ། །
2CH 24:26 ཁོང་ལྐོག་གསོད་བྱེད་མཁན་དག་ནི། ཨམ་མོན་པའི་བུད་མེད་ཤིམ་ཨད་ཀྱི་བུ་ཟཱ་བད་དང་། མོ་ཨབ་པའི་བུད་མེད་ཤིམ་རིད་ཀྱི་བུ་ཡེ་ཧོ་ཟཱ་བད་བྱ་བ་གཉིས་སོ། །
2CH 24:27 ཡང་ཡོ་ཨ་སིའི་སྲས་རྣམས་དང་། དེའི་སྐོར་གྱི་ལུང་བསྟན་མང་པོ་དང་། དཀོན་མཆོག་གི་མཆོད་ཁང་ཞིག་གསོ་བྱས་པའི་སྐོར་རྣམས་ནི་རྒྱལ་རབས་ཀྱི་གླེགས་བམ་ནང་དུ་ཡི་གེར་བཀོད་ཡོད། ཡང་དེའི་སྲས་ཨ་མཱ་ཙི་ཡ་ཁོའི་ཚབ་ཏུ་རྒྱལ་པོར་གྱུར་ཏོ། །
2CH 25:1 ཨ་མཱ་ཙི་ཡས་རྒྱལ་སྲིད་འཛིན་དུས་ལོ་ཉེར་ལྔ་ཡིན་པ་དང་། ཡེ་རུ་སཱ་ལེམ་དུ་ལོ་ཉེར་དགུའི་རིང་ལ་རྒྱལ་སྲིད་བསྐྱངས། ཁོང་གི་ཡུམ་གྱི་མིང་ལ་ཡེ་ཧོ་ཨད་དིན་ཞེས་ཟེར། མོ་ནི་ཡེ་རུ་སཱ་ལེམ་གྱི་མི་ཡིན་ནོ། །
2CH 25:2 ཁོས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་པ་སྤྱད་ཀྱང་། བློ་གཅིག་སེམས་གཅིག་ནི་མ་ཡིན་ནོ། །
2CH 25:3 དེས་རྒྱལ་སྲིད་བརྟན་པོར་མཛད་པ་ཙམ་གྱིས། རང་གི་ཡབ་རྒྱལ་པོ་གསོད་མཁན་བློན་འཁོར་རྣམས་བསད་ཀྱང་།
2CH 25:4 དེ་དག་གི་བུ་རྣམས་མ་བསད་དོ། །གང་ལ་ཞེ་ན། དེ་ནི་མོ་ཤེའི་བཀའ་ཁྲིམས་ཀྱི་མདོ་རུ་བཀོད་ཡོད་པའི་དཀོན་མཆོག་ཡ་ཝཱེའི་བཀའ་ནི་འདི་སྐད་དུ། བུ་ཡི་རྐྱེན་གྱིས་ཕ་ནི་གསོད་མི་རུང་ལ། ཕ་ཡི་རྐྱེན་གྱིས་བུ་ཡང་གསོད་མི་རུང་སྟེ། མི་རེ་རེ་རང་རང་གི་སྡིག་ཉེས་རྐྱེན་གྱིས་ཤི་དགོས་ཞེས་གསུངས་པས་སོ། །
2CH 25:5 དེ་ནས་ཨ་མཱ་ཙི་ཡས་ཡ་ཧུ་དཱ་པ་རྣམས་བསྡུས་ཏེ། ཡ་ཧུ་དཱ་དང་པེན་ཡཱ་མེན་པའི་ཁྱིམ་རྒྱུད་བཞིན་དུ་སྟོང་དཔོན་དང་བརྒྱ་དཔོན་རྣམས་བསྐོས་ནས། ལོ་ཉི་ཤུའི་ཡན་རྣམས་ཀྱི་རྩིས་གྲངས་བླངས་པ་དང་། མདུང་དང་ཕུབ་ཐོགས་ཏེ་དམག་ལ་འགྲོ་ཐུབ་པའི་སྐྱེས་པ་ཁྲི་སུམ་ཅུ་ཡོད།
2CH 25:6 ཡང་དངུལ་གྱི་རྡོ་ཚད་བརྒྱ་སྤྲད་དེ། ཡེས་ར་ཨེལ་གྱི་ནང་ནས་དམག་མི་དཔའ་རྩལ་ཅན་ཁྲི་བཅུ་གླས།
2CH 25:7 དེར་དཀོན་མཆོག་གི་སྐྱེས་བུ་ཞིག་ཨ་མཱ་ཙི་ཡའི་མདུན་དུ་འོངས་ནས་འདི་ལྟར། ཀྱེ་རྒྱལ་པོ་ལགས། ཡེས་ར་ཨེལ་གྱི་དམག་དཔུང་ཁྱོད་དང་མཉམ་དུ་མ་ཁྲིད་ཅིག ཅིའི་ཕྱིར་ཞེ་ན། དཀོན་མཆོག་ཡ་ཝཱེ་ནི་ཡེས་ར་ཨེལ་པ་ཨེ་ཕཱར་ཡིམ་གྱི་བུ་རྒྱུད་རྣམས་དང་མཉམ་དུ་མི་བཞུགས།
2CH 25:8 ཇི་སྟེ་ཁྱོད་ཅིས་ཀྱང་འགྲོ་དགོས་ན། སོང་ནས་དཔའ་ངར་བསྐྱེད་དེ་འཐབ་ན་ཡང་དཀོན་མཆོག་གིས་ཁྱོད་ནི་ཕ་རོལ་པོའི་མདུན་དུ་ཕམ་པར་མཛད་ངེས། གང་ལ་ཞེ་ན། དཀོན་མཆོག་ལ་སྐྱབས་མཛད་པའི་དབང་ཡོད་ལ། ཕམ་པར་མཛད་པའི་དབང་ཡང་ཡོད་ཅེས་བསྒོས་པ་དང་།
2CH 25:9 ཨ་མཱ་ཙི་ཡས་དཀོན་མཆོག་གི་སྐྱེས་བུ་ལ་ལན་དྲིས་ཏེ་ན་རེ། ངས་ཡེས་ར་ཨེལ་གྱི་དམག་དཔུང་དེ་ལ་སྤྲད་པའི་དངུལ་རྡོ་ཚད་བརྒྱ་ཡི་ཕྱིར་ངེད་ཅག་གིས་ཅི་བྱའམ་ཞེས་པ་ལ། ལན་དུ་དཀོན་མཆོག་གི་སྐྱེས་བུ་ན་རེ། དཀོན་མཆོག་ཡ་ཝཱེས་འདི་ལས་མང་པོ་ཁྱོད་ལ་གནང་ངེས་ཡིན་ཞེས་སྨྲས་སོ། །
2CH 25:10 དེ་ནས་ཨ་མཱ་ཙི་ཡ་ཡིས་ཨེ་ཕཱར་ཡིམ་ནས་འོངས་པའི་དམག་རྣམས་བཏང་ནས་རང་རང་གི་ཡུལ་ལ་ལོག་ཏུ་བཅུག་པས། དེ་རྣམས་ཡ་ཧུ་དཱ་པར་རབ་ཏུ་ཁྲོས་ནས་ཁོང་ཁྲོ་ཆེན་པོ་དང་བཅས་རང་ཡུལ་དུ་ལོག་གོ །
2CH 25:11 དེ་ནས་ཨ་མཱ་ཙི་ཡས་སྤོབས་པ་བསྐྱེད་དེ་རང་གི་མི་རྣམས་ཁྲིད་དེ་ཚྭའི་ལུང་པ་རུ་ཕྱིན་ནས། སེ་ཨིར་པ་ཁྲི་གཅིག་བསད་པ་དང་།
2CH 25:12 ཡ་ཧུ་དཱ་པ་རྣམས་ཀྱིས་མི་ཁྲི་གཅིག་གསོན་པོར་བཟུང་སྟེ། བྲག་ཁར་ཁྲིད་ནས་དེ་རུ་གཡང་ལ་འཕངས་པ་ན། དེ་དག་ཐམས་ཅད་གས་པ་རེད།
2CH 25:13 ཡིན་ཡང་ཨ་མཱ་ཙི་ཡས་རང་དང་མཉམ་དུ་དམག་ལ་འགྲོ་རུ་མ་བཅུག་པར་ཕྱིར་བཟློགས་པའི་དམག་མི་དེ་རྣམས། སཱ་མར་ཡ་ནས་པེད་ཧོ་རོན་གྱི་བར་དུ་ཡ་ཧུ་དཱའི་གྲོང་ཁྱེར་རྣམས་ལ་བཙན་འཛུལ་གྱིས། དེ་དག་གི་མི་སུམ་སྟོང་བསད་ནས་བཅོམ་ནོར་མང་པོ་ཕྲོགས།
2CH 25:14 དེ་ནས་ཨ་མཱ་ཙི་ཡས་ཨེ་དོམ་པ་རྣམས་བསད་དེ་ཕྱིར་ལོག་པའི་དུས་སུ། སེ་ཨིར་པའི་སྐུ་འདྲ་རྣམས་ཁྱེར་འོངས་ནས། དེ་རྣམས་རང་གི་ལྷ་རུ་བྱས་ཤིང་བསླངས་ཏེ། དེའི་མདུན་དུ་ཕྱག་བཙལ་ནས་སྤོས་བདུགས་པས།
2CH 25:15 ཨ་མཱ་ཙི་ཡའི་ཐོག་ཏུ་དཀོན་མཆོག་ཡ་ཝཱེ་ཐུགས་རབ་ཏུ་ཁྲོས་ནས། ཁོང་གིས་དེའི་མདུན་དུ་ལུང་སྟོན་པ་ཞིག་བཏང་ནས་དེ་ལ་ན་རེ། རང་གི་མི་རྣམས་ཀྱང་ཁྱོད་ཀྱི་ལག་ནས་སྐྱོབ་མི་ནུས་པའི་ལྷ་རྣམས་ཀྱི་རྗེས་སུ་ཁྱོད་ཅི་ལ་འབྲངས་པ་ཡིན་ནམ་ཞེས་སྨྲས་ཤིང་།
2CH 25:16 དེ་བཞིན་གཏམ་སྨྲ་བའི་དུས་སུ་རྒྱལ་པོས་ཁོ་ལ་ན་རེ། ང་ཚོས་ཁྱོད་ནི་རྒྱལ་པོའི་གྲོས་མིར་བསྐོས་པ་ཡིན་ནམ། ཁ་རོག་སྡོད་ཅིག གཅར་རྡུང་མྱང་འདོད་པ་ཡིན་ནམ་ཞེས་སྨྲས་པས། ལུང་སྟོན་པ་དེས་གླེང་མཚམས་བཞག་ནས་ཡང་ན་རེ། ཁྱོད་ཀྱིས་དེ་བཞིན་བྱས་ནས་ངའི་གཏམ་ལའང་མ་མཉན་པས། དཀོན་མཆོག་གིས་ཁྱོད་གསོད་པའི་ཐུགས་ཐག་བཅད་པ་ངས་ཤེས་པ་ཡིན་ཞེས་གསུངས།
2CH 25:17 དེ་ནས་ཡ་ཧུ་དཱའི་རྒྱལ་པོ་ཨ་མཱ་ཙི་ཡས་བློན་པོ་རྣམས་དང་གྲོས་བྱས་ཏེ། ཡེ་ཧུའི་ཚ་བོའམ། ཡེ་ཧོ་ཨ་ཧ་སི་ཡི་སྲས་ཏེ་ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སིའི་རྩར་བང་ཆེན་བཏང་སྟེ་ན་རེ། ཚུར་ཤོག་དང་། འུ་གཉིས་གཡུལ་ངོར་ཐུག་པར་བྱ་ཞེས་སྨྲས་པ་ལ།
2CH 25:18 ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡིས་ཡ་ཧུ་དཱའི་རྒྱལ་པོ་ཨ་མཱ་ཙི་ཡ་ལ་འཕྲིན་ལན་སྤྲིངས་ཏེ་ན་རེ། ལེ་པཱ་ནོན་གྱི་ཚེར་སྡོང་གིས་ལེ་པཱ་ནོན་གྱི་ཐང་ཤིང་ལ། ཁྱོད་ཀྱི་བུ་མོ་དེ་ངའི་བུ་ལ་མནའ་མར་ཐོངས་ཤིག་ཅེས་འཕྲིན་བསྐུར་ཞིང་། ཕྱིས་སུ་ལེ་པཱ་ནོན་དུ་ཡོད་པའི་རི་དྭགས་ཤིག་ཚེར་སྡོང་གི་སྟེང་དུ་འགྲུལ་ནས་དེ་རྐང་པས་བརྫིས་སོ། །
2CH 25:19 ཁྱོད་ཀྱིས་ལྟོས་དང་ངས་ཨེ་དོམ་པ་རྣམས་ཕམ་པར་བྱས་སྨྲ་ཞིང་། ཁྱོད་ཀྱི་སེམས་ལ་ང་རྒྱལ་གྱིས་ཁེངས་ཏེ་རང་བསྟོད་བྱེད་པའོ། །ད་ལྟ་ཁྱོད་ནི་རང་ཁྱིམ་དུ་སྡོད་ཅིག ཆག་སྒོ་བསླངས་ནས་ཁྱོད་དང་མཉམ་དུ་ཡ་ཧུ་དཱ་ཡང་བརླག་པར་བྱེད་དོན་ཅི་ཡིན་ནམ་ཞེས་སྨྲས་ན་ཡང་།
2CH 25:20 ཨ་མཱ་ཙི་ཡས་དེ་ལ་མ་མཉན་པ་རེད། གང་ལ་ཞེ་ན། དེ་ཚོས་ཨེ་དོམ་པའི་ལྷ་རྣམས་བཙལ་བའི་རྐྱེན་གྱིས། དེ་ཚོ་ཕ་རོལ་པོའི་ལག་ཏུ་གཏད་པའི་དོན་འདི་དཀོན་མཆོག་ལས་བྱུང་བ་ཡིན།
2CH 25:21 དེ་ནས་ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡར་འོངས་ནས། ཡ་ཧུ་དཱའི་རྒྱལ་པོ་ཨ་མཱ་ཙི་ཡ་དང་ཡ་ཧུ་དཱའི་པེད་ཤེ་མེ་སི་བྱ་བར་གཡུལ་ངོར་ཕྲད་པ་དང་།
2CH 25:22 ཡ་ཧུ་དཱ་པ་རྣམས་ཡེས་ར་ཨེལ་པའི་མདུན་དུ་ཕམ་པར་གྱུར་ནས། ཚང་མ་རང་རང་གི་ཁྱིམ་དུ་བྲོས་སོང་བས།
2CH 25:23 ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡིས་པེད་ཤེ་མེ་སི་རུ་ཡེ་ཧོ་ཨ་ཧཱ་ཟིའི་ཚ་བོའམ། ཡོ་ཨ་སིའི་སྲས་ཨ་མཱ་ཙི་ཡ་བྱ་བ་སྟེ་ཡ་ཧུ་དཱའི་རྒྱལ་པོ་བཟུང་ནས་ཡེ་རུ་སཱ་ལེམ་དུ་ཁྲིད་དེ། ཡང་ཨེ་ཕཱར་ཡིམ་གྱི་རྟ་སྒོ་ཞེས་པ་ནས་གྲུ་ཁའི་རྟ་སྒོ་བར་དུ། ཡེ་རུ་སཱ་ལེམ་གྱི་ལྕགས་རི་ཁྲུ་བཞི་བརྒྱ་བཤིགས་པ་དང་།
2CH 25:24 ཡང་ཨོ་བེད་ཨེ་དོམ་གྱིས་སྲུང་བའི་དཀོན་མཆོག་གི་མཆོད་ཁང་ནང་གི་གསེར་དངུལ་དང་ཡོ་བྱད། དེ་མིན་རྒྱལ་པོའི་ཕོ་བྲང་ནང་གི་གཏེར་རྣམས་ཀྱང་ཁྱེར་ཏེ། མི་མང་པོ་མི་གཏའ་རུ་བཟུང་ནས་སཱ་མར་ཡ་རུ་ལོག་གོ །
2CH 25:25 ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་ཧ་སིའི་སྲས་ཡེ་ཧོ་ཨ་སི་གྲོངས་པའི་རྗེས་སུ། ཡ་ཧུ་དཱའི་རྒྱལ་པོ་ཡོ་ཨ་སིའི་སྲས་ཨ་མཱ་ཙི་ཡ་ཡང་ལོ་བཅོ་ལྔར་བསྡད་པ་དང་།
2CH 25:26 ཨ་མཱ་ཙི་ཡའི་མཛད་རྗེས་གཞན་རྣམས་འགོ་ནས་མཇུག་བར་དུ་ཐམས་ཅད་ཡ་ཧུ་དཱ་དང་ཡེས་ར་ཨེལ་གྱི་རྒྱལ་རབས་ཀྱི་གླེགས་བམ་ནང་དུ་བཀོད་ཡོད་པ་མ་ཡིན་ནམ།
2CH 25:27 ཡང་ཨ་མཱ་ཙི་ཡ་དཀོན་མཆོག་ཡ་ཝཱེ་དང་བྲལ་བའི་རྗེས་སུ། ཡེ་རུ་སཱ་ལེམ་དུ་མི་རྣམས་ཀྱིས་ཁོ་རང་གསོད་པར་བརྩམས་པས་ཁོ་ལཱ་ཀི་སི་རུ་བྲོས་ཀྱང་། དེ་དག་གིས་ཁོའི་རྗེས་སུ་ལཱ་ཀི་སི་ལ་མི་ར་མདར་མངགས་ནས་ཁོ་དེ་རུ་བསད་དོ། །
2CH 25:28 ཡང་མི་ཞིག་གིས་ཁོའི་བེམ་པོ་རྟ་ལ་བཀལ་ནས་ཕྱིར་ཁྱེར་འོངས་ཏེ། དཱ་བིད་ཀྱི་གྲོང་ཁྱེར་ དུ་དེའི་ཕ་མེས་རྣམས་ཀྱི་ཁྲོད་དུ་དུར་ལ་སྦས་སོ། །
2CH 26:1 དེ་ནས་ཡ་ཧུ་དཱའི་མི་ཐམས་ཅད་ཀྱིས་དགུང་ལོ་བཅུ་དྲུག་ཡིན་པའི་ཨུ་ཟི་ཡཱ་ནི་ཁོང་གི་ཕ་ཨ་མཱ་ཙི་ཡའི་ཚབ་ཏུ་རྒྱལ་པོར་བསྐོས་པ་དང་།
2CH 26:2 རྒྱལ་པོ་ཨ་མཱ་ཙི་ཡ་རང་གི་ཕ་མེས་དང་མཉམ་དུ་གཟིམས་པའི་རྗེས་སུ། ཨུ་ཟི་ཡཱ་ཡིས་ཨེ་ལོད་སླར་ཡང་ཞིག་གསོ་མཛད་ཅིང་ཡ་ཧུ་དཱ་ལ་དབང་བར་བྱས།
2CH 26:3 ཨུ་ཟི་ཡཱ་རྒྱལ་སར་བསྐོ་དུས་ལོ་བཅུ་དྲུག་ཡིན་པ་དང་། ཡེ་རུ་སཱ་ལེམ་དུ་ལོ་ལྔ་བཅུ་ང་གཉིས་རིང་རྒྱལ་སྲིད་བསྐྱངས། ཁོང་གི་ཡུམ་གྱི་མིང་ལ་ཡེ་ཀོལ་ཡཱ་ཟེར་ཞིང་། མོ་ནི་ཡེ་རུ་སཱ་ལེམ་གྱི་མི་ཡིན་ནོ། །
2CH 26:4 ཁོང་གིས་རང་གི་ཡབ་ཨ་མཱ་ཙི་ཡའི་བྱ་སྤྱོད་བཞིན་དུ། དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་པ་རེད།
2CH 26:5 ཟཱ་ཀར་ཡ་ཡིས་ཨུ་ཟི་ཡཱ་ལ་དཀོན་མཆོག་ལ་གུས་ཤིང་འཇིགས་དགོས་པའི་བསླབ་བྱ་གནང་བ་དང་། ཁོང་གསོན་པའི་དུས་སུ་ཨུ་ཟི་ཡཱས་དུས་རྟག་ཏུ་དཀོན་མཆོག་བཙལ་ཞིང་། ཁོང་གིས་དཀོན་མཆོག་ཡ་ཝཱེ་འཚོལ་བའི་དུས་སུ། དཀོན་མཆོག་གིས་དེའི་བསམ་དོན་ལྷུན་གྱིས་འགྲུབ་པར་མཛད་དོ། །
2CH 26:6 ཁོང་ཕྱི་རུ་སོང་སྟེ་ཕེ་ལེ་ཤེད་པ་རྣམས་ལ་འཐབ་ཅིང་། གཱད་དང་ཡབ་ནེ། ཨ་སི་དོད་བཅས་ཀྱི་ལྕགས་རི་དག་བཤིགས་ཏེ། ཨ་སི་དོད་ཀྱི་མངའ་ཁོངས་སུ་ཕེ་ལེ་ཤེད་པའི་ཁྲོད་དུ་གྲོང་ཁྱེར་རྣམས་བཙུགས།
2CH 26:7 ཡང་དཀོན་མཆོག་གིས་དེ་ལ་གྲོགས་མཛད་ནས་ཕེ་ལེ་ཤེད་པ་དང་། གུར་བ་ཨལ་དུ་གནས་པའི་ཨ་རབ་པ་དང་མེ་ཨུན་པར་ངོ་རྒོལ་བྱས།
2CH 26:8 ཨམ་མོན་པས་ཨུ་ཟི་ཡཱ་ལ་དཔྱ་ཁྲལ་ཕུལ་བ་དང་། ཁོང་ཧ་ཅང་དར་རྒྱས་སུ་ཕྱིན་པས་ཁོང་གི་མཚན་སྙན་གྲགས་ཨེ་ཅིབ་ཀྱི་བར་དུ་རྒྱས་པ་རེད།
2CH 26:9 ཡང་ཨུ་ཟི་ཡཱས་ཡེ་རུ་སཱ་ལེམ་གྱི་གྲུ་ཁའི་རྟ་སྒོ་དང་ལུང་པའི་རྟ་སྒོ། ལྕགས་རིའི་གྲུ་ཟུར་བཅས་ལ་མཁར་བརྩིགས་ནས་ཤིན་ཏུ་བརྟན་པོར་མཛད་ཅིང་།
2CH 26:10 དབེན་སྟོང་དུའང་སོ་ལྟའི་མཁར་བརྩིགས་ཏེ། རྫིང་བུ་མང་ཙམ་བྲུས། གང་ལ་ཞེ་ན། དེར་རི་ཀླུང་དང་ཐང་ལ་ཕྱུགས་མང་པོ་ཡོད་པས་སོ། །ཡང་ཁོང་ནི་སོ་ནམ་ལ་དགའ་བས། རི་ཁུལ་དང་གཤིན་ས་རུ་ཞིང་པ་དང་རྒུན་ཚལ་བདག་གཉེར་བྱེད་མཁན་མང་པོ་བཞག
2CH 26:11 ཡང་ཨུ་ཟི་ཡཱ་ལ་དམག་མི་རྩལ་ཅན་མང་པོ་ཡོད་པ་དེ་རྣམས་དྲུང་ཡིག་ཡེ་ཨི་ཨེལ་བྱ་བ་དང་འགོ་དཔོན་མ་ཨ་སེ་ཡཱ་གཉིས་ཀྱིས་རྩིས་གྲངས་བླངས་པའི་ཐོ་བཞིན་དུ། རྒྱལ་པོའི་དམག་དཔོན་ནང་གི་ཧ་ནན་ཡཱའི་ལག་འོག་ཏུ་རུ་བསྒྲིགས་ནས་འཐབ་མོར་འགྲོ་བ་ཡིན།
2CH 26:12 དམག་མི་དཔའ་རྩལ་ཅན་དེ་དག་ཁྲོད་གྱི་ཁྱིམ་རྒྱུད་སོ་སོའི་འགོ་དཔོན་རྣམས་ཀྱི་བསྡོམས་གྲངས་ནི་ཉིས་སྟོང་དྲུག་བརྒྱ་ཡོད་པ་ཡིན།
2CH 26:13 དེ་དག་གི་ལག་འོག་ཏུ་རྒྱལ་པོར་རོགས་བྱས་ནས་དགྲ་ལ་རྒོལ་བའི་དམག་དཔུང་དཔའ་རྩལ་ཅན་སུམ་འབུམ་བདུན་སྟོང་ལྔ་བརྒྱ་ཡོད་པ་ཡིན།
2CH 26:14 ཨུ་ཟི་ཡཱས་དམག་ཚོགས་ཀུན་གྱི་ཕྱིར་ཕུབ་དང་། མདུང་དང་། ཁྲབ་རྨོག་དང་། མདའ་གཞུ་དང་། འུར་རྡོ་སོགས་གྲ་སྒྲིག་བྱས།
2CH 26:15 ཡང་ཁོང་གིས་ཡེ་རུ་སཱ་ལེམ་གྱི་མཁར་དང་ལྕགས་རི་ལས་མདའ་དང་རྡོ་ཆེན་པོ་འཕེན་པའི་ཕྱིར། འཕྲུལ་ཆས་བཟོ་མཁན་ལ་སྒྱོགས་ཀྱི་འཕྲུལ་འཁོར་བཟོ་རུ་བཅུག ཁོང་ལ་རོགས་རམ་ངོ་མཚར་བ་ཐོབ་ནས་ཧ་ཅང་དར་རྒྱས་སུ་ཕྱིན་པས་ཁོང་གི་མཚན་སྙན་རྒྱང་རིང་དུ་གྲགས་སོ། །
2CH 26:16 འོན་ཀྱང་ཨུ་ཟི་ཡཱ་དར་ཞིང་རྒྱས་པའི་དུས་སུ། ཁོང་གི་སེམས་ལ་ང་རྒྱལ་གྱིས་ཁེངས་པས་ངན་པར་གྱུར་ཏེ། ཐ་ན་ཡ་ཝཱེ་སྟེ་རང་གི་དཀོན་མཆོག་ལའང་བློ་ལོག་ནས། དཀོན་མཆོག་ཡ་ཝཱེའི་མཆོད་ཁང་ནང་དུ་བདུག་སྤོས་ཀྱི་མཆོད་ཁྲིའི་ཁར་སྤོས་བདུག་ཏུ་སོང་།
2CH 26:17 མཆོད་དཔོན་ཨ་ཟར་ཡཱ་དང་དཀོན་མཆོག་ཡ་ཝཱེའི་མཆོད་དཔོན་བརྒྱད་ཅུ་ཁོང་གི་རྗེས་འབྲངས་ནས་ནང་ལ་ཕྱིན་པ་དང་། དེ་ཐམས་ཅད་དཔའ་བོ་ཡིན་ནོ། །
2CH 26:18 དེར་དེ་དག་གིས་རྒྱལ་པོ་ཨུ་ཟི་ཡཱ་བཀག་ནས་ན་རེ། ཀྱེ་ཨུ་ཟི་ཡཱ། དཀོན་མཆོག་ཡ་ཝཱེ་ལ་སྤོས་བདུག་པ་ནི་ཁྱེད་ཀྱི་ལས་ཀ་མིན་ཏེ། དེ་ནི་སྤོས་བདུག་པའི་དོན་དུ་དམ་པར་བྱས་པའི་མཆོད་དཔོན་ནམ། ཨ་རོན་གྱི་བུ་རྒྱུད་དག་གི་ལས་ཀ་ཡིན་ནོ། །ཁྱེད་ཀྱིས་ལོག་སྤྱོད་སྤེལ་བས་དམ་པའི་གནས་ལས་ཕྱིར་བུད་དང་། དོན་འདིའི་རྐྱེན་གྱིས་ཁྱེད་ལ་ཡ་ཝཱེ་དཀོན་མཆོག་ལས་བཀུར་སྟི་མི་འཐོབ་བོ་ཞེས་སྨྲས་པ་ལ།
2CH 26:19 ཨུ་ཟི་ཡཱ་ཁྲོས་ནས་སྤོས་ཕོར་ལག་ཏུ་བཟུང་ནས་སྤོས་བདུག་པར་བརྩམས་པ་དང་། དེ་མཆོད་དཔོན་རྣམས་ལ་ཁྲོས་པ་ཙམ་གྱིས། དཀོན་མཆོག་ཡ་ཝཱེའི་མཆོད་ཁང་དུ་སྤོས་ཁྲིའི་འགྲམ་ལ་མཆོད་དཔོན་དག་གི་མདུན་དུ་དེའི་དཔྲལ་བར་མཛེ་ཐོན།
2CH 26:20 དེར་མཆོད་དཔོན་ཆེན་པོ་ཨ་ཟར་ཡཱ་དང་མཆོད་དཔོན་གཞན་ཀུན་གྱིས་དེ་ལ་བལྟས་པ་དང་། དེའི་དཔྲལ་བར་མཛེ་ཐོན་པ་མཐོང་ནས། དེ་མྱུར་དུ་མཆོད་ཁང་ལས་བཏོན་པ་རེད། ཁོང་ཡང་མྱུར་དུ་ཕྱི་རུ་ཐོན། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་དེ་ལ་བརྡུངས་པས་སོ། །
2CH 26:21 དེ་ལྟར་རྒྱལ་པོ་ཨུ་ཟི་ཡཱ་འཆི་བའི་བར་དུ་མཛེ་ནད་བྱུང་ནས་ལུས། ཁོང་ནི་མཛེ་ནད་ཅན་ཡིན་པས་ཟུར་དུ་ཁང་པ་ཞིག་གི་ནང་བསྡད་ཅིང་། དཀོན་མཆོག་ཡ་ཝཱེའི་མཆོད་ཁང་དུ་འགྲོ་མི་ཆོག་པ་ཡིན། དེ་ནས་ཁོང་གི་སྲས་ཡོ་ཐམ་གྱིས་རྒྱལ་པོའི་ཁྱིམ་རྒྱུད་ལ་བདག་གཉེར་མཛད་པ་དང་། མི་ཀུན་ལ་ཡང་བདག་སྐྱོང་མཛད།
2CH 26:22 ཨུ་ཟི་ཡཱའི་མཛད་རྗེས་གཞན་རྣམས་འགོ་ནས་མཇུག་བར་དུ་ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱས་ཡི་གེར་བཀོད་ཡོད།
2CH 26:23 དེ་ནས་ཨུ་ཟི་ཡཱ་ཕ་མེས་དང་མཉམ་དུ་གཟིམས་པ་དང་། མི་རྣམས་ཀྱིས་ཁོང་ནི་མཛེ་ཅན་ཡིན་ནོ་ཞེས་སྨྲས་པས་ན། ཁོང་ཉིད་རྒྱལ་པོར་གཏོགས་པའི་ཐང་གི་དུར་ཁྲོད་དུ་སྦས་པ་དང་། དེའི་སྲས་ཡོ་ཐམ་གྱིས་ཁོང་གི་ཚབ་ཏུ་རྒྱལ་སྲིད་བསྐྱངས་པའོ། །
2CH 27:1 ཡོ་ཐམ་རྒྱལ་པོར་བཞུགས་དུས་སུ་དགུང་ལོ་ཉེར་ལྔ་ཡིན་པ་དང་། ལོ་བཅུ་དྲུག་གི་རིང་ལ་ཡེ་རུ་སཱ་ལེམ་དུ་རྒྱལ་སྲིད་བསྐྱངས། ཁོང་གི་ཡུམ་གྱི་མིང་ལ་ཡེ་རུ་ཤཱ་ཟེར་ཏེ། ཟཱ་ཏོག་གི་སྲས་མོ་ཡིན་ནོ། །
2CH 27:2 ཡོ་ཐམ་གྱིས་ཡབ་ཨུ་ཟི་ཡཱས་ཅི་མཛད་པ་བཞིན་དུ། དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་ནའང་། དཀོན་མཆོག་ཡ་ཝཱེའི་མཆོད་ཁང་གི་ནང་དུ་མ་འཛུལ། མི་རྣམས་ཀྱིས་ད་དུང་ངན་པའི་ལས་བྱས་པ་རེད།
2CH 27:3 ཡོ་ཐམ་གྱིས་དཀོན་མཆོག་ཡ་ཝཱེའི་མཆོད་ཁང་གི་རྟ་སྒོ་གོང་མ་བརྩིགས་ཏེ། ཨོ་ཕེལ་གྱི་ལྕགས་རིའི་ཁར་ཡང་མཁར་ལས་མང་པོ་བཏང་།
2CH 27:4 ཡ་ཧུ་དཱའི་རི་ཁུལ་དུ་གྲོང་ཁྱེར་རྣམས་བཙུགས་ཏེ། ནགས་གསེབ་ཏུའང་མཁར་དང་སོ་ལྟའི་མཁར་རྣམས་བཞེངས།
2CH 27:5 ཡང་ཡོ་ཐམ་གྱིས་ཨམ་མོན་པའི་རྒྱལ་པོ་ལ་དམག་འཐབ་ནས་རྒྱལ་བས། ཨམ་མོན་པས་ཁོང་ལ་ལོ་དེར་དངུལ་རྡོ་ཚད་བརྒྱ་དང་། གྲོ་ཁལ་ཆིག་ཁྲི་དང་། ནས་ཁལ་ཆིག་ཁྲི་ཕུལ་བ་དང་། ལོ་གཉིས་པ་དང་གསུམ་པ་ལ་ཡང་དེ་ལྟར་ཕུལ།
2CH 27:6 ཡོ་ཐམ་གྱིས་རང་གི་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་པས་ཤིན་ཏུ་དར།
2CH 27:7 ཡོ་ཐམ་གྱི་མཛད་རྗེས་གཞན་རྣམས་དང་། དེའི་དམག་འཐབ་ཚུལ་དང་འཕྲིན་ལས་རྣམས་ནི་ཡེས་ར་ཨེལ་དང་ཡ་ཧུ་དཱའི་རྒྱལ་པོ་རྣམས་ཀྱི་གླེགས་བམ་ནང་དུ་བཀོད་ཡོད།
2CH 27:8 ཁོང་རྒྱལ་པོར་བཞུགས་དུས་སུ་དགུང་ལོ་ཉེར་ལྔ་ཡིན་པ་དང་། ཡེ་རུ་སཱ་ལེམ་དུ་ལོ་བཅུ་དྲུག་ལ་རྒྱལ་སྲིད་བསྐྱངས་ནས།
2CH 27:9 ཡོ་ཐམ་རང་གི་ཕ་མེས་དང་མཉམ་དུ་གཟིམས་པ་དང་། དཱ་བིད་ཀྱི་གྲོང་ཁྱེར་དུ་དུར་ལ་སྦས་ནས། ཁོང་གི་སྲས་ཨ་ཧ་ཟཱ་ཁོའི་ཚབ་ཏུ་རྒྱལ་པོར་བསྡད་དོ། །
2CH 28:1 ཨ་ཧ་ཟཱ་རྒྱལ་པོར་སྡོད་དུས་སུ་ལོ་ཉི་ཤུ་ཡིན་ལ། ཡེ་རུ་སཱ་ལེམ་དུ་ལོ་བཅུ་དྲུག་གི་རིང་ལ་རྒྱལ་སྲིད་བསྐྱངས། ཁོས་རང་གི་མེས་པོ་དཱ་བིད་དང་འདྲ་བར་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་མ་སྤྱད་དེ།
2CH 28:2 ཡེས་ར་ཨེལ་གྱི་རྒྱལ་པོ་རྣམས་ཀྱི་སྤྱོད་ལམ་བཞིན་སྤྱད་དེ། པཱ་ཨལ་རྣམས་ཀྱི་ཕྱིར་བླུགས་སྐུ་བཟོས།
2CH 28:3 ཡང་པེན་ཧིན་ནོམ་ལུང་པ་རུ་བསང་བཏང་སྟེ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་བསྐྲད་པའི་ཕྱི་རོལ་པའི་ཞེན་ལོག་གི་ལུགས་བཞིན་དུ་རང་གི་བུ་བུ་མོ་རྣམས་སྦྱིན་སྲེག་ཏུ་ཕུལ།
2CH 28:4 ཡང་མཐོ་གླིང་དང་། རིའི་སྟེང་དང་། ལྗོན་ཤིང་རེ་རེའི་འོག་ཏུ་མཆོད་པ་ཕུལ་ཏེ་བསང་བཏང་བ་རེད།
2CH 28:5 དེའི་རྐྱེན་གྱིས་ཨ་ཧ་ཟཱ་ཡི་དཀོན་མཆོག་ཡ་ཝཱེས་ཁོ་རང་ཨ་རམ་པའི་རྒྱལ་པོའི་ལག་ཏུ་གཏད་པས། དེས་ཁོ་ཕམ་པར་བརྒྱབ་ཅིང་ཁོའི་མི་ཚོགས་ཆེན་པོ་ཞིག་བཙན་ཁྲིད་བྱས་ཏེ་དཱ་མེ་སེག་ཏུ་དྲངས། ཡང་དཀོན་མཆོག་གིས་ཁོ་རང་ཡེས་ར་ཨེལ་གྱི་རྒྱལ་པོའི་ལག་ཏུ་གཏད་ནས། ཡེས་ར་ཨེལ་གྱི་རྒྱལ་པོས་ཡ་ཧུ་དཱ་རུ་གསོད་གཏུབ་ཆེན་པོ་བྱས།
2CH 28:6 རེ་མལ་ཡཱའི་བུ་ཕེ་ཀཱས་ཉིན་གཅིག་གི་རིང་ཡ་ཧུ་དཱ་རུ་དམག་མི་དཔའ་རྩལ་ཅན་ཁྲི་བཅུ་གཉིས་བསད་པ་ཡིན། གང་ལ་ཞེ་ན། དེ་དག་གིས་རང་གི་ཕ་མེས་ཀྱི་དཀོན་མཆོག་ཡ་ཝཱེ་སྤངས་པའི་ཕྱིར་རོ། །
2CH 28:7 ཡང་ཟིག་རི་ཞེས་པའི་ཨེ་ཕཱར་ཡིམ་གྱི་དཔའ་བོ་ཞིག་ཡོད་པ་དེས་རྒྱལ་སྲས་མ་ཨ་སེ་ཡཱ་དང་། རྒྱལ་པོའི་ཕོ་བྲང་གི་ཕྱག་མཛོད་ཨས་རི་ཀམ་དང་། རྒྱལ་པོའི་བློན་ཆེན་ཨེལ་ཁ་ནཱ་བཅས་བསད་དོ། །
2CH 28:8 ཡེས་ར་ཨེལ་པ་རྣམས་ཀྱིས་རང་གི་སྤུན་ཡ་ཧུ་དཱ་པའི་ནང་ནས་བུད་མེད་དང་བུ་དང་བུ་མོ་བཅས་ཁྲི་ཉི་ཤུ་བཙན་ཁྲིད་བྱས་པར་མ་ཟད། དེ་དག་ལས་ནོར་མང་པོ་བཅོམ་ནས། བཅོམ་ནོར་དེ་རྣམས་སཱ་མར་ཡ་རུ་ཁྱེར་ཏོ། །
2CH 28:9 དེར་དཀོན་མཆོག་ཡ་ཝཱེའི་ལུང་སྟོན་པ་ཨོ་དེད་བྱ་བ་ཞིག་ཡོད་པ་སཱ་མར་ཡ་རུ་ལོག་འོངས་པའི་དམག་ཚོགས་བསུ་བར་ཕྱིན་ཏེ་ན་རེ། ལྟོས་ཤིག ཁྱོད་ཅག་གི་ཕ་མེས་ཀྱི་དཀོན་མཆོག་ཡ་ཝཱེ་ནི་ཡ་ཧུ་དཱ་ལ་ཐུགས་ཁྲོས་ཏེ། ཁོ་རྣམས་ཁྱོད་ཅག་གི་ལག་ཏུ་གཏད་པ་ཡིན་མོད། འོན་ཀྱང་ཁྱོད་ཚོས་ཁོང་ཁྲོའི་མེ་ལྕེ་དགུང་དུ་འཕྱུར་ནས་དེ་རྣམས་བསད་པ་རེད།
2CH 28:10 ད་ནི་ཁྱོད་ཚོས་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་བཙན་གྱིས་རང་གི་བྲན་པོ་དང་བྲན་མོ་རུ་འགོད་འདོད་པ་རེད། ཁྱོད་ཚོས་ཀྱང་རང་གི་དཀོན་མཆོག་ཡ་ཝཱེའི་དྲུང་དུ་སྡིག་ཉེས་བསགས་པ་མིན་ནམ།
2CH 28:11 དེ་བས་བདག་ལ་ཉོན་དང་། དཀོན་མཆོག་ཡ་ཝཱེའི་ཐུགས་ཁྲོ་དྲག་པོ་ནི་ཁྱོད་ཅག་གི་སྟེང་བབས་པས། ཁྱོད་ཚོས་བཙན་ཁྲིད་བྱས་འོངས་པའི་རང་གི་སྤུན་རྣམས་ཐོངས་ཤིག་ཅེས་གདམས་པ་དང་།
2CH 28:12 དེ་ནས་ཨེ་ཕཱར་ཡིམ་པའི་འགོ་དཔོན་རྣམས་ལས་ཡེ་ཧོ་ཧ་ནན་གྱི་བུ་ཨ་ཟར་ཡཱ་དང་། མེ་ཟིལ་ལེ་མོད་ཀྱི་བུ་པེ་རེག་ཡཱ་དང་། ཤལ་ལུམ་གྱི་བུ་ཡེ་ཧི་ཟག་ཡཱ་དང་། ཧད་ལ་ཨིའི་བུ་ཨ་མ་སཱ་བཅས་ཀྱིས་གཡུལ་ས་ནས་འོངས་པའི་དམག་རྣམས་བཀག་ནས་དེ་དག་ལ་ན་རེ།
2CH 28:13 ཁྱོད་ཚོས་བཙོན་མ་འདི་དག་ནང་དུ་ཁྲིད་མི་རུང་སྟེ། ང་ཚོས་དཀོན་མཆོག་ཡ་ཝཱེའི་དྲུང་དུ་ཉེས་པ་བསགས་ཟིན་ལ། ཁྱོད་ཚོས་ཀྱང་དེའི་སྟེང་དུ་སྡིག་ཉེས་བསག་འདོད་པའོ། །རང་ཅག་གི་ཉེས་སྐྱོན་ཤིན་ཏུ་ཚབས་ཆེ་ལ། ཡེས་ར་ཨེལ་གྱི་སྟེང་དུ་ཐུགས་ཁྲོ་ཆེན་པོ་ཡོད་ཅེས་སྨྲས་པས།
2CH 28:14 དམག་དཔུང་གིས་འགོ་དཔོན་དང་མི་ཚོགས་ཀྱི་མདུན་དུ་བཙོན་མ་རྣམས་བཅོམ་ནོར་དང་བཅས་བཏང་བ་རེད།
2CH 28:15 དེར་གོང་ནས་བརྗོད་པའི་སྐྱེ་བོ་རྣམས་ལངས་ནས་བཙོན་མ་རྣམས་ཁྲིད་དེ། དེ་དག་གི་ནང་ནས་གཅེར་བུར་ཡོད་པ་ཐམས་ཅད་ལ་བཅོམ་ནོར་ལས་གོས་དང་ལྷམ་བླངས་ནས་བསྐོན་ཏེ། བཟའ་བཏུང་སྤྲད་ཅིང་སྣུམ་གྱིས་བྱུགས་པ་དང་། དེ་དག་ཁྲོད་ཀྱི་སྟོབས་ཞན་པ་རྣམས་བོང་བུར་བསྐྱོན་ཏེ། ཁ་ཟུར་ཤིང་གི་གྲོང་ཁྱེར་ཡེ་རུ་ཀོ་རུ་དེ་དག་གི་སྤུན་གྱི་དྲུང་དུ་བསྐྱལ་ནས་ཕྱིར་སཱ་མར་ཡ་རུ་ལོག
2CH 28:16 དེའི་ཚེ་རྒྱལ་པོ་ཨ་ཧ་ཟཱས་ཨ་སུར་གྱི་རྒྱལ་པོ་རྣམས་ལ་སྐྱབས་ཞུ་རུ་བང་ཆེན་བཏང་བ་རེད།
2CH 28:17 གང་ལ་ཞེ་ན། ཨེ་དོམ་པ་རྣམས་ཡང་བསྐྱར་ཡ་ཧུ་དཱ་ལ་རྒོལ་དུ་འོངས་ཏེ་མི་མང་པོ་བཟུང་ནས་ཁྲིད།
2CH 28:18 ཕེ་ལེ་ཤེད་པས་ཀྱང་རི་ཀླུང་དང་ཡ་ཧུ་དཱའི་ནེ་གུབ་ཡུལ་གྱི་གྲོང་ཁྱེར་རྣམས་ལ་བཙན་འཛུལ་བྱས་ནས་བཟུང་སྟེ། པེད་ཤེ་མེ་སི་དང་། ཨ་ཡཱ་ལོན་དང་། གེ་དེ་རོད་དང་། སོ་ཀོ་དང་དེའི་གྲོང་ཚོ་རྣམས་དང་། ཐིམ་ནཱ་དང་དེའི་གྲོང་ཚོ་རྣམས་དང་། གིམ་ཟོ་དང་དེའི་གྲོང་ཚོ་རྣམས་བཅས་བླངས་ནས་དེར་གཞིས་ཕབ།
2CH 28:19 ཅིའི་ཕྱིར་ཞེ་ན། ཡ་ཧུ་དཱའི་རྒྱལ་པོ་ཨ་ཧ་ཟཱས་ཡ་ཧུ་དཱ་རུ་ངན་པ་བག་མེད་དུ་སྤྱད་དེ། དཀོན་མཆོག་ཡ་ཝཱེའི་དྲུང་དུ་སྡིག་པ་ཚབས་ཆེན་བྱས་པས། དཀོན་མཆོག་ཡ་ཝཱེས་ཡ་ཧུ་དཱ་དམའ་སར་ཕབ་པ་ཡིན།
2CH 28:20 དེར་ཨ་སུར་གྱི་རྒྱལ་པོ་ཏིལ་གད་པིལ་ནེ་བཟིར་ཁོའི་རྩར་འོངས་པ་དང་། ཁོ་ལ་རོགས་བྱེད་པ་ཕར་ཞོག དེ་ལས་ལྡོག་སྟེ་ཁོ་ལ་བརྙས་བཅོས་བྱས།
2CH 28:21 ཨ་ཧ་ཟཱས་དཀོན་མཆོག་ཡ་ཝཱེའི་མཆོད་ཁང་དང་རྒྱལ་པོའི་ཕོ་བྲང་དང་། འགོ་དཔོན་རྣམས་ཀྱི་ཁྱིམ་བཅས་ནས་རྒྱུ་ནོར་ཁྱེར་ཏེ་ཨ་སུར་རྒྱལ་པོར་ཕུལ་ནའང་ཕན་ཅི་ཡང་མ་ཐོགས་སོ། །
2CH 28:22 འུ་ཐུག་གི་དུས་དེ་ལ་རྒྱལ་པོ་ཨ་ཧ་ཟཱས་དཀོན་མཆོག་ཡ་ཝཱེའི་དྲུང་དུ་སྡིག་པ་ལྷག་པར་བྱས་ཏེ།
2CH 28:23 རང་ཉིད་ཕམ་པར་བཅུག་པའི་དཱ་མེ་སེག་གི་ལྷ་རྣམས་ལ་མཆོད་པ་ཕུལ་ནས་ན་རེ། ཨ་རམ་རྒྱལ་པོའི་ལྷ་རྣམས་ཀྱིས་དེ་དག་ལ་སྐྱབས་བྱས་པས། ལྷ་དེ་རྣམས་ཀྱིས་ང་ལ་ཡང་སྐྱབས་བྱེད་པའི་ཆེད་དུ། ངས་མཆོད་པ་འབུལ་བར་བྱའོ་སྨྲས་ཀྱང་། ལྷ་དེ་རྣམས་ཀྱིས་ཁོ་དང་ཡེས་ར་ཨེལ་ཐམས་ཅད་ཕམ་པར་བཅུག
2CH 28:24 ཡང་ཨ་ཧ་ཟཱས་དཀོན་མཆོག་གི་མཆོད་ཁང་གི་ཡོ་བྱད་རྣམས་བསྡུས་ནས། དཀོན་མཆོག་གི་མཆོད་ཁང་ནང་གི་སྣོད་ཆས་ཐམས་ཅད་དུམ་བུར་བཅག་ཅིང་། དཀོན་མཆོག་ཡ་ཝཱེའི་མཆོད་ཁང་གི་སྒོ་རྣམས་བརྒྱབ་ནས། ཡེ་རུ་སཱ་ལེམ་གྱི་གྲུ་ཟུར་རེ་རེར་མཆོད་ཁྲི་བརྩིགས།
2CH 28:25 ཡང་ཡ་ཧུ་དཱའི་གྲོང་ཁྱེར་རེ་རེའི་ནང་དུ་མཐོ་གླིང་རྣམས་བརྩིགས་ནས་ལྷ་གཞན་རྣམས་ལ་བསང་བཏང་སྟེ། དཀོན་མཆོག་ཡ་ཝཱེ་སྟེ་རང་གི་ཕ་མེས་ཀྱི་དཀོན་མཆོག་ཐུགས་ཁྲོ་རུ་བཅུག་པ་རེད།
2CH 28:26 ཨ་ཧ་ཟཱའི་བྱས་རྗེས་གཞན་རྣམས་དང་། སྤྱོད་པ་ཐམས་ཅད་འགོ་ནས་མཇུག་བར་དུ་ཡ་ཧུ་དཱ་དང་ཡེས་ར་ཨེལ་གྱི་རྒྱལ་པོ་རྣམས་ཀྱི་གླེགས་བམ་ནང་དུ་བཀོད་ཡོད།
2CH 28:27 ཨ་ཧ་ཟཱ་རང་གི་ཕ་མེས་ཀྱི་ཁྲོད་དུ་གཉིད་ནས། ཡེ་རུ་སཱ་ལེམ་རྒྱལ་ས་རུ་དུར་ལ་སྦས་མོད། འོན་ཀྱང་ཡེས་ར་ཨེལ་གྱི་རྒྱལ་པོ་རྣམས་ཀྱི་དུར་ཁྲོད་དུ་མ་བཞག དེའི་སྲས་ཧི་ཟི་ཀི་ཡཱ་ཁོའི་ཚབ་ཏུ་རྒྱལ་པོར་གྱུར་ཏོ། །
2CH 29:1 ཧི་ཟི་ཀི་ཡཱས་རྒྱལ་སྲིད་འཛིན་དུས་ཁོང་དགུང་ལོ་ཉེར་ལྔ་ཡིན་པ་དང་། ལོ་ཉེར་དགུའི་རིང་ལ་ཡེ་རུ་སཱ་ལེམ་དུ་རྒྱལ་སྲིད་བསྐྱངས། ཟཱ་ཀར་ཡའི་བུ་མོ་ཨ་བི་བྱ་བ་ནི་ཁོང་གི་ཡུམ་མོ། །
2CH 29:2 ཧི་ཟི་ཀི་ཡཱས་རང་གི་ཡབ་མེས་དཱ་བིད་ཀྱི་མཛད་པ་ཐམས་ཅད་བཞིན་དུ། དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད།
2CH 29:3 ཁོང་གིས་རྒྱལ་སྲིད་སྐྱོང་བའི་ལོ་དང་པོའི་ཟླ་དང་པོར། དཀོན་མཆོག་ཡ་ཝཱེའི་མཆོད་ཁང་གི་སྒོ་རྣམས་ཕྱེས་ནས་དེ་རྣམས་ཞིག་གསོ་མཛད།
2CH 29:4 ཡང་ཁོང་གིས་མཆོད་དཔོན་དང་ལེ་ཝི་པ་རྣམས་བོས་ཏེ་ཤར་ཕྱོགས་ཀྱི་ཐང་ཆེན་ལ་བསྡུས་ནས་དེ་དག་ལ་ན་རེ།
2CH 29:5 ཀྱེ་ལེ་ཝི་པ་རྣམས་བདག་ལ་ཉོན་དང་། ཁྱོད་ཅག་གིས་རང་ཉིད་དམ་པར་བྱོས་དང་། ཡང་རང་གི་ཕ་མེས་ཀྱི་དཀོན་མཆོག་ཡ་ཝཱེའི་མཆོད་ཁང་ཡང་དམ་པར་བྱོས་ལ། དམ་པའི་གནས་ལས་རྫས་མི་གཙང་བ་དེ་ཕྱུང་ཞིག
2CH 29:6 རང་ཅག་གི་ཕ་མེས་རྣམས་ཀྱིས་སྡིག་པའི་ལས་བྱས་ཏེ། རང་ཅག་གི་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ་ཁོང་ཉིད་སྤངས་པ་དང་། དཀོན་མཆོག་ཡ་ཝཱེའི་བཞུགས་གནས་ལ་ཁ་ཡ་མི་བྱེད་པར་ཁོང་ལ་རྒྱབ་བསྟན་པ་ཡིན་ཏེ།
2CH 29:7 ཡང་དེ་དག་གིས་མཆོད་ཁང་བར་ཁྱམས་ཀྱི་སྒོ་རྣམས་བརྒྱབ་སྟེ། སྒྲོན་མེ་རྣམས་གཟིམས། ཡེས་ར་ཨེལ་གྱི་དཀོན་མཆོག་ལ་གནས་དམ་པའི་ནང་དུ་སྤོས་ཀྱང་མ་བདུག་ལ། སྦྱིན་སྲེག་གི་མཆོད་པ་ཡང་མ་ཕུལ་བས།
2CH 29:8 ཡ་ཧུ་དཱ་དང་ཡེ་རུ་སཱ་ལེམ་གྱི་སྟེང་དུ་དཀོན་མཆོག་ཡ་ཝཱེའི་ཐུགས་ཁྲོ་བབས་ཏེ། ཁྱོད་ཚོའི་མིག་གིས་མཐོང་བ་བཞིན་དུ། ཁོང་གིས་དེ་རྣམས་འཇིགས་སུ་རུང་བ་དང་ཡ་ང་བ། དགོད་བྲོ་བ་བཅས་ཀྱི་གནས་སུ་བསྐྱུར།
2CH 29:9 ལྟོས་ཤིག དེའི་རྐྱེན་གྱིས་རང་ཅག་གི་ཕ་མེས་རྣམས་རལ་གྲིས་བརྡབས་ཤིང་། བུ་དང་བུ་མོ་དང་ཆུང་མ་རྣམས་བཙོན་མ་རུ་གྱུར།
2CH 29:10 ད་ལྟ་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཐུགས་ཁྲོ་དྲག་པོ་དེ་རང་ཅག་དང་འབྲལ་བའི་ཆེད་དུ། བདག་གི་སེམས་སུ་ཁོང་དང་ཁ་ཆད་འཇོག་པའི་འདུན་པ་ཡོད་དེ།
2CH 29:11 བདག་གི་བུ་རྣམས། དཀོན་མཆོག་ཡ་ཝཱེས་ཁྱོད་ཅག་ནི་ཁོང་གི་དྲུང་དུ་ལངས་ནས་ཁོང་ལ་ཞབས་ཕྱི་བསྒྲུབ་པ་དང་། ཁོང་གི་ཞབས་ཕྱི་བྱས་ནས་ཁོང་ལ་སྤོས་བདུག་པའི་ཕྱིར་བདམས་པས། ད་ནི་བག་གཡེང་མ་བྱེད་ཅིག་ཅེས་བསྐུལ་བ་ན།
2CH 29:12 ལེ་ཝི་པ་རྣམས་ཡར་ལངས་ཏེ། དེའི་ཁྲོད་དུ་ཀོ་ཧད་ཀྱི་བུ་རྒྱུད་ལས། ཨ་མ་སཱ་ཨིའི་བུ་མ་ཧད་དང་། ཨ་ཟར་ཡཱའི་བུ་ཡོ་ཨེལ། ཡང་མཱ་རཱ་རེའེ་ཡི་བུ་རྒྱུད་ལས། ཨབ་དིའི་བུ་ཁི་སི་དང་། ཡེ་ཧལ་ལེ་ཨེལ་གྱི་བུ་ཨ་ཟར་ཡཱ་དང་། གེར་ཤོན་པ་ལས། ཟིམ་མཱའི་བུ་ཡོ་ཨག་དང་། ཡོ་ཨག་གི་བུ་ཨེ་དེན་དང་།
2CH 29:13 ཨེ་ལི་ཙ་ཕན་གྱི་བུ་རྒྱུད་ལས། ཤིམ་རི་དང་ཡེ་ཨི་ཡེལ། ཨ་སབ་ཀྱི་བུ་རྒྱུད་ལས། ཟཱ་ཀར་ཡ་དང་། མད་ཐན་ཡཱ་དང་།
2CH 29:14 ཧེ་མཱན་གྱི་བུ་རྒྱུད་ལས། ཡེ་ཧི་ཨེལ་དང་། ཤིམ་ཨི་དང་། ཡེ་དུ་ཐུན་གྱི་བུ་རྒྱུད་ལས། ཤེ་མ་ཡཱ་དང་ཨུ་ཟི་ཨེལ་བཅས་སོ། །
2CH 29:15 དེ་དག་གིས་རང་གི་སྤུན་རྣམས་བསྡུས་ནས་རང་ཉིད་དམ་པར་བྱས་ཤིང་། དཀོན་མཆོག་ཡ་ཝཱེའི་བཀའ་དང་རྒྱལ་པོའི་གསུང་བཞིན་དུ། དཀོན་མཆོག་ཡ་ཝཱེའི་མཆོད་ཁང་ལ་བྱི་དོར་བྱེད་དུ་ཆས་ཏེ།
2CH 29:16 མཆོད་དཔོན་དག་དཀོན་མཆོག་ཡ་ཝཱེའི་མཆོད་ཁང་ནང་དུ་བྱི་དོར་བྱེད་དུ་ཞུགས་ནས། དཀོན་མཆོག་ཡ་ཝཱེའི་མཆོད་ཁང་ནང་དུ་ཡོད་པའི་རྫས་མི་གཙང་བ་ཐམས་ཅད་དཀོན་མཆོག་ཡ་ཝཱེའི་མཆོད་ཁང་གི་ར་སྐོར་ནང་དུ་བཏོན་པ་དང་། ལེ་ཝི་པ་རྣམས་ཀྱིས་དེ་བླངས་ནས་ཕྱི་རོལ་ཏུ་ཀིད་རོན་གྲོག་མོ་ལ་བསྐྱལ་བ་ཡིན།
2CH 29:17 དེ་ལྟར་དེ་དག་གིས་ཟླ་དང་པོའི་ཚེས་གཅིག་གི་ཉིན་ནས་བཟུང་དམ་པར་བྱེད་པའི་འགོ་བརྩམས་ནས། ཟླ་དེའི་ཉིན་བརྒྱད་པར་དཀོན་མཆོག་ཡ་ཝཱེའི་མཆོད་ཁང་གི་ཁྱམས་རར་སླེབས། ཉིན་བརྒྱད་ཀྱི་རིང་ལ་དཀོན་མཆོག་ཡ་ཝཱེའི་མཆོད་ཁང་དམ་པར་བྱས་ནས། ཟླ་དང་པོའི་ཚེས་བཅུ་དྲུག་ཉིན་ལས་ཀ་ཡོངས་སུ་གྲུབ།
2CH 29:18 དེ་ནས་ཁོ་རྣམས་རྒྱལ་པོ་ཧི་ཟི་ཀི་ཡཱའི་དྲུང་དུ་ཕྱིན་ཏེ་ན་རེ། ངེད་ཅག་གིས་དཀོན་མཆོག་ཡ་ཝཱེའི་མཆོད་ཁང་ཧྲིལ་པོ་དང་། སྦྱིན་སྲེག་གི་མཆོད་ཁྲི་དང་། དེའི་ཡོ་བྱད་ཚང་མ་དང་། སྤྱན་བསྟར་བག་ལེབ་བཤམ་སའི་སྒྲོག་ཙེ་དང་། དེའི་ཡོ་བྱད་ཚང་མ་གཙང་མར་བྱས་པ་ཡིན།
2CH 29:19 གཞན་ཡང་རྒྱལ་པོ་ཨ་ཧ་ཟཱས་སྲིད་བསྐྱངས་ནས། དཀོན་མཆོག་ལ་ཉེས་པ་བསགས་པའི་དུས་སུ་གཡུགས་ནས་བཞག་པའི་སྣོད་ཆས་ཐམས་ཅད་ཀྱང་བདག་ཅག་གིས་བཤམས་ནས་དམ་པར་བྱས་ཏེ། གཟིགས་ཤིག ད་ལྟ་དེ་རྣམས་དཀོན་མཆོག་ཡ་ཝཱེའི་མཆོད་ཁྲིའི་དྲུང་དུ་ཡོད་ཅེས་ཞུས་པའོ། །
2CH 29:20 རྒྱལ་པོ་ཧི་ཟི་ཀི་ཡཱ་སྔ་མོར་ཡར་ལངས་ཏེ། རྒྱལ་སའི་འགོ་དཔོན་རྣམས་བསྡུས་ནས་ཡར་དཀོན་མཆོག་ཡ་ཝཱེའི་མཆོད་ཁང་དུ་སོང་སྟེ།
2CH 29:21 རྒྱལ་ཁམས་དང་གནས་དམ་པ་དང་ཡ་ཧུ་དཱ་པ་བཅས་ཀྱི་སྡིག་བཤགས་མཆོད་པའི་ཕྱིར་བ་གླང་བདུན་དང་། ལུག་ཐུག་བདུན། ལུ་གུ་བདུན། ར་ཐུག་བདུན་བཅས་ཁྲིད་འོངས་ནས། རྒྱལ་པོས་ཨ་རོན་བུ་རྒྱུད་ཀྱི་མཆོད་དཔོན་རྣམས་ལ་དེ་དག་དཀོན་མཆོག་ཡ་ཝཱེའི་མཆོད་ཁྲིའི་ཁར་འབུལ་བའི་བཀའ་གནང་བ་རེད།
2CH 29:22 དེ་དག་གིས་བ་གླང་དེ་རྣམས་བཤས་ནས། མཆོད་དཔོན་གྱིས་ཁྲག་ཚུར་བླངས་ཏེ་མཆོད་ཁྲིའི་ཁར་གཏོར། དེ་བཞིན་དུ་ལུག་ཐུག་རྣམས་བཤས་ཏེ་ཁྲག་ནི་མཆོད་ཁྲིའི་ཁར་གཏོར། ཡང་ལུ་གུ་རྣམས་ཀྱང་བཤས་ཏེ་ཁྲག་མཆོད་ཁྲི་ལ་གཏོར།
2CH 29:23 ཡང་སྡིག་བཤགས་མཆོད་པར་འབུལ་བའི་ར་ཐུག་རྣམས་རྒྱལ་པོ་དང་མི་ཚོགས་ཀྱི་མདུན་དུ་ཁྲིད་དེ། ཚང་མས་དེ་རྣམས་ཀྱི་ཐོག་ལ་ལག་པ་བཞག
2CH 29:24 དེ་ནས་མཆོད་དཔོན་རྣམས་ཀྱིས་ར་ཐུག་རྣམས་བཤས་ཏེ། ཡེས་ར་ཨེལ་པ་ཐམས་ཅད་ཀྱི་སྡིག་པ་བསལ་ཆེད་ར་ཐུག་གི་ཁྲག་མཆོད་ཁྲི་ལ་གཏོར། ཅིའི་ཕྱིར་ཞེ་ན། རྒྱལ་པོས་ཡེས་ར་ཨེལ་པ་ཐམས་ཅད་ཀྱི་དོན་དུ་སྦྱིན་སྲེག་དང་སྡིག་བཤགས་མཆོད་པ་འབུལ་དགོས་པའི་བཀའ་བསྒོས་ཡོད་དོ། །
2CH 29:25 ཡང་དཱ་བིད་དང་རྒྱལ་པོའི་མངོན་ཤེས་པ་གཱ་རྡུ་དང་ལུང་སྟོན་པ་ནཱ་ཐན་བཅས་ཀྱིས་བསྒོས་པ་བཞིན་དུ། རྒྱལ་པོས་ལེ་ཝི་པ་རྣམས་དཀོན་མཆོག་ཡ་ཝཱེའི་མཆོད་ཁང་ནང་དུ་སྦུག་ཆལ་དང་། རྒྱུད་མངས་དང་། པི་ཝང་བཅས་ལག་ཏུ་ཐོགས་ནས་ལངས་སུ་བཅུག་གོ །ཅི་ལ་ཞེ་ན། དཀོན་མཆོག་ཡ་ཝཱེས་ལུང་སྟོན་པ་རྣམས་བརྒྱུད་ནས་དེ་བཞིན་བྱེད་དུ་བཀའ་བསྩལ་བ་ཡིན།
2CH 29:26 དེ་ནས་ལེ་ཝི་པ་རྣམས་ཀྱིས་དཱ་བིད་ཀྱི་རོལ་ཆས་དང་། མཆོད་དཔོན་རྣམས་ཀྱིས་དུང་བཟུང་ནས་ལངས་བསྡད་པ་དང་།
2CH 29:27 ཧི་ཟི་ཀི་ཡཱས་མཆོད་ཁྲིའི་ཁར་སྦྱིན་སྲེག་འབུལ་བའི་བཀའ་བསྩལ་ཞིང་སྦྱིན་སྲེག་འབུལ་བར་བརྩམས་པ་དང་། དུང་དང་ཡེས་ར་ཨེལ་གྱི་རྒྱལ་པོ་དཱ་བིད་ཀྱི་རོལ་ཆས་དང་བཅས་སུ་དཀོན་མཆོག་ཡ་ཝཱེ་ལ་བསྟོད་དབྱངས་ཕུལ་ཏོ། །
2CH 29:28 མི་ཚོགས་ཡོངས་ཀྱིས་ཀྱང་ཕྱག་བཙལ་ཏེ། སྦྱིན་སྲེག་ཕུལ་ཚར་བའི་བར་དུ་མགུར་ལེན་མཁན་དག་གིས་བསྟོད་དབྱངས་བླངས། དུང་འབུད་མཁན་དག་གིས་དུང་བུས།
2CH 29:29 མཆོད་པ་ཕུལ་ནས་རྫོགས་པ་ན། རྒྱལ་པོ་དང་ཁོང་དང་མཉམ་དུ་ཡོད་པ་ཐམས་ཅད་ཀྱིས་ཕྱག་བཙལ།
2CH 29:30 དེ་ནས་རྒྱལ་པོ་ཧི་ཟི་ཀི་ཡཱ་དང་འགོ་དཔོན་རྣམས་ཀྱིས་ལེ་ཝི་པ་རྣམས་ལ། དཱ་བིད་དང་མངོན་ཤེས་པ་ཨ་སབ་ཀྱི་མགུར་མ་བླངས་ནས་དཀོན་མཆོག་ཡ་ཝཱེ་ལ་བསྟོད་པ་འབུལ་བར་བསྒོས་པ་དང་། དེ་དག་གིས་དགའ་དགའ་སྤྲོ་སྤྲོའི་ངང་བསྟོད་བསྔགས་བརྗོད་ནས་ཕྱག་བཙལ་ཏོ། །
2CH 29:31 ཡང་ཧི་ཟི་ཀི་ཡཱས་འདི་ལྟར། ཁྱོད་རྣམས་ཀྱིས་རང་ཉིད་དཀོན་མཆོག་ཡ་ཝཱེའི་ཕྱིར་དུ་དམ་པར་བྱས་པ་ཡིན་པས། ཉེ་བར་ཤོག་དང་། མཆོད་པ་དང་གཏང་རག་གི་མཆོད་པ་རྣམས་དཀོན་མཆོག་ཡ་ཝཱེའི་མཆོད་ཁང་ནང་དུ་ཁྱེར་ཤོག་ཅེས་བསྒོས་པ་ལ། མི་ཚོགས་ཀྱིས་མཆོད་པ་དང་གཏང་རག་གི་མཆོད་པ་ཁྱེར་འོངས་པ་དང་། སེམས་མོས་པ་ཐམས་ཅད་ཀྱིས་སྦྱིན་སྲེག་གི་མཆོད་པ་ཕུལ་ཏོ། །
2CH 29:32 མི་ཚོགས་ཀྱིས་ཕུལ་བའི་སྦྱིན་སྲེག་གི་མཆོད་པའི་གྲངས་ནི་འདི་ལྟར་ཏེ། བ་གླང་བདུན་ཅུ་དང་ལུག་ཐུག་བརྒྱ་དང་། ལུ་གུ་ཉིས་བརྒྱ་བཅས་ཡིན་ལ། དེ་ཐམས་ཅད་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་ཕུལ་བའོ། །
2CH 29:33 ཡང་བ་གླང་དྲུག་བརྒྱ་དང་ར་ལུག་སུམ་སྟོང་ཡང་དམ་པར་བྱས་སོ། །
2CH 29:34 ཡིན་ཡང་མཆོད་དཔོན་ཤིན་ཏུ་ཉུང་བས་མཆོད་བྱ་ཐམས་ཅད་ཀྱི་པགས་པ་བཤུ་མ་ནུས་པ་དང་། དེ་དག་གི་སྤུན་ལེ་ཝི་པ་རྣམས་ཀྱིས་ལས་ཀ་འགྲུབ་པའི་བར་དུ་རོགས་བྱས། དེའི་བར་དུ་མཆོད་དཔོན་གཞན་རྣམས་ཀྱིས་རང་ཉིད་དམ་པར་བྱས། གང་ལ་ཞེ་ན། དམ་པར་བྱེད་དུ་མཆོད་དཔོན་ལས་ལེ་ཝི་པའི་སེམས་དྲང་པོ་ཡིན་ནོ། །
2CH 29:35 དེར་སྦྱིན་སྲེག་གི་མཆོད་པ་དང་། ཞི་བདེའི་མཆོད་པའི་ཚིལ་དང་། སྦྱིན་སྲེག་དང་མཉམ་དུ་ཕུལ་བའི་སྐྱེམས་མཆོད་ཀྱང་རབ་ཏུ་མང་པོ་ཡོད་དེ། དེ་ལྟར་དཀོན་མཆོག་ཡ་ཝཱེའི་མཆོད་ཁང་གི་ཞབས་ཏོག་གི་གྲལ་ཡང་བསྐྱར་ལེགས་པར་བསྒྲིགས།
2CH 29:36 ཡང་དཀོན་མཆོག་གིས་མི་རྣམས་ཀྱི་དོན་དུ་གྲ་སྒྲིག་མཛད་ནས་བྱ་བ་དེ་མྱུར་དུ་གྲུབ་པས། ཧི་ཟི་ཀི་ཡཱ་དང་མི་ཚོགས་ཐམས་ཅད་དགའ་བར་གྱུར་ཏོ། །
2CH 30:1 དེ་ནས་ཧི་ཟི་ཀི་ཡཱ་ཡིས་ཡེས་ར་ཨེལ་དང་ཡ་ཧུ་དཱའི་ཡུལ་ཀུན་ཏུ་མི་མངགས་ཤིང་། ཨེ་ཕཱར་ཡིམ་དང་མཱ་ན་ཤེ་པ་དག་ལ་འཕྲིན་ཡིག་སྤྲིངས་ཏེ། དེ་རྣམས་ཡེ་རུ་སཱ་ལེམ་གྱི་དཀོན་མཆོག་ཡ་ཝཱེའི་མཆོད་ཁང་དུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱིར་དུ་པེ་སག་དུས་ཆེན་བསྲུང་དུ་འོང་དགོས་པའི་བཀའ་བསྒོས་པ་རེད།
2CH 30:2 དེའི་རྒྱུ་མཚན་ནི། རྒྱལ་པོ་དང་འགོ་དཔོན་རྣམས་དང་། ཡེ་རུ་སཱ་ལེམ་གྱི་མི་ཚོགས་ཡོངས་ཀྱིས་ཟླ་གཉིས་པར་པེ་སག་དུས་ཆེན་བསྲུང་བར་གྲོས་བྱས་སོ། །
2CH 30:3 ཡིན་ཡང་སྐབས་དེར་ཁོ་ཚོས་པེ་སག་དུས་ཆེན་སྲུང་མ་ཐུབ་སྟེ། རྒྱུ་མཚན་རང་ཉིད་དམ་པར་བཟོས་པའི་མཆོད་དཔོན་མི་འདང་བར་མ་ཟད། མི་རྣམས་ཀྱང་ཡེ་རུ་སཱ་ལེམ་དུ་མ་འཛོམས་པས་སོ། །
2CH 30:4 རྒྱལ་པོ་དང་མི་ཚོགས་ཡོངས་ཀྱིས་འཆར་གཞི་དེ་ཤིན་ཏུ་ལེགས་པར་འདོད་དེ།
2CH 30:5 ཁོ་ཚོས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱིར་པེ་སག་གི་དུས་ཆེན་བསྲུང་བར་ཡེ་རུ་སཱ་ལེམ་དུ་འོང་བ་ལ། པེར་ཤ་བཱ་ནས་དཱན་གྱི་བར་དུ་ཡེས་ར་ཨེལ་ཡོངས་ལ་འཕྲིན་བསྐུར་ནས་བཀའ་བབས་པ་རེད། གང་ལ་ཞེ་ན། དེ་དག་གིས་གསུང་རབ་ནང་བཀོད་པ་བཞིན་དུ་པེ་སག་དུས་ཆེན་སྲུང་མཁན་ཉུང་བས་སོ། །
2CH 30:6 ཡང་བང་ཆེན་རྣམས་ཀྱིས་རྒྱལ་པོ་དང་འགོ་དཔོན་རྣམས་ཀྱི་འཕྲིན་ཡིག་ཁྱེར་ནས། རྒྱལ་པོའི་བཀའ་བཞིན་དུ་ཡེས་ར་ཨེལ་དང་ཡ་ཧུ་དཱའི་ཡུལ་ཀུན་ཏུ་ཕྱིན་པ་དང་། འཕྲིན་ཡིག་ནང་དུ་འདི་ལྟར། ཀྱེ་ཡེས་ར་ཨེལ་པ་རྣམས། ཁྱོད་ཅག་ཨབ་ར་ཧམ་དང་། ཨི་སཱག་དང་། ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱོགས་སུ་ཕྱིར་འཁོར་ཅིག དེ་ནས་ཡ་ཝཱེ་ཁོང་ཉིད་ཨ་སུར་རྒྱལ་པོ་རྣམས་ཀྱི་ལག་ནས་ཐར་བའི་ལྷག་ལུས་རྣམས་ཀྱི་ཕྱོགས་སུ་ཕྱིར་འབྱོན་པར་འགྱུར།
2CH 30:7 རང་གི་ཕ་མེས་དང་སྤུན་རྣམས་བཞིན་དུ་མ་བྱེད་ཅིག ཁོ་ཚོ་རང་གི་ཕ་མེས་རྣམས་ཀྱི་དཀོན་མཆོག་ཡ་ཝཱེའི་བཀའ་ལ་འགལ་བ་དང་། ཁྱོད་ཚོས་མཐོང་བ་ལྟར། དེའི་རྐྱེན་གྱིས་ཡ་ཝཱེས་དེ་དག་འཇིགས་སུ་རུང་བའི་གནས་སུ་བྱས་སོ། །
2CH 30:8 དེ་བས་ན་ཁྱོད་ཅག་གིས་རང་གི་ཕ་མེས་ལྟར་གཉའ་རེངས་མི་བྱེད་པར། དཀོན་མཆོག་ཡ་ཝཱེ་ལ་བསྟུན་ནས་ཁོང་གིས་དུས་གཏན་དུ་དམ་པར་མཛད་པའི་གནས་དམ་པ་རུ་ཤོག་ཅིག ཁོང་གི་ཐུགས་ཁྲོ་ཆེན་པོ་ཁྱོད་རྣམས་དང་འབྲལ་བའི་ཕྱིར་དུ། དཀོན་མཆོག་ཡ་ཝཱེ་ལ་ཞབས་ཕྱི་སྒྲུབས་ཤིག
2CH 30:9 གལ་ཏེ་ཁྱོད་ཅག་དཀོན་མཆོག་ཡ་ཝཱེའི་ཕྱོགས་སུ་འཁོར་ན། ཁྱོད་ཅག་གི་སྤུན་དང་བུ་བུ་མོ་རྣམས་བྲན་ཏུ་བཀོལ་མཁན་རྣམས་ཀྱི་མདུན་དུ་སྙིང་རྗེ་གནང་ཞིང་། ཡུལ་འདིར་ལོག་སྟེ་སླེབ་པར་འགྱུར། ཁྱོད་ཅག་གི་དཀོན་མཆོག་ཡ་ཝཱེ་ནི་ཐུགས་རྗེ་ཅན་དང་སྙིང་རྗེ་ཆེན་པོ་མངའ་བ་ཡིན་པས། གལ་ཏེ་ཁྱོད་ཅག་ཁོང་གི་ཕྱོགས་སུ་ལོག་འོངས་ན། ཁོང་གིས་ཀྱང་ཁྱོད་ཅག་སྣང་མེད་དུ་བསྐྱུར་མི་སྲིད་ཅེས་བྲིས་ཡོད་དོ། །
2CH 30:10 བང་ཆེན་རྣམས་ཨེ་ཕཱར་ཡིམ་དང་མཱ་ན་ཤེ་ཡུལ་ནས་ཟེ་བུ་ལུན་གྱི་བར་དུ་གྲོང་ཁྱེར་ནས་གྲོང་ཁྱེར་དུ་འཁོར་ནའང་། ཡུལ་དེའི་མི་རྣམས་ཀྱིས་ཁོ་ཚོ་ཁྱད་དུ་བསད་ནས་འཕྱས་སོ། །
2CH 30:11 ཡིན་ཡང་ཨ་ཤེར་དང་མཱ་ན་ཤེ་དང་ཟེ་བུ་ལུན་བཅས་ནས་ལ་ལས་ཁེངས་སྐྱུང་བྱས་ཏེ་ཡེ་རུ་སཱ་ལེམ་དུ་འོངས་སོ། །
2CH 30:12 དེ་དག་གིས་སེམས་གཏིང་ནས་རྒྱལ་པོ་དང་འགོ་དཔོན་རྣམས་ཀྱིས་དཀོན་མཆོག་ཡ་ཝཱེའི་བཀའ་བཞིན་བསྒོས་པ་ནང་ལྟར་བྱེད་པའི་ཕྱིར། དཀོན་མཆོག་གིས་ཡ་ཧུ་དཱའི་སྟེང་དུ་ཕྱག་བཞག་པ་ཡིན།
2CH 30:13 དེ་ནས་ཟླ་གཉིས་པར་སྐྱུར་མེད་བག་ལེབ་ཀྱི་དུས་ཆེན་བསྲུང་ཕྱིར། ཡེ་རུ་སཱ་ལེམ་དུ་འཛོམས་པའི་མི་ཚོགས་ནི་ཤིན་ཏུ་མང་པོར་གྱུར།
2CH 30:14 ཡང་དེ་རྣམས་ཡར་ལངས་ཏེ། ཡེ་རུ་སཱ་ལེམ་དུ་ཡོད་པའི་མཆོད་ཁྲི་དང་བསང་ཁྲི་ཐམས་ཅད་བཤིགས་ཏེ་ཀིད་རོན་གྲོག་མོ་ལ་གཡུགས།
2CH 30:15 ཟླ་གཉིས་པའི་ཚེས་བཅུ་བཞི་ཉིན་དེ་རྣམས་ཀྱིས་པེ་སག་དུས་ཆེན་གྱི་ཆེད་དུ་ལུ་གུ་བཤས་པ་དང་། མཆོད་དཔོན་དང་ལེ་ཝི་པ་རྣམས་ངོ་ཚ་ཞིང་རང་ཉིད་དམ་པར་བྱས་ཏེ། དཀོན་མཆོག་ཡ་ཝཱེའི་མཆོད་ཁང་དུ་སྦྱིན་སྲེག་གི་མཆོད་པ་ཕུལ་བ་རེད།
2CH 30:16 ཁོ་ཚོས་དཀོན་མཆོག་གི་སྐྱེས་བུ་མོ་ཤེའི་བཀའ་ཁྲིམས་བཞིན་དུ། རྒྱུན་སྲོལ་ལྟར་རང་རང་གི་གནས་སུ་ལངས་ཏེ། མཆོད་དཔོན་རྣམས་ཀྱིས་ལེ་ཝི་པའི་ལག་ནས་ཁྲག་བླངས་ཏེ་མཆོད་ཁྲིའི་ཁར་གཏོར་ཏོ། །
2CH 30:17 ཅིའི་ཕྱིར་ཞེ་ན། མི་ཚོགས་ཀྱི་ཁྲོད་དུ་དམ་པར་མ་བྱས་པ་མང་པོ་ཡོད་པས། དཀོན་མཆོག་ཡ་ཝཱེའི་ཕྱིར་དམ་པར་མ་བྱས་པ་ཐམས་ཅད་ཀྱི་ཚབ་ཏུ་ལེ་ཝི་པ་རྣམས་ཀྱིས་པེ་སག་དུས་ཆེན་གྱི་ལུ་གུ་བཤས་པ་རེད།
2CH 30:18 གང་ལ་ཞེ་ན། ཨེ་ཕཱར་ཡིམ་དང་མཱ་ན་ཤེ་དང་། ཡེས་སི་ཀཱར་དང་། ཟེ་བུ་ལུན་བཅས་ནས་འོངས་པའི་མི་མང་པོ་ཞིག་གིས་རང་ཉིད་གཙང་མར་མ་བྱས་པར་པེ་སག་གི་ལུ་གུ་ཟོས་པ་དང་། བྱ་སྤྱོད་དེ་ནི་བྲིས་པའི་བཀའ་དང་མ་མཐུན་པར། ཧི་ཟི་ཀི་ཡཱས་དེ་དག་གི་དོན་དུ་གསོལ་བ་བཏབ་པ་སྟེ། ཀྱེ་དཀོན་མཆོག་ཡ་ཝཱེ་བཟང་པོ་ལགས་ཀྱིས་གུ་ཡངས་གཏོང་རོགས།
2CH 30:19 བློ་གཅིག་སེམས་གཅིག་གིས་ཕ་མེས་རྣམས་ཀྱི་དཀོན་མཆོག་ཡ་ཝཱེ་འཚོལ་མཁན་ཐམས་ཅད་ནི། གནས་དམ་པའི་གཙང་སྦྲ་བཞིན་དུ་གཙང་མར་གྱུར་མེད་ནའང་དཀོན་མཆོག་ཡ་ཝཱེ་ཁྱེད་ཀྱིས་གུ་ཡངས་གནང་བར་མཛོད་ཅེས་ཞུས་པ་ལ།
2CH 30:20 དཀོན་མཆོག་ཡ་ཝཱེས་ཧི་ཟི་ཀི་ཡཱ་ལ་གསན་ནས་མི་རྣམས་ལ་གུ་ཡངས་གནང་བའོ། །
2CH 30:21 ཡང་ཡེ་རུ་སཱ་ལེམ་དུ་འཛོམས་པའི་ཡེས་ར་ཨེལ་པ་རྣམས་རབ་ཏུ་དགའ་ཞིང་ཉིན་བདུན་ལ་སྐྱུར་མེད་བག་ལེབ་ཀྱི་དུས་ཆེན་བཏང་སྟེ། ལེ་ཝི་པ་དང་མཆོད་དཔོན་རྣམས་ཀྱིས་ཉིན་རེར་སྐད་གདངས་ཆེན་པོའི་རོལ་མོ་ཡིས་དཀོན་མཆོག་ཡ་ཝཱེ་ལ་བསྟོད་བསྔགས་ཕུལ།
2CH 30:22 ཡང་དཀོན་མཆོག་ཡ་ཝཱེ་ལ་ཞབས་ཕྱི་སྒྲུབ་པར་བྱང་བའི་ལེ་ཝི་པ་རྣམས་ལ་ཧི་ཟི་ཀི་ཡཱས་སེམས་ཤུགས་བསྐྱེད་པའི་གཏམ་སྨྲས་ཏེ། མི་རྣམས་ཀྱིས་ཉིན་བདུན་ལ་སྟོན་མོར་རོལ་ཞིང་། ཞི་བདེའི་མཆོད་པ་ཕུལ་བ་དང་། རང་གི་ཕ་མེས་ཀྱི་དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་དོ། །
2CH 30:23 དེ་ནས་མི་ཚོགས་ཡོངས་ཀྱིས་ཡང་ཉིན་བདུན་ལ་དུས་ཆེན་བསྲུང་བར་གྲོས་བྱས་ནས། ཡང་ཉིན་བདུན་ལ་དགའ་དགའ་སྤྲོ་སྤྲོའི་ངང་དུས་ཆེན་ལ་རོལ་བ་རེད།
2CH 30:24 ཡ་ཧུ་དཱའི་རྒྱལ་པོ་ཧི་ཟི་ཀི་ཡཱས་མི་ཚོགས་ལ་བ་གླང་ཆིག་སྟོང་དང་ལུག་བདུན་སྟོང་སྤྲད་པ་དང་། འགོ་དཔོན་རྣམས་ཀྱིས་ཀྱང་མི་ཚོགས་ལ་བ་གླང་ཆིག་སྟོང་དང་ལུག་ཆིག་ཁྲི་སྤྲད་པར་མ་ཟད། མཆོད་དཔོན་མང་པོ་ཞིག་གིས་རང་ཉིད་དམ་པར་བྱས་སོ། །
2CH 30:25 དེ་ནས་ཡ་ཧུ་དཱའི་མི་ཚོགས་ཀུན་དང་། མཆོད་དཔོན་དང་ལེ་ཝི་པ་རྣམས། ཡེས་ར་ཨེལ་ནས་འོངས་པའི་མི་ཚོགས་ཡོངས། ཡེས་ར་ཨེལ་ཡུལ་དུ་གཞིས་ཕབ་པའི་བྱེས་པ་རྣམས། ཡ་ཧུ་དཱ་རུ་གཞིས་ཕབ་པའི་བྱེས་པ་རྣམས་བཅས་ཐམས་ཅད་ཤིན་ཏུ་དགའ་བར་གྱུར་ཏོ། །
2CH 30:26 དེ་ལྟར་ཡེ་རུ་སཱ་ལེམ་དུ་བདེ་སྐྱིད་ཆེན་པོ་ཞིག་བྱུང་བ་དང་། ཡེས་ར་ཨེལ་གྱི་རྒྱལ་པོ་དཱ་བིད་ཀྱི་སྲས་སོ་ལོ་མོན་གྱི་དུས་ཚུན་ཆད་དུ་ཡེ་རུ་སཱ་ལེམ་ནས་དེ་འདྲ་བ་ཞིག་བྱུང་མ་མྱོང་ངོ་། །
2CH 30:27 སྐབས་དེར་ལེ་ཝི་ཚོ་པའི་མཆོད་དཔོན་རྣམས་ཡར་ལངས་ནས་མི་ཚོགས་ལ་བྱིན་རླབས་མཛད་ཅིང་། དེ་དག་གི་སྐད་ལ་གསན་པ་དང་དེ་དག་གི་གསོལ་འདེབས་ནི་ནམ་མཁའི་དཀོན་མཆོག་གི་བཞུགས་གནས་དམ་པ་རུ་སླེབས་སོ། །
2CH 31:1 དོན་དེ་ཐམས་ཅད་རྫོགས་པ་དང་། དེར་ཚོགས་པའི་ཡེས་ར་ཨེལ་པ་ཐམས་ཅད་ཡ་ཧུ་དཱའི་གྲོང་ཁྱེར་སོ་སོར་ཕྱིན་ཏེ། ལྷ་རྟེན་རྣམས་བཅག་ནས་ཨ་ཤེ་རཱ་རྣམས་བཅད་པ་དང་། ཡང་ཡ་ཧུ་དཱ་དང་པེན་ཡཱ་མེན་དང་། ཨེ་ཕཱར་ཡིམ་དང་། མཱ་ན་ཤེའི་བཅས་ཡུལ་ཀུན་ཏུ་ཡོད་པའི་མཐོ་གླིང་དང་། མཆོད་ཁྲི་ཐམས་ཅད་ཡོངས་སུ་བཤིགས། དེ་ནས་ཡེས་ར་ཨེལ་གྱི་མི་ཐམས་ཅད་རང་རང་གི་གྲོང་ཁྱེར་དང་རང་གནས་སུ་ལོག་སོང་།
2CH 31:2 ཡང་ཧི་ཟི་ཀི་ཡཱས་མཆོད་དཔོན་དང་ལེ་ཝི་པ་རྣམས་རང་རང་གི་ལས་རེས་བཞིན་དུ་ཞབས་ཏོག་བསྒྲུབ་པར་བསྐོས་ཏེ། མཆོད་དཔོན་དང་ལེ་ཝི་པ་རྣམས་ཀྱིས་རང་རང་གི་ལས་འགན་བཞིན་སྦྱིན་སྲེག་གི་མཆོད་པ་དང་། ཞི་བདེའི་མཆོད་པ་འབུལ་བ་དང་། ཞབས་ཏོག་བསྒྲུབ་པ་དང་། གཏང་རག་དང་བསྟོད་དབྱངས་འབུལ་བའི་ཕྱིར། དཀོན་མཆོག་ཡ་ཝཱེའི་བཞུགས་གནས་ཀྱི་སྒོ་སོ་སོར་བཞག་སྟེ།
2CH 31:3 ཡང་དཀོན་མཆོག་ཡ་ཝཱེའི་བཀའ་ཁྲིམས་ནང་བཀོད་པ་བཞིན་དུ། རྒྱལ་པོས་རང་གི་རྒྱུ་ནོར་ལས་ནངས་དགོང་གཉིས་ཀའི་སྦྱིན་སྲེག་གི་མཆོད་པ་དང་། ངལ་གསོ་བའི་ཉིན་མོ། ཚེས་གཅིག དུས་ཆེན་བཅས་ཀྱི་སྦྱིན་སྲེག་གི་ཕྱིར་འབུལ་བྱའི་སྐལ་གཏན་ལ་ཕབ་ཅིང་།
2CH 31:4 ཡང་རྒྱལ་པོས་ཡེ་རུ་སཱ་ལེམ་དུ་གནས་པའི་མི་ཀུན་ལ། མཆོད་དཔོན་དང་ལེ་ཝི་པ་རྣམས་ཀྱིས་བསམ་པ་རྩེ་གཅིག་གིས་དཀོན་མཆོག་ཡ་ཝཱེའི་བཀའ་ཁྲིམས་ལག་ལེན་དུ་འདེབས་པའི་ཕྱིར། དེ་དག་ལ་འཐོབ་འོས་པའི་སྐལ་དེ་སྟེར་བར་བསྒོས་སོ། །
2CH 31:5 བཀའ་དེ་བབས་མ་ཐག་ཏུ། ཡེས་ར་ཨེལ་པ་རྣམས་ཀྱིས་འབྲུ་རིགས་ཀྱི་ཐོག་ཕུད་དང་། རྒུན་ཆང་གསར་པ་དང་། སྣུམ་དང་། སྦྲང་རྩི་དང་། ཞིང་གི་ལོ་ཏོག་ཐམས་ཅད་ཀྱི་ཕུད་མང་དུ་དྲངས་ཏེ། ཡང་དངོས་པོ་ཐམས་ཅད་ཀྱི་བཅུ་ཆའི་གཅིག་འབོར་ཆེན་ཕུལ་བའོ། །
2CH 31:6 ཡ་ཧུ་དཱའི་གྲོང་ཁྱེར་རྣམས་སུ་གནས་པའི་ཡེས་ར་ཨེལ་པ་དང་ཡ་ཧུ་དཱ་པ་རྣམས་ཀྱིས་ཀྱང་བ་གླང་དང་ར་ལུག་གི་བཅུ་ཆའི་གཅིག་དང་། རང་གི་དཀོན་མཆོག་ཡ་ཝཱེ་ལ་བསྔོས་པའི་རྫས་དམ་པ་རྣམས་ཀྱི་བཅུ་ཆའི་གཅིག་ཕུལ་ནས་མང་པོ་སྤུངས།
2CH 31:7 དེ་དག་ཟླ་གསུམ་པ་ནས་སྤུང་བར་ཚུགས་ནས། ཟླ་བདུན་པར་ད་གཟོད་མཇུག་རྫོགས།
2CH 31:8 ཧི་ཟི་ཀི་ཡཱ་དང་འགོ་དཔོན་རྣམས་འོངས་ཏེ་ཕུང་པོ་དེ་རྣམས་མཐོང་ནས་དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་པ་དང་། ཡང་ཁོང་གི་འབངས་མི་ཡེས་ར་ཨེལ་ལ་བྱིན་གྱིས་བརླབས་སོ། །
2CH 31:9 དེ་ནས་ཧི་ཟི་ཀི་ཡཱས་མཆོད་དཔོན་དང་ལེ་ཝི་པ་ལ་ཕུང་པོ་དེ་རྣམས་ཀྱི་སྐོར་དྲིས་པ་དང་།
2CH 31:10 ཟཱ་ཏོག་ཁྱིམ་རྒྱུད་ཀྱི་མཆོད་དཔོན་ཆེན་པོ་ཨ་ཟར་ཡཱས་ལན་དུ། མི་རྣམས་ཀྱིས་དཀོན་མཆོག་ཡ་ཝཱེའི་མཆོད་ཁང་དུ་དངོས་པོ་མང་པོ་ཁྱེར་འོངས་ཏེ། ངེད་རྣམས་ལ་ཚིམ་པར་ཟ་རྒྱུ་བྱུང་བར་མ་ཟད། ལྷག་མ་ཡང་མང་པོ་ལུས་ཡོད་དེ། ཅི་ལ་ཞེ་ན། དཀོན་མཆོག་ཡ་ཝཱེས་ཉིད་ཀྱི་འབངས་མི་ལ་བྱིན་གྱིས་བརླབས་པས། ཕུང་པོ་ཆེན་པོ་འདི་ནི་ལྷག་ནས་ལུས་པ་ཡིན་ཞེས་ཞུས་པ་དང་།
2CH 31:11 ཧི་ཟི་ཀི་ཡཱས་དཀོན་མཆོག་ཡ་ཝཱེའི་མཆོད་ཁང་དུ་བང་མཛོད་གྲ་སྒྲིག་བྱེད་པར་བསྒོས་པ་ལ། དེ་དག་གིས་དེ་ལྟར་གྲ་སྒྲིག་བྱས།
2CH 31:12 ཡང་དེ་དག་གིས་ལྷག་བསམ་རྣམ་དག་གིས་འབུལ་བ་དང་དངོས་པོ་སྣ་ཚོགས་ཀྱི་བཅུ་ཆའི་གཅིག་དང་། བསྔོས་པའི་རྫས་དམ་པ་བཅས་ཐམས་ཅད་བང་མཛོད་དུ་བསྐྱལ་ཏེ། དེའི་ཕྱག་མཛོད་དུ་ལེ་ཝི་པ་ཀོ་ནན་ཡཱ་དང་། ལག་གཡོག་ཏུ་དེའི་སྤུན་ཤིམ་ཨི་གཉིས་ཡོད་དོ། །
2CH 31:13 ཡང་ཡེ་ཧི་ཨེལ་དང་། ཨ་ཟས་ཡཱ། ནཱ་ཧད། ཨ་སཱ་ཧེལ། ཡེ་རི་མོད། ཡོ་ཟཱ་བད། ཨེ་ལི་ཨེལ། ཨིས་མག་ཡཱ། མ་ཧད། པེ་ནཱ་ཡ་བཅས་ནི། རྒྱལ་པོ་ཧི་ཟི་ཀི་ཡཱ་དང་། དཀོན་མཆོག་གི་མཆོད་ཁང་གི་འགོ་དཔོན་ཨ་ཟར་ཡཱའི་བཀའ་བསྩལ་པ་བཞིན་དུ། ཀོ་ནན་ཡཱ་དང་དེའི་སྤུན་ཤིམ་ཨི་ཡི་ལག་འོག་ཏུ་ལྟ་སྐུལ་གྱི་ལས་བྱེད་མཁན་ཡིན།
2CH 31:14 ཤར་སྒོ་སྲུང་མཁན་ལེ་ཝི་པ་ཡིམ་ནཱ་ཡི་བུ་ཀོ་རེད་བྱ་བ་དེས་དཀོན་མཆོག་ལ་ཡིད་མོས་ངང་ཕུལ་བའི་ཕྱག་རྟེན་ལ་བདག་གཉེར་བྱེད་པ་དང་། དཀོན་མཆོག་ཡ་ཝཱེ་ལ་ཕུལ་བའི་མཆོད་པ་དང་རྫས་དམ་མཆོག་རྣམས་བགོ་བཤའ་རྒྱག་པ་ཡིན་ནོ། །
2CH 31:15 མཆོད་དཔོན་རྣམས་ཀྱི་གྲོང་ཁྱེར་སོ་སོར་དེའི་ལག་འོག་ཏུ་ཨེ་དེན་དང་། མིན་ཡ་མིན་དང་། ཡེ་ཤུ་ཨ་དང་། ཤེ་མ་ཡཱ་དང་། ཨ་མར་ཡཱ་དང་། ཤེ་ཀན་ཡཱ་བཅས་ཡོད་ལ། རང་རང་གི་སྤུན་ཆེ་ཆུང་ཚང་མ་ལ་ལས་རེས་བཞིན་དུ་ཟ་སྐལ་སྟེར་བ་ཡིན།
2CH 31:16 གཞན་ཡང་ཁྱིམ་ཐོ་བཞིན་དུ་ལོ་གསུམ་ལོན་པ་དང་དེའི་ཡན་གྱི་སྐྱེས་པ་ནི་སུ་ཡིན་ཡང་། ཉིན་རེར་ལས་རེས་བཞིན་དུ་དཀོན་མཆོག་ཡ་ཝཱེའི་མཆོད་ཁང་ལ་འོངས་ནས་ལས་འགན་སྒྲུབ་པ་ཐམས་ཅད་ལའང་བགོ་བཤའ་བརྒྱབ་པ་ཡིན།
2CH 31:17 ཡང་ཁྱིམ་རྒྱུད་བཞིན་དུ་ཁྱིམ་ཐོ་ནང་དུ་བཀོད་ཡོད་པའི་མཆོད་དཔོན་རྣམས་ལ་བགོ་བཤའ་བརྒྱབ་པ་དང་། ལས་རེས་དང་ལས་འགན་བཞིན་དུ་ལོ་ཉི་ཤུ་ལོན་པ་དང་དེའི་ཡན་གྱི་ལེ་ཝི་པ་རྣམས་ལའང་བགོས་པའོ། །
2CH 31:18 ཡང་དེ་དག་གིས་བསམ་པ་རྩེ་གཅིག་གིས་རང་ཉིད་དམ་པར་བྱས་པས། ཁྱིམ་ཐོ་བཞིན་དུ་དེ་དག་ཐམས་ཅད་ཀྱི་ཕྲུ་གུ་དང་། ཆུང་མ་དང་། བུ་དང་བུ་མོ་བཅས་ལ་བགོས་པའོ། །
2CH 31:19 ཡང་གྲོང་ཁྱེར་སོ་སོའི་མཐའ་འཁོར་དུ་གནས་པའི་ཨ་རོན་གྱི་བུ་རྒྱུད་མཆོད་དཔོན་རྣམས་ལ་གྲོང་ཁྱེར་སོ་སོར་མིང་བཏོན་ནས་བསྐོས་པའི་མི་ཡོད་དེ། མཆོད་དཔོན་ཁྲོད་ཀྱི་སྐྱེས་པ་ཐམས་ཅད་དང་། ཁྱིམ་ཐོ་རུ་བཀོད་ཡོད་པའི་ལེ་ཝི་པ་ཐམས་ཅད་ལ་འཐོབ་འོས་པའི་སྐལ་བགོས་པ་ཡིན་ནོ། །
2CH 31:20 ཧི་ཟི་ཀི་ཡཱས་ཡ་ཧུ་དཱ་ཐམས་ཅད་དུ་དེ་བཞིན་བྱས་ཏེ། རང་གི་དཀོན་མཆོག་ཡ་ཝཱེའི་དྲུང་དུ་བཟང་པོ་དང་ལེགས་པོ། དྲང་པོ་བཅས་གང་ཡིན་པ་དེ་སྤྱད་ཅིང་།
2CH 31:21 དཀོན་མཆོག་གི་མཆོད་ཁང་གི་ཞབས་ཏོག་སྒྲུབ་པ་དང་། ཡང་ན་བཀའ་ཁྲིམས་དང་། བཀའ་རྒྱ་སྲུང་བ་སོགས་གང་ཡིན་ཡང་ཁོང་གིས་རང་གི་དཀོན་མཆོག་བཙལ་ཞིང་། ཁོང་གིས་སེམས་ཧྲིལ་པོས་བྱས་པས་དོན་ཐམས་ཅད་ལྷུན་གྱིས་གྲུབ་པའོ། །
2CH 32:1 ཡང་ཧི་ཟི་ཀི་ཡཱས་བློ་སེམས་དྲང་པོའི་ལས་དེ་དག་བྱས་པའི་མཐར། ཨ་སུར་གྱི་རྒྱལ་པོ་སེན་ན་ཧེ་རིབ་འོངས་ནས་ཡ་ཧུ་དཱའི་ནང་དུ་འཛུལ་ཏེ། གྲོང་ཁྱེར་བཙན་པོ་རྣམས་ཀྱི་མཐའ་འཁོར་དུ་དམག་སྒར་ཕབ་ནས་དེ་དག་ལེན་འདོད་པ་རེད།
2CH 32:2 ཧི་ཟི་ཀི་ཡཱས་སེན་ན་ཧེ་རིབ་དངོས་གནས་ཡེ་རུ་སཱ་ལེམ་ལ་འཐབ་ཏུ་འོང་འདོད་པ་མཐོང་ནས།
2CH 32:3 འགོ་དཔོན་དང་དཔའ་བོ་རྣམས་ལ་གྲོས་བཏབ་ནས། རྒྱལ་སའི་ཕྱི་རོལ་ཏུ་ཡོད་པའི་ཆུ་མིག་རྣམས་འགོག་རྒྱུ་བྱས་པ་ལ། དེ་དག་ཐམས་ཅད་ཀྱིས་ཁོང་ལ་རོགས་བྱས་པ་སྟེ།
2CH 32:4 མི་མང་པོ་འཛོམས་ཏེ་ཆུ་མིག་དང་ཡུལ་དེར་བཞུར་བའི་ཆུ་ཕྲན་ཡོད་ཚད་བཀག་སྟེ་ན་རེ། ཨ་སུར་གྱི་རྒྱལ་པོར་ཆུ་མོད་པོ་རྙེད་དུ་འཇུག་དོན་ཅི་ཡོད་ཅེས་སྨྲས་སོ། །
2CH 32:5 ཡང་ཧི་ཟི་ཀི་ཡཱས་བརྩོན་པ་བསྐྱེད་དེ། ལྕགས་རི་ཞིག་རལ་དུ་སོང་བ་ཐམས་ཅད་ཞིག་གསོ་མཛད་ཅིང་། ལྕགས་རིའི་སྟེང་དུ་ལྕོག་མཁར་རྣམས་བཞེངས། མཁར་དེའི་ཕྱི་རོལ་ཏུ་ཡང་མཁར་ཞིག་བརྩིགས་ཏེ། དཱ་བིད་གྲོང་ཁྱེར་གྱི་འཛིངས་རགས་ཀྱང་ཞིག་གསོ་མཛད་ནས། མཚོན་ཆ་དང་ཕུབ་མང་པོ་བཟོས།
2CH 32:6 ཡང་མི་རྣམས་ལ་དམག་དཔོན་བཞག་སྟེ། མཁར་སྒོའི་ཐང་ཆེན་དུ་དེ་དག་རང་གི་དྲུང་དུ་བསྡུས་ནས། དེ་དག་ལ་སེམས་ཤུགས་བསྐྱེད་ཅིང་ན་རེ།
2CH 32:7 ཁྱོད་ཚོས་སྙིང་སྟོབས་དང་དཔའ་སེམས་སྐྱེད་ཅིག ཨ་སུར་རྒྱལ་པོ་དང་ཁོས་བཀོད་འདོམས་བྱེད་པའི་དམག་དཔུང་ཆེན་པོའི་རྐྱེན་གྱིས་མ་འཇིགས་མ་ཚབས་ཤིག གང་ལ་ཞེ་ན། རང་ཅག་དང་མཉམ་དུ་ཡོད་པ་ནི་དེ་དག་དང་མཉམ་དུ་ཡོད་པ་ལས་ལྷག་ཏུ་མང་སྟེ།
2CH 32:8 དེ་དག་དང་མཉམ་དུ་ཡོད་པ་ནི་ཤ་ཁྲག་གདོས་བཅས་ཀྱི་དཔུང་པ་ཡིན་མོད། རང་ཅག་དང་མཉམ་དུ་བཞུགས་པ་ནི་རང་ཅག་གི་དཀོན་མཆོག་ཡ་ཝཱེ་ཡིན་ལ། ཁོང་གིས་རང་ཅག་ལ་རོགས་རམ་མཛད་པ་དང་། རང་ཅག་གི་ཚབ་ཏུ་འཐབ་མོ་མཛད་ངེས་ཡིན་ཞེས་སྨྲས་པས། ཡ་ཧུ་དཱའི་རྒྱལ་པོ་ཧི་ཟི་ཀི་ཡཱའི་གཏམ་དེའི་རྐྱེན་གྱིས་མི་ཚོགས་ལ་སྐུལ་སློང་ཐོབ།
2CH 32:9 དེའི་རྗེས་སུ་ཨ་སུར་རྒྱལ་པོ་སེན་ན་ཧེ་རིབ་ཀྱིས་རང་གི་དམག་དཔུང་ཐམས་ཅད་ཁྲིད་ནས་ལཱ་ཀི་སི་ལ་དམག་རྒྱག་པའི་ཚེ། རང་གི་འཁོར་ནས་འགའ་ཞིག་ཡེ་རུ་སཱ་ལེམ་དུ་རྒྱལ་པོ་ཧི་ཟི་ཀི་ཡཱ་དང་། དེར་ཡོད་པའི་ཡ་ཧུ་དཱ་པ་ཚང་མའི་མདུན་དུ་བཏང་ནས་དེ་དག་ལ་འདི་ལྟར།
2CH 32:10 ཨ་སུར་རྒྱལ་པོ་སེན་ན་ཧེ་རིབ་ཀྱིས་འདི་ལྟར་གསུངས་ཏེ། ད་ནི་ཁྱོད་རྣམས་ཡེ་རུ་སཱ་ལེམ་དུ་དམག་གིས་བསྐོར་བས་ཁྱོད་རྣམས་སུ་ལ་བརྟེན་པར་བྱའམ།
2CH 32:11 ཧི་ཟི་ཀི་ཡཱས་ཁྱོད་ཅག་ལ། རང་ཅག་གི་དཀོན་མཆོག་ཡ་ཝཱེས་འོ་སྐོལ་ཨ་སུར་གྱི་རྒྱལ་པོའི་ལག་ནས་སྐྱོབ་པར་འགྱུར་རོ་སྨྲ་ཞིང་། འདི་ནི་ཁྱོད་ཅག་བཀྲེས་སྐོམ་གྱིས་འཆི་བའི་ཕྱིར་བསླུ་བ་མིན་ནམ།
2CH 32:12 ཧི་ཟི་ཀི་ཡཱས་དཀོན་མཆོག་ཡ་ཝཱེའི་མཐོ་གླིང་དང་མཆོད་ཁྲི་རྣམས་བཤིགས་ནས། ཡ་ཧུ་དཱ་དང་ཡེ་རུ་སཱ་ལེམ་གྱི་མི་ལ་འདི་ལྟར། ཁྱོད་ཅག་གིས་མཆོད་ཁྲི་གཅིག་གི་མདུན་དུ་བསྙེན་བཀུར་བྱེད་ཅིང་། དེའི་ཁར་བསང་ཐོངས་ཤིག་ཅེས་བསྒོས་པ་མིན་ནམ།
2CH 32:13 བདག་དང་བདག་གི་མེས་པོ་རྣམས་ཀྱིས་ས་གཞིའི་མི་ཐམས་ཅད་ལ་ཅི་བྱས་པའི་ཆ་ཁྱོད་ཅག་ལ་མེད་དམ། ཡུལ་དེ་དག་གི་མི་སོ་སོའི་ལྷ་རྣམས་ཀྱིས་རང་རང་གི་ཡུལ་བདག་ལས་སྐྱོབ་ནུས་སམ།
2CH 32:14 ངའི་ཡབ་མེས་ཀྱིས་ཚར་བཅད་པའི་མི་སོ་སོའི་ལྷ་ཐམས་ཅད་ལས། ལྷ་གང་ཞིག་གིས་རང་གི་འབངས་མི་བདག་གི་ལག་ནས་བསྒྲལ་ནུས་པ་ཡིན་ནམ། དེས་ན་ཁྱོད་ཚོའི་དཀོན་མཆོག་གིས་ཁྱོད་ཅག་ངའི་ལག་ནས་བསྒྲལ་ནུས་སམ།
2CH 32:15 དེའི་ཕྱིར་ད་ནི་ཧི་ཟི་ཀི་ཡཱ་ལ་ཁྱོད་ཅག་ལ་མགོ་བསྐོར་ནས་བསླུ་བར་མ་འཇུག ཁོ་ལ་ཡིད་ཆེས་མ་བྱེད་ཅིག གང་ལ་ཞེ་ན། མི་རིགས་སམ་རྒྱལ་སྲིད་གང་གི་ལྷ་ཡིས་ཀྱང་རང་གི་འབངས་མི་ནི་བདག་གི་ལག་དང་ངའི་ཡབ་མེས་ཀྱི་ལག་ནས་སྐྱོབ་མ་ནུས་པས། ཁྱོད་ཚོའི་དཀོན་མཆོག་གིས་ཁྱོད་ཚོ་ངའི་ལག་ནས་དེ་ལས་ཀྱང་སྐྱོབ་མི་ནུས་པ་མ་ཡིན་ནམ་ཞེས་པའོ་ཞེས་འཕྲིན་བསྐུར་བར་མ་ཟད།
2CH 32:16 སེན་ན་ཧེ་རིབ་ཀྱི་བློན་འཁོར་གྱིས་དཀོན་མཆོག་ཡ་ཝཱེ་དང་། ཁོང་གི་ཞབས་ཕྱི་ཧི་ཟི་ཀི་ཡཱ་གཉིས་ལ་སྐུར་འདེབས་ཀྱི་གཏམ་མང་པོ་སྨྲས་པ་དང་།
2CH 32:17 སེན་ན་ཧེ་རིབ་ཀྱིས་ཡང་འཕྲིན་ཡིག་བྲིས་ཏེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་དམའ་འབེབས་བྱས་ཤིང་། ཁོང་ལ་འཕྱས་ནས་འདི་ལྟར། མི་རིགས་གཞན་དག་གི་ཡུལ་གྱི་ལྷ་སོ་སོས་རང་གི་འབངས་མི་བདག་གི་ལག་ནས་སྐྱོབ་མ་ནུས་པ་བཞིན་དུ། ཧི་ཟི་ཀི་ཡཱའི་དཀོན་མཆོག་གིས་ཀྱང་རང་གི་འབངས་མི་ངའི་ལག་ནས་སྐྱོབ་མི་ནུས་སོ་ཞེས་སྨྲས་སོ། །
2CH 32:18 ཡང་ཨ་སུར་རྒྱལ་པོའི་བློན་འཁོར་རྣམས་ཀྱིས་མཁར་སྟེང་གི་ཡེ་རུ་སཱ་ལེམ་པ་རྣམས་ལ་འཇིགས་སྐུལ་བ་དང་དངང་སྐྲག་བསྐྱེད་ནས། མཁར་ལོན་པའི་ཆེད་དུ་ཡ་ཧུ་དཱའི་སྐད་ཀྱིས་ཅ་ཅོ་ཆེན་པོས་གཏམ་སྨྲས་ཤིང་།
2CH 32:19 ཡེ་རུ་སཱ་ལེམ་གྱི་དཀོན་མཆོག་གི་སྐོར་གླེང་བའི་སྐབས་སུ། འཇིག་རྟེན་གྱི་མི་ཀུན་གྱི་ལྷ་རྣམས་ཏེ་མིས་བཟོས་པའི་ལྷ་སྐུ་རྣམས་དང་འདྲ་བའི་ལྟ་སྟངས་བཟུང་བའོ། །
2CH 32:20 དེ་ནས་རྒྱལ་པོ་ཧི་ཟི་ཀི་ཡཱ་དང་ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱ་གཉིས་ཀྱིས་དེའི་ཕྱིར་ནམ་མཁའི་ཕྱོགས་སུ་འོ་དོད་བོས་ནས་གསོལ་བ་བཏབ་པ་ལ།
2CH 32:21 དཀོན་མཆོག་ཡ་ཝཱེས་ཕོ་ཉ་ཞིག་དེར་མངགས་ནས། དེས་ཨ་སུར་རྒྱལ་པོའི་དམག་སྒར་གྱི་དཔའ་རྒོད་དང་དམག་དཔོན་ཐམས་ཅད་ཚར་བཅད་ཅིང་། ཨ་སུར་གྱི་རྒྱལ་པོ་ནི་ངོ་གནོངས་ནས་རང་ཡུལ་དུ་ལོག་སྟེ། རང་གི་ལྷ་ཁང་དུ་ཕྱིན་པ་ན། ཁོའི་བུ་རྣམས་ལས་འགའ་ཞིག་གིས་ཁོ་རལ་གྲིས་བསད་དོ། །
2CH 32:22 དེ་ལྟར་དཀོན་མཆོག་ཡ་ཝཱེས་ཧི་ཟི་ཀི་ཡཱ་དང་། ཡེ་རུ་སཱ་ལེམ་པ་ཐམས་ཅད་ཨ་སུར་གྱི་རྒྱལ་པོ་སེན་ན་ཧེ་རིབ་དང་གཞན་ཀུན་གྱི་ལག་ནས་བསྒྲལ་བར་མཛད་དེ། ཕྱོགས་ཀུན་ནས་ཁོ་ཚོ་བདེ་ལ་བཀོད་པ་རེད།
2CH 32:23 དེ་ནས་མི་མང་པོ་ཡེ་རུ་སཱ་ལེམ་དུ་འོངས་ནས་དཀོན་མཆོག་ཡ་ཝཱེ་ལ་ཞལ་འདེབས་དང་། ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་ལ་རིན་པོ་ཆེའི་ཕྱག་རྟེན་ཕུལ་བ་དང་། དེ་ནས་བཟུང་མི་ཐམས་ཅད་ཀྱིས་ཧི་ཟི་ཀི་ཡཱ་ལ་བཀུར་བ་བྱས་སོ། །
2CH 32:24 དེའི་དུས་སུ་ཧི་ཟི་ཀི་ཡཱར་འཆི་བར་ཐུག་པའི་ནད་བྱུང་བ་དང་། དཀོན་མཆོག་ཡ་ཝཱེ་ལ་གསོལ་བ་བཏབ་པ་ན། དཀོན་མཆོག་ཡ་ཝཱེས་དེ་ལ་བཀའ་ལན་གནང་ནས་རྟགས་ངོ་མཚར་ཅན་ཞིག་བསྟན་མོད།
2CH 32:25 ཁོང་གིས་རང་ལ་ཐོབ་པའི་བཀའ་དྲིན་དང་འཚམ་པའི་གཏང་རག་མ་ཕུལ་བར་སེམས་སུ་ང་རྒྱལ་སྐྱེས་པས། ཡ་ཝཱེའི་ཐུགས་ཁྲོ་ནི་ཁོ་དང་ཡ་ཧུ་དཱ། ཡེ་རུ་སཱ་ལེམ་བཅས་ཀྱི་སྟེང་ལ་བབས།
2CH 32:26 ཡིན་ཡང་ཧི་ཟི་ཀི་ཡཱས་རང་གི་ང་རྒྱལ་གྱི་རྐྱེན་གྱིས་འགྱོད་བཤགས་བྱས་ཤིང་། ཁོང་དང་ཡེ་རུ་སཱ་ལེམ་པ་ཐམས་ཅད་ཀྱིས་འགྱོད་བཤགས་བྱས་པས། ཧི་ཟི་ཀི་ཡཱའི་སྐུ་རིང་དུ་དཀོན་མཆོག་ཡ་ཝཱེའི་ཐུགས་ཁྲོ་དེ་དག་ལ་མ་བབས་སོ། །
2CH 32:27 ཧི་ཟི་ཀི་ཡཱ་ལ་རྒྱུ་ནོར་དང་གཟི་བརྗིད་ཆེན་པོ་ལྡན་ཏེ། དེས་གསེར་དངུལ་དང་། གཏེར་རྡོ། བསུང་རྫས། ཕུབ། རིན་པོ་ཆེ་རིགས་སྣ་ཚོགས་བཅས་ཀྱི་ཕྱིར་རང་ཉིད་ལ་གཏེར་མཛོད་བརྩིགས་ཤིང་།
2CH 32:28 ཡང་འབྲུ་དང་། རྒུན་ཆང་དང་། སྣུམ་བཅས་ཀྱི་ཕྱིར་མཛོད་ཁང་དང་། ཕྱུགས་རིགས་སྣ་ཚོགས་ཀྱི་ཕྱིར་ཕྱུགས་ར་དང་ལུག་ར་བཟོས་པ་རེད།
2CH 32:29 གཞན་ཡང་ཁོང་གིས་རང་གི་ཕྱིར་དུ་གྲོང་ཁྱེར་བརྩིགས་ཏེ། དཀོན་མཆོག་གིས་ཁོང་ལ་རྒྱུ་ནོར་མང་པོ་གནང་བས། བ་གླང་དང་ར་ལུག་གི་ཕྱུགས་ཁྱུ་རབ་ཏུ་མང་པོ་འཕེལ་བའོ། །
2CH 32:30 ཡང་ཧི་ཟི་ཀི་ཡཱས་གེ་ཧོན་གྱི་ཆུ་མགོ་བཅད་དེ། ཆུ་དེ་དཱ་བིད་གྲོང་ཁྱེར་གྱི་ནུབ་ཕྱོགས་སུ་ཐུར་དུ་ཕབ་པ་རེད། ཧི་ཟི་ཀི་ཡཱས་ཅི་བྱས་པ་ཐམས་ཅད་ལྷུན་གྱིས་གྲུབ།
2CH 32:31 འོན་ཀྱང་པཱ་པེལ་ལོན་གྱི་རྒྱལ་པོས་འགོ་དཔོན་རྣམས་ཧི་ཟི་ཀི་ཡཱའི་རྩར་བང་ཆེན་དུ་མངགས་ནས་ཡུལ་དེར་འོངས་ཏེ། ཡ་ཧུ་དཱ་རུ་བྱུང་བའི་དོན་ངོ་མཚར་ཅན་རྣམས་ལ་རྩད་བཅད་པ་ན། དཀོན་མཆོག་གིས་ཁོང་ལ་ཚོད་བརྟག་མཛད་པ་དང་ཁོོང་གི་སེམས་སུ་ཅི་ཡོད་པ་ཐམས་ཅད་གཟིགས་པའི་ཕྱིར་ཁོང་དང་ཁ་བྲལ་ཏོ། །
2CH 32:32 ཧི་ཟི་ཀི་ཡཱའི་མཛད་རྗེས་གཞན་རྣམས་དང་སྤྱོད་བཟང་རྣམས་ནི། ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱའི་ཞལ་གཟིགས་ཀྱི་མདོ་དང་། ཡ་ཧུ་དཱ་དང་ཡེས་ར་ཨེལ་གྱི་རྒྱལ་རབས་ནང་དུ་བཀོད་ཡོད།
2CH 32:33 ཧི་ཟི་ཀི་ཡཱ་རང་གི་ཕ་མེས་དང་མཉམ་དུ་གཟིམས་ནས། དཱ་བིད་ཀྱི་བུ་རྒྱུད་ཀྱི་དུར་ཁུང་རྣམས་ཀྱི་མཐོ་སར་སྦས་སོ། །ཁོང་སྐུ་གཤེགས་པ་དང་ཡ་ཧུ་དཱ་དང་ཡེ་རུ་སཱ་ལེམ་གྱི་མི་ཀུན་གྱིས་ཁོང་ལ་བསྙེན་བཀུར་ཆེན་པོ་བྱས། ཁོང་གི་སྲས་མཱ་ན་ཤེ་ཁོང་གི་ཚབ་ཏུ་རྒྱལ་པོར་བསྡད་དོ། །
2CH 33:1 མཱ་ན་ཤེ་རྒྱལ་པོར་འགོད་དུས་སུ་ལོ་བཅུ་གཉིས་ཡིན་པ་དང་། ཡེ་རུ་སཱ་ལེམ་དུ་ལོ་ལྔ་བཅུ་ང་ལྔའི་རིང་ལ་རྒྱལ་སྲིད་བསྐྱངས་སོ། །
2CH 33:2 ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་བསྐྲད་པའི་ཕྱི་རོལ་པ་རྣམས་ཀྱི་ཞེན་ལོག་གི་སྤྱོད་ཚུལ་བཞིན་དུ་སྤྱད་ཅིང་།
2CH 33:3 ཁོས་རང་གི་ཕ་ཧི་ཟི་ཀི་ཡཱས་བཤིགས་པའི་མཐོ་གླིང་རྣམས་ཕྱིར་བརྩིགས་ཏེ། པཱ་ཨལ་རྣམས་ཀྱི་དོན་དུ་མཆོད་ཁྲི་བཞེངས་པ་དང་། ཨ་ཤེ་རཱ་རྣམས་བཙུགས་ཏེ། ནམ་མཁའི་སྐར་ཚོགས་ཐམས་ཅད་ལ་ཕྱག་བཙལ་ནས་ཞབས་ཏོག་བསྒྲུབས།
2CH 33:4 ཁོས་དཀོན་མཆོག་ཡ་ཝཱེའི་མཆོད་ཁང་ནང་དུ་མཆོད་ཁྲི་རྣམས་བཞེངས་པ་སྟེ། སྔར་དཀོན་མཆོག་ཡ་ཝཱེས་མཆོད་ཁང་དེར་དམིགས་ནས་འདི་སྐད་དུ། བདག་གི་མིང་ནི་རྒྱུན་ནས་རྒྱུན་དུ་ཡེ་རུ་སཱ་ལེམ་དུ་གནས་པར་བྱ་ཞེས་གསུངས་པའོ། །
2CH 33:5 ཁོས་དཀོན་མཆོག་ཡ་ཝཱེའི་མཆོད་ཁང་གི་ཁྱམས་ར་གཉིས་ཀྱི་ནང་དུ་ནམ་མཁའི་སྐར་ཚོགས་ཀུན་གྱི་ཆེད་དུ་མཆོད་ཁྲི་རྣམས་བཞེངས།
2CH 33:6 པེན་ཧིན་ནོམ་ལུང་པར་རང་གི་བུ་རྣམས་མེ་མཆོད་དུ་ཕུལ་ཞིང་། ཡང་རྩིས་པ་དང་མོ་པ། སྒྱུ་མ་མཁན། ལྷ་པ། གཤིན་འདྲེ་འགུག་མཁན་སོགས་བསྟེན་ནས་དཀོན་མཆོག་ཡ་ཝཱེའི་སྤྱན་སྔར་ངན་པ་མང་པོ་སྤྱད་དེ་ཁོང་ཐུགས་ཁྲོ་བར་བྱས།
2CH 33:7 ཁོས་ཡང་རང་གིས་བརྐོས་པའི་སྐུ་འདྲ་དེ་དཀོན་མཆོག་གི་མཆོད་ཁང་དུ་བསླངས་ནས་བཞག སྔར་ཡ་ཝཱེས་མཆོད་ཁང་དེར་དམིགས་ནས་དཱ་བིད་དང་དེའི་སྲས་སོ་ལོ་མོན་གཉིས་ལ་འདི་སྐད་དུ། ངས་མཆོད་ཁང་འདི་དང་ཡེས་ར་ཨེལ་གྱི་ཚོ་པ་ཁག་ནས་བདམས་པའི་ཡེ་རུ་སཱ་ལེམ་དུ་རང་གི་མིང་དུས་རྟག་ཏུ་འཇོག་པར་བྱ་སྟེ།
2CH 33:8 ཇི་སྟེ་ཡེས་ར་ཨེལ་པ་རྣམས་ཀྱིས་གཟབ་གཟབ་ངང་བདག་གིས་མོ་ཤེ་བརྒྱུད་ནས་བསྒོས་པའི་བཀའ་ཁྲིམས་དང་བཀའ་རྒྱ། སྲོལ་ཡིག་བཅས་ཐམས་ཅད་བཞིན་དུ་བྱེད་ན། ངས་དེ་དག་གི་མེས་པོ་རྣམས་ལ་སྤྲད་པའི་ཡུལ་ཁམས་ནས་ཁོ་རྣམས་ནམ་ཡང་སྐྲོད་པར་མི་བྱ་ཞེས་གསུངས།
2CH 33:9 ཡིན་ནའང་མཱ་ན་ཤེ་ཡིས་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་ལོག་པར་ཁྲིད་ནས་དེ་དག་ངན་པའི་ལས་ལ་བཅུག་ཅིང་། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ནས་ཚར་བཅད་པའི་ཕྱི་རོལ་པ་རྣམས་ལས་ཀྱང་ཚབས་ཆེའོ། །
2CH 33:10 དཀོན་མཆོག་ཡ་ཝཱེས་མཱ་ན་ཤེ་དང་དེའི་འབངས་ལ་ཞལ་ཏ་མཛད་ཀྱང་དེ་ཚོས་མ་མཉན།
2CH 33:11 དེའི་ཕྱིར་དཀོན་མཆོག་ཡ་ཝཱེས་དེ་དག་གི་སྟེང་ཏུ་ཨ་སུར་རྒྱལ་པོའི་དམག་དཔོན་རྣམས་བཏང་བ་ལ། དེ་དག་གིས་མཱ་ན་ཤེ་ལྕགས་ཀྱུས་བཟུང་སྟེ། ལི་ཡི་སྒྲོག་བརྒྱབས་ནས་པཱ་པེལ་ལོན་དུ་ཁྲིད།
2CH 33:12 དེར་ཁོ་སྡུག་བསྔལ་གྱིས་མནར་དུས་སུ། རང་གི་དཀོན་མཆོག་ཡ་ཝཱེ་ལ་ཞུ་བ་ཕུལ་ཞིང་། ཁོའི་ཕ་མེས་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་རབ་ཏུ་ཁེངས་ཆུང་བྱས།
2CH 33:13 ཁོས་སྨོན་ལམ་བཏབ་པ་དང་དཀོན་མཆོག་གིས་ཁོའི་ཞུ་བ་བསྐངས་ནས། དེའི་གསོལ་ཚིག་ལ་གསན་ཏེ། ཁོ་ཡེ་རུ་སཱ་ལེམ་དུ་ཕྱིར་དྲངས་ནས་ཁོའི་རྒྱལ་ཁྲི་སླར་གསོ་མཛད་པས། མཱ་ན་ཤེ་ཡིས་ད་གཟོད་དཀོན་མཆོག་ཡ་ཝཱེ་འབའ་ཞིག་ནི་དཀོན་མཆོག་ཡིན་པ་ཤེས།
2CH 33:14 དེའི་རྗེས་སུ་མཱ་ན་ཤེ་ཡིས་དཱ་བིད་གྲོང་ཁྱེར་གྱི་ཕྱི་རོལ་ཏུ། ལུང་པའི་གེ་ཧོན་ཆུ་མིག་གི་ནུབ་ཕྱོགས་ནས་ཉའི་རྟ་སྒོའི་བར་དུ་ལྕགས་རི་བརྩིགས་ནས། ཨོ་ཕེལ་ས་ཁུལ་བསྐོར་ཏེ་མཐོན་པོ་བྱས། ཡང་ཡ་ཧུ་དཱའི་འགོག་སྲུང་གྲོང་ཁྱེར་ཐམས་ཅད་ཀྱི་ནང་དུ་དམག་དཔོན་བཞག
2CH 33:15 དཀོན་མཆོག་ཡ་ཝཱེའི་མཆོད་ཁང་དུ་ཡོད་པའི་ཕྱི་རོལ་པའི་ལྷ་རྟེན་དང་སྐུ་འདྲ་རྣམས་མེད་པར་བཟོས་ཤིང་། དཀོན་མཆོག་ཡ་ཝཱེའི་མཆོད་ཁང་གི་རི་དང་། ཡེ་རུ་སཱ་ལེམ་དུ་བཞེངས་པའི་མཆོད་ཁྲི་ཐམས་ཅད་ཁྱེར་ཏེ་རྒྱལ་སའི་ཕྱི་རོལ་ཏུ་གཡུགས་ནས།
2CH 33:16 དཀོན་མཆོག་ཡ་ཝཱེའི་མཆོད་ཁྲི་ཞིག་གསོ་བྱས་པ་དང་དེའི་ཁར་ཞི་བདེའི་མཆོད་པ་དང་གཏང་རག་གི་མཆོད་པ་ཕུལ་ནས། ཡ་ཧུ་དཱ་པ་རྣམས་ལ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལ་ཞབས་ཕྱི་བྱེད་པར་བསྒོས་ན་ཡང་།
2CH 33:17 མི་རྣམས་ཀྱིས་ད་དུང་མཐོ་གླིང་རྣམས་སུ་མཆོད་པ་ཕུལ་ཏེ། རང་གི་དཀོན་མཆོག་ཡ་ཝཱེ་འབའ་ཞིག་ལ་མཆོད་པ་ཕུལ་བ་ཡིན།
2CH 33:18 མཱ་ན་ཤེའི་བྱས་རྗེས་གཞན་རྣམས་དང་། ཁོས་རང་གི་དཀོན་མཆོག་ལ་སྨོན་ལམ་བཏབ་པ་དང་། མངོན་ཤེས་པ་རྣམས་ཀྱིས་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཚན་གྱི་སྒོ་ནས་ཁོ་ལ་གསུངས་པའི་ཞལ་གདམས་རྣམས་ནི། ཡེས་ར་ཨེལ་གྱི་རྒྱལ་རབས་ཀྱི་མདོ་རུ་བཀོད་ཡོད།
2CH 33:19 ཡང་ཁོའི་གསོལ་འདེབས་དང་། དཀོན་མཆོག་གིས་ཁོའི་ཞུ་བ་ཅི་ལྟར་བསྐངས་ཚུལ་དང་། ཁོས་ཁེངས་ཆུང་མ་བྱས་གོང་ལ་སྡིག་པ་དང་ཉེས་སྐྱོན་ཅི་བྱས་ཡོད་ཚད། ཡུལ་གང་དུ་མཐོ་གླིང་རྣམས་བརྩིགས་ཚུལ། ཨ་ཤེ་རཱ་དང་རྟེན་རྣམས་བཞག་པ་ནི་ལུང་སྟོན་པ་རྣམས་ཀྱི་གཏམ་སྤྱོད་ཀྱི་ལོ་རྒྱུས་ནང་བཀོད་ཡོད།
2CH 33:20 དེ་ནས་མཱ་ན་ཤེ་རང་གི་ཕ་མེས་དང་མཉམ་དུ་གཉིད་པ་དང་། རང་གི་ཕོ་བྲང་ནང་དུ་དུར་ལ་སྦས། ཁོའི་སྲས་ཨ་མོན་བྱ་བ་དེའི་ཚབ་ཏུ་རྒྱལ་པོར་གྱུར་ཏོ། །
2CH 33:21 དེ་ཡང་ཨ་མོན་གྱིས་རྒྱལ་སྲིད་འཛིན་པའི་དུས་སུ་ཁོ་ལོ་ཉེར་གཉིས་ཡིན་པ་དང་། ཁོས་ཡེ་རུ་སཱ་ལེམ་དུ་ལོ་གཉིས་ཀྱི་རིང་ལ་རྒྱལ་སྲིད་བསྐྱངས།
2CH 33:22 ཨ་མོན་གྱིས་རང་གི་ཕ་མཱ་ན་ཤེས་བྱས་པ་བཞིན་དུ་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་དེ། ཁོས་རང་གི་ཕ་མཱ་ན་ཤེས་བརྐོས་པའི་སྐུ་འདྲ་ཐམས་ཅད་ལ་མཆོད་པ་ཕུལ་ནས་ཞབས་ཕྱི་བསྒྲུབས།
2CH 33:23 ཡང་ཁོས་རང་གི་ཕ་མཱ་ན་ཤེས་ཁེངས་སྐྱུང་བྱས་པ་བཞིན་དུ་དཀོན་མཆོག་ཡ་ཝཱེའི་དྲུང་དུ་ཁེངས་སྐྱུང་མ་བྱས་པར། ཨ་མོན་གྱིས་སྡིག་པ་ཆེན་པོ་བྱས།
2CH 33:24 ཕྱིས་སུ་ཁོའི་བློན་འཁོར་རྣམས་ཀྱིས་ཁོ་ལ་ངོ་ལོག་བྱས་ནས་ཁོ་རང་གི་ཕོ་བྲང་ནས་བསད།
2CH 33:25 འོན་ཀྱང་ཡ་ཧུ་དཱ་པ་རྣམས་ཀྱིས་རྒྱལ་པོ་ཨ་མོན་ལ་ངོ་ལོག་པའི་མི་ཐམས་ཅད་བསད་དེ། ཁོའི་སྲས་ཡོ་ཤི་ཡཱ་ཁོའི་ཚབ་ཏུ་རྒྱལ་པོར་བཞག་པའོ། །
2CH 34:1 ཡོ་ཤི་ཡཱ་རྒྱལ་པོར་བཞུགས་དུས་དགུང་ལོ་བརྒྱད་ཡིན་ཏེ། ཡེ་རུ་སཱ་ལེམ་དུ་ལོ་སུམ་ཅུ་སོ་གཅིག་གི་རིང་ལ་རྒྱལ་སྲིད་བསྐྱངས།
2CH 34:2 ཁོང་གིས་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་དེ་སྤྱད་ཅིང་། རང་གི་ཡབ་མེས་དཱ་བིད་ཀྱི་ལམ་ནང་འགྲུལ་ཏེ། གཡས་གཡོན་གང་དུའང་མ་གཟུར།
2CH 34:3 ཁོང་གི་སྲིད་ལོ་བརྒྱད་པར་ད་དུང་ལོ་ན་ཕྲ་བའི་དུས་སུ། ཁོང་གིས་རང་གི་ཡབ་མེས་དཱ་བིད་ཀྱི་དཀོན་མཆོག་འཚོལ་བར་བརྩམས་ཤིང་། ལོ་བཅུ་གཉིས་པ་ནས་ཡ་ཧུ་དཱ་དང་ཡེ་རུ་སཱ་ལེམ་གཙང་མར་མཛད་དེ། མཐོ་གླིང་དང་། ཨ་ཤེ་རཱ། སྐུ་འདྲ། བླུགས་སྐུ་ཐམས་ཅད་མེད་པར་བྱེད་འགོ་ཚུགས་པ་དང་།
2CH 34:4 མི་རྣམས་ཀྱིས་ཁོང་གི་དྲུང་ནས་པཱ་ཨལ་གྱི་མཆོད་ཁྲི་རྣམས་བཤིགས། ཁོང་གིས་དངོས་སུ་མཆོད་ཁྲི་སྟེང་གི་སྤོས་ཁྲི་མཐོན་པོ་རྣམས་བཅག་པ་དང་། ཡང་ཨ་ཤེ་རཱ་དང་། སྐུ་འདྲ་དང་། བླུགས་སྐུ་རྣམས་བཅག་སྟེ་རྡུལ་དུ་བརླགས་ནས། དེ་དག་ལ་མཆོད་པ་ཕུལ་མྱོང་བ་རྣམས་ཀྱི་དུར་ས་ཐོག་ཏུ་གཏོར།
2CH 34:5 མཆོད་དཔོན་རྣམས་ཀྱི་རུས་པ་ནི་དེ་དག་གི་མཆོད་ཁྲིའི་ཁར་བསྲེགས་ནས། ཡ་ཧུ་དཱ་དང་ཡེ་རུ་སཱ་ལེམ་གཙང་མར་མཛད།
2CH 34:6 ཡང་ཁོང་གིས་མཱ་ན་ཤེ་དང་། ཨེ་ཕཱར་ཡིམ་དང་། སི་མུ་ཨོན་དང་། ནཱབ་ཐ་ལི་བཅས་ཀྱི་གྲོང་ཁྱེར་སོ་སོ་དང་དེ་དག་མཐའ་འཁོར་གྱི་ཡུལ་རྣམས་སུའང་དེ་བཞིན་བྱས།
2CH 34:7 ཁོང་གིས་མཆོད་ཁྲི་རྣམས་བཤིགས་པ་དང་། ཨ་ཤེ་རཱ་དང་སྐུ་འདྲ་རྣམས་བཅག་ནས་རྡུལ་དུ་བརླགས་པ་དང་། ཡེས་ར་ཨེལ་ཡུལ་ཀུན་གྱི་སྤོས་ཁྲི་རྣམས་བཤིགས་ཏེ་ཕྱིར་ཡེ་རུ་སཱ་ལེམ་དུ་ལོག
2CH 34:8 ཡོ་ཤི་ཡཱའི་སྲིད་ལོ་བཅོ་བརྒྱད་པར། ཡ་ཧུ་དཱའི་ཡུལ་དང་མཆོད་ཁང་གཙང་མར་མཛད་ཟིན་པ་དང་། ཨ་ཙལ་ཡཱའི་བུ་ཤཱ་ཕན་དང་། གྲོང་དཔོན་མ་ཨ་སེ་ཡཱ་དང་། ལོ་རྒྱུས་འགོད་མཁན་ཡོ་ཨ་ཧཱ་ཟིའི་བུ་ཡོ་ཨག་བཅས་ནི་རང་གི་དཀོན་མཆོག་ཡ་ཝཱེའི་མཆོད་ཁང་ཞིག་གསོ་བྱེད་པའི་ལས་སྒྲུབ་པར་བཏང་ནས།
2CH 34:9 དེ་དག་མཆོད་དཔོན་ཆེན་པོ་ཧིལ་ཀི་ཡཱའི་དྲུང་དུ་ཕྱིན་ཏེ། དཀོན་མཆོག་གི་མཆོད་ཁང་ལ་ཕུལ་བའི་དངུལ་ཡོད་ཚད་དེར་གཏད་པ་དང་། དངུལ་དེ་ཐམས་ཅད་ནི་ལེ་ཝི་པ་སྒོ་སྲུང་རྣམས་ཀྱིས་མཱ་ན་ཤེ་དང་། ཨེ་ཕཱར་ཡིམ་དང་། ཡེས་ར་ཨེལ་པ་ལྷག་ལུས་ཡོངས་དང་། ཡ་ཧུ་དཱ་དང་། པེན་ཡཱ་མེན་དང་། ཡེ་རུ་སཱ་ལེམ་གྱི་ཡུལ་མི་བཅས་ལས་བསྡུས་པ་ཡིན།
2CH 34:10 ཡང་དེ་དག་གིས་དངུལ་ནི་དཀོན་མཆོག་ཡ་ཝཱེའི་མཆོད་ཁང་ལ་ལྟ་རྟོགས་བྱེད་མཁན་གྱི་ལག་ཏུ་གཏད་དེ། ཡང་ཁོ་ཚོས་དཀོན་མཆོག་ཡ་ཝཱེའི་མཆོད་ཁང་ཞིག་གསོ་བྱེད་པའི་ལག་ཤེས་པ་རྣམས་ཀྱི་ལག་ཏུ་གཏད་དོ། །
2CH 34:11 ཡ་ཧུ་དཱའི་རྒྱལ་པོ་རྣམས་ཀྱིས་བཤིགས་པའི་ཕོ་བྲང་རྣམས་ཞིག་གསོ་བྱེད་པའི་ཕྱིར་། དེ་དག་གིས་ཤིང་བཟོ་དང་རྡོ་བཟོའི་ལག་ཏུ་དངུལ་གཏད་དེ། འཇམ་ཤ་བཏོད་པའི་རྡོ་དང་སྐྱོར་ཤིང་དང་གདུང་མའི་ཕྱིར་ཤིང་ཆ་བཅས་ཉོས།
2CH 34:12 མི་དེ་དག་གིས་གཞུང་དྲང་སྒོས་ལས་ཀ་བྱས་ཤིང་། དེ་དག་གི་ལས་དཔོན་ནི་ལེ་ཝི་པ་མཱ་རཱ་རེའེ་ཡི་བུ་རྒྱུད་ཡཱ་ཧད་དང་ཨོ་བད་ཡཱ་ཡིན་པ་དང་། དེ་དག་གི་ལྟ་སྐུལ་ནི་ཀོ་ཧད་ཀྱི་བུ་རྒྱུད་ཟཱ་ཀར་ཡ་དང་མཱེ་ཤུལ་ལིམ་བྱ་བ་ཡིན། དེ་མིན་ད་དུང་རོལ་མོར་མཁས་པའི་ལེ་ཝི་པ་ཐམས་ཅད་ཡོད་ལ།
2CH 34:13 ཡང་དེ་དག་གིས་ཁུར་མཁན་དང་། ཞབས་ཏོག་གི་ལས་གང་རུང་སྒྲུབ་མཁན་ལ་ལྟ་སྐུལ་བྱེད་པ་དང་། ལེ་ཝི་པའི་ནང་དུ་དྲུང་ཡིག་དང་འགོ་དཔོན། སྒོ་སྲུང་བཅས་ཡོད་དོ། །
2CH 34:14 ཁོ་ཚོས་དཀོན་མཆོག་ཡ་ཝཱེའི་མཆོད་ཁང་ལ་ཕུལ་བའི་དངུལ་ཕྱུང་དུས་སུ། མཆོད་དཔོན་ཧིལ་ཀི་ཡཱས་དཀོན་མཆོག་ཡ་ཝཱེས་མོ་ཤེ་བརྒྱུད་དེ་བཀོད་པའི་བཀའ་ཁྲིམས་ཀྱི་མདོ་རྙེད་ཅིང་།
2CH 34:15 ཧིལ་ཀི་ཡཱས་དྲུང་ཡིག་པ་ཤཱ་ཕན་ལ་ན་རེ། ངས་དཀོན་མཆོག་ཡ་ཝཱེའི་མཆོད་ཁང་ནས་བཀའ་ཁྲིམས་ཀྱི་མདོ་རྙེད་བྱུང་ཞེས་སྨྲས་ནས། ཧིལ་ཀི་ཡཱས་དེ་ཤཱ་ཕན་གྱི་ལག་ཏུ་གཏད།
2CH 34:16 ཤཱ་ཕན་གྱིས་མདོ་དེ་རྒྱལ་པོའི་དྲུང་དུ་ཕུལ་ནས་རྒྱལ་པོ་ལ་འདི་ལྟར། ཁྱེད་ཀྱིས་འཁོར་གཡོག་དག་གི་ལག་ཏུ་བཅོལ་བའི་ལས་ཀ་ཡོད་ཚད་དེ་དག་གིས་སྒྲུབ་ཀྱིན་ཡོད།
2CH 34:17 ཁོ་ཚོས་དཀོན་མཆོག་ཡ་ཝཱེའི་མཆོད་ཁང་ལས་རྙེད་པའི་དངུལ་དག་བསྡུས་ནས། ལས་དཔོན་དང་ལག་ཤེས་པ་རྣམས་ཀྱི་ལག་ཏུ་གཏད་པ་ཡིན་ཞེས་ཞུས་སོ། །
2CH 34:18 ཡང་དྲུང་ཡིག་ཤཱ་ཕན་གྱིས་རྒྱལ་པོ་ལ་འདི་ལྟར། མཆོད་དཔོན་ཧིལ་ཀི་ཡཱས་ང་ལ་ཤོག་སྒྲིལ་གྱི་མདོ་འདིའང་སྤྲད་བྱུང་ཞེས་ནས་རྒྱལ་པོའི་དྲུང་དུ་མདོ་དེ་བཀླགས།
2CH 34:19 ཡང་རྒྱལ་པོས་བཀའ་ཁྲིམས་ཀྱི་གསུང་རྣམས་ཐོས་པ་ཙམ་གྱིས་རང་གི་གོས་བཤགས་ཏེ།
2CH 34:20 རྒྱལ་པོ་ཧིལ་ཀི་ཡཱ་དང་། ཤཱ་ཕན་གྱི་བུ་ཨ་ཧི་ཀམ་དང་། མི་ཀཱ་ཡི་བུ་ཨབ་དོན་དང་། དྲུང་ཡིག་ཤཱ་ཕན་དང་། རྒྱལ་པོའི་ཞབས་ཕྱི་ཨ་སཱ་ཡཱ་བཅས་ལ་བཀའ་བསྩལ་ནས་ན་རེ།
2CH 34:21 སོང་ལ། བདག་དང་ཡེས་ར་ཨེལ། ཡ་ཧུ་དཱ་རུ་ལུས་པའི་མི་རྣམས་ཀྱི་དོན་དུ། རང་ཅག་གིས་རྙེད་པའི་མདོ་འདིའི་གསུང་གི་སྐོར་ནས་ཐུགས་བརྟག་ཞུས་ཤིག ཅིའི་ཕྱིར་ཞེ་ན། འོ་སྐོལ་གྱི་ཕ་མེས་རྣམས་ཀྱིས་དཀོན་མཆོག་ཡ་ཝཱེའི་བཀའ་རྣམས་མ་བསྲུངས་ལ། མདོ་འདི་ནང་བྲིས་པ་ཐམས་ཅད་བཞིན་དུའང་མ་བྱས་པས། དཀོན་མཆོག་ཡ་ཝཱེ་རང་ཅག་ལ་ཐུགས་རབ་ཏུ་ཁྲོས་པ་ཡིན་ཞེས་གསུངས།
2CH 34:22 དེ་ནས་ཧིལ་ཀི་ཡཱ་དང་། རྒྱལ་པོས་མངགས་པའི་མི་རྣམས་བུད་མེད་ལུང་སྟོན་པ་ཧུལ་དཱའི་རྩར་ཕྱིན་ཏེ། མོ་ནི་གོས་ཁང་གི་གཉེར་བ་ཤལ་ལུམ་གྱི་ཆུང་མ་ཡིན་ལ། ཡང་ཤལ་ལུམ་ནི་ཧས་རཱའི་ཚ་བོ་དང་། ཐོག་ཧད་ཀྱི་བུའོ། །མོ་ནི་ཡེ་རུ་སཱ་ལེམ་གྱི་ཁུལ་གཉིས་པར་སྡོད་པ་དང་། ཁོ་ཚོས་ཡོང་དོན་མོ་ལ་བཤད་ཅིང་།
2CH 34:23 ཁོ་མོས་དེ་དག་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་ངའི་རྩར་མངག་མཁན་དེ་ལ་འདི་ལྟར་སྦྲོན་ཅིག
2CH 34:24 དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ཡ་ཧུ་དཱའི་རྒྱལ་པོའི་མདུན་དུ་བཀླགས་པའི་མདོ་ནང་དུ་བྲིས་པའི་དམོད་མོ་ཐམས་ཅད་བཞིན་དུ། ངས་གནས་འདི་དང་འདིར་གནས་པའི་ཡུལ་མིའི་སྟེང་དུ་ཆག་སྒོ་གཏོང་བར་བྱའོ། །
2CH 34:25 ཅིའི་ཕྱིར་ཞེ་ན། ཁོ་ཚོས་ང་རང་དོར་ནས་ལྷ་གཞན་ལ་སྤོས་བསྒྲོན་པ་དང་། རང་གི་བྱས་པའི་ལས་ཀུན་གྱིས་ངའི་ཁོང་ཁྲོ་བསྐྱེད་པས། ངའི་ཁོང་ཁྲོའི་མེ་ལྕེ་གནས་འདིར་འབབ་ངེས་ཤིང་ནམ་ཡང་ཞི་བར་མི་འགྱུར།
2CH 34:26 དཀོན་མཆོག་ཡ་ཝཱེ་ནས་བརྟག་པ་ཞུ་བར་ཁྱོད་རྣམས་མངགས་མཁན་ཡ་ཧུ་དཱའི་རྒྱལ་པོ་ལ་འདི་ལྟར་སྨྲོས་ཤིག ཁྱོད་ཀྱིས་ཐོས་པའི་བཀའ་ཡི་སྐོར་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ།
2CH 34:27 བདག་གིས་གནས་འདི་དང་གནས་འདིར་སྡོད་པ་རྣམས་ལ་གནང་བའི་བཀའ་ཐོས་པ་ཙམ་གྱིས། ཁྱོད་ཀྱི་སེམས་སྙི་མོར་གྱུར་པ་དང་། བདག་གི་མདུན་ནས་ཁེངས་སྐྱུང་བྱས་ཏེ་གོས་གཤགས་ནས་ངུས་པ་ན་ངས་ཀྱང་ཁྱོད་ཀྱི་ཞུ་བར་མཉན་པ་ཡིན། འདི་ནི་དཀོན་མཆོག་ཡ་ཝཱེའི་བཀའ་ཁྱབ་སྟེ།
2CH 34:28 ལྟོས་དང་། བདག་གིས་ཁྱོད་ནི་རང་གི་ཕ་མེས་ཀྱི་ཁྲོད་དུ་བསྡུ་བར་བྱ་སྟེ། ཞི་བདེའི་ངང་རང་གི་དུར་ལ་འཇུག་པར་འགྱུར། ངས་གནས་འདི་དང་གནས་འདིའི་ཡུལ་མི་རྣམས་ཀྱི་སྟེང་དུ་འབེབ་པར་བྱ་བའི་ཆག་སྒོ་ཐམས་ཅད་ཁྱོད་ཀྱི་མིག་གིས་མཐོང་བར་མི་འགྱུར་ཞེས་གསུངས་ཞེས་སྨྲས་པ་དང་། ཁོ་ཚོས་བཀའ་དེ་རྒྱལ་པོ་ལ་བསྐྱལ་ཏོ། །
2CH 34:29 དེ་ནས་རྒྱལ་པོས་བང་ཆེན་བཏང་ནས། ཡ་ཧུ་དཱ་དང་ཡེ་རུ་སཱ་ལེམ་གྱི་རྒན་པོ་ཐམས་ཅད་བསྡུས་ཏེ།
2CH 34:30 རྒྱལ་པོ་དང་ཡ་ཧུ་དཱ་པ་དང་། ཡེ་རུ་སཱ་ལེམ་པ་ཐམས་ཅད་དང་། མཆོད་དཔོན་རྣམས་དང་ལེ་ཝི་པ་དང་མི་རིགས་ཆེ་ཆུང་ཡོད་དོ་ཅོག་དཀོན་མཆོག་ཡ་ཝཱེའི་མཆོད་ཁང་དུ་ཡར་སོང་ནས། རྒྱལ་པོས་དཀོན་མཆོག་ཡ་ཝཱེའི་མཆོད་ཁང་ནས་རྙེད་པའི་ཞལ་ཆད་ཀྱི་མདོ་ཡི་བཀའ་ཐམས་ཅད་དེ་རྣམས་ཀྱི་མདུན་དུ་བསྒྲགས་ནས།
2CH 34:31 རྒྱལ་པོ་རང་གི་འདུག་སར་བཞེངས་ཏེ། བློ་གཅིག་སེམས་གཅིག་གིས་དཀོན་མཆོག་ཡ་ཝཱེའི་རྗེས་སུ་འབྲང་བ་དང་། ཁོང་གི་བཀའ་རྒྱ་དང་དཔང་ཡིག ཁྲིམས་སྲོལ་བཅས་པ་གཟབ་ནན་གྱིས་བསྲུངས་ནས། མདོ་འདིའི་ནང་དུ་བཀོད་པའི་ཞལ་ཆད་ཀྱི་བཀའ་བཞིན་དུ་སྤྱོད་པའི་ཐད་དཀོན་མཆོག་ཡ་ཝཱེའི་དྲུང་དུ་ཞལ་ཆད་མཛད་དོ། །
2CH 34:32 ཡང་ཁོང་གིས་ཡེ་རུ་སཱ་ལེམ་དང་པེན་ཡཱ་མེན་དུ་སྡོད་པའི་མི་ཐམས་ཅད་ལ་ཞལ་ཆད་དེ་བསྲུང་དུ་བཅུག་པ་དང་། དེ་ནས་ཡེ་རུ་སཱ་ལེམ་གྱི་ཡུལ་མི་ཐམས་ཅད་ཀྱིས་རང་གི་ཕ་མེས་ཀྱི་དཀོན་མཆོག་གི་ཞལ་ཆད་བཞིན་དུ་སྤྱོད་པ་སྤྱད་དོ། །
2CH 34:33 དེ་ནས་ཡོ་ཤི་ཡཱས་ཡེས་ར་ཨེལ་པ་ལ་གཏོགས་པའི་ཡུལ་ཀུན་ནས་ཞེན་ལོག་གི་སྐུ་འདྲ་ཐམས་ཅད་མེད་པར་བཟོས་ནས། ཡེས་ར་ཨེལ་ཡུལ་ཁམས་སུ་གནས་པ་ཀུན་ལ་རང་གི་དཀོན་མཆོག་ཡ་ཝཱེ་ལ་ཞབས་ཕྱི་སྒྲུབ་ཏུ་བཅུག་པས། ཡོ་ཤི་ཡཱའི་སྐུ་རིང་ལ་མི་རྣམས་རང་གི་ཕ་མེས་ཀྱི་དཀོན་མཆོག་ཡ་ཝཱེའི་རྗེས་སུ་འབྲངས་པ་ལས་མ་བྱོལ་ཏོ། །
2CH 35:1 ཡོ་ཤི་ཡཱ་ཡིས་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་ཕྱིར་པེ་སག་དུས་ཆེན་བསྲུངས་པ་དང་། ཟླ་དང་པོའི་ཚེས་བཅུ་བཞི་ཉིན་དེ་དག་གིས་པེ་སག་དུས་ཆེན་གྱི་ལུ་གུ་བཤས་ཏེ།
2CH 35:2 རྒྱལ་པོས་མཆོད་དཔོན་རྣམས་ལ་རང་རང་གི་ལས་འགན་བསྐོས་ནས་དཀོན་མཆོག་ཡ་ཝཱེའི་མཆོད་ཁང་གི་ལས་ཀ་རྣམས་བསྒྲུབ་པར་བསྐུལ།
2CH 35:3 ཡང་ཁོང་གིས་ཡེས་ར་ཨེལ་པ་ཐམས་ཅད་ལ་བསླབ་བྱ་གནང་མཁན་དང་དཀོན་མཆོག་ཡ་ཝཱེའི་ཕྱིར་དམ་པར་བྱས་པའི་ལེ་ཝི་པ་དག་ལ་འདི་ལྟར། ཁྱོད་ཚོས་དཀོན་མཆོག་གི་དམ་པའི་ཤུར་སྒམ་ནི་ཡེས་ར་ཨེལ་གྱི་རྒྱལ་པོ་དཱ་བིད་ཀྱི་སྲས་སོ་ལོ་མོན་གྱིས་བཞེངས་པའི་མཆོད་ཁང་དུ་འཇོག་པ་ལས་ཡང་བསྐྱར་ཕྲག་ལ་འཁུར་མི་དགོས་ཏེ། ད་ལྟ་ཁྱོད་ཚོས་རང་གི་དཀོན་མཆོག་ཡ་ཝཱེ་དང་ཁོང་གི་འབངས་མི་ཡེས་ར་ཨེལ་ལ་ཞབས་ཕྱི་བསྒྲུབ་དགོས།
2CH 35:4 ཁྱོད་ཚོས་རང་གི་ཁྱིམ་རྒྱུད་དང་ལས་རེས་བཞིན་དང་། ཡེས་ར་ཨེལ་གྱི་རྒྱལ་པོ་དཱ་བིད་ཀྱི་མདོ་དང་ཁོང་གི་སྲས་སོ་ལོ་མོན་གྱིས་ཡི་གེར་བཀོད་པ་ལྟར་གྲ་སྒྲིག་བྱེད་དགོས།
2CH 35:5 ཁྱོད་ཚོ་རང་རང་གི་ཉེ་འབྲེལ་ཏེ། མི་སེར་དཀྱུས་མའི་ཁྱིམ་རྒྱུད་ཀྱི་ལས་རེས་ལྟར་དམ་པའི་གནས་སུ་ལངས་སྡོད་དགོས་ལ། ལས་རེས་རེ་རེར་ལེ་ཝིའི་ཁྱིམ་རྒྱུད་ཀྱི་མི་ཁ་ཤས་ཡོད་དགོས།
2CH 35:6 ཁྱོད་ཚོས་པེ་སག་དུས་ཆེན་གྱི་ལུ་གུ་བཤས་ནས་རང་ཉིད་དམ་པར་བྱེད་དགོས་ལ། རང་གི་ཉེ་འབྲེལ་གྱི་ཆེད་དུ་ཐམས་ཅད་གྲ་སྒྲིག་བྱེད་པ་དང་། དཀོན་མཆོག་ཡ་ཝཱེས་མོ་ཤེ་བརྒྱུད་ནས་གསུངས་པའི་བཀའ་བརྩི་དགོས་ཞེས་སྨྲས།
2CH 35:7 དེ་ནས་ཡོ་ཤི་ཡཱ་ཡིས་ལུ་གུ་དང་རེའུ་བསྡོམས་པས་ཁྲི་གསུམ་དང་། གླང་ཐུག་སུམ་སྟོང་བཅས་གནས་དེར་ཡོད་པའི་མི་ཐམས་ཅད་ལ་པེ་སག་གི་མཆོད་པ་འབུལ་བའི་ཆེད་དུ་གནང་སྟེ། འདི་ཐམས་ཅད་ནི་རྒྱལ་པོ་རང་ཉིད་ཀྱི་རྒྱུ་ནོར་ཡིན་ནོ། །
2CH 35:8 ཡོ་ཤི་ཡཱའི་ལག་འོག་གི་འགོ་དཔོན་རྣམས་ཀྱིས་ཀྱང་མཆོད་རྫས་དག་མི་རྣམས་དང་མཆོད་དཔོན། ལེ་ཝི་པ་བཅས་ལ་རང་མོས་ཀྱིས་སྤྲད་ཅིང་། ཡང་དཀོན་མཆོག་གི་མཆོད་ཁང་གི་སྤྱི་གཉེར་ཏེ་ཧིལ་ཀི་ཡཱ་དང་ཟཱ་ཀར་ཡ། ཡེ་ཧི་ཨེལ་བཅས་ཀྱིས་ཀྱང་ལུ་གུ་ཉིས་སྟོང་དྲུག་བརྒྱ་དང་གླང་ཐུག་སུམ་བརྒྱ་པེ་སག་དུས་ཆེན་གྱི་མཆོད་རྫས་སུ་མཆོད་དཔོན་ལག་ཏུ་བཞག
2CH 35:9 ལེ་ཝི་པའི་འགོ་དཔོན་ཀོ་ནན་ཡཱ་དང་། དེའི་སྤུན་ཤེ་མ་ཡཱ་དང་ནེ་ཐན་ཨེལ་བཅས་དང་། ཧ་ཤབ་ཡཱ་དང་ཡེ་ཨི་ཨེལ། ཡོ་ཟཱ་བད་བཅས་ཀྱིས་ཀྱང་ལུ་གུ་ལྔ་སྟོང་དང་གླང་ཐུག་ལྔ་བརྒྱ་པེ་སག་དུས་ཆེན་གྱི་མཆོད་རྫས་སུ་ལེ་ཝི་པའི་ལག་ཏུ་བཞག
2CH 35:10 དེ་ལྟར་ཞབས་ཕྱི་སྒྲུབ་པའི་ལས་ཡོངས་གྲ་སྒྲིག་བྱས་ཚར་རྗེས། རྒྱལ་པོའི་བཀའ་བཞིན་ཏུ་མཆོད་དཔོན་རྣམས་རང་རང་གི་ལས་གནས་སུ་འགྲེང་པ་དང་། ལེ་ཝི་པ་རྣམས་ཀྱང་རང་རང་གི་ལས་རེས་བཞིན་ལངས་ནས་བསྡད།
2CH 35:11 ལེ་ཝི་པ་རྣམས་ཀྱིས་པེ་སག་དུས་ཆེན་ལ་གྲ་སྒྲིག་བྱས་བའི་ལུ་གུ་བཤས་ཏེ། ལེ་ཝི་པས་པགས་པ་བཤུས་པ་དང་། མཆོད་དཔོན་རྣམས་ཀྱིས་དེ་ཚོའི་ལག་ནས་ལུ་གུའི་ཁྲག་བླངས་ཏེ་མཆོད་ཁྲིའི་ཁར་གཏོར་རྗེས།
2CH 35:12 སྦྱིན་སྲེག་གི་ཤ་རྣམས་ཁྱེར་ནས་ཁྱིམ་རྒྱུད་སོ་སོའི་ནང་ཚན་བཞིན་མི་ཀུན་ལ་བགོས་ཏེ། མོ་ཤེས་བཀོད་པའི་བཀའ་ཁྲིམས་ལྟར་དཀོན་མཆོག་ཡ་ཝཱེ་ལ་མཆོད་པ་ཕུལ་བ་དང་། གླང་ཐུག་རྣམས་ཀྱང་དེ་ལྟར་ཕུལ་ཏོ། །
2CH 35:13 ཡང་ལུགས་སྲོལ་ལྟར་པེ་སག་དུས་ཆེན་ལ་བཤས་པའི་ལུ་གུ་མེས་བསྲེགས་ཏེ། མཆོད་རྫས་དམ་པ་གཞན་དག་ནི་ཁོ་ཚོས་རྫ་ཁོག་དང་སླ་ང་དང་། བསྲེགས་སླང་སོགས་ཀྱི་ནང་དུ་བཙོས་ནས་མྱུར་བ་མྱུར་དུ་མི་རྣམས་ལ་སྤྲད།
2CH 35:14 དེ་ནས་ཁོ་ཚོས་ད་གཟོད་རང་ཉིད་དང་མཆོད་དཔོན་རྣམས་ཀྱི་ཆེད་དུ་མཆོད་རྫས་གྲ་སྒྲིག་བྱས་ཏེ། ཅི་ལ་ཞེ་ན། མཆོད་དཔོན་ཨ་རོན་གྱི་བུ་རབས་ཚ་རྒྱུད་རྣམས་ཀྱིས་དགོང་མོའི་བར་དུ་སྦྱིན་སྲེག་དང་ཚིལ་འབུལ་དགོས་པས། ལེ་ཝི་པ་རྣམས་ཀྱིས་རང་ཉིད་དང་མཆོད་དཔོན་ཨ་རོན་གྱི་བུ་རབས་ཚ་རྒྱུད་དག་ལ་མཆོད་རྫས་གྲ་སྒྲིག་བྱས།
2CH 35:15 བསྟོད་དབྱངས་འབུལ་མཁན་ཨ་སབ་ཀྱི་བུ་རབས་ཚ་རྒྱུད་རྣམས་ཀྱིས་དཱ་བིད་དང་ཨ་སབ། ཧེ་མཱན། རྒྱལ་པོའི་མངོན་ཤེས་པ་ཡེ་དུ་ཐུན་བཅས་ཀྱིས་བསྒོས་པ་བཞིན། རང་རང་གི་ལས་གནས་སུ་བསྡད་ཅིང་། སྒོ་སྲུང་རྣམས་ཀྱིས་སྒོ་རྣམས་སྲུང་བ་ལས་རང་ཉིད་ཀྱི་ལས་འགན་དང་འབྲལ་མི་དགོས་ཏེ། ཅི་ལ་ཞེ་ན། ཁོ་ཚོའི་ཉེ་འབྲེལ་ལེ་ཝི་པ་རྣམས་ཀྱིས་ཁོ་ཚོའི་དོན་དུ་མཆོད་རྫས་གྲ་སྒྲིག་བྱས་པ་རེད།
2CH 35:16 དེ་བཞིན་ཉིན་དེར་དཀོན་མཆོག་ཡ་ཝཱེ་ལ་ཞབས་ཏོག་སྒྲུབ་པའི་ལས་འགན་ཐམས་ཅད་བཀོད་སྒྲིག་བརྒྱབ་པ་དང་། རྒྱལ་པོ་ཡོ་ཤི་ཡཱ་ཡིས་བསྒོས་པ་བཞིན་པེ་སག་དུས་ཆེན་བསྲུངས་ཤིང་། ད་དུང་དཀོན་མཆོག་ཡ་ཝཱེའི་མཆོད་ཁྲི་སྟེང་དུ་སྦྱིན་སྲེག་ཕུལ།
2CH 35:17 སྐབས་དེར་གནས་དེ་རུ་ཡོད་པའི་ཡེས་ར་ཨེལ་པ་རྣམས་ཀྱིས་པེ་སག་དུས་ཆེན་བསྲུངས་པ་དང་། ཡང་ཉིན་བདུན་ལ་སྐྱུར་མེད་བག་ལེབ་ཀྱི་དུས་ཆེན་བསྲུངས།
2CH 35:18 ལུང་སྟོན་པ་སཱ་མུ་ཨེལ་བྱུང་བ་ནས་བཟུང་། ཡེས་ར་ཨེལ་གྱི་ནང་དུ་སུས་ཀྱང་པེ་སག་དུས་ཆེན་དེ་ལྟ་བུ་བསྲུངས་མ་མྱོང་སྟེ། ཡོ་ཤི་ཡཱ་དང་མཆོད་དཔོན་རྣམས། ལེ་ཝི་པ་རྣམས། ཡ་ཧུ་དཱ་པ་ཐམས་ཅད་དང་གནས་དེར་འཛོམས་པའི་ཡེས་ར་ཨེལ་པ་རྣམས་བཅས་དང་། ད་དུང་ཡེ་རུ་སཱ་ལེམ་དུ་སྡོད་པའི་ཡུལ་མི་དག་གིས་པེ་སག་དུས་ཆེན་བསྲུངས་པ་ལྟར་ཡེས་ར་ཨེལ་གྱི་རྒྱལ་པོ་རྣམས་ཀྱིས་ཀྱང་བསྲུངས་མ་མྱོང་ངོ་། །
2CH 35:19 པེ་སག་དུས་ཆེན་དེ་ནི་ཡོ་ཤི་ཡཱ་རྒྱལ་པོར་བསྡད་པའི་ལོ་བཅོ་བརྒྱད་པ་ལ་བསྲུངས་པ་ཡིན།
2CH 35:20 ཡོ་ཤི་ཡཱ་ཡིས་མཆོད་ཁང་གི་ཆེད་དུ་ལས་ཀ་ཡོད་ཚད་བསྒྲུབས་ཚར་རྗེས། ཨེ་ཅིབ་ཀྱི་རྒྱལ་པོ་ནེ་ཀོ་ཡར་འོངས་ཏེ། ཕི་རཱད་ཆུ་བོ་དང་ཉེ་བའི་ཀར་ཀེ་མི་སི་གྲོང་ཁྱེར་ལ་དམག་དྲངས་པ་དང་། ཡོ་ཤི་ཡཱ་ཕྱི་རུ་ཁོ་དང་འགྲན་དུ་སོང་།
2CH 35:21 ནེ་ཀོ་ཡིས་ཡོ་ཤི་ཡཱ་ཡི་རྩར་བང་ཆེན་མངགས་ཏེ་ན་རེ། ཡ་ཧུ་དཱའི་རྒྱལ་པོ་ལགས། བདག་ནི་ཁྱོད་དང་འབྲེལ་བ་ཅི་ཡོད་དམ། བདག་ནི་དེ་རིང་ཁྱོད་དང་དམག་རྒྱག་ཏུ་འོངས་པ་མིན་ལ། བདག་དང་འཐབ་པའི་རྒྱལ་ཁམས་ལ་དམག་རྒྱག་ཏུ་འོངས་ཏེ། དེ་ནི་དཀོན་མཆོག་གིས་བདག་ལ་བསྐུལ་བ་ཡིན་པས། ཁྱོད་ཀྱིས་བདག་དང་མཉམ་དུ་བཞུགས་པའི་དཀོན་མཆོག་ལ་ངོ་རྒོལ་མ་བྱེད་ཅིག ཅི་ལ་ཞེ་ན། ཁོང་གིས་ཁྱོད་རང་མེད་པར་མི་མཛད་པའི་ཆེད་དུ་ཡིན་ནོ་ཞེས་སྨྲས་ནའང་།
2CH 35:22 ཡོ་ཤི་ཡཱ་ཁོ་དང་མི་འབྲལ་བར་མ་ཟད། ཆས་གོས་བསྒྱུར་ནས་ཁོ་དང་དམག་རྒྱག་པར་བརྩམས་ཤིང་དཀོན་མཆོག་གིས་ནེ་ཀོ་བརྒྱུད་ནས་གསུངས་པའི་བཀའ་ལ་མ་མཉན་པར། མེ་གིད་དོ་བདེ་ཐང་དུ་འོངས་ཏེ་ནེ་ཀོ་དང་དམག་བརྒྱབ།
2CH 35:23 མདའ་བའི་མདའ་ཡོ་ཤི་ཡཱ་ལ་ཕོག་སྟེ། རྒྱལ་པོས་རང་གི་འཁོར་གཡོག་ལ་འདི་ལྟར། བདག་ལ་རྨས་སྐྱོན་ཚབས་ཆེན་བྱུང་བས་ཁྱོད་ཚོས་ང་རང་གཡུལ་ས་ནས་ཁྱེར་ཅིག་ཅེས་བསྒོས་པ་ན།
2CH 35:24 ཁོང་གི་འཁོར་གཡོག་རྣམས་ཀྱིས་ཁོ་རང་བསྐྱོར་ནས་ཤིང་རྟ་ལས་འབབ་དུ་བཅུག་སྟེ། ཡང་ཤིང་རྟ་གཞན་ཞིག་ལ་བསྡད་དེ་ཡེ་རུ་སཱ་ལེམ་དུ་བསྐྱལ་བ་ན། ཁོང་ཚེ་ལས་འདས་པ་དང་རང་གི་ཕ་མེས་ཀྱི་དུར་ལ་སྦས། ཡ་ཧུ་དཱ་དང་ཡེ་རུ་སཱ་ལེམ་གྱི་མི་ཐམས་ཅད་ཀྱིས་ཡོ་ཤི་ཡཱའི་ཆེད་དུ་མྱ་ངན་བྱས་སོ། །
2CH 35:25 ཡེ་རེམ་ཡཱ་ཡིས་ཡོ་ཤི་ཡཱའི་དོན་དུ་སྐྱོ་གླུ་བརྩམས་པ་དང་། མགུར་ལེན་མཁན་སྐྱེས་ཕོ་མོ་ཡོད་ཚད་ཀྱིས་སྐྱོ་གླུ་ལངས་ནས་དེ་རིང་གི་བར་དུ་ཡོ་ཤི་ཡཱ་ལ་མྱ་ངན་བྱས། དེ་ནི་ཐ་ན་ཡེས་ར་ཨེལ་གྱི་ནང་དུ་རྒྱུན་སྲོལ་ཞིག་ཏུ་ཆགས། ལྟོས་ཤིག དེ་དག་ནི་སྐྱོ་གླུའི་མདོ་རུ་བཀོད་ཡོད།
2CH 35:26 ཡང་ཡོ་ཤི་ཡཱའི་མཛད་རྗེས་གཞན་དག་དང་། ཁོང་གིས་དཀོན་མཆོག་ཡ་ཝཱེའི་བཀའ་ཁྲིམས་ལྟར་བསྒྲུབས་པའི་ལས་བཟང་པོ་ཐམས་ཅད་དང་།
2CH 35:27 ད་དུང་ཁོང་གི་མཛད་རྗེས་རྣམས་འགོ་ནས་མཇུག་བར་དུ་ཡེས་ར་ཨེལ་དང་ཡ་ཧུ་དཱའི་རྒྱལ་རབས་ནང་དུ་བཀོད་ཡོད་དོ། །
2CH 36:1 དེ་ནས་ཡ་ཧུ་དཱའི་ཡུལ་མི་རྣམས་ཀྱིས་ཡོ་ཤི་ཡཱའི་སྲས་ཡེ་ཧོ་ཨ་ཧཱ་ཟི་ཁོའི་ཡབ་ཀྱི་ཚབ་ཏུ་ཡེ་རུ་སཱ་ལེམ་ནས་རྒྱལ་པོར་བསྐོས།
2CH 36:2 ཡེ་ཧོ་ཨ་ཧཱ་ཟི་རྒྱལ་པོར་བཞུགས་དུས་སུ་དགུང་ལོ་ཉེར་གསུམ་ཡིན་པ་དང་། ཡེ་རུ་སཱ་ལེམ་དུ་ཟླ་གསུམ་གྱི་རིང་ལ་རྒྱལ་སྲིད་བསྐྱངས།
2CH 36:3 དེ་ནས་ཨེ་ཅིབ་ཀྱི་རྒྱལ་པོ་ཡེ་རུ་སཱ་ལེམ་དུ་འོངས་ནས་ཁོང་ཁྲི་ལས་ཕབ་སྟེ། ཡུལ་དེར་དངུལ་གྱི་རྡོ་ཚད་བརྒྱ་དང་། གསེར་གྱི་རྡོ་ཚད་གཅིག་གི་དཔྱ་ཁྲལ་བཀལ།
2CH 36:4 ཡང་ཨེ་ཅིབ་ཀྱི་རྒྱལ་པོ་ནེ་ཀོ་བྱ་བས་ཡེ་ཧོ་ཨ་ཧཱ་ཟིའི་གཅེན་པོ་ཨེལ་ཡ་ཀིམ་ཞེས་པ་ཡ་ཧུ་དཱ་དང་ཡེ་རུ་སཱ་ལེམ་གྱི་རྒྱལ་པོར་བསྐོས་ནས། དེའི་མིང་བརྗེས་ནས་ཡེ་ཧོ་ཡཱ་ཀིམ་ཞེས་བཏགས། ནེ་ཀོས་ཡེ་ཧོ་ཡཱ་ཀིམ་གྱི་གཅེན་པོ་ཡེ་ཧོ་ཨ་ཧཱ་ཟི་བཟུང་ནས་ཨེ་ཅིབ་ཏུ་ཁྲིད་དོ། །
2CH 36:5 ཡེ་ཧོ་ཡཱ་ཀིམ་རྒྱལ་པོར་སྡོད་དུས་སུ་ལོ་ཉེར་ལྔ་ཡིན་པ་དང་། ཁོས་ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས། ཁོས་རང་གི་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད་ཅིང་།
2CH 36:6 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ཡར་འོངས་ནས་དེ་ལ་དམག་དྲངས་ཤིང་། ཁོ་རང་ལྕགས་སྒྲོག་བརྒྱབས་ནས་པཱ་པེལ་ལོན་དུ་ཁྲིད།
2CH 36:7 ནེ་བོ་ཀད་ནེ་ཙར་གྱིས་དཀོན་མཆོག་ཡ་ཝཱེའི་མཆོད་ཁང་ནང་གི་སྣོད་ཆས་འགའ་ཞིག་པཱ་པེལ་ལོན་དུ་ཁྱེར་ནས་རང་གི་ལྷ་ཁང་དུ་བཞག
2CH 36:8 ཡང་ཡེ་ཧོ་ཡཱ་ཀིམ་གྱི་བྱས་རྗེས་གཞན་དག་དང་། ཞེན་ལོག་གི་སྤྱོད་པ་རྣམས་དང་ཁོའི་གསང་བ་རྣམས་ནི་ཐམས་ཅད་ཡེས་ར་ཨེལ་དང་ཡ་ཧུ་དཱའི་རྒྱལ་རབས་ཀྱི་ནང་དུ་བཀོད་ཡོད། ཁོའི་སྲས་ཡེ་ཧོ་ཡཱ་ཀིན་ཁོའི་ཚབ་ཏུ་རྒྱལ་པོར་གྱུར།
2CH 36:9 ཡེ་ཧོ་ཡཱ་ཀིན་རྒྱལ་པོར་སྡོད་དུས་སུ་ལོ་བརྒྱད་ཡིན་པ་དང་། ཡེ་རུ་སཱ་ལེམ་དུ་ཟླ་གསུམ་དང་ཞག་བཅུའི་རིང་ལ་རྒྱལ་སྲིད་བསྐྱངས། ཁོས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་སྤྱད།
2CH 36:10 དཔྱིད་ཀའི་དུས་སུ། རྒྱལ་པོ་ནེ་བོ་ཀད་ནེ་ཙར་གྱིས་མི་མངགས་ནས། དཀོན་མཆོག་ཡ་ཝཱེའི་མཆོད་ཁང་ནང་གི་ཡོ་བྱད་རྩ་ཆེན་རྣམས་དང་བཅས་སུ་ཁོ་རང་པཱ་པེལ་ལོན་དུ་ཁྲིད་དེ། དེའི་ཁུ་བོ་ ཚིད་ཀི་ཡཱ་ནི་ཡ་ཧུ་དཱ་དང་ཡེ་རུ་སཱ་ལེམ་གྱི་རྒྱལ་པོར་བསྐོས།
2CH 36:11 ཚིད་ཀི་ཡཱ་རྒྱལ་པོར་སྡོད་དུས་སུ་ལོ་ཉེར་གཅིག་ཡིན་པ་དང་། ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས།
2CH 36:12 དེས་ཡ་ཝཱེ་རང་གི་དཀོན་མཆོག་གི་སྤྱན་སྔར་ངན་པ་གང་ཡིན་སྤྱད་དེ། ལུང་སྟོན་པ་ཡེ་རེམ་ཡཱ་ཡིས་དཀོན་མཆོག་ཡ་ཝཱེའི་བཀའ་ལ་བརྟེན་ནས་ཁོ་ལ་ཉེན་བརྡ་བཏང་ཡང་ཁོས་ཁེངས་སྐྱུང་མ་བྱས་ལ།
2CH 36:13 རྒྱལ་པོ་ནེ་བོ་ཀད་ནེ་ཙར་གྱིས་དེ་སྔར་ཁོ་ལ་དཀོན་མཆོག་དཔང་དུ་བཙུགས་ནས་མནའ་སྐྱེལ་དུ་བཅུག་ཀྱང་། ཁོས་དེ་ལའང་ངོ་ལོག་བྱས། ཁོ་ནི་ཨུ་ཚུགས་ཆེ་ཞིང་གཤིས་གྱོང་ཡིན་ཏེ། ཡེས་ར་ཨེལ་གྱི་དཀོན་མཆོག་ཡ་ཝཱེའི་ཕྱོགས་སུ་མ་འཁོར་ཏོ། །
2CH 36:14 དེ་མིན་མཆོད་དཔོན་ཆེན་པོ་རྣམས་དང་མི་ཐམས་ཅད་ཀྱང་སྔར་ལས་ལྷག་པར་དཀོན་མཆོག་དང་འགལ་ནས། ཕྱི་རོལ་པའི་ཞེན་ལོག་གི་བྱ་བ་ཐམས་ཅད་ཀྱི་རྗེས་སུ་འབྲངས་ནས་སྡིག་པ་ཚབས་ཆེན་བྱས་ཏེ། ཡེ་རུ་སཱ་ལེམ་དུ་དམ་པར་མཛད་པའི་དཀོན་མཆོག་ཡ་ཝཱེའི་མཆོད་ཁང་དེ་མི་གཙང་བར་བྱས།
2CH 36:15 ཁོ་ཚོའི་ཕ་མེས་ཀྱི་དཀོན་མཆོག་ཡ་ཝཱེས་ཉིད་ཀྱི་འབངས་མི་དང་བཞུགས་གནས་ལ་ཐུགས་བརྩེ་བར་དགོངས་པས། རྟག་ཏུ་ཉིད་ཀྱི་ལུང་སྟོན་པ་རྣམས་དེ་དག་གི་རྩར་མངགས་ནས་ཉེན་བརྡ་བཏང་མོད།
2CH 36:16 འོན་ཀྱང་དེ་དག་གིས་དཀོན་མཆོག་གི་ལུང་སྟོན་པ་རྣམས་ལ་འཕྱས་ཏེ་ཁོང་གི་བཀའ་སྣང་མེད་དུ་བཞག་ཅིང་། ཁོང་གི་ལུང་སྟོན་པ་དག་ལ་སྨད་པས། དཀོན་མཆོག་ཡ་ཝཱེའི་ཐུགས་ཁྲོ་ཁོང་གི་འབངས་མིའི་སྟེང་དུ་བབས་ནས་མཐར་སྐྱོབ་ཐབས་བྲལ་བའི་གནས་སུ་ལྷུང་།
2CH 36:17 དཀོན་མཆོག་ཡ་ཝཱེས་ཀལ་དི་པའི་རྒྱལ་པོ་ཡར་འོངས་ནས་དེ་དག་ལ་རྒོལ་བར་མཛད་པ་དང་། རྒྱལ་པོས་ཀྱང་ཁོ་ཚོའི་གནས་མཆོག་ཏུ་དར་མ་རྣམས་རལ་གྲིས་བསད་དེ། ཕོ་མོ་ན་གཞོན་དང་རྒན་པ་རྣམས་ལ་ཡང་སྙིང་རྗེ་མ་བྱས་པར་། ཁོང་གིས་ཐམས་ཅད་དེའི་ལག་ཏུ་གཏད་པ་ཡིན།
2CH 36:18 དེས་དཀོན་མཆོག་གི་མཆོད་ཁང་དུ་ཡོད་པའི་ཡོ་བྱད་ཆེ་ཆུང་གང་ཡིན་ཐམས་ཅད་དང་། དཀོན་མཆོག་ཡ་ཝཱེའི་མཆོད་ཁང་གི་ནོར་བུ་རྣམས་དང་། རྒྱལ་པོ་དང་དེའི་སྐུ་དྲག་རྣམས་ཀྱི་རྒྱུ་ནོར་ཐམས་ཅད་པཱ་པེལ་ལོན་དུ་ཁྱེར་ཏེ།
2CH 36:19 ཀལ་དི་པས་དཀོན་མཆོག་གི་མཆོད་ཁང་མེར་བསྲེགས་པ་དང་། ཡེ་རུ་སཱ་ལེམ་གྱི་མཁར་རྣམས་ཀྱང་བཤིགས་ཤིང་། གྲོང་ཁྱེར་ནང་དུ་ཡོད་པའི་ཕོ་བྲང་ཀུན་མེས་བསྲེགས་ནས། གྲོང་ཁྱེར་ནང་གི་སྣོད་ཆས་རྩ་ཆེན་ཐམས་ཅད་མེད་པར་བཟོས་པ་རེད།
2CH 36:20 གྲི་ལས་ཐར་བ་རྣམས་བཟུང་སྟེ་ཀལ་དིའི་རྒྱལ་པོས་པཱ་པེལ་ལོན་དུ་བཙན་ཁྲིད་བྱས་ནས། ཏ་ཟིག་གི་རྒྱལ་སྲིད་དར་རྒྱས་སུ་ཕྱིན་པའི་བར་དུ། དེ་དག་ནི་ཁོ་དང་ཁོའི་བུ་རྒྱུད་རྣམས་ཀྱི་བྲན་ཏུ་བཀོལ།
2CH 36:21 འདི་ནི་དཀོན་མཆོག་ཡ་ཝཱེས་ཡེ་རེམ་ཡཱ་བརྒྱུད་ནས་གསུངས་པ་དེ་བཞིན་དུ། ལོ་བདུན་ཅུ་རྫོགས་རིང་བར་དུ། ཡུལ་ཁམས་ལ་ངལ་གསོ་ཐོབ་པ་སྟེ། ས་རྒོད་དུ་ལུས་པའི་དུས་སུ་ཡུལ་ཁམས་ལ་ངལ་གསོ་ཐོབ་པ་ཡིན་ཞེས་གསུངས་པས་སོ། །
2CH 36:22 དེ་ནས་ཏ་ཟིག་གི་རྒྱལ་པོ་ཀོ་རེས་ཀྱི་ལོ་དང་པོར། དཀོན་མཆོག་ཡ་ཝཱེས་ཁོང་ཉིད་ཀྱི་བཀའ་སྟེ་ཡེ་རེམ་ཡཱའི་ངག་བརྒྱུད་ནས་གསུངས་པ་དེ་འགྲུབ་པར་མཛད་པའི་ཕྱིར། ཏ་ཟིག་གི་རྒྱལ་པོ་ཀོ་རེས་ལ་ཡི་གེར་བཀོད་དེ་རང་གི་རྒྱལ་ཁམས་ཡོངས་ལ་ཁྱབ་བསྒྲགས་བྱེད་པར་སྐུལ་མ་གནང་ནས་འདི་ལྟར་བྲིས་པ་སྟེ།
2CH 36:23 ཏ་ཟིག་གི་རྒྱལ་པོ་ཀོ་རེས་ཀྱིས་འདི་ལྟར། ནམ་མཁའི་དཀོན་མཆོག་ཡ་ཝཱེས་ས་གཞིའི་རྒྱལ་ཁམས་ཐམས་ཅད་བདག་ལ་གནང་བ་དང་། ཁོང་གིས་བདག་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་དུ་ཁོང་གི་ཕྱིར་མཆོད་ཁང་ཞིག་བཞེང་བར་བསྐོས་པ་ཡིན། ཁྱོད་ཅག་གི་ཁྲོད་དུ་ཡོད་པའི་ཁོང་གི་མི་ཐམས་ཅད་ཡར་སོང་ཆོག་སྟེ། ཁོའི་དཀོན་མཆོག་ཡ་ཝཱེ་ནི་ཁོ་དང་མཉམ་དུ་བཞུགས་པར་ཤོག་ཅེས་གསུངས་པའོ།། །།
EZR 1:1 དེ་ཡང་ཏ་ཟིག་གི་རྒྱལ་པོ་ཀོ་རེས་ཀྱི་སྲིད་ལོ་དང་པོར། དཀོན་མཆོག་ཡ་ཝཱེས་ཁོང་ཉིད་ཀྱི་བཀའ་སྟེ་ཡེ་རེམ་ཡཱའི་ངག་བརྒྱུད་ནས་གསུངས་པ་དེ་འགྲུབ་པར་མཛད་པའི་ཕྱིར། ཏ་ཟིག་གི་རྒྱལ་པོ་ཀོ་རེས་ལ་ཡི་གེར་བཀོད་དེ་རང་གི་རྒྱལ་ཁམས་ཡོངས་ལ་ཁྱབ་བསྒྲགས་བྱེད་པར་སྐུལ་མ་གནང་ནས་འདི་ལྟར་བྲིས་པ་སྟེ།
EZR 1:2 ཏ་ཟིག་གི་རྒྱལ་པོ་ཀོ་རེས་ཀྱིས་འདི་ལྟར། ནམ་མཁའི་དཀོན་མཆོག་ཡ་ཝཱེས་ས་གཞིའི་རྒྱལ་ཁམས་ཐམས་ཅད་བདག་ལ་གནང་བ་དང་། ཁོང་གིས་བདག་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་དུ་ཁོང་གི་ཕྱིར་མཆོད་ཁང་ཞིག་བཞེང་བར་བསྐོས་པ་ཡིན།
EZR 1:3 ཁྱོད་ཅག་གི་ཁྲོད་དུ་དཀོན་མཆོག་གི་འབངས་མི་གང་དང་གང་ཡོད་ན། ཁོ་ཚོའི་དཀོན་མཆོག་དེ་དག་དང་མཉམ་དུ་བཞུགས་པར་ཤོག དེ་དག་ཡ་ཧུ་དཱ་ཡུལ་གྱི་ཡེ་རུ་སཱ་ལེམ་དུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བར་ཡར་འགྲོ་རུ་ཆུག ཁོང་ནི་ཡེ་རུ་སཱ་ལེམ་དུ་བཞུགས་པའི་དཀོན་མཆོག་ཡིན།
EZR 1:4 གནས་དེའི་མི་ཡིས་གསེར་དང་དངུལ། རྒྱུ་ནོར། ཕྱུགས་ཟོག་བཅས་ཀྱིས་གང་ས་གང་དུ་སྡོད་པའི་མི་ལྷག་ལུས་རྣམས་ལ་རོགས་བྱེད་དགོས། དེར་མ་ཟད་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་དུ་ཡིད་མོས་མཆོད་པ་འབུལ་དགོས་ཞེས་བཀའ་བསྩལ།
EZR 1:5 དེ་ནས་ཡ་ཧུ་དཱ་དང་། པེན་ཡཱ་མེན་གྱི་ཚོ་དཔོན་དང་། མཆོད་དཔོན་རྣམས། ལེ་ཝི་པ་རྣམས་ཏེ་དཀོན་མཆོག་ནས་སེམས་འགུལ་ཐེབས་པ་ཐམས་ཅད་ཡར་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བར་ཕྱིན།
EZR 1:6 ཡང་ཕྱོགས་བཞིར་གནས་པ་རྣམས་ཀྱིས་དངུལ་གྱི་ཡོ་བྱད་དང་གསེར། རྒྱུ་ནོར། ཕྱུགས་ཟོག རིན་པོ་ཆེ་བཅས་ཀྱིས་རྒྱབ་སྐྱོར་བྱས་པར་མ་ཟད། རང་མོས་ཀྱིས་འབུལ་བ་སྣ་ཚོགས་ཕུལ་ཞིང་།
EZR 1:7 རྒྱལ་པོ་ཀོ་རེས་ཀྱིས་དཀོན་མཆོག་ཡ་ཝཱེའི་མཆོད་ཁང་གི་སྣོད་ཆས་རྣམས་ཕྱིར་བཏོན་པ་དང་། སྣོད་ཆས་དེ་དག་ནི་སྔར་རྒྱལ་པོ་ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་ནས་ཁྱེར་ཅིང་རང་གི་ལྷ་ཁང་དུ་བཞག་པ་རྣམས་ཡིན་ཏེ།
EZR 1:8 ཏ་ཟིག་གི་རྒྱལ་པོ་ཀོ་རེས་ཀྱིས་ཕྱག་མཛོད་མིད་རེ་དད་མངགས་ཏེ་སྣོད་ཆས་དེ་རྣམས་ཕྱིར་བླངས་ནས་ཡ་ཧུ་དཱའི་འགོ་དཔོན་ཤེ་སཱ་པ་ཙར་ལ་རྩིས་སྤྲད་པ་རེད།
EZR 1:9 དེ་དག་གི་བསྡོམས་གྲངས་ནི་འདི་ལྟ་སྟེ། གསེར་གྱི་གསོལ་སྡེར་སུམ་ཅུ་དང་། དངུལ་གྱི་གསོལ་སྡེར་ཆིག་སྟོང་། གྲི་ཉེར་དགུ།
EZR 1:10 གསེར་གྱི་ཕོར་བ་སུམ་ཅུ། དངུལ་གྱི་ཕོར་བ་དམིགས་རྟེན་བཞི་བརྒྱ་དང་བཅུ། སྣོད་ཆས་གཞན་པའི་རིགས་ཆིག་སྟོང་བཅས་ཡོད།
EZR 1:11 གསེར་དང་དངུལ་གྱི་སྣོད་ཆས་ཐམས་ཅད་བསྡོམས་པས་ལྔ་སྟོང་བཞི་བརྒྱ་ཡོད། བཙོན་དུ་ཁྲིད་པའི་མི་རྣམས་པཱ་པེལ་ལོན་ནས་ཡེ་རུ་སཱ་ལེམ་དུ་འོང་དུས། ཤེ་སཱ་པ་ཙར་གྱིས་སྣོད་ཆས་འདི་ཐམས་ཅད་ཀྱང་ཁྱེར་འོངས་སོ། །
EZR 2:1 ཡ་ཧུ་དཱ་ཡུལ་གྱི་མི་འདི་རྣམས་ནི་སྔར་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་པཱ་པེལ་ལོན་ལ་བཙོན་དུ་ཁྲིད་པ་དང་། ད་ལྟ་ཁོ་རྣམས་བཙན་ཁྲིད་བྱས་པའི་ཡུལ་ནས་ཡར་ཐོན་ཏེ་ཡེ་རུ་སཱ་ལེམ་དང་ཡ་ཧུ་དཱའི་ཡུལ་དུ་སོ་སོའི་གནས་སུ་ཕྱིར་ལོག་པ་ནི་འདི་ལྟ་སྟེ།
EZR 2:2 ཁོ་ཚོ་ནི་ཟེ་རུ་པཱ་པེལ་དང་། ཡེ་ཤུ་ཨ། ནེ་ཧེམ་ཡཱ། སེ་ར་ཡཱ། རེ་ཨེ་ལ་ཡཱ། མོར་དོ་ཀཱ་ཡི། པིལ་ཤན། མིས་ཕར། པིག་ཝ་ཨི། རེ་ཧུམ། པ་ཨ་ནཱ་བཅས་མཉམ་དུ་ཕྱིར་ལོག་པ་སྟེ། ཡེས་ར་ཨེལ་གྱི་སྐྱེས་པ་རྣམས་ཀྱི་བསྡོམས་གྲངས་ནི།
EZR 2:3 ཕཱར་ཨོ་སིའི་བུ་རྒྱུད་ཉིས་སྟོང་བརྒྱ་དང་བདུན་ཅུ་དོན་གཉིས་ཡོད།
EZR 2:4 ཤེ་ཕད་ཡཱ་ཡི་བུ་རྒྱུད་སུམ་བརྒྱ་དང་བདུན་ཅུ་དོན་གཉིས་ཡོད།
EZR 2:5 ཨ་རཱའི་བུ་རྒྱུད་བདུན་བརྒྱ་དང་བདུན་ཅུ་དོན་ལྔ་ཡོད།
EZR 2:6 ཕཱ་ཧད་མོ་ཨབ་ཀྱི་རུས་རྒྱུད་དེ། ཡེ་ཤུ་ཨ་དང་ཡོ་ཨབ་ཀྱི་བུ་རྒྱུད་ཉིས་སྟོང་བརྒྱད་བརྒྱ་བཅུ་གཉིས་ཡོད།
EZR 2:7 ཨེ་ལཱམ་གྱི་བུ་རྒྱུད་ཆིག་སྟོང་ཉིས་བརྒྱ་ལྔ་བཅུ་ང་བཞི་ཡོད།
EZR 2:8 ཟད་ཐུའི་བུ་རྒྱུད་དགུ་བརྒྱ་དང་བཞི་བཅུ་ཞེ་ལྔ་ཡོད།
EZR 2:9 ཟག་ཀ་ཨི་ཡི་བུ་རྒྱུད་བདུན་བརྒྱ་དང་དྲུག་ཅུ་ཡོད།
EZR 2:10 པཱ་ནིའི་བུ་རྒྱུད་དྲུག་བརྒྱ་དང་བཞི་བཅུ་ཞེ་གཉིས་ཡོད།
EZR 2:11 པེ་བཱ་ཨིའི་བུ་རྒྱུད་དྲུག་བརྒྱ་དང་ཉེར་གསུམ་ཡོད།
EZR 2:12 ཨས་གད་ཀྱི་བུ་རྒྱུད་ཆིག་སྟོང་ཉིས་བརྒྱ་དང་ཉེར་གཉིས་ཡོད།
EZR 2:13 ཨ་དོ་ནི་ཀམ་གྱི་བུ་རྒྱུད་དྲུག་བརྒྱ་དང་དྲུག་ཅུ་རེ་དྲུག་ཡོད།
EZR 2:14 པིག་ཝ་ཨིའི་བུ་རྒྱུད་ཉིས་སྟོང་དང་ལྔ་བཅུ་ང་དྲུག་ཡོད།
EZR 2:15 ཨ་དིན་གྱི་བུ་རྒྱུད་བཞི་བརྒྱ་དང་ལྔ་བཅུ་ང་བཞི་ཡོད།
EZR 2:16 ཨ་ཏེར་གྱི་བུ་རྒྱུད་དེ། ཧི་ཟི་ཀི་ཡཱའི་བུ་རྒྱུད་དགུ་བཅུ་གོ་བརྒྱད་ཡོད།
EZR 2:17 པེ་ཙ་ཨིའི་བུ་རྒྱུད་སུམ་བརྒྱ་དང་ཉེར་གསུམ་ཡོད།
EZR 2:18 ཡོ་རཱའི་བུ་རྒྱུད་བརྒྱ་དང་བཅུ་གཉིས་ཡོད།
EZR 2:19 ཧ་ཤུམ་གྱི་བུ་རྒྱུད་ཉིས་བརྒྱ་དང་ཉེར་གསུམ་ཡོད།
EZR 2:20 གིབ་བར་གྱི་བུ་རྒྱུད་དགུ་བཅུ་གོ་ལྔ་ཡོད།
EZR 2:21 པེད་ལེ་ཧེམ་གྱི་མི་བརྒྱ་དང་ཉེར་གསུམ་ཡོད།
EZR 2:22 ནེ་ཏོ་ཕཱའི་མི་ལྔ་བཅུ་ང་དྲུག་ཡོད།
EZR 2:23 ཨ་ན་ཐོད་པའི་མི་བརྒྱ་དང་ཉེར་བརྒྱད་ཡོད།
EZR 2:24 ཨས་མ་ཝེད་ཀྱི་མི་བཞི་བཅུ་ཞེ་གཉིས་ཡོད།
EZR 2:25 ཀིར་ཡཱད་ཡེ་ཨ་རིམ་དང་ཀེ་ཕི་རཱ། པེ་ཨེ་རཱོད་ཀྱི་མི་བསྡོམས་པས་བདུན་བརྒྱ་དང་བཞི་བཅུ་ཞེ་གསུམ་ཡོད།
EZR 2:26 རཱ་མ་དང་གེ་བཱའི་མི་བསྡོམས་པས་དྲུག་བརྒྱ་དང་ཉེར་གཅིག་ཡོད།
EZR 2:27 མིགས་མཱ་སི་ཡི་མི་བརྒྱ་དང་ཉེར་གཉིས་ཡོད།
EZR 2:28 པེད་ཨེལ་དང་ཨེ་ཡུ་ཡི་མི་བསྡོམས་པས་ཉིས་བརྒྱ་དང་ཉེར་གསུམ་ཡོད།
EZR 2:29 ནེ་བོའི་མི་ལྔ་བཅུ་ང་གཉིས་ཡོད།
EZR 2:30 མ་བིས་ཀྱི་བུ་རྒྱུད་བརྒྱ་དང་ལྔ་བཅུ་ང་དྲུག་ཡོད།
EZR 2:31 ཨེ་ལཱམ་གཞན་དེའི་བུ་རྒྱུད་ཆིག་སྟོང་ཉིས་བརྒྱ་ལྔ་བཅུ་ང་བཞི་ཡོད།
EZR 2:32 ཧ་རིམ་གྱི་བུ་རྒྱུད་སུམ་བརྒྱ་ཉི་ཤུ་ཡོད།
EZR 2:33 ལོད་དང་ཧ་དིད་དང་ཨོ་ནོའི་བུ་རྒྱུད་བསྡོམས་པས་བདུན་བརྒྱ་དང་ཉེར་ལྔ་ཡོད།
EZR 2:34 ཡེ་རུ་ཀོའི་བུ་རྒྱུད་སུམ་བརྒྱ་དང་ཞེ་ལྔ་ཡོད།
EZR 2:35 སེ་ན་ཨའི་བུ་རྒྱུད་སུམ་སྟོང་དྲུག་བརྒྱ་སུམ་ཅུ་ཡོད།
EZR 2:36 མཆོད་དཔོན་དག་ནི། ཡེ་ཤུ་ཨའི་ཁྱིམ་རྒྱུད་ཀྱི་ཡེ་དཱ་ཡའི་བུ་རྒྱུད་དགུ་བརྒྱ་བདུན་ཅུ་དོན་གསུམ་ཡོད།
EZR 2:37 ཨིམ་མེར་གྱི་བུ་རྒྱུད་ཆིག་སྟོང་ལྔ་བཅུ་ང་གཉིས་ཡོད།
EZR 2:38 ཕཱ་ཤུར་གྱི་བུ་རྒྱུད་ཆིག་སྟོང་ཉིས་བརྒྱ་བཞི་བཅུ་ཞེ་བདུན་ཡོད།
EZR 2:39 ཧ་རིམ་གྱི་བུ་རྒྱུད་ཆིག་སྟོང་བཅུ་བདུན་ཡོད།
EZR 2:40 ལེ་ཝི་པ་རྣམས་ནི། ཧོ་དབ་ཡཱའི་རུས་རྒྱུད་དེ། ཡེ་ཤུ་ཨ་དང་ཀད་མི་ཨེལ་གྱི་བུ་རྒྱུད་བདུན་ཅུ་དོན་བཞི་ཡོད།
EZR 2:41 མགུར་ལེན་མཁན་རྣམས་ནི། ཨ་སབ་ཀྱི་བུ་རྒྱུད་བརྒྱ་དང་ཉེར་བརྒྱད་ཡོད།
EZR 2:42 སྒོ་སྲུང་རྣམས་ནི། ཤལ་ལུམ་གྱི་བུ་རྒྱུད་དང་། ཨ་ཏེར་གྱི་བུ་རྒྱུད། ཏལ་མོན་གྱི་བུ་རྒྱུད། ཨག་ཁུབ་ཀྱི་བུ་རྒྱུད། ཧ་ཏི་ཏའི་བུ་རྒྱུད། ཤོ་བཱའི་བུ་རྒྱུད་བཅས་བསྡོམས་པས་མི་བརྒྱ་དང་སུམ་ཅུ་སོ་དགུ་ཡིན།
EZR 2:43 མཆོད་གཡོག་ནི། ཙི་ཧཱའི་བུ་རྒྱུད་དང་། ཧ་སུ་ཕའི་བུ་རྒྱུད། ཏབ་བ་ཨོད་ཀྱི་བུ་རྒྱུད།
EZR 2:44 ཀོ་རེས་ཀྱི་བུ་རྒྱུད། སི་ཨ་ཧའི་བུ་རྒྱུད། ཕ་དོན་གྱི་བུ་རྒྱུད།
EZR 2:45 ལེ་བ་ནཱའི་བུ་རྒྱུད། ཧ་ག་བཱའི་བུ་རྒྱུད། ཨག་ཁུབ་ཀྱི་བུ་རྒྱུད།
EZR 2:46 ཧ་གབ་ཀྱི་བུ་རྒྱུད། ཤལ་མཱ་ཨིའི་བུ་རྒྱུད། ཧ་ནན་གྱི་བུ་རྒྱུད།
EZR 2:47 གིད་དེལ་གྱི་བུ་རྒྱུད། ག་ཧར་གྱི་བུ་རྒྱུད། རེ་ཨ་ཡཱའི་བུ་རྒྱུད།
EZR 2:48 རེ་ཙིན་གྱི་བུ་རྒྱུད། ནེ་ཀོ་དཱའི་བུ་རྒྱུད། ག་ཟམ་གྱི་བུ་རྒྱུད།
EZR 2:49 ཨུ་ཟཱའི་བུ་རྒྱུད། ཕཱ་སེ་ཨའི་བུ་རྒྱུད། པེ་སཱ་ཨིའི་བུ་རྒྱུད།
EZR 2:50 ཨས་ནའི་བུ་རྒྱུད། མེ་ཧུ་ནིམ་གྱི་བུ་རྒྱུད། ནེ་ཕུ་སིམ་གྱི་བུ་རྒྱུད།
EZR 2:51 པག་པུག་གི་བུ་རྒྱུད། ཧ་ཀུ་ཕཱའི་བུ་རྒྱུད། ཧར་ཧར་གྱི་བུ་རྒྱུད།
EZR 2:52 པ་ཟི་ལུད་ཀྱི་བུ་རྒྱུད། མེ་ཧི་དཱའི་བུ་རྒྱུད། ཧར་ཤའི་བུ་རྒྱུད།
EZR 2:53 པཱར་ཀོས་ཀྱི་བུ་རྒྱུད། སི་ས་རཱའི་བུ་རྒྱུད། ཐེ་མཱའི་བུ་རྒྱུད།
EZR 2:54 ནེ་ཙི་ཡཱའི་བུ་རྒྱུད། ཧ་ཏི་ཕའི་བུ་རྒྱུད་བཅས་ཡིན།
EZR 2:55 སོ་ལོ་མོན་གྱི་གཡོག་པོའི་བུ་རྒྱུད་ནི་སོ་ཏའི་བུ་རྒྱུད་དང་། སོ་ཕེ་རེད་ཀྱི་བུ་རྒྱུད། པེ་རུ་དཱའི་བུ་རྒྱུད།
EZR 2:56 ཡ་ཨ་ལའི་བུ་རྒྱུད། དར་ཀོན་གྱི་བུ་རྒྱུད། གིད་དེལ་གྱི་བུ་རྒྱུད།
EZR 2:57 ཤེ་ཕད་ཡཱའི་བུ་རྒྱུད། ཧད་ཏིལ་གྱི་བུ་རྒྱུད། ཕོ་ཁེ་རེད་ཧ་ཙེ་བཱ་ཡི་བུ་རྒྱུད། ཨ་མིའི་བུ་རྒྱུད་བཅས་ཡིན།
EZR 2:58 མཆོད་གཡོག་ཐམས་ཅད་དང་སོ་ལོ་མོན་གྱི་གཡོག་པོ་དག་གི་བུ་རྒྱུད་ཀྱི་བསྡོམས་གྲངས་ནི་མི་སུམ་བརྒྱ་དང་དགུ་བཅུ་གོ་གཉིས་ཡིན།
EZR 2:59 ཡང་ཐེལ་མེ་ཝཱ་དང་། ཐེལ་ཧར་ཤ། ཀེ་རུབ། ཨད་དོན། ཨིམ་མེར་ཡུལ་བཅས་ནས་ཡོང་བ་རྣམས་ཀྱིས་རང་གི་ཕ་མེས་ཀྱི་གདུང་རབས་ཡེས་ར་ཨེལ་ནས་ཆད་པར་ར་སྤྲོད་བྱེད་མ་ནུས་སོ། །
EZR 2:60 དེ་རྣམས་ནི་དི་ལཱ་ཡའི་བུ་རྒྱུད་དང་། ཏོ་བི་ཡཱའི་བུ་རྒྱུད། ནེ་ཀོ་དཱའི་བུ་རྒྱུད་བཅས་བསྡོམས་པས་མི་དྲུག་བརྒྱ་ལྔ་བཅུ་ང་གཉིས་ཡིན།
EZR 2:61 མཆོད་དཔོན་དག་གི་བུ་རྒྱུད་ནས་ཧ་བཱ་ཡཱའི་བུ་རྒྱུད་དང་། ཧག་ཀོས་ཀྱི་བུ་རྒྱུད། པཱར་ཟི་ལ་ཨིའི་བུ་རྒྱུད་བཅས་ཡོད་དེ། པཱར་ཟི་ལ་ཨི་བྱ་བ་དེས་གིལ་ཨད་པའི་པཱར་ཟི་ལ་ཨི་ཞེས་པ་དེའི་བུ་མོ་ཆུང་མར་བླངས་པས། དེའི་མིང་བཞིན་དུ་བཏགས།
EZR 2:62 དེ་དག་གིས་རང་གི་རུས་རྒྱུད་ཀྱི་གདུང་རབས་བཙལ་ཡང་མ་རྙེད། དེའི་ཕྱིར་དེ་རྣམས་མི་གཙང་བར་བརྩིས་ཏེ་མཆོད་དཔོན་གྱི་གྲལ་ནས་ཕུད།
EZR 2:63 ཡང་འགོ་དཔོན་གྱིས་ཁོ་ཚོར། མཆོད་དཔོན་ཞིག་གིས་ཨུའུ་རིམ་དང་ཐུའུ་མིམ་ལ་བརྟེན་ནས་ཐག་གིས་མ་བཅད་བར་དུ། ཁོ་རྣམས་ཀྱིས་དམ་པའི་ཟས་ཅི་ཡང་བཟའ་མི་ཆོག་པར་བསྐུལ།
EZR 2:64 འདུ་ཚོགས་འདིའི་བསྡོམས་གྲངས་ནི་བཞི་ཁྲི་ཉིས་སྟོང་སུམ་བརྒྱ་དྲུག་ཅུ་ཡིན།
EZR 2:65 གཞན་གཡོག་པོ་དང་གཡོག་མོ་བདུན་སྟོང་སུམ་བརྒྱ་སུམ་ཅུ་སོ་བདུན་ཡོད་པ་དང་། ཡང་མགུར་ལེན་མཁན་སྐྱེས་པ་དང་བུད་མེད་ཉིས་བརྒྱ་ཡོད།
EZR 2:66 རྟ་བདུན་བརྒྱ་སུམ་ཅུ་སོ་དྲུག་ཡོད། དྲེལ་ཉིས་བརྒྱ་བཞི་བཅུ་ཞེ་ལྔ་ཡོད།
EZR 2:67 རྔ་མོང་བཞི་བརྒྱ་སུམ་ཅུ་སོ་ལྔ་ཡོད། བོང་བུ་དྲུག་སྟོང་བདུན་བརྒྱ་ཉི་ཤུ་ཡོད།
EZR 2:68 ཚོ་དཔོན་འགའ་ཤས་ཡེ་རུ་སཱ་ལེམ་དུ་དཀོན་མཆོག་ཡ་ཝཱེའི་མཆོད་ཁང་དུ་སླེབས་ཚེ། དཀོན་མཆོག་གི་མཆོད་ཁང་དེ་སྔའི་རྨང་གཞི་སྟེང་ཡང་བསྐྱར་བཞེང་བའི་ཕྱིར་དུ་རང་མོས་ཀྱིས་འབུལ་བ་ཕུལ།
EZR 2:69 དེ་དག་གིས་རང་གི་ནུས་པར་བསྟུན་ནས་མཁར་བཟོའི་མཛོད་ཁང་ལ་གསེར་གྱི་དོང་ཙེ་དྲུག་ཁྲི་ཆིག་སྟོང་དང་། དངུལ་མཱེ་ན་ལྔ་སྟོང་། མཆོད་དཔོན་གྱི་གོས་བརྒྱ་བཅས་ཀྱི་འབུལ་བ་ཕུལ།
EZR 2:70 དེ་ནས་མཆོད་དཔོན་དང་། ལེ་ཝི་པ། མགུར་ལེན་མཁན། སྒོ་སྲུང་། མཆོད་གཡོག འབངས་མི་ཁ་ཤས་བཅས་སོ་སོ་རང་གི་གྲོང་ཁྱེར་དུ་གནས་པ་དང་། ཡེས་ར་ཨེལ་པ་རྣམས་རང་གི་གྲོང་ཁྱེར་དུ་གནས་སོ། །
EZR 3:1 དེ་ནས་ཟླ་བདུན་པ་ལོན་པའི་ཚེ། གྲོང་ཁྱེར་སོ་སོར་གནས་པའི་ཡེས་ར་ཨེལ་པ་རྣམས་ཡེ་རུ་སཱ་ལེམ་དུ་བློ་སེམས་གཅིག་མཐུན་ངང་མཉམ་དུ་འཛོམས་ཏེ།
EZR 3:2 ཡོ་ཚ་དག་གི་བུ་ཡེ་ཤུ་ཨ་དང་། ཁོའི་སྤུན་མཆོད་དཔོན་རྣམས་དང་། ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་། ཁོའི་སྤུན་རྣམས་ཡོང་ནས་དཀོན་མཆོག་གི་སྐྱེས་བུ་མོ་ཤེའི་བཀའ་ཁྲིམས་ནང་བཀོད་པ་བཞིན་དུ། སྦྱིན་སྲེག་གི་མཆོད་པ་འབུལ་ཕྱིར་ཡེས་ར་ཨེལ་གྱི་དཀོན་མཆོག་གི་མཆོད་ཁྲི་བཞེངས་སོ། །
EZR 3:3 ཁོ་ཚོ་ཡུལ་མི་རྣམས་ལ་འཇིགས་པས། མཆོད་ཁྲི་དེ་སྔར་གནས་སུ་བཞེངས་ནས་དཀོན་མཆོག་ཡ་ཝཱེ་ལ་ནངས་དགོང་སྦྱིན་སྲེག་གི་མཆོད་པ་ཕུལ་བ་དང་།
EZR 3:4 ཡང་མདོ་ནང་བཀོད་པ་བཞིན་དུ། དེ་དག་གིས་སྤྱིལ་བུའི་དུས་ཆེན་རོལ་ཏེ་ཁྲིམས་སྲོལ་ལྟར་སྦྱིན་སྲེག་གི་མཆོད་པ་ནི་ཉིན་རེའི་གྲངས་ཀ་བཞིན་དུ་ཕུལ།
EZR 3:5 ཡང་དེའི་རྗེས་སུ་དུས་རྒྱུན་གྱི་སྦྱིན་སྲེག་གི་མཆོད་པ་ཕུལ་བ་དང་། ཚེས་གཅིག་གི་མཆོད་པ་དང་དཀོན་མཆོག་ཡ་ཝཱེའི་དམ་པར་བྱས་པའི་དུས་ཆེན་གྱི་མཆོད་པ་དང་། ཡང་མི་རེ་རེས་དཀོན་མཆོག་ཡ་ཝཱེའི་ཕྱིར་ཡིད་མོས་མཆོད་པ་ཕུལ།
EZR 3:6 ཟླ་བདུན་པའི་ཚེས་གཅིག་ཉིན་ནས་བཟུང་དཀོན་མཆོག་ཡ་ཝཱེའི་མཆོད་ཁང་གི་རྨང་གཞི་ད་དུང་བཏིངས་མེད་ན་ཡང་། ཁོ་རྣམས་ཀྱིས་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པ་འབུལ་བའི་འགོ་བརྩམས།
EZR 3:7 ཡང་དེ་དག་གིས་རྡོ་བཟོ་དང་ཤིང་བཟོ་ལ་དངུལ་སྤྲད་དེ། ཏ་ཟིག་གི་རྒྱལ་པོ་ཀོ་རེས་ཀྱི་བཀའ་བཞིན་དུ། ལེ་པཱ་ནོན་ནས་རྒྱ་མཚོ་བརྒྱུད་དེ་ཡོ་ཕཱའི་བར་དུ་ཐང་ཤིང་འདྲེན་པའི་ཕྱིར། ཚི་ཏུན་པ་དང་ཐཱར་པ་རྣམས་ལ་བཟའ་བཏུང་དང་སྣུམ་བཅས་སྤྲད་དོ། །
EZR 3:8 ཁོ་ཚོ་ཡེ་རུ་སཱ་ལེམ་དུ་དཀོན་མཆོག་གི་མཆོད་ཁང་བཞེངས་སར་སླེབས་པའི་ལོ་གཉིས་པའི་ཟླ་གཉིས་པར། ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་། ཡོ་ཚ་དག་གི་བུ་ཡེ་ཤུ་ཨ་དང་། དེ་དག་གི་སྤུན་མཆོད་དཔོན་རྣམས་དང་། ལེ་ཝི་པ་རྣམས་དང་། བཙོན་ལས་ཐར་ཏེ་ཡེ་རུ་སཱ་ལེམ་དུ་ཡོང་བ་རྣམས་ཀྱིས་ལས་འགོ་བརྩམས་པ་དང་། ལེ་ཝི་པ་ལོ་ཉི་ཤུ་ཡན་ལོན་པ་རྣམས་དཀོན་མཆོག་ཡ་ཝཱེའི་མཆོད་ཁང་གི་ལས་ཀའི་ལྟ་སྐུལ་བ་བྱེད་དུ་བཅུག
EZR 3:9 དེ་ནས་ཡ་ཧུ་དཱའི་བུ་རྒྱུད་དེ། ཡེ་ཤུ་ཨ་དང་ཁོའི་བུ་རྒྱུད་དང་སྤུན་རྣམས་དང་། ཀད་མི་ཨེལ་དང་ཁོའི་བུ་རྒྱུད་རྣམས་ནི་ལེ་ཝི་པ་ཧེ་ན་དད་ཀྱི་བུ་རྒྱུད་དང་སྤུན་རྣམས་དང་བཅས་འཛོམས་ནས། བློ་སེམས་རྩེ་གཅིག་ངང་དཀོན་མཆོག་གི་མཆོད་ཁང་བཞེང་བའི་ལས་བཟོ་པ་རྣམས་ལ་ལྟ་སྐུལ་བྱས།
EZR 3:10 ལས་བཟོ་པ་རྣམས་ཀྱིས་དཀོན་མཆོག་ཡ་ཝཱེའི་མཆོད་ཁང་གི་རྨང་གཞི་འདིང་བའི་ཚེ། མཆོད་དཔོན་གྱིས་ཆོས་གོས་གྱོན་ཏེ་དུང་ཐོགས་པ་དང་། ལེ་ཝི་པ་ཨ་སབ་ཀྱི་བུ་རྒྱུད་ཀྱིས་སྦུག་ཆལ་བརྡུངས་པ་དང་། ཡེས་ར་ཨེལ་གྱི་རྒྱལ་པོ་དཱ་བིད་ཀྱིས་བཙུགས་པའི་ཁྲིམས་བཞིན་དུ་ཡར་ལངས་ནས་དཀོན་མཆོག་ཡ་ཝཱེ་ལ་བསྟོད་པ་ཕུལ་ཏེ།
EZR 3:11 ཁོ་ཚོས་མཉམ་དུ་དཀོན་མཆོག་ཡ་ཝཱེ་ལ་བསྟོད་པ་དང་གཏང་རག་ཕུལ་ཞིང་འདི་ལྟར། ཁོང་ནི་བཟང་པོ་ལགས་ཤིང་། ཁོང་གིས་ཡེས་ར་ཨེལ་ལ་བཅངས་པའི་བྱམས་བརྩེ་རྒྱུན་ནས་རྒྱུན་དུ་གནས་སོ་ཞེས་བསྟོད་དབྱངས་ཕུལ་བ་དང་། ཁོ་ཚོས་དཀོན་མཆོག་ཡ་ཝཱེ་ལ་བསྟོད་བསྔགས་འབུལ་བའི་དུས་སུ། དཀོན་མཆོག་ཡ་ཝཱེའི་མཆོད་ཁང་གི་རྨང་གཞི་བཏིངས་ཟིན་པས་མི་ཚོགས་ཀྱིས་སྐད་ཆེན་པོས་ཀི་སྒྲ་བསྒྲགས་སོ། །
EZR 3:12 འོན་ཀྱང་མཆོད་དཔོན་མང་པོ་དང་ལེ་ཝི་པ། ཚོ་དཔོན་བཅས་སྔར་གྱི་མཆོད་ཁང་མཐོང་མྱོང་བའི་རྒན་པོ་མང་པོས་མཆོད་ཁང་འདིའི་རྨང་གཞི་ཡང་བསྐྱར་བཏིངས་པ་མཐོང་ནས་སྐད་ཆེན་པོས་ངུས་པ་དང་། ཡང་མི་མང་པོས་དགའ་སྤྲོའི་འབོད་སྒྲ་མཐོན་པོར་བསྒྲགས་པ་ལ།
EZR 3:13 དགའ་བའི་སྒྲ་དང་ངུ་བའི་སྒྲ་གང་ཡིན་ཁྱད་འབྱེད་མ་ནུས། གང་ལ་ཞེ་ན། འབངས་མི་རྣམས་ཀྱིས་སྐད་ཤིན་ཏུ་ཆེན་པོ་བཏོན་ཏེ། རྒྱང་རིང་ནས་ཀྱང་འུར་སྒྲ་དེ་ཐོས་ཐུབ་པའོ། །
EZR 4:1 ཡ་ཧུ་དཱ་དང་པེན་ཡཱ་མེན་གྱི་དགྲ་བོས་བཙོན་ལས་ཐར་ཏེ་ཕྱིར་ལོག་པའི་མི་རྣམས་ཀྱིས་ཡེས་ར་ཨེལ་གྱི་དཀོན་མཆོག་ཡ་ཝཱེའི་ཆེད་དུ་མཆོད་ཁང་ཡང་བསྐྱར་བཞེང་བ་ཐོས་ནས།
EZR 4:2 དེ་དག་ཟེ་རུ་པཱ་པེལ་དང་ཚོ་དཔོན་རྣམས་ཀྱི་མདུན་དུ་འོངས་ནས་དེ་རྣམས་ལ། ངེད་རྣམས་ལ་ཡང་ཁྱོད་ཚོ་དང་མཉམ་དུ་བཞེང་བར་འཇུག་རོགས། གང་ལ་ཞེ་ན། ངེད་རྣམས་ཀྱིས་ཀྱང་ཁྱོད་ཚོའི་དཀོན་མཆོག་འཚོལ་བཞིན་ཡོད་དེ། ཨ་སུར་གྱི་རྒྱལ་པོ་ཨེ་སར་ཧད་ཏོན་གྱིས་ངེད་རྣམས་བཟུང་སྟེ་གནས་འདིར་ཁྲིད་འོངས་པའི་དུས་ནས་བཟུང་ཁོང་ལ་རྒྱུན་དུ་མཆོད་པ་ཕུལ་བ་ཡིན་ཞེས་ཞུས།
EZR 4:3 འོན་ཀྱང་ཟེ་རུ་པཱ་པེལ་དང་ཡེ་ཤུ་ཨ། ཡེས་ར་ཨེལ་གྱི་ཚོ་དཔོན་རྣམས་ཀྱིས་དེ་དག་ལ། ངེད་རྣམས་ཀྱིས་དཀོན་མཆོག་གི་ཕྱིར་མཆོད་ཁང་བཞེང་བ་དེ་ཁྱོད་ཚོ་དང་འབྲེལ་བ་མེད་དེ། རྒྱུ་མཚན་ནི་ཏ་ཟིག་གི་རྒྱལ་པོ་ཀོ་རེས་ཀྱིས་བཀའ་བསྒོས་པ་བཞིན་དུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཆོད་ཁང་ནི་ང་ཚོ་རང་གིས་བཞེང་ཆོག་ཅེས་སྨྲས་སོ། །
EZR 4:4 དེ་ནས་གནས་དེའི་ཡུལ་མི་རྣམས་ཀྱིས་ཡ་ཧུ་དཱ་པ་རྣམས་ལ་འཇིགས་བསྐུལ་ནས་མཆོད་ཁང་བཞེང་དུ་མ་བཅུག
EZR 4:5 ཏ་ཟིག་གི་རྒྱལ་པོ་ཀོ་རེས་ཀྱི་དུས་ནས་ཏ་ཟིག་གི་རྒྱལ་པོ་དར་ཡཱའི་བར་དུ་དེ་དག་གིས་བློ་འདོན་མཁན་ནོར་གྱིས་བསླུས་ཏེ། ཡ་ཧུ་དཱ་པ་རྣམས་ཀྱི་འཆར་གཞི་ལ་གཏོར་བརླག་བྱེད་པའི་ཆེད་དུ་ཁོ་ཚོར་རྒོལ་བ་རེད།
EZR 4:6 ཡང་ཨ་ཧཱ་ཤུ་ཝེ་རོ་ཤུ་བྱ་བས་རྒྱལ་སྲིད་ཐོག་མར་སྐྱོང་དུས། དེ་དག་གིས་གཏུག་ཡིག་བྲིས་ཏེ་ཡ་ཧུ་དཱ་དང་ཡེ་རུ་སཱ་ལེམ་གྱི་ཡུལ་མི་རྣམས་གཏུགས་པ་དང་།
EZR 4:7 དེ་ནས་ཨར་ཐག་ཤཱ་ཐིའི་དུས་སྐབས་སུ། པིས་ལམ་དང་མིད་རེ་དཱད་དང་། ཏ་བེ་ཨེལ་དང་། གྲོས་མི་གཞན་རྣམས་དང་མཉམ་དུ་ཏ་ཟིག་གི་རྒྱལ་པོ་ཨར་ཐག་ཤཱ་ཐི་ལ་སྙན་ཞུ་ཕུལ་བ་སྟེ། སྙན་ཞུ་དེ་ནི་ཨ་རམ་གྱི་ཡི་གེ་ནས་བྲིས་ཤིང་སྐད་གཞན་དུ་བསྒྱུར།
EZR 4:8 འགོ་དཔོན་རེ་ཧུམ་དང་དྲུང་ཡིག་ཤིམ་ཤ་ཨི་གཉིས་ཀྱིས་ཀྱང་རྒྱལ་པོ་ཨར་ཐག་ཤཱ་ཐི་ལ་སྙན་ཞུ་ཕུལ་ཏེ། ཡེ་རུ་སཱ་ལེམ་གྱི་འབངས་མི་རྣམས་གཏུག་བཤེར་བྱས་པ་འདི་ལྟར།
EZR 4:9 འགོ་དཔོན་རེ་ཧུམ་དང་དྲུང་ཡིག་ཤིམ་ཤ་ཨི་དང་གྲོས་མི་གཞན་རྣམས་ཏེ། ཁྲིམས་དཔོན་དང་། འགོ་དཔོན། དམག་དཔོན། ཏ་ཟིག་གི་འགོ་དཔོན། ཨེ་རེག་པ། པཱ་བེལ་པ། ཨེ་ལཱམ་ཡུལ་གྱི་མི་སྟེ་སོའུ་སཱན་པ།
EZR 4:10 ད་དུང་མི་ཆེན་ཨོས་ན་ཕཱར་གྱིས་བཙན་ཁྲིད་བྱས་ནས་སཱ་མར་ཡ་གྲོང་ཁྱེར་དང་གཙང་པོའི་ནུབ་ཕྱོགས་ལ་གནས་སུ་བཅུག་པའི་མི་མང་བཅས་ཀྱི་སྙན་ཞུ་འདི་ཡིན་ལགས།
EZR 4:11 ཁོ་ཚོས་རྒྱལ་པོ་ཨར་ཐག་ཤཱ་ཐི་ལ་ཕུལ་བའི་སྙན་ཞུ་བཤུས་མ་ནི་འདི་ལྟ་སྟེ། གཙང་པོའི་ནུབ་རྒྱུད་དུ་སྡོད་པ་རྣམས་ཀྱིས་རྒྱལ་པོ་ཨར་ཐག་ཤཱ་ཐི་ལ་སྙན་ཞུ་འབུལ་དོན་ནི།
EZR 4:12 རྒྱལ་པོ་ཆེན་པོར་ཞུ་དོན། རྒྱལ་པོའི་མདུན་ནས་ང་ཚོའི་འདིར་ཡར་འོངས་པའི་ཡ་ཧུ་དཱ་པ་རྣམས་ནི། ངོ་ལོག་ཐ་ཤལ་ཡིན་པའི་གྲོང་ཁྱེར་ཡེ་རུ་སཱ་ལེམ་དུ་སླེབས་ནས་དེ་བཞེང་བཞིན་འདུག་སྟེ། རྨང་གཞི་བཏིངས་ནས་མཁར་གྱང་བསྐྱར་གསོ་བྱེད་བཞིན་ནོ། །
EZR 4:13 ད་ལྟ་རྒྱལ་པོ་ཆེན་པོས་མཁྱེན་རོགས་ཞུ། གྲོང་ཁྱེར་འདི་བཞེངས་ནས་མཁར་གྱང་བརྩིགས་ཚར་དུས། དེ་དག་གིས་དཔྱ་ཁྲལ་དང་འབུལ་མཚན། འབྲུ་ཁྲལ་བཅས་མི་འཇལ་བར། རྒྱལ་པོའི་མཛོད་ཁང་གི་ཡོང་འབབ་ལ་གནོད་པ་འབྱུང་ངེས་ཏེ།
EZR 4:14 ད་ལྟ་བདག་ཅག་གིས་ཟ་བའི་ཚྭ་ཡང་རྒྱལ་པོའི་ཕོ་བྲང་གི་ཡིན་པས། རྒྱལ་པོ་ལ་སྨོད་པ་འབྱུང་བར་མི་འདོད། དེའི་ཕྱིར་རྒྱལ་པོ་ལ་སྙན་ཞུ་ཕུལ་བ་སྟེ།
EZR 4:15 ཁྱེད་ཀྱི་ཡབ་མེས་རྣམས་ཀྱི་ལོ་རྒྱུས་དེབ་ཐེར་ནང་དུ་རྩད་གཅོད་རོགས། ལོ་རྒྱུས་དེབ་ཐེར་ལས་གྲོང་ཁྱེར་འདི་ནི་གྲོང་ཁྱེར་ངོ་ལོག་ཅན་དང་། རྒྱལ་པོ་དང་ལྗོངས་རྣམས་ལ་གནོད་པ་ཆེ་བ་དང་། ཐོག་མ་ནས་གཞན་ལ་ངོ་ལོག་བྱེད་དུ་འཇུག་མཁན་ཡིན་པ་མཁྱེན་པར་འགྱུར་བས། གྲོང་ཁྱེར་འདི་སྔོན་ཆད་མེད་པར་བྱས་སོ། །
EZR 4:16 གལ་ཏེ་གྲོང་ཁྱེར་འདི་ཡང་བསྐྱར་བཞེངས་ནས་མཁར་གྱང་བརྩིགས་ཚར་ན། གཙང་པོའི་ཕ་རོལ་གྱི་ཡུལ་རྣམས་སུ་རྒྱལ་པོ་ལ་དབང་ཅི་ཡང་མེད་དོ་ཞེས་པའོ། །
EZR 4:17 དེར་རྒྱལ་པོས་འགོ་དཔོན་རེ་ཧུམ་དང་དྲུང་ཡིག་ཤིམ་ཤ་ཨི་གཉིས་དང་། དེ་དག་གི་གྲོས་མི་གཞན་རྣམས་ཏེ་སཱ་མར་ཡ་དང་གཙང་པོའི་ནུབ་རྒྱུད་དུ་གནས་པ་རྣམས་ལ་གོང་མའི་བཀའ་བབས་ནས་འདི་ལྟར། ཁྱོད་ཅག་བདེའམ།
EZR 4:18 ཁྱོད་ཚོས་ང་ལ་བསྐུར་བའི་སྙན་ཞུ་དེ་ངའི་མདུན་ནས་ཞིབ་ཏུ་བཀླགས་པ་དང་།
EZR 4:19 ངས་བཀའ་གནང་ནས་རྩད་བཅད་པ་ཡིན། དེ་ནི་གྲོང་ཁྱེར་དེས་གནའ་ནས་རྒྱལ་པོ་ལ་ངོ་ལོག་བྱས་ཤིང་། དེའི་ནང་རྒྱུན་དུ་ངོ་ལོག་དང་ཟིང་འཁྲུག་བྱུང་འདུག
EZR 4:20 སྔར་ཡེ་རུ་སཱ་ལེམ་དུ་རྒྱལ་པོ་ཤིན་ཏུ་དབང་ཅན་རྣམས་བྱུང་སྟེ། གཙང་པོའི་ནུབ་རྒྱུད་ཀྱི་ཡུལ་ཐམས་ཅད་དུ་སྲིད་བྱས་ཤིང་། མི་ཐམས་ཅད་ཀྱིས་དེ་དག་ལ་དཔྱ་ཁྲལ་དང་འབུལ་མཚན། འབྲུ་ཁྲལ་བཅས་བཅལ་ཏོ། །
EZR 4:21 ད་ཁྱོད་ཅག་གིས་མི་དེ་རྣམས་ཀྱི་ལས་མཚམས་འཇོག་པར་གྱིས་ཤིག བདག་གིས་བཀའ་མ་གནང་བར་དུ། གྲོང་ཁྱེར་དེ་ཡང་བསྐྱར་བཞེངས་མི་ཆོག
EZR 4:22 ཁྱོད་ཚོས་བྱ་བ་འདི་གཟབ་ནན་གྱིས་སྒྲུབས་ཤིག སྣང་མེད་དུ་བསྐྱུར་མི་རུང་། དེ་མིན་ཚེ་རྒྱལ་པོ་རྣམས་ལ་གནོད་པ་འདི་ལྡབ་འགྱུར་གྱིས་འཕེལ་བར་འགྱུར་རོ་ཞེས་པའོ། །
EZR 4:23 རྒྱལ་པོ་ཨར་ཐག་ཤཱ་ཐིའི་གོང་མའི་བཀའ་ཡིག་བཤུས་མ་དེ་རེ་ཧུམ་དང་། དྲུང་ཡིག་ཤིམ་ཤ་ཨི་དང་། གྲོས་མི་རྣམས་ཀྱི་མདུན་དུ་བཀླགས་པ་དང་། དེ་རྣམས་མྱུར་དུ་ཡེ་རུ་སཱ་ལེམ་དུ་ཡ་ཧུ་དཱ་པའི་རྩར་ཕྱིན་ནས། དེ་དག་གི་ལས་མཚམས་བཙན་གྱིས་བཀག
EZR 4:24 དེའི་ཕྱིར་ཏ་ཟིག་གི་རྒྱལ་པོ་དར་ཡཱའི་སྲིད་ལོ་གཉིས་པའི་བར་དུ་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་བཞེང་མཚམས་བཞག་གོ །
EZR 5:1 དེ་ནས་ལུང་སྟོན་པ་ཧག་གཱ་ཨི་དང་། ཨིད་དོའི་བུ་རྒྱུད་དེ་ལུང་སྟོན་པ་ཟཱ་ཀར་ཡ་གཉིས་ཀྱིས་ཡ་ཧུ་དཱ་ཡུལ་དང་ཡེ་རུ་སཱ་ལེམ་དུ་གནས་པའི་ཡ་ཧུ་དཱ་པ་རྣམས་ལ། ཡེས་ར་ཨེལ་གྱི་དཀོན་མཆོག་གི་མཚན་བརྗོད་ནས་ལུང་བསྟན་གནང་།
EZR 5:2 དེ་ནས་ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་ཡོ་ཚ་དག་གི་བུ་ཡེ་ཤུ་ཨ་གཉིས་ལངས་ཏེ། ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་དེ་ཡང་བསྐྱར་བཞེང་བའི་འགོ་བརྩམས་ནས། དེ་དག་ལ་དཀོན་མཆོག་གི་ལུང་སྟོན་པས་རྒྱབ་སྐྱོར་མཛད་དོ། །
EZR 5:3 དུས་དེ་ཉིད་དུ་གཙང་པོའི་ཕ་རོལ་གྱི་སྤྱི་དཔོན་ཐད་ན་ཨི་དང་། ཧྲི་ཐིར་པོ་ཟི་ནཱ་ཨི་དང་། དེའི་གྲོས་མི་རྣམས་འོངས་ནས་ཡ་ཧུ་དཱ་པ་རྣམས་ལ། སུ་ཞིག་གིས་ཁྱོད་ཅག་ལ་མཆོད་ཁང་འདི་ཡང་བསྐྱར་བཞེང་བར་བཀའ་བསྩལ་ལམ་ཞེས་དང་།
EZR 5:4 ཡང་དེ་དག་གིས། བཟོ་སྐྲུན་འདིའི་འགན་འཁུར་མཁན་རྣམས་ཀྱི་མིང་ལ་ཅི་ཟེར་རམ་ཞེས་དྲིས།
EZR 5:5 འོན་ཀྱང་ཡ་ཧུ་དཱ་པའི་རྒན་པོ་རྣམས་ལ་དཀོན་མཆོག་གིས་གཟིགས་སྐྱོང་མཛད་པས། དར་ཡཱ་ལ་སྙན་ཞུ་ཞིག་ཕུལ་བ་དང་། དེར་བཀའ་ལན་འཐོབ་པའི་བར་དུ་མི་སུས་ཀྱང་ཁོ་ཚོའི་ལས་ཀར་བཀག་འགོག་མ་བྱས།
EZR 5:6 ཡང་གཙང་པོའི་ཕ་རོལ་གྱི་སྤྱི་དཔོན་ཐད་ན་ཨི་དང་། ཧྲི་ཐིར་པོ་ཟི་ནཱ་ཨི་དང་། དེའི་གྲོས་མི་རྣམས་ཏེ། གཙང་པོའི་ཕ་རོལ་གྱི་འགོ་དཔོན་རྣམས་ཀྱིས་རྒྱལ་པོ་དར་ཡཱ་ལ་ཕུལ་བའི་སྙན་ཞུ་བཤུས་མ་ནི་འདི་ལྟར་ཡིན།
EZR 5:7 དེའི་ནང་དུ་འདི་ལྟར་བྲིས་ཡོད་དེ། རྒྱལ་པོ་དར་ཡཱ་ཁྱེད་ཉིད་ཕྱོགས་ཀུན་ནས་བདེ་བར་སྨོན།
EZR 5:8 རྒྱལ་པོ་ཆེན་པོས་མཁྱེན་རོགས་ཞུ། བདག་ཅག་ཡ་ཧུ་དཱ་ཡུལ་གྱི་དཀོན་མཆོག་ཆེན་པོའི་མཆོད་ཁང་དུ་སོང་བ་ན། དེ་རྣམས་ཀྱིས་མཆོད་ཁང་ནི་རྡོ་ཕ་བོང་ཆེན་པོས་བརྩིགས་ཏེ། གྱང་གི་ནང་དུ་གདུང་མ་བཅུག་ཡོད། ལས་ཀ་འདི་ནི་མྱུར་དུ་བྱས་པ་དང་། དེ་དག་གིས་ལེགས་པར་སྒྲུབ་བཞིན་འདུག
EZR 5:9 དེ་ནས་བདག་ཅག་གིས་རྒན་པོ་རྣམས་ལ། སུ་ཞིག་གིས་ཁྱོད་ཅག་ལ་མཆོད་ཁང་འདི་ཡང་བསྐྱར་བཞེང་བར་བཀའ་བསྩལ་ལམ་ཞེས་དྲིས་པ་དང་།
EZR 5:10 དེ་དག་གི་འགོ་དཔོན་སུ་ཡིན་པའི་འཕྲིན་ཁྱེད་ལ་འབུལ་བའི་ཕྱིར་སོ་སོའི་མིང་ཡང་དྲིས་པ་ཡིན།
EZR 5:11 ཁོ་ཚོས་ངེད་རྣམས་ཀྱི་ལན་དུ། ངེད་ཅག་ནི་གནམ་ས་གཉིས་ཀྱི་དཀོན་མཆོག་གི་ཞབས་ཕྱི་ཡིན་ཏེ། ལོ་མང་པོའི་སྔོན་དུ་ཡེས་ར་ཨེལ་གྱི་རྒྱལ་པོ་ཆེན་པོ་ཞིག་གིས་བཞེངས་པའི་མཆོད་ཁང་འདི་ཡང་བསྐྱར་བཞེང་བཞིན་ཡོད།
EZR 5:12 འོན་ཀྱང་ངེད་རྣམས་ཀྱི་ཕ་མེས་རྣམས་ཀྱིས་ནམ་མཁའི་དཀོན་མཆོག་ཐུགས་ཁྲོས་པར་བྱས་པས། ཁོང་གིས་དེ་རྣམས་ཀལ་དི་པ་ཡིན་པའི་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་སྤྲད་དེ། མཆོད་ཁང་བཤིགས་ནས་མི་རྣམས་པཱ་པེལ་ལོན་དུ་བཙན་ཁྲིད་བྱས།
EZR 5:13 ཡིན་ཡང་པཱ་པེལ་ལོན་གྱི་རྒྱལ་པོ་ཀོ་རེས་ཀྱིས་རྒྱལ་སྲིད་བསྐྱངས་པའི་ལོ་དང་པོར། རྒྱལ་པོས་དཀོན་མཆོག་གི་མཆོད་ཁང་བཞེང་བར་བཀའ་གནང་ངོ་། །
EZR 5:14 དཀོན་མཆོག་གི་མཆོད་ཁང་གི་གསེར་དངུལ་གྱི་སྣོད་ཆས་ཏེ། ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་གྱི་མཆོད་ཁང་ནས་ཕྲོགས་ཏེ། པཱ་པེལ་ལོན་གྱི་ལྷ་ཁང་དུ་ཁྱེར་བ་དག་ཀྱང་རྒྱལ་པོ་ཀོ་རེས་ཀྱིས་པཱ་པེལ་ལོན་གྱི་ལྷ་ཁང་ནས་ཕྱིར་བླངས་ཤིང་། ཁོ་རང་ཉིད་ཀྱིས་འགོ་དཔོན་དུ་བསྐོས་པའི་ཤེ་སཱ་པ་ཙར་བྱ་བའི་ལག་ཏུ་སྤྲད་དེ།
EZR 5:15 ཁོ་ལ་སྣོད་ཆས་འདི་དག་ཡེ་རུ་སཱ་ལེམ་གྱི་མཆོད་ཁང་དུ་ཁྱེར་ནས་དཀོན་མཆོག་གི་མཆོད་ཁང་དེ་སྔར་གནས་སུ་བཞེང་བར་གྱིས་ཞེས་བཀའ་བསྩལ།
EZR 5:16 དེ་ནས་ཤེ་སཱ་པ་ཙར་ཕྱིར་འོངས་ནས། ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་གི་རྨང་གཞི་བཏིངས་པ་དང་། དུས་དེ་ནས་བཟུང་ད་ལྟའི་བར་དུ་བཞེང་བཞིན་ཡོད་ཀྱང་ད་དུང་མ་འགྲུབ་བོ་ཞེས་སྨྲས་བྱུང་ངོ་། །
EZR 5:17 གལ་ཏེ་རྒྱལ་པོ་ཐུགས་མོས་ན། པཱ་པེལ་ལོན་དུ་ཡོད་པའི་རྒྱལ་པོའི་ཡིག་ཚང་ཁང་དུ་རྩད་གཅོད་མཛད་ནས། རྒྱལ་པོ་ཀོ་རེས་ཀྱིས་ཡེ་རུ་སཱ་ལེམ་དུ་དཀོན་མཆོག་གི་མཆོད་ཁང་ཡང་བསྐྱར་བཞེང་བའི་ཕྱིར་བཀའ་བསྩལ་བའི་གོང་མའི་བཀའ་ཡིག་ཡོད་མེད་ལ་གཟིགས་རོགས། ཡང་རྒྱལ་པོ་ལགས་ཀྱིས་བདག་ཅག་ལ་བྱ་གཞག་འདིའི་ཐད་ཀྱི་དགོངས་པ་སྟོན་པར་མཛོད་ཅེས་པའོ། །
EZR 6:1 དེར་རྒྱལ་པོ་དར་ཡཱ་ཡིས་པཱ་པེལ་ལོན་གྱི་ཡིག་ཚང་ཁང་དུ་རྩད་གཅོད་བྱེད་པའི་བཀའ་གནང་བས།
EZR 6:2 མ་དཱི་ཡ་ཡུལ་གྱི་ཨག་མེ་ཐའི་མཁར་ནང་དུ་ཤོག་དྲིལ་ཞིག་རྙེད་ཅིང་། དེའི་ནང་དུ་འདི་ལྟར་བྲིས་ཡོད་དེ།
EZR 6:3 རྒྱལ་པོ་ཀོ་རེས་ཀྱིས་རྒྱལ་སྲིད་བསྐྱངས་པའི་ལོ་དང་པོར། རྒྱལ་པོས་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་སྐོར་ལ་འདི་སྐད་ཅེས་བཀའ་གནང་སྟེ། མཆོད་ཁང་དེ་ཡང་བསྐྱར་བཞེངས་ནས་མཆོད་པ་འབུལ་བའི་གནས་སུ་གྱིས་ཤིག མཆོད་ཁང་གི་རྨང་གཞི་འདིང་དགོས། མཐོ་ཚད་ལ་དཔུང་ཚད་དྲུག་ཅུ་དང་། ཞེང་ལ་དཔུང་ཚད་དྲུག་ཅུ་ཡོད་པ་ཞིག་དགོས།
EZR 6:4 རྡོ་ཕ་བོང་ཆེན་པོའི་བང་རིམ་གསུམ་དང་། གདུང་མ་བང་རིམ་གཅིག་ཡོད་དགོས། དེའི་འགྲོ་སོང་ནི་རྒྱལ་པོའི་བང་མཛོད་ནས་འབུལ་བར་འགྱུར།
EZR 6:5 ཡང་ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་དུ་དཀོན་མཆོག་གི་མཆོད་ཁང་ནས་གསེར་དང་དངུལ་གྱི་སྣོད་ཆས་རྣམས་ཕྲོགས་ཏེ་པཱ་པེལ་ལོན་དུ་ཁྱེར་བ་དེ་དག་ཕྱིར་སྤྲད་དེ། ཡེ་རུ་སཱ་ལེམ་གྱི་མཆོད་ཁང་དུ་ཁྱེར་ནས་སྔར་གནས་སུ་ཞོག་ཅིག་ཅེས་པའོ། །
EZR 6:6 དེ་ནས་རྒྱལ་པོ་དར་ཡཱས་འདི་ལྟར། ཀྱེ། གཙང་པོའི་ནུབ་ཕྱོགས་སུ་སྡོད་པའི་སྤྱི་དཔོན་ཐད་ན་ཨི་དང་། ཧྲི་ཐིར་པོ་ཟི་ནཱ་ཨི་དང་། ཁྱོད་ཚོའི་གཙང་པོའི་ནུབ་ཕྱོགས་སུ་སྡོད་པའི་གྲོས་མི་རྣམས་དང་བཅས་པའི་འོ་ཟི་ག་པ་ཁྱོད་རྣམས་ཡུལ་དེར་རྒྱང་བཀྱེད་ཅིག
EZR 6:7 ཁྱོད་ཚོས་དཀོན་མཆོག་གི་མཆོད་ཁང་བཞེང་བར་བཀག་འགོག་མ་བྱེད་ཅིག ཡ་ཧུ་དཱ་པའི་འགོ་དཔོན་དང་རྒན་པོ་རྣམས་ལ་སྔར་གནས་སུ་མཆོད་ཁང་ཡང་བསྐྱར་བཞེང་དུ་ཆུག
EZR 6:8 ད་ལྟ་བདག་གིས་ཡང་བསྐྱར་བཀའ་ཞིག་འབེབ་པར་བྱ་སྟེ། ཁྱོད་ཚོས་དཀོན་མཆོག་གི་མཆོད་ཁང་བཞེང་བའི་ཡ་ཧུ་དཱ་པའི་རྒན་པོ་རྣམས་ལ་རོགས་བྱས་ཏེ། ཁོ་ཚོའི་འགྲོ་སོང་རྒྱལ་པོའི་བང་མཛོད་ནས་གཙང་པོའི་ཕ་རོལ་གྱི་དཔྱ་ཁྲལ་ལས་གཏོང་དགོས། དེ་ལྟར་མ་བསྒྲུབས་ན་ལས་མཚམས་ཆད་ངེས་ཡིན།
EZR 6:9 ཁོ་ཚོས་ནམ་མཁའི་དཀོན་མཆོག་ལ་སྦྱིན་སྲེག་གི་མཆོད་པར་འབུལ་བའི་གླང་ཐུག་དང་། ལུག་ཐུག ལུ་གུ། གྲོ། ཚྭ། རྒུན་ཆང་། སྣུམ་བཅས་ཐམས་ཅད་ཡེ་རུ་སཱ་ལེམ་གྱི་མཆོད་དཔོན་གྱིས་སྨྲས་པ་བཞིན་དུ་མ་ཆག་པར་ཉིན་རེ་བཞིན་སྤྲད་ནས།
EZR 6:10 དེ་དག་གིས་ནམ་མཁའི་དཀོན་མཆོག་ལ་དྲི་ཞིམ་གྱི་མཆོད་པ་འབུལ་བ་དང་། རྒྱལ་པོ་དང་ཁོང་གི་བུ་རྒྱུད་རྣམས་བདེ་ཞིང་སྐྱིད་པའི་ཕྱིར་སྨོན་ལམ་འདེབས་སུ་ཆུག
EZR 6:11 ཡང་བདག་གིས་བཀའ་ཞིག་འབེབ་པར་བྱ་སྟེ། སུ་ཞིག་གིས་བཀའ་འདི་བསྒྱུར་ན། མི་དེའི་ཁང་པ་ནས་གདུང་མ་ཞིག་བླངས་ཏེ་ཁོ་རང་དེའི་སྟེང་དུ་བཀལ་ནས་དཔྱང་དགོས་ལ། ཁོའི་ཁང་པ་ཡང་ཐལ་དུ་བརླག་པར་འགྱུར།
EZR 6:12 རྒྱལ་པོ་དང་ཡང་ན་འབངས་མི་སུ་ཞིག་གིས་བདག་གི་བཀའ་འདི་བསྒྱུར་ནས་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་འདི་བཤིག་ན། ཉིད་ཀྱི་མཚན་དེ་རུ་གནས་པར་མཛད་པའི་དཀོན་མཆོག་གིས་དེ་དག་འཇོམས་པར་མཛོད་ཅིག འདི་ནི་ང་དར་ཡཱའི་བཀའ་ཡིན་ཏེ། ཁྱོད་ཚོས་བརྩོན་འགྲུས་ཀྱིས་མྱུར་དུ་སྒྲུབས་ཤིག་ཅེས་བཀའ་བསྒོས་སོ། །
EZR 6:13 དེ་ནས་གཙང་པོའི་ཕ་རོལ་གྱི་སྤྱི་དཔོན་ཐད་ན་ཨི་དང་། ཧྲི་ཐིར་པོ་ཟི་ནཱ་ཨི་དང་། དེ་དག་གི་གྲོས་མི་རྣམས་ཀྱིས་རྒྱལ་པོ་དར་ཡཱའི་བཀའ་གནང་བ་བཞིན་མྱུར་དུ་བསྒྲུབས།
EZR 6:14 ཡང་ཡ་ཧུ་དཱ་པའི་རྒན་པོ་རྣམས་ཀྱིས་ལུང་སྟོན་པ་ཧག་གཱ་ཨི་དང་། ཨིད་དོའི་ཚ་བོ་སྟེ་ཟཱ་ཀར་ཡའི་ལུང་བསྟན་གྱི་སྒོ་ནས་མྱུར་དུ་བསྐྱར་བཞེངས་ཀྱི་ལས་ཀ་བསྒྲུབས། ཁོ་ཚོས་ཡེས་ར་ཨེལ་གྱི་དཀོན་མཆོག་གི་བཀའ་དང་། ཏ་ཟིག་གི་རྒྱལ་པོ་ཀོ་རེས་དང་། དར་ཡཱ་དང་། ཨར་ཐག་ཤཱ་ཐི་བཅས་ཀྱི་བཀའ་ལྟར་བསྐྱར་བཞེངས་ཀྱི་ལས་ཀ་འགྲུབ་པར་བྱས།
EZR 6:15 རྒྱལ་པོ་དར་ཡཱས་རྒྱལ་སྲིད་བསྐྱངས་པའི་ལོ་དྲུག་པའི་ཨ་དར་ཟླ་བའི་ཚེས་གསུམ་ཉིན་མཆོད་ཁང་བཞེངས་ནས་གྲུབ་བོ། །
EZR 6:16 དེ་ནས་ཡེས་ར་ཨེལ་པའི་མཆོད་དཔོན་དང་ལེ་ཝི་པ། བཙོན་ལས་ཐར་ཏེ་ཕྱིར་ལོག་པའི་མི་རྣམས་ཀྱིས་དགའ་དགའ་སྤྲོ་སྤྲོའི་ངང་དཀོན་མཆོག་གི་མཆོད་ཁང་བསྔོ་བའི་མཛད་སྒོར་རོལ།
EZR 6:17 ཁོ་ཚོས་དཀོན་མཆོག་གི་མཆོད་ཁང་གི་མཛད་སྒོར་རྟེན་འབྲེལ་ཞུ་བའི་སྐབས་སུ། གླང་བརྒྱ་དང་། ལུག་ཐུག་ཉིས་བརྒྱ། ལུ་གུ་བཞི་བརྒྱ་བཅས་དང་། ཡང་ཡེས་ར་ཨེལ་ཚོ་ཁག་བཅུ་གཉིས་ཀྱི་གྲངས་ཀ་ལྟར་ཚང་མས་སྡིག་བཤགས་ཀྱི་མཆོད་པའི་ཕྱིར་ར་ཕོ་བཅུ་གཉིས་ཕུལ།
EZR 6:18 ཡང་མོ་ཤེའི་མདོ་ནང་བཀོད་པ་བཞིན་དུ། མཆོད་དཔོན་དང་ལེ་ཝི་པ་རྣམས་ལ་དུས་བཅད་བཞིན་དུ་ཡེ་རུ་སཱ་ལེམ་ནས་དཀོན་མཆོག་གི་ཞབས་ཏོག་སྒྲུབ་ཏུ་བཅུག་གོ །
EZR 6:19 དེ་ནས་བཙོན་ལས་ཐར་བའི་མི་རྣམས་ཀྱིས་ཟླ་དང་པོའི་ཚེས་བཅུ་བཞི་ཉིན་པེ་སག་དུས་ཆེན་བསྲུངས་ཏེ།
EZR 6:20 མཆོད་དཔོན་དང་ལེ་ཝི་པ་རྣམས་ཀྱིས་ལྷན་ཅིག་ཏུ་རང་ཉིད་གཙང་མར་བཟོས་ནས་ཐམས་ཅད་དག་པར་གྱུར། དེ་ནས་ལེ་ཝི་པ་རྣམས་ཀྱིས་བཙོན་ལས་ཐར་བའི་མི་རྣམས་དང་། ཁོ་ཚོའི་སྤུན་མཆོད་དཔོན་རྣམས་དང་རང་ཉིད་ཀྱི་ཕྱིར་པེ་སག་དུས་ཆེན་གྱི་ལུ་གུ་བཤས་པ་དང་།
EZR 6:21 བཙོན་ལས་ཐར་བའི་ཡེས་ར་ཨེལ་པ་རྣམས་དང་། ཡུལ་དེའི་ཕྱི་རོལ་པའི་མི་གཙང་བ་དང་བྲལ་ཞིང་ཡེས་ར་ཨེལ་གྱི་དཀོན་མཆོག་ཡ་ཝཱེ་འཚོལ་འདོད་པ་ཐམས་ཅད་ཀྱིས་ལྷན་ཅིག་ཏུ་ལུ་གུའི་ཤ་ཟོས་ཤིང་།
EZR 6:22 ཉིན་བདུན་གྱི་རིང་ལ་སྐྱུར་མེད་བག་ལེབ་ཀྱི་དུས་ཆེན་ལ་དགའ་དགའ་སྤྲོ་སྤྲོའི་ངང་རོལ། གང་ལ་ཞེ་ན། དཀོན་མཆོག་ཡ་ཝཱེས་ཁོ་ཚོར་སྤྲོ་སྐྱིད་དང་ལྡན་པར་མཛད་ཅིང་། ཡེས་ར་ཨེལ་གྱི་དཀོན་མཆོག་གི་མཆོད་ཁང་བཞེང་བར་རོགས་བྱེད་པའི་ཕྱིར། ཡ་ཝཱེས་ཨ་སུར་རྒྱལ་པོའི་སེམས་ཁོ་ཚོའི་ཕྱོགས་སུ་བསྒྱུར་བའོ། །
EZR 7:1 ཡང་དོན་དེ་དག་གི་རྗེས་སུ། ཏ་ཟིག་གི་རྒྱལ་པོ་ཨར་ཐག་ཤཱ་ཐི་ཡིས་རྒྱལ་སྲིད་འཛིན་པའི་དུས་སུ། ཨེས་སི་རཱ་བྱ་བ་ཞིག་ཡོད་དེ། ཨེས་སི་རཱ་ནི་སེ་ར་ཡཱའི་བུ་ཡིན། སེ་ར་ཡཱ་ནི་ཨ་ཟར་ཡཱ་ཡི་བུ་ཡིན། ཨ་ཟར་ཡཱ་ནི་ཧིལ་ཀི་ཡཱའི་བུ་ཡིན།
EZR 7:2 ཧིལ་ཀི་ཡཱ་ནི་ཤལ་ལུམ་གྱི་བུ་ཡིན། ཤལ་ལུམ་ནི་ཟཱ་ཏོག་གི་བུ་ཡིན། ཟཱ་ཏོག་ནི་ཨ་ཧི་ཏུབ་ཀྱི་བུ་ཡིན།
EZR 7:3 ཨ་ཧི་ཏུབ་ནི་ཨ་མར་ཡཱའི་བུ་ཡིན། ཨ་མར་ཡཱ་ནི་ཨ་ཟར་ཡཱའི་བུ་ཡིན། ཨ་ཟར་ཡཱ་ནི་མེ་ར་ཡོད་ཀྱི་བུ་ཡིན།
EZR 7:4 མེ་ར་ཡོད་ནི་ཟེ་རཱ་ཡཱའི་བུ་ཡིན། ཟེ་རཱ་ཡཱ་ནི་ཨུ་ཟིའི་བུ་ཡིན། ཨུ་ཟི་ནི་པུག་ཀིའི་བུ་ཡིན།
EZR 7:5 པུག་ཀི་ནི་ཨ་བི་ཤུ་ཨའི་བུ་ཡིན། ཨ་བི་ཤུ་ཨ་ནི་ཕི་ནེ་ཧེའི་བུ་ཡིན། ཕི་ནེ་ཧེ་ནི་ཨེ་ལི་ཨ་ཟར་གྱི་བུ་ཡིན། ཨེ་ལི་ཨ་ཟར་ནི་མཆོད་དཔོན་ཆེན་པོ་ཨ་རོན་གྱི་བུ་ཡིན།
EZR 7:6 ཨེས་སི་རཱ་འདི་ནི་པཱ་པེལ་ལོན་ནས་ཡར་ཕྱིན་ཏེ། ཁོ་ནི་དྲུང་ཡིག་ཅིག་ཡིན་པ་དང་། ཡེས་ར་ཨེལ་གྱི་དཀོན་མཆོག་ཡ་ཝཱེས་མོ་ཤེ་ལ་གནང་བའི་བཀའ་ཁྲིམས་ལ་ཤིན་ཏུ་མཁས་པ་ཡིན་ལ། ཁོའི་དཀོན་མཆོག་ཡ་ཝཱེས་ཁོ་ལ་རོགས་རམ་མཛད་པས། རྒྱལ་པོས་ཁོས་ཞུ་བ་ལྟར་གནང་ངོ་། །
EZR 7:7 ཡང་རྒྱལ་པོ་ཨར་ཐག་ཤཱ་ཐི་ཡིས་རྒྱལ་སྲིད་འཛིན་པའི་ལོ་བདུན་པར། ཡེས་ར་ཨེལ་གྱི་མི་འགའ་ཞིག་དང་། མཆོད་དཔོན་འགའ་ཞིག་དང་། ལེ་ཝི་པ། མཆོད་ཁང་གི་མགུར་ལེན་མཁན། སྒོ་སྲུང་། མཆོད་གཡོག་འགའ་ཞིག་བཅས་ཡར་ཡེ་རུ་སཱ་ལེམ་དུ་སོང་།
EZR 7:8 ཡང་རྒྱལ་པོ་དེའི་ལོ་བདུན་པའི་ཟླ་ལྔ་བའི་ནང་དུ་ཨེས་སི་རཱ་ཁོང་ཉིད་ཡེ་རུ་སཱ་ལེམ་དུ་ཕྱིན།
EZR 7:9 ཁོ་ནི་ཟླ་དང་པོའི་ཚེས་གཅིག་ཉིན་པཱ་པེལ་ལོན་ནས་ལམ་དུ་ཆས་ཤིང་། ཁོའི་དཀོན་མཆོག་གིས་རོགས་རམ་མཛད་པས། ཟླ་ལྔ་བའི་ཚེས་གཅིག་ཉིན་ཡེ་རུ་སཱ་ལེམ་དུ་སླེབས།
EZR 7:10 ཡང་ཨེས་སི་རཱ་ཡིས་བློ་སེམས་རྩེ་གཅིག་གིས་དཀོན་མཆོག་ཡ་ཝཱེའི་བཀའ་ཁྲིམས་སྦྱངས་ནས་དེ་བཞིན་བརྩིས་པ་དང་། བཀའ་རྒྱ་དང་སྒྲིག་སྲོལ་དག་གིས་ཡེས་ར་ཨེལ་གྱི་འབངས་མི་ལ་མཛུབ་སྟོན་གནང་ངོ་། །
EZR 7:11 དཀོན་མཆོག་ཡ་ཝཱེའི་བཀའ་ཁྲིམས་དང་ཡེས་ར་ཨེལ་ལ་གནང་བའི་བཀའ་རྒྱ་རྣམས་སྦྱོང་མཁན་གྱི་མཆོད་དཔོན་དང་དྲུང་ཡིག་ཨེས་སི་རཱ་བྱ་བ་ལ་རྒྱལ་པོ་ཨར་ཐག་ཤཱ་ཐི་ཡིས་གནང་བའི་བཀའ་ཡིག་གི་ངོ་བཤུས་ནི་འདི་ལྟ་སྟེ།
EZR 7:12 རྒྱལ་པོ་རྣམས་ཀྱི་རྒྱལ་པོ་ཨར་ཐག་ཤཱ་ཐི་ཡིས། ནམ་མཁའི་དཀོན་མཆོག་གི་བཀའ་ཁྲིམས་བྱང་དུ་ཆུབ་པའི་དཔེ་ཆ་པ་མཆོད་དཔོན་ཨེས་སི་རཱ་ལ་གོང་མའི་བཀའ་ཡིག་སྤྲིངས་དོན་འདི་ལྟ་སྟེ།
EZR 7:13 ངའི་རྒྱལ་ཁམས་སུ་ཡོད་པའི་ཡེས་ར་ཨེལ་པ་རྣམས་ལས། ཡར་ཡེ་རུ་སཱ་ལེམ་དུ་འགྲོ་འདོད་པའི་མཆོད་དཔོན་དང་ལེ་ཝི་པ་ཐམས་ཅད་ཁྱོད་དང་མཉམ་དུ་སོང་ཆོག
EZR 7:14 ཁྱོད་ནི་རྒྱལ་པོ་དང་གྲོས་མི་བདུན་པོས་མངགས་པ་ཡིན་པས། ཁྱོད་ཀྱི་ལག་ཏུ་ཡོད་པའི་དཀོན་མཆོག་གི་བཀའ་ཁྲིམས་ལྟར་ཡ་ཧུ་དཱ་དང་ཡེ་རུ་སཱ་ལེམ་གྱི་གནས་ཚུལ་ལ་རྩད་ཆོད་ཅིག
EZR 7:15 རྒྱལ་པོ་དང་གྲོས་མི་རྣམས་ཀྱིས་ཡེ་རུ་སཱ་ལེམ་དུ་བཞུགས་པའི་དཀོན་མཆོག་ལ་དགའ་མགུ་ངང་ཕུལ་བའི་གསེར་དངུལ་ཡང་ཁྱོད་ཀྱིས་འཁྱེར་དགོས།
EZR 7:16 དེར་མ་ཟད། ཁྱོད་ཀྱིས་པཱ་པེལ་ལོན་གྱི་ཡུལ་ཐམས་ཅད་ནས་བསྡུས་པའི་གསེར་དངུལ་དང་། འབངས་མི་དང་མཆོད་དཔོན་རྣམས་ཀྱིས་ཡིད་མོས་ངང་ཡེ་རུ་སཱ་ལེམ་གྱི་དཀོན་མཆོག་གི་མཆོད་ཁང་དུ་ཕུལ་བའི་ལེགས་སྐྱེས་དག་ཀྱང་འཁྱེར་དགོས།
EZR 7:17 ཁྱོད་ཀྱིས་དངུལ་འདི་ལས་གཟབ་ནན་གྱིས་གླང་དང་ལུག་ཐུག་དང་ལུ་གུ་དང་། འབྲུ་རིགས་ཀྱི་མཆོད་པ་དང་སྐྱེམས་མཆོད་ཉོས་ནས། ཡེ་རུ་སཱ་ལེམ་དུ་ཡོད་པའི་ཁྱོད་ཚོའི་དཀོན་མཆོག་གི་མཆོད་ཁང་གི་མཆོད་ཁྲིའི་སྟེང་ནས་མཆོད་ཅིག
EZR 7:18 ཡང་གསེར་དངུལ་ལྷག་མ་དེ་དག་ནི། ཁྱོད་ཚོའི་དཀོན་མཆོག་གི་དགོངས་པ་བཞིན་དུ། ཁྱོད་དང་ཁྱོད་ཀྱི་སྤུན་རྣམས་ཀྱིས་གང་ལེགས་པར་བསམས་ན་དེ་བཞིན་གྱིས་ཤིག
EZR 7:19 ཡང་ཁྱོད་ལ་བཅོལ་བའི་དཀོན་མཆོག་གི་མཆོད་ཁང་དུ་ཞབས་ཕྱི་སྒྲུབ་བྱེད་ཀྱི་སྣོད་ཆས་རྣམས་ནི་ཡེ་རུ་སཱ་ལེམ་གྱི་དཀོན་མཆོག་ལ་ཕུལ་ཞིག
EZR 7:20 དེ་མིན་ཁྱོད་ཀྱི་དཀོན་མཆོག་གི་མཆོད་ཁང་དུ་ཅི་ཞིག་མཁོ་ན། འགྲོ་གྲོན་ཚང་མ་རྒྱལ་པོའི་བང་མཛོད་ནས་ལོངས་ཤིག
EZR 7:21 རྒྱལ་པོ་ཨར་ཐག་ཤཱ་ཐི་བདག་གིས་གཙང་པོའི་ཕ་རོལ་གྱི་ཕྱག་མཛོད་ཐམས་ཅད་ལ་བཀའ་འདི་གནང་བ་ཡིན། ནམ་མཁའི་དཀོན་མཆོག་གི་བཀའ་ཁྲིམས་ལ་མཁས་པའི་དཔེ་ཆ་པ་མཆོད་དཔོན་ཨེས་སི་རཱ་ལ་ཁྱོད་ཅག་ལས་ཅི་དགོས་ན་མྱུར་དུ་སྒྲུབས་ཤིག
EZR 7:22 དངུལ་གྱི་རྡོ་ཚད་བརྒྱ་དང་། གྲོ་ཁལ་བརྒྱ། རྒུན་ཆང་ཆུ་བེན་བརྒྱ། སྐྱུ་རུའི་ཚི་སྣུམ་ཆུ་བེན་བརྒྱ། ཚྭ་འདོད་པ་བཞིན་དུ་འབུལ་དགོས།
EZR 7:23 ནམ་མཁར་བཞུགས་པའི་དཀོན་མཆོག་གིས་བཀའ་གང་ཞིག་གནང་བ་དེ། ནམ་མཁའི་དཀོན་མཆོག་གི་མཆོད་ཁང་གི་ཕྱིར་བརྩོན་པར་གྱིས། གང་ལ་ཞེ་ན། རྒྱལ་པོ་དང་དེའི་སྲས་ཀྱི་རྒྱལ་ཁམས་ལ་ཐུགས་ཁྲོ་བར་མི་འགྱུར་རོ། །
EZR 7:24 ཁྱོད་རྣམས་ཀྱིས་ཤེས་དགོས་པ་ཞིག་ནི། མཆོད་དཔོན་དང་། ལེ་ཝི་པ། མགུར་ལེན་མཁན། སྒོ་སྲུང། མཆོད་གཡོག་རྣམས་དང་། དཀོན་མཆོག་གི་མཆོད་ཁང་འདིའི་གཉེར་པ་རྣམས་ལས་དཔྱ་ཁྲལ་དང་འབུལ་མཚན། འབྲུ་ཁྲལ་བཅས་བླང་མི་ཆོག
EZR 7:25 ཀྱེ་ཨེས་སི་རཱ་ཁྱོད་རང་ལ་མཚོན་ན། ཁྱོད་ཀྱི་དཀོན་མཆོག་གིས་གནང་བའི་ཤེས་རབ་བཞིན་དུ་ཁྲིམས་དཔོན་དང་འགོ་དཔོན་བསྐོས་ནས། གཙང་པོའི་ཕ་རོལ་ཏུ་གནས་པའི་འབངས་མི་དཀོན་མཆོག་གི་བཀའ་ཁྲིམས་ཤེས་པ་རྣམས་ལ་དབང་བསྒྱུར་དགོས་ལ། ཁྱོད་ཀྱིས་དཀོན་མཆོག་གི་བཀའ་ཁྲིམས་མི་ཤེས་པ་རྣམས་ལ་སློབས་ཤིག
EZR 7:26 གལ་ཏེ། མི་སུ་ཞིག་གིས་ཁྱོད་ཀྱི་དཀོན་མཆོག་གི་བཀའ་ཁྲིམས་དང་རྒྱལ་པོའི་བཀའ་མི་བསྲུང་ན། དེ་ལ་སྲོག་ཆད་གཅོད་པའམ་རྒྱང་ཕུད་དུ་གཏོང་བའམ། རྒྱུ་ནོར་ལེན་པའམ་བཙོན་དུ་འཇུག་པའི་ཁྲིམས་སོགས་གཟབ་ནན་གྱིས་ཆོད་ཅིག་ཅེས་བྲིས་སོ། །
EZR 7:27 ཨེས་སི་རཱ་ན་རེ། ངེད་ཀྱི་མེས་པོ་རྣམས་ཀྱི་དཀོན་མཆོག་ཡ་ཝཱེ་ནི་བསྟོད་འོས་པ་ཡིན། གང་ལ་ཞེ་ན། ཡེ་རུ་སཱ་ལེམ་གྱི་ཡ་ཝཱེའི་མཆོད་ཁང་ལ་གཟི་བརྗིད་འབུལ་བའི་བསམ་པ་འདི་རྒྱལ་པོའི་སེམས་སུ་གནང་བ་དང་།
EZR 7:28 ཡང་ཁོང་གིས་རྒྱལ་པོ་དང་། དེའི་གྲོས་མི་དང་། རྒྱལ་པོའི་འགོ་དཔོན་ནུས་པ་ཅན་ཐམས་ཅད་ཀྱི་མདུན་ནས་བདག་ཐུགས་རྗེས་བསྐྱངས་པའི་ཕྱིར་རོ། །བདག་གི་དཀོན་མཆོག་ཡ་ཝཱེས་ང་ལ་རོགས་རམ་མཛད་པས། བདག་ལ་སྤོབས་པ་འཛོམས་ཏེ། ཡེས་ར་ཨེལ་གྱི་འགོ་དཔོན་ཁ་ཤས་ང་དང་མཉམ་དུ་འགྲོ་བའི་ཕྱིར་བསྡུས་པ་ཡིན་ཞེས་པའོ། །
EZR 8:1 རྒྱལ་པོ་ཨར་ཐག་ཤཱ་ཐིའི་དུས་སུ་པཱ་པེལ་ལོན་ནས་ང་དང་མཉམ་དུ་འོངས་པ་རྣམས་ཀྱི་ཚོ་དཔོན་དག་དང་ཁོ་ཚོའི་གདུང་རྒྱུད་ཀྱི་ཐོ་ནི།
EZR 8:2 ཕི་ནེ་ཧེ་ཡི་བུ་རྒྱུད་ནས་གེར་ཤོམ་དང་། ཨི་ཐ་མཱར་གྱི་བུ་རྒྱུད་ནས་དཱ་ནེ་ཨེལ་དང་། དཱ་བིད་ཀྱི་བུ་རྒྱུད་ནས་ཧད་ཏུས་དང་།
EZR 8:3 ཤེ་ཀན་ཡཱའི་བུ་རྒྱུད་དེ་ཕཱར་ཨོ་སིའི་བུ་རྒྱུད་ནས་ཟཱ་ཀར་ཡ་དང་། དེ་དང་མཉམ་དུ་ཁྱིམ་རྒྱུད་ཀྱི་ཐོ་ལྟར་སྐྱེས་པ་བརྒྱ་དང་ལྔ་བཅུ་ཡོད།
EZR 8:4 ཕཱ་ཧད་མོ་ཨབ་ཀྱི་བུ་རྒྱུད་ནས་ཟེ་རཱ་ཡཱའི་བུ་ཨེ་ལི་ཧོ་ནེ་ཨི་དང་མཉམ་དུ་སྐྱེས་པ་ཉིས་བརྒྱ་ཡོད།
EZR 8:5 ཤེ་ཀན་ཡཱའི་བུ་རྒྱུད་ནས་ཡེ་ཧ་ཟི་ཨེལ་གྱི་བུ་དང་མཉམ་དུ་སྐྱེས་པ་སུམ་བརྒྱ་ཡོད།
EZR 8:6 ཨ་དིན་གྱི་བུ་རྒྱུད་ནས་ཡོ་ནཱ་ཐན་གྱི་བུ་ཨེ་བད་དང་། དེ་དང་མཉམ་དུ་སྐྱེས་པ་ལྔ་བཅུ་ཡོད།
EZR 8:7 ཨེ་ལཱམ་གྱི་བུ་རྒྱུད་ནས་ཨ་ཐལ་ཡཱའི་བུ་ཡེ་ཤ་ཡཱ་དང་། དེ་དང་མཉམ་དུ་སྐྱེས་པ་བདུན་ཅུ་ཡོད།
EZR 8:8 ཤེ་ཕད་ཡཱའི་བུ་རྒྱུད་ནས་མེའ་ཀཱ་ཨེལ་གྱི་བུ་ཟེ་བད་ཡཱ་དང་། དེ་དང་མཉམ་དུ་སྐྱེས་པ་བརྒྱད་ཅུ་ཡོད།
EZR 8:9 ཡོ་ཨབ་ཀྱི་བུ་རྒྱུད་ནས་ཡེ་ཧི་ཨེལ་གྱི་བུ་ཨོ་བད་ཡཱ་དང་། དེ་དང་མཉམ་དུ་སྐྱེས་པ་ཉིས་བརྒྱ་དང་བཅོ་བརྒྱད་ཡོད།
EZR 8:10 ཤེ་ལོ་མིད་ཀྱི་བུ་རྒྱུད་ནས་ཡོ་སེབ་ཡཱའི་བུ་དང་། དེ་དང་མཉམ་དུ་སྐྱེས་པ་བརྒྱ་དང་དྲུག་ཅུ་ཡོད།
EZR 8:11 པེ་བཱ་ཨིའི་བུ་རྒྱུད་ནས་པེ་བཱ་ཨིའི་བུ་ཟཱ་ཀར་ཡ་དང་། དེ་དང་མཉམ་དུ་སྐྱེས་པ་ཉེར་བརྒྱད་ཡོད།
EZR 8:12 ཨས་གད་ཀྱི་བུ་རྒྱུད་ནས་ཧག་ག་ཏན་གྱི་བུ་ཡོ་ཧ་ནན་དང་། དེ་དང་མཉམ་དུ་སྐྱེས་པ་བརྒྱ་དང་བཅུ་ཡོད།
EZR 8:13 ཨ་དོ་ནི་ཀམ་གྱི་བུ་རྒྱུད་ནི་མཐའ་མ་རྣམས་ཡིན་ཏེ་ཨེ་ལི་ཕེ་ལེད་དང་། ཡེ་ཧི་ཨེལ་དང་། ཤེ་མ་ཡཱ་གསུམ་དང་མཉམ་དུ་སྐྱེས་པ་དྲུག་ཅུ་ཡོད།
EZR 8:14 པིག་ཝ་ཨིའི་བུ་རྒྱུད་ནི་ཨུ་ཐ་ཨི་དང་ཟ་ཀུར་དང་མཉམ་དུ་སྐྱེས་པ་བདུན་ཅུ་ཐམ་པ་ཡོད།
EZR 8:15 བདག་གིས་ཨ་ཧ་ཝའི་ཕྱོགས་སུ་འབབ་པའི་ཆུ་བོའི་འགྲམ་དུ་དེ་རྣམས་བསྡུས་ནས་སྒར་བརྒྱབ་སྟེ་དེར་ཉིན་གསུམ་ལ་བསྡད། འབངས་མི་དང་མཆོད་དཔོན་རྣམས་ཀྱི་གྲས་སུ་རྩད་བཅད་ཀྱང་ལེ་ཝི་པ་གཅིག་ཀྱང་མ་རྙེད།
EZR 8:16 དེ་ནས་ངས་ཨེ་ལི་ཨེ་བཟིར་དང་། ཨ་རི་ཨེལ། ཤེ་མ་ཡཱ། ཨེལ་ནཱ་ཐན། ཡ་རིབ། ཨེལ་ནཱ་ཐན། ནཱ་ཐན། ཟཱ་ཀར་ཡ། མཱེ་ཤུལ་ལིམ་སོགས་འགོ་དཔོན་རྣམས་དང་། ཡོ་ཡཱ་རིབ་དང་ཨེལ་ནཱ་ཐན་ཞེས་བྱ་བའི་ཡོན་ཏན་ཅན་གཉིས་བཅས་བསྡུས་ཏེ།
EZR 8:17 ཁོ་ཚོ་ཀ་སིབ་ཡཱ་བྱ་བའི་ས་གནས་ཀྱི་འགོ་དཔོན་ཨིད་དོའི་དྲུང་དུ་མངགས་ནས། དེ་རྣམས་ཀྱིས་ཨིད་དོ་དང་ཁོའི་སྤུན་མཆོད་གཡོག་ཡིན་པ་རྣམས་ལ་ཅི་ལྟར་སྨྲ་དགོས་ལུགས་བསླབས་པ་དང་། ངེད་ཀྱི་དཀོན་མཆོག་གི་མཆོད་ཁང་གི་ཕྱིར་ཞབས་ཕྱི་སྒྲུབ་མཁན་གཏོང་བར་ཞུས་པ་ཡིན།
EZR 8:18 ངེད་ཀྱི་དཀོན་མཆོག་གི་ཐུགས་རྗེའི་རོགས་རམ་ལ་བརྟེན་ནས། དེ་རྣམས་ཀྱིས་ཡེས་ར་ཨེལ་གྱི་བུ་རྒྱུད་དང་ལེ་ཝིའི་བུ་རྒྱུད་དང་། མཱ་ལིའི་བུ་རྒྱུད་ལས་མི་བློ་རིག་ཅན་ཞིག་ཁྲིད་ཡོང་བ་སྟེ། ཤེ་རེབ་ཡཱ་དང་དེའི་བུ་རྣམས་དང་སྤུན་དག་བསྡོམས་པས་མི་བཅོ་བརྒྱད་ཡོད།
EZR 8:19 གཞན་ད་དུང་ཧ་ཤབ་ཡཱ་དང་། དེ་དང་མཉམ་དུ་མཱ་རཱ་རེའེ་ཡི་བུ་རྒྱུད་ལས་ཡེ་ཤ་ཡཱ་དང་། དེའི་སྤུན་དང་དེ་དག་གི་བུ་རྣམས་བསྡོམས་པས་མི་ཉི་ཤུ་ཡོད།
EZR 8:20 དེར་མ་ཟད་སྔར་དཱ་བིད་དང་འགོ་དཔོན་དག་གིས་ལེ་ཝི་པ་རྣམས་ལ་ཞབས་ཕྱི་བསྒྲུབ་པར་བསྐོས་པའི་མཆོད་གཡོག་རྣམས་ལས། མིང་བཀོད་ཡོད་པའི་མི་ཉིས་བརྒྱ་དང་ཉི་ཤུ་བཅས་མངགས་ཡོད་དོ། །
EZR 8:21 སྐབས་དེར་ངས་ཆུ་བོ་ཨ་ཧ་ཝའི་འགྲམ་དུ་སྨྱུང་གནས་བསྲུང་དགོས་པའི་བཀའ་བསྒྲགས་པ་ཡིན། གང་ལ་ཞེ་ན། ང་ཚོའི་དཀོན་མཆོག་གི་དྲུང་དུ་ཁེངས་སྐྱུང་གི་སེམས་དང་བཅས་ང་ཚོ་དང་ང་ཚོའི་ཕྲུ་གུ་རྣམས་དང་། རང་གི་རྒྱུ་ནོམ་པ་ཐམས་ཅད་ལ་བགྲོད་བདེའི་ལམ་བུ་ཞིག་འབྱུང་བའི་ཕྱིར་གསོལ་བ་བཏབ་པ་ཡིན།
EZR 8:22 ལམ་བར་དུ་དགྲ་ལས་བསྲུང་བའི་ཕྱིར་རྒྱལ་པོ་ལ་རྐང་དམག་དང་སྐྱ་དམག་མངགས་པར་ཞུ་བ་ལ་ངོ་ཚ་བྱུང་། གང་ལ་ཞེ་ན། སྔར་ངེད་རྣམས་ཀྱིས་རྒྱལ་པོར་སྨྲས་པ་ལྟར། སུ་ཞིག་གིས་ང་ཚོའི་དཀོན་མཆོག་བཙལ་ན་དེ་ལ་བྱིན་རླབས་གནང་ངེས་ཡིན་པ་དང་། གལ་ཏེ་སུ་ཞིག་གིས་ཁོང་ལ་རྒྱབ་འགལ་བྱས་ན་ཁོང་ཐུགས་ཁྲོ་བ་དང་དེ་ལ་ཆད་པ་གཅོད་ངེས་སོ་ཞེས་སྨྲས་པའི་ཕྱིར་རོ། །
EZR 8:23 དེ་ནས་ངེད་རྣམས་ཀྱིས་སྨྱུང་གནས་བསྲུངས་ཏེ་རང་གི་དཀོན་མཆོག་ལ་གསོལ་བ་བཏབ་པ་དང་ཁོང་གིས་གསན་པར་མཛད་དོ། །
EZR 8:24 དེར་ངས་མཆོད་དཔོན་འགོ་ཁྲིད་རྣམས་ལས་མི་བཅུ་གཉིས་དང་། ཡང་ཤེ་རེབ་ཡཱ་དང་། ཧ་ཤབ་ཡཱ། དེ་དག་གི་སྤུན་བཅུ་བཅས་བསྐོ་མངགས་བྱས་ཏེ།
EZR 8:25 རྒྱལ་པོ་དང་བློ་འདོན་པ་དང་། དམག་དཔོན་དང་། དེར་ཡོད་པའི་ཡེས་ར་ཨེལ་པ་ཐམས་ཅད་ཀྱིས་ང་ཚོའི་དཀོན་མཆོག་གི་མཆོད་ཁང་གི་ཕྱིར་ཕུལ་བའི་གསེར་དངུལ་དང་སྣོད་ཆས་དག་ཚད་ནས་ཁོ་ཚོར་སྤྲད་པ་ཡིན།
EZR 8:26 ངས་ཚད་ནས་སྤྲད་པའི་དངུལ་རྡོ་ཚད་དྲུག་བརྒྱ་ལྔ་བཅུ་དང་། རྡོ་ཚད་བརྒྱ་ཡི་དངུལ་ཆས་དང་། གསེར་རྡོ་ཚད་བརྒྱ་དང་།
EZR 8:27 གསེར་གྱི་དཀར་ཡོལ་ཉི་ཤུ་སྟེ། དེའི་རིན་ཐང་ནི་གསེར་གྱི་དོང་ཙེ་ཆིག་སྟོང་དང་། གསེར་ལྟར་རིན་ཐང་ཆེ་བའི་ལི་ཆས་འོད་ཅན་གཉིས་བཅས་ཡོད།
EZR 8:28 ངས་ཁོ་ཚོར་སྨྲས་པ། ཁྱོད་རྣམས་དཀོན་མཆོག་ཡ་ཝཱེའི་དོན་དུ་དམ་པ་ཡིན་ལ། སྣོད་ཆས་འདི་དག་ཀྱང་དམ་པ་ཡིན། ཡང་གསེར་དངུལ་ནི་ཁྱོད་ཚོའི་ཕ་མེས་རྣམས་ཀྱི་དཀོན་མཆོག་ཡ་ཝཱེ་ལ་ཡིད་མོས་ངང་ཕུལ་བའི་འབུལ་བ་ཡིན་ནོ། །
EZR 8:29 མཆོད་དཔོན་དང་ལེ་ཝི་པའི་ཚོ་དཔོན་དག་དང་། དེ་མིན་ཡེས་ར་ཨེལ་གྱི་ཚོ་དཔོན་རྣམས་ཀྱི་མདུན་དུ་སླེབས་པའི་བར་དུ་ཁྱོད་ཚོས་གཟབ་ནན་ངང་སྲུངས་ཤིག ཡེ་རུ་སཱ་ལེམ་གྱི་དཀོན་མཆོག་ཡ་ཝཱེའི་མཆོད་ཁང་གི་མཛོད་ཁང་དུ་རྩིས་བླངས་ཏེ་སྤྲོད་ཅིག་ཅེས་པའོ། །
EZR 8:30 དེར་རྩིས་བླངས་པའི་གསེར་དངུལ་དང་སྣོད་ཆས་རྣམས་ཡེ་རུ་སཱ་ལེམ་དུ་ངེད་ཀྱི་དཀོན་མཆོག་གི་མཆོད་ཁང་དུ་འཁྱེར་བའི་ཕྱིར་མཆོད་དཔོན་དང་ལེ་ཝི་པ་རྣམས་ཀྱིས་བླངས་སོ། །
EZR 8:31 ཟླ་དང་པོའི་ཚེས་བཅུ་གཉིས་ཉིན་ང་ཚོ་ཆུ་བོ་ཨ་ཧ་ཝའི་འགྲམ་ནས་ཆས་ཏེ་ཡེ་རུ་སཱ་ལེམ་གྱི་ཕྱོགས་སུ་ཕྱིན། ངེད་ཀྱི་དཀོན་མཆོག་གིས་རོགས་སྐྱོབ་མཛད་ནས་ངེད་རྣམས་དགྲ་དང་ལམ་གྱི་ཇག་པའི་ལག་ནས་ཐར་བར་བཅུག
EZR 8:32 ངེད་རྣམས་ཡེ་རུ་སཱ་ལེམ་དུ་སླེབས་པ་དང་ཉིན་གསུམ་གྱི་རིང་ལ་དེ་རུ་བསྡད།
EZR 8:33 ཉིན་བཞི་པར་གསེར་དངུལ་དང་སྣོད་ཆས་དག་དཀོན་མཆོག་གི་མཆོད་ཁང་ནས་རྩིས་གྲངས་བླངས་ཏེ། ཨུ་རི་ཡཱའི་བུ་སྟེ་མཆོད་དཔོན་མེ་རེ་མོད་ལ་སྤྲད། ཁོ་དང་མཉམ་དུ་གཞན་ཕི་ནེ་ཧེ་ཡི་བུ་ཨེ་ལི་ཨ་ཟར་དང་། ད་དུང་ལེ་ཝི་པ་ཡེ་ཤུ་ཨའི་བུ་ཡོ་ཟཱ་བད་དང་། པིན་ནུ་ཨིའི་བུ་ནོ་ཨད་ཡཱ་རྣམས་ཡོད་པ་ཡིན།
EZR 8:34 དེ་དག་རེ་རེ་བཞིན་རྩིས་གྲངས་བླངས་ནས་ལྗིད་ཚད་ཚང་མ་དུས་དེ་རང་ལ་ཟིན་ཐོར་བཀོད་དོ། །
EZR 8:35 བཙོན་ལས་ཐར་ཏེ་ཕྱིར་ལོག་པ་རྣམས་ཀྱིས་ཡེས་ར་ཨེལ་གྱི་དཀོན་མཆོག་ལ་སྦྱིན་སྲེག་ཕུལ་བ་སྟེ། ཡེས་ར་ཨེལ་པ་ཐམས་ཅད་ཀྱི་དོན་དུ་གླང་བཅུ་གཉིས་དང་། ལུག་ཐུག་དགུ་བཅུ་གོ་དྲུག་དང་། ལུ་གུ་བདུན་ཅུ་དོན་བདུན་ཕུལ་ཞིང་། སྡིག་བཤགས་ཀྱི་མཆོད་པར་ར་མ་བཅུ་གཉིས་ཕུལ། འདི་ཐམས་ཅད་དཀོན་མཆོག་ཡ་ཝཱེ་ལ་ཕུལ་བའི་སྦྱིན་སྲེག་གི་མཆོད་པ་ཡིན།
EZR 8:36 ཁོ་རྣམས་ཀྱིས་རྒྱལ་པོའི་བཀའ་ཡིག་རྒྱལ་པོའི་སྤྱི་དཔོན་དང་གཙང་པོའི་ཕ་རོལ་གྱི་འགོ་དཔོན་རྣམས་ལ་སྤྲད་ཅིང་། དེ་རྣམས་ཀྱིས་དཀོན་མཆོག་གི་མཆོད་ཁང་དང་འབངས་མི་ལ་རོགས་བྱས་སོ། །
EZR 9:1 དོན་དེ་དག་འགྲུབ་རྗེས་འགོ་དཔོན་རྣམས་ངའི་རྩར་འོངས་ནས་འདི་ལྟར། ཡེས་ར་ཨེལ་གྱི་མི་མང་དང་། མཆོད་དཔོན་རྣམས་དང་། ལེ་ཝི་པ་རྣམས་ཀྱིས་ཀ་ན་ཨན་པ་དང་། ཧེད་པ། ཕེ་རེ་ཟི་པ། ཡེ་བུ་སི་པ། ཨམ་མོན་པ། མོ་ཨབ་པ། ཨེ་ཅིབ་པ། ཨེ་མོར་པ་རྣམས་ཏེ། ཡུལ་མི་རྣམས་ཀྱི་ཞེན་ལོག་གི་བྱ་སྤྱོད་དག་ལ་བསྟུན་ནས།
EZR 9:2 ཁོ་རྣམས་ཀྱིས་རང་ཉིད་དང་རང་གི་བུ་རྣམས་ལ་ཕྱི་ཕྱོགས་པའི་ཆུང་མ་བླངས་ཏེ། རིགས་རྒྱུད་གཙང་མ་དེ་མི་རིགས་གཞན་དང་བསྲེས་འདུག དེར་མ་ཟད་འགོ་དཔོན་དང་འགོ་ཁྲིད་རྣམས་བྱ་བ་འདིའི་སྟེང་ནས་ཉེས་ཅན་གཏེ་བོ་ཡིན་ཞུས་བྱུང་།
EZR 9:3 ངས་གཏམ་དེ་ཐོས་པ་དང་། གྱོན་གོས་དང་བེར་གོས་ཧྲལ་ཏེ། མགོའི་སྐྲ་དང་སྨྲ་ར་བལ་ཞིང་། དངངས་སྐྲག་དང་བཅས་བསྡད།
EZR 9:4 བཙོན་ལས་ཐར་ཏེ་ཕྱིར་ལོག་པ་རྣམས་ཀྱི་སྡིག་ཉེས་ཀྱི་ཕྱིར། ཡེས་ར་ཨེལ་གྱི་དཀོན་མཆོག་གི་བཀའ་ཡི་རྐྱེན་གྱིས་སྐྲག་ནས་འདར་མཁན་ཐམས་ཅད་ངའི་མདུན་དུ་འཛོམས་ཤིང་། ང་རང་མཚན་མོའི་སྦྱིན་སྲེག་འབུལ་བའི་བར་དུ་འཇིགས་སྣང་དང་བཅས་བསྡད་པ་ཡིན།
EZR 9:5 མཚན་མོའི་སྦྱིན་སྲེག་གི་མཆོད་པའི་དུས་སུ་ང་རང་སྡུག་བསྔལ་ཁྲོད་ཡར་ལངས་ཏེ། སྔར་བཞིན་གྱོན་གོས་དང་བེར་གོས་ཧྲལ་པོ་དག་གྱོན་ནས་པུས་མོ་སར་བཙུགས་ཤིང་། བདག་གི་དཀོན་མཆོག་ཡ་ཝཱེའི་ཕྱོགས་སུ་ལག་པ་བརྐྱངས་ནས་སྨོན་ལམ་ཞུས།
EZR 9:6 ཀྱེ། བདག་གི་དཀོན་མཆོག་ལགས། ངེད་ཅག་གིས་སྡིག་པ་མང་པོ་སྲོག་ལ་འབབ་འོས་པ་བྱས་ཤིང་། ངེད་ཅག་གི་སྡིག་པ་ནི་ནམ་མཁར་ཡང་མི་ཤོང་བས། ང་རང་ཁྱེད་ཀྱི་ཕྱོགས་སུ་མགོ་བོ་འདེགས་པར་ངོ་གནོང་བའོ། །
EZR 9:7 ང་ཚོའི་ཕ་མེས་རྣམས་ཀྱི་དུས་ནས་ད་བར་དུ། ངེད་ཅག་གི་སྡིག་པ་ཤིན་ཏུ་ཚབས་ཆེ་ཞིང་། ཡང་སྡིག་པ་བྱས་ཡོད་པའི་ཕྱིར། ངེད་ཅག་དང་ངེད་ཅག་གི་རྒྱལ་པོ་རྣམས་དང་མཆོད་དཔོན་རྣམས་ནི་རྒྱལ་ཁབ་གཞན་གྱི་རྒྱལ་པོ་རྣམས་ཀྱི་ལག་ཏུ་ལྷུང་ནས་བསད་པ་དང་། བཟུང་བ་དང་། བཅོམ་པ་དང་། ངོ་ཚར་སྦྱར་བ་སོགས་ནི་ད་ལྟའི་དུས་དང་གཅིག་མཚུངས་ཡིན།
EZR 9:8 ད་ལྟ་ངེད་ཅག་གི་དཀོན་མཆོག་ཡ་ཝཱེས་ཡུད་ཙམ་ལ་ཐུགས་རྗེ་མཛད་ཅིང་། ངེད་ཅག་ལ་ལྷག་ལུས་འགའ་རེ་བསྐྱུར་ཡོད་ལ། ངེད་ཅག་ནི་ཁོང་གི་གནས་དམ་པ་རུ་འཛེར་མ་བརྡབས་པ་བཞིན་དུ་བག་ཕེབས་ངང་གནས་ཐུབ་པར་མཛད་ཅིང་། ཁོང་གི་གཟི་འོད་ཀྱིས་ང་ཚོའི་མིག་སྒོ་ཡང་ཕྱེས་ཏེ་བཙན་གནོན་འོག་ཡང་བསྐྱར་དར་བ་ཙམ་བྱས།
EZR 9:9 ངེད་ཅག་བྲན་གཡོག་ཡིན་ནའང་། རང་རེའི་དཀོན་མཆོག་གིས་ངེད་ཅག་བཙན་གནོན་འོག་ཏུ་མ་བསྐྱུར་བར། ཏ་ཟིག་གི་རྒྱལ་པོ་རྣམས་ཀྱི་མདུན་ནས་ངེད་ཅག་ལ་ཐུགས་རྗེས་གཟིགས་ཏེ་བསྐྱར་དར་མཛད་ཅིང་། རང་རེའི་དཀོན་མཆོག་གི་མཆོད་ཁང་ཞིག་རལ་དེ་ཉམས་གསོ་མཛད་པ་དང་། ངེད་ཅག་ལ་ཡ་ཧུ་དཱ་དང་ཡེ་རུ་སཱ་ལེམ་དུ་མཁར་གྱང་ཡོད་པར་མཛད།
EZR 9:10 ཀྱེ། ངེད་ཀྱི་དཀོན་མཆོག་ལགས། ད་ནི་ངེད་ཅག་གིས་ཅི་ཞུ་བར་བྱའམ། གང་ལ་ཞེ་ན། ངེད་ཅག་གིས་ཁྱེད་ཀྱི་བཀའ་དོར་བ་དང་།
EZR 9:11 བཀའ་དེ་ནི་ཁྱེད་ཀྱིས་ཞབས་ཕྱི་ལུང་སྟོན་པ་རྣམས་བརྒྱུད་ནས་གསུངས་པ་ཡིན་ཏེ། ཁྱེད་ཀྱིས་འདི་སྐད་དུ། ཁྱོད་རྣམས་ལ་བགོ་སྐལ་དུ་འཐོབ་པར་འགྱུར་བའི་ཡུལ་ནི་བཙོག་པ་ཡིན་ཏེ། ཡུལ་དེའི་མི་རིགས་རྣམས་ཀྱི་བཙོག་པས་བཀང་ཡོད་པ་ཡིན། ཁོ་རྣམས་ཀྱི་ཞེན་ལོག་གི་ལས་ཀྱིས་ཡུལ་དེའི་མགོ་ནས་མཇུག་བར་དུ་བཙོག་པས་གང་བར་བྱས།
EZR 9:12 དེའི་ཕྱིར། ཁྱོད་ཅག་གིས་རང་གི་བུ་མོ་རྣམས་དེ་དག་ལ་མནའ་མར་བྱིན་མི་ཆོག་ལ། ཁྱོད་ཅག་གི་བུ་རྣམས་ལ་དེ་དག་གི་བུ་མོ་རྣམས་མནའ་མར་བླངས་ནའང་མི་ཆོག ཁོ་ཚོའི་ཞི་བདེ་དང་ཁོ་ཚོའི་ཁེ་ཕན་ནམ་ཡང་བཙལ་མི་ཆོག དེ་ལྟར་བྱས་ན་ཁྱོད་རྣམས་སྟོབས་ཅན་དུ་འགྱུར་ངེས་ཏེ། ཡུལ་འདིའི་ཟས་མཆོག་རྣམས་སྤྱོད་ཅིང་། ཡུལ་འདི་རྒྱུན་ནས་རྒྱུན་དུ་ཁྱོད་ཚོའི་བུ་རྒྱུད་རྣམས་ལ་བགོ་སྐལ་དུ་བསྐྱུར་བར་འགྱུར་ཞེས་གསུངས་སོ། །
EZR 9:13 ཡང་ངེད་ཅག་གིས་སྤྱོད་ངན་དང་སྡིག་པ་ཆེན་པོ་བྱས་པས། འདི་ཐམས་ཅད་ངེད་ཅག་གི་སྟེང་དུ་བྱུང་བ་རེད། ཡིན་ཡང་ངེད་ཀྱི་དཀོན་མཆོག་ཁྱེད་ཉིད་ཀྱིས་ངེད་ཅག་གི་སྡིག་པའི་ཚད་དང་བསྟུན་ནས་ཉེས་ཆད་ལྗིད་མོ་མ་བཅད་པར། ང་ཚོ་ལ་ལྷག་ལུས་འགའ་རེ་བསྐྱུར་ཡོད།
EZR 9:14 ད་ནི་ངེད་ཅག་གིས་སླར་ཡང་ཁྱེད་ཀྱི་བཀའ་དང་འགལ་ནས། སྤྱད་པ་ཞེན་ལོག་སྤྱོད་པའི་མི་རིགས་འདི་རྣམས་དང་གཉེན་འབྲེལ་བྱེད་དམ། གལ་ཏེ་ང་ཚོས་འདི་ལྟར་བྱས་ན་ཁྱེད་རང་ཐུགས་ཁྲོས་ཏེ་ང་ཚོ་མེད་པར་བཏང་ནས་མི་གཅིག་ཀྱང་མི་ལྷག་པར་མཛད་པ་མ་ཡིན་ནམ།
EZR 9:15 ཀྱེ། ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ཁྱེད་ནི་དྲང་བདེན་ཡིན་པས་ངེད་ཅག་ལུས་ནས་ལྷག་མ་རུ་གྱུར་ཏེ། གཟིགས་དང་། ངེད་ཅག་ལ་ཁྱེད་ཀྱི་དྲུང་དུ་སྡིག་པ་ཡོད་པས། མི་སུ་ཡིན་ཡང་ཁྱེད་ཀྱི་དྲུང་དུ་ཚུགས་མི་ནུས་ཞེས་ཞུས་སོ། །
EZR 10:1 དེ་ནས་ཨེས་སི་རཱ་ཡིས་དཀོན་མཆོག་གི་མཆོད་ཁང་མདུན་ནས་སྨོན་ལམ་ཞུས་ཏེ། འགྱོད་བཤགས་བྱས་ནས་ངུས་ཤིང་ཕྱག་བཙལ་ནས་སྡོད་སྐབས། ཡེས་ར་ཨེལ་པའི་སྐྱེས་པ་དང་བུད་མེད། བྱིས་པ་བཅས་ཀྱི་མི་ཚོགས་ཆེན་པོ་ཞིག་ཁོའི་རྩར་འདུས་ཏེ་སྡུག་བསྔལ་དང་བཅས་མཉམ་དུ་ངུས་སོ། །
EZR 10:2 དེར་ཨེ་ལཱམ་གྱི་བུ་རྒྱུད་དེ། ཡེ་ཧི་ཨེལ་གྱི་བུ་ཤེ་ཀན་ཡཱ་ཡིས་ཨེས་སི་རཱ་ལ་འདི་ལྟར། ངེད་ཅག་ནི་རང་གི་དཀོན་མཆོག་ལ་བློ་མི་དཀར་ཞིང་། ཡུལ་འདིའི་ཕྱི་ཕྱོགས་ཀྱི་བུད་མེད་ཆུང་མར་བླངས་པ་ཡིན། འོན་ཀྱང་ཡེས་ར་ཨེལ་ལ་ད་དུང་རེ་བ་ཡོད་དེ།
EZR 10:3 ད་ལྟ་ངེད་ཅག་གིས་དཀོན་མཆོག་ལ་དམ་བཅས་ནས། ཕྱི་རོལ་པའི་བུད་མེད་དང་ཁོ་ཚོའི་ཕྲུ་གུ་རྣམས་ཕྱིར་བསྐྱལ་དགོས། བདག་པོ་ཁྱེད་དང་དཀོན་མཆོག་གི་བཀའ་ལ་འཇིགས་མཁན་རྣམས་ཀྱི་གྲོས་ཆོད་ནང་ལྟར་བཀའ་ཁྲིམས་བཞིན་བྱེད་པར་རིགས་སོ། །
EZR 10:4 ཁྱེད་རང་ཡར་བཞེང་བར་མཛོད། འདི་ཁྱེད་ཀྱི་ལས་འགན་ཡིན། ངེད་ཅག་གིས་ཁྱེད་ལ་རྒྱབ་སྐྱོར་བྱེད་ངེས་ཡིན། ཁྱེད་ཀྱིས་སྤོབས་པ་བསྐྱེད་ནས་བྱ་བ་བསྒྲུབ་པར་མཛོད་ཅེས་སྨྲས་པ་དང་།
EZR 10:5 དེར་ཨེས་སི་རཱ་ཡར་ལངས་ནས། མཆོད་དཔོན་འགོ་ཁྲིད་དང་ལེ་ཝི་པ། ཡེས་ར་ཨེལ་པ་ཐམས་ཅད་ལ་དེ་བཞིན་དུ་བྱེད་པའི་མནའ་བཀལ་བས་ཁོ་རྣམས་ཀྱིས་མནའ་དེ་བསྐྱལ།
EZR 10:6 དེ་ནས་ཨེས་སི་རཱ་དཀོན་མཆོག་གི་མཆོད་ཁང་གི་མདུན་ནས་ལངས་ཏེ། ཨེལ་ཡཱ་ཤིབ་ཀྱི་བུ་ཡེ་ཧོ་ཧ་ནན་གྱི་ཁང་མིག་ཏུ་སོང་ནས། ཟས་མ་སྤྱད་ལ་ཆུ་ཡང་མ་འཐུང་། གང་ལ་ཞེ་ན། བཙོན་ལས་ཐར་ཏེ་ཕྱིར་ལོག་པ་རྣམས་ཀྱི་སྡིག་པའི་ཕྱིར་མྱ་ངན་བྱས་སོ། །
EZR 10:7 ཡང་འགོ་དཔོན་རྣམས་ཀྱིས་ཡ་ཧུ་དཱ་དང་ཡེ་རུ་སཱ་ལེམ་གྱི་བཙོན་ལས་ཐར་ཏེ་ཕྱིར་ལོག་པ་ཐམས་ཅད་ལ་བརྡ་བརྒྱབ་སྟེ། ཡེ་རུ་སཱ་ལེམ་དུ་འཛོམས་དགོས་པར་བསྒྲགས་ནས།
EZR 10:8 འགོ་དཔོན་རྣམས་དང་རྒན་པོ་རྣམས་ཀྱི་གྲོས་ཆོད་བཞིན་དུ་སུ་ཞིག་ཉིན་ཞག་གསུམ་གྱི་ནང་ཚུན་དུ་མ་འོངས་ན། མི་དེའི་ནོར་རྫས་ཐམས་ཅད་གཞུང་བཞེས་བྱེད་པ་དང་བཙོན་ལས་ཐར་ཏེ་ཕྱིར་ལོག་པ་རྣམས་ཀྱི་ཚོགས་ནས་ཀྱང་འདོན་པར་བྱའོ། །
EZR 10:9 དེ་ནས་ཉིན་གསུམ་གྱི་ནང་དུ་ཡ་ཧུ་དཱ་དང་པེན་ཡཱ་མེན་གྱི་མི་ཐམས་ཅད་ཡེ་རུ་སཱ་ལེམ་དུ་འཛོམས་ཤིང་། དེ་ནི་ཟླ་དགུ་བའི་ཚེས་ཉི་ཤུ་ཉིན་ཡིན་ལ། འབངས་མི་རྣམས་དཀོན་མཆོག་གི་མཆོད་ཁང་གི་ཐང་ཆེན་ནས་བསྡད་པ་དང་། ཡང་བྱ་བ་དེའི་ཕྱིར་དང་ཆར་པ་ཡང་དྲག་པོ་བབས་པས་མི་རྣམས་འདར་བཞིན་ཡོད།
EZR 10:10 དེར་མཆོད་དཔོན་ཨེས་སི་རཱ་ཡར་ལངས་ནས་དེ་རྣམས་ལ། ཁྱོད་རྣམས་དཀོན་མཆོག་ལ་བློ་མི་དཀར་ཏེ། རྒྱུ་མཚན་ནི་ཕྱི་ཕྱོགས་ཀྱི་བུད་མེད་རྣམས་ཆུང་མར་བླངས་ནས་ཡེས་ར་ཨེལ་གྱི་སྡིག་པ་སྔར་ལས་མང་དུ་བཏང་།
EZR 10:11 ད་ནི་རང་གི་ཕ་མེས་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་འགྱོད་བཤགས་བྱས་ནས། ཁོང་གི་ཐུགས་དགོངས་བཞིན་དུ་ཡུལ་འདིའི་འབངས་མི་དང་ཕྱི་ཕྱོགས་ཀྱི་བུད་མེད་རྣམས་དང་སོ་སོར་གྱེས་ཤིག་ཅེས་བསྐུལ་ཏོ། །
EZR 10:12 དེ་ནས་མི་ཚོགས་ཐམས་ཅད་ཀྱིས་སྐད་གསང་མཐོན་པོས་ལན་བཏབ་ནས་ན་རེ། ངེད་ཅག་གིས་ཁྱེད་ཀྱི་བསྒོ་བ་བཞིན་དུ་བསྒྲུབ་བོ། །
EZR 10:13 འོན་ཀྱང་མི་ཚོགས་ནི་མང་པོ་ཡོད་པར་མ་ཟད་དུས་ཚིགས་འདི་ལ་ཆར་པའང་མང་བས། བདག་ཅག་ཕྱི་རོལ་ཏུ་ལངས་ནས་སྡོད་ཐབས་མེད། ཡང་བདག་ཅག་གིས་བྱ་བ་འདིའི་ཐད་ཉེས་པ་ཆེན་པོ་བྱས་པས། འདི་ནི་ཞག་གཅིག་གམ་གཉིས་ཀྱི་ནང་དུ་བསྒྲུབ་ཐུབ་པའི་ལས་མ་ཡིན།
EZR 10:14 བདག་ཅག་གི་འགོ་དཔོན་རྣམས་མི་ཚོགས་ཐམས་ཅད་ཀྱི་ཚབ་ཏུ་འདིར་བཞུགས་སུ་མཛོད་ཅིག བྱ་བ་འདིའི་རྐྱེན་གྱིས་བྱུང་བའི་དཀོན་མཆོག་གི་ཐུགས་ཁྲོ་དྲག་པོ་ཞི་བའི་བར་དུ། གྲོང་ཁྱེར་སོ་སོ་ནས་ཕྱི་ཕྱོགས་ཀྱི་བུད་མེད་ཆུང་མར་བླངས་པ་ཐམས་ཅད་ནི། དུས་བཅད་ལྟར་གྲོང་ཁྱེར་དེའི་རྒན་པོ་དང་ཁྲིམས་དཔོན་རྣམས་མཉམ་དུ་ཡོང་ནས་ལས་འདི་བསྒྲུབ་པར་མཛོད་ཅེས་ཞུས་སོ། །
EZR 10:15 གྲོས་འདི་ལ་ཨ་ས་ཧེལ་གྱི་བུ་ཡོ་ནཱ་ཐན་དང་ཏིག་ཝའི་བུ་ཡ་ཧ་ཟེ་གཉིས་མོས་མཐུན་མ་བྱུང་ལ། མཱེ་ཤུལ་ལིམ་དང་ལེ་ཝི་པ་ཤབ་བེ་ཐ་ཨི་གཉིས་ཀྱིས་དེ་རྣམས་ལ་རྒྱབ་སྐྱོར་མཛད།
EZR 10:16 དེ་ནས་བཙོན་ལས་ཐར་ཏེ་ཕྱིར་ལོག་པ་རྣམས་ཀྱིས་དེ་ལྟར་བསྒྲུབས་ཏེ། མཆོད་དཔོན་ཨེས་སི་རཱ་ཡིས་མིང་བཏོན་ནས་རུས་རྒྱུད་སོ་སོའི་ཚོ་དཔོན་རྣམས་བདམས་མངགས་བྱས་པ་དང་། ཟླ་བཅུ་པའི་ཚེས་གཅིག་ཉིན་ནས་བྱ་བ་འདིར་རྩད་གཅོད་བྱས་ནས།
EZR 10:17 ཟླ་དང་པོའི་ཚེས་གཅིག་ཉིན་ཁོ་རྣམས་ཀྱིས་ཕྱི་ཕྱོགས་ཀྱི་བུད་མེད་ཆུང་མར་ལེན་མཁན་རྣམས་རྩད་ཆོད་དོ། །
EZR 10:18 མཆོད་དཔོན་གྱི་བུ་རྒྱུད་ཁྲོད་དུ་ཕྱི་ཕྱོགས་ཀྱི་བུད་མེད་ཆུང་མར་ལེན་མཁན་རྣམས་ནི་ཡོ་ཚ་དག་གི་བུ་ཡེ་ཤུ་ཨ་ཡི་བུ་རྒྱུད་དང་སྤུན་རྣམས་ལས། མ་ཨ་སེ་ཡཱ་དང་། ཨེ་ལི་ཨེ་བཟིར། ཡཱ་རིབ། གེ་དལ་ཡཱ་བཅས་སོ། །
EZR 10:19 དེ་དག་གིས་རང་གི་ཆུང་མ་རྣམས་སྤངས་པའི་དམ་བཅའ་བཞག་ནས་སྡིག་བཤགས་མཆོད་པ་ཕུལ་བ་སྟེ། རང་རང་གི་སྡིག་པའི་དོན་དུ་ལུག་ཁྱུ་ནས་ལུག་ཐུག་ཅིག་མཆོད་པར་ཕུལ།
EZR 10:20 ཡང་ཨིམ་མེར་གྱི་བུ་རྒྱུད་རྣམས་ལས་ཧ་ནཱ་ནེ་དང་ཟེ་བད་ཡཱ་གཉིས་ཡོད་ཅིང་།
EZR 10:21 ཧ་རིམ་གྱི་བུ་རྒྱུད་རྣམས་ལས་མ་ཨ་སེ་ཡཱ་དང་། ཨེ་ལི་ཡཱ། ཤེ་མ་ཡཱ། ཡེ་ཧི་ཨེལ། ཨུ་ཟི་ཡཱ་བཅས་ཡོད་དོ། །
EZR 10:22 ཕཱ་ཤུར་གྱི་བུ་རྒྱུད་རྣམས་ལས་ཨེལ་ཡོ་ཨེ་ནཱ་ཨི། མ་ཨ་སེ་ཡཱ། ཡེས་མ་ཨེལ། ནེ་ཐན་ཨེལ། ཡོ་ཟཱ་བད། ཨེ་ལ་ཟ་བཅས་ཡོད་དོ། །
EZR 10:23 ལེ་ཝི་པ་རྣམས་ལས་ཡོ་ཟཱ་བད་དང་། ཤིམ་ཨི། ཀེ་ལ་ཡཱའམ་ཀེ་ལི་ཏ་བྱ་བ། ཕེ་ཐ་ཡཱ། ཡ་ཧུ་དཱ། ཨེ་ལི་ཨེ་བཟིར་བཅས་ཡོད་དོ། །
EZR 10:24 མགུར་ལེན་མཁན་རྣམས་ལས་ཨེལ་ཡཱ་ཤིབ་དང་། སྒོ་སྲུང་རྣམས་ལས་ཤལ་ལུམ་དང་། ཏེ་ལེམ། ཨུ་རི་བཅས་ཡོད་དོ། །
EZR 10:25 ཡེས་ར་ཨེལ་པ་ཕཱར་ཨོ་སིའི་བུ་རྒྱུད་རྣམས་ལས་རམ་ཡཱ་དང་། ཡི་ཟི་ཡཱ། མལ་ཀི་ཡཱ། མི་ཡཱ་མིན། ཨེ་ལི་ཨ་ཟར། མལ་ཀི་ཡཱ། པེ་ན་ཡཱ་བཅས་ཡོད་དོ། །
EZR 10:26 ཨེ་ལཱམ་གྱི་བུ་རྒྱུད་རྣམས་ལས་མད་ཐན་ཡཱ་དང་། ཟཱ་ཀར་ཡ། ཡེ་ཧི་ཨེལ། ཨབ་དི། ཡེ་རེ་མོད། ཨེ་ལི་ཡཱ་བཅས་ཡོད་དོ། །
EZR 10:27 ཟད་ཐུའི་བུ་རྒྱུད་རྣམས་ལས་ཨེལ་ཡོ་ཨེ་ནཱ་ཨི་དང་། ཨེལ་ཡཱ་ཤིབ། མད་ཐན་ཡཱ། ཡེ་རེ་མོད། ཟཱ་བད། ཨ་ཟི་ཟ་བཅས་ཡོད་དོ། །
EZR 10:28 པེ་བཱ་ཨིའི་བུ་རྒྱུད་རྣམས་ལས་ཡེ་ཧོ་ཧ་ནན་དང་། ཧ་ནན་ཡཱ། ཟ་བཱ་ཨི། ཨད་ལཱ་ཨི་བཅས་ཡོད་དོ། །
EZR 10:29 པཱ་ནིའི་བུ་རྒྱུད་རྣམས་ལས་མཱེ་ཤུལ་ལིམ་དང་། མལ་ལུག ཨ་ད་ཡཱ། ཡ་ཤུབ། ཤེ་ཨལ། རཱ་མོད་བཅས་ཡོད་དོ། །
EZR 10:30 ཕཱ་ཧད་མོ་ཨབ་ཀྱི་བུ་རྒྱུད་རྣམས་ལས་ཨད་ནཱ་དང་། ཁེ་ལམ། པེ་ན་ཡཱ། མ་ཨ་སེ་ཡཱ། མད་ཐན་ཡཱ། པེ་ཟལ་ཨེལ། པིན་ནུ་ཨི། མ་ན་ཤེ་བཅས་ཡོད་དོ། །
EZR 10:31 ཧ་རིམ་གྱི་བུ་རྒྱུད་རྣམས་ལས་ཨེ་ལི་ཨེ་བཟིར་དང་། ཨི་ཤི་ཡཱ། མལ་ཀི་ཡཱ། ཤེ་མ་ཡཱ། སི་མུ་ཨོན།
EZR 10:32 པེན་ཡཱ་མེན། མལ་ལུག ཤེ་མར་ཡཱ་བཅས་ཡོད་དོ། །
EZR 10:33 ཧ་ཤུམ་གྱི་བུ་རྒྱུད་རྣམས་ལས་མད་ཏེ་ནཱ་ཨི་དང་། མད་ཐད་ཐཱ། ཟཱ་བད། ཨེ་ལི་ཕེ་ལེད། ཡེ་རེ་མཱ་ཨི། མ་ན་ཤེ། ཤིམ་ཨི་བཅས་ཡོད་དོ། །
EZR 10:34 པཱ་ནིའི་བུ་རྒྱུད་རྣམས་ལས་མ་ཨ་དཱ་ཨི་དང་། ཨམ་རམ། ཨུ་ཨེལ།
EZR 10:35 པེ་ན་ཡཱ། པེ་དེ་ཡཱ། ཁེ་ལུ་ཧི།
EZR 10:36 ཝན་ཡཱ། མེ་རེ་མོད། ཨེལ་ཡཱ་ཤིབ།
EZR 10:37 མད་ཐན་ཡཱ། མད་ཏེ་ནཱ་ཨི། ཡ་ཡ་སུ།
EZR 10:38 པཱ་ནི། པིན་ནུ་ཨི། ཤིམ་ཨི།
EZR 10:39 ཤེ་ལེམ་ཡཱ། ནཱ་ཐན། ཨ་ད་ཡཱ།
EZR 10:40 མག་ནཱད་བ་ཨི། ཤ་ཤ་ཨི། ཤ་ར་ཨི།
EZR 10:41 ཨ་ཟར་ཨེལ། ཤེ་ལེམ་ཡཱ། ཤེ་མར་ཡཱ།
EZR 10:42 ཤལ་ལུམ། ཨ་མར་ཡཱ། ཡོ་སེབ་བཅས་ཡོད་དོ། །
EZR 10:43 ནེ་བོའི་བུ་རྒྱུད་རྣམས་ལས་ཡེ་ཨི་ཨེལ་དང་། མད་ཏིད་ཡཱ། ཟཱ་བད། ཟེ་བི་ནཱ། ཡད་དཱ་ཨི། ཡོ་ཨེལ། པེ་ན་ཡཱ་བཅས་ཡོད་དོ། །
EZR 10:44 དེ་ཐམས་ཅད་ཀྱིས་ཕྱི་ཕྱོགས་ཀྱི་བུད་མེད་ཆུང་མར་བླངས་པ་དང་། འགའ་ཞིག་གི་ཆུང་མར་ཕྲུ་གུ་ཡང་སྐྱེས་ཡོད་དོ།། །།
NEH 1:1 ཧ་ཁལ་ཡཱའི་བུ་ནེ་ཧེམ་ཡཱ་ཡི་སྐད་ཆ་ནི་གཤམ་གསལ་ལྟར། རྒྱལ་པོ་ཨར་ཐག་ཤཱ་ཐི་ཡིས་རྒྱལ་སྲིད་བསྐྱངས་པའི་ལོ་ཉི་ཤུ་པའི་ཁིས་ལེབ་ཅེས་པའི་ཟླ་བར། ང་རང་སོའུ་སཱན་གྱི་མཁར་རྫོང་དུ་ཡོད་དུས་འདི་ལྟར་བྱུང་།
NEH 1:2 དེ་ཡང་མི་འགའ་ཞིག་ངའི་སྤུན་ཧ་ནཱ་ནེ་དང་མཉམ་དུ་ཡ་ཧུ་དཱ་ཡུལ་ནས་འོངས་པ་དང་། བདག་གིས་དེ་རྣམས་ལ་བཙོན་ལས་ཐར་ཏེ་ད་ལྟ་ད་དུང་གསོན་པོར་ཡོད་པའི་ཡ་ཧུ་དཱ་པ་རྣམས་ཀྱི་སྐོར་དང་། ཡེ་རུ་སཱ་ལེམ་གྱི་གནས་ཚུལ་ཇི་འདྲ་ཡིན་པར་དྲིས།
NEH 1:3 དེ་རྣམས་ཀྱིས་ང་ལ། བཙོན་ལས་ཐར་ཏེ་ཤུལ་དུ་ལུས་པ་རྣམས་ཀྱིས་ཡུལ་དེར་སྡུག་བསྔལ་ཆེན་པོ་དང་བརྙས་བཅོས་མྱོང་གིན་ཡོད་པར་མ་ཟད། ཡེ་རུ་སཱ་ལེམ་གྱི་མཁར་གྱང་བཤིགས་པ་དང་། དེའི་མཁར་སྒོ་རྣམས་མེས་བསྲེགས་འདུག་གོ་ཞེས་ཟེར།
NEH 1:4 ངས་གཏམ་དེ་ཐོས་རྗེས་ས་རུ་བསྡད་དེ་ངུས་ནས་ཉིན་ཞག་ཁ་ཤས་ལ་མྱ་ངན་བྱས་ཤིང་། ནམ་མཁའི་དཀོན་མཆོག་གི་དྲུང་དུ་སྨྱུང་གནས་དང་བཅས་གསོལ་བ་བཏབ་པ་སྟེ།
NEH 1:5 ཀྱེ། ནམ་མཁའི་དཀོན་མཆོག་ཡ་ཝཱེ་ལགས། ཁྱེད་ནི་གུས་ཤིང་འཇིགས་འོས་པའི་དཀོན་མཆོག་ལགས། ཁྱེད་ལ་དགའ་ཞིང་ཁྱེད་ཀྱི་བཀའ་སྲུང་མཁན་རྣམས་ལ་ཞལ་ཆད་བཞིན་དུ་བྱམས་པ་གནང་མཁན་དེ་ལགས།
NEH 1:6 ཁྱེད་ཀྱིས་སྤྱན་ཟུང་ཕྱེ་སྟེ་གཟིགས་རོགས། ཁྱེད་ཀྱི་སྙན་གྱིས་གསན་རོགས། ཁྱེད་ཀྱི་ཞབས་ཕྱི་བདག་གིས་ཉིན་མཚན་མེད་པར་ཁྱེད་ཀྱི་ཞབས་ཕྱི་སྟེ་ཡེས་ར་ཨེལ་པ་རྣམས་ཀྱི་ཆེད་དུ་སྨོན་ལམ་འདི་ལྟར་ཞུ། ངེད་ཡེས་ར་ཨེལ་པ་རྣམས་ཀྱིས་ཁྱེད་ལ་འགལ་བའི་སྡིག་པ་བྱས་པ་ཁས་ལེན་ཞིང་། ང་དང་ངའི་ཕ་ཁྱིམ་ཀུན་གྱིས་སྡིག་པ་བྱས་པའང་ཁས་བླངས་པ་ཡིན།
NEH 1:7 ངེད་ཅག་གིས་ཁྱེད་ལ་ཧ་ཅང་ངན་པའི་ལས་བྱས་པ་དང་། ཁྱེད་ཀྱིས་ཉིད་ཀྱི་ཞབས་ཕྱི་མོ་ཤེ་བརྒྱུད་ནས་གནང་བའི་བཀའ་དང་སྒྲིག་ཁྲིམས་དང་ཁྲིམས་སྲོལ་བཅས་ལ་དོ་སྣང་མ་བྱས་པ་ལ་མཐོལ་ལོ་བཤགས་སོ། །
NEH 1:8 ཁྱེད་ཀྱིས་ཉིད་ཀྱི་ཞབས་ཕྱི་མོ་ཤེ་ལ་གསུངས་པའི་བཀའ་ནི་འདི་ལྟ་སྟེ། གལ་ཏེ་ཁྱོད་རྣམས་ཀྱིས་སྡིག་པའི་ལས་བྱེད་ན། ངས་ཁྱོད་རྣམས་མི་རིགས་རྣམས་ཀྱི་ཁྲོད་དུ་གཏོར་བར་བྱ།
NEH 1:9 ཡིན་ཡང་གལ་ཏེ་ཁྱོད་རྣམས་ངའི་ཕྱོགས་སུ་ཕྱིར་ལོག་སྟེ་ངའི་བཀའ་ཁྲིམས་རྣམས་བསྲུང་བར་བྱེད་ན། ཁ་ཐོར་དུ་ཕྱིན་པའི་མི་རྣམས་རྒྱང་རིང་དུ་ཡོད་ཀྱང་། བདག་གིས་ངེས་པར་དུ་ཁོ་རྣམས་མཉམ་དུ་བསྡུས་ཏེ། བདག་གིས་རང་གི་མཚན་གྱི་བཞུགས་གནས་སུ་བདམས་པའི་གནས་དེར་འཁྲིད་པར་བྱའོ་གསུངས་པ་ཐུགས་སུ་དྲན་པར་མཛོད།
NEH 1:10 ཁོ་རྣམས་ནི་ཁྱེད་ཉིད་ཀྱི་ནུས་མཐུ་ཆེན་པོ་དང་ཕྱག་སྟོབས་ཆེན་པོས་སྐྱོབ་པར་མཛད་པའི་ཁྱེད་ཀྱི་ཞབས་ཕྱི་དང་འབངས་མི་ཡིན།
NEH 1:11 ཀྱེ། གཙོ་བོ་ལགས། ཁྱེད་ཀྱི་སྙན་གྱིས་ཞབས་ཕྱི་བདག་གི་སྨོན་ལམ་འདིར་གསན་རོགས་ཞུ། ཁྱེད་ཀྱི་མཚན་ལ་གུས་ཤིང་འཇིགས་པའི་ཞབས་ཕྱི་གཞན་དག་གི་སྨོན་ལམ་ལའང་གསན་རོགས་གནང་། ད་ལྟ་ཁྱེད་ཀྱིས་ཞབས་ཕྱི་བདག་གི་ལས་དོན་རྣམས་བདེ་བླག་ངང་འགྲུབ་པར་མཛོད། རྒྱལ་པོའི་མདུན་དུ་ང་ལ་ཐུགས་རྗེ་གནང་བར་མཛོད་ཅེས་གསོལ་ཏོ། །ང་ནི་རྒྱལ་པོའི་ཆང་གཉེར་བློན་ཆེན་ཡིན་ནོ། །
NEH 2:1 དེ་ནས། རྒྱལ་པོ་ཨར་ཐག་ཤཱ་ཐི་ཡིས་རྒྱལ་སྲིད་བསྐྱངས་པའི་ལོ་ཉི་ཤུ་པའི་ནེ་སཱན་ཞེས་པའི་ཟླ་བར་རྒུན་ཆང་རྒྱལ་པོའི་མདུན་དུ་ཡོད་པ་དང་། ངས་ཆང་དེ་བླངས་ནས་རྒྱལ་པོར་ཕུལ་ཏོ། །སྔོན་ཆད་ངས་རྒྱལ་པོའི་དྲུང་ནས་སྐྱོ་བའི་རྣམ་འགྱུར་བསྟན་མྱོང་མེད།
NEH 2:2 རྒྱལ་པོས་ང་ལ། ཁྱོད་ལ་ནད་གང་ཡང་མེད་པས་ཁྱོད་ཀྱི་ངོ་གདོང་སྐྱོ་བོར་མཐོང་བ་དེ་ཅི་ཡིན། དེ་ནི་གཞན་གང་ཡང་མིན་ཏེ་སེམས་སྡུག་ཡིན་ནོ་ཞེས་གསུངས་པས། ང་ཤིན་ཏུ་འཇིགས་སྐྲག་སྐྱེས་སོ། །
NEH 2:3 ངས་རྒྱལ་པོར་འདི་ལྟར། རྒྱལ་པོ་སྐུ་ཚེ་བརྟན་པར་ཤོག ངའི་ཡབ་མེས་ཀྱི་དུར་ས་ཡོད་པའི་གྲོང་ཁྱེར་དེ་སྟོང་བར་ལུས་ནས། དེའི་མཁར་སྒོ་རྣམས་མེས་བསྲེགས་འདུག་པས། ངའི་གདོང་ལ་སྡུག་ཉམས་མི་འབྱུང་ངམ་ཞེས་ཞུས།
NEH 2:4 རྒྱལ་པོས་ང་ལ། ཁྱོད་ལ་རེ་བ་ཅི་ཞིག་ཡོད་ཅེས་གསུངས་པས། ངས་ནམ་མཁའི་དཀོན་མཆོག་ལ་གསོལ་བ་བཏབ་ནས་རྒྱལ་པོ་ལ།
NEH 2:5 གལ་ཏེ་རྒྱལ་པོའི་ཐུགས་ལ་འབབ་ཅིང་། ཞབས་ཕྱི་བདག་ལ་ཐུགས་རྗེས་གཟིགས་པ་ཡིན་ན། ཕྲན་ཡ་ཧུ་དཱ་ཡུལ་ཏེ་ངའི་ཡབ་མེས་ཀྱི་དུར་ས་ཡོད་སའི་གྲོང་ཁྱེར་དེ་རུ་མངགས་ནས་བསྐྱར་བཞེངས་གནང་བར་མཛོད་ཅིག་ཅེས་ཞུས་པ་དང་།
NEH 2:6 སྐབས་དེར། རྒྱལ་མོའང་ཁོའི་འགྲམ་དུ་བཞུགས་ཡོད་དེ། རྒྱལ་པོས་ང་ལ། ཁྱོད་སོང་ན་ག་ཚོད་འགོར་རམ། ནམ་ཞིག་ཕྱིར་ལོག་འོང་ངམ་ཞེས་དྲིས་བྱུང་། རྒྱལ་པོ་ང་མངག་རྒྱུར་ཐུགས་འཐད་བྱུང་ཞིང་། ངས་རྒྱལ་པོར་ཟླ་ཚེས་གཏན་ཁེལ་བྱས་སོ། །
NEH 2:7 ཡང་ངས་རྒྱལ་པོ་ལ། རྒྱལ་པོ་ཐུགས་མཉེས་ན། རྒྱལ་པོས་བཀའ་ཡིག་བསྩལ་ཏེ་གཙང་པོའི་ཕ་རོལ་གྱི་འགོ་དཔོན་རྣམས་ལ་ང་ཡ་ཧུ་དཱའི་བར་དུ་གཏོང་བའི་ཕྱིར་བརྡ་རྒྱག་རོགས།
NEH 2:8 ཡང་བཀའ་ཡིག་བསྩལ་ཏེ། རྒྱལ་པོའི་ནགས་སྲུང་ཨ་སབ་ལ་བརྡ་བརྒྱབ་ནས། མཆོད་ཁང་མཁར་རྫོང་གི་སྒོ་རྣམས་དང་གྲོང་ཁྱེར་གྱི་མཁར་གྱང་དང་། ང་སྡོད་སའི་ཁང་པའི་འཕྲེད་གདུང་བཅས་ཀྱི་ཆེད་དུ་ང་ལ་ཤིང་སྡོང་གནང་བར་མཛོད་ཅེས་ཞུས་པར། དཀོན་མཆོག་གི་ཕྱག་ཐུགས་རྗེ་ཅན་གྱིས་ང་ལ་རོགས་སྐྱོར་མཛད་དེ་རྒྱལ་པོས་དེ་བཞིན་དུ་གནང་བྱུང་།
NEH 2:9 རྒྱལ་པོས་དམག་དཔོན་དང་རྟ་དམག་མངགས་ནས་ང་རང་བསྐྱལ་བ་དང་། དེ་ནས་ང་གཙང་པོའི་ཕ་རོལ་གྱི་འགོ་དཔོན་རྣམས་ཀྱི་རྩར་སླེབས་ནས། རྒྱལ་པོའི་བཀའ་ཡིག་རྣམས་སྤྲད་པ་ཡིན་ནོ། །
NEH 2:10 ཡང་ཧོ་རོན་པ་སན་པཱ་ལད་དང་ཨམ་མོན་པ་ཏོ་བི་ཡཱ་ཞེས་པའི་འཁོར་གཡོག་གིས། མི་ཞིག་ཡེས་ར་ཨེལ་པ་རྣམས་ཀྱི་ཁེ་ཕན་རྩོད་དུ་སླེབས་བྱུང་བ་ཐོས་པའི་ཚེ་ཤིན་ཏུ་མི་དགའ་བར་གྱུར་ཏོ། །
NEH 2:11 དེ་ནས་ང་ཡེ་རུ་སཱ་ལེམ་དུ་འོངས་ནས་ཉིན་གསུམ་ལ་བསྡད་པ་དང་།
NEH 2:12 ང་དང་ངའི་མཉམ་དུ་ཡོད་པའི་མི་འགའ་ཞིག་མཚན་མོར་ཡར་ལངས། ཡིན་ནའང་དཀོན་མཆོག་གིས་ང་ལ་སེམས་འགུལ་ཐེབས་པར་མཛད་ནས། ཡེ་རུ་སཱ་ལེམ་གྱི་ཕྱིར་བསྒྲུབ་རྒྱུ་ཡིན་པའི་ལས་དེ་ནི་མི་སུ་ལ་ཡང་མ་བཤད། བདག་གི་ཞོན་པ་མ་གཏོགས་སྒོ་ཕྱུགས་གཞན་གང་ཡང་ང་དང་མཉམ་དུ་མེད་དོ། །
NEH 2:13 མཚན་མོ་དེར་ང་རང་ལུང་སྒོ་ནས་བུད་དེ་འབྲུག་གི་ཆུ་མིག་ཕྱོགས་སུ་ཕྱིན་ཏེ། ལྕི་བའི་སྒོ་ནས་ཐོན་ཞིང་། ཡེ་རུ་སཱ་ལེམ་གྱི་ཞིག་རལ་དུ་གྱུར་པའི་མཁར་གྱང་དང་མེས་བསྲེགས་པའི་མཁར་སྒོ་ལ་བལྟས།
NEH 2:14 དེ་ནས་ང་རང་ཆུ་མིག་གི་སྒོ་ཡོད་སར་ཕྱིན་པ་དང་། ཡང་རྒྱལ་པོའི་རྫིང་བུ་ལ་སླེབས་པ་ན། དེར་ང་རང་ཞོན་པའི་སྒོ་ཕྱུགས་ལ་ཕར་འགྲོ་བའི་ལམ་མེད་དོ། །
NEH 2:15 དེའི་ཕྱིར་མཚན་མོར་མུ་མཐུད་དུ་ཆུ་ཕྲན་དེད་ནས་ཡར་ཕྱིན་ཏེ། མཁར་གྱང་ལ་བལྟས་ཤིང་ཡང་ཁ་ཕྱིར་འཁོར་ཏེ་ལུང་སྒོར་ཞུགས་ནས་འོངས་སོ། །
NEH 2:16 ང་རང་གང་དུ་སོང་བ་དང་དོན་ཅི་བསྒྲུབས་པ་ནི་དཔོན་ཆེན་དག་གིས་ཀྱང་མི་ཤེས་སོ། །ངས་ཀྱང་ཡ་ཧུ་དཱ་པ་དང་། མཆོད་དཔོན། སྐུ་དྲག་རྣམས། དཔོན་ཆེན། གཞན་ལས་བཟོ་པ་སུ་ལའང་དེ་མ་བཤད་དོ། །
NEH 2:17 ཕྱིས་སུ་ངས་དེ་རྣམས་ལ་ངེད་ཅག་ལ་ཕོག་པའི་སྡུག་བསྔལ་དང་། ཡེ་རུ་སཱ་ལེམ་ཇི་ལྟར་སྟོང་བར་ལུས་པ་དང་། མཁར་སྒོ་མེས་བསྲེགས་ནས་ཡོད་པ་ཁྱོད་ཚོས་ཀྱང་མཐོང་ངོ་། །ཤོག་དང་། ཡང་བསྐྱར་བརྙས་བཅོས་མི་འཕོག་པའི་ཆེད་དུ། ཡེ་རུ་སཱ་ལེམ་གྱི་མཁར་གྱང་བརྩིག་པར་བྱ་ཞེས་སྨྲས་སོ། །
NEH 2:18 དཀོན་མཆོག་གི་ཕྱག་ཐུགས་རྗེ་ཅན་གྱིས་ཇི་ལྟར་ང་ལ་རོགས་སྐྱོར་མཛད་དེ་རྒྱལ་པོས་ང་ལ་སྨྲས་པ་ཐམས་ཅད་དེ་རྣམས་ལ་བཤད་པས། དེ་ཚོ་ན་རེ། ངེད་རྣམས་ཡར་ལངས་ནས་བརྩིག་པར་བྱའོ་ཟེར་ནས། དེ་དག་གིས་དཔའ་ངར་ཆེར་བསྐྱེད་དེ་ལས་བཟང་པོ་འདི་སྒྲུབ་འགོ་བརྩམས།
NEH 2:19 འོན་ཀྱང་ཧོ་རོན་པ་སན་པཱ་ལད་དང་། ཨམ་མོན་པ་སྟེ་འཁོར་གཡོག་ཏོ་བི་ཡཱ་དང་། ཨ་རབ་པ་གེ་ཤེམ་བཅས་ཀྱིས་གཏམ་འདི་ཐོས་ཚེ། ངེད་རྣམས་ལ་ཁྲེལ་དགོད་བྱས་ཏེ་བརྙས་པར་བྱེད་ཅིང་འདི་ལྟར། ཁྱོད་རྣམས་ཀྱིས་སྒྲུབ་པ་འདི་ཅི་ཞིག་ཡིན་ནམ། རྒྱལ་པོར་ངོ་ལོག་བྱའམ་ཞེས་སྨྲས་པ་དང་།
NEH 2:20 ངས་དེ་དག་གི་ལན་དུ། ནམ་མཁའི་དཀོན་མཆོག་གིས་ངེད་ཀྱི་ལས་དོན་བསྒྲུབ་པར་འགྱུར་བས་ན། ཁོང་གི་ཞབས་ཕྱི་ངེད་རྣམས་ཡར་ལངས་ནས་བརྩིག་པར་བྱའོ། །འོན་ཀྱང་ཁྱོད་རྣམས་ལ་ཡེ་རུ་སཱ་ལེམ་དུ་བགོ་སྐལ་དང་། ཐོབ་ཐང་དང་། དྲན་རྟེན་གང་ཡང་མེད་དོ་ཞེས་སྨྲས་སོ། །
NEH 3:1 དེ་ནས་མཆོད་དཔོན་ཆེན་པོ་ཨེལ་ཡཱ་ཤིབ་དང་རང་གི་སྤུན་མཆོད་དཔོན་རྣམས་ཡར་ལངས་ནས་ལུག་སྒོ་བརྩིགས་ཏེ་དམ་པར་བྱས་ཤིང་སྒོ་བཙུགས་ནས་ཧམ་མེ་ཨའི་མཁར་སྒོ་བར་དུ་དམ་པར་བྱས་པ་དང་། དེ་དག་གིས་ཡང་ཧ་ནན་ཨེལ་གྱི་མཁར་བར་དུ་དམ་པར་བྱས་སོ། །
NEH 3:2 དེ་ཡི་ཉེ་འགྲམ་དུ་ཡེ་རུ་ཀོ་པས་བརྩིགས། དེའི་ཉེ་འགྲམ་དུ་ཨིམ་རིའི་བུ་ཟག་ཀུར་གྱིས་བརྩིགས་སོ། །
NEH 3:3 ཧ་སེ་ན་ཨའི་བུ་རྒྱུད་རྣམས་ཀྱིས་ཉ་སྒོ་བརྩིགས་པ་དང་། དེའི་གདུང་མ་རྣམས་བཀྲམས་ཏེ་སྒོ་བཙུགས་ནས་སྒོ་གཏན་དང་ཟྭ་རྣམས་ཀྱང་བཟོས་སོ། །
NEH 3:4 དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་ཧག་ཀོས་ཀྱི་ཚ་བོའམ་ཨུ་རི་ཡཱའི་བུ་མེ་རེ་མོད་དང་། དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་མེ་ཤེ་ཟ་བེ་ཨེལ་གྱི་ཚ་བོའམ་པེ་རེག་ཡཱའི་བུ་མཱེ་ཤུལ་ལིམ་དང་། དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་པ་ཨ་ནཱའི་བུ་ཟཱ་ཏོག་ཡིན་ནོ། །
NEH 3:5 དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་ཐེ་ཀོ་ཨ་པ་ཡིན། འོན་ཀྱང་དེ་དག་གི་སྐུ་དྲག་རྣམས་ཀྱིས་རང་གི་གཙོ་བོའི་ལས་ཕྲག་ལ་མ་འཁུར་ཏོ། །
NEH 3:6 ཕཱ་སེ་ཨའི་བུ་ཡོ་ཡ་དཱ་དང་། པེ་སོད་ཡཱའི་བུ་མཱེ་ཤུལ་ལིམ་གཉིས་ཀྱིས་སྒོ་རྙིང་དེ་ཉམས་གསོ་མཛད་དེ། དེའི་གདུང་མ་བཀྲམས་ནས་སྒོ་བཙུགས། ཟྭ་དང་སྒོ་གཏན་བཟོས་སོ། །
NEH 3:7 ཡང་དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་གིབ་ཡོན་པ་མེ་ལད་ཡཱ་དང་། མེ་རོ་ནོད་པ་ཡ་དོན་དང་། གིབ་ཡོན་པ་དང་གཙང་པོའི་ཚུ་རོལ་གྱི་སྤྱི་དཔོན་མངའ་འོག་གི་མཱས་ཟི་ཕཱ་པ་བཅས་སོ། །
NEH 3:8 དེའི་ཉེ་འགྲམ་དུ་ཉམས་གསོ་མཛད་མཁན་ནི་ཧར་ཧ་ཡའི་བུ་དངུལ་མགར་ཨུ་ཟི་ཨེལ་དང་། ཡང་དེའི་ཉེ་འགྲམ་དུ་ཉམས་གསོ་མཛད་མཁན་ནི་སྤོས་བཟོ་མཁན་ཧ་ནན་ཡཱ་ཡིན་ལ། ཡེ་རུ་སཱ་ལེམ་གྱི་མཁར་གྱང་ཞེང་ཆེན་བྱ་བའི་བར་དུ་ཉམས་གསོ་མཛད་དོ། །
NEH 3:9 དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་ཡེ་རུ་སཱ་ལེམ་གྲོང་ཁྱེར་ཕྱེད་ཀར་བདག་འཛིན་བྱེད་མཁན་ཏེ་ཧུར་གྱི་བུ་རེ་ཕ་ཡཱ་དང་།
NEH 3:10 དེ་དག་གི་ཉེ་འགྲམ་དུ་ཉམས་གསོ་མཛད་མཁན་ནི་ཧ་རུ་མབ་ཀྱི་བུ་ཡེ་དཱ་ཡ་ཡིན་ལ། རང་གི་ཁང་པའི་ཁ་གཏད་དུ་ཉམས་གསོ་མཛད་དོ། །དེའི་ཉེ་འགྲམ་དུ་ཉམས་གསོ་མཛད་མཁན་ནི་ཧ་ཤབ་ནེ་ཡཱའི་བུ་ཧད་ཏུས་ཡིན།
NEH 3:11 ཧ་རིམ་གྱི་བུ་མལ་ཀི་ཡཱ་དང་། ཕཱ་ཧད་མོ་ཨབ་ཀྱི་བུ་ཧ་ཤུབ་གཉིས་ཀྱིས་ཁག་རྗེས་མ་དང་ཐབ་ཚང་ཉམས་གསོ་མཛད་དོ། །
NEH 3:12 དེའི་ཉེ་འགྲམ་དུ་ཉམས་གསོ་མཛད་མཁན་ནི་ཡེ་རུ་སཱ་ལེམ་གྲོང་ཁྱེར་ཕྱེད་ཀའི་བདག་གཉེར་པ་ཧ་ལོ་ཧེས་ཀྱི་བུ་ཤལ་ལུམ་དང་ཁོའི་བུ་མོ་རྣམས་ཡིན་ནོ། །
NEH 3:13 ཧ་ནུན་དང་ཟཱ་ནོ་ཨ་པ་རྣམས་ཀྱིས་ལུང་སྒོ་ཉམས་གསོ་མཛད་ནས། སྒོ་བཙུགས་ཏེ་སྒོ་གཏན་དང་སྒོ་ཟྭ་རྣམས་བཟོས་པ་དང་། ཡང་མཁར་གྱང་ཁྲུ་ཆིག་སྟོང་ཙམ་ལྕི་བའི་སྒོ་བར་དུ་བརྡུངས་སོ། །
NEH 3:14 པེད་ཧག་ཀེ་རེམ་ཡུལ་གྱི་བདག་གཉེར་པ་སྟེ། རེ་ཁབ་ཀྱི་བུ་མལ་ཀི་ཡཱས་ལྕི་བའི་སྒོ་ཉམས་གསོ་མཛད་ཅིང་། ཁོས་སྒོ་བཙུགས་ཏེ་སྒོ་གཏན་དང་ཟྭ་རྣམས་བཟོས་སོ། །
NEH 3:15 མཱས་ཟི་ཕཱ་ཡུལ་གྱི་བདག་གཉེར་པ་སྟེ། ཀོལ་ཧོ་ཟེའི་བུ་ཤལ་ལུན་གྱིས་ཆུ་མིག་གི་སྒོ་ཉམས་གསོ་མཛད་ནས། ཁོས་སྒོ་བཙུགས་ཏེ་སྒོ་ཁང་ཕུབས་ཤིང་། སྒོ་གཏན་དང་ཟྭ་རྣམས་བཟོས་སོ། །དེར་མ་ཟད་རྒྱལ་པོའི་སྐྱེད་ཚལ་ཉེ་འགྲམ་གྱི་ཤི་ལོ་ཨའི་རྫིང་བུའི་མཁར་གྱང་དང་། དཱ་བིད་གྲོང་ནས་མར་འབབ་སའི་ཐེམ་པའི་བར་དུ་བརྩིགས་སོ། །
NEH 3:16 དེ་དང་མུ་མཐུད་དུ་པེད་ཚུར་ཡུལ་ཕྱེད་ཀའི་བདག་གཉེར་པ་སྟེ། ཨས་བུག་གི་བུ་ནེ་ཧེམ་ཡཱས་ནི་དཱ་བིད་ཀྱི་དུར་སའི་ཁ་གཏད་དང་། མིས་བཟོས་རྫིང་བུ་དང་དཔའ་བོའི་དམག་སྒར་བར་དུ་ཉམས་གསོ་མཛད་དོ། །
NEH 3:17 དེ་དང་མུ་མཐུད་དུ་ཉམས་གསོ་མཛད་མཁན་ནི་ལེ་ཝི་པ་པཱ་ནིའི་བུ་རེ་ཧུམ་དང་། ཁོའི་ཉེ་འགྲམ་དུ་ཀེ་ཨི་ལཱའི་ཡུལ་ཕྱེད་ཀའི་བདག་གཉེར་པ་སྟེ་ཧ་ཤབ་ཡཱ་ཡིས་ཡུལ་དེའི་ཆེད་དུ་ཉམས་གསོ་མཛད།
NEH 3:18 དེ་དང་མུ་མཐུད་དུ་ཉམས་གསོ་མཛད་མཁན་ནི་དེ་དག་གི་སྤུན་རྣམས་ལས། ཀེ་ཨི་ལཱའི་ཡུལ་གཞན་ཕྱེད་ཀའི་བདག་གཉེར་པ་སྟེ་ཧེ་ན་དད་ཀྱི་བུ་པུ་ཝ་ཨིས་ཉམས་གསོ་མཛད།
NEH 3:19 ཁོའི་ཉེ་འགྲམ་དུ་མཱས་ཟི་ཕཱ་ཡི་བདག་གཉེར་པ་སྟེ། ཡེ་ཤུ་ཨའི་བུ་ཨེ་ཟེར་གྱིས་ཡར་མཚོན་ཆའི་ཁང་པར་འགྲོ་སའི་ཁ་གཏད་ཀྱི་མཁར་གྱང་ཁག་རྗེས་མ་དེ་དཀྱོགས་མཚམས་བར་དུ་ཉམས་གསོ་མཛད།
NEH 3:20 དེ་དང་མུ་མཐུད་དུ་ཟབ་བ་ཨིའི་བུ་པཱ་རུག་གིས་སྙིང་རུས་བསྐྱེད་དེ་ཁག་རྗེས་མ་ཉམས་གསོ་མཛད་དེ། དཀྱོགས་མཚམས་ནས་མཆོད་དཔོན་ཆེན་པོ་ཨེལ་ཡཱ་ཤིབ་ཀྱི་ཁང་པའི་སྒོ་བར་དུ་ཉམས་གསོ་མཛད་དོ། །
NEH 3:21 དེ་དང་མུ་མཐུད་དུ་ཧག་ཀོས་ཀྱི་བུ་ཨུ་རི་ཡཱའི་བུ་མེ་རེ་མོད་ཀྱིས་ཁག་རྗེས་མ་ཉམས་གསོ་མཛད། དེ་ནི་ཨེལ་ཡཱ་ཤིབ་ཀྱི་ཁང་པའི་སྒོ་ནས་ཨེལ་ཡཱ་ཤིབ་ཀྱི་ཁང་པའི་མཇུག་བར་དུ་ཡིན་ནོ། །
NEH 3:22 དེ་དང་མུ་མཐུད་དུ་ཉམས་གསོ་མཛད་མཁན་ནི་ཐང་དུ་གནས་པའི་མཆོད་དཔོན་རྣམས་ཡིན་ནོ། །
NEH 3:23 དེ་དང་མུ་མཐུད་དུ་པེན་ཡཱ་མེན་དང་ཧ་ཤུབ་གཉིས་ཀྱིས་རང་གི་ཁང་པའི་ཁ་གཏད་ནས་ཉམས་གསོ་མཛད། དེ་ནས་ཨ་ནན་ཡཱའི་ཚ་བོའམ་མ་ཨ་སེ་ཡཱའི་བུ་ཨ་ཟར་ཡཱས་རང་ཁྱིམ་གྱི་ཉེ་འཁོར་ནས་ཉམས་གསོ་མཛད།
NEH 3:24 ཁོའི་རྗེས་ནས་ཧེ་ན་དད་ཀྱི་བུ་པིན་ནུ་ཨིས་ཁག་རྗེས་མ་ཉམས་གསོ་མཛད། དེ་ནི་ཨ་ཟར་ཡཱའི་ཁང་པའི་དཀྱོགས་མཚམས་བར་དང་། ཡང་གྲོང་ཁྱེར་གྱི་གྲུ་ཟུར་བར་དུ་ཉམས་གསོ་མཛད་དོ། །
NEH 3:25 ཨུ་ཟཱ་ཨིའི་བུ་ཕཱ་ལལ་གྱིས་མཁར་གྱང་གི་དཀྱོགས་མཚམས་དང་རྒྱལ་པོའི་ཕོ་བྲང་གི་ཉེ་འགྲམ་གྱི་བཙོན་ཁང་གི་ར་སྐོར་དང་། རྒྱལ་པོའི་ཕོ་བྲང་སྟེང་གི་འབུར་དུ་ཐོན་པའི་མཁར་ཁང་བཅས་ཉམས་གསོ་མཛད། དེའི་རྗེས་སུ་ཕཱར་ཨོ་སིའི་བུ་ཕེ་ད་ཡཱ་ཡིན་པ་དང་།
NEH 3:26 མཆོད་གཡོག་རྣམས་ནི་ཨོ་ཕེལ་དུ་བསྡད་ཅིང་། ཤར་ཕྱོགས་སུ་ཆུ་སྒོའི་ཁ་གཏད་དང་འབུར་དུ་ཐོན་པའི་མཁར་ཁང་གི་བར་དུ་མཁར་གྱང་ཉམས་གསོ་མཛད།
NEH 3:27 དེ་དང་མུ་མཐུད་དུ་ཐེ་ཀོ་ཨ་པས་ཁག་རྗེས་མ་ཉམས་གསོ་མཛད་པ་སྟེ། འབུར་དུ་ཐོན་པའི་མཁར་ཁང་ཆེན་པོར་ཁ་གཏད་ནས་ཨོ་ཕེལ་གྱི་མཁར་གྱང་བར་དུ་ཉམས་གསོ་མཛད་དོ། །
NEH 3:28 རྟ་སྒོ་ནས་ཡར་ལ་མཆོད་དཔོན་རྣམས་ཀྱིས་རང་ཉིད་ཀྱི་ཁང་པའི་མདུན་དུ་ཉམས་གསོ་མཛད་དོ། །
NEH 3:29 དེ་དང་མུ་མཐུད་དུ་ཨིམ་མེར་གྱི་བུ་ཟཱ་ཏོག་གིས་རང་ཉིད་ཀྱི་ཁང་པའི་མདུན་དུ་ཉམས་གསོ་མཛད་པ་དང་། དེ་དང་མུ་མཐུད་དུ་ཉམས་གསོ་མཛད་མཁན་ནི་ཤར་སྒོ་སྲུང་མཁན་ཤེ་ཀན་ཡཱའི་བུ་ཤེ་མ་ཡཱ་ཡིན་ནོ། །
NEH 3:30 ཁོའི་རྗེས་ནས་ཤེ་ལེམ་ཡཱའི་བུ་ཧ་ནན་ཡཱ་དང་ཙ་ལབ་ཀྱི་བུ་དྲུག་པ་ཧ་ནུན་གྱིས་ཁག་རྗེས་མ་ཉམས་གསོ་མཛད། དེའི་རྗེས་སུ་པེ་རེག་ཡཱའི་བུ་མཱེ་ཤུལ་ལིམ་གྱིས་རང་ཉིད་ཀྱི་ཁང་པའི་མདུན་ནས་ཉམས་གསོ་མཛད་དོ། །
NEH 3:31 དེའི་རྗེས་ནས་དངུལ་མགར་མལ་ཀི་ཡཱས་ཉམས་གསོ་མཛད། མཆོད་ཁང་གི་མཆོད་གཡོག་དང་ཚོང་པའི་ཁང་པ་མིབ་ཀད་ཟེར་བའི་སྒོར་གཏད་དེ་གྲུ་ཟུར་གྱི་ཁང་པའི་བར་དུ་གཏུགས།
NEH 3:32 དངུལ་མགར་དང་ཚོང་པས་གྲུ་ཟུར་གྱི་ཁང་པ་དང་ལུག་སྒོ་བར་དུ་ཉམས་གསོ་མཛད་དོ། །
NEH 4:1 དེ་ནས། ངེད་རྣམས་ཀྱིས་མཁར་གྱང་བརྩིགས་པ་སན་པཱ་ལད་ཀྱིས་ཐོས་པ་དང་ཁོང་ཁྲོ་ལངས་ཏེ། ཞེ་སྡང་རབ་ཏུ་ལངས་ནས་ཡ་ཧུ་དཱ་པ་རྣམས་ལ་ཁྲེལ་དགོད་བྱས་སོ། །
NEH 4:2 ཁོས་རང་གི་སྤུན་དང་སཱ་མར་ཡའི་དམག་དཔུང་ལ་འདི་ལྟར། ཡ་ཧུ་དཱ་པ་ཉམ་ཐག་འདི་རྣམས་ཀྱིས་ཅི་བྱེད་དམ། རང་ཉིད་ཀྱི་ཆེད་དུ་ཡང་བསྐྱར་བརྩིག་གམ། སྦྱིན་སྲེག་འབུལ་ལམ། ཉིན་གཅིག་ཏུ་འགྲུབ་བམ། མེས་བསྲེགས་པའི་རྡོ་ཕུང་ཡང་བསྐྱར་བཀོལ་བར་འགྱུར་རམ་ཞེས་སྨྲས།
NEH 4:3 ཨམ་མོན་པ་ཏོ་བི་ཡཱ་ཁོའི་ཉེ་འགྲམ་དུ་བསྡད་དེ་འདི་ལྟར། དེ་དག་གིས་བརྩིགས་པའི་མཁར་རྡོའི་སྟེང་དུ་ཝ་མོ་ཞིག་འཛེག་ནའང་རྡོ་རྩིག་དེ་བཤིག་པར་འགྱུར་ཞེས་སྨྲས་སོ། །
NEH 4:4 ཀྱེ། ངེད་ཀྱི་དཀོན་མཆོག་ལགས། ངེད་རྣམས་སྨད་པར་གྱུར་པས་གསན་དུ་གསོལ། དེ་དག་གི་འཕྱ་སྨོད་ནི་ཁོ་ཚོ་སོ་སོའི་མགོར་ཕོབ་ལ། བཙོན་དུ་ཁྲིད་པའི་གནས་ལ་འཇོམས་སུ་ཆུག
NEH 4:5 དེ་དག་གིས་ཉམས་གསོ་མཛད་མཁན་གྱི་མདུན་དུ་ཁྱེད་ཉིད་ཐུགས་ཁྲོ་བར་བྱས་པས། དེ་དག་གི་སྡིག་པ་མི་སྦེད་ཅིང་། ཁྱེད་ཀྱི་སྤྱན་སྔར་དེ་དག་གི་སྡིག་པ་མི་བསལ་བར་མཛོད།
NEH 4:6 དེ་ལྟར་ངེད་རྣམས་ཀྱིས་མཁར་གྱང་བརྩིགས་ཏེ་མཁར་གྱང་ཐམས་ཅད་མཐུད་ནས་མཐོ་ཚད་ཕྱེད་ཀར་སླེབས་སོ། །དེ་ནི་འབངས་རྣམས་ཀྱིས་བློ་སེམས་རྩེ་གཅིག་གིས་ལས་པའི་ཕྱིར་རོ། །
NEH 4:7 སན་པཱ་ལད་དང་། ཏོ་བི་ཡཱ་དང་། ཨ་རབ་པ་དང་། ཨམ་མོན་པ་དང་། ཨ་སི་དོད་པ་བཅས་ཀྱིས་ཡེ་རུ་སཱ་ལེམ་གྱི་མཁར་གྱང་ཉམས་གསོ་བྱེད་པ་དང་། ཉམས་རྒུད་དུ་སོང་བའི་གནས་དེ་རྣམས་ཞིག་གསོ་བྱེད་འགོ་བརྩམས་པ་ཐོས་ནས་ཤིན་ཏུ་ཁྲོས་ཤིང་།
NEH 4:8 ཐམས་ཅད་ཡེ་རུ་སཱ་ལེམ་ལ་འཐབ་ཏུ་འོངས་ནས་གྲོང་འདི་དཀྲུག་པར་ཁ་འཆམ་པ་ལ།
NEH 4:9 ངེད་རྣམས་ཀྱིས་རང་གི་དཀོན་མཆོག་ལ་གསོལ་བ་བཏབ་ཅིང་། ཉིན་མཚན་མེད་པར་དེ་དག་གི་ཕྱིར་སོ་པ་བཞག་གོ །
NEH 4:10 ཡང་ཡ་ཧུ་དཱ་པ་རྣམས་ཀྱིས་འདི་ལྟར། ཁལ་འཁུར་བའི་སྟོབས་ཤུགས་ཞན་ལ་རྡོ་རུལ་ནི་མང་བས་ངེད་རྣམས་ཀྱིས་མཁར་གྱང་བརྩིག་མི་ནུས་སོ་ཞེས་སྨྲས་ཤིང་།
NEH 4:11 ངེད་རྣམས་ཀྱི་དགྲ་བོས་འདི་ལྟར་སྨྲས་པ་སྟེ། དེ་དག་གིས་མི་ཤེས་པ་དང་མི་མཐོང་བའི་སྐབས་སུ་ངེད་རྣམས་དེ་དག་གི་དཀྱིལ་དུ་སོང་སྟེ། དེ་དག་བསད་ནས་ལས་ཀ་དེ་མཚམས་གཅོད་དོ་ཞེས་པའོ། །
NEH 4:12 དགྲ་དང་ཉེ་བར་གནས་པའི་ཡ་ཧུ་དཱ་པ་རྣམས་ཐེངས་བཅུ་ལ་ངེད་ཅག་གི་རྩར་འོངས་ནས་འདི་ལྟར། ཁྱོད་རྣམས་ངེས་པར་དུ་ང་ཚོའི་རྩར་ཕྱིར་ཡོང་དགོས་ཞེས་སྨྲས་པར།
NEH 4:13 ངས་འབངས་མི་རྣམས་ནི་མཁར་གྱང་རྒྱབ་ཀྱི་གནས་དམའ་སར་རལ་གྲི་དང་། མདུང་དང་། མདའ་གཞུ་བཟུང་དུ་བཅུག་ནས་རང་རང་གི་རིགས་རྒྱུད་བཞིན་དུ་བཞག་པ་ཡིན།
NEH 4:14 ངས་ཞིབ་ལྟ་བྱས་ཏེ་ཡར་ལངས་ནས་སྐུ་དྲག་དང་འགོ་དཔོན། འབངས་མི་རྣམས་ལ་འདི་ལྟར། དེ་དག་ལ་མ་འཇིགས་ཤིག གཙོ་བོ་དཀོན་མཆོག་ནི་ཆེན་པོ་དང་འཇིགས་སུ་རུང་བ་ལགས་པ་དེ་སེམས་ལ་ཟུངས་ཤིག རང་གི་སྤུན་ཟླ་དང་། བུ་དང་བུ་མོ་དང་། ཆུང་མ་དང་ཁྱིམ་ཚང་གི་ཆེད་དུ་འཐབ་འཛིང་བྱོས་ཤིག་ཅེས་སྨྲས་པ་ཡིན།
NEH 4:15 དེ་ནས་དགྲ་བོས་ངེད་རྣམས་ཀྱིས་ཁོ་ཚོའི་བསམ་ཚུལ་ཤེས་ཟིན་པ་དང་། དཀོན་མཆོག་གིས་ཀྱང་ཁོ་ཚོའི་ངན་ཇུས་དེ་གཏོར་བ་ཐོས་ནས་འོང་མ་ཕོད་པས། ངེད་རྣམས་ཕྱིར་མཁར་གྱང་གི་ཕྱོགས་སུ་སོང་ནས་རང་ཉིད་ཀྱི་ལས་བསྒྲུབས་པའོ། །
NEH 4:16 ཉིན་དེ་ནས་བཟུང་ངའི་གཡོག་པོ་ཕྱེད་ཀས་ལས་བྱེད་པ་དང་། ཕྱེད་ཀས་མདུང་དང་། མདའ་གཞུ་དང་། ཕུབ་བཅས་བཟུང་ཞིང་། གོ་ཁྲབ་གྱོན་ནས་བསྡད་དོ། །འགོ་དཔོན་རྣམས་ཡ་ཧུ་དཱའི་ཁྱིམ་རྒྱུད་ཡོངས་ཀྱི་རྒྱབ་སྐྱོར་དུ་ཡོད་པ་ཡིན།
NEH 4:17 ཡ་ཧུ་དཱ་པ་རྣམས་ཀྱིས་མཁར་གྱང་བརྩིགས་པ་དང་། ཁུར་པོ་འཁུར་མཁན་ཐམས་ཅད་ཀྱིས་ལག་པ་ཡ་གཅིག་གིས་ལས་ཀ་བྱས། ལག་པ་ཡ་གཅིག་གིས་མཚོན་ཆ་བཟུང་བ་ཡིན།
NEH 4:18 རྩིག་མཁན་ཐམས་ཅད་ཀྱིས་རལ་གྲི་རྐེད་པར་བཏགས་ཏེ་བརྩིགས་སོ། །རྭ་དུང་འབུད་མཁན་དེ་ངའི་རྩར་ཡོད་པ་ཡིན།
NEH 4:19 དེར་ངས་སྐུ་དྲག་དང་། འགོ་དཔོན་དང་། འབངས་མི་རྣམས་ལ་འདི་ལྟར། ལས་བཟོ་འདི་རྒྱ་ཆེ་བ་དང་། ངེད་ཅག་མཁར་གྱང་སྟེང་ནས་ཕན་ཚུན་བར་རྒྱང་ཐག་རིང་བས།
NEH 4:20 ཁྱོད་ཚོས་རྭ་དུང་གི་སྒྲ་ཐོས་མ་ཐག་ཏུ་ངེད་ཅག་གི་རྩར་འཛོམས་དགོས་ལ། བདག་ཅག་གི་དཀོན་མཆོག་གིས་ང་ཚོའི་དོན་དུ་འཐབ་འཛིང་བགྱིའོ་ཞེས་སྨྲས་པ་ཡིན།
NEH 4:21 འདི་ལྟར་དུ་ངེད་ཀྱིས་ལས་ཀ་བྱས་ཤིང་། མི་ཕྱེད་ཀས་མདུང་བཟུང་སྟེ་ནམ་ལངས་པ་ནས་སྐར་མ་ཤར་བའི་བར་དུ་བསྡད་དོ། །
NEH 4:22 སྐབས་དེར་ངས་འབངས་མི་རྣམས་ལ་འདི་ལྟར། མཚན་མོར་ངེད་ཀྱི་མེལ་ཚེ་བྱེད་པ་དང་། ཉིན་མོར་ལས་ཀ་བྱེད་པའི་ཕྱིར། མི་རེ་རེ་ཁོའི་གཡོག་པོ་དང་བཅས་ཡེ་རུ་སཱ་ལེམ་དུ་ཞག་སྡོད་གྱིས་ཤིག་ཅེས་བསྒོས་སོ། །
NEH 4:23 དེ་ལྟར་ང་རང་དང་ངའི་སྤུན་དང་གཡོག་པོ་དང་། ངའི་སྲུང་དམག་བཅས་ཀྱིས་རང་གི་གྱོན་པ་མ་ཕུད་པ་དང་། ཆུ་འཐུང་བའི་སྐབས་སུའང་རང་གི་མཚོན་ཆ་བཟུང་ཡོད་དོ། །
NEH 5:1 དེ་ནས་འབངས་མི་དང་དེ་དག་གི་ཆུང་མ་རྣམས་ཀྱིས་རང་གི་སྤུན་ཟླ་ཡ་ཧུ་དཱ་པ་རྣམས་ཀྱི་ཕྱིར་འོ་དོད་དྲག་པོ་བཏོན་ཏེ།
NEH 5:2 ལ་ལས་ནི་ངེད་ཅག་ལ་བུ་དང་བུ་མོ་མི་གྲངས་མང་པོ་ཡོད་པས། འབྲུ་རིགས་ཟོས་ན་ད་གཟོད་གསོན་པོར་གནས་ཐུབ་བོ་ཞེས་དང་།
NEH 5:3 ལ་ལས་མུ་གེའི་དུས་སུ་འབྲུ་རིགས་ཉོ་བའི་ཕྱིར་རང་གི་ས་ཞིང་དང་། རྒུན་འབྲུམ་ར་བ་དང་། ཁང་པ་རྣམས་གཏའ་མར་བཞག་པ་ཡིན་ཟེར།
NEH 5:4 ལ་ལས་ངེད་ཅག་གིས་དངུལ་བསྐྱིས་ཏེ་རྒྱལ་པོ་ལ་ས་ཞིང་དང་རྒུན་འབྲུམ་ར་བའི་དཔྱ་ཁྲལ་ཕུལ་བ་ཡིན།
NEH 5:5 ད་ལྟ་ངེད་ཅག་གི་ལུས་ཕུང་ནི་ངེད་ཅག་གི་སྤུན་ཟླའི་ལུས་ཕུང་དང་འདྲ་བ་ཡིན། ངེད་ཅག་གི་ཕྲུ་གུ་དེ་ཚོའི་ཕྲུ་གུ་དང་འདྲ་བ་ཡིན་མོད། ལྟོས་དང་། ངེད་ཀྱིས་རང་གི་བུ་དང་བུ་མོ་རྣམས་གཡོག་པོར་བཏང་སྟེ། ངེད་ཅག་གི་བུ་མོ་འགའ་ཞིག་གིས་ཕྲོགས་ཟིན་པ་དང་། ཡང་ངེད་ཅག་གི་ས་ཞིང་དང་རྒུན་འབྲུམ་ར་བ་མི་གཞན་ལ་དབང་བ་ཡིན་པས། ངེད་ཅག་ཅི་བྱ་གཏོལ་མེད་དུ་གྱུར་ཞེས་སྨྲས་སོ། །
NEH 5:6 ངས་དེ་དག་གི་སྐད་ངན་དང་གཏམ་འདི་རྣམས་ཐོས་པ་ཙམ་གྱིས་ཤིན་ཏུ་ཁྲོས་པར་གྱུར།
NEH 5:7 དེ་ནས་ངས་སེམས་ཐག་བཅད་ནས་སྐུ་དྲག་དང་འགོ་དཔོན་རྣམས་ལ་འདི་ལྟར། ཁྱོད་ཅག་གིས་རང་གི་སྤུན་རྣམས་ལ་དངུལ་གཡར་ཏེ་ཁེ་ཕན་བླངས་པ་རེད་ཅེས་གཤེ་གཤེ་བཏང་བ་དང་། ངས་མི་ཚོགས་ཆེན་པོ་ཞིག་བསྡུས་ནས་དེ་དག་ལ་རྒོལ་ཏོ། །
NEH 5:8 ངས་དེ་རྣམས་ལ་འདི་ལྟར། ངེད་ཅག་གིས་ནུས་པ་ཡོད་རྒུ་བཏོན་ནས་རང་གི་སྤུན་ཡ་ཧུ་དཱ་པ་སྟེ་ཕྱི་ཕྱོགས་པ་རྣམས་ལ་བཙོངས་པ་དག་ཕྱིར་བླུས་པ་དང་། ཁྱོད་ཅག་གིས་ད་དུང་སྤུན་རྣམས་བཙོངས་ནས་ངེད་ཅག་ལ་དེ་དག་ཕྱིར་ཉོ་རུ་འཇུག་པ་ཡིན་ནམ་ཞེས་སྨྲས་པ་ལ། དེ་རྣམས་ཁ་རོག་བསྡད་ཅིང་ལན་ཅི་ཡང་འདེབས་མ་ནུས་སོ། །
NEH 5:9 ཡང་ངས་དེ་ཚོ་ལ། ཁྱོད་ཅག་གིས་བྱེད་པའི་ལས་འདི་ལེགས་པོ་མི་འདུག ང་ཚོའི་དགྲ་བོ་ཕྱི་ཕྱོགས་པ་རྣམས་ལས་ངེད་ཅག་ལ་འཕྱ་སྨོད་མི་འབྱུང་བའི་ཕྱིར། ཁྱོད་ཅག་གིས་ལས་བྱེད་དུས་ངེད་ཀྱི་དཀོན་མཆོག་ལ་གུས་ཤིང་འཇིགས་པར་མི་རུང་ངམ།
NEH 5:10 ང་དང་ངའི་སྤུན་དང་གཡོག་པོས་ཀྱང་དངུལ་སྒོར་དང་འབྲུ་རིགས་འབངས་མི་ལ་བསྐྱི་དགོས་པ་དང་། ཚང་མས་སྐྱེད་ཀ་འདོར་རུང་བ་ཡིན།
NEH 5:11 དེ་རིང་དེ་དག་གི་ས་ཞིང་དང་རྒུན་འབྲུམ་ར་བ་དང་། སྐྱུ་རུ་རའི་ཚལ་དང་ཁང་པ་དང་། ཁྱོད་ཅག་གིས་བླངས་པའི་དངུལ་བུན་དང་འབྲུ་རིགས་དང་རྒུན་ཆང་གསར་པ་དང་སྣུམ་གསར་པ་བཅས་ཀྱི་བརྒྱ་ཆ་གཅིག་གི་སྐྱེད་ཀ་ཕྱིར་སྤྲོད་དགོས་ཞེས་སྨྲས་པ་ལ།
NEH 5:12 སྐུ་དྲག་དང་འགོ་དཔོན་རྣམས་ཀྱིས་འདི་ལྟར། ངེད་ཅག་གིས་ཕྱིར་སྦྱིན་པར་བྱའོ། །ཁྱེད་ཀྱིས་སྨྲས་པ་བཞིན་དུ་བྱེད་ཅིང་དེ་རྣམས་ལས་ཅི་ཡང་མི་ལེན་ཞེས་སྨྲས་པས། ངས་མཆོད་དཔོན་རྣམས་བོས་ཏེ། སྐུ་དྲག་དང་འགོ་དཔོན་རྣམས་ཀྱིས་ཇི་ལྟར་སྨྲས་པ་བཞིན་བྱེད་པར་མནའ་བསྐྱལ་དུ་བཅུག་གོ །
NEH 5:13 ངས་ཡང་རང་གི་བྲང་ཁུག་སྤྲུགས་ནས་འདི་ལྟར། ཁ་བཤད་དོན་ལ་མི་གནས་པ་སུ་ཡིན་ཡང་དཀོན་མཆོག་གིས་དེ་སྤྲུགས་ནས་རང་གི་ཁང་པ་དང་སྡུག་ལས་བརྒྱབ་ནས་ཐོབ་པ་དང་ཕྲལ་ཏེ་སྟོང་བར་གྱུར་ཅིག་ཅེས་སྨྲས་པས། མི་ཚོགས་ཐམས་ཅད་ཀྱིས་ཨ་མེན་ཞེས་བརྗོད་ནས། དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་པ་དང་འབངས་མི་རྣམས་ཀྱིས་ཞལ་དོན་དེ་བཞིན་དུ་བགྱིས་སོ། །
NEH 5:14 དེ་ཡང་། ང་རང་ཡ་ཧུ་དཱ་ཡུལ་གྱི་འགོ་དཔོན་དུ་གྱུར་པའི་ཉིན་ཏེ། རྒྱལ་པོ་ཨར་ཐག་ཤཱ་ཐི་ཡིས་རྒྱལ་སྲིད་བསྐྱངས་པའི་ལོ་ཉི་ཤུ་པ་ནས་སུམ་ཅུ་སོ་གཉིས་བར་དུ། བསྡོམས་པས་ལོ་བཅུ་གཉིས་ཀྱི་རིང་དུ་ང་དང་ངའི་སྤུན་གྱིས་འགོ་དཔོན་གྱི་ཕོགས་ཐོབ་མ་བླངས།
NEH 5:15 ངའི་སྔོན་གྱི་འགོ་དཔོན་གྱིས་འབངས་ཀྱི་འཁུར་བོ་ཇེ་ལྕི་རུ་བཏང་ནས། ཡང་འབངས་ནས་འབྲུ་རིགས་དང་རྒུན་ཆང་དང་དངུལ་སྲང་བཞི་བཅུ་བླངས་པ་དང་། ཐ་ན་དེ་དག་གི་གཡོག་པོ་རྣམས་ཀྱིས་ཀྱང་འབངས་ལ་དབང་ཤེད་བྱས། ཡིན་ཡང་ང་རང་དཀོན་མཆོག་ལ་གུས་ཤིང་འཇིགས་པས་དེ་ལྟར་མ་བྱས།
NEH 5:16 ཡང་ངས་ཧུར་ཐག་གིས་མཁར་གྱང་ཉམས་གསོ་བྱས་ལ། ང་ཚོས་ས་ཞིང་མ་ཉོས་ཤིང་། ངའི་གཡོག་པོ་ཐམས་ཅད་ཀྱང་མཉམ་དུ་འཛོམས་ནས་མཁར་ལས་བྱས་སོ། །
NEH 5:17 ཉེ་འཁོར་གྱི་ཕྱི་ཕྱོགས་པ་རྣམས་ལས་འོངས་པའི་མི་ལས་གཞན། ཡ་ཧུ་དཱ་པ་དང་འགོ་དཔོན་བརྒྱ་དང་ལྔ་བཅུ་ཡིས་ང་དང་མཉམ་དུ་ངའི་གསོལ་ལྕོག་གི་ཁར་ཁ་ཟས་སྤྱད་དོ། །
NEH 5:18 ཉིན་རེར་གླང་རེ་དང་ལུག་ཚོན་པོ་དྲུག་རེ་གྲ་སྒྲིག་བྱས་ལ། བྱ་འགའ་ཡང་ང་ལ་གྲ་སྒྲིག་བྱས། ཉིན་བཅུ་རེར་ཐེངས་གཅིག་ལ་རྒུན་ཆང་སྣ་ཚོགས་གང་མང་མང་གྲ་སྒྲིག་བྱས། འབངས་མི་རྣམས་ཀྱི་ཁྲལ་ལྕི་དྲགས་པས་ངས་དེ་དག་ལས་འགོ་དཔོན་གྱི་ཕོགས་ཐོབ་མ་བླངས་སོ། །
NEH 5:19 ཀྱེ། ང་ཡི་དཀོན་མཆོག་ལགས། བདག་གིས་འབངས་མི་འདི་རྣམས་ཀྱི་ཆེད་དུ་དོན་གང་དང་གང་བྱས་པ་ཐམས་ཅད་ཁྱེད་ཀྱི་ཐུགས་སུ་བཟུང་ནས་ང་རང་དྲིན་གྱིས་སྐྱོང་བར་མཛོད།
NEH 6:1 དེ་ནས་སན་པཱ་ལད་དང་ཏོ་བི་ཡཱ། ཨ་རབ་པ་གེ་ཤེམ་དང་། གཞན་དགྲ་བོ་ཀུན་གྱིས་ངས་མཁར་གྱང་བརྩིགས་ཚར་ཞིང་ཞིག་རལ་མེད་པ་ཐོས་པ་དང་། སྐབས་དེར་མཁར་སྒོ་ད་དུང་བཙུགས་མེད།
NEH 6:2 སན་པཱ་ལད་དང་གེ་ཤེམ་གཉིས་ཀྱིས་ངའི་རྩར་མི་མངགས་ནས་འདི་ལྟར། ཁྱོད་ཕེབས་ཤོག་དང་ངེད་ཅག་ཨོ་ནོའི་ཐང་གི་གྲོང་ཚོ་རུ་མཇལ་ཡོང་ཞེས་སྨྲས་བྱུང་། དོན་དངོས་སུ་དེ་དག་གིས་ང་ལ་གནོད་སྐྱེལ་འདོད་པ་རེད།
NEH 6:3 དེ་བས་ངས་མི་མངགས་ནས་དེ་ཚོར། ངས་ལས་ཀ་ཆེན་པོ་ལས་བཞིན་ཡོད་པས་ང་རང་མར་འགྲོ་མི་རུང་། ང་ཁ་བྲལ་ནས་མར་ཁྱོད་ཅག་དང་འཕྲད་དུ་སོང་སྟེ་ལས་ཀ་མཚམས་འཇོག་པར་བྱེད་ག་ལ་རུང་ཞེས་སྨྲས་སོ། །
NEH 6:4 དེ་རྣམས་ཀྱིས་འདི་ལྟར་ཐེངས་བཞི་ལ་ངའི་རྩར་སྐད་བཏང་ཞིང་ངས་སྔར་བཞིན་ལན་བཏབ་བོ། །
NEH 6:5 དེ་ནས་སན་པཱ་ལད་ཀྱིས་ཐེངས་ལྔ་པར་གོང་བཞིན་དུ་མི་མངགས་ཏེ་ལག་ཏུ་ཡི་གེ་ཐུམ་མེད་པ་ཞིག་བསྐུར་བྱུང་།
NEH 6:6 ཡིག་ཐོག་ཏུ་འདི་ལྟར། མི་རིགས་སོ་སོའི་ཁྲོད་དུ་འདི་འདྲ་ཞིག་གྲགས་བཞིན་ཡོད་ལ། གེ་ཤེམ་གྱིས་ཀྱང་འདི་བཞིན་སྨྲས་བྱུང་སྟེ། ཁྱོད་དང་ཡ་ཧུ་དཱ་པ་རྣམས་ཀྱིས་ངོ་ལོག་བྱེད་པའི་ཕྱིར། ཁྱོད་ཀྱིས་མཁར་གྱང་བརྩིགས་པ་ཡིན་ལ། གོ་ཐོས་ལྟར་ན། ཁྱོད་དེ་དག་གི་རྒྱལ་པོར་འགྱུར་བའི་དོན་དུ་ཡིན་ཟེར།
NEH 6:7 ཁྱོད་ཀྱིས་ཡེ་རུ་སཱ་ལེམ་དུ་མངགས་པའི་ལུང་སྟོན་པས་ཁྱོད་ལ་དམིགས་ནས་ཡ་ཧུ་དཱ་རུ་རྒྱལ་པོ་ཡོད་ཅེས་སྒྲོག་གོ །ད་ལྟ་གཏམ་འདི་དག་རྒྱལ་པོར་བསྒྲག་པར་འགྱུར། ཁྱོད་རང་ཤོག་དང་ངེད་རྣམས་ལྷན་ཅིག་ཏུ་གྲོས་བྱའོ་ཞེས་བྲིས་འདུག
NEH 6:8 དེར་ངས་ཁོ་ལ་སྐད་བཏང་སྟེ་འདི་ལྟར། ཁྱོད་ཀྱིས་སྨྲས་པའི་དོན་འདི་དག་གཅིག་ཀྱང་མེད། འདི་ནི་ཁྱོད་རང་གི་རྫུན་བཟོ་ཡིན་ནོ་ཞེས་སྨྲས་པ་ཡིན།
NEH 6:9 དེ་དག་གིས་ངེད་རྣམས་ལ་འཇིགས་བསྐུལ་ནས་འདི་ལྟར། དེ་རྣམས་ཀྱི་ལག་པའི་སྟོབས་ཞན་པར་གྱུར་ཅིག ལས་སྒྲུབ་མི་ཐུབ་ཅིང་། ལས་ཀ་རྫོགས་པར་བྱ་མི་ནུས་ཞེས་སྨྲས། ད་ལྟ་ངའི་ལག་པར་སྟོབས་གནང་བར་མཛོད་ཅིག
NEH 6:10 དེའི་རྗེས་སུ་ང་མཱས་ཧེ་ཏ་བེལ་གྱི་ཚ་བོའམ་དི་ལཱ་ཡའི་བུ་ཤེ་མ་ཡཱའི་ཁང་པར་ཕྱིན། སྐབས་དེར་ཁོས་སྒོ་བརྒྱབ་སྟེ་ཕྱིར་མི་འབུད་པ་དང་། ཁོ་ན་རེ། ངེད་གཉིས་དཀོན་མཆོག་གི་མཆོད་ཁང་གི་དཀྱིལ་དུ་འཛོམས་ཏེ་མཆོད་ཁང་གི་སྒོ་རྒྱག་པར་བྱའོ། །གང་ལ་ཞེ་ན། དེ་དག་ཁྱོད་རང་གསོད་དུ་འོང་བ་ཡིན། མཚན་མོ་འོངས་ནས་ཁྱོད་རང་གསོད་དོ་ཞེས་སྨྲས།
NEH 6:11 ངས་དེ་ལ། ང་ལྟ་བུའི་མི་ཞིག་འབྲོ་བར་བྱེད་དམ། ང་འདྲ་བའི་མི་ཞིག་གིས་རང་སྲོག་སྐྱོབ་པའི་ཆེད་དུ་མཆོད་ཁང་ནང་དུ་འབྱོལ་ལམ། ང་ནང་དུ་མི་འགྲོ་ཞེས་སྨྲས་སོ། །
NEH 6:12 ངས་གསལ་པོར་བལྟས་པ་དང་། དཀོན་མཆོག་གིས་ཁོ་མ་མངགས་སོ། །ཁོ་རང་ཉིད་ཀྱིས་ང་ལ་གནོད་པའི་ལུང་བསྟན་ཏེ། ཏོ་བི་ཡཱ་དང་སན་པཱ་ལད་གཉིས་ཀྱིས་དེ་གླས་པ་རེད།
NEH 6:13 ང་ལ་འཇིགས་བསྐུལ་ནས་ངས་དེར་བསྟུན་ཏེ་སྡིག་པ་བྱེད་པ་དང་། མིང་ངན་བཞག་ནས་ཁོ་རྣམས་ཀྱིས་འཕྱ་སྨོད་བྱེད་པའི་ཕྱིར་དེ་གླས་པ་རེད།
NEH 6:14 ཀྱེ། ངའི་དཀོན་མཆོག་ལགས། ཏོ་བི་ཡཱ་དང་སན་པཱ་ལད་དང་ལུང་སྟོན་མ་ནོ་ཨད་ཡཱ་དང་། ལུང་སྟོན་པ་གཞན་དག་གིས་དོན་འདི་དག་བསྒྲུབས་དོན་ནི་ང་ལ་འཇིགས་བསྐུལ་བའི་ཕྱིར་ཡིན་པས། ཁྱེད་ཀྱིས་དེ་དག་ཐུགས་སུ་བཟུང་བར་མཛོད།
NEH 6:15 ཨེ་ལུད་ཟླ་བའི་ཚེས་ཉེར་ལྔ་ཉིན་མཁར་གྱང་བརྩིགས་ཟིན་པ་དང་། བསྡོམས་པས་ཉིན་ལྔ་བཅུ་ང་གཉིས་ལ་ཉམས་གསོ་བྱས་སོ། །
NEH 6:16 ངེད་རྣམས་ཀྱི་དགྲ་བོ་ཀུན་གྱིས་ཐོས་པ་དང་། ཕྱོགས་བཞིའི་མི་རིགས་རྣམས་འཇིགས་ཤིང་སྐྱོ་མདངས་ཤར། གང་ལ་ཞེ་ན། ལས་འདི་ངེད་ཀྱི་དཀོན་མཆོག་གིས་འགྲུབ་པར་མཛད་པ་དེ་དག་གིས་ཤེས་སོ། །
NEH 6:17 ཡང་ཉིན་དེ་དག་གི་རིང་ལ་ཡ་ཧུ་དཱའི་སྐུ་དྲག་ཚོས་ཐེངས་མང་པོར་ཏོ་བི་ཡཱ་ལ་ཡི་གེ་བསྐུར་བ་དང་། ཏོ་བི་ཡཱས་ཀྱང་ཡིག་ལན་བསྐུར་ཏོ། །
NEH 6:18 ཡ་ཧུ་དཱའི་ཡུལ་དུ་མི་མང་པོས་ཏོ་བི་ཡཱ་དང་མནའ་འབྲེལ་བྱས་སོ། །གང་ལ་ཞེ་ན། ཁོ་ནི་ཨ་རཱའི་བུ་ཤེ་ཀན་ཡཱའི་མག་པ་ཡིན་ལ། ཁོའི་བུ་ཡེ་ཧོ་ཧ་ནན་གྱིས་ཀྱང་པེ་རེག་ཡཱའི་བུ་མཱེ་ཤུལ་ལིམ་གྱི་བུ་མོ་བག་མར་བླངས་ཡོད་པའི་ཕྱིར་རོ། །
NEH 6:19 དེ་དག་གིས་ཀྱང་ངའི་མདུན་དུ་ཏོ་བི་ཡཱ་ལ་གཏམ་བཟང་པོ་སྨྲས་པ་དང་། ངའི་གཏམ་ཡང་ཁོ་ལ་བཤད་དོ། །ཏོ་བི་ཡཱས་རྒྱུན་ཏུ་ང་ལ་ཡི་གེ་བསྐུར་ནས་འཇིགས་སྣང་བསྐུལ་ལོ། །
NEH 7:1 དེ་ནས་མཁར་གྱང་བརྩིགས་ཚར་བ་དང་། སྒོ་རྣམས་བསླངས་ཏེ། སྒོ་སྲུང་དང་མགུར་ལེན་མཁན། ལེ་ཝི་པ་རྣམས་བསྐོས་སོ། །
NEH 7:2 ངས་རང་གི་སྤུན་ཧ་ནཱ་ནེ་དང་མཁར་རྫོང་གི་འགོ་དཔོན་ཧ་ནན་ཡཱ་གཉིས་ལ་ཡེ་རུ་སཱ་ལེམ་དུ་བདག་འཛིན་གྱི་འགན་བཀལ་ཏོ། །རྒྱུ་མཚན་ཧ་ནན་ཡཱ་ནི་མི་མང་པོ་ལས་གཞུང་རྒྱུད་དྲང་ཞིང་དཀོན་མཆོག་ལ་གུས་ཤིང་འཇིགས་པ་ཞིག་ཡིན་ནོ། །
NEH 7:3 ཡང་ངས་དེ་དག་ལ། ཉི་མ་དྲོ་བའི་དུས་སུ་ད་གཟོད་ཡེ་རུ་སཱ་ལེམ་གྱི་མཁར་སྒོ་ཕྱེས་ཤིག ཡེ་རུ་སཱ་ལེམ་གྱི་འབངས་མི་མངགས་ནས་སོ་སོའི་ལས་རེས་བཞིན་རང་རང་གི་ཁང་པའི་མདུན་དུ་ས་བསྲུང་དགོས། དེ་དག་གིས་ད་དུང་སྲུང་བཞིན་པའི་སྐབས་སུ་སྒོ་རྣམས་བརྒྱབ་སྟེ་སྒོ་གཏན་ཡང་གནོན་དགོས་ཞེས་སྨྲས་སོ། །
NEH 7:4 དེ་ཡང་གྲོང་ཁྱེར་དེ་ནི་རྒྱ་ཆེ་ནའང་། དེའི་ནང་རོལ་དུ་མི་ཉུང་ཞིང་ཁང་པའང་ད་དུང་བརྩིགས་མེད་པ་ཡིན་ནོ། །
NEH 7:5 དེ་ནས་ངའི་དཀོན་མཆོག་གིས་ང་ཡི་སེམས་བསྐུལ་ཏེ། ངས་ཁྱིམ་རབས་ཐོ་རུ་འགོད་པའི་ཕྱིར་སྐུ་དྲག་དང་འགོ་དཔོན་དང་འབངས་མི་བཅས་བསྡུས་པ་དང་། ཐོག་མར་འོང་མཁན་གྱི་ཁྱིམ་ཐོ་རྙེད་པ་དང་དེའི་སྟེང་དུ་འདི་ལྟར་བྲིས་ཡོད་དེ།
NEH 7:6 ཡ་ཧུ་དཱ་ཡུལ་གྱི་མི་འདི་རྣམས་ནི་སྔར་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་པཱ་པེལ་ལོན་ལ་བཙོན་དུ་ཁྲིད་པ་དང་། ད་ལྟ་ཁོ་རྣམས་བཙན་ཁྲིད་བྱས་པའི་ཡུལ་ནས་ཡར་ཐོན་ཏེ་ཡེ་རུ་སཱ་ལེམ་དང་ཡ་ཧུ་དཱའི་ཡུལ་དུ་སོ་སོའི་གནས་སུ་ཕྱིར་ལོག་པ་ནི་འདི་ལྟ་སྟེ།
NEH 7:7 དེ་དག་ནི་ཟེ་རུ་པཱ་པེལ་དང་། ཡེ་ཤུ་ཨ་དང་། ནེ་ཧེམ་ཡཱ་དང་། ཨ་ཟར་ཡཱ་དང་། ར་ཨས་ཡཱ་དང་། ན་ཧ་མ་ནི་དང་། མོར་དོ་ཀཱ་ཡི་དང་། པིལ་ཤན་དང་། མིས་ཕེ་རེད་དང་། པིག་ཝ་ཨི་དང་། ནེ་ཧུམ་དང་། པ་ཨ་ནཱ་དང་ལྷན་ཅིག་ཏུ་ཕྱིར་འོངས་སོ། །ཡེས་ར་ཨེལ་གྱི་སྐྱེས་པ་རྣམས་ཀྱི་བསྡོམས་གྲངས་ནི་འདི་ལྟ་སྟེ།
NEH 7:8 ཕཱར་ཨོ་སིའི་བུ་རྒྱུད་ཉིས་སྟོང་བརྒྱ་དང་བདུན་ཅུ་དོན་གཉིས་དང་།
NEH 7:9 ཤེ་ཕད་ཡཱའི་བུ་རྒྱུད་སུམ་བརྒྱ་བདུན་ཅུ་དོན་གཉིས།
NEH 7:10 ཨ་རཱའི་བུ་རྒྱུད་དྲུག་བརྒྱ་ལྔ་བཅུ་ང་གཉིས།
NEH 7:11 ཕཱ་ཧད་མོ་ཨབ་ཀྱི་བུ་རབས་ཚ་རྒྱུད་དེ་ཡེ་ཤུ་ཨ་དང་ཡོ་ཨབ་ཀྱི་བུ་རྒྱུད་ཉིས་སྟོང་བརྒྱད་བརྒྱ་བཅོ་བརྒྱད།
NEH 7:12 ཨེ་ལཱམ་གྱི་བུ་རྒྱུད་ཆིག་སྟོང་ཉིས་བརྒྱ་ལྔ་བཅུ་ང་བཞི།
NEH 7:13 ཟད་ཐུའི་བུ་རྒྱུད་ནི་བརྒྱད་བརྒྱ་བཞི་བཅུ་ཞེ་ལྔ།
NEH 7:14 ཟག་ཀ་ཨིའི་བུ་རྒྱུད་བདུན་བརྒྱ་དྲུག་ཅུ།
NEH 7:15 པིན་ནུ་ཨིའི་བུ་རྒྱུད་དྲུག་བརྒྱ་བཞི་བཅུ་ཞེ་བརྒྱད།
NEH 7:16 པེ་བཱ་ཨིའི་བུ་རྒྱུད་དྲུག་བརྒྱ་དང་ཉེར་བརྒྱད།
NEH 7:17 ཨས་གད་ཀྱི་བུ་རྒྱུད་ཉིས་སྟོང་སུམ་བརྒྱ་དང་ཉེར་གཉིས།
NEH 7:18 ཨ་དོ་ནི་ཀམ་གྱི་བུ་རྒྱུད་དྲུག་བརྒྱ་དྲུག་ཅུ་རེ་བདུན།
NEH 7:19 པིག་ཝ་ཨིའི་བུ་རྒྱུད་ཉིས་སྟོང་དྲུག་ཅུ་རེ་བདུན།
NEH 7:20 ཨ་དིན་གྱི་བུ་རྒྱུད་དྲུག་བརྒྱ་ལྔ་བཅུ་ང་ལྔ།
NEH 7:21 ཧི་ཟི་ཀི་ཡཱའི་བུ་རབས་ཚ་རྒྱུད་དེ་ཨ་ཏེར་གྱི་བུ་རྒྱུད་དགུ་བཅུ་གོ་བརྒྱད།
NEH 7:22 ཧ་ཤུམ་གྱི་བུ་རྒྱུད་སུམ་བརྒྱ་དང་ཉེར་བརྒྱད།
NEH 7:23 པེ་ཙ་ཨིའི་བུ་རྒྱུད་སུམ་བརྒྱ་དང་ཉེར་བཞི།
NEH 7:24 ཧ་རིབ་ཀྱི་བུ་རྒྱུད་ནི་བརྒྱ་དང་བཅུ་གཉིས།
NEH 7:25 གིབ་ཡོན་གྱི་བུ་རྒྱུད་དགུ་བཅུ་གོ་ལྔ།
NEH 7:26 པེད་ལེ་ཧེམ་པ་དང་ནེ་ཏོ་ཕཱ་པ་བརྒྱ་དང་བརྒྱད་ཅུ་གྱ་བརྒྱད།
NEH 7:27 ཨ་ན་ཐོད་པ་བརྒྱ་དང་ཉེར་བརྒྱད།
NEH 7:28 པེད་བ་ཡ་མ་ཝེད་པ་བཞི་བཅུ་ཞེ་གཉིས།
NEH 7:29 ཀིར་ཡཱད་ཡེ་ཨ་རིམ་པ་དང་ཀེ་ཕི་རཱ་པ་དང་། པེ་ཨེ་རཱོད་པ་བདུན་བརྒྱ་བཞི་བཅུ་ཞེ་གསུམ།
NEH 7:30 རཱ་མ་པ་དང་གེ་བཱ་པ་དྲུག་བརྒྱ་དང་ཉེར་གཅིག
NEH 7:31 མིགས་མཱ་སི་པ་བརྒྱ་དང་ཉེར་གཉིས།
NEH 7:32 པེད་ཨེལ་པ་དང་ཨེ་ཡུ་པ་བརྒྱ་དང་ཉེར་གསུམ།
NEH 7:33 གཞན་ནེ་བོ་པ་ལྔ་བཅུ་ང་གཉིས།
NEH 7:34 ཨེ་ལཱམ་གཞན་དེའི་བུ་རྒྱུད་ཆིག་སྟོང་ཉིས་བརྒྱ་ལྔ་བཅུ་ང་བཞི།
NEH 7:35 ཧ་རིམ་གྱི་བུ་རྒྱུད་སུམ་བརྒྱ་ཉི་ཤུ།
NEH 7:36 ཡེ་རུ་ཀོ་པ་སུམ་བརྒྱ་བཞི་བཅུ་ཞེ་ལྔ།
NEH 7:37 ལོད་དང་ཧ་དིད་དང་ཨོ་ནོའི་མི་བདུན་བརྒྱ་དང་ཉེར་གཅིག
NEH 7:38 སེ་ན་ཨ་པ་སུམ་སྟོང་དགུ་བརྒྱ་སུམ་ཅུ།
NEH 7:39 མཆོད་དཔོན་རྣམས་ལས། ཡེ་ཤུ་ཨའི་ཁྱིམ་ལ་གཏོགས་པའི་ཡེ་དཱ་ཡའི་བུ་རྒྱུད་དགུ་བརྒྱ་བདུན་ཅུ་དོན་གསུམ།
NEH 7:40 ཨིམ་མེར་གྱི་བུ་རྒྱུད་ཆིག་སྟོང་ལྔ་བཅུ་ང་གཉིས།
NEH 7:41 ཕཱ་ཤུར་གྱི་བུ་རྒྱུད་ཆིག་སྟོང་ཉིས་བརྒྱ་བཞི་བཅུ་ཞེ་བདུན།
NEH 7:42 ཧ་རིམ་གྱི་བུ་རྒྱུད་ཆིག་སྟོང་བརྒྱ་དང་བཅུ་བདུན།
NEH 7:43 ལེ་ཝི་པ་རྣམས་ལས། ཧོ་དབ་ཡཱའི་བུ་རབས་ཚ་རྒྱུད་དེ་ཡེ་ཤུ་ཨ་དང་ཀད་མི་ཨེལ་གྱི་བུ་རྒྱུད་བདུན་ཅུ་དོན་བཞི།
NEH 7:44 མགུར་ལེན་མཁན་རྣམས་ལས། ཨ་སབ་ཀྱི་བུ་རྒྱུད་བརྒྱ་དང་བཞི་བཅུ་ཞེ་བརྒྱད།
NEH 7:45 སྒོ་སྲུང་རྣམས་ལས། ཤལ་ལུམ་གྱི་བུ་རྒྱུད་དང་། ཨ་ཏེར་གྱི་བུ་རྒྱུད། ཏལ་མོན་གྱི་བུ་རྒྱུད། ཨག་ཁུབ་ཀྱི་བུ་རྒྱུད། ཧ་ཏི་ཏ་ཡི་བུ་རྒྱུད། ཤོ་བཱའི་བུ་རྒྱུད་བཅས་བསྡོམས་པས་བརྒྱ་དང་སུམ་ཅུ་སོ་བརྒྱད།
NEH 7:46 མཆོད་གཡོག་རྣམས་ལས། ཙི་ཧཱའི་བུ་རྒྱུད་དང་ཧ་སུ་ཕའི་བུ་རྒྱུད་དང་། ཏབ་བ་ཨོད་ཀྱི་བུ་རྒྱུད་དང་།
NEH 7:47 ཀོ་རེས་ཀྱི་བུ་རྒྱུད་དང་། སི་ཨ་ཧའི་བུ་རྒྱུད་དང་། ཕ་དོན་གྱི་བུ་རྒྱུད་དང་།
NEH 7:48 ལེ་བ་ནཱ་ཡི་བུ་རྒྱུད་དང་། ཧ་ག་བཱ་ཡི་བུ་རྒྱུད་དང་། ཤལ་མཱ་ཨིའི་བུ་རྒྱུད་དང་།
NEH 7:49 ཧ་ནན་གྱི་བུ་རྒྱུད་དང་། གིད་དེལ་གྱི་བུ་རྒྱུད་དང་། ག་ཧར་གྱི་བུ་རྒྱུད་དང་།
NEH 7:50 རེ་ཨ་ཡཱ་ཡི་བུ་རྒྱུད་དང་། རེ་ཙིན་གྱི་བུ་རྒྱུད་དང་། ནེ་ཀོ་དཱའི་བུ་རྒྱུད་དང་།
NEH 7:51 ག་ཟམ་གྱི་བུ་རྒྱུད་དང་། ཨུ་ཟཱ་ཡི་བུ་རྒྱུད་དང་། ཕཱ་སེ་ཨའི་བུ་རྒྱུད་དང་།
NEH 7:52 པེ་སཱ་ཨི་ཡི་བུ་རྒྱུད་དང་། མེ་ཧུ་ནིམ་གྱི་བུ་རྒྱུད་དང་། ནེ་ཕུ་ཤཱ་སིམ་གྱི་བུ་རྒྱུད་དང་།
NEH 7:53 པག་པུག་གི་བུ་རྒྱུད་དང་། ཧ་ཀུ་ཕཱ་ཡི་བུ་རྒྱུད་དང་། ཧར་ཧར་གྱི་བུ་རྒྱུད་དང་།
NEH 7:54 པ་སི་ལུད་ཀྱི་བུ་རྒྱུད་དང་། མེ་ཧི་དཱ་ཡི་བུ་རྒྱུད་དང་། ཧར་ཤའི་བུ་རྒྱུད་དང་།
NEH 7:55 པཱར་ཀོས་ཀྱི་བུ་རྒྱུད་དང་། སི་ས་རཱ་ཡི་བུ་རྒྱུད་དང་། ཐེ་མཱའི་བུ་རྒྱུད་དང་།
NEH 7:56 ནེ་ཙི་ཡཱ་ཡི་བུ་རྒྱུད་དང་། ཧ་ཏི་ཕའི་བུ་རྒྱུད་བཅས་སོ། །
NEH 7:57 སོ་ལོ་མོན་གྱི་གཡོག་པོའི་བུ་རབས་ཚ་རྒྱུད་ནི། སོ་ཏའི་བུ་རྒྱུད་དང་སོ་ཕེ་རེད་ཀྱི་བུ་རྒྱུད་དང་། ཕེ་རི་དཱའི་བུ་རྒྱུད་དང་།
NEH 7:58 ཡ་ཨཱ་ལ་ཡི་བུ་རྒྱུད་དང་། དར་ཀོན་གྱི་བུ་རྒྱུད་དང་། གིད་དེལ་གྱི་བུ་རྒྱུད་དང་།
NEH 7:59 ཤེ་ཕད་ཡཱ་ཡི་བུ་རྒྱུད་དང་། ཧད་ཏིལ་གྱི་བུ་རྒྱུད་དང་། ཕོ་ཁེ་རེད་ཧ་ཙེ་བཱ་ཡི་བུ་རྒྱུད་དང་། ཨ་མོན་གྱི་བུ་རྒྱུད་རྣམས་སོ། །
NEH 7:60 མཆོད་གཡོག་དང་སོ་ལོ་མོན་གྱི་གཡོག་པོའི་བུ་རབས་ཚ་རྒྱུད་ཀྱི་བསྡོམས་གྲངས་ནི་སུམ་བརྒྱ་དགུ་བཅུ་གོ་གཉིས་ཡིན།
NEH 7:61 ཡང་རང་གི་ཕ་ཡི་རུས་རྒྱུད་དང་བུ་རབས་ཚ་རྒྱུད་རྣམས་ཡེས་ར་ཨེལ་ནས་ཐོན་པ་ཡིན་མིན་ལ་ར་སྤྲོད་བྱེད་མི་ནུས་ཤིང་། ཐེལ་མེ་ཝཱ་དང་། ཐེལ་ཧར་ཤ་དང་། ཀེ་རུབ་དང་། ཨད་དོན་དང་། ཨིམ་མེར་བཅས་ནས་ཐོན་པ་འདི་ལྟ་སྟེ།
NEH 7:62 དི་ལཱ་ཡ་ཡི་བུ་རྒྱུད་དང་། ཏོ་བི་ཡཱ་ཡི་བུ་རྒྱུད་དང་། ནེ་ཀོ་དཱའི་བུ་རྒྱུད་བསྡོམས་པས་དྲུག་བརྒྱ་ཞེ་གཉིས་ཡིན།
NEH 7:63 མཆོད་དཔོན་རྣམས་ལས། ཧ་བཱ་ཡཱ་ཡི་བུ་རྒྱུད་དང་ཧག་ཀོས་ཀྱི་བུ་རྒྱུད་དང་། པཱར་ཟི་ལ་ཨིའི་བུ་རྒྱུད་རྣམས་སོ། །པཱར་ཟི་ལ་ཨི་ཡིས་གིལ་ཨད་པ་པཱར་ཟི་ལ་ཨིའི་བུ་མོ་བག་མར་བླངས་པས་དེ་དག་གི་མིང་ལ་འདི་ལྟར་བཏགས་སོ། །
NEH 7:64 འདི་ཚོས་གདུང་རབས་ལས་རང་རང་གི་ཁྱིམ་རྒྱུད་བཙལ་ཡང་མ་རྙེད་པས། འདི་དག་མི་གཙང་བར་བརྩིས་ཏེ་མཆོད་དཔོན་བྱས་མི་ཆོག་པ་ཡིན།
NEH 7:65 ཡང་འགོ་དཔོན་གྱིས་དེ་དག་ལ། མཆོད་དཔོན་གྱིས་ཨུའུ་རིམ་དང་ཐུའུ་མིམ་བཏགས་ནས་ཐོན་པའི་བར་དུ། དམ་པའི་ཟས་བཟའ་མི་རུང་བར་བསྐུལ་ཏོ། །
NEH 7:66 མི་ཚོགས་ཀྱི་བསྡོམས་གྲངས་ནི་བཞི་ཁྲི་ཉིས་སྟོང་སུམ་བརྒྱ་དྲུག་ཅུ་ཡོད།
NEH 7:67 དེ་རྣམས་ལས་གཞན་གཡོག་པོ་དང་གཡོག་མོ་བདུན་སྟོང་སུམ་བརྒྱ་སུམ་ཅུ་སོ་བདུན་དང་། མགུར་ལེན་མཁན་སྐྱེས་ཕོ་མོ་ཉིས་བརྒྱ་བཞི་བཅུ་ཞེ་ལྔ་ཡོད།
NEH 7:68 དེ་དག་ལ་རྟ་བདུན་བརྒྱ་སུམ་ཅུ་སོ་དྲུག་དང་། བོང་བུ་ཉིས་བརྒྱ་བཞི་བཅུ་ཞེ་ལྔ་དང་།
NEH 7:69 རྔ་མོང་བཞི་བརྒྱ་སུམ་ཅུ་སོ་ལྔ་དང་། བོང་བུ་དྲུག་སྟོང་བདུན་བརྒྱ་ཉི་ཤུ་ཡོད་པ་ཡིན།
NEH 7:70 ཡང་ཚོ་དཔོན་ཁ་ཤས་ཀྱིས་མཁར་ལས་ཀྱི་ཕྱིར་ཞལ་འདེབས་ཕུལ་བ་དང་། འགོ་དཔོན་གྱིས་དཀོར་མཛོད་དུ་གསེར་གྱི་དོང་ཙེ་ཆིག་སྟོང་དང་། ཏིང་ཕོར་ལྔ་བཅུ་དང་། མཆོད་དཔོན་གྱི་ཆོས་གོས་ལྔ་བརྒྱ་དང་སུམ་ཅུ་ཐམ་པ་བཅས་ཕུལ་ཏོ། །
NEH 7:71 ཡང་ཚོ་དཔོན་ཁ་ཤས་ཀྱིས་དཀོར་མཛོད་དུ་གསེར་གྱི་དོང་ཙེ་ཉིས་ཁྲི་དང་། དངུལ་མཱེ་ན་ཉིས་སྟོང་ཉིས་བརྒྱ་དང་།
NEH 7:72 གཞན་པའི་འབངས་མི་རྣམས་ཀྱིས་གསེར་གྱི་དོང་ཙེ་ཉིས་ཁྲི་དང་། དངུལ་མཱེ་ན་ཉིས་སྟོང་དང་། མཆོད་དཔོན་གྱི་ཆོས་གོས་དྲུག་ཅུ་རེ་བདུན་བཅས་ཕུལ་ཏོ། །
NEH 7:73 དེ་ནས་མཆོད་དཔོན་དང་། ལེ་ཝི་པ། སྒོ་སྲུང་། མགུར་ལེན་མཁན། འབངས་མི་ཁ་ཤས། མཆོད་གཡོག ཡེས་ར་ཨེལ་པ་བཅས་ཚང་མ་རང་གི་གྲོང་ཁྱེར་དུ་གནས་ཏེ། ཡེས་ར་ཨེལ་པ་རྣམས་རང་གི་གྲོང་ཁྱེར་དུ་བསྡད་དོ། །
NEH 8:1 ཟླ་བདུན་པ་ཚེས་དུས་སུ། འབངས་རྣམས་མི་གཅིག་ལྟར་ཆུ་སྒོའི་མདུན་གྱི་ཐང་ཆེན་དུ་འཛོམས་ནས། དྲུང་ཡིག་ཨེས་སི་རཱ་ལ། དཀོན་མཆོག་ཡ་ཝཱེས་ཡེས་ར་ཨེལ་ལ་གསུངས་པའི་མོ་ཤེའི་བཀའ་ཁྲིམས་ཀྱི་གླེགས་བམ་ཁྱེར་ཡོང་བར་ཞུས།
NEH 8:2 དེར་ཟླ་བདུན་པའི་ཚེས་གཅིག་ཉིན་མཆོད་དཔོན་ཨེས་སི་རཱ་ཡིས་ཐོས་ཤིང་དོན་རྟོགས་ནུས་པའི་སྐྱེས་ཕོ་མོ་རྣམས་ཀྱི་མདུན་དུ་བཀའ་ཁྲིམས་ཀྱི་གླེགས་བམ་དེ་ཁྱེར་ཡོང་ནས།
NEH 8:3 སྔ་དྲོ་ནས་ཉིན་གུང་གི་བར་དུ་ཆུ་སྒོའི་མདུན་གྱི་ཐང་ཆེན་དུ་སྐྱེས་ཕོ་མོ་དང་དོན་རྟོགས་ནུས་པ་ཐམས་ཅད་ཀྱི་མདུན་དུ་བཀླགས་ཏེ། འབངས་ཐམས་ཅད་ཀྱིས་བཀའ་ཁྲིམས་ཀྱི་མདོ་དེ་ལ་རྣ་བ་བླགས་ནས་མཉན་ཏོ། །
NEH 8:4 དེའི་དོན་དུ་བཟོས་པའི་ཤིང་སྟེགས་སྟེང་དུ་དྲུང་ཡིག་ཨེས་སི་རཱ་བཞེངས་ནས་བསྡད། ཁོའི་གཡས་ཕྱོགས་སུ་མད་ཐིད་ཡཱ་དང་། ཤེ་མཱ། ཨ་ན་ཡཱ། ཨུ་རི་ཡཱ། ཧིལ་ཀི་ཡཱ། མ་ཨ་སེ་ཡཱ་བཅས་ལངས་བསྡད་ཡོད། ཁོའི་གཡོན་ཕྱོགས་སུ་ཕེ་ད་ཡཱ་དང་། མེ་ཤཱ་ཨེལ། མལ་ཀི་ཡཱ། ཧ་ཤུམ། ཧས་བད་ད་ནཱ། ཟཱ་ཀར་ཡ། མཱེ་ཤུལ་ལིམ་བཅས་ལངས་བསྡད་ཡོད་དོ། །
NEH 8:5 དེར་ཨེས་སི་རཱ་མཐོ་སར་བཞེངས་ནས་མི་ཚང་མའི་མཐོང་སར་མདོ་དེ་ཁ་ཕྱེས་པ་དང་། ཁོང་གིས་ཕྱེས་མ་ཐག་ཏུ་མི་ཐམས་ཅད་ཡར་ལངས་སོ། །
NEH 8:6 ཨེས་སི་རཱས་བླ་ན་མེད་པའི་དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་པ་དང་། མི་ཐམས་ཅད་ཀྱིས་ལག་པ་ཡར་བརྐྱངས་ནས། ཨ་མེན། ཨ་མེན་ཞེས་ཞུས་ཤིང་། མགོ་བོ་བསྒུར་ཏེ་གདོང་སར་བཏུད་ནས་དཀོན་མཆོག་ཡ་ཝཱེ་ལ་ཕྱག་བཙལ་ཏོ། །
NEH 8:7 ཡང་ཡེ་ཤུ་ཨ་དང་། པཱ་ནི། ཤེ་རེབ་ཡཱ། ཡ་མིན། ཨག་ཁུབ། ཤབ་བེ་ཐ་ཨི། ཧོ་དི་ཡཱ། མ་ཨ་སེ་ཡཱ། ཀེ་ལི་ཏ། ཨ་ཟར་ཡཱ། ཡོ་ཟཱ་བད། ཧ་ནན། ཕེ་ལ་ཡཱ་དང་ལེ་ཝི་པ་རྣམས་ཀྱིས་འབངས་མི་རྣམས་ལ་བཀའ་ཁྲིམས་རྟོགས་སུ་བཅུག་པ་དང་། འབངས་ཐམས་ཅད་རང་རང་གི་གནས་སུ་ལངས་བསྡད་དོ། །
NEH 8:8 དེ་དག་གིས་དཀོན་མཆོག་གི་བཀའ་ཁྲིམས་ཀྱི་མདོ་གསལ་པོར་བཀླགས་ནས་དོན་སྨྲས་ཤིང་། འབངས་མི་རྣམས་ལ་བཀླགས་པའི་མདོ་ཡི་དོན་ཧ་གོ་རུ་བཅུག་གོ །
NEH 8:9 འགོ་དཔོན་ནེ་ཧེམ་ཡཱ་དང་། མཆོད་དཔོན་དང་དྲུང་ཡིག་ཨེས་སི་རཱ་དང་། འབངས་མི་རྣམས་ལ་སློབ་སྟོན་བྱེད་པའི་ལེ་ཝི་པ་རྣམས་ཀྱིས་འབངས་རྣམས་ལ་འདི་ལྟར། དེ་རིང་ནི་ཁྱོད་ཅག་གི་དཀོན་མཆོག་ཡ་ཝཱེའི་ཉིན་དམ་པ་ཡིན་པས། མྱ་ངན་བྱས་ནས་མ་ངུ་ཞིག་ཅེས་སྨྲས། གང་ལ་ཞེ་ན། བཀའ་ཁྲིམས་ཐོས་ཏེ་ཁོ་ཚོ་ངུས་པས་ཡིན།
NEH 8:10 ནེ་ཧེམ་ཡཱས་ཁོ་རྣམས་ལ་འདི་ལྟར། ཁྱོད་རྣམས་སོང་སྟེ་ཤ་ཞིམ་པོ་ཟོ་ལ། བཏུང་བ་མངར་མོ་ཐུངས་ཤིག སྟ་གོན་བྱེད་མི་ནུས་པ་ལ་བགོས་ཤིག དེ་རིང་ནི་བདག་ཅག་གི་གཙོ་བོའི་ཉིན་དམ་པ་ཡིན་པས་སོ། །སེམས་མ་སྐྱོ་ཞིག དཀོན་མཆོག་ཡ་ཝཱེ་ལ་བརྟེན་ནས་བྱུང་བའི་དགའ་སྤྲོ་ནི་ཁྱོད་ཚོའི་སྟོབས་ཤུགས་ཡིན་ནོ་ཞེས་སྨྲས་པ་ལ།
NEH 8:11 ལེ་ཝི་པས་འབངས་མི་ཐམས་ཅད་ཁ་རོག་ལ་འདུག་ཏུ་བཅུག་སྟེ་འདི་ལྟར། ཁ་རོག་སྡོད་ཅིག དེ་རིང་ནི་ཉིན་དམ་པ་ཡིན་པས་སེམས་མ་སྡུག་ཅེས་སྨྲས།
NEH 8:12 འབངས་མི་ཐམས་ཅད་སོང་ནས་བཟའ་བཏུང་སྤྱད་པ་དང་། མི་གཞན་ལའང་བགོས་པས་ཐམས་ཅད་ཤིན་ཏུ་དགའ་བར་གྱུར། གང་ལ་ཞེ་ན། དེ་དག་གིས་ཁྲིད་སྟོན་གནང་བ་དག་རྟོགས་པས་སོ། །
NEH 8:13 དེའི་ཕྱི་ཉིན་འབངས་མི་ཀུན་གྱི་ཚོ་དཔོན་རྣམས་དང་། མཆོད་དཔོན་རྣམས་དང་། ལེ་ཝི་པ་རྣམས་བཀའ་ཁྲིམས་ཀྱི་ནང་དོན་སློབ་ཆེད་དྲུང་ཡིག་ཨེས་སི་རཱའི་དྲུང་དུ་འཛོམས་སོ། །
NEH 8:14 དེར་དཀོན་མཆོག་ཡ་ཝཱེས་མོ་ཤེའི་ངག་བརྒྱུད་ནས་གསུངས་པའི་བཀའ་ཁྲིམས་ནང་དུ་ཟླ་བདུན་པའི་དུས་ཆེན་ལ་ཡེས་ར་ཨེལ་པ་རྣམས་སྤྱིལ་བུར་སྡོད་དགོས་པ་དང་།
NEH 8:15 གྲོང་ཁྱེར་ཐམས་ཅད་དང་ཡེ་རུ་སཱ་ལེམ་དུ་འདི་ལྟར། ཁྱོད་ཚོ་ཕྱི་རོལ་ཏུ་རི་ལ་སོང་ནས་སྐྱུ་རུ་རའི་ཤིང་གི་ཡལ་ག་དང་། རི་སྐྱེས་སྐྱུ་རུ་རའི་ཡལ་ག་དང་། པ་སངས་མེ་ཏོག་གི་ཡལ་ག་དང་། ཏ་ལའི་ཤིང་གི་ཡལ་ག་དང་། ལོ་འདབ་རྒྱས་པའི་ཤིང་སྣ་ཚོགས་ཀྱི་ཡལ་ག་རྣམས་བཏོགས་ནས། བཀའ་ཁྲིམས་ལས་གསུངས་པ་བཞིན་སྤྱིལ་བུ་བཟོ་བར་གྱིས་ཞེས་བསྒྲག་དགོས་ཞེས་པ་རྙེད་དེ།
NEH 8:16 འབངས་མི་རྣམས་ཕྱི་རོལ་ཏུ་སོང་ནས་སྡོང་པོའི་ཡལ་ག་ཁྱེར་འོངས་ཏེ། རང་རང་གི་ཁང་པའི་ཐོག་དང་ཁྱམས་ར་དང་། དཀོན་མཆོག་གི་མཆོད་ཁང་གི་ར་སྐོར་ནང་དང་། ཆུ་སྒོའི་ཐང་ཆེན་དང་། ཨེ་ཕཱར་ཡིམ་སྒོའི་ཐང་ཆེན་རྣམས་སུ་སྤྱིལ་བུ་བཟོས་སོ། །
NEH 8:17 ཡང་བཙོན་ལས་ཐར་བའི་མི་ཚོགས་ཐམས་ཅད་ཀྱིས་སྤྱིལ་བུ་བཟོས་ནས་དེའི་ནང་དུ་གནས་སོ། །ནུན་གྱི་བུ་ཡོ་ཤུ་ཨའི་དུས་ནས་བཟུང་སྟེ་ཉིན་འདིའི་བར་དུ་ཡེས་ར་ཨེལ་པ་རྣམས་ཀྱིས་དེ་ལྟར་མ་བྱས་པ་ཡིན། དེའི་རྐྱེན་གྱིས་དེ་དག་ཤིན་ཏུ་དགའ་བར་གྱུར་ཏོ། །
NEH 8:18 ཡང་ཨེས་སི་རཱ་ཡིས་ཉིན་དང་པོ་ནས་མཐའ་མཇུག་བར་དུ། ཉིན་ལྟར་དཀོན་མཆོག་གི་བཀའ་ཁྲིམས་བཀླགས་ཏེ། དེ་རྣམས་ཀྱིས་ཉིན་ཞག་བདུན་གྱི་རིང་ལ་དུས་ཆེན་བསྲུངས་ནས། ཉིན་བརྒྱད་པར་ཁྲིམས་སྲོལ་བཞིན་དུ་འདུ་འཛོམས་དམ་ནན་ཡོད་པ་བཅས་སོ། །
NEH 9:1 དེ་ནས་ཟླ་འདིའི་ཚེས་ཉེར་བཞི་ཉིན་ཡེས་ར་ཨེལ་པ་རྣམས་ཀྱིས་མཉམ་གཅིག་ཏུ་སྨྱུང་གནས་བསྲུངས་ཤིང་། ལུས་ལ་རྩིད་རས་གྱོན་ཏེ་མགོ་ལ་ས་རྡུལ་བླུགས་སོ། །
NEH 9:2 ཡང་ཡེས་ར་ཨེལ་པ་རྣམས་ཕྱི་ཕྱོགས་པ་ཐམས་ཅད་དང་རྩ་བ་ནས་བཀར་ཏེ། དེ་དག་ཡར་ལངས་ནས་རང་གི་སྡིག་པ་དང་རང་གི་ཕ་མེས་ཀྱི་སྐྱོན་རྣམས་མཐོལ་བཤགས་བྱས་སོ། །
NEH 9:3 ཉིན་དེའི་བཞི་ཆའི་གཅིག་ལ་ཁོ་རྣམས་རང་ཉིད་ཀྱི་སར་ཡར་ལངས་ནས་རང་གི་དཀོན་མཆོག་ཡ་ཝཱེའི་བཀའ་ཁྲིམས་ཀྱི་མདོ་བཀླགས་པ་དང་། ཡང་ཉིན་དེའི་བཞི་ཆའི་གཅིག་ལ་སྡིག་པ་མཐོལ་བཤགས་བྱས་ནས་དཀོན་མཆོག་ཡ་ཝཱེ་ལ་ཕྱག་བཙལ་ཏོ། །
NEH 9:4 དེ་ནས་ཡེ་ཤུ་ཨ་དང་། པཱ་ནི། ཀད་མི་ཨེལ། ཤེ་བན་ཡཱ། པུན་ནི། ཤེ་རེབ་ཡཱ། པཱ་ནི། ཁེ་ན་ནི་བཅས་ལེ་ཝི་པ་རྣམས་ཀྱི་ཐེམ་པའི་ཁར་ལངས་ཏེ་སྐད་ཆེན་པོས་རང་གི་དཀོན་མཆོག་ཡ་ཝཱེ་ལ་སྐྱབས་བཅོལ་ཞུས།
NEH 9:5 ཡང་ཡེ་ཤུ་ཨ་དང་། ཀད་མི་ཨེལ། པཱ་ནི། ཧ་ཤབ་ནེ་ཡཱ། ཤེ་རེབ་ཡཱ། ཧོ་དི་ཡཱ། ཤེ་བན་ཡཱ། ཕེ་ཐ་ཡཱ་བྱ་བའི་ལེ་ཝི་པ་རྣམས་ཀྱིས་འདི་ལྟར། ཡར་ལོངས་ཤིག ཁྱོད་ཅག་གི་དཀོན་མཆོག་ཡ་ཝཱེ་ལ་རྒྱུན་ནས་རྒྱུན་དུ་བསྟོད་པ་ཕུལ་ཞིག ཁྱེད་ཀྱི་གཟི་བརྗིད་ཀྱི་མཚན་ནི་བསྟོད་པ་འབུལ་འོས་པ་དང་། ཀུན་ལས་འཕགས་པའི་བསྟོད་པ་དང་བསྔགས་བརྗོད་འབུལ་འོས་སོ། །
NEH 9:6 ཁྱེད་གཅིག་པོ་དཀོན་མཆོག་ཡ་ཝཱེ་ལགས། ཁྱེད་ཀྱིས་ནམ་མཁའ་དང་ནམ་མཁའི་མཁའ་དབྱིངས་མཛད་པ་དང་། དེ་དག་གི་དཔུང་ཚོགས་ཐམས་ཅད་དང་། ས་གཞི་དང་དེའི་སྟེང་གི་བྱ་དངོས་ཐམས་ཅད། རྒྱ་མཚོ་དང་དེའི་ནང་དུ་ཡོད་པ་ཐམས་ཅད་བཀོད་པར་མཛད་ཅིང་། ཁྱེད་ཀྱིས་དངོས་པོ་དེ་མཐའ་དག་ལ་ཚེ་སྲོག་གནང་ནས་སྐྱོང་བར་མཛད་པ་དང་། ནམ་མཁའི་དཔུང་ཚོགས་ཀྱིས་ཀྱང་ཁྱེད་ལ་བསྟོད་བསྔགས་བརྗོད་དོ། །
NEH 9:7 ཁྱེད་ནི་དཀོན་མཆོག་ཡ་ཝཱེ་ལགས། ཁྱེད་ཀྱིས་སྔོན་ཆད་ཨབ་རམ་བདམས་ཏེ་ཀལ་དི་པའི་ཨུར་ཞེས་པའི་ཡུལ་ནས་ཁྲིད་ཅིང་། དེའི་མིང་བརྗེས་ནས་ཨབ་ར་ཧམ་ཞེས་བཏགས་སོ། །
NEH 9:8 ཁྱེད་ཀྱིས་ཁྱེད་ཀྱི་དྲུང་དུ་མི་དེའི་བློ་སེམས་དཀར་བ་གཟིགས་ནས་དེ་ལ་ཞལ་ཆད་བཞག་ཅིང་། ཀ་ན་ཨན་པ་དང་། ཧེད་པ། ཨེ་མོར་པ། ཕེ་རེ་ཟི་པ། ཡེ་བུ་སི་པ། གིར་གས་པ་བཅས་པའི་ཡུལ་རྣམས་ཁོའི་མི་མང་ལ་གནང་བར་ཞལ་གྱིས་བཞེས་ཤིང་། ཁྱེད་ཀྱིས་རང་ཉིད་ཀྱི་བཀའ་བཞིན་དུ་ཡང་མཛད། གང་ལ་ཞེ་ན། ཁྱེད་ནི་དྲང་བདེན་ལགས་པའི་ཕྱིར་རོ། །
NEH 9:9 ཡང་ཨེ་ཅིབ་ཡུལ་དུ་བདག་ཅག་གི་ཕ་མེས་རྣམས་ཀྱིས་སྡུག་བསྔལ་མྱོང་བ་ཁྱེད་ཀྱིས་མཐོང་ཞིང་། དེ་དག་གི་རྒྱ་མཚོ་དམར་པོའི་འགྲམ་གྱི་སྨྲེ་ངག་ཐོས་སོ། །
NEH 9:10 ཕཱར་ཨོལ་དང་དེའི་འཁོར་གཡོག་ཐམས་ཅད་དང་། དེའི་རྒྱལ་ཁབ་ཀྱི་འབངས་མིའི་ལུས་སྟེང་དུ་གྲུབ་རྟགས་དང་དོན་ངོ་མཚར་ཅན་རྣམས་མཛད་པ་སྟེ། དེ་དག་གིས་ངེད་ཅག་གི་ཕ་མེས་ལ་ང་རྒྱལ་གྱིས་ཁེངས་ནས་བརྙས་པ་ཁྱེད་ཀྱིས་མཁྱེན་པས་སོ། །ཁྱེད་ཀྱིས་རང་ཉིད་ལ་མིང་བཏོན་ནས་ད་ལྟའི་བར་དུ་ཡོད་པ་དེ་བཞིན་ནོ། །
NEH 9:11 ཁྱེད་ཀྱིས་ངེད་ཀྱི་ཕ་མེས་རྣམས་ཀྱི་མདུན་ནས་རྒྱ་མཚོ་ཁག་གཉིས་སུ་མཛད་ནས། དེ་དག་རྒྱ་མཚོའི་དཀྱིལ་དུ་སྐམ་སར་ཕྱིན་ཏོ། །ཁྱེད་ཀྱིས་དེ་དག་ལ་ར་མདའ་བྱེད་མཁན་རྣམས་རྒྱ་མཚོའི་ནང་དུ་འཕངས་པ་དང་། རྡོ་ཞིག་ཆུ་གཏིང་ཟབ་ཀྱི་ནང་དུ་འཕེན་པ་ལྟར་མཛད་དོ། །
NEH 9:12 ཉིན་མོར་སྤྲིན་གྱི་ཀ་བ་ཞིག་ལ་བརྟེན་ནས་དེ་དག་འཁྲིད་པར་མཛད་པ་དང་། མཚན་མོར་མེའི་ཀ་བ་ཞིག་གི་འོད་ལ་བརྟེན་ནས་དེ་དག་གང་དུ་བགྲོད་དགོས་པའི་ལམ་ལ་འཁྲིད་པར་མཛད།
NEH 9:13 ཁྱེད་རང་རི་བོ་སི་ནཱའི་སྟེང་དུ་ཕེབས་ཏེ་ནམ་མཁའ་ནས་དེ་དག་ལ་གསུང་གླེང་མཛད་ཅིང་། དྲང་གཞག་གི་སྒྲིག་སྲོལ་དང་བདེན་པ་ཉིད་ཀྱི་བཀའ་ཁྲིམས། ཁྲིམས་ལུགས་དང་བཀའ་རྒྱ་བཟང་པོ་བཅས་གནང་བ་དང་།
NEH 9:14 ཁྱེད་ཀྱི་ངལ་གསོ་བའི་ཉིན་དམ་པ་དེ་དག་ལ་མངོན་པར་མཛད་ཅིང་། ཁྱེད་ཀྱི་ཞབས་ཕྱི་པ་མོ་ཤེའི་ངག་གི་སྒོ་ནས་དེ་དག་ལ་བཀའ་རྒྱ་དང་། ཁྲིམས་ལུགས་དང་། བཀའ་ཁྲིམས་བཙུགས་སོ། །
NEH 9:15 ཁྱེད་ཀྱིས་ནམ་མཁའ་ནས་དེ་དག་ལ་ཁ་ཟས་གནང་ནས་ལྟོགས་སྡུག་སེལ་བ་དང་། ཡང་བྲག་ངོས་ནས་ཆུ་བཏོན་ནས་དེ་དག་གི་སྐོམ་པ་སེལ་བར་བྱས། ཁྱེད་ཀྱིས་དེ་དག་ལ་ཡུལ་དེའི་ནང་དུ་སོང་སྟེ་ཁྱེད་ཀྱིས་སྔར་ནས་ཁོ་རྣམས་ལ་གནང་བར་ཁས་བླངས་པའི་ཡུལ་དེ་ལེན་པར་བཀའ་གསུངས་པ་ཡིན།
NEH 9:16 འོན་ཀྱང་ངེད་ཀྱི་ཕ་མེས་ཀྱིས་ང་རྒྱལ་བསྐྱེད་ནས་མཇིང་པ་གྱོང་པོ་བྱས་ཏེ་ཁྱེད་ཀྱི་བཀའ་ལ་མ་མཉན།
NEH 9:17 ཁོ་རྣམས་ཀྱིས་བཀའ་ལ་མ་མཉན་པ་དང་། ཁྱེད་ཀྱིས་དེ་རྣམས་ཀྱི་དཀྱིལ་དུ་བསྟན་པའི་དོན་ངོ་མཚར་ཅན་རྣམས་ཡིད་ལ་མ་དྲན་པར། རང་གི་མཇིང་པ་གྱོང་པོ་བྱས་ནས་བསམ་གཟས་ཏེ་ངོ་ལོག་བྱས་ཤིང་། རང་དགར་འགོ་དཔོན་ཞིག་ཀྱང་བསྐོས་ཏེ་སྔོན་ཆད་ཁོ་ཚོ་བྲན་གཡོག་ཏུ་བཀོལ་པའི་ཨེ་ཅིབ་ཡུལ་དུ་འགྲོ་བར་འདོད། འོན་ཀྱང་ཁྱེད་ནི་དགོངས་ཡངས་གནང་བའི་ཐུགས་རྗེ་ཅན་དང་། སྙིང་རྗེ་ཆེན་པོ་མངའ་བ། རང་དགར་ཐུགས་མི་ཁྲོ་བ། བྱམས་བརྩེ་མཐའ་ཡས་པའི་དཀོན་མཆོག་ལགས་པས་དེ་དག་མ་སྤངས་སོ། །
NEH 9:18 དེ་དག་གིས་གསེར་གྱི་བ་ཕྲུག་བླུགས་མ་ཞིག་བཟོས་ཏེ་འདི་ལྟར། ཁྱོད་ཅག་ཨེ་ཅིབ་ཡུལ་ནས་བཏོན་ཏེ་ཁྲིད་པའི་དཀོན་མཆོག་དེ་ནི་འདི་ཡིན་ཟེར་ཞིང་། སྐུར་བ་བཏབ་ནས་ཉེས་པ་ཆེན་པོ་བཟོས་སོ། །
NEH 9:19 ཡིན་ན་ཡང་ཁྱེད་ཀྱི་ཐུགས་བརྩེ་བ་ཆེན་པོའི་སྒོ་ནས་དེ་དག་དབེན་སྟོང་དུ་མ་སྤངས་པར། ཉིན་མོར་ལམ་དུ་འཁྲིད་པའི་སྤྲིན་གྱི་ཀ་བ་དང་། མཚན་མོར་འོད་གནང་བའི་མེའི་ཀ་བས་དེ་དག་བགྲོད་སའི་ལམ་ལ་ཁྲིད་དོ། །
NEH 9:20 ཁྱེད་ཀྱི་ཐུགས་ཉིད་ལེགས་པོས་དེ་དག་ལ་བསླབ་བྱ་ཡང་གནང་བ་ཡིན། ཁྱེད་ཀྱི་མཱན་ནཱ་དེ་དག་གི་ཁ་ནས་ཕྱིར་མ་བླངས་པར། ཆུ་གནང་ནས་དེ་དག་གི་སྐོམ་པ་སེལ་ཏོ། །
NEH 9:21 ལོ་ངོ་བཞི་བཅུའི་རིང་ལ་དབེན་སྟོང་དུ་ཁྱེད་ཀྱིས་དེ་དག་བསྐྱངས་པས། དེ་དག་ལ་མི་འདང་བ་གང་ཡང་མ་བྱུང་། དེ་དག་གི་གོས་རྣམས་རྙིང་ཧྲུལ་དུ་མ་གྱུར་པ་དང་། རྐང་པ་ཡང་སྐྲངས་མེད་དོ། །
NEH 9:22 ཁྱེད་ཀྱིས་དེ་དག་ལ་རྒྱལ་ཁམས་དང་མི་རིགས་སོ་སོ་གནང་བ་དང་། ཡུལ་དེའི་གྲུ་ཟུར་དེ་དག་ཁོ་ཚོར་བགོས་ནས། དེ་དག་གིས་ཧེ་སི་པོན་གྱི་རྒྱལ་པོ་སི་ཧོན་གྱི་ཡུལ་དང་། པཱ་ཤན་གྱི་རྒྱལ་པོ་ཨོག་བྱ་བའི་ཡུལ་རྣམས་བདག་ཏུ་བཟུང་ངོ་། །
NEH 9:23 ཁྱེད་ཀྱིས་དེ་དག་གི་བུ་རྣམས་ནམ་མཁའི་སྐར་མ་ལྟར་དར་བར་མཛད་ནས། སྔར་ཁྱེད་ཀྱིས་དེ་དག་གི་མེས་པོ་རྣམས་ལ་ནང་དུ་སོང་ནས་ས་གཞི་དེ་བདག་གིར་བཟུང་ཞེས་ཞལ་བཞེས་མཛད་པའི་ཡུལ་དུ་དེ་དག་ཁྲིད་དོ། །
NEH 9:24 དེ་ལྟར་བུ་རྒྱུད་དེ་དག་ཡུལ་དེའི་ནང་དུ་སོང་ནས་ཡུལ་དེ་དབང་བ་ཡིན། དེ་དག་གི་མདུན་དུ་ཡུལ་དེའི་མི་ཀ་ན་ཨན་པ་རྣམས་ཁྱེད་ཀྱིས་བཏུལ་ནས། ཡུལ་མི་རྣམས་དང་རྒྱལ་པོ་ནི་ཁོ་ཚོས་ཅི་འདོད་བཞིན་དུ་བྱེད་པའི་ཕྱིར་ཁྱེད་ཀྱིས་དེ་དག་ལ་སྤྲད་དོ། །
NEH 9:25 དེ་དག་ལ་གྲོང་ཁྱེར་བརྟན་པོ་དང་ཡུལ་སྐྱིད་པོ་ཐོབ་ནས། ནོར་གྱིས་གང་བའི་ཁང་པ་དང་། ཆུ་ཡོད་པའི་ཁྲོན་པ་དང་། རྒུན་འབྲུམ་ར་བ་དང་། སྐྱུ་རུ་རའི་ཚལ་དང་། སིལ་སྡོང་མང་པོ་བཅས་ཐོབ་ཅིང་། དེ་དག་གིས་ཟོས་ཏེ་ཡིད་ཚིམས་ནས་ལུས་དར་བ་དང་། ཁྱེད་ཀྱི་བཀའ་དྲིན་ཆེན་པོའི་ནང་དུ་འཚོ་བ་སྐྱིད་པོ་རོལ་ཏོ། །
NEH 9:26 འོན་ཀྱང་དེ་དག་གིས་བཀའ་ལ་མ་མཉན་པར་ཁྱེད་ལ་ངོ་ལོག་བྱས་ཤིང་། ཁྱེད་ཀྱི་བཀའ་ཁྲིམས་དེ་རྒྱབ་ཏུ་གཡུགས་ནས། ཁྱེད་ཀྱི་ཕྱོགས་སུ་འགུག་པའི་ཕྱིར་ཉེན་བརྡ་གཏོང་བའི་ཁྱེད་ཀྱི་ལུང་སྟོན་པ་རྣམས་བསད་ནས་སྐུར་འདེབས་ཀྱི་ཉེས་པ་ཆེན་པོ་བཟོས་སོ། །
NEH 9:27 དེའི་ཕྱིར་ཁྱེད་ཀྱིས་དེ་དག་དགྲ་བོ་རྣམས་ཀྱི་ལག་ཏུ་སྤྲད་ནས། དགྲ་རྣམས་ཀྱིས་དེ་དག་ལ་མནར་གཅོད་བཏང་། དེ་དག་སྡུག་བསྔལ་གྱི་ནང་དུ་ཡོད་པའི་ཚེ་ཁྱེད་ལ་ཞུ་འབོད་བྱས་པ་དང་། ཁྱེད་ཀྱིས་ནམ་མཁའ་ནས་གསན་ཞིང་། ཁྱེད་ཉིད་ཀྱི་ཐུགས་བརྩེ་བ་ཆེན་པོས་སྐྱོབ་མཁན་མངགས་ཏེ་ཁོ་ཚོ་དགྲ་བོའི་ལག་ནས་ཐར་བར་མཛད་དོ། །
NEH 9:28 འོན་ཀྱང་དེ་དག་གིས་བདེ་སྐྱིད་ངང་འཚོ་བ་ཡུད་ཙམ་རོལ་རྗེས། སླར་ཡང་ཁྱེད་ཀྱི་དྲུང་དུ་མི་དགེ་བའི་ལས་བྱས་པས། ཁྱེད་ཀྱིས་དེ་དག་དོར་ནས་དགྲ་བོའི་ལག་ཏུ་སྤྲད་པ་དང་། དགྲ་བོས་དེ་དག་དབང་འོག་ཏུ་བསྡུས། ཡང་སྔར་བཞིན་ཁྱེད་ལ་སྐྱབས་འབོད་ཞུས་པ་ལ། ཁྱེད་ཀྱིས་ནམ་མཁའ་རུ་གསན་ནས་ཐུགས་བརྩེ་བ་དང་བསྟུན་དེ་དག་ཡང་དང་བསྐྱར་དུ་ཐར་བར་མཛད་པ་ཡིན།
NEH 9:29 ཁྱེད་ཀྱིས་དེ་དག་ལ་བཀའ་ཁྲིམས་ཕྱོགས་སུ་བསྒྱུར་བར་སྐུལ་མ་བཏང་ཡང་། དེ་དག་གིས་ང་རྒྱལ་བསྐྱེད་ནས་ཁྱེད་ཀྱི་བཀའ་དང་དུ་མ་བླངས་པར། ཁྱེད་ཀྱི་སྒྲིག་སྲོལ་རྣམས་དང་འགལ་ནས་སྡིག་པ་བྱས། མི་སུས་ཀྱང་བཀའ་ཁྲིམས་བསྲུངས་ན་འཚོ་བར་འགྱུར། དེ་དག་གིས་རང་གི་གཉའ་མ་བསྒུར་བར་སྐེ་གཅུས་ནས་མཇིང་པ་གྱོང་པོ་བྱས་ཏེ་མ་མཉན་ནོ། །
NEH 9:30 འོན་ཀྱང་ཁྱེད་ཀྱིས་ལོ་མང་པོར་ཐུགས་བཟོད་མཛད་ཅིང་། ལུང་སྟོན་པ་རྣམས་བརྒྱུད་ནས་ཁྱེད་ཀྱི་ཐུགས་ཉིད་ཀྱིས་དེ་དག་ལ་སྐུལ་མ་བཏང་ཡང་། དེ་དག་གི་རྣ་བ་མ་བཏུད། དེ་བས་ཁྱེད་ཀྱིས་དེ་དག་ཡུལ་སོ་སོའི་ཡུལ་མི་ལག་ཏུ་སྤྲད་དོ། །
NEH 9:31 འོན་ཀྱང་ཁྱེད་ཀྱི་སྙིང་རྗེ་ཆེན་པོའི་རྐྱེན་གྱིས་དེ་དག་ཡོངས་སུ་རྩ་མེད་དུ་མ་བཏང་བ་དང་། དོར་བར་མ་བྱས་སོ། །གང་ལ་ཞེ་ན། ཁྱེད་ནི་ཐུགས་རྗེ་ཅན་དང་སྙིང་རྗེ་ཆེན་པོ་མངའ་བའི་དཀོན་མཆོག་ལགས་སོ། །
NEH 9:32 ད་ནི་ཀྱེ་ཀྱེ་ངེད་ཅག་གི་དཀོན་མཆོག་ལགས། ཁྱེད་ནི་ཆེས་ཆེན་པོ་དང་། ནུས་མཐུ་བླ་ན་འཕགས་པ། ཆེས་འཇིགས་སུ་རུང་བ། དམ་བཅའ་བཞིན་དུ་མཛད་ཅིང་ཐུགས་བརྩེ་བར་མཛད་པའི་དཀོན་མཆོག་ལགས། ཨ་སུར་གྱི་རྒྱལ་པོ་རྣམས་ཀྱི་དུས་ནས་དེ་རིང་གི་བར་དུ་ངེད་ཅག་གི་རྒྱལ་པོ་དང་སྐུ་དྲག་དང་། མཆོད་དཔོན་དང་། ལུང་སྟོན་པ་དང་། ཕ་མེས་དང་། འབངས་མི་ཡོངས་ཀྱི་སྟེང་དུ་བབས་པའི་སྡུག་བསྔལ་དེ་ཚང་མ་ཁྱེད་ཀྱིས་དོན་ཆུང་བར་མི་དགོངས་པར་མཛོད།
NEH 9:33 ངེད་ཅག་ལ་བྱུང་བའི་དོན་ཐམས་ཅད་ཀྱི་སྟེང་ནས་ཁྱེད་ནི་དྲང་བདེན་ལགས་ཏེ། ཁྱེད་ཀྱིས་མཛད་པ་ཐམས་ཅད་དྲང་བདེན་ཡིན་པ་དང་། ངེད་ཅག་གིས་བྱས་པ་ཐམས་ཅད་ནི་ངན་པ་ཡིན་ནོ། །
NEH 9:34 ངེད་ཅག་གི་རྒྱལ་པོ་དང་། སྐུ་དྲག་དང་། མཆོད་དཔོན་དང་། ཕ་མེས་རྣམས་ཀྱིས་ཁྱེད་ཀྱི་བཀའ་ཁྲིམས་མ་བསྲུངས་པ་དང་། ཁྱེད་ཀྱི་བཀའ་རྒྱ་དང་ཁྱེད་ཀྱིས་དེ་དག་ལ་བསྐུལ་མ་བཏང་བ་རྣམས་ལའང་མ་མཉན་ནོ། །
NEH 9:35 དེ་དག་གིས་རང་གི་རྒྱལ་ཁམས་ནས་ཁྱེད་ཀྱི་བཀའ་དྲིན་ཆེན་པོ་དང་དུ་བླངས་པ་དང་། ཁྱེད་ཀྱིས་དེ་དག་ལ་གནང་བའི་རྒྱ་ཆེ་ཞིང་ཕྱུག་པོ་ཡིན་པའི་ཡུལ་འདི་རུ། དེ་དག་གིས་ཁྱེད་ལ་ཞབས་ཕྱི་མ་བསྒྲུབས་པ་དང་རང་གི་ལས་ངན་པ་རྣམས་ཀྱང་མ་སྤངས་སོ། །
NEH 9:36 གཟིགས་དང་། ད་ལྟ་ངེད་ཅག་ནི་གཡོག་པོར་གྱུར་ཏེ། ཁྱེད་ཀྱིས་ངེད་ཅག་གི་ཕ་མེས་རྣམས་ལ་ཐོན་རྫས་དང་སྐྱེ་དངོས་ཡིད་དུ་འོང་བ་ལོངས་སུ་སྤྱོད་པར་གནང་བའི་ཡུལ་ལ་གཟིགས་དང་། ངེད་ཅག་ཡུལ་འདི་རུ་གཡོག་པོར་གྱུར་ཏོ། །
NEH 9:37 ས་འདིའི་ཐོན་རྫས་མང་པོ་རྒྱལ་པོ་རྣམས་ལ་དབང་བ་དང་། ངེད་ཅག་གི་སྡིག་པའི་རྐྱེན་གྱིས་ཁྱེད་ཀྱིས་རྒྱལ་པོ་རྣམས་ནི་ངེད་ཅག་ལ་དབང་བྱེད་པར་གནང་བ་དང་། དེ་རྣམས་ཀྱིས་ངེད་ཅག་གི་ལུས་ཕུང་དང་ཕྱུགས་ཟོག་གཉིས་ལ་གང་འདོད་བཞིན་དུ་དབང་བྱས་པས། ངེད་ཅག་སྡུག་བསྔལ་ཆེན་པོའི་ནང་དུ་ལྷུང་ངོ་ཞེས་ཞུས་ཤིག་སྨྲས་སོ། །
NEH 9:38 བྱ་བ་འདི་ཐམས་ཅད་ཀྱི་རྐྱེན་གྱིས་འགྱུར་དུ་མེད་པའི་གན་རྒྱ་བྲིས་ཤིང་ངེད་རྣམས་ཀྱི་འགོ་དཔོན་དང་། ལེ་ཝི་པ་རྣམས་དང་། མཆོད་དཔོན་རྣམས་ཀྱིས་དེ་ལ་མིང་རྟགས་བཀོད་དོ། །
NEH 10:1 མིང་རྟགས་བཀོད་པའི་མི་རྣམས་ནི། ཧ་ཁལ་ཡཱའི་བུ་སྟེ་འགོ་དཔོན་ནེ་ཧེམ་ཡཱ་དང་། ཚིད་ཀི་ཡཱ།
NEH 10:2 སེ་ར་ཡཱ། ཨ་ཟར་ཡཱ། ཡེ་རེམ་ཡཱ།
NEH 10:3 ཕཱ་ཤུར། ཨ་མར་ཡཱ། མལ་ཀི་ཡཱ།
NEH 10:4 ཧད་ཏུས། ཤེ་བན་ཡཱ། མལ་ལུག
NEH 10:5 ཧ་རིམ། མེ་རེ་མོད། ཨོ་བད་ཡཱ།
NEH 10:6 དཱ་ནེ་ཨེལ། གིན་ནེ་ཐོན། པཱ་རུག
NEH 10:7 མཱེ་ཤུལ་ལིམ། ཨ་བི་ཡཱ། མི་ཡཱ་མིན།
NEH 10:8 མ་ཨ་ཟི་ཡཱ། པིལ་ག་ཨི། ཤེ་མ་ཡཱ་བཅས་མཆོད་དཔོན་རྣམས་སོ། །
NEH 10:9 ཡང་ལེ་ཝི་པ་ཨ་ཟན་ཡཱའི་བུ་ཡེ་ཤུ་ཨ་དང་། ཧེ་ན་དད་ཀྱི་བུ་རྒྱུད་ལས་པིན་ནུ་ཨི། ཀད་མི་ཨེལ་དང་།
NEH 10:10 དེ་དག་གི་སྤུན་རྣམས་ནི། ཤེ་བན་ཡཱ། ཧོ་དི་ཡཱ། ཀེ་ལི་ཏ། ཕེ་ལ་ཡཱ། ཧ་ནན།
NEH 10:11 མི་ཀ རེ་ཧོབ། ཧ་ཤབ་ཡཱ།
NEH 10:12 ཟག་ཀུར། ཤེ་རེབ་ཡཱ། ཤེ་བན་ཡཱ།
NEH 10:13 ཧོ་དི་ཡཱ། པཱ་ནི། པེ་ནེ་ནོ་བཅས་སོ། །
NEH 10:14 འབངས་མིའི་འགོ་དཔོན་རྣམས་ནི། ཕཱར་ཨོ་སི། ཕཱ་ཧད་མོ་ཨབ། ཨེ་ལཱམ། ཟད་ཐུ། པཱ་ནི།
NEH 10:15 པུན་ནི། ཨས་གད། པེ་བཱ་ཨི།
NEH 10:16 ཨ་དོ་ནི་ཡཱ། པིག་ཝ་ཨི། ཨ་དིན།
NEH 10:17 ཨ་ཏེར། ཧི་ཟི་ཀི་ཡཱ། ཨ་ཟུར།
NEH 10:18 ཧོ་དི་ཡཱ། ཧ་ཤུམ། པེ་ཙ་ཨི།
NEH 10:19 ཧ་རིབ། ཨ་ན་ཐོད། ནོ་བཱ་ཨི།
NEH 10:20 མག་བི་ཨ་སི། མཱེ་ཤུལ་ལིམ། ཧེ་ཟིར།
NEH 10:21 མེ་ཤེ་ཟ་བ་ཨེལ། ཟཱ་ཏོག ཡད་དུ་ཨ།
NEH 10:22 ཕེ་ལད་ཡཱ། ཧ་ནན། ཨ་ན་ཡཱ།
NEH 10:23 ཧོ་ཤེ་ཨ། ཧ་ནན་ཡཱ། ཧ་ཤུབ།
NEH 10:24 ཧ་ལོ་ཧེས། ཕིལ་ཧཱ། ཤོ་བེག
NEH 10:25 རེ་ཧུམ། ཧ་ཤབ་ནཱ། མ་ཨ་སེ་ཡཱ།
NEH 10:26 ཨ་ཧི་ཡཱ། ཧ་ནན། ཨ་ནན།
NEH 10:27 མལ་ལུག ཧ་རིམ། པ་ཨ་ནཱ་རྣམས་སོ། །
NEH 10:28 གཞན་འབངས་མི་དང་མཆོད་དཔོན་དང་། ལེ་ཝི་པ། སྒོ་སྲུང་། མགུར་ལེན་མཁན། མཆོད་གཡོག ཉེ་འཁོར་གྱི་མི་རིགས་རྣམས་ལས་ལོགས་སུ་བཀར་ནས་དཀོན་མཆོག་གི་བཀའ་ཁྲིམས་ལ་བསྟུན་མཁན་དག་དང་། དེ་རྣམས་ཀྱི་ཆུང་མ་དང་བུ་དང་བུ་མོ་ལས་གོ་རྟོགས་ཡོད་པ་ཐམས་ཅད་ཀྱིས།
NEH 10:29 རང་རང་གི་སྐུ་དྲག་སྤུན་རྣམས་ལ་བསྟུན་ནས་དཀོན་མཆོག་གིས་ཞབས་ཕྱི་མོ་ཤེ་བརྒྱུད་ནས་གནང་བའི་བཀའ་ཁྲིམས་བཞིན་དུ་བྱེད་པ་དང་། བདག་ཅག་གི་གཙོ་བོ་ཡ་ཝཱེའི་བཀའ་རྒྱ་དང་སྒྲིག་ཁྲིམས་དང་ཁྲིམས་སྲོལ་བཞིན་དུ་གཟབ་ནན་ངང་བསྲུང་བར་མནའ་བསྐྱལ་བའོ། །
NEH 10:30 ངེད་ཀྱིས་རང་གི་བུ་མོ་རྣམས་ཡུལ་འདིའི་མི་རྣམས་ལ་བག་མར་མི་སྟེར་བ་དང་། དེ་དག་གི་བུ་མོ་རྣམས་ཀྱང་རང་གི་བུ་རྣམས་ལ་མནའ་མར་མི་ལེན།
NEH 10:31 གལ་ཏེ་ཡུལ་མི་རྣམས་ཀྱིས་ངལ་གསོ་བའི་ཉིན་མོའམ་ཉིན་དམ་པར་ཚོང་རྫས་སམ་ཟས་རིགས་འཚོང་དུ་ཁྱེར་ཡོང་ན། ངེད་རྣམས་ཀྱིས་གཏན་ནས་མི་ཉོ། ལོ་བདུན་པ་རེ་ལ་ཞིང་ཡང་མི་རྨོ། དོམ་ཆད་པ་དག་ཀྱང་གཏན་ནས་འདེད་པར་མི་བྱའོ། །
NEH 10:32 ངེད་རྣམས་ཀྱིས་དམ་བཅས་པ་ལྟར་ལོ་རེ་བཞིན་དངུལ་སྲང་གསུམ་ཆ་གཅིག་ཕུལ་ཏེ། དཀོན་མཆོག་གི་མཆོད་ཁང་དུ་བཀོལ་སྤྱོད་བྱེད་དོ། །
NEH 10:33 སྤྱན་བསྟར་བག་ལེབ་དང་། རྒྱུན་དུ་འབུལ་བའི་འབྲུ་རིགས་ཀྱི་མཆོད་པ་དང་སྦྱིན་སྲེག ངལ་གསོ་བའི་ཉིན་མོ་དང་། ཚེས་གཅིག་དང་དུས་ཆེན་ལ་འབུལ་བའི་སྦྱིན་སྲེག་དང་རྫས་དམ་པ་དང་། ཡེས་ར་ཨེལ་གྱི་སྡིག་བཤགས་མཆོད་པ་དང་། ངེད་ཀྱི་དཀོན་མཆོག་གི་མཆོད་ཁང་གི་ལས་ཐམས་ཅད་ཀྱི་ཕྱིར་བཀོལ་བ་ཡིན།
NEH 10:34 ངེད་རྣམས་ཀྱི་མཆོད་དཔོན་དང་ལེ་ཝི་པ་དང་འབངས་མི་རྣམས་ཀྱི་ནང་དུ་རྒྱན་བླངས་ཏེ། ལོ་རེར་ཕ་མེས་ཀྱི་དུས་བཅད་ལྟར་ཕུལ་བའི་བུད་ཤིང་ནི་རང་གི་དཀོན་མཆོག་གི་མཆོད་ཁང་དུ་བསྐྱལ་བ་དང་། བཀའ་ཁྲིམས་ནང་དུ་བཀོད་ཡོད་པ་བཞིན་རང་གི་དཀོན་མཆོག་ཡ་ཝཱེའི་མཆོད་ཁྲི་སྟེང་མེར་བསྲེགས་པའོ། །
NEH 10:35 གཞན་ཡང་། ལོ་རེ་བཞིན་བདག་ཅག་གིས་ས་སྟེང་གི་ཐོན་རྫས་ཐོག་ཕུད་དང་ལྗོན་ཤིང་གི་འབྲས་བུ་ཐོག་མ་ཐམས་ཅད་དཀོན་མཆོག་ཡ་ཝཱེའི་མཆོད་ཁང་དུ་འབུལ་ལོ། །
NEH 10:36 ཡང་བཀའ་ཁྲིམས་ནང་བཀོད་ཡོད་པ་བཞིན་དུ། ངེད་རྣམས་ཀྱིས་རང་གི་བུ་སྐྱེས་འགོ་དང་སྒོ་ཕྱུགས་ནས་སྐྱེས་པའི་སྔོན་མ་རྣམས་ངེད་ཀྱི་དཀོན་མཆོག་གི་མཆོད་ཁང་དུ་འབུལ་བ་དང་། དཀོན་མཆོག་གི་མཆོད་ཁང་དུ་ཞབས་ཏོག་སྒྲུབ་པའི་མཆོད་དཔོན་རྣམས་ལ་འབུལ་བར་བྱའོ། །
NEH 10:37 རང་གི་ཐོག་ཕུད་ཀྱི་གྲོ་ཕྱེ་དང་། ཤིང་ཏོག་རིགས་ཐམས་ཅད་ཀྱི་འབྲས་བུ་དང་། རྒུན་ཆང་གསར་པ་དང་སྣུམ་གསར་པ་མཆོད་དཔོན་ལ་འབུལ་བ་དང་། བདག་ཅག་གི་དཀོན་མཆོག་གི་མཆོད་ཁང་གི་མཛོད་ཁང་དུ་བསྡུ་བར་བྱ། ངེད་ཅག་གི་ས་ཞིང་ནས་སྐྱེ་དངོས་ཐམས་ཅད་ཀྱི་བཅུ་ཆའི་གཅིག་ལེ་ཝི་པ་རྣམས་ལ་འབུལ་བ་དང་། ལེ་ཝི་པ་རྣམས་ཀྱིས་ངེད་ཅག་གི་མཁར་གྲོང་ནས་ས་ཞིང་ལས་བཅུ་ཆའི་གཅིག་ལེན་འོས་པས་སོ། །
NEH 10:38 ལེ་ཝི་པ་རྣམས་ཀྱིས་བཅུ་ཆའི་གཅིག་ལེན་དུས། ཨ་རོན་གྱི་བུ་རྒྱུད་ཀྱི་མཆོད་དཔོན་ཞིག་ལེ་ཝི་པ་དང་མཉམ་དུ་ཡོད་དགོས། ལེ་ཝི་པ་རྣམས་ཀྱིས་ཀྱང་བཅུ་ཆའི་གཅིག་ལས་བཅུ་ཆའི་གཅིག་ངེད་ཀྱི་དཀོན་མཆོག་གི་མཆོད་ཁང་དུ་འབུལ་བ་དང་། མཛོད་ཁང་གི་ཁང་མིག་རྣམས་ཀྱི་ནང་དུ་འཇོག་དགོས།
NEH 10:39 གང་ལ་ཞེ་ན། ཡེས་ར་ཨེལ་པ་དང་ལེ་ཝི་པ་རྣམས་ཀྱིས་བསྡུ་བའི་འབྲུ་དང་། རྒུན་ཆང་གསར་པ་དང་། སྣུམ་གསར་པ་དག་གནས་མཆོག་གི་ཡོ་བྱད་ཡོད་པའི་མཛོད་ཁང་དུ་བསྡུས་ནས། ཞབས་ཏོག་འབུལ་བའི་མཆོད་དཔོན་དང་སྒོ་སྲུང་དང་། མགུར་ལེན་མཁན་ཐམས་ཅད་དེར་ཡོད་པ་དང་། ངེད་ཅག་གིས་རང་གི་དཀོན་མཆོག་གི་མཆོད་ཁང་སྣང་མེད་དུ་མི་བྱའོ་ཞེས་དམ་བཅས་སོ། །
NEH 11:1 ཡང་འབངས་མིའི་འགོ་དཔོན་རྣམས་ཡེ་རུ་སཱ་ལེམ་དུ་གཞི་སྡོད་བྱས་པ་དང་། དེའི་འཕྲོ་ཡི་འབངས་མི་རྣམས་ཀྱིས་རྒྱན་བླངས་ནས་མི་བཅུ་རེའི་ནང་ནས་གཅིག་བདམས་པ་དེ་གྲོང་ཁྱེར་དམ་པ་ཡེ་རུ་སཱ་ལེམ་དུ་གཞི་སྡོད་བྱས་པ་དང་། གཞན་མི་དགུ་བོ་ནི་གྲོང་ཁྱེར་གཞན་དུ་གནས་སོ། །
NEH 11:2 ཡེ་རུ་སཱ་ལེམ་དུ་དགའ་མོས་ངང་འདུག་པར་འབངས་མི་ཐམས་ཅད་ཀྱིས་དེ་དག་ལ་བྱིན་གྱིས་བརླབས་པ་ཡིན།
NEH 11:3 ཡེས་ར་ཨེལ་པ་དང་། མཆོད་དཔོན། ལེ་ཝི་པ། མཆོད་གཡོག སོ་ལོ་མོན་གྱི་ཞབས་ཕྱི་པ་རྣམས་ཀྱི་བུ་རྒྱུད་ཡ་ཧུ་དཱའི་གྲོང་ཁྱེར་ནང་དུ་གནས་པ་དང་། རེ་རེ་རང་རང་གི་མཁར་གྲོང་ནང་དུ་རང་གི་ས་གནས་སུ་སྡོད་པ་དང་། ཡེ་རུ་སཱ་ལེམ་དུ་གཞི་སྡོད་བྱེད་པའི་ས་འདིའི་འགོ་དཔོན་རྣམས་ནི་འདི་ལྟ་སྟེ།
NEH 11:4 ཡེ་རུ་སཱ་ལེམ་དུ་གནས་པ་ནི་ཡ་ཧུ་དཱ་པ་ཁ་ཤས་དང་པེན་ཡཱ་མེན་པ་ཁ་ཤས་ཡོད་པ་སྟེ། ཡ་ཧུ་དཱ་པ་ལས་ཕེ་རེལ་ཟིའི་བུ་རྒྱུད་ཨ་ཐ་ཡཱ་ཡོད་པ་ཡིན། ཨ་ཐ་ཡཱ་ནི་ཨུ་ཟི་ཡཱའི་བུ་དང་། ཨུ་ཟི་ཡཱ་ནི་ཟཱ་ཀར་ཡའི་བུ་དང་། ཟཱ་ཀར་ཡ་ནི་ཨ་མར་ཡཱའི་བུ་དང་། ཨ་མར་ཡཱ་ནི་ཤེ་ཕད་ཡཱའི་བུ་དང་། ཤེ་ཕད་ཡཱ་ནི་མཱ་ཧ་ལ་ཨེལ་གྱི་བུའོ། །
NEH 11:5 དེར་མ་ཟད་པ་རུག་གི་བུ་མ་ཨ་སེ་ཡཱ་ཡོད་པ་དང་། པ་རུག་ནི་ཀོལ་ཧོ་ཟེའི་བུ་དང་། ཀོལ་ཧོ་ཟེ་ནི་ཧ་ཟ་ཡཱའི་བུ་དང་། ཧ་ཟ་ཡཱ་ནི་ཨ་ད་ཡཱའི་བུ་དང་། ཨ་ད་ཡཱ་ནི་ཡོ་ཡ་རིབ་ཀྱི་བུ་དང་། ཡོ་ཡ་རིབ་ནི་ཟཱ་ཀར་ཡའི་བུ་དང་། ཟཱ་ཀར་ཡ་ནི་ཞི་ལོ་པའི་བུའོ། །
NEH 11:6 ཡེ་རུ་སཱ་ལེམ་དུ་གནས་པའི་ཕེ་རེལ་ཟིའི་བུ་རྒྱུད་བསྡོམས་པས་བཞི་བརྒྱ་དྲུག་ཅུ་རེ་བརྒྱད་ཡོད། ཐམས་ཅད་དཔའ་རྩལ་ཅན་ཡིན།
NEH 11:7 ཡང་པེན་ཡཱ་མེན་པའི་ཁྲོད་སལ་ལུ་ཡོད་པ་དང་། སལ་ལུ་ནི་མཱེ་ཤུལ་ལིམ་གྱི་བུ་དང་། མཱེ་ཤུལ་ལིམ་ནི་ཡོ་ཨེད་ཀྱི་བུ་དང་། ཡོ་ཨེད་ནི་ཕེ་ད་ཡཱའི་བུ་དང་། ཕེ་ད་ཡཱ་ནི་ཀོ་ལ་ཡཱའི་བུ་དང་། ཀོ་ལ་ཡཱ་ནི་མ་ཨ་སེ་ཡཱའི་བུ་དང་། མ་ཨ་སེ་ཡཱ་ནི་ཨི་ཐི་ཨེལ་གྱི་བུ་དང་། ཨི་ཐི་ཨེལ་ནི་ཡེ་ཤ་ཡཱའི་བུའོ། །
NEH 11:8 ཡང་དེའི་རྗེས་སུ་གབ་བ་ཨི་དང་སལ་ལཱ་ཨི་བཅས་མི་དགུ་བརྒྱ་དང་ཉེར་བརྒྱད་ཡོད་དོ། །
NEH 11:9 ཟིག་རིའི་བུ་ཡོ་ཨེལ་ནི་དེ་དག་གི་འགོ་དཔོན་ཡིན་པ་དང་། ཧ་སེ་ནུ་ཨའི་བུ་ཡ་ཧུ་དཱ་ཞེས་བྱ་བ་ནི་ཡེ་རུ་སཱ་ལེམ་གྱི་འགོ་དཔོན་གཞོན་པ་ཡིན།
NEH 11:10 ཡང་མཆོད་དཔོན་རྣམས་ཀྱི་གྲས་ནས་ཡོ་ཡ་རིབ་ཀྱི་བུ་ཡེ་དཱ་ཡ་དང་། ད་དུང་ཡཱ་ཀིན་ཞེས་པ་དང་།
NEH 11:11 དཀོན་མཆོག་གི་མཆོད་ཁང་དུ་བདག་གཉེར་བྱེད་མཁན་སེ་ར་ཡཱ་ཡང་ཡོད་པ་དང་། སེ་ར་ཡཱ་ནི་ཧིལ་ཀི་ཡཱའི་བུ་དང་། ཧིལ་ཀི་ཡཱ་ནི་མཱེ་ཤུལ་ལིམ་གྱི་བུ་དང་། མཱེ་ཤུལ་ལིམ་ནི་ཟཱ་ཏོག་གི་བུ་དང་། ཟཱ་ཏོག་ནི་མེ་ར་ཡོད་ཀྱི་བུ་དང་། མེ་ར་ཡོད་ནི་ཨ་ཧི་ཏུབ་ཀྱི་བུ་ཡིན་ནོ། །
NEH 11:12 ཡང་མཆོད་ཁང་དུ་ཞབས་ཏོག་སྒྲུབ་པ་དེ་དག་གི་སྤུན་བརྒྱད་བརྒྱ་དང་ཉེར་གཉིས་ཡོད་པ་ཡིན། དེར་མ་ཟད་ཨ་ད་ཡཱ་ཡོད་པ་སྟེ། ཨ་ད་ཡཱ་ནི་ཡེ་རོ་ཧམ་གྱི་བུ་དང་། ཡེ་རོ་ཧམ་ནི་ཕེ་ལལ་ཡའི་བུ་དང་། ཕེ་ལལ་ཡ་ནི་ཨམ་ཙིའི་བུ་དང་། ཨམ་ཙི་ནི་ཟཱ་ཀར་ཡའི་བུ་དང་། ཟཱ་ཀར་ཡ་ནི་ཕཱ་ཤུར་གྱི་བུ་དང་། ཕཱ་ཤུར་ནི་མལ་ཀི་ཡཱའི་བུའོ། །
NEH 11:13 ཡང་ཁོ་ཚོའི་སྤུན་ཚོ་དཔོན་ཡིན་པ་ཉིས་བརྒྱ་བཞི་བཅུ་ཞེ་གཉིས་ཡོད་པ་དང་། ཡང་ཨ་མས་སཱ་ཨི་ཡོད་པ་སྟེ། ཨ་མས་སཱ་ཨི་ནི་ཨ་ཟ་ར་ཨེལ་གྱི་བུ་དང་། ཨ་ཟ་ར་ཨེལ་ནི་ཨ་ཧ་ས་ཨིའི་བུ་དང་། ཨ་ཧ་ས་ཨི་ནི་མེ་ཤིལ་ལེ་མོད་ཀྱི་བུ་དང་། མེ་ཤིལ་ལེ་མོད་ནི་ཨིམ་མེར་གྱི་བུའོ། །
NEH 11:14 ཡང་དེ་དག་གི་སྤུན་དཔའ་རྩལ་ཅན་བསྡོམས་པས་བརྒྱ་དང་ཉེར་བརྒྱད་ཡོད་པ་དང་། དེ་དག་གི་འགོ་དཔོན་ནི་ཧ་གེ་དོ་ལིམ་གྱི་བུ་ཟབ་དི་ཨེལ་ཡིན།
NEH 11:15 ཡང་ལེ་ཝི་པ་རྣམས་ལས་ཤེ་མཱ་ཡ་ཡོད་པ་སྟེ། ཤེ་མཱ་ཡ་ནི་ཧ་ཤུབ་ཀྱི་བུ་དང་། ཧ་ཤུབ་ནི་ཨས་རི་ཀམ་གྱི་བུ་དང་། ཨས་རི་ཀམ་ནི་ཧ་ཤབ་ཡཱའི་བུ་དང་། ཧ་ཤབ་ཡཱ་ནི་པུན་ནིའི་བུའོ། །
NEH 11:16 ཡང་ལེ་ཝི་པའི་ཚོ་དཔོན་ཤབ་བེ་ཐ་ཨི་དང་ཡོ་ཟཱ་བད་གཉིས་ཀྱིས་དཀོན་མཆོག་གི་མཆོད་ཁང་གི་ཕྱི་རོལ་གྱི་ལས་ལ་བདག་བྱེད་པ་ཡིན།
NEH 11:17 གསོལ་བ་འདེབས་པའི་ཚེ་བསྟོད་པ་འབུལ་བའི་དབུ་མཛད་དུ་མི་ཀཱ་ཡི་བུ་མད་ཐན་ཡཱ་ཡོད་པ་ཡིན། མི་ཀཱ་ནི་ཟབ་དིའི་བུ་དང་། ཟབ་དི་ནི་ཨ་སབ་ཀྱི་བུའོ། །ཡང་མད་ཐན་ཡཱའི་སྤུན་རྣམས་ལས་པག་པུག་ཡཱ་ནི་འགོ་དཔོན་གཞོན་པ་ཡིན་ལ། ད་དུང་ཨབ་དཱ་ཡོད་པ་སྟེ། ཨབ་དཱ་ནི་ཤམ་མུ་ཨའི་བུ་དང་། ཤམ་མུ་ཨ་ནི་ག་ལལ་གྱི་བུ་དང་། ག་ལལ་ནི་ཡེ་དུ་ཐུན་གྱི་བུའོ། །
NEH 11:18 གྲོང་ཁྱེར་དམ་པ་རུ་གནས་པའི་ལེ་ཝི་པའི་བསྡོམས་གྲངས་ནི་ཉིས་བརྒྱ་བརྒྱད་ཅུ་གྱ་བཞི་ཡོད་པ་ཡིན།
NEH 11:19 སྒོ་སྲུང་ཨག་ཀུབ་དང་ཏལ་མོན་གཉིས་དང་། སྒོ་རེ་རེ་བསྲུངས་པ་དེ་དག་གི་སྤུན་བརྒྱ་དང་བདུན་ཅུ་དོན་གཉིས་ཡོད་པ་ཡིན་ནོ། །
NEH 11:20 དེ་འཕྲོའི་ཡེས་ར་ཨེལ་པ་དང་མཆོད་དཔོན་དང་ལེ་ཝི་པ་ཐམས་ཅད་ཡ་ཧུ་དཱའི་གྲོང་ཁྱེར་སོ་སོ་རུ་རང་རང་གི་གནས་སུ་བསྡད་ཡོད།
NEH 11:21 མཆོད་གཡོག་རྣམས་ནི་ཨོ་ཕེལ་དུ་གནས་ཏེ། ཁོ་ཚོར་ཙི་ཧཱ་དང་གེས་པ་གཉིས་ཀྱིས་བདག་སྐྱོང་བྱེད་ཀྱི་ཡོད་པ་ཡིན།
NEH 11:22 ཡང་ཡེ་རུ་སཱ་ལེམ་དུ་གནས་པའི་ལེ་ཝི་པ་རྣམས་ཀྱི་འགོ་དཔོན་དང་། དཀོན་མཆོག་གི་མཆོད་ཁང་ལ་བདག་སྐྱོང་བྱེད་པའི་ལས་ནི་མགུར་ལེན་མཁན་ཨ་སབ་ཀྱི་བུ་རྒྱུད་ཨུ་ཟི་ཡིན་པ་དང་། ཨུ་ཟི་ནི་པཱ་ནིའི་བུ་དང་། པཱ་ནི་ནི་ཧ་ཤབ་ཡཱའི་བུ་དང་། ཧ་ཤབ་ཡཱ་ནི་མད་ཐན་ཡཱའི་བུ་དང་། མད་ཐན་ཡཱ་ནི་མི་ཀཱའི་བུའོ། །
NEH 11:23 ཡང་རྒྱལ་པོའི་བཀའ་ལྟར་མགུར་ལེན་མཁན་དག་ལ་ཉིན་རེ་བཞིན་དུ་འབྲུ་ཕོག་སྦྱིན་པ་ཡིན།
NEH 11:24 ཡང་ཡ་ཧུ་དཱའི་བུ་ཟེ་རག་གི་བུ་རྒྱུད་ལས་བྱུང་བའི་མེ་ཤེ་ཟ་བེ་ཨེལ་གྱི་བུ་ཕེ་ཐ་ཡཱ་ནི་འབངས་མིའི་བྱ་བ་ཐམས་ཅད་བསྒྲུབ་པར་རྒྱལ་པོའི་སྐུ་མདུན་དུ་ཡོད་པ་ཡིན་ནོ། །
NEH 11:25 གྲོང་ཚོ་དང་ཞིང་ས་སོ་སོའི་སྐོར་ནི། ཡ་ཧུ་དཱ་པ་རྣམས་ནི་ཀིར་ཡཱད་ཨར་པཱ་དང་དེའི་གྲོང་རྡལ་དུ་གནས་པ་དང་། དི་བོན་དང་དེའི་གྲོང་རྡལ་དུ་གནས་པ་དང་། ཡེ་ཀབ་ཙེ་ཨེལ་དང་དེའི་གྲོང་ཚོ་རུ་གནས་པ་ཡིན།
NEH 11:26 གཞན་ཡང་། ཡེ་ཤུ་ཨ་དང་མོ་ལ་དཱ་དང་པེད་ཕེ་ལེད་དང་།
NEH 11:27 ཧ་ཚར་ཤུ་ཨལ་དང་པེར་ཤ་བཱ་དང་དེའི་གྲོང་རྡལ་རྣམས་དང་།
NEH 11:28 ཙིག་ལག་དང་མེ་ཁོ་ནཱ་དང་དེའི་གྲོང་རྡལ་རྣམས་དང་།
NEH 11:29 ཨེན་རིམ་མོན་དང་ཚོར་ཨ་དང་ཡར་མུད་དང་།
NEH 11:30 ཟཱ་ནོ་ཨ་དང་ཨ་དུལ་ལཱམ་དང་དེ་དག་གི་གྲོང་ཚོ་རྣམས་དང་། ལཱ་ཀི་སི་དང་དེའི་ཞིང་ས་རྣམས་དང་། ཨ་ཟེ་ཀཱ་དང་དེའི་གྲོང་རྡལ་རྣམས་དང་པེར་ཤ་བཱ་ནས་ཧིན་ནོམ་ལུང་པའི་བར་དུ་གཞི་སྡོད་བྱེད་པ་ཡིན།
NEH 11:31 པེན་ཡཱ་མེན་པ་རྣམས་ནི་གེ་བཱ་ནས་བཟུང་སྟེ། མིགས་མཱ་སི་དང་ཨ་ཡཱ་དང་པེད་ཨེལ་དང་དེའི་གྲོང་རྡལ་རྣམས་སུ་གཞི་སྡོད་བྱེད་པ་ཡིན།
NEH 11:32 ཨ་ན་ཐོད་དང་ནོབ་དང་ཨ་ནན་ཡཱ་དང་།
NEH 11:33 ཧ་ཟོར་དང་རཱ་མ་དང་གིད་ཏཱ་ཡིམ་དང་།
NEH 11:34 ཧ་དིད་དང་ཙེ་བོ་ཡིམ་དང་ནེ་བལ་ལད་དང་།
NEH 11:35 ལོད་དང་། ཨོ་ནོ་དང་ལག་ཤེས་ལུང་པའི་བར་དུ་གནས་པ་དང་།
NEH 11:36 ཡང་ཡ་ཧུ་དཱའི་ས་ཁུལ་གྱི་ལེ་ཝི་པ་ཁ་ཤས་པེན་ཡཱ་མེན་ལ་དབང་བ་ཡིན་ནོ། །
NEH 12:1 འདི་དག་ནི་ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་ཡེ་ཤུ་ཨ་བཅས་དང་མཉམ་དུ་ཡར་འོངས་པའི་མཆོད་དཔོན་དང་ལེ་ཝི་པ་རྣམས་ཡིན་ཏེ། སེ་ར་ཡཱ་དང་། ཡེ་རེམ་ཡཱ། ཨེས་སི་རཱ།
NEH 12:2 ཨ་མར་ཡཱ། མལ་ལུག ཧད་ཏུས།
NEH 12:3 ཤེ་ཀན་ཡཱ། རེ་ཧུམ། མེ་རེ་མོད།
NEH 12:4 ཨིད་དོ། གིན་ནེ་ཐོ། ཨ་བི་ཡཱ།
NEH 12:5 མི་ཡཱ་མིན། མ་ཨད་ཡཱ། པིལ་གཱ
NEH 12:6 ཤེ་མ་ཡཱ། ཡོ་ཡ་རིབ། ཡེ་དཱ་ཡ་དང་།
NEH 12:7 སལ་ལུ། ཨ་མོག ཧིལ་ཀི་ཡཱ། ཡེ་དཱ་ཡ་བཅས་མི་འདི་དག་ནི་ཡེ་ཤུ་ཨའི་དུས་སྐབས་སུ་མཆོད་དཔོན་དང་། དེ་དག་གི་སྤུན་རྣམས་ཀྱི་འགོ་དཔོན་ཡིན་ནོ། །
NEH 12:8 ཡང་ལེ་ཝི་པ་རྣམས་ལས། ཡེ་ཤུ་ཨ་དང་། པིན་ནུ་ཨི། ཀད་མི་ཨེལ། ཤེ་རེབ་ཡཱ། ཡ་ཧུ་དཱ། མད་ཐན་ཡཱ་དང་དེའི་སྤུན་རྣམས་ཀྱིས་བསྟོད་པའི་མགུར་མའི་དབུ་མཛད་ཀྱི་འགན་འཁུར་ཡོད།
NEH 12:9 དེར་མ་ཟད་དེ་དག་གི་སྤུན་པག་པུག་ཡཱ་དང་ཨུན་ནི་གཉིས་ཀྱིས་དེ་དག་གི་མདུན་དུ་ལངས་ནས་ཞབས་ཞུ་བྱས་སོ། །
NEH 12:10 ཡང་ཡེ་ཤུ་ཨ་ལས་ཡོ་ཡ་ཀིམ་སྐྱེས། ཡོ་ཡ་ཀིམ་ལས་ཨེལ་ཡཱ་ཤིབ་སྐྱེས། ཨེལ་ཡཱ་ཤིབ་ལས་ཡོ་ཡ་དཱ་སྐྱེས།
NEH 12:11 ཡོ་ཡ་དཱ་ལས་ཡོ་ནཱ་ཐན་སྐྱེས། ཡོ་ནཱ་ཐན་ལས་ཡད་དུ་ཨ་སྐྱེས་སོ། །
NEH 12:12 ཡོ་ཡ་ཀིམ་གྱི་དུས་སྐབས་སུ་མཆོད་དཔོན་རྣམས་ལས་ཚོ་དཔོན་བྱེད་པ་ནི་འདི་ལྟ་སྟེ། སེ་ར་ཡཱའི་རྒྱུད་དུ་མེ་ར་ཡཱ་ཡོད། ཡེ་རེམ་ཡཱའི་རྒྱུད་དུ་ཧ་ནན་ཡཱ་ཡོད།
NEH 12:13 ཨེས་སི་རཱའི་རྒྱུད་དུ་མཱེ་ཤུལ་ལིམ་ཡོད། ཨ་མར་ཡཱའི་རྒྱུད་དུ་ཡེ་ཧོ་ཧ་ནན་ཡོད།
NEH 12:14 མེ་ལི་ཀུའི་རྒྱུད་དུ་ཡོ་ནཱ་ཐན་ཡོད། ཤེ་བན་ཡཱའི་རྒྱུད་དུ་ཡོ་སེབ་ཡོད།
NEH 12:15 ཧ་རིམ་གྱི་རྒྱུད་དུ་ཨད་ན་ཡོད། མེ་ར་ཡོད་ཀྱི་རྒྱུད་དུ་ཧེལ་ཀཱ་ཨི་ཡོད།
NEH 12:16 ཨིད་དོའི་རྒྱུད་དུ་ཟཱ་ཀར་ཡ་ཡོད། གིན་ནེ་ཐོན་གྱི་རྒྱུད་དུ་མཱེ་ཤུལ་ལིམ་ཡོད།
NEH 12:17 ཨ་བི་ཡཱའི་རྒྱུད་དུ་ཟིག་རི་ཡོད། མིན་ཡ་མིན་གྱི་རྒྱུད་དང་མོ་ཨད་ཡའི་རྒྱུད་དུ་ཕིལ་ཏ་ཨི་ཡོད།
NEH 12:18 པིལ་གཱའི་རྒྱུད་དུ་ཤམ་མུ་ཨ་ཡོད། ཤེ་མ་ཡཱའི་རྒྱུད་དུ་ཡོ་ནཱ་ཐན་ཡོད།
NEH 12:19 ཡོ་ཡ་རིབ་ཀྱི་རྒྱུད་དུ་མད་ཏེ་ན་ཨི་ཡོད། ཡེ་དཱ་ཡའི་རྒྱུད་དུ་ཨུ་ཟི་ཡོད།
NEH 12:20 སལ་ལཱ་ཨིའི་རྒྱུད་དུ་ཀལ་ལ་ཨི་ཡོད། ཨ་མོག་གི་རྒྱུད་དུ་ཨེ་བེར་ཡོད།
NEH 12:21 ཧིལ་ཀི་ཡཱའི་རྒྱུད་དུ་ཧ་ཤབ་ཡཱ་ཡོད། ཡེ་དཱ་ཡའི་རྒྱུད་དུ་ནེ་ཐན་ཨེལ་ཡོད་པ་ཡིན་ནོ། །
NEH 12:22 ཨེལ་ཡཱ་ཤིབ་དང་། ཡོ་ཡ་དཱ་དང་ཡོ་ཧ་ནན་དང་ཡད་དུ་ཨའི་དུས་སྐབས་སུ། ལེ་ཝི་པའི་ཕ་མེས་རྒྱུད་ཀྱི་ཚོ་དཔོན་རྣམས་ཀྱི་མིང་དང་མཆོད་དཔོན་རྣམས་ཀྱི་མིང་ཡང་ཏ་ཟིག་གི་རྒྱལ་པོ་དར་ཡཱའི་རིང་དུ་ལོ་རྒྱུས་ཟིན་ཐོའི་སྟེང་དུ་བྲིས་ཡོད་དོ། །
NEH 12:23 ལེ་ཝི་པ་ལས་ཕ་མེས་རྒྱུད་ཀྱི་ཚོ་དཔོན་བྱེད་པ་རྣམས་ནི། ཨེལ་ཡཱ་ཤིབ་ཀྱི་བུ་ཡོ་ཧ་ནན་གྱི་དུས་སྐབས་བར་དུ་ལོ་རྒྱུས་ཟིན་ཐོའི་སྟེང་དུ་བྲིས་སོ། །
NEH 12:24 ཡང་ལེ་ཝི་པ་རྣམས་ཀྱི་ཚོ་དཔོན་རྣམས་ནི། ཧ་ཤབ་ཡཱ་དང་ཤེ་རེབ་ཡཱ་དང་ཀད་མི་ཨེལ་གྱི་བུ་ཡེ་ཤུ་ཨ་བཅས་ཡིན་པ་དང་། དེ་དག་གི་སྤུན་རྣམས་དཀོན་མཆོག་གི་སྐྱེས་བུ་དཱ་བིད་ཀྱི་བཀའ་བཞིན་དུ་བསྟོད་པ་དང་བཀའ་དྲིན་འབུལ་དུས་མདུན་དུ་ལངས་ནས་སྡོད་པ་ཡིན།
NEH 12:25 སྒོ་སྲུང་རྣམས་ནི་མད་ཐན་ཡཱ་དང་། པག་པུག་ཡཱ། ཨོ་བད་ཡཱ། མཱེ་ཤུལ་ལིམ། ཏལ་མོན། ཨག་ཁུབ་བཅས་ཡིན་ལ། མཛོད་ཁང་གི་སྒོ་བསྲུངས་ཏེ་ལངས་སྡོད་པའོ། །
NEH 12:26 མི་འདི་དག་ཐམས་ཅད་ནི་ཡོ་ཚ་དག་གི་ཚ་བོའམ་ཡེ་ཤུ་ཨའི་བུ་ཡོ་ཡ་ཀིམ་དང་འགོ་དཔོན་ནེ་ཧེམ་ཡཱ་དང་། མཆོད་དཔོན་དང་དྲུང་ཡིག་ཨེས་སི་རཱའི་དུས་སྐབས་སུ་དེ་ལྟར་ཡོད་པ་ཡིན་ནོ། །
NEH 12:27 ཡང་ཡེ་རུ་སཱ་ལེམ་གྱི་མཁར་གྱང་གི་ཆེད་དུ་སྟོན་མོར་རོལ་དུས། མང་ཚོགས་ཀྱིས་ལེ་ཝི་པ་རྣམས་ཡེ་རུ་སཱ་ལེམ་དུ་བསྡུ་བར་དེ་དག་གི་ས་གནས་སོ་སོ་ནས་བཙལ་ཏེ། བཀའ་དྲིན་ཞུ་བ་དང་གླུ་ལེན་པ་དང་། སྦུག་ཆལ་རྡུང་བ། རྒྱུད་མངས་དང་པི་ཝང་དཀྲོལ་བ་བཅས་ཀྱིས་དགའ་སྤྲོའི་ངང་སྟོན་མོའི་མཛད་སྒོར་རོལ་ཏོ། །
NEH 12:28 དེ་ནས་མགུར་ལེན་མཁན་རྣམས་ཡེ་རུ་སཱ་ལེམ་གྱི་མཐའ་འཁོར་ནས་བསྡུས་ཏེ་ནེ་ཏོ་ཕཱ་པའི་གྲོང་ཚོ་དང་།
NEH 12:29 པེད་གིལ་གལ་དང་། གེ་བཱ་དང་ཨས་མ་ཝེད་ཀྱི་ཞིང་ས་ནས་འོངས། གང་ལ་ཞེ་ན། མགུར་ལེན་མཁན་རྣམས་ཀྱིས་ཡེ་རུ་སཱ་ལེམ་གྱི་ཉེ་འཁོར་དུ་རང་ཉིད་ཀྱི་ཕྱིར་གྲོང་ཚོ་རྣམས་བསྐྲུན་ཏོ། །
NEH 12:30 དེར་མཆོད་དཔོན་དང་ལེ་ཝི་པ་རྣམས་ཀྱིས་རང་ཉིད་གཙང་སྦྲ་བྱས་ཤིང་། འབངས་མི་ཡང་གཙང་སྦྲ་བྱས་པ་དང་། མཁར་སྒོ་དང་མཁར་གྱང་ལའང་གཙང་སྦྲ་བྱས་སོ། །
NEH 12:31 དེ་ནས་ངས་ཡ་ཧུ་དཱའི་འགོ་དཔོན་རྣམས་མཁར་གྱང་ཐོག་ཏུ་ཁྲིད་ནས། གཏང་རག་འབུལ་བའི་མགུར་ལེན་མཁན་རྣམས་རུ་ཁག་གཉིས་བྱས་ཏེ། རུ་ཁག་གཅིག་ནི་མཁར་གྱང་སྟེང་དུ་གཡས་ཕྱོགས་ཀྱི་ལྕི་བའི་སྒོ་ཡི་ཕྱོགས་སུ་ཕྱིན་ཏོ། །
NEH 12:32 དེ་དག་གི་རྗེས་ནས་འགྲོ་བ་ནི་ཧོ་ཤ་ཡཱ་དང་ཡ་ཧུ་དཱའི་འགོ་དཔོན་གྱི་ཕྱེད་ཀ་ཡོད་དོ། །
NEH 12:33 ཡང་ཨ་ཟར་ཡཱ་དང་། ཨེས་སི་རཱ་དང་། མཱེ་ཤུལ་ལིམ་དང་།
NEH 12:34 ཡ་ཧུ་དཱ་དང་། པེན་ཡཱ་མེན་དང་། ཤེ་མ་ཡཱ་དང་། ཡེ་རེམ་ཡཱ་བཅས་ཡོད་དོ། །
NEH 12:35 ད་དུང་མཆོད་དཔོན་གྱི་བུ་རྒྱུད་ལས་དུང་འབུད་མཁན་ནི་ཟཱ་ཀར་ཡ་ཡོད་དེ། ཟཱ་ཀར་ཡ་ནི་ཡོ་ནཱ་ཐན་གྱི་བུ་དང་། ཡོ་ནཱ་ཐན་ནི་ཤེ་མ་ཡཱའི་བུ་དང་། ཤེ་མ་ཡཱ་ནི་མད་ཐན་ཡཱའི་བུ་དང་། མད་ཐན་ཡཱ་ནི་མི་ཀ་ཡཱའི་བུ་དང་། མི་ཀ་ཡཱ་ནི་ཟག་ཀུར་གྱི་བུ་དང་། ཟག་ཀུར་ནི་ཨ་སབ་ཀྱི་བུའོ། །
NEH 12:36 ཡང་ཟཱ་ཀར་ཡ་ཡི་སྤུན་རྣམས་ནི། ཤེ་མ་ཡཱ་དང་། ཨ་ཟར་ཨེལ། མི་ལ་ལ་ཨི། གི་ལ་ལ་ཨི། མ་ཨ་ཨི། ནེ་ཐན་ཨེལ། ཡ་ཧུ་དཱ། ཧ་ནཱ་ནེ་བཅས་ཡོད་ལ། ཁོ་ཚོས་དཀོན་མཆོག་གི་སྐྱེས་བུ་དཱ་བིད་ཀྱི་རོལ་ཆས་ཁུར་ཡོད། དེ་དག་གི་སྔོན་དུ་དྲུང་ཡིག་ཨེས་སི་རཱ་ཕྱིན་ཏོ། །
NEH 12:37 དེ་རྣམས་ཆུ་མིག་གི་སྒོ་ཞེས་པ་བརྒྱུད་དཱ་བིད་ཀྱི་གྲོང་ཁྱེར་གྱི་ཐེམ་སྐས་ནས་འཛེགས་ཏེ། མཁར་གྱང་གི་ངོས་ལ་ཡར་འགྲོ་ཞིང་། དཱ་བིད་ཀྱི་ཕོ་བྲང་ནས་ཤར་ཕྱོགས་ཀྱི་ཆུ་སྒོའི་བར་དུ་ཕྱིན་ཏོ། །
NEH 12:38 ཡང་མགུར་ལེན་མཁན་གྱི་རུ་ཁག་གཞན་དེ་ཁ་ཕྱིར་འཁོར་ནས་སོང་། བདག་དང་འབངས་མི་ཕྱེད་ཀ་མཁར་གྱང་སྟེང་ནས་དེ་དག་གི་རྗེས་འབྲངས་ནས་སོང་སྟེ། མེ་ཐབ་མཁར་ནས་མཁར་གྱང་ཞེང་ཆེན་བར་དུ་ཕྱིན་ཏོ། །
NEH 12:39 དེ་ནས་ཡང་ཨེ་ཕཱར་ཡིམ་གྱི་སྒོ་དང་། གནའ་སྒོ་དང་། ཉ་སྒོ་དང་། ཧ་ནན་ཨེལ་མཁར་དང་། ཧམ་མེ་ཨའི་མཁར་དང་། ལུག་སྒོའི་བར་དུ་ཕྱིན་ཏེ། སྲུང་སྒོར་ལངས་ནས་བསྡད་དོ། །
NEH 12:40 དེ་ནས་མགུར་ལེན་མཁན་རུ་ཁག་གཉིས་པོ་དཀོན་མཆོག་གི་མཆོད་ཁང་དུ་ལངས་ནས་བསྡད་པ་དང་། དེར་བདག་དང་འགོ་དཔོན་ཕྱེད་ཀ་ཡོད་པ་ཡིན།
NEH 12:41 ད་དུང་ཨེལ་ཡ་ཀིམ་དང་། མ་ཨ་སེ་ཡཱ། མིན་ཡ་མིན། མི་ཀ་ཡཱ། ཨེལ་ཡོ་ཨེ་ནཱ་ཨི། ཟཱ་ཀར་ཡ། ཧ་ནན་ཡཱ་བཅས་དུང་འབུད་མཁན་མཆོད་དཔོན་རྣམས་ཡོད་དོ། །
NEH 12:42 ཡང་མ་ཨ་སེ་ཡཱ་དང་ཤེ་མ་ཡཱ། ཨེ་ལི་ཨ་ཟར། ཨུ་ཟི། ཡེ་ཧོ་ཧ་ནན། མལ་ཀི་ཡཱ། ཨེ་ལཱམ་དང་ཨེ་བཟིར་བཅས་ཡོད། ཡང་མགུར་ལེན་མཁན་རྣམས་ཀྱིས་སྐད་ཆེན་པོས་མགུར་བླངས་ཤིང་། ཡིས་ར་ཧི་ཡཱ་ཡིས་ཁོ་ཚོར་དབུ་མཛད་བྱས་སོ། །
NEH 12:43 ཉིན་དེར་ཁོ་ཚོས་དམར་མཆོད་རྒྱ་ཆེན་པོ་ཕུལ་བ་དང་དཀོན་མཆོག་གིས་དེ་རྣམས་ལ་དགའ་སྤྲོ་ཆེན་པོ་དང་བདེ་སྐྱིད་གནང་། ཁོ་ཚོར་དགའ་སྤྲོས་ཁེངས་པ་དང་། བུད་མེད་དང་བྱིས་པའང་དགའ་སྤྲོས་ཁེངས། ཡེ་རུ་སཱ་ལེམ་གྱི་དགའ་སྤྲོའི་སྒྲ་ནི་རྒྱང་རིང་ནས་ཀྱང་ཐོས་པར་གྱུར་ཏོ། །
NEH 12:44 ཉིན་དེར་མི་འགའ་ཞིག་མཛོད་ཁང་དུ་བདག་གཉེར་བྱེད་པར་མངགས་པ་དང་། འདེགས་མཆོད་དང་། སྐྱེ་དངོས་ཀྱི་ཐོག་ཕུད་དང་། བཅུ་ཆའི་གཅིག་བླངས་པ་ནི་ཞལ་འདེབས་སུ་འབུལ་བ་དང་། གྲོང་རྡལ་སོ་སོའི་ཞིང་ས་ལྟར་དང་བཀའ་ཁྲིམས་ནང་བཞིན་མཆོད་དཔོན་དང་ལེ་ཝི་པ་རྣམས་ཀྱི་སྐལ་དེ་མཛོད་ཁང་དུ་བསྡུས། ཡ་ཧུ་དཱ་པ་ནི་མཆོད་དཔོན་དང་ལེ་ཝི་པ་རྣམས་ཀྱི་ཞབས་ཏོག་ལ་དགའ་བར་གྱུར་ཏོ། །
NEH 12:45 མཆོད་དཔོན་དང་ལེ་ཝི་པ་རྣམས་ཀྱིས་དཀོན་མཆོག་གི་བཀའ་བརྩིས་ཏེ་གཙང་སྦྲ་བྱས་པ་དང་། མགུར་ལེན་མཁན་དང་སྒོ་སྲུང་རྣམས་ཀྱིས་ཀྱང་དཱ་བིད་དང་ཁོའི་བུ་སོ་ལོ་མོན་གྱི་བཀའ་ནང་བཞིན་བསྒྲུབས་སོ། །
NEH 12:46 གང་ལ་ཞེ་ན། གནའ་སྔ་མོར་དཱ་བིད་དང་ཨ་སབ་ཀྱི་དུས་སྐབས་སུ་མགུར་ལེན་མཁན་རྣམས་ལ་དབུ་མཛད་ཡོད་པ་དང་། དཀོན་མཆོག་ལ་བསྟོད་པ་དང་བཀའ་དྲིན་འབུལ་བའི་མགུར་ཡང་ཡོད་དོ། །
NEH 12:47 དེ་ཡང་ཟེ་རུ་པཱ་པེལ་དང་ནེ་ཧེམ་ཡཱའི་དུས་སྐབས་སུ། ཡེས་ར་ཨེལ་པ་ཐམས་ཅད་ཀྱིས་མགུར་ལེན་མཁན་དང་སྒོ་སྲུང་རྣམས་ལ་ཉིན་རེ་བཞིན་སྐལ་སྦྱིན་པ་དང་། ཡང་ལེ་ཝི་པ་རྣམས་ཀྱི་སྐལ་ལོགས་སུ་བཀར་བ་དང་། ལེ་ཝི་པ་རྣམས་ཀྱིས་ཀྱང་ཨ་རོན་གྱི་བུ་རྒྱུད་ཀྱི་སྐལ་ལོགས་སུ་བཀར་བའོ། །
NEH 13:1 ཉིན་དེར་འབངས་མིས་མོ་ཤེའི་མདོ་དེ་ཀློག་པ་ཐོས་ནས། ཨམ་མོན་པ་དང་མོ་ཨབ་པ་རྣམས་དཀོན་མཆོག་གི་ཚོགས་འདུའི་ཁྲོད་དུ་ནམ་ཡང་ཡོང་མི་ཆོག་པ་དེའི་ནང་དུ་བཀོད་ཡོད་པ་ཤེས་སོ། །
NEH 13:2 གང་ལ་ཞེ་ན། དེ་དག་གིས་ཡེས་ར་ཨེལ་པ་རྣམས་བསུ་བར་བག་ལེབ་དང་ཆུ་ཁུར་ནས་མ་འོངས་པ་དང་། པེལ་ཨམ་གླས་ནས་དེ་རྣམས་ལ་དམོད་པ་བྱས་ནའང་། ངེད་ཀྱི་དཀོན་མཆོག་གིས་དམོད་པ་དེ་བྱིན་རླབས་སུ་བསྒྱུར་བར་མཛད་དོ། །
NEH 13:3 ཡེས་ར་ཨེལ་པ་རྣམས་ཀྱིས་བཀའ་ཁྲིམས་དེ་ཐོས་མ་ཐག་ཏུ་རིགས་རྒྱུད་འདྲེས་མ་ཐམས་ཅད་ལས་སོ་སོར་ཕྱེས་སོ། །
NEH 13:4 ཡང་དོན་འདིའི་སྔོན་དུ་ཏོ་བི་ཡཱ་དང་གཉེན་ཉེ་ཡིན་པའི་མཆོད་དཔོན་ཨེལ་ཡཱ་ཤིབ་གཉིས་ཀྱིས། མངགས་བཅོལ་ལྟར་རང་ཅག་དཀོན་མཆོག་གི་མཆོད་ཁང་གི་མཛོད་ཁང་དུ་བདག་གཉེར་བྱེད་པ་དང་།
NEH 13:5 ཏོ་བི་ཡཱར་ཁང་པ་ཆེན་པོ་ཞིག་གྲ་སྒྲིག་བྱས་ཡོད་པ་སྟེ། དེ་ནི་སྔོན་ཆད་འབྲུ་རིགས་ཀྱི་མཆོད་པ་དང་། སྤོས་དཀར་དང་། སྣོད་ཆས་བཅས་དང་། ཁྲིམས་སྲོལ་ལྟར་ལེ་ཝི་པ་རྣམས་དང་མགུར་ལེན་མཁན་དང་། སྒོ་སྲུང་བཅས་ལ་འབུལ་བྱའི་འབྲུ་དང་རྒུན་ཆང་། སྣུམ་བཅས་ཀྱི་བཅུ་ཆའི་གཅིག་དང་། མཆོད་དཔོན་ལ་དབང་བའི་འདེགས་མཆོད་བཅས་བསྡུས་ཡོད་པའི་ཁང་པ་ཡིན་ནོ། །
NEH 13:6 དོན་འདི་ཐམས་ཅད་འབྱུང་དུས་སུ་ང་ནི་ཡེ་རུ་སཱ་ལེམ་དུ་མེད། གང་ལ་ཞེ་ན། པཱ་པེལ་ལོན་གྱི་རྒྱལ་པོ་ཨར་ཐག་ཤཱ་ཐིའི་སྲིད་ལོ་སོ་གཉིས་པར་ང་རྒྱལ་པོའི་དྲུང་དུ་ཕྱིན་པ་དང་། ཉིན་འགའ་ཤས་བསྡད་རྗེས་རྒྱལ་པོ་དང་འབྲལ་བའི་དགོངས་པ་ཞུས།
NEH 13:7 ཡེ་རུ་སཱ་ལེམ་དུ་སླེབས་ནས། ཨེལ་ཡཱ་ཤིབ་ཀྱིས་ཏོ་བི་ཡཱའི་ཆེད་དུ་དཀོན་མཆོག་གི་མཆོད་ཁང་གི་ཚོམས་སྐོར་ནང་དུ་ཁང་མིག་ཅིག་གྲ་སྒྲིག་བྱས་པའི་དོན་ངན་འདི་རྟོགས་པ་དང་།
NEH 13:8 ང་ཁོང་ཁྲོ་ཆེན་པོ་ལངས་ནས་ཏོ་བི་ཡཱའི་ཁྱིམ་གྱི་ནོར་རྫས་ཐམས་ཅད་མཛོད་ཁང་དེའི་ནང་ནས་ཕྱིར་འཕངས་སོ། །
NEH 13:9 དེ་ནས་ངས་བཀའ་བསྒོས་ཏེ་ཁང་པ་དེའི་ནང་གཙང་མ་བྱས་པ་དང་། དཀོན་མཆོག་གི་མཆོད་ཁང་གི་སྣོད་ཆས་རྣམས་དང་། འབྲུ་རིགས་ཀྱི་མཆོད་པ་དང་། སྤོས་དཀར་རྣམས་སླར་དེའི་ནང་དུ་བཞག་གོ །
NEH 13:10 ཡང་ངས་ལེ་ཝི་པ་རྣམས་ལ་ནོར་སྐལ་མི་སུས་ཀྱང་མ་སྤྲད་པས། ཞབས་ཏོག་སྒྲུབ་པའི་ལེ་ཝི་པ་དང་མགུར་ལེན་མཁན་ཀུན་པོ་རང་ཉིད་ཀྱི་ཞིང་སར་ཕྱིན་པ་ཤེས་ཚོར་བྱུང་།
NEH 13:11 དེ་ནས་ངས་འགོ་དཔོན་དག་ལ་གཤེ་གཤེ་བཏང་ནས་འདི་ལྟར། དཀོན་མཆོག་གི་མཆོད་ཁང་སྤངས་བཞག་པ་ཅི་ཡིན་ནམ་ཞེས་སྨྲས་ཤིང་། ངས་ལེ་ཝི་པ་རྣམས་མཉམ་དུ་བསྡུས་ཏེ་རང་རང་གི་ལས་སྣེར་བཞག་གོ །
NEH 13:12 དེ་ནས་ཡ་ཧུ་དཱ་པ་ཐམས་ཅད་ཀྱིས་འབྲུ་དང་རྒུན་ཆང་གསར་པ་དང་། སྣུམ་གསར་པ་བཅས་ཀྱི་བཅུ་ཆའི་གཅིག་དཀོར་མཛོད་དུ་བསྐྱལ་བྱུང་།
NEH 13:13 ཡང་ངས་མཆོད་དཔོན་ཤེ་ལེམ་ཡཱ་དང་དྲུང་ཡིག་ཟཱ་ཏོག་དང་། ལེ་ཝི་པ་ཕེ་ད་ཡཱ་བྱ་བ་བཅས་གསུམ་པོ་དཀོར་མཛོད་ཀྱི་གཉེར་པར་བསྐོས་ཏེ། དེ་དག་གི་གཉེར་གཡོག་ཏུ་ཧ་ནན་བསྐོས། ཧ་ནན་ནི་ཟག་ཀུར་གྱི་བུ་དང་། ཟག་ཀུར་ནི་མད་ཐན་ཡཱའི་བུའོ། །དེ་དག་ནི་མི་གཞུང་དྲང་ཡིན་ཏེ། རང་གི་སྤུན་རྣམས་ལ་བགོ་བཤའ་རྒྱག་པ་ནི་དེ་དག་གི་ལས་འགན་ཡིན་ནོ། །
NEH 13:14 ཀྱེ། ངའི་དཀོན་མཆོག་ལགས། ངས་རང་གི་དཀོན་མཆོག་གི་མཆོད་ཁང་དོན་དུ་སེམས་གཏིང་ནས་ལས་བཟང་པོ་བསྒྲུབས་པས་བདག་མ་འདོར་ཅིག འདིའི་ཕྱིར་དུའང་བདག་དྲན་དུ་གསོལ་ལོ། །
NEH 13:15 ཉིན་དེ་དག་གི་རིང་ལ་ངས་ཡ་ཧུ་དཱ་རུ་མི་ཁ་ཤས་ཀྱིས་ངལ་གསོ་བའི་ཉིན་ལ་རྒུན་ཆང་འཚིར་གནོན་བྱེད་པ་དང་། ཚར་ཕོན་མང་པོ་བོང་བུ་ལ་ཁལ་འགེལ་བ་དང་། རྒུན་ཆང་དང་རྒུན་འབྲུམ་དང་། སེ་ཡབ་དང་ཁུར་པོ་གང་རུང་ཡེ་རུ་སཱ་ལེམ་དུ་ངལ་གསོ་བའི་ཉིན་མོར་སྐྱེལ་བ་མཐོང་ནས། དེ་དག་གིས་ཉོ་ཚོང་བྱེད་པའི་ཉིན་མོར་ངས་དེ་རྣམས་ལ་ཉེན་བརྡ་བཏང་བ་ཡིན།
NEH 13:16 དེར་མ་ཟད། ཡེ་རུ་སཱ་ལེམ་དུ་གནས་པའི་ཐཱར་པ་འགའ་ཤས་ཀྱིས་ཀྱང་ཉ་དང་ཚོང་རིགས་སྣ་ཚོགས་ནང་དུ་དྲངས་ནས་ངལ་གསོ་བའི་ཉིན་མོར་ཡ་ཧུ་དཱ་པ་རྣམས་ལ་བཙོངས་སོ། །
NEH 13:17 དེར་ངས་ཡ་ཧུ་དཱའི་སྐུ་དྲག་རྣམས་ལ་གཤེ་གཤེ་བཏང་ནས་འདི་ལྟར། ཁྱོད་ཅག་གིས་ལས་ངན་པ་འདི་བྱས་ནས་ངལ་གསོ་བའི་ཉིན་མོ་བཙོག་པར་བྱེད་པ་ཅི་ཡིན་ནམ།
NEH 13:18 ཁྱོད་ཀྱི་ཕ་མེས་རྣམས་ཀྱིས་ཀྱང་དེ་ལྟར་བྱས་པས། བདག་ཅག་གི་དཀོན་མཆོག་གིས་ང་རང་ཚོ་དང་། ཐ་ན་གྲོང་ཁྱེར་འདིའི་སྟེང་དུ་གནོད་པ་འདི་ཚང་མ་བཏང་བ་མ་ཡིན་ནམ། ད་ལྟ་ངལ་གསོ་བའི་ཉིན་མོ་བཙོག་པར་བྱས་པ་དང་བསྟུན་ནས་ཁྱོད་ཅག་གིས་ཡེས་ར་ཨེལ་ལ་གཏུམ་དྲག་མང་པོ་བསྐྱལ་ཡོང་ངོ་ཞེས་སྨྲས་སོ། །
NEH 13:19 ངལ་གསོ་བའི་ཉིན་གྱི་ཉིན་སྔོན་མ་ས་རུབ་ཁར་བདག་གིས་ཡེ་རུ་སཱ་ལེམ་གྱི་སྒོ་ཐམས་ཅད་ཟྭ་རྒྱག་དགོས་པ་དང་། ཡང་ངལ་གསོ་བའི་ཉིན་མོ་མ་འདས་བར་དུ་སྒོ་ཕྱེ་མི་ཆོག་པའི་བཀའ་བབས་པ་ཡིན། ཡང་ངལ་གསོ་བའི་ཉིན་མོར་གྲོང་ཁྱེར་ནང་དུ་ཁུར་པོ་བསྐྱལ་མི་ཡོང་བའི་ཆེད་དུ། བདག་གིས་གཡོག་པོ་འགའ་ཞིག་མངགས་ནས་མཁར་སྒོ་སྲུང་དུ་བཅུག་པ་ཡིན།
NEH 13:20 དེའི་རྐྱེན་གྱིས་ཚོང་པ་དང་ཚོང་རིགས་སྣ་ཚོགས་འཚོང་མཁན་རྣམས་ཐེངས་གཅིག་གཉིས་ལ་ཡེ་རུ་སཱ་ལེམ་གྲོང་ཁྱེར་ཕྱི་རོལ་ཏུ་ཞག་སྡོད་བྱས།
NEH 13:21 ངས་དེ་དག་ལ་ཉེན་བརྡ་བཏང་ནས་འདི་ལྟར། ཁྱོད་ཅག་གིས་ཅིའི་ཕྱིར་མཁར་གྱང་མདུན་ནས་མཚན་བསྐྱལ་ལམ། ཡང་བསྐྱར་འདི་འདྲ་བྱེད་ན་ངས་ཁྱོད་ཚོར་ལག་འགུལ་ངེས་ཡིན་ཞེས་སྨྲས་པས། དེ་ནས་བཟུང་དེ་དག་ངལ་གསོ་བའི་ཉིན་མོར་མ་འོངས་སོ། །
NEH 13:22 ངས་ལེ་ཝི་པ་རྣམས་ལ་གཙང་སྦྲ་བྱས་ནས་ཡོང་སྟེ་མཁར་སྒོ་བསྲུང་དགོས་པ་དང་། ངལ་གསོ་བའི་ཉིན་མོ་དམ་པར་བརྩི་དགོས་པའི་བཀའ་བབས་པ་ཡིན། ཀྱེ། ངའི་དཀོན་མཆོག་ལགས། འདིའི་ཕྱིར་དུ་བདག་དྲན་པར་མཛོད། ཁྱེད་ཀྱི་ཐུགས་བརྩེ་བ་ཕུན་སུམ་ཚོགས་པས་བདག་ལ་གཟིགས་སུ་གསོལ་ལོ། །
NEH 13:23 ཉིན་དེ་དག་གི་རིང་ལ་ཡང་བདག་གིས་ཡ་ཧུ་དཱ་པ་དག་ཨ་སི་དོད་པ་དང་། ཨམ་མོན་པ་དང་། མོ་ཨབ་པ་བཅས་ཀྱི་བུད་མེད་རྣམས་དང་གཉེན་བསྒྲིགས་པ་མཐོང་བྱུང་།
NEH 13:24 དེ་དག་གི་བུ་དང་བུ་མོ་རྣམས་ལས་ཕྱེད་ཀས་ཨ་སི་དོད་ཀྱི་སྐད་སྨྲ་བ་དང་། ཡང་ན་མི་རིགས་གཞན་པའི་སྐད་སྨྲ་ཞིང་། ཡ་ཧུ་དཱའི་སྐད་སྨྲ་མི་ཤེས་སོ། །
NEH 13:25 ངས་དེ་དག་ལ་གཤེ་གཤེ་བཏང་ནས་དམོད་པ་བཏབ་སྟེ། མི་འགའ་ཞིག་ལ་གཅར་རྡུང་བྱས། དེ་དག་གི་མགོའི་སྐྲ་ཡང་བལ་ཞིང་། དཀོན་མཆོག་དཔང་དུ་བཙུགས་ནས་མནའ་བསྐྱལ་དུ་བཅུག་པ་སྟེ། ཁྱོད་ཅག་གིས་རང་གི་བུ་མོ་ཕྱི་རོལ་པའི་བུ་ལ་གཉེན་འབྲེལ་བྱེད་དུ་འཇུག་མི་ཆོག་པ་དང་། ཡང་རང་ཉིད་ཀྱི་བུ་ལ་དེ་དག་གི་བུ་མོ་ཆུང་མར་བླང་མི་ཆོག
NEH 13:26 ཡེས་ར་ཨེལ་གྱི་རྒྱལ་པོ་སོ་ལོ་མོན་གྱིས་ཀྱང་དོན་འདིའི་སྟེང་དུ་སྡིག་པ་མ་བྱས་སམ། རྒྱལ་ཁབ་མང་པོ་ཞིག་གི་ནང་དུ་ཁོང་ལྟ་བུའི་རྒྱལ་པོ་མེད་པ་དང་། དཀོན་མཆོག་གིས་ཁོང་ལ་ཧ་ཅང་གཅེས་པས་ཡེས་ར་ཨེལ་ཡོངས་ལ་བདག་སྐྱོང་བྱེད་པའི་རྒྱལ་པོར་བསྐོས་ཡོད། དེ་ལྟ་ནའང་ཕྱི་ཕྱོགས་པའི་བུད་མེད་རྣམས་ཀྱིས་ཁོང་སྡིག་པའི་ནང་ལྷུང་དུ་བཅུག་གོ །
NEH 13:27 ང་ཚོས་ཁྱོད་ཅག་གིས་དོན་ངན་འདི་རྣམས་བྱེད་པ་རྒྱ་ཡན་དུ་བཏང་ནས། ཕྱི་ཕྱོགས་པའི་བུད་མེད་དང་གཉེན་བསྒྲིགས་ཏེ་ངེད་ཀྱི་དཀོན་མཆོག་ལ་སྡིག་པ་བྱེད་དུ་འཇུག་ག་ལ་རུང་ཞེས་སྨྲས་པའོ། །
NEH 13:28 ཡང་མཆོད་དཔོན་ཆེན་པོ་ཨེལ་ཡཱ་ཤིབ་ཀྱི་བུ་ཡོ་ཡ་དཱའི་བུ་རྣམས་ལས་གཅིག་ནི་ཧོ་རོན་པ་སན་པཱ་ལད་ཀྱི་མག་པ་ཡིན་པས། ངས་ཁོ་རང་ངའི་མདུན་ནས་ཕར་བསྐྲད་པ་ཡིན།
NEH 13:29 ཀྱེ། ངའི་དཀོན་མཆོག་ལགས། དེ་དག་གི་སྡིག་པ་ཐུགས་སུ་དགོངས་པར་མཛོད་ཅིག དེ་དག་གིས་མཆོད་དཔོན་གྱི་གོ་གནས་སྦགས་ཤིང་། མཆོད་དཔོན་དང་ལེ་ཝི་པ་རྣམས་ཀྱི་དམ་བཅའ་དང་འགལ་ལོ། །
NEH 13:30 དེ་ལྟར་ངས་ཁོ་རྣམས་ལ་གཙང་སྦྲ་བྱས་ཏེ། ཕྱི་ཕྱོགས་པ་རྣམས་ལ་གཏོགས་པ་ཐམས་ཅད་ལས་ཕྲལ་ཞིང་། ཡང་ངས་མཆོད་དཔོན་དང་ལེ་ཝི་པ་རྣམས་ཀྱི་ལས་རེས་གཏན་ལ་ཕབ་སྟེ་ཁོ་རྣམས་ལ་རང་རང་གི་ལས་འགན་བསྒྲུབ་ཏུ་བཅུག་ཅིང་།
NEH 13:31 དུས་ལྟར་འབུད་ཤིང་དང་སྐྱེ་དངོས་ཐོག་མ་རྣམས་ཕུལ་ཏོ། །ཀྱེ། ངའི་དཀོན་མཆོག་ལགས། བདག་ཐུགས་སུ་བཟུང་ནས་དྲིན་གྱིས་སྐྱོང་བར་མཛོད་ཅིག ། །།
EST 1:1 དེ་ཡང་དོན་འདི་ནི་རྒྱལ་པོ་ཨ་ཧཱ་ཝེ་རོ་ཡི་དུས་སྐབས་སུ་བྱུང་བ་ཡིན་ལ། ཨ་ཧཱ་ཝེ་རོ་ཡིས་རྒྱ་གར་ནས་གུ་ཤ་བྱ་བའི་ཡུལ་གྱི་བར་དུ་ལྗོངས་བརྒྱ་དང་ཉེར་བདུན་ལ་དབང་བྱས་པ་ཡིན།
EST 1:2 ཁོང་ཉིད་སོའུ་སཱན་མཁར་ཆེན་གྱི་རྒྱལ་ཁྲིའི་སྟེང་དུ་བཞུགས་པའི་དུས་ཏེ།
EST 1:3 ཁོང་གིས་རྒྱལ་སྲིད་སྐྱོང་བའི་ལོ་གསུམ་པ་ལ། དཔོན་རིགས་དང་འཁོར་གཡོག་ཐམས་ཅད་ལ་གསོལ་སྟོན་བཤམས་ཤིང་། ཏ་ཟིག་དང་མཱ་ཏི་ཡུལ་གྱི་དམག་དཔོན་རྣམས་དང་། ལྗོངས་སོ་སོའི་སྐུ་དྲག་དང་འགོ་དཔོན་བཅས་ཐམས་ཅད་ཁོང་གི་དྲུང་དུ་འཛོམས་པ་རེད།
EST 1:4 རྒྱལ་པོས་རང་གི་རྒྱལ་སྲིད་ཀྱི་རྒྱུ་འབྱོར་བའི་གཟི་དཔལ་དང་། རང་གི་བརྗིད་ཉམས་རབ་ཏུ་འཕགས་པ་རྣམས་ཁོ་རྣམས་ལ་ཉིན་མང་པོར་བསྟན་ཞིང་བསྡོམས་པས་ཉིན་བརྒྱ་དང་བརྒྱད་ཅུའོ། །
EST 1:5 དུས་དེ་རྫོགས་ནས་རྒྱལ་པོས་སོའུ་སཱན་མཁར་ཆེན་དུ་གནས་པའི་མི་མཆོག་དམན་ཐམས་ཅད་ལ་ཕོ་བྲང་གི་སྐྱེད་ཚལ་ཐང་ནས་ཉིན་བདུན་ལ་གསོལ་སྟོན་བཤམས་སོ། །
EST 1:6 དེར་གོས་ཡུག་དཀར་ལྗང་སྔོ་གསུམ་ལ་རས་རྒྱ་སྨུག་དང་སོ་རས་གཉིས་མཉམ་སྦྲེལ་གྱི་ཐག་པས་དངུལ་གྱི་ཨ་ལོང་ལ་བཏགས་ཏེ་རྡོ་ཀ་མ་རུའི་ཀ་ཆེན་རྣམས་ལ་མདུད་ཡོད་ཅིང་། གསེར་དངུལ་གྱི་འབོལ་ཁྲི་རྣམས་རྡོ་ཀ་མ་རུ་དཀར་དམར་སེར་ནག་བཅས་ཀྱིས་གྲུབ་པའི་པང་གཅལ་སྟེང་དུ་བཀྲམས་པའོ། །
EST 1:7 རྒུན་ཆང་འབུལ་བྱེད་ཀྱི་གསེར་ཕོར་རྣམས་ནི་རེ་རེ་མི་འདྲ་ཞིང་། རྒུན་ཆང་ཧ་ཅང་མོད་པོ་ཡོད་པ་དེས་རྒྱལ་པོ་གཏོང་ཕོད་ཆེ་བ་ཡོངས་སུ་མཚོན་པ་རེད།
EST 1:8 ཡང་རྒུན་ཆང་འཐུང་བར་ལུགས་སྲོལ་ཡོད་ལ་ནན་གྱིས་བཏང་མི་ཆོག་པ་སྟེ། རྒྱལ་པོས་རང་གི་ཕོ་བྲང་གི་ལས་སྣེ་པ་རྣམས་ལ། མི་རེ་རེར་རང་རང་གི་འདོད་པ་བཞིན་སྤྱོད་དུ་འཇུག་དགོས་པའི་བཀའ་གནང་བས་སོ། །
EST 1:9 རྒྱལ་མོ་ཝཱ་སི་ཏི་ཡིས་ཀྱང་རྒྱལ་པོ་ཨ་ཧཱ་ཝེ་རོ་ཡི་ཕོ་བྲང་ནང་དུ་བུད་མེད་རྣམས་ལ་གསོལ་སྟོན་བཤམས་ཤིང་།
EST 1:10 ཉིན་བདུན་པ་ལ་རྒྱལ་པོའི་ཐུགས་ནི་རྒུན་ཆང་གིས་སྤྲོ་བར་གྱུར་པའི་ཚེ། ཁོང་གིས་རང་ཉིད་ཀྱི་དྲུང་དུ་ཞབས་ཕྱི་བྱེད་པའི་མེ་ཧུ་མན་དང་པིས་ཐཱ། ཧར་པོ་ནཱ། པིག་ཐཱ། ཨ་བག་ཐཱ། ཙེ་ཐར། ཀར་ཀ་སི་བཅས་ཉུག་རུམ་པ་བདུན་ལ།
EST 1:11 རྒྱལ་མོ་ཝཱ་སི་ཏི་ཡིས་རྒྱལ་མོའི་ཅོད་པན་གསོལ་ནས་རྒྱལ་པོའི་མདུན་དུ་ཡོང་དགོས་པའི་བཀའ་གནང་སྟེ། དེ་ནི་ཁོ་མོ་བྱད་གཟུགས་ཡིད་དུ་འོང་བ་ཞིག་ཡིན་པས། མི་རིགས་སོ་སོའི་ཡུལ་མི་དང་ས་གནས་དཔོན་རིགས་རྣམས་ལ་ཁོ་མོའི་བཞིན་རས་སྟོན་པའི་ཕྱིར་ཡིན་ནོ། །
EST 1:12 འོན་ཀྱང་ཁོ་མོ་ཉུག་རུམ་པ་རྣམས་ཀྱིས་སྦྲན་པའི་རྒྱལ་པོའི་བཀའ་བཞིན་མ་འོངས་པས། རྒྱལ་པོ་ཤིན་ཏུ་ཁྲོས་ནས་ཞེ་སྡང་གི་མེ་ལྕེ་འབར་བར་གྱུར་ཏོ། །
EST 1:13 རྒྱལ་པོའི་ལུགས་སྲོལ་ལྟར་ན། དོན་ཐམས་ཅད་བསྒྲུབ་པར་སྔོན་ལ་ཁྲིམས་སྲོལ་དང་བཀའ་རྒྱ་ཤེས་པའི་མི་ལ་བློ་འདྲི་བ་ཡིན། སྐབས་དེར་རྒྱལ་པོས་དུས་སྐར་ཤེས་པའི་མཁས་པ་རྣམས་དང་གྲོས་བཏབ་སྟེ།
EST 1:14 དེ་དག་ནི་ཀར་ཤེ་ནཱ་དང་སི་ཐཱར། ཨད་མ་ཐཱ། ཐཱར་ཞིས། མེ་རེས། མཱར་སེ་ནཱ། མེ་མུ་ཀན་བཅས་ཏ་ཟིག་དང་མཱ་ཏི་ཡུལ་གྱི་བློན་ཆེན་བདུན་པོ་དེ་ཡིན་ཞིང་། རྟག་ཏུ་རྒྱལ་པོའི་ཞལ་མཇལ་མཁན་དང་། རྒྱལ་ཁམས་ཀྱི་ནང་དུ་གྲལ་མགོ་འཛིན་མཁན་ཡང་ཡིན་ནོ། །
EST 1:15 རྒྱལ་པོས་དེ་རྣམས་ལ། རྒྱལ་མོ་ཝཱ་སི་ཏི་ལ་ཉུག་རུམ་པ་ཚོས་རྒྱལ་པོ་ཨ་ཧཱ་ཝེ་རོའི་བཀའ་སྦྲན་ཀྱང་ཉན་མ་བྱུང་བས། ཁྲིམས་སྲོལ་ལྟར་ན་ད་ནི་ཅི་བྱེད་པར་རིགས་སམ་ཞེས་གསུངས་པ་དང་།
EST 1:16 མེ་མུ་ཀན་གྱིས་རྒྱལ་པོ་དང་ས་གནས་དཔོན་པོ་རྣམས་ཀྱི་མདུན་དུ་འདི་ལྟར། རྒྱལ་མོ་ཝཱ་སི་ཏི་ཡི་བྱ་སྤྱོད་འདི་ནི་རྒྱལ་པོ་དང་འགལ་བར་མ་ཟད། རྒྱལ་པོ་ཨ་ཧཱ་ཝེ་རོའི་ལྗོངས་སོ་སོའི་དཔོན་འབངས་སྤྱི་ལའང་གནོད་པར་འདུག
EST 1:17 ཅི་ལ་ཞེ་ན། རྒྱལ་མོའི་དོན་འདི་བུད་མེད་ཐམས་ཅད་ཀྱི་རྣ་བར་བརྒྱུད་ན། དེ་དག་གིས་ཀྱང་རང་རང་གི་ཁྱོ་གར་དམའ་འབེབས་བྱེད་ཅིང་ན་རེ། རྒྱལ་པོ་ཨ་ཧཱ་ཝེ་རོ་ཡིས་རྒྱལ་མོ་ཝཱ་སི་ཏི་ཁོང་གི་དྲུང་དུ་བོས་ནའང་ཁོ་མོ་དེར་མ་ཕྱིན་ཏོ་ཞེས་སྨྲ་བར་འགྱུར།
EST 1:18 ད་ནི་ཏ་ཟིག་དང་མཱ་ཏི་ཡུལ་གྱི་བཙུན་མོ་རྣམས་ཀྱིས་རྒྱལ་མོའི་བྱ་སྤྱོད་དེ་ཐོས་ན། རྒྱལ་པོའི་བློན་ཆེན་ཐམས་ཅད་ལ་དེ་ལྟར་སྨྲ་བ་དང་། དེ་ལྟར་བྱས་ཚེ་དམའ་འབེབས་དང་ཞེ་སྡང་རྫོགས་མེད་འབྱུང་བར་འགྱུར་རོ། །
EST 1:19 གལ་ཏེ་རྒྱལ་པོའི་ཐུགས་དང་འཕྲོད་ན། དོན་འདི་འགྱུར་བ་མེད་པའི་ཁྲིམས་སུ་ཕོབས་ལ། ཏ་ཟིག་དང་མཱ་ཏི་ཡུལ་དུ་རྒྱལ་པོའི་བཀའ་ཤོག་ཅིག་སྤྲིང་བར་མཛོད། དེའི་ནང་དུ་ཝཱ་སི་ཏི་ནི་དེང་ཕྱིན་ཆད་རྒྱལ་པོ་ཨ་ཧཱ་ཝེ་རོ་ཡི་དྲུང་དུ་ཡོང་མི་ཆོག་པ་དང་། རྒྱལ་མོའི་གོ་ས་ཁོ་མོ་ལས་ལྷག་པའི་བཙུན་མོ་ཞིག་ལ་གནང་བར་བྱའོ། །
EST 1:20 རྒྱལ་ཁམས་ཀྱི་མངའ་ཁོངས་ནི་ཅི་འདྲའི་རྒྱ་ཆེ་ཡང་། རྒྱལ་པོའི་བཀའ་མཆིད་རྒྱལ་ཁམས་ཡོངས་ལ་ཁྱབ་པའི་དུས་སུ། ཆུང་མ་རྣམས་ཀྱིས་རང་རང་གི་ཁྱོ་ག་མཆོག་དམན་སུ་ཞིག་ཡིན་རུང་དེ་ལ་བཀུར་བསྟི་བྱེད་ངེས་སོ་ཞེས་ཞུས་པ་ལ།
EST 1:21 གཏམ་འདི་ལ་རྒྱལ་པོ་དང་ས་གནས་དཔོན་རིགས་ཐམས་ཅད་ཤིན་ཏུ་དགྱེས་ཤིང་། རྒྱལ་པོས་མེ་མུ་ཀན་གྱི་གཏམ་བཞིན་དུ་བྱས་སོ། །
EST 1:22 དེ་ནས་ཁོང་གིས་རྒྱལ་པོའི་ལྗོངས་ཐམས་ཅད་དུ་མི་རིགས་རེ་རེའི་སྐད་རིགས་དང་ཡི་གེ་བཞིན་དུ། སྐྱེས་པ་ཀུན་གྱིས་སོ་སོའི་ཁྱིམ་ནང་དུ་བདག་པོ་བྱེད་པ་དང་བཟའ་མི་རྣམས་ལ་རང་མི་རིགས་ཀྱི་སྐད་ཆ་སྨྲ་བར་འོས་ཞེས་བཀའ་རྒྱ་ཞིག་བཀྲམས་སོ། །
EST 2:1 དོན་དེའི་རྗེས་སུ་རྒྱལ་པོ་ཨ་ཧཱ་ཝེ་རོའི་ཁོང་ཁྲོ་ཞི་བར་གྱུར་ནས། ཝཱ་སི་ཏི་དང་ཁོ་མོས་ཅི་བྱས་པ་དང་རང་གིས་དེའི་སྐོར་ལ་བཀའ་ཅི་གནང་བའང་དྲན་པ་རེད།
EST 2:2 དེ་ནས་ཞབས་ཕྱི་པ་རྣམས་ཀྱིས་རྒྱལ་པོ་ལ། ཁྱེད་ཀྱིས་རང་ཉིད་ཀྱི་ཆེད་དུ་མི་མངགས་ནས་ན་ཆུང་བུ་མོ་རྣམས་འཚོལ་དུ་བཅུག་ན་འོས་ཤིང་།
EST 2:3 ལྗོངས་ཀུན་ཏུ་འགོ་དཔོན་བསྐོས་ཏེ། ན་ཆུང་བུ་མོ་ཐམས་ཅད་སོའུ་སཱན་མཁར་ཆེན་གྱི་སྐྱེས་མའི་གླིང་ག་རུ་བསྡུ་དགོས་པ་དང་། ཁོ་མོ་རྣམས་རྒྱལ་པོས་བུད་མེད་རྣམས་ལ་བདག་སྐྱོང་བྱེད་པར་བསྐོས་པའི་ཉུག་རུམ་པ་ཧེ་ག་ཨི་ཡི་ལག་ཏུ་གཏད་ནས། དེ་དག་ལ་མཁོ་བའི་བྱུག་སྣུམ་སྣ་ཚོགས་ཡང་སྟེར་བ་དང་།
EST 2:4 དེ་ནས་རྒྱལ་པོས་ཐུགས་དང་ལྡན་པའི་ན་ཆུང་མ་ཞིག་ཝཱ་སི་ཏི་ཡི་ཚབ་ཏུ་རྒྱལ་མོར་མཛད་རོགས་ཞེས་ཞུ་བ་ཞུས་པ་ལ། རྒྱལ་པོས་ཐུགས་སུ་འཕྲོད་ནས་དེ་ལྟར་དུ་མཛད་དོ། །
EST 2:5 སོའུ་སཱན་མཁར་ཆེན་དུ་མིང་ལ་མོར་དོ་ཀཱ་ཨི་ཞེས་བྱ་བའི་ཡ་ཧུ་དཱ་པ་ཞིག་ཡོད་ལ། ཁོ་ནི་པེན་ཡཱ་མེན་པ་ཁི་སིའི་ཡང་ཚ་དང་། ཤིམ་ཨི་ཡི་ཚ་བོ་དང་། ཡཱ་ཨིར་གྱི་བུ་ཡིན་ནོ། །
EST 2:6 དེ་སྔོན་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས། ཡ་ཧུ་དཱའི་རྒྱལ་པོ་ཡེ་ཀོན་ཡཱ་དང་བཅས་པ་ཡེ་རུ་སཱ་ལེམ་གྲོང་ཁྱེར་ནས་བཙན་ཁྲིད་བྱས་ནས་ཡོང་དུས། མོར་དོ་ཀཱ་ཨི་ཡང་དེའི་ཁྲོད་ཀྱི་གཅིག་ཡིན།
EST 2:7 ཁོས་རང་གི་ཁུ་བོའི་བུ་མོ་ཧ་དས་སཱའམ་ཨེས་སི་ཐེར་བྱ་བ་སྙོར་སྐྱོང་བྱས་པ་ཡིན་ཏེ། གང་ལ་ཞེ་ན། དེ་ལ་ཕ་མ་གཉིས་ཀ་མེད་པ་དང་། ཁོ་མོ་ནི་བྱད་གཟུགས་ཡིད་དུ་འོང་བ་ཞིག་ཡིན་ལ། ཕ་མ་ཤི་བའི་ཚེ་མོར་དོ་ཀཱ་ཨི་ཡིས་དེ་རང་གི་བུ་སྐལ་དུ་བསྙོར་བ་རེད།
EST 2:8 རྒྱལ་པོའི་བཀའ་མཆིད་ཁྱབ་བསྒྲགས་བྱས་པ་ན། ན་ཆུང་བུ་མོ་མང་པོ་སོའུ་སཱན་མཁར་ཆེན་དུ་བསྡུས་པ་དང་། བུད་མེད་རྣམས་ལ་བདག་སྐྱོང་བྱེད་མཁན་ཉུག་རུམ་པ་ཧེ་ག་ཨི་ལ་སྤྲད་ཅིང་། ཨེས་སི་ཐེར་ཡང་རྒྱལ་པོའི་ཕོ་བྲང་དུ་བསྐྱལ་ནས་ཧེ་ག་ཨི་ལ་གཏད།
EST 2:9 ཧེ་ག་ཨི་ནི་ཨེས་སི་ཐེར་ལ་ཧ་ཅང་བརྩེ་ཞིང་ཁོ་མོ་བྱམས་ཀྱིས་བསྐྱངས་ནས། མྱུར་དུ་ཁོ་མོར་བྱུག་སྣུམ་དང་འབབ་འོས་པའི་སྐལ་ཡང་སྤྲད་དོ། །དེར་མ་ཟད་ཕོ་བྲང་ནས་ཁོ་མོ་ལ་ཞབས་ཞུ་བྱེད་པར་ཞལ་ཏ་མ་བདུན་ཡང་མངགས་པ་དང་། ཁོ་མོ་དང་ཞལ་ཏ་མ་རྣམས་སྐྱེས་མའི་གླིང་གའི་ཁྱིམ་ལེགས་ཤོས་དེར་གནས་སྤར་ཏོ། །
EST 2:10 ཨེས་སི་ཐེར་གྱིས་རང་གི་གདུང་རྒྱུད་དང་རིགས་རུས་མི་གཞན་པར་གཏན་ནས་མ་བཤད་དོ། །ཅིའི་ཕྱིར་ཞེ་ན། མོར་དོ་ཀཱ་ཨི་ཡིས་སུ་ལའང་ཤེས་སུ་མི་འཇུག་པར་གདམས་ཡོད་པས་སོ། །
EST 2:11 ཡང་མོར་དོ་ཀཱ་ཨི་ནི་ཨེས་སི་ཐེར་བདེ་མིན་དང་ཁོ་མོའི་འཚོ་བ་ཇི་ལྟར་ཡིན་པ་ཤེས་པའི་ཕྱིར་དུ། ཉིན་རེ་བཞིན་སྐྱེས་མའི་གླིང་གའི་མདུན་དུ་ཕར་འགྲོ་ཚུར་འགྲོ་བྱས་སོ། །
EST 2:12 ལུགས་སྲོལ་ལྟར་དུ། ན་ཆུང་བུ་མོ་རྣམས་ཀྱིས་སྔོན་ལ་ཟླ་བ་བཅུ་གཉིས་རིང་ལ་ལུས་པོར་སྣུམ་བསྐུ་བར་བྱ་བ་སྟེ། ཟླ་བ་དྲུག་གི་རིང་ལ་གུ་གུལ་གྱི་སྣུམ་བསྐུ་ཞིང་། ཡང་ཟླ་བ་དྲུག་ལ་སྤོས་སྣུམ་དང་བྱུག་སྣུམ་འབྱུག་དགོས་པ་དང་། དེ་ནས་སྟ་གོན་མཇུག་རྫོགས་པ་ལ་ན་ཆུང་བུ་མོ་རེ་རེ་རིམ་བཞིན་རྒྱལ་པོ་ཨ་ཧཱ་ཝེ་རོའི་དྲུང་དུ་འགྲོ་བ་ཡིན་ནོ། །
EST 2:13 ན་ཆུང་བུ་མོ་རྣམས་རྒྱལ་པོའི་ཕོ་བྲང་དུ་འགྲོ་ལུགས་ནི་འདི་ལྟ་སྟེ། སྐྱེས་མའི་གླིང་ག་ནས་རྒྱལ་པོའི་དྲུང་དུ་འགྲོ་བའི་དུས་སུ། དེ་ལ་ཅི་ཞིག་མཁོ་བ་ཐམས་ཅད་སྤྲད་ནས་ནང་དུ་ཁྱེར་ཆོག་པ་དང་།
EST 2:14 མཚན་མོར་རྒྱལ་པོའི་དྲུང་དུ་སོང་ནས་ཕྱི་ཉིན་སྔ་མོར་སྐྱེས་མའི་གླིང་ག་གཞན་པར་ལོག་དགོས་ཤིང་། བཙུན་མོ་རྣམས་ལ་བདག་སྐྱོང་བྱེད་མཁན་ཉུག་རུམ་པ་སཱ་ཨས་ག་སིའི་ལག་ཏུ་སྤྲོད་པ་དང་། རྒྱལ་པོ་ཁོ་མོར་དགའ་ཞིང་མོས་པ་དང་སླར་ཡང་མིང་བཏོན་ནས་བོས་ན་མ་གཏོགས་ཕྱིན་ཆད་རྒྱལ་པོའི་གམ་དུ་འགྲོ་བ་མིན་ནོ། །
EST 2:15 དེ་ནས་མོར་དོ་ཀཱ་ཨིས་བུ་སྐལ་དུ་བྱས་པའི་རང་གི་ཁུ་བོ་ཨ་བི་ཧ་ཡིལ་གྱི་བུ་མོ་ཨེས་སི་ཐེར་ཡང་། རིམ་པ་བཞིན་རྒྱལ་པོའི་དྲུང་དུ་འགྲོ་བའི་རེས་ལ་བབས་པ་ན། བུད་མེད་རྣམས་ལ་བདག་སྐྱོང་བྱེད་མཁན་ཉུག་རུམ་པ་ཧེ་ག་ཨི་ཡིས་བཀོད་སྒྲིག་བྱས་པ་མ་གཏོགས་གཞན་གང་ཡང་མ་ཞུས་སོ། །ཨེས་སི་ཐེར་མཐོང་བ་ཐམས་ཅད་ཁོ་མོར་མཉེས་པར་གྱུར་ཏོ། །
EST 2:16 དེར་རྒྱལ་པོ་ཨ་ཧཱ་ཝེ་རོ་ཡིས་སྲིད་སྐྱོང་བའི་ལོ་བདུན་པའི་ཟླ་བཅུ་པ་སྟེ་ཐཱེ་བེད་ཟླ་བ་ལ། ཨེས་སི་ཐེར་ཡང་ཕོ་བྲང་ནང་རྒྱལ་པོའི་དྲུང་དུ་ཁྲིད་དོ། །
EST 2:17 རྒྱལ་པོ་ནི་བུད་མེད་གཞན་ཐམས་ཅད་ལས་ཨེས་སི་ཐེར་ལ་དགའ་བར་གྱུར་ཅིང་། རྒྱལ་པོའི་དྲུང་དུ་ན་ཆུང་བུ་མོ་ཀུན་ལས་ཁོ་མོར་བརྩེ་བ་ཆེན་པོ་ཐོབ་པས། རྒྱལ་པོ་ཡིས་རྒྱལ་མོའི་ཅོད་པན་ཁོ་མོའི་མགོ་ལ་བསྐོན་པ་དང་། ཁོ་མོ་ཝཱ་སི་ཏིའི་ཚབ་ཏུ་རྒྱལ་མོར་བསྐོས་སོ། །
EST 2:18 རྒྱལ་པོས་ཨེས་སི་ཐེར་གྱི་རྐྱེན་གྱིས་ས་གནས་དཔོན་རིགས་དང་འཁོར་གཡོག་ཐམས་ཅད་ལ་གསོལ་སྟོན་གཟབ་རྒྱས་བཤམས་ཤིང་། ལྗོངས་སོ་སོར་གུང་གསེང་གནང་བར་མ་ཟད། མི་ཐམས་ཅད་ལ་གཏོང་ཕོད་ཆེན་པོས་གསོལ་རས་ཀྱང་བསྩལ་ཏོ། །
EST 2:19 ཡང་ཐེངས་གཉིས་པར་ན་ཆུང་བུ་མོ་རྣམས་བསྡུ་བའི་ཚེ། མོར་དོ་ཀཱ་ཨི་རྒྱལ་པོའི་ཕོ་བྲང་གི་སྒོ་ཁར་བསྡད།
EST 2:20 ཨེས་སི་ཐེར་གྱིས་མོར་དོ་ཀཱ་ཨིས་བསྒོས་པ་བཞིན་དུ་རང་གི་གདུང་རྒྱུད་དང་རིགས་རུས་གཞན་ལ་མ་བཤད། སྔོན་ཆད་མོར་དོ་ཀཱ་ཨིས་རང་ཉིད་སྐྱོང་བའི་དུས་སུ་ཇི་ལྟར་ཁོང་གི་ཁ་ལ་མཉན་པ་བཞིན་དུ། ཁོ་མོས་ཁོང་གི་བཀའ་བཞིན་བྱས་པ་རེད།
EST 2:21 དེའི་ཚེ་མོར་དོ་ཀཱ་ཨི་རྒྱལ་པོའི་ཕོ་བྲང་གི་སྒོ་ཁར་བསྡད་པ་ལ། ཉུག་རུམ་པའི་ཁྲོད་དུ་པིག་ཐན་དང་ཐེ་རེ་སི་ཞེས་བྱ་བའི་ནང་སྒོ་སྲུང་མཁན་མི་གཉིས་ཡོད་པ་རྒྱལ་པོ་ཨ་ཧཱ་ཝེ་རོ་ལ་རབ་ཏུ་ཁྲོས་ཤིང་། ཁོང་ལྐོག་གསོད་བྱེད་པའི་རེ་ངན་བཅངས་པ་དང་།
EST 2:22 མོར་དོ་ཀཱ་ཨི་ཡིས་དོན་དེ་ཤེས་ནས་རྒྱལ་མོ་ཨེས་སི་ཐེར་ལ་བཤད་པ་དང་། ཨེས་སི་ཐེར་གྱིས་མོར་དོ་ཀཱ་ཨིའི་ངོ་ཚབ་བྱས་ནས་རྒྱལ་པོར་ཞུས་སོ། །
EST 2:23 རྒྱལ་པོས་བྱ་བ་དེ་ལ་ཞིབ་བཤེར་གནང་སྟེ་དོན་དངོས་ཡིན་པ་ཤེས་ནས། མི་དེ་གཉིས་གདུང་མའི་སྟེང་དུ་དཔྱངས་པ་དང་། ཡང་གནས་ཚུལ་འདི་རྒྱལ་པོའི་དྲུང་གི་ལོ་རྒྱུས་ཀྱི་དེབ་ཐེར་ནང་དུ་བཀོད་དོ། །
EST 3:1 དོན་དེའི་རྗེས་སུ་རྒྱལ་པོ་ཨ་ཧཱ་ཝེ་རོ་ཡིས་ཨ་གག་པ་ཧམ་མེ་དཱ་ཐའི་བུ་ཧ་མཱན་ཞེས་བྱ་བ་ཆེན་པོར་བརྩིས་ནས་བསྐོ་འཐེན་བྱས་ཤིང་། དེའི་གོ་གནས་ནི་ཁོ་དང་མཉམ་དུ་ཡོད་པའི་དཔོན་རིགས་ཀུན་ལས་མཐོ་བར་བྱས།
EST 3:2 ཡང་རྒྱལ་པོའི་ཕོ་བྲང་གི་སྒོ་ཁར་ཡོད་པའི་འཁོར་གཡོག་རྣམས་ཀྱིས་ཧ་མཱན་ལ་མགོ་བསྒུར་ནས་ཕྱག་བཙལ་ཏོ། །ཅིའི་ཕྱིར་ཞེ་ན། རྒྱལ་པོས་དེ་ལྟ་བུའི་བཀའ་གནང་ཡོད་པ་ཡིན། འོན་ཀྱང་། མོར་དོ་ཀཱ་ཨི་ཡིས་ཧ་མཱན་ལ་མགོ་མ་སྒུར་ཕྱག་ཀྱང་མ་བཙལ་ཏོ། །
EST 3:3 དེ་ནས་རྒྱལ་པོའི་ཕོ་བྲང་གི་སྒོ་ཁར་ཡོད་པའི་འཁོར་གཡོག་རྣམས་ཀྱིས་མོར་དོ་ཀཱ་ཨི་ལ། ཁྱོད་རང་ཅིའི་ཕྱིར་རྒྱལ་པོའི་བཀའ་དང་འགལ་ལམ་ཞེས་སྨྲས་ཤིང་།
EST 3:4 དེ་དག་གིས་ཉིན་རེ་བཞིན་ཁོ་ལ་སྐུལ་འདེབས་བྱས་ཀྱང་། ཁོས་སྔར་བཞིན་མ་མཉན་པ་རེད། དེ་བས་མོར་དོ་ཀཱ་ཨི་ཡིས་རང་ཉིད་ཡ་ཧུ་དཱ་པ་ཡིན་ ཟེར་བའི་གཏམ་དེ་དོན་ལ་གནས་མིན་ལ་བལྟ་བའི་ཆེད་དུ། དེ་དག་གིས་ཧ་མཱན་ལ་སྨྲས་སོ། །
EST 3:5 མོར་དོ་ཀཱ་ཨི་ཡིས་མགོ་མི་སྒུར་ལ་ཕྱག་ཀྱང་མི་འཚལ་བ་མཐོང་ནས་ཧ་མཱན་ཤིན་ཏུ་ཁྲོས་སོ། །
EST 3:6 དེ་རྣམས་ཀྱིས་མོར་དོ་ཀཱ་ཨི་ཡི་རིགས་རྒྱུད་ཅི་ཡིན་པ་ཧ་མཱན་ལ་སྨྲས་པས། ཁོའི་བསམ་པར་མོར་དོ་ཀཱ་ཨི་གཅིག་པུ་གསོད་པ་ནི་དོན་ཆུང་ངུ་ཡིན་པས། མོར་དོ་ཀཱ་ཨི་ཡི་མི་མང་སྟེ། རྒྱལ་པོ་ཨ་ཧཱ་ཝེ་རོའི་རྒྱལ་ཁམས་སུ་གནས་པའི་ཡ་ཧུ་དཱ་པ་ཐམས་ཅད་རྩ་མེད་དུ་གཏོང་དགོས་པར་འདོད་དོ། །
EST 3:7 རྒྱལ་པོ་ཨ་ཧཱ་ཝེ་རོ་ཡིས་སྲིད་སྐྱོང་བའི་ལོ་བཅུ་གཉིས་པའི་ཟླ་བ་དང་པོ་སྟེ་ནེ་སཱན་ཟླ་བར། དེ་དག་གིས་ཟླ་ཚེས་ཐག་གིས་གཅོད་པའི་ཆེད་དུ་ཉིན་རེ་བཞིན་དང་ཟླ་རེ་བཞིན་ཧ་མཱན་གྱི་མདུན་ནས་པུར་ཞེས་པའི་རྒྱན་བླངས་པ་ལ་ཟླ་བཅུ་གཉིས་པ་སྟེ་ཨ་དཱར་ཟླ་བ་ལ་བབས་སོ། །
EST 3:8 དེ་ནས་ཧ་མཱན་གྱིས་རྒྱལ་པོ་ཨ་ཧཱ་ཝེ་རོ་ལ། ཁྱེད་ཀྱི་རྒྱལ་ཁམས་ནང་དུ་མི་རིགས་གཅིག་ནི་ལྗོངས་སོ་སོའི་མི་རིགས་ཁྲོད་ཁ་འཐོར་དུ་གནས་པ་དང་། དེའི་ལུགས་སྲོལ་ནི་མི་ཐམས་ཅད་ཀྱི་ལུགས་སྲོལ་དང་མི་མཐུན་ལ། རྒྱལ་པོའི་ཁྲིམས་སྲོལ་ཡང་མི་བསྲུང་བས། དེ་རྣམས་སྐྱོང་བ་ནི་རྒྱལ་པོར་ཕན་ཐོགས་མེད་པ་རེད།
EST 3:9 དེ་བས་རྒྱལ་པོ་ཁྱེད་རང་ཐུགས་དགྱེས་ན། དེ་རྣམས་རྩ་མེད་གཏོང་བའི་བཀའ་མཆིད་གནང་བར་མཛོད་དང་། བདག་གིས་རྒྱལ་པོའི་གཏེར་མཛོད་ཁང་གི་བདག་གཉེར་བྱེད་མཁན་རྣམས་ཀྱི་ལག་ཏུ་དངུལ་གྱི་རྡོ་ཚད་ཆིག་ཁྲི་འབུལ་བར་བྱའོ་ཞེས་ཞུས་པས།
EST 3:10 རྒྱལ་པོས་རང་ཉིད་ཀྱི་ཕྱག་གི་ཐམ་ག་དང་ལྡན་པའི་མཛུབ་དཀྲིས་ཕུད་ནས། ཡ་ཧུ་དཱ་པ་རྣམས་ལ་བཙན་གནོན་གཏོང་མཁན་ཨ་གག་པ་ཧམ་མེ་དཱ་ཐའི་བུ་ཧ་མཱན་ལ་གནང་སྟེ།
EST 3:11 ཧ་མཱན་ལ། དངུལ་ནི་ཁྱོད་ལ་གནང་བ་དང་། མི་འདི་རྣམས་ཀྱང་ཁྱོད་ལ་སྤྲད་པ་ཡིན། དེ་དག་ལ་ཁྱོད་ཀྱིས་གང་དགར་གྱིས་ཤིག་ཅེས་གསུངས་སོ། །
EST 3:12 དེ་ནས་ཟླ་བ་དང་པོའི་ཚེས་བཅུ་གསུམ་ཉིན་ལ། རྒྱལ་པོའི་དྲུང་ཡིག་དག་བོས་ཡོང་སྟེ། ཧ་མཱན་གྱིས་བསྒོས་པ་བཞིན་དུ་ལྗོངས་སོ་སོའི་ཡི་གེ་དང་མི་རིགས་སོ་སོའི་སྐད་ཀྱིས་རྒྱལ་པོ་ཨ་ཧཱ་ཝེ་རོའི་མིང་ལ་བརྟེན་ནས་བཀའ་མཆིད་བྲིས་ཤིང་། ཡང་རྒྱལ་པོའི་མཛུབ་དཀྲིས་ཀྱིས་ཕྱག་རྒྱ་བཏབ་ནས། རྒྱལ་པོའི་སྤྱི་དཔོན་དང་ལྗོངས་སོ་སོའི་འགོ་བདག་དང་། མི་རིགས་རེ་རེའི་དཔོན་རིགས་སོགས་ལ་བསྒྲགས།
EST 3:13 ཟླ་བ་བཅུ་གཉིས་པ་སྟེ་ཨ་དཱར་ཟླ་བའི་ཚེས་བཅུ་གསུམ་པ་ལ། ཡ་ཧུ་དཱ་པའི་སྐྱེས་པ་རྒན་གཞོན་ཐམས་ཅད་བུད་མེད་བྱིས་པ་དང་བཅས་པ་ཉིན་གཅིག་ཏུ་ཡོངས་རྫོགས་བསད་ནས་ཚར་གཅོད་པར་མ་ཟད། དེ་དག་གི་རྒྱུ་ནོར་ཡང་འཕྲོག་པའི་བཀའ་ཤོག་དེ་བང་ཆེན་བརྒྱུད་ནས་རྒྱལ་པོའི་ལྗོངས་སོ་སོར་བསྐྱལ།
EST 3:14 བཀའ་ཤོག་དེ་ནི་འདྲ་བཤུས་བགྱིས་ཏེ་ལྗོངས་ཐམས་ཅད་ཀྱི་ཁྲིམས་སུ་ཕབ་ནས། ཉིན་དེར་གྲ་སྒྲིག་བྱེད་པའི་དོན་དུ་མི་རིགས་ཀུན་ལ་ཁྱབ་བསྒྲགས་བྱས་སོ། །
EST 3:15 བང་ཆེན་རྣམས་རྒྱལ་པོའི་བཀའ་བཞིན་མྱུར་དུ་ལམ་ལ་ཆས་པ་དང་། སོའུ་སཱན་མཁར་ཆེན་ཧྲིལ་པོར་བཀའ་མཆིད་ཁྱབ་བསྒྲགས་བྱས་སོ། །རྒྱལ་པོས་ཧ་མཱན་དང་མཉམ་དུ་ཆང་བཞེས་ནས་བསྡད་མོད། སོའུ་སཱན་མཁར་ཆེན་གྱི་འབངས་མི་རྣམས་འཁྲུགས་པར་གྱུར་ཏོ། །
EST 4:1 མོར་དོ་ཀཱ་ཨི་ཡིས་དོན་ཐམས་ཅད་ཤེས་པ་ན་རང་གི་གོས་གཤགས་ཏེ་རྩིད་རས་གྱོན་ཞིང་། མགོ་ལ་ཐལ་བ་གཏོར་ནས་གྲོང་ཁྱེར་ནང་དུ་འགྲོ་སྐྱོད་བྱས་པ་དང་། སྐད་ཆེན་པོ་བརྒྱབ་ནས་དྲག་ཏུ་ངུས་སོ། །
EST 4:2 རྩིད་རས་གྱོན་མཁན་སུ་ཡང་རྒྱལ་པོའི་མཁར་སྒོའི་ནང་དུ་འཛུལ་མི་ཆོག་པས། ཁོ་རང་རྒྱལ་པོའི་མཁར་སྒོའི་མདུན་དུ་སླེབས་ནས་འགྲོ་མཚམས་བཞག
EST 4:3 ཡང་རྒྱལ་པོའི་བཀའ་ཤོག་སླེབས་པའི་ལྗོངས་སོ་སོ་དང་ཡུལ་སོ་སོའི་ཡ་ཧུ་དཱ་པ་ཐམས་ཅད་སྡུག་བསྔལ་ཆེན་པོས་མནར་ཞིང་། སྨྱུང་གནས་བསྲུངས་ཏེ་ངུས་པ་དང་། སྐྱོ་གདུང་གི་སྐད་ཆེན་པོ་བཏོན་ནས། མི་མང་པོས་རྩིད་རས་དང་ཐལ་བ་བཏིངས་ནས་དེའི་ནང་དུ་ཉལ་ཏོ། །
EST 4:4 དེ་ནས་རྒྱལ་མོ་ཨེས་སི་ཐེར་གྱི་ཞལ་ཏ་མ་དང་ཉུག་རུམ་པ་རྣམས་ཀྱིས་དོན་དེ་ཁོ་མོར་བཤད་པ་དང་། ཁོ་མོའི་སེམས་ཤིན་ཏུ་སྡུག་སྟེ། མོར་དོ་ཀཱ་ཨི་ལ་རྩིད་རས་འདོར་དགོས་པར་ཞུས་ནས་གོས་གཞན་ཞིག་གསོལ་དུ་བསྐུར་ཡང་ཁོས་དེ་མ་བླངས་སོ། །
EST 4:5 ཨེས་སི་ཐེར་གྱིས་སྔར་རྒྱལ་པོས་ཁོ་མོར་ཞབས་ཞུ་བྱེད་པར་མངགས་པའི་ཉུག་རུམ་པ་ཧ་ཐག་ཅེས་བྱ་བ་བོས་ནས། དོན་དམ་དུ་ཅི་བྱུང་བ་དང་དེ་ལྟར་བྱེད་དགོས་དོན་ཅི་ཡིན་ཤེས་པའི་ཕྱིར། དེ་མོར་དོ་ཀཱ་ཨིའི་རྩར་མངགས་པས།
EST 4:6 ཧ་ཐག་རྒྱལ་པོའི་མཁར་སྒོ་མདུན་གྱི་ཐང་ཆེན་དུ་མོར་དོ་ཀཱ་ཨི་ལ་འཕྲད་པར་སོང་ངོ་། །
EST 4:7 དེར་མོར་དོ་ཀཱ་ཨིས་རང་ལ་ཅི་བྱུང་བ་ཐམས་ཅད་དང་། ཧ་མཱན་གྱིས་ཡ་ཧུ་དཱ་པ་རྣམས་རྩ་མེད་གཏོང་ཕྱིར་རྒྱལ་པོའི་གཏེར་མཛོད་དུ་འབུལ་གྲབས་ཡོད་པའི་རྒྱལ་དངུལ་གྱི་གྲངས་ཀ་ཡང་ཧ་ཐག་ལ་བཤད།
EST 4:8 གཞན་ཡང་སོའུ་སཱན་མཁར་ཡོངས་སུ་ཁྱབ་པ་དང་ཡ་ཧུ་དཱ་པ་རྣམས་རྩ་མེད་གཏོང་བའི་བཀའ་ཤོག་གི་འདྲ་བཤུས་ཀྱང་ཧ་ཐག་ལ་སྤྲད་ནས། ཨེས་སི་ཐེར་ལ་གཟིགས་འབུལ་ཞུ་བ་དང་དེའི་སྐོར་སྨྲ་བར་མ་ཟད། ད་དུང་ཨེས་སི་ཐེར་རྒྱལ་པོའི་སྐུ་མདུན་དུ་སོང་སྟེ་རྒྱལ་པོར་ཞུ་བ་འབུལ་བ་དང་། རང་གི་མི་རྣམས་ཀྱི་ཆེད་དུ་རྒྱལ་པོའི་དྲུང་ནས་སྐྱབས་བཅོལ་ཞུ་དགོས་པའི་དོན་ཧ་ཐག་ལ་ནན་གྱིས་གཏད་དོ། །
EST 4:9 དེ་ནས་ཧ་ཐག་ཕྱིར་སོང་ནས། མོར་དོ་ཀཱ་ཨིའི་གཏམ་ཐམས་ཅད་ཨེས་སི་ཐེར་ལ་ཞུས་སོ། །
EST 4:10 ཨེས་སི་ཐེར་གྱིས་སླར་ཡང་ཧ་ཐག་ལ་མོར་དོ་ཀཱ་ཨི་ལ་འདི་ལྟར་ཞུ་བའི་བཀའ་བསྒོས་པ་སྟེ།
EST 4:11 ཞལ་འབོད་མ་གནང་བར་ཚོམས་ཆེན་ནང་དུ་ཕོ་མོ་སུ་ཞིག་རྒྱལ་པོར་མཇལ་དུ་ཕྱིན་ན། རྒྱལ་པོས་དེ་ལ་གསེར་གྱི་འཁར་བ་བརྐྱངས་ན་མ་གཏོགས་གསོན་མི་ཐུབ་པའི་ཁྲིམས་སྲོལ་གཅིག་རང་ཡོད་པ་ནི། འཁོར་གཡོག་དང་ལྗོངས་སོ་སོའི་ཡུལ་མི་ཀུན་གྱིས་ཤེས་ལ། བདག་ཀྱང་ཁོང་གི་དྲུང་དུ་མ་བོས་པར་ཞག་མ་སུམ་ཅུ་ཙམ་འགོར་ཡོད་ཅེས་པའོ། །
EST 4:12 དེ་དག་གིས་ཨེས་སི་ཐེར་གྱི་གཏམ་མོར་དོ་ཀཱ་ཨི་ལ་བཤད་པ་དང་།
EST 4:13 མོར་དོ་ཀཱ་ཨིས་དེ་རྣམས་བརྒྱུད་ནས་ཨེས་སི་ཐེར་ལ་ལན་དུ། ཡ་ཧུ་དཱ་པ་ཐམས་ཅད་ཀྱི་ནང་ནས་ཁྱོད་གཅིག་པུ་རྒྱལ་པོའི་ཕོ་བྲང་དུ་ཡོད་པའི་དབང་གིས། རྐྱེན་ངན་འདི་ལས་རང་ཉིད་ཐར་ཐུབ་པར་མ་སེམས་ཤིག
EST 4:14 གལ་ཏེ་ཁྱོད་རང་སྐབས་འདིར་ཁ་རོག་བསྡད་ན། ཡ་ཧུ་དཱ་པ་སྐྱོབ་མཁན་ཕྱོགས་གཞན་ནས་འབྱུང་ལ་ཐར་བར་འགྱུར། ཁྱོད་ནི་རང་གི་ཁྱིམ་རྒྱུད་དང་བཅས་མེད་པར་འགྱུར་རོ། །དུས་སྐབས་འདིའི་ཆེད་དུ་ཁྱོད་རང་རྒྱལ་མོའི་གོ་སར་སླེབས་པ་ཡིན་ཡང་སྲིད་ཅེས་སྨྲས་པ་དང་།
EST 4:15 ཨེས་སི་ཐེར་གྱིས་དེ་དག་བརྒྱུད་ནས་མོར་དོ་ཀཱ་ཨི་ལ་ལན་བཏབ་པ་ནི།
EST 4:16 ཁྱོད་རང་སོང་ནས་སོའུ་སཱན་མཁར་ཆེན་དུ་ཡོད་པའི་ཡ་ཧུ་དཱ་པ་ཐམས་ཅད་བསྡུས་ཏེ། ཉིན་ཞག་གསུམ་ལ་ཅི་ཡང་མི་བཟའ་མི་འཐུང་བར་བདག་གི་ཆེད་དུ་སྨྱུང་གནས་སྲུངས་ཤིག ང་རང་དང་ངའི་ཞལ་ཏ་མ་རྣམས་ཀྱིས་ཀྱང་དེ་བཞིན་དུ་སྨྱུང་གནས་བསྲུང་བར་བྱ། དེ་ནས་ཁྲིམས་དང་འགལ་ནའང་བདག་རྒྱལ་པོའི་དྲུང་དུ་འགྲོ་བར་བྱ་སྟེ། གལ་ཏེ་ང་རང་ཤི་ནའང་མི་འཕངས་ཞེས་པས།
EST 4:17 མོར་དོ་ཀཱ་ཨི་ཕར་སོང་ནས་ཨེས་སི་ཐེར་གྱིས་བསྒོས་པ་བཞིན་དུ་ཐམས་ཅད་བསྒྲུབས་སོ། །
EST 5:1 དེ་ནས་ཉིན་གསུམ་པ་ལ། ཨེས་སི་ཐེར་གྱིས་རྒྱལ་མོའི་ན་བཟའ་གསོལ་ཏེ། ཕོ་བྲང་གི་ཚོམས་ཆེན་ནང་རྒྱལ་པོའི་ཕོ་བྲང་གི་དྲང་ཐད་དུ་ལངས་ནས་བསྡད་པ་དང་། རྒྱལ་པོ་ཡང་ཕོ་བྲང་གི་སྒོའི་དྲང་ཐད་ཀྱི་ཁྲི་སྟེང་དུ་བཞུགས་ཡོད་པ་ལ།
EST 5:2 རྒྱལ་མོ་ཨེས་སི་ཐེར་ཚོམས་ཆེན་ནང་དུ་ལངས་འདུག་པ་མཐོང་བ་དང་། ཁོ་མོར་ཐུགས་རྗེས་གཟིགས་ཏེ། རྒྱལ་པོས་གསེར་གྱི་འཁར་བ་ཨེས་སི་ཐེར་གྱི་ཕྱོགས་སུ་བཏེགས་པ་ལ། ཨེས་སི་ཐེར་ཉེ་བར་བཅར་ནས་འཁར་བའི་མགོ་ལ་རེག་པའོ། །
EST 5:3 དེ་ནས་རྒྱལ་པོས་འདི་ལྟར། རྒྱལ་མོ་ཨེས་སི་ཐེར་ཁྱོད་ལ་ཅི་དགོས་སམ། ཁྱོད་ཀྱིས་གང་ཞིག་ཞུས་ཀྱང་རྒྱལ་སྲིད་ཀྱི་ཕྱེད་ཀ་ཡིན་ཡང་ཁྱོད་ལ་སྦྱིན་པར་བྱའོ་ཞེས་གསུངས་པ་དང་།
EST 5:4 ཨེས་སི་ཐེར་གྱིས། གལ་སྲིད་རྒྱལ་པོ་ལགས་ཐུགས་དགྱེས་པ་ཡིན་ན། ཁྱེད་ཉིད་ཧ་མཱན་དང་ལྷན་དུ་བདག་གིས་དེ་རིང་བཤམས་པའི་གསོལ་སྟོན་དུ་ཕེབས་རོགས་མཛོད་ཅེས་ཞུས་པ་ལ།
EST 5:5 རྒྱལ་པོ་ན་རེ། ཧ་མཱན་ལ་མྱུར་དུ་ཨེས་སི་ཐེར་གྱི་ངག་བཞིན་བསྒྲུབ་ཏུ་ཆུག་ཅེས་གསུངས་པ་དང་། ཧ་མཱན་ཁྲིད་ནས་ཨེས་སི་ཐེར་གྱིས་བཤམས་པའི་གསོལ་སྟོན་ལ་ཕེབས་སོ། །
EST 5:6 ཡང་གསོལ་སྟོན་གྱི་སྐབས་སུ་རྒྱལ་པོས་སླར་ཡང་ཨེས་སི་ཐེར་ལ། ཁྱོད་ལ་ཅི་དགོས་ན་གནང་བར་བྱ། ཁྱོད་ཀྱིས་གང་ཞིག་ཞུས་ཀྱང་སྟེར་ངེས་ལ། རྒྱལ་སྲིད་ཀྱི་ཕྱེད་ཀ་ཡིན་ཡང་ཁྱོད་ལ་སྦྱིན་ངེས་ཡིན་ཞེས་གསུངས་པའི་ལན་དུ།
EST 5:7 ཨེས་སི་ཐེར་གྱིས་བདག་གིས་ཞུ་འདོད་པ་ནི།
EST 5:8 གལ་ཏེ་རྒྱལ་པོའི་དྲུང་དུ་བདག་ལ་ཐུགས་རྗེ་ཐོབ་ཅིང་། རྒྱལ་པོས་བདག་གི་རེ་འདོད་ཐམས་ཅད་བསྒྲུབ་པར་བྱེད་ན། རྒྱལ་པོ་ཁྱེད་ཉིད་ཧ་མཱན་དང་མཉམ་དུ་སླར་ཡང་བདག་གིས་བཤམས་པའི་གསོལ་སྟོན་ལ་ཕེབས་རོགས་མཛོད་དང་། སང་ཉིན་བདག་གིས་རྒྱལ་པོའི་དྲི་བ་ལ་ལན་གདབ་བོ་ཞེས་ཞུས་སོ། །
EST 5:9 ཉིན་དེ་ལ་ཧ་མཱན་བློ་བདེ་ཞིང་སེམས་དགའ་སྟེ་སོང་མོད། འོན་ཀྱང་མོར་དོ་ཀཱ་ཨི་རྒྱལ་པོའི་མཁར་སྒོར་ཡར་མི་ལངས་ལ་སྐྲག་པའི་སྣང་བ་ཙམ་ཡང་མེད་པ་མཐོང་ནས་མོར་དོ་ཀཱ་ཨི་ལ་ཤིན་ཏུ་ཁྲོས་ནའང་།
EST 5:10 ཁོང་ཁྲོ་ཁོག་ལ་བཅུག་ནས་ཁྱིམ་དུ་ལོག་ཅིང་། གྲོགས་པོ་རྣམས་དང་རང་གི་ཆུང་མ་ཙེ་རེ་ཟི་འབོད་དུ་བཏང་ངོ་། །
EST 5:11 དེ་ནས་ཧ་མཱན་གྱིས་དེ་དག་ལ། རང་གི་རྒྱུ་འབྱོར་བའི་གཟི་དཔལ་དང་བུ་ཕྲུག་མང་པོ་ཡོད་པ་དང་། རྒྱལ་པོས་ཁོའི་གོ་ས་ཇི་ཙམ་བཏེགས་ཚུལ་དང་། དཔོན་རིགས་དང་རྒྱལ་པོའི་འཁོར་གཡོག་ཀུན་ལས་མཐོ་བར་མཛད་པ་ཐམས་ཅད་སྨྲས་པ་དང་།
EST 5:12 ཡང་ཧ་མཱན་གྱིས། འོ། རྒྱལ་མོ་ཨེས་སི་ཐེར་གྱིས་བཤམས་པའི་གསོལ་སྟོན་ལ་ང་མ་གཏོགས་རྒྱལ་པོ་དང་ལྷན་དུ་སུ་ཡང་སོང་མི་ཆོག སང་ཉིན་ཡང་ང་རང་རྒྱལ་པོ་དང་མཉམ་དུ་སྐུ་མགྲོན་ལ་བོས་པ་ཡིན།
EST 5:13 འོན་ཀྱང་ཡ་ཧུ་དཱ་པ་མོར་དོ་ཀཱ་ཨི་རྒྱལ་པོའི་མཁར་སྒོར་མཐོང་ཐེངས་རེར། འདི་ཐམས་ཅད་བདག་ལ་མཚོན་ན་དོན་སྙིང་ཅི་ཡང་མེད་དོ་ཞེས་སྨྲས་སོ། །
EST 5:14 དེ་ནས་ཁོའི་ཆུང་མ་ཙེ་རེ་ཟི་དང་གྲོགས་པོ་རྣམས་ཀྱིས་ཧ་མཱན་ལ། ཁྲུ་ལྔ་བཅུ་ཅན་གྱི་འཕྱར་ཤིང་ཞིག་བཟོ་རུ་ཆུག་ལ། སང་ཉིན་ཞོགས་པར་མོར་དོ་ཀཱ་ཨི་དེའི་སྟེང་དུ་དཔྱང་བའི་ཕྱིར་རྒྱལ་པོར་ཞུས་ཤིག་དང་། དེ་ནས་ཁྱོད་རང་སེམས་དགའ་བའི་ངང་ནས་རྒྱལ་པོ་དང་མཉམ་དུ་མགྲོན་ལ་སོང་ཆོག་ཅེས་སྨྲས་པ་ན། ཧ་མཱན་ནི་གཏམ་དེ་ལ་དགའ་བས་འཕྱར་ཤིང་བཟོ་རུ་བཅུག་གོ །
EST 6:1 མཚན་མོ་དེར་རྒྱལ་པོ་མནལ་མ་ཁུགས་པས་མི་གཞན་ལ་ལོ་རྒྱུས་ཀྱི་དེབ་ཐེར་འཁྱེར་འོང་བའི་བཀའ་གནང་བ་དང་། དེ་ལ་ཀློག་ཏུ་བཅུག་ནས་ཁོང་གིས་མཉན་ཏོ། །
EST 6:2 སྟེས་དབང་གིས་དཔེ་ཆ་དེའི་ནང་དུ་རྒྱལ་པོའི་ཉུག་རུམ་པའི་ཁྲོད་དུ་པིག་ཐན་དང་ཐེ་རེ་སི་ཞེས་པའི་སྒོ་སྲུང་པ་གཉིས་ཡོད་ཅིང་། དེ་གཉིས་ཀྱིས་རྒྱལ་པོ་ཨ་ཧཱ་ཝེ་རོ་ལ་གནོད་བསྐྱལ་བསམས་ཀྱང་། མོར་དོ་ཀཱ་ཨི་ཡིས་དོན་དེ་སྨྲས་བྱུང་ཞེས་བྲིས་པ་དང་ཕྲད་པས།
EST 6:3 དེར་རྒྱལ་པོས་འདི་ལྟར། དོན་དེའི་ཕྱིར་མོར་དོ་ཀཱ་ཨི་ལ་མཚན་སྙན་གྲགས་དང་ཐོབ་གོ་ས་ཅི་ཞིག་གནང་བ་ཡིན་ཞེས་དྲིས་པ་ལ། ཞབས་ཕྱི་པ་རྣམས་ཀྱིས། དེ་ལ་ཅི་ཡང་མ་གནང་ངོ་ཞེས་ཞུས་སོ། །
EST 6:4 ཡང་རྒྱལ་པོས། ཚོམས་ཆེན་ཕྱི་རུ་སུ་ཞིག་ཡོད་དམ་ཞེས་དྲིས་ཤིང་། ཏག་ཏག་སྐབས་དེར་ཧ་མཱན་ཚོམས་ཆེན་ཕྱི་རུ་སླེབས་ཏེ། རང་གིས་གྲ་སྒྲིག་བྱས་པའི་འཕྱར་ཤིང་གི་སྟེང་དུ་མོར་དོ་ཀཱ་ཨི་དཔྱང་བའི་ཕྱིར་རྒྱལ་པོར་ཞུ་བར་སྒུག་ཡོད་པ་ལ།
EST 6:5 གཞོན་ནུ་རྣམས་ཀྱིས། གཟིགས་དང་། ཧ་མཱན་ར་བའི་ནང་དུ་ལངས་འདུག་ཅེས་ཞུས་པས། རྒྱལ་པོས་ཁོ་རང་ནང་དུ་བོས་ཤོག་ཅེས་བཀའ་བསྒོས་སོ། །
EST 6:6 དེ་ནས་ཧ་མཱན་ནང་དུ་འོངས་པ་དང་། རྒྱལ་པོས་འདི་ལྟར། རྒྱལ་པོ་དགའ་ཞིང་གོང་བཀུར་བྱེད་པའི་མི་ལ་ཅི་བྱེད་པར་རིགས་སམ་ཞེས་དྲིས་པ་ན། ཧ་མཱན་གྱི་སེམས་སུ། རྒྱལ་པོ་མཉེས་ཤིང་གོང་བཀུར་བྱེད་པ་ནི་ང་རང་ལས་གཞན་སུ་ཡོད་དམ་སྙམ་སྟེ།
EST 6:7 ཧ་མཱན་གྱིས་རྒྱལ་པོ་ལ། རྒྱལ་པོ་མཉེས་ཤིང་གོང་བཀུར་བྱེད་པའི་མི་དེ་ལ་ནི།
EST 6:8 རྒྱལ་པོས་མནབས་པའི་ན་བཟའ་དང་། རྒྱལ་པོ་འཆིབས་པའི་ཆིབས་ཆེན་དང་དེའི་པྲོག་ཞུ་དང་བཅས་པ་བཏོན་ཏེ།
EST 6:9 ན་བཟའ་དང་ཆིབས་ཆེན་ནི་དཔོན་རིགས་ཀུན་ལས་ཆེས་བཀུར་འོས་པ་དེ་ལ་གཏོད་པ་དང་། དེས་རྒྱལ་པོ་མཉེས་ཤིང་གོང་བཀུར་བྱེད་པའི་མི་ལ་ན་བཟའ་བསྐོན་ནས། ཆིབས་པར་བསྐྱོན་ཏེ། གྲོང་ཁྱེར་གྱི་ཁྲོམ་སྲང་ཡོངས་ལ་འཁྲིད་པ་དང་། སུ་ཞིག་ལ་རྒྱལ་པོ་མཉེས་ཤིང་གོང་བཀུར་བྱེད་ན། དེ་ལ་འདི་ལྟར་མཛད་དོ་ཞེས་མི་དེའི་མདུན་ནས་བསྒྲག་དགོས་ཞེས་ཞུས་སོ། །
EST 6:10 དེ་ནས་རྒྱལ་པོས་ཧ་མཱན་ལ། ཁྱོད་ཀྱིས་སྨྲས་པའི་གཏམ་བཞིན་དུ། ན་བཟའ་ཁྱེར་ནས་ཆིབས་ཆེན་ཁྲིད་དེ་རྒྱལ་པོའི་མཁར་སྒོར་སྡོད་པའི་ཡ་ཧུ་དཱ་པ་མོར་དོ་ཀཱ་ཨི་ལ་མྱུར་དུ་སྒྲུབས་ཤིག ཁྱོད་ཀྱིས་སྨྲས་པའི་ཚིག་ཀུན་ལས་ཆད་ལུས་གཅིག་ཀྱང་ཡོད་མི་ཆོག་ཅེས་གསུངས་པས།
EST 6:11 ཧ་མཱན་གྱིས་ན་བཟའ་ཁྱེར་ནས་ཆིབས་ཆེན་ཁྲིད་འོངས་ཏེ། མོར་དོ་ཀཱ་ཨི་ལ་བསྐོན་ཞིང་ཆིབས་པར་བསྐྱོན་པ་དང་གྲོང་ཁྱེར་གྱི་ཐང་ཆེན་བརྒྱུད་ནས། རྒྱལ་པོ་མཉེས་ཤིང་གོང་བཀུར་བྱེད་པའི་མི་ལ་འདི་ལྟར་མཛད་དོ་ཞེས་མོར་དོ་ཀཱ་ཨི་ཡི་མདུན་དུ་བསྒྲགས་སོ། །
EST 6:12 ཡང་མོར་དོ་ཀཱ་ཨི་སྔར་བཞིན་རྒྱལ་པོའི་མཁར་སྒོར་ཕྱིར་འོངས་པ་དང་། ཧ་མཱན་ནི་མྱ་ངན་དང་བཅས་མགོ་བཏུམས་ཏེ་མགྱོགས་པོར་རང་ཁྱིམ་དུ་ལོག
EST 6:13 དེར་ཧ་མཱན་གྱིས་རང་གི་ཆུང་མ་ཙེ་རེ་ཟི་དང་གྲོགས་པོ་ཐམས་ཅད་ལ། རང་གི་མགོར་ཅི་ཡོང་བ་ཐམས་ཅད་བཤད་པ་དང་། ཁོའི་གྲོགས་པོའི་ཁྲོད་ཀྱི་ཤེས་རབ་ཅན་དག་དང་ཆུང་མ་ཙེ་རེ་ཟི་ཡིས། ཁྱོད་རང་མོར་དོ་ཀཱ་ཨིའི་མདུན་ནས་ཉམས་བཞིན་འདུག ཁོ་རང་ཡ་ཧུ་དཱ་པའི་རྒྱུད་ནས་ཆད་པ་ཡིན་ན་ཁྱོད་རང་ཁོའི་འགྲན་ཡར་མི་འོང་། དེའི་མདུན་དུ་ཁྱོད་རང་ཉམས་ངེས་ཡིན་ཞེས་སྨྲས་སོ། །
EST 6:14 དེ་དག་གི་གཏམ་མཇུག་མ་རྫོགས་པར་རྒྱལ་པོའི་ཉུག་རུམ་པ་རྣམས་སླེབས་ནས། ཧ་མཱན་མྱུར་དུ་ཨེས་སི་ཐེར་གྱིས་བཤམས་པའི་གསོལ་སྟོན་ལ་ཞུགས་པར་བསྐུལ་ཏོ། །
EST 7:1 རྒྱལ་པོས་ཧ་མཱན་ཁྲིད་ནས་རྒྱལ་མོ་ཨེས་སི་ཐེར་གྱི་གསོལ་སྟོན་ལ་ཕེབས་ཤིང་།
EST 7:2 ཉིན་གཉིས་པའི་སྐྱེམས་མགྲོན་གྱི་སྟེང་དུ་རྒྱལ་པོས་ཡང་བསྐྱར་རྒྱལ་མོ་ཨེས་སི་ཐེར་ལ། ལྕམ་ཨེས་སི་ཐེར་ལགས། ཁྱོད་ལ་ཅི་དགོས་ན་གནང་བར་བྱ། ཁྱོད་ཀྱིས་གང་ཞིག་ཞུས་ཀྱང་རྒྱལ་སྲིད་ཀྱི་ཕྱེད་ཀ་ཡིན་ཡང་ཁྱོད་ལ་གནང་བར་བྱའོ་ཞེས་གསུངས་པ་ལ།
EST 7:3 ཨེས་སི་ཐེར་གྱིས་ལན་དུ། རྒྱལ་པོ་ལགས། བདག་ལ་ཁྱེད་ཀྱིས་སྙིང་རྗེས་གཟིགས་ཤིང་ཁྱེད་རང་ཐུགས་དགྱེས་ན། བདག་གི་སྲོག་སྐྱོབ་པ་ནི་ངའི་རེ་བ་ཡིན། བདག་གི་མི་མང་གི་དོན་དུ་ངས་ཞུ་བ་འབུལ།
EST 7:4 མི་ཞིག་གིས་བདག་དང་བདག་གི་མི་རྣམས་ཚར་གཅོད་པ་དང་། འགུམ་པ་དང་། མེད་པར་བྱ་བའི་ཕྱིར་གཡོ་འཚོང་བྱས་ཚར་འདུག གལ་ཏེ་ངེད་རྣམས་གཞན་ལ་གཡོག་པོ་དང་གཡོག་མོར་བཙོངས་ན། བདག་ཀྱང་ཁ་རོག་འདུག་མོད། འོན་ཀྱང་བདག་ཅག་གི་སྡུག་བསྔལ་ནི་རྒྱལ་པོའི་གྱོང་གུད་དང་བསྡུར་ན་ཅི་ཡང་མ་ཡིན་ཞེས་ཞུས་པར།
EST 7:5 རྒྱལ་པོ་ན་རེ། འདི་ལྟར་སྒྲུབ་ཕོད་པའི་སྙིང་སྟོབས་ཅན་དེ་ནི་སུ་ཡིན། གང་དུ་ཡོད་ཅེས་དྲིས་པ་ན།
EST 7:6 ཨེས་སི་ཐེར་གྱིས། བཙན་གནོན་གཏོང་མཁན་དང་དགྲ་ནག་མི་ངན་དེ་ནི་ཧ་མཱན་འདི་ཡིན་ཞུས་པས། ཧ་མཱན་ནི་རྒྱལ་པོ་དང་རྒྱལ་མོའི་དྲུང་དུ་རྦད་དེ་སྐྲག་པར་གྱུར་ཏོ། །
EST 7:7 དེ་ནས་རྒྱལ་པོ་ཐུགས་ཤིན་ཏུ་ཁྲོས་ཤིང་། གསོལ་སྟོན་དང་ཁ་བྲལ་ནས་ཕོ་བྲང་གི་སྐྱེད་ཚལ་དུ་ཕྱིན། ཧ་མཱན་གྱིས་རྒྱལ་པོས་རང་ཉིད་ལ་ནག་ཉེས་འགེལ་རྒྱུའི་ཐུགས་ཐག་བཅད་པ་ཤེས་པ་དང་། དེར་བསྡད་ནས་རང་སྲོག་སྐྱོབ་ཕྱིར་རྒྱལ་མོ་ཨེས་སི་ཐེར་ལ་ཞུ་བ་ཕུལ་ཏོ། །
EST 7:8 དེ་ནས་རྒྱལ་པོ་ཕོ་བྲང་གི་སྐྱེད་ཚལ་ནས་གསོལ་སྟོན་གྱི་གནས་སུ་ཕྱིར་ཕེབས་པ་དང་། ཨེས་སི་ཐེར་ཡོད་པའི་འབོལ་ཁྲིའི་ཁར་ཧ་མཱན་ཁ་སྦུབ་ཏུ་ལོག་ཡོད་པ་ལ། རྒྱལ་པོས་འདི་ལྟར། ཁོས་ཕོ་བྲང་ནང་ངའི་མདུན་དུ་རྒྱལ་མོར་བརྙས་བཅོས་བྱེད་ཕོད་དམ་ཞེས་གསུངས་མ་ཐག་ཏུ། མི་འགའ་ཞིག་གིས་ཧ་མཱན་གྱི་གདོང་བཀབ་བོ། །
EST 7:9 དེ་ནས་ཉུག་རུམ་པའི་ཁྲོད་ཀྱི་རྒྱལ་པོར་ཞབས་ཕྱི་སྒྲུབ་མཁན་ཧར་པོ་ནཱ་ཟེར་བ་ན་རེ། གཟིགས་དང་། རྒྱལ་པོར་སྙན་ཞུ་ཕུལ་ཞིང་རྒྱལ་པོའི་སྲོག་སྐྱོབ་མཁན་མོར་དོ་ཀཱ་ཨིའི་ཕྱིར་དུ། མཐོ་ཚད་ཁྲུ་ལྔ་བཅུ་ཅན་གྱི་འཕྱར་ཤིང་ཞིག་ཧ་མཱན་གྱིས་རང་ཁྱིམ་དུ་བསླངས་འདུག་ཅེས་ཞུས་པ་ལ། རྒྱལ་པོས། ཧ་མཱན་དེའི་སྟེང་དུ་དཔྱང་བར་གྱིས་ཤིག་ཅེས་བཀའ་བསྒོས་པ་དང་།
EST 7:10 དེ་ནས་མི་འགའ་ཞིག་གིས་མོར་དོ་ཀཱ་ཨིའི་ཆེད་དུ་གྲ་སྒྲིག་བྱས་པའི་འཕྱར་ཤིང་སྟེང་དུ་ཧ་མཱན་དཔྱངས་པ་ན། རྒྱལ་པོའི་ཐུགས་ཁྲོ་ད་གཟོད་ཞི་བར་གྱུར་ཏོ། །
EST 8:1 ཉིན་མོ་དེ་ལ་རྒྱལ་པོ་ཨ་ཧཱ་ཝེ་རོ་ཡིས་ཡ་ཧུ་དཱ་པ་རྣམས་ལ་བཙན་གནོན་གཏོང་མཁན་ཧ་མཱན་གྱི་ཁྱིམ་གཞིས་ནི་རྒྱལ་མོ་ཨེས་སི་ཐེར་ལ་སྤྲད་དོ། །མོར་དོ་ཀཱ་ཨི་ཡང་རྒྱལ་པོའི་དྲུང་དུ་སླེབས། ཅི་ལ་ཞེ་ན། ཨེས་སི་ཐེར་གྱིས་མོར་དོ་ཀཱ་ཨི་དང་རང་ཉིད་ཀྱི་འབྲེལ་བ་ཅི་ཡིན་པ་རྒྱལ་པོར་ཞུས་པས་སོ། །
EST 8:2 ཡང་རྒྱལ་པོས་ཧ་མཱན་གྱི་ལག་ནས་ཕྱིར་བླངས་པའི་ཉིད་ཀྱི་ཕྱག་གི་ཐམ་ག་དང་ལྡན་པའི་མཛུབ་དཀྲིས་ཕུད་ནས་དེ་མོར་དོ་ཀཱ་ཨི་ལ་གནང་ཞིང་། ཨེས་སི་ཐེར་གྱིས་ཧ་མཱན་གྱི་ཁྱིམ་གཞིས་མོར་དོ་ཀཱ་ཨི་ལ་བདག་གཉེར་བྱེད་དུ་བཅུག་གོ །
EST 8:3 ཨེས་སི་ཐེར་གྱིས་སླར་ཡང་རྒྱལ་པོའི་ཞབས་དྲུང་དུ་བཏུད་ནས། སྤྱན་ཆབ་བཞུར་བཞིན་སྨྲེ་སྔགས་བཏོན་ཅིང་། ཨ་གག་པ་ཧ་མཱན་གྱིས་ཡ་ཧུ་དཱ་པ་ལ་གནོད་བསྐྱལ་བའི་གྲོས་ངན་དེ་མེད་པར་མཛད་ཕྱིར་ནན་གྱིས་ཞུས་སོ། །
EST 8:4 དེ་ནས་རྒྱལ་པོས་ཨེས་སི་ཐེར་གྱི་ཕྱོགས་སུ་གསེར་གྱི་འཁར་བ་བཏེགས་པས། ཨེས་སི་ཐེར་རྒྱལ་པོའི་དྲུང་དུ་ཡར་ལངས་ནས་འདི་ལྟར།
EST 8:5 གལ་ཏེ་རྒྱལ་པོ་ཐུགས་དགྱེས་ཏེ་བདག་ལ་སྙིང་རྗེས་གཟིགས་པ་དང་། ཞུ་བ་འདི་རྒྱལ་པོས་ལུགས་དང་མཐུན་པར་དགོངས་ཤིང་རྒྱལ་པོ་བདག་ལ་མོས་ན། ཨ་གག་པ་ཧམ་མེ་དཱ་ཐའི་བུ་ཧ་མཱན་གྱིས་རྒྱལ་པོའི་ལྗོངས་སོ་སོའི་ཡ་ཧུ་དཱ་པ་རྣམས་ཚར་གཅོད་པར་བཀྲམས་པའི་ལྐོག་ཇུས་ཀྱི་བཀའ་ཤོག་དེ་མེད་པར་བཟོ་ཆེད། སླར་ཡང་བཀའ་མཆིད་གནང་བར་མཛོད།
EST 8:6 བདག་གི་མི་རྣམས་ལ་འབྱུང་བར་འགྱུར་བའི་གནོད་འཚེ་དེར་ངས་ཇི་ལྟར་བལྟ་ནུས་སམ། བདག་གི་རུས་རྒྱུད་རྣམས་མེད་པར་བྱེད་པ་དེ་ངས་ཇི་ལྟར་བཟོད་ནུས་སམ་ཞེས་ཞུས་སོ། །
EST 8:7 དེར་རྒྱལ་པོ་ཨ་ཧཱ་ཝེ་རོ་ཡིས་རྒྱལ་མོ་ཨེས་སི་ཐེར་དང་། ཡ་ཧུ་དཱ་པ་མོར་དོ་ཀཱ་ཨི་གཉིས་ལ་འདི་ལྟར། ལྟོས་ཤིག ཧ་མཱན་གྱིས་ཡ་ཧུ་དཱ་པ་རྣམས་ལ་གནོད་བསྐྱལ་བསམས་པས། ངས་ཁོའི་ཁྱིམ་གཞིས་ཨེས་སི་ཐེར་ལ་སྤྲད་པ་དང་། ཧ་མཱན་ཡང་འཕྱར་ཤིང་སྟེང་དུ་དཔྱངས་པ་ཡིན།
EST 8:8 ད་ལྟ་ཁྱོད་གཉིས་ཀྱིས་རང་གི་འདོད་མོས་བཞིན། རྒྱལ་པོ་ངའི་མིང་ལ་བརྟེན་ནས་ཡ་ཧུ་དཱ་པ་རྣམས་ལ་བཀའ་མཆིད་ཕྲིས་ལ། བདག་གི་མཛུབ་དཀྲིས་ཀྱི་ཕྱག་རྒྱ་ཐོབས་ཤིག ཅིའི་ཕྱིར་ཞེ་ན། རྒྱལ་པོའི་མིང་ལ་བརྟེན་ནས་བྲིས་ཤིང་རྒྱལ་པོའི་མཛུབ་དཀྲིས་ཀྱི་ཕྱག་རྒྱ་བཏབ་པའི་བཀའ་ཤོག་ནི་མེད་པར་བཟོ་མི་ནུས་སོ་ཞེས་གསུངས་སོ། །
EST 8:9 དེ་ནས་ཟླ་བ་གསུམ་པ་སྟེ་སི་ཝཱན་ཟླ་བའི་ཚེས་ཉེར་གསུམ་ལ། རྒྱལ་པོའི་དྲུང་ཡིག་པ་རྣམས་བོས་ཡོང་ནས། མོར་དོ་ཀཱ་ཨིའི་བཀའ་བཞིན་དུ་ལྗོངས་སོ་སོའི་ཡི་གེ་དང་མི་རིགས་སོ་སོའི་སྐད་དང་། ཡ་ཧུ་དཱ་པའི་སྐད་དང་ཡི་གེ་ནང་བཀའ་མཆིད་བྲིས་ཏེ། རྒྱ་གར་ནས་གུ་ཤ་བྱ་བའི་ཡུལ་གྱི་བར་དུ་ཡོད་པའི་ལྗོངས་བརྒྱ་དང་ཉེར་བདུན་གྱི་ནང་དུ་གནས་པའི་ཡ་ཧུ་དཱ་པ་དང་། སྤྱི་དཔོན་རྣམས་དང་། འགོ་བདག་དང་དཔོན་རིགས་རྣམས་ལ་བསྒྲགས་སོ། །
EST 8:10 མོར་དོ་ཀཱ་ཨི་ཡིས་རྒྱལ་པོ་ཨ་ཧཱ་ཝེ་རོའི་མཚན་ལ་བརྟེན་ནས་བྲིས་པའི་བཀའ་ཤོག་ལ་རྒྱལ་པོའི་མཛུབ་དཀྲིས་ཀྱིས་ཕྱག་རྒྱ་བཏབ་ཅིང་། འགྲོས་མྱུར་བའི་ཆིབས་ཆེན་ཞོན་མཁན་ལ་བསྐུར་ནས་ཡུལ་སོ་སོར་བཏང་ངོ་། །
EST 8:11 དེའང་རྒྱལ་པོས་ལྗོངས་དང་གྲོང་ཁྱེར་སོ་སོའི་ཡ་ཧུ་དཱ་པ་ཚང་མ་ཉིན་གཅིག་གི་རིང་། ཟླ་བ་བཅུ་གཉིས་པ་སྟེ་ཨ་དཱར་ཟླ་བའི་ཚེས་བཅུ་གསུམ་ལ་འཚོག་དགོས་ཤིང་། རྒྱལ་པོ་ཨ་ཧཱ་ཝེ་རོ་ཡིས་ལྗོངས་སོ་སོར་ཡོད་པའི་ཡ་ཧུ་དཱ་པ་རྣམས་ཀྱིས་རང་སྲོག་སྐྱོབ་པ་དང་། ལྗོངས་དང་གྲོང་ཁྱེར་སོ་སོའི་ནང་དུ་ཡ་ཧུ་དཱ་པར་རྒོལ་བར་འགྱུར་བའི་དམག་དཔུང་དང་། དེ་དག་གི་བུད་མེད་དང་བུ་ཕྲུག་བཅས་པ་ཚར་གཅོད་པ་དང་། འགུམ་པ་དང་། མེད་པར་བྱེད་པ་དང་། དེ་དག་གི་རྒྱུ་ནོར་འཕྲོག་བཅོམ་བཏང་ཆོག་པའི་དགོངས་འཁྲོལ་གནང་ཡོད་པ་ཡིན་ནོ། །
EST 8:13 བཀའ་ཤོག་འདྲ་བཤུས་བགྱིས་ནས་ལྗོངས་སོ་སོར་བཀྲམས་པ་དང་མི་མང་སོ་སོར་ཁྱབ་བསྒྲགས་བྱས་ཤིང་། ཡ་ཧུ་དཱ་པ་རྣམས་ཀྱིས་དགྲ་ནག་ལ་ཤ་འཁོན་ལེན་པའི་ཉིན་དེར་བསྒུག་ཅིང་སྟ་གོན་བྱེད་པའི་ཕྱིར་ཡིན།
EST 8:14 དེ་ནས་འགྲོས་མྱུར་བའི་ཆིབས་ཆེན་ལ་ཞོན་པའི་བང་ཆེན་པ་རྣམས་རྒྱལ་པོའི་བཀའ་བཞིན་དུ་ཇི་མྱུར་གྱིས་སོང་བ་དང་། བཀའ་མཆིད་དེ་སོའུ་སཱན་མཁར་ཆེན་དུ་བསྒྲགས་སོ། །
EST 8:15 མོར་དོ་ཀཱ་ཨིས་རྒྱལ་པོའི་ན་བཟའ་དཀར་ལ་སྔོ་བ་ཞིག་གྱོན་པ་དང་། མགོ་ལ་གསེར་གྱི་ཅོད་པན་ཆེན་པོ་ཞིག་དང་། སོ་རས་སྲབ་བུའི་ལྭ་རིང་རྒྱ་སྨུག་ཅིག་གྱོན་ཏེ། རྒྱལ་པོའི་མདུན་ནས་ཕྱི་རོལ་ཏུ་སོང་བ་ན། སོའུ་སཱན་མཁར་ཆེན་གྱི་མི་རྣམས་ཀྱིས་དགའ་མགུ་རང་བའི་འབོད་སྒྲ་བསྒྲགས།
EST 8:16 ཡ་ཧུ་དཱ་པ་རྣམས་ལ་གཟི་བརྗིད་ཐོབ་ཅིང་། དགའ་དགའ་སྐྱིད་སྐྱིད་ཀྱིས་བཀུར་བསྟི་ཡང་རེག་གོ །
EST 8:17 རྒྱལ་པོའི་བཀའ་སླེབས་པའི་ལྗོངས་དང་གྲོང་ཁྱེར་རེ་རེའི་ནང་དུ། ཡ་ཧུ་དཱ་པ་རྣམས་དགའ་ཞིང་གསོལ་སྟོན་བཤམས་པ་དང་། ཉིན་དེ་ནི་དུས་ཆེན་དུ་གཏན་འཁེལ་བྱས་ལ། ཡ་ཧུ་དཱ་པ་ལ་སྐྲག་ནས་རྒྱལ་ཁབ་དེའི་མི་མང་པོ་ཡང་ཁོ་ཚོའི་གྲས་སུ་ཞུགས་སོ། །
EST 9:1 དེ་ནས་ཟླ་བ་བཅུ་གཉིས་པ་སྟེ་ཨ་དཱར་ཟླ་བའི་ཚེས་བཅུ་གསུམ་ལ། རྒྱལ་པོའི་བཀའ་ལག་བསྟར་བྱེད་པའི་དུས་ལ་སླེབས་ཏེ། དགྲ་བོས་ཡ་ཧུ་དཱ་པ་རྣམས་དབང་དུ་བསྡུ་བར་རེ་སྒུག་བྱས་ནའང་། དེ་ལས་ལྡོག་སྟེ། ཡ་ཧུ་དཱ་པ་རྣམས་ཀྱིས་རང་ལ་སྡང་བའི་མི་རྣམས་དབང་དུ་བསྡུས་སོ། །
EST 9:2 ཡ་ཧུ་དཱ་པ་རྣམས་རྒྱལ་པོ་ཨ་ཧཱ་ཝེ་རོའི་ལྗོངས་སོ་སོའི་གྲོང་ཁྱེར་ནང་དུ་འཚོགས་པ་དང་། ཁོ་རྣམས་ལ་གནོད་སྐྱེལ་མཁན་ཐམས་ཅད་བསད་ཅིང་། མི་ཐམས་ཅད་དེ་དག་ལ་འཇིགས་པས་སུས་ཀྱང་འགོག་རྒོལ་བྱེད་མ་ནུས་སོ། །
EST 9:3 དེ་ནས་ལྗོངས་སོ་སོའི་དཔོན་རིགས་དང་སྤྱི་དཔོན། འགོ་དཔོན། རྒྱལ་པོའི་ལས་གཉེར་པ་ཀུན་མོར་དོ་ཀཱ་ཨི་ལ་སྐྲག་པའི་རྐྱེན་གྱིས་ཡ་ཧུ་དཱ་པ་རྣམས་ལ་དཔུང་གྲོགས་བྱས་སོ། །
EST 9:4 ཡང་མོར་དོ་ཀཱ་ཨི་ནི་རྒྱལ་པོའི་ཕོ་བྲང་དུ་ཆེན་པོར་གྱུར་ཏེ། ཁོའི་སྙན་གྲགས་ལྗོངས་སོ་སོར་ཁྱབ་ཅིང་། ཁོའི་དབང་ཤུགས་ཉིན་རེ་ནས་ཉིན་རེར་ཆེ་རུ་རྒྱས་སོ། །
EST 9:5 ཡ་ཧུ་དཱ་པ་རྣམས་ཀྱིས་དགྲ་ནག་ཐམས་ཅད་རལ་གྲིས་བརྒྱབ་ནས་བསད་ཅིང་མེད་པར་བྱས་པ་དང་། རང་ལ་སྡང་བ་ཀུན་ལ་འདོད་པ་ལྟར་དུ་བྱས་སོ། །
EST 9:6 ཡ་ཧུ་དཱ་པས་སོའུ་སཱན་མཁར་དུ་མི་ལྔ་བརྒྱ་བསད་ནས་མེད་པར་བྱས་སོ། །
EST 9:7 ཁོ་རྣམས་ཀྱིས་པཱར་ཤན་དཱ་ཐ་དང་། དལ་ཕོན། ཨ་སི་པཱ་ཐཱ།
EST 9:8 ཕོ་ར་ཐཱ། ཨ་དཱལ་ཡ། ཨ་རི་དཱ་ཐ།
EST 9:9 པར་མས་ཏཱ། ཨ་རི་ས་ཨི། ཨ་རི་དཱ་ཨི། ཝ་ཡེ་ཟ་ཐཱ་བཅས་བསད།
EST 9:10 དེ་བཅུ་པོ་ནི་ཧམ་མེ་དཱ་ཐའི་ཚ་བོ་དང་། ཡ་ཧུ་དཱ་པ་རྣམས་ལ་བཙན་གནོན་གཏོང་མཁན་ཧ་མཱན་གྱི་བུ་ཡིན། འོན་ཀྱང་ཡ་ཧུ་དཱ་པ་ཚོས་ཁོ་ཚོའི་རྒྱུ་ནོར་ལ་ལག་པས་མ་རེག་གོ །
EST 9:11 ཉིན་དེར། སོའུ་སཱན་མཁར་དུ་བསད་པའི་མིའི་བསྡོམས་གྲངས་ནི་རྒྱལ་པོའི་དྲུང་དུ་རྩིས་སྤྲོད་ཞུས་སོ། །
EST 9:12 རྒྱལ་པོས་རྒྱལ་མོ་ཨེས་སི་ཐེར་ལ། ཡ་ཧུ་དཱ་པ་རྣམས་ཀྱིས་སོའུ་སཱན་མཁར་དུ་མི་ལྔ་བརྒྱ་བསད་པ་དང་། ཧ་མཱན་གྱི་བུ་བཅུ་པོའང་བསད་དེ་མེད་པར་བྱས་པས། ལྗོངས་གཞན་རྣམས་སུ་དེ་དག་གིས་ཅི་བྱས་མི་ཤེས། ཁྱོད་ལ་ད་དུང་ཅི་དགོས་ནའང་ངས་གནང་བར་བྱ། ད་དུང་ཞུ་བ་ཅི་ཞིག་ཡོད་ཀྱང་བདག་གིས་བསྒྲུབ་པར་བྱའོ་ཞེས་སྨྲས་སོ། །
EST 9:13 དེ་ནས་ཨེས་སི་ཐེར་གྱིས། གལ་ཏེ་རྒྱལ་པོའི་ཐུགས་དགྱེས་ན། སོའུ་སཱན་མཁར་དུ་ཡོད་པའི་ཡ་ཧུ་དཱ་པ་རྣམས་ལ། སང་ཉིན་ཡང་དེ་རིང་གི་བཀའ་བཞིན་བྱེད་དུ་འཇུག་པ་དང་། ད་དུང་ཧ་མཱན་གྱི་བུ་བཅུ་པོའི་བེམ་པོ་འཕྱར་ཤིང་སྟེང་དཔྱང་བར་མཛོད་ཅེས་ཞུས་པས།
EST 9:14 རྒྱལ་པོས་ཆོག་མཆན་གནང་ནས་བཀའ་ཤོག་སོའུ་སཱན་ཡོངས་ལ་ཁྱབ་ཅིང་། ཧ་མཱན་གྱི་བུ་བཅུ་པོའི་བེམ་པོ་ཡང་འཕྱར་ཤིང་སྟེང་དཔྱངས་པ་རེད།
EST 9:15 དེ་ནས་སོའུ་སཱན་མཁར་དུ་ཡོད་པའི་ཡ་ཧུ་དཱ་པ་རྣམས་ཨ་དཱར་ཟླ་བའི་ཚེས་བཅུ་བཞི་ལའང་གནས་དེར་འདུས་ཏེ། མི་སུམ་བརྒྱ་བསད་ཅིང་རྒྱུ་ནོར་འཕྲོག་བཅོམ་མ་བྱས་སོ། །
EST 9:16 ཡང་རྒྱལ་པོའི་ལྗོངས་སོ་སོར་ཡོད་པའི་ཡ་ཧུ་དཱ་པ་གཞན་རྣམས་ཀྱང་འདུས་ཏེ། རང་གི་ཚེ་སྲོག་ལ་སྲུང་སྐྱོབ་བྱས་ཤིང་། དགྲ་ལས་ཐར་ཏེ་ཞི་བར་གནས་པ་དང་། རང་ལ་སྡང་བ་རྣམས་ལས་ཁྲི་བདུན་དང་སྟོང་ལྔ་བསད། འོན་ཀྱང་རྒྱུ་ནོར་འཕྲོག་བཅོམ་མ་བྱས་སོ། །
EST 9:17 ཨ་དཱར་ཟླ་བའི་ཚེས་བཅུ་གསུམ་ལ་དེ་ལྟར་བྱས་ཤིང་ཚེས་བཅུ་བཞི་ལ་ངལ་གསོ་བྱས་པ་དང་། ཉིན་མོ་དེ་ནི་དགའ་སྤྲོའི་དུས་ཆེན་ལ་གཏན་འཁེལ་བྱས་སོ། །
EST 9:18 ཡིན་ནའང་། སོའུ་སཱན་མཁར་དུ་ཡོད་པའི་ཡ་ཧུ་དཱ་པ་རྣམས་ཚེས་བཅུ་གསུམ་དང་བཅུ་བཞི་གཉིས་པོར་འདུས་ནས། ཚེས་བཅོ་ལྔ་ལ་ངལ་གསོ་བྱས་ཤིང་། ཉིན་མོ་དེ་ནི་དགའ་སྤྲོའི་དུས་ཆེན་ལ་གཏན་འཁེལ་བྱས་སོ། །
EST 9:19 དེའི་ཕྱིར། མཁར་གྱང་མེད་པའི་ཡུལ་ཚོའམ་གྲོང་རྡལ་ལ་གནས་པའི་ཡ་ཧུ་དཱ་པ་རྣམས་ཀྱིས། ཨ་དཱར་ཟླ་བའི་ཚེས་བཅུ་བཞི་ནི་གསོལ་སྟོན་བཤམས་ནས་སྤྲོ་སྐྱིད་གཏོང་བའི་ཉིན་བཟང་དུ་གཏན་འཁེལ་བྱས་ཤིང་། གཅིག་གིས་གཅིག་ལ་ལེགས་སྐྱེས་རྫོང་བའོ། །
EST 9:20 མོར་དོ་ཀཱ་ཨི་ཡིས་དོན་དེ་རྣམས་ཟིན་ཐོར་བཀོད་ནས་རྒྱལ་པོ་ཨ་ཧཱ་ཝེ་རོའི་ལྗོངས་སོ་སོ་སྟེ་ཐག་ཉེ་རིང་གང་སར་གནས་པའི་ཡ་ཧུ་དཱ་པ་ཐམས་ཅད་ལ་ཡི་གེ་བསྐུར་ཞིང་།
EST 9:21 ཨ་དཱར་ཟླ་བའི་ཚེས་བཅུ་བཞི་དང་བཅོ་ལྔ་གཉིས་པོ་ལོ་ལྟར་དུ་བརྩི་སྲུང་བྱེད་དགོས་པ་དང་།
EST 9:22 ཉིན་དེ་གཉིས་ནི་ཡ་ཧུ་དཱ་པ་རྣམས་རང་གི་དགྲ་བོ་ལས་ཐར་ནས་ཞི་བདེ་ཐོབ་པ་དང་། སྡུག་བསྔལ་ནས་དགའ་སྤྲོ་དང་། མྱ་ངན་ནས་བདེ་སྐྱིད་དུ་གྱུར་པའི་ཉིན་བཟང་པོར་བརྩི་བར་མ་ཟད། ཉིན་དེ་གཉིས་ལ་གསོལ་སྟོན་བཤམས་ནས་སྤྲོ་སྐྱིད་གཏོང་བ་དང་། གཅིག་གིས་གཅིག་ལ་ལེགས་སྐྱེས་རྫོང་བ། དབུལ་ཕོངས་ལ་སྦྱིན་པ་གཏོང་བར་བསྒོས་སོ། །
EST 9:23 དེ་ནས་ཡ་ཧུ་དཱ་པ་རྣམས་ཀྱིས་མོར་དོ་ཀཱ་ཨིས་ཁོ་རང་ཚོར་བྲིས་པའི་ཡི་གེ་བཞིན་དུ་བྱེད་པ་དང་། ཐོག་མར་ཇི་ལྟར་བསྲུངས་པ་བཞིན་ཉིན་མོ་དེ་གཉིས་བསྲུང་བར་ཁས་བླངས་སོ། །
EST 9:24 ཅིའི་ཕྱིར་ཞེ་ན། ཡ་ཧུ་དཱ་པ་རྣམས་ལ་བཙན་གནོན་གཏོང་མཁན་ཏེ་ཨ་གག་པ་ཧམ་མེ་དཱ་ཐའི་བུ་ཧ་མཱན་གྱིས། ཡ་ཧུ་དཱ་པ་རྣམས་མེད་པར་བྱེད་ཆེད་གྲོས་ངན་བཏབ་ཅིང་པུར་བྱ་བའི་རྒྱན་བླངས་ནའང་།
EST 9:25 གྲོས་ངན་དེ་རྒྱལ་པོར་ཞུས་པ་ལ། རྒྱལ་པོས་བཀའ་མཆིད་བསྩལ་ནས་བཀའ་བསྒོས་པ་དང་། ཡ་ཧུ་དཱ་པ་རྣམས་མེད་པར་བཟོ་བའི་ཧ་མཱན་གྱི་གྲོས་ངན་དེ་ཁོ་རང་གི་མགོ་ལ་བབས་ཤིང་། ཁོ་དང་ཁོའི་བུ་ཐམས་ཅད་འཕྱར་ཤིང་སྟེང་དཔྱངས་པ་རེད།
EST 9:26 དེའི་ཕྱིར། ཡ་ཧུ་དཱ་པ་རྣམས་ཀྱིས་པུར་གྱི་མིང་ལྟར་ཉིན་འདི་གཉིས་ལ་པུ་རིམ་ཞེས་བཏགས་སོ། །དེ་ཡང་ཡི་གེ་དེའི་ཚིག་དང་། ཁོ་ཚོ་རང་གིས་མཐོང་བ་དང་། ཁོ་ཚོ་རང་ཉིད་ཕྲད་པ་ལ་བརྟེན་ནས།
EST 9:27 རང་ཉིད་དང་རང་གི་བུ་རྒྱུད་དང་། རང་གི་ཁྲོད་དུ་འདྲེས་པ་ཐམས་ཅད་ཀྱིས་ལོ་རེ་བཞིན་ཡིག་ཐོག་ཏུ་བཀོད་པ་ལྟར་དུ། དུས་ལྟར་ཉིན་དེ་གཉིས་ཀ་བསྲུང་བར་ཁས་བླངས་ཤིང་ནམ་ཡང་མ་ཆད་དོ། །
EST 9:28 ལྗོངས་དང་གྲོང་ཁྱེར་སོ་སོ་དང་། དུས་རབས་རེ་རེ་དང་། ཁྱིམ་ཚང་རེ་རེ་བཅས་ཐམས་ཅད་ཀྱིས་ཉིན་མོ་འདི་གཉིས་དྲན་གསོ་བྱས་ཤིང་བསྲུངས་པ་དང་། པུ་རིམ་གྱི་ཉིན་མོ་འདི་གཉིས་ཡ་ཧུ་དཱ་པའི་ཁྲོད་དུ་ནམ་ཡང་ཆད་མི་རུང་བ་དང་། ཁོ་ཚོའི་མི་རབས་རྗེས་མ་རྣམས་ཀྱིས་ཀྱང་གཏན་ནས་བརྗེད་མི་ཆོག་པར་མཛད་དོ། །
EST 9:29 དེ་ནས་ཨ་བི་ཧ་ཡིལ་གྱི་བུ་མོ་སྟེ་རྒྱལ་མོ་ཨེས་སི་ཐེར་དང་། ཡ་ཧུ་དཱ་པ་མོར་དོ་ཀཱ་ཨི་གཉིས་ཀྱིས་དབང་ཆ་ཡོངས་རྫོགས་སྤྱད་ནས་པུ་རིམ་གྱི་སྐོར་ལ་འཕྲིན་ཡིག་གཉིས་པ་བྲིས་ཤིང་།
EST 9:30 ཞི་དུལ་ཟོལ་མེད་ཀྱི་ཚིག་གིས་རྒྱལ་པོ་ཨ་ཧཱ་ཝེ་རོའི་རྒྱལ་ཁམས་སུ་ལྗོངས་བརྒྱ་དང་ཉེར་བདུན་གྱི་ནང་དུ་ཡོད་པའི་ཡ་ཧུ་དཱ་པ་ཐམས་ཅད་ལ་ཡི་གེ་བསྐུར་ནས།
EST 9:31 ཡ་ཧུ་དཱ་པ་མོར་དོ་ཀཱ་ཨི་དང་རྒྱལ་མོ་ཨེས་སི་ཐེར་གཉིས་ཀྱི་གཏན་ཁེལ་བཞིན་དུ། དུས་ལྟར་པུ་རིམ་ཞེས་པའི་ཉིན་མོ་འདི་གཉིས་བརྩི་སྲུང་བྱེད་དགོས་པ་དང་། ཡང་ཡ་ཧུ་དཱ་པ་རྣམས་ཀྱིས་རང་ཉིད་དང་བུ་རྒྱུད་རྣམས་ལ་ཁས་བླངས་པ་བཞིན་དུ། སྨྱུང་གནས་བསྲུང་བ་དང་ཞུ་འབོད་བྱེད་པར་བསྐུལ་ཏོ། །
EST 9:32 ཡང་ཨེས་སི་ཐེར་གྱིས་པུ་རིམ་ཞེས་པའི་དུས་ཆེན་བསྲུང་དགོས་པའི་སྲོལ་ཡིག་གཏན་ལ་ཕབ་ཅིང་། དོན་དེ་ཡང་དེབ་ཐེར་ནང་དུ་བཀོད་ཡོད་དོ། །
EST 10:1 དེ་ཡང་རྒྱལ་པོ་ཨ་ཧཱ་ཝེ་རོ་ཡིས་སྐམ་ས་དང་རྒྱ་མཚོའི་གླིང་ཕྲན་རྣམས་ལ་དཔྱ་ཁྲལ་བཞག་གོ །
EST 10:2 ཡང་ཁོང་གིས་དབང་དང་མཐུ་སྟོབས་ལ་བརྟེན་ནས་མཛད་པ་ཐམས་ཅད་དང་། ཁོང་གིས་མོར་དོ་ཀཱ་ཨི་ཆེན་པོར་མཛད་དེ་གོ་ས་གནང་བའི་ལོ་རྒྱུས་ནི། མཱ་ཏི་དང་ཏ་ཟིག་གི་རྒྱལ་པོ་རྣམས་ཀྱི་རྒྱལ་རབས་ཀྱི་དེབ་ཐེར་ནང་དུ་བྲིས་ཡོད་པ་མ་ཡིན་ནམ།
EST 10:3 ཡ་ཧུ་དཱ་པ་མོར་དོ་ཀཱ་ཨི་ཡི་གོང་དུ་རྒྱལ་པོ་ཨ་ཧཱ་ཝེ་རོ་ལས་མེད་དེ། ཡ་ཧུ་དཱ་པའི་ཁྲོད་དུ་ཆེན་པོ་ཡིན་པ་དང་། རང་གི་མི་རྣམས་ཀྱི་ནང་དུ་འདང་ཆེན་ཞིག་ཡིན་ལ། དེས་རང་གི་མི་རྣམས་ཀྱི་ཕན་ཁེ་སྤེལ་བར་བརྩོན་ཏེ། མི་རབས་རྗེས་མ་ཐམས་ཅད་ཀྱི་དོན་དུ་བདེ་སྐྱིད་བསྙེགས་པའོ།། །།
JOB 1:1 ཨུ་ཟཱ་ཞེས་བྱ་བའི་ཡུལ་ཁམས་སུ་ཨེས་ཡོབ་ཅེས་པའི་སྐྱེས་བུ་ཞིག་ཡོད་ཅིང་། དེ་ནི་སྐྱོན་གྱི་དྲི་མས་མ་གོས་པ་དང་སེམས་རྒྱུད་དྲང་བ། དཀོན་མཆོག་ལ་གུས་ཤིང་འཇིགས་པ་དང་ངན་པའི་ལས་ལ་འཛེམ་པ་ཞིག་ཡིན།
JOB 1:2 དེ་ལ་བུ་བདུན་དང་བུ་མོ་གསུམ་སྐྱེས་ཡོད།
JOB 1:3 དེའི་རྒྱུ་ནོར་ལ་ར་ལུག་བདུན་སྟོང་དང་། རྔ་མོང་སུམ་སྟོང་། བ་གླང་དོར་ལྔ་བརྒྱ། བོང་མོ་ལྔ་བརྒྱ། གཡོག་འཁོར་མང་པོ་བཅས་ཡོད་པས། སྐྱེས་བུ་དེ་ཤར་ཕྱོགས་པ་རྣམས་ལས་མཆོག་ཏུ་གྱུར་ཏོ། །
JOB 1:4 ཡང་དེའི་བུ་རྣམས་ཀྱིས་དུས་བཅད་ལྟར་རེ་རེའི་ཁྱིམ་དུ་གསོལ་སྟོན་ཤོམ་རེས་བྱེད་པ་དང་། ལྷན་ཅིག་ཏུ་བཟའ་བཏུང་ལ་རོལ་བའི་ཕྱིར་ལྕམ་སྲིང་གསུམ་པོ་འབོད་དུ་མི་བཏང་བ་རེད།
JOB 1:5 གསོལ་སྟོན་གྱི་ཉིན་རྣམས་རྫོགས་པའི་དུས་སུ། ཨེས་ཡོབ་ཀྱིས་མི་མངགས་ནས་དེ་དག་ལ་གཙང་སྦྲ་བྱེད་དུ་བཅུག་པ་རེད། ཁོང་ཞོགས་པ་ཡར་ལངས་ནས་དེ་རྣམས་ཀྱི་གྲངས་ཀ་བཞིན་དུ་སྦྱིན་སྲེག་གི་མཆོད་པ་རྣམས་ཕུལ། ཅིའི་ཕྱིར་ཞེ་ན། ཁོང་གིས་ངའི་བུ་རྣམས་ཀྱིས་ཉེས་པ་བྱས་ཏེ། སེམས་ནས་དཀོན་མཆོག་ལ་སྨད་ཀྱང་སྲིད་སྙམ་དུ་བསམས་པ་རེད། ཨེས་ཡོབ་ཀྱིས་རྒྱུན་དུ་དེ་ལྟར་བྱེད་པའོ། །
JOB 1:6 ཉིན་ཞིག་ལ་དཀོན་མཆོག་གི་ཕོ་ཉ་རྣམས་དཀོན་མཆོག་ཡ་ཝཱེའི་དྲུང་དུ་བྱོན་པ་དང་། བདུད་སཱ་ཏན་བྱ་བ་ཡང་དེ་དག་གི་ཁྲོད་དུ་འོངས།
JOB 1:7 དཀོན་མཆོག་ཡ་ཝཱེས་སཱ་ཏན་ལ་འདི་སྐད་དུ། ཁྱོད་གང་ནས་འོངས་པ་ཡིན་ཞེས་དྲིས་པར། སཱ་ཏན་གྱིས་དཀོན་མཆོག་ཡ་ཝཱེ་ལ་ཞུ་ལན་དུ། ང་ནི་ས་གཞི་རུ་ཡར་མར་རྒྱུ་ཞིང་དེ་རུ་འཁོར་ནས་འོངས་པ་ཡིན་ཞེས་ཞུས་པ་དང་།
JOB 1:8 དཀོན་མཆོག་ཡ་ཝཱེས་སཱ་ཏན་ལ་འདི་སྐད་དུ། ཁྱོད་ཀྱིས་ངའི་ཞབས་ཕྱི་ཨེས་ཡོབ་ལ་ཞིབ་ཏུ་བལྟས་སམ། ས་སྟེང་དུ་དེ་དང་འདྲ་བའི་མི་སྐྱོན་གྱི་དྲི་མས་མ་གོས་པ་དང་སེམས་རྒྱུད་དྲང་བ། དཀོན་མཆོག་ལ་གུས་ཤིང་འཇིགས་པ། ངན་པའི་ལས་ལ་འཛེམ་པ་གཞན་སུ་ཡང་མེད་ཅེས་གསུངས།
JOB 1:9 དེ་ནས་སཱ་ཏན་གྱིས་དཀོན་མཆོག་ཡ་ཝཱེ་ལ་ཞུ་ལན་དུ། ཨེས་ཡོབ་ནི་དོན་མེད་པར་དཀོན་མཆོག་ལ་གུས་ཤིང་འཇིགས་པ་ཡིན་ནམ།
JOB 1:10 ཁྱེད་ཀྱིས་དེ་དང་དེའི་ཁང་པའི་མཐའ་སྐོར་དང་། དེའི་རྒྱུ་ནོར་ཐམས་ཅད་ཀྱི་ཕྱོགས་བཞི་ར་བས་བསྐོར་བ་མ་ཡིན་ནམ། ཁྱེད་ཀྱིས་དེའི་ལག་གི་ལས་ཀ་ཡོངས་ལ་བྱིན་གྱིས་བརླབས་པས། དེའི་རྒྱུ་ནོར་ཡུལ་དེར་ཆེ་ཆེར་འཕེལ་ཏོ། །
JOB 1:11 འོན་ཀྱང་ཁྱེད་ཀྱིས་ཕྱག་བརྐྱངས་ཏེ་ཁོ་ལ་གང་ཡོད་པ་ཐམས་ཅད་བརླག་པར་མཛད་ན། དེས་ཐད་ཀར་ཁྱེད་ལ་སྨོད་པར་མི་བྱའམ་ཞེས་ཞུས་པ་དང་།
JOB 1:12 དཀོན་མཆོག་ཡ་ཝཱེས་སཱ་ཏན་ལ་འདི་སྐད་དུ། ལྟོས་དང་། ཁོ་ལ་ཅི་ཡོད་པ་ཐམས་ཅད་ཁྱོད་ཀྱི་དབང་དུ་ཡོད་ནའང་། ཁོ་རང་ལ་ཁྱོད་ཀྱི་ལག་པས་མ་རེག་ཅིག་ཅེས་བསྒོས་པ་དང་། སཱ་ཏན་དཀོན་མཆོག་ཡ་ཝཱེའི་སྤྱན་སྔ་ནས་སོང་ངོ་། །
JOB 1:13 ཉིན་ཞིག་ལ་ཨེས་ཡོབ་ཀྱི་བུ་བུ་མོ་རྣམས་ཀྱིས་ཁོ་ཚོའི་གཅེན་པོའི་ཁྱིམ་དུ་བཟའ་བཏུང་ལ་རོལ་ནས་རྒུན་ཆང་འཐུང་བའི་ཚེ་ན།
JOB 1:14 བང་ཆེན་ཞིག་ཨེས་ཡོབ་ཀྱི་དྲུང་དུ་འོངས་ནས་ན་རེ། བ་གླང་རྣམས་ཀྱིས་ཞིང་རྨོ་བ་དང་བོང་མོ་རྣམས་ཀྱིས་དེ་དག་གི་འཁོར་དུ་རྩྭ་ཟ་བཞིན་པའི་སྒང་ལ།
JOB 1:15 ཤེ་བཱ་པ་རྣམས་གློ་བར་དུ་འོངས་ཏེ་ཕྱུགས་ཟོག་རྣམས་ཕྲོགས་ནས་ཁྱེར་བར་མ་ཟད། ཞབས་ཕྱི་པ་རྣམས་རལ་གྲིས་བཀུམས། བདག་གཅིག་པོ་ཐར་ཏེ་ཁྱེད་ལ་འཕྲིན་བསྐྱལ་འོངས་པ་ཡིན་ཞེས་ཞུས།
JOB 1:16 ཁོས་དེ་བཞིན་ཞུ་བའི་མོད་ལ་ཡང་མི་གཅིག་འོངས་ནས་ན་རེ། དཀོན་མཆོག་གིས་ནམ་མཁའ་ནས་མེ་ཕབ་སྟེ་ལུག་ཁྱུ་དང་ཞབས་ཕྱི་པ་རྣམས་བསྲེགས་ནས་མེད་པར་བྱས་ཤིང་། བདག་གཅིག་པོ་ཐར་ནས་ཁྱེད་ལ་འཕྲིན་བསྐྱལ་འོངས་པ་ཡིན་ཞེས་ཞུས།
JOB 1:17 ཁོས་ཞུ་འཕྲོ་མ་རྫོགས་པར་ཡང་གཞན་ཞིག་འོངས་ནས་ན་རེ། ཀལ་དི་པ་རྣམས་ཁག་གསུམ་བྱས་ནས་གློ་བུར་ཉིད་ལ་འོངས་ཏེ་རྔ་མོང་རྣམས་ཕྲོགས་ནས་ཁྲིད་པར་མ་ཟད། ཞབས་ཕྱི་པ་རྣམས་རལ་གྲིས་བཀུམས། བདག་གཅིག་པོ་ཐར་ཏེ་ཁྱེད་ལ་འཕྲིན་བསྐྱལ་འོངས་པ་ཡིན་ཞེས་ཞུས།
JOB 1:18 ཁོས་ཞུ་འཕྲོ་མ་རྫོགས་པར་ཡང་མི་གཅིག་འོངས་ནས་ཁོ་ལ། ཁྱེད་ཀྱི་བུ་དང་བུ་མོ་རྣམས་ཀྱིས་གཅེན་པོའི་ཁྱིམ་དུ་གསོལ་བ་བཞེས་ནས་རྒུན་ཆང་འཐུང་བཞིན་པའི་མོད་ལ།
JOB 1:19 བློ་ཡིད་ལས་འདས་པ་ཞིག་ལ་དབེན་སྟོང་ནས་རླུང་ཆེན་ཞིག་གཡུགས་འོངས་ནས་ཁང་པའི་གྲུ་བཞིར་ཕོག་སྟེ། ཁང་པ་གཞོན་ནུ་རྣམས་ཀྱི་སྟེང་ལ་བརྡིབས་ནས་ཁོང་རྣམས་འདས་སོང་། བདག་གཅིག་པོ་ཐར་ནས་ཁྱེད་ལ་འཕྲིན་བསྐྱལ་འོངས་པ་ཡིན་ཞེས་ཞུས་པ་དང་།
JOB 1:20 ཨེས་ཡོབ་ཡར་བཞེངས་ཏེ་གྱོན་གོས་བཤགས་ནས་སྐྲ་བཞར་བ་དང་། ཁ་སར་བཏུད་ནས་ཕྱག་བཙལ་ཏེ་ན་རེ།
JOB 1:21 བདག་ནི་མའི་མངལ་ནས་གཅེར་བུར་ཐོན་པ་དང་སླར་ཡང་གཅེར་བུར་ཕྱིར་ལོག་དགོས། དཀོན་མཆོག་ཡ་ཝཱེས་གནང་ཞིང་དཀོན་མཆོག་ཡ་ཝཱེས་བླངས། དཀོན་མཆོག་ཡ་ཝཱེའི་མཚན་ནི་བསྟོད་འོས་པ་ཡིན་ཞེས་གསུངས་པ་དང་།
JOB 1:22 དོན་འདི་ཐམས་ཅད་ཀྱི་ནང་དུ་ཨེས་ཡོབ་ཀྱིས་ཉེས་པ་མ་བྱས་པ་དང་། དཀོན་མཆོག་ལ་སྙད་ཀྱང་མ་བཙུགས་སོ། །
JOB 2:1 ཡང་ཉིན་ཞིག་ལ་དཀོན་མཆོག་གི་ཕོ་ཉ་རྣམས་དཀོན་མཆོག་ཡ་ཝཱེའི་ཞབས་དྲུང་དུ་བྱོན་པ་དང་། སཱ་ཏན་ཡང་དེ་དག་གི་ཁྲོད་དུ་འོངས་པ་རེད།
JOB 2:2 དཀོན་མཆོག་ཡ་ཝཱེས་སཱ་ཏན་ལ་འདི་སྐད་དུ། ཁྱོད་གང་ནས་འོངས་སམ་ཞེས་དྲིས་པར། སཱ་ཏན་གྱིས་དཀོན་མཆོག་ཡ་ཝཱེ་ལ་ཞུ་ལན་དུ། ང་ནི་ས་གཞི་རུ་ཡར་མར་རྒྱུ་ཞིང་དེ་རུ་འཁོར་ནས་འོངས་པ་ཡིན་ཞེས་ཞུས་པ་དང་།
JOB 2:3 དཀོན་མཆོག་ཡ་ཝཱེས་སཱ་ཏན་ལ་འདི་སྐད་དུ། ཁྱོད་ཀྱིས་ངའི་ཞབས་ཕྱི་ཨེས་ཡོབ་ལ་ཞིབ་ཏུ་བལྟས་སམ། ས་སྟེང་དུ་དེ་དང་འདྲ་བའི་མི་སྐྱོན་གྱི་དྲི་མས་མ་གོས་པ་དང་སེམས་རྒྱུད་དྲང་བ། དཀོན་མཆོག་ལ་གུས་ཤིང་འཇིགས་པ། ངན་པའི་ལས་ལ་འཛེམ་པ་གཞན་སུ་ཡང་མེད། རྒྱུ་མཚན་མེད་པར་དེ་འཇོམས་པའི་ཆེད་དུ་ཁྱོད་ཀྱིས་ང་ལ་སྐུལ་སློང་བྱས་ནའང་། དེས་རང་གི་དྲང་བདེན་སྔར་བཞིན་དམ་དུ་བཟུང་ངོ་ཞེས་གསུངས་པས།
JOB 2:4 སཱ་ཏན་གྱིས་དཀོན་མཆོག་ཡ་ཝཱེ་ལ་ཞུ་ལན་དུ། སྐྱི་མོའི་ཚབ་ཏུ་སྐྱི་མོ་ ཡིན་ཏེ། མིས་རང་གི་སྲོག་གི་དོན་དུ་རྒྱུ་ནོར་ཐམས་ཅད་སྦྱིན་པར་འགྱུར།
JOB 2:5 ཡིན་ཡང་ད་ལྟ་ཁྱེད་ཀྱིས་ཕྱག་བརྐྱངས་ནས་དེའི་ཤ་དང་རུས་པ་ལ་རེག་པར་མཛད་ན། དེས་ཐད་ཀར་ཁྱེད་ལ་སྨོད་པར་མི་བྱའམ་ཞེས་ཞུས།
JOB 2:6 དེ་ནས་དཀོན་མཆོག་ཡ་ཝཱེས་སཱ་ཏན་ལ། ལྟོས་དང་ཁོ་ནི་ཁྱོད་ཀྱི་ལག་ཏུ་ཡོད། ཡིན་ནའང་དེ་ཡི་སྲོག་འབའ་ཞིག་ལུས་སུ་ཆུག་ཅེས་བསྒོས།
JOB 2:7 དེ་ནས་སཱ་ཏན་དཀོན་མཆོག་ཡ་ཝཱེའི་སྤྱན་སྔ་ནས་སོང་སྟེ་ཨེས་ཡོབ་ལ་བརྡེགས་པ་དང་། དེའི་ཞབས་མཐིལ་ནས་སྤྱི་གཙུག་གི་བར་དུ་གཉན་འབུར་འབྱུང་དུ་བཅུག་པ་ལ།
JOB 2:8 ཨེས་ཡོབ་ཐལ་གྱི་ནང་དུ་བཞུགས་ཏེ་རྫ་ཆག་དུམ་བུ་ཞིག་བླངས་ནས་ལུས་ཀྱི་གཉན་འབུར་བྲད་ཅིང་།
JOB 2:9 དེ་ནས་ཁོའི་ཆུང་མས་ཁྱོད་ཀྱིས་ད་དུང་རང་ཉིད་ཀྱི་དྲང་བདེན་དམ་དུ་འཛིན་པ་ཡིན་ནམ། ཁྱོད་ཀྱིས་དཀོན་མཆོག་ལ་སྨད་ནས་ཤི་ན་དགའ་ཞེས་སྨྲས་ན་ཡང་།
JOB 2:10 ཨེས་ཡོབ་ཀྱིས་མོ་ལ་ན་རེ། ཀྱེ་ཧོ་ཁྱོད་ཀྱིས་བུད་མེད་བླུན་མོའི་ལུགས་སུ་གཏམ་བཤད་པ་རེད། རང་ཅག་གིས་དཀོན་མཆོག་གི་ཕྱག་ནས་བཟང་པོ་རྣམས་བླངས་ནས། སྡུག་བསྔལ་རྣམས་ལེན་པར་མི་རིགས་སམ་ཞེས་སྨྲས་ནས། དོན་འདི་ཀུན་གྱི་ནང་དུ་ཨེས་ཡོབ་ཀྱིས་ངག་ལས་ཉེས་པ་ཅི་ཡང་མ་བྱས་སོ། །
JOB 2:11 དེ་ནས་ཨེས་ཡོབ་ཀྱི་གྲོགས་པོ་སྟེ། དེ་མན་པ་ཨེ་ལི་ཕཱ་སི་དང་། ཤུ་ཧེ་པ་པེལ་དེལ་དང་། ན་ཨ་མད་པ་ཚའོ་ཕར་ཞེས་བྱ་བ་གསུམ་གྱིས་ཁོ་ལ་བྱུང་བའི་རྐྱེན་ངན་ཐམས་ཅད་ཐོས་པའི་ཚེ། ཁོང་ཚོ་རང་རང་གི་གནས་ནས་འོངས་ཏེ། ཨེས་ཡོབ་ལ་མྱ་ངན་ཞུ་བ་དང་སེམས་གསོ་བྱེད་ཆེད་མཉམ་དུ་འདུས་སོ། །
JOB 2:12 ཡང་དེ་དག་གིས་རྒྱང་རིང་ནས་མགོ་ཡར་བཀྱགས་ནས་བལྟས་པའི་ཚེ་ཨེས་ཡོབ་ཀྱི་ངོ་ཡང་མ་ཤེས་པས་སྐད་ཆེན་པོས་ངུས་ཏེ། རང་རང་གི་གོས་གཤགས་ནས་ཐལ་བ་ནམ་མཁར་གཏོར་བ་ན། ཐལ་བ་ཕྱིར་རང་རང་གི་མགོ་ལ་བབས།
JOB 2:13 དེ་ལྟར་དེ་དག་ཉིན་ཞག་བདུན་ལ་ཁོང་དང་མཉམ་དུ་སར་བསྡད་པ་དང་། དེའི་སྡུག་བསྔལ་རབ་ཏུ་ཆེ་བ་མཐོང་སྟེ་ཁོང་ཚོས་ཚིག་གཅིག་ཀྱང་ཞུ་བར་མ་ནུས་སོ། །
JOB 3:1 དེའི་རྗེས་སུ་ཨེས་ཡོབ་ཀྱིས་ཁ་ནས་རང་གི་ཚེ་ལ་དམོད་མོ་བརྒྱབ་སྟེ།
JOB 3:2 འདི་ལྟར་སྨྲས་པ།
JOB 3:3 ང་རང་བཙས་པའི་ཉིན་མོ་དང་། ། བུ་ཞིག་ཆགས་འདུག་ཅེས་སྨྲས་པའི། ། མཚན་མོ་དེ་ནི་སྟོངས་པར་ཤོག །
JOB 3:4 ཉིན་དེ་མུན་པར་གྱུར་ནས་ནི། ། དཀོན་མཆོག་གིས་དེར་མི་གཟིགས་ཤིང་། ། དེའི་སྟེང་འོད་ཀྱང་སྤྲོ་མ་འགྱུར། །
JOB 3:5 མུན་པ་དང་ནི་སྨག་རུམ་གྱིས། ། ཉིན་མོ་དེ་ལ་དབང་སྒྱུར་ཅིག ། དེའི་སྟེང་སྤྲིན་ནག་འཁྲིགས་ནས་ནི། ། ཉིན་འཛིན་དེ་ལ་འཇིགས་བསྐུལ་ཤོག །
JOB 3:6 མཚན་དེ་སྨག་རུམ་གྱིས་འཕྲོག་ཅིང་། ། ལོ་རྩིས་ནང་དེར་དགའ་སྤྲོ་མེད། ། ཟླ་རྩིས་ནང་དེ་མ་རྩིས་ཤིག །
JOB 3:7 ལྟོས་དང་མཚན་མོ་དེ་ལ་མངལ་ནི་མི་ཆགས་ཤིང་། ། དེའི་ནང་དགའ་སྤྲོའི་སྐད་ཀྱང་འབྱུང་བར་མ་གྱུར་ཅིག །
JOB 3:8 ཉིན་མོར་དམོད་མོ་འདེབས་པ་དང་། ། ཆུ་སྲིན་ སློང་བར་ནུས་པ་རྣམས། ། མཚན་མོ་དེར་ཡང་དམོད་པར་ཤོག །
JOB 3:9 མཚན་དེའི་ཞོགས་པའི་སྐར་མ་སྒྲིབ་པར་ཤོག ། དེ་ཡིས་འོད་ལ་རེ་ཡང་རྙེད་མི་འགྱུར། ། སྐྱ་མདའ་གཏོང་བ་ཡང་ནི་མི་མཐོང་ངོ་། །
JOB 3:10 བདག་གི་མ་ཡི་མངལ་སྒོ་མ་བཅད་པར། ། ང་ཡི་མིག་ནས་སྡུག་བསྔལ་མ་སྦས་རྐྱེན། །
JOB 3:11 ཅིའི་ཕྱིར་བདག་ནི་མངལ་ནང་མ་ཤི་འམ། ། མངལ་ལས་ཐོན་དུས་དབུགས་ནི་ཅིའི་མ་ཆད། །
JOB 3:12 ཅིའི་ཕྱིར་པུས་མོ་བཙུགས་ནས་བདག་བསུས་ཏེ། ། ང་ཡིས་འཇིབ་ཏུ་ཅིའི་ཕྱིར་འོ་མ་ཐོན། །
JOB 3:13 དེ་མིན་ད་ལྟ་བདག་ནི་མར་ལོག་ཅིང་། ། བདེ་བར་ཤི་ནས་ངལ་གསོ་ཐོབ་པ་ཡིན། །
JOB 3:14 སྟོང་སར་རང་རང་གནས་ཕྱིར་བརྩིགས་པ་ཡི། ། རྒྱལ་པོ་བཀའ་བློན་རྣམས་དང་ལྷན་ཅིག་གམ། །
JOB 3:15 ཡང་ན་ཁང་པར་དངུལ་གྱིས་བཀང་བ་ཡི། ། གསེར་བདག་རྒྱལ་སྲས་མཉམ་དུ་འདུག་ཐུབ་ལ། །
JOB 3:16 ང་ནི་ཅིའི་ཕྱིར་མངལ་ནས་ཤོར་བ་དང་། ། དུར་དུ་སྦས་པའི་ཕྲུ་གུ་ནང་བཞིན་དང་། ། འོད་སྣང་མ་མཐོང་ཕྲུ་གུ་ལྟར་མ་ཡིན། །
JOB 3:17 གནས་དེར་མི་ངན་ཟིང་ཆ་མཚམས་བཞག་པས། ། ཉམ་ཐག་རྣམས་ལ་ངལ་གསོ་ཐོབ་པ་ཡིན། །
JOB 3:18 དེ་རུ་བཙོན་པའི་སེམས་ཀྱང་ལྷོད་ལ་བབས། ། དེ་ཚོས་ལས་རྒྱབ་པ་ཡི་སྒྲ་མི་ཐོས། །
JOB 3:19 ཆེ་ཆུང་ཐམས་ཅད་དེ་རུ་འདྲ་མཉམ་ཡིན། ། བྲན་པོ་བདག་པོའི་དབང་ལས་ཐར་བ་ཡིན། །
JOB 3:20 སྡུག་བསྔལ་ཅན་ལ་འོད་ནི་ཅི་ལ་གནང་། ། སེམས་སྡུག་ཅན་ལ་སྲོག་ནི་ཅི་ལ་གནང་། །
JOB 3:21 དེ་ཚོས་འཆི་བར་སྒུག་ཀྱང་དེ་མི་འོང་། ། སྦས་པའི་གཏེར་ལས་ལྷག་པར་འཆི་བ་འབྲུ། །
JOB 3:22 དེ་ཚོས་དུར་ཁྲོད་རྙེད་གྱུར་དུས། ། རབ་ཏུ་དགའ་ཞིང་མགུ་བར་བྱེད། །
JOB 3:23 མི་ཡི་ལམ་ནི་སྦས་ཤིང་དཀོན་མཆོག་གིས། ། ཕྱོགས་བཞིར་ཁོ་རང་སྡུག་ལ་སྦྱར་བས་ན། ། དེ་ལ་འོད་སྣང་སྦྱིན་པའི་རྒྱུ་མཚན་ཅི། །
JOB 3:24 ཁ་ཟས་ཚབ་ཏུ་བདག་གིས་ཤུགས་ནར་ཕྱུང་། ། ཆུ་བོ་བཞིན་དུ་བདག་གིས་འཁུན་སྒྲ་བསྒྲགས། །
JOB 3:25 ང་རང་འཇིགས་པ་དེ་ནི་ངའི་ཐོག་བབས། ། ང་རང་སྐྲག་པ་དེ་ཡིས་ང་རང་བསུས། །
JOB 3:26 བདག་ལ་ཞི་བདེ་དང་ནི་ལྷིང་འཇགས་མེད། ། ངལ་གསོ་མེད་པའི་སྟེང་དུ་དཀའ་སྡུག་སླེབས། །
JOB 4:1 དེ་ནས་དེ་མན་པ་ཨེ་ལི་ཕཱ་སི་ཡིས་ལན་དུ་སྨྲས་པ།
JOB 4:2 མི་ཡིས་ཁྱེད་དང་གླེང་མོལ་བྱེད་འདོད་པས། ། ཁྱེད་ཀྱི་ཐུགས་ནི་ངལ་བ་ཡིན་ནམ་ཅི། ། ཡིན་ཡང་སུ་ཡིས་བཟོད་ནས་གཏམ་མི་བརྗོད། །
JOB 4:3 ཁྱེད་ཀྱིས་མི་ལ་གདམས་ངག་གནང་བ་དང་། ། ཁྱེད་ཀྱིས་ཉམས་ཆུང་དག་ལ་སྟོབས་ཤུགས་གནང་། །
JOB 4:4 ཁྱེད་ཀྱི་ཞལ་ཏས་ཉམ་ཆུང་དག་ལ་རོགས་སྐྱོར་མཛད། ། ཁྱེད་ཀྱིས་སྟོབས་ཤུགས་མེད་པའི་པུས་མོ་བརྟན་པོར་མཛད། །
JOB 4:5 འོན་ཀྱང་ད་ལྟ་སྡུག་བསྔལ་ཁྱེད་ཐོག་བབས། ། དེ་བས་ཁྱེད་རང་ཡིད་སེམས་ཕམ་པ་དང་། ། ཁྱེད་ལ་ཕོག་པས་ཁྱེད་སེམས་འཁྲུག་པར་བྱེད། །
JOB 4:6 དཀོན་མཆོག་ཁོང་ལ་གུས་ཤིང་འཇིགས་པ་དེ། ། ཁྱེད་ཀྱི་བརྟེན་ས་དེ་ཉིད་མ་ཡིན་ནམ། ། ཁྱེད་ཀྱིས་དྲང་པོའི་ལུགས་སུ་སྤྱད་པ་ནི། ། ཉིད་ཀྱི་རེ་བ་བཅང་ས་མ་ཡིན་ནམ། །
JOB 4:7 ནོངས་མེད་སུ་ཞིག་མེད་པར་གྱུར་པ་དང་། ། སེམས་རྒྱུད་དྲང་བ་གང་ནས་ཚར་དུ་བཅད། ། དེ་ལ་ཁྱེད་ཀྱིས་ཕྱིར་འདང་རྒྱག་པར་མཛོད། །
JOB 4:8 ཉེས་པ་རྨོ་ཞིང་མི་དགེ་འདེབས་པ་ཡིས། ། དེ་དང་དེ་བཞིན་སྡུད་པ་ང་ཡིས་མཐོང་། །
JOB 4:9 དཀོན་མཆོག་ཁོང་གི་ཞལ་ཕུ་ཡིས། ། དེ་དག་མེད་པར་བཟོས་པ་དང་། ། ཁོང་ཉིད་ཁྲོས་པས་དེ་དག་ནུབ། །
JOB 4:10 སེང་གེའི་ངར་སྐད་དང་ནི་དྲག་པོའི་སྒྲ། ། སེང་གེ་དར་མའི་མཆེ་བ་དང་བཅས་ཆག །
JOB 4:11 ཕོ་སེང་ལ་ནི་བརྔོན་རྒྱུ་མེད་པར་འཆི། ། སེང་ཕྲུག་རྣམས་ཀྱང་མོ་སེང་ལ་ནི་བྲལ། །
JOB 4:12 དེ་ཡང་བདག་གིས་གསང་བའི་གཏམ་ཞིག་ཐོས། ། དེ་ཡི་ཤུབ་ལབ་བདག་གི་རྣ་བར་ཆུད། །
JOB 4:13 ལྕི་བའི་གཉིད་ནི་འཇིག་རྟེན་མི་ལ་འཐིབ་པའི་དུས། ། མཚན་མོའི་ཞལ་གཟིགས་ཀྱི་ནི་བསམ་ཚུལ་སྣ་ཚོགས་ནང་། །
JOB 4:14 བདག་གི་རུས་པ་ཡོད་ཚད་འཁྲུགས་འཇུག་པའི། ། དངངས་སྐྲག་འདར་ཡམ་ཞིག་ནི་བདག་ལ་བྱུང་།
JOB 4:15 སེམས་ཉིད་ང་ཡི་མདུན་ནས་རྒྱུ་བ་ལ། ། བདག་གི་ལུས་ཀྱི་བ་སྤུ་གྱེན་དུ་གཟེངས། །
JOB 4:16 སེམས་ཉིད་དེ་ནི་ང་ཡི་མདུན་དུ་བསྡད། ། བདག་གིས་དེ་ཡི་དབྱིབས་ནི་མ་ཤེས་ཏེ། ། གཟུགས་བརྙན་ང་ཡི་དྲུང་དུ་བསྡད་པ་དང་། ། ལྷིང་འཇགས་ཁྲོད་དུ་ང་ཡིས་སྐད་ཅིག་ཐོས། །
JOB 4:17 འཆི་ངེས་མི་ནི་དཀོན་མཆོག་ལས་དྲང་ངམ། ། མི་རྣམས་ཁོ་ཚོའི་བྱེད་པོ་ལས་གཙང་ངམ། །
JOB 4:18 གཙོ་བོས་འཁོར་གཡོག་རྣམས་ལ་ཐུགས་མི་བརྟེན། ། ཁོང་གི་ཕོ་ཉ་བླུན་པོར་བརྩིས་པས་ན། །
JOB 4:19 འདམ་གྱི་ཁང་པར་གནས་པའི་མི་རྣམས་དང་། ། གཞི་ནི་ས་རྡུལ་ནང་དུ་ཆགས་པ་སྟེ། ། མུག་པ་ལས་ཀྱང་ཚར་གཅོད་བྱེད་སླ་བའི། ། འཇིག་རྟེན་མི་བུ་དག་ནི་ལྟ་ཅི་སྨོས། །
JOB 4:20 ཉིན་མོ་དང་ནི་མཚན་མོའི་བར། ། དེ་དག་དུམ་བུར་བཅད་པ་དང་། ། ཇི་སྲིད་བར་དུ་མེད་པར་འགྱུར། ། ཤི་ཡང་ལྟ་མཁན་གཅིག་ཀྱང་མེད། །
JOB 4:21 དེ་རྣམས་ལོངས་སྤྱོད་རྩ་ནས་མ་ཁྱེར་རམ། ། ཤེས་རབ་དང་བྲལ་ཚེ་ལས་འདས་པ་འོ། །
JOB 5:1 ཁྱེད་ཀྱིས་ཞུས་ཀྱང་ཞུས་ལན་འདེབས་མཁན་སུ། ། ཕོ་ཉ་གང་ལ་ཁྱེད་རང་སྐྱབས་སུ་འགྲོ། །
JOB 5:2 གླེན་པའི་སྲོག་ནི་ཁོང་ཁྲོས་གཅོད་པ་དང་། ། ཕྲག་དོག་གིས་ནི་བློ་རྨོངས་སྲོག་དང་ཕྲལ། །
JOB 5:3 གླེན་པའི་རྩ་བ་རྒྱས་པ་ངས་མཐོང་ཡང་། ། གློ་བུར་ངས་དེའི་ཁྱིམ་ལ་དམོད་པར་གྱུར། །
JOB 5:4 དེ་ཡི་བུ་ཕྲུག་བདེ་བར་རིང་དུ་གྱེས། ། མཁར་སྒོར་བརྙས་བཅོས་ཐེབས་ཀྱང་སྒྲོལ་མཁན་མེད། །
JOB 5:5 དེ་ཡི་སྟོན་ཐོག་བཀྲེས་པ་རྣམས་ཀྱིས་ཟོས། ། ཚེར་མའི་གསེང་དུ་ཡོད་པ་བཏོན་ནས་ཁྱེར། ། འདོད་རྔམ་ཅན་གྱིས་དེ་ཡི་རྒྱུ་ནོར་མིད། །
JOB 5:6 ས་གཞི་ལས་ནི་སྡུག་བསྔལ་མི་སྐྱེས་ཤིང་། ། ས་རྡུལ་ནང་དུ་དཀའ་སྡུག་མི་འོང་ཡང་། །
JOB 5:7 མེ་སྟག་ཇི་ལྟར་འཕར་བ་བཞིན། ། མི་ཡང་དཀའ་སྡུག་དོན་དུ་སྐྱེས། །
JOB 5:8 འོན་ཀྱང་བདག་གིས་དཀོན་མཆོག་ཁོང་བཙལ་ནས། ། རང་གི་དོན་རྣམས་ཁོང་ལ་བཅོལ་བར་བྱ། །
JOB 5:9 ཁོང་གིས་དོན་ཆེན་བསམ་ལས་འདས་པ་འགོད། ། ངོ་མཚར་རྨད་བྱུང་བགྲང་ལས་འདས་པ་མཛད། །
JOB 5:10 ཁོང་གིས་ས་གཞིར་ཆར་ཆུ་འབེབ་པ་དང་། ། ས་ཞིང་ལ་ནི་ཆུ་ཡང་གནང་བར་མཛད། །
JOB 5:11 ཁོང་གིས་ཉམས་ཆུང་རྣམས་ནི་མཐོ་སར་བཀོད། ། སྡུག་བསྔལ་ཅན་ནི་བདེ་བའི་ཕྱོགས་སུ་འདེགས། །
JOB 5:12 ཟོལ་ཟོག་ཅན་གྱི་ཇུས་རྣམས་འཕུང་འཇུག་པས། ། དེ་དག་ལག་པས་བསམ་དོན་འགྲུབ་མི་ནུས། །
JOB 5:13 ཤེས་རབ་ཅན་ནི་རང་གི་གཡོ་འོག་ཚུད་དུ་བཅུག ། གཡོ་སྒྱུ་ཅན་གྱི་གྲོས་ནི་མྱུར་ཏུ་སྟོངས་པར་མཛད། །
JOB 5:14 དེ་དག་ཉིན་མོ་ལ་ཡང་མུན་པར་འཕྲད། ། ཉིན་གུང་ལ་ཡང་མཚན་ལྟར་མུན་ཉུལ་རྒྱག །
JOB 5:15 ཁོང་གིས་དབུལ་པོ་རྣམས་ནི་དེ་དག་གི ། ཁ་ནས་ཐོན་པའི་རལ་གྲི་ལས་སྐྱོབ་ཅིང་། ། དབང་ཤུགས་ཅན་གྱི་ལག་ནས་ཐར་བར་མཛད། །
JOB 5:16 དེ་ལྟར་དབུལ་པོ་རྣམས་ལ་རེ་བ་ཡོད། ། སྡིག་སྤྱོད་ཅན་ལ་སྨྲ་བ་ཅི་ཡང་མེད། །
JOB 5:17 དཀོན་མཆོག་ཉིད་ཀྱིས་བཀའ་བཀྱོན་གནང་བའི་མི་རྣམས་བདེ། ། དེ་བས་ཀུན་དབང་ཁོང་གི་འདུལ་བ་འདོར་མི་བྱ། །
JOB 5:18 ཁོང་གིས་རྨས་པར་མཛད་ཀྱང་དེ་ནི་དཀྲི། ། སྣད་པར་མཛད་ཀྱང་ཕྱག་གིས་གསོ་ཕྱིར་རོ། །
JOB 5:19 ཉོན་མོངས་དྲུག་ལས་ཁོང་གིས་ཁྱེད་སྒྲོལ་ཞིང་། ། ལན་བདུན་ནང་དུ་རྐྱེན་ངན་ཁྱེད་མི་འབྱུང་། །
JOB 5:20 ཁོང་གིས་མུ་གེའི་འཆི་བ་ལས་ཁྱེད་སྒྲོལ། ། འཐབ་མོའི་རལ་གྲི་ལས་ཀྱང་ཁྱེད་རང་སྐྱོབ། །
JOB 5:21 མི་ཡི་ཁ་དུག་ལས་ནི་ཁྱེད་རང་བསྲུང་། ། གནོད་འཚེ་སླེབས་ཀྱང་ཁྱེད་ལ་འཇིགས་པ་མེད། །
JOB 5:22 གནོད་འཚེ་དང་ནི་མུ་གེར་ཁྱེད་རང་བཞད་པར་འགྱུར། ། ས་གཞིའི་གཅན་གཟན་ལ་ཡང་ཁྱེད་ནི་འཇིགས་མི་འགྱུར། །
JOB 5:23 ཞིང་ཁའི་རྡོ་དང་ཁྱེད་ཀྱིས་ཁ་ཆད་འཇོག ། ཐང་གི་གཅན་གཟན་ཁྱེད་དང་འཆམ་པས་སོ། །
JOB 5:24 ཁྱེད་ཀྱིས་གུར་ཁང་བདེ་བར་གནས་པ་རྟོགས། ། ལུག་རར་བལྟ་དུས་གཅིག་ཀྱང་བོར་བ་མེད། །
JOB 5:25 ཕྱིས་སུ་ཁྱེད་ཀྱི་བུ་རབས་ཚ་རྒྱུད་རྣམས། ། རྩྭ་སྔོན་བཞིན་དུ་རྒྱས་པ་རྟོགས་པར་འགྱུར། །
JOB 5:26 རང་གི་དུས་བཞིན་འབྲུ་རིགས་བསྡུ་བ་ལྟར། ། སྐུ་ཚེ་ཚིམ་ནས་སྤུར་ཁང་སླེབ་པར་འགྱུར། །
JOB 5:27 ང་ཚོས་བརྟགས་པས་གཟིགས་དང་དེ་བཞིན་ལགས། ། ཁྱེད་ཀྱིས་དོན་འདི་རྟོགས་ཤིང་ཐུགས་བསམ་མཛོད། །
JOB 6:1 དེ་ནས་ཨེས་ཡོབ་ཀྱིས་བཀའ་ལན་འདི་ལྟར་གསུངས་པ།
JOB 6:2 ང་ཡི་སྡུག་བསྔལ་ཚད་ན་ཅི་མ་རུང་། ། གནོད་འཚེ་ལྷན་ཅིག་སྲང་ནང་བཅལ་ན་ལེགས། །
JOB 6:3 ད་ལྟ་རྒྱ་མཚོའི་བྱེ་མ་ལས་ཀྱང་ལྕི། ། དེའི་ཕྱིར་འཚབ་འཚུབ་ངང་ནས་བདག་གིས་བརྗོད། །
JOB 6:4 ཀུན་དབང་ཁོང་གི་མདའ་ངའི་ལུས་སྟེང་ཕོག ། ང་ཡི་སེམས་ཀྱིས་དུག་དེ་ཡོངས་སུ་འཐུང་། ། དཀོན་མཆོག་ཉིད་ཀྱི་འཇིགས་པས་ང་གཡུལ་བཤམས། །
JOB 6:5 རྩྭ་ཁ་བཟང་དུས་རྐྱང་གིས་ཅི་ལ་འབོད། ། གཟན་ཆས་ཡོད་དུས་གླང་གིས་ཅིའི་ཕྱིར་འབོད། །
JOB 6:6 བྲོ་མེད་ཚྭ་མེད་བཟའ་བཏུང་ཅི་ལྟར་སྤྱོད། ། སྒོ་ངའི་དཀར་སྤྲིར་བྲོ་བ་ཅི་ལྟར་ལྡན། །
JOB 6:7 ལོངས་སུ་སྤྱོད་འདོད་མེད་པའི་བཟའ་བཏུང་དག ། ང་ཡི་ཡིད་སེམས་ཀྱིས་ནི་རེག་མི་འདོད། །
JOB 6:8 བདག་གི་གསོལ་བ་བསྐང་ཞིང་དཀོན་མཆོག་གིས། ། བདག་གིས་འདུན་པ་གནང་ན་ཅི་མ་རུང་། །
JOB 6:9 ང་རང་ཚར་གཅོད་བྱེད་དུ་ཐུགས་དགྱེས་ཤིང་། ། ཕྱག་ཟུང་བརྐྱངས་ནས་ངའི་སྲོག་གཅོད་པར་ཤོག །
JOB 6:10 དམ་པ་གཅིག་པོའི་བཀའ་གསུང་མ་བཟློག་པས། ། དེ་ལས་ང་ལ་ད་དུང་སེམས་གསོ་ལྡན། ། སྡུག་བསྔལ་རྫོགས་མཐའ་བྲལ་ཡང་དགའ་བས་མྱང་། །
JOB 6:11 རེ་སྒུག་བྱེད་པར་བདག་ལ་སྟོབས་ཅི་ཡོད། ། མཇུག་འབྲས་གང་ཕྱིར་བདག་གིས་བཟོད་སེམས་སྒོམ། །
JOB 6:12 ང་ཡི་སྟོབས་ཤུགས་རྡོ་ལྟར་མ་ཡིན་ལ། ། བདག་གི་ལུས་ཀྱང་ལི་ཡིས་མ་གྲུབ་སྟེ། །
JOB 6:13 བདག་གི་ནང་དུ་རོགས་རམ་མེད་པ་དང་། ། ཤེས་རབ་སེམས་ནས་དོར་བ་མ་ཡིན་ནམ། །
JOB 6:14 ཡིད་སེམས་ཕམ་པར་མཛའ་བོས་སྙིང་རྗེ་དགོས། ། རྒྱུ་མཚན་དེ་ཡིས་ཀུན་དབང་ཁོང་ཉིད་ལ། ། གུས་ཤིང་འཇིགས་པའི་སེམས་པ་དོར་བས་ཡིན། །
JOB 6:15 གཙང་པོ་རྒྱུ་བའི་གྲོག་རོང་སྐམ་པོ་བཞིན། ། ང་ཡི་སྤུན་མཆེད་རྣམས་ལ་གཡོ་སྒྱུ་ལྡན། །
JOB 6:16 འཁྱགས་རོམ་བཞུ་བས་ཆུ་རྒྱུན་མི་གཙང་ཞིང་། ། དེ་ཡི་ནང་དུ་ཁ་བ་སྦས་ནས་ཡོད། །
JOB 6:17 དྲོད་འབེབས་དུས་སུ་དེ་དག་བཞུ་འགྲོ་ཞིང་། ། ཚ་བའི་དུས་སུ་དེ་དག་རང་སར་སྐམ། །
JOB 6:18 ཚོང་པས་ཆུ་རྒྱུན་དེད་ནས་ལམ་གཟུར་ཅིང་། ། དབེན་སྟོང་གནས་སུ་དེ་རྣམས་ཚེ་ལས་འདས། །
JOB 6:19 ཐེ་མཱའི་ཚོང་པས་ཆུ་བོར་རེ་ལྟོས་བཅངས། ། ཤེ་བཱའི་ལམ་པས་ཆུ་རྒྱུན་བསྒུགས་ནས་ཡོད། །
JOB 6:20 ཁོང་ཚོའི་རེ་བ་སྟོངས་པས་ངོ་གནོང་ཞིང་། ། དེ་རུ་ཕྱིན་ནས་དེ་ཚོ་ཡིད་སེམས་ཕམ། །
JOB 6:21 ད་ལྟ་ཁྱོད་རྣམས་དེ་དང་དེ་བཞིན་ཡིན། ། འཇིགས་རུང་དོན་རྣམས་མཐོང་སྟེ་སྐྲག་སྣང་སྐྱེས། །
JOB 6:22 བདག་ལ་སྦྱིན་ཞིག་ཡང་ན་ཁྱོད་ཅག་གི ། ནོར་ལས་ལེགས་སྐྱེས་ཐོངས་ཞེས་ཞུས་མྱོང་ངམ། །
JOB 6:23 ཡང་ན་དགྲ་ཡི་ལག་ནས་བདག་སྐྱོབ་རོགས། ། གདུག་རྩུབ་ཅན་ལས་སྒྲོལ་བར་མཛོད་ཞུས་སམ། །
JOB 6:24 ཁྱོད་ཀྱིས་བདག་ལ་སློབས་ཤིག་ངས་མི་སྨྲ། ། ང་རང་གང་ནས་འཕྱུགས་པ་ཤེས་སུ་གསོལ། །
JOB 6:25 དྲང་བའི་ཚིག་ནི་ཅི་འདྲའི་སྟོབས་ལྡན་ཨང་། ། ཡིན་ཡང་ཁྱོད་ཚོས་ཅིའི་ཕྱིར་བཀའ་བཀྱོན་གནང་། །
JOB 6:26 ཡིད་སེམས་ཕམ་པའི་གཏམ་གླེང་རླུང་དང་མཚུངས། ། ཁྱོད་ཚོས་ད་དུང་དགག་ལན་སྤྲོད་དམ་ཅི། །
JOB 6:27 ཁྱོད་ཚོས་དྭ་ཕྲུག་ཆེད་དུ་རྒྱན་འཕེན་ཞིང་། ། རང་གི་མཆེད་གྲོགས་འཚོང་བའི་ཚོང་ཟོག་བྱེད། །
JOB 6:28 ད་ལྟ་ཁྱོད་ཅག་གིས་ནི་ང་གཟིགས་དང་། ། ང་ཡིས་ཁྱོད་ཚོའི་མདུན་དུ་རྫུན་མི་སྨྲ། །
JOB 6:29 ཁྱོད་རྣམས་བསམ་བློ་བསྒྱུར་བར་མཛོད། ། དྲང་བདེན་མིན་པ་ཀུན་ནས་སྤོངས། ། ཡང་ནས་ཡང་དུ་བསམ་བློ་བསྒྱུར། ། ང་ཡི་དོན་ལ་གནས་ལུགས་ཡོད། །
JOB 6:30 ང་ཡི་ལྕེ་ཐོག་དྲང་བདེན་མེད་དམ་ཅི། ། ང་ཡི་སེམས་པས་ཉམ་ཉེས་མི་ཤེས་སམ། །
JOB 7:1 ས་གཞིར་མི་ཡིས་ངལ་ལས་བྱེད་པ་མ་ཡིན་ནམ། ། དེ་ཡི་མི་ཚེ་གླ་པའི་ཚེ་དང་མི་འདྲ་འམ། །
JOB 7:2 དེ་ནི་གཡོག་པོས་གྲིབ་བསིལ་སྙེག་འདྲ་དང་། ། གླ་པས་གླ་ཕོག་རེ་བ་བྱེད་དང་མཚུངས། །
JOB 7:3 ལོ་ཟླ་ཕན་མེད་བདག་གིས་བསྐྱལ་མྱོང་སྟེ། ། སྡུག་བསྔལ་ཅན་གྱི་མཚན་མོ་ང་ལ་གཏད། །
JOB 7:4 ང་རང་མལ་དུ་ལོག་དུས་འདི་ལྟར་བརྗོད། ། ང་རང་ནམ་དུས་ཡར་ལ་ལང་འོས་སམ། ། མཚན་མོ་དེ་ནི་ནམ་ཞིག་འདའ་བར་འགྱུར། ། ཕར་ལོག་ཚུར་ལོག་བྱས་ནས་མཚན་དུས་ཡོལ། །
JOB 7:5 ང་ཡི་ལུས་པོ་འབུ་དང་ས་ཡིས་གཡོགས། ། ང་ཡི་སྐྱི་མོ་གས་ནས་རྣག་ཀྱང་བཞུར། །
JOB 7:6 ང་ཡི་མི་ཚེ་སྒྲོམ་བུ་ལས་ཀྱང་མགྱོགས། ། རེ་བ་མེད་པའི་ནང་དུ་དུས་རྣམས་འདས། །
JOB 7:7 ང་ཡི་ཚེ་ནི་རླུང་དང་འདྲ་བ་ཡིད་ལ་ཞོག ། ང་ཡི་མིག་གིས་རྗེས་སུ་བདེ་སྐྱིད་མི་མཐོང་སྟེ། །
JOB 7:8 བདག་ལ་ལྟ་བའི་མི་ཡིས་བདག་མི་མཐོང་། ། ཁྱོད་ཚོའི་མིག་གིས་བལྟས་ཀྱང་བདག་མི་ལུས། །
JOB 7:9 སྤྲིན་ནི་ཡལ་ཞིང་སྣང་བར་མི་འགྱུར་བཞིན། ། གཤིན་ཡུལ་ཕྱིན་པ་རྣམས་ཀྱང་སླར་མི་འཐོན། །
JOB 7:10 དེ་ནི་རང་གི་ཁྱིམ་དུ་ཕྱིར་མི་ལོག ། དེ་ཡི་ཡུལ་གྱིས་ཁོ་རང་ངོ་མི་ཤེས། །
JOB 7:11 དེའི་ཕྱིར་བདག་གིས་ངག་མི་བསྡོམ། ། སེམས་ཀྱི་སྡུག་བསྔལ་སྨྲ་བ་དང་། ། ཁོག་གི་ཟུག་ངུ་བརྗོད་པར་བྱ། །
JOB 7:12 རྒྱ་མཚོ་དང་ནི་ཆུ་སྲིན་བདག་མ་ཡིན། ། ཁྱེད་ཀྱིས་བདག་ལ་བཀག་འགོག་མཛད་དོན་ཅི། །
JOB 7:13 གལ་ཏེ་བདག་གིས་འདི་ལྟར་སྨྲས་གྱུར་ཏེ། ། མལ་སྟན་གྱིས་ནི་བདག་ལ་སེམས་གསོ་དང་། ། མལ་སས་ང་ཡི་སྡུག་བསྔལ་འཁུར་ཞེས་ན། །
JOB 7:14 ཁྱེད་ཀྱིས་རྨི་ལམ་ནང་དུ་བདག་འཚབ་འཇུག ། ཞལ་གཟིགས་བརྒྱུད་ནས་བདག་ལ་འཇིགས་སྐྲག་གནང་། །
JOB 7:15 ཐ་ན་དབུགས་རྒྱུན་ཆད་ནས་ང་ཤི་ཡང་། ། བདག་གི་ཤ་སྐམ་རུས་སྐམ་ལས་ནི་བཟང་། །
JOB 7:16 བདག་གིས་སྲོག་འདི་དོར་འདོད་དེ། ། ཇི་སྲིད་བར་དུ་གསོན་མི་འདོད། ། མི་ཚེ་སྟོང་བ་ཡིན་པས་ན། ། ང་རང་གཅིག་པུ་བསྐྱུར་བར་མཛོད། །
JOB 7:17 ཁྱེད་ཀྱིས་མཐོན་པོར་བཟུང་བ་དང་། ། ཐུགས་སུ་འཛིན་པའི་མི་རྣམས་ནི། ། དོན་ལ་ཅི་ཞིག་ཡིན་ལགས་སམ། །
JOB 7:18 ཞོགས་པ་རེ་རེར་གཟིགས་ཞིབ་མཛད་ནས་ནི། ། དུས་ཚོད་རེ་རེར་ཚོད་བགམ་མཛད་པ་ཅི། །
JOB 7:19 ཁྱེད་ཀྱིས་ནམ་ཞིག་བདག་ལས་ཞལ་འཁོར་ནས། ། བདག་ལ་མཆིལ་མ་མིད་པའི་དུས་གནང་ངམ། །
JOB 7:20 མི་ལ་ལྟ་ཞིབ་མཛད་པའི་གཙོ་བོ་ལགས། ། བདག་ལ་ཉེས་པ་ཡོད་ན་ཁྱེད་ཅི་འབྲེལ། ། ང་རང་ཁྱེད་དྲུང་འབེན་ལྟར་ཅི་ལ་འཇོག ། ང་རང་ཁྱེད་ཀྱི་ཁུར་པོར་གྱུར་དོན་ཅི། །
JOB 7:21 ཁྱེད་ཀྱིས་ཅིའི་ཕྱིར་བདག་གི་སྐྱོན་མི་བཟོད། ། ཅི་ལ་བདག་གི་ཉེས་པ་སེལ་མི་མཛད། ། ད་ལྟ་ང་རང་ས་རྡུལ་ནང་ཉལ་ཏེ། ། ཁྱེད་ཀྱིས་བཙལ་ཡང་བདག་ནི་མི་རྙེད་དོ། །
JOB 8:1 དེ་ནས་ཤུ་ཧེ་པ་པེལ་དེལ་གྱིས་ལན་བཏབ་ནས་ན་རེ།
JOB 8:2 ནམ་བར་ཁྱེད་ཀྱིས་འདི་འདྲ་གླེང་བར་བྱ། ། ནམ་བར་ཁྱེད་ཀྱི་ཚིག་ནི་རླུང་ལྟར་འཚུབ། །
JOB 8:3 དཀོན་མཆོག་ཁོང་ནི་དྲང་བདེན་ལས་འཛོལ་ལམ། ། ཀུན་དབང་ཁོང་ནི་བདེན་པ་ལས་འཛོལ་ལམ། །
JOB 8:4 ཡང་ན་ཁྱེད་ཀྱི་བུ་ཚོས་ཁོང་ལ་སྡིག་པ་བྱས་པས་ན། ། ཁོང་གིས་དེ་དག་ལ་ནི་ཉེས་ཆད་ཕོག་ཏུ་བཅུག་པ་ཡིན། །
JOB 8:5 ཁྱེད་ཀྱིས་སེམས་གཏིང་དཀོན་མཆོག་བཙལ་ནས་ནི། ། ཀུན་དབང་ཉིད་ལ་ཡང་ཡང་ཞུས་པ་དང་། །
JOB 8:6 ཁྱེད་ནི་གཙང་ཞིང་དྲང་པོ་ཡིན་གྱུར་ན། ། ཁོང་ཉིད་ཁྱེད་ཀྱི་དོན་དུ་བཞེངས་ངེས་ཏེ། ། ཁྱེད་ཀྱི་དྲང་པོའི་ཁྱིམ་ནི་དར་བར་མཛད། །
JOB 8:7 ཐོག་མར་ཁྱེད་ནི་ཉམས་ཆུང་ཡང་། ། རྗེས་སུ་རབ་ཏུ་རྒྱས་པར་འགྱུར། །
JOB 8:8 ཁྱེད་ཀྱིས་མེས་པོ་རྣམས་ལ་འདྲི་བར་མཛོད། ། དེ་ཚོའི་མེས་པོས་བརྟགས་པ་སེམས་ལ་ཟུངས། །
JOB 8:9 ང་ཚོ་ཁ་སང་སྐྱེས་པས་ཅང་མི་ཤེས། ། ང་ཚོའི་མི་ཚེ་གྲིབ་མ་ཙམ་དུ་སྣང་། །
JOB 8:10 དེ་ཚོས་ཁྱེད་ལ་བསླབ་ཅིང་འཆད་པ་དང་། ། ཁྱེད་ལ་སེམས་ཀྱི་སྙིང་གཏམ་སྨྲ་བར་འགྱུར། །
JOB 8:11 འདམ་རྫབ་མེད་སར་པ་པི་རཱ་སྐྱེ་འམ། ། ཆུ་དང་བྲལ་ན་འདམ་རྩྭ་སྐྱེ་སྲིད་དམ། །
JOB 8:12 དེ་ནི་སྔོ་ལྗང་ཡིན་དུས་མ་བྲེག་གོང་། ། རྩི་ཤིང་ཀུན་ལས་དེ་ནི་སྔོན་ལ་སྐམ། །
JOB 8:13 དཀོན་མཆོག་བརྗེད་པའི་མི་ཀུན་གྱི། ། ལམ་ཡང་དེ་དང་དེ་འདྲ་སྟེ། ། དད་མེད་རྣམས་ཀྱི་རེ་བ་ཡང་། ། ཡོད་ཚད་སྟོངས་པར་འགྱུར་ངེས་ཡིན། །
JOB 8:14 ཁོ་ཡི་བརྟེན་ས་སྡོམ་དྲ་ཡིན་པས་ན། ། གང་ལ་བརྟེན་པ་རྩ་ནས་གཅོད་ངེས་ཡིན། །
JOB 8:15 དེ་ཡིས་ཁང་པར་བརྟེན་ཡང་ཚུགས་མི་ཐུབ། ། ཁང་པར་དམ་དུ་འཇུས་རུང་གནས་མི་འགྱུར། །
JOB 8:16 ཁོ་ནི་ཉི་མའི་འོག་ཏུ་ལོ་འདབ་རྒྱས། ། ལྕུག་ཕྲན་དག་ནི་སྐྱེད་ཚལ་ནང་དུ་ཁྱབ། །
JOB 8:17 དེ་ཡི་རྩ་བ་རྡོ་སྤུངས་ལ་འཁྲིལ་ཞིང་། ། དེ་ནི་རྡོ་ཡི་སྲིབ་ལ་ཡོངས་སུ་འཛུལ། །
JOB 8:18 སུ་ཡིས་དེ་ནི་རང་གནས་ལས་བལ་ན། ། ས་དེས་ཁོ་ནི་ངོ་ཡང་མི་ཤེས་ཏེ། ། ང་ཡིས་ཁྱོད་རང་མཐོང་མྱོང་མེད་ཅེས་ཟེར། །
JOB 8:19 ལྟོས་དང་འདི་དེའི་ལམ་གྱི་དགའ་སྤྲོ་སྟེ། ། དེ་ནས་གཞན་རྣམས་ས་ལས་འཁྲུངས་པར་འགྱུར། །
JOB 8:20 དཀོན་མཆོག་གིས་ནི་དྲང་པོ་མི་འདོར་ཞིང་། ། སྡིག་སྤྱོད་ལ་ཡང་རོགས་རམ་གནང་མི་འགྱུར ། །
JOB 8:21 ཁོང་གིས་ཁྱེད་ཀྱི་སྨྲ་སྒོར་གད་མོ་དང་། ། མཆུ་ནི་དགའ་མགུས་འགེངས་པར་མཛད་འགྱུར་རོ། །
JOB 8:22 ཁྱེད་ལ་སྡང་པ་རྣམས་ནི་ངོ་ཚས་གཡོག ། མི་ངན་དག་གི་གུར་ནི་ལུས་མི་འགྱུར། །
JOB 9:1 དེ་ནས་ཨེས་ཡོབ་ཀྱིས་འདི་ལྟར་ལན་གསུངས་པ་སྟེ།
JOB 9:2 དེ་བཞིན་ལགས་པ་ང་ཡིས་ཤེས་ན་ཡང་། ། མི་ནི་དཀོན་མཆོག་དྲུང་དུ་ཅི་ལྟར་དྲང་། །
JOB 9:3 གལ་ཏེ་མི་རྣམས་ཁོང་དང་རྩོད་འདོད་ན། ། སྟོང་ཆའི་གཅིག་གི་ལན་ཡང་ཞུ་མི་ནུས། །
JOB 9:4 ཁོང་ནི་ཤེས་རབ་ལྡན་ཞིང་མཐུ་སྟོབས་ཆེ། ། ཁོང་ལ་རྒོལ་ཡང་བདེ་བར་ལུས་པ་སུ། །
JOB 9:5 ཁོང་གིས་རི་བོ་སྤོས་ཀྱང་དེ་ཡིས་མ་ཚོར་ཞིང་། ། ཁོང་གིས་ཐུགས་ཁྲོ་ནང་དུ་རི་བོ་སློག་པར་མཛད། །
JOB 9:6 ཁོང་གིས་ས་གཞི་རང་གནས་ལས་གཡོས་ཤིང་། ། ས་གཞིའི་ཀ་བ་རྣམས་ནི་ཡོམ་ཡོམ་འདར། །
JOB 9:7 ཉི་མར་བཀའ་གསུང་གནང་བས་དེ་མི་འཆར། ། སྐར་མ་རྣམས་ལ་ཕྱག་རྒྱ་འདེབས་པར་མཛད། །
JOB 9:8 ཁོང་ཉིད་གཅིག་པུས་ནམ་མཁའ་མཐར་བརྐྱངས་ཤིང་། ། རྒྱ་མཚོའི་རྦ་རླབས་སྟེང་དུ་ཞབས་ཀྱིས་བཅགས། །
JOB 9:9 སྨིན་བདུན་དྲང་སྲོང་སྨིན་དྲུག་གསུམ་པོ་དང་། ། ལྷོ་ཕྱོགས་སྐར་ཁྱིམ་རྣམས་ནི་ཁོང་གིས་མཛད། །
JOB 9:10 ཁོང་གི་འཕྲིན་ལས་ཆེན་པོ་བསམ་མི་ཁྱབ། ། ངོ་མཚར་དོན་ནི་བགྲང་ལས་འདས་པ་མཛད། །
JOB 9:11 ཁོང་ངའི་གམ་ནས་གཤེགས་ཀྱང་ངས་མི་མཐོང་། ། ཁོང་ངའི་མདུན་ནས་ཕེབས་ཀྱང་ངས་མི་ཚོར། །
JOB 9:12 ཁོང་གིས་ཕྲོགས་ན་སུ་ཡིས་བཟློག་ནུས་སམ། ། ཁྱེད་ཀྱིས་ཅི་ཞིག་མཛད་པ་ཡིན་ནམ་ཞེས། ། སུ་ཡིས་ཁོང་ལ་བཀའ་འདྲི་ཞུ་ཕོད་དམ། །
JOB 9:13 དཀོན་མཆོག་གིས་ནི་ཐུགས་ཁྲོ་བཟོད་མི་བྱ། ། ཁོང་འོག་ར་ཧབ་ སྡོངས་གྲོགས་འཁུམ་པ་ཡིན། །
JOB 9:14 དེ་ལྟར་ཡིན་པས་བདག་གིས་བརྗོད་མ་ཕོད། ། ཁོང་གི་དྲུང་དུ་ཅི་ལྟར་རྩོད་ནུས་སམ། །
JOB 9:15 བདག་ནི་དྲང་ཡང་ལན་ནི་བཟློག་མ་ནུས། ། རང་ལ་ཁྲིམས་ཐག་གཅོད་མཁན་ཁོང་ལ་ཞུ། །
JOB 9:16 ང་ཡིས་ཞུས་ན་ཁོང་གིས་བཀའ་ལན་གནང་སྲིད་ཀྱང་། ། ཁོང་གིས་བདག་ལ་གསན་པར་ང་རང་ཡིད་བརྟན་མེད། །
JOB 9:17 ཁོང་གིས་རླུང་དམར་དང་བཅས་བདག་ལ་བར་ཆད་གཏོང་། ། རྒྱུ་མཚན་མེད་པར་ང་ཡི་རྨ་རྣམས་ཁྱབ་པར་མཛད། །
JOB 9:18 ཁོང་གིས་བདག་ལ་དབུགས་ལེན་ལོང་མི་གནང་། ། བདག་ལ་དཀའ་སྡུག་ཡོངས་སུ་མྱངས་པར་མཛད། །
JOB 9:19 སྟོབས་ཤུགས་གླེང་ན་ཀྱེ་ཧོ་ཁོང་སྟོབས་ལྡན། ། དྲང་གཞག་གླེང་ན་སུ་ཡིས་བདག་འབོད་དམ། །
JOB 9:20 བདག་ནི་དྲང་བདེན་ཡིན་ན་ཡང་། ། རང་གི་སྨྲ་སྒོས་ཉེས་ཅན་བརྩི། ། ང་རང་སྐྱོན་བྲལ་ཡིན་ཡང་དེས། ། སྐྱོན་ཅན་ཡིན་པར་བདེན་དཔང་བྱེད། །
JOB 9:21 བདག་ནི་སྐྱོན་བྲལ་ཡིན་ཡང་རང་ཉིད་མི་བསམ་པས། ། ང་ནི་རང་གི་སྲོག་ལ་སུན་སྣང་རབ་ཏུ་སྐྱེས། །
JOB 9:22 དེའི་ཕྱིར་བདག་གིས་འདི་ལྟར་བརྗོད། ། སྐྱོན་བྲལ་ཅན་དང་སྡིག་སྤྱོད་ཅན། ། ཡོད་ཚད་གཅིག་མཚུངས་ཡིན་པ་དང་། ། ཁོང་གིས་རྩ་མེད་གཏོང་བར་མཛད། །
JOB 9:23 གནོད་འཚེས་གློ་བུར་འཆི་བ་ཁྱེར་འོངས་ན། ། ཉེས་མེད་དཀའ་སྡུག་འཕྲད་པར་ཁོང་བཞད་ངེས། །
JOB 9:24 སྡིག་སྤྱོད་ལག་ཏུ་ས་གཞི་གཏད་གྱུར་ན། ། ཁོང་གིས་ཁྲིམས་དཔོན་དག་གི་གདོང་བཏུམ་སྟེ། ། དེ་ནི་ཁོང་ཉིད་མིན་ན་གཞན་སུ་ཡིན། །
JOB 9:25 བདག་གི་ཚེ་ནི་བང་ཆེན་ལས་མྱུར་ཞིང་། ། དེ་རྣམས་ལམ་སེང་འདས་པས་སྐྱིད་མི་མཐོང་། །
JOB 9:26 བདག་གི་ཚེ་ནི་འདམ་རྩྭའི་གྲུ་ཆུང་དང་། ། ཁྱི་ར་རྒྱག་པར་རྔམ་པའི་གླག་ལྟར་ཤོར། །
JOB 9:27 རང་སྡུག་བརྗེད་དེ་སྐྱོ་གདོང་བསྐྱུར་ནས་ནི། ། འཛུམ་མདངས་རྒྱས་པར་བྱ་ཞེས་ངས་སྨྲས་ན། །
JOB 9:28 ཁྱེད་ཀྱིས་ང་རང་ནོངས་མེད་མི་མཛད་ངས་ཤེས་པས། ། ང་ནི་རང་གི་དཀའ་སྡུག་ཀུན་ཕྱིར་འཇིགས་སྣང་སྐྱེས། །
JOB 9:29 བདག་ནི་སྡིག་པ་ཅན་དུ་བརྩི་མཛད་ན། ། དོན་མེད་དཀའ་བ་ཅི་ལ་སྤྱོད་དགོས་སམ། །
JOB 9:30 གལ་ཏེ་བདག་གིས་ཁ་བས་ལུས་བཀྲུས་ཏེ། ། རང་གི་ལག་པར་བ་ཚྭ་བརྒྱབ་ན་ཡང་། །
JOB 9:31 ཁྱེད་ཀྱིས་ས་དོང་ནང་དུ་བདག་གཡུག་ཅིང་། ། ང་ཡི་གོས་ཀྱང་བདག་ལ་ཞེན་ལོག་འོང་། །
JOB 9:32 ཁོང་ནི་བདག་གིས་ལན་འདེབས་ནུས་པ་དང་། ། ལྷན་ཅིག་ཁྲིམས་རར་ཁ་རྩོད་བྱེད་ཆོག་པའི། ། ང་དང་འདྲ་བའི་མི་ནི་མ་ཡིན་ནོ། །
JOB 9:33 ངེད་གཉིས་སྟེང་དུ་ལག་པ་འཇོག་ནུས་པའི། ། ཁྲིམས་ཐག་གཅོད་མཁན་བར་ན་སུ་ཡང་མེད། །
JOB 9:34 ཁོང་གིས་ཉིད་ཀྱི་ཕྱག་འཁར་བདག་ལས་འཐེན་པར་ཤོག ། འཇིགས་རུང་བརྗིད་ཉམས་ཀྱིས་ནི་དངངས་པར་མ་གྱུར་ཅིག །
JOB 9:35 དེ་ནས་བདག་གིས་འཇིགས་པ་མེད་པར་ཁོང་ལ་ཞུ། ། རྒྱུ་མཚན་བདག་ནི་དེ་འདྲ་མ་ཡིན་རྐྱེན་གྱིས་སོ། །
JOB 10:1 བདག་ནི་ཚེ་ལ་སུན་སྣང་སྐྱེས་པ་དང་། ། སེམས་ཀྱི་སྡུག་བསྔལ་དག་ནི་བརྗོད་འདོད་པས། ། རང་གི་སྡུག་རྣམས་རང་ལ་གླེང་བར་བྱ། །
JOB 10:2 བདག་གིས་དཀོན་མཆོག་ཁོང་ལ་འདི་ལྟར་ཞུ། ། ང་རང་ཉེས་ཅན་ལ་ནི་མི་བརྩི་བར། ། ཅིའི་ཕྱིར་བདག་དང་རྒོལ་བ་སྟོན་པར་མཛོད། །
JOB 10:3 ཁྱེད་ཀྱིས་ཕྱག་གིས་བཀོད་པར་བརྙས་ཅིང་སྨད། ། མི་ངན་རྣམས་ཀྱི་ཇུས་ལ་ཐུགས་དགྱེས་པས། ། དོན་འདི་ཁྱེད་ཀྱིས་ལེགས་པར་གཟིགས་སམ་ཅི། །
JOB 10:4 ཁྱེད་ལ་ཤ་ཡི་སྤྱན་མངའ་འམ། ། མི་ཡི་ལུགས་བཞིན་གཟིགས་ལགས་སམ། །
JOB 10:5 ཁྱེད་ཀྱི་ཉིན་མོ་མི་ཡི་ཉིན་དང་འདྲ་བ་མིན། ། ཁྱེད་ཀྱི་ལོ་ཟླ་གྱད་མིའི་ལོ་ཟླར་མི་མཚུངས་པས། །
JOB 10:6 ཁྱེད་ཀྱིས་ང་ཡི་སྡིག་པར་རྩད་གཅོད་ཅིང་། ། ང་ཡི་ཉེས་པར་ཞིབ་དཔྱོད་མཛད་འོང་ངམ། །
JOB 10:7 བདག་གིས་སྡིག་པ་མ་བཟོས་ཁྱེད་ཀྱིས་མཁྱེན་ན་ཡང་། ། ང་རང་ཁྱེད་ཀྱི་ཕྱག་ལས་སྒྲོལ་མཁན་སུ་ཡང་མེད། །
JOB 10:8 ཁྱེད་ཀྱི་ཕྱག་གིས་ང་རང་བཀོད་ནས་གཟུགས་བརྙན་གནང་། ། ཡིན་ཡང་ཁྱེད་ཀྱིས་བདག་ནི་སླར་ཡང་རྩ་མེད་མཛད། །
JOB 10:9 བདག་ནི་འདམ་ལྟར་བཀོད་པ་ཁྱེད་ཀྱིས་དྲན་པར་མཛོད། ། ཁྱེད་ཀྱིས་བདག་ནི་སླར་ཡང་རྡུལ་དུ་ལོག་མཛད་དམ། །
JOB 10:10 འོ་མ་བཞིན་དུ་ཁྱེད་ཀྱིས་བདག་ནི་མ་བླུགས་སམ། ། ཆུར་བ་ནང་བཞིན་བདག་ནི་ཆགས་སུ་མ་བཅུག་གམ ། །
JOB 10:11 ཁྱེད་ཀྱིས་ང་རང་ཤ་དང་སྐྱི་མོས་གཡོགས། ། རུས་དང་རྒྱུས་པས་བདག་ནི་སྦྲེལ་བར་མཛད། །
JOB 10:12 ཁྱེད་ཀྱིས་བདག་ལ་སྲོག་དང་བྱམས་བརྩེ་གནང་། ། ཁྱེད་ཀྱི་སྐྱབས་ཀྱིས་བདག་གི་སེམས་ཉིད་བསྲུངས། །
JOB 10:13 ཡིན་ཡང་འདི་རྣམས་ཁྱེད་ཀྱི་ཐུགས་སུ་སྦས། ། ཁྱེད་ཀྱི་ཐུགས་དགོངས་ཡིན་པ་བདག་གིས་རྟོགས། །
JOB 10:14 སྡིག་པ་སྤྱད་ན་ཁྱེད་ཀྱིས་ང་ལ་གཟིགས། ། ང་ཡི་སྡིག་པ་སེལ་དུ་ཁྱེད་མི་མཉེས། །
JOB 10:15 བདག་གིས་ཉེས་པ་བསགས་ན་ཆག་སྒོ་འབྱུང་། ། དྲང་བདེན་སྤྱད་ཀྱང་མགོ་ནི་འདེགས་མ་ཕོད། ། ངོ་ཚས་ཁྱབ་ཅིང་རང་གི་སྡུག་བསྔལ་མཐོང་། །
JOB 10:16 བདག་གིས་ང་རྒྱལ་མགོ་འཕང་གཏད་ན་ནི། ། ཁྱེད་ཀྱིས་སེང་གེ་བཞིན་དུ་ང་འདེད་ཅིང་། ། ཡ་མཚན་དོན་རྣམས་ངའི་སྟེང་མངོན་པར་མཛད། །
JOB 10:17 ཡང་བསྐྱར་བདེན་དཔང་བཙལ་ནས་ང་ལ་རྒོལ། ། ཁྱེད་ཀྱི་ཐུགས་ཁྲོ་ངའི་སྟེང་རྒྱས་པར་མཛད། ། དམག་དཔུང་རྣམས་ནི་བསྟུད་མར་ངའི་སྟེང་རྒྱུགས། །
JOB 10:18 ཁྱེད་ཀྱིས་ང་རང་མངལ་ནས་ཕྱུང་བ་ཅི། ། ང་རང་སྐབས་དེར་དབུགས་ཀྱི་རྒྱུན་ཆད་ནས། ། སུས་ཀྱང་མཐོང་བ་མིན་ན་ཅི་མ་རུང་། །
JOB 10:19 དེ་ནས་བདག་ནི་མ་སྐྱེས་པ་དང་མཚུངས། ། མངལ་ནས་ཐོན་ཚེ་དུར་དུ་བསྐྱལ་བ་ཡིན། །
JOB 10:20 བདག་གི་ཚེ་ནི་ཐུང་བ་མ་ཡིན་ནམ། ། བདག་ལ་དགའ་སྤྲོ་ཅུང་ཙམ་འཐོབ་པའི་ཕྱིར། ། ཁྱེད་ནི་བདག་དང་བྲལ་ནས་བསྐྱུར་བར་མཛོད། །
JOB 10:21 ཕྱིར་འོང་མེད་པའི་ཡུལ་དང་མུན་པའི་ཁམས། ། འཆི་བའི་ཕྱོགས་སུ་ང་རང་མ་སོང་གོང་། ། བདག་ལ་སྤྲོ་སྐྱིད་ཅུང་ཙམ་གནང་བར་མཛོད། །
JOB 10:22 ཡུལ་དེའི་སྨག་རུམ་ཅི་འདྲ་སྟུག་གེ་བ། ། འཆི་བའི་ཁམས་ནི་གོ་རིམ་ཉོག་པ་དང་། ། དེ་ཡི་འོད་ཀྱང་མུན་པའི་སྨག་རུམ་མོ། །
JOB 11:1 དེ་ནས་ན་ཨ་མད་པ་ཚའོ་ཕར་གྱིས་ལན་བཏབ་སྟེ་སྨྲས་པ།
JOB 11:2 ཚིག་འདི་ཡོངས་ལ་ལན་འདེབས་མི་འོས་སམ། ། སྐད་ཆ་མང་བ་དྲང་བདེན་ཅི་ལྟར་ཡིན། །
JOB 11:3 ཁྱེད་ཀྱི་ལབ་གླེང་གིས་ནི་མི་ཡི་ངག་བསྡམ་མམ། ། ཁྱེད་ཀྱིས་འཕྱ་དུས་ངོ་ཚ་གཏོད་མཁན་མེད་དམ་ཅི། །
JOB 11:4 ཁྱེད་ཀྱིས་ང་ཡི་བསླབ་བྱ་བདེན་པ་ཡིན། ། ཁྱེད་ཀྱི་གཟིགས་ངོར་བདག་ནི་གཙང་ཞེས་སྨྲས། །
JOB 11:5 དཀོན་མཆོག་ཉིད་ཀྱིས་བཀའ་གསུངས་ནས། ། ཁྱེད་ལ་སྐུར་བ་འདེབས་པར་ཤོག །
JOB 11:6 དག་པའི་ཤེས་བྱར་ཕྱོགས་གཉིས་ལྡན་པས་ན། ། གསང་བའི་ཤེས་རབ་ཁྱེད་ལ་སྟོན་པར་ཤོག ། ཁྱེད་ཀྱིས་ནམ་ཡང་ཤེས་པར་དགོས་པ་ནི། ། ཁྱེད་ཀྱི་སྡིག་ཉེས་ཁག་ཅིག་ཁོང་གིས་བརྗེད། །
JOB 11:7 ཁྱེད་ཀྱིས་དཀོན་མཆོག་ཉིད་ཀྱི་གསང་བ་རྙེད་འགྱུར་རམ། ། ཁྱེད་ནི་ཀུན་དབང་ཁོང་གི་མཐའ་རུ་སོན་ཐུབ་བམ། །
JOB 11:8 ཁོང་གི་ཤེས་རབ་ནམ་མཁའི་དབྱིངས་ལས་མཐོ། ། ཁྱེད་ཀྱིས་དེ་ལ་ཅི་ཞིག་བྱ་ནུས་སམ། ། གཤིན་ཡུལ་ལས་ཀྱང་ཟབ་པས་རྟོགས་ཅི་ནུས། །
JOB 11:9 དེ་ནི་ས་གཞི་ལས་ཀྱང་རྒྱང་རིང་ཞིང་། ། རྒྱ་མཚོ་བས་ཀྱང་ཤིན་ཏུ་རྒྱ་ཆེ་འོ། །
JOB 11:10 ཇི་སྟེ་ཁོང་དེར་ཕེབས་ནས་མི་བཀག་ཅིང་། ། མི་ཚོགས་ཁྲིམས་སར་བཀུག་ན་སུས་འགོག་ནུས། །
JOB 11:11 ཁོང་གིས་ཕན་མེད་མི་རྣམས་མཁྱེན་པ་དང་། ། ངན་སྤྱོད་མཐོང་དུས་གཟིགས་ཞིབ་མི་མཛད་དམ། །
JOB 11:12 ཁོག་སྟོང་ཅན་ལ་ཤེས་རབ་ལྡན་པ་ནི། ། རྐྱང་ལས་འགྲོ་བ་མིའི་རིགས་སྐྱེས་དང་མཚུངས། །
JOB 11:13 ཇི་སྟེ་ཁྱེད་ཀྱིས་རང་སེམས་བརྟན་པོར་མཛད་གྱུར་ཏེ། ། རང་གི་ལག་པ་དཀོན་མཆོག་ཕྱོགས་སུ་བཏེགས་ནས་ནི། །
JOB 11:14 ལག་པའི་སྡིག་པ་རིང་དུ་འདོར་བ་དང་། ། གུར་ནང་ཉེས་པ་གནས་སུ་མ་བཅུག་ན། །
JOB 11:15 ཁྱེད་གདོང་སྨེ་དང་བྲལ་ནས་ཡར་འདེགས་ཤིང་། ། ཁྱེད་རང་བརྟན་ཞིང་འཇིགས་པ་ཡེ་ནས་མེད། །
JOB 11:16 ཁྱེད་ཀྱིས་རང་གི་སྡུག་བསྔལ་བརྗེད་པར་འགྱུར། ། དྲན་ཡང་བཞུར་ཆུ་བཞིན་དུ་རྒྱུགས་པར་འགྱུར། །
JOB 11:17 ཁྱེད་ཀྱི་ཚེ་ནི་ཉིན་གུང་འོད་ལས་གསལ། ། མུན་པ་འབྱུང་ཡང་ཞོགས་པ་དང་མཚུངས་ཏེ། །
JOB 11:18 རེ་བ་ལྡན་པས་ཁྱེད་ནི་བརྟན་པོར་འགྱུར། ། ཕྱོགས་བཞིར་བལྟ་ཞིང་བདེ་བའི་ངལ་གསོ་ཐོབ། །
JOB 11:19 ཁྱེད་རང་ཉལ་དུས་སུས་ཀྱང་དཀྲོག་མི་འགྱུར། ། མང་པོས་ཁྱེད་ལ་གཟིགས་སྐྱོང་བྱེད་རེ་ཞུ། །
JOB 11:20 འོན་ཀྱང་སྡིག་སྤྱོད་མིག་ནི་ལོང་པར་འགྱུར། ། དེ་དག་ཐར་བའི་ལམ་ནི་མེད་པ་དང་། ། དེ་ཚོའི་རེ་བ་མཇུག་མཐའི་དབུགས་རྒྱུན་ཡིན། །
JOB 12:1 དེ་ནས་ཨེས་ཡོབ་ཀྱིས་ལན་བཏབ་སྟེ་གསུངས་པ།
JOB 12:2 ཁྱོད་རྣམས་དངོས་གནས་ཤེས་ལྡན་མི་སྡེ་ཡིན། ། ཁྱོད་དང་ལྷན་ཅིག་ཤེས་རབ་འདའ་བར་འགྱུར། །
JOB 12:3 ཁྱོད་ཅག་ལྟ་བུའི་ཤེས་རབ་བདག་ལའང་ལྡན། ། ཁྱོད་རྣམས་ལས་བདག་དམན་པ་མ་ཡིན་ཏེ། ། ཀྱེ་ཧུད་འདི་རྣམས་སུ་ཡིས་མི་ཤེས་སམ། །
JOB 12:4 བདག་གིས་དཀོན་མཆོག་ཞུས་ནས་ལན་ཐོབ་ཀྱང་། ། བདག་ནི་གྲོགས་པོ་རྣམས་ཀྱི་བཞད་གད་གྱུར། ། དྲང་བདེན་ཅན་དང་ཡོངས་སུ་རྫོགས་པའི་མི། ། གཞན་དག་རྣམས་ཀྱིས་འཕྱ་བའི་གནས་སུ་གྱུར། །
JOB 12:5 སྐྱིད་པོ་མི་ཡིས་ཆག་སྒོར་མཐོང་ཆུང་བྱེད། ། ཆག་སྒོ་སྡུག་བསྔལ་ཅན་གྱི་སྟེང་དུ་འབྱུང་། །
JOB 12:6 རྐུན་ཇག་རྣམས་ཀྱི་གུར་ནི་བདེ་ལེགས་ཤིང་། ། དཀོན་མཆོག་ཉིད་ཀྱི་ཐུགས་དཀྲུགས་རྣམས་བརྟན་ལ། ། དེ་ཚོའི་ལྷ་རྣམས་རང་གི་ལག་ཏུ་ཡོད། །
JOB 12:7 རི་དྭགས་རྣམས་ལ་དྲིས་ཤིག་ལམ་སྟོན་གནང་། ། ནམ་མཁའི་བྱ་ལ་དྲིས་ཤིག་འཆད་པར་འགྱུར། །
JOB 12:8 ཡང་ན་ས་ལ་དྲིས་དང་སྟོན་པར་འགྱུར། ། རྒྱ་མཚོའི་ཉ་ལ་དྲིས་དང་གསལ་པོར་སྟོན། །
JOB 12:9 དོན་འདི་ཀུན་ལ་ལྟ་དུས་སུ། ། དཀོན་མཆོག་ཡ་ཝཱེའི་ཕྱག་གིས་ནི། ། མཛད་པ་སུ་ཡིས་མི་ཤེས་སམ། །
JOB 12:10 སྲོག་ལྡན་གང་ཡིན་སེམས་ཅན་ཐམས་ཅད་དང་། ། དབུགས་ཐོགས་མི་ཡང་ཁོང་གི་ཕྱག་ཏུ་ཡོད། །
JOB 12:11 དཀན་གྱིས་ཁ་ཟས་བྲོ་བ་མྱོང་བ་བཞིན། ། རྣ་བས་གཏམ་གྱི་བྱེ་བྲག་མི་འབྱེད་དམ། །
JOB 12:12 རྒན་པ་རྣམས་ལ་ཤེས་རབ་ལྡན། ། ཚེ་རིང་རྣམས་ལ་བློ་གྲོས་ཡོད། །
JOB 12:13 ཤེས་རབ་དང་ནི་ནུས་མཐུ་ཁོང་ལ་མངའ། ། ཐབས་ཇུས་དང་ནི་བློ་གྲོས་ཁོང་ལ་ལྡན། །
JOB 12:14 ཁོང་གིས་བཤིགས་པ་ཡང་བསྐྱར་བརྩིག་མི་ནུས། ། ཁོང་གིས་བཀག་པ་སུས་ཀྱང་སྒྲོལ་ཐབས་མེད། །
JOB 12:15 ཁོང་གིས་ཆུ་རྣམས་བཀག་པས་དེ་རྣམས་བསྐམ། ། དེ་རྣམས་བཏང་བས་ས་གཞི་ཡོངས་སུ་བསྣུབ། །
JOB 12:16 ཁོང་ལ་ནུས་མཐུ་དང་ནི་ཤེས་རབ་ལྡན། ། གཡོ་སྒྱུ་ཅན་དང་གཡོ་འོག་ཚུད་པ་ནི། ། ཐམས་ཅད་མ་ལུས་ཁོང་ལ་དབང་བ་ཡིན། །
JOB 12:17 ཁོང་གིས་དཔོན་རིགས་རྐང་རྗེན་བཙོན་ལ་འཁྱེར། ། ཁྲིམས་དཔོན་རྣམས་ནི་བློ་གྲོས་རྨོངས་པར་མཛད། །
JOB 12:18 ཁོང་གིས་རྒྱལ་པོའི་ཆིངས་ཐག་སྒྲོལ་བྱེད་ཅིང་། ། དེ་དག་རྐེད་པར་སྐ་རགས་བཅིང་བར་མཛད། །
JOB 12:19 ཁོང་གིས་མཆོད་དཔོན་རྐང་རྗེན་ཁྲིད་པ་དང་། ། དཔའ་བོ་རྣམས་ནི་ཡོངས་སུ་ཕམ་པར་མཛད། །
JOB 12:20 ཁོང་གིས་བློ་དཀར་ཅན་གྱི་གཏམ་དོར་ཏེ། ། རྒན་པོའི་བློ་གྲོས་ཁོང་གིས་འཁྱེར་བར་མཛད། །
JOB 12:21 སྐུ་དྲག་རྣམས་ལ་ངོ་ཚ་ཐེབས་སུ་འཇུག ། དཔའ་རྩལ་ཅན་གྱི་སྐ་རགས་སྒྲོལ་བར་མཛད། །
JOB 12:22 ཁོང་གིས་གཏིང་ཟབ་དོན་རྣམས་མུན་ནག་ནང་ནས་མངོན། ། ཁོང་གིས་འཆི་བའི་སྨག་རུམ་ལས་ནི་འོད་ཟེར་སྤྲོ། །
JOB 12:23 ཁོང་གིས་མི་རིགས་དར་དུ་བཅུག་ནས་འཇོམས་པར་མཛད། ། མི་རིགས་འཕེལ་བར་མཛད་ནས་ཡང་བསྐྱར་བཙོན་དུ་འཁྲིད། །
JOB 12:24 ཁོང་གིས་མི་སྡེའི་འགོ་དཔོན་རྣམས་ཀྱི་བློ་རིག་འཁྱེར། ། ལམ་མེད་དབེན་སྟོང་གནས་སུ་དེ་རྣམས་འཁྱམ་དུ་འཇུག །
JOB 12:25 འོད་མེད་མུན་ནག་ནང་དུ་དེ་ཚོས་ལག་མྱུལ་བྱེད། ། ཁོང་གིས་དེ་ཚོ་བཟི་བའི་མི་ལྟར་འཁྱོར་མཛད་དོ། །
JOB 13:1 ང་ཡི་མིག་གིས་འདི་དག་ཐམས་ཅད་མཐོང་། ། ང་ཡི་རྣ་བས་འདི་དག་ཐམས་ཅད་ཐོས། ། དེ་ཡི་མི་ཚད་ད་དུང་ཡོད་ཚད་ཤེས། །
JOB 13:2 ཁྱོད་ཚོས་ཤེས་པ་ངས་ཀྱང་རྟོགས་པ་སྟེ། ། བདག་ནི་ཁྱོད་ལས་དམན་པ་མ་ཡིན་ནོ། །
JOB 13:3 བདག་གིས་ཀུན་དབང་ཁོང་དང་གླེང་འདོད་དེ། ། དཀོན་མཆོག་དང་ནི་རྩོད་གླེང་བྱེད་པར་དགའ། །
JOB 13:4 གང་ལྟར་ཁྱོད་ཅག་རྫུན་གཏམ་སྒྲིག་མཁན་ཏེ། ། ཐམས་ཅད་ཕན་ཐོགས་མེད་པའི་སྨན་པ་བཞིན། །
JOB 13:5 ཨེ་མ་ཁྱོད་ཅག་ཁ་རོག་བསྡད་ན་དགའ། ། དེ་ནི་ཁྱོད་ཀྱི་ཤེས་རབ་ཡིན་པར་མངོན། །
JOB 13:6 ད་ལྟ་བདག་གི་རྩོད་པར་ཉོན་ཅིག་དང་། ། བདག་གི་མཆུ་ཡིས་ཅི་ཞིག་ཞུ་བར་ཉོན། །
JOB 13:7 དཀོན་མཆོག་དོན་དུ་ཁྱོད་ཚོས་རྫུན་སྨྲ་འམ། ། ཁོང་གི་ཆེད་དུ་གཡོ་སྒྱུའི་གཏམ་གླེང་ངམ། །
JOB 13:8 ཁྱོད་ཚོས་དཀོན་མཆོག་ངོ་སོར་བལྟ་འདོད་དམ། ། དཀོན་མཆོག་དོན་དུ་རྩོད་པ་བྱེད་དམ་ཅི། །
JOB 13:9 ཁོང་གིས་ཁྱོད་ཚོར་ཞིབ་བཤེར་མཛད་པ་འདི། ། དོན་བཟང་ཡིན་མིན་ཁྱོད་ཀྱིས་མི་ཤེས་སམ། ། མི་ཡིས་མི་ལ་སླུ་བྲིད་བྱེད་པ་བཞིན། ། ཁྱོད་ཚོས་དེ་བཞིན་ཁོང་ཡང་བསླུ་འདོད་དམ། །
JOB 13:10 ཇི་སྟེ་ཁྱོད་ཚོས་ལྐོག་ནས་ཕྱོགས་བྱེད་ན། ། ཁོང་གིས་ཁྱོད་ཚོར་བཀའ་བཀྱོན་གནང་ངེས་ཏེ། །
JOB 13:11 ཁོང་གི་གཟི་བརྗིད་དང་ནི་མཆོག་གྱུར་གྱིས། ། ཁྱོད་ཚོར་འཇིགས་སྣང་སྐྱེ་བར་མཛད་པ་དང་། ། ཁྱོད་ཚོར་ཁོང་གི་འཇིགས་པ་མི་འབེབ་བམ། །
JOB 13:12 ཁྱོད་ཚོས་རྗེས་དྲན་བྱེད་པའི་ལེགས་བཤད་ནི། ། ཐལ་བར་འདྲ་བའི་གདམས་ངག་ཡིན་པ་དང་། ། ཁྱོད་ཚོའི་རྒྱབ་རྟེན་འདམ་གྱི་རྒྱབ་རྟེན་འདྲ། །
JOB 13:13 ཁྱོད་ཚོས་ཅི་ཡང་མི་འཆད་པར། ། བདག་ལ་སྨྲ་བར་མཛོད་ཅིག་དང་། ། དེ་ནས་བདག་ལ་ཅི་བྱུང་ཡང་། ། ཡོད་ཚད་བདག་གིས་འཁུར་བར་བྱ། །
JOB 13:14 ང་ཡིས་ཅི་ལ་རང་ཤ་རང་གི་སོ་ཐོག་སྐོན། ། ཚེ་སྲོག་རང་གི་ལག་མཐིལ་ལ་ནི་འཇོག་དོན་ཅི། །
JOB 13:15 ལྟོས་དང་ཁོང་གིས་བདག་ནི་གསོད་འགྱུར་བས། ། བདག་ལ་རེ་བ་ཅི་ཡང་མེད་པར་གྱུར། ། ཡིན་ཡང་ཁོང་གི་དྲུང་དུ་རང་ཉིད་ཀྱི། ། སྤྱོད་པ་སྤྱད་པར་བརྡར་ཤ་གཅོད་བྱེད་དོ། །
JOB 13:16 དད་མེད་ཁོང་དྲུང་འགྲོ་བར་མི་ནུས་པས། ། འདི་ནི་བདག་གི་ཐར་པར་འགྱུར་དགོས་ཏེ། །
JOB 13:17 ཁྱོད་ཚོས་བདག་གི་གཏམ་ལ་གསལ་པོར་ཉོན། ། བདག་གི་སྨྲ་བ་ཁྱོད་ཚོའི་རྣ་བར་བཅུག །
JOB 13:18 ལྟོས་དང་རང་གི་གནས་ལུགས་གསལ་བར་བྱ། ། བདག་ལ་བདེན་དྲང་ཡོད་པ་རང་གིས་ཤེས། །
JOB 13:19 བདག་དང་རྩོད་གླེང་བྱེད་མཁན་སུ་ཡོད་དམ། ། ཡོད་ན་བདག་གིས་ཅི་ཡང་མི་བརྗོད་པར། ། དབུགས་རྒྱུན་ཆད་དེ་ཤི་བ་ལྟར་དུ་ལུས། །
JOB 13:20 དོན་གཉིས་བདག་ལ་ལག་བསྟར་མི་མཛད་རོགས། ། དེ་ནས་ཁྱེད་ལས་བདག་ནི་ཡིབ་མི་བྱ། །
JOB 13:21 ཁྱེད་ཕྱག་བདག་གི་ལུས་དང་རིང་དུ་འབྲལ་བར་མཛོད། ། ཁྱེད་ཀྱི་བརྗིད་ཉམས་ཀྱིས་ནི་བདག་ལ་འཇིགས་མ་སློང་། །
JOB 13:22 དེ་ནས་ཁྱེད་ཀྱིས་འབོད་དུས་བདག་གིས་ཞུ་ལན་འབུལ། ། ཡང་ན་བདག་གིས་ཞུས་ཏེ་ཁྱེད་ཀྱིས་ལན་བསྩལ་རོགས། །
JOB 13:23 བདག་ལ་ཉེས་སྐྱོན་སྡིག་པ་ཅི་ཙམ་ཡོད། ། བདག་གི་སྐྱོན་དང་སྡིག་ཉེས་བདག་ལ་སྟོན། །
JOB 13:24 ཁྱེད་ཀྱི་ཞལ་རས་ཅི་ལ་སྦ་བར་མཛད། ། ཁྱེད་ཀྱིས་ང་རང་དགྲ་རུ་འཛིན་པ་ཅི། །
JOB 13:25 རླུང་འཁྱེར་ལོ་མར་ཁྱེད་ཀྱིས་འཇིགས་མཛད་དམ། ། སྦུར་མ་སྐམ་པོ་ཁྱེད་ཀྱིས་བདས་ཡོང་ངམ། །
JOB 13:26 ཁྱེད་ཀྱིས་ང་ཡི་ནག་ཉེས་བཅད་ཁྲར་འཁོད། ། གཞོན་དུས་ཉེས་ཆད་བདག་ལ་འཁུར་དུ་བཅུག །
JOB 13:27 ཁྱེད་ཀྱིས་བདག་གི་རྐང་པར་ཨན་གཏད་བརྒྱབ། ། བདག་གི་འགྲོ་ལམ་ཀུན་ལ་བལྟ་ཞིབ་མཛད། ། བདག་གི་གོམ་པ་སྤོ་སའི་དབྱེ་མཚམས་ཕྱེས། །
JOB 13:28 མི་ནི་རྩ་མེད་བཏང་བའི་སྙིགས་རུལ་དང་། ། མུག་མས་ཟོས་པའི་ལྭ་བ་དང་འདྲ་འོ། །
JOB 14:1 མི་ནི་བུད་མེད་དག་ལས་སྐྱེས་པ་དང་། ། ཚེ་ནི་ཐུང་ཞིང་སྡུག་བསྔལ་གྱིས་ནི་བཀང་། །
JOB 14:2 དེ་ནི་མེ་ཏོག་བཞིན་དུ་བཞད་ཅིང་གཅོད་པར་བྱེད། ། དེ་ནི་གྲིབ་མ་བཞིན་དུ་འབྲོ་ཞིང་མི་ལུས་ཏེ། །
JOB 14:3 དེ་ལྟའི་མི་ལ་ཁྱེད་ཀྱིས་གཟིགས་འགྱུར་རམ། ། ཉེས་ཆེད་གཅོད་ཕྱིར་ཁྱེད་དྲུང་བདག་འགུག་གམ། །
JOB 14:4 བཙོག་པའི་ནང་ནས་གཙང་བ་སུས་འདོན་ནུས། ། དེ་འདྲ་ནུས་པའི་མི་ནི་ཡོད་མ་ཡིན། །
JOB 14:5 མི་ཡི་ཚེ་ལོར་ཚད་ཡོད་ཅིང་། ། ཟླ་རྣམས་ཁྱེད་ལ་རག་ལས་ཏེ། ། ཁྱེད་ཀྱིས་ཁོ་ལ་མཚམས་བཅད་ན། ། ཁོ་རང་དེ་ལས་བརྒལ་མི་སྲིད། །
JOB 14:6 ཁྱེད་ཀྱིས་ཁོ་ལ་མི་གཟིགས་པར། ། ངལ་གསོ་ལེགས་པོ་གནང་བར་མཛོད། ། ཁོ་ཡིས་ཉིན་རེའི་སྐྱིད་ལ་རོལ། ། དེ་ནི་གླ་པའི་ཉིན་དང་མཚུངས། །
JOB 14:7 སྡོང་པོར་རེ་བ་ལྡན་པ་སྟེ། ། དེ་ཡི་ཡལ་ག་བཅད་ན་ཡང་། ། ཕྱིས་སུ་མྱུ་གུ་འབུས་པ་དང་། ། ལྕུག་གསར་ཡང་ནས་ཡང་དུ་སྐྱེས། །
JOB 14:8 སྡོང་པོའི་རྩད་པ་ས་ནང་རྙིང་གྱུར་ཏེ། ། དེ་ཡི་ཡལ་ག་ས་ནང་ཤི་ན་ཡང་། །
JOB 14:9 ཆུ་ཡི་གཤེར་གྱིས་མྱུག་གསར་སྐྱེ་འགྱུར་ཞིང་། ། སྡོང་ཕྲུག་བཞིན་དུ་ཡལ་ག་འཐོན་འགྱུར་གྱིས། །
JOB 14:10 མི་ནི་ཤི་ན་མེད་པར་འགྱུར་བ་དང་། ། དབུགས་རྒྱུན་ཆད་པར་གྱུར་དུས་ཚར་བ་ཡིན། །
JOB 14:11 རྒྱ་མཚོའི་ཆུ་རྣམས་བསྐམ་པར་འགྱུར་བ་དང་། ། གཙང་པོ་ཡང་ནི་བསྐམ་ཞིང་ཡལ་བར་འགྱུར། །
JOB 14:12 མི་ནི་ཉལ་རྗེས་ཡང་བསྐྱར་མི་ལང་སྟེ། ། ནམ་མཁའ་དག་ནི་མེད་པར་གྱུར་ན་ཡང་། ། མི་རྣམས་རང་གི་གཉིད་ལས་སད་མི་འགྱུར། ། གཞན་གྱིས་དེ་རྣམས་གཉིད་ལས་བསླང་མི་ནུས། །
JOB 14:13 ཁྱེད་ཀྱི་ཐུགས་ཁྲོ་ཞི་ཞིང་འདའ་བའི་བར། ། བདག་ནི་གཤིན་པོའི་ཡུལ་དུ་སྦ་བར་མཛོད། ། བདག་གི་དོན་དུ་དུས་བཅད་མཛད་པར་སྨོན། ། ད་དུང་བདག་ནི་ཐུགས་སུ་དྲན་རོགས་གནང་། །
JOB 14:14 མི་ནི་ཤི་རྗེས་སླར་ཡང་གསོན་ཐུབ་བམ། ། བདག་གིས་ངལ་ལས་རྒྱག་པའི་དུས་ཀུན་ཏུ། ། ཐར་པ་འཐོབ་པའི་བར་དུ་སྒུག་པར་འགྱུར། །
JOB 14:15 ཁྱེད་ཀྱིས་འབོད་དུས་ང་ཡིས་ཞུ་ལན་འབུལ། ། ཁྱེད་ཀྱི་བཀོད་པར་ཁྱེད་ནི་དུངས་པར་འགྱུར། །
JOB 14:16 དེ་ནས་ཁྱེད་ཀྱིས་ང་ཡི་གོམ་པ་བརྩི། ། བདག་གི་སྡིག་པར་ཁྱེད་ཀྱིས་མ་གཟིགས་ཏེ། །
JOB 14:17 བདག་གི་ཉེས་སྐྱོན་ཁྱེད་ཀྱིས་སྣོད་དུ་བཅུག ། ང་ཡི་སྡིག་ཉེས་ཁྱེད་ཀྱིས་འགེབ་པར་མཛད། །
JOB 14:18 འོན་ཀྱང་རི་བོ་ནུར་ཏེ་མེད་པར་གྱུར། ། ཕ་བོང་རང་གི་གནས་ལས་འཕོ་བར་གྱུར། །
JOB 14:19 བཞུར་ཆུས་རྡོ་རྣམས་བརྡར་བ་དང་། ། ཆུ་ལོག་གིས་ནི་རྡུལ་རྣམས་འཁུར། ། ཁྱེད་ཀྱིས་མི་ཡི་རེ་བ་གཅོད། །
JOB 14:20 ཁྱེད་ནི་ནམ་ཡང་མི་ལས་རྒྱལ། ། དེ་རྣམས་འཆི་བར་འགྱུར་བ་དང་། ། དེའི་གདོང་བསྒྱུར་བར་མཛད་གྱུར་ནས། ། མཐའ་མར་དེ་དག་མངག་པར་འགྱུར། །
JOB 14:21 ཁོང་གི་བུ་ལ་གཟི་བརྗིད་ཐོབ་ཀྱང་དེས་མི་རྟོགས། ། དེ་དག་དམན་སར་ལྷུང་ཡང་དེ་ཡིས་མི་ཤེས་ཏེ། །
JOB 14:22 རང་གི་ལུས་ཀྱི་ན་ཟུག་འབའ་ཞིག་ཚོར། ། སེམས་སུ་རང་གི་ཆེད་དུ་མྱ་ངན་བྱེད། །
JOB 15:1 དེ་མན་པ་ཨེ་ལི་ཕཱ་སི་ཡིས་ལན་བཏབ་ནས་སྨྲས་པ།
JOB 15:2 མཁས་པས་ཤེས་བྱ་སྟོང་བས་ལན་འདེབས་ག་ལ་རུང་། ། ཤར་རླུང་ གིས་ཀྱང་ཁོག་པ་འགེང་བར་མི་འཇུག་སྟེ། །
JOB 15:3 དེ་ཡིས་སྙིང་པོ་མེད་པའི་གཏམ་སྨྲས་ནས། ། ཕན་ཐོགས་མེད་པའི་གཏམ་གྱིས་མི་རྩོད་དོ། །
JOB 15:4 ཁྱེད་ཀྱིས་གུས་ཤིང་འཇིགས་པའི་སེམས་འདོར་ཞིང་། ། དཀོན་མཆོག་དྲུང་དུ་གསོལ་བ་འདེབས་པ་འགོག །
JOB 15:5 ཁྱེད་ཀྱི་སྡིག་པས་ངག་ལ་བཀའ་སློབ་མཛད། ། གཡོ་སྒྱུ་ཅན་གྱི་ལྕེ་ནི་ཁྱེད་ཀྱིས་བཟུང་། །
JOB 15:6 ཁྱེད་ཀྱི་ཁ་ཡིས་ཉེས་ཆད་གཅོད་པ་ལས། ། བདག་གིས་ཁྱེད་ལ་ཉེས་ཆད་གཏོང་བ་མིན། ། ཁྱེད་ཀྱི་མཆུ་ཡིས་སྤྱོད་ངན་དཔང་པོ་བྱེད། །
JOB 15:7 མི་ལས་ཐོག་མར་ཁྱེད་རང་སྐྱེས་གྱུར་ཏམ། ། ཡང་ན་རི་ལས་སྔོན་དུ་ཁྱེད་བཀོད་དམ། །
JOB 15:8 ཁྱེད་ཀྱིས་དཀོན་མཆོག་གསུང་མོལ་སྔོན་ཐོས་ཏེ། ། རང་ཉིད་གཅིག་པོས་ཤེས་རབ་ལོངས་སྤྱོད་དམ། །
JOB 15:9 ཁྱེད་ཀྱིས་ཤེས་ཏེ་ང་ཚོས་མི་ཤེས་ཅི། ། ཁྱེད་ཀྱིས་རྟོགས་ཏེ་ང་ཚོས་མི་རྟོགས་ཅི། །
JOB 15:10 ཁྱེད་ཀྱི་ཕ་ལས་མང་དུ་བགྲེས་གྱུར་པའི། ། མགོ་དཀར་བགྲེས་པོ་རྣམས་ནི་ངེད་མཉམ་ཡོད། །
JOB 15:11 ཁྱེད་ལ་དཀོན་མཆོག་ཁོང་གི་སེམས་གསོ་དང་། ། བཀའ་གསུང་སྙན་མོ་ཤིན་ཏུ་ཉུང་བསམ་མམ། །
JOB 15:12 ཁྱེད་རང་སེམས་ཚོར་དབང་དུ་སོང་བ་དང་། ། མིག་ལས་ཁོང་ཁྲོའི་མེ་ལྕེ་རབ་འབར་ནས། །
JOB 15:13 སེམས་ནས་དཀོན་མཆོག་ཉིད་ལ་རྒོལ་བ་དང་། ། ཁ་ནས་འདི་འདྲའི་ཚིག་ལོག་རྒྱག་པ་ཅི། །
JOB 15:14 གཙང་མར་བརྩིས་པའི་མི་ནི་སུ་ཡིན་ནམ། ། བུད་མེད་དག་ལས་བཙས་པ་ཅི་ཡིན་ནམ། ། དེ་རྣམས་དྲང་བདེན་དྲང་ལ་བརྩི་འོས་སམ། །
JOB 15:15 དཀོན་མཆོག་ཕོ་ཉ་རྣམས་ལ་ཡིད་རྟོན་མེད། ། ཁོང་གི་གཟིགས་ངོར་གནམ་ཡང་མི་གཙང་ན། །
JOB 15:16 སྡིག་པ་ཆུ་བཞིན་འཐུང་བའི་མི་རྣམས་དང་། ། ཐ་ཤལ་ཞེན་ལོག་ཅན་རྣམས་ལྟ་ཅི་སྨོས། །
JOB 15:17 བདག་གིས་མཛུབ་སྟོན་བྱེད་པར་ཁྱེད་ཀྱིས་ཉོན། ། བདག་གིས་གང་ཞིག་མཐོང་བ་འཆད་པར་བྱ། །
JOB 15:18 མཁས་པས་ཕ་མེས་རྣམས་ལས་ཐོས་པ་དང་། ། གསང་བ་མེད་པར་གསུངས་པའི་ཚིག་རྣམས་ཡིན། །
JOB 15:19 ཡུལ་འདི་ཁོང་རྣམས་གཅིག་པུར་གནང་བར་མཛད། ། དེ་དག་ཁྲོད་དུ་ཕྱི་རོལ་པ་ནི་མེད། །
JOB 15:20 ངན་པའི་མི་ཚེ་གང་པོར་སྡུག་གིས་མནར། ། གདུག་རྩུབ་ཅན་གྱི་མི་ཚེ་འདི་འདྲ་ཡིན། །
JOB 15:21 ཁོ་ཡི་རྣ་བར་རྒྱུན་དུ་འཇིགས་སྒྲ་སྒྲོག ། ཞི་བདེ་དུས་སུ་དེའི་ཐོག་ཆོམ་རྐུན་འོང་། །
JOB 15:22 མུན་པ་ལས་ནི་ཐར་བར་ཁོས་མི་རློམ། ། རལ་གྲིས་ཁོ་ལ་ནམ་རྒྱུན་བསྒུགས་ནས་ཡོད། །
JOB 15:23 དེ་ནི་བཟའ་བཏུང་འཚོལ་ཕྱིར་ཕྱི་རུ་འཁྱམ། ། གང་དུ་བཟའ་བཏུང་ཡོད་དམ་ཞེས་སྨྲ་ཞིང་། ། མུན་པའི་ཉིན་མོ་སླེབས་པ་ཁོས་ཤེས་སོ། །
JOB 15:24 སེམས་ཁྲལ་དཀའ་སྡུག་དབང་གིས་ཁོ་རང་འཇིགས། ། དེ་ནི་རྒྱལ་པོ་འཐབ་ལ་ཞུགས་པ་འདྲ། །
JOB 15:25 ཁོས་ནི་དཀོན་མཆོག་ཉིད་ལ་ཁུ་ཚུར་གཡུགས། ། ཀུན་དབང་ཁོང་ལ་རང་ཤུགས་ངོམ་པས་སོ། །
JOB 15:26 དེ་ཡིས་གཤིས་གྱོང་སེམས་དང་བཅས། ། སྲ་ཞིང་བརྟན་པའི་ཕུབ་བཟུང་ནས། ། ཀུན་དབང་ཉིད་ལ་རྒོལ་བར་རྒྱུགས། །
JOB 15:27 དེ་ཡི་ངོ་གདོང་ཤ་ཡིས་རྒྱགས། ། རྐེད་པར་ཚིལ་གྱིས་བཀང་བས་སོ། །
JOB 15:28 ཁོ་ནི་དབེན་སྟོང་གནས་སུ་བསྡད་པ་སྟེ། ། ཁང་པ་ནང་དུ་སྡོད་མཁན་གཅིག་ཀྱང་མེད། ། དེ་རྣམས་རྗེས་སུ་གྱང་རོར་འགྱུར་ངེས་ཡིན། །
JOB 15:29 ཁོ་ནི་ཕྱུག་པོར་མི་འགྱུར་ཞིང་། ། རྒྱུ་ནོར་ཅི་ཡང་བསོག་མི་ཐུབ། ། ཐོན་རྫས་གང་ཡང་འཕེལ་མི་འགྱུར། །
JOB 15:30 ཁོ་རང་སྨག་རུམ་དང་ནི་འབྲལ་མི་འགྱུར། ། དེ་ཡི་ཡལ་ག་མེ་ལྕེས་བསྲེག་པར་བྱ། ། དཀོན་མཆོག་ཁོང་གི་ཞལ་དབུགས་དབང་གིས་ནི། ། ཁོ་ཉིད་འབྲལ་བར་འགྱུར་བའི་ཕྱིར་ཡིན་ནོ། །
JOB 15:31 དེ་ལ་རྫུས་མ་ལན་དུ་འཐོབ་ངེས་པས། ། རྫུས་མར་བརྟེན་ནས་རང་ཉིད་བསླུ་མ་བྱེད། །
JOB 15:32 དེ་ཡི་ཚེ་མཇུག་མ་སླེབས་གོང་། ། བྱ་བ་འདི་ནི་འགྲུབ་པར་འགྱུར། ། དེ་ཡི་ཡལ་ག་རྒྱས་མི་འགྱུར། །
JOB 15:33 ཁོ་ནི་རྒུན་འབྲུམ་ཤིང་གི་རྒུན་འབྲུམ་བཞིན། ། མ་སྨིན་སྔོན་ལ་ས་རུ་ལྷུང་བ་དང་། ། སྐྱུ་རུ་ཤིང་གི་མེ་ཏོག་ནང་བཞིན་དུ། ། བཞད་མ་ཐག་ནས་ཡལ་དང་གཉིས་སུ་མེད། །
JOB 15:34 དད་གུས་མེད་པའི་མི་ལ་བུ་རྒྱུད་ཆད། ། ལྐོག་རྔན་ལེན་མཁན་གུར་རྣམས་མེས་བསྲེག་འོང་། །
JOB 15:35 དེ་ཚོར་ཟོལ་ཟོག་མངལ་ཆགས་ཤིང་། ། དེ་ཚོས་བཙས་པ་སྡིག་ཉེས་ཡིན། ། ཁོག་ནང་གཡོ་སྒྱུ་བསྒྲིགས་ཡོད་དོ། །
JOB 16:1 དེ་ནས་ཨེས་ཡོབ་ཀྱིས་ལན་བཏབ་ནས་གསུངས་པ།
JOB 16:2 བདག་གིས་འདི་འདྲའི་གཏམ་ནི་མང་དུ་ཐོས། ། ཁྱོད་རྣམས་སེམས་གསོ་བྱེད་མཁན་ཐབས་རྡུགས་ཡིན། །
JOB 16:3 འཆོལ་གཏམ་ལ་ནི་རྫོགས་པའི་དུས་ཡོད་དམ། ། གང་གིས་ཁྱོད་ལ་གཙེར་ནས་ལན་ཟློག་གམ། །
JOB 16:4 ངས་ཀྱང་ཁྱོད་ཚོའི་གཏམ་བཞིན་གླེང་ནུས་ཏེ། ། ཁྱོད་ཚོ་ང་ཡི་གནས་སུ་ལྷུང་གྱུར་ན། ། ངས་ཀྱང་ཁྱོད་ལ་རྒོལ་བའི་གཏམ་གླེང་ནུས། ། ཁྱོད་ཚོའི་ཕྱོགས་སུ་མགོ་ཡང་གཡུག་པར་ནུས། །
JOB 16:5 ཡིན་ཡང་བདག་གིས་ཁྱོད་ཚོ་བརྟན་པོར་བྱེད། ། སྨྲ་སྒོས་ཁྱོད་རྣམས་སེམས་སྡུག་མེད་པར་བྱ། །
JOB 16:6 ང་ཡིས་བརྗོད་ཀྱང་སྡུག་བསྔལ་མ་ཡལ་ཏེ། ། ངས་ངག་བསྡམས་ན་སྡུག་བསྔལ་འབྲལ་འགྱུར་རམ། །
JOB 16:7 ད་ནི་དཀོན་མཆོག་ཁོང་གིས་ང་རང་ཆད་དུ་བཅུག ། ང་ཡི་གཡོག་འཁོར་ཐམས་ཅད་གཞི་ནས་བརླག་པར་མཛད། །
JOB 16:8 དེ་མིན་ཁྱེད་ཀྱིས་ང་རང་བཟུང་ནས་ནི། ། བདེན་དཔང་དང་བཅས་ང་ལ་རྒོལ་བ་དང་། ། བདག་གི་ལུས་ཟུངས་རིད་པོ་འདི་ཡིས་ཀྱང་། ། དངོས་སུ་ང་ཡི་ཉེས་པར་དཔང་པོ་བྱེད། །
JOB 16:9 ཁོང་གི་ཐུགས་ཁྲོས་ང་རང་དབྲལ་བ་དང་། ། ཁོང་གི་ཐུགས་ཁྲོས་བདག་ལ་བཙན་སྐུལ་བྱེད། ། བདག་ཕྱོགས་ཁོང་གི་ཚེམས་ཀྱང་གཙིག་པར་མཛད། ། དགྲ་བོས་སྡང་བའི་མིག་གིས་བདག་ལ་ལྟ། །
JOB 16:10 དེ་ཚོས་ང་ལ་འཕྱ་བར་ཁ་གདང་ཞིང་། ། བརྙས་བཅོས་གཏོང་ཆེད་ང་ལ་འགྲམ་ལྕག་གཞུས། ། དེ་རྣམས་ལྷན་ཅིག་འཛོམས་ཏེ་ང་ལ་རྒོལ། །
JOB 16:11 ཁོང་གིས་ང་རང་བྱིས་པའི་ལག་པར་གཏད། ། སྡིག་སྤྱོད་ལག་ནང་ཁོང་གིས་བདག་ནི་བཅུག །
JOB 16:12 བདེ་བར་སྡོད་དུས་ཁོང་གིས་རྩ་ནས་གཏོར། ། ང་ཡི་གཉའ་ནས་བཟུང་སྟེ་ས་རུ་གཡུགས། ། ཁོང་གི་འབེན་དུ་བདག་ནི་སློང་བར་མཛད། །
JOB 16:13 ཁོང་གི་མདའ་པས་བདག་གི་མཐའ་ནས་བསྐོར། ། སྙིང་རྗེ་མེད་པར་བདག་གི་མཁལ་མ་ཕུག ། བདག་གི་མཁྲིས་ཁུ་ས་རུ་འཕོ་བར་མཛད། །
JOB 16:14 ཁོང་གིས་ང་རང་ཡང་ནས་ཡང་དུ་གཏོར། ། དཔའ་བོ་ནང་བཞིན་བདག་གི་ཕྱོགས་སུ་འཁྱོངས། །
JOB 16:15 ང་ཡིས་སྐྱི་མོ་སྟེང་དུ་གཙོ་མ་བཙེམས། ། རང་གི་རྭ་ཅོ་ ཐལ་བའི་ནང་དུ་བཞག །
JOB 16:16 བདག་ནི་ངུས་པས་ངོ་གདོང་དམར་པོར་གྱུར། ། ང་ཡི་མིག་ལྕིབས་སྟེང་དུ་སྨག་རུམ་ཡོད། །
JOB 16:17 འོན་ཀྱང་ང་ཡི་ལག་པར་གདུག་རྩུབ་མེད། ། བདག་གི་སྨོན་ལམ་རྣམ་དག་ཡིན་པར་ངེས། །
JOB 16:18 ཀྱེ་ཀྱེ་ས་གཞི་ངའི་ཁྲག་མ་སྦས་ཤིག ། ང་ཡི་འོ་དོད་འགོག་པར་མི་མཛད་རོགས། །
JOB 16:19 ལྟོས་དང་ནམ་མཁར་ང་ཡི་བདེན་དཔང་མཆིས། ། ང་རང་སྲུང་མཁན་མཐོན་པོའི་གནས་སུ་བཞུགས། །
JOB 16:20 བདག་གི་གྲོགས་པོས་བདག་ལ་འཕྱས་ན་ཡང་། ། དཀོན་མཆོག་ཕྱོགས་སུ་ང་ཡིས་མིག་ཆུ་བཞུར། །
JOB 16:21 མི་ཡིས་རང་གི་གྲོགས་པོ་བཞིན། ། དཀོན་མཆོག་ལ་ཡང་རྩོད་པར་ཤོག །
JOB 16:22 རྒྱུ་མཚན་ལོ་འགའ་ཕྱིན་པའི་རྗེས། ། བདག་ནི་མི་ལྡོག་ལམ་དུ་འཇུག །
JOB 17:1 ངའི་དབུགས་ཆད་ཅིང་ང་ཡི་ཚེ་རྫོགས་པས། ། དུར་ཁྲོད་བདག་ཆེད་གྲ་སྒྲིག་བྱས་ཟིན་ཏེ། །
JOB 17:2 ཁྲེལ་དགོད་བྱེད་མཁན་དངོས་གནས་བདག་དང་མཉམ་དུ་གནས། ། ང་ཡི་མིག་གིས་ཁོ་ཚོའི་གྱེན་ལོག་སྣང་ཚུལ་མཐོང་། །
JOB 17:3 ཁྱེད་ཀྱིས་དངོས་སུ་བདག་ལ་གཏའ་མ་གནང་བར་མཛོད། ། ང་ལ་ཁག་ཐེག་བྱེད་མཁན་ཁྱེད་ལས་གཞན་སུ་ཡོད། །
JOB 17:4 དེ་དག་སེམས་ཀྱི་ཤེས་རབ་སྦས་མཛད་པས། ། ཁྱེད་ཀྱིས་དེ་དག་མཐོ་སར་མི་འཇོག་སྟེ། །
JOB 17:5 སྐལ་བ་ཐོབ་ཆེད་མཛའ་བོ་གཏུག་མཁན་རྣམས། ། དེ་ཡི་བུ་ཕྲུག་མིག་ནི་ཞར་གྱུར་ཅིག །
JOB 17:6 ཁོང་གིས་ང་རང་མི་རྣམས་གཏམ་དཔེར་མཛད། ། མི་ཡིས་བདག་གི་གདོང་ལ་མཆིལ་མ་གཏོར། །
JOB 17:7 སྡུག་བསྔལ་རྐྱེན་གྱིས་ངའི་མིག་རབ་རིབ་གྱུར། ། ང་ཡི་རྐང་ལག་གྲིབ་མ་ཙམ་དུ་གྱུར། །
JOB 17:8 དྲང་པོ་རྣམས་ནི་འདི་ལ་ཧ་ལས་ཤིང་། ། ཉེས་མེད་རྣམས་ཀྱིས་ཆོས་མེད་དག་ལ་རྒོལ། །
JOB 17:9 དྲང་བདེན་དག་གིས་རང་ལམ་བསྲུང་བ་དང་། ། ལག་གཙང་མི་ལ་སྟོབས་ཁར་སྟོབས་ཤུགས་འཛོམས། །
JOB 17:10 འོན་ཀྱང་ཁྱོད་ཅག་ཐམས་ཅད་ཕྱིར་ལོག་ཤོག ། ཁྱོད་རྣམས་ཁྲོད་དུ་བློ་ལྡན་གཅིག་ཀྱང་མེད། །
JOB 17:11 ང་ཡི་ཉིན་མོ་རྣམས་ནི་འདས་ཟིན་ཏེ། ། ཐབས་ཇུས་དང་ནི་སེམས་ཀྱི་རེ་འདུན་ཆད། །
JOB 17:12 དེ་ཚོས་མཚན་མོ་ཉིན་མོར་བསྒྱུར་བྱེད་ཅིང་། ། མུན་པར་ཐུག་ཀྱང་འོད་ནི་ཉེ་བར་སྨྲ། །
JOB 17:13 གཤིན་ཁམས་རང་གི་ཁྱིམ་དུ་འདོད་ནས་ནི། ། རང་གི་མལ་ཆས་སྨག་རུམ་དུ་བཏིངས་ཚེ། །
JOB 17:14 བདག་གིས་གཤིན་པོའི་ཡུལ་ལ་ནི། ། ཁྱོད་ནི་ང་ཡི་ཕ་ཡིན་ཞིང་། ། འབུ་ཁྱོད་ང་ཡི་མ་དང་ནི། ། ལྕམ་སྲིང་ཡིན་ཞེས་སྨྲས་གྱུར་ན། །
JOB 17:15 དེ་ནས་བདག་གི་རེ་བ་གང་དུ་ཡོད། ། བདག་གིས་བཅངས་པའི་རེ་བ་སུས་མཐོང་ཡོང་། །
JOB 17:16 རེ་བ་དེ་ནི་བདག་མཉམ་དུར་སྒོར་བབས་ནས་ནི། ། བདག་དང་ལྷན་ཅིག་ས་རྡུལ་ནང་དུ་གནས་འགྱུར་རམ། །
JOB 18:1 དེ་ནས་ཤུ་ཧེ་པ་པེལ་དེལ་གྱིས་ལན་བཏབ་ནས་སྨྲས་པ།
JOB 18:2 ཁྱེད་ཀྱིས་ནམ་དུས་བར་དུ་གཏམ་འཚོལ་ལམ། ། གསལ་པོར་སོམས་དང་དེ་ནས་བརྗོད་པར་བྱ། །
JOB 18:3 ངེད་ཅག་དུད་འགྲོ་ལྟ་བུར་བརྩིས་ནས་ནི། ། ཁྱེད་ཀྱི་མིག་ནང་བླུན་པོར་གྱུར་པ་ཅི། །
JOB 18:4 ཁོང་ཁྲོའི་ནང་དུ་རང་ཉིད་ཧྲལ་པ་ཁྱེད། ། ས་གཞི་ཁྱེད་ཕྱིར་མེད་པར་འགྱུར་བ་དང་། ། བྲག་རིས་རང་གི་གནས་ཀྱང་འཕོ་འགྱུར་རམ། །
JOB 18:5 སྡིག་སྤྱོད་མི་ཡི་འོད་ནི་ཞི་ངེས་ཏེ། ། དེ་ཡི་མེ་སྟག་གིས་ནི་འོད་མི་སྤྲོ། །
JOB 18:6 དེ་ཡི་གུར་ནང་འོད་ནི་མུན་པར་འགྱུར། ། སྟེང་གི་འོད་ཀྱང་མཉམ་དུ་ཞི་བར་འགྱུར། །
JOB 18:7 ཁོ་ཡི་སྟོབས་ལྡན་གོམ་སྟབས་དགག་པར་མཛད། ། རང་གི་ཇུས་ཀྱིས་ཁོ་རང་བརྡབ་པར་འགྱུར། །
JOB 18:8 དེ་ལྟར་རང་གི་རྐང་པས་རྙི་ནང་འཚུད། ། རྙི་ཡི་སྟེང་དུ་ཁོ་རང་འགྲུལ་བས་ན། །
JOB 18:9 དྲ་རྒྱས་དེ་ཡི་ཕྱི་རྟིང་འཛིན་པར་འགྱུར། ། རྒྱ་རྙི་ཞིག་གིས་ཁོ་ནི་འཁྱིག་པར་བྱ། །
JOB 18:10 ཁོའི་དོན་ས་འོག་ཞགས་པ་སྦས་འདུག་ཅིང་། ། ཁོའི་ཕྱིར་ལམ་དུ་འཆིང་སྒྲོག་སྦས་ནས་ཡོད། །
JOB 18:11 ཕྱོགས་བཞིའི་འཇིགས་པས་ཁོ་རང་སྐྲག་པར་བྱེད། ། ཁོ་ཡི་གོམ་པའི་རྗེས་སུ་བདས་ནས་འོང་། །
JOB 18:12 བཀྲེས་པས་ཁོ་ཡི་སྟོབས་ནི་ཟད་འགྱུར་ཞིང་། ། གནོད་འཚེས་ཁོ་ཡི་གམ་དུ་སྒུག་པར་བྱེད། །
JOB 18:13 ཁོ་ཡི་ལུས་ཀྱི་ཡན་ལག་དེ་ཡིས་བཟའ། ། འཆི་བའི་སྔོན་སྐྱེས་ཀྱིས་དེའི་ཡན་ལག་མིད། །
JOB 18:14 དེ་ནི་རང་ཉིད་བརྟེན་སའི་གུར་ལས་སྐྲོད་པར་འགྱུར། ། དེ་ནི་འཇིགས་བྱེད་རྒྱལ་པོའི་དྲུང་དུ་འདྲེན་པར་འགྱུར། །
JOB 18:15 ཁོ་ལ་མི་གཏོགས་པ་ནི་དེ་ཡི་གུར་ནང་གནས། ། མུ་ཟི་ཁོ་རང་སྡོད་པའི་གནས་སུ་གཏོར་ངེས་ཡིན། །
JOB 18:16 མཐིལ་ནས་དེ་ཡི་རྩ་བ་སྐམ་པ་དང་། ། སྟེང་ནས་དེ་ཡི་ཡལ་ག་རྙིད་པར་འགྱུར། །
JOB 18:17 དེ་ཡི་མཚན་སྙན་ས་ལས་ནུབ་པ་དང་། ། སྲང་ལམ་ནང་དེའི་མིང་ཡང་ལུས་མི་འགྱུར། །
JOB 18:18 དེ་ནི་འོད་ལས་མུན་པར་འདེད་འགྱུར་ཏེ། ། ས་གཞི་ལས་ནི་ཁོ་རང་སྐྲོད་པར་འགྱུར། །
JOB 18:19 རང་གི་སྡེ་ནང་བུ་རབས་ཚ་རྒྱུད་མེད། ། བྱེས་སུ་སྡོད་སར་གཅིག་ཀྱང་ལུས་མི་འགྱུར། །
JOB 18:20 སྔོན་མའི་མི་རྣམས་འཇིགས་པས་བཟུང་བ་ནང་བཞིན་དུ། ། རྗེས་རབས་པ་རྣམས་ཁོ་ཡི་མི་ཚེར་ཧ་ལས་ཡོང་། །
JOB 18:21 སྡིག་སྤྱོད་ཅན་གྱི་ཁྱིམ་ནི་འདི་ལྟར་ཏེ། ། དཀོན་མཆོག་མི་ཤེས་མཁན་གྱི་གནས་དེ་འོ། །
JOB 19:1 དེ་ནས་ཨེས་ཡོབ་ཀྱིས་ལན་བཏབ་ནས་གསུངས་པ།
JOB 19:2 ཁྱོད་ཚོས་ཅི་ཙམ་བདག་གི་སེམས་འཚེ་སྟེ། ། ཚིག་གིས་བདག་ལ་གནོན་ཤུགས་སྟེར་བ་ཡིན། །
JOB 19:3 ཁྱོད་ཚོས་ཐེངས་བཅུར་བདག་ལ་ངོ་ཚ་གཏད། ། ང་རང་སྡུག་ལ་གཏད་ཀྱང་ངོ་མི་གནོང་། །
JOB 19:4 ང་རང་ནོར་བའི་དབང་དུ་བཏང་ན་ཡང་། ། སྐྱོན་ཆ་ཐམས་ཅད་བདག་ལས་བྱུང་བ་སྟེ། །
JOB 19:5 ཁྱོད་ཚོས་རང་རློམ་དང་བཅས་ང་རྒོལ་ཞིང་། ། བདག་གི་ངོ་ཚས་ང་ལ་བཀྱོན་འདོད་ན། །
JOB 19:6 དཀོན་མཆོག་ཉིད་ཀྱིས་ང་རང་ཕམ་བཅུག་སྟེ། ། དྲ་རྒྱས་ངའི་མཐའ་བསྐོར་བ་ཤེས་པར་གྱིས། །
JOB 19:7 བདག་གིས་འོ་དོད་བོས་ཀྱང་ལན་མི་གནང་། ། བདག་གིས་ཞུས་ཀྱང་དྲང་གཞག་འབྱུང་མི་སྲིད། །
JOB 19:8 ཁོང་གིས་བདག་གི་ལམ་བུ་བཀག་པས་ན། ། ང་རང་ལམ་བུ་དེ་ལ་རྒྱུ་མ་ནུས། ། བདག་གི་ལམ་དུ་སྨག་རུམ་འཐིབས་པར་མཛད། །
JOB 19:9 ཁོང་གིས་བདག་གི་དཔལ་ནི་བཤུས་ཁྱེར་ཏེ། ། བདག་གི་མགོ་ནས་ཅོད་པན་བསྣམས་པར་མཛད། །
JOB 19:10 ཁོང་གིས་ཕྱོགས་བཞིར་ང་རྒོལ་བས། ། ང་རང་འཆི་བའི་ལམ་དུ་བརྫངས། ། ཁོང་གིས་བདག་གི་རེ་བ་ནི། ། སྡོང་པོ་བཞིན་དུ་རྩ་ནས་བལ། །
JOB 19:11 ཁོང་ཉིད་བདག་ལ་ཐུགས་ཁྲོ་མེ་ལྟར་འབར། ། ང་རང་ཁོང་གི་དགྲ་རུ་བརྩི་བར་མཛད། །
JOB 19:12 ཁོང་གི་དཔུང་ཚོགས་འདུས་ནས་བདག་ཕྱོགས་འོངས། ། ལམ་བུ་བཟོས་ཏེ་བདག་ལ་རྒོལ་བ་དང་། ། བདག་གི་གུར་གྱི་མཐའ་ནས་དམག་སྒར་བཙུགས། །
JOB 19:13 ཁོང་གིས་བདག་གི་སྤུན་རྣམས་རིང་དུ་གྱེས་པར་མཛད། ། ང་ཡི་ངོ་ཤེས་རྣམས་ཀྱང་འབྲེལ་བ་གཞི་ནས་ཆད། །
JOB 19:14 བདག་གི་ཤ་ཉེ་རྣམས་ནི་བདག་དང་བྲལ། ། བདག་གི་མཛའ་བོ་རྣམས་ཀྱིས་ང་རང་བརྗེད། །
JOB 19:15 བདག་གི་མགྲོན་དང་བྲན་མོས་ང་རང་ཆ་མེད་བརྩིས། ། དེ་ཚོའི་མིག་ནང་བདག་ནི་ཕྱི་རོལ་པ་རུ་གྱུར། །
JOB 19:16 ང་ཡིས་འཁོར་གཡོག་བོས་ཀྱང་ལན་མ་བྱིན། ། དངོས་སུ་ཞུ་བ་ཕུལ་ཡང་ཨ་ལན་མེད། །
JOB 19:17 ཆུང་མ་བདག་གི་ཁ་དྲིར་ཞེན་ལོག་ཅིང་། ། སྤུན་ཟླ་རྣམས་ནི་བདག་ལ་སྡང་བ་ཡིན། །
JOB 19:18 བྱིས་པ་རྣམས་ཀྱང་བདག་ལ་མཐོང་ཆུང་བྱེད། ། ང་ཡར་ལངས་དུས་དེ་ཚོས་སྨད་པར་རྩོམ། །
JOB 19:19 བདག་གི་མཛའ་བོ་རྣམས་ནི་ང་ལ་སྡང་། ། ང་རང་བྱམས་པའི་མི་ཡིས་བདག་སྤངས་སོ། །
JOB 19:20 ང་ཡི་ཤ་དང་སྐྱི་མོ་རུས་པར་འབྱར། ། བདག་ལ་རྙིལ་ཙམ་ལུས་ཏེ་ཐར་བ་ཡིན། །
JOB 19:21 དཀོན་མཆོག་ཕྱག་གིས་བདག་ལ་རྒོལ་བས་ན། ། མཛའ་བོ་རྣམས་ཀྱིས་བདག་ལ་སྙིང་རྗེ་གནོངས། །
JOB 19:22 ཁྱོད་ཚོས་དཀོན་མཆོག་བཞིན་དུ་ང་འདེད་ཅིང་། ། བདག་ལུས་སྡུག་བསྔལ་བས་ཀྱང་མི་ཚིམ་ཅི། །
JOB 19:23 ང་ཡི་ཚིག་རྣམས་ད་ལྟ་འབྲི་རོགས་གནང་། ། གླེགས་བམ་ནང་དུ་བཀོད་ན་ཅི་མ་རུང་། །
JOB 19:24 གཏན་དུ་གནས་པའི་ཕྱིར་དུ་ཕ་བོང་སྟེང་། ། ལྕགས་སྨྱུག་དང་ནི་ཞ་ཉེས་བརྐོས་ན་ལེགས། །
JOB 19:25 ང་ཡི་སྐྱབས་མགོན་གསོན་པོར་བཞུགས་པ་དང་། ། མཇུག་མཐར་ས་གཞིའི་སྟེང་དུ་བཞེང་བ་ཤེས། །
JOB 19:26 ང་ཡི་ཤ་རུས་འདི་ནི་འཇིག་འགྱུར་ཡང་། ། གཟུགས་པོ་མེད་བཞིན་དཀོན་མཆོག་མཇལ་ངེས་ཡིན ། །
JOB 19:27 བདག་གི་མིག་གིས་ཁོང་ཉིད་མཐོང་བར་འགྱུར། ། གཞན་མིན་རང་གི་མིག་གིས་ཁོང་མཇལ་ཡོང་། ། ངའི་སེམས་རང་གི་ཁོག་ནང་ཤིན་ཏུ་ངལ། །
JOB 19:28 རྩ་བའི་རྒྱུ་རྐྱེན་བདག་ནང་ཡོད་པ་བཞིན། ། ཁོ་རང་འདེད་ཅིག་ཁྱོད་ཚོས་ཅི་ལ་ཟེར། །
JOB 19:29 ཁོང་ཁྲོས་རལ་གྲིའི་བཀའ་ཆད་འདྲེན་པའི་ཕྱིར། ། ཁྱོད་རྣམས་རལ་གྲི་དེ་ལ་འཇིགས་པར་འོས། ། དེ་ལྟར་ཁྱོད་ཚོས་ཉེས་ཆད་རྟོགས་འགྱུར་རོ། །
JOB 20:1 དེ་ནས་ན་ཨ་མད་པ་ཚའོ་ཕར་གྱིས་ལན་བཏབ་ནས་སྨྲས་པ།
JOB 20:2 ང་ཡི་སེམས་པ་ཤིན་ཏུ་འཚབ་པས་ན། ། ང་ཡི་བསམ་པས་ལན་ཞིག་འདེབས་སུ་འཇུག །
JOB 20:3 བདག་ལ་བརྙས་པའི་བཀའ་བཀྱོན་ངས་ཐོས་པས། ། ང་ཡི་གོ་རྟོགས་ཀྱིས་ནི་ལན་འདེབས་འཇུག །
JOB 20:4 ས་སྟེང་མི་བུ་བཀོད་ནས་ད་ལྟའི་བར། ། ཁྱེད་ཀྱིས་འདི་ནི་སྔར་ནས་མ་རྟོགས་སམ། །
JOB 20:5 སྡིག་སྤྱོད་མི་ཡི་དགའ་འབོད་དུས་ཐུང་ཞིང་། ། ཆོས་མེད་མི་ཡི་དགའ་སྤྲོ་ཡུད་ཙམ་ཡིན། །
JOB 20:6 དེ་ཡི་གཟི་དཔལ་ནམ་མཁའི་བར་དུ་ཕྱིན། ། མགོ་བོ་སྤྲིན་པའི་ནང་དུ་ཟུག་ན་ཡང་། །
JOB 20:7 ཁོ་ནི་རང་གི་རྟུག་པ་བཞིན་དུ་ཡལ། ། གང་དུ་ཡོད་ཅེས་མཐོང་མཁན་རྣམས་ཀྱིས་འདྲི། །
JOB 20:8 ཁོ་ནི་རྨི་ལམ་ལྟར་དུ་ཡལ་བས་རྙེད་མི་འགྱུར། ། མཚན་མོའི་འཆར་སྣང་བཞིན་དུ་ཁོ་ནི་འདེད་པར་འགྱུར། །
JOB 20:9 ཁོ་སྔར་མཐོང་བའི་མིག་གིས་ཁོ་མི་མཐོང་། ། རང་ཁྱིམ་ལ་ཡང་ཁོ་ནི་མཐོང་མི་འགྱུར། །
JOB 20:10 དེ་ཡི་བུ་ཚོས་དབུལ་པོར་སྐྱབས་འཇུག་ཞུ། ། དེ་ཡི་ལག་པས་རྒྱུ་ནོར་ཕྱི་རུ་སྤྲོད། །
JOB 20:11 རུས་པར་ན་གཞོན་ལྟ་བུའི་ཤེད་ལྡན་ཡང་། ། ཁོ་དང་མཉམ་དུ་རྡུལ་ནང་ཉལ་བར་འགྱུར། །
JOB 20:12 དེ་ཡི་ཁ་ལ་ཉེས་སྡིག་མངར་མོ་ཡིན། ། ལྕེ་ཡི་འོག་ཏུ་ཉེས་སྡིག་སྦ་བ་དང་། །
JOB 20:13 དེ་ལ་ཆགས་ཤིང་འདོར་བར་མི་འདོད་དེ། ། རང་གི་ཁ་ནང་སྦས་ནས་འཇོག་མོད་ཀྱང་། །
JOB 20:14 དེ་ཡི་ཁ་ཟས་ལྟོ་བར་རུལ་ནས་ནི། ། ཁོག་ནང་དུག་སྦྲུལ་དུག་ཆུ་བཞིན་དུ་འགྱུར། །
JOB 20:15 དེ་ཡིས་ནོར་རྣམས་མིད་ཀྱང་སླར་བསྐྱུག་ངེས། ། དཀོན་མཆོག་ཉིད་ཀྱིས་དེ་ཡི་ཁོག་ནས་འདོན། །
JOB 20:16 དུག་སྦྲུལ་གྱི་ནི་དུག་ཆུ་ཁོས་འཇིབ་སྟེ། ། ལྟོ་འགྲོ་ལྕེ་ཡིས་ཁོའི་སྲོག་གཅོད་པར་འགྱུར། །
JOB 20:17 འོ་མ་དང་ནི་སྦྲང་རྩིའི་ཆུ་བོ་དང་། ། གཙང་པོ་རྣམས་ནི་ཁོས་ནི་མཐོང་མི་འགྱུར། །
JOB 20:18 དེ་ཡིས་འབད་ཀྱིས་ཐོབ་སྐལ་རྙེད་ཀྱང་ཕྱིར་སྤྲོད་དགོས། ། ཚོང་ལས་རྒྱུ་ནོར་ཐོབ་ཀྱང་དགའ་སྤྲོ་མི་རྙེད་དེ། །
JOB 20:19 རྒྱུ་མཚན་དེ་ཡིས་དབུལ་པོར་བརྙས་ཤིང་དོར། ། གཞན་གྱིས་བསྐྲུན་པའི་ཁང་པ་བཙན་གྱིས་བླངས། །
JOB 20:20 ཁོ་ནི་ཧམ་འདོད་ངོམས་མེད་ཡིན་པས་ན། ། གང་ལ་ཆགས་པ་ཅི་ཡང་ལུས་མི་འགྱུར། །
JOB 20:21 ལུས་པ་གཅིག་ཀྱང་མིད་ནས་མ་བཞག་པས། ། དེ་ཡི་ལོངས་སྤྱོད་ཡུན་རིང་གནས་མི་འགྱུར། །
JOB 20:22 ཚིམ་པའི་དུས་ལ་ཁོ་རང་འུ་ཐུག་འགྱུར། ། ཉོན་མོངས་ཅན་གྱི་ལག་ཀུན་དེའི་ཐོག་དབབ། །
JOB 20:23 རང་གི་ལྟོ་བ་འགྲངས་སུ་འཇུག་པའི་དུས། ། དཀོན་མཆོག་ཁོང་གི་ཐུགས་ཁྲོ་དེའི་སྟེང་དབབ། ། དེ་ཡིས་ཁ་ཟས་ལ་ནི་རོལ་བའི་དུས། ། ཐུགས་ཁྲོ་ཆར་བ་བཞིན་དུ་དེའི་ཐོག་དབབ། །
JOB 20:24 ལྕགས་ཀྱི་མཚོན་ཆ་ལས་ཁོ་བྲོས་ན་ཡང་། ། ལི་ཡི་མདའ་གཞུས་ཁོ་ནི་འབིགས་པར་འགྱུར། །
JOB 20:25 མདའ་མོ་བཏོན་པར་རྒྱབ་ནས་ཐོན་པ་དང་། ། འོད་སྤྲོ་མདའ་མགོ་མཁྲིས་པའི་ནང་ནས་ཐོན། ། དངངས་སྐྲག་གིས་ནི་ཁོ་རང་འཇོམས་པར་འགྱུར། །
JOB 20:26 དེ་ཡི་གཏེར་ནི་མུན་པའི་ནང་དུ་ལྟུང་། ། མི་ཡིས་མ་སྦར་མེས་དེ་བསྲེག་པར་འགྱུར། ། གུར་གྱི་ནང་གི་ལྷག་མ་རྣམས་བསྲེག་འོང་། །
JOB 20:27 གནམ་གྱིས་དེ་ཡི་སྡིག་ཉེས་མངོན་པར་བྱ། ། ས་གཞི་ཡང་ནི་དེ་ཡི་དགྲ་རུ་ལང་། །
JOB 20:28 དེ་ཡི་ཁྱིམ་གྱི་ཐོན་རྫས་མེད་པར་འགྱུར་བ་དང་། ། དཀོན་མཆོག་ཐུགས་ཁྲོའི་ཉིན་མོར་རྒྱུ་ནོར་འཁུར་བར་འགྱུར། །
JOB 20:29 འདི་ནི་སྡིག་སྤྱོད་ཅན་ལ་ཐོབ་པའི་སྐལ་བ་སྟེ། ། དཀོན་མཆོག་ཉིད་ཀྱིས་དེ་ལ་གནང་བའི་ནོར་སྐལ་ཡིན། །
JOB 21:1 དེ་ནས་ཨེས་ཡོབ་ཀྱིས་ལན་བཏབ་ནས་སྨྲས་པ།
JOB 21:2 ཁྱོད་ཚོས་བདག་གི་གཏམ་ལ་ཞིབ་ཏུ་ཉོན་ཅིག་དང་། ། བདག་ལ་མཚོན་ན་དེ་ནི་ཁྱོད་ཚོའི་སེམས་གསོ་ཡིན། །
JOB 21:3 བདག་གིས་ཡང་བསྐྱར་གཏམ་གླེང་བྱེད་པར་གུ་ཡངས་ཐོངས། ། ངའི་གཏམ་བརྗོད་རྗེས་ཁྱོད་ཚོས་འཕྱ་མོད་བྱེད་ཆོག་ཆོག །
JOB 21:4 བདག་གིས་མིའི་མདུན་སྡུག་བསྔལ་བགྲང་བྱེད་དམ། ། ང་ཡི་སེམས་ཀྱིས་བཟོད་པ་ཅི་ལ་བསྒོམ། །
JOB 21:5 ཁྱོད་ཚོ་བདག་ཕྱོགས་འཁོར་ནས་ཧ་ལས་ཤིང་། ། རང་གི་སྨྲ་སྒོ་ལག་པས་འགེབ་པ་ཡིན། །
JOB 21:6 ང་ཡིས་དྲན་པའི་ཚེ་ན་འཇིགས་སྣང་སྐྱེ། ། བདག་གི་ལུས་ལ་འདར་ཡོམ་བྱུང་བ་ཡིན། །
JOB 21:7 མི་ངན་གསོན་པོར་ལུས་ཤིང་ཚེ་རིང་ལ། ། སྟོབས་ཤུགས་རྒྱས་ཤིང་འཕེལ་བ་ཅི་ཡིན་ནམ། །
JOB 21:8 དེ་དང་མཉམ་དུ་བུ་རྒྱུད་མིག་མདུན་གནས། ། རང་གི་ཚ་རྒྱུད་བརྟན་པོར་གནས་པ་མཐོང་། །
JOB 21:9 དེའི་ཁྱིམ་འཇིགས་པར་བྲལ་ཞིང་བདེ་བར་གནས། ། ཁོ་ཚོའི་སྟེང་དུ་དཀོན་མཆོག་དབྱུག་པ་མེད། །
JOB 21:10 ཁོ་ཚོའི་གླང་གིས་རྒྱུད་ནི་སྤེལ་ཞིང་རྒྱུན་མི་ཆད། ། ཁོ་ཚོའི་བ་མོར་བ་ཕྲུག་སྐྱེ་ཞིང་མངལ་མི་ལྷུང་། །
JOB 21:11 ལུག་ཁྱུ་བཞིན་དུ་དེ་ཚོས་བྱིས་པ་ཕྱི་རོལ་འཁྲིད། ། དེ་ཡི་བུ་ཕྲུག་རྣམས་ཀྱིས་དགའ་སྤྲོའི་བྲོ་གར་འཁྲབ། །
JOB 21:12 རྔ་དང་པི་ཝང་བསྟུན་ནས་གླུ་ལེན་ཞིང་། ། འཕྲེད་གླིང་སྒྲ་ལ་དེ་དག་དགའ་ཞིང་མགུ །
JOB 21:13 དེ་རྣམས་འཚོ་ཞིང་དོན་ཀུན་ལྷུན་གྱིས་འགྲུབ། ། སྐད་ཅིག་ཉིད་ལ་དེ་དག་གཤིན་ཡུལ་སླེབས། །
JOB 21:14 ཁོ་ཚོས་དཀོན་མཆོག་ཉིད་ལ་འདི་ལྟར་ཞུ། ། ང་ཚོ་དང་ནི་བྲལ་ནས་ཕར་བཞུད་ཅིག ། ཁྱེད་ཀྱི་ལམ་རྣམས་ང་ཚོས་རྟོགས་མི་འདོད། །
JOB 21:15 ཀུན་དབང་ཁོང་ཉིད་དོན་ལ་སུ་ཡིན་ནམ། ། ང་ཚོས་ཁོང་ལ་ཞབས་ཕྱི་ཅི་ལ་བྱེད། ། ཁོང་ལ་ཞུས་ན་ཅི་ཕན་ཞེས་པ་འོ། །
JOB 21:16 ལྟོས་དང་དེ་ཚོའི་དོན་ཀུན་འགྲུབ་པ་ནི། ། ཁོ་ཚོ་རང་ལ་བརྟེན་པ་མ་ཡིན་གྱི། ། སྡིག་སྤྱོད་ཇུས་ངན་བདག་དང་རིང་དུ་གྱེས། །
JOB 21:17 སྡིག་སྤྱོད་ཅན་གྱི་སྒྲོན་མེ་ཅི་ལྟར་གསོད། ། དེ་དག་སྟེང་དུ་ཉོན་མོངས་མི་འབྱུང་ངམ། ། དཀོན་མཆོག་ཁོང་ཉིད་ཅིའི་ཕྱིར་ཐུགས་ཁྲོས་ནས། ། དེ་ཚོར་གནོད་འཚེ་ཅི་ལྟར་བསྐྱལ་འགྱུར་རམ། །
JOB 21:18 ཅིའི་ཕྱིར་དེ་རྣམས་རླུང་བུའི་མདུན་གྱི་སོག་རོ་དང་། ། དྲག་རླུང་གིས་ནི་འཁྱེར་བའི་ཕུབ་མ་དང་འདྲ་འམ། །
JOB 21:19 དཀོན་མཆོག་ཁོང་གིས་སྡིག་ཅན་ཕྲུ་གུའི་ཆེད། ། ཉེས་ཆད་མང་པོ་གསོག་ཅེས་ཁྱོད་ཚོས་སྨྲ། ། བདག་གིས་དེ་ལ་རྒྱུ་འབྲས་སྨིན་གྱུར་ནས། ། རང་ལ་རྟོགས་པར་མཛད་ན་ལེགས་ཞེས་བརྗོད། །
JOB 21:20 དེ་ཡི་མིག་གིས་རང་ཉིད་ཕམ་པ་མཐོང་བ་དང་། ། ཀུན་དབང་ཁོང་གི་ཐུགས་ཁྲོ་དངོས་སུ་འཐུང་གྱུར་ཅིག །
JOB 21:21 དེ་ཡི་ལོ་ཟླ་ཚར་ནས་འཆི་གྱུར་ན། ། ད་དུང་རང་གི་ཁྱིམ་དེ་གཉེར་ཐུབ་བམ། །
JOB 21:22 སུ་ཡིས་དཀོན་མཆོག་ཁོང་ལ་བསླབ་ཐུབ་བམ། ། མཐོ་སར་གནས་པར་ཁོང་གིས་ཁྲིམས་ཐག་གཅོད། །
JOB 21:23 ལ་ལ་འཆི་ཁར་ད་དུང་ལུས་སྟོབས་ལྡན། ། བློ་བདེ་བག་ཕེབས་ངང་ནས་འཆི་བར་འགྱུར། །
JOB 21:24 དེ་ཡི་ལྟོ་བར་འོ་མས་བཀང་། ། དེ་ཡི་རུས་རྐང་བཅུད་ཀྱིས་ཕྱུག །
JOB 21:25 ལ་ལ་འཆི་དུས་སེམས་སུ་སྡུག་བསྔལ་བཀང་། ། བདེ་སྐྱིད་འཚོ་བ་ནམ་ཡང་རོལ་མྱོང་མེད། །
JOB 21:26 དེ་གཉིས་གཅིག་མཚུངས་ས་ནང་ཉལ་བ་སྟེ། ། དེ་གཉིས་ལུས་པོར་འབུ་ཡིས་ཁྱབ་ཅིང་ཁྱབ། །
JOB 21:27 ཁྱོད་ཚོས་བདག་ལ་གནོད་འཚེ་གཏོང་འདོད་པའི། ། ཇུས་ངན་དེ་ནི་བདག་གིས་རྟོགས་པ་སྟེ། །
JOB 21:28 ཁྱོད་ཚོས་དབང་ཅན་ཁྱིམ་གཞིས་གང་དུ་ཡོད། ། གང་ལ་སྡིག་སྤྱོད་གནས་པའི་གུར་ཡོད་ཟེར། །
JOB 21:29 ལམ་འགྲོ་བ་ལ་ཁྱོད་ཚོས་མ་དྲིས་སམ། ། དེ་ཚོའི་བདེན་དཔང་ཁྱོད་ཚོས་མི་རྟོགས་སམ། །
JOB 21:30 ཚར་གཅོད་ཉིན་ལ་སྡིག་སྤྱོད་ལུས་པ་དང་། ། ཐུགས་ཁྲོའི་ཉིན་མོར་དེ་དག་སྐྱོབ་པར་འགྱུར། །
JOB 21:31 སུས་དེའི་སྤྱོད་པ་དངོས་སུ་གསལ་བར་བྱ། ། དེ་ཡིས་བྱས་པའི་ལས་འབྲས་སུས་སྟེར་རམ། །
JOB 21:32 དེ་ནི་དུར་གྱི་ནང་དུ་བསྐྱལ་བ་དང་། ། མི་ཡིས་དུར་ཁྲོད་བསྲུངས་ནས་སྡོད་པར་འགྱུར། །
JOB 21:33 ཁོ་ཡིས་ལུང་པའི་སྤོ་ཐོ་མངར་མོར་བསམས། ། དེ་ཡི་སྔོན་ལ་གྲངས་མེད་འདས་པ་བཞིན། ། དེ་ཡི་རྗེས་སུ་སྔར་ལས་མང་པོ་འདྲེན། །
JOB 21:34 ཁྱོད་ཚོའི་ལན་ནི་ཐམས་ཅད་ནོར་བས་ན། ། སྟོང་བཤད་ཀྱིས་ནི་བདག་སེམས་ཅི་ལྟར་གསོ། །
JOB 22:1 དེ་མན་པ་ཨེ་ལི་ཕཱ་སི་ཡིས་ལན་བཏབ་ནས་སྨྲས་པ།
JOB 22:2 མཁས་པས་རང་ལ་ཕན་འདོགས་ཇི་བཞིན་དུ། ། མི་ཡིས་དཀོན་མཆོག་ལ་ནི་ཕན་ཐོགས་སམ། །
JOB 22:3 ཁྱེད་ནི་དྲང་བདེན་ཅན་ཞིག་ཡིན་ན་ཡང་། ། ཀུན་དབང་ཁོང་ཉིད་དགྱེས་པར་བྱེད་ནུས་སམ། ། ཁྱེད་ཀྱི་བྱ་སྤྱོད་སྐྱོན་དང་བྲལ་ན་ཡང་། ། ཀུན་དབང་ཁོང་ལ་ཕན་ཐོགས་ཅི་ཞིག་ལྡན། །
JOB 22:4 ཁྱེད་རང་ཁོང་ལ་གུས་ཤིང་འཇིགས་པས་ན། ། ཁྱེད་ལ་བཀྱོན་ཞིང་ཁྲིམས་ཐག་གཅོད་འགྱུར་རམ། །
JOB 22:5 ཁྱེད་ཀྱི་སྡིག་ཉེས་ཆེན་པོ་མ་ཡིན་ནམ། ། ཁྱེད་ཀྱི་ཉེས་པ་རྫོགས་མཐའ་མེད་པ་ཡིན། །
JOB 22:6 ཁྱེད་ཀྱིས་དོན་མེད་སྤུན་ལས་གཏའ་མ་བླངས། ། ཁྱེད་ཀྱིས་དབུལ་པོའི་གྱོན་གོས་བཤུས་པས་ཡིན། །
JOB 22:7 ངལ་དུབ་པ་ལ་ཁྱེད་ཀྱིས་ཆུ་མ་བྱིན། ། བཀྲེས་ལྟོགས་ཅན་ལ་ཁྱེད་ཀྱིས་ཟས་མ་སྤྲད། །
JOB 22:8 སྟོབས་ལྡན་མི་ཡིས་ས་གཞིར་དབང་བསྒྱུར་བྱེད། ། གུས་པར་འོས་པའི་མི་ནི་དེ་ནང་གནས། །
JOB 22:9 ཁྱེད་ཀྱིས་ཡུགས་མོ་ལག་སྟོང་འགྲོ་རུ་བཅུག ། དྭ་ཕྲུག་རྣམས་ཀྱི་དཔུང་ངར་བཅག་པ་ཡིན། །
JOB 22:10 དེའི་ཕྱིར་དྲ་རྒྱས་ཁྱེད་རང་མཐའ་ནས་བསྐོར། ། གློ་བུར་འཇིགས་སྐྲག་གིས་ནི་ཁྱེད་རང་མནར། །
JOB 22:11 ཡང་ན་མུན་པས་ཁྱེད་ལ་མཐོང་མ་བཅུག ། ཆུ་ལོག་གིས་ནི་ཁྱེད་རང་བསྣུབས་ནས་འཁྱེར། །
JOB 22:12 དཀོན་མཆོག་ནམ་མཁའི་མཐོ་སར་མི་བཞུགས་སམ། ། སྐར་མ་རྣམས་ནི་ཇི་ལྟར་མཐོ་བར་ལྟོས། །
JOB 22:13 འོན་ཀྱང་ཁྱེད་ཀྱིས་འདི་ལྟར་བརྗོད་པ་སྟེ། ། དཀོན་མཆོག་ཁོང་གིས་ཅི་ཞིག་མཁྱེན་པ་ཡིན། ། སྨག་རུམ་གསེབ་ནས་ཁྲིམས་ཐག་གཅོད་ནུས་སམ། །
JOB 22:14 སྤྲིན་པ་སྟུག་པོས་ཁོང་ཉིད་གཡོགས་པས་ན། ། ཁོང་གིས་ཅི་ཡང་གཟིགས་པར་མི་འགྱུར་ཏེ། ། ནམ་མཁའི་དཀྱིལ་འཁོར་སྟེང་ཁོང་འཁོར་འདུག་ཟེར། །
JOB 22:15 སྡིག་སྤྱོད་མི་རྣམས་རྒྱུ་བར་བྱས་པ་ཡི། ། གནའ་བོའི་ལམ་ལ་ཁྱེད་རང་རྒྱུ་འདོད་དམ། །
JOB 22:16 དེ་དག་དུས་ལ་མ་བབས་བཟུང་ཁྱེར་ཏེ། ། ཁོ་ཚོའི་རྩ་བ་གཙང་པོས་ཁུར་བར་གྱུར། །
JOB 22:17 དེ་ཚོས་དཀོན་མཆོག་ཉིད་ལ་འདི་ལྟར་སྨྲས། ། ངེད་ཅག་རྣམས་ལས་གྱེས་ཏེ་ཕེབས་ཤིག་དང་། ། ཀུན་དབང་ཁོང་གིས་ངེད་ལ་ཅི་བྱེད་ནུས། །
JOB 22:18 ཁོང་གིས་དེ་དག་ཁྱིམ་ལ་ནོར་གྱིས་བཀང་། ། སྡིག་སྤྱོད་གྲོས་ངན་བདག་ལས་ཤིན་ཏུ་རིང་། །
JOB 22:19 དྲང་པོས་ཁོ་ཚོའི་མཇུག་འབྲས་མཐོང་ནས་དགའ། ། ཉེས་མེད་དེ་ལ་དགོད་ཅིང་འདི་ལྟར་སྨྲ། །
JOB 22:20 ང་ཚོའི་དགྲ་བོ་དངོས་གནས་ཚར་བཅད་དེ། ། རྒྱུ་ནོར་རྣམས་ཀྱང་མེ་ཡིས་བསྲེགས་གྱུར་ཟེར། །
JOB 22:21 ཁྱེད་ནི་དཀོན་མཆོག་ཁོང་དང་མཐུན་པར་གྱིས། ། དེ་ནས་ཁྱེད་ལ་བདེ་བ་འཐོབ་པར་འགྱུར། །
JOB 22:22 ཁྱེད་ཀྱིས་ཁོང་གི་ཞལ་གདམས་བླངས་ནས་ནི། ། ཁོང་གི་བཀའ་མཆིད་སེམས་སུ་འཛིན་པར་གྱིས། །
JOB 22:23 ཁྱེད་རང་ཀུན་དབང་ཕྱོགས་སུ་འཁོར་ནས་ནི། ། རང་གི་གུར་ལས་ངན་པ་རིང་དོར་ན། ། ཁྱེད་ནི་སླར་ཡང་བརྟན་པོར་འགོད་པར་འགྱུར། །
JOB 22:24 ཁྱེད་ཀྱི་ནོར་རྣམས་ས་རྡུལ་ནང་དུ་ཕོངས། ། ཨོ་ཕིར་གསེར་རྣམས་གྲོག་རོང་རྡོ་ལ་སྐྱུར། །
JOB 22:25 ཀུན་དབང་ཁོང་ཉིད་ཁྱེད་ཀྱི་ནོར་དུ་འགྱུར། ། ཁོང་ཉིད་ཁྱེད་ཀྱི་རིན་ཆེན་དངུལ་དུ་འགྱུར། །
JOB 22:26 དུས་དེར་ཀུན་དབང་ཁྱེད་ཀྱི་དགའ་སྤྲོ་སྟེ། ། དཀོན་མཆོག་ཕྱོགས་སུ་མགོ་བོ་འདེགས་པར་བྱེད། །
JOB 22:27 ཁྱེད་ཀྱིས་ཁོང་ལ་སྨོན་ལམ་འདེབས་པ་དང་། ། ཁོང་གིས་ཁྱེད་ཀྱི་སྨོན་ལམ་གསན་འགྱུར་ཞིང་། ། ཁྱེད་ཀྱིས་རང་གི་དམ་བཅའ་ཡང་ནི་བསྒྲུབ། །
JOB 22:28 ཁྱེད་ཀྱི་བསམ་དོན་ལྷུན་གྱིས་འགྲུབ་པ་དང་། ། ཁྱེད་ཀྱི་ལམ་དུ་འོད་ཟེར་འཕྲོ་བར་འགྱུར། །
JOB 22:29 མི་ཡིས་ཁྱེད་རང་དམའ་སར་ཕབ་གྱུར་ན། ། ཁྱེད་ཀྱིས་ང་རང་རྒྱལ་བར་འགྱུར་ཟེར་ཏེ། ། ཁེངས་སྐྱུང་ཅན་རྣམས་དཀོན་མཆོག་ཉིད་ཀྱིས་སྐྱོབ། །
JOB 22:30 དཀོན་མཆོག་གིས་ནི་ཉེས་ཅན་སྐྱོབ་པས་ན། ། ཁྱེད་ལག་གཙང་བས་ཁོང་གིས་སྐྱོབ་ངེས་སོ། །
JOB 23:1 དེ་ནས་ཨེས་ཡོབ་ཀྱིས་ལན་བཏབ་ནས་སྨྲས་པ།
JOB 23:2 ད་ལྟ་བདག་གི་སྡུག་སྐད་ལུགས་འགལ་ཡིན། ། བཀའ་བཀྱོན་མཛད་པ་འཁུན་སྒྲ་ལས་ཀྱང་ལྕི། །
JOB 23:3 བདག་གིས་ཁོང་གི་བཞུགས་གནས་ཤེས་པ་དང་། ། ཁོང་གི་བཞུགས་ཁྲིའི་མདུན་དུ་སླེབས་གྱུར་ཅིག །
JOB 23:4 བདག་གིས་ཁོང་མདུན་དོན་རྣམས་གསལ་པོར་ཞུ། ། རྩོད་པའི་ཚིག་གིས་སྨྲ་སྒོ་འགེང་བར་བྱ། །
JOB 23:5 ཁོང་གིས་བཀའ་ལན་ཅི་གནང་ངས་རྟོགས་ཤིང་། ། ཁོང་གིས་ཅི་གསུང་བདག་གིས་ཤེས་པར་འདོད། །
JOB 23:6 ཁོང་གིས་ཉིད་ཀྱི་ནུས་མཐུ་ཆེན་པོ་ཡིས། ། བདག་ལ་རྒོལ་ལམ་ཞེ་ན་མི་རྒོལ་ཏེ། ། ཁོང་གིས་བདག་ལ་གཟིགས་སྐྱོང་གནང་ངེས་ཡིན། །
JOB 23:7 གནས་དེར་སེམས་རྒྱུད་དྲང་པོ་ཁོང་དང་རྩོད་རུང་སྟེ། ། ང་རང་ཁྲིམས་ཐག་གཅོད་མཁན་ཁོང་ལས་ཐར་བར་འགྱུར། །
JOB 23:8 ང་རང་མདུན་དུ་སོང་ཡང་ཁོང་མི་བཞུགས། ། ཕྱིར་བསྣུར་སྟེག་ཀྱང་ཁོང་ཉིད་རྙེད་པ་མིན། །
JOB 23:9 ཁོང་གིས་གཡོན་ཕྱོགས་འཕྲིན་ལས་མཛད་ན་ཡང་། ། བདག་གིས་ཁོང་ཉིད་མཇལ་བར་མ་གྱུར་ལ། ། ཁོང་ཉིད་གཡས་ཕྱོགས་འཁོར་བར་གྱུར་ན་ཡང་། ། བདག་གིས་ཁོང་ནི་མཇལ་བར་མ་གྱུར་ཏོ། །
JOB 23:10 འོན་ཀྱང་བདག་གི་བགྲོད་ལམ་ཁོང་གིས་མཁྱེན། ། ཚོད་བགམ་མཛད་རྗེས་གསེར་ལྟར་བདག་འཐོན་འོང་། །
JOB 23:11 བདག་གི་རྐང་པ་ཁོང་གི་ཞབས་རྗེས་འབྲང་། ། ཁོང་གི་གཤེགས་ལམ་བསྲུངས་ནས་བདག་མ་གཟུར། །
JOB 23:12 ཁོང་གི་ཞལ་གྱི་བཀའ་ལ་བདག་མ་འགལ། ། ཟས་སྐལ་ལས་ཀྱང་ཁོང་གི་གསུང་ལ་ཆགས། །
JOB 23:13 ཡིན་ཡང་ཁོང་ཉིད་གཅིག་པུ་དཀོན་མཆོག་ལགས། ། ཁོང་གི་ཐུགས་དགོངས་སུ་ཡིས་བཟློག་ནུས་སམ། ། ཅི་ལ་དགྱེས་ན་དེ་ལྟར་མཛད་པར་འགྱུར། །
JOB 23:14 བདག་ལ་ཐུགས་ཐག་བཅད་པ་ཁོང་གིས་བསྒྲུབ། ། དེ་འདྲའི་དོན་རྣམས་ཁོང་ལ་མོད་པོ་ཡོད། །
JOB 23:15 དེ་བས་ང་རང་ཁོང་དྲུང་འཇིགས་པ་དང་། ། བདག་གིས་བསམ་ཞིང་བསམ་བཞིན་ཁོང་ལ་འཇིགས། །
JOB 23:16 དཀོན་མཆོག་ཉིད་ཀྱིས་ངའི་སེམས་འཁུམས་སུ་བཅུག ། ཀུན་དབང་ཁོང་གིས་ང་རང་དངངས་པར་མཛད། །
JOB 23:17 སྨག་རུམ་གྱིས་ནི་ང་ཡི་གདོང་བཀབ་ཀྱང་། ། བདག་སེམས་ཕམ་བྱེད་མུན་པ་མ་ཡིན་ནོ། །
JOB 24:1 ཀུན་དབང་ཉིད་ཀྱིས་དུས་བཅད་བགོས་ཟིན་ན། ། ཁོང་ཉིད་ཤེས་མཁན་རྣམས་ལ་ཉིན་མོ་དེ། ། མཐོང་བར་མི་མཛད་པ་ནི་ཅི་ཡིན་ནམ། །
JOB 24:2 ངན་པས་རང་གི་ས་མཚམས་ཕར་སྤོས་ནས། ། ཕྱུགས་ཁྱུ་འཕྲོག་ཅིང་འཚོ་སྐྱོང་བྱེད་པ་ཡིན། །
JOB 24:3 དེ་ཚོས་དྭ་ཕྲུག་རྣམས་ཀྱི་བོང་བུ་འདེད། ། ཡུགས་མོའི་གླང་ནི་འཕྲོག་ཅིང་གཏའ་མར་ལེན། །
JOB 24:4 དེ་ཚོས་དབུལ་པོ་དྲང་ལམ་ལས་ནི་བཟློག་བྱེད་ཅིང་། ། ས་གཞིའི་ཉམ་ཐག་ཅན་རྣམས་མ་ལུས་ཡིབ་པར་བྱེད། །
JOB 24:5 དབུལ་པོ་དེ་རྣམས་རྐྱང་ལྟར་ཐང་སྟོང་དུ། ། བརྩོན་པས་ལས་ཀ་བྱེད་ཅིང་ཁ་ཟས་འཚོལ། ། ཐང་སྟོང་ཡུལ་ལ་བརྟེན་ནས་བུ་ཕྲུག་གསོ། །
JOB 24:6 དེ་ཚོས་གཞན་གྱི་ཞིང་ཁའི་ལོ་ཏོག་བསྡུ། ། སྡིག་སྤྱོད་མི་ཡི་རྒུན་འབྲུམ་ལྷག་མ་འཐོག །
JOB 24:7 དེ་རྣམས་གོས་མེད་སྒྲེན་མོར་མཚན་གང་ཉལ། ། འཁྱགས་པའི་དུས་སུ་འགེབས་རྒྱུ་ཅི་ཡང་མེད། །
JOB 24:8 དེ་རྣམས་རི་བོར་དྲག་ཆར་གྱིས་སྦངས་ཏེ། ། གཡོལ་ས་མེད་པས་དེ་རྣམས་བྲག་ལ་བཅར། །
JOB 24:9 ངན་པས་ཨ་མའི་པང་ནས་དྭ་ཕྲུག་འཕྲོག ། དབུལ་པོའི་གྱོན་གོས་གཏའ་མར་བཙན་གྱིས་ལེན། །
JOB 24:10 ཉམ་ཐག་ཅན་རྣམས་གཅེར་བུར་གང་སར་འཁྱམས། ། ལྟོགས་སྐོམ་མྱངས་ཏེ་སྟོན་ཁའི་ཚར་ཕོན་ཁུར། །
JOB 24:11 དེ་ཚོས་ཕྲེང་བར་སྣུམ་བཙགས་ནས། ། འཚིར་གཞོང་ནང་དུ་ཆང་འཚག་ཀྱང་། ། རང་ཉིད་སྔར་བཞིན་སྐོམ་པས་གདུང་། །
JOB 24:12 འཆི་ཁའི་མི་ཡིས་མཁར་ནང་འཁུན་སྒྲ་འབྱིན། ། རྨས་མ་རྣམས་ཀྱིས་འོ་དོད་བོས་ན་ཡང་། ། དཀོན་མཆོག་ཁོང་གིས་ངན་པའི་དོན་མི་གཟིགས། །
JOB 24:13 ལ་ལས་འོད་ནི་བསྐྱུར་བ་དང་། ། འོད་ཀྱི་ལམ་ཡང་མི་ཤེས་ཏེ། ། འོད་ལྡན་ལམ་དུ་གནས་མ་གྱུར། །
JOB 24:14 མི་གསོད་ཐོ་རངས་ལངས་ཏེ་ཉམ་ཐག་དང་། ། རྒྱུ་མེད་གསོད་ཅིང་མཚན་མོར་ཆོམ་རྐུན་བྱེད། །
JOB 24:15 གཡེམ་པོའི་མིག་གིས་ས་སྲོས་དུས་ལ་སྒུག ། སུས་ཀྱང་ང་རང་མཐོང་བར་མི་འགྱུར་ཟེར། ། རང་གི་ངོ་གདོང་གོས་ཀྱིས་འགེབ་བྱེད་དོ། །
JOB 24:16 ཆོམ་རྐུན་དག་གིས་མུན་པར་གྱང་རྟོལ་ཞིང་། ། ཉིན་མོའི་དུས་སུ་དེ་དག་ཡིབ་སྡོད་པས། ། ཁོ་ཚོས་འོད་ནི་དངོས་གནས་ཤེས་མ་གྱུར། །
JOB 24:17 སྨག་རུམ་འཇིགས་པ་ཁོ་ཚོས་ཤེས་པས་ན། ། དེ་ཚོའི་མཐོང་ངོར་སྨག་རུམ་སྐྱ་རེངས་ཡིན། །
JOB 24:18 མི་ངན་ཆུ་ཁའི་ལྦུ་བ་བཞིན་དུ་ཡལ། ། ས་རུ་ཐོབ་པའི་སྐལ་བར་དམོད་པར་གྱུར། ། སུ་ཡང་རྒུན་ཚལ་ཉེ་སར་བཅར་བ་མེད། །
JOB 24:19 ཐན་པའི་ཚ་བས་ཁ་བ་ཞུ་བ་བཞིན། ། གཤིན་རྗེའི་ལམ་དུ་སྡིག་ཅན་འདི་ལྟར་འཁྱེར། །
JOB 24:20 ཁོ་རང་ཆགས་པའི་མངལ་གྱིས་ཁོ་བརྗེད་ཅིང་། ། འབུ་ཡིས་ཁོ་རང་ཞིམ་མངར་ལོངས་སུ་སྤྱོད། ། ཁོ་ལ་མི་ཡིས་རྗེས་དྲན་མི་བྱེད་དེ། ། དྲང་བདེན་མིན་པའི་མི་ནི་ཤིང་ལྟར་ཆག །
JOB 24:21 མངལ་ནི་མི་ཆགས་བུ་ཡང་མི་སྐྱེས་པའི། ། བུད་མེད་རྣམས་ལ་དེ་ཡིས་འཕྲོག་བཅོམ་བྱེད། ། ཡུགས་མོ་རྣམས་ཀྱང་དྲིན་གྱིས་མི་སྐྱོང་ངོ་། །
JOB 24:22 ཡིན་ཡང་དཀོན་མཆོག་ཁོང་གིས་ནུས་མཐུ་ཡིས། ། སྟོབས་ཤུགས་ལྡན་པའི་མི་རྣམས་སྲུང་བ་དང་། ། ཚེ་སྲོག་འཆོར་ཉེན་ཡོད་པ་སྔར་བཞིན་དར། །
JOB 24:23 དཀོན་མཆོག་ཉིད་ཀྱིས་དེ་དག་བདེ་ལ་བཀོད། ། དེ་དག་བརྟེན་ས་དཀོན་མཆོག་ཁོང་ཉིད་གྱུར། ། ཁོང་གི་སྤྱན་གྱིས་དེ་རྣམས་ལམ་ལ་གཟིགས། །
JOB 24:24 དེ་དག་ཡུད་ཙམ་མཐོ་སར་བཏེགས་ན་ཡང་། ། ཡུན་རིང་མི་གནས་ཡལ་ཞིང་དམན་སར་དབབ། ། ཀུན་ལྟར་དེ་དག་ལམ་ནས་འཁྱེར་བ་དང་། ། འབྲུ་ཡི་སྙེ་མ་བཞིན་དུ་གཅོད་པར་འགྱུར། །
JOB 24:25 དེ་ལྟར་མིན་ཚེ་སུ་ཡིས་ང་རང་ནི། ། རྫུན་གཏམ་སྨྲ་མཁན་ཡིན་པར་ར་སྤྲོད་བྱེད། ། བདག་གི་གཏམ་ནི་གླེང་རིན་མེད་པར་དགག །
JOB 25:1 དེ་ནས་ཤུ་ཧེ་པ་པེལ་དེལ་གྱིས་ལན་བཏབ་ནས་སྨྲས་པ།
JOB 25:2 དཀོན་མཆོག་ཁོང་ཉིད་དབང་བསྒྱུར་མཛད་མཁན་ཏེ། ། འཇིགས་སུ་རུང་ཞིང་མཐོ་སར་ཞི་བདེ་མཛད། །
JOB 25:3 ཁོང་གི་དཔུང་ཚོགས་རྣམས་ནི་བགྲང་ལས་འདས། ། ཁོང་གི་འོད་ནི་སུ་ལ་མི་འཆར་རམ། །
JOB 25:4 དེ་བས་དཀོན་མཆོག་ཁོང་གི་སྐུ་དྲུང་དུ། ། མི་ནི་ཇི་ལྟར་དྲང་བདེན་ཅན་དུ་བརྩི། ། བུད་མེད་དག་ལས་བཙས་པ་ཇི་ལྟར་གཙང་། །
JOB 25:5 དཀོན་མཆོག་དྲུང་དུ་ཟླ་བར་བཀྲག་མདངས་མེད། ། ཁོང་གི་གཟིགས་ངོར་སྐར་མ་དྭངས་གཙང་མིན། །
JOB 25:6 དེ་བས་འབུ་དང་འདྲ་བའི་མི་རྣམས་དང་། ། སྐྱག་འབུ་ལྟ་བུའི་མི་ནི་སྨྲ་ཅི་དགོས། །
JOB 26:1 དེ་ནས་ཨེས་ཡོབ་ཀྱིས་ལན་བཏབ་ནས་སྨྲས་པ།
JOB 26:2 སྟོབས་ཤུགས་ཟད་པར་ཁྱེད་ཀྱི་རོགས་རམ་ཐོབ། ། དཔུང་ངར་ཉམ་ཐག་ཅན་ལ་མགོན་སྐྱབས་མཛད། །
JOB 26:3 བློ་རྨོངས་ཅན་ལ་ཁྱེད་ཀྱི་མཛུབ་སྟོན་ཐོབ། ། ཁྱེད་ཀྱིས་དེ་ལ་ཕུན་ཚོགས་ཤེས་རབ་མངོན། །
JOB 26:4 གང་ལ་བརྟེན་ནས་ཁྱེད་ཀྱིས་བཀའ་གནང་ངམ། ། སུ་ཡི་སེམས་ཉིད་ཁྱེད་ལས་ཐོན་པ་ཡིན། །
JOB 26:5 ཆུ་ཆེན་རྣམས་དང་དེ་ནང་གནས་པ་ཡི། ། འོག་ཏུ་གནས་པའི་གཤིན་པོ་རྣམས་འདར་ཞིང་། །
JOB 26:6 ཁོང་གི་དྲུང་དུ་གཤིན་ཡུལ་ཕྱི་རུ་མངོན། ། འཇིག་པའི་ཡུལ་ཡང་ལྐོག་ཏུ་མ་གནས་ཏེ། །
JOB 26:7 ཁོང་གིས་བྱང་སྣེ་མཁའ་རུ་ཁེབས་པར་མཛད། ། ས་གཞི་སྟོང་པའི་ནམ་མཁར་དཔྱང་བར་མཛད། །
JOB 26:8 ཁོང་གིས་སྤྲིན་པའི་ནང་དུ་ཆུ་རྣམས་འཐུམ། ། ཆུ་ནི་མང་ཡང་སྤྲིན་ནི་མ་ཐོར་ཏེ། །
JOB 26:9 ཁོང་གིས་བཞུགས་ཁྲིའི་མདུན་ངོས་འགེབ་བྱེད་ཅིང་། ། དེ་ཡི་སྟེང་དུ་ཆུ་འཛིན་འདིང་བར་མཛད། །
JOB 26:10 འོད་དང་མུན་པ་གཉིས་པོའི་མཐའ་མཚམས་སུ། ། ཁོང་གིས་ཆུ་ངོས་ཟླུམ་པོའི་དབྱེ་མཚམས་བཅད། །
JOB 26:11 ཁོང་གི་བཀའ་བཀྱོན་རྐྱེན་གྱིས་ནམ་མཁའ་ཡི། ། ཀ་བ་རྣམས་ཀྱང་འདར་ཞིང་འཁྱོར་བར་གྱུར། །
JOB 26:12 ཁོང་གི་ནུས་མཐུས་རྒྱ་མཚོ་དཀྲུགས་མཛད་ཅིང་། ། མཁྱེན་རབ་ཀྱིས་ནི་ར་ཧབ་འཇོམས་པར་མཛད། །
JOB 26:13 ཁོང་གི་ཐུགས་ཀྱིས་ནམ་མཁའ་དྭངས་པར་མཛད། ། ཁོང་གི་ཕྱག་གིས་འཁྱུག་པའི་སྦྲུལ་ཡང་བཅོམ། །
JOB 26:14 ལྟོས་དང་འདི་ནི་ཁོང་གི་མཛད་པའི་ཟུར་ཙམ་དང་། ། ང་ཚོས་ཐོས་པ་ཁོང་གི་ཤུབ་སྐད་ཙམ་ཡིན་ཞིང་། ། ཁོང་གི་འབྲུག་སྒྲའི་དབང་ནི་སུ་ཡིས་རྟོགས་ནུས་སམ། །
JOB 27:1 ཨེས་ཡོབ་ཀྱིས་མུ་མཐུད་དུ་རང་གི་གཏམ་སྨྲས་ཏེ་ན་རེ།
JOB 27:2 བདག་གིས་རང་ལས་དྲང་བདེན་ཕྲོགས་པ་ཡི། ། ངའི་སེམས་སྡུག་པར་མཛད་པའི་ཀུན་དབང་ཉིད། ། གཏན་དུ་བཞུགས་པའི་དཀོན་མཆོག་ཁོང་ཉིད་ནི། ། དཔང་དུ་བཙུགས་ཏེ་འདི་ལྟར་སྨྲས་པ་སྟེ། །
JOB 27:3 བདག་ནང་ཚེ་སྲོག་ལྡན་པ་དང་། ། དཀོན་མཆོག་ཁོང་གིས་གནང་བའི་དབུགས། ། སྣ་ཁུང་ནང་དུ་ཡོད་པའི་ཚེ། །
JOB 27:4 བདག་གི་མཆུ་ཡིས་ཚིག་ངན་སྨྲ་མི་བྱ། ། བདག་གི་ལྕེ་ཡིས་རྫུན་གཏམ་གླེང་མི་བྱ། །
JOB 27:5 བདག་གིས་ནམ་ཡང་ཁྱོད་ཚོ་བདེན་མི་ཟེར། ། ཤི་ཡང་རང་གི་ལྷད་མེད་འདོར་མི་འགྱུར། །
JOB 27:6 བདག་གིས་དྲང་བདེན་འཛིན་ཞིང་མི་སྤོང་སྟེ། ། གསོན་དུས་རང་གི་སེམས་ཀྱིས་སྐྱོན་མི་འཛུགས། །
JOB 27:7 བདག་གི་དགྲ་ནི་མི་ངན་བཞིན་གྱུར་ཅིག ། བདག་ལ་རྒོལ་མཁན་སྡིག་སྤྱོད་བཞིན་གྱུར་ཅིག །
JOB 27:8 དད་མེད་ཅན་ལ་རེ་བ་ཅི་ཡོད་དམ། ། དཀོན་མཆོག་ཉིད་ཀྱིས་ཁོ་རང་ཚར་གཅོད་ཅིང་། ། ད་དུང་དེ་ཡི་སྲོག་ཀྱང་ལེན་པར་ངེས། །
JOB 27:9 དེ་ལ་སྡུག་བསྔལ་འབྱུང་བའི་དུས་སུ་ཡང་། ། དཀོན་མཆོག་ཉིད་ཀྱིས་འོ་དོད་ག་ལ་གསན། །
JOB 27:10 དེ་ཡིས་ཀུན་དབང་དགའ་སྤྲོར་བརྩིས་ནས་ནི། ། ནམ་རྒྱུན་དཀོན་མཆོག་ཁོང་ལ་ཞུ་མི་འགྱུར། །
JOB 27:11 དཀོན་མཆོག་ཕྱག་གིས་མཛད་པ་དེ། ། བདག་གིས་ཁྱོད་ཚོར་སྟོན་པར་བྱ། ། ཀུན་དབང་ཁོང་གི་མཛད་རྗེས་ཀྱང་། ། བདག་གིས་ཁྱོད་ཚོར་གསང་མི་འགྱུར། །
JOB 27:12 ཁྱོད་ཚོས་འདི་ཀུན་མཐོང་མོད་ཀྱང་། ། ཅིའི་ཕྱིར་ཐམས་ཅད་དོན་མེད་གྱུར། །
JOB 27:13 འདི་ནི་དཀོན་མཆོག་ཁོང་ཉིད་ཀྱིས། ། མི་ངན་རྣམས་ལ་གནང་བའི་སྐལ། ། གདུག་རྩུབ་ཅན་ལ་ཀུན་དབང་ནས། ། ཐོབ་པའི་ནོར་སྐལ་འདི་ཡིན་ལགས། །
JOB 27:14 དེ་ཚོའི་བུ་ཕྲུག་འཕེལ་ཡང་རལ་གྲིའི་དོན་དུ་ཡིན། ། དེ་ཡི་བུ་རྒྱུད་ཟས་ཀྱིས་འགྲང་བར་མི་འགྱུར་རོ། །
JOB 27:15 དེ་ལས་ལུས་པ་ཤི་ནས་བསྐུང་བར་འགྱུར། ། དེ་ཡི་ཡུགས་མོ་རྣམས་ནི་ངུ་མི་འགྱུར། །
JOB 27:16 དེ་ཡིས་བྱེ་མ་བཞིན་དུ་དངུལ་བསགས་ནས། ། འདམ་བག་ལྟར་དུ་གོས་རྣམས་སྤུངས་ན་ཡང་། །
JOB 27:17 དེ་ཡིས་སྤུངས་པ་དྲང་བདེན་ཅན་གྱིས་གྱོན། ། ཉེས་མེད་རྣམས་ཀྱིས་དངུལ་དེ་བགོ་བར་བྱ། །
JOB 27:18 དེ་ཡིས་ཁང་པ་བརྩིགས་པ་ནི། ། མུག་པས་ཁུང་བུ་རྐོ་བ་དང་། ། ཡང་ན་སོ་པས་གུར་ཕུབ་འདྲ། །
JOB 27:19 དེ་ནི་ཉལ་དུས་ཕྱུག་ཀྱང་བདག་པོ་རྒྱག་རྒྱུ་མེད། ། དེ་ཡིས་མིག་ཟུང་འབྱེད་དུས་རྒྱུ་ནོར་མེད་པར་གྱུར། །
JOB 27:20 འཇིགས་སྐྲག་ཆུ་ལོག་བཞིན་དུ་ཁོའི་རྗེས་འདེད། ། མཚན་མོའི་དྲག་རླུང་གིས་ནི་ཁོ་རང་འཁུར། །
JOB 27:21 ཤར་རླུང་གིས་ནི་ཁོ་རང་ཁྱེར་ནས་འགྲོ། ། དེས་ཁོ་རང་གི་གནས་དང་འབྲལ་དུ་འཇུག །
JOB 27:22 དཀོན་མཆོག་ཁོང་གིས་ཕངས་མེད་ཁོ་ལ་བརྒྱབ། ། ཁོང་གི་ཕྱག་ལས་ཐར་བར་རབ་ཏུ་འཚབ། །
JOB 27:23 དཀོན་མཆོག་ཉིད་ཀྱིས་ཁོ་ལ་ཕྱག་གིས་རྡེག ། ད་དུང་ཐུགས་ཁྲོའི་ང་རོ་བསྒྲགས་ནས་ནི། ། དེ་ནི་རང་གི་གནས་ལས་སྐྲོད་འགྱུར་རོ། །
JOB 28:1 དངུལ་ལ་གཏེར་ཁ་ཡོད་པ་བཞིན། ། གསེར་ལ་བཙོ་སྦྱང་བྱེད་ས་ཡོད། །
JOB 28:2 ལྕགས་ནི་ས་ཡི་འོག་ནས་འདོན་པར་བྱེད། ། ཟངས་ཀྱང་རྡོ་ཡི་སྣུམ་ལས་བཞུ་ཞིང་འདོན། །
JOB 28:3 མི་ཡིས་མུན་པར་མཐའ་མཚམས་གཅོད་པ་དང་། ། རྒྱང་རིང་གསང་བའི་ཡུལ་གྱི་སྨག་རུམ་ཁྲོད། ། མཐའ་མཚམས་ཕུག་གི་གཏེར་རྡོ་འཚོལ་བྱེད་དོ། །
JOB 28:4 དེ་ཡིས་དབེན་སར་གཏེར་ཁ་བརྟོལ་བ་དང་། ། རྐང་རྗེས་མེད་པའི་གནས་སུ་བརྗེད་པར་གྱུར། ། མི་དང་བྲལ་ཏེ་མཁའ་རུ་དཔྱངས་ནས་སྡོད། །
JOB 28:5 ས་གཞི་ལས་ནི་འབྲུ་རིགས་ཐོན་པ་དང་། ། ས་གཞིའི་འོག་ནས་མེ་བཞིན་འཕྱུར་བ་སྟེ། །
JOB 28:6 ས་ཡི་རྡོ་ལས་ཨིནྡྲ་ནཱི་ལ་དང་། ། དེ་རུ་ད་དུང་གསེར་ཕྱེ་ཡང་ཡོད་ཅིང་། །
JOB 28:7 བྱ་རྒོད་ཀྱིས་ནི་ལམ་དེ་མི་ཤེས་ལ། ། གླག་གི་མིག་གིས་དེ་ནི་མཐོང་མྱོང་མེད། །
JOB 28:8 རློམ་སེམས་ཅན་གྱི་གཅན་གཟན་དེར་མ་སླེབས། ། སེང་གེ་རྩུབ་པོ་གནས་དེར་རྒྱུ་མ་མྱོང་། །
JOB 28:9 མི་ཡི་ལག་པས་མེ་རྡོར་ཁུང་འབིགས་གཏད། ། རི་བོ་རྣམས་ཀྱི་རྩ་བ་བསློགས་པ་སྟེ། །
JOB 28:10 བྲག་རྡོ་རྣམས་ལས་ཆུ་རྐ་བརྐོས་པ་དང་། ། རིན་ཆེན་སྣ་ཚོགས་མིག་གིས་དངོས་སུ་མཐོང་། །
JOB 28:11 དེ་ཡིས་གཙང་པོ་བཀག་ནས་ཆུ་མ་ཐིགས། ། སྦས་པའི་དངོས་པོ་ཐམས་ཅད་མངོན་པར་བཅུག །
JOB 28:12 འོན་ཀྱང་ཤེས་རབ་གང་ནས་རྙེད་འགྱུར་རམ། ། བློ་གྲོས་ལྡན་པའི་གནས་ནི་གང་དུ་ཡོད། །
JOB 28:13 ཤེས་རབ་ཀྱི་ནི་རིན་ཐང་སུ་ཡིས་ཤེས། ། གསོན་པོའི་གནས་སུ་དེ་ནི་རྙེད་མི་སྲིད། །
JOB 28:14 གཏིང་ཟབ་ཀྱིས་ནི་བདག་ནང་དེ་མེད་ཟེར། ། རྒྱ་མཚོ་ཡིས་ཀྱང་ང་མཉམ་དེ་མེད་ཟེར། །
JOB 28:15 ཤེས་རབ་དེ་ནི་གསེར་གྱིས་བརྗེ་མི་ནུས། ། དངུལ་གྱིས་དེ་ཡི་རིན་ཐང་ཚད་མི་ཐུབ། །
JOB 28:16 ཨོ་ཕིར་གསེར་དང་རིན་ཆེན་གཟི་དང་ནི། ། ད་དུང་རིན་ཆེན་ཨིནྡྲ་ནཱི་ལ་ཡང་། ། དེ་ཡི་ཤེས་རབ་དང་ནི་འགྲན་མི་ནུས། །
JOB 28:17 གསེར་དང་ཤེལ་གཉིས་དེ་དང་བསྡུར་མི་ཕོད། ། ལྷད་མེད་གསེར་གྱིས་དེ་ནི་བརྗེ་མི་ཐུབ། །
JOB 28:18 བྱུ་རུ་རིན་པོ་ཆེ་གཉིས་གླེང་རིན་མེད། ། མུ་ཏིག་ལས་ཀྱང་ཤེས་རབ་རིན་ཐང་ཆེ། །
JOB 28:19 གུ་ཤའི་སྤྲིན་རྡོ་དེ་དང་བསྡུར་མི་ཕོད། ། ལྷད་མེད་གསེར་ཡང་དེ་ཡི་འགྲན་ཡ་མིན། །
JOB 28:20 དེས་ན་ཤེས་རབ་གང་ནས་འབྱུང་བ་དང་། ། བློ་གྲོས་ལྡན་པའི་གནས་ནི་གང་དུ་ཡོད། །
JOB 28:21 སྲོག་ལྡན་ཀུན་གྱི་མིག་ལས་དེ་སྦས་ཤིང་། ། ནམ་མཁའི་འདབ་ཆགས་ལས་ནི་དེ་ཡིབ་སྟེ། །
JOB 28:22 འཇིག་པ་འཆི་བ་གཉིས་པོས་འདི་ལྟར་སྨྲ། ། ང་ཚོའི་རྣ་བས་དེ་ཡི་སྐད་ཙམ་ཐོས། །
JOB 28:23 དཀོན་མཆོག་གིས་ནི་ཤེས་རབ་ལམ་མཁྱེན་ཏེ། ། ཤེས་རབ་གནས་ས་ཡང་ནི་ཁོང་གིས་མཁྱེན། །
JOB 28:24 ས་མཚམས་བར་དུ་ཁོང་གིས་དཔྱད་པ་བཏང་། ། གནམ་ས་ཡོངས་ལ་ཁོང་གིས་གཟིགས་པས་སོ། །
JOB 28:25 ཁོང་གིས་རླུང་གི་དྲག་འཇམ་བཅད་པ་དང་། ། ཆུ་ཡི་ཚད་གཞི་ཡང་ནི་འཇལ་བ་སྟེ། །
JOB 28:26 ཆར་བའི་ཆེད་དུ་བཀའ་འདོམས་མཛད་ནས་ནི། ། གློག་དམར་རྒྱུ་བའི་ལམ་ཡང་སྟོན་པར་མཛད། །
JOB 28:27 དུས་དེར་ཁོང་གིས་ཤེས་རབ་གཟིགས་པ་ན། ། ཤེས་རབ་འཆད་ནས་བརྟན་པོར་མཛད་པ་དང་། ད་དུང་དེ་ལ་ཞིབ་བཤེར་མཛད་པ་ཡིན། །
JOB 28:28 ཁོང་གིས་མི་ལ་འདི་སྐད་གསུངས། ། ལྟོས་དང་གཙོ་བོ་ཁོང་ཉིད་ལ། ། གུས་ཤིང་འཇིགས་པ་ཤེས་རབ་ཡིན། ། ངན་པར་བྲལ་ན་བློ་གྲོས་ཡིན། །
JOB 29:1 ཨེས་ཡོབ་ཀྱིས་མུ་མཐུད་དུ་རང་གི་གཏམ་སྨྲས་ཏེ་ན་རེ།
JOB 29:2 དཀོན་མཆོག་ང་རང་བསྲུངས་པའི་ཉིན་མོ་སྟེ། ། སྔར་གྱི་དུས་བཞིན་ཡིན་ན་ཅི་མ་རུང་། །
JOB 29:3 སྐབས་དེར་ཁོང་གི་སྒྲོན་མེ་ངའི་སྟེང་ཤར། ། ང་རང་འོད་དེར་བརྟེན་ནས་མུན་པར་རྒྱུ། །
JOB 29:4 ང་རང་དར་ལ་བབས་པའི་དུས། ། དཀོན་མཆོག་ཁོང་གི་མཛའ་བརྩེ་ནི། ། བདག་གི་གུར་ནང་མཆིས་པ་དང་། །
JOB 29:5 བདག་དང་ལྷན་དུ་ཀུན་དབང་བཞུགས། ། ཕྲུ་གུ་རྣམས་ཀྱིས་མཐའ་ནས་བསྐོར། །
JOB 29:6 བདག་གི་རྐང་པ་འོ་སྤྲིས་བཀྲུས་པ་དང་། ། བྲག་རིས་སྣུམ་གྱི་གཙང་པོ་བདག་ཕྱིར་བཞུར། །
JOB 29:7 ང་རང་མཁར་གྱི་སྒོ་ཁར་ཕྱིན་ནས་ནི། ། ཐང་ཆེན་ཡོད་སར་འདུག་གནས་བཤམས་པ་དང་། །
JOB 29:8 གཞོན་ནུས་ང་རང་མཐོང་པ་ཙམ་གྱིས་གཡོལ། ། རྒན་པོ་རྣམས་ཀྱང་ས་ནས་ཡར་ལ་ལངས། །
JOB 29:9 རྒྱལ་སྲས་རྣམས་ཀྱིས་སྨྲ་བརྗོད་མཚམས་བཞག་ཅིང་། ། རང་གི་སྨྲ་སྒོ་ལག་པས་བཀབ་ནས་བསྡད། །
JOB 29:10 འགོ་དཔོན་རྣམས་ཀྱིས་སྐད་མ་བཏོན། ། ཁོ་ཚོའི་ལྗགས་ལྕེ་རྐན་ལ་འབྱར། །
JOB 29:11 ང་རང་ཐོས་མཁན་རྣམས་ཀྱིས་བདེ་ལེགས་བརྗོད། ། ང་རང་མཐོང་བ་དག་གིས་བསྟོད་པ་ཕུལ། །
JOB 29:12 ངུ་འབོད་བྱེད་པའི་ཉམ་ཐག་ཅན་རྣམས་དང་། ། རོགས་རམ་མེད་པའི་དྭ་ཕྲུག་བསྐྱབས་ཕྱིར་རོ། །
JOB 29:13 འཆི་ཁའི་མི་ཡིས་བདག་ལ་སྨོན་འདུན་ཞུས། ། བདག་གིས་ཡུགས་མོའི་སེམས་སུ་དགའ་འབོད་བསྐྱེད། །
JOB 29:14 བདག་གིས་དྲང་བདེན་གོས་བཞིན་གཡོགས་པ་དང་། ། དྲང་གཞག་ཕྱི་གོས་དང་ནི་མགོ་རས་བཞིན། །
JOB 29:15 བདག་ནི་ལོང་པའི་མིག་དང་ནི། ། ཞ་བོའི་རྐང་པ་བཞིན་དུ་གྱུར། །
JOB 29:16 བདག་ནི་དབུལ་ཕོངས་རྣམས་ཀྱི་ཕ་བཞིན་ཡིན། ། རྒྱུས་མེད་མི་ཡི་གྱོད་གཞིར་རྩད་གཅོད་བྱས། །
JOB 29:17 བདག་གིས་སྡིག་སྤྱོད་ཅན་གྱི་འགྲམ་རུས་བཅག ། དེ་ཡི་བརྔོན་ཤ་སོ་ཡི་བར་ནས་ཕྲོགས། །
JOB 29:18 དེ་ནས་བདག་གིས་འདི་ལྟར་སྨྲས། ། བདག་གིས་རང་གི་ཉིན་མོ་ནི། ། བྱེ་མ་བཞིན་དུ་འཕེལ་བཅུག་ནས། ། རང་གི་ཁྱིམ་དུ་བདག་འཆི་ངེས། །
JOB 29:19 བདག་གི་རྩ་བ་ཆུ་ཡི་འགྲམ་དུ་བརྐྱངས། ། བདག་གི་ཡལ་གར་མཚན་མོ་ཟིལ་བ་འབབ། །
JOB 29:20 རང་གི་གཟི་དཔལ་ངའི་སྟེང་མི་ཉམས་ཏེ། ། རང་གི་ལག་ནང་གཞུ་མོ་གསར་བར་འགྱུར། །
JOB 29:21 མི་ཡིས་བདག་གི་གཏམ་ལ་མཉན་ཞིང་བསྒུགས། ། ང་ཡི་བཀའ་སློབ་ཆེད་དུ་ངག་ཀྱང་བསྡམས། །
JOB 29:22 ངའི་གཏམ་ཐོས་རྗེས་ཁོ་ཚོས་མ་སྨྲས་ལ། ། དེ་རྣམས་སྟེང་དུ་བདག་གི་གཏམ་བབས་ཤིང་། །
JOB 29:23 དེ་ཚོས་ཆར་བར་སྒུག་ལྟར་བདག་ལ་སྒུག ། ཆར་ལ་རེ་བ་བཞིན་དུ་ཁ་ཆེར་གདངས ། །
JOB 29:24 བདག་གིས་ཁོ་ཚོར་འཛུམ་བསྟན་ཡང་། ། ཁོ་རྣམས་དེ་ལ་ཡིད་མ་ཆེས། ། དེ་ཚོས་ང་ཡི་གདོང་གི་མདངས། ། ནམ་ཡང་ཉམས་སུ་མ་བཅུག་སྟེ། །
JOB 29:25 བདག་གིས་དེ་རྣམས་ཆེད་དུ་ལམ་བདམས་ཤིང་། ། ཁོ་ཚོའི་ཁྲོད་དུ་བདག་ནི་གྲལ་མགོར་བསྡད། ། བདག་ནི་དམག་དཔུང་དཀྱིལ་གྱི་རྒྱལ་པོ་ལྟར། ། མྱ་ངན་ཅན་གྱི་སེམས་གསོ་མཁན་དུ་གྱུར། །
JOB 30:1 ད་ལྟ་བདག་ལས་གཞོན་པས་བདག་ལ་འཕྱ། ། དེ་ཚོའི་ཕ་རྣམས་བདག་གིས་མཐོང་ཆུང་བྱས། ། བདག་གི་ལུག་ཁྱུའི་ཁྱི་མཉམ་མ་བཞག་སྟེ། །
JOB 30:2 སྟོབས་ཤུགས་ཟད་པར་གྱུར་པའི་མི་དེ་ཡི། ། ལག་པའི་སྟོབས་ཀྱིས་བདག་ལ་ཕན་ཅི་ཐོགས། །
JOB 30:3 དེ་ཚོ་དབུལ་ཞིང་ཤིན་ཏུ་ལྟོགས་པས་ན། ། ལུས་ཀྱི་ཤེད་ཤུགས་ཀྱང་ནི་ཉམས་པ་དང་། ། མཚན་མོར་སྐྱོ་སྣང་ཁེངས་པའི་ཐང་རྒོད་དུ། ། དབེན་སྟོང་ཡུལ་གྱི་རྩྭ་སྐམ་བལྡད་པ་ཡིན། །
JOB 30:4 དེ་ཚོས་རྩྭ་གསེང་ཚྭ་རྩྭ་བཙལ་བ་དང་། ། ཤུག་སྡོང་རྩད་པ་དེ་རྣམས་བཟའ་ཆས་ཡིན། །
JOB 30:5 དེ་དག་མི་ཡི་ཁྲོད་ནས་ཕྱིར་བཏོན་ཏེ། ། རྐུན་རྗེས་འདེད་བཞིན་མི་ཡིས་ཀི་བརྒྱབ་པས། །
JOB 30:6 དེ་རྣམས་ལུང་སྟོང་རྣམས་ཀྱི་ཕུག་དང་ནི། ། ས་ཁུང་རྣམས་དང་བྲག་ཕུག་བཅས་ནས་བསྡད། །
JOB 30:7 དེ་ཚོས་ཤིང་ཕྲན་གསེང་དུ་འབོད་སྒྲ་བཏང་། ། ལྗང་ཚེར་འོག་ཏུ་ལྷན་ཅིག་འཛོམས་པ་ཡིན། །
JOB 30:8 འདི་དག་གྲགས་པ་མེད་པའི་བུ་ཡིན་པས། ། དེ་དག་སྤྱུགས་ནས་ས་མཚམས་ཕྱི་རུ་བསྐྲད། །
JOB 30:9 ད་ལྟ་བདག་ནི་དེ་ཚོའི་གླུ་རུ་གྱུར། ། དེ་ཚོའི་བཞད་གད་གཏམ་དུ་གྱུར་པ་ཡིན། །
JOB 30:10 དེ་ཚོ་ང་ལ་ཞེན་ཁ་ལོག ། ཟུར་དུ་གཡོལ་ནས་བསྡད་པའི་ཁར། ། བདག་གི་གདོང་དུ་མཆིལ་མ་གཏོར། །
JOB 30:11 ཁོང་གིས་གཞུ་རྒྱུད་བཀྲོལ་ནས་བདག་ལ་གཙེས། ། དེ་ཚོས་བདག་གི་མདུན་དུ་གང་འདོད་སྤྱད། །
JOB 30:12 དེ་དག་བདག་གི་གཡས་སུ་ཡར་ལངས་ཏེ། ། བདག་གི་རྐང་པར་ཕུད་རྒྱག་བྱས་པ་དང་། ། གནོད་འཚེའི་ལམ་གྱིས་བདག་ལ་རྒོལ་བར་གྱུར། །
JOB 30:13 དེ་ཚོས་བདག་གི་ལམ་ནི་བརླག་གྱུར་ཏེ། ། བདག་གི་གནོད་འཚེ་འཕེལ་དུ་བཅུག་པ་དང་། ། དེ་ཚོར་རོགས་རམ་བྱེད་མཁན་ཡོད་མ་ཡིན། །
JOB 30:14 དེ་དག་ཆུ་རུད་ཆེན་པོ་ལྟར་འོངས་ཤིང་། ། འཕུང་དུས་བདག་གི་སྟེང་ལ་རྦབ་ཏུ་བསྒྲིལ། །
JOB 30:15 འཇིགས་པ་རྣམས་ནི་བདག་གི་སྟེང་དུ་བབས། ། ང་ཡི་གཟི་དཔལ་རླུང་ལྟར་ཕར་བདས་ཤིང་། ། བདག་གི་བདེ་བ་སྤྲིན་ལྟར་ཡལ་བར་གྱུར། །
JOB 30:16 ད་ལྟ་ང་ཡི་སེམས་ནི་རབ་ཏུ་སྡུག ། དཀའ་སྡུག་ཉིན་མོས་ང་རང་དམ་པོར་བཟུང་། །
JOB 30:17 མཚན་མོའི་དུས་སུ་རུས་པའི་ནང་དུ་ཟུག ། བདག་ལ་རྨུག་པའི་གཟེར་ལ་མཚམས་འཇོག་མེད། །
JOB 30:18 དཀོན་མཆོག་སྟོབས་ཀྱིས་ངའི་གོས་གཅུ་སྒྲིམ་བརྒྱབ། ། གོས་ཀྱི་གོང་བ་ལྟར་དུ་ང་རང་བསྡམས། །
JOB 30:19 ཁོང་གིས་འདམ་རྫབ་ནང་དུ་བདག་གཡུགས་པས། ། ས་དང་ཐལ་རྡུལ་ལྟར་ཏུ་བདག་གྱུར་བྱུང་། །
JOB 30:20 ཀྱེ་ཀྱེ་དཀོན་མཆོག་བདག་གིས་ཁྱེད་ཉིད་ལ། ། ཞུ་བ་ཕུལ་ཡང་ཁྱེད་ཀྱིས་མ་གསན་ཏེ། ། ཡར་ལ་ལངས་ཀྱང་ཁྱེད་ཀྱིས་གཟིགས་པ་ཙམ། །
JOB 30:21 ཁྱེད་ཉིད་འགྱུར་ནས་བདག་ལ་གདུག་རྩུབ་མཛད། ། ནུས་མཐུ་ཕྱག་གིས་བདག་ལ་འཚེ་བར་བྱེད། །
JOB 30:22 ང་རང་རླུང་དམར་ནང་དུ་འཇིག་པའི་ཕྱིར། ། ཁྱེད་ཀྱིས་བདག་ནི་རླུང་ནང་བཏེགས་ཤིང་ཁྱེར། ། ང་རང་དེ་ཡི་སྟེང་ལ་བཞོན་དུ་བཅུག །
JOB 30:23 ཁྱེད་ཀྱིས་སེམས་ཅན་ཆེད་དུ་མཛད་པའི་གཤིན་ཡུལ་དུ། ། བདག་ཀྱང་འཆི་བར་མཛད་པ་ང་ཡིས་རྟོགས་པར་གྱུར། །
JOB 30:24 ཡིན་ཡང་སུ་ཞིག་འགྱེལ་དུས་ལག་མི་བརྐྱང་། ། གནོད་པར་འཕྲད་དུས་ཞུ་བ་མི་འབུལ་ལམ། །
JOB 30:25 མི་རྣམས་སྡུག་བསྔལ་འཕྲད་དུས་ང་རང་མ་ངུས་སམ། ། སུ་ཞིག་དབུལ་ཕོངས་ཡིན་དུས་ང་རང་མ་གདུང་ངམ། །
JOB 30:26 བདག་གིས་བདེ་བར་སྒུག་དུས་རྐྱེན་ངན་བྱུང་། ། བདག་གིས་འོད་ལ་སྒུག་དུས་སྨག་རུམ་སླེབས། །
JOB 30:27 བདག་གི་སེམས་ནང་སྡུག་ཅིང་ཞི་བདེ་མེད། ། དཀའ་སྡུག་ཉིན་མོ་བདག་གི་སྟེང་དུ་བབས། །
JOB 30:28 བདག་ནི་མུན་པར་མཆིས་ཀྱང་འོད་མེད་དེ། ། ཚོགས་ནང་ལངས་ནས་བདག་གིས་སྐྱབས་འཇུག་ཞུས། །
JOB 30:29 ང་རང་ཁྱི་སྤྱང་དག་གི་སྤུན་དུ་གྱུར། ། རྔ་བྱ་རྣམས་ཀྱི་གྲོགས་སུ་བདག་གྱུར་བྱུང་། །
JOB 30:30 བདག་གི་སྐྱི་མོ་ནག་ཅིང་ལྷུང་པ་སྟེ། ། ཚ་བས་བདག་གི་རུས་པ་རྣམས་ཀྱང་བསྲེགས། །
JOB 30:31 བདག་གི་པི་ཝང་གིས་ནི་མྱ་ངན་སྐད་འདོན་ཞིང་། ། བདག་གི་འཕྲེད་གླིང་སྒྲ་ནི་ངུ་སྐད་དུ་གྱུར་ཏོ། །
JOB 31:1 ང་ཡིས་མིག་དང་ཞལ་ཆད་བཞག་ཡོད་པས། ། ན་ཆུང་བུ་མོར་ཞེན་གྱིས་བལྟ་རུང་ངམ། །
JOB 31:2 བླ་མེད་དཀོན་མཆོག་ཁོང་གིས་གནང་བའི་སྐལ་བ་དང་། ། བླ་མེད་ཀུན་དབང་ཁོང་གི་ནོར་སྐལ་ཅི་ཡིན་ནམ། །
JOB 31:3 དེ་ནི་སྡིག་སྤྱོད་རྣམས་ལ་ཆག་སྒོ་འབྱུང་བ་དང་། ། ཉེས་སྤྱོད་ཅན་ལ་ཆག་སྒོ་འབྱུང་བ་མ་ཡིན་ནམ། །
JOB 31:4 བདག་གི་ལམ་རྣམས་ཁོང་གིས་གཟིགས་གྱུར་ཏེ། ། བདག་གི་གོམ་པ་བརྩི་བར་མི་མཛད་དམ། །
JOB 31:5 ཇི་སྟེ་རྫུན་གཏམ་ནང་དུ་བདག་མཆིས་ཤིང་། ། རྐང་པ་བསླུ་བྲིད་རྗེས་སུ་འབྲངས་གྱུར་ན། །
JOB 31:6 དཀོན་མཆོག་གིས་ངའི་ཟོལ་མེད་རྟོགས་པའི་ཕྱིར། ། དྲང་པོ་སྲང་གིས་ང་རང་འཇལ་བར་ཤོག །
JOB 31:7 དྲང་པོའི་ལམ་ནས་གོམ་པ་འཁྱོར་བ་དང་། ། རང་སེམས་མིག་གི་རྗེས་སུ་འབྲངས་ནས་ནི། ། བདག་གི་ལག་པར་བཙོག་པས་གང་ཡོད་ན། །
JOB 31:8 བདག་གིས་འདེབས་པ་གཞན་གྱིས་བཟའ་བར་ཤོག ། བདག་གི་ལོ་ཏོག་རྩ་ནས་འབྱིན་པར་ཤོག །
JOB 31:9 ངའི་སེམས་བུད་མེད་ཅིག་ལ་ཆགས་པ་དང་། ། ཁྱིམ་མཚེས་སྒོ་ཁར་བསྒུགས་ནས་བསྡད་གྱུར་ན། །
JOB 31:10 བདག་གི་ཆུང་མས་གཞན་ལ་གཡོག་བྱས་ནས། ། མོ་དང་མཉམ་དུ་གཞན་རྣམས་འགྲོགས་པར་ཤོག །
JOB 31:11 རྒྱུ་མཚན་འདི་ནི་ངོ་ཚའི་བྱ་སྤྱོད་དེ། ། ཁྲིམས་དཔོན་ཉེས་ཆད་གཅོད་འོས་སྡིག་ཉེས་ཡིན། །
JOB 31:12 དེ་ནི་འཇོམས་ཤིང་སྲེག་པའི་མེ་ཡིན་ཏེ། ། རྩ་མེད་གཏོང་བའི་བར་དུ་འབར་བ་དང་། ། བདག་གི་རྒྱུ་ནོར་ཀུན་ཡང་འཁྱེར་བར་ངེས། །
JOB 31:13 ང་ཡི་གཡོག་དང་གཡོག་མོས་བདག་ལ་རྩོད་དུས་སུ། ། བདག་གིས་མཐོང་ཆུང་བྱས་ནས་དེ་ཚོར་མ་མཉན་ན། །
JOB 31:14 དཀོན་མཆོག་བཞེངས་དུས་བདག་གིས་ཅི་ལྟར་བྱ། ། ཁོང་གིས་གཟིགས་དུས་བདག་གིས་ལན་ཅི་ཞུ། །
JOB 31:15 བདག་ནི་མངལ་ནང་མཛད་མཁན་གྱིས། ། དེ་ཡང་མཛད་པ་མ་ཡིན་ནམ། ། བདག་ཅག་མངལ་ནང་འགོད་མཁན་ཡང་། ། ཁོང་ཉིད་གཅིག་པུ་མ་ཡིན་ནམ། །
JOB 31:16 བདག་གིས་དབུལ་པོའི་རེ་བ་མ་བསྐངས་ལ། ། ཡུགས་མོའི་མིག་ནང་རེ་ཐག་ཆད་བཅུག་ཅིང་། །
JOB 31:17 ཡང་ན་གཅིག་པུས་རང་གི་ཟས་སྤྱད་ཅིང་། ། དྭ་ཕྲུག་དང་ནི་མཉམ་དུ་མ་སྤྱད་ན། །
JOB 31:18 བདག་ནི་གཞོན་པའི་དུས་ནས་བཟུང་། ། དྭ་ཕྲུག་བདག་མཉམ་ནར་སོན་ཞིང་། ། བདག་ནི་དེ་ཚོའི་ཕ་བཞིན་ཡིན། ། སྐྱེས་ནས་ཡུགས་མོར་རོགས་བྱས་སོ། །
JOB 31:19 གང་ཞིག་གྱོན་གོས་མེད་པས་འཆི་བ་དང་། ། ཡང་ན་དབུལ་པོར་གཡོག་རྒྱུ་མེད་དུས་སུ། །
JOB 31:20 བདག་གི་ལུག་བལ་གྱིས་ནི་དེ་ལ་དྲོད་བསྐྱེད་ཅིང་། ། དེ་ཡིས་སེམས་གཏིང་བདག་ཆེད་སྨོན་འདུན་མ་ཞུས་ན། །
JOB 31:21 མཁར་སྒོར་རོགས་རམ་བྱེད་མཁན་ཡོད་པས་ན། ། ལག་པ་གཡུགས་ཏེ་དྭ་ཕྲུག་རྒོལ་གྱུར་ན། །
JOB 31:22 སོག་པ་ལས་ངའི་དཔུང་པ་འབུད་པར་ཤོག ། བདག་གི་དཔུང་པའི་རུས་པ་ཆག་པར་ཤོག །
JOB 31:23 བདག་ནི་དཀོན་མཆོག་ཁོང་གི་བཀའ་ཆད་ལ་འཇིགས་ཏེ། ། ཁོང་གི་གཟི་བྱིན་དབང་གིས་བདག་ལ་སྤོབས་པ་མེད། །
JOB 31:24 བདག་གིས་གསེར་ནི་བརྟེན་ས་རུ་བཞག་སྟེ། ། དེ་ནི་ང་ཡི་བརྟེན་ས་ཡིན་ཟེར་ཞིང་། །
JOB 31:25 ང་རང་རྒྱུ་ནོར་ཕུན་ཚོགས་ལྡན་པ་དང་། ། ལག་པར་འབྱོར་བ་མོད་སྟབས་དགའ་གྱུར་ན། །
JOB 31:26 ཡང་ན་ཉི་མའི་འོད་ཟེར་འཕྲོ་བ་དང་། ། དཀར་གསལ་ཟླ་བའི་འཁོར་སྐྱོད་མཐོང་བའི་ཚེ། །
JOB 31:27 ངའི་སེམས་ཕག་ནས་བསླུ་བར་གྱུར་པ་དང་། ། ཁ་ཡིས་རང་གི་ལག་པར་འོ་བྱས་ ན། །
JOB 31:28 འདི་ཡང་ཉེས་ཆད་གཅོད་འོས་སྡིག་ཉེས་ཡིན། ། བདག་གིས་བླ་མེད་དཀོན་མཆོག་དོར་ཕྱིར་རོ། །
JOB 31:29 དགྲ་བོར་ཆག་སྒོ་འབྱུང་དུས་བདག་དགའ་ཞིང་། ། ཁོ་རང་དཀའ་སྡུག་འཕྲད་དུས་སྤྲོ་གྱུར་ན། །
JOB 31:30 དེ་ཡི་སྲོག་ལ་དམོད་མོ་བཏབ་ནས་ནི། ། རང་གི་ཁ་ལ་ཉེས་པ་བསག་མ་བཅུག །
JOB 31:31 བདག་པོའི་ཁ་ཟས་ལས་ནི་ཟོས་ཞིང་མ་ཚིམ་པ། ། སུ་ཞིག་ཡོད་ཅེས་ང་ཡི་ཁྱིམ་མིས་སྨྲས་མེད་ན། །
JOB 31:32 བདག་གིས་ཆ་མེད་སྲང་དུ་ཞག་སྡོད་བྱེད་མ་བཅུག ། བདག་གིས་སྒོ་ཆེར་ཕྱེས་ནས་ལམ་འགྲོ་བསུས་པ་ཡིན། །
JOB 31:33 བདག་གིས་ཨ་དམ་བཞིན་དུ་རང་ཉེས་བཀབ་ནས་ནི། ། རང་གི་སྡིག་ཉེས་དག་ནི་ཁོག་ཏུ་སྦས་གྱུར་ན། །
JOB 31:34 ཡང་ན་མི་ཚོགས་ཆེན་པོར་བདག་འཇིགས་ཏེ། ། རུས་རྒྱུད་སོ་སོའི་མཐོང་ཆུང་ལ་འཇིགས་པས། ། ཁ་རོག་བསྡད་ཅིང་ཕྱི་རུ་མ་བུད་ཚེ། །
JOB 31:35 བདག་ལ་ཉན་མཁན་གཅིག་ནི་ཡོད་པར་སྨོན། ། ལྟོས་དང་ང་ཡི་རྟགས་ནི་འདི་ཡིན་ཏེ། ། ཀུན་དབང་ཁྱེད་ཀྱིས་བདག་ལ་ལན་གནང་རོགས། ། བདག་དང་རྩོད་པས་བྲིས་ན་ཅི་མ་རུང་། །
JOB 31:36 བདག་གིས་དངོས་གནས་དཔུང་པའི་སྟེང་བཏེགས་ཏེ། ། གཙུག་རྒྱན་བཞིན་དུ་བདག་གིས་འཁུར་བར་བྱ། །
JOB 31:37 རང་གི་སྤྱོད་སྟངས་ཁོང་ལ་ཡོངས་སུ་འཆད། ། རྒྱལ་སྲས་བཞིན་དུ་ཁོང་དྲུང་བཅར་བར་བྱ། །
JOB 31:38 བདག་གི་ཞིང་ཁས་བདག་ལ་སྙད་བཙུགས་ཤིང་། ། རྨོས་ཤུར་ཡང་ནི་ལྷན་ཅིག་ངུ་གྱུར་ནས། །
JOB 31:39 ཞིང་ཁའི་ཐོན་རྫས་རིན་མེད་ཟོས་པ་དང་། ། ཡང་ན་ས་བདག་ཚེ་སྲོག་ངས་བླངས་ན། །
JOB 31:40 གྲོ་ཡི་ཚབ་ཏུ་གཟེ་མ་ར་མགོ་དང་། ། སོ་བའི་ཚབ་ཏུ་རྩྭ་ངན་སྐྱེ་བར་ཤོག ། དེ་ནས་ཨེས་ཡོབ་ཁོང་གི་གཏམ་རྫོགས་སོ། །
JOB 32:1 དེ་ནས་མི་དེ་གསུམ་པོས་ཨེས་ཡོབ་ཁོང་ལ་ཞུ་ལན་མ་བཏབ་སྟེ། ཅིའི་ཕྱིར་ཞེ་ན། དེ་ཡི་སྣང་བར་རང་ཉིད་དྲང་པོ་ཡིན་པས་སོ། །
JOB 32:2 དེ་ནས་པུ་ཟེ་པ་ཡི་ཁོངས་སུ་གཏོགས་པའི་རཱམ་གྱི་རུས་རྒྱུད་ལས་པ་རག་ཨེལ་གྱི་བུ་ཨེལ་ལེ་ཧུ་ཁྲོས་ཤིང་། ཁོ་ནི་ཨེས་ཡོབ་ལ་ཤིན་ཏུ་ཁྲོས་པར་གྱུར་ཏེ། ཨེས་ཡོབ་ཀྱིས་དཀོན་མཆོག་གི་དྲུང་དུ་རང་ཉིད་དྲང་པོར་བརྩིས་པའི་ཕྱིར་རོ། །
JOB 32:3 ཡང་ཨེས་ཡོབ་ཀྱི་མཆེད་གྲོགས་གསུམ་པོ་ལའང་ཁྲོས་པར་གྱུར་ཏེ། གང་ལ་ཞེ་ན། ཁོ་ཚོས་ཞུ་ལན་འདེབས་རྒྱུ་མེད་བཞིན་དུ་ཨེས་ཡོབ་ཉེས་ཅན་དུ་བརྩིས་པས་སོ། །
JOB 32:4 ཡང་དེ་རྣམས་ཨེལ་ལེ་ཧུ་ལས་དགུང་ལོ་མཐོ་བའི་སྟབས་ཀྱིས། ཁོས་ཨེས་ཡོབ་ལ་གཏམ་གླེང་བར་བསྒུགས་བསྡད་ཅིང་།
JOB 32:5 ཁོས་མི་དེ་གསུམ་པོའི་ཁ་རུ་ལན་འདེབས་རྒྱུ་མེད་པ་མཐོང་ནས་ཤིན་ཏུ་ཁྲོ་བར་གྱུར།
JOB 32:6 པུ་ཟེ་པ་ཡི་པ་རག་ཨེལ་གྱི་བུ་ཨེལ་ལེ་ཧུ་ཡིས་ཞུ་ལན་བཏབ་ནས་སྨྲས་པ། བདག་ནི་གཞོན་ཞིང་ཁྱེད་ཅག་རབ་བགྲེས་པས། ། རང་ཚོད་བཟུང་ནས་བསམ་པ་བརྗོད་མ་ཕོད། །
JOB 32:7 རྒན་པ་རྣམས་ཀྱིས་སྔོན་ལ་གཏམ་བརྗོད་དེ། ། བགྲེས་པོས་ཤེས་རབ་སྟོན་པར་རིགས་ཞེས་བསམས། །
JOB 32:8 འོན་ཀྱང་མི་ནང་ཐུགས་ཉིད་བཞུགས་པ་དང་། ། ཀུན་དབང་ཁོང་གི་དབུགས་ཀྱིས་བློ་གྲོས་གནང་། །
JOB 32:9 བགྲེས་པོ་ཐམས་ཅད་མཁས་པ་ཡིན་པའི་ངེས་པ་མེད། ། རྒན་པ་ཀུན་གྱིས་ལེགས་ཉེས་རྟོགས་པའི་ངེས་པ་མེད། །
JOB 32:10 དེའི་ཕྱིར་བདག་ལ་གསོན་དང་བདག་གིས་ཞུ། ། བདག་གི་བསམ་པ་རྣམས་ཀྱང་བརྗོད་པར་བྱ། །
JOB 32:11 ཁྱེད་ཚོས་བརྗོད་པའི་གཏམ་ནི་རྙེད་བར་དུ། ། ལྟོས་དང་ཁྱེད་ཚོས་གསུང་ལ་བདག་གིས་བསྒུགས། ། ང་ཡིས་ཁྱེད་ཚོའི་རྩོད་པར་རྣ་བ་བླགས། །
JOB 32:12 བདག་གིས་ཁྱེད་ཚོའི་གཏམ་ལ་གཟབ་གཟབ་མཉན། ། ཁྱེད་ཅག་ནང་ནས་ཨེས་ཡོབ་དགག་མཁན་དང་། ། ཁོང་ལ་ཞུ་ལན་འདེབས་མཁན་གཅིག་མ་བྱུང་། །
JOB 32:13 ཁྱེད་ཚོས་འདི་ལྟར་བརྗོད་མི་ནུས། ། ངེད་ཀྱིས་ཤེས་རབ་རྙེད་བྱུང་སྟེ། ། དཀོན་མཆོག་ཁོ་ལས་རྒྱལ་ནུས་ཤིང་། ། མི་ནི་དེ་ལས་རྒྱལ་བ་མེད། །
JOB 32:14 ཨེས་ཡོབ་ཁོང་གིས་གཏམ་གྱིས་བདག་ལ་རྒོལ་བ་མིན། ། ཁྱེད་ཅག་བཞིན་དུ་བདག་གིས་ཁོང་ལ་ལན་མི་འདེབས། །
JOB 32:15 དེ་རྣམས་འཇིགས་སྐྲག་སྐྱེས་ཏེ་ལན་མ་བཏབ། ། མི་དེ་རྣམས་ལ་སྨྲ་བ་ཅི་ཡང་མེད། །
JOB 32:16 ཡིན་ཡང་དེ་ཚོས་གཏམ་ནི་མ་སྨྲས་ཤིང་། ། ཁ་རོག་བསྡད་ནས་ཞུ་ལན་མ་བཏབ་རྐྱེན། ། བདག་གིས་སྔར་བཞིན་བསྒུགས་ནས་སྡོད་འོས་སམ། །
JOB 32:17 ངས་ཀྱང་རང་གི་གཏམ་བཞིན་ལན་འདེབས་ཤིང་། ། བདག་གིས་རང་གི་བསམ་བློ་བརྗོད་པར་བྱ། །
JOB 32:18 གང་ལ་ཞེ་ན་བདག་ནང་གཏམ་གྱིས་གང་། ། ནང་གི་སེམས་ཉིད་ཀྱིས་ནི་བདག་ལ་བསྐུལ། །
JOB 32:19 ངའི་ཁོག་བུ་ག་མེད་པའི་ཆང་གི་སྐྱི་ཁུག་དང་། ། ཡང་ན་གས་ལ་ཉེ་བའི་རྐྱལ་བ་གསར་པ་བཞིན། །
JOB 32:20 བདག་བློ་བདེ་ཕྱིར་བདག་གིས་གླེང་དགོས་ཤིང་། ། བདག་གི་མཆུ་སྒྲོས་ཕྱེས་ནས་ལན་འདེབས་དགོས། །
JOB 32:21 བདག་གིས་མི་ཡི་ཁ་ངོར་མི་བལྟ་ཞིང་། ། ངོ་བསྟོད་ཡང་ནི་མི་ལ་མི་བྱེད་དེ། །
JOB 32:22 ངོ་བསྟོད་ཅི་ལྟར་བྱེད་པ་ངས་མི་ཤེས། ། ཤེས་ན་རང་ཉིད་སྐྲུན་མཁན་དཀོན་མཆོག་གིས། ། བདག་ནི་མྱུར་དུ་མེད་པར་མཛད་ངེས་ཡིན། །
JOB 33:1 ཨེས་ཡོབ་ཁྱེད་ཀྱིས་བདག་གི་གླེང་མོར་གསོན། ། བདག་གི་གཏམ་གླེང་ཐམས་ཅད་གསན་པར་མཛོད། །
JOB 33:2 གཟིགས་དང་ད་ནི་བདག་གི་མཆུ་སྒྲོས་འབྱེད། ། བདག་གི་ཁ་ནང་ལྕེ་ཡིས་གཏམ་སྨྲ་ཞིང་། །
JOB 33:3 ང་ཡི་གཏམ་གྱིས་སེམས་ཀྱི་དྲང་བདེན་མཚོན། ། བདག་གི་མཆུ་ཡིས་གང་ཤེས་དྲང་པོར་བརྗོད། །
JOB 33:4 དཀོན་མཆོག་ཐུགས་ཉིད་ཀྱིས་ནི་བདག་བཀོད་ཅིང་། ། ཀུན་དབང་ཞལ་དབུགས་ཀྱིས་ནི་ཚེ་སྲོག་སྩོལ། །
JOB 33:5 ཇི་སྟེ་བདག་ལ་ལན་ནི་འདེབས་ནུས་ན། ། ངའི་མདུན་ལངས་ཏེ་གཏམ་རྣམས་གསལ་པོར་ཤོད། །
JOB 33:6 དཀོན་མཆོག་དྲུང་དུ་བདག་ཀྱང་ཁྱེད་དང་འདྲ། ། བདག་ཀྱང་ས་རྡུལ་གྱིས་ནི་བཀོད་པ་ལགས། །
JOB 33:7 ལྟོས་དང་རྔམ་བརྗིད་སྒོ་ནས་ཁྱེད་ལ་འཇིགས་མི་སྐུལ། ། སྟོབས་ཤུགས་ཀྱིས་ནི་ཁྱེད་ལ་གནོན་ཤུགས་སྟེར་མི་བྱ། །
JOB 33:8 འོན་ཀྱང་ཁྱེད་ཀྱི་སྨྲ་བརྗོད་བདག་གིས་ཐོས། ། སྨྲས་པའི་གཏམ་ཡང་བདག་གིས་འདི་སྐད་ཐོས། །
JOB 33:9 ང་ནི་གཙང་ཞིང་ཉེས་སྐྱོན་གང་ཡང་མེད། ། ང་ནི་ཚུལ་དང་ལྡན་ཞིང་སྡིག་ཉེས་མེད། །
JOB 33:10 ལྟོས་དང་ཁོང་གིས་རྒོལ་བའི་གླགས་བཙལ་ཞིང་། ། བདག་ནི་ཁོང་གི་དགྲ་རུ་འགྱུར་བར་མཛད། །
JOB 33:11 ང་ཡི་རྐང་པར་ཁོང་གིས་ཨན་གཏད་བརྒྱབ། ། ང་ཡི་རྒྱུ་ལམ་ཀུན་ལ་གཟིགས་ཞེས་ཟེར། །
JOB 33:12 ཀྱེ་ཧོ་བདག་གིས་ཁྱེད་ལ་ལན་འདེབས་ཏེ། ། མི་ལས་དཀོན་མཆོག་ཆེན་པོ་ཡིན་པས་ན། ། ཁྱེད་ཀྱི་གཏམ་འདི་ནོར་འཁྲུལ་ཅན་ཡིན་ནོ། །
JOB 33:13 ཁོང་གིས་དོན་ཀུན་མི་ལ་ལན་ནི་མི་གནང་ཞེས། ། ཅིའི་ཕྱིར་ཁྱེད་ཀྱིས་ཁོང་དང་རྩོད་པར་བྱེད་པ་ཡིན། །
JOB 33:14 དཀོན་མཆོག་ཉིད་ཀྱིས་ཡང་ཡང་གསུངས་གྱུར་ཡང་། ། མི་ཡིས་ཁོང་གི་གསུང་ལ་མ་མཉན་ཏེ། །
JOB 33:15 མི་རྣམས་མལ་ཁྲིར་གཉིད་ནས་བརྒྱལ་བའི་དུས། ། མཚན་མོའི་རྨི་ལམ་དང་ནི་ཞལ་གཟིགས་ནང་། །
JOB 33:16 ཁོང་གིས་མི་ཡི་རྣ་བ་འབྱེད་མཛད་ཅིང་། ། མི་ཡི་སེམས་སུ་ཞལ་གདམས་ཕྱག་རྒྱས་འདེབས། །
JOB 33:17 མི་རྣམས་རང་གི་ངན་པའི་ལས་ནས་བཟློག་པ་དང་། ། ཁོ་རྣམས་ང་རྒྱལ་ལས་དང་འབྲལ་དུ་འཇུག་པ་དང་། །
JOB 33:18 གཤིན་པོའི་ཡུལ་དུ་མི་ལྷུང་ཆེད་དུ་འགོག་པ་དང་། ། རལ་གྲིའི་འོག་ཏུ་ཚེ་སྲོག་མི་འཆོར་ཕྱིར་དུ་ཡིན། །
JOB 33:19 མི་རྣམས་ན་སྟེ་མལ་ཁྲིར་ཟུག་གཟེར་ཉེས་ཆད་མྱངས། ། ལུས་ཀྱི་རུས་པ་རྣམས་ཀྱིས་དཀའ་སྡུག་ཚད་མེད་མྱངས། །
JOB 33:20 དེ་ལྟར་ལུས་ཀྱིས་ཁ་ཟས་འདོར་བ་དང་། ། སེམས་ནས་དྲི་ལྡན་ཟས་ལ་ཞེན་ཁ་ལོག །
JOB 33:21 དེ་ཡི་ཤ་ནི་ཟད་ཅིང་མཐོང་དཀའ་སྟེ། ། སྔོན་ལ་མཐོང་ངོར་མེད་པའི་རུས་པ་ཡང་། ། ད་ལྟ་ཐམས་ཅད་ཕྱི་རུ་མངོན་པ་ཡིན། །
JOB 33:22 གཤིན་པོའི་ཡུལ་ནི་ཁོ་ཡི་ཚེ་དང་ཉེ། ། སྲོག་ཀྱང་འཇིག་བྱེད་རྣམས་དང་ཉེ་བར་འགྲོ། །
JOB 33:23 ཇི་སྟེ་ཕོ་ཉ་སྟོང་གི་ནང་ནས་གཅིག ། དཀོན་མཆོག་མཉམ་དུ་གནས་ཤིང་བཀའ་ཁྱེར་ཏེ། ། མི་ལ་བསྒྲུབ་འོས་བྱ་བ་བསྟན་ནས་ནི། །
JOB 33:24 ཁོ་རང་དྲིན་གྱིས་བསྐྱངས་ནས་དཀོན་མཆོག་ལ། ། ཁོ་ནི་གཤིན་པོའི་ཡུལ་དུ་མི་ལྷུང་ཕྱིར། ། སྐྱོབས་ཤིག་བདག་ལ་བླུ་རིན་ཐོབ་ཞུས་ན། །
JOB 33:25 དེ་ནས་བུ་ཆུང་ལས་ཀྱང་ཁོའི་ཤ་འཇམ། ། དེ་ནི་བྱིས་པའི་དུས་སུ་ལོག་པར་འགྱུར། །
JOB 33:26 དེ་ཡིས་དཀོན་མཆོག་ཁོང་ལ་གསོལ་བ་འདེབས། ། དཀོན་མཆོག་ཉིད་ཀྱང་ཁོ་ལ་མཉེས་པ་ཡིན། ། ཁོ་ཡང་དགའ་བཞིན་ཁོང་གི་ཞལ་ངོར་མཇལ། ། དཀོན་མཆོག་ཉིད་ཀྱིས་ཁོ་རང་དྲང་བདེན་བརྩིས། །
JOB 33:27 དེ་ཡིས་མིའི་མདུན་བསྟོད་གླུ་ལེན་ཞིང་འདི་སྐད་དུ། ། ང་ཡིས་ཉེས་པ་བཟོས་ཏེ་བདེན་རྫུན་གོ་ལྡོག་ཀྱང་། ། འཁུར་བར་འོས་པའི་ཉེས་ཆད་ངའི་སྟེང་མ་བབས་ཏེ། །
JOB 33:28 དཀོན་མཆོག་ཉིད་ཀྱིས་ངའི་སྲོག་བསྐྱབས་པ་དང་། ། གཤིན་པོའི་ཡུལ་དུ་འགྲོ་རུ་མ་བཅུག་ཅིང་། ། བདག་གི་ཚེ་ཡིས་འོད་མདངས་མཐོང་ཞེས་ཟེར། །
JOB 33:29 ཀྱེ་ཧོ་བྱ་བ་འདི་ཀུན་དཀོན་མཆོག་གིས། ། མི་ཡི་ཆེད་དུ་ཡང་དང་བསྐྱར་དུ་མཛད། །
JOB 33:30 མིའི་སྲོག་གཤིན་པོའི་ཡུལ་ནས་སྐྱོབ་པ་དང་། ། སྲོག་གི་འོད་ནི་དེ་ལ་སྣང་ཕྱིར་ཡིན། །
JOB 33:31 ཀྱེ་ཀྱེ་ཨེས་ཡོབ་མ་གཡེང་བདག་ལ་གསོན། ། སྒྲ་ནི་མ་འདོན་བདག་གིས་གླེང་བར་བྱ། །
JOB 33:32 ཁྱེད་ཀྱི་དྲང་བདེན་བདག་གིས་སྟོན་འདོད་པས། ། གླེང་རྒྱུ་ཡོད་ན་བཀའ་ལན་གནང་བར་མཛོད། །
JOB 33:33 དེ་མིན་ང་ལ་གསན་ནས་ཞལ་རོག་བཞུགས། ། ཁྱེད་ལ་བདག་གིས་ཤེས་རབ་སྟོན་པར་བྱ། །
JOB 34:1 ཨེལ་ལེ་ཧུ་ཡིས་ལན་བཏབ་ནས་སྨྲས་པ།
JOB 34:2 མཁྱེན་དཔྱོད་ལྡན་པ་ཁྱེད་ཚོས་བདག་ལ་གསོན། ། ཤེས་བྱ་ལྡན་པའི་མི་ཡིས་བདག་ལ་གསོན། །
JOB 34:3 རྐན་གྱིས་ཟས་ཀྱི་བྲོ་བ་མྱོང་བ་ལྟར། ། རྣ་བས་གཏམ་གྱི་ཤན་ནི་འབྱེད་པའི་ཕྱིར། །
JOB 34:4 ང་ཚོས་དྲང་བདེན་འདེམས་དགོས་ཤིང་། ། མཉམ་དུ་གང་ལེགས་རྟོགས་དགོས་སོ། །
JOB 34:5 ཨེས་ཡོབ་ཀྱིས་ནི་ང་རང་དྲང་ན་ཡང་། ། དཀོན་མཆོག་ཉིད་ཀྱིས་ང་ཡི་དྲང་བདེན་ཕྲོགས། །
JOB 34:6 ང་ལ་གནས་ལུགས་གང་འདྲ་ལྡན་ན་ཡང་། ། བདག་ནི་རྫུན་གཏམ་སྨྲ་མཁན་དུ་བརྩིས་ཤིང་། ། བདག་ལ་ཉེས་པ་གཏན་ནས་མེད་ན་ཡང་། ། མདའ་ཡིས་རྨས་པ་གསོ་ཐབས་མེད་ཅེས་སྨྲས། །
JOB 34:7 ཆུ་ལྟར་ཟུར་ཟ་འཐུང་བར་བྱེད་པ་ཡི། ། ཨེས་ཡོབ་ལྟ་བུའི་མི་ནི་གཞན་སུ་ཡོད། །
JOB 34:8 ཁོང་ནི་ངན་པ་དང་འགྲོགས་ཤིང་། ། མི་ངན་མཉམ་དུ་འགྲོ་བར་བྱེད། །
JOB 34:9 མི་ཡིས་དཀོན་མཆོག་དགྱེས་པར་བྱེད་ན་ཡང་། ། ཕན་ཐོགས་ཅི་ཡང་མེད་ཅེས་ཁོང་གིས་སྨྲ། །
JOB 34:10 དེའི་ཕྱིར་གོ་རྟོགས་ཅན་རྣམས་བདག་ལ་གསོན། ། དཀོན་མཆོག་ཁོང་གིས་ངན་པ་མཛད་མི་སྲིད། ། ཀུན་དབང་ཉིད་ཀྱིས་ཉེས་པ་བསག་མི་འགྱུར། །
JOB 34:11 མི་ཡི་ལས་བཞིན་ཁོང་གིས་ལན་འཇལ་ཞིང་། ། མི་རེར་རང་གི་ལམ་བཞིན་རྙེད་དུ་འཇུག །
JOB 34:12 དཀོན་མཆོག་ཁོང་གིས་ངན་པ་མཛད་མི་སྲིད། ། ཀུན་དབང་ཁོང་ནི་དྲང་བདེན་ལས་མི་འཛོལ། །
JOB 34:13 སུ་ཡིས་ཁོང་ཉིད་ས་གཞི་སྐྱོང་བར་མངགས། ། འཇིག་རྟེན་ཡོངས་ཀུན་སུ་ཡིས་གཏན་ལ་ཕབ། །
JOB 34:14 ཁོང་གིས་རང་ཉིད་གཅིག་པུ་དགོངས་མཛད་ཅིང་། ། ཐུགས་ཉིད་དང་ནི་དབུགས་ཀྱང་ཕྱིར་བསྡུས་ན། །
JOB 34:15 ཤ་ཁྲག་གདོས་བཅས་ཐམས་ཅད་ལྷན་ཅིག་འཆི། ། མི་ཀུན་ཡང་བསྐྱར་ས་རྡུལ་ནང་དུ་འཐིམ། །
JOB 34:16 ཁྱེད་ལ་གོ་རྟོགས་ཡོད་ན་འདི་ལ་ཉོན། ། ང་ཡི་གཏམ་གྱི་སྒྲ་ལ་རྣ་བ་བློགས། །
JOB 34:17 དྲང་པོར་སྡང་མཁན་གྱིས་ནི་རྒྱལ་སྲིད་སྐྱོང་ནུས་སམ། ། དྲང་བདེན་མཐུ་སྟོབས་ཅན་ལ་ཁྱེད་ཀྱིས་སྐྱོན་འཛུགས་སམ། །
JOB 34:18 ཁོང་གིས་རྒྱལ་པོར་ཁྱོད་ནི་ཕན་མེད་ཡིན་ཞེས་དང་། ། སྐུ་དྲག་རྣམས་ལ་ཁྱོད་ནི་ངན་པ་ཡིན་ཞེས་གསུང་། །
JOB 34:19 ཁོང་གིས་རྒྱལ་སྲས་རྣམས་ཀྱི་ཁ་ངོར་མི་གཟིགས་ཤིང་། ། དབུལ་པོ་རྣམས་ལས་ཕྱུག་པོར་མཐོང་ཆེན་ཡང་མི་བྱ། ། རྒྱུ་མཚན་དེ་ཀུན་ཁོང་གི་ཕྱག་གིས་བཀོད་པས་སོ། །
JOB 34:20 སྐད་ཅིག་ཉིད་ལ་དེ་རྣམས་འཆི་གྱུར་ཏེ། ། འབངས་མི་ནམ་གུང་གཡོ་འགུལ་ལས་འཆི་ཞིང་། ། སྟོབས་ཅན་རྣམས་ཀྱང་འཁྱེར་བར་མཛད་པ་དང་། ། དེ་ནི་མི་ཡིས་བཟོས་པ་མ་ཡིན་ནོ། །
JOB 34:21 མི་ཡི་ལམ་རྣམས་དཀོན་མཆོག་སྤྱན་དྲུང་ཡོད། ། གོམ་སྟབས་རེ་རེ་ཁོང་གིས་གཟིགས་པ་ཡིན། །
JOB 34:22 སྡིག་སྤྱོད་མི་རྣམས་ཡིབ་ནས་སྡོད་ཐུབ་པའི། ། མུན་པ་དང་ནི་སྨག་རུམ་གང་ཡང་མེད། །
JOB 34:23 ཉེས་ཆད་ཕོག་ཏུ་དཀོན་མཆོག་དྲུང་འོང་བར། ། ཁོང་གིས་ཡང་ཡང་མི་ལ་བརྟག་མི་དགོས། །
JOB 34:24 ཁོང་གིས་མ་བརྟག་ནུས་ལྡན་བརླག་ནུས་ཤིང་། ། དེ་དག་ཚབ་ཏུ་གཞན་རྣམས་སློང་བར་མཛད། །
JOB 34:25 ཁོང་གིས་དེ་ཚོའི་ཅི་བྱས་ལས་རྣམས་མཁྱེན། ། མཚན་མོར་དེ་རྣམས་འགྱེལ་ནས་མེད་པར་མཛད།
JOB 34:26 ཁོང་གིས་ངན་པར་ཉེས་ཆད་བཅད་པ་ལྟར། ། གཞན་གྱི་མིག་མདུན་དེ་ཚོར་རྡུང་རྡེག་བཏང་། །
JOB 34:27 ཁོ་རྣམས་གྱེས་ནས་ཁོང་གི་རྗེས་མ་འབྲང་། ། ཁོང་གི་གཤེགས་ལམ་ཀུན་ལ་མ་བལྟས་རྐྱེན། །
JOB 34:28 དབུལ་པོའི་ངུ་སྐད་ཁོང་དྲུང་སླེབས་སུ་བཅུག ། སྡུག་བསྔལ་གདུངས་པའི་འོ་དོད་ཁོང་གིས་གསན། །
JOB 34:29 ཇི་སྟེ་ཁོང་ཉིད་ཞལ་རོག་བཞུགས་གྱུར་ན། ། སུ་ཡིས་ཁོང་ལ་ཉེས་པ་འགེལ་ནུས་སམ། ། ཡང་ན་ཁོང་གིས་ཞལ་རས་སྦེད་དུས་སུ། ། སུ་ཡིས་ཁོང་ཉིད་མཇལ་བར་འགྱུར་ནུས་སམ། ། མི་དང་རྒྱལ་ཁབ་གང་ཡིན་ཁྱད་པར་མེད། །
JOB 34:30 འབངས་རྣམས་འཆིང་རྒྱ་ནང་དུ་མི་ཚུད་ཆེད། ། དད་མེད་མི་ལ་རྒྱལ་སྲིད་སྐྱོང་མ་འཇུག །
JOB 34:31 བདག་ལ་བཀའ་བཀྱོན་ཕོག་པས་ན། ། དེང་ཕྱིན་ཉེས་པའི་དོན་མི་བྱ། །
JOB 34:32 བདག་གིས་མཐོང་བར་མ་གྱུར་པ། ། ཁྱེད་ཀྱིས་ང་ལ་སྟོན་པར་མཛོད། ། བདག་གིས་སྡིག་ཉེས་བསགས་ཡོད་ན། ། ཕྱིས་སུ་དེ་བཞིན་མི་བྱ་ཞེས། ། སུ་ཡིས་ཁོང་ལ་ཞུ་ནུས་སམ། །
JOB 34:33 ཁྱེད་ཀྱིས་འགྱོད་བཤགས་མི་བྱེད་རྐྱེན། ། ཁོང་གིས་ཁྱེད་ཀྱི་འདོད་པ་བཞིན། ། ཁྱེད་ལ་ཉེས་སྐྱོན་འཛུགས་དགོས་སམ། ། ང་མིན་ཁྱེད་ཀྱིས་ཐག་གཅོད་དགོས། ། ཁྱེད་ཀྱིས་གང་ཤེས་དེ་སྨྲོས་ཤིག །
JOB 34:34 གནས་ལུགས་རྟོགས་པའི་མི་ཡིས་བདག་ལ་བརྗོད། ། ཤེས་རབ་ལྡན་པས་འདི་ལྟར་སྨྲ་བར་འགྱུར། །
JOB 34:35 ཨེས་ཡོབ་ཁོང་གིས་ཤེས་བྱ་མེད་བཞིན་གླེང་། ། ཁོང་གི་གཏམ་རྣམས་ཤེས་རབ་དང་བྲལ་ཏོ། །
JOB 34:36 ཁོང་གིས་མི་ངན་བཞིན་དུ་ལན་འདེབས་པས། ། མཐར་ཐུག་བར་དུ་ཚོད་བགམ་གནང་བར་ཤོག །
JOB 34:37 དེ་ཡིས་རང་གི་སྡིག་པར་ངོ་ལོག་སྣོན། ། ང་ཚོའི་དཀྱིལ་དུ་ཐལ་མོ་བརྡབས་ནས་ནི། ། དཀོན་མཆོག་རྒོལ་བའི་གཏམ་གླེང་མང་དུ་སྤེལ། །
JOB 35:1 ཨེལ་ལེ་ཧུ་ཡིས་མུ་མཐུད་དུ་སྨྲས་པ།
JOB 35:2 ཁྱེད་ཀྱིས་གཏམ་འདིར་གནས་ལུགས་ཡོད་བསམས་ཏེ། ། དཀོན་མཆོག་དྲུང་དུ་བདག་ནི་དྲང་ཟེར་ཞིང་། །
JOB 35:3 དེ་ནས་ཁྱེད་ཀྱིས་འདི་ལྟར་སྨྲས། ། འདི་ནི་ཁྱོད་ལ་ཕན་ཅི་ཡོད། ། ང་ཡིས་སྡིག་པ་མ་བཟོས་ན། ། ང་ལ་ཕན་ཐོགས་ཅི་ཡོད་ཟེར། །
JOB 35:4 ཁྱེད་དང་ཁྱེད་མཉམ་ཡོད་པའི་གྲོགས་རྣམས་ལ། ། བདག་གིས་འདི་ལྟར་ལན་ཞིག་འདེབས་པར་བྱ། །
JOB 35:5 ཁྱེད་ཀྱིས་མགོ་ཡར་བཀྱགས་ནས་ནམ་མཁར་ལྟོས། ། ཁྱེད་ལས་མཐོ་བའི་ཆུ་འཛིན་ལ་ལྟོས་ཤིག །
JOB 35:6 ཁྱེད་ཀྱིས་སྡིག་པ་བསགས་གྱུར་ན། ། དཀོན་མཆོག་ཁོང་ལ་ཅི་ཞིག་གནོད། ། ཁྱེད་ཀྱི་ཉེས་སྐྱོན་འཕེལ་ན་ཡང་། ། དཀོན་མཆོག་ཁོང་གིས་གྱོང་མི་རག །
JOB 35:7 ཁྱེད་རང་དྲང་ན་དཀོན་མཆོག་ལ་ཅི་སྦྱིན། ། ཁྱེད་ཀྱི་ལག་ནས་ཁོང་ལ་ཅི་འཐོབ་བམ། །
JOB 35:8 ཁྱེད་ཀྱི་ངན་པས་ཁྱེད་འདྲའི་མི་ལ་གནོད། ། ཁྱེད་ཀྱི་དྲང་པོས་མི་བུ་ཁོ་ནར་ཕན། །
JOB 35:9 བརྙས་བཅོས་ཐེབས་པས་མི་ཡིས་སྐད་རྒྱག་ཅིང་། ། དབང་ཅན་གཉའ་གནོན་རྐྱེན་གྱིས་འོ་དོད་ཞུ། །
JOB 35:10 མཚན་མོར་གླུ་དབྱངས་གནང་ཞིང་བདག་བསྐྲུན་པའི། ། དཀོན་མཆོག་གང་དུ་བཞུགས་ཞེས་སུ་ཡིས་འདྲི། །
JOB 35:11 ཁོང་གིས་ས་ཡི་དུད་འགྲོ་ལས། ། ང་ཚོར་བཀའ་སློབ་གནང་བ་དང་། ། ནམ་མཁའི་བྱ་ལས་རང་ཅག་རྣམས། ། མཁས་པར་མཛད་ཅེས་སྨྲ་མཁན་མེད། །
JOB 35:12 མི་ངན་ང་རྒྱལ་ཆེ་བའི་རྐྱེན་དབང་གིས། ། དེ་ཚོས་འོ་དོད་བོས་ཀྱང་ལན་མི་གནང་།
JOB 35:13 སྙིང་པོ་མེད་པའི་ཞུ་འབོད་ལ། ། དཀོན་མཆོག་ཁོང་གིས་མི་གསན་ཞིང་། ། ཀུན་དབང་ཉིད་ཀྱིས་དེར་མི་གཟིགས། །
JOB 35:14 ཁོང་ཉིད་མི་མཇལ་ཟེར་བས་ལྟ་ཅི་སྨོས། ། གྱོད་གཞི་ཁོང་དྲུང་ཡོད་པས་ཁོང་ལ་སྒུགས། །
JOB 35:15 ཁོང་ཉིད་ཁྲོས་ཀྱང་བཀའ་ཆད་མི་གཅོད་ཅིང་། ། ང་རྒྱལ་ལ་ཡང་དེ་འདྲ་མི་གཟིགས་པས། །
JOB 35:16 ཨེས་ཡོབ་ཁོང་གིས་དོན་མེད་གཏམ་གླེང་ཞིང་། ། ཤེས་རབ་མེད་པའི་གཏམ་ནི་མང་ཙམ་ལབ། །
JOB 36:1 ཨེལ་ལེ་ཧུ་ཡིས་ཡང་མུ་མཐུད་དུ་སྨྲས་པ།
JOB 36:2 དཀོན་མཆོག་དོན་དུ་བདག་ལ་གཏམ་ཡོད་པས། ། ཅུང་ཙམ་བཞུགས་དང་བདག་གིས་ཁྱེད་ལ་སྟོན། །
JOB 36:3 བདག་གིས་རྒྱང་ནས་བློ་གྲོས་འདྲེན་འགྱུར་ཞིང་། ། རང་ཉིད་སྐྲུན་མཁན་དཀོན་མཆོག་ཁོང་ཉིད་ཀྱི། ། དྲང་བདེན་དེ་ནི་ཆེ་བར་བརྗོད་པར་བྱ། །
JOB 36:4 ང་ཡི་གཏམ་ནི་དངོས་གནས་རྫུན་མིན་ཏེ། ། ཤེས་རབ་གཏམས་པ་ཁོང་ཉིད་ཁྱེད་མཉམ་བཞུགས། །
JOB 36:5 ལྟོས་དང་དཀོན་མཆོག་ནུས་མཐུ་ཆེན་པོ་ཡིན། ། མི་ལ་མཐོང་ཆུང་ཡང་ནི་མི་མཛད་ཅིང་། ། ཁོང་གི་མཁྱེན་རབ་ཤིན་ཏུ་རྒྱ་ཆེ་འོ། །
JOB 36:6 ཁོང་གིས་སྡིག་སྤྱོད་མི་ཡི་སྲོག་མི་སྐྱོབ། ། འོན་ཀྱང་སྡུག་བསྔལ་ཅན་ལ་དག་འབུད་མཛད། །
JOB 36:7 ཁོང་གིས་དྲང་བདེན་ཅན་ལ་གཟིགས་སྐྱོང་གནང་། ། དེ་དག་རྒྱལ་པོ་མཉམ་དུ་རྒྱལ་ཁྲིའི་སྟེང་། ། ཇི་སྲིད་བར་དུ་མཐོ་སར་བཀོད་པ་ཡིན། །
JOB 36:8 ཇི་སྟེ་ཁོ་ཚོར་ལྕགས་སྒྲོག་བརྒྱབ་ནས་ནི། ། སྡུག་གི་ཐག་པས་དེ་རྣམས་བཅིངས་གྱུར་ན། །
JOB 36:9 ཁོང་གིས་དེ་ཚོའི་ལས་དང་ཉེས་སྐྱོན་དང་། ། ང་རྒྱལ་རང་རློམ་ཆེ་བ་ཁོ་ཚོར་སྟོན། །
JOB 36:10 བཀའ་སློབ་ཉན་ཕྱིར་ཁོང་གིས་དེ་ཚོའི་རྣ་འབྱེད་ཅིང་། ། སྤྱོད་ངན་སྤངས་ནས་ཁ་ཕྱིར་འཁོར་བའི་བཀའ་བསྩལ་ཏོ། །
JOB 36:11 གལ་ཏེ་ཁོ་ཚོས་མཉན་ནས་བཀའ་བསྲུངས་ན། ། དེ་ཚོའི་ཉི་མ་ལོངས་སྤྱོད་ནང་དུ་དང་། ལོ་རྣམས་བདེ་སྐྱིད་ནང་ནས་རྫོགས་པར་འགྱུར། །
JOB 36:12 འོན་ཀྱང་དེ་ཚོས་བཀའ་ལ་མ་མཉན་ན། ། རལ་གྲིས་གསོད་ཅིང་ཤེས་རབ་མེད་པར་འཆི། །
JOB 36:13 དད་གུས་མེད་པ་རྣམས་ཀྱིས་ཁོང་ཁྲོ་བསག ། དཀོན་མཆོག་ཁོ་རྣམས་བཅིངས་རུང་སྐྱབས་མི་ཞུ། །
JOB 36:14 མཆོད་གཤོམ་གཞང་འཚོང་ནང་བཞིན་དུ། ། དེ་དག་གཞོན་པའི་དུས་སུ་འཆི། །
JOB 36:15 སྡུག་བསྔལ་བརྒྱུད་ནས་ཁོང་གིས་དབུལ་ཕོངས་སྐྱོབ། ། བརྙས་བཅོས་ཐེབས་དུས་དེ་ཚོའི་རྣ་བ་འབྱེད། །
JOB 36:16 དེ་བཞིན་ཁྱེད་ཀྱང་དཀའ་སྡུག་ལས་སྒྲོལ་ཞིང་། ། ཚད་བཀག་མེད་པའི་ཡངས་སར་འདྲེན་འགྱུར་ཏེ། ། ཁྱེད་ཀྱི་ཅོག་ཙེར་ཞིམ་མངར་ཟས་རྣམས་བཤམས། །
JOB 36:17 འོན་ཀྱང་སྡིག་སྤྱོད་ཁྲིམས་ཀྱིས་ཁྱེད་ཁེངས་པས། ། གཤགས་དང་ཁྲིམས་ཀྱིས་ཁྱེད་རང་དམ་པོར་བཟུང་། །
JOB 36:18 ཁྱེད་ཉིད་ཞེ་སྡང་ཆེན་པོ་ལངས་གྱུར་ཏེ། ། ཁ་ནས་འཕྱ་སྨོད་བྱེད་པར་མ་མཛོད་ཅིག ། བླུ་རིན་ཆེ་བས་ལོག་ལམ་བསྐྱོད་མི་རུང་། །
JOB 36:19 ཁྱེད་ཀྱི་ཞུ་འབོད་དང་ནི་སྟོབས་ཀུན་གྱིས། ། ཁྱེད་ལ་དཀའ་སྡུག་མེད་པར་བཟོ་ནུས་སམ། །
JOB 36:20 མི་རྣམས་རང་སར་རྩ་མེད་གཏོང་དུས་ཏེ། ། ཁྱེད་ཀྱིས་མཚན་མོར་ཡིད་སྨོན་མ་བྱེད་ཅིག །
JOB 36:21 སྡིག་པའི་ཕྱོགས་སུ་མི་འགྲོ་ཆེད། ། ཁྱེད་ཀྱིས་དོགས་ཟོན་བྱེད་དགོས་ཏེ། ། ཁྱེད་ཀྱིས་སྡིག་པའི་ལས་བདམས་པ། ། དཀའ་སྡུག་ལས་ཀྱང་མང་བས་སོ། །
JOB 36:22 ལྟོས་དང་དཀོན་མཆོག་ནུས་མཐུ་ཆེ་བས་མཆོག ། སུ་ཡིས་ཁོང་ལྟར་བཀའ་སློབ་མཛད་ནུས་སམ། །
JOB 36:23 སུ་ཡིས་ཁོང་གི་ལམ་མངགས་ཤིང་། ། ཁྱེད་ཀྱིས་ཆོས་དྲང་མ་སྤྱད་ཅེས། ། སུ་ཡིས་དེ་ལྟར་བརྗོད་ནུས་སམ། །
JOB 36:24 མི་ཡིས་ཁོང་ལ་བསྟོད་དབྱངས་ཕུལ་བ་བཞིན། ། ཁོང་གི་མཛད་པར་བསྟོད་པ་ཡིད་ལ་ཟུངས། །
JOB 36:25 ཁོང་གི་མཛད་པ་མི་བུ་ཀུན་གྱིས་མཐོང་། ། མི་ཡིས་རྒྱང་རིང་ཡུལ་ནས་ཧུར་རེར་ལྟ། །
JOB 36:26 ལྟོས་དང་དཀོན་མཆོག་ཆེ་བ་རྟོགས་མི་ནུས། ། ཁོང་གི་དགུང་ལོ་ཚོད་དཔག་བྱེད་ཐབས་བྲལ། །
JOB 36:27 ཆུ་ཐིགས་རྣམས་ནི་ཁོང་གིས་འདྲེན་མཛད་པས། ། དེ་ནི་སྤྲིན་སྨུག་ཁྲོད་དུ་ཆར་བར་གྱུར།།
JOB 36:28 སྤྲིན་པས་དེ་རྣམས་ས་ལ་བབས་བཅུག་སྟེ། ། མི་ཡི་སྟེང་དུ་མོད་པོ་འབབ་པར་བྱེད། །
JOB 36:29 སྤྲིན་པ་ཅི་ལྟར་རྐྱོང་བ་དང་། ། དཀོན་མཆོག་ཁོང་གི་གཟིམ་ཁང་གི ། འབྲུག་སྒྲ་སུ་ཡིས་རྟོགས་ནུས་སམ། །
JOB 36:30 ཁོང་གིས་ཉིད་ཀྱི་མཐའ་རུ་འོད་སྣང་ཞིང་། ། རྒྱ་མཚོའི་གཏིང་རྣམས་ཁོང་གིས་གཡོགས་པར་མཛད། །
JOB 36:31 ཁོང་གིས་འདི་ལྟར་མི་ལ་ཉེས་ཆད་གཅོད། ། ཁོང་གིས་འབྲུ་རིགས་མང་པོ་གནང་བར་མཛད། །
JOB 36:32 ཁོང་གི་ཕྱག་ཟུང་གློག་དམར་ནང་སྦས་ཏེ། ། འབེན་དུ་ཕོག་པར་དེ་ལ་བཀའ་གནང་མཛད། །
JOB 36:33 ཁོང་གི་འབྲུག་སྒྲས་ཉིད་ཀྱི་མཛད་པ་མངོན། ། དུད་འགྲོར་རླུང་དམར་ལྡང་བ་གསལ་པོར་བསྟན། །
JOB 37:1 དེའི་ཕྱིར་བདག་གི་སྙིང་འདར་ཞིང་། ། རང་གི་གནས་ནས་གཞན་སར་མཆོངས། །
JOB 37:2 ཁོང་གི་གསུང་སྐད་ང་རོར་གསོན་ཞིག་དང་། ། དེ་ནི་དཀོན་མཆོག་ཞལ་ལས་ཐོན་པའི་སྐད། །
JOB 37:3 ཁོང་གི་གསུང་སྐད་ས་གཞི་ཡོངས་ལ་ཁྱབ། ། ས་མཐའི་བར་དུ་ཁོང་གི་གློག་དམར་འཁྱུགས། །
JOB 37:4 དེའི་རྗེས་མི་ཡིས་ཁོང་གི་འུར་སྒྲ་ཐོས། ། ཁོང་གིས་བརྗིད་ཉམས་ཆེ་བའི་ལྡིར་སྒྲ་སྒྲོག ། གསུང་སྐད་སྒྲོག་དུས་ཕྱིར་འཐེན་མ་བྱས་སོ། །
JOB 37:5 དཀོན་མཆོག་ཁོང་ལས་ངོ་མཚར་ལྡིར་སྒྲ་འབྱུང་། ། ང་ཚོས་རྟོགས་པར་དཀའ་བའི་དོན་ཆེན་མཛད། །
JOB 37:6 ཁོང་གིས་ཁ་བར་ས་ལ་བོབས་ཤིག་གསུངས། ། དྲག་ཆར་ལ་ཡང་དེ་ལྟར་བཀའ་བབས་སོ། །
JOB 37:7 བཀོད་པའི་མི་ཡིས་ཁོང་གི་འཕྲིན་ལས་རྟོགས་ཆེད་དུ། ། ཁོང་གིས་མི་ཡི་ལག་པར་ཕྱག་རྒྱ་འདེབས་པར་མཛད། །
JOB 37:8 གཅན་གཟན་རང་གི་ཁུང་ནང་འཛུལ། ། དེ་ཡི་ཚང་ནང་སྡོད་པར་བྱེད། །
JOB 37:9 རླུང་འཚུབ་དེ་ཡི་ཕོ་བྲང་ལས་ནི་འབྱུང་། ། རླུང་དམར་ལས་ནི་གྲང་ངར་ལྡང་བ་ཡིན། །
JOB 37:10 ཁོང་གིས་དབུགས་རིང་ཕྱུང་ནས་དར་ཆགས་ཏེ། ། ཡངས་པའི་ཆུ་བོ་དག་ནི་འཁེང་བར་མཛད། །
JOB 37:11 སྤྲིན་ནག་སྟུག་པོར་བརླན་གཤེར་ཁེངས་པར་མཛད། ། སྤྲིན་པའི་གསེབ་ནས་གློག་དམར་རྒྱང་རིང་གཏོར། །
JOB 37:12 སྤྲིན་ནག་ཁོང་གི་མཛུབ་སྟོན་འོག་ཏུ་གང་སར་འཁྲིགས། ། འཛམ་གླིང་ས་གཞིའི་སྟེང་དུ་ཁོང་གི་བཀའ་ལྟར་བྱེད། །
JOB 37:13 དེ་ནི་ཉེས་ཆད་མཛད་པ་དང་། ། ཡང་ན་ས་གཞིར་གསོ་བ་དང་། ། ཡང་ན་བྱམས་བརྩེས་སྐྱོང་བ་བཅས། ། ཐམས་ཅད་ཁོང་གི་མཛད་པ་ལགས། །
JOB 37:14 ཀྱེ་ཀྱེ་ཨེས་ཡོབ་ཁྱེད་ཀྱིས་འདི་ལ་གསོན། ། ལངས་ནས་དཀོན་མཆོག་ངོ་མཚར་འཕྲིན་ལས་དྲོན། །
JOB 37:15 ཁོང་གིས་འདི་ཚོར་ཅི་ལྟར་བཀའ་བབས་ཤིང་། ། སྤྲིན་ནང་གློག་དམར་འཁྱུགས་མཛད་ཁྱེད་ཤེས་སམ། །
JOB 37:16 སྤྲིན་པ་མཁའ་རུ་ཅི་ལྟར་རྒྱུ་བ་དང་། ། མཁྱེན་རབ་ཡོངས་སུ་རྫོགས་པ་ཁོང་ཉིད་ཀྱི། ། ངོ་མཚར་འཕྲིན་ལས་དེ་དག་རྟོགས་ནུས་སམ། །
JOB 37:17 ལྷོ་རླུང་རྐྱེན་གྱིས་ས་གཞི་ལྷིང་འཇགས་སུ་ལུས་དུས། ། ཁྱེད་ཀྱི་གོས་རྣམས་དྲོན་པོར་འགྱུར་བ་ཤེས་ལགས་སམ། །
JOB 37:18 བླུགས་མའི་མེ་ལོང་བཞིན་དུ་བརྟན་པའི་གནམ། ། ཁྱེད་ཀྱིས་ཁོང་མཉམ་རྐྱོང་བར་བྱེད་ཐུབ་བམ། །
JOB 37:19 ངེད་རྣམས་གླེན་ཞིང་རྨོངས་པས་སྨྲ་བརྗོད་བྱེད་མི་ཤེས། ། དེའི་ཕྱིར་ཁོང་ལ་ཅི་ཞུ་ཁྱེད་ཀྱིས་སྟོན་པར་མཛོད། །
JOB 37:20 སུ་ཡིས་ཁོང་ལ་ང་ཡིས་སྨྲ་འདོད་ཅེས་ཞུ་རུང་། ། སུ་ཡིས་རང་ཉིད་མེད་པར་འགྱུར་འདོད་ཅེས་བརྗོད་དམ། །
JOB 37:21 ད་ལྟ་སྤྲིན་པའི་གསེང་གི་ཉི་འོད་མཐོང་མི་ཕོད། ། རླུང་གི་རྒྱུན་ལ་བརྟེན་ནས་གནམ་ངོ་དྭངས་པར་འགྱུར། །
JOB 37:22 གསེར་གྱི་མདངས་ནི་བྱང་ཕྱོགས་ཡུལ་ནས་འབྱུང་། ། དཀོན་མཆོག་དྲུང་དུ་འཇིགས་རུང་གཟི་བྱིན་ཡོད། །
JOB 37:23 ངེད་ཀྱིས་ཀུན་དབང་ཁོང་ལ་བརྟག་མི་ནུས། ། ཁོང་ནི་མཐུ་སྟོབས་ཆེ་ཞིང་དྲང་བདེན་ཅན། ། ཐུགས་ནི་དྲང་ཞིང་མི་རྣམས་སྡུག་མི་མཛད། །
JOB 37:24 དེའི་ཕྱིར་ཁོང་ལ་གུས་ཤིང་འཇིགས་འོས་ཏེ། ། རང་ཉིད་མཁས་པར་འཛིན་པའི་མི་ལ་ནི། ། ཁོང་གིས་གཏན་ནས་གཟིགས་པར་མི་འགྱུར་རོ། །
JOB 38:1 དུས་དེར་དཀོན་མཆོག་ཡ་ཝཱེ་ཁོང་གིས་རླུང་འཚུབ་ནང། ། ཨེས་ཡོབ་ཁོང་ལ་བཀའ་ལན་གནང་ཞིང་འདི་སྐད་གསུངས། །
JOB 38:2 སུ་ཡིས་ཤེས་རབ་དང་ནི་བྲལ་བའི་གཏམ་གླེང་གིས། ། ང་ཡི་ཐུགས་དགོངས་གསལ་མིན་རྟོགས་དཀའི་གནས་སུ་བསྒྱུར། །
JOB 38:3 ཁྱོད་ཀྱིས་དཔའ་བོ་བཞིན་དུ་སྐ་རགས་ཆིངས་ཤིག་དང་། ། བདག་གིས་ཁྱོད་ལ་འདྲི་དུས་ཁྱོད་ཀྱིས་ལན་ཐོབས་ཤིག །
JOB 38:4 བདག་གིས་ས་གཞིའི་རྨང་གཞི་འགོད་དུས་སུ། ། ཁྱོད་རང་གང་དུ་ཡོད་པ་རྟོགས་ན་ཤོད། །
JOB 38:5 སའི་ཚད་སུས་བླངས་ཁྱོད་ལ་ཆ་ཡོད་དམ། ། ཡང་ན་དེའི་ངོས་སྐྱ་ཐིག་སུ་ཡིས་བརྒྱབ། །
JOB 38:6 ས་ཡི་རྨང་གཞི་གང་གི་སྟེང་དུ་བཙུགས། ། ས་གཞིའི་ཟུར་རྡོ་སུ་ཡིས་བཞག་པ་ཡིན། །
JOB 38:7 དུས་དེར་ཐོ་རངས་སྐར་མས་མཉམ་མགུར་བླངས། ། དཀོན་མཆོག་ཕོ་ཉ་ ཀུན་གྱིས་དགའ་འབོད་བྱས། །
JOB 38:8 མངལ་ལས་ཐོན་བཞིན་རྒྱ་མཚོ་འཕྱུར་བའི་དུས། ། སུ་ཡིས་དེ་རྣམས་སྒོ་ཡིས་བཀག་པ་ཡིན། །
JOB 38:9 བདག་གིས་རྒྱ་མཚོའི་གོས་སུ་སྤྲིན་བྱས་ཤིང་། ། མུན་ནག་དེ་ཉིད་བཏུམ་བྱའི་རས་སུ་བསྒྱུར། །
JOB 38:10 བདག་གིས་དེ་ལ་ས་མཚམས་ཤིག་བཅད་དེ། ། སྒོ་གཏན་དང་ནི་སྒོ་མོ་རྣམས་བཙུགས་ཤིང་། །
JOB 38:11 ཁྱོད་ནི་འདི་རུ་སླེབས་ནས་ཕར་ལ་བརྒལ་མི་རུང་། ། ཆེས་ཆེར་རྒྱས་པའི་རྦ་རླབས་འདི་ནས་མཚམས་ཆོད་སྨྲས། །
JOB 38:12 ཁྱོད་ཀྱིས་ཚེ་ནང་སྐྱ་མདའ་གཏོང་བར་བཀའ་བཀོད་ཅིང་། ། ཞོགས་པའི་སྐྱ་རེངས་ལ་ནི་རང་གནས་རྟོགས་བཅུག་སྟེ། །
JOB 38:13 འོད་དེ་ས་གཞིའི་ཕྱོགས་མཐར་འཕྲོས་ནས་ནི། ། ས་ལས་སྡིག་སྤྱོད་ཅན་རྣམས་བསྐྲད་དམ་ཅི། །
JOB 38:14 ས་ངོས་ཐམ་ཀའི་འོག་གི་འཇིམ་བཞིན་འགྱུར། ། དངོས་པོ་ཐམས་ཅད་གོས་དང་འདྲ་བར་མངོན། །
JOB 38:15 དེ་ལྟར་སྡིག་སྤྱོད་རྣམས་ཀྱི་འོད་མི་སྤྲོ། ། མཐོར་འདེགས་དཔུང་ངར་རྣམས་ཀྱང་གཅོག་པར་མཛད། །
JOB 38:16 རྒྱ་མཚོ་འཕྱུར་བའི་གནས་སུ་ཁྱོད་ཕྱིན་ནམ། ། ཡང་ན་གཏིང་ཟབ་གནས་སུ་བསྐྱོད་མྱོང་ངམ། །
JOB 38:17 འཆི་བའི་སྒོ་རྣམས་ཁྱོད་ལ་མངོན་གྱུར་ཏམ། ། སྨག་རུམ་སྒོ་རྣམས་ཁྱོད་ཀྱིས་མཐོང་མྱོང་ངམ། །
JOB 38:18 རྒྱ་ཆེན་ས་གཞི་ཁྱོད་ཀྱིས་ཚད་ཐུབ་བམ། ། ཁྱོད་ཀྱིས་འདི་ཀུན་ཤེས་ན་ད་ཤོད་ཅིག །
JOB 38:19 འོད་ལྡན་ཁྱིམ་གྱི་ལམ་དེ་གང་ཡིན་ནམ། ། མུན་པ་དེ་ཡི་རང་གནས་གང་དུ་ཡོད། །
JOB 38:20 ཁྱོད་ཀྱིས་དེ་རྣམས་རང་གི་མངའ་ཁོངས་སུ། ། ཁྲིད་དེ་ཁྱིམ་དེར་འགྲོ་བའི་ལམ་ཤེས་སམ། །
JOB 38:21 དུས་དེར་ཁྱོད་རང་སྐྱེས་པས་ཁྱོད་ཀྱིས་ཤེས། ། ཁྱོད་ཀྱིས་མི་ཚེའི་ཉི་མ་མང་པོ་བསྐྱལ། །
JOB 38:22 ཁ་བ་འབྱུང་བའི་གནས་སུ་ཁྱོད་སླེབས་སམ། ། ཡང་ན་སེར་བའི་བང་མཛོད་རྣམས་མཐོང་ངམ། །
JOB 38:23 དེ་རྣམས་བདག་གིས་དཀའ་སྡུག་འབྱུང་དུས་དང་། ། དམག་དང་འཐབ་མོའི་ཕྱིར་དུ་མཛད་པ་ཡིན། །
JOB 38:24 གློག་དམར་ལམ་བུ་གང་ནས་བཀར་བ་དང་། ། ཤར་རླུང་ས་གཞིའི་སྟེང་ལ་ཅི་ལྟར་ཐོར། །
JOB 38:25 སུ་ཡིས་ཆར་ཆུའི་རྒྱུ་ལམ་གཤགས། ། སུ་ཡིས་ཐོག་ལ་བགྲོད་ལམ་ཕྱེས། །
JOB 38:26 མི་མེད་ལུང་སྟོང་ལ་ནི་ཆར་གནང་ཞིང་། ། དབེན་སྟོང་ཡུལ་ལ་ཆར་བ་འབབ་ཏུ་བཅུག །
JOB 38:27 ཐང་རྒོད་ལུས་པའི་ས་ནི་བརླན་གཤེར་རྒྱས། ། རྩྭ་སྔོན་དག་ནི་སྐམ་སར་སྐྱེས་སུ་བཅུག །
JOB 38:28 ཆར་བ་ལ་ནི་ཕ་ཡོད་དམ། ། ཟིལ་བ་སུ་ལས་སྐྱེས་པ་ཡིན། །
JOB 38:29 འཁྱགས་རོམ་གང་གི་མངལ་ལས་བྱུང་བ་ཡིན། ། ནམ་མཁའི་བ་མོ་སུ་ལས་སྐྱེས་པ་ཡིན། །
JOB 38:30 ཆུ་རྣམས་སྲ་ཤིང་རྡོ་ལྟར་གྱུར། ། གཏིང་ཟབ་ངོས་སུ་འཁྱགས་རོམ་ཆགས། །
JOB 38:31 སྨིན་དྲུག་སྐར་མ་ཁྱོད་ཀྱིས་འཆིང་ནུས་སམ། ། དྲང་སྲོང་སྐར་མ་ཁྱོད་ཀྱིས་སྒྲོལ་ནུས་སམ། །
JOB 38:32 ཁྱོད་ཀྱིས་དུས་ལྟར་སྐར་ཁྱིམ་དག་ནི་འདྲེན་ནུས་སམ། ། སྨིན་བདུན་དང་ནི་རྒྱུ་སྐར་གཞན་དག་འཁྲིད་ནུས་སམ། །
JOB 38:33 ནམ་མཁའི་ཆོས་ཉིད་ཁྱོད་ཀྱིས་ཤེས་ལགས་སམ། ། དེ་ཡི་དབང་འོག་ས་གཞི་འཇུག་ཐུབ་བམ། །
JOB 38:34 ཁྱོད་ཀྱིས་ཆུ་འཛིན་སྤྲིན་ཕུང་ཕྱོགས་ལ་སྐད་བརྒྱབ་ནས། ། དྲག་ཆར་ལ་ནི་ཁྱོད་རང་འགེབ་ཏུ་འཇུག་ནུས་སམ། །
JOB 38:35 གློག་དམར་འཁྱུག་ཏུ་ཁྱོད་ཀྱིས་མངག་ནུས་སམ། ། ངེད་འདིར་ཡོད་ཅེས་ཁྱོད་ལ་ཞུ་འོང་ངམ། །
JOB 38:36 སུ་ཡིས་ཤེས་རབ་སེམས་གཏིང་བཞག་པ་དང་། ། མི་ཡི་སེམས་ལ་གོ་རྟོགས་སུ་ཡིས་བསྩལ། །
JOB 38:37 ཤེས་རབ་ཀྱིས་ནི་ཆུ་འཛིན་སུས་བགྲང་ནུས། ། ནམ་མཁའི་ཆུ་རྐྱལ་རྣམས་ཀྱང་སུས་ཕྱོ་ནུས། །
JOB 38:38 དེའི་དུས་ས་རྡུལ་འདུས་ཏེ་གོང་བུར་ཆགས། ། ས་རྡོག་རྣམས་ནི་གཅིག་ལ་གཅིག་འབྲེལ་ལོ། །
JOB 38:39 ཁྱོད་ཀྱིས་མོ་སེང་ཆེད་དུ་རྔོན་རྒྱག་ཅིང་། ། སེང་གེའི་ལྟོ་བ་འགྲང་བར་བྱེད་ནུས་སམ། །
JOB 38:40 དེའི་དུས་དེ་རྣམས་དོང་ནང་འཇབ་པ་དང་། ། གསང་བའི་གནས་སུ་ཡིབ་ནས་སྡོད་པ་ཡིན། །
JOB 38:41 ཕོ་རོག་བྱ་ཕྲུག་ཁ་ཟས་མེད་པས་ན། ། ཐང་ནས་མྱུལ་ཞིང་དཀོན་མཆོག་ཞུ་བའི་དུས། ། སུ་ཡིས་ཕོ་རོག་ཆེད་དུ་ཟས་གནང་ངམ། །
JOB 39:1 ཁྱོད་ཀྱིས་བྲག་གི་གནའ་བའི་བཙའ་དུས་དང་། ། ཤྭ་མོས་ཤ་ཕྲུག་ནམ་སྐྱེ་ཤེས་ལགས་སམ། །
JOB 39:2 དེ་ཚོས་མངལ་ཆགས་ཟླ་ཚེས་བརྩི་ནུས་སམ། ། དེ་ཚོས་ནམ་ཞིག་བཙའ་བ་རྟོགས་ནུས་སམ། །
JOB 39:3 དེ་ཚོས་ལུས་པོ་འཁུམས་ནས་ཕྲུ་གུ་བཙའ། ། དེ་ནས་རང་གི་ཟུག་གཟེར་བསལ་བ་ཡིན། །
JOB 39:4 ཕྲུ་གུ་རིམ་བཞིན་ཤེད་རྒྱས་ཏེ། ། དབེན་སྟོང་གནས་སུ་ནར་སོན་ཞིང་། ། དེ་དག་ཕྱི་རོལ་ཕྱིན་ཙ་ན། ། རང་གི་ཡུལ་དུ་ཕྱིར་མི་ལོག །
JOB 39:5 སུ་ཡིས་རྐྱང་ལ་རང་དབང་སྤྲད། ། རྐྱང་གི་ཐག་པ་སུ་ཡིས་བསྒྲལ། །
JOB 39:6 བདག་གིས་དེ་ཡི་ཁྱིམ་དུ་དབེན་སྟོང་གནང་། ། བ་ཚྭ་ཅན་གྱི་ས་དེའི་སྡོད་གནས་བྱས། །
JOB 39:7 དེ་ཡིས་གྲོང་ཁྱེར་ནང་གི་འདུ་འཛིར་འཕྱས། ། འདེད་མཁན་རྣམས་ཀྱི་སྐད་ལ་མི་མཉན་ཏེ། །
JOB 39:8 རི་རྒྱུད་དག་ནི་རྒྱུ་བའི་རྩྭ་ཐང་ཡིན། ། སྔོ་ལྗང་རིགས་རྣམས་དེ་ཡིས་འཚོལ་བྱེད་དོ། །
JOB 39:9 གླང་རྒོད་ཁྱོད་ལ་ཞབས་ཞུ་བྱེད་སྲིད་དམ། ། ཡང་ན་ཁྱོད་ཀྱི་ཁ་རར་མཚན་བསྐྱལ་ལམ། །
JOB 39:10 གླང་རྒོད་རྨོས་ཤུར་མཐུར་གྱིས་འདོགས་ནུས་སམ། ། དེ་ཡིས་ཁྱོད་རྗེས་ལུང་པར་ཤལ་རྒྱག་གམ། །
JOB 39:11 ཁྱོད་ནི་དེ་སྟོབས་ཆེ་ཕྱིར་དེ་ལ་བརྟེན་འགྱུར་རམ། ། ཡང་ན་རང་གི་ལས་ཀ་དེ་ལ་བཅོལ་བ་ཡིན། །
JOB 39:12 ཁྱོད་ཀྱིས་དེར་བརྟེན་འབྲུ་རིགས་ནང་ལ་འམ། ། ཡང་ན་ཁྱོད་ཀྱི་གཡུལ་ཁར་བསྡུས་པ་ཡིན། །
JOB 39:13 རྔ་བྱའི་གཤོག་ཟུང་དགའ་ནས་བརྡབས་ན་ཡང་། ། བྱ་ཡི་གཤོག་སྒྲོའི་ལྷག་བསམ་ཨེ་ལྡན་ནམ། །
JOB 39:14 ས་ཡིས་རང་གི་སྒོ་ངར་དྲོད་བསྐྱེད་ཕྱིར། ། དེ་ཚོས་སྒོ་ང་ས་ཡི་ནང་དུ་བཞག །
JOB 39:15 ཡིན་ཡང་རྐང་པས་སྒོ་ང་བརྫི་བ་དང་། ། རི་དྭགས་རྣམས་ཀྱིས་རྡོག་བརྫིས་གཏོང་བ་བརྗེད། །
JOB 39:16 བྱ་ཕྲུག་རང་གི་མིན་ལྟར་གདུག་རྩུབ་སྤྱོད། ། དོན་མེད་དཀའ་སྡུག་མྱངས་ཀྱང་འཇིགས་པ་མེད། །
JOB 39:17 དཀོན་མཆོག་དེ་ལ་ཤེས་རབ་མེད་པར་མཛད། ། གོ་རྟོགས་ཀྱང་ནི་དེ་ལ་མ་གནང་ཕྱིར། །
JOB 39:18 ནམ་ཞིག་བྱ་དེས་གཤོག་པ་བརྐྱངས་པའི་དུས། ། རྟ་དང་ཞོན་མཁན་གཉིས་ལ་འཕྱ་བར་འགྱུར། །
JOB 39:19 རྟ་ཡི་ཤ་ཤེད་ཁྱོད་ཀྱིས་གནང་བ་འམ། ། མཇིང་པའི་རྔོག་མ་ཁྱོད་ཀྱིས་གཡོགས་སམ་ཅི། །
JOB 39:20 ཆ་ག་འབུ་ལྟར་མཆོང་དུ་དེ་བཅུག་གམ། ། སྣ་ཤུ་རྒྱག་པའི་རྔམ་སྐད་འཇིགས་སུ་རུང་། །
JOB 39:21 དེ་ཡི་རྨིག་པས་ལུང་པའི་ས་སློག་ཅིང་། ། རང་གི་ནུས་པས་དགའ་སྤྲོའི་མཆོང་ལྡིང་བྱེད། ། དེ་ནས་ཕྱི་རུ་ཕྱིན་ཏེ་དགྲ་བོ་བསུ། །
JOB 39:22 དེ་ཡིས་འཇིགས་པར་འཕྱ་ཞིང་སེམས་མི་འཚབ། ། རལ་གྲིའི་རྐྱེན་གྱིས་ཕྱིར་བསྣུར་མི་བྱེད་དོ། །
JOB 39:23 མདའ་ཁུག་གིས་ནི་དེའི་སྟེང་ཁྲོག་སྒྲ་སྒྲོག ། རྣོན་པོ་མདུང་དང་མདུང་རིང་འོད་ཆེམ་ཆེམ། །
JOB 39:24 ངར་དང་ཁྲོས་རྐྱེན་དེ་ལ་ཐོགས་པ་མེད། ། རྭ་དུང་ཐོས་པ་ཙམ་གྱིས་སྡོད་མི་ཚུགས། །
JOB 39:25 རྭ་དུང་ཐོས་ཚེ་དེ་ཡིས་སྣ་ཤུ་རྒྱག ། རྒྱང་ཐག་རིང་སར་འཐབ་མོའི་དྲི་མ་ཚོར། ། དམག་དཔོན་རྣམས་ཀྱི་འུར་སྒྲའི་ཅ་ཅོ་ཐོས། །
JOB 39:26 བྱ་ཁྲའི་གཤོག་རྩལ་བརྐྱངས་ཏེ་ལྷོ་ཕྱོགས་འཕུར། ། དེ་ནི་ཁྱོད་ཀྱི་ཤེས་རབ་ལས་བྱུང་ངམ། །
JOB 39:27 གླག་གིས་གནམ་འཕང་གཅོད་ཅིང་མཐོ་ས་རུ། ། ཚང་ནི་བཅོས་པ་ཁྱོད་ཀྱི་བཀའ་ལགས་སམ། །
JOB 39:28 དེ་ནི་བྲག་ལ་གནས་ཤིང་བྲག་རྩེ་དང་། ། བརྟན་པོ་ཡུལ་རྣམས་རང་གི་གནས་སུ་བྱ། །
JOB 39:29 ས་ཆ་དེ་ནས་བཟའ་བཏུང་རྣམས་འཚོལ་ཞིང་། ། མིག་གིས་རྒྱང་ཐག་རིང་པོར་བལྟ་བ་ཡིན། །
JOB 39:30 དེ་ཡི་བྱ་ཕྲུག་རྣམས་ཀྱིས་ཁྲག་འཇིབ་ཅིང་། ། བེམ་པོ་ཡོད་སར་དེ་ཡང་ཡོད་པ་ཡིན། །
JOB 40:1 དཀོན་མཆོག་ཡ་ཝཱེས་ཡང་ཨེས་ཡོབ་ལ་བཀའ་ལན་གནང་སྟེ་འདི་སྐད་གསུངས་པ།
JOB 40:2 ཧམ་རྩོད་ཅན་གྱིས་ཀུན་དབང་ཁོང་དང་རྩོད་རུང་ངམ། ། དཀོན་མཆོག་ཁོང་ལ་རྩོད་པའི་མི་ཡིས་ལན་ཐོབས་ཤོག །
JOB 40:3 དེ་ནས་ཨེས་ཡོབ་ཀྱིས་དཀོན་མཆོག་ཡ་ཝཱེ་ལ་ལན་ཞུས་ཏེ་འདི་ལྟར།
JOB 40:4 གཟིགས་དང་བདག་ནི་དམན་པ་སྟེ། ། བདག་གིས་ཁྱེད་ལ་ལན་ཅི་ཞུ། ། བདག་གིས་སྨྲ་སྒོ་ལག་པས་འགེབ། །
JOB 40:5 བདག་གིས་ཐེངས་གཅིག་སྨྲས་པ་ན། ། དེ་ནས་ཡང་བསྐྱར་ལན་མི་འདེབས། ། བདག་གིས་ཐེངས་གཉིས་སྨྲས་པ་ན། ། རྗེས་སུ་ནམ་ཡང་གླེང་མི་བྱ། །
JOB 40:6 དེ་ནས་དཀོན་མཆོག་ཡ་ཝཱེས་རླུང་འཚུབ་ནང་ཨེས་ཡོབ་ལ་བཀའ་ལན་གནང་བ་སྟེ།
JOB 40:7 ཁྱོད་ཀྱིས་དཔའ་བོ་བཞིན་དུ་སྐ་རགས་ཆིངས། ། བདག་གིས་འདྲི་འོང་ཁྱོད་ཀྱིས་ང་ལ་ཤོད། །
JOB 40:8 ཁྱོད་ཀྱིས་བདག་གི་དྲང་གཞག་འདོར་རུང་ངམ། ། ཁྱོད་རང་དྲང་ཕྱིར་བདག་ལ་སྐྱོན་འཛུགས་སམ། །
JOB 40:9 ཁྱོད་ལ་དཀོན་མཆོག་དཔུང་ངར་ལྡན་ནམ་ཅི། ། ཁོང་འདྲར་ཁྱོད་ཀྱིས་འབྲུག་སྐད་ལྡིར་ནུས་སམ། །
JOB 40:10 གཟི་བརྗིད་བཀྲག་མདངས་ཀྱིས་ནི་རང་ཉིད་སྤྲོས། ། བཀུར་སྟི་གཟི་བྱིན་གོས་ལྟར་གཡོག་པར་གྱིས། །
JOB 40:11 རང་གི་ཁྲོ་གཏུམ་མ་འགོག་ཡོངས་སུ་བླུགས། ། ང་རྒྱལ་ཅན་ནི་དམན་སར་འབེབ་པར་གྱིས། །
JOB 40:12 ང་རྒྱལ་ཅན་ནི་ཁྱོད་ཀྱིས་འདུལ་བ་དང་། ། ངན་པ་རང་གི་གནས་སུ་རྡོག་པས་རྫིས། །
JOB 40:13 ཁྱོད་ཀྱིས་དེ་རྣམས་ལྷན་ཅིག་རྡུལ་ནང་སྦོས། ། དེ་ཚོའི་གདོང་ནི་གསང་བའི་གནས་སུ་ཆུག །
JOB 40:14 དེ་ནས་བདག་གིས་ཁྱོད་ཀྱི་གཡས་ལག་གིས། ། ཁྱོད་རང་སྐྱོབ་པར་ནུས་པས་བསྔགས་པར་བྱ། །
JOB 40:15 བདག་གིས་རྦག་རྨད་བཞིན་དུ་ཁྱོད་ཀྱང་བཀོད། ། ལྟོས་དང་དེ་ཡིས་གླང་ལྟར་རྩྭ་ཟ་སྟེ། །
JOB 40:16 ལྟོས་དང་དེ་ཡི་སྟོབས་ནི་རྐེད་པར་ཡོད། ། གྲོད་པའི་ལྟེ་བར་དེ་ཡི་ཤ་ཤེད་རྒྱས། །
JOB 40:17 དེ་ཡི་རྔ་མ་ཐང་ཤིང་བཞིན་དུ་དྲང་། ། དེ་ཡི་བརླ་རྩ་གཅིག་དང་གཅིག་སྦྲེལ་འདུག །
JOB 40:18 རུས་པ་རྣམས་ཀྱང་ལི་ཡི་སྦུ་གུ་བཞིན། ། དེ་ཡི་ཡན་ལག་ལྕགས་ཀྱི་དབྱུག་པ་འདྲ། །
JOB 40:19 དེ་ནི་དཀོན་མཆོག་ཁོང་གི་བཀོད་པ་ཡི། ། འཕྲིན་ལས་རྣམས་ཀྱི་ཐོག་མ་ཡིན་པ་དང་། ། དེ་ཉིད་འགོད་མཁན་ཁོང་ཉིད་གཅིག་པུ་ཡིས། ། རལ་གྲི་དེའི་སྟེང་འབབ་པར་མཛད་ནུས་སོ། །
JOB 40:20 རི་རྒྱུད་རྣམས་ཀྱིས་དེའི་དོན་ཟས་རིགས་སྐྱེད། ། རི་དྭགས་སྣ་ཚོགས་གནས་དེར་རྩེད་འཇོར་རོལ། །
JOB 40:21 དེ་ནི་པད་མའི་འདབ་མ་འོག་ཏུ་ཉལ། ། འདམ་རྩྭའི་གསེབ་དང་ན་ཁུག་རྣམས་སུ་སྦས། །
JOB 40:22 པད་འདབ་གྲིབ་བསིལ་གྱིས་ནི་དེ་སྒྲིབ་ཅིང་། ། གྲོག་མོའི་ལྕང་ཤིང་དག་གིས་མཐའ་ནས་སྐོར། །
JOB 40:23 གཙང་པོ་འཕེལ་ཡང་དེ་ནི་སེམས་མི་འཚབ། ། ཡོར་དན་གཙང་པོ་དེ་ཡི་ཁར་འཕེལ་ཡང་། ། དེ་ནི་འཚེར་སྣང་མེད་ཅིང་བདེ་བར་གནས། །
JOB 40:24 སུ་ཡིས་དེ་ཡི་མིག་མདུན་དེ་འཛིན་ཐུབ། ། སུ་ཡིས་རྙི་རྒྱས་དེ་ཡི་སྣ་དབུག་ནུས། །
JOB 41:1 ཁྱོད་ཀྱིས་ལྕགས་ཀྱུས་ཆུ་སྲིན་འཐེན་ནུས་སམ། ། ཐག་པས་དེ་ཡི་ལྕེ་ནི་གནན་ནུས་སམ། །
JOB 41:2 དེ་ཡི་སྣ་ལ་ཐ་གུ་བརྒྱུ་ནུས་སམ། ། དེ་ཡི་འགྲམ་རུས་ལྕགས་ཀྱུས་དབུག་ནུས་སམ། །
JOB 41:3 དེ་ཡིས་ཁྱོད་ལ་ཡང་ཡང་ཞུ་འགྱུར་རམ། ། ཡང་ན་ཁྱོད་ལ་འཇམ་པོའི་ཚིག་སྨྲ་འམ། །
JOB 41:4 ཁྱོད་ཀྱིས་དེ་ནི་ཚེ་གཡོག་བྱེད་ཆེད་དུ། ། དེ་ཡིས་ཁྱོད་ལ་ཁ་ཆད་འཇོག་འགྱུར་རམ། །
JOB 41:5 དེ་ནི་བྱེའུ་ཆུང་བཞིན་དུ་རྩེ་འོང་ངམ། ། ཡང་ན་བུ་མོའི་ཕྱིར་དུ་འདོགས་ནུས་སམ། །
JOB 41:6 ཉ་པ་རྣམས་ཀྱིས་མཉམ་འབྲེལ་བྱས་གྱུར་ནས། ། ཚོང་རྫས་བཞིན་དུ་དེ་ནི་བཙོང་ནུས་སམ། ། ཁོ་ཚོས་དེ་ནི་ཚོང་པར་བགོ་ནུས་སམ། །
JOB 41:7 ཁྱོད་ཀྱིས་ཉ་མདུང་དེ་ཡི་པགས་པར་འཛུགས་པ་དང་། ། དེ་ཡི་མགོ་ལ་ཉ་ཚེབ་བཙུགས་ནས་བཀང་ནུས་སམ། །
JOB 41:8 ཁྱོད་ཀྱིས་དེའི་སྟེང་ལག་པ་བཞག་ན་ནི། ། དེ་དང་འཐབ་པ་ཡིད་ལ་དྲན་གྱུར་ནས། ། སླར་ཡང་དེ་བཞིན་བྱེད་པར་མི་འགྱུར་རོ། །
JOB 41:9 དེ་ཉིད་འདུལ་བར་འདོད་པ་དོན་མེད་ཡིན། ། སུས་དེ་མཐོང་བ་ཙམ་གྱིས་དཔའ་མི་ཞུམ། །
JOB 41:10 དེ་དཀྲོག་སྤོབས་པའི་ངར་ཅན་གང་ཡང་མེད། ། དེ་བཞིན་བདག་དྲུང་སུ་ཞིག་འགྲེང་ནུས་སམ། །
JOB 41:11 གནམ་འོག་ཡོད་ཚད་ང་ཡི་ཡིན་པས་ན། ། བདག་གིས་མི་ལ་སྐྱིན་ཚབ་སྤྲོད་པའི་ཕྱིར། ། སྔོན་དུ་བདག་ལ་ཕུལ་བ་སུ་ཡོད་དམ། །
JOB 41:12 དེ་ཡི་ཡན་ལག་དང་ནི་སྟོབས། ། ཡིད་དུ་འོང་བའི་རུས་ཚུགས་བཅས། ། བདག་གིས་མི་གླེང་ག་མེད་བྱུང་། །
JOB 41:13 དེ་ཡི་ཕྱི་གོས་སུ་ཡིས་བཤུ་ནུས་ཤིང་། ། དེ་ཡི་གོ་ཁྲབ་བར་ལ་སུ་འཛུལ་ནུས། །
JOB 41:14 སུ་ཡིས་དེ་ཡི་འགྲམ་རུས་འབྱེད་ནུས་སམ། ། དེ་ཡི་སོ་ཡི་མཐའ་འཁོར་འཇིགས་སུ་རུང་། །
JOB 41:15 དེ་ཡི་རྐེད་པར་ཉ་ཁྲབ་བསྒྲིགས་ཡོད་དེ། ། དེ་ནི་དམ་པོར་བཙུམས་ནས་བསྡམས་པ་འདྲ། །
JOB 41:16 ཉ་ཁྲབ་དེ་དག་གཅིག་ལ་གཅིག་སྦྲེལ་ཞིང་། ། དེ་ཡི་ནང་དུ་རླུང་ཡང་རྒྱུ་མི་ནུས། །
JOB 41:17 དེ་དག་ཕན་ཚུན་གཅིག་ལ་གཅིག་སྦྲེལ་ཞིང་། ། ཕན་ཚུན་འབྱར་ནས་སོ་སོར་འབྲལ་མ་ནུས། །
JOB 41:18 སྦྲིད་དུས་དེ་ཡིས་འོད་ཟེར་སྤྲོ་བ་དང་། ། དེ་ཡི་མིག་ཟུང་ཞོགས་པའི་སྐྱ་འོད་འདྲ། །
JOB 41:19 དེ་ཡི་ཁ་ནས་འབར་བའི་དཔལ་འབར་ཐོན། ། མེ་སྟག་རྣམས་ནི་དེ་ནས་རྒྱང་རིང་འཕུར། །
JOB 41:20 ཁོལ་བའི་སླ་ང་འབར་བའི་འདམ་རྩྭ་བཞིན། ། དེ་ཡི་སྣ་ཁུང་ལས་ནི་དུ་བ་འཕྱུར། །
JOB 41:21 དེ་ཡི་དབུགས་ཀྱིས་སོལ་བ་མེ་ལ་སྦར། ། དེ་ཡི་ཁ་ནས་མེ་ལྕེ་ལྷབ་ལྷབ་ཐོན། །
JOB 41:22 དེ་ཡི་མཇིང་པའི་ནང་དུ་སྟོབས་གནས་ཤིང་། ། དེ་ཡི་མདུན་དུ་འཇིགས་པས་གར་ལྡིང་ངོ་། །
JOB 41:23 དེ་ཡི་ཤ་རྡོག་རྣམས་ནི་དམ་པོར་སྦྲེལ། ། དེ་རྣམས་དེའི་ཐོག་འབྱར་བས་བསྒུལ་མི་ནུས། །
JOB 41:24 དེ་ཡི་སྙིང་ནི་རྡོ་ལྟར་སྲ་ཞིང་བརྟན། ། རང་འཐག་འོག་རྡོ་བཞིན་དུ་སྲ་བ་ཡིན། །
JOB 41:25 དེ་ཡར་བཞེངས་དུས་དཔའ་རྒོལ་རྣམས་ཀྱང་སྐྲག ། ཧ་ཅང་འཇིགས་པའི་དབང་གིས་དྲན་པ་ཤོར། །
JOB 41:26 མི་ཡིས་རལ་གྲིས་དེ་ལ་འཛུགས་པ་དང་། ། ཡང་ན་མདུང་དང་མདུང་ཐུང་གིས་བཙུགས་ཏེ། ། རྣོན་པོ་མདུང་གིས་གཙགས་ཀྱང་ཕན་མི་ཐོགས། །
JOB 41:27 ལྕགས་ནི་དེ་ལ་མཚོན་ན་རྩྭ་སྐྱ་དང་། ། ལི་ནི་དེ་ལ་མཚོན་ན་ཤིང་རུལ་འདྲ། །
JOB 41:28 མདའ་མོས་དེ་ནི་འབྲོ་རུ་འཇུག་མི་ནུས། ། འུར་རྡོ་དེ་ལ་མཚོན་ན་ཕུབ་མ་བཞིན། །
JOB 41:29 དེ་ཡི་མིག་ནང་དབྱུག་པ་སོག་མ་ལྟར། ། མདུང་ཐུང་འཕེན་པའི་སྒྲ་ལ་དེ་ཡིས་འཕྱ། །
JOB 41:30 དེ་ཡི་ལྟོ་འོག་རྫ་ལེབ་རྣོན་པོ་འདྲ། ། དེ་ནི་སོ་ཤལ་འདམ་ནང་དྲུད་པ་བཞིན། །
JOB 41:31 དེ་ཡིས་མཚོ་གཏིང་སླ་ང་ལྟར་དུ་ཁོལ་བར་བཅུག ། རྒྱ་མཚོ་སླ་ང་ནང་གི་འབྱུག་སྣུམ་ལྟ་བུར་བྱས། །
JOB 41:32 དེ་ཡིས་ཕྱིན་པའི་ལམ་ལ་འོད་ཟེར་འཕྲོ་བཅུག་ཅིང་། ། མཚོ་གཏིང་སྐྲ་དཀར་ལྟ་བུ་ཡིན་པའི་སྣང་བ་སྦྱིན། །
JOB 41:33 བཀོད་པའི་ནང་དུ་འཇིགས་མེད་དེ་འདྲ་བ། ། ས་གཞིའི་སྟེང་དུ་མཚུངས་ཟླ་གང་ཡང་མེད། །
JOB 41:34 ཁེངས་དྲེགས་ཅན་ལ་དེ་ཡིས་སྨད་པ་དང་། ། སྲོག་ཆགས་ང་རྒྱལ་ཅན་གྱི་རྒྱལ་པོ་ལགས། །
JOB 42:1 དེ་ནས་ཨེས་ཡོབ་ཀྱིས་དཀོན་མཆོག་ཡ་ཝཱེ་ལ་ཞུ་ལན་འདི་ལྟར་ཕུལ་བ་སྟེ།
JOB 42:2 ཁྱེད་ཀྱིས་ཐམས་ཅད་མཛད་ནུས་བདག་གིས་ཤེས། ། ཁྱེད་ཀྱི་དགོངས་པ་གང་ཡང་ཟློག་མི་སྲིད། །
JOB 42:3 སུ་ཡིས་རྨོངས་པའི་ཚིག་གིས་ཁྱེད་ཀྱི་དགོངས་པ་སྦས། ། དེ་བས་བདག་གིས་ཅི་བཤད་རང་གིས་མི་རྟོགས་ཏེ། ། དོན་འདི་ངོ་མཚར་ཆེ་བས་བདག་གིས་རྟོགས་མ་ནུས། །
JOB 42:4 བདག་གིས་ཞུ་བར་བྱ་སྟེ་ཁྱེད་ཀྱིས་གསན་པར་མཛོད། ། བདག་གིས་ཞུ་དུས་ཁྱེད་ཀྱིས་བཀའ་ལན་གནང་བར་མཛོད། །
JOB 42:5 སྔོན་ཆད་བདག་གིས་ཁྱེད་ཉིད་བཞུགས་པ་ཐོས། ། ད་ལྟ་མིག་གིས་ཁྱེད་ཉིད་དངོས་སུ་མཇལ། །
JOB 42:6 དེ་བས་བདག་གིས་རང་ལ་སྨད་ནས་ནི། ། རྡུལ་དང་ཐལ་བའི་ནང་དུ་འགྱོད་བཤགས་བྱེད། །
JOB 42:7 དཀོན་མཆོག་ཡ་ཝཱེས་ཨེས་ཡོབ་ལ་གསུང་གནང་རྗེས་དེ་མན་པ་ཨེ་ལི་ཕཱ་སི་ལ་འདི་སྐད་གསུངས་པ་སྟེ། ཁྱོད་དང་ཁྱོད་ཀྱི་གྲོགས་པོ་གཉིས་ཀྱིས་བདག་གི་སྐོར་གླེང་པ་ནི་ངའི་ཞབས་ཕྱི་ཨེས་ཡོབ་ལྟར་དྲང་བདེན་མ་ཡིན་པས་བདག་ཁྱོད་རྣམས་ལ་ཁྲོས་པ་ཡིན།
JOB 42:8 ད་ལྟ་ཁྱོད་ཚོས་རང་གི་ཕྱིར་དུ་བ་གླང་བདུན་དང་ལུག་ཐུག་བདུན་གྲ་སྒྲིག་བྱས་ཏེ། བདག་གི་ཞབས་ཕྱི་ཨེས་ཡོབ་ཀྱི་དྲུང་དུ་སོང་ནས་རང་ཉིད་ཀྱི་ཆེད་དུ་སྦྱིན་སྲེག་འབུལ་དགོས་ཏེ། དེ་ནས་བདག་གི་ཞབས་ཕྱི་ཨེས་ཡོབ་ཀྱིས་ཁྱོད་ཅག་གི་ཆེད་དུ་སྨོན་ལམ་ཞུ་ངེས་ཤིང་བདག་གིས་སྨོན་ལམ་དེར་མཉན་ནས་ཁྱོད་ཚོའི་རྨོངས་སྤྱོད་བཞིན་དུ་ཁྱོད་ཚོར་ཉེས་ཆད་མི་གཅོད་དེ། ཁྱོད་ཚོས་བདག་གི་སྐོར་གླེང་པ་ནི་བདག་གི་ཞབས་ཕྱི་ཨེས་ཡོབ་ལྟར་དྲང་བདེན་མ་ཡིན་ཞེས་པའོ། །
JOB 42:9 དེ་ནས་དེ་མན་པ་ཨེ་ལི་ཕཱ་སི་དང་། ཤུ་ཧེ་པ་པེལ་དེལ། ན་ཨ་མད་པ་ཚའོ་ཕར་བཅས་གསུམ་པོ་སོང་ནས་དཀོན་མཆོག་ཡ་ཝཱེས་བཀའ་གནང་བ་བཞིན་དུ་བྱས་པས། དཀོན་མཆོག་ཡ་ཝཱེས་ཀྱང་ཨེས་ཡོབ་ལ་གཟིགས་སྐྱོང་གནང་བའོ། །
JOB 42:10 ཨེས་ཡོབ་ཀྱིས་རང་གི་མཆེད་གྲོགས་རྣམས་ཀྱི་དོན་དུ་གསོལ་བ་བཏབ་པ་ལ། དཀོན་མཆོག་ཡ་ཝཱེས་ཨེས་ཡོབ་སྡུག་བསྔལ་ཀུན་ལས་བསྐྱབས་ ཤིང་ཁོང་ལ་སྔར་བདོག་པ་ལས་ཀྱང་ལྡབ་འགྱུར་གྱིས་གནང་བ་དང་།
JOB 42:11 ཨེས་ཡོབ་ཀྱི་མིང་སྲིང་དང་སྔར་ངོ་ཤེས་པའི་མི་ཐམས་ཅད་ཁོང་ཡོད་སར་འོངས་ནས་དེའི་ཁྱིམ་དུ་དེ་དང་ལྷན་ཅིག་ཁ་ཟས་སྤྱད། ཡང་དཀོན་མཆོག་ཡ་ཝཱེས་ཁོང་གི་སྟེང་དུ་དྲངས་པའི་རྐྱེན་ངན་ཐམས་ཅད་གླེང་ནས། ཀུན་པོ་སེམས་སྡུག་སྟེ་ཁོང་ལ་སེམས་གསོ་གནང་བ་དང་། མི་རེ་རེས་ཁོང་ལ་དངུལ་དུམ་བུ་ཞིག་དང་གསེར་གྱི་ཨ་ལུང་རེ་སྤྲད།
JOB 42:12 དེ་ལྟར་དཀོན་མཆོག་ཡ་ཝཱེས་ཨེས་ཡོབ་ལ་སྔར་ལས་ལྷག་པར་བྱིན་གྱིས་བརླབས་པས། ཁོང་ལ་ར་ལུག་ཆིག་ཁྲི་བཞི་སྟོང་དང་། རྔ་མོང་དྲུག་སྟོང་དང་། བ་གླང་དོར་ཆིག་སྟོང་དང་། བོང་མོ་ཆིག་སྟོང་བཅས་ཡོད་པར་གྱུར།
JOB 42:13 ཡང་ཁོང་ལ་བུ་བདུན་དང་བུ་མོ་གསུམ་སྐྱེས་ཏེ།
JOB 42:14 ཁོང་གིས་བུ་མོ་སྐྱེས་འགོ་ཡི་མིང་ལ་ཡེ་མི་མཱ་ཞེས་དང་། བུ་མོ་འབྲིང་བའི་མིང་ལ་ཀི་ཟི་ཨ་ཞེས་དང་། བུ་མོ་ཆུང་བའི་མིང་ལ་ཀེ་རེན་ཧ་ཕུད་ཅེས་བཏགས་སོ། །
JOB 42:15 ཡུལ་དེའི་གནས་ཀུན་ཏུ་ཨེས་ཡོབ་ཀྱི་སྲས་མོ་གསུམ་པོ་དང་འདྲ་བའི་བྱད་གཟུགས་མཛེས་པའི་བུད་མེད་གང་ཡང་མེད་ལ། དེ་རྣམས་ཀྱི་ཕ་ཡིས་དེ་དག་གི་མིང་པོ་རྣམས་ཀྱི་ཁྲོད་དུ་དེ་ཚོར་ནོར་སྐལ་གནང་།
JOB 42:16 དེའི་རྗེས་སུ་ཨེས་ཡོབ་ཡང་ལོ་བརྒྱ་དང་བཞི་བཅུར་བསྡད་དེ། རང་གི་བུ་རབས་བཞི་ཡི་བུ་རབས་ཚ་རྒྱུད་རྣམས་མཐོང་བར་གྱུར།
JOB 42:17 དེ་བཞིན་ཨེས་ཡོབ་རྒས་ནས་ཚེ་ལོ་མཐར་ཕྱིན་ཏེ་ཚེ་ལས་འདས་སོ།། །།
PSA 1:1 སྡིག་སྤྱོད་མི་ཡི་ཇུས་བཞིན་མི་འགྲུལ༌ཞིང༌། །སྡིག་ཅན་དག་གི་ལམ་ནང་མི་འགྲེང༌བར། །འཕྱ་མཁན་གྲལ་དུ་མི་འདུག་པ་ནི༌བདེ།།
PSA 1:2 ཡ་ཝཱེའི་བཀའ་ཁྲིམས་ལ་ནི་ཡི་རང༌ཞིང༌། །ཉིན་མཚན་ཀུན་ཏུ་བཀའ་ཁྲིམས་སྒོམ་མཁན༌ནི།།
PSA 1:3 ཆུ་རྒྱུན་འགྲམ་དུ་བཙུགས་པའི་ལྗོན་ཤིང༌བཞིན། །དུས་དང་མཐུན་པར་འབྲས་བུ་བསྐྱེད་བྱེད༌ཅིང༌། །ལོ་མ་དག་ཀྱང་ནམ་ཡང་མི་རྙིད༌ལ། །མི་དེས་ཅི་བྱེད་དོན་ཀུན་འགྲུབ་པར༌འགྱུར།།
PSA 1:4 འོན་ཀྱང་སྡིག་སྤྱོད་མི་ནི་ཆ་མི༌མཚུངས། །དེ་ནི་རླུང་གིས་ཁྱེར་བའི་ཕུབ་མ༌འདྲ།།
PSA 1:5 ཁྲིམས་ཐག་གཅོད་དུས་སྡིག་སྤྱོད་ཚུགས་མི༌ཐུབ། །དྲང་པོའི་ཚོགས་ནང་སྡིག་ཅན་དེ་བཞིན༌ཡིན།།
PSA 1:6 ཡ་ཝཱེས་དྲང་པོ་རྣམས་ཀྱི་ལམ་གཟིགས༌ཤིང༌། །སྡིག་སྤྱོད་དག་གི་ལམ་ནི་འཇིག་པར༌འགྱུར།།
PSA 2:1 ཕྱི་ཕྱོགས་པ་རྣམས་ཁོང་ཁྲོ་ཅི་ལ༌ལངས། །མི་རྣམས་དོན་མེད་ཇུས་ངན་ཅི་ལ༌བཤམས།།
PSA 2:2 ཡ་ཝཱེ་དང་ནི་ཁོང་གིས་བྱུགས་པ༌ལ། །ས་གཞིའི་རྒྱལ་པོ་རྣམས་ནི་རྒོལ་བར༌བྱེད། །བློན་ཆེན་རྣམས་ནི་འདུས་ནས་གྲོས་འདེབས༌ཤིང༌།།
PSA 2:3 ཤོག་དང་ང་ཚོས་ཁོང་གི་འཆིང་ཐག༌གཅོད། །ཁོང་གི་ཐག་པ་རྣམས་ནི་གཡུག་ཅེས༌ཟེར།།
PSA 2:4 ནམ་མཁར་བཞུགས་པ་ཁོང་ཉིད་བཞད་པར༌འགྱུར། །གཙོ་བོས་མི་བུ་དེ་རྣམས་སྨད་པར༌མཛད།།
PSA 2:5 དེའི་དུས་ཁྲོས་ཤིང་ཁོ་ཚོར་གསུང་གླེང༌མཛད། །ཁྲོ་གཏུམ་དང་བཅས་ཁོ་རྣམས་དངངས་པར་བྱ།།
PSA 2:6 བདག་གི་རི་བོ་དམ་པ་ཛ་ཡན༌སྟེང༌། །བདག་གིས་རང་གི་རྒྱལ་པོ་བསྐོས་ ཞེས༌གསུངས།།
PSA 2:7 བཀའ་བསྩལ་དེ་ནི་ང་ཡིས་སྒྲོག་པར༌བྱ། །ཡ་ཝཱེས་ང་ལ་འདི་སྐད་གསུངས་པ༌སྟེ། །ཁྱོད་ནི་ངའི་སྲས་དེ་རིང་བདག་ལ་འཁྲུངས།།
PSA 2:8 བདག་ལ་ཞུས་དང་བདག་གིས་མི་རིགས༌རྣམས། །ཁྱོད་ཀྱི་ནོར་སྐལ་དུ་ནི་ངས་གནང༌ཞིང༌། །ས་གཞི་ཡོངས་སུ་ཁྱོད་ལ་དབང་བར༌མཛད།།
PSA 2:9 ལྕགས་ཀྱི་དབྱུག་པས་ཁྱོད་ཀྱིས་དེ་རྣམས༌གཅག །རྫ་ཆས་ནང་བཞིན་དེ་རྣམས་དུམ་བུར༌གཅག།
PSA 2:10 དེའི་ཕྱིར་རྒྱལ་པོ་ཁྱེད་རྣམས་མཁས་པར༌མཛོད། །ས་གཞིའི་ཁྲིམས་དཔོན་ཁྱེད་ཚོས་གདམས་ངག༌ལོངས།།
PSA 2:11 ཡ་ཝཱེར་གུས་ཤིང་འཇིགས་པས་ཞབས་ཕྱི༌སྒྲུབས། །སྐྲག་འདར་དང་བཅས་དགའ་མགུ་རངས་པར༌གྱིས།།
PSA 2:12 སྲས་ཀྱི་ཐུགས་ཁྲོ་མྱུར་དུ་འབར་འོང༌ཞིང༌། །ཁྱོད་རྣམས་ལམ་ཁར་མེད་པར་མི་མཛད༌ཕྱིར། །ཁྱོད་ཚོས་ཁོང་གི་ཞབས་ལ་མཆུ་སྒྲོས༌གློན། །ཁོང་ལ་སྐྱབས་སུ་འགྲོ་བ་ཀུན༌ནི་བདེ།།
PSA 3:1 ༼དཱ་བིད་ཀྱིས་རང་གི་སྲས་ཨབ་ཤཱ་ལོམ་ལས་བྲོས་བྱོལ་བྱེད་དུས་བཀོད་པའི་མགུར༌མ།༽ ཀྱེ་ཀྱེ་ཡ་ཝཱེ་ངའི་དགྲ་ག་ཙམ༌འཕེལ། །ང་ལ་རྒོལ་མཁན་ཅི་འདྲ་མང་བ༌ཨང༌།།
PSA 3:2 དཀོན་མཆོག་ཕྱོགས་ནས་ཁོ་ལ་སྐྱབས་མི༌འབྱུང༌། །དེ་ལྟར་ངའི་སྲོག་སྐོར་ལ་མང་པོས༌སྨྲ།། ༼ སེ༌ལཱ། ༽
PSA 3:3 ཡ་ཝཱེ་ཁྱེད་ནི་ང་ཡི་ཕྱོགས་བཞིའི༌ཕུབ། །ང་ཡི་དཔལ་དང་མགོ་བོ་འདེགས་མཁན༌ལགས།།
PSA 3:4 སྐད་གསང་མཐོན་པོས་ཡ་ཝཱེ་ཞེས་འབོད༌དུས། །ཁོང་གིས་དམ་པའི་རི་ནས་བཀའ་ལན༌གནང༌།། ༼ སེ༌ལཱ། ༽
PSA 3:5 ང་རང་ཉལ་ཞིང་གཉིད་དུ་ཡུར་བ༌དང༌། །ང་རང་གཉིད་ལས་སད་པ་འདི་ཐམས༌ཅད། །ཡ་ཝཱེས་ང་ལ་གཟིགས་སྐྱོང་གནང་བས༌ཡིན།།
PSA 3:6 བདག་གི་མཐའ་ནས་བསྐོར་ཅིང་རྒོལ་བ༌ཡི། །སྐྱེས་པ་ཁྲི་འབུམ་དེ་ལ་ང་མི༌འཇིགས།།
PSA 3:7 ཀྱེ་ཀྱེ་ཡ་ཝཱེ་ཡར་ལ་བཞེང་བར་མཛོད། །ང་ཡི་དཀོན་མཆོག་ང་རང་སྐྱོབ་པར༌མཁྱེན། །ཁྱེད་ཀྱིས་ང་ཡི་དགྲ་བོར་འགྲམ་ལྕག༌གཞུས། །མི་ངན་དག་གི་སོ་རྣམས་དུམ་བུར༌བཅག།
PSA 3:8 ཡ་ཝཱེ་ཁོང་ནས་ཐར་པ་འབྱུང་བ༌དང༌། །ཁྱེད་ཀྱི་འབངས་མི་ལ་ནི་བྱིན་རླབས༌མཛོད།། ༼ སེ༌ལཱ། ༽
PSA 4:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར་སྒྲ་སྙན་སྤེལ༌མ།༽ ང་རང་རྣམ་དག་མཛད་པའི་དཀོན་མཆོག༌ལགས། །ང་ཡིས་འབོད་དུས་བཀའ་ལན་གནང་བར༌མཛོད། །དཀའ་སྡུག་དུས་སུ་ང་རང་སྐྱོབ་མཁན༌ཁྱེད། །ཐུགས་རྗེས་གཟིགས་ཤིང་སྨོན་ལམ་གསན་རོགས༌གནོངས།།
PSA 4:2 ཀྱེ་ཀྱེ་ཁྱོད་ཚོས་ང་ཡི་བརྗིད་ཉམས༌ནི། །ངོ་ཚར་བསྒྱུར་ནས་ནམ་དུས་བར་དུ༌ལུས། །ཁྱོད་ཚོ་འཁྲུལ་སྣང་ཙམ་ལ་ཆགས་པ༌དང༌། །རྫུན་གཏམ་བཙལ་ནས་ནམ་དུས་བར་དུ༌ལུས།། ༼ སེ༌ལཱ། ༽
PSA 4:3 ཡ་ཝཱེས་དད་གུས་ཅན་ནི་ཁོང་ཉིད༌ཕྱིར། །ལོགས་སུ་བཀར་བ་ཁྱོད་ཚོས་རྟོགས་པར༌གྱིས། །བདག་གིས་འབོད་དུས་ཡ་ཝཱེས་གསན་པར༌འགྱུར།།
PSA 4:4 ཁོང་ཁྲོ་འབར་ཡང་སྡིག་པ་མ་བྱེད༌ཅིག ། མལ་ཁྲིར་མནོ་བསམ་བཏང་སྟེ་ཁ་རོག༌སྡོད།། ༼ སེ༌ལཱ། ༽
PSA 4:5 དྲང་བདེན་མཆོད་པ་འབུལ་བར་རིགས་པ༌དང༌། །ཡ་ཝཱེ་ལ་ནི་ཁྱོད་ཀྱིས་བློ་གཏོད༌དགོས།།
PSA 4:6 བདག་ཅག་ལ་ནི་ཕན་པ་འཐོབ་པའི༌ཕྱིར། །སུ་ཡིས་བཀའ་སློབ་མཛད་འོང་མང་པོས༌འདྲི། །ཡ་ཝཱེ་ཁྱེད་ཀྱི་ཞལ་རས་ཡར་བཏེགས༌ནས། །ངེད་ཅག་སྟེང་དུ་འོད་ཟེར་སྤྲོ་བར༌མཛོད།།
PSA 4:7 འབྲུ་དང་རྒུན་ཆང་མོད་པའི་མི་ལས༌ཀྱང༌། །ལྷག་པའི་དགའ་སྤྲོ་ཁྱེད་ཀྱིས་ང་ལ༌བསྩལ།།
PSA 4:8 ང་ནི་ཡ་ཝཱེ་ཁྱེད་ཉིད་འབའ་ཞིག༌གིས། །བདེ་བར་བཀོད་པས་ཉལ་ཞིང་གཉིད་སྐྱིད༌ཁུག།
PSA 5:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར་གླིང་བུ་སྤེལ༌མ།༽ ཡ་ཝཱེ་ང་ཡི་གཏམ་རྣམས་སྙན་དུ༌ཟུངས། །ང་ཡིས་ཤུགས་རིང་འབྱིན་པར་ཐུགས་བསམ༌བཞེས།།
PSA 5:2 བདག་གི་རྒྱལ་པོ་བདག་གི་དཀོན་མཆོག༌ལགས། །ང་ཡིས་ཁྱེད་ལ་གསོལ་བ་འདེབས་པས༌ན། །ང་ཡི་འོ་དོད་ལ་ནི་གསན་དུ༌གསོལ།།
PSA 5:3 ཀྱེ་ཀྱེ་ཡ་ཝཱེ་ཁྱེད་ཀྱིས་ནངས་སྔ༌མོར། །ང་ཡི་སྐད་ནི་གསན་འོང་ཞོགས་པའི༌དུས། །བདག་གིས་ཁྱེད་ལ་ཞུ་ཞིང་སྒུག་པར༌བྱ།།
PSA 5:4 ངན་པར་དགྱེས་པའི་དཀོན་མཆོག་ཁྱེད་མིན༌པས། །ངན་པ་ཁྱེད་དང་མཉམ་དུ་སྡོད་མི༌ཚུགས།།
PSA 5:5 ང་རྒྱལ་ཅན་རྣམས་ཁྱེད་དྲུང་ཚུགས་མི༌ནུས། །སྡིག་སྤྱོད་ཅན་ལ་ཁྱེད་རང་སྡང་བ༌ཡིན།།
PSA 5:6 ཁྱེད་ཀྱིས་རྫུན་གཏམ་སྨྲ་མཁན་ཚར་གཅོད༌ཅིང༌། །ལག་དམར་དང་ནི་གཡོ་སྒྱུ་ཅན་རྣམས༌ལ། །ཡ་ཝཱེའི་ཐུགས་ནས་ཞེན་པ་ལོག་པ༌འོ།།
PSA 5:7 ཁྱེད་ཀྱི་བྱམས་བརྩེ་ཆེན་པོར་བདག་བརྟེན༌ནས། །ཁྱེད་ཀྱི་བཞུགས་གནས་ནང་དུ་འགྲོ་བར༌བྱ། །ཁྱེད་ལ་གུས་ཤིང་འཇིགས་པའི་སེམས་དང༌བཅས། །དམ་པའི་མཆོད་ཁང་དེ་ལ་ཕྱག་འཚལ༌ལོ།།
PSA 5:8 ཀྱེ་ཀྱེ་ཡ་ཝཱེ་བདག་གི་དགྲའི་རྐྱེན༌གྱིས། །དྲང་བདེན་ངང་ནས་ང་རང་འཁྲིད་པར༌མཛོད། །བདག་མདུན་ཁྱེད་ཀྱི་ཕེབས་ལམ་སྙོམས་པར༌མཛོད།།
PSA 5:9 དེ་ཚོའི་ངག་ཏུ་བདེན་པ་ཅི་ཡང༌མེད། །དེ་ཚོའི་སེམས་པ་གཏོར་བཤིག་དོན་ལ༌ཕྱོགས། །དེ་ཚོའི་མིད་པ་དུར་ཁུང་ཁ་ཕྱེས༌འདྲ། །དེ་ཚོའི་ལྕེ་ཡིས་མི་ལ་ངོ་སོ༌བསྟོད།།
PSA 5:10 དེ་དག་ཉེས་ཅན་མཛོད་ཅིག་དཀོན་མཆོག༌ལགས། །དེ་རྣམས་རང་གི་གཡོ་སྒྱུས་འགྱེལ་བར༌ཤོག །དེ་ཚོས་ཁྱེད་ལ་ངོ་ལོག་བྱས་པས༌ན། །དེ་ཚོའི་ཉེས་སྐྱོན་མང་བས་སྐྲོད་པར༌གྱིས།།
PSA 5:11 ཁྱེད་ལ་སྐྱབས་སུ་མཆི་བ་མགུ་བར༌ཤོག །དུས་རྒྱུན་དགའ་སྤྲོའི་འབོད་སྒྲ་སྒྲོག་གྱུར༌ཅིག །ཁྱེད་མཚན་གཅེས་སུ་འཛིན་པའི་མི་རྣམས༌ནི། །ཁྱེད་ནང་དགའ་མགུ་རངས་ཕྱིར་བསྲུང་བར༌མཛོད།།
PSA 5:12 ཡ་ཝཱེས་དྲང་པོར་བྱིན་རླབས་མཛད་འོང༌བས། །ཁྱེད་ཀྱི་ཐུགས་རྗེས་ཕུབ་ལྟར་ཁོ་ཚོ༌འགེབ།།
PSA 6:1 ༼གཞས་གདངས་བརྒྱད་པའི་ནང་དབུ་མཛད་ལ་སྤྲད་པའི་དཱ་བིད་ཀྱི་མགུར་སྒྲ་སྙན་སྤེལ༌མ།༽ ཀྱེ་ཀྱེ་ཡ་ཝཱེ་ཁྱེད་ཀྱིས་ང་རང༌ལ། །ཐུགས་ཁྲོ་དང་བཅས་བཀའ་བཀྱོན་མི་མཛད༌རོགས། །ཁྲོ་གཏུམ་ནང་དུ་ཉེས་ཆད་མི་གཅོད༌རོགས།།
PSA 6:2 ང་རང་རྒུད་པས་སྙིང་རྗེས་གཟིགས་སུ༌གསོལ། །རུས་པར་ན་ཟུག་ལངས་པས་གསོ་བར༌མཛོད།།
PSA 6:3 ཀྱེ་ཀྱེ་ཡ་ཝཱེ་ངའི་སེམས་ཤིན་ཏུ༌འཁྲུགས། །ནམ་ཞིག་ཁྱེད་ཀྱིས་ང་རང་བསྐྱབ་མཛད༌དམ།།
PSA 6:4 ཁྱེད་ཕྱིར་འཁོར་ནས་ང་རང་སྐྱོབ་པར༌མཛོད། །ཉིད་ཀྱི་བྱམས་བརྩེའི་དབང་གིས་སྐྱོབ་པར༌མཛོད།།
PSA 6:5 འདས་པོས་ཁྱེད་ཉིད་མི་དྲན་གཤིན་ཡུལ༌དུ། །ཁྱེད་ལ་གཏང་རག་འབུལ་མཁན་སུ་ཡོད༌དམ།།
PSA 6:6 ང་ནི་འཁུན་སྒྲ་ཕྱུང་ནས་ཐང་ཆད༌ཅིང༌། །ཞག་མ་རེ་རེར་མཆི་མ་བཞུར་ནས༌ནི། །མལ་ཁྲི་གཡེངས་ཤིང་མལ་སྟན་སྦངས༌པ་འོ།།
PSA 6:7 སྐྱོ་གདུང་དབང་གིས་ང་ཡི་མིག་ཟུང༌བསྒྲིབས། །དགྲ་བོ་ཀུན་པོའི་རྐྱེན་གྱིས་མིག་དབང༌ཉམས།།
PSA 6:8 ཡ་ཝཱེས་ང་ཡི་འོ་དོད་གསན་ཟིན༌པས། །སྡིག་སྤྱོད་ཅན་རྣམས་ང་དང་འབྲལ་བར༌གྱིས།།
PSA 6:9 ཡ་ཝཱེས་ང་ཡི་ཞུ་བར་གསན་ཟིན༌པས། །ཁོང་གིས་ང་ཡི་གསོལ་འདེབས་ཐུགས་སུ༌བཞེས།།
PSA 6:10 ང་ཡི་དགྲ་ཀུན་ནོངས་ཤིང་འཚབ་པ༌དང༌། །ཕྱི་བསྣུར་བྱེད་ཅིང་གློ་བུར་སྐྱེངས་པར༌འགྱུར།།
PSA 7:1 ༼པེན་ཡཱ་མེན་པ་གུ་ཤའི་ཚིག་ལ་བརྟེན་ནས་དཀོན་མཆོག་ཡ་ཝཱེ་ལ་ཕུལ་བའི་དཱ་བིད་ཀྱི་ཤིས་ག་ཡོན་ཞིག༽ ཀྱེ་ཀྱེ་ ང་ཡི་དཀོན་མཆོག༌ཡ་ཝཱེ་ལགས། །བདག་ནི་ཁྱེད་ལ་སྐྱབས་སུ་འགྲོ་བར༌བྱ། །འདེད་མཁན་ཀུན་ལས་བསྐྱབས་ནས་སྒྲོལ་བར༌མཛོད།།
PSA 7:2 དེ་ལྟར་མིན་ཚེ་ཁོ་ཚོས་སེང་གེ༌བཞིན། །ང་རང་གཤགས་ནས་དུམ་བུར་ཕྲལ༌ན་ཡང་། །སྐྱོབ་མཁན་སུ་ཡང་འབྱུང་བར་མི་འགྱུར༌རོ།།
PSA 7:3 ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ལགས། །གལ་སྲིད་བདག་གིས་ལས་འདི་བྱས་ཡོད༌ན། །བདག་གི་ལག་ཏུ་ཉེས་པ་གང་ཡོད༌ན།།
PSA 7:4 ཞི་མཐུན་མི་ལ་བཟང་ལན་ངན་འཇལ༌ལམ། །དོན་མེད་དགྲ་ལས་འཕྲོག་བཅོམ་བྱས་ཡོད༌ན།།
PSA 7:5 དེ་ནས་དགྲ་བོས་ང་རང་ཟིན་ནས༌ནི། །ང་ཡི་སྲོག་ནི་རྐང་པས་སར་བརྫི༌ཞིང༌། །ང་ཡི་གཟི་དཔལ་རྡུལ་དུ་བརླག་པའི༌བར། །ཇི་ལྟར་འདེད་ན་དེ་བཞིན་འདེད་དུ༌ཆུགས།། ༼ སེ༌ལཱ། ༽
PSA 7:6 ཁྱེད་ཉིད་ཐུགས་ཁྲོའི་ནང་དུ་བཞེང་བར་མཛོད། །དགྲ་བོའི་ཁོང་ཁྲོར་རྒོལ་དུ་བཞེང་བར་མཛོད། །བདག་དོན་སད་ནས་དྲང་པོའི་ཁྲིམས་གཅོད༌རོགས།།
PSA 7:7 མི་སྡེ་ཐམས་ཅད་འདུས་ནས་ཁྱེད་བསྐོར༌ཅིང༌། །ཡང་བསྐྱར་མཐོ་སར་བཞུགས་ཏེ་དབང་སྒྱུར༌ཤོག།
PSA 7:8 ཡ་ཝཱེས་མི་སྡེ་རྣམས་ལ་ཁྲིམས་གཅོད༌མཛད། །ཀྱེ་ཀྱེ་ཡ་ཝཱེས་ང་ཡི་དྲང་བདེན༌དང༌། །རྣམ་དག་སེམས་ལ་བསྟུན་ནས་ཁྲིམས་གཅོད༌རོགས།།
PSA 7:9 དཀོན་མཆོག་དྲང་པོས་མི་ཡི་བསམ་པ༌དང༌། །སྙིང་ཁོང་རུས་པའི་གཏིང་ལ་དཔྱད་པས༌ན། །ངན་པའི་གདུག་རྩུབ་རྦད་དེ་ཚར་གཅོད༌ཅིང༌། །དྲང་བདེན་མི་རྣམས་བདེ་ལ་བཀོད་གྱུར༌ཅིག།
PSA 7:10 དཀོན་མཆོག་ཁོང་ཉིད་བདག་གི་ཕུབ་ཡིན༌ཞིང༌། །ཁོང་གིས་སེམས་རྒྱུད་དྲང་བའི་མི་རྣམས༌སྐྱོབ།།
PSA 7:11 དཀོན་མཆོག་ཁོང་ཉིད་ཁྲིམས་དཔོན་དྲང་པོ༌ལགས། །ཉིན་རེར་ངན་པར་ཁྲོ་བའི་དཀོན་མཆོག༌ལགས།།
PSA 7:12 གལ་ཏེ་མི་ཡིས་འགྱོད་བཤགས་མི་བྱེད༌ན། །ཁོང་གིས་རལ་གྲི་རྣོན་པོར་བརྡར་བ༌དང༌། །མདའ་མོ་གཞུ་ལ་བཀུག་ནས་འཕེན་རྐྱང༌བྱ།།
PSA 7:13 ཁོང་གིས་སྲོག་ལེན་མཚོན་ཆ་བཤམས་ནས༌ཡོད། །འཕེན་པའི་མདའ་རྣམས་མེ་ཡི་མདའ་རུ༌མཛད།།
PSA 7:14 ལྟོས་དང་རང་གི་སྡིག་ཉེས་རྐྱེན་དབང༌གིས། །ངན་པས་ཕྲུ་གུ་བཙའ་བའི་ཟུག་གཟེར༌མྱོང༌། །གདུག་རྩུབ་ཡིད་ལ་བཅངས་ནས་འཕྲུལ་སྣང༌བསྐྱེད།།
PSA 7:15 མི་དེས་གཏིང་ཟབ་ས་དོང་འབྲུ་བ༌དང༌། །རང་གིས་བྲུས་པའི་དོང་ལ་རང་ཉིད༌ལྷུང༌།།
PSA 7:16 ཁོ་ཡི་གདུག་རྩུབ་རང་གི་མགོ་ལ༌འོང༌། །ཁོ་ཡི་གཏུམ་དྲག་རང་གི་སྤྱི་བོར༌འབབ།།
PSA 7:17 ཡ་ཝཱེའི་དྲང་བདེན་དང་ནི་འཚམ་པ༌ཡི། །བདག་གིས་ཁོང་ལ་བཀའ་དྲིན་ཞུ་བར༌བྱ། །བླ་མེད་ཡ་ཝཱེའི་མཚན་ལ་བསྟོད་བསྔགས༌བརྗོད།།
PSA 8:1 ༼གཱད་ཀྱི་དབྱངས་ནང་དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཀྱེ་ཀྱེ་ཡ་ཝཱེ་ངེད་ཀྱི་གཙོ་བོ༌ལགས། །ཁྱེད་ཀྱི་མཚན་སྙན་ས་གཞི་ཡོངས་སུ༌ཁྱབ། །ཁྱེད་ཀྱིས་རང་གི་གཟི་བརྗིད་ཆེན་པོ༌ནི། །ནམ་མཁའི་དབྱིངས་ལས་མཐོ་ཞིང་མངོན་པར༌མཛད།།
PSA 8:2 ཁྱེད་ཀྱིས་ཕ་རོལ་དགྲ་བོའི་རྐྱེན་ལ༌བརྟེན། །བྱིས་པ་དང་ནི་ཕྲུ་གུ་འོ་འཐུང་གི །ངག་ལས་སྟོབས་ཤུགས༌མངོན་པར་མཛད་པ་ཡིན། །དགྲ་དང་འཁོན་ལན་སློག་པའི་གཏམ་སྤྱོད༌བཀག།
PSA 8:3 ཁྱེད་ཀྱི་ཕྱག་གིས་བཀོད་པའི་ནམ་མཁའ༌དང༌། །ཟླ་བ་སྐར་ཚོགས་བཤམས་པ་ངས་མཐོང༌སྟེ།།
PSA 8:4 མི་ནི་ཅི་ཡིན་ཁྱེད་ཀྱིས་ཐུགས་ཁུར༌མཛད། །མིའི་བུ་ཅི་ཡིན་ཁྱེད་ཀྱིས་གཟིགས་སྐྱོང༌གནང༌།།
PSA 8:5 ཁྱེད་ཀྱིས་ཕོ་ཉ་དང་ནི་བསྡུར་བ༌ན། །ཁོང་ནི་ཅུང་ཙམ་དམའ་བར་མཛད་པ༌དང༌། །ཁོང་ལ་གཟི་བྱིན་གནང་སྟེ་གཙུག་རྒྱན༌གྱུར།།
PSA 8:6 ཁྱེད་ཀྱིས་དངོས་སུ་མཛད་པའི་དངོས་པོ༌སྟེ།།
PSA 8:7 གླང་དང་ར་ལུག་སྤང་གི་རི་དྭགས༌དང༌།།
PSA 8:8 ནམ་མཁའི་བྱ་དང་རྒྱ་མཚོའི་ཉ་རིགས༌དང༌། །མཚོ་ལམ་བརྒྱུད་ནས་འགྲོ་བ་ལ་སོགས༌པ། །འཇིག་རྟེན་མི་ཡི་རྐང་འོག་གནོན་པར༌མཛད།།
PSA 8:9 ཀྱེ་ཀྱེ་ཡ་ཝཱེ་ངེད་ཀྱི་གཙོ་བོ༌ལགས། །ཁྱེད་ཀྱི་མཚན་སྙན་ས་གཞི་ཡོངས་སུ༌ཁྱབ།།
PSA 9:1 ༼བུ་ཤི་བ་ཞེས་པའི་དབྱངས་ནང་དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེར་རྩེ་གཅིག་གིས་ནི་གཏང་རག༌འབུལ། །ཁྱེད་ཀྱི་མཛད་པ་ངོ་མཚར་ཅན་ཀུན༌བརྗོད།།
PSA 9:2 ཁྱེད་ཕྱིར་ང་རང་དགའ་མགུ་ཡི་རང༌འགྱུར། །བླ་མེད་ཁྱེད་ཀྱི་མཚན་ལ་བསྟོད་དབྱངས༌འབུལ།།
PSA 9:3 བདག་གི་དགྲ་རྣམས་ཁ་ཕྱིར་འཁོར་ནས༌ནི། །འབྲོ་བའི་དུས་སུ་ཁྱེད་ཀྱི་ཞལ་དྲུང༌དུ། །ས་རུ་འགྱེལ་ཞིང་མེད་པར་འགྱུར་བ༌འོ།།
PSA 9:4 རྒྱུ་མཚན་ཁྱེད་ཀྱིས་ང་ལ་དཀར་འདོན༌གནང༌། །ཁྱེད་ཀྱིས་ང་ཡི་རྩོད་པའི་ཕྱོགས་མཛད༌བྱུང༌། །རྒྱལ་ཁྲིར་བཞུགས་ནས་དྲང་པོའི་ཁྲིམས་བཅད༌དོ།།
PSA 9:5 ཁྱེད་ཀྱིས་མི་རིགས་རྣམས་ལ་བཀའ་བཀྱོན༌གནང༌། །མི་ངན་གཏན་མེད་བཏང་ཞིང་དེ་དག༌གི །མིང་ནི་ཇི་སྲིད་བར་དུ་བསུབས་པ༌འོ།།
PSA 9:6 དགྲ་བོ་རྣམས་ཀྱི་མཇུག་འབྲས་སླེབས་བྱུང༌སྟེ། །དེ་རྣམས་རྒྱུན་ནས་རྒྱུན་དུ་བརླག་པར༌འགྱུར། །དེ་ཚོའི་གྲོང་ཁྱེར་དག་ནི་རྩ་ནས༌བཤིགས། །དེ་དག་གྲགས་པ་ཡང་ནི་གཏན་མེད༌མཛད།།
PSA 9:7 འོན་ཀྱང་ཡ་ཝཱེ་རྟག་ཏུ་རྒྱལ་ཁྲིར༌བཞུགས། །ཁྲིམས་ཐག་གཅོད་ཕྱིར་ཁོང་གིས་རྒྱལ་ཁྲི༌བཙུགས།།
PSA 9:8 འཇིག་རྟེན་ཡོངས་ལ་ཁྲིམས་ཐག་དྲང་པོར༌གཅོད། །མི་སྡེ་ཀུན་ནི་དྲང་གཞག་ངང་ནས༌སྐྱོང༌།།
PSA 9:9 གཉའ་གནོན་འོག་ཏུ་གདུང་བའི་མི་ལ༌ནི། །ཡ་ཝཱེ་ཁོང་ཉིད་མཁར་རྫོང་མཐོན་པོ༌དང༌། །དཀའ་སྡུག་གནས་སུ་ལྷུང་དུས་སྐྱབས་གནས༌ཡིན།།
PSA 9:10 ཀྱེ་ཀྱེ་ཡ་ཝཱེ་ཁྱེད་ཉིད་འཚོལ་མཁན༌ནི། །ཁྱེད་ཀྱིས་ནམ་ཡང་དོར་བ་མེད་པས༌ན། །ཁྱེད་མཚན་རྟོགས་པའི་མི་ནི་ཁྱེད་ལ༌བརྟེན།།
PSA 9:11 ཛ་ཡན་རི་བོའི་ཡ་ཝཱེར་བསྟོད་དབྱངས༌ཕུལ། །ཁོང་གི་མཛད་འཕྲིན་མི་སྡེའི་དཀྱིལ་ནས༌སྒྲོགས།།
PSA 9:12 ཡ་ཝཱེས་སྐྱོ་བོ་རྣམས་ནི་ཐུགས་སུ༌འཇགས། །དེ་དག་སྨྲེ་སྔགས་བརྗེད་པར་མི་འགྱུར༌ཞིང་། །ཁོང་གིས་དེ་ཚོའི་སྲོག་ལན་འཇལ་ཡོང༌ངོ༌།།
PSA 9:13 ཀྱེ་ཀྱེ་ཡ་ཝཱེ་ང་ལ་སྙིང་རྗེ༌མཛོད། །སྡང་མཁན་རྣམས་ཀྱི་བཙན་གནོན་གཟིགས་ནས༌ནི། །ང་རང་འཆི་བའི་སྒོ་ལས་འཐེན་པར༌མཛོད།།
PSA 9:14 དེ་ནས་ཁྱེད་ཀྱི་བསྔགས་པ་བདག་གིས༌བརྗོད། །ཛ་ཡན་བུ་མོའི་ མཁར་སྒོ་རྣམས༌སུ་ཡང་། །ཁྱེད་ཀྱི་ཐར་པའི་དབང་གིས་དགའ་མགུ༌རངས།།
PSA 9:15 མི་རིགས་རྣམས་ནི་རང་བརྐོས་དོང་ལ༌ལྷུང༌། །རྐང་པ་རང་གིས་བཙུགས་པའི་རྙི་རུ༌ཚུད།།
PSA 9:16 ཡ་ཝཱེས་ཁྲིམས་ཐག་བཅད་ནས་རང་ཉིད༌མངོན། །མི་ངན་རང་བྱས་ལས་ཀྱིས་བཅིངས་པ༌ཡིན།། ༼ སེ༌ལཱ། ༽
PSA 9:17 མི་ངན་རྣམས་དང་དཀོན་མཆོག་བརྗེད་པའི༌རྒྱུད། །ཐམས་ཅད་གཤིན་པོའི་ཡུལ་དུ་ལོག་པར༌འགྱུར།།
PSA 9:18 དབུལ་ཕོངས་རྣམས་ནི་རྟག་ཏུ་བརྗེད་མི༌འགྱུར། །ཉམ་ཐག་རེ་བ་གཏན་དུ་ཟད་པ༌མིན།།
PSA 9:19 མི་ལ་རྒྱལ་ཁ་ལོན་པར་མི་མཛད༌ཕྱིར། །ཀྱེ་ཀྱེ་ཡ་ཝཱེ་ཁྱེད་ཉིད་བཞེང་བར་མཛོད། །ཁྱེད་དྲུང་མི་རིགས་རྣམས་ལ་ཁྲིམས་ཐག་གཅོད།།
PSA 9:20 ཀྱེ་ཀྱེ་ཡ་ཝཱེ་ཁྱེད་ཀྱིས་མི་རིགས༌རྣམས། །འཇིགས་ཤིང་སྐྲག་པར་མཛོད་ཅིག་ཁོ་རྣམས༌ཀྱིས། །རང་ཉིད་མི་ཙམ་ཡིན་པ་རྟོགས་གྱུར༌ཅིག། ༼ སེ༌ལཱ། ༽
PSA 10:1 ཀྱེ་ཀྱེ་ཡ་ཝཱེ་རྒྱང་ནས་བཞེངས་དོན༌ཅི། །དཀའ་སྡུག་དུས་སུ་ཡིབས་ནས་བཞུགས་པ༌ཅི།།
PSA 10:2 ངན་པས་ང་རྒྱལ་དང་བཅས་ཉམ་ཐག༌འདེད། །རང་གིས་བཤམས་པའི་ཇུས་ནང་ཚུད་གྱུར༌ཅིག།
PSA 10:3 ངན་པས་རང་གི་སེམས་ཀྱི་འདོད་པ༌ངོམ། །ནོར་རྔམ་ཅན་ལ་བསྟོད་ཅིང་ཡ་ཝཱེར༌སྨད།།
PSA 10:4 ངན་པས་ཁེངས་དྲེགས་བསྐྱེད་ཅིང་ཁོང་མི༌འཚོལ། །དེ་ཡི་བསམ་བློ་ཀུན་ཏུ་དཀོན་མཆོག༌མེད།།
PSA 10:5 ངན་པའི་ལམ་རྣམས་རྟག་ཏུ་བརྟན་པོར༌ལུས། །ཁྱེད་ཀྱི་བཀའ་ཁྲིམས་ཁྱད་འཕགས་ཁོས་མི༌མཐོང༌། །རང་གི་དགྲ་བོ་རྣམས་ལ་ཁྲེལ་དགོད༌བྱེད།།
PSA 10:6 དེ་ཡི་སེམས་སུ་ང་རང་གཡོ་འགུལ༌མེད། །མི་རབས་ཀུན་ཏུ་ཆག་སྒོ་མི་འབྱུང༌སྙམ།།
PSA 10:7 དེ་ཡི་ཁ་རུ་དམོད་མོ་གཡོ་སྒྱུ༌དང༌། །འཇིགས་སྐུལ་བཅས་ཀྱིས་གང་ཞིང་ལྕེའི་འོག༌ཏུ། །དུག་སྐྱོན་དང་ནི་གནོད་འཚེ་རྐྱང་རྐྱང༌ཡིན།།
PSA 10:8 གྲོང་ཚོ་དག་གི་ཉེ་འགྲམ་འཇབ་སྒུག༌བྱེད། །ལྐོག་གྱུར་གནས་སུ་ཉེས་མེད་སྲོག་དང༌ཕྲལ། །མིག་གིས་གོད་ཆག་ཅན་ལ་ལྐོག་ལྟ༌བགྱི།།
PSA 10:9 ནགས་ཀྱི་སེང་གེ་བཞིན་དུ་ཁོ་འཇབ༌ཅིང༌། །སྐྱོ་བོ་འཛིན་པའི་ཆེད་དུ་འཇབ་སྒུག༌བྱེད། །སྐྱོ་བོ་རང་གི་རྙི་རུ་བཟུང་ནས༌འཁྱེར།།
PSA 10:10 རྒྱབ་བརྟེན་མེད་པ་རྡུལ་དུ་བརླགས་པ༌དང༌། །ས་རུ་འགྱེལ་ཞིང་དེ་ཡི་ལག་ཏུ༌ལྷུང༌།།
PSA 10:11 དེ་ཡི་སེམས་སུ་དཀོན་མཆོག་གིས་བརྗེད༌ཅིང༌། །ཞལ་ངོ་བཀབ་ནས་ནམ་ཡང་མི་གཟིགས༌ཟེར།།
PSA 10:12 ཀྱེ་ཀྱེ་ཡ་ཝཱེ་ཁྱེད་ཉིད་བཞེང་བར་མཛོད། །ཀྱེ་ཀྱེ་དཀོན་མཆོག་ཁྱེད་ཕྱག་ཡར་བཏེགས༌ནས། །ཉམ་ཆུང་མི་རྣམས་ཐུགས་སུ་འཛིན་དུ༌གསོལ།།
PSA 10:13 མི་ངན་སེམས་སུ་དཀོན་མཆོག་ཁྱད་བསད༌དེ། །ཁྱེད་ཀྱིས་རྩད་གཅོད་མི་མཛད་ཟེར་དོན༌ཅི།།
PSA 10:14 དོན་དུ་ཁྱེད་ཀྱིས་དེ་ནི་གཟིགས་པ༌དང༌། །དུག་སྐྱོན་ཁོང་ཁྲོ་མཐའ་དག་གཟིགས་ནས༌ནི། །དེ་ལ་ཉིད་ཀྱི་ཕྱག་གིས་ལན་འཇལ༌ལོ། །རྒྱབ་བརྟེན་མེད་པས་རང་ཉིད་ཁྱེད་ལ༌བཅོལ། །ཕ་མེད་རྣམས་ལ་སྐྱབས་མཛད་ཁྱེད་གཅིག༌ལགས།།
PSA 10:15 ངན་པ་དག་གི་དཔུང་པ་གཅོག་པར༌མཛོད། །དེ་ཚོའི་སྡིག་སྤྱོད་མཐའ་དག་རྩད་གཅོད༌གནོངས།།
PSA 10:16 རྒྱུན་ནས་རྒྱུན་དུ་ཡ་ཝཱེ་རྒྱལ་པོ༌ལགས། །ཕྱི་ཕྱོགས་པ་རྣམས་ཁོང་གི་ཡུལ་ནས༌ཡལ།།
PSA 10:17 ཡ་ཝཱེ་ཁྱེད་ཀྱིས་སྐྱོ་བོའི་ཡིད་སྨོན༌གསན། །དེ་ཚོར་བློ་སྟོབས་བསྐྱེད་ཅིང་གསན་པར༌མཛད།།
PSA 10:18 ཕ་མེད་དང་ནི་གཉའ་གནོན་འོག་ཏུ༌ནི། །གདུང་བ་རྣམས་ལ་དག་འབུད་གནང་བ༌དང༌། །ས་སྟེང་མི་ཡི་འཇིགས་སྐུལ་བཟློག་ཕྱིར༌རོ།།
PSA 11:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེ་ཁོང་ཉིད་ང་ཡི་སྐྱབས་གནས༌ཡིན། །དེས་ན་ཁྱོད་ཚོས་བདག་ལ་འདི་ལྟར༌དུ། །ཁྱོད་ནི་བྱ་ལྟར་རང་གི་རི་ལ༌ཕྲོས།།
PSA 11:2 ལྐོག་ནས་སེམས་རྒྱུད་དྲང་པོར་བསྣུན་པའི༌ཕྱིར། །ལྟོས་ཤིག་ངན་པའི་གཞུ་ཐིག་འཐེན་པ༌དང༌། །དེ་ཡི་སྟེང་དུ་མདའ་མོ་བསྐྱིལ་ནས༌ཡོད།།
PSA 11:3 རྩིག་རྨང་བཤིགས་པ་ཡིན་ན་དྲང་པོ༌ཡིས། །གང་ཞིག་བྱ་ནུས་ཞེས་སུ་སྨྲ་བ༌ཅི།།
PSA 11:4 ཡ་ཝཱེ་ཉིད་ཀྱི་མཆོད་ཁང་དམ་པར༌བཞུགས། །ཁོང་གི་རྒྱལ་ཁྲི་ནམ་མཁའི་ཡང་སྟེང༌དུ། །སྤྱན་གྱིས་མི་བུ་རྣམས་ལ་གཟིགས་པ༌དང༌། །སྤྱན་ཟུང་ གིས་ནི་མི་ལ་བརྟག་དཔྱོད༌མཛད།།
PSA 11:5 ཡ་ཝཱེས་དྲང་པོ་ངན་པ་གཉིས་ཀར༌བརྟག །གཏུམ་སྤྱོད་ལ་ནི་དགའ་བར་ཁོང་ཉིད༌སྡང༌།།
PSA 11:6 མི་ངན་སྟེང་དུ་རྙི་རྒྱ་འབེབ་པ༌དང༌། །དེ་ཚོའི་ཕོར་པའི་ནང་གི་ཐོབ་སྐལ༌ནི། །མེ་དང་མུ་ཟི་ཚད་རླུང་བཅས་ཡིན༌ནོ།།
PSA 11:7 གང་ལ་ཞེ་ན་ཡ་ཝཱེ་དྲང་བདེན༌ཡིན། །ཁོང་ཉིད་སྤྱོད་པ་དྲང་པོར་ཐུགས་མཉེས༌ཤིང༌། །གཞུང་དྲང་མི་ཡིས་ཁོང་གི་ཞལ་ངོ༌མཇལ།།
PSA 12:1 ༼གཞས་གདངས་བརྒྱད་པའི་ནང་དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ དད་གུས་ཅན་ནི་ཟད་ཅིང་མི་བུ༌ཁྲོད། །བློ་དཀར་ཚར་བས་ཡ་ཝཱེ་སྐྱབས་མཛོད༌ཅིག།
PSA 12:2 ཁོ་ཚོས་ཕན་ཚུན་བར་དུ་རྫུན་སྨྲ༌ཞིང༌། །ངོ་བསྟོད་མཆུ་ཡིས་གཡོ་སྒྱུའི་སྦྱོར་བ༌སྤེལ།།
PSA 12:3 ཡ་ཝཱེས་ངོ་བསྟོད་བརྗོད་པའི་མཆུ་སྒྲོས༌དང༌། །འུད་གཏམ་ཤོད་པའི་ལྕེ་ནི་གཅོད་པར༌ཤོག།
PSA 12:4 དེ་ཚོས་རང་རེའི་ལྕེ་ཡིས་རྒྱལ་ཁ༌ལོན། །རང་གི་མཆུ་སྒྲོས་རང་ལ་དབང་བ༌ཡིན། །རང་ཅག་བདག་པོ་སུ་ཡོད་ཅེས་སྨྲས༌སོ།།
PSA 12:5 སྐྱོ་བོ་རྣམས་ལ་ཐེབས་པའི་གཏོར་བརླག༌དང༌། །དབུལ་པོས་ཕྱུང་བའི་འཁུན་སྒྲ་དེའི་རྐྱེན༌གྱིས། །ད་ལྟ་ང་རང་ལངས་ནས་ཁོ་རྣམས༌ནི། །ཡིད་སྨོན་འཆོར་བའི་བདེ་ལ་འགོད་ཅེས༌གསུངས།།
PSA 12:6 ཡ་ཝཱེའི་བཀའ་ནི་ལྷད་མེད་བཀའ་ཡིན༌ཞིང༌། །ས་ཡི་བཞུ་ཐབ་ནང་དུ་ལན་བདུན༌ལ། །བཙོ་སྦྱང་བྱས་པའི་དངུལ་དང་གཅིག་མཚུངས༌ཡིན།།
PSA 12:7 ཡ་ཝཱེ་ཁྱེད་ཀྱིས་ཁོ་རྣམས་སྐྱོབ་པར༌མཛོད། །འཇིག་རྟེན་མི་ལས་གཏན་དུ་སྐྱབས་སུ༌གསོལ།།
PSA 12:8 མི་ཡི་དཀྱིལ་དུ་ངན་ལ་བསྟོད་ཙ༌ན། །སྡིག་སྤྱོད་ཅན་རྣམས་ཕྱོགས་བཞིར་འཁོར་བ༌ཡིན།།
PSA 13:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཀྱེ་ཀྱེ་ཡ་ཝཱེ་རྒྱུན་ནས་རྒྱུན༌དུ་འམ། །ནམ་ཞིག་བར་དུ་ང་ནི་བརྗེད་པར༌བྱ། །ཁྱེད་ཀྱིས་ཉིད་ཀྱི་ཞལ་ངོ་བཀབ་ནས༌ནི། །ང་ལ་མི་གཟིགས་ག་དུས་བར་དུ༌གནས།།
PSA 13:2 བདག་སེམས་འཁྲུགས་ཤིང་ཉི་མ་རེ་རེ༌བཞིན། །ཡིད་སེམས་སྐྱོ་ནས་ནམ་དུས་བར་དུ༌གནས། །དགྲ་བོ་བདག་ལས་རྒྱལ་ནས་ག་དུས༌བར།།
PSA 13:3 སྟུག་པོ་གཉིད་དང་བཅས་ཏེ་མི་འཆི༌ཕྱིར། །ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ལགས། །བདག་ལ་གཟིགས་ཤིང་བཀའ་ལན་གནང་བར༌མཛོད། །བདག་གི་མིག་ཟུང་གསལ་པོར་མཛད་དུ༌གསོལ།།
PSA 13:4 དེ་མིན་ང་ཡི་དགྲ་བོས་འདི་ལྟར༌དུ། །བདག་ནི་ཁོ་ལས་རྣམ་པར་རྒྱལ་སོང༌ཟེར། །ང་རང་འགྱེལ་དུས་དགྲ་རྣམས་སྤྲོ་བར༌འགྱུར།།
PSA 13:5 འོན་ཀྱང་བདག་ནི་ཁྱེད་ཀྱི་བྱམས་བརྩེར༌བརྟེན། །ཁྱེད་ཀྱི་ཐར་པའི་དབང་གིས་ངའི་སེམས༌སྤྲོ།།
PSA 13:6 ཡ་ཝཱེས་ང་རང་དྲིན་གྱིས་བསྐྱངས་པས༌ན། །བདག་གིས་ཁོང་ལ་བསྟོད་པའི་མགུར་མ༌ལེན།།
PSA 14:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ གླེན་པས་སེམས་སུ་དཀོན་མཆོག་མེད་ཅེས༌སྨྲ། །དེ་རྣམས་ཉམས་ནས་ཞེན་ལོག༌ཉེས་པ་བྱས། །བཟང་པོ་བྱེད་མཁན་གཅིག་ཀྱང་ཡོད་མ༌ཡིན།།
PSA 14:2 གོ་བ་ཅན་དང་དཀོན་མཆོག་འཚོལ་བའི༌མི། །ཡོད་དང་མེད་པར་གཟིགས་པའི་ཆེད་དུ༌ནི། །ཡ་ཝཱེས་གནམ་ནས་མི་བུ་རྣམས་ལ༌གཟིགས།།
PSA 14:3 ཐམས་ཅད་དྲང་པོའི་ལམ་དང་བྲལ་ནས༌ནི། །ལྷན་ཅིག་བཙོག་པར་གྱུར་ཅིང་དེ་རྣམས༌ལས། །ལས་བཟང་སྒྲུབ་མཁན་ཡོད་པ་མ་ཡིན་ལ། །དེ་འདྲ་གཅིག་ཀྱང༌ཡོད་པ་མ་ཡིན་ནོ།།
PSA 14:4 ང་ཡི་འབངས་མི་བག་ལེབ་བཞིན་མིད༌ཅིང༌། །ཡ་ཝཱེའི་མཚན་ནི་མི་འབོད་ལས་ངན༌པ། །བྱེད་མཁན་ཀུན་ལ་བློ་གྲོས་ཡེ་མེད༌དམ།།
PSA 14:5 དཀོན་མཆོག་དྲང་པོའི་ཚོགས་སུ་བཞུགས་པས༌ན། །འཇིགས་སྐྲག་ཆེན་པོ་དེ་རྣམས་སྟེང་དུ༌བབས།།
PSA 14:6 ཁྱོད་ཚོས་དབུལ་པོའི་ཐབས་ཇུས་ཕམ་བྱེད༌ཀྱང༌། །ཡ་ཝཱེ་དེ་ཚོའི་སྐྱབས་གནས་ཡིན་ལགས༌སོ།།
PSA 14:7 ཀྱེ་ཀྱེ་ཡེས་ར་ཨེལ་གྱི་ཐར་པ༌ནི། །ཛ་ཡན་ཡུལ་ནས་བྱུང་ན་ཅི་མ༌རུང༌། །ཡ་ཝཱེས་ཉིད་ཀྱི་མི་རྣམས་བཙོན་ལས༌ནི། །ཕྱིར་ཁྲིད་འོང་དུས་ཡ་ཀོབ་དགའ་བ༌དང༌། །ཡེས་ར་ཨེལ་ནི་མགུ་བར་འགྱུར་བ༌འོ།།
PSA 15:1 ༼དཱ་བིད་ཀྱི་མགུར༌མ།༽ ཡ་ཝཱེ་ཁྱེད་ཀྱི་གུར་ནང་སུ་གནས༌ཐུབ། །ཁྱེད་ཀྱི་དམ་པའི་རི་སྟེང་སུ་འདུག༌ནུས།།
PSA 15:2 སྤྱོད་པ་སྐྱོན་བྲལ་དྲང་པོར་སྤྱོད་མཁན༌དང༌། །སྙིང་ནས་བདེན་པ་སྨྲ་བའི་མི་ཡིན༌ཞིང༌།།
PSA 15:3 དེས་ནི་ལྕེ་ཡིས་མི་ལ་ངན་མི༌སྨྲ། །རང་གི་གྲོགས་ལ་གནོད་འཚེ་མི་བྱེད༌ཅིང༌། །ཁྱིམ་མཚེས་ལ་ཡང་གཏམ་ངན་མི་གཏོང༌ངོ༌།།
PSA 15:4 དེ་ཡི་མིག་ལམ་ངན་པ་ཁྱད་དུ༌གསོད། །ཡ་ཝཱེར་གུས་ཤིང་འཇིགས་པའི་མི་ལ༌བཀུར། །རང་ལ་གནོད་ཀྱང་མནའ་ལས་མི་འགལ༌ཞིང༌།།
PSA 15:5 རང་གི་དངུལ་ནི་སྐྱེད་ཀའི་ཕྱིར་མི༌གཏོང༌། །ཉེས་མེད་གནག་པའི་ལྐོག་རྔན་དེས་མི༌ལེན། །དེ་བཞིན་བྱེད་མཁན་ནམ་ཡང་བརྟན་པོར༌ཚུགས།།
PSA 16:1 ༼དཱ་བིད་ཀྱི་མེག་ཏཱམ་ཞིག༽ བདག་ནི་ ཁྱེད་ལ་སྐྱབས་སུ་མཆི་བས༌ན། །ཀྱེ་ཀྱེ་དཀོན་མཆོག་ང་རང་སྐྱོབ་པར༌མཛོད།།
PSA 16:2 ཡ་ཝཱེ་ལ་ནི་བདག་གིས་འདི་ལྟར༌ཞུས། །ཁྱེད་ནི་ང་ཡི་གཙོ་བོ་ཡིན་ལགས༌ཤིང༌། །ཁྱེད་མིན་བདག་ལ་ལེགས་པོ་ཅི་ཡང༌མེད།།
PSA 16:3 ས་གཞིའི་སྟེང་གི་སྐྱེས་བུ་དམ་པ༌རྣམས། །ཐམས་ཅད་བརྗིད་ཅིང་ང་རང་ཤིན་ཏུ༌དགའ།།
PSA 16:4 ཡ་ཝཱེའི་ཚབ་ཏུ་གཞན་པའི་ལྷ་བསྙེགས༌ན། །དེ་ཡི་སྡུག་བསྔལ་ཆེས་ཆེར་འཕེལ་བ༌ཡིན། །དེ་ཚོའི་ཁྲག་གི་སྐྱེམས་མཆོད་ངས་མི༌འབུལ། །གཞན་པའི་ལྷ་ཡི་མིང་ཡང་ངས་མི༌གླེང༌།།
PSA 16:5 ཡ་ཝཱེ་ཁྱེད་ཉིད་བདག་གི་ནོར་སྐལ༌དང༌། །ང་ཡི་ཕོར་པའི་ནང་གི་ཟ་སྐལ༌ཡིན། །ང་ཡི་ཐོབ་སྐལ་ཁྱེད་ཀྱིས་སྲུང་བར་མཛད།།
PSA 16:6 མཐའ་མཚམས་དག་ནི་སྐྱིད་པའི་གནས་སུ༌ཆགས། །སྙིང་དུ་སྡུག་པའི་བགོ་སྐལ་ང་ལ༌ཐོབ།།
PSA 16:7 ང་ལ་སློབ་སྟོན་མཛད་པའི་ཡ་ཝཱེར༌བསྟོད། །མཚན་མོར་བདག་གི་སེམས་ཀྱིས་གདམས་ངག༌གནང༌།།
PSA 16:8 དུས་རྒྱུན་ཡ་ཝཱེ་ང་ཡི་མདུན་དུ༌བཞག །ཁོང་ངའི་གཡས་སུ་བཞུགས་པས་ང་མི༌གཡོ།།
PSA 16:9 དེའི་ཕྱིར་ངའི་སེམས་དགའ་ཞིང་ཡིད་སྤྲོ༌ལ། །ང་ཡི་ལུས་ཀྱང་བདེ་བར་གནས་འགྱུར༌རོ།།
PSA 16:10 ང་ཡི་རྣམ་ཤེས་གཤིན་ཡུལ་དུ་མི་བསྐྱུར། །ཁྱེད་ཀྱི་སྐྱེས་བུ་དམ་པའང་རུལ་མི༌འཇུག།
PSA 16:11 ཁྱེད་ཀྱིས་ང་ལ་སྲོག་གི་ལམ་སྟོན༌མཛད། །ཁྱེད་ཀྱི་དྲུང་དུ་དགའ་སྤྲོ་མཐའ་ཡས༌མཆིས། །ཁྱེད་ཀྱི་གཡས་སུ་གཏན་གྱི་བདེ་བ༌ཡོད།།
PSA 17:1 ༼དཱ་བིད་ཀྱི་གསོལ༌འདེབས།༽ ཀྱེ་ཀྱེ་ཡ་ཝཱེ་བདེན་པར་གསན་དུ༌གསོལ། །བདག་གི་འོ་དོད་ལ་ནི་གསན་དུ༌གསོལ། །ལྕེ་གཉིས་མཆུ་ལས་བྱུང་བ་མ་ཡིན༌པའི། །བདག་གི་གསོལ་འདེབས་ལ་ནི་སྙན་གཏོད༌མཛོད།།
PSA 17:2 ཁྱེད་དྲུང་བདག་གི་ཁྲིམས་ཐག་གཅོད་པར༌ཤོག །ཁྱེད་ཀྱི་སྤྱན་གྱིས་དྲང་པོར་གཟིགས་པར༌མཛོད།།
PSA 17:3 ཁྱེད་ཀྱིས་ང་ཡི་སེམས་ལ་དཔྱད་པ༌དང༌། །མཚན་གྱི་དུས་སུ་ང་ལ་བརྟགས་པ༌ཡིན། །བདག་ལ་ཚོད་བགམ་བྱས་ཀྱང་ཅང་མི༌རྙེད། །སྨྲ་སྒོ་མི་འཆུག་སེམས་ཐག་བཅད་ནས༌ཡོད།།
PSA 17:4 འཇིག་རྟེན་མི་ཡི་བྱ་སྤྱོད་གླེང་ན༌ནི། །ཁྱེད་ཀྱི་ཞལ་ནས་ཐོན་པའི་བཀའ་ལ༌བརྟེན། །གདུག་རྩུབ་ཅན་གྱི་ལམ་ལས་རང་ཉིད༌བསྲུངས།།
PSA 17:5 ཁྱེད་ཀྱི་ལམ་ནང་བདག་གི་གོམ་སྟབས༌བརྟན། །ང་ཡི་རྐང་པ་འགྲེད་པར་མ་གྱུར༌ཏོ།།
PSA 17:6 ཀྱེ་ཀྱེ་དཀོན་མཆོག་ཁྱེད་ཀྱིས་ང་རང༌ལ། །བཀའ་ལན་གནང་བས་བདག་གིས་ཁྱེད་ལ༌ཞུ། །ང་ཡི་གསོལ་འདེབས་སྙན་གྱིས་གསན་དུ༌གསོལ།།
PSA 17:7 བྱམས་བརྩེ་ཆེན་པོའི་ངོ་མཚར་སྟོན་པར༌མཛོད། །ཁྱེད་ལ་སྐྱབས་སུ་འོང་བ་ཕྱག་གཡས༌པས། །ཁོ་ཚོའི་དགྲ་ལས་སྐྱོབ་པར་མཛད་པ༌འོ།།
PSA 17:8 བདག་ནི་མིག་འབྲས་བཞིན་དུ་བསྲུང་བར༌མཛོད། །གཤོག་པའི་གྲིབ་བསིལ་འོག་ཏུ་སྦ་བར༌གནོངས།།
PSA 17:9 ང་རང་བཙན་གནོན་བྱེད་པའི་མི་ངན༌དང༌། །མཐའ་ནས་བསྐོར་ཅིང་སྲོག་ལ་རྔམ་པ༌ཡི། །བདག་གི་དགྲ་བོ་རྣམས་ལས་ཐར་བར༌མཛོད།།
PSA 17:10 དེ་ཚོའི་སྙིང་ནི་ཚིལ་གྱིས་བཏུམས་པ་དང༌། །ཁ་རུ་ཁེངས་དྲེགས་གཏམ་རྣམས་སྨྲ་བ༌འོ།།
PSA 17:11 དེ་ཚོས་ངེད་རྣམས་དེད་ཅིང་མཐའ་ནས༌བསྐོར། །སྡང་མིག་བགྲད་ཀྱིན་ས་རུ་བརྡབ་རྩིས༌བྱེད།།
PSA 17:12 དེ་དག་དབྲལ་བར་རྔམ་པའི་སེང་གེ༌བཞིན། །ཕག་ཏུ་འཇབ་པའི་སེང་གེ་དར་མ༌འདྲ།།
PSA 17:13 ཀྱེ་ཀྱེ་ཡ་ཝཱེ་ཁྱེད་ཉིད་ཡར་བཞེངས༌ནས། །དགྲ་ལ་འཐབ་ནས་དེ་རྣམས་སར་བརྡབ༌རོགས། །རལ་གྲིས་ངའི་སྲོག་ངན་ལས་སྐྱོབ་པར་མཛོད།།
PSA 17:14 ཀྱེ་ཀྱེ་ཡ་ཝཱེ་ཁྱེད་ཀྱི་ཕྱག་གིས༌ནི། །ཚེ་འདི་ཁོ་ནར་སྐལ་བ་ལྡན་པ༌ཡི། །འཇིག་རྟེན་མི་ལས་ང་རང་ཐར་བར༌མཛོད། །གཏེར་གྱིས་དེ་རྣམས་ལྟོ་བ་འགྲང་བར༌མཛོད། །དེ་ཚོ་བུ་ཕྲུག་མང་པོས་ཡིད་ཚིམ༌ཅིང༌། །རྒྱུ་ནོར་ལྷག་མ་བུ་རྒྱུད་རྣམས་ལ༌བཞག།
PSA 17:15 ང་ཡིས་དྲང་བདེན་ནང་དུ་ཁྱེད་མཇལ༌འོང༌། །གཉིད་ལས་སད་དུས་ཁྱེད་ཀྱི་སྣང་བརྙན༌མཇལ། །དེ་བས་ང་རང་ཀུན་ནས་ཚིམ་པར༌འགྱུར།།
PSA 18:1 ༼དབུ་མཛད་ལ་སྤྲད་པའི་དཀོན་མཆོག་ཡ་ཝཱེའི་ཞབས་ཕྱི་དཱ་བིད་ཀྱི་མགུར་མ༌སྟེ། དཀོན་མཆོག་ཡ་ཝཱེས་ཁོང་སོ་ལོ་དང་དགྲ་བོ་ཐམས་ཅད་ཀྱི་ལག་ནས་བསྐྱབས་པའི་ཉིན༌མོར། ཁོང་གིས་དཀོན་མཆོག་ཡ་ཝཱེ་ལ་མགུར་འདིའི་ཚིག་རྣམས་ཞུས༌པ།༽ ཀྱེ་ཀྱེ་ཡ་ཝཱེ་ང་ཡི་སྟོབས་ཤུགས༌ལགས། །ང་ཡིས་ཁྱེད་ཉིད་གཅེས་སུ་འཛིན་པ༌འོ།།
PSA 18:2 ང་ཡི་བྲག་རྡོ་དང་ནི་རི་རྫོང༌དང༌། །ང་ཡི་སྲོག་སྐྱོབ་ཡ་ཝཱེ་ཁོང་ཉིད༌ཡིན། །ང་ཡི་དཀོན་མཆོག་བདག་གི་ཕ་བོང༌ལགས། །ཁོང་ནི་ང་རང་སྐྱབས་སུ་འགྲོ་ས༌ཡིན། །ང་ཡི་ཕུབ་དང་ཐར་པའི་རྭ་དུང་ དང༌། །བདག་གི་བཙན་རྫོང་ཡང་ནི་ཁོང་ལགས༌སོ།།
PSA 18:3 བསྟོད་པར་འོས་པའི་ཡ་ཝཱེ་ང་ཡིས༌འབོད། །དེ་ནས་ང་རང་དགྲ་བོ་ཀུན་ལས༌ཐར།།
PSA 18:4 འཆི་བའི་ཐག་པས་ང་ནི་བཅིངས་པ༌དང༌། །འཇོམས་བྱེད་དྲག་བཞུར་ཆུ་བོས་ང་རང༌བསྣུབས།།
PSA 18:5 གཤིན་པོའི་ཡུལ་གྱི་ཐག་པས་བདག་ནི༌འཁྲིས། །འཆི་བའི་རྙི་རྒྱ་ང་ཡི་སྟེང་དུ༌བབས།།
PSA 18:6 དཀའ་སྡུག་མྱོང་དུས་བདག་གིས་ཡ་ཝཱེ༌བོས། །རང་གི་དཀོན་མཆོག་ཉིད་ལ་ཆོ་ངེ༌བཏོན། །མཆོད་ཁང་ནང་དུ་བདག་གི་སྐད་གསན༌ཅིང༌། །ཁོང་དྲུང་བོས་པའི་འོ་དོད་སྙན་དུ༌ཆུད།།
PSA 18:7 དེའི་དུས་ས་གཞི་འགུལ་ཞིང་འདར་བ༌དང༌། །རི་བོ་དག་གི་རྩ་བ་གཡོས་པ༌སྟེ། །ཡ་ཝཱེ་ཁོང་ཉིད་ཁྲོས་པའི་རྐྱེན་ལས༌བྱུང༌།།
PSA 18:8 ཁོང་གི་ཤངས་ནས་དུ་བ་སྟུག་པོ༌འཕྱུར། །ཁོང་གི་ཞལ་ལས་འཇོམས་བྱེད་མེ་དཔུང་འབར། །ཐ་ན་སོལ་བ་ཡང་ནི་མེ་ལ༌སྦར།།
PSA 18:9 ཁོང་གིས་ནམ་མཁའ་དཔྱངས་ནས་མར་ཕེབས༌ཤིང༌། །ཁོང་གི་ཞབས་འོག་སྤྲིན་ནག་སྟུག་པོ༌འཁྲིགས།།
PSA 18:10 ཁོང་ཉིད་ཀེ་རུབ་ཅིག་ལ་བཅིབས་ནས༌འཕུར། །རླུང་གི་གཤོག་པར་བརྟེན་ནས་ནམ་འཕང༌བཅད།།
PSA 18:11 ཁོང་གིས་སྨག་རུམ་ཉིད་ཀྱི་ཡིབ་ས༌བྱས། །ཆར་སྤྲིན་ནག་པོ་ཕྱོགས་བཞིའི་ཡོལ་བར༌མཛད།།
PSA 18:12 ཁོང་གི་ཞལ་ངོའི་མདངས་ཀྱིས་སྤྲིན་ནག༌ཁྲོད། །སེར་བ་དང་ནི་སོལ་མེ་ཐོན་བྱུང༌ངོ༌།།
PSA 18:13 ཡ་ཝཱེས་ནམ་མཁར་འབྲུག་སྒྲ་ལྡིར་དུ༌བཅུག །བླ་ན་མེད་པ་ཁོང་གི་གསུང་སྐད༌ཀྱིས། །སེར་བ་དང་ནི་སོལ་མེ་བྱུང་བ༌འོ།།
PSA 18:14 མདའ་མོ་འཕངས་ནས་དགྲ་རྣམས་ཕྱོགས་བཞིར༌གཏོར། །གློག་དམར་ཡང་ཡང་འཁྱུགས་ནས་དེ་རྣམས༌བཅོམ།།
PSA 18:15 ཀྱེ་ཀྱེ་ཡ་ཝཱེས་བཀའ་བཀྱོན་གནང་བ༌དང༌། །ཁྱེད་ཀྱི་ཤངས་ལས་ཐོན་པའི་དབུགས་གཅིག༌གིས། །རྒྱ་མཚོའི་མཐིལ་དང་ས་གཞིའི་རྨང་ཡང༌ཕྱུང༌།།
PSA 18:16 སྟེང་ནས་ཕྱག་ཟུང་བརྐྱངས་ཏེ་ང་ནི༌ཟིན། །གཏིང་ཟབ་ཆུ་ལས་ང་རང་ཡར་དྲངས༌སོ།།
PSA 18:17 ཁོང་གིས་ང་ནི་དགྲ་བོ་སྟོབས་ཆེན༌དང༌། །ང་ལ་སྡང་བ་རྣམས་ལས་བསྐྱབས་པ༌སྟེ། །རྒྱུ་མཚན་དེ་རྣམས་ང་ལས་སྟོབས་ཆེ༌འོ།།
PSA 18:18 ཆག་སྒོའི་ཉིན་མོར་ཁོ་རྣམས་ང་ལ༌རུབས། །འོན་ཀྱང་ཡ་ཝཱེ་བདག་གི་སྐྱབས་གནས༌ཡིན།།
PSA 18:19 ཁོང་གིས་ང་རང་ས་ཁོད་ཡངས་སར༌ཁྲིད། །ཁོང་ནི་བདག་ལ་མཉེས་པས་བདག་ནི༌བསྐྱབས།།
PSA 18:20 བདག་གི་དྲང་བདེན་བཞིན་དུ་གསོལ་རས་བསྩལ། །ལག་པ་གཙང་བ་ལྟར་དུ་ཨ་ལན་གནང་། །
PSA 18:21 རྒྱུ་མཚན་བདག་གིས་ཡ་ཝཱེའི་ལམ་རྣམས༌བསྲུངས། །ངན་པར་སྤྱད་ནས་དཀོན་མཆོག་བསྐྱུར་པ༌མེད།།
PSA 18:22 ཁོང་གི་ཁྲིམས་སྲོལ་ཐམས་ཅད་ངའི་མདུན༌མཆིས། །ཁོང་གི་སྒྲིག་ཁྲིམས་ནམ་ཡང་སྤངས་པ༌མིན།།
PSA 18:23 ཁོང་གི་ཞལ་དྲུང་ང་རང་སྐྱོན་དང༌བྲལ། །རང་ཉིད་ཉེས་སྐྱོན་རྣམས་ལས་བསྲུངས་པ༌ཡིན།།
PSA 18:24 དེ་བས་ཡ་ཝཱེས་ང་ཡི་དྲང་བདེན༌དང༌། །ཁོང་གི་སྤྱན་སྔར་ལག་པ་གཙང་བ༌བཞིན། །དེ་དང་མཐུན་པའི་གསོལ་རས་ང་ལ༌གནང༌།།
PSA 18:25 བྱམས་བརྩེ་ཅན་ལ་ཁྱེད་ཀྱིས་བྱམས་བརྩེས༌སྐྱོང་། །ཉེས་མེད་མི་ལ་ཁྱེད་རང་ཕུལ་བྱུང་ལགས།།
PSA 18:26 དྭངས་གཙང་མི་ལ་ཁྱེད་ཀྱིས་རྣམ་དག༌མངོན། །གཡོ་སྒྱུ་ཅན་ལ་ཁྱེད་ཀྱིས་མཁས་མཛངས་སྤྱོད།།
PSA 18:27 ཉམ་ཐག་མི་རྣམས་ཁྱེད་ཀྱིས་སྐྱོབ་ངེས༌ཤིང༌། །དྲེགས་ཉམས་ལྡན་པའི་མིག་རྣམས་དམའ་སར༌དབབ།།
PSA 18:28 ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ཡིས། །ང་ཡི་སྒྲོན་མེ་སྦར་ཞིང་མུན་པ༌སེལ།།
PSA 18:29 ཁྱེད་ལ་བརྟེན་ནས་དགྲ་བོའི་དམག་དཔུང་གཏོར། །དཀོན་མཆོག་མཉམ་དུ་ལྕགས་རིར་རྒྱང་མཆོང༌བྱེད།།
PSA 18:30 དཀོན་མཆོག་ཁོང་གི་ལམ་ནི་རྣམ་དག༌ཡིན། །ཡ་ཝཱེའི་བཀའ་ནི་དྲི་མ་མེད་པ༌ལགས། །སྐྱབས་བཅོལ་རྣམས་ཀྱི་ཕུབ་ནི་ཁོང་ཉིད༌ཡིན།།
PSA 18:31 ཡ་ཝཱེ་མ་གཏོགས་དཀོན་མཆོག་གཞན་སུ༌ཡོད། །དཀོན་མཆོག་ལས་གཞན་བྲག་རྡོ་སུ་ཡིན༌ནམ།།
PSA 18:32 ཁོང་གིས་སྟོབས་ཀྱི་སྐ་རགས་ང་ལ༌འཆིང༌། །བདག་གི་སྤྱོད་ལམ་ཕུལ་དུ་བྱུང་བར༌མཛད།།
PSA 18:33 ཁོང་གིས་བདག་ལ་ཤྭ་མོའི་བདེ་མྱུར༌བསྩལ། །མཐོན་པོའི་གནས་སུ་བརྟན་པོར་ཚུགས་པར༌མཛད།།
PSA 18:34 འཐབ་མོ་འགྱེད་ལུགས་བདག་གི་ལག་པར༌བསླབ། །དཔུང་པས་ལི་གཞུ་འགུག་ཀྱང་ནུས་པར༌མཛད།།
PSA 18:35 ཁྱེད་ཀྱི་ཐར་པའི་ཕུབ་ནི་ང་ལ༌གནང༌། །ཉིད་ཀྱི་ཕྱག་གཡས་ཀྱིས་ནི་ང་རང༌སྐྱོར། །ཁྱེད་ཀྱི་ཞི་བས་ང་ནི་ཆེན་པོར༌མཛད།།
PSA 18:36 གོམ་པ་སྤོ་སའི་ལམ་ནི་ཡངས་པར༌མཛད། །བདག་གི་རྐང་པ་ནམ་ཡང་འདྲེད་མ༌གྱུར།།
PSA 18:37 བདག་གིས་དགྲ་རྣམས་དེད་ནས་ཟིན་པ༌དང༌། །ཚར་གཅོད་བྱེད་པའི་བར་དུ་ཕྱིར་མ༌ལོག།
PSA 18:38 ཁོ་རྣམས་ཤིན་ཏུ་རྨས་ཏེ་ལང་མི༌ནུས། །ཐམས་ཅད་བདག་གི་རྐང་འོག་འགྱེལ་བ༌ཡིན།།
PSA 18:39 འཐབ་ཕྱིར་ང་ལ་སྟོབས་ཀྱི་སྐ་རགས༌བཅིངས། །དགྲ་རུ་ལང་མཁན་ང་ཡི་རྐང་འོག༌བཅུག།
PSA 18:40 དགྲ་རྣམས་ང་ཡི་མདུན་ནས་འབྲོ་མཛད་པས། །ང་ལ་སྡང་བའི་མི་རྣམས་བཅོམ་པ་ཡིན།།
PSA 18:41 དེ་ཚོས་ཆོ་ངེ་བཏོན་ཡང་སྐྱོབ་མཁན༌མེད། །ཡ་ཝཱེ་བོས་ཀྱང་ཁོང་གིས་ལན་མ༌གནང༌།།
PSA 18:42 རླུང་ཁའི་རྡུལ་བཞིན་དེ་རྣམས་ངས་བཏགས༌ཤིང༌། །ལམ་ཁའི་འདམ་རྫབ་ལྟར་དུ་ཕྱི་རུ༌གཡུགས།།
PSA 18:43 མི་སྡེའི་འཐབ་རྩོད་ལས་ང་ཁྱེད་ཀྱིས༌བསྐྱབས། །མི་རིགས་རྣམས་ཀྱི་མགོན་དུ་ང་རང་མཛད། །རྒྱུས་མེད་མི་སྡེས་ང་ལ་ཞབས་ཕྱི༌སྒྲུབ།།
PSA 18:44 ཐོས་པ་ཙམ་གྱིས་དེ་ཚོས་ང་ཉན༌ཞིང་། །མཐའ་མི་རྣམས་ནི་ང་ཡི་མདུན་དུ༌འཁུམས།།
PSA 18:45 ཁོ་རྣམས་ཐམས་ཅད་ཉམས་རྒུད་དུ་གྱུར༌ཅིང༌། །སྐྲག་ནས་འདར་གྱིན་བཙན་རྫོང་དག་ནས༌ཐོན།།
PSA 18:46 ཡ་ཝཱེ་ཁོང་ཉིད་གཏན་དུ་གསོན་པོར༌བཞུགས། །ང་ཡི་བྲག་རྡོ་བསྟོད་པར་འོས་སོ༌ལོ། །ང་ཡི་སྲོག་སྐྱོབ་ལགས་པའི་དཀོན་མཆོག༌ནི། །ཁོང་ལ་བཀུར་བསྟི་འབྱུང་བར་གྱུར་ཅིག་ཨང་།།
PSA 18:47 དཀོན་མཆོག་ང་ཡི་དགྲ་ཤ་ལེན་མཁན༌ཡིན། །མི་སྡེ་རྣམས་ནི་ང་ཡི་དབང་དུ༌བཀོད།།
PSA 18:48 ཁོང་གིས་ང་རང་དགྲ་ལས་ཐར་བར༌མཛད། །བདག་གི་དགྲ་ཟླ་རྣམས་ལས་ཁྱེད་ཀྱིས༌བཏེགས། །གདུག་རྩུབ་ཅན་ལས་ང་ནི་བསྐྱབས་པ༌འོ།།
PSA 18:49 ཀྱེ་ཀྱེ་ཡ་ཝཱེ་དེའི་ཕྱིར་བདག་གིས༌ནི། །མི་རིགས་རྣམས་ཀྱི་དཀྱིལ་ནས་ཁྱེད་ལ༌བསྔགས། །ཁྱེད་ཀྱི་མཚན་ལ་བསྟོད་པའི་མགུར་མ༌འབུལ།།
PSA 18:50 ཡ་ཝཱེས་མཆོག་ཏུ་གྱུར་པའི་ཐར་པ༌ནི། །ཁོང་གིས་བསྐོས་པའི་རྒྱལ་པོར་གནང་བ༌དང༌། །སྣུམ་གྱིས་བྱུགས་པར་བྱམས་བརྩེ་དཔག་མེད༌མཛད། །དཱ་བིད་དང་ནི་ཁོང་གི་བུ་རྒྱུད༌རྣམས། །རྒྱུན་ནས་རྒྱུན་དུ་བྱམས་བརྩེས་སྐྱོང་བ༌འོ།།
PSA 19:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ནམ་མཁའི་མཐོངས་ཀྱིས་དཀོན་མཆོག་གཟི་དཔལ༌མངོན། །ཨ་སྔོན་དབྱིངས་ཀྱིས་ཁོང་གི་མཛད་པ༌སྒྲོག།
PSA 19:2 ཉིན་རེ་བཞིན་དུ་ངག་ནས་གཏམ་གླེང༌ཞིང༌། །མཚན་མོ་རེ་ལ་ཤེས་བྱ་སྤེལ་བ༌ཡིན།།
PSA 19:3 སྐད་ཆ་དང་ནི་ཚིག་གི་སྦྱོར་བ༌མེད། །མི་ཡིས་དེ་རྣམས་སྐད་སྒྲ་མི་ཐོས༌ཀྱང༌།།
PSA 19:4 དེ་ཚོའི་སྐད་གདངས་གནམ་འོག་ཀུན་ཏུ༌ཁྱབ། །དེ་ཚོའི་སྨྲ་བརྗོད་ས་མཐའི་བར་དུ༌སླེབས། །ཁོང་གིས་དེའི་ནང་ཉི་མར་གུར་ཞིག༌ཕུབ།།
PSA 19:5 མག་གསར་བཞིན་དུ་ཉི་མ་གཟིམས་ལས་ཐོན། །དཔའ་རྒོད་དགའ་སྤྲོས་ལམ་ལ་རྒྱུག་དང༌མཚུངས།།
PSA 19:6 དེ་ནི་ནམ་མཁའི་ཕྱོགས་གཅིག་ནས་འཆར༌ཞིང་། །བསྐོར་ནས་ནམ་མཁའི་ཕྱོགས་གཞན་དུ་སླེབ༌བོ། །དེ་ཡི་ཚ་དྲོད་ལས་ནི་བསྐུངས་པ༌མེད།།
PSA 19:7 ཡ་ཝཱེའི་བཀའ་ཁྲིམས་ཁྱད་དུ་འཕགས་པ༌ལགས། །དེས་ནི་མི་ཡི་དྲན་པ་གསོ་བ༌ཡིན། །ཡ་ཝཱེའི་དཔང་ཡིག་བློ་གཏད་ཁེལ་བ༌ཡིན། །དེས་ནི་གླེན་པ་མཁས་པར་མཛད་པ༌འོ།།
PSA 19:8 ཡ་ཝཱེའི་བཀའ་སློབ་དྲང་པོ་ཡིན་པ༌དང༌། །དེས་ནི་མི་ཡི་སེམས་ལ་དགའ་སྤྲོ༌གནང༌། །ཡ་ཝཱེའི་བཀའ་ནི་དྭངས་ཤིང་གཙང་བ༌ཡིན། །དེས་ནི་མི་ཡི་མིག་ལ་འོད་མདངས༌སྦྱིན།།
PSA 19:9 ཡ་ཝཱེར་གུས་ཤིང་འཇིགས་པ་རྣམ་དག༌ཡིན། །དེ་ནི་རྒྱུན་ནས་རྒྱུན་དུ་གནས་པར༌འགྱུར། །ཡ་ཝཱེའི་སྒྲིག་སྲོལ་བདེན་ཞིང་ཡོངས་སུ༌དྲང༌།།
PSA 19:10 དེ་རྣམས་གསེར་ལས་རིན་ཐང་ཆེ་བ༌སྟེ། །ལྷད་མེད་གསེར་རྐྱང་མོད་པོ་ལས་ཀྱང༌ལྷག །དེ་རྣམས་སྦྲང་རྩི་ལས་ཀྱང་མངར་བ༌སྟེ། །སྦྲང་བུའི་ཚང་གི་སྦྲང་རྩི་ལས་ཀྱང༌མངར།།
PSA 19:11 ཁྱེད་ཀྱི་ཞབས་ཕྱིར་དེ་ལས་དྲན་སྐུལ༌ཐོབ། །དེ་རྣམས་སྲུང་བར་རྔན་པ་ཆེན་པོ༌ཡོད།།
PSA 19:12 རང་སྐྱོན་རང་གིས་རྟོགས་པ་སུ་ཡོད༌དམ། །མངོན་མེད་ཉེས་སྐྱོན་རྣམས་ལ་གུ་ཡངས༌མཛོད།།
PSA 19:13 གང་བྱུང་སྤྱོད་པའི་སྡིག་ཉེས་མི་བསག༌ཆེད། །ཁྱེད་ཀྱིས་ཉིད་ཀྱི་ཞབས་ཕྱི་བསྲུང་བར༌མཛོད། །ང་རང་དེ་རྣམས་དབང་དུ་འགྲོར་མི༌བྱ། །དེ་ནས་ང་རང་སྐྱོན་དང་བྲལ་བ༌དང༌། །སྡིག་པ་ཆེན་པོ་ལས་ནི་ཐར་བར༌འགྱུར།།
PSA 19:14 ཡ་ཝཱེ་ང་ཡི་བྲག་རྡོ་སྲོག་སྐྱོབ༌ལགས། །བདག་གི་སྨྲ་སྒོའི་གཏམ་དང་སེམས་ཀྱི༌བློ། །ཁྱེད་ཀྱི་དྲུང་དུ་ཐུགས་སུ་འབབ་པར༌ཤོག།
PSA 20:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ སྡུག་དུས་ཡ་ཝཱེས་བཀའ་ལན་གནང་བར༌ཤོག །ཡ་ཀོབ་དཀོན་མཆོག་མཚན་གྱིས་འདེགས་གྱུར༌ཅིག།
PSA 20:2 ཁོང་གིས་གནས་ཀྱི་མཆོག་ནས་རོགས་མཛད་ཅིང་། །ཛ་ཡན་ཡུལ་ནས་ཁྱོད་རང་སྐྱོར་བར༌ཤོག།
PSA 20:3 ཁྱོད་ཀྱི་མཆོད་པ་ཐམས་ཅད་དྲན་པ༌དང༌། །སྦྱིན་སྲེག་ཀྱང་ནི་ཁོང་གིས་བཞེས་གྱུར༌ཅིག། ༼ སེ༌ལཱ། ༽
PSA 20:4 སེམས་ཀྱི་འདོད་མོས་ཁོང་གིས་བསྐངས་ནས༌ནི། །ཁྱོད་ཀྱི་འཆར་བཀོད་ཐམས་ཅད་བསྒྲུབ་པར༌ཤོག།
PSA 20:5 ཁྱེད་ཀྱི་རྒྱལ་ཁའི་རྐྱེན་གྱིས་དགའ་འབོད༌བྱེད། །དཀོན་མཆོག་མཚན་ནང་དར་ཆ་མཐོ་རུ༌བསྒྲེང༌། །ཡ་ཝཱེས་ཞུ་བ་ཐམས་ཅད་བསྐང་བར༌ཤོག།
PSA 20:6 ཡ་ཝཱེས་ཁོང་གིས་བྱུགས་པར་མཛད་པ༌ནི། །སྐྱོབ་པར་བྱེད་པ་ད་ལྟ་བདག་གིས༌རྟོགས། །ཁོང་གིས་དམ་པའི་གནམ་ནས་བཀའ་ལན༌གནང༌། །ཕྱག་གཡས་མཐུ་སྟོབས་ཀྱིས་ནི་ཁོ་རང༌སྐྱོབ།།
PSA 20:7 ཁ་ཅིག་ཤིང་རྟ་ཁ་ཅིག་དམག་རྟར༌བརྟེན། །རང་ཅག་བརྟེན་ཡུལ་དཀོན་མཆོག་ཡ་ཝཱེའི༌མཚན།།
PSA 20:8 དེ་དག་བསྒུར་ནས་ས་རུ་འགྱེལ༌ན་ཡང་། །རང་ཅག་ལངས་ནས་བརྟན་པོར་ཚུགས་པ༌ཡིན།།
PSA 20:9 ཀྱེ་ཀྱེ་ཡ་ཝཱེས་རྒྱལ་པོ་སྐྱོབ་པར༌མཛོད། །ང་ཚོས་འབོད་དུས་བཀའ་ལན་གནང་བར༌ཤོག།
PSA 21:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེ་ཁྱེད་ཀྱི་སྟོབས་ནང་རྒྱལ་པོ༌དགའ། །ཁྱེད་ཀྱི་རྒྱལ་ཁའི་དབང་གིས་རབ་ཏུ༌སྤྲོ།།
PSA 21:2 དེ་ཡི་སེམས་ཀྱི་འདོད་སྨོན་ཁྱེད་ཀྱིས༌བསྐངས། །ཁ་ནས་ཅི་ཞུས་ཀུན་ལ་བཀའ་ལན༌གནང༌།།༼ སེ༌ལཱ། ༽
PSA 21:3 ཡིད་འོང་བྱིན་རླབས་དང་བཅས་ཁོ་རང༌བསུས། །ལྷད་མེད་གསེར་གྱི་ཅོད་པན་དེའི་མགོར༌བསྐོན།།
PSA 21:4 དེ་ཡིས་འཚོ་ཡུན་ཕྱིར་དུ་ཞུས་པ༌ན། །ཁྱེད་ཀྱིས་གཏན་དུ་ཚེ་ཐག་རིང་བར༌མཛད།།
PSA 21:5 ཁྱེད་ཀྱི་རྒྱལ་ཁའི་དབང་གིས་གཟི་དཔལ༌ཆེ། །ཟིལ་ཤུགས་བརྗིད་ཉམས་ཀྱིས་ནི་ཁོ་རང༌བརྒྱན།།
PSA 21:6 ཁྱེད་ཀྱིས་ཁོ་ལ་གཏན་གྱི་བྱིན་རླབས༌གནང༌། །ཁྱེད་དྲུང་ཁོ་རང་དགའ་ཞིང་སྐྱིད་པར༌མཛད།།
PSA 21:7 རྒྱལ་པོས་ཡ་ཝཱེར་ཡིད་རྟོན་བྱེད་པ༌དང༌། །བླ་ན་མེད་པ་ཉིད་ཀྱི་མཐའ་ཡས༌པའི། །བྱམས་བརྩེའི་དབང་གིས་ཁོ་ནི་གཡོ་བ༌མེད།།
PSA 21:8 ཁྱེད་ཀྱི་ཕྱག་གིས་དགྲ་བོ་ཐམས་ཅད༌རྙེད། །ཁྱེད་ཕྱག་གཡས་པས་དགྲ་ཟླ་འཛིན་པར༌འགྱུར།།
PSA 21:9 ཁྱེད་ཉིད་མངོན་སུམ་བྱོན་པའི་དུས་དེ༌ལ། །དེ་རྣམས་རབ་ཚའི་མེ་ཐབ་བཞིན་དུ༌མཛད། །ཡ་ཝཱེས་ཐུགས་ཁྲོ་དང་བཅས་ཁོ་རྣམས༌མིད། །མེ་ཡིས་དེ་རྣམས་འཇོམས་པར་བྱེད་པ་འོ།།
PSA 21:10 དེ་ཚོའི་བུ་རྒྱུད་ས་ནས་མེད་པར༌བྱེད། །དེ་རྣམས་ས་བོན་མི་ཡི་གྲས་ནས༌འཇོམས།།
PSA 21:11 དེ་ཚོས་ཁྱེད་ལ་ངན་སེམས་བཅངས༌ན་ཡང་། །ཁོ་ཚོས་སྤེལ་བའི་གཡོ་ཐབས་འགྲུབ་མ༌གྱུར།།
PSA 21:12 དེ་རྣམས་གདོང་ལ་གཏད་ནས་གཞུ་འཐེན༌དུས། །ཁོ་ཚོ་ཁ་ཕྱིར་འཁོར་ནས་འབྲོ་བར༌འགྱུར།།
PSA 21:13 ཀྱེ་ཀྱེ་ཡ་ཝཱེ་ཁྱེད་ཉིད་མཐུ་སྟོབས༌ནང༌། །ཁྱད་དུ་འཕགས་པར་གྱུར་དང་ངེད་རྣམས༌ཀྱིས། །ཁྱེད་ཀྱི་དབང་ལ་བསྟོད་ཅིང་མགུར་གླུ༌ལེན།།
PSA 22:1 ༼ཐོ་རངས་ཤྭ་ཡུ་མོའི་དབྱངས་ནང་དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ བདག་གི་དཀོན་མཆོག་བདག་གི་དཀོན་མཆོག༌ལགས། །ཁྱེད་ཀྱིས་ང་རང་རྒྱབ་ཏུ་བསྐྱུར་དོན༌ཅི། །རྒྱང་རིང་གནས་སུ་བཞུགས་ནས་མི་སྐྱོབ༌ཅིང༌། །འཁུན་སྒྲ་ཕྱུང་ཡང་མི་གསན་རྒྱུ་མཚན༌ཅི།།
PSA 22:2 ཀྱེ་ཀྱེ་ང་ཡི་དཀོན་མཆོག་ཉིན་མོའི༌དུས། །འོ་དོད་བོས་ཀྱང་བཀའ་ལན་གནང་མ༌བྱུང༌། །མཚན་མོའི་དུས་ཀྱང་ཞུ་བའི་མཚམས་མ༌བཞག།
PSA 22:3 འོན་ཀྱང་ཁྱེད་ནི་དམ་པ་ཉིད་ལགས༌ཤིང༌། །ཡེས་ར་ཨེལ་གྱི་བསྟོད་པའི་ཁྲི་ལ༌བཞུགས།།
PSA 22:4 ངེད་ཅག་མེས་པོས་ཁྱེད་ལ་བློ་གཏད༌བཅོལ། །ཁོ་རྣམས་ཁྱེད་ལ་བརྟེན་ནས་ཁྱེད་ཀྱིས༌བསྐྱབས།།
PSA 22:5 ཁྱེད་ལ་འོ་དོད་བོས་ཤིང་ཐར་བར༌གྱུར། །ཁྱེད་ལ་བློ་གཏད་བཅོལ་བས་ཕངས་མ༌གྱུར།།
PSA 22:6 ང་ནི་འབུ་ཙམ་ཡིན་ཞིང་མི་མ༌ཡིན། །མི་ཡིས་སྨད་ནས་མཐོང་ཆུང་བྱས་པ༌འོ།།
PSA 22:7 ང་རང་མཐོང་མཁན་ཀུན་གྱིས་འཕྱ་སྨོད༌བྱེད། །མཆུ་སྒྲོས་བསེགས་ནས་མགོ་བོ་གཡུག་བཞིན༌དུ།།
PSA 22:8 ཁོས་ནི་རང་ཉིད་ཡ་ཝཱེར་བཅོལ་བས༌ན། །ཡ་ཝཱེ་ལ་ནི་ཁོ་རང་སྐྱོབ་ཏུ༌ཆུག །ཡ་ཝཱེས་ཁོ་རང་གཅེས་སུ་འཛིན་པས༌ན། །ཁོང་ལ་དེ་ནི་སྒྲོལ་དུ་ཆུག་ཅེས༌སྨྲ།།
PSA 22:9 འོན་ཀྱང་ཁྱེད་ཀྱིས་ང་རང་མངལ་ལས༌ཕྱུང༌། །འོ་འཐུང་དུས་ནས་ཁྱེད་ལ་བརྟེན་པ༌བསླབས།།
PSA 22:10 སྐྱེས་པའི་ཚུན་ནས་ང་རང་ཁྱེད་ལ༌བཅོལ། །མངལ་ནས་ཁྱེད་ནི་ང་ཡི་དཀོན་མཆོག༌ཡིན།།
PSA 22:11 ཆག་སྒོ་ཉེ་ཞིང་སྡོངས་གྲོགས་མེད་པས༌ན། །ཁྱེད་རང་ང་དང་རིང་དུ་མི་གྱེས༌རོགས།།
PSA 22:12 གླང་གོག་མང་པོས་ང་རང་བསྐོར་བ༌དང༌། །པཱ་ཤན་གླང་གོག་སྟོབས་ཆེན་མཐའ་ནས༌རུབས།།
PSA 22:13 སྡེར་བགྲད་ང་རོ་སྒྲོག་པའི་སེང་གེ༌བཞིན། །དེ་ཚོས་ང་ཡི་ཕྱོགས་སུ་ཁ་ཆེར༌གདང༌།།
PSA 22:14 ང་ནི་ཆུ་བཞིན་ཕྱི་རུ་ཕོས་པ༌དང༌། །ལུས་ཀྱི་རུས་ཚིགས་ཐམས་ཅད་ཐོར་ནས༌ནི། །ངའི་སེམས་སྤྲ་ཚིལ་བཞིན་དུ་ཁོག་ནས༌བཞུས།།
PSA 22:15 ང་ཡི་སྟོབས་ཤུགས་རྫ་ཆག་ལྟར་དུ༌བསྐམས། །བདག་གི་ལྕེ་ནི་རྐན་གྱི་ངོས་ལ༌འབྱར། །ཁྱེད་ཀྱིས་ང་རང་འཆི་བའི་ཐལ་ནང༌བཞག།
PSA 22:16 ཁྱི་སྤྱང་ངན་པས་ང་རང་མཐའ་ནས༌བསྐོར། །མི་ངན་ཚོགས་ཀྱིས་ང་ཡི་ཕྱོགས་བཞིར༌རུབས། །བདག་གི་རྐང་ལག་བཞི་པོར་བུ་ག༌བརྟོལ།།
PSA 22:17 བདག་གིས་རུས་པ་ཀུན་གྱི་གྲངས་བརྩི༌ནུས། །ཁོ་ཚོའི་མིག་གིས་བདག་ལ་ཅེར་རེ༌བལྟས།།
PSA 22:18 ང་ཡི་ཕྱི་གོས་དེ་ཚོས་བགོ་བཤའ༌བརྒྱབ། །ང་ཡི་གྱོན་གོས་ཕྱིར་དུ་རྒྱན་འཕངས༌སོ།།
PSA 22:19 ཡ་ཝཱེ་ཁྱེད་ཉིད་རྒྱང་རིང་མི་བཞུགས༌རོགས། །ཁྱེད་ངའི་སྟོབས་ཡིན་མྱུར་དུ་རོགས་རམ༌མཛོད།།
PSA 22:20 ཁྱེད་ཀྱིས་ངའི་སྲོག་གཅིག་པུ་རལ་གྲི༌དང༌། །ཁྱི་སྤྱང་ངན་པའི་དབང་ལས་སྐྱོབ་པར༌མཛོད།།
PSA 22:21 ང་རང་སེང་གེའི་ཁ་ལས་ཐར་བར༌མཛོད། །ཞལ་བཞེས་བཞིན་དུ་གླང་རྒོད་རྭ་ལས༌སྐྱོབ།།
PSA 22:22 ང་ཡིས་རང་གི་སྤུན་ཟླར་ཁྱེད་མཚན༌བརྗོད། །ཚོགས་ཀྱི་ནང་དུ་ཁྱེད་ལ་བསྟོད་པ༌འབུལ།།
PSA 22:23 ཀྱེ་ཀྱེ་ཡ་ཝཱེར་གུས་ཤིང་འཇིགས་པ༌རྣམས། །ཁྱོད་ཅག་ཀུན་པོས་ཁོང་ལ་བསྟོད་པར༌གྱིས། །ཡ་ཀོབ་བུ་རྒྱུད་ཀུན་གྱིས་ཁོང་ལ༌བཀུར། །ཡེས་ར་ཨེལ་གྱི་རྒྱུད་རྣམས་གུས་འདུད༌ཞུས།།
PSA 22:24 རྒྱུ་མཚན་སྡུག་གིས་མནར་བའི་མི་རྣམས༌ལ། །ཁོང་གིས་མ་སྨད་ཞེ་ཡང་ལོག་པ༌མིན། །ཁོང་གིས་དེ་ལ་ཞལ་ངོ་བཀབ་པ༌མེད། །འོ་དོད་འབོད་དུས་ཁོང་གིས་གསན་པ༌ཡིན།།
PSA 22:25 མི་ཚོགས་ཆེན་པོའི་དཀྱིལ་དུ་ངས་ཁྱེད༌ལ། །ཕུལ་བའི་བསྟོད་ཚིག་ཁྱེད་ནས་འབྱུང་བ༌ཡིན། །ཡ་ཝཱེར་གུས་ཤིང་འཇིགས་པ་རྣམས་ཀྱི༌མདུན། །ང་ཡིས་རང་གི་དམ་བཅའ་བསྒྲུབ་པར༌བྱ།།
PSA 22:26 སྙེམས་ཆུང་རྣམས་ཀྱིས་བཟའ་ཞིང་ཚིམ་པར༌འགྱུར། །ཡ་ཝཱེ་འཚོལ་མཁན་རྣམས་ཀྱིས་ཁོང་ལ༌བསྟོད། །ཁྱོད་ཚོའི་སེམས་ནི་གཏན་དུ་འཚོ་བར༌ཤོག།
PSA 22:27 སའི་མཐའ་ཀུན་གྱིས་ཡ་ཝཱེ་དྲན་ནས༌ནི། །ཐམས་ཅད་ཁོང་གི་དྲུང་དུ་ལོག་པར༌འགྱུར། །མི་རིགས་ཀུན་གྱི་རིགས་རུས་མཐའ་དག༌གིས། །ཁྱེད་ཀྱི་དྲུང་དུ་གུས་པས་ཕྱག་འཚལ༌བགྱི།།
PSA 22:28 གང་ལ་ཞེ་ན་རྒྱལ་སྲིད་ཡ་ཝཱེའི༌ཡིན། །མི་རིགས་རྣམས་ཀྱི་མངའ་བདག་ཁོང་ཉིད༌དོ།།
PSA 22:29 ས་གཞིའི་སྟེང་གི་འབྱོར་ལྡན་ཐམས་ཅད༌ཀྱིས། །བཟའ་བཏུང་སྤྱོད་ཅིང་བསྙེན་བཀུར་བྱེད་པར༌འགྱུར། །གསོན་པར་མ་ནུས་ས་རུ་ཐིམ་པ༌རྣམས། །ཁོང་གི་དྲུང་དུ་པུས་མོ་ས་རུ༌འཛུགས།།
PSA 22:30 ཁོང་ལ་ཞབས་ཏོག་སྒྲུབ་པའི་བུ་རྒྱུད༌འབྱུང༌། །གཙོ་བོའི་འཕྲིན་ལས་མི་རབས་རྗེས་མར༌སྒྲོག།
PSA 22:31 ཁོ་ཚོས་སྐྱེ་བར་འགྱུར་བའི་མི་རྣམས༌ལ། །ཁོང་གི་དྲང་བདེན་བསྒྲག་ཅིང་འཕྲིན་ལས༌འདི། །ཁོང་གི་མཛད་པ་ཡིན་པར་གསལ་པོར་སྟོན།།
PSA 23:1 ༼དཱ་བིད་ཀྱི་མགུར༌མ།༽ ཡ་ཝཱེ་ང་ཡི་རྫི་བོ་ཡིན་པ༌དང༌། །བདག་ལ་མི་འདང་བ་ནི་ཅི་ཡང༌མེད།།
PSA 23:2 ཁོང་གིས་ནེའུ་གསིང་སྤང་ཁར་བདག་བསྙལ༌ཞིང༌། །ཆུ་ཕྲན་ལྷིང་འཇགས་འགྲམ་དུ་བདག་ཁྲིད༌དོ།།
PSA 23:3 བདག་གི་སེམས་ནི་སླར་ཡང་སོས་སུ༌མཛད། །ཁོང་གི་མཚན་སྙན་ལ་ནི་བསྔགས་པའི༌ཕྱིར། །བདག་ནི་དྲང་ཕྱོགས་ལམ་དུ་ལེགས་པར༌ཁྲིད།།
PSA 23:4 ཁྱེད་ནི་བདག་དང་ལྷན་དུ་བཞུགས་པའི༌ཕྱིར། །འཆི་བའི་ གཅོང་རོང་བརྒྱུད་ནས་སོང་ན༌ཡང༌། །ང་རང་ངན་པར་འཇིགས་སྣང་ཡོད་མ༌ཡིན། །ཁྱེད་ཀྱི་འཁར་བ་དང་ནི་དབྱུག་པས༌ཀྱང༌། །བདག་གི་ཡིད་སེམས་ལ་ནི་གསོ་བར༌མཛད།།
PSA 23:5 ཁྱེད་ཀྱིས་ཕ་རོལ་དགྲ་བོའི་མིག་མདུན༌ནས། །བདག་གི་ཆེད་དུ་གསོལ་ལྕོག་རྒྱས་པར༌བཤམས། །བདག་གི་མགོ་བོར་སྣུམ་གྱིས་ཡོངས་སུ༌བྱུགས། །བདག་གི་འཐུང་བའི་ཕོར་པ་ལྟེམས་པར༌མཛད།།
PSA 23:6 བདག་གི་ཚེ་གཅིག་ལུས་གཅིག་དུས་ཀུན༌ཏུ། །ཁྱེད་ཀྱི་བྱམས་དང་སྙིང་རྗེ་བདག་ལ༌འགྲོགས། །བདག་ནི་ཡ་ཝཱེའི་བཞུགས་གནས་ནང་དུ༌ནི། །ཇི་སྲིད་བར་དུ་སྡོད་པར་འགྱུར་བ༌འོ།།
PSA 24:1 ༼དཱ་བིད་ཀྱི་མགུར༌མ།༽ ས་གཞི་དང་ནི་སྣོད་བཅུད་མ་ལུས༌པ། །འཇིག་རྟེན་དང་ནི་དེར་གནས་ཡ་ཝཱེའི༌ཡིན།།
PSA 24:2 ས་ཡི་རྨང་གཞི་རྒྱ་མཚོའི་སྟེང་དུ༌བཏིངས། །ཆུ་ཆེན་སྟེང་དུ་བརྟན་པོར་མཛད་པས༌སོ།།
PSA 24:3 སུ་ཞིག་ཡ་ཝཱེའི་རི་བོར་འཛེག་ནུས༌སམ། །སུ་ཞིག་ཁོང་གི་དམ་པའི་གནས་སུ༌ཚུགས།།
PSA 24:4 ལག་པ་གཙང་ཞིང་བསམ་པ་རྣམ་དག༌ཅན། །སྙིང་པོ་མེད་པའི་ཕྱོགས་སུ་མི་འཁོར༌བ། །གཡོ་སྒྱུའི་མནའ་ཡང་མི་བསྐྱལ་བ་རྣམས༌སོ།།
PSA 24:5 དེ་ཡིས་ཡ་ཝཱེ་ཁོང་ནས་བྱིན་རླབས༌དང༌། །སྐྱབས་མཛད་དཀོན་མཆོག་ཉིད་ནས་དྲང་བདེན༌རྙེད།།
PSA 24:6 འདི་ནི་ཡ་ཝཱེ་འཚོལ་བའི་རིགས་རྒྱུད༌དང༌། །ཁྱེད་ཀྱི་ཞལ་ངོ་འཚོལ་མཁན་ཡ་ཀོབ༌ཡིན།།༼ སེ༌ལཱ། ༽
PSA 24:7 མཁར་སྒོ་དག་གིས་སྒོ་མོ་ཡར་ཕྱེ་དང་། །གནའ་བོའི་སྒོ་རྣམས་ཡར་ལ་འདེགས་པར༌གྱིས། །དེ་ནས་དཔལ་ལྡན་རྒྱལ་པོ་འབྱོན་པར༌འགྱུར།།
PSA 24:8 དཔལ་ལྡན་རྒྱལ་པོ་དེ་ཉིད་སུ་ལགས༌སམ། །སྟོབས་དང་ནུས་མཐུ་ལྡན་པའི་ཡ་ཝཱེ༌ཡིན། །གཡུལ་སར་མཐུ་སྟོབས་མངའ་བའི་ཡ་ཝཱེ༌ཡིན།།
PSA 24:9 མཁར་སྒོ་དག་གིས་སྒོ་མོ་ཡར་ཕྱེ་དང་། །གནའ་བོའི་སྒོ་རྣམས་ཡར་ལ་འདེགས་པར༌གྱིས། །དེ་ནས་དཔལ་ལྡན་རྒྱལ་པོ་འབྱོན་པར༌འགྱུར།།
PSA 24:10 དཔལ་ལྡན་རྒྱལ་པོ་དེ་ཉིད་སུ་ལགས༌སམ། །དཔུང་ཚོགས་ཡ་ཝཱེ་དཔལ་ལྡན་རྒྱལ་པོ༌ལགས།།
PSA 25:1 ༼དཱ་བིད་ཀྱི་མགུར༌མ།༽ ང་ཡི་རེ་སྨོན་ཡ་ཝཱེ་ཁྱེད་ལ༌བཅངས།།
PSA 25:2 ང་ཡི་དཀོན་མཆོག་ང་རང་ཁྱེད་ལ༌བརྟེན། །ཁྱེད་ཀྱིས་ང་རང་སྐྱེངས་སུ་མི་འཇུག༌ཅིང༌། །དགྲ་རྣམས་ང་ལས་རྒྱལ་དུ་མི་འཇུག༌མཁྱེན།།
PSA 25:3 ཁྱེད་ལ་སྒུག་མཁན་ནམ་ཡང་སྐྱེངས་མི༌འགྱུར། །དོན་མེད་གཡོ་སྒྱུ་བྱེད་མཁན་ངོ་ཚར༌སྦྱོར།།
PSA 25:4 ཡ་ཝཱེ་ཁྱེད་ཀྱི་ཕེབས་ལམ་ང་ལ༌སྟོན། །ཁྱེད་ཀྱི་ལམ་བུ་ང་ལ་སྟོན་པར༌མཛོད།།
PSA 25:5 ཁྱེད་ནི་ང་ཡི་སྲོག་སྐྱོབ་དཀོན་མཆོག༌ཡིན། །བདག་གིས་ཉིན་གང་ཁྱེད་ལ་སྒུག་པ༌ཡིན། །བདེན་པ་ཉིད་ནང་འཁྲིད་ཅིང་སྟོན་པར༌མཛོད།།
PSA 25:6 ཀྱེ་ཀྱེ་ཡ་ཝཱེ་གདོད་ནས་ཡོད་པ༌ཡི། །བྱམས་དང་སྙིང་རྗེ་ཐུགས་སུ་དྲན་དུ༌གསོལ།།
PSA 25:7 ང་རང་གཞོན་ནུའི་དུས་ཀྱི་སྡིག་པ༌དང༌། །ཉེས་སྐྱོན་རྣམས་ནི་དྲན་པར་མི་མཛད༌ཅིང༌། །ཡ་ཝཱེ་ཁྱེད་ཀྱི་བཀའ་དྲིན་དབང་གིས༌ནི། །བྱམས་བརྩེ་བཞིན་དུ་ང་རང་ཐུགས་སུ༌ཟུངས།།
PSA 25:8 ཡ་ཝཱེ་ལེགས་ཤིང་དྲང་པོ་ཡིན་པས༌ན། །སྡིག་ཅན་རྣམས་ལ་ལམ་སྟོན་མཛད་པ༌འོ།།
PSA 25:9 ཁེངས་སྐྱུང་ཅན་རྣམས་དྲང་གཞག་ནང་དུ༌འཁྲིད། །ཉིད་ཀྱི་གཤེགས་ལམ་དེ་ཚོར་སྟོན་བྱེད༌དོ།།
PSA 25:10 ཡ་ཝཱེའི་ཞལ་ཆད་སྒྲིག་ཁྲིམས་སྲུང་མཁན༌ལ། །ཁོང་ནི་བྱམས་ཤིང་ཡིད་རྟོན་རུང་བ༌ཡིན།།
PSA 25:11 བདག་གི་སྡིག་ཉེས་ཤིན་ཏུ་ཚབས་ཆེ༌བས། །ཀྱེ་ཀྱེ་ཡ་ཝཱེ་ཁྱེད་ཀྱི་མཚན་གྱི༌ཕྱིར། །ང་ཡི་སྡིག་ཉེས་ཁྱེད་ཀྱིས་སེལ་བར༌མཛོད།།
PSA 25:12 ཡ་ཝཱེར་གུས་ཤིང་འཇིགས་པ་སུ་ཡོད༌དམ། །ཁོང་གིས་དེ་ལ་འདེམས་འོས་ལམ་ཕྱོགས་སྟོན།།
PSA 25:13 དེས་ནི་དགའ་བདེའི་དཔལ་ལ་རོལ་བ༌དང༌། །བུ་རྒྱུད་རྣམས་ལ་ས་གཞི་འཐོབ་པར༌འགྱུར།།
PSA 25:14 ཡ་ཝཱེས་ཉིད་ཀྱི་ཐུགས་དགོངས་ཅི་ཡིན༌པ། །ཁོང་ལ་གུས་ཤིང་འཇིགས་པའི་མི་ལ༌མངོན། །ཁོང་གི་ཞལ་ཆད་ཀྱང་ནི་སྟོན་པར༌འགྱུར།།
PSA 25:15 ཡ་ཝཱེས་བདག་གི་རྐང་པ་རྙི་ལས༌དགྲོལ། །ང་ཡི་མིག་གིས་དུས་རྒྱུན་ཁོང་ལ༌བལྟ།།
PSA 25:16 ང་རང་གྲོགས་མེད་ཉམ་ཐག་ཡིན་པས༌ན། །ངའི་ཕྱོགས་འཁོར་ནས་དྲིན་གྱིས་སྐྱོང་བར༌མཛོད།།
PSA 25:17 ང་ཡི་སེམས་ཀྱི་སྐྱོ་གདུང་རབ་ཏུ༌འཕེལ། །ཁྱེད་ཀྱིས་སྡུག་བསྔལ་ལས་ང་སྐྱབས་སུ༌གསོལ།།
PSA 25:18 ང་ཡི་སྐྱོ་གདུང་དཀའ་ངལ་ལ་གཟིགས༌ཤིང༌། །བདག་གི་སྡིག་པ་ཐམས་ཅད་སེལ་བར༌མཛོད།།
PSA 25:19 བདག་གི་དགྲ་བོ་ཤིན་ཏུ་མང་བ༌དང༌། །ང་ལ་ཚད་མེད་སྡང་བས་གཟིགས་སུ༌གསོལ།།
PSA 25:20 ངའི་སྲོག་བསྲུངས་ནས་ང་རང་སྐྱོབ་པར༌མཛོད། །ཁྱེད་ལ་སྐྱབས་སུ་འགྲོ་བས་སྐྱེངས་མ༌འཇུག།
PSA 25:21 བདག་གི་རེ་བ་ཁྱེད་ལ་བཅོལ་བས༌ན། །རྣམ་དག་དྲང་པོས་ང་རང་སྐྱོབ་གྱུར༌ཅིག།
PSA 25:22 ཀྱེ་ཀྱེ་དཀོན་མཆོག་ཁྱེད་ཀྱིས་ཡེས་ར༌ཨེལ། །དེ་ཚོའི་དཀའ་སྡུག་ཀུན་ནས་ཐར་བར༌མཛོད།།
PSA 26:1 ༼དཱ་བིད་ཀྱི་མགུར༌མ།༽ བདག་གིས་སྔར་ནས་སྤྱོད་པ་དྲང་པོར༌སྤྱད། །གཡོ་བ་མེད་པར་ཁྱེད་ལ་བློ་གཏད༌པས། །ཀྱེ་ཀྱེ་ཡ་ཝཱེ་ང་ལ་དཀར་འདོན༌མཛོད།།
PSA 26:2 བདག་ལ་ཚོད་ལྟ་དང་ནི་བརྟག་པར༌མཛོད། །སེམས་ དང་སྙིང་ཁོང་རུས་པའི་གཏིང་ལ༌དཔྱོད།།
PSA 26:3 ཁྱེད་ཀྱི་བྱམས་བརྩེ་ནམ་རྒྱུན་མིག་མདུན༌དུ། །ཁྱེད་ཀྱི་བདེན་པའི་ལམ་ནང་འགྲུལ་བར༌བྱ།།
PSA 26:4 གཡོ་སྒྱུ་ཅན་གྱི་གྲལ་དུ་ང་མི༌འདུག །ཚུལ་འཆོས་ཅན་དང་འགྲོ་འོང་ངས་མི༌བྱེད།།
PSA 26:5 ངན་པའི་ཚོགས་ལ་ང་རང་སྡང་བ༌དང༌། །ངན་སྤྱོད་མཉམ་དུ་ང་རང་སྡོད་པ༌མིན།།
PSA 26:6 ཡ་ཝཱེ་བདག་གིས་ཉེས་མེད་མཚོན་ཕྱིར༌དུ། །ལག་ཟུང་བཀྲུས་ ནས་ཁྱེད་ཀྱི་མཆོད་ཁྲིར༌སྐོར།།
PSA 26:7 གཏང་རག་འབུལ་བའི་འབོད་སྒྲ་བསྒྲག་པ༌དང༌། །ངོ་མཚར་མཛད་པ་ཐམས་ཅད་བརྗོད་ཕྱིར༌རོ།།
PSA 26:8 ཡ་ཝཱེ་ཁྱེད་ཉིད་བཞུགས་སའི་གནས༌མཆོག་དང༌། །ཁྱེད་ཀྱི་གཟི་བརྗིད་གདན་སར་ང༌རང་དགའ།།
PSA 26:9 སྡིག་ཅན་ཁོངས་སུ་བདག་སེམས་མི་འཁྱེར༌ཞིང་། །ལག་དམར་ཁོངས་སུ་བདག་སྲོག་མི་ལེན༌རོགས།།
PSA 26:10 དེ་རྣམས་ལག་ཏུ་གཡོ་འཕྲུལ་ཡོད་པ༌དང༌། །གཡས་ལག་རྣམས་སུ་ལྐོག་རྔན་གྱིས་གང༌ངོ༌།།
PSA 26:11 འོན་ཀྱང་ང་རང་དྲང་པོར་འགྲུལ་བར༌བྱ། །ང་རང་བསྐྱབས་ནས་དྲིན་གྱིས་སྐྱོང་བར༌མཛོད།།
PSA 26:12 བདག་གི་རྐང་པ་བདེ་སྙོམས་ས་རུ༌ཚུགས། །ང་ཡིས་ཚོགས་ནང་ཡ་ཝཱེར་བསྟོད་པར༌བྱ།།
PSA 27:1 ༼དཱ་བིད་ཀྱི་མགུར༌མ།༽ ཡ་ཝཱེ་བདག་གི་འོད་དང་ཐར་པ༌ཡིན། །དེའི་ཕྱིར་ང་རང་སུ་ལ་འཇིགས་དགོས༌སམ། །ཡ་ཝཱེ་ང་ཡི་སྲོག་གི་སྟོབས་ཡིན༌པས། །ང་ནི་སུ་དང་གང་ལའང་སྐྲག་དོན༌མེད།།
PSA 27:2 ང་ལ་སྡང་བའི་ངན་སྤྱོད་དགྲ་རྣམས༌ནི། །ངའི་ཤ་བཟའ་བར་རུབས་དུས་ཐོགས་ཏེ༌འགྱེལ།།
PSA 27:3 དཔུང་གིས་ང་ལ་འཐབ་ཏུ་སྒར་བཏབ༌ཀྱང༌། །ང་ཡི་སེམས་ལ་འཇིགས་སྣང་གང་ཡང༌མེད། །ངའི་སྟེང་དམག་དཔུང་དྲངས་ཀྱང་བརྟན་པོར༌ཚུགས།།
PSA 27:4 བདག་གིས་ཡ་ཝཱེར་དོན་ཞིག་ཞུས་མྱོང༌ལ། །ད་ལྟ་ད་དུང་ང་ཡིས་འཚོལ་བ༌སྟེ། །ཚེ་གང་ཡ་ཝཱེའི་བཞུགས་གནས་སུ་བསྡད༌ནས། །ཁོང་གི་བཟང་པོ་མཇལ་བར་ཡར་བལྟ༌ཞིང༌། །ཁོང་གི་མཆོད་ཁང་ནང་དུ་བཀའ་འདྲི༌ཞུ།།
PSA 27:5 དེ་ནས་སྡུག་བསྔལ་འབྱུང་བའི་ཉིན་མོ༌ལ། །གུར་ཁང་ནང་དུ་སྦས་ནས་བསྲུང་བར༌འགྱུར། །གུར་མཆོག་ཕག་ཏུ་ང་རང་སྦ་བར༌མཛད། །བྲག་རྡོའི་སྟེང་དུ་ང་རང་འདེགས་པར༌བྱ།།
PSA 27:6 ད་ལྟ་བདག་གི་མགོ་བོ་ཡར་བཀྱགས༌ནས། །ང་རང་བསྐོར་བའི་དགྲ་ལས་མཐོ་བར༌མཛད། །ཁོང་གི་གུར་མཆོག་ནང་དུ་དགའ་སྤྲོས༌མཆོད། །མགུར་གླུ་ལེན་བཞིན་ཡ་ཝཱེར་བསྟོད་པ༌འབུལ།།
PSA 27:7 ཀྱེ་ཀྱེ་ཡ་ཝཱེ་བདག་གིས་འབོད་དུས༌སུ། །ཁྱེད་ཀྱིས་ང་ཡི་སྐད་ལ་གསན་པར༌མཛོད། །ང་ལ་སྙིང་རྗེ་མཛད་ཅིང་བཀའ་ལན༌གནོངས།།
PSA 27:8 ངའི་གདོང་ཚོལ་ཞིག་གསུངས་དུས་བདག་སེམས༌ཀྱིས། །ཡ་ཝཱེའི་ཞལ་ངོ་ང་ཡིས་འཚོལ་ཞེས༌ཞུ།།
PSA 27:9 ཁྱེད་ཀྱི་ཞལ་རས་བདག་ལ་མི་སྦ༌ཞིང༌། །ཐུགས་ཁྲོ་དང་བཅས་ཞབས་ཕྱི་མི་སྐྲོད་རོགས། །ཁྱེད་ཉིད་གདོད་ནས་ང་ཡི་སྡོངས་གྲོགས༌ཡིན། །བདག་གི་སྲོག་སྐྱོབ་ལགས་པའི་དཀོན་མཆོག༌ཀྱེ། །ང་རང་མ་སྤོང་བསྐྱུར་བར་མི་མཛད༌རོགས།།
PSA 27:10 བདག་གི་ཕ་མས་ང་རང་བསྐྱུར་ན༌ཡང༌། །ཡ་ཝཱེས་ང་ལ་སྣེ་ལེན་མཛད་པར༌འགྱུར།།
PSA 27:11 ཡ་ཝཱེ་ཁྱེད་ཀྱི་གཤེགས་ལམ་ང་ལ༌སྟོན། །དགྲ་ཡི་རྐྱེན་གྱིས་བདེ་སྙོམས་ལམ་དུ༌འཁྲིད།།
PSA 27:12 རྫུན་གྱི་དཔང་པོ་ལངས་ནས་ང་རྒོལ༌ཞིང༌། །ཁ་རུ་གདུག་རྩུབ་གཏམ་ངན་སྨྲ་བས༌ན། །ང་ནི་དགྲ་བོས་ཅི་མོས་བྱེད་མ༌འཇུག།
PSA 27:13 ཡ་ཝཱེའི་བཀའ་དྲིན་གསོན་ཡུལ་དུ་མཇལ༌བར། །ང་ལ་ཡིད་ཆེས་བརྟན་པོ་ཡོད་པ༌ཡིན།།
PSA 27:14 ཡ་ཝཱེར་སྒུགས་དང་ངར་ཤུགས་ཆེན་པོའི༌ངང༌། །སྙིང་རུས་བསྐྱེད་ནས་ཡ་ཝཱེར་སྒུག་པར༌གྱིས།།
PSA 28:1 ༼དཱ་བིད་ཀྱི་མགུར༌མ།༽ ཀྱེ་ཀྱེ་ཡ་ཝཱེ་ཁྱེད་ལ་འོ་དོད༌འབོད། །ང་ཡི་བྲག་རྡོ་ང་ལ་གསན་པར༌མཛོད། །གལ་ཏེ་ཁྱེད་ཉིད་ཞལ་རོག་བཞུགས་གྱུར༌ན། །ང་ནི་དུར་དུ་སྦས་པའི་མི་དང༌མཚུངས།།
PSA 28:2 བདག་གིས་ཁྱེད་ལ་འོ་དོད་འབོད་པ༌དང༌། །དམ་མཆོག་གནས་ཕྱོགས་ལག་པ་འདེགས་དུས༌སུ། །ཞུ་བ་འབུལ་བའི་སྐད་ལ་གསན་པར༌ཞུ།།
PSA 28:3 མི་ངན་སྡིག་སྤྱོད་མཉམ་དུ་ང་མ༌འདྲུད། །ཁྱིམ་མཚེས་རྣམས་ལ་དེ་ཚོས་ཚིག་འཇམ༌སྨྲ། །འོན་ཀྱང་སེམས་སུ་བསམ་ངན་བཅངས་ནས༌ཡོད།།
PSA 28:4 དེ་ཚོའི་ལས་དང་སྤྱད་པའི་དོན་ངན༌དང༌། །ལག་པས་ཅི་བྱས་བཞིན་དུ་ལན་གནང༌རོགས། །འོས་ཤིང་འཚམ་པའི་ལས་འབྲས་དེ་ཚོར༌གནོངས།།
PSA 28:5 དེ་ཚོས་ཡ་ཝཱེ་ཁོང་གི་མཛད་འཕྲིན༌དང༌། །ཕྱག་ལས་རྣམས་ལ་དོ་སྣང་མི་བྱེད༌པས། །ཁོང་གིས་དེ་རྣམས་བརླག་ཅིང་བསླང་མི༌བྱ།།
PSA 28:6 ཡ་ཝཱེ་ཁོང་ཉིད་བསྟོད་པར་འོས་པ༌སྟེ། །ཁོང་གིས་ང་ཡི་ཞུ་བར་གསན་པས༌སོ།།
PSA 28:7 ཡ་ཝཱེ་བདག་གི་སྟོབས་དང་ཕུབ་ཡིན༌ཏེ། །ངའི་སེམས་ཁོང་ལ་བརྟེན་ནས་སྐྱབས་མཛད༌པས། །ང་ཡི་ཡིད་སེམས་དགའ་བ་འབུམ་གྱིས༌མཉེས། །མགུར་མ་དང་བཅས་ཁོང་ལ་བསྟོད་བསྔགས༌འབུལ།།
PSA 28:8 ཡ་ཝཱེ་འབངས་མི་རྣམས་ཀྱི་སྟོབས་ཡིན༌ཞིང༌། །ཉིད་ཀྱིས་བྱུགས་པར་མཛད་པའི་ཐར་པའི༌རྫོང༌།།
PSA 28:9 ཁྱེད་ཀྱིས་ཉིད་ཀྱི་འབངས་མི་སྐྱོབ་པ༌དང༌། །ཁྱེད་ཀྱི་ནོར་སྐལ་ལ་ནི་བྱིན་གྱིས༌རློབས། །དེ་རྣམས་རྟག་ཏུ་སྐྱོང་ཞིང་འཁུར་དུ༌གསོལ།།
PSA 29:1 ༼དཱ་བིད་ཀྱི་མགུར༌མ།༽ ཀྱེ་ཀྱེ་ལྷ་ཡི་སྲས་རྣམས་ཡ་ཝཱེ༌ཡི། །གཟི་བརྗིད་ནུས་མཐུ་ལ་ནི་བསྔགས་པར༌གྱིས།།
PSA 29:2 ཡ་ཝཱེའི་མཚན་ལ་འབྱོར་བའི་བསྟོད་པ༌ཕུལ། །གཟབ་གོས་དམ་པ་གྱོན་ནས་ཡ་ཝཱེར༌ཐུད།།
PSA 29:3 ཡ་ཝཱེའི་གསུང་སྐད་ཆུ་རྣམས་སྟེང་དུ༌མཆིས། །དཔལ་ལྡན་དཀོན་མཆོག་གསུང་སྐད་འབྲུག་སྒྲར༌མཚུངས། །ཡ་ཝཱེས་ཆུ་ཆེན་རྣམས་སྟེང་འབྲུག་སྒྲ༌ལྡིར།།
PSA 29:4 ཡ་ཝཱེའི་གསུང་སྐད་མཐུ་སྟོབས་ལྡན་པ༌འོ། །ཡ་ཝཱེའི་གསུང་སྐད་ཟིལ་ཤུགས་ཀྱིས་ཁྱབ༌བོ།།
PSA 29:5 ཡ་ཝཱེའི་གསུང་སྐད་ཀྱིས་ནི་ཐང་ཤིང༌བཅག །ཡ་ཝཱེས་ལེ་པཱ་ནོན་གྱི་ཐང་ཤིང༌བཅག།
PSA 29:6 ཁོང་གིས་ལེ་པཱ་ནོན་ནི་བ་ཕྲུག་དང༌། །སིར་ཡོན་ གླང་རྒོད་ཕྲུག་ལྟར་མཆོང་བར༌མཛད།།
PSA 29:7 ཡ་ཝཱེའི་གསུང་སྐད་གློག་དམར་བཞིན་དུ༌འཁྱུག།
PSA 29:8 ཡ་ཝཱེའི་གསུང་སྐད་ཀྱིས་ནི་དབེན་སྟོང༌སྒུལ། །ཡ་ཝཱེས་ཀཱ་དེའི་ཤཱ་ཡི་དབེན་སྟོང༌གཡོ།།
PSA 29:9 ཡ་ཝཱེའི་གསུང་སྐད་ཀྱིས་ནི་ཤྭ་མོ༌དཀྲོག །དེ་ལ་ཤ་ཕྲུག་བཙའ་བའི་ཟུག་གཟེར༌བསྐྱེད། །ནགས་ཀྱི་ལྗོན་ཤིང་གཅེར་བུར་བཤུ་མཛད༌ཅིང༌། །ཁོང་གི་མཆོད་ཁང་ནང་གི་མི་ཀུན༌གྱིས། །ཇི་འདྲའི་གཟི་བརྗིད་ཆེ་ཨང་ཞེས་བརྗོད༌དོ།།
PSA 29:10 ཆུ་ལོག་འབྱུང་དུས་ཡ་ཝཱེ་རྒྱལ་ཁྲིར༌བཞུགས། །ཁོང་ཉིད་རྒྱུན་ནས་རྒྱུན་དུ་རྒྱལ་ཁྲིར༌བཞུགས།།
PSA 29:11 ཡ་ཝཱེས་འབངས་མི་ལ་ནི་སྟོབས་ཤུགས༌བསྩལ། །ཞི་བདེའི་བྱིན་རླབས་དེ་རྣམས་ལ་གནང༌ངོ༌།།
PSA 30:1 ༼དཱ་བིད་ཀྱི་མགུར་མ༌ཞིག བཞུགས་གནས་བསྔོ་བའི་མགུར༌མ།༽ ཀྱེ་ཀྱེ་ཡ་ཝཱེ་ཁྱེད་ཀྱིས་ང་ཡར༌འཐེན། །དགྲ་བོར་བདག་ལ་ངོམ་བཟོ་སྟོན་མ༌མཛད། །དེ་བས་བདག་གིས་ཁྱེད་ལ་བསྟོད་བསྔགས༌བརྗོད།།
PSA 30:2 ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ལགས། །ཁྱེད་ལ་འོ་དོད་བོས་པས་དྲག་སྐྱེད་གནང༌།།
PSA 30:3 ཡ་ཝཱེས་ང་རང་གཤིན་པོའི་ཡུལ་ནས༌བསྐྱབས། །དུར་ནང་མི་ལྷུང་ཕྱིར་དུ་གསོན་པོར༌བཞག།
PSA 30:4 ཀྱེ་ཀྱེ་ཡ་ཝཱེའི་དད་གུས་ལྡན་པ༌རྣམས། །ཁྱོད་ཚོས་ཡ་ཝཱེར་བསྟོད་དབྱངས་འབུལ་བར༌གྱིས། །ཁོང་གི་དམ་པའི་མཚན་ལ་བསྟོད་བསྔགས་ཕུལ།།
PSA 30:5 ཁོང་ཉིད་ཐུགས་དགོངས་ཚོམ་ཡང་ཡུད་ཙམ༌ལགས། །གང་ཉིད་ཐུགས་རྗེ་མི་ཚེ་གང་པོར་གནས། །མཚན་མོར་མིག་ཆུ་བཞུར་དགོས་བྱུང༌ན་ཡང་། །ཞོགས་པར་དགའ་མགུ་ཡི་རང་འབྱུང་བར༌འགྱུར།།
PSA 30:6 ང་རང་བདེ་བར་གནས་པའི་དུས་སྐབས༌སུ། །བདག་ནི་ནམ་ཡང་གཡོ་བར་མི་འགྱུར༌སྨྲས།།
PSA 30:7 ཀྱེ་ཀྱེ་ཡ་ཝཱེ་ཁྱེད་ཀྱི་ཐུགས་རྗེ༌ཡིས། །ང་རང་རི་རབ་བཞིན་དུ་བརྟན་པོར༌མཛད། །ཁྱེད་ཀྱི་ཞལ་རས་སྦས་པས་ང་རང༌ཞེད།།
PSA 30:8 ཡ་ཝཱེ་ཁྱེད་ལ་བདག་གིས་འོ་དོད༌བོས། །བདག་གིས་ཁྱེད་ལ་ཞུ་བ་ཡང་ནི༌ཕུལ།།
PSA 30:9 ང་རང་ཤི་ནས་དུར་སྦས་ཅི་ལ༌ཕན། །ཐལ་བས་ཁྱེད་ལ་བསྟོད་བསྔགས་བརྗོད་འོང༌ངམ། །ཁྱེད་ཉིད་ཡིད་རྟོན་རུང་བ་བསྒྲག་ནུས༌སམ།།
PSA 30:10 ཡ་ཝཱེ་བདག་ལ་གསན་ཞིང་སྙིང་རྗེ༌མཛོད། །ཁྱེད་ཀྱིས་ང་ལ་རོགས་རམ་མཛད་དུ༌གསོལ།།
PSA 30:11 ང་ཡི་མྱ་ངན་ཁྱེད་ཀྱིས་གར་དུ༌བསྒྱུར། །བདག་གི་རྩིད་རས་སྡུག་གོས་ཕུད་མཛད༌ཅིང༌། །ང་རང་དགའ་སྤྲོའི་གོས་ཀྱིས་གཡོགས་སོ༌ལོ།།
PSA 30:12 དེ་ནི་ང་ཡི་སེམས་ཀྱིས་མཚམས་མེད༌པར། །ཁྱེད་ལ་བསྟོད་དབྱངས་འབུལ་བའི་ཕྱིར་ཡིན༌ཞིང༌། །ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ལགས། །བདག་གིས་རྟག་ཏུ་ཁྱེད་ལ་གཏང་རག༌འབུལ།།
PSA 31:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེ་བདག་གིས་ཁྱེད་ལ་སྐྱབས་སུ༌བཅོལ། །ང་རང་ནམ་ཡང་ངོ་ཚར་མི་སྦྱོར༌མཁྱེན། །ཁྱེད་ཀྱི་དྲང་བདེན་ངང་ནས་ང་སྐྱོབ༌རོགས།།
PSA 31:2 སྙན་གྱིས་གསན་ཏེ་མྱུར་དུ་ང་སྐྱོབས༌ཤིག །ཁྱེད་ཉིད་བདག་གི་བྲག་རི་བརྟན་པོ༌དང༌། །སྐྱོབ་པར་བྱེད་པའི་སྐྱབས་སུ་འགྱུར་བར༌ཤོག།
PSA 31:3 ཁྱེད་ནི་ང་ཡི་བྲག་དང་རྫོང་ཡིན༌པས། །ཁྱེད་མཚན་ཕྱིར་དུ་འཁྲིད་ཅིང་ལམ་སྣ༌དྲོངས།།
PSA 31:4 ཁྱེད་ཉིད་བདག་གི་སྐྱབས་གནས་ཡིན་པས་ན། །མི་ཡིས་བཙུགས་པའི་རྙི་ལས་ཐར་བར༌མཛོད།།
PSA 31:5 རང་གི་རྣམ་ཤེས་ཁྱེད་ཀྱི་ཕྱག་ཏུ༌བཅོལ། །བདེན་པའི་དཀོན་མཆོག་ཡ་ཝཱེས་ང་རང༌བསྐྱབས།།
PSA 31:6 འཕྲུལ་སྣང་ཙམ་གྱི་ལྷ་སྐུར་བརྟེན་པ་ཡི། །མི་རྣམས་ལ་ནི་ང་རང་སྡང༌བ་དང་། །བདག་གིས་ཡ་ཝཱེ་ཁོང་ལ་བློ་གདེང༌བསྐྱེད།།
PSA 31:7 ང་ཡི་སྡུག་བསྔལ་ཁྱེད་ཀྱིས་གཟིགས་པ༌དང༌། །ང་ཡི་སེམས་སྡུག་ཁྱེད་ཀྱིས་མཁྱེན་ཡོད༌པས། །ཁྱེད་ཀྱི་བྱམས་བརྩེའི་ནང་དུ་དགའ་ཞིང༌མགུ།
PSA 31:8 ཁྱེད་ཀྱིས་ང་རང་དགྲའི་ལག་མ་གཏད༌པར། །བདག་གི་རྐང་པ་ཡངས་པའི་སར་བཞག༌གོ།
PSA 31:9 བདག་ནི་དཀའ་སྡུག་གནས་སུ་ལྷུང་བས༌ན། །ཀྱེ་ཀྱེ་ཡ་ཝཱེ་སྙིང་རྗེས་གཟིགས་སུ༌གསོལ། །སེམས་སྡུག་དབང་གིས་མིག་ཟུང་རབ་རིབ་གྱུར། །ཐ་ན་ལུས་དང་སེམས༌ཀྱི་ཤུགས་ཀྱང་ཉམས།།
PSA 31:10 ང་ཡི་ཚེ་སྲོག་སྐྱོ་གདུང་དབང་གིས༌ཟད། །བདག་གི་ལོ་ཟླ་འཁུན་སྒྲ་དང་བཅས༌བཞུད། །ཉེས་པའི་རྐྱེན་གྱིས་ཤེད་ཟད་རུས་པ༌བསྐམས།།
PSA 31:11 དགྲ་རྣམས་དབང་གིས་ཀུན་གྱིས་བརྙས་པར༌བྱ། །ཁྱིམ་མཚེས་མདུན་དུ་དེ་ལས་ཐུ་བ༌ཡིན། །ངོ་ཤེས་ཐམས་ཅད་བདག་ལ་འཇིགས་པ༌དང༌། །ཕྱི་ནས་ང་རང་མཐོང་མཁན་བྱོལ་ནས༌འགྲོ།།
PSA 31:12 གཤིན་པོ་ལྟར་དུ་ང་རང་གཞི་ནས༌བརྗེད། །བདག་ནི་རྫ་ཆག་ལྟ་བུར་གྱུར་པ༌ཡིན།།
PSA 31:13 མང་པོས་གཏམ་ངན་སྒྲོག་པ་བདག་གིས༌ཐོས། །འཇིགས་སྣང་ཕྱོགས་བཞིར་ཁྱབ་ནས་འདུག་པ༌འོ། །དེ་རྣམས་ཕྱོགས་གཅིག་འདུས་ཏེ་གྲོས་བྱས༌ནས། །བདག་གི་ཚེ་སྲོག་གཅོད་པའི་ཇུས་འགོད༌ཀྱང༌།།
PSA 31:14 ཡ་ཝཱེ་བདག་གིས་ཁྱེད་ལ་བློ་གཏོད༌ཅིང༌། །ཁྱེད་ཉིད་ང་ཡི་དཀོན་མཆོག་ཡིན་ཞེས༌སྨྲ།།
PSA 31:15 བདག་གི་མི་ཚེ་ཁྱེད་ཀྱི་ཕྱག་ཏུ༌ཡོད། །དགྲ་དང་འཚེ་མཁན་རྣམས་ལས་བདག་སྐྱོབ་རོགས།།
PSA 31:16 ཁྱེད་ཀྱི་ཞབས་ཕྱིར་ཞལ་མདངས་སྣང་བར༌མཛོད། །ཁྱེད་ཀྱི་བྱམས་བརྩེའི་ངང་ནས་སྐྱབས་སུ༌གསོལ།།
PSA 31:17 ཀྱེ་ཀྱེ་ཡ་ཝཱེ་བདག་གིས་ཁྱེད་ལ༌ནི། །འོ་དོད་བོས་པས་ངོ་ཚར་མི་སྦྱོར༌མཁྱེན། །སྡིག་སྤྱོད་ངོ་ཚར་སྦྱར་ནས་ཁོ་རྣམས༌ནི། །གཤིན་པོའི་ཡུལ་དུ་གྲགས་འགུལ་མེད་པར༌མཛོད།།
PSA 31:18 ང་རྒྱལ་མཐོང་ཆུང་དང་བཅས་དྲང་པོ༌ལ། །ཁེངས་གཏམ་སྨྲ་ཞིང་རྒོལ་བར་བྱེད་པ༌ཡི། །རྫུན་གྱི་མཆུ་སྒྲོས་ལྐུགས་པར་གྱུར་ཅིག༌གུ།
PSA 31:19 ཁྱེད་ལ་གུས་ཤིང་འཇིགས་པ་རྣམས་ཀྱི༌ཕྱིར། །བཞག་པའི་བཀའ་དྲིན་ཇི་ལྟར་ཆེ་བ༌ལ། །དེ་ནི་ཁྱེད་ལ་སྐྱབས་སུ་འགྲོ་མཁན༌ཕྱིར། །འཇིག་རྟེན་མི་བུ་རྣམས་ཀྱི་མཐོང་ངོར༌བཤམས།།
PSA 31:20 མི་ཡི་བྱུས་ངན་དག་ལས་དེ་རྣམས༌ནི། །ཁྱེད་དྲུང་ལྐོག་གྱུར་གནས་སུ་སྦ་བར༌འགྱུར། །ཁ་རྩོད་དག་ལས་གུར་ཁང་ནང་དུ༌སྲུང༌།།
PSA 31:21 དགྲ་ཡིས་བསྐོར་བའི་མཁར་ནང་ང་རང༌ལ། །བྱམས་བརྩེ་ཧང་སང་བསྟན་པས་ཡ་ཝཱེར༌བསྟོད།།
PSA 31:22 ཞེད་སྣང་ཁྲོད་དུ་བདག་གིས་འདི་ལྟར༌དུ། །ང་རང་ཁྱེད་ཀྱི་དྲུང་ནས་ཕྲལ་ཞེས༌སྨྲས། །འོན་ཀྱང་བདག་གིས་འོ་དོད་འབོད་དུས༌སུ། །ཁྱེད་ཀྱིས་ང་ཡི་ཞུ་བར་གསན་པ༌འོ།།
PSA 31:23 ཀྱེ་ཀྱེ་ཡ་ཝཱེའི་དད་གུས་ལྡན་པ༌རྣམས། །ཐམས་ཅད་ཁོང་ལ་དགའ་བར་གྱིས་ཤིག༌ཨང༌། །ཡ་ཝཱེས་དྲང་པོ་རྣམས་ནི་བསྲུང་མཛད༌ཅིང༌། །ང་རྒྱལ་ཅན་ལ་བཀའ་ཆད་ནན་མོ༌གནང༌།།
PSA 31:24 ཡ་ཝཱེར་རེ་ལྟོས་བྱེད་མཁན་ཐམས་ཅད༌ནི། །སྙིང་སྟོབས་བསྐྱེད་ནས་བློ་རྩ་བརྟན་པར༌གྱིས།།
PSA 32:1 ༼དཱ་བིད་ཀྱི་བསླབ་བྱའི་མགུར༌མ།༽ གང་གི་ཉེས་པ་བསལ་བས་བྱིན་རླབས༌ཆེ། །གང་གི་སྡིག་པ་བཀབ་པས་མི་དེ༌བདེ།།
PSA 32:2 སེམས་སུ་གཡོ་སྒྱུ་མེད་ཅིང་ཡ་ཝཱེ༌ཡིས། །སྡིག་པ་ཅན་དུ་མི་བརྩི་བ་དེ༌བདེ།།
PSA 32:3 བདག་གིས་སྡིག་པ་ཁས་ལེན་མི་བྱེད༌པར། །ཁ་རོག་འདུག་དུས་ཉིན་གང་འཁུན་སྒྲ༌འབྱིན། །སྡུག་བསྔལ་ཆེ་བས་རུས་ཟུངས་ཡོངས་སུ༌ཤོར།།
PSA 32:4 ཁྱེད་ཕྱག་ངའི་སྟེང་ཉིན་མཚན་ཀུན་ཏུ༌མནན། །བདག་ནི་སྟོབས་ཟད་དབྱར་གྱི་ཐན་པ༌བཞིན།།༼ སེ༌ལཱ། ༽
PSA 32:5 བདག་གིས་སྦ་གསང་ཅི་ཡང་མེད་པའི༌ངང༌། །སྡིག་པ་ཐམས་ཅད་མཐོལ་ནས་འདི་ལྟར༌དུ། །ཡ་ཝཱེར་ཉེས་སྐྱོན་ཁས་ལེན་བྱ་ཞེས༌སྨྲས། །ཁྱེད་ཀྱིས་བདག་གི་སྡིག་པའི་མཇུག་འབྲས༌བསལ།། ༼ སེ༌ལཱ། ༽
PSA 32:6 དེའི་ཕྱིར་དད་གུས་ཅན་གྱིས་རྩེ་གཅིག༌གིས། །ཁྱེད་རྙེད་ཐུབ་དུས་གསོལ་བ་འདེབས་པར༌སྨོན། །ཆུ་ལོག་ཆེན་པོ་འོང་བའི་དུས་དེ༌ལ། །དེ་ནི་ཁོ་ཡི་གམ་དུ་བཞུར་མི༌སྲིད།།
PSA 32:7 ཁྱེད་ནི་བདག་གི་སྦས་ས་ཡིན་པ༌དང༌། །ཁྱེད་ཀྱིས་ང་རང་དཀའ་སྡུག་རྣམས་ལས༌བསྲུང༌། །ཐར་པའི་མགུར་མས་ཕྱོགས་བཞིར་ང་རང༌བསྐོར།།༼ སེ༌ལཱ། ༽
PSA 32:8 ང་ཡིས་ཁྱོད་ལ་བསླབ་བྱ་སྦྱིན་པ༌དང༌། །འགྲུལ་བར་འོས་པའི་ལམ་ཡང་སྟོན་པར༌བྱ། །བལྟ་སྐྱོང་བྱེད་ཅིང་གྲོས་ཀྱང་འདེབས༌པ་འོ།།
PSA 32:9 གོ་མེད་རྟ་དྲེལ་བཞིན་དུ་མ་གྱུར༌ཅིག །དེ་རྣམས་སྲབ་མཐུར་བསྐོན་ནས་འདུལ་དགོས༌ཤིང༌། །དེ་བཞིན་མ་བྱས་ཉེ་བར་བཏུད་པ༌མིན།།
PSA 32:10 སྡིག་སྤྱོད་ཅན་ལ་སྡུག་བསྔལ་མང་དུ༌འབྱུང༌། །འོན་ཀྱང་ཡ་ཝཱེར་སྐྱབས་སུ་འགྲོ་བ༌རྣམས། །བྱམས་བརྩེ་ཆེན་པོས་ངེས་པར་མཐའ་ནས༌བསྐོར།།
PSA 32:11 གཞུང་དྲང་ཡ་ཝཱེར་བརྟེན་ནས་དགའ་བར༌གྱིས། །ཡིད་སེམས་དྲང་བ་རྣམས་ཀྱིས་ཀི་སྒྲ༌སྒྲོགས།།
PSA 33:1 དྲང་པོས་ཡ་ཝཱེར་བརྟེན་ནས་དགའ་འབོད༌བྱོས། །བསྟོད་དབྱངས་འབུལ་བ་ཁྱེད་ཚོར་འཚམ་པ༌ཡིན།།
PSA 33:2 ཡ་ཝཱེར་པི་ཝང་དཀྲོལ་ནས་གཏང་རག༌ཕུལ། །རྒྱུད་བཅུའི་རྒྱུད་མངས་འཁྲོལ་ཞིང་མགུར་དབྱངས༌ཕུལ།།
PSA 33:3 ཁོང་ལ་མགུར་མ་གསར་པ་ལེན་པ༌དང༌། །དགའ་འབོད་བྱེད་ཅིང་བྱང་ཆ་ལྡན་པར༌དཀྲོལ།།
PSA 33:4 ཁོང་གི་བཀའ་ནི་དྲང་ཞིང་བདེན་པ༌དང༌། །འཕྲིན་ལས་མཐའ་དག་ཐུགས་རྒྱུད་དྲང་པོས༌མཛད།།
PSA 33:5 དྲང་བདེན་དྲང་གཞག་ལ་ནི་ཡ་ཝཱེ༌མཉེས། །ཁོང་གི་བྱམས་བརྩེ་ས་གཞི་ཡོངས་སུ༌ཁྱབ།།
PSA 33:6 ཁོང་གི་བཀའ་ཡིས༌ནམ་མཁའ་མཛད་པ་དང་། །ཞལ་དབུགས་ཀྱིས་ནི་སྐར་ཚོགས་མཐའ་དག༌བཀོད།།
PSA 33:7 རྒྱ་མཚོའི་ཆུ་རྣམས་བསྡུས་ནས་རགས་སུ༌གྲུབ། །གཏིང་ཟབ་ཆུ་རྣམས་བང་མཛོད་ནང་དུ༌བཅུག།
PSA 33:8 ས་གཞི་ཡོངས་སུ་ཡ་ཝཱེར་འཇིགས་པ༌དང༌། །འཇིག་རྟེན་མི་ཀུན་ཁོང་ལ་གུས་པར༌ཤོག།
PSA 33:9 ཁོང་གིས་གསུངས་པར་མཛད་པས་དེ་ལྟར༌བྱུང༌། །བཀའ་བསྒོ་གནང་བ་ཇི་བཞིན་སྣང་གྱུར༌ཏོ།།
PSA 33:10 ཡ་ཝཱེས་ཕྱི་པའི་གྲོས་རྣམས་འཇིག་པར༌མཛད། །མི་སྡེ་རྣམས་ཀྱི་བསམ་སྦྱོར་འཆོལ་བར༌མཛད།།
PSA 33:11 ཡ་ཝཱེའི་ཐུགས་བཀོད་དུས་རྒྱུན་བརྟན་པ༌དང༌། །ཁོང་གི་ཐུགས་དགོངས་མི་རབས་ཀུན་ཏུ༌གནས།།
PSA 33:12 ཡ་ཝཱེ་དཀོན་མཆོག་ལགས་པའི་མི་རིགས༌བདེ། །ཁོང་གིས་བདག་ཕྱིར་བདམས་པའི་མི་རྣམས་བདེ།།
PSA 33:13 ཡ་ཝཱེས་ནམ་མཁའི་མཐོངས་ནས་གཟིགས་པ༌དང༌། །འཇིག་རྟེན་མིའི་རིགས་ཀུན་ལ་གཟིགས་པར༌མཛད།།
PSA 33:14 ཁོང་གིས་ཉིད་ཀྱི་བཞུགས་པའི་གནས་དེ༌ནས། །ས་གཞིའི་སྟེང་གི་ཡུལ་མི་ཀུན་ལ༌གཟིགས།།
PSA 33:15 ཀུན་པོའི་སྙིང་གི་མཛད་པོ་ཁོང་ཉིད༌ཡིན། །མི་ཡི་བྱ་གཞག་ཐམས་ཅད་མཁྱེན་པ༌འོ།།
PSA 33:16 དམག་དཔུང་ཆེ་བས་རྒྱལ་པོ་ཐར་མི༌འགྱུར། །སྟོབས་ཤུགས་ཆེ་བས་གྱད་མི་འཆོར་མི༌འགྱུར།།
PSA 33:17 རྟ་ནི་སྲོག་སྐྱོབ་ཕྱིར་དུ་ཕན་མེད༌ཡིན། །རྟ་མཆོག་སྟོབས་ཤུགས་ཆེ་ཡང་སྐྱོབ་མི༌ནུས།།
PSA 33:18 ཀྱེ་ཧོ་ཡ་ཝཱེར་གུས་ཤིང་འཇིགས་པ༌དང༌། །ཁོང་གི་བྱམས་བརྩེར་རེ་ལྟོས་བྱེད་མཁན༌ལ། །ཁོང་གི་སྤྱན་གྱིས་གཟིགས་སྐྱོང་མཛད་པ༌ཡིན།།
PSA 33:19 དེ་རྣམས་སྲོག་ནི་འཆི་བ་ལས་སྒྲོལ༌ཞིང༌། །མུ་གེའི་དུས་སུ་གསོན་པོར་འཇོག་པ༌ཡིན།།
PSA 33:20 བདག་ཅག་སེམས་ཀྱིས་ཡ་ཝཱེར་སྒུག་པ༌ཡིན། །ཁོང་ནི་ང་ཚོའི་སྐྱབས་དང་ཕུབ་ཡིན༌ནོ།།
PSA 33:21 ཁོང་གི་དམ་པའི་མཚན་ལ་བློ་གཏོད༌པས། །རང་ཅག་སྙིང་ནི་ཁོང་ལ་བརྟེན་ནས༌མགུ།
PSA 33:22 ཀྱེ་ཀྱེ་ཡ་ཝཱེ་ངེད་ཅག་རེ་ལྟོས༌བཞིན། །ཉིད་ཀྱི་བྱམས་བརྩེ་ང་ཚོར་གནང་བར༌ཤོག།
PSA 34:1 ༼ཨ་བི་མེ་ལེག་གི་གམ་དུ་དཱ་བིད་ཀྱིས་སྨྱོ་ཁུལ་བྱས་ཤིང་དེས་ཁོ་བསྐྲད་ནས་ཆས་པའི་དུས་ཀྱི་མགུར༌མ།༽ ཡ་ཝཱེར་ང་ཡིས་རྒྱུན་དུ་བསྟོད་བསྔགས༌བརྗོད། །ཁོང་གི་བསྟོད་ཚིག་རྟག་ཏུ་ངའི་ཁར༌གནས།།
PSA 34:2 ཡ་ཝཱེའི་དབང་གིས་བདག་སེམས་ཡིད་ཆེས༌ཁེངས། །ཉམ་ཆུང་རྣམས་ཀྱིས་ཐོས་པས་དགའ་བར༌འགྱུར།།
PSA 34:3 ང་དང་ལྷན་ཅིག་ཡ་ཝཱེའི་ཆེ་བ༌བརྗོད། །ང་ཚོས་མཉམ་དུ་ཁོང་གི་མཚན་ལ༌བསྟོད།།
PSA 34:4 ང་ཡིས་ཁོང་ལ་ཞུས་པས་བཀའ་ལན༌གནང༌། །འཇིགས་པ་ཀུན་ལས་ང་རང་ཐར་བར༌མཛད།།
PSA 34:5 ཁོང་ལ་རེ་ལྟོས་འཆང་མཁན་འཛུམ་མདངས༌རྒྱས། །དེ་ཚོའི་གདོང་ནི་ནམ་ཡང་ནོངས་མི༌འགྱུར།།
PSA 34:6 ཉམ་ཆུང་མི་འདིའི་འོ་དོད་ཡ་ཝཱེས༌གསན། །དཀའ་སྡུག་ཀུན་ལས་ཁོང་གིས་ཐར་བར༌མཛད།།
PSA 34:7 ཡ་ཝཱེར་གུས་ཤིང་འཇིགས་པའི་མཐའ་སྐོར༌དུ། །ཁོང་གི་ཕོ་ཉས་དམག་སྒར་བཏབ་ནས༌སྐྱོབ།།
PSA 34:8 ཡ་ཝཱེ་ཇི་འདྲ་ལེགས་པ་ཉམས་སུ༌མྱོངས། །ཁོང་ལ་སྐྱབས་སུ་འགྲོ་བའི་མི་རྣམས༌བདེ།།
PSA 34:9 ཡ་ཝཱེར་གུས་ཤིང་འཇིགས་པར་ཕོངས་པ༌མེད། །དེའི་ཕྱིར་ཁོང་གི་སྐྱེས་བུ་དམ་པ༌རྣམས། །ཁྱོད་རྣམས་ཁོང་ལ་གུས་ཤིང་འཇིགས་པར༌གྱིས།།
PSA 34:10 སེང་དར་ཡིན་ཡང་རྒུད་ཅིང་ལྟོགས་ངེས༌མོད། །ཡ་ཝཱེ་འཚོལ་མཁན་མི་ལ་ཅང་མི༌ཆད།།
PSA 34:11 ཕྲུ་གུ་ཁྱོད་རྣམས་ཤོག་དང་ང་ལ༌ཉོན། །ཡ་ཝཱེར་གུས་ཤིང་འཇིགས་པའི་ལུགས་བསླབ༌ཡོང༌།།
PSA 34:12 ཚེ་སྲོག་གཅེས་སུ་འཛིན་ཞིང་ཚེ་རིང༌ནས། །སྐྱིད་ལ་རོལ་བར་འདོད་པ་སུ་ཡོད༌ན།།
PSA 34:13 ཚིག་ངན་སྨྲ་བའི་ལྕེ་ནི་བསྡམ་དགོས་ཤིང་། །མཆུ་ཏོའི་གཡོ་སྒྱུ་རྣམས་ཀྱང་བསྲུང་བར་གྱིས།།
PSA 34:14 ངན་པ་སྤངས་ནས་བཟང་པོའི་ལས་བྱེད༌ཅིང༌། །ཞི་མཐུན་འཚོལ་ཞིང་རྩེ་གཅིག་གིས་ནི༌སྙེགས།།
PSA 34:15 ཡ་ཝཱེའི་སྤྱན་གྱིས་དྲང་བདེན་མི་ལ༌གཟིགས། །ཁོང་གི་སྙན་གྱིས་དེ་ཚོའི་འོ་དོད༌གསན།།
PSA 34:16 སྡིག་སྤྱོད་རྗེས་ཤུལ་ས་ལས་ཡལ་བའི༌ཕྱིར། །དེ་རྣམས་ལ་ནི་ཡ་ཝཱེའི་ཞལ་རས༌འགྱུར།།
PSA 34:17 དྲང་པོའི་འོ་དོད་ཡ་ཝཱེས་གསན་པ༌དང༌། །དེ་རྣམས་དཀའ་སྡུག་ཀུན་ལས་ཐར་བར༌མཛད།།
PSA 34:18 ཡ་ཝཱེ་ཡིད་སེམས་སྐྱོ་བའི་མི་ལ༌བཅར། །སེམས་ཁམས་སྡུག་གིས་མནར་བ་ཁོང་གིས༌བསྐྱབ།།
PSA 34:19 དྲང་བདེན་མི་ལ་དཀའ་སྡུག་མང་ན༌ཡང༌། །ཡ་ཝཱེས་དེ་ནི་ཡོངས་སུ་སྐྱོབ་པ༌ཡིན།།
PSA 34:20 ཁོང་གིས་མི་དེའི་རུས་པ་ཐམས་ཅད༌བསྲུང༌། །རུས་རྐང་གཅིག་ཀྱང་འཆག་པར་མི་འགྱུར༌རོ།།
PSA 34:21 མི་དགེས་སྡིག་སྤྱོད་སྲོག་ནི་གཅོད་པར༌བྱེད། །དྲང་པོར་སྡང་མཁན་ཉེས་ཅན་དུ་བརྩི༌འོ།།
PSA 34:22 ཡ་ཝཱེས་ཉིད་ཀྱི་ཞབས་ཕྱིའི་སྲོག་སྐྱོབ༌ཅིང༌། །ཁོང་ལ་སྐྱབས་སུ་འགྲོ་ཀུན་ཉེས་མེད༌བརྩི།།
PSA 35:1 ༼དཱ་བིད་ཀྱི་མགུར༌མ།༽ ང་དང་རྩོད་པའི་མི་རྣམས༌ལ། །ཡ་ཝཱེ་ཁྱེད་ཀྱིས་རྩོད་པར༌མཛོད། །ང་དང་འཐབ་པའི་མི་རྣམས༌ལ། །ཁྱེད་ཀྱིས་འཐབ་མོ་མཛད་དུ༌གསོལ།།
PSA 35:2 ཕུབ་དང་ཕ་ལི་བསྣམས་མཛད༌དེ། །ང་ཡི་གྲོགས་སུ་བཞེང་བར་ཞུ།།
PSA 35:3 མདུང་དང་དགྲ་སྟ་བཏོན་ནས༌ནི། །ང་རང་འདེད་མཁན་འགོག་པར༌མཛོད། །ཁྱོད་ཀྱི་སྐྱབས་ནི་ང་ཡིན༌ཞེས། །བདག་གི་སེམས་ལ་གསུང་དུ༌གསོལ།།
PSA 35:4 ང་ཡི་སྲོག་ལ་རྔམ་མཁན༌རྣམས། །སྐྱེངས་ཤིང་ངོ་ནི་ཚ་བར༌ཤོག །ང་ལ་གནོད་སྐྱེལ་གྲོས་བྱེད༌རྣམས། །ཕམ་པར་གྱུར་ཏེ་ནོངས་པར་ཤོག།
PSA 35:5 དེ་དག་རླུང་འཁྱེར་ཕུབ་མ༌ལྟར། །ཁོང་གི་ཕོ་ཉས་སྐྲོད་པར༌ཤོག།
PSA 35:6 ལམ་ནི་མུན་ཞིང་འདྲེད་གྱུར༌ཅིག །ཁོང་གི་ཕོ་ཉས་འདེད་པར༌ཤོག།
PSA 35:7 དེ་ཚོས་དོན་མེད་ང་ཡི༌ཕྱིར། །རྙི་རྒྱ་བཙུགས་ཤིང་རྒྱུ་མེད༌པར། །ངའི་སྲོག་ལེན་ཕྱིར་དོང་བྲུས༌མྱོང༌།།
PSA 35:8 དེ་ཚོར་ཆག་སྒོ་ཐོལ་གྱིས༌འབྱུང༌། །རང་གིས་བཙུགས་པའི་རྙི་རུ༌འཚུད། །དེའི་ནང་ལྷུང་ནས་འཕུང་གྱུར༌ཅིག།
PSA 35:9 ངའི་སེམས་ཡ་ཝཱེའི་ནང་དགའ༌ཞིང༌། །ཁོང་གི་སྐྱབས་ནང་སྤྲོ་བར༌འགྱུར།།
PSA 35:10 སྟོབས་ལྡན་དག་ནས་དབུལ་པོ༌སྐྱོབ། །དབུལ་ཕོངས་ནོར་མེད་ཇག་པ༌ལས། །ཐར་བར་མཛད་མཁན་ལགས་པ༌ཡི། །ཡ་ཝཱེ་ཁྱེད་འདྲ་སུ་ཡོད༌ཅེས། །ང་ཡི་རུས་པ་ཀུན་གྱིས༌ཞུ།།
PSA 35:11 དཔང་པོ་གདུག་རྩུབ་ཅན་ལངས༌ནས། །ང་ལ་རྒྱུས་མེད་གཏམ་དག༌འདྲི།།
PSA 35:12 དེ་ཚོས་བཟང་ལན་ངན་འཇལ༌གྱིས། །ངའི་སེམས་ཕམ་ཞིང་ཁེར་རྐྱང༌ལུས།།
PSA 35:13 ཁོ་རྣམས་ན་དུས་ང་ཡིས༌ནི། །སྡུག་གོས་གྱོན་ཏེ་སྨྱུང་གནས༌བསྲུངས། །རང་སེམས་བཏུལ་ཞིང་སྨོན་ལམ༌ནི། །ཡང་ནས་ཡང་དུ་བཏབ་པ༌ཡིན།།
PSA 35:14 དེ་ཚོར་གྲོགས་དང་སྤུན་ལྟར༌བྱམས། །མའི་ཕྱིར་མྱ་ངན་བྱེད་པ༌ལྟར། །མགོ་བོ་བསྒུར་ནས་སྡུག་བསྔལ༌བྱས།།
PSA 35:15 འོན་ཀྱང་ང་རང་འཁྱོར་དུས༌སུ། །དེ་རྣམས་སྤྲོ་ཞིང་ལྷན་དུ༌འཚོགས། །རྒྱུས་མེད་འདུས་ནས་ང་ལ༌རྒོལ། །རྒྱུན་ཆད་མེད་པར་བརྙས་བཅོས༌བཏང༌།།
PSA 35:16 མགྲོན་དུ་རྩུབ་མོ་ཚིག་གིས༌འཕྱས། །དེ་ཚོས་ང་ལ་སོ་ཡང༌འཆོས།།
PSA 35:17 གཙོ་བོ་ནམ་ཞིག་བར་དུ༌གཟིགས། །བདག་སེམས་དེ་ཚོའི་གནོད་འཚེ༌དང༌། །གཅེས་སྲོག་སེང་དར་ལས་སྐྱོབ༌རོགས།།
PSA 35:18 ཚོགས་ཆེན་ནང་དུ་གཏང་རག༌འབུལ། །མི་མང་ཁྲོད་དུ་ཁྱེད་ལ༌བསྟོད།།
PSA 35:19 དོན་མེད་ངའི་དགྲར་གྱུར་པ༌རྣམས། །ཁྲེལ་དགོད་བྱེད་པར་མ་གནང༌ཞིག །རྐྱེན་མེད་བདག་ལ་སྡང་བ༌དག །ང་ལ་སྡང་མིག་བགྲད་མ༌འཇུག།
PSA 35:20 དེ་ཚོས་ཞི་མཐུན་མི་གླེང༌ཁར། །ཡུལ་དེའི་ཞི་འཇམ་མི་རྣམས༌ལ། །འཚེ་ཕྱིར་གཡོ་སྒྱུའི་སྦྱོར་བ༌སྤེལ།།
PSA 35:21 ཁ་ཆེར་གདངས་ཏེ་ང་ལ་རྒོལ། །ཨ་ཧ་ཨ་ཧ་ངེད་ཅག༌གི །མིག་གིས་མཐོང་བྱུང་ཞེས་སྨྲས༌སོ།།
PSA 35:22 ཡ་ཝཱེ་ཁྱེད་ཀྱིས་དེ་གཟིགས༌ཡོད། །ཁྱེད་རང་ཞལ་རོག་མི་བཞུགས༌མཁྱེན། །ང་དང་ཉེ་བར་བཞུགས་པར༌མཛོད།།
PSA 35:23 ང་ཡི་དཀོན་མཆོག་ངའི་གཙོ༌བོ། །ཐུགས་མཉམ་བཞག་ནས་ཡར་བཞེངས༌ཏེ། །དག་འབུད་དང་ནི་ཁྲིམས་གཅོད༌གནོངས།།
PSA 35:24 ང་ཡི་དཀོན་མཆོག༌ཡ་ཝཱེ་ལགས། །དྲང་བདེན་ངང་ནས་ཁྲིམས་གཅོད༌རོགས། །ངོམ་སོ་སྟོན་པར་མི་མཛད༌རོགས།།
PSA 35:25 དེ་ཚོའི་སེམས་སུ་ཀྱེ་མ༌ཧོ། །ཏག་ཏག་ང་ཡི་འདོད་སྟེང༌བབས། །ཞེས་སུ་སྙམ་དུ་མི་མཛད༌རོགས། །ང་ཚོས་ཁོ་རང་ཁྱུར་མིད༌བཏང༌། །ཞེས་ཀྱང་སྨྲ་བར་མི་འཇུག༌མཁྱེན།།
PSA 35:26 ང་རང་སྡུག་དུས་དགའ་མཁན༌རྣམས། །ངོ་ནི་ཚ་ཞིང་ནོངས་པར་ཤོག །བདག་ལ་ངོམ་སོ་སྟོན་མཁན༌རྣམས། །དམའ་འབེབས་ངོ་ཚས་ཁེབས་གྱུར༌ཅིག།
PSA 35:27 ང་ཡི་དག་འབུད་ལ་དགའ༌མཁན། །སྤྲོ་ཞིང་ཀི་སྒྲ་བསྒྲག་པར༌ཤོག །ཉིད་ཀྱི་ཞབས་ཕྱི་བདེ་བ༌ལ། །མཉེས་པའི་ཡ་ཝཱེར་བསྟོད་ཅིག༌ཅེས། །དེ་ཚོས་དུས་རྒྱུན་སྨྲ་བར༌ཤོག།
PSA 35:28 དེ་ནས་བདག་གི་ལྕེ་ཡིས༌ནི། །ཁྱེད་ཀྱི་དྲང་བ་གཏམ་དུ༌བྱེད། །ཉི་མ་གང་པོར་ཁྱེད་ལ༌བསྟོད།།
PSA 36:1 ༼དཀོན་མཆོག་ཡ་ཝཱེའི་ཞབས་ཕྱི་དཱ་བིད་ཀྱི་མགུར༌མ། དབུ་མཛད་ལ་སྤྲད༌པ།༽ སྡིག་ཅན་མི་ཡི་ཉེས་སྐྱོན༌གྱིས། །དེ་ཡི་སེམས་གཏིང་གཏམ་སྨྲ༌ཞིང༌། །མིག་མདུན་དཀོན་མཆོག་འཇིགས་པ༌མེད།།
PSA 36:2 རང་གི་སྡིག་ཉེས་མི་མངོན༌ཞིང༌། །གཞན་རྣམས་སྡང་བར་མི་འགྱུར༌ཞེས། །མཐོང་སྣང་དེ་བཞིན་ཡིན་པས༌ན། །རང་གིས་རང་ལ་བསྟོད་ར༌བྱེད།།
PSA 36:3 དེ་ཡི་ངག་གི་ཚིག་ཐམས༌ཅད། །ངན་པ་དང་ནི་གཡོ་སྒྱུ༌ཡིན། །ཤེས་རབ་སྤྱོད་བཟང་གཞི་ནས༌སྤངས།།
PSA 36:4 མལ་ཁྲིའི་སྟེང་དུ་གྲོས་ངན༌འདེབས། །བཟང་པོ་མིན་པའི་ལམ་དུ༌འཇུག །ངན་པར་ཞེན་པ་ཁོ་མི༌ལོག།
PSA 36:5 ཡ་ཝཱེའི་བྱམས་བརྩེ་ནམ་མཁར༌ཟུག །ཐུགས་རྒྱུད་དྲང་པོ་སྤྲིན་པར༌ཐུག།
PSA 36:6 ཁྱེད་ཀྱི་དྲང་བདེན་རི་རབ༌བཞིན། །དྲང་གཞག་གཏིང་ཟབ་རྒྱ་མཚོ༌ཡིན། །ཀྱེ་ཀྱེ་ཡ་ཝཱེ་ཁྱེད་ཉིད༌ཀྱིས། །མི་ཕྱུགས་གཉིས་ཀ་སྲུང་བ༌ཡིན།།
PSA 36:7 དཀོན་མཆོག་ཁྱེད་ཀྱི་བྱམས་བརྩེ༌ནི། །ཇི་འདྲའི་རིན་ཐང་བྲལ་བ༌ཡིན། །ཁྱེད་ཀྱི་འདབ་གཤོག་བསིལ་གྲིབ༌འོག །མི་རྣམས་སྐྱབས་སུ་འགྲོ་བ༌ལགས།།
PSA 36:8 ཁྱེད་ཀྱི་བཞུགས་གནས་སྣུམ་རྩི༌ཡིས། །དེ་རྣམས་ཤིན་ཏུ་འགྲང་བར༌འགྱུར། །ཁྱེད་ཀྱིས་དགའ་སྤྲོའི་གཙང་པོ༌ལས། །ཁོ་ཚོར་བཏུང་བ་གནང་ངེས༌ཡིན།།
PSA 36:9 ཁྱེད་དྲུང་སྲོག་གི་འབྱུང་གནས༌ཡོད། །ཁྱེད་ཀྱི་འོད་ནང་ངེད་འོད༌མཐོང༌།།
PSA 36:10 ཁྱེད་ཉིད་ཤེས་པར་དུས་རྟག༌ཏུ། །བྱམས་བརྩེ་མཛོད་ཅིག་གཞུང་དྲང༌ལ། །རྒྱུན་དུ་དྲང་བདེན་གནང་བར༌མཛོད།།
PSA 36:11 ང་རྒྱལ་ཅན་གྱི་རྐང་པ༌ལ། །རྡོག་བརྫིས་རྒྱག་ཏུ་མི་འཇུག༌མཁྱེན། །སྡིག་ཅན་མི་ཡི་ལག་པར༌ཡང༌། །ང་རང་ཕྱི་རུ་འདོན་མ༌འཇུག།
PSA 36:12 སྡིག་སྤྱོད་ཅན་རྣམས་དེར་འགྱེལ༌ཞིང༌། །ས་རུ་བསྒྱེལ་ནས་ལང་མི༌ཐུབ།།
PSA 37:1 ༼དཱ་བིད་ཀྱི་མགུར༌མ།༽ མི་ངན་རྐྱེན་གྱིས་འཚིག་པ་ཁྱོད་མ༌ཟ། །སྡིག་སྤྱོད་ཅན་ལ་ཕྲག་དོག་ཀྱང་མ༌བྱེད།།
PSA 37:2 དེ་རྣམས་རྩྭ་ལྟར་མགྱོགས་པོར་བསྐམ་པ༌དང༌། །རྩྭ་སྔོན་བཞིན་དུ་རྙིད་པར་འགྱུར་བ༌ཡིན།།
PSA 37:3 ཡ་ཝཱེར་བརྟེན་ནས་དོན་བཟང་སྤྱོད་དགོས༌ཤིང༌། །ས་སྟེང་གནས་ཤིང་དྲང་བ་ཟས་སུ༌སྤྱོད།།
PSA 37:4 ཡ་ཝཱེའི་ནང་དུ་དགའ་བར་གྱིས་ཤིག༌དང༌། །ཁྱོད་ཀྱི་རེ་འདུན་ཁོང་གིས་གནང་བར༌འགྱུར།།
PSA 37:5 སོ་སོའི་བགྲོད་ལམ་ཡ་ཝཱེར་གཏོད་པ༌དང༌། །ཁོང་ལ་བློ་གཏོད་ཁོང་གིས་བསྒྲུབ་པར༌མཛད།།
PSA 37:6 ཁྱོད་ཀྱི་དྲང་བདེན་སྐྱ་རེངས་ཤར་བ༌དང༌། །དྲང་གཞག་ཉིན་གུང་ཉི་མ་བཞིན་དུ༌མཛད།།
PSA 37:7 ཡ་ཝཱེའི་དྲུང་དུ་ཁ་ཁུ་སིམ་པོར༌སྡོད། །སྡུག་རུས་བསྐྱེད་ནས་ཁོང་ལ་སྒུག་པར༌གྱིས། །དོན་ཀུན་འགྲུབ་ཅིང་བྱུས་ངན་སྒྲུབ་པ༌ཡི། །མི་རྣམས་དབང་གིས་འཚིག་པ་ཁྱོད་མ༌ཟ།།
PSA 37:8 ཁོང་ཁྲོ་བསྐྱུར་ཞིང་གཏུམ་དྲག་སྤང་བར༌གྱིས། །འཚིག་པ་མ་ཟ་དེས་ནི་ངན་པར༌འདྲེན།།
PSA 37:9 སྡིག་སྤྱོད་ཅན་རྣམས་ཚར་གཅོད་བྱེད་པ༌དང༌། །ཡ་ཝཱེར་སྒུག་པ་རྣམས་ལ་ས་གཞི༌འཐོབ།།
PSA 37:10 ཡུད་ཙམ་རྗེས་སུ་མི་ངན་མེད་པར༌འགྱུར། །དེ་རྣམས་སྡོད་སར་བཙལ་ཡང་རྙེད་མི༌འགྱུར།།
PSA 37:11 འོན་ཀྱང་སྙེམས་ཆུང་དག་ལ་ས་གཞི༌འཐོབ། །ཞི་བདེ་ཆེན་པོའི་སྐྱིད་ལ་རོལ་བར༌འགྱུར།།
PSA 37:12 ངན་པས་དྲང་པོར་གནོད་འཚེ་སྐྱེལ་བ༌དང༌། །དེ་ཡི་སྟེང་ལ་ཁོ་ཚོས་སོ་འཆའ༌འོ།།
PSA 37:13 གཙོ་བོས་དེ་ཚོའི་དུས་ནི་སླེབས་གཟིགས༌པས། །དེ་རྣམས་རྐྱེན་གྱིས་ཁོང་ཉིད་བཞད་པར༌མཛད།།
PSA 37:14 སྐྱོ་བོ་དང་ནི་དབུལ་པོ་སར་བསྒྱེལ༌ཞིང༌། །སྤྱད་པ་དྲང་པོར་སྤྱོད་མཁན་གསོད་པའི༌ཆེད། །སྡིག་སྤྱོད་རལ་གྲི་བཏོན་ནས་གཞུ་འཐེན༌ནོ།།
PSA 37:15 དེ་ཚོའི་རལ་གྲིས་རང་གི་སྙིང་བརྟོལ༌ཞིང༌། །མི་དེ་རྣམས་ཀྱི་གཞུ་མོ་གཅོག་པར༌འགྱུར།།
PSA 37:16 སྡིག་སྤྱོད་མང་པོའི་རྒྱུ་ནོར་མོད་པོ༌ལས། །དྲང་བདེན་མི་ལ་ཉུང་ངུ་ཡོད་པས༌ལེགས།།
PSA 37:17 སྡིག་སྤྱོད་མི་ཡི་དཔུང་པ་གཅོག་པར༌འགྱུར། །ཡ་ཝཱེས་དྲང་བདེན་མི་ལ་རོགས་སྐྱོར༌མཛད།།
PSA 37:18 སྐྱོན་བྲལ་མི་ཡི་ཚེ་ཚད་ཡ་ཝཱེས༌མཁྱེན། །དེ་ཚོའི་ནོར་སྐལ་རྟག་ཏུ་གནས་པ༌ཡིན།།
PSA 37:19 དཀའ་སྡུག་དུས་སུ་དེ་དག་སྐྱེངས་པ༌མིན། །མུ་གེའི་དུས་ཀྱང་དེ་དག་འགྲང་བར༌འགྱུར།།
PSA 37:20 ངན་པ་འཇིག་ཅིང་ཡ་ཝཱེའི་དགྲ་བོ༌རྣམས། །རྩྭ་ཁའི་མཛེས་སྡུག་ཇི་བཞིན་མེད་པར༌འགྱུར། །དེ་རྣམས་དུ་བ་བཞིན་དུ་ཡལ་ནས༌འགྲོ།།
PSA 37:21 ངན་པས་བུ་ལོན་གཡར་ནས་མི་འཇལ༌ཡང༌། །དྲང་པོས་གཏོང་ཕོད་ངང་ནས་སྦྱིན་པ༌གཏོང༌།།
PSA 37:22 ཡ་ཝཱེས་བྱིན་རླབས་གནང་བར་ས་གཞི༌འཐོབ། །ཁོང་གིས་དམོད་པ་རྣམས་ནི་རྩ་མེད༌གཏོང༌།།
PSA 37:23 ཁོང་གིས་མི་ཡི་གོམ་པ་བརྟན་པོར༌མཛད། །དེ་ཡི་ལམ་ལ་ཁོང་ནི་ཐུགས་དགྱེས༌སོ།།
PSA 37:24 ཡ་ཝཱེའི་ཕྱག་གིས་ཁོ་རང་སྐྱོར་བས༌ན། །དེ་ནི་རྐང་འདྲེད་ཤོར་ཡང་འགྱེལ་མི༌སྲིད།།
PSA 37:25 དེ་སྔ་གཞོན་ཞིང་ད་ཆ་རྒས༌ན་ཡང་། །དྲང་པོ་སྤངས་ཤིང་དེ་ཡི་རྒྱུད་རྣམས༌ཀྱིས། །བག་ལེབ་སློང་བ་བདག་གིས་མཐོང་མ༌མྱོང༌།།
PSA 37:26 ཉིན་གང་གཏོང་ཕོད་ངང་ནས་བུ་ལོན༌གཏོང༌། །དེ་ཡི་བུ་རྒྱུད་རྣམས་ལ་བྱིན་རླབས༌འཐོབ །།
PSA 37:27 མི་དགེ་བ་ལས་གཡོལ་ཞིང་བཟང་པོ༌བྱོས། །རྒྱུན་ནས་རྒྱུན་དུ་བདེ་བར་གནས་འགྱུར༌རོ།།
PSA 37:28 ཡ་ཝཱེ་དྲང་གཞག་ལ་ནི་ཐུགས་མཉེས༌ཤིང༌། །ཁོང་གི་དད་ལྡན་རྣམས་ནི་བསྐྱུར་མི༌སྲིད། །ཁོང་གིས་དེ་རྣམས་རྟག་ཏུ་བསྲུང་བ༌དང༌། །སྡིག་སྤྱོད་ཅན་གྱི་བུ་རྒྱུད་གཅོད་པར༌འགྱུར།།
PSA 37:29 དྲང་བདེན་མི་ལ་ས་གཞི་འཐོབ་པ༌དང༌། །རྒྱུན་ནས་རྒྱུན་དུ་དེ་རུ་གནས་པར༌འགྱུར།།
PSA 37:30 དྲང་པོའི་ཞལ་གྱིས་ཤེས་རབ་གླེང་བ༌དང༌། །ལྗགས་ཀྱིས་དྲང་གཞག་གཏམ་རྣམས་གླེང་བར༌མཛད།།
PSA 37:31 སོ་སོའི་དཀོན་མཆོག་ཉིད་ཀྱི་བཀའ་ཁྲིམས༌དེ། །སེམས་ལ་ཡོད་པས་གོམ་པ་འཁྱོར་མི༌སྲིད།།
PSA 37:32 ངན་པས་དྲང་བདེན་མི་ལ་འཇབ་སྒུག༌བྱེད། །དེ་ཡི་ཚེ་སྲོག་ལེན་ཕྱིར་གོ་སྐབས་འཚོལ།།
PSA 37:33 ཡ་ཝཱེས་ངན་པའི་ལག་ཏུ་དེ་མི༌བསྐྱུར། །ཁྲིམས་གཅོད་དུས་ཀྱང་དེ་ལ་ཉེས་འགེལ༌མེད།།
PSA 37:34 ཡ་ཝཱེར་རེ་ཞིང་ཁོང་གི་ལམ་ནང༌འགྲུལ། །ཁྱོད་ལ་ས་གཞི་འཐོབ་ཕྱིར་ཡར་འདེགས༌ཤིང༌། །ངན་པ་ཚར་གཅོད་བྱེད་དུས་ཁྱོད་མཐོང༌འོང༌།།
PSA 37:35 ལྗོན་ཤིང་སྔོན་པོ་རང་སར་རྒྱས་པ༌ལྟར། །ངན་པ་འཇིགས་རུང་དར་བ་ངས་མཐོང༌ཡང༌།།
PSA 37:36 ཁོ་རང་ལམ་སང་འདས་ཤིང་མེད་པར༌གྱུར། །བདག་གིས་ཁོ་རང་བཙལ་ཡང་རྙེད་མ༌བྱུང༌།།
PSA 37:37 ཁྱོད་ཀྱིས་སྐྱོན་བྲལ་མི་ལ་ཞིབ་ཏུ༌ལྟོས། །དྲང་བདེན་མི་ལ་གསལ་པོར་ལྟོས་ཤིག༌དང༌། །ཞི་ཞིང་བདེ་བའི་མི་ལ་རིགས་རྒྱུད༌འབྱུང༌།།
PSA 37:38 འོན་ཀྱང་སྡིག་ཅན་ཐམས་ཅད་ཚར་བར༌འགྱུར། །ངན་པ་དག་གི་རིགས་རྒྱུད་རྩ་མེད༌གཏོང༌།།
PSA 37:39 དྲང་པོའི་ཐར་པ་ཡ་ཝཱེའི་ཕྱོགས་ནས༌འབྱུང༌། །སྐྱོ་དུས་ཁོང་ནི་དེ་ཚོའི་བཙན་རྫོང༌ཡིན།།
PSA 37:40 དེ་རྣམས་ཡ་ཝཱེར་སྐྱབས་སུ་འགྲོ་བས༌ན། །དེ་ཚོར་རོགས་རམ་མཛད་ཅིང་སྐྱོབ་པར༌བྱེད། །སྡིག་སྤྱོད་མི་ལས་སྐྱོབ་ཅིང་ཐར་བར༌མཛད།།
PSA 38:1 ༼དཱ་བིད་ཀྱི་དྲན་གསོའི་མགུར༌མ།༽ ཐུགས་ཁྲོས་བཀའ་བཀྱོན་མ་གནང་ཀྱེ་ཡ༌ཝཱེ། །གཏུམ་དྲག་ནང་དུ་ང་རང་མི་གཅུན༌རོགས།།
PSA 38:2 ཁྱེད་ཀྱི་མདའ་མོས་ང་ཡི་ལུས་བརྟོལ༌ཞིང༌། །ཁྱེད་ཀྱི་ཕྱག་ནི་ངའི་སྟེང་ལྗིད་པར༌གནོན།།
PSA 38:3 ཁྱེད་ཉིད་ཁྲོས་པས་བདག་གི་ལུས་སྟོབས༌ཉམས། །སྡིག་པའི་རྐྱེན་གྱིས་རུས་པ་བདེ་མ༌བྱུང༌།།
PSA 38:4 བདག་གི་ཉེས་པས་ང་རང་བསྣུབས་པ༌དང༌། །ཁུར་ཆེན་བཞིན་དུ་ང་ལ་རབ་ཏུ༌ལྕི།།
PSA 38:5 ང་རང་གླེན་པས་བདག་གི་རྨ་ཁ༌རྣམས། །རྣག་གིས་ཟོས་ཤིང་དྲི་ངན་འཐུལ་ནས༌འོང༌།།
PSA 38:6 ཟུག་གཟེར་ལངས་ནས་ལུས་པོ་རབ་ཏུ༌བསྒུར། །ཉི་མ་གང་པོར་སྡུག་བསྔལ་གནས་སུ༌ལྷུང༌།།
PSA 38:7 ང་ཡི་རྐེད་པར་མེ་ཡི་ན་ཟུག༌བྱུང༌། །ལུས་སྟེང་ན་ཚ་མེད་ས་ཡོད་མ༌ཡིན།།
PSA 38:8 བདག་ནི་ཞ་ཞིང་སྟོབས་ཤུགས་རབ་ཏུ༌ཟད། །སེམས་ཀྱི་སྡུག་བསྔལ་རྐྱེན་གྱིས་སྨྲེ་སྔགས༌བཏོན།།
PSA 38:9 གཙོ་བོ་ཁྱེད་དྲུང་ང་ཡི་བསམ་འདུན༌བཤམས། །ང་ཡི་འཁུན་སྒྲ་ཁྱེད་ལ་སྦས་པ༌མེད།།
PSA 38:10 ངའི་སྙིང་འདར་ཞིང་ལུས་སྟོབས་ཟད་པ༌དང༌། །ང་ཡི་མིག་གི་མདངས་ཀྱང་ཡལ་བར༌གྱུར།།
PSA 38:11 བདག་གི་གྲོགས་མཆོག་དང་ནི་མཛའ་བོ༌རྣམས། །ང་ཡི་ན་ཚའི་རྐྱེན་གྱིས་གཡོལ་བ༌དང༌། །ཤ་ཉེ་གཉེན་འབྲེལ་རྣམས་ ཀྱང་རྒྱང་ནས༌སྡོད།།
PSA 38:12 བདག་གི་སྲོག་ལ་རྔམ་པས་རྙི་འཛུགས༌ཤིང༌། །གནོད་འཚེ་བྱ་འདོད་རྣམས་ཀྱིས་བརླག་པར༌སྨྲ། །དེ་ཚོས་ཉིན་གང་གཡོ་སྒྱུའི་གྲོས་བྱེད༌མོད།།
PSA 38:13 འོན་པ་བཞིན་དུ་ང་ཡིས་མི་ཐོས༌ཤིང༌། །ལྐུགས་པའི་ཚུལ་གྱིས་བདག་གིས་ཅང་མི༌སྨྲ།།
PSA 38:14 དེའི་ཕྱིར་ང་ནི་རྣ་བས་མི་ཐོས༌ཤིང༌། །ངག་ཏུ་ཨ་ལན་འདེབས་རྒྱུ་མེད་མཁན༌འདྲ།།
PSA 38:15 ཡ་ཝཱེ་བདག་གིས་ཁྱེད་ལ་རེ་ལྟོས༌བཅངས། །ང་ཡི་དཀོན་མཆོག་ཁྱེད་ཀྱིས་བཀའ་ལན༌གནང༌།།
PSA 38:16 དེ་ཚོས་ང་ལ་ངོམ་སོ་སྟོན་པ༌དང༌། །བདག་གི་རྐང་པ་འདྲེད་དུས་དེ་དག༌གིས། །རང་རློམ་བྱེད་པར་མ་གནང་ཞེས་ངས༌སྨྲས།།
PSA 38:17 ང་ནི་ནམ་ཡང་འགྱེལ་ལ་ཁད་ཡོད༌པས། །ང་ཡི་ན་ཟུག་ནམ་རྒྱུན་ངའི་མདུན༌ལྷགས།།
PSA 38:18 བདག་གིས་རང་གི་ཉེས་པ་མཐོལ་བཤགས༌བྱ། །རང་གི་སྡིག་པའི་རྐྱེན་གྱིས་སེམས་འཚེར༌ཡང༌།།
PSA 38:19 བདག་གི་ངར་ཤུགས་ཆེ་བའི་དགྲ་ནི༌མང་། །དོན་མེད་ང་ལ་སྡང་མཁན་བགྲང་ལས༌འདས།།
PSA 38:20 བཟང་ལན་ངན་འཇལ་བྱེད་མཁན་དེ་ཚོ༌ཡིས། །ང་ཡིས་བཟང་པོ་བསྙེགས་ཕྱིར་ངའི་དགྲར༌ལངས།།
PSA 38:21 ཀྱེ་ཀྱེ་ཡ་ཝཱེ་བདག་ནི་མི་འདོར༌ཞིང་། །ང་ཡི་དཀོན་མཆོག་རིང་དུ་མི་གྱེས༌རོགས།།
PSA 38:22 ཀྱེ་ཀྱེ་གཙོ་བོ་ང་ཡི་མགོན་སྐྱབས༌ལགས། །མྱུར་དུ་ཕེབས་ནས་ང་རང་སྐྱབས་སུ༌གསོལ།།
PSA 39:1 ༼དབུ་མཛད་ཡེ་དུ་ཐུན་ལ་སྤྲད་པའི་དཱ་བིད་ཀྱི་མགུར༌མ།༽ ངའི་ལྕེས་སྡིག་པ་མི་བྱེད༌ཕྱིར། །སོ་སོའི་སྤྱོད་པར་ཟོན་བྱེད༌ཅིང༌། །སྡིག་སྤྱོད་ངའི་མདུན་ཡོད་རིང༌དུ། །ཁ་རུ་སྲབ་ཅིག་བསྐོན་འོང༌སྨྲས།།
PSA 39:2 ང་ནི་ལྐུགས་ཤིང་ཁ་རོག༌བསྡད། །ཡིན་ཡང་དེ་ཡིས་ཅང་མ༌ཕན། །སྐྱོ་གདུང་རབ་ཏུ་ཆེ་རུ༌གྱུར།།
PSA 39:3 སེམས་ནི་རབ་ཏུ་འཚིག་པ༌དང༌། །ཞིབ་འདང་རྒྱག་དུས་མེ་འབར༌བྱུང༌། །དེ་ནས་ལྕེ་ཡིས་འདི་སྐད༌ཞུས།།
PSA 39:4 ང་ཡི་ཚེ་མཇུག་དང་ཚེ༌ཚད། །ཅི་ཡིན་ཡ་ཝཱེ་མངོན་པར༌མཛོད། །མི་ཚེ་ཐུང་བ་ཤེས་སུ༌གསོལ།།
PSA 39:5 ཁྱེད་ཀྱིས་བདག་གི་ཚེ་ལོ༌ནི། །མཐོ་གང་ཙམ་དུ་མཛད་པ༌དང༌། །ང་ཡི་མི་ཚེ་ཁྱེད་དྲུང༌དུ། །ཅི་ཡང་མིན་པའི་ཚུལ་དུ༌སྣང༌། །མི་རྣམས་བརྟན་འཇགས་ཡིན་དུས༌ཀྱང༌། །དབུགས་ཐེངས་གཅིག་ལས་མ་འདས༌སོ།།༼ སེ༌ལཱ། ༽
PSA 39:6 མི་ནི་འཕྲུལ་སྣང་བཞིན་དུ༌འགྲུལ། །བྲེལ་འཚུབ་ཆེ་ཡང་སྙིང་པོ་དབེན། །རྒྱུ་ནོར་བསོག་ཀྱང་སུས་ཁྱེར་མེད།།
PSA 39:7 གཙོ་བོ་ད་ངས་ཅི་ལ༌སྒུག །ཁྱེད་གཅིག་ཁོ་ནར་རེ་བ༌བྱེད།།
PSA 39:8 ང་ཡི་འགལ་སྐྱོན་ཀུན་ལས༌སྒྲོལ། །གླེན་པས་འཕྱ་བར་བདག་མ༌མཛད།།
PSA 39:9 ཁྱེད་ཀྱིས་དེ་བཞིན་མཛད་པས༌ན། །བདག་ནི་ལྐུགས་ཤིང་ཁ་མི༌གྲགས།།
PSA 39:10 ཁྱེད་ཀྱི་ལྕག་ཚན་ང་ནས༌ལོངས། །ཕྱག་གིས་རྡུང་བས་ང་ཚར༌རོ།།
PSA 39:11 ཉེས་པའི་ཕྱིར་དུ་མི་ལ༌ནི། །ཁྱེད་ཀྱིས་བཀྱོན་ཞིང་འཇུན་པ༌དང༌། །དེ་ཚོས་མཆོག་ཏུ་འཛིན་པ༌རྣམས། །མུག་པས་བཟས་པའི་གོས་ལྟར༌མཛད། །མི་ནི་དབུགས་ཐེངས་གཅིག་ཙམ༌མོ།།༼ སེ༌ལཱ། ༽
PSA 39:12 ཀྱེ་ཀྱེ་ཡ་ཝཱེ་ང་ཡི༌ནི། །སྨོན་ལམ་ལ་ནི་གསན་པར༌ཞུ། །འོ་དོད་འབོད་པ་གསན་པར༌མཛོད། །མཆི་མར་གཟིགས་ཤིང་ཞལ་མ༌རོག །ཕ་མེས་ནང་བཞིན་ང་རང༌ནི། །ཁྱེད་དྲུང་མགྲོན་དང་བྱེས་པ༌ཡིན།།
PSA 39:13 འདས་ནས་མེད་པར་མ་གྱུར༌སྔོན། །ང་རང་ཡང་བསྐྱར་སྤྲོ་བའི༌ཕྱིར། །ཐུགས་ཁྲོའི་སྤྱན་གྱིས་མི་གཟིགས༌རོགས།།
PSA 40:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ བདག་གིས་ཡ་ཝཱེ་ལ་ནི་ངང་གིས༌བསྒུགས། །ཁོང་གིས་བདག་ལ་གཟིགས་ཤིང་འོ་དོད༌གསན།།
PSA 40:2 འཇིགས་རུང་དོང་དང་འདམ་ལས་བདག་དྲངས༌ཏེ། །བདག་ནི་ཕ་བོང་སྟེང་དུ་འགྱིང་བ༌དང༌། །ང་ཡི་གོམ་སྟབས་ཀྱང་ནི་བརྟན་པར༌མཛད།།
PSA 40:3 བདག་ཅག་དཀོན་མཆོག་བསྟོད་པའི་མགུར་གསར༌ཞིག །བདག་གི་ཁ་རུ་ལེན་པར་མཛད་པ༌ན། །མང་པོས་མཐོང་ནས་གུས་ཤིང་འཇིགས་པ༌དང༌། །ཡ་ཝཱེ་ཁོང་ལ་བརྟེན་པའི་འདུན་པ༌ཆེ།།
PSA 40:4 རྫུན་དང་ང་རྒྱལ་ཅན་ལ་མ་འཁོར༌བར། །ཡ་ཝཱེར་བརྟེན་པའི་མི་ལ་བདེ་བ༌འཐོབ།།
PSA 40:5 ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ལགས། །ཁྱེད་ཀྱིས་མཛད་པའི་ངོ་མཚར་འཕྲིན་ལས༌དང༌། །ངེད་ཅག་དོན་དུ་ཐུགས་བསྐྱེད་ཤིན་ཏུ༌མང༌། །ཁྱེད་ལ་དོ་ཟླ་སུ་དང་གང་ཡང༌མེད། །བདག་ལ་ཇི་བཞིན་བརྗོད་པའི་ནུས་པ༌བྲལ། །གལ་ཏེ་བརྗོད་པར་འདོད་ན་མཐའ་ཡས༌སོ།།
PSA 40:6 མཆོད་པ་དང་ནི་འབུལ་བར་ཁྱེད་མི༌དགྱེས། །ཁྱེད་ཀྱིས་བདག་གི་རྣ་བ་ཕྱེས་པར༌མཛད། །སྦྱིན་སྲེག་དང་ནི་སྡིག་བཤགས་མཆོད་པ༌སོགས། །ཁྱེད་ཀྱིས་ནམ་ཡང་མཁོ་བར་གསུངས་པ༌མེད།།
PSA 40:7 དེ་ནས་བདག་གིས་འདི་ལྟར་ཞུས་པ༌སྟེ། །ལྟོས་དང་བདག་ནི་སླེབས་ཤིང་ངའི་དོན༌རྣམས། །ཤོག་སྒྲིལ་མདོ་ནང་སྔར་ནས་བཀོད་འདུག༌གོ།
PSA 40:8 ཀྱེ་ཀྱེ་བདག་གི་དཀོན་མཆོག་ང་རང༌ནི། །ཁྱེད་ཀྱི་ཐུགས་དགོངས་ཇི་བཞིན་སྒྲུབ་པར༌དགའ། །ཁྱེད་ཀྱི་བཀའ་ཁྲིམས་ནམ་རྒྱུན་སེམས་སུ༌མཆིས།།
PSA 40:9 ཚོགས་ཆེན་ནང་དུ་དྲང་བདེན་འཕྲིན་བཟང༌སྒྲོག །བདག་གིས་རང་གི་མཆུ་སྒྲོས་འཚུམ་མི༌བྱ། །ཡ་ཝཱེ་ཁྱེད་ཀྱིས་འདི་རྣམས་མཁྱེན་པ༌འོ།།
PSA 40:10 ཁྱེད་ཀྱི་དྲང་བདེན་སེམས་སུ་སྦས་པ༌མིན། །ཁྱེད་ཀྱི་དམ་ཚིག་ཐར་པ་ངས་བཤད༌ཡོད། །ཁྱེད་ཀྱི་བྱམས་བརྩེ་དང་ནི་བདེན་པ༌ཉིད། །ང་ཡིས་ཚོགས་ཆེན་ནང་དུ་མ་སྦས༌སོ།།
PSA 40:11 ཡ་ཝཱེས་ང་ལ་སྙིང་རྗེ་མི་འཕྲི༌རོགས། །ཁྱེད་ཀྱི་བྱམས་དང་བདེན་པས་རྟག་ཏུ༌སྲུངས།།
PSA 40:12 གྲངས་མེད་ཆག་སྒོས་ང་རང་བསྐོར་བ༌དང༌། །བདག་གི་ཉེས་པས་ང་ནི་བཟུང་བས༌ན། །མིག་ཀྱང་བསྒྲིབས་ཤིང་ཉེས་པ་དེ་དག༌ནི། །རང་གི་སྐྲ་ལས་མང་བས་སྙིང་རྩ༌འདར།།
PSA 40:13 ཀྱེ་ཀྱེ་ཡ་ཝཱེ་ཐུགས་རྗེས་སྐྱབས་སུ༌གསོལ། །མགྱོགས་པོར་ང་ལ་རོགས་རམ་གནང་བར༌མཛོད།།
PSA 40:14 ངའི་སྲོག་གཅོད་ཕྱིར་ང་རང་འཚོལ་མཁན༌རྣམས། །ལྷན་ཅིག་སྐྱེངས་ཤིང་ངོ་ཡང་ནོངས་གྱུར༌ཅིག །ང་ལ་གནོད་པ་འབྱུང་བར་དགའ་བ༌རྣམས། །ངོ་ཚ་དང་བཅས་ཕམ་པར་གྱུར་ཅིག༌གུ།
PSA 40:15 ང་ལ་ཨ་ཧ་ཨ་ཧ་ཟེར་མཁན༌རྣམས། །རང་གི་ངོ་ཚའི་རྐྱེན་གྱིས་སྟོངས་པར༌ཤོག།
PSA 40:16 ཁྱེད་རང་འཚོལ་མཁན་དགའ་ཞིང་མགུ་བ༌དང༌། །ཁྱེད་ཀྱི་སྐྱབས་ལ་དགའ་བས་དུས་རྒྱུན༌དུ། །ཡ་ཝཱེར་བསྟོད་འོས་ཞེས་སུ་སྨྲ་གྱུར༌ཅིག།
PSA 40:17 འོན་ཀྱང་ང་ནི་དབུལ་ཞིང་ཕོངས་ན༌ཡང༌། །གཙོ་བོས་ང་རང་ཐུགས་སུ་འཛིན་པར༌སྨོན། །ང་ཡི་རོགས་རམ་དང་ནི་སྲོག་སྐྱོབ༌ཁྱེད། །ཀྱེ་ཀྱེ་དཀོན་མཆོག་ཐུགས་གཡེལ་མ་མཛད༌ཅིག།
PSA 41:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ དབུལ་པོར་ལྟ་སྐྱོང་བྱེད་པའི་མི་དེ༌བདེ། །རྐྱེན་ངན་དུས་སུ་ཡ་ཝཱེས་ཁོ་བསྐྱབ༌འོང༌།།
PSA 41:2 ཡ་ཝཱེས་ཁོ་རང་བསྲུངས་ནས་གསོན་པར༌མཛད། །ས་གཞིའི་སྟེང་དུ་མི་དེ་བདེ་བར༌བརྗོད། །དགྲ་བོར་ཅི་འདོད་བྱེད་པར་ཁོ་མ༌གནང༌།།
PSA 41:3 མལ་སར་ལྷུང་དུས་ཡ་ཝཱེས་ཁོ་སྐྱོང༌ཞིང༌། །ན་བའི་དུས་སུ་ཁྱེད་ཀྱིས་དྲག་སྐྱེད༌གནང༌།།
PSA 41:4 ཀྱེ་ཀྱེ་ཡ་ཝཱེ་བདག་ལ་སྙིང་རྗེས༌གཟིགས། །བདག་གིས་ཁྱེད་ལ་སྡིག་པ་བྱས་པས༌ན། །ང་རང་དྲག་སྐྱེད་གནང་བར་མཛོད་ཅེས༌ཞུས།།
PSA 41:5 ཁོ་ནམ་འཆི་ཞིང་མིང་ནི་མེད་པར༌འགྱུར། །དེ་སྐད་དགྲ་རྣམས་བདག་ལ་གཏམ་ངན༌སྨྲ།།
PSA 41:6 འཕྲད་དུ་འོང་དུས་སྨྲ་བ་རྫུན་གཏམ༌ཡིན། །ཁོས་ནི་རང་གི་སེམས་ནང་གཡོ་སྒྱུ༌གསོག །ཕྱི་རོལ་སླེབས་དུས་དེ་རྣམས་བསྒྲག་པ༌ཡིན།།
PSA 41:7 ང་ལ་སྡང་མཁན་ཀུན་གྱིས་ཤབ་ཤུབ༌བྱེད། །གནོད་པ་བསྐྱལ་ཕྱིར་ངན་ཇུས་བཤམས་ནས༌ནི།།
PSA 41:8 ཁོ་རང་ན་ཚ་ལྗིད་མོས་མནར་བ་དང༌། །མལ་སར་ལྷུང་བས་ནམ་ཡང་མི་ལང༌ཟེར།།
PSA 41:9 ཐ་ན་ང་ཡི་བློས་ཐུབ་མཛའ་གྲོགས་ཏེ། །བདག་དང་མཉམ་དུ་ཁ་ཟས་སྤྱོད་མཁན༌གྱིས། །བདག་ལ་རྐང་པའི་ཕྱི་རྟིང་བསྟན་པ་ཡིན །།
PSA 41:10 འོན་ཀྱང་ཡ་ཝཱེ་ཁྱེད་ཀྱིས་སྙིང་རྗེ༌མཛོད། །དེ་ཚོའི་དགྲ་ཤ་ལེན་ཕྱིར་ང་བསླང༌རོགས།།
PSA 41:11 དགྲ་བོས་བདག་ལ་རྒྱལ་ཁའི་འུད་མ༌བརྒྱབ། །དེ་བས་ཁྱེད་ཉིད་བདག་ལ་དགྱེས་པ༌ཤེས།།
PSA 41:12 ང་རང་རྣམ་པར་དག་པས་ཁྱེད་ཀྱིས༌བསྐྱོར། །རྒྱུན་དུ་ཁྱེད་དྲུང་འགྲེང་བར་མཛད་པ༌ཡིན།།
PSA 41:13 ཡེས་ར་ཨེལ་གྱི་དཀོན་མཆོག་ཡ་ཝཱེ༌ལ། །རྟག་ཏུ་བསྟོད་འོས་ཨ་མེན་ཨ་མེན༌བརྗོད།།
PSA 42:1 ༼དབུ་མཛད་ལ་སྤྲད་པའི་ཀོ་རཱག་གི་བུ་རྣམས་ཀྱི་བསླབ་བྱའི་མགུར༌མ།༽ ཆུ་ཕྲན་ལ་ནི་ཤྭ་བ་གདུང་བ༌ལྟར། །དཀོན་མཆོག་ཁྱེད་ལ་ངའི་སེམས་རབ་ཏུ༌གདུང༌།།
PSA 42:2 ང་ཡི་སེམས་ཀྱིས་དཀོན་མཆོག་ཁོང་ཉིད༌དེ། །གཏན་དུ་གསོན་པོར་བཞུགས་པའི་དཀོན་མཆོག་དྲན། །དཀོན་མཆོག་དྲུང་དུ་ང་རང་ནམ་ཞིག༌བསླེབ།།
PSA 42:3 ཁྱོད་ཀྱི་དཀོན་མཆོག་གང་དུ་ཡོད་ཅེས༌ཏེ། །མི་ཡིས་ཉིན་གང་བདག་ལ་ཟེར་བས༌ན། །ཉིན་མཚན་གཉིས་པོར་མཆི་མ་ཟས་སུ༌གྱུར།།
PSA 42:4 སྔོན་ཆད་ནམ་རྒྱུན་མི་ཚོགས་དང་མཉམ༌དུ། །དགའ་སྤྲོའི་ཀི་སྒྲ་དང་ནི་བསྟོད་དབྱངས༌བཅས། །དེ་རྣམས་ཁྲིད་ནས་དཀོན་མཆོག་བཞུགས་གནས༌སུ། །དུས་ཆེན་གཏོང་བར་ཕྱིན་ཚུལ་དྲན་པ༌ལ། །བདག་གི་སེམས་ནི་རབ་ཏུ་སྐྱོ་བར༌གྱུར།།
PSA 42:5 ང་ཡི་སེམས་ནི་ཅི་ལ་ཕམ་པ༌ཡིན། །བདག་གི་སྙིང་ཁོང་འཁྲུགས་དོན་ཅི་ཡིན༌ནམ། །ང་ཡི་མགོན་སྐྱབས་ང་ཡི་དཀོན་མཆོག༌ལ། །བདག་གིས་ད་དུང་བསྟོད་བསྔགས་བརྗོད་པས༌ན། །ཁྱོད་ཀྱིས་ཁོང་ལ་རེ་ལྟོས་བཅང་འོས༌སོ།།
PSA 42:6 ཀྱེ་ཀྱེ་ང་ཡི་དཀོན་མཆོག་ངའི་སེམས༌ནི། །ང་ཡི་ནང་ནས་རབ་ཏུ་ཕམ་པས༌ན། །ཡོར་དན་ཡུལ་དང་ཧེར་མོན་རི་བོ༌དང༌། །རྨི་ཙར་རི་བོ་བཅས་ནས་ཁྱེད་དྲན༌ནོ།།
PSA 42:7 ཁྱེད་ཀྱི་རྦབ་ཆུས་སྐད་སྒྲ་བསྒྲགས་པ༌ན། །གཏིང་ཟབ་རྒྱ་མཚོ་གཅིག་གིས་གཅིག་ལ༌གླེང༌། །ཁྱེད་ཀྱི་རྦ་ཀློང་རྦ་རླབས་དྲག་པོ༌ཡིས། །ང་རང་ཀུན་ནས་གཡོགས་ཏེ་ཁྱེར་པ༌འོ།།
PSA 42:8 ཉིན་མོར་ཡ་ཝཱེས་བདག་ལ་བྱམས་བརྩེ༌གནང༌། །མཚན་མོར་ང་ཡིས་ཁོང་ལ་བསྟོད་དབྱངས༌འབུལ། །ཚེ་སྲོག་སྩོལ་བའི་དཀོན་མཆོག་ཁོང་ལ༌གསོལ།།
PSA 42:9 ང་ཡི་བྲག་རི་ལགས་པའི་དཀོན་མཆོག༌ལ། །ཁྱེད་ཀྱིས་ང་རང་བརྗེད་དོན་ཅི་ཡིན༌ནམ། །དགྲ་བོའི་གཉའ་གནོན་དབང་གིས་ང་རང༌ནི། །མྱ་ངན་ནང་དུ་འགྲུལ་བ་ཅི་ཞེས༌ཞུ།།
PSA 42:10 དགྲ་བོས་ཉིན་གང་བདག་ལ་སྨད་ནས༌ནི། །ཁྱོད་ཀྱི་དཀོན་མཆོག་གང་དུ་བཞུགས་ཟེར༌དུས། །ང་ཡི་རུས་པ་རལ་གྲིས་གཏོར་བ༌འདྲ།།
PSA 42:11 ང་ཡི་སེམས་ནི་ཅི་ལ་ཕམ་པ༌ཡིན། །བདག་གི་སྙིང་ཁོང་འཁྲུགས་དོན་ཅི་ཡིན༌ནམ། །ང་ཡི་མགོན་སྐྱབས་ང་ཡི་དཀོན་མཆོག༌ལ། །བདག་གིས་ད་དུང་བསྟོད་བསྔགས་བརྗོད་པས༌ན། །ཁྱོད་ཀྱིས་ཁོང་ལ་རེ་ལྟོས་བཅང་འོས༌སོ།།
PSA 43:1 ཀྱེ་ཀྱེ་དཀོན་མཆོག་ང་ལ་དག་འབུད༌མཛོད། །བདག་གི་གྱོད་དོན་དད་མེད་མི་རིགས༌ལ། །རྩོད་པར་མཛོད་ཅིག་གཡོ་སྒྱུ་ཅན་རྣམས༌དང༌། །ལོག་ལྟ་ཅན་ལས་ང་རང་བསྐྱབ་ཏུ༌གསོལ།།
PSA 43:2 ཁྱེད་ནི་ང་ཡི་སྐྱབས་གནས་དཀོན་མཆོག༌ཡིན། །ཁྱེད་ཀྱིས་ང་རང་སྤངས་དོན་ཅི་ཡིན༌ནམ། །དགྲ་བོའི་གཉའ་གནོན་དབང་གིས་ང་རང༌ནི། །མྱ་ངན་ནང་དུ་འགྲུལ་བ་ཅིའི་ཕྱིར༌ཡིན།།
PSA 43:3 ཁྱེད་ཀྱིས་ཉིད་ཀྱི་འོད་དང་བདེན་པ༌སྩོལ། །དེ་ཡིས་ང་ལ་ལམ་སྟོན་མཛད་ནས༌ནི། །དམ་པའི་རི་དང་བཞུགས་གནས་དེར་འཁྲིད༌རོགས།།
PSA 43:4 དེ་ནས་དཀོན་མཆོག་མཆོད་ཁྲིའི་རྩར་བཏུད༌ནས། །བདག་གི་དགའ་སྤྲོའི་མཆོག་སྟེ་དཀོན་མཆོག༌དྲུང༌། །ཀྱེ་ཀྱེ་དཀོན་མཆོག་ང་ཡི་དཀོན་མཆོག༌ལགས། །པི་ཝང་དཀྲོལ་ཞིང་ཁྱེད་ལ་བསྟོད་བསྔགས༌བརྗོད།།
PSA 43:5 ང་ཡི་སེམས་ནི་ཅི་ལ་ཕམ་པ༌ཡིན། །བདག་གི་སེམས་ཁོང་འཁྲུགས་དོན་ཅི་ཡིན༌ནམ། །ང་ཡི་མགོན་སྐྱབས་ང་ཡི་དཀོན་མཆོག༌ལ། །བདག་གིས་ད་དུང་བསྟོད་བསྔགས་བརྗོད་པས༌ན། །ཁྱོད་ཀྱིས་ཁོང་ལ་རེ་ལྟོས་བཅང་འོས༌སོ།།
PSA 44:1 ༼དབུ་མཛད་ལ་སྤྲད་པའི་ཀོ་རཱག་གི་བུ་རྣམས་ཀྱི་བསླབ་བྱའི་མགུར༌མ།༽ དཀོན་མཆོག་ཁྱེད་ཀྱིས་གནའ་སྔ༌མོར། །ངེད་ཀྱི་ཕ་མེས་རྣམས་ཀྱི༌དུས། །མཛད་པའི་འཕྲིན་ལས་རྣ་བས༌ཐོས། །མེས་པོས་བདག་ལ་སྨྲས་བྱུང༌ངོ༌།།
PSA 44:2 ཁྱེད་ཀྱི་ཕྱག་གིས་མི་རིགས༌རྣམས། །བསྐྲད་ཀྱང་ཕ་མེས་གསོ་སྐྱོང༌མཛད། །ཁྱེད་ཀྱིས་མི་སྡེ་རྣམས་གཏོར༌ཡང༌། །ཕ་མེས་རྣམས་ནི་དར་བར༌མཛད།།
PSA 44:3 དེ་ཚོའི་རལ་གྲིས་ཡུལ་ཁམས༌ནི། །བཟུང་བ་མ་ཡིན་རྒྱལ་ཁ༌ཡང༌། །རང་གི་དཔུང་པས་བླངས་པ༌མིན། །ཁྱེད་ཀྱིས་དེ་ཚོར་གཅེས་པས༌ན། །ཁྱེད་ཕྱག་གཡས་དང་དཔུང་པ་དང༌། །ཞལ་རས་འོད་མདངས་བཅས་ལ༌བརྟེན། །ཡུལ་ནི་བཟུང་བ་ཡིན་ལགས༌སོ།།
PSA 44:4 དཀོན་མཆོག་ཁྱེད་ངའི་རྒྱལ་པོ༌ལགས། །ཡ་ཀོབ་རྒྱལ་བའི་བཀའ་གནོངས༌ཤིག།
PSA 44:5 ཁྱེད་ལ་བརྟེན་ནས་དགྲ་བཟློག༌ཅིང༌། །ངེད་ལ་སྡང་བའི་མི་རྣམས༌ནི། །ཁྱེད་མཚན་ནང་དུ་རྡོག་རྫིས༌གཏོང༌།།
PSA 44:6 རང་གི་གཞུ་ལ་བློ་གཏད༌མེད། །རལ་གྲིས་ང་རང་རྒྱལ་མི༌འགྱུར།།
PSA 44:7 འོན་ཀྱང་ངེད་རྣམས་དགྲ་ལས༌བསྐྱབས། །སྡང་མཁན་རྣམས་ཀྱང་ནོངས་པར༌མཛད།།
PSA 44:8 ངེད་ཀྱིས་ཉིན་གང་དཀོན་མཆོག༌བསྔགས། །རྒྱུན་དུ་ཁྱེད་ཀྱི་མཚན་ལ༌བསྟོད།།༼ སེ༌ལཱ། ༽
PSA 44:9 འོན་ཀྱང་ད་ལྟ་ཁྱེད་ཉིད༌ཀྱིས། །ངེད་རྣམས་དོར་ནས་དམའ་སར༌ཕབ། །དམག་དཔུང་མཉམ་དུ་ཁྱེད་མི༌གཤེགས།།
PSA 44:10 དགྲ་ལས་ངེད་རྣམས་ཕམ་པར༌མཛད། །སྡང་མཁན་རྣམས་ཀྱིས་གང་འདོད༌བཅོམ།།
PSA 44:11 བཤས་ལུག་བཞིན་དུ་ཁྱེད་ཀྱིས༌མཛད། །མི་རིགས་ཁྲོད་དུ་ངེད་རྣམས༌གཏོར།།
PSA 44:12 ཉིད་ཀྱི་མི་སྡེ་རིན་མེད༌བཙོངས། །རིན་དེས་ཁྱེད་ཀྱི་ནོར་མ༌སྤེལ།།
PSA 44:13 ཁྱིམ་མཚེས་དག་གི་སྨད་ར༌དང༌། །ཉེ་འཁོར་མི་ཡི་ཟུར་ཟ༌དང༌། །ཁྲེལ་དགོད་བྱེད་སར་ཁྱེད་ཀྱིས༌མཛད།།
PSA 44:14 མི་རིགས་རྣམས་ཀྱི་ངག་རྒྱུན༌དང༌། །མི་སྡེ་རྣམས་ཀྱིས་མགོ་གཡུག༌པའི། །གནས་སུ་ཁྱེད་ཀྱིས་ངེད་རྣམས༌མཛད།།
PSA 44:15 དགྲ་དང་དགྲ་ཤ་ལེན་མཁན༌དང༌། །འཕྱ་སྨོད་དམའ་འབེབ་ཚིག་གི༌རྐྱེན། །ཉིན་གང་ངོ་ཚ་མདུན་དུ༌ལྷགས། །འཚེར་བས་གདོང་ཡང་བཏུམས་པར༌བྱས།།
PSA 44:17 འདི་རྣམས་ངེད་སྟེང་བབས་ན༌ཡང༌། །ཁྱེད་ཉིད་བརྗེད་པར་མ་གྱུར༌ཅིང༌། །ཞལ་ཆད་ལ་ཡང་འགལ་བ༌མེད།།
PSA 44:18 སེམས་ནི་མ་འཁྱོར་གོམ་སྟབས༌ཀྱང༌། །ཁྱེད་ཀྱི་ཕེབས་ལམ་ལས་མ༌འཆོལ།།
PSA 44:19 འོན་ཀྱང་ཁྱི་སྤྱང་གནས་སུ༌ནི། །ཁྱེད་ཀྱིས་ངེད་རྣམས་རབ་ཏུ༌བརྫིས། །འཆི་བའི་གྲིབ་མས་ཡོངས་སུ༌བཀབ།།
PSA 44:20 རང་གི་དཀོན་མཆོག་མཚན་བརྗེད༌ཅིང༌། །གཞན་ལྷར་ལག་པ་བརྐྱངས་ཡོད༌ན།།
PSA 44:21 སེམས་ཀྱི་གསང་བ་དཀོན་མཆོག༌གིས། །མཁྱེན་པས་དེ་རྩད་མི་ཆོད༌དམ།།
PSA 44:22 ཁྱེད་ཉིད་རྐྱེན་གྱིས་གཞན་དག་གིས། །ངེད་རྣམས་ཉིན་རེར་གསོད་པ་དང་། །ངེད་ཅག་བཤས་ལུག་ལྟ་བུར་བརྩིས།།
PSA 44:23 ཀྱེ་ཀྱེ་གཙོ་བོ་སད་རོགས༌གནོངས། །ད་དུང་གཟིམས་ནས་བཞུགས་པ༌ཅི། །ཁྱེད་ཉིད་ཡར་ལ་བཞེངས་པར་མཛོད། །ངེད་རྣམས་རྟག་ཏུ་མི་སྤང༌རོགས།།
PSA 44:24 ཁྱེད་ཀྱི་ཞལ་རས་སྦས་ནས༌ནི། །ངེད་རྣམས་འཕྲད་པའི་སྡུག་བསྔལ༌དང༌། །གཉའ་གནོན་བརྗེད་པ་ཅི་ཡིན༌ནམ།།
PSA 44:25 ངེད་རྣམས་བཏུད་ནས་ཐལ་བར༌འདྲེས། །ལུས་ཀྱང་ས་ལ་འབྱར་བར༌གྱུར།།
PSA 44:26 ཁྱེད་ཉིད་བཞེངས་ནས་གྲོགས་མཛོད༌དང་། །བྱམས་བརྩེའི་དབང་གིས་ངེད་སྒྲོལ༌ཅིག།
PSA 45:1 ༼མེ་ཏོག་ཀུ་མུད་ཀྱི་དབྱངས་ནང༌དུ། ཀོ་རཱག་གི་བུ་རྣམས་ཀྱིས་གདུང་སེམས་དང་བཅས་དབུ་མཛད་ལ་བླངས་པའི་བསླབ་བྱའི་མགུར༌མ།༽ ཚིག་སྦྱོར་སྙན་མོས་བདག་གི་སེམས་བསྒུལ༌ཞིང༌། །རྒྱལ་པོ་ལ་ནི་ང་ཡིས་ཅི་བྱས༌བརྗོད། །བདག་གི་ལྕེ་ནི་མཁས་པའི་འབྲི་སྨྱུག༌ཡིན།།
PSA 45:2 མི་བུ་རྣམས་ལས་ཁྱེད་ནི་ལྷག་པར༌མཛེས། །ཁྱེད་ཀྱི་མཆུ་ལ་ཐུགས་རྗེ་ཕྱུག་པའི༌སྟབས། །དཀོན་མཆོག་གིས་ནི་གཏན་དུ་བྱིན་གྱིས༌བརླབས།།
PSA 45:3 དཔལ་དང་གཟི་བྱིན་ལགས་པའི་རལ་གྲི༌དེ། །ཀུན་དབང་ཁྱེད་ཀྱི་སྐུ་རྐེད་འདོགས་པར༌མཛོད།།
PSA 45:4 བདེན་པ་ཉིད་དང་ཁེངས་སྐྱུང་དྲང་བདེན༌ཕྱིར། །ཉིད་ཀྱི་གཟི་བྱིན་ཁྲོད་དུ་རྒྱལ་ཁའི༌ངང༌། །ཆིབས་ཁ་བསྒྱུར་ནས་མདུན་དུ་བསྐྱོད་པར༌མཛོད། །ཕྱག་གཡས་འཇིགས་རུང་དོན་རྣམས་མཛད་གྱུར༌ཅིག།
PSA 45:5 རྒྱལ་པོའི་རྣོ་ཞིང་མྱུར་བའི་མདའ་མོ༌ནི། །ཉིད་ཀྱི་དགྲ་ཡི་སྙིང་ལ་ཕོག་པ༌དང༌། །མི་སྡེ་ཐམས་ཅད་ཁྱེད་ཀྱི་ཞབས་འོག༌འགྱེལ།།
PSA 45:6 དཀོན་མཆོག་ཁྱེད་ཀྱི་བཞུགས་ཁྲི་རྟག་ཏུ༌གནས། །འཁར་བ་དྲང་པོ་ཁྱེད་ཀྱི་སྲིད་འཁར་ཡིན།།
PSA 45:7 ཁྱེད་ནི་དྲང་པོར་མཉེས་ཤིང་ངན་པར༌སྡང༌། །དེའི་ཕྱིར་དཀོན་མཆོག་ཁྱེད་ཀྱི་དཀོན་མཆོག༌གིས། །ཁྱེད་ཀྱི་གྲོགས་པོ་རྣམས་ལས་ལྷག་པར༌དུ། །ཁྱེད་ལ་དགའ་སྤྲོའི་སྣུམ་གྱིས་བྱུགས་པར༌མཛད།།
PSA 45:8 ན་བཟའ་རྣམས་ལས་བྱུགས་རྫས་གུ་གུལ༌དང༌། །ཨ་ག་རུ་དང་ཤིང་ཚའི་དྲི་བསུང༌འཐུལ། །བ་སོའི་མཁར་གྱི་རོལ་མོ་ལས་འབྱུང༌བའི། །སྙན་པའི་སྒྲ་ཡིས་ཁྱེད་ལ་སྤྲོ་བ༌བསྐྱེད།།
PSA 45:9 ཁྱེད་ཀྱི་བཀུར་འོས་བཞིན་བཟང་རྣམས་ཀྱི༌ཁྲོད། །རྒྱལ་པོའི་སྲས་མོ་བཞུགས་ཤིང་ཕྱག་གཡས༌སུ། །ཨོ་ཕིར་གསེར་རྒྱན་བཏགས་པའི་རྒྱལ་མོ༌བཞེངས།།
PSA 45:10 ཀྱེ་ཀྱེ་བུ་མོ་ཁྱེད་ཀྱིས་མཉན་པར༌གྱིས། །བསམ་བློ་ཐོངས་ལ་རྣ་བ་གཏད་ནས༌ཉོན། །རང་གི་རྒྱུད་དང་ཕ་གཞིས་བརྗེད་གྱུར༌ཅིག །
PSA 45:11 ཁྱེད་ཀྱི་མཛེས་སྡུག་ལ་ནི་རྒྱལ་པོ༌གདུང༌། །རང་གི་གཙོ་བོ་ཁོང་ལ་ཕྱག་ཕུལ༌ཞིག།
PSA 45:12 ཐཱར་གྱི་བུ་མོས་ཕྱག་རྟེན་འབུལ་བ༌དང༌། །མི་སྡེའི་ཕྱུག་པོས་ཁྱེད་ཀྱི་ཐུགས་རྗེ༌བསྙེག།
PSA 45:13 ཁབ་ཏུ་རྒྱལ་པོའི་སྲས་མོ་ཤིན་ཏུ༌མཛེས། །ན་བཟའ་གསེར་གྱི་སྐུད་པས་བཏགས་པ༌འོ།།
PSA 45:14 ཚེམ་དྲུབ་གསོལ་ཏེ་རྒྱལ་པོའི་དྲུང་བསྐྱལ༌འོང༌། །ཁོ་མོའི་བག་རོགས་ན་ཆུང་བུ་མོ༌རྣམས། །དེ་བཞིན་ཁྱེད་ཀྱི་སྐུ་དྲུང་བསྐྱལ་བར༌འགྱུར།།
PSA 45:15 དགའ་མགུ་ཡི་རངས་དང་བཅས་བསྐྱལ་བ༌དང༌། །དེ་རྣམས་རྒྱལ་པོའི་ཁབ་ནང་འཇུག་པར༌འགྱུར།།
PSA 45:16 བུ་རྒྱུད་རྣམས་ཀྱིས་ཡབ་མེས་རྒྱུན་འཛིན༌ཞིང་། །ས་གཞི་ཡོངས་སུ་རྗེ་བོར་ཁྱེད་ཀྱིས༌བསྐོ།།
PSA 45:17 ཁྱེད་མཚན་མི་རབས་ཀུན་ལ་དྲན་པར༌བྱ། །མི་སྡེ་ཡོངས་ཀྱིས་རྟག་ཏུ་ཁྱེད་ལ༌བསྟོད།།
PSA 46:1 ༼དབུ་མཛད་ལ་སྐྱེས་མའི་གཞས་གདངས་མཐོན་པོར་བླངས་པའི་ཀོ་རཱག་གི་བུ་རྣམས་ཀྱི་མགུར༌མ།༽ དཀོན་མཆོག་རང་ཅག་སྐྱབས་གནས་སྟོབས་ཤུགས༌ཡིན། །སྡུག་བསྔལ་ནང་དུ་ང་ཚོའི་སྐྱབས་ལགས༌སོ།།
PSA 46:2 དེའི་ཕྱིར་ས་གཞི་འགུལ་ཞིང་རི་བོ༌རྣམས། །བརྡིབས་ནས་རྒྱ་མཚོའི་གཏིང་དུ་ནུབ་པ༌དང༌།།
PSA 46:3 རྒྱ་མཚོའི་རྦ་རླབས་དྲག་ཏུ་འཕྱུར་ནས༌ནི། །རི་རྣམས་བསྒུལ་ཡང་ང་ཚོར་འཇིགས་པ༌མེད།།༼ སེ༌ལཱ། ༽
PSA 46:4 དེ་རུ་གཙང་པོ་ཞིག་ཀྱང་ཡོད་པ༌དང༌། །ཆུ་ཕྲན་མང་པོས་བླ་མེད་དཀོན་མཆོག༌གི །བཞུགས་གནས་དམ་པའི་གྲོང་ཁྱེར་སྐྱིད་པར༌བྱེད།།
PSA 46:5 དཀོན་མཆོག་དབུས་སུ་བཞུགས་པས་གཡོ་མི༌འགྱུར། །ཐོ་རངས་དཀོན་མཆོག་གིས་ནི་དེར་གྲོགས༌མཛད།།
PSA 46:6 ཕྱི་ཕྱོགས་མི་རྣམས་འུར་སྒྲོག་རྒྱལ་ཁམས༌གཡོ། །ཁོང་གིས་གསུང་སྐད་བཏོན་པས་ས་གཞི༌ཞུ།།
PSA 46:7 དཔུང་ཚོགས་ཡ་ཝཱེ་རང་ཅག་མཉམ་དུ༌བཞུགས། །ཡ་ཀོབ་དཀོན་མཆོག་ང་ཚོའི་སྐྱབས་གནས༌ལགས།།༼ སེ༌ལཱ། ༽
PSA 46:8 ས་གཞི་ཇི་ལྟར་སྟོངས་སུ་བཅུག་པ༌ཡི། །ཡ་ཝཱེའི་མཛད་པ་རྣམས་ལ་བལྟ་རུ༌ཤོག།
PSA 46:9 ཁོང་གིས་ས་མཐའི་བར་དུ་དམག་འཁྲུག༌སེལ། །གཞུ་བཅག་མདུང་གཏུབ་ཤིང་རྟ་མེར་བསྲེགས༌སོ།།
PSA 46:10 དཀོན་མཆོག་ང་ཡིན་རྟོགས་ནས་ལྷོད་ལྷོད༌གྱིས། །མི་རིགས་རྣམས་ཀྱི་ཁྲོད་དུ་བདག་ལ༌བསྟོད། །ས་གཞི་ཡོངས་སུ་བདག་ལ་བསྟོད་པ༌འབྱུང༌།།
PSA 46:11 དཔུང་ཚོགས་ཡ་ཝཱེ་རང་ཅག་མཉམ་དུ༌བཞུགས། །ཡ་ཀོབ་དཀོན་མཆོག་ང་ཚོའི་སྐྱབས་གནས༌ལགས།།༼ སེ༌ལཱ། ༽
PSA 47:1 ༼དབུ་མཛད་ལ་སྤྲད་པའི་ཀོ་རཱག་གི་བུ་རྣམས་ཀྱི་མགུར༌མ།༽ བླ་མེད་ཡ་ཝཱེ་གུས་པར་འོས་པ་དང༌། །ས་གཞི་ཡོངས་ཀྱི་རྒྱལ་ཆེན་ཡིན་པས༌ན། །མི་རིགས་ཀུན་གྱིས་ཐལ་མོ་བརྡབས་ནས༌ནི། །དཀོན་མཆོག་ཉིད་ལ་དགའ་སྤྲོའི་ཀི་སྒྲ༌སྒྲོགས།།
PSA 47:3 ཁོང་གིས་སྡེ་རྣམས་རང་ཅག་འོག་ཏུ༌བསྡུས། །མི་རིགས་རྣམས་ཀྱང་ང་ཚོའི་རྐང་འོག༌བཅུག།
PSA 47:4 ཁོང་གིས་གཅེས་སུ་འཛིན་པའི་ཡ་ཀོབ༌ཀྱི། །གཟི་དཔལ་ཡིན་པའི་ནོར་སྐལ་ང་ཚོར༌བདམས།།༼ སེ༌ལཱ། ༽
PSA 47:5 ཀི་སྒྲའི་ཁྲོད་དུ་དཀོན་མཆོག་ཡར་འཕགས༌ཤིང༌། །དུང་སྐད་དང་བཅས་ཡ་ཝཱེ་ཡར་འཕགས༌སོ།།
PSA 47:6 ཁྱོད་ཚོས་དཀོན་མཆོག་ཁོང་ལ་བསྟོད་དབྱངས༌ཕུལ། །ང་ཚོའི་རྒྱལ་པོར་བསྟོད་པའི་མགུར་མ༌ཕུལ།།
PSA 47:7 དཀོན་མཆོག་ས་གཞི་ཡོངས་ཀྱི་རྒྱལ་པོ༌ཡིན། །དེའི་ཕྱིར་གོ་རྟོགས་དང་བཅས་ཁོང་ལ༌བསྟོད།།
PSA 47:8 དཀོན་མཆོག་ཉིད་ཀྱིས་མི་རྣམས་དབང་དུ༌བསྒྱུར། །ཁོང་ནི་དམ་པའི་རྒྱལ་ཁྲིར་བཞུགས་པ༌ལགས།།
PSA 47:9 ཨབ་ར་ཧམ་གྱི་དཀོན་མཆོག་འབངས་མི༌བཞིན། །མི་སྡེའི་སྐུ་དྲག་རྣམས་ཀྱང་མཉམ་དུ༌འདུ། །ས་གཞིའི་ཕུབ་རྣམས་དཀོན་མཆོག་ཉིད་ཀྱི༌ཡིན། །ཁོང་ཉིད་རབ་ཏུ་འཕགས་པ་ལགས་པས༌སོ།།
PSA 48:1 ༼ཀོ་རཱག་གི་བུ་རྣམས་ཀྱི་མགུར༌མ།༽ རང་རེའི་དཀོན་མཆོག་ཉིད་ཀྱི་གྲོང་ཁྱེར༌ཏེ། །རི་བོ་དམ་པར་ཡ་ཝཱེ་ཁྱད་དུ༌འཕགས། །ཁོང་ནི་རབ་ཏུ་བསྟོད་པར་འོས་ལགས༌སོ།།
PSA 48:2 རྒྱལ་པོ་ཆེན་པོའི་གྲོང་ཁྱེར་བྱང་ངོས༌ཀྱི། །ཛ་ཡན་རི་བོ་མཐོན་པོའི་གནས་སུ༌མཛེས། །ས་གཞི་ཡོངས་ཀུན་དགའ་བའི་གནས་མཆོག༌ཡིན།།
PSA 48:3 དཀོན་མཆོག་དེ་ཡི་མཁར་རྫོང་ནང་དུ༌བཞུགས། །ཁོང་ཉིད་སྐྱབས་གནས་ཡིན་པ་གསལ་ལེར༌མངོན།།
PSA 48:4 ལྟོས་དང་རྒྱལ་པོ་རྣམས་ནི་མཉམ་དུ༌འདུས། །ཁོ་རྣམས་ལྷན་ཅིག་མདུན་དུ་སྐྱོད་པ༌ཡིན།།
PSA 48:5 ཁོ་ཚོས་གྲོང་ཁྱེར་དེ་ཉིད་མཐོང་མ༌ཐག །ཡ་མཚན་སྐྱེས་ཤིང་འཇིགས་ནས་བྲོས༌པ་འོ།།
PSA 48:6 ཁོ་རྣམས་དེ་རུ་སྐྲག་ནས་འདར་བ༌དང༌། །ཕྲུ་གུ་བཙའ་བའི་བུད་མེད་བཞིན་དུ༌གདུང༌།།
PSA 48:7 ཤར་རླུང་དང་བཅས་ཐཱར་ཞིས་གྲུ་རྣམས༌གཅོག།
PSA 48:8 ང་ཚོས་དཔུང་ཚོགས་ཡ་ཝཱེའི་གྲོང་ཁྱེར༌ཏེ། །རང་ཅག་དཀོན་མཆོག་ཉིད་ཀྱི་གྲོང་ཁྱེར༌དུ། །ཇི་ལྟར་ཐོས་བཞིན་ང་ཚོས་མཐོང་བ༌ཡིན། །ཁོང་གིས་གྲོང་ཁྱེར་རྟག་ཏུ་བརྟན་པོར༌མཛད།།༼ སེ༌ལཱ། ༽
PSA 48:9 ཀྱེ་ཀྱེ་དཀོན་མཆོག་ཁྱེད་ཀྱི་མཆོད་ཁང༌དུ། །ང་ཚོས་ཉིད་ཀྱི་བྱམས་བརྩེ་སྒོམ་པར༌བྱེད།།
PSA 48:10 ཀྱེ་ཀྱེ་དཀོན་མཆོག་ཁྱེད་ཀྱི་མཚན་ནང༌བཞིན། །ཁྱེད་ལ་ཕུལ་བའི་བསྟོད་བསྔགས་ས་མཐར༌སླེབས། །ཁྱེད་ཕྱག་གཡས་པར་དྲང་བདེན་ཁྱབ་ནས༌ཡོད།།
PSA 48:11 ཁྱེད་ཀྱི་ཁྲིམས་གཅོད་རྣམས་ཀྱི་དབང་གིས༌ནི། །རི་བོ་ཛ་ཡན་དགའ་ཞིང་ཡ་ཧུ༌དཱའི། །བུ་མོ་ཐམས་ཅད་མགུ་བར་འོས་སོ༌ལོ།།
PSA 48:12 ཁྱོད་རྣམས་ཛ་ཡན་ཡུལ་ལ་འགྲིམ་པ༌དང༌། །སྐོར་བ་བྱས་ནས་ལྕོག་མཁར་རྣམས་རྩིས༌ཤིག།
PSA 48:13 མི་རབས་ཕྱི་མ་རྣམས་ལ་འཆད་ཐུབ༌ཕྱིར། །ཁོང་གི་ལྕགས་རིར་མཉམ་པར་འཇོག་པ་དང་། །ཁོང་གི་ཕོ་བྲང་ལ་ནི་ཞིབ་ལྟ༌གྱིས།།
PSA 48:14 གང་ལ་ཞེ་ན་དཀོན་མཆོག་འདི་ཉིད༌ནི། །རྒྱུན་ནས་རྒྱུན་དུ་རང་རེའི་དཀོན་མཆོག༌ཡིན། །འཆི་བའི་བར་དུ་ང་ཚོར་ལམ་སྟོན༌མཛད།།
PSA 49:1 ༼དབུ་མཛད་ལ་སྤྲད་པའི་ཀོ་རཱག་གི་བུ་རྣམས་ཀྱི་མགུར༌མ།༽ མི་སྡེ་ཡོངས་ཀྱིས་བདག་གི་གཏམ་ལ༌གསོན། །རྣ་བ་གཏོད་ཅིག་འཇིག་རྟེན་སྐྱེ་དགུ༌ཀུན།།
PSA 49:2 མཆོག་དམན་དབུལ་ཕྱུག་གང་ཡིན་ཉོན་ཅིག༌ཀྱེ།།
PSA 49:3 བདག་གི་ངག་ལས་ཤེས་རབ་གཏམ་སྨྲ༌ཞིང༌། །བདག་གི་སེམས་ནས་དོན་ཟབ་བསམ་བློ༌གཏོང༌།།
PSA 49:4 བདག་གིས་ལེགས་བཤད་ཅིག་ལ་རྣ་བ༌གཏད། །པི་ཝང་སྒྲ་དང་སྦྲགས་ནས་གབ་ཚིག༌འགྲེལ།།
PSA 49:5 སྡུག་བསྔལ་མང་དུ་འབྱུང་བའི་ཉིན་མོ༌ལ། །མི་ངན་བདག་གི་རྐང་བའི་རྗེས་འབྲངས༌ཏེ། །ཕྱོགས་བཞི་མཚམས་བརྒྱད་ཀུན་ནས་མཐའ་བསྐོར༌ཡང༌། །བདག་ནི་འཇིགས་པའི་སྐལ་བ་ཡོད་དམ༌ཅི།།
PSA 49:6 དེ་ཚོས་རྒྱུ་ལ་བརྟེན་ནས་འབྱོར་ཕྱུག༌ངོམས།།
PSA 49:7 འོན་ཀྱང་དེ་ལས་རང་གི་སྤུན་ཟླ༌ནི། །སྐྱོབ་པར་ནུས་པ་གཅིག་ཀྱང་ཡོད་མ༌ཡིན། །ཡང་ན་དེ་ཡི་ཚབ་ཏུ་དཀོན་མཆོག༌ལ། །བླུ་རིན་འབུལ་བར་ནུས་པ་ཡོད་མ༌ཡིན།།
PSA 49:8 དུར་ལ་མི་འཇུག་རྟག་ཏུ་གསོན་པའི༌ཕྱིར། །ཚེ་སྲོག་ཉོ་བའི་བླུ་རིན་རྫོགས་མེད༌པས། །འཇལ་བའི་བསམ་པ་རྟག་ཏུ་འདོར་དགོས༌བྱུང༌།།
PSA 49:10 སུས་ཀྱང་ཤེས་རབ་ལྡན་པ་འཆི་བ༌མཐོང༌། །བླུན་ཞིང་རྨོངས་པ་མཉམ་དུ་འཆི་བ༌མཐོང༌། །དེ་ཡི་རྒྱུ་ནོར་ཐམས་ཅད་གཞན་ལ༌འཐོབ།།
PSA 49:11 དེ་ཚོའི་སེམས་སུ་རང་གི་ཁྱིམ་གཞིས༌ཀུན། །རྟག་ཏུ་གནས་ཤིང་ཕྱི་མར་དབང་བར༌སྙམ། །ས་ལ་རང་གི་མིང་ཡང་འདོགས་པར༌བྱེད།།
PSA 49:12 འོན་ཀྱང་རྙེད་བཀུར་ནང་དུ་སྡོད་མི༌རིང༌། །འཆི་བར་འགྱུར་བའི་དུད་འགྲོ་ནང་བཞིན༌ཡིན།།
PSA 49:13 དེ་ཚོའི་བྱེད་ལུགས་གླེན་པ་ཡིན་ན༌ཡང༌། །མི་རབས་རྗེས་མ་དེ་ཚོའི་གཏམ་ལ༌མོས།།༼ སེ༌ལཱ། ༽
PSA 49:14 དེ་རྣམས་གཤིན་ཡུལ་མངགས་པའི་ལུག་ཁྱུ༌བཞིན། །འཆི་བ་དངོས་ནི་རྫི་བོ་ཤ་སྟག༌ཡིན། །ཞོགས་པའི་དུས་སུ་གཞུང་དྲང་མི་རྣམས༌ཀྱིས། །དེ་རྣམས་དབང་ཤེད་དྲག་པོས་གནོན་པར༌བྱེད། །གཤིན་པོའི་གནས་ཀྱིས་དེ་དག་ལུས་གཟུགས༌འཇོམས། །དེ་ལ་སྡོད་པའི་གནས་ཀྱང་མེད་པར༌བྱས།།
PSA 49:15 འོན་ཀྱང་བདག་གི་རྣམ་ཤེས་དཀོན་མཆོག༌གིས། །གཤིན་པོའི་གནས་ཀྱི་དབང་ཤུགས་ནས་བླུས༌ཏེ། །བདག་ནི་ཁོང་གི་དྲུང་དུ་འདྲེན་པར༌སྲིད།།༼ སེ༌ལཱ། ༽
PSA 49:16 སུ་ཞིག་རྒྱུ་ནོར་འཛོམས་ཤིང་དཔལ་རྒྱས༌དུས། །ཁྱོད་ཀྱི་སེམས་ནི་འཁྲུགས་པར་མི༌བྱ་འོ།།
PSA 49:17 གང་ལ་ཞེ་ན་ཁོ་རང་འཆི་བའི༌དུས། །རྒྱུ་ནོར་ལ་སོགས་ཅི་ཡང་འཁྱེར་མི༌ནུས། །གཟི་དཔལ་ཁོ་ཡི་རྗེས་སུ་འབྲང་བ༌མིན།།
PSA 49:18 དེ་ཡང་ཁོ་རང་གསོན་པོར་འཚོ་དུས༌སུ། །རང་ཉིད་བྱིན་རླབས་ཅན་ཡིན་ཞེས་སྨྲ༌ཞིང༌། །རང་ཕན་ཅན་ལ་གཞན་གྱིས་བསྟོད་ར༌བྱེད།།
PSA 49:19 ཁོ་ནི་མེས་པོའི་གྲས་སུ་འགྲོ་བ༌དང༌། །འོད་ཟེར་དངོས་ནི་ནམ་ཡང་མཐོང་བ༌མེད།།
PSA 49:20 རྙེད་བཀུར་ནང་དུ་གོ་རྟོགས་མ་བྱུང༌ན། །འཆི་བར་འགྱུར་བའི་དུད་འགྲོ་ལས་མ༌མཆིས།།
PSA 50:1 ༼ཨ་སབ་ཀྱི་མགུར༌མ།༽ ཀུན་དབང་དཀོན་མཆོག་ཡ་ཝཱེས་གསུང་གནང༌སྟེ། །ཤར་ནས་ནུབ་ལ་ཐུག་པའི་ས་གཞི༌བོས།།
PSA 50:2 མཛེས་སྡུག་ཡོངས་སུ་རྫོགས་པའི་ཛ་ཡན༌ལས། །དཀོན་མཆོག་གིས་ནི་ཉིད་ཀྱི་གཟི་འོད༌མངོན།།
PSA 50:3 རང་ཅག་དཀོན་མཆོག་ཕེབས་ཤིང་ཞལ་མི༌རོག །ཁོང་གི་དྲུང་དུ་མེ་ཡིས་འཇོམས་བྱེད༌ཅིང༌། །ཁོང་གི་ཕྱོགས་བཞིར་རླུང་དམར་དྲག་ཏུ༌གཡུག།
PSA 50:4 ཉིད་ཀྱི་མི་སྡེར་ཁྲིམས་ཐག་གཅོད་པའི༌ཕྱིར། །སྟེང་གི་གནམ་དང་ས་གཞིར་ཞལ་འབོད༌གནང༌།།
PSA 50:5 མཆོད་པ་ཕུལ་ནས་ཁ་ཆད་བཞག་པ༌ཡི། །དད་གུས་ཅན་རྣམས་ངའི་དྲུང་སྡུས་ཤིག༌གསུངས།།
PSA 50:6 དཀོན་མཆོག་ཉིད་ཀྱིས་དངོས་སུ་ཁྲིམས་གཅོད༌པས། །ནམ་མཁའི་དབྱིངས་རྣམས་ཁོང་གི་དྲང་བདེན༌སྒྲོག།༼ སེ༌ལཱ། ༽
PSA 50:7 ང་ཡི་བུ་རྒྱུད་ཉོན་ཅིག་བདག་གིས༌གསུང༌། །ཡེས་ར་ཨེལ་ཁྱོད་བདག་གིས་ནག་ཉེས༌འཛུགས། །ང་ནི་དཀོན་མཆོག་ཁྱོད་ཀྱི་དཀོན་མཆོག༌ཡིན།།
PSA 50:8 ཁྱོད་ཀྱི་མཆོད་པའི་ཕྱིར་དུ་བཀའ་མི༌བཀྱོན། །ཁྱོད་ཀྱི་སྦྱིན་སྲེག་རྟག་ཏུ་ངའི་མདུན༌གནས།།
PSA 50:9 ཁྱོད་ཀྱི་ཁྱིམ་ནས་གླང་ཐུག་ངས་མི༌ལེན། །ཁྱོད་ཀྱི་ལྷས་ནས་ར་ཕོ་ངས་མི༌འཁྱེར།།
PSA 50:10 རྒྱ་རྫོང་ནགས་ཀྱི་རི་དྭགས་ཐམས་ཅད་དང༌། །སྟོང་ཕྲག་རི་བོའི་ཕྱུགས་རྣམས་ཁོ་བོའི༌ཡིན།།
PSA 50:11 རི་ཡི་འདབ་ཆགས་ཐམས་ཅད་ངས་ཤེས༌ཤིང༌། །ཐང་གི་རི་དྭགས་མཐའ་དག་ང་ཡི༌ཡིན།།
PSA 50:12 འཇིག་རྟེན་དང་ནི་དེ་རུ་ཡོད་པ༌ཀུན། །བདག་གི་ཡིན་པས་ང་རང་བཀྲེས༌ན་ཡང་། །ཁྱོད་ལ་སྨྲ་བའི་དགོས་པ་ཡེ་མ༌མཆིས།།
PSA 50:13 ང་ཡིས་གླང་གི་ཤ་ནི་བཟའ་འགྱུར༌རམ། །དེ་བཞིན་ར་ཕོའི་ཁྲག་ཀྱང་ངས་བཏུང༌ངམ།།
PSA 50:14 དཀོན་མཆོག་ལ་ནི་གཏང་རག་མཆོད་པར༌ཕུལ། །བླ་མེད་ཁོང་ལ་དམ་བཅའ་རྣམས་སྒྲུབས༌ཤིག།
PSA 50:15 དཀའ་སྡུག་དུས་སུ་ང་ལ་འོ་དོད༌བོས། །ངས་ཁྱོད་སྒྲོལ་ཞིང་ཁྱོད་ཀྱིས་ང་ལ༌བསྟོད།།
PSA 50:16 འོན་ཀྱང་ངན་པར་ཁོང་གིས་འདི་སྐད༌གསུངས། །ང་ཡི་སྒྲིག་ཁྲིམས་ཁྱོད་ཀྱིས་ཅི་ལ༌འཆད། །ང་ཡི་ཞལ་ཆད་ཁ་རུ་ཅི་ལ༌གླེང༌།།
PSA 50:17 དོན་དུ་ཁྱོད་ནི་བསླབ་བྱར་སྡང་བ༌དང༌། །ང་ཡི་བཀའ་རྣམས་རྒྱབ་ཏུ་བསྐྱུར་པ༌འོ།།
PSA 50:18 ཇག་རྐུན་མཐོང་དུས་ཁྱོད་ནི་ཁོ་དང༌འགྲོགས། །ལོག་གཡེམ་བྱེད་མཁན་ལ་ཡང་ཁྱོད་རང༌འདྲེས།།
PSA 50:19 ཁྱོད་ཀྱི་ཁ་ཡིས་གཏམ་ངན་གང་བྱུང༌སྨྲ། །ཁྱོད་ཀྱི་ལྕེ་ཡིས་གཡོ་སྒྱུ་རྩོམ༌པ་འོ།།
PSA 50:20 ཁྱོད་ཀྱིས་རྒྱུན་དུ་རང་གི་སྤུན་ལ༌སྨད། །རང་གི་མ་ཡི་བུ་ལ་སྙད་འདོགས༌བྱེད།།
PSA 50:21 དེ་བཞིན་བྱས་ཀྱང་བདག་གིས་ཅང་མ༌སྨྲས། །ཁྱོད་ཀྱིས་ང་རང་ཁྱོད་དང་འདྲ་བར༌བསམས། །དོན་དུ་ང་ཡིས་ཁྱོད་ལ་བཀྱོན་ནས༌ནི། །ཁ་རི་ཁ་ཐུག་ཁྱོད་ཀྱི་སྐྱོན་བརྗོད༌དོ།།
PSA 50:22 སྐྱོབ་མཁན་མེད་པར་ངས་ཁྱོད་དབྲལ་ལས༌ཆེ། །དཀོན་མཆོག་བརྗེད་མཁན་ཁྱོད་རྣམས་མནོ༌བསམ་ཐོངས།།
PSA 50:23 གཏང་རག་མཆོད་པར་འབུལ་མཁན་ཐམས་ཅད༌ཀྱིས། །དོན་དུ་ང་ལ་བསྟོད་པ་ཕུལ་བ༌ཡིན། །སྤྱོད་ལམ་ཚགས་སུ་ཆུད་པར་བྱེད་མཁན༌ལ། །དཀོན་མཆོག་ང་ཡི་ཐར་པ་བདག་གིས༌སྟོན།།
PSA 51:1 ༼དཱ་བིད་པད་ཤེ་བཱ་དང་འགྲོགས་པའི་རྗེས༌སུ། ལུང་སྟོན་པ་ནཱ་ཐན་ཁོང་གི་དྲུང་དུ་འོངས་པའི་ཚེ་ཁོང་གིས་མགུར་འདི་བརྩམས་ནས་དབུ་མཛད་ལ་སྤྲད༌པ།༽ ཀྱེ་ཀྱེ་དཀོན་མཆོག་ཁྱེད་ཀྱི་བྱམས་བརྩེ༌བཞིན། །བདག་ལ་སྙིང་རྗེས་གཟིགས་པར་མཛད་དུ༌གསོལ། །ཁྱེད་ཀྱི་ཐུགས་རྗེ་ཆེན་པོ་ལ་བརྟེན༌ནས། །བདག་གི་ཉེས་སྐྱོན་མཐའ་དག་སེལ་བར༌མཛོད།།
PSA 51:2 བདག་གི་ཉེས་སྐྱོན་ཡོངས་སུ་འདག་པར༌མཛོད། །བདག་གི་སྡིག་པ་ཡོངས་སུ་སེལ་རོགས༌གནོངས།།
PSA 51:3 དེ་ནི་རང་སྐྱོན་རང་གིས་ཤེས་པ༌དང༌། །རང་གི་སྡིག་པ་ནམ་རྒྱུན་མཐོང་ཕྱིར༌རོ།།
PSA 51:4 བདག་གིས་ཁྱེད་ཉིད་གཅིག་པུར་འགལ་བ་ཡི། །སྡིག་པ་བྱས་ཤིང་ཁྱེད་ཀྱི་སྤྱན་དྲུང་དུ། །ངན་པར་གཟིགས་པའི་སྤྱོད་ངན་འདི་སྤྱད་པས། །ཁྱེད་ཀྱིས་བཀའ་བཀྱོན་གནང་དུས་དྲང་བདེན༌མངོན། །ཉེས་ཆད་གཅོད་དུས་གསལ་ཞིང་ཡང་དག༌གོ།
PSA 51:5 གཟིགས་དང་ང་རང་སྡིག་པའི་ནང་དུ༌སྐྱེས། །མ་ཡི་མངལ་དུ་ཆགས་དུས་སྡིག་པ༌ཡོད།།
PSA 51:6 གཟིགས་དང་ཁྱེད་ནི་སེམས་རྒྱུད་དྲང་པོར༌དགྱེས། །ཁྱེད་ཀྱིས་བདག་གི་ཕུགས་སུ་ཤེས་རབ༌བསྩལ།།
PSA 51:7 ཨི་སོབ་རྩྭ་ཡིས་ང་རང་གཙང་བར་མཛོད། །དེ་ནས་ང་རང་གཙང་མར་འགྱུར་འོང༌ངོ༌། །ཁྱེད་ཀྱིས་ང་རང་གཙང་མར་འཁྲུ་བར༌མཛོད། །བདག་ནི་ཁ་བ་ལས་ཀྱང་དཀར་པོར༌འགྱུར།།
PSA 51:8 དགའ་མགུ་རངས་པའི་སྐད་སྒྲ་ཐོས་སུ༌གསོལ། །ཁྱེད་ཀྱིས་བཅག་པའི་རུས་པ་སྤྲོ་བར༌མཛོད།།
PSA 51:9 ཁྱེད་ཀྱིས་བདག་གི་ཉེས་པར་མི་གཟིགས༌པར། །ང་ཡི་སྡིག་ཉེས་ཐམས་ཅད་འདག་པར༌མཛོད།།
PSA 51:10 ཀྱེ་ཀྱེ་དཀོན་མཆོག་ཁྱེད་ཀྱིས་ང་རང༌ལ། །ཡིད་སེམས་གཙང་མ་ངེས་པར་མཛད་དུ༌གསོལ། །སླར་ཡང་ཡིད་སེམས་བརྟན་པོར་གནང་བར༌མཛོད།།
PSA 51:11 ཁྱེད་ཀྱི་དྲུང་ནས་ང་རང་མི་སྐྲོད་ཅིང༌། །དམ་པའི་ཐུགས་ཉིད་ང་ནས་མི་ལེན༌རོགས།།
PSA 51:12 ཁྱེད་ཀྱིས་བདག་ལ་ཐར་པའི་དགའ་སྤྲོ༌དང༌། །དགའ་བའི་སེམས་ཉིད་སླར་ཡང་གནང་སྟེ༌སྐྱོངས།།
PSA 51:13 བདག་གིས་ཁྱེད་ཀྱི་བཀའ་ཁྲིམས་རྣམས་ལ༌ནི། །བརྟེན་ནས་ཉེས་ཅན་རྣམས་ལ་བསླབ་བྱ༌སྟོན། །སྡིག་ཅན་དག་ནི་ཁྱེད་ཕྱོགས་འཁོར་དུ༌འཇུག།
PSA 51:14 ཀྱེ་ཀྱེ་དཀོན་མཆོག་ང་ཡི་སྐྱབས་མགོན༌ལགས། །མི་ཁྲག་བཞུར་བའི་སྡིག་ཉེས་ལས་སྐྱོབ༌རོགས། །དེ་ནས་ངའི་ལྕེས་སྐད་གསང་མཐོན་པོའི༌ངང༌། །ཁྱེད་ཀྱི་དྲང་བདེན་ལ་ནི་བསྟོད་བསྔགས༌བརྗོད།།
PSA 51:15 ང་ཡི་མཆུ་སྒྲོས་ཕྱེས་དང་ཀྱེ་གཙོ༌བོ། །བདག་གི་ཁ་ཡིས་ཁྱེད་ལ་བསྔགས་པར༌བྱ།།
PSA 51:16 གང་ལ་ཞེ་ན་མཆོད་པར་ཁྱེད་མི༌མཉེས། །མཉེས་པ་ཡིན་ན་བདག་གིས་འབུལ་བར༌བྱ། །སྦྱིན་སྲེག་ལ་ཡང་ཁྱེད་ཉིད་ཐུགས་མི༌དགྱེས།།
PSA 51:17 དཀོན་མཆོག་མཉེས་པའི་མཆོད་པ་སྡུག་པའི༌སེམས། །སྡུག་གིས་མནར་ཞིང་གནོང་འགྱོད་ཅན་གྱི༌སེམས། །དཀོན་མཆོག་ཁྱེད་ཀྱིས་བརྙས་པར་མི་མཛད༌དོ།།
PSA 51:18 ཐུགས་དགོངས་ཡག་པོས་ཛ་ཡན་དྲིན་གྱིས༌སྐྱོང༌། །ཡེ་རུ་སཱ་ལེམ་ལྕགས་རི་བརྩིག་པར༌མཛོད།།
PSA 51:19 དུས་དེར་དྲང་བདེན་མཆོད་པ་སྦྱིན་སྲེག༌དང༌། །སྦྱིན་སྲེག་མཆོད་པ་ཧྲིལ་པོར་ཁྱེད་ནི༌མཉེས། །གླང་ཐུག་རྣམས་ཀྱང་མཆོད་ཁྲིར་འབུལ་བར༌འགྱུར།།
PSA 52:1 ༼ཨེ་དོམ་པ་དོ་ཨེག་སོང་ནས་སོ་ལོ་ལ་དཱ་བིད་ནི་ཨ་ཧི་མེ་ལེག་གི་ཁྱིམ་དུ་འཛུལ་སོང་ཞེས་སྨྲས་པའི༌ཚེ། དཱ་བིད་ཀྱིས་བསླབ་བྱའི་མགུར་མ་འདི་བརྩམས་ནས་དབུ་མཛད་ལ་སྤྲད༌པ།༽ དཔའ་རྒོད་ཁྱོད་ཀྱིས་སེམས་ངན་ཅི་ལ༌ངོམ། །དཀོན་མཆོག་ཁོང་གི་བྱམས་བརྩེ་དུས་རྒྱུན༌གནས།།
PSA 52:2 ཁྱོད་ཀྱི་ལྕེ་ཡིས་ངན་ཇུས་གཤོམ་པ༌དང༌། །སྤུ་གྲི་རྣོན་པོ་བཞིན་དུ་གཡོ་སྒྱུ༌སྤེལ།།
PSA 52:3 ཁྱོད་རང་བཟང་པོ་ལས་ནི་ངན་པར༌དགའ། །དྲང་པོའི་གཏམ་ལས་རྫུན་ལ་ལྷག་ཏུ༌གདུང༌།།༼ སེ༌ལཱ། ༽
PSA 52:4 གཡོ་ཅན་ལྕེ་ཁྱོད་སྲོག་ལེན་གཏམ་ལ༌དགའ།།
PSA 52:5 དཀོན་མཆོག་གིས་ཀྱང་ཁྱོད་ནི་གཏན་དུ༌གཞོམ། །ཁོང་གིས་བཟུང་ནས་གུར་སྒོར་བསྐྲད་པ༌དང༌། །གསོན་པོའི་ཡུལ་དུ་རྩ་ནས་བརླག་པར༌བྱེད།།༼ སེ༌ལཱ། ༽
PSA 52:6 དྲང་པོས་མཐོང་ཞིང་འཇིགས་པར་འགྱུར་བ༌དང༌། །དེ་ལ་ཁྲེལ་དགོད་བྱེད་ཅིང་འདི་བཞིན༌དུ།།
PSA 52:7 ལྟོས་དང་དཀོན་མཆོག་སྟོབས་སུ་མ་བཟུང༌བར། །རང་གི་རྒྱུ་ནོར་མང་པོར་བློ་གཏད༌དེ། །གཞན་པ་བརླག་ནས་རང་ལ་ཤེད་བཅུག༌སྨྲ།།
PSA 52:8 འོན་ཀྱང་བདག་ནི་དཀོན་མཆོག་བཞུགས་གནས༌ནང༌། །ལོ་འདབ་རྒྱས་པའི་སྐྱུ་རུ་ཤིང་དང༌འདྲ། །དུས་རྒྱུན་དཀོན་མཆོག་བྱམས་བརྩེར་བློ་གདེང༌བསྐྱེད།།
PSA 52:9 ཁྱེད་ཀྱིས་དེ་ལྟར་འཕྲིན་ལས་མཛད་པས་ན། །ང་ཡིས་རྟག༌ཏུ་ཁྱེད་ལ་གཏང་རག་འབུལ། །ཁྱེད་ཀྱི༌མཚན་སྙན་མཆོག་ཏུ་གྱུར་པས་ན། །དད་ལྡན་མདུན་དུ་བདག་གིས་དེ་ལ་རེ། །
PSA 53:1 ༼མ་ཧ་ལཱད་ཀྱི་དབྱངས་ནང་དུ་དབུ་མཛད་ལ་སྤྲད་པའི་དཱ་བིད་ཀྱི་བསླབ་བྱའི་མགུར༌མ།༽ གླེན་པས་སེམས་སུ་དཀོན་མཆོག་མེད་ཅེས༌སྨྲ། །དེ་རྣམས་ཉམས་ནས་ཞེན་ལོག་ཉེས་པ༌བྱས། །བཟང་པོ་བྱེད་མཁན་གཅིག་ཀྱང་ཡོད་མ༌ཡིན།།
PSA 53:2 གོ་བ་ཅན་དང་དཀོན་མཆོག་འཚོལ་བའི༌མི། །ཡོད་དམ་མེད་ལ་གཟིགས་ཕྱིར་དཀོན་མཆོག༌གིས། །གནམ་ནས་འཇིག་རྟེན་མི་ལ་མར་གཟིགས༌སོ།།
PSA 53:3 ཐམས་ཅད་ཁོང་དང་བྲལ་ནས་ལོག་ལམ༌ཞུགས། །དེ་འདྲའི་སྐྱེ་བོ་ཚང་མ་བཙོག་པར༌གྱུར། །ལས་བཟང་སྒྲུབ་མཁན་ཡོད་པ་མ་ཡིན་ལ། །དེ་འདྲ་གཅིག་ཀྱང༌ཡོད་པ་མ་ཡིན་ནོ།།
PSA 53:4 ང་ཡི་འབངས་མི་བག་ལེབ་ལྟར་མིད༌ཅིང༌། །དཀོན་མཆོག་མཚན་ལ་འོ་དོད་མི་འབོད༌པར། །སྡིག་སྤྱོད་ཅན་རྣམས་བློ་གྲོས་ཅང་མེད༌དམ།།
PSA 53:5 སྒར་ནི་བཏབ་ཅིང་ཁྱེད་ལ་རྒོལ་བ༌ཡི། །དགྲ་ཡི་རུས་པ་དཀོན་མཆོག་གིས་གཏོར༌བས། །འཇིགས་པ་མེད་སར་དེ་རྣམས་ཤིན་ཏུ༌དངངས། །དཀོན་མཆོག་ཉིད་ཀྱིས་ཁོ་ཚོ་སྤངས་པས༌ན། །ཁྱེད་ཀྱིས་དེ་རྣམས་ངོ་ཚར་སྦྱར་བ༌ཡིན།།
PSA 53:6 ཀྱེ་ཀྱེ་ཡེས་ར་ཨེལ་གྱི་ཐར་པ༌ནི། །ཛ་ཡན་ཡུལ་ནས་བྱུང་ན་ཅི་མ༌རུང༌། །ཁོང་གིས་མི་སྡེ་བཙོན་ལས་བསྐྱབས་འོང༌དུས། །ཡ་ཀོབ་དགའ་ཞིང་ཡེས་ར་ཨེལ་ནི༌མགུ།།
PSA 54:1 ༼ཟིབ་པ་རྣམས་འོངས་ནས་སོ་ལོ་ལ་དཱ་བིད་ནི་ངེད་རྣམས་ཀྱི་ཁྲོད་དུ་ཡིབ་ཡོད་པ་མ་ཡིན་ནམ་ཞེས་སྨྲས་པའི༌ཚེ། དཱ་བིད་ཀྱིས་རྒྱུད་མང་རོལ་ཆས་སྤེལ་མའི་བསླབ་བྱའི་མགུར་མ་འདི་བརྩམས་ཏེ་དབུ་མཛད་ལ་སྤྲད༌པ།༽ དཀོན་མཆོག་ཁྱེད་ཀྱི་མཚན་གྱིས་ང་སྐྱོབ༌རོགས། །མཐུ་སྟོབས་ཆེན་པོས་ང་ལ་དག་འབུད༌མཛོད།།
PSA 54:2 ཕྱི་ཕྱོགས་མི་རྣམས་བདག་གི་དགྲ་རུ༌ལངས། །གདུག་རྩུབ་ཅན་རྣམས་ང་ཡི་སྲོག་ལ༌རྔམ། །དེ་ཚོས་དཀོན་མཆོག་མིག་ནང་མི་འཇོག༌པས། །ང་ཡི་སྨོན་ལམ་གསན་རོགས་ཀྱེ་དཀོན༌མཆོག །བདག་གི་སྨྲ་སྒོའི་གཏམ་ལ་གསན་པར་མཛོད།།༼ སེ༌ལཱ། ༽
PSA 54:4 ལྟོས་དང་ང་ཡི་གྲོགས་སུ་དཀོན་མཆོག༌ཡོད། །ང་ཡི་ཚེ་སྲོག་སྐྱོར་མཁན་གཙོ་བོ༌ཡིན།།
PSA 54:5 དགྲ་རྣམས་སྟེང་ལ་ཆག་སྒོ་བཟློག་གྱུར༌ཅིག །དྲང་བདེན་བཞིན་དུ་དེ་རྣམས་ཚར་ཆོད༌ཅིག།
PSA 54:6 དཀའ་སྡུག་ཀུན་ལས་ཁོང་གིས་ང་བསྐྱབས་ཤིང་། །དགྲ་རྣམས་ཕམ་པ་མིག་གིས་མཐོང་བས༌ན།།
PSA 54:7 རང་མོས་མཆོད་པ་བདག་གིས་ཁྱེད་ལ༌འབུལ། །ཀྱེ་ཀྱེ་ཡ་ཝཱེ་ཁྱེད་མཚན་ཡིད་དུ༌འོང༌། །བདག་གིས་ཁྱེད་ཀྱི་མཚན་ལ་བསྟོད་བསྔགས༌བརྗོད།།
PSA 55:1 ༼དབུ་མཛད་ལ་སྤྲད་པའི་དཱ་བིད་ཀྱི་བསླབ་བྱའི་མགུར་རྒྱུད་མང་རོལ་ཆས་སྤེལ༌མ།༽ ཀྱེ་ཀྱེ་དཀོན་མཆོག་བདག་གི་སྨོན་ལམ༌གསོན། །ང་ཡི་ཞུ་འབོད་སྣང་མེད་མི་བསྐྱུར༌རོགས།།
PSA 55:2 བདག་ལ་གསན་ཞིང་བཀའ་ལན་གནང་བར༌མཛོད། །སྡུག་ནང་སེམས་འཁྲུག་སྨྲེ་སྔགས་འདོན་པ༌ཡིན།།
PSA 55:3 དེ་དག་ཐམས་ཅད་དགྲ་ཡི་སྐད་སྒྲ༌དང༌། །ངན་པའི་གཉའ་གནོན་ལས་བྱུང་ཁོ་རྣམས༌ཀྱིས། །ང་ཡི་སྟེང་ལ་ཆག་སྒོ་འབབ་བཅུག༌སྟེ། །ཁོང་ཁྲོ་དང་བཅས་བདག་ལ་འཚེ་བར༌བྱེད།།
PSA 55:4 ང་ཡི་ཁོག་ཏུ་སྙིང་ལ་ཟུག་གཟེར༌ལངས། །འཆི་བའི་འཇིགས་པ་བདག་གི་སྟེང་ལ༌བབས།།
PSA 55:5 འཇིགས་སྣང་དང་ནི་འདར་ཡམ་ང་ལ༌བྱུང༌། །དངངས་སྐྲག་གིས་ནི་ང་རང་འགེབས་པར༌བྱས།།
PSA 55:6 དེ་ནས་བདག་གིས་འདི་ལྟར་སྨྲས་པ༌སྟེ། །བདག་ལ་ཕུག་རོན་གཤོག་ཟུང་ལྡན་གྱུར༌ན། །ནམ་འཕང་བཅད་དེ་བདེ་བར་སྡོད༌བྱ་འོ།།
PSA 55:7 ལྟོས་དང་ང་ནི་རྒྱང་རིང་ཡུལ་དུ༌འབྲོ། །དབེན་སྟོང་གནས་སུ་སྡོད་པར་འགྱུར༌བ་འོ།།༼ སེ༌ལཱ། ༽
PSA 55:8 ང་རང་མྱུར་དུ་སྐྱབས་གནས་སུ་ཕྱིན༌ཏེ། །རླུང་འཚུབ་དྲག་ཆར་ལ་ནི་གཡོལ་བར༌བྱ།།
PSA 55:9 གདུག་རྩུབ་འགྲན་རྩོད་གྲོང་ཁྱེར་ནང་མཐོང༌བས། །ཀྱེ་ཀྱེ་གཙོ་བོ་དེ་རྣམས་ཚར་གཅོད༌ཅིང༌། །དེ་དག་སྐད་ཆ་རབ་ཏུ་འཁྲུག་པར༌མཛོད།།
PSA 55:10 ངན་པ་ཉིན་མཚན་མེད་པར་ལྕགས་རིར༌འཁོར། །གྲོང་ཁྱེར་ནང་དུ་སྡིག་ཉེས་ཆག་སྒོས༌གང༌།།
PSA 55:11 གཏོར་བཤིག་གཏོང་བའི་དོན་ཡང་དེའི་ནང༌མཆིས། །གཉའ་གནོན་གཡོ་སྒྱུ་ཐང་ཆེན་དང་སྦྲེལ༌ལོ།།
PSA 55:12 དོན་དུ་ང་ལ་སྨད་མཁན་དགྲ་བོ༌མིན། །དགྲ་བོ་ཡིན་ན་བདག་གིས་བཟོད་ནུས༌ཡིན། །སྡང་མཁན་གྱིས་ནི་ཁེངས་དྲེགས་སྟོན་པའང༌མིན། །དེ་འདྲ་ཡིན་ཚེ་ང་རང་གཡོལ་ཐུབ༌བོ།།
PSA 55:13 འོན་ཀྱང་ཁྱོད་ནི་བདག་དང་ཆ་མཚུངས༌ཤིང༌། །ང་ཡི་ཟླ་བོ་ང་ཡི་མཛའ་གྲོགས༌ཡིན།།
PSA 55:14 དུས་རྒྱུན་མཉམ་དུ་གཏམ་གླེང་ཟབ་མོ༌བྱས། །ཚོགས་མཉམ་དཀོན་མཆོག་བཞུགས་གནས་ནང་དུ༌སྐྱོད།།
PSA 55:15 དེ་ཚོ་སྡོད་པའི་གནས་དང་སེམས་ནང༌དུ། །ཏག་ཏག་མ་རུངས་པ་ཡིས་ཁེངས་འདུག༌པས། །འཆི་བ་གློ་བུར་དེ་ཚོར་འབབ་གྱུར༌ཅིག །དེ་རྣམས་གསོན་པོར་གཤིན་ཡུལ་ལྷུང་བར༌ཤོག།
PSA 55:16 འོན་ཀྱང་ང་ཡིས་དཀོན་མཆོག་འབོད་པར༌བྱ། །ཡ་ཝཱེས་ང་རང་སྐྱོབ་པར་གདོན་མི༌ཟ།།
PSA 55:17 ནངས་དང་དགོང་མོ་ཉི་མའི་གུང་བཅས༌ལ། །འོ་དོད་དང་ནི་སྨྲེ་སྔགས་འདོན་འགྱུར༌བས། །བདག་གི་ངུ་སྐད་ཁོང་གིས་གསན་པར༌འགྱུར།།
PSA 55:18 ང་ལ་འཐབ་མཁན་ཤིན་ཏུ་མང་ན༌ཡང༌། །ང་ལ་རྒོལ་བར་བྱེད་པའི་མི་རྣམས༌ལས། །ཁོང་གིས་ངའི་སྲོག་སྐྱོབ་ཅིང་བདེ་བར༌འགོད།།
PSA 55:19 གདོད་ནས་རྒྱལ་ཁྲིར་བཞུགས་པའི་དཀོན་མཆོག༌གིས། །གསན་ཞིང་ཁོ་རྣམས་སྡུག་ལ་སྦྱོར་བར༌ངེས། །༼ སེ༌ལཱ། ༽ གང་ལ་ཞེ་ན་དེ་རྣམས་འགྱུར་མི༌འདོད། །དཀོན་མཆོག་ལ་ཡང་གུས་ཤིང་འཇིགས་པ༌མེད།།
PSA 55:20 མི་དེས་རང་གི་དམ་ཚིག་བརླགས་ནས༌ནི། །སེམས་མཐུན་ཕྱོགས་སུ་ལག་པ་བརྐྱངས་ནས༌རྒོལ།།
PSA 55:21 སྨྲ་སྒོའི་གཏམ་ནི་སྣུམ་ལས་འཇམ་ན༌ཡང༌། །སེམས་ཀྱི་ནང་དུ་འཐབ་འཛིང་ཉར་ནས༌ཡོད། །ཁ་ཡི་གཏམ་རྣམས་སྣུམ་ལས་མཉེན༌ན་ཡང་། །དོན་དུ་ཤུབས་ནས་བཏོན་པའི་རལ་གྲི༌ཡིན།།
PSA 55:22 ཁྱོད་ཀྱིས་རང་གི་ཁུར་བོ་ལྕི་མོ༌རྣམས། །ཡ་ཝཱེར་འཆོལ་དང་ཁོང་གིས་ཁྱོད་རང༌སྐྱོར། །ཁོང་གིས་དྲང་པོ་ནམ་ཡང་འགྱེལ་མི༌བྱ།།
PSA 55:23 ཀྱེ་ཀྱེ་དཀོན་མཆོག་ཁྱེད་ཀྱིས་མི་ངན༌རྣམས། །འཇིག་པའི་དོང་རིང་ནང་དུ་འབེབས་པར༌བྱ། །ལག་དམར་དང་ནི་གཡོ་སྒྱུ་སྤེལ་མཁན༌རྣམས། །ཚེ་ཕྱེད་ཙམ་ཡང་གསོན་པར་མི་འགྱུར༌མོད། །འོན་ཀྱང་བདག་གིས་ཁྱེད་ལ་བློ་གཏད༌བྱ།།
PSA 56:1 ༼ཕེ་ལེ་ཤེད་པས་གཱད་ནས་དཱ་བིད་བཟུང་དུས༌སུ། རྒྱང་རིང་བེ་ཤིང་རྩེ་མོའི་ཕུག་རོན་བྱ་བའི་དབྱངས་ནང་དཱ་བིད་ཀྱིས་བརྩམས་ནས་དབུ་མཛད་ལ་སྤྲད་པའི་མགུར་མ་སྟེ། དཱ་བིད་ཀྱི་མེག་ཏཱམ་ཞིག༽ མི་ཡིས་ཁོ་བོ་རྡོག་བརྫིས་གཏོང་འདོད༌ཅིང༌། །ཉིན་གང་ང་ལ་རྒོལ་ཞིང་མནར་བས༌ན། །ཀྱེ་ཀྱེ་དཀོན་མཆོག་ང་ལ་སྙིང་རྗེ༌མཛོད།།
PSA 56:2 དགྲ་ཡིས་ཉིན་གང་ང་ལ་རྡོག་བརྫིས༌རྒྱག །ང་རྒྱལ་བསྐྱེད་ཅིང་བདག་ལ་རྒོལ་མཁན༌མང༌།།
PSA 56:3 འཇིགས་དུས་བདག་གིས་ཁྱེད་ལ་བློ་གཏད༌བྱ།།
PSA 56:4 དཀོན་མཆོག་ནང་དུ་ཁོང་གི་བཀའ་ལ༌བསྔགས། །བདག་གིས་དཀོན་མཆོག་ཉིད་ལ་བློ་གཏོད༌པས། །བདག་ལ་འཇིགས་པའི་དོན་ནི་ཡོད་མི༌སྲིད། །འཇིག་རྟེན་མི་ཡིས་བདག་ལ་ཅི་བྱེད༌ནུས།།
PSA 56:5 དེ་ཚོས་ཉིན་གང་ངའི་གཏམ་སྐྱོག་ལ༌འཁྱེར། །རྟག་ཏུ་ང་ལ་འཚེ་བའི་ངན་ཇུས༌གཤོམ།།
PSA 56:6 དེ་རྣམས་ཕྱོགས་གཅིག་འདུས་ནས་འཇབ་པར༌བྱེད། །གར་འགྲོ་བལྟས་ནས་ངའི་སྲོག་གཅོད་པར༌སྒུག།
PSA 56:7 སྡིག་ཉེས་བྱེད་པས་དེ་རྣམས་ཐར་འགྱུར༌རམ། །ཀྱེ་ཀྱེ་དཀོན་མཆོག་ཉིད་ཀྱི་ཐུགས་ཁྲོ༌ཡིས། །མི་སྡེ་འདི་རྣམས་ཕམ་པར་མཛད་དུ༌གསོལ།།
PSA 56:8 ང་རང་འཁྱམ་པའི་རྩིས་གྲངས་ཁྱེད་ཀྱིས༌བླངས། །བདག་གི་མཆི་མ་སྐྱི་ཁུག་ནང་དུ༌བསགས། །ཁྱེད་ཀྱི་ཕྱག་དཔེ་ནང་དུ་བཀོད་མེད༌དམ།།
PSA 56:9 བདག་གིས་འོ་དོད་འབོད་དུས་དགྲ་རྣམས༌ཕམ། །དཀོན་མཆོག་ངའི་ཕྱོགས་ཡིན་པ་དེ་ནས༌རྟོགས།།
PSA 56:10 དཀོན་མཆོག་ནང་དུ་ཁོང་གི་བཀའ་ལ༌བསྔགས། །ཡ་ཝཱེར་བརྟེན་ནས་ཁོང་གི་བཀའ་ལ༌བསྟོད།།
PSA 56:11 བདག་གིས་དཀོན་མཆོག་ཉིད་ལ་བློ་གཏོད༌པས། །བདག་ལ་འཇིགས་པའི་དོན་ནི་ཡོད་མི༌སྲིད། །འཇིག་རྟེན་མི་ཡིས་བདག་ལ་ཅི་བྱེད༌ནུས།།
PSA 56:12 ཀྱེ་ཀྱེ་དཀོན་མཆོག་བདག་གིས་དམ་བཅའ༌བསྒྲུབ། །ང་ཡིས་གཏང་རག་མཆོད་པ་ཁྱེད་ལ༌འབུལ།།
PSA 56:13 གང་ལ་ཞེ་ན་ང་རང་དཀོན་མཆོག༌དྲུང༌། །སྲོག་གི་འོད་ནང་འགྲུལ་བའི་ཕྱིར་དུ༌ནི། །ཁྱེད་ཀྱིས་ངའི་སྲོག་འཆི་བ་ལས་བསྐྱབས༌ཤིང༌། །ང་ཡི་གོམ་པ་འཁྱོར་བར་མ་མཛད༌དོ།།
PSA 57:1 ༼དཱ་བིད་ཁོང་ཉིད་སོ་ལོའི་དྲུང་ནས་བྲག་ཕུག་ཏུ་འབྲོ་དུས༌སུ། འཕུང་མ་འཇུག་ཅེས་པའི་དབྱངས་ནང་མགུར་འདི་བརྩམས་ནས་དབུ་མཛད་ལ་སྤྲད༌པ་སྟེ། དཱ་བིད་ཀྱི་མེག་ཏཱམ་ཞིག༽ དཀོན་མཆོག་སྙིང་རྗེ་མཛོད་ཅིག་སྙིང་རྗེ༌མཛོད། །བར་ཆད་འདི་དག་མེད་པར་འགྱུར་བའི༌བར། །ཁྱེད་ལ་སྐྱབས་སུ་མཆི་ཞིང་ཁྱེད་ཉིད༌ཀྱི། །གཤོག་པའི་གྲིབ་བསིལ་འོག་ཏུ་འཛུལ་བར༌བྱ།།
PSA 57:2 བདག་གིས་བླ་ན་མེད་པའི་དཀོན་མཆོག༌སྟེ། །ཉིད་ཀྱི་ཐུགས་དགོངས་བཞིན་དུ་ང་རང༌ལ། །ཐམས་ཅད་གནང་བ་ཁོང་ལ་འོ་དོད༌འབོད།།
PSA 57:3 ཁོང་གིས་གནམ་ནས་ང་རང་སྐྱོབ་ངེས༌ཤིང༌། །ང་ལ་རྡོག་བརྫིས་གཏོང་མཁན་རྣམས་ལ༌བཀྱོན། །༼ སེ༌ལཱ། ༽ བྱམས་དང་དྲང་བདེན་ཁོང་གིས་ང་ལ༌གནང༌།།
PSA 57:4 ང་ཡི་ཚེ་སྲོག་སེང་གེའི་ཁྲོད་དུ༌ཡོད། །རྩ་མེད་གཏོང་མཁན་གསེབ་ཏུ་ང་རང༌ཉལ། །དེ་ཚོའི་སོ་ནི་མདུང་དང་མདའ་མོ༌ཡིན། །དེ་ཚོའི་ལྕེ་ནི་རལ་གྲི་རྣོན་པོ༌ཡིན།།
PSA 57:5 ཀྱེ་ཀྱེ་དཀོན་མཆོག་ཁྱེད་ཉིད་ནམ་མཁའ་ལས། །བླ་ན་འཕགས་ཤིང་ཁྱེད་ཀྱི་གཟི་བརྗིད་ཀྱང་། །ས་གཞིའི་སྟེང་ལ་ཡོངས་སུ་ཁྱབ་གྱུར་ཅིག།
PSA 57:6 དེ་ཚོས་ང་ཡི་རྐང་འོག་རྙི་བཙུགས༌ཤིང༌། །མནར་གཅོད་བཏང་ནས་ང་ཡི་སེམས་ཀྱང༌འཁུམས། །ང་ཡི་མདུན་དུ་ས་དོང་བྲུས་མོད༌ཀྱང༌། །ཁོ་ཚོ་རང་ཉིད་དེ་ཡི་ནང་དུ༌ལྷུང༌།།༼ སེ༌ལཱ། ༽
PSA 57:7 ཀྱེ་ཀྱེ་དཀོན་མཆོག་ང་ཡི་སེམས་ནི༌བརྟན། །ང་ཡི་སེམས་ལ་གཡོ་འགུལ་ཅི་ཡང༌མེད། །བདག་གིས་མགུར་མ་དང་ནི་བསྟོད་དབྱངས༌འབུལ།།
PSA 57:8 ཀྱེ་ཀྱེ་ང་ཡི་སེམས་ཉིད་སད་པར༌གྱིས། །ཀྱེ་མ་རྒྱུད་མངས་པི་ཝང་སད་པར༌གྱིས། །བདག་གིས་སྐྱ་རེངས་གཉིད་ལས་བསླང་བར༌བྱ།།
PSA 57:9 ཀྱེ་ཀྱེ་གཙོ་བོ་མི་རིགས་ཀུན་གྱི༌ཁྲོད། །ང་ཡིས་ཁྱེད་ལ་གཏང་རག་འབུལ་བར༌བྱ། །མི་རྣམས་དབུས་སུ་ཁྱེད་ལ་བསྟོད་དབྱངས༌འབུལ།།
PSA 57:10 ཁྱེད་ཀྱི་བྱམས་བརྩེ་ཆེ་ཞིང་ནམ་མཁར༌ཟུག །ཁྱེད་ཀྱི་དྲང་བདེན་ནམ་མཁའི་སྤྲིན་དང༌མཉམ།།
PSA 57:11 ཀྱེ་ཀྱེ་དཀོན་མཆོག་ཁྱེད་ཉིད་ནམ་མཁའ་ལས། །བླ་ན་འཕགས་ཤིང་ཁྱེད་ཀྱི་གཟི་བརྗིད་ཀྱང་། །ས་གཞིའི་སྟེང་ལ་ཡོངས་སུ་ཁྱབ་གྱུར་ཅིག།
PSA 58:1 ༼དཱ་བིད་ཀྱིས་འཕུང་མ་འཇུག་ཅེས་པའི་དབྱངས་ནང་མགུར་འདི་བརྩམས་ནས་དབུ་མཛད་ལ་སྤྲད༌པ་སྟེ། དཱ་བིད་ཀྱི་མེག་ཏཱམ་ཞིག༽ ཀྱེ་ཀྱེ་ཁྱོད་ཅག་དབང་སྒྱུར་རྣམས་ཀྱིས༌ནི། །དངོས་གནས་དྲང་བདེན་གླེང་བ་ཡིན་ནམ༌ཅི། །དྲང་གཞག་སྒོ་ནས་མི་ལ་ཁྲིམས་གཅོད༌དམ།།
PSA 58:2 དེ་བཞིན་མ་ཡིན་སེམས་སུ་ངན་རྩོམ༌ཞིང༌། །ལག་པས་ས་སྟེང་གདུག་རྩུབ་སྤྱོད་པ༌འོ།།
PSA 58:3 མི་ངན་མངལ་ལས་ཐོན་དུས་ལོག་ལམ༌ཞུགས། །སྐྱེས་མ་ཐག་ནས་ལམ་འཛོལ་རྫུན་ཡང༌སྨྲ།།
PSA 58:4 དེ་ཚོའི་རླངས་པ་སྦྲུལ་གྱི་དུག་རླངས༌འདྲ། །རྣ་བ་བཀག་པའི་དུག་སྦྲུལ་ དང་མཚུངས༌པར།།
PSA 58:5 སྔགས་རྒྱག་སྔགས་པའི་སྒྲ་སྐད་མི་ཐོས༌ཤིང༌། །ངན་སྔགས་ཆེན་མོ་ཡིན་ཡང་གོ་མི༌ཆོད།།
PSA 58:6 དཀོན་མཆོག་དེ་ཚོའི་ཁ་ཡི་སོ་རྣམས༌ཆོགས། །ཡ་ཝཱེས་སེང་དར་མཆེ་བ་གཅོག་པར༌མཛོད།།
PSA 58:7 དེ་རྣམས་བཞུར་ཆུ་བཞིན་དུ་མེད་པར༌མཛོད། །གཞུ་མོ་འཐེན་དུས་མདའ་རྩེ་ཆག་གྱུར༌ཅིག །
PSA 58:8 སྐྱོགས་འབུ་བཞིན་དུ་ནུར་ནས་བཞུ་བར༌ཤོག །ཉི་མ་མ་མཐོང་མངལ་ཤོར་ཕྲུ་གུར༌མཛོད།།
PSA 58:9 ཁྱོད་ཚོའི་སླ་ང་ཚེར་མས་མ་ངར༌གོང༌། །མེ་ཡིས་འཚིག་དང་མ་འཚིག་ཁྱད་མེད༌པར། །འཁྱིལ་རླུང་ཞིག་ལ་འཁུར་བར་མཛད་འགྱུར༌རོ།།
PSA 58:10 དགྲ་བོ་རྣམས་ལ་འཁོན་ལན་སློག་པ༌དེ། །དྲང་པོ་རྣམས་ཀྱིས་མཐོང་དུས་དགའ་བར༌འགྱུར། །སྡིག་སྤྱོད་ཁྲག་ནང་དེ་ཡིས་རྐང་པ༌བཀྲུ།།
PSA 58:11 དེ་ནས་མི་ཚོས་འདི་ལྟར་སྨྲ་ངེས༌ཏེ། །དྲང་བདེན་མི་ལ་དངོས་གནས་རྔན་པ༌ཐོབ། །ས་གཞི་ཡོངས་ལ་ཁྲིམས་ཐག་གཅོད་པ༌ཡི། །དཀོན་མཆོག་ཅིག་ནི་དངོས་གནས་བཞུགས༌པ་འོ།།
PSA 59:1 ༼སོ་ལོ་ཡིས་དཱ་བིད་གསོད་པར་མི་མངགས་ནས་ཁོང་གི་ཁང་པར་ལྐོག་ལྟ་བྱེད་པའི༌ཚེ། དཱ་བིད་ཀྱིས་འཕུང་མ་འཇུག་ཅེས་པའི་དབྱངས་ནང་མགུར་འདི་བརྩམས་ནས་དབུ་མཛད་ལ་སྤྲད༌པ་སྟེ། དཱ་བིད་ཀྱི་མེག་ཏཱམ་ཞིག༽ ཀྱེ་ངའི་དཀོན་མཆོག་དགྲ་ལས་སྐྱོབ་པར༌མཛོད། །དགྲ་རུ་ལང་མཁན་རྣམས་ལས་འདེགས་སུ༌གསོལ།།
PSA 59:2 ཉེས་པ་བྱེད་མཁན་རྣམས་ལས་སྒྲོལ་བ་དང༌། །ཁྲག་ལ་རྔམ་པའི་མི་ལས་ང་སྐྱོབ༌རོགས།།
PSA 59:3 ཀྱེ་ཀྱེ་ཡ་ཝཱེ་བདག་གི་ཉེས་སྐྱོན༌དང༌། །སྡིག་པའི་རྐྱེན་གྱིས་མ་ཡིན་དེ་རྣམས༌ནི། །ང་ཡི་སྲོག་ལ་འཇབ་ཅིང་སྟོབས་ཅན༌དག །ང་ཡི་དགྲ་རུ་ཕྱོགས་གཅིག་འདུས་པར༌གཟིགས།།
PSA 59:4 དེ་རྣམས་ཉེས་མེད་ངའི་ཐོག་རྒྱུག་རྐྱང༌ཡིན། །ང་ཡི་གྲོགས་སུ་བཞེངས་ནས་གཟིགས་སུ༌གསོལ།།
PSA 59:5 ཀྱེ་ཀྱེ་ཡ་ཝཱེ་དཔུང་ཚོགས་ཀྱི་དཀོན་མཆོག །ཁྱེད་ནི་ཡེས་ར་ཨེལ་གྱི་དཀོན་མཆོག༌ཡིན། །མི་རིགས་ཀུན་ལ་ཉེས་ཆད་གཅོད་པའི༌ཕྱིར། །ཁྱེད་ཉིད་བཞེང་བར་མཛོད་དང་མི་ངན༌ཏེ། །ངོ་ལོག་བྱེད་མཁན་དག་ལ་སྙིང་མ༌རྗེ།།༼ སེ༌ལཱ། ༽
PSA 59:6 ཁོ་རྣམས་དགོང་མོ་རེ་རེར་ལོག་འོང༌སྟེ། །ཁྱི་ལྟར་རྨུག་ཅིང་གྲོང་ཁྱེར་བསྐོར་ནས༌སྐྱོད།།
PSA 59:7 དེ་ཚོའི་ཁ་ནས་གཏམ་ངན་འཕྱུར་བ༌དང༌། །མཆུ་སྒྲོས་བར་ནས་རལ་གྲི་ཐོན་པ༌ཡིན། །དེ་ཚོའི་སེམས་ནས་ཐོས་མཁན་སུ་ཡོད༌ཟེར།།
PSA 59:8 འོན་ཀྱང་ཡ་ཝཱེས་དེ་ཚོར་ཁྲེལ་དགོད༌མཛད། །མི་རིགས་ཀུན་ལ་འཕྱ་དམོད་མཛད་འགྱུར༌རོ།།
PSA 59:9 དཀོན་མཆོག་ང་ཡི་བཙན་རྫོང་ཡིན་པས༌ན། །ང་ཡི་སྟོབས་ཤུགས་ཁྱེད་ལ་རེ་ལྟོས༌བྱ།།
PSA 59:10 ང་ཡི་བརྩེ་བའི་དཀོན་མཆོག་ངའི་མདུན༌བསུ། །དགྲ་རྣམས་ལ་ཡོགས་ང་ལ་མཐོང་བར༌མཛད།།
PSA 59:11 བདག་གི་མི་སྡེས་བརྗེད་པར་མི་འགྱུར༌ཕྱིར། །ཀྱེ་ཀྱེ་གཙོ་བོ་ང་ཚོའི་ཕུབ་ལགས༌པ། །ཁྱེད་ཀྱིས་དགྲ་རྣམས་གསོད་པར་མི་བྱེད་རོགས། །ནུས་མཐུ་ཆེན་པོས་གཏོར་ནས་དམན་སར༌ཕོབ།།
PSA 59:12 སྨྲ་སྒོའི་སྡིག་པ་མཆུ་སྒྲོས་ཚིག་དང༌ནི། །རྫུན་དང་སྨོན་ལོག་འདེབས་པའི་རྒྱུ་རྐྱེན༌གྱིས། །རང་གི་ང་རྒྱལ་གྱིས་ནི་ཟིན་གྱུར༌ཅིག །
PSA 59:13 དཀོན་མཆོག་ཉིད་ཀྱིས་ཡ་ཀོབ་སྲིད་སྐྱོང༌ཞིང༌། །ས་མཐའི་བར་དུ་སླེབས་པ་ཤེས་པའི༌ཕྱིར། །ཐུགས་ཁྲོ་དང་བཅས་དེ་རྣམས་ཚར་གཅོད༌ཅིང༌། །ཤུལ་ལུས་མེད་པར་རྦད་དེ་ཚར་གཅོད༌རོགས།།༼ སེ༌ལཱ། ༽
PSA 59:14 ཁོ་རྣམས་དགོང་མོ་རེ་རེར་ལོག་འོང༌སྟེ། །ཁྱི་ལྟར་རྨུག་ཅིང་གྲོང་ཁྱེར་བསྐོར་ནས༌སྐྱོད།།
PSA 59:15 ཕྱོགས་བཞིར་འཁྱམས་ནས་ཁ་ཟས་འཚོལ་བ༌དང༌། །འགྲང་བའི་བར་དུ་ངར་སྐད་སྒྲོག་པ༌ཡིན།།
PSA 59:16 ཁྱེད་ནི་བདག་གི་བཙན་རྫོང་ཡིན་པ༌དང༌། །དཀའ་སྡུག་ཉིན་མོའི་སྐྱབས་གནས་སུ་གྱུར༌པས། །ང་ཡིས་ཁྱེད་ཀྱི་ནུས་མཐུར་བསྟོད་དབྱངས༌འབུལ། །ཞོགས་པར་ཁྱེད་ཀྱི་བྱམས་བརྩེའི་གླུ་གཞས༌ལེན།།
PSA 59:17 ང་ཡི་སྟོབས་ཤུགས་ཁྱེད་ལ་བསྟོད་དབྱངས༌འབུལ། །དཀོན་མཆོག་ཁྱེད་ཉིད་ང་ཡི་བཙན་རྫོང༌ཡིན། །ང་ལ་བྱམས་བརྩེ་གནང་བའི་དཀོན་མཆོག༌ཡིན།།
PSA 60:1 ༼དཱ་བིད་ཀྱིས་མེ་སོ་པོ་ཐེམ་ཡཱ་དང་ཨ་རམ་ཙོ་བཱ་ལ་འཐབ་མོ་བྱས༌ཤིང༌། ཡོ་ཨབ་ཕྱིར་ལོག་ནས་ཚྭའི་ལུང་པར་ཨེ་དོམ་པ་ཆིག་ཁྲི་ཉིས་སྟོང་བསད་པའི༌ཚེ། དཱ་བིད་ཀྱིས་མེ་ཏོག་ཀུ་མུད་ཀྱི་དཔང་པོ་བྱ་བའི་དབྱངས་ནང་བརྩམས་ནས་དབུ་མཛད་ལ་སྤྲད་པའི་བསླབ་བྱའི་མགུར༌མ་སྟེ། དཱ་བིད་ཀྱི་མེག་ཏཱམ་ཞིག༽ ཀྱེ་ཀྱེ་དཀོན་མཆོག་ཁྱེད་ཀྱིས་ངེད་རྣམས༌སྤངས། །ངེད་རྣམས་རྩ་ནས་གཏོར་ཅིང་ཐུགས་ཁྲོས༌སོ། །ད་ནི་ངེད་ཅག་ཡང་བསྐྱར་དར་བར༌མཛོད།།
PSA 60:2 ཁྱེད་ཀྱིས་ས་ནི་འགུལ་ཞིང་གས་པར༌མཛད། །ས་གཞི་འགུལ་བས་སྲུབས་ཀ་གསབ་པར༌མཛོད།།
PSA 60:3 ཁྱེད་ཀྱིས་ཉིད་ཀྱི་མི་སྡེ་སྡུག་ལ༌གཏད། །ཁྱར་ཁྱོར་བྱེད་པའི་རྒུན་ཆང་ང་ཚོར༌བླུད།།
PSA 60:4 བདེན་པའི་དོན་དུ་ཡར་ལ་འདེགས་པའི༌ཕྱིར། །ཁྱེད་ལ་གུས་ཤིང་འཇིགས་པར་དར་ཆ༌གནང༌།།༼ སེ༌ལཱ། ༽
PSA 60:5 ཁྱེད་ཀྱིས་གཅེས་པའི་མི་རྣམས་ཐར་བའི༌ཕྱིར། །ཕྱག་གཡས་ང་རང་སྐྱོབ་ཅིང་བཀའ་ལན༌གནོངས།།
PSA 60:6 གནས་ཀྱི་མཆོག་ནས་དཀོན་མཆོག་འདི་སྐད༌གསུངས། །བདག་གིས་རྒྱལ་ཁ་དང་བཅས་སི་ཀེམ༌བགོ །སོའུ་ཀོད་ལུང་པའི་ཚད་ཀྱང་འཇལ་བར༌བྱ།།
PSA 60:7 གིལ་ཨད་དང་ནི་མཱ་ན་ཤེ་ངའི༌ཡིན། །ཨེ་ཕཱར་ཡིམ་ནི་བདག་གི་རྨོག་ཞྭ་ཡིན། །ཡ་ཧུ་དཱ་ནི་ང་ཡི་སྲིད་འཁར་ཡིན།།
PSA 60:8 མོ་ཨབ་བདག་གི་ཁྲུས་གཞོང་ཡིན་པ༌དང༌། །ཨེ་དོམ་ཕྱོགས་སུ་བདག་གིས་བསིལ་ལྷམ༌གཡུག ། ། ཕེ་ལེ་ཤེད་པར་རྒྱལ་ཁའི་ཀི་སྒྲ༌སྒྲོག།
PSA 60:9 གྲོང་ཁྱེར་བརྟན་པོར༌ང་རང་སུ་ཡིས་བསྐྱལ། །ཨེ་དོམ་ཡུལ་དུ༌ང་རང་སུ་ཡིས་འཁྲིད།།
PSA 60:10 དཀོན་མཆོག་ཁྱེད་ཀྱིས་ངེད་རྣམས་མ་སྤངས༌སམ། །ཀྱེ་ཀྱེ་དཀོན་མཆོག་ཁྱེད་ཉིད་ངེད་ཅག༌གི །དམག་དཔུང་མཉམ་དུ་གཤེགས་པ་མ་ཡིན༌ནམ།།
PSA 60:11 མི་ཡི་རོགས་སྐྱོར་ཕན་མེད་ཡིན་པས༌ན། །དགྲ་བོ་འགོག་ཕྱིར་ང་ཚོར་རོགས་རམ༌མཛོད།།
PSA 60:12 དཀོན་མཆོག་ཁོང་གིས་དགྲ་རྣམས་བརྫི་འོང༌བས། །ཁོང་ལ་བརྟེན་ནས་ང་ཚོས་དཔའ་རྩལ་ངོམ།།
PSA 61:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར་མ་རྒྱུད་མང་རོལ་ཆས་སྤེལ༌མ།༽ དཀོན་མཆོག་ང་ཡི་འོ་དོད་གསན་པར༌མཛོད། །བདག་གི་གསོལ་འདེབས་ལ་ནི་སྙན་གཏོད༌རོགས།།
PSA 61:2 ངའི་སེམས་ཕམ་པའི་དུས་སུ་ས་མཐའ༌ནས། །བདག་གིས་ཁྱེད་ལ་འོ་དོད་འབོད་པ༌ཡིན། །ང་ལས་མཐོ་བའི་བྲག་སྟེང་འདྲེན་པར༌མཛོད།།
PSA 61:3 གང་ལ་ཞེ་ན་ཁྱེད་ངའི་སྐྱབས་གནས༌དང༌། །དགྲ་ལས་ཐར་བའི་མཁར་རྫོང་ཡིན་ཕྱིར༌རོ།།
PSA 61:4 ང་རང་གཏན་དུ་ཁྱེད་ཀྱི་གུར་ནང༌གནས། །ཁྱེད་ཀྱི་འདབ་གཤོག་གྲིབ་བསིལ་འོག་ཏུ༌ཡིབ།།༼ སེ༌ལཱ། ༽
PSA 61:5 དཀོན་མཆོག་ཁྱེད་ཀྱིས་ང་ཡི་དམ་བཅར༌གསན། །ཁྱེད་ཀྱི་མཚན་ལ་གུས་ཤིང་འཇིགས་པ༌ཡི། །མི་ལ་ཁྱེད་ཀྱིས་ནོར་སྐལ་གནང་བ༌ཡིན།།
PSA 61:6 ཁྱེད་ཀྱིས་རྒྱལ་པོ་སྐུ་ཚེ་རིང་བར༌མཛོད། །མི་རབས་མང་པོར་ཚེ་ལོ་བརྟན་པར༌ཤོག།
PSA 61:7 ཁྱེད་དྲུང་གཏན་དུ་རྒྱལ་ཁྲིར་བཞུགས་པར༌མཛོད། །བྱམས་བརྩེ་དྲང་བདེན་བསྩལ་ནས་བསྲུང་བར༌ཞུ།།
PSA 61:8 དེ་ནས་རྟག་ཏུ་ཁྱེད་ཀྱི་མཚན་ལ༌བསྟོད། །ཉིན་རེ་བཞིན་དུ་དམ་བཅའ་བསྒྲུབ་པར༌བྱ།།
PSA 62:1 ༼ཡེ་དུ་ཐུན་གྱི་ལུགས་སུ་དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ དཀོན་མཆོག་གཅིག་པུར་སྒུག་དུས་བདག་སེམས༌བདེ། །ང་ཡི་ཐར་པ་ཁོང་ནས་འབྱུང་བ༌ཡིན།།
PSA 62:2 ཁོང་ཉིད་གཅིག་པུ་བྲག་དང་སྲོག་སྐྱོབ༌ཡིན། །ཁོང་ཉིད་བཙན་རྫོང་ཡིན་པས་ང་མི༌གཡོ།།
PSA 62:3 ཁྱོད་ཅག་ཀུན་པོས་མི་ཞིག་གསོད་པའི༌ཕྱིར། །བསེགས་པའི་རྩིག་པ་འགྱེལ་ལ་ཉེ་བའི༌གྱང༌། །བཤིག་པ་བཞིན་དུ་ནམ་ཞིག་བར་དུ༌རྒོལ།།
PSA 62:4 ཁོང་ཉིད་གོ་ས་མཐོན་པོ་ནས་འབབ་ཕྱིར། །དེ་ཚོས་གྲོས་བསྡུར་བྱེད་ཅིང་རྫུན་ལ༌དགའ། །ཁ་ནས་ཤིས་ཚིག་བརྗོད་ཀྱང་ཁོག་ནས༌དམོད།།༼ སེ༌ལཱ། ༽
PSA 62:5 བདག་གི་རེ་བ་དཀོན་མཆོག་ནས་འོང༌བས། །ཁོང་ཉིད་གཅིག་པུར་སྒུག་པའི་དུས་སྐབས༌སུ། །ཀྱེ་མ་བདག་སེམས་བདེ་ལ་འབབ་པར༌གྱིས།།
PSA 62:6 ཁོང་ཉིད་གཅིག་པུ་བྲག་དང་སྲོག་སྐྱོབ༌ཡིན། །ཁོང་ཉིད་བཙན་རྫོང་ཡིན་པས་ང་མི༌གཡོ།།
PSA 62:7 ཐར་པ་གཟི་དཔལ་དཀོན་མཆོག་ཁོ་ནར༌བརྟེན། །སྟོབས་ཀྱི་བྲག་དང་སྐྱབས་གནས་དཀོན་མཆོག༌ལགས།།
PSA 62:8 དཀོན་མཆོག་ང་ཚོའི་སྐྱབས་གནས་ཡིན་པས༌ན། །མི་རྣམས་དུས་རྒྱུན་ཁོང་ལ་བློ་གཏོད༌ཅིག །ཁོང་གི་དྲུང་དུ་སྙིང་གཏམ་ལྷུག་པོར༌བརྗོད།།༼ སེ༌ལཱ། ༽
PSA 62:9 ཐ་ཤལ་བ་རྣམས་ཅི་ཡང་མིན་པ༌དང༌། །མཆོག་གྱུར་རྣམས་ཀྱང་རྫུས་མ་རྐྱང་རྐྱང༌ཡིན། །སྲང་ལ་འཇལ་དུས་དེ་རྣམས་ཡར་འདེགས༌ཤིང༌། །ཁོ་ཚོ་མཉམ་དུ་མཁའ་དབུགས་ལས་ཀྱང༌ཡང༌།།
PSA 62:10 བཙན་དབང་བཀོལ་ནས་ཐོབ་པའི་རྒྱུར་མ༌བརྟེན། །འཕྲོག་བཅོམ་བྱས་པའི་ནོར་ལ་བསྙེམ་མི༌རུང༌། །རང་ནོར་འཕེལ་ན་དེ་ལ་སེམས་མ༌ཆགས།།
PSA 62:11 དཀོན་མཆོག་ཉིད་ཀྱིས་ཐེངས་གཅིག་ཐེངས་གཉིས༌ལ། །གསུངས་པ་བདག་གིས་ཡང་ཡང་ཐོས་པ༌སྟེ། །ནུས་མཐུ་ཡོད་ཚད་དཀོན་མཆོག་ལ་དབང༌ངོ༌།།
PSA 62:12 མི་རེའི་སྤྱོད་པ་བཞིན་དུ་ལན་གནང༌བས། །བྱམས་བརྩེ་ཡང་ནི་གཙོ་བོ་ཁྱེད་ཀྱི༌ཡིན།།
PSA 63:1 ༼དཱ་བིད་ཀྱིས་ཡ་ཧུ་དཱའི་དབེན་སྟོང་དུ་བརྩམས་པའི་མགུར༌མ།༽ ཀྱེ་ཀྱེ་དཀོན་མཆོག་ཁྱེད་ངའི་དཀོན་མཆོག༌ཡིན། །བདག་གིས་སྙིང་རུས་བསྐྱེད་ནས་ཁྱེད་རང༌བཙལ། །ས་ཆ་སྐམ་ཞིང་ཉམ་ཐག་ཆུ་མེད༌སར། །བདག་གི་ལུས་སེམས་གཉིས་ཀ་ཁྱེད་ལ༌གདུང༌།།
PSA 63:2 ཁྱེད་ཀྱི་སྟོབས་དང་གཟི་དཔལ་མཇལ་བའི༌ཕྱིར། །གནས་མཆོག་ནང་དུ་བདག་གིས་ཁྱེད་ལ༌བལྟས།།
PSA 63:3 ཁྱེད་ཀྱི་བྱམས་བརྩེ་ཚེ་སྲོག་ལས་ཀྱང༌ལྷག །དེའི་ཕྱིར་བདག་གི་ངག་ནས་ཁྱེད་ལ༌བསྟོད།།
PSA 63:4 བདག་གིས་མི་ཚེ་གང་པོར་ཁྱེད་ལ༌བསྟོད། །ཁྱེད་མཚན་བརྗོད་ཅིང་ལག་ཟུང་ཡར་འདེགས༌འོང༌།།
PSA 63:5 ཚིལ་དང་རྐང་གིས་ང་རང་འགྲང་པ༌ལྟར། །ང་ཡི་སེམས་ཀྱང་དེ་བཞིན་ཚིམ་པར༌འགྱུར། །དགའ་མགུ་རངས་པའི་ངག་གིས་ཁྱེད་ལ༌བསྟོད།།
PSA 63:6 མལ་དུ་ཉལ་དུས་བདག་གིས་ཁྱེད་དྲན༌ཞིང་། །མཚན་མོ་གང་པོར་ཁྱེད་རང་སྒོམ་པ༌ཡིན།།
PSA 63:7 ཁྱེད་ཀྱིས་ང་ལ་རོགས་རམ་གནང་བས༌ན། །འདབ་གཤོག་འོག་ཏུ་དགའ་སྤྲོའི་ཀི་སྒྲ༌སྒྲོག།
PSA 63:8 ངའི་སེམས་ཁྱེད་ཀྱི་རྗེས་སུ་དམ་པོར༌སྙེག །ཁྱེད་ཕྱག་གཡས་པས་ང་རང་སྐྱོར༌བ་འོ།།
PSA 63:9 ཡིན་ཡང་ང་ཡི་ཚེ་སྲོག་སྙེག་མཁན༌རྣམས། །ས་ཡི་མཐིལ་ལ་འགྲོ་བར་གདོན་མི༌ཟ།།
PSA 63:10 དེ་རྣམས་རལ་གྲིའི་འོག་ཏུ་གཏོད་བྱེད༌ཅིང༌། །དེ་རྣམས་ཁྱི་སྤྱང་ཁ་ཡི་ཟས་སུ༌འགྱུར།།
PSA 63:11 རྒྱལ་པོ་དཀོན་མཆོག་ནང་དུ་དགའ་བར༌འགྱུར། །དཀོན་མཆོག་དཔང་དུ་འཛུགས་མཁན་ཐམས་ཅད༌འཕར། །རྫུན་གཏམ་སྨྲ་བའི་ཁ་རྣམས་དགག་པར༌བྱ།།
PSA 64:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཀྱེ་ཀྱེ་དཀོན་མཆོག་སྡུག་ཡུས་འདོན་དུས༌སུ། །ཁྱེད་ཀྱིས་བདག་གི་སྐད་ལ་གསན་པར༌མཛོད། །ངའི་སྲོག་དགྲ་ཡི་འཇིགས་སྐུལ་ལས་བསྲུང༌རོགས།།
PSA 64:2 དོན་ངན་སྤྱོད་མཁན་རྣམས་ཀྱི་ལྐོག་གྲོས༌དང༌། །ཉེས་པ་གསོག་མཁན་རྣམས་ཀྱི་ཟིང་ཆ༌ལས། །ཁྱེད་ཀྱིས་ང་རང་ཡིབ་ཅིང་བསྐྱབ་ཏུ༌གསོལ།།
PSA 64:3 དེ་ཚོས་ལྕེ་ནི་རལ་གྲི་བཞིན་བརྡར༌ཞིང༌། །ཚིག་རྩུབ་མདའ་མོ་རྣོན་པོ་བཞིན་དུ༌འཕེན།།
PSA 64:4 ཉེས་མེད་རྣམས་ལ་ལྐོག་ནས་མདའ་འཕེན༌ཞིང༌། །འཇིགས་སྣང་མེད་པར་གློ་བུར་མདའ་ཡིས༌རྒྱག།
PSA 64:5 ཕན་ཚུན་སྙིང་ཕུར་རྡེབ་ཅིང་ཇུས་ངན༌འགོད། །ལྐོག་ཏུ་རྙི་རྒྱ་འཛུགས་པར་གྲོས་བྱས༌ནས། །སུ་ཡིས་འདི་རྣམས་མཐོང་བར་འགྱུར་ཞེས༌སྨྲ།།
PSA 64:6 དེ་ཚོས་གཡོ་སྒྱུའི་སྦྱོར་བ་སྤེལ་ནས༌ནི། །ང་ཚོས་ཇུས་ལེགས་དཔེ་མེད་བཤམས་ཡོད༌སྨྲ། །མི་ཡི་སེམས་དང་བསམ་པ་གཏིང་མི༌ལོན།།
PSA 64:7 འོན་ཀྱང་དཀོན་མཆོག་དེ་ཚོར་མདའ་འཕེན༌ཞིང༌། །ཁོ་རྣམས་གློ་བུར་ཉིད་དུ་རྨས་པར༌འགྱུར།།
PSA 64:8 རང་རང་ལྕེ་ཡིས་དེ་རྣམས་འཕུང་བར༌བྱ། །ཚུལ་དེ་མཐོང་བའི་མི་རྣམས་མགོ་བོ༌གཡུག།
PSA 64:9 འཇིག་རྟེན་མི་བུ་ཐམས་ཅད་འཇིགས་པ༌དང༌། །དཀོན་མཆོག་ཁོང་གི་འཕྲིན་ལས་བསྒྲགས་ནས༌ནི། །ཁོང་གི་མཛད་པར་བསམ་བློ་ཞིབ་ཏུ༌གཏོང༌།།
PSA 64:10 དྲང་བདེན་མི་རྣམས་ཡ་ཝཱེའི་ནང་དགའ་ཞིང་། །ཁོང་ལ་བློ་གདེང་བསྐྱེད་པར་གྱུར་ཅིག༌གུ །གཞུང་དྲང་རྣམས་ཀྱིས་ངོམ་སོ་སྟོན་པར༌ཤོག།
PSA 65:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཀྱེ་ཀྱེ་དཀོན་མཆོག་ཛ་ཡན་གྲོང་ཁྱེར༌དུ། །མི་རྣམས་ཁྱེད་ལ་བསྟོད་ཕྱིར་བསྒུགས་ནས༌ཡོད། །དམ་བཅའ་ཡང་ནི་ཁྱེད་ལ་བསྒྲུབ་པར༌འགྱུར།།
PSA 65:2 ཀྱེ་མ་གསོལ་འདེབས་གསན་པའི་གཙོ་བོ༌ལགས། །མི་བུ་ཐམས་ཅད་ཁྱེད་དྲུང་འོང་བར༌འགྱུར།།
PSA 65:3 སྡིག་ཉེས་ངེད་ལས་རྒྱལ་བར་གྱུར་ན༌ཡང༌། །ངེད་རྣམས་ཉེས་སྐྱོན་མ་ལུས་ཁྱེད་ཀྱིས༌བསལ།།
PSA 65:4 ཁྱེད་ཀྱིས་བདམས་ཤིང་ཉེ་བར་དྲངས་ནས༌ནི། །ཉིད་ཀྱི་སྒོ་རར་གནས་པར་མཛད་པ༌ཡི། །སྐྱེ་བོ་དེ་རྣམས་བྱིན་རླབས་ཆེ་བ༌ལ། །ཁྱེད་ཀྱི་བཞུགས་གནས་མཆོད་ཁང་དམ་པ༌ཡི། །གཡང་གིས་ངེད་རྣམས་འདོད་བློ་ཚིམ་གྱུར༌ཅིག།
PSA 65:5 ཀྱེ་ཀྱེ་ང་ཚོའི་མགོན་སྐྱབས་དཀོན་མཆོག༌ལགས། །ཁྱེད་ཀྱིས་ངོ་མཚར་ཆེ་བའི་མཛད་པ་དང༌། །དྲང་བདེན་ངང་ནས་ང་ཚོར་བཀའ་ལན༌གནང༌། །ཁྱེད་ནི་ས་མཐའ་ཀུན་དང་རྒྱ་མཚོ༌ཡི། །རྒྱང་རིང་གནས་པ་ཡོངས་ཀྱི་རྒྱབ་བརྟེན༌ཡིན།།
PSA 65:6 མཐུ་སྟོབས་ཆེན་པོའི་སྐ་རགས་བཅིངས་པ༌དང༌། །སྟོབས་ཀྱིས་རི་རྣམས་བརྟན་པོར་ཚུགས་པར༌མཛད།།
PSA 65:7 རྒྱ་མཚོའི་འུར་སྒྲ་རྦ་རླབས་དྲག་པོ༌དང༌། །མི་སྡེའི་ཀི་སྒྲ་བཅས་ནི་ཞི་བར༌མཛད།།
PSA 65:8 དེའི་ཕྱིར་ས་མཐར་གནས་པའི་མི་རྣམས༌ནི། །ཁྱེད་ཀྱི་གྲུབ་རྟགས་མཐོང་བས་གུས་ཤིང་འཇིགས། །ཤར་ནས་ནུབ་བར་མི་རྣམས་དགའ་བར༌མཛད།།
PSA 65:9 ཁྱེད་ཀྱིས་ས་ལ་གཟིགས་ཤིང་ཆར་ཆུ༌གནང༌། །ས་ལ་ས་བཅུད་ཤིན་ཏུ་འཛོམས་པར༌མཛད། །མི་ལ་འབྲུ་རིགས་སྟ་གོན་མཛད་པའི༌ཕྱིར། །དཀོན་མཆོག་ཉིད་ཀྱི་གཙང་པོར་ཆུ་ཡིས༌བཀང༌། །དེ་བཞིན་ཁོང་གིས་ས་གཞི་གྲ་སྒྲིག༌མཛད།།
PSA 65:10 ས་ཡི་ཤུར་མོ་རྣམས་ལ་ཆུ་བཏང༌ཞིང༌། །སྒལ་གཞུང་རྣམས་ཀྱང་བདེ་བར་བསྙམས་པ༌དང༌། །ཆར་ཟིམ་གནང་ནས་ས་ཞིང་སོབ་སོབ༌བྱས། །ས་ལས་རྡོལ་བ་རྣམས་ལ་བྱིན་གྱིས༌རླབས།།
PSA 65:11 ཁྱེད་ཀྱིས་ལོ་ཟླར་ཐུགས་རྗེའི་ཅོད་པན༌བསྐོན། །ཁྱེད་ཀྱི་ཕེབས་ལམ་རྣམས་སུ་སྣུམ་རྩི༌ཐིགས།།
PSA 65:12 འབྲོག་གི་རྩྭ་སར་སྣུམ་དེས་ཁྱབ་པ༌དང༌། །རི་སྒང་རྣམས་ཀྱིས་དགའ་སྤྲོའི་སྐ་རགས༌བཅིངས།།
PSA 65:13 ལུག་གི་ཁྱུ་ཡིས་རྩྭ་ཁ་ཁེབས་པ༌དང༌། །ལུང་པ་རྣམས་ནི་འབྲུ་ཡིས་ཁེངས་ནས༌ནི། །ཐམས་ཅད་དགའ་འབོད་བྱེད་ཅིང་གླུ་གཞས༌ལེན།།
PSA 66:1 ༼དབུ་མཛད་ལ་སྤྲད་པའི་མགུར༌མ།༽ ཀྱེ་ཀྱེ་ས་གཞི་ཡོངས་ཀྱིས་དཀོན་མཆོག༌ལ། །དགའ་མགུ་རངས་པའི་ཀུ་ཅོ་སྒྲོགས་ཤིག༌དང༌།།
PSA 66:2 ཁོང་གི་སྙན་གྲགས་ལ་ནི་བསྟོད་དབྱངས༌ཕུལ། །གཟི་བརྗིད་བསྟོད་བསྔགས་ཁོང་ལ་འབུལ་བར༌གྱིས།།
PSA 66:3 དཀོན་མཆོག་ལ་ནི་འདི་ལྟར་ཞུ་བར༌གྱིས། །ཁྱེད་ཀྱི་མཛད་པ་ཅི་འདྲའི་ཁྱད་དུ་འཕགས། །ཁྱེད་ཀྱི་མཐུ་སྟོབས་ཤིན་ཏུ་ཆེ་བས༌ན། །དགྲ་རྣམས་ཁྱེད་ཀྱི་དྲུང་དུ་འཁུམ་པར༌འགྱུར།།
PSA 66:4 ས་གཞི་ཡོངས་ཀྱིས་ཁྱེད་ལ་ཕྱག་འཚལ༌ཞིང༌། །ཁྱེད་ཀྱི་མཚན་ལ་བསྟོད་དབྱངས་འབུལ་བར༌བྱ།།༼ སེ༌ལཱ། ༽
PSA 66:5 ཁྱོད་རྣམས་ཤོག་ལ་དཀོན་མཆོག་མཛད་པར༌ལྟོས། །མི་ལ་མཛད་པའི་དོན་རྣམས་ངོ་མཚར་ཆེ།།
PSA 66:6 ཁོང་གིས་རྒྱ་མཚོ་སྐམ་སར་མཛད་པ༌དང༌། །མི་རྣམས་རྐང་ཐང་གཙང་པོ་བརྒལ་ནས༌ཕྱིན། །བདག་ཅག་ཁོང་གི་ནང་དེར་དགའ་བར༌བྱ།།
PSA 66:7 ཁོང་གི་དབང་གིས་རྟག་ཏུ་སྲིད་སྐྱོང༌ཞིང༌། །ཐུགས་རྗེའི་སྤྱན་གྱིས་མི་རིགས་ཀུན་ལ༌གཟིགས། །གྱེན་ལོག་མི་རྣམས་ཁེངས་དྲེགས་མ་བསྐྱེད༌ཅིག།༼ སེ༌ལཱ། ༽
PSA 66:8 མི་སྡེ་རྣམས་ཀྱིས་ང་ཚོའི་དཀོན་མཆོག༌ལ། །བསྟོད་པ་ཕུལ་ཞིག་བསྔགས་སྒྲ་ཐོས་སུ༌ཆུགས།།
PSA 66:9 ཁོང་གིས་རང་ཅག་ཚེ་སྲོག་སྲུང་བར༌མཛད། །རང་རེའི་རྐང་པ་འཁྱོར་དུ་མ་བཅུག༌གོ།
PSA 66:10 དཀོན་མཆོག་ཁྱེད་ཀྱིས་ང་ཚོར་ཚོད་བགམས༌ཤིང༌། །དངུལ་ལ་བཙོ་སྦྱང་བྱེད་ལྟར་ངེད་ལ༌བརྟག།
PSA 66:11 ཁྱེད་ཀྱིས་ངེད་རྣམས་རྙི་རྒྱའི་ནང་དུ༌བཅུག །ཁུར་པོ་ལྕི་མོ་ངེད་ཅག་རྒྱབ་ཏུ༌བཀལ།།
PSA 66:12 མི་རྣམས་ང་ཚོའི་མགོ་བོར་ཞོན་དུ༌བཅུག །ངེད་རྣམས་མེ་ཆུ་བརྒྱུད་ནས་སོང་ན༌ཡང༌། །ལོངས་སྤྱོད་འཛད་མེད་གནས་སུ་ཁྱེད་ཀྱིས༌དྲངས།།
PSA 66:13 སྦྱིན་སྲེག་ཁྱེར་ནས་ཁྱེད་ཀྱི་མཆོད་ཁང༌དུ། །ང་རང་ཡོང་ནས་དམ་བཅའ་བསྒྲུབ་པར༌བྱ།།
PSA 66:14 དཀའ་སྡུག་དུས་སུ་ང་ཡི་མཆུ་སྒྲོས༌ཀྱིས། །དམ་བཅའ་བཞག་ཅིང་ཁ་ཡིས་སྨྲས་པ༌ལྟར།།
PSA 66:15 ཕྱུགས་ཟོག་ཤ་ཤེད་ཅན་རྣམས་སྦྱིན་སྲེག༌དང༌། །ལུག་ཐུག་རྣམས་ནི་དྲི་ཞིམ་མཆོད་པར༌འབུལ། །དེ་མིན་གླང་དང་ར་ཡང་འབུལ་བར༌བྱ།།༼ སེ༌ལཱ། ༽
PSA 66:16 དཀོན་མཆོག་ལ་ནི་གུས་ཤིང་འཇིགས་པ༌ཀུན། །ཤོག་ལ་ཉོན་ཅིག་བདག་གིས་ཁྱོད་རྣམས༌ལ། །ཁོང་གིས་ངའི་དོན་ཅི་མཛད་འཆད་པར༌བྱ།།
PSA 66:17 བདག་གི་སྨྲ་སྒོས་ཁོང་ལ་འོ་དོད༌བོས། །བདག་གི་ལྕེ་ཡིས་ཁོང་ལ་བསྟོད་བསྔགས༌ཕུལ།།
PSA 66:18 གལ་ཏེ་ངའི་སེམས་སྡིག་པར་དགའ་ན༌ནི། །གཙོ་བོས་བདག་ལ་གསན་པར་མི་འགྱུར༌རོ།།
PSA 66:19 འོན་ཀྱང་ཁོང་གིས་དངོས་གནས་གསན་པ༌དང༌། །ང་ཡི་གསོལ་འདེབས་སྐད་ལ་སྙན་གཏད༌དོ།།
PSA 66:20 ང་ཡི་སྨོན་ལམ་ལ་ནི་གསན་པ༌དང༌། །ཉིད་ཀྱི་བྱམས་བརྩེ་ང་ལས་མ་ཕྲལ༌བའི། །དཀོན་མཆོག་ཁོང་ཉིད་བསྟོད་པར་འོས་སོ༌ལོ།།
PSA 67:1 ༼དབུ་མཛད་ལ་སྤྲད་པའི་མགུར་རྒྱུད་མང་རོལ་ཆས་སྤེལ༌མ།༽ ངེད་ལ་སྙིང་རྗེས་གཟིགས་དང་དཀོན་མཆོག༌ལགས། །བྱིན་རླབས་གནོངས་དང་ཞལ་རས་འཛུམ་པའི༌འོད། །ངེད་ཅག་ལ་ནི་འཕྲོ་བར་མཛད་དུ༌གསོལ།།༼ སེ༌ལཱ། ༽
PSA 67:2 ས་གཞི་ཡོངས་ཀྱིས་ཁྱེད་ཀྱི་ཕེབས་ལམ༌དང༌། །མི་རིགས་ཀུན་གྱིས་ཉིད་ཀྱི་ཐར་པ༌ནི། །ཤེས་པའི་ཕྱིར་དུ་དེ་བཞིན་མཛད་དུ༌གསོལ།།
PSA 67:3 ཀྱེ་ཀྱེ་དཀོན་མཆོག་མི་སྡེ་ཐམས་ཅད༌དང༌། །མི་རིགས་ཀུན་གྱིས་ཁྱེད་ལ་བསྟོད་པར༌ཤོག།
PSA 67:4 འཇིག་རྟེན་མི་ཀུན་དགའ་ཞིང་སྤྲོ་བ༌དང༌། །བསྟོད་པའི་གླུ་ཡིས་ཁྱེད་ལ་བསྟོད་པར༌ཤོག །ཁྱེད་ཀྱིས་ངེས་པར་འཇིག་རྟེན་མི་ཀུན༌ལ། །བདེན་པའི་ཁྲིམས་ཀྱིས་ལེགས་ཉེས་འབྱེད་པ༌དང༌། །མི་རིགས་ཐམས་ཅད་བདེ་བར་སྐྱོང་ངེས༌སོ།།༼ སེ༌ལཱ། ༽
PSA 67:5 ཀྱེ་ཀྱེ་དཀོན་མཆོག་མི་སྡེ་ཐམས་ཅད༌དང༌། །མི་རིགས་ཀུན་གྱིས་ཁྱེད་ལ་བསྔགས་པར༌ཤོག།
PSA 67:6 ས་ལས་འབྲུ་དང་ཤིང་ཏོག་སྣ་ཚོགས༌བྱུང༌། །དཀོན་མཆོག་ཉིད་ནི་ངེད་ཀྱི་དཀོན་མཆོག༌སྟེ། །རང་ཅག་ལ་ནི་བྱིན་རླབས་གནང་བར༌འགྱུར།།
PSA 67:7 ཁོང་གིས་ང་ཚོར་བྱིན་རླབས་གནང་བར༌འགྱུར། །འཇིག་རྟེན་ཡོངས་ཀུན་ཁོང་ལ་གུས་ཤིང་འཇིགས།།
PSA 68:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ དཀོན་མཆོག་བཞེངས་ནས་དགྲ་རྣམས་འཐོར་བར༌ཤོག །ཁོང་ལ་སྡང་མཁན་ཁོང་ནས་འབྲོ་གྱུར༌ཅིག།
PSA 68:2 དུ་བ་རླུང་གིས་ཁྱེར་བ་ནང་བཞིན༌དུ། །དེ་རྣམས་ཁྱེད་ཀྱིས་ཕྱོགས་བཞིར་སྐྲོད་པར༌ཤོག །སྤྲ་ཚིལ་མེ་དང་ཕྲད་ན་བཞུ་བ༌ལྟར། །མི་ངན་དཀོན་མཆོག་དྲུང་དུ་ཡལ་གྱུར༌ཅིག།
PSA 68:3 འོན་ཀྱང་དྲང་བདེན་མི་རྣམས་དཀོན་མཆོག༌དྲུང༌། །དགའ་བ་འབུམ་གྱིས་མཉེས་ཤིང་སྤྲོ་བར༌ཤོག།
PSA 68:4 དཀོན་མཆོག་ཁོང་ལ་མགུར་གླུ་ལེན་པར༌གྱིས། །ཁོང་གི་མཚན་ལ་བསྟོད་དབྱངས་འབུལ་བར༌གྱིས། །སྤྲིན་པར་བཅིབས་ནས་ཕེབས་མཁན་བསྟོད་པས་འདེགས། །ཁོང་གི་མཚན་ལ་ཡ་ཝཱེ་ཞེས་ཞུ༌ཞིང༌། །ཁྱོད་རྣམས་ཁོང་གི་དྲུང་དུ་དགའ་བར༌གྱིས།།
PSA 68:5 དཀོན་མཆོག་ཉིད་ཀྱི་བཞུགས་གནས་དམ་པ༌རུ། །དྭ་ཕྲུག་རྣམས་ཀྱི་ཡབ་དང་ཡུགས་མོ༌ཡི། །དཀར་འདོན་མཁན་ནི་ཁོང་ཉིད་ཡིན་ལགས༌སོ།།
PSA 68:6 ཁོང་གིས་ཁེར་རྐྱང་ལ་ནི་ཁྱིམ་གཞིས༌གནང༌། །བཙོན་པ་བསྒྲལ་ནས་དར་རྒྱས་ཡུལ་དུ༌ཁྲིད། །གྱེན་ལོག་འབའ་ཞིག་ཐན་པའི་གནས་སུ༌ལུས།།
PSA 68:7 ཀྱེ་ཀྱེ་དཀོན་མཆོག་ཁྱེད་ཀྱིས་འབངས་མི༌རྣམས། །ཕྱི་རུ་ཁྲིད་ནས་དབེན་སྟོང་བརྒྱུད་དུས༌སུ།།༼ སེ༌ལཱ། ༽
PSA 68:8 ས་ནི་གཡོས་ཤིང་ཆར་ཡང་ཁྱེད་དྲུང༌བརྡིབས། །ཡེས་ར་ཨེལ་གྱི་དཀོན་མཆོག་མདུན་དྲུང༌དུ། །སི་ནཱ་རི་བོ་ཡང་ནི་གཡོས༌པ་འོ།།
PSA 68:9 དཀོན་མཆོག་ཁྱེད་ཀྱིས་ཆར་ཆེན་འབབ་མཛད༌དེ། །ཉམས་ཤིང་རྒུད་པའི་ནོར་སྐལ་གསོ་བར༌མཛད།།
PSA 68:10 ཁྱེད་ཀྱི་མི་རྣམས་ཡུལ་དེར་གནས་པ༌ཡིན། །ཀྱེ་ཀྱེ་དཀོན་མཆོག་ཁྱེད་ནི་ཤིན་ཏུ༌བཟང༌། །དབུལ་ཕོངས་རྣམས་ཀྱི་དོན་དུ་གྲ་སྒྲིག༌མཛད།།
PSA 68:11 གཙོ་བོ་ལགས་ཀྱིས་བཀའ་གསུང་གནང་བ༌དང༌། །འཕྲིན་བཟང་སྒྲོག་པའི་བུད་མེད་ཚོགས་སུ༌གྲུབ།།
PSA 68:12 དམག་དཔུང་རྣམས་ཀྱི་རྒྱལ་པོ་བྲོས་པ༌དང༌། །ཁྱིམ་པ་བུད་མེད་རྣམས་ཀྱིས་བཅོམ་ནོར༌བགོ།
PSA 68:13 ཁྱོད་རྣམས་ལུག་རའི་ནང་དུ་ཉལ་བའི༌དུས། །ཕུག་རོན་འདབ་གཤོག་དངུལ་གྱིས་བཏུམས་པ༌དང༌། །བྱ་སྒྲོ་སེར་པོ་གསེར་གྱིས་བྱུགས་འདྲ༌ཡིན།།
PSA 68:14 ཀུན་དབང་ཉིད་ཀྱིས་རྒྱལ་པོ་རྣམས་གཏོར༌དུས། །ཙལ་མོན་རི་ལ་ཁ་བ་བབས་འདྲ༌ཡིན།།
PSA 68:15 རི་བོ་པཱ་ཤན་ལྷ་རྣམས་གནས་རི༌ཡིན། །རི་བོ་པཱ་ཤན་རི་རྩེ་མང་པོ༌ཅན།།
PSA 68:16 ཀྱེ་ཀྱེ་རྩེ་མོ་མང་བའི་རི་བོ༌ལགས། །དཀོན་མཆོག་བཞུགས་པར་མཉེས་པའི་རི་བོ༌ལ། །ཁྱོད་རྣམས་སྡང་མིག་བགྲད་དོན་ཅི་ཡིན༌ནམ། །ཡ་ཝཱེ་རྒྱུན་ནས་རྒྱུན་དུ་དེར་བཞུགས༌འོང༌།།
PSA 68:17 དཀོན་མཆོག་ཤིང་རྟ་ཁྲི་ཁྲི་འབུམ་འབུམ༌ཡོད། །རི་བོ་དམ་པ་སི་ནཱར་བཞུགས་བཞིན༌དུ། །གཙོ་བོ་དེ་དག་ཁྲོད་དུ་བཞུགས་པ༌ཡིན།།
PSA 68:18 ཁྱེད་ཉིད་ནམ་མཁར་འཕགས་ཤིང་བཙོན་པ༌ཁྲིད། །དཀོན་མཆོག་ཡ་ཝཱེ་མི་མཉམ་བཞུགས་པའི༌ཕྱིར། །མི་དང་གཉའ་རེངས་ལས་ཀྱང་ལག་རྟགས༌བཞེས།།
PSA 68:19 ཉིན་རེར་རང་ཅག་ཁུར་བོ་འཁུར་བ༌ཡི། །བདག་ཅག་སྐྱོབ་པར་མཛད་པའི་དཀོན་མཆོག༌སྟེ། །གཙོ་བོ་ཁོང་ཉིད་བསྟོད་པར་འོས་སོ༌ལོ།།༼ སེ༌ལཱ། ༽
PSA 68:20 རང་རེའི་དཀོན་མཆོག་སྒྲོལ་མཛད་དཀོན་མཆོག༌ཡིན། །འཆི་ལས་ཐར་བ་གཙོ་བོ་ཡ་ཝཱེར་རག།
PSA 68:21 དཀོན་མཆོག་ཉིད་ཀྱིས་དགྲ་བོའི་མགོ་བོ༌སྟེ། །རྒྱུན་ཆད་མེད་པར་སྡིག་པ་བྱེད་པ༌ཡི། །མི་རྣམས་སྤྱི་བོ་དུམ་བུར་གཅོག་པར༌འགྱུར།།
PSA 68:22 ཞབས་ཟུང་དེ་རྣམས་ཁྲག་ནང་བརྡབ་པ༌དང༌། །དགྲ་རྣམས་ཁྲག་ནི་ཁྱི་ཡིས་བལྡག་པའི༌ཕྱིར།།
PSA 68:23 གཙོ་བོས་འདི་སྐད་གསུངས་ཏེ་བདག་གིས༌ནི། །ཁོ་རྣམས་པཱ་ཤན་ཡུལ་ནས་ཕྱིར་འཁྲིད༌འོང༌། །རྒྱ་མཚོའི་གཏིང་ནས་བདག་གིས་ཕྱིར་འདོན༌འོང༌།།
PSA 68:24 དཀོན་མཆོག་མི་ཚོས་ཁྱེད་ཀྱི་བསྟར་ཕྲེང༌མཇལ། །ང་ཡི་དཀོན་མཆོག་ང་ཡི་རྒྱལ་པོ༌ཡི། །བསྟར་ཕྲེང་གནས་མཆོག་ནང་དུ་འབྱོན་པ༌མཇལ།།
PSA 68:25 གླུ་བ་རྣམས་ནི་མདུན་དུ་སྐྱོད་པ༌དང༌། །རོལ་མོ་པ་རྣམས་དེ་དག་རྗེས་སུ༌འབྲངས། །དེའི་ཁྲོད་སིལ་རྔ་རྡུང་བའི་བུ་མོ༌མཆིས།།
PSA 68:26 ཁྱོད་ཚོས་ཚོགས་ཆེན་དཀྱིལ་དུ་དཀོན་མཆོག༌བསྟོད། །ཀྱེ་ཀྱེ་ཡེས་ར་ཨེལ་གྱི་བུ་རྒྱུད༌རྣམས། །ཁྱོད་ཚོས་ཡ་ཝཱེ་ཁོང་ལ་བསྟོད་བསྔགས༌བརྗོད།།
PSA 68:27 དེ་རྣམས་རྗེ་བོ་ཚོ་ཆུང་པེན་ཡཱ༌མེན། །ཡ་ཧུ་དཱ་ཡི་འགོ་དཔོན་ཁྱུ་ཚོགས༌ཡོད། །ཟེ་བུ་ལུན་དང་ནཱབ་ཐ་ལི་ཡི༌ནི། །འགོ་དཔོན་རྣམས་ཀྱང་དེ་རུ་ཡོད༌པ་འོ།།
PSA 68:28 ཀྱེ་ཀྱེ་དཀོན་མཆོག་ནུས་མཐུ་མངོན་པར༌མཛོད། །ང་ཚོར་མཛད་པའི་དོན་རྣམས་བརྟན་པོར༌མཛོད།།
PSA 68:29 ཡེ་རུ་སཱ་ལེམ་ཡུལ་དུ་གནས་པ༌ཡི། །ཁྱེད་ཀྱི་མཆོད་ཁང་ཕྱིར་དུ་རྒྱལ་པོ༌རྣམས། །ཕྱག་རྟེན་ཁྱེར་ནས་ཁྱེད་ལ་འབུལ་བར༌འགྱུར།།
PSA 68:30 ཁྱེད་ཀྱིས་འདམ་རྩྭའི་ཁྲོད་ཀྱི་གཅན་གཟན་དང༌། །གླང་གི་ཁྱུ་དང་མི་སྡེའི་བ་ཕྲུག༌རྣམས ། །དངུལ་གྱི་དོང་ཙེར་ཆགས་རྣམས་བརྫི་བར༌མཛོད། །དམག་འཁྲུག་ལ་དགའི་མི་རིགས་གཏོར་གྱུར༌ཅིག།
PSA 68:31 ཨེ་ཅིབ་ཡུལ་ནས་སྐུ་དྲག་རྣམས་འོང༌ཞིང༌། །གུ་ཤས་དཀོན་མཆོག་ཉིད་ལ་ཕྱག་རྟེན༌དབུལ།།
PSA 68:32 ཀྱེ་མ་ས་གཞི་ཡོངས་ཀྱི་རྒྱལ་ཁམས༌རྣམས། །ཁྱོད་ཚོས་དཀོན་མཆོག་ཁོང་ལ་གླུ་གཞས༌ཕུལ། །ཁྱོད་ཚོས་གཙོ་བོར་བསྟོད་དབྱངས་འབུལ་བར༌གྱིས།།༼ སེ༌ལཱ། ༽
PSA 68:33 གདོད་མའི་ནམ་མཁའི་དབྱིངས་དག་འཆིབ་པ༌ཡི། །གཙོ་བོ་ཁོང་ལ་བསྟོད་པའི་མགུར་མ༌ལེན། །ལྟོས་དང་ཁོང་གིས་སྟོབས་ལྡན་གསུང་སྐད༌འདོན།།
PSA 68:34 དཀོན་མཆོག་ཉིད་ཀྱི་མཐུ་སྟོབས་བསྒྲག་པར༌གྱིས། །ཁོང་གི་བརྗིད་ཉམས་ཡེས་ར་ཨེལ་སྟེང༌གནས། །ནམ་མཁའི་དབྱིངས་སུ་ཁོང་གི་དབང་ཐང༌མངོན།།
PSA 68:35 ཀྱེ་ཀྱེ་དཀོན་མཆོག་གནས་མཆོག་ནང་དུ་ནི། །ཁྱེད་རང་གུས་ཤིང་འཇིགས་པར་མངོན་པ༌དང༌། །ཡེས་ར་ཨེལ་གྱི་དཀོན་མཆོག་ཉིད་ཀྱིས༌ནི། །མཐུ་སྟོབས་དབང་ཐང་རང་གི་མི་ལ༌གནང༌། །དཀོན་མཆོག་ཁོང་ཉིད་བསྟོད་པར་འོས་སོ༌ལོ།།
PSA 69:1 ༼མེ་ཏོག་ཀུ་མུད་ཀྱི་དབྱངས་ནང་དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཆུ་ཆེན་རྣམས་ཀྱིས་ང་རང་བསྣུབ་ལ༌ཉེ། །ཀྱེ་ཀྱེ་དཀོན་མཆོག་ང་ནི་སྐྱོབ་པར༌མཛོད།།
PSA 69:2 ང་རང་གཏིང་ཟབ་འདམ་ནང་ཟུག་པ༌དང༌། །དེ་རུ་རྐང་པ་འཛུགས་སའི་གནས་ཀྱང༌མེད། །ང་རང་གཏིང་ཟབ་ཆུ་ཡི་ནང་དུ༌སླེབས། །ང་ཡི་སྟེང་དུ་ཆུ་ལོག་བརྒྱུགས༌པ་འོ།།
PSA 69:3 འོ་དོད་བོས་ནས་ཆད་ཅིང་མགྲིན་པ༌བསྐམས། །དཀོན་མཆོག་ཉིད་ལ་བསྒུགས་ནས་མིག་ཤེད༌ཉམས།།
PSA 69:4 དོན་མེད་བདག་ལ་སྡང་བའི་མི་གྲངས༌ནི། །བདག་གི་མགོ་ཡི་སྐྲ་ལས་མང་བ༌ཡིན། །རྒྱུ་རྐྱེན་མེད་པར་ང་ཡི་དགྲར་ལངས༌ཤིང༌། །ང་རང་གསོད་པར་འདོད་པ་ཤིན་ཏུ༌མང༌། །མ་འཕྲོག་མ་བཅོམ་དེ་ཡང་འཇལ་དགོས༌བྱུང༌།།
PSA 69:5 དཀོན་མཆོག་ཁྱེད་ཀྱིས་ང་ཡི་གླེན་རྟགས༌མཁྱེན། །ང་ཡི་ཉེས་པ་ཁྱེད་ལ་སྦས་པ༌མེད།།
PSA 69:6 ཀྱེ་ཀྱེ་གཙོ་བོ་དཔུང་ཚོགས་ཀྱི་ཡ་ཝཱེ། །ཁྱེད་ལ་རེ་སྒུག་བྱེད་པའི་མི་རྣམས༌ནི། །ང་ཡི་རྐྱེན་གྱིས་ནོངས་པར་མི༌བྱ་འོ། །ཀྱེ་ཀྱེ་ཡེས་ར་ཨེལ་གྱི་དཀོན་མཆོག༌ལགས། །ཁྱེད་ཉིད་འཚོལ་མཁན་མི་རྣམས་ང་ཡི༌རྐྱེན། །བརྙས་བཅོས་འཁེལ་བར་མི་མཛད་ཁྱེད་ལ༌མཁྱེན།།
PSA 69:7 ཅི་ལ་ཞེ་ན་བདག་གིས་ཁྱེད་དོན༌དུ། །སྨད་པ་བཟོད་ཅིང་གདོང་ཡང་ངོ་ཚས༌བཏུམས།།
PSA 69:8 རང་གི་སྤུན་ཟླ་ང་དང་རིང་དུ༌གྱེས། །མ་གཅིག་སྤུན་ལ་ང་རང་ཕྱི་མིར༌གྱུར།།
PSA 69:9 ཁྱེད་ཀྱི་བཞུགས་གནས་དོན་དུ་ང་རང༌ནི། །སེམས་པ་ཤིན་ཏུ་འཚབ་ནས་མེ་ལྟར༌འབར། །ཁྱེད་ལ་སྨད་པའི་སྨད་སྒྲ་ང་ལ༌ཕོག།
PSA 69:10 ང་རང་ངུ་ཞིང་ཟས་ཀྱང་མི་སྤྱོད་སྐབས། །ཐ་ན་དེ་ཡང་བདག་གི་ངོ་ཚར༌གྱུར།།
PSA 69:11 བདག་གིས་ལུས་ལ་རྩིད་རས་གྱོན་པ༌ན། །ཁོ་ཚོས་འཕྱ་དགོད་བྱེད་པའི་ཡུལ་དུ༌གྱུར།།
PSA 69:12 མཁར་སྒོར་བསྡད་པས་ང་ཡི་སྐོར་གླེང༌ཞིང༌། །ང་རང་ཆང་རྐྱལ་རྣམས་ཀྱི་གླུ་རུ༌གྱུར།།
PSA 69:13 འོན་ཀྱང་ཀྱེ་ཀྱེ་ཡ་ཝཱེ་བདག་གིས༌ནི། །ཁྱེད་ཐུགས་མཉེས་དུས་ཁྱེད་ལ་སྨོན་ལམ༌འདེབས། །དཀོན་མཆོག་ཁྱེད་ཀྱི་བྱམས་བརྩེ་ཆེན་པོ༌དང༌། །བློས་ཐུབ་ཐར་པའི་ནང་དུ་བཀའ་ལན༌གནོངས།།
PSA 69:14 འདམ་གྱི་ནང་ནས་ང་རང་སྐྱོབ་པར༌ཞུ། །ང་རང་དེའི་ནང་ནུབ་ཏུ་མི་འཇུག༌རོགས། །ང་ལ་ཞེ་འཁོན་འཛིན་པའི་མི་རྣམས༌དང༌། །གཏིང་ཟབ་ཆུ་ལས་ང་རང་སྐྱོབ་པར༌མཛོད།།
PSA 69:15 ང་རང་ཆུ་ལོག་ལ་ནི་བསྣུབ་མ༌འཇུག །གཏིང་ཟབ་ཆུ་ལ་མིད་དུ་ཡང་མ༌འཇུག །ངའི་སྟེང་དོང་ཁ་བཙུམ་པར་མི་མཛད༌རོགས།།
PSA 69:16 ཀྱེ་ཀྱེ་ཡ་ཝཱེ་ཁྱེད་ཀྱི་བྱམས་བརྩེ༌ནི། །གཞི་ནས་ལེགས་པས་བདག་ལ་བཀའ་ལན༌གནོངས། །ཁྱེད་ཀྱིས་ཉིད་ཀྱི་སྙིང་རྗེ་ཆེན་པོ༌བཞིན། །ཞལ་རས་ང་ཡི་ཕྱོགས་སུ་འཁོར་བར༌མཛོད།།
PSA 69:17 ཁྱེད་ཀྱི་ཞབས་ཕྱིར་ཞལ་ངོ་མི་སྦ༌བར། །ང་རང་སྡུག་པས་མྱུར་དུ་བཀའ་ལན༌གནོངས།།
PSA 69:18 ང་ཡི་ཉེ་སར་ཕེབས་ཏེ་ང་སྐྱོབ༌རོགས། །དགྲ་རྣམས་རྐྱེན་གྱིས་ང་ནི་བླུ་བར༌མཛོད།།
PSA 69:19 ང་ལ་ཕོག་པའི་འཕྱ་དམོད་བརྙས་བཅོས༌དང༌། །དམའ་འབེབས་བཅས་ནི་ཁྱེད་ཀྱིས་ཀུན་ནས༌མཁྱེན། །བདག་གི་དགྲ་བོ་ཐམས་ཅད་ཁྱེད་མཁྱེན༌ནོ།།
PSA 69:20 འཕྱ་དམོད་ཚིག་ནི་བདག་གི་སེམས་ལ༌ཕོག །ང་རང་སྐྱོ་ཞིང་སྡུག་བསྔལ་གནས་སུ༌ལྷུང༌། །སྙིང་རྗེ་བྱེད་མཁན་བཙལ་ཡང་གཅིག་ཀྱང༌མེད། །སེམས་གསོ་ཨེ་འཐོབ་སྙམ་ཡང་ཐོབ་མ༌བྱུང༌།།
PSA 69:21 ང་ཡི་ཟས་སུ་མཁྲིས་ཁུ་བསྲེས་པ༌དང༌། །སྐོམ་པ་སེལ་ཕྱིར་ང་ལ་སྐྱུར་ཁུ༌བླུགས།།
PSA 69:22 དེ་རྣམས་གསོལ་ལྕོག་དེ་ཚོར་རྙི་རྒྱ༌དང༌། །བདེ་བའི་དུས་ཀྱི་ལྕགས་ཀྱུ་རུ་གྱུར༌ཅིག།
PSA 69:23 དེ་རྣམས་མིག་དབང་ཉམས་ནས་མི་མཐོང༌ཞིང༌། །རྐེད་པ་རྒྱུན་ཆད་མེད་པར་གཡོ་བར༌ཤོག།
PSA 69:24 ཁྱེད་ཀྱི་ཐུགས་ཁྲོ་དེ་ཚོའི་སྟེང་བླུགས༌ནས། །ཁྲོ་གཏུམ་གྱིས་ནི་ཁོ་རྣམས་ཟིན་གྱུར༌ཅིག།
PSA 69:25 དེ་ཚོའི་སྡོད་གནས་སྟོངས་ཤིང་སྟོང་པར༌ཤོག །གུར་ནང་སུ་ཡང་གནས་པར་མ་གྱུར༌ཅིག།
PSA 69:26 ཁྱེད་ཀྱིས་བརྡུངས་པར་དེ་ཚོས་འཚེ་བ༌དང༌། །ཁྱེད་ཀྱིས་རྨས་པར་མཛད་པའི་མི་དེ༌ཡི། །ཟུག་གཟེར་ལ་ཡང་དེ་ཚོས་འཕྱ་བས༌སོ།།
PSA 69:27 ཉེས་ཆད་སྟེང་ལ་ཉེས་ཆད་བསྣན་ནས༌ནི། །ཁྱེད་ཀྱི་དྲང་བདེན་ནང་དུ་མི་འཇུག༌རོགས།།
PSA 69:28 དེ་རྣམས་སྲོག་གི་གླེགས་བམ་ལས་བསུབས༌ནས། །དྲང་བདེན་ཁྲོད་དུ་འབྲི་བར་མི་མཛད༌རོགས།།
PSA 69:29 འོན་ཀྱང་ང་ནི་སྐྱོ་ཞིང་སྡུག་བསྔལ༌ཅན། །ཀྱེ་ཀྱེ་དཀོན་མཆོག་སྐྱབས་ཀྱིས་བསྲུང་བར༌མཛོད།།
PSA 69:30 དཀོན་མཆོག་མཚན་ལ་བསྟོད་པའི་མགུར་མ༌ལེན། །གཏང་རག་ཕུལ་ནས་ཁོང་གི་ཆེ་བ༌བརྗོད།།
PSA 69:31 འདི་ལ་ཡ་ཝཱེ་གླང་གོག་ཕུལ༌བ་འམ། །ཡང་ན་གླང་ཐུག་རྭ་དང་རྨིག་པ༌ཅན། །ཕུལ་བ་ལས་ཀྱང་རབ་ཏུ་དགྱེས་པ༌ཡིན།།
PSA 69:32 སྙེམས་ཆུང་རྣམས་ཀྱིས་མཐོང་ནས་དགའ་བར༌འགྱུར། །ཀྱེ་མ་དཀོན་མཆོག་འཚོལ་བའི་མི་རྣམས༌ལགས། །ཁྱོད་ཅག་སེམས་ནི་གསོན་པོར་གནས་གྱུར༌ཅིག།
PSA 69:33 ཡ་ཝཱེས་དབུལ་པོ་རྣམས་ལ་གསན་པ༌དང༌། །ཉིད་ཀྱི་བཙོན་པར་མཐོང་ཆུང་མི་མཛད༌དོ།།
PSA 69:34 གནམ་དང་ས་དང་རྒྱ་མཚོ་ཆེན་པོའི༌ནང༌། །འགྲུལ་བ་ཀུན་གྱིས་ཁོང་ལ་བསྟོད་པར༌ཤོག།
PSA 69:35 དཀོན་མཆོག་ཉིད་ཀྱིས་ཛ་ཡན་སྐྱོབ་པར༌མཛད། །ཡ་ཧུ་དཱ་ཡི་གྲོང་ཁྱེར་བརྩིག་པར༌འགྱུར། །ཁོང་གི་མི་རྣམས་དེའི་ནང་གནས་པ༌དང༌། །ཡུལ་དེ་བདག་ཏུ་འཛིན་པར་འགྱུར༌བ་འོ། །
PSA 69:36 ཁོང་གི་ཞབས་ཕྱི་དག་གི་བུ་རྒྱུད༌རྣམས། །ཐམས་ཅད་ཡུལ་དེའི་བདག་པོར་འགྱུར་བ༌དང༌། །ཁོང་མཚན་གཅེས་སུ་འཛིན་པ་དེ་རུ༌གནས།།
PSA 70:1 ༼དཱ་བིད་ཀྱི་དྲན་གསོའི་མགུར་མ་དབུ་མཛད་ལ་སྤྲད༌པ།༽ ཀྱེ་ཀྱེ་དཀོན་མཆོག་ང་རང་མྱུར་དུ༌སྐྱོབས། །ཡ་ཝཱེ་མགྱོགས་པོར་ང་ལ་རོགས་རམ༌མཛོད།།
PSA 70:2 ངའི་སྲོག་གཅོད་ཕྱིར་ང་རང་འཚོལ་མཁན༌རྣམས། །ལྷན་ཅིག་སྐྱེངས་ཤིང་ངོ་ཡང་ནོངས་གྱུར༌ཅིག །ང་ལ་གནོད་པ་འབྱུང་བར་དགའ་བ༌རྣམས། །ངོ་ཚ་དང་བཅས་ཕམ་པར་གྱུར་ཅིག༌གུ།
PSA 70:3 ང་ལ་ཨ་ཧ་ཨ་ཧ་ཟེར་མཁན༌རྣམས། །རང་གི་ངོ་ཚའི་རྐྱེན་གྱིས་ཕམ་པར༌ཤོག།
PSA 70:4 ཁྱེད་རང་འཚོལ་མཁན་དགའ་ཞིང་མགུ་བ༌དང༌། །ཁྱེད་ཀྱི་སྐྱབས་ལ་དགའ་བས་དུས་རྒྱུན༌དུ། །དཀོན་མཆོག་བསྟོད་འོས་ཞེས་སུ་སྨྲ་གྱུར༌ཅིག།
PSA 70:5 འོན་ཀྱང་ང་ནི་དབུལ་ཞིང་ཕོངས་པས༌ན། །དཀོན་མཆོག་ལམ་སེང་ངའི་རྩར་ཕེབས་པར༌མཛོད། །ང་ཡི་རོགས་རམ་དང་ནི་སྲོག་སྐྱོབ༌ཁྱེད། །ཀྱེ་ཀྱེ་ཡ་ཝཱེ་ཐུགས་གཡེལ་མ་མཛད༌ཅིག།
PSA 71:1 ཀྱེ་ཀྱེ་ཡ་ཝཱེ་ཁྱེད་ལ་སྐྱབས་སུ༌བཅོལ། །ང་རང་ནམ་ཡང་ངོ་ཚར་མི་སྦྱོར༌རོགས།།
PSA 71:2 ཁྱེད་ཀྱི་དྲང་བདེན་ངང་ནས་སྐྱོབ་ཅིང༌སྒྲོལ། །སྙན་གྱིས་གསན་ཞིང་ང་རང་ཐར་བར༌མཛོད།།
PSA 71:3 རྟག་ཏུ་གཡོལ་སའི་བྲག་ཏུ་ཁྱེད་གྱུར༌ཅིག །བདག་གི་བྲག་དང་བཙན་རྫོང་ཁྱེད་ལགས༌པས། །ཁྱེད་ཀྱིས་ང་རང་སྐྱོབ་པའི་བཀའ་གནང༌ངོ༌།།
PSA 71:4 ཀྱེ་ཀྱེ་དཀོན་མཆོག་སྡིག་སྤྱོད་ལག་པ༌དང༌། །མི་ངན་དང་ནི་གདུག་རྩུབ་ཅན་རྣམས༌ཀྱི། །སྦར་མོ་ལས་ང་སྐྱོབ་པར་མཛོད་ཅིག༌གུ།
PSA 71:5 གཙོ་བོ་ཡ་ཝཱེ་ཁྱེད་ངའི་རེ་བ༌དང༌། །ཆུང་ངུའི་དུས་ནས་བློ་གཏད་བཅོལ་ས༌ཡིན།།
PSA 71:6 སྐྱེས་པའི་ཚུན་ནས་ང་རང་ཁྱེད་ལ༌བརྟེན། །མ་ཡི་མངལ་ལས་ཁྱེད་ཀྱིས་ང་ཕྱུང༌བས། །བདག་གིས་དུས་རྒྱུན་ཁྱེད་ལ་བསྟོད་པར༌བྱ།།
PSA 71:7 མང་པོས་ང་རང་ཡ་མ་གཟུགས་སུ༌མཐོང༌། །འོན་ཀྱང་ཁྱེད་ངའི་སྐྱབས་གནས་བརྟན་པོ༌ཡིན།།
PSA 71:8 བདག་གི་སྨྲ་སྒོས་ནམ་ཡང་ཁྱེད་ལ༌བསྟོད། །ཉིན་གང་ཁྱེད་ཀྱི་གཟི་དཔལ་བརྗོད་པར༌བྱ།།
PSA 71:9 རྒས་པའི་དུས་སུ་ང་རང་མི་བསྐྱུར༌རོགས། །སྟོབས་ཤུགས་ཉམས་དུས་སྤང་བར་མི༌བྱའོ།།
PSA 71:10 ཅི་ལ་ཞེ་ན་དགྲ་ཡིས་ངའི་སྐོར༌གླེང༌། །ང་རང་གསོད་པར་འཇབ་མཁན་གྲོས་བྱས༌ནས།།
PSA 71:11 དཀོན་མཆོག་ཉིད་ཀྱིས་ཁོ་ནི་སྤངས་པ༌དང༌། །ཁོ་རང་སྐྱོབ་མཁན་སུ་ཡང་མེད་པས༌ན། །ང་ཚོས་ཁོ་རང་དེད་ནས་གཟུང་ཞེས༌སྨྲ།།
PSA 71:12 ཀྱེ་ཀྱེ་དཀོན་མཆོག་ང་དང་རིང་མ༌གྱེས། །ང་ཡི་དཀོན་མཆོག་མགྱོགས་པོར་སྐྱབས་སུ༌ཕེབས།།
PSA 71:13 ང་ལ་ནག་ཉེས་འཛུགས་པའི་མི་རྣམས༌ནི། །ཐམས་ཅད་སྐྱེངས་ཤིང་རྩ་མེད་འགྲོ་བར༌ཤོག །ང་ལ་གནོད་འཚེ་བྱེད་པར་འདོད་པ༌རྣམས། །འཕྱ་དམོད་དང་ནི་དམའ་འབེབས་ཕོག་གྱུར༌ཅིག །
PSA 71:14 འོན་ཀྱང་ང་ཡིས་དུས་རྒྱུན་ཁྱེད་ལ༌རེ། །ཁྱེད་ལ་བསྟོད་པ་མང་དུ་འབུལ་བར༌བྱ།།
PSA 71:15 ཁྱེད་ཀྱི་དྲང་བ་ཉིད་དང་སྐྱབས་མཛད༌པའི། །གྲངས་ཀ་བདག་གིས་བརྗོད་པར་མི་ནུས༌ཀྱང༌། །བདག་གི་སྨྲ་སྒོས་ཉིན་གང་དེ་རྣམས༌བརྗོད།།
PSA 71:16 གཙོ་བོ་ཡ་ཝཱེའི་མཛད་པ་སྟོབས་ལྡན༌རྣམས། །བདག་གིས་བརྗོད་པར་བྱ་ཞིང་ཁྱེད་གཅིག༌པུའི། །དྲང་བ་ཉིད་ཀྱི་སྐོར་ཡང་གླེང་བར༌བྱ།།
PSA 71:17 ང་རང་ལོ་ན་ཕྲ་བའི་དུས་ནས༌བཟུང༌། །དཀོན་མཆོག་ཁྱེད་ཀྱིས་ང་ལ་སློབ་སྟོན༌གནང༌། །ང་ཡིས་ད་ལྟའི་བར་དུ་ཁྱེད་ཉིད༌ཀྱི། །མཛད་པ་ངོ་མཚར་ཅན་རྣམས་སྒྲོག༌པ་འོ།།
PSA 71:18 མི་རབས་རྗེས་མར་ཁྱེད་ཀྱི་ནུས་མཐུ༌དང༌། །ཕྱིས་འབྱུང་ཀུན་ལ་ཁྱེད་སྟོབས་སྟོན་པའི༌ཕྱིར། །ང་རང་རྒས་ཤིང་མགོ་དཀར་ཡིན་དུས༌སུ། །དཀོན་མཆོག་ཁྱེད་ཀྱིས་ང་ནི་མི་སྤང༌རོགས།།
PSA 71:19 དཀོན་མཆོག་ཁྱེད་ཀྱི་དྲང་བདེན་ནམ་མཁར༌སླེབས། །ཁྱེད་ཀྱིས་འཕྲིན་ལས་ཆེན་པོ་རྣམས་མཛད༌ཅིང༌། །ཀྱེ་ཀྱེ་དཀོན་མཆོག་ཁྱེད་འདྲ་སུ་ཡོད༌དམ།།
PSA 71:20 ང་རང་སྡུག་བསྔལ་གང་མང་བརྒྱུད་པར༌མཛད། །ཁྱེད་ཀྱིས་ང་ནི་སླར་ཡང་གསོན་པར༌མཛད། །ས་གཞིའི་གཏིང་ནས་ང་རང་སྐྱོབ་པར༌འགྱུར།།
PSA 71:21 བདག་གི་ཆེ་བ་ཁྱེད་ཀྱིས་སྤེལ་བར༌མཛོད། །ངའི་ཕྱོགས་འཁོར་ནས་སླར་ཡང་སེམས་གསོ༌གནོངས།།
PSA 71:22 ཀྱེ་ཀྱེ་དཀོན་མཆོག་བདག་གིས་རྒྱུད་མངས༌ཀྱིས། །ཁྱེད་ཀྱི་བདེན་པ་ཉིད་ལ་བསྟོད་པར༌བྱ། །ཀྱེ་ཀྱེ་ཡེས་ར་ཨེལ་གྱི་དམ་པ༌ཉིད། །པི་ཝང་དཀྲོལ་ནས་ཁྱེད་ལ་བསྟོད་དབྱངས༌འབུལ།།
PSA 71:23 ཁྱེད་ལ་བསྟོད་དབྱངས་འབུལ་བའི་དུས་དེ༌ལ། །བདག་གི་མཆུ་ཡིས་དགའ་སྤྲོའི་ཀི་སྒྲ༌སྒྲོག །ངའི་སེམས་ཁྱེད་ཀྱིས་བླུས་པ་རབ་ཏུ༌དགའ།།
PSA 71:24 ང་ལ་གནོད་འཚེ་གཏོང་བར་འདོད་པ༌རྣམས། །ངོ་ཚར་སྦྱར་ཅིང་ཕམ་པར་གྱུར་པས༌ན། །བདག་གི་ལྕེ་ཡིས་ཉིན་གང་ཁྱེད་ཉིད༌ཀྱི། །དྲང་བ་ཉིད་ཀྱི་སྐོར་ནི་གླེང་བར༌བྱ།།
PSA 72:1 ༼སོ་ལོ་མོན་གྱི་མགུར༌མ།༽ དཀོན་མཆོག་ཁྱེད་ཀྱི་དྲང་གཞག་རྒྱལ་པོ༌དང༌། །དྲང་བདེན་རྒྱལ་སྲས་ལ་ནི་གནང་བར༌མཛོད།།
PSA 72:2 དྲང་བདེན་ངང་ནས་ཁྱེད་ཀྱི་མི་རྣམས༌དང༌། །ཁྱེད་ཀྱི་དབུལ་པོར་ཁྲིམས་ཐག་དྲང་གཞག༌གཅོད།།
PSA 72:3 དྲང་བདེན་དབང་གིས་རི་རབ་རི་ཕྲན༌ལས། །མི་རྣམས་ལ་ནི་ཞི་བདེ་འཐོབ་གྱུར༌ཅིག།
PSA 72:4 ཁོང་གིས་མི་རྣམས་ཁྲོད་ཀྱི་སྐྱོ་བོ༌ལ། །དག་འབུད་མཛད་ཅིང་དབུལ་ཕོངས་བུ་ཕྲུག༌སྐྱོབ། །མི་ལ་གཉའ་གནོན་བྱེད་མཁན་རྡུལ་དུ༌བརླག།
PSA 72:5 ཉི་མ་ཟླ་བ་གནས་པའི་དུས་ཡུན༌རིང༌། །མི་རབས་མི་རབས་ཁྱེད་ལ་གུས་ཤིང་འཇིགས།།
PSA 72:6 བརྔས་པའི་རྩྭ་སའི་སྟེང་ལ་ཆར་ཆུ༌དང༌། །ས་གཞི་བརླན་པའི་ཆར་བཞིན་ཁོང་འབྱོན༌ཡོང༌།།
PSA 72:7 ཁོང་གི་སྐུ་རིང་དྲང་པོ་དར་བ༌དང༌། །ཟླ་བ་གནས་རིང་ཕྱོགས་བཞི་བདེ་ལ༌བཀོད།།
PSA 72:8 མཚོ་ནས་མཚོ་ཡི་བར་དང་ཆུ་བོ་ནས། །ས་མཐའི་བར་དུ་ཁོང་གིས་རྒྱལ་སྲིད༌སྐྱོང༌།།
PSA 72:9 དབེན་སྟོང་གནས་པས་ཁོང་དྲུང་ཕྱག་འཚལ༌ཞིང༌། །ཁོང་གི་དགྲ་རྣམས་ས་རྡུལ་ལྡག་པར༌འགྱུར།།
PSA 72:10 ཐཱར་ཞིས་དང་ནི་གླིང་ཕྲན་རྒྱལ་པོ༌ཚོས། །འབུལ་ཚན་འབུལ་ཞིང་ཤེ་བཱ་དང་སེ༌བཱའི། །རྒྱལ་པོ་རྣམས་ཀྱིས་ཕྱག་རྟེན་འབུལ་བར༌འགྱུར།།
PSA 72:11 རྒྱལ་པོ་ཀུན་གྱིས་ཁོང་ལ་ཕྱག་འཚལ༌ཞིང༌། །མི་རིགས་ཀུན་གྱིས་ཁོང་ལ་གཡོག་བྱེད༌དོ།།
PSA 72:12 དབུལ་པོས་འོ་དོད་འདོན་དུས་ཁོང་གིས༌སྐྱོབ། །སྐྱབས་མེད་སྐྱོ་བོ་ཁོང་གིས་སྒྲོལ་བར༌མཛད།།
PSA 72:13 ཉམ་ཆུང་དབུལ་པོར་ཁོང་གིས་སྙིང་རྗེས༌གཟིགས། །དབུལ་པོ་རྣམས་ཀྱི་སྲོག་ཀྱང་སྐྱོབ་པར༌བྱ།།
PSA 72:14 ཁོ་རྣམས་བརྙས་བཅོས་གདུག་རྩུབ་ལས་སྐྱོབ༌ཅིང༌། །ཁོང་གི་སྤྱན་སྔར་དེ་ཚོའི་ཁྲག་རྩ༌ཆེ།།
PSA 72:15 ཁོང་ཉིད་ཡུན་རིང་གནས་ཤིང་མི་རྣམས༌ཀྱིས། །ཤེ་བཱའི་གསེར་རྣམས་ཁོང་ལ་འབུལ་བར༌ཤོག །ཁོང་དོན་ཆད་མེད་སྨོན་ལམ་འདེབས་གྱུར༌ཅིག །ཉིན་རེ་བཞིན་དུ་བྱིན་རླབས་འཐོབ་པར༌ཤོག།
PSA 72:16 ས་གཞིའི་སྟེང་དུ་འབྲུ་རིགས་མོད་པ༌དང༌། །རི་རྩེ་རྣམས་སུ་ལོ་ལེགས་འབྱུང་བར༌ཤོག །ས་སྟེང་ལོ་འདབ་ཤིན་ཏུ་རྒྱས་ནས༌ནི། །ལེ་པཱ་ནོན་གྱི་ནགས་བཞིན་གྱུར་ཅིག༌གུ །གྲོང་ཁྱེར་པ་རྣམས་རྩྭ་ལྟར་དར་བར༌ཤོག།
PSA 72:17 ཁོང་གི་མཚན་ནི་དུས་རྒྱུན་གནས་པ༌དང༌། །ཉི་མ་ཡོད་རིང་མཚན་སྙན་ལུས་གྱུར༌ཅིག །ཁོང་རྐྱེན་མི་རིགས་ཀུན་ལ་བྱིན་རླབས༌འཐོབ། །ཀུན་གྱིས་ཁོང་ལ་བདེ་ལེགས་ཞུ་བར༌ཤོག།
PSA 72:18 ངོ་མཚར་དོན་རྣམས་མཛད་མཁན་འབའ་ཞིག༌སྟེ། །ཡེས་ར་ཨེལ་གྱི་དཀོན་མཆོག་ཡ་ཝཱེ༌ནི། །བསྟོད་ཅིང་བསྔགས་པར་འོས་པ་ཡིན་ལགས༌སོ།།
PSA 72:19 ཁོང་གི་གཟི་དཔལ་ལྡན་པའི་མཚན་ལ༌ནི། །རྒྱུན་ནས་རྒྱུན་དུ་བསྟོད་པ་འབུལ་འོས༌ཤིང༌། །ཁོང་གི་གཟི་བརྗིད་ས་གཞིར་གང་བར༌ཤོག །ཨ་མེན་ཨ་མེན་ཞེས་སུ་ཡང་ཡང༌བརྗོད།།
PSA 72:20 ཡེ་སེའི་བུ་སྟེ་དཱ་བིད་ཁོང་ཉིད༌ཀྱི། །སྨོན་ལམ་འདི་ནས་རེ་ཞིག་རྫོགས༌པ་འོ།།
PSA 73:1 ༼ཨ་སབ་ཀྱི་མགུར༌མ།༽ ཡེས་ར་ཨེལ་དང་སེམས་པ་རྣམ་དག༌ལ། །དཀོན་མཆོག་བཟང་པོ་ལགས་པར་གདོན་མི༌ཟ།།
PSA 73:2 འོན་ཀྱང་ང་ཡི་རྐང་པ་འདྲེད་ལ༌ཉེ། །གོམ་སྟབས་དོན་མེད་འགྱེལ་ལ་ཁད་ཙམ༌བྱུང༌།།
PSA 73:3 རྒྱུ་མཚན་མི་ངན་དར་ལུགས་ངས་མཐོང༌ཞིང༌། །ང་རྒྱལ་ཅན་ལ་བདག་ནི་ཕྲག་དོག༌སྐྱེས།།
PSA 73:4 དེ་རྣམས་འཆི་བའི་དུས་སུ་ཟུག་གཟེར༌མེད། །ཁོག་པ་རྒྱགས་ཤིང་སྟོབས་ཀྱང་རྒྱས་པ༌ཡིན།།
PSA 73:5 དེ་ཚོར་གཞན་ལྟར་དཀའ་སྡུག་མི་འབྱུང༌ལ། །གཞན་པ་ནང་ལྟར་རྐྱེན་ངན་ཡང་མི༌འཕྲད།།
PSA 73:6 དེའི་ཕྱིར་ང་རྒྱལ་དེ་ཚོའི་མགུལ་རྒྱན༌ཡིན། །གདུག་རྩུབ་གོས་བཞིན་དེ་ཚོས་གྱོན་བྱེད༌དོ།།
PSA 73:7 ལུས་ཕུང་རྒྱགས་པས་མིག་ཟུང་འབུར་དུ༌ཐོན། །དེ་ཚོའི་ངན་སེམས་བསམ་ཡུལ་ལས་ཀྱང༌འདས།།
PSA 73:8 མི་ལ་འཕྱ་ཞིང་སེམས་ངན་བཅངས་ནས༌ནི། །གཉའ་གནོན་གཏམ་རྣམས་སྨྲ་ཞིང་ཁ་ཕོ༌ཆེ།།
PSA 73:9 དེ་ཚོའི་ངག་གིས་ནམ་མཁར་སྐུར་བ་འདེབས། །དེ་ཚོའི་སྨྲ་བརྗོད་ས་གཞི་ཡོངས་ལ༌སླེབས།།
PSA 73:10 དེའི་ཕྱིར་ཁོང་གི་མི་རྣམས་དེའི་ཕྱོགས༌ལོག །མོད་པོ་ཆུ་ནི་ངོམ་པར་བཏུང་བ༌འོ།།
PSA 73:11 དེ་ཚོས་དཀོན་མཆོག་གིས་ནི་ཇི་ལྟར༌མཁྱེན། །བླ་ན་མེད་པར་ཤེས་ཡོན་ཡོད་དམ༌ཟེར།།
PSA 73:12 མི་ངན་འདི་ཚོར་ལྟོས་དང་ཁོ་རྣམས༌ནི། །རྟག་ཏུ་བདེ་བར་གནས་ཤིང་ནོར་ཡང༌འཕེལ།།
PSA 73:13 བདག་གིས་དོན་མེད་རང་སེམས་གཙང་མར༌བྱས། །ཉེས་མེད་མཚོན་ཕྱིར་ལག་ཟུང་བཀྲུས་པ༌སྟོང༌།།
PSA 73:14 རྒྱུ་མཚན་ང་ལ་ཉིན་གང་རྐྱེན་ངན༌བྱུང༌། །ཞོགས་པ་རེ་རེར་ང་ལ་ཉེས་ཆད༌ཕོག།
PSA 73:15 བདག་གིས་འདི་ལྟར་སྨྲ་འོང་ཞེས་བརྗོད༌ན། །ཁྱེད་ཀྱི་བུ་རྒྱུད་དག་ལ་ངོ་ལོག༌བྱས།།
PSA 73:16 དཀོན་མཆོག་གནས་མཆོག་ནང་དུ་ང་སོང༌སྟེ། །དེ་ཚོའི་མཐའ་མར་བསམ་བློ་བཏང་བའི༌བར། །ཇི་ལྟར་རྟོགས་ཕྱིར་བསམ་བློ་བསྐོར་དུས༌སུ། །ང་ཡི་མཐོང་ངོར་དེ་ནི་ཤིན་ཏུ༌དཀའ།།
PSA 73:18 ཁྱེད་ཀྱིས་དངོས་གནས་དེ་རྣམས་འདྲེད་སར༌བཞག །སྟོངས་ཕྱིར་དེ་དག་ཐུར་དུ་གཡུགས་མཛད༌དོ།།
PSA 73:19 དེ་རྣམས་སྐད་ཅིག་ཉིད་ལ་ཇི་ལྟར༌སྟོངས། །འཇིགས་སྣང་གིས་ནི་ཡོངས་སུ་མེད་པར༌བྱས།།
PSA 73:20 གཉིད་སད་རྨི་ལམ་ཇི་ལྟར་ཡིན་ན༌ནི། །ཀྱེ་ཀྱེ་གཙོ་བོ་ཁྱེད་ཉིད་མནལ་སད༌དུས། །དེ་ཚོའི་འཆར་སྣང་ལ་ནི་དེ་བཞིན༌སྨད།།
PSA 73:21 བདག་སེམས་འཚེར་ཞིང་སྙིང་ཁུང་ཕུག་དུས༌སུ།།
PSA 73:22 ང་ནི་ཅི་འདྲའི་གླེན་ཞིང་རྨོངས་པ༌ལ། །ཁྱེད་དྲུང་ང་རང་དུད་འགྲོ་ནང་བཞིན༌ཡིན།།
PSA 73:23 འོན་ཀྱང་ང་རང་ནམ་ཡང་ཁྱེད་དང༌འགྲོགས། །ཁྱེད་ཀྱིས་བདག་གི་གཡས་ལག་ནས་བཟུང༌ངོ༌།།
PSA 73:24 ཁྱེད་ཀྱིས་བཀའ་སློབ་གནང་ནས་ལམ་སྣ༌དྲངས། །ཕྱིས་སུ་གཟི་བརྗིད་ནང་དུ་བདག་འཁྲིད༌འོང༌།།
PSA 73:25 ནམ་མཁར་ཁྱེད་ལས་ང་ལ་གཞན་སུ༌ཡོད། །ས་གཞིར་ཁྱེད་མིན་ཅི་ཡང་ངས་མི༌འདོད།།
PSA 73:26 ང་ཡི་ལུས་དང་ང་ཡི་སེམས་རྒུད༌ཀྱང༌། །དཀོན་མཆོག་ང་ཡི་སེམས་ཀྱི་སྟོབས་ཡིན༌ལ། །བདག་གི་གཏན་མའི་ནོར་སྐལ་ཡང་ཡིན༌ནོ།།
PSA 73:27 གཟིགས་ཤིག་ཁྱེད་དང་གྱེས་པ་མེད་པར༌འགྱུར། །ཁྱེད་དང་བྲལ་ནས་ལོག་གཡེམ་སྤྱོད་པ༌རྣམས། །ཐམས་ཅད་ཁྱེད་ཀྱིས་རྨེག་མེད་མཛད་མོད༌ཀྱང༌།།
PSA 73:28 དཀོན་མཆོག་ཉེ་སར་བཏུད་པ་བདག་ལ༌ཕན། །ཁྱེད་ཀྱི་མཛད་པ་ཐམས་ཅད་བརྗོད་པའི༌ཆེད། །གཙོ་བོ་ཡ་ཝཱེ་ང་ཡི་སྐྱབས་གནས༌བྱས།།
PSA 74:1 ༼ཨ་སབ་ཀྱི་བསླབ་བྱའི་མགུར༌མ།༽ ཀྱེ་ཀྱེ་དཀོན་མཆོག་ཁྱེད་ཀྱིས་དུས་གཏན༌དུ། །ངེད་རྣམས་སྤངས་པའི་རྒྱུ་མཚན་ཅི་ཡིན༌ནམ། །ཁྱེད་ཉིད་རང་གི་རྩྭ་རའི་ལུག་ཁྱུ༌ལ། །ཐུགས་ཁྲོ་དུ་བ་བཞིན་དུ་འཕྱུར་བ༌ཅི།།
PSA 74:2 གནའ་དུས་ཁྱེད་ཀྱིས་ཉོས་པའི་མི་ཚོགས༌ཏེ། །ཁྱེད་ཀྱིས་བླུས་ཤིང་ནོར་སྐལ་ཡིན་པའི༌སྡེ། །ཉིད་ཀྱི་གདན་ས་ཛ་ཡན་རི་དྲན༌མཛོད།།
PSA 74:3 ཡུན་རིང་ཞིག་རོར་ལུས་པའི་ཡུལ་རྣམས༌དང༌། །དགྲ་ཡིས་གནས་མཆོག་ནང་དུ་བྱས་པ༌ཡི། །གཏོར་བརླག་ཀུན་ལ་གཟིགས་ཕྱིར་ཕེབས་པར༌མཛོད།།
PSA 74:4 ཁྱེད་ཀྱི་ཚོགས་དཀྱིལ་དགྲ་ཡིས་ཀུ་ཅོ༌བསྒྲགས། །དེ་ཚོས་རང་གི་དར་ཆ་རྟགས་སུ༌བསླངས།།
PSA 74:5 དེ་དག་ནགས་ཚལ་སྟུག་པོའི་ཤིང་སྡོང༌རྣམས། །སྟ་རེ་འཕྱར་ནས་གཅོད་པའི་མི་དང༌མཚུངས།།
PSA 74:6 ད་ནི་གནས་མཆོག་ནང་གི་བརྐོས་རིས༌རྣམས། །དེ་ཚོས་སྟ་རེ་ཐོ་བས་རྡུལ་དུ༌བརླགས།།
PSA 74:7 ཁྱེད་ཀྱི་གནས་མཆོག་ཉིད་ནི་མེ་རུ༌བསྲེགས། །ཁྱེད་མཚན་གདན་སར་དམོད་ཅིང་ཁྱོན་ནས༌བརླགས།།
PSA 74:8 དེ་ཚོའི་སེམས་སུ་ང་ཚོས་བཙན་གནོན༌བྱ། །ཞེས་སུ་སྙམ་ཞིང་ཡུལ་ཕྱོགས་ཐམས་ཅད༌དུ། །དཀོན་མཆོག་ཆོས་ཁང་ཡོད་ཚད་རྩད་ནས༌བསྲེགས།།
PSA 74:9 ང་ཚོས་ངོ་མཚར་རྟགས་རྣམས་མི་མཐོང༌ཞིང༌། །ལུང་སྟོན་མེད་ལ་འདི་བཞིན་ནམ་དུས༌བར། །ལུས་འོང་ཤེས་མཁན་རང་ཅག་ཁྲོད་དུ་མེད།།
PSA 74:10 དགྲ་བོས་ནམ་བར་སྨད་འོང་ཀྱེ་དཀོན༌མཆོག །དགྲ་ཡིས་རྟག་ཏུ་ཁྱེད་མཚན་སྨད་འགྱུར༌རམ།།
PSA 74:11 ཁྱེད་ཀྱིས་ཕྱག་གཡས་བསྐུམས་པ་ཅི་ཡིན༌ནམ། །ཕྱག་གཡས་བཏོན་ནས་ཁོ་རྣམས་ཚར་ཆོད༌ཅིག།
PSA 74:12 ས་གཞིའི་སྟེང་དུ་ཐར་ལམ་གནང་བ༌ཡི། །དཀོན་མཆོག་གནའ་ནས་བདག་གི་རྒྱལ་པོ༌ཡིན།།
PSA 74:13 ཁྱེད་ཀྱི་སྟོབས་ཀྱིས་རྒྱ་མཚོ་ཁག་གཉིས༌བཤགས། །ཆུ་ནང་སྲིན་པོའི་མགོ་བོ་གཅོག་པར༌མཛད།།
PSA 74:14 ཁྱེད་ཀྱིས་ཆུ་སྲིན་རྣམས་ཀྱི་མགོ་བོ༌གཏུབས། །དབེན་སྟོང་གནས་པའི་མི་ལ་ཟས་སུ༌གནང༌།།
PSA 74:15 ཁྱེད་ཀྱིས་ཆུ་མིག་ཆུ་ཕྲན་ཕྱེས་པ༌དང༌། །བཞུར་རྒྱུན་གཙང་པོ་རྣམས་ནི་བསྐམས་པར༌མཛད།།
PSA 74:16 ཉིན་དང་མཚན་མོ་གཉིས་ཀ་ཁྱེད་ཀྱི༌ཡིན། །འོད་དང་ཉི་མ་ཁྱེད་ཀྱིས་བཤམས་པ༌འོ།།
PSA 74:17 ས་གཞིའི་མཐའ་མཚམས་ཐམས་ཅད་ཁྱེད་ཀྱིས༌མཛད། །དབྱར་དགུན་གཉིས་ཀ་ཁྱེད་ཀྱིས་མཛད་པ༌ཡིན།།
PSA 74:18 ཀྱེ་ཀྱེ་ཡ་ཝཱེ་དགྲ་ཡི་འཕྱ་སྨོད༌དང༌། །གླེན་པས་ཁྱེད་མཚན་སྐུར་བཏབ་དྲན་པར༌མཛོད།།
PSA 74:19 ཁྱེད་ཀྱི་ཕུག་རོན་གཅན་གཟན་ལ་མ༌སྤྲོད། །གཏན་དུ་ཁྱེད་ཀྱི་དབུལ་པོའི་སྲོག་མ༌བརྗེད།།
PSA 74:20 ས་སྟེང་མུན་ཁམས་གདུག་རྩུབ་གནས་ཀྱིས༌ཁེངས། །དེའི་ཕྱིར་ཞལ་ཆད་ཐུགས་སུ་འཛིན་པར༌འཚལ།།
PSA 74:21 བཙན་གནོན་ཐེབས་པ་སྐྱེངས་ནས་ཕྱིར་མ༌མངག །ནོར་མེད་དབུལ་པོས་ཁྱེད་མཚན་བསྟོད་པར༌ཤོག།
PSA 74:22 ཀྱེ་ཀྱེ་དཀོན་མཆོག་ཁྱེད་ཉིད་ཡར་བཞེངས༌ནས། །རང་གི་ཆེད་དུ་དག་འབུད་མཛད་པར༌ཞུ། །གླེན་པས་ཉིན་གང་སྨད་པ་དྲན་དུ༌གསོལ།།
PSA 74:23 ཁྱེད་ཀྱི་སྡང་དགྲའི་སྐད་ཅོར་ཚ་པོ༌དང༌། །དགྲ་བོའི་ཆད་མེད་འུར་སྒྲ་དྲན་པར༌མཛོད།།
PSA 75:1 ༼འཕུང་མ་འཇུག་ཅེས་པའི་དབྱངས་སྤྱད་ནས་བླངས་ཤིང་དབུ་མཛད་ལ་སྤྲད་པའི་ཨ་སབ་ཀྱི་མགུར༌མ།༽ དཀོན་མཆོག་ང་ཚོས་ཁྱེད་ལ་གཏང་རག༌འབུལ། །ཁྱེད་མཚན་ཉེ་བར་བཞུགས་པས་གཏང་རག༌འབུལ། །ཁྱེད་ཀྱི་ངོ་མཚར་མཛད་པ་མི་ཡིས༌གླེང་།།
PSA 75:2 བདག་གིས་གཏན་ལ་ཕབ་པའི་དུས་དེ༌ལ། །དྲང་གཞག་ངང་ནས་ཁྲིམས་ཐག་གཅོད་པར༌བྱ།།
PSA 75:3 ས་དང་དེ་ཡི་མི་རྣམས་འཕུང་གྱུར༌ཏོ། །ས་གཞིའི་ཀ་བ་རྣམས་ནི་ངས་བཙུགས༌སོ།།༼ སེ༌ལཱ། ༽
PSA 75:4 ང་རྒྱལ་ཅན་ལ་རང་མཐོང་མ་ཆེ༌དང༌། །ངན་པར་རྭ་དུང་བསྒྲེང་བར་མ་བྱེད༌ཅིག།
PSA 75:5 ཁྱོད་ཚོའི་རྭ་དུང་ནམ་མཁར་མ་བསྒྲེང༌ཞིག །མགོ་བོ་བཏེགས་ནས་གཏམ་གླེང་མ་བྱེད༌གསུངས།།
PSA 75:6 ཅིའི་ཕྱིར་ཞེ་ན་གོང་དུ་བཀུར་བ༌ནི། །ཤར་ནུབ་དབེན་སྟོང་གང་ནས་ཀྱང་མ༌བྱུང༌།།
PSA 75:7 དཀོན་མཆོག་གཅིག་པོས་དཔྱད་ཁྲ་གཏོང་བ༌སྟེ། །སུ་ཞིག་མར་འབེབས་ཡར་འཐེན་ཁོང་གིས༌མཁྱེན།།
PSA 75:8 ཡ་ཝཱེའི་ཕྱག་ཏུ་མཆོད་ཞལ་བསྣམས་ཡོད༌ཅིང༌། །དེའི་ནང་རྒུན་ཆང་འདྲེས་མས་གང་བ༌དང༌། །རྒུན་ཆང་དེ་ལས་ལྦུ་བ་སོབ་སོབ༌འཕྱུར། །ཁོང་གིས་དེ་ཡི་ནང་ནས་བླུགས་པར༌མཛད། །ས་གཞིའི་མི་ངན་ཀུན་གྱིས་དེའི་སྙིགས༌རོ། །ངེས་པར་བཏུང་ཞིང་ཚར་བའི་བར་དུ༌འཐུང༌།།
PSA 75:9 འོན་ཀྱང་བདག་གིས་རྟག་ཏུ་ཁྱབ་བསྒྲགས༌བྱ། །ཡ་ཀོབ་དཀོན་མཆོག་ཁོང་ལ་བསྟོད་དབྱངས༌འབུལ།།
PSA 75:10 ངན་པའི་རྭ་དུང་ཐམས་ཅད་བདག་གིས༌གཅོག །དྲང་བདེན་རྣམས་ཀྱི་རྭ་དུང་འདེགས་ངེས༌ཡིན།།
PSA 76:1 ༼རྒྱུད་ལྡན་གྱི་རོལ་ཆས་སྤྱད་ནས་དབུ་མཛད་ལ་སྤྲད་པའི་ཨ་སབ་ཀྱི་མགུར༌མ།༽ ཡ་ཧུ་དཱ་རུ་དཀོན་མཆོག་ཀུན་གྱིས༌ཤེས། །ཡེས་ར་ཨེལ་ནང་ཁོང་ཉིད་སྙན་གྲགས༌ཆེ།།
PSA 76:2 སཱ་ལེམ་ཡུལ་དུ་ཁོང་གི་གུར་མཆོག༌ཡོད། །ཛ་ཡན་ལ་ནི་ཁོང་གི་བཞུགས་གནས༌མངའ།།
PSA 76:3 དེ་རུ་ཁོང་གིས་གཞུ་ཡི་མེ་མདའ༌དང༌། །ཕུབ་དང་རལ་གྲི་དམག་ཆས་རྣམས་བཅག༌གོ།༼ སེ༌ལཱ། ༽
PSA 76:4 ཁྱེད་ཉིད་གཟི་དཔལ་ལྡན་ཞིང་རི་རྣམས༌ཏེ། །རྔོན་ཤ་ མོད་པོ་རྣམས་ལས་བརྗིད་ཉམས༌ཆེ།།
PSA 76:5 དཔའ་སེམས་ཅན་ཀུན་བཅོམས་པས་གཏན་དུ༌གཉིད། །དཔའ་བོ་སུས་ཀྱང་ལག་པ་འདེགས་མ༌ནུས།།
PSA 76:6 ཀྱེ་ཀྱེ་ཡ་ཀོབ་དཀོན་མཆོག་ཁྱེད་ཉིད༌ཀྱི། །བཀའ་བཀྱོན་གྱིས་ནི་རྟ་དང་ཤིང་རྟ༌གཉིས། །སྟུག་པོ་གཉིད་ལ་ཡུར་བར་བྱས་པ༌དང༌།།
PSA 76:7 འཇིགས་པར་འོས་པ་ཁྱེད་ཉིད་གཅིག་པུ་ཡིན། །ཁྱེད་ཐུགས་ཁྲོ་དུས་ཁྱེད་དྲུང་སུ་འགྲེང༌ནུས།།
PSA 76:8 ས་གཞིའི་ཉམ་ཆུང་ཐམས་ཅད་སྐྱོབ་པའི༌ཕྱིར། །ཁྲིམས་ཐག་གཅོད་དུ་དཀོན་མཆོག་བཞེངས་པའི༌དུས།།
PSA 76:9 ཁྱེད་ཀྱིས་གནམ་ནས་དཔྱད་ཁྲ་ཁྱབ་བསྒྲགས༌མཛད། །ས་གཞི་འཇིགས་ཏེ་ཁ་ཁུ་སིམ་པོར༌གྱུར།།༼ སེ༌ལཱ། ༽
PSA 76:10 ཁོང་ཁྲོ་མི་ཡིས་ཁྱེད་ལ་བསྟོད་པ༌འབུལ། །ཐུགས་ཁྲོ་ལྷག་མ་ཁྱེད་ཀྱིས་འགོག་པར༌འགྱུར།།
PSA 76:11 རང་གི་དཀོན་མཆོག་ཡ་ཝཱེར་དམ་བཅས༌ནས། །བསྒྲུབ་པར་གྱིས་ཤིག་ཁོང་གི་འཁོར་ཀུན༌གྱིས། །འཇིགས་འོས་ཁོང་ལ་ཕྱག་རྟེན་འབུལ་འོས༌སོ།།
PSA 76:12 ཁོང་གིས་མི་ཆེན་རྣམས་ཀྱི་ང་རྒྱལ༌བཅག །ས་གཞིའི་རྒྱལ་པོར་ཁོང་ཉིད་འཇིགས་རུང༌ཡིན།།
PSA 77:1 ༼ཡེ་དུ་ཐུན་གྱི་ལུགས་སུ་དབུ་མཛད་ལ་སྤྲད་པའི་ཨ་སབ་ཀྱི་མགུར༌མ།༽ དཀོན་མཆོག་དྲུང་དུ་སྐད་གསང་མཐོན་པོས༌འབོད། །དཀོན་མཆོག་བོས་པས་ཁོང་གིས་གསན་པར༌འགྱུར།།
PSA 77:2 དཀའ་སྡུག་ཉིན་མོར་ང་ཡིས་ཡ་ཝཱེ༌བཙལ། །མཚན་གྱི་དུས་སུ་ལག་པ་ཡར་བཏེགས༌ནས། །རྒྱུན་ཆད་མེད་པར་ཁོང་ལ་གསོལ་བ༌བཏབ། །བདག་གི་སེམས་ཀྱིས་སེམས་གསོ་མ་འདོད༌དོ།།
PSA 77:3 ང་ཡིས་དཀོན་མཆོག་དྲན་ཞིང་འཁུན་སྒྲ༌ཕྱུང༌། །འོ་དོད་འབོད་དུས་བདག་སེམས་རྒུད་པར༌གྱུར།།༼ སེ༌ལཱ། ༽
PSA 77:4 ཁྱེད་ཀྱིས་བདག་གི་མིག་ལྕིབས་ཕྱེ་བར་མཛད། །བདག་སེམས་འཁྲུགས་ནས་གཏམ་ཡང་སྨྲ་མ༌ནུས།།
PSA 77:5 སྔར་གྱི་ཉིན་མོ་རྣམས་དང་གནའ་སྔ༌མོའི། །ལོ་ཟླ་རྣམས་ལ་ང་ཡིས་བསམ་བློ༌བཏང༌།།
PSA 77:6 རང་གི་མཚན་མོའི་མགུར་མ་དྲན་པ༌དང༌། །སྙིང་དུ་བསྒོམས་ཤིང་སེམས་ཀྱིས་ཞིབ་དཔྱོད༌བྱས།།
PSA 77:7 གཙོ་བོས་ང་རང་རྟག་ཏུ་སྤངས་ནས༌ནི། །ཕྱིན་ཆད་ནམ་ཡང་ཐུགས་རྗེ་མི་མཛད༌དམ།།
PSA 77:8 ཁོང་གི་བྱམས་བརྩེ་གཏན་དུ་ཡལ་བ༌དང༌། །ཁོང་གི་ཞལ་བཞེས་དུས་རྒྱུན་མི་འགྲུབ༌བམ།།
PSA 77:9 དཀོན་མཆོག་ཉིད་ཀྱིས་སྙིང་རྗེ་བརྗེད་གྱུར༌རམ། །ཐུགས་ཁྲོས་ཁོང་གི་བྱམས་བརྩེའི་བར་བཅད༌དམ།།༼ སེ༌ལཱ། ༽
PSA 77:10 བླ་ན་མེད་པ་ཁོང་གི་ཕྱག༌གཡས་པས། །ང་ལ་སྔར་བཞིན་འཕྲིན་ལས་མི་མཛད༌པ། །འདི་ནི་བདག་གི་སྐྱོ་གདུང་ཡིན་པར༌བསམས།།
PSA 77:11 བདག་གིས་ཡ་ཝཱེའི་མཛད་པ་རྣམས་བརྗོད༌ཅིང༌། །ཁྱེད་ཀྱི་གནའ་བོའི་ངོ་མཚར་དོན་རྣམས༌དྲན།།
PSA 77:12 ཁྱེད་ཀྱི་འཕྲིན་ལས་ཀུན་ནི་བསྒོམ་བྱ༌ཞིང༌། །ཁྱེད་ཀྱི་མཛད་པ་རྣམས་ལ་བསམ་བློ༌གཏོང༌།།
PSA 77:13 དཀོན་མཆོག་ཁྱེད་ཀྱི་ཐབས་ལམ་རྣམ་དག༌ཡིན། །དཀོན་མཆོག་ལྟ་བུ་ཆེན་པོའི་ལྷ་སུ༌ཡོད།།
PSA 77:14 ངོ་མཚར་མཛད་མཁན་དཀོན་མཆོག་ཁྱེད་ལགས༌ཏེ། །མི་སྡེའི་ནང་དུ་ཁྱེད་ཀྱིས་སྟོབས་ཀྱང༌བསྟན།།
PSA 77:15 ཁྱེད་ཀྱིས་ཕྱག་དཔུང་བརྐྱངས་ནས་མི་རྣམས༌ཏེ། །ཡ་ཀོབ་དང་ནི་ཡོ་སེབ་བུ་རྣམས༌བསྐྱབས།།༼ སེ༌ལཱ། ༽
PSA 77:16 ཀྱེ་ཀྱེ་དཀོན་མཆོག་ཆུ་རྣམས་ཁྱེད་མཇལ༌ཞིང༌། །མཇལ་བ་ཙམ་གྱིས་ཤིན་ཏུ་འཚབ་པ༌དང༌། །མཚོ་འོག་རྣམས་ཀྱང་ཐམས་ཅད་འདར་བ༌འོ།།
PSA 77:17 སྤྲིན་ཕུང་གིས་ནི་ཆར་ཆུ་བྱོ་བ་དང༌། །ནམ་མཁའི་དབྱིངས་ཀྱིས་སྐད་སྒྲ་འུར་འུར༌བསྒྲགས། །ཁྱེད་ཀྱི་ཕྱག་མདའ་རྣམས་ཀྱང་ཕྱོགས་བཞིར༌འཁྱུགས།།
PSA 77:18 རླུང་འཁོར་འཚུབ་མའི་ནང་དུ་ཐོག་སྐད༌གྲགས། །གློག་དམར་འཁྱུགས་ནས་འཇིག་རྟེན་འོད་ལ༌ཁྱེར། །ས་གཞི་འདར་ཞིང་འགུལ་ནས་ཡོམ་ཡོམ༌བྱས།།
PSA 77:19 ཁྱེད་ཀྱི་ཕེབས་ལམ་རྒྱ་མཚོའི་ནང་དུ༌མཆིས། །ཆུ་ཆེན་རྣམས་སུ་གཤེགས་པའི་ལམ་ཡང༌ཡོད། །ཁྱེད་ཀྱི་ཞབས་རྗེས་མཐོང་མཁན་སུ་ཡང༌མེད།།
PSA 77:20 མོ་ཤེ་དང་ནི་ཨ་རོན་ལག་པ༌མཉམ། །ཁྱེད་ཀྱི་འབངས་མི་ལུག་གི་ཁྱུ་ལྟར༌ཁྲིད།།
PSA 78:1 ༼ཨ་སབ་ཀྱི་བསླབ་བྱའི་མགུར༌མ།༽ ཀྱེ་ངའི་མི་རྣམས་ང་ཡི་བསླབ་བྱར༌ཉོན། །བདག་གི་སྨྲ་སྒོའི་གཏམ་ལ་རྣ་བ༌གཏོད།།
PSA 78:2 དཔེ་དང་བཅས་ཏེ་བདག་གིས་ངག་ཕྱེ་ཞིང༌། །གནའ་བོའི་གབ་ཚིག་རྣམས་ནི་ང་ཡིས༌བརྗོད།།
PSA 78:3 དེ་རྣམས་ང་ཚོས་ཐོས་ཤིང་ཤེས་པ༌སྟེ། །མེས་པོ་རྣམས་ཀྱིས་ང་ཚོར་སྨྲས་པ༌ལགས།།
PSA 78:4 དེ་ཚོའི་བུ་རྒྱུད་རྣམས་ལ་མི་གསང༌ཞིང༌། །ཡ་ཝཱེའི་བསྟོད་པར་འོས་པའི་མཛད་པ༌དང༌། །མཐུ་སྟོབས་དང་ནི་ངོ་མཚར་འཕྲིན་ལས༌རྣམས། །མི་རབས་རྗེས་མ་དག་ལ་འཆད་པར༌བྱ།།
PSA 78:5 ཁོང་གིས་ཡ་ཀོབ་ལ་ནི་དཔང་ཡིག་བཙུགས། །ཡེས་ར་ཨེལ་ནང་བཀའ་ཁྲིམས་གཏན་ལ༌ཕབ། །དེའི་སྐོར་ཁོང་གིས་རང་ཅག་ཕ་མེས༌ལ། །བུ་རྒྱུད་རྣམས་ལ་སློབ་པའི་བཀའ་ཡང༌གནང༌།།
PSA 78:6 དེ་ནི་སྐྱེ་བར་ངེས་པའི་མི་རབས༌ཏེ། །བུ་རྒྱུད་རྣམས་ཀྱིས་ཤེས་ནས་ཡར་ལངས༌ཏེ། །བུ་ཕྲུག་རྣམས་ལ་དེ་རྣམས་འཆད་ཕྱིར༌དང༌།།
PSA 78:7 དེ་ཚོས་དཀོན་མཆོག་ལ་ནི་རེ་བ༌བསྐྱེད། །དཀོན་མཆོག་མཛད་པ་རྣམས་ནི་མི་བརྗེད༌ཅིང༌། །ཁོང་གི་བཀའ་རྒྱ་རྣམས་ཀྱང་བསྲུང་བ༌དང༌།།
PSA 78:8 དཀོན་མཆོག་དྲུང་དུ་དད་པ་མི་བརྟན༌པའི། །ཕ་མེས་ལྟར་དུ་གཤིས་གྱོང་ངོ་ལོག༌ཅིང༌། །དཀོན་མཆོག་ཉིད་ལ་བློ་གཏད་མི་བཅོལ༌བའི། །མི་རབས་ཤིག་ལ་འགྱུར་བར་མི་བྱ༌ཕྱིར།།
PSA 78:9 ཨེ་ཕཱར་ཡིམ་གྱི་བུ་རྒྱུད་དམག་ཆས༌སྤྲས། །གཞུ་མོ་ཁུར་ཡང་འཐབ་མོའི་ཉིན་སླེབས༌དུས། །ཁ་ཕྱིར་འཁོར་ནས་ཕྱི་བསྣུར་རྒྱག་པ༌ཡིན།།
PSA 78:10 དེ་ཚོས་དཀོན་མཆོག་ཞལ་ཆད་མ་བསྲུངས༌ཏེ། །ཁོང་གི་བཀའ་ཁྲིམས་ཀྱང་ནི་བསྲུང་བ༌མེད།།
PSA 78:11 ཁོང་གིས་དེ་ཚོར་བསྟན་པའི་འཕྲིན་ལས༌དང༌། །མཛད་པ་ངོ་མཚར་ཅན་རྣམས་བརྗེད་གྱུར༌ཏོ།།
PSA 78:12 ཨེ་ཅིབ་ཡུལ་དང་ཚོ་ཨན་མངའ་ཁོངས༌སུ། །མེས་པོའི་མདུན་དུ་ངོ་མཚར་ཅན་རྣམས༌མཛད།།
PSA 78:13 རྒྱ་མཚོ་གཤགས་ནས་དེ་རྣམས་ཕ་རོལ༌དྲངས། །ཆུ་རྣམས་རྩིག་པ་ལྟར་དུ་ཀྲོང་ངེར༌བསླངས།།
PSA 78:14 ཁོང་གིས་དེ་རྣམས་ཉིན་དཀར་སྤྲིན་པ༌དང༌། །མཚན་གང་མེ་འོད་ཀྱིས་ནི་ལམ་སྟོན༌མཛད།།
PSA 78:15 དབེན་སྟོང་གནས་སུ་བྲག་རྡོ་གཤགས་མཛད༌ཅིང༌། །མཚོ་ལས་ཐོན་འདྲའི་ཆུ་མང་དེ་ཚོར༌གནང༌།།
PSA 78:16 ཁོང་གིས་བྲག་རྡོའི་གསེབ་ནས་ཆུ་བོ༌བཏོན། །ཆུ་རྣམས་གཙང་པོ་ནང་ལྟར་བཞུར་བར༌མཛད།།
PSA 78:17 འོན་ཀྱང་དེ་ཚོས་སྔར་བཞིན་ཁོང་ཉིད༌དང༌། །འགལ་བའི་སྡིག་པ་བྱེད་ཀྱིན་དབེན་སྟོང༌དུ། །བླ་ན་མེད་པ་ཉིད་ལ་གྱེན་ལོག༌བྱས།།
PSA 78:18 དེ་ཚོའི་སེམས་སུ་དཀོན་མཆོག་ཐུགས་ནི༌སད། །རང་འདོད་བཞིན་དུ་ཁ་ཟས་གནང་བར༌ཞུས།།
PSA 78:19 དཀོན་མཆོག་ཁོང་ལ་སྐུར་བ་བཏབ་ནས༌ནི། །དབེན་སྟོང་ཡུལ་དུ་གསོལ་ལྕོག་བཤམ་ནུས༌སམ།།
PSA 78:20 ལྟོས་ཤིག་ཁོང་གིས་བྲག་ལ་བརྡུངས་པ༌དང༌། །ཆུ་རྣམས་ཐོན་ཏེ་ཆུ་རྒྱུན་འབབ་པར༌གྱུར། །ཁོང་གིས་ད་དུང་བག་ལེབ་གནང་ནུས༌སམ། །འབངས་ལ་ཤ་ནི་གནང་ངམ་ཞེས་སྨྲས༌པར།།
PSA 78:21 ཡ་ཝཱེས་གསན་ནས་ཐུགས་ནི་རབ་ཁྲོས༌ཏེ། །ཁོང་གི་མེ་དཔུང་ཡ་ཀོབ་ཕྱོགས་སུ༌འབར། །ཁོང་གི་ཐུགས་ཁྲོ་ཡེས་ར་ཨེལ་སྟེང༌བབས།།
PSA 78:22 རྒྱུ་མཚན་དཀོན་མཆོག་ཉིད་ལ་མ་དད༌ཅིང༌། །ཁོང་གི་སྐྱབས་ལ་བློ་ཡང་མ་གཏད༌དོ།།
PSA 78:23 འོན་ཀྱང་ཁོང་གིས་གནམ་ལ་བཀའ་བསྩལ༌ཅིང༌། །ནམ་མཁའི་སྒོ་རྣམས་ཕྱེ་བར་མཛད་པ༌དང༌།།
PSA 78:24 བཟའ་ཕྱིར་དེ་ཚོར་མཱན་ན་ཆར་བཞིན༌ཕབ། །ནམ་མཁའི་འབྲུ་རྣམས་དེ་ཚོར་གནང་བ་ཡིན།།
PSA 78:25 མི་ཡིས་ཕོ་ཉ་རྣམས་ཀྱི་བག་ལེབ༌ཟོས། །ཁ་ཟས་གནང་ནས་ཁོ་རྣམས་འགྲང་བར༌མཛད།།
PSA 78:26 ཁོང་གིས་ནམ་མཁར་ཤར་རླུང་གཡུག་ཏུ༌བཅུག །ཁོང་གི་སྟོབས་ཀྱིས་ལྷོ་རླུང་འདྲེན་པར༌མཛད།།
PSA 78:27 ཐང་གི་ས་རྡུལ་བཞིན་དུ་ཤ་ཕབ༌ཅིང༌། །རྒྱ་མཚོའི་བྱེ་མ་ལྟ་བུར་འདབ་ཆགས༌ཕབ།།
PSA 78:28 ཁོང་གིས་དེ་རྣམས་སྒར་གྱི་ནང་རོལ༌དང༌། །གུར་གྱི་ཕྱོགས་བཞིར་ཕབ་པར་མཛད་པ༌ལགས།།
PSA 78:29 དེ་ལྟར་དེ་ཚོས་ཟོས་ནས་ཤིན་ཏུ༌འགྲངས། །དེ་ཚོའི་འདོད་པ་ཁོང་གིས་བསྐངས་པ༌ཡིན།།
PSA 78:30 དེ་ཚོའི་འདོད་པ་མ་གང་སྔོན་རོལ༌ལ། །ཁ་རུ་ད་དུང་ཁ་ཟས་ཡོད་པའི༌ཚེ།།
PSA 78:31 དཀོན་མཆོག་དེ་ཚོར་རབ་ཏུ་ཐུགས་ཁྲོས༌ནས། །དེ་ཚོའི་ཤེད་ཤུགས་ཅན་རྣམས་བསད་པ༌དང༌། །ཡེས་ར་ཨེལ་གྱི་ན་གཞོན་རྣམས་བརྡབས༌སོ།།
PSA 78:32 དེ་ཀུན་སྟེང་དུ་སྡིག་པ་བྱེད་ཀྱིན༌དུ། །ཁོང་གི་ངོ་མཚར་མཛད་པར་མ་དད༌དོ།།
PSA 78:33 དེའི་ཕྱིར་དེ་རྣམས་མི་ཚེ་དོན་མེད༌དང༌། །ལོ་རྣམས་འཇིགས་སྐྲག་ནང་དུ་རྫོགས་པར༌མཛད།།
PSA 78:34 ཁོང་གིས་གསོད་དུས་དེ་ཚོས་ཁོང་འཚོལ༌ཞིང༌། །བློ་ཁ་ཕྱོགས་ཏེ་སེམས་ནས་དཀོན་མཆོག༌བཙལ།།
PSA 78:35 ཁོང་ཉིད་རང་གི་བྲག་རྡོ་ཡིན་པ༌དང༌། །བླ་མེད་དཀོན་མཆོག་སྐྱོབ་མཁན་ཡིན་པ༌དྲན།།
PSA 78:36 འོན་ཀྱང་ཁ་ནས་ཁོང་ལ་ངོ་བསྟོད༌བྱེད། །ལྕེ་ཡིས་ཁོང་ལ་རྫུན་གཏམ་ཞུ་བ༌སྟེ།།
PSA 78:37 དེ་རྣམས་དཀོན་མཆོག་ལ་ནི་སེམས་མི༌བརྟན། །ཁོང་གི་ཞལ་ཆད་ལ་ཡང་བློ་མི༌དཀར།།
PSA 78:38 འོན་ཀྱང་ཁོང་ནི་སྙིང་རྗེ་ཅན་ལགས༌པས། །སྡིག་ཉེས་བསལ་ཞིང་ཁོ་རྣམས་ཚར་མ༌བཅད། །ལན་མང་རང་གི་ཐུགས་ཁྲོ་བཟོད་བསྲན༌གྱིས། །ཉིད་ཀྱི་ཐུགས་ཁྲོ་ཡོངས་རྫོགས་ཐོན་མ༌བཅུག།
PSA 78:39 རླུང་ནི་གཡུག་ཅིང་ཕྱིར་ལོག་མེད་པ༌ལྟར། །དེ་རྣམས་ལུས་ཅན་འབའ་ཞིག་ཡིན་པ༌དྲན།།
PSA 78:40 རེབ་ཐེངས་ཅི་ཙམ་དེ་ཚོས་དབེན་སྟོང༌དུ། །ཁོང་ལ་གྱེན་ལོག་བྱས་ཤིང་ཐང་སྟོང༌དུ། །ཁོང་གི་ཐུགས་དགོངས་ག་ཙམ་དཀྲུགས་པ༌ཡིན།།
PSA 78:41 དེ་ཚོས་དཀོན་མཆོག་ཐུགས་ནི་ཡང་ཡང༌སད། །ཡེས་ར་ཨེལ་གྱི་དམ་པར་ཐུགས་ཁྲོ༌བསླངས།།
PSA 78:42 ཁོང་གི་ནུས་མཐུ་དྲན་པར་མ་གྱུར༌ཏེ། །ཁོ་རྣམས་དགྲ་ལས་ཐར་བར་མཛད་པའི༌ཉིན།།
PSA 78:43 ཁོང་གིས་རང་གི་གྲུབ་རྟགས་ཨེ་ཅིབ༌དང༌། །ཚོ་ཨན་ཐང་དུ་ངོ་མཚར་དོན་རྣམས༌མཛད།།
PSA 78:44 དེ་ཚོའི་གཙང་པོ་རྣམས་ནི་ཁྲག་ཏུ༌བསྒྱུར། །ཆུ་བོ་རྣམས་ལས་དེ་ཚོས་འཐུང་མ༌ནུས།།
PSA 78:45 སྦྲང་ནག་དེ་ཚོར་བཏང་ནས་ཁོ་རྣམས༌ཟོས། །སྦལ་བ་བཏང་ནས་དེ་དག་རྩ་ནས༌བརླགས།།
PSA 78:46 དེ་ཚོའི་སྟོན་ཐོག་ཨ་ཚག་ཚག་པར༌གནང༌། །དེ་ཚོའི་འཐོབ་བྱ་ཆ་ག་འབུ་ལ༌སྤྲད།།
PSA 78:47 དེ་ཚོའི་རྒུན་ཤིང་སེར་བས་བརྡུངས་པ༌དང༌། །འོ་སེ་ཤིང་རྣམས་སད་ཀྱིས་འཇོམས་པར༌མཛད།།
PSA 78:48 ཁོང་གིས་དེ་ཚོའི་ཕྱུགས་རྣམས་སེར་བ༌དང༌། །ལུག་གི་ཁྱུ་རྣམས་གློག་དམར་དབང་དུ༌བཏང༌།།
PSA 78:49 ཁོང་གིས་ཐུགས་ཁྲོ་ཆེན་པོ་གཏུམ་དྲག༌དང༌། །ཞེ་སྡང་དང་ནི་སྡུག་བསྔལ་ལ་སོགས༌པ། །གནོད་པའི་ཕོ་ཉའི་དཔུང་དུ་ཕབ་པར༌མཛད།།
PSA 78:50 ཁོང་གི་ཐུགས་ཁྲོའི་ཕྱིར་དུ་ལམ་ཡང༌མཛད། །དེ་རྣམས་འཆི་བ་ལས་ཀྱང་མ་བསྐྱབས༌པར། །དེ་ཚོའི་སྲོག་ནི་ནད་ཡམས་ལ་གཏད༌དོ།།
PSA 78:51 ཨེ་ཅིབ་ཡུལ་དུ་སྐྱེས་འགོ་ཐམས་ཅད༌བསད། །ཧཱམ་ གྱི་གུར་རྣམས་ནང་དུ་དེ་དག༌གི །སྟོབས་ཀྱི་ཐོག་མ་ ཡིན་པ་གསོད་པར༌མཛད།།
PSA 78:52 འོན་ཀྱང་ཉིད་ཀྱི་མི་རྣམས་ལུག་ལྟར༌ཁྲིད། །དབེན་སྟོང་ཡུལ་དུ་ཕྱུགས་ཁྱུ་བཞིན་དུ༌ཁྲིད།།
PSA 78:53 བདེ་བར་ཁྲིད་པས་དེ་དག་མ་འཇིགས༌ཤིང༌། །དགྲ་བོ་རྣམས་ནི་རྒྱ་མཚོས་བསྣུབས་པར༌མཛད།།
PSA 78:54 ཁོང་གིས་དེ་རྣམས་ཁྲིད་ནས་ཁོང་ཉིད༌ཀྱི། །དམ་པའི་གནས་ཀྱི་ས་མཚམས་དག་ལ༌སླེབས། །ཕྱག་གཡས་ཀྱིས་ནི་བླངས་པའི་རི་ཁུལ༌ཡིན།།
PSA 78:55 དེ་དག་མདུན་ནས་ཕྱི་ཕྱོགས་མི་རྣམས༌བསྐྲད། །ཐག་པས་འཇལ་ནས་ས་སྐལ་དེ་ཚོར༌བགོས། །ཡེས་ར་ཨེལ་གྱི་ཚོ་པ་ཁག་གི༌མི། །རང་རང་གུར་ནང་གནས་སུ་བཅུག་མོད༌ཀྱང༌།།
PSA 78:56 དེ་ཚོས་སྔར་བཞིན་དཀོན་མཆོག་ཐུགས་སད༌ནས། །བླ་ན་མེད་པ་ཁོང་ལ་གྱེན་ལོག༌བྱས། །ཁོང་གི་སྒྲིག་ཁྲིམས་ཡང་ནི་མ་བརྩིས༌པར།།
PSA 78:57 ཕྱི་བསྣུར་བྱས་ནས་གཡོ་སྒྱུ་སྤེལ་བ༌སྟེ། །རང་གི་ཕ་མེས་རྣམས་དང་འདྲ་བར༌བྱས། །གཞུ་མོ་སྐྱོན་ཅན་བཞིན་དུ་དེ་རྣམས༌གྱུར།།
PSA 78:58 ཁོ་ཚོའི་མཐོ་གླིང་རྣམས་དང་བརྐོས་སྐུ༌ཡིས། །ཁོང་ལ་ཐུགས་ཁྲོ་བསླངས་ཤིང་ཕྲག་དོག༌བསྐྱེད།།
PSA 78:59 དཀོན་མཆོག་ཉིད་ཀྱིས་གསན་དུས་ཐུགས་ཁྲོས༌ཤིང༌། །ཡེས་ར་ཨེལ་ནི་གཞི་ནས་དོར་བར༌མཛད།།
PSA 78:60 དེ་ལྟར་མིའི་ཁྲོད་ཕུབ་པའི་གཟིམ་གུར༌རམ། །ཞི་ལོའི་གདན་ས་ཁོང་གིས་སྤངས་མཛད༌དེ།།
PSA 78:61 ཁོང་གིས་ཉིད་ཀྱི་མཐུ་སྟོབས་མཚོན་པ༌ཡི། །ཞལ་ཆད་ཤུར་སྒམ་བཙོན་པར་བཏང་བ༌དང༌། །ཉིད་ཀྱི་གཟི་དཔལ་དགྲ་བོའི་ལག་ཏུ༌གཏད།།
PSA 78:62 ཁོང་གི་འབངས་མི་རལ་གྲིར་གཏད་པ༌དང༌། །ཉིད་ཀྱི་ནོར་སྐལ་ལ་ཡང་ཐུགས་ཁྲོས༌སོ།།
PSA 78:63 དེ་ཚོའི་གཞོན་ནུ་རྣམས་ནི་མེས་བསྲེགས་ཤིང༌། །ན་ཆུང་རྣམས་ལ་སྟོན་མོའི་མགུར་ཡང༌མེད།།
PSA 78:64 མཆོད་དཔོན་རྣམས་ནི་རལ་གྲིས་བསད་ན༌ཡང༌། །ཡུགས་མོ་རྣམས་ཀྱིས་མྱ་ངན་མ་བྱས༌སོ།།
PSA 78:65 དེ་ནས་གཙོ་བོ་མནལ་ལས་བཞེངས་འདྲ༌འམ། །རྒུན་ཆང་དབང་གིས་དཔའ་བོས་ཀི་སྒྲོག༌བཞིན།།
PSA 78:66 དགྲ་བོ་རྣམས་ལ་བརྡུངས་ནས་བཟློགས་པ༌དང༌། །དེ་རྣམས་གཏན་གྱི་ངོ་ཚའི་ནང་དུ༌བཅུག།
PSA 78:67 ཡོ་སེབ་གུར་རྣམས་ཁོང་གིས་བསྐྱུར་བར༌བྱས། །ཨེ་ཕཱར་ཡིམ་གྱི་ཚོ་པ་མ་འདེམ་པར།།
PSA 78:68 གཅེས་པར་འཛིན་པའི་ཛ་ཡན་རི་བོ༌སྟེ། །ཡ་ཧུ་དཱ་ཡི་ཚོ་པ་འདེམ་པར༌མཛད།།
PSA 78:69 རྟག་ཏུ་གནས་པར་བཀོད་པའི་ས་གཞི༌ལྟར། །རི་རྣམས་འདྲ་བར་གནས་ཀྱི་མཆོག་བཞེངས༌སོ།།
PSA 78:70 ཉིད་ཀྱི་ཞབས་ཕྱི་དཱ་བིད་འདེམ་པར༌མཛད། །ལུག་ར་དག་ལས་དེ་ལ་ཞལ་འབོད༌གནང༌།།
PSA 78:71 ཉིད་ཀྱི་འབངས་མི་ལགས་པའི་ཡ་ཀོབ༌དང༌། །ནོར་སྐལ་ཡིན་པའི་ཡེས་ར་ཨེལ་འཚོ༌ཕྱིར། །མ་མོ་འོ་མ་ཅན་གྱི་རྗེས་ནས༌བླངས།།
PSA 78:72 སེམས་རྒྱུད་དྲང་པོས་དེ་རྣམས་འཚོས་པ༌དང༌། །ལག་གི་རྩལ་གྱིས་དེ་ཚོར་ཁྲིད་སྟོན༌བྱས།།
PSA 79:1 ༼ཨ་སབ་ཀྱི་མགུར༌མ།༽ ཀྱེ་ཀྱེ་དཀོན་མཆོག་ཕྱི་ཕྱོགས་མི་རྣམས༌ནི། །ཁྱེད་ཀྱི་ཡུལ་དུ་བཙན་འཛུལ་བྱས་པ༌དང༌། །ཉིད་ཀྱི་མཆོད་ཁང་དམ་པ་བཙོག་པར༌བྱས། །ཡེ་རུ་སཱ་ལེམ་ཞིག་རོར་བཏང་བ༌ཡིན།།
PSA 79:2 ཁྱེད་ཀྱི་ཞབས་ཕྱི་རྣམས་ཀྱི་བེམ་པོ་ནི། །ནམ་མཁའི་བྱ་ཡི་ཟས་སུ་གཏད་པ༌དང༌། །ཁྱེད་ལ་དད་གུས་ལྡན་པ་རྣམས་ཀྱི༌ཤ །ཐང་གི་གཅན་གཟན་རྣམས་ལ་བཏང་བ༌འོ།།
PSA 79:3 ཡེ་རུ་སཱ་ལེམ་ཡུལ་གྱི་ཕྱོགས་བཞི༌རུ། །དེ་ཚོའི་ཁྲག་ནི་ཆུ་ལྟར་ཕོས་པ༌དང༌། །བེམ་པོ་སྐུང་མཁན་སུ་ཡང་མེད་པར༌ལུས།།
PSA 79:4 ངེད་རྣམས་ཁྱིམ་མཚེས་དག་གི་སྨད་ར༌དང༌། །མི་རྣམས་འཕྱ་དམོད་ཁྲེལ་དགོད་བྱེད་སར༌གྱུར།།
PSA 79:5 ཀྱེ་ཀྱེ་ཡ་ཝཱེ་འདི་བཞིན་ག་དུས༌བར། །ཁྱེད་ཉིད་ཇི་སྲིད་བར་དུ་ཐུགས༌ཁྲོ་འམ། །ཁྱེད་ཀྱི་ཕྲག་དོག་མེ་ལྟར་འབར་ཡོང༌ངམ།།
PSA 79:6 ཁྱེད་ལ་རྒྱུས་མེད་ཡིན་པའི་ཕྱི་ཕྱོགས༌དང༌། །ཁྱེད་ཀྱི་མཚན་ལ་ཞུ་བ་མི་འབུལ༌བའི། །རྒྱལ་ཁམས་རྣམས་ལ་ཁྱེད་ཉིད་ཁྲོ་བར༌མཛོད།།
PSA 79:7 རྒྱུ་མཚན་དེ་ཚོས་ཡ་ཀོབ་ཁྱུར་མིད༌བཏང༌། །དེ་ཡི་ཁྱིམ་གཞིས་རྩད་ནས་བརླགས་པས༌སོ།།
PSA 79:8 ངེད་ཅག་ཕ་མེས་སྡིག་ཉེས་མི་དྲན༌རོགས། །ངེད་རྣམས་འུ་ཐུག་གནས་སུ་ལྷུང་བས༌ན། །ཁྱེད་ཀྱིས་མགྱོགས་པོར་སྙིང་རྗེས་གཟིགས་པར༌མཛོད།།
PSA 79:9 ཀྱེ་ཀྱེ་ང་ཚོའི་སྲོག་སྐྱོབ་དཀོན་མཆོག༌ལགས། །ཁྱེད་མཚན་དཔལ་གྱི་ཕྱིར་དུ་སྐྱབས་མཛོད༌ཅིག །ཉིད་ཀྱི་མཚན་ཕྱིར་ངེད་རྣམས་ཐར་བར༌མཛོད། །ང་ཚོའི་སྡིག་པ་རྣམས་ཀྱང་བསལ་དུ༌གསོལ།།
PSA 79:10 ཁོ་ཚོའི་དཀོན་མཆོག་གང་དུ་བཞུགས་ཡོད༌ཅེས། །ཕྱི་ཕྱོགས་མི་ལ་ཟེར་དུ་འཇུག་དོན༌ཅི། །ཁྱེད་ཀྱི་ཞབས་ཕྱི་རྣམས་ཀྱི་ཁྲག་ཕོས༌པའི། །ཤ་འཁོན་ཁྱེད་ཀྱིས་ལེན་པ་མི་རྣམས༌ལ། །ང་ཚོའི་མིག་མདུན་ཤེས་སུ་འཇུག་ཏུ༌གསོལ།།
PSA 79:11 བཙོན་པའི་འཁུན་སྒྲ་ཁྱེད་དྲུང་བསླེབ་པར༌ཤོག །འཆི་ཁར་ཡོད་པ་ཁྱེད་ཀྱི་མཐུ་ཡིས༌སྐྱོབས།།
PSA 79:12 ཀྱེ་ཀྱེ་གཙོ་བོ་ཁྱིམ་མཚེས་འཕྱ་སྨོད༌ཚིག །དེ་ཚོའི་སྟེང་ལ་ལྡབ་བདུན་འབབ་པར༌མཛོད།།
PSA 79:13 ངེད་རྣམས་ཁྱེད་ཀྱི་མི་དང་རྩྭ་རའི༌ལུག །ཇི་སྲིད་བར་དུ་ཁྱེད་ལ་གཏང་རག༌འབུལ། །ཁྱེད་ཀྱི་བསྟོད་པ་མི་རབས་ཀུན་ལ༌སྟོན།།
PSA 80:1 ༼མེ་ཏོག་ཀུ་མུད་ཀྱི་དཔང་པོ་ཞེས་པའི་དབྱངས་ནང་དབུ་མཛད་ལ་སྤྲད་པའི་ཨ་སབ་ཀྱི་མགུར༌མ།༽ ཀྱེ་ཀྱེ་ཡེས་ར་ཨེལ་གྱི་རྫི་བོ༌དང༌། །ཡོ་སེབ་ལུག་ཁྱུ་བཞིན་དུ་ཁྲིད་མཁན༌ལགས། །ཁྱེད་ཀྱིས་སྙན་དུ་གསོལ་བར་གསན་རོགས༌གནང༌། །ཀྱེ་ཀྱེ་ཀེ་རུབ་སྟེང་དུ་བཞུགས་མཁན༌ལགས། །ཁྱེད་ཀྱིས་འོད་ཟེར་འཕྲོ་རུ་མཛད་དུ༌གསོལ།།
PSA 80:2 ཨེ་ཕཱར་ཡིམ་དང་པེན་ཡཱ་མེན་དང༌ནི། །མཱ་ན་ཤེ་བཅས་གསུམ་གྱི་མཐོང་ས༌རུ། །ཁྱེད་ཀྱིས་ཉིད་ཀྱི་མཐུ་སྟོབས་ཆེར་བསྐྱེད༌ནས། །ངེད་རྣམས་སྐྱོབ་ཕྱིར་འབྱོན་པར་མཛོད་ཅིག༌གུ།
PSA 80:3 ཀྱེ་ཀྱེ་དཀོན་མཆོག་ངེད་རྣམས་བསྐྱར་གསོ༌མཛོད། །ཁྱེད་ཀྱི་ཞལ་ངོའི་འོད་མདངས་འཕྲོ་བར༌མཛོད། །དེ་ནས་ངེད་རྣམས་ཐར་བར་འགྱུར་བ༌འོ།།
PSA 80:4 ཀྱེ་ཀྱེ་ཡ་ཝཱེ་དཔུང་ཚོགས་ཀྱི་དཀོན་མཆོག །ཁྱེད་ཉིད་ནམ་དུས་བར་དུ་འབངས་མི༌ཡི། །སྨོན་ལམ་རྐྱེན་གྱིས་ཐུགས་ནི་ཁྲོ་བར༌བྱ།།
PSA 80:5 དེ་ཚོར་མཆི་མ་ཟས་སུ་གནང་བ༌དང༌། །མིག་ཆུ་མང་མང་དེ་ཚོར་འཐུང་བར༌མཛད།།
PSA 80:6 ཁྱིམ་མཚེས་ངེད་རྣམས་རྐྱེན་གྱིས་རྩོད་པར༌མཛད། །དགྲ་བོ་རྣམས་ཀྱིས་ང་ཚོར་འཕྱ་སྨོད༌བྱེད།།
PSA 80:7 དཔུང་ཚོགས་དཀོན་མཆོག་ངེད་རྣམས་བསྐྱར་གསོ༌མཛོད། །ཁྱེད་ཀྱི་ཞལ་ངོའི་འོད་མདངས་འཕྲོ་བར༌མཛོད། །དེ་ནས་ངེད་རྣམས་ཐར་བར་འགྱུར་བ༌འོ།།
PSA 80:8 ཨེ་ཅིབ་ཡུལ་ནས་རྒུན་འབྲུམ་ཤིང་གཅིག༌དྲངས། །ཕྱི་ཕྱོགས་མི་རྣམས་བསྐྲད་ནས་ཤུལ་དུ༌བཙུགས།།
PSA 80:9 ཁྱེད་ཀྱིས་ཤིང་དེར་ས་ཞིག་སྟ་གོན༌མཛད། །དེ་ཡི་རྩ་བ་རྒྱས་ནས་ཡུལ་གྲུར༌ཁྱབ།།
PSA 80:10 དེ་ཡི་གྲིབ་བསིལ་རི་བོ་རྣམས་ལ༌ཁེབས། །ཡན་ལག་གིས་ནི་ཐང་ཤིང་མཐོན་པོ༌གཡོགས།།
PSA 80:11 རྒྱ་མཚོའི་བར་དུ་ཡལ་འདབ་རྒྱས་པ༌དང༌། །ཆུ་བོའི་བར་དུ་ལྕུག་གསར་བརྐྱངས་པ༌ཡིན།།
PSA 80:12 ཁྱེད་ཀྱིས་ཤིང་དེའི་མཐའ་གྱང་ཅི་ལ༌བཤིགས། །ལམ་འགྲོ་ཚང་མར་བཏོག་ཏུ་འཇུག་དོན༌ཅི།།
PSA 80:13 ནགས་ཀྱི་ཕག་པས་དེ་ནི་རྩ་ནས༌སློག །ཐང་གི་རི་དྭགས་ཀྱིས་ནི་དེ་ཟ༌འོ།།
PSA 80:14 ཀྱེ་ཀྱེ་དཔུང་ཚོགས་དཀོན་མཆོག་ཕྱིར་འཁོར༌ཏེ། །གནམ་ནས་རྒུན་ཤིང་འདི་ལ་གཟིགས་པར༌མཛོད།།
PSA 80:15 ཁྱེད་ཕྱག་གཡས་པས་བཙུགས་ཤིང་ཁྱེད་ཉིད༌ཕྱིར། །བརྟན་པོར་མཛད་པའི་ཡལ་ག་ བསྲུང་བར༌མཛོད།།
PSA 80:16 ཤིང་དེ་མེ་ཡིས་བསྲེགས་ཤིང་གྲི་ཡིས༌གཏུབ། །ཁྱེད་ཀྱི་ཁྲོ་བའི་ཉམས་ཀྱིས་དེ་རྣམས༌འདས།།
PSA 80:17 ཁྱེད་ཉིད་ཕྱིར་དུ་བརྟན་པོར་མཛད་པ༌ཡི། །མི་ཡི་བུ་སྟེ་ཁྱེད་ཀྱི་གཡས་ཕྱོགས༌སུ། །གནས་པའི་མི་དེ་ཕྱག་གིས་སྐྱོར་བར༌མཛོད།།
PSA 80:18 དེ་ནས་ངེད་རྣམས་ཁྱེད་ལས་ཕྱིར་མི༌བསྣུར། །ཁྱེད་ཀྱིས་ངེད་རྣམས་གསོན་པོར་མཛད་དུ༌གསོལ། །ང་ཚོས་ཁྱེད་ཀྱི་མཚན་ལ་ཞུ་བ༌འབུལ།།
PSA 80:19 ཀྱེ་ཀྱེ་ཡ་ཝཱེ་དཔུང་ཚོགས་ཀྱི་དཀོན་མཆོག །ཁྱེད་ཀྱིས་ངེད་རྣམས་བསྐྱར་གསོ་མཛད་དུ༌གསོལ། །ཁྱེད་ཀྱི་ཞལ་ངོའི་འོད་མདངས་འཕྲོ་བར༌མཛོད། །དེ་ནས་ངེད་རྣམས་ཐར་བར་འགྱུར་བ༌འོ།།
PSA 81:1 ༼གཱད་པའི་དབྱངས་ནང་དབུ་མཛད་ལ་སྤྲད་པའི་ཨ་སབ་ཀྱི་མགུར༌མ།༽ ང་ཚོའི་སྟོབས་ཤུགས་ཡིན་པའི་དཀོན་མཆོག༌ལ། །དགའ་སྤྲོའི་སྐད་སྒྲ་སྒྲོགས་དང་ཡ་ཀོབ༌ཀྱི། །དཀོན་མཆོག་དྲུང་དུ་དགའ་མགུའི་སྐད་སྒྲ༌སྒྲོགས།།
PSA 81:2 མགུར་གླུ་ལོངས་ཤིག་སིལ་རྔ་སྐད་སྙན༌པོའི། །པི་ཝང་དང་ནི་རྒྱུད་མངས་དཀྲོལ་བར༌གྱིས།།
PSA 81:3 ཚེས་གཅིག་དང་ནི་ཉ་གང་རང་ཅག༌གི །དུས་ཆེན་སྐབས་སུ་རྭ་དུང་འབུད་པར༌གྱིས།།
PSA 81:4 འདི་ནི་ཡེས་ར་ཨེལ་ཕྱིར་སྒྲིག་ཁྲིམས༌དང༌། །ཡ་ཀོབ་དཀོན་མཆོག་ཉིད་ཀྱི་སྲོལ་ཡིག༌ཡིན།།
PSA 81:5 ཁོང་གིས་ཨེ་ཅིབ་ཡུལ་ལ་རྒོལ་དུས༌སུ། །ཡོ་སེབ་ཕྱིར་དུ་དཔང་ཡིག་འདི་བཙུགས༌སོ། །བདག་གིས་ཆ་རྒྱུས་མེད་པའི་སྐད་ཅིག༌ཐོས།།
PSA 81:6 དཀོན་མཆོག་ཉིད་ཀྱིས་འདི་སྐད་གསུངས་པ༌སྟེ། །བདག་གིས་དེ་ཡི་ཕྲག་པའི་ཁུར་པོ༌ཕབ། །སླེ་པོ་ཡང་ནི་ཁོ་ཡི་ལག་པར༌ཕྲལ།།
PSA 81:7 དཀའ་སྡུག་ཁྲོད་ནས་འོ་དོད་བོས་པ༌ན། །ང་ཡིས་ཁྱོད་རང་བསྐྱབས་ཤིང་འབྲུག་གྲགས༌པའི། །སྤྲིན་ནག་ཁྲོད་དུ་ཁྱོད་ལ་ལན་བཏབ༌ཅིང༌། །མེ་རི་བཱ་ ཡི་ཆུ་འགྲམ་ཁྱོད་ལ༌བརྟག།༼ སེ༌ལཱ། ༽
PSA 81:8 ཉོན་དང་ང་ཡི་མི་རྣམས་ཉེན་བརྡར༌ཉོན། །ཡེས་ར་ཨེལ་གྱིས་མཉན་ན་ཅི་མ༌རུང༌།།
PSA 81:9 ཁྱོད་ནང་རྒྱུས་མེད་ལྷ་ནི་ཡོད་མི༌རུང༌། །ཕྱི་པའི་ལྷ་ལ་ཕྱག་ཀྱང་འཚལ་མི༌རུང༌།།
PSA 81:10 ཁྱོད་རང་ཨེ་ཅིབ་ཡུལ་ནས་ཕྱིར་ཁྲིད༌པའི། །ཁྱོད་ཀྱི་དཀོན་མཆོག་ཡ་ཝཱེ་ང་ཡིན༌ནོ། །ཁ་ཆེར་གདོངས་ཤིག་བདག་གིས་འགེང་བར༌བྱ།།
PSA 81:11 ངའི་འབངས་ང་ཡི་སྐད་ལ་མ་མཉན༌ཞིང༌། །ཡེས་ར་ཨེལ་གྱིས་ང་ལ་མ་བསྟུན༌པས།།
PSA 81:12 དེ་རྣམས་སེམས་རྒྱུད་གྱོང་པོར་བསྐྱུར་ནས༌ནི། །རང་གི་གྲོས་བཞིན་སྤྱད་པ་སྤྱོད་དུ༌བཅུག།
PSA 81:13 ང་ཡི་འབངས་ཀྱིས་ང་ལ་མཉན་པ༌དང༌། །ཡེས་ར་ཨེལ་ངའི་ལམ་དུ་འགྲུལ་ན༌ནི།།
PSA 81:14 བདག་གིས་མྱུར་དུ་དགྲ་རྣམས་འདུལ་བྱ༌ཞིང༌། །ཕྱི་ལག་བྱས་ནས་དེ་ཚོའི་དགྲ་ལ༌རྒོལ།།
PSA 81:15 ཡ་ཝཱེར་སྡང་མཁན་ཟོལ་གྱིས་ཁོང་ལ༌བསྟུན། །དེ་ཚོའི་ཉེས་ཆད་ཁུར་ཡུན་རྫོགས་མཐའ༌མེད།།
PSA 81:16 ཁོང་གིས་དེ་ཚོར་གྲོའི་ཕུད་གནང་བ༌དང༌། །བྲག་ནས་ཐོན་པའི་སྦྲང་རྩིས་ཚིམ་པར༌མཛད།།
PSA 82:1 ༼ཨ་སབ་ཀྱི་མགུར༌མ།༽ དཀོན་མཆོག་ནུས་མཐུ་ཅན་གྱི་ཚོགས་དཀྱིལ༌བཞེངས། །འགོ་དཔོན་ ཁྲོད་དུ་ཁྲིམས་ཐག་འདི་སྐད༌གཅོད།།
PSA 82:2 ཁྱོད་ཚོས་ཁྲིམས་གཅོད་དྲང་གཞག་མི་བྱེད༌ཅིང༌། །ངན་པར་ཕྱོགས་རིས་བཟུང་ནས་ནམ་དུས༌བར།།༼ སེ༌ལཱ། ༽
PSA 82:3 དབུལ་ཕོངས་དྭ་ཕྲུག་རྣམས་ལ་བདག་སྐྱོང༌བྱོས། །སྡུག་བསྔལ་ཅན་དང་རྒུད་པོར་དྲང་བདེན༌སྐྱོངས།།
PSA 82:4 དགོས་མཁོ་ཅན་དང་དབུལ་པོ་སྐྱོབ་པར༌གྱིས། །སྡིག་སྤྱོད་ལག་ནས་དེ་རྣམས་ཐར་དུ༌ཆུགས།།
PSA 82:5 དེ་ཚོར་ཤེས་བྱ་མི་ལྡན་གོ་བའང༌མེད། །མུན་ནག་ཁྲོད་ནས་ཕར་འགྲོ་ཚུར་འོང༌བྱེད། །ས་གཞིའི་གཏིང་གཞི་ཐམས་ཅད་འགུལ་གྱུར༌ཏོ།།
PSA 82:6 བདག་གིས་སྔར་ནས་འདི་ལྟར་སྨྲས་མྱོང༌སྟེ། །ཁྱོད་རྣམས་ཐམས་ཅད་ལྷ་རྣམས་ ཡིན༌པ་དང༌། །བླ་ན་མེད་པ་ཉིད་ཀྱི་སྲས་རྣམས༌ཡིན།།
PSA 82:7 འོན་ཀྱང་མི་རྣམས་ལྟར་དུ་ཁྱོད་འཆི༌ཞིང༌། །སྐུ་དྲག་ཅིག་དང་འདྲ་ལ་འགྱེལ་བར༌འགྱུར།།
PSA 82:8 མི་རིགས་ཐམས་ཅད་ཁྱེད་ཀྱི་ནོར་སྐལ༌ཡིན། །ཀྱེ་ཀྱེ་དཀོན་མཆོག་དེའི་ཕྱིར་ཡར་བཞེངས༌ནས། །ས་གཞིར་ཁྲིམས་ཐག་གཅོད་པར་མཛད་དུ༌གསོལ།།
PSA 83:1 ༼ཨ་སབ་ཀྱི་མགུར༌མ།༽ ཀྱེ་ཀྱེ་དཀོན་མཆོག་ཞལ་རོག་མི་བཞུགས༌རོགས། །ཀྱེ་ཀྱེ་དཀོན་མཆོག་གསུང་ངག་མི་བསྡམ༌རོགས། །ལྷོད་དལ་ངང་ནས་བཞུགས་པར་མི་མཛད༌རོགས།།
PSA 83:2 གཟིགས་དང་ཁྱེད་ཀྱི་དགྲ་རྣམས་འུར་སྐད༌སྒྲོག །ཁྱེད་ལ་སྡང་བ་རྣམས་ཀྱིས་གྱེན་ལོག༌བྱེད།།
PSA 83:3 ཁྱེད་ཀྱི་འབངས་མི་ལ་ནི་འཚེ་བའི༌ཕྱིར། །དེ་ཚོས་གཡོ་སྒྱུའི་ཇུས་ངན་འདེབས་པ༌དང༌། །ཁྱེད་ཀྱི་སྦས་པའི་མི་ལ་གནོད་པའི༌ཕྱིར། །དེ་ཚོས་ཕན་ཚུན་བར་ལ་ངན་ཇུས༌ཤོམ།།
PSA 83:4 དེ་ཚོས་ཤོག་དང་ང་ཚོས་ཁོ་རྣམས༌ནི། །མི་རིགས་གཅིག་ཏུ་ལུས་པར་མི་བྱ༌ཞིང༌། །ཕྱིན་ཆད་ཡེས་ར་ཨེལ་གྱི་མིང་ཙམ༌ཡང༌། །མི་དྲན་ཕྱིར་དུ་ཚར་གཅོད་བྱ་ཞེས༌ཟེར།།
PSA 83:5 དེ་རྣམས་འགྲིག་མཐུན་ངང་ནས་གྲོས་བྱེད༌ཅིང༌། །ཁྱེད་ཉིད་འགོག་པར་ཕན་ཚུན་མནའ་འབྲེལ༌བྱེད།།
PSA 83:6 དེ་ནི་གུར་ནང་སྡོད་པའི་ཨེ་དོམ༌པ། །ཡེས་མ་ཨེལ་པ་དང་ནི་མོ་ཨབ༌པ། །ཧ་གར་པ་དང་བཅས་རྣམས་ཡིན་པ༌དང༌།།
PSA 83:7 གེ་བལ་དང་ནི་ཨམ་མོན་ཨ་མཱད༌ལེག །ཕེ་ལེ་ཤེད་དང་ཐཱར་གྱི་ཡུལ་མི༌བཅས།།
PSA 83:8 དེའི་ཁྲོད་ཨ་སུར་པ་ཡང་འདྲེས་ནས༌ནི། །ལོད་ཐུའི་བུ་ཚོའི་གྲོགས་སུ་གྱུར་པ༌འོ།།༼ སེ༌ལཱ། ༽
PSA 83:9 སི་སེ་རཱ་དང་ཡཱ་བིན་གཉིས་ལ༌ནི། །ཁི་ཤོན་གཙང་པོར་ཇི་ལྟར་མཛད་པ༌དང༌། །མིད་ཡཱན་པ་ལ་ཇི་ལྟར་མཛད་པ༌བཞིན། །ཁྱེད་ཀྱིས་དེ་ཚོར་དེ་བཞིན་མཛད་དུ༌གསོལ།།
PSA 83:10 དེ་རྣམས་ཨེན་དོར་ཡུལ་དུ་མེད་པར༌གྱུར། །ཐང་གི་ལྕི་བ་ལྟ་བུར་གྱུར་པ་འོ།།
PSA 83:11 ཁྱེད་ཀྱིས་དེ་ཚོའི་འགོ་འཛིན་པ་རྣམས༌ནི། །ཨོ་རེབ་དང་ནི་ཟེབ་ལྟར་མཛད་པ༌དང༌། །དེ་ཚོའི་རྒྱལ་སྲས་ཐམས་ཅད་ཟེ་བཱ༌དང༌། །ཚལ་མུན་ནཱ་དང་འདྲ་བར་མཛད་དུ༌གསོལ།།
PSA 83:12 དེ་ཚོས་འདི་བཞིན་སྨྲས་ཏེ་རང་ཅག༌གིས། །དཀོན་མཆོག་སྤང་ཐང་བདག་ཏུ་འཛིན་ཞེས༌སོ།།
PSA 83:13 ཀྱེ་ཀྱེ་ང་ཡི་དཀོན་མཆོག་མི་དེ༌རྣམས། །རླུང་འཚུབ་ནང་གི་ས་རྡུལ་འདྲ་བ༌དང༌། །རླུང་མདུན་ལྷགས་པའི་ཕུབ་མ་ལྟར་དུ༌མཛོད།།
PSA 83:14 མེ་ཡིས་ནགས་ཚལ་ཇི་ལྟར་སྲེག་པ༌དང༌། །མེ་ལྕེས་རི་རྣམས་ཇི་ལྟར་སྦར་བ༌བཞིན།།
PSA 83:15 ཁྱེད་ཀྱིས་དྲག་པོ་རླུང་གིས་དེ་རྣམས༌དེད། །རླུང་འཚུབ་ཆེན་པོས་དེ་རྣམས་འཇིགས་སུ༌ཆུགས།།
PSA 83:16 དེ་ཚོས་ཡ་ཝཱེ་ཁྱེད་ཀྱི་མཚན་འཚོལ༌ཕྱིར། །དེ་ཚོའི་གདོང་ལ་ངོ་ཚས་གང་བར༌མཛོད།།
PSA 83:17 ཡ་ཝཱེ་མཚན་ཅན་ཁྱེད་ཉིད་གཅིག་པུ༌དང༌། །ས་གཞི་ཀུན་ཏུ་བླ་མེད་ཁྱེད་ཡིན༌པ། །དེ་ཚོས་ཤེས་པར་འགྱུར་བའི་དོན་ཆེད༌དུ། །དེ་རྣམས་རྟག་ཏུ་སྐྱེངས་ཤིང་དངངས་པ༌དང༌། །ངོ་ཚ་དང་བཅས་ཁོ་རྣམས་སྟོངས་གྱུར༌ཅིག།
PSA 84:1 ༼བྱིན་རླབས་དང་བསྟོད༌བསྔགས། གཱད་པའི་དབྱངས་ནང་དབུ་མཛད་ལ་སྤྲད་པའི་ཀོ་རཱག་གི་བུ་རྣམས་ཀྱི་མགུར༌མ།༽ ཀྱེ་ཀྱེ་ཡ་ཝཱེ་དཔུང་ཚོགས་ཀྱི་ཡ་ཝཱེ། །ཁྱེད་ཀྱི་གདན་ས་ཇི་འདྲའི་མཛེས་པ༌ལ།།
PSA 84:2 བདག་སེམས་ཡ་ཝཱེའི་ཁྱམས་རར་དུངས་ནས་བརྒྱལ། །གཏན་དུ་གསོན་པོར་བཞུགས་པའི་དཀོན་མཆོག༌ལ། །ང་ཡི་ལུས་སེམས་གཉིས་ཀྱིས་དགའ་འབོད༌བྱེད།།
PSA 84:3 ཀྱེ་ཀྱེ་ཡ་ཝཱེ་དཔུང་ཚོགས་ཀྱི་ཡ་ཝཱེ། །ང་ཡི་རྒྱལ་པོ་ང་ཡི་དཀོན་མཆོག༌ལགས། །ཁྱེད་ཀྱི་མཆོད་ཁྲིའི་གམ་དུ་ཁང་བྱེའུ༌དང༌། །ཁུག་རྟ་སོགས་ཀྱིས་བྱེའུ་ཚང་བཟོ་བ༌བཞིན།།
PSA 84:4 ཁྱེད་ཀྱི་གདན་ས་གང་དུ་སྡོད་མཁན༌ཀུན། །བྱིན་རླབས་ཆེ་ཞིང་རྟག་ཏུ་ཁྱེད་ལ༌བསྟོད།།༼ སེ༌ལཱ། ༽
PSA 84:5 ཁྱེད་ལ་བརྟེན་ནས་སྟོབས་ཤུགས་མངའ་བ༌དང༌། །སེམས་སུ་ཛ་ཡན་ལམ་རྣམས་ཡོད་པ༌ནི། །བྱིན་རླབས་ཆེ་ཞིང་དགའ་སྤྲོའི་བདེ་བས༌ཁྱབ།།
PSA 84:6 མཆི་མའི་ལུང་པ་བརྒྱུད་ནས་འགྲོ་བ༌ན། །དེ་ནི་ཆུ་མིག་གནས་སུ་བསྒྱུར་བ༌དང༌། །སྟོན་ཁའི་ཆར་བས་ལུང་པ་ཡོངས་སུ༌བརྒྱན།།
PSA 84:7 ཛ་ཡན་ཡུལ་དུ་སྐྱོད་ཅིང་སྟོབས་ཤུགས༌རྒྱས། །དཀོན་མཆོག་ཞལ་རས་མཇལ་བའི་སྐལ་བ༌ཐོབ།།
PSA 84:8 ཀྱེ་ཀྱེ་ཡ་ཝཱེ་དཔུང་ཚོགས་ཀྱི་དཀོན་མཆོག །བདག་གི་གསོལ་འདེབས་ལ་ནི་གསན་པར༌ཞུ། །ཀྱེ་ཀྱེ་ཡ་ཀོབ་ཉིད་ཀྱི་དཀོན་མཆོག༌ལགས། །ཁྱེད་ཀྱིས་བདག་ལ་སྙན་དབང་གཏོད་པར༌མཛོད།།༼ སེ༌ལཱ། ༽
PSA 84:9 ཀྱེ་ཀྱེ་དཀོན་མཆོག་ང་ཚོའི་ཕུབ་དང༌ནི། །ཁྱེད་ཀྱིས་བྱུགས་པའི་གདོང་ལ་གཟིགས་པར༌མཛོད།།
PSA 84:10 ཁྱེད་ཀྱི་ར་བར་ཉིན་གཅིག་བསྡད་ན༌ཡང༌། །གཞན་དུ་ཉིན་ཞག་སྟོང་ཕྲག་བསྡད་པས༌ལེགས། །བདག་ནི་ངན་པའི་གུར་དུ་འདུག་པ༌ལས། །ཁྱེད་ཀྱི་གདན་སའི་སྒོ་ཁར་སྡོད་པ༌དགའ།།
PSA 84:11 ཅི་ལ་ཞེ་ན་ཡ་ཝཱེ་དཀོན་མཆོག༌ཉིད། །ཁྲི་གདུགས་ཉི་མ་དང་ནི་ཕུབ་ཀྱང༌ཡིན། །ཁོང་གིས་ཐུགས་རྗེ་གཟི་དཔལ་གནང་བ༌དང༌། །ཁོང་གིས་དྲང་པོར་སྤྱོད་པའི་མི་རྣམས༌ལ། །ཕན་ཡོན་གཅིག་ཀྱང་མ་ལུས་གནང་བ༌ཡིན།།
PSA 84:12 ཀྱེ་ཀྱེ་ཡ་ཝཱེ་དཔུང་ཚོགས་ཀྱི་ཡ་ཝཱེ། །ཁྱེད་ལ་ཡིད་རྟོན་བྱེད་མཁན་བྱིན་རླབས༌ཆེ།།
PSA 85:1 ༼དབུ་མཛད་ལ་སྤྲད་པའི་ཀོ་རཱག་གི་བུ་རྣམས་ཀྱི་མགུར༌མ།༽ ཀྱེ་ཀྱེ་ཡ་ཝཱེས་རང་ཡུལ་དྲིན་གྱིས༌བསྐྱངས། །ཡ་ཀོབ་བཙོན་པ་ཁྱེད་ཀྱིས་ཕྱིར་དྲངས༌སོ།།
PSA 85:2 ཁྱེད་ཀྱི་འབངས་མི་ཉེས་པ་བཤགས་པར༌མཛད། །དེ་ཚོའི་སྡིག་པ་ཐམས་ཅད་བཀབ་པ༌འོ།།༼ སེ༌ལཱ། ༽
PSA 85:3 ཁྱེད་ཀྱི་ཐུགས་ཁྲོ་ཡོངས་སུ་བསྐྱུར་བ༌དང༌། །ཉིད་ཀྱི་ཐུགས་ཁྲོ་དྲག་པོ་ཞི་བར༌མཛད།།
PSA 85:4 ཀྱེ་ཀྱེ་ངེད་རྣམས་སྐྱོབ་པའི་དཀོན་མཆོག༌ལགས། །ཁྱེད་ཀྱིས་ང་ཚོ་ཡང་བསྐྱར་དར་བར༌མཛོད། །ཁྱེད་ཀྱི་ཐུགས་ཁྲོ་ངེད་ལས་མེད་པར༌མཛོད།།
PSA 85:5 དུས་རྒྱུན་ངེད་ཅག་ལ་ནི་ཐུགས་ཁྲོ༌འམ། །མི་རབས་ཀུན་ལ་ཐུགས་ཁྲོ་བསྐྱེད་འོང༌ངམ།།
PSA 85:6 ཁྱེད་ཀྱི་འབངས་མི་ཁྱེད་ནང་སྐྱིད་པའི༌ཕྱིར། །ངེད་རྣམས་སླར་ཡང་གསོན་པོར་མི་མཛད༌དམ།།
PSA 85:7 ཁྱེད་ཀྱི་ཐུགས་རྗེ་སྟོན་མཛོད་ཡ་ཝཱེ་ཀྱེ། །ཁྱེད་ཀྱི་ཐར་པ་ང་ཚོར་གནང་བར༌མཛོད།།
PSA 85:8 ཁྱེད་ཀྱི་དད་གུས་ཅན་དང་འབངས་མི༌ལ། །ཞི་བདེ་གནང་བའི་དམ་བཅའ་ཡོད་པས༌ན། །དཀོན་མཆོག་ཡ་ཝཱེས་ཅི་གསུང་བདག་གིས༌མཉན། །འོན་ཀྱང་དེ་རྣམས་གླེན་ཕྱོགས་འཁོར་མི༌རུང༌།།
PSA 85:9 གཟི་བརྗིད་རང་ཅག་ཡུལ་དུ་གནས་པའི༌ཕྱིར། །ཁོང་ལ་གུས་ཤིང་འཇིགས་པའི་མི་རྣམས༌ལ། །ཁོང་གི་ཐར་པ་དངོས་གནས་ཉེ་བ༌ཡིན།།
PSA 85:10 བྱམས་བརྩེ་དང་ནི་གཞུང་དྲང་མཉམ་དུ༌འཕྲད། །བདེན་དྲང་ཞི་བདེ་ཕན་ཚུན་མཛའ་བོར༌འགྱུར།།
PSA 85:11 ས་ལས་དྲང་བདེན་རྡོལ་ཞིང་ནམ་མཁའ༌ནས། །དྲང་བ་ཉིད་ཀྱིས་ཐུར་ལ་བལྟ་བར༌བྱེད།།
PSA 85:12 ཡ་ཝཱེས་ང་ཚོར་གང་བཟང་གནང་བ༌ཡིན། །རང་ཅག་ས་ལས་ལོ་ཏོག་བསྐྱེད་པར༌འགྱུར།།
PSA 85:13 ཁོང་གི་སྔོན་དུ་དྲང་བ་ཉིད་སྐྱོད༌ཅིང༌། །ཁོང་གི་ཞབས་ལ་ཕེབས་ལམ་སྟ་གོན༌མཛད།།
PSA 86:1 ༼དཱ་བིད་ཀྱི་གསོལ༌འདེབས།༽ ང་ནི་འཕོངས་ཤིང་ཉམ་ཐག་ཅན་ཡིན༌པས། །གསན་ཞིང་བཀའ་ལན་གནོངས་ཤིག་ཀྱེ་ཡ༌ཝཱེ།།
PSA 86:2 དད་གུས་ལྡན་པས་ངའི་སྲོག་བསྲུང་བར༌མཛོད། །ཀྱེ་ཀྱེ་དཀོན་མཆོག་ཁྱེད་ལ་བློ་གཏོད༌པའི། །ཁྱེད་ཀྱི་ཞབས་ཕྱི་ང་རང་སྐྱབས་སུ༌གསོལ།།
PSA 86:3 ཉིན་གང་ཁྱེད་ལ་འོ་དོད་ངས་འབོད༌པས། །ང་ལ་སྙིང་རྗེ་མཛོད་ཅིག་ཀྱེ་གཙོ༌བོ།།
PSA 86:4 སེམས་ཀྱི་རེ་སྨོན་ཁྱེད་ལ་བཅངས་པས༌ན། །ཁྱེད་ཀྱི་ཞབས་ཕྱིའི་སེམས་པ་སྐྱིད་པར༌མཛོད།།
PSA 86:5 ཀྱེ་ཀྱེ་གཙོ་བོ་ཁྱེད་ནི་བཟང་བ༌དང༌། །མི་ལ་དགོངས་ཡངས་གནང་བ་ཡིན་ལགས༌ཤིང༌། །ཁྱེད་མཚན་འབོད་པར་བྱམས་བརྩེ་དཔག་མེད༌མངའ།།
PSA 86:6 ང་ཡི་སྨོན་ལམ་གསན་རོགས་ཀྱེ་ཡ༌ཝཱེ། །བདག་གི་ཞུ་བའི་སྐད་ལ་གསན་མཛོད༌ཅིག།
PSA 86:7 ཁྱེད་ཀྱིས་ང་ལ་བཀའ་ལན་གནང་འོང༌བས། །དཀའ་སྡུག་ཉིན་མོར་ང་ཡིས་ཁྱེད་འབོད༌དོ།།
PSA 86:8 གཙོ་བོ་ཁྱེད་འདྲ་ལྷ་ཡི་ཁྲོད་དུ༌མེད། །ཁྱེད་ཀྱི་མཛད་པ་དཔེ་ཟླ་དང་བྲལ༌ཏོ།།
PSA 86:9 གཙོ་བོ་ཁྱེད་ཀྱིས་མཛད་པའི་མི་རིགས༌ཀུན། །ཁྱེད་དྲུང་འོངས་ནས་གུས་ཕྱག་འཚལ་བ༌དང༌། །ཁྱེད་ཀྱི་མཚན་ལ་བསྟོད་བསྔགས་བརྗོད་པར་འགྱུར།།
PSA 86:10 ཁྱེད་གཅིག་དཀོན་མཆོག་ལགས་ཏེ་ཁྱེད་ཆེ༌ཞིང༌། །ངོ་མཚར་རྨད་བྱུང་དོན་རྣམས་ཁྱེད་ཀྱིས༌མཛད།།
PSA 86:11 ཁྱེད་ཀྱི་ལམ་ནི་ང་ལ་སྟོན་པར༌མཛོད། །ཁྱེད་ཀྱི་བདེན་པའི་ནང་དུ་འགྲུལ་བར༌བྱ། །ཁྱེད་ཀྱི་མཚན་ལ་བློ་སེམས་རྩེ་གཅིག༌གིས། །གུས་ཤིང་འཇིགས་པར་མཛོད་ཅིག་ཀྱེ་ཡ༌ཝཱེ།།
PSA 86:12 ཀྱེ་ཀྱེ་གཙོ་བོ་ང་ཡི་དཀོན་མཆོག༌ལགས། །བདག་གིས་ཡིད་སེམས་ཧྲིལ་པོས་ཁྱེད་ལ༌བསྟོད། །རྟག་ཏུ་ཁྱེད་ཀྱི་མཚན་ལ་བསྟོད་བསྔགས་འབུལ།།
PSA 86:13 ཁྱེད་ཀྱིས་ང་ལ་སྙིང་རྗེ་ཆེར་བསྐྱེད༌ཅིང༌། །གཤིན་པོའི་ཡུལ་གྱི་མཐིལ་ནས་ངའི་སྲོག༌བསྐྱབས།།
PSA 86:14 ཀྱེ་ཧོ་དཀོན་མཆོག་ང་རྒྱལ་ཅན་རྣམས༌ནི། །དགྲ་རུ་ལངས་ཤིང་གདུག་རྩུབ་ཅན་རྣམས༌ཀྱིས། །བདག་གི་སྲོག་ལ་བསྙེགས་ནས་དེ་དག༌གིས། །ཁྱེད་ཉིད་མིག་གི་ནང་དུ་མི་འཇོག༌གོ།
PSA 86:15 འོན་ཀྱང་གཙོ་བོ་ཁྱེད་ནི་སྙིང་རྗེ༌དང༌། །ཐུགས་རྗེ་ཅན་གྱི་དཀོན་མཆོག་ལགས་པས༌ན། །ཁྱེད་ཉིད་རང་དགར་ཐུགས་ནི་མི་ཁྲོ༌ཞིང༌། །བྱམས་བརྩེ་དྲང་བདེན་དཔག་ཏུ་མེད་པ༌ཡོད།།
PSA 86:16 ངའི་ཕྱོགས་འཁོར་ནས་ང་རང་དྲིན་གྱིས༌སྐྱོངས། །ཁྱེད་ཀྱི་ཞབས་ཕྱིར་ཉིད་ཀྱི་མཐུ་སྟོབས༌གནོངས། །ཁྱེད་ཀྱི་གཡོག་མོའི་བུ་ནི་སྐྱོབ་པར༌མཛོད།།
PSA 86:17 ཡ་ཝཱེ་ཁྱེད་ཀྱིས་བདག་ལ་གྲོགས་མཛད༌ཅིང༌། །སེམས་གསོ་གནང་བ་དགྲ་བོས་མཐོང་ནས༌ནི། །སྐྱེངས་ཕྱིར་ང་ལ་བཟང་བའི་རྟགས་སྟོན༌རོགས།།
PSA 87:1 ༼ཀོ་རཱག་གི་བུ་རྣམས་ཀྱི་མགུར༌མ།༽ རི་བོ་དམ་པར་ཡ་ཝཱེའི་རྟེན་གཞི༌ཡོད།།
PSA 87:2 ཡ་ཀོབ་ཁོང་གི་སྡོད་གནས་ཡོད་ཚད༌ལས། །ཛ་ཡན་སྒོ་རྣམས་ཡ་ཝཱེས་གཅེས་སུ༌འཛིན།།
PSA 87:3 ཀྱེ་མ་དཀོན་མཆོག་ཉིད་ཀྱི་གྲོང་ཁྱེར༌ལགས། །གཟི་བརྗིད་ལྡན་པའི་དོན་རྣམས་ཁྱེད་ལ༌སྨྲ།།༼ སེ༌ལཱ། ༽
PSA 87:4 ང་རང་ཤེས་པ་རྣམས་ལས་ར་ཧབ་དང༌། །པཱ་པེལ་ལོན་གཉིས་བདག་གིས་གླེང་བར༌བྱ། །ཕེ་ལེ་ཤེད་དང་ཐཱར་དང་གུ་ཤར༌ལྟོས། །འདི་ནི་དེ་རུ་སྐྱེས་ཞེས་བདག་གིས༌སྨྲ།།
PSA 87:5 འདི་དང་དེ་གཉིས་ཡུལ་དེར་སྐྱེས་པ༌ཞེས། །ཛ་ཡན་སྐོར་ལ་དེ་སྐད་སྨྲ་བར༌འགྱུར། །བླ་མེད་ཁོང་གིས་དེ་ནི་བརྟན་པོར༌མཛད།།
PSA 87:6 ཡ་ཝཱེས་མི་སྡེ་རྣམས་ཀྱི་གྲངས་ལེན༌དུས། །མི་འདི་དེ་རུ་སྐྱེས་ཞེས་འབྲི་བར༌འགྱུར།།༼ སེ༌ལཱ། ༽
PSA 87:7 ང་ཡི་ཆུ་མིག་ཐམས་ཅད་ཁྱེད་ནང༌ཡོད། །དེ་སྐད་གླུ་པ་གར་མཁན་རྣམས་ཀྱིས༌ཞུ།།
PSA 88:1 ༼ཀོ་རཱག་གི་བུ་རྣམས་ཀྱིས་མ་ཧ་ལད་ལེ་ཨན་ནོད་ཀྱི་དབྱངས་ནང་དབུ་མཛད་ལ་སྤྲད་པའི་ཨེས་རག་པ་ཧེ་མཱན་གྱི་བསླབ་བྱའི་མགུར༌མ།༽ བདག་གི་སྲོག་སྐྱོབ་དཀོན་མཆོག་ཡ་ཝཱེ༌ཀྱེ། །ང་ཡིས་ཉིན་མཚན་མེད་པར་ཁྱེད་དྲུང༌ཞུས།།
PSA 88:2 ང་ཡི་སེམས་སུ་སྡུག་གིས་གང་བ༌དང༌། །རང་སྲོག་གཤིན་ཡུལ་ཉེ་སར་སླེབས་གྱུར༌པས། །ང་ཡི་སྨོན་ལམ་ཁྱེད་དྲུང་བསླེབ་པར༌ཤོག །བདག་གི་འོ་དོད་ལ་ནི་ཁྱེད་གསན༌རོགས།།
PSA 88:4 དུར་ནང་འབབ་མཁན་མིའི་ཁྲོད་ང་རང༌འདུས། །ང་ནི་བྱ་ཐབས་ཟད་པའི་མི་དང༌འདྲ།།
PSA 88:5 བསད་ནས་དུར་ཁུང་ནང་དུ་ཉལ་འདྲ༌བར། །ང་རང་གཤིན་པོའི་ཁྲོད་དུ་བསྐྱུར་བར༌མཛད། །ཁྱེད་ཀྱིས་དེ་རྣམས་ཐུགས་སུ་མི་དྲན༌ཞིང༌། །ཁོ་རྣམས་ཁྱེད་ཀྱི་ཕྱག་དང་ཡོངས་སུ༌བྲལ།།
PSA 88:6 ཁྱེད་ཀྱིས་ང་རང་གཏིང་ཟབ་དོང་རིང༌སྟེ། །མུན་ནག་གཤིན་ཁམས་མཐིལ་དུ་བཞག་པར༌མཛད།།
PSA 88:7 ཁྱེད་ཀྱི་ཐུགས་ཁྲོ་ངའི་སྟེང་རབ་ཏུ༌ལྕི། །ཁྱེད་ཀྱི་རྦ་རླབས་ཀུན་གྱིས་ང་རང༌བསྣུབས།།༼ སེ༌ལཱ། ༽
PSA 88:8 ཁྱེད་ཀྱིས་བདག་གི་མཛའ་གྲོགས་ང་ལས༌ཕྲལ། །ཁྱེད་ཀྱིས་དེ་ཚོར་ང་རང་ཞེན་ལོག༌མཛད། །ནང་དུ་བཀག་པས་ཕྱི་རོལ་འཐོན་མི༌ནུས།།
PSA 88:9 སྡུག་བསྔལ་དབང་གིས་ངའི་མིག་བསྒྲིབས་པར༌གྱུར། །ཀྱེ་ཀྱེ་ཡ་ཝཱེ་བདག་གིས་ཉིན་རེ༌བཞིན། །ཁྱེད་རང་འབོད་ཅིང་ཁྱེད་ཕྱོགས་ལག་པ༌བརྐྱངས།།
PSA 88:10 གཤིན་པོར་ཁྱེད་ཀྱིས་ངོ་མཚར་བསྟན༌བྱ་འམ། །འདས་པོ་ལངས་ནས་ཁྱེད་ལ་བསྟོད་འགྱུར༌རམ།།༼ སེ༌ལཱ། ༽
PSA 88:11 དུར་གྱི་ནང་དུ་ཁྱེད་ཀྱི་བྱམས་བརྩེ༌དང༌། །དམྱལ་བར་ཁྱེད་ཀྱི་དྲང་བདེན་འཆད་འགྱུར༌རམ།།
PSA 88:12 མུན་ནག་ཁྲོད་དུ་ཁྱེད་ཀྱི་ངོ་མཚར༌དང༌། །བརྗེད་པའི་གནས་སུ་དྲང་ལུགས་རྟོགས་འགྱུར༌རམ།།
PSA 88:13 འོན་ཀྱང་ཡ་ཝཱེ་ང་ཡིས་ཁྱེད་འབོད༌ཅིང༌། །ང་ཡི་གསོལ་འདེབས་ཞོགས་པར་ཁྱེད་དྲུང༌བསླེབ།།
PSA 88:14 ཀྱེ་ཀྱེ་ཡ་ཝཱེ་ང་རང་ཅི་ལ༌གཡུགས། །ཁྱེད་ཀྱི་ཞལ་རས་ང་ལ་ཅིའི་ཕྱིར༌སྦས།།
PSA 88:15 ཆུང་ངུའི་དུས་ནས་སྡུག་ཅིང་འཆི་བར༌ཉེ། །ཁྱེད་ཀྱི་འཇིགས་པས་ང་ཡི་རེ་བ༌ཟད།།
PSA 88:16 ཁྱེད་ཀྱི་ཐུགས་ཁྲོ་དྲག་པོས་ང་རང༌བསྣུབས། །ཁྱེད་ཀྱི་འཇིགས་པས་ང་ནི་མེད་པར༌བྱས།།
PSA 88:17 ཆུ་ལྟར་དེ་ཚོས་ཉིན་གང་ངའི་མཐའ༌བསྐོར། །དེ་ཚོས་ལྷན་ཅིག་ང་རང་འགོག་པར༌བྱས།།
PSA 88:18 ཁྱེད་ཀྱིས་མཛའ་བའི་གྲོགས་རྣམས་ང་ལས༌ཕྲལ། །མུན་ནག་ང་ཡི་མཛའ་གྲོགས་སུ་བསྐྱུར༌ཏོ།།
PSA 89:1 ༼ཨེས་རག་པ་ཨེ་ཐན་གྱི་བསླབ་བྱའི་མགུར༌མ།༽ དུས་རྒྱུན་ཡ་ཝཱེའི་བྱམས་བརྩེའི་གླུ་ལེན༌ཞིང༌། །མི་རབས་ཀུན་ཏུ་ཁྱེད་ཀྱི་དྲང་བདེན༌བརྗོད།།
PSA 89:2 ཁྱེད་ཀྱི་བྱམས་བརྩེ་རྒྱུན་ནས་རྒྱུན་དུ༌བརྟན། །དྲང་བདེན་ནམ་མཁར་བརྟན་ཞེས་བདག་གིས༌སྨྲ།།
PSA 89:3 བདག་གིས་བདམས་པའི་མི་ལ་ཞལ་ཆད༌བཞག །ང་ཡི་ཞབས་ཕྱི་དཱ་བིད་ལ་མནའ༌བསྐྱལ།།
PSA 89:4 ང་ཡིས་ཁྱོད་ཀྱི་བུ་རྒྱུད་དུས་གཏན༌དུ། །གནས་པར་བྱ་ཞིང་མི་རབས་ཀུན་ལ༌ནི། །ཁྱོད་ཀྱི་རྒྱལ་ཁྲི་བརྟན་པར་བྱ་ཞེས༌གསུངས།།༼ སེ༌ལཱ། ༽
PSA 89:5 ཀྱེ་ཀྱེ་ཡ་ཝཱེ་ནམ་མཁའི་དབྱིངས་རྣམས༌ཀྱིས། །ཁྱེད་ཀྱི་ངོ་མཚར་དོན་རྣམས་སྒྲོག་བྱེད༌ཅིང༌། །དམ་པའི་ཚོགས་ནང་ཁྱེད་ཐུགས་དྲང་བར༌བསྟོད།།
PSA 89:6 ནམ་མཁར་ཡ་ཝཱེའི་མཚུངས་ཟླ་སུ་ཞིག༌ཡོད། །དམ་པ་རྣམས་ཀྱི་ཁྲོད་དུའང་ཁོང་འདྲ༌མེད།།
PSA 89:7 དམ་པའི་ཚོགས་ནང་དཀོན་མཆོག་བརྗིད་ཉམས༌ཆེ། །ཕྱོགས་བཞིར་ཡོད་པ་ཀུན་ལས་གུས་པར་འོས།།
PSA 89:8 ཀྱེ་ཀྱེ་དཔུང་ཚོགས་དཀོན༌མཆོག་ཡ་ཝཱེ་ལགས། །མཐུ་ལྡན་རྣམས་ལས་ཁྱེད་ཀྱི་མཚུངས་ཟླ༌སུ། །ཁྱེད་ཀྱི་ཕྱོགས་བཞིར་ཉིད་ཀྱི་དྲང་བདེན༌ཡོད།།
PSA 89:9 རྒྱ་མཚོའི་རྦ་རླབས་ཆེན་པོ་དབང་དུ༌བསྒྱུར། །རྦ་ཀློང་འཕྱུར་དུས་ཁྱེད་ཀྱིས་ཞི་བར༌མཛད།།
PSA 89:10 བསད་པའི་མི་ལྟར་ཁྱེད་ཀྱིས་ར་ཧབ་གཏུབ། །མཐུ་ལྡན་དཔུང་པས་དགྲ་རྣམས་གཏོར་བར༌མཛད།།
PSA 89:11 གནམ་ས་གཉིས་ཀ་ཁྱེད་ཀྱི་ཡིན་ལགས༌ཤིང༌། །འཇིག་རྟེན་སྣོད་བཅུད་མ་ལུས་ཁྱེད་ཀྱིས༌བཙུགས།།
PSA 89:12 བྱང་དང་ལྷོ་ཕྱོགས་གཉིས་པོ་ཁྱེད་ཀྱིས༌བཀོད། །ཐ་པོར་དང་ནི་ཧེར་མོན་གཉིས་པོ༌ཡིས། །ཁྱེད་ཀྱི་མཚན་ཕྱིར་དགའ་འབོད་བྱེད་པ༌འོ།།
PSA 89:13 ཁྱེད་ལ་མཐུ་སྟོབས་ལྡན་པའི་དཔུང་པ༌ཡོད། །ཕྱག་ཤེད་ཆེ་ཞིང་ཕྱག་གཡས་མཐོན་པོར༌སྒྲེང༌།།
PSA 89:14 དྲང་པོ་དྲང་གཞག་རྒྱལ་ཁྲིའི་རྨང་གཞི༌ཡིན། །བྱམས་བརྩེ་དྲང་བདེན་ཁྱེད་ཀྱི་དྲུང་དུ༌སྐྱོད།།
PSA 89:15 ཁྱེད་ཕྱོགས་དགའ་འབོད་བྱེད་ཤེས་མི་རྣམས༌བདེ། །ཁྱེད་ཀྱི་ཞལ་ངོའི་མདངས་ནང་དེ་རྣམས༌འགྲུལ།།
PSA 89:16 ཉིན་གང་ཁྱེད་ཀྱི་མཚན་ཕྱིར་དགའ་འབོད༌བྱེད། །ཁྱེད་ཀྱི་དྲང་བ་ཉིད་ཀྱིས་དེ་རྣམས༌འདེགས།།
PSA 89:17 དེ་ཚོའི་གཟི་དཔལ་སྟོབས་ཤུགས་ཁྱེད་རང༌ཡིན། །ཁྱེད་ཀྱི་ཐུགས་རྗེས་ངེད་ཀྱི་རྭ་དུང་འདེགས།།
PSA 89:18 ཅི་ལ་ཞེ་ན་ཡ་ཝཱེ་ང་ཚོའི༌ཕུབ། །ཡེས་ར་ཨེལ་གྱི་དམ་པ་རྒྱལ་པོ༌ཡིན།།
PSA 89:19 དེའི་ཚེ་ཞལ་གཟིགས་ནང་དུ་ཁྱེད་ཉིད༌ཀྱིས། །དད་ལྡན་རྣམས་ལ་འདི་སྐད་གསུངས་པ༌སྟེ། །ང་ཡིས་དཔའ་རྒོད་ཅིག་ལ་རོགས་བྱས༌ཤིང༌། །མི་རྣམས་ཁྲོད་ནས་བདམས་པ་མཐོ་རུ༌བཏེགས།།
PSA 89:20 བདག་གིས་ང་ཡི་ཞབས་ཕྱི་དཱ་བིད༌རྙེད། །ཁོ་བོའི་དམ་པའི་སྣུམ་གྱིས་དེར་བྱུགས༌སོ།།
PSA 89:21 ང་ཡི་ལག་པས་ཁོ་ནི་སྐྱོར་བྱེད༌ཅིང༌། །ང་ཡི་དཔུང་པས་ཁོ་ནི་བརྟན་པར༌བྱ།།
PSA 89:22 དགྲ་ཡིས་དེ་ལ་བསླུ་བར་བྱེད་མི༌ནུས། །ངན་པས་དེ་ལ་གཉའ་གནོན་བྱེད་མི༌འགྱུར།།
PSA 89:23 དེ་ཡི་མཐོང་ངོར་དགྲ་རྣམས་རྡུལ་དུ༌བརླག །དེ་ལ་སྡང་བའི་མི་རྣམས་ས་རུ༌བརྡབ།།
PSA 89:24 ང་ཡི་དྲང་བདེན་བྱམས་བརྩེ་དེ་མཉམ༌གནས། །ང་ཡི་མིང་གིས་དེ་ཡི་རྭ་དུང༌འདེགས།།
PSA 89:25 བདག་གིས་དེ་ཡི་གཡོན་ལག་རྒྱ་མཚོ༌དང༌། །གཡས་ལག་གཙང་པོའི་བར་དུ་བརྐྱང་བར༌བྱ།།
PSA 89:26 དེ་ཡིས་ང་རང་འབོད་ཅིང་འདི་བཞིན༌དུ། །ཁྱེད་ནི་ང་ཡི་ཡབ་དང་དཀོན་མཆོག༌དང༌། །ང་ཡི་སྲོག་སྐྱོབ་བྲག་རི་ཡིན་ཞེས༌ཞུ།།
PSA 89:27 ངས་ཀྱང་དེ་ནི་རང་གི་སྐྱེས་འགོ༌དང༌། །ས་གཞིའི་རྒྱལ་པོ་རྣམས་ཀྱི་མཆོག་ཏུ༌མཛད།།
PSA 89:28 ང་ཡི་བྱམས་བརྩེ་དེ་ལ་རྟག་ཏུ༌བསྐྱུར། །དེ་ལ་བཞག་པའི་ཁ་ཆད་བརྟན་པར༌བྱ།།
PSA 89:29 དེ་ཡི་བུ་རྒྱུད་གཏན་དུ་གནས་པ༌དང༌། །རྒྱལ་ཁྲི་ནམ་མཁའ་བཞིན་དུ་ཡུན་རིང༌བྱ།།
PSA 89:30 དེ་ཡི་བུ་ཚོས་ང་ཡི་བཀའ་སྤང༌ཞིང༌། །ང་ཡི་ཁྲིམས་རྣམས་བཞིན་དུ་མི་སྤྱོད༌པར།།
PSA 89:31 ང་ཡི་སྒྲིག་ཁྲིམས་རྣམས་ཀྱང་དོར་ནས༌ནི། །ང་ཡི་བཀའ་རྒྱ་བསྲུང་བར་མི་བྱེད༌ན།།
PSA 89:32 དེ་ཚོའི་ཉེས་སྐྱོན་ཕྱིར་དུ་དབྱུག་པ༌དང༌། །སྡིག་ཉེས་ཕྱིར་དུ་ལྕག་གིས་བརྡུང་བར༌བྱ།།
PSA 89:33 ང་ཡི་བྱམས་བརྩེ་ཁོ་ལས་ཕྱིར་མི༌ལེན། །ང་ཡི་དྲང་བདེན་ཡང་ནི་བསྐྱུར་མི༌སྲིད།།
PSA 89:34 ང་ཡི་ཁ་ཆད་དང་ནི་བདག་མི༌འགལ། །བདག་གི་སྨྲ་སྒོའི་ཚིག་ཀྱང་བསྒྱུར་མི༌སྲིད།།
PSA 89:35 གཏན་དུ་བདག་གིས་རང་གི་དམ་པ༌ཉིད། །དཔང་དུ་བཙུགས་ནས་འདི་བཞིན་མནའ་བསྐྱལ༌ཏེ། །ང་ཡིས་དཱ་བིད་ལ་ནི་རྫུན་མི༌སྨྲ།།
PSA 89:36 དེ་ཡི་བུ་རྒྱུད་གཏན་དུ་གནས་པ༌དང༌། །རྒྱལ་ཁྲི་ཉི་མ་བཞིན་དུ་ངའི་གམ༌གནས།།
PSA 89:37 ཟླ་བ་ནང་བཞིན་རྟག་ཏུ་གནས་འགྱུར༌ཞིང༌། །གནམ་གྱི་དཔང་པོ་བདེན་པ་ལྟར་དུ༌འགྱུར།།༼ སེ༌ལཱ། ༽
PSA 89:38 འོན་ཀྱང་ཁྱེད་ཉིད་ཁྱེད་ཀྱིས་བྱུགས་པ༌ལ། །རབ་ཏུ་ཁྲོས་ནས་གཡུགས་ཏེ་སྤངས་པར༌མཛད།།
PSA 89:39 ཞབས་ཕྱིར་བཞག་པའི་ཞལ་ཆད་བསྐྱུར་བ༌དང༌། །དེ་ཡི་ཅོད་པན་ས་རུ་རྫོབ་པར༌མཛད།།
PSA 89:40 དེ་ཡི་ར་སྐོར་ཐམས་ཅད་བཤིགས་པ༌དང༌། །དེ་ཡི་མཁར་རྫོང་རྣམས་ནི་ཞིག་རོར༌མཛད།།
PSA 89:41 ལམ་འགྲོ་ཀུན་གྱིས་དེ་ལས་འཕྲོག་བཅོམ༌བྱས། །ཁྱིམ་མཚེས་རྣམས་ཀྱིས་འཕྱ་བའི་གནས་སུ༌བཏང༌།།
PSA 89:42 ཁྱེད་ཀྱིས་དེ་ཡི་དགྲ་བོའི་གཡས་ལག༌བཏེགས། །དེ་ཡི་དགྲ་བོ་ཐམས་ཅད་དགའ་རུ༌བཅུག།
PSA 89:43 ཁྱེད་ཀྱིས་དེ་ཡི་རལ་གྲིའི་ཁ་ནི༌བཟློགས། །འཐབ་མོའི་ནང་དུ་དེ་ནི་ཚུགས་དཀའ༌བྱས།།
PSA 89:44 ཁྱེད་ཀྱིས་དེ་ཡི་གཟི་དཔལ་ཡལ་བར༌མཛད། །དེ་ཡི་རྒྱལ་ཁྲི་ཡང་ནི་ས་རུ༌བརྡབས།།
PSA 89:45 དེ་ཡི་ན་གཞོན་དུས་ཡུན་ཕྲི་བ་དང༌། །དེ་ནི་ངོ་ཚས་གཡོགས་པར་མཛད་པ༌འོ།།༼ སེ༌ལཱ། ༽
PSA 89:46 ཀྱེ་ཀྱེ་ཡ་ཝཱེ་འདི་བཞིན་ནམ་དུས༌བར། །ཁྱེད་ཀྱིས་རང་ཉིད་དུས་རྒྱུན་ཡིབ་བམ༌ཅི། །ཐུགས་ཁྲོ་མེ་ལྟར་འབར་ནས་ནམ་དུས༌བར།།
PSA 89:47 ངའི་ཚེ་ཇི་ལྟར་ཐུང་བ་དྲན་པར༌མཛོད། །ཁྱེད་ཀྱིས་བཀོད་པའི་མི་ཀུན་སྙིང་པོ༌མེད།།༼ སེ༌ལཱ། ༽
PSA 89:48 གསོན་ཞིང་འཆི་བ་མི་མཐོང་བ་ནི༌སུ། །གཤིན་ཡུལ་དབང་ལས་རང་སྲོག་སྐྱོབ་པ༌སུ།།༼ སེ༌ལཱ། ༽
PSA 89:49 གཙོ་བོ་ཁྱེད་ཀྱིས་སྔར་ནས་དཱ་བིད༌ལ། །ཉིད་ཀྱི་དྲང་བདེན་ངང་ནས་མནའ་བཞེས༌པའི། །བྱམས་བརྩེ་དེ་ནི་ད་ལྟ་གང་དུ༌ཡོད།།
PSA 89:50 གཙོ་བོ་ཞབས་ཕྱིའི་ངོ་ཚ་དྲན་དུ༌གསོལ། །མི་རིགས་ཀུན་གྱི་འཕྱ་དམོད་ཁོག་ལ༌བཅུག།
PSA 89:51 ཀྱེ་ཀྱེ་ཡ་ཝཱེ་ཁྱེད་ཀྱི་དགྲ་རྣམས༌ཀྱིས། །ཚིག་ངན་བཏང་ནས་ཁྱེད་ཀྱི་ཞབས་ཕྱིར་སྨད། །ཁྱེད་ཀྱི་བྱུགས་པའི་གོམ་སྟབས་རེ་རེར༌སྨད།།
PSA 89:52 ཡ་ཝཱེ་ཁོང་ཉིད་གཏན་དུ་བསྟོད་འོས༌སོ། །ཨ་མེན་ཨ་མེན་ཞེས་སུ་ཡང་ཡང༌བརྗོད།།
PSA 90:1 ༼དཀོན་མཆོག་གི་སྐྱེས་བུ་མོ་ཤེའི་གསོལ༌འདེབས།༽ ཀྱེ་ཀྱེ་གཙོ་བོ་ཁྱེད་ཉིད་ངེད་རྣམས༌ཀྱི། །མི་རབས་ཀུན་ཏུ་སྐྱབས་གནས་ཡིན་ལགས༌སོ།།
PSA 90:2 རི་བོ་དག་ནི་མ་བྱུང་སྔོན་རོལ༌དང༌། །ས་དང་འཇིག་རྟེན་མ་བཀོད་ཡར་སྔོན༌ལ། །ཁྱེད་ཉིད་ཐོག་མཐའ་མེད་པའི་དཀོན་མཆོག༌ལགས།།
PSA 90:3 ཁྱེད་ཀྱིས་མི་རྣམས་རྡུལ་དུ་ཕྱིར་ལོག༌མཛད། །མི་ཡི་བུ་རྣམས་ཕྱིར་ལོག་ཅེས་སུ༌གསུངས།།
PSA 90:4 ཁྱེད་ཀྱི་གཟིགས་ངོར་ལོ་ངོ་སྟོང་ཕྲག༌ཅིག །ཉེ་ཆར་འདས་པའི་ཉིན་མོ་གཅིག་དང༌ནི། །མདང་གི་མཚན་ཐུན་གཅིག་དང་ཆ་མཚུངས༌སོ།།
PSA 90:5 ཁྱེད་ཀྱིས་ཁོ་རྣམས་ཆུ་ལོག་འཁུར་བཞིན༌མཛད། །ཁོ་རྣམས་རྨི་ལམ་ཞིག་དང་མཚུངས་པ༌དང༌། །ཞོགས་པར་གསར་དུ་སྐྱེས་པའི་རྩྭ་སྔོན༌འདྲ།།
PSA 90:6 ཞོགས་པར་མྱུ་གུ་འབུས་ནས་སྐྱེས་པ༌དང༌། །མཚན་མོའི་དུས་སུ་རྙིད་ནས་བསྐམས་པ༌འོ།།
PSA 90:7 ཁྱེད་ཉིད་ཐུགས་ཁྲོས་རྐྱེན་གྱིས་ངེད་རྣམས༌རྫོགས། །ཁྱེད་ཀྱི་ཐུགས་ཁྲོ་དབང་གིས་ངེད་རྣམས༌འཇིགས།།
PSA 90:8 ང་ཚོའི་ཉེས་སྐྱོན་ཁྱེད་ཀྱི་སྤྱན་སྔར༌བཤམས། །གསང་བའི་སྡིག་པ་ཞལ་མདངས་འོད་ལ༌དྲངས།།
PSA 90:9 ཁྱེད་ཀྱི་ཐུགས་ཁྲོའི་ནང་དུ་མི་ཚེ༌འདས། །ངེད་ཅག་མི་ཚེ་ཤུགས་རིང་འབྱིན་པ༌ཙམ།།
PSA 90:10 ངེད་རྣམས་ཚེ་ཚད་བགྲང་བྱ་བདུན་ཅུ༌འམ། །གཟུགས་སྟོབས་ཆེ་ན་བརྒྱད་ཅུའི་བར་དུ༌འཚོ། །མྱུར་དུ་ཡལ་ཞིང་ངེད་རྣམས་འཕུར་འགྲོ༌བས། །དཀའ་ལས་སྐྱོ་སྡུག་ཙམ་ལས་ངོམ་རྒྱུ༌མེད།།
PSA 90:11 ཁྱེད་ཀྱི་ཐུགས་ཁྲོའི་མཐུ་སྟོབས་སུ་ཡིས༌ཤེས། །ཁྱེད་ཉིད་གུས་ཤིང་འཇིགས་པར་འོས་པ༌བཞིན། །ཉིད་ཀྱི་ཐུགས་ཁྲོ་རྟོགས་མཁན་སུ་ཞིག༌ཡོད།།
PSA 90:12 རང་གི་ཚེ་ཚད་བརྩི་ཚུལ་སློབ་པར༌མཛོད། །ངེད་ཅག་སེམས་ལ་ཤེས་རབ་འཐོབ་ཀྱང་སྲིད།།
PSA 90:13 ནམ་དུས་བར་དུ་སྒུག་དགོས་ཀྱེ་ཡ༌ཝཱེ། །ཁྱེད་ཐུགས་འགྱོད་ཅིང་ཞབས་ཕྱིར་སྙིང་རྗེས༌གཟིགས།།
PSA 90:14 ཚེ་གང་དགའ་འབོད་བྱེད་ཅིང་སྐྱིད་པའི༌ཕྱིར། །ཁྱེད་ཀྱི་བྱམས་བརྩེས་ཞོགས་པར་ངེད་ཚིམ༌མཛོད།།
PSA 90:15 ངེད་རྣམས་སྡུག་ལ་སྦྱར་བའི་ཉིན་གྲངས༌དང༌། །དཀའ་ལས་མྱངས་པར་མཛད་པའི་ལོ་ཟླ༌བཞིན། །ཁྱེད་ཀྱིས་ངེད་ཅག་དགའ་མགུ་ཡི་རངས༌མཛོད།།
PSA 90:16 ཁྱེད་ཀྱི་འཕྲིན་ལས་ཉིད་ཀྱི་ཞབས་ཕྱི་དང༌། །གཟི་དཔལ་ཁོ་ཚོའི་བུ་རྒྱུད་རྣམས་ལ༌སྟོན།།
PSA 90:17 རང་རེའི་གཙོ་བོ་དཀོན་མཆོག་ཁོང་ཉིད༌ཀྱི། །གཟི་བྱིན་རང་ཅག་སྟེང་ལ་འབབ་གྱུར༌ཅིག །ངེད་རྣམས་ལག་གི་ལས་ཀ་གཏན་ཆགས༌མཛོད། །ལག་གི་ལས་ཀ་ཁྱེད་ཀྱིས་གཏན་ཆགས༌མཛོད།།
PSA 91:1 བླ་མེད་དཀོན་མཆོག་སྐྱབས་སུ་འགྲོ་མཁན༌ནི། །ཀུན་དབང་ཉིད་ཀྱི་གྲིབ་བསིལ་འོག་ཏུ༌སྡོད།།
PSA 91:2 ཡ་ཝཱེའི་སྐོར་ལ་བདག་གིས་འདི་ལྟར༌སྨྲ། །ཁོང་ནི་བདག་གི་སྐྱབས་གནས་རི་རྫོང༌དང༌། །ང་ཡི་དཀོན་མཆོག་ང་ཡི་རྟེན་གཞི༌ཡིན།།
PSA 91:3 ཁོང་གིས་ཁྱོད་རང་བྱ་པའི་རྙི་རྒྱ༌དང༌། །འཆི་བྱེད་རིམས་ནད་སོགས་ལས་སྐྱོབ་པར༌འགྱུར།།
PSA 91:4 ཁོང་གིས་ཉིད་ཀྱི་གཤོག་སྒྲོས་ཁྱོད་འགེབས༌ཤིང༌། །ཁོང་གི་འདབ་གཤོག་འོག་ཏུ་སྐྱབས་གནས༌རྙེད། །ཁོང་གི་བདེན་པ་ཕུབ་དང་ལྕགས་རི༌ཡིན།།
PSA 91:5 ཁྱོད་ནི་མཚན་མོའི་འཇིགས་སྣང་གང་ཞིག༌དང༌། །ཉིན་མོར་འཕུར་བའི་མདའ་ལ་སྐྲག་མི༌དགོས།།
PSA 91:6 ཡང་ན་མཚན་མོར་རྒྱུ་བའི་རིམས་ནད༌དང༌། །ཉིན་གུང་འཇོམས་བྱེད་ནད་ལའང་འཇིགས་མི༌དགོས།།
PSA 91:7 ཁྱོད་ཀྱི་ལོགས་སུ་མི་གྲངས་ཆིག་སྟོང༌དང༌། །གཡས་སུ་མི་གྲངས་ཆིག་ཁྲི་འགྱེལ་ན༌ཡང༌། །ཆག་སྒོ་དེ་ནི་ཁྱོད་ལ་ཐེབས་མི༌འགྱུར།།
PSA 91:8 མི་ངན་དག་ལ་ཉེས་ཆད་ཕོག་པ༌ནི། །ཁྱོད་ཀྱི་མིག་གིས་དངོས་སུ་མཐོང་བར༌འགྱུར།།
PSA 91:9 བདག་གི་སྐྱབས་གནས་ལགས་པའི་ཡ་ཝཱེ༌སྟེ། །བླ་ན་མེད་པའི་དཀོན་མཆོག་ཁོང་ཉིད༌ནི། །ཁྱོད་ཀྱིས་རང་གི་སྡོད་སའི་གནས་བྱས༌པས།།
PSA 91:10 ཁྱོད་ལ་བར་ཆད་གང་ཡང་འབྱུང་མི༌སྲིད། །གནོད་པ་ཁྱོད་ཀྱི་གུར་ལ་བཏུད་མི༌ནུས།།
PSA 91:11 ཁོང་གིས་ཉིད་ཀྱི་ཕོ་ཉར་བཀའ་གནང༌སྟེ། །བགྲོད་ལམ་ཀུན་ཏུ་ཁྱོད་རང་བསྲུང་བར༌འགྱུར།།
PSA 91:12 ཁྱོད་ཀྱི་རྐང་པ་རྡོ་ལ་མི་ཐོགས༌ཕྱིར། །ཕོ་ཉའི་ཕྱག་གིས་ཁྱོད་རང་འདེགས་པར༌བྱ།།
PSA 91:13 ཁྱོད་རང་སེང་གེ་དུག་སྦྲུལ་སྟེང་དུ༌སྤོ། །སེང་དར་དང་ནི་དུག་སྦྲུལ་བརྫི་བར༌བྱ།།
PSA 91:14 དཀོན་མཆོག་ཉིད་ཀྱིས་འདི་སྐད་གསུངས་པ༌སྟེ། །ཁོ་ནི་བདག་ལ་རྩེ་གཅིག་གིས་དུངས༌པས། །བདག་གིས་ཁོ་ནི་སྐྱོབ་པར་བྱེད་པ༌དང༌། །ཁོ་ཡིས་བདག་གི་མིང་ཡང་ཤེས་པས༌ན། །བདག་གིས་ཁོ་ནི་ནམ་ཡང་བསྲུང་བར༌འགྱུར།།
PSA 91:15 ཁོ་ཡིས་བདག་ལ་ཞུས་ན་ལན་འདེབས་ཤིང་། །དཀའ་སྡུག་ཁྲོད་དུ་ཁོ་དང་མཉམ་དུ༌ཡོད། །ཁོ་རང་བསྐྱབས་ནས་བཀུར་སྟི་འཐོབ་པར༌བྱ།།
PSA 91:16 བདག་གིས་ཁོ་ནི་ཚེ་ཐག་རིང་བར༌བྱ། །བདག་གི་ཐར་པ་ཁོ་ལ་སྟོན་པར༌བྱ།།
PSA 92:1 ༼ངལ་གསོ་བའི་ཉིན་མོའི་གསུང༌མགུར།༽ ཡ་ཝཱེར་གཏང་རག་འབུལ་བ༌དང༌། །བླ་ན་མེད་པའི་ཁྱེད་མཚན༌ལ། །བསྟོད་དབྱངས་འབུལ་བ་ཤིན་ཏུ༌ལེགས།།
PSA 92:2 རྒྱུད་བཅུའི་རོལ་ཆས་རྒྱུད་མངས༌དང༌། །པི་ཝང་བཅས་ཀྱི་དབྱངས་རྟ༌ཡིས། །ཞོགས་པར་ཁྱེད་ཀྱི་བྱམས་བརྩེ༌དང༌། །མཚན་མོར་ཉིད་ཀྱི་ཐུགས་དྲང༌པོར། །བསྟོད་པར་བྱེད་པ་འོས་སོ༌ལོ།།
PSA 92:4 ཡ་ཝཱེས་ཉིད་ཀྱི་འཕྲིན་ལས༌ཀྱིས། །ང་རང་དགའ་བར་བཅུག་པས༌ན། །ཁྱེད་ཀྱི་ཕྱག་གི་མཛད་པའི༌རྐྱེན། །ང་ཡིས་དགའ་འབོད་བྱེད་པར༌བྱ།།
PSA 92:5 ཀྱེ་ཀྱེ་ཡ་ཝཱེ་ཁྱེད་ཉིད༌ཀྱི། །འཕྲིན་ལས་ཇི་ལྟར་རླབས་ཆེ༌ཞིང༌། །ཁྱེད་ཀྱི་དགོངས་པ་རབ་ཏུ༌ཟབ།།
PSA 92:6 དུད་འགྲོ་ལྟ་བུས་མི་རྟོགས༌ཤིང༌། །གླེན་པ་རྣམས་ཀྱིས་གོ་བ༌མིན།།
PSA 92:7 མི་ངན་རྩྭ་སྔོན་བཞིན་དུ༌སྐྱེ། །སྡིག་སྤྱོད་ཐམས་ཅད་དར་ན༌ཡང༌། །ཁོ་ཚོ་གཏན་དུ་རྒུད་པར༌འགྱུར།།
PSA 92:8 ཡ་ཝཱེ་ཁྱེད་རང་གཅིག་པུ་ནི། །རྟག་ཏུ་བླ་ན་མཐོ་བ༌ཡིན།།
PSA 92:9 ཀྱེ་ཀྱེ་ཡ་ཝཱེ་ཁྱེད་ཉིད༌ཀྱི། །དགྲ་བོ་ཐམས་ཅད་རྩ་མེད༌འགྲོ། །སྡིག་སྤྱོད་ཅན་ཀུན་གཏོར་བར༌འགྱུར།།
PSA 92:10 འོན་ཀྱང་ང་ཡི་རྭ་དུང༌ནི། །གླང་རྒོད་རྭ་བཞིན་ཁྱེད་ཀྱིས༌བཏེགས། །གསར་ཐོན་སྣུམ་གྱིས་ང་རང༌བྱུགས།།
PSA 92:11 ང་ཡི་མིག་གིས་དགྲ་རྣམས༌ལ། །ངན་ལན་ཕོག་པ་མཐོང་བ༌དང༌། །ང་ལ་རྒོལ་བའི་མི་ངན༌ལ། །ཉེས་ཆད་ཕོག་པ་རྣ་ལམ༌ཐོས།།
PSA 92:12 གཞུང་དྲང་ཏ་ལའི་ཤིང་ལྟར༌རྒྱས། །ལེ་པཱ་ནོན་གྱི་ཐང་ཤིང༌བཞིན། །དེ་རྣམས་སྐྱེ་བར་འགྱུར་བ༌འོ།།
PSA 92:13 ཡ་ཝཱེའི་བཞུགས་གནས་སུ་བཙུགས༌ཤིང༌། །རང་ཅག་རྣམས་ཀྱི་དཀོན་མཆོག༌གི །ཁྱམས་རའི་ནང་དུ་དར་ཞིང༌རྒྱས།།
PSA 92:14 རྒས་པའི་དུས་ཀྱང་འབྲས་བུ༌བསྐྱེད། །རྩི་བཅུད་ལྡན་ཞིང་སྔོ་ལྗང༌ལྗང༌།།
PSA 92:15 དེ་ནི་ཡ་ཝཱེ་ཐུགས་དྲང༌ཞིང༌། །ཁོང་ངའི་བྲག་རི་ཡིན་པ༌དང༌། །ཁོང་གི་ནང་དུ་མ་རུངས་པ། །གང་ཡང་མེད་པ་སྒྲོག་ཕྱིར༌རོ།།
PSA 93:1 ཡ་ཝཱེས་སྲིད་སྐྱོང་གཟི་བྱིན་ན་བཟའ་གསོལ། །ཡ་ཝཱེས་མཐུ་ཡི་སྐ་རགས་ན་བཟའ༌གསོལ། །དེའི་ཕྱིར་འཇིག་རྟེན་མི་གཡོ་བརྟན་པོར༌གནས།།
PSA 93:2 གནའ་བོའི་དུས་ནས་ཁྱེད་ཀྱི་རྒྱལ་ཁྲི༌བརྟན། །ཐོག་མ་མེད་པའི་དུས་ནས་ཁྱེད་ཉིད༌བཞུགས།།
PSA 93:3 ཀྱེ་ཀྱེ་ཡ་ཝཱེ་ཆུ་བོ་ཆེན་པོ༌འཁྲུགས། །དེ་ཡིས་འུར་སྒྲ་བསྒྲགས་ཤིང་རྦ་རླབས༌བསླངས།།
PSA 93:4 ཆུ་བོའི་སྒྲ་དང་རྒྱ་མཚོའི་དྲག་རླབས༌ལས། །ཡ་ཝཱེ་མཐོ་ཞིང་མཐུ་སྟོབས་ལྡན་པ༌ལགས།།
PSA 93:5 ཡ་ཝཱེ་ཁྱེད་ཀྱི་སྒྲིག་ཁྲིམས་ཤིན་ཏུ༌བདེན། །ཁྱེད་ཀྱི་བཞུགས་གནས་གཏན་དུ་དམ་པ༌ཡིན། །དེ་བཞིན་རྟག་ཏུ་བསྔགས་པར་འོས་སོ༌ལོ།།
PSA 94:1 དགྲ་ཤ་ལེན་པའི་དཀོན་མཆོག་ཀྱེ་ཡ༌ཝཱེ། །དགྲ་ཤ་ལེན་པའི་དཀོན་མཆོག་འོད་སྣང༌མཛོད།།
PSA 94:2 ས་གཞིའི་ཁྲིམས་དཔོན་ཁྱེད་ཉིད་ཡར་བཞེང་མཛོད། །ང་རྒྱལ་ཅན་ཚོར་དགྲ་ལན་འོས་པ༌མཛོད།།
PSA 94:3 ཀྱེ་ཀྱེ་ཡ་ཝཱེ་ནམ་དུས་བར་དུ༌ནི། །མི་ངན་རྣམས་ཀྱིས་རྒྱལ་ཁ་ངོམ་བྱེད༌དམ།།
PSA 94:4 དེ་ཚོའི་ཁ་ནས་ང་རྒྱལ་གཏམ་རྡོལ༌ཞིང༌། །སྡིག་སྤྱོད་ཚང་མས་རང་མཐོང་སྐྱེད་བྱེད༌དོ།།
PSA 94:5 ཀྱེ་ཀྱེ་ཡ་ཝཱེ་ཁྱེད་ཀྱི་འབངས་མི༌ལ། །དེ་ཚོས་གཉའ་གནོན་བྱེད་ཅིང་ཁྱེད་ཉིད༌ཀྱི། །ནོར་སྐལ་ཡིན་པ་རྣམས་ལ་གནོད་འཚེ༌སྐྱེལ།།
PSA 94:6 དེ་ཚོས་ཡུགས་མོ་དང་ནི་བྱེས་པ༌གསོད། །ཕ་མེད་དྭ་ཕྲུག་རྣམས་ཀྱི་སྲོག་ཀྱང༌གཅོད།།
PSA 94:7 དེ་ཚོས་ཡ་ཝཱེས་མི་གཟིགས་ཡ་ཀོབ༌ཀྱི། །དཀོན་མཆོག་ཐུགས་སྣང་མི་མཛད་ཅེས༌སྨྲ་འོ།།
PSA 94:8 མི་སྡེའི་ནང་གི་གླེན་ཤོས་མནོ༌བསམ་ཐོངས། །བླུན་པོ་ཁྱོད་རྣམས་མཁས་པར་ནམ་འགྱུར༌རམ།།
PSA 94:9 རྣ་བ་མཛད་མཁན་ཁོང་གིས་མི་གསན༌ནམ། །མིག་གི་བྱེད་པོས་གཟིགས་པར་མི་འགྱུར༌རམ།།
PSA 94:10 མི་རིགས་ཀུན་ལ་འཇུན་མཁན་ཁོང་ཉིད༌ཀྱིས། །ཉེས་ཆད་གཅོད་པར་འགྱུར་བ་མ་ཡིན༌ནམ། །ཁོང་ཉིད་མི་ལ་རིག་པ་སློབ་མཁན༌ཡིན།།
PSA 94:11 ཡ་ཝཱེས་མི་ཡི་བསམ་ཚུལ་ཐམས་ཅད༌ནི། །སྟོང་པ་ཡིན་པ་མངོན་པར་མཁྱེན་པ༌ལགས།།
PSA 94:12 ཀྱེ་ཀྱེ་ཡ་ཝཱེ་ཁྱེད་ཀྱིས་འཇུན་བྱེད༌ཅིང༌། །བཀའ་ཁྲིམས་བསླབ་པའི་མི་དེ་བདེ་བ༌འོ།།
PSA 94:13 མི་ངན་ཕྱིར་དུ་དོང་བྲུས་ཚར་བའི༌བར། །དཀའ་སྡུག་ཉིན་མོར་ཁོ་རང་བདེ་བར༌བཀོད།།
PSA 94:14 ཡ་ཝཱེས་ཉིད་ཀྱི་འབངས་མི་སྤང་མི༌བྱ། །ཁོང་གི་ནོར་སྐལ་ནམ་ཡང་འདོར་མི༌འགྱུར།།
PSA 94:15 ཁྲིམས་གཅོད་དྲང་བདེན་ཕྱོགས་སུ་འཁོར་བ༌དང༌། །སེམས་རྒྱུད་དྲང་པོ་ཐམས་ཅད་དེའི་རྗེས༌འབྲང༌།།
PSA 94:16 སུ་ཞིག་ངའི་ཕྱིར་ལངས་ནས་མི་ངན༌རྒོལ། །སུ་ཞིག་ངའི་ཕྱིར་འགྲེང་ནས་སྡིག་སྤྱོད༌འགོག།
PSA 94:17 ཡ་ཝཱེས་ང་ལ་རོགས་རམ་མ་མཛད༌དུས། །སྔར་ནས་གྲགས་འགུལ་མེད་པའི་གནས་སུ༌ལུས།།
PSA 94:18 ང་རང་རྐང་འདྲེད་ཤོར་སོང་ཞུས་པའི༌ཚེ། །ཡ་ཝཱེ་ཁྱེད་ཀྱི་བྱམས་བརྩེས་ང་རང༌སྐྱོར།།
PSA 94:19 ང་ཡི་སེམས་ལ་སེམས་ཁྲལ་གང་དུས༌སུ། །ཁྱེད་ཀྱི་སེམས་གསོས་བདག་ལ་དགའ་སྤྲོ༌བསྩལ།།
PSA 94:20 རྒྱལ་ཁྲིམས་ཐབས་ཀྱིས་ཇུས་ངན་རྩོམ་མཁན༌གྱི། །ངན་པའི་ཁྲི་དང་ཁྱེད་ལ་འབྲེལ་བ༌ཅི།།
PSA 94:21 གཞུང་དྲང་སྲོག་ལེན་ཕྱིར་དུ་དེ་རྣམས༌འདུ། །ཉེས་མེད་རྣམས་ལ་སྲོག་ཆད་གཅོད་བྱེད༌དོ།།
PSA 94:22 འོན་ཀྱང་ཡ་ཝཱེ་ང་ཡི་བཙན་རྫོང༌ཡིན། །ང་ཡི་དཀོན་མཆོག་སྐྱབས་གནས་བྲག་རི༌ཡིན།།
PSA 94:23 དེ་ཚོའི་སྡིག་ཉེས་རང་རང་མགོ་ལ༌འབབ། །སྡིག་སྤྱོད་ཕྱིར་དུ་དེ་རྣམས་རྩ་མེད༌གཏོང༌། །རང་ཅག་དཀོན་མཆོག་ཡ་ཝཱེས་དེ་རྣམས༌འཇོམས།།
PSA 95:1 ཤོག་དང་ང་ཚོས་ཡ་ཝཱེར་བསྟོད་དབྱངས༌འབུལ། །རང་ཅག་སྐྱོབ་པའི་བྲག་རིར་དགའ་འབོད༌བྱེད།།
PSA 95:2 རང་ཅག་རྣམས་ཀྱིས་ཁོང་ལ་བཀའ་དྲིན༌ཞུ། །གླུ་སྐད་ཆེན་པོས་ཁོང་ལ་བསྔགས་བརྗོད༌བྱ།།
PSA 95:3 ཡ་ཝཱེ་ཁོང་ཉིད་དཀོན་མཆོག་ཆེན་པོ༌དང༌། །ལྷ་ཚོགས་ཀུན་ལས་བླ་ན་འཕགས་པ༌ཡི། །རྒྱལ་པོ་ཆེན་པོ་ངོ་མཚར་ཆེ་ཕྱིར༌རོ།།
PSA 95:4 ས་གཞིའི་ནང་སྙིང་ཁོང་གི་ཕྱག་ཏུ༌མཆིས། །རི་རྩེ་མཐོན་པོ་དག་ཀྱང་ཁོང་ལ༌དབང༌།།
PSA 95:5 རྒྱ་མཚོ་ཆེན་པོ་ཁོང་ལ་དབང་བ༌སྟེ། །དེ་ནི་ཁོང་གིས་དངོས་སུ་བསྐྲུན་པ༌ལགས། །སྐམ་ས་སོགས་ཀྱང་ཁོང་གི་ཕྱག་གིས༌མཛད།།
PSA 95:6 ཤོག་དང་ལུས་སར་བཏུད་ནས་ཕྱག་འཚལ༌བགྱི། །རང་ཅག་མཛད་མཁན་ཡ་ཝཱེའི་སྐུ་དྲུང་དུ། །པུས་མོ་ས་ལ་བཙུགས་ནས་ཕྱག་འཚལ་བགྱི། །
PSA 95:7 ཁོང་ཉིད་ང་ཚོའི་དཀོན་མཆོག་ཡིན་ལགས༌ཤིང༌། །རང་ཅག་ཁོང་གི་རྩྭ་ཁའི་ལུག་ཁྱུ༌དང༌། །ཁོང་གིས་བདག་སྐྱོང་མཛད་པའི་མི་ཡིན༌ཏེ། །དེ་རིང་ཁྱོད་ཚོས་ཁོང་གི་བཀའ་ཐོས་ན།།
PSA 95:8 ཉིན་མོ་དེ་ལ་མེ་རི་བཱ་ཡུལ༌ཏེ། །དབེན་སྟོང་ཡུལ་གྱི་མཱ་སཱར་བྱས་པ༌ལྟར། །ཁྱོད་ཚོས་སེམས་རྒྱུད་གྱོང་པོ་མ་བྱེད༌ཅིག།
PSA 95:9 ཁྱོད་ཚོའི་མེས་པོས་ང་ཡི་འཕྲིན་ལས༌མཐོང༌། །ཡིན་ཡང་ང་ལ་ཚོད་བགམ་བྱས་ཤིང༌བརྟག།
PSA 95:10 མི་རབས་དེ་ལ་བགྲང་བྱ་བཞི་བཅུའི༌རིང༌། །ང་རང་ཞེན་པ་ལོག་ཅིང་འདི་བཞིན༌དུ། །འདི་ནི་ལོག་ལམ་ཞུགས་པའི་འབངས་མི༌སྟེ། །བདག་གི་སྤྱོད་ལམ་མི་ཤེས་ཞེས་སུ༌སྨྲས།།
PSA 95:11 དེའི་ཕྱིར་བདག་ནི་ཁྲོས་ནས་དམ་བཅས་ཤིང༌། །ཁོ་རྣམས་བདག་གི་ངལ་གསོ་དེའི་ནང༌དུ། །གཏན་ནས་ཞུགས་པར་མི་བྱ་ཞེས་པ་འོ།།
PSA 96:1 ཀྱེ་ཀྱེ་ཁྱོད་ཚོས་ཡ་ཝཱེར་བསྟོད་དབྱངས་གསར་པ་ཕུལ། །ས་གཞི་ཡོངས་ཀྱིས་ཁོང་ལ་བསྟོད་དབྱངས་ཕུལ་ཞིག༌ཀྱེ།།
PSA 96:2 ཡ་ཝཱེར་བསྟོད་དབྱངས་ཕུལ་ནས་ཁོང་གི་མཚན་ལ༌བསྟོད། །ཉིན་ནས་ཉིན་དུ་ཁོང་གི་ཐར་པའི་འཕྲིན་བཟང༌སྒྲོགས།།
PSA 96:3 མི་རིགས་ཡོངས་ལ་ཁོང་གི་གཟི་བརྗིད་བསྒྲག་པར༌གྱིས། །མི་རྣམས་ཡོངས་ལ་ཁོང་གི་ངོ་མཚར་འཕྲིན་ལས༌སྒྲོགས།།
PSA 96:4 ཡ་ཝཱེ་ཆེན་པོ་ལས་ཀྱང་རབ་ཏུ་ཆེ་བའི༌ཕྱིར། །ཁོང་ལ་རྟག་ཏུ་བསྟོད་བསྔགས་ཆེན་པོ་བརྗོད་པར༌འོས། །ཁོང་ནི་ལྷ་ཚོགས་ལས་ཀྱང་བླ་ན་མཐོ་བས་ན། །མི་རིགས་ཐམས་ཅད་ཁོང་ལ་གུས་ཤིང་འཇིགས་འོས༌སོ།།
PSA 96:5 ཕྱི་ཕྱོགས་མི་ཡི་ལྷ་ནི་སྟོངས་ཤིང་སྟོང་པ་ཡིན། །ཡ་ཝཱེ་ཁོང་ཉིད་ཁོ་ནས་ནམ་མཁའ་དངོས་སུ༌བཀོད།།
PSA 96:6 ཁོང་གི་དྲུང་དུ་གཟི་དཔལ་དང་ནི་བརྗིད་ཉམས༌ཡོད། །ཁོང་གི་གནས་ཀྱི་མཆོག་ཏུ་མཐུ་དང་མཛེས་སྡུག༌ལྡན།།
PSA 96:7 ཀྱེ་ཀྱེ་མི་རིགས་ཀུན་གྱི་ཁྱིམ་རྒྱུད་ཐམས་ཅད༌ཀྱིས། །གཟི་བརྗིད་དང་ནི་མཐུ་སྟོབས་ཡ་ཝཱེར་འབུལ་བར༌ཤོག།
PSA 96:8 ཡ་ཝཱེའི་མཚན་ལ་འབྱོར་བའི་གཟི་བརྗིད་ཁོང་ལ༌ཕུལ། །མཆོད་རྫས་བཟུང་ནས་ཁོང་གི་ར་བར་སོང་ཞིག༌ཀྱེ།།
PSA 96:9 དམ་པའི་གཟི་རྔམ་དང་བཅས་ཁོང་ལ་བསྟོད་པར༌ཤོག །ས་གཞི་ཡོངས་ནི་ཁོང་གི་དྲུང་དུ་གཡོ་བར༌གྱིས།།
PSA 96:10 མི་རིགས་རྣམས་ཀྱི་ཁྲོད་དུ་འདི་ལྟར་སྨྲ་བར་གྱིས། །དཀོན་མཆོག་ཡ་ཝཱེ་ཁོང་གིས་རྒྱལ་སྲིད་སྐྱོང་བས་ན། །འཇིག་རྟེན་བརྟན་པོར་ཚུགས་ཤིང་དེ་ལ་གཡོ་བ༌མེད། །ཁོང་གིས་ཕྱོགས་རིས་མེད་པའི་ཁྲིམས་ཐག་གཅོད་ཅེས༌སོ།།
PSA 96:11 ནམ་མཁའ་དང་ནི་ས་གཞི་དགའ་ཞིང་སྤྲོ་བར༌ཤོག །རྒྱ་མཚོ་དང་ནི་དེའི་ནང་ཡོངས་སུ་ཁེངས་པ༌ཡིས། །ང་རོའི་སྐད་སྒྲ་སིང་སིང་བསྒྲག་པར་གྱུར་ཅིག༌གུ།
PSA 96:12 ས་ཞིང་དང་བཅས་ཐམས་ཅད་དགའ་ཞིང་སྤྲོ་བར༌ཤོག །ནགས་ཚལ་ཐམས་ཅད་ཁོང་གི་དྲུང་དུ་དགའ་འབོད༌བྱེད།།
PSA 96:13 དེ་ནི་ཁྲིམས་ཐག་གཅོད་པར་ཁོང་ཉིད་ཕེབས་པའི༌ཕྱིར། །འཇིག་རྟེན་ཡོངས་ལ་བདེན་པའི་དཔྱད་ཁྲ་གཏོང་བ༌དང༌། །མི་རྣམས་ཡོངས་ལ་ཁྲིམས་ཐག་ཡང་དག་གཅོད་པར༌འགྱུར།།
PSA 97:1 ཡ་ཝཱེས་རྒྱལ་སྲིད་སྐྱོང་བས་ས་གཞི་སྐྱིད་པར༌གྱིས། །གླིང་ཕྲན་རྣམས་ཀྱི་ཚོགས་ཀྱང་དགའ་ཞིང་སྤྲོ་བར༌ཤོག།
PSA 97:2 ཁོང་གི་མཐའ་འཁོར་སྤྲིན་དང་སྨག་རུམ་གྱིས་བསྐོར༌ཞིང༌། །དྲང་གཞག་འདྲ་མཉམ་ཁོང་གི་རྒྱལ་ཁྲིའི་གཞི་རྩ༌ཡིན།།
PSA 97:3 ཁོང་གི་སྔོན་དུ་མེ་ཞིག་འགྲོ་བར་བྱེད་པ༌དང༌། །ཉིད་ཀྱི་ཕྱོགས་བཞིའི་དགྲ་རྣམས་བསྲེགས་ནས་རྩ་མེད༌གཏོང༌།།
PSA 97:4 ཁོང་གི་གློག་གིས་འཇིག་རྟེན་འོད་དུ་འཁྱེར་བ༌དང༌། །ས་གཞིས་དེ་ཉིད་མཐོང་སྟེ་འདར་ཞིང་གཡོ་བ༌ཡིན།།
PSA 97:5 ས་གཞི་ཡོངས་ཀྱི་བདག་པོ་ཡ་ཝཱེའི་སྤྱན་དྲུང༌དུ། །རི་བོ་རྣམས་ཀྱང་སྤྲ་ཚིལ་བཞིན་དུ་བཞུས་པ༌ཡིན།།
PSA 97:6 ནམ་མཁའི་དབྱིངས་རྣམས་ཁོང་གི་དྲང་བདེན་སྒྲོག་པ༌དང༌། །མི་སྡེ་ཀུན་གྱིས་ཁོང་གི་གཟི་བྱིན་མཐོང་བ༌འོ།།
PSA 97:7 སྙིང་པོ་མེད་པའི་སྐུ་འདྲ་ངོམ་པར་བྱེད་པ༌དང༌། །བརྐོས་སྐུ་རྣམས་ལ་སྟེན་མཁན་མི་རྣམས་སྐྱེངས་པར༌ཤོག །ལྷ་ཡི་ཚོགས་རྣམས་ཁོང་ལ་བཏུད་ཅིང་ཕྱག་འཚལ༌བགྱིས།།
PSA 97:8 ཀྱེ་ཀྱེ་ཡ་ཝཱེ་ཁྱེད་ཀྱི་ཁྲིམས་གཅོད་ཐོས་ནས༌ནི། །ཛ་ཡན་དགའ་ཞིང་ཡ་ཧུ་དཱ་ཡི་སྡེ་རྣམས༌སྐྱིད།།
PSA 97:9 ཡ་ཝཱེ་ཁྱེད་ཉིད་ས་གཞི་ཀུན་ཏུ་བླ་ན་མེད། །ལྷ་ཡི་ཚོགས་ལས་ཁྱེད་ཉིད་ཤིན་ཏུ་མཐོ་བས༌སོ།།
PSA 97:10 ཡ་ཝཱེར་དགའ་བ་ཁྱོད་རྣམས་ངན་པར་སྡང་འོས༌ཤིང༌། །ཁོང་གིས་ཉིད་ཀྱི་དད་ལྡན་རྣམས་ཀྱི་སེམས་སྲུང༌ཞིང༌། །དེ་རྣམས་ངན་པའི་ལག་ནས་སྐྱོབ་ཅིང་ཐར་བར༌མཛད།།
PSA 97:11 དྲང་བདེན་རྣམས་ཀྱི་དོན་དུ་འོད་ཟེར་འཕྲོ་བ་དང༌། །གཞུང་དྲང་རྣམས་ཀྱི་ཕྱིར་དུ་དགའ་སྤྲོ་སྟ་གོན༌མཛད།།
PSA 97:12 དྲང་བདེན་རྣམས་ནི་ཡ་ཝཱེའི་ནང་དུ་དགའ་བར༌ཤོག །ཁོང་གི་དམ་པའི་མཚན་ལ་གཏང་རག་འབུལ་བར༌གྱིས།།
PSA 98:1 ༼མགུར༌མ་ཞིག༽ ཡ་ཝཱེས་ངོ་མཚར་རྨད་བྱུང་དོན་རྣམས༌མཛད། །ཕྱག་གཡས་དང་ནི་དཔུང་ངར་དམ་པ༌ཡིས། །ཉིད་ཀྱི་ཕྱིར་དུ་ཐར་ལམ་མཛད་པས༌ན། །ཁོང་ལ་མགུར་གླུ་གསར་པ་འབུལ་བར༌གྱིས།།
PSA 98:2 ཡ་ཝཱེས་ཉིད་ཀྱི་ཐར་པ་སྟོན་མཛད༌ཅིང༌། །མི་རིགས་ཀུན་གྱི་མཐོང་ངོར་དྲང་བདེན༌མངོན།།
PSA 98:3 ཁོང་གིས་ཡེས་ར་ཨེལ་པར་བསྟན་པ༌ཡི། །བྱམས་བརྩེ་དང་ནི་དྲང་བདེན་ཐུགས་སུ༌དྲན། །ས་མཐའ་ཀུན་གྱིས་རང་ཅག་དཀོན་མཆོག༌གི །ཐར་པ་དེ་ནི་མཐོང་བར་འགྱུར་བ༌འོ།།
PSA 98:4 ས་གཞི་ཡོངས་ཀྱིས་ཡ་ཝཱེར་དགའ་འབོད༌བྱེད། །སྐད་གསང་མཐོན་པོས་དགའ་སྤྲོའི་བསྟོད་དབྱངས༌འབུལ།།
PSA 98:5 པི་ཝང་དང་བཅས་ཡ་ཝཱེར་བསྟོད་དབྱངས༌ཕུལ། །པི་ཝང་གླུ་སྐད་བཅས་ཀྱིས་ཁོང་ལ༌བསྟོད།།
PSA 98:6 དུང་དང་རྭ་དུང་གཉིས་ཀྱི་སྐད་སྒྲ༌ཡིས། །རྒྱལ་ཆེན་ཡ་ཝཱེའི་དྲུང་དུ་དགའ་འབོད༌བྱེད།།
PSA 98:7 རྒྱ་མཚོ་དང་ནི་དེའི་ནང་ཡོད་པ༌དང༌། །འཇིག་རྟེན་དང་ནི་དེ་རུ་ཆགས་པ༌སོགས། །ཀུན་གྱིས་ང་རོའི་སྐད་སྒྲ་བསྒྲག་གྱུར༌ཅིག།
PSA 98:8 གཙང་པོ་རྣམས་ཀྱིས་ཐལ་མོ་བརྡབ་པ༌དང༌། །རི་བོ་རྣམས་ཀྱིས་ལྷན་ཅིག་དགའ་འབོད༌གྱིས།།
PSA 98:9 ཀུན་གྱིས་ཡ་ཝཱེའི་དྲུང་དུ་དགའ་འབོད༌གྱིས། །ས་གཞིར་ཁྲིམས་ཐག་གཅོད་དུ་ཁོང་ཕེབས༌ཡོང༌། །འཇིག་རྟེན་ལ་ནི་དྲང་པོའི་དཔྱད་ཁྲ༌གཏོང༌། །མི་སྡེ་རྣམས་ལ་ཁྲིམས་གཅོད་དྲང་གཞག༌མཛད།།
PSA 99:1 ཡ་ཝཱེས་སྲིད་དབང་བཟུང་བས་མི་སྡེ་འདར་ཞིག་ཨང་། །ས་གཞི་གཡོས་དང་ཁོང་ཉིད་ཀེ་རུབ་སྟེང་དུ༌བཞུགས།།
PSA 99:2 ཛ་ཡན་ཡུལ་དུ་ཡ་ཝཱེ་ཆེན་པོ་ཡིན་ལགས༌ཤིང༌། །མི་སྡེ་ཡོད་དོ་ཅོག་ལས་ཁོང་ཉིད་རབ་ཏུ༌མཐོ།།
PSA 99:3 དེ་ཚོས་ཁོང་གི་མཆོག་ཏུ་གྱུར་ཅིང་གུས་འོས་པའི། །མཚན་ལ་བསྟོད་པར་འོས་ཏེ་ཁོང་ཉིད་དམ་པ༌ལགས།།
PSA 99:4 རྒྱལ་པོར་མཐུ་སྟོབས་ལྡན་ཞིང་དྲང་བདེན་ལ་དགྱེས༌ཤིང༌། །ཁྱེད་ཀྱིས་དྲང་གཞག་བརྟན་པོར་གནས་པར་མཛད་པ༌དང༌། །ཡ་ཀོབ་ཁྱིམ་དུ་དྲང་གཞག་དྲང་བདེན་ལག་ལེན༌བཏབ།།
PSA 99:5 ཁྱོད་ཚོས་ངེད་ཀྱི་དཀོན་མཆོག་ཡ་ཝཱེར་བསྟོད་པར༌གྱིས། །དམ་པ་ཉིད་ཀྱི་ཞབས་སྟེགས་དྲུང་དུ་ཕྱག་ཕུལ༌ཞིག།
PSA 99:6 ཁོང་གི་མཆོད་དཔོན་ཁྲོད་དུ་མོ་ཤེ་ཨ་རོན༌ཡོད། །ཁོང་མཚན་ཞུ་མཁན་གྲས་སུ་སཱ་མུ་ཨེལ་ཡོད༌ཅིང༌། །དེ་ཚོས་ཡ་ཝཱེར་ཞུས་པས་ཁོང་གིས་བཀའ་ལན༌གནང༌།།
PSA 99:7 སྤྲིན་གྱི་ཀ་བའི་ནང་དུ་ཁོ་ཚོར་གསུང་གླེང༌མཛད། །དཔང་ཡིག་སྒྲིག་ཁྲིམས་གནང་བ་དེ་ཚོས་བསྲུངས་པ༌ཡིན།།
PSA 99:8 ཀྱེ་ཀྱེ་དཀོན་མཆོག་ཡ་ཝཱེ་ང་ཚོའི་དཀོན་མཆོག༌ལགས། །ཁྱེད་ཀྱིས་དེ་ཚོར་བཀའ་ལན་གནང་བར་མཛད་པ༌དང༌། །དེ་ཚོར་ཅི་བྱས་བཞིན་དུ་ཉེས་ཆད་བཅད༌ན་ཡང་། །ཁྱེད་ཉིད་མི་ལ་སྡིག་སེལ་གནང་བའི་དཀོན་མཆོག༌ཡིན།།
PSA 99:9 ཁྱོད་ཚོས་ངེད་ཀྱི་དཀོན་མཆོག་ཡ་ཝཱེར་བསྟོད་པར༌གྱིས། །ངེད་ཀྱི་དཀོན་མཆོག་ཡ་ཝཱེ་དམ་པ་ཡིན་པས༌ན། །ཁྱོད་ཚོས་ཁོང་གི་རི་བོ་དམ་པར་ཕྱག་ཕུལ༌ཞིག།
PSA 100:1 ༼གཏང་རག་འབུལ་བའི་གསུང༌མགུར།༽ གནམ་འོག་ཀུན་གྱིས་ཡ་ཝཱེར་དགའ་འབོད༌གྱིས།།
PSA 100:2 དགའ་སྣང་དང་བཅས་ཡ་ཝཱེར་ཞབས་ཏོག༌སྒྲུབས། །དགའ་སྤྲོའི་མགུར་མ་ལེན་བཞིན་ཁོང་དྲུང༌ཤོག།
PSA 100:3 ཡ་ཝཱེ་དཀོན་མཆོག་ལགས་པ་ཤེས་གྱུར༌ཅིག །རང་ཅག་ཁོང་གིས་མཛད་ཅིང་ཁོང་ལ༌གཏོགས། །ཁོང་གི་རྩྭ་ཁའི་ལུག་དང་མི་སྡེ་ཡིན།།
PSA 100:4 བཀའ་དྲིན་དྲན་བཞིན་ཁོང་གི་རྒྱལ་སྒོ༌དང༌། །བསྟོད་པ་དང་བཅས་ཁོང་གི་ཁྱམས་རར༌ཞུགས། །གཏང་རག་འབུལ་ཞིང་ཁོང་གི་མཚན་ལ༌བསྟོད།།
PSA 100:5 ཡ་ཝཱེ་ཡོངས་སུ་ལེགས་ཤིང་ཁོང་ཉིད༌ཀྱི། །བྱམས་དང་བརྩེ་བ་རྒྱུན་ནས་རྒྱུན་དུ༌གནས། །ཁོང་གི་དྲང་བདེན་མི་རབས་ཀུན་ལ༌གནས།།
PSA 101:1 ༼དཱ་བིད་ཀྱི་མགུར་མ།༽ བྱམས་བརྩེ་དྲང་བདེན་མགུར་གླུ་ང་ཡིས༌ལེན། །ཀྱེ་ཀྱེ་ཡ་ཝཱེ་ཁྱེད་ལ་བསྟོད་དབྱངས༌འབུལ།།
PSA 101:2 མཁས་མཛངས་ཐབས་ཀྱིས་སྐྱོན་བྲལ་ལམ་དུ༌སྤྱོད། །ང་རང་ནམ་ཞིག་ཡོངས་སུ་རྫོགས་འགྱུར༌རམ། །རང་གི་ཁྱིམ་དུ་གཞུང་དྲང་སེམས་ཀྱིས༌འགྲུལ།།
PSA 101:3 ཕན་མེད་དོན་རྣམས་མིག་མདུན་འཇོག་པ༌མིན། །ཕྱིན་ལོག་རྣམས་ཀྱི་ལས་ལ་ང་རང༌སྡང༌། །དེ་དག་ང་ལ་འགོས་པར་ཡེ་མི༌བྱ།།
PSA 101:4 གཡོ་སྒྱུའི་སེམས་ལ་ང་རང་རྒྱང་འགྱེད༌ཅིང༌། །ངན་པའི་ལས་ལ་ང་རང་ཞུགས་མི༌འགྱུར།།
PSA 101:5 ལྐོག་ནས་རང་གི་ཁྱིམ་མཚེས་རྣམས་ལ༌ནི། །གཏམ་ངན་གཏོང་མཁན་བདག་གིས་ཚར་གཅོད༌ཅིང༌། །ཁེངས་དྲེགས་མིག་ཅན་ང་རྒྱལ་སེམས་བཅངས༌པ། །སུ་ཡང་བདག་གིས་བཟོད་པར་མི་འགྱུར༌རོ།།
PSA 101:6 ངའི་མཉམ་ཡུལ་མི་དྲང་པོ་རྣམས་གནས༌ཕྱིར། །ང་ཡི་མིག་གིས་དེ་ཚོར་བལྟ་བར༌བྱ། །སྤྱོད་པ་སྐྱོན་བྲལ་རྣམས་ཀྱིས་ངའི་གཡོག༌བྱེད།།
PSA 101:7 གཡོ་སྒྱུའི་སྦྱོར་བ་སྤེལ་མཁན་སུ་ཡིན༌ཡང༌། །བདག་གི་ཁྱིམ་དུ་གནས་པར་མི་བྱ༌ཞིང༌། །རྫུན་གཏམ་སྨྲ་བ་ངའི་མདུན་ཚུགས་མི༌ཐུབ།།
PSA 101:8 ནངས་རེར་ཡུལ་གྱི་ངན་པ་ཐམས་ཅད༌འཇོམས། །ཡ་ཝཱེའི་གྲོང་ནས་སྡིག་སྤྱོད་འཕྲལ་ཕྱིར༌རོ།།
PSA 102:1 ༼མི་ཉམ་ཆུང་གིས་དཀོན་མཆོག་ཡ་ཝཱེའི་དྲུང་དུ་རང་གི་སྡུག་བསྔལ་ལྷུག་པོར་ཞུ་བའི་སྨོན༌ལམ།༽ ང་ཡི་སྨོན་ལམ་གསན་མཛོད་ཀྱེ་ཡ༌ཝཱེ། །བདག་གི་ཞུ་བ་ཁྱེད་དྲུང་བསླེབ་པར༌ཤོག།
PSA 102:2 ང་རང་དཀའ་སྡུག་འཕྲད་པའི་ཉིན་མོ༌ལ། །ཁྱེད་ཀྱི་ཞལ་རས་ང་ལ་མི་སྦེད༌རོགས། །བདག་གིས་འབོད་དུས་ཁྱེད་ཀྱིས་སྙན་གཏད་ནས། །མྱུར་དུ་ང་ལ་བཀའ་ལན་གནང་དུ༌གསོལ།།
PSA 102:3 ང་ཡི་མི་ཚེ་དུ་བ་ནང་བཞིན༌ཡལ། །བདག་གི་རུས་པ་བུད་ཤིང་ལྟར་དུ་འཚིག།
PSA 102:4 ངའི་སེམས་བསྣད་ཅིང་རྩྭ་ལྟར་བསྐམས་ནས༌ནི། །ཐ་ན་རང་གི་ཁ་ཟས་སྤྱོད་པའང༌བརྗེད།།
PSA 102:5 བདག་གིས་འཁུན་སྒྲ་ཕྱུང་བའི་རྐྱེན་དབང༌གིས། །ང་ཡི་ལུས་ཕུང་ཤ་ཟད་རུས་པར༌ཐུག།
PSA 102:6 ང་ནི་དབེན་སྟོང་ཡུལ་གྱི་འུག་ཆུང༌དང༌། །ཞིག་རལ་གནས་ཀྱི་འུག་པ་ལྟ་བུ༌ཡིན།།
PSA 102:7 ང་རང་མལ་དུ་ཉལ་ཡང་གཉིད་མི༌ཁུག །ཁང་ཐོག་ལུས་པའི་བྱེའུ་ཆུང་ཁེར་རྐྱང༌བཞིན།།
PSA 102:8 དགྲ་ཚོས་ཉིན་གང་ང་ལ་དམའ་འབེབ༌བྱེད། །སྨྱོས་པ་བཞིན་དུ་ང་ལ་རྒོལ་བ༌ཚོས། །བདག་གི་མིང་ནས་ང་ལ་དམོད་པ༌གཏོང༌།།
PSA 102:9 ང་ཡིས་གོ་ཐལ་ཟས་སུ་སྤྱད་པ༌དང༌། །མཆི་མ་འདྲེས་པའི་བཏུང་བྱ་འཐུང་བ་ཡིན།།
PSA 102:10 དེ་ནི་ཉིད་ཀྱི་ཐུགས་ཁྲོ་གཏུམ༌དྲག་རྐྱེན། །ཁྱེད་ཀྱིས་ང་རང་བཀྱགས་ཏེ་ས་རུ༌འཕངས།།
PSA 102:11 ང་ཡི་མི་ཚེ་ནུབ་ཁའི་ཉི་མ༌འདྲ། །ང་ནི་རྩྭ་དང་འདྲ་བར་བསྐམས་གྱུར༌ཏོ།།
PSA 102:12 ཡ་ཝཱེ་ཁྱེད་ཉིད་གཅིག་པུ་རྟག་ཏུ༌བཞུགས། །ཁྱེད་མཚན་མི་རབས་ཀུན་ཏུ་གནས་པར༌འགྱུར།།
PSA 102:13 ཛ་ཡན་ཡུལ་ལ་སྙིང་རྗེ་བསྐྱེད་པ༌ཡི། །ཐུགས་ཐག་བཅད་པའི་དུས་སུ་སླེབས་པས༌ན། །ཁྱེད་རང་ཡར་ལ་བཞེངས་ནས་སྙིང་རྗེ༌མཛོད།།
PSA 102:14 ཁྱེད་ཀྱི་ཞབས་ཕྱི་དེ་ཡི་རྡོ་ལ༌དགའ། །དེ་ཡི་རྡུལ་ཕྲན་ལ་ཡང་སྙིང་རྗེ༌བསྐྱེད།།
PSA 102:15 མི་རིགས་རྣམས་ནི་ཡ་ཝཱེའི་མཚན་ལ༌དང༌། །ས་གཞིའི་རྒྱལ་པོ་ཐམས་ཅད་ཁོང་ཉིད༌ཀྱི། །གཟི་བྱིན་ལ་ནི་གུས་ཤིང་འཇིགས་བྱེད༌དེ།།
PSA 102:16 ཅི་ལ་ཞེ་ན་ཡ་ཝཱེས་ཛ་ཡན༌བརྩིགས། །ཉིད་ཀྱི་གཟི་བྱིན་ནང་དུ་མངོན་པར༌མཛད།།
PSA 102:17 དབུལ་ཕོངས་རྣམས་ཀྱི་གསོལ་བར་གསན་པ༌དང༌། །དེ་ཚོའི་སྨོན་ལམ་སྣང་མེད་མ་བསྐྱུར༌ཏོ།།
PSA 102:18 ཕྱིས་འབྱུང་མི་རབས་ཕྱིར་དུ་ཡི་གེར༌འགོད། །འབྱུང་འགྱུར་མི་སྡེ་རྣམས་ཀྱིས་ཡ་ཝཱེར༌བསྟོད།།
PSA 102:19 ཡ་ཝཱེས་དམ་པའི་གནས་ཀྱི་མཐོ་ས༌ནས། །མར་ལ་གཟིགས་ཤིང་གནམ་ནས་ས་གཞིར༌གཟིགས།།
PSA 102:20 དེ་ནི་བཙོན་པའི་ཤུགས་རིང་གསན་པ༌དང༌། །འཆི་ཁའི་མི་རྣམས་བསྒྲལ་བའི་ཕྱིར་ཡིན༌ཏེ།།
PSA 102:21 ཛ་ཡན་ཡུལ་དུ་ཡ་ཝཱེའི་མཚན་བརྗོད༌ཅིང༌། །ཡེ་རུ་སཱ་ལེམ་ཡུལ་དུ་ཁོང་ལ༌བསྟོད།།
PSA 102:22 མི་སྡེ་རྒྱལ་ཁམས་ཀུན་པོ་ལྷན་འཛོམས༌ཏེ། །ཡ་ཝཱེར་བསྙེན་བཀུར་འབུལ་དུས་དེ་བཞིན༌འབྱུང༌།།
PSA 102:23 དར་མའི་དུས་སུ་ངའི་སྟོབས་ཉམས་མཛད༌ཅིང༌། །བདག་གི་མི་ཚེ་ཁོང་གིས་ཐུང་ངུར༌མཛད།།
PSA 102:24 དེའི་ཕྱིར་བདག་གིས་ཁོང་ལ་འདི་སྐད༌ཞུས། །ཀྱེ་ཀྱེ་ང་ཡི་དཀོན་མཆོག་ཁྱེད་ཉིད༌ཀྱིས། །ང་རང་དར་མ་ཡིན་དུས་འཁྱེར་མ༌འགྲོ། །ཁྱེད་ཀྱི་ལོ་ཟླ་མི་རབས་ཀུན་ཏུ༌གནས།།
PSA 102:25 ཁྱེད་ཀྱིས་ཐོག་མར་ས་གཞིའི་རྨང་བཏིངས༌ཤིང༌། །ནམ་མཁའ་ཁྱེད་ཀྱི་ཕྱག་གིས་བཀོད་པ༌ཡིན།།
PSA 102:26 གནམ་ས་འཇིག་ཀྱང་ཁྱེད་ནི་རྟག་ཏུ༌བཞུགས། །གནམ་དང་ས་ནི་གོས་ལྟར་རྙིང་པར༌འགྱུར། །གནམ་ས་གོས་བཞིན་བརྗེས་པས་དེ་རྣམས༌ཡལ།།
PSA 102:27 ཁྱེད་ཉིད་ཁོ་ན་ནམ་ཡང་འགྱུར་བ༌མེད། །ཁྱེད་ཀྱི་ལོ་ཟླ་འཛད་མཐའ་མེད་པ༌ཡིན།།
PSA 102:28 ཁྱེད་ཀྱི་ཞབས་ཕྱིའི་བུ་རྣམས་རྟག་ཏུ༌གནས། །ཁོ་ཚོའི་བུ་རྒྱུད་ཁྱེད་དྲུང་བརྟན་པོར༌ཚུགས།།
PSA 103:1 ༼དཱ་བིད་ཀྱི་མགུར་མ།༽ ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད། །ང་ཡི་སེམས་སུ་ཅི་ཡོད་ཐམས་ཅད༌ཀྱིས། །ཁོང་གི་དམ་པའི་མཚན་ལ་བསྟོད་པར༌ཤོག །
PSA 103:2 ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད། །ཁོང་གི་བཀའ་དྲིན་མཐའ་དག་བརྗེད་མི༌རུང༌།།
PSA 103:3 ཁོང་གིས་ཁྱོད་ཀྱི་སྡིག་ཉེས་ཀུན་སེལ༌ཞིང༌། །ཁྱོད་ཀྱི་ནད་གཞི་ཐམས་ཅད་གསོ་བར༌མཛད།།
PSA 103:4 ཁྱོད་ཀྱི་ཚེ་སྲོག་འཆི་བ་ལས་བསྐྱབས༌ཤིང༌། །བྱམས་བརྩེ་ཐུགས་རྗེའི་ཅོད་པན་ཁྱོད་ལ༌བསྐོན།།
PSA 103:5 ཁྱོད་ཀྱི་འདོད་པ་ཡིད་འོང་རྫས་ཀྱིས༌བསྐངས། །ཁྱོད་རང་གླག་ལྟར་སླར་ཡང་གཞོན་པར༌མཛད།།
PSA 103:6 གཉའ་གནོན་འོག་གི་མི་ལ་དཀར་འདོན༌ཕྱིར། །ཡ་ཝཱེས་དྲང་བདེན་ངང་ནས་འཕྲིན་ལས༌མཛད།།
PSA 103:7 ཉིད་ཀྱི་གཤེགས་ལམ་རྣམས་ནི་མོ་ཤེ༌དང༌། །ཁོང་གི་འཕྲིན་ལས་ཡེས་ར་ཨེལ་པར༌བསྟན།།
PSA 103:8 ཡ་ཝཱེར་སྙིང་རྗེ་ཆེ་ཞིང་ཐུགས་རྗེ༌ལྡན། །རང་དགར་མི་ཁྲོ་བྱམས་བརྩེ་ཕུན་སུམ༌ཚོགས།།
PSA 103:9 ཡུན་རིང་མི་བཀྱོན་རྟག་ཏུ་ཁྲོ་བའང༌མིན།།
PSA 103:10 ང་ཚོའི་སྡིག་པ་བཞིན་དུ་མཛད་མ༌བྱུང༌། །རང་ཅག་ཉེས་པར་འོས་པའི་ལན་མ༌གནང༌།།
PSA 103:11 ས་ལས་ནམ་མཁའ་ཇི་ལྟར་མཐོ་བ༌བཞིན། །ཁོང་ལ་གུས་ཤིང་འཇིགས་པའི་མི་རྣམས༌ལ། །ཁོང་གི་བྱམས་བརྩེ་ཡང་ནི་དེ་བཞིན༌ཆེ།།
PSA 103:12 ཤར་ནུབ་རྒྱང་ཐག་ཅི་ཙམ་རིང་བ༌བཞིན། །ང་ཚོའི་ཉེས་སྐྱོན་དེ་ལྟར་རིང་དུ༌མཛད།།
PSA 103:13 ཕ་ཡིས་བུ་ལ་སྙིང་རྗེ་བསྐྱེད་པ༌བཞིན། །ཡ་ཝཱེར་གུས་ཤིང་འཇིགས་པའི་མི་རྣམས༌ལ། །ཁོང་གིས་དེ་བཞིན་སྙིང་རྗེས་གཟིགས་པ༌ཡིན།།
PSA 103:14 ང་ཚོ་ཇི་ལྟར་གྲུབ་པ་ཁོང་གིས༌མཁྱེན། །ས་རྡུལ་ཙམ་ལས་མ་འདས་ཁོང་གིས༌དྲན།།
PSA 103:15 འཇིག་རྟེན་མི་ཡི་ལོ་ཟླ་རྩྭ་དང༌འདྲ། །ཐང་གི་མེ་ཏོག་བཞིན་དུ་སྐྱེས་ན༌ཡང༌།།
PSA 103:16 དེ་ལ་ལྷགས་པ་བརྒྱབ་པས་ཡལ་གྱུར༌ཅིང༌། །དེ་ཡི་ཤུལ་གྱིས་དེ་ནི་དྲན་མི༌འགྱུར།།
PSA 103:17 འོན་ཀྱང་ཡ་ཝཱེའི་བྱམས་བརྩེ་དུས་རྒྱུན༌དུ། །ཁོང་ལ་གུས་ཤིང་འཇིགས་པའི་མི་ལ༌ཡོད། །ཁོང་གི་དྲང་བདེན་མི་རབས་ཕྱི་མར༌གནས།།
PSA 103:18 ཁོང་གི་ཞལ་ཆད་སྲུང་ཞིང་བཀའ་སློབ༌བཞིན། །སྤྱད་པ་སྤྱོད་པ་དྲན་པའི་མི་རྣམས༌སོ།།
PSA 103:19 ཡ་ཝཱེས་ནམ་མཁར་རྒྱལ་ཁྲི་བརྟན་པོར༌མཛད། །ཉིད་ཀྱི་དབང་གིས་ཀུན་ལ་སྲིད་མཛད༌དོ།།
PSA 103:20 ཁོང་གི་བཀའ་ལ་ཉན་ཞིང་དེ་སྒྲུབ༌པའི། །མཐུ་ལྡན་ཕོ་ཉ་ཀུན་གྱིས་ཡ་ཝཱེར༌བསྟོད།།
PSA 103:21 ཀྱེ་ཀྱེ་ཡ་ཝཱེའི་དཔུང་ཚོགས་ཡོད་དོ༌ཅོག །ཁོང་གི་ཐུགས་དགོངས་བཞིན་དུ་སྒྲུབ་པའི༌བྲན། །ཁྱོད་ཅག་ཀུན་གྱིས་ཡ་ཝཱེར་བསྟོད་གྱུར༌ཅིག།
PSA 103:22 ཡ་ཝཱེས་འགོད་པར་མཛད་པ་ཐམས་ཅད༌ཀྱིས། །ཁོང་གི་མངའ་འོག་ཀུན་ཏུ་ཁོང་ལ༌བསྟོད། །ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད།།
PSA 104:1 ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད། །ང་ཡི་དཀོན་མཆོག་ཡ་ཝཱེ་ཤིན་ཏུ༌ཆེ། །ཁྱེད་ཀྱིས་དཔལ་དང་གཟི་བྱིན་ན་བཟའ་གསོལ།།
PSA 104:2 འོད་ཟེར་ན་བཟའ་བཞིན་དུ་གསོལ་བ༌དང༌། །ནམ་མཁའི་དབྱིངས་རྣམས་གུར་བཞིན་ཐར་བརྐྱངས༌སོ།།
PSA 104:3 སྟེང་ཁང་རྣམས་ཀྱི་གདུང་མ་ཆུ་སྟེང༌འཛུགས། །གནམ་གྱི་ཆུ་འཛིན་ཉིད་ཀྱི་ཤིང་རྟར༌མཛད། །རླུང་གི་འདབ་གཤོག་རྣམས་ཀྱི་སྟེང་ནས༌ཕེབས།།
PSA 104:4 ཁོང་གིས་རླུང་རྣམས་ཉིད་ཀྱི་ཕོ་ཉར༌མཛད། །མེ་ལྕེ་ཉིད་ཀྱི་ཞབས་ཕྱིར་མཛད་པ༌འོ།།
PSA 104:5 གཞི་གདན་སྟེང་དུ་ས་གཞི་བཞག་ནས༌ནི། །དེ་ནི་གཏན་དུ་གཡོ་བ་མེད་པར༌མཛད།།
PSA 104:6 གཏིང་ཟབ་ཆུ་ཡིས་ས་གཞི་གོས་ལྟར༌གཡོགས། །ཆུ་རྣམས་རི་རྩེ་དག་ལས་བརྒལ་བར༌གྱུར།།
PSA 104:7 ཁྱེད་ཀྱིས་བཀའ་བཀྱོན་གནང་བས་ཆུ་རྣམས༌བྲོས། །ཉིད་ཀྱི་འབྲུག་སྒྲ་དབང་གིས་ཆུ་རྣམས༌བྱོལ།།
PSA 104:8 རི་རྣམས་འབུར་ཞིང་ལུང་པ་བརྡིབས་ནས༌ནི། །ཁྱེད་ཀྱིས་བཤམས་པའི་གནས་སུ་སླེབས་པ༌ཡིན།།
PSA 104:9 ཆུ་རྣམས་ཕར་ལ་བརྒལ་ནས་ས་གཞི༌ནི། །འགེབ་པར་མི་བྱ་ཆེད་དུ་ས་མཚམས༌བཅད།།
PSA 104:10 ཡ་ཝཱེས་གྲོག་མོར་ཆུ་མིག་འབབ་བཅུག༌ཅིང༌། །དེ་རྣམས་རི་བོའི་གསེབ་ནས་བཞུར་བར༌མཛད།།
PSA 104:11 ཐང་གི་རི་དྭགས་རྣམས་ཀྱིས་དེ་འཐུང༌ཞིང༌། །རྐྱང་གིས་རང་གི་སྐོམ་པ་དེ་ཡིས༌སེལ།།
PSA 104:12 དེ་ཡི་ཉེ་འཁོར་ནམ་མཁའི་བྱ་རྣམས༌གནས། །ཡལ་གའི་གསེབ་ནས་དེ་དག་མགུར་མ༌ལེན།།
PSA 104:13 སྟེང་ཁང་རྣམས་ནས་རི་ལ་ཆུ་གཏོང༌ཞིང༌། །ཁོང་གི་མཛད་པའི་འབྲས་བུས་ས་གཞི༌ཚིམས།།
PSA 104:14 ཕྱུགས་ཀྱི་ཕྱིར་དུ་རྩྭ་སྔོན་སྐྱེས་པར༌མཛད། །མི་ཡིས་སྤྱོད་ཕྱིར་སྔོ་ཚོད་བསྐྱེད་ནས༌ནི། །ས་ནས་མི་ལ་ཁ་ཟས་འཐོབ་པ༌དང༌།།
PSA 104:15 མི་སེམས་དགའ་བར་བྱེད་པའི་རྒུན་ཆང༌དང༌། །གདོང་ལ་འོད་མདངས་སྦྱིན་པའི་སྣུམ་རྩི༌དང༌། །ལུས་ཤུགས་བསྐྱེད་པའི་འབྲུ་རིགས་ཐོབ་པར༌མཛད།།
PSA 104:16 ཡ་ཝཱེས་བཙུགས་པའི་ཡིད་འོང་ཤིང་སྡོང༌སྟེ། །ལེ་པཱ་ནོན་གྱི་ཐང་ཤིང་ཚིམ་པར༌མཛད།།
PSA 104:17 འདབ་ཆགས་བྱ་ཡིས་དེའི་སྟེང་ཚང་བཟོ༌ཞིང༌། །ཁྲུང་ཁྲུང་དཀར་མོའི་ཚང་ནི་གསོམ་ཤིང༌ཡིན།།
PSA 104:18 རི་བོ་མཐོན་པོ་གནའ་ཡི་གནས་གཞི༌ཡིན། །བྲག་རྣམས་འཕྱི་བ་དག་གི་སྐྱབས་གནས༌ཡིན།།
PSA 104:19 དུས་ཚིགས་འབྱེད་ཕྱིར་ཁྱེད་ཀྱིས་ཟླ་བ༌བཞག །ཉི་མས་ནམ་ཞིག་ནུབ་དགོས་ཤེས་པ༌ཡིན།།
PSA 104:20 ཁྱེད་ཀྱིས་མུན་པ་མཛད་པས་མཚན་མོར༌གྲུབ། །ནགས་ཀྱི་རི་དྭགས་ཐམས་ཅད་ཕྱི་རུ༌ཐོན།།
PSA 104:21 སེང་གེས་ང་རོ་དང་བཅས་བརྔོན་ཤ༌འཚོལ། །དཀོན་མཆོག་ལས་ནི་རང་ལ་ཁ་ཟས༌སློང༌།།
PSA 104:22 ཉི་མ་ཤར་བ་ཙམ་གྱིས་དེ་རྣམས༌ནི། །རང་གི་ཚང་ལ་ཡིབས་ནས་ཉལ་བ༌ཡིན།།
PSA 104:23 མི་ནི་ལས་ཀ་བྱེད་དུ་ཕྱི་རོལ༌ཐོན། །དགོང་མོའི་བར་དུ་ངལ་ལས་བྱེད་པ༌ཡིན།།
PSA 104:24 ཡ་ཝཱེ་ཁྱེད་ཀྱི་འཕྲིན་ལས་ཇི་ལྟར༌མང༌། །ཁྱེད་ཀྱིས་དེ་ཀུན་ཤེས་རབ་ལམ་ནས༌བཀོད། །ས་གཞི་ཡོངས་ལ་ཁྱེད་ཀྱི་བཀོད་པས༌ཁེངས།།
PSA 104:25 ཡངས་ཤིང་ཆེ་བའི་རྒྱ་མཚོ་ཕ་རོལ་གནས། །སྲོག་ཆགས་ཆེ་ཆུང་གྲངས་མེད་འཕྱོ་བར༌བྱེད།།
PSA 104:26 དེ་རུ་གྲུ་གཟིངས་ཕར་འགྲོ་ཚུར་འོང༌བྱེད། །ཁྱེད་ཀྱིས་བཀོད་པའི་ཆུ་སྲིན་དེ་རུ༌རྩེ།།
PSA 104:27 དུས་ཐོག་ཁྱེད་ཀྱིས་ཁ་ཟས་གནང་བའི༌ཆེད། །དེ་རྣམས་ཀུན་གྱིས་ཁྱེད་ལ་སྒུག་བྱེད༌དོ།།
PSA 104:28 ཁྱེད་ཀྱིས་ཅི་གནང་དེ་ཚོས་སྡུད་པ༌དང༌། །ཁྱེད་ཕྱག་ཕྱེས་པར་དེ་རྣམས་བཟང་པོས༌ཚིམས།།
PSA 104:29 ཁྱེད་ཀྱི་ཞལ་རས་སྦ་དུས་དེ་རྣམས༌དངངས། །ཁྱེད་ཀྱིས་དེ་ཚོའི་དབུགས་ནི་འཁྱེར་མཛད༌པས། །དེ་རྣམས་འཆི་ཞིང་སླར་ཡང་རྡུལ་དུ༌འགྱུར།།
PSA 104:30 ཁྱེད་ཀྱིས་ཐུགས་ཉིད་མངགས་ཤིང་དེ་རྣམས༌བཀོད། །ས་གཞིའི་ངོས་ནི་ཡང་བསྐྱར་གསར་དུ༌བསྒྱུར།།
PSA 104:31 ཡ་ཝཱེའི་གཟི་བྱིན་གཏན་དུ་གནས་པར༌ཤོག །ཡ་ཝཱེ་ཉིད་ཀྱི་མཛད་པར་དགྱེས་གྱུར༌ཅིག།
PSA 104:32 ཁོང་གིས་ས་གཞིར་གཟིགས་པས་ས་གཞི༌འདར། །རི་བོར་རེག་པས་རི་ལས་དུ་བ༌འཕྱུར།།
PSA 104:33 བདག་གིས་ཚེ་གང་ཡ་ཝཱེར་མགུར་མ༌ལེན། །གསོན་པའི་རིང་ལ་ང་ཡི་དཀོན་མཆོག༌བསྟོད།།
PSA 104:34 ང་ཡི་བསམ་བློར་ཁོང་ཉིད་མཉེས་པར༌ཤོག །ཡ་ཝཱེའི་ནང་དུ་ང་རང་དགའ་མགུ༌རངས།།
PSA 104:35 སྡིག་ཅན་མི་རྣམས་ས་ནས་ཡལ་བ༌དང༌། །སྡིག་སྤྱོད་ཅན་རྣམས་རྩ་མེད་འགྲོ་བར༌ཤོག །ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད། །ཡ་ཝཱེ་ཁོང་ལ་བསྟོད་པར་གྱིས་ཤིག༌ཨང༌།།
PSA 105:1 ཁྱོད་ཚོས་ཡ་ཝཱེར་གཏང་རག་འབུལ་བ༌དང༌། །ཁོང་གི་མཚན་ལ་ཞུ་བ་ཕུལ་ཞིག༌དང༌། །མི་རྣམས་ཁྲོད་དུ་ཁོང་གི་འཕྲིན་ལས༌བརྗོད།།
PSA 105:2 ཁོང་ལ་མགུར་གླུ་ལེན་བཞིན་བསྟོད་བསྔགས་ཕུལ། །ཁོང་གི་ངོ་མཚར་མཛད་པ་ཐམས་ཅད༌གླེངས།།
PSA 105:3 ཁོང་གི་དམ་པའི་མཚན་ལ་བསྟོད་བསྔགས་བརྗོད། །ཡ་ཝཱེ་འཚོལ་མཁན་སེམས་ནང་དགའ་བར༌ཤོག།
PSA 105:4 ཡ་ཝཱེ་ཁོང་དང་ཁོང་གི་མཐུ་སྟོབས་དང་། །ཁོང་གི་ཞལ་རས་རྒྱུན་དུ་བཙལ་བར་གྱིས།།
PSA 105:5 ཁོང་གི་མཛད་པ་ངོ་མཚར་གྲུབ་རྟགས་དང་། །ཞལ་གྱི་ཁྲིམས་གཅོད་བཅས་རྣམས་དྲན་པར༌གྱིས།།
PSA 105:6 ཁོང་གི་ཞབས་ཕྱི་ཨབ་ར་ཧམ་གྱི༌རྒྱུད། །ཁོང་གིས་བདམས་པའི་ཡ་ཀོབ་བུ་རྒྱུད༌ཀྱེ།།
PSA 105:7 ཁོང་ནི་ང་ཚོའི་དཀོན་མཆོག༌ཡ་ཝཱེ་ཡིན། །ས་གཞི་ཡོངས་སུ་ཁོང་གི་ཁྲིམས་གཅོད༌ཡོད།།
PSA 105:8 ཁོང་གི་ཞལ་ཆད་གཏན་དུ་ཐུགས་སུ༌འཇགས། །ཁོང་གི་བཀའ་རྣམས་མི་རབས་སྟོང་ལ༌གནས།།
PSA 105:9 ཨབ་ར་ཧམ་ལ་མཛད་པའི་ཞལ་ཆད༌ཡིན། །ཨི་སཱག་ལ་ནི་བཞེས་པའི་དབུ་མནའ༌ཡིན།།
PSA 105:10 ཁོང་གིས་ཞལ་ཆད་འདི་ནི་ཡ་ཀོབ༌ལ། །སྒྲིག་ཁྲིམས་བྱས་ནས་གཏན་ལ་ཕབ་པ༌དང༌། །ཡེས་ར་ཨེལ་ལ་གཏན་གྱི་ཞལ་ཆད༌གནང༌།།
PSA 105:11 བདག་གིས་ཀ་ན་ཨན་གྱི་ཡུལ་དེ་ནི། །ཁྱོད་ལ་གནང་ཞིང་ཁྱོད་ཀྱི་ས་སྐལ་ཡིན།།
PSA 105:12 དེ་དུས་ཁོ་རྣམས་མི་གྲངས་ཉུང་བ༌དང༌། །ཉུང་བར་མ་ཟད་ཡུལ་དེར་བྱེས་པ༌ཡིན།།
PSA 105:13 དེ་རྣམས་མི་རིགས་གཅིག་ནས་གཅིག་བརྒྱུད༌ཅིང༌། །རྒྱལ་ཁམས་གཅིག་ནས་གཅིག་ལ་ཉུལ་ནས༌བསྡད།།
PSA 105:14 དེ་ཚོར་གཉའ་གནོན་སུ་ལའང་བྱེད་མ༌གནང༌། །ཁོ་ཚོའི་ཆེད་དུ་རྒྱལ་པོར་བཀའ་བཀྱོན༌མཛད།།
PSA 105:15 ཁོ་བོས་བྱུགས་པ་རྣམས་ལ་མི་རེག༌ཅིང༌། །ལུང་སྟོན་རྣམས་ལ་གནོད་པ་མ་བསྐྱལ་གསུངས།།
PSA 105:16 ཁོང་གིས་ཡུལ་དེར་མུ་གེ་འབྱུང་བར་མཛད། །ཟས་ཀྱི་གཏད་སོ་མཐའ་དག་མེད་པར༌མཛད།།
PSA 105:17 ཁོ་ཚོའི་སྔོན་ལ་མི་ཞིག་བརྫངས་པ༌སྟེ། །གཡོག་པོར་བཙོངས་པའི་ཡོ་སེབ་ཡིན་ལགས༌ཤིང༌།།
PSA 105:18 དེ་ཡི་རྐང་པ་སྒྲོག་གིས་བསྣད་པ༌དང༌། །མཇིང་པ་ལྕགས་སྒྲོག་རྣམས་ཀྱིས་བཅིངས་པ༌འོ།།
PSA 105:19 ཁོང་གིས་གསུངས་པའི་བཀའ་རྣམས་འགྲུབ་པའི༌བར། །ཡ་ཝཱེའི་བཀའ་ཡིས་ཁོང་ལ་ཚོད་བགམ༌མཛད།།
PSA 105:20 རྒྱལ་པོས་གཡོག་པོ་བཏང་ནས་ཁོང་བཀྲོལ༌ཞིང༌། །མི་སྡེ་ཁག་གི་བདག་པོས་ཐར་དུ༌བཅུག།
PSA 105:21 རྒྱལ་པོའི་ཁབ་ཀྱི་བདག་པོར་ཁོང་བཞག༌ཅིང༌། །རྒྱུ་ནོར་ཐམས་ཅད་ཁོང་གི་དབང་ལ༌བཅུག།
PSA 105:22 རྒྱལ་པོའི་འཁོར་གཡོག་རང་དགར་འཆིང་བ༌དང༌། །རྒན་པ་རྣམས་ལ་ཤེས་རབ་བསླབ་ཏུ༌བཅུག།
PSA 105:23 ཡེས་ར་ཨེལ་ཡང་ཨེ་ཅིབ་ཡུལ་དུ༌སླེབས། །ཧཱམ་གྱི་ཡུལ་དུ་ཡ་ཀོབ་བྱེས་པར༌ལུས།།
PSA 105:24 ཡ་ཝཱེས་ཉིད་ཀྱི་འབངས་མི་མང་དུ༌སྤེལ། །ཁོ་རྣམས་དགྲ་ལས་ཤིན་ཏུ་དར་བར༌མཛད།།
PSA 105:25 དགྲ་རྣམས་སེམས་ནི་འབངས་མིར་སྡང་གྱུར༌ཏེ། །ཁོང་གི་ཞབས་ཕྱིར་གཡོ་སྒྱུའི་སྦྱོར་བ༌སྤེལ།།
PSA 105:26 ཁོང་གིས་ཉིད་ཀྱི་ཞབས་ཕྱི་མོ་ཤེ༌དང༌། །ཉིད་ཀྱིས་བདམས་པའི་ཨ་རོན་བརྫངས་ནས༌ནི།།
PSA 105:27 དགྲ་བོའི་ཁྲོད་དུ་ངོ་མཚར་རྟགས་རྣམས༌བསྟན། །ཧཱམ་གྱི་ཡུལ་དུ་ཡ་མཚན་དོན་རྣམས༌མངོན།།
PSA 105:28 ཁོང་གིས་སྨག་རུམ་མངགས་པས་སྨག་རུམ༌འཐིབས། །ཁོང་གི་བཀའ་ལ་ཟློག་ཐབས་ཡེ་མ༌ཡོད།།
PSA 105:29 ཁོང་གིས་ཨེ་ཅིབ་ཆུ་རྣམས་ཁྲག་ཏུ༌བསྒྱུར། །དེ་ཚོའི་ཉ་རྣམས་སྲོག་དང་ཕྲལ་བར༌མཛད།།
PSA 105:30 དེ་ཚོའི་ཡུལ་དང་རྒྱལ་པོའི་གཟིམ་ཆུང༌དུ། །ག་ས་གང་ལ་སྦལ་བས་གང་བར༌བྱས།།
PSA 105:31 ཁོང་གིས་བཀའ་ཞིག་གནང་བར་སྦྲང་ནག༌སླེབས། །སྲིན་བུ་ཤིག་ཀྱང་ཁོ་ཚོའི་ཕྱོགས་བཞིར༌ཐོན།།
PSA 105:32 ཆར་བའི་ཚབ་ཏུ་དེ་ཚོར་སེར་བ༌ཕབ། །དེ་རྣམས་ཡུལ་དུ་གནམ་ལྕགས་ཐོག་མདའ༌འཕངས།།
PSA 105:33 ཁོང་གིས་དེ་ཚོའི་རྒུན་འབྲུམ་ཤིང་རྣམས༌དང༌། །སེ་ཡབ་ཤིང་ལ་བརྡབས་ཤིང་དེ་དག༌གི །རྒྱལ་ཁམས་ནང་གི་ལྗོན་ཤིང་རྩ་ནས༌བརླག།
PSA 105:34 ཁྱེད་ཀྱིས་བཀའ་ཞིག་གནང་བར་གྲངས་མེད༌པའི། །ཆ་ག་འབུ་དང་སྲིན་འབུ་ཡར་ཐོན༌ཞིང༌།།
PSA 105:35 དེ་རྣམས་ཡུལ་གྱི་སྔོ་ཚོད་སྣ་ཚོགས༌དང༌། །ཞིང་གི་ལོ་ཏོག་མ་ལུས་ཟོས་པ༌ཡིན།།
PSA 105:36 དེ་རྣམས་ཡུལ་གྱི་སྐྱེས་འགོ་ཐམས་ཅད༌དེ། །ཁོ་རྣམས་ལུས་སྟོབས་རྒྱས་དུས་སྐྱེས་པ༌ཡི། །སྐྱེས་འགོ་མཐའ་དག་ཁོང་གིས་བསད་པ༌ཡིན།།
PSA 105:37 ཁོང་གི་འབངས་མི་གསེར་དངུལ་དང་བཅས༌བཏོན། །ཉིད་ཀྱི་ཚོ་པ་ཁག་ལས་རྒུད་པ༌མེད།།
PSA 105:38 ཨེ་ཅིབ་མི་རྣམས་ཁོ་ཚོར་འཇིགས་པའི༌རྐྱེན། །ཁོ་ཚོ་ཕྱི་རུ་ཐོན་དུས་དེ་རྣམས༌སྤྲོ།།
PSA 105:39 ཁོང་གིས་སྤྲིན་ཞིག་ཁེབས་ཀྱི་ཚུལ་དུ༌བཀྲམ། །མཚན་མོར་འོད་སྣང་སྤྲོ་བར་མེ་ཡང༌བསྩལ།།
PSA 105:40 དེ་ཚོས་ཞུ་བར་ཁོང་གིས་སྲེག་པ༌དྲངས། །ནམ་མཁའི་ཟས་ཀྱིས་དེ་རྣམས་འགྲང་བར༌མཛད།།
PSA 105:41 ཁོང་གིས་བྲག་རྡོ་ཕྱེས་ནས་ཆུ་བརྡོལ༌ཞིང༌། །མྱ་ངམ་ཐང་དུ་གཙང་པོ་ནང་བཞིན༌བརྒྱུགས།།
PSA 105:42 ཁོང་གིས་ཞབས་ཕྱི་ཨབ་ར་ཧམ་ལ༌ནི། །གནང་བའི་ཞལ་བཞེས་དམ་པ་དྲན་པས༌སོ།།
PSA 105:43 ཁོང་གི་འབངས་མི་དགའ་སྤྲོའི་ངང་ནས༌བཏོན། །བདམས་པའི་མི་རྣམས་དགའ་འབོད་དང་བཅས༌ཁྲིད།།
PSA 105:44 མི་རིགས་སོ་སོའི་ཡུལ་རྣམས་དེ་ཚོར༌གནང༌། །གཞན་གྱི་ངལ་བའི་འབྲས་བུ་དེ་ཚོར༌ཐོབ།།
PSA 105:45 དེ་ཚོས་ཁོང་གི་ཁྲིམས་སྲོལ་བཞིན་བྱ༌ཞིང༌། །ཉིད་ཀྱི་བཀའ་ཁྲིམས་བསྲུང་བའི་ཆེད་དུ༌ཡིན། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 106:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཡ་ཝཱེ་ལེགས་པས་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 106:2 ཡ་ཝཱེའི་མཐུ་ལྡན་ཕྱག་ལས་སུས་བརྗོད༌ནུས། །ཡང་ན་བསྟོད་པ་ཁ་ཚང་སུས་འབུལ༌ཐུབ།།
PSA 106:3 སུ་ཡིས་དྲང་གཞག་སྐྱོང་ཞིང་དུས་རྟག༌ཏུ། །དྲང་བདེན་བཞིན་དུ་སྤྱོད་པའི་མི་དེ༌བདེ།།
PSA 106:4 ཁྱེད་ཀྱི་འབངས་མི་དྲིན་གྱིས་སྐྱོང་དུས༌སུ། །ང་ཡང་ཐུགས་སུ་འཛིན་རོགས་ཀྱེ་ཡ༌ཝཱེ། །ཁོ་རྣམས་སྐྱོབ་དུས་ང་ཡང་གཟིགས་པར༌མཛོད།།
PSA 106:5 ཁྱེད་ཀྱིས་བདམས་པ་རྣམས་ཀྱི་བྱིན་རླབས༌མཐོང༌། །ཁྱེད་ཀྱི་འབངས་མིའི་དགའ་སྐྱིད་དཔལ་ལ༌རོལ། །ཁྱེད་ཀྱི་ནོར་སྐལ་མཉམ་དུ་བསྟོད་པ༌འབུལ།།
PSA 106:6 ངེད་དང་མེས་པོ་ཀུན་གྱིས་སྡིག་པ༌བྱས། །ཉེས་པ་བསགས་ཤིང་ངན་པར་སྤྱད་པ༌ཡིན།།
PSA 106:7 ཨེ་ཅིབ་ཡུལ་དུ་རང་རེའི་མེས་པོ༌རྣམས། །ཁྱེད་ཀྱི་ངོ་མཚར་དོན་རྣམས་རྟོགས་པ༌མེད། །ཁྱེད་ཀྱི་དཔག་མེད་བྱམས་བརྩེ་མ་དྲན༌ཞིང༌། །རྒྱ་མཚོ་དམར་པོའི་འགྲམ་ནས་ངོ་ལོག༌བྱས།།
PSA 106:8 འོན་ཀྱང་ཁོང་གིས་ནུས་མཐུ་སྟོན་པ༌དང༌། །མཚན་གྱི་ཕྱིར་དུ་དེ་རྣམས་ཐར་བར༌མཛད།།
PSA 106:9 རྒྱ་མཚོ་དམར་པོར་བཀྱོན་ནས་མཚོ་ཡང༌བསྐམས། །དེ་རྣམས་ཁྲིད་དེ་ཐང་སྟོང་བརྒྱུད་པ༌བཞིན། །མཚོ་ཡི་གཞུང་རྣམས་བརྒལ་ནས་ཕེབས་པ༌ཡིན།།
PSA 106:10 དེ་ཚོར་སྡང་བ་རྣམས་ཀྱི་ལག་ནས༌བསྒྲལ། །དགྲ་བོའི་ལག་ནས་ཁོ་རྣམས་སྐྱོབ་པར༌མཛད།།
PSA 106:11 དེ་ནས་ཁོ་ཚོའི་དགྲ་རྣམས་ཆུ་ཡིས༌བསྣུབས། །ཤུལ་དུ་ལུས་པ་གཅིག་ཀྱང་ཡོད་མ༌ཡིན།།
PSA 106:12 དེ་ནས་ཁོ་རྣམས་ཁོང་གི་གསུང་ལ༌དད། །མགུར་གླུ་བླངས་ནས་ཁོང་ལ་བསྟོད་པ༌ཕུལ།།
PSA 106:13 འོན་ཀྱང་དུས་ཡུན་རིང་པོ་མ་འགོར༌བར། །དེ་ཚོས་ཁོང་གི་འཕྲིན་ལས་བརྗེད་གྱུར༌ཅིང༌། །ཁོང་གི་སློབ་སྟོན་ལ་ནི་མ་སྒུག༌པར།།
PSA 106:14 འདོད་པ་ཚད་མེད་དབེན་སྟོང་དུ་སྐྱེས༌ཏེ། །མྱ་ངམ་ཐང་དུ་དཀོན་མཆོག་ཐུགས་ཀྱང༌སད།།
PSA 106:15 དེའི་ཕྱིར་ཁོ་ཚོའི་ཞུ་བ་བཞིན་དུ༌གནང༌། །འོན་ཀྱང་ཁོ་ཚོའི་སྟེང་དུ་ནད་ཡམས༌ཕབ།།
PSA 106:16 དེ་ཚོས་སྒར་གྱི་ནང་དུ་མོ་ཤེ༌དང༌། །ཡ་ཝཱེའི་སྐྱེས་བུ་དམ་པ་ཨ་རོན༌ཏེ། །ཁོང་གཉིས་ལ་ནི་ཕྲག་དོག་བྱས་པ༌འོ།།
PSA 106:17 ས་ཡིས་ཁ་གདངས་དཱ་ཐན་ཁྱུར་མིད༌བཏང༌། །ཨ་བི་རཱམ་གྱི་ཕྱོགས་རྣམས་སས་བསྣུབས༌སོ།།
PSA 106:18 དེ་ཚོའི་ཚོགས་ནང་མེ་ཡང་འབར་གྱུར༌ནས། །མེ་ལྕེས་སྡིག་སྤྱོད་ཅན་རྣམས་བསྲེགས་པར༌བྱས།།
PSA 106:19 དེ་ཚོས་ཧོ་རེབ་རི་བོར་བ་ཕྲུག་བཟོས། །བླུགས་པའི་སྐུ་ལ་བཏུད་ནས་ཕྱག་བཙལ༌ཏོ།།
PSA 106:20 ཁོ་ཚོས་གཟི་བརྗིད་ལྡན་པའི་དཀོན་མཆོག༌ནི། །རྩྭ་གཟན་གླང་གི་གཟུགས་སུ་བསྒྱུར་པ༌ཡིན།།
PSA 106:21 ཁོ་རྣམས་སྐྱོབ་པའི་དཀོན་མཆོག་བརྗེད་གྱུར༌ཏེ། །ཁོང་གིས་ཨེ་ཅིབ་ཡུལ་ནས་དོན་ཆེན༌མཛད།།
PSA 106:22 ཧཱམ་གྱི་ཡུལ་དུ་ངོ་མཚར་དོན་རྣམས༌མཛད། །རྒྱ་མཚོ་དམར་པོར་འཇིགས་རུང་དོན་རྣམས༌བྱས།།
PSA 106:23 དེའི་ཕྱིར་ཁོང་གིས་དེ་རྣམས་འཇོམས་དགོས༌གསུངས། །གལ་ཏེ་ཁོང་གིས་བདམས་པའི་མོ་ཤེ༌ནི། །ཁོང་གི་དྲུང་དུ་བར་མིར་ལངས་བསྡད༌ནས། །ཉིད་ཀྱི་ཐུགས་ཁྲོ་ཞི་བར་མ་བྱས༌ཚེ། །ཁོང་གིས་དེ་རྣམས་རྩད་ནས་བརླག་ཉེན༌ཆེ།།
PSA 106:24 ཁོ་ཚོས་སྐྱིད་པའི་ཡུལ་དེར་མཐོང་ཆུང༌བྱས། །ཁོང་གི་བཀའ་ལ་ཡིད་ཆེས་ཀྱང་མ༌བྱས།།
PSA 106:25 རང་རང་གུར་ནང་འཁང་ར་བྱས་པ༌དང༌། །ཡ་ཝཱེའི་གསུང་སྐད་ལ་ཡང་མ་མཉན༌ཏོ།།
PSA 106:26 དེའི་ཕྱིར་ཁོང་གིས་དེ་ཚོར་མནའ་བཞེས་ཏེ། །ཁོ་རྣམས་དབེན་སྟོང་ཡུལ་དུ་སར་བསྒྱེལ༌ཞིང༌།།
PSA 106:27 ཁོ་ཚོའི་བུ་རྒྱུད་མི་རྣམས་ཁྲོད་འགྱེལ༌ནས། །ས་ཕྱོགས་ཀུན་ཏུ་ཐོར་བར་བྱ་ཞེས༌གསུངས།།
PSA 106:28 དེ་ཚོས་པཱ་ཨལ་ཕེ་ཨོར་སྐྱབས་སུ༌བསྟེན། །སྲོག་མེད་ལྷ་ལ་མཆོད་པའི་རྫས་རྣམས༌ཟོས།།
PSA 106:29 དེ་བཞིན་བྱས་ནས་ཡ་ཝཱེར་ཐུགས་ཁྲོ༌བསླངས། །དེ་དག་ནང་དུ་རིམས་ནད་ཐོན་པར༌གྱུར།།
PSA 106:30 དེ་དུས་ཕི་ནེ་ཧེ་ཁོང་ཡར་ལངས༌ནས། །ངན་པར་ཉེས་ཆད་བཅད་པས་རིམས་ནད༌ཆད།།
PSA 106:31 རྒྱུན་ནས་རྒྱུན་དུ་མི་རབས་ཐམས་ཅད༌ལ། །ལས་དེ་ཁོའི་ཕྱིར་དྲང་བདེན་དུ་བརྩིས་སོ།།
PSA 106:32 དེ་ཚོས་མེ་རི་བཱ་ཡི་ཆུ་འགྲམ༌དུ། །ཡང་བསྐྱར་ཡ་ཝཱེར་ཐུགས་ཁྲོ་བསླངས་པ༌དང༌། །ཐ་ན་མོ་ཤེ་ལ་ཡང་ཉེས་ཆད༌ཕོག།
PSA 106:33 དེ་ཚོས་དཀོན་མཆོག་ཐུགས་ལ་གྱེན་ཟློག༌བྱས། །མོ་ཤེའི་ཁ་ནས་བསམ་མེད་གཏམ་ཡང༌ཤོར།།
PSA 106:34 ཡ་ཝཱེས་གནང་བའི་བཀའ་བཞིན་དེ་རྣམས༌ཀྱིས། །ཕྱི་ཕྱོགས་མི་རྣམས་ཚར་དུ་མ་བཅད༌པར།།
PSA 106:35 དེ་རྣམས་དང་ནི་ཡོངས་སུ་འདྲེས་གྱུར༌ཏེ། །དེ་ཚོའི་ཡུལ་སྲོལ་གོམས་འདྲིས་བསླབ་པ༌དང༌།།
PSA 106:36 དེ་ཚོའི་སྐུ་འདྲ་རྣམས་ལ་བསྙེན་བཀུར༌ཞུས། །དེ་ནི་ཁོ་ཚོའི་རྙི་རུ་གྱུར་པ༌ཡིན།།
PSA 106:37 བུ་དང་བུ་མོ་གདོན་འདྲེར་མཆོད་པ༌བྱས།།
PSA 106:38 དེ་ཚོས་ཉེས་མེད་རྣམས་ཀྱི་ཁྲག་བཞུར༌ཏེ། །རང་གི་བུ་དང་བུ་མོའི་ཁྲག་གིས༌ནི། །ཀ་ན་ཨན་གྱི་སྐུ་ལ་མཆོད་པ༌ཕུལ། །ཁྲག་གིས་ཡུལ་ཁམས་དེ་ཡང་བཙོག་པར༌བཟོས།།
PSA 106:39 རང་བྱས་ལས་ཀྱིས་རང་ཉིད་བཙོག་པར༌བཟོས། །སྤྱོད་པའི་ཐད་ནས་ལོག་གཡེམ་སྤེལ་བས༌ན།།
PSA 106:40 ཡ་ཝཱེ་འབངས་མིའི་སྟེང་ལ་ཐུགས་ཁྲོས༌ཤིང༌། །ཉིད་ཀྱི་ནོར་སྐལ་ལ་ནི་ཞེན་ལོག༌སྟེ།།
PSA 106:41 ཁོ་རྣམས་ཕྱི་ཕྱོགས་མི་ཡི་ལག་ཏུ༌སྤྲད། །ཁོ་ཚོར་སྡང་བ་དག་གིས་དབང་དུ༌བསྒྱུར།།
PSA 106:42 དགྲ་བོས་ཁོ་ཚོར་གཉའ་གནོན་བྱས་པ༌དང༌། །ཁོ་རྣམས་དགྲ་བོའི་ལག་ཏུ་ཚུད་པ༌ཡིན།།
PSA 106:43 ཁོང་གིས་དེ་རྣམས་ལན་མང་ཐར་བཅུག༌ཀྱང༌། །དེ་ཚོས་བསམ་བཞིན་གྱེན་ཟློག་བྱས་པས༌ན། །རང་གི་ཉེས་པས་རང་ཉིད་དམན་སར༌ཕབ།།
PSA 106:44 འོན་ཀྱང་དེ་ཚོའི་ངུ་འབོད་གསན་པ༌དང༌། །ཁོང་གིས་དེ་ཚོའི་སྡུག་བསྔལ་གཟིགས་པར༌གྱུར།།
PSA 106:45 ཁོང་གི་ཞལ་ཆད་དེ་རྣམས་དོན་དུ༌དྲན། །དཔག་མེད་བྱམས་བརྩེ་བཞིན་དུ་ཐུགས་ཀྱང༌འགྱོད།།
PSA 106:46 དེ་རྣམས་བཙན་གནོན་བྱེད་མཁན་ཀུན་གྱི༌མདུན། །དེ་ཚོར་ཁོང་གི་སྙིང་རྗེ་ཐོབ་པར༌མཛད།།
PSA 106:47 ཁྱེད་མཚན་དམ་པར་གཏང་རག་འབུལ་བ༌དང༌། །ཁྱེད་ལ་བསྟོད་པ་གཟི་བརྗིད་དུ་བརྩི༌ཕྱིར། །ང་ཚོའི་དཀོན་མཆོག་ཡ་ཝཱེས་ངེད་རྣམས༌སྐྱོབ། །ཕྱི་ཕྱོགས་མི་རྣམས་ཁྲོད་ནས་ངེད་བསྡུ༌རོགས།།
PSA 106:48 ཡེས་ར་ཨེལ་གྱི་དཀོན་མཆོག་ཡ་ཝཱེ༌ནི། །རྒྱུན་ནས་རྒྱུན་དུ་བསྟོད་པར་འོས་སོ༌ལོ། །མི་སྡེ་ཀུན་གྱིས་ཨ་མེན་ཞུ་བར༌ཤོག །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 107:1 ཡ་ཝཱེ་ལེགས་པས་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 107:2 དེ་ལྟར་ཡ་ཝཱེས་བླུས་པ་རྣམས་ཀྱིས༌ཞུས། །འབངས་འདི་ཁོང་གིས་དགྲ་ཡི་ལག་ནས༌བསྒྲལ།།
PSA 107:3 ཤར་ལྷོ་ནུབ་བྱང་ཡུལ་ཕྱོགས་ཀུན་ནས༌བསྡུས།།
PSA 107:4 ཁོ་ཚོ་ས་སྟོང་ལུང་སྟོང་དག་ཏུ༌ཉུལ། །གནས་སའི་གྲོང་ཁྱེར་གང་ཡང་མ་རྙེད༌པར།།
PSA 107:5 བཀྲེས་སྐོམ་མྱངས་ནས་སེམས་ཀྱང་རྒུད་པར༌གྱུར།།
PSA 107:6 སྡུག་བསྔལ་ཁྲོད་དུ་ཡ་ཝཱེར་འོ་དོད༌བོས། །ཁོང་གིས་དེ་རྣམས་དཀའ་སྡུག་དག་ལས༌བསྐྱབས།།
PSA 107:7 ཁོ་རྣམས་གཞིས་ཆགས་གྲོང་དུ་བསླེབ་པའི༌ཕྱིར། །ཁོང་གིས་དེ་རྣམས་དྲང་པོའི་ལམ་དུ༌ཁྲིད།།
PSA 107:8 ཡ་ཝཱེའི་བྱམས་བརྩེ་དང་ནི་མི་བུ༌ཚོར། །མཛད་པའི་ངོ་མཚར་དོན་ཕྱིར་བསྟོད་པར༌ཤོག །
PSA 107:9 ཁོང་གིས་སྐོམ་པའི་མི་རྣམས་ངོམས་མཛད༌ཅིང༌། །བཀྲེས་པ་རྣམས་ཀྱང་བཟང་པོས་ཚིམ་པར༌བཅུག།
PSA 107:10 འགའ་ཤས་མུན་ནག་འཆི་བའི་སྨག་རུམ༌དུ། །སྡུག་བསྔལ་དང་ནི་ལྕགས་སྒྲོག་གིས་བཅིངས༌ཏེ།།
PSA 107:11 ཁོ་རྣམས་དཀོན་མཆོག་བཀའ་ལས་འགལ་བ༌དང༌། །བླ་མེད་ཞལ་གདམས་སྣང་མེད་བསྐྱུར་བས༌སོ།།
PSA 107:12 དེའི་ཕྱིར་ཁོང་གིས་དཀའ་བའི་ལས་ལ༌བརྟེན། །དེ་རྣམས་སེམས་ནི་བཏུལ་ཞིང་སར་འགྱེལ༌ཡང༌། །རོགས་རམ་བྱེད་མཁན་སུ་ཡང་ཡོད་མ་ཡིན།།
PSA 107:13 སྡུག་བསྔལ་ཁྲོད་དུ་ཡ་ཝཱེར་འོ་དོད༌བོས། །ཁོང་གིས་དེ་རྣམས་དཀའ་སྡུག་དག་ལས༌བསྐྱབས།།
PSA 107:14 མུན་ནག་དང་ནི་འཆི་བའི་སྨག་རུམ༌ལས། །ཕྱི་རུ་བཏོན་ཞིང་དེ་ཚོའི་སྒྲོག་རྣམས༌བཅད།།
PSA 107:15 ཡ་ཝཱེའི་བྱམས་བརྩེ་དང་ནི་མི་བུ༌ཚོར། །མཛད་པའི་ངོ་མཚར་དོན་ཕྱིར་བསྟོད་པར༌ཤོག །
PSA 107:16 ཁོང་གིས་ལི་ཡི་རྒྱ་སྒོ་བཅག་ནས༌ནི། །ལྕགས་ཀྱི་སྒོ་གཏན་རྣམས་ཀྱང་བཅད་ཕྱིར༌རོ།།
PSA 107:17 གླེན་པ་རྣམས་ཀྱིས་རང་གི་ཉེས་སྐྱོན༌དང༌། །སྡིག་པའི་ལས་ཀྱི་ཕྱིར་དུ་སྡུག་བསྔལ༌མྱོང༌།།
PSA 107:18 ཁ་ཟས་ཀུན་ལ་ཁོ་རྣམས་སྐྱུག་མེར༌ལངས། །འཆི་བའི་སྒོ་ལ་ཉེ་བར་སླེབས་པ༌དང༌།།
PSA 107:19 སྡུག་བསྔལ་ཁྲོད་དུ་ཡ་ཝཱེར་འོ་དོད༌བོས། །ཁོང་གིས་དེ་རྣམས་དཀའ་སྡུག་དག་ལས༌བསྐྱབས།།
PSA 107:20 བཀའ་གསུང་གནང་ནས་དེ་རྣམས་གསོས་པ༌དང༌། །འཆི་བ་ལས་ཀྱང་དེ་རྣམས་བསྒྲལ་བ༌ཡིན།།
PSA 107:21 ཡ་ཝཱེའི་བྱམས་བརྩེ་དང་ནི་མི་བུ༌ཚོར། །མཛད་པའི་ངོ་མཚར་དོན་ཕྱིར་བསྟོད་པར༌ཤོག།
PSA 107:22 ཁོང་ལ་གཏང་རག་མཆོད་པར་འབུལ་བ༌དང༌། །སྤྲོ་གླུས་ཁོང་གི་མཛད་འཕྲིན་འཆད་གྱུར༌ཅིག།
PSA 107:23 འགའ་ཤས་གྲུ་གཟིངས་བསྡད་ནས་རྒྱ་མཚོར༌བསྐྱོད། །ཆུ་ཆེན་སྟེང་ནས་ཉོ་འཚོང་ལས་ལ༌བྲེལ།།
PSA 107:24 དེ་ཚོས་རྒྱ་མཚོར་ཡ་ཝཱེའི་མཛད་པ༌དང༌། །ཉིད་ཀྱི་ངོ་མཚར་དོན་རྣམས་མཐོང་གྱུར༌ཏེ།།
PSA 107:25 ཁོང་གིས་བཀའ་ཞིག་བབས་པར་རླུང་དམར༌གཡུགས། །རྒྱ་མཚོའི་རྦ་རླབས་གྱེན་དུ་འཕྱུར་བར༌མཛད།།
PSA 107:26 དེ་རྣམས་ནམ་མཁར་འཛེགས་ཤིང་གཏིང་ལ༌བབས། །ཉེན་ཚབ་རྐྱེན་གྱིས་དེ་ཚོའི་སྙིང་སྟོབས་ཞུམ།།
PSA 107:27 ཆང་གིས་བཟི་བའི་མི་ལྟར་འཁྱོར་བ༌དང༌། །ཕར་གཡོ་ཚུར་གཡོ་བྱེད་ཅིང་དེ་དག༌གི །རིག་པ་ཡོད་ཚད་ཕན་ཐོགས་མེད་པར༌གྱུར།།
PSA 107:28 སྡུག་བསྔལ་ཁྲོད་དུ་ཡ་ཝཱེར་འོ་དོད༌བོས། །ཁོང་གིས་དེ་རྣམས་དཀའ་སྡུག་དག་ལས༌བསྐྱབས།།
PSA 107:29 ཁོང་གིས་རླུང་དམར་གཡུགས་མཚམས་བཅད་པ༌དང༌། །རྒྱ་མཚོའི་རྦ་རླབས་ཞི་བར་གྱུར་པ༌འོ།།
PSA 107:30 ཞི་འཇགས་འོངས་པས་ཁོ་རྣམས་དགའ་གྱུར༌ཅིང་། །ཡིད་སྨོན་འཆོར་བའི་གྲུ་ཁར་སྐྱེལ་མ༌མཛད།།
PSA 107:31 ཡ་ཝཱེའི་བྱམས་བརྩེ་དང་ནི་མི་བུ༌ཚོར། །མཛད་པའི་ངོ་མཚར་དོན་ཕྱིར་བསྟོད་པར༌ཤོག།
PSA 107:32 དེ་ཚོས་མི་སྡེའི་ཚོགས་ནང་ཁོང་བསྟོད༌ཅིང༌། །རྒན་པའི་ཚོགས་ནང་ཁོང་ལ་བསྔགས་པར༌ཤོག།
PSA 107:33 ཁོང་གིས་གཙང་པོ་རྣམས་ནི་ཐང་སྟོང༌མཛད། །ཆུ་མིག་རྣམས་ཀྱང་སྐམ་སར་བསྒྱུར་པ༌ཡིན།།
PSA 107:34 བཅུད་བཟང་ཡུལ་གྱི་མི་རྣམས་ངན་པའི༌ཕྱིར། །ཁོང་གིས་ཡུལ་དེ་བ་ཚྭའི་ཐང་དུ༌མཛད།།
PSA 107:35 ཁོང་གིས་ཐང་སྟོང་རྫིང་བུར་བསྒྱུར་པ༌དང༌། །སྐམ་ས་ཡང་ནི་ཆུ་མིག་རྣམས་སུ༌མཛད།།
PSA 107:36 ཁོ་རྣམས་གནས་སའི་གྲོང་ཞིག་བརྩིག་པའི༌ཕྱིར། །ཁོང་གིས་བཀྲེས་པའི་མི་རྣམས་གནས་དེར༌བཀོད།།
PSA 107:37 ཞིང་རྣམས་རྨོས་ཤིང་རྒུན་ཚལ་བཙུགས་པ༌དང༌། །ལོ་ཡག་སྟོན་ཐོག་དེ་ཚོར་ཐོབ་གྱུར༌ཏོ།།
PSA 107:38 ཁོང་གིས་དེ་ཚོར་བྱིན་རླབས་གནང་ནས༌ནི། །དེ་ཚོའི་མི་གྲངས་མང་དུ་སྤེལ་བ༌དང༌། །དེ་ཚོའི་སྒོ་ཟོག་ཀྱང་ནི་འཕྲི་མ༌མཛད།།
PSA 107:39 ཕྱིས་སུ་དེ་རྣམས་གཉའ་གནོན་དཀའ་སྡུག༌དང༌། །སེམས་ཁྲལ་བཅས་ཀྱིས་མི་གྲངས་བྲི་ཞིང༌རྒུད།།
PSA 107:40 ཁོང་གིས་སྐུ་དྲག་རྣམས་ནི་ངོ་ཚར༌སྦྱར། །དེ་རྣམས་ལམ་མེད་ཐང་སྟོང་རྒྱུ་བར༌མཛད།།
PSA 107:41 དབུལ་པོ་སྡུག་ལས་བསྒྲལ་ཞིང་མཐོ་སར༌བཞག །དེ་ཚོའི་ཁྱིམ་རྒྱུད་ལུག་ཁྱུ་བཞིན་དུ༌སྤེལ།།
PSA 107:42 དྲང་པོས་མཐོང་ནས་དགའ་མགུ་ཡི་རངས༌ཤིང༌། །མི་ངན་ཐམས་ཅད་ངག་མེད་ལྐུགས་པར༌ལུས།།
PSA 107:43 ཤེས་རབ་ཅན་གྱིས་འདི་ལ་མཉམ་འཇོག༌ཅིང༌། །ཡ་ཝཱེའི་བྱམས་བརྩེ་ལ་ནི་བསམ་བློ༌ཐོངས།།
PSA 108:1 ༼དཱ་བིད་ཀྱི་གསུང་མགུར་ཏེ་མགུར་མ༌ཞིག༽ ཀྱེ་ཀྱེ་དཀོན་མཆོག་ངའི་སེམས་བརྟན་པོར༌གནས། །ཡིད་སེམས་ཀུན་ནས་གླུ་ལེན་བསྟོད་དབྱངས༌བྱ།།
PSA 108:2 ཀྱེ་མ་རྒྱུད་མངས་པི་ཝང་སད་པར་གྱིས། །བདག་གིས་སྐྱ་རེངས་གཉིད་ལས་བསླང་བར༌བྱ།།
PSA 108:3 ཀྱེ་ཀྱེ་ཡ་ཝཱེ་མི་རིགས་ཀུན་གྱི༌ཁྲོད། །ང་ཡིས་ཁྱེད་ལ་གཏང་རག་འབུལ་བར༌བྱ། །མི་རྣམས་དབུས་སུ་ཁྱེད་ལ༌བསྟོད་དབྱངས༌འབུལ།།
PSA 108:4 ཁྱེད་ཀྱི་བྱམས་བརྩེ་ཆེན་པོ་གནམ་ལས༌མཐོ། །ཁྱེད་ཀྱི་དྲང་བདེན་ནམ་མཁའི་སྤྲིན་དང་མཉམ།།
PSA 108:5 ཀྱེ་ཀྱེ་དཀོན་མཆོག་ཁྱེད་ཉིད་ནམ་མཁའ་ལས། །བླ་ན་འཕགས་ཤིང་ཁྱེད་ཀྱི་གཟི་བརྗིད་ཀྱང་། །ས་གཞིའི་སྟེང་ལ་ཡོངས་སུ་ཁྱབ་གྱུར་ཅིག།
PSA 108:6 ཁྱེད་ཀྱིས་གཅེས་པའི་མི་རྣམས་ཐར་བའི༌ཕྱིར། །ཕྱག་གཡས་ང་རང་སྐྱོབ་ཅིང་བཀའ་ལན༌གནོངས།།
PSA 108:7 གནས་ཀྱི་མཆོག་ནས་དཀོན་མཆོག་འདི་སྐད༌གསུངས། །བདག་གིས་རྒྱལ་ཁ་དང་བཅས་སི་ཀེམ༌བགོ །སོའུ་ཀོད་ལུང་པའི་ཚད་ཀྱང་འཇལ་བར༌བྱ།།
PSA 108:8 གིལ་ཨད་དང་ནི་མཱ་ན་ཤེ་ངའི༌ཡིན། །ཨེ་ཕཱར་ཡིམ་ནི་བདག་གི་རྨོག་ཞྭ༌ཡིན། །ཡ་ཧུ་དཱ་ནི་ང་ཡི་སྲིད་འཁར་ཡིན།།
PSA 108:9 མོ་ཨབ་བདག་གི་ཁྲུས་གཞོང་ཡིན་པ༌དང༌། །ཨེ་དོམ་ཕྱོགས་སུ་བདག་གིས་བསིལ་ལྷམ༌གཡུག །ཕེ་ལེ་ཤེད་པར་རྒྱལ་ཁའི་ཀི་སྒྲ་སྒྲོག།
PSA 108:10 གྲོང་ཁྱེར་བརྟན་པོར་ང་རང་སུ་ཡིས༌བསྐྱལ། །ཨེ་དོམ་ཡུལ་དུ་ང་རང་སུ་ཡིས༌འཁྲིད།།
PSA 108:11 དཀོན་མཆོག་ཁྱེད་ཀྱིས་ངེད་རྣམས་མ་སྤངས༌སམ། །ཀྱེ་ཀྱེ་དཀོན་མཆོག་ཁྱེད་ཉིད་ངེད་ཅག༌གི །དམག་དཔུང་མཉམ་དུ་གཤེགས་པ་མ་ཡིན༌ནམ།།
PSA 108:12 མི་ཡི་རོགས་སྐྱོར་ཕན་མེད་ཡིན་པས༌ན། །དགྲ་བོ་འགོག་ཕྱིར་ང་ཚོར་རོགས་རམ༌མཛོད།།
PSA 108:13 དཀོན་མཆོག་ཁོང་གིས་དགྲ་རྣམས་བརྫི་འོང༌བས། །ཁོང་ལ་བརྟེན་ནས་ང་ཚོས་དཔའ་རྩལ༌ངོམ།།
PSA 109:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར་མ།༽ ཀྱེ་ཀྱེ་ང་ཡིས་བསྟོད་པའི་དཀོན་མཆོག༌ལགས། །ཁུ་སིམ་ངང་ནས་མ་བཞུགས་རྒྱུ་མཚན་ནི།།
PSA 109:2 མི་ངན་དང་ནི་གཡོ་སྒྱུ་ཅན་རྣམས༌ཀྱིས། །ཁ་ཆེར་གདངས་ནས་ང་ལ་རྒོལ་བ༌དང༌། །རྫུན་གྱི་ལྕེ་ཡིས་ང་ལ་གཏམ་ལབ༌བྱུང༌།།
PSA 109:3 ཞེ་འཁོན་ཚིག་གིས་དེ་ཚོས་ངའི་མཐའ༌བསྐོར། །རྒྱུ་མཚན་གང་ཡང་མེད་པར་ང་ལ༌རྒོལ།།
PSA 109:4 ང་ཡི་བྱམས་པའི་ལན་དུ་དགྲ་རུ༌ལངས། །འོན་ཀྱང་བདག་གིས་སྨོན་ལམ་འདེབས་པར༌བྱ།།
PSA 109:5 དེ་ཚོས་ང་ལ་བཟང་ལན་ངན་གྱིས༌འཇལ། །བདག་གི་བྱམས་པའི་ལན་དུ་ཞེ་སྡང༌སྐྱེད།།
PSA 109:6 མི་ངན་ཞིག་ནི་དེ་ཡི་འགོ་བྱེད༌དང༌། །དགྲ་ཞིག་དེ་ཡི་གཡས་སུ་སློང་བར༌མཛོད།།
PSA 109:7 ཁྲིམས་ཐག་གཅོད་དུས་ཉེས་ཅན་དུ་སྣང༌ཞིང༌། །དེ་ཡི་སྨོན་ལམ་སྡིག་པར་འགྱུར་བར༌ཤོག།
PSA 109:8 དེ་ཡི་མི་ཚེ་ཤིན་ཏུ་ཐུང་བ༌དང༌། །དེ་ཡི་ལས་ཚན་གཞན་གྱིས་ལེན་པར༌ཤོག།
PSA 109:9 དེ་ཡི་བུ་དང་བུ་མོ་དྭ་ཕྲུག༌དང༌། །དེ་ཡི་ཆུང་མ་ཡུགས་མོར་ལུས་གྱུར༌ཅིག།
PSA 109:10 བུ་རྣམས་འཁྱམ་ཞིང་སློང་མོ་སློང་བ༌དང༌། །ཞིག་རོའི་གཞིས་ནས་དེ་རྣམས་སྐྲོད་གྱུར༌ཅིག།
PSA 109:11 ཅི་ཡོད་ཚང་མ་བུན་བདག་གིས་འཛིན༌ཞིང༌། །ངལ་བའི་འབྲས་བུ་ཕྱི་མིས་འཕྲོག་གྱུར༌ཅིག།
PSA 109:12 ཁོ་ལ་སྙིང་རྗེ་སྐྱེད་མཁན་མེད་པ༌དང༌། །དྭ་ཕྲུག་དྲིན་གྱིས་སྐྱོང་མཁན་མེད་གྱུར༌ཅིག།
PSA 109:13 བུ་རྒྱུད་ཆད་ཅིང་མི་རབས་ཕྱི་མ༌ལ། །ཁོ་ཚོའི་མིང་ཡང་རྩ་ནས་གསུབ་གྱུར༌ཅིག།
PSA 109:14 མེས་པོའི་སྡིག་ཉེས་ཡ་ཝཱེས་དྲན་པ༌དང༌། །མ་ཡི་སྡིག་པ་བསལ་བར་མ་གྱུར༌ཅིག།
PSA 109:15 དེ་ཚོའི་མིང་རྣམས་ས་ལས་ཚར་གཅོད༌ཕྱིར། །སྡིག་པ་རྟག་ཏུ་ཡ་ཝཱེའི་དྲུང་ལུས༌ཤོག།
PSA 109:16 དེ་ཡིས་དྲིན་གྱིས་སྐྱོང་བ་བརྗེད་གྱུར༌ནས། །ཉམ་ཐག་དབུལ་ཕོངས་སྡུག་གིས་མནར་བའི༌སེམས། །འཆི་ལམ་སྐྱེལ་ཕྱིར་དེ་ཚོར་གཙེས་ཕྱིར༌རོ།།
PSA 109:17 ཁོ་རང་དམོད་པར་དགའ་བས་རང་སྟེང༌བབས། །བྱིན་རླབས་ལ་ནི་སྡང་བས་རིང་དུ༌གྱེས།།
PSA 109:18 དམོད་པ་གྱོན་གོས་བཞིན་དུ་གྱོན་པས༌ན། །ཁོ་ཡི་ཁོག་ནང་དེ་ནི་ཆུ་ལྟར༌དང༌། །རུས་པའི་གསེང་དུ་སྣུམ་བཞིན་ཐིམ་པ༌ཡིན།།
PSA 109:19 དམོད་པ་དེ་ལ་གྱོན་གོས་བསྐོན་བཞིན༌དང༌། །ནམ་རྒྱུན་འཆིང་བའི་སྐ་རགས་སུ་གྱུར༌ཅིག།
PSA 109:20 འདི་ནི་ང་ལ་གཏམ་ངན་སྨྲ་བ༌དང༌། །ང་ཡི་དགྲ་བོར་ཡ་ཝཱེས་གནང་བའི༌ལན།།
PSA 109:21 འོན་ཀྱང་ཀྱེ་ཀྱེ་གཙོ་བོ་ཡ་ཝཱེ༌ལགས། །ཁྱེད་ཀྱི་མཚན་ཕྱིར་ང་རང་དྲིན་གྱིས༌སྐྱོངས། །ཡིད་འོང་བྱམས་བརྩེས་ང་རང་སྐྱབས་སུ༌གསོལ།།
PSA 109:22 ང་ནི་ཉམ་ཐག་དབུལ་ཕོངས་ཡིན་པ༌དང༌། །སེམས་ཀྱི་གཏིང་ལ་རྨས་སྐྱོན་ཤོར་ནས༌ཡོད།།
PSA 109:23 ནུབ་ཁའི་གྲིབ་མ་ནང་བཞིན་ང་ཡལ༌ཞིང༌། །ཆ་ག་པ་ལྟར་ང་རང་སྤྲུགས་ནས༌ཐོན།།
PSA 109:24 སྨྱུང་བར་གནས་པར་པུས་མོའི་ཤེད་ཉམས༌ཤིང༌། །གཟུགས་པོ་རིད་ནས་ཤ་ཡང་བསྐམས་པ༌འོ།།
PSA 109:25 ང་རང་དེ་ཚོས་འཕྱ་བའི་གནས་སུ༌གྱུར། །ང་རང་མཐོང་ཚེ་དེ་ཚོས་མགོ་གཡུག༌གོ།
PSA 109:26 ཀྱེ་ཀྱེ་ང་ཡི་དཀོན་མཆོག༌ཡ་ཝཱེ་ལགས། །ཁྱེད་ཀྱིས་ང་ལ་རོགས་རམ་གནང་ནས༌ནི། །ཉིད་ཀྱི་བྱམས་བརྩེ་བཞིན་དུ་སྐྱབས་སུ༌གསོལ།།
PSA 109:27 འདི་ནི་ཡ་ཝཱེ་ཁྱེད་ཀྱི་ཕྱག་ལས༌དང༌། །ཉིད་ཀྱི་མཛད་འཕྲིན་ཡིན་པ་ཤེས་སུ༌གསོལ།།
PSA 109:28 དེ་ཚོས་དམོད་ཀྱང་ཁྱེད་ཀྱིས་བྱིན་རླབས༌གནོངས། །རྒོལ་བར་ལངས་དུས་དེ་རྣམས་ངོ་ཚ༌ཡང༌། །ཁྱེད་ཀྱི་ཞབས་ཕྱི་དགའ་མགུ་རངས་པར༌འགྱུར།།
PSA 109:29 ང་ཡི་དགྲ་རྣམས་ངོ་ཚ་གྱོན་པར༌ཤོག །རང་གི་ངོ་ཚས་གོས་ལྟར་གཡོག་གྱུར༌ཅིག།
PSA 109:30 བདག་ཁས་ཡ་ཝཱེར་གཏང་རག་ཆེན་པོ༌འབུལ། །མི་ཚོགས་ཁྲོད་དུ་ཁོང་ལ་བསྟོད་བསྔགས༌བརྗོད།།
PSA 109:31 སྲོག་ཆད་གཅོད་མཁན་རྣམས་ལས་དེ་སྐྱོབ༌ཕྱིར། །ཁོང་ཉིད་དབུལ་པོའི་གཡས་ཕྱོགས་སུ་བཞེང་འོང༌།།
PSA 110:1 ༼དཱ་བིད་ཀྱི་གསུང༌མགུར།༽ ཡ་ཝཱེས་ང་ཡི་གཙོ་བོར་འདི་སྐད༌དུ། །བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན། །ཁྱོད་ཀྱི་ཞབས་ཀྱི་སྟེགས་སུ་བསྒྱུར་བའི༌བར། །ཁྱོད་རང་བདག་གི་གཡས་སུ་བཞུགས་ཞེས་གསུངས།།
PSA 110:2 ཡ་ཝཱེས་ཁྱེད་ལ་ཛ་ཡན་ཡུལ་ནས༌ནི། །སྟོབས་ཀྱི་འཁར་བ་བརྐྱང་བར་མཛད་པས༌ན། །ཁྱེད་ཀྱིས་དགྲ་རྣམས་དཀྱིལ་དུ་རྒྱལ་སྲིད༌སྐྱོང༌།།
PSA 110:3 ཁྱེད་ཀྱིས་དམག་འཁྲུག་རྒྱག་པའི་ཉིན་མོ༌ལ། །ཉིད་ཀྱི་མི་སྡེ་མོས་ཤིང་ཁྱེད་རྗེས༌འབྲང༌། །གཞོན་ནུ་རྣམས་ཀྱིས་དམ་པ་རྒྱན་དུ༌གྱོན། །ཞོགས་པའི་ཟིལ་པ་བཞིན་དུ་ཁྱེད་དྲུང༌བསླེབ།།
PSA 110:4 མཆོད་དཔོན་མཱལ་ཀི་ཚེ་དེག་རིམ་པ༌བཞིན། །ཁྱེད་ནི་ཇི་སྲིད་བར་དུ་མཆོད་དཔོན༌ཡིན། །ཡ་ཝཱེས་དེ་སྐད་འགྱོད་མེད་དབུ་མནའ༌བཞེས།།
PSA 110:5 གཙོ་བོ་ཁྱེད་ཀྱི་གཡས་སུ་བཞུགས་པ༌དང༌། །ཐུགས་ཁྲོའི་ཉིན་མོར་རྒྱལ་པོ་རྣམས་འཇོམས་སོ།།
PSA 110:6 ཁོང་གིས་མི་རིགས་རྣམས་ལ་ཁྲིམས་ཐག༌གཅོད། །ག་ས་གང་དུ་བམ་རོས་ཁེབས་འགྱུར༌ཞིང༌། །ས་གཞི་ཡོངས་ཀྱི་འགོ་དཔོན་ཚར་གཅོད༌མཛད།།
PSA 110:7 རྒྱལ་པོས་ལམ་ཁའི་རྒྱུག་ཆུ་འཐུང་བས༌ན། །ཁོང་གི་མགོ་འཕང་མཐོ་རུ་འདེགས་པར༌འགྱུར།།
PSA 111:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །དྲང་པོའི་གྲོས་ཚོགས་དང་ནི་འདུ་འཛོམས༌ཁྲོད། །བློ་རྩེ་གཅིག་གིས་ཡ་ཝཱེར་གཏང་རག༌འབུལ།།
PSA 111:2 ཡ་ཝཱེའི་འཕྲིན་ལས་ཤིན་ཏུ་ཆེན་པོ༌ཡིན། །དགའ་མཁན་རྣམས་ཀྱིས་དེ་ལ་འབད་པས༌དཔྱོད།།
PSA 111:3 ཁོང་གི་མཛད་པར་དཔལ་དང་གཟི་བརྗིད༌མངའ། །ཉིད་ཀྱི་དྲང་བདེན་རྒྱུན་ནས་རྒྱུན་དུ༌གནས།།
PSA 111:4 ཁོང་གི་རྨད་བྱུང་རྣམས་ཀྱི་དྲན་རྟེན༌བཞག །ཡ་ཝཱེ་བཀའ་དྲིན་ཆེ་ཞིང་སྙིང་རྗེ༌ལྡན།།
PSA 111:5 གུས་ཤིང་འཇིགས་པའི་མི་ལ་ཁ་ཟས༌གནང༌། །ཉིད་ཀྱི་ཞལ་ཆད་རྟག་ཏུ་ཐུགས་སུ༌དྲན།།
PSA 111:6 མི་རིགས་གཞན་རྣམས་རང་གི་མི་སྡེ༌ལ། །ནོར་སྐལ་གནང་ནས་ཉིད་ཀྱི་མཐུ་སྟོབས༌མངོན།།
PSA 111:7 ཁོང་གི་འཕྲིན་ལས་བདེན་ཞིང་དྲང་གཞག༌ཡིན། །ཁོང་གི་བསླབ་བྱ་ཡིད་རྟོན་རུང་བ༌ཡིན།།
PSA 111:8 ཁོང་གི་བསླབ་བྱ་ནམ་ཡང་འགྱུར་བ༌མེད། །བདེན་ཞིང་དྲང་བའི་ལམ་ནས་བཀོད་ལེགས༌སོ།།
PSA 111:9 ཁོང་གིས་ཉིད་ཀྱི་མི་སྡེར་ཐར་པ༌གནང༌། །ཁོང་གི་ཞལ་ཆད་ཇི་སྲིད་བར་དུ༌བཞག །ཁོང་མཚན་དམ་པ་དང་ནི་བཀུར་འོས་ཡིན།།
PSA 111:10 ཡ་ཝཱེ་མཆོག་ལ་གུས་ཤིང་འཇིགས་པ༌ནི། །ཤེས་རབ་ཐོག་མ་ཡིན་ཞིང་དེ་བཞིན༌དུ། །སྤྱོད་མཁན་ཐམས་ཅད་མཁས་མཛངས་ལྡན་པ༌དང༌། །ཁོང་ལ་རྒྱུན་ནས་རྒྱུན་དུ་བསྟོད་འོས༌སོ།།
PSA 112:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཡ་ཝཱེར་གུས་ཤིང་འཇིགས་ལ་ཁོང་ཉིད༌ཀྱི། །བཀའ་ལ་ཤིན་ཏུ་དགའ་བའི་མི་རྣམས༌བདེ།།
PSA 112:2 དེའི་རྒྱུད་ས་སྟེང་སྟོབས་དང་ལྡན་པར༌འགྱུར། །དྲང་པོའི་བུ་རྒྱུད་ལ་ནི་བྱིན་རླབས༌འཐོབ།།
PSA 112:3 དེ་ཡི་ཁྱིམ་ལ་རྒྱུ་ནོར་འབྱོར་ཕྱུག༌ལྡན། །དེ་ཡི་དྲང་བདེན་རྒྱུན་ནས་རྒྱུན་དུ༌གནས།།
PSA 112:4 དྲང་པོ་མུན་པར་གནས་ཀྱང་འོད་སྤྲོ༌ཞིང༌། །དེ་ལ་ཐུགས་རྗེ་སྙིང་རྗེ་དྲང་བདེན༌མངའ།།
PSA 112:5 གཞན་ལ་སྙིང་རྗེ་བྱེད་ཅིང་སྐྱི་མཁན༌དང༌། །རང་དོན་དྲང་པོར་ཐག་གིས་གཅོད་པ༌བདེ།།
PSA 112:6 དེ་ནི་ཁོ་རང་ནམ་ཡང་གཡོ་བ༌མེད། །དྲང་བདེན་མི་ནི་རྟག་ཏུ་དྲན་པར༌འགྱུར།།
PSA 112:7 དེ་ནི་གཏམ་ངན་ལ་ཡང་འཇིགས་པ༌མེད། །ཡ་ཝཱེར་བློ་གཏད་བཅོལ་བས་སེམས་བརྟན༌ནོ།།
PSA 112:8 དགྲ་བོ་རྣམས་ལ་ལྟད་མོ་ལྟ་བའི༌བར། །དེའི་སེམས་བརྟན་ཞིང་འཇིགས་སྣང་གང་ཡང༌མེད།།
PSA 112:9 དབུལ་པོ་རྣམས་ལ་སྦྱིན་པ་ཆེར་བཏང༌ཞིང༌། །དེ་ཡི་དྲང་བདེན་ཇི་སྲིད་བར་དུ་གནས། །དེ་ཡི་རྭ་དུང་གཟི་དཔལ་ནང་དུ༌འདེགས།།
PSA 112:10 ངན་པས་དེ་རྣམས་མཐོང་ནས་འཚིག་པ༌ཟ། །ཁའི་སོ་བརྡར་ནས་ལུས་སེམས་རྒུད་པར༌གྱུར། །ངན་པའི་འདོད་འདུན་རྩ་ནས་ཡལ་བར༌འགྱུར།།
PSA 113:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཀྱེ་ཀྱེ་ཡ་ཝཱེའི་ཞབས་ཕྱི་ཁྱོད་རྣམས༌ཀྱིས། །ཡ་ཝཱེའི་མཚན་ལ་བསྟོད་པར་གྱིས་ཤིག༌ཨང༌།།
PSA 113:2 ཡ་ཝཱེའི་མཚན་ནི་བསྟོད་པར་འོས་པ༌སྟེ། །དེ་རིང་དུས་ནས་རྟག་ཏུ་བསྟོད་འོས༌སོ།།
PSA 113:3 ཉི་མ་ཤར་ནས་ནུབ་ལ་བཞུད་པའི༌བར། །ཡ་ཝཱེའི་མཚན་ནི་ཀུན་ནས་བསྟོད་འོས༌སོ།།
PSA 113:4 ཁོང་ནི་མི་རིགས་ཀུན་ལས་བླ་ན༌མཐོ། །ཁོང་གི་གཟི་བརྗིད་ནམ་མཁའ་ལས་ཀྱང༌མཐོ།།
PSA 113:5 རང་ཅག་དཀོན་མཆོག་ཡ་ཝཱེར་མཚུངས་པ༌སུ། །བླ་ན་མེད་པའི་གནས་སུ་དཀོན་མཆོག༌བཞུགས།།
PSA 113:6 གནམ་ས་ཡོངས་ཀྱི་དོན་ལ་གཟིགས་པའི༌ཕྱིར། །ཁོང་གིས་རང་ཉིད་དམའ་བར་བཟུང་མཛད༌དོ།།
PSA 113:7 སྙིགས་རྡུལ་ཚོགས་ལས་ཁོང་གིས་དབུལ་པོ༌འདེགས། །གད་སྙིགས་ཚོགས་ལས་ཁོང་གིས་སྤྲང་པོ༌འཐེན།།
PSA 113:8 རྒྱལ་སྲས་དང་ནི་མཉམ་དུ་འདུག་པ༌སྟེ། །མི་སྡེའི་རྒྱལ་སྲས་དང་ནི་འདུག་ཕྱིར༌རོ།།
PSA 113:9 མོ་ཤམ་རྣམས་ནི་ཁྱིམ་དུ་བདེ་ལ༌བཀོད། །ཕྲུ་གུ་མང་བའི་བདེ་སྐྱིད་གནང་བ༌འོ། །ཡ་ཝཱེ་ཁོང་ལ་ཀུན་གྱིས་བསྟོད་པར༌ཤོག།
PSA 114:1 ཡེས་ར་ཨེལ་ནི་ཨེ་ཅིབ་ནས་ཐོན༌ཞིང༌། །ཡ་ཀོབ་ཁྱིམ་རྒྱུད་སྐད་གཞན་སྨྲ་བ༌ཡི། །མི་སྡེ་དང་ནི་བྲལ་ནས་ཐོན་དུས༌སུ།།
PSA 114:2 ཡ་ཧུ་དཱ་ནི་གཙོ་བོའི་གནས༌མཆོག་དང༌། །ཡེས་ར་ཨེལ་ནི་ཁོང་གི་རྒྱལ་སྲིད༌གྱུར།།
PSA 114:3 རྒྱ་མཚོ་ཆེན་པོས་མཐོང་ནས་བྲོས་པ༌དང༌། །ཡོར་དན་གཙང་པོ་ཡང་ནི་ལྡོག་ནས༌བཞུར།།
PSA 114:4 རི་བོ་ཆེན་པོ་ལུག་ཐུག་བཞིན་དུ༌མཆོངས། །རི་སྒང་རྣམས་ཀྱང་ལུ་གུ་བཞིན་དུ༌ལྡིང༌།།
PSA 114:5 ཀྱེ་མ་རྒྱ་མཚོ་ཁྱོད་ནི་བྲོས་པ་དང༌། །ཡོར་དན་གཙང་པོ་ལྡོག་ཏུ་བཞུར་བ༌ཅི།།
PSA 114:6 ཀྱེ་ཀྱེ་རི་རྣམས་ལུག་ཐུག་ཇི་བཞིན༌དང༌། །སྒང་རྣམས་ལུ་གུ་ཇི་བཞིན་མཆོང་བ༌ཅི།།
PSA 114:7 ས་གཞི་ཆེན་པོ་གཙོ་བོའི་ཞལ་དྲུང༌སྟེ། །ཡ་ཀོབ་དཀོན་མཆོག་དྲུང་དུ་འདར་བར༌གྱིས།།
PSA 114:8 ཁོང་གིས་བྲག་རྡོ་ཆུ་ཡི་རྫིང་བུ༌དང༌། །ལྕགས་རྡོ་ཆུ་མིག་ལ་ནི་མཛད་པ༌འོ།།
PSA 115:1 ཀྱེ་ཀྱེ་ཡ་ཝཱེ་གཟི་བརྗིད་ངེད་རྣམས༌ལ། །གནང་བར་མ་མཛད་ངེད་ལ་གནང་མ༌མཛད། །ཁྱེད་ཀྱི་བྱམས་བརྩེ་དང་ནི་དྲང་བདེན༌ཕྱིར། །ཉིད་ཀྱི་མཚན་ལ་སྙན་གྲགས་གནང་དུ༌གསོལ།།
PSA 115:2 ཁོ་ཚོའི་དཀོན་མཆོག་གང་དུ་ཡོད་དམ༌ཞེས། །མི་རིགས་གཞན་ལ་སྨྲ་བར་མཛད་དོན༌ཅི།།
PSA 115:3 ང་ཚོའི་དཀོན་མཆོག་ནམ་མཁར་བཞུགས་ལགས༌ཤིང༌། །ཁོང་ཉིད་ཅི་ལ་དགྱེས་ན་དེ་བཞིན༌མཛད།།
PSA 115:4 དེ་ཚོའི་ལྷ་སྐུ་དག་ནི་གསེར་དང༌དངུལ། །དེ་ནི་མི་ཡི་ལག་པས་བཟོས་པ༌དང༌།།
PSA 115:5 སྨྲ་སྒོ་ཡོད་ཀྱང་དེ་དག་གཏམ་མི༌ལབ། །མིག་ནི་ཡོད་ཀྱང་དེ་རྣམས་མཐོང་བ༌མིན།།
PSA 115:6 རྣ་བ་ཡོད་ཀྱང་དེ་རྣམས་ཐོས་མི་ཐུབ། །སྣ་བུག་ཡོད་ཀྱང་དྲི་མ་བསྣོམ་མི༌བྱེད།།
PSA 115:7 ལག་པ་ཡོད་ཀྱང་རེག་པར་མི་ནུས༌ཤིང༌། །རྐང་པ་ཡོད་ཀྱང་འགྲུལ་བར་མི་བྱེད༌ལ། །དེ་དག་མགྲིན་པ་ལས་ཀྱང་ངག་མི༌ཐོན།།
PSA 115:8 ལྷ་སྐུ་བཟོ་མཁན་ལྷ་སྐུ་དང་མཚུངས༌ཤིང༌། །དེ་ལ་བརྟེན་པ་རྣམས་ཀྱང་དེ་བཞིན༌ནོ།།
PSA 115:9 ཡེས་ར་ཨེལ་ཁྱོད་ཡ་ཝཱེར་བརྟེན་པར༌གྱིས། །ཁོང་ནི་དེ་ཚོའི་ཕུབ་དང་རོགས་རམ་ཡིན།།
PSA 115:10 ཨ་རོན་ཁྱིམ་རྒྱུད་ཡ་ཝཱེར་བློ་གཏོད༌ཅིག །ཁོང་ནི་དེ་ཚོའི་ཕུབ་དང་རོགས་རམ་ཡིན།།
PSA 115:11 ཀྱེ་ཀྱེ་ཡ་ཝཱེར་གུས་ཤིང་འཇིགས་པ༌རྣམས། །ཁྱོད་ཚོས་ཡ་ཝཱེར་བློ་གཏད་བཅོལ་དགོས༌ཏེ། །ཁོང་ནི་དེ་ཚོའི་ཕུབ་དང་རོགས་རམ་ཡིན།།
PSA 115:12 ཡ་ཝཱེས་རང་ཅག་ཐུགས་སུ་དྲན་ནས༌ནི། །ང་ཚོར་བྱིན་རླབས་གནང་བར་གདོན་མི༌ཟ། །ཡེས་ར་ཨེལ་ལ་བྱིན་རླབས་གནང་བར༌འགྱུར། །ཨ་རོན་ཁྱིམ་ལའང་བྱིན་རླབས་གནང་བར༌འགྱུར།།
PSA 115:13 ཡ་ཝཱེར་གུས་ཤིང་འཇིགས་པར་བྱེད་པ༌ཡི། །ཆེ་ཆུང་མཆོག་དམན་ཀུན་ལ་བྱིན་གྱིས༌བརླབ།།
PSA 115:14 ཡ་ཝཱེས་ཁྱོད་རྣམས་འཕེལ་བར་མཛད་པ༌དང༌། །ཁྱོད་དང་ཁྱོད་ཀྱི་བུ་རྒྱུད་སྤེལ་བར༌མཛོད།།
PSA 115:15 གནམ་ས་གཉིས་ཀྱི་བྱེད་པོ་ཡ་ཝཱེ༌ཡི། །བྱིན་རླབས་ཁྱོད་ཚོར་འཐོབ་པར་གྱུར་ཅིག༌གུ།
PSA 115:16 ནམ་མཁའི་དབྱིངས་རྣམས་ཡ་ཝཱེའི་ཡིན་མོད༌ཀྱང༌། །ས་གཞི་ཁོང་གིས་འཇིག་རྟེན་མི་ལ༌གནང༌།།
PSA 115:17 གཤིན་པོ་རྣམས་དང་གཤིན་ཡུལ་བབས་པ༌ཡིས། །ཡ་ཝཱེར་བསྟོད་བསྔགས་བརྗོད་པར་ནུས་མ༌ཡིན།།
PSA 115:18 དེ་ཡང་ད་ལྟའི་དུས་ནས་ཇི་སྲིད༌བར། །ང་ཚོས་ཡ་ཝཱེར་བསྟོད་པ་འབུལ་བར༌བྱ། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 116:1 ཡ་ཝཱེས་ང་ཡི་སྐད་དང་འོ་དོད༌ལ། །གསན་པར་གྱུར་པས་ང་རང་ཁོང་ལ༌དགའ།།
PSA 116:2 དེ་བཞིན་ཁོང་གིས་བདག་ལ་སྙན་གཏད༌པས། །ང་ཡིས་མི་ཚེ་གང་པོར་ཁོང་ལ༌ཞུ།།
PSA 116:3 འཆི་བའི་ཐག་པས་ང་རང་བཅིངས་པ༌དང༌། །གཤིན་པོའི་ཡུལ་གྱི་ཟུག་གཟེར་ང་ལ༌བྱུང༌། །དཀའ་ལས་དང་ནི་སྡུག་བསྔལ་ང་ཡིས༌མྱངས།།
PSA 116:4 དེའི་དུས་བདག་གིས་ཡ་ཝཱེའི་མཚན་བོས༌ནས། །ངའི་སྲོག་སྐྱོབ་པར་མཛོད་ཅེས་ཞུ་བ༌ཕུལ།།
PSA 116:5 ཡ་ཝཱེ་ཐུགས་རྗེ་ཅན་དང་དྲང་བདེན༌ལགས། །རང་ཅག་དཀོན་མཆོག་སྙིང་རྗེའི་བདག་པོ༌ཡིན།།
PSA 116:6 ཡ་ཝཱེས་བླུན་རྨོངས་མི་རྣམས་སྲུང་བར༌མཛད། །ང་རང་དམན་སར་ལྷུང་དུས་ཁོང་གིས༌བསྐྱབས།།
PSA 116:7 ཡ་ཝཱེས་ཁྱོད་རང་དྲིན་གྱིས་བསྐྱངས་པས༌ན། །ང་ཡི་སེམས་ཁྱོད་ཡང་བསྐྱར་བདེ་ལ༌བོབས།།
PSA 116:8 གཙོ་བོ་ཁྱེད་ཀྱིས་ངའི་སྲོག་འཆི་བ༌དང༌། །ང་ཡི་མིག་ཟུང་མཆི་མ་བཞུར་བ༌དང༌། །བདག་གི་རྐང་པ་འདྲེད་པ་བཅས་ལས༌བསྐྱབས།།
PSA 116:9 གསོན་པོའི་ཡུལ་ནང་ཡ་ཝཱེའི་དྲུང་དུ༌འགྲུལ།།
PSA 116:10 བདག་གིས་སྡུག་བསྔལ་ཆེན་པོ་མྱངས་པ༌ཞེས། །ང་ཡིས་དད་པའི་རྐྱེན་གྱིས་དེ་སྐད༌སྨྲས།།
PSA 116:11 དངངས་སྐྲག་ནང་དུ་བདག་གིས་འདི་ལྟར༌དུ། །མི་ཀུན་རྫུན་རྐྱལ་ཡིན་ཞེས་སྨྲས་པ༌འོ།།
PSA 116:12 ཡ་ཝཱེས་གནང་བའི་ཐུགས་རྗེ་ཀུན་གྱི༌ཕྱིར། །བདག་གིས་ཁོང་ལ་དྲིན་ལན་གང་གིས༌འཇལ།།
PSA 116:13 བདག་གིས་ཐར་པའི་ཕོར་པ་ཡར་བཏེགས༌ནས། །ཡ་ཝཱེའི་མཚན་ལ་བསྟོད་བསྔགས་བརྗོད་བྱེད༌དོ།།
PSA 116:14 ཡ་ཝཱེའི་མི་སྡེ་ཀུན་གྱི་མཐོང་ལམ༌དུ། །དམ་བཅའ་རྣམས་ནི་ཁོང་ལ་བསྒྲུབ་པར༌བྱ།།
PSA 116:15 དད་གུས་ལྡན་པ་རྣམས་ཀྱི་འཆི་བ༌ནི། །ཡ་ཝཱེའི་གཟིགས་ངོར་རིན་ཐང་དཔག་ཏུ༌མེད།།
PSA 116:16 ཁྱེད་ཀྱི་ཞབས་ཕྱི་ང་ཡིན་ཀྱེ་ཡ༌ཝཱེ། །ཁྱེད་ཀྱི་བྲན་མོའི་བུ་ང་ཁྱེད་ཀྱི༌བྲན། །ང་ཡི་ལྕགས་ཐག་ཁྱེད་ཀྱིས་བཀྲོལ་བ༌ཡིན།།
PSA 116:17 བདག་གིས་གཏང་རག་མཆོད་པ་ཁྱེད་ལ༌འབུལ། །ཡ་ཝཱེའི་མཚན་ལ་བསྟོད་བསྔགས་བརྗོད་པར༌བྱ།།
PSA 116:18 ཡ་ཝཱེའི་མི་སྡེ་ཀུན་གྱི་མཐོང་ལམ༌དུ། །དམ་བཅའ་རྣམས་ནི་ཁོང་ལ་བསྒྲུབ་པར༌བྱ།།
PSA 116:19 ཡེ་རུ་སཱ་ལེམ་ཁྱེད་ཀྱི་དཀྱིལ་དབུས༌སུ། །ཡ་ཝཱེའི་བཞུགས་གནས་དམ་པའི་ཁྱམས་ར༌ནང༌། །བདག་གིས་རང་གི་དམ་བཅའ་བསྒྲུབ་པར༌བྱ། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 117:1 ཀྱེ་ཀྱེ་མི་རིགས་ཀུན་གྱིས་ཡ་ཝཱེར༌བསྟོད། །ཀྱེ་ཀྱེ་མི་སྡེ་ཡོངས་ཀྱིས་ཁོང་ལ༌བསྟོད།།
PSA 117:2 ཁོང་གིས་གནང་བའི་བྱམས་བརྩེ་ཆེན་པོ༌ཡིན། །ཁོང་གི་དྲང་བདེན་རྒྱུན་ནས་རྒྱུན་དུ༌གནས། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 118:1 ཡ་ཝཱེ་ལེགས་པས་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 118:2 ཡེས་ར་ཨེལ་གྱིས་འདི་ལྟར་ཞུ་བར༌གྱིས། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 118:3 ཨ་རོན་རྒྱུད་ཀྱིས་འདི་ལྟར་ཞུ་བར༌གྱིས། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 118:4 ཡ་ཝཱེར་གུས་ཤིང་འཇིགས་པས་འདི་ལྟར༌ཞུས། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 118:5 སྡུག་བསྔལ་ཁྲོད་ནས་ཡ་ཝཱེར་འོ་དོད༌བོས། །བཀའ་ལན་གནང་ཞིང་ཐར་བར་མཛད་ལགས༌སོ།།
PSA 118:6 ཡ་ཝཱེ་ངའི་ཕྱོགས་བཞུགས་པས་ང་མི༌འཇིགས། །མི་ཡིས་བདག་ལ་ཅི་ཞིག་བྱེད་ནུས༌སམ།།
PSA 118:7 ང་ཡི་སྡོངས་གྲོགས་ཁོང་ཉིད་ངའི་ཕྱོགས༌བཞུགས། །བདག་གིས་དགྲ་བོ་རྣམས་ལ་ལྟད་མོར༌བལྟ།།
PSA 118:8 འཇིག་རྟེན་མི་ལ་བློ་གཏད་བཅོལ་བ༌ལས། །ཡ་ཝཱེར་སྐྱབས་སུ་འགྲོ་བ་ཤིན་ཏུ༌ལེགས།།
PSA 118:9 རྒྱལ་སྲས་རྣམས་ལ་བློ་གཏད་བཅོལ་བ༌ལས། །ཡ་ཝཱེར་སྐྱབས་སུ་འགྲོ་བ་ཤིན་ཏུ༌ལེགས།།
PSA 118:10 མི་རིགས་ཀུན་གྱིས་ངའི་མཐའ་བསྐོར་ན༌ཡང༌། །ཡ་ཝཱེའི་མཚན་ལ་བརྟེན་ནས་ཚར་གཅོད༌བྱ།།
PSA 118:11 དེ་ཚོས་ང་ཡི་མཐའ་ནས་ང་རང༌བསྐོར། །ཡ་ཝཱེའི་མཚན་ལ་བརྟེན་ནས་ཚར་གཅོད༌བྱ།།
PSA 118:12 སྦྲང་མ་ནང་བཞིན་དེ་རྣམས་ངའི་སྟེང༌རུབ། །དེ་རྣམས་ཚེར་མའི་མེ་བཞིན་ཞི་བར༌འགྱུར། །ཡ་ཝཱེའི་མཚན་ལ་བརྟེན་ནས་ཚར་གཅོད༌བྱ།།
PSA 118:13 ཁྱོད་ཀྱིས་ང་རང་བསྒྱེལ་ཕྱིར་ཤེད་ཀྱིས༌འཕུལ། །འོན་ཀྱང་ཡ་ཝཱེས་ང་ལ་རོགས་རམ༌མཛད།།
PSA 118:14 ཡ་ཝཱེ་ང་ཡི་སྟོབས་དང་མགུར་མ༌ཡིན། །ཁོང་ཉིད་བདག་གི་སྐྱབས་སུ་གྱུར་པ༌ཡིན།།
PSA 118:15 སྐྱེས་བུ་དྲང་བདེན་རྣམས་ཀྱི་གུར་ནང༌དུ། །དགའ་སྤྲོ་ཐར་པའི་ཀི་སྒྲས་འདི་བཞིན༌བརྗོད། །ཡ་ཝཱེའི་ཕྱག་གཡས་ཀྱིས་ནི་དོན་ཆེན༌མཛད།།
PSA 118:16 ཡ་ཝཱེ་ཕྱག་གཡས་མཐོན་པོར་བཀྱགས་པ༌དང༌། །ཁོང་གི་ཕྱག་གཡས་ཀྱིས་ནི་དོན་ཆེན༌མཛད།།
PSA 118:17 ང་ནི་འཆི་བར་མི་འགྱུར་གསོན་བསྡད༌དེ། །ཡ་ཝཱེའི་འཕྲིན་ལས་གང་མཛད་སྨྲ་བར༌བྱ།།
PSA 118:18 ཡ་ཝཱེས་ང་རང་དྲག་པོར་བཅུན་ན༌ཡང༌། །ང་རང་འཆི་བའི་དབང་དུ་མ་བཏད༌དོ།།
PSA 118:19 དྲང་བདེན་སྒོ་རྣམས་ང་ལ་ཕྱེས་ཤིག༌དང༌། །ང་དེར་འཛུལ་ནས་ཡ་ཝཱེར་གཏང་རག༌འབུལ།།
PSA 118:20 འདི་ནི་ཡ་ཝཱེའི་རྒྱལ་སྒོ་ཡིན་པ༌སྟེ། །དྲང་བདེན་མི་རྣམས་འབའ་ཞིག་འཇུག་པར༌འགྱུར།།
PSA 118:21 ཁྱེད་ཀྱིས་ང་ལ་བཀའ་ལན་གནང་བ༌དང༌། །ང་ཡི་སྐྱབས་སུ་གྱུར་པས་གཏང་རག༌འབུལ།།
PSA 118:22 བཟོ་བ་རྣམས་ཀྱིས་སྤངས་པའི་རྡོ་དེ༌ནི། །ཁང་པའི་ཟུར་གྱི་རྨང་རྡོར་གྱུར་པ༌ཡིན།།
PSA 118:23 འདི་ནི་ཡ་ཝཱེས་མཛད་པའི་འཕྲིན་ལས༌ཡིན། །བདག་ཅག་མིག་ལ་ངོ་མཚར་རབ་ཏུ༌ཆེ།།
PSA 118:24 འདི་ནི་ཡ་ཝཱེས་བཙུགས་པའི་ཉིན་མོ༌ཡིན། །ཉིན་འདིར་ང་ཚོ་དགའ་ཞིང་སྐྱིད་པར༌བྱེད།།
PSA 118:25 ཀྱེ་ཀྱེ་ཡ་ཝཱེ་ངེད་རྣམས་སྐྱོབ་པར༌མཛོད། །ངེད་རྣམས་དོན་ཀུན་འགྲུབ་པར་མཛད་དུ༌གསོལ།།
PSA 118:26 ཡ་ཝཱེའི་མཚན་ནས་བྱོན་པ་བྱིན་རླབས་ཅན། །ཡ་ཝཱེའི་བཞུགས་གནས་ལས་ནི་ངེད་རྣམས༌ཀྱིས། །ཁྱོད་རྣམས་ཀུན་ལ་བྱིན་གྱིས་བརླབ་པར༌བྱ།།
PSA 118:27 ཡ་ཝཱེ་ཁོང་ཉིད་དཀོན་མཆོག་ལགས་པ༌དང༌། །ཁོང་གིས་ཉིད་ཀྱི་འོད་སྣང་ངེད་ལ༌སྤྲོས། །ཁྱོད་ཚོས་དམར་མཆོད་ཐག་པས་བཀྱིགས་ནས༌ནི། །མཆོད་ཁྲིའི་རུ་ཐུར་ཡོད་སར་ཁྲིད་ལ༌ཐོགས།།
PSA 118:28 ཁྱེད་ངའི་དཀོན་མཆོག་ཡིན་པས་གཏང་རག༌འབུལ། །ཁྱེད་ངའི་དཀོན་མཆོག་ཡིན་པས་བཀུར་སྟི༌བྱ།།
PSA 118:29 ཡ་ཝཱེ་ལེགས་པས་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 119:1 སུ་ཞིག་སྤྱོད་པ་ཡོངས་སུ་རྫོགས་པ༌དང༌། །ཡ་ཝཱེའི་བཀའ་ཁྲིམས་བརྩི་སྲུང་བྱེད་པ༌བདེ།།
PSA 119:2 ཁོང་གི་དཔང་ཡིག་སྲུང་ཞིང་རྩེ་གཅིག༌གིས། །ཁོང་ཉིད་འཚོལ་བར་བྱེད་པའི་མི་རྣམས༌བདེ།།
PSA 119:3 དེ་ཚོས་མ་རུང་གང་ཡང་མི་བྱེད༌ཅིང༌། །ཁོང་གི་ཕེབས་ལམ་རྣམས་སུ་འགྲུལ་བར༌བྱ།།
PSA 119:4 ང་ཚོས་བརྩི་སྲུང་ནན་མོ་བགྱི་བའི༌ཕྱིར། །ཡ་ཝཱེ་ཁྱེད་ཀྱིས་ང་ཚོར་བཀའ་སློབ༌གནང༌།།
PSA 119:5 ཁྱེད་ཀྱི་སྒྲིག་ཁྲིམས་བརྩི་སྲུང་བྱ་ཐུབ༌ཕྱིར། །ང་ཡི་སྤྱོད་པ་བརྟན་པོ་འོང་བར༌ཤོག།
PSA 119:6 ཁྱེད་ཀྱི་བཀའ་རྒྱར་བརྩི་མཐོང་བྱེད་པས༌ན། །ང་རང་ནམ་ཡང་ནོངས་པར་མི་འགྱུར༌རོ།།
PSA 119:7 བདག་གིས་ཁྱེད་ཀྱི་དྲང་པོའི་ཁྲིམས་བསླབ༌པས། །གཞུང་དྲང་སེམས་ཀྱིས་ཁྱེད་ལ་གཏང་རག༌འབུལ།།
PSA 119:8 བདག་གིས་ཁྱེད་ཀྱི་སྒྲིག་ཁྲིམས་བསྲུང་བྱ༌ཞིང༌། །ཁྱེད་ཀྱིས་ང་རང་ཡོངས་སུ་སྤང་མ༌མཛོད།།
PSA 119:9 གཞོན་ནུས་སྤྱོད་ལམ་ཅི་ལྟར་གཙང་བར༌བྱ། །ཁྱེད་ཀྱི་བཀའ་བཞིན་འཚོ་བས་ཆོག་པ༌ཡིན།།
PSA 119:10 བདག་གིས་ཡིད་སེམས་ཧྲིལ་པོས་ཁྱེད་རང༌འཚོལ། །ཁྱེད་ཀྱི་བཀའ་ལས་ང་རང་འཁྱར་མ༌འཇུག།
PSA 119:11 ཁྱེད་དང་འགལ་བའི་སྡིག་པ་མི་བྱེད༌ཕྱིར། །ཁྱེད་ཀྱི་བཀའ་ནི་སེམས་གཏིང་ཉར་ནས༌ཡོད།།
PSA 119:12 ཀྱེ་ཀྱེ་ཡ་ཝཱེ་ཁྱེད་ཉིད་བསྟོད་པར༌འོས། །ཉིད་ཀྱི་སྒྲིག་ཁྲིམས་ང་ལ་སློབ་པར༌མཛོད།།
PSA 119:13 ཁྱེད་ཀྱི་ཞལ་ལས་འབྱུང་བའི་ཁྲིམས་སྲོལ༌ཀུན། །བདག་གི་མཆུ་སྒྲོས་ཀྱིས་ནི་བསྒྲག་པར༌བྱ།།
PSA 119:14 རྒྱུ་ནོར་ལོངས་སྤྱོད་ཀུན་ལ་དགའ་བ༌བཞིན། །ང་རང་ཁྱེད་ཀྱི་དཔང་ཡིག་ལ་དགའ༌འོ།།
PSA 119:15 ཁྱེད་ཀྱི་བཀའ་སློབ་བདག་གིས་སྒོམ་པར༌བྱ། །ཁྱེད་ཀྱི་ཕེབས་ལམ་རྣམས་ལ་བཀུར་སྟི་བྱེད།།
PSA 119:16 ང་རང་ཁྱེད་ཀྱི་སྒྲིག་ཁྲིམས་རྣམས་ལ༌དགའ། །ཁྱེད་ཀྱི་བཀའ་ནི་བདག་གིས་བརྗེད་མི༌བྱ།།
PSA 119:17 ཁྱེད་ཀྱི་ཞབས་ཕྱི་དྲིན་གྱིས་སྐྱོང་བར༌མཛོད། །ང་རང་འཚོ་ཞིང་ཉིད་ཀྱི་བཀའ་རྣམས༌བརྩི།།
PSA 119:18 བཀའ་ཁྲིམས་ཁྲོད་ཀྱི་ངོ་མཚར་མཐོང་བའི༌ཕྱིར། །ཁྱེད་ཀྱིས་བདག་གི་མིག་ཟུང་འབྱེད་པར༌མཛོད།།
PSA 119:19 ས་གཞིར་ང་རང་བྱེས་པ་ཡིན་པས༌ན། །ཁྱེད་ཀྱི་བཀའ་རྣམས་བདག་ལ་མི་སྦ༌རོགས།།
PSA 119:20 རྟག་ཏུ་ཁྱེད་ཀྱི་ཁྲིམས་ལ་རབ་དུངས༌བས། །ཐ་ན་བདག་གི་སེམས་ཤུགས་ཀྱང་ཉམས༌སོ།།
PSA 119:21 དམོད་མོ་ཐེབས་ཤིང་བཀའ་ལས་འཁྱར་བ༌ཡི། །ང་རྒྱལ་ཅན་ལ་ཁྱེད་ཀྱིས་བཀའ་བཀྱོན༌མཛད།།
PSA 119:22 བདག་གིས་ཁྱེད་ཀྱི་དཔང་ཡིག་རྣམས་བསྲུངས༌པས། །འཕྱ་དམོད་མཐོང་ཆུང་ང་དང་འབྲལ་བར༌མཛོད།།
PSA 119:23 སྐུ་དྲག་ལྷན་ཅིག་བསྡད་ནས་ང་རང༌གླེང༌། །འོན་ཀྱང་ཞབས་ཕྱིས་ཉིད་ཀྱི་སྒྲིག་ཁྲིམས༌སྒོམ།།
PSA 119:24 ཁྱེད་ཀྱི་དཔང་ཡིག་ང་ཡི་དགའ་སྤྲོ༌ཡིན། །དེ་རྣམས་བདག་གི་གྲོས་འདེབས་ཡིན་པ༌འོ།།
PSA 119:25 ང་ནི་ས་རྡུལ་ནང་དུ་འདྲེས་ལ༌ཉེ། །ཁྱེད་ཀྱི་བཀའ་བཞིན་ང་རང་གསོན་པར༌མཛོད།།
PSA 119:26 བདག་གིས་རང་གི་ཅི་བྱས་རྣམས་བཤད༌པས། །ཁྱེད་ཀྱིས་ང་ལ་བཀའ་ལན་གནང་བ༌དང༌། །ཉིད་ཀྱི་སྒྲིག་ཁྲིམས་ང་ལ་སློབ་པར༌མཛོད།།
PSA 119:27 ཁྱེད་ཀྱི་བཀའ་ཡི་བསླབ་བྱ་རྟོགས་སུ༌གསོལ། །བདག་གིས་ཁྱེད་ཀྱི་ངོ་མཚར་དོན་རྣམས༌སྒོམ།།
PSA 119:28 སྡུག་བསྔལ་དབང་གིས་མཆི་མ་བཞུར་བས༌ན། །ཁྱེད་ཀྱི་བཀའ་བཞིན་ང་ལ་སྟོབས་ཤུགས༌གནོངས།།
PSA 119:29 ང་རང་གཡོ་སྒྱུའི་ལམ་དང་ཕྲལ་བར༌མཛོད། །ཁྱེད་ཀྱི་བཀའ་ཁྲིམས་ང་ལ་གནང་དུ༌གསོལ།།
PSA 119:30 བདག་གིས་དྲང་བདེན་ལམ་དེ་བདམས་པ༌ཡིན། །ཁྱེད་ཀྱི་ཁྲིམས་སྲོལ་རྟག་ཏུ་མདུན་སར༌བཞག།
PSA 119:31 ཁྱེད་ཀྱི་དཔང་ཡིག་དམ་པོར་བསྲུངས་པས༌ན། །ཀྱེ་ཀྱེ་ཡ་ཝཱེ་ངོ་ཚར་མ་གཏོད༌ཅིག།
PSA 119:32 ཁྱེད་ཀྱིས་ངའི་སེམས་ཡངས་སར་བཀོད་པས༌ན། །ང་རང་ཁྱེད་ཀྱི་བཀའ་རྒྱའི་ལམ་དུ༌རྒྱུག།
PSA 119:33 ཡ་ཝཱེ་ཁྱེད་ཀྱི་སྒྲིག་ཁྲིམས་ང་ལ༌སློབ། །བདག་གིས་དེ་རྣམས་མཐའ་མའི་བར་དུ༌བསྲུང༌།།
PSA 119:34 བློ་གྲོས་གནོངས་དང་ཁྱེད་ཀྱི་བཀའ་ཁྲིམས༌བསྲུང༌། །ཡིད་སེམས་ཧྲིལ་པོས་དེ་ཉིད་བསྲུང་བར༌བྱ།།
PSA 119:35 ཁྱེད་ཀྱི་བཀའ་རྒྱའི་ལམ་ནང་ཁྲིད་པར༌མཛོད། །དེ་རུ་བདག་སེམས་དགའ་མགུ་རངས་པས༌སོ།།
PSA 119:36 ངའི་སེམས་མི་གཙང་ནོར་ལ་མི་ཕྱོགས༌པར། །ཁྱེད་ཀྱི་དཔང་ཡིག་ཕྱོགས་སུ་འདྲེན་པར༌མཛོད།།
PSA 119:37 སྙིང་པོ་མེད་པའི་དོན་ལས་ངའི་མིག༌སྲུངས། །ཁྱེད་ཀྱི་བཀའ་ནང་ང་རང་འཚོ་བར༌མཛོད།།
PSA 119:38 གུས་ཤིང་འཇིགས་པའི་མི་ལ་གནང་བ༌ཡི། །ཞལ་བཞེས་ཁྱེད་ཀྱི་ཞབས་ཕྱིར་མཛད་དུ༌གསོལ།།
PSA 119:39 ཁྱེད་ཀྱི་ཁྲིམས་སྲོལ་གཞི་ནས་བཟང་བས༌ན། །ང་རང་འཇིགས་པའི་ངོ་ཚ་ཕྲལ་བར༌མཛོད།།
PSA 119:40 ཁྱེད་ཀྱི་བཀའ་སློབ་ལ་ནི་ང་རང༌དུངས། །ཁྱེད་ཀྱི་དྲང་བདེན་ནང་དུ་འཚོ་བར༌མཛོད།།
PSA 119:41 ཀྱེ་ཀྱེ་ཡ་ཝཱེ་ཁྱེད་ཀྱི་ཞལ་བཞེས་བཞིན། །བྱམས་བརྩེ་ཐར་པ་ངའི་སྟེང་འབབ་པར༌ཤོག།
PSA 119:42 ཁྱེད་ཀྱི་བཀའ་ལ་བློ་གཏད་བཅོལ་བས༌ན། །ངོ་ཚ་གཏོད་མཁན་རྣམས་ལ་ངས་ལན༌འདེབས།།
PSA 119:43 ཁྱེད་ཀྱི་ཁྲིམས་སྲོལ་རྣམས་ལ་ངས་རེ༌བས། །བདེན་པའི་བཀའ་ངའི་སྨྲ་སྒོར་འབྲལ་མ༌འཇུག།
PSA 119:44 ཁྱེད་ཀྱི་བཀའ་ཁྲིམས་བདག་གིས་གཏན་དུ༌བསྲུང༌།།
PSA 119:45 ཁྱེད་ཀྱི་བཀའ་སློབ་བདག་གིས་བཙལ་བས༌ན། །ང་རང་ས་ཁོད་ཡངས་སར་འགྲུལ་བར༌བྱ།།
PSA 119:46 ཁྱེད་ཀྱི་དཔང་ཡིག་རྒྱལ་པོ་རྣམས་ཀྱི༌དྲུང༌། །འཆད་པར་བྱ་ཞིང་ང་རང་གནོང་མི༌འགྱུར།།
PSA 119:47 ཁྱེད་ཀྱི་བཀའ་རྒྱའི་ནང་དུ་ང་རང༌དགའ། །བཀའ་དེར་ང་རང་གཞི་ནས་དགའ་བ༌ཡིན།།
PSA 119:48 གཅེས་སུ་འཛིན་པའི་ཁྱེད་ཀྱི་བཀའ་རྒྱའི༌ཕྱོགས། །ང་ཡིས་ལག་པ་མཐོ་རུ་འདེགས་པར༌བྱ། །ཁྱེད་ཀྱི་སྒྲིག་ཁྲིམས་རྣམས་ནི་བདག་གིས༌སྒོམ།།
PSA 119:49 ཁྱེད་ཀྱིས་བདག་ལ་རེ་བ་བསྐྱེད་མཛད༌པས། །ཞབས་ཕྱིར་ཞལ་གྱིས་བཞེས་པའི་བཀའ་དྲན༌མཛོད།།
PSA 119:50 ཁྱེད་ཀྱི་བཀའ་ཡིས་ང་རང་གསོན་པར༌མཛད། །འདི་ནི་སྡུག་བསྔལ་ཁྲོད་ཀྱི་སེམས་གསོ༌ཡིན།།
PSA 119:51 ང་རྒྱལ་ཅན་གྱིས་ཚད་མེད་བརྙས་ན༌ཡང༌། །ང་རང་ཁྱེད་ཀྱི་བཀའ་ཁྲིམས་ལས་མ༌འཁྱར།།
PSA 119:52 ཀྱེ་ཀྱེ་ཡ་ཝཱེ་བདག་གིས་ཁྱེད་ཉིད༌ཀྱི། །གནའ་བོའི་ཁྲིམས་སྲོལ་དྲན་ནས་སེམས་གསོ༌ཐོབ།།
PSA 119:53 ཁྱེད་ཀྱི་བཀའ་ཁྲིམས་སྤངས་པའི་མི་ངན༌རྐྱེན། །ཁོང་ཁྲོའི་མེ་ལྕེ་དྲག་པོ་ངའི་ནང༌འབར།།
PSA 119:54 བདག་གིས་འཇིག་རྟེན་འདི་རུ་གནས་བཅས༌ཤིང༌། །ཁྱེད་ཀྱི་སྒྲིག་ཁྲིམས་མགུར་མའི་དབྱངས་སུ༌བྱས།།
PSA 119:55 ཡ་ཝཱེ་མཚན་མོར་ཁྱེད་ཀྱི་མཚན་དྲན༌ཞིང༌། །ཉིད་ཀྱི་བཀའ་ཁྲིམས་ང་ཡིས་བསྲུངས་པ༌ཡིན།།
PSA 119:56 ཁྱེད་ཀྱི་བཀའ་སློབ་རྩི་བ་བདག་ལ༌གོམས།།
PSA 119:57 ཡ་ཝཱེ་ང་ཡི་ནོར་སྐལ་ཡིན་པས༌ན། །ཁྱེད་ཀྱི་བཀའ་རྣམས་བསྲུང་དགོས་བདག་གིས༌སྨྲས།།
PSA 119:58 ཡིད་སེམས་ཧྲིལ་པོས་ཁྱེད་ཀྱི་བཀའ་དྲིན༌བཙལ། །ཁྱེད་ཀྱི་བཀའ་བཞིན་ང་ལ་སྙིང་རྗེ༌མཛོད།།
PSA 119:59 རང་གི་ལམ་ལ་བསམ་བློ་བཏང་ནས༌ནི། །ཁྱེད་ཀྱི་དཔང་ཡིག་ཕྱོགས་སུ་གོམ་སྟབས༌བསྒྱུར།།
PSA 119:60 ཁྱེད་ཀྱིས་གནང་བའི་བཀའ་རྣམས་བསྲུང་བའི༌ཕྱིར། །མགྱོགས་མགྱོགས་བགྱིས་ནས་འགོར་འགྱང་མི་བྱ༌འོ།།
PSA 119:61 ངན་པའི་ཐག་པས་ང་རང་དཀྲིས་ན༌ཡང༌། །བདག་གིས་ཁྱེད་ཀྱི་བཀའ་ཁྲིམས་བརྗེད་མེད༌ཡིན།།
PSA 119:62 ཁྱེད་ཀྱི་དྲང་བདེན་ཁྲིམས་སྲོལ་རྣམས་ཀྱི༌ཕྱིར། །ནམ་གུང་ལངས་ནས་ཁྱེད་ལ་གཏང་རག༌འབུལ།།
PSA 119:63 ཁྱེད་ལ་གུས་ཤིང་འཇིགས་ལ་བཀའ་སློབ༌རྣམས། །རྩི་མཁན་དག་གི་གྲོགས་པོ་ང་ཡིན༌ནོ།།
PSA 119:64 ཡ་ཝཱེ་ཁྱེད་ཀྱི་བྱམས་བརྩེ་ས་གཞིར༌ཁྱབ། །ཉིད་ཀྱི་སྒྲིག་ཁྲིམས་ང་ལ་སློབ་པར༌མཛོད།།
PSA 119:65 ཀྱེ་ཀྱེ་ཡ་ཝཱེ་ཁྱེད་ཀྱི་བཀའ་བཞིན༌དུ། །ཉིད་ཀྱི་ཞབས་ཕྱིར་ལེགས་པོ་མཛད་བྱུང༌ངོ༌།།
PSA 119:66 ང་རང་ཁྱེད་ཀྱི་བཀའ་ལ་དད་པས༌ན། །ཤེས་བྱ་མཁས་མཛངས་ང་ལ་སློབ་པར༌མཛོད།།
PSA 119:67 སྡུག་བསྔལ་མ་མྱངས་སྔོན་ལ་ཉེས་སྐྱོན༌བཟོས། །འོན་ཀྱང་ད་ནི་ཁྱེད་ཀྱི་བཀའ་སྲུང༌ངོ༌།།
PSA 119:68 ཁྱེད་ནི་བཟང་པོ་ལགས་པས་བཟང་པོ༌མཛད། །ཁྱེད་ཀྱི་སྒྲིག་ཁྲིམས་བདག་ལ་སློབ་པར༌མཛོད།།
PSA 119:69 ང་རྒྱལ་ཅན་གྱིས་བདག་ལ་རྫུན་གྱིས༌སྨད། །ངའི་སེམས་ཧྲིལ་པོས་ཁྱེད་ཀྱི་བཀའ་སློབ༌རྩི།།
PSA 119:70 དེ་ཚོའི་སྙིང་ནི་ཚིལ་གྱིས་བཏུམས་ན༌ཡང༌། །ང་རང་ཁྱེད་ཀྱི་བཀའ་ཁྲིམས་ལ་དགའ༌འོ།།
PSA 119:71 ཁྱེད་ཀྱི་སྒྲིག་ཁྲིམས་བདག་གིས་སློབ་པའི༌ཕྱིར། །སྡུག་བསྔལ་མྱངས་པས་བདག་ལ་ཕན་ཐོགས༌སོ།།
PSA 119:72 གསེར་དངུལ་སྟོང་ཕྲག་ལས་ཀྱང་ཁྱེད་ཉིད༌ཀྱི། །ཞལ་ལས་འབྱུང་བའི་བཀའ་ཁྲིམས་བདག་ལ༌ཕན།།
PSA 119:73 ང་ནི་ཁྱེད་ཀྱི་ཕྱག་གིས་བཀོད་ཅིང༌བཟོས། །ཁྱེད་ཀྱི་བཀའ་རྣམས་སློབ་ཕྱིར་གོ་རྟོགས༌གནོངས།།
PSA 119:74 ཁྱེད་ཀྱི་བཀའ་ལ་བདག་གིས་རེ་བས༌ན། །ཁྱེད་ལ་གུས་ཤིང་འཇིགས་པའི་མི་རྣམས༌ཀྱིས། །ང་རང་མཐོང་ན་དགའ་མགུ་ཡི་རང༌བགྱི།།
PSA 119:75 ཡ་ཝཱེ་ཁྱེད་ཀྱི་ཁྲིམས་གཅོད་དྲང་བ༌ཤེས། །དྲང་བདེན་སྒོ་ནས་ང་རང་སྡུག་ལ༌སྦྱར།།
PSA 119:76 ཞབས་ཕྱིར་ཞལ་གྱིས་བཞེས་པའི་བཀའ་བཞིན༌དུ། །ཉིད་ཀྱི་བྱམས་བརྩེས་བདག་ལ་སེམས་གསོ༌གནོངས།།
PSA 119:77 ཁྱེད་ཀྱི་བཀའ་ཁྲིམས་ལ་ནི་ང་དགའ༌བས། །ང་རང་འཚོ་ཕྱིར་སྙིང་རྗེ་གནང་བར༌ཤོག།
PSA 119:78 ང་རྒྱལ་ཅན་གྱིས་དོན་མེད་ང་ལ༌སྨད། །དེའི་ཕྱིར་ཁོ་རྣམས་ངོ་ཚར་སྦྱོར་བར༌ཤོག །འོན་ཀྱང་བདག་གིས་ཁྱེད་ཀྱི་བཀའ་སློབ༌བསྒོམ།།
PSA 119:79 ཁྱེད་ལ་གུས་པ་ངའི་ཕྱོགས་འཁོར་བར༌ཤོག །དེ་ཚོས་ཁྱེད་ཀྱི་དཔང་ཡིག་ཤེས་པར༌འགྱུར།།
PSA 119:80 ང་རང་ངོ་ཚའི་གནས་སུ་མི་ལྷུང༌ཕྱིར། །སྒྲིག་ཁྲིམས་ཐད་ནས་ངའི་སེམས་སྐྱོན་བྲལ༌ཤོག །
PSA 119:81 ཁྱེད་ཀྱི་སྐྱབས་ལ་དུངས་ནས་བདག་སེམས༌རྒུད། །ཉིད་ཀྱི་བཀའ་ལ་སྔར་བཞིན་རེ་སྒུག༌བྱེད།།
PSA 119:82 ཁྱེད་ཀྱི་བཀའ་ལ་རེ་བས་མིག་ཀྱང༌རིབ། །ནམ་ཞིག་སེམས་གསོ་གནང་ཞེས་བདག་གིས༌ཞུ།།
PSA 119:83 ང་རང་དུད་གདུག་ཁྲོད་ཀྱི་རྐྱལ་བ་བཞིན། །ཡིན་ཡང་ཁྱེད་ཀྱི་སྒྲིག་ཁྲིམས་བརྗེད་མེད༌དོ།།
PSA 119:84 ཁྱེད་ཀྱི་ཞབས་ཕྱིར་ཉི་མ་ག་ཚོད་ཡོད། །ང་ལ་འཚེ་མཁན་དག་ལ་ཁྲིམས་ནམ༌གཅོད།།
PSA 119:85 ཁྱེད་ཀྱི་བཀའ་ཁྲིམས་ཚུལ་བཞིན་མི་བརྩི༌བའི། །ང་རྒྱལ་ཅན་གྱིས་ངའི་ཆེད་ས་དོང༌བྲུས།།
PSA 119:86 ཁྱེད་ཀྱི་བཀའ་ནི་ཁ་ཚང་བདེན་པ༌ལགས། །དེ་ཚོས་གཡོ་སྒྱུས་འཚེ་བས་སྐྱབས་མཛོད༌ཅིག།
PSA 119:87 ཅུང་ཟད་ཙམ་གྱིས་དེ་ཚོས་ང་ཚར༌བཅད། །ཡིན་ཡང་ཁྱེད་ཀྱི་བཀའ་སློབ་དོར་བ༌མིན།།
PSA 119:88 ཁྱེད་ཀྱི་བྱམས་བརྩེ་བཞིན་དུ་སྐྱབས་སུ༌གསོལ། །ཉིད་ཀྱི་ཞལ་ལས་འབྱུང་བའི་དཔང་ཡིག༌བསྲུང༌།།
PSA 119:89 ཡ་ཝཱེ་ཁྱེད་ཀྱི་བཀའ་ནི་རྟག་ཏུ༌གནས། །ནམ་མཁའི་དབྱིངས་སུ་འཇགས་པར་མཛད་ལགས༌སོ།།
PSA 119:90 ཁྱེད་ཀྱི་དྲང་བདེན་མི་རབས་ཀུན་ཏུ་གནས། །ས་གཞི་བརྟན་པོར་བཙུགས་པས་རྟག་ཏུ༌གནས།།
PSA 119:91 ཡོད་ཚད་ཁྱེད་ཀྱི་ཞབས་ཕྱི་ཡིན་པས༌ན། །ཉིད་ཀྱི་ཁྲིམས་བཞིན་གནམ་ས་ད་བར༌གནས།།
PSA 119:92 ཁྱེད་ཀྱི་བཀའ་ཁྲིམས་ལ་ནི་དགའ་མེད༌ཚེ། །སེམས་སྡུག་ནང་དུ་ང་རང་ཤི་བ༌ཡིན།།
PSA 119:93 བཀའ་སློབ་བརྒྱུད་ནས་ང་ཡི་སྲོག་བསྐྱབས༌པས། །ཁྱེད་ཀྱི་བཀའ་སློབ་ནམ་ཡང་བརྗེད་མི༌འགྱུར།།
PSA 119:94 ཁྱེད་ཀྱི་བཀའ་སློབ་བདག་གིས་བཙལ་བ༌དང༌། །ང་རང་ཁྱེད་ཀྱི་ཡིན་པས་སྐྱབས་སུ༌གསོལ།།
PSA 119:95 ང་རང་གསོད་ཕྱིར་ངན་པ་འཇབ་ན༌ཡང༌། །བདག་གིས་ཁྱེད་ཀྱི་དཔང་ཡིག་ཞིབ་ཏུ༌བསམ།།
PSA 119:96 ཕུལ་བྱུང་ཀུན་ལ་མཐའ་ཡོད་ངས་མཐོང༌མོད། །ཁྱེད་ཀྱི་བཀའ་ནི་ཤིན་ཏུ་མཐའ་ཡས༌སོ།།
PSA 119:97 ཁྱེད་ཀྱི་བཀའ་ཁྲིམས་ལ་ང་ཇི་འདྲ༌དགའ། །ཉིན་གང་མཚམས་མེད་བདག་གིས་དེ་ནི༌སྒོམ།།
PSA 119:98 ཁྱེད་ཀྱི་བཀའ་རྣམས་ངའི་ནང་གཏན་དུ༌གནས། །ང་རང་དགྲ་བོ་རྣམས་ལས་མཁས་པར༌མཛད།།
PSA 119:99 བདག་གིས་ཁྱེད་ཀྱི་དཔང་ཡིག་བསྒོམས་པས༌ན། །བདག་གི་སློབ་དཔོན་ཀུན་ལས་བདག་མཁས༌སོ།།
PSA 119:100 ང་ཡིས་ཁྱེད་ཀྱི་བཀའ་སློབ་བསྲུངས་པས༌ན། །བདག་གི་གོ་རྟོགས་རྒན་པ་ལས་ཀྱང༌ཟབ།།
PSA 119:101 བཀའ་བཞིན་སྤྱོད་ཕྱིར་རང་གི་རྐང་པ༌ནི། །ངན་པའི་ལམ་ནང་ཞུགས་པར་བཀག་པ༌ཡིན།།
PSA 119:102 ཁྱེད་ཀྱིས་ང་ལ་བསླབ་བྱ་གནང་བས༌ན། །ཁྲིམས་སྲོལ་རྣམས་ལས་ང་རང་འཁྱོར་བ༌མེད།།
PSA 119:103 ཁྱེད་ཀྱི་བཀའ་རྣམས་བདག་ལ་མངར་མོ༌ཡིན། །ཁ་ལ་སྦྲང་རྩི་ལས་ཀྱང་མངར་མོ༌ཡིན།།
PSA 119:104 ཁྱེད་ཀྱི་གསུང་ལས་གོ་རྟོགས་རྙེད་པས༌ན། །རྫུན་གྱི་བགྲོད་ལམ་ཀུན་ལ་ང་རང༌སྡང༌།།
PSA 119:105 ཁྱེད་ཀྱི་བཀའ་ནི་མདུན་གྱི་སྒྲོན་མེ༌དང༌། །ང་ཡི་ལམ་གྱི་འོད་ཟེར་དེ་ཡང༌ཡིན།།
PSA 119:106 ཁྱེད་ཀྱི་བདེན་པའི་ཁྲིམས་སྲོལ་བསྲུང་བའི༌ཕྱིར། །བདག་གིས་མནའ་བསྐྱལ་དེའི་ནང་བརྟན་པོར༌གནས།།
PSA 119:107 ང་ནི་ཤིན་ཏུ་སྡུག་པས་ཀྱེ་ཡ༌ཝཱེ། །ཁྱེད་ཀྱི་བཀའ་བཞིན་ང་རང་སྐྱབས་སུ༌གསོལ།།
PSA 119:108 ཀྱེ་ཀྱེ་ཡ་ཝཱེ་བདག་གི་སྨྲ་སྒོ༌ཡི། །ཡིད་མོས་མཆོད་པ་ཐུགས་སུ་བཞེས་རོགས༌ཞུ། །ཉིད་ཀྱི་ཁྲིམས་སྲོལ་བདག་ལ་སློབ་པར༌མཛོད།།
PSA 119:109 ང་ཡི་ཚེ་སྲོག་རྟག་ཏུ་ཉེན་ཁར༌གནས། །ཡིན་ཡང་ཁྱེད་ཀྱི་བཀའ་ཁྲིམས་བརྗེད་མི༌སྲིད།།
PSA 119:110 ངན་པ་དག་གིས་ང་ལ་རྙི་བཙུགས༌ཀྱང༌། །ཁྱེད་ཀྱི་བཀའ་སློབ་ལས་ནི་འཁྱོར་བ༌མེད།།
PSA 119:111 བདག་སེམས་ཁྱེད་ཀྱི་དཔང་ཡིག་ལ་དགའ༌བས། །ང་ཡི་གཏན་གྱི་ནོར་སྐལ་དེ་ལགས༌སོ།།
PSA 119:112 བདག་སེམས་ཁྱེད་ཀྱི་སྒྲིག་ཁྲིམས་ཕྱོགས་འཁོར༌ནས། །འགྱུར་བ་མེད་པར་ནམ་རྒྱུན་བསྲུང་བར༌བྱ།།
PSA 119:113 བློ་གཉིས་ཅན་ལ་ང་རང་སྡང་བ༌དང༌། །ཁྱེད་ཀྱི་བཀའ་ཁྲིམས་ལ་ནི་ང་རང༌དགའ།།
PSA 119:114 ཁྱེད་ཉིད་བདག་གི་ཕུབ་དང་སྐྱབས་བཅོལ་ཡིན། །ང་ཡིས་ཁྱེད་ཀྱི་བཀའ་ལ་རེ་བ༌བསྐྱེད།།
PSA 119:115 ང་ཡིས་དཀོན་མཆོག་བཀའ་རྣམས་བསྲུང་ནུས༌ཕྱིར། །སྡིག་སྤྱོད་ཅན་རྣམས་ང་དང་འབྲལ་བར༌གྱིས།།
PSA 119:116 བཀའ་བཞིན་ང་རང་བསྐྱོར་ནས་འཚོ་བར༌མཛོད། །བདག་གི་རེ་བ་ངོ་ཚར་མི་སྦྱར༌རོགས།།
PSA 119:117 ང་རང་བསྐྱོར་དང་བདག་ནི་ཐར་ངེས༌ཤིང༌། །དུས་རྒྱུན་ཁྱེད་ཀྱི་སྒྲིག་ཁྲིམས་གཙིགས་སུ༌འཛིན།།
PSA 119:118 སྒྲིག་ཁྲིམས་ལས་ནི་གྱར་ཀུན་ཁྱེད་ཀྱིས༌འདོར། །དེ་ཚོའི་གཡོ་སྒྱུ་དོན་མེད་ཡིན་པས༌སོ།།
PSA 119:119 ས་སྟེང་མི་ངན་ཐམས་ཅད་སྙིགས་རོ༌བཞིན། །འདོར་བས་ཁྱེད་ཀྱི་དཔང་ཡིག་ལ་དགའ༌འོ།།
PSA 119:120 ཁྱེད་ལ་འཇིགས་པས་ང་ཡི་ལུས་ཕུང༌འདར། །ཁྱེད་ཀྱི་ཁྲིམས་གཅོད་ལ་ཡང་ང་འཇིགས༌སོ།།
PSA 119:121 དྲང་བདེན་དྲང་གཞག་བདག་གིས་སྤྱད་པས༌ན། །གཉའ་གནོན་བྱེད་མཁན་ལག་ཏུ་ང་མ༌སྤྲོད།།
PSA 119:122 ཁྱེད་ཀྱི་ཞབས་ཕྱིར་ཕན་ཕྱིར་ཁག་ཐེག༌མཛོད། །ང་རྒྱལ་ཅན་ལ་གཉའ་གནོན་བྱེད་མ༌འཇུག།
PSA 119:123 ཁྱེད་ཀྱི་སྐྱབས་དང་དྲང་བདེན་བཀའ་ལ༌ནི། །རེ་ལྟོས་བཅངས་ནས་བདག་གི་མིག་དབང༌ཉམས།།
PSA 119:124 ཁྱེད་ཀྱི་བྱམས་བརྩེའི་ངང་ནས་ཞབས་ཕྱིར༌གཟིགས། །ཉིད་ཀྱི་སྒྲིག་ཁྲིམས་བདག་ལ་སློབ་པར༌མཛོད།།
PSA 119:125 ཁྱེད་ཀྱི་དཔང་ཡིག་བདག་གིས་རྟོགས་པའི༌ཕྱིར། །ཉིད་ཀྱི་ཞབས་ཕྱིར་གོ་རྟོགས་གནང་བར༌མཛོད།།
PSA 119:126 མི་རྣམས་ཁྱེད་ཀྱི་བཀའ་ཁྲིམས་དང་འགལ་བས། །ཡ་ཝཱེས་འཕྲིན་ལས་མཛད་པའི་དུས་ལ༌བབས།།
PSA 119:127 དེའི་ཕྱིར་གསེར་དང་བཙོ་མའི་གསེར་ལས༌ཀྱང༌། །ང་རང་ཁྱེད་ཀྱི་བཀའ་ལ་ལྷག་ཏུ༌དགའ།།
PSA 119:128 བཀའ་སློབ་ཐམས་ཅད་བདག་གིས་བདེན་པར༌འཛིན། །ལོག་ལམ་ཀུན་ལ་ང་རང་གཞི་ནས༌སྡང༌།།
PSA 119:129 ཁྱེད་ཀྱི་དཔང་ཡིག་དག་ནི་ངོ་མཚར༌ཆེ། །དེའི་ཕྱིར་བདག་གིས་རྩེ་གཅིག་གིས་སྲུང༌ངོ༌།།
PSA 119:130 ཁྱེད་ཀྱི་བཀའ་རྣམས་གྲོལ་ན་འོད་འཕྲོ་ཞིང༌། །བླུན་རྨོངས་རྣམས་ཀྱི་བློ་སྒོ་འབྱེད་པ༌ཡིན།།
PSA 119:131 ང་རང་ཁྱེད་ཀྱི་བཀའ་ལ་རབ་དུངས༌པས། །བདག་གིས་ཁ་ཆེར་གདངས་བར་དབུགས་འཚངས༌སྐྱེས།།
PSA 119:132 ཁྱེད་ཀྱི་མཚན་ལ་དགའ་བར་ཅི་བྱས༌བཞིན། །ཁྱེད་ཉིད་ངའི་ཕྱོགས་འཁོར་ནས་སྙིང་རྗེ༌མཛོད།།
PSA 119:133 ཁྱེད་ཀྱི་བཀའ་ཡིས་བདག་གི་ལམ་སྣ༌དྲོངས། །སྡིག་པའི་དབང་དུ་ཚུད་པར་མི་མཛད༌རོགས།།
PSA 119:134 མི་ཡི་གཉའ་གནོན་འོག་ནས་བསྒྲལ་བར༌མཛོད། །བདག་གིས་ཉིད་ཀྱི་བཀའ་སློབ་བརྩི་བར༌བྱ།།
PSA 119:135 ཞབས་ཕྱིར་ཞལ་གྱི་འོད་མདངས་སྣང་བར༌མཛོད། །ཉིད་ཀྱི་སྒྲིག་ཁྲིམས་ང་ལ་སློབ་པར༌མཛོད།།
PSA 119:136 ཁོ་ཚོས་ཁྱེད་ཀྱི་བཀའ་ཁྲིམས་མི་སྲུང༌བས། །བདག་གི་མིག་ལས་མཆི་མའི་གཙང་པོ༌རྒྱུག།
PSA 119:137 ཀྱེ་ཀྱེ་ཡ་ཝཱེ་ཁྱེད་ཉིད་དྲང་བདེན༌ལགས། །ཁྱེད་ཀྱི་ཁྲིམས་གཅོད་ཀྱང་ནི་དྲང་གཞག༌ཡིན།།
PSA 119:138 དྲང་པོ་དང་ནི་བདེན་པ་བདེན་རྐྱང༌གིས། །ཉིད་ཀྱི་དཔང་ཡིག་མཐའ་དག་གཏན་ལ༌ཕབ།།
PSA 119:139 བདག་གི་དགྲ་བོས་ཁྱེད་ཀྱི་བཀའ་བརྗེད༌པས། །ངའི་སེམས་འཚུབ་ནས་མེ་ལྕེ་འབར་དང༌མཚུངས།།
PSA 119:140 ཁྱེད་ཀྱི་བཀའ་ནི་རབ་ཏུ་གཙང་བས༌ན། །ཞབས་ཕྱི་ང་རང་དེ་ལ་ཤིན་ཏུ༌དགའ།།
PSA 119:141 ང་ནི་སྨད་ཅིང་ཐ་ཤལ་ཡིན་ན༌ཡང༌། །ཁྱེད་ཀྱི་བཀའ་སློབ་བདག་གིས་བརྗེད་མེད༌ཡིན།།
PSA 119:142 ཁྱེད་ཀྱི་དྲང་བདེན་རྒྱུན་ནས་རྒྱུན་དུ༌གནས། །ཉིད་ཀྱི་བཀའ་ཁྲིམས་ཐམས་ཅད་བདེན་པ༌ལགས།།
PSA 119:143 དཀའ་ངལ་ཟུག་གཟེར་བདག་ལ་ཐེབས་གྱུར༌ཀྱང༌། །ཁྱེད་ཀྱི་བཀའ་ལ་བདག་སེམས་དགའ་བ༌ཡིན།།
PSA 119:144 ཁྱེད་ཀྱི་དཔང་ཡིག་རྟག་ཏུ་དྲང་བདེན༌ཡིན། །གོ་རྟོགས་གནོངས་དང་ང་རང་འཚོ་བྱེད༌དོ།།
PSA 119:145 ཀྱེ་ཀྱེ་ཡ་ཝཱེ་བདག་གིས་སེམས་ཧྲིལ༌པོས། །ཁྱེད་རང་འབོད་པས་བདག་ལ་བཀའ་ལན༌གནོངས། །ང་ཡིས་ཁྱེད་ཀྱི་སྒྲིག་ཁྲིམས་བསྲུང་ངེས༌ཡིན།།
PSA 119:146 ཁྱེད་ལ་འོ་དོད་འབོད་པས་སྐྱབས་སུ༌གསོལ། །ཁྱེད་ཀྱི་དཔང་ཡིག་བདག་གིས་ནན་གྱིས༌བསྲུང༌།།
PSA 119:147 ཐོ་རངས་སྔོན་དུ་ཁྱེད་ལ་འོ་དོད༌འབོད། །ཁྱེད་ཀྱི་བཀའ་ལ་བདག་གིས་རེ་བ༌བཅོལ།།
PSA 119:148 ཁྱེད་ཀྱི་བཀའ་རྣམས་ཡིད་དུ་བསྒོམ་པའི༌ཆེད། །བདག་གིས་མཚན་གང་མིག་ཟུང་བཙུམས་པ༌མེད།།
PSA 119:149 ཀྱེ་ཀྱེ་ཡ་ཝཱེ་ཉིད་ཀྱི་བྱམས་བརྩེ༌བཞིན། །ཁྱེད་ཀྱིས་ང་ཡི་སྐད་ལ་གསན་པར༌མཛོད། །ཁྲིམས་སྲོལ་དང་བསྟུན་ང་རང་འཚོ་བར༌མཛོད།།
PSA 119:150 གཡོ་སྒྱུ་སྙེག་པའི་མི་རྣམས་ཉེ་བར༌སླེབས། །ཁྱེད་ཀྱི་བཀའ་ཁྲིམས་ལས་ནི་རྒྱང་རིང༌གནས།།
PSA 119:151 ཀྱེ་ཀྱེ་ཡ་ཝཱེ་ཁྱེད་ཉིད་ཉེ་བར༌བཞུགས། །ཁྱེད་ཀྱི་བཀའ་ནི་ཐམས་ཅད་བློས་ཐུབ༌ཡིན།།
PSA 119:152 ཁྱེད་ཀྱི་དཔང་ཡིག་རྣམས་ལས་སྔར་ནས༌རྟོགས། །ཁྱེད་ཀྱིས་དེ་རྣམས་གཏན་དུ་ཚུགས་ཕྱིར༌བཙུགས།།
PSA 119:153 བདག་གིས་ཁྱེད་ཀྱི་བཀའ་ཁྲིམས་མ་བརྗེད༌པས། །ང་ཡི་སྡུག་བསྔལ་གཟིགས་ནས་སྐྱོབ་པར༌མཛོད།།
PSA 119:154 ང་ལ་དག་འབུད་བྱས་ནས་ཐར་བར༌མཛོད། །ཁྱེད་ཀྱི་བཀའ་བཞིན་ང་རང་འཚོ་བར༌མཛོད།།
PSA 119:155 ངན་པས་ཁྱེད་ཀྱི་སྒྲིག་ཁྲིམས་མི་འཚོལ༌བས། །ཐར་པ་དེ་ཚོར་ཤིན་ཏུ་རྒྱང་རིང༌ངོ༌།།
PSA 119:156 ཡ་ཝཱེ་ཁྱེད་ཀྱི་སྙིང་རྗེ་ཆེན་པོ༌ཡིན། །ཉིད་ཀྱི་ཁྲིམས་སྲོལ་བཞིན་དུ་ངའི་སྲོག༌སྐྱོབ།།
PSA 119:157 ང་ལ་འཚེ་ཞིང་རྒོལ་མཁན་མང་ན༌ཡང༌། །ང་རང་ཁྱེད་ཀྱི་དཔང་ཡིག་ལས་མ༌འཁྱར།།
PSA 119:158 གཡོ་སྒྱུ་ཅན་གྱིས་ཁྱེད་ཀྱི་བཀའ་མི༌བརྩི། །དེའི་ཕྱིར་ཁོ་རྣམས་མཐོང་དུས་སུན་སྣང༌སྐྱེས།།
PSA 119:159 ཀྱེ་ཀྱེ་ཡ་ཝཱེ་ང་རང་ཁྱེད་ཉིད༌ཀྱི། །བཀའ་ལ་ཅི་ཙམ་དགའ་ཚོད་གཟིགས་སུ༌གསོལ། །ཉིད་ཀྱི་བྱམས་བརྩེ་བཞིན་དུ་ངའི་སྲོག༌སྐྱོབ།།
PSA 119:160 ཁྱེད་ཀྱི་གསུང་གི་སྙིང་པོ་བདེན་པ༌ལགས། །དྲང་བའི་ཁྲིམས་སྲོལ་ཐམས་ཅད་རྟག་ཏུ༌གནས།།
PSA 119:161 སྐུ་དྲག་རྣམས་ཀྱིས་དོན་མེད་བདག་ལ༌འཚེ། །ཡིན་ཡང་བདག་སེམས་ཁྱེད་ཀྱི་བཀའ་ལ༌འཇིགས།།
PSA 119:162 ང་རང་ཁྱེད་ཀྱི་བཀའ་ནང་དགའ་བ༌ནི། །བཅོམ་ནོར་དཔག་མེད་ཐོབ་པའི་མི་དང༌མཚུངས།།
PSA 119:163 རྫུན་ལ་ང་རང་སྡང་ཞིང་ཞེན་ལོག༌ཀྱང༌། །ཁྱེད་ཀྱི་བཀའ་ཁྲིམས་ལ་ནི་ང་དགའ༌འོ།།
PSA 119:164 ཁྱེད་ཀྱི་དྲང་བདེན་ཁྲིམས་སྲོལ་རྣམས་ཀྱི༌ཕྱིར། །ཉིན་རེར་ལན་བདུན་ཁྱེད་ལ་བསྟོད་བསྔགས༌འབུལ།།
PSA 119:165 བཀའ་ཁྲིམས་རྣམས་ལ་དགའ་བར་ཞི་བདེ༌ཆེ། །དེ་དག་བསྒྱེལ་ནུས་གང་ཡང་ཡོད་མ༌ཡིན།།
PSA 119:166 བདག་གིས་ཡ་ཝཱེ་ཁྱེད་ཀྱི་སྐྱབས་ལ༌རེ། །ཁྱེད་ཀྱི་བཀའ་རྣམས་བཞིན་དུ་སྒྲུབ་པ༌ཡིན།།
PSA 119:167 ཁྱེད་ཀྱི་དཔང་ཡིག་ང་ཡི་སེམས་ནས༌སྲུང༌། །དེ་ལ་ང་རང་ཤིན་ཏུ་དགའ་བ༌ཡིན།།
PSA 119:168 བདག་གི་ལམ་རྣམས་ཁྱེད་ཀྱིས་མཁྱེན་པས༌ན། །ང་ཡིས་ཁྱེད་ཀྱི་བཀའ་སློབ་དཔང་ཡིག༌སྲུང༌།།
PSA 119:169 འོ་དོད་ཡ་ཝཱེ་ཁྱེད་དྲུང་བསླེབ་གྱུར༌ཅིག །ཉིད་ཀྱི་བཀའ་བཞིན་ང་ལ་གོ་རྟོགས༌སྩོལ།།
PSA 119:170 ཞུ་འབོད་ཁྱེད་ཀྱི་དྲུང་དུ་བསླེབ་གྱུར༌ཅིག །ཉིད་ཀྱི་བཀའ་བཞིན་ང་རང་སྐྱོབ་པར༌མཛོད།།
PSA 119:171 ཁྱེད་ཀྱིས་སྒྲིག་ཁྲིམས་བདག་ལ་བསླབ་པས༌ན། །བདག་གི་མཆུ་ལས་བསྟོད་བསྔགས་འབྱུང་བར༌ཤོག།
PSA 119:172 ཁྱེད་ཀྱི་བཀའ་ནི་ཐམས་ཅད་དྲང་བས༌ན། །ངའི་ལྕེས་བཀའ་ཡི་མགུར་གླུ་ལེན་པར༌ཤོག།
PSA 119:173 བདག་གིས་ཁྱེད་ཀྱི་བཀའ་སློབ་བདམས་པས༌ན། །ཁྱེད་ཀྱི་ཕྱག་གིས་རོགས་རམ་མཛད་པར༌ཤོག།
PSA 119:174 ཡ་ཝཱེ་ང་རང་ཁྱེད་ཀྱི་སྐྱབས་ལ༌དུངས། །ཁྱེད་ཀྱི་བཀའ་ཁྲིམས་ལ་ནི་ང་རང༌དགའ།།
PSA 119:175 ཁྱེད་ལ་བསྟོད་ཕྱིར་ངའི་སྲོག་འཚོ་བར༌ཤོག །ཁྲིམས་སྲོལ་རྣམས་ཀྱིས་ང་རང་སྐྱོར་བར༌ཤོག།
PSA 119:176 ཁྱེད་ཀྱི་བཀའ་རྣམས་བདག་གིས་མ་བརྗེད༌པས། །ང་རང་སྟོར་བའི་ལུག་ལྟར་གྱར་ན༌ཡང༌། །ཁྱེད་ཀྱིས་ཞབས་ཕྱི་ང་རང་འཚོལ་བར༌མཛོད།།
PSA 120:1 ༼ཡར་གནས་མཇལ་དུ་འགྲོ་བའི་མགུར༌མ།༽ དཀའ་སྡུག་ཁྲོད་ནས་ཡ་ཝཱེ་བོས་པ༌དང༌། །ཁོང་གིས་ང་ལ་བཀའ་ལན་གནང་བྱུང༌ངོ༌།།
PSA 120:2 ཀྱེ་ཀྱེ་ཡ་ཝཱེ་རྫུན་གྱི་མཆུ་སྒྲོས༌དང༌། །གཡོ་སྒྱུའི་ལྕེ་ལས་ང་རང་སྐྱོབ་པར༌མཛོད།།
PSA 120:3 གཡོ་སྒྱུའི་ལྕེ་ཁྱོད་ཁོང་གིས་ཅི་སྟེར༌རམ། །དེ་ལས་ལྷག་པ་ཅི་ཞིག་བྱ་འོང༌ངམ།།
PSA 120:4 ཁོང་གིས་དཔའ་བོའི་མདའ་མོ་རྣོན་པོ༌དང༌། །ཤུག་པའི་སྡོང་པོའི་སོལ་མེ་བཏང་འོང༌ངོ༌།།
PSA 120:5 ང་རང་ད་མེ་ཤེག་ཏུ་བསྡད་པ༌དང༌། །ཀེ་དཱར་གུར་ནང་གནས་པས་ཆག་སྒོ༌འབྱུང༌།།
PSA 120:6 ཞི་མཐུན་ལ་ནི་སྡང་བའི་མི་མཉམ༌དུ། །ང་རང་བསྡད་ནས་དུས་ཡུན་རིང་དྲགས༌སོ།།
PSA 120:7 ང་ནི་མཐུན་པར་དགའ་ཞིང་གཏམ་སྨྲ༌དུས། །དེ་རྣམས་འཁྲུག་པ་རྒྱག་པར་རྩོམ་བྱེད༌དོ།།
PSA 121:1 ༼ཡར་གནས་མཇལ་དུ་འགྲོ་བའི་མགུར༌མ།༽ རི་རྣམས་ཕྱོགས་སུ་ང་ཡི་མིག་ཟུང༌འདེགས། །ང་ཡི་སྡོངས་གྲོགས་གང་ནས་འབྱོན་འགྱུར༌རམ།།
PSA 121:2 མ་གཞི་དེ་ནི་གནམ་སའི་བྱེད་པོ༌སྟེ། །ཡ་ཝཱེའི་ཕྱོགས་ནས་ང་ལ་འཐོབ་པ༌ཡིན།།
PSA 121:3 ཁོང་གིས་ཁྱོད་ཀྱི་རྐང་པ་འཁྱར་མི༌འཇུག །ཁྱོད་རང་སྲུང་མཁན་ཁོང་ཉིད་གཟིམ་མི༌བྱ།།
PSA 121:4 ལྟོས་དང་ཡེས་ར་ཨེལ་ནི་སྲུང་མཁན༌ཁོང༌། །གཉིད་ཅོག་མི་རྒྱག་མནལ་དུ་ཡང་མི༌གཟིམ།།
PSA 121:5 ཡ་ཝཱེ་ཁྱོད་རང་སྲུང་མཁན་ཡིན་པ༌ལགས། །ཁོང་ཉིད་ཁྱོད་ཀྱི་གཡས་སུ་གྲིབ་སོ༌ཡིན།།
PSA 121:6 ཉིན་མོར་ཉི་མས་ཁྱོད་ལ་གནོད་མི༌བསྐྱལ། །མཚན་མོར་ཟླ་བས་ཁྱོད་ལ་འཚེ་མི༌བྱ།།
PSA 121:7 ཡ་ཝཱེས་ཁྱོད་རང་གནོད་འཚེ་ཀུན་ལས༌བསྲུང༌། །ཁྱོད་ཀྱི་ཚེ་སྲོག་ཀྱང་ནི་བསྲུང་བར༌འགྱུར།།
PSA 121:8 ད་ལྟའི་དུས་ནས་ཇི་སྲིད་འཚོ་བའི༌བར། །ཁྱོད་ནི་ཐོན་ནམ་འགྲོ་དུས་ཡ་ཝཱེས༌བསྲུང༌།།
PSA 122:1 ༼ཡར་གནས་མཇལ་དུ་འགྲོ་བའི་དཱ་བིད་ཀྱི་མགུར༌མ།༽ རང་ཅག་ཡ་ཝཱེའི་བཞུགས་གནས་སུ་འགྲོ༌ཞེས། །མི་ཡིས་བདག་ལ་བརྗོད་དུས་སེམས་དགའ༌བྱུང༌།།
PSA 122:2 ཀྱེ་མ་ཡེ་རུ་སཱ་ལེམ་ངེད་ཅག༌ནི། །ཁྱེད་ཀྱི་རྒྱལ་སྒོའི་ནང་དུ་འགྲེང་ནས༌ཡོད།།
PSA 122:3 མུ་རྒྱུན་གཅིག་ཏུ་འབྲེལ་བའི་གྲོང་ཁྱེར༌ལྟར། །ཡེ་རུ་སཱ་ལེམ་བཞེངས་ནས་གྲུབ་པ༌འོ།།
PSA 122:4 ཡེས་ར་ཨེལ་གྱི་ཁྲིམས་སྲོལ་གཞིར་བཞག༌ནས། །ཡ་ཝཱེའི་མཚན་ལ་བསྟོད་བསྔགས་འབུལ་བའི༌ཆེད། །ཡ་ཝཱེའི་ཚོ་ཁག་ཐམས་ཅད་ཡར་ཕྱིན༌ཏོ།།
PSA 122:5 དེ་རུ་ཁྲིམས་ཐག་གཅོད་ཕྱིར་ཁྲི་རྣམས༌བཞག །དཱ་བིད་རིགས་རྒྱུད་དག་གི་ཁྲི་རྣམས༌བཞག།
PSA 122:6 ཡེ་རུ་སཱ་ལེམ་བདེ་ཕྱིར་སྨོན་ལམ༌ཞུས། །ཁྱེད་ལ་དགའ་བའི་མི་རྣམས་དར་བར༌ཤོག།
PSA 122:7 ཁྱེད་ཀྱི་ལྕགས་རིའི་ནང་དུ་དུས་བདེ༌ཤོག །ཕོ་བྲང་ནང་དུ་གཏན་འཇགས་འོང་བར༌ཤོག།
PSA 122:8 བདག་གི་སྤུན་དང་གྲོགས་པོ་རྣམས་ཀྱི༌ཆེད། །ཁྱེད་ནང་དུས་བདེ་ཤོག་ཅེས་བདག་གིས༌སྨྲ།།
PSA 122:9 དཀོན་མཆོག་ཡ་ཝཱེའི་བཞུགས་གནས་དོན་ཆེད༌དུ། །བདག་གིས་ཁྱེད་ཀྱི་ཕན་དོན་འཚོལ་བར༌བྱ།།
PSA 123:1 ༼ཡར་གནས་མཇལ་དུ་འགྲོ་བའི་མགུར༌མ།༽ ནམ་མཁའི་ཁྲི་ལ་བཞུགས་པའི་གཙོ་བོ༌ལགས། །ང་ཡི་མིག་ཟུང་ཁྱེད་ཀྱི་ཕྱོགས་སུ༌འདེགས།།
PSA 123:2 གཟིགས་དང་ཞབས་ཕྱིའི་མིག་གིས་བདག་པོའི༌ཕྱག །བྲན་མོའི་མིག་གིས་བདག་མོའི་ཕྱག་ལ༌ལྟ། །དེ་དང་དེ་བཞིན་ང་ཚོའི་མིག་གིས༌ཀྱང༌། །རང་ཅག་དཀོན་མཆོག་ཡ་ཝཱེས་ང་ཚོ༌ལ། །སྙིང་རྗེ་གནང་བའི་བར་དུ་ཁོང་ལ༌བལྟ།།
PSA 123:3 ངེད་ཅག་སྨད་ར་ཚད་མེད་མྱངས་པས༌ན། །ཀྱེ་ཀྱེ་ཡ་ཝཱེ་ང་ཚོར་སྙིང་རྗེ༌གནོངས། །ཁྱེད་ཀྱིས་ང་ཚོར་སྙིང་རྗེ་གནང་བར༌མཛོད།།
PSA 123:4 བདེ་བར་གནས་པ་རྣམས་ཀྱིས་འཕྱ་སྨོད༌བྱེད། །ང་རྒྱལ་ཅན་གྱིས་སྨད་ར་ཚད་མེད༌བཏང༌།།
PSA 124:1 ༼ཡར་གནས་མཇལ་དུ་འགྲོ་བའི་དཱ་བིད་ཀྱི་མགུར༌མ།༽ ཡེས་ར་ཨེལ་པས་འདི་ལྟར་སྨྲ་བར༌བྱ། །ངེད་ཕྱོགས་ཡ་ཝཱེ་ཡོད་པ་མ་ཡིན༌ན།།
PSA 124:2 ངེད་ཕྱོགས་ཡ་ཝཱེ་ཡོད་པ་མ་ཡིན༌ཚེ། །མི་རྣམས་ངེད་ཀྱི་དགྲ་རུ་ལངས་ནས༌ནི།།
PSA 124:3 དེ་ཚོའི་ཁོང་ཁྲོ་ངེད་སྟེང་འབར་དུས༌སུ། །དེ་ཚོས་ངེད་ཅག་གསོན་པོར་མིད་པ༌འོ།།
PSA 124:4 དེ་དུས་རྦ་རླབས་ཀྱིས་ནི་ངེད་རྣམས༌འགེབ། །དྲག་བཞུར་ཆུ་བོས་ངེད་ཅག་བསྣུབ་བྱེད༌དོ།།
PSA 124:5 ཆུ་ལོག་ཆེན་པོས་ངེད་རྣམས་བསྣུབ་པར༌བྱེད།།
PSA 124:6 དེ་ཚོའི་མཆེ་བར་གཤག་ཏུ་མ་གནང༌བའི། །ཡ་ཝཱེ་ཁོང་ཉིད་བསྟོད་པར་འོས་སོ༌ལོ།།
PSA 124:7 རང་ཅག་བྱ་པའི་རྙི་ལས་ཐར་བ༌ཡི། །བྱེའུ་ཆུང་ཞིག་དང་ཀུན་ནས་མཚུངས་པ༌སྟེ། །རྙི་རྒྱ་རལ་ཏེ་རང་ཅག་ཐར་བ་ཡིན།།
PSA 124:8 གནམ་སའི་བྱེད་པོ་དཀོན་མཆོག་ཡ་ཝཱེ༌ཡི། །མཚན་ལ་བརྟེན་ནས་ངེད་ལ་རོགས་རམ༌ཐོབ།།
PSA 125:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཡ་ཝཱེར་བློ་གཏད་བཅོལ་བའི་མི་རྣམས༌ནི། །འགྱིང་ངེར་ལངས་པའི་རི་བོ་ཛ་ཡན༌འདྲ།།
PSA 125:2 ཡེ་རུ་སཱ་ལེམ་རི་ཡིས་བསྐོར་བ༌ལྟར། །ད་ལྟའི་དུས་ནས་ཇི་སྲིད་འཚོ་བའི༌བར། །ཡ་ཝཱེས་ཁོང་གི་འབངས་མི་དེ་བཞིན༌བསྐོར།།
PSA 125:3 དྲང་པོས་ཉེས་པར་ལག་པ་མི་བརྐྱང༌ཕྱིར། །ངན་པའི་འཁར་བ་དྲང་བདེན་མི་རྣམས༌ཀྱི། །ས་སྐལ་སྟེང་དུ་དུས་རྒྱུན་གནས་མི༌འགྱུར།།
PSA 125:4 བཟང་པོ་རྣམས་དང་གཞུང་དྲང་མི་རྣམས༌ལ། །ཡ་ཝཱེ་ཁྱེད་ཀྱིས་བཀའ་དྲིན་མཛད་དུ༌གསོལ།།
PSA 125:5 འོན་ཀྱང་འཁྱོག་པོའི་ལམ་ནང་སྐྱོད་པ༌རྣམས། །ཡ་ཝཱེས་སྡིག་སྤྱོད་མཉམ་དུ་འཁྲིད་པར༌འགྱུར། །ཡེས་ར་ཨེལ་སྟེང་ཞི་བདེ་འབབ་པར༌སྨོན།།
PSA 126:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཡ་ཝཱེས་བཙོན་དུ་ཡོད་པའི་མི་རྣམས༌ནི། །ཛ་ཡན་ཡུལ་ལ་ཕྱིར་ཁྲིད་འོང་བའི༌དུས། །ངེད་རྣམས་རྨི་ལམ་པ་དང་ཀུན་ནས༌མཚུངས།།
PSA 126:2 ངེད་རྣམས་ཁ་རུ་གད་མོ་ལྷང་ལྷང༌སྒྲོག །ལྕེ་ཡིས་དགའ་སྤྲོའི་གླུ་དབྱངས་སིང་སིང་ལེན། །དེ་དུས་མི་རིགས་གཞན་རྣམས་ཁྲོད་དུ༌ན། །ཡ་ཝཱེས་ཁོ་ཚོར་དོན་ཆེན་མཛད་ཅེས༌བརྗོད།།
PSA 126:3 ཡ་ཝཱེས་དངོས་གནས་དོན་ཆེན་མཛད་བྱུང༌སྟེ། །ངེད་ཅག་ཡིད་སེམས་དགའ་སྤྲོས་ཁེངས་པར༌གྱུར།།
PSA 126:4 ཀྱེ་ཀྱེ་ཡ་ཝཱེ་ལྷོ་ཕྱོགས་གཙང་པོ་བཞིན། །ངེད་ཀྱི་བཙོན་པ་རྣམས་ཀྱང་ཁྲིད་འོང༌རོགས།།
PSA 126:5 མཆི་མ་གཏོར་བཞིན་ས་བོན་འདེབས་མཁན༌དེས། །དགའ་མགུ་རང་ཞིང་སྟོན་ཐོག་བརྔ་བར༌འགྱུར།།
PSA 126:6 ངུ་བཞིན་ས་བོན་འདེབས་སུ་འགྲོ་མཁན༌གྱིས། ། སྤྲོ་སྤྲོ་ངང་ནས་ཚར་ཕོན་ཁུར་ཏེ་འོང་།།
PSA 127:1 ༼ཡར་གནས་མཇལ་དུ་འགྲོ་བའི་སོ་ལོ་མོན་གྱི་མགུར༌མ།༽ ཁང་པ་ཡ་ཝཱེས་བརྩིག་པར་མི་མཛད༌ན། །རྩིག་མཁན་རྣམས་ཀྱིས་དོན་མེད་ལས་ཀ༌བྱེད། །མཁར་གྲོང་ཡ་ཝཱེས་བསྲུང་བར་མི་མཛད༌ན། །སྲུང་མཁན་མེལ་ཚེ་བྱེད་པ་དོན་མེད༌ཡིན།།
PSA 127:2 སྔ་མོ་ལངས་ཤིང་ངལ་གསོ་འཕྱི་བ༌དང༌། །དཀའ་ལས་ཟས་ནི་ཟ་བ་དོན་མེད༌ཡིན། །ཁོང་གིས་བརྩེ་བ་རྣམས་ལ་གཉིད་གནང༌ངོ༌།།
PSA 127:3 བུ་ཕྲུག་ཡ་ཝཱེས་གནང་བའི་ནོར་སྐལ༌ཡིན། །མངལ་གྱི་ཕྲུ་གུ་ཁོང་གི་གསོལ་རས༌ཡིན།།
PSA 127:4 གཞོན་དུས་སྐྱེས་པའི་བུ་དང་བུ་མོ༌ནི། །དཔའ་རྒོད་ལག་གི་མདའ་དང་ཀུན་ནས༌མཚུངས།།
PSA 127:5 མདའ་ཤུབས་མདའ་ཡིས་གང་བའི་མི་དེ༌བདེ། །དེ་ཚོས་མཁར་སྒོར་དགྲ་བོ་རྣམས་ཀྱི༌མདུན། །གླེང་མོལ་བྱེད་དུས་ངོ་ནི་ཚ་མི༌འགྱུར།།
PSA 128:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཡ་ཝཱེ་ལ་ནི་གུས་ཤིང་འཇིགས་པ་དང༌། །ཁོང་གི་ལམ་ནང་འགྲུལ་མཁན་རྣམས༌བདེ་འོ། །
PSA 128:2 རང་གི་ལག་པས་འབད་པ་དེ་ཟ༌ཞིང༌། །བྱིན་རླབས་འཐོབ་ཅིང་དོན་ཀུན་ལམ་འགྲོ༌འོང༌།།
PSA 128:3 ཁྱོད་ཀྱི་ཁྱིམ་སྦུག་རང་གི་ཆུང་མ༌ནི། །འབྲས་བུ་གཡུར་དུ་ཟ་བའི་རྒུན་ཤིང༌འདྲ། །བུ་ཕྲུག་རྣམས་ཀྱིས་སྒྲོག་ཙེའི་མཐའ་བསྐོར༌ཞིང༌། །སྐྱུ་རུ་ཤིང་གི་ཡལ་ག་དང་མཚུངས༌སོ།།
PSA 128:4 ལྟོས་དང་ཡ་ཝཱེར་གུས་ཤིང་འཇིགས་པ༌ཡི། །མི་ལ་དེ་འདྲའི་བྱིན་རླབས་འཐོབ་པར༌འགྱུར།།
PSA 128:5 ཡ་ཝཱེས་ཛ་ཡན་ཡུལ་ནས་ཁྱོད་རང༌ལ། །བྱིན་རླབས་གནང་ཞིང་ཁྱོད་ཀྱིས་ཚེ་གང༌བོར། །ཡེ་རུ་སཱ་ལེམ་ཡུལ་གྱི་དར་རྒྱས༌མཐོང༌།།
PSA 128:6 ཁྱོད་ཀྱིས་བུ་རབས་ཚ་རྒྱུད་རྣམས་མཐོང༌ཞིང༌། །ཡེས་ར་ཨེལ་སྟེང་བདེ་བ་འབབ་པར༌ཤོག།
PSA 129:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཡེས་ར་ཨེལ་གྱིས་འདི་བཞིན་སྨྲ་གྱུར༌ཅིག །ང་རང་གཞོན་པའི་དུས་ནས་ད་ལྟའི༌བར། །དགྲ་བོ་རྣམས་ཀྱིས་ང་ལ་ལན་མང༌གཙེས།།
PSA 129:2 ང་རང་གཞོན་པའི་དུས་ནས་ད་ལྟའི༌བར། །དགྲ་བོ་རྣམས་ཀྱིས་བདག་ལ་ལན་མང༌གཙེས། །ཡིན་ཡང་དེ་རྣམས་བདག་ལས་རྒྱལ་མ༌གྱུར།།
PSA 129:3 གཤོལ་གྱིས་བདག་གི་རྒྱབ་ཏུ་ཞིང་རྨོས༌ཏེ། །རྨོས་ཤུར་རིང་མོ་དེ་ཚོས་བཏོད་པ༌ཡིན།།
PSA 129:4 འོན་ཀྱང་ཡ་ཝཱེ་དྲང་བདེན་ལགས་པས༌ན། །ངན་པའི་ཐག་པ་རྣམས་ནི་དུམ་བུར༌བཅད།།
PSA 129:5 ཛ་ཡན་ཡུལ་ལ་སྡང་བའི་མི་རྣམས༌ནི། །གནོང་ཞིང་ཁ་ཕྱིར་འཁོར་ནས་འབྲོ་བར༌ཤོག།
PSA 129:6 དེ་རྣམས་ཁང་པའི་སྟེང་གི་རྩྭ་བཞིན༌དུ། །མ་སྐྱེས་སྔོན་ལ་བསྐམས་ནས་རྙིད་གྱུར༌ཅིག།
PSA 129:7 དེ་ཡིས་རྔ་མཁན་སྤར་བ་མི་གང༌ཞིང༌། །ཚར་ཕོན་སྡོམ་མཁན་པང་ཡང་མི་གང༌ངོ༌།།
PSA 129:8 ཡ་ཝཱེས་ཁྱོད་ལ་བྱིན་གྱིས་བརླབ་པར༌ཤོག །ཡ་ཝཱེའི་མཚན་ནང་ངས་ཁྱོད་སྨོན་འདུན༌ཞུ། །དེ་སྐད་འགྲུལ་པ་རྣམས་ཀྱིས་མི་སྨྲ༌འོ།།
PSA 130:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཡ་ཝཱེ་བདག་གིས་གཏིང་ནས་ཁྱེད་ཉིད་འབོད།།
PSA 130:2 ཀྱེ་ཀྱེ་གཙོ་བོ་ང་ཡི་སྐད་ལ༌གསོན། །ང་ཡི་འོ་དོད་ཞུ་བར་སྙན་གཏོད༌རོགས།།
PSA 130:3 ཡ་ཝཱེ་ཁྱེད་ཀྱིས་ཉེས་པ་རྩད་བཅད༌ན། །དེ་ནས་སུ་ཞིག་ཚུགས་ནུས་ཀྱེ་གཙོ༌བོ།།
PSA 130:4 འོན་ཀྱང་ཁྱེད་ལ་གུས་ཤིང་འཇིགས་ཕྱིར༌དུ། །སྡིག་ཉེས་བསལ་བའི་བཀའ་དྲིན་ཁྱེད་ལ༌ཡོད།།
PSA 130:5 ང་ཡིས་ཡ་ཝཱེར་སྒུག་ཅིང་སེམས་ཀྱིས༌སྒུག །ཁོང་གི་བཀའ་ལ་བདག་གིས་རེ་བར༌བྱེད།།
PSA 130:6 ང་ཡི་སེམས་ཀྱིས་གཙོ་བོར་སྒུག་པ༌ནི། །མེལ་ཚེས་སྐྱ་རེངས་ཤར་བར་སྒུག་ལས༌ལྷག །མེལ་ཚེས་སྐྱ་རེངས་ཤར་བར་སྒུག་ལས༌ལྷག།
PSA 130:7 ཡེས་ར་ཨེལ་ཁྱོད་ཡ་ཝཱེར་རེ་སྒུག༌གྱིས། །ཅི་ལ་ཞེ་ན་ཁོང་ལ་བྱམས་བརྩེ༌དང༌། །བླུ་ཐབས་ཡོངས་སུ་རྫོགས་པ་ལྡན་པས་སོ།།
PSA 130:8 དེ་ནས་ཉེས་པ་ཀུན་ལས་ཡེས་ར༌ཨེལ། །ཁོང་གིས་སྒྲོལ་བར་མཛད་པར་གདོན་མི༌ཟ།།
PSA 131:1 ༼ཡར་གནས་མཇལ་དུ་འགྲོ་བའི་དཱ་བིད་ཀྱི་མགུར༌མ།༽ ང་ཡི་སེམས་ལ་ང་རྒྱལ་མེད་པ༌དང༌། །མིག་ལ་ཁེངས་དྲེགས་མེད་དོ་ཀྱེ་ཡ༌ཝཱེ། །བྱ་བ་ཆེན་པོ་རྣམས་ལ་ང་མི༌ཐེ། །རྟོགས་པར་དཀའ་བའི་དོན་རྣམས་བསྒྲུབ་མི༌ཕོད།།
PSA 131:2 ང་ཡིས་རང་སེམས་ཞི་ཞིང་བདེ་བར༌བཀོད། །དེ་ནི་ཨ་མའི་པང་དུ་ཉལ་བ༌ཡི། །ནུ་མ་བཀར་བའི་ཕྲུ་གུ་ལྟ་བུ༌ཡིན། །ནུ་མ་ལྡུད་མཚམས་བཞག་པའི་ཕྲུ་གུ་བཞིན། །ངའི་སེམས་ང་ཡི་ནང་དུ་གནས་པ༌འོ།།
PSA 131:3 ད་ལྟའི་དུས་ནས་ཇི་སྲིད་འཚོ་བའི༌བར། །ཡེས་ར་ཨེལ་ཁྱོད་ཡ་ཝཱེར་རེ་སྒུག༌བྱོས།།
PSA 132:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཀྱེ་ཀྱེ་ཡ་ཝཱེ་དཱ་བིད་དྲན་པར༌མཛོད། །ཁོ་བོའི་སྡུག་བསྔལ་ཐམས་ཅད་དྲན་དུ༌གསོལ།།
PSA 132:2 ཡ་ཝཱེར་གདན་ས་ཞིག་དང་ཡ་ཀོབ༌ཀྱི། །སྟོབས་ལྡན་ཕྱིར་དུ་བཞུགས་གནས་རྙེད་པའི༌བར། །
PSA 132:3 ང་ནི་རང་གི་གུར་ནང་མི་འགྲོ༌ལ། །རང་གི་མལ་ཁྲི་ལ་ཡང་འཛེག་མི༌བྱ།།
PSA 132:4 རང་གི་མིག་ཟུང་གཉིད་དུ་ཡུར་མི༌བྱ། །མིག་ལྕིབས་གཉིད་ཅོག་རྒྱག་ཏུ་མི་འཇུག༌ཅེས།།
PSA 132:5 ཁོ་བོས་ཡ་ཝཱེར་ཇི་ལྟར་མནའ་བསྐྱལ༌ཞིང༌། །ཡ་ཀོབ་སྟོབས་ལྡན་དྲུང་དུ་དམ་བཅས༌ལྟར།།
PSA 132:6 ཨེབ་རཱད་ཡུལ་དུ་བཞུགས་པའི་གཏམ་ཐོས༌ཤིང༌། །ཡཱ་ཨིར་ཐང་དུ་ང་ཚོ་དེར་ཕྲད་བྱུང༌།།
PSA 132:7 རང་ཅག་ཁོང་གི་བཞུགས་གནས་སུ་ཕྱིན༌ཏེ། །ཁོང་གི་ཞབས་སྟེགས་དྲུང་དུ་ཕྱག་འཚལ༌བྱ།།
PSA 132:8 ཀྱེ་ཀྱེ་ཡ་ཝཱེ་ཁྱེད་ཉིད་ཡར་བཞེངས༌ནས། །ཁྱེད་ཀྱི་མཐུ་ལྡན་ཤུར་སྒམ་དང་བཅས༌ཏེ། །ཉིད་ཀྱི་གདན་སར་ཕེབས་ནས་བཞུགས་པར༌མཛོད།།
PSA 132:9 ཁྱེད་ཀྱི་མཆོད་དཔོན་རྣམས་ཀྱིས་དྲང་བདེན་གྱོན་པ༌དང༌། །ཉིད་ཀྱི་དད་ལྡན་དམ་པས་དགའ་འབོད་བགྱི་བར༌ཤོག།
PSA 132:10 ཁྱེད་ཀྱི་ཞབས་ཕྱི་དཱ་བིད་ཕྱིར་དུ༌ནི། །ཁྱེད་ཀྱིས་བྱུགས་པའི་མི་ཡི་ངོ་མ༌བཟློག།
PSA 132:11 ཡ་ཝཱེས་དངོས་གནས་དཱ་བིད་ཁོ་ལ༌ནི། །བཟློག་ཐབས་མེད་པའི་དབུ་མནའ་བཞེས་པ༌སྟེ། །བདག་གིས་ཁྱོད་ཀྱི་བུ་རབས་ཚ་རྒྱུད༌ལས། །གཅིག་ནི་ཁྱོད་ཀྱི་ཁྲི་ལ་འགོད་པར༌བྱ།།
PSA 132:12 ཁྱོད་ཀྱི་བུ་ཚོས་ང་ཡི་ཞལ་ཆད༌དང༌། །བདག་གིས་བསླབ་པའི་དཔང་ཡིག་རྣམས་བསྲུངས༌ན། །ཁོ་ཚོའི་བུ་རབས་ཚ་རྒྱུད་དུས་གཏན༌དུ། །ཁྱོད་ཀྱི་ཁྲི་ཐོག་བཞུགས་འོང་ཞེས་གསུངས༌སོ།།
PSA 132:13 ཅི་ལ་ཞེ་ན་ཡ་ཝཱེས་ཛ་ཡན༌བདམས། །དེ་ནི་ཁོང་གི་གདན་སར་འགྱུར་ཕྱིར༌ལགས།།
PSA 132:14 རྒྱུན་ནས་རྒྱུན་དུ་འདི་ངའི་བསྟི་གནས༌ཡིན། །ངས་འདི་འདོད་པས་ང་རང་འདི་རུ༌གནས།།
PSA 132:15 བདག་གིས་དེ་ལ་ཁ་ཟས་མོད་པོ༌སྦྱིན། །དེ་ཡི་དབུལ་པོ་ཟས་ཀྱིས་ཚིམ་པར༌བྱ།།
PSA 132:16 དེ་ཡི་མཆོད་དཔོན་རྣམས་ལ་ཐར་པ༌བསྐོན། །དད་ལྡན་རྣམས་ཀྱིས་དགའ་མགུའི་ཀི་སྒྲ༌བསྒྲག།
PSA 132:17 དཱ་བིད་ཕྱིར་དུ་དེ་རུ་རྭ་དུང༌ཞིག །སྐྱེ་བར་བྱ་ཞིང་བདག་གིས་བྱུགས་པ༌ཡི། །ཆེད་དུ་དཀར་གསལ་སྒྲོན་མེ་ཞིག་ཀྱང༌བསྒྲིག།
PSA 132:18 དེ་ཡི་དགྲ་རྣམས་བདག་གིས་ངོ་ཚར༌སྦྱོར། །འོན་ཀྱང་དེའི་མགོར་ཅོད་པན་འོད་སྣང༌འཚེར།།
PSA 133:1 ༼ཡར་གནས་མཇལ་དུ་འགྲོ་བའི་དཱ་བིད་ཀྱི་མགུར༌མ།༽ ལྟོས་དང་ཁྱོད་ཅག་སྤུན་ཟླ་རྣམས་ནི་མཐུན་སྒྲིལ༌ངང༌། །མཉམ་དུ་སྡོད་པ་ཇི་འདྲའི་མཛེས་ཤིང་སྐྱིད་པ༌ལ།།
PSA 133:2 དེ་ནི་ཨ་རོན་མགོ་ལ་རིན་ཆེན་སྣུམ་བྱུགས༌ཏེ། །ཨག་ཚོམ་དང་ནི་གོས་ཀྱི་གོང་བར་བཞུར་བ༌བཞིན།།
PSA 133:3 ཧེར་མོན་ཟིལ་པ་ཛ་ཡན་རི་ལ་བབས་པ༌བཞིན། །གནས་དེར་ཡ་ཝཱེས་གནང་བའི་བྱིན་རླབས་ལྡན་པ༌སྟེ། །ཟད་མཐའ་མེད་པའི་ཚེ་སྲོག་དེ་ཉིད་མཆིས་ཕྱིར༌རོ།།
PSA 134:1 ༼ཡར་གནས་མཇལ་དུ་འགྲོ་བའི་མགུར༌མ།༽ ཀྱེ་ཀྱེ་མཚན་མོར་ཡ་ཝཱེའི་བཞུགས་གནས་སུ། །འགྲེང་བའི་ཞབས་ཕྱི་རྣམས་ཀྱིས་ཡ་ཝཱེར༌བསྟོད།།
PSA 134:2 གནས་མཆོག་ནང་དུ་ལག་པ་ཡར་བཀྱགས༌ནས། །ཡ་ཝཱེ་ཁོང་ལ་བསྟོད་བསྔགས་བརྗོད་པར༌གྱིས།།
PSA 134:3 གནམ་སའི་མཛད་པོ་ཡ་ཝཱེས་ཁྱོད་རྣམས༌ལ། །ཛ་ཡན་ཡུལ་ནས་བྱིན་གྱིས་བརླབ་པར༌ཤོག།
PSA 135:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཡ་ཝཱེའི་མཚན་ལ་བསྟོད་པར་གྱིས་ཤིག༌ཨང༌། །ཡ་ཝཱེའི་ཞབས་ཕྱི་རྣམས་ཀྱིས་ཁོང་ལ༌བསྟོད།།
PSA 135:2 ཡ་ཝཱེའི་བཞུགས་གནས་ནང་དུ་འགྲེང་བ༌དང༌། །རང་རེའི་དཀོན་མཆོག་བཞུགས་གནས་ཁྱམས་ར༌རུ། །ཞབས་ཏོག་སྒྲུབ་པ་ཁྱོད་ཚོས་ཁོང་ལ༌བསྟོད།།
PSA 135:3 ཡ་ཝཱེ་ལེགས་པོ་ཡིན་པས་ཁོང་ལ༌བསྟོད། །ཁོང་གི་མཚན་ལ་བསྟོད་དབྱངས་འབུལ་བར༌གྱིས། །ཅི་ལ་ཞེ་ན་དེ་ནི་ཡིད་དུ༌འོང༌།།
PSA 135:4 ཡ་ཝཱེས་ཡ་ཀོབ་ཁོང་གི་ཕྱིར་དུ༌བདམས། །ཡེས་ར་ཨེལ་ནི་ནོར་སྐལ་དུ་བདམས༌སོ།།
PSA 135:5 ཡ་ཝཱེ་ཆེན་པོ་ལགས་པ་ངས་ཤེས༌ཏེ། །རང་ཅག་གཙོ་བོ་ལྷ་ཚོགས་ཀུན་ལས༌འཕགས།།
PSA 135:6 གནམ་དང་ས་དང་རྒྱ་མཚོའི་གཏིང་རིམ༌ནས། །ཡ་ཝཱེས་ཅི་ལ་དགྱེས་པ་དེ་བཞིན༌མཛད།།
PSA 135:7 ཁོང་གིས་ས་མཐའ་རྣམས་ནས་སྤྲིན་པ༌སློང༌། །ཆར་ཆུ་མཉམ་དུ་གློག་དམར་འཁྱུག་པར༌མཛད། །ཁོང་གི་མཛོད་ནས་ལྷགས་རླུང་འདོན་པར༌བྱ།།
PSA 135:8 ཨེ་ཅིབ་ཡུལ་གྱི་མི་ཕྱུགས་གང་ཡིན༌ཡང༌། །སྐྱེས་འགོ་ཐམས་ཅད་ཁོང་གིས་བསད་པ༌ལགས།།
PSA 135:9 ཀྱེ་ཀྱེ་ཨེ་ཅིབ་ཁྱོད་ཀྱི་དཀྱིལ་དབུས༌སུ། །ཕཱར་ཨོལ་དང་ནི་འཁོར་གཡོག་རྣམས་ཀྱི༌སྟེང༌། །ཁོང་གིས་གྲུབ་རྟགས་ངོ་མཚར་དོན་རྣམས་མཛད།།
PSA 135:10 ཁོང་གིས་མི་རིགས་མང་པོར་བརྡེགས་པ༌དང༌། །རྒྱལ་པོ་དཔའ་ངར་ཅན་རྣམས་སྲོག་དང༌ཕྲལ།།
PSA 135:11 ཨེ་མོར་པ་ཡི་རྒྱལ་པོ་སི་ཧོན༌དང༌། །པཱ་ཤན་ཡུལ་གྱི་རྒྱལ་པོ་ཨོག་དང༌ནི། །ཀ་ན་ཨན་གྱི་རྒྱལ་པོ་ཐམས་ཅད༌དོ།།
PSA 135:12 ཁོང་གིས་དེ་ཚོའི་ཡུལ་རྣམས་རང་ཉིད༌ཀྱི། །འབངས་མི་ཡེས་ར་ཨེལ་ལ་ས་སྐལ༌གནང༌།།
PSA 135:13 ཀྱེ་ཀྱེ་ཡ་ཝཱེ་ཁྱེད་མཚན་གཏན་དུ༌གནས། །ཡ་ཝཱེའི་དྲན་རྟེན་མི་རབས་ཀུན་ལ༌གནས།།
PSA 135:14 ཅི་ལ་ཞེ་ན་ཡ་ཝཱེས་རང་ཉིད༌ཀྱི། །འབངས་མི་ལ་ནི་དག་འབུད་མཛད་པ༌དང༌། །ཉིད་ཀྱི་ཞབས་ཕྱིར་སྙིང་རྗེ་གནང་ཕྱིར༌རོ།།
PSA 135:15 མི་རིགས་རྣམས་ཀྱི་ལྷ་སྐུ་གསེར་དངུལ༌ཡིན། །དེ་ནི་མི་ཡི་ལག་པས་བཟོས་པ༌དང༌།།
PSA 135:16 སྨྲ་སྒོ་ཡོད་ཀྱང་དེ་དག་གཏམ་མི་ལབ། །མིག་ནི་ཡོད་ཀྱང་དེ་རྣམས་མཐོང་བ་མིན།།
PSA 135:17 རྣ་བ་ཡོད་ཀྱང་དེ་རྣམས་ཐོས་མི་ཐུབ། །དེ་དག་ཁ་རུ་དབུགས་ཀྱང་ཡོད་མ༌ཡིན།།
PSA 135:18 ལྷ་སྐུ་བཟོ་མཁན་ལྷ་སྐུ་དང་མཚུངས༌ཤིང༌། །དེ་ལ་བརྟེན་པ་རྣམས་ཀྱང་དེ་བཞིན༌ནོ།།
PSA 135:19 ཡེས་ར་ཨེལ་ཁྱོད་ཡ་ཝཱེར་བསྟོད་པར༌གྱིས། །ཨ་རོན་ཁྱིམ་རྒྱུད་ཡ་ཝཱེར་བསྟོད་པར༌གྱིས།།
PSA 135:20 ལེ་ཝི་ཁྱིམ་རྒྱུད་ཡ་ཝཱེར་བསྟོད་པ༌ཕུལ། །ཀྱེ་ཀྱེ་ཡ་ཝཱེར་གུས་ཤིང་འཇིགས་པ༌རྣམས། །ཁྱོད་ཚོས་ཡ་ཝཱེར་བསྟོད་པ་འབུལ་བར༌གྱིས།།
PSA 135:21 ཡེ་རུ་སཱ་ལེམ་ནང་དུ་བཞུགས་པ༌ཡི། །ཡ་ཝཱེར་ཛ་ཡན་ཡུལ་ནས་བསྟོད་པར༌གྱིས། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 136:1 ཡ་ཝཱེ་ལེགས་པས་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:2 ལྷ་རྣམས་དཀོན་མཆོག་ལ་ནི་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:3 གཙོ་བོ་རྣམས་ཀྱི་གཙོ་བོར་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:4 ཁོང་ཉིད་གཅིག་པུས་ངོ་མཚར་རྣམས་ནི༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:5 གང་གི་ཤེས་རབ་ཀྱིས་ནི་གནམ་རྣམས༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:6 ཆུ་རྣམས་སྟེང་དུ་ས་གཞི་འདིང་བར༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:7 འོད་ཟེར་ཆེན་པོ་རྣམས་ཀྱང་ཁོང་གིས༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:8 ཉིན་མོ་དབང་དུ་བསྒྱུར་བར་ཉི་མ༌བཀོད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:9 མཚན་མོར་དབང་བྱེད་ཟླ་བ་སྐར་མ༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:10 གང་གིས་ཨེ་ཅིབ་སྐྱེས་འགོ་ཐམས་ཅད༌བསད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:11 དེ་ཚོའི་ཁྲོད་ནས་ཡེས་ར་ཨེལ་པ༌བཏོན། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:12 མཐུ་ལྡན་ཕྱག་དང་བརྐྱངས་པའི་དཔུང་པ༌ཡིས། །དེ་རྣམས་ཕྱི་རུ་ཁྲིད་ནས་ཐོན་པ༌ཡིན། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:13 རྒྱ་མཚོ་དམར་པོ་ཁག་ནི་གཉིས་སུ༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:14 ཡེས་ར་ཨེལ་པ་མཚོ་ཡི་དཀྱིལ་ནས༌དྲངས། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:15 ཕཱར་ཨོལ་དང་ནི་ཁོ་ཡི་དམག་དཔུང༌ནི། །རྒྱ་མཚོ་དམར་པོའི་ནང་དུ་བསྐྱུར་བར༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:16 ཉིད་ཀྱི་མི་སྡེ་དབེན་སྟོང་ལམ་ནས༌དྲངས། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:17 གང་གིས་རྒྱལ་པོ་ཆེན་པོ་རྣམས་ལ༌བརྡུངས། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:18 དཔའ་ངར་ཆེ་བའི་རྒྱལ་པོ་རྣམས་ཀྱང༌བསད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:19 ཨེ་མོར་པ་ཡི་རྒྱལ་པོ་སི་ཧོན༌བསད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:20 པཱ་ཤན་ཡུལ་གྱི་རྒྱལ་པོ་ཨོག་ཀྱང༌བསད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:21 ཁོང་གིས་དེ་ཚོའི་ཡུལ་རྣམས་རང་ཉིད༌ཀྱི། །འབངས་མི་ལ་ནི་ས་སྐལ་དུ་གནང༌ངོ༌། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:22 དེ་ཚོའི་ཡུལ་རྣམས་ཉིད་ཀྱི་ཞབས་ཕྱི༌སྟེ། །ཡེས་ར་ཨེལ་ལ་ནོར་སྐལ་དུ་གནང༌ངོ༌། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:23 ཉམ་ཐག་གནས་སུ་རང་ཅག་ཁོང་གིས༌དྲན། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:24 རང་ཅག་དགྲ་བོ་རྣམས་ལས་སྐྱོབ་པར༌མཛད། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:25 ལུས་ཅན་ཀུན་ལ་ཁོང་གིས་ཁ་ཟས༌སྩོལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 136:26 ནམ་མཁའི་དཀོན་མཆོག་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
PSA 137:1 ངེད་ཅག་པཱ་པེལ་གཙང་པོའི་འགྲམ་བསྡད༌ཅིང༌། །ཛ་ཡན་དྲན་དུས་དེ་རུ་ངུས་པ༌ཡིན།།
PSA 137:2 དེ་དག་ཁྲོད་དུ་ལྕང་ཤིང་རྣམས་ཀྱི༌སྟེང༌། །ང་ཚོའི་པི་ཝང་རྣམས་ནི་བཏགས་པ༌ལགས།།
PSA 137:3 རྒྱུ་མཚན་ངེད་ཅག་བཙོན་དུ་ཁྲིད་མཁན༌གྱིས། །ང་ཚོར་མགུར་གླུ་ལོངས་ཤོག་སྨྲས་བྱུང༌ཞིང༌། །ཛ་ཡན་གླུ་ཞིག་ལོངས་ལ་སྐྱིད་པོ༌བྱོས། །དེ་སྐད་མནར་གཅོད་གཏོང་མཁན་རྣམས་ཀྱིས༌ཟེར།།
PSA 137:4 ང་ཚོས་མི་རིགས་གཞན་གྱི་ཡུལ་ཁམས༌སུ། །ཡ་ཝཱེའི་མགུར་གླུ་ཅི་ལྟར་ལེན་པར༌བྱ།།
PSA 137:5 ཡེ་རུ་སཱ་ལེམ་ང་ཡིས་ཁྱེད་བརྗེད༌ན། །ངའི་ལག་གཡས་པས་ལག་རྩལ་བརྗེད་གྱུར༌ཅིག།
PSA 137:6 གལ་ཏེ་བདག་གིས་ཡེ་རུ་སཱ་ལེམ༌ཁྱེད། །ང་ཡི་དགའ་སྤྲོའི་མཆོག་ཏུ་མི་བརྩི༌བར། །བརྗེད་ན་ངའི་ལྕེ་རྐན་ལ་འབྱར་བར༌ཤོག།
PSA 137:7 ཀྱེ་ཀྱེ་ཡ་ཝཱེ་ཨེ་དོམ་པ་རྣམས༌ཀྱིས། །ཡེ་རུ་སཱ་ལེམ་བར་ཆད་དང་ཕྲད་དུས། །ཅི་ཞིག་བྱས་པ་ཐུགས་སུ་དྲན་དུ༌གསོལ། །དེ་ཚོས་ཤིགས་ཤིག་རྩ་ནས་ཤིགས་ཤིག༌སྨྲས།།
PSA 137:8 ཀྱེ་ཀྱེ་རྩ་མེད་འགྲོ་རྒྱུའི་པཱ་པེལ༌གྲོང༌། །ཁྱོད་ཀྱིས་ངེད་ལ་ཅི་ཞིག་བྱས་པ༌ལྟར། །ངན་ལན་འཇལ་མཁན་དེ་ནི་བདེ་བ༌འོ།།
PSA 137:9 ཁྱོད་ཀྱི་ཕྲུ་གུ་རྣམས་ནི་འཛིན་བྱེད༌ཅིང༌། །བྲག་ལ་རྡབ་མཁན་དེ་ནི་བདེ་བ༌འོ།།
PSA 138:1 ༼དཱ་བིད་ཀྱི་མགུར༌མ།༽ བདག་གིས་ཡིད་སེམས་ཧྲིལ་པོས་ཁྱེད་ལ༌བསྟོད། །ལྷ་རྣམས་ མདུན་དུ་ཁྱེད་ལ་བསྟོད་དབྱངས༌འབུལ།།
PSA 138:2 ཁྱེད་ཀྱིས་ཉིད་ཀྱི་མཚན་དང་བཀའ་གསུང་ནི། །ཀུན་ལས་རབ་ཏུ་ཆེ་བར་མཛད་པས༌ན། །ཁྱེད་ཀྱི་མཆོད་ཁང་དམ་པར་ངས་ཕྱག༌འཚལ། །ཁྱེད་ཀྱི་བྱམས་བརྩེ་དང་ནི་དྲང་བདེན༌ཕྱིར། །ཁྱེད་ཀྱི་མཚན་ལ་གཏང་རག་འབུལ་བར༌བྱ།།
PSA 138:3 བདག་གིས་ཞུས་ཚེ་ཁྱེད་ཀྱིས་བཀའ་ལན༌གནང༌། །སེམས་ཤུགས་སྤོབས་པ་ཁྱེད་ཀྱིས་བདག་ལ༌བསྩལ།།
PSA 138:4 ཀྱེ་ཀྱེ་ཡ་ཝཱེ་ཁྱེད་ཀྱི་ཞལ་གདམས༌རྣམས། །ས་གཞིའི་རྒྱལ་པོ་ཀུན་གྱིས་ཐོས་ཡོད༌པས། །དེ་ཚོས་ཁྱེད་ལ་གཏང་རག་ཅིས་མི༌འབུལ།།
PSA 138:5 ཡ་ཝཱེའི་གཟི་བརྗིད་རབ་ཏུ་ཆེ་བས༌ན། །ཉིད་ཀྱི་མཛད་པ་རྣམས་ཀྱི་གླུ་ཡང༌ལེན།།
PSA 138:6 ཡ་ཝཱེ་ཁོང་ཉིད་བླ་མེད་ལགས་ན༌ཡང༌། །ཉམ་ཆུང་དག་ལ་ཁོང་གིས་གཟིགས་པར༌མཛད། །འོན་ཀྱང་ང་རྒྱལ་ཅན་དེ་རྒྱང་ནས༌མཁྱེན།།
PSA 138:7 ང་རང་སྡུག་བསྔལ་ཁྲོད་ནས་འགྲོ་དུས༌སུ། །ཁྱེད་ཀྱིས་ང་ཡི་ཚེ་སྲོག་སྐྱོབ་པ༌དང༌། །ཕྱག་ཟུང་བརྐྱངས་ནས་དགྲ་བོའི་ཁོང་ཁྲོ༌འགོག །ཁྱེད་ཕྱག་གཡས་པས་ང་རང་སྐྱོབ་པར༌འགྱུར།།
PSA 138:8 ཡ་ཝཱེས་ང་ཡི་དོན་ཀུན་བསྒྲུབ་པར༌འགྱུར། །ཡ་ཝཱེ་ཁྱེད་ཀྱི་བྱམས་བརྩེ་རྟག་ཏུ༌གནས། །ཁྱེད་ཀྱི་ཕྱག་ལས་རྣམས་ཀྱང་སྤོང་མ་མཛོད།།
PSA 139:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེ་ཁྱེད་ཀྱིས་ང་ལ་བརྟགས་ཤིང༌མཁྱེན།།
PSA 139:2 ང་རང་ལངས་དུས་འདུག་དུས་ཁྱེད་ཀྱིས༌མཁྱེན། །ང་ཡི་བསམ་ཚུལ་ཁྱེད་ཀྱིས་རྒྱང་ནས༌མཁྱེན།།
PSA 139:3 ལམ་དུ་འགྲོ་བ་དང་ནི་མར་ཉལ༌བ། །ཁྱེད་ཀྱིས་དེ་ཀུན་ཞིབ་ཏུ་གཟིགས་པ༌དང༌། །ང་ཡིས་ཅི་བྱས་ཚང་མ་ཁྱེད་ཀྱིས༌མཁྱེན།།
PSA 139:4 ཀྱེ་ཀྱེ་ཡ་ཝཱེ་ང་ཡི་ལྕེའི་སྟེང༌དུ། །ཁྱེད་ཀྱིས་མི་མཁྱེན་ཚིག་རྡོག་གཅིག་ཀྱང༌མེད།།
PSA 139:5 ཁྱེད་ཀྱིས་ང་རང་མདུན་རྒྱབ་གཉིས་ནས༌བསྐོར། །ཁྱེད་ཀྱི་ཕྱག་ནི་བདག་གི་སྟེང་དུ༌ཡོད།།
PSA 139:6 འདི་འདྲའི་ཤེས་རིག་ང་ཡིས་དཔག་ཐབས༌བྲལ། །བླ་ན་མཐོ་བས་ངས་དེར་སྙོབ་པར༌དཀའ།།
PSA 139:7 ཁྱེད་ཀྱི་ཐུགས་ཉིད་ལས་བདག་གང་དུ༌འགྲོ། །ཁྱེད་ཀྱི་དྲུང་ནས་ང་རང་གང་དུ༌འབྲོ།།
PSA 139:8 ནམ་མཁར་འཛེགས་ན་ཁྱེད་ཉིད་དེར་བཞུགས༌ཤིང༌། །གལ་ཏེ་གཤིན་པོའི་ཡུལ་དུ་མལ་བཅོས༌ཀྱང༌། །ཁྱེད་ཉིད་དེ་ག་རུ་ཡང་བཞུགས་པ༌ལགས།།
PSA 139:9 ཐོ་རངས་བདག་གིས་གཤོག་ཟུང་བརྐྱངས་ནས༌ནི། །རྒྱ་མཚོའི་ཕ་མཐར་འཕུར་ཏེ་བསྡད་ན༌ཡང༌།།
PSA 139:10 དེར་ཡང་ཁྱེད་ཀྱི་ཕྱག་གིས་ལམ་སྣ༌འདྲེན། །ཁྱེད་ཕྱག་གཡས་པས་ང་རང་སྐྱོར་བྱེད༌དོ།།
PSA 139:11 མུན་པས་ང་རང་ཡོངས་སུ་སྦ་བར༌ཤོག །ཕྱོགས་བཞིའི་འོད་ཀྱང་མཚན་མོར་འགྱུར་སྨྲ༌ཡང༌།།
PSA 139:12 ཁྱེད་ལ་མུན་པ་མུན་པར་མི་སྣང༌ཞིང༌། །མཚན་མོས་ཉིན་མོ་ནང་བཞིན་འོད་སྣང༌སྤྲོ། །ཁྱེད་དྲུང་འོད་དང་མུན་པ་ཁྱད་མེད༌ཡིན།།
PSA 139:13 བདག་གི་སེམས་ཁོང་ཁྱེད་ཀྱིས་མཛད་པ༌དང༌། །མ་ཡི་མངལ་ནང་ཁྱེད་ཀྱིས་ང་རང༌སྦྲེལ།།
PSA 139:14 ངོ་མཚར་འཇིགས་རུང་ལམ་ནས་ང་མཛད༌པས། །བདག་གིས་ཁྱེད་ལ་གཏང་རག་འབུལ་བར༌བྱ། །ཁྱེད་ཀྱི་མཛད་པ་ཤིན་ཏུ་ངོ་མཚར༌ཆེ། །ང་ཡི་སེམས་ཀྱིས་དེ་རྣམས་ལེགས་པར༌ཤེས།།
PSA 139:15 ང་རང་ལྐོག་གྱུར་གནས་སུ་བཟོས་པ༌དང༌། །ས་ཡི་གཏིང་ནས་མཉམ་དུ་སྦྲེལ་བའི༌ཚེ། །ང་ཡི་གཟུགས་རིས་ཁྱེད་ལ་སྦས་མ༌ཡིན།།
PSA 139:16 ང་རང་གཟུགས་སུ་མ་གྲུབ་སྔོན་རོལ༌དུ། །ཁྱེད་ཀྱི་སྤྱན་གྱིས་སྔར་ནས་གཟིགས་པ༌དང༌། །ཁྱེད་ཀྱིས་ཐུགས་ཐག་བཅད་པའི་ཚེ་ཚད༌ལས། །བདག་གིས་ད་དུང་ཉིན་གཅིག་མ་རོལ༌གོང༌། །ཐམས་ཅད་ཁྱེད་ཀྱི་ཕྱག་དཔེའི་ནང་དུ༌བཀོད།།
PSA 139:17 ཀྱེ་ཀྱེ་དཀོན་མཆོག་ཁྱེད་ཀྱི་བཞེད་དགོངས༌རྣམས། །བདག་གི་ཕྱིར་དུ་ཅི་འདྲའི་རིན་ཐང༌ཆེ། །དེ་རྣམས་བསྡོམས་གྲངས་གང་འདྲ་འབོར་ཆེ༌ཨང༌།།
PSA 139:18 རྩིས་གྲངས་བླངས་ན་བྱེ་མ་ལས་ཀྱང༌མང༌། །གཉིད་ལས་སད་དུས་ད་དུང་ཁྱེད་མཉམ༌གནས།།
PSA 139:19 ཀྱེ་ཀྱེ་དཀོན་མཆོག་མི་ངན་གསོད་གྱུར༌ཅིག །ལག་དམར་ཁྱོད་རྣམས་ང་དང་འབྲལ་བར༌གྱིས།།
PSA 139:20 དེ་ཚོས་ཁྱེད་ལ་རྒོལ་བའི་ཚིག་ངན༌ལབ། །ཁྱེད་ཀྱི་དགྲ་བོས་ཁྱེད་མཚན་དོན་མེད༌བརྗོད།།
PSA 139:21 ཡ་ཝཱེ་ཁྱེད་ལ་སྡང་བའི་མི་རྣམས༌ལ། །ང་རང་ཡང་ནི་སྡང་བར་མི་འགྱུར༌རམ། །ཀྱེ་མ་ཁྱེད་ལ་རྒོལ་བའི་མི་རྣམས༌ལ། །ང་རང་ཞེན་ཁ་ལོག་པ་མ་ཡིན༌ནམ།།
PSA 139:22 ང་རང་དེ་ཚོར་ཞེ་འཁོན་སྙིང་ནས༌སྐྱེ། །བདག་གིས་དེ་རྣམས་དགྲ་རུ་རྩི་བྱེད༌དོ།།
PSA 139:23 ཀྱེ་ཀྱེ་དཀོན་མཆོག་ང་ལ་བརྟགས་ནས༌ནི། །ང་ཡི་སེམས་པ་མཁྱེན་པར་མཛོད་ཅིག༌ཀྱེ། །ང་ལ་དཔྱད་ནས་བསམ་ཚུལ་མཁྱེན་པར༌མཛོད།།
PSA 139:24 ངའི་ནང་སྤྱོད་ངན་ཡོད་མེད་གཟིགས་ནས༌ནི། །གཏན་གྱི་ལམ་ནང་ང་རང་འཁྲིད་པར༌མཛོད།།
PSA 140:1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ མི་ངན་ལས་ང་སྐྱོབས་ཤིག་ཀྱེ་ཡ༌ཝཱེ། །གདུག་རྩུབ་ཅན་ལས་ང་རང་བསྲུང་བར༌མཛོད།།
PSA 140:2 དེ་ཚོས་སེམས་ནས་བྱུས་ངན་རྩོམ་པ༌དང༌། །འཐབ་ཕྱིར་དེ་རྣམས་རྟག་པར་འཚོགས་པ༌ཡིན།།
PSA 140:3 སྦྲུལ་ལྟར་དེ་ཚོས་རང་ལྕེ་རྣོན་པོ༌བྱེད། །མཆུ་སྒྲོས་འོག་ཏུ་སྦྲུལ་གྱི་དུག་རླངས༌འདུག།༼ སེ༌ལཱ། ༽
PSA 140:4 སྡིག་སྤྱོད་ལག་ནས་བདག་སྐྱོབས་ཀྱེ་ཡ༌ཝཱེ། །གདུག་རྩུབ་ཅན་ལས་ཕྲན་ཆུང་བསྲུང་བར༌མཛོད། །དེ་ཚོས་ང་རང་ས་རུ་བསྒྱེལ་བར༌དམིགས།།
PSA 140:5 རང་རློམ་ཅན་ཚོས་རྙི་དང་ཐག་པ༌རྣམས། །བདག་གི་ཆེད་དུ་སྦས་ནས་བཞག་ཡོད༌དེ། །ལམ་གྱི་ཟུར་དུ་དེ་ཚོས་རྙི་རྒྱ༌བཙུགས། །ངའི་ཆེད་དེ་ཚོས་ཞགས་པ་བཀྲམས་ནས༌ཡོད།།༼ སེ༌ལཱ། ༽
PSA 140:6 ཁྱེད་ངའི་དཀོན་མཆོག་ལགས་ཞེས་ཡ་ཝཱེར༌གསོལ། །ང་ཡི་ཞུ་འབོད་ལ་ནི་གསན་རོགས༌མཛོད།།
PSA 140:7 གཙོ་བོ་ཡ་ཝཱེ་ང་ཡི་སྐྱབས་ཀྱི༌སྟོབས། །འཐབ་མོའི་དུས་སུ་ང་ཡི་མགོ་བཀབ༌བྱུང༌།།
PSA 140:8 སྡིག་སྤྱོད་འདོད་ལ་མ་བསྟུན་ཀྱེ་ཡ༌ཝཱེ། །དེ་རྣམས་བྱུས་ངན་བསྒྲུབ་པར་མི་གནང༌རོགས། །བསྒྲུབས་ན་དེ་རྣམས་ང་རྒྱལ་སྐྱེ་ཡང༌སྲིད།།༼ སེ༌ལཱ། ༽
PSA 140:9 ང་རང་མཐའ་ནས་བསྐོར་བའི་མི་རྣམས༌ནི། །རང་ཁའི་བྱུས་ངན་སོ་སོའི་མགོར་འབབ་ཤོག།
PSA 140:10 དེ་ཚོའི་ཐོག་ཏུ་སོལ་མེ་འབབ་པ༌དང༌། །དེ་ཚོ་མེ་ཡི་ནང་དུ་བསྐྱུར་བར༌ཤོག །ཕྱིར་ལངས་མེད་པར་དོང་ནང་གཡུག་གྱུར༌ཅིག།
PSA 140:11 གཏམ་ངན་སྨྲ་བ་ས་གཞིར་ཚུགས་མི༌ཐུབ། །རྐྱེན་ངན་གྱིས་ནི་གཏུམ་པོ་འདེད་ཅིང༌བརྡབ།།
PSA 140:12 ཡ་ཝཱེས་དཀའ་ངལ་ཅན་ལ་དྲང་གཞག༌སྐྱོང༌། །དབུལ་པོའི་ཁ་མཆུ་རྩོད་པ་ང་ཡིས༌ཤེས།།
PSA 140:13 དྲང་པོས་ཁྱེད་ཀྱི་མཚན་ལ་གཏང་རག༌འབུལ། །གཞུང་དྲང་ཁྱེད་ཀྱི་དྲུང་དུ་གནས་པར༌འགྱུར།།
PSA 141:1 ༼དཱ་བིད་ཀྱི་མགུར༌མ།༽ ཀྱེ་ཀྱེ་ཡ་ཝཱེ་བདག་གིས་ཁྱེད་ཉིད༌འབོད། །ཁྱེད་ཉིད་འཕྲལ་དུ་ངའི་རྩར་ཕེབས་པར༌མཛོད། །བདག་གིས་འབོད་དུས་ངའི་སྐད་གསན་དུ༌གསོལ།།
PSA 141:2 བདག་གི་སྨོན་ལམ་ཁྱེད་དྲུང་སྤོས་བཞིན༌དང༌། །ལག་ཟུང་འདེགས་པ་དགོང་མཆོད་ལྟར་གྱུར༌ཅིག།
PSA 141:3 ཀྱེ་ཀྱེ་ཡ་ཝཱེ་ངའི་ངག་བསྲུང་བ༌དང༌། །ང་ཡི་སྨྲ་སྒོ་ཉིད་ཀྱིས་བསྲུང་བར༌མཛོད།།
PSA 141:4 སྡིག་སྤྱོད་མཉམ་དུ་དོན་ངན་མི་གཉེར༌ཕྱིར། །བདག་སེམས་ངན་པར་འཕྲེང་དུ་མི་འཇུག༌རོགས། །དེ་དག་ཟས་ཞིམ་ང་ལ་གནང་མ༌མཛད།།
PSA 141:5 དྲང་པོས་བརྡུང་བར་ཤོག་ཅིག་བྱམས་བརྩེ༌ཡིན། །བཀྱོན་པར་གྱུར་ཅིག་མགོར་བྱུགས་སྣུམ་ཡིན༌ཏེ། །བདག་གི་མགོ་ནི་དེ་ལ་གཡོལ་མི༌བྱ། །སྡིག་སྤྱོད་རྣམས་ཀྱིས་ངན་པ་བྱེད་པའི༌ཚེ། །ང་ནི་སྨོན་ལམ་འདེབས་ཀྱིན་འདུག་པར༌བྱ།།
PSA 141:6 དེ་ཚོའི་ཁྲིམས་དཔོན་བྲག་གི་གཡང་ནས༌འཕེན། །ངའི་སྐད་སྙན་པས་དེ་ཚོས་བདག་ལ༌མཉན།།
PSA 141:7 སེར་ཁ་གས་པའི་ས་གཞི་ནང་བཞིན༌དུ། །གཤིན་པོའི་ཡུལ་གྱིས་ཁ་ཆེར་གདངས་ནས༌ནི། །ངེད་ཀྱི་ཕྱོགས་བཞིར་འཐོར་བའི་རུས་པ༌རྣམས། །ཁྱུར་མིད་གཏོང་ཞེས་དེ་ཚོས་སྨྲ་བར༌འགྱུར།།
PSA 141:8 འོན་ཀྱང་ཀྱེ་ཀྱེ་གཙོ་བོ་ཡ་ཝཱེ༌ལགས། །ང་ཡི་མིག་གིས་ཁྱེད་ལ་རེ་ལྟོས༌བཅངས། །ང་རང་ཁྱེད་ལ་སྐྱབས་སུ་འགྲོ་བས༌ན། །ང་རང་འཆི་བའི་ནང་དུ་ལྷུང་མ༌མཛད།།
PSA 141:9 ངན་པས་ངའི་ཕྱིར་བཙུགས་པའི་རྙི་རྒྱ༌དང༌། །སྡིག་སྤྱོད་རྣམས་ཀྱི་ཞགས་ལས་སྐྱོབ་པར༌མཛོད།།
PSA 141:10 མི་ངན་རང་གི་རྙི་ནང་ཚུད་གྱུར༌ཅིག །ང་ནི་བདེ་ཞིང་ཐར་བར་གྱུར་ཅིག༌གུ།
PSA 142:1 ༼དཱ་བིད་ཀྱི་བསླབ་བྱའི་མགུར་མ༌སྟེ། བྲག་ཕུག་ནང་གི་གསོལ༌འདེབས།༽ སྐད་གསང་མཐོན་པོས་ཡ་ཝཱེར་འོ་དོད༌འབོད། །སྙིང་རྗེ་གནང་ཕྱིར་ཡ་ཝཱེར་སྐད་ཅོར༌རྒྱག།
PSA 142:2 ཁོང་དྲུང་སོ་སོའི་སེམས་སྡུག་ལྷུག་པོར༌བརྗོད། །རང་གི་སྡུག་བསྔལ་ཁོང་ལ་ཞུ་བར༌བྱ།།
PSA 142:3 རང་གི་སེམས་ཀྱི་བློ་གཏད་ཉམས་དུས༌སུ། །ང་ཡི་ལམ་ནི་ཁྱེད་ཀྱིས་མཁྱེན་པ༌ཡིན། །ང་རང་འགྲུལ་བའི་ལམ་དུ་དགྲ་དག༌གིས། །ང་ལ་འཚེ་ཕྱིར་རྙི་རྒྱ་བཙུགས་ནས༌ཡོད།།
PSA 142:4 ཁྱེད་ཀྱིས་ང་ཡི་གཡས་སུ་གཟིགས་པར༌མཛོད། །ང་ལ་དོ་ཁུར་བྱེད་མཁན་སུ་ཡང༌མེད། །སྐྱབས་གནས་མེད་ལ་གཟིགས་སྐྱོང་གནང་མཁན༌དབེན།།
PSA 142:5 ཀྱེ་ཀྱེ་ཡ་ཝཱེ་བདག་གིས་འོ་དོད༌འབོད། །ཁྱེད་ནི་ང་ཡི་སྐྱབས་གནས་ཡིན་པ༌དང༌། །གསོན་པོའི་ཡུལ་གྱི་ནོར་སྐལ་ཡིན་ཞེས༌ཞུ།།
PSA 142:6 ང་རང་ཉམ་ཐག་གནས་སུ་ལྷུང་བས༌ན། །ང་ཡི་འོ་དོད་ལ་ནི་གསན་དུ༌གསོལ། །འདེད་མཁན་བདག་ལས་ཤིན་ཏུ་སྟོབས་ཆེ༌བས། །ང་རང་དེ་ལས་སྐྱོབ་པར་མཛོད་གྱུར༌ཅིག།
PSA 142:7 ཁྱེད་ཀྱི་མཚན་ལ་བསྟོད་བསྔགས་འབུལ་བའི༌ཕྱིར། །ཁྱེད་ཀྱིས་ང་རང་བཙོན་ལས་སྒྲོལ་བར༌མཛོད། །ཁྱེད་ཀྱིས་ང་རང་དྲིན་གྱིས་བསྐྱངས་པས༌ན། །དྲང་བདེན་རྣམས་ཀྱིས་ང་རང་བསྐོར་འོང༌ངོ༌།།
PSA 143:1 ༼དཱ་བིད་ཀྱི་མགུར༌མ།༽ བདག་གི་སྨོན་ལམ་གསོན་དང་ཀྱེ་ཡ༌ཝཱེ། །ང་ཡི་ཞུ་བར་ཁྱེད་ཀྱིས་སྙན་གཏད༌རོགས། །དམ་ཚིག་དྲང་བདེན་སྒོ་ནས་བཀའ་ལན༌གནོངས།།
PSA 143:2 ཁྱེད་ཀྱིས་ཞབས་ཕྱིར་ཁྲིམས་ཐག་གཅོད་མི༌བྱ། །ཁྱེད་ཀྱི་སྤྱན་སྔར་སྐྱེ་བོ་གསོན་པོ༌ལས། །སྐྱེ་བོ་དམ་པ་གཅིག་ཀྱང་མེད་ཕྱིར༌རོ།།
PSA 143:3 དགྲ་ཟླས་ང་རང་ཚ་འདེད་བྱས་ནས༌ནི། །ཕམ་པར་བརྒྱབ་སྟེ་ཤི་ནས་ཡུན་རིང༌བའི། །མི་བཞིན་མུན་ནག་ནང་དུ་འདུག་བཅུག༌གོ།
PSA 143:4 དེའི་ཕྱིར་བདག་གི་ནུས་སྟོབས་ཉམས་པ༌དང༌། །བདག་གི་སེམས་ནི་སྐྱོ་ཞིང་གདུང་བར༌གྱུར།།
PSA 143:5 བདག་གིས་གནའ་བོའི་དུས་དེ་ཡང་ཡང༌དྲན། །ཡ་ཝཱེ་ཁྱེད་ཀྱི་མཛད་པ་ཡོད་དགུ་སེམས། །ཁྱེད་ཀྱི་ཕྱག་གི་འཕྲིན་ལས་དེ་ཡང༌བསམས།།
PSA 143:6 ཆུ་མེད་སྐམ་སས་ཆར་ཆུ་འདོད་པ༌བཞིན། །བདག་གིས་ཁྱེད་ནི་རྟག་ཏུ་དྲན་གྱུར༌ཅིང་། །ཁྱེད་ལ་ལག་ཟུང་བཏེགས་ཏེ་ཞུ་བ༌བྱེད།།༼ སེ༌ལཱ། ༽
PSA 143:7 འཕྲལ་དུ་བཀའ་ལན་གནང་རོགས་ཀྱེ་ཡ༌ཝཱེ། །བདག་གི་སེམས་ནི་ཡོངས་སུ་ཉམས་པ༌འོ། །དོང་ལ་ལྷུང་བའི་མི་བཞིན་མ་ཡིན༌ཕྱིར། །ཁྱེད་ཀྱི་ཞལ་རས་བདག་ལ་མི་འགེབ༌རོགས།།
PSA 143:8 ང་རང་ཁྱེད་ལ་བརྟེན་པས་ནངས་སྔ༌མོར། །ཁྱེད་ཀྱི་བྱམས་བརྩེའི་གཏམ་དེ་ཐོས་པར༌མཛོད། །བདག་གི་སེམས་པ་ཁྱེད་ལ་བཅོལ་བའི༌ཕྱིར། །ད་ལྟའི་འགྲོ་ལམ་བདག་ལ་ཤེས་པར༌མཛོད།།
PSA 143:9 ཀྱེ་ཀྱེ་ཡ་ཝཱེ་ང་རང་དགྲ་ལས༌སྐྱོབས། །ཁྱེད་ཉིད་ང་ཡི་སྐྱབས་གནས་ཡིན་ལགས༌སོ།།
PSA 143:10 ཁྱེད་ནི་བདག་གི་དཀོན་མཆོག་ལགས་པའི༌ཕྱིར། །ཁྱེད་ཀྱི་དགོངས་དོན་ཇི་བཞིན་སྒྲུབ་པའི༌དོན། །བདག་ལ་སློབ་པར་མཛོད་ཅིག་དཀོན་མཆོག༌ལགས། །ཁྱེད་ཀྱི་རབ་ཏུ་ལེགས་པའི་ཐུགས་ཉིད༌ཀྱིས། །བདག་ནི་བདེ་བའི་ལམ་དུ་ཁྲིད་པར༌མཛོད།།
PSA 143:11 ཀྱེ་ཀྱེ་ཡ་ཝཱེ་ཁྱེད་ཀྱི་མཚན་སྙན༌ཕྱིར། །ཁྱེད་ཀྱིས་ང་རང་སྐྱོབ་ཅིང་གསོན་པར༌མཛོད། །ཀྱེ་ཀྱེ་ཁྱེད་ཀྱི་བདེན་པ་བདེན་དྲང༌བཞིན། །བདག་ནི་སྡུག་བསྔལ་དག་ལས་སྒྲོལ་བར༌མཛོད།།
PSA 143:12 བདག་ནི་ཁྱེད་ཀྱི་ཞབས་ཕྱི་ཡིན་པའི༌ཕྱིར། །ཀྱེ་ཀྱེ་ཁྱེད་ཀྱིས་བྱམས་བརྩེ་ཆེན་པོ༌ལས། །བདག་གི་དགྲ་བོ་རྩད་ནས་འཇོམས་པར༌ཤོག །བདག་ལ་འཚེ་མཁན་ཐམས་ཅད་འཇོམས་པར༌ཤོག།
PSA 144:1 ༼དཱ་བིད་ཀྱི་མགུར༌མ།༽ ང་ཡི་བྲག་རི་ཡ་ཝཱེ་བསྟོད་པར་འོས། །ཁོང་གིས་ང་ཡི་ལག་པར་འཐབ་ལུགས༌དང༌། །མཛུབ་མོར་དམག་འཁྲུག་རྒྱག་ཚུལ་བསླབ་པ༌ཡིན།།
PSA 144:2 ཁོང་ངའི་བྱམས་བརྩེ་ལྡན་པའི་གཙོ་བོ༌དང༌། །ང་ཡི་རི་རྫོང་དང་ནི་བཙན་རྫོང༌དང༌། །ང་ཡི་སྲོག་སྐྱོབ་དང་ནི་ཕུབ་ཡིན༌ཞིང༌། །ང་རང་སྐྱབས་སུ་འགྲོ་ས་ཡང་ཡིན༌ནོ། །ཁོང་གིས་འབངས་རྣམས་ང་ཡི་དབང་དུ༌བསྡུས།།
PSA 144:3 ཀྱེ་ཀྱེ་ཡ་ཝཱེ་འཇིག་རྟེན་མི་ནི༌ཅི། །ཁྱེད་ཀྱིས་མི་རྣམས་ཐུགས་སུ་འཛིན་དོན༌ཅི། །ཀྱེ་ཀྱེ་འཇིག་རྟེན་མི་བུ་ཅི་འདྲ༌ཙམ། །ཁྱེད་ཀྱིས་དེ་ལ་ཐུགས་ཁུར་མཛད་དོན༌ཅི།།
PSA 144:4 མི་ནི་དབུགས་ཐེངས་གཅིག་ཙམ་ཡིན་པ༌དང༌། །དེ་ཡི་མི་ཚེ་གྲིབ་མ་ནང་བཞིན༌ཡལ།།
PSA 144:5 ཡ་ཝཱེ་ནམ་མཁའ་འཕྱངས་ནས་མར་ཕེབས༌ཤོག །རི་བོ་རྣམས་ལ་ཕྱག་གིས་རེག་པར༌མཛོད། །རི་བོ་རྣམས་ལས་དུ་བ་འཕྱུར་བྱེད༌དོ།།
PSA 144:6 གློག་དམར་འཁྱུགས་ནས་དགྲ་རྣམས་གཏོར་བར༌མཛོད། །ཕྱག་མདའ་འཕངས་ནས་དེ་རྣམས་དཀྲོག་པར༌མཛོད།།
PSA 144:7 སྟེང་ནས་ཕྱག་མར་བརྐྱངས་ཏེ་ང་སྐྱོབ༌རོགས། །ཆུ་ཆེན་དང་ནི་ཕྱི་པའི་ལག་ནས༌སྒྲོལ།།
PSA 144:8 དེ་དག་ཁ་ནས་རྫུན་གཏམ་ལབ་པ༌དང༌། །གཡས་ལག་བཀྱགས་ནས་རྫུན་གྱི་མནའ་སྐྱེལ༌ལོ།།
PSA 144:9 དཀོན་མཆོག་ཁྱེད་ལ་བསྟོད་དབྱངས་གསར་པ༌འབུལ། །རྒྱུད་བཅུའི་རྒྱུད་མངས་ཀྱིས་ནི་ཁྱེད་ལ༌བསྟོད།།
PSA 144:10 ཁོང་གིས་རྒྱལ་པོ་རྣམས་ནི་ཐར་དུ༌འཇུག །ཞབས་ཕྱི་དཱ་བིད་སྲོག་ལེན་གྲི་ལས༌སྲུང༌།།
PSA 144:11 ཕྱི་པའི་ལག་ནས་ང་སྐྱོབ་ང་སྒྲོལ༌དང༌། །དེ་དག་ཁ་ནས་རྫུན་གཏམ་ལབ་པ༌དང༌། །གཡས་ལག་བཀྱགས་ནས་རྫུན་གྱི་མནའ་སྐྱེལ༌ལོ།།
PSA 144:12 ངེད་ཀྱི་བུ་རྣམས་གཞོན་ནུའི་དུས་ནས༌བཟུང༌། །ལྗོན་གསར་བཞིན་དུ་ཆེ་ཆེར་སྐྱེ་བ༌དང༌། །བུ་མོ་རྣམས་ནི་ཕོ་བྲང་ཟུར་བཞི༌ཡི། །རྒྱན་བྱེད་ཀ་བ་བཞོགས་འདྲར་གྱུར་ཅིག༌གུ།
PSA 144:13 ངེད་ཀྱི་བང་མཛོད་རྣམས་ནི་འབྲུ་ཡིས༌གཏམས། །ཟས་རིགས་སྣ་ཚོགས་དེ་ལས་འབྱུང་བ༌ཡིན། །ངེད་ཀྱི་སྤང་དུ་ལུག་ནི་ཁྲི་སྟོང༌འཕེལ།།
PSA 144:14 ངེད་ཀྱི་བ་ཁྱུ་མང་དུ་འཕེལ་བ༌དང༌། །མངལ་ཤོར་དང་ནི་འཆི་བ་ཡོད་མ༌ཡིན། །ཕྱི་རུ་བསྐྱོད་དེ་འཐབ་འཁྲུག་རྒྱག་པ༌མེད། །ལམ་སྲང་རྣམས་སུ་སྨྲེ་སྔགས་སྐད་ཀྱང༌མེད།།
PSA 144:15 འདི་འདྲའི་དཔལ་ལ་རོལ་བའི་འབངས་རྣམས༌བདེ། །ཡ་ཝཱེ་དཀོན་མཆོག་ལགས་པའི་འབངས་རྣམས༌བདེ།།
PSA 145:1 ༼དཱ་བིད་ཀྱི་བསྟོད་པའི་མགུར༌མ།༽ ང་ཡི་དཀོན་མཆོག་ང་ཡི་རྒྱལ་པོ༌ལགས། །བདག་གིས་ཁྱེད་ལ་གུས་ཤིང་འདུད་པ༌དང༌། །རྟག་ཏུ་ཁྱེད་ཀྱི་མཚན་ལ་བསྔགས་པར༌བྱ།།
PSA 145:2 བདག་གིས་ནམ་རྒྱུན་ཁྱེད་ལ་བསྟོད་པ༌དང༌། །ཁྱེད་ཀྱི་མཚན་ལ་ནམ་ཡང་བསྔགས་པར༌བྱ།།
PSA 145:3 ཡ་ཝཱེ་རབ་ཏུ་ཆེ་ཞིང་བསྔགས་པར༌འོས། །ཉིད་ཀྱི་ཆེ་བ་བསམ་གྱིས་མི་ཁྱབ༌བོ།།
PSA 145:4 མི་རབས་ཀུན་གྱིས་ཁྱེད་ཀྱི་མཛད་པར༌བསྔགས། །ཁོ་ཚོས་ཁྱེད་ཀྱི་མཛད་པ་སྟོབས་ལྡན༌སྒྲོག།
PSA 145:5 ཁྱེད་ཀྱི་བརྗིད་ཉམས་ལྡན་པའི་གཟི་དཔལ༌དང༌། །ངོ་མཚར་མཛད་པར་བསམ་གཞིགས་མང་དུ༌བཏང༌།།
PSA 145:6 མི་ཡིས་ཁྱེད་ཀྱི་འཇིགས་རུང་ནུས་མཐུ༌སྒྲོག །ངས་ཀྱང་ཁྱེད་ཀྱི་ཆེ་བ་སྒྲོག་པ༌ལགས།།
PSA 145:7 འཇིག་རྟེན་མི་ཡིས་ཁྱེད་ཀྱི་ཐུགས་རྗེ༌ནི། །དྲན་ཞིང་དྲན་ཏེ་ཀུན་ལ་སྒྲོག་འགྱུར༌ཞིང༌། །ཁྱེད་ཀྱི་བདེན་པ་ཉིད་ལ་བསྔགས་པར༌བྱེད།།
PSA 145:8 ཡ་ཝཱེར་ཐུགས་རྗེ་ལྡན་ཞིང་སྙིང་རྗེ༌ཆེ། །རང་དགར་མི་ཁྲོ་བྱམས་བརྩེ་ཕུན་སུམ༌ཚོགས།།
PSA 145:9 ཁོང་གིས་མི་རིགས་ཐམས་ཅད་བདེ་བར༌སྐྱོང༌། །ཁོང་གི་བྱམས་བརྩེ་ཆེན་པོ་དེ་ཡིས༌ནི། །ཉིད་ཀྱིས་བསྐྲུན་པ་ཀུན་ལ་ཁྱབ་པར༌བྱེད།།
PSA 145:10 ཀྱེ་ཀྱེ་ཡ་ཝཱེ་ཁྱེད་ཀྱི་མཛད་པ༌ཀུན། །ཁྱེད་ལ་གཏང་རག་འབུལ་བར་འགྱུར་བ༌དང༌། །དད་ལྡན་རྣམས་ཀྱིས་ཁྱེད་ལ་བསྔགས་པར༌བྱེད།།
PSA 145:11 དེ་ཚོས་ཁྱེད་ཀྱི་རྒྱལ་སྲིད་དཔལ་བརྗོད༌ཅིང༌། །ཁྱེད་ཀྱི་མཛད་པ་སྟོབས་ལྡན་གླེང་བར༌བྱེད།།
PSA 145:12 མི་ཡིས་ཁྱེད་ཀྱི་མཛད་པ་སྟོབས་ལྡན༌དང༌། །བརྗིད་ཉམས་ལྡན་པའི་རྒྱལ་སྲིད་གཟི་དཔལ༌ནི། །ཤེས་པར་བྱ་ཆེད་ཡིན་པ་གོར་མ༌ཆག།
PSA 145:13 ཁྱེད་ཀྱི་རྒྱལ་སྲིད་རྟག་ཏུ་བཞུགས་པ༌དང༌། །ཁྱེད་ཀྱི་མངའ་ཐང་དུས་རབས་ཀུན་ལ༌ཁྱབ།།
PSA 145:14 ས་རུ་འགྱེལ་བ་ཐམས་ཅད་ཡ་ཝཱེས༌སྐྱོར། །གཉའ་གནོན་ཐེབས་པ་ཀུན་པོ་ཁོང་གིས༌འདེགས།།
PSA 145:15 འཇིག་རྟེན་མིག་ཀུན་ཁྱེད་ལ་རེ་ལྟོས༌བཅངས། །ཁྱེད་ཀྱིས་དུས་ལྟར་ཁ་ཟས་གནང་བར༌མཛད།།
PSA 145:16 ཁྱེད་ཀྱིས་ཕྱག་ཟུང་བརྐྱངས་ནས་སྲོག་ལྡན༌ཀུན། །ཡིད་ཀྱི་འདོད་པ་ཡོངས་སུ་ཚིམ་པར༌མཛད།།
PSA 145:17 ཡ་ཝཱེས་མཛད་པའི་འཕྲིན་ལས་ཡོད་དོ༌ཅོག །དྲང་བདེན་མ་ཡིན་པ་ནི་ཅི་ཡང༌མེད། །ཁོང་གིས་བསྐྲུན་པ་ཀུན་ལ་བྱམས་བརྩེ༌ཁྱབ།།
PSA 145:18 སུ་ཞིག་གིས་ནི་ཀུན་སློང་རབ་དག༌གིས། །ཁོང་ལ་ཞུས་ན་ཁོང་ནི་ཉེ་བར༌བཅར།།
PSA 145:19 སུ་ཞིག་ཁོང་ལ་གུས་ཤིང་འཇིགས་གྱུར༌ན། །ཁོང་གིས་དེ་ཡི་རེ་བ་སྐོང་བྱེད༌ཅིང༌། །དེ་རྣམས་འོ་དོད་གསན་ཞིང་སྐྱོབ་པར༌མཛད།།
PSA 145:20 ཡ་ཝཱེས་རང་ལ་གཅེས་མཁན་རྣམས་སྲུང༌ཞིང༌། །མི་ངན་ཐམས་ཅད་རྩ་ནས་འཇོམས་བྱེད༌དོ།།
PSA 145:21 བདག་གི་ངག་ལས་ཡ་ཝཱེར་བསྟོད་བསྔགས༌བརྗོད། །སྲོག་ལྡན་ཀུན་གྱིས་ཁྱེད་ཀྱི་མཚན་དམ༌པར། །རྟག་ཏུ་བསྟོད་ཅིང་བསྔགས་པ་བརྗོད་པར༌ཤོག།
PSA 146:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ང་ཡི་སེམས་ཀྱིས་ཡ་ཝཱེར་བསྟོད་བསྔགས༌བརྗོད།།
PSA 146:2 མི་ཚེ་གང་པོར་ཡ་ཝཱེར་བསྟོད་པ༌འབུལ། །འཇིག་རྟེན་འདི་རུ་འཚོ་བའི་དུས་ཡུན༌ནང༌། །དཀོན་མཆོག་ཉིད་ལ་བསྟོད་དབྱངས་འབུལ་བར༌བྱ།།
PSA 146:3 ཁྱོད་རྣམས་སྐྱོབ་ཐབས་བྲལ་བའི་སྐུ་དྲག༌དང༌། །འཇིག་རྟེན་མི་ལ་བློ་གཏད་མ་བཅོལ༌ཞིག།
PSA 146:4 དེ་ཡི་དབུགས་རྒྱུ་ཆད་དུས་རྡུལ་དུ༌འགྱུར། །དེ་ཡི་ཇུས་རྣམས་ཉིན་གཅིག་ནང་ལ༌འཇིག།
PSA 146:5 ཡ་ཀོབ་དཀོན་མཆོག་སྡོངས་གྲོགས་ཡིན་པ༌དང༌། །སུ་ཡིས་རང་གི་དཀོན་མཆོག་ཡ་ཝཱེ༌ལ། །རེ་བ་བྱེད་པའི་མི་དེ་བདེ་བ༌ཡིན།།
PSA 146:6 ཡ་ཝཱེས་གནམ་དང་ས་དང་རྒྱ་མཚོ༌དང༌། །དེའི་ནང་ཁྱབ་པ་ཡོད་དགུ་མཛད་པ༌ལགས། །ཁོང་ནི་རྟག་ཏུ་ཡིད་རྟོན་རུང་བ༌ཡིན།།
PSA 146:7 གཉའ་གནོན་འོག་གི་མི་ལ་དཀར་འདོན་བྱེད། །ལྟོགས་པ་རྣམས་ལ་ཁ་ཟས་གནང་བ༌དང༌། །ཁོང་གིས་བཙོན་པ་རྣམས་ཀྱང་ཐར་དུ༌འཇུག།
PSA 146:8 ཡ་ཝཱེས་ལོང་བ་རྣམས་ཀྱི་མིག་འབྱེད༌ཅིང༌། །གཉའ་གནོན་ཐེབས་པ་རྣམས་ནི་སློང་བར༌མཛད། །ཁོང་ཉིད་དྲང་བདེན་མི་ལ་ཐུགས་མཉེས༌སོ།།
PSA 146:9 ཡ་ཝཱེས་བྱེས་སུ་སྡོད་པ་རྣམས་བསྲུང༌ཞིང༌། །དྭ་ཕྲུག་ཡུགས་མོ་རྣམས་ལ་རོགས་སྐྱོར༌གནང༌། །འོན་ཀྱང་སྡིག་སྤྱོད་ལམ་ནི་འཁྱོག་པོར༌མཛད།།
PSA 146:10 ཡ་ཝཱེས་རྒྱུན་ནས་རྒྱུན་དུ་སྲིད་མཛད༌དེ། །ཀྱེ་ཀྱེ་ཛ་ཡན་ཁྱེད་ཀྱི་དཀོན་མཆོག༌ནི། །མི་རབས་ཀུན་ཏུ་རྒྱལ་པོར་བཞུགས་གྱུར༌ཅིག །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 147:1 ཁྱོད་ཚོས་ངེད་ཀྱི་དཀོན་མཆོག༌ཡ་ཝཱེ་ལ། །བསྟོད་དབྱངས་འབུལ་བ་དེ་ནི་རབ་ལེགས༌སོ། །ཁོང་ལ་བསྟོད་པ་མཛེས་ཤིང་འོས་སོ༌ལོ།།
PSA 147:2 ཡ་ཝཱེས་ཡེ་རུ་སཱ་ལེམ་བསྐྱར་འཛུགས༌ཤིང༌། །ཡེས་ར་ཨེལ་གྱི་སྤྱུགས་པའི་མི་རྣམས༌བསྡུ།།
PSA 147:3 སྡུག་གིས་མནར་བ་རྣམས་ལ་སེམས་གསོ༌གནང༌། །དེ་ཚོའི་རྨ་ཁ་རས་ཀྱིས་དཀྲི་བྱེད༌དོ།།
PSA 147:4 ཁོང་གིས་སྐར་མའི་གྲངས་ཀ་རྩི་བྱེད༌ཅིང༌། །དེ་དག་རེ་རེར་མིང་ཡང་འདོགས་པ༌འོ།།
PSA 147:5 རང་ཅག་གཙོ་བོ་ཆེ་ཞིང་མཐུ་སྟོབས༌ལྡན། །ཁོང་གི་ཡེ་ཤེས་དེ་ནི་མཐའ་ཡས༌སོ།།
PSA 147:6 ཡ་ཝཱེས་ཉམ་ཆུང་མི་རྣམས་ཡར་སྐྱོར༌ཞིང༌། །སྡིག་སྤྱོད་མི་རྣམས་ཆམ་ལ་འབབ་པ༌ཡིན།།
PSA 147:7 གཏང་རག་དང་བཅས་ཡ་ཝཱེར་མགུར་གླུ༌ལོངས། །པི་ཝང་དཀྲོལ་ནས་རང་རེའི་དཀོན་མཆོག༌བསྟོད།།
PSA 147:8 ཁོང་གིས་ནམ་མཁའ་སྤྲིན་གྱིས་གཡོག་བྱེད༌ཅིང༌། །ས་གཞི་ལ་ནི་ཆར་ཆུ་ཤོམ་པ༌དང༌། །རི་སྒང་རྣམས་ལ་རྩྭ་སྔོན་སྐྱེ་བར༌མཛད།།
PSA 147:9 ཁོང་གིས་རི་དྭགས་རྣམས་ལ་ཁ་ཟས༌གནང༌། །ཕོ་རོག་བྱ་ཡི་བྱེའུ་ཕྲུག་གསོ་བར༌མཛད།།
PSA 147:10 ཡ་ཝཱེ་རྟ་ཡི་སྟོབས་ལ་མི་དགྱེས༌ཤིང༌། །མི་ཡི་གོམ་འགྲོས་མགྱོགས་པར་མཉེས་པ༌མིན།།
PSA 147:11 ཁོང་ལ་གུས་ཤིང་འཇིགས་པའི་མི་རྣམས༌དང༌། །ཉིད་ཀྱི་བྱམས་བརྩེར་རེ་བའི་མི་ལ༌མཉེས།།
PSA 147:12 ཀྱེ་ཀྱེ་ཡེ་རུ་སཱ་ལེམ་ཡ་ཝཱེར༌སྔོགས། །ཀྱེ་ཀྱེ་ཛ་ཡན་རང་གི་དཀོན་མཆོག༌བསྟོད།།
PSA 147:13 ཁྱོད་ཀྱི་རྟ་སྒོའི་སྒོ་གཏན་བརྟན་པོར༌མཛད། །ཁྱོད་ཀྱི་བུ་དང་བུ་མོར་བྱིན་རླབས༌གནང༌།།
PSA 147:14 ཁོང་གིས་ཁྱོད་ཀྱི་ས་མཚམས་བདེ་ལ༌བཀོད། །གྲོ་ཡི་བཅུད་ཀྱིས་ཁྱོད་རང་ཚིམ་པར༌མཛད།།
PSA 147:15 ཁོང་གིས་ས་གཞིར་ཉིད་ཀྱི་བཀའ་གནང༌ཞིང༌། །བཀའ་རྣམས་ལམ་སང་ལག་ཏུ་བསྟར་བར༌མཛད།།
PSA 147:16 ཁོང་གིས་བལ་དང་འདྲ་བའི་གངས་ཕབ༌ཅིང༌། །གོ་ཐལ་འདྲ་བའི་བ་མོ་གཏོར་བ༌འོ།།
PSA 147:17 ཧྲུག་ཧྲུག་ཡིན་པའི་སེར་བ་མར་འཕེན༌ནོ། །ཁོང་གིས་བཏང་བའི་འཁྱགས་རླུང་སུ་ཡིས༌བཟོད།།
PSA 147:18 ཁོང་གིས་བཀའ་ཞིག་གནང་བས་དེ་རྣམས༌འཇུ། །ལྷགས་རླུང་གཡུག་ཏུ་བཅུག་པར་ཆུ་རྣམས༌རྒྱུག།
PSA 147:19 ཁོང་གི་བཀའ་རྣམས་ཡ་ཀོབ་ལ་བསྟན༌ཞིང༌། །སྒྲིག་ཁྲིམས་སྲོལ་ཡིག་ཡེས་ར་ཨེལ་ལ༌བསྟན།།
PSA 147:20 མི་རིགས་གཞན་ལ་འདི་བཞིན་མཛད་པ༌མེད། །དེ་ཚོས་ཁོང་གི་ཁྲིམས་སྲོལ་རྟོགས་པ༌མིན། །ཁྱོད་ཚོའི་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 148:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ནམ་མཁའི་ཀློང་ནས་ཁོང་ལ་བསྟོད་པར༌གྱིས། །བླ་ན་མཐོ་བའི་གནས་སུ་ཁོང་ལ༌བསྟོད།།
PSA 148:2 ཁོང་གི་ཕོ་ཉ་ཀུན་གྱིས་ཁོང་ལ༌བསྟོད། །ཁོང་གི་དཔུང་ཚོགས་རྣམས་ཀྱིས་ཁོང་ལ༌བསྟོད།།
PSA 148:3 ཀྱེ་ཀྱེ་ཉི་ཟླ་གཉིས་པོས་ཁོང་ལ༌བསྟོད། །འོད་ཅན་སྐར་མ་རྣམས་ཀྱིས་ཁོང་ལ༌བསྟོད།།
PSA 148:4 ཀྱེ་ཀྱེ་ནམ་མཁའི་རྩེ་མོ་ཁོང་ལ༌བསྟོད། །ནམ་མཁའི་སྟེང་གི་ཆུ་རྣམས་ཁོང་ལ༌བསྟོད།།
PSA 148:5 ཁོང་གི་བཀའ་ལས་དེ་དག་བྱུང་བས༌ན། །ཀུན་གྱིས་ཡ་ཝཱེའི་མཚན་ལ་བསྟོད་པར༌གྱིས།།
PSA 148:6 ཁོང་གིས་དེ་རྣམས་རྒྱུན་ནས་རྒྱུན་དུ༌བཙུགས། །འགྱུར་བ་མེད་པའི་ཆོས་ཉིད་གཏན་ལ༌ཕབ།།
PSA 148:7 ཁྱོད་ཚོས་ས་གཞིའི་སྟེང་ནས་ཡ་ཝཱེར༌བསྟོད། །རྒྱ་མཚོའི་ཆུ་སྲིན་རྣམས་དང་གཏིང་ཟབ༌མཚོ།།
PSA 148:8 མེ་དང་སེར་བ་ཁ་བ་སྤྲིན་པ༌དང༌། །ཁོང་གི་བཀའ་ལྟར་སྒྲུབ་པའི་རླུང་ཆེན༌དང༌།།
PSA 148:9 རི་རབ་རྣམས་དང་རི་ཕྲན་མཐའ་དག༌དང༌། །སིལ་སྡོང་དང་ནི་ཐང་ཤིང་ཐམས་ཅད༌དང༌།།
PSA 148:10 རི་དྭགས་གཅན་གཟན་དང་ནི་ཕྱུགས་ཟོག༌ཀུན། །ལྟོ་འགྲོ་སྲོག་ཆགས་དང་ནི་འདབ་ཆགས༌དང༌།།
PSA 148:11 ས་གཞིའི་རྒྱལ་པོ་དང་ནི་མི་རིགས༌ཀུན། །མི་ཆེན་རྣམས་དང་ས་སྟེང་ཁྲིམས་དཔོན༌ཀུན།།
PSA 148:12 སྟག་ཤར་མོ་གསར་རྒན་རབས་བྱིས་པ༌བཅས།།
PSA 148:13 ཀུན་གྱིས་ཡ་ཝཱེའི་མཚན་ལ་བསྟོད་པར༌ཤོག །རྒྱུ་མཚན་ཁོང་མཚན་འབའ་ཞིག་གོང་དུ༌བཀུར། །ཁོང་གི་གཟི་བྱིན་གནམ་ས་གཉིས་ལས༌བརྒལ།།
PSA 148:14 ཁོང་གིས་ཉིད་ཀྱི་འབངས་ཕྱིར་རྒྱལ་པོ༌བསྐོས། །ཁོང་གི་དད་གུས་ལྡན་པ་ཐམས་ཅད༌དེ། །ཁོང་དང་ཉེ་བའི་ཡེས་ར་ཨེལ་པ༌རྣམས། །ཀུན་གྱིས་ཁོང་ལ་བསྟོད་པ་འབུལ་བར༌གྱིས། །ཁྱོད་ཚོས་ཡ་ཝཱེར་བསྟོད་པ་འབུལ་བར༌གྱིས།།
PSA 149:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཁོང་ལ་མགུར་གླུ་གསར་པ་ཞིག་ཕུལ༌དང༌། །དད་ལྡན་རྣམས་ཀྱི་ཚོགས་ནང་ཁོང་ལ༌བསྟོད།།
PSA 149:2 ཡེས་ར་ཨེལ་ནི་རང་གི་བྱེད་པོའི༌ནང༌། །དགའ་བར་གྱུར་ཅིག་ཛ་ཡན་མི་རྣམས༌ནི། །རྒྱལ་པོའི་རྐྱེན་ལ་བརྟེན་ནས་སྐྱིད་པར༌ཤོག།
PSA 149:3 བྲོ་གར་འཁྲབ་ཀྱིན་ཁོང་གི་མཚན་ལ༌བསྟོད། །སིལ་རྔ་པི་ཝང་ལམ་ནས་བསྟོད་དབྱངས༌ཕུལ།།
PSA 149:4 ཡ་ཝཱེ་ཉིད་ཀྱི་འབངས་ལ་ཐུགས་མཉེས༌ཤིང༌། །ཁེངས་སྐྱུང་མི་རྣམས་ཐར་པས་བརྒྱན་བྱེད༌དོ།།
PSA 149:5 དད་ལྡན་རྣམ་པ་དཔལ་ནང་དགའ་བར༌ཤོག །མལ་ཁྲིའི་སྟེང་དུ་དགའ་འབོད་བྱེད་གྱུར༌ཅིག།
PSA 149:6 དེ་རྣམས་སྨྲ་སྒོར་དཀོན་མཆོག་རྒྱུན་བསྟོད༌ཅིང༌། །རལ་གྲི་ཁ་གཉིས་ལག་ཏུ་ཐོགས་གྱུར༌ཅིག།
PSA 149:7 མི་རིགས་སོ་སོར་དགྲ་ལན་སློག་པ༌དང༌། །མི་སྡེ་ཀུན་ལ་ཉེས་ཆད་གཅོད་ཕྱིར༌དང༌།།
PSA 149:8 དེ་ཚོའི་རྒྱལ་པོ་སྒྲོག་གིས་བཅིང་བ༌དང༌། །སྐུ་དྲག་རྣམས་ལ་ལྕགས་སྒྲོག་རྒྱག་པ༌དང༌།།
PSA 149:9 དེ་ཚོར་བྲིས་པའི་ཉེས་ཆད་གཏོང་ཕྱིར༌རོ། །འདི་ནི་དད་ལྡན་རྣམ་པའི་གཟི་དཔལ༌ཡིན། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།
PSA 150:1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །གནས་མཆོག་ནང་དུ་དཀོན་མཆོག་ཉིད་ལ༌བསྟོད། །ནུས་མཐུ་མངོན་སའི་དབྱིངས་སུ་ཁོང་ལ༌བསྟོད།།
PSA 150:2 མཐུ་ལྡན་འཕྲིན་ལས་རྣམས་ཕྱིར་ཁོང་ལ༌བསྟོད། །མཐའ་ཡས་ཆེ་བར་འཚམ་པའི་བསྟོད་པ༌ཕུལ།།
PSA 150:3 རྭ་དུང་སྒྲ་དང་བཅས་པར་ཁོང་ལ༌བསྟོད། །རྒྱུད་མངས་པི་ཝང་དང་བཅས་ཁོང་ལ༌བསྟོད།།
PSA 150:4 སིལ་རྔ་བྲོ་གར་མཉམ་དུ་ཁོང་ལ༌བསྟོད། །རྒྱུད་མང་དང་ནི་འཕྲེད་གླིང་གིས་ཀྱང༌བསྟོད།།
PSA 150:5 སྒྲ་ཆེའི་སྦུག་ཆལ་དང་བཅས་ཁོང་ལ༌བསྟོད། །སྐད་ཆེའི་སིལ་སྙན་དང་བཅས་ཁོང་ལ༌བསྟོད།།
PSA 150:6 དབུགས་ཐོགས་ཀུན་གྱིས་ཡ་ཝཱེར་བསྟོད་པ༌ཕུལ། །ཁྱོད་ཚོས་ཡ་ཝཱེ་ལ་ནི་བསྟོད་པར༌གྱིས།། །།
PRO 1:1 ཡེས་ར་ཨེལ་གྱི་རྒྱལ་པོ་དཱ་བིད་ཀྱི་སྲས་སོ་ལོ་མོན་གྱི་ལེགས་བཤད་ནི་འདི་ལྟ༌སྟེ།
PRO 1:2 མི་ལ་ཤེས་རབ་འཐོབ་ཆེད༌དང༌། །དེ་ནས་གདམས་ངག་རྟོགས་ཕྱིར༌དང༌། །གཞན་ཡང་བརྗོད་པའི་ལེགས་ཉེས༌ཀྱི། །དབྱེ་བ་གསལ་ཞིང་གསལ་ཕྱིར༌དང༌།།
PRO 1:3 དྲང་བདེན་དྲང་གཞག་གཟུ་བོའི་བློར་གནས༌ཏེ། །ཤེས་རབ་བསླབ་བྱ་དང་དུ་ལེན་ཆེད༌དང༌།།
PRO 1:4 བླུན་པོ་དག་ནི་ཧ་ཅང་བློ་གྲོས་ལྡན་པ༌དང༌། །གཞོན་ནུ་རྣམས་ལ་ཤེས་བྱ་རྣམ་དཔྱོད་འཐོབ་ཕྱིར༌རོ།།
PRO 1:5 མཁས་པས་ཐོས་ན་ཤིན་ཏུ་མཁས་པར་འགྱུར་བ་དང༌། །བློ་གྲོས་ཅན་གྱིས་ཇུས་བཟང་རྙེད་པར་འགྱུར་ངེས༌ཡིན།།
PRO 1:6 ལེགས་པར་བཤད་དང་དཔེ་ཡི་འགྲེལ་བ༌དང༌། །མཁས་པའི་གསུང་དང་གབ་ཚིག་རྟོགས་ཕྱིར༌རོ།།
PRO 1:7 ཡ་ཝཱེ་ཁོང་ལ་གུས་ཤིང་འཇིགས་པ༌ནི། །ཤེས་ཡོན་ཀུན་གྱི་ཐོག་མ་ཡིན༌པ་འོ། །འོན་ཀྱང་བླུན་པོ་དག་གིས་ཤེས་རབ༌དང༌། །གདམས་ངག་གཉིས་པོ་ཁྱད་དུ་གསོད་པར༌བྱེད།།
PRO 1:8 ཀྱེ་ཀྱེ་བདག་གི་བུ་ཁྱོད༌ཀྱིས། །རང་གི་ཕ་ཡི་བཀའ་ལ༌ཉོན། །མ་ཡི་བསླབ་བྱ་འདོར་མི༌བྱ།།
PRO 1:9 འདི་གཉིས་ཁྱོད་ཚོའི་མགོ་ཐོག༌གི །ཐུགས་རྗེའི་ཟིལ་ལྡན་གཙུག་རྒྱན༌དང༌། །མཇིང་པའི་མགུལ་རྒྱན་ཡིན་ལགས༌སོ།།
PRO 1:10 ཀྱེ་ཀྱེ་བདག་གི་བུ་ཁྱོད༌ཀྱིས། །གལ་སྲིད་སྡིག་ཅན་རྣམས་ཀྱིས༌ཁྱོད། །བསླུ་བར་བྱེད་ན་དེར་མ༌བསྟུན།།
PRO 1:11 གལ་ཏེ་ཁོ་ཚོས་འདི་ལྟར༌དུ། །ངེད་དང་མཉམ་དུ་ཤོག་ཅིག༌དང༌། །གཞན་གྱི་ཁྲག་ནི་བཞུར་བའི༌ཕྱིར། །ལྐོག་ནས་སྒུག་སྟེ་སྡོད་པར༌བྱ། །ཉེས་མེད་མི་ལ་དོན་མེད༌དུ། །འཚེ་བའི་ཕྱིར་དུ་འཇབ་པར༌བྱ།།
PRO 1:12 དེ་དག་གཤིན་ཡུལ་ཚུལ་དུ༌དང༌། །དོང་ནང་འགྲིལ་མཁན་དང་མཚུངས༌པར། །ཡོངས་སུ་གསོན་པོར་ཁྱུར་མིད༌གཏོང༌།།
PRO 1:13 དེ་ནས་རིན་ཆེན་སྣ་ཚོགས༌ནི། །ང་ཚོར་འཐོབ་ཅིང་རང་ཁྱིམ༌ལ། །བཅོམ་ནོར་གྱིས་ནི་འགེང་བར༌བྱ།།
PRO 1:14 ཁྱོད་རང་ང་ཚོའི་གྲས་སུ༌ཞུགས། །རང་ཅག་ཀུན་པོས་དངུལ་ཁུག༌གཅིག །སྤྱོད་པར་འགྱུར་རོ་ཞེས་ཟེར༌ན།།
PRO 1:15 ཀྱེ་ཀྱེ་བདག་གི་བུ་ཁྱོད༌རང༌། །དེ་ཚོར་གཤིབ་སྟེ་མི་འགྲོ༌ཞིང༌། །རྐང་པ་ལམ་དེར་སྤོ་མི༌བྱ།།
PRO 1:16 དེ་ནི་ཅིའི་ཕྱིར་ཡིན་ཞེ༌ན། །དེ་དག་ངན་པའི་ཕྱོགས་སུ༌རྒྱུག །དེ་དག་མི་ཁྲག་བཞུར་བར༌རྔམ།།
PRO 1:17 འདབ་ཆགས་བྱ་ཡི་མཐོང་ངོ༌རུ། །དྲ་རྒྱ་བཙུགས་ཀྱང་ཅི་ལ༌ཕན།།
PRO 1:18 དེ་རྣམས་རང་གི་ཁྲག་ནི་བཞུར་བར༌སྒུག །འཇབ་ནས་རང་སྲོག་འཚེ་བར་བྱེད་པ༌འོ།།
PRO 1:19 རྒྱུ་ནོར་མི་གཙང་བ་ལ་ཆགས་པ་རྣམས། །འགྲོ་བའི་ལམ་ནི་ཐམས་ཅད་དེ་ག༌ཡིན། །རྒྱུ་དེས་ནོར་རྔམ་ཅན་གྱི་ཚེ་སྲོག༌འཇོམས།།
PRO 1:20 སྲང་ལམ་དུ་ནི་ཤེས་རབ་ཀྱིས་སྐད༌རྒྱག །ཐང་ཆེན་དུ་ནི་ཁོ་མོས་འབོད་སྒྲ༌སྒྲོག།
PRO 1:21 ཁོ་མོས་འདུ་འཛིའི་ལམ་མདོ་དག་ནས་འབོད། །མཁར་སྒོ་རྣམས་སུ་འདི་ལྟར་གཏམ་གླེང༌སྟེ།།
PRO 1:22 ཁྱོད་ཅག་བླུན་པོ་རྣམས་ནི་རྨོངས་པར༌ཆགས། །ཁྱོད་ཅག་འཕྱ་མཁན་རྣམས་ནི་འཕྱ་བར༌དགའ། །གླེན་པ་ཤེས་བྱར་སྡང་ནས་ནམ་དུས༌བར།།
PRO 1:23 ང་ཡི་བཀྱོན་ཚིག་དབང་གིས་ཕྱིར་འཁོར༌ཤོག །ཀྱེ་ཀྱེ་ང་ཡི་སེམས་ཉིད་ཁྱོད་ཚོར༌གཏོང༌། །བཀའ་མཆིད་ཀྱང་ནི་ཁྱོད་ཚོར་མཛུབ་སྟོན༌བྱ།།
PRO 1:24 ང་ཡིས་འབོད་དུས་ཁྱོད་ཚོས་རྣ་མ༌གཏད། །ང་ཡིས་ལག་པ་བརྐྱངས་མོད་སུ་ཡིས༌ཀྱང༌། །དོ་སྣང་ཙམ་ཡང་བྱེད་པ་མ་བྱུང༌ངོ༌།།
PRO 1:25 ང་ཡི་བསླབ་བྱ་ཐམས་ཅད་སྣང་མེད༌བསྐྱུར། །ང་ཡི་བཀྱོན་ཚིག་ཀྱང་ནི་མ་བརྩིས༌པས།།
PRO 1:26 ཁྱོད་ཅག་ཉོན་རེ་མོངས་པའི་དུས་སུ༌ནི། །ང་རང་དགོད་ཅིང་ཁྱོད་ཅག་འཇིགས་སྣང༌དུ། །ལྟུང་བའི་སྐབས་སུ་ངས་ཀྱང་འཕྱ་བར༌བྱ།།
PRO 1:27 འཇིགས་སྣང་རླུང་དམར་བཞིན་དུ་ཁྱོད་ཚོར༌འབབ། །ཆག་སྒོ་དྲག་རླུང་བཞིན་དུ་བསླེབ་པར༌འགྱུར། །སྡུག་བསྔལ་དང་ནི་ཟུག་རྔུ་འབྱུང་དུས༌སུ།།
PRO 1:28 དེ་ཚོས་ང་ལ་ཞུ་འབོད་བྱེད་མོད༌ཀྱང༌། །བདག་གིས་དེ་ལ་ཨ་ལན་འདེབས་པ༌མིན། །ནན་གྱིས་ང་རང་བཙལ་ཡང་རྙེད་མི༌འགྱུར།།
PRO 1:29 རྒྱུ་མཚན་དེ་རྣམས་ཤེས་བྱར་སྡང་བ༌དང༌། །ཡ་ཝཱེར་གུས་ཤིང་འཇིགས་པ་མ་བདམས༌སོ།།
PRO 1:30 བདག་གི་ཁ་ཏ་དང་དུ་མ་བླངས༌ཤིང༌། །བདག་གི་བཀའ་བཀྱོན་ཁྱད་དུ་བསད་པ༌འོ།།
PRO 1:31 དེའི་ཕྱིར་ཁོ་ཚོས་རང་གི་འབྲས་ངན༌བཟའ། །རང་གི་ཇུས་ཀྱིས་ཡོངས་སུ་འཚེ་བར༌འགྱུར།།
PRO 1:32 བླུན་པོ་རྣམས་ཀྱི་ཕྱིན་ལོག༌གིས། །རང་ཉིད་འཆི་བའི་ལམ་དུ༌འཇུག །གླེན་པ་རྣམས་ཀྱི་བདེ་བ༌ཡིས། །རང་ཉིད་སྲོག་དང་འབྲལ་བར༌འགྱུར།།
PRO 1:33 འོན་ཀྱང་སུ་ཡིས་ང་ལ་མཉན་གྱུར༌ན། །ཉེ་ཞོ་མེད་པར་བདེ་བར་གནས་པ༌དང༌། །ཆག་སྒོ་འབྱུང་བའི་འཇིགས་པ་དང་གྱེས༌ཏེ། །བློ་བདེ་བག་ཕེབས་ངང་ནས་འཚོ་བར༌འགྱུར།།
PRO 2:1 ཀྱེ་ཀྱེ་བདག་གི་བུ་ལགས་ཁྱོད་ཀྱིས༌ནི། །ཅི་སྟེ་བདག་གི་ཚིག་རྣམས་དང་བླངས༌ཏེ། །བཀའ་རྒྱ་རྣམས་ནི་སེམས་སུ་འཛིན་པ༌དང༌།།
PRO 2:2 རྣ་བ་བླགས་ཏེ་ཤེས་རབ་ལ་མཉན༌ཞིང༌། །བློ་དང་རིག་པ་འཚོལ་བར་གཞོལ་བ༌དང༌།།
PRO 2:3 རྣམ་དཔྱོད་འཚོལ་ཕྱིར་འབོད་པ་དང་། །བློ་གྲོས་ཕྱིར་ནི་སྐད་བཏོན་ཏེ།།
PRO 2:4 དངུལ་ནི་འཚོལ་བ་བཞིན་དུ་དེ་འཚོལ༌ཞིང༌། །རིན་ཆེན་གཏེར་བཞིན་དེ་ནི་བསྔོག་གྱུར༌ན།།
PRO 2:5 ཁྱོད་ཀྱིས་ཡ་ཝཱེར་གུས་ཤིང་འཇིགས་པ༌རྟོགས། །དཀོན་མཆོག་ཁོང་ཉིད་ཤེས་པར་འགྱུར་བ༌འོ།།
PRO 2:6 དེ་ནི་ཅིའི་ཕྱིར་ཡིན་ཞེ༌ན། །ཡ་ཝཱེས་ཤེས་རབ་གནང་བ༌དང༌། །ཤེས་བྱ་དང་ནི་བློ་གྲོས༌ཀུན། །ཁོང་གི་ཞལ་ལས་ཐོན་ཕྱིར༌རོ།།
PRO 2:7 དྲང་པོའི་དོན་དུ་ཤེས་རབ་གཅེས་ཉར༌མཛད། །སྤྱོད་བཟང་ཅན་གྱི་ཕུབ་ཀྱང་ཁོང་ཉིད༌ཡིན།།
PRO 2:8 དྲང་གཞག་བགྲོད་ལམ་བསྲུང་ཞིང་སྐྱོབ་པ༌དང༌། །དད་གུས་ལྡན་པའི་ལམ་ནི་བསྲུང་བར༌མཛད།།
PRO 2:9 དེ་ནས་དྲང་བདེན་དྲང་གཞག་གཟུ་བོ༌དང༌། །ལམ་བཟང་མཐའ་དག་ཁྱོད་ཀྱིས་རྟོགས་འགྱུར༌ཏེ།།
PRO 2:10 ཤེས་རབ་ཁྱོད་ཀྱི་སེམས་སུ་ཞུགས་པ༌དང༌། །ཤེས་བྱས་ཁྱོད་ཀྱི་སེམས་ནི་སྐྱིད་པར༌བྱ།།
PRO 2:11 ཤན་འབྱེད་ནུས་པས་ཁྱོད་རང་བསྲུང་བ༌དང༌། །བློ་གྲོས་ཀྱིས་ནི་ཁྱོད་ལ་གཟིགས་སྐྱོང༌མཛད།།
PRO 2:12 ཁྱོད་རང་ངན་པའི་ལམ་ནས་སྐྱོབ་པ༌དང༌། །ཁུངས་མེད་འཆལ་གཏམ་སྨྲ་མཁན་མི་རྣམས༌ལས། །ཐར་བར་མཛད་པའི་ཆེད་དུ་ཡིན་ལགས༌ཤིང༌།།
PRO 2:13 དེ་རྣམས་དྲང་པོའི་ལམ་འདོར༌ཞིང༌། །མུན་ནག་ལམ་དུ་ཞུགས་པ༌འོ།།
PRO 2:14 དེ་དག་ངན་པ་བྱེད་པར་ཡིད་མོས༌ཤིང༌། །ངན་པའི་ནོར་འཛོལ་ལ་ཡང་དགའ་བ༌ཡིན།།
PRO 2:15 དེ་དག་འགྲོ་བའི་ལམ་ནི་འཁྱོག་པོ༌དང༌། །བགྲོད་པའི་ལམ་ཡང་ལོག་པའི་ལམ་ཡིན༌ནོ།།
PRO 2:16 ཤེས་རབ་ཀྱིས་ནི་ཁྱོད་རང་བྱི་མོ༌དང༌། །གཡོ་ཟོལ་བསླུ་བྲིད་ཚིག་རྣམས་སྨྲ་བ༌ཡི། །སྨད་འཚོང་མ་ལས་སྐྱོབ་ཅིང་ཐར་བར༌མཛད།།
PRO 2:17 དེ་ཚོས་རང་ཉིད་ན་གཞོན་ཡིན་དུས༌ཀྱི། །བཟའ་ཟླ་སྤང་བར་བྱས་ཤིང་དཀོན་མཆོག༌གི །ཞལ་ཆད་ཀྱང་ནི་བརྗེད་པར་གྱུར་པ༌འོ།།
PRO 2:18 དེ་ནི་གང་གི་ཕྱིར་དུ་ཡིན་ཞེ༌ན། །ཁོ་མོའི་ཁྱིམ་ནི་འཆི་བའི་གནས་སུ༌ལྷུང༌། །ཁོ་མོའི་ལམ་ནི་གཤིན་པོའི་ཡུལ་དུ༌ཕྱོགས།།
PRO 2:19 ཁོ་མོའི་གམ་དུ་ཕྱིན་པ༌ཀུན། །ཕྱིར་ལོག་འོང་བ་སུ་ཡང༌མེད། །སྲོག་གི་ལམ་ཡང་ཐོབ་པ༌མེད།།
PRO 2:20 དེ་བས་ཁྱོད་ཀྱི་བགྲོད་ལམ༌ནི། །བཟང་པོའི་ལམ་ལ་བསྐྱོད་དགོས༌ཤིང༌། །དྲང་བདེན་ལམ་དང་མ་འབྲལ༌ཞིག།
PRO 2:21 གང་ལ་ཞེ་ན་གཟུ་བོ༌རྣམས། །ཡུལ་འདིར་བདེ་བར་གནས་པ༌དང༌། །ཕུལ་དུ་བྱུང་བའི་མི་རྣམས༌ནི། །འདི་ཡི་སྟེང་དུ་སྡོད་པར༌འགྱུར།།
PRO 2:22 མི་ངན་ཡུལ་འདིར་འཕྲལ་བྱེད༌ཅིང༌། །གཡོ་སྒྱུའི་སྦྱོར་བ་སྤེལ་མཁན༌ནི། །འདི་ལས་རྩ་མེད་གཏོང་ཕྱིར༌རོ།།
PRO 3:1 བདག་གི་བུ་ལགས་ང་ཡི་བསླབ་བྱ་བརྗེད་མི༌རུང༌། །ཁྱོད་ཀྱི་སེམས་ཀྱིས་ང་ཡི་བཀའ་རྒྱ་ནན་གྱིས་རྩིས།།
PRO 3:2 གང་ལ་ཞེ་ན་དེ་དག༌གིས། །ཚེ་རིང་ན་སོ་ཆེ་བ༌དང༌། །ཞི་བདེ་ཁྱོད་ལ་སྣོན་པར༌འགྱུར།།
PRO 3:3 བྱམས་བརྩེ་དང་ནི་བདེན་པ༌ཉིད། །ཁྱོད་དང་འབྲལ་བར་མི་བྱ༌ཞིང༌། །དེ་གཉིས་རང་གི་སྐེར་བཏགས༌ནས། །སྙིང་གི་བྱང་བུའི་སྟེང་དུ༌ཕྲིས།།
PRO 3:4 དེ་ནས་དཀོན་མཆོག་དང་ནི་མི་གཉིས༌ཀའི། །སྤྱན་སྔར་ཐུགས་རྗེ་མཚན་སྙན་ཁྱོད་ལ༌འཐོབ།།
PRO 3:5 ཁྱོད་ཀྱིས་བློ་གཅིག་སེམས་གཅིག༌གིས། །ཡ་ཝཱེ་ཁོང་ལ་བློ་གཏོད༌ཅིག །རང་གི་རིག་པར་མ་བརྟེན༌ཞིག།
PRO 3:6 རང་ཉིད་འགྲོ་བའི་ལམ་ཀུན༌དུ། །ཁོང་ཉིད་ཁས་ནི་ལེན་པར༌གྱིས། །ཁོང་གིས་ཁྱོད་ཀྱི་བགྲོད་ལམ༌ནི། །བདེ་ཞིང་དྲང་བར་མཛད་ངེས༌ཡིན།།
PRO 3:7 རང་ཉིད་མཁས་པ་ཡིན་པར་མ་འདོད༌ཅིག །ཡ་ཝཱེ་ལ་ནི་གུས་ཤིང་འཇིགས་པར༌གྱིས། །ངན་པའི་ལས་དང་རིང་དུ་བྲལ་གྱུར༌ཅིག།
PRO 3:8 དེས་ནི་ཁྱོད་ཀྱི་ལུས་པོ་བདེ་བ༌དང༌། །ཁྱོད་ཀྱི་རུས་ཟུངས་གསོ་བར་འགྱུར་བ༌འོ།།
PRO 3:9 ཁྱོད་ཀྱིས་རང་གི་རྒྱུ་ནོར༌དང༌། །ལོ་ཏོག་ཀུན་གྱི་ཐོག་ཕུད༌ཀྱིས། །ཡ་ཝཱེ་ལ་ནི་བསྙེན་བཀུར༌གྱིས།།
PRO 3:10 དེ་ནས་ཁྱོད་ཀྱི་བང་མཛོད་བལྟམ་ངེས་ཤིང་། །རྒུན་ཆང་གསར་པས་འཚིར་གཞོང་གང་བར༌འགྱུར།།
PRO 3:11 ངའི་བུ་ཡ་ཝཱེའི་འཆུན་འདོམས་ཁྱད་མ་གསོད། །ཁོང་གི་བཀའ་བཀྱོན་ལ་ཡང་སུན་མི༌རུང༌།།
PRO 3:12 དེ་ནི་གང་གི་ཕྱིར་དུ་ཡིན་ཞེ༌ན། །ཕ་ཡིས་རང་གི་གཅེས་པའི་བུ་ལ༌ནི། །གཤེ་གཤེ་གཏོང་བ་ནང་བཞིན་ཡ་ཝཱེས༌ཀྱང༌། །གཅེས་པ་རྣམས་ལ་བཀའ་བཀྱོན་གནང་ཕྱིར༌རོ།།
PRO 3:13 ཤེས་རབ་རྙེད་པའི་སྐྱེས་བུ༌དང༌། །བློ་གྲོས་ཐོབ་མཁན་བདེ་ཞིང༌སྐྱིད།།
PRO 3:14 དེ་ནི་ཅིའི་ཕྱིར་ཡིན་ཞེ༌ན། །ཤེས་རབ་ལས་ཐོབ་ཁེ་སྤོགས༌ནི། །དངུལ་གྱི་ཁེ་སྤོགས་ལས་ཀྱང༌མཆོག །ཁོ་མོ་ ལས་ཐོབ་ཡོང་འབབ༌ནི། །གསེར་གྱི་ཡོང་འབབ་ལས་ཀྱང༌འཕགས།།
PRO 3:15 པད་མ་ར་ག་ལས་ཀྱང་ཁོ་མོ་རིན་ཐང༌ཆེ། །ཁྱོད་ཀྱིས་གང་འདོད་ཐམས་ཅད་དེ་དང་མཚུངས་ཟླ༌བྲལ།།
PRO 3:16 ཁོ་མོའི་ཕྱག་གཡས་སྐུ་ཚེ་རིང་བ༌དང༌། ཁོ་མོའི་ཕྱག་གཡོན་རྒྱུ་དང་བཀུར་སྟི༌མངའ།།
PRO 3:17 ཁོ་མོའི་གཤེགས་ལམ་རྣམས་ནི་དགའ་བདེའི༌ལམ། །ཁོ་མོའི་ཕེབས་ལམ་ཐམས་ཅད་ཞི་བདེ༌ཡིན།།
PRO 3:18 ཁོ་མོ་དམ་པོར་འཛིན་པ་རྣམས་ལ༌ནི། །ཁོ་མོ་སྲོག་གི་ལྗོན་ཤིང་ཡིན་པ༌དང༌། །ཁོ་མོ་དམ་པོར་འཆིང་བ་ཐམས་ཅད༌བདེ།།
PRO 3:19 ཡ་ཝཱེས་ཤེས་རབ་ཀྱིས་ནི་ས་གཞིའི་རྨང་བཏིངས་ཤིང་། །མཁྱེན་རབ་ཀྱིས་ནི་ནམ་མཁའ་བརྟན་པོར་མཛད་པ༌ལགས།།
PRO 3:20 ཁོང་གི་མཁྱེན་པས་རྒྱ་མཚོའི་གཏིང་འོག༌ཕྲལ། །ནམ་མཁའ་ལས་ཀྱང་བདུད་རྩི་འབབ་པ༌ཡིན།།
PRO 3:21 ངའི་བུ་ཁྱོད་ཀྱིས་ཤེས་རབ་དངོས་མ༌དང༌། །ཤན་འབྱེད་བློ་ནི་ནན་གྱིས་བསྲུངས་ནས༌ནི། །དེ་དག་རང་གི་མཐོང་རྒྱར་འབྲལ་མི༌བྱ།།
PRO 3:22 དེ་ནས་དེ་དག་ཁྱོད་ཀྱི་ཚེ་སྲོག༌དང༌། །མགུལ་གྱི་རྒྱན་དུ་ཡང་ནི་འགྱུར་ངེས༌ཤིང༌།།
PRO 3:23 ཁྱོད་རང་ལམ་དུ་བདེ་བར་འགྲོ་བ༌དང༌། །གོམ་པ་ཡང་ནི་འཁྱོར་བར་མི་འགྱུར༌རོ།།
PRO 3:24 ཁྱོད་རང་སྙེ་བའི་དུས་སུ་འཇིགས་མི༌འགྱུར། །མལ་དུ་ཉལ་དུས་བདེ་བའི་གཉིད་དུ༌ཡུར།།
PRO 3:25 གློ་བུར་བྱུང་བའི་འཇིགས་པར་མ་སྐྲག༌ཅིག །མི་ངན་རྩ་མེད་གཏོང་དུས་མ་དངངས༌ཤིག།
PRO 3:26 ཡ་ཝཱེ་ཁོང་ཉིད་ཁྱོད་ཀྱི་བརྟེན་ས༌ཡིན། །ཁྱོད་ཀྱི་རྐང་པ་རྙི་རྒྱར་མི་ཚུད༌ཆེད། །ཁོང་གིས་བསྲུང་བར་འགྱུར་བའི་ཕྱིར་དུ༌ཡིན།།
PRO 3:27 ཁྱོད་ཀྱི་ལག་པའི་ནང་དུ་དྲིན་བྱེད༌པའི། །དབང་ཡོད་རིང་ལ་གཡོལ་ཐབས་མི་བྱེད༌པར། །རོགས་རམ་མཁོ་བ་རྣམས་ལ་དྲིན་གཟོས༌ཤིག།
PRO 3:28 ཅི་སྟེ་ཁྱོད་ཀྱི་ལག་ཏུ་ཡོད་དུས༌སུ། །རང་གི་ཁྱིམ་མཚེས་ལ་ནི་ད་སོང༌ཞིག །སང་ཉིན་ཤོག་དང་ངས་ཁྱོད་སྦྱིན་མ༌ཟེར།།
PRO 3:29 ཁྱིམ་མཚེས་ཁྱོད་རྩར་བདེ་བར་སྡོད་པའི༌ཚེ། །ཇུས་ངན་བཏབ་ནས་དེ་ལ་འཚེ་མི༌རུང༌།།
PRO 3:30 ཁྱོད་ལ་གནོད་པ་བསྐྱལ་བ་མིན་ན༌ནི། །སུ་ཞིག་ལ་ཡང་དོན་མེད་འཁྲུག་མི༌བྱ།།
PRO 3:31 གདུག་རྩུབ་ཅན་ལ་ཕྲག་དོག་མ་བསྐྱེད༌ཅིག །དེ་ཡི་ལམ་ནི་གང་ཡང་འདེམས་མི༌རུང༌།།
PRO 3:32 དེ་ནི་ལོག་ལམ་ཕྱིན་པ༌ལ། །ཡ་ཝཱེ་ཐུགས་ནས་ཞེན་ལོག༌ཅིང༌། །གཞུང་རྒྱུད་དྲང་བའི་མི་རྣམས༌ལ། །ཁོང་གིས་སྙིང་ནས་བརྩེ་ཕྱིར༌རོ།།
PRO 3:33 མི་ངན་ཁྱིམ་ལ་ཡ་ཝཱེའི་དམོད་པ༌ཐེབས། །དྲང་པོའི་ཁྱིམ་ལ་ཁོང་གིས་བྱིན་རླབས༌གནང༌།།
PRO 3:34 འཕྱ་མཁན་རྣམས་ལ་ཁོང་གིས་འཕྱ་བར༌མཛད། །འོན་ཀྱང་སྙེམས་ཆུང་མི་ལ་ཐུགས་རྗེས༌གཟིགས།།
PRO 3:35 ཤེས་རབ་ཅན་ལ་བཀུར་སྟི་མངའ་འགྱུར༌ཡང༌། །གླེན་པ་རྣམས་ནི་ངོ་ཚར་ལྷུང་བར༌འགྱུར།།
PRO 4:1 ཀྱེ་ཀྱེ་བུ་རྣམས་ཕ་ཡི་བསླབ་བྱར༌ཉོན། །གོ་བ་རྟོགས་པར་གཟབ་གཟབ་བྱས་ནས༌བརྩོན།།
PRO 4:2 བདག་གིས་ཁྱོད་ཚོར་སློབ་སྟོན་བཟང་པོ༌བྱེད། །དེའི་ཕྱིར་ང་ཡི་བསླབ་བྱ་འདོར་མི༌བྱ།།
PRO 4:3 ང་ནི་རང་གི་ཕ་ཡི་དྲུང་དུ་བུ་ཆུང༌དང༌། །མ་ཡི་མདུན་དུ་གཅེས་ཕྲུག་གཅིག་པུ་ཡིན་དུས༌སུ།།
PRO 4:4 ཕ་ཡིས་ང་ལ་བསླབ་བྱ་འདི་སྐད༌གནང༌། །ཁྱོད་ཀྱིས་སེམས་ནས་ང་ཡི་ཚིག་རྣམས༌རྩིས། །ང་ཡི་བཀའ་རྒྱ་སྲུངས་དང་གསོན་པར༌འགྱུར།།
PRO 4:5 ཤེས་རབ་དང་ནི་གོ་རྟོགས་ལེན་པ༌དང༌། །ང་ཡི་ཚིག་རྣམས་བརྗེད་པར་མི་བྱ༌ཞིང༌། །དེ་ལས་ལམ་ཡན་དུ་ཡང་འཁོར་མི༌བྱ།།
PRO 4:6 ཤེས་རབ་མ་སྤང་ཁོ་མོས་ཁྱོད་ལ༌གཟིགས། །ཁོ་མོར་གཅེས་ན་ཁོ་མོས་ཁྱོད་རང༌བསྲུང༌།།
PRO 4:7 ཤེས་རབ་གཙོ་བོ་ཡིན་པས་ཤེས་རབ༌ལོངས། །རང་ལ་ཡོད་པ་ཀུན་གྱིས་གོ་རྟོགས༌འཚོལ།།
PRO 4:8 ཤེས་རབ་མཐོན་པོར་བསྒྲེངས་ན་ནི། །ཁོ་མོས༌ཁྱོད་རང་མཐོ་སར་འཇོག །ཁྱོད་ཀྱིས་ཤེས་རབ་པང་དུ་ལོངས། །ཁོ་མོས་ཁྱོད་ལ་བཀུར་སྟི་སྦྱིན།།
PRO 4:9 ཁོ་མོས་ཁྱོད་ཀྱི་མགོ་ལ་ནི། །ཐུགས་རྗེའི་གཙུག་རྒྱན༌བསྐོན་བྱེད་ཅིང་། །ཟིལ་གྱི་ཅོད་པན་ཁྱོད་ལ་གནང་།།
PRO 4:10 བདག་གི་བུ་ཡིས་ངའི་གཏམ་ལ། །མཉན་ནས་དང་དུ་ལོངས་ཤིག༌དང༌། །ཁྱོད་ནི་ཚེ་ཐག་རིང་པོར་གནས།།
PRO 4:11 ང་ཡིས་ཁྱོད་རང་ཤེས་རབ་ལམ་དུ༌དྲངས། །དྲང་པོའི་ལམ་དུ་སྐྱོད་པར་ལམ་སྟོན༌བྱས།།
PRO 4:12 ཁྱོད་རང་ལམ་ལ་བགྲོད་དུས༌སུ། །རྐང་པ་བཀག་རྒྱར་མི་ཐོགས༌ཤིང༌། །རྒྱུག་དུས་ས་ལ་འགྱེལ་མི༌འགྱུར།།
PRO 4:13 གདམས་ངག་དམ་པོར་བསྲུངས་ནས་ལྷོད་མི༌རུང༌། །ཁོ་མོ་ཚེ་སྲོག་ཡིན་པས་ནན་གྱིས༌སྲུངས།།
PRO 4:14 ངན་རུལ་ཅན་གྱི་ལམ་དུ་མི་ཞུགས༌ཤིང༌། །ངན་པའི་ལམ་དུ་འགྲོ་བར་མི་བྱ༌འོ།།
PRO 4:15 དེ་ལ་གཡོལ་ཞིང་དེའི་ནང་མ་འགྲོ༌ཞིག །ཁ་ཕྱིར་འཁོར་ནས་དེ་ལས་ཕར་སོང༌ཞིག།
PRO 4:16 ཅིའི་ཕྱིར་ཞེ་ན་དེ་རྣམས༌ཀྱིས། །ལས་ངན་མ་བྱས་གཉིད་མི༌ཐུབ། །སུ་ཞིག་བསྒྱེལ་བར་མ་བྱས༌ན། །དེ་རྣམས་གཉིད་ཀྱང་མི་ཁུག༌གོ།
PRO 4:17 དེ་ཚོའི་བཟའ་རྒྱུ་ངན་པའི་བག་ལེབ༌ཡིན། །དེ་ཚོའི་བཏུང་བ་གདུག་རྩུབ་རྒུན་ཆང༌ཡིན།།
PRO 4:18 དྲང་པོའི་བགྲོད་ལམ་སྐྱ་མདའ་ཤར་བ༌འདྲ། །ཉིན་གུང་བར་དུ་ཇེ་གསལ་འགྲོ་བ༌ཡིན།།
PRO 4:19 ངན་པའི་ལམ་ནི་སྨག་རུམ་དང་མཚུངས༌ཤིང༌། །རང་ཉིད་འགྱེལ་བའི་རྒྱུ་ཡང་རྟོགས་པ༌མིན།།
PRO 4:20 བདག་གི་བུ་ཡིས་བདག་གི་ཚིག་ལ༌སོམས། །ང་ཡི་གཏམ་ལ་རྣ་བ་གཏད་ནས༌ཉོན།།
PRO 4:21 དེ་རྣམས་རང་གི་མིག་དང་འབྲལ་མ༌འཇུག །གཟབ་ནན་བགྱིས་ནས་རང་གི་སེམས་ལ༌ཟུངས།།
PRO 4:22 འདི་དག་ཐོབ་པར་ཚེ་སྲོག་ཐོབ་པ༌དང༌། །ཁོ་ཚོའི་ལུས་ཁམས་བདེ་བར་འགྱུར་ཕྱིར༌རོ།།
PRO 4:23 བསྲུང་བྱ་ཀུན་ལས་རང་སེམས་ལྷག་པར་སྲུངས། །རྒྱུ་མཚན་དེ་ནི་སྲོག༌གི་འབྱུང་གནས་ཡིན།།
PRO 4:24 ལོག་པར་སྨྲ་བའི་ཁ་ནི་འདོར་བ༌དང༌། །སླུ་བྲིད་གཏམ་གྱི་མཆུ་སྒྲོས་རིང་དུ༌སྤོངས།།
PRO 4:25 ཁྱོད་ཀྱི་མིག་གིས་མདུན་ལ༌ལྟོས། །མིག་གིས་དྲང་མོར་བལྟ་བར༌གྱིས།།
PRO 4:26 རང་གི་རྐང་པའི་གོམ་སྟབས༌ལ། །གཟབ་གཟབ་གྱིས་དང་རང་གི༌ལམ། །ཐམས་ཅད་བརྟན་པོར་འགྱུར་བ༌འོ།།
PRO 4:27 གཡས་སམ་གཡོན་དུ་མི་གཡོ༌བར། །རང་གི་རྐང་པ་ངན་ལས༌སྲུངས།།
PRO 5:1 ངའི་བུ་བདག་གི་ཤེས་རབ༌ལ། །གཟབ་གཟབ་བྱས་ནས་མཉན་པ༌དང༌། །ང་ཡི་ཤེས་བྱར་རྣ་བ༌གཏོད།།
PRO 5:2 དེ་ནས་ཁྱོད་ཀྱིས་ལེགས་ཉེས་འབྱེད་པ༌ཡི། །རྣམ་འགྱུར་འཛིན་ཞིང་རང་གི་མཆུ་སྒྲོས༌ཀྱིས། །ཅི་ལྕོགས་ཀྱིས་ནི་ཤེས་བྱ་བསྲུང་བར༌བྱ།།
PRO 5:3 བྱི་མོའི་མཆུ་ལས་སྦྲང་རྩི༌ཐིགས། །ཁོ་མོའི་ཁ་ནི་སྣུམ་ལས༌འཇམ།།
PRO 5:4 མཐར་མཇུག་མཁན་པ་ལས་ཀྱང༌ཁ། །རལ་གྲི་ཁ་གཉིས་ལས་ཀྱང༌རྣོ།།
PRO 5:5 ཁོ་མོའི་རྐང་པ་འཆི་བའི་ཕྱོགས་སུ༌སྤོ། །ཁོ་མོའི་གོམ་སྟབས་གཤིན་པོའི་ཡུལ་དུ༌བསྒྱུར།།
PRO 5:6 ཁོ་མོས་ཚེ་སྲོག་ལམ་ནི་སྣང་མེད༌བསྐྱུར། །ཁོ་མོའི་བགྲོད་ལམ་ཀྱག་ཀྱོག་ངེས་མེད༌ཡིན། །འོན་ཀྱང་དེ་ནི་རང་གིས་མི༌རྟོགས་སོ།།
PRO 5:7 ཀྱེ་ཀྱེ་བདག་གི་བུ་རྣམས་བདག་ལ༌ཉོན། །བདག་གི་ཁ་ཡི་གཏམ་ལ་མ་གཡོལ༌ཞིག།
PRO 5:8 ཁྱོད་ཀྱི་ལམ་ནི་ཁོ་མོར་རིང་དུ༌གྱེས། །ཁོ་མོའི་ཁྱིམ་གྱི་སྒོ་དང་བཅར་མི༌རུང༌།།
PRO 5:9 ཁྱོད་ཀྱི་སྟོབས་ཤུགས་གཞན་པར་མི་སྟེར༌ལ། །ལོ་ཟླ་གཏུམ་དྲག་ཅན་ལ་མི་སྤྲོད༌ཅིང༌།།
PRO 5:10 ཁྱོད་ཀྱི་རྒྱུ་ནོར་གཞན་ལ་མི་དབང༌ཞིང་། །ངལ་བའི་འབྲས་བུ་གཞན་ལ་མི་འཐོབ༌ཕྱིར།།
PRO 5:11 རྗེས་སུ་ཁྱོད་ཀྱི་ཚེ་ཟད༌ནས། །ཤ་དང་ལུས་པོ་རྒས་དུས༌སུ། །འཁུན་སྒྲ་འབྱིན་ཞིང་འདི་ལྟར༌དུ།།
PRO 5:12 ང་ནི་ཅིའི་ཕྱིར་འཆུན་འདོམས་ལ་སྡང༌ཞིང༌། །ང་ཡི་སེམས་ཀྱིས་བཀའ་བཀྱོན་ཅི་ལ༌དོར།།
PRO 5:13 རང་གི་སློབ་དཔོན་སྐད་ལ་མ་མཉན༌ཞིང༌། །བཤེས་གཉེན་ཚོར་ཡང་རྣ་བ་བཏུད་པ༌མིན།།
PRO 5:14 མི་ཚོགས་ཁྲོམ་པའི་དཀྱིལ་དབུས༌སུ། །བདག་ནི་རྒུད་པའི་མཐའ་རུ༌སླེབས། །དེ་བཞིན་ཁྱོད་ཀྱིས་སྨྲ་བར༌འགྱུར།།
PRO 5:15 ཁྱོད་ཀྱིས་རང་གི་རྫིང་བུའི་ཆུ་འཐུང༌ཞིང༌། །རང་གི་ཆུ་མགོའི་བཞུར་ཆུ་འཐུང་བར༌གྱིས།།
PRO 5:16 ཁྱོད་ཀྱི་ཆུ་མགོ་རྣམས་ནི་ཕྱི་རོལ༌དང༌། །གཙང་པོ་རྣམས་ནི་སྲང་དུ་བཞུར་རུང༌ངམ།།
PRO 5:17 དེ་རྣམས་ཁྱོད་རང་ཁོ་ནར་དབང་བ༌ཡིན། །ཕྱི་མི་དང་ནི་མཉམ་དུ་སྤྱོད་མི༌རུང༌།།
PRO 5:18 ཁྱོད་ཀྱི་ཆུ་མགོར་བྱིན་རླབས་འཐོབ་པ༌དང༌། །རང་གི་གཞོན་དུས་ཆུང་མར་དགའ་བར༌གྱིས།།
PRO 5:19 ཁོ་མོ་གཅེས་སུ་འོས་པའི་ཤྭ་མོ༌དང༌། །དགའ་བར་རུང་བའི་གནའ་མོ་ཇི་བཞིན༌ཡིན། །ཁོ་མོའི་ནུ་མས་དུས་རྒྱུན་ཁྱོད་ཚིམ༌ཞིང༌། །བརྩེ་བས་རྟག་ཏུ་ཁྱོད་ཡིད་འཕྲོག་པར༌ཤོག།
PRO 5:20 ངའི་བུ་ཁྱོད་རང་བྱི་མོར་གདུང་བ༌དང༌། །ཕྱི་མོའི་པང་དུ་འབྱར་བ༌ཅི་ཡིན་ནམ།།
PRO 5:21 ཅི་ལ་ཞེ་ན་མི་ཡི་བགྲོད་ལམ༌ཀུན། །ཡ་ཝཱེའི་སྤྱན་སྔར་ལྷང་ངེར་གསལ་བ༌དང༌། །ལམ་བུ་ཀུན་ལ་ཁོང་གིས་ཞིབ་ཏུ༌གཟིགས།།
PRO 5:22 སྡིག་སྤྱོད་ཅན་ནི་རང་གི་ནག་ཉེས༌འཛིན། །དེ་ནི་རང་གི་སྡིག་པའི་ཐག་པས༌འཆིང༌།།
PRO 5:23 འཆུན་འདོམས་མེད་པས་འཆི་བར༌འགྱུར། །རང་གི་བླུན་རྨོངས་ཆེན་པོ༌ཡིས། །ལོག་པའི་ལམ་དུ་འཁྲིད་པར༌འགྱུར།།
PRO 6:1 གལ་སྲིད་བདག་གི་བུ་ཁྱོད་རང་ཉིད༌ཀྱི། །མཛའ་བོའི་འགན་ལེན་བྱས་ཤིང་ཕྱི་མིའི༌ཚབ། །ལག་པ་འཇུས་ནས་གཏའ་མར་བཞག་པ༌དང༌།།
PRO 6:2 རང་ཁའི་གཏམ་གྱི་རྙིར་བཙུད༌ཅིང༌། །རང་གི་ཚིག་གིས་བཟུང་གྱུར༌ན།།
PRO 6:3 ངའི་བུ་རང་གི་མཆེད་གྲོགས༌ཀྱི། །ལག་ཏུ་ཚུད་པར་གྱུར་པས༌ན། །འདི་ལྟར་གྱིས་ལ་རང་ཉིད༌སྐྱོབས། །མྱུར་དུ་སོང་ལ་ཁེངས་སྐྱུང༌གིས། །གྲོགས་དེར་ཞུ་བ་ཕུལ་ཞིག༌ཀྱེ།།
PRO 6:4 རང་གི་མིག་ཟུང་གཉིད༌པ་འམ། །མིག་ལྕིབས་གཉིད་ལ་ཡུར་མ༌འཇུག།
PRO 6:5 དགོ་བ་རྔོན་པའི་ལག་དང་འདབ་ཆགས༌ནི། །བྱ་པའི་ལག་ནས་སྐྱོབ་བཞིན་རང་ཉིད༌སྐྱོབས།།
PRO 6:6 ལེ་ལོ་ཅན་ཁྱོད་གྲོག་མའི་རྩར་སོང༌ལ། །དེ་ཡི་སྤྱོད་པ་རྣམས་ལ་ཞིབ་བལྟ༌གྱིས། །ཁྱོད་རང་ཤེས་རབ་དང་ནི་ལྡན་པར༌བྱོས།།
PRO 6:7 གྲོག་མར་ལྡིང་དཔོན་དང་ནི་འགོ་དཔོན༌དང༌། །དབང་དུ་སྒྱུར་མཁན་བཅས་ནི་མེད༌ན་ཡང་།།
PRO 6:8 དབྱར་དུས་ཁ་ཟས་གྲ་སྒྲིག་བྱེད་པ༌དང༌། །སྟོན་ཀར་བཟའ་བཅའ་བསྡུ་གསོག་རྒྱག་པ༌ཡིན།།
PRO 6:9 ཀྱེ་ཀྱེ་ལེ་ལོ་ཅན་ཁྱོད༌ནི། །ག་ཚོད་བར་དུ་གཉིད་ལ༌ཡུར། །ནམ་ཞིག་གཉིད་ལས་སད་པར༌འགྱུར།།
PRO 6:10 ད་དུང་ཡུད་ཙམ་གཉིད་ཅིག་དང༌། །སྐད་ཅིག་ཙམ་ལ་གཉིད་དུ༌ཡུར། །ལག་པ་འཁུམས་ལ་ཨེན་ཙམ༌སྡོད།།
PRO 6:11 དེ་ནས་ཁྱོད་ཀྱི་དབུལ་ཕོངས༌ནི། །ཆོམ་པོ་བཞིན་དུ་བསླེབ་ཡོང༌ཞིང༌། །དགོས་འདོད་མཚོན་ཐོགས་ཚུལ་དུ༌བསླེབ།།
PRO 6:12 ཁྲེལ་མེད་དང་ནི་མི་ངན༌གྱིས། །ཕྱོགས་བཞིར་ངག་འཁྱལ་སྤེལ་བ༌དང༌།།
PRO 6:13 དེ་ཡི་མིག་གིས་ལྐོག་བརྡ༌གཏོང༌། །རྐང་པས་བསམ་ཚུལ་བརྗོད་པ༌དང༌། །མཛུབ་མོས་བཀོད་འདོམས་བྱེད་པ༌ཡིན།།
PRO 6:14 སེམས་སུ་གཡོ་སྒྱུ་བཅངས་པ༌དང༌། །བྱ་བ་ངན་པ་ཇུས་འགོད༌བྱེད། །རྟག་ཏུ་རྩོད་པའི་ས་བོན༌འདེབས།།
PRO 6:15 དེའི་ཕྱིར་ཆག་སྒོ་དེ་འཕྲལ༌འབྱུང༌། །ཁོ་རང་གློ་བུར་མེད་པར༌འགྱུར། །སྐྱོབ་ཐབས་མེད་པར་དེ་བཞིན༌འབྱུང༌།།
PRO 6:16 ཡ་ཝཱེ་སྡང་བའི་དོན་དྲུག༌དང༌། །དེའི་ཁར་ཐུགས་ནས་ཞེན་ལོག༌པའི། །དོན་ནི་བསྡོམས་པས་བདུན་ཡོད༌དེ།།
PRO 6:17 ཁེངས་དྲེགས་ཅན་གྱི་མིག་ཟུང༌དང༌། །རྫུན་གཏམ་སྨྲ་བའི་ལྕེ་དང༌ནི། །ཉེས་མེད་བསད་པའི་ལག་པ༌དང༌།།
PRO 6:18 དོན་ངན་ཇུས་འགོད་བྱེད་པའི༌སེམས། །ངན་པར་བྲེལ་བའི་རྐང་པ༌དང༌།།
PRO 6:19 རྫུན་གཏམ་སྨྲ་བའི་རྫུན་དཔང༌དང༌། །སྤུན་གྱི་ཁྲོད་དུ་རྩོད་པ༌ཡི། །ས་བོན་འདེབས་མཁན་བཅས་ཡིན༌ནོ།།
PRO 6:20 ངའི་བུ་ཕ་ཡི་བཀའ་ལ༌ཉོན། །མ་ཡི་བསླབ་བྱ་འདོར་མི༌རུང༌།།
PRO 6:21 དེ་རྣམས་རྟག་ཏུ་སེམས་ལ༌ཆོངས། །མཇིང་ལ་འདོགས་པར་གྱིས་ཤིག༌དང༌།།
PRO 6:22 དེ་ཡིས་ཁྱོད་རང་འགྲོ་དུས་ལམ་སྟོན༌ཞིང༌། །གཉིད་ལ་ཡུར་དུས་སྲུང་སྐྱོབ་བྱེད་པ༌དང༌། །གཉིད་ལས་སད་དུས་ཁྱོད་ལ་གཏམ་གླེང༌བྱེད།།
PRO 6:23 དེ་ཡི་རྒྱུ་མཚན་གང་ལ་ཡིན་ཞེ༌ན། །བཀའ་ནི་སྒྲོན་མེ་བསླབ་བྱ་འོད་ཡིན༌ཞིང༌། །གཅུན་པའི་ཚིག་ནི་སྲོག་གི་ལམ་ཡིན༌ལ།།
PRO 6:24 དེ་ཡིས་ཁྱོད་རང་བུད་མེད་ངན་པ༌དང༌། །བྱི་མོ་ངག་འཇམ་ལྕེ་ལས་བསྲུང་བར༌འགྱུར།།
PRO 6:25 ཁྱོད་ཀྱི་སེམས་ནི་ཁོ་མོའི་སྒེག་ཉམས་ལ་མ༌ཆགས། །ཁོ་མོའི་མིག་ལྕིབས་ལ་ཡང་ཁྱོད་རང་འཛིན་མ༌འཇུག།
PRO 6:26 རྒྱུ་མཚན་སྨད་འཚོང་མ་ཡི་རིན་གོང་ནི། །བག་ལེབ་རྡོག་རྡོག་གཅིག་ཙམ་ཡིན་མོད་ཀྱང་། །གཞན་གྱི་ཆུང་མས་རིན་ཆེན་ཚེ་སྲོག་རྔོན།།
PRO 6:27 གལ་སྲིད་མི་ཡིས་པང་ལ་མེ་བཟུང༌ན། །གྱོན་གོས་མེ་ཡིས་མི་སྲེག་དཔེ་མི༌སྲིད།།
PRO 6:28 སུ་ཞིག་སོལ་བའི་མེའི་སྟེང་འགྲོ་བ༌ཡི། །རྐང་པ་མེ་ཡིས་མི་འཚིག་དཔེ་མི༌སྲིད།།
PRO 6:29 གཞན་གྱི་ཆུང་མར་འགྲོགས་མཁན་དེ་བཞིན༌ཡིན། །སུ་དེའི་ཉེ་བར་བཏུད་ན་ཉེས་ཆད༌འཕོག།
PRO 6:30 ལྟོགས་སྐོམ་མྱངས་ནས་ཁོག་པ་འགྲང་ཕྱིར༌དུ། །རྐུ་བར་བྱེད་པའི་རྐུན་མར་སྨད་པ༌མིན།།
PRO 6:31 འོན་ཀྱང་ཁོ་རང་བཟུང་གྱུར༌ན། །སྐྱིན་ཚབ་ལྡབ་བདུན་འཇལ་དགོས༌ཞིང༌། །ཁྱིམ་གྱི་རྒྱུ་ནོར་ཀུན་སྤྲོད༌དགོས།།
PRO 6:32 སྐྱེས་མར་ལོག་གཡེམ་བྱེད་པ༌དེ། །དངོས་གནས་བློ་གྲོས་མེད་པ༌ཡིན། །སུ་ཡིས་དེ་འདྲ་བྱེད་པ༌ཡིས། །རང་སྲོག་རང་གིས་བརླག་པ༌ཡིན།།
PRO 6:33 དེ་ལ་རྨས་སྐྱོན་དང་ནི་དམའ་འབེབས༌འཕོག །དེ་ཡི་ངོ་ཚ་ནམ་ཡང་ཡལ་མི༌འགྱུར།།
PRO 6:34 དེ་ཡི་རྒྱུ་མཚན་གང་ལ་ཡིན་ཞེ༌ན། །ཕྲག་དོག་གིས་ནི་སྐྱེས་པའི་ཁོང་ཁྲོ༌སློང༌། །དགྲ་ཤ་ལེན་དུས་སྙིང་རྗེ་བསྐྱེད་མི༌འགྱུར།།
PRO 6:35 སྐྱིན་ཚབ་གང་ཡང་དེ་ཡིས་ལེན་པ༌མིན། །ལེགས་སྐྱེས་ཅི་འདྲ་མང་པོ་ཕུལ་ན༌ཡང༌། །དེ་ཡིས་ཅིས་ཀྱང་བསྐྱུར་བར་མི་བྱ༌འོ།།
PRO 7:1 ངའི་བུ་ང་ཡི་ཚིག་ནི་བརྩི་བ༌དང༌། །ང་ཡི་བཀའ་རྒྱ་ཡིད་ལ་འཛིན་པར༌གྱིས།།
PRO 7:2 ང་ཡི་བཀའ་རྒྱ་སྲུངས་དང་གསོན་པར༌འགྱུར། །ང་ཡི་བསླབ་བྱ་མིག་འབྲས་བཞིན༌དུ་སྲུངས།།
PRO 7:3 དེ་དག་མཛུབ་མོ་རྣམས་ལ་དཀྲི་བ༌དང༌། །སྙིང་གི་བྱང་བུ་སྟེང་དུ་བརྐོ་བར༌གྱིས།།
PRO 7:4 ཤེས་རབ་ལ་ནི་ལྕམ་སྲིང་ཡིན་ཞེས༌བརྗོད། །བློ་གྲོས་ལ་ནི་ཉེ་འབྲེལ་ཞེས་ཐོགས༌ཤིག།
PRO 7:5 དེ་ལྟར་བྱས་ན་ཁྱོད་རང་བྱི་མོ༌དང༌། །གཡོ་ཟོལ་བསླུ་བྲིད་ཚིག་རྣམས་སྨྲ་བ༌ཡི། །སྨད་འཚོང་མ་ལས་སྲུང་ཞིང་ཐར་བར༌མཛད།།
PRO 7:6 བདག་གིས་རང་གི་ཁྱིམ་གྱི་སྒེའུ་ཁུང༌གི། །དྲ་མིག་དག་ལས་ཕྱི་རུ་བལྟས་པ༌དང༌།།
PRO 7:7 གླེན་པ་རྣམས་དང་ན་གཞོན༌ཁྲོད། །ཞིབ་ཏུ་མིག་གིས་བལྟས་ཙ༌ན། །གཞོན་ནུ་བླུན་པོ་ཞིག་མཐོང༌ཞིང༌།།
PRO 7:8 ཁོ་རང་སྲང་ལམ་བརྒྱུད་ནས༌ནི། །འཆལ་མོའི་སྡོད་སར་བཏུད་པ༌དང༌། །ཁོ་མོའི་ཁྱིམ་གྱི་ཕྱོགས་སུ༌སྐྱོད།།
PRO 7:9 དེའི་དུས་ཉི་མ་ནུབ་ནས་ས་རུབ༌ཅིང༌། །མཚན་མོར་མུན་ནག་འཐིབས་པའི་དུས་སུ༌ཡིན།།
PRO 7:10 ལྟོས་ཤིག་བུད་མེད་ཁོ་རང་བསུ་རུ༌ཐོན། །སྨད་འཚོང་མ་ཡི་གྱོན་ཆས་ལུས་ལ༌གྱོན། །དེ་ཡི་སེམས་སུ་གཡོ་སྒྱུས་ཁེངས་པ༌འོ།།
PRO 7:11 ཁོ་མོ་སྐད་གདངས་མཐོ་ལ་ཚོད་མི༌ཟིན། །རང་གི་ཁྱིམ་དུ་ཁོ་མོ་སྡོད་མི༌ཚུགས།།
PRO 7:12 ཁོ་མོ་སྐབས་འགར་སྲང་ལམ་དག་རྒྱུ༌ཞིང༌། །ལན་རེར་ཐང་ཆེན་རྣམས་སུ་ཡོད་པ༌དང༌། །གྲུ་ཟུར་གང་རུང་ལ་ཡང་འཇབ་ནས༌འདུག།
PRO 7:13 ཁོ་མོས་གཞོན་ནུ་དམ་པོར་བཟུང་ནས་མཆུ་སྒྲོས་སྦྱར། །ངོ་ཚ་མེད་པར་ཁོ་ལ་འདི་ལྟར་སྨྲས་པ༌སྟེ།།
PRO 7:14 ཞི་བདེའི་མཆོད་པ་ཕུལ་བ་བདག་གི་ཁྱིམ་དུ་ཡོད། །དེ་རིང་རང་གི་དམ་བཅའ་བཞིན་དུ་བསྒྲུབས་པ༌ཡིན།།
PRO 7:15 དེའི་ཕྱིར་བདག་ནི་ཁྱོད་རང་བསུ་རུ༌འོངས། །ཞིབ་ཏུ་བཙལ་ཞིང་མཐར་མཇུག་ཁྱོད་རང༌རྙེད།།
PRO 7:16 བདག་གིས་ཨེ་ཅིབ་སྐུད་པས་བཏགས་པ༌ཡི། །རས་ཁྲའི་མལ་སྟེན་གྱིས་ནི་མལ་ཁྲི༌བཀབ།།
PRO 7:17 བྱུགས་རྫས་གུ་གུལ་དང་ནི་ཨ་ག་རུ། །ཤིང་ཚ་བཅས་ཀྱིས་མལ་ཁྲིར་བདུགས་པ༌ཡིན།།
PRO 7:18 ཤོག་དང་ཞོགས་པའི་བར་དུ་འུ་གཉིས་ཀྱིས། །ལུས་འབྲེལ་སྐྱིད་ལ་ཚིམ་པར་རོལ་བར༌བྱ། །བྱམས་པ་དང་བཅས་དགའ་བདེའི་དཔལ་ལ༌རོལ།།
PRO 7:19 གང་ལ་ཞེ་ན་ང་ཡི་ཁྱོ་ག༌ནི། །ས་ཐག་རིང་པོར་སོང་བས་ཁྱིམ་དུ༌མེད།།
PRO 7:20 ཁོས་ནི་དངུལ་གྱི་ཁུག་མ་ཁུར་ནས༌སོང༌། །ཉ་གང་དུས་སུ་ད་གཟོད་ཕྱིར་ལོག༌འོང༌།།
PRO 7:21 འཆལ་མོས་ཁ་ཡག་ཚིག་གིས་ཁོ་རང༌བསླུས། །ངག་འཇམ་མཆུ་ཡིས་ལོག་པའི་ལམ་དུ༌བརྫངས།།
PRO 7:22 དེ་ནི་གླང་གོག་བཤན་པའི་དྲུང་དུ་འགྲོ༌བ་འམ། །བླུན་པོ་ལྕགས་སྒྲོག་དང་བཅས་ཉེས་ཆད་དང་ལེན༌དུ། །འགྲོ་བཞིན་གཞོན་ནུ་ཁོ་མོའི་རྗེས་སུ་ཤར་སེ༌འགྲོ།།
PRO 7:23 མདའ་མོས་དེ་ཡི་མཆིན་མ་བརྟོལ་བའི༌བར། །འདབ་ཆགས་རྙི་རྒྱའི་ནང་དུ་མཆོང་བ༌བཞིན། །རང་སྲོག་འཆོར་བར་འགྱུར་བ་ཚོར་མ༌ཡིན།།
PRO 7:24 དེ་བས་བུ་རྣམས་ཁྱོད་ཚོས་བདག་ལ༌ཉོན། །བདག་གི་ཁ་ཡི་གཏམ་ལ་མ་གཡེངས༌ཉོན།།
PRO 7:25 ཁྱོད་སེམས་འཆལ་མོའི་ལམ་དུ་ཕྱོགས་མི༌རུང༌། །ཁོ་མོའི་བགྲོད་ལམ་ལ་ཡང་ཞེ་མ༌ཆགས།།
PRO 7:26 ཁོ་མོས་མང་པོ་ས་ལ་བརྡབས་པ༌དང༌། །སྲོག་དང་ཕྲལ་བ་གྲངས་ལས་འདས་པས༌སོ།།
PRO 7:27 ཁོ་མོའི་ཁྱིམ་ནི་གཤིན་ཡུལ་འགྲོ་བའི༌ལམ། །འཆི་བའི་ནང་དུ་འདྲུད་པའི་ཁང་མིག༌ཡིན།།
PRO 8:1 ཤེས་རབ་ཀྱིས་ནི་འབོད་སྐད་མི་སྒྲོག༌གམ། །གོ་རྟོགས་ཀྱིས་ནི་སྐད་སྒྲ་མི་འདོན༌ནམ།།
PRO 8:2 ཁོ་མོ་ལམ་འགྲམ་གནས་ཀྱི་མཐོ་ས༌དང༌། །རྒྱ་ལམ་བཞི་མདོར་འགྲེང་ནས་སྡོད་པ༌དང༌།།
PRO 8:3 མཁར་སྒོའི་ཉེ་འགྲམ་དང་ནི་སྒོ་ཁ་དང་། །གྲོང་ཁྱེར་ནང་དུ་འཇུག་སའི་རྒྱལ་སྒོ་རུ། །སྐད་གསང་མཐོན་པོས་འབོད་སྒྲ་སྒྲོག་པ༌སྟེ།།
PRO 8:4 ཀྱེ་ཀྱེ་མི་རྣམས་བདག་གིས་ཁྱོད་རྣམས༌འབོད། །འཇིག་རྟེན་མི་རྣམས་ལ་ནི་སྐད་སྒྲ༌སྒྲོག།
PRO 8:5 ཀྱེ་ཀྱེ་བླུན་པོ་རྣམས་ཀྱིས་བློ་རིག༌སྦྱོངས། །གླེན་པ་དག་གིས་དོན་རྣམས་རྟོགས་པར༌གྱིས།།
PRO 8:6 ཁྱོད་ཚོས་ཉོན་ཅིག་གང་ལ་ཞེ་ན༌ནི། །ང་ཡིས་ཡིད་དུ་འོང་བའི་དོན་རྣམས༌གླེང༌། །མཆུ་སྒྲོས་བར་ནས་དྲང་པོའི་གཏམ་བརྗོད༌དོ།།
PRO 8:7 བདག་གི་ཁ་ནས་བདེན་པའི་ཚིག་སྨྲ༌ཞིང༌། །ང་ཡི་མཆུ་སྒྲོས་ངན་པར་ཞེན་ཁ༌ལོག།
PRO 8:8 ང་ཡི་གཏམ་ནི་ཐམས་ཅད་དྲང་བདེན༌ཡིན། །གཡོ་སྒྱུ་དང་ནི་ཕྱིན་ཅི་ལོག་པ༌མེད།།
PRO 8:9 གོ་བ་ཅན་ལ་དེ་རྣམས་དྲང་པོ༌ཡིན། །ཤེས་ཡོན་ཅན་ལ་ཐམས་ཅད་འཁྲུལ་མེད༌ཡིན།།
PRO 8:10 ཁྱོད་ཚོས་དངུལ་ལས་ང་ཡི་གདམས་ངག༌ལོངས། །བཙོ་མའི་གསེར་ལས་ཀྱང་ནི་ཤེས་ཡོན༌འདེམས།།
PRO 8:11 གང་ལ་ཞེ་ན་པདྨ་ར་ག༌ལས། །ཤེས་རབ་ཤིན་ཏུ་ལེགས་པོ་ཡིན་པ༌དང༌། །ཁྱོད་ཀྱི་འདོད་མོས་བསྐྱེད་པ་གང་ཡིན༌ཡང༌། །ཁོ་མོའི་དོ་ཟླར་འོས་པ་ཅི་ཡང༌མེད།།
PRO 8:12 ཤེས་རབ་བདག་ནི་བློ་གྲོས་མཉམ་དུ༌གནས། །བདག་ལ་ཤེས་ཡོན་དང་ནི་ཐབས་ཇུས༌ལྡན།།
PRO 8:13 ཡ་ཝཱེ་ཁོང་ལ་གུས་ཤིང་འཇིགས་པ༌ནི། །ངན་པ་ལ་ནི་སྡང་བ་དེ་ཡིན༌ཞིང༌། །བདག་ནི་ང་རྒྱལ་ཁེངས་དྲེགས་སྤྱོད་ངན༌དང༌། །སྨྲ་སྒོ་ཕྱིན་ཅི་ལོག་པ་བཅས་ལ༌སྡང༌།།
PRO 8:14 བདག་ལ་གདམས་ངག་དང་ནི་ཐབས་མཁས༌མངའ། །བློ་གྲོས་དང་ནི་མཐུ་སྟོབས་ལྡན་པ༌ཡིན།།
PRO 8:15 ང་ལ་བརྟེན་ནས་རྒྱལ་པོས་སྲིད་སྐྱོང༌ཞིང༌། །དབང་སྒྱུར་མཁན་གྱིས་དྲང་གཞག་གཏན་ལ༌འབེབས།།
PRO 8:16 འགོ་དཔོན་སྐུ་དྲག་ཁྲིམས་དཔོན་དྲང་གཞག༌ཅན། །ཀུན་པོས་བདག་ལ་བརྟེན་ནས་རྒྱལ་སྲིད༌སྐྱོང༌།།
PRO 8:17 ང་རང་གཅེས་སུ་འཛིན་པར་ངས་ཀྱང༌གཅེས། །ང་རང་བཙལ་ན་ང་ནི་རྙེད་པར༌འགྱུར།།
PRO 8:18 རྒྱུ་ནོར་དང་ནི་བཀུར་སྟི་བདག་ལ༌དབང༌། །གཏན་གྱི་འབྱོར་བ་དྲང་བདེན་བདག་གི༌ཡིན།།
PRO 8:19 བདག་གི་འབྲས་བུ་གསེར་ལས་ལྷག་པ༌དང༌། །གསེར་སྦྱང་བཙོ་མ་ལས་ཀྱང་མཆོག་ཏུ༌གྱུར། །བདག་གི་ཐོབ་འབབ་དངུལ་རྐྱང་ལས་ཀྱང༌ལྷག།
PRO 8:20 བདག་ནི་དྲང་བདེན་ལམ་དུ༌སྐྱོད། །དྲང་གཞག་ལམ་དུ་བསྐྱོད་པ༌ཡིན།།
PRO 8:21 ང་རང་གཅེས་སུ་འཛིན་པར་རྒྱུ་ནོར༌གནང༌། །ཁོ་ཚོའི་གཏེར་མཛོད་གང་བར་བྱེད་པ༌འོ།།
PRO 8:22 ཡ་ཝཱེས་འགོད་པའི་འཕྲིན་ལས་རྩོམ་དུས༌དང༌། །གདོད་མར་ཅི་ཡང་མ་བཀོད་སྔོན་རོལ༌དུ། །ཁོང་གིས་ང་རང་གནས་པར་མཛད་པ༌འོ།།
PRO 8:23 གནའ་བོའི་དུས་དང་གདོད་མ་ཉིད་ཀྱི༌དུས། །ས་གཞི་མ་ཆགས་སྔོན་ལ་ང་རང༌བསྐོས།།
PRO 8:24 གཏིང་ཟབ་རྒྱ་མཚོ་དང་ནི་ཆུ་མོད༌པོའི། །ཆུ་མིག་མ་བྱུང་སྔོན་ལ་ང་རང༌སྐྱེས།།
PRO 8:25 རི་བོ་རྣམས་ནི་མ་ཚུགས་སྔ་རོལ༌དང༌། །དེའུ་འབུར་མ་བྱུང་གོང་ལ་བདག་ནི༌སྐྱེས།།
PRO 8:26 དེའི་དུས་ཡ་ཝཱེས་ས་ཡི་གོང་བོ༌དང༌། །ཐང་རྒོད་དང་ནི་ས་གཞིའི་ས་རྡུལ༌རྣམས། །ད་དུང་བཀོད་པར་མ་མཛད་སྔོན་རོལ༌ཡིན།།
PRO 8:27 ཁོང་གིས་ནམ་མཁའི་དབྱིངས་རྣམས་འགོད་པ༌དང༌། །གཏིང་ཟབ་མཐའ་མཚམས་རྣམས་སུ་དཀྱིལ་འཁོར༌ནི། །མཛད་པའི་དུས་སུ་ང་རང་དེ་རུ༌མཆིས།།
PRO 8:28 ཁོང་གིས་སྟེང་གི་དབྱིངས་རྣམས་བརྟན་པོ༌དང༌། །གཏིང་ཟབ་ཆུ་མིག་རྣམས་ནི་སྲ་བརྟན༌མཛད།།
PRO 8:29 ཆུ་རྣམས་ཁོང་གི་བཀའ་ལས་མི་བརྒལ༌ཕྱིར། །རྒྱ་མཚོ་ཆེན་པོའི་མཐའ་མཚམས་གཏན་ལ༌ཕབ། །ས་གཞིའི་རྨང་གཞི་རྣམས་ཀྱང་ཁོང་གིས༌བཏིངས།།
PRO 8:30 དེའི་དུས་ཁོང་དྲུང་ང་རང་ལག་ཤེས༌ཡིན། །ཉིན་རེ་བཞིན་དུ་དགའ་སྤྲོས་ཁེངས་པ༌དང༌། །ཁོང་གི་ཞལ་དྲུང་དུས་རྒྱུན་དགའ་མགུ༌རང༌།།
PRO 8:31 ཁོང་གི་ས་གཞི་སྟེང་དུ་དགའ་མགུ༌རང༌། །འཇིག་རྟེན་མི་རྣམས་ལྷན་ཅིག་སྐྱིད་ལ༌རོལ།།
PRO 8:32 ཀྱེ་ཀྱེ་བུ་རྣམས་ད་ལྟ་བདག་ལ༌ཉོན། །བདག་གི་ལམ་རྣམས་སྲུང་བར་བྱིན་རླབས༌འཐོབ།།
PRO 8:33 བསླབ་བྱར་མཉན་ཏེ་ཤེས་རབ་ལྡན་པར༌གྱིས། །དེ་ནི་ནམ་ཡང་སྤང་བར་མི་བྱ༌འོ།།
PRO 8:34 བདག་ལ་ཉན་ཞིང་ཉིན་རྒྱུན་ངའི་སྒོ༌ཁར། །གཟབ་གཟབ་བྱས་ནས་རེ་ལྟོས་བཅང་མཁན༌དང༌། །སྒོ་འགྲམ་སྒུག་པ་རྣམས་ལ་བྱིན་རླབས༌འཐོབ།།
PRO 8:35 གང་ལ་ཞེ་ན་ང་རང་རྙེད་པ༌ཡིས། །ཚེ་སྲོག་རྙེད་ཅིང་ཡ་ཝཱེའི་ཐུགས་རྗེ༌ཐོབ།།
PRO 8:36 བདག་དང་འགལ་ན་རང་ལ་འཚེ་བ༌ཡིན། །ང་ལ་སྡང་བ་འཆི་བར་དགའ་བ༌འོ།།
PRO 9:1 ཤེས་རབ་ཀྱིས་ནི་རང་གི་ཁང་པ༌བཟོས། །ཁོ་མོས་ ཀ་བ་བདུན་པོ་བཞོགས་པ༌འོ།།
PRO 9:2 ཁོ་མོས་སྒོ་ཕྱུགས་བཤས་ནས་རྒུན་ཆང༌སྦྱར། །དེ་ནས་གསོལ་ལྕོག་ཡང་ནི་བཤམས་པ༌འོ།།
PRO 9:3 ཞལ་ཏ་མ་རྣམས་ཕྱི་རུ་མངགས་པ༌དང༌། །ཁོ་མོས་མཁར་གྱི་མཐོ་སར་འབོད་སྒྲ༌སྒྲོག།
PRO 9:4 བླུན་རྨོངས་ཡིན་པ་ཀུན་ནི་ཚུར་ཤོག༌ཟེར། །ཤེས་དམན་རྣམས་ལ་ཡང་ནི་འདི་ལྟར༌དུ།།
PRO 9:5 ཁྱོད་རྣམས་ཤོག་ལ་ང་ཡི་བག་ལེབ༌ཟོ། །ང་ཡིས་སྦྱར་བའི་རྒུན་ཆང་འཐུང་བར༌གྱིས།།
PRO 9:6 བླུན་རྨོངས་རྣམས་ཀྱིས་རྨོངས་པའི་སེམས་དོར༌ཅིག །དེ་ནས་ཁྱོད་རྣམས་འཚོ་བར་འགྱུར་བ༌དང༌། །གོ་བ་ལྡན་པའི་ལམ་དུ་བསྐྱོད་པར༌གྱིས།།
PRO 9:7 འཕྱ་སྨོད་མཁན་ལ་ཡོ་བསྲང་བྱེད་པ༌ཡིས། །རང་གིས་རང་ལ་དམའ་འབེབས་གཏོང་བ༌ཡིན། །མི་ངན་ལ་ནི་བཀའ་བཀྱོན་གནང་བ༌ཡིས། །རང་གིས་རང་ཉིད་ངོ་ཚར་སྦྱོར་བ༌ཡིན།།
PRO 9:8 འཕྱ་བར་དགའ་བ་ཁྱོད་ལ་མི་སྡང༌ཕྱིར། །དེ་ལ་བཀའ་བཀྱོན་གནང་བར་མི༌བྱ་འོ། །ཤེས་རབ་ཅན་ལ་བཀྱོན་དང་དེ་ཁྱོད༌དགའ།།
PRO 9:9 ཤེས་རབ་ཅན་ལ་བསླབ་བྱ་གནང་ན༌ནི། །ཁོ་རང་དེ་ལས་མཁས་པར་འགྱུར་བ༌དང༌། །དྲང་བདེན་མི་ལ་སློབ་སྟོན་བྱས་ན༌ནི། །དེ་ཡི་ཤེས་ཡོན་གོང་དུ་འཕེལ་བར༌འགྱུར།།
PRO 9:10 ཡ་ཝཱེ་ཁོང་ལ་གུས་ཤིང་འཇིགས་པ༌ནི། །ཤེས་རབ་ཉིད་ཀྱི་ཐོག་མ་ཡིན་པ༌དང༌། །དམ་པ་ཉིད་དེ་རྟོགས་པ་བློ་གྲོས༌ཡིན།།
PRO 9:11 གང་ལ་ཞེ་ན་ང་རང་བརྒྱུད་ནས༌ནི། །ཁྱོད་ཀྱི་ཉི་མ་མང་དུ་འཕེལ་ངེས༌ཤིང༌། །ཁྱོད་རང་ཚེ་ཐག་རིང་བར་འགྱུར་བ༌འོ།།
PRO 9:12 གལ་སྲིད་ཁྱོད་ལ་ཤེས་རབ་ལྡན་ན༌ནི། །དེ་ཡིས་ཁྱོད་ལ་ཕན་ཡོན་བསྐྲུན་པ༌དང༌། །གལ་སྲིད་ཁྱོད་ཀྱིས་གཞན་ལ་འཕྱ་བྱེད༌ན། །དེ་ཡི་མཇུག་འབྲས་རང་གི་སྟེང་ལ༌འབབ།།
PRO 9:13 བུད་མེད་གླེན་པ་འདུ་འཛི་ཆེ་བ༌དང༌། །ཁོ་མོ་བླུན་ཞིང་ཅི་ཡང་མི་རྟོགས༌སོ།།
PRO 9:14 ཁོ་མོ་རང་གི་ཁྱིམ་གྱི་སྒོ་ཁ༌དང༌། །མཁར་གྱི་མཐོ་སའི་འདུག་སྟེགས་ལ་བསྡད༌ནས།།
PRO 9:15 ལམ་འགྲོ་བ་སྟེ་དྲང་མོར་སྐྱོད་མཁན༌ལ། །འབོད་སྐད་བསྒྲགས་ནས་འདི་ལྟར་སྨྲ་བ༌སྟེ།།
PRO 9:16 བླུན་རྨོངས་ཡིན་པ་ཀུན་ནི་ཚུར་ཤོག༌ཟེར། །ཤེས་དམན་རྣམས་ལ་ཡང་ནི་འདི་ལྟར༌དུ།།
PRO 9:17 བརྐུས་པའི་ཆུ་ནི་མངར་མོ་ཡིན་པ༌དང༌། །ལྐོག་ཏུ་ཟོས་པའི་ཟས་ནི་ཞིམ་ཞེས་སྨྲ།།
PRO 9:18 ཁོ་མོའི་གམ་དུ་འདས་པོ་རྣམས་ཡོད༌ཅིང༌། །ཁོ་མོའི་མགྲོན་པོ་གཤིན་ཡུལ་མཐིལ་དུ༌གནས། །དེ་ནི་ཁོ་ཡིས་རྟོགས་པ་མ་ཡིན༌ནོ།།
PRO 10:1 སོ་ལོ་མོན་གྱི་ལེགས་བཤད་འདི་ལྟ༌སྟེ། །བུ་ལ་ཤེས་རབ་ལྡན་གྱུར༌ན། །རང་གི་ཕ་ནི་དགའ་བྱེད༌ཅིང༌། །བུ་ཞིག་གླེན་པ་ཡིན་ན༌ནི། །རང་གི་མ་ཡང་སྡུག་ལ༌སྦྱོར།།
PRO 10:2 མི་གཙང་ནོར་ལ་ཕན་ཐོགས་ཅི་ཡང༌མེད། །དྲང་བདེན་ཁོ་ནས་འཆི་བ་ཉིད་ལས༌སྐྱོབ།།
PRO 10:3 ཡ་ཝཱེས་དྲང་བདེན་མི་ནི་བཀྲེས་མི༌འཇུག །ངན་པའི་གང་ཞིག་འདོད་པ་དགག་པར༌བྱ།།
PRO 10:4 སྒྱིད་ལུག་གིས་ནི་ཕོང་བར་བྱེད་པ༌དང༌། །ལས་ལ་བརྩོན་པར་འབྱོར་ཕྱུག་ལྡན་འགྱུར༌རོ།།
PRO 10:5 དབྱར་དུས་གསོག་པ་ཤེས་རབ་ཅན་ཡིན༌ལ། །སྟོན་དུས་གཉིད་མཁན་ཞབས་འདྲེན་བུ་ཡིན༌ནོ།།
PRO 10:6 བྱིན་རླབས་དྲང་བདེན་མི་ཡི་ཅོད་པན༌ཡིན། །ངན་པའི་སྨྲ་སྒོར་གདུག་སྤྱོད་སྦས་པ༌འོ།།
PRO 10:7 དྲང་བདེན་མི་ཡི་མིང་ལ་བསྟོད་བསྔགས༌འབྱུང༌། །འོན་ཀྱང་ངན་པའི་མིང་ནི་རུལ་བར༌འགྱུར།།
PRO 10:8 སེམས་སུ་ཤེས་རབ་ལྡན་པའི་མི་དེ༌ཡིས། །བཀའ་རྒྱ་རྣམས་ནི་དང་དུ་ལེན་པར༌འགྱུར། །ངག་ཀྱལ་སྨྲ་མཁན་བླུན་པོས་རང་ཉིད༌བརླག།
PRO 10:9 ཀུན་སྤྱོད་ཕུལ་བྱུང་ཅན་ནི་བརྟན་པོར༌བགྲོད། །ལོག་ལམ་འགྲོ་མཁན་མངོན་པར་འགྱུར་བ༌ཡིན།།
PRO 10:10 མིག་བརྡ་གཏོང་བ་སྡུག་བསྔལ་འབྱུང་བའི༌རྒྱུ། །ངག་ཀྱལ་སྨྲ་མཁན་བླུན་པོས་རང་ཉིད༌འཕུང་།།
PRO 10:11 དྲང་པོའི་སྨྲ་སྒོ་སྲོག་གི་ཆུ་མིག༌ཡིན། །ངན་པའི་སྨྲ་སྒོར་གདུག་སྤྱོད་སྦས་པ༌འོ།།
PRO 10:12 སྡང་སེམས་ཀྱིས་ནི་རྩོད་གཞི་སློང་བར༌བྱ། །བྱམས་པས་ཉེས་སྐྱོན་མཐའ་དག་འགེབས་པ༌འོ།།
PRO 10:13 བློ་རིག་ཅན་གྱི་མཆུ་ལ་ཤེས་རབ༌མངའ། །གོ་བ་མེད་པའི་རྒྱབ་ལ་ཁྲིམས་དབྱུག༌ཡོད།།
PRO 10:14 ཤེས་རབ་ཅན་གྱིས་ཤེས་ཡོན་གསོག་པ༌དང༌། །བླུན་པོའི་ཁ་ཡིས་ཉམ་ཆག་བཟོ་བ༌ཡིན།།
PRO 10:15 ཕྱུག་པོའི་རྒྱུ་ནོར་དེ་ཡི་མཁར་རྫོང༌ཡིན། །དབུལ་པོའི་དབུལ་ཕོངས་ཁོ་རང་འཇིག་པའི༌རྒྱུ།།
PRO 10:16 དྲང་བདེན་མི་ཡི་འཐོབ་བྱ་ཚེ་སྲོག༌ཡིན། །འོན་ཀྱང་ངན་པར་ཉེས་ཆད་འཕོག་པ༌ཡིན།།
PRO 10:17 བསླབ་བྱ་ལེན་མཁན་སྲོག་གི་ལམ་དུ༌སྐྱོད། །བཀའ་བཀྱོན་འདོར་མཁན་འཁྲུལ་བའི་ལམ་དུ༌ཞུགས།།
PRO 10:18 སྡང་སེམས་སྦེད་མཁན་མཆུ་ལས་རྫུན་གཏམ༌འབྱུང༌། །དཀྲོག་གཏམ་རྒྱ་ཁྱབ་སྒྲོག་མཁན་གླེན་པ༌ཡིན།།
PRO 10:19 སྐད་ཆ་མང་ན་ཉེས་སྐྱོན་འབྱུང་བར༌ངེས། །རང་ཁ་གཅུན་པ་དེ་ནི་མཁས་པ༌ཡིན།།
PRO 10:20 དྲང་བདེན་མི་ཡི་ལྕེ་ནི་དངུལ་རྐྱང༌འདྲ། །ངན་པའི་སེམས་ལ་རིན་ཐང་ཅི་ཡང༌མེད།།
PRO 10:21 དྲང་པོའི་མཆུ་ཡིས་མང་པོ་གསོ་སྐྱོང༌བྱེད། །བླུན་པོ་གོ་བ་མེད་པས་འཆི་བ༌ཡིན།།
PRO 10:22 ཡ་ཝཱེ་ཁོང་གིས་གནང་བའི་བྱིན་རླབས༌ཀྱིས། །ཕྱུག་པར་བྱེད་ཅིང་སྡུག་བསྔལ་སྣོན་པ༌མིན།།
PRO 10:23 གླེན་པས་ལོག་པར་སྤྱོད་པ་རྩེད་མོར༌འཛིན། །བློ་རིག་ཅན་གྱིས་ཤེས་རབ་སྐྱིད་དུ༌བསམ།།
PRO 10:24 ངན་པ་གང་ལ་འཇིགས་པ་རང་སྟེང༌འབབ། །དྲང་བདེན་མི་ཡི་རེ་འདུན་བསྐང་བར༌འགྱུར།།
PRO 10:25 རླུང་དམར་གཡུགས་རྗེས་མི་ངན་རྩ་མེད༌འགྲོ། །དྲང་བདེན་མི་ནི་རྟག་ཏུ་བརྟན་པོར༌ཚུགས།།
PRO 10:26 སོ་ལ་སྐྱུར་ཁུ་མིག་ལ་དུ་བ༌བཞིན། །ལེ་ལོ་ཅན་གྱིས་ཁོ་རང་མངགས་མཁན༌ནི། །སྡུག་ལ་སྦྱར་བ་དེ་དང་དེ་བཞིན༌ཡིན།།
PRO 10:27 ཡ་ཝཱེར་གུས་ཤིང་འཇིགས་པས་ཚེ་རིང༌ཞིང༌། །མི་ངན་ཚེ་ཐག་ཐུང་བར་བྱེད་པ༌འོ།།
PRO 10:28 དྲང་པོའི་རེ་སྨོན་གྱིས་ནི་དགའ་བར༌བྱེད། །ངན་པའི་རེ་བ་མཇུག་མཐར་མེད་པར༌འགྱུར།།
PRO 10:29 ཡ་ཝཱེའི་གཤེགས་ལམ་དྲང་པོའི་བཙན་རྫོང༌དང༌། །ངན་པ་བྱེད་མཁན་འཕུང་བའི་རྒྱུ་ཡིན༌ནོ།།
PRO 10:30 དྲང་བདེན་མི་ནི་ནམ་ཡང་གཡོ་བ༌མེད། །འོན་ཀྱང་མི་ངན་ཡུལ་འདིར་སྡོད་མི༌ཚུགས།།
PRO 10:31 དྲང་པོའི་ཞལ་ལས་ཤེས་རབ་འབྱུང་བ༌དང༌། །ཕྱིན་ཅི་ལོག་པའི་ལྕེ་ནི་གཅོད་པར༌འགྱུར།།
PRO 10:32 དྲང་པོའི་མཆུ་ཡིས་འོས་འཚམ་གང་ཡིན༌ཤེས། །ངན་པའི་ཁ་ནས་ལོག་གཏམ་སྨྲ་བ༌འོ།།
PRO 11:1 འཁྱོག་པའི་སྲང་ལ་ཡ་ཝཱེ་ཞེན་ལོག༌ཅིང༌། །རྒྱ་རྡོ་དྲང་པོར་ཁོང་ཉིད་ཐུགས་དགྱེས༌སོ།།
PRO 11:2 ང་རྒྱལ་སླེབ་དུས་ངོ་ཚ་མཉམ་དུ༌འོང༌། །ཁེངས་སྐྱུང་མི་ལ་ཤེས་རབ་ལྡན་པ༌ཡིན།།
PRO 11:3 དྲང་པོའི་དྲང་བ་ཉིད་ཀྱིས་རང་ལ་ལམ་སྟོན༌ཞིང༌། །ལོག་སྤྱོད་ཅན་གྱི་གཡོ་སྒྱུས་རང་ཉིད་བརླག་པར༌བྱེད།།
PRO 11:4 དཀོན་མཆོག་ཐུགས་ཁྲོའི་ཉིན་མོར་ནོར་གྱིས་ཕན་མི༌ཐོགས། །དྲང་བདེན་ཁོ་ནས་འཆི་བ་ཉིད་ལས་སྐྱོབ་པར༌བྱ།།
PRO 11:5 སྐྱོན་དང་བྲལ་བའི་མི་ཡི་དྲང་བདེན་གྱིས། །རང་གི་བགྲོད་ལམ་བདེ་ཞིང་དྲང་བར་བྱེད། །མི་ངན་རང་གི་ངན་པས་བསྒྱེལ་བ༌ཡིན།།
PRO 11:6 དྲང་པོའི་དྲང་བདེན་གྱིས་ནི་རང་ཉིད༌སྐྱོབ། །གདུག་སྤྱོད་ཅན་རྣམས་འདོད་པ་ངན་པས༌ཟིན།།
PRO 11:7 ངན་པ་འཆི་བའི་དུས་སུ་རེ་བ༌ཡལ། །ནུས་པ་ཅན་གྱི་འདུན་པའང་མེད་པར༌འགྱུར།།
PRO 11:8 དྲང་པོ་བསྐྱབས་ནས་སྡུག་བསྔལ་ལས་ཐར༌ཞིང༌། །ངན་པ་དེ་ཡི་ཚབ་ཏུ་ལྟུང་བར༌འགྱུར།།
PRO 11:9 དད་མེད་རྣམས་ཀྱིས་སྨྲ་སྒོས་ཁྱིམ་མཚེས༌བརླག །དྲང་པོ་ཤེས་ཡོན་དབང་གིས་དེ་ལས༌ཐར།།
PRO 11:10 དྲང་པོ་འཕེལ་དུས་གྲོང་ཁྱེར་ཡོངས་སུ༌སྤྲོ། །ངན་པ་འཆི་དུས་ཀུན་གྱིས་དགའ་འབོད༌བྱེད།།
PRO 11:11 དྲང་པོའི་བྱིན་རླབས་ཀྱིས་ནི་གྲོང་ཁྱེར༌འདེགས། །ངན་པའི་སྨྲ་སྒོས་གྲོང་ཁྱེར་བརླག་པ༌ཡིན།།
PRO 11:12 གོ་བ་མེད་པས་ཁྱིམ་མཚེས་ལ་སྨད༌ཅིང༌། །བློ་རིག་ཅན་གྱིས་ཅི་ཡང་སྨྲ་བ༌མིན།།
PRO 11:13 ངག་ཀྱལ་ཅན་གྱིས་གསང་གཏམ་ཕྱི་ལ༌འཆོར། །གཞུང་རྒྱུད་དྲང་པོས་དོན་རྣམས་གསང་བར༌བྱེད།།
PRO 11:14 ལམ་སྟོན་མེད་པའི་མི་རིགས་ལྟུང་བར༌འགྱུར། །གྲོས་མི་མང་ན་རྒྱལ་ཁ་ལོན་ངེས༌ཡིན།།
PRO 11:15 རྒྱུས་མེད་འགན་ལེན་བྱེད་པར་གོད་ཆེ༌ཡང༌། །ཁག་འཁུར་ལེན་པར་སྡང་མཁན་བདེ་འཇགས༌ཡིན།།
PRO 11:16 བུད་མེད་བྱམས་སེམས་ཅན་ལ་གུས་པ༌འཐོབ། །སྐྱེས་པ་གདུག་རྩུབ་ཅན་གྱིས་རྒྱུ་ནོར༌རྙེད།།
PRO 11:17 སྙིང་རྗེ་ཅན་གྱིས་རང་ལ་ཕན་འདོགས༌ཤིང༌། །གདུག་སྤྱོད་ཅན་གྱིས་རང་ལ་འཚེ་བ༌ཡིན།།
PRO 11:18 ངན་པས་རག་པའི་གླ་ཆ་རྫུན་མ༌ཡིན། །དྲང་བདེན་བྱེད་པར་ཏན་ཏན་རྔན་པ་འཐོབ།།
PRO 11:19 ཡུན་རིང་དྲང་བདེན་སྐྱོང་བར་ཚེ་སྲོག༌འཐོབ། །ངན་པ་སྙེག་མཁན་འཆི་བའི་གནས་སུ༌ལྷུང༌།།
PRO 11:20 གཡོ་སྒྱུའི་སེམས་ལ་ཡ་ཝཱེ་ཞེན་ལོག༌ཅིང༌། །སྤྱོད་པ་ཕུལ་བྱུང་ཅན་ལ་ཁོང་ནི༌དགྱེས།།
PRO 11:21 ངན་པར་ཉེས་ཆད་འཕོག་པ་གདོན་མི༌ཟ། །འོན་ཀྱང་དྲང་པོའི་བུ་རྒྱུད་ཐར་ངེས༌ཡིན།།
PRO 11:22 བུད་མེད་བྱད་བཟང་ཚུལ་དང་མི་མཐུན༌ན། །ཕག་གི་སྣ་བར་གསེར་གྱི་སྣ་གཅུ༌བཞིན།།
PRO 11:23 དྲང་པོའི་རེ་འདོད་ཐམས་ཅད་ཡིད་དུ༌འོང༌། །ངན་པའི་རེ་བས་ཁོང་ཁྲོ་སློང་བ༌འོ།།
PRO 11:24 གཏོང་ཕོད་ཅན་ལ་རྒྱུ་ནོར་འཕེལ་བ༌དང༌། །སེར་སྣ་ཚད་མེད་བྱེད་མཁན་དབུལ་བར༌འགྱུར།།
PRO 11:25 གཏོང་ཕོད་ཆེ་བའི་མི་ལ་འབྱོར་བ༌རྒྱས། །གཞན་ལ་ཕན་པར་བྱས་ན་རང་ལ༌ཕན།།
PRO 11:26 འབྲུ་རིགས་མཛོད་ལ་གསོག་པར་མི་ཡིས༌དམོད། །འབྲུ་རིགས་འཚོང་མཁན་མགོ་ལ་བྱིན་རླབས༌འཐོབ།།
PRO 11:27 འབད་པས་བཟང་པོ་བསྙེག་པར་བཟང་འཐོབ༌ཅིང༌། །ངན་པ་སྙེག་མཁན་ལ་ནི་ངན་པ༌འཁོར།།
PRO 11:28 རང་གི་ནོར་ལ་བརྟེན་མཁན་ཉམས་པར༌འགྱུར། །དྲང་པོ་ལོ་འདབ་སྔོན་པོ་བཞིན་དུ༌རྒྱས།།
PRO 11:29 རང་ཁྱིམ་སྡུག་ལ་སྦྱོར་བར་རླུང་ཙམ༌འཐོབ། །བླུན་པོ་མཁས་པའི་གཡོག་པོར་འགྱུར་བ༌འོ།།
PRO 11:30 དྲང་པོའི་འབྲས་བུ་སྲོག་གི་ལྗོན་ཤིང༌ཡིན། །ཤེས་རབ་ཅན་གྱིས་མི་སེམས་འགུག་པར༌ནུས།།
PRO 11:31 དྲང་པོར་འཇིག་རྟེན་འདི་རུ་ལན་འཕོག༌ན། །ངན་པ་དང་ནི་སྡིག་ཅན་ལྟ་ཅི༌སྨོས།།
PRO 12:1 ཁ་ཏར་དགའ་བ་ཤེས་ཡོན་ལ་དགའ༌ཞིང༌། །བཀའ་བཀྱོན་ལ་ནི་སྡང་བ་གླེན་པ༌ཡིན།།
PRO 12:2 བཟང་པོར་ཡ་ཝཱེའི་ཐུགས་རྗེ་འཐོབ་པ༌དང༌། །ཇུས་ངན་གཤོམ་པར་ཡ་ཝཱེས་ཉེས་ཆད༌གཅོད།།
PRO 12:3 ངན་པའི་ཐབས་ཀྱིས་སུ་ཡང་ཚུགས་མི༌ཐུབ། །དྲང་པོའི་རྩ་བར་ནམ་ཡང་གཡོ་འགུལ༌མེད།།
PRO 12:4 བུད་མེད་འཇོན་པོ་ཁྱོ་གའི་གཙུག་རྒྱན༌ཡིན། །ངོ་ཚར་སྦྱོར་མཁན་དེ་ཡི་རུས་མྱགས༌འདྲ།།
PRO 12:5 དྲང་པོའི་འཆར་བཀོད་དྲང་བདེན་ཡིན༌ན་ཡང༌། །ངན་པའི་ཐབས་ཇུས་གཡོ་སྒྱུའི་སྦྱོར་བ༌ཡིན།།
PRO 12:6 ངན་པའི་ཚིག་ནི་འཇབ་ནས་མི་གསོད༌ཀྱང༌། །དྲང་པོའི་སྨྲ་སྒོས་དེ་རྣམས་སྐྱོབ་པ༌ཡིན།།
PRO 12:7 མི་ངན་འགྱེལ་ན་རྩ་བ་ཉིད་ནས༌འཇིག །དྲང་པོའི་ཁྱིམ་གཞིས་བརྟན་པོར་གནས་པ༌འོ།།
PRO 12:8 ཤེས་རྒྱའི་དབང་གིས་མི་ལ་བསྟོད་བསྔགས༌འབྱུང༌། །བསམ་པ་གྱ་གྱུ་ཅན་ལ་སྨད་པར༌འགྱུར།།
PRO 12:9 རང་རློམ་བྱེད་ཀྱང་ཁ་ཟས་ཆད་པ༌ལས། །གཞན་གྱིས་སྨད་ཀྱང་གཡོག་པོ་ཡོད་མཁན༌ལེགས།།
PRO 12:10 དྲང་པོས་རང་གི་ཕྱུགས་ཀྱི་སྲོག་ལ༌གཅེས། །ངན་པས་སྙིང་རྗེ་བསྐྱེད་ཀྱང་གདུག་རྩུབ༌ཡིན།།
PRO 12:11 འབད་པས་སོ་ནམ་བྱེད་པར་ཟས་ཀྱིས༌མོད། །འཕྲུལ་སྣང་སྙེག་མཁན་དངོས་གནས་བླུན་རྨོངས༌ཡིན།།
PRO 12:12 སྡིག་སྤྱོད་ཅན་ནི་ངན་པའི་རྙི་རྒྱར༌ཆགས། །དྲང་པོའི་རྩ་བས་འབྲས་བུ་བསྐྱེད་པ༌ཡིན།།
PRO 12:13 མི་ངན་རང་གི་གཏམ་གྱི་རྙི་རུ༌འཚུད། །དྲང་པོ་དཀའ་སྡུག་ལས་ནི་ཐར་བར༌འགྱུར།།
PRO 12:14 མི་ཡིས་སྨྲ་སྒོའི་འབྲས་བུ་དེའི་རྐྱེན༌གྱིས། །རྫས་མཆོག་ལ་ནི་ཚིམ་པར་རོལ་བ༌དང༌། །མི་ཡིས་བྱས་པའི་ལས་ཀ་རང་སྟེང༌འབབ།།
PRO 12:15 བླུན་པོའི་མིག་ལ་རང་གི་སྤྱོད་པ༌དྲང༌། །ཤེས་རབ་ཅན་གྱིས་ཞལ་ཏར་ཉན་པ༌ཡིན།།
PRO 12:16 བླུན་པོའི་ཁོང་ཁྲོ་སྐད་ཅིག་ཉིད་ལ༌མངོན། །མཛངས་པས་ངོ་ཚ་གཟོད་པར་ནུས་པ༌ཡིན།།
PRO 12:17 དྲང་གཏམ་སྨྲ་བས་དྲང་བདེན་མངོན་པར༌བྱེད། །རྫུན་གྱི་དཔང་པོས་མགོ་སྐོར་གཏོང་བ༌འོ།།
PRO 12:18 གང་བྱུང་ཚིག་ནི་རལ་གྲིས་བསྣུན་འདྲ༌ཡིན། །མཁས་པའི་ལྗགས་ཀྱིས་མི་ནི་གསོ་བར༌མཛད།།
PRO 12:19 དྲང་གཏམ་སྨྲ་བའི་མཆུ་སྒྲོས་གཏན་དུ༌ཚུགས། །རྫུན་གྱི་ལྕེ་ནི་སྐད་ཅིག་ཉིད་ལ༌ཡལ།།
PRO 12:20 དོན་ངན་གཤོམ་པའི་སེམས་ལ་གཡོ་སྒྱུ༌བཅངས། །བར་འདུམ་པ་ཡི་སེམས་སུ་དགའ་མགུ༌རང༌།།
PRO 12:21 དྲང་པོའི་མགོ་ལ་བར་ཆད་མི་འབྱུང༌མོད། །འོན་ཀྱང་ངན་པས་དཀའ་སྡུག་ཚད་མེད༌མྱོང༌།།
PRO 12:22 རྫུན་གྱི་མཆུ་ལ་ཡ་ཝཱེ་ཞེན་ལོག༌ཅིང༌། །དྲང་པོར་སྤྱོད་པ་དག་ལ་ཁོང་ནི༌དགྱེས།།
PRO 12:23 མཛངས་པས་རང་གི་ཤེས་ཡོན་སྦ་བྱེད་ཀྱང༌། །གླེན་པའི་སེམས་ཀྱིས་གླེན་རྟགས་སྟོན་པ༌ཡིན།།
PRO 12:24 བརྩོན་འགྲུས་ཅན་གྱི་ལག་པས་སྲིད་སྐྱོང༌ཞིང༌། །ལེ་ལོ་ཅན་ནི་སྡུག་པོའི་ལས་ལ༌སྦྱོར།།
PRO 12:25 སེམས་པ་འཚབ་ན་མི་ནི་བག་འཁུམ༌ཞིང་། །གཏམ་སྙན་གྱིས་ནི་མི་དེ་སྤྲོ་བར༌བྱ།།
PRO 12:26 དྲང་པོས་ཁྱིམ་མཚེས་ལ་ནི་ལམ་སྟོན༌ཞིང༌། །ངན་པའི་ལམ་གྱིས་མི་རྣམས་ལོག་ལམ༌འཇུག།
PRO 12:27 ལེ་ལོས་རང་གི་རྔོན་ཤ་མེར་མི༌སྲེག །ཧུར་བརྩོན་ཅན་ལ་རིན་ཆེན་རྒྱུ་ནོར༌འཐོབ།།
PRO 12:28 དྲང་བདེན་ལམ་དུ་ཚེ་སྲོག་ཡོད་པ་དང༌། །ལམ་བུ་དེ་རུ་འཆི་བ་གཏན་ནས༌མེད།།
PRO 13:1 ཤེས་ལྡན་བུ་ཡིས་ཕ་ཡི་ཞལ་གདམས༌ཉན། །འཕྱ་སྨོད་མཁན་གྱིས་བཀའ་བཀྱོན་སྣང་མེད༌བསྐྱུར།།
PRO 13:2 མི་ཡིས་སྨྲ་སྒོའི་འབྲས་བུ་དེའི་རྐྱེན༌གྱིས། །རྫས་མཆོག་ལ་ནི་ཚིམ་པར་རོལ་བ༌དང༌། །གཡོ་སྒྱུ་ཅན་གྱི་འདོད་པ་གདུག་རྩུབ༌ཡིན།།
PRO 13:3 སྨྲ་སྒོ་སྲུང་མཁན་གྱིས་ནི་རང་སྲོག༌སྲུང༌། །གང་བྱུང་སྨྲ་བས་རང་ཉིད་བརླག་པར༌འགྱུར།།
PRO 13:4 ལེ་ལོ་ཅན་གྱིས་བརྔམས་ཀྱང་ཅང་མི༌འཐོབ། །ཧུར་བརྩོན་ཅན་ནི་ཡོངས་སུ་ཚིམ་པར༌འགྱུར།།
PRO 13:5 དྲང་བདེན་མི་ནི་རྫུན་ལ་སྡང་བ༌དང༌། །ངན་པའི་ལས་ཀྱིས་སུན་སྣང་ངོ་ཚར༌སྦྱོར།།
PRO 13:6 དྲང་བདེན་གྱིས་ནི་ཉེས་མེད་སྲུང་བ༌དང༌། །ངན་པས་སྡིག་ཅན་འགྱེལ་དུ་འཇུག་པ༌ཡིན།།
PRO 13:7 གཅིག་གིས་ཅི་ཡང་མེད་ཀྱང་ཕྱུག་པོ་ཡིན་ཁུལ༌བྱེད། །གཅིག་ནི་རབ་ཏུ་ཕྱུག་ཀྱང་དབུལ་པོར་བརྫུས་པ༌འོ།།
PRO 13:8 མི་ཡི་རྒྱུ་ནོར་སྲོག་གི་བླུ་རིན༌ཡིན། །དབུལ་པོས་འཇིགས་སྐུལ་ཚིག་ནི་ཐོས་པ༌མེད།།
PRO 13:9 དྲང་པོའི་འོད་ཟེར་གསལ་ལེར་འཕྲོ་བ༌དང༌། །ངན་པའི་སྒྲོན་མེ་ཞི་བར་འགྱུར་བ༌འོ།།
PRO 13:10 ང་རྒྱལ་གྱིས་ནི་རྩོད་གླེང་སློང་བ༌དང༌། །གྲོས་ལ་ཉན་པར་ཤེས་རབ་ལྡན་པ༌ཡིན།།
PRO 13:11 སྐད་ཅིག་ཉིད་ལ་འབྱོར་བའི་རྒྱུ་ནོར༌ཟད། །རིམ་བཞིན་བསགས་པ་མང་དུ་འཕེལ་བར༌འགྱུར།།
PRO 13:12 རེ་ལྟོས་འགྱངས་ན་མི་ཡི་སྙིང་ལ༌གཟན། །བསམ་དོན་འགྲུབ་པ་སྲོག་གི་ལྗོན་ཤིང༌བཞིན།།
PRO 13:13 སློབ་སྟོན་ཁྱད་དུ་གསོད་པས་རང་ཉིད༌སྟོང༌། །བཀའ་རྒྱར་གུས་ཤིང་འཇིགས་པར་རྔན་པ༌འཐོབ།།
PRO 13:14 མཁས་པའི་སློབ་སྟོན་སྲོག་གི་ཆུ་མིག༌ཡིན། །འཆི་བའི་རྙི་ལས་ཐར་བར་མཛད་པ༌འོ།།
PRO 13:15 གོ་རྟོགས་ལེགས་པོས་ཐུགས་རྗེ་འཐོབ་པར༌བྱ། །གཡོ་སྒྱུ་ཅན་གྱི་བགྲོད་ལམ་ཀྱག་ཀྱོག༌ཡིན།།
PRO 13:16 མཛངས་པ་ཀུན་གྱིས་མཁས་པར་སྤྱོད་པ༌དང༌། །གླེན་པས་རང་གི་གླེན་རྟགས་ཕྱི་རུ༌འཕུད།།
PRO 13:17 བང་ཆེན་ངན་པ་ཆག་སྒོའི་ནང་དུ༌ལྟུང༌། །སྐུ་ཚབ་བློ་དཀར་གྱིས་ནི་གསོ་བར༌མཛད།།
PRO 13:18 ཁ་ཏ་སྣང་མེད་བསྐྱུར་བ་དབུལ་ཞིང༌ནོངས། །བཀའ་བཀྱོན་གཙིགས་སུ་འཛིན་པར་བཀུར་སྟི༌འཐོབ།།
PRO 13:19 བསམ་དོན་འགྲུབ་ན་སེམས་པ་མངར་མོ༌ཡིན། །གླེན་པ་ངན་དང་འབྲལ་བར་ཞེ་ལོག༌གོ།
PRO 13:20 མཁས་པ་མཉམ་དུ་སྐྱོད་ན་མཁས་པར༌འགྱུར། །གླེན་པའི་འགྲོགས་ཡ་བྱས་ན་གྱོང་གུད༌ཐེབས།།
PRO 13:21 སྡིག་ཅན་རྗེས་སུ་ཆག་སྒོ་ར་མདར༌རྒྱུག །དྲང་བདེན་མི་ལ་རྔན་པ་ལེགས་པོ༌འཐོབ།།
PRO 13:22 བཟང་པོས་བུ་རྒྱུད་ལ་ནི་ནོར་སྐལ༌འཇོག །སྡིག་ཅན་རྒྱུ་ནོར་དྲང་པོའི་ཆེད་དུ༌བསགས།།
PRO 13:23 དབུལ་པོའི་ཞིང་སར་ཁ་ཟས་འབོར་ཆེན༌ཐོན། །དྲང་གཞག་མིན་པས་ཐམས་ཅད་བརླག་པ༌ཡིན།།
PRO 13:24 དབྱུག་པས་མི་རྡུང་བུ་ལ་སྡང་བ༌ཡིན། །བུ་ལ་གཅེས་ན་དེ་ནི་འབད་པས༌འཇུན།།
PRO 13:25 དྲང་པོས་ཡིད་སེམས་ཚིམ་པར་ཁ་ཟས༌སྤྱོད། །ངན་པའི་གྲོད་པ་སྟོང་བར་ལུས་པ༌འོ།།
PRO 14:1 མཛངས་མས་རང་གི་ཁྱིམ་གཞིས་འཛུགས་བྱེད༌ཅིང༌། །བླུན་མོས་དངོས་སུ་རང་ཁྱིམ་བཤིག་པར༌བྱེད།།
PRO 14:2 དྲང་པོར་འགྲོ་བ་ཡ་ཝཱེར་གུས་ཤིང༌འཇིགས། །ལོག་པར་སྤྱོད་པས་ཁོང་ཉིད་ཁྱད་དུ༌གསོད།།
PRO 14:3 བླུན་པོའི་ཁ་ནས་ང་རྒྱལ་ཡལ་ག༌ཐོན། །ཤེས་རབ་ཅན་གྱི་མཆུ་ཡིས་རང་ཉིད༌བསྲུང༌།།
PRO 14:4 བ་གླང་མེད་སར་ཁ་ར་གཙང༌ན་ཡང༌། །ལོ་ལེགས་གླང་གི་ཤུགས་ལས་འབྱུང་བ༌ཡིན།།
PRO 14:5 དཔང་པོ་དྲང་པོས་རྫུན་མི༌ལབ། །རྫུན་གྱི་དཔང་པོས་རྫུན་གཏམ༌སྨྲ།།
PRO 14:6 འཕྱ་སྨོད་མཁན་གྱིས་ཤེས་རབ་འཚོལ་བ་དཀའ། །བློ་རིག་ཅན་ལ་ཤེས་ཡོན་རང་བཞིན༌འཐོབ།།
PRO 14:7 གླེན་པའི་ཁ་ནས་ཤེས་ཡོན་རྙེད་དཀའ༌བས། །ཁྱོད་རང་དེ་དང་རིང་དུ་གྱེས་ཤིག༌ཨང༌།།
PRO 14:8 མཛངས་པའི་རིག་པས་རང་གི་བགྲོད་ལམ༌ཤེས། །གླེན་པའི་བླུན་རྨོངས་ཀྱིས་ནི་རང་ཉིད༌བསླུ།།
PRO 14:9 བླུན་པོས་ཉེས་སྐྱོན་རྩེད་མོར་འཛིན་མོད༌ཀྱང༌། །དྲང་པོའི་ཁྲོད་དུ་མཛའ་མཐུན་གནས་པ༌འོ།།
PRO 14:10 རང་གི་དཀའ་སྡུག་རང་གི་སེམས་ཀྱིས༌ཤེས། །སེམས་ཀྱི་དགའ་སྤྲོ་ཕྱི་མིས་མྱོང་མི༌ཐུབ།།
PRO 14:11 ངན་པའི་ཁྱིམ་གཞིས་བརླག་པར་འགྱུར་བ༌དང༌། །དྲང་པོའི་གུར་ནི་དར་ཞིང་རྒྱས་པ༌ཡིན།།
PRO 14:12 ལམ་ཞིག་ཡོད་པ་དྲང་པོར༌སྣང༌ན་ཡང་། །མཐའ་རུ་སླེབ་དུས་དེ་ནི་འཆི་ལམ༌ཡིན།།
PRO 14:13 དགོད་སྒྲ་སྒྲོག་པའི་སེམས་ལ་སྡུག་བསྔལ༌ཡོད། །དགའ་སྤྲོའི་མཐའ་མ་སྐྱོ་གདུང་ཡིན་ཡང༌སྲིད།།
PRO 14:14 སེམས་ནས་ཕྱིན་ཅི་ལོག་པའི་མི་དེ༌ཡིས། །རང་གི་སྤྱོད་པའི་མཇུག་འབྲས་ཚད་མེད༌མྱོང༌། །བཟང་པོར་ཅི་བྱས་བཞིན་དུ་རྔན་པ༌འཐོབ།།
PRO 14:15 བླུན་པོ་སྨྲ་བརྗོད་ཀུན་ལ་ཡིད་ཆེས༌ཀྱང༌། །མཛངས་པས་གོམ་སྟབས་རེ་རེར་གཟབ་གཟབ༌བགྱི།།
PRO 14:16 ཤེས་ལྡན་འཇིགས་ཤིང་ངན་ལས་འབྱོལ་བ༌དང༌། །གླེན་པས་ང་རྒྱལ་ཁེངས་རློམ་བྱེད་པ༌འོ།།
PRO 14:17 ངང་རྒྱུད་ཐུང་བ་བླུན་པོའི་ལུགས་སུ༌སྤྱོད། །སེམས་ལ་ཇུས་ངན་བཅངས་པར་ཐམས་ཅད༌སྡང༌།།
PRO 14:18 བླུན་པོས་ཤེས་རྨོངས་ནོར་སྐལ་དུ་རྙེད༌ཅིང༌། །མཛངས་པའི་སྟེང་ལ་ཤེས་ཡོན་ཅོད་པན༌མཛེས།།
PRO 14:19 མི་ངན་བཟང་པོའི་མདུན་སར་མགོ་བཏུད༌ཅིང༌། །ངན་པས་དྲང་པོའི་སྒོ་ཁར་མགོ་བོ༌སྨད།།
PRO 14:20 དབུལ་པོར་ཁྱིམ་མཚེས་ཡིན་ཡང་ཁོ་ལ༌སྡང༌། །ཕྱུག་པོར་མཛའ་བོ་གང་མང་ཡོད་པ༌འོ།།
PRO 14:21 ཁྱིམ་མཚེས་ཁྱད་དུ་གསོད་པ་སྡིག་ཉེས༌ཡིན། །དབུལ་པོ་དྲིན་གྱིས་སྐྱོང་བར་བྱིན་རླབས༌འཐོབ།།
PRO 14:22 ཇུས་ངན་གཤོམ་པ་ལམ་ནོར་མ་ཕྱིན༌ནམ། །ཐབས་བཟང་འཚོལ་བར་བྱམས་བརྩེ་བློ་དཀར༌འཐོབ།།
PRO 14:23 ངལ་བའི་ལས་ཀ་ཀུན་གྱིས་ཕན་ཐོགས༌ཤིང༌། །ཁ་སྟོང་ཚིག་སྟོང་གིས་ནི་ཕོངས་པར༌བྱེད།།
PRO 14:24 ཤེས་ལྡན་རྒྱུ་ནོར་ཁོ་ཚོའི་ཅོད་པན༌ཡིན། །གླེན་པའི་ཤེས་རྨོངས་ནམ་ཡང་ཤེས་རྨོངས༌སོ།།
PRO 14:25 དཔང་པོ་བདེན་པ་བྱེད་པས་མི་སྲོག༌སྐྱོབ། །རྫུན་གཏམ་སྨྲ་བས་གཡོ་སྒྱུས་མི་ལ༌འཚེ།།
PRO 14:26 ཡ་ཝཱེར་གུས་ཤིང་འཇིགས་པར་བརྟེན་ས༌ཡོད། །དེ་ཡི་བུ་རྒྱུད་ལ་ཡང་སྐྱབས་གནས༌མངའ།།
PRO 14:27 ཡ་ཝཱེར་འཇིགས་པ་སྲོག་གི་ཆུ་མིག༌ཡིན། །མི་ནི་འཆི་བའི་རྙི་ལས་ཐར་བར༌བྱ།།
PRO 14:28 འབངས་མི་རྒྱས་པ་རྒྱལ་པོའི་གཟི་དཔལ༌ཡིན། །མི་སེར་ཉུང་བ་གོང་མ་ཉམས་པའི༌རྒྱུ།།
PRO 14:29 ངང་རྒྱུད་རིང་པོ་ཤིན་ཏུ་སྤྱང་གྲུང༌ཡིན། །ངང་རྒྱུད་ཐུང་བས་གླེན་རྟགས་ཆེན་པོ༌སྟོན།།
PRO 14:30 སེམས་རྒྱུད་ཞི་ཞིང་དུལ་ན་ལུས་པོ༌བདེ། །ཕྲག་དོག་གིས་ནི་རུས་ཟུངས་རྒུད་པར༌བྱ།།
PRO 14:31 དབུལ་པོར་གཉའ་གནོན་བྱེད་པ༌ཡིས། །དེ་ཡི་བྱེད་པོར་སྨད་པ༌དང༌། །དབུལ་པོ་དྲིན་གྱིས་སྐྱོང་བ༌ནི། །དེ་ཡི་བྱེད་པོར་བཀུར༌བ་འོ།།
PRO 14:32 ངན་པ་རང་གི་ཉེས་པས་ཐུར་དུ༌འདྲུད། །དྲང་པོར་འཆི་བའི་དུས་ཀྱང་བརྟེན་ས༌ཡོད།།
PRO 14:33 ཤེས་རབ་བློ་རིག་ཅན་གྱི་སེམས་སུ༌གནས། །གླེན་པ་རྣམས་ཀྱི་ཁྲོད་ཀྱང་གསལ་ལེར༌མངོན།།
PRO 14:34 དྲང་བདེན་གྱིས་ནི་རྒྱལ་ཁབ་དར་བྱེད༌མོད། །འོན་ཀྱང་སྡིག་པ་དམངས་ཀྱི་ངོ་ཚ༌ཡིན།།
PRO 14:35 འཁོར་གཡོག་ཤེས་རབ་ཅན་ལ་རྒྱལ་པོ༌མཉེས། །ངོ་ཚར་སྦྱོར་བ་རྣམས་ལ་ཐུགས་རྒྱུད༌ཁྲོ།།
PRO 15:1 ཚིག་ལན་འཇམ་པོས་ཁོང་ཁྲོ༌ཞི། །རྩུབ་པོའི་གཏམ་གྱིས་ཞེ་སྡང༌སློང༌།།
PRO 15:2 ཤེས་ལྡན་ལྕེ་ཡིས་ཤེས་ཡོན༌བརྒྱན། །གླེན་པའི་ཁ་ནས་བླུན་རྨོངས༌ཐོན།།
PRO 15:3 ཡ་ཝཱེའི་སྤྱན་ནི་གང་སར༌བཞུགས། །ངན་པ་བཟང་པོ་ཐམས་ཅད༌གཟིགས།།
PRO 15:4 སེམས་གསོའི་ལྕེ་ནི་སྲོག་གི་ལྗོན་ཤིང༌ཡིན། །གཡོ་སྒྱུ་ཅན་གྱི་ལྕེ་ཡིས་མི་སེམས༌སྣད།།
PRO 15:5 བླུན་པོས་ཕ་ཡི་ཁ་ཏར་སྨད་པ༌དང༌། །བཀའ་བཀྱོན་གཙིགས་སུ་འཛིན་པ་སྤྱང་གྲུང་ལྡན།།
PRO 15:6 དྲང་པོའི་ཁྱིམ་དུ་ནོར་བུ་མང་པོ༌ཡོད། །ངན་པའི་ཡོང་འབབ་ཀྱིས་ནི་སྡུག་བསྔལ༌བཟོ།།
PRO 15:7 མཁས་པའི་ཞལ་ལས་ཤེས་ཡོན་སྤེལ་བ༌ཡིན། །གླེན་པའི་སེམས་ཀྱིས་དེ་བཞིན་བྱེད་པ༌མིན།།
PRO 15:8 ངན་པའི་མཆོད་པར་ཡ་ཝཱེ་ཞེན་པ༌ལོག །དྲང་པོའི་སྨོན་ལམ་དེ་ལ་ཁོང་ནི༌དགྱེས།།
PRO 15:9 ངན་པའི་ལམ་ལ་ཡ་ཝཱེ་ཞེན་ལོག༌ཀྱང༌། །དྲང་པོ་སྙེག་མཁན་ལ་ནི་ཁོང་གིས༌བྱམས།།
PRO 15:10 དྲང་ལམ་འདོར་བར་བསླབ་བྱ་ནན་མོ༌གཏོང༌། །བཀའ་བཀྱོན་ལ་ནི་སྡང་བ་འཆི་བར༌འགྱུར།།
PRO 15:11 གཤིན་ཡུལ་དམྱལ་ཁམས་ཡ་ཝཱེའི་དྲུང་དུ༌མངོན། །འཇིག་རྟེན་མི་ཡི་སེམས་ནི་ལྟ་ཅི༌སྨོས།།
PRO 15:12 འཕྱ་སྨོད་བྱེད་པ་འཇུན་མཁན་ལ་མི༌དགའ། །ཤེས་རབ་ཅན་གྱི་དྲུང་དུའང་འགྲོ་མི༌བྱ།།
PRO 15:13 ཡིད་སེམས་སྤྲོ་བས་མི་ལ་འཛུམ་མདངས༌རྒྱས། །སེམས་སྡུག་གིས་ནི་མི་སེམས་རྒུད་པར༌བྱེད།།
PRO 15:14 བློ་རིག་ཅན་གྱི་སེམས་ཀྱིས་ཤེས་ཡོན༌འཚོལ། །གླེན་པའི་ཁ་ཡིས་བླུན་རྨོངས་འབའ་ཞིག༌ཟ།།
PRO 15:15 མནར་གཅོད་མྱོང་བའི་ཉིན་ཀུན་དཀའ་ངལ༌ཡིན། །སེམས་པ་སྐྱིད་ན་ནམ་ཡང་གསོལ་སྟོན༌ཡིན།།
PRO 15:16 ནོར་གྱིས་ཕྱུག་ཀྱང་ཉོན་མོངས་ལྡན་པ༌ལས། །རྒྱུ་ནོར་ཉུང་ཡང་ཡ་ཝཱེར་འཇིགས་པ༌ལེགས།།
PRO 15:17 སྔོ་ཚལ་ཟ་ཞིང་ཕན་ཚུན་བྱམས་པ༌ནི། །བ་གླང་ཚོན་པོ་ཟ་ཞིང་ཕན་ཚུན༌ལ། །སྡང་སེམས་བསྐྱེད་པ་དེ་ལས་ལྷག་པ༌ཡིན།།
PRO 15:18 ཁྲོ་གཏུམ་ཅན་གྱིས་ནམ་རྒྱུན་འཁྲུག་པ༌སློང༌། །ངང་རྒྱུད་རིང་མོས་རྩོད་གཞི་འཇགས་པར༌བྱེད།།
PRO 15:19 ལེ་ལོ་ཅན་གྱི་ལམ་ནི་ཚེར་མའི་ར་སྐོར༌འདྲ། །གཞུང་རྒྱུད་དྲང་བའི་ལམ་བུ་བདེ་སྙོམས་གཞུང་ལམ༌ཡིན།།
PRO 15:20 ཤེས་རབ་ཅན་གྱིས་ཕ་ནི་མགུ་བྱེད༌ཀྱང༌། །གླེན་པས་རང་གི་མ་ལ་བརྙས་པར༌བྱེད།།
PRO 15:21 ཤེས་རྨོངས་ཀྱིས་ནི་བླུན་རྨོངས་དགའ་སྤྲོར༌རྩི། །བློ་རིག་ལྡན་པ་དྲང་པོར་འགྲོ་བ༌ཡིན།།
PRO 15:22 གྲོས་མོལ་མེད་ན་འཆར་བཀོད་འཆོལ་བ༌དང༌། །གྲོས་མི་མང་སར་གྲོས་གཞི་འགྲུབ་པ༌ཡིན།།
PRO 15:23 ངག་ལན་འཚམ་པོས་རང་ཉིད་དགའ་བྱེད༌ཅིང༌། །དུས་དང་མཐུན་པའི་གཏམ་ནི་བཟང་བ༌ལ།།
PRO 15:24 སྲོག་གི་ལམ་གྱིས་མཁས་པ་ཡར་འདྲེན༌པས། །ཁོ་རང་ཐུར་གྱི་གཤིན་ཡུལ་དང་འབྲལ༌ལོ།།
PRO 15:25 ཡ་ཝཱེས་ང་རྒྱལ་ཅན་གྱི་ཁང་པ༌བཤིག །ཡུགས་མོའི་མཐའ་མཚམས་བརྟན་པོར་མཛད་པ༌འོ།།
PRO 15:26 ངན་པའི་བསམ་བློར་ཡ་ཝཱེ་ཞེན་ལོག༌ཀྱང༌། །སྙིང་རྗེའི་གཏམ་ནི་དྭངས་ཤིང་གཙང་བ༌འོ།།
PRO 15:27 མི་གཙང་ནོར་ལ་ཧམ་པས་རང་ཁྱིམ༌འཚེ། །ལྐོག་རྔན་ལ་ནི་སྡང་བ་འཚོ་བར༌འགྱུར།།
PRO 15:28 དྲང་པོའི་སེམས་ཀྱིས་ལན་ལ་གཟབ་པ༌དང༌། །ངན་པའི་ཁ་ནས་གཏམ་ངན་བརྡོལ་བ༌ཡིན།།
PRO 15:29 ཡ་ཝཱེ་ངན་པར་རིང་དུ་གྱེས་པ༌དང༌། །དྲང་པོའི་གསོལ་འདེབས་ལ་ནི་གསན་པ༌འོ།།
PRO 15:30 མིག་གི་འོད་མདངས་ཀྱིས་ནི་སེམས་མགུ༌ཞིང༌། །འཕྲིན་བཟང་གིས་ནི་རུས་ཟུངས་གསོ་བ༌འོ།།
PRO 15:31 སྲོག་དང་འབྲེལ་བའི་འཇུན་ཚིག་ལ་ཉན༌པ། །ཤེས་རབ་ལྡན་པ་དག་གི་ཁྲོད་དུ༌གནས།།
PRO 15:32 ཁ་ཏ་སྣང་མེད་བསྐྱུར་བས་རང་ཉིད༌སྨད། །ཁ་ཏར་ཉན་པས་གོ་རྟོགས་རྙེད་པ༌ཡིན།།
PRO 15:33 ཡ་ཝཱེར་གུས་ཤིང་འཇིགས་པས་ཤེས་རབ༌བསླབ། །བཀུར་སྟི་མ་འཐོབ་གོང་ལ་ཁེངས་སྐྱུང༌དགོས།།
PRO 16:1 སེམས་ཀྱི་འཆར་བཀོད་མི་ལ་གཏོགས༌ན་ཡང་། །ལྕེ་ལན་འདེབས་པ་ཡ་ཝཱེ་ཁོང་ལས༌འབྱུང༌།།
PRO 16:2 རང་གི་མིག་ལམ་ཅི་བྱས་ཐམས་ཅད༌གཙང༌། །ཡ་ཝཱེས་མི་སེམས་སྲང་ལ་འཇལ་བ༌ཡིན།།
PRO 16:3 རང་གི་སྒྲུབ་བྱ་ཐམས་ཅད་ཡ་ཝཱེར༌བཅོལ། །ཁྱོད་ཀྱི་འཆར་བཀོད་ཡིད་བཞིན་འགྲུབ་པར༌འགྱུར།།
PRO 16:4 ཡ་ཝཱེས་བཀོད་པ་ཀུན་ལ་དམིགས་བྱ༌ཡོད། །ཐ་ན་ངན་པ་ཆག་སྒོའི་ཉིན་ཕྱིར༌ཡིན།།
PRO 16:5 ང་རྒྱལ་ཀུན་ལ་ཡ་ཝཱེ་ཞེན་པ༌ལོག །ཁོ་རྣམས་ཉེས་ཆད་མེད་པར་གཏོང་མི༌སྲིད།།
PRO 16:6 བྱམས་པ་དང་ནི་བདེན་པས་སྡིག་པ༌བཤགས། །ཡ་ཝཱེར་འཇིགས་པས་ངན་པར་གཡོལ་ནུས༌སོ།།
PRO 16:7 མི་ཡི་སྤྱོད་པར་ཡ་ཝཱེ་ཐུགས་དགྱེས༌ན། །ཁོང་གིས་དེ་ཡི་དགྲ་ཡང་དེ་དང༌བསྡུམ།།
PRO 16:8 ཐོབ་བྱ་མང་ཡང་དྲང་གཞག་མེད་པ༌ལས། །ཡོང་འབབ་ཉུང་ཡང་དྲང་བདེན་ཡིན་པ༌ལེགས།།
PRO 16:9 མི་ཡི་སེམས་ཀྱིས་རང་གི་ལམ་གཤོམ༌ཡང༌། །དེ་ཡི་ལམ་སྣ་འདྲེན་མཁན་ཡ་ཝཱེ༌ཡིན།།
PRO 16:10 རྒྱལ་པོའི་ཞལ་དུ་དཀོན་མཆོག་བཀའ་གསུང༌ཡོད། །འདྲི་གཅོད་བྱེད་དུས་ཞལ་ལ་འཁྲུལ་བ༌མེད།།
PRO 16:11 དྲང་བའི་སྲང་དང་རྒྱ་མ་ཡ་ཝཱེར༌གཏོགས། །ཁུག་མའི་གདོས་ཚད་ཐམས་ཅད་ཁོང་གིས༌བཀོད།།
PRO 16:12 དྲང་པོར་བརྟེན་ནས་རྒྱལ་ཁྲི་བརྟན་བྱེད༌པས། །བྱ་ངན་བྱེད་པར་རྒྱལ་པོ་ཞེན་པ༌ལོག།
PRO 16:13 དྲང་བདེན་མཆུ་ལ་རྒྱལ་པོ་ཐུགས་དགྱེས༌ཤིང༌། །དྲང་གཏམ་སྨྲ་བར་ཁོང་ཉིད་དགའ་བ༌འོ།།
PRO 16:14 རྒྱལ་པོའི་ཐུགས་ཁྲོ་འཆི་བའི་ཕོ་ཉར༌མཚུངས། །མཁས་པས་རྒྱལ་པོའི་ཐུགས་ཁྲོ་ཞི་བར༌བྱ།།
PRO 16:15 རྒྱལ་པོའི་ཞལ་འཛུམ་གྱིས་ནི་ཚེ་སྲོག༌སྦྱིན། །ཁོང་གི་ཐུགས་རྗེ་དཔྱིད་ཀའི་ཆར་སྤྲིན༌མཚུངས།།
PRO 16:16 ཤེས་རབ་འབྱོར་བ་གསེར་བས་རབ་ཏུ༌དྲག །དངུལ་ལས་བློ་གྲོས་བདམས་པས་ཤིན་ཏུ༌བཟང༌།།
PRO 16:17 ངན་པ་ལས་གཡོལ་དྲང་པོའི་ལམ་ཆེན༌ཡིན། །རང་གི་བགྲོད་ལམ་སྲུང་བས་རང་སྲོག༌བསྲུང༌།།
PRO 16:18 རྩ་མེད་འགྲོ་བའི་སྔོན་ལ་ང་རྒྱལ༌འབྱུང༌། །མ་ལྟུང་གོང་ལ་སེམས་སུ་ཁེངས་དྲེགས༌བསྐྱེད།།
PRO 16:19 ང་རྒྱལ་ཅན་དང་བཅོམ་ནོར་བགོ་བ༌ལས། །ཁེངས་པ་བསྐྱུངས་ནས་དབུལ་པོར་འགྲོགས་ན༌བཟང༌།།
PRO 16:20 གཟབ་གཟབ་བཀའ་ལ་ཉན་པར་ཕན་ཐོགས༌ཤིང༌། །ཡ་ཝཱེར་བརྟེན་པའི་མི་ལ་བདེ་བ༌འཐོབ།།
PRO 16:21 བློ་རིག་ཅན་གྱི་སེམས་ལ་ཤེས་རབ༌ལྡན། །སྙན་མོ་གཏམ་གྱིས་མི་སེམས་འགུག་ནུས༌སོ།།
PRO 16:22 མཛངས་པའི་བློ་གྲོས་སྲོག་གི་ཆུ་མིག༌ཡིན། །བླུན་པོའི་བླུན་རྨོངས་དེ་ཡི་ཆད་པ༌འོ།།
PRO 16:23 མཁས་པའི་སེམས་ཀྱིས་རང་གི་ཁ་ལ༌བསླབ། །རང་གི་ཚིག་ལ་མི་སེམས་འགུག་ཤུགས༌སྣོན།།
PRO 16:24 སྙན་མོ་ཚིག་ནི་སྦྲང་རྩིའི་ཚང་ལྟར༌ཡིན། །སེམས་ལ་མངར་ཞིང་རུས་ཟུངས་གསོ་བར༌བྱེད།།
PRO 16:25 ལམ་ཞིག་ཡོད་པ་དྲང་པོར་སྣང་ན༌ཡང༌། །མཐའ་རུ་སླེབ་དུས་དེ་ནི་འཆི་ལམ༌ཡིན།།
PRO 16:26 གླ་པས་རང་གི་དགོས་མཁོ་བསྐང་བར༌འབད། །བཀྲེས་སྐོམ་གྱིས་ནི་ཁོ་ལ་ཚ་འདེད༌བགྱི།།
PRO 16:27 གཡོ་ཁྲམ་ཅན་གྱིས་ངན་པ་ཕྱི་རུ༌འདོན། །དེ་ཡི་སྨྲ་བརྗོད་སྲེག་བྱེད་མེ་དང༌མཚུངས།།
PRO 16:28 ལོག་སྤྱོད་ཅན་གྱིས་འཁྲུག་པའི་ས་བོན༌འདེབས། །ཕྲ་མ་བྱེད་པས་མཛའ་གྲོགས་གཏོར་བ༌ཡིན།།
PRO 16:29 གདུག་རྩུབ་ཅན་གྱིས་ཁྱིམ་མཚེས་བསླུ་བ༌དང༌། །དེ་ནི་ངན་པའི་ལམ་དུ་འདྲེན་བྱེད༌དོ།།
PRO 16:30 སྲོལ་ལོག་འཚོལ་བས་མིག་བརྡ་གཏོང་བ༌དང༌། །ཁ་ཚུགས་སྟོན་པས་ངན་པ་འགྲུབ་པར༌བྱ།།
PRO 16:31 མགོ་སྐྲ་དཀར་པོ་དཔལ་གྱི་ཅོད་པན༌ཡིན། །དྲང་བདེན་ལམ་དུ་དེ་ནི་འཐོབ་པར༌འགྱུར།།
PRO 16:32 ངང་རྒྱུད་རིང་བ་དཔའ་བོ་ལས་ཀྱང༌ལྷག །རང་སེམས་འདུལ་བ་གྲོང་ཁྱེར་ལོན་པས༌མཆོག།
PRO 16:33 རྟགས་རིལ་མི་ཡི་པང་དུ་འཕངས༌ན་ཡང་། །ཐུགས་ཐག་གཅོད་པ་ཡ་ཝཱེ་ཁོང་ཉིད༌ལགས།།
PRO 17:1 ནང་འཁྲུག་དང་བཅས་སྟོན་མོས་ཁེངས་པའི་ཁྱིམ་གཞིས༌ལས། །བག་ཕབ་ངང་ནས་གོར་སྐམ་ཁམ་གང་ཟ་བ༌ལེགས།།
PRO 17:2 གཡོག་པོ་གྲུང་པོས་ཁྲེལ་མེད་བུ་ནི་དབང་འོག༌བསྡུ། །སྤུན་རྣམས་ཁྲོད་ནས་ནོར་སྐལ་ཡང་ནི་རྙེད་པར༌འགྱུར།།
PRO 17:3 གསེར་དངུལ་བཙོ་ཕྱིར་མེ་ཐབ་ལུགས་ཀོང༌ཡོད། །ཡ་ཝཱེས་མི་ཡི་སེམས་ལ་བརྟག་པར༌མཛད།།
PRO 17:4 ལས་ངན་བྱེད་པས་སྨྲ་བརྗོད་ངན་པར༌ཉན། །རྫུན་གཏམ་སྨྲ་བས་ཕྲ་མའི་ལྕེ་ལ༌བླག།
PRO 17:5 དབུལ་པོར་འཕྱ་བས་དེ་ཡི་བྱེད་པོར༌སྨད། །གཞན་སྡུག་སྙིང་ཚིམ་ལ་ནི་ཉེས་ཆད༌འཕོག།
PRO 17:6 བུ་རབས་ཚ་རྒྱུད་རྒན་པའི་ཅོད་པན༌ཡིན། །ཕ་ནི་བུ་ཕྲུག་རྣམས་ཀྱི་དཔལ་ལགས༌སོ།།
PRO 17:7 གླེན་པས་གཏམ་སྙན་སྨྲ་བ་མི་འོས༌ཤིང༌། །བཀུར་སྟི་ཅན་ལ་རྫུན་གཏམ་ལྟ་ཅི༌སྨོས།།
PRO 17:8 སྤྲོད་མཁན་མིག་ལ་ལྐོག་རྔན་སྲུང་འཁོར༌བཞིན། །གང་སར་ཕྱིན་ཡང་དོན་ཀུན་འགྲུབ་པར༌སྙམ།།
PRO 17:9 གཞན་གྱི་ཉེས་སྐྱོན་བརྗེད་པས་མཛའ་བརྩེ༌སྙེག །ཡང་དང་བསྐྱར་དུ་གླེང་བས་མཛའ་གྲོགས༌འཕྲལ།།
PRO 17:10 རྣམ་དཔྱོད་ཅན་ལ་གཤེ་ཚིག་གཅིག་སྨྲ༌བ། །གླེན་པར་ལན་བརྒྱ་གཞུས་པས་ལྷག་ཡིན༌ནོ།།
PRO 17:11 མི་ངན་གྱིས་ནི་གྱེན་ཟློག་ཁོ་ན༌བསྙེག །གདུག་རྩུབ་ཆེ་བའི་བང་ཆེན་དེ་རྩར༌མངག།
PRO 17:12 གླེན་པས་གླེན་རྟགས་སྟོན་པར་འཕྲད་པ༌ལས། །དོམ་ཕྲུག་བོར་བའི་དོམ་དང་འཕྲད་ན༌ལེགས།།
PRO 17:13 བཟང་ལན་ངན་གྱིས་འཇལ་བའི་མི་ལ༌ནི། །རྐྱེན་ངན་དེ་ཡི་ཁྱིམ་དང་འབྲལ་མི༌འགྱུར།།
PRO 17:14 རྩོད་པའི་འགོ་ནི་རགས་ཤོར་ཆུ་དང༌འདྲ། །འཁྲུག་རྩོད་མ་བརྩམས་གོང་ལ་སྤང་བར༌བྱ།།
PRO 17:15 ངན་པ་དྲང་པོར་རྩི་བ༌དང༌། །དྲང་བདེན་སྡིག་ཅན་དུ་རྩི༌བ། །གཉིས་ཀར་ཡ་ཝཱེ་ཞེན་ལོག༌གོ།
PRO 17:16 གླེན་པའི་ནང་དུ་གོ་རྟོགས་མེད་ན༌ནི། །རིན་དངུལ་བཟུང་ནས་ཤེས་རབ་ཅི་ལ༌ཉོ།།
PRO 17:17 མཛའ་བོས་དུས་དང་རྣམ་པ་ཀུན་ཏུ༌བརྩེ། །སྤུན་ཟླ་དཀའ་སྡུག་འབྱུང་བའི་དུས་ཕྱིར༌སྐྱེས།།
PRO 17:18 ཁྱིམ་མཚེས་མཐོང་ངོར་ལག་པ་འཇུས་ནས༌ནི། །འགན་ལེན་བྱེད་པ་དེ་ནི་བླུན་རྨོངས༌ཡིན།།
PRO 17:19 རྩོད་པར་སེམས་པ་འཆོར་བ་ཉེས་པར༌དགའ། །རྒྱ་སྒོ་མཐོན་པོར་བརྩིགས་པས་རང་ཉིད༌བརླག།
PRO 17:20 སེམས་པ་གཡོ་སྒྱུ་ཅན་ལ་ཕན་མི༌ཐོགས། །ལྕེ་ཡིས་ཕྲ་མ་སྤེལ་བ་ཆག་སྒོར༌ལྷུང༌།།
PRO 17:21 གླེན་པའི་བུ་ཞིག་སྐྱེས་པ་ཕ་ཡི༌སྡུག །གླེན་པའི་ཕ་ལ་དགའ་སྤྲོ་ཡོད་མ༌ཡིན།།
PRO 17:22 དགའ་ཞིང་སྤྲོ་བའི་སེམས་ནི་སྨན་གྱི༌མཆོག །ཡིད་སེམས་སྐྱོ་བས་རུས་ཟུངས་ཟད་པར༌བྱེད།།
PRO 17:23 དྲང་གཞག་མགོ་རྟིང་སློག་པའི༌ཕྱིར། །ངན་པས་ལྐོག་ནས་ལྐོག་རྔན༌ལེན།།
PRO 17:24 བློ་ལྡན་མདུན་དུ་ཤེས་རབ༌གནས། །གླེན་པའི་མིག་ནི་ས་མཐར༌ཕྱོགས།།
PRO 17:25 གླེན་པས་ཕ་ནི་སེམས་ཁུར༌གཏུག །རང་གི་མ་ཡང་སྡུག་ལ༌སྦྱོར།།
PRO 17:26 དྲང་པོ་ལ་ནི་ཆད་པ་གཅོད་མི༌འོས། །འགོ་དཔོན་ཡ་རབས་ལ་ནི་བརྡེག་མི༌རུང༌།།
PRO 17:27 ཤེས་ཡོན་ཅན་གྱིས་གཏམ་ཉུང༌གླེང༌། །ཞི་དུལ་ངང་རིང་བློ་གྲོས༌ལྡན།།
PRO 17:28 བླུན་པོ་ཁ་རོག་སྡོད་པ་མཁས་པར༌རྩི། །ཅི་ཡང་མི་སྨྲ་བ་ནི་རིག་ལྡན༌སྙམ།།
PRO 18:1 ཁེར་རྐྱང་སྡོད་པས་རང་གི་འདོད་པ༌བསྙེག །དེ་ཡིས་ཤེས་རབ་ཀུན་ལ་འགོག་རྒོལ༌བྱ།།
PRO 18:2 གླེན་པ་གོ་བ་ལོན་པར་མི་དགའ༌ཞིང༌། །རང་གི་བསམ་དོན་བརྗོད་པ་ཁོ་ནར༌སྤྲོ།།
PRO 18:3 ངན་པ་སླེབ་སར་འཕྱ་སྨོད་ཀྱང་ནི༌སླེབ། །ངོ་ཚ་དང་བཅས་ཞབས་འདྲེན་འབྱུང་བ༌ཡིན།།
PRO 18:4 མི་ཁའི་གཏམ་ནི་གཏིང་ཟབ་ཆུ་དང༌འདྲ། །ཤེས་རབ་ཆུ་མིག་བཞུར་རྒྱུན་རིང་མོ༌ཡིན།།
PRO 18:5 ཁྲིམས་ཐག་གཅོད་དུས་ངན་པའི་ཕྱོགས་ལངས༌དང༌། །དྲང་པོར་མ་ཉེས་ཁ་གཡོགས་བྱེད་པ༌ཐན།།
PRO 18:6 གླེན་པའི་མཆུ་ཡིས་རྩོད་གཞི་སློང་བ༌དང༌། །དེ་ཡི་སྨྲ་སྒོས་རྡུང་རྡེག་ཉོ་བར༌འགྱུར།།
PRO 18:7 གླེན་པའི་ཁ་ཡིས་རང་ཉིད་འཕུང་བྱེད༌ཅིང༌། །དེ་ཡི་མཆུ་སྒྲོས་སྲོག་གི་རྙི་རྒྱ༌ཡིན།།
PRO 18:8 ཕྲ་མ་བྱེད་པའི་མི་ཡི་སྨྲ་བརྗོད༌ནི། །ཟས་མཆོག་བཞིན་དུ་གྲོད་པའི་ཕུགས་སུ༌འཇུག།
PRO 18:9 ལས་ཀའི་དུས་སུ་ལེ་ལོ་བྱེད་པ༌ནི། །རྩ་མེད་གཏོང་བའི་སྤུན་ཟླ་ཤ་སྟག༌གོ།
PRO 18:10 ཡ་ཝཱེའི་མཚན་ནི་ལྕོག་མཁར་བརྟན་པོ༌ཡིན། །དྲང་པོ་དེ་རུ་བརྒྱུགས་ཤིང་བདེ་བར༌གནས།།
PRO 18:11 ཕྱུག་པོའི་རྒྱུ་ནོར་དེ་ཡི་མཁར་རྫོང༌ཡིན། །དེ་ཚོའི་བསམ་པར་ལྕགས་རི་ལྟར་དུ༌སྣང༌།།
PRO 18:12 མ་འཕུང་གོང་དུ་མི་ཡིས་ཁེངས་དྲེགས༌བྱེད། །བཀུར་སྟིའི་སྔོན་དུ་ཁེངས་སྐྱུང་བསྐྱེད་པ༌ཡིན།།
PRO 18:13 མ་ཉན་གོང་ལ་གཏམ་ལན་འདེབས་པ༌ནི། །བླུན་རྨོངས་དང་ནི་ངོ་ཚའི་རྒྱུ་ཡིན༌ནོ།།
PRO 18:14 མི་ཡི་སེམས་ཀྱིས་ན་ཚ་བཟོད་ཐུབ༌ཀྱང༌། །ཡིད་སེམས་གདུང་བ་སུ་ཡིས་བསྲན་ནུས༌སམ།།
PRO 18:15 བློ་རིག་ཅན་གྱི་སེམས་ལ་ཤེས་ཡོན༌འཐོབ། །མཁས་པའི་སྙན་གྱིས་ཤེས་ཡོན་འཚོལ་བར༌བྱེད།།
PRO 18:16 ལག་རྟགས་ཀྱིས་ནི་མི་ལ་ལམ་འབྱེད༌ཅིང༌། །མི་ཆེན་རྣམས་ཀྱི་དྲུང་དུ་འདྲེན་བྱེད༌དོ།།
PRO 18:17 སྔོན་དུ་རྒྱུ་མཚན་སྨྲ་བར་གནས་ལུགས༌ལྡན། །མི་གཞན་སླེབ་དུས་ད་གཟོད་དོན་དངོས༌རྙེད།།
PRO 18:18 རྟགས་རིལ་གྱིས་ནི་འཁྲུག་རྩོད་ཞི་བར༌བྱ། །གྱོད་ཡ་སྟོབས་ཅན་སོ་སོར་འཕྲལ་བར༌བྱ།།
PRO 18:19 ཁོང་ཁྲོ་བསླངས་པའི་སྤུན་ཟླ་སྡུམ་པ༌ནི། །མཁར་རྫོང་ལེན་པ་ལས་ཀྱང་དཀའ་བ༌དང༌། །རྩོད་གཞི་དེ་འདྲ་བཙན་རྫོང་སྒོ་གཏན༌བཞིན།།
PRO 18:20 མི་ཡི་ཁ་ནས་ཐོགས་པའི་འབྲས་བུ༌ཡིས། །རང་གི་གྲོད་པ་འགྲང་བར་བྱེད་པ༌དང༌། །ཁ་ནས་ཅི་ཞིག་ཐོན་པས་རང་ཉིད༌ཚིམ།།
PRO 18:21 ཤི་གསོན་གཉིས་ནི་ལྕེ་ཡི་དབང་འོག༌ཏུ། །དབང་དེར་དགའ་བ་འབྲས་བུ་རང་ལ༌འཁོར།།
PRO 18:22 ཆུང་མ་རྙེད་ན་བདེ་སྐྱིད༌རག །དེ་ལ་ཡ་ཝཱེའི་ཐུགས་རྗེ༌ཐོབ།།
PRO 18:23 དབུལ་པོས་བཀའ་དྲིན་འཐོབ་པར་ཞུ་བ༌འབུལ། །ཕྱུག་པོས་རྩུབ་མོ་ཚིག་གིས་ལན་སྨྲ༌འོ།།
PRO 18:24 མཛའ་གྲོགས་མང་ཡང་མཐར་མཇུག་འཕུང་བར༌འགྱུར། །གྲོགས་མཆོག་གཅིག་རང་ཡོད་པ་སྤུན་ལས༌ཉེ།།
PRO 19:1 ཁ་རུ་གཡོ་འཕྲུལ་གང་བའི་གླེན་པ༌ལས། །སྤྱོད་པ་སྐྱོན་དང་བྲལ་བའི་དབུལ་པོ༌ལེགས།།
PRO 19:2 མི་ལ་ཤེས་ཡོན་མེད་ན་ཐན་ཡིན༌ཞིང༌། །གོམ་འགྲོས་མྱུར་བ་ལམ་ནོར་འགྲོ་ཉེན༌ཆེ།།
PRO 19:3 མི་ཡི་རྨོངས་པས་རང་གི་བགྲོད་ལམ༌བརླག །དེ་ཡི་སེམས་ནི་ཡ་ཝཱེར་ཁྲོ་བ༌ཡིན།།
PRO 19:4 ནོར་གྱིས་མཛའ་བོ་མང་དུ་སྤེལ་བ༌དང༌། །དབུལ་པོ་མཛའ་གྲོགས་གཅིག་རང་ཡོད་པས༌འདོར།།
PRO 19:5 རྫུན་གྱི་དཔང་པོར་ཉེས་ཆད་འཕོག་པར༌འགྱུར། །རྫུན་གཏམ་སྨྲ་བ་ཐར་བར་མི་འགྱུར༌རོ།།
PRO 19:6 བཀུར་སྟི་ཅན་ལ་མང་པོས་ངོ་སོ༌བྱེད། །གཏོང་ཕོད་ཆེ་ན་མི་ཀུན་གྲོགས་སུ༌འགྱུར།།
PRO 19:7 དབུལ་པོ་ལ་ནི་སྤུན་ཡང༌སྡང༌། །མཛའ་གྲོགས་དེ་དང་རིང་དུ༌གྱེས། །ཞུ་བ་ནན་གྱིས་ཕུལ་ན༌ཡང༌། །དེ་རྣམས་ཁ་ཡ་བྱེད་པ༌མིན།།
PRO 19:8 ཤེས་རབ་ཐོབ་པས་རང་སྲོག་གཅེས་སུ༌འཛིན། །གོ་རྟོགས་སྲུང་བར་ཕན་པ་འཐོབ་པར༌འགྱུར།།
PRO 19:9 རྫུན་གྱི་དཔང་པོར་ཉེས་ཆད་འཕོག་པར༌འགྱུར། །རྫུན་གཏམ་སྨྲ་བ་མཐའ་མཇུག་མེད་པར༌འགྱུར།།
PRO 19:10 གླེན་པ་རྒྱས་སྤྲོས་ལ་ནི་མི་འཚམ༌ན། །གཡོག་པོས་རྒྱལ་བུར་དབང་བྱེད་ལྟ་ཅི༌སྨོས།།
PRO 19:11 ཤེས་རབ་ཀྱིས་ནི་མི་ལ་བཟོད་སྒོམ༌གནང༌། །གཞན་སྐྱོན་གུ་ཡངས་གཏོང་བ་རང་གི༌དཔལ།།
PRO 19:12 རྒྱལ་པོའི་ཐུགས་ཁྲོ་སེང་གེའི་ང་རོ༌བཞིན། །ཁོང་གི་ཐུགས་རྗེ་རྩྭ་མགོའི་ཟིལ་བ༌འདྲ།།
PRO 19:13 བུ་བླུན་ཕ་ཡི་ཆག་སྒོ་ཡིན་པ༌དང༌། །ཆུང་མ་འཁོན་ཞུགས་ཆར་ཐིགས་འཐིག་པ༌འདྲ།།
PRO 19:14 ཁྱིམ་དང་རྒྱུ་ནོར་ཕ་བཞག་ནོར་སྐལ༌ཡིན། །ཆུང་མ་མཛངས་མ་ཡ་ཝཱེས་གནང་བ༌འོ།།
PRO 19:15 སྒྱིད་ལུག་གིས་ནི་གཏི་མུག་གནས་སུ༌བསྐྱལ། །ལེ་ལོ་ཅན་གྱིས་བཀྲེས་ལྟོགས་མྱོང་བར༌འགྱུར།།
PRO 19:16 བཀའ་རྒྱ་སྲུང་བས་རང་སྲོག་སྲུང་བྱེད༌ཅིང༌། །སྤྱོད་ལམ་སྣང་མེད་བསྐྱུར་བ་འཆི་བར༌འགྱུར།།
PRO 19:17 དབུལ་པོ་དྲིན་གྱིས་སྐྱོང་བ༌ནི། །ཡ་ཝཱེར་བུ་ལོན་གཏོང་བ༌ཡིན། །དེ་ཡིས་ཅི་བྱས་ཡ་ཝཱེས༌ཚབ།།
PRO 19:18 རེ་བ་ཡོད་དུས་བུ་ལ་གཅུན་དགོས༌ཤིང༌། །བསམ་བཞིན་བུ་དེ་འཆི་བར་མི་བྱ༌འོ།།
PRO 19:19 ནམ་རྒྱུན་རབ་ཏུ་ཁྲོ་བའི་མི་ལ་ཆད་པ༌འཕོག །དེ་ལ་རོགས་རམ་བྱས་ཚེ་ཡང་ཡང་བྱེད་དགོས༌འགྱུར།།
PRO 19:20 ཁྱོད་ནི་ཕུགས་སུ་མཁས་པར་འགྱུར་ཕྱིར༌དུ། །ཁ་ཏར་མཉན་ནས་འཆུན་འདོམས་དང་ལེན༌གྱིས།།
PRO 19:21 མི་ཡི་སེམས་སུ་ཐབས་ཇུས་མང༌ན་ཡང་། །ཡ་ཝཱེའི་དགོངས་དོན་འབའ་ཞིག་བརྟན་པོར༌ཚུགས།།
PRO 19:22 མི་ཡི་འདུན་པ་བློ་སེམས་དཀར་བ༌ཡིན། །རྫུན་གཏམ་ལབ་པའི་མི་ལས་དབུལ་པོ༌ལེགས།།
PRO 19:23 ཡ་ཝཱེར་གུས་ཤིང་འཇིགས་པར་ཚེ་སྲོག༌འཐོབ། །བདེ་ཞིང་ཚིམ་པར་གནས་ཤིང་བར་ཆད༌མེད།།
PRO 19:24 ལེ་ལོས་སྡེར་མའི་ནང་དུ་ལག་བརྐྱངས༌ནས། །ཁ་ཟས་རང་གི་ཁ་ལ་སྐྱེལ་མི༌འདོད།།
PRO 19:25 འཕྱ་སྨོད་མཁན་ལ་བརྡུང་ན༌ནི། །བླུན་རྨོངས་ཡིན་ཡང་གྲུང་པོར༌འགྱུར། །བློ་རིག་ཅན་ལ་བཀྱོན་པ༌ན། །དེ་ཡིས་ཤེས་བྱ་རྟོགས་འགྱུར༌རོ།།
PRO 19:26 ཕ་ལ་མནར་ཞིང་མ་ཡང་སྐྲོད་པ༌ནི། །ཞབས་འདྲེན་དང་ནི་ངོ་ཚའི་བུ་ཡིན༌ནོ།།
PRO 19:27 ངའི་བུས་ཁ་ཏར་ཉན་པ་མཚམས་བཞག༌ན། །ཤེས་ཡོན་ལྡན་པའི་ཚིག་དང་འབྲལ་བ༌འོ།།
PRO 19:28 ཁྲམ་པས་དཔང་པོ་བྱས་ན་དྲང་གཞག༌སྨད། །ངན་པའི་ཁ་ཡིས་སྡིག་ཉེས་ཁྱུར་མིད༌བྱེད།།
PRO 19:29 འཕྱ་སྨོད་མཁན་ལ་ཁྲིམས་ཆད་ཡོད་པ༌དང༌། །གླེན་པའི་རྒྱབ་ལ་རྡེག་ཕྱིར་རྟ་ལྕག༌ཡོད།།
PRO 20:1 རྒུན་ཆང་གིས་ནི་འཕྱ་སྨོད་སློང་བ༌དང༌། །གར་ཆང་འུར་སྒྲ་སློང་བའི་རྒྱུ་ཡིན༌ལ། །ཆང་གིས་ཉེས་སྐྱོན་བཟོ་བར་ཤེས་རབ༌དབེན།།
PRO 20:2 རྒྱལ་པོའི་ཐུགས་ཁྲོ་སེང་གེའི་ང་རོ༌བཞིན། །དེ་ལ་ཁོང་ཁྲོ་སློང་བས་རང་སྲོག༌འདོར།།
PRO 20:3 རྩོད་གཞིར་གཡོལ་བ་མི་ཡི་གཟི་དཔལ༌ཡིན། །བླུན་པོ་ཡིན་ཚད་འཁོན་འཛིང་ལ་དགའ༌འོ།།
PRO 20:4 ལེ་ལོ་ཅན་གྱིས་དུས་ལྟར་ཞིང་མི༌རྨོ། །སྟོན་དུས་འཚོལ་བར་བྱེད་ཀྱང་འཐོབ་བྱ༌མེད།།
PRO 20:5 སེམས་ཀྱི་ཐབས་ཇུས་གཏིང་ཟབ་ཆུ་དང༌འདྲ། །བློ་ལྡན་ཁོ་ནས་དེ་ཕྱིར་འདོན་པ༌ཡིན།།
PRO 20:6 མང་པོས་རང་ཉིད་བློ་སེམས་དཀར་ཞེས༌སྒྲོག །བློ་གཏད་རུང་བར་སུ་ཞིག་འཕྲད་ནུས༌སམ།།
PRO 20:7 སྤྱོད་པ་སྐྱོན་བྲལ་སྐྱེས་བུ་དམ་པ༌ཡི། །བུ་རབས་ཚ་རྒྱུད་བྱིན་རླབས་ཆེ་བ༌འོ།།
PRO 20:8 ཉེས་ཆད་གཅོད་པའི་རྒྱལ་ཁྲི་ལ་བཞུགས༌པའི། །རྒྱལ་པོའི་སྤྱན་གྱིས་ངན་པ་ཐམས་ཅད༌གཤེར།།
PRO 20:9 བདག་གིས་རང་གི་སེམས་པ་གཙང་མར༌བྱས། །དྭངས་གཙང་སྡིག་བྲལ་ཡིན་ཞེས་སུས་བརྗོད༌ནུས།།
PRO 20:10 རྒྱ་སྲང་དང་ནི་འཇལ་བྱེད་ཐ་དད༌པ། །གཉིས་ཀར་ཡ་ཝཱེ་ཁོང་ཉིད་ཞེ་ལོག༌གོ།
PRO 20:11 བྱིས་པའི་སྤྱོད་ལུགས་གཙང་ཞིང་དྲང་མིན༌ནི། །དེ་ཡི་བྱ་སྤྱོད་ཀྱིས་ནི་གསལ་པོར༌མངོན།།
PRO 20:12 ཐོས་བྱེད་རྣ་བ་མཐོང་བྱེད༌མིག །གཉིས་པོ་ཡ་ཝཱེས་བཀོད་ལགས༌སོ།།
PRO 20:13 གཏི་མུག་གཉིད་ལ་མ་ཆགས་ཕོངས་པའི༌རྒྱུ། །མིག་ནི་ཕྱེས་ན་ད་གཟོད་འགྲང་བར༌འགྱུར།།
PRO 20:14 ཚོང་ཟོག་ཉོ་དུས་ཡང་ཡང་མི་ལེགས༌ཟེར། །དེ་ནས་ཐོན་རྗེས་རང་ལ་བསྟོད་ར་བྱེད།།
PRO 20:15 གསེར་དང་པདྨ་ར་ག་མོད༌ན་ཡང་། །ཤེས་ཡོན་གཏམས་པའི་མཆུ་སྒྲོས་ནོར་ལས༌ལྷག།
PRO 20:16 སུ་ཞིག་རྒྱུས་མེད་འགན་ལེན་བྱེད་ན༌ནི། །དེ་ཡི་ཕྱི་གོས་ལེན་པར་གྱིས་ཤིག༌དང༌། །དེ་ཡིས་ཕྱི་མིའི་འགན་ལེན་བྱེད་ན༌ནི། །དེ་ནི་འགན་ལེན་པ་རུ་འགྱུར་དགོས༌སོ།།
PRO 20:17 གཡོ་སྒྱུས་རག་པའི་ཁ་ཟས་མི་ལ༌ཞིམ། །འོན་ཀྱང་ཕྱིས་སུ་ཁ་ནང་ཟེགས་མས༌གང༌།།
PRO 20:18 ཇུས་འགོད་བགྱིས་ན་ཇུས་གཞི་ཚུགས་པ༌དང༌། །གཡུལ་འགྱེད་པ་ཡང་ཇུས་བཟང་ལ་བརྟེན༌དགོས།།
PRO 20:19 གང་སར་ངག་ཀྱལ་སྨྲ་བས་གསང་གཏམ༌འཆོར། །ཆོ་མེད་སྨྲ་བའི་མི་ལ་འགྲོགས་མི༌རུང༌།།
PRO 20:20 ཕ་མར་དམོད་མཁན་དེ་ཡི་སྒྲོན་མེ༌ནི། །སྨག་རུམ་སྟུག་པོའི་ནང་དུ་ཞི་བར༌འགྱུར།།
PRO 20:21 ཐོག་མར་མྱུར་དུ་རྙེད་པའི་ནོར་སྐལ༌ནི། །མཇུག་མཐར་བྱིན་རླབས་སུ་ནི་གྱུར་པ༌མེད།།
PRO 20:22 བདག་གིས་ངན་ལན་འཇལ་ལོ་ཞེས་མ༌ཟེར། །ཡ་ཝཱེར་སྒུགས་དང་ཁོང་གིས་ཁྱོད་རང༌སྐྱོབ།།
PRO 20:23 ཐ་དད་རྒྱ་མར་ཡ་ཝཱེ་ཞེན་པ༌ལོག །གཡོ་ཟོལ་ཅན་གྱི་སྲང་ཡང་མི་ལེགས༌སོ།།
PRO 20:24 མི་ཡི་བགྲོད་ལམ་ཡ་ཝཱེས་གཏན་ལ༌འབེབ། །མི་ཡིས་རང་གི་བགྲོད་ལམ་ཇི་ལྟར༌རྟོགས།།
PRO 20:25 སུ་ཡིས་འཚབ་འཚུབ་ངང་ནས་དཀོན་མཆོག༌ཕྱིར། །འདི་ནི་དམ་པ་ཡིན་ཞེས་དམ་བཅས༌རྗེས། །བསམ་གཞིགས་གཏོང་བས་རང་ཉིད་རྙི་རུ༌ཚུད།།
PRO 20:26 རྒྱལ་པོ་མཁས་པས་ངན་པ་རྣམས་གཏོར༌ཞིང༌། །དེ་དག་འཁོར་ལོས་བཅག་བཅག་བྱེད་པ༌ཡིན།།
PRO 20:27 མི་ཡི་སེམས་ནི་ཡ་ཝཱེའི་སྒྲོན་མེ༌ཡིན། །ཕུགས་ཀྱི་བློ་སེམས་གསལ་པོར་འོད་དུ༌དགྱེ།།
PRO 20:28 བྱམས་བརྩེ་དྲང་བདེན་རྒྱལ་པོའི་སྲུང་སྐྱོབ༌ཡིན། །བྱམས་བརྩེས་ཁོང་གི་རྒྱལ་ཁྲི་བརྟན་པར༌མཛད།།
PRO 20:29 སྟོབས་ནི་སྟག་ཤར་གཞོན་པའི་དཔལ་ཡིན༌ལ། །དབུ་སྐྲ་དཀར་པོ་བགྲེས་པོའི་རྒྱན་ཆ༌ཡིན།།
PRO 20:30 ལྕག་ཚན་བསྣུན་པའི་རྨ་ཁས་ངན་པ༌སེལ། །རྡུང་རྡེག་གིས་ནི་ནང་སེམས་གཙང་མར༌མཛད།།
PRO 21:1 རྒྱལ་པོའི་སེམས་ནི་ཡ་ཝཱེའི་ཕྱག་ཏུ༌ཡོད། །ཡུར་བའི་ཆུ་བཞིན་ཁོང་ཐུགས་དགྱེས་སར༌བསྒྱུར།།
PRO 21:2 རང་གི་མིག་ལམ་ཅི་བྱས་ཐམས་ཅད༌དྲང༌། །ཡ་ཝཱེས་མི་སེམས་སྲང་ལ་འཇལ་བ༌ཡིན།།
PRO 21:3 ཡང་དག་དང་ནི་དྲང་གཞག་སྤྱོད་པ༌ནི། །མཆོད་པ་ལས་ཀྱང་ཡ་ཝཱེ་དེ་ལ༌མཉེས།།
PRO 21:4 དྲེགས་ཉམས་ལྡན་པའི་མིག་དང་ཁེངས་པའི༌སེམས། །ངན་པའི་སྒྲོན་མེ་བཅས་ནི་སྡིག་པ༌ཡིན།།
PRO 21:5 བརྩོན་པ་ཅན་གྱི་འཆར་གཞིས་ཁེ་ཕན༌རག །འཚབ་འཚུབ་ངང་ནས་སྤྱོད་པ་ཕོངས་པར༌འགྱུར།།
PRO 21:6 རྫུན་ལ་བརྟེན་ནས་ཐོབ་པའི་རྒྱུ་ནོར༌ནི། །རླངས་པ་ཙམ་དང་འཆི་བའི་རྙི་རྒྱ༌ཡིན།།
PRO 21:7 ངན་པས་དྲང་གཞག་སྤྱོད་པ་མ་འདོད༌ཕྱིར། །དེ་ཡི་གདུག་རྩུབ་ཀྱིས་ནི་རང་ཉིད༌འདྲུད།།
PRO 21:8 ཉེས་ཅན་ལམ་ནང་གཡོ་སྒྱུས་གང་བ༌དང༌། །ཉེས་མེད་ཅན་གྱི་སྤྱོད་ལམ་དྲང་པོ༌ཡིན།།
PRO 21:9 བུད་མེད་འཁོན་ཞུགས་མཉམ་དུ་ཁང་པར་སྡོད་པ༌ལས། །ཁང་པའི་ཀླད་ཀྱི་གྲུ་ཟུར་སྡོད་པ་ཅིས་མི༌ལེགས།།
PRO 21:10 ངན་པའི་སེམས་ཀྱིས་ངན་པ་འབའ་ཞིག༌བསྙེག །མིག་མདུན་ཁྱིམ་མཚེས་ལ་ནི་སྙིང་རྗེ༌མེད།།
PRO 21:11 འཕྱ་སྨོད་མཁན་ལ་ཉེས་ཆད་གཅོད་དུས༌སུ། །བླུན་རྨོངས་རྣམས་ལ་ཤེས་རབ་འཐོབ་པར༌འགྱུར། །མཁས་པར་གདམས་ངག་ཐོབ་དུས་ཤེས་ཡོན༌རྙེད།།
PRO 21:12 དྲང་བ་ཉིད་ཀྱིས་ངན་པའི་ཁྱིམ་ལ༌གཟིགས། །ངན་པ་ཆག་སྒོ་ཁྲོད་དུ་མེད་པར༌མཛད།།
PRO 21:13 དབུལ་པོའི་ཞུ་བར་རྣ་བ་འགེབ་མཁན༌གྱིས། །ཞུ་འབོད་བྱེད་དུས་ཨ་ལན་སྟེར་བ༌མེད།།
PRO 21:14 ལྐོག་ནས་སྤྲད་པའི་སྐྱེས་ཀྱིས་ཁོང་ཁྲོ༌འཇོམས། །པང་གི་ལྐོག་རྔན་གྱིས་ནི་ཁོང་ཁྲོ༌ཞི།།
PRO 21:15 དྲང་གཞག་སྤྱོད་པས་དྲང་པོ་དགའ་བར༌བྱེད། །ངན་པར་སྤྱོད་པ་རྣམས་ལ་འཇིགས་སྣང༌བསྐྱེད།།
PRO 21:16 གོ་རྟོགས་ལམ་ལས་འཛོལ་བའི་མི་དེ༌ནི། །གཤིན་པོ་རྣམས་ཀྱི་ཚོགས་ནང་ཚུད་པར༌འགྱུར།།
PRO 21:17 འདོད་ཡོན་ལ་ནི་ཆགས་པ་དབུལ་བར༌འགྱུར། །རྒུན་ཆང་སྣུམ་རྩིར་ཆགས་པ་ཕྱུག་མི༌འགྱུར།།
PRO 21:18 ངན་པ་དྲང་པོའི་བླུ་རིན་དུ་འགྱུར༌ཞིང༌། །གཡོ་སྒྱུ་ཅན་ནི་ཡ་རབས་ཚབ་བྱེད༌ཡིན།།
PRO 21:19 བུད་མེད་འཁོན་ཞུགས་ངང་ཐུང་མཉམ་དུ༌ནི། །སྡོད་པ་དེ་ལས་ཐང་སྟོང་གནས་ན༌ལེགས།།
PRO 21:20 མཁས་པ་དག་གི་ཁྱིམ་གཞིས༌སུ། །རིན་ཆེན་ནོར་དང་སྣུམ་བསགས༌ཡོད། །གླེན་པས་རང་ལ་གང་ཡོད༌བརླག།
PRO 21:21 དྲང་གཞག་དང་ནི་བྱམས་བརྩེ་སྙེག་མཁན༌ལ། །སྲོག་དང་དྲང་གཞག་བཀུར་སྟི་བཅས་འཐོབ༌བོ།།
PRO 21:22 མཁས་པས་དཔའ་བོའི་གྲོང་ལ་གཡུལ་འགྱེད༌ཅིང༌། །དེ་རྣམས་བརྟེན་སའི་བཙན་རྫོང་ས་ལ༌བརྡེབ།།
PRO 21:23 རང་གི་ཁ་དང་ལྕེ་ལ་བདག་བྱེད༌ན། །རང་ཉིད་ཆག་སྒོར་འཕྲད་པ་ལས་བསྲུང༌ངོ༌།།
PRO 21:24 ང་རྒྱལ་རང་རློམ་བྱེད་པ༌ཡི། །མིང་ལ་འཕྱ་སྨོད་མཁན་ཞེས༌བྱ། །ཁེངས་དྲེགས་དང་བཅས་སྤྱད་པ༌སྤྱོད།།
PRO 21:25 ལེ་ལོ་ཅན་གྱིས་ལས་ཀ་མི་བྱེད་པས། །དེ་ཡི་འདུན་མས་རང་ཉིད་འགུམ་པ༌འོ།།
PRO 21:26 ལ་ལས་ཉི་མ་ཧྲིལ་པོར་བརྣབས་སེམས༌བསྐྱེད། །དྲང་པོས་ཕངས་པ་གང་ཡང་མེད་པར༌སྦྱིན།།
PRO 21:27 ངན་པའི་མཆོད་པར་ཡ་ཝཱེ་ཞེན་ལོག༌སྟེ། །སེམས་ངན་བཅངས་ནས་ཕུལ་བར་ལྟ་ཅི༌སྨོས།།
PRO 21:28 དཔང་བོ་རྫུན་མ་བྱེད་པ་རྩ་མེད༌འགྲོ། །ཐོས་པ་ཟབ་མོའི་གཏམ་ནི་ཡུན་རིང༌གནས།།
PRO 21:29 ངན་པའི་ངོ་ཤ་མཐུག་ཅིང་གནོང་བ༌མེད། །འོན་ཀྱང་དྲང་པོས་རང་ལམ་བརྟན་པར༌བྱ།།
PRO 21:30 ཤེས་རབ་བློ་གྲོས་ཐབས་ཇུས་གང་ཡིན༌ཡང༌། །ཡ་ཝཱེ་ཁོང་ལ་རྒོལ་ནུས་ཡོད་མ༌ཡིན།།
PRO 21:31 རྟ་ཕོ་འཐབ་མོའི་ཕྱིར་དུ་གྲ་སྒྲིག༌བྱས། །རྒྱལ་ཁ་ཡ་ཝཱེ་ཁོང་ལ་རག་ལས༌སོ།།
PRO 22:1 དཔག་ཏུ་མེད་པའི་ནོར་ལས་མཚན་སྙན༌ལེགས། །གསེར་དང་དངུལ་ལས་བྱམས་སེམས་མཆོག་ཏུ༌གྱུར།།
PRO 22:2 འཇིག་རྟེན་འདི་རུ་དབུལ་ཕྱུག་གཉིས་ཀ༌འཛོམས། །དེ་དག་ཀུན་གྱི་མཛད་པོ་ཡ་ཝཱེ༌ལགས།།
PRO 22:3 གྲུང་པོས་བར་ཆད་མཐོང་ནས་ཡིབ་པར༌བྱེད། །བླུན་པོ་མུ་མཐུད་སྐྱོད་ཅིང་སྡུག་བསྔལ༌མྱོང༌།།
PRO 22:4 ཁེངས་སྐྱུང་དང་ནི་ཡ་ཝཱེར་འཇིགས་པ༌ལ། །རྒྱུ་ནོར་བཀུར་སྟི་སྲོག་བཅས་རྔན་པ༌ཡོད།།
PRO 22:5 ཁྲམ་པའི་ལམ་དུ་ཚེར་མ་རྙི་རྒྱས༌གང༌། །རང་སེམས་སྲུང་པ་དེ་དང་རིང་དུ༌གྱེས།།
PRO 22:6 བུ་ཆུང་སྤྱོད་ལམ་དྲང་པོར་ཁྲིད་ན༌ནི། །ལོ་ན་རྒས་ཀྱང་དེ་དང་འབྲལ་མི༌འགྱུར།།
PRO 22:7 ཕྱུག་པོས་དབུལ་པོར་དབང་སྒྱུར་བྱེད་པ༌དང༌། །སྐྱི་མཁན་བུན་བདག་རྣམས་ཀྱི་བྲན་པོ༌ཡིན།།
PRO 22:8 མི་རུང་འདེབས་པས་ཉོན་མོངས་བསྡུ་བར༌འགྱུར། །དེ་ཡི་ཁོང་ཁྲོའི་དབྱུག་པ་བརླག་ངེས༌ཡིན།།
PRO 22:9 གཏོང་ཕོད་ཆེ་བའི་མི་ལ་བདེ་བ༌ཐོབ། །རང་གི་ཁ་ཟས་དབུལ་པོར་སྦྱིན་པས༌སོ།།
PRO 22:10 འཕྱ་སྨོད་མཁན་རྣམས་སྐྲོད་དང་འཁྲུག་པ༌ཞི། །རྩོད་གླེང་ངོ་ཚ་ཡང་ནི་ཆད་པར༌འགྱུར།།
PRO 22:11 དྭངས་གཙང་སེམས་ལ་དགའ་ཞིང་གཏམ་སྙན་སྨྲ་མཁན༌ལ། །རྒྱལ་པོ་ཡང་ནི་དེ་ཡི་མཛའ་བོར་འགྱུར་བ༌འོ།།
PRO 22:12 ཡ་ཝཱེའི་སྤྱན་གྱིས་ཤེས་ཡོན་བསྲུང་ན༌ཡང༌། །གདུག་རྩུབ་ཅན་གྱི་སྨྲ་བརྗོད་རྩ་མེད༌གཏོང༌།།
PRO 22:13 ལེ་ལོ་ཅན་གྱིས་ཕྱི་རུ་སེང་གེ༌འདུག །དེ་ཡིས་བདག་ནི་སྲང་དུ་གསོད་ཅེས༌སྨྲ།།
PRO 22:14 བྱི་མོའི་སྨྲ་སྒོ་གཏིང་ཟབ་དོང་རིང༌ཡིན། །ཡ་ཝཱེ་སྡང་བའི་མི་ནི་དེ་རུ་ལྟུང༌།།
PRO 22:15 བྱིས་པའི་སེམས་ནི་རྨོངས་པས་བཅིངས་མོད༌ཀྱང༌། །གཅུན་བྱེད་དབྱུག་པས་དེ་ནི་རྒྱང་དུ༌འཕེན།།
PRO 22:16 རང་ནོར་སྤེལ་དུ་དབུལ་པོར་བརྙས་མཁན༌དང༌། །ཕྱུག་པོར་ཕྱག་རྟེན་འབུལ་བ་ཕོངས་པར༌འགྱུར།།
PRO 22:17 རྣ་བ་གཏད་ནས་མཁས་པའི་གསུང་ལ༌ཉོན། །བདག་གི་ཤེས་ཡོན་རྩེ་གཅིག་གིས་ལོངས༌ཤིག།
PRO 22:18 ཁྱོད་ཀྱིས་དེ་དག་ཡིད་ལ་འཛིན་པ༌དང༌། །ཁ་རུ་ནམ་རྒྱུན་བརྗོད་པར་རྩོམ་ན༌ནི། །ཅི་འདྲའི་ཡིད་དུ་འོང་བ་རྟོགས་འགྱུར༌རོ།།
PRO 22:19 ཁྱོད་རང་ཡ་ཝཱེ་ཁོང་ལ་བརྟེན་པའི༌ཕྱིར། །དེ་རིང་བདག་གིས་ཆེད་དུ་ཁྱོད་ལ༌བསྟན།།
PRO 22:20 ཐབས་ཇུས་དང་ནི་ཤེས་ཡོན་ལ་འབྲེལ༌བའི། །དོན་རྣམས་བདག་གིས་ཁྱོད་ལ་མ་བྲིས༌སམ།།
PRO 22:21 བདེན་པའི་ཚིག་ལན་མངག་མཁན་ལ་འདེབས་ཕྱིར། །བདེན་ཞིང་བློས་ཐུབ་གསུང་རྣམས་ཁྱོད་ལ༌བསླབ།།
PRO 22:22 དབུལ་པོ་དབུལ་ཕོངས་ཡིན་པ་མཐོང་ནས༌ནི། །དེ་ལས་འཕྲོག་བཅོམ་ཁྱོད་ཀྱིས་བྱེད་མི༌རུང༌། །མཁར་སྒོར་སྡུག་བསྔལ་ཅན་ལ་བརྙས་མི༌འོས།།
PRO 22:23 ཅིའི་ཕྱིར་ཞེ་ན་ཡ་ཝཱེས་དེ་ཚོའི༌ཕྱིར། །དག་འབུད་མཛད་ཅིང་དེ་དག་འཇོམས་མཁན༌གྱི། །ཚེ་སྲོག་ཀྱང་ནི་ཁོང་གིས་འཇོམས་པར༌འགྱུར།།
PRO 22:24 ངང་ཐུང་མི་དང་གྲོགས་མ༌བྱེད། །ཁོང་ཁྲོ་ཅན་དང་འགྲོ་འོང༌ཆོད།།
PRO 22:25 དེ་མིན་ཁྱོད་ཀྱང་ལམ་དེར༌འགྲོ། །རང་ཉིད་རྙི་རྒྱར་ཚུད་པར༌བྱེད།།
PRO 22:26 ལག་པ་འཇུས་ནས་འགན་ལེན་བྱེད་མི༌རུང༌། །བུ་ལོན་ཅན་གྱི་འགན་ལེན་བྱེད་མི་འོས།།
PRO 22:27 ཁྱོད་ལ་སྐྱིན་ཚབ་འཇལ་རྒྱུ་ཅང་མེད༌ན། །གཞན་ལ་མལ་ཁྲི་འཕྲོག་ཏུ་འཇུག་དོན༌ཅི།།
PRO 22:28 ཁྱོད་ཀྱི་མེས་པོས་གནའ་བོའི་མཐའ་མཚམས༌བཅད། །ཁྱོད་ཀྱིས་དེ་ནི་སྤོ་བར་མི་བྱ༌འོ།།
PRO 22:29 རང་གི་ལས་ཀར་འཇོན་པ་མཐོང་མྱོང༌ངམ། །དེ་ནི་རྒྱལ་པོའི་དྲུང་དུ་འགྲེང་འགྱུར༌ཞིང༌། །རང་ག་བ་རྣམས་མདུན་དུ་ལངས་པ༌མིན།།
PRO 23:1 འགོ་དཔོན་མཉམ་དུ་ཟས་ཟ༌དུས། །ཁྱོད་ཀྱི་མདུན་དུ་ཅི་ཡོད༌ལྟོས།།
PRO 23:2 ཁྱོད་ནི་གྲོད་པོ་ཆེ་ཡིན༌ན། །རང་གི་སྐེ་ལ་གྲི་ཞོག༌ཅིག།
PRO 23:3 དེ་ནི་གཡོ་སྒྱུའི་ཟས་ཡིན༌པས། །ཞིམ་པོ་དེ་ལ་ཞེ་མ༌ཆགས།།
PRO 23:4 ཕྱུག་པོར་འགྱུར་དུ་འབད་མ༌བྱེད། །ཤེས་རྒྱས་བསམ་ཚུལ་དེ་དོར༌ཅིག།
PRO 23:5 མིག་གིས་ནོར་ལ་བལྟས་ཙམ༌གྱིས། །དེ་ནི་མེད་པར་འགྱུར་བ༌སྟེ། །ནོར་དེས་གཤོག་རྩལ་བརྐྱངས་ནས༌ནི། །བྱ་གླག་བཞིན་དུ་གནམ་ལ༌འཕུར།།
PRO 23:6 སེར་སྣ་ཅན་གྱི་ཟས་མ༌ཟ། །དེའི་ཟས་ཞིམ་པོར་ཞེ་མ༌ཆགས།།
PRO 23:7 སེམས་སུ་ཅི་ལྟར་རྩིས་རྒྱག༌ན། །ཁོ་ནི་མི་ཡང་དེ་འདྲ༌ཡིན། །གསོལ་གསོལ་བཞེས་བཞེས་ཟེར་ན༌ཡང༌། །དེ་ཡི་སེམས་སུ་ཁྱོད་ནི༌མེད།།
PRO 23:8 ཁྱོད་ཀྱིས་ཅུང་ཙམ་ཟོས་པ༌སྐྱུག །བསྟོད་རའི་སྙན་ཚིག་སྟོར་པ༌ཡིན།།
PRO 23:9 གླེན་པའི་རྣ་བར་གཏམ་མ༌སྨྲ། །ཅི་ལ་ཞེ་ན་དེ་ཡིས༌ནི། །ཁྱོད་ཀྱི་ཤེས་རབ་ཚིག་ལ༌སྨད།།
PRO 23:10 གནའ་བོའི་མཐའ་མཚམས་མ་སྤོར༌ཅིག །དྭ་ཕྲུག་ས་ཞིང་འཕྲོག་མི༌རུང༌།།
PRO 23:11 དེ་དག་སྐྱབས་མགོན་ནུས་མཐུ༌ཆེ། །ཁོང་གིས་དེ་དག་ཆེད་དུ༌ནི། །དག་འབུད་མཛད་ངེས་ཡིན་པས༌སོ།།
PRO 23:12 ཞལ་གདམས་ལ་ནི་སེམས་འབུངས༌ཤིག །ཤེས་ཡོན་གཏམ་ལ་རྣ་བ༌གཏོད།།
PRO 23:13 ཕྲུ་གུར་འཇུན་དུས་ཕྱིར་མ་འཐེན། །ཁྱོད་ཀྱིས་དབྱུག་པས་དེར་བརྡུངས་ཀྱང་། །ཁོ་རང་འཆི་བར་འགྱུར་མི་སྲིད།།
PRO 23:14 ཅི་སྟེ་དབྱུག་པས་དེར་བརྡེགས༌ན། །དེའི་སྲོག་གཤིན་པོའི་ཡུལ་ལས༌སྒྲོལ།།
PRO 23:15 ངའི་བུ་ཁྱོད་ཀྱི་སེམས་ལ༌ནི། །ཤེས་རབ་ལྡན་ན་བདག་སེམས༌སྤྲོ།།
PRO 23:16 ཁྱོད་ཀྱི་མཆུ་ཡིས་བདེན་ལབ༌དུས། །ང་ཡི་ནང་སེམས་དགའ་མགུ༌རང༌།།
PRO 23:17 ཁྱོད་ཀྱི་སེམས་སུ་སྡིག་ཅན༌ལ། །ཕྲག་དོག་མ་བསྐྱེད་དུས་རྟག༌ཏུ། །ཡ་ཝཱེར་གུས་ཤིང་འཇིགས་པར༌གྱིས།།
PRO 23:18 དོན་ཀུན་མཇུག་འབྲས་ཡོད་ངེས༌པས། །ཁྱོད་ཀྱི་རེ་ཐག་ཆད་མི༌འགྱུར།།
PRO 23:19 ངའི་བུ་ཁྱོད་ཀྱིས་ཚུར་ཉོན༌ཅིག །ཤེས་རབ་དང་བཅས་རང་གི༌སེམས། །ལམ་ཁ་དེ་ལ་འཁྲིད་པར༌གྱིས།།
PRO 23:20 ཆང་འཐུང་རྣམས་དང་མ་འགྲོགས༌ཤིག །ཁ་ཟས་བག་མེད་སྤྱོད་པ༌ཡི། །མི་ཡང་གྲོགས་སུ་མ་འགུག༌ཅིག།
PRO 23:21 གང་ལ་ཞེ་ན་ཆང་འཐུང༌དང༌། །གྲོད་པོ་ཆེ་རྣམས་དབུལ་བར༌འགྱུར། །གཏི་མུག་ཅན་ནི་གོས་ཧྲུལ༌གྱོན།།
PRO 23:22 ཁྱོད་ཀྱིས་སྲོག་སྦྱིན་ཕ་ལ༌ཉོན། །མ་ནི་བགྲེས་པས་ཁྱད་མ༌གསོད།།
PRO 23:23 བདེན་པ་རག་ཅིང་འདོར༌མི་བྱ། ། ཤེས་རབ་དང་ནི་གདམས་ངག༌དང༌། །བློ་གྲོས་སོགས་ནི་འཐོབ་པར༌གྱིས།།
PRO 23:24 དྲང་པོའི་ཕ་ནི་རབ་ཏུ༌དགྱེས། །ཤེས་ལྡན་བསྐྱེད་པ་ཡི་རང༌འགྱུར།།
PRO 23:25 ཕ་མའི་སེམས་པ་དགའ་རུ༌ཆུག །ཁྱོད་རང་བཙའ་མཁན་སྤྲོ་བར༌གྱིས།།
PRO 23:26 ངའི་བུ་ཁྱོད་སེམས་ང་ལ༌ཐོངས། །མིག་གིས་བདག་གི་ལམ་ལ༌ལྟོས།།
PRO 23:27 སྨད་འཚོང་མ་ནི་དོང་རིང༌སྟེ། །བྱི་མོ་ཁྲོན་པ་གུ་དོག༌ཡིན།།
PRO 23:28 མོ་ནི་ཇག་པ་བཞིན་དུ༌འཇབ། །མིའི་ནང་རྒྱབ་གཏོད་མང་དུ༌སྤེལ།།
PRO 23:29 ཆག་སྒོ་སྡུག་བསྔལ་སུ་ལ༌ཡོད། །འཁྲུག་རྩོད་སྡུག་ཡུས་སུ་ལ༌ཡོད། །དོན་མེད་རྨས་པ་སུ་ཞིག༌ཡོད། །མིག་རྩ་དམར་པོ་ཅན་ནི༌སུ།།
PRO 23:30 རྟག་ཏུ་རྒུན་ཆང་འཐུང་བ༌དང༌། །རྒུན་ཆང་སྤེལ་མའི་རོ་བཅུད༌ལ། །མྱང་དུ་འགྲོ་མཁན་དེ་ཡིན༌ནོ།།
PRO 23:31 རྒུན་ཆང་དམར་པོ་ཕོར་བར་འོད་འཚེར༌བ། །འཇམ་པོར་ཁོག་ལ་འབབ་པ་དེར་མ༌བལྟ།།
PRO 23:32 མཇུག་མཐར་དེ་ཡིས་སྦྲུལ་ལྟར༌རྨུག །དུག་སྦྲུལ་ལྟར་དུ་མདུང་གིས༌གཙག།
PRO 23:33 མིག་གིས་ཆོ་འཕྲུལ་ལྟས་རྣམས༌མཐོང༌། །སེམས་ནས་གོ་ལོག་གཏམ་རྣམས༌སྨྲ།།
PRO 23:34 རྒྱ་མཚོའི་དཀྱིལ་དུ་ཉལ་བ༌འམ། །གྲུ་ཡི་རྩེ་མོར་ཉལ་བ༌འདྲ།།
PRO 23:35 དེ་ནས་ཁྱོད་ཀྱིས་དེ་དག༌གིས། །ང་ལ་བརྡུངས་ཀྱང་ཟུག་མ༌བྱུང༌། །ང་ལ་བརྡེགས་ཀྱང་ཚོར་བ༌མེད། །བདག་ནི་ནམ་ཞིག་སད་ཡོང༌ངམ། །ད་དུང་རྒུན་ཆང་འཚོལ་དུ༌འགྲོ། །ཞེས་སུ་སྨྲ་བར་འགྱུར་བ༌འོ།།
PRO 24:1 མི་ངན་ལ་ནི་ཕྲག་དོག་མ་བྱེད༌ཅིག །དེ་དང་འགྲོགས་པའི་རེ་འདོད་སྤང་བར༌གྱིས།།
PRO 24:2 རྒྱུ་མཚན་དེ་དག་སེམས་ཀྱིས་གདུག་རྩུབ༌སྙེག །དེ་ཚོའི་ཁ་ནས་བསྟན་བཤིག་གཏམ་གླེང༌བྱ།།
PRO 24:3 ཤེས་རབ་ལ་བརྟེན་ཁང་པ་བརྩིགས་པ༌དང༌། །གོ་རྟོགས་ཀྱིས་ནི་ཁང་པ་ཚུགས་པར༌བྱེད།།
PRO 24:4 ཤེས་ཡོན་བརྒྱུད་ནས་ཁང་མིག་སོ་སོ༌རུ། །རིན་པོ་ཆེ་དང་ཡིད་འོང་ནོར་རྫས༌འགེངས།།
PRO 24:5 ཤེས་ལྡན་སྟོབས་དང་ལྡན་པ༌དང༌། །ཤེས་ཡོན་ཅན་གྱི་མཐུ་སྟོབས༌རྒྱས།།
PRO 24:6 ཐབས་མཁས་ཀྱིས་ནི་གཡུལ་འགྱེད༌དགོས། །གྲོས་མི་མང་ན་རྒྱལ་ཁ༌ལོན།།
PRO 24:7 བླུན་པོར་ཤེས་རབ་ཆེས་འཕགས༌པས། །མཁར་སྒོར་དེ་ཡིས་ཁ་མི༌གྲགས།།
PRO 24:8 ཐབས་བཀོད་ངན་པ་འཐེན་མཁན༌ལ། །ངན་ཤོམ་བྱེད་པོ་ཞེས་སུ༌འབོད།།
PRO 24:9 བླུན་པོའི་གཡོ་ཇུས་སྡིག་པ་ཡིན་པ༌དང༌། །འཕྱ་སྨོད་མཁན་ལ་མི་རྣམས་ཞེན་པ༌ལོག།
PRO 24:10 སྡུག་བསྔལ་ཉིན་མོར་ཡིད་ཕམ༌ན། །ཁྱོད་ཀྱི་སྟོབས་ཤུགས་ཆུང་བ༌ཡིན།།
PRO 24:11 གསོད་དུ་འདྲུད་རྣམས་སྐྱོབ་པར༌གྱིས། །འཆི་ཁར་འཁྱོར་བ་ཕྱིར་འཐེན༌བྱོས།།
PRO 24:12 བདག་གིས་མ་ཤེས་ཞེས་སྨྲ༌ན། །མི་སེམས་སྲང་ལ་འཇལ་མཁན༌གྱིས། །དེ་ནི་རྟོགས་པ་མ་ཡིན༌ནམ། །ཁྱོད་ཀྱི་ཚེ་སྲོག་སྲུང་མཁན༌གྱིས། །དེ་ནི་མཁྱེན་པ་མ་ཡིན༌ནམ། །ཁོང་གིས་རེ་རེའི་བྱ་སྤྱོད༌བཞིན། །རེ་རེར་ལན་ཞིག་མི་གནང༌ངམ།།
PRO 24:13 ངའི་བུ་སྦྲང་རྩི་བཟང་བས་དེ་ཟོ༌ཞིག །སྦྲང་ཚང་ཁ་ཡི་སྦྲང་རྩི་ཁ་ལ༌མངར།།
PRO 24:14 ཤེས་རབ་ཁྱོད་ཀྱི་ཡིད༌ལ་ཡང་། །དེ་བཞིན་ཡིན་པ་ཤེས་པར༌གྱིས། །གལ་སྲིད་ཤེས་རབ་ཐོབ་ན༌ནི། །ཁྱོད་ལ་མཇུག་འབྲས་ལེགས་པོ༌འབྱུང༌། །རེ་ལྟོས་ཀྱང་ནི་ཟད་མི༌འགྱུར།།
PRO 24:15 ངན་པ་ཁྱོད་ནི་དྲང་པོ༌ཡི། །ཁྱིམ་ལ་རྒོལ་བར་མ་འཇབ༌ཅིག །དེ་ཡི་སྡོད་གནས་མ་བརླག༌ཅིག།
PRO 24:16 གང་ལ་ཞེ་ན་དྲང་པོ༌ནི། །ལན་བདུན་འགྱེལ་ཡང་སླར་འགྲེང༌ནུས། །ངན་པ་བར་ཆད་ནང་དུ༌ལྟུང༌།།
PRO 24:17 དགྲ་བོ་འགྱེལ་དུས་ཁྱོད་མ༌དགའ། །དེ་ཁ་རྡབ་དུས་སེམས་མ༌སྤྲོ།།
PRO 24:18 དེ་ནས་ཡ་ཝཱེས་གཟིགས་ན༌ནི། །ཁོང་ཉིད་ཁྱོད་ལ་ཐུགས་མི༌དགྱེས། །ཁོང་གི་ཐུགས་ཁྲོ་དགྲ་ལས༌འཐེན།།
PRO 24:19 ངན་པའི་ཕྱིར་དུ་སེམས་མ༌འབར། །དེ་ལ་ཕྲག་དོག་ཀྱང་མ༌བསྐྱེད།།
PRO 24:20 གང་ལ་ཞེ་ན་མི་ངན༌ལ། །མཇུག་འབྲས་ལེགས་པོ་ཡོད་མ༌ཡིན། །ངན་པའི་སྒྲོན་མེ་ཞི་བར༌འགྱུར།།
PRO 24:21 ངའི་བུ་ཁྱོད་ཀྱིས་ཡ་ཝཱེ༌ལ། །གུས་ཤིང་འཇིགས་པར་གྱིས་ཤིག༌ཨང༌། །རྒྱལ་པོ་ལ་ཡང་བཀུར་བར༌གྱིས། །ངོ་ལོག་ཅན་དང་མ་འགྲོགས༌ཤིག།
PRO 24:22 ཅིའི་ཕྱིར་ཞེ་ན་དེ་དག༌ལ། །གློ་བུར་ཉེས་ཆད་འབྱུང་བར༌འགྱུར། །ཡ་ཝཱེ་དང་ནི་རྒྱལ་པོ༌ལས། །བར་ཆད་ཅི་འབྱུང་སུ་ཡིས༌རྟོགས།།
PRO 24:23 གཤམ་གྱི་ཚིག་འདི་རྣམས་ཀྱང་ཤེས་ལྡན༌གསུང༌། །ཁྲིམས་ཐག་གཅོད་དུས་ཕྱོགས་རིས་འཛིན་པ༌ཐན།།
PRO 24:24 ངན་པར་ཁྱོད་ནི་མི་བཟང་རེད་ཅེས༌ན། །མི་སྡེ་ཀུན་གྱིས་དེ་ལ་དམོད་མོ༌འདེབས། །མི་རིགས་ཡོངས་ཀུན་དེ་ལ་ཞེ་སྡང༌སྐྱེ།།
PRO 24:25 ངན་པར་གཤེ་གཤེ་གཏོང་བར་དགའ་མོས༌འབྱུང༌། །བྱིན་རླབས་ཆེན་པོ་དེ་རྣམས་ལ་འཐོབ༌བོ།།
PRO 24:26 ཚིག་ལན་དྲང་པོར་སྨྲ་བ༌ནི། །མཆུ་སྒྲོས་སྟེང་ལ་འོ་སྐྱེལ༌བཞིན།།
PRO 24:27 ཕྱི་ཡི་ལས་ཀ་འགྲུབ་པར༌གྱིས། །ས་ཞིང་གྲ་སྒྲིག་ལེགས་པོ༌བྱོས། །དེ་ནས་ཁང་པ་བརྩིག་པར༌གྱིས།།
PRO 24:28 དོན་མེད་རང་གི་ཁྱིམ་མཚེས༌ལ། །གནོད་པའི་དཔང་པོར་མ་གྱུར༌ཅིག །མཆུ་སྒྲོས་མགོ་སྐོར་གཏོང་མི༌རུང༌།།
PRO 24:29 མི་ཡིས་ང་ལ་ཅི་བྱས༌ན། །ངས་ཀྱང་ཁོ་ལ་དེ་བཞིན༌བྱ། །མི་དེའི་ལས་ལ་འོས་པའི༌ལན། །འཇལ་བར་བྱ་འོ་མ་ཟེར༌ཞིག།
PRO 24:30 ང་རང་ལེ་ལོ་ཅན་གྱི་ཞིང་ཁ༌དང༌། །བླུན་པོའི་རྒུན་ཚལ་བརྒྱུད་ནས་འགྲོ་དུས༌སུ།།
PRO 24:31 གང་ས་གང་ལ་ཚེར་མ་སྐྱེས་པ༌དང༌། །ས་ངོས་ཡོངས་ལ་རྩྭ་ལྡུམ་གྱིས་ཁེབས༌ཤིང༌། །རྡོ་ཡི་ལྕགས་རི་ཞིག་རལ་གྱུར་པ༌མཐོང༌།།
PRO 24:32 བདག་གིས་ཅི་ཞིག་མཐོང་བར་བསམ་བློ༌བཏང༌། །ཞིབ་པར་བལྟས་ནས་བསླབ་བྱ་ཐོབ་པ༌འོ།།
PRO 24:33 ད་དུང་ཡུད་ཙམ་གཉིད་ཅིག་དང༌། །སྐད་ཅིག་ཙམ་ལ་གཉིད་དུ༌ཡུར། །ལག་པ་འཁུམས་ལ་ཨེན་ཙམ༌སྡོད།།
PRO 24:34 དེ་ནས་ཁྱོད་ཀྱི་དབུལ་ཕོངས༌ནི། །ཆོམ་པོ་བཞིན་དུ་བསླེབ་ཡོང༌ཞིང༌། །དཀོན་པོ་མཚོན་ཐོགས་ཚུལ་དུ༌བསླེབ།།
PRO 25:1 ཡ་ཧུ་དཱ་ཡི་རྒྱལ་པོ་ཧི་ཟི་ཀི༌ཡཱའི་མི་རྣམས་ཀྱིས་བཤུས་ནས་ཐོན་པའི་སོ་ལོ་མོན་གྱི་ལེགས་བཤད་ནི་འདི་ལྟ༌སྟེ།
PRO 25:2 གསང་བར་བྱེད་པ་དཀོན་མཆོག་དཔལ་ཡིན༌ཞིང༌། །རྩད་གཅོད་བྱེད་པ་རྒྱལ་པོའི་གཟི་དཔལ༌ཡིན།།
PRO 25:3 མཐོན་པོ་གནམ་དང་སྟུག་པོ་ས་གཞི༌བཞིན། །རྒྱལ་པོའི་སེམས་ཀྱང་རྟོགས་པར་མི་ནུས༌སོ།།
PRO 25:4 དངུལ་གྱི་སྙིགས་རོ་ཕྱུང་ཞིག༌དང༌། །དངུལ་མགར་གྱིས་ནི་སྣོད་ཆས༌བཟོ།།
PRO 25:5 ངན་པ་རྒྱལ་པོའི་མདུན་ནས༌སྐྲོད། །དྲང་པོའི་ནང་དུ་རྒྱལ་ཁྲི༌བརྟན།།
PRO 25:6 རྒྱལ་པོའི་དྲུང་དུ་རང་རློམ་བྱེད་མི༌རུང༌། །མི་ཆེན་ཁྲོད་དུ་རང་དགར་འགྲེང་མི༌རུང༌།།
PRO 25:7 ཁྱོད་ཀྱིས་དངོས་སུ་མཐོང་བ༌ཡི། །སྐུ་དྲག་མདུན་དུ་འབེབས་པ༌ལས། །གྲལ་མགོར་ཕེབས་ཤོག་ཟེར་ན༌ལེགས།།
PRO 25:8 རྟབ་རྟོབ་མི་ལ་འཐབ་ཕྱིར་འགྲོ་མི༌རུང༌། །དེ་ལྟར་བྱས་ཚེ་ཁྱོད་རང་ཁྱིམ་མཚེས༌ཀྱིས། །ངོ་ཚར་གཏད་ན་ཁྱོད་ཀྱིས་ཅི༌བྱ་འམ།།
PRO 25:9 རྩོད་གཞི་ཡོད་ན་ཁྱིམ་མཚེས་ཁོ་ནར༌རྩོད། །གཞན་གྱི་གསང་བ་ཕྱི་ལ་འཆད་མི༌རུང༌།།
PRO 25:10 བཤད་ན་ཐོས་པའི་མི་ཡིས་ཁྱོད་ལ༌བསྡིག །ཁྱོད་རང་མིང་ངན་ལས་ནི་ཐར་མི༌འགྱུར།།
PRO 25:11 ཚིག་གཅིག་སྨྲས་པ་གནད་ལ་ཁེལ་ན༌ནི། །དངུལ་གྱི་སྣོད་ནང་གསེར་གྱི་ཀུ་ཤུ༌འདྲ།།
PRO 25:12 མཁས་པའི་ཞལ་ཏ་བཀའ་ལ་ཉན་པ༌ཡི། །རྣ་བར་མཚོན་ན་གསེར་གྱི་རྣ་ཆ༌དང༌། །བཙོ་མའི་གསེར་གྱི་རྒྱན་ཆ་ལྟ་བུ༌ཡིན།།
PRO 25:13 བློ་སེམས་དཀར་བའི་བང་ཆེན༌དེ། །ཁོ་རང་མངག་མཁན་མི་ལ༌ནི། །སྟོན་ཐོག་བསྡུ་བའི་དུས་ཚིགས༌སུ། །ཁ་བའི་བསིལ་བུ་བཞིན་ཡིན༌ཏེ། །བདག་པོའི་སེམས་ཁམས་གསོ་བར༌བྱེད།།
PRO 25:14 རྔན་པར་བསྟོད་ཀྱང་མི་སྦྱིན༌པ། །ཆར་བ་མེད་པའི་སྤྲིན་དང༌མཚུངས།།
PRO 25:15 ཡུན་རིང་བཟོད་བསྲན་བྱེད་མཁན༌གྱིས། །དཔོན་པོའི་བློ་ཁ་བསྒྱུར་བ༌དང༌། །ལྕེ་འཇམ་གྱིས་ནི་རུས་པ༌གཅོག།
PRO 25:16 སྦྲང་རྩི་ཐོབ་ན་འཇུ་ཚད༌ཟོ། །མང་མང་ཟོས་ན་སྐྱུག་པར༌འགྱུར།།
PRO 25:17 ཁྱིམ་མཚེས་ནང་དུ་རྐང་པ་སྤོ་མ༌མང༌། །མང་ན་ཁོ་ནི་ཁྱོད་ལ་སུན་ཞིང༌སྡང༌།།
PRO 25:18 རྫུན་གྱི་དཔང་པོས་ཁྱིམ་མཚེས་ལ་འཚེ༌མཁན། །ཐོ་བ་རལ་གྲི་རྣོན་པོ་མདའ་དང༌འདྲ།།
PRO 25:19 ཆག་སྒོ་འབྱུང་དུས་ཁྲམ་པར་བརྟེན་པ༌ནི། །སོ་ཆག་ཚིགས་འབུད་རྐང་པར་བརྟེན་དང༌མཚུངས།།
PRO 25:20 སྐྱོ་གདུང་སེམས་ལ་གླུ་གཞས་ལེན་པ༌ནི། །འཁྱག་པའི་དུས་སུ་གྱོན་གོས་ཕུད་པ༌དང༌། །རྨ་ཁའི་སྟེང་ལ་སྐྱུར་ཁུ་བླུགས་འདྲ༌ཡིན།།
PRO 25:21 ཁྱོད་ཀྱི་དགྲ་བོ་ལྟོགས་ན་ཁ་ཟས༌བྱིན། །སྐོམ་པ་བྱུང་ན་དེ་ལ་འཐུང་ཆུ༌སྦྱིན།།
PRO 25:22 གང་ལ་ཞེ་ན་དེ་བཞིན་སྒྲུབ་པ༌ནི། །དེ་ཡི་མགོ་ལ་སོལ་མེ་སྤུངས་པ༌ཡིན། །ཡ་ཝཱེས་ཁྱོད་ལ་བྱ་དགའ་གནང་བར༌འགྱུར།།
PRO 25:23 བྱང་རླུང་གིས་ནི་ཆར་བ་འདྲེན་པ༌ལྟར། །ལྐོག་ངན་སྨྲ་བའི་ལྕེ་ཡིས་ངོ་གདོང༌གནག།
PRO 25:24 བུད་མེད་འཁོན་ཞུགས་མཉམ་དུ་ཁང་པར་སྡོད་པ༌ལས། །ཁང་པའི་ཀླད་ཀྱི་གྲུ་ཟུར་སྡོད་པ་ཅིས་མི༌ལེགས།།
PRO 25:25 རྒྱང་རིང་ཡུལ་ནས་ཐོན་པའི་གཏམ་བཟང༌ནི། །ངལ་བའི་མི་ལ་གྲང་མོ་ཆུ་བཞིན༌ཡིན།།
PRO 25:26 ངན་པའི་མདུན་དུ་དྲང་པོ་མགོ་བསྒུར༌ན། །རྙོག་པའི་ཆུ་མིག་སྦགས་པའི་ཁྲོན་པ༌བཞིན།།
PRO 25:27 སྦྲང་རྩི་ཚད་མེད་སྤྱད་ན་མི་ལེགས༌ཤིང༌། །རང་ལ་བཀུར་སྟི་འཚོལ་བ་དེ་བཞིན༌ཡིན།།
PRO 25:28 རང་གི་སེམས་ལ་ཚོད་འཛིན་མི་བྱེད༌ན། །ལྕགས་རི་མེད་པའི་ཞིག་རལ་གྲོང་དང༌མཚུངས།།
PRO 26:1 དབྱར་གྱི་དུས་སུ་ཁ་བ༌དང༌། །སྟོན་ཀར་ཆར་བ་འབབ་པ༌བཞིན། །གླེན་པར་བཀུར་སྟི་འོས་མ༌ཡིན།།
PRO 26:2 གང་སར་འཕུར་བའི་མཆིལ་པ༌དང༌། །ལྡིང་སྐོར་རྒྱག་པའི་ཁུག་རྟ༌བཞིན། །དོན་མེད་དམོད་པ་འཕོག་མི༌འགྱུར།།
PRO 26:3 རྟ་ལ་ལྕག་དང་བོང་བུར༌སྲབ། །དེ་དང་དེ་བཞིན་གླེན་པ༌རྣམས། །རྒྱབ་ལ་དབྱུག་པ་མཁོ་བ༌ཡིན།།
PRO 26:4 གླེན་པར་དེ་ཡི་བླུན་རྨོངས༌བཞིན། །ཚིག་ལན་མ་འདེབས་བཏབ་ན༌ནི། །ཁྱོད་ཀྱང་ཁོ་ལྟར་འགྱུར་ཉེན༌ཡོད།།
PRO 26:5 གླེན་པར་དེ་ཡི་བླུན་རྨོངས༌བཞིན། །ཚིག་ལན་འདེབས་དགོས་མ་བཏབ༌ན། །དེ་ཡིས་རང་ཉིད་མཁས་པར༌བརྩི།།
PRO 26:6 གླེན་ལག་བརྒྱུད་ནས་འཕྲིན་སྐུར༌མཁན། །རང་གི་རྐང་པ་རང་གིས༌འབྲེག །གདུག་རྩུབ་རང་གིས་ཉོ་བ༌ཡིན།།
PRO 26:7 གླེན་པའི་ཁ་ལ་ལེགས་བཤད༌ནི། །མཁོ་མེད་དཔྱངས་པའི་ཞ་རྐང༌བཞིན།།
PRO 26:8 གླེན་པར་བཀུར་སྟི་བྱེད་པ༌ནི། །འུར་ཆར་འུར་རྡོ་བསྡམས་པ༌འདྲ།།
PRO 26:9 གླེན་པའི་ཁ་ལ་ལེགས་བཤད༌ནི། །ར་བཟིའི་ལག་གི་ཚེར་མ༌བཞིན།།
PRO 26:10 གླེན་པ་དང་ནི་ལམ་འགྲོ་གླ་བ༌ནི། །ཐམས་ཅད་རྨས་པར་བྱེད་པའི་མདའ་པར༌མཚུངས།།
PRO 26:11 ཁྱི་ཕྱིར་འཁོར་ནས་སྐྱུག་རོར་ལོག་པ༌བཞིན། །གླེན་པས་ཡང་དང་བསྐྱར་དུ་གླེན་རྟགས༌སྟོན།།
PRO 26:12 རང་ཉིད་མཁས་པར་རློམ་པ་མཐོང་མྱོང༌ངམ། །དེ་ལས་གླེན་པར་རེ་བ་ལྡན་པ༌ཡིན།།
PRO 26:13 ལེ་ལོ་ཅན་གྱིས་ལམ་ཁར་སེང་གེ༌འདུག །ཐང་ཆེན་དུ་ཡང་སེང་གེ་ཡོད་ཅེས༌སྨྲ།།
PRO 26:14 སྒོ་གླེགས་འཁོར་མིག་ཁ་རུ་འཁོར་བ༌ལྟར། །ལེ་ལོ་ཅན་ནི་མལ་ཁྲི་སྟེང་ནས༌འཁོར།།
PRO 26:15 ལེ་ལོས་སྡེར་མའི་ནང་དུ་ལག་བརྐྱངས༌ནས། །ཁ་ཟས་རང་གི་ཁ་ལ་སྐྱེལ་མི༌འདོད།།
PRO 26:16 ལེ་ལོ་ཅན་གྱིས་རང་ལ་བལྟས་ན༌ནི། །ཁུངས་སྐྱེལ་ནུས་པའི་སྐྱེ་བོ་བདུན་ལས༌མཁས།།
PRO 26:17 ལམ་འགྲོ་པ་ཞིག་དགོས་མེད༌ཀྱི། །འཁོན་འཛིང་ནང་དུ་ཞུགས་མཁན༌ནི། །ཁྱི་ཡི་རྣ་བ་འཐེན་པ༌འདྲ།།
PRO 26:18 མི་ཡིས་ཁྱིམ་མཚེས་བསླུས་པ༌དང༌། །ཀུ་རེ་ཡིན་ཞེས་སྨྲ་བ༌ནི། །སྨྱོན་པས་མགལ་མེ་མདའ་རྣོན༌པོ། །སྲོག་ལེན་མཚོན་ཆ་འཕེན་པར༌མཚུངས།།
PRO 26:20 བུད་ཤིང་མེད་ན་མེ་ཡང༌ཞི། །དཀྲུག་མཁན་མེད་སར་རྩོད་གཞི༌འཇགས།།
PRO 26:21 འཁོན་འཛིང་ཅན་གྱིས་རྩོད་གཞི་སློང་བ༌ནི། །སོལ་མེའི་སྟེང་དུ་སོལ་བ་འཇོག་པ༌དང༌། །མེ་ཡི་སྟེང་དུ་བུད་ཤིང་འཇོག་པ༌འདྲ།།
PRO 26:22 ཕྲ་མ་བྱེད་པའི་མི་ཡི་སྨྲ་བརྗོད༌ནི། །ཟས་མཆོག་བཞིན་དུ་གྲོད་པའི་ཕུགས་སུ༌འཇུག།
PRO 26:23 ཁ་ནི་འབར་ཡང་སེམས་ནི་ངན་པ༌དེ། །དངུལ་གྱི་སྙིགས་མས་བཏུམས་པའི་རྫ་ཆས༌འདྲ།།
PRO 26:24 སྡང་སེམས་ཅན་གྱིས་རང་ཉིད་ཚིག་གིས༌འགེབས། །འོན་ཀྱང་བསམ་པའི་ནང་དུ་གཡོ་སྒྱུ༌བཅངས།།
PRO 26:25 དེ་ཡི་ཚིག་ནི་སྙན་ཡང་བློ་མ༌གཏོད། །དེ་ཡི་སེམས་སུ་ཞེན་ལོག་རིགས་བདུན༌མཆིས།།
PRO 26:26 དེ་ཡི་སྡང་སེམས་གཡོ་སྒྱུས་སྦས༌ན་ཡང་། །དེ་ཡི་ངན་པ་ཚོགས་ཀྱི་མདུན་དུ༌མངོན།།
PRO 26:27 ས་དོང་འདྲུ་མཁན་དེ་ཡི་ནང་དུ༌ལྟུང༌། །རྦབ་རྡོ་བགྲིལ་མཁན་རྦབ་རྡོའི་འོག་ཏུ༌འཆོར།།
PRO 26:28 རྫུན་གྱི་ལྕེ་ནི་རང་གིས་རྨས་པར༌སྡང༌། །ངོ་དགའ་བྱེད་པའི་ཁ་ཡིས་བརླག་པར༌འགྱུར།།
PRO 27:1 ཉིན་གཅིག་ཅི་འབྱུང་ཁྱོད་ཀྱིས་མི་ཤེས༌པས། །སང་ཉིན་དོན་ལ་ཁ་ཕོ་མ་བྱེད༌ཅིག།
PRO 27:2 གཞན་ལ་བསྟོད་དུ་འཇུག་པ༌ལས། །རང་ཁས་རང་ལ་བསྟོད་མི༌རུང༌། །གཞན་གྱིས་བསྟོད་བསྔགས་བྱེད་པ༌ལས། །རང་གི་མཆུ་ཡིས་བསྟོད་མི༌འོས།།
PRO 27:3 རྡོ་བ་ལྕི་ཞིང་བྱེ་མ་ཡང་ལྗིད༌དེ། །བླུན་པོའི་ཁོང་ཁྲོ་དེ་ལས་ཀྱང་ལྕི༌འོ།།
PRO 27:4 ཁོང་ཁྲོ་གདུག་རྩུབ་ཆེ་བ༌དང༌། །ཁྲོ་གཏུམ་ཆུ་ལོག་ཡིན་ན༌ཡང༌། །ཕྲག་དོག་མདུན་དུ་སུ་ཞིག༌ཚུགས།།
PRO 27:5 དྲང་མོར་བཀའ་བཀྱོན་མཛད་པ༌ནི། །ལྐོག་ནས་བརྩེ་བ་བྱེད་པས༌ལྷག།
PRO 27:6 མཛའ་བོས་ཕྱུང་བའི་རྨ་ཁ་སླུ་མེད༌ཡིན། །དགྲ་བོས་ཁྱོད་ལ་ཡང་ཡང་ཁ་སྐྱེལ༌ལོ།།
PRO 27:7 རྒྱགས་པའི་ཁ་ནི་སྦྲང་རྩི་ལ་ཡང༌སྡང༌། །ལྟོགས་ན་ཁ་ཏིག་ཀྱང་ནི་མངར་མོ༌ཡིན།།
PRO 27:8 ཁྱིམ་དང་བྲལ་བ་ཕྱོགས་བཞིར༌འཁྱམ། །ཚང་ལས་འཁྱར་བའི་བྱ་དང༌འདྲ།།
PRO 27:9 བྱུགས་རྫས་དང་ནི་བསུང་རྫས༌ཀྱིས། །མི་སེམས་སྤྲོ་བར་བྱེད་པ༌དང༌། །མཛའ་བོའི་ཁ་ཏ་མངར་བ༌ཡིན།།
PRO 27:10 རང་གི་གྲོགས་དང་ཕ་ཡི༌གྲོགས། །ཁྱོད་ཀྱིས་གང་ཡང་འདོར་མི༌བྱ། །ཆག་སྒོར་འཕྲད་པའི་ཉིན་མོ༌ལ། །སྤུན་ཟླའི་ཁྱིམ་ལ་མ་འགྲོ༌ཞིག །རྒྱང་ཐག་རིང་བའི་སྤུན་ཟླ༌ལས། །ཉེ་བར་ཡོད་པའི་ཁྱིམ་མཚེས༌ལེགས།།
PRO 27:11 ངའི་བུ་ཁྱོད་ནི་ཤེས་རབ་ལྡན་གྱུར༌ནས། །ང་ཡི་སེམས་པ་སྤྲོ་བར་གྱིས་ཤིག༌དང༌། །ང་རང་སྨད་མཁན་ལ་ནི་ལན་གདབ་བོ།།
PRO 27:12 གྲུང་པོས་བར་ཆད་མཐོང་ནས་ཡིབ་པར༌བྱེད། །བླུན་པོ་མུ་མཐུད་སྐྱོད་ཅིང་སྡུག་བསྔལ༌མྱོང༌།།
PRO 27:13 སུ་ཞིག་རྒྱུས་མེད་འགན་ལེན་བྱེད་ན༌ནི། །དེ་ཡི་ཕྱི་གོས་ལེན་པར་གྱིས་ཤིག༌དང༌། །དེ་ཡིས་བྱི་མོའི་འགན་ལེན་བྱེད་ན༌ནི། །དེ་ནི་འགན་ལེན་པ་རུ་འགྱུར་དགོས༌སོ།།
PRO 27:14 སྔ་མོ་ལངས་ནས་ཁྱིམ་མཚེས༌ལ། །སྐད་གསང་མཐོན་པོས་ཤིས་བརྗོད༌པ། །དེ་ནི་སྨོན་ལོག་ཏུ་འགྱུར༌རོ།།
PRO 27:15 བུད་མེད་འཁོན་འཛིང་ཅན་དེ༌ནི། །དྲག་ཆར་ཉིན་མོའི་ཐིགས་པར༌མཚུངས།།
PRO 27:16 འགོག་པར་བསམས་པས་རླུང་ནི་འགོག་པ༌དང༌། །ལག་པ་གཡས་པས་སྣུམ་ནི་འཛིན་དང༌མཚུངས།།
PRO 27:17 ལྕགས་ནི་ལྕགས་ཀྱིས་རྣོན་པོར་བརྡར་བ༌ལྟར། །མཛའ་གྲོགས་ཕན་ཚུན་བརྡར་ན་རིག་པ༌རྣོ།།
PRO 27:18 སེ་ཡབ་ཤིང་ལ་བདག་སྐྱོང་བྱེད་མཁན༌གྱིས། །དེ་ཡི་འབྲས་བུ་སྤྱོད་པར་གདོན་མི༌ཟ། །བདག་པོར་ཞབས་ཕྱི་སྒྲུབ་པར་བཀུར་སྟི༌འབྱུང༌།།
PRO 27:19 ཆུ་ནང་ཇི་ལྟར་ངོ་གདོང་འཆར་བ༌བཞིན། །མི་ཡི་བསམ་པས་མི་དེ་མཚོན་པ༌ཡིན།།
PRO 27:20 གཤིན་ཡུལ་དམྱལ་ཁམས་ཚིམ་པ་མེད་པ༌ལྟར། །མི་ཡི་མིག་ཀྱང་དེ་དང་དེ་བཞིན༌ཡིན།།
PRO 27:21 གསེར་དངུལ་བཙོ་ཕྱིར་མེ་ཐབ་ལུགས་ཀོང༌ཡོད། །གཞན་གྱི་བསྟོད་པས་མི་ལ་བརྟག་པ༌ཡིན།།
PRO 27:22 ཁྱོད་ཀྱིས་འབྲུ་དང་མཉམ་དུ་བླུན་པོ༌ནི། །གཏུན་ཁུང་ནང་དུ་བརྡུངས་པ་ཡིན་ན༌ཡང༌། །དེ་ཡི་བླུན་རྨོངས་ཁོ་དང་འབྲལ་མི༌འགྱུར།།
PRO 27:23 ཁྱོད་ཀྱིས་ལུག་ཁྱུའི་གནས་ཚུལ་རྟོགས་དགོས༌ལ། །རང་གི་བ་ཁྱུར་བདག་སྐྱོང་ལེགས་པོ༌བྱོས།།
PRO 27:24 གང་ལ་ཞེ་ན་རྒྱུ་ནོར་ཡུན་མི༌གཏན། །མི་རབས་མི་རབས་ཅོད་པན་ཡང་མི༌ལུས།།
PRO 27:25 རྩྭ་སྐྱ་འབྲེག་ཅིང་རྩྭ་སྔོན་སྐྱེ་བ༌ཡིན། །རི་བོའི་རྩྭ་ཡང་ཕུང་པོར་བསྡུ་བ༌འོ།།
PRO 27:26 ལུ་གུ་ཁྱོད་ཀྱི་གྱོན་གོས༌ཡིན། །ར་ནི་ཞིང་གི་རིན་པ༌ཡིན།།
PRO 27:27 ཁྱོད་དང་ཁྱིམ་མི་གང་པོ་དང༌། །བྲན་མོ་རྣམས་ཀྱི་འཚོ་བའི༌ཕྱིར། །ར་མའི་འོ་མས་འདང་བར༌འགྱུར།།
PRO 28:1 ངན་པ་འདེད་མཁན་མེད་ཀྱང་འབྲོ༌ན་ཡང་། །དྲང་པོ་སེང་གེ་བཞིན་དུ་ཞུམ་པ༌མེད།།
PRO 28:2 རྒྱལ་ཁམས་ཤིག་ལ་ཉེས་སྐྱོན་མངའ་བས༌ན། །དེ་ལ་འགོ་དཔོན་མང་དུ་འབྱུང་བ༌འོ། །བློ་གྲོས་ཤེས་ཡོན་ལྡན་པས་སྲིད་བརྟན༌ཡོང་།།
PRO 28:3 དབུལ་པོས་དབུལ་པོར་གཉའ་གནོན་བྱེད་པ༌ནི། །འབྲུ་རིགས་ཡོངས་སུ་འཁུར་བའི་དྲག་ཆར༌འདྲ།།
PRO 28:4 བཀའ་ཁྲིམས་འདོར་བའི་མི་ཡིས་ངན་པར༌བསྟོད། །བཀའ་ཁྲིམས་སྲུང་མཁན་གྱིས་ནི་ངན་པར༌རྒོལ།།
PRO 28:5 མི་ངན་གྱིས་ནི་དྲང་གཞག་གོ་བ༌མིན། །ཡ་ཝཱེ་འཚོལ་མཁན་ཐམས་ཅད་ལེགས་པར༌རྟོགས།།
PRO 28:6 སྤྱོད་པ་ཕྱིན་ཅི་ལོག་པའི་ཕྱུག་བདག༌ལས། །དྲང་པོར་སྤྱོད་པའི་དབུལ་པོ་ལེགས་པ༌འོ།།
PRO 28:7 བཀའ་རྒྱ་སྲུང་མཁན་བློ་གྲོས་བུ་ཡིན༌ཞིང༌། །ཟས་རྔམ་ཅན་དང་འགྲོགས་པའི་མི་དེས༌ནི། །རང་གི་ཕ་ཡང་ངོ་ཚར་སྦྱོར་བ༌ཡིན།།
PRO 28:8 སྐྱེད་ཀ་མཐོན་པོས་རང་ནོར་སྤེལ་བ༌དེས། །དབུལ་པོར་སྙིང་རྗེ་བྱེད་པའི་དོན་དུ༌གསོག།
PRO 28:9 ཁ་ཕྱིར་འཁོར་ནས་བཀའ་རྒྱར་མི་ཉན༌པའི། །སྨོན་ལམ་ཡང་ནི་ཞེན་པ་ལོག་པར༌རྩི།།
PRO 28:10 དྲང་པོ་ལོག་ལམ་འདྲེན་མཁན༌ནི། །རང་གི་དོང་ནང་ལྟུང་བར༌འགྱུར། །སྐྱོན་དང་བྲལ་བར་ནོར་སྐལ༌འཐོབ།།
PRO 28:11 ཕྱུག་པོས་རང་ཉིད་མཁས་པར༌འཛིན། །དབུལ་པོ་མཛངས་པས་དེ་ནི༌རྟོགས།།
PRO 28:12 དྲང་པོ་རྒྱལ་དུས་གཟི་དཔལ་ཤིན་ཏུ༌ཆེ། །ངན་པ་དར་དུས་མི་རྣམས་གཡོལ་བར༌འགྱུར།།
PRO 28:13 རང་གི་ཉེས་སྐྱོན་སྦེད་མཁན་དོན་མི༌འགྲུབ། །རང་སྐྱོན་མཐོལ་ནས་སྤང་བར་ཐུགས་རྗེ༌འཐོབ།།
PRO 28:14 རྟག་ཏུ་གུས་ཤིང་འཇིགས་པའི་མི་ནི༌བདེ། །སེམས་པ་གྱོང་པོ་བར་ཆད་ནང་དུ༌ལྟུང༌།།
PRO 28:15 གདུག་རྩུབ་ཆེ་བའི་འགོ་དཔོན༌གྱིས། །དབུལ་པོར་དབང་སྒྱུར་བྱེད་པ༌ནི། །སེང་གེས་ང་རོ་སྒྲོག་པ༌དང༌། །ཁ་ཟས་འཚོལ་བའི་དོམ་དང༌མཚུངས།།
PRO 28:16 འགོ་དཔོན་གླེན་པས་གདུག་རྩུབ༌བཀོལ། །མི་གཙང་རྒྱུ་ལ་སྡང་བ༌ནི། །ཚེ་ཐག་རིང་བར་བྱེད་པ༌འོ།།
PRO 28:17 མི་ཁྲག་བཞུར་བའི་སྡིག་པ་འཁུར་མཁན༌ནི། །འཆི་བའི་བར་དུ་བྲོས་ཀྱང་སྐྱོབ་མི༌འོས།།
PRO 28:18 སྤྱོད་པ་སྐྱོན་བྲལ་ཐར་བར༌འགྱུར། །ལོག་ལམ་ཞུགས་པ་ཐོལ་གྱིས༌འགྱེལ།།
PRO 28:19 འབད་པས་སོ་ནམ་བྱེད་པར་ཟས་ཀྱིས༌མོད། །འཕྲུལ་སྣང་སྙེག་པས་ཕོངས་པའི་སྡུག་བསྔལ༌མྱོང༌།།
PRO 28:20 བློ་སེམས་དཀར་བ་ལ་ནི་བྱིན་རླབས༌མོད། །ཕྱུག་པོར་འགྱུར་བར་རྔམ་ལ་ཉེས་ཆད༌འཕོག།
PRO 28:21 མི་ལ་ཕྱོགས་རིས་འཛིན་པ་མི་ལེགས༌ཀྱང༌། །མི་ཡིས་བག་ལེབ་དུམ་བུའི་ཕྱིར་ཉེས༌བྱེད།།
PRO 28:22 སེར་སྣ་ཅན་ནི་ཕྱུག་པོར་འགྱུར་བར༌རྔམ། །དབུལ་ཕོངས་སླེབ་པ་ཡིད་ལ་འཆར་བ༌མེད།།
PRO 28:23 ལྗགས་ཀྱིས་མི་ལ་ཁ་ཡག་བཤད་པ༌ལས། །བཀྱོན་མཁན་ལ་ནི་མཇུག་མཐར་ངོ་སོ༌འཐོབ།།
PRO 28:24 རང་གི་ཕ་མའི་རྒྱུ་འཕྲོག༌ཅིང༌། །འདི་ནི་ཉེས་པ་མིན་ཟེར༌ན། །དེ་ནི་ཇག་པའི་འགྲོགས་ཡ༌ཡིན།།
PRO 28:25 ཧམ་པ་ཅན་གྱིས་རྩོད་གཞི༌སློང༌། །ཡ་ཝཱེར་བརྟེན་པ་ཕྱུག་པར༌འགྱུར།།
PRO 28:26 རང་ཉིད་མཁས་པར་འཛིན་པ་གླེན་པ༌ཡིན། །ཤེས་རབ་ནང་དུ་འགྲོ་བ་ཐར་བར༌འགྱུར།།
PRO 28:27 དབུལ་པོར་སྦྱིན་པ་གཏོང་མཁན་ཕོངས་མི༌འགྱུར། །དེ་རྣམས་མིག་ནང་མེད་པར་དམོད་མོ༌ཐེབས།།
PRO 28:28 ངན་པ་དར་དུས་མི་རྣམས༌གཡོལ། །དེ་རྣམས་འཇིག་དུས་དྲང་པོ༌འཕེལ།།
PRO 29:1 ཡང་ཡང་བཀའ་བཀྱོན་འཕོག་བཞིན༌དུ། །གཉའ་རེངས་བྱེད་པ་གློ་བུར༌ཉིད། །མེད་པར་འགྱུར་ཞིང་སྐྱོབ་ཐབས༌ཟད།།
PRO 29:2 དྲང་པོ་འཕེལ་དུས་མི་རྣམས༌དགའ། །ངན་པས་དབང་དུ་སྒྱུར་དུས༌སུ། །མི་རྣམས་འཁུན་སྒྲ་འབྱིན་པ༌ཡིན།།
PRO 29:3 ཤེས་རབ་ལ་ནི་དགའ་བ༌ཡིས། །རང་གི་ཕ་ནི་སྤྲོ་བར༌བྱེད། །སྨད་འཚོང་མ་དང་འགྲོགས་པ༌ཡིས། །ཁྱིམ་གྱི་རྒྱུ་ནོར་ཆུད་ཟོས༌གཏོང༌།།
PRO 29:4 དྲང་གཞག་ངང་ནས་རྒྱལ་པོས༌ནི། །རང་གི་རྒྱལ་སྲིད་ཚུགས་སུ༌འཇུག །ལྐོག་རྔན་ལེན་པས་རྒྱལ་སྲིད༌བརླག།
PRO 29:5 ཁྱིམ་མཚེས་ལ་ནི་ངོ་དགའ་བྱེད་པ༌ཡིས། །དེ་ཡི་རྐང་འོག་རྙི་རྒྱ་འཛུགས་པ༌ཡིན།།
PRO 29:6 མི་ངན་ཉེས་སྐྱོན་དབང་གིས་རྙི་རྒྱར༌ཚུད། །དྲང་པོ་དགའ་མགུ་རང་ཞིང་ཀི་སྒྲ༌སྒྲོག།
PRO 29:7 དྲང་པོས་དབུལ་པོའི་དོན་ལ་མནོ་བསམ༌གཏོང༌། །ངན་པར་དེ་ཉིད་གོ་བའི་འདུ་ཤེས༌མེད།།
PRO 29:8 འཕྱ་སྨོད་མཁན་གྱིས་གྲོང་ཁྱེར་ཡོངས་སུ༌དཀྲུག །ཤེས་རབ་ཅན་གྱིས་ཁོང་ཁྲོ་ཞི་བར༌བྱེད།།
PRO 29:9 ཤེས་རབ་ཅན་དང་བླུན་པོ་རྩོད་དུས༌སུ། །བླུན་པོས་ཀུ་ཅོ་སྒྲོག་ཅིང་འཕྱ་དགོད༌བྱེད། །དེ་ལ་ཞི་འཇགས་ཅིས་ཀྱང་འབྱུང་མི༌སྲིད།།
PRO 29:10 མི་ཁྲག་བཞུར་བར་རྔམ་པ་བཟང་པོར༌སྡང༌། །དེས་ནི་དྲང་པོའི་ཚེ་སྲོག་ལེན་པར༌བསྙེག།
PRO 29:11 གླེན་པ་ཁོང་ཁྲོ་རབ་ཏུ་འབར་བ༌དང༌། །ཤེས་རབ་ཅན་གྱིས་རང་གི་ཁོང་ཁྲོ༌འགོག།
PRO 29:12 སྲིད་དབང་འཛིན་མཁན་རྫུན་ལ་ཡིད་ཆེས༌ན། །དེ་ཡི་འཁོར་གཡོག་ཐམས་ཅད་ངན་དུ༌འགྲོ།
PRO 29:13 དབུལ་པོ་དང་ནི་གཞན་གདུང༌ཅན། །ལྷན་ཅིག་འཛོམས་ཤིང་ཡ་ཝཱེ༌ཡིས། །དེ་གཉིས་མིག་ལ་འོད་སྣང༌སྦྱིན།།
PRO 29:14 གལ་ཏེ་རྒྱལ་པོས་གཞུང་དྲང༌སྒོས། །དབུལ་པོར་ཁྲིམས་ཐག་བཅད་ན༌ནི། །དེ་ཡི་རྒྱལ་ཁྲི་རྟག་ཏུ༌བརྟན།།
PRO 29:15 དབྱུག་པ་དང་ནི་འཆུན་འདོམས་ཀྱིས། །མི་ལ་ཤེས་རབ་སྩོལ་བ་དང༌། །ལང་ཤོར་བཏང་བའི་བུ་ཡིས་ནི། །རང་གི་མ་ཡང་ངོ་ཚར༌སྦྱོར།།
PRO 29:16 ངན་པ་མོད་དུས་ཉེས་སྐྱོན༌འཕེལ། །དྲང་པོས་དེ་དག་ལྟུང་ལུགས༌གཟིགས།།
PRO 29:17 རང་གི་བུ་ནི་ཆུན་ཞིག༌དང༌། །དེ་ཡིས་ཁྱོད་རང་བདེ་བ༌དང༌། །ཁྱོད་ཀྱི་སེམས་ཀྱང་སྤྲོ་བར༌བྱ།།
PRO 29:18 ལུང་བསྟན་མེད་སར་མི་རྣམས་རང་དགར༌སྤྱོད། །བཀའ་ཁྲིམས་སྲུང་བའི་སྐྱེ་བོར་བྱིན་རླབས༌འཐོབ།།
PRO 29:19 ཁ་བཤད་ཙམ་གྱིས་གཡོག་པོ་མི་འཆུན༌ཏེ། །དེ་ཡིས་གོ་ཡང་སྣང་དག་མི་བྱེད༌དོ།།
PRO 29:20 སྐད་ཆ་རྟབ་རྟབ་སྨྲ་མཁན་མཐོང་མྱོང༌ངམ། །དེ་ལས་གླེན་པར་རེ་བ་ལྡན་པ༌ཡིན།།
PRO 29:21 ཆུང་ནས་གཡོག་པོ་ལང་ཤོར་བཏང་ན༌ནི། །དེ་ཡིས་མཇུག་མཐར་སྡུག་བསྔལ་བསྐྱེད་པ༌འོ།།
PRO 29:22 ངང་ཐུང་གིས་ནི་རྩོད་གཞི༌སློང༌། །གཏུམ་པོས་ཉེས་སྡིག་མང་དུ༌གསོག།
PRO 29:23 མི་ནི་རང་གི་ང་རྒྱལ༌གྱིས། །དམའ་སར་དབབ་ཀྱང་ཁེངས་སྐྱུང༌གིས། །བཀུར་སྟི་རྙེད་པར་འགྱུར་བ༌ཡིན།།
PRO 29:24 རྐུན་མའི་ངན་གྲོགས་བྱེད་པ༌ནི། །རང་སྲོག་འཁོན་དུ་འཛིན་པ༌ཡིན། །མནའ་ཡིས་དཔང་པོ་བྱེད་དགོས༌པ། །ཐོས་ཀྱང་དེ་ཡིས་ཅང་མི༌སྨྲ།།
PRO 29:25 མི་ལ་འཇིགས་ན་རྙི་ནང༌འཚུད། །ཡ་ཝཱེར་བརྟན་པར་ཉེ་ཞོ༌མེད།།
PRO 29:26 མང་པོས་མངའ་བདག་ཁ་ངོ་འཚོལ་ན༌ཡང༌། །རེ་རེའི་དྲང་གཞག་ཡ་ཝཱེ་ཁོང་ནས༌འབྱུང༌།།
PRO 29:27 དྲང་པོ་གྱ་གྱུ་ཅན་ལ་སྐྱུག་བྲོ༌ཞིང༌། །མི་ངན་གཞུང་རྒྱུད་དྲང་པོར་ཞེ་ལོག༌གོ།
PRO 30:1 ཡཱ་ཀེའི་བུ་ཨ་གུར་གྱི་ངག་རྒྱུན་ཏེ་ཁོང་གི་བཀའ་ལུང་ནི། སྐྱེ་བོ་དེས་ཨི་ཐི་ཨེལ༌དང༌། ཨི་ཐི་ཨེལ་དང་ཡུ་ཀལ་གཉིས་ལ་བསྒོས་པ་ཡིན༌ཏེ།
PRO 30:2 ང་ནི་ཀུན་ལས་བླུན་རྨོངས༌ཡིན། །མི་ཡི་གོ་རྟོགས་ང་ལ༌མེད།།
PRO 30:3 ཤེས་རབ་ཀྱང་ནི་ངས་མ༌བསླབས། །དམ་པ་ཉིད་ཀྱང་ཤེས་མ༌གྱུར།།
PRO 30:4 ནམ་མཁར་འཕགས་ནས་སུ་ཞིག༌བབས། །ལག་མཐིལ་རླུང་ཆེན་སུ་ཡིས༌བསྡུས། །ཆུ་རྣམས་གོས་ནང་སུ་ཡིས༌བསྒྲིལ། །ས་གཞིའི་མཐའ་བཞི་སུ་ཡིས༌བཙུགས། །ཁོང་གི་མཚན་ལ་ཅི༌བྱ་འམ། །ཁོང་གི་སྲས་ཀྱི་མཚན་ཡང༌ཅི། །ཤེས་ན་ང་ལ་འཆད་རོགས༌གནང༌།།
PRO 30:5 དཀོན་མཆོག་བཀའ་ལ་དྲི་མ༌མེད། །ཁོང་ཉིད་སྐྱབས་སུ་བརྟེན་མཁན༌ལ། །ཁོང་ནི་དེ་ཡི་ཕུབ་ལགས༌སོ།།
PRO 30:6 ཁོང་གི་བཀའ་ལ་ཁ་སྣོན་རྒྱག་མི༌རུང༌། །བརྒྱབ་ན་ཁོང་གིས་ཁྱོད་ལ་བཀའ་བཀྱོན༌མཛད། །ཁྱོད་ནི་རྫུན་གཏམ་སྨྲ་བར་མངོན་པར༌འགྱུར།།
PRO 30:7 བདག་ལ་ཞུ་བ་འབུལ་རྒྱུ་གཉིས་ཡོད༌དེ། །ང་རང་མ་ཤི་སྔོན་ལ་གནང་བར༌མཛོད།།
PRO 30:8 གཡོ་སྒྱུ་དང་ནི་རྫུན་གཏམ༌གཉིས། །ང་དང་རིང་དུ་གྱེས་པར༌མཛོད། །ང་ནི་དབུལ་པོར་མི་མཛད༌ཅིང༌། །ཕྱུག་པོར་ཡང་ནི་མི་མཛད༌པར། །ཁ་ཟས་འདང་ངེས་གནང་བས༌ཆོག།
PRO 30:9 དེ་མིན་ང་རང་འགྲངས་དུས༌སུ། །ཁྱེད་ཉིད་སྤངས་ཏེ་འདི་ལྟར༌དུ། །ཡ་ཝཱེ་སུ་ཡིན་ཞུ་ཡང༌སྲིད། །ཡང་ན་དབུལ་དུས་རྐུ་བྱས༌ནས། །དཀོན་མཆོག་མཚན་སྙན་བརླག་ཀྱང༌སྲིད།།
PRO 30:10 བདག་པོའི་དྲུང་དུ་བྲན་པོར་ངན་མ༌གཏམ། །དེ་ཡིས་ཁྱོད་ལ་དམོད་ན་ཉེས་སྐྱོན༌འཕོག།
PRO 30:11 རང་གི་ཕ་ལ་དམོད་འབོར༌ཞིང༌། །མ་ལ་སྨོན་འདུན་མི་ཞུ༌བའི། །མི་རབས་ཀྱང་ནི་ཡོད་པ༌ཡིན།།
PRO 30:12 རང་གི་དྲི་མ་མ་བཀྲུས༌བཞིན། །རང་གི་སྣང་བར་རང་གཙང༌བའི། །མི་རབས་ཀྱང་ནི་ཡོད་པ༌ཡིན།།
PRO 30:13 མིག་ལ་དྲེགས་ཉམས་ཆེ་བ༌དང༌། །མིག་ལྕིབས་གཙིགས་སུ་འདེགས་པ༌ཡི། །མི་རབས་ཀྱང་ནི་ཡོད་པ༌ཡིན།།
PRO 30:14 སོ་ནི་རལ་གྲི་མཆེ་བ་གྲི་རྣམས་བཞིན། །ས་གཞིའི་དབུལ་པོ་རྣམས་དང་མི་ཡི༌ཁྲོད། །མེད་པོ་རྣམས་ནི་ཁྱུར་མིད་བྱེད་པ༌ཡི། །མི་རབས་ཀྱང་ནི་ཡོད་པ་ཡིན་ལགས༌སོ།།
PRO 30:15 ཁྲག་འཐུང་སྲིན་བུར་བུ་མོ་གཉིས་ཡོད༌དེ། །རྟག་ཏུ་ཡང་ཡང་ང་ལ་བྱིན་ཅིག༌ཟེར། །ཚིམ་པ་མེད་པའི་རིགས་ནི་གསུམ་ཡོད༌ལ། །འདང་སོང་མི་ཟེར་བ་དང་བཞི་བཅས༌ཏེ།།
PRO 30:16 གཤིན་ཡུལ་དང་ནི་མོ་གཤམ༌དང༌། །ཆུ་ཡིས་ངོམས་པ་མེད་པའི༌ས། །འདང་སོང་མི་ཟེར་མེ་བཅས༌སོ།།
PRO 30:17 རང་གི་ཕ་ལ་འཕྱ་བ༌དང༌། །རྒས་པའི་མ་ལ་སྨད་པ༌ཡི། །མིག་ནི་ལུང་བའི་ཕོ་རོག༌གིས། །དྲུས་ཏེ་གླག་ཕྲུག་གིས་ཟ༌འོ།།
PRO 30:18 བདག་ལ་དོན་གསུམ་ངོ་མཚར༌ཆེ། །མི་རྟོགས་དོན་བཅས་བཞི་ཡོད༌དེ།།
PRO 30:19 གླག་གིས་གནམ་འཕང་གཅོད་པའི༌ལམ། །ཕ་བོང་སྟེང་གི་སྦྲུལ་གྱི༌ལམ། །རྒྱ་མཚོ་དཀྱིལ་གྱི་གྲུ་ཡི༌ལམ། །ན་གཞོན་ཕོ་མོ་འགྲོགས་པའི༌ལམ།།
PRO 30:20 གཡེམ་མོའི་ལམ་ནི་འདི་ལྟ༌སྟེ། །མོས་ནི་ཟ་ཞིང་ཁ་ཕྱིས༌ནས། །མི་རུང་ཅི་ཡང་མ་བྱས༌ཟེར།།
PRO 30:21 ས་གཞི་སྒུལ་བར་བྱེད་པའི་དོན་གསུམ༌ཡོད། །བཟོད་ཐབས་མེད་པའི་དོན་དང་བཞི་བཅས༌ཏེ།།
PRO 30:22 བྲན་པོ་རྒྱལ་པོར་སྡོད་པ༌དང༌། །གླེན་པའི་གྲོད་པ་འགྲང་བ༌དང༌།།
PRO 30:23 བརྩེ་མེད་མནའ་མར་འགྲིམ་པ༌དང༌། །གཡོག་མོས་བདག་མོའི་ཚབ་བྱེད༌པ།།
PRO 30:24 ས་གཞིར་ཆུང་ཆུང་བཞི་ཡོད༌ཅིང༌། །དེ་དག་རབ་ཏུ་མཛངས་པ༌སྟེ།།
PRO 30:25 གྲོག་མ་སྲོག་ཆགས་སྟོབས་ཞན༌ཡང༌། །དབྱར་དུས་རང་གི་རྒྱགས་གསོག༌གོ།
PRO 30:26 འཕྱི་བ་སྟོབས་བོ་ཆེ་མིན༌ཡང། །རང་གི་ཚང་ནི་བྲག་ལ༌རྐོ།།
PRO 30:27 ཆ་ག་པ་ལ་རྒྱལ་པོ༌མེད། །ལྷན་ཅིག་དཔུང་ཁག་བསྒྲིགས་ནས༌འགྲོ།
PRO 30:28 རྨིགས་པ་ལག་པས་འཛིན་ནུས༌ཀྱང༌། །དེ་ནི་ཕོ་བྲང་ནང་དུ༌སྡོད།།
PRO 30:29 གོམ་སྟབས་རྫིག་རྫིག་ཅན་ནི་གསུམ་ཡོད༌ལ། །རྫིག་རྫིག་ངང་ནས་འགྲོ་བ་དང་བཞི༌སྟེ།།
PRO 30:30 རི་དྭགས་ནང་གི་སྟོབས་བོ༌ཆེ། །སེང་གེ་སུ་ལ་ཕྲད་ན་ཡང་། །ཕྱིར་བསྣུར་སྟེག་པར་མི་འགྱུར༌རོ།།
PRO 30:31 མགོ་བོ་དགྱེ་ནས་མདུན་སྐྱོད༌པའི། །བྱ་ཕོ་དང་ནི་ར་ཐུག༌དང༌། །དམག་དཔུང་དབུས་ཀྱི་རྒྱལ་པོ༌འོ།།
PRO 30:32 རང་ཆེ་བྱས་ནས་གླེན་རྟགས་བསྟན་པ༌འམ། །སེམས་ངན་བསྐྱེད་ན་རང་ཁ་ལག་པས༌ཁོབ།།
PRO 30:33 རྒྱུ་མཚན་གང་ལ་ཡིན་ཞེ༌ན། །འོ་མ་དཀྲུགས་ན་མར་འཐོན༌ཞིང༌། །སྣ་བ་གཅུས་པས་ཁྲག་འཐོན༌བཞིན། །ཁོང་ཁྲོ་བསླངས་ན་འཁྲུག་རྩོད༌འབྱུང༌།།
PRO 31:1 རྒྱལ་པོ་ལེ་མུ་ཨེལ་གྱི་ངག་རྒྱུན་ཏེ་རང་གི་མ་ལས་བསླབས་པའི་བཀའ་ལུང་ནི།
PRO 31:2 ངའི་བུ་ང་ཡི་མངལ་ལས་སྐྱེས་པའི༌བུ། །ང་ཡིས་དམ་བཅའ་བཞག་ནས་ཐོབ་པའི༌བུ། །ང་ཡིས་ཁྱོད་ལ་ཅི་ཞིག་སྨྲ་བར༌བྱ།།
PRO 31:3 རང་གི་སྟོབས་ནི་སྐྱེས་མར་སྦྱིན་མི་བྱ། །རྒྱལ་པོ་བརླག་པའི་སྤྱད་པ་མ་སྤྱོད༌ཅིག།
PRO 31:4 ལེ་མུ་ཨེལ་ལགས་རྒྱལ་པོ༌ཡིས། །རྒུན་ཆང་འཐུང་བ་མི་མཛེས༌ཏེ། །སྲིད་དབང་འཛིན་པས་ཆང་གར༌བོ། །འཐུང་བར་རྔམ་པ་ཡེ་མི༌འོས།།
PRO 31:5 གལ་སྲིད་འཐུང་ན་བཀའ་གསུང་བརྗེད་གྱུར༌ནས། །གཉའ་གནོན་མྱོང་མཁན་དྲང་གཞག་ལོག་པར༌གཅོད།།
PRO 31:6 ཆང་གར་འཆི་ཁར་ཡོད་པ༌དང༌། །རྒུན་ཆང་སེམས་སྡུག་ཅན་ལ༌བླུགས།།
PRO 31:7 དེ་ཚོས་འཐུང་ན་རང་གི་དབུལ་ཕོངས༌བརྗེད། །རང་གི་སྐྱོ་གདུང་ཡང་ནི་དྲན་མི༌འགྱུར།།
PRO 31:8 ལྐུགས་པའི་དོན་དུ་ཁ་གྲགས་དགོས་པ༌དང༌། །ཉམ་ཆུང་ཕྱིར་དུ་དག་འབུད་བྱེད་པར༌གྱིས།།
PRO 31:9 ཁྱོད་ཀྱིས་ལེགས་ཉེས་དྲང་པོར་ཕྱེས་ཤིག༌དང༌། །དབུལ་ཞིང་ཕོངས་པའི་ཕྱིར་དུ་དག་འབུད༌གྱིས།།
PRO 31:10 ཆུང་མ་བཟང་མོ་འཇོན་ཐང༌ཅན། །སུ་ཞིག་གིས་ནི་རྙེད་འགྱུར༌རམ། །སྐྱེས་མ་དེ་ཡི་རིན་ཐང༌ནི། །པདྨ་ར་ག་ལས་ཀྱང༌ལྷག།
PRO 31:11 ཁོ་མོའི་ཁྱོ་གས་མོ་ལ་སེམས་གཏོད༌ཅིང༌། །མི་དེའི་ཐོབ་བྱ་ཕོངས་པར་མི་འགྱུར༌རོ།།
PRO 31:12 ཁོ་མོས་མི་ཚེ་གང་པོར་ཁྱོ་ག༌ལ། །ཕན་འདོགས་པ་ལས་གནོད་པ་ཡེ་མི༌བསྐྱལ།།
PRO 31:13 ཁོ་མོས་བལ་དང་སོ་མ་འཚོལ་བསྡུ༌བྱེད། །སེམས་པ་དགའ་ཞིང་ལག་པས་ལས་ཀ༌བྱེད།།
PRO 31:14 ཁོ་མོ་ཚོང་པའི་གྲུ་ཚོགས་དང་མཚུངས༌ཏེ། །རྒྱང་རིང་ཡུལ་ནས་རང་གི་འཚོ་རྒྱགས༌འདྲེན།།
PRO 31:15 ཞོགས་པ་སྔ་མོ་ཡར་ལངས༌ཏེ། །ནང་མི་རྣམས་ལ་ཁ་ཟས་སྦྱིན། །གཡོག་མོ་རྣམས་ལ་ལས་ཀ་བགོ།
PRO 31:16 ཁོ་མོས་ས་ཞིང་བདམས་ནས༌ཉོ། །རང་གི་ལག་པའི་འབྲས་བུ༌ལས། །རྒུན་ཚལ་ཞིག་ཀྱང་འཛུགས་པ༌ཡིན།།
PRO 31:17 ཁོ་མོས་ནུས་པའི་སྐ་རགས༌བཅིང༌། །རང་ལ་དཔུང་ཤེད་འཇུག་པ༌ཡིན།།
PRO 31:18 ཁོ་མོས་ཚོང་རྣམས་ཁེ་ཅན་ཡིན་པ༌ཤེས། །ཁོ་མོའི་སྒྲོན་མེ་མཚན་གང་ཞི་བ༌མེད།།
PRO 31:19 ཁོ་མོའི་ལག་པས་སྐུད་འཕང་འཛིན། །ལག་པ་འཕང་ལོར་འཇུ་བ༌ཡིན།།
PRO 31:20 དབུལ་པོའི་ཕྱོགས་སུ་ལག་པ་རྐྱོང་བ༌དང༌། །དགོས་མཁོ་ཅན་ལ་ལག་པས་རོགས་སྐྱོར༌བྱེད།།
PRO 31:21 ཁོ་མོའི་ནང་མི་ཀུན་པོ༌ཡིས། །གྱོན་གོས་མཚལ་མདོག་གོན་ཡོད༌པས། །ཁ་བ་བབས་པས་མི་འཇིགས༌སོ།།
PRO 31:22 ཁོ་མོས་རང་ལ་མལ་སྟན་བཟོ་བ༌དང༌། །ཁོ་མོའི་གྱོན་གོས་སོ་རས་སྲབ་བུ༌དང༌། །རྒྱ་སྨུག་རས་ལས་གྲུབ་པ་ཡིན་ལགས༌སོ།།
PRO 31:23 ཁོ་མོའི་ཁྱོ་ག་ཡུལ་དེའི་རྒན་པོ༌དང༌། །ལྷན་ཅིག་མཁར་སྒོ་ཁ་རུ་སྡོད་པ༌དང༌། །ཀུན་གྱིས་ཁོ་ལ་བརྩི་བཀུར་བྱེད་པ༌ཡིན།།
PRO 31:24 ཁོ་མོས་སོ་རས་སྲབ་བུ་འཚོང་བ༌དང༌། །ཚོང་པ་རྣམས་ལ་སྐ་རགས་མཁོ་སྤྲོད༌བྱེད།།
PRO 31:25 སྟོབས་དང་བརྗིད་ཉམས་ཁོ་མོའི་གྱོན་གོས༌ཡིན། །ཕྱིས་ཀྱི་བདེ་སྐྱིད་བསམ་དུས་གད་མོ༌དགོད།།
PRO 31:26 ཁ་གྲགས་ཡོང་དུས་ཤེས་རབ་གླེང་བ༌དང༌། །ལྕེ་རྩེར་བྱམས་བརྩེ་ལྡན་པའི་བསླབ་བྱ༌ཡོད།།
PRO 31:27 ཁོ་མོས་ནང་ལས་ཀུན་ལ་ཞིབ་ཏུ༌ལྟ། ། སྙོམ་ལས་ཅན་གྱི་བག་ལེབ་ཟ་བ༌མིན།།
PRO 31:28 ཁོ་མོའི་བུ་ཕྲུག་ཐམས་ཅད་ཡར་ལངས༌ནས། །ཁོ་མོ་བདེ་འོ་ཞེས་སུ་བརྗོད་པ༌དང༌། །ཁོ་མོའི་ཁྱོ་གས་ཁོ་མོར་འདི་ལྟར༌བསྟོད།།
PRO 31:29 བཟང་མོ་འཇོན་ཐང་ཅན་ནི་ཤིན་ཏུ༌མང༌། །ཁྱོད་ནི་ཀུན་ལས་ཁྱད་དུ་འཕགས་པ༌འོ།།
PRO 31:30 མཚར་སྡུག་བསླུ་བའི་རྒྱུ་ཡིན༌ཞིང༌། །འཇོ་སྒེག་རླངས་པ་ནང་བཞིན༌ཡིན། །ཡ་ཝཱེ་ལ་ནི་འཇིགས་པ༌ཡི། །བུད་མེད་དེ་ལ་བསྟོད་བསྔགས༌འཐོབ།།
PRO 31:31 ཁོ་མོར་རང་གི་ལག་པ༌ཡི། །འབྲས་བུ་ལོངས་སུ་སྤྱོད་པར༌གྱིས། །ཁོ་མོའི་ལས་ཀས་རང་ཉིད༌ལ། །མཁར་སྒོར་བསྟོད་བསྔགས་འཐོབ་གྱུར༌ཅིག།། །།
ECC 1:1 ཡེ་རུ་སཱ་ལེམ་གྱི་རྒྱལ་པོ་སྟེ་དཱ་བིད་ཀྱི་སྲས་སྟོན་པ་ལགས་པའི་གཏམ་ནི་འདི་ལྟ་སྟེ།
ECC 1:2 སྟོང་པ་དང་ནི་སྟོང་པའི་སྟོང་པ་སྟེ། ། ཐམས་ཅད་སྟོང་པ་ཡིན་ཞེས་སྟོན་པས་གསུངས། །
ECC 1:3 མི་ཡིས་ཉི་མའི་འོག་ཏུ་སྡུག་མྱངས་ནས། ། དཀའ་བ་སྤྱད་པར་ཕན་ཐོགས་ཅི་ཞིག་ཡོད། །
ECC 1:4 མི་རབས་འདའ་ཞིང་མི་རབས་འབྱུང་མོད་ཀྱང་། ། ས་གཞིར་འགྱུར་བ་མེད་ཅིང་རྟག་ཏུ་གནས། །
ECC 1:5 ཉི་མ་འཆར་ཞིང་ཉི་མ་ནུབ་པ་དང་། ། མཇུག་མཐར་ལམ་སང་ཤར་སའི་གནས་སུ་བཞུད། །
ECC 1:6 རླུང་ནི་ལྷོ་རུ་གཡུག་ཅིང་བྱང་དུ་འཁོར། ། སྐོར་བ་བརྒྱབ་ནས་འཁོར་ཞིང་མཚམས་མི་ཆད།
ECC 1:7 གཙང་པོ་མཐའ་དག་རྒྱ་མཚོར་ཞུགས་ན་ཡང་། ། རྒྱ་མཚོ་ནམ་ཡང་གང་བར་མ་གྱུར་ཏེ། ། གཙང་པོ་ཐོན་སའི་གནས་སུ་ཕྱིར་ལོག་གོ །
ECC 1:8 བྱ་བ་ཀུན་གྱིས་མི་ལ་སུན་སྣང་བསྐྱེད། ། དེ་ནི་མི་ཡིས་བརྗོད་གྱིས་མི་ལང་ངོ་། ། མིག་གིས་བལྟས་ཀྱང་ནམ་ཡང་མི་ངོམས་ལ། ། རྣ་བས་མཉན་ཡང་ཚིམ་པ་ཡེ་ནས་མེད། །
ECC 1:9 སྔར་བྱུང་དོན་རྣམས་ཡང་བསྐྱར་འབྱུང་ངེས་ལ། ། བྱས་ཟིན་དོན་རྣམས་ཡང་བསྐྱར་བྱེད་འགྱུར་བས། ། ཉི་མའི་འོག་ཏུ་གསར་པ་ཅི་ཡང་མེད། །
ECC 1:10 མི་ཡིས་འདི་ནི་གསར་པ་ཡིན་ནོ་ཞེས། ། སྨྲ་བར་ནུས་པའི་བྱ་བ་ཅི་ཡོད་དམ། ། མ་གཞི་དེ་ནི་རང་ཅག་ཡར་སྔོན་ལ། ། སྔ་མོའི་དུས་ནས་ཡོད་པ་ཡིན་ལགས་སོ། །
ECC 1:11 འདས་ཟིན་མི་རབས་སུས་ཀྱང་མི་དྲན་ལ། ། མ་འོངས་འབྱུང་འགྱུར་མི་རབས་དག་ཀྱང་ནི། ། རྗེས་མ་རྣམས་ཀྱིས་དྲན་པར་མི་འགྱུར་རོ། །
ECC 1:12 སྐབས་དེར་སྟོན་པ་བདག་ནི་ཡེ་རུ་སཱ་ལེམ་དུ་ཡེས་ར་ཨེལ་གྱི་རྒྱལ་པོ་བྱེད་དུས།
ECC 1:13 བདག་གིས་རང་གི་ཤེས་རབ་ཀྱིས་གནམ་འོག་ཏུ་བྱུང་བའི་དོན་ཐམས་ཅད་ལ་སེམས་རྣལ་དུ་ཕབ་ནས་བརྟགས་པ་ན། དཀོན་མཆོག་གིས་མི་ལ་ཁུར་བོ་ལྗིད་པོ་གནང་ནས་ཁོ་ཚོར་དཀའ་སྡུག་མྱང་བར་མཛད་པའོ། །
ECC 1:14 ངས་ཉི་མའི་འོག་ཏུ་བྱུང་བའི་དོན་ཐམས་ཅད་ལ་བལྟས་པ་ན། ཐམས་ཅད་སྟོང་པ་ཡིན་པ་དང་། རླུང་ལ་ཞགས་པ་འཕེན་པ་ཙམ་ཡིན་པ་རྟོགས།
ECC 1:15 འཁྱོག་པོ་ཡིན་པ་བསྲང་མི་ནུས་ལ། མེད་པ་དེ་རྩི་བར་ཡང་མི་ནུས།
ECC 1:16 ངའི་སེམས་སུ་ང་ལ་ཤེས་རབ་ཆེན་པོ་ཐོབ་ཅིང་། ངའི་ཡར་སྔོན་དུ་ཡེ་རུ་སཱ་ལེམ་ལ་དབང་སྒྱུར་མཁན་ཐམས་ཅད་ལས་ཀྱང་ལྷག་པ་ཡིན་ཏེ། ངའི་སེམས་སུ་ཤེས་རབ་དང་ཤེས་བྱ་ཉམས་ལེན་ཐོབ་བྱུང་སྙམ།
ECC 1:17 བདག་གིས་ཡང་བློ་སེམས་རྩེ་གཅིག་གིས་ཤེས་རབ་དང་ཤེས་བྱ་དང་། ཁེངས་དྲེགས་དང་བླུན་རྨོངས་ཅི་ཡིན་པར་ཞིབ་ཏུ་བརྟགས་པ་ན། ད་གཟོད་དེ་ཡང་རླུང་ལ་ཞགས་པ་འཕེན་པ་ཙམ་ཡིན་པ་རྟོགས་བྱུང་།
ECC 1:18 ཅི་ལ་ཞེ་ན། ཤེས་རབ་འཕེལ་ན་སེམས་སྡུག་དེ་ལས་མང་ཞིང་། ཤེས་བྱ་མང་ན་མྱ་ངན་དེ་ལས་ཆེ་བ་འོ། །
ECC 2:1 ངས་རང་གི་སེམས་ལ་འདི་ལྟར། ཤོག་དང་། ངས་ཁྱོད་ལ་དགའ་སྤྲོས་དཔྱོད་ཅིང་ཕན་ཐོགས་ཅི་ཞིག་ཡོད་པར་བལྟ་རུ་འཇུག་བསམས་ཀྱང་། འདི་ཡང་སྟོང་པ་ཡིན་ཏེ།
ECC 2:2 གད་མོ་ལ་བདག་གིས་དེ་ནི་ཁེངས་དྲེགས་ཡིན་པར་སྨྲས། ལོངས་སྤྱོད་གླེང་ན་དེར་ཕན་ནུས་ཅི་ཡོད་དམ།
ECC 2:3 བདག་གིས་མི་ནི་ཅི་འདྲ་ཡིན་པ་གསལ་པོར་ངེས་པ་དང་། གནམ་འོག་ཏུ་མི་ཚེ་ཐུང་ཐུང་གི་ལོ་ཟླའི་ཁྲོད་དུ་དོན་གང་ཞིག་ལེགས་པོ་ཡིན་པ་རྟོགས་པའི་བར་དུ། རྒུན་ཆང་གིས་རང་གི་ལུས་སྐྱིད་པར་བྱས་ནས་བླུན་པོ་ལྟར་སྤྱོད་པར་བསམ་བློ་བཏང་མོད་ཀྱང་། ངའི་ཤེས་རབ་ཀྱིས་ང་ལ་ལམ་བསྟན་ཏོ། །
ECC 2:4 ངས་ལས་ཀ་ཆེན་པོ་རྣམས་བྱས་ཏེ། རང་གི་ཕྱིར་ཕོ་བྲང་རྣམས་བཞེངས་ནས་རྒུན་ཚལ་རྣམས་བཙུགས།
ECC 2:5 མེ་ཏོག་ལྡུམ་ར་དང་སྐྱེད་མོས་ཚལ་རྣམས་བཟོས་ཏེ། དེ་དག་གི་ནང་དུ་སིལ་སྡོང་སྣ་ཚོགས་བཙུགས།
ECC 2:6 ངས་ནགས་ཚལ་གྱི་ལྗང་བུ་རྣམས་ལ་ཆུ་གཏོང་བའི་ཆེད་དུ་རྫིང་བུ་རྣམས་ཀྱང་བཟོས།
ECC 2:7 ངས་གཡོག་པོ་གཡོག་མོ་གཞན་ཡང་ཉོས་ལ། རང་ཁྱིམ་དུ་སྐྱེས་པའི་བྲན་གཡོག་ཀྱང་ཡོད། ཡང་སྔོན་ཆད་ཡེ་རུ་སཱ་ལེམ་དུ་གནས་པ་ཀུན་ལས་ཀྱང་བདག་ལ་སྒོ་ཕྱུགས་མང་པོ་ཡོད།
ECC 2:8 ཡང་ངས་གསེར་དངུལ་དང་། རྒྱལ་པོ་དང་སྡེ་རྣམས་ཀྱི་གཏེར་མཛོད་རྣམས་ཀྱང་རང་གི་ཕྱིར་བསགས་པར་མ་ཟད། གླུ་བ་གླུ་མ་རྣམས་དང་། མི་རྣམས་དུང་བའི་དངོས་པོ་དང་། བཙུན་མོ་རྣམས་ཀྱང་རང་གི་ཕྱིར་བསྡུས་པ་ཡིན།
ECC 2:9 དེ་ལྟར་བདག་ནི་ཉིན་རེར་རྒྱས་པ་དང་། སྔོན་ཆད་ཡེ་རུ་སཱ་ལེམ་དུ་གནས་པ་ཀུན་ལས་ཀྱང་ལྷག་པར་དར་ཏེ། ངའི་ཤེས་རབ་ནི་ད་དུང་ངའི་ནང་དུ་ལུས་སོ། །
ECC 2:10 ངས་རང་གི་མིག་གིས་མཐོང་འདོད་པ་ཐམས་ཅད་ལ་བལྟས་ཤིང་། སྐྱིད་པར་བསམས་པ་གང་ལས་ཀྱང་རང་གི་སེམས་ནི་མ་བཀག ཅིའི་ཕྱིར་ཞེ་ན། ངའི་སེམས་ནི་རང་གི་དཀའ་ལས་ཐམས་ཅད་ལ་དགའ་ཞིང་། འདི་ནི་ངས་བྱས་པའི་དཀའ་ལས་ཐམས་ཅད་ནས་ཐོབ་པའི་སྐལ་ཡིན་ནོ། །
ECC 2:11 དེ་ནས་ངས་རང་བྱས་ཀྱི་ལས་དང་དཀའ་ལས་ཀྱི་འབྲས་བུ་ཐམས་ཅད་ལ་བལྟས་པ་དང་། ཀྱེ་ཧོ། དེ་ཐམས་ཅད་ནི་སྟོང་པ་དང་རླུང་ལ་ཞགས་པ་འཕེན་པ་ཙམ་ཡིན། ཉི་མའི་འོག་ཏུ་དེ་ལ་ཕན་ཐོགས་ཅི་ཡང་མེད།
ECC 2:12 དེ་ནས་ངས་ཤེས་རབ་དང་ཁེངས་དྲེགས། བླུན་རྨོངས་བཅས་ཀྱི་ཕྱོགས་སུ་བློ་ཁ་བསྒྱུར་པ་ཡིན། སྔར་ནས་བྱས་ཟིན་པ་དེ་ལས་གཞན། རྒྱལ་པོའི་རྗེས་སུ་འབྱུང་བ་རྣམས་ཀྱིས་གཞན་ཅི་ཞིག་བྱེད་ནུས་སམ།
ECC 2:13 དེ་ནས་འོད་ནི་མུན་པ་ལས་བརྒལ་བ་ལྟར། ཤེས་རབ་ནི་བླུན་རྨོངས་ལས་བརྒལ་བ་ངས་རྟོགས་བྱུང་།
ECC 2:14 མཁས་པ་ལ་ནི་ཤེས་རབ་ཀྱི་སྤྱན་དང་ལྡན། བླུན་པོ་ནི་མུན་པའི་ནང་དུ་འགྲུལ་བ་ཡིན། འོན་ཀྱང་དེ་གཉིས་ཀྱི་སྔོན་ལས་གཅིག་ཡིན་པ་ངས་རྟོགས་བྱུང་།
ECC 2:15 ངའི་སེམས་སུ་འདི་ལྟར། བླུན་པོ་ལ་འབྱུང་བ་བཞིན་དུ་བདག་ལའང་འབྱུང་བར་འགྱུར་བས། བདག་རབ་ཏུ་མཁས་པར་འགྱུར་དགོས་དོན་ཅི་ཡོད་སྙམ་པ་དང་། ཡང་ངའི་སེམས་སུ་འདི་ཡང་སྟོང་པ་ཡིན་བསམས་པའོ། །
ECC 2:16 ཅིའི་ཕྱིར་ཞེ་ན། མཁས་བླུན་གཉིས་ཀ་གཅིག་ཡིན་ཏེ་སུ་ཞིག་གིས་ཀྱང་ཁོ་རྣམས་དུས་རྟག་ཏུ་དྲན་པར་མི་བྱེད་ལ། མ་འོངས་པའི་དུས་སུ་ཐམས་ཅད་བརྗེད་པར་འགྱུར་བས། བླུན་པོ་ནང་བཞིན་མཁས་པ་ཡང་འཆི་བར་ངེས།
ECC 2:17 དེའི་རྐྱེན་གྱིས་ཉི་མའི་འོག་ཏུ་བྱེད་པའི་ལས་ནི་སྡུག་བསྔལ་དུ་མཐོང་བས་ང་རང་ཚེ་སྲོག་ལ་སྡང་བ་ཡིན། ཐམས་ཅད་སྟོང་པ་ཡིན་པ་དང་། རླུང་ལ་ཞགས་པ་འཕེན་པ་ཙམ་ཡིན་ནོ། །
ECC 2:18 དེར་མ་ཟད། ཉི་མའི་འོག་ཏུ་བྱས་པའི་དཀའ་ལས་ཐམས་ཅད་ལའང་ང་རང་སྡང་སྟེ། ཅིའི་ཕྱིར་ཞེ་ན། ངས་དེ་རྣམས་མི་རབས་རྗེས་མའི་དོན་དུ་འཇོག་དགོས་པས་སོ། །
ECC 2:19 ཡང་དེ་ནི་མཁས་པའམ་ཡང་ན་བླུན་པོ་ཡིན་པ་སུས་ཤེས། འོན་ཀྱང་ངས་སྤྱད་པའི་དཀའ་བ་ཐམས་ཅད་དང་། གང་གི་དོན་དུ་ཉི་མའི་འོག་ཏུ་རང་གི་ཤེས་རབ་ལ་བརྟེན་ནས་ཐོབ་པ་ལ་དེས་དབང་བསྒྱུར་བས་ན་འདི་ཡང་སྟོང་པ་ཡིན།
ECC 2:20 དེའི་ཕྱིར་ཉི་མའི་འོག་ཏུ་ངས་སྤྱད་པའི་དཀའ་བ་ཐམས་ཅད་ལ་ང་རང་ཡིད་ཐང་ཆད་དོ། །
ECC 2:21 ཅིའི་ཕྱིར་ཞེ་ན། ཤེས་རབ་དང་ཤེས་བྱ། རིག་རྩལ་བཅས་ལ་བརྟེན་ནས་ཐོབ་པའི་རང་གི་ཡོད་ཚད་ནི། མཐར་དཀའ་བ་ཅི་ཡང་མ་སྤྱད་པའི་མི་ལ་ནོར་སྐལ་དུ་འཇོག་དགོས་པའི་ཕྱིར། འདི་ཡང་སྟོང་པ་ཡིན་པ་སྟེ་སེམས་སྡུག་ཆེན་པོ་ཞིག་གོ །
ECC 2:22 ཉི་མའི་འོག་ཏུ་སེམས་ཁུར་ངང་སྤྱད་པའི་དཀའ་བ་ཐམས་ཅད་ནས་མི་ལ་ཅི་ཞིག་འཐོབ་པ་ཡིན་ནམ།
ECC 2:23 ཁོས་ཉིན་རེར་སྡུག་བསྔལ་མྱངས་པས། ཁོའི་དཀའ་ངལ་སེམས་སྡུག་ཏུ་གྱུར་ཏེ། ཁོའི་སེམས་ནི་མཚན་མོར་ཡང་ལྷོད་ལ་མ་བབས་པས། འདི་ཡང་སྟོང་པ་ཡིན་ནོ། །
ECC 2:24 བཟའ་བཏུང་དང་རང་གི་དཀའ་ལས་ཀྱི་ནང་དུ་ཡིད་ཚིམ་པ་ལས་ལྷག་པ་ཞིག་མི་ལ་མེད་དེ། དེ་ཡང་དཀོན་མཆོག་གི་ཕྱག་གིས་གནང་བ་ངས་མཐོང་ངོ་། །
ECC 2:25 བཟའ་བཏུང་དང་ལོངས་སྤྱོད་གླེང་ན། སུ་ཞིག་བདག་ལས་ལྷག་པ་ཡིན་ནམ།
ECC 2:26 དཀོན་མཆོག་སུ་ལ་ཐུགས་མཉེས་ན་ཁོང་གིས་དེ་ལ་ཤེས་རབ་དང་ཤེས་བྱ། དགའ་སྤྲོ་བཅས་གནང་བ་དང་། སྡིག་ཅན་ལ་ཅི་གནང་ཞེ་ན། དཀའ་སྡུག་གནང་བར་མ་ཟད། དེ་རྣམས་ཀྱིས་བསགས་པའི་རྒྱུ་ནོར་ཐམས་ཅད་ཀྱང་དཀོན་མཆོག་ཐུགས་མཉེས་པ་ལ་ནོར་སྐལ་དུ་གཏོང་ངོ་། །འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་ལས་མ་འདས་སོ། །
ECC 3:1 བྱ་བ་ཀུན་ལ་དུས་ཤིག་ཡོད་པ་དང་། ། གནམ་འོག་དོན་རེར་དུས་ཤིག་ཡོད་པ་སྟེ། །
ECC 3:2 སྐྱེ་བའི་དུས་ཤིག་འཆི་བའི་དུས་ཤིག་ཡོད། ། འཛུགས་པའི་དུས་ཤིག་འབལ་བའི་དུས་ཤིག་ཡོད།
ECC 3:3 གསོད་པའི་དུས་ཤིག་གསོ་བའི་དུས་ཤིག་ཡོད། ། བཤིག་པའི་དུས་ཤིག་བསྐྲུན་པའི་དུས་ཤིག་ཡོད། །
ECC 3:4 ངུ་བའི་དུས་ཤིག་དགོད་པའི་དུས་ཤིག་ཡོད། ། མྱ་ངན་དུས་ཤིག་གར་རྩེད་དུས་ཤིག་ཡོད། །
ECC 3:5 རྡོ་བ་འཕེན་པའི་དུས་ཤིག་ཡོད་པ་དང་། ། རྡོ་བ་སྤུང་བའི་དུས་ཤིག་ཀྱང་ནི་ཡོད། ། འཐམ་པའི་དུས་ཤིག་མི་འཐམ་དུས་ཤིག་ཡོད། །
ECC 3:6 འཚོལ་བའི་དུས་ཤིག་སྤང་བའི་དུས་ཤིག་ཡོད། ། འཇོག་པའི་དུས་ཤིག་འཕེན་པའི་དུས་ཤིག་ཡོད། །
ECC 3:7 དབྲལ་བའི་དུས་ཤིག་འཚེམ་པའི་དུས་ཤིག་ཡོད། ། ཁ་ཁུ་སིམ་པོར་སྡོད་པའི་དུས་ཤིག་དང་། ། ངག་ནས་སྐད་ཆ་སྨྲ་བའི་དུས་ཤིག་ཡོད། །
ECC 3:8 བརྩེ་བའི་དུས་ཤིག་སྡང་བའི་དུས་ཤིག་ཡོད། ། འཐབ་མོའི་དུས་ཤིག་ཞི་བདེའི་དུས་ཤིག་ཡོད། །
ECC 3:9 དེས་ན་ལས་ཀ་བྱེད་པའི་མི་ལ་རང་གི་དཀའ་ལས་ཀྱི་ནང་ནས་ཕན་ཐོགས་ཅི་ཞིག་འཐོབ་བམ།
ECC 3:10 དཀོན་མཆོག་གིས་མི་རྣམས་ལ་ལས་ཀ་གནང་སྟེ་ཁོ་ཚོ་དེ་ལ་བྲེལ་བ་ངས་མཐོང་བྱུང་ངོ་། །
ECC 3:11 དཀོན་མཆོག་གིས་ཐམས་ཅད་བཀོད་པ་དང་། ཁོང་ཉིད་ཀྱི་དུས་སུ་དངོས་པོ་ཐམས་ཅད་མཛེས་པར་བཀོད་ཅིང་། ཐོག་མཐའ་མེད་པའི་འདུ་ཤེས་ཀྱང་དེ་དག་གི་སེམས་སུ་བཞག་པར་མཛད་ནའང་། དཀོན་མཆོག་གི་ཐོག་མཐའ་བར་གསུམ་གྱི་མཛད་པ་ནི་མི་རྣམས་ཀྱིས་རྟོགས་མི་ནུས་སོ། །
ECC 3:12 མི་རྣམས་ཚེ་གང་པོར་དགའ་ཞིང་དགེ་བ་སྒྲུབ་པ་ལས་ལྷག་པ་ཞིག་མེད་པ་ངས་རྟོགས་བྱུང་།
ECC 3:13 མི་རྣམས་ཀྱིས་བཟའ་བཏུང་སྤྱོད་པ་དང་། རང་གི་དཀའ་ལས་ཐམས་ཅད་ཀྱི་འབྲས་བུ་ལོངས་སུ་སྤྱོད་པ་ནི་དཀོན་མཆོག་གི་གནང་སྦྱིན་ལགས་སོ། །
ECC 3:14 དཀོན་མཆོག་གིས་ཅི་མཛད་ཐམས་ཅད་རྟག་ཏུ་གནས་ཏེ། དེའི་ནང་དུ་ཅི་ཡང་བསྣོན་པར་མི་ནུས་ལ་ཅི་ཡང་འཕྲི་བར་མི་འཇོན། དེ་ནི་མི་རྣམས་དཀོན་མཆོག་ལ་གུས་ཤིང་འཇིགས་པའི་ཆེད་དུ་ཁོང་གིས་དེ་བཞིན་བསྒྲུབས་པ་ངས་རྟོགས་བྱུང་།
ECC 3:15 ད་ལྟ་ཡོད་པ་དེ་སྔར་ནས་བྱུང་ཟིན་པ་དང་། འབྱུང་འགྱུར་གྱི་དོན་རྣམས་ཀྱང་སྔར་ནས་བྱུང་བ་ཡིན་ཏེ། དཀོན་མཆོག་གིས་འདས་ཟིན་རྣམས་ཡང་བསྐྱར་འབྱུང་བར་མཛད་དོ། །
ECC 3:16 ཡང་དེར་མ་ཟད་ངས་ཉི་མའི་འོག་ཏུ་ཁྲིམས་ཐག་གཅོད་སར་གཡོ་སྒྱུ་ལྡན་པ་དང་། དྲང་བདེན་ཡིན་སར་གཡོ་སྒྱུ་ཡོད་པའང་རྟོགས་བྱུང་།
ECC 3:17 ངས་རང་གི་སེམས་སུ། བྱ་བ་རེ་རེ་དང་ལས་དོན་ཐམས་ཅད་ལ་དུས་ཤིག་ཡོད་པས། དཀོན་མཆོག་གིས་མི་དྲང་བདེན་དང་མི་ངན་པ་གཉིས་ལ་ལེགས་ཉེས་འབྱེད་པར་འགྱུར་སྙམ་དུ་བསམས་བྱུང་།
ECC 3:18 ཡང་ངས་རང་གི་སེམས་སུ། འཇིག་རྟེན་མི་བུ་རྣམས་ལ་མཚོན་ན་དཀོན་མཆོག་གིས་དེ་དག་ལ་བརྟག་པར་མཛད་ཅིང་། མི་རྣམས་ལ་རང་ཉིད་ནི་དུད་འགྲོ་ལྟ་བུ་ཡིན་པ་རྟོགས་སུ་འཇུག་སྙམ་པ་ཡིན།
ECC 3:19 ཅི་ལ་ཞེ་ན། མི་བུ་རྣམས་ལ་བྱུང་བ་དེ་རྣམས་དུད་འགྲོ་ལའང་འབྱུང་ལ། དེ་གཉིས་ཀའི་སྔོན་ལས་ནི་གཅིག་ཡིན་ཏེ། འདི་ཅི་ལྟར་འཆི་བ་ཡིན་ན་དེ་ཡང་དེ་ལྟར་དུ་འཆི་བ་ཡིན། དེ་གཉིས་ཀྱིས་དབུགས་ལེན་པའང་གཅིག་ཡིན་པས། མི་ནི་དུད་འགྲོ་ལས་རྩ་ཆེན་མ་ཡིན་ལ་ཐམས་ཅད་སྟོང་པ་ཡིན།
ECC 3:20 ཐམས་ཅད་གནས་གཅིག་ཏུ་འགྲོ་བ་སྟེ། ཐམས་ཅད་ས་རྡུལ་ལས་བྱུང་ཞིང་། ཐམས་ཅད་སླར་ཡང་ས་རྡུལ་དུ་འགྱུར་བ་ཡིན།
ECC 3:21 མི་ཡི་རྣམ་ཤེས་ཡར་འཕག་པ་དང་། དུད་འགྲོའི་རྣམ་ཤེས་ནི་མར་ལྷུང་བ་སུ་ཡིས་ཤེས་སམ།
ECC 3:22 དེ་བས། མི་ལ་རང་གི་ལས་རྣམས་ནས་དགའ་སྤྲོ་ཐོབ་པ་ལས་ལྷག་པ་ཞིག་མེད་པ་ངས་མཐོང་བྱུང་། དེ་ནི་ཁོའི་ཐོབ་སྐལ་ཡིན་པས་སོ། །སུ་ཞིག་གིས་ཁོའི་རྗེས་སུ་འབྱུང་བ་དེ་ཁོ་ལ་སྟོན་ནུས་སམ།
ECC 4:1 ཡང་ཉི་མའི་འོག་ཏུ་གཉའ་གནོན་གྱི་བྱ་བ་རྣམས་བྱུང་བ་ངས་མཐོང་སོང་། གཉའ་གནོན་ཐེབས་མཁན་རྣམས་ངུས་ཀྱང་སེམས་གསོ་བྱེད་མཁན་སུ་ཡང་མེད་དེ། དེ་དག་ལ་གཉའ་གནོན་བྱེད་མཁན་རྣམས་དབང་ཆེ་བས། དེ་དག་ལ་སེམས་གསོ་བྱེད་མཁན་མེད་དོ། །
ECC 4:2 དེ་བས། ངས་ད་ལྟ་གསོན་པོར་གནས་པའི་གསོན་པོ་རྣམས་ལས་སྔར་ནས་འདས་ཟིན་པའི་གཤིན་པོ་རྣམས་ལ་ལྷག་པར་བསྟོད་པ་ཡིན།
ECC 4:3 འོན་ཀྱང་དེ་གཉིས་ཀ་ལས་ཀྱང་། ཉི་མའི་འོག་ཏུ་བྱས་པའི་ལས་ངན་པ་མ་མཐོང་བའི་ད་དུང་སྐྱེས་མེད་པ་དག་ནི་སྐྱིད་པར་བསམས།
ECC 4:4 མི་རྣམས་ཀྱིས་སྤྱད་པའི་དཀའ་བ་དང་གྲུབ་འབྲས་ཐམས་ཅད་ཀྱང་ཕན་ཚུན་བར་གྱི་ཕྲག་དོག་ལས་བྱུང་བ་ངས་མཐོང་བྱུང་། འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་མོ། །
ECC 4:5 བླུན་པོས་ལག་པར་ལག་པ་རུམ་ནས་རང་ཤ་རང་གིས་ཟ་བ་ཡིན།
ECC 4:6 དཀའ་ལས་ངང་རླུང་ལ་ཞགས་པ་འཕེན་པའི་སྤར་བ་གཉིས་ལས། སེམས་ལྷོད་པོའི་སྤར་བ་གང་དེ་ལེགས་སོ། །
ECC 4:7 དེ་ནས་ངས་སླར་ཡང་ཉི་མའི་འོག་གི་སྙིང་པོ་མེད་པའི་དོན་ཞིག་མཐོང་བ་ནི།
ECC 4:8 མི་ལ་ལ་གྲོགས་མེད་ཁེར་རྐྱང་ཡིན་ལ། བུ་ཡང་མེད། སྤུན་ཟླ་ཡང་མེད། འོན་ཀྱང་དེའི་འབད་བརྩོན་ལ་རྫོགས་མཐའ་མེད་ཅིང་། དེའི་མིག་ཟུང་ཡང་ནོར་གྱིས་མི་ཚིམ། དེ་ན་རེ། ངས་དཀའ་ལས་ཡོད་ཚད་སུའི་དོན་དུ་བྱེད་ཅིང་། ཅི་ལ་རང་གི་སེམས་བདེ་བ་ལས་འབྲལ་བར་བྱེད་དམ་ཟེར། འདི་ཡང་སྟོང་པ་ཡིན་ལ་ཁུར་བོ་ཤིན་ཏུ་ལྗིད་པོ་ཡིན་ནོ། །
ECC 4:9 མི་ཁེར་རྐྱང་ལས་མི་གཉིས་ཡིན་ན་དགའ། གང་ལ་ཞེ་ན། དེ་དག་ལ་དཀའ་ལས་ཀྱི་རྔན་པ་ལེགས་པར་འཐོབ་སྟེ།
ECC 4:10 གཅིག་འགྱེལ་ན་གཞན་དེས་རང་གི་གྲོགས་པོ་སློང་བར་བྱ། འོན་ཀྱང་གཅིག་པུ་ཡིན་པ་དེ་འགྱེལ་ན། ཁོ་རང་སློང་མཁན་མེད་པས་མི་དེར་ཆག་སྒོ་ཡིན་ནོ། །
ECC 4:11 ཡང་མི་གཉིས་མཉམ་དུ་ཉལ་ན་དྲོན་པོ་ཡིན་མོད། འོན་ཀྱང་མི་ཁེར་རྐྱང་ནི་ཅི་ལྟར་དྲོ་བར་འགྱུར།
ECC 4:12 ཡང་མི་ཁེར་རྐྱང་ནི་དགྲ་ངོར་འཕམ་ཞིང་མི་གཉིས་ཀྱིས་ཐུབ་པར་འགྱུར། ཐག་པ་སུམ་རྐྱ་ནི་མྱུར་དུ་མི་ཆད།
ECC 4:13 ཞལ་གདམས་ལ་མི་ཉན་པའི་རྒྱལ་པོ་བླུན་པོ་ཞིག་ལས། ན་གཞོན་དབུལ་པོ་མཁས་པ་ཞིག་ལེགས།
ECC 4:14 ན་གཞོན་དེ་ནི་རྒྱལ་སྲིད་ཀྱི་ནང་དུ་དབུལ་པོར་སྐྱེས་པ་དང་། བཙོན་ར་ནས་ཐོན་ཏེ་རྒྱལ་སྲིད་འཛིན་དུ་འོངས་པའོ། །
ECC 4:15 ཡང་ཉི་མའི་འོག་ཏུ་གསོན་པོར་གནས་པ་ཐམས་ཅད་རྒྱལ་པོ་རྒན་པ་དེའི་ཚབ་ཏུ་རྒྱལ་སྲིད་འཛིན་དུ་འོངས་པའི་ན་གཞོན་དེའི་རྗེས་སུ་འབྲངས་ནས།
ECC 4:16 ཁོས་སྐྱོང་བའི་མི་རྣམས་ཏེ་འབངས་མི་ཐམས་ཅད་བགྲང་ལས་འདས་ཀྱང་། དེའི་རྗེས་སུ་ཐོན་པ་རྣམས་དེ་ལ་ཡང་དགའ་བར་མ་གྱུར་པས། འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་མོ། །
ECC 5:1 ཁྱོད་རང་དཀོན་མཆོག་གི་མཆོད་ཁང་དུ་འགྲོ་དུས་སུ་རང་གི་གོམ་སྟབས་ལ་གཟབ་གཟབ་གྱིས་ཤིག ཉེ་སར་བཏུད་ནས་དཀོན་མཆོག་གི་བཀའ་ལ་ཉན་པ་ནི་བླུན་པོ་ཞིག་གིས་སྦྱིན་སྲེག་འབུལ་བ་ལས་ལེགས་ཏེ། ཁོ་ཚོས་རང་གིས་ལས་ངན་པ་བྱས་པའང་མི་ཤེས་སོ། །
ECC 5:2 དཀོན་མཆོག་གི་དྲུང་དུ་ཁྱོད་བབ་ཅོལ་ཅན་བྱས་ནས་གཏམ་སྨྲ་བར་ཁ་མ་མགྱོགས་ཤིག གང་ལ་ཞེ་ན། དཀོན་མཆོག་ནི་ནམ་མཁར་བཞུགས་ཤིང་ཁྱོད་ས་ལ་ཡོད་པས། གཏམ་ཉུང་ཉུང་བརྗོད་པར་གྱིས་ཤིག
ECC 5:3 དོན་བྱ་མང་ན་རྨི་ལམ་འབྱུང་བ་དང་། སྨྲ་བརྗོད་མང་བ་བླུན་པོའི་རྟགས།
ECC 5:4 ནམ་ཞིག་ཁྱོད་ཀྱིས་དཀོན་མཆོག་ལ་དམ་བཅས་པ་ཡིན་ན་དེ་བསྒྲུབ་པར་དུས་འགྱང་མ་བྱེད། ཅི་ལ་ཞེ་ན། བླུན་པོ་རྣམས་ལ་ཁོང་ཐུགས་མི་མཉེས་པས། དམ་བཅའ་དེ་ཅི་ནས་ཀྱང་བསྒྲུབ་དགོས།
ECC 5:5 དམ་བཅས་ནས་མི་བསྒྲུབ་པ་ལས་དམ་མ་བཅས་ན་ལེགས།
ECC 5:6 ཁྱོད་ཀྱིས་རང་གི་སྨྲ་སྒོའི་རྐྱེན་གྱིས་རང་ཉིད་ཉེས་པར་ལྷུང་དུ་འཇུག་མི་རུང་། ཕོ་ཉའི་མདུན་དུ་ངས་མ་ཤེས་པར་དམ་བཅས་ནས་ནོར་སོང་ཞེས་མ་ཞུས་ཤིག ཁྱོད་ཀྱི་སྐད་ཀྱིས་དཀོན་མཆོག་ལ་ཐུགས་ཁྲོ་བསླངས་ནས་ཁྱོད་ཀྱི་ལག་གི་ལས་ཀ་མེད་པར་མཛད་དུ་འཇུག་དོན་ཅི་ཡོད།
ECC 5:7 རྨི་ལམ་མང་བ་དང་གཏམ་མང་བ་ཐམས་ཅད་སྟོང་པ་ཡིན་པས། ཁྱོད་ཀྱིས་དཀོན་མཆོག་ལ་གུས་ཤིང་འཇིགས་པར་གྱིས།
ECC 5:8 ཇི་སྟེ་ཁྱོད་ཀྱིས་ཡུལ་ཞིག་ཏུ་དབུལ་པོ་ལ་གཉའ་གནོན་ཐེབས་པ་དང་། ཁྲིམས་ལོག་དང་གཤགས་ལོག་བྱེད་པ་མཐོང་ན་དེར་ཧ་ལས་མི་དགོས་ཏེ། ཅིའི་ཕྱིར་ཞེ་ན། མཐོ་ཤོས་རྣམས་ལས་ཀྱང་མཐོན་པོ་ཡིན་པ་དེས་ལྟ་སྐྱོང་བྱེད་ཅིང་། དེ་དག་ལས་ཀྱང་མཐོ་བ་ཞིག་ཡོད་དོ། །
ECC 5:9 དེར་མ་ཟད་ས་གཞིའི་ཁེ་བཟང་ནི་ཀུན་གྱི་ཕྱིར་ཡིན་ཏེ། རྒྱལ་པོ་ཡིན་ནའང་ཞིང་གིས་དེ་ལ་ཕན་ཐོགས་སོ། །
ECC 5:10 དངུལ་འདོད་ཅན་ཞིག་དངུལ་གྱིས་ཆོག་པར་མི་འགྱུར། ནོར་འདོད་ཅན་ཞིག་འཕེལ་བས་ཀྱང་ཆོག་པར་མི་འགྱུར། འདི་ཡང་སྟོང་པ་ཡིན།
ECC 5:11 ནོར་འཕེལ་དུས་ལོངས་སྤྱོད་བྱེད་མཁན་ཡང་འཕེལ་བས། ནོར་གྱི་བདག་པོ་ལ་མིག་གིས་ལྟ་བ་ལས་ཕན་ཐོགས་ཅི་ཡོད་དམ།
ECC 5:12 ལས་བྱེད་མཁན་གྱིས་མང་ཉུང་ཅི་ཟ་ཡང་དེའི་གཉིད་སྐྱིད་མོད། འོན་ཀྱང་ནོར་མང་པོས་ཕྱུག་པོ་གཉིད་དུའང་མི་འཇུག་གོ །
ECC 5:13 ངས་ཉི་མའི་འོག་ཏུ་སེམས་སྡུག་པའི་རྐྱེན་ངན་ཆེན་པོ་ཞིག་མཐོང་སྟེ། གང་ཡིན་ཞེ་ན། རྒྱུ་ནོར་གྱིས་བདག་པོ་རང་ལ་གནོད་བསྐྱལ་ཏོ། །
ECC 5:14 ཁོ་ལ་གནོད་འཚེ་ཐེབས་པས་རྒྱུ་ནོར་ཟད་པ་དང་། བུ་ཞིག་སྐྱེས་ན་ཡང་དེའི་ལག་ཏུ་ཅི་ཡང་མེད་དེ།
ECC 5:15 གཅེར་བུར་མངལ་ནས་ཐོན་པ་ལྟར་ཕྱིར་ཡང་དེ་ལྟར་འགྲོ་བ་སྟེ། དེས་དཀའ་བ་སྤྱད་པའི་ཐོབ་བྱ་དག་ནི་ཅི་ཡང་མཉམ་དུ་འཁྱེར་མི་ནུས།
ECC 5:16 ཁོ་ཅི་ལྟར་འོངས་པ་དེ་ལྟར་འགྲོ་དགོས་ཏེ། ལས་དོན་གྱི་ཆེད་དུ་འབད་ཀྱང་ཁོ་ལ་ཕན་ཅི་ཐོགས། འདི་ཡང་སེམས་སྡུག་པའི་རྐྱེན་ངན་ཆེན་པོ་ཞིག་གོ །
ECC 5:17 དེའི་ཚེ་གང་པོ་ནི་མུན་ནག་དང་སྡུག་བསྔལ་ནང་དུ་རོལ་བ་དང་། སེམས་ཁྲལ་མང་ཞིང་ན་ཚ་ཕོག་ནས་ཁོང་ཁྲོ་ཟའོ། །
ECC 5:18 ངས་ལེགས་ཤིང་ཡིད་དུ་འོང་བར་མཐོང་བའི་དོན་ནི། མི་ཡིས་དཀོན་མཆོག་གིས་གནང་བའི་ཚེ་གང་པོར་བཟའ་བཏུང་སྤྱོད་པ་དང་། ཉི་མའི་འོག་ཏུ་སྤྱད་པའི་དཀའ་བ་ཐམས་ཅད་ནས་ཐོབ་པའི་འབྲས་བུ་ལོངས་སུ་སྤྱད་དེ་སྐྱིད་པོ་བྱེད་པ་དེ་ཡིན་ལ། ཅིའི་ཕྱིར་ཞེ་ན། འདི་ནི་ཁོ་ལ་ཐོབ་འོས་པ་ཡིན་ནོ། །
ECC 5:19 དེར་མ་ཟད། དཀོན་མཆོག་གིས་མི་ལ་ནོར་དང་ལོངས་སྤྱོད་གནང་ཞིང་། དེ་ལས་བཟའ་བ་དང་རང་གི་ཐོབ་སྐལ་བླངས་ནས་རང་གི་དཀའ་ལས་ཁྲོད་དགའ་མགུ་བྱེད་པའི་དབང་ཡང་གནང་བ་ལགས། འདི་ནི་དཀོན་མཆོག་གི་གནང་སྦྱིན་ཡིན་ནོ། །
ECC 5:20 དཀོན་མཆོག་གིས་དེའི་སེམས་སུ་དགའ་སྤྲོ་གནང་བས། དེས་རང་གི་ཚེ་གང་པོའི་དོན་རྣམས་མང་དུ་དྲན་པར་མི་བྱའོ། །
ECC 6:1 ངས་ཉི་མའི་འོག་ཏུ་སྡུག་བསྔལ་ཞིག་མཐོང་བ་དང་། དེ་ནི་མི་ལ་ལྗིད་པོ་ཡིན་ཏེ།
ECC 6:2 དཀོན་མཆོག་གིས་མི་ལ་ཁོའི་འདོད་པ་བཞིན་དུ་རྒྱུ་ནོར་ལོངས་སྤྱོད་དང་ཐོབ་གོ་ས་གནང་ཡང་། ཁོ་ལ་ལོངས་སུ་སྤྱོད་པའི་དབང་ཐང་མ་གནང་བས། མི་ཆ་མེད་ཀྱིས་དེ་ལོངས་སུ་སྤྱོད་པ་སྟེ། འདི་ཡང་སྟོང་པ་ཡིན་པ་དང་སེམས་སྡུག་པའི་རྐྱེན་ངན་ཞིག་གོ །
ECC 6:3 ཇི་སྟེ་མི་ཞིག་ལ་བུ་བརྒྱ་སྐྱེས་ནས་ཚེ་ཐག་ཤིན་ཏུ་རིང་ཡང་། ཁོའི་སེམས་སུ་ད་དུང་ཡིད་མ་ཚིམ་པ་དང་། དེའི་བེམ་པོ་ཡང་དུར་ལ་འཇུག་པར་མ་གྱུར་ན། མངལ་དུ་ཤི་བའི་བུ་ནི་ཁོ་ལས་ལྷག་པ་ཡིན་ཞེས་ངས་སྨྲའོ། །
ECC 6:4 ཅིའི་ཕྱིར་ཞེ་ན། མངལ་ལས་བྱུང་བ་དེ་ནི་ཕན་ཐོགས་མེད་པར་ཐོན་པ་དང་མུན་པའི་ནང་དུ་འགྲོ་བས། དེའི་མིང་ནི་མུན་པའི་ནང་དུ་ནུབ་པར་གྱུར།
ECC 6:5 དེས་ཉི་མ་མཐོང་མ་མྱོང་ལ་ཅི་ཡང་མ་ཤེས་པས། མི་དེ་ལས་འདི་ལ་ངལ་གསོ་ཡོད།
ECC 6:6 དེར་མ་ཟད། གལ་ཏེ་མི་དེ་ནི་ལོ་ངོ་ཉིས་སྟོང་ལ་གསོན་པོར་གནས་ཀྱང་བདེ་སྐྱིད་ལ་རོལ་མ་ཐུབ་ན། མཐར་ཚང་མ་གནས་གཅིག་ཏུ་འགྲོ་བ་མ་ཡིན་ནམ།
ECC 6:7 མིའི་དཀའ་ལས་ཐམས་ཅད་རང་གི་ལྟོ་བཅུད་ཀྱི་དོན་དུ་ཡིན་པ་ལས་ཡིད་ཚིམ་པ་མེད་དོ། །
ECC 6:8 དེ་ཅིའི་ཕྱིར་ཞེ་ན། མཁས་པ་ལ་བླུན་པོ་ལས་ལྷག་པའི་དགེ་མཚན་ཅི་ཡོད་དམ། སྡུག་བསྔལ་ཅན་གྱིས་མི་རྣམས་ཀྱི་མདུན་དུ་ཅི་ལྟར་བྱེད་པ་ཤེས་ཀྱང་དེར་ཕན་ཐོགས་ཅི་ཡོད།
ECC 6:9 སེམས་སུ་དྲན་པ་ལས་མིག་གིས་མཐོང་བ་ལེགས། འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་མོ། །
ECC 6:10 སྔར་ཡོད་པ་ལ་སྔ་མོ་ནས་མིང་བཏགས་ཡོད་དེ། མི་ཡིས་རང་ནི་ཅི་འདྲ་ཡིན་པ་དང་། རང་ལས་སྟོབས་ཆེ་བ་དང་འགྲན་མི་ནུས་པ་རྟོགས་ཡོད།
ECC 6:11 གཏམ་མང་ན་སྙིང་པོ་མེད་པ་དེ་ལས་མང་བས། དེ་དག་མི་ལ་ཕན་ཐོགས་ཅི་ཡོད་དམ།
ECC 6:12 སྟོང་ཟད་དུ་བཏང་བའི་གྲིབ་མ་ལྟ་བུའི་མི་ཚེ་ནི་རང་ལ་ཕན་ཐོགས་ཅི་ཡོད་པ་སུ་ཡིས་རྟོགས། རྗེས་སུ་ཉི་མའི་འོག་ཏུ་ཅི་འབྱུང་བར་འགྱུར་བ་སུས་འཆད་ནུས་སམ།
ECC 7:1 ཕུལ་དུ་བྱུང་བའི་བྱུག་སྣུམ་ལས། ། མཚན་དང་སྙན་གྲགས་རྒྱས་པ་ལེགས། ། སྐྱེས་དུས་ལས་ནི་འཆི་དུས་ལེགས། །
ECC 7:2 སྟོན་མོའི་ཁྱིམ་དུ་འགྲོ་བ་ལས། ། མྱ་ངན་བྱེད་སར་འགྲོ་བ་ལེགས། ། གང་ལ་ཞེ་ན་འཆི་བ་ནི། ། མི་བུ་ཀུན་གྱི་མཐའ་འབྲས་ཡིན། ། གསོན་པོ་རྣམས་ཀྱིས་དོན་དེ་ཉིད། ། རྟག་ཏུ་ཡིད་ལ་ངེས་དགོས་སོ། །
ECC 7:3 དགའ་བ་ལས་ནི་སྐྱོ་བ་ལེགས། ། རྒྱུ་མཚན་སྐྱོ་བའི་ངོ་གདོང་གིས། ། མི་ཡི་སེམས་ལ་ཕན་ཐོགས་སོ། །
ECC 7:4 མཁས་པའི་སེམས་ནི་མྱ་ངན་ཁྱིམ་དུ་ཡོད། ། བླུན་པོའི་སེམས་ནི་སྤྲོ་སྐྱིད་ཁྱིམ་དུ་ཡོད། །
ECC 7:5 བླུན་པོའི་བསྟོད་གླུར་ཉན་པ་ལས། ། མཁས་པའི་བཀའ་བཀྱོན་ཐོས་ན་ལེགས། །
ECC 7:6 བླུན་པོ་གད་མོ་དགོད་པའི་སྒྲ། ། ཚེར་མ་མེ་ལ་བསྒྲོན་དང་མཚུངས། ། དེ་ལ་སྙིང་པོ་གང་ཡང་མེད། །
ECC 7:7 བཙན་འཕྲོག་གིས་ནི་མཁས་པ་བླུན་པོར་བསྒྱུར། ། ལྐོག་རྔན་གྱིས་ནི་མི་སེམས་བརླག་པར་བྱེད། །
ECC 7:8 དོན་གྱི་ཐོག་མ་ལས་ནི་ཕུགས་འབྲས་ལེགས། ། ང་རྒྱལ་ལས་ནི་བཟོད་སྒོམ་བྱེད་པ་ལེགས། །
ECC 7:9 ཁོང་ཁྲོ་བླུན་པོའི་སེམས་སུ་གནས་པས་ན། ། རང་སེམས་རང་དགར་ཁྲོ་བར་མི་བྱ་འོ། །
ECC 7:10 ཁྱོད་ཀྱིས་སྔ་མའི་དུས་ནི་ད་ལྟ་ལས། ། ལེགས་པ་ཅི་ཞིག་ཡིན་ནམ་མ་ཟེར་ཞིག ། དེ་བཞིན་འདྲི་བ་མཁས་རྟགས་མ་ཡིན་ནོ། །
ECC 7:11 ཤེས་རབ་དང་ནི་ནོར་སྐལ་གཉིས་ཀ་བཟང་། ། ཉི་མ་མཐོང་བ་དག་ལ་ཕན་ཐོགས་ཆེ། །
ECC 7:12 རྒྱུ་ཡིས་མི་ནི་སྲུང་བ་ལྟར། ། ཤེས་རབ་ཀྱིས་ཀྱང་བསྲུང་བར་མཛད། ། དེ་ཡང་ཤེས་རབ་འབའ་ཞིག་གིས། ། ཤེས་རབ་དང་ནི་ལྡན་པ་ཡི། ། ཚེ་སྲོག་གཅེས་སྲུང་མཛད་ནུས་ཤིང་། ། དེ་ནི་ཤེས་བྱའི་ཕན་ཡོན་ཡིན། །
ECC 7:13 དཀོན་མཆོག་མཛད་པར་ཞིབ་ཏུ་ལྟོས། ། ཁོང་གིས་གང་ཞིག་བཀུག་པ་དེ། ། སུ་ཡིས་བསྲང་བར་བྱ་ནུས་སམ། །
ECC 7:14 བདེ་བླག་ཡིན་པའི་དུས་སུ་དགའ་བར་གྱིས། ། དཀའ་སྡུག་མྱོང་བའི་དུས་སུ་བསམ་བློ་ཐོངས། ། དཀོན་མཆོག་ཉིད་ཀྱིས་འདི་གཉིས་འབྱུང་བར་མཛད། ། མི་ཡིས་འབྱུང་འགྱུར་མི་ཤེས་ཆེད་དུ་ཡིན། །
ECC 7:15 དྲང་བདེན་ཅན་ནི་དྲང་བདེན་ནང་དུ་འཆི་བ་དང་། ངན་པས་སྡིག་པའི་ནང་དུ་མི་ཚེ་བཏང་ནས་ཚེ་ལོ་མཐར་ཕྱིན་པ་ཐམས་ཅད་ངས་སྙིང་པོ་མེད་པའི་མི་ཚེ་ལ་རོལ་བའི་དུས་སུ་མཐོང་བྱུང་།
ECC 7:16 དྲང་བདེན་ཚད་ལས་བརྒལ་དུ་མ་འཇུག སྤྱང་གྲུང་ཚད་ལས་བརྒལ་དུའང་མ་འཇུག རང་གིས་རང་ཉིད་འཕུང་བར་ཅི་ལ་བྱེད།
ECC 7:17 ཚོད་མེད་པར་སྤྱོད་ངན་མ་བྱེད། བླུན་པོར་མ་གྱུར་ཅིག དུས་མ་སླེབས་པར་འཆི་དགོས་དོན་ཅི་ཡོད།
ECC 7:18 འདི་བསྲུང་བར་མ་ཟད་གཞན་དེ་ཡང་ལག་པས་མ་ལྷོད་ཅིག ཅི་ལ་ཞེ་ན། དཀོན་མཆོག་ལ་གུས་ཤིང་འཇིགས་པ་རྣམས་ནི་འདི་གཉིས་ལ་གཡོལ་ངེས་ཡིན།
ECC 7:19 ཤེས་རབ་ཀྱིས་ནི་གྲོང་ཁྱེར་ལ་ཡོད་པའི་འགོ་དཔོན་བཅུ་ལས་མཁས་པ་ལ་ནི་ལྷག་པར་སྟོབས་དང་ལྡན་པར་བྱེད།
ECC 7:20 ས་སྟེང་དུ་རྟག་ཏུ་བཟང་པོ་བྱེད་ཅིང་ཉེས་པ་གང་ཡང་མི་བྱེད་པའི་མི་དྲང་པོ་ནི་གཅིག་ཀྱང་མེད།
ECC 7:21 གཏམ་ཐམས་ཅད་ལ་དོ་སྣང་མ་བྱེད་ཅིག ཇི་སྟེ་བྱས་ན་གཡོག་པོས་ཁྱོད་ལ་ངན་སྨྲ་བ་ཐོས་པར་འགྱུར།
ECC 7:22 དེ་ཅིའི་ཕྱིར་ཞེ་ན། ཁྱོད་ཀྱིས་ཀྱང་ལན་དུ་མར་གཞན་ལ་དེ་བཞིན་དུ་ངན་སྨྲས་པ་ནི་ཁྱོད་རང་གི་སེམས་ཀྱིས་ཤེས་སོ། །
ECC 7:23 ངས་དེ་སྔར་འདི་ཐམས་ཅད་ལ་ཤེས་རབ་ཀྱི་སྒོ་ནས་དཔྱད་པ་ཡིན། ང་མཁས་པར་འགྱུར་འདོད་ཅེས་སྨྲས་ཀྱང་། དེ་ནི་ང་དང་རྒྱང་རིང་དུ་མཆིས་ཏེ།
ECC 7:24 བྱ་བ་ཡོད་ཚད་རབ་ཏུ་རྒྱང་རིང་ཞིང་ཤིན་ཏུ་གཏིང་ཟབ་པས། སུ་ཞིག་གིས་དེ་རྟོགས་ནུས་སམ།
ECC 7:25 ངས་རང་གི་བློ་ཁ་བསྒྱུར་ཏེ། སེམས་གཏིང་ནས་ཤེས་རབ་དང་བྱ་བ་ཡོད་ཚད་ཀྱི་འབྱུང་རྐྱེན་རྟོགས་འདོད་པ་དང་དཔྱོད་འདོད་པ། བཙལ་འདོད་པ་ཡིན། ཡང་བླུན་པོའི་ལུགས་ནི་ངན་པ་དང་། ཁེངས་དྲེགས་ནི་བླུན་རྨོངས་ཡིན་པ་རྟོགས་འདོད་པ་ཡིན།
ECC 7:26 ཡང་ངས་བུད་མེད་ལ་ལ་ནི་འཆི་བ་ལས་ཀྱང་ཁ་ཏིག་ཡིན་པ་དང་། སེམས་ནི་རྙི་རྒྱ་དང་ལག་པ་ནི་ལྕགས་ཐག་ལྟ་བུ་ཡིན་པ་རྟོགས་ཤིང་། དཀོན་མཆོག་ཐུགས་མཉེས་པ་རྣམས་ནི་མོ་ལས་ཐར་བ་དང་། སྡིག་ཅན་རྣམས་ནི་མོས་འཛིན་པར་འགྱུར།
ECC 7:27 ཀྱེ་ཧོ་སྟོན་པས་འདི་སྐད་དུ། ངས་མཐར་ཐུག་དེ་རྟོགས་པའི་དོན་དུ་རེ་རེ་བཞིན་བསྡུར་ནས་བརྩད་ཆོད་པ་ནི། བྱ་བ་ཡོད་ཚད་ཀྱི་འབྱུང་རྐྱེན་ཤེས་འདོད་པ་ཡིན་ཏེ།
ECC 7:28 ད་ཙམ་གྱི་བར་དུ་ངའི་སེམས་ཀྱིས་བཙལ་ཡང་མ་ཐོབ། སྐྱེས་པ་སྟོང་ཕྲག་གི་ནང་ནས་གཞུང་དྲང་གཅིག་རང་ངས་རྙེད་ཀྱང་། བུད་མེད་ཐམས་ཅད་ལས་གཞུང་དྲང་གཅིག་ཀྱང་རྙེད་མ་བྱུང་།
ECC 7:29 དཀོན་མཆོག་གིས་མི་ནི་དྲང་པོར་བཀོད་ཀྱང་། དེ་དག་གིས་བྱུས་ངན་མང་པོ་བཙལ་ཡོད་པ་ཁོ་ན་ངས་རྙེད་པ་ཡིན་ནོ། །
ECC 8:1 མཁས་པ་དང་འདྲ་བ་སུ་ཡོད་དམ། དོན་ཐམས་ཅད་སུ་ཞིག་གིས་འགྲེལ་ནུས་སམ། ཤེས་རབ་ཀྱིས་མིའི་ངོ་མདངས་གསལ་བར་བྱེད་ལ། དེའི་ངོ་མདངས་རྩུབ་མོ་ཡང་འགྱུར་བར་བྱེད།
ECC 8:2 དཀོན་མཆོག་དཔང་དུ་བཙུགས་ནས་དམ་བཅས་པའི་རྐྱེན་གྱིས་རྒྱལ་པོའི་བཀའ་བརྩི་དགོས་པ་ངས་ཁྱོད་ལ་བསྐུལ་ཏེ།
ECC 8:3 རྒྱལ་པོའི་མདུན་ནས་འགྲོ་བར་མ་བྲེལ་ཞིག སྤྱོད་ངན་ནང་དུའང་བསྲེ་བར་མ་བྱེད་ཅིག ཅིའི་ཕྱིར་ཞེ་ན། ཁོང་གིས་ཉིད་ཀྱི་ཐུགས་དགོངས་བཞིན་དུ་བྱེད་པས་སོ། །
ECC 8:4 རྒྱལ་པོའི་བཀའ་ལ་དབང་ཆེན་པོ་ལྡན་ཏེ། ཁྱེད་ཀྱིས་ཅི་བྱེད་པ་ཡིན་ནམ་ཞེས་སུ་ཞིག་གིས་ཞུ་བར་ནུས་སམ།
ECC 8:5 བཀའ་ལ་ཉན་མཁན་གྱིས་རྐྱེན་ངན་མཐོང་བར་མི་འགྱུར་ཏེ། མཁས་པའི་སེམས་ཀྱིས་དུས་དང་གཏན་སྲོལ་གཉིས་ཀ་ཤེས།
ECC 8:6 དེ་ཅིའི་ཕྱིར་ཞེ་ན། མི་ཡི་སྟེང་དུ་སྡུག་གི་ཁུར་བོ་ལྕི་ནའང་། དོན་རེ་རེ་ལ་དུས་དང་གཏན་སྲོལ་ཡོད་པའོ། །
ECC 8:7 འབྱུང་འགྱུར་གྱི་དོན་རྣམས་ཁོས་མི་ཤེས་ཏེ། ཕྱིས་སུ་གང་ཞིག་འབྱུང་བར་འགྱུར་བ་སུས་ཁོ་ལ་འཆད་ནུས་སམ།
ECC 8:8 མི་སུས་ཀྱང་རླུང་ལ་ཁ་ལོ་བསྒྱུར་ནས་དེ་འགོག་མི་ཐུབ་ལ། ཡང་འཆི་དུས་ལ་དབང་ཡོད་པའི་མི་སུ་ཡང་མེད། འཐབ་མོ་འདི་ལ་ཞུགས་མི་དགོས་པ་སུ་ཡང་མེད། ངན་པས་ཀྱང་ངན་པ་བྱེད་མཁན་རྣམས་སྐྱོབ་པར་མི་ནུས།
ECC 8:9 འདི་དག་ཐམས་ཅད་ངས་མཐོང་སྟེ། ཉི་མའི་འོག་ཏུ་བྱུང་བའི་དོན་ཐམས་ཅད་ལ་སེམས་ཞིབ་མོས་བརྟགས་པ་ན། མི་གཅིག་གིས་གཞན་ལ་སྲིད་བྱེད་པའི་ངང་ནས་རང་ལ་རྐྱེན་ངན་འགུག་པའི་དུས་ཀྱང་འདུག་གོ །
ECC 8:10 དེ་ལྟར་ངས་མི་སྡིག་ཅན་དུར་ཁུང་དུ་བསྐུངས་པ་མཐོང་། སྔར་དེ་རྣམས་དམ་པའི་གནས་སུ་འགྲོ་འོང་བྱེད་ཅིང་། དེ་དག་གིས་སྤྱད་པ་སྤྱོད་སའི་གྲོང་ཁྱེར་ནང་གི་མི་རྣམས་ཀྱིས་བརྗེད་པ་སྟེ། འདི་ཡང་སྟོང་པ་ཡིན་ནོ། །
ECC 8:11 དེ་ཡང་སྤྱོད་ངན་ལ་མྱུར་དུ་ཆད་པ་མ་བཅད་པས། མི་རྣམས་ཀྱི་སེམས་སུ་ལས་ངན་པ་བྱེད་པའི་བསམ་བློས་ཁེངས།
ECC 8:12 ཇི་སྟེ་ངན་པས་ལན་བརྒྱ་ལ་ལས་ངན་པ་བྱས་ཀྱང་ཚེ་རིང་བར་གྱུར་ན། དཀོན་མཆོག་ལ་གུས་ཤིང་འཇིགས་པའི་མི་སྟེ་ཁོང་གི་དྲུང་དུ་གུས་ཞུམ་གྱི་སེམས་དང་ལྡན་པ་དག་གིས་སྐྱིད་ལ་རོལ་བ་ངས་ལེགས་པར་ཤེས་སོ། །
ECC 8:13 འོན་ཀྱང་ངན་པར་ནམ་ཡང་བདེ་སྐྱིད་མི་འཐོབ་ལ་ཚེ་ཐག་ཀྱང་མི་རིང་སྟེ། ཁོས་དཀོན་མཆོག་ལ་གུས་ཤིང་འཇིགས་པར་མི་བྱེད་པས། དེའི་མི་ཚེ་ནི་གྲིབ་མ་ལྟ་བུ་ཡིན་ནོ། །
ECC 8:14 ས་སྟེང་དུ་སྙིང་པོ་མེད་པའི་དོན་ཞིག་ཡོད་པ་ནི་དྲང་པོར་ངན་པས་ཅི་བྱས་བཞིན་ལན་འཐོབ་ཅིང་། ངན་པར་དྲང་པོས་ཅི་བྱས་བཞིན་ལན་འབྱུང་བ་སྟེ། ངས་འདི་ཡང་སྟོང་པ་ཡིན་ཞེས་སྨྲས་པའོ། །
ECC 8:15 བཟའ་བཏུང་སྤྱད་ནས་སྐྱིད་ལ་རོལ་བ་ལས་ལེགས་པ་ཞིག་ཉི་མའི་འོག་ཏུ་མི་ལ་གཞན་གང་ཡང་མེད་པས་ངས་བདེ་སྐྱིད་ལ་བསྟོད་པ་ཡིན། དེ་ཅིའི་ཕྱིར་ཞེ་ན། དཀོན་མཆོག་གིས་མི་ལ་ཉི་མའི་འོག་ཏུ་གནང་བའི་ཚེ་གང་པོའི་དཀའ་ལས་ཀྱི་འབྲས་བུ་ནི་དེ་དང་ལྷན་ཅིག་ཏུ་གནས་པར་འགྱུར་རོ། །
ECC 8:16 ངས་སེམས་པ་རྩེ་གཅིག་གིས་ཡེ་ཤེས་རྟོགས་འདོད་པ་དང་ས་གཞིའི་སྟེང་དུ་བྱེད་པའི་ལས་ཐམས་ཅད་ལ་བལྟས་པའི་ཚེ། ཞག་གང་པོར་གཉིད་མི་ཁུག་པའི་མི་ཡང་ཡོད་པ་རེད།
ECC 8:17 དཀོན་མཆོག་གིས་སའི་སྟེང་དུ་མཛད་པའི་འཕྲིན་ལས་ཐམས་ཅད་མི་ཡིས་རྟོགས་མི་ནུས་པ་མཐོང་། མི་ཡིས་ཉི་མའི་འོག་གི་ལས་རྣམས་རྟོགས་པའི་ཕྱིར་དཀའ་བ་སྤྱད་མོད་རྟོགས་པར་མི་འགྱུར། དེར་མ་ཟད་མཁས་པས་ངས་དེ་རྟོགས་སོ་བསམས་ཀྱང་ཁོས་དེ་ནམ་ཡང་རྟོགས་པར་མ་གྱུར་ཏོ། །
ECC 9:1 ངས་དོན་འདི་ཐམས་ཅད་སེམས་ལ་བཟུང་ཞིང་ཞིབ་ཏུ་བརྟགས་པ་ན། མི་དྲང་བདེན་དང་མཁས་པ་དག་གི་ལས་རྣམས་དཀོན་མཆོག་གི་ཕྱག་ཏུ་ཡོད་ཅིང་། མི་སུ་ཞིག་གིས་ཀྱང་རང་གི་སྔུན་དུ་ཡོད་པའི་ཆགས་སྡང་གང་ཡིན་ཡང་དེ་རྟོགས་མི་ནུས།
ECC 9:2 མི་ཐམས་ཅད་ཀྱི་སྔོན་ལས་ནི་གཅིག་མཚུངས་ཡིན་ཏེ། མི་དྲང་བདེན་དང་སྡིག་ཅན་གཉིས་དང་། མི་བཟང་པོ་དང་ངན་པ་གཉིས། གཙང་བ་དང་མི་གཙང་བ་གཉིས། མཆོད་པ་འབུལ་མཁན་དང་མཆོད་པ་མི་འབུལ་མཁན་གཉིས་བཅས་ཐམས་ཅད་ཀྱི་མྱོང་ཚུལ་གཅིག་འདྲ་ཡིན་ཏེ། མི་བཟང་པོ་ཅི་ལྟར་ཡིན་ན་སྡིག་ཅན་ཡང་དེ་ལྟར་ཡིན་ལ། མནའ་སྐྱེལ་མཁན་ཅི་ལྟར་ཡིན་ན་མནའ་བསྐྱལ་བར་འཇིགས་པའི་མི་ཡང་དེ་ལྟར་ཡིན།
ECC 9:3 ཉི་མའི་འོག་ཏུ་འབྱུང་བའི་དོན་ཐམས་ཅད་ལས་རྐྱེན་ངན་ཞིག་ཡོད་པ་ནི། མི་ཐམས་ཅད་ཀྱི་སྔོན་ལས་གཅིག་པར་མ་ཟད་མི་རྣམས་ཀྱི་སེམས་སུ་ངན་པས་གང་སྟེ། གསོན་པའི་སྐབས་སུ་ཁེངས་དྲེགས་བསྐྱེད་ཅིང་མཐར་གཤིན་པོའི་ཁྲོད་དུ་འགྲོ་བའོ། །
ECC 9:4 དེ་ལྟར་གསོན་པོ་ཀུན་དང་འབྲེལ་བ་རྣམས་ལ་རེ་བ་ཡོད་དེ། སེང་གེ་ཤི་རོ་ཞིག་ལས་ཁྱི་གསོན་པོ་ཞིག་གིས་དགའ།
ECC 9:5 ཅིའི་ཕྱིར་ཞེ་ན། གསོན་པོ་རྣམས་ཀྱིས་རང་ཉིད་འཆི་བར་འགྱུར་བ་ཤེས་ཀྱང་གཤིན་པོས་ཅི་ཡང་མི་ཤེས་ཏེ། དེ་དག་ལ་རྔན་པ་གང་ཡང་མི་འཐོབ་ལ་ཁོ་ཚོ་བརྗེད་པར་གྱུར་པ་ཡིན།
ECC 9:6 དེ་དག་གི་ཆགས་སྡང་དང་ཕྲག་དོག་ཀྱང་མེད་པར་གྱུར་ཅིང་། དེ་རྣམས་ལ་ཉི་མའི་འོག་གི་ལས་གང་རུང་ནས་ནམ་ཡང་ཐོབ་སྐལ་ཅི་ཡང་མེད་དོ། །
ECC 9:7 ཁྱོད་ཀྱི་ལས་རྣམས་དཀོན་མཆོག་གི་ཐུགས་ལ་ལྡན་པས་ན། དགའ་དགའ་སྤྲོ་སྤྲོས་རང་གི་ཁ་ཟས་སྤྱོད་ཅིང་བློ་བདེ་བག་ཕབ་ངང་རྒུན་ཆང་བཏུང་བར་གྱིས་ཤིག
ECC 9:8 རྒྱུན་དུ་རྒྱན་གོས་གྱོན་ཏེ་སྐྲ་ལ་སྣུམ་གྱིས་བྱུགས་ཤིག
ECC 9:9 ཁྱོད་ཀྱི་མི་ཚེའི་སྙིང་པོ་མེད་པའི་ལོ་ཟླ་རྣམས་ཏེ། དཀོན་མཆོག་གིས་ཉི་མའི་འོག་ཏུ་ཁྱོད་ལ་གནང་བའི་སྙིང་པོ་མེད་པའི་ལོ་ཟླའི་ནང་དུ། ཁྱོད་ཀྱིས་དགའ་སྤྲོའི་ངང་རང་གི་གཅེས་སུ་འཛིན་པའི་ཆུང་མ་དང་ལྷན་ཅིག་འཚོ་བ་རོལ་དགོས་ཏེ། དེ་ནི་ཁྱོད་ཀྱིས་ཉི་མའི་འོག་ཏུ་ཚེ་གང་པོར་དཀའ་བ་སྤྱད་ནས་ཐོབ་པའི་སྐལ་ཡིན་ནོ། །
ECC 9:10 ཁྱོད་རང་འགྲོ་སའི་གཤིན་པོའི་གནས་སུ་ལས་ཀ་མེད་ལ། འབྱུང་རྐྱེན་ཡང་མེད། ཤེས་བྱ་ཡང་མེད། ཤེས་རབ་ཀྱང་མེད་པས། རང་གིས་བསྒྲུབ་འོས་པའི་ལས་ནི་སྟོབས་ཤུགས་ཡོད་རྒུ་བཏོན་ནས་བསྒྲུབ་པར་གྱིས་ཤིག
ECC 9:11 ཡང་ངས་བལྟས་པ་ལ་ཉི་མའི་འོག་ཏུ་མགྱོགས་མྱུར་ཅན་ཡིན་ཡང་བང་རྩལ་གྱིས་མི་རྒྱལ། དཔའ་བོ་ཡིན་ཡང་འཐབ་མོར་མི་རྒྱལ། ཤེས་རབ་ཅན་ཡིན་ཡང་ཁ་ཟས་མི་རྙེད། བློ་ལྡན་ཡིན་ཡང་རྒྱུ་ནོར་མི་རྙེད། མཁས་པ་ཡིན་ཡང་མི་ཡི་བརྩི་མཐོང་མི་འབྱུང་སྟེ། དེ་དག་ཐམས་ཅད་དུས་དང་སྔོན་ལས་བཞིན་དུ་འབྱུང་བས་སོ། །
ECC 9:12 དྲ་བའི་ནང་དུ་ཚུད་པའི་ཉ་ལྟར་རམ། རྙི་རྒྱ་རུ་ཚུད་པའི་བྱ་ལྟར། མི་ཡིས་ཀྱང་རང་གི་དུས་མི་ཤེས་པས། མི་རྣམས་ཀྱི་སྟེང་ལ་གློ་བུར་ཉིད་ལ་རྐྱེན་ངན་འབྱུང་བའི་ཚེ་དེའི་ནང་དུ་ལྷུང་བར་འགྱུར་རོ། །
ECC 9:13 ཉི་མའི་འོག་ཏུ་ཤེས་རབ་ཅིག་ཡོད་པ་ངས་མཐོང་སྟེ། བདག་གིས་དོན་སྙིང་ཆེན་པོ་ལྡན་པར་སྙམ།
ECC 9:14 དེ་ཡང་མི་གྲངས་ཉུང་བའི་གྲོང་ཁྱེར་ཆུང་ངུ་ཞིག་ཡོད་དེ། ཡང་དེ་ལ་རྒྱལ་པོ་ཆེན་པོ་ཞིག་གིས་དམག་དྲངས་ཏེ་མཐའ་ནས་བསྐོར་ཞིང་། འཛིང་རགས་ཆེན་པོ་རྣམས་བརྩིགས་ནས་གྲོང་ཁྱེར་ལ་རྒོལ་ཡང་།
ECC 9:15 གྲོང་ཁྱེར་དེའི་ནང་དུ་མཁས་པ་དབུལ་པོ་ཞིག་ཡོད་པས། བློ་རིག་པར་བརྟེན་ནས་གྲོང་ཁྱེར་དེ་བསྐྱབས་པ་ཡིན་མོད། འོན་ཀྱང་མི་སུ་ཞིག་གིས་ཀྱང་མི་དེར་རྗེས་དྲན་མ་བྱས་སོ། །
ECC 9:16 མཁས་པ་དབུལ་པོ་དེ་ལ་མི་ཡིས་མཐོང་ཆུང་བྱས་ནས་ཁོའི་གཏམ་ལ་མ་མཉན་རུང་། དྲག་ཤུགས་ལས་ཤེས་རབ་ལེགས་སོ་ཞེས་ངས་སྨྲས་པ་ཡིན།
ECC 9:17 བླུན་པོ་རྣམས་ལ་སྲིད་བྱེད་པའི་མི་ཡི་ཀི་སྒྲ་ལས། མཁས་པས་གསུངས་པའི་འཇམ་པོ་ཚིག་ལ་མང་དུ་ཉོན།
ECC 9:18 འཐབ་མོའི་མཚོན་ཆ་ལས་ཤེས་རབ་ལེགས་མོད། འོན་ཀྱང་སྡིག་ཅན་གཅིག་གིས་དོན་བཟང་པོ་མང་ཙམ་སྟོངས་སུ་འཇུག་གོ །
ECC 10:1 སྦྲང་བུ་ཤི་རོས་དྲི་ཞིམ་སྦྱོར་བྱེད་ཀྱི། ། སྣུམ་ལ་དྲི་ངན་འཐུལ་དུ་འཇུག་པ་ལྟར། ། བླུན་པོའི་གླེན་རྟགས་ཕྲན་བུ་ཞིག་གིས་ཀྱང་། ། ཤེས་རབ་དང་ནི་གཟི་བརྗིད་གནོན་པར་བྱེད། །
ECC 10:2 མཁས་པའི་སྙིང་ནི་གཡས་སུ་ཕྱོགས་པ་དང་། ། བླུན་པོའི་སྙིང་ནི་གཡོན་དུ་བསེགས་ནས་ཡོད། །
ECC 10:3 བླུན་པོས་ལམ་དུ་སྐྱོད་པའི་དུས་སུ་ཡང་། ། རང་ལ་ཤེས་རབ་མེད་པ་སྟོན་བྱེད་ཅིང་། ། ཀུན་ལ་རང་ཉིད་བླུན་པོ་ཡིན་པ་མངོན། །
ECC 10:4 སྲིད་དབང་སྐྱོང་མཁན་ཁྱོད་ལ་ཁྲོས་གྱུར་ན། ། ཁྱོད་ནི་རང་གི་གནས་དང་མ་འབྲལ་ཞིག ། གང་ལ་ཞེ་ན་ཞི་བའི་ངང་ཚུལ་གྱིས། ། ཉེས་པ་ཆེན་པོ་རྣམས་ཀྱང་ཞི་བར་བྱེད། །
ECC 10:5 ཉི་མའི་འོག་ཏུ་རྐྱེན་ངན་ཞིག་ཡོད་པ། ། བདག་གིས་མཐོང་ཞིང་དེ་ནི་དབང་སྒྱུར་བའི། ། འགལ་འཛོལ་ལས་ནི་བྱུང་བ་འདྲ་ཡིན་ཏེ། །
ECC 10:6 བླུན་པོ་རྣམས་ལ་གོ་ས་མཐོན་པོ་སྤྲད། ། འབྱོར་ལྡན་རྣམས་ནི་དམན་སར་སྡོད་པ་ཡིན། །
ECC 10:7 བྲན་གཡོག་རྣམས་ནི་རྟ་ལ་ཞོན་པ་དང་། ། རྒྱལ་སྲས་རྣམས་ནི་བྲན་གཡོག་ནང་བཞིན་གྱིས། ། ས་ལ་རྐང་འགྲོས་བྱེད་པ་བདག་གིས་མཐོང་། །
ECC 10:8 ས་དོང་འབྲུ་མཁན་རང་ཉིད་དེའི་ནང་ལྷུང་། ། རྩིག་པ་བཤིག་ན་སྦྲུལ་གྱིས་སོ་བཏབ་ཡོང་། །
ECC 10:9 གཏེར་རྡོ་འདོན་མཁན་རྡོ་ཡིས་རྨས་བྱེད་ཅིང་། ། ཤིང་དུམ་གཤག་མཁན་ལ་ནི་ཉེན་ཁ་ཆེ། །
ECC 10:10 སྟ་རེ་རྟུལ་པོར་རྣོ་རྩེ་མ་བཏོན་ན། ། ཤ་ཤེད་མང་དུ་གཏོང་དགོས་འབྱུང་བ་དང་། ། འོན་ཀྱང་ཤེས་རབ་ཀྱིས་ནི་རྒྱལ་བར་བྱེད། །
ECC 10:11 སྔགས་མ་བརྒྱབ་པར་སྦྲུལ་གྱིས་སོ་བཏབ་ན། ། སྔགས་པར་ཕན་ཐོགས་ཅི་ཡང་ཡོད་མ་ཡིན། །
ECC 10:12 མཁས་པའི་ཞལ་ནས་ལེགས་བཤད་གསུང་བ་དང་། ། བླུན་པོའི་མཆུ་ཡིས་རང་ཉིད་མིད་པར་བྱེད། །
ECC 10:13 བླུན་པོའི་གཏམ་གྱི་ཐོག་མ་བླུན་བཤད་དང་། ། མཐའ་མ་ཁེངས་དྲེགས་དང་ནི་ངན་པ་ཡིན། །
ECC 10:14 བླུན་པོར་སྨྲ་བ་ཤིན་ཏུ་མང་ན་ཡང་། ། ཕྱིས་སུ་ཅི་འབྱུང་སུས་ཀྱང་མི་ཤེས་ལ། ། འཆི་བའི་རྗེས་སུ་ཅི་ཞིག་འབྱུང་ངེས་པ། ། འཆད་པར་ནུས་པ་སུ་ཡང་ཡོད་མ་ཡིན། །
ECC 10:15 བླུན་པོས་གྲོང་ཁྱེར་ལམ་ཡང་མི་ཤེས་ལ། ། རེ་རེ་རང་གི་ལས་ཀྱིས་དུབ་པར་བྱེད། །
ECC 10:16 ཀྱེ་ཀྱེ་རྒྱལ་ཁམས་ཁྱོད་ཀྱི་རྒྱལ་པོ་ནི། ། བྱིས་པ་ཡིན་ཞིང་ཁྱོད་ཀྱི་བློན་པོ་ཚོས། ། ཞོགས་པར་བཟའ་བཏུང་བག་མེད་སྤྱད་ན་ནི། ། ཁྱོད་ལ་ཆག་སྒོ་འབྱུང་བར་གདོན་མི་ཟ། །
ECC 10:17 ཀྱེ་ཀྱེ་རྒྱལ་ཁམས་ཁྱོད་ཀྱི་རྒྱལ་པོ་ནི། ། སྐུ་དྲག་སྲས་ནི་ཡིན་ཞིང་བློན་པོ་ཚོས། ། བཟི་བར་མིན་གྱིས་རང་ལ་སྟོབས་བསྐྱེད་ཕྱིར། ། དུས་ལྟར་བཟའ་བཏུང་སྤྱད་ན་ཁྱོད་བདེ་འོ། །
ECC 10:18 ལེ་ལོ་ཡིན་པས་ཁང་ཀླད་རྡིབ་པ་དང་། ། ལག་པ་དལ་བས་ཁང་པར་ཐིགས་ཆུ་ཡོང་། །
ECC 10:19 གད་མོའི་ཕྱིར་དུ་གསོལ་སྟོན་གཤོམ་པ་དང་། ། རྒུན་ཆང་གིས་ནི་མི་ལ་དགའ་སྣང་བསྐྱེད། ། འོན་ཀྱང་དངུལ་གྱིས་དོན་ཀུན་འགྲུབ་པར་བྱེད། །
ECC 10:20 རྒྱལ་པོར་སྨོན་ལོག་འདེབས་པར་མ་བསམ་ཞིག ། ཡང་ན་རང་གི་གཟིམ་ཁང་ནང་རོལ་ལ། ། ཕྱུག་པོར་དམོད་མོ་ཡང་ནི་མ་བྱེད་ཅིག ། རྒྱུ་མཚན་ནམ་མཁའི་བྱ་ཡིས་སྐད་འཁྱེར་ཞིང་། ། གཤོག་ལྡན་གྱིས་ནི་གཏམ་དེ་འཆད་པར་འགྱུར། །
ECC 11:1 རང་གི་འབྲུ་རིགས་ཆུ་ཁར་གཏོར་ཞིག་དང་། ། ཡུན་རིང་འདས་རྗེས་སླར་ཡང་རྙེད་པར་འགྱུར། །
ECC 11:2 ས་སྟེང་ཆག་སྒོ་ཅི་འབྱུང་མི་ཤེས་པས། ། བདུན་གྱིས་མ་ཚད་བརྒྱད་ལ་སྐལ་བྱིན་ཅིག །
ECC 11:3 ཇི་སྟེ་སྤྲིན་པ་ཆུ་ཡིས་གང་གྱུར་ན། ། དེ་ལས་ས་ལ་ཆར་བ་གཤོ་བར་འགྱུར། ། ཤིང་སྡོང་ལྷོ་བྱང་གང་དུ་འགྱེལ་ན་ཡང་། ། གང་ནས་འགྱེལ་ན་དེ་རུ་ལུས་པ་ཡིན། །
ECC 11:4 རླུང་ལ་ལྟ་མཁན་དེས་ནི་སོན་མི་འདེབས། ། སྤྲིན་ལ་ལྟ་མཁན་གྱིས་ཀྱང་ཞིང་མི་རྔ། །
ECC 11:5 ཁྱོད་ཀྱིས་རླུང་རྒྱུ་བའི་ལམ་དང་མངལ་གྱི་ནང་དུ་རུས་པ་ཇི་ལྟར་སྐྱེ་བ་མི་ཤེས་པ་བཞིན། ཐམས་ཅད་མཛད་པའི་དཀོན་མཆོག་གི་འཕྲིན་ལས་ནི་ཁྱོད་ཀྱིས་དེ་ལས་ཀྱང་མི་ཤེས་སོ། །
ECC 11:6 ཞོགས་པར་རང་གི་ས་བོན་གཏོར་ལ། དགོང་མོ་ཡང་ལག་པ་དལ་བར་མ་བྱེད། ཅིའི་ཕྱིར་ཞེ་ན། ཞོགས་པར་གཏོར་བའམ་ཡང་ན་དགོང་མོ་བཏབ་པ་གཉིས་ལས་གང་ཞིག་ལེགས་པོ་འབྱུང་བའམ། ཡང་ན་དེ་གཉིས་ཀ་ཁྱད་མེད་པར་ལེགས་པོ་འབྱུང་བ་ཁྱོད་ཀྱིས་མི་ཤེས་པས་སོ། །
ECC 11:7 འོད་ནི་བཟང་པོ་ཡིན་ཏེ། མིག་གིས་ཉི་འོད་མཐོང་བ་ནི་སྐྱིད་ཡིན།
ECC 11:8 ཇི་སྟེ་མི་ཞིག་ལོ་མང་པོར་གསོན་ན་དེ་ཐམས་ཅད་ཀྱི་ནང་དུ་དགའ་བར་འོས་མོད། འོན་ཀྱང་མུན་པའི་ཉིན་མོ་རྣམས་ཀྱང་དྲན་པར་གྱིས། ཅིའི་ཕྱིར་ཞེ་ན། དེ་འདྲའི་ཉིན་མོ་མང་ཙམ་ཡོད་པར་འགྱུར་ཏེ། འབྱུང་འགྱུར་ཐམས་ཅད་སྟོང་པ་ཡིན་ནོ། །
ECC 11:9 ཀྱེ་ན་གཞོན་ཚོ། རང་ཉིད་ན་གཞོན་ཡིན་དུས་དགའ་མགུར་སྤྱོད་དང་། རང་གི་ལོ་ན་གཞོན་པའི་ཉིན་མོ་རྣམས་ལ་སེམས་སྐྱིད་པར་བྱོས། ཡང་རང་གི་སེམས་ནས་གང་ཞིག་བསྒྲུབ་འདོད་པ་དང་། མིག་གིས་ཅི་ལ་བལྟ་འདོད་པ་བཞིན་བྱོས་དང་། ཡིན་ནའང་དོན་དེ་ཐམས་ཅད་ཀྱི་ཕྱིར་དུ་དཀོན་མཆོག་གིས་ཁྱོད་ལ་འདྲི་གཅོད་བྱེད་ངེས་པ་ཤེས་དགོས།
ECC 11:10 རང་སེམས་ཀྱི་སྡུག་བསྔལ་དོར་ནས་རང་གི་ལུས་ནས་དཀའ་ངལ་བསལ་བར་གྱིས། ཅིའི་ཕྱིར་ཞེ་ན། གཞོན་དུས་དང་དར་དུས་གང་ཡིན་ཡང་སྟོང་པ་ཡིན་ནོ། །
ECC 12:1 ཁྱོད་ལོ་ན་གཞོན་པ་དང་རྒས་པའི་ཉིན་མོ་སྟེ། ང་ལ་དགའ་སྤྲོ་གང་ཡང་མེད་ཟེར་བའི་ཉིན་དེ་ད་དུང་མ་སླེབས་པའི་སྔོན་ལ། རང་ཉིད་མཛད་མཁན་གཙོ་བོ་དྲན་པར་འོས།
ECC 12:2 ཉི་མ་དང་འོད། ཟླ་བ་དང་སྐར་མ་བཅས་འགྲིབ་པ་དང་། ཆར་བའི་རྗེས་སུ་སྤྲིན་རྣམས་ཕྱིར་འཁོར་བའི་བར་དུ་མ་སྒུག་ཅིག
ECC 12:3 སྐབས་དེར་ཁང་པ་སྲུང་མཁན་འདར་ཞིང་སྟོབས་ཅན་རྣམས་མགོ་བསྒུར་བ་དང་། རང་འཐག་སྐོར་མཁན་རྣམས་ཀྱིས་མི་ཉུང་བའི་རྐྱེན་གྱིས་ལས་མཚམས་འཇོག་ཅིང་། དཀར་ཁུང་ལས་ཕར་ལྟ་མཁན་རྣམས་ཀྱི་མིག་མདངས་ཀྱང་ཉམས་པར་འགྱུར་ཏེ།
ECC 12:4 སྲང་ལམ་གྱི་སྒོ་རྣམས་བརྒྱབ་པ་དང་རང་འཐག་གི་སྒྲ་ཡང་ཆུང་སྟེ། བྱ་ཡིས་སྐད་འབྱིན་དུས་མི་རྣམས་ཡར་ལང་ཞིང་། གླུ་མ་ཐམས་ཅད་རྒུད་པའོ། །
ECC 12:5 མི་རྣམས་མཐོ་སར་འཇིགས་ཏེ་ལམ་ལ་འཇིགས་སྐྲག་རྣམས་འོང་ཞིང་། སྟར་སྡོང་གི་མེ་ཏོག་བཞད་པ་དང་། ཆ་ག་འབུ་རྣམས་ཁྱར་ཁྱོར་དུ་སྐྱོད་ཅིང་། འདོད་པ་རྣམས་ཡལ་བར་འགྱུར། ཅིའི་ཕྱིར་ཞེ་ན། མི་ནི་རང་གི་དུས་གཏན་གྱི་སྡོད་གནས་སུ་འགྲོ་བས། མྱ་ངན་ཞུ་མཁན་རྣམས་སྲང་ལམ་དུ་རྒྱུ་བར་འགྱུར་རོ། །
ECC 12:6 ཡང་དངུལ་ཐག་ཆད་ཅིང་གསེར་ཕོར་ཆག་པ་དང་། བུམ་པ་ཆུ་མིག་གི་རྩར་ཆག་ནས་འཁོར་ལོ་ཆུ་དོང་གི་རྩར་ཆག་པར་འགྱུར།
ECC 12:7 ས་རྡུལ་ནི་ཕྱིར་ས་ལ་འཐིམ་པ་དང་སེམས་ཉིད་ནི་དེ་གནང་མཁན་གྱི་དཀོན་མཆོག་གི་དྲུང་དུ་ལོག་པར་འགྱུར་རོ། །
ECC 12:8 སྟོང་པའི་སྟོང་པ། ཡོད་ཚད་སྟོང་པ་ཡིན་ཞེས་སྟོན་པས་གསུངས་སོ། །
ECC 12:9 སྟོན་པར་ཤེས་རབ་ལྡན་པས། མི་རྣམས་ལ་རིག་པ་མང་དུ་བསླབས་ཏེ། དེས་བསམ་བློ་ཞིབ་པར་བཏང་ནས་བརྟག་དཔྱད་བྱས་པ་དང་། ལེགས་བཤད་མང་པོ་རིམ་པར་བཀོད་པ་ཡིན་ནོ། །
ECC 12:10 སྟོན་པས་ཡིད་དུ་འོང་བའི་ཚིག་རྣམས་བཙལ་ཞིང་། བློ་དྲང་པོས་བདེན་ཚིག་ལ་བརྟེན་ནས་བྲིས་པ་ཡིན།
ECC 12:11 མཁས་པའི་གཏམ་ནི་དབྱུག་ལྕག་དང་། ལེགས་བཤད་འདི་དག་ནི་བརྡབས་པའི་འཛེར་མ་དང་མཚུངས་ཏེ། དེ་རྣམས་རྫི་བོ་གཅིག་གིས་གནང་བའོ། །
ECC 12:12 དེ་བས་ན་ངའི་བུ་ལགས། གདམས་ངག་འདི་དང་དུ་ལོངས་ཤིག གཞུང་མང་པོ་རྩོམ་པར་རྫོགས་མཐའ་མེད། སློབ་སྦྱོང་མང་བས་ལུས་དུབ་ཏུ་འཇུག
ECC 12:13 ཐོས་པར་གྱུར་པ་ཐམས་ཅད་ཀྱི་མཐར་ཐུག་ནི་འདི་ལྟ་སྟེ། དཀོན་མཆོག་ལ་གུས་ཤིང་འཇིགས་པ་དང་ཁོང་གི་བཀའ་རྒྱ་རྣམས་སྲུངས་ཤིག འདི་ནི་མི་རྣམས་ཀྱིས་བསྒྲུབ་དགོས་པའི་འོས་འགན་དེ་ཡིན་ནོ། །
ECC 12:14 ཅིའི་ཕྱིར་ཞེ་ན། ལས་ཐམས་ཅད་དེ་ཐ་ན་གསང་བའི་དོན་ཡོད་ཚད་བཟང་ངན་གང་ཞིག་ཡིན་རུང་། དཀོན་མཆོག་གིས་དེར་འདྲི་གཅོད་གནང་བར་འགྱུར་རོ།། །།
SOL 1:1 སོ་ལོ་མོན་གྱིས་མཛད་པའི་མགུར་མཆོག་ཏུ་གྱུར་པ།
SOL 1:2 བརྩེ་སེམས་བདུད་རྩི་ལས་ཀྱང་མངར་བས་ན། ། ཁོང་གིས་ང་ལ་མཆུ་སྒྲོས་འོ་མཛད་ཤོག །
SOL 1:3 ཁྱེད་ཀྱི་སྤོས་ཀྱི་དྲི་བསུང་སྣ་ལ་ཞིམ། ། ཉིད་ཀྱི་མཚན་ནི་སྤོས་བཟང་བླུགས་འདྲ་ཡིན། ། དེའི་ཕྱིར་ལང་ཚོ་མ་རྣམས་ཁྱེད་ལ་དུངས། །
SOL 1:4 ཁྱེད་ཀྱིས་ངའི་སེམས་བཀུག་ནས་འགུག་གྱུར་ཅིག ། ངེད་གཉིས་ཁྱེད་ཀྱི་རྗེས་སུ་འབྲངས་ནས་རྒྱུག ། རྒྱལ་པོས་ང་རང་གཟིམས་ཁང་ནང་དུ་ཁྲིད། ། ༼ མཛའ་གྲོགས་རྣམས། ༽ ཁྱེད་ཕྱིར་ངེད་ཅག་དགའ་ཞིང་མགུ་བར་བྱ། ། དྲི་མཆོག་བདུད་རྩི་ལས་ཀྱང་ལྷག་པ་ཡི། ། ཁྱེད་ཀྱི་མཛའ་སེམས་ལ་ནི་བསྟོད་བསྔགས་བརྗོད། ། ༼ བག་མ། ༽ ཁོ་མོ་ཚོ་ནི་ཁྱེད་ལ་དགའ་འོས་སོ། །
SOL 1:5 ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། བདག་གི་ཤ་མདངས་ནག་ཀྱང་མཛེས་སྡུག་ལྡན། ། དེ་ནི་ཀེ༌དཱར་གྱི་ནི་གུར་དང་མཚུངས། ། སོ་ལོ་མོན་གྱི་ཡོལ་བ་ལྟར་དུ་ཡིན། །
SOL 1:6 ངའི་གདོང་ཉི་མས་ཚིག་ནས་ནག་པོར་གྱུར། ། མཐོང་ཆུང་མིག་གིས་ང་ལ་མ་བལྟ་རོགས། ། མ་གཅིག་སྤུན་རྣམས་བདག་ལ་རབ་ཏུ་ཁྲོས། ། རྒུན་ཚལ་བསྲུང་དུ་ང་རང་བསྐོས་པ་དང་། ། ང་ཡི་རྒུན་ཚལ་བསྐྱུར་ནས་བདག་མེད་ལུས། །
SOL 1:7 ཀྱེ་ཀྱེ་ང་ཡི་བྱམས་པ་ལགས། ། ཁྱེད་ཀྱིས་གང་དུ་ལུག་འཚོ་འམ། ། ཉིན་གུང་ལུག་ཁྱུ་གང་དུ་གསོ། ། ཐམས་ཅད་བདག་ལ་སྨྲ་བར་མཛོད། ། ཁྱེད་ཀྱི་གྲོགས་པོའི་ལུག་ཁྱུ་འགྲམ། ། གདོང་ཁེབས་ཅན་ལྟར་འགྱུར་དོན་ཅི། །
SOL 1:8 མཛེས་མའི་མཆོག་ཁྱེད་རྒྱུས་མེད་ན། ། ལུག་ཁྱུའི་རྐང་རྗེས་དེད་ནས་སོང་། ། རྫི་བོའི་གུར་གྱི་ཉེ་འཁོར་དུ། ། རང་གི་རེའུ་རྣམས་འཚོ་བར་མཛོད། །
SOL 1:9 ཀྱེ་ཀྱེ་ང་ཡི་སྙིང་སྡུག་ཁྱེད་རང་ནི། ། ཕཱར་ཨོལ་ཤིང་རྟའི་རྒོད་མ་བཞིན་དུ་མཛེས། །
SOL 1:10 ཁྱེད་ཀྱི་མཁུར་ཚོས་ལན་བུ་དག་གིས་མཛེས། ། ཁྱེད་ཀྱི་མགུལ་ནི་རིན་པོ་ཆེ་ཡིས་བརྒྱན། །
SOL 1:11 ང་ཚོས་དངུལ་གྱིས་བརྒྱན་པ་ཡི། ། གསེར་གྱི་རྣ་ལོང་ཁྱེད་ལ་བཟོ། །
SOL 1:12 རྒྱལ་པོ་ཁོང་ཉིད་འབོལ་ཁྲི་ལ་བཞུགས་དུས། ། ང་ཡི་ནཱར་དི་སྤོས་ཀྱི་དྲི་བསུང་འཐུལ། །
SOL 1:13 ང་ཡི་དགའ་གྲོགས་གུ་གུལ་ཐུམ་གཅིག་འདྲ། ། ཁོང་ནི་ནམ་རྒྱུན་ང་ཡི་བྲང་ཁར་ཡོད། །
SOL 1:14 ང་ཡི་དགའ་གྲོགས་ཨེན་གེ་དི་ཡུལ་གྱི། ། རྒུན་ཚལ་ནང་གི་མེ་ཏོག་གླང་སྣ་བཞིན། །
SOL 1:15 ཀྱེ་ཀྱེ་ང་ཡི་སྙིང་སྡུག་ལགས། ། ཁྱེད་ཀྱི་བྱད་གཟུགས་རབ་ཏུ་མཛེས། ། ཁྱེད་ཀྱི་བྱད་གཟུགས་རབ་ཏུ་མཛེས། ། ཕུག་རོན་སྤྱན་ཟུང་ཁྱེད་ལ་ལྡན། །
SOL 1:16 ཀྱེ་ཀྱེ་གཟིགས་དང་ང་ཡི་དགའ་གྲོགས་ལགས། ། ཁྱེད་ཀྱི་ཞལ་རས་མཚར་ཞིང་ཡིད་དུ་འོང་། ། མཛེས་སྡུག་སྤང་ལྗོངས་ང་ཚོའི་མལ་ཁྲི་ཡིན། །
SOL 1:17 ངེད་ཀྱི་ཁང་པའི་གདུང་མ་ཐང་ཤིང་དང་། ། ཁང་པའི་ལྕམ་གདུང་ལ་ནི་གསོམ་ཤིང་ཡོད། །
SOL 2:1 ང་ནི་ཤཱ་རོན་ཡུལ་གྱི་རྒྱ་སེ་དང་། ། ལུང་པའི་ནང་གི་མེ་ཏོག་ཀུ་མུད་ཡིན། །
SOL 2:2 ཚེར་མའི་ཁྲོད་ཀྱི་མེ་ཏོག་ཀུ་མུད་ལྟར། ། ང་ཡི་སྙིང་སྡུག་བུ་མོ་ཀུན་ལས་མཆོག །
SOL 2:3 ནགས་ལ་སྐྱེས་པའི་ཀུ་ཤུ་ཤིང་བཞིན་དུ། ། ང་ཡི་དགའ་གྲོགས་སྐྱེས་པའི་ཁྲོད་དུ་ཡོད། ། བདག་ནི་དགའ་ཞིང་ཁོང་གི་གྲིབ་བསིལ་འོག ། བསྡད་དེ་ཁོང་གི་ཤིང་ཏོག་མངར་མོར་རོལ། །
SOL 2:4 ཁོང་གིས་བདག་ནི་གསོལ་སྟོན་ཁང་ལ་ཁྲིད། ། ང་ཡི་སྟེང་དུ་བརྩེ་བའི་དར་ཆ་བསྒྲེངས། །
SOL 2:5 བདག་ནི་དུངས་སེམས་དབང་གིས་རབ་གདུངས་པས། ། རྒུན་འབྲུམ་སྐམ་པོས་བདག་ལ་སྟོབས་བཅུག་ནས། ། ཀུ་ཤུས་བདག་གི་སེམས་ལ་བདེ་བ་སྩོལ། །
SOL 2:6 ཁོང་ཕྱག་གཡོན་པས་བདག་གི་མགོ་བོ་སྐྱོར། ། ཁོང་ཕྱག་གཡས་པས་བདག་གི་ལུས་ཡོངས་འཁྱུད། །
SOL 2:7 ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། ང་ཡི་དགའ་གྲོགས་དགྱེས་ཏེ་མ་བཞེངས་བར། ། ཁྱེད་ཚོས་ཁོང་ཉིད་མནལ་ལས་མི་སློང་ཕྱིར། ། བདག་གིས་དགོ་དང་ཐང་གི་ཡུ་མོ་གཉིས། ། དཔང་དུ་བཙུགས་ནས་ཁྱེད་ཚོར་མནའ་འགེལ་ལོ། །
SOL 2:8 ང་ཡི་དགའ་གྲོགས་གསུང་སྐད་ལ་ཉོན་དང་། ། ཁོང་ཉིད་རི་དང་ལ་ལུང་བརྒལ་ནས་ནི། ། ཚུར་རོལ་འབྱོན་བཞིན་པ་ལ་ལྟོས་ཤིག་ཀྱེ། །
SOL 2:9 ང་ཡི་དགའ་གྲོགས་དགོ་དང་ཤྭ་ཕྲུག་འདྲ། ། ལྟོས་ཤིག་ཁོང་ནི་ངེད་ཀྱི་རྩིག་འདབས་སླེབས། ། དཀར་ཁུང་ནང་དུ་བདག་ལ་གཟིགས་པ་དང་། ཤིང་དྲའི་བར་ནས་བདག་ལ་ནན་གྱིས་ལྟ། །
SOL 2:10 ང་ཡི་དགའ་གྲོགས་བདག་ལ་འདི་སྐད་གསུངས། ། ང་ཡི་སྙིང་སྡུག་བཟང་པོ་བཞིན་བཟང་མ། ། ཡར་ལ་བཞེངས་ཏེ་བདག་དང་མཉམ་དུ་འགྲོ། །
SOL 2:11 ཅི་ལ་ཟེར་ན་དགུན་དུས་རྫོགས་ཟིན་ལ། ། ཆར་གྱི་དུས་ཀྱང་འདས་ནས་སོང་ཟིན་ཏོ། །
SOL 2:12 ས་གཞི་ཡོངས་སུ་མེ་ཏོག་རྣམ་པར་བཀྲ། ། བྱིའུས་གསུང་སྙན་སྒྲོག་པའི་དུས་ལ་བབས། ། ང་ཚོའི་ཡུལ་དུ་ཐི་བའི་གསུང་སྐད་ཐོས། །
SOL 2:13 སེ་ཡབ་ཤིང་གི་ཤིང་ཏོག་རིམ་གྱིས་སྨིན། ། རྒུན་འབྲུམ་མེ་ཏོག་དྲི་ཞིམ་ཕྱོགས་བཞིར་འཐུལ། ། ང་ཡི་སྙིང་སྡུག་ང་ཡི་བཞིན་བཟང་མ། ། ཡར་ལ་བཞེངས་ཏེ་ང་དང་མཉམ་དུ་འགྲོ། །
SOL 2:14 ཀྱེ་ཀྱེ་ང་ཡི་ཕུག་རོན་ཁྱེད་རང་ནི། ། བྲག་སྲུབ་རི་གཟར་ཕུག་ཏུ་ཡིབ་སྡོད་དེ། ། ཁྱེད་ཀྱི་ཞལ་རས་ང་ལ་སྟོན་པར་མཛོད། ། ཁྱེད་ཀྱི་གསུང་སྐད་ང་ལ་ཐོས་འཇུག་རོགས། ། ཅི་ལ་ཟེར་ན་ཁྱེད་ཀྱི་གསུང་སྐད་སྙན། ། ཁྱེད་ཀྱི་ཞལ་རས་མཛེས་ཤིང་ལྟ་ན་སྡུག །
SOL 2:15 ང་ཚོའི་རྒུན་འབྲུམ་ཤིང་ལ་མེ་ཏོག་བཞད། ། དེ་བས་ཁྱེད་ཀྱིས་རྒུན་ཚལ་བརླག་པ་ཡི། ། ཝ་མོ་ཝ་ཕྲུག་ང་ཚོའི་དོན་དུ་འཛིན། །
SOL 2:16 ང་ཡི་དགའ་གྲོགས་ང་ལ་དབང་བ་ལྟར། ། ང་ཡི་ཡོད་ཚད་ཁོང་ལ་དབང་བ་ཡིན། ། ཁོང་གིས་ཀུ་མུད་གསེབ་ནས་ལུག་ཁྱུ་འཚོ། །
SOL 2:17 ཉི་མ་ནུབ་ནས་བསིལ་རླུང་ལྡང་དུས་སུ། ། ཁྱེད་ནི་དགོ་བ་དང་ནི་ཤྭ་ཕྲུག་ལྟར། ། བེ་ཐེར་རི་ནས་ལོག་ཤོག་ངའི་དགའ་གྲོགས། །
SOL 3:1 མཚན་མོར་རང་གི་མལ་ཁྲིའི་སྟེང་། ། ང་ཡི་སེམས་ཀྱི་བྱམས་པ་དེ། ། ཡང་ཡང་བཙལ་མོད་ངས་མ་རྙེད། །
SOL 3:2 དེ་ནས་ང་རང་ཡར་ལངས་ནས། ། གྲོང་ཁྱེར་ནང་དུ་བསྐྱོད་ནས་ནི། ། སྲང་ལམ་ཐང་ཆེན་དག་བརྒྱུད་ཅིང་། ། ང་ཡི་སེམས་ཀྱི་བྱམས་པ་དེ། ། ཡང་ཡང་བཙལ་མོད་ངས་མ་རྙེད། །
SOL 3:3 སྐོར་ཞིབ་བྱས་ནས་སྐྱོད་པ་ཡི། ། གྲོང་ཁྱེར་སྲུང་མཁན་བདག་དང་ཕྲད། ། ང་ཡི་སྙིང་གི་བྱམས་པ་དེ། ། ཁྱེད་ཚོས་མཐོང་ངམ་ཞེས་དྲིས་སོ། །
SOL 3:4 བདག་ནི་དེ་དག་ལས་བྲལ་རྗེས། ། སྙིང་གི་བྱམས་པ་དང་ཕྲད་བྱུང་། ། ང་ཡིས་ཁོང་ལ་འཇུས་ནས་ནི། ། ཁོང་ཉིད་འགྲོ་རུ་མ་བཅུག་པར། ། རང་གི་མ་ཡི་ཁྱིམ་གཞིས་ཏེ། ། ང་རང་མངལ་དུ་ཁུར་མཁན་གྱི། ། གཟིམ་ཆུང་ནང་དུ་ཁྲིད་པ་ཡིན། །
SOL 3:5 ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། ང་ཡི་དགའ་གྲོགས་དགྱེས་ཏེ་མ་བཞེངས་བར། ། ཁྱེད་ཚོས་ཁོང་ཉིད་མནལ་ལས་མི་སློང་ཕྱིར། ། བདག་གིས་དགོ་དང་ཐང་གི་ཡུ་མོ་གཉིས། ། དཔང་དུ་བཙུགས་ནས་ཁྱེད་ཚོར་མནའ་འགེལ་ལོ། །
SOL 3:6 གུ་གུལ་དང་ནི་སྤོས་དཀར་དང་། ། ཚོང་པའི་སྤོས་ཀྱི་དྲི་བསུང་གིས། ། ཀུན་ནས་བྱུགས་ཤིང་དབེན་སྟོང་ནས། ། དུ་བའི་ཀ་ལྟར་འབྱོན་པ་སུ། །
SOL 3:7 དེ་ནི་སོ་ལོ་མོན་གྱི་ཁྱོགས་ཁྲི་ཡིན། ། ཡེས་ར་ཨེལ་གྱི་དཔའ་བོ་དྲུག་ཅུ་ཡིས། ། དེ་ཡི་ཕྱོགས་བཞིར་ཡོངས་སུ་བསྐོར་ནས་ཡོད། །
SOL 3:8 ཀུན་གྱིས་རལ་གྲི་ལག་ཏུ་བཅངས། ། དེ་ཚོར་དམག་གི་རྩལ་དང་ལྡན། ། མཚན་མོའི་འཇིགས་པ་འགོག་པའི་ཆེད། ། རལ་གྲི་དཔྱི་ལ་བཏགས་ནས་འདུག །
SOL 3:9 རྒྱལ་པོ་སོ་ལོ་མོན་ཉིད་ཀྱིས། ། ལེ་པཱ་ནོན་གྱི་ཤིང་གིས་ནི། ། རང་ལ་ཁྱོགས་ཁྲི་ཞིག་བཟོས་ཏེ། །
SOL 3:10 ཁྱོགས་ཁྲིའི་ཀ་བ་དངུལ་ལས་བཟོས། ། ཁྱོགས་ཁྲིའི་མཐིལ་ནི་གསེར་གྱིས་གྲུབ། ། གདན་གྱི་ཁ་དོག་རྒྱ་སྨུག་ཡིན། ། དེའི་ནང་ཡེ་རུ་སཱ་ལེམ་གྱི། ། བུ་མོ་རྣམས་ཀྱི་བརྩེ་བས་ཁེངས། །
SOL 3:11 ཀྱེ་ཀྱེ་ཛ་ཡན་བུ་མོ་ཕྱིར་བུད་དང་། ། རྒྱལ་པོ་སོ་ལོ་མོན་གྱི་བག་སྟོན་ཉིན། ། ཁོང་གི་དབུ་ལ་ཅོད་པན་གྱིས་བརྒྱན་ཏེ། ། ཁོང་གི་ཡིད་སེམས་དགའ་བ་འབུམ་གྱིས་མཉེས། ། ཡུམ་གྱིས་བསྐོན་པའི་ཅོད་པན་ལ་ལྟོས་ཤིག །
SOL 4:1 ང་ཡི་སྙིང་སྡུག་ཁྱེད་ཀྱི་བྱད་གཟུགས་རབ་ཏུ་མཛེས། ། གདོང་ཁེབས་འོག་ཏུ་ཕུག་རོན་ལྟ་བུའི་མིག་ཟུང་ལྡན། ། ཁྱེད་ཀྱི་སྐྲ་ལོ་དག་ནི་གིལ་ཨད་རི་བོའི་ངོགས། ། ཐུར་དུ་འབབ་པའི་ར་ཁྱུ་དང་ནི་ཀུན་ནས་མཚུངས། །
SOL 4:2 ཆ་ནི་འགྲིག་ཅིང་ཁེར་སྐྱེས་མིན་པའི་ཁྱེད་ཀྱི་ཚེམས། ། ལུག་བལ་བྲེགས་པའི་མ་མོ་དཀར་བཀྲུས་ཐོན་པ་འདྲ། །
SOL 4:3 ཁྱེད་ཀྱི་མཆུ་སྒྲོས་མཚལ་གྱི་སྣལ་མ་འདྲ། ། ཁྱེད་ཀྱི་སྨྲ་སྒོ་མཛེས་ཤིང་ལྟ་ན་སྡུག ། གདོང་ཁེབས་འོག་གི་ཁྱེད་ཀྱི་མཁུར་ཚོས་ནི། ། དམར་མདངས་བཀྲ་བའི་སེ་འབྲུ་ཕྱེད་ཀ་བཞིན། །
SOL 4:4 ཁྱེད་ཀྱི་མཇིང་ནི་དཱ་བིད་ཀྱིས་བརྩིགས་པའི། ། བང་རིམ་ལྡན་པའི་ལྕོག་མཁར་དང་མཚུངས་ཤིང་། ། དེ་ཡི་སྟེང་དུ་ཕུབ་ནི་སྟོང་ཕྲག་དཔྱངས། ། ཐམས་ཅད་དཔའ་རྒོད་དག་གི་ཕུབ་ཡིན་ནོ། །
SOL 4:5 ཁྱེད་ཀྱི་བྲང་ཁའི་ནུ་མ་ཟུང་དེ་ནི། ། མེ་ཏོག་ཀུ་མུད་གསེབ་ཏུ་རྩྭ་ཟ་བའི། ། དགོ་བའི་དགོ་ཕྲུག་མཚེ་མར་ཀུན་ནས་མཚུངས། །
SOL 4:6 ཉི་མ་ནུབ་སྟེ་བསིལ་རླུང་ལྡང་དུས་སུ། ། བདག་ནི་གུ་གུལ་རི་བོའི་ཕྱོགས་སུ་དང་། དྲི་ཞིམ་སྤོས་དཀར་སྒང་ལ་འགྲོ་བར་བྱ། །
SOL 4:7 ང་ཡི་སྙིང་སྡུག་ཁྱེད་ནི་ཀུན་ནས་མཛེས། ། ཁྱེད་ཀྱི་ལུས་ལ་སྐྱོན་ཆག་གང་ཡང་མེད། །
SOL 4:8 ཀྱེ་ཀྱེ་ང་ཡི་བག་མ་ལགས། ། ཁྱེད་རང་ང་དང་མཉམ་དུ་ནི། ། ལེ་པཱ་ནོན་དང་འབྲལ་བར་མཛོད། ། ལེ་པཱ་ནོན་དང་འབྲལ་བར་མཛོད། ། ཨ་མ་རཱ་དང་སེ་ནིར་དང་། ། ཧེར་མོན་རི་བོའི་རྩེ་མོ་དང་། སེང་གེའི་ཚང་དང་གཟིག་གི་རི། ། གནས་དེ་རྣམས་ལས་མར་ཐོན་ཤོག །
SOL 4:9 ང་ཡི་ལྕམ་དང་བག་མ་ལགས། ། ཁྱེད་ཀྱི་མིག་གིས་བལྟས་ཙམ་དང་། ། མགུལ་ལ་བརྒྱན་པའི་སྐེ་འཕྲེང་གིས། ། ང་ཡི་ཡིད་སེམས་ཀུན་ནས་ཕྲོགས། །
SOL 4:10 ང་ཡི་ལྕམ་དང་བག་མ་ལགས། ། ཁྱེད་ཀྱི་བརྩེ་སེམས་མཛེས་པ་ལ། ། རྒུན་ཆང་ལས་ཀྱང་ལྷག་ཏུ་མངར། ། ཁྱེད་ཀྱི་སྤོས་ཆུའི་དྲི་ཞིམ་ནི། ། དྲི་བཟང་རིགས་ཀྱི་མཆོག་ཡིན་ནོ། །
SOL 4:11 ཀྱེ་ཀྱེ་ང་ཡི་བག་མ་ལགས། ། ཁྱེད་ཀྱི་མཆུ་ལས་སྦྲང་ཚང་བཞིན། ། སྦྲང་རྩི་མངར་མོ་ཐིགས་པ་དང་། ། ལྗགས་འོག་སྦྲང་རྩི་འོ་མ་ཡོད། ། ཁྱེད་ཀྱི་ན་བཟའི་དྲི་བསུང་ནི། ། ལེ་པཱ་ནོན་གྱི་དྲི་དང་མཚུངས། །
SOL 4:12 ང་ཡི་ལྕམ་དང་བག་མ་ཁྱེད། ། སྒོ་མོ་བཅད་པའི་སྐྱེད་ཚལ་དང་། ཁུངས་མིག་བཅད་པའི་ཆུ་མིག་དང་། ཁ་གཅོད་བརྒྱབ་པའི་ཁྲོན་པ་འདྲ། །
SOL 4:13 ཁྱེད་ཀྱིས་བཏབ་པའི་སྐྱེད་ཚལ་དུ། ། སེ་འབྲུ་ཤིང་ལ་འབྲས་བུ་ཐོགས། ། ད་དུང་མེ་ཏོག་གླང་སྣ་དང་། ། སྤང་སྤོས་ནཱར་དིའི་ཤིང་རྣམས་ཡོད། །
SOL 4:14 སྤང་སྤོས་ནཱར་དི་དང་ནི་གུར་ཀུམ་དང་། ། ཤུ་དག་ཤིང་ཚ་དང་ནི་སྤོས་དཀར་ཤིང་། ། གུ་གུལ་ཨ་ག་རུ་བཅས་རིན་ཆེན་པོའི། ། བསུང་རྫས་རིགས་ཀུན་དེ་རུ་འཛོམས་པ་ཡིན། །
SOL 4:15 ཁྱེད་ནི་སྐྱེད་ཚལ་ནང་གི་ཆུ་མིག་དང་། ། ཆུ་རྒྱུན་བཞུར་བའི་ཁྲོན་པ་ཡིན་ལགས་ཤིང་། ། ལེ་པཱ་ནོན་ནས་བཞུར་བའི་ཆུ་ཀླུང་ཡིན། །
SOL 4:16 ཀྱེ་ཀྱེ་བྱང་རླུང་ལྷོ་རླུང་ལྡང་བར་གྱིས། ། ང་ཡི་སྐྱེད་ཚལ་ནང་དུ་ལྡང་ནས་ནི། ། དྲི་ཞིམ་ཕྱོགས་བཞིར་འཐུལ་དུ་འཇུག་པར་མཛོད། ། ང་ཡི་དགའ་གྲོགས་རང་གི་སྐྱེད་ཚལ་དུ། ། བྱོན་ནས་ཤིང་ཏོག་མངར་མོ་བཞེས་གྱུར་ཅིག །
SOL 5:1 ང་ཡི་ལྕམ་དང་བག་མ་ལགས། ། ང་ནི་སྐྱེད་ཚལ་དུ་ཕྱིན་ནས། ། གུ་གུལ་དང་ནི་སྤོས་བསྡུས་ཏེ། ། སྦྲང་ཚང་དང་བཅས་སྦྲང་རྩི་ཟོས། ། རྒུན་ཆང་དང་ནི་འོ་མ་འཐུངས། ། ༼ མཛའ་གྲོགས་རྣམས། ༽ ཀྱེ་ཀྱེ་ང་ཡི་མཛའ་གྲོགས་རྣམས། ། བཟའ་བཏུང་ལ་ནི་རོལ་བར་གནོངས། ། ཀྱེ་ཀྱེ་ང་ཡི་སྙིང་གྲོགས་ལགས། ། རྒུན་ཆང་མང་དུ་བཞེས་རོགས་གནོངས། །
SOL 5:2 ངའི་ལུས་མལ་དུ་ཉལ་ན་ཡང་། ། བདག་སེམས་གཉིད་ལས་སད་ཡོད་དོ། ། དགའ་གྲོགས་ཀྱིས་ནི་སྒོ་རྡུང་བའི། ། སྐད་སྒྲ་ཡང་ནས་ཡང་དུ་ཐོས། ། ༼ མག་གསར། ༽ ང་ཡི་ལྕམ་དང་སྙིང་སྡུག་ལགས། ། ཕུག་རོན་དང་ནི་ཕུལ་བྱུང་ལགས། ། ང་ཡི་མགོ་ལ་ཟིལ་བས་གང་། ། མཚན་མོའི་ཟིལ་བས་སྐྲ་ལོ་བངས། ། ཁྱེད་ཀྱིས་ང་ལ་སྒོ་ཕྱེ་རོགས། །
SOL 5:3 དེ་ཡི་ལན་དུ་འདི་ལྟར་ཞུས། ། ང་ཡིས་གྱོན་གོས་ཕུད་ཟིན་པས། ། དེ་ནི་ཡང་བསྐྱར་ཇི་ལྟར་གྱོན། ། ང་ཡིས་རྐང་པ་བཀྲུས་ཟིན་པས། ། དེ་ནི་ཇི་ལྟར་བཙོག་པར་བྱ། །
SOL 5:4 ང་ཡི་དགའ་གྲོགས་ཀྱིས་ནི་ཨི་ཁུང་ལས། ། ཉིད་ཀྱི་ཕྱག་ནི་ནང་དུ་བརྐྱངས་པས་ན། ། ཁོང་གི་དོན་དུ་ང་ལ་སེམས་འགུལ་ཐེབས། །
SOL 5:5 ང་ཡི་དགའ་གྲོགས་ལ་ནི་སྒོ་འབྱེད་དུ། ། ཡར་ལ་ལངས་དུས་ང་ཡི་ལག་ཟུང་ལས། ། གུ་གུལ་ཐིགས་ཤིང་ང་ཡི་མཛུབ་མོ་ལས། ། གུ་གུལ་དྲི་ཞིམ་སྒོ་གཏན་སྟེང་ལ་ཐིགས། །
SOL 5:6 ང་ཡིས་དགའ་གྲོགས་ཁོང་ལ་ཕྱེས་པ་ལ། ། ཁོང་ཉིད་ཞལ་ཕྱིར་འཁོར་ནས་གྱེས་ཟིན་ཏོ། ། ཁོང་གི་གསུང་སྐད་ཐོས་དུས་སུ། ། རང་སེམས་རང་ལ་མ་དབང་ངོ་། ། ཁོང་ཉིད་བཙལ་ཡང་རྙེད་མ་བྱུང་། ། ཡང་ཡང་བོས་ཀྱང་ལན་མ་ཐོབ། །
SOL 5:7 དེ་ནས་གྲོང་ཁྱེར་ནང་འཁོར་བའི། ། བྱ་ར་པ་དང་བདག་ཕྲད་བྱུང་། ། བདག་ལ་བརྡུངས་ནས་རྨས་སུ་བཅུག ། ལྕགས་རིའི་སོ་པ་རྣམས་ཀྱིས་ཀྱང་། ། ང་ཡི་བེར་ཐུལ་བཤུས་ནས་ཁྱེར། །
SOL 5:8 ཀྱེ་ཀྱེ་ཡེ་རུ་སཱ་ལེམ་གྱི་བུ་མོ། ། བདག་གིས་ཁྱེད་ཚོར་འདི་བཞིན་གདམས་པར་བྱ། ། ཁྱེད་ཚོ་ང་ཡི་དགའ་གྲོགས་དང་ཕྲད་ན། ། ང་ནི་བརྩེ་དུངས་དབང་གིས་གདུང་ཞེས་སྨྲོས། །
SOL 5:9 ཁྱེད་ཀྱི་དགའ་གྲོགས་གཞན་ལས་ལྷག་པ་ཅི། ། ཀྱེ་ཀྱེ་བུད་མེད་ནང་གི་མཛེས་མའི་མཆོག ། ང་ཚོར་ཡང་ཡང་དེ་འདྲའི་མནའ་འགེལ་བས། ། ཁྱེད་ཀྱི་དགའ་གྲོགས་གཞན་ལས་ལྷག་པ་ཅི། །
SOL 5:10 ང་ཡི་དགའ་གྲོགས་དཀར་ལ་དམར་མདངས་རྒྱས། ། འཇིག་རྟེན་སྐྱེས་བོ་ཁྲི་ཕྲག་ལས་ཀྱང་མཆོག །
SOL 5:11 ཁོང་གི་དབུ་ནི་ལྷད་མེད་གསེར་དང་འདྲ། ། སྐྲ་ལོ་འཁྱིལ་ཞིང་ཕོ་རོག་ལྟར་ནག་གོ །
SOL 5:12 སྤྱན་ནི་གཙང་པོ་འགྲམ་གྱི་ཕུག་རོན་ལྟར། ། འོ་མའི་ཁྲུས་ལ་ཞུགས་ནས་ལེགས་པར་བཀོད། །
SOL 5:13 མཁུར་ཚོས་གཉིས་ནི་མེ་ཏོག་ར་བའི་ནང་། ། དྲི་ཞིམ་ཕྱོགས་བཞིར་འཐུལ་བའི་མེ་ཏོག་འདྲ། ། མཆུ་སྒྲོས་ཟུང་ནི་མེ་ཏོག་ཀུ་མུད་བཞིན། ། དེ་ལས་གུ་གུལ་རྩི་བཅུད་ཐིགས་པ་ཡིན། །
SOL 5:14 ཕྱག་ངར་བཻཌཱུརྱས་བརྒྱན་པའི། ། གསེར་གྱི་གདུབ་བུ་དང་མཚུངས་ཞིང་། ། སྐུ་ནི་བ་སོ་ལྷག་གེ་བ། ། དབང་སྔོན་གྱིས་ནི་བརྒྱན་དང་མཚུངས། །
SOL 5:15 ཞབས་ནི་ཀ་མ་རུ་ཡི་ཀ་བར་མཚུངས། ། ལྷད་མེད་གསེར་གྱི་ཞབས་རའི་སྟེང་དུ་བཞེངས། ། ཁོང་གི་གཟུགས་བརྙན་ལེ་པཱ་ནོན་དང་འདྲ། ། ཐང་ཤིང་ལྟར་དུ་མཛེས་ཤིང་ལྟ་ན་སྡུག །
SOL 5:16 ཁོང་གི་ཞལ་ནི་རབ་ཏུ་མངར་བ་དང་། ། ཐམས་ཅད་ཡིད་དུ་འོང་བ་ཡིན་ལགས་ཤིང་། ། ཡེ་རུ་སཱ་ལེམ་ཡུལ་གྱི་བུ་མོ་རྣམས། ། དེ་ནི་ང་ཡི་སྙིང་གི་དགའ་གྲོགས་དང་། ། དེ་ནི་ང་ཡི་གྲོགས་ཀྱི་མཆོག་ལགས་སོ། །
SOL 6:1 བུད་མེད་རྣམས་ཀྱི་མཛེས་མའི་མཆོག ། ཁྱེད་ཀྱི་དགའ་གྲོགས་གང་དུ་སོང་། ། ངེད་ཀྱང་ཁྱེད་མཉམ་བཙལ་དུ་འགྲོ ། ཁྱེད་ཀྱི་དགའ་གྲོགས་གང་དུ་བཞུད། །
SOL 6:2 ང་ཡི་དགའ་གྲོགས་སྐྱེད་ཚལ་དུ། ། ལུག་ཁྱུ་འཚོ་རུ་ཕྱིན་པ་དང་། ། མེ་ཏོག་ཀུ་མུད་འཐུ་བ་ལ། ། ཉིད་ཀྱི་དྲི་ཞིམ་ར་བར་བཞུད། །
SOL 6:3 བདག་ནི་དགའ་གྲོགས་ཁོང་ལ་དབང་། ། ཁོང་གི་སེམས་ཀྱང་བདག་ལ་དབང་། ། ཁོང་གིས་མེ་ཏོག་ཀུ་མུད་གསེང་། ། ལུག་གི་ཁྱུ་ནི་འཚོ་བར་བྱེད། །
SOL 6:4 ཀྱེ་ཀྱེ་ང་ཡི་སྙིང་སྡུག་ལགས། ། ཁྱེད་ནི་ཐིར་ཙ་ལྟར་མཛེས་ཤིང་། ། ཡེ་རུ་སཱ་ལེམ་བཞིན་དུ་མཚར། ། རྒྱལ་མཚན་བསྒྲེངས་པའི་དམག་དཔུང་ལྟར། ། རྔམ་བརྗིད་ལྡན་པ་ཡིན་ལགས་སོ། །
SOL 6:5 ཀྱེ་ཀྱེ་ཁྱེད་ཀྱི་སྤྱན་གྱིས་ང་མ་གཟིགས། ། གཟིགས་ན་ང་ཡི་སེམས་ཀྱང་དབང་དུ་སྡུད། ། ཁྱེད་ཀྱི་སྐྲ་ལོ་གིལ་ཨད་རི་བོའི་ངོགས། ། ཐུར་དུ་འབབ་པའི་ར་ཁྱུར་ཀུན་ནས་མཚུངས། །
SOL 6:6 ཆ་ནི་འགྲིག་ཅིང་ཁེར་སྐྱེས་མིན་པའི་ཁྱེད་ཀྱི་ཚེམས། ། ལུག་བལ་བྲེགས་པའི་མ་མོ་དཀར་བཀྲུས་ཐོན་པ་འདྲ། །
SOL 6:7 གདོང་ཁེབས་འོག་གི་ཁྱེད་ཀྱི་མཁུར་ཚོས་ནི། ། དམར་མདངས་བཀྲ་བའི་སེ་འབྲུ་ཕྱེད་ཀ་བཞིན། །
SOL 6:8 རྒྱལ་མོ་དྲུག་ཅུ་བཙུན་མོ་བརྒྱད་ཅུ་དང་། ། ལང་ཚོ་མ་ནི་བགྲང་གིས་མི་ལང་ཡང་། །
SOL 6:9 ང་ཡི་ཕུག་རོན་ང་ཡི་ཕུལ་བྱུང་མ། ། མོ་ནི་ཨ་མའི་བུ་མོ་ཁེར་སྐྱེས་དང་། ། མངལ་དུ་འཁུར་མཁན་མ་ཡི་གཅེས་ཕྲུག་ཡིན། ། བུ་མོ་རྣམས་ཀྱིས་མོ་རང་མཐོང་བ་ན། ། མོ་ནི་ཁྱད་དུ་འཕགས་པ་ཡིན་ཞེས་སྨྲ། ། རྒྱལ་མོ་བཙུན་མོ་རྣམས་ཀྱིས་ཁོ་མོར་བསྟོད། །
SOL 6:10 ཞོགས་པའི་སྐྱ་རེངས་ཤར་འདྲ་དང་། ། ཞལ་རས་དཀར་གསལ་ཟླ་ལྟར་མཛེས། ། གདོང་ནི་ཉི་མ་བཞིན་དུ་གསལ། ། རྒྱལ་མཚན་བསྒྲེངས་པའི་དམག་དཔུང་ལྟར། ། རྔམ་བརྗིད་ལྡན་པ་སུ་ཡིན་ནམ། །
SOL 6:11 ལུང་པའི་ལྗོན་ཤིང་སྣ་ཚོགས་དང་། ། རྒུན་འབྲུམ་ལོ་མ་འབུས་མིན་དང་། ། སེ་འབྲུ་མེ་ཏོག་བཞད་མིན་ལ། ། བལྟ་ཕྱིར་སྟར་ཀའི་ར་བར་ཕྱིན། །
SOL 6:12 ཤེས་ཚོར་གང་ཡང་མ་བྱུང་བར། ། བདག་གི་སེམས་ཀྱིས་ང་རང་ནི། ། བཀུར་འོས་འབངས་ཀྱི་ཤིང་རྟར་བསྐྱོན། །
SOL 6:13 ལོག་ཤོག་ལོག་ཤོག་ཤུ་ལམ་མིད་ཀྱི་བུ་མོ་ཁྱེད། ། ལོག་ཤོག་ལོག་ཤོག་ང་ཚོས་ཁྱེད་ལ་བལྟ་བར་འདོད། ། ༼ བག་མ། ༽ ཁྱེད་ཚོས་བདག་ལ་ལྟ་བ་དེ། ། མ་ཧ་ན་ཨིམ་གར་ལ་ནི། ། ལྟ་བ་ནང་བཞིན་ཡིན་པ་ཅི། །
SOL 7:1 ཀྱེ་ཀྱེ་གུས་པར་འོས་པའི་སྲས་མོ་ལགས། ། ཁྱེད་ཞབས་བསིལ་ལྷམ་ནང་དུ་ཅི་འདྲ་མཛེས། ། ཁྱེད་ཀྱི་དཔྱི་དང་བརླ་ཡི་འཁྱོག་མཚམས་ནི། ། ལག་ཤེས་པ་ཡིས་བཟོས་པའི་གཡང་ཊི་བཞིན། །
SOL 7:2 ཁྱེད་ཀྱི་ལྟེ་བ་ཡོལ་གོར་ཟླུམ་པོ་བཞིན། ། དེའི་ནང་རྒུན་ཆང་མངར་མོས་གང་གྱུར་ཅིག ། ཁྱེད་ཀྱི་གྲོད་པ་གྲོ་འབྲུ་སྤུངས་པ་འདྲ། ། ཕྱོགས་བཞིར་མེ་ཏོག་ཀུ་མུད་བཞད་ནས་ཡོད། །
SOL 7:3 ཁྱེད་ཀྱི་ནུ་མ་ཟུང་ནི་དགོ་བ་མོའི། ། དགོ་ཕྲུག་མཚེ་མ་དང་ནི་ཀུན་ནས་མཚུངས། །
SOL 7:4 ཁྱེད་ཀྱི་མགུལ་ནི་བ་སོའི་ལྕོག་མཁར་བཞིན། ། ཡིད་འོང་སྤྱན་ཟུང་ཧེ་སི་པོན་དང་ནི། ། པཱ་ཐུ་ལ་པིན་སྒོ་འགྲམ་རྫིང་བུ་འདྲ། ། ཁྱེད་ཀྱི་དྲི་འཛིན་དབང་བོ་ནི། ། དཱ་མེ་སེག་ལ་འཁོར་བ་ཡི། ། ལེ་པཱ་ནོན་གྱི་ལྕོག་མཁར་བཞིན། །
SOL 7:5 ཁྱེད་ཀྱི་དབུ་ནི་ཀར་མེལ་རི་དང་མཚུངས། ། སྐྲ་ལོ་རྒྱ་སྨུག་ཅན་གྱིས་རྒྱལ་པོ་བཀུག །
SOL 7:6 ཀྱེ་ཀྱེ་ང་ཡི་སྙིང་སྡུག་མ། ། མི་ལ་དགའ་སྤྲོ་བསྐྱེད་པ་ཁྱེད། ། ཇི་འདྲའི་མཛེས་ཤིང་ཡིད་དུ་འོང་། །
SOL 7:7 ཁྱེད་ཀྱི་སྐུ་གཟུགས་ཏ་ལའི་ཤིང་དང་མཚུངས། ། ནུ་མ་ཟུང་ནི་ཤིང་ཏོག་ཐོགས་པ་འདྲ། །
SOL 7:8 ང་རང་ཏ་ལའི་ཤིང་དེར་འགོས་ནས་ནི། ། ཤིང་ཏོག་ཆུན་པོར་འཇུ་ཞེས་བདག་གིས་སྨྲས། ། ཁྱེད་ཀྱི་ནུ་མ་ཟུང་ནི་ཐུར་འཕྱང་བའི། ། རྒུན་འབྲུམ་ཆུན་པོ་རྣམས་དང་འདྲ་བར་ཤོག ། ཁ་རླངས་དྲི་བསུང་ཀུ་ཤུ་ལྟ་བུ་ཡིན། །
SOL 7:9 ཁྱེད་ཀྱི་ཞལ་ནི་རྒུན་ཆང་མཆོག་གྱུར་བཞིན། ། ༼ བག་མ། ༽ ང་ཡི་དགའ་གྲོགས་ཞལ་ནང་བཞུར་བ་དང་། ། མནལ་དུ་གཟིམས་པའི་ཞལ་ནང་བཞུར་གྱུར་ཅིག །
SOL 7:10 ང་ནི་ང་ཡི་དགའ་གྲོགས་ལ་དབང་ཞིང་། ། ཁོང་ཡང་ང་ལ་དགའ་ཞིང་དུངས་པ་ཡིན། །
SOL 7:11 ཀྱེ་ཀྱེ་ང་ཡི་དགའ་གྲོགས་ཚུར་ཕེབས་དང་། ། ཞིང་ཁར་ཕྱིན་ནས་གྲོང་སྡེ་རུ་བསྡད་ཆོག །
SOL 7:12 ཞོགས་པ་འུ་གཉིས་རྒུན་ཚལ་དུ་ཕྱིན་ཏེ། ། རྒུན་འབྲུམ་ཤིང་ལ་མྱུ་གུ་འབུས་མིན་དང་། ། རྒུན་འབྲུམ་ཤིང་ལ་མེ་ཏོག་བཞད་མིན་དང་། ། སེ་འབྲུ་ཤིང་ལ་མེ་ཏོག་འབུས་མིན་བལྟ། ། དེ་རུ་ང་ཡིས་བརྩེ་སེམས་ཁྱེད་ལ་འབུལ། །
SOL 7:13 དུའུ་དཱ་ནི་ཡི་དྲི་བསུང་འཐུལ་བ་དང་། ། ཀྱེ་ཀྱེ་ང་ཡི་དགའ་གྲོགས་ཁྱེད་ཀྱི་ཕྱིར། ། བསགས་པའི་ཤིང་ཏོག་གསར་རྙིང་སྣ་ཚོགས་པ། ། ང་ཚོའི་ཡུལ་གྱི་སྒོ་འགྲམ་བཞག་ཡོད་དོ། །
SOL 8:1 ཁྱེད་ནི་ང་དང་མ་གཅིག་ཅིང་། ། ཁོང་མོའི་ནུ་མ་ནུས་པ་ཡི། ། མིང་པོ་ཡིན་ན་ཅི་མ་རུང་། ། དེ་ནས་ང་དང་ཁྱེད་གཉིས་ནི། ། ཕྱི་རུ་འཕྲད་དུས་ཁ་སྐྱེལ་ཡང་། ། སུས་ཀྱང་མཐོང་ཆུང་བྱེད་མི་འགྱུར། །
SOL 8:2 དེ་ནས་ང་ཡིས་ཁྱེད་ཁྲིད་དེ། ། མ་ཡི་ཁང་པར་གདན་འདྲེན་བྱ། ། ཁོང་མོས་ང་ལ་ཞལ་ཏ་གནང་། ། བདག་གི་སེ་འབྲུ་ལས་བསྙལ་བའི། ། དྲི་ཞིམ་བདུད་རྩི་ཁྱེད་ལ་འདྲེན། །
SOL 8:3 ཁོང་ཕྱག་གཡོན་པས་བདག་གི་མགོ་བོ་སྐྱོར། ། ཁོང་ཕྱག་གཡས་པས་བདག་གི་ལུས་ཡོངས་འཁྱུད། །
SOL 8:4 ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། ང་ཡི་དགའ་གྲོགས་དགྱེས་ཏེ་མ་བཞེངས་བར། ། ཁྱེད་ཚོས་ཁོང་ཉིད་མནལ་ལས་མི་སློང་རོགས། །
SOL 8:5 དབེན་སྟོང་ཡུལ་ནས་དགའ་གྲོགས་ལ་བསྙེས་ཏེ། ། ཡར་ལ་བྱོན་པ་དེ་ནི་སུ་ཡིན་ལགས། ། ༼ བག་མ། ༽ བདག་གིས་ཀུ་ཤུ་ཤིང་གི་འོག་ཏུ་ནི། ། ཁྱེད་རང་གཉིད་ལས་སད་དུ་བཅུག་པ་དང་། ། གནས་དེར་ཁྱེད་ཀྱི་ཡུམ་ལ་ཁྱེད་བལྟམས་ནས། ། ཁྱེད་ཀྱི་ཆེད་དུ་སྡུག་བསྔལ་གང་མང་མྱངས། །
SOL 8:6 རྟགས་ཐམ་བཞིན་དུ་བདག་ཁྱེད་སེམས་ལ་ཟུངས། ། ཐེལ་ཙེ་བཞིན་དུ་ཕྱག་ངར་འདོགས་པར་མཛོད། ། དུངས་སེམས་འཆི་བ་ལྟར་དུ་སྟོབས་ཤུགས་ཆེ། ། ཕྲག་དོག་གཤིན་ཡུལ་ནང་བཞིན་རྩུབ་པོ་ཡིན། ། དེ་ནི་མེ་དཔུང་དྲག་པོའི་མེ་ལྕེ་ཡིན། ། དེ་ནི་ཡ་ཝཱེའི་མེ་དཔུང་དྲག་པོ་ཡིན། །
SOL 8:7 ཆུ་བོ་མང་པོས་དུངས་སེམས་གསོད་མི་ནུས། ། གཙང་པོ་རྣམས་ཀྱིས་དེ་ནི་བསྣུབ་མི་ཐུབ། ། སུ་ཡིས་རང་གི་རྒྱུ་ནོར་ཀུན་བཏང་ནས། ། དུངས་སེམས་ཉོ་བར་འདོད་ན་སྨད་པའི་གནས། །
SOL 8:8 ངེད་ཅག་རྣམས་ལ་སྲིང་མོ་ཞིག་ཡོད་དེ། ། ཁོ་མོར་ད་དུང་ལང་ཚོ་དར་མེད་པས། ། མི་ཞིག་བག་མར་སློང་དུ་འོང་དུས་སུ། ། ང་ཚོས་ཁོ་མོའི་དོན་དུ་གཏམ་ཅི་སྨྲ། །
SOL 8:9 ཇི་སྟེ་མོ་ནི་ལྕགས་རི་ཞིག་ཡིན་ན། ། ངེད་ཀྱིས་ཐོག་ཏུ་དངུལ་གྱི་ལྕོག་མཁར་བརྩིག ། ཇི་སྟེ་མོ་ནི་སྒོ་ཞིག་ཡིན་པའི་ཚེ། ། ཐང་ཤིང་སྤང་ལེབ་ཀྱིས་ནི་བསྲུང་བར་བྱ། །
SOL 8:10 ང་ནི་ལྕགས་རི་ཡིན་པ་དང་། ནུ་མ་ཟུང་ནི་ལྕོག་མཁར་འདྲ། ། ཁོང་གི་སྤྱན་དྲུང་ང་རང་ནི། ། བདེ་ལ་བབས་པའི་མི་བཞིན་ཡིན། །
SOL 8:11 སོ་ལོ་མོན་ལ་པཱ་ཨལ་ཧ་མོན་དུ། ། རྒུན་འབྲུམ་ར་བ་ཞིག་ནི་ཡོད་པ་དང་། ། ཁོང་གིས་རྒུན་ཚལ་སྲུང་མཁན་དག་ལ་གླས། ། དེ་རྣམས་རེ་རེས་ཐོབ་པའི་ཤིང་ཏོག་ཕྱིར། ། དངུལ་སྲང་ཆིག་སྟོང་ཁོང་ལ་སྤྲོད་དགོས་སོ། །
SOL 8:12 བདག་ལ་རྒུན་འབྲུམ་ར་བ་ཞིག་ཡོད་དེ། ། དངུལ་སྲང་ཆིག་སྟོང་སོ་ལོ་མོན་ལ་དབང་། ། ཉིས་བརྒྱ་ཤིང་ཏོག་སྲུང་མཁན་རྣམས་ཀྱི་ཡིན། །
SOL 8:13 ཀྱེ་ཀྱེ་སྐྱེད་ཚལ་རྣམས་སུ་བཞུགས་པ་ཁྱེད། ། ཟླ་གྲོགས་རྣམས་ཀྱིས་ཁྱེད་ཀྱི་གསུང་སྐད་ཉན། ། གསུང་སྐད་དེ་ནི་བདག་ལ་ཐོས་པར་མཛོད། །
SOL 8:14 ཀྱེ་ཀྱེ་ང་ཡི་དགའ་གྲོགས་ལགས། ། དྲི་ཞིམ་རྩྭ་ཡི་རི་བོ་ལ། ། དགོ་བ་དང་ནི་ཤྭ་ཕྲུག་བཞིན། ། མྱུར་བ་མྱུར་དུ་ཡར་ཕེབས་ཤོག ། །།
ISA 1:1 འདི་ནི་ཡ་ཧུ་དཱའི་རྒྱལ་པོ་ཨུ་ཟི་ཡཱ་དང་ཡོ་ཐམ། ཨ་ཧ་ཟཱ། ཧི་ཟི་ཀི་ཡཱ་བཅས་བཞི་པོའི་རིང་དུ་ཨ་མོ་ཟིའི་བུ་ཡེ་ཤ་ཡཱ་ལ་བྱུང་བའི་ཡ་ཧུ་དཱ་དང་ཡེ་རུ་སཱ་ལེམ་སྐོར་གྱི་ཞལ་གཟིགས་ཡིན་ནོ། །
ISA 1:2 ཀྱེ་ནམ་མཁའི་དབྱིངས་རྣམས་ཀྱིས་ཉོན་དང་། ཀྱེ་ས་གཞི་ཡིས་དཀོན་མཆོག་ཡ་ཝཱེའི་གསུང་ལ་ཞིབ་ཏུ་ཉོན་ཅིག ཁོང་ན་རེ། བདག་གིས་ཕྲུ་གུ་རྣམས་གསོས་ཤིང་བསྐྱངས་ནའང་། དེ་དག་གིས་བདག་ལ་ངོ་ལོག་བྱས།
ISA 1:3 བ་གླང་གིས་རང་གི་བདག་པོ་ངོ་ཤེས་པ་དང་། བོང་བུས་རང་གི་བདག་པོའི་ཁ་ར་ངོས་ཟིན་ནའང་། ཡེས་ར་ཨེལ་གྱིས་དེ་ཙམ་ཡང་མི་རྟོགས། བདག་གི་འབངས་མིས་ང་རང་མི་ཤེས་ཞེས་གསུངས་སོ། །
ISA 1:4 ཀྱེ་སྡིག་པ་ཅན་གྱི་མི་རིགས། སྡིག་ཉེས་ཚབས་ཆེ་བའི་མི་རྣམས། ངན་སྤྱོད་ཅན་གྱི་བུ་རབས་ཚ་རྒྱུད། ངན་པར་གྱུར་པའི་བུ་དང་བུ་མོ། འདི་དག་གིས་དཀོན་མཆོག་ཡ་ཝཱེ་སྤངས་ཤིང་། ཡེས་ར་ཨེལ་གྱི་དམ་པ་ཉིད་ལ་མཐོང་ཆུང་བྱས་ནས་ཡོངས་སུ་དོར།
ISA 1:5 ཁྱོད་ལ་ད་དུང་རྡུང་རྡེག་གཏོང་དགོས་སམ། ཁྱོད་ཀྱིས་བསྟུད་མར་ངོ་ལོག་བྱེད་དོན་ཅི། དེ་བས་ཁྱོད་ཀྱི་མགོ་ལ་རྨས་ཕོག་ནས་སྙིང་ཞུམ་པར་གྱུར་ཅིང་།
ISA 1:6 རྐང་མཐིལ་ནས་སྤྱི་བོའི་བར་དུ་སྐྱོན་མེད་ས་གཅིག་ཀྱང་ལུས་མེད་དེ། རྨ་ཤུལ་དང་ལྕག་ཚན་བསྣུན་ཤུལ་དང་། ཁྲག་བཞུར་བའི་རྨ་ཁ་བཅས་ཀྱིས་གང་འདུག་ལ། རྨ་ཁ་རྣམས་མ་བཙིར་མ་བསྡམས་ལ། འབྱུག་སྣུམ་གྱིས་འཇམ་པོའང་བྱས་མེད་དོ། །
ISA 1:7 ཁྱོད་ཀྱི་ཡུལ་ནི་དབེན་སྟོང་དུ་གྱུར་ཅིང་གྲོང་ཁྱེར་རྣམས་མེ་ཡིས་བསྲེགས། འཁྱམ་པོ་ཚོས་ཁྱོད་ཅག་གི་ཞིང་ས་རྣམས་ཁྱོད་ཅག་གི་མདུན་ནས་ཁྱུར་མིད་བཏང་ཞིང་། འཁྱམ་པོ་ཚོས་དེ་ལྟར་བཤིག་ནས་སྟོང་བར་བྱས།
ISA 1:8 ཛ་ཡན་གྱི་བུ་མོ་ནི་རྒུན་ཚལ་ཁྲོད་ཀྱི་སྤྱིལ་བུ་དང་ཁི་རའི་ཞིང་ཁའི་ཁང་བུ་དང་། མཐའ་བཞི་ནས་བསྐོར་བའི་གྲོང་ཁྱེར་དང་འདྲའོ། །
ISA 1:9 གལ་སྲིད་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་རང་ཅག་ལ་སྲོག་ཉེན་ལས་ཐར་བ་འགའ་རེ་བསྐྱུར་བ་མིན་ཚེ། རང་ཅག་ནི་སཱ་དོམ་དང་གཱ་མོ་ར་ལྟ་བུར་གྱུར་ཡོད།
ISA 1:10 ཀྱེ་སཱ་དོམ་གྱི་འགོ་དཔོན་ཚོ། དཀོན་མཆོག་ཡ་ཝཱེའི་བཀའ་ལ་ཉོན་ཅིག ཀྱེ་གཱ་མོ་རའི་མི་རྣམས། རང་རེའི་དཀོན་མཆོག་གི་བཀའ་སློབ་ལ་རྣ་བ་གཏོད་ཅིག
ISA 1:11 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་མཆོད་པ་རྒྱ་ཆེ་ཡང་ང་ལ་ཕན་པ་གང་ཡང་མེད། བདག་ནི་ལུག་ཐུག་གི་སྦྱིན་སྲེག་དང་། ཕྱུགས་ཤ་ཤེད་ཅན་གྱི་ཚིལ་གྱིས་ཚིམས་ཡོད་པས། བ་གླང་དང་ལུ་གུ ར་ཐུག་གི་ཁྲག་བཅས་ལ་དགའ་བ་མེད་དོ། །
ISA 1:12 ཁྱོད་ཅག་ངའི་མདུན་དུ་ཡོང་དུས། ངའི་ར་སྐོར་རྣམས་ལ་རྡོག་རྫིས་བཏང་བ་དེ་སུའི་འདོད་པ་ཡིན་ནམ།
ISA 1:13 ཕྱིན་ཆད་སྙིང་པོ་མེད་པའི་མཆོད་པ་ཁྱེར་ནས་འོང་མི་དགོས། བདུག་སྤོས་ལ་བདག་ཡི་ག་ལོག་ཡོད། ཚེས་གཅིག་དང་ངལ་གསོ་བའི་ཉིན་མོ། འདུ་འཛོམས་བཅས་ལ་བདག་སུན་སྣང་སྐྱེས། ཁྱོད་ཚོས་སྡིག་ཉེས་དང་བཅས་འདུ་འཛོམས་དམ་ནན་སྲུང་བ་ནི་བདག་གིས་བཟོད་མི་ཐུབ་པ་ཡིན།
ISA 1:14 ཁྱོད་ཅག་གི་ཚེས་གཅིག་གི་དུས་ཆེན་དང་གཏན་ལ་ཁེལ་བའི་དུས་ཆེན་རྣམས་ལ་བདག་སེམས་ནས་སྡང་། དེ་དག་ནི་ང་ལ་ཁྲེས་པོ་ཞིག་ཡིན་པས་དེ་དག་འཁུར་བར་བདག་སུན་སྣང་སྐྱེས་བྱུང་།
ISA 1:15 དེ་བས་ཁྱོད་ཅག་གིས་ལག་ཟུང་བརྐྱངས་ནས་སྨོན་ལམ་འདེབས་དུས། ངས་རང་གི་མིག་བཀབ་ནས་ཁྱོད་ཅག་ལ་ལྟ་བ་མིན། ཁྱོད་ཅག་གི་ལག་པ་ཁྲག་གིས་བརྫིས་ཡོད་པས་ཁྱོད་ཀྱིས་སྨོན་ལམ་མང་པོ་བཏབ་ཀྱང་ངས་དེ་ལ་མཉན་པར་མི་བྱའོ། །
ISA 1:16 ཁྱོད་ཅག་གིས་རང་ཉིད་བཀྲུས་ནས་གཙང་མར་བཟོ་དགོས། རང་གི་སྡིག་སྤྱོད་རྣམས་ངའི་མིག་སྔ་ནས་མེད་པར་ཐོངས། བྱ་སྤྱོད་ངན་པ་དག་མཚམས་འཇོག་པར་གྱིས།
ISA 1:17 དོན་བཟང་སྒྲུབས་ལ་ཁྲིམས་དྲང་པོར་སྐྱོངས། གདུག་རྩུབ་ཅན་ལ་གཤེ་གཤེ་ཐོངས། དྭ་ཕྲུག་ལ་བདེན་ལུགས་སྦྱིན་པ་དང་ཡུགས་མོ་བསྲུང་བར་གྱིས་ཤིག་ཅེས་གསུངས་སོ། །
ISA 1:18 ཡང་དཀོན་མཆོག་ཡ་ཝཱེས་འདི་སྐད་དུ། ཤོག་དང་རང་ཅག་གིས་མཉམ་དུ་རྩོད་པར་བྱ། ཁྱོད་ཅག་གི་སྡིག་པ་ནི་དམར་པོ་ཁྲག་དང་འདྲ་ཡང་དེ་ནི་ཁ་བ་ལྟར་དཀར་པོར་འགྱུར་བ་དང་། དེ་རྣམས་དམར་པོ་དམར་རྐྱང་ཡིན་ཡང་བལ་ལྟར་དཀར་པོར་འགྱུར་འོང་།
ISA 1:19 གལ་སྲིད་ཁྱོད་བཀའ་བརྩི་བར་མོས་ན། ས་གཞིའི་ལོ་ཏོག་ཡིད་དུ་འོང་བ་རྣམས་ཁྱོད་ཀྱིས་བཟའ་བར་འགྱུར།
ISA 1:20 འོན་ཀྱང་ཁྱོད་ཀྱིས་བཀའ་མི་བརྩི་བར་ངོ་ལོག་བྱས་ན་རལ་གྲིས་འགེམས་པར་འགྱུར་ཞེས་པའོ། །དཀོན་མཆོག་ཡ་ཝཱེས་དངོས་སུ་དེ་ལྟར་གསུངས་པའོ། །
ISA 1:21 བློ་དཀར་བའི་གྲོང་ཁྱེར་དེ་སྨད་འཚོང་མ་རུ་ཇི་ལྟར་གྱུར། སྔོན་ཆད་དེ་ནི་དྲང་གཞག་དང་དྲང་བདེན་གྱི་གནས་ཚང་ཞིག་ཡིན་ནའང་། ད་ལྟ་དེར་ལག་དམར་མང་པོས་གང་འདུག
ISA 1:22 ཁྱོད་ཀྱི་དངུལ་རྣམས་སྙིགས་རོར་གྱུར་ཅིང་། ཁྱོད་ཀྱི་རྒུན་ཆང་ཆུ་ལ་འདྲེས་འདུག
ISA 1:23 ཁྱོད་ཀྱི་འགོ་དཔོན་རྣམས་ཀྱིས་གྱེན་ལོག་བྱས་ཏེ་ཇག་རྐུན་རྣམས་ཀྱི་འགྲོགས་ཡ་རུ་གྱུར། མི་ཐམས་ཅད་ལྐོག་རྔན་ལ་རྔམ་ཞིང་བརྔན་པར་སྙེག་གོ །ཁོ་ཚོས་དྭ་ཕྲུག་རྣམས་ལ་བདེན་ལུགས་མི་སྟེར་ཞིང་། ཡུགས་མོའི་གྱོད་གཞི་རྣམས་ཀྱང་ཁོ་ཚོའི་མདུན་དུ་འབྱོར་ཐབས་མེད།
ISA 1:24 དེ་བས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེ་སྟེ། ཡེས་ར་ཨེལ་གྱི་མཐུ་སྟོབས་ཆེན་པོ་ལྡན་པ་ཡིས་འདི་སྐད་དུ། བདག་གིས་རང་གི་དགྲ་ཟླར་ཤ་འཁོན་རྩོད་ཅིང་དགྲ་རྣམས་ལ་འཁོན་ལན་སློག་དགོས།
ISA 1:25 ངས་རང་གི་ལག་པ་བརྐྱངས་ནས། ཁྱོད་ཀྱི་སྙིགས་རོ་རྣམས་འདག་རྫས་ཀྱིས་བཀྲུ་བ་ལྟར་བཀྲུས་ནས་ཁྱོད་ཀྱི་སྐྱོན་སེལ་བར་བྱའོ། །
ISA 1:26 ངས་ཁྱོད་ཀྱི་ཁྲིམས་དཔོན་རྣམས་སྔོན་ལྟར་འཇོག་ཅིང་། ཁྱོད་ཀྱི་སློབ་སྟོན་པ་དག་སྔར་བཞིན་འཇོག་དགོས། དེའི་རྗེས་སུ་ཁྱོད་ལ་དྲང་བདེན་གྱི་གྲོང་ཁྱེར་དང་། བློ་དཀར་བའི་གྲོང་ཁྱེར་ཞེས་འབོད་དོ་ཞེས་གསུངས་སོ། །
ISA 1:27 ཛ་ཡན་ནི་དྲང་གཞག་གི་དབང་གིས་ཐར་བར་འགྱུར་ལ། གྲོང་ཁྱེར་ནང་གི་འགྱོད་བཤགས་བྱེད་མཁན་རྣམས་ཀྱང་དྲང་བདེན་གྱི་དབང་གིས་ཐར་བར་འགྱུར།
ISA 1:28 འོན་ཀྱང་ངོ་ལོག་པ་དང་སྡིག་ཅན་ཐམས་ཅད་ནི་ལྷན་ཅིག་ཏུ་མེད་པར་འགྲོ་ལ། དཀོན་མཆོག་ཡ་ཝཱེ་འདོར་མཁན་རྣམས་ཀྱང་ནུབ་པར་འགྱུར་རོ། །
ISA 1:29 ཁྱོད་རྣམས་ནི་རང་ཉིད་དགའ་བའི་བེ་ཤིང་གིས་ངོ་ཚར་སྦྱོར་ཞིང་། ཁྱོད་ཅག་གིས་བདམས་པའི་སྐྱེད་ཚལ་རྣམས་ཀྱིས་ནོངས་པར་བྱ།
ISA 1:30 ཅི་ལ་ཞེ་ན། ཁྱོད་ནི་ལོ་མ་ལྷུང་བའི་བེ་ཤིང་དང་། ཆུ་དཀོན་པའི་སྐྱེད་ཚལ་ལྟ་བུར་འགྱུར་ངེས།
ISA 1:31 མི་སྟོབས་ཆེན་དེ་བལ་སྐུད་ལྟར་འགྱུར་ཞིང་། ཁོའི་ལས་དོན་རྣམས་མེ་སྟག་བཞིན་ཡིན་ལ། དེ་གཉིས་ལྷན་ཅིག་ཏུ་འབར་འགྲོ་བས་སུས་ཀྱང་མེ་དེ་གསོད་མི་ནུས་སོ། །
ISA 2:1 ཡ་ཧུ་དཱ་དང་ཡེ་རུ་སཱ་ལེམ་གྱི་སྐོར་ལ། ཨ་མོ་ཟིའི་བུ་ཡེ་ཤ་ཡཱ་ལ་བྱུང་བའི་བཀའ་ནི་འདི་ལྟ་སྟེ།
ISA 2:2 མཐའ་མའི་ཉིན་མོ་དག་ལ་དཀོན་མཆོག་ཡ་ཝཱེའི་མཆོད་ཁང་གི་རི་བོ་དེ་རི་བོ་གཞན་དག་གི་རྩེ་མོར་བཞེང་ཞིང་རི་སྒང་རྣམས་ཀྱི་ཡང་སྟེང་དུ་འགྱིང་བ་དང་། མི་རིགས་ཐམས་ཅད་དེའི་ཕྱོགས་སུ་བཞུར་ངེས་ཡིན།
ISA 2:3 མི་མང་པོ་འོངས་ནས་ན་རེ། ཤོག་དང་། རང་ཅག་ཡར་དཀོན་མཆོག་ཡ་ཝཱེའི་རི་བོ་སྟེ། ཡ་ཀོབ་ཀྱི་དཀོན་མཆོག་གི་མཆོད་ཁང་ལ་འགྲོ་བར་བྱའོ། །ཁོང་གིས་ང་ཚོ་ལ་ཁོང་གི་ཕེབས་ལམ་སྟོན་ཞིང་ང་ཚོ་ཁོང་གི་ཕེབས་ལམ་དུ་འགྲུལ་བར་བྱ་ཞེས་སྨྲ་བར་འགྱུར། ཅི་ལ་ཞེ་ན། ཛ་ཡན་ནས་ཁོང་གི་བཀའ་ཁྲིམས་འབྱུང་ཞིང་། ཡེ་རུ་སཱ་ལེམ་ནས་དཀོན་མཆོག་ཡ་ཝཱེའི་བཀའ་འབྱུང་ངེས་ཡིན།
ISA 2:4 ཁོང་གིས་མི་རིགས་རྣམས་ཀྱི་བར་ཁྲིམས་གཅོད་ཅིང་མི་རྣམས་ལ་ལེགས་ཉེས་འབྱེད་པར་འགྱུར། ཁོ་ཚོས་རང་གི་རལ་གྲི་རྣམས་ཐོང་གཤོལ་དུ་བརྡུང་ཞིང་། མདུང་རྣམས་ཟོར་བར་བརྡུངས་ཏེ། མི་རིགས་དང་མི་རིགས་བར་ལ་རལ་གྲི་མི་འཕྱར་ཞིང་། འཐབ་འཁྲུག་ཀྱང་སློབ་པར་མི་བྱ།
ISA 2:5 ཀྱེ་ཡ་ཀོབ་ཀྱི་ཁྱིམ་རྒྱུད། ཤོག་དང་། ང་ཚོ་དཀོན་མཆོག་ཡ་ཝཱེའི་འོད་སྣང་ཁྲོད་བསྐྱོད་པར་བྱའོ། །
ISA 2:6 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་རང་གི་འབངས་མི་སྟེ་ཡ་ཀོབ་ཀྱི་ཁྱིམ་རྒྱུད་རྣམས་དོར་བའི་རྒྱུ་རྐྱེན་ནི། ཁོ་ཚོར་ཕེ་ལེ་ཤེད་པ་ལྟར་ཤར་ཕྱོགས་པའི་རྨོངས་དད་དང་མོ་པས་གང་ཞིང་། ལག་པ་བརྡབས་ནས་ཕྱི་ཕྱོགས་པ་རྣམས་ལ་ཚོང་གཏམ་མོ། །
ISA 2:7 དེ་དག་གི་ཡུལ་ལ་གསེར་དངུལ་གྱིས་གང་ནས་རྒྱུ་ནོར་ཟད་མཐའ་མེད་ལ། ས་གཞི་རྟ་ཡིས་ཁྱབ་ནས་ཤིང་རྟ་བགྲང་གིས་མི་ལང་བ་ཡིན།
ISA 2:8 དེ་དག་གི་ཡུལ་དུ་ལྷ་སྐུས་གང་ཞིང་། དེ་ཚོས་རང་གི་ལག་པས་བཟོས་པའི་ལྷ་སྐུ་རྣམས་ལ་ཕྱག་འཚལ་བ་ཡིན།
ISA 2:9 མི་ཐ་མལ་བ་རྣམས་ཀྱིས་ལྷ་སྐུ་ལ་མགོ་བོ་སྨད་དུ་སྒུར་ཅིང་། མི་ཆེན་རྣམས་ཀྱིས་ཀྱང་ཁེངས་སྐྱུང་བྱས་པས་དེ་རྣམས་ལ་གུ་ཡངས་མཛད་མི་རུང་།
ISA 2:10 དཀོན་མཆོག་ཡ་ཝཱེའི་འཇིགས་སློང་དང་ཁོང་གི་གཟི་དཔལ་བརྗིད་ཉམས་ཅན་ལ་གཡོལ་བར་བྲག་གསེབ་ལ་འཛུལ་ནས་རྡུལ་ནང་དུ་ཡིབ་པར་གྱིས་ཤིག
ISA 2:11 ཉིན་དེར་མིག་གི་ལྟ་སོ་མཐོ་བ་རྣམས་ལ་དམའ་འབེབ་བྱེད་ཅིང་། ང་རྒྱལ་ཅན་རྣམས་ཀྱིས་མགོ་བོ་སྨད་པ་དང་། དཀོན་མཆོག་ཡ་ཝཱེ་གཅིག་པུ་ཡར་འདེག་པར་འགྱུར་རོ། །
ISA 2:12 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རྒྱལ་ཅན་དང་ཁེངས་དྲེགས་ཅན། རང་རློམ་ཅན་བཅས་ཐམས་ཅད་ལ་རྒོལ་བའི་ཉིན་མོ་ཞིག་ཡོད་ལ། ཉིན་མོ་དེར་ཁོ་རྣམས་ཉམ་ཆུང་དུ་འགྱུར་བའོ། །
ISA 2:13 ལེ་པཱ་ནོན་གྱི་གཟེངས་མཐོ་བའི་ཐང་ཤིང་དང་། པཱ་ཤན་གྱི་བེ་ཤིང་ཐམས་ཅད་དང་།
ISA 2:14 རི་བོ་མཐོན་པོ་རྣམས་དང་གྱེན་དུ་གཟེངས་པའི་རི་ཕྲན་རྣམས་དང་།
ISA 2:15 མཁར་མཐོན་པོ་རེ་རེ་དང་སྲ་ཞིང་བརྟན་པའི་ལྕགས་རི་རེ་རེ་དང་།
ISA 2:16 ཐཱར་ཞིས་ཀྱི་གྲུ་གཟིངས་ཐམས་ཅད་དང་ཡིད་དུ་འོང་བའི་གྲུ་ཡོད་ཚད་ལ་རྒོལ་བར་བྱ་ཞིང་།
ISA 2:17 མི་ཡི་ཁེངས་དྲེགས་ནི་ཉམ་ཆུང་དུ་འགྱུར་བ་དང་། མི་ཡི་ང་རྒྱལ་ནི་ཁེངས་སྐྱུང་དུ་མཛད་ཅིང་། ཉིན་མོ་དེར་དཀོན་མཆོག་ཡ་ཝཱེ་གཅིག་པུ་ཡར་འདེག་པར་འགྱུར།
ISA 2:18 སྐུ་འདྲ་རྣམས་རྩ་བ་ནས་མེད་པར་འགྱུར་རོ། །
ISA 2:19 དཀོན་མཆོག་ཡ་ཝཱེ་ཡར་བཞེངས་ཏེ་ས་གཞི་དྲག་ཏུ་གཡོ་བའི་ཚེ། མི་རྣམས་ཁོང་གི་འཇིགས་སློང་དང་གཟི་དཔལ་བརྗིད་ཉམས་ཅན་ལ་གཡོལ་བར་བྲག་ཁུང་དང་སའི་བུ་ག་དག་ལ་ཡིབ་པར་འགྱུར།
ISA 2:20 ཉིན་མོ་དེ་ལ་མི་རྣམས་ཀྱིས་རང་གི་ཆེད་དུ་ཕྱག་བཙལ་སར་བཞེངས་པའི་གསེར་སྐུ་དང་དངུལ་སྐུ་རྣམས་བྱི་ལོང་དང་ཕ་ཝང་རྣམས་ལ་འདོར་ཞིང་།
ISA 2:21 དཀོན་མཆོག་ཡ་ཝཱེ་ཡར་བཞེངས་ཏེ་ས་གཞི་དྲག་ཏུ་གཡོ་བའི་ཚེ། ཁོ་རྣམས་བྲག་ཕུག་དང་ཕ་བོང་གི་སྲུབས་ལ་ཡིབས་ནས། ཁོང་གི་འཇིགས་སློང་དང་གཟི་དཔལ་བརྗིད་ཉམས་ཅན་ལ་གཡོལ་བ་ཡིན།
ISA 2:22 ཁྱོད་རྣམས་མི་ལ་མ་བརྟེན་ཞིག དེའི་སྣ་ཁུང་ལས་དབུགས་ཐེངས་གཅིག་ལས་མེད་དེ། ཁོ་ནི་དངོས་གནས་ཅི་ཡང་མ་ཡིན་ནོ། །
ISA 3:1 ལྟོས་དང་། དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་མྱུར་བ་མྱུར་དུ་ཡེ་རུ་སཱ་ལེམ་དང་ཡ་ཧུ་དཱ་གཉིས་ལས། མི་རྣམས་ཀྱི་རྒྱབ་རྟེན་དང་རོགས་སྐྱོར་ཏེ་མི་རྣམས་བརྟེན་པའི་འབྲུ་རིགས་དང་ཆུ་གཉིས་ཀ་མེད་པར་མཛད་ཅིང་།
ISA 3:2 དཔའ་རྒོད་དང་དྲག་རྩལ་ཅན། ཁྲིམས་དཔོན་དང་ལུང་སྟོན་པ། མོ་པ་དང་རྒན་པོ།
ISA 3:3 ལྔ་བཅུ་དཔོན་དང་ཐོབ་གོ་ས་ཅན། སློབ་སྟོན་པ་དང་ལག་ཤེས་པ། སྒྱུ་མ་མཁན་བཅས་མེད་པར་གཏོང་ངེས།
ISA 3:4 བདག་གིས་དེ་དག་གི་རྗེ་བོ་ལ་བྱིས་པ་རྣམས་འཇོག་ཅིང་། ཕྲུ་གུ་ཚོས་དེ་དག་དབང་དུ་བསྒྱུར་བར་བྱེད།
ISA 3:5 དེ་ནས་མི་རྣམས་ཀྱིས་ཁྱིམ་མཚེས་བར་དུའང་གཅིག་གིས་གཅིག་ལ་གཉའ་གནོན་བྱ་ཞིང་། ན་གཞོན་ཚོས་རྒན་པ་རྣམས་ལ་བརྙས་ཤིང་། ཐ་མལ་བ་རྣམས་ཀྱིས་ཆེ་མཐོང་ཅན་ལ་ཁེངས་དྲེགས་བསྐྱེད།
ISA 3:6 མི་ཞིག་གིས་ཕ་གཞིས་སུ་རང་གི་སྤུན་མཆེད་ནང་གི་གཅིག་ལ་འཇུས་ནས། ཁྱེད་ལ་ཕྱི་གོས་ཡོད་པས་ང་ཚོའི་འགོ་དཔོན་དུ་འདུག་རོགས། ཞིག་རལ་འདི་དག་ཁྱེད་ལ་དབང་བ་ཡིན་ཞེས་སྨྲ་ཞིང་།
ISA 3:7 དེའི་ཚེ་མི་དེས་སྐད་ཆེན་པོས་འདི་ལྟར། ངའི་ཁྱིམ་དུ་འབྲུ་རིགས་མེད་ལ་ཕྱི་གོས་ཀྱང་མེད་པས་ང་ནི་ཁྱོད་ཅག་གསོ་མཁན་དུ་མི་འགྱུར། ཁྱོད་ཅག་གིས་ང་མི་རྣམས་ཀྱི་འགོ་དཔོན་དུ་བསྐོ་མི་རུང་ཞེས་སྨྲ་བར་ངེས།
ISA 3:8 དེ་དག་གི་སྨྲ་བརྗོད་དང་བྱ་སྤྱོད་ཐམས་ཅད་དཀོན་མཆོག་ཡ་ཝཱེའི་དགྲ་རུ་ལངས་ཤིང་། ཁོང་གི་གཟི་བརྗིད་ཀྱི་དཔལ་འབར་བའི་སྤྱན་ལམ་ནས་ཁོང་ལ་རྒོལ་བ་ཡིན་པས། ཡེ་རུ་སཱ་ལེམ་རྒུད་ཅིང་། ཡ་ཧུ་དཱ་ནི་འགྱེལ་ལོ། །
ISA 3:9 དེ་དག་གི་གདོང་མདོག་གིས་རང་ཉིད་ཀྱི་སྐྱོན་གསལ་པོར་སྟོན་ཞིང་། སཱ་དོམ་ལྟར་རང་གི་སྡིག་པ་ཕྱི་ལ་མངོན་པ་ལས་སྦ་བར་མི་བྱ། དེ་ཚོས་རང་ལ་ཆག་སྒོ་སློང་བས་ཆག་སྒོ་འབྱུང་།
ISA 3:10 དྲང་པོ་རྣམས་ཀྱིས་རང་རང་གི་བྱ་སྤྱོད་ལས་སྨིན་པའི་འབྲས་བུ་ལོངས་སུ་སྤྱོད་ངེས་ཡིན་པས། ཁྱོད་ཅག་གིས་དེ་རྣམས་ལ་བདེ་བར་འགྱུར་ཡོང་ཞེས་ཤོད་ཅིག
ISA 3:11 ཀྱེ་ཧུ་མི་ངན་ལ་ཆག་སྒོ་འབྱུང་། ཅི་ལ་ཞེ་ན། དེ་དག་ལ་རང་གི་ལག་པས་ཅི་བྱས་བཞིན་ལན་འཇལ་དགོས་པ་ཡིན།
ISA 3:12 བདག་གི་འབངས་མི་ལ་མཚོན་ན། བྱིས་པ་རྣམས་ཀྱིས་ཁོ་རྣམས་ལ་གཉའ་གནོན་བྱ་ཞིང་སྐྱེས་མ་ཚོས་དབང་དུ་བསྒྱུར་བ་ཡིན། ཀྱེ་བདག་གི་འབངས་མི། ཁྱོད་རྣམས་ཀྱི་སྣེ་ཁྲིད་པས་ཁྱོད་ཅག་ལོག་ལམ་དུ་ཁྲིད་ཅིང་ཁ་ཕྱོགས་ནོར་དུ་བཅུག་གོ །
ISA 3:13 དཀོན་མཆོག་ཡ་ཝཱེ་ཡར་བཞེངས་ནས་རྩོད་ཅིང་། མི་རྣམས་ལ་ཁྲིམས་གཅོད་པར་བཞེང་བའོ། །
ISA 3:14 དཀོན་མཆོག་ཡ་ཝཱེས་ཁོང་གི་འབངས་མིའི་རྒན་པོ་དང་འགོ་དཔོན་རྣམས་ལ་འདི་སྐད་དུ། ཁྱོད་ཅག་གིས་རྒུན་ཚལ་ཁྱུར་མིད་བཏང་ཞིང་། དབུལ་པོ་དག་ནས་ཕྲོགས་པའི་རྒྱུ་ནོར་རྣམས་ཁྱོད་ཅག་གི་ཁྱིམ་དུ་ཡོད་ཅེས་འདྲི་གཅོད་མཛད་ཅིང་།
ISA 3:15 དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་བདག་གི་འབངས་མི་ལ་གཉའ་གནོན་བྱེད་དོན་ཅི་ཡིན། དབུལ་པོ་རྣམས་ཀྱི་ངོ་བརྡར་དོན་ཅི་ཡིན་ཞེས་གསུངས་སོ། །
ISA 3:16 ཡང་དཀོན་མཆོག་ཡ་ཝཱེས་འདི་སྐད་དུ། ཛ་ཡན་གྱི་བུད་མེད་རྣམས་ཁེངས་དྲེགས་ཆེ་ཞིང་མཇིང་པ་དགྱེ་དགྱེ་བྱས་ནས་འགྲོ་བ་དང་། བཅོས་མའི་མཛའ་བརྩེ་སྟོན་བཞིན་སྒེག་ཉམས་བཏོད་ནས་འགྲོ་བ་དང་རྐང་གདུབ་སིལ་སིལ་སྒྲོག
ISA 3:17 དེ་བས་དཀོན་མཆོག་ཡ་ཝཱེས་ཛ་ཡན་གྱི་བུད་མེད་རྣམས་ཀྱི་སྤྱི་གཙུག་ལ་རྔོ་འབུད་པར་མཛད་ཅིང་། དཀོན་མཆོག་ཡ་ཝཱེས་དེ་དག་གི་ཁོག་སྨད་རྗེན་པར་འདོན་ངེས།
ISA 3:18 ཉིན་དེ་ལ་གཙོ་བོ་ཡ་ཝཱེས་དེ་དག་གི་ཡིད་དུ་འོང་བའི་རྐང་གདུབ་དང་དབུ་རྒྱན། ཟླ་གམ་གྱི་མགུལ་རྒྱན།
ISA 3:19 རྣ་ལོང་། ལག་གདུབ། གདོང་ཁེབས།
ISA 3:20 གཙུག་ཏོར། རྐང་རྒྱན། སྐ་རགས། དྲི་ཞིམ་གྱི་བུམ་པ། སྲུང་འཁོར།
ISA 3:21 མཛུབ་དཀྲིས། སྣ་ལོང་།
ISA 3:22 ཤོམ་ལྭ། སྟོད་དཀྲིས། བེར་གྱོན། ལག་ཁུག
ISA 3:23 མེ་ལོང་། སོ་རས་སྲབ་བུའི་ནང་གོས། མགོ་དཀྲིས། ཕྲག་ཁེབས་བཅས་མེད་པར་གཏོང་ངོ་། །
ISA 3:24 དེ་ནས་དྲི་ཞིམ་གྱི་ཚབ་ལ་རུལ་དྲི་དང་སྐ་རགས་ཀྱི་ཚབ་ལ་ཐག་པ། སྐྲ་ལོའི་ཚབ་ལ་སྤྱི་ཐེར་དང་ཤོམ་ལྭའི་ཚབ་ལ་རྩིད་རས་ཀྱི་གྱོན་པ། བཞིན་རས་མཛེས་པའི་ཚབ་ལ་མེ་ཐེལ་བཅས་བྱས་ནས།
ISA 3:25 ཁྱོད་ཀྱི་སྐྱེས་པ་རྣམས་རལ་གྲིའི་ཁ་ནས་འགྱེལ་ཞིང་། ཁྱོད་ཀྱི་དཔའ་རྒོད་རྣམས་གཡུལ་ངོར་འཆི་བར་འགྱུར།
ISA 3:26 ཛ་ཡན་གྱི་མཁར་སྒོས་སྐྱོ་གདུང་ངང་ངུ་འབོད་བྱེད་ཅིང་། གཞན་གྱིས་འཕྲོག་བཅོམ་བྱས་ཏེ་ས་སྟོང་དུ་ལུས་ནས་སར་སྡོད་པར་འགྱུར་རོ། །
ISA 4:1 ཉིན་དེ་ལ་བུད་མེད་བདུན་གྱིས་སྐྱེས་པ་གཅིག་ལ་འཐམས་ཏེ་ན་རེ། ང་ཚོས་རང་གི་ཁ་ཟས་སྤྱད་ནས་རང་གི་གོན་པ་ཡང་གྱོན་ཆོག ང་ཚོའི་ངོ་ཚ་བསལ་བའི་ཕྱིར་ཁྱེད་ཀྱི་མིང་གི་འོག་ཏུ་ལེན་རོགས་ཞེས་ཞུ་ངེས།
ISA 4:2 ཉིན་མོ་དེ་ལ་དཀོན་མཆོག་ཡ་ཝཱེའི་ལྕུག་ཕྲན་ནི་མཛེས་ཤིང་གཟི་བརྗིད་ཀྱིས་ཁྱབ་སྟེ། ཡུལ་དེའི་ཤིང་ཏོག་རྣམས་ཡེས་ར་ཨེལ་ནས་ལུས་པ་རྣམས་ཀྱི་གཟི་བརྗིད་དང་དཔལ་ཡོན་དུ་འགྱུར་ཞིང་།
ISA 4:3 དེའི་དུས་སུ་ཛ་ཡན་ནས་ལུས་ཤིང་ད་དུང་ཡེ་རུ་སཱ་ལེམ་དུ་འཚོ་སྡོད་བྱས་ཡོད་པ་སྟེ། ཡེ་རུ་སཱ་ལེམ་ནས་ཐོ་བརྒྱབ་པའི་གསོན་པོ་ཐམས་ཅད་ལ་དམ་པ་ལགས་ཞེས་འབོད་དོ། །
ISA 4:4 གཙོ་བོས་ཁོང་གི་ཁྲིམས་གཅོད་ཀྱི་ཐུགས་ཉིད་དང་མེར་སྲེག་པའི་ཐུགས་ཉིད་ལ་བརྟེན་ནས། ཛ་ཡན་གྱི་བུད་མེད་རྣམས་ཀྱི་མི་གཙང་བ་བཀྲུ་ཞིང་། ཡེ་རུ་སཱ་ལེམ་ཁྲོད་ཀྱི་ཁྲག་ཐིགས་རྣམས་གཙང་མར་བཀྲུ་ངེས་ཡིན།
ISA 4:5 དེ་ནས་དཀོན་མཆོག་ཡ་ཝཱེས་རི་བོ་ཛ་ཡན་ཡོངས་དང་མི་ཚོགས་ཀྱི་སྟེང་དུ་ཉིན་དཀར་སྤྲིན་དང་དུ་བ། མཚན་མོར་མེ་འོད་འགོད་པར་བྱའོ། །ཅི་ལ་ཞེ་ན། གཟི་བརྗིད་དེ་ཐམས་ཅད་ཀྱི་སྟེང་དུ་གདུགས་ཀྱིས་གཡོག་པར་འགྱུར་རོ། །
ISA 4:6 ཡང་ཁོང་གིས་ཉིན་མོར་ཚ་བར་གཡོལ་བ་དང་། རླུང་དང་དྲག་ཆར་ལ་ཡིབ་སའི་ལྡིང་ཁང་གནང་བར་བྱའོ། །
ISA 5:1 ངས་རང་གི་སྙིང་ཉེ་ལ་མགུར་ཞིག་ལེན་ཏེ། མགུར་འདི་ནི་ཁོང་གི་རྒུན་འབྲུམ་ར་བའི་སྐོར་ཡིན། ངའི་སྙིང་ཉེ་ལ་ས་བཅུད་འཛོམས་པའི་རི་སྒང་དུ་རྒུན་འབྲུམ་ར་བ་ཞིག་ཡོད།
ISA 5:2 ཁོང་གིས་ར་བའི་ས་བསྔོགས་པ་དང་རྡོ་བཏུས་ནས་རྒུན་འབྲུམ་ཡག་ཤོས་བཙུགས་ཤིང་། ར་བའི་དཀྱིལ་དུ་སོ་ལྟ་ཁང་བརྩིགས་པ་དང་། རྒུན་འབྲུམ་འཚིར་གཞོང་ཞིག་ཀྱང་བརྐོས་ཏེ་རྒུན་འབྲུམ་བཟང་པོ་སྨིན་པར་རེ་ལྟོས་བཅངས་ནའང་། དེ་ལས་རི་སྐྱེས་རྒུན་འབྲུམ་ཐོགས་སོ། །
ISA 5:3 ཀྱེ་ཡེ་རུ་སཱ་ལེམ་གྱི་ཡུལ་མི་དང་ཡ་ཧུ་དཱ་པ་རྣམས། ད་ནི་ང་དང་ངའི་རྒུན་འབྲུམ་ར་བའི་བར་དུ་ལེགས་ཉེས་ཀྱི་ཤན་འབྱེད་པར་གྱིས་ཤིག
ISA 5:4 ངས་རང་གི་རྒུན་འབྲུམ་ར་བའི་ཆེད་དུ་ཅི་བྱས་པ་ལས་ད་དུང་ལྷག་མ་གང་ཞིག་བྱ་དགོས་སམ། ངས་དེ་ལས་རྒུན་འབྲུམ་བཟང་པོ་སྨིན་པར་རེ་ལྟོས་བཅངས་ནའང་། དེ་ལས་རི་སྐྱེས་རྒུན་འབྲུམ་ཐོགས་པ་ཅི་ཡིན་ནམ།
ISA 5:5 ད་ནི་ངས་རང་གི་རྒུན་འབྲུམ་ར་བ་ལ་ཅི་བྱེད་པར་འགྱུར་བ་ཁྱོད་ལ་འཆད་པར་བྱ་སྟེ། ངས་དེའི་ར་སྐྱོར་བཤིགས་ནས་ཁྱུར་མིད་གཏོང་དུ་འཇུག་དགོས་ལ། དེའི་གྱང་ར་བཤིག་ནས་རྡུལ་དུ་བརླག་དགོས།
ISA 5:6 ངས་དེ་བེད་མེད་དུ་བསྐྱུར་ནས་འབྲེག་བཅོས་དང་རྨོ་སློག་མི་བྱ་ཞིང་། ཚེར་མ་དང་གཟེ་མ་ར་མགོ་སྐྱེ་བར་འགྱུར་ལ། སྤྲིན་ལའང་བཀའ་བསྒོས་ནས་ར་བའི་ནང་ཆར་པ་འབེབ་ཏུ་མི་འཇུག་གོ །
ISA 5:7 དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་རྒུན་འབྲུམ་ར་བ་ནི་ཡེས་ར་ཨེལ་གྱི་ཁྱིམ་རྒྱུད་ཡིན་ལ། ཁོང་ཐུགས་དགྱེས་པའི་ལྗོན་ཤིང་ནི་ཡ་ཧུ་དཱ་པ་རྣམས་ཡིན། ཁོང་གི་རེ་ལྟོས་ནི་དྲང་བདེན་ཡིན་ནའང་། དེར་ཁྲག་བཞུར་བ་གཟིགས་ཤིང་། ཁོང་གི་རེ་ལྟོས་ནི་དྲང་གཞག་ཡིན་ནའང་སྨྲེ་སྔགས་འབའ་ཞིག་ཐོས་པའོ། །
ISA 5:8 ཁང་པར་ཁང་པ་མཐུད་པ་དང་ཞིང་དང་ཞིང་སྦྲེལ་ནས་ས་ལྷག་གང་ཡང་མི་བསྐྱུར་བའི་མི་ལ་ཆག་སྒོ་འབྱུང་ཞིང་། ཁྱོད་རྣམས་ཡུལ་དེར་གཅིག་པུར་ལུས་པ་ཡིན།
ISA 5:9 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་པ་ངས་ཐོས་བྱུང་སྟེ། ཁང་པ་མང་པོ་སྟོངས་ཤིང་། ཁང་པ་ཆེན་པོ་ཡིད་དུ་འོང་བ་རྣམས་ཀྱང་སྡོད་མཁན་མེད་པར་འགྱུར།
ISA 5:10 བ་གླང་དོར་བཅུ་ཡིས་རྨོད་པའི་རྒུན་ཚལ་ལས་རྒུན་ཆང་ཆུ་བེན་གང་དང་། ས་བོན་ཁལ་གཅིག་ལས་འབྲུ་རིགས་ཨེ་ཕཱ་གཅིག་མ་གཏོགས་མི་རེག
ISA 5:11 ཞོགས་པ་སྔ་མོ་ལངས་ནས་གར་ཆང་བཏུང་ཞིང་། དགོང་མོའི་བར་དུ་རྒུན་ཆང་འཐུངས་ནས་ངར་ལངས་པ་རྣམས་ལ་ཆག་སྒོ་འབྱུང་།
ISA 5:12 དེ་དག་གི་གསོལ་སྟོན་སྟེང་པི་ཝང་དང་རྒྱུད་མངས་དང་། སིལ་རྔ་དང་། གླིང་བུ་དང་། རྒུན་ཆང་བཅས་ཡོད་ནའང་། དེ་དག་གིས་དཀོན་མཆོག་ཡ་ཝཱེའི་མཛད་པ་ལ་དོ་སྣང་མི་བྱེད་ལ། ཁོང་གི་ཕྱག་ལས་ལའང་མཉམ་འཇོག་མེད་དོ། །
ISA 5:13 དེ་བས་བདག་གི་འབངས་མི་ནི་གོ་བ་མེད་པའི་རྐྱེན་གྱིས་བཙོན་དུ་འཁྲིད་དགོས་བྱུང་ཞིང་། དེའི་མི་ཆེན་རྣམས་ལྟོགས་ནས་འཆི་བ་དང་། དེའི་མི་དམངས་ནི་སྐོམ་པས་གདུང་བར་འགྱུར།
ISA 5:14 གཤིན་པོའི་གནས་ཀྱིས་ཚད་མེད་པར་མིད་པ་ཆེར་ཕྱེ་ཞིང་ཁ་ཆེ་རུ་གདངས་ཏེ། ཡེ་རུ་སཱ་ལེམ་གྱི་དཔལ་ཡོན་དང་མི་ཚོགས། འུར་སྐད་སྒྲོག་མཁན་དང་སྤྲོ་སྐྱིད་གཏོང་བ་ཐམས་ཅད་དེའི་ཁ་ནང་དུ་ལྷུང་བར་འགྱུར།
ISA 5:15 དེར་བརྟེན་མི་ཐ་ཤལ་བ་རྣམས་ཀྱིས་མགོ་བོ་སྨད་ཅིང་། མི་ཆེན་རྣམས་ཀྱིས་ཁེངས་སྐྱུང་བྱེད་པ་དང་། རང་རློམ་ཅན་རྣམས་ཀྱིས་ཀྱང་ཁེངས་སྐྱུང་བྱེད་པར་འགྱུར།
ISA 5:16 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་གཅིག་པུ་ནི་དྲང་བདེན་གྱི་རྐྱེན་གྱིས་མཐོ་རུ་འདེགས་ཤིང་། དཀོན་མཆོག་དམ་པ་ཁོང་ཉིད་དྲང་པོའི་སྒོ་ནས་དམ་པ་རུ་མངོན་ནོ། །
ISA 5:17 དེ་ནས་ལུ་གུ་ཡོང་ནས་རང་གི་རྩྭ་རར་རྩྭ་ཟ་བ་བཞིན་དུ་རྩྭ་ཟ་ཞིང་། ཕྱུག་བདག་རྣམས་རྒུད་པའི་ཤུལ་དུ་ཡུལ་འཁྱམ་པ་རྣམས་ཀྱིས་གང་འདོད་དུ་ཟས་བཅུད་ལོངས་སུ་སྤྱོད་དོ། །
ISA 5:18 སྙིང་པོ་མེད་པའི་ཐིག་གུས་ཉེས་པ་འདྲེན་ཞིང་། ཤིང་རྟ་འདྲུད་བྱེད་ཀྱི་ཐག་པས་སྡིག་པ་འཐེན་མཁན་དག་ལ་ཆག་སྒོ་འབྱུང་།
ISA 5:19 དེ་དག་ན་རེ། ཁོང་གིས་མགྱོགས་མྱུར་ངང་དེ་འཕྲལ་དུ་ཉིད་ཀྱི་ཕྱག་ལས་འགྲུབ་པར་མཛད་དེ་རང་ཅག་ལ་སྟོན་པར་ཤོག ཡང་རང་ཅག་གིས་རྟོགས་པའི་ཕྱིར་དུ་ཡེས་ར་ཨེལ་གྱི་དམ་པ་ཉིད་ཀྱི་དགོངས་འཆར་ཉེ་བར་སླེབས་གྱུར་ཅིག་ཅེས་སྨྲའོ། །
ISA 5:20 ངན་པ་ལ་བཟང་པོ་ཞེས་དང་བཟང་པོ་ལ་ངན་པ་ཞེས་འབོད་ཅིང་། འོད་ཀྱི་ཚབ་ཏུ་མུན་པ་དང་མུན་པའི་ཚབ་ལ་འོད་སྣང་འཇོག་པ་དང་། ཁ་མོའི་ཚབ་ཏུ་མངར་མོ་དང་མངར་མོའི་ཚབ་ལ་ཁ་མོ་འཇོག་མཁན་དག་ལ་ཆག་སྒོ་འབྱུང་།
ISA 5:21 རང་གི་མིག་ལམ་དུ་ཤེས་རབ་ཆེ་མདོག་དང་། རང་གི་མཐོང་ལམ་དུ་སྤྱང་པོ་ཡིན་སྙམ་པ་རྣམས་ལ་ཆག་སྒོ་འབྱུང་།
ISA 5:22 རྒུན་ཆང་བཏུང་བར་དཔའ་བ་དང་། གར་ཆང་འདྲེས་སྦྱོར་ལ་མཁས་པ་དག་ལ་ཆག་སྒོ་འབྱུང་།
ISA 5:23 དེ་དག་གིས་ལྐོག་རྔན་བླངས་ནས་ངན་པ་དྲང་པོར་རྩི་བ་དང་། དྲང་པོ་རྣམས་ཀྱི་ཁེ་དབང་འཕྲོག་པར་བྱེད།
ISA 5:24 དེ་བས་མེ་ལྕེས་སོག་མ་འགེམས་པ་དང་། རྩྭ་སྐམ་མེ་ཡིས་བསྲེག་པ་བཞིན་དེ་དག་གི་རྩ་བ་རུལ་ཞིང་། མེ་ཏོག་རྣམས་རྡུལ་ལྟར་རླུང་གིས་འཁུར། ཅི་ལ་ཞེ་ན། དེ་དག་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་བཀའ་ཁྲིམས་སྤངས་ཤིང་། ཡེས་ར་ཨེལ་གྱི་དམ་པ་ཉིད་ཀྱི་བཀའ་ཁྱད་དུ་བསད་པའོ། །
ISA 5:25 རྒྱུ་མཚན་དེའི་དབང་གིས་དཀོན་མཆོག་ཡ་ཝཱེ་རང་གི་འབངས་མི་ལ་རབ་ཏུ་ཁྲོས་ཏེ། ཕྱག་བརྐྱངས་ནས་དེ་དག་ལ་བརྡུང་བ་དང་། རི་བོ་རྣམས་འདར་ཞིང་བམ་རོ་རྣམས་སྲང་ལམ་གྱི་གད་སྙིགས་ལྟར་འགྱེལ། དེས་ཀྱང་ཁོང་གི་ཐུགས་ཁྲོ་མ་ཞི་བར་ཕྱག་ནི་སྔར་བཞིན་བརྐྱངས་པའོ། །
ISA 5:26 ཁོང་གིས་དར་ཆ་བསྒྲེངས་ནས་མི་རིགས་རྣམས་རྒྱང་རིང་ནས་འབོད་ཅིང་། ཤུ་སྒྲ་སྒྲོག་བཞིན་སའི་མཐའ་མཚམས་ནས་དེ་རྣམས་འབོད་པར་འགྱུར། ལྟོས་དང་། དེ་དག་བྲེལ་འཚུབ་ངང་མགྱོགས་པོར་སླེབ་ཡོང་།
ISA 5:27 དེ་དག་གི་ཁྲོད་དུ་ཐང་ཆད་པ་དང་སར་འགྱེལ་བ། གཉིད་ཅོག་རྒྱག་པ། གཉིད་ལ་ཡུར་བ་བཅས་ནི་གཅིག་ཀྱང་མེད་ལ། དེ་དག་གི་སྐ་རགས་ལྷོད་མེད་པ་དང་ལྷམ་སྒྲོག་ཀྱང་ཆད་མེད།
ISA 5:28 དེ་དག་གི་མདའ་རྣོན་པོ་རྣམས་གཞུ་ལ་བསྐྱིལ་བ་དང་། དེ་དག་གི་རྟའི་རྨིག་པ་རྣམས་མེ་ཆ་བཞིན་དང་། ཤིང་རྟའི་འཁོར་ལོ་རྣམས་རླུང་འཚུབ་ལྟར་ཡིན།
ISA 5:29 དེ་དག་གི་སྐད་སྒྲ་ནི་སེང་གེའི་ཁྲོད་ཀྱི་སེང་དར་མའི་ང་རོ་ལྟར་སྒྲོག་ཅིང་། ངར་སྐད་ལྷང་ལྷང་སྒོས་འཕྲོག་བཅོམ་བྱས་ནས་འཁྱེར་འགྲོ་བ་དང་སྐྱོབ་མཁན་གཅིག་ཀྱང་མེད།
ISA 5:30 ཉིན་དེར་དེ་དག་གིས་ཡེས་ར་ཨེལ་པ་རྣམས་ལ་རྦ་རླབས་ཀྱི་ཀུ་ཅོ་ལྟ་བུའི་ངར་སྐད་འདོན་ཞིང་། གལ་ཏེ་མི་ཞིག་གིས་ཡུལ་དེར་བལྟས་ཚེ། ཀྱེ་མ། དེ་རུ་འཇིགས་རུང་གི་སྨག་རུམ་འཁྲིགས་ནས་སྤྲིན་གྱིས་འོད་ཟེར་བསྒྲིབས་འདུག་པ་མཐོང་ངོ་། །
ISA 6:1 རྒྱལ་པོ་ཨུ་ཟི་ཡཱ་སྐུ་གཤེགས་པའི་ལོ་དེར། གཙོ་བོ་ཁོང་ཉིད་ཁྲི་མཐོན་པོའི་སྟེང་གོང་དུ་བཀུར་ནས་བཞུགས་འདུག་ལ། ཁོང་གི་ན་བཟའི་སྣེ་མོ་ཡིས་མཆོད་ཁང་ཡོངས་སུ་ཁེབས་ཡོད་པ་ངས་མཐོང་བྱུང་།
ISA 6:2 ཁོང་གི་གོང་དུ་སཱ་རཱབ་རྣམས་ཡོད་ལ་དེ་དག་རེ་རེར་གཤོག་པ་དྲུག་རེ་ཡོད་ཅིང་། གཤོག་པ་གཉིས་ཀྱིས་ཁོང་གི་ཞལ་རས་བཀབ་པ་དང་། གཤོག་པ་གཉིས་ཀྱིས་ཞབས་བཀབ་ལ། གཤོག་པ་གཉིས་ཀྱིས་འཕུར་སྐྱོད་བྱེད་པའོ། །
ISA 6:3 དེ་དག་གིས་སྐད་ཆེན་པོས་ཕན་ཚུན་ལ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་དམ་པ། དམ་པ། དམ་པ་ཡིན། ཁོང་གི་གཟི་བརྗིད་ས་གཞི་ཡོངས་ལ་ཁྱབ་བོ་ཞེས་བསྒྲགས་པ་དང་།
ISA 6:4 ཀི་སྒྲ་སྒྲོག་མཁན་གྱི་སྒྲ་དེས་སྒོ་ཐེམ་གྱི་རྩིག་རྨིང་འདར་དུ་བཅུག་ཅིང་མཆོད་ཁང་ལའང་དུ་བས་ཁྱབ།
ISA 6:5 དེའི་དུས་སུ་ངས་ང་ལ་ཆག་སྒོ་འབྱུང་ངོ་། །ང་ནི་མེད་པར་གྱུར་ཏོ། །ཅི་ལ་ཞེ་ན། ངའི་ཁ་མི་གཙང་བ་དང་། ང་ནི་ཁ་མི་གཙང་བའི་མི་རྣམས་ཀྱི་དཀྱིལ་དུ་ཡོད་ལ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ། རྒྱལ་པོ་ཆེན་པོ་ཁོང་ཉིད་ནི་ངའི་མིག་གིས་མཐོང་བྱུང་ངོ་ཞེས་སྨྲས་པ་ཡིན།
ISA 6:6 དེ་ནས་སཱ་རཱབ་རྣམས་ལས་གཅིག་གིས་མཆོད་ཁྲི་ནས་སྐམ་པས་བླངས་པའི་མེ་རྡོག་ཅིག་ལག་ལ་བཟུང་སྟེ་ངའི་ཕྱོགས་སུ་འཕུར་འོངས་ནས།
ISA 6:7 ཁོང་གིས་དེ་ངའི་ཁ་ལ་རེག་ནས་འདི་སྐད་དུ། ལྟོས་དང་། སོལ་བ་འདི་ཁྱོད་ཀྱི་ཁ་ལ་རེག་པས་ཁྱོད་ཀྱི་ཉེས་པ་དག་ཅིང་སྡིག་པ་བསལ་བའོ་ཞེས་གསུངས་སོ། །
ISA 6:8 ཡང་ངས་གཙོ་བོས་འདི་སྐད་དུ། བདག་གིས་སུ་ཞིག་མངག་དགོས་སམ། རང་ཅག་གི་ཆེད་དུ་སུ་འགྲོའམ་ཞེས་གསུངས་པ་ཐོས་ནས། ངས་ང་རང་འདི་རུ་ཡོད། ང་རང་མངག་པར་ཞུ་ཞེས་ཞུས་པ་ཡིན།
ISA 6:9 དེ་ནས་ཁོང་གིས་འདི་སྐད་དུ། ཁྱོད་སོང་ནས་མི་འདི་དག་ལ་འདི་ལྟར། ཁྱོད་ཚོས་ཡང་ཡང་མཉན་ཀྱང་ཧ་མི་གོ་ལ། ཡང་ཡང་བལྟས་ཀྱང་དོན་མི་རྟོགས་ཞེས་ཤོད་ཅིག
ISA 6:10 ཁྱོད་ཀྱིས་མི་འདི་དག་གི་སེམས་ཀྱིས་མི་ཚོར་ཞིང་རྣ་ཡིས་མི་གོ་བ་དང་། མིག་གིས་མི་མཐོང་བར་གྱིས་ཤིག དེ་ལྟར་མིན་ན། དེ་དག་གི་མིག་གིས་མཐོང་ཞིང་རྣ་ཡིས་ཐོས་པ་དང་། སེམས་ཀྱིས་རྟོགས་ནས་ཕྱིར་འཁོར་ཡོང་དུས་དྲག་པར་འགྱུར་རོ་ཞེས་གསུངས་སོ། །
ISA 6:11 དེ་ནས་ངས་གཙོ་བོ་ལགས། དུས་ཅི་ཙམ་དགོས་སམ་ཞེས་ཞུས་པ་ན། ཁོང་གིས་ལན་དུ། གྲོང་ཁྱེར་རྣམས་ཞིག་རོར་གྱུར་ནས་སྡོད་མཁན་གཅིག་ཀྱང་མེད་པ་དང་། ཁང་པ་རྣམས་སྟོང་བར་ལུས་ནས་ས་ཞིང་རྣམས་ཐང་རྒོད་དུ་འགྱུར་བའི་བར་དང་།
ISA 6:12 དཀོན་མཆོག་ཡ་ཝཱེས་མི་རྣམས་རྒྱང་རིང་དུ་སྤྱུགས་ནས་ཡུལ་འདིའི་ས་ཆ་མང་པོ་བདག་མེད་དུ་མ་གྱུར་པའི་བར་དུའོ། །
ISA 6:13 ཡུལ་འདིར་ཤུལ་དུ་ལུས་པ་ཡིས་བཅུ་ཆའི་གཅིག་ཙམ་ལས་མི་ཟིན་ཡང་དེའང་རྩ་མེད་གཏོང་བར་འགྱུར། འོན་ཀྱང་ཐང་ཤིང་ཚི་བ་ཅན་དང་བེ་ཤིང་བཅད་ཤུལ་ནས་ལུས་པའི་སྡོང་པོ་ལྟར། དེའི་ཤུལ་ལུས་སྡོང་པོ་དེ་ནི་དམ་པའི་ས་བོན་ལ་འགྱུར་རོ་ཞེས་གསུངས་སོ། །
ISA 7:1 ཨུ་ཟི་ཡཱའི་ཚ་བོ་སྟེ་ཡོ་ཐམ་གྱི་བུ་ཨ་ཧ་ཟཱ་ནི་ཡ་ཧུ་དཱའི་རྒྱལ་པོ་ཡིན་པའི་སྐབས་སུ། ཨ་རམ་གྱི་རྒྱལ་པོ་རེ་ཙིན་དང་། ཡེས་ར་ཨེལ་གྱི་རྒྱལ་པོ་སྟེ་རེ་མལ་ཡཱའི་བུ་ཕེ་ཀཱ་གཉིས་ཡར་ཡེ་རུ་སཱ་ལེམ་ལ་དམག་རྒྱག་ཏུ་ཡོང་ནའང་དེ་དབང་འོག་ཏུ་བསྡུ་མ་ནུས།
ISA 7:2 ཨ་རམ་པས་ཨེ་ཕཱར་ཡིམ་པ་དང་མནའ་འབྲེལ་བཙུགས་པ་རེད་ཅེས་དཱ་བིད་ཀྱི་རིགས་རྒྱུད་ལ་སྨྲས་པ་ན། ནགས་ཀྱི་ལྗོན་ཤིང་རླུང་གིས་བསྒུལ་བ་ལྟར། ཨ་ཧ་ཟཱ་དང་མི་རྣམས་ཀྱི་སྙིང་འདར་སིག་སིག་བྱས་སོ། །
ISA 7:3 དཀོན་མཆོག་ཡ་ཝཱེས་ཡེ་ཤ་ཡཱ་ལ་འདི་སྐད་དུ། ཁྱོད་དང་ཁྱོད་ཀྱི་བུ་ཤེ་ཨར་ཡ་ཤུབ་ གཉིས་རྫིང་བུ་གོང་མ་ཡི་ཆུ་རྐའི་མཇུག་སྟེ། གོས་འཁྲུད་མཁན་གྱི་ཞིང་ཁར་ཡོད་པའི་ལམ་ཆེན་དུ་ཨ་ཧ་ཟཱ་བསུ་བར་སོང་ནས།
ISA 7:4 ཁོ་ལ་འདི་ལྟར། གཟབ་གཟབ་གྱིས་ཤིག སེམས་ལྷོད་ལྷོད་གྱིས་ཤིག ཨ་རམ་གྱི་རྒྱལ་པོ་རེ་ཙིན་དང་རེ་མལ་ཡཱའི་བུ་སྟེ་དུ་བ་འཕྱུར་བའི་མགལ་མེ་དེ་གཉིས་ལས་ཐོན་པའི་ཁོང་ཁྲོ་ལ་སྐྲག་མི་དགོས། དཔའ་ཡང་ཞུམ་མི་དགོས།
ISA 7:5 ཅི་ལ་ཞེ་ན། ཨ་རམ་དང་ཨེ་ཕཱར་ཡིམ་དང་། རེ་མལ་ཡཱའི་བུ་བཅས་ཀྱིས་ཁྱོད་ལ་ཇུས་ངན་བཤམས་ཏེ་ན་རེ།
ISA 7:6 རང་ཅག་ཡར་ཡ་ཧུ་དཱ་ལ་དམག་རྒྱག་ཏུ་སོང་ནས་དེ་དཀྲུག་པར་བྱ། དེ་ཚུར་བླངས་ནས་རང་ཅག་བར་དུ་བགོ་བར་བྱ། དེ་དག་གི་ཁྲོད་དུ་ཏ་བེ་ཨེལ་གྱི་བུ་རྒྱལ་པོར་འཇོག་ཅེས་སྨྲའོ། །
ISA 7:7 ཡང་གཙོ་བོ་ཡ་ཝཱེས་འདི་སྐད་དུ། ཇུས་ངན་དེ་ཚུགས་མི་ཐུབ་ལ། དེ་ལྟར་འབྱུང་ཡང་མི་སྲིད།
ISA 7:8 ཅི་ལ་ཞེ་ན། ཨ་རམ་གྱི་རྒྱལ་ས་ནི་དཱ་མེ་སེག་ཡིན་པ་དང་། དཱ་མེ་སེག་གི་འགོ་དཔོན་ནི་རེ་ཙིན་ཡིན། དེ་ཡང་ཨེ་ཕཱར་ཡིམ་ནི་ལོ་ངོ་དྲུག་ཅུ་རེ་ལྔའི་ནང་རོལ་ཏུ་གང་སར་འཐོར་ནས་མི་རྣམས་སྟོང་བར་འགྱུར།
ISA 7:9 ཨེ་ཕཱར་ཡིམ་གྱི་རྒྱལ་ས་ནི་སཱ་མར་ཡ་དང་། སཱ་མར་ཡའི་འགོ་དཔོན་ནི་རེ་མལ་ཡཱའི་བུ་ཡིན། གལ་ཏེ་ཁྱོད་ཀྱི་དད་པ་བརྟན་པོ་མིན་ན། ཁྱོད་རྩ་བ་ནས་ཚུགས་མི་ཐུབ་ཅེས་གསུངས་སོ། །
ISA 7:10 དཀོན་མཆོག་ཡ་ཝཱེས་ཡང་ཨ་ཧ་ཟཱ་ལ་འདི་སྐད་དུ།
ISA 7:11 ཁྱོད་ཀྱིས་རང་གི་དཀོན་མཆོག་ཡ་ཝཱེ་ལ་རྟགས་མཚན་ཞུས་ཤིག འོག་གི་ས་གཞི་དང་ཡང་ན་སྟེང་གི་ནམ་མཁའ་རུ་སྟོན་པར་ཞུས་ཆོག་པ་ཡིན་ཞེས་གསུངས་ནའང་།
ISA 7:12 ཨ་ཧ་ཟཱ་ཡིས་ངས་ཞུ་བར་མི་བྱ། ངས་དཀོན་མཆོག་ཡ་ཝཱེ་ལ་ཚོད་བགམ་མི་བྱེད་ཅེས་ཞུས།
ISA 7:13 དེ་ནས་ཡེ་ཤ་ཡཱ་ཡིས་འདི་ལྟར། ཀྱེ་དཱ་བིད་ཀྱི་རིགས་རྒྱུད་ཁྱོད་ཅག་གིས་ཉོན་དང་། ཁྱོད་ཅག་གིས་མི་རྣམས་ལ་སུན་སྣང་བསྐྱེད་པ་དོན་ཆུང་ཡིན་ནམ། ད་དུང་ངའི་དཀོན་མཆོག་ལའང་སུན་སྣང་བསྐྱེད་དམ།
ISA 7:14 གཙོ་བོས་ཁྱོད་ལ་རྟགས་ཤིག་སྟོན་པར་འགྱུར་ཏེ། ལྟོས་དང་། ན་ཆུང་བུ་མོ་ཞིག་ལ་མངལ་སྦྲུམ་སྟེ་སྲས་ཤིག་འཁྲུངས་ངེས་ཤིང་། ཁོ་མོས་དེའི་མཚན་ལ་ཨིམ་མཱ་ནུ་ཨེལ་ ཞེས་འདོགས་པར་འགྱུར།
ISA 7:15 སྲས་དེས་ངན་པ་འདོར་ཞིང་བཟང་པོ་འདེམས་ཤེས་པའི་དུས་སུ་ཞོ་དང་སྦྲང་རྩི་འཐུང་ངེས་ཡིན།
ISA 7:16 འོན་ཀྱང་སྲས་དེས་ངན་པ་འདོར་ཞིང་བཟང་པོ་འདེམས་མ་ཤེས་གོང་ལ། ཁྱོད་རང་འཇིགས་པའི་རྒྱལ་པོ་དེ་གཉིས་ཀྱི་ཡུལ་ཁམས་སྟོང་བར་འགྱུར།
ISA 7:17 དཀོན་མཆོག་ཡ་ཝཱེས་ཁྱོད་དང་ཁྱོད་ཀྱི་མི་རྣམས་དང་། ཁྱོད་ཀྱི་ཕ་གཞིས་ལ་ཨ་སུར་རྒྱལ་པོ་འཁྲིད་འོང་ཞིང་། ཨེ་ཕཱར་ཡིམ་ནི་ཡ་ཧུ་དཱ་དང་གྱེས་པའི་ཚུན་ལ་ཉིན་མོ་དེ་ལྟ་བུ་གཏན་ནས་བྱུང་མྱོང་བ་མེད་དོ་ཞེས་གསུངས་སོ། །
ISA 7:18 དུས་དེ་ལ་དཀོན་མཆོག་ཡ་ཝཱེས་ཤུ་སྒྲ་བསྒྲགས་ཏེ་ཨེ་ཅིབ་ཀྱི་གཙང་པོ་དག་གི་མགོ་ཁུངས་ནས་སྦྲང་བུ་དང་། ཨ་སུར་ཡུལ་ནས་བུང་བའི་ཚོགས་འཕུར་འོང་བར་བཅུག་སྟེ།
ISA 7:19 དེ་དག་ཐམས་ཅད་སླེབས་ནས་གྲོག་གཟར་དང་བྲག་སྲུབས་དང་། ཚེར་གསེང་དང་། སྤང་ཐང་ཡོད་ཚད་ལ་ཁྱབ་པར་འགྱུར་རོ། །
ISA 7:20 ཉིན་མོ་དེར་གཙོ་བོས་གཙང་པོའི་ཕ་རོལ་ནས་གཡར་བའི་སྤུ་གྲི་སྟེ་ཨ་སུར་རྒྱལ་པོ་བརྒྱུད་ནས་ཁྱོད་ཅག་གི་སྐྲ་དང་རྐང་པའི་བ་སྤུ་འབྲེག་ཅིང་སྨ་ར་གཞར་ངེས་ཡིན།
ISA 7:21 དུས་དེར་སྐྱེས་པ་གཅིག་གིས་བ་མོ་ཁ་ཆུང་གཅིག་དང་མ་མོ་གཉིས་ལས་མི་སོས་ཤིང་།
ISA 7:22 དེ་གཉིས་ལ་འོ་མ་ཧ་ཅང་མང་པོ་བཞོ་རྒྱུ་ཡོད་པས་ཁོས་ཞོ་འཐུང་ཆོག་ལ། ཡུལ་དེར་ལུས་པའི་མི་ཐམས་ཅད་ཀྱིས་ཞོ་འཐུང་ཞིང་སྦྲང་རྩི་སྤྱོད་པར་འགྱུར།
ISA 7:23 ཡང་ཉིན་མོ་དེར་སྔར་རྒུན་འབྲུམ་སྡོང་པོ་ཆིག་སྟོང་བཙུགས་ཤིང་། རིན་གོང་དངུལ་ཆིག་སྟོང་ཡིན་པའི་ཡུལ་དག་ཀྱང་ཚེར་སྡོང་དང་ཚེར་མ་སྐྱེས་ས་རུ་འགྱུར།
ISA 7:24 ཡུལ་དེ་ཐམས་ཅད་ལ་ཚེར་སྡོང་དང་ཚེར་མས་གང་ཡོད་པས་མི་རྣམས་ཀྱིས་མདའ་གཞུ་ཐོགས་ནས་འགྲོ་བ་ཡིན།
ISA 7:25 སྔོན་ཆད་འཇོར་གྱིས་བརྐོས་པའི་ཞིང་ཁ་རྣམས་ནི་ཚེར་སྡོང་དང་ཚེར་མས་གང་སྟེ་ཁྱོད་སྐྲག་པར་གྱུར་ནས་དེ་རུ་འགྲོ་མི་ཕོད་ཅིང་། དེ་ནི་བ་གླང་རྣམས་བག་ཡངས་སུ་རྒྱུ་ཞིང་ལུག་ཁྱུ་རྣམས་རྒྱུག་ས་རུ་གྱུར་པའོ། །
ISA 8:1 དེ་ཡང་དཀོན་མཆོག་ཡ་ཝཱེས་ང་ལ་འདི་སྐད་དུ། བྱང་བུ་ཆེན་པོ་ཞིག་ཁྱེར་འོངས་ནས་དེའི་སྟེང་དུ་ཐུན་མོང་གི་ཡི་གེ་བཀོལ་ཏེ་མཱ་ཧེར་ཤལ་ལཱ་ཧ་ཤཱ་པཱ་ཟི་ ཞེས་ཕྲིས་ཤིག
ISA 8:2 དེ་ནས་ངས་བློ་དཀར་བའི་དཔང་པོ་སྟེ་མཆོད་དཔོན་ཨུ་རི་ཡཱ་དང་། ཡེ་བིར་ཀི་ཡཱའི་བུ་ཟཱ་ཀར་ཡ་གཉིས་ལ་བདག་གི་ཆེད་དུ་བདེན་དཔང་བྱེད་དུ་འཇུག་དགོས་ཞེས་གསུངས་སོ། །
ISA 8:3 དེ་ནས་ང་རང་བུད་མེད་ལུང་སྟོན་པ་སྟེ་རང་གི་ཆུང་མར་བཅར་བ་དང་། མོ་ལ་མངལ་སྦྲུམ་ནས་བུ་ཞིག་སྐྱེས་ཤིང་། དཀོན་མཆོག་ཡ་ཝཱེས་ང་ལ། བུ་ཡི་མིང་ལ་མཱ་ཧེར་ཤལ་ལཱ་ཧ་ཤཱ་པཱ་ཟི་ཞེས་ཐོགས་ཤིག
ISA 8:4 ཅི་ལ་ཞེ་ན། བུ་ཆུང་གིས་ངའི་ཕ་ལགས། ངའི་མ་ལགས་ཞེས་འབོད་ཤེས་པའི་སྔོན་ལ། དཱ་མེ་སེག་གི་རྒྱུ་ནོར་དང་སཱ་མར་ཡའི་བཅོམ་ནོར་རྣམས་ཨ་སུར་རྒྱལ་པོའི་དྲུང་ནས་འཁྱེར་བར་འགྱུར་རོ་ཞེས་གསུངས་སོ། །
ISA 8:5 ཡང་དཀོན་མཆོག་ཡ་ཝཱེས་ང་ལ་འདི་སྐད་དུ།
ISA 8:6 མི་འདི་དག་གིས་ཤི་ལོ་ཨག་གི་དལ་འབབ་ཆུ་བོ་དོར་ནས། རེ་ཙིན་དང་རེ་མལ་ཡཱའི་བུ་ལ་དགའ་བར་གྱུར།
ISA 8:7 དེ་བས་ལྟོས་དང་། གཙོ་བོས་ཟབ་ཅིང་རྒྱས་པའི་གཙང་པོ་མང་པོ་སྟེ་ཨ་སུར་རྒྱལ་པོའི་གཟི་དཔལ་ཐམས་ཅད་དེ་དག་གི་སྟེང་ལ་འདྲེན་ཞིང་། ཆུ་དེ་ཡར་རྒྱས་ནས་ཆུ་རྐའི་གོང་ལ་བཞུར་ཞིང་། ཆུ་འགྲམ་བརྒྱུད་ནས་བཞུར་འགྲོ།
ISA 8:8 ཆུ་རྒྱས་ཤིང་རྡོལ་ནས་ཡ་ཧུ་དཱའི་དཀྱིལ་གཤག་ཅིང་དེའི་སྐེ་མཚམས་བར་དུ་རྒྱག་ངེས། ཀྱེ་ཨིམ་མཱ་ནུ་ཨེལ། དེའི་གཤོག་པ་རྣམས་ཕྱི་ལ་བརྐྱངས་ཏེ་ཁྱོད་ཀྱི་ཡུལ་ཁམས་རྒྱ་ཆེན་པོ་ཁེངས་པར་འགྱུར་རོ། །
ISA 8:9 ཀྱེ་མི་རྣམས། ངན་སྤྱོད་སྤེལ་དང་ཁྱོད་ཅག་སིལ་བུར་འཐོར་འགྲོ། རྒྱང་རིང་གི་མི་རིགས་རྣམས་ཀྱིས་རྣ་བ་གཏོད་དང་། ཁྱོད་ཚོས་སྐ་རགས་བཅིངས་ ནའང་སིལ་བུར་འཐོར་འགྲོ། ཁྱོད་ཚོས་སྐ་རགས་བཅིངས་ནའང་སིལ་བུར་འཐོར་འགྲོ།
ISA 8:10 ཁྱོད་ཚོས་གྲོས་མོལ་བྱས་ཀྱང་དོན་ཅི་ཡང་མི་འགྲུབ། ཁྱོད་ཚོས་གྲོས་གཞི་བཏོན་ཡང་ནུས་པ་མི་ཐོན། ཅི་ལ་ཞེ་ན། དཀོན་མཆོག་ང་ཚོ་དང་ལྷན་དུ་བཞུགས་པས་སོ། །
ISA 8:11 དཀོན་མཆོག་ཡ་ཝཱེས་དེ་ལྟར་ཉིད་ཀྱི་མཐུ་སྟོབས་ཆེན་པོའི་ཕྱག་གིས་ང་རང་བསྐྱོར་ནས། མི་འདི་དག་ནང་ལྟར་འགྲོ་མི་རུང་བའི་བཀའ་སློབ་བསྩལ་ནས་འདི་སྐད་དུ།
ISA 8:12 མི་འདི་རྣམས་ཀྱིས་ཇུས་ངན་དུ་འབོད་པ་རྣམས་ཁྱོད་ཚོས་ཇུས་ངན་དུ་འབོད་མི་རུང་ལ། ཁོ་ཚོ་སྐྲག་ས་དེར་ཁྱོད་སྐྲག་མི་དགོས་ལ་སྔངས་ཀྱང་མི་དགོས།
ISA 8:13 འོན་ཀྱང་། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁྱོད་ཚོས་དམ་པ་རུ་བཀུར་དགོས་ཤིང་། ཁོང་ལ་ཁྱོད་རྣམས་སྐྲག་ནས་སྔངས་དགོས་པ་ཡིན།
ISA 8:14 དེ་ནས་ཁོང་ནི་ཁྱོད་ཀྱི་གནས་མཆོག་ཏུ་འགྱུར། འོན་ཀྱང་ཡེས་ར་ཨེལ་གྱི་ཁྱིམ་རྒྱུད་གཉིས་ལ་བཀག་རྡོ་དང་ས་རུ་སྒྱེལ་བའི་ཕ་བོང་དུ་འགྱུར་བ་དང་། ཡེ་རུ་སཱ་ལེམ་གྱི་མི་རྣམས་ལ་རྙི་རྒྱ་དང་དྲ་བ་རུ་འགྱུར་ངེས་ཡིན།
ISA 8:15 དེ་དག་ལས་མི་མང་པོ་ཁ་སྦུབ་ཏུ་ལོག་ནས་སར་འགྱེལ་ཞིང་འཐོར་བ་དང་། རྙི་ལ་ཚུད་ནས་འཛིན་པར་འགྱུར་ཞེས་གསུངས་སོ། །
ISA 8:16 ཁྱོད་ཀྱིས་བཀའ་ཁྲིམས་ཀྱི་ཤོག་དྲིལ་བསྒྲིལ་ནས་ངའི་རྗེས་འབྲང་པའི་དཀྱིལ་དུ་བཀའ་སློབ་ལ་ཐམ་ཀ་རྒྱོབས།
ISA 8:17 ངས་ཡ་ཀོབ་ཀྱི་ཁྱིམ་རྒྱུད་ལ་ཡིབས་པའི་དཀོན་མཆོག་ཡ་ཝཱེའི་ཞལ་རས་མཇལ་བར་སྒུག་པར་བྱ། ངས་ཁོང་ལ་རེ་ལྟོས་བཅང་བར་བྱ།
ISA 8:18 ལྟོས་དང་། ང་རང་ཉིད་དང་དཀོན་མཆོག་ཡ་ཝཱེས་ང་ལ་གནང་བའི་བུ་ཕྲུག་རྣམས་ནི་ཡེས་ར་ཨེལ་ནས་རྟགས་དང་མཚན་མ་རུ་ལངས་ཤིང་། དེ་ནི་རི་བོ་ཛ་ཡན་དུ་བཞུགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནས་བྱུང་བའོ། །
ISA 8:19 གལ་སྲིད་དེ་དག་གིས་ཁྱོད་ལ། ལྷ་པ་དང་མོ་པ་སྟེ་ཤབ་ཤུབ་སྨྲ་མཁན་དག་ལ་བསྟེན་དགོས་ཞེས་སྨྲ་བ་ཡིན་ན། ཁྱོད་ཅག་གི་མི་རྣམས་ཀྱིས་རང་གི་དཀོན་མཆོག་ལ་བཀའ་འདྲི་ཞུ་དགོས་པ་མིན་ནམ། གསོན་པོའི་དོན་དུ་གཤིན་པོ་ལ་འདྲི་རུང་ངམ་ཞེས་ལན་འདེབས་དགོས།
ISA 8:20 མི་རྣམས་ཀྱིས་བཀའ་ཁྲིམས་དང་བཀའ་གསུང་ཚད་གཞི་རུ་འཛིན་དགོས་པ་དང་། ཁོ་ཚོའི་སྨྲ་བརྗོད་དེ་དང་མི་མཐུན་ན། དེ་དག་གིས་སྐྱ་རེངས་མཐོང་མི་སྲིད།
ISA 8:21 དེ་ཚོས་དཀའ་སྡུག་དང་ལྟོགས་སྐོམ་མྱོང་བཞིན་ཡུལ་དེ་བརྒྱུད་ནས་འགྲོ་ལ། ཁོ་ཚོ་ལྟོགས་པའི་ཚེ་ཁྲོས་ནས་རང་གི་རྒྱལ་པོ་དང་རང་གི་དཀོན་མཆོག་ལ་དམོད་མོ་འདེབས་ངེས།
ISA 8:22 དེ་དག་གིས་མགོ་ཡར་བཏེགས་ནས་ནམ་མཁར་བལྟ་ཞིང་། ཡང་ཐུར་དུ་ས་གཞིར་བལྟ་བའི་ཚེ། དེ་རུ་དཀའ་སྡུག་དང་མུན་ནག སྨག་རུམ་བཅས་ཀྱི་སྡུག་བསྔལ་གྱིས་ཁེངས་ཤིང་། དེ་དག་སྨག་རུམ་སྟུག་པོའི་ཁྲོད་འདེད་པར་འགྱུར་རོ། །
ISA 9:1 ཡིན་ནའང་སྔར་དཀའ་སྡུག་མྱངས་པ་དག་གི་སྨག་རུམ་ཡལ་བར་འགྱུར་ཞིང་། སྔར་དཀོན་མཆོག་གིས་ཟེ་བུ་ལུན་དང་ནཱབ་ཐ་ལིའི་ཡུལ་གཉིས་ལ་ཁྱད་གསོད་བྱེད་དུ་བཅུག་ནའང་། རྗེས་སུ་ཁོང་གིས་རྒྱ་མཚོའི་འགྲམ་རྒྱུད་དང་ཡོར་དན་གཙང་པོའི་ཕར་ཕྱོགས། ཕྱི་ཕྱོགས་པའི་ག་ལིལ་ཡུལ་བཅས་སུ་གཟི་བརྗིད་འཐོབ་པར་བྱའོ། །
ISA 9:2 མུན་པའི་ནང་དུ་བགྲོད་པའི་མི་རྣམས་ཀྱིས་འོད་ཟེར་ཆེན་པོ་མཐོང་བ་དང་། སྨག་རུམ་ཡུལ་དུ་གནས་པ་རྣམས་ཀྱི་སྟེང་དུ་འོད་འཕྲོ་བར་འགྱུར།
ISA 9:3 ཁྱེད་ཀྱིས་རྒྱལ་ཁམས་འདིའི་མི་རྣམས་མང་དུ་སྤེལ་ཞིང་དེ་དག་ལ་དགའ་སྤྲོ་གནང་བ་དང་། མི་རྣམས་ནི་སྟོན་ཐོག་བསྡུ་སྐབས་དགའ་ཞིང་བཅོམ་ནོར་བགོ་བཤའ་རྒྱག་དུས་སྤྲོ་བ་ནང་བཞིན་ཁྱེད་ཀྱི་དྲུང་དུ་དགའ་བར་འགྱུར་རོ། །
ISA 9:4 ཅི་ལ་ཞེ་ན། ཁྱེད་ཀྱིས་མིད་ཡཱན་ཡུལ་དུ་གང་ཞིག་མཛད་པའི་ཉིན་མོ་བཞིན་དུ། དེ་དག་གིས་འཁུར་བའི་གཉའ་ཤིང་དང་ཕྲག་གི་དབྱུག་པ། དེ་དག་ལ་བརྙས་བཅོས་བྱེད་མཁན་གྱི་ལྕུག་ཕྲན་རྣམས་བཅག་པ་དང་།
ISA 9:5 གཡུལ་འཁྲུག་གི་ཟིང་ཆའི་ནང་ཞུགས་པའི་དམག་མི་ཐམས་ཅད་ཀྱི་ལྷམ་དང་། ཁྲག་གི་ནང་དུ་གྲིལ་བའི་གྱོན་གོས་རྣམས་འབར་རྫས་སུ་གྱུར་ནས་མེ་རུ་བསྲེག་པར་འགྱུར་བའི་ཕྱིར་དང་།
ISA 9:6 ཡང་ང་ཚོའི་ཆེད་དུ་ཕྲུ་གུ་ཞིག་འཁྲུངས་ཤིང་ང་ཚོ་ལ་སྲས་ཤིག་གནང་བ་ཡིན། སྲིད་དབང་ཁོང་གི་ཕྲག་ལ་མནབས་པ་དང་། ཁོང་གི་མཚན་ལ་ངོ་མཚར་བའི་ཇུས་འདོན་མཁན་དང་ཀུན་དབང་གི་དཀོན་མཆོག རྟག་པའི་ཡབ་ཆེན། ཞི་བདེའི་རྒྱལ་སྲས་བཅས་སུ་འབོད་པའོ། །
ISA 9:7 ཁོང་གི་སྲིད་དབང་དང་ཞི་བདེ་ནི་མུ་མཐའ་མེད་པར་འཕེལ་ཞིང་། ཁོང་གིས་དཱ་བིད་ཀྱི་བཞུགས་ཁྲིའི་སྟེང་ཉིད་ཀྱི་རྒྱལ་སྲིད་བསྐྱང་བ་དང་། དུས་རྟག་ཏུ་དྲང་གཞག་དང་དྲང་བདེན་ངང་རྒྱལ་སྲིད་བརྟན་པོར་བཟོས་ནས་སྲུང་སྐྱོབ་བྱེད། དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་འཁུར་ཞེན་གྱིས་དེ་ལྟར་མཛད་ངེས་སོ། །
ISA 9:8 དཀོན་མཆོག་ཡ་ཝཱེས་ཡ་ཀོབ་ལ་བཀའ་བསྩལ་བ་དང་བཀའ་དེ་ཡེས་ར་ཨེལ་གྱི་སྟེང་ལ་འབབ་པར་འགྱུར།
ISA 9:9 མི་ཐམས་ཅད་དེ་ཨེ་ཕཱར་ཡིམ་དང་སཱ་མར་ཡའི་མི་རྣམས་ཀྱིས་དོན་འདི་རྟོགས་པར་འགྱུར། ཁོ་རྣམས་ཀྱིས་ང་རྒྱལ་དང་ཁེངས་དྲེགས་ཀྱི་སེམས་བཅངས་ཏེ་ན་རེ།
ISA 9:10 སོ་ཕག་གི་མཁར་གྱང་ལོག་ནའང་ང་ཚོས་རྡོ་འཇམ་ཤ་ཅན་གྱིས་བརྩིག་པར་བྱ། འོ་སེ་ཤིང་རྣམས་བཅད་ཀྱང་དེའི་ཚབ་ལ་ཐང་ཤིང་གིས་བྱའོ་ཞེས་སྨྲས།
ISA 9:11 དེ་བས་དཀོན་མཆོག་ཡ་ཝཱེས་རེ་ཙིན་གྱི་དགྲ་རྣམས་སྟོབས་ཤུགས་རྒྱས་པར་མཛད་ནས་ཡེས་ར་ཨེལ་ལ་རྒོལ་བར་འདྲེན་ཞིང་། ཡེས་ར་ཨེལ་གྱི་དགྲ་རྣམས་ལ་ངར་སློང་བར་འགྱུར།
ISA 9:12 ཤར་ཕྱོགས་ནས་ཨ་རམ་པ་དང་ནུབ་ཕྱོགས་ནས་ཕེ་ལེ་ཤེད་པ་རྣམས་ཡོད་ཅིང་། དེ་དག་གིས་ཁ་གདངས་ནས་ཡེས་ར་ཨེལ་ནི་ཁྱུར་མིད་བཏང་། དེ་ལྟ་ནའང་དཀོན་མཆོག་ཡ་ཝཱེའི་ཐུགས་ཁྲོ་མ་ཞི་བར་ཁོང་གི་ཕྱག་ནི་སྔར་བཞིན་བརྐྱངས་ཡོད་པའོ། །
ISA 9:13 མི་འདི་རྣམས་ད་དུང་ཁོ་ཚོར་ཉེས་ཆད་གཅོད་མཁན་ཏེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཕྱོགས་སུ་འཁོར་མེད་ལ། ཁོང་བཙལ་ཡང་མ་བཙལ།
ISA 9:14 དེ་བས་དཀོན་མཆོག་ཡ་ཝཱེས་ཡེས་ར་ཨེལ་གྱི་མགོ་དང་རྔ་མ་དང་། ཏ་ལའི་ཡལ་ག་དང་འདམ་རྩྭ་བཅས་ཉིན་གཅིག་གི་ནང་དུ་གཅོད་ངེས་ཡིན།
ISA 9:15 རྒན་པ་དང་ཆེ་མཐོང་ཅན་རྣམས་ནི་མགོ་དང་། རྫུན་གྱི་སློབ་སྟོན་གནང་མཁན་གྱི་ལུང་སྟོན་པ་ནི་མཇུག་མའོ། །
ISA 9:16 ཅི་ལ་ཞེ་ན། འགོ་དཔོན་དག་གིས་མི་རྣམས་ལོག་ལམ་དུ་ཁྲིད་པ་དང་། སྣེ་ཁྲིད་འོག་གི་མི་རྣམས་ཟང་ཟིང་དུ་ལུས་སོ། །
ISA 9:17 མི་དེ་ཐམས་ཅད་ནི་དད་པ་མེད་ཅིང་ངན་པ་ཡིན་ལ་ཀུན་གྱིས་བླུན་གཏམ་སྨྲ་བས། དཀོན་མཆོག་ཡ་ཝཱེ་དེ་དག་གི་མི་དར་མ་རྣམས་ལ་ཐུགས་མི་དགྱེས་པར་མ་ཟད། དེ་དག་གི་དྭ་ཕྲུག་རྣམས་དང་ཡུགས་མོ་རྣམས་ལའང་སྙིང་རྗེ་མི་དགོངས། དེ་ལྟ་ནའང་དཀོན་མཆོག་ཡ་ཝཱེའི་ཐུགས་ཁྲོ་མ་ཞི་བར་ཁོང་གི་ཕྱག་ནི་སྔར་བཞིན་བརྐྱངས་ཡོད་པའོ། །
ISA 9:18 དེ་དག་གི་ངན་རུལ་མེ་ལྟར་འབར་ཏེ། ཚེར་སྡོང་དང་ཚེར་མ་རྣམས་ཁྱུར་མིད་གཏོང་ཞིང་། ནགས་ཚལ་སྟུག་པོ་ལའང་མེ་སྦར་ནས་མེ་ལྕེ་དགུང་ལ་མཆེད་ཅིང་དུ་བའི་ཀ་བར་འགྱུར་རོ། །
ISA 9:19 དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཐུགས་ཁྲོ་དྲག་པོས་ཡུལ་དེ་ཁྱུར་མིད་གཏོང་བ་དང་། མི་རྣམས་མེ་སྦར་བའི་འབར་རྫས་ལྟར་གྱུར་པས་རང་གི་སྤུན་ཟླ་ལ་གུ་ཡངས་གཏོང་མཁན་གཅིག་ཀྱང་མེད།
ISA 9:20 དེ་ཚོས་ལག་གཡས་པའི་ཤ་བཅད་ནས་ཟོས་ཀྱང་སྔར་བཞིན་བཀྲེས་པ་དང་། ལག་གཡོན་པའི་ཤ་ཟོས་ཀྱང་ད་དུང་མགུ་མི་ཁེངས། དེ་དག་གིས་རང་རང་གི་དཔུང་ཤ་བཟའ་བར་འགྱུར།
ISA 9:21 མཱ་ན་ཤེ་ཡིས་ཨེ་ཕཱར་ཡིམ་ཁྱུར་མིད་གཏོང་ཞིང་། ཨེ་ཕཱར་ཡིམ་གྱིས་མཱ་ན་ཤེ་ཁྱུར་མིད་གཏོང་བ་དང་། དེ་རྣམས་བསྡོངས་ནས་ཡ་ཧུ་དཱ་ལ་ཕར་རྒོལ་བྱེད། དེ་ལྟ་ནའང་དཀོན་མཆོག་ཡ་ཝཱེའི་ཐུགས་ཁྲོ་མ་ཞི་བར་ཁོང་གི་ཕྱག་ནི་སྔར་བཞིན་བརྐྱངས་ཡོད་པའོ། །
ISA 10:1 དྲང་བདེན་མིན་པའི་ཁྲིམས་གཏན་ལ་འབེབས་མཁན་དང་གཡོ་སྒྱུའི་ཁྲིམས་གཅོད་ཟིན་ཐོར་འགོད་མཁན་དག་ལ་ཆག་སྒོ་འབྱུང་སྟེ།
ISA 10:2 དེ་དག་གིས་དེར་བརྟེན་ནས་བདག་གི་འབངས་མིའི་ཁྲོད་ཀྱི་དབུལ་པོ་རྣམས་ཀྱི་དྲང་བདེན་མེད་པར་བཟོ་ཞིང་། དཀའ་སྡུག་ཅན་རྣམས་ཀྱི་ཁེ་དབང་ཕྲོགས་ནས། ཡུགས་མོ་དང་དྭ་ཕྲུག་གི་རྒྱུ་ནོར་འཕྲོག་བཅོམ་བྱེད་པའོ། །
ISA 10:3 ཉེས་ཆད་གཅོད་པའི་ཉིན་མོར་ཆག་སྒོ་ཐག་རིང་ནས་སླེབ་ཡོང་དུས་ཁྱོད་ཅག་གིས་ཅི་བྱའམ། ཁྱོད་ཅག་མགོན་སྐྱབས་སུ་ཡི་དྲུང་དུ་འབྲོའམ། ཁྱོད་ཅག་གི་རྒྱུ་ནོར་གང་དུ་བསོག་དགོས་སམ།
ISA 10:4 ཁྱོད་ཅག་བཙོན་པ་རྣམས་ཀྱི་ཁྲོད་དུ་པུས་མོ་སར་བཙུགས་ནས་སྡོད་པའམ། ཡང་ན་ཤི་བོ་རྣམས་ཀྱི་དཀྱིལ་དུ་འགྱེལ་བར་འགྱུར། དེ་ལྟ་ནའང་དཀོན་མཆོག་ཡ་ཝཱེའི་ཐུགས་ཁྲོ་མ་ཞི་བར་ཁོང་གི་ཕྱག་ནི་སྔར་བཞིན་བརྐྱངས་ཡོད་པའོ། །
ISA 10:5 བདག་གི་ཁོང་ཁྲོའི་ལྕུག་ཕྲན་ཏེ་ཨ་སུར་ལ་ཆག་སྒོ་འབྱུང་ངོ་། །དེ་དག་གི་ལག་ཏུ་བདག་གི་ཁོང་ཁྲོའི་དབྱུག་པ་ཡོད།
ISA 10:6 བདག་གིས་དེ་ནི་དད་པ་མེད་པའི་རྒྱལ་ཁམས་ཤིག་དང་ང་ལ་ཁོང་ཁྲོ་སློང་བའི་མི་རྣམས་ལ་རྒོལ་བར་མངགས་ཏེ། རྒྱུ་ནོར་མང་པོ་འཕྲོག་བཅོམ་བྱེད་པ་དང་། དེ་དག་སྲང་ལམ་གྱི་འདམ་མྱགས་ལྟར་བརྫི་བར་བྱ་དགོས།
ISA 10:7 འོན་ཀྱང་ཨ་སུར་གྱིས་དེ་ལྟ་བུ་ཡིད་ལ་དྲན་མྱོང་མེད་ལ། སེམས་སུའང་དེ་ལྟ་བུ་བྱེད་འདོད་མེད། ཁོའི་སེམས་ཀྱི་དམིགས་བྱ་ནི་མི་རིགས་མང་པོ་རྩ་མེད་གཏོང་རྒྱུ་དེ་ཡིན།
ISA 10:8 ཅི་ལ་ཞེ་ན། ཁོའི་སེམས་སུ་ངའི་ལག་འོག་གི་དམག་དཔོན་ཐམས་ཅད་ནི་རྒྱལ་པོ་མ་ཡིན་ནམ།
ISA 10:9 ཀལ་ནོ་ནི་ཀར་ཀེ་མི་སི་དང་མི་འདྲའམ། ཧ་མཱད་ནི་ཨར་ཕད་དང་མི་འདྲའམ། སཱ་མར་ཡ་ནི་དཱ་མེ་སེག་དང་མི་འདྲའམ།
ISA 10:10 བདག་གི་ལག་པ་ནི་ལྷ་སྐུ་ཡིས་ཁེངས་པའི་རྒྱལ་ཁམས་དག་ལ་བརྐྱངས་པ་དང་། དེ་དག་གིས་བརྐོས་པའི་ལྷ་སྐུ་ནི་ཡེ་རུ་སཱ་ལེམ་དང་སཱ་མར་ཡ་ལས་ཀྱང་མང་ངོ་། །
ISA 10:11 བདག་གིས་སཱ་མར་ཡའི་ལྷ་སྐུ་རྣམས་ལ་ཅི་ལྟར་བྱས་པ་ཡིན་ན། ཡེ་རུ་སཱ་ལེམ་དང་དེའི་ལྷ་སྐུ་རྣམས་ལའང་དེ་ལྟར་བྱེད་པ་མ་ཡིན་ནམ་ཞེས་སྨྲ་བའོ། །
ISA 10:12 གཙོ་བོས་རི་བོ་ཛ་ཡན་དང་ཡེ་རུ་སཱ་ལེམ་དུ་ཉིད་ཀྱི་ཕྱག་ལས་རྣམས་བསྒྲུབས་ཟིན་པའི་ཚེ། ཁོང་གིས་འདི་སྐད་དུ། བདག་གིས་ཨ་སུར་རྒྱལ་པོའི་ང་རྒྱལ་གྱི་སེམས་ནས་སྨིན་པའི་འབྲས་བུ་དང་ཁེངས་དྲེགས་ཀྱི་མིག་མདངས་ལ་ཆད་པ་གཅོད་པར་བྱ་ཞེས་གསུང་ངེས་ཏེ།
ISA 10:13 ཅི་ལ་ཞེ་ན། ཁོས་འདི་ལྟར་སྨྲས་ཡོད་དེ། བདག་ལ་བློ་གྲོས་ལྡན་པས་ངས་རང་གི་ལག་པའི་ནུས་མཐུ་དང་རང་གི་ཤེས་རབ་ལ་བརྟེན་ནས་འདི་ལྟར་བྱས་པ་ཡིན། མི་རིགས་མང་པོའི་ས་མཚམས་སྤར་ཅིང་ཁོ་རྣམས་ཀྱིས་བསགས་པའི་རྒྱུ་ནོར་ཕྲོགས་པ་དང་། ང་རང་ནི་དཔའ་རྒོད་ཅིག་དང་འདྲ་བར་དེ་དག་གི་ཡུལ་མི་རྣམས་མར་ཕབ་པ་ཡིན་ལ།
ISA 10:14 བདག་གི་ལག་པ་ནི་བྱ་ཚང་ཟིན་པ་ལྟར་མི་རིགས་རྣམས་ཀྱི་རྒྱུ་ནོར་ལ་བསྲིངས་པ་དང་། མི་ཡིས་གཞན་གྱིས་དོར་བའི་སྒོ་ང་མང་པོ་འཐུ་བ་བཞིན་ངས་ས་གཞི་ཡོངས་སུ་བླངས་ནའང་། ང་ལ་གཤོག་པ་བརྐྱང་མཁན་དང་ཁ་གདང་མཁན་མེད་ལ། ཀྱུར་སྒྲ་ཙམ་འབྱིན་མཁན་ཡང་མ་བྱུང་ངོ་། །
ISA 10:15 སྟ་རེས་ཤིང་གཅོད་མཁན་ལ་རང་བསྟོད་བྱེད་དམ། ཤིང་གཤག་མཁན་གྱི་མདུན་དུ་སོག་ལེ་ཡིས་རང་གི་མགོ་བོ་དགྱེ་དགྱེ་བྱེད་དམ། ལྕུག་ཕྲན་འཕྱར་མཁན་དེ་ལྕུག་ཕྲན་གྱིས་འཕྱར་ནུས་སམ། དབྱུག་པས་ནི་ཤིང་མིན་པ་ཞིག་གཡུག་ཐུབ་བམ།
ISA 10:16 དེ་བས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ཨ་སུར་རྒྱལ་པོའི་དམག་མི་གཟུགས་སྟོབས་ཅན་རྣམས་ཀྱི་ཁྲོད་དུ་ཉམས་རྒུད་ཀྱི་ནད་ཡམས་གཏོང་ཞིང་། ཁོང་གི་གཟི་དཔལ་མེ་ལྟར་འབར་ནས་མཆེད་པར་བྱ་སྟེ།
ISA 10:17 ཡེས་ར་ཨེལ་གྱི་འོད་ནི་མེ་དང་། དེ་དག་གི་དམ་པ་ཉིད་མེ་ལྕེ་རུ་གྱུར་ནས་ཨ་སུར་རྒྱལ་པོའི་ཚེར་སྡོང་དང་ཚེར་མ་རྣམས་ཉིན་གཅིག་ལ་བསྲེགས་ནས་ཁྱུར་མིད་གཏོང་ངོ་། །
ISA 10:18 ཡང་ཁོའི་ནགས་ཚལ་དང་ས་ཞིང་གཤིན་པོའི་གཟི་དཔལ་རྩ་ནས་མེད་པར་བཟོ་ཞིང་། མི་ཞིག་ན་ཚས་གཟིར་བ་དང་འདྲ་བར་རྣམ་ཤེས་དང་ཕུང་པོ་གཉིས་སར་ཟགས་ནས།
ISA 10:19 ཁོའི་ནགས་ཚལ་ལས་བྱིས་པས་ཀྱང་གྲངས་ཀ་ལེན་ཐུབ་པའི་སྡོང་པོ་ཁ་ཤས་ལས་ལུས་པར་མི་འགྱུར་རོ། །
ISA 10:20 ཉིན་མོ་དེར་ཡེས་ར་ཨེལ་གྱི་ཤུལ་ལུས་རྣམས་དང་ཡ་ཀོབ་ཀྱི་ཁྱིམ་རྒྱུད་ལས་ཐར་བ་རྣམས་ཁོ་ཚོར་རྡུང་རྡེག་གཏོང་མཁན་ལ་མི་བརྟེན་པར། བློ་གཅིག་སེམས་གཅིག་གིས་ཡེས་ར་ཨེལ་གྱི་དམ་པ་ཉིད་དེ་དཀོན་མཆོག་ཡ་ཝཱེ་ལ་བརྟེན་པར་འགྱུར།
ISA 10:21 ཤུལ་ལུས་རྣམས་ཏེ་ཡ་ཀོབ་རྒྱུད་ཀྱི་ཤུལ་ལུས་རྣམས་ནི་ཀུན་དབང་དཀོན་མཆོག་གི་ཕྱོགས་སུ་འཁོར་བར་འགྱུར།
ISA 10:22 ཀྱེ་ཡེས་ར་ཨེལ་པ་རྣམས། ཁྱོད་ཀྱི་རིགས་རྒྱུད་རྒྱ་མཚོའི་བྱེ་མ་ལྟར་མང་ན་ཡང་། དེའི་ཁྲོད་ཀྱི་ཤུལ་ལུས་འབའ་ཞིག་ཕྱིར་ལོག་ཐུབ་པ་ཡིན། ཅི་ལ་ཞེ་ན། རྩ་མེད་གཏོང་བའི་དོན་ནི་གཏན་ལ་ཕབ་ཟིན་ལ། དྲང་བདེན་ནི་ཆུ་བོ་རྒྱས་པ་བཞིན་འབྱུང་ངོ་། །
ISA 10:23 དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ཡུལ་ཁམས་ཡོངས་སུ་རྩ་མེད་གཏོང་བའི་དོན་གཏན་ལ་ཕབ་ཟིན་པ་དེ་འགྲུབ་པར་མཛད་པའི་ཕྱིར་རོ། །
ISA 10:24 དེའི་ཕྱིར་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འདི་སྐད་དུ། ཀྱེ་བདག་གི་འབངས་མི་ཛ་ཡན་དུ་གནས་པ་རྣམས། ཨ་སུར་པས་ཁྱོད་རྣམས་ལ་ལྕུག་ཕྲན་གྱིས་རྡེག་ཅིང་། ཨེ་ཅིབ་པ་ནང་བཞིན་དབྱུག་པ་བཏེགས་ནས་ཁྱོད་ཚོར་བརྡུངས་ནའང་དེ་རྣམས་ལ་སྐྲག་མི་དགོས།
ISA 10:25 ཅི་ལ་ཞེ་ན། བདག་གིས་ཁྱོད་ཅག་ལ་བཅངས་པའི་ཁོང་ཁྲོ་ནི་དུས་ཡུན་ཐུང་ངུའི་ནང་ཞི་བར་འགྱུར་ཞིང་། ངའི་ཁོང་ཁྲོ་ནི་ཁོ་ཚོའི་ཕྱོགས་སུ་འཁོར་ནས་དེ་ཚོ་མེད་པར་གཏོང་བའོ་ཞེས་གསུངས་སོ། །
ISA 10:26 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཨོ་རེབ་ཀྱི་བྲག་ཁ་ནས་མིད་ཡཱན་པ་རྣམས་བསད་པ་ནང་བཞིན་ལྕག་ཚན་གྱིས་ཁོ་རྣམས་ལ་གཞུ་ཞིང་། ཁོང་གིས་ཨེ་ཅིབ་པ་ལ་ཅི་བྱས་པ་ལྟར། ཉིད་ཀྱི་དབྱུག་པ་རྒྱ་མཚོའི་ཕྱོགས་སུ་འཕྱར་རོ། །
ISA 10:27 ཉིན་མོ་དེར་ཨ་སུར་པའི་ཁུར་པོ་ལྗིད་མོ་ཁྱོད་ཅག་གི་ཕྲག་སྟེང་ནས་ཡལ་ཞིང་། དེ་དག་གི་གཉའ་ཤིང་ཁྱོད་རྣམས་ཀྱི་སྐེ་ནས་ཆག་པར་འགྱུར། ཁྱོད་ལ་ཤེད་ཤུགས་རྒྱས་པའི་རྐྱེན་གྱིས་གཉའ་ཤིང་དེ་ཆག་པར་འགྱུར་རོ། །
ISA 10:28 ཨ་སུར་པ་རྣམས་ཨ་ཡད་ལ་སླེབས་ཤིང་མག་རོན་བརྒྱུད་ནས་སོང་བ་དང་། མིགས་མཱ་སི་ལ་དམག་དཔུང་གི་དངོས་པོ་རྣམས་བཞག
ISA 10:29 ཁོ་ཚོ་ཕར་ཕྱོགས་སུ་བསྐྱོད་དེ་གེ་བཱ་ཡུལ་དུ་ཞག་སྡོད་བྱས་པ་དང་། རཱ་མ་པ་རྣམས་སྐྲག་ཅིང་སོ་ལོ་ཡི་གི་བེ་ཨ་རྣམས་བྲོས།
ISA 10:30 ཀྱེ་གཱལ་ལིམ་གྱི་ཡུལ་མི་རྣམས་སྐད་ཆེན་པོ་རྒྱོབས་ཤིག ཀྱེ་ལཱ་ཤུ་ཨ་དང་ཉམ་ང་བའི་ཨ་ན་ཐོད་ཀྱིས་རྣ་བ་གཏད་ནས་ཉོན་ཅིག
ISA 10:31 མད་མེ་ནཱ་བྲོས་བྱོལ་ཕྱིན་པ་དང་། གེ་བིམ་གྱི་ཡུལ་མི་རྣམས་སྐྱབས་བཅོལ་ལ་བུད།
ISA 10:32 དེ་རིང་ཉིན་མོར་ཨ་སུར་རྒྱལ་པོ་ནོབ་ནས་ལངས་བསྡད་དེ། ཁོས་ཛ་ཡན་བུ་མོའི་རི་བོ་སྟེ་ཡེ་རུ་སཱ་ལེམ་གྱི་རི་བོར་ཁུ་ཚུར་འཕྱར་རོ། །
ISA 10:33 ལྟོས་དང་། དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འཇིགས་སུ་རུང་བའི་འུར་སྒྲ་དང་བཅས་ཤིང་གི་ཡལ་ག་རྣམས་གཅོད་ཅིང་། གྱེན་དུ་གཟེངས་པའི་ཤིང་རྣམས་གཅོད་པ་དང་མཐོ་ཞིང་ཆེ་བ་རྣམས་མར་ཕབ་ངེས་ཡིན།
ISA 10:34 ཁོང་གིས་ནགས་སྟུག་པོ་རྣམས་སྟ་རེས་གཅོད་ཅིང་། མཐུ་སྟོབས་ཆེན་པོའི་བདག་ཉིད་ཀྱིས་ལེ་པཱ་ནོན་འགྱེལ་བར་བྱའོ། །
ISA 11:1 དེ་ཡང་ཡེ་སེའི་སྡོང་རྐང་ལས་ལྕུག་ཕྲན་ཞིག་འབུས་ཤིང་། དེའི་རྩ་བ་ནས་སྐྱེ་བའི་ཡལ་ག་ལས་ཤིང་ཏོག་སྨིན་པར་འགྱུར།
ISA 11:2 དཀོན་མཆོག་ཡ་ཝཱེའི་ཐུགས་ཉིད་དེ། ཤེས་རབ་དང་རྣམ་དཔྱོད་ཀྱི་ཐུགས་ཉིད། མཐུ་སྟོབས་དང་སློབ་སྟོན་གྱི་ཐུགས་ཉིད། མཁྱེན་རྒྱ་དང་དཀོན་མཆོག་ཡ་ཝཱེར་གུས་ཤིང་འཇིགས་པའི་ཐུགས་ཉིད་བཅས་དེའི་སྟེང་དུ་བཞུགས་པར་འགྱུར།
ISA 11:3 དཀོན་མཆོག་ཡ་ཝཱེར་གུས་ཤིང་འཇིགས་པས་དེར་དགའ་སྤྲོ་ཐོབ་པ་དང་། ཁོང་གིས་མིག་གིས་མཐོང་བ་ཁོ་ནར་བརྟེན་ནས་ཆད་པ་མི་གཅོད་ཅིང་། རྣ་བས་ཐོས་པ་ཇི་བཞིན་ལེགས་ཉེས་ཀྱི་དབྱེ་བ་མི་འབྱེད།
ISA 11:4 འོན་ཀྱང་ཁོང་གིས་དྲང་བ་ཉིད་ཀྱིས་དབུལ་པོའི་ཁྲིམས་གཅོད་ཅིང་། དྲང་པོས་ས་གཞིའི་ཉམ་ཆུང་རྣམས་སྐྱོང་། དེའི་ཁ་རུ་ཡོད་པའི་ལྕུག་ཕྲན་གྱིས་ས་གཞིར་རྡུང་ཞིང་། དེའི་ཁ་ནང་གི་རླུང་གིས་མི་ངན་རྣམས་ཚར་གཅོད་བྱེད།
ISA 11:5 དྲང་བ་ཉིད་ནི་ཁོང་གི་སྐ་རགས་དང་། གཞུང་དྲང་ནི་ཁོང་གི་སྐེད་འཆིང་ཡིན་ནོ། །
ISA 11:6 འཕར་སྤྱང་དང་ལུ་གུ་མཉམ་དུ་འགྲོགས་ཤིང་། གཟིག་དང་ར་ཕྲུག་མཉམ་དུ་གནས་ལ། བ་ཕྲུག་དང་སེང་དར་མ། ཤ་ཤེད་རྒྱས་པའི་ཕྱུགས་ཟོག་བཅས་མཐུན་པོར་གྱུར་ནས་བྱིས་པས་དེ་རྣམས་འཚོ་བར་འགྱུར།
ISA 11:7 བ་མོ་ཡིས་དོམ་དང་མཉམ་དུ་རྩྭ་བཟའ་ཞིང་། བ་ཕྲུག་ནི་དོམ་ཕྲུག་དང་ལྷན་དུ་ཉལ། སེང་གེས་བ་གླང་བཞིན་དུ་རྩྭ་བཟའ་བ་དང་།
ISA 11:8 འོ་འཐུང་ཕྲུ་གུ་སྦྲུལ་ཚང་ཁ་ནས་རྩེད་ཅིང་། འོ་ཐག་ཆོད་པའི་བྱིས་པས་རང་གི་ལག་པ་དུག་སྦྲུལ་གྱི་ཚང་ཁར་འཇོག་པ་ཡིན།
ISA 11:9 བདག་གི་རི་བོ་དམ་པའི་ཡུལ་ཐམས་ཅད་དུ་དེ་དག་གིས་གནོད་ཅིང་འཚེ་བའི་དོན་མི་སྤྱོད་དེ། ཅི་ལ་ཞེ་ན། ཆུ་བོ་རྣམས་ཀྱིས་ཇི་ལྟར་རྒྱ་མཚོ་བཀང་བ་བཞིན་དུ། དཀོན་མཆོག་ཡ་ཝཱེ་རྟོགས་པའི་ཤེས་ཡོན་ནི་ས་གཞི་ཡོངས་སུ་ཁྱབ་པ་དང་།
ISA 11:10 ཉིན་དེར་ཡེ་སེའི་རྩ་བ་ནི་མི་རིགས་ཀུན་གྱི་དར་ཆ་བཞིན་བསྒྲེང་ཞིང་། རྒྱལ་ཁབ་ཀུན་གྱིས་དེ་འཚོལ་ཞིང་། ཁོང་གི་གནས་ཡུལ་ནི་གཟི་བརྗིད་དང་ལྡན་པར་འགྱུར་རོ། །
ISA 11:11 ཡང་ཉིན་དེར་དཀོན་མཆོག་ཡ་ཝཱེས་ཉིད་ཀྱི་ཕྱག་གིས་ཁོང་གི་འབངས་མིའི་ནང་གི་ལྷག་མ་སྟེ། ཨ་སུར་དང་ཨེ་ཅིབ། ཕཱད་རུའུ་སི་དང་གུ་ཤ། ཨེ་ལཱམ་དང་ཤིན་ཨར། ཧ་མཱད་དང་རྒྱ་མཚོའི་གླིང་བཅས་སུ་ཡོད་པ་རྣམས་ཕྱོགས་གཅིག་ཏུ་བསྡུ་བ་དང་།
ISA 11:12 ཁོང་གིས་རྒྱལ་ཁབ་རྣམས་ཀྱི་ཕྱིར་དུ་དར་ཆ་བསྒྲེངས་ཏེ་བཙོན་དུ་ཁྲིད་པའི་ཡེས་ར་ཨེལ་པ་རྣམས་ཕྱིར་བསྡུ་ཞིང་། ཁ་འཐོར་དུ་སོང་བའི་ཡ་ཧུ་དཱ་པ་རྣམས་ཕྱོགས་བཞི་ནས་བསྡུ་བར་བྱའོ། །
ISA 11:13 དེ་ནས་ཨེ་ཕཱར་ཡིམ་གྱི་ཕྲག་དོག་གཅོད་པ་དང་། ཡ་ཧུ་དཱ་དགྲ་རུ་འཛིན་མཁན་རྣམས་ཚར་དུ་གཅོད་ཅིང་། ཨེ་ཕཱར་ཡིམ་གྱིས་ཡ་ཧུ་དཱ་ལ་ཕྲག་དོག་མི་བྱ་ཞིང་། ཡ་ཧུ་དཱས་ཀྱང་ཨེ་ཕཱར་ཡིམ་ནི་དགྲ་རུ་མི་འཛིན་ནོ། །
ISA 11:14 དེ་ཚོ་ནུབ་ཕྱོགས་སུ་ཕེ་ལེ་ཤེད་པའི་རི་རྩེར་མཆོང་སྟེ། མཉམ་དུ་ཤར་ཕྱོགས་པ་འཕྲོག་ཅིང་། ཨེ་དོམ་པ་དང་མོ་ཨབ་ལ་ལག་པ་བརྐྱངས་ཏེ། ཨམ་མོན་པ་རྣམས་ཀྱིས་དེ་དག་གི་ཅི་བཤད་ལ་མཉན་ངེས་ཡིན།
ISA 11:15 དཀོན་མཆོག་ཡ་ཝཱེས་ཨེ་ཅིབ་ཀྱི་མཚོ་ཁུགས་སྐམ་པར་མཛད་ཅིང་། ཁོང་གིས་ཚ་རླུང་གིས་མཚོ་སྟེང་དུ་ཕྱག་གཡུགས་ནས་དེ་ལ་བརྡུང་ཞིང་། ཆུ་ཕྲན་བདུན་དུ་དགར་ལ། དེ་ནས་མི་རྣམས་ཆུ་ཕྲན་བརྒྱུད་ཀྱང་ལྷམ་ནི་རློན་པར་མི་བྱེད་དོ། །
ISA 11:16 དེ་ཡང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ཉིན་དང་འདྲ་བར། ཨ་སུར་ནས་ལུས་པའི་དཀོན་མཆོག་གི་མི་སྡེ་ལ་ཕྱིར་ལོག་པའི་ལམ་ཆེན་ཞིག་ཡོད་པར་འགྱུར་རོ། །
ISA 12:1 ཉིན་མོ་དེར་ཁྱོད་ཀྱིས་འདི་ལྟར། ཀྱེ་དཀོན་མཆོག་ཡ་ཝཱེ་ལགས། བདག་གིས་ཁྱེད་ལ་བསྟོད་དབྱངས་འབུལ། སྔོན་ཆད་ཁྱེད་བདག་ལ་ཐུགས་ཁྲོས་ཀྱང་། ད་ལྟ་ཁྱེད་ཐུགས་མི་ཁྲོས་པར་ང་ལ་སེམས་གསོ་མཛད།
ISA 12:2 ལྟོས་དང་། དཀོན་མཆོག་ནི་ངའི་སྐྱབས་མགོན་ལགས། ང་ཁོང་ལ་བརྟེན་ཞིང་འཇིགས་པ་མེད། ཅི་ལ་ཞེ་ན། དཀོན་མཆོག་ཡ་ཝཱེ་ནི་ངའི་སྟོབས་ཤུགས་དང་བསྟོད་དབྱངས་ཡིན་པས་སོ། །ཡང་ཁོང་ནི་ངའི་སྐྱབས་མགོན་དུ་གྱུར་ཏོ་ཞེས་སྨྲའོ། །
ISA 12:3 དེ་བས་ཁྱོད་རྣམས་ཀྱིས་དགའ་སྤྲོའི་ངང་ནས་སྐྱབས་མགོན་གྱི་ཆུ་མགོ་ནས་ཆུ་ལེན་པར་འགྱུར།
ISA 12:4 ཉིན་མོ་དེར་ཁྱོད་རྣམས་ན་རེ། དཀོན་མཆོག་ཡ་ཝཱེ་ལ་བཀའ་དྲིན་ཞུས་ནས་ཁོང་གི་མཚན་བརྗོད་ཅིང་། མི་ཐམས་ཅད་ཀྱི་ཁྲོད་དུ་ཁོང་གི་མཛད་པ་བསྒྲགས་ནས། དེ་རྣམས་ལ་ཁོང་གི་བླ་ན་མེད་པའི་མཚན་གླེང་བར་འགྱུར།
ISA 12:5 ཁོང་གིས་ཆེས་ལེགས་པའི་དོན་རྣམས་མཛད་པ་དང་། དོན་དེ་ས་གཞི་ཡོངས་སུ་ཁྱབ་པའི་ཕྱིར་དུ། ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་བསྟོད་དབྱངས་ཕུལ་ཞིག
ISA 12:6 ཡེས་ར་ཨེལ་གྱི་དམ་པ་ཁོང་ནི་ཁྱོད་ཅག་གི་ཁྲོད་དུ་གཟི་བརྗིད་ལྡན་པ་ཡིན་པས། ཀྱེ་ཛ་ཡན་གྱི་ཡུལ་མི་རྣམས། ཁྱོད་ཅག་གིས་དགའ་འབོད་བྱོས་ཤིག་ཅེས་སྨྲའོ། །
ISA 13:1 ཨ་མོ་ཟིའི་བུ་ཡེ་ཤ་ཡཱས་མཐོང་བའི་པཱ་པེལ་ལོན་སྐོར་གྱི་བཀའ་ལུང་ནི་འདི་ལྟ་སྟེ།
ISA 13:2 ཁྱོད་ཀྱིས་སྐྱ་ཐེར་ཐེར་གྱི་རི་རྩེ་ལ་དར་བསྒྲེངས་ནས། མི་རྣམས་ལ་སྐད་བརྒྱབ་སྟེ་ལག་པ་གཡུགས་ཤིག དེ་དག་དབང་ཆེན་ཚོའི་མཁར་སྒོ་ལ་འཛུལ་དུ་ཆུག་དང་།
ISA 13:3 ངས་ནི་རང་གིས་ཆེད་དུ་བདམས་པའི་དམག་མི་རྣམས་ལ་བཀའ་བབས་ཤིང་། རང་གི་དཔའ་བོ་རྣམས་ཏེ་ང་རྒྱལ་དང་རང་རློམ་ཆེ་བའི་མི་རྣམས་བསྡུས་ནས་བདག་གིས་ཐུགས་ཁྲོ་ནང་དུ་མཛད་པའི་དོན་རྣམས་བསྒྲུབ་པར་འགྱུར།
ISA 13:4 ཉོན་དང་། རི་རྩེ་ནས་མི་ཚོགས་འདུས་པ་བཞིན་དུ་འུད་སྒྲོག་ཅིང་། ཉོན་དང་། རྒྱལ་ཁབ་མང་པོ་འདུས་པ་བཞིན་དུ་མི་སྡེ་མང་པོའི་འུར་སྒྲ་ཡོད། དེ་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་དམག་མི་བརྩིས་ནས་གཡུལ་འཁྲུག་ལ་བཀོད་འདོམས་མཛད་པ་ཡིན།
ISA 13:5 ཡུལ་ཁམས་འདི་ཐམས་ཅད་བརླག་པའི་ཕྱིར་དུ། དཀོན་མཆོག་ཡ་ཝཱེ་དང་ཁོང་གི་ཐུགས་ཁྲོའི་མཚོན་ཆ་རྣམས་རྒྱང་རིང་ཡུལ་དང་ས་མཐའ་ནས་སླེབ་ངེས་སོ། །
ISA 13:6 སྨྲེ་སྔགས་ཐོན་དང་། གང་ལ་ཞེ་ན། དཀོན་མཆོག་ཡ་ཝཱེའི་ཉིན་མོ་སླེབ་ལ་ཉེ་ཞིང་། གཏོར་བརླག་ནི་ཀུན་དབང་ཁོང་ལས་སླེབས་པ་བཞིན་དུ་ཉིན་མོ་འདི་སླེབ་ལ་ཉེ་བས།
ISA 13:7 མི་རེ་རེའི་ལག་པའི་ཤེད་ཉམས་ཤིང་། མི་རེ་རེའི་སྙིང་རྩ་འདར་བར་འགྱུར།
ISA 13:8 དེ་དག་ཐམས་ཅད་དངངས་སྐྲག་སྐྱེ་བ་དང་། ཟུག་གཟེར་དང་སྡུག་བསྔལ་གྱིས་དེ་རྣམས་བཟུང་སྟེ་ཤིན་ཏུ་སྡུག་ལ་བསྒྱུར་ནས། ཕྲུ་གུ་བཙའ་བའི་བུད་མེད་བཞིན་དུ་དེ་ཚོས་དངངས་སྐྲག་གིས་ཕན་ཚུན་ལ་བལྟ་ཞིང་། གདོང་མདོག་དམར་པོ་མེ་ལྟར་ཡིན་ནོ། །
ISA 13:9 ལྟོས་དང་། དཀོན་མཆོག་ཡ་ཝཱེའི་ཉིན་མོ་སླེབ་ལ་ཉེ་ཞིང་། གདུག་རྩུབ་དང་ཞེ་སྡང་། ཐུགས་ཁྲོ་ཆེན་པོ་བཅས་ཀྱིས་ཡུལ་འདི་དབེན་སྟོང་ལ་འགྱུར་བར་བྱ་སྟེ། ཡུལ་འདིའི་སྡིག་ཅན་དག་མེད་པར་མཛད་དོ། །
ISA 13:10 ནམ་མཁའི་སྐར་མ་དང་སྐར་ཚོམ་གྱིས་འོད་མི་སྤྲོ་ཞིང་། ཉི་མ་ཤར་མ་ཐག་ཏུ་མུན་ནག་འཐིབས། ཟླ་བས་ཀྱང་འོད་སྤྲོ་བར་མི་བྱ།
ISA 13:11 བདག་གིས་ས་གཞིའི་སྡིག་སྤྱོད་ཀྱི་ཕྱིར་དུ་ཉེས་ཆད་གཅོད་ཅིང་། མི་ངན་གྱི་སྡིག་པའི་ཕྱིར་དུ་དེ་ཚོར་ཉེས་ཆད་བཅད་ནས། བདག་གིས་རང་རློམ་ཅན་གྱི་ང་རྒྱལ་བཅག་སྟེ། གཏུམ་སྤྱོད་ཅན་གྱི་ཁེངས་དྲེགས་ཉམས་པར་བྱ།
ISA 13:12 བདག་གིས་མི་ནི་གསེར་བཙོ་མ་ལས་ཀྱང་ཉུང་བར་བྱེད་ཅིང་། མི་ནི་ཨོ་ཕིར་གྱི་གསེར་ལས་ཀྱང་ཁྱད་དུ་འཕགས་པར་བྱའོ། །
ISA 13:13 བདག་ཤིན་ཏུ་ཐུགས་ཁྲོས་པའི་ཉིན་མོ་སྟེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཐུགས་ཁྲོས་པའི་ཉིན་མོར། བདག་གིས་ནམ་མཁའ་བསྒུལ་ཞིང་། ས་གཞི་འདར་ནས་རང་སར་འབྲལ་བར་བྱ།
ISA 13:14 དེ་ནས་མི་རྣམས་རྔོན་པས་བདའ་བའི་དགོ་བའམ། བདག་པོ་མེད་པའི་ལུག་ཁྱུ་བཞིན་རང་རང་གི་མི་རྣམས་ཀྱི་ཕྱོགས་སུ་འཁོར་ནས་རང་ཡུལ་དུ་འབྲོ་ངེས་ཡིན།
ISA 13:15 བདས་ནས་རྗེས་ཆོད་པ་ཐམས་ཅད་མཚོན་གྱིས་བསྣུན་ཞིང་། བཟུང་བ་ཐམས་ཅད་རལ་གྲིའི་ཁ་ནས་འགྱེལ་ལོ། །
ISA 13:16 དེ་ཚོའི་ཕྲུ་གུ་རྣམས་རང་རང་གི་ཕ་མའི་མིག་ལམ་ནས་སར་བསྒྱེལ་ནས་འཆི་བ་དང་། དེ་ཚོའི་ཁང་པ་རྣམས་འཕྲོག་ཅིང་། དེ་ཚོའི་ཆུང་མ་རྣམས་ལའང་བཙན་གཡེམ་ཐེབས་པར་འགྱུར།
ISA 13:17 ལྟོས་དང་། མཱ་ཏི་པས་དངུལ་གྱི་ཁ་ངོར་མི་བལྟ་ཞིང་གསེར་ལའང་མི་དགའ་བས། བདག་གིས་མཱ་ཏི་པ་རྣམས་བསྐུལ་ནས་དེ་དག་ལ་རྒོལ་བར་འགྱུར།
ISA 13:18 དེ་དག་གི་གཞུ་ཡིས་གཞོན་ནུ་རྣམས་བསྒྱེལ་བ་དང་། དེ་དག་གིས་ཕྲུ་གུ་ལ་སྙིང་རྗེ་མི་བསྐྱེད་ཅིང་། མིག་གིས་བྱིས་པ་རྣམས་ལ་སྙིང་རྗེས་ཀྱང་མི་གཟིགས་སོ། །
ISA 13:19 པཱ་པེལ་ལོན་ནི་རྒྱལ་ཁབ་ནང་ནས་བརྗིད་ཉམས་ཅན་དང་། ཀལ་དི་པས་གཟི་བརྗིད་དུ་རྩི་བ་ཞིག་ཡིན། དེ་ནི་དཀོན་མཆོག་གིས་ཕམ་པར་མཛད་པའི་ས་དོམ་དང་གཱ་མོ་ར་གཉིས་དང་འདྲའོ། །
ISA 13:20 མི་རབས་ནས་མི་རབས་བར་མི་གཅིག་ཀྱང་ཡུལ་དེར་གནས་པར་མི་བྱ་སྟེ། ཨ་རབ་པས་གནས་དེ་རུ་སྦྲ་གུར་མི་ཕུབ་ཅིང་། ཕྱུགས་རྫི་རྣམས་ཀྱིས་ཀྱང་གནས་དེར་ཕྱུགས་འཚོ་བར་མི་བྱའོ། །
ISA 13:21 ཡུལ་དེར་དབེན་སྟོང་གི་རི་དྭགས་རྣམས་འཚོ་ཞིང་ཉལ་བ་དང་། དེ་དག་གི་ཁང་པ་རྣམས་སུ་ཅེ་སྤྱང་གི་ཀུ་ཅོས་ཁེངས་ཏེ། རྔ་བྱ་དེ་རུ་སྡོད་ཅིང་། ར་རྒོད་རྣམས་དེ་རུ་མཆོང་རྒྱུག་བྱེད།
ISA 13:22 འཕར་སྤྱང་གི་ཚོགས་ཀྱིས་པཱ་པེལ་ལོན་གྱི་ཕོ་བྲང་དུ་ངར་སྐད་འདོན་ཞིང་། ཁྱི་སྤྱང་ནི་དེ་ཚོའི་ཡིད་དུ་འོང་བའི་འདུ་ཁང་ནང་ཟུག་པར་འགྱུར། པཱ་པེལ་ལོན་ལ་ཉེས་ཆེད་གཅོད་པའི་དུས་སླེབས་ཤིང་དུས་དེ་ནི་ཡུན་མི་རིང་ངོ་། །
ISA 14:1 དཀོན་མཆོག་ཡ་ཝཱེས་ཡ་ཀོབ་ལ་ཐུགས་རྗེ་དགོངས་ནས་ཡེས་ར་ཨེལ་སླར་ཡང་བདམས་ཤིང་། དེ་དག་རང་ཡུལ་དུ་བདེ་བར་སྡོད་དུས། ཕྱི་རོལ་པ་རྣམས་ཁོ་ཚོ་དང་འདྲེས་ནས་ཡ་ཀོབ་ཀྱི་ཁྱིམ་རྒྱུད་དུ་གཏོགས་པར་འགྱུར།
ISA 14:2 ཡེས་ར་ཨེལ་པས་དེ་ཚོ་རང་ཡུལ་དུ་འཁྲིད་པར་འགྱུར་ཞིང་། ཡེས་ར་ཨེལ་བུ་རྒྱུད་ཀྱིས་དེ་དག་དཀོན་མཆོག་ཡ་ཝཱེས་གནང་བའི་གནས་སུ་གཡོག་པོ་དང་གཡོག་མོ་རུ་བཀོལ་ནས་རང་ལ་དབང་བར་བྱེད། དེ་དག་གིས་རང་ཉིད་བཙོན་ལ་ཁྲིད་མཁན་རྣམས་བཙོན་དུ་འཁྲིད་ཅིང་། ཁོ་རྣམས་ལ་བརྙས་བཅོས་བྱེད་མཁན་རྣམས་དབང་དུ་བསྒྱུར་ངེས་སོ། །
ISA 14:3 དཀོན་མཆོག་ཡ་ཝཱེས་ཁྱོད་ཅག་སྡུག་བསྔལ་དང་སེམས་ངལ། བཙན་བཀོལ་བའི་ངལ་ལས་བཅས་ནས་བསྐྱབས་ཏེ། ངལ་གསོ་བའི་ཉིན་མོ་ལོངས་སུ་སྤྱོད་པར་འགྱུར།
ISA 14:4 དེ་ནས་ཁྱོད་ཅག་གིས་གླུ་བླངས་ཏེ་པཱ་པེལ་ལོན་གྱི་རྒྱལ་པོར་ཟུར་ཟ་བྱས་ཏེ་ན་རེ། མི་ལ་བརྙས་བཅོས་གཉའ་གནོན་བྱེད་མཁན་ཅི་ལྟར་མཚམས་ཆད་དམ། གཏུམ་དྲག་ཅི་ལྟར་མཚམས་བཅད་དམ་ཞེས་སྨྲའོ། །
ISA 14:5 དཀོན་མཆོག་ཡ་ཝཱེས་མི་ངན་གྱི་དབྱུག་པ་བཅག་ཅིང་དབང་སྒྱུར་པའི་བེ་ཅོན་བརླགས།
ISA 14:6 དེ་དག་ནི་ཁྲོ་གཏུམ་ནང་དུ་མི་རྣམས་ལ་རྡུང་མཁན་དང་། ཁོང་ཁྲོ་ཆེན་པོས་རྒྱལ་ཁབ་སྐྱོང་མཁན་དང་། བཟོད་བསྲན་མེད་པར་མི་ལ་གནོད་འཚེ་གཏོང་མཁན་དག་ཡིན་ནོ། །
ISA 14:7 ད་ལྟ་ས་གཞི་ཐམས་ཅད་ལྷིང་འཇགས་ངང་ངལ་གསོ་ཞིང་། མི་རེ་རེས་སྐད་བཏོན་ཏེ་དགའ་འབོད་བྱེད་ཀྱིན་འདུག
ISA 14:8 གསོམ་ཤིང་དང་ལེ་པཱ་ནོན་གྱི་ཐང་ཤིང་རྣམས་ཀྱིས་ཀྱང་ཁྱོད་ཀྱི་ཕྱིར་དུ་མཉེས་ཏེ་ན་རེ། པཱ་པེལ་ལོན་ཁྱོད་འགྱེལ་ཟིན་པའི་རྗེས་སུ། ད་ནི་ཤིང་གཅོད་མཁན་གཅིག་ཀྱང་ང་ཚོ་གཅོད་པར་མི་འོང་ངོ་ཞེས་སྨྲའོ། །
ISA 14:9 ས་འོག་ནས་གཤིན་ཡུལ་ཁྱོད་ཕྱིར་འགུལ་ཏེ། ཁྱོད་འོང་བར་བསུ་ཞིང་། ཡང་ཁྱོད་ཀྱི་ཕྱིར་དུ་སྔར་ས་གཞིའི་སྟེང་གི་འགོ་དཔོན་ཡིན་པ་ཀུན་གྱི་རྣམ་ཤེས་སད་དུ་བཅུག་སྟེ། སྔར་རྒྱལ་ཁབ་ཁག་གི་རྒྱལ་པོ་ཡིན་པ་ཐམས་ཅད་ཀྱང་རང་སར་བྲལ་ནས་ཡར་ལངས་པ་ཡིན།
ISA 14:10 དེ་ཐམས་ཅད་ཀྱིས་ཁྱོད་ལ་ན་རེ། ཁྱོད་ཀྱང་ང་ཚོ་བཞིན་ཉམ་ཆུང་བར་གྱུར་རམ། ཁྱོད་ཀྱང་ངེད་ཅག་དང་འདྲ་བར་གྱུར་རམ་ཞེས་འདྲི་བར་འགྱུར།
ISA 14:11 ཁྱོད་ཀྱི་གཟི་བརྗིད་དང་རྒྱུད་མངས་ཀྱི་སྒྲ་ནི་མར་གཤིན་ཡུལ་ལ་སླེབས་ཏེ། ཁྱོད་ཀྱི་འོག་ཏུ་ཤ་འབུ་བཏིངས་ཡོད་ལ། ཁྱོད་ཀྱི་སྟེང་དུ་སྐྱག་འབུ་བཀབ་ཡོད་པ་ཡིན།
ISA 14:12 ཀྱེ་འོད་མདངས་བཀྲ་བའི་སྐར་ཆེན་དང་སྐྱ་རེངས་ཀྱི་བུ་ལགས། ཁྱོད་ཅིའི་ཕྱིར་ནམ་མཁའ་ནས་སར་འཕངས་པ་ཡིན་ནམ། རྒྱལ་ཁབ་ཐམས་ཅད་ཕམ་པར་བརྒྱབ་པ་ཁྱོད་རང་ཅིའི་ཕྱིར་ས་རུ་འགྱེལ་བ་ཡིན།
ISA 14:13 སྔར་ཁྱོད་ཀྱི་སེམས་སུ། ང་རང་ནམ་མཁར་འཕགས་ཏེ་རང་གི་བཞུགས་ཁྲི་ནི་དཀོན་མཆོག་གི་རྒྱུ་སྐར་ལས་ཀྱང་མཐོ་བར་བཞེངས་ནས། བྱང་ཕྱོགས་ཀྱི་ས་མཐའི་རི་ཚོགས་སྟེང་དུ་འདུག་པ་དང་།
ISA 14:14 ང་ནི་སྤྲིན་གྱི་མཐོ་སར་འཛེགས་ཏེ། རང་ཉིད་བླ་ན་མེད་པ་དེ་དང་མཚུངས་པར་བྱའོ་སྙམ་ནའང་།
ISA 14:15 ཁྱོད་ནི་གཤིན་ཡུལ་དུ་གཡུགས་ནས། དོང་གི་ཆེས་གཏིང་སར་ལྷུང་བ་ཡིན།
ISA 14:16 མཐོང་མཁན་རྣམས་ཀྱིས་ཁྱོད་ལ་མིག་གིས་ཅེ་རེར་བལྟ་ཞིང་ན་རེ། ས་གཞི་སྒུལ་ཞིང་རྒྱལ་ཁབ་འཐོར་དུ་འཇུག་མཁན་དང་།
ISA 14:17 ས་གཞི་དབེན་སྟོང་དུ་བསྒྱུར་བ་དང་། གྲོང་ཁྱེར་རྣམས་བརླག་པ། བཙོན་གྲོལ་མི་གཏོང་བ་དེ་མི་འདི་ཡིན་ནམ་ཟེར་ཞིང་།
ISA 14:18 རྒྱལ་ཁབ་ཀུན་གྱི་རྒྱལ་པོ་རྣམས་གཟི་བརྗིད་ངང་རང་རང་གི་དུར་ས་ནས་གཟིམས།
ISA 14:19 འོན་ཀྱང་ཁྱོད་ནི་གཞན་གྱིས་དོར་བའི་སྡོང་པོའི་ཡལ་ག་བཞིན། རང་གི་དུར་ས་ནས་ཕྱིར་སྐྲོད་པར་འགྱུར། དོང་ནང་གི་རྡོ་ཡོད་སར་གཡུགས་པའི་མི་རྣམས་ཏེ། སྲོག་གྲི་ཁ་ནས་ཤོར་བ་དག་གིས་ཁྱོད་གཡོགས་ཤིང་། ཁྱོད་ནི་མི་ཡིས་རྡོག་བརྫིས་བརྒྱབ་པའི་རོ་དང་འདྲ།
ISA 14:20 ཁྱོད་ཀྱིས་རང་གི་རྒྱལ་ཁབ་ཉམས་སུ་བཅུག་ཅིང་། རང་གི་མི་དམངས་དམར་གསོད་བཏང་བས། ཁྱོད་ནི་རྒྱལ་པོ་གཞན་དང་མཉམ་དུ་སྦ་བར་མི་བྱ་སྟེ། མི་ངན་དག་གི་བུ་རྒྱུད་ནམ་ཡང་མི་ཡིས་གླེང་བར་མི་བྱའོ། །
ISA 14:21 ཅིའི་ཕྱིར་ཞེ་ན། ཁོ་ཚོའི་མེས་པོ་རྣམས་ཀྱིས་སྡིག་པ་བྱས་པས། ཁྱོད་ཅག་གིས་དེའི་བུ་རྒྱུད་རྣམས་ཀྱི་ཕྱིར་དུ་དམར་གསོད་བྱེད་ས་གྲ་སྒྲིག་བྱེད་དགོས་པ་ལས། དེ་དག་དར་ཞིང་རྒྱས་ནས་ས་ཞིང་བདག་འཛིན་དང་གྲོང་ཁྱེར་བཙུགས་ནས་ས་གཞིར་ཁྱབ་ཏུ་འཇུག་མི་རུང་ངོ་། །
ISA 14:22 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་ནི་དེ་དག་གི་དགྲ་རུ་ལངས་ཤིང་། པཱ་པེལ་ལོན་གྱི་མིང་དང་། ཤུལ་ལུས་དག དེའི་བུ་རབས་ཚ་རྒྱུད་དང་བཅས་ཚར་དུ་གཅོད་པར་འགྱུར་ཞེས་གསུངས་པ་སྟེ། དཀོན་མཆོག་ཡ་ཝཱེས་དེ་སྐད་གསུངས་སོ། །
ISA 14:23 བདག་གིས་པཱ་པེལ་ལོན་ནི་འུག་པར་འཛིན་དུ་འཇུག་ཅིང་། ས་དེ་ནི་འདམ་རྫབ་ལ་བསྒྱུར་ནས། བདག་གིས་ཕྱགས་མས་ས་ཕྱག་པ་བཞིན་དེ་མེད་པར་གཏོང་བར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
ISA 14:24 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་དམ་བཅས་ནས་འདི་སྐད་དུ། བདག་གིས་ཅི་ལྟར་དྲན་ན་དོན་དེ་ལྟར་འགྲུབ་ཅིང་། བདག་གིས་ཅི་ལྟར་འཆར་གཞི་བཙུགས་ན་དོན་ནི་དེ་ལྟར་འགྲུབ་ངེས་ཡིན།
ISA 14:25 དེ་ནི་བདག་གི་གནས་སུ་ཨ་སུར་པ་རྣམས་མེད་པར་བཟོ་ཞིང་། ངའི་རི་བོ་ནས་ཁོ་ཚོར་རྡོག་བརྫིས་གཏོང་སྟེ། དེས་བཞག་པའི་གཉའ་ཤིང་ཡེས་ར་ཨེལ་པ་རྣམས་དང་འབྲལ་ཞིང་། དེས་བཀལ་བའི་ཁུར་པོ་ཡེས་ར་ཨེལ་པའི་ཕྲག་དང་འབྲལ་བར་འགྱུར་ཞེས་གསུངས།
ISA 14:26 འདི་ནི་ས་གཞི་ཡོངས་ལ་བཙུགས་པའི་དགོངས་པ་སྟེ། རྒྱལ་ཁམས་ཀུན་ལ་བརྐྱངས་པའི་ཕྱག་ཡིན་ནོ། །
ISA 14:27 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཐུགས་སུ་དགོངས་པའི་དོན་ནི་སུས་ཀྱང་འགོག་ཐབས་མེད་ལ། ཁོང་གིས་བརྐྱངས་པའི་ཕྱག་ནི་སུ་ཞིག་གིས་ཕྱིར་འཐེན་ནུས་སམ།
ISA 14:28 རྒྱལ་པོ་ཨ་ཧ་ཟཱ་ཤི་བའི་ལོ་དེར་བཀའ་ལུང་གནང་བ་འདི་ལྟར།
ISA 14:29 ཀྱེ་ཀྱེ་ཕེ་ལེ་ཤེད་པ་རྣམས། ཁྱོད་ལ་རྡུང་བའི་དབྱུག་པ་ཆག་སོང་ཞེས་དགའ་བར་མི་བྱའོ། །ཅི་ལ་ཞེ་ན། སྦྲུལ་ལས་དུག་སྦྲུལ་འབྱུང་ཞིང་། དེ་ལས་བྱུང་བ་ནི་འཁྱུག་ཅིང་བགྲོད་པའི་དུག་སྦྲུལ་ཡིན།
ISA 14:30 དབུལ་པོ་རྣམས་ལ་ཁ་ཟས་ལྡན་ཞིང་མེད་པོ་རྣམས་བདེ་བར་གནས་ཐུབ། བདག་གིས་མུ་གེས་ཁྱོད་ཀྱི་བུ་རྒྱུད་རྣམས་གཏོར་ཞིང་། ཁྱོད་ཀྱི་ཤུལ་ལུས་དག་མུ་གེས་མེད་པར་བྱའོ། །
ISA 14:31 ཀྱེ་ཀྱེ་མཁར་སྒོས་ངུ་འབོད་བྱོས་དང་། གྲོང་ཁྱེར་གྱིས་སྨྲེ་སྔགས་ཐོན་ཅིག ཕེ་ལེ་ཤེད་པ་རྣམས། ཁྱོད་ཅག་འཇིགས་ནས་ཡོངས་སུ་རྒུད་པར་གྱུར་ཅིག ཅི་ལ་ཞེ་ན། བྱང་ཕྱོགས་ནས་དུ་བ་ཞིག་འཕྱུར་འོང་སྟེ། དེའི་དཔུང་ཚོགས་དང་བྲལ་ནས་འབྲོ་ཐུབ་མཁན་གཅིག་ཀྱང་མེད།
ISA 14:32 མི་ཡིས་ཕྱི་ཕྱོགས་པའི་བང་ཆེན་ལ་ལན་ཅི་ལྟར་འདེབས་སམ་ཞེ་ན། དཀོན་མཆོག་ཡ་ཝཱེས་ཛ་ཡན་མཛད་ཅིང་། ཁོང་གི་མི་སྡེའི་སྡུག་བསྔལ་ཅན་རྣམས་དེའི་ནང་དུ་སྦ་བར་འགྱུར་ཞེས་སྨྲའོ། །
ISA 15:1 དེ་ཡང་མོ་ཨབ་སྐོར་གྱི་བཀའ་ལུང་ནི། མོ་ཨབ་ཀྱི་ཨར་ནི་ཞག་མ་གཅིག་གི་རིང་ལ་བརྙས་བཅོས་ཐེབས་ནས་མེད་པར་གྱུར་ཅིང་། ཡང་ཞག་མ་གཅིག་གི་རིང་ལ་མོ་ཨབ་ཀྱི་ཀིར་ལའང་བརྙས་བཅོས་ཐེབས་ཏེ་མེད་པར་གྱུར་ཏོ། །
ISA 15:2 ཁོ་རྣམས་ཁང་པའི་ནང་དུ་འགྲོ་བ་དང་། དི་བོན་གྱི་མཐོ་སར་ཕྱིན་ཏེ་ངུ་འབོད་བྱེད་ལ། མོ་ཨབ་པ་རྣམས་ཀྱིས་ནེ་བོ་དང་མེ་དེ་བཱའི་ཕྱིར་དུ་སྨྲེ་སྔགས་འདོན་ཞིང་། སྐྱེ་བོ་ཀུན་གྱིས་སྐྲ་དང་སྨྲ་ར་བཞར།
ISA 15:3 དེ་དག་གིས་སྲང་ལམ་དུ་རྩིད་རས་གྱོན་ནས་ཁང་ཐོག་དང་ཐང་ཆེན་དུ་མི་རེ་རེས་མིག་ཆུ་བཏོན་ནས་ངུ་འབོད་བྱེད།
ISA 15:4 ཧེ་སི་པོན་དང་ཨེལ་ཨ་ལེ་གཉིས་པོའི་ངུ་འབོད་ཀྱི་སྒྲ་ནི་ཡ་ཧ་ཙཱ་ནས་ཀྱང་ཐོས་པར་གྱུར་པས། མོ་ཨབ་ཀྱི་དམག་མི་རྣམས་ཀྱིས་སྐད་ཆེན་པོས་ངུ་འབོད་བྱེད་ཅིང་སྙིང་རྩ་འདར།
ISA 15:5 མོ་ཨབ་ཀྱི་ཆེད་དུ་བདག་གི་སེམས་ངུས་སོང་། དེའི་བྲོས་བྱོལ་པ་རྣམས་ཚོ་ཨར་དང་ཨེག་ལད་ཤེ་ལི་ཤི་ཡཱ་ རུ་སླེབས་ཤིང་། ལུ་ཧིད་ཀྱི་རི་ལ་འགོས་པ་དང་། ཧོ་རོ་ན་ཨིམ་གྱི་ལམ་དུ་མེད་པར་འགྱུར་བའི་ངུ་སྐད་འདོན་ནོ། །
ISA 15:6 ནིམ་རིམ་གྱི་ཆུ་རྣམས་ཆད་ཅིང་། རྩྭ་སྔོན་རྣམས་སྐམ། རྩྭ་གསར་པ་རྣམས་རྙིད་པར་གྱུར་ནས་ལྗང་མདོག་གཅིག་ཀྱང་མ་ལུས།
ISA 15:7 དེ་བས་ཁོ་ཚོས་རང་ཉིད་ལ་ཐོབ་པ་དང་བསགས་པའི་རྒྱུ་ནོར་རྣམས་ཨ་རཱ་ཡིམ་གྲོག་རོང་ལ་ཁྱེར་ཏོ། །
ISA 15:8 དེ་དག་གི་ངུ་འབོད་མོ་ཨབ་ཀྱི་ཡུལ་ཀུན་ཏུ་ཁྱབ་ཅིང་། ངུ་སྐད་ནི་ཨེག་ལ་ཡིམ་དུ་སླེབས་པ་དང་། པེར་ཨེ་ལིམ་གྱི་བར་དུ་གྲགས་སོ། །
ISA 15:9 དི་བོན་གྱི་ཆུ་རྣམས་ཁྲག་གིས་བཀང་སྟེ། བདག་གིས་དེ་ལས་མང་བའི་གནོད་འཚེ་དེ་རྣམས་ལ་ཐེབས་སུ་འཇུག་ཅིང་། བྲོས་བྱོལ་པ་དང་ཤུལ་ལུས་མོ་ཨབ་པའི་ཐོག་ཏུ་སེང་གེ་ཞིག་གཏོང་བར་བྱའོ། །
ISA 16:1 སེ་ལཱ་ནས་དབེན་སྟོང་བརྒྱུད་དེ། ཛ་ཡན་བུ་མོའི་རི་བོའི་གནས་དེའི་དབང་སྒྱུར་མཁན་ལ་ཁྱོད་ཅག་གིས་ལུ་གུ་བསྐྱལ་དགོས་ཤིང་།
ISA 16:2 མོ་ཨབ་ཀྱི་བུད་མེད་རྣམས་ཚང་ནས་ཕྱིར་བསྐྲད་པའི་བྱ་དང་འཁྱམ་པའི་འདབ་ཆགས་དང་འདྲ་བར་ཨར་ནོན་རབ་ཁར་སྡོད་པ་དང་།
ISA 16:3 ཁྱེད་ཀྱིས་ང་ཚོར་སློབ་སྟོན་གནང་སྟེ་དྲང་བདེན་གྱི་ཐག་གཅོད་དང་། ཁྱེད་ཀྱི་གྲིབ་གཟུགས་ཉིན་གུང་མུན་ནག་བཞིན་བྱས་ནས། བསྐྲད་པར་གྱུར་པའི་མི་རྣམས་སྦས་ནས་བྲོས་བྱོལ་རྣམས་ལ་ངོ་ལོག་མ་བྱེད་ཅིག
ISA 16:4 མོ་ཨབ་ཀྱི་བྲོས་བྱོལ་པ་རྣམས་ཁྱེད་དང་ལྷན་དུ་བསྡད་དེ། ཁྱེད་ནི་ཁོ་ཚོའི་སྦས་ས་རུ་བྱས་ནས་དེ་དག་གཏོར་བརླག་བྱེད་མཁན་དང་འབྲལ་བར་གྱུར་ཅིག མི་ལས་བཙན་ལེན་བྱེད་པ་རྣམས་མཚམས་གཅོད་ཅིང་། མི་ལ་གཏོར་བརླག་བྱེད་མཁན་རྣམས་ཀྱང་མཚམས་ཆད་དེ། མི་ལ་བརྙས་བཅོས་བྱེད་མཁན་དག་ནི་ས་འདི་ལས་རྩ་མེད་དུ་འགྲོ་བའོ། །
ISA 16:5 རྒྱལ་ཁྲི་ཞིག་བྱམས་བརྩེའི་སྒོ་ནས་བཞེང་བར་འགྱུར་ཞིང་། བློ་གཏོད་རུང་བ་ཞིག་དེའི་སྟེང་དུ་བཞུགས་ཏེ། ཁོང་གིས་དཱ་བིད་ཀྱི་གུར་ནང་དུ་ཁྲིམས་ཐག་གཅོད་པ་དང་། བདེན་པ་འཚོལ་ཞིང་དྲང་བདེན་མྱུར་དུ་སྤྱོད་དོ། །
ISA 16:6 རང་ཅག་གིས་མོ་ཨབ་ཤིན་ཏུ་ང་རྒྱལ་ཆེ་བ་ཐོས་ཤིང་། ཡང་དེའི་ཁེངས་དྲེགས་དང་ང་རྒྱལ། ཞེ་སྡང་། དེའི་འུད་བསྟོད་ཀྱི་གཏམ་དག་བཅོས་མ་ཡིན་པ་ཐོས་པར་གྱུར་པས།
ISA 16:7 མོ་ཨབ་པ་རྣམས་ངུ་བར་འགྱུར་ཞིང་། ཁོ་ཚོ་ལྷན་ཅིག་མོ་ཨབ་ཀྱི་ཕྱིར་དུ་ངུ་བར་འགྱུར་ཞིང་། མོ་ཨབ་པ་རྣམས་ཀིར་ཧ་རེ་ཤེད་ཀྱིས་བཤམས་པའི་རྒུན་འབྲུམ་སྐམ་པོ་ལེབ་མོའི་ཕྱིར་དུ་སྐྱོ་བར་འགྱུར།
ISA 16:8 གང་ལ་ཞེ་ན། ཧེ་སི་པོན་གྱི་ས་ཞིང་རྣམས་དང་སིབ་མའི་རྒུན་འབྲུམ་ཤིང་རྣམས་སྐམ་སྟེ། སྔོན་ཆད་དེའི་མཛེས་སྡུག་ལྡན་པའི་ཡལ་གས་རྒྱལ་ཁབ་ཀུན་གྱི་རྒྱལ་པོ་རྣམས་བཟི་བར་གྱུར། དེའི་ཡལ་ག་ཡཱ་ཟེར་གྱི་བར་དུ་སྐྱེས་ཏེ་དབེན་སྟོང་དུ་འཕེལ་ནས། ཕྱིར་རྒྱས་ནས་ཚྭ་མཚོ་ལས་བརྒལ་ཏོ། །
ISA 16:9 དེ་བས་ཡཱ་ཟེར་པས་ངུ་འབོད་བྱེད་པ་བཞིན་ངས་ཀྱང་སིབ་མའི་རྒུན་འབྲུམ་ཤིང་གི་ཕྱིར་དུ་ངུ་འབོད་བྱེད་དེ། ཀྱེ་ཧེ་སི་པོན་དང་ཨེལ་ཨ་ལེ། ངས་མིག་ཆུས་ཁྱོད་སྦང་བར་བྱ་སྟེ། གང་ལ་ཞེ་ན། ཁྱོད་ཀྱི་དབྱར་ཁའི་ལོ་ཏོག་དང་སྟོན་ཐོག་སྡུད་དུས་ཀྱི་དགའ་སྤྲོའི་འབོད་སྒྲ་མཚམས་ཆད་དོ། །
ISA 16:10 དགའ་སྤྲོ་ས་ཞིང་གཤིན་པོ་ལས་ལེན་པར་འགྱུར་ཞིང་། རྒུན་འབྲུམ་ར་བའི་ནང་གི་གླུ་སྐད་དང་དགའ་འབོད་བྱེད་པའི་སྒྲ་མི་ཐོས་ཤིང་། འཚིར་གཞོང་ལས་རྒུན་ཆང་འཚིར་མཁན་གཅིག་ཀྱང་མེད་དེ། ཅིའི་ཕྱིར་ཞེ་ན། ངས་དེ་དག་གི་དགའ་སྤྲོའི་འབོད་སྒྲ་རྣམས་མཚམས་བཅད་པ་ཡིན།
ISA 16:11 དེ་བས་བདག་སེམས་མོ་ཨབ་ཀྱི་ཕྱིར་དུ་སྐྱོ་ཞིང་། པི་ཝང་གི་དབྱངས་རྟ་ཇི་བཞིན་ངའི་སེམས་ཀྱིས་ཀིར་ཧེ་རེ་སིའི་ཕྱིར་དུ་སྨྲེ་སྔགས་འདོན་པ་ཡིན།
ISA 16:12 དུས་དེར་མོ་ཨབ་པ་ཡར་ཡོང་ནས། མཐོ་གླིང་ནས་ངལ་དུབ་ཚད་མེད་མྱངས་ཤིང་། རང་གི་གནས་དམ་པ་རུ་སོང་ནས་སྨོན་ལམ་བཏབ་ནའང་། དེའི་རེ་འདུན་ཅི་ཡང་འགྲུབ་པར་མི་བྱ་ཞེས་པའོ། །
ISA 16:13 འདི་ནི་སྔོན་ཆད་དཀོན་མཆོག་ཡ་ཝཱེས་མོ་ཨབ་སྐོར་ལ་གསུངས་པའི་བཀའ་ཡིན་ནོ། །
ISA 16:14 འོན་ཀྱང་ད་ལྟ་དཀོན་མཆོག་ཡ་ཝཱེས་འདི་སྐད་དུ། ལོ་གསུམ་གྱི་ནང་སྟེ་གླ་བའི་ལོ་ཚད་བཞིན་དུ། མོ་ཨབ་ཀྱི་གཟི་བརྗིད་དང་དེའི་འབངས་འབོར་ཆེན་རྣམས་ལ་མཐོང་ཆུང་བྱེད་པར་འགྱུར་ཞིང་། ཤུལ་དུ་ལུས་པ་ཉུང་ལ་ནུས་སྟོབས་མེད་པར་འགྱུར་ཞེས་གསུངས་སོ། །
ISA 17:1 དཱ་མེ་སེག་སྐོར་གྱི་བཀའ་ལུང་ནི་འདི་ལྟར། ལྟོས་དང་། དཱ་མེ་སེག་གྲོང་ཁྱེར་འདོར་བའི་དུས་ལ་སླེབས་པས་དེ་ནི་ཞིག་རོར་འགྱུར་ངེས་ཡིན།
ISA 17:2 ཨར་ཨོར་གྱི་གྲོང་ཁྱེར་རྣམས་ཀྱང་བསྐྱུར་ནས་ཕྱུགས་འཚོ་སར་འགྱུར་ངེས་ལ། ལུག་ཁྱུ་རྣམས་དེ་རུ་ཉལ་ཡང་འདྲོག་སློང་མཁན་གཅིག་ཀྱང་མེད་དོ། །
ISA 17:3 ཨེ་ཕཱར་ཡིམ་གྱི་མཁར་བརྟན་པོ་རྣམས་བཤིག་ཅིང་། དཱ་མེ་སེག་གི་རྒྱལ་དབང་ཉམས་ཤིང་། ཨ་རམ་པའི་ཤུལ་ལུས་རྣམས་ཡེས་ར་ཨེལ་གྱི་གཟི་བརྗིད་བཞིན་དུ་ཡལ་བར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
ISA 17:4 ཉིན་མོ་དེར་ཡ་ཀོབ་ཀྱི་གཟི་བྱིན་ཡལ་བར་གྱུར་ནས་དེའི་ཤ་རྒྱགས་པའི་ལུས་པོའང་སྐམ་པར་འགྱུར།
ISA 17:5 དེ་ནི་ཞིང་རྔ་མཁན་གྱིས་སྟོན་ཐོག་བསྡུ་བ་དང་། ལག་པས་ལོ་ཏོག་ལེན་པ་དང་མཚུངས་ཤིང་། རེ་ཕཱ་ཨམ་ལུང་པ་ནས་ལུས་པའི་སྙེ་མ་འཐུ་བ་དང་ཡང་འདྲའོ། །
ISA 17:6 དེ་ནི་སྐྱུ་རུ་ཤིང་ལ་རྡུང་བ་བཞིན་དུ་ལུས་པའི་ཤིང་ཏོག་ཉུང་ངུ་མ་གཏོགས་མེད་དེ། སྡོང་རྩེ་རུ་ཤིང་ཏོག་གཉིས་གསུམ་མ་གཏོགས་ལུས་མེད་པ་དང་། ཤིང་ཏོག་མང་པོ་སྨིན་པའི་ཡལ་གའི་སྟེང་དུའང་བཞི་ལྔ་ཙམ་ལས་ལུས་པར་མི་འགྱུར་ཞེས་ཡེས་ར་ཨེལ་གྱི་དཀོན་མཆོག་ཡ་ཝཱེས་གསུངས་སོ། །
ISA 17:7 ཉིན་དེར་མི་རྣམས་ཀྱིས་རང་ཉིད་མཛད་མཁན་ལ་རེ་ཞིང་། དེ་དག་གིས་ཡེས་ར་ཨེལ་གྱི་དམ་པ་ཁོང་ཉིད་དངོས་སུ་མཇལ་བར་འགྱུར།
ISA 17:8 རང་གི་ལག་པས་བཟོས་པའི་མཆོད་ཁྲི་ལ་མི་རེ་ཞིང་། རང་གི་མཛུབ་མོས་བཟོས་པའི་ཨ་ཤེ་རཱ་དང་བདུག་སྤོས་སྒྲོན་སྟེགས་གང་ལའང་རེ་བར་མི་འགྱུར་རོ། །
ISA 17:9 ཉིན་མོ་དེར་ཡེས་ར་ཨེལ་གྱི་ཕྱིར་དུ་བསྐྱུར་བའི་མཁར་བརྟན་པོ་དག་ནི། ནགས་ཚལ་དང་རི་རྩེ་ནས་དོར་བའི་གནས་དང་མཚུངས་ཏེ་སྟོངས་ཤིང་མེད་པར་འགྱུར།
ISA 17:10 ཅིའི་ཕྱིར་ཞེ་ན། ཁྱོད་ཀྱིས་རང་ཉིད་སྐྱོབ་མཁན་དཀོན་མཆོག་བརྗེད་པ་དང་། ཁྱོད་ཉིད་སྦས་ས་ཡིན་པའི་བྲག་རྡོ་དེ་མ་དྲན་པས། ཁྱོད་ཀྱིས་མཛེས་སྡུག་གི་མྱུ་གུ་དང་ཕྱི་རོལ་ཡུལ་ནས་ཁྱེར་འོངས་པའི་ལྗང་བུ་བཙུགས་ཤིང་།
ISA 17:11 ཡང་ཁྱོད་ཀྱིས་རྩི་ཤིང་འདེབས་པའི་ཉིན་མོར་གཟབ་ནན་གྱིས་མཐའ་ར་སྐོར་ཏེ། ཞོགས་པའི་དུས་སུ་ཁྱོད་ཀྱིས་བཏབ་པ་ལ་མེ་ཏོག་བཞད་ཀྱང་། སྡུག་བསྔལ་དང་རབ་ཏུ་སྐྱོ་བའི་དུས་སུ་བསྡུ་རྒྱུ་ཅི་ཡང་མེད་དོ། །
ISA 17:12 ཀྱེ་མ། མཚོ་རླབས་འཕྱུར་བ་བཞིན་དུ་མི་རིགས་ཀུན་གྱིས་ཅ་ཅོ་སྒྲོག་ཅིང་། ཆུ་ལོག་རྒྱུག་པ་བཞིན་དུ་རྒྱལ་ཁབ་ཀུན་གྱིས་ང་རོ་སྒྲོག
ISA 17:13 ཆུ་བོ་མང་པོ་ཆིལ་ཆིལ་དུ་འབབ་པ་བཞིན་མི་རིགས་ཀུན་གྱིས་འུར་རྒྱག་པར་བྱེད། འོན་ཀྱང་དཀོན་མཆོག་གིས་ཁོ་ཚོར་བཀའ་བཀྱོན་གནང་སྟེ། དེ་རྣམས་ཐག་རིང་སར་བྲོས་ཀྱང་རྗེས་སུ་སྙེག་པར་གྱུར་ནས། དེ་དག་ནི་རི་ཁྲོད་ཀྱི་རླུང་ནང་གི་ཕུབ་མ་དང་། དྲགས་རླུང་གིས་འཁུར་བའི་ས་རྡུལ་བཞིན་ནོ། །
ISA 17:14 ཀྱེ་ཧོ། ས་སྲོས་ཀྱི་དུས་སུ་དེ་དག་འཇིགས་ཤིང་སྐྲག་ནའང་། ཐོ་རངས་མ་སླེབས་སྔོན་ལ་དེ་དག་མེད་པར་འགྱུར། འདི་ནི་རང་ཅག་འཕྲོག་བཅོམ་བྱེད་མཁན་རྣམས་ཀྱི་བགོ་སྐལ་ཡིན་ཞིང་། རང་ཅག་འཕྲོག་པའི་མི་རྣམས་ལ་འཐོབ་འོས་པའི་ལན་ཡིན་ནོ། །
ISA 18:1 གུ་ཤ་གཙང་པོའི་ཕ་རོལ་ན། གྲུ་གཟིངས་རླུང་ལྟར་སྐྱོད་པའི་ཡུལ་ལ་ཆག་སྒོ་འབྱུང་།
ISA 18:2 དེ་ནི་རྒྱུན་དུ་ཕོ་ཉ་མངགས་ཏེ་ཆུ་སྟེང་དུ་པ་པི་རཱའི་གྲུ་ལ་བསྡད་དེ་རྒྱ་མཚོ་བརྒལ་བའི་གནས་ཡིན་ཞིང་། སོང་དང་འགྲོས་མྱུར་ཕོ་ཉ་རྣམས། གཟུགས་རིང་ཞིང་སྐྱི་མོ་འཇམ་པའི་རྒྱང་ཐག་ཉེ་རིང་གི་མི་ཀུན་སྐྲག་པའི་མི་རིགས་དེ་རྩར་སོང་དང་། རྒྱལ་ཁབ་དེ་ནི་སྟོབས་འབྱོར་ལྡན་ཞིང་མི་ལ་ཐུབ་ཚོད་བྱེད་མཁན་ཡིན་ཏེ། གཙང་པོས་དེ་དག་གི་ས་ཞིང་བགོས་སོ། །
ISA 18:3 ཀྱེ་ས་གཞི་ཡོངས་སུ་གནས་ཤིང་ས་སྟེང་དུ་སྡོད་པའི་ཡུལ་མི་རྣམས། རི་ནས་དར་སྒྲེང་བའི་དུས་སུ་ཁྱོད་ཀྱིས་ལྟོས་ཤིག རྭ་དུང་འབུད་པའི་ཚེ་ཁྱོད་ཀྱིས་ཉོན་ཅིག
ISA 18:4 ཅི་ལ་ཞེ་ན། དཀོན་མཆོག་ཡ་ཝཱེས་ང་ལ་འདི་སྐད་དུ། ཉི་མའི་འོད་ཟེར་ལས་འཕྲོས་པའི་ཚ་རླངས་དང་། ལོ་ཏོག་སྡུད་དུས་ཀྱི་ཚ་བའི་ཁྲོད་ཟིལ་པའི་རླངས་པ་ཡོད་པ་ཇི་བཞིན། ངས་རང་གི་བཞུགས་གནས་ནས་འཇམ་ཐིང་ངེ་གཟིགས་ཡོད་ཅེས་གསུངས་སོ། །
ISA 18:5 ལོ་ཏོག་མ་བསྡུས་སྔོན་དང་མེ་ཏོག་གི་གང་བུ་བཞད་ཚར་ཏེ་རྒུན་འབྲུམ་སྨིན་ལ་ཁེལ་བའི་དུས་སུ། ཁོང་གིས་ལྕུག་ཕྲན་དང་ཡོངས་སུ་རྒྱས་པའི་ཡལ་འདབ་རྣམས་ཟོར་བས་གཅོད་དོ། །
ISA 18:6 དེ་དག་ཐམས་ཅད་དོར་ནས་རི་བོའི་བྱ་རྒོད་དང་ས་ཡི་རི་དྭགས་ལ་སྟེར་ཞིང་། བྱ་རྒོད་དག་གིས་དེ་ཁ་ཟས་སུ་སྤྱད་ནས་དབྱར་སྐྱེལ་བ་དང་། སའི་རི་དྭགས་ཀུན་གྱིས་དེ་ཟོས་ནས་དགུན་སྐྱེལ་བའོ། །
ISA 18:7 དུས་དེར། མཐོ་ཞིང་འཇམ་པའི་རྒྱང་ཐག་ཉེ་རིང་གི་མི་ཀུན་སྐྲག་པའི་མི་རིགས་ཏེ། སྟོབས་འབྱོར་ལྡན་ཞིང་མི་ལ་ཐུབ་ཚོད་བྱེད་པའི་རྒྱལ་ཁབ། གཙང་པོས་ས་ཞིང་བགོས་ཡོད་པ་དེ་དག་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེར་ཕྱག་རྟགས་འབུལ་ཞིང་། དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་དང་ལྡན་པའི་རི་བོ་ཛ་ཡན་དུ་འཁྱེར་འོང་བར་འགྱུར་རོ། །
ISA 19:1 ཨེ་ཅིབ་སྐོར་གྱི་བཀའ་ལུང་ནི་འདི་ལྟ་སྟེ། ལྟོས་དང་། དཀོན་མཆོག་ཡ་ཝཱེ་འགྲོས་མྱུར་སྤྲིན་ལ་བཅིབས་ནས་ཨེ་ཅིབ་ཏུ་ཕེབས་ཤིང་། ཨེ་ཅིབ་ཀྱི་སྐུ་འདྲ་རྣམས་ཁོང་གི་དྲུང་དུ་འཇིགས་ནས་འདར་བ་དང་། ཨེ་ཅིབ་པའི་སེམས་ནི་ཤིན་ཏུ་སྐྲག་གོ །
ISA 19:2 བདག་གིས་ཨེ་ཅིབ་པར་བསྐུལ་ཏེ་ཨེ་ཅིབ་པ་ལ་རྒོལ་བར་འགྱུར་ལ། དེ་དག་ནང་འཁྲུག་ལངས་ཏེ། མི་རེ་རེས་རང་གི་སྤུན་ཟླ་ལ་རྒོལ་བར་འགྱུར་ཞིང་། རང་གི་ཁྱིམ་མཚེས་བར་འཁྲུག་པ་ལངས་ནས་གྲོང་ཁྱེར་གྱིས་གྲོང་ཁྱེར་དང་། རྒྱལ་ཁབ་ཀྱིས་རྒྱལ་ཁབ་ལ་རྒྱག་པར་འགྱུར།
ISA 19:3 དེ་ནས་ཨེ་ཅིབ་པའི་སེམས་ཤུགས་ཉམས་ཤིང་། བདག་གིས་དེ་དག་གི་ཇུས་ངན་རྣམས་མེད་པར་གཏོང་བ་དང་། དེ་དག་གིས་སྐུ་འདྲ་དང་སྔགས་པ། ལྷ་པ། སྒྱུ་མ་མཁན་བཅས་ལ་ཞུ་བར་འགྱུར།
ISA 19:4 ངས་ཨེ་ཅིབ་པ་རྣམས་རྒྱལ་པོ་གདུག་རྩུབ་ཅན་གྱི་ལག་ཏུ་གཏད་དེ། རྒྱལ་པོ་གཏུམ་དྲག་ཅན་གྱིས་དེ་ཚོ་དབང་དུ་བསྡུའོ་ཞེས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་གསུངས་སོ། །
ISA 19:5 རྒྱ་མཚོའི་ཆུ་རྣམས་སྐམ་ཞིང་། ཆུ་བཞུར་ས་རྣམས་ཀྱང་སྐམ་ཐག་ཆོད་པར་འགྱུར།
ISA 19:6 ཆུ་ལམ་ནང་དུ་དྲི་ངན་ཐུལ་ཞིང་། ཨེ་ཅིབ་ཀྱི་ཆུ་བོ་རྣམས་ཐག་ཅིང་སྐམ་པ་དང་། འདམ་རྩྭ་དང་འདག་རྒྱུད་རྙིད་ཅིང་སྐམ་པར་འགྱུར།
ISA 19:7 ནཱ་ཡོལ་གཙང་པོའི་འགྲམ་རྒྱུད་དང་ནཱ་ཡོལ་གཙང་པོ་མདོ་ཡི་རྩྭ་ས། ད་དུང་ནཱ་ཡོལ་གཙང་པོའི་འགྲམ་ལ་བཏབ་ཡོད་པའི་ཞིང་བཅས་སྐམ་ནས་རླུང་གིས་ཐོར་ཞིང་མེད་པར་འགྱུར།
ISA 19:8 ཉ་པ་རྣམས་ཀྱིས་སྨྲེ་སྔགས་འདོན་པ་དང་། ནཱ་ཡོལ་གཙང་པོའི་ནང་དུ་ལྕགས་ཀྱུས་ཉ་འཛིན་མཁན་རྣམས་སེམས་སྡུག་ཅིང་། ཆུ་སྟེང་ལ་རྙི་རྒྱ་འགྲེམ་པ་དག་ནི་ཡིད་ཆད་དེ་སེམས་སྐྱོ་བར་འགྱུར།
ISA 19:9 སོ་མ་ར་ཙས་སོ་རས་འཐག་པ་དང་རས་དཀར་པོ་འཐག་པའི་མི་རྣམས་ཀྱང་ངོ་ཚ་བར་འགྱུར།
ISA 19:10 ཨེ་ཅིབ་ཀྱི་ཀ་བ་རྣམས་དུམ་བུར་གཅོག་པ་དང་། གླ་པ་རྣམས་ཀྱང་སེམས་སྡུག་གིས་ཁེངས་པར་འགྱུར།
ISA 19:11 ཚོ་ཨན་གྱི་འགོ་དཔོན་རྣམས་ཤིན་ཏུ་རྨོངས་ཤིང་། ཤེས་རབ་ལྡན་པའི་ཕཱར་ཨོལ་གྱི་ཐབས་བཀོད་པས་ཇུས་བཏིངས་པ་རྣམས་ཀྱང་རྨོངས་གཉིད་དུ་གྱུར་པས། ཁྱོད་ཀྱིས་ཕཱར་ཨོལ་ལ། ང་ནི་ཤེས་རབ་ཅན་གྱི་བུ་དང་། གནའ་བོའི་རྒྱལ་པོའི་བུ་རྒྱུད་ཡིན་ཞེས་ཅི་ལྟར་བརྗོད་དམ།
ISA 19:12 ཁྱོད་ཀྱི་མཛངས་མི་རྣམས་གང་དུ་ཡོད་དམ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཨེ་ཅིབ་ལ་བཅངས་པའི་ཐུགས་དགོངས་ཅི་ཡིན་པ་ཁྱོད་ལ་ཤེས་སུ་འཇུག་ཕྱིར། དེ་དག་གིས་ཁྱོད་ལ་བརྗོད་པར་གྱུར་ཅིག
ISA 19:13 ཚོ་ཨན་གྱི་འགོ་དཔོན་རྣམས་བླུན་རྨོངས་སུ་གྱུར་ཅིང་། ནོབ་ཀྱི་འགོ་དཔོན་དག་ལ་མགོ་སྐོར་ཐེབས། ཨེ་ཅིབ་ཕྱོགས་ཁག་གི་འགོ་དཔོན་རྣམས་ཀྱིས་ཨེ་ཅིབ་པ་རྣམས་ལམ་ལོག་ཏུ་ཁྲིད་དོ། །
ISA 19:14 དཀོན་མཆོག་ཡ་ཝཱེས་ཨེ་ཅིབ་པའི་ནང་དུ་ལོག་སེམས་བསྐྲུན་པ་དང་། ཐ་ན་ཨེ་ཅིབ་པས་སྤྱད་པ་ཐམས་ཅད་འཁྲུལ་ཞིང་། དེ་ནི་ཆང་གིས་བཟི་བའི་མི་རང་གི་སྐྱུག་རོ་ནང་དུ་འགྲེད་བདར་འཆོར་བ་དང་འདྲའོ། །
ISA 19:15 མགོ་ནས་རྔ་མ་དང་། ཤིང་ཏ་ལའི་ཡལ་ག་ནས་འདམ་རྩྭ་ གང་གིས་ཀྱང་ཨེ་ཅིབ་ཀྱི་ཕྱིར་དུ་ཅི་ཡང་བསྒྲུབ་མི་ནུས་སོ། །
ISA 19:16 ཉིན་དེར་ཨེ་ཅིབ་པ་རྣམས་བུད་མེད་དང་འདྲ་བར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཨེ་ཅིབ་ཀྱི་སྟེང་ལ་ཕྱག་གཡུག་གནང་བའི་ཕྱིར་དེ་ཚོ་སྐྲག་ནས་འདར་བར་འགྱུར།
ISA 19:17 ཡ་ཧུ་དཱའི་ཡུལ་ཁམས་ཀྱིས་ཨེ་ཅིབ་ལ་དངངས་སྐྲག་སློང་ཞིང་། སུ་ཞིག་གིས་ཨེ་ཅིབ་པར་ཡ་ཧུ་དཱ་གླེང་ན་དེ་དག་འཇིགས་པར་འགྱུར། གང་ལ་ཞེ་ན། འདི་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཨེ་ཅིབ་ལ་བཅངས་པའི་ཐུགས་དགོངས་ཡིན་ནོ། །
ISA 19:18 ཉིན་དེར། ཨེ་ཅིབ་ཡུལ་གྱི་གྲོང་ཁྱེར་ལྔ་ཡི་མི་རྣམས་ཀྱིས་ཀ་ན་ཨན་གྱི་སྐད་སྨྲ་ཞིང་། ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་བློ་དཀར་བར་མནའ་བསྐྱལ་ནས། གྲོང་ཁྱེར་གཅིག་ལ་ཉི་མའི་གྲོང་ ཞེས་འབོད་པར་འགྱུར།
ISA 19:19 དེའི་དུས་སུ། ཨེ་ཅིབ་ཡུལ་དུ་དཀོན་མཆོག་ཡ་ཝཱེར་ཕུལ་བའི་མཆོད་ཁྲི་ཞིག་དང་། དེའི་ས་མཚམས་སུ་དཀོན་མཆོག་ཡ་ཝཱེར་ཕུལ་བའི་ཀ་བ་ཞིག་ཡོད་པར་འགྱུར།
ISA 19:20 དེ་ཐམས་ཅད་ཨེ་ཅིབ་ཡུལ་དུ་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་རྟགས་དང་དཔང་ཡིན། ཅི་ལ་ཞེ་ན། ཨེ་ཅིབ་པར་བརྙས་བཅོས་ཐེབས་ནས་དཀོན་མཆོག་ཡ་ཝཱེར་ཞུ་སྐབས། ཁོང་གིས་དེ་དག་ལ་སྐྱོབ་མཁན་དང་སྲུང་མཁན་ཞིག་མངགས་ཤིང་། དེ་ཡིས་ཁོ་ཚོ་སྐྱོབ་པར་འགྱུར།
ISA 19:21 དེ་ནས་དཀོན་མཆོག་ཡ་ཝཱེས་ཨེ་ཅིབ་པ་རྣམས་ལ་ཁོང་ཉིད་ངོ་ཤེས་པར་མཛད་ཅིང་། དུས་དེར་ཨེ་ཅིབ་པས་དཀོན་མཆོག་ཡ་ཝཱེ་ངོ་ཤེས་པས། དེ་དག་གིས་ཁོང་ལ་མཆོད་རྫས་དང་མཆོད་པ་ཕུལ་ནས་བསྙེན་བཀུར་བྱེད་པ་དང་། དཀོན་མཆོག་ཡ་ཝཱེ་ལ་དམ་བཅའ་བཞག་ནས་དེ་བཞིན་བསྒྲུབ་པར་འགྱུར།
ISA 19:22 དཀོན་མཆོག་ཡ་ཝཱེས་ཨེ་ཅིབ་ལ་རྒོལ་ཞིང་གསོ་བར་འགྱུར་བས། དེ་རྣམས་དཀོན་མཆོག་ཡ་ཝཱེའི་ཕྱོགས་སུ་སེམས་འཁོར་ཞིང་། དེ་ནས་ཁོང་གིས་དེ་དག་གི་གསོལ་བ་བཏབ་པ་ལ་གསན་ཞིང་དེ་དག་གསོ་བར་བྱའོ། །
ISA 19:23 དུས་དེར་ཨེ་ཅིབ་ནས་ཨ་སུར་ལ་འགྲོ་བའི་ལམ་ཆེན་ཞིག་ཡོད་ལ། ཨ་སུར་པ་རྣམས་ཨེ་ཅིབ་ཡུལ་དུ་འགྲོ་བ་དང་། ཨེ་ཅིབ་པ་རྣམས་ཨ་སུར་ཡུལ་དུ་སླེབས་ནས་ཨེ་ཅིབ་པས་ཨ་སུར་པ་དང་མཉམ་དུ་དཀོན་མཆོག་ཡ་ཝཱེར་བསྙེན་བཀུར་ཞུའོ། །
ISA 19:24 དུས་དེར་ཡེས་ར་ཨེལ་ནི་ཨེ་ཅིབ་དང་། ཨ་སུར་བཅས་མཉམ་དུ་ས་གཞིའི་རྒྱལ་ཁབ་ཡོངས་ཀྱི་བྱིན་རླབས་སུ་འགྱུར་ངེས།
ISA 19:25 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་དེ་དག་ལ་བྱིན་རླབས་གནང་སྟེ་འདི་སྐད་དུ། བདག་གི་འབངས་མི་ཨེ་ཅིབ། ངའི་ལག་གི་ལས་ཀ་ཨ་སུར། ངའི་ནོར་སྐལ་ཡེས་ར་ཨེལ་བཅས་བདེའོ་ཞེས་གསུངས་སོ། །
ISA 20:1 ཨ་སུར་གྱི་རྒྱལ་པོ་སི་ཀོན་བྱ་བས་དམག་དཔོན་ཨ་སི་དོད་ཅེས་པའི་ཡུལ་དུ་བཏང་བའི་ལོ་དེར། དམག་དཔོན་དེས་ཨ་སི་དོད་ལ་དམག་བརྒྱབ་ནས་གྲོང་ཁྱེར་བླངས།
ISA 20:2 དུས་དེར། དཀོན་མཆོག་ཡ་ཝཱེས་ཨ་མོ་ཟིའི་བུ་ཡེ་ཤ་ཡཱ་བརྒྱུད་ནས་འདི་སྐད་དུ། ཁྱོད་ཀྱིས་རང་གི་སྐེད་པའི་རྩིད་རས་དང་། རྐང་པའི་ལྷམ་ཕུད་ཅིག་ཅེས་གསུངས་པ་དང་། ཡེ་ཤ་ཡཱ་ཡིས་དེ་ལྟར་བྱས་རྗེས་གཅེར་བུར་བུད་ནས་རྐང་རྗེན་དུ་སོང་།
ISA 20:3 དཀོན་མཆོག་ཡ་ཝཱེས་འདི་སྐད་དུ། ཨེ་ཅིབ་པ་དང་གུ་ཤ་པ་ལ་རྒོལ་བའི་སྔ་ལྟས་སུ། ངའི་ཞབས་ཕྱི་ཡེ་ཤ་ཡཱ་ལོ་གསུམ་གྱི་རིང་ལ་གཅེར་བུ་དང་རྐང་རྗེན་དུ་སོང་བ་བཞིན།
ISA 20:4 ཨ་སུར་རྒྱལ་པོས་དེ་བཞིན་དུ་ཨེ་ཅིབ་ཀྱི་བཙོན་པ་དང་གུ་ཤའི་རྒྱང་ཕུད་བཏང་བའི་མི་རྣམས་འཁྲིད་ཅིང་། རྒན་གཞོན་གང་ཡིན་ཁྱད་མེད་པར་ཐམས་ཅད་གྱོན་གོས་བཤུས་ནས་རྐང་རྗེན་ལ། ཁོག་སྨད་གཅེར་བུར་ཕུད་དེ་ཨེ་ཅིབ་ལ་ངོ་ཚ་གཏོད་པར་འགྱུར།
ISA 20:5 དེ་ནས་ཡེས་ར་ཨེལ་པ་རྣམས་ཁོ་ཚོས་རེ་བ་བྱེད་པའི་གུ་ཤ་དང་། ངོམ་ཟིལ་སྟོན་པའི་ཨེ་ཅིབ་ཀྱི་ཕྱིར་དུ་འཇིགས་ཤིང་ངོ་ཚ་བར་འགྱུར།
ISA 20:6 ཉིན་དེར་མཚོ་རྒྱུད་ཀྱི་ཡུལ་མི་རྣམས་ན་རེ། ལྟོས་དང་། ང་ཚོས་རེ་བ་བཅངས་པ་སྟེ། རང་ཅག་གིས་ཨ་སུར་རྒྱལ་པོ་དང་ཁ་འབྲལ་ཕྱིར་སྐྱབས་བཅོལ་སའང་འདི་འདྲ་ཡིན་པས་རང་ཅག་ཅི་ལྟར་ཐར་རམ་ཞེས་སྨྲ་བར་འགྱུར་ཞེས་གསུངས་སོ། །
ISA 21:1 མཚོ་འགྲམ་གྱི་དབེན་གནས་སྐོར་གྱི་བཀའ་ལུང་ནི་འདི་ལྟ་སྟེ། དགྲ་བོ་རྣམས་ནི་ནེ་གུབ་ཡུལ་ནས་ཡོང་བའི་དྲག་རླུང་བཞིན་དུ་དབེན་སྟོང་གི་འཇིགས་སུ་རུང་བའི་གནས་ནས་ཐོན་ཞིང་།
ISA 21:2 བདག་ལ་ལུང་བསྟན་འཇིགས་སུ་རུང་བ་ཞིག་བསྟན་པ་ནི། གཡོ་སྒྱུ་སྤྱོད་མཁན་གྱིས་གཡོ་སྒྱུ་སྤྱོད་ཅིང་། གཏོར་བརླག་གཏོང་མཁན་གྱིས་གཏོར་བརླག་གཏོང་བ་སྟེ། ཀྱེ་ཨེ་ལཱམ་ཡར་སོང་དང་། ཀྱེ་མཱ་ཏི་བསྐོར་ནས་རྒོལ་ཞིག གཙོ་བོས་བདག་གིས་སྨྲེ་སྔགས་ཡོད་ཚད་མཚམས་ཆད་པར་བྱའོ་ཞེས་གསུངས།
ISA 21:3 དེ་བས་ངའི་སྐེད་པ་ན་ཟུག་གིས་གདུང་བར་གྱུར་ཏེ། སྦྲུམ་མའི་ཟུག་གཟེར་བཞིན་དུ་སྡུག་བསྔལ་གྱིས་ང་རང་བཟུང་། ང་རང་རྣ་བས་གང་ཞིག་ཐོས་པའི་རྐྱེན་གྱིས་ཟུག་གཟེར་ལངས་ཤིང་། མིག་གིས་ཅི་ཞིག་མཐོང་བའི་དབང་གིས་དངངས་སྐྲག་སྐྱེས་སོ། །
ISA 21:4 ངའི་སེམས་བློང་བློང་པོར་གྱུར་ཏེ། དངངས་སྐྲག་གིས་ང་ལ་འཇིགས་སྐུལ་ཞིང་། ང་རང་གདུང་བའི་ས་སྲོས་ཀྱིས་ཀྱང་ང་རང་སྐྲག་སྐྲག་འདར་འདར་བྱེད་དུ་བཅུག
ISA 21:5 དེ་ཚོས་གསོལ་ལྕོག་བསྒྲིགས་ཤིང་། ས་གདན་བཏིངས་ནས་བཟའ་བཏུང་སྤྱོད་ལ། ཀྱེ་འགོ་དཔོན་རྣམས་ཡར་ལངས་ཏེ་ཕུབ་ལ་སྣུམ་བྱུགས་ ཤིག
ISA 21:6 ཅིའི་ཕྱིར་ཞེ་ན། གཙོ་བོས་ང་ལ་འདི་སྐད་དུ། ཁྱོད་རང་སོང་སྟེ་སོ་པ་ཞིག་བསྐོས་ནས་དེས་ཅི་མཐོང་བ་རྣམས་སྙན་ཞུ་བྱེད་དུ་ཆུག
ISA 21:7 དེས་རྟ་དམག་ཆ་ཆ་བྱས་ནས་འོང་བ་དང་། བོང་བུའི་དམག་དཔུང་དང་རྔ་མོང་གི་དམག་དཔུང་མཐོང་བའི་ཚེ། ཁོས་དེ་དག་ལ་གཟབ་གཟབ་བྱེད་ཅིང་། ཤིན་ཏུ་གཟབ་གཟབ་བྱེད་དགོས་ཞེས་གསུངས་སོ། །
ISA 21:8 རྗེས་སུ་སོ་པས་སེང་གེའི་ང་རོ་སྒྲོག་པ་བཞིན་ན་རེ། ཀྱེ་གཙོ་བོ་ལགས། ང་རང་ཉི་མ་རེ་རེར་སོ་ལྟའི་མཁར་ཐོག་ནས་ལངས་ཤིང་། མཚན་མོ་རེ་རེར་རང་གནས་སུ་བསྡད་པ་ཡིན།
ISA 21:9 ལྟོས་དང་། རྟ་དམག་ཁག་ཅིག་འོང་བ་སྟེ། རྟ་དང་དམག་ནི་ཆ་ཆ་བྱས་ནས་ཡོང་གིན་འདུག ཡང་མི་ཞིག་གིས་ལན་བཏབ་པ་སྟེ། འགྱེལ་ཏེ། པཱ་པེལ་ལོན་འགྱེལ་ཏོ། །དེའི་སྐུ་འདྲ་བརྐོས་མ་ཐམས་ཅད་བཅག་ནས་ས་རུ་ལྷུང་ཞེས་དང་།
ISA 21:10 ཀྱེ་ངའི་རྡུང་བར་གྱུར་པའི་ལོ་ཏོག་དང་། ངའི་གཡུལ་ཁའི་འབྲུ་རིགས། ངའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་ལས་ཐོས་པ་ཐམས་ཅད་ཁྱོད་རྣམས་ལ་བསྒྲགས་པར་བྱའོ་ཞེས་སྨྲས་སོ། །
ISA 21:11 དུའུ༌མཱ་སྐོར་གྱི་བཀའ་ལུང་ནི་འདི་ལྟ་སྟེ། མི་ཞིག་གིས་སེ་ཨིར་ཕྱོགས་ནས་ང་བོས་ཏེ་ན་རེ། ཀྱེ་སོ་ལྟ་ལགས། མཚན་མོ་ད་དུང་ཇི་ཙམ་ལུས་སམ། སོ་ལྟ་ལགས། མཚན་མོ་ད་དུང་ཇི་ཙམ་ལུས་སམ་ཞེས་དྲིས་པ་ན།
ISA 21:12 སོ་ལྟ་ན་རེ། ཞོགས་པ་སླེབས་ཀྱང་མཚན་མོ་ཡང་བསྐྱར་སླེབ་ངེས། ཁྱོད་ཀྱིས་ད་དུང་འདྲི་འདོད་ན། ཕྱིར་ཤོག་ལ་དྲིས་ཤིག་ཅེས་པའོ། །
ISA 21:13 ཡང་ཨ་རབ་སྐོར་གྱི་བཀའ་ལུང་ནི་འདི་ལྟ་སྟེ། ཀྱེ་དི་དཱན་པའི་ཚོང་གཉེར་རུ་ཁག ཁྱོད་རྣམས་ཨ་རབ་ཀྱི་ནགས་ཁྲོད་དུ་ཞག་སྡོད་བྱེད་དགོས་ལ།
ISA 21:14 ཀྱེ་ཐེ་མཱའི་ཡུལ་མི་རྣམས། ཁ་སྐོམ་པ་ལ་ཆུ་སྟེར་དགོས་ཤིང་། བྲོས་བྱོལ་པ་རྣམས་ལ་བག་ལེབ་སྦྱིན་དགོས།
ISA 21:15 ཅིའི་ཕྱིར་ཞེ་ན། དེ་དག་ཕྱིར་ཐོན་པའི་རལ་གྲི་དང་། འཐེན་པའི་མདའ་མོ། ཛ་དྲག་ཆེ་བའི་དམག་འཁྲུག་བཅས་ལས་ཐར་བས་སོ། །
ISA 21:16 གཙོ་བོས་ང་ལ་འདི་སྐད་དུ། གླ་པའི་ལོ་གྲངས་བཞིན་དུ་ལོ་གཅིག་གི་ནང་དུ་ཀེ་དཱར་གྱི་གཟི་བརྗིད་ཐམས་ཅད་རྫོགས་པར་འགྱུར་ཏེ།
ISA 21:17 མདའ་པ་ལས་ཐར་བའི་མི་གྲངས་ནི་ཀེ་དཱར་པའི་དཔའ་བོ་ཡིན་པས་ཤིན་ཏུ་ཉུང་ཞེས་ཡེས་ར་ཨེལ་གྱི་དཀོན་མཆོག་ཡ་ཝཱེས་གསུངས་སོ། །
ISA 22:1 ཞལ་གཟིགས་ལུང་པའི་སྐོར་གྱི་བཀའ་ལུང་ནི་འདི་ལྟ་སྟེ། ཁྱོད་ཅག་ཐམས་ཅད་ལ་དོན་ཅི་ཞིག་བྱུང་སྟེ་ཁང་ཀླད་དུ་འགོས་པ་ཡིན་ནམ།
ISA 22:2 ཀྱེ་ཅ་ཅོ་དང་འདུ་འཛི། དགའ་སྤྲོས་བཀང་བའི་གྲོང་ཁྱེར། ཁྱོད་ཀྱི་ནང་དུ་བསད་པ་དག་ནི་རལ་གྲིས་བསད་པ་མ་ཡིན་ལ། དམག་སར་ཤི་བའང་མ་ཡིན།
ISA 22:3 ཁྱོད་ཀྱི་འགོ་དཔོན་རྣམས་ལྷན་དུ་བྲོས་ཤིང་། དེ་དག་ལ་མདའ་གཞུ་མེད་པས་འཛིན་བཟུང་ཐེབས་པ་དང་། དེ་དག་ཐག་རིང་དུ་བྲོས་ཀྱང་ཁྱོད་ལས་རྙེད་པ་ཐམས་ཅད་བཙོན་དུ་ཁྲིད།
ISA 22:4 དེ་བས་ངས་ཁྱོད་ཀྱི་མིག་གིས་ང་ལ་མ་ལྟ་ཞིག ང་རང་དྲག་ཏུ་ངུ་རུ་ཆུག ཡང་ངའི་འབངས་མེད་པར་བཟོས་པའི་རྐྱེན་གྱིས་ང་ལ་སེམས་གསོ་བྱེད་པར་མ་བྲེལ་ཞིག་ཅེས་པའོ། །
ISA 22:5 ཅིའི་ཕྱིར་ཞེ་ན། དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ཞལ་གཟིགས་ལུང་པར་དངངས་སྐྲག་དང་རྡོག་བརྫིས། ཟང་ཟིང་གི་དུས་ཡོད་པར་མཛད་དེ། མཁར་རྣམས་བཤིག་ཅིང་། སྡུག་སྐད་རི་སྒང་དུ་སླེབས།
ISA 22:6 ཨེ་ལཱམ་པས་མདའ་ཤུབས་ཐོགས་ཏེ་ཤིང་རྟ་དང་རྟ་དམག་ཡོད་ལ། ཀིར་གྱི་དམག་མིས་ཕུབ་བཟུང་ནས་གྲ་སྒྲིག་བྱས་འདུག
ISA 22:7 ཁྱོད་ཀྱི་ལུང་པ་བཟང་པོའི་ནང་དུ་ཤིང་རྟ་ཡིས་གང་ཞིང་། དམག་རྟའི་ཚོགས་ཀྱང་མཁར་སྒོའི་མདུན་དུ་བསྒྲིགས་ཡོད།
ISA 22:8 ཁོང་གིས་ཡ་ཧུ་དཱའི་འགེབ་སྲུང་བསྣུར་ཅིང་། དུས་དེར་ཁྱོད་ཀྱིས་ནགས་ཚལ་མཛོད་ཁང་ནང་གི་མཚོན་ཆར་རེ་བ་བཅོལ་བ་ཡིན།
ISA 22:9 ཁྱོད་ཅག་གིས་དཱ་བིད་གྲོང་ཁྱེར་གྱི་མཁར་ཆག་མང་པོ་མཐོང་སྟེ། རྫིང་བུ་འོག་མ་ནས་ཆུ་དྲངས་ཤིང་།
ISA 22:10 ཁྱོད་རྣམས་ཀྱིས་ཡེ་རུ་སཱ་ལེམ་གྱི་ཁང་ཁྱིམ་རྣམས་བརྩིས་པ་དང་། དེ་དག་བཤིགས་ནས་མཁར་རྫོང་བརྩིགས།
ISA 22:11 རྫིང་བུ་རྙིང་པའི་ཆུ་གསོག་ཕྱིར་ཁྱོད་རྣམས་ཀྱིས་ཡང་མཁར་གཉིས་ཀྱི་བར་ནས་ཆུ་མཛོད་བཟོས། འོན་ཀྱང་ཁྱོད་ཀྱིས་དེ་མཛད་མཁན་གྱི་དཀོན་མཆོག་ལ་མ་བལྟས་ཤིང་། གནའ་ནས་ད་བར་དུ་དོན་འདི་མཛད་མཁན་གྱི་དཀོན་མཆོག་ཀྱང་མ་དྲན་ནོ། །
ISA 22:12 ཉིན་མོ་དེར་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་མི་རྣམས་ངུ་ཞིང་སྨྲེ་སྔགས་འདོན་པ་དང་། མགོའི་སྐྲ་བཞར་ནས་རྩིད་རས་གྱོན་པར་དགོངས་པ་ཡིན།
ISA 22:13 ལྟོས་དང་། མི་རྣམས་ད་དུང་དགའ་ཞིང་སྐྱིད་པའི་ངང་ནས་གླང་དང་ལུག་བཤས་ཏེ། ཤ་བཟའ་བ་དང་རྒུན་ཆང་འཐུང་ནས་ན་རེ། རང་ཅག་གིས་བཟའ་བཏུང་སྤྱོད་དང་། ཅིའི་ཕྱིར་ཞེ་ན། སང་ཉིན་རང་ཅག་འཆི་བར་འགྱུར་ཞེས་པའོ། །
ISA 22:14 དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་དངོས་སུ་ང་ལ་བསྟན་ཏེ་འདི་སྐད་དུ། སྡིག་པ་འདི་དག་ཁྱོད་འཆི་བའི་བར་དུ་འདག་པར་མི་བྱའོ་ཞེས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་གསུངས་སོ། །
ISA 22:15 དེ་ཡང་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འདི་སྐད་དུ། ཕོ་བྲང་གི་ཕྱག་མཛོད་ཤེབ་ནཱའི་རྩར་སོང་ནས་ཁོ་ལ།
ISA 22:16 ཁྱོད་ཀྱིས་འདི་ནས་ཅི་བྱེད་པ་ཡིན་ནམ། ཁྱོད་ཀྱིས་རང་ཉིད་སུ་ཡིན་འདོད་དམ། ཁྱོད་ཀྱིས་འདི་ནས་རང་ལ་དུར་ཁུང་ཞིག་བརྐོས་ཏེ། མཐོ་ས་ནས་དུར་ཁུང་བརྐོས་ཏེ་བྲག་ཁུང་ནང་དུ་སྡོད་རྒྱུ་ཡིན་ནམ།
ISA 22:17 ལྟོས་ཤིག་དཔའ་བོ། དཀོན་མཆོག་ཡ་ཝཱེས་ཁྱོད་ཤུགས་ཀྱིས་འཕེན་ཞིང་། ཁོང་གིས་ཁྱོད་དམ་པོར་འཛིན་པར་འགྱུར།
ISA 22:18 ཁོང་གིས་ཁྱོད་ནི་གྲུ་གུ་ལྟར་རིལ་རིལ་བྱས་ནས་ཡངས་ཤིང་རྒྱ་ཆེ་བའི་གནས་ཤིག་ཏུ་འཕེན་པ་དང་། ཁྱོད་ཡུལ་དེར་ཤི་ནས་ཁྱོད་ཀྱི་ཤིང་རྟ་དཔལ་དང་ལྡན་པ་རྣམས་ཀྱང་ཡུལ་དེར་གནས་ཤིང་། ཁྱོད་ནི་རང་གི་བདག་པོའི་ཁྱིམ་གྱི་ངོ་ཚ་རུ་འགྱུར་རོ། །
ISA 22:19 བདག་གིས་ཁྱོད་ཀྱི་དཔོན་གནས་བླངས་ཏེ། ཁྱོད་ནི་རང་གི་གོ་ས་ནས་མར་འབེབ་པར་འགྱུར།
ISA 22:20 ཉིན་མོ་དེར་ངས་ཧིལ་ཀི་ཡཱའི་བུ་སྟེ་ཉིད་ཀྱི་ཞབས་ཕྱི་ཨེལ་ཡ་ཀིམ་བོས་ནས།
ISA 22:21 བདག་གིས་ཁྱོད་ཀྱི་ཕྱི་གོས་དེ་ལ་བསྐོན་ནས་ཁྱོད་ཀྱི་སྐ་རགས་དེ་ལ་འཆིང་དགོས་པ་དང་། ཁྱོད་ཀྱི་དབང་ཆ་དེའི་ལག་ཏུ་སྤྲད་ནས། དེ་ནི་ཡེ་རུ་སཱ་ལེམ་དང་ཡ་ཧུ་དཱ་ཁྱིམ་རྒྱུད་ཀྱི་ཡབ་ཆེན་དུ་འགྱུར་ངེས་ཡིན།
ISA 22:22 ངས་དཱ་བིད་ཚང་གི་ལྡེ་མིག་ཁོའི་ཕྲག་པར་བཞག་སྟེ། དེས་ཕྱེས་པའི་སྒོ་ནི་སུས་ཀྱང་རྒྱག་མི་ཐུབ་ལ། དེས་བརྒྱབ་པའི་སྒོ་ནི་སུས་ཀྱང་འབྱེད་མི་ཐུབ།
ISA 22:23 ངས་དེ་ཕུར་པ་ལྟར་བརྡབས་ནས་བརྟན་པོར་མཛད་ཅིང་། དེ་ནི་ཕ་གཞིས་ཀྱི་བཞུགས་ཁྲི་གཟི་བརྗིད་ཅན་དུ་འགྱུར་བར་བྱའོ། །
ISA 22:24 དེའི་ཕ་གཞིས་ཀྱི་གཟི་བརྗིད་ཐམས་ཅད་དེ། དེའི་བུ་ཕྲུག་དང་ཚ་རྒྱུད། ད་དུང་ཡོ་བྱད་སྣ་ཚོགས་ཏེ། ཕོར་པ་དང་བུམ་པ་བཅས་ཐམས་ཅད་ཁོ་ལ་བརྟེན་པར་འགྱུར།
ISA 22:25 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དུས་དེར། བརྟན་པོར་བརྡབས་པའི་ཕུར་པ་དེ་སྒུལ་ཞིང་བཅག་ནས་སར་ལྷུང་ཞིང་། དེའི་སྟེང་དུ་ཡོད་པའི་ཁུར་པོ་རྣམས་མེད་པར་འགྱུར། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་དེ་ལྟར་གསུངས་སོ། །
ISA 23:1 ཐཱར་ཞེས་པའི་སྐོར་གྱི་བཀའ་ལུང་ནི་འདི་ལྟ་སྟེ། ཀྱེ་ཐཱར་ཞིས་ཀྱི་གྲུ་གཟིངས་རྣམས། ངུ་འབོད་གྱིས་ཤིག གང་ལ་ཞེ་ན། ཐཱར་གྱི་ས་ཆ་སྟོངས་ཤིང་འཇིག་ནས་དེ་རུ་ཁང་པ་མེད་ཅིང་། གྲུ་ཁའང་མེད་ཅེས་པའི་བརྡ་འདི་ནི་ཁོ་ཚོས་ཀིབ་རིས་ཡུལ་ནས་ཐོས་པར་གྱུར།
ISA 23:2 མཚོ་རྒྱུད་ཀྱི་ཡུལ་མི་སྟེ། མཚོ་འགྲུལ་ལ་བརྟེན་ནས་ཕྱུག་པོར་འགྱུར་བའི་ཚི་ཏུན་གྱི་ཚོང་པ་ཁྱོད་རྣམས་ཁུ་སིམ་པོར་སྡོད་ཅིག
ISA 23:3 ཆུ་ཆེན་སྟེང་གི་ཤུ་ཧོར་གྱི་འབྲུ་རིགས་དང་། ནཱ་ཡོལ་གཙང་པོའི་ལོ་ཏོག་བཅས་ནི་ཚི་ཏུན་གྱི་ཡོང་འབབ་ཡིན་པས། ཚི་ཏུན་ནི་རྒྱལ་ཁབ་ཀུན་གྱི་ཚོང་ར་རུ་གྱུར།
ISA 23:4 ཀྱེ་ཚི་ཏུན་ངོ་ཚ་བར་གྱུར་ཅིག གང་ལ་ཞེ་ན། རྒྱ་མཚོ་དང་རྒྱ་མཚོའི་ངར་ཤུགས་ཀྱིས། ངས་ཕྲུ་གུ་སྐྱེ་བའི་ན་ཟུག་ཉམས་སུ་མ་མྱངས་ལ། ཕྲུ་གུ་ཡང་བཙས་མ་མྱོང་། བུ་གསོས་མ་མྱོང་ལ་བུ་མོ་ཡང་གསོ་སྐྱོང་བྱས་མ་མྱོང་ངོ་ཞེས་པའོ། །
ISA 23:5 གནས་ཚུལ་འདི་ཨེ་ཅིབ་པས་ཐོས་པས། ཨེ་ཅིབ་པ་རྣམས་ཐཱར་གྱི་གནས་ཚུལ་འདིའི་ཕྱིར་ཤིན་ཏུ་སྐྱོ་བར་གྱུར་ཏོ། །
ISA 23:6 ཀྱེ་མཚོ་རྒྱུད་ཀྱི་ཡུལ་མི་རྣམས། ངུ་འབོད་བྱོས་ཤིག ཁྱོད་རྣམས་ཕ་རོལ་གྱི་ཐཱར་ཞིས་ལ་སོང་ཞིག
ISA 23:7 འདི་ནི་ཁྱོད་རྣམས་དགའ་བའི་གྲོང་ཁྱེར་ཡིན་ནམ། དེའི་འབྱུང་ཁུངས་བརྗོད་ན་གནའ་རབས་ཡིན་ཞིང་། དེའི་རྐང་པས་ཡུལ་མི་རྣམས་རྒྱང་རིང་དུ་ཁྲིད་ནས་སྡོད་པར་གྱུར་ཏོ། །
ISA 23:8 སུ་ཞིག་གིས་ཇུས་འགོད་བྱས་ཏེ་ཐཱར་ལ་རྒོལ་དུ་བཅུག་པ་ཡིན་ནམ། དེ་ནི་མི་ལ་ཅོད་པན་གནང་བའི་གྲོང་ཁྱེར་ཞིག་སྟེ། དེའི་ཚོང་པ་ནི་རྒྱལ་སྲས་དང་། དེའི་ཚོང་དཔོན་རྣམས་ནི་ས་གཞིའི་སྟེང་གི་བཀུར་འོས་པ་ཡིན།
ISA 23:9 འདི་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཐུགས་དགོངས་ཏེ། གཟི་བརྗིད་ཀྱིས་ང་རྒྱལ་ཆེ་བ་དག་ལ་བརྙས་བཅོས་དང་། ས་གཞིའི་སྐུ་དྲག་ཐམས་ཅད་ལ་མཐོང་ཆུང་བྱེད་པའི་ཕྱིར་ཡིན།
ISA 23:10 ཀྱེ་ཐཱར་ཞིས་ཀྱི་ཡུལ་མི་རྣམས། བཀག་འགོག་ཅི་ཡང་མེད་པའི་ནཱ་ཡོལ་གཙང་པོ་ཁྱོད་ཀྱི་ཡུལ་ལ་བཞུར་བ་བཞིན་དུ་སོང་ཞིག
ISA 23:11 དཀོན་མཆོག་ཡ་ཝཱེས་ཕྱག་ཟུང་རྒྱ་མཚོའི་ཁྱོན་ལ་བརྐྱངས་ཏེ་རྒྱལ་ཁབ་ཀུན་སྒུལ་ཞིང་། ཁོང་གིས་ཀ་ན་ཨན་གྱི་སྐོར་ལ་དེའི་ནང་གི་བཙན་རྫོང་རྣམས་བཤིག་པར་འགྱུར་ཞེས་པའི་བཀའ་ཞིག་བབས།
ISA 23:12 ཡང་ཁོང་གིས་འདི་སྐད་དུ། བཙན་གནོན་ཐེབས་པའི་ཚི་ཏུན་གྱི་ཡུལ་མི་རྣམས། ཁྱོད་རྣམས་ཡང་བསྐྱར་དགའ་བར་མི་འགྱུར་ཏེ། ཡར་ལངས་ནས་ཕར་ཕྱོགས་ཀྱི་ཀིབ་རིས་སུ་སོང་དང་། དེ་ནས་ཀྱང་ཁྱོད་ལ་ངལ་གསོ་འཐོབ་པར་མི་འགྱུར་ཞེས་གསུངས།
ISA 23:13 ལྟོས་དང་། ཐཱར་ནི་དབེན་སྟོང་དང་རི་དྭགས་གནས་སར་འགྱུར་དུ་འཇུག་མཁན་ནི་ཀལ་དི་ནས་ཐོན་པའི་མི་ཡིན་པ་ལས་ཨ་སུར་པ་མ་ཡིན་ཏེ། ཁོ་ཚོས་མཁར་ལ་རྒོལ་བའི་ལྕོག་མཐོན་པོ་བརྩིགས་ཤིང་། ཐཱར་གྱི་མཁར་རྫོང་བཤིགས་ནས་ཞིག་རལ་དུ་བཏང་ཡོད་དོ། །
ISA 23:14 ཀྱེ་ཐཱར་ཞིས་ཀྱི་གྲུ་གཟིངས་རྣམས། ཁྱོད་ཀྱི་བཙན་རྫོང་རྣམས་གཏོར་བས་ངུ་འབོད་གྱིས་ཤིག
ISA 23:15 ཉིན་མོ་དེར། ཐཱར་ནི་རྒྱལ་རབས་གཅིག་གི་དུས་སྐབས་བཞིན་དུ་ལོ་བདུན་ཅུར་བརྗེད་པར་འགྱུར་ཞིང་། ལོ་བདུན་ཅུའི་རྗེས་སུ་ཐཱར་ནི་སྨད་འཚོང་མས་བླངས་པའི་གླུ་བཞིན་འགྱུར་ཏེ།
ISA 23:16 ཀྱེ་བརྗེད་ཟིན་པའི་གཡེམ་མ། མི་ཡིས་ཁྱོད་རང་ཕྱིར་དྲན་པའི་ཆེད་དུ་པི་ཝང་ཐོགས་ཏེ་གྲོང་ཁྱེར་ཡོངས་སུ་སྐྱོད་ཅིག རོལ་དབྱངས་དཀྲོལ་བཞིན་གླུ་མང་པོ་ལོངས་ཤིག་ཅེས་པའོ། །
ISA 23:17 ལོ་བདུན་ཅུའི་རྗེས་སུ་དཀོན་མཆོག་ཡ་ཝཱེས་ཐཱར་ལ་གཟིགས་སྐྱོང་མཛད་ཅིང་། ཐཱར་ཡང་བསྐྱར་དར་ཞིང་རྒྱས་ཏེ། ས་གཞིའི་སྟེང་གི་རྒྱལ་ཁམས་ཀུན་དང་སྨད་འཚོང་མའི་ཚོང་བྱེད་དོ། །
ISA 23:18 དེའི་རྒྱུ་ནོར་དང་ཐོབ་པའི་ཁེ་ཕན་དམ་པའི་ཚུལ་དུ་དཀོན་མཆོག་ཡ་ཝཱེར་འབུལ་ཞིང་། གསོག་འཇོག་བྱེད་པར་མི་འགྱུར། གང་ལ་ཞེ་ན། དེའི་རྒྱུ་ནོར་དག་ནི་དཀོན་མཆོག་ཡ་ཝཱེའི་དྲུང་དུ་སྡོད་པའི་མི་ལ་དབང་བས། ཁོ་ཚོའི་ལྟོ་བ་འགྲང་ཞིང་གྱོན་པ་ལེགས་པོ་ཡིན་ནོ། །
ISA 24:1 ལྟོས་དང་། དཀོན་མཆོག་ཡ་ཝཱེས་ས་གཞི་སྟོངས་ཤིང་སྟོང་བར་མཛད་དེ། ཁོང་གིས་ས་སྟེང་བསློགས་ཤིང་དེའི་ཡུལ་མི་རྣམས་ཕྱོགས་སོ་སོར་གཏོར་བ་དང་།
ISA 24:2 འབངས་དང་མཆོད་དཔོན། གཡོག་པོ་དང་བདག་པོ། གཡོག་མོ་དང་བདག་མོ། ཉོ་མཁན་དང་འཚོང་མཁན། སྐྱི་མཁན་དང་གཡོར་མཁན། སྐྱེད་མཁན་དང་སྐྱེད་འཇལ་མཁན་ཐམས་ཅད་གཏོར་བར་འགྱུར།
ISA 24:3 ས་གཞི་རྩ་བ་ནས་སྟོང་བར་གྱུར་ཏེ་ཡོངས་སུ་མེད་པར་འགྱུར་ཞེས་བཀའ་འདི་ནི་དཀོན་མཆོག་ཡ་ཝཱེས་གསུངས་སོ། །
ISA 24:4 ས་གཞི་སྐམ་ནས་ཉམས་རྒུད་དུ་འགྲོ་ཞིང་། དེའི་སྟེང་གི་མཐོ་སར་བཞུགས་པའི་ཁེངས་དྲེགས་ཅན་རྣམས་ཀྱང་ཉམས་པར་འགྱུར།
ISA 24:5 ཡུལ་མི་རྣམས་ཀྱིས་བཀའ་ཁྲིམས་མ་བརྩིས་ཤིང་། སྲོལ་ཡིག་དང་འགལ་ནས་དུས་གཏན་གྱི་ཁ་ཆད་དོར་བས། ས་གཞི་ནི་དེའི་སྟེང་གི་ཡུལ་མིས་སྦགས་པ་ཡིན།
ISA 24:6 དེ་བས་ས་གཞི་ལ་དམོད་མོ་ཐེབས་ཏེ་རྩ་མེད་དུ་གཏོང་ཞིང་། དེར་གནས་པའི་ཡུལ་མི་ཚོས་ཉེས་ཆེད་འཁུར་བར་འགྱུར། དེ་བས་ས་སྟེང་གི་ཡུལ་མི་རྣམས་བསྲེག་པར་འགྱུར་ལ། ཤུལ་དུ་ལུས་པ་ཤིན་ཏུ་ཉུང་།
ISA 24:7 རྒུན་ཆང་སྐྱོ་ཞིང་རྒུན་ཤིང་རྒུད་པ་དང་། སྐྱིད་སྣང་ཅན་གྱིས་ཤུགས་རིང་འབྱིན།
ISA 24:8 སིལ་རྔ་རྡུང་བའི་དགའ་སྤྲོ་མཚམས་ཆད་ཅིང་། དགའ་སྟོན་ལ་རོལ་བའི་འདུ་འཛི་ཁུ་སིམ་པོར་གྱུར་ལ། པི་ཝང་དཀྲོལ་བའི་དགའ་སྤྲོ་མཚམས་ཆད་དོ། །
ISA 24:9 དེ་དག་གིས་ཡང་བསྐྱར་ཆང་འཐུང་ནས་གླུ་ལེན་པར་མི་འགྱུར་ཞིང་། ཆང་གར་པོ་འཐུང་མཁན་རྣམས་ཀྱང་སྤྲོ་བར་མི་འགྱུར་རོ། །
ISA 24:10 སྟོངས་ཤིང་གོ་རིམ་མེད་པའི་གྲོང་ཁྱེར་ནི་གཏོར་ནས་བརླག་པ་དང་། ཁྱིམ་ཚང་རེ་རེས་སྒོ་བརྒྱབ་ནས་ནང་དུ་འགྲོ་མི་ཐུབ་པར་བྱས།
ISA 24:11 ཆང་མེད་པས་མི་ལ་ལས་རྒྱ་སྲང་ནས་སྡིག་སྐད་བཏོན། དགའ་སྤྲོ་ཡོད་ཚད་མེད་པར་གྱུར། ས་གཞིའི་དགའ་སྤྲོ་ཡལ་བར་གྱུར།
ISA 24:12 གྲོང་ཁྱེར་ནི་དབེན་སྟོང་དུ་གྱུར་ཏེ་མཁར་སྒོ་རྣམས་བརྡུངས་ནས་བཤིགས།
ISA 24:13 ས་གཞིའི་མི་ཀུན་སྐྱུ་རུ་ར་ཡི་སྡོང་པོ་སྒུལ་བ་བཞིན་དང་། བཏོགས་ཚར་བའི་རྒུན་འབྲུམ་ཤིང་ལྟར་མང་པོ་ལུས་མེད་དོ། །
ISA 24:14 ཤུལ་ལུས་རྣམས་ཀྱིས་དགའ་འབོད་བྱེད་ཅིང་། ནུབ་ཕྱོགས་པ་ཡིས་དཀོན་མཆོག་ཡ་ཝཱེའི་གཟི་བརྗིད་སྒྲོག
ISA 24:15 ཤར་ཕྱོགས་པས་དཀོན་མཆོག་ཡ་ཝཱེའི་གཟི་བརྗིད་མངོན་ཏེ། མཚོ་རྒྱུད་ཀྱི་གླིང་ཕྲན་རྣམས་སུ་ཡེས་ར་ཨེལ་གྱི་དཀོན་མཆོག་ཡ་ཝཱེའི་མཚན་ལ་བསྟོད་པར་བྱའོ། །
ISA 24:16 ང་ཚོས་ས་གཞིའི་མཐའ་ནས་གཟི་བརྗིད་དྲང་བདེན་ཅན་ལ་འབུལ་ཞེས་པའི་གླུ་སྐད་ཐོས་ཡོང་། ཡིན་ནའང་ངས་བདག་ནི་ཚར་རོ། །བདག་ནི་ཚར་རོ། །བདག་ལ་ཆག་སྒོ་འབྱུང་ངོ་། །གང་ལ་ཞེ་ན། གཡོ་སྒྱུ་སྤྱོད་མཁན་གྱིས་གཡོ་སྒྱུ་སྤྱོད་ཅིང་། གཡོ་སྒྱུ་སྤྱོད་མཁན་གྱིས་གཡོ་སྒྱུ་ཆེ་རུ་སྤྱོད་དོ་ཞེས་སྨྲས་སོ། །
ISA 24:17 ཀྱེ་ས་གཞིའི་ཡུལ་མི་རྣམས། འཇིགས་སྐྲག་དང་ས་དོང་། རྒྱ་རྙི་བཅས་ཀྱིས་ཁྱོད་ལ་བསྒུགས་ཡོད།
ISA 24:18 འཇིགས་སྐྲག་གི་སྐད་ལས་འབྲོ་མཁན་རྣམས་དོང་ནང་དུ་ལྷུང་ཞིང་། དོང་ནས་ཡར་འགོས་པ་རྣམས་རྙི་ལ་ཚུད་པར་འགྱུར། ཅིའི་ཕྱིར་ཞེ་ན། ནམ་མཁའི་སྒེའུ་ཁུང་རྣམས་ཕྱེས་ནས་ས་གཞིའི་རྩ་བ་འདར།
ISA 24:19 ས་གཞི་ཡོངས་སུ་བརྡིབས་ཏེ་གས་པ་དང་། ས་རབ་ཏུ་གཡོས།
ISA 24:20 ས་གཞི་ནི་ཆང་གིས་བཟི་བའི་མི་བཞིན་ཡར་མར་འཁྱོར་ཞིང་། སྤྱིལ་བུ་དང་འདྲ་བར་གཡོས་ཏེ། ས་གཞི་ནི་རང་སྟེང་གི་ཉེས་ཆད་ཀྱིས་མནན་ཞིང་། ཐ་ན་བརྡིབས་ནས་ཡར་ལངས་མི་ནུས།
ISA 24:21 ཉིན་མོ་དེར། དཀོན་མཆོག་ཡ་ཝཱེས་མཐོ་དབྱིངས་སུ་ནམ་མཁའི་དཔུང་ཚོགས་དག་ལ་ཉེས་ཆད་གཅོད་ཅིང་། ས་སྟེང་གི་རྒྱལ་པོ་རྣམས་ལ་ཆད་པ་གཅོད་པར་འགྱུར།
ISA 24:22 དེ་དག་བཙོན་པ་རྣམས་མུན་དོང་དུ་བསྡུས་པ་བཞིན་དུ་བསྡུ་བར་འགྱུར་ཞིང་། དེ་དག་བཙོན་ཁང་དུ་བཅུག་སྟེ་ཉིན་མང་པོའི་རྗེས་སུ་ཉེས་ཆད་གཅོད་ངེས།
ISA 24:23 དུས་དེར་ཟླ་བ་སྐྱེངས་ཤིང་ཉི་མའང་ནོངས་པར་འགྱུར། གང་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་རི་བོ་ཛ་ཡན་དང་ཡེ་རུ་སཱ་ལེམ་དུ་རྒྱལ་པོར་འགྱུར་ཞིང་། ཁོང་གི་རྒན་པོ་རྣམས་ཀྱི་མདུན་དུ་གཟི་བརྗིད་ཆེན་པོ་ཡོད།
ISA 25:1 ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་ང་ཡི་དཀོན་མཆོག་ཡིན་ཏེ། ངས་ཁྱེད་ལ་བསྟོད་ཅིང་ཁྱེད་ཀྱི་མཚན་ལ་བསྔགས་པར་བྱ། ཅི་ལ་ཞེ་ན། ཁྱེད་ཀྱིས་དྲང་བདེན་ཆ་ཡོངས་སུ་རྫོགས་པའི་ངང་ནས་ངོ་མཚར་ཅན་གྱི་དོན་རྣམས་མཛད་ཅིང་། དེ་ནི་ཁྱེད་ཀྱིས་གནའ་དུས་ནས་ཐུགས་སུ་བཅངས་པའི་དོན་ཡིན་ནོ། །
ISA 25:2 ཁྱེད་ཀྱིས་གྲོང་ཁྱེར་རྣམས་ཞིག་རལ་དུ་མཛད་པ་དང་། མཁར་བརྟན་པོ་རྣམས་དབེན་སྟོང་དུ་མཛད་དེ། ཕྱི་ཕྱོགས་པའི་མཁར་རྫོང་རྣམས་བཤིག་ཅིང་། སླར་ཡང་བརྩིག་པར་མི་བྱའོ། །
ISA 25:3 དེ་བས་མི་རིགས་སྟོབས་ལྡན་ཅན་གྱིས་ཁྱེད་ཀྱི་གཟི་བརྗིད་མངོན་ཞིང་། གྲོང་ཁྱེར་གདུག་རྩུབ་ཅན་རྣམས་ཀྱང་ཁྱེད་ལ་གུས་ཤིང་འཇིགས་པར་འགྱུར།
ISA 25:4 ཁྱེད་ནི་སྐྱོ་བོ་རྣམས་ཀྱི་སྐྱབས་དང་། དབུལ་པོའི་དཀའ་སྡུག་ཁྲོད་ཀྱི་སྐྱབས་གནས་དང་། ཆར་རླུང་དྲག་པོ་ལས་གཡོལ་བའི་སྦས་ས་དང་། ཚ་ངད་ཆེན་པོ་ལས་གཡོལ་བའི་གྲིབ་བསིལ་ལྟ་བུ་ཡིན་ཏེ། བཙན་ཤུགས་ཅན་གྱིས་བརྒྱབ་པའི་དབུགས་ནི་རྩིག་ངོར་རྒྱག་པའི་དྲག་རླུང་དང་འདྲའོ། །
ISA 25:5 སྐམ་སའི་ཚ་བ་ཉམས་པར་མཛད་པ་བཞིན་ཁྱེད་ཀྱིས་ཕྱི་ཕྱོགས་པའི་ཀུ་ཅོ་མེད་པར་མཛད་པ་དང་། སྤྲིན་གྱིས་ཚ་རླངས་འཇོམས་པ་བཞིན་ཁྱེད་ཀྱིས་གདུག་རྩུབ་ཅན་གྱི་རྒྱལ་ཁའི་གླུ་དབྱངས་མཚམས་བཅད་དོ། །
ISA 25:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་རི་བོ་འདི་ནས་མི་ཐམས་ཅད་ཀྱི་ཕྱིར་དུ་ཕུན་སུམ་ཚོགས་པའི་གསོལ་སྟོན་བཤམས་ཤིང་། དེའི་ནང་དུ་ལོ་ཆང་དང་རྐང་མར་ཞིམ་པོ། བདུད་རྩི་མངར་མོ་བཅས་ཡོད།
ISA 25:7 ཡང་ཁོང་གིས་རི་བོ་འདི་ནས་མི་ཐམས་ཅད་གཡོགས་པའི་ཡོལ་བ་དང་། རྒྱལ་ཁབ་ཀུན་ལ་བཀབ་པའི་རས་མེད་པར་མཛད་དེ།
ISA 25:8 ཁོང་གིས་འཆི་བ་ནི་དུས་གཏན་དུ་ཁྱུར་མིད་བཏང་ཞིང་། གཙོ་བོ་ཡ་ཝཱེས་མི་རེ་རེའི་གདོང་གི་མཆི་མ་ཕྱིས་ནས། ཉིད་ཀྱི་མི་སྡེའི་ངོ་ཚ་ནི་ས་གཞི་ཡོངས་ནས་མེད་པར་མཛད་ཅེས་དཀོན་མཆོག་ཡ་ཝཱེས་གསུངས་སོ། །
ISA 25:9 ཉིན་མོ་དེར་མི་ན་རེ། ལྟོས་དང་། འདི་ནི་ང་ཚོའི་དཀོན་མཆོག་ཡིན་ཏེ། ང་ཚོ་ཁོང་ལ་དད་ཅིང་བརྟེན་པ་ཡིན་ན་ཁོང་གིས་ང་ཚོ་སྐྱོབ་པར་འགྱུར། འདི་ནི་ང་ཚོ་བརྟེན་སའི་དཀོན་མཆོག་ཡ་ཝཱེ་ཡིན། ང་ཚོ་ནི་ཁོང་གི་ཐར་པའི་ལམ་ནས་དགའ་ཞིང་སྤྲོ་བར་བྱ་ཞེས་པའོ། །
ISA 25:10 དེ་ནས་དཀོན་མཆོག་ཡ་ཝཱེའི་ཕྱག་ནི་རི་བོ་འདིར་འཇོག་མོད་ཀྱང་། མོ་ཨབ་པ་རྣམས་རང་ཡུལ་ནས་རྡོག་རྫིས་གཏོང་བར་འགྱུར་ཞིང་། དེ་ནི་བཤང་གཅི་རློན་པའི་ནང་དུ་སོག་མ་བརྫིས་པ་བཞིན་ཡིན་ལ།
ISA 25:11 ཁོ་ཚོས་ལག་པ་བརྐྱངས་ནས་ཆུ་ལ་རྐྱལ་བ་ལྟར་དེའི་ནང་ནས་ལག་པ་རྐྱོང་ནའང་། དཀོན་མཆོག་ཡ་ཝཱེས་དེ་ཚོའི་ང་རྒྱལ་དང་ལག་གི་རྩལ་ཐམས་ཅད་ཉམས་པར་མཛད་དེ།
ISA 25:12 དཀོན་མཆོག་ཡ་ཝཱེས་དེ་ཚོའི་མཐོ་ཞིང་བརྟན་པའི་མཁར་རྣམས་སར་བསྒྱེལ་ནས་རྡུལ་དུ་བརླགས་སོ། །
ISA 26:1 ཉིན་མོ་དེར། ཡ་ཧུ་དཱའི་ཡུལ་ནས་བསྟོད་དབྱངས་འདི་ལྟར་འབུལ་བར་འགྱུར་ཏེ། ང་ཚོ་ལ་མཁར་བརྟན་པོ་ཞིག་ཡོད། དཀོན་མཆོག་ཡ་ཝཱེས་ཐར་པ་ནི་དེའི་ལྕགས་རི་དང་གྱང་རགས་སུ་མཛད་ཡོད།
ISA 26:2 བདེན་པ་ཉིད་དང་བློ་དཀར་བའི་མི་རྣམས་ཀྱི་ནང་དུ་སླེབ་ཕྱིར་མཁར་སྒོ་ཕྱེས་ཤིག
ISA 26:3 སེམས་བསམ་པས་ཁྱེད་ལ་བརྟེན་མཁན་རྣམས་ནི་ཁྱེད་ཀྱིས་ཞི་བདེའི་ནང་དུ་བསྲུང་བ་སྟེ། གང་ལ་ཞེ་ན། དེ་ནི་ཁྱེད་ལ་བརྟེན་པའི་ཕྱིར་ཡིན།
ISA 26:4 དཀོན་མཆོག་ཡ་ཝཱེ་ནི་དུས་གཏན་གྱི་བྲག་རྡོ་ཡིན་པས་ཁྱོད་རྣམས་ཀྱིས་ནམ་ཡང་ཁོང་ལ་ཡིད་ཆེས་བྱོས་ཤིག
ISA 26:5 ཅིའི་ཕྱིར་ཞེ་ན། ཁོང་གིས་ང་རྒྱལ་ཅན་མར་འབེབ་ཅིང་། མཐོ་སར་ཡོད་པའི་གྲོང་ཁྱེར་རྣམས་ཉམས་པར་མཛད་དེ་བཤིག་པ་དང་། ས་རུ་གཏོར་ནས་རྡུལ་དུ་བརླག
ISA 26:6 དཀའ་སྡུག་ཅན་དང་དབུལ་པོའི་རྐང་པ་ཡིས་དེ་ལ་རྡོག་རྫིས་གཏོང་བར་བྱའོ། །
ISA 26:7 དྲང་བདེན་མི་ཡི་ལམ་ནི་དྲང་པོ་ཡིན། ཀྱེ་དྲང་བདེན་ཅན་གྱི་གཙོ་བོ་ལགས། ཁྱེད་ཀྱིས་དྲང་བདེན་མི་ཡི་བགྲོད་ལམ་བདེ་བར་མཛད།
ISA 26:8 ཀྱེ་དཀོན་མཆོག་ཡ་ཝཱེ་ལགས། ང་ཚོས་ཁྱེད་ཀྱི་ཁྲིམས་གཅོད་པའི་ལམ་དུ་ཁྱེད་ལ་སྒུག་ཡོད། ཁྱེད་ཀྱི་མཚན་སྙན་ནི་ང་ཚོའི་སེམས་ཀྱི་རེ་འདུན་ཉག་གཅིག་ཡིན།
ISA 26:9 མཚན་མོའི་དུས་སུ་ངའི་སེམས་སུ་ཁྱེད་ཉིད་དྲན། ངའི་སེམས་ཉིད་ཀྱིས་ཁྱེད་རང་འཚོལ་བར་བརྩོན། ཅིའི་ཕྱིར་ཞེ་ན། ཁྱེད་ཀྱི་ཁྲིམས་གཅོད་ས་སྟེང་དུ་སླེབས་པའི་ཚེ། ས་གཞིའི་མི་ཐམས་ཅད་ཀྱིས་དྲང་བདེན་ཅི་ཡིན་ཤེས་པར་འགྱུར།
ISA 26:10 མི་སྡིག་ཅན་ལ་ཐུགས་རྗེ་ཐོབ་ཀྱང་། དེས་དྲང་བདེན་ཅི་ཡིན་མི་རྟོགས་ཤིང་། དྲང་བདེན་ཡོད་སར་དེས་ད་དུང་ངན་པ་སྤྱོད་དེ། དཀོན་མཆོག་ཡ་ཝཱེའི་གཟི་བྱིན་དེ་ཡིས་མི་མཐོང་ངོ་། །
ISA 26:11 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱི་ཕྱག་ཡར་བཏེགས་ཀྱང་དེ་དག་གིས་མཐོང་བར་མ་གྱུར། ཁྱེད་ཀྱིས་ཉིད་ཀྱི་མི་རྣམས་ལ་བཅངས་པའི་འཁུར་ཞེན་མཐོང་བར་མཛད་ནས་དེ་དག་ངོ་ཚར་གཏོད་ཅིག ཁྱེད་ཀྱི་དགྲ་ཡི་ཕྱིར་དུ་གྲ་སྒྲིག་བྱས་པའི་མེ་ཡིས་དེ་དག་ཁྱུར་མིད་གཏོང་གྱུར་ཅིག
ISA 26:12 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་ཚོར་ཞི་བདེ་གནང་ངེས་ཏེ། ཅིའི་ཕྱིར་ཞེ་ན། ངེད་རྣམས་ཀྱིས་སྤྱོད་པ་ཐམས་ཅད་ཁྱེད་ཀྱིས་ངེད་ཕྱིར་མཛད་པ་ཡིན།
ISA 26:13 ཀྱེ་ངེད་ཅག་གི་དཀོན་མཆོག་ཡ་ཝཱེ་ལགས། ཁྱེད་ལས་གཞན་པའི་བདག་པོ་ཡིས་ང་ཚོར་དབང་བསྒྱུར་ནའང་། ང་ཚོས་ཁྱེད་ཀྱི་མཚན་ཁོ་ན་བརྗོད་པར་བྱའོ། །
ISA 26:14 ཁོ་ཚོ་འཆི་བ་རྣམས་གསོན་པར་མི་འགྱུར་ལ། འདས་པོ་རྣམས་ཀྱང་ཡར་འགྲེང་བར་མི་འགྱུར། ཅི་ལ་ཞེ་ན། ཁྱེད་ཀྱིས་དེ་ཚོར་ཉེས་ཆད་བཅད་དེ་མེད་པར་མཛད་ཅིང་། དེ་དག་ནམ་ཡིན་ཡང་དྲན་པར་མི་མཛད།
ISA 26:15 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་མི་རྣམས་དར་ཞིང་རྒྱས་པར་མཛད། ཁྱེད་ཀྱིས་མི་རྣམས་དར་ཞིང་རྒྱས་པར་མཛད་ནས་གཟི་བརྗིད་ཁྱེད་ལ་ཐོབ་གྱུར་ཅིང་། ས་ཡི་ཕྱོགས་བཞི་ཁྱེད་ཀྱིས་རྒྱ་ཆེར་བསྐྱེད།
ISA 26:16 ཀྱེ་དཀོན་མཆོག་ཡ་ཝཱེ་ལགས། དཀའ་ངལ་དུས་སུ་ངེད་ཀྱིས་ཁྱེད་འཚོལ་ཞིང་། ཁྱེད་ཀྱི་ཉེས་ཆད་ངེད་ཀྱི་སྟེང་དུ་འབབ་དུས། ང་ཚོས་ལྷག་བསམ་རྣམ་དག་གིས་ཤུབ་ཤུབ་ཏུ་ཁྱེད་ལ་གསོལ་བ་འདེབས།
ISA 26:17 སྦྲུམ་མས་ཕྲུ་གུ་སྐྱེ་དུས་ཅི་ལྟར་ཟུག་གཟེར་ལངས་ནས་ངུ་སྐད་འཆོར་བ་བཞིན། ཀྱེ་དཀོན་མཆོག་ཡ་ཝཱེ་ལགས། ངེད་རྣམས་ཁྱེད་ཀྱི་དྲུང་དུའང་དེ་བཞིན་ནོ། །
ISA 26:18 ངེད་རྣམས་སྦྲུམ་མ་བཞིན་དུ་ཟུག་གཟེར་ལངས་ཀྱང་རླུང་ལྟར་གྱུར་ནས་གང་ཡང་བཙས་མ་བྱུང་། ང་ཚོས་ས་སྟེང་དུ་ཐར་བའི་དོན་གང་ཡང་གཉེར་མ་ཐུབ་ལ། ས་གཞིའི་ཡུལ་མི་ངེད་ཀྱི་ཕྱིར་ཡང་བཙས་མ་ནུས།
ISA 26:19 ཁྱེད་ལ་དབང་བའི་འདས་པོ་རྣམས་གསོན་པར་འགྱུར་ཞིང་། དེ་དག་གི་བེམ་པོ་རྣམས་ཡར་ལངས་ངེས། ས་རྡུལ་ཁྲོད་དུ་སྡོད་མཁན་དག་སད་ནས་དགའ་འབོད་བྱེད་དེ། ཅི་ལ་ཞེ་ན། ཁྱེད་ཀྱི་ཟིལ་ཆར་ནི་ཞོགས་པའི་ཟིལ་པ་ཇི་བཞིན་ས་གཞིའི་འདས་པོ་རྣམས་ཀྱི་སྟེང་ལ་འབབ་ཅིང་། ས་གཞིར་ཚེ་ལས་འདས་པ་རྣམས་ཕྱིར་སྤྲོད་དུ་འཇུག་གོ །
ISA 26:20 ཀྱེ་ངའི་མི་རྣམས། ཚུར་ཤོག་དང་། ཁྱོད་ཀྱི་གཟིམ་ཁང་དུ་འཛུལ་ནས་སྒོ་རྒྱོབས་ཤིག ཁོང་གི་ཐུགས་ཁྲོ་མ་ཞི་བར་དུ་ཁྱོད་རྣམས་ཡུད་ཙམ་ཡིབ་ནས་སྡོད་ཅིག
ISA 26:21 ཅི་ལ་ཞེ་ན། ས་གཞིའི་ཡུལ་མི་རྣམས་ཀྱི་སྡིག་པར་ཉེས་ཆད་གཅོད་པར། དཀོན་མཆོག་ཡ་ཝཱེ་ཁོང་གི་བཞུགས་གནས་ནས་ཕེབས་ཏེ། ས་གཞིས་རང་གི་སྟེང་ནས་བཞུར་བའི་ཁྲག་མངོན་པ་དང་། བསད་པ་རྣམས་འགེབས་པར་མི་བྱའོ། །
ISA 27:1 ཉིན་མོ་དེར། དཀོན་མཆོག་ཡ་ཝཱེས་ཁོང་གི་རྣོ་ཞིང་ཆེ་བའི་རལ་གྲི་ཤུགས་ལྡན་གྱིས་ཆུ་སྲིན་ ཏེ་མྱུར་སྐྱོད་དང་འཁྱོག་འགྲོ་སྦྲུལ་ལ་ཆད་པ་གཅོད་ཅིང་། རྒྱ་མཚོའི་ནང་གི་འབྲུག་ཆེན་ཡང་གསོད་པར་འགྱུར།
ISA 27:2 ཉིན་མོ་དེར། རྒུན་ཆང་ཐོན་པའི་རྒུན་འབྲུམ་ར་བ་དེར་དམིགས་ནས་ཁྱོད་ཚོས་གླུ་ཞིག་ལེན་པར་བྱ་སྟེ།
ISA 27:3 དཀོན་མཆོག་ཡ་ཝཱེ་ང་རང་ནི་རྒུན་འབྲུམ་ར་བ་དེ་སྲུང་མཁན་ཡིན། བདག་གིས་རྟག་ཏུ་དེ་ལ་ཆུ་གཏོང་ཞིང་། མི་ཡིས་དེ་ལ་གཏོར་བརླག་མི་བཟོ་བའི་ཕྱིར་བདག་གིས་ཉིན་མཚན་མེད་པར་སྲུང་བ་ཡིན།
ISA 27:4 བདག་ལ་ཁྲོ་བ་མེད་དེ། ཚེར་མ་དང་ཚེར་ཤིང་གིས་བདག་དང་གཡུལ་འགྱེད་ན། བདག་གིས་དེ་དག་རྡོག་བརྫིས་བཏང་ནས་ལྷན་ཅིག་ཏུ་བསྲེག་ངེས་ཡིན།
ISA 27:5 དེ་ཡིས་ང་ལ་འཇུས་ནས་ང་ནི་སྦས་སར་གྱུར་ཏེ། ང་དང་ཞི་མཐུན་བྱས་ན་མ་གཏོགས། ངས་དེ་བཞིན་བྱེད་ངེས་ཡིན།
ISA 27:6 ཕྱིས་ཀྱི་ཉིན་མོ་དག་ལ་ཡ་ཀོབ་ཀྱི་རྩ་བ་ཚུགས་པ་དང་། ཡེས་ར་ཨེལ་ལ་མྱུ་གུ་འབུས་ནས་མེ་ཏོག་བཞད་ཅིང་། དེ་དག་གི་འབྲས་བུ་ནི་ས་གཞི་ཡོངས་སུ་ཁྱབ་པར་བྱའོ། །
ISA 27:7 དེ་ཡང་དཀོན་མཆོག་ཡ་ཝཱེས་ཡེས་ར་ཨེལ་ལ་རྡུང་རྡེག་བྱེད་པ་ནི་དེ་རྣམས་ལ་རྡུང་རྡེག་བྱེད་མཁན་ལ་རྡུང་རྡེག་བྱེད་པ་བཞིན་དུ་ག་ལ་ཡིན། གཙོ་བོས་ཡེས་ར་ཨེལ་པ་རྣམས་གསོད་པ་ནི་ཁོ་རྣམས་གསོད་མཁན་དག་གསོད་པ་བཞིན་དུ་ག་ལ་ཡིན།
ISA 27:8 ཁྱེད་ཀྱིས་རིམ་བཞིན་དེ་དག་བཙོན་དུ་ཁྲིད་པ་དང་ཕན་ཚུན་འཐབ་པ་བརྒྱུད་དེ་ཤར་རླུང་ལྡང་བའི་དུས་སུ། དྲག་རླུང་གིས་དེ་དག་དེད་པ་ཡིན།
ISA 27:9 དེ་བས་ཡ་ཀོབ་ཀྱི་སྡིག་པ་བསལ་བ་དང་། ཁོང་གི་སྡིག་པ་བསལ་བ་ནི་ཐམས་ཅད་འདི་ལ་རག་ལས་ཏེ། ཁོང་གིས་མཆོད་ཁྲིའི་སྟེང་གི་རྡོ་ཐམས་ཅད་རྡོ་ཐལ་དུ་མཛད་པ་དང་། ལྷ་མོ་ཨ་ཤེ་རཱའི་ཀ་བ་རྣམས་དང་སྤོས་ཁྲི་རྣམས་ལུས་པར་མ་མཛད་དོ། །
ISA 27:10 མཁར་བརྟན་པོ་རྣམས་སྟོངས་ཤིང་། བསྐྱུར་ནས་དོར་བའི་སྡོད་གནས་སུ་གྱུར་པ་དང་དབེན་སྟོང་བཞིན་དུ་ལུས། བ་ཕྲུག་གིས་དེ་རུ་རྩྭ་ཟ་ཞིང་ཉལ་བར་མ་ཟད། དེའི་སྡོང་པོའི་ཡལ་ག་རྣམས་ཀྱང་བཟའ་བར་འགྱུར།
ISA 27:11 ཡལ་ག་སྐམ་ཚེ་གཅོད་པར་འགྱུར། དེ་ནས་བུད་མེད་རྣམས་འོངས་ནས་ཁྱེར་ཏེ་མེ་ལ་འབུད། ཅི་ལ་ཞེ་ན། འབངས་འདི་རྣམས་གླེན་རྨོངས་ཤེས་མེད་ཡིན་པས། དེ་དག་མཛད་མཁན་གྱི་གཙོ་བོས་ཁོ་ཚོ་ལ་སྙིང་རྗེ་མི་དགོངས་ཤིང་། དེ་དག་སྐྲུན་མཁན་གྱིས་དེ་དག་ལ་ཐུགས་རྗེས་མི་གཟིགས་སོ། །
ISA 27:12 ཉིན་མོ་དེར། ཕི་རཱད་གཙང་པོ་ནས་ཨེ་ཅིབ་ཡུལ་གྱི་གྲོག་ཆུའི་བར་དུ་དཀོན་མཆོག་ཡ་ཝཱེས་ཁོང་གི་འབྲུ་རིགས་བསྡུ་ཞིང་། ཀྱེ་ཡེས་ར་ཨེལ་གྱི་བུ་རྒྱུད། ཁྱོད་རྣམས་ཀྱང་རེ་རེ་བཞིན་བསྡུ་བར་འགྱུར།
ISA 27:13 ཡང་ཉིན་མོ་དེར། དུང་ཆེན་བུས་ནས་ཨ་སུར་ཡུལ་དུ་མེད་པར་འགྱུར་ལ་ཁད་ཡོད་པ་དང་། ཨེ་ཅིབ་ཡུལ་དུ་བསྐྲད་པ་ཐམས་ཅད་འོངས་ནས་ཡེ་རུ་སཱ་ལེམ་གྱི་རི་བོ་དམ་པ་རུ་དཀོན་མཆོག་ཡ་ཝཱེ་ལ་ཕྱག་འཚལ་བར་འགྱུར་རོ། །
ISA 28:1 ང་རྒྱལ་གྱི་ཅོད་པན་སྤྲས་པའི་ཨེ་ཕཱར་ཡིམ་གྱི་ར་བཟི་རྣམས་ལ་ཆག་སྒོ་འབྱུང་། དེའི་ལུང་པ་ཕྱུག་པོའི་རི་མགོ་ཡི་གཟི་བརྗིད་དག་ལའང་ཆག་སྒོ་འབྱུང་། དེ་ནི་མེ་ཏོག་རྙིད་པ་དང་འདྲ་ཞིང་ཆང་གིས་བཟི་བའི་མི་ཡིས་ཁེངས།
ISA 28:2 ལྟོས་ཤིག དཀོན་མཆོག་ཡ་ཝཱེ་ལ་ནུས་མཐུ་དང་སྟོབས་ཤུགས་ལྡན་པའི་མི་ཞིག་ཡོད་པ་དང་། དེ་ནི་སེར་བ་དང་ཚར་གཅོད་པའི་དྲག་རླུང་བཞིན་དང་། ཡང་གྱེན་དུ་འཕྱུར་བའི་ཆུ་ཆེན་བཞིན་ཡིན་ཞིང་ཁོང་གི་ཕྱག་གིས་དེ་ས་རུ་བསྒྱེལ་བར་འགྱུར།
ISA 28:3 ཨེ་ཕཱར་ཡིམ་གྱི་ར་བཟི་རྣམས་ཀྱིས་གྱོན་པའི་ང་རྒྱལ་གྱི་ཅོད་པན་དེ་རྡོག་བརྫིས་གཏོང་བར་འགྱུར་ཞིང་།
ISA 28:4 དེའི་ལུང་པ་ཕྱུག་པོའི་རི་མགོ་ཡི་མེ་ཏོག་རྙིད་པ་བཞིན་གྱི་གཟི་བརྗིད་དག་ཀྱང་དབྱར་སྟོད་སྨིན་པའི་སེ་ཡབ་ཤིང་འབྲས་ཇི་བཞིན། མི་ཡིས་མཐོང་བ་ཙམ་གྱིས་དེར་མཉམ་འཇོག་ཅིང་ལག་ཏུ་ཡོང་བ་ཙམ་གྱིས་ཁྱུར་མིད་གཏོང་ངོ་། །
ISA 28:5 ཉིན་མོ་དེར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་ཁོང་གི་མི་ལྷག་ལུས་རྣམས་ཀྱི་མཛེས་སྡུག་གི་ཅོད་པན་དང་། གཟི་བརྗིད་ཀྱི་དབུ་རྒྱན།
ISA 28:6 ཁྲིམས་སྐྱོང་པས་ཁྲིམས་དྲང་པོར་སྐྱོང་བའི་ཐུགས་ཉིད་དང་། མཁར་སྒོ་ནས་དགྲ་བོ་ཕྱིར་ཟློག་མཁན་གྱི་སྟོབས་ཤུགས་སུ་འགྱུར་རོ། །
ISA 28:7 ཡུལ་དེའི་མི་རྣམས་ཀྱང་ཆང་གིས་གཡས་གཡོན་དུ་འཁྱོར་ཞིང་། ཆང་གར་པོས་ཕར་འཁྱོག་ཚུར་འཁྱོག་བྱེད་པ་དང་། མཆོད་དཔོན་དང་ལུང་སྟོན་པ་རྣམས་ཀྱང་ཆང་གར་པོས་གཡས་གཡོན་དུ་འཁྱོར་ནས་རིག་པ་མི་གསལ་བར་གྱུར། དེ་དག་གིས་ཞལ་གཟིགས་མཐོང་དུས་འཁྱོར་ཞིང་། དེ་དག་གིས་ཉེས་ཆད་གཅོད་དུས་ཀྱང་ཡར་མར་ལོག་གོ །
ISA 28:8 གསོལ་ལྕོག་སྟེང་དུ་ཉག་ཉིག་གི་སྐྱུག་རོས་གང་སྟེ་གཙང་ས་གཅིག་ཀྱང་མ་ལུས་སོ། །
ISA 28:9 དེ་རྣམས་ན་རེ། ཁོང་གིས་སུ་ལ་ཤེས་བྱ་བསླབ་ཅིང་གསུང་འཕྲིན་གྱི་བསྟན་དོན་རྟོགས་སུ་འཇུག་གམ། ནུ་ཞོ་བཀར་བ་དང་མ་ཡི་པང་ལས་བྲལ་བ་དེ་དག་ཡིན་ནམ།
ISA 28:10 དེས་བརྗོད་པ་ནི་བསྐྱར་བཤད་དང་། དོན་སྙིང་མེད་པའི་ཚིག་འབྲུ་སྟེ། འདི་ནས་ཉུང་ཙམ་དང་གན་ནས་ཉུང་ཙམ་ཡིན་ཞེས་པའོ། །
ISA 28:11 དཀོན་མཆོག་ཡ་ཝཱེས་ཕྱི་ཕྱོགས་པའི་ངག་དང་ཕྱི་ཕྱོགས་པའི་སྐད་བརྒྱུད་ནས་མི་རྣམས་ལ་གསུངས་པ་སྟེ།
ISA 28:12 ཁོང་གིས་དེ་དག་ལ་འདི་སྐད་དུ། འདི་ནི་ངལ་གསོ་བའི་གནས་ཡིན། ཁྱོད་རྣམས་ཀྱིས་ཐང་ཆད་པའི་མི་ལ་ངལ་གསོ་ཐོབ་ཏུ་བཅུག་ན། ངལ་གསོའི་གནས་འདི་འཐོབ་པར་འགྱུར་ཞེས་གསུངས་ཀྱང་དེ་དག་གིས་མ་མཉན་ནོ། །
ISA 28:13 དེ་བས་དཀོན་མཆོག་ཡ་ཝཱེས་དེ་དག་ལ་གསུངས་པའི་བཀའ་ནི་བསྐྱར་བཤད་དང་དོན་སྙིང་མེད་པའི་ཚིག་འབྲུར་གྱུར་ཏེ་འདི་ནས་ཉུང་ཙམ་དང་གན་ནས་ཉུང་ཙམ་ཡིན་ལ། ཐ་ན་དེ་དག་མདུན་དུ་སྐྱོད་ཀྱང་གན་རྐྱལ་དུ་འགྱེལ་ཞིང་། གསོད་གཅོད་ཐེབས་ནས་རྙི་རུ་ཚུད་པ་ཡིན།
ISA 28:14 དེ་བས་སྐུར་འདེབས་བྱེད་རྒྱུར་དགའ་བའི་མི་སྟེ། ཡེ་རུ་སཱ་ལེམ་གྱི་མི་སྡེར་དབང་སྒྱུར་མཁན་རྣམ་པ། ཁྱོད་ཅག་གིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
ISA 28:15 ཁྱོད་ཅག་ན་རེ། ང་ཚོས་འཆི་བ་ལ་ཁ་ཆད་བཞག་ནས་གཤིན་ཡུལ་དང་མནའ་འབྲེལ་བྱས་ཡོད་པས། ཉེས་ཆད་ཀྱི་ལྕག་ཚན་གྱིས་གཞུ་དུས་ང་ཚོའི་སྟེང་ལ་ཕོག་མི་སྲིད་དེ། གང་ལ་ཞེ་ན། ང་ཚོ་རྫུན་གྱི་འོག་ཏུ་ཡིབ་ནས་སྡོད་པ་དང་རྫུས་མས་འགེབས་སྲུང་བྱེད་ཅེས་པའོ། །
ISA 28:16 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་ཤིག བདག་གིས་ཛ་ཡན་ལ་རྨང་རྡོ་བརྟན་པོ་ཞིག་བཞག་ཡོད། རྡོ་དེ་ནི་ཚོད་ལྟ་བྱས་པའི་རྡོ་དང་རིན་པོ་ཆེའི་ཟུར་རྡོ་ཡིན་པས། དེ་ལ་དད་ཅིང་བརྟེན་མཁན་རྣམས་སེམས་འཚབ་པར་མི་འགྱུར།
ISA 28:17 བདག་གིས་དྲང་བདེན་ཚད་གཞི་དང་། བདེན་པ་ཉིད་ཚད་ཐིག་ཏུ་བཟུང་སྟེ། སེར་བས་རྫུན་གྱི་སྐྱབས་གནས་ཕྱགས་ཤིང་། ཆུ་ཆེན་གྱིས་འགེབས་སྲུང་ཐམས་ཅད་འཁུར་བར་བྱའོ་ཞེས་གསུངས།
ISA 28:18 ཁྱོད་རྣམས་ཀྱིས་འཆི་བ་དང་བཞག་པའི་ཁ་ཆད་བརླག་པར་འགྱུར་ཞིང་། ཁྱོད་རྣམས་ཀྱིས་གཤིན་ཡུལ་དང་བཞག་པའི་ཆོད་དོན་ཡང་མེད་པར་གཏོང་། ཉེས་ཆད་ཀྱི་ལྕག་ཚན་གྱིས་གཞུ་དུས་ཁྱོད་རྣམས་རྡོག་བརྫིས་གཏོང་བར་འགྱུར།
ISA 28:19 དེ་རྒྱུ་དུས་ཁྱོད་རྣམས་འཁྲིད་ཅིང་། སྔ་དྲོ་རེ་རེ་དང་ཉིན་མཚན་རེ་རེ་བཞིན་དུ་དེ་རྒྱུ་ཞིང་། མི་ཡིས་དེ་རྒྱུ་བ་རྟོགས་ན་དངངས་སྐྲག་སྐྱེ་བར་འགྱུར།
ISA 28:20 ཅི་ལ་ཞེ་ན། མལ་ཁྲི་ཆུང་དྲགས་པས་ཁྱོད་ཀྱི་ལུས་པོ་བརྐྱང་སྐུམ་མི་ནུས་ཤིང་། ཉལ་ཐུལ་ཆུང་དྲགས་པས་ལུས་པོ་ཡོངས་སུ་འགེབས་མི་ཐུབ།
ISA 28:21 དེ་ཡང་ཉིད་ཀྱི་འཕྲིན་ལས་མཛད་པ་དང་། ཡ་མཚན་ཅན་གྱི་འཕྲིན་ལས་མཛད་དེ་ཁོང་གི་ངོ་མཚར་ཅན་གྱི་དོན་རྣམས་མཛད་པའི་ཕྱིར། དཀོན་མཆོག་ཡ་ཝཱེ་རི་བོ་ཕེ་ར་ཙིམ་ནས་བཞེངས་པ་བཞིན་དུ་ཡར་བཞེང་ཞིང་། གིབ་ཡོན་ལུང་པར་ཐུགས་ཁྲོས་པ་བཞིན་དུ་ཁྲོ་བར་འགྱུར།
ISA 28:22 ཁྱོད་རྣམས་བསྡམས་པའི་ཐག་པ་དམ་པོར་མི་འགྱུར་བའི་ཆེད་དུ། ད་ལྟ་ཁྱོད་རྣམས་ཀྱིས་སྐུར་བ་འདེབས་མི་རུང་སྟེ། ཅི་ལ་ཞེ་ན། དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ས་གཞི་ཐམས་ཅད་མེད་པར་གཏོང་བའི་ཐུགས་དགོངས་བཅངས་ཡོད་པ་ངས་ཐོས་སོ། །
ISA 28:23 ཁྱོད་རྣམས་ཀྱིས་རྣ་བ་གཏད་དེ་བདག་གི་སྐད་ལ་ཉོན་དང་། སེམས་བསམ་པས་བདག་གི་བཀའ་ལ་ཉོན་ཅིག
ISA 28:24 ཞིང་པས་རྟག་པར་ལོག་རྒྱག་གམ། ཁོས་རྒྱུན་ཆད་མེད་པར་རང་གི་ཞིང་སར་ཤལ་འདྲུད་དམ།
ISA 28:25 ས་ཞིང་སྙོམས་པ་ཙམ་གྱིས་དེས་གོ་སྙོད་དང་བྲོ་རྫས་མཚོན་གྱི་འཁོར་ལོ་འདེབས་ཤིང་། རིམ་གྱིས་གྲོ་འདེབས་པ་དང་། གཏན་འཁེལ་བྱས་པའི་གནས་སུ་ནས་བཏབ་སྟེ་ཞིང་ཚིགས་ཁར་སོ་བ་འདེབས་པ་མ་ཡིན་ནམ།
ISA 28:26 ཅིའི་ཕྱིར་ཞེ་ན། ཁོའི་དཀོན་མཆོག་གིས་ཁོ་ལ་ཞལ་གདམས་མཛད་དེ། ཁོ་ལ་ཡང་དག་པའི་བློ་གྲོས་བསྩལ་ཏོ། །
ISA 28:27 གོ་སྙོད་རྡུང་དུས་སྦར་མོ་རྣོ་ངར་ཅན་མི་སྤྱོད་དེ། བྲོ་རྫས་མཚོན་གྱི་འཁོར་ལོ་བཙིར་དུས་ཀྱང་བགྲུས་འཁོར་མི་སྤྱོད་པར། དབྱུག་པས་གོ་སྙོད་དང་བྲོ་རྫས་མཚོན་གྱི་འཁོར་ལོ་རྡུང་བ་ཡིན།
ISA 28:28 བག་ལེབ་བཟོ་བའི་འབྲུ་རྡོག་ནི་འཐག་དགོས་ཤིང་། མི་སུས་ཀྱང་དེ་རྒྱུན་ནས་རྒྱུན་དུ་བརྡུང་བར་མི་བྱེད་ལ། མི་ཡིས་འཁོར་ལོ་དང་རྟ་ནི་འབྲུ་རིགས་སྟེང་དུ་བསྐོར་ཡང་དེ་འཐག་པར་མི་བྱའོ། །
ISA 28:29 འདི་ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལས་བྱུང་བ་སྟེ། ཁོང་གི་གདམས་ངག་ཡ་མཚན་ཞིང་། ཁོང་གི་ཤེས་རབ་རྒྱ་ཆེའོ། །
ISA 29:1 ཀྱེ་ཨ་རི་ཨེལ། དཱ་བིད་ཀྱིས་གཞིས་ཕབ་པའི་གྲོང་ཁྱེར་ཨ་རི་ཨེལ་ལ་ཆག་སྒོ་འབྱུང་བ་དང་། ཁྱོད་ཀྱིས་ལོ་རེ་རེར་དུས་བཞིན་དུ་དུས་ཆེན་རོལ་ཡང་།
ISA 29:2 བདག་གིས་ཨ་རི་ཨེལ་དཀའ་སྡུག་ནང་ལྷུང་དུ་བཅུག་ནས། སྡུག་བསྔལ་དང་ངུ་འབོད་ཀྱིས་ཁེངས་པའི་གྲོང་ཁྱེར་དུ་བྱས་ཏེ། བདག་གིས་དེ་ལ་ཨ་རི་ཨེལ་ཞེས་འབོད།
ISA 29:3 ངས་ཁྱོད་ཀྱི་ཕྱོགས་བཞི་ནས་དམག་སྒར་འཛུགས་ཤིང་། གྲོང་ཁྱེར་ལ་རྒོལ་བའི་ལྕོག་མཐོན་པོ་བརྩིགས་ནས་ཁྱོད་བསྐོར་བ་དང་། ཡང་འཛིང་རགས་རྣམས་བརྩིགས་ནས་ཁྱོད་ལ་རྒོལ་བར་འགྱུར།
ISA 29:4 དེ་ནས་ཁྱོད་མར་ཕབ་ཅིང་ས་འོག་ནས་སྐད་འདོན་པ་དང་། ཁྱོད་ཀྱི་སྐད་ས་རྡུལ་ལས་བྱུང་བ་བཞིན་ཤིན་ཏུ་དམའ་སྟེ། ཁྱོད་ཀྱི་སྐད་ནི་ཤི་བོའི་སྐད་བཞིན་དུ་ས་འོག་ནས་འབྱུང་ཞིང་། ཁྱོད་ཀྱི་གཏམ་ནི་ས་རྡུལ་ལས་བྱུང་བ་བཞིན་ཤུབ་ལབ་གཏོང་བར་འགྱུར།
ISA 29:5 འོན་ཀྱང་ཁྱོད་ཀྱི་དགྲ་བོའི་ཚོགས་ནི་ས་རྡུལ་ལྟར་མང་ཞིང་། བཙན་ཤུགས་སྤྱོད་པའི་མི་རྣམས་ཀྱང་རླུང་གིས་གཏོར་བའི་ཕུབ་མ་བཞིན་མང་སྟེ། དེ་ནི་སྐད་ཅིག་ཙམ་དང་གློ་བུར་ཉིད་ལ་འབྱུང་བར་འགྱུར།
ISA 29:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འབྲུག་སྒྲ་དང་ས་འགུལ། སྒྲ་ཆེན། འཁྱིལ་རླུང་། རླུང་ནག ཡོངས་རྫོགས་རྩ་མེད་གཏོང་བའི་མེ་བཅས་ཀྱིས་དེ་དག་ལ་ཆད་པ་གཅོད་པར་འགྱུར།
ISA 29:7 དུས་དེར་ཨ་རི་ཨེལ་ལ་རྒོལ་བའི་རྒྱལ་ཁབ་ཀུན་གྱི་དམག་དཔུང་སྟེ། ཨ་རི་ཨེལ་དང་དེའི་སྲུང་མཁར་ལ་རྒོལ་ཞིང་། དེ་ལ་གནོད་འཚེ་གཏོང་མཁན་ཐམས་ཅད་རྨི་ལམ་དང་མཚན་མོའི་སྣང་བ་ལྟར་འགྱུར་ཏེ།
ISA 29:8 ཡང་ལྟོ་བ་བཀྲེས་པའི་མི་ཞིག་གིས་རྨི་ལམ་དུ་ཟས་ཟ་བ་བཞིན། གཉིད་སད་དུས་སྔར་བཞིན་བཀྲེས་ལྟོགས་ཚོར་ཞིང་། ཁ་སྐོམ་པའི་མི་ཞིག་གིས་རྨི་ལམ་དུ་ཆུ་འཐུང་ཡང་། གཉིད་སད་དུས་སྔར་བཞིན་ཁ་སྐོམ་ཞིང་སེམས་ནས་ཆུ་འཐུང་འདོད་སྐྱེས། ཛ་ཡན་ལ་རྒོལ་བའི་རྒྱལ་ཁབ་ཀུན་གྱི་དམག་དཔུང་རྣམས་ཀྱང་དེ་བཞིན་ནོ། །
ISA 29:9 དེ་ཡང་ཁྱོད་རྣམས་ཧོན་འཐོར་ནས་ཧ་ལས་ཤིང་། རང་མགོ་རང་གིས་གཡོགས་ལ་རྨོངས་ཚོད་ཀྱིས་སྡོད་ཅིག ཁྱོད་རྣམས་བཟི་ཡང་རྒུན་ཆང་གིས་བཟི་བ་མིན། གོམ་ཁ་འཁྱོར་ཡང་ཆང་གར་པོས་འཁྱོར་བ་མིན།
ISA 29:10 དཀོན་མཆོག་ཡ་ཝཱེས་གཉིད་སྟུག་པོ་ཁུག་པའི་ཐུགས་ཉིད་ཁྱོད་ཀྱི་སྟེང་ལ་བླུགས་ཏེ། ཁོང་གིས་ཁྱོད་ཀྱི་མིག་སྟེ་ལུང་སྟོན་པའི་མིག་ནི་བཙུམ་པར་མཛད་པ་དང་། ཁྱོད་ཀྱི་མགོ་སྟེ་མངོན་ཤེས་པའི་མགོ་ཡང་བཀབ་པ་ཡིན།
ISA 29:11 ཁྱོད་རྣམས་ལ་མཚོན་ན་ལུང་བསྟན་དེ་ཐམས་ཅད་ནི་ཐམ་ཀ་བརྒྱབ་ཟིན་པའི་གླེགས་བམ་གྱི་གསུང་ཚིག་དང་འདྲ་སྟེ། མི་ཡིས་གླེགས་བམ་དེ་ཡི་གེ་ཤེས་མཁན་ལ་བསྟན་ནས་ན་རེ། འདི་བཀླག་རོགས་ཞུས་ཚེ། དེ་ན་རེ། འདི་ལ་ཐམ་ཀ་བརྒྱབ་ཡོད་པས་ངས་ཀློག་མི་ནུས་ཞེས་བརྗོད་ངེས།
ISA 29:12 ཡང་མི་ཡིས་གླེགས་བམ་དེ་ཡིག་རྨོངས་ཤིག་ལ་སྤྲད་དེ་ན་རེ། འདི་བཀླག་རོགས་ཞེས་ཞུས་ཀྱང་། དེས་ང་ཡིག་རྨོངས་ཡིན་ཞེས་བརྗོད་དོ། །
ISA 29:13 དཀོན་མཆོག་ཡ་ཝཱེས་འདི་སྐད་དུ། མི་སྡེ་འདི་ནི་ཁ་བཤད་ཙམ་གྱིས་བདག་དང་ཉེ་ཞིང་། ཁ་ནས་བདག་ལ་བཀུར་ན་ཡང་། ཁོ་ཚོའི་སེམས་ནི་བདག་དང་རྒྱང་ཐག་རིང་བས། ཁོ་ཚོ་བདག་ལ་གུས་ཤིང་འཇིགས་པ་ནི་མིས་བསླབས་པའི་སྲོལ་ཙམ་ཡིན།
ISA 29:14 དེ་བས། ལྟོས་ཤིག བདག་གིས་མི་སྡེ་འདི་ལ་ངོ་མཚར་གྱི་དོན་ཏེ། ངོ་མཚར་གྱི་སྟེང་ལ་ངོ་མཚར་འབྱུང་དུ་བཅུག་ནས། ཁོ་ཚོ་ཤེས་རབ་ཅན་གྱི་ཤེས་རབ་ཉམས་ཤིང་། རིག་པ་ཅན་གྱི་རིག་པ་འགེབས་པར་འགྱུར་ཞེས་གསུངས་སོ། །
ISA 29:15 རང་གི་ཇུས་འགོད་དཀོན་མཆོག་ཡ་ཝཱེ་ལ་སྦ་མཁན་རྣམས་ལ་ཆག་སྒོ་འབྱུང་། དེ་དག་གིས་ལྐོག་ནས་དོན་བསྒྲུབས་ཏེ་ན་རེ། སུས་ང་ཚོ་མཐོང་སྲིད། སུས་ང་ཚོ་ཤེས་སམ་ཞེས་པའོ། །
ISA 29:16 ཁྱོད་ཀྱིས་གནས་ལུགས་གོ་ལྡོག་སྟེ། རྫ་བཟོ་ནི་ཅི་ལྟར་འཇིམ་པ་རུ་ལྟའམ། བཟོས་པར་གྱུར་པ་ཡིས་བཟོ་མཁན་ལ། དེས་ང་མ་བཟོས། ཡང་གྲུབ་རྫས་ཀྱིས་རང་ཉིད་བཟོ་མཁན་ལ། ཁོ་ལ་བློ་རིག་མི་ལྡན་ཞེས་སྨྲ་ནུས་སམ།
ISA 29:17 ལེ་པཱ་ནོན་ས་ཞིང་གཤིན་པོ་རུ་གྱུར་ཏེ། ས་ཞིང་གཤིན་པོ་དེ་ནགས་ཚལ་དུ་རྩི་བ་ནི་དུས་ཚོད་ཐུང་ཐུང་ཞིག་མ་ཡིན་ནམ།
ISA 29:18 ཉིན་མོ་དེར་འོན་པས་གླེགས་བམ་སྟེང་གི་གསུང་ཚིག་རྣམས་ཐོས་ཤིང་། ལོང་བའི་མིག་གིས་མུན་པ་དང་སྨག་རིམ་ཁྲོད་ནས་མཐོང་བར་འགྱུར།
ISA 29:19 ཉམ་ཐག་རྣམས་ཀྱིས་དཀོན་མཆོག་ཡ་ཝཱེའི་ནང་དུ་དགའ་སྤྲོ་རྙེད་ཅིང་། འཇིག་རྟེན་གྱི་དབུལ་ཕོངས་རྣམས་ཀྱང་ཡེས་ར་ཨེལ་གྱི་དམ་པའི་ཕྱིར་དུ་དགའ་བར་འགྱུར།
ISA 29:20 ཅི་ལ་ཞེ་ན། གདུག་རྩུབ་ཅན་རྣམས་མི་ལུས་ཤིང་འཕྱ་དམོད་བྱེད་མཁན་རྣམས་ཀྱི་རྒྱུན་ཆད་ཅིང་། ངན་སྤྱོད་བྱེད་འདོད་པ་ཐམས་ཅད་ཚར་གཅོད་བྱེད་པར་འགྱུར།
ISA 29:21 དེ་ཚོས་ཚིག་གཅིག་གིས་མི་ལ་སྐྱོན་འཛུགས་ཤིང་། མཁར་སྒོ་ནས་ཁྲིམས་གཅོད་མཁན་དག་ལ་རྙི་བཙུགས་ནས། གཞི་རྟེན་མེད་པའི་དོན་གྱིས་མི་དྲང་བདེན་ཅན་ལ་སྙོན་འཛུགས་པའོ། །
ISA 29:22 དེ་བས། སྔར་ཨབ་ར་ཧམ་སྐྱོབ་མཁན་གྱི་དཀོན་མཆོག་ཡ་ཝཱེས་ཡ་ཀོབ་ཀྱི་ཁྱིམ་རྒྱུད་ལ་གཟིགས་ནས་འདི་སྐད་དུ། ད་ཕྱིན་ཆད་ཡ་ཀོབ་ཁ་སྐྱེངས་པར་མི་འགྱུར་ཞིང་། གདོང་ཡང་སྐྱ་བོར་མི་འགྱུར།
ISA 29:23 གང་ལ་ཞེ་ན། བདག་གི་ཕྱག་གིས་མཛད་པའི་རང་གི་བུ་རྒྱུད་ཁོའི་ནང་དུ་ཡོད་པ་ཁོས་མཐོང་ཚེ། དེ་དག་གིས་ངའི་མིང་ལ་བསྟོད་ཅིང་། ཡ་ཀོབ་ཀྱི་དམ་པ་ཁོ་ནར་བཀུར་ལ། ཡེས་ར་ཨེལ་གྱི་དཀོན་མཆོག་ལའང་གུས་ཤིང་འཇིགས་པར་འགྱུར།
ISA 29:24 སེམས་འཐོམས་པ་རྣམས་ཀྱིས་བདེན་དོན་རྟོགས་ཤིང་། སྡུག་སྐད་འདོན་པ་རྣམས་ཀྱིས་བཀའ་སློབ་ལེན་པར་འགྱུར་ཞེས་གསུངས་སོ། །
ISA 30:1 དེ་ཡང་དཀོན་མཆོག་ཡ་ཝཱེས་འདི་སྐད་དུ། ངོ་ལོག་པའི་བུ་རྒྱུད་འདི་དག་ལ་ཆག་སྒོ་འབྱུང་། དེ་ཚོས་བདག་གི་ཐུགས་དགོངས་བཞིན་མ་ཡིན་པའི་གྲོས་བཏབ་ནས། བདག་གི་ཐུགས་ཉིད་ལས་བྱུང་བ་མ་ཡིན་པར་དེ་དག་གིས་ཆིངས་ཡིག་བཞག་པས་སྡིག་པའི་ཐོག་ལ་སྡིག་པ་བྱས།
ISA 30:2 དེ་ཚོས་བདག་ལ་མ་ཞུས་པར་ཨེ་ཅིབ་ཡུལ་དུ་སོང་ཞིང་། ཕཱར་ཨོལ་གྱི་སྐྱབས་འོག་ཏུ་བྲོས་ནས་ཨེ་ཅིབ་པའི་གྲིབ་བསིལ་ལ་རྒྱབ་རྟེན་བཅོལ།
ISA 30:3 དེ་བས་ཕཱར་ཨོལ་གྱི་སྐྱབས་ནི་ཁྱོད་ཅག་གི་ངོ་ཚ་དང་། ཨེ་ཅིབ་ཀྱི་གྲིབ་བསིལ་ལ་རྒྱབ་རྟེན་བཅོལ་བ་ནི་ཁྱོད་ཅག་གི་ཞབས་འདྲེན་དུ་འགྱུར།
ISA 30:4 དེའི་འགོ་དཔོན་རྣམས་ཚོ་ཨན་ལ་ཡོད་ཅིང་། དེའི་ཕོ་ཉ་རྣམས་ཧ་ནེ་ རུ་སླེབས་ཀྱང་།
ISA 30:5 ཁོ་ཚོ་ལ་ཕན་ཐོགས་ཅི་ཡང་མེད་པའི་འབངས་རྣམས་ཀྱི་ཕྱིར་དུ་ཁོ་རྣམས་ངོ་ཚ་བར་འགྱུར་ཞིང་། འབངས་དེ་དག་ལས་ཕན་ཐོགས་དང་རོགས་རམ་མ་བྱུང་བར། ངོ་ཚ་དང་བརྙས་བཅོས་ཐོན་ནོ་ཞེས་གསུངས་སོ། །
ISA 30:6 དེ་ཡང་དཀོན་མཆོག་ཡ་ཝཱེའི་ནེ་གུབ་ཡུལ་གྱི་གཅན་གཟན་སྐོར་གྱི་བཀའ་ལུང་ནི་འདི་ལྟ་སྟེ། ཁོ་ཚོས་རང་རང་གི་རྒྱུ་ནོར་བོང་བུའི་རྒྱབ་དང་། རྔ་མོང་གི་སྟེང་ལ་བཀལ་ནས་ཕོ་སེང་དང་མོ་སེང་། དུག་སྦྲུལ་དང་འཕུར་སྐྱོད་བྱེད་པའི་སྦྲུལ་གཟུགས་བཅས་ཐོན་པའི་དཀའ་སྡུག་ཅན་གྱི་ས་ཆ་བརྒྱུད་དེ། ཁོ་ཚོ་ལ་ཕན་མི་ཐོགས་པའི་མི་སྡེའི་ཕྱོགས་སུ་ཕྱིན།
ISA 30:7 ཨེ་ཅིབ་པའི་རོགས་རམ་ནི་དོན་མེད་དང་སྟོང་པ་ཡིན་པས། བདག་གིས་དེ་ལ་ཅི་ཡང་མི་བྱེད་པའི་ར་ཧབ་ཅེས་བཏགས་པ་ཡིན།
ISA 30:8 ཕྱིས་འབྱུང་དང་དུས་གཏན་གྱི་བདེན་དཔང་བྱེད་ཕྱིར། ད་ཁྱོད་སོང་ལ་དེ་དག་གི་མདུན་དུ་བཀའ་འདི་རྡོ་ཐོག་ཏུ་རྐོས་དང་། གླེགས་བམ་སྟེང་དུ་ཕྲིས་ཤིག
ISA 30:9 ཅི་ལ་ཞེ་ན། དེ་ཚོ་ནི་ངོ་ལོག་པའི་མི་སྡེ་དང་། བློ་མི་དཀར་བའི་བུ་རྒྱུད། དཀོན་མཆོག་ཡ་ཝཱེའི་བཀའ་ལ་མི་མཉན་པའི་བུ་རྒྱུད་ཡིན་ནོ། །
ISA 30:10 དེ་ནས་ཁོ་ཚོས་མངོན་ཤེས་པ་རྣམས་ལ་ན་རེ། ཁྱོད་རྣམས་ཀྱིས་ད་ནི་ཞལ་གཟིགས་ལ་མ་བལྟ་ཞེས་དང་། ལུང་སྟོན་པ་དག་ལ་ན་རེ། ཁྱོད་རྣམས་ཀྱིས་ད་ནས་ངེད་ཅག་ལ་ལུང་བསྟན་བདེན་པ་མི་སྨྲ་བར་གཏམ་སྙན་པོ་དང་། ལུང་བསྟན་རྫུན་མ་སྨྲ་དགོས།
ISA 30:11 ཁྱོད་རྣམས་དྲང་ལམ་དང་འབྲལ་ཞིང་བདེན་པའི་ལམ་ནས་གཟུར་ཏེ་ངེད་རྣམས་ཀྱི་དྲུང་དུ་ཡེས་ར་ཨེལ་གྱི་དམ་པ་ཉིད་མ་གླེང་ཞིག་ཅེས་པའོ། །
ISA 30:12 དེ་བས་ཡེས་ར་ཨེལ་གྱི་དམ་པ་ཉིད་ཀྱིས་འདི་སྐད་དུ། ཁྱོད་རྣམས་ཀྱིས་བཀའ་འདི་དོར་ཅིང་བརྙས་བཅོས་གཉའ་གནོན་དང་གཡོ་སྒྱུ་ལ་བརྟེན་པས།
ISA 30:13 སྡིག་པ་འདི་ཁྱོད་རྣམས་ལ་མཚོན་ན་སེར་ཁ་ཡོད་པ་དང་ཕྱིར་འབུར་བ། རྡིབ་ལ་ཉེ་བའི་རྩིག་པ་ཞིག་དང་འདྲ་བར་སྐད་ཅིག་ཙམ་ལ་ལོག་པར་འགྱུར།
ISA 30:14 རྩིག་པ་དེ་ལོག་པ་ནི་རྫ་མཁན་གྱི་རྫ་ཆས་བཅག་པ་བཞིན་དྲག་རྩུབ་ངང་རྩ་བ་ནས་བཅག་པ་དང་། ཐ་ན་དེའི་ཆག་དུམ་ནང་དུ་ཐབ་ལས་མེ་ལེན་པ་དང་ཆུ་རྫིང་ལས་ཆུ་ལེན་བྱེད་གཅིག་ཀྱང་མ་རྙེད་དོ་ཞེས་གསུངས་སོ། །
ISA 30:15 ཡེས་ར་ཨེལ་གྱི་དམ་པ་ཉིད་དེ་གཙོ་བོ་ཡ་ཝཱེས་འདི་སྐད་དུ། ཁྱོད་རྣམས་ལ་ཐར་པ་ཐོབ་པ་ནི་འགྱོད་བཤགས་དང་ངལ་གསོའི་ཕྱིར་ཡིན་ལ། ཁྱོད་རྣམས་ལ་སྟོབས་ཤུགས་ཐོབ་པ་ནི་ཞི་བདེ་དང་དད་པའི་ཕྱིར་ཡིན་ཡང་། ཁྱོད་རྣམས་དེ་ལ་མ་འཐད་པར།
ISA 30:16 ཁྱོད་རྣམས་ན་རེ། མི་དགོས་ལ་ངེད་རྣམས་རྟ་ལ་ཞོན་ནས་བྲོས་ཆོག་ཅེས་སྨྲས་ནས་འབྲོ་ཞིང་། ཡང་ཁྱོད་རྣམས་ན་རེ། ངེད་རྣམས་རྟ་འགྲོས་མར་ཞོན་དགོས་ཞེས་པས་ཁྱོད་ཅག་གི་རྗེས་འདེད་མཁན་རྣམས་ཀྱང་ཇེ་མགྱོགས་སུ་གཏོང་བར་འགྱུར།
ISA 30:17 དགྲ་བོ་གཅིག་གིས་ཁྱོད་ལ་འཇིགས་བསྐུལ་ན་མི་ཆིག་སྟོང་འབྲོ་བ་དང་། དགྲ་བོ་ལྔ་ཡིས་ཁྱོད་ལ་འཇིགས་བསྐུལ་ན་ཁྱོད་རྣམས་ལས་མང་ཤོས་འབྲོ་བར་འགྱུར་ཞིང་། ཐ་ན་ཁྱོད་ཀྱི་ཤུལ་དུ་ལུས་པ་དེ་ནི་རི་རྩེའི་དར་ཤིང་དང་དེའུ་འབུར་སྟེང་གི་དར་ཆ་བཞིན་ཡིན་པར་འགྱུར།
ISA 30:18 དེ་བས་དཀོན་མཆོག་ཡ་ཝཱེས་ཁྱོད་རྣམས་ལ་བསྒུགས་ནས་གཟིགས་སྐྱོང་མཛད་ཅིང་། ཁོང་གིས་ཁྱོད་ལ་ཐུགས་རྗེས་གཟིགས་ནས་ཡར་བཞེང་བར་འགྱུར། གང་ལ་ཞེ་ན། དཀོན་མཆོག་ཡ་ཝཱེ་ནི་དྲང་བདེན་ཅན་གྱི་དཀོན་མཆོག་ལགས་པས། ཁོང་ལ་སྒུག་མཁན་ཐམས་ཅད་བདེ་བར་འགྱུར་རོ། །
ISA 30:19 ཀྱེ་ཛ་ཡན་གྱི་འབངས་མི་དང་། ཡེ་རུ་སཱ་ལེམ་གྱི་ཡུལ་མི་རྣམས། ཁྱོད་རྣམས་ཡང་བསྐྱར་ངུ་བར་མི་འགྱུར། ཁྱོད་ཀྱི་སྐྱབས་ཞུ་བའི་སྐད་ཀྱི་ཕྱིར་ཁོང་གིས་ཁྱོད་ལ་ཐུགས་རྗེས་གཟིགས་ཤིང་། ཁོང་གིས་གསན་ནས་ཁྱོད་ལ་བཀའ་ལན་གནང་ངེས།
ISA 30:20 དཀོན་མཆོག་ཡ་ཝཱེས་ཁྱོད་ཀྱི་ཟས་སུ་དཀའ་སྡུག་དང་། སྡུག་བསྔལ་གྱི་ཆུ་ཁྱོད་ལ་བཏུང་བར་མཛད་ནའང་། ཁྱོད་ཀྱི་སློབ་དཔོན་གྱིས་རང་ཉིད་སྦ་བར་མི་འགྱུར་ཞིང་། ཁྱོད་ཀྱིས་དངོས་སུ་རང་གི་སློབ་དཔོན་མཇལ་བར་འགྱུར།
ISA 30:21 ཁྱོད་གར་འགྲོ་འདིར་འགྲོ་མི་ཤེས་པའི་ཚེ། འདི་ནི་དྲང་ལམ་ཡིན་ལ་འདིའི་ནང་དུ་རྒྱུ་དགོས་ཞེས་རང་གི་རྒྱབ་ཕྱོགས་ནས་བཀའ་ཞིག་ཁྱོད་ཀྱིས་ཐོས་པར་འགྱུར།
ISA 30:22 བཙོག་པར་བཟོས་པའི་དངོས་པོ་བཞིན་དུ། ཁྱོད་ཀྱིས་དངུལ་གྱིས་ཤན་པའི་རང་གི་སྐུ་འདྲ་དང་། གསེར་ཆུ་བྱུགས་པའི་སྐུ་འདྲ་བླུག་མ་རྣམས་འདོར་ཞིང་། ཡང་དེ་དག་ལ་ཕར་སོང་ཞིག་ཅེས་བརྗོད་པར་བྱའོ། །
ISA 30:23 ཁྱོད་ཀྱིས་སའི་ནང་དུ་བཏབ་པའི་ས་བོན་ལ་ཁོང་གིས་ཆར་བ་གནང་ཞིང་། ས་ལས་ཐོན་པའི་ཁྱོད་ཀྱི་འབྲུ་རིགས་ནི་ཕུན་སུམ་ཚོགས་ཤིང་བཅུད་དང་ལྡན་པར་མཛད། ཉིན་མོ་དེ་ལ་ཁྱོད་ཀྱི་ཕྱུགས་ཁྱུས་ཁོད་ཡངས་པོའི་སྤང་ཐང་ནས་རྩྭ་བཟའ་བར་འགྱུར།
ISA 30:24 ཁྱེམ་དང་ཚེབ་ཀྱིས་རླུང་ལ་འཕྱར་བའི་རྩྭ་སྟེ། ཞིང་འདེབས་པའི་བ་གླང་དང་བོང་བུས་ཚྭ་ལྡན་གཟན་རྩྭ་དེ་བཟའ་བར་འགྱུར།
ISA 30:25 གསོད་གཅོད་ཀྱི་ཉིན་མོ་དང་ལྕོག་མཁར་རྣམས་སར་ལོག་པའི་དུས་སུ། རི་མཐོན་པོ་རེ་རེ་དང་དེའུ་འབུར་སྟེང་དུ་ཆུ་ཕྲན་ལང་ལོང་དུ་འབབ་པར་འགྱུར།
ISA 30:26 དཀོན་མཆོག་ཡ་ཝཱེས་ཉིད་ཀྱི་རྡུང་རྡེག་ལས་མི་སྡེ་ལ་བཏོད་པའི་རྨ་ཁ་བསྡམས་ནས། དེ་དག་གི་རྨ་ཤུལ་གསོ་བའི་ཉིན་མོར། ཟླ་འོད་ནི་ཉི་འོད་ལྟར་འགྱུར་ཞིང་། ཉི་འོད་ལྡབ་བདུན་དུ་གྱུར་ནས་ཉིན་མོ་བདུན་གྱི་འོད་དང་འདྲའོ། །
ISA 30:27 ཡང་ལྟོས་དང་། དཀོན་མཆོག་ཡ་ཝཱེའི་མཚན་ནི་རྒྱང་རིང་ནས་སླེབས་ཏེ། ཁོང་ཐུགས་ཁྲོས་ཤིང་དུ་བ་སྟུག་པོ་འཕྱུར་བ་དང་། ཁོང་གི་ཞལ་ལ་ཁྲོ་བས་ཁེངས་ཤིང་། ལྗགས་ནི་ཡོངས་རྫོགས་རྩ་མེད་གཏོང་བའི་མེ་དང་འདྲ།
ISA 30:28 ཁོང་གི་དབུགས་ནི་གཙང་ཆུ་རྒྱས་ནས་མཇིང་པར་སླེབས་པ་བཞིན་དང་། ཚར་དུ་གཅོད་པའི་ཁྲོལ་ཚགས་ཀྱིས་མི་རིགས་རྣམས་གཙང་མར་ཚགས་ཤིང་། ཡང་མི་དེ་དག་གི་ཁ་ནང་དུ་རང་ཉིད་ལམ་ལོག་ཏུ་འཁྲིད་པའི་སྲབ་འཇོག་པར་འགྱུར།
ISA 30:29 དེ་ནས་ཁྱོད་ཅག་གིས་དམ་པའི་དུས་ཆེན་སྲུང་བའི་མཚན་མོ་བཞིན་གླུ་ལེན་ཞིང་། གླིང་བུ་འབུད་བཞིན་འགྲོ་བའི་མི་ནི་དཀོན་མཆོག་ཡ་ཝཱེའི་རི་བོ་དང་། ཡེས་ར་ཨེལ་གྱི་བྲག་རྡོའི་གམ་དུ་ཆས་པ་བཞིན་ཁྱོད་རྣམས་ཀྱི་སེམས་སྤྲོ་བར་འགྱུར།
ISA 30:30 དཀོན་མཆོག་ཡ་ཝཱེས་ཉིད་ཀྱི་དབང་དང་ལྡན་པའི་གསུང་སྐད་མི་རྣམས་ལ་ཐོས་སུ་བཅུག་སྟེ། ཐུགས་ཁྲོ་དང་ཐམས་ཅད་རྩ་མེད་གཏོང་བའི་མེ་ལྕེ་དང་། དྲག་ཆར་དང་རླུང་དམར། སེར་བ་བཅས་ཀྱི་ནང་དུ་ཁོང་གི་དཔུང་ངར་རྒྱངས་པ་མི་ལ་སྟོན་པར་བྱའོ། །
ISA 30:31 ཨ་སུར་པ་དཀོན་མཆོག་ཡ་ཝཱེའི་གསུང་སྐད་ཀྱི་ཕྱིར་འཇིགས་ཤིང་། དཀོན་མཆོག་ཡ་ཝཱེས་དབྱུག་པ་ཡིས་དེ་དག་ལ་རྡུང་བར་འགྱུར།
ISA 30:32 དཀོན་མཆོག་ཡ་ཝཱེས་ཉེས་ཆད་ཀྱི་དབྱུག་པས་དེ་དག་གི་སྟེང་ལ་བསྣུན་ཞིང་། རྡུང་ཐེངས་རེ་ལ་སིལ་རྔ་དང་པི་ཝང་གི་སྒྲ་ཡོད་པ་དང་། དཀོན་མཆོག་ཡ་ཝཱེས་འཐབ་པའི་དུས་སུ་ཕྱག་གཡུགས་ནས་དེ་དག་ལ་རྒོལ་བར་བྱའོ། །
ISA 30:33 ཐོ་ཕེད་ཀྱི་འབར་བའི་མེ་དེ་སྔ་མོ་ནས་གྲ་སྒྲིག་བྱས་ཟིན་ལ། དེ་ནི་རྒྱལ་པོའི་དོན་དུ་གྲ་སྒྲིག་བྱས་ཤིང་། དེའི་ནང་དུ་མེ་དང་བུད་ཤིང་སྤུངས་ཡོད་པས་རྒྱ་ཆེ་ཞིང་གཏིང་ཟབ་ལ། དཀོན་མཆོག་ཡ་ཝཱེའི་དབུགས་ནི་མེ་འབར་བའི་མུ་ཟིའི་ཆུ་རྒྱུན་དང་འདྲ་བར་དེ་ལ་མེ་སྦར་བར་བྱའོ། །
ISA 31:1 ཨེ་ཅིབ་ཡུལ་དུ་མར་སོང་ནས་སྐྱབས་ཞུས་ཏེ། རྟ་དང་ཤིང་རྟ་མང་པོར་བརྟེན་ཞིང་། སྐྱ་དམག་སྟོབས་ཆེན་རྣམས་ལ་བརྟེན་པ་ལས་ཡེས་ར་ཨེལ་གྱི་དམ་པ་ཉིད་ལ་རེ་བར་མི་བྱ་སྟེ། དཀོན་མཆོག་ཡ་ཝཱེར་སྐྱབས་ཀྱང་མི་ཞུ་བ་རྣམས་ལ་ཆག་སྒོ་འབྱུང་།
ISA 31:2 དཀོན་མཆོག་ཡ་ཝཱེ་ལ་ཤེས་རབ་མངའ་བས་ཁོང་གིས་ཆག་སྒོ་འབེབ་པ་ལས་ཉིད་ཀྱི་བཀའ་གསུང་ཕྱིར་མི་ཟློག་ཅིང་། ངན་པའི་ཁྱིམ་དང་གཞན་རྣམས་སྡིག་ཉེས་ལ་འཇུག་མཁན་དག་ལ་རྒོལ་དུ་ཁོང་ཉིད་ཡར་བཞེང་བར་འགྱུར།
ISA 31:3 ཨེ་ཅིབ་པ་རྣམས་མི་ཡིན་པ་ལས་དཀོན་མཆོག་ནི་མ་ཡིན། དེ་དག་གི་རྟ་རྣམས་ཤ་ཁྲག་གི་ཕུང་བོ་ཡིན་པ་ལས་ཐུགས་ཉིད་ནི་མ་ཡིན། དཀོན་མཆོག་ཡ་ཝཱེས་ཕྱག་བརྐྱངས་པ་ཙམ་གྱིས་མི་སྐྱོབ་མཁན་རྣམས་འགྱེལ་ཞིང་། སྐྱབས་ཐོབ་མཁན་རྣམས་ཀྱང་སར་ལྷུང་ནས་མཉམ་གཅིག་ཏུ་མེད་པར་འགྱུར།
ISA 31:4 དཀོན་མཆོག་ཡ་ཝཱེས་བདག་ལ་འདི་སྐད་དུ། རི་དྭགས་རྒྱལ་པོ་དང་སེང་དར་གྱིས་རྔོན་ཤ་ཟིན་པས་ངར་སྐད་སྒྲོག་ཅིང་། ལུག་རྫི་མང་པོ་རང་ལ་རྒོལ་བར་བསྡུས་ཀྱང་། དེ་དག་ཁོ་ཚོའི་སྐད་སྒྲ་ལ་མི་འཇིགས་ཤིང་། ཁོ་ཚོའི་ཅ་ཅོའི་རྐྱེན་གྱིས་འཇབ་པར་ཡང་མི་འགྱུར་བ་བཞིན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཡང་མར་རི་བོ་ཛ་ཡན་དང་དེའི་རི་སྒང་ཀུན་ལ་བྱོན་ནས་འཐབ་པར་འགྱུར་ཞེས་གསུངས།
ISA 31:5 བྱིའུ་དག་གིས་གཤོག་པ་བརྡབས་ནས་རང་གི་བྱ་ཕྲུག་སྲུང་བ་བཞིན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཀྱང་ཡེ་རུ་སཱ་ལེམ་བསྲུང་བར་འགྱུར། ཁོང་གིས་བསྲུང་ཞིང་སྐྱོབ་པ་དང་དེའི་སྟེང་ནས་བརྒལ་ཏེ་སྐྱོབ་པར་བྱའོ་ཞེས་གསུངས་སོ། །
ISA 31:6 ཀྱེ་ཡེས་ར་ཨེལ་པ་རྣམས། ཁྱོད་རྣམས་ཕྱིར་ལོག་ཅིག ཁྱོད་ཚོས་རྩ་བ་ནས་དོར་བའི་དཀོན་མཆོག་ཡ་ཝཱེའི་ཕྱོགས་སུ་ཕྱིར་ལོག་པར་གྱུར་ཅིག
ISA 31:7 ཉིན་མོ་དེ་ལ་མི་རེ་རེས་རང་གི་ལག་པས་བཟོས་པ་དང་། རང་ཉིད་སྡིག་པར་སྦྱར་བའི་གསེར་སྐུ་དང་དངུལ་སྐུ་རྣམས་འདོར་ངེས་ཡིན་ནོ། །
ISA 31:8 སྐབས་དེར་ཨ་སུར་པ་རྣམས་མི་ཡི་མིན་པའི་རལ་གྲིའི་འོག་ཏུ་འགྱེལ་བར་འགྱུར་ཞིང་། ཡང་མི་ཡི་མིན་པའི་རལ་གྲིས་ཁོ་རྣམས་ཁྱུར་མིད་གཏོང་བ་དང་། ཁོ་ཚོ་རལ་གྲིའི་ཁ་ནས་ཐར་བར་མི་འགྱུར་ལ། དེ་དག་གི་གཞོན་སྐྱེས་ཚོས་སྡུག་ལས་བྱེད་དགོས།
ISA 31:9 ཁོ་ཚོའི་བྲག་རྡོ་ནི་དངངས་སྐྲག་གིས་འགྱེལ་བར་འགྱུར་ཞིང་། ཁོ་ཚོའི་འགོ་དཔོན་རྣམས་ཀྱིས་ཡེས་ར་ཨེལ་གྱི་རུ་དར་མཐོང་ནས་འདྲོག་པར་འགྱུར་ཞེས་ཛ་ཡན་དུ་མེ་དང་། ཡེ་རུ་སཱ་ལེམ་དུ་མེ་ཐབ་ཡོད་པའི་དཀོན་མཆོག་ཡ་ཝཱེས་དེ་སྐད་ཅེས་གསུངས་སོ། །
ISA 32:1 ལྟོས་དང་། རྒྱལ་པོ་ཞིག་གིས་དྲང་བདེན་ངང་ནས་སྲིད་སྐྱོང་ཞིང་། འགོ་དཔོན་རྣམས་ཀྱིས་ཉེ་རིང་མེད་པར་ཁྲིམས་སྐྱོང་བར་འགྱུར།
ISA 32:2 མི་ཞིག་ནི་རླུང་འཚུབ་ལ་བྱོལ་ས་དང་དྲག་ཆར་ལ་གཡོལ་ས། སྐམ་སའི་བཞུར་རྒྱུན། ཐན་པ་ཆེ་བའི་ཡུལ་ལ་བྲག་རི་ཆེན་པོའི་གྲིབ་བསིལ་ལྟ་བུར་འགྱུར།
ISA 32:3 དུས་དེར་མཐོང་ནུས་པའི་མིག་ནི་མི་བཙུམ་ལ། ཐོས་ནུས་པའི་རྣ་བས་ཀྱང་མཉན་པར་འགྱུར།
ISA 32:4 ངང་ཐུང་སེམས་ཀྱིས་ཤེས་བྱ་རྟོགས་ཤིང་། ལྕེ་དིག་ངག་ནས་སྐད་ཆ་གསལ་པོར་སྨྲ་ཐུབ་པར་འགྱུར།
ISA 32:5 དེ་ནས་བླུན་པོ་རྣམས་ཡ་རབས་སུ་མི་འབོད་ལ། ཁྲེལ་མེད་དག་ལ་ཆེ་བསྟོད་ཀྱང་མི་བྱེད།
ISA 32:6 གང་ལ་ཞེ་ན། བླུན་པོ་རྣམས་ཀྱིས་བླུན་གཏམ་སྨྲ་ཞིང་། སེམས་སུ་སྡིག་པའི་ལས་རྣམས་དྲན་ཏེ་དཀོན་མཆོག་ཁྱད་དུ་གསོད་པའི་དོན་ལ་གོམས་པ་དང་། འཆལ་གཏམ་སྨྲས་ནས་དཀོན་མཆོག་ཡ་ཝཱེ་ལ་རྒོལ་ཞིང་། བཀྲེས་ལྟོགས་ཀྱིས་མནར་བ་ཁོག་སྟོང་དུ་བསྐྱུར་བ་དང་། ཁ་སྐོམ་པའི་མི་ལ་བཏུང་བ་མི་སྤྲོད་དོ། །
ISA 32:7 ཁྲེལ་མེད་དག་གི་ཐབས་ལམ་ངན་པ་ཡིན་ཏེ། དེས་ཇུས་ངན་བརྩམས་ནས་རྫུན་གྱིས་དཀའ་སྡུག་གནས་སུ་ལྷུང་བ་རྣམས་བརླག་ཅིང་། དབུལ་ཕོངས་དག་གིས་དྲང་གཞག་བརྗོད་པའི་སྐབས་སུའང་དེས་དེ་བཞིན་སྤྱོད་པ་ཡིན།
ISA 32:8 འོན་ཀྱང་། ཡ་རབས་ཀྱིས་སྤྱོད་པ་ཡ་རབས་འཚོལ་ཞིང་། དེ་སྤྱོད་པ་ཡ་རབས་ཀྱི་ཐད་བརྟན་པོར་ཚུགས་པ་ཡིན།
ISA 32:9 ཀྱེ་ལྷོད་ལ་བབས་པའི་བུད་མེད་རྣམས། ཁྱོད་རྣམས་ཡར་ལངས་ནས་ངའི་སྐད་ལ་ཉོན་ཅིག བག་ཡངས་སུ་སྡོད་པའི་བུ་མོ་ཁྱོད་ཅག་གིས་ངའི་གཏམ་ལ་རྣ་བ་གཏོད་ཅིག
ISA 32:10 ཀྱེ་བག་ཡངས་སུ་སྡོད་པའི་བུ་མོ་རྣམས། ལོ་འཁོར་གཅིག་ལྷག་གི་རྗེས་སུ་ཁྱོད་རྣམས་དཀའ་སྡུག་དང་འཕྲད་པར་འགྱུར། ཅིའི་ཕྱིར་ཞེ་ན། རྒུན་འབྲུམ་ཤིང་ལ་འབྲས་བུ་མི་ཐོགས་ཤིང་། ལོ་ཏོག་བསྡུ་བའི་དུས་ཀྱང་འབྱུང་བར་མི་འགྱུར་རོ། །
ISA 32:11 ཀྱེ་ལྷོད་ལ་བབས་པའི་བུད་མེད་ཁྱོད་རྣམས་ཧ་ལས་པར་འགྱུར་ཞིང་། བག་ཡངས་སུ་སྡོད་པའི་བུ་མོ་ཁྱོད་ཅག་གིས་དཀའ་སྡུག་མྱང་བར་འགྱུར། གོས་རྣམས་ཕུད་ནས་གཅེར་བུར་སྡོད་ཅིང་སྐེད་པར་རྩིད་རས་དཀྲིས་ཤིག
ISA 32:12 ཁྱོད་རྣམས་ཉམས་དགའ་བའི་ས་ཞིང་དང་། འབྲས་བུ་མོད་པོ་ཐོགས་པའི་རྒུན་འབྲུམ་ཤིང་གི་དོན་དུ་བྲང་ཁོག་རྡུང་བཞིན་ངུ་བར་གྱིས་ཤིག
ISA 32:13 ངའི་འབངས་ཀྱི་ས་ལས་སྐྱེས་པའི་ཚེར་མ་དང་སྤྱང་ཚེར་གྱི་ཕྱིར་དུ་ངུ་བར་གྱིས། དགའ་སྤྲོ་ལྡན་པའི་གྲོང་ཁྱེར་དང་ཁྱིམ་སྐྱིད་པོའི་ཕྱིར་དུའང་དེ་ལྟར་བྱའོ། །
ISA 32:14 གང་ལ་ཞེ་ན། ཕོ་བྲང་རྣམས་འདོར་ཞིང་མི་ཚོགས་ཀྱིས་གང་བའི་གྲོང་ཁྱེར་ཡང་བསྐྱུར་བར་འགྱུར་ལ། རི་སྒང་དང་བྱ་རའི་ལྕོག་མཁར་ཡང་རྒྱུན་ནས་རྒྱུན་དུ་ས་ཕུག་ཏུ་གྱུར་ནས་རྐྱང་ཚོགས་དགའ་བའི་གནས་དང་ལུག་ཁྱུའི་རྩྭ་ས་རུ་འགྱུར།
ISA 32:15 དེ་ནས་སྟེང་ཕྱོགས་ནས་རང་ཅག་གི་ཐོག་ཏུ་ཐུགས་ཉིད་གནང་སྟེ། དབེན་སྟོང་ནི་ས་ཞིང་གཤིན་པོ་དང་། ས་ཞིང་གཤིན་པོ་ནགས་ཚལ་དུ་འགྱུར་དུས།
ISA 32:16 དབེན་སྟོང་དུ་དྲང་གཞག་དང་། ས་ཞིང་གཤིན་པོའི་ནང་དུ་དྲང་བདེན་གནས་པར་འགྱུར།
ISA 32:17 དྲང་བདེན་གྱི་འབྲས་བུ་ནི་ཞི་བདེ་དང་། དྲང་བདེན་གྱི་གྲུབ་འབྲས་ནི་དུས་གཏན་གྱི་ལྷིང་འཇགས་དང་བརྟན་བརླིང་ཡིན་ནོ། །
ISA 32:18 དུས་དེར་བདག་གི་འབངས་རྣམས་ཞི་བདེའི་གནས་དང་བརྟན་བརླིང་གི་གཞིས་ཀ་དང་། ཟང་ཟིང་མེད་པའི་ངལ་གསོའི་ཡུལ་རྣམས་སུ་གནས་པར་འགྱུར།
ISA 32:19 ཡིན་ཡང་དགྲ་བོའི་ཡུལ་དུ་སེར་བ་བབས་ཏེ་ཁོ་ཚོའི་ནགས་ཚལ་བརླག་ཅིང་། དེ་དག་གི་གྲོང་ཁྱེར་ནི་ས་བདེ་ཐང་བདེ་རུ་བསྒྱུར་རོ། །
ISA 32:20 ཆུ་ཀུན་གྱི་འགྲམ་དུ་ཞིང་འདེབས་པ་དང་། གླང་དང་བོང་བུ་རྣམས་དེར་རང་དབང་གིས་འཚོ་བ་ཁྱོད་རྣམས་ཅི་འདྲའི་བདེ་བ་ལ་ཨང་།
ISA 33:1 ཀྱེ་མི་ལ་གཏོར་བརླག་གཏོང་ཞིང་རང་ཉིད་བརླག་པར་མི་འགྱུར་བ་དང་། གཡོ་སྒྱུ་སྤྱོད་ཅིང་གཞན་པས་ཁྱོད་ལ་གཡོ་སྒྱུ་མི་སྤྱོད་པ་རྣམས་ལ་ཆག་སྒོ་འབྱུང་། ཁྱོད་ཀྱིས་གཏོར་བརླག་བཏང་ཚར་མ་ཐག་ཏུ་རང་ཉིད་ཀྱང་འཇིག་པར་འགྱུར་ལ། ཁྱོད་ཀྱིས་གཡོ་སྒྱུ་སྤྱོད་མཚམས་བཞག་མ་ཐག་ཏུ་རང་ལ་ཡང་གཡོ་སྒྱུ་ཐེབས་པར་འགྱུར།
ISA 33:2 ཀྱེ་དཀོན་མཆོག་ཡ་ཝཱེ་ལགས། ང་ཚོས་ཁྱེད་ལ་སྒུག་ཡོད་པས་ངེད་ཅག་ལ་ཐུགས་རྗེས་གཟིགས་སུ་གསོལ། ཞོགས་པ་རེ་རེར་ཁྱེད་ནི་ང་ཚོའི་དཔུང་པ་དང་། དཀའ་སྡུག་གི་དུས་སུ་ང་ཚོའི་མགོན་སྐྱབས་སུ་འགྱུར་བར་ཤོག
ISA 33:3 འུར་སྒྲ་ཐོས་མ་ཐག་མི་རྣམས་ཕྱོགས་བཅུར་འབྲོ་ཞིང་། ཁྱེད་ཡར་བཞེངས་དུས་མི་རིགས་རྣམས་གང་སར་འཐོར།
ISA 33:4 ཀྱེ་མི་རིགས་ཀུན། ཆ་ག་པས་འབྲུ་རིགས་སྡུད་པ་བཞིན་ཁྱོད་ཀྱི་བཅོམ་ནོར་རྣམས་ཕྱིར་ལེན་པར་འགྱུར་ཏེ། ཆ་ག་པ་ཟས་ཀྱི་ཕྱིར་དུ་བྲེལ་འཚུབ་ངང་འདུར་བ་བཞིན་མི་རྣམས་ཀྱང་བཅོམ་ནོར་སྟེང་བརྒྱུག་པར་བྱའོ། །
ISA 33:5 དཀོན་མཆོག་ཡ་ཝཱེ་མཐོ་སར་བཞུགས་པས་ཁོང་ལ་བསྟོད་བསྔགས་བརྗོད་ཅིག ཁོང་གིས་དྲང་གཞག་དང་དྲང་བདེན་གྱིས་ཛ་ཡན་ཁེངས་པར་མཛད།
ISA 33:6 ཁོང་ནི་ཁྱོད་ཀྱི་ཚེ་གཅིག་ལུས་གཅིག་གི་བརྟེན་ས་དང་། ཕུན་སུམ་ཚོགས་པའི་སྲོག་སྐྱོབ། ཤེས་རབ་དང་ཤེས་བྱ་བཅས་ལགས་པས། དཀོན་མཆོག་ཡ་ཝཱེར་གུས་ཤིང་འཇིགས་པ་ནི་ཁྱོད་ཀྱི་ནོར་བུ་རྩ་ཆེན་ཡིན་ ནོ། །
ISA 33:7 ལྟོས་དང་། དེ་དག་གི་དཔའ་རྒོད་རྣམས་ཀྱིས་སྲང་ལམ་ནས་འོ་དོད་འབོད་ཅིང་། ཞི་མཐུན་གྱི་སྐུ་ཚབ་རྣམས་སྡུག་བསྔལ་གྱིས་ཞུམ་པའོ། །
ISA 33:8 ལམ་ཆེན་རྣམས་སྟོངས་ཤིང་དེ་བརྒྱུད་ནས་འགྲོ་མཁན་མེད་པ་དང་། དགྲ་རྣམས་དམ་བཅའ་དང་འགལ་ཞིང་ཁྲིམས་མི་བརྩི་ལ། མི་ལ་བཀུར་བའང་མེད་དོ། །
ISA 33:9 ས་གཞི་མྱ་ངན་གྱིས་རྒུད་ཅིང་། ལེ་པཱ་ནོན་གནོང་ཞིང་སྐམ་པ་དང་། ཤཱ་རོན་ནི་མྱ་ངམ་ཐང་བཞིན་ཡིན་ལ། པཱ་ཤན་དང་ཀར་མེལ་གྱི་སྡོང་ལོ་རྣམས་ལྷུང་བའོ། །
ISA 33:10 དེ་ནས་དཀོན་མཆོག་ཡ་ཝཱེས་འདི་སྐད་དུ། ད་ནི་བདག་ཡར་ལང་བར་བྱའོ། །ད་ནི་བདག་དར་བར་འགྱུར་ཞིང་། ད་ནི་མི་ཡིས་བདག་ལ་བསྟོད་པར་བྱའོ། །
ISA 33:11 ཁྱོད་ཀྱི་མངལ་དུ་ཆགས་པ་ནི་ཕུབ་མ་དང་སྐྱེ་བར་འགྱུར་བ་སོག་མ་ཡིན་ཏེ། ཁྱོད་ཀྱི་དབུགས་ཀྱིས་མེ་བཞིན་རང་ཉིད་ཁྱུར་མིད་གཏོང་བར་འགྱུར།
ISA 33:12 མི་རྣམས་ནི་མེ་རུ་བསྲེགས་པའི་རྡོ་ཐལ་དང་། བྲེགས་ཟིན་པའི་ཚེར་མ་བཞིན་དུ་མེ་ལ་སྦར་བར་འགྱུར་ཞེས་གསུངས་སོ། །
ISA 33:13 ཀྱེ་རྒྱང་ཐག་རིང་བའི་མི་རྣམས། ཁྱོད་ཚོས་བདག་གིས་ཅི་བྱས་ལ་ཉོན་ཅིག ཀྱེ་ཉེ་བར་གནས་པའི་མི་རྣམས། ཁྱོད་ཚོས་བདག་གི་མཐུ་སྟོབས་ཤེས་པར་གྱིས།
ISA 33:14 ཛ་ཡན་དུ་གནས་པའི་སྡིག་ཅན་རྣམས་འཇིགས་ཤིང་། དད་པ་མེད་པའི་མི་རྣམས་འདར་ཡམ་གྱིས་བཟུང་སྟེ་ན་རེ། ང་ཚོ་ལས་སུ་ཞིག་ཡོངས་རྫོགས་རྩ་མེད་གཏོང་བའི་མེའི་ནང་དུ་སྡོད་ནུས་སམ། ང་ཚོ་ལས་སུ་ཞིག་དུས་རྟག་ཏུ་འབར་བའི་མེའི་ནང་དུ་སྡོད་ནུས་སམ་ཞེས་སྨྲའོ། །
ISA 33:15 དེ་ཡང་དྲང་པོར་སྤྱོད་ཅིང་བདེན་ཚིག་སྨྲ་བ་དང་། བཙན་འཕྲོག་བྱས་པའི་རྒྱུ་ནོར་མི་ལེན་པ། ལག་པ་གཡུགས་ནས་ལྐོག་རྔན་མི་ལེན་པ། མི་གསོད་སྐོར་གྱི་གཏམ་ལ་མི་མཉན་པ། དོན་ངན་ལ་མི་བལྟ་བ་བཅས་པ་སྟེ།
ISA 33:16 མི་འདི་ལྟ་བུ་རྣམས་ནི་མཐོ་སར་བཞུགས་ཤིང་། བྲག་རི་བརྟན་པོ་རྣམས་དེའི་སྐྱབས་གནས་ཡིན་ལ། དེ་ལ་བག་ལེབ་གནང་ཞིང་དེའི་ཆུ་ཡང་ཆད་པར་མི་འགྱུར་རོ། །
ISA 33:17 ཁྱོད་ཀྱིས་དངོས་སུ་རྒྱལ་པོའི་གཟི་བརྗིད་མཇལ་ཞིང་། མུ་མཐའ་མེད་པའི་ཡུལ་ཡང་མཐོང་བར་འགྱུར།
ISA 33:18 ཁྱོད་ཀྱི་སེམས་སུ་འདས་ཟིན་པའི་འཇིགས་སྣང་དྲན་ཏེ། རྩིས་གྲངས་ལེན་མཁན་དེ་གང་དུ་ཡོད་དམ། ཁྲལ་དངུལ་ཡང་ལྕི་འཇལ་མཁན་དེ་གང་དུ་ཡོད་དམ། བྱ་རའི་ཐོག་ཁང་བགྲང་མཁན་དེ་གང་དུ་ཡོད་དམ་ཞེས་བསམ་པར་འགྱུར།
ISA 33:19 དེ་ནས་ཁྱོད་ཀྱིས་མི་གཏུམ་དྲག་ཅན་རྣམས་ཏེ། རྟོགས་དཀའ་བའི་གཏམ་སྨྲ་མཁན་དང་། ཚིག་ལྡབ་ལྡིབ་སྨྲ་བའི་མི་རྣམས་སླར་མཐོང་བར་མི་འགྱུར།
ISA 33:20 ཁྱོད་ཀྱིས་རང་ཅག་གི་དུས་ཆེན་གཏོང་ཡུལ་ཛ་ཡན་གྲོང་ཁྱེར་ལ་ལྟོས་དང་། ཡེ་རུ་སཱ་ལེམ་ནི་ཞི་བའི་སྡོད་གནས་ཤིག་དང་། སྤོ་བར་མི་འགྱུར་བའི་གུར་མཆོག་ཅིག་ཡིན་པ་ཁྱོད་ཀྱིས་མཐོང་བར་འགྱུར། དེའི་ཕུར་པ་ནམ་ཡང་འབལ་བར་མི་འགྱུར་ལ། དེའི་ཐག་པའང་གཅོད་པར་མི་འགྱུར་རོ། །
ISA 33:21 གནས་དེར་བརྗིད་ཉམས་ལྡན་པའི་དཀོན་མཆོག་ཡ་ཝཱེ་ནི་རང་ཅག་དང་མཉམ་དུ་བཞུགས་ཤིང་། གཙང་པོ་དང་ཆུ་བོ་ཆེན་པོའི་གནས་ལྟ་བུ་ཡིན་ཞིང་། དེའི་སྟེང་དུ་བརྒྱུད་ནུས་པའི་གྲུ་དང་སྐྱ་བ་གང་ཡང་མེད་ལ། གྲུ་གཟིངས་ཀྱང་དེར་བརྒྱུད་མི་ནུས་སོ། །
ISA 33:22 དཀོན་མཆོག་ཡ་ཝཱེ་ནི་རང་ཅག་གི་ཁྲིམས་གཅོད་མཁན་དང་། ཁོང་ནི་རང་ཅག་ལ་ཁྲིམས་གནང་མཁན་དང་རང་ཅག་གི་རྒྱལ་པོ་བཅས་ཡིན་པས་ཁོང་གིས་ང་ཚོ་སྐྱོབ་ངེས་ཡིན།
ISA 33:23 ད་ལྟ་ཁྱོད་ཀྱི་གྲུ་ཐག་ལྷོད་པས་དར་ཤིང་དམ་པོར་སྡོམ་མི་ནུས་ལ། གྲུ་གཡོར་ཡང་བརྟན་པོར་བསྒྲེང་མི་ནུས་ནའང་། དུས་དེར་བཅོམ་ནོར་མང་པོ་ཁྱོད་ཚོས་བགོ་ཞིང་། ཐ་ན་ཞ་བོས་ཀྱང་བཅོམ་ནོར་ཕྲོགས་ནས་འཁྱེར་ནུས་པ་ཡིན།
ISA 33:24 དེ་ནས་ཡེས་ར་ཨེལ་གྱི་ཡུལ་མི་ཚོས་ང་ལ་ན་ཚ་ཡོད་ཅེས་སྨྲ་བར་མི་བྱ་སྟེ། གང་ལ་ཞེ་ན། ཡུལ་དེར་གནས་པའི་མི་རྣམས་ཀྱི་སྡིག་ཉེས་སེལ་བར་འགྱུར་རོ། །
ISA 34:1 ཀྱེ་མི་རིགས་ཀུན་ཉེ་བར་ཐུད་ལ་ཉོན་ཅིག ཀྱེ་མི་ཀུན་གྱིས་གཟབ་གཟབ་བྱས་ནས་ཉོན་ཅིག ས་གཞི་དང་དེ་ལ་ཁྱབ་པ་ཀུན་དང་། འཇིག་རྟེན་ཁམས་དང་དེ་ལས་བྱུང་བ་ཐམས་ཅད་ཀྱིས་ཉོན་ཅིག
ISA 34:2 གང་ལ་ཞེ་ན། དཀོན་མཆོག་ཡ་ཝཱེ་ནི་མི་རིགས་ཀུན་ལ་ཐུགས་ཁྲོས་ཤིང་། དམག་དཔུང་ཡོངས་ཀྱི་སྟེང་རབ་ཏུ་ཁྲོས་པས། ཁོང་གིས་དེ་རྣམས་རྩ་མེད་དུ་གཏོང་ཞིང་། དེ་རྣམས་ཕྱིར་གཏད་དེ་དམར་གསོད་ཐེབས་པར་འགྱུར།
ISA 34:3 ཡང་བསད་པ་རྣམས་ཕྱིར་འདོར་ཞིང་། རོ་ལས་དྲི་ངན་འཐུལ་ནས་རི་བོ་རྣམས་ཁོ་ཚོའི་ཁྲག་གིས་སྦང་བར་འགྱུར།
ISA 34:4 ནམ་མཁའི་ཚོགས་ཐམས་ཅད་ཟད་ཅིང་། ནམ་མཁའ་ཡང་ཤོག་དྲིལ་བཞིན་དུ་བསྒྲིལ་བ་དང་། རྒུན་འབྲུམ་ཤིང་ལས་ལོ་མ་འཐོར་བའམ། སེ་ཡབ་ཤིང་གི་ལོ་མ་རྙིད་པ་བཞིན་སྐར་ཚོགས་ཐམས་ཅད་སར་ལྷུང་བར་འགྱུར་རོ། །
ISA 34:5 གང་ལ་ཞེ་ན། མཁའ་དབྱིངས་ནས་བདག་གི་རལ་གྲི་ངོམས་པར་གྱུར་ཏོ། །ལྟོས་དང་། ཉེས་ཆད་གཅོད་ཕྱིར་དེ་ནི་ཨེ་དོམ་དང་། བདག་གིས་མེད་པར་བཟོ་བར་རྩོམ་པའི་མི་རྣམས་ཀྱི་སྟེང་དུ་འབབ་པར་འགྱུར།
ISA 34:6 དཀོན་མཆོག་ཡ་ཝཱེའི་རལ་གྲི་ཁྲག་གིས་བརྫིས་ཤིང་། གྲི་དེ་ལ་ཚིལ་དང་། ལུ་གུ་དང་ར་ཐུག་གི་ཁྲག ལུག་ཐུག་གི་མཁལ་ཚིལ་བཅས་ཀྱི་དབང་གིས་སྣུམ་ཆགས་ཏེ། གང་ལ་ཞེ་ན། དཀོན་མཆོག་ཡ་ཝཱེར་པོ་ཚ་རཱ་ནས་ཕྱུགས་ཟོག་བསད་དེ་དམར་མཆོད་བྱེད་པའི་དོན་ཡོད་པ་དང་། ཨེ་དོམ་ཡུལ་ནས་དམར་གསོད་ཆེན་པོ་ཞིག་ཡོད་པ་ཡིན།
ISA 34:7 གླང་རྒོད་དང་བ་ཕྲུག གླང་གོག་བཅས་ནི་དེ་དག་དང་ལྷན་དུ་འགྱེལ་ནས་དེའི་ཡུལ་ཁམས་ཁྲག་གིས་ངོམ་ཞིང་། དེའི་ས་རྡུལ་ཡང་ཚིལ་གྱིས་སྦང་བར་འགྱུར།
ISA 34:8 གང་ལ་ཞེ་ན། དཀོན་མཆོག་ཡ་ཝཱེས་ལན་འཇལ་བའི་ཉིན་མོ་ཞིག་དང་། ཛ་ཡན་གྱི་གྱོད་དོན་ལ་ཉེས་ཆད་གཅོད་པའི་ལོ་ཞིག་ཡོད་པས་སོ། །
ISA 34:9 དེ་ནས་ཨེ་དོམ་གྱི་ཆུ་བོ་རྣམས་རྡོ་སྣུམ་དུ་འགྱུར་ཞིང་། དེའི་ས་རྡུལ་དག་མུ་ཟི་རུ་འགྱུར་ངེས་ལ། དེའི་ས་གཞི་ནི་མེ་འབར་བའི་སྣུམ་སྙིགས་སུ་འགྱུར་བ་སྟེ།
ISA 34:10 མེ་དེ་ཉིན་མཚན་གཉིས་ལ་ཞི་བ་མེད་པ་དང་། དེའི་དུ་བ་ནམ་ཡང་འཕྱུར་ཏེ། མི་རབས་ནས་མི་རབས་སུ་ལུང་སྟོང་དུ་གྱུར་ནས། དུས་གཏན་དུ་དེར་བརྒྱུད་ནས་འགྲོ་མཁན་གཅིག་ཀྱང་མེད་དོ། །
ISA 34:11 འོན་ཀྱང་ཆུ་བྱ་དང་ཕག་པ་བྱི་ཐུར་གྱིས་ས་དེ་བཟུང་བ་དང་། འུག་རྒན་དང་ཕོ་རོག་གིས་དེ་རུ་ཚང་བཟོ་ཞིང་། དཀོན་མཆོག་ཡ་ཝཱེས་དེའི་སྟེང་དུ་ཐིག་སྐུད་དང་དཔྱང་ཐག་སྟོངས་ཤིང་གོ་རིམ་མེད་པ་འཐེན་པར་འགྱུར།
ISA 34:12 དེ་དག་གི་སྐུ་དྲག་གཅིག་ཀྱང་མི་ལུས་པས་དེ་ལ་རྒྱལ་ཁབ་ཅེས་འབོད་པར་མི་འགྱུར་ཞིང་། དེའི་འགོ་དཔོན་རྣམས་ཀྱང་མེད་པར་འགྱུར་རོ། །
ISA 34:13 ཨེ་དོམ་གྱི་ཕོ་བྲང་ནང་དུ་ཚེར་མ་སྐྱེ་ཞིང་། དེའི་ལྕགས་རི་སྟེང་དུ་སྤྱང་ཚེར་དང་ཚེར་སྐྱ་སྐྱེས་ཏེ། ཁྱི་སྤྱང་གི་ཚང་དང་རྔ་བྱའི་སྡོད་གནས་སུ་འགྱུར་ངེས།
ISA 34:14 དབེན་སྟོང་གི་རི་དྭགས་རྣམས་ཁྱི་སྤྱང་ལ་འཕྲད་པ་དང་། ར་རྒོད་ཀྱིས་རང་གི་རིགས་འབོད་ཅིང་། མཚན་མོའི་སྲིན་བྱ་རྣམས་ཀྱང་དེར་བསྡད་དེ་རང་གི་གནས་འཚོལ་བར་འགྱུར།
ISA 34:15 འུག་པས་གནས་དེར་ཚང་བཟོ་བ་དང་སྒོ་ང་བཏང་ནས་རུམ་སྟེ་བྱ་ཕྲུག་རང་གི་གྲིབ་མའི་འོག་ཏུ་བསྡུ་བར་བྱ། འོལ་པ་རྣམས་ཀྱང་རང་རང་གི་སྐྱ་ཡ་དང་མཉམ་དུ་དེར་འདུ་བའོ། །
ISA 34:16 ཁྱོད་རྣམས་ཀྱིས་དཀོན་མཆོག་ཡ་ཝཱེའི་གླེགས་བམ་ལ་ཞིབ་དཔྱད་བཏང་ནས་ཀློགས་ཤིག དེ་དག་ལས་གཅིག་ཀྱང་ཆད་པར་མི་འགྱུར་ལ། དེ་རྣམས་ལས་ཆ་མིན་པ་གཅིག་ཀྱང་མེད། གང་ལ་ཞེ་ན། ཁོང་གི་ཞལ་ནས་བཀའ་གནང་ཞིང་ཁོང་གི་ཐུགས་ཉིད་ཀྱིས་དེ་དག་ལྷན་དུ་བསྡུས་པས་སོ། །
ISA 34:17 ཁོང་གིས་དེ་དག་གི་ཕྱིར་དུ་རྒྱན་འཕངས་ཏེ། ཁོང་གི་ཕྱག་གིས་ཐིག་སྐུད་འཐེན་ནས་དེ་དག་ལ་ས་བགོས་པས། དེ་ཚོར་དུས་གཏན་དུ་ཡུལ་དེ་ས་སྐལ་དུ་འཐོབ་ཅིང་། མི་རབས་ནས་མི་རབས་སུ་ཡུལ་དེར་གནས་པར་བྱའོ། །
ISA 35:1 དབེན་སྟོང་དང་སྐམ་ས་སྤྲོ་བར་འགྱུར་ཞིང་། ཐང་སྟོང་དགའ་བས་ཁྱབ་ནས་མེ་ཏོག་གུར་ཀུམ་བཞིན་བཞད་པར་འགྱུར།
ISA 35:2 དེ་ལ་ལོ་འདབ་རྒྱས་ནས་མེ་ཏོག་བཞད་དེ། དགའ་མགུའི་འབོད་སྒྲ་སྒྲོག་བཞིན་བདེ་སྐྱིད་ཀྱི་དཔལ་ལ་རོལ། ལེ་པཱ་ནོན་གྱི་གཟི་བརྗིད་དང་། ཀར་མེལ་དང་ཤཱ་རོན་གྱི་གཟི་བྱིན་ཡང་དེ་ལ་གནང་བ་དང་། མི་རྣམས་ཀྱིས་དཀོན་མཆོག་ཡ་ཝཱེའི་གཟི་བརྗིད་དང་ང་ཚོའི་དཀོན་མཆོག་གི་གཟི་བྱིན་མཇལ་བར་འགྱུར་རོ། །
ISA 35:3 ཁྱོད་ཅག་གིས་ལག་ཤེད་ཉམས་པ་རྣམས་ལ་སྟོབས་འཇུག་པ་དང་། པུས་མོ་འདར་བ་རྣམས་བརྟན་པོར་བྱས་ནས།
ISA 35:4 སེམས་ཁྲལ་ཅན་རྣམས་ལ། ཁྱོད་རྣམས་ཞུམ་པ་མེད་པར་སྙིང་སྟོབས་སྐྱེད་ཅིག ལྟོས་དང་། ཁྱོད་རྣམས་ཀྱི་དཀོན་མཆོག་ལན་འཇལ་བར་ཕེབས་ཤིང་། ཁོང་གིས་ཁྱོད་རྣམས་སྐྱོབ་པར་འགྱུར་ཞེས་སྨྲོས་ཤིག
ISA 35:5 དུས་དེར་ལོང་པ་རྣམས་ཀྱི་མིག་འབྱེད་ཅིང་། འོན་པ་རྣམས་ཀྱི་རྣ་བས་ཐོས་པ་དང་།
ISA 35:6 དུས་དེར། ཞ་བོ་རྣམས་ཤྭ་བ་ལྟར་མཆོང་ཞིང་། ལྐུགས་པའི་ལྕེ་ཡིས་སྤྲོ་གླུ་ལེན་པར་འགྱུར། དབེན་སྟོང་ནས་ཆུ་ཐོན་ཞིང་། བྱེ་ཐང་རྣམས་ལས་གཙང་པོ་བཞུར་བར་འགྱུར།
ISA 35:7 མེ་ལྟར་ཚ་བའི་བྱེ་ཐང་ནི་རྫིང་བུ་རུ་འགྱུར་བ་དང་། སྐམ་ས་རྣམས་སུ་ཆུ་མགོ་བརྡོལ་ཞིང་། ཁྱི་སྤྱང་ཉལ་བའི་གནས་སུ་རྩྭ་སྔོན་དང་འདམ་བུ། འདམ་རྩྭ་པ་པི་རཱ་བཅས་སྐྱེ་བར་འགྱུར།
ISA 35:8 དེ་རུ་ལམ་ཆེན་ཞིག་ཡོད་པ་ལ་དམ་པའི་ལམ་ཞེས་འབོད་ཅིང་། མི་གཙང་པ་རྣམས་ལམ་དེར་འགྲོ་བར་མི་བྱ་སྟེ། ལམ་དེ་ནི་དྲང་ལམ་སྐྱོད་མཁན་རྣམས་ཀྱི་ཕྱིར་དུ་སྟ་གོན་མཛད་པས། གླེན་པ་ཡིན་ཡང་ལམ་དེ་ནས་གཟུར་བར་མི་འགྱུར་རོ། །
ISA 35:9 གནས་དེར་སེང་གེ་མེད་ལ་གཅན་གཟན་གདུག་རྩུབ་ཅན་རྣམས་ཀྱང་མི་འགྲོ་སྟེ། བླུས་པ་རྣམས་འབའ་ཞིག་དེར་སྐྱོད་པ་ལས། སེང་གེ་དང་གཅན་གཟན་ལ་འཕྲད་པར་མི་འགྱུར།
ISA 35:10 དཀོན་མཆོག་ཡ་ཝཱེས་བླུས་པའི་མི་རྣམས་ཕྱིར་ལོག་ཅིང་། གླུ་ལེན་བཞིན་ཛ་ཡན་ལ་སླེབ་ངེས། མཐའ་མེད་པའི་དགའ་སྤྲོ་ནི་ཅོད་པན་བཞིན་དེ་དག་གི་སྟེང་དུ་འབབ་པ་དང་། དེ་རྣམས་དགའ་ཞིང་སྤྲོ་བར་གྱུར་ནས་སྡུག་བསྔལ་དང་ཤུགས་རིང་མེད་པར་འགྱུར་རོ། །
ISA 36:1 དེ་ཡང་རྒྱལ་པོ་ཧི་ཟི་ཀི་ཡཱས་རྒྱལ་སྲིད་སྐྱོང་བའི་ལོ་བཅུ་བཞི་པར། ཨ་སུར་རྒྱལ་པོ་སེན་ན་ཧེ་རིབ་ཀྱིས་ཡ་ཧུ་དཱའི་འགོག་སྲུང་གྲོང་ཁྱེར་རྣམས་ལ་དཔུང་འཇུག་བྱས་ནས་བླངས་པ་དང་།
ISA 36:2 ཨ་སུར་རྒྱལ་པོས་ལཱ་ཀི་སི་ནས་རབ་ཤཱ་ཀེ་ཞེས་བྱ་བའི་དམག་དཔུང་ཆེན་པོ་དང་བཅས་པ་ཡེ་རུ་སཱ་ལེམ་གྱི་རྒྱལ་པོ་ཧི་ཟི་ཀི་ཡཱའི་དྲུང་དུ་བརྫངས་ཏེ། གོས་འཁྲུད་མཁན་གྱི་ཞིང་ཁའི་ལམ་ཆེན་དུ་ཡོད་པའི་རྫིང་བུ་གོང་མའི་ཆུ་ཡུར་འགྲམ་དུ་ལངས་བསྡད་པ་ན།
ISA 36:3 ཧིལ་ཀི་ཡཱའི་བུ་སྟེ་རྒྱལ་པོའི་ཕོ་བྲང་གི་ནང་བློན་ཨེལ་ཡ་ཀིམ་དང་། དྲུང་ཡིག་ཤེབ་ནཱ་དང་། ཨ་སབ་ཀྱི་བུ་སྟེ་ལོ་རྒྱུས་འགོད་མཁན་ཡོ་ཨག་བཅས་པ་ཁོ་བསུ་བར་ཕྱི་རོལ་ཏུ་ཐོན་ནོ། །
ISA 36:4 དེར་རབ་ཤཱ་ཀེས་དེ་དག་ལ་ན་རེ། ཁྱོད་ཅག་སོང་སྟེ་ཧི་ཟི་ཀི་ཡཱ་ལ་ཞུས་ཤིག རྒྱལ་པོ་ཆེན་པོ་ཨ་སུར་གྱིས་འདི་སྐད་གསུངས་ཏེ། ཁྱོད་ཀྱིས་བློ་བཅོལ་བའི་འགོག་སྲུང་དེ་ཅི་ཡིན་ནམ།
ISA 36:5 ངས་བལྟས་ན་ཁྱོད་ཀྱིས་གཡུལ་འགྱེད་པའི་བློ་བཀོད་དང་སྟོབས་ཤུགས་ཡོད་ཅེས་པ་ནི་སྟོང་བཤད་ཙམ་ཡིན་ལ། ད་ལྟ་ཁྱོད་ཀྱིས་སུ་ལ་བརྟེན་ནས་བདག་ལ་ངོ་ལོག་བྱེད་དམ།
ISA 36:6 ལྟོས་དང་། ཁྱོད་ཀྱིས་འདམ་བུའི་དབྱུག་པ་ཆག་པོ་སྟེ་ཨེ་ཅིབ་ལ་བློ་བཅོལ་བ་རེད། སུ་ཞིག་དེར་བརྟེན་ན་དེ་ནི་ཁོའི་ལག་པར་ཟུག་ནས་བརྟོལ་བར་བྱེད། ཨེ་ཅིབ་ཀྱི་རྒྱལ་པོ་ཕཱར་ཨོལ་གྱིས་རང་ལ་བློ་གཏད་བཅོལ་མཁན་ཐམས་ཅད་ལའང་དེ་བཞིན་དུ་བྱེད་དོ། །
ISA 36:7 ཡང་གལ་ཏེ་ཁྱོད་ཀྱིས་ང་ལ། ངེད་ཅག་ནི་རང་གི་དཀོན་མཆོག་ཡ་ཝཱེ་ལ་བརྟེན་པ་ཡིན་ཟེར་ན། ཧི་ཟི་ཀི་ཡཱས་དཀོན་མཆོག་ཡ་ཝཱེའི་མཐོ་གླིང་དང་མཆོད་ཁྲི་རྣམས་བཤིགས་ནས། ཡ་ཧུ་དཱ་པ་དང་ཡེ་རུ་སཱ་ལེམ་གྱི་མི་རྣམས་ལ། ཁྱོད་ཅག་གིས་མཆོད་ཁྲི་འདིའི་མདུན་དུ་བསྙེན་བཀུར་ཞུ་དགོས་ཞེས་བསྒོས་པ་མ་ཡིན་ནམ།
ISA 36:8 ད་ལྟ་ཁྱོད་ཀྱིས་ངའི་བདག་པོ་ཨ་སུར་གྱི་རྒྱལ་པོ་དང་གྲོས་མཐུན་འཇོག་པར་ཞུ། གལ་ཏེ་ཁྱོད་ཀྱིས་ཞོན་པ་ཉིས་སྟོང་མངག་ནུས་ན། ངས་ཁྱོད་ལ་དམག་རྟ་སྟོང་ཕྲག་གཉིས་སྟེར་བར་བྱའོ། །
ISA 36:9 ཁྱོད་ཀྱིས་ཤིང་རྟ་དང་སྐྱ་དམག་རྣམས་ཀྱི་ཕྱིར་ཨེ་ཅིབ་ཀྱི་རྒྱལ་པོར་བློ་བཅོལ་ཡང་། ངའི་བདག་པོའི་འཁོར་འབངས་ཆུང་ཤོས་གཅིག་གི་ངོ་གདོང་དེ་ཡང་ཇི་ལྟར་བཟློག་ནུས་སམ།
ISA 36:10 ད་ལྟ་ང་ནི་དཀོན་མཆོག་ཡ་ཝཱེའི་བཀའ་འཁྲོལ་མེད་པར་ས་ཆ་འདི་འཇིག་པར་བྱེད་དུ་ཡར་འོངས་པ་ཡིན་ནམ། དཀོན་མཆོག་ཡ་ཝཱེས་བདག་ལ། ཡུལ་དེར་ཡར་སོང་ལ་དེ་མེད་པར་བྱོས་ཤིག་ཅེས་པའོ་ཞེས་གསུངས་སོ། །
ISA 36:11 དེ་ནས་ཨེལ་ཡ་ཀིམ་དང་། ཤེབ་ནཱ། ཡོ་ཨག་བཅས་ཀྱིས་རབ་ཤཱ་ཀེ་ལ་ན་རེ། ང་ཚོས་ཨ་རམ་པའི་སྐད་ཤེས་པས་ཁྱོད་ཀྱི་ཞབས་ཕྱི་ཚོར་ཨ་རམ་པའི་སྐད་སྨྲ་བར་མཛོད་ཅིག ལྕགས་རིའི་སྟེང་གི་མི་རྣམས་ཀྱིས་ཡ་ཧུ་དཱའི་སྐད་གོ་བས་དེ་མི་གསུང་རོགས་ཞེས་ཞུས་ཀྱང་།
ISA 36:12 རབ་ཤཱ་ཀེ་ན་རེ། ང་ཡི་བདག་པོས་ཁྱོད་ཀྱི་བདག་པོ་དང་ཁྱོད་ཁོ་ནར་གཏམ་འདི་དག་སྨྲ་བའི་ཕྱིར་ང་འདིར་མངགས་པ་ཡིན་ནམ། ཁོང་གིས་ལྕགས་རིའི་སྟེང་སྡོད་པའི་མི་རྣམས་ཏེ། ཁྱོད་དང་མཉམ་དུ་རང་གི་སྐྱག་པ་ཟ་ཞིང་། རང་གི་གཅིན་པ་འཐུང་བ་རྣམས་ལའང་སྨྲ་བའི་ཕྱིར་ང་རང་མངགས་པ་མ་ཡིན་ནམ་ཞེས་སྨྲས་སོ། །
ISA 36:13 དེ་ནས་རབ་ཤཱ་ཀེ་ཡར་ལངས་ནས་སྐད་ཆེན་པོས་ཡ་ཧུ་དཱའི་སྐད་དུ། ཁྱོད་ཅག་གིས་རྒྱལ་པོ་ཆེན་པོ་ཨ་སུར་གྱི་བཀའ་ལ་ཉོན་ཅིག
ISA 36:14 རྒྱལ་པོས་འདི་སྐད་གསུངས་ཏེ། ཧི་ཟི་ཀི་ཡཱས་ཁྱོད་ཅག་སྐྱོབ་མི་ནུས་པས། ཁྱོད་ཅག་ཁོའི་གཡོ་འོག་ཏུ་མི་ཚུད་པར་གྱིས།
ISA 36:15 ཡང་ཧི་ཟི་ཀི་ཡཱས་ཁྱོད་ཅག་དཀོན་མཆོག་ཡ་ཝཱེར་བརྟེན་དགོས་པའི་ཐད། དཀོན་མཆོག་ཡ་ཝཱེས་ང་ཚོ་སྐྱོབ་ངེས་ཤིང་། གྲོང་ཁྱེར་འདིའང་ཨ་སུར་གྱི་རྒྱལ་པོའི་ལག་ཏུ་གཏོད་པར་མི་བྱའོ་ཞེས་པའི་ཚིག་ལ་མ་མཉན་ཅིག
ISA 36:16 ཧི་ཟི་ཀི་ཡཱའི་གཏམ་ལ་མཉན་མི་རུང་། རྒྱུ་མཚན་ནི་ཨ་སུར་གྱི་རྒྱལ་པོས་འདི་སྐད་གསུངས་ཏེ། ཁྱོད་ཅག་བདག་དང་མཐུན་པོ་ཡོང་ཆེད་ཕྱི་རུ་ཤོག་དང་། ཁྱོད་ཚོ་མི་རེ་རེས་རང་གི་རྒུན་ཤིང་དང་སེ་ཡབ་ཤིང་གི་འབྲས་བུ་བཟའ་ཞིང་། རང་རང་གི་ཁྲོན་པའི་ཆུ་འཐུང་བར་འགྱུར།
ISA 36:17 རྗེས་སུ་བདག་འོང་བའི་དུས་སུ་ཁྱོད་རྣམས་ནི་ཁྱོད་ཅག་གི་ཡུལ་ཁམས་ལྟ་བུའི་ཡུལ་ཞིག་ལ་འཁྲིད་པར་བྱ་སྟེ། ཡུལ་དེར་འབྲུ་རིགས་འཛོམས་ཤིང་རྒུན་ཆང་གསར་པ་ཡོད་པ་དང་། བག་ལེབ་དང་རྒུན་འབྲུམ་ར་བ་ཡོད་པ་ཡིན།
ISA 36:18 དཀོན་མཆོག་ཡ་ཝཱེས་ངེད་ཅག་སྐྱོབ་ངེས་ཡིན་ཞེས་ཧི་ཟི་ཀི་ཡཱས་བློ་འགུག་པ་ལ་ཁྱོད་རྣམས་དོགས་པར་གྱིས། མི་རིགས་རྣམས་ཀྱི་ལྷ་རྣམས་ལས་སུ་ཞིག་གིས་རང་གི་ས་ཆ་ཨ་སུར་རྒྱལ་པོའི་ལག་ནས་བསྐྱབས་མྱོང་ངམ།
ISA 36:19 ཧ་མཱད་དང་ཨར་ཕད་ཀྱི་ལྷ་རྣམས་གང་དུ་ཡོད་དམ། སེ་ཕར་ཝ་ཨིམ་གྱི་ལྷ་རྣམས་གང་དུ་ཡོད་དམ། ལྷ་དེ་དག་གིས་སཱ་མར་ཡ་ངའི་ལག་ནས་བསྐྱབས་མྱོང་ངམ།
ISA 36:20 ཡུལ་དེ་དག་གི་ལྷ་རྣམས་ལས་སུ་ཞིག་གིས་རང་གི་ས་ཆ་ངའི་ལག་ནས་བླངས་པ་ཡིན་ནམ། དཀོན་མཆོག་ཡ་ཝཱེས་ངའི་ལག་ནས་ཡེ་རུ་སཱ་ལེམ་སྐྱོབ་ནུས་སམ་ཞེས་སྨྲས་ཀྱང་།
ISA 36:21 རྒྱལ་པོས་དེ་ལ་ལན་མ་འདེབས་ཞེས་བཀའ་བསྒོས་ཡོད་པས། མི་རྣམས་ཁ་རོག་གེར་བསྡད་དེ་གཏམ་ལན་ཚིག་གཅིག་ཀྱང་མ་སྨྲས་སོ། །
ISA 36:22 དེ་ནས་ཧིལ་ཀི་ཡཱའི་བུ་སྟེ་རྒྱལ་པོའི་ཕོ་བྲང་གི་ནང་བློན་ཨེལ་ཡ་ཀིམ་དང་། དྲུང་ཡིག་ཤེབ་ནཱ་དང་། ཨ་སབ་ཀྱི་བུ་སྟེ་ལོ་རྒྱུས་འགོད་མཁན་ཡོ་ཨག་བཅས་ཀྱིས་རང་རང་གི་གྱོན་གོས་གཤགས་ཏེ། ཧི་ཟི་ཀི་ཡཱའི་དྲུང་དུ་འོངས་ནས་རབ་ཤཱ་ཀེའི་གཏམ་རྣམས་ཁོང་ལ་ཞུས་སོ། །
ISA 37:1 དེ་ཡང་རྒྱལ་པོ་ཧི་ཟི་ཀི་ཡཱས་དེ་ཐོས་པ་ཙམ་གྱིས་རང་གི་ན་བཟའ་གཤགས་ནས། ལུས་པོར་རྩིད་རས་གཡོགས་ཏེ་དཀོན་མཆོག་ཡ་ཝཱེའི་མཆོད་ཁང་དུ་ཕྱིན།
ISA 37:2 ཁོས་ཕོ་བྲང་གི་ནང་བློན་ཨེལ་ཡ་ཀིམ་དང་དྲུང་ཡིག་ཤེབ་ནཱ། མཆོད་དཔོན་རྣམས་ལས་རྒན་པོ་དག་རྩིད་རས་ཀྱིས་གཡོགས་ཏེ་ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱའི་དྲུང་དུ་མངགས།
ISA 37:3 དེ་དག་གིས་ཁོང་ལ། ཧི་ཟི་ཀི་ཡཱ་ན་རེ། དེ་རིང་ནི་ཉེན་ཚབས་ཆེ་ཞིང་འཇིགས་སྐུལ་ཐེབས་པ་དང་། བརྙས་བཅོས་ཐེབས་པའི་ཉིན་མོ་ཡིན། དེ་ནི་ཕྲུ་གུ་བཙའ་རན་ནའང་བཙའ་བའི་སྟོབས་ཟད་པ་དང་འདྲའོ། །
ISA 37:4 ཁྱེད་ཀྱི་དཀོན་མཆོག་ཡ་ཝཱེ་ལགས་ཀྱིས་རབ་ཤཱ་ཀེའི་གཏམ་རྣམས་གསན་ཡོད་ཀྱང་སྲིད། དེ་ནི་ཁོའི་བདག་པོ་ཨ་སུར་རྒྱལ་པོས་གཏན་དུ་གསོན་པོར་བཞུགས་པའི་དཀོན་མཆོག་ལ་སྨོད་ཅིང་སྐུར་བ་འདེབས་པའི་དོན་དུ་ཁོ་རང་འདིར་མངགས་པ་ཡིན་ཞིང་། ཁྱེད་ཀྱི་དཀོན་མཆོག་ཡ་ཝཱེས་གསན་པའི་ཚིག་རྣམས་ཀྱི་རྐྱེན་གྱིས་ཁོ་ལ་གཤེ་གཤེ་གཏོང་ངེས་ཡིན། དེ་བས་ཁྱེད་ཀྱིས་ཤུལ་ལུས་རྣམས་ཀྱི་དོན་དུ་གསོལ་བ་འདེབས་རོགས་ཟེར་ཞེས་ཞུས་སོ། །
ISA 37:5 དེ་ནས་རྒྱལ་པོ་ཧི་ཟི་ཀི་ཡཱའི་འཁོར་གཡོག་རྣམས་ཡེ་ཤ་ཡཱའི་དྲུང་དུ་སླེབས་པའི་ཚེ།
ISA 37:6 ཡེ་ཤ་ཡཱས་དེ་དག་ལ། ཁྱོད་ཅག་གི་བདག་པོ་ལ་འདི་ལྟར་སྦྲོན་ཅིག དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ཨ་སུར་རྒྱལ་པོའི་འཁོར་གཡོག་རྣམས་ཀྱིས་བདག་ལ་སྐུར་བ་བཏབ་པའི་གཏམ་ཐོས་ཀྱང་དེ་ལ་མ་འཇིགས་ཤིག
ISA 37:7 ལྟོས་དང་། བདག་གིས་ཁོའི་ནང་དུ་ཐུགས་ཉིད་ཅིག་འཇུག་སྟེ། ཁོས་འཆལ་གཏམ་ཞིག་ཐོས་ནས་རང་ཡུལ་དུ་ལོག་ཅིང་། བདག་གིས་གནས་དེར་ཁོ་རལ་གྲིའི་འོག་ཏུ་འགྱེལ་བར་བྱེད་ངེས་ཡིན་ཞེས་སྨྲ་དགོས་པར་གསུངས་སོ། །
ISA 37:8 ཡང་རབ་ཤཱ་ཀེ་ཕྱིར་ལོག་པ་ན། ཨ་སུར་རྒྱལ་པོས་ལིབ་ནཱ་དང་དམག་རྒྱག་གིན་ཡོད་པ་དང་ཕྲད་ཅིང་། མ་གཞི་ཁོས་ཨ་སུར་རྒྱལ་པོ་ལཱ་ཀི་སི་ནས་ཆས་ཟིན་པའི་གཏམ་ཐོས་པ་རེད།
ISA 37:9 ཨ་སུར་རྒྱལ་པོས་གུ་ཤའི་རྒྱལ་པོ་ཐིར་ཧ་ཀཱའི་སྐོར་ནས། ཁོ་ནི་ཁྱོད་དང་འཐབ་འཛིང་བྱེད་དུ་འོང་བཞིན་འདུག་ཅེས་པའི་གཏམ་ཐོས་ཚེ། ཧི་ཟི་ཀི་ཡཱའི་དྲུང་དུ་བང་ཆེན་མངགས་ཏེ་ན་རེ།
ISA 37:10 ཁྱོད་ཅག་གིས་ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་ལ་འདི་ལྟར་སྨྲོས་ཤིག ཡེ་རུ་སཱ་ལེམ་ནི་ཨ་སུར་རྒྱལ་པོའི་ལག་ཏུ་གཏོད་པར་མི་འགྱུར་ཞེས་ཁྱོད་ཚོས་བློ་བཅོལ་བའི་དཀོན་མཆོག་ལ་ཁྱོད་རང་བསླུ་བར་མ་འཇུག
ISA 37:11 ཨ་སུར་གྱི་རྒྱལ་པོ་རྣམས་ཀྱིས་ཡུལ་ཐམས་ཅད་ལ་ཅི་བྱས་པ་དང་རྩ་ནས་བཅོམ་པ་ཁྱོད་ཀྱིས་ཐོས་ཡོད་པས། ཁྱོད་ལ་ཐར་ས་ཡོད་དམ།
ISA 37:12 ངའི་ཕ་མེས་རྣམས་ཀྱིས་བཅོམ་པའི་གོ་ཟན་དང་ཧཱ་རན། རེ་ཙེབ། ཐེ་ལཱ་སར་ལ་ཡོད་པའི་ཨེ་དེན་གྱི་མི་རྣམས་བཅས་མི་རིགས་སོ་སོའི་ལྷ་རྣམས་ཀྱིས་ཁོ་ཚོ་བསྐྱབས་སམ།
ISA 37:13 ཧ་མཱད་ཀྱི་རྒྱལ་པོ་དང་ཨར་ཕད་ཀྱི་རྒྱལ་པོ། སེ་ཕར་ཝ་ཨིམ་གྲོང་ཁྱེར་གྱི་རྒྱལ་པོ། ཧེ་ནཱ་དང་ཨི་ཝཱ་ཡི་རྒྱལ་པོ་བཅས་རྣམས་ད་ལྟ་གང་དུ་ཡོད་དམ་ཞེས་འཕྲིན་བསྐུར་ཏོ། །
ISA 37:14 དེ་ཡང་ཧི་ཟི་ཀི་ཡཱས་བང་ཆེན་རྣམས་ཀྱི་ལག་ནས་འབྱོར་བའི་འཕྲིན་ཡིག་དེ་བཀླགས་རྗེས། ཡར་དཀོན་མཆོག་ཡ་ཝཱེའི་མཆོད་ཁང་དུ་སོང་ནས་དཀོན་མཆོག་ཡ་ཝཱེའི་སྤྱན་སྔར་འཕྲིན་ཡིག་ཁ་ཕྱེས་ཏེ་བཞག་གོ །
ISA 37:15 ཁོས་དཀོན་མཆོག་ཡ་ཝཱེ་ལ་འདི་བཞིན་གསོལ་བ་བཏབ་པ་སྟེ།
ISA 37:16 ཀྱེ་ཀེ་རུབ་རྣམས་ཀྱི་དབུས་སུ་བཞུགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ། ཡེས་ར་ཨེལ་གྱི་དཀོན་མཆོག་ལགས། ཁྱེད་ཉིད་གཅིག་པུ་ས་གཞིའི་རྒྱལ་ཁམས་ཀུན་གྱི་དཀོན་མཆོག་ལགས་ཤིང་། ཁྱེད་ཀྱིས་གནམ་ས་གཉིས་ཀ་བཀོད་པ་ཡིན།
ISA 37:17 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་སྙན་གཏད་ནས་གསན་པར་མཛོད་ཅིག ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་སྤྱན་ཟུང་ཕྱེས་ནས་གཟིགས་སུ་གསོལ། སེན་ན་ཧེ་རིབ་ཀྱིས་བང་ཆེན་མངགས་ནས་གཏན་དུ་གསོན་པོར་བཞུགས་པའི་དཀོན་མཆོག་ལ་དམའ་འབེབས་ཀྱི་ཚིག་སྨྲས་པ་ཐམས་ཅད་གསན་པར་མཛོད་ཅིག
ISA 37:18 ཀྱེ་དཀོན་མཆོག་ཡ་ཝཱེ་ལགས། ཨ་སུར་གྱི་རྒྱལ་པོ་རྣམས་ཀྱིས་རྒྱལ་ཁམས་དེ་ཐམས་ཅད་དང་། དེ་དག་གི་ས་ཆ་ཀུན་རྡུལ་དུ་བརླགས་པ་ནི་བདེན་ཏེ།
ISA 37:19 དེ་དག་གི་ལྷ་རྣམས་མེ་ལ་གཡུགས། ཅི་ལ་ཞེ་ན། དེ་དག་ནི་དཀོན་མཆོག་མ་ཡིན་པར་མིའི་ལག་བཟོས་ཀྱི་ཤིང་སྐུ་དང་རྡོ་སྐུ་ཡིན་པས། ཁོ་ཚོས་དེ་དག་མེད་པར་བཏང་བ་རེད།
ISA 37:20 ཀྱེ་དཀོན་མཆོག་ཡ་ཝཱེ་ངེད་ཅག་གི་དཀོན་མཆོག་ལགས། ས་གཞིའི་རྒྱལ་ཁམས་ཀུན་གྱིས་ཡ་ཝཱེ་ཁྱེད་ཉིད་གཅིག་པུ་ཡ་ཝཱེ་ཡིན་པ་གསལ་པོར་རྟོགས་པའི་ཕྱིར། ངེད་ཅག་ཨ་སུར་རྒྱལ་པོའི་ལག་ནས་སྐྱོབ་པར་མཛོད་ཅིག་ཅེས་ཞུས་སོ། །
ISA 37:21 དེ་ནས་ཨ་མོ་ཟིའི་བུ་ཡེ་ཤ་ཡཱ་ཡིས་ཧི་ཟི་ཀི་ཡཱའི་དྲུང་དུ་མི་ཞིག་མངགས་ཏེ་ན་རེ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ཨ་སུར་རྒྱལ་པོ་སེན་ན་ཧེ་རིབ་ཀྱི་སྐོར་ནས་བདག་ལ་གསོལ་བ་བཏབ་པས།
ISA 37:22 དཀོན་མཆོག་ཡ་ཝཱེས་དེ་ལ་རྒོལ་ལན་གསུངས་པ་འདི་ལྟར། ཛ་ཡན་བུ་མོ་ན་ཆུང་མས། །ཁྱོད་ལ་བརྙས་ཤིང་ཁྲེལ་རྒོད་བྱས། །ཡེ་རུ་སཱ་ལེམ་བུ་མོ་ཚོས། །ཁྱོད་ཀྱི་རྒྱབ་ནས་མགོ་བོ་གཡུགས། །
ISA 37:23 ཁྱོད་ཀྱིས་སུ་ལ་སྨད་ཅིང་སྐུར་བ་བཏབ་པ་ཡིན་ནམ། ཁྱོད་ཀྱིས་ཀུ་ཅོ་བསྒྲགས་ནས་མིག་ཟུང་ཡར་བཏེགས་ཏེ་སུ་ལ་རྒོལ་བ་ཡིན་ནམ། ཡེས་ར་ཨེལ་གྱི་དམ་པ་ཉིད་ལ་རྒོལ་བ་ཡིན།
ISA 37:24 ཁྱོད་ཀྱིས་རང་གི་འཁོར་གཡོག་རྣམས་བརྒྱུད་ནས་གཙོ་བོར་སྨད་ཅིང་ན་རེ། ང་ནི་རང་གི་ཤིང་རྟའི་དཔུང་ཚོགས་དང་མཉམ་དུ་རི་བོ་དག་གི་ཡང་རྩེར་འཛེགས་ཤིང་། ལེ་པཱ་ནོན་གྱི་ཕུགས་སུ་ཕྱིན། དེའི་ཐང་ཤིང་རིང་པོ་རྣམས་དང་གསོམ་ཤིང་གང་བཟང་རྣམས་བཅད་ཅིང་། རྒྱང་ཐག་རིང་བའི་མཐོ་ས་རྣམས་དང་དེའི་ནགས་ཚལ་སྟུག་པོའི་ནང་དུ་ཞུགས་པ་ཡིན།
ISA 37:25 ངས་དོང་ཆུ་བརྐོས་ནས་ཆུ་འཐུང་ཞིང་། རང་གི་རྐང་མཐིལ་གྱིས་ཨེ་ཅིབ་ཀྱི་གཙང་པོ་ཐམས་ཅད་བསྐམས་སུ་བཅུག་གོ་སྨྲས་བྱུང་ཞེས་པའོ། །
ISA 37:26 དཀོན་མཆོག་ཡ་ཝཱེས་འདི་སྐད་དུ། བདག་གིས་གནའ་ནས་བཀོད་སྒྲིག་བྱས་ཤིང་། སྔོན་ནས་འཆར་བཀོད་བཟོས་ཡོད་པ་ཁྱོད་ཀྱིས་མ་ཐོས་སམ། ད་ནི་ཁྱོད་ཀྱི་ལྕགས་རིས་བསྐོར་བའི་གྲོང་ཁྱེར་རྣམས་བཤིགས་ནས་ས་རོར་བསྒྱུར་བ་དེ་བདག་གིས་བསྒྲུབས་པ་ཡིན།
ISA 37:27 དེ་བས་ཡུལ་དེའི་མི་རྣམས་ནི་སྟོབས་ཟད་ནས་སྐྲག་ཅིང་ཞེ་གནོང་སྟེ། ཞིང་ཁའི་སྔོ་ཚལ་དང་རྩྭ་སྔོན་བཞིན་དང་། ཡང་ཡར་མ་སྐྱེ་སྔོན་ལ་སྐམ་ཐག་ཆོད་པའི་ཁང་ཐོག་གི་རྩྭ་བཞིན་ནོ། །
ISA 37:28 ཁྱོད་རང་མར་སྡོད་པ་དང་། ཁྱོད་རང་ཕྱི་ནང་དུ་འགྲོ་འོང་བྱེད་པ། ཁྱོད་རང་ང་ལ་རབ་ཏུ་ཁྲོས་པ་སོགས་ངས་ཤེས་ཡོད།
ISA 37:29 ཁྱོད་རང་ང་ལ་རབ་ཏུ་ཁྲོས་ཤིང་། ཁྱོད་ཀྱི་ཁེངས་རློམ་བདག་གི་རྣ་བས་ཐོས་བྱུང་བས། བདག་གིས་ཁྱོད་ཀྱི་སྣ་རུ་ལྕགས་ཀྱུ་བསྐོན་ཞིང་། ཁྱོད་ཀྱི་ཁ་ལ་སྲབ་བསྐོན་ཏེ། ཁྱོད་རང་ཐོན་པའི་ལམ་དེར་ཕྱིར་ཟློག་ཏུ་འཇུག་གོ །
ISA 37:30 ཀྱེ་ཧི་ཟི་ཀི་ཡཱ། འདི་ནི་ཁྱོད་ཀྱི་སྔ་ལྟས་ཡིན་ཏེ། ལོ་འདིར་ཁྱོད་ཅག་གིས་རང་བཞིན་དུ་སྐྱེ་བ་རྣམས་བཟའ་ཞིང་། ལོ་རྗེས་མར་དེ་ལས་སྐྱེ་བ་རྣམས་བཟའ་དགོས། དེ་ནས་ལོ་གསུམ་པར་ཁྱོད་རྣམས་ཀྱིས་ས་བོན་བཏབ་ནས་འབྲུ་རིགས་བསྡུ་བ་དང་། རྒུན་ཚལ་བཙུགས་ནས་དེའི་འབྲས་བུ་བཟའ་དགོས།
ISA 37:31 ཡ་ཧུ་དཱ་ཁྱིམ་རྒྱུད་ཀྱི་ཤུལ་ལུས་རྣམས་ནི་སླར་ཡང་རྩ་བ་ཟུག་ཅིང་སྟེང་དུ་འབྲས་བུ་ཐོགས་པར་འགྱུར།
ISA 37:32 ཅིའི་ཕྱིར་ཞེ་ན། ལྷག་ལུས་རྣམས་ཡེ་རུ་སཱ་ལེམ་ནས་ཕྱི་རུ་ཐོན་ཞིང་། སྲོག་ཐར་བ་རྣམས་རི་བོ་ཛ་ཡན་ནས་ཕྱི་ལ་སླེབ་པར་འགྱུར། དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཐུགས་འཁྲེན་གྱིས་དེ་ལྟར་མཛད་པར་བྱའོ་ཞེས་གསུངས་སོ། །
ISA 37:33 དེའི་ཕྱིར་དཀོན་མཆོག་ཡ་ཝཱེས་ཨ་སུར་རྒྱལ་པོའི་སྐོར་ལ་འདི་སྐད་དུ། ཁོ་རང་གྲོང་ཁྱེར་འདིར་འོང་བར་མི་འགྱུར་ཞིང་། དེ་གར་མདའ་ཡང་འཕེན་པར་མི་འགྱུར། ཕུབ་ཐོགས་ནས་དེའི་ཕྱོགས་སུ་འོང་བར་མི་འགྱུར་ལ། དེའི་མཐའ་རུ་འཐབ་ར་ཡང་བརྩིག་པར་མི་འགྱུར།
ISA 37:34 ཁོ་སྔར་འོངས་པའི་ལམ་དེ་ནས་ཕྱིར་ལོག་འགྲོ་བ་དང་། གྲོང་ཁྱེར་དེའི་ནང་དུ་འོང་བར་མི་འགྱུར་བ་ནི་དཀོན་མཆོག་ཡ་ཝཱེས་གསུངས་སོ། །
ISA 37:35 བདག་གིས་རང་ཉིད་དང་བདག་གི་ཞབས་ཕྱི་དཱ་བིད་ཀྱི་དོན་དུ། གྲོང་ཁྱེར་འདི་བསྲུང་ཞིང་སྐྱོབ་པར་འགྱུར་གསུངས་ཞེས་སྨྲས་སོ། །
ISA 37:36 དེ་ནས་དཀོན་མཆོག་ཡ་ཝཱེའི་ཕོ་ཉ་ཕྱི་རུ་ཐོན་ཏེ། ཨ་སུར་པའི་དམག་སྒར་ལས་མི་ཆིག་འབུམ་བརྒྱད་ཁྲི་ལྔ་སྟོང་བསད་པ་དང་། ཐོ་རངས་མི་རྣམས་མལ་ལས་ལངས་པའི་ཚེ། ཀྱེ་ཧོ། མིག་གིས་མཐོང་ཚད་བམ་རོ་ཡིན་ནོ། །
ISA 37:37 དེར་ཨ་སུར་རྒྱལ་པོ་སེན་ན་ཧེ་རིབ་ཀྱིས་སྒར་གཏོར་ཞིང་རང་ཡུལ་དུ་ལོག་སྟེ་ནིན་ཝེ་ཞེས་པར་བསྡད།
ISA 37:38 ཁོས་རང་གི་ལྷ་ནིས་རོག་གི་ལྷ་ཁང་དུ་ཕྱག་འཚལ་དུས་སུ། ཁོའི་བུ་ཨད་རམ་མེ་ལེག་དང་སཱར་ཨེ་ཚེར་གཉིས་ཀྱིས་ཁོ་རལ་གྲིས་བསད་ཅིང་། དེ་ནས་ཁོ་གཉིས་ཨ་ར་རད་ཡུལ་དུ་བྲོས་པ་དང་། ཁོའི་བུ་ཨེ་སར་ཧད་ཏོན་ཁོའི་རྒྱུན་མཐུད་ནས་རྒྱལ་པོར་གྱུར་ཏོ། །
ISA 38:1 དུས་དེར་ཧི་ཟི་ཀི་ཡཱ་ལ་ནད་ལྗིད་མོ་ཞིག་ཕོག་སྟེ་འཆི་ལ་ཉེ་བ་དང་། ཨ་མོ་ཟིའི་བུ་ལུང་སྟོན་པ་ཡེ་ཤ་ཡཱ་ཁོའི་དྲུང་དུ་འོངས་ཏེ་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་གསོན་མི་ཐུབ་པར་འཆི་བར་འགྱུར་བས། ཁྱོད་ཀྱིས་རང་གི་ཁྱིམ་ལ་བཀོད་སྒྲིག་ལེགས་པོ་གྱིས་ཤིག་གསུངས་ཞེས་སྨྲས་པ་ན།
ISA 38:2 ཧི་ཟི་ཀི་ཡཱས་ངོ་གདོང་རྩིག་པའི་ཕྱོགས་སུ་འཁོར་ཏེ་དཀོན་མཆོག་ཡ་ཝཱེ་ལ་སྨོན་ལམ་བཏབ་ནས་ན་རེ།
ISA 38:3 ཀྱེ་དཀོན་མཆོག་ཡ་ཝཱེ་ལགས། ང་རང་ཁྱེད་ཀྱི་སྤྱན་སྔར་བློ་དཀར་བ་དང་བསམ་པ་ལྷད་མེད་ཀྱིས་འགྲུལ་ཞིང་། ཁྱེད་ཀྱི་སྤྱན་སྔར་གང་ལེགས་པ་དེ་བསྒྲུབས་པ་ཁྱེད་ཀྱིས་ཐུགས་སུ་དྲན་པར་མཛོད་ཅེས་ཞུས་ཏེ་དྲག་ཏུ་ངུས་སོ། །
ISA 38:4 དེ་ནས་དཀོན་མཆོག་ཡ་ཝཱེས་ཡེ་ཤ་ཡཱ་ལ་བཀའ་གནང་ནས་འདི་སྐད་དུ།
ISA 38:5 ཁྱོད་སོང་ནས་ཧི་ཟི་ཀི་ཡཱ་ལ། ཁྱོད་ཀྱི་མེས་པོ་དཱ་བིད་ཀྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་ཁྱོད་ཀྱི་གསོལ་འདེབས་ཐོས་ཤིང་། ཁྱོད་ཀྱི་མིག་ཆུ་ཡང་མཐོང་བ་ཡིན། ལྟོས་དང་། བདག་གིས་ཁྱོད་ཀྱི་ཚེ་ཚད་ལ་ལོ་བཅོ་ལྔ་སྣོན་པར་བྱ།
ISA 38:6 ཡང་བདག་གིས་ཁྱོད་དང་གྲོང་ཁྱེར་འདི་ཨ་སུར་རྒྱལ་པོའི་ལག་ནས་བསྐྱབས་ཏེ། གྲོང་ཁྱེར་འདི་བསྲུང་བར་བྱ་གསུངས་ཞེས་སྨྲོས་ཤིག
ISA 38:7 འདི་ནི་དཀོན་མཆོག་ཡ་ཝཱེས་ཅི་གསུངས་པ་དེ་འགྲུབ་པར་མཛད་ངེས་པའི་བདེན་དཔང་དུ་ཁྱོད་ལ་གནང་བའི་རྟགས་ཡིན།
ISA 38:8 ལྟོས་དང་། ཨ་ཧ་ཟཱ་ཡི་དུས་ཀྱི་གོམ་འགྲོས་སྟེང་གི་ཉི་མའི་གྲིབ་གཟུགས་མདུན་དུ་སྐྱོད་པ་དེ་བདག་གིས་གོམ་པ་བཅུ་ཕྱིར་འཐེན་པར་འགྱུར་ཞེས་གསུངས་པས། ཉི་མའི་གྲིབ་གཟུགས་མདུན་དུ་སྐྱོད་པ་དེ་དུས་ཀྱི་གོམ་འགྲོས་སྟེང་གོམ་པ་བཅུ་ཕྱིར་བསྣུར་བ་རེད།
ISA 38:9 ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་ནད་ལས་ཐར་རྗེས། ཁོས་མགུར་མ་འདི་བརྩམས་པ་སྟེ།
ISA 38:10 ང་རང་དར་མ་ཡིན་པའི་དུས་སྐབས་སུ། །གཤིན་པོའི་ཡུལ་གྱི་སྒོ་ནང་འཛུལ་དགོས་ཤིང་། །བདག་གི་མི་ཚེའི་ལོ་ཟླ་ལྷག་མ་རྣམས། །ང་ལས་འཕྲོག་པར་འགྱུར་རོ་བདག་གིས་སྨྲས། །
ISA 38:11 ད་ནི་གསོན་པོའི་ཡུལ་དུ་བདག་ལྟ་བུས། །དཀོན་མཆོག་ཡ་ཝཱེ་སླར་ཡང་མཇལ་མི་འོང་། །འཇིག་རྟེན་ཡུལ་གྱི་མི་རྣམས་ཁྲོད་ནས་ནི། །གཅིག་ཀྱང་མཐོང་བར་མི་འགྱུར་བདག་གིས་སྨྲས། །
ISA 38:12 ང་ཡི་སྡོད་གནས་རྩ་ནས་ཕྱུང་བ་སྟེ། །ལུག་རྫིའི་གུར་བཞིན་ང་དང་ཕྲལ་བ་ཡིན། །འཐག་མཁན་ཇི་བཞིན་ང་ཡིས་རང་སྲོག་བསྒྲིལ། །ཁོང་གིས་ང་རང་ཐགས་ཁྲི་ལས་བཅད་དེ། །ཉིན་གཅིག་རིང་ལ་ངའི་ཚེ་རྫོགས་པར་མཛད། །
ISA 38:13 ཞོགས་པའི་བར་དུ་བདག་གིས་དབུགས་རིང་ཕྱུང་། །རི་དྭགས་རྒྱལ་པོ་བཞིན་དུ་ཁོང་ཉིད་ཀྱིས། །ང་ཡི་ལུས་ཀྱི་རུས་པ་ཐམས་ཅད་བཅག །ཉིན་གཅིག་རིང་ལ་ངའི་ཚེ་རྫོགས་པར་མཛད། །
ISA 38:14 བདག་གིས་ཁུག་རྟ་ནང་བཞིན་བྱིའུ་སྐད་བསྒྲགས། །ཁྲུང་ཁྲུང་དཀར་པོ་ནང་བཞིན་སྐད་ཅོར་བརྒྱབ། །ཕུག་རོན་བཞིན་དུ་ངུ་སྐད་བཏོན་པ་ཡིན། །སྟེང་ཕྱོགས་བལྟས་ནས་ངའི་མིག་ཐང་ཆད་བྱུང་། །ཀྱེ་ཀྱེ་ཡ་ཝཱེ་ང་རང་སྡུག་ལ་ཕྲད། །ཁྱེད་ཉིད་ང་ཡི་སྐྱབས་སུ་འགྱུར་བར་མཛོད། །
ISA 38:15 ད་ནི་བདག་གིས་ཅི་ཞིག་སྨྲ་བར་བྱ། །གནང་བའི་ཞལ་བཞེས་ཁོང་གིས་བསྒྲུབས་པར་མཛད། །འདས་ཟིན་ངའི་སེམས་སྡུག་གིས་མནར་བས་ན། །གཟབ་གཟབ་ངང་ནས་མི་ཚེ་རོལ་དགོས་སོ། །
ISA 38:16 ཀྱེ་ཀྱེ་གཙོ་བོ་མི་དེར་བརྟེན་ནས་འཚོ། །བདག་གི་སེམས་ཀྱིས་དེའི་ནང་ཚེ་སྲོག་རྙེད། །ཁྱེད་ཀྱིས་ང་རང་གསོས་ནས་གསོན་པར་མཛད། །
ISA 38:17 ལྟོས་དང་བདག་གིས་དཀའ་སྡུག་ཚད་མེད་མྱངས། །དེ་ནི་ང་ལ་ཞི་བདེ་ཐོབ་ཕྱིར་ཡིན། །ཁྱེད་ཀྱིས་ང་ཡི་ཚེ་སྲོག་བསྲུངས་ནས་ནི། །ང་རང་འཆི་བའི་དོང་ལས་བསྒྲལ་བར་མཛད། །ཁྱེད་ཀྱིས་ང་ཡི་སྡིག་པ་ཡོད་དོ་ཅོག །ཐམས་ཅད་ཉིད་ཀྱི་སྐུ་རྒྱབ་གཡུགས་པས་སོ། །
ISA 38:18 གཤིན་པོའི་ཡུལ་ནས་ཁྱེད་ལ་གཏང་རག་མེད། །འཆི་བས་ཁྱེད་ལ་བསྟོད་བསྔགས་འབུལ་མི་ནུས། །དོང་ནང་ལྷུང་པ་རྣམས་ཀྱིས་ཁྱེད་ཉིད་ཀྱི། །བདེན་པ་ཉིད་ལ་རེ་བ་བསྐྱེད་ནུས་མིན། །
ISA 38:19 དེ་རིང་བདག་གིས་སྤྱོད་པ་ཇི་བཞིན་དུ། །གསོན་པོས་ཁྱེད་ལ་གཏང་རག་འབུལ་ནུས་ཡིན། །ཕ་ཡིས་རང་གི་བུ་དང་བུ་མོ་ལ། །ཁྱེད་ཀྱི་དྲང་བདེན་རྟོགས་སུ་འཇུག་པ་ཡིན། །
ISA 38:20 དཀོན་མཆོག་ཡ་ཝཱེས་ང་རང་སྐྱོབ་ངེས་པས། །ང་ཚོས་དཀོན་མཆོག་ཡ་ཝཱེའི་མཆོད་ཁང་ནང་། །རྒྱུད་མང་རོལ་ཆས་སྣ་ཚོགས་དཀྲོལ་ནས་ནི། །མི་ཚེ་གང་པོར་ང་ཡི་མགུར་མ་ལེན། །ཞེས་པའོ། །
ISA 38:21 ཡེ་ཤ་ཡཱ་ཡིས་འདི་ལྟར། སེ་ཡབ་ལེབ་མོ་ཞིག་ཁྱེར་འོངས་ནས་རྨ་ཁའི་སྟེང་དུ་ཕུར་ཅིག་དང་། རྒྱལ་པོ་དྲག་པར་འགྱུར་ཞེས་སྨྲས་ཤིང་།
ISA 38:22 ཧི་ཟི་ཀི་ཡཱ་ན་རེ། བདག་ཡར་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་རྟགས་ཅི་ཡོད་དམ་ཞེས་སྨྲས་སོ། །
ISA 39:1 དེའི་དུས་སུ། པཱ་པེལ་ལོན་གྱི་རྒྱལ་པོ་པལ་ཨ་དན་གྱི་བུ་སྟེ་མེ་རོ་དག་པལ་ཨ་དན་གྱིས་ཧི་ཟི་ཀི་ཡཱ་ལ་ནད་བྱུང་ནས་སངས་དྲག་ཏུ་གྱུར་པ་ཐོས་རྗེས། མི་མངགས་ནས་ཧི་ཟི་ཀི་ཡཱ་ལ་འཕྲིན་ཡིག་དང་ཕྱག་རྟེན་བསྐུར་པ་རེད།
ISA 39:2 དེར་ཧི་ཟི་ཀི་ཡཱ་ཤིན་ཏུ་དགའ་བར་གྱུར་ཏེ། རང་གི་གཏེར་མཛོད་ཀྱི་གསེར་དངུལ་དང་། སྤོས་དང་འབྱུག་སྣུམ་རིན་ཐང་ཅན། མཚོན་ཆའི་མཛོད་དང་གཏེར་མཛོད་ནང་དུ་ཅི་ཡོད་པ་ཐམས་ཅད་དེ་དག་ལ་བསྟན་ཏོ། །ཧི་ཟི་ཀི་ཡཱས་རང་གི་ཕོ་བྲང་དང་ཁོའི་རྒྱལ་ཁམས་ཡོངས་སུ་ནོར་རྫས་གང་ཡོད་ཐམས་ཅད་ལས་དེ་དག་ལ་མ་བསྟན་པ་གཅིག་ཀྱང་མེད་དོ། །
ISA 39:3 དེ་ནས་ལུང་སྟོན་པ་ཡེ་ཤ་ཡཱ་རྒྱལ་པོ་ཧི་ཟི་ཀི་ཡཱའི་དྲུང་དུ་འོངས་ནས་ཁོ་ལ་ན་རེ། མི་དེ་ཚོས་ཅི་ཟེར་རམ། དེ་ཚོ་ཡུལ་གང་ནས་ཁྱོད་ཀྱི་མདུན་དུ་འོངས་པ་ཡིན་ནམ་ཞེས་དྲིས་པ་ལ། ཧི་ཟི་ཀི་ཡཱས། དེ་དག་ནི་རྒྱང་ཐག་རིང་བའི་པཱ་པེལ་ལོན་ནས་ང་དང་འཕྲད་དུ་འོངས་པ་རེད་ཅེས་སྨྲས་ཤིང་།
ISA 39:4 ཡེ་ཤ་ཡཱ་ཡིས་དེ་དག་གིས་ཁྱོད་ཀྱི་ཕོ་བྲང་ནས་ཅི་མཐོང་བ་ཡིན་ནམ་ཞེས་དྲིས་པའི་ལན་དུ། ཧི་ཟི་ཀི་ཡཱས་དེ་དག་གིས་ངའི་ཕོ་བྲང་དུ་ཅི་ཡོད་པ་ཐམས་ཅད་མཐོང་བ་ཡིན་ཏེ། དེ་དག་ལ་མ་བསྟན་པའི་ནོར་རྫས་གང་ཡང་ངའི་གཏེར་མཛོད་ནང་ལུས་མེད་ཅེས་སྨྲས་སོ། །
ISA 39:5 དེར་ཡེ་ཤ་ཡཱས་ཧི་ཟི་ཀི་ཡཱ་ལ། དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་བཀའ་ལ་ཉོན་ཅིག
ISA 39:6 ལྟོས་དང་། ཁྱོད་ཀྱི་ཕོ་བྲང་དུ་ཡོད་པ་ཐམས་ཅད་དང་། ཁྱོད་ཀྱི་ཕ་མེས་རྣམས་ཀྱིས་དེ་རིང་གི་བར་དུ་བསགས་པ་ཐམས་ཅད་ཅི་ཡང་མ་ལུས་པར་པཱ་པེལ་ལོན་དུ་འཁྱེར་བའི་དུས་ཤིག་སླེབས་འོང་ཞེས་དཀོན་མཆོག་ཡ་ཝཱེས་གསུངས།
ISA 39:7 ཡང་ཁྱོད་ལས་མཆེད་ཅིང་ཁྱོད་ལས་སྐྱེས་པའི་བུ་རྒྱུད་རྣམས་ལས་ཁ་ཅིག་བཙོན་དུ་ཁྲིད་ནས་པཱ་པེལ་ལོན་རྒྱལ་པོའི་ཕོ་བྲང་དུ་ཉུག་རུམ་པར་འགྱུར་རོ་ཞེས་སྨྲས་པ་ན།
ISA 39:8 ཧི་ཟི་ཀི་ཡཱས་ཡེ་ཤ་ཡཱ་ལ། ཁྱོད་ཀྱིས་གསུངས་པའི་དཀོན་མཆོག་ཡ་ཝཱེའི་གསུང་ནི་ལེགས་སོ་ཞེས་སྨྲས་པ་དང་། ཁོའི་སེམས་སུ་ངའི་ཉིན་མོ་རྣམས་ཞི་བདེ་དང་བརྟན་འཇགས་ཡོད་པ་མིན་ནམ་སྙམ་མོ། །
ISA 40:1 ཁྱོད་རྣམས་ཀྱིས་སེམས་གསོ་བྱོས་ཤིག བདག་གི་མི་སྡེ་ལ་སེམས་གསོ་བྱོས་ཤིག་ཅེས་ཁྱོད་ཚོའི་དཀོན་མཆོག་གིས་གསུངས།
ISA 40:2 ཁྱོད་རྣམས་ཀྱིས་ཡེ་རུ་སཱ་ལེམ་ལ་གཏམ་འཇམ་པོ་བཤད་ནས་དེ་ལ། ཁོ་ཚོའི་དཀའ་སྡུག་རྫོགས་ཤིང་། ཁོ་ཚོའི་སྡིག་པའི་བླུ་རིན་འཇལ་ཏོ། །ཁོ་ཚོར་རང་གི་སྡིག་པ་ཐམས་ཅད་ཀྱི་རྐྱེན་གྱིས་དཀོན་མཆོག་ཡ་ཝཱེའི་ཕྱག་ནས་ཆད་པ་ལྡབ་འགྱུར་གྱིས་བབས་སོ་ཞེས་སྒྲོགས་ཤིག
ISA 40:3 དེ་ནས་སྐད་སྒྲ་ཞིག་གིས་འདི་ལྟར་འབོད་བཞིན་འདུག དབེན་སྟོང་ཡུལ་ནས་དཀོན་མཆོག་ཡ་ཝཱེ་ལ། །ཕེབས་ལམ་སྟ་གོན་བྱེད་ཅིང་བྱེ་ཐང་དུ། །རང་ཅག་དཀོན་མཆོག་གཤེགས་ལམ་དྲང་པོར་བཟོས། །
ISA 40:4 གྲོག་རོང་ཐམས་ཅད་འགེང་བར་བྱེད་པ་དང་། །རི་སྒང་མཐའ་དག་སྙོམས་པར་གཏོང་ངེས་ལ། །གཡང་གཟར་ཐམས་ཅད་བདེ་སྙོམ་དུ་བཟོ་ཞིང་། །ཀྱག་ཀྱོག་རྣམས་ནི་ཐང་བདེ་རུ་མཛད་ངེས། །
ISA 40:5 དཀོན་མཆོག་ཡ་ཝཱེའི་གཟི་བརྗིད་མངོན་འགྱུར་ཞིང་། །སྐྱེ་བོ་ཀུན་གྱིས་ལྷན་ཅིག་མཐོང་བར་འགྱུར། །འདི་བཞིན་དཀོན་མཆོག་ཡ་ཝཱེས་གསུངས་པས་སོ། །
ISA 40:6 ཡང་སྒྲ་ཞིག་གིས་ཁྱོད་ཀྱིས་སྐད་རྒྱོབ་ཅིག་ཅེས་པ་ན། ཁོས་བདག་གིས་ཅི་ཞིག་སྒྲོག་གམ་ཞེས་དྲིས་པ་དང་། ལུས་ཅན་ཐམས་ཅད་རྩྭ་དང་འདྲ། །མཛེས་སྡུག་སྤང་གི་མེ་ཏོག་འདྲ། །
ISA 40:7 རྩྭ་ནི་སྐམ་ཞིང་མེ་ཏོག་ཡལ། །ཡ་ཝཱེས་ཞལ་ཕུ་བཏབ་པས་ན། །ལུས་ཅན་ཐམས་ཅད་རྩྭ་དང་འདྲ། །
ISA 40:8 རྩྭ་ནི་སྐམ་ཞིང་མེ་ཏོག་ཡལ། །རང་ཅག་དཀོན་མཆོག་ཉིད་ཀྱི་བཀའ། །རྒྱུན་ནས་རྒྱུན་དུ་གནས་པ་ཡིན། །ཞེས་པའོ། །
ISA 40:9 ཡང་ཀྱེ་ཛ་ཡན་ལ་འཕྲིན་བཟང་སྐྱེལ་མཁན་ཁྱོད། རི་མཐོན་པོར་འཛེགས་པར་གྱིས། ཀྱེ་ཡེ་རུ་སཱ་ལེམ་ལ་ལོན་བཟང་སྐྱེལ་མཁན་ཁྱོད་ཀྱིས་ཅི་ལྕོགས་ཀྱིས་སྐད་མཐོན་པོ་གྱིས་ཤིག འཇིགས་པ་མེད་པར་སྐད་མཐོན་པོ་གྱིས་ཤིག ལྟོས་དང་འདི་ནི་ཁྱོད་ཀྱི་དཀོན་མཆོག་ལགས་སོ་ཞེས་ཡ་ཧུ་དཱའི་གྲོང་ཁྱེར་ཀུན་ལ་སྒྲོགས་ཤིག
ISA 40:10 ལྟོས་དང་། གཙོ་བོ་ཡ་ཝཱེ་མཐུ་སྟོབས་དང་བཅས་ཕེབས་ངེས་ཤིང་། ཁོང་གི་ཕྱག་གིས་ཉིད་ཀྱི་ཕྱིར་དུ་དབང་སྒྱུར་ཏོ། །ལྟོས་དང་། ཁོང་གིས་མི་རྣམས་ལ་གནང་བའི་གསོལ་རས་ཁོང་གི་རྩར་གནས་ཤིང་། ཁོང་གི་ཐོབ་ཆ་ཉིད་ཀྱི་དྲུང་དུ་ཡོད།
ISA 40:11 ཁོང་ཉིད་རྫི་བོ་ཞིག་དང་མཚུངས་པར་རང་གི་ལུག་ཁྱུ་འཚོ་སྐྱོང་ལེགས་པོ་བྱེད་པ་དང་། ལུ་གུ་རྣམས་ཕྱག་གིས་པང་དུ་བསྣམས་ནས་མ་མོ་རྣམས་ལ་དལ་གྱིས་ལམ་སྟོན་མཛད་དོ། །
ISA 40:12 སུས་རྒྱ་མཚོའི་ཆུ་ཡི་ཚད་ནི་ལག་མཐིལ་གྱིས་འཇལ་ཞིང་། ལག་པས་ནམ་མཁའི་མཐོ་ཚད་བཅལ་བ་ཡིན་ནམ། སུས་ས་གཞིའི་རྡུལ་གྲངས་བྲེ་ལ་འཇལ་ཞིང་། རི་མཐོན་པོ་རྣམས་སྲང་དང་རི་ཕྲན་རྣམས་རྒྱ་མར་བཏེགས་པ་ཡིན་ནམ།
ISA 40:13 དཀོན་མཆོག་ཡ་ཝཱེའི་ཐུགས་ཉིད་སུས་དཔོག་ནུས་སམ། ཡང་ན་སུ་ཞིག་གིས་ཁོང་ལ་སློབ་སྟོན་བྱས་པ་ཡིན་ནམ།
ISA 40:14 ཁོང་གིས་སུ་ལ་གྲོས་བཏབ་ནས་ཁོང་ལ་སུ་ཡིས་བློ་གྲོས་བསྩལ་ཏམ། སུས་ཁོང་ལ་དྲང་པོའི་ལམ་བསྟན་ཅིང་ཤེས་བྱ་བསླབས་ཏེ་བློ་སྒོ་ཕྱེས་སམ།
ISA 40:15 ལྟོས་དང་། མི་རིགས་ཀུན་ནི་ཟོ་བ་ནང་གི་ཆུ་ཐིགས་ཙམ་དང་རྒྱ་སྲང་གི་རྡུལ་ཕྲན་ཙམ་ཡིན། ལྟོས་དང་། ཁོང་གིས་གླིང་ཕྲན་རྣམས་རྡུལ་ཕྲ་མོ་བཞིན་ཡར་འགྱོག་པའོ། །
ISA 40:16 ཐ་ན་ལེ་པཱ་ནོན་གྱི་ནགས་ཚལ་ནི་བུད་ཤིང་ལ་མི་འདང་ཞིང་། དེའི་ནང་གི་རི་དྭགས་རྣམས་ཀྱང་སྦྱིན་སྲེག་གི་མཆོད་པར་འདང་བ་མིན།
ISA 40:17 ཁོང་གི་སྤྱན་སྔར་མི་རིགས་ཐམས་ཅད་ཅི་ཡང་མིན་པར་སྣང་ཞིང་། ཁོང་གི་ཐུགས་སུ་དེ་རྣམས་སྟོང་བ་ཡིན་ནོ། །
ISA 40:18 དེས་ན་ཁྱོད་ཚོས་སུ་ཞིག་དཀོན་མཆོག་དང་བསྡུར་བར་བྱའམ། ཁྱོད་ཚོས་གཟུགས་བརྙན་ཇི་ལྟ་བུ་ཞིག་གིས་ཁོང་དང་བསྡུར་རམ།
ISA 40:19 སྐུ་འདྲར་མཚོན་ན་དེ་ནི་བཟོ་པས་བླུགས་ཏེ། མགར་པས་དེ་གསེར་གྱིས་བཏུམས་ནས་དངུལ་གྱི་ཉག་ཐག་བཟོ་བའོ། །
ISA 40:20 མཆོད་པ་དེ་འདྲ་འབུལ་མི་ནུས་པའི་དབུལ་ཕོངས་རྣམས་ཀྱིས་རུལ་རྒྱུ་མེད་པའི་ཤིང་བདམས་ཏེ། རང་ལ་ལག་ཤེས་པ་ཞིག་བཙལ་ནས་གཡོ་བ་མེད་པའི་སྐུ་འདྲ་བཟོ་བའོ། །
ISA 40:21 ཁྱོད་ཅག་གིས་མ་ཤེས་མ་ཐོས་སམ། གཏམ་འདི་དང་པོ་ནས་ཁྱོད་རྣམས་ལ་སྨྲས་པ་མ་ཡིན་ནམ། ས་གཞིའི་རྨང་བཙུགས་པའི་ཚུན་ལ་ཁྱོད་ཅག་གིས་ད་དུང་རྟོགས་པར་མ་གྱུར་རམ།
ISA 40:22 དཀོན་མཆོག་ཁོང་ཉིད་ས་གཞིའི་དཀྱིལ་འཁོར་གྱི་ཡང་སྟེང་དུ་བཞུགས་ཤིང་། ས་སྟེང་གི་ཡུལ་མི་རྣམས་ནི་འབུ་ཆ་ག་པ་དང་མཚུངས། ཁོང་གིས་ནམ་མཁའི་དབྱིངས་རྣམས་གནམ་ཡོལ་ལྟར་འདིང་བ་དང་། དེ་རྣམས་སྡོད་གནས་སུ་རུང་བའི་གུར་བཞིན་རྐྱོང་བ་ཡིན།
ISA 40:23 ཁོང་གིས་རྒྱལ་སྲས་རྣམས་ཅི་ཡང་མིན་པ་དང་ས་གཞིའི་ཁྲིམས་དཔོན་རྣམས་ཀྱང་སྙིང་པོ་མེད་པར་མཛད།
ISA 40:24 དེ་དག་ས་རུ་བཙུགས་ཤིང་བཏབ་པ་ཙམ་དང་། དེ་དག་གི་རྩ་བ་ས་འོག་ཏུ་ཟུག་པ་ཙམ་དུ། ཁོང་གིས་ཞལ་ཕུ་འདེབས་དུས་དེ་དག་སྐམ་ཞིང་། རླུང་འཚུབ་ཀྱིས་དེ་རྣམས་སོག་མ་ཇི་བཞིན་འཁུར་འགྲོ་བའོ། །
ISA 40:25 དམ་པ་ཉིད་ཀྱིས་འདི་སྐད་དུ། ཁྱོད་ཀྱིས་སུ་ཞིག་ང་དང་བསྡུར་བར་བྱའམ། ཡང་ན་བདག་ལ་འགྲན་ཟླ་སུ་ཞིག་ཡོད་དམ་ཞེས་གསུངས་སོ། །
ISA 40:26 ཁྱོད་ཚོས་མགོ་ཡར་ཁྱོག་ལ་ནམ་མཁར་ལྟོས་དང་། སྐར་ཚོགས་འདི་ཐམས་ཅད་སུས་བཀོད་པ་ཡིན་ནམ། སུས་གྲངས་ཀ་བཞིན་དེ་རྣམས་ཕྱིར་ཁྲིད་འོངས་ནས་རེ་རེ་བཞིན་མིང་ནས་ཞལ་འབོད་གནང་ངམ། ཁོང་ལ་དབང་དང་མཐུ་སྟོབས་ཆེན་པོ་མངའ་བས་གཅིག་ཀྱང་མ་ལུས་སོ། །
ISA 40:27 ཀྱེ་ཡ་ཀོབ། ཁྱོད་ཀྱིས་ངའི་བགྲོད་ལམ་དཀོན་མཆོག་ཡ་ཝཱེས་མི་མཁྱེན་ཞེས་བརྗོད་དོན་ཅི་ཡིན་ནམ། ཀྱེ་ཡེས་ར་ཨེལ། ཁྱོད་ཀྱིས་ངའི་གྱོད་གཞི་ལ་དཀོན་མཆོག་གིས་མི་གཟིགས་ཞེས་འཁང་ར་བྱེད་དོན་ཅི་ཡིན་ནམ།
ISA 40:28 ཁྱོད་ཀྱིས་མི་ཤེས་ཤིང་ཐོས་ཀྱང་མ་མྱོང་ངམ། གཏན་གནས་ཀྱི་དཀོན་མཆོག་ཡ་ཝཱེ། ས་གཞི་ཡོངས་ཀྱི་བྱེད་པོ་ཁོང་ཉིད་ནམ་ཡང་མི་ཆད་མི་དུབ་ཅིང་། ཁོང་གི་མཁྱེན་རྒྱ་དཔག་ཏུ་མེད་དོ། །
ISA 40:29 ཉམ་ཐག་རྣམས་ལ་ཁོང་གིས་སྟོབས་ཤུགས་སྦྱིན་ཞིང་། ཟུངས་ཤོར་བའི་མི་ལ་ཁོང་གིས་ནུས་པ་གནང་།
ISA 40:30 ན་གཞོན་ཡིན་ཡང་ཉམ་ཐག་ཅིང་ངལ་དུབ་འབྱུང་ངེས་ལ། དར་མ་ཡིན་ཡང་གཞི་ནས་འགྱེལ་བར་འགྱུར།
ISA 40:31 འོན་ཀྱང་དཀོན་མཆོག་ཡ་ཝཱེར་རེ་སྒུག་བྱེད་མཁན་རྣམས་ལ་ཡང་བསྐྱར་སྟོབས་ཤུགས་འཛོམ་ངེས་ཡིན། ཁོ་ཚོས་གླག་བཞིན་གཤོག་པ་བརྐྱངས་ནས་ནམ་འཕང་གཅོད་ཅིང་། དེ་དག་མཆོང་རྒྱུག་བྱས་ཀྱང་ཐང་མི་ཆད་ལ། བགྲོད་ཀྱང་ངལ་བར་མི་འགྱུར་རོ། །
ISA 41:1 ཀྱེ་གླིང་ཕྲན་རྣམས། ཁྱོད་རྣམས་ངའི་མདུན་དུ་ཁུ་སིམ་པོར་སྡོད་ཅིག མི་སྡེ་ཀུན་ལ་ཡང་བསྐྱར་སྟོབས་ཤུགས་འཛོམ་པར་གྱུར་ཅིག ཁོ་ཚོར་ཉེ་བར་འོངས་ནས་གཏམ་གླེང་བྱེད་དུ་ཆུག་དང་། རང་ཅག་མཉམ་དུ་འདུས་ཏེ་རྩོད་གླེང་བྱ།
ISA 41:2 སུ་ཞིག་གིས་ཤར་ཕྱོགས་ནས་མི་ཞིག་ལ་བསྐུལ་ཞིང་། དྲང་གཞག་སྒོ་ནས་མི་དེ་ རང་གི་མདུན་སར་འདྲེན་ནམ། ཁོང་གིས་རྒྱལ་ཁམས་ཐམས་ཅད་དེའི་མདུན་དུ་གཏོད་ཅིང་། ཁོང་གིས་རྒྱལ་པོ་ཀུན་དབང་དུ་བསྡུ་བ་དང་། རལ་གྲི་ཐོགས་ནས་དེ་དག་རྡུལ་དུ་བརླག་ཅིང་། དེ་དག་ཉིད་ཀྱི་གཞུ་འོག་ཏུ་སོག་མ་བཞིན་འཁུར་བར་མཛད།
ISA 41:3 ཁོང་གིས་དེ་དག་དེད་ནས་ཚེགས་མེད་དུ་རང་ཉིད་བརྒྱུད་མ་མྱོང་བའི་ལམ་དུ་འགྲོ་བར་མཛད།
ISA 41:4 སུ་ཞིག་གིས་འདི་དག་བཀོད་ཅིང་མཛད་དེ། སུ་ཞིག་གིས་ཐོག་མའི་དུས་ནས་མི་རབས་ཀུན་ལ་ཞལ་འབོད་གནང་བ་ཡིན་ནམ། དེ་ནི་དཀོན་མཆོག་ཡ་ཝཱེ་ང་རང་སྟེ། བདག་ནི་ཐོག་མ་ཉིད་དང་མཐའ་མའི་མི་དང་མཉམ་དུ་གནས་པའང་ང་རང་ཡིན།
ISA 41:5 གླིང་ཕྲན་རྣམས་ཀྱིས་མཐོང་ནས་འཇིགས་ཤིང་། ས་གཞིའི་མཐའ་མཚམས་རྣམས་ཀྱང་འདར་ནས་ཐམས་ཅད་ཉེ་སར་འོང་ངོ་། །
ISA 41:6 མི་རེ་རེས་ཕན་ཚུན་ལ་རོགས་བྱེད་ཅིང་། རང་གི་སྤུན་ཟླར་ན་རེ། སྙིང་རུས་སྐྱེད་ཅིག་ཅེས་སྨྲ་བ་ཡིན།
ISA 41:7 ཤིང་བཟོས་གསེར་མགར་བརྟན་པོར་མཛད་པ་དང་། ཐོ་བས་ལྕགས་རིགས་ལ་འཇམ་ཤ་བཏོད་མཁན་གྱིས་འོག་རྡོ་སྟེང་རྡུང་མཁན་ལ་སྐུལ་འདེབས་བྱེད་པ་ཡིན། ཚ་ལ་རྒྱག་མཁན་ལ་ཚ་ལ་བརྒྱབ་པ་ལེགས་སོ་ཟེར་ཞིང་། སྐུ་འདྲ་མི་གཡོ་བའི་ཕྱིར་དུ་འཛེར་མས་བརྟན་པོར་བྱེད་དོ། །
ISA 41:8 ཡིན་ཡང་བདག་གི་ཞབས་ཕྱི་ཡེས་ར་ཨེལ་ལགས། ཀྱེ་བདག་གི་གྲོགས་ཨབ་ར་ཧམ་གྱི་བུ་རྒྱུད་དེ་བདག་གིས་བདམས་པའི་ཡ་ཀོབ་ལགས།
ISA 41:9 ཁྱོད་ནི་ས་མཐའ་ནས་བདག་གིས་ཁྲིད་འོངས་ཤིང་། བདག་གིས་ས་ཐག་རིང་པོ་ནས་ཁྱོད་བོས་འོངས་ཏེ་ཁྱོད་ལ་ན་རེ། ཁྱོད་ནི་ངའི་ཞབས་ཕྱི་སྟེ། བདག་གིས་ཁྱོད་བདམས་ཤིང་མ་དོར་བ་ཡིན་ཞེས་སྨྲས་པ་ཡིན།
ISA 41:10 བདག་ནི་ཁྱོད་དང་མཉམ་དུ་ཡོད་པས་མ་འཇིགས་ཤིག བདག་ནི་ཁྱོད་ཀྱི་དཀོན་མཆོག་ཡིན་པས་དཔའ་མ་ཞུམ། བདག་གིས་ཁྱོད་རང་བརྟན་པོར་བྱེད་ཅིང་ཁྱོད་ལ་རོགས་བྱས་ནས། བདག་གི་དྲང་གཞག་གི་ལག་གཡས་པས་ཁྱོད་རང་སྐྱོར་བར་བྱའོ། །
ISA 41:11 ལྟོས་དང་། ཁྱོད་ལ་ཁོང་ཁྲོ་ལང་མཁན་རྣམས་ཁ་སྐྱེངས་ཤིང་བརྙས་བཅོས་ཐེབས་པར་འགྱུར། ཁྱོད་དང་རྒོལ་མཁན་རྣམས་སྟོང་ཞིང་མེད་པར་འགྱུར་ངེས་ཡིན།
ISA 41:12 ཁྱོད་དང་རྩོད་མཁན་རྣམས་ཁྱོད་ཀྱིས་བཙལ་ཡང་མི་རྙེད་ཅིང་། ཁྱོད་དང་འཐབ་མཁན་རྣམས་སྟོང་ཞིང་ཅི་ཡང་མིན་པར་འགྱུར།
ISA 41:13 གང་ལ་ཞེ་ན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞིང་ངས་ཁྱོད་ཀྱི་གཡས་ལག་ནས་བཟུང་སྟེ། མ་འཇིགས་ཤིག བདག་ནི་ཁྱོད་ལ་གྲོགས་མཛད་མཁན་ཡིན་ཞེས་སྨྲའོ། །
ISA 41:14 ཀྱེ་སྲིན་འབུ་ལྟ་བུའི་ཡ་ཀོབ། ཀྱེ་ཡེས་ར་ཨེལ་པ་རྣམས། ཁྱོད་རྣམས་མ་འཇིགས་ཤིག ཁྱོད་རྣམས་ཀྱི་དཀོན་མཆོག་ཡ་ཝཱེ་ཁྱོད་རང་སྐྱོབ་མཁན་ཏེ། ཡེས་ར་ཨེལ་གྱི་དམ་པ་ཉིད་ཀྱིས་ངས་ཁྱོད་ལ་གྲོགས་མཛད་པར་བྱའོ་ཞེས་གསུངས་སོ། །
ISA 41:15 ལྟོས་དང་། བདག་གིས་ཁྱོད་རང་གསར་ཞིང་རྣོ་ལ་སོ་མང་བའི་འབྲུ་རིགས་རྡུང་བྱེད་ལག་ཆ་རུ་བྱེད་དེ། ཁྱོད་ཀྱིས་རི་བོ་རྣམས་གཙང་མར་བརྡུང་ཞིང་རྡུལ་དུ་བཏང་ནས། རི་སྒང་ཐམས་ཅད་ཕུབ་མར་བསྒྱུར།
ISA 41:16 ཁྱོད་ཀྱིས་དེ་དག་རླུང་ལ་འཕྱར་ཞིང་རླུང་གིས་དེ་དག་འཁུར་བ་དང་། རླུང་འཚུབ་ཀྱིས་དེ་དག་གཏོར་བར་འགྱུར། འོན་ཀྱང་ཁྱོད་ནི་དཀོན་མཆོག་ཡ་ཝཱེར་བརྟེན་ནས་དགའ་བ་དང་། ཡེས་ར་ཨེལ་གྱི་དམ་པ་ཉིད་ཀྱི་ཕྱིར་གཟི་དཔལ་ངོམ་དགོས།
ISA 41:17 དཀའ་སྡུག་ཅན་དང་དབུལ་པོ་རྣམས་ཀྱིས་ཆུ་བཙལ་ཡང་མི་རྙེད་དེ། ཁོ་ཚོའི་ཁ་ལྕེ་སྐམ་ནས་སྐམ་པོར་འགྱུར་ཡང་། དཀོན་མཆོག་ཡ་ཝཱེ་བདག་གིས་དེ་དག་ལ་ལན་གནང་ཞིང་། ཡེས་ར་ཨེལ་གྱི་དཀོན་མཆོག་ངས་ཁོ་ཚོ་འདོར་བར་མི་བྱ།
ISA 41:18 བདག་གིས་རྩྭ་མེད་པའི་མཐོ་ས་དག་ཏུ་གཙང་པོ་འབྱེད་ཅིང་། ལུང་པ་རྣམས་སུ་ཆུ་འགོ་འདྲེན་པ་དང་། དབེན་སྟོང་ནི་རྫིང་བུ་དང་སྐམ་ས་རྣམས་ཆུ་མིག་ཏུ་བསྒྱུར་རོ། །
ISA 41:19 བདག་གིས་དབེན་སྟོང་དུ་ཐང་ཤིང་དང་སེང་ལྡེང་། པ་སངས་མེ་ཏོག རི་སྐྱེས་སྐྱུ་རུ་རའི་ཤིང་བཅས་འཛུགས་ཤིང་། བྱེ་ཐང་དུ་གསོམ་པ་དང་སྒྲོན་ཤིང་། ཤུག་ཤིང་བཅས་འཛུགས་པར་བྱ་སྟེ།
ISA 41:20 དེ་ནི་མི་ཡིས་མཐོང་ན་ཤེས་ཤིང་། བསམ་ན་རྟོགས་པར་འགྱུར་བའི་ཕྱིར་ཡིན་ཏེ། འདི་ནི་དཀོན་མཆོག་ཡ་ཝཱེའི་ཕྱག་གིས་མཛད་པ་དང་། ཡེས་ར་ཨེལ་གྱི་དམ་པ་ཉིད་ཀྱིས་བཀོད་པ་ཡིན་ནོ། །
ISA 41:21 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་རྩོད་པ་རྣམས་ཤོད་ཅིག་ཅེས་གསུང་བ་དང་། ཡ་ཀོབ་ཀྱི་རྒྱལ་པོས་ཁྱོད་ཀྱི་རྒྱུ་མཚན་ངོ་མ་རྣམས་ཁྱེར་ཤོག་ཅེས་གསུང་ངོ་། །
ISA 41:22 འབྱུང་འགྱུར་རྣམས་ངེད་ཅག་ལ་བཤད་དུ་འོང་བར་ཆུག སྔོན་ཆད་ཀྱི་དོན་རྣམས་ཅི་ཡིན་པ་བཤད་དུ་ཆུག དེ་ནས་ང་ཚོས་བསམ་བློ་བཏང་སྟེ་དོན་དེ་དག་གི་མཇུག་འབྲས་ཤེས་ཐུབ་པ་དང་། ཡང་ན་ཕྱིས་སུ་ཅི་འབྱུང་བ་ངེད་ཅག་ལ་སྟོན་ཅིག
ISA 41:23 ཁྱོད་ཅག་ལྷ་ཡིན་པ་ངེད་ཀྱིས་རྟོགས་པའི་ཕྱིར། ཕྱིས་སུ་ཅི་འབྱུང་བ་རྣམས་ངེད་ཅག་ལ་ཤོད་དང་། ཁྱོད་ཅག་གིས་དོན་བཟང་ངན་གང་ཞིག་བྱོས་དང་ང་ཚོས་མཉམ་དུ་མཐོང་ཞིང་འཇིགས་པར་འགྱུར།
ISA 41:24 ལྟོས་དང་། ཁྱོད་ཅག་ནི་ཅི་ཡང་མིན་ཏེ། ཁྱོད་ཅག་གིས་ཅི་བྱས་རྣམས་ཀྱང་དོན་མེད་ཡིན་ལ། ཁྱོད་ཅག་འདེམས་མཁན་རྣམས་སྐྱུག་བྲོ་བ་ཡིན་ནོ། །
ISA 41:25 བདག་གིས་བྱང་ཕྱོགས་ནས་མི་གཅིག་བསླངས་པ་དང་ཁོ་འོངས་པ་སྟེ། ཁོ་ཉི་མ་འཆར་ས་ནས་འོངས་ཏེ་ངའི་མིང་འབོད་ཅིང་། འཇིམ་པ་བརྫི་ཞིང་རྫ་བཟོས་འདམ་བུ་རྫི་བ་ལྟར། དབང་འཛིན་མཁན་རྣམས་རྡོག་བརྫིས་སུ་གཏོང་བར་འགྱུར།
ISA 41:26 སུ་ཞིག་གིས་ཐོག་མ་ཉིད་ནས་དོན་འདི་གླེང་སྟེ་ངེད་རྣམས་ལ་རྟོགས་སུ་བཅུག་གམ། སུ་ཞིག་གིས་སྔར་ནས་བཤད་དེ་ང་ཚོས་ཁོ་བདེན་ནོ་ཞེས་སྨྲས་པ་ཡིན་ནམ། སུས་ཀྱང་མ་བཤད་སུས་ཀྱང་མ་བསྒྲགས་ལ། ཁྱོད་ཚོའི་གཏམ་ཐོས་པ་སུ་ཡང་མེད་དོ། །
ISA 41:27 དང་པོར་བདག་གིས་ཛ་ཡན་ལ། ལྟོས་དང་། འདི་དག་ལ་ལྟོས་དང་ཞེས་སྨྲ་ཞིང་། བདག་གིས་ཡེ་རུ་སཱ་ལེམ་ལ་འཕྲིན་བཟང་སྒྲོག་མཁན་ཞིག་གནང་བར་བྱའོ། །
ISA 41:28 ངས་བལྟས་པའི་ཚེ། མི་གཅིག་ཀྱང་མི་འདུག དེ་ཚོའི་གྲས་སུ་བདག་གིས་འདྲི་དུས་སུ་ལན་ཚིག་གཅིག་འདེབས་ཐུབ་པའི་གྲོས་མི་གཅིག་ཀྱང་མི་འདུག
ISA 41:29 ལྟོས་དང་། དེ་དག་ནི་ཅི་ཡང་མིན་ཏེ། ཁོ་ཚོས་ཅི་བྱས་རྣམས་ཀྱང་དོན་མེད་ཡིན་ལ། དེ་དག་གི་བླུགས་སྐུ་རྣམས་རླུང་དང་སྟོང་བ་ཡིན་ནོ། །
ISA 42:1 ལྟོས་དང་། འདི་ནི་བདག་གི་ཞབས་ཕྱི་སྟེ། བདག་གིས་ཁོ་སྐྱོར་ཞིང་། བདག་གིས་ཁོ་བདམས་པ་དང་སེམས་ནས་ཁོ་ལ་དགའ་སྟེ། ངས་རང་གི་སེམས་ཉིད་ཁོ་ལ་གནང་བ་དང་། ཁོས་མི་རིགས་ཀུན་ལ་དྲང་གཞག་སྐྱོང་ངོ་། །
ISA 42:2 དེས་འབོད་སྒྲ་མི་སྒྲོག་ལ་ཀུ་ཅོ་ཡང་མི་འདོན། ཁྲོམ་ནས་མི་ལ་ཁོའི་སྐད་ཐོས་པར་ཡང་མི་བྱ།
ISA 42:3 བསྣད་པའི་འདམ་རྩྭ་མི་གཅོག་ལ། དུ་བ་འཐུལ་བའི་སྡོང་རས་གཟུམ་མི་འགྱུར། ཁོས་ལྷག་བསམ་དཀར་པོས་དྲང་བདེན་བསྒྲག་པ་ཡིན།
ISA 42:4 ས་སྟེང་ནས་བདེན་ལུགས་ཚུགས་པའི་བར་དུ། ཁོ་ཡིད་མི་ཆད་ལ་བློ་ཡང་མི་ཕམ་ཞིང་། གླིང་ཕྲན་རྣམས་ཀྱི་མི་ཐམས་ཅད་ཀྱིས་ཁོའི་བསླབ་བྱ་ལ་སྒུག་པའོ། །
ISA 42:5 ནམ་མཁའི་དབྱིངས་རྣམས་བཀོད་ཅིང་ཨ་སྔོན་དབྱིངས་རྣམས་རྐྱོང་མཁན་གྱིས་ས་གཞི་དང་དེའི་སྟེང་གི་ཐམས་ཅད་བཏིངས་པ་དང་། ས་གཞི་སྟེང་གི་མི་རྣམས་ལ་དབུགས་བསྩལ་ཞིང་། ས་གཞིའི་སྟེང་དུ་སྐྱོད་པའི་མི་རྣམས་ལ་སེམས་ཉིད་གནང་མཁན་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ།
ISA 42:6 བདག་ནི་ཡ་ཝཱེ་ཡིན་ཞིང་ངས་ཁྱོད་དྲང་བདེན་ངང་ནས་བོས་པ་སྟེ། བདག་གིས་ཁྱོད་ཀྱི་ལག་པར་དམ་པོར་འཇུས་ནས་ཁྱོད་རང་བསྲུང་བ་དང་། ཁྱོད་ནི་མི་རྣམས་ཀྱི་ཞལ་ཆད་དང་། ཕྱི་ཕྱོགས་པ་རྣམས་ཀྱི་འོད་དུ་བྱས་ནས།
ISA 42:7 ལོང་པ་རྣམས་ཀྱི་མིག་འབྱེད་ཅིང་བཙོན་པ་རྣམས་བཙོན་ཁང་ནས་ཕྱི་རུ་འཁྲིད་པ་དང་། སྨག་རུམ་ཁྲོད་དུ་གནས་པ་རྣམས་བཙོན་ལས་སྒྲོལ་བའི་ཕྱིར་ཡིན་ནོ། །
ISA 42:8 བདག་ནི་ཡ་ཝཱེ་སྟེ། འདི་ངའི་མིང་ཡིན། བདག་གིས་རང་གི་གཟི་བརྗིད་གཞན་ལ་མི་སྟེར་ཞིང་། བདག་ལ་འོས་པའི་བསྟོད་བསྔགས་ནི་བརྐོས་བརྙན་ལ་འཐོབ་པར་མི་བྱའོ། །
ISA 42:9 ལྟོས་དང་། སྔར་ལུང་བསྟན་པའི་དོན་རྣམས་འགྲུབ་པར་གྱུར་ཅིང་། ད་ནི་བདག་གིས་ཁྱོད་ལ་དོན་གསར་པ་རྣམས་བརྗོད་པར་བྱ་སྟེ། དེ་དག་མ་བྱུང་སྔོན་ལ་བདག་གིས་ཁྱོད་ཅག་ལ་སྨྲས་པ་ཡིན་ཞེས་གསུངས་སོ། །
ISA 42:10 ཀྱེ་རྒྱ་མཚོར་འགྲུལ་མཁན་དང་མཚོ་ནང་དུ་ཡོད་པ་ཐམས་ཅད་དང་། གླིང་ཕྲན་རྣམས་དང་དེའི་སྟེང་དུ་གནས་པའི་ཡུལ་མི་ཀུན་གྱིས་དཀོན་མཆོག་ཡ་ཝཱེར་བསྟོད་དབྱངས་གསར་པ་ལོངས་ཤིག ས་མཐའ་ནས་ཁོང་ལ་བསྟོད་པ་ཕུལ་ཞིག
ISA 42:11 དབེན་སྟོང་དང་དེའི་ནང་གི་གྲོང་སྡེ་རྣམས་ཀྱིས་དགའ་འབོད་གྱིས་ཤིག ཀེ་དཱར་པ་རྣམས་སྡོད་པའི་གྲོང་ཚོ་ཐམས་ཅད་ཀྱིས་ཀི་སྒྲ་སྒྲོགས་ཤིག ས་ལཱའི་ཡུལ་མི་རྣམས་ཀྱིས་སྤྲོ་གླུ་ལོངས་ལ་རི་རྩེ་དག་ནས་འུར་སྒྲ་སྒྲོགས་ཤིག
ISA 42:12 དེ་དག་གིས་དཀོན་མཆོག་ཡ་ཝཱེ་ལ་གཟི་བརྗིད་འབུལ་ཞིང་གླིང་ཕྲན་དག་ནས་ཁོང་ལ་བསྟོད་བསྔགས་བརྗོད་པར་གྱུར་ཅིག
ISA 42:13 དཀོན་མཆོག་ཡ་ཝཱེ་ནི་དཔའ་རྒོད་ལྟར་ཕེབས་ཏེ། གཡུལ་ལ་ཞུགས་པའི་དམག་མི་བཞིན་སེམས་ཤུགས་ཆེ་རུ་བསྐྱེད་པ་དང་། ཁོང་གིས་ཀི་སྒྲ་དང་བཅས་ངར་སྐད་ཆེན་པོ་བསྒྲག་ཅིང་། ཉིད་ཀྱི་ཟིལ་ཤུགས་དགྲ་བོ་རྣམས་ལ་སྟོན་པར་བྱའོ། །
ISA 42:14 བདག་གིས་ནི་ཡུན་རིང་པོར་ཁ་རོག་ལ་བསྡད་ཅིང་ངག་བསྡམས་ནས་རང་ཚོད་བཟུང་བ་ཡིན། ཡིན་ཡང་ད་ལྟ་བདག་གིས་ཕྲུ་གུ་བཙའ་དུས་ཀྱི་བུད་མེད་བཞིན་སྐད་སྒྲ་སྒྲོག་ཅིང་། དབུགས་འཁུན་ཞིང་ཧལ་བར་བྱ།
ISA 42:15 ངས་རི་བོ་དང་རི་སྒང་རྣམས་ས་རྒོད་དུ་གཏོང་ཞིང་། སྐྱེ་དངོས་ཐམས་ཅད་སྐམ་དུ་འཇུག་པ་དང་། གཙང་པོ་རྣམས་སྐམ་སར་བསྒྱུར་ཏེ། རྫིང་བུ་རྣམས་སྐམ་དུ་འཇུག་དགོས།
ISA 42:16 བདག་གིས་ལོང་པ་རྣམས་ཆ་རྒྱུས་མེད་པའི་ལམ་དང་། ཁོ་ཚོས་མི་ཤེས་པའི་ལམ་དུ་འཁྲིད་དགོས་ལ། ངས་དེ་དག་གི་མདུན་དུ་མུན་པ་འོད་དུ་བསྒྱུར་བ་དང་། ཀྱག་ཀྱོག་རྣམས་བདེ་བར་བཟོ་དགོས། དོན་འདི་རྣམས་བདག་གིས་བསྒྲུབ་དགོས་ཏེ་ནམ་ཡང་འདོར་བར་མི་བྱའོ། །
ISA 42:17 སྐུ་འདྲ་ལ་བརྟེན་མཁན་དང་། བླུགས་སྐུ་ལ་ཁྱོད་རྣམས་ང་ཚོའི་ལྷ་ཡིན་ཟེར་མཁན་དག་ནི་ཕྱིར་སྐྲོད་པར་འགྱུར་ཞིང་། ངོ་ཚ་ཆེན་པོར་གཏོད་ངེས་ཡིན།
ISA 42:18 ཀྱེ་འོན་པ་རྣམས། ཁྱོད་ཚོས་ཉོན་དང་། ཀྱེ་ལོང་པ་རྣམས། ཁྱོད་ཅག་གིས་གཟབ་གཟབ་བྱས་ནས་ལྟོས་ཤིག དེ་ནས་མཐོང་བར་འགྱུར་རོ། །
ISA 42:19 བདག་གི་ཞབས་ཕྱི་ལས་ཀྱང་ལྷག་པའི་ལོང་པ་སུ་ཞིག་ཡོད་དམ། བདག་གིས་མངགས་པའི་ཕོ་ཉ་ལས་ཀྱང་ལྷག་པའི་འོན་པ་སུ་ཞིག་ཡོད་དམ། བདག་དང་ཞི་ཆིངས་བཞག་པ་ལྟ་བུའི་ལོང་པ་སུ་ཞིག་ཡོད་དམ། དཀོན་མཆོག་ཡ་ཝཱེའི་ཞབས་ཕྱི་ལྟ་བུའི་ལོང་པ་སུ་ཞིག་ཡོད་དམ།
ISA 42:20 ཁྱོད་ཀྱིས་དོན་མང་པོ་མཐོང་ཡང་དེར་དོ་སྣང་མ་བྱས་ལ། རྣ་བ་ཕྱེས་ཀྱང་ཐོས་པར་མ་གྱུར།
ISA 42:21 དཀོན་མཆོག་ཡ་ཝཱེ་ནི་ཉིད་ཀྱི་དྲང་བདེན་དབང་གིས། བཀའ་ཁྲིམས་ཆེན་པོ་དང་གཟི་བརྗིད་ཅན་དུ་བརྩི་བར་དགྱེས།
ISA 42:22 ཡིན་ཡང་འབངས་འདི་དག་ནི་ཕྲོགས་ནས་བཅོམ་པ་སྟེ། ཐམས་ཅད་ས་དོང་དག་ཏུ་བཅུག་ཅིང་། བཙོན་ཁང་དག་ལ་སྦས་པ་དང་། ཁོ་ཚོར་འཕྲོག་བཅོམ་ཐེབས་ཀྱང་སྐྱོབ་མཁན་མེད། བཅོམ་ནོར་དུ་གྱུར་ཡང་ཕྱིར་སྤྲོད་ཤོག་ཅེས་ཟེར་མཁན་གཅིག་ཀྱང་མེད་དོ། །
ISA 42:23 ཁྱོད་ཚོའི་ཁྲོད་དུ་འདི་ལ་རྣ་བ་གཏད་ནས་ཉན་མཁན་སུ་ཡོད་དམ། སུ་ཞིག་གིས་ད་ནས་བཟུང་གཟབ་གཟབ་བྱས་ནས་མཉན་པར་བྱའམ།
ISA 42:24 སུ་ཞིག་གིས་ཡ་ཀོབ་འཕྲོག་མཁན་གྱི་ལག་ཏུ་གཏད་པ་ཡིན་ནམ། སུ་ཞིག་གིས་ཡེས་ར་ཨེལ་བཅོམ་མཁན་གྱི་ལག་ཏུ་གཏད་པ་ཡིན་ནམ། དེ་ནི་ངེད་ཅག་གིས་ཕོག་ཐུག་བཏང་བའི་དཀོན་མཆོག་ཡ་ཝཱེ་མ་ཡིན་ནམ། དེ་ཚོ་ནི་ཁོང་གི་ལམ་དུ་འགྲོ་བར་མ་དགའ་ལ། ཁོང་གི་བཀའ་ཁྲིམས་ཀྱང་མ་བརྩིས་སོ། །
ISA 42:25 དེ་བས་ཁོང་གིས་ཉིད་ཀྱི་ཐུགས་ཁྲོ་དྲག་པོ་དང་དམག་འཁྲུག་ཆེན་པོ་དེ་ཚོའི་སྟེང་དུ་བླུགས་ཤིང་། དེ་ཚོའི་ཕྱོགས་ཀུན་ནས་མེ་བཞིན་འབར་ནའང་ཁོ་ཚོས་མ་ཤེས་ཏེ། ཁོ་རྣམས་བསྲེགས་ཀྱང་ཁོ་ཚོས་ཡིད་ལ་མ་བཟུང་ངོ་། །
ISA 43:1 ཡིན་ཡང་ཀྱེ་ཡ་ཀོབ། ཁྱོད་རང་སྐྲུན་མཁན་གྱི་དཀོན་མཆོག་ཡ་ཝཱེ་དང་། ཀྱེ་ཡེས་ར་ཨེལ། ཁྱོད་རང་བཟོ་མཁན་གྱི་གཙོ་བོས་ད་ལྟ་འདི་སྐད་དུ། ངས་ཁྱོད་རང་བསྐྱབས་པས་མ་འཇིགས་ཤིག ངས་ཁྱོད་ཀྱི་མིང་ནས་ཁྱོད་རང་བོས་པས། ཁྱོད་ནི་ང་ལ་གཏོགས་སོ། །
ISA 43:2 ཁྱོད་རང་ཆུ་བོ་བརྒྱུད་ནས་འགྲོ་དུས་སུ་ང་རང་ཁྱོད་དང་མཉམ་དུ་ཡོད། ཁྱོད་རང་གཙང་པོར་བརྒལ་དུས་སུ་ཆུ་ཡིས་ཁྱོད་བསྣུབ་པར་མི་འགྱུར། ཁྱོད་མེའི་དཀྱིལ་ནས་འགྲོ་དུས་སུ་འཚིག་པར་མི་འགྱུར་ལ། མེ་ལྕེ་ཡང་ཁྱོད་ཀྱི་སྟེང་དུ་འབར་བར་མི་འགྱུར་རོ། །
ISA 43:3 གང་ལ་ཞེ་ན། བདག་ནི་ཁྱོད་ཀྱི་དཀོན་མཆོག་ཡ་ཝཱེ་དང་། ཡེས་ར་ཨེལ་གྱི་དམ་པ་ཉིད། ཁྱོད་ཀྱི་སྐྱབས་མགོན་བཅས་ཡིན་ལ། ངས་ཨེ་ཅིབ་ཁྱོད་ཀྱི་བླུ་རིན་དུ་བྱས་ཤིང་། གུ་ཤ་དང་སེ་བཱ་གཉིས་ཁྱོད་ཀྱི་ཚབ་ཏུ་སྤྲད་པ་ཡིན།
ISA 43:4 གང་ལ་ཞེ་ན། ཁྱོད་ནི་ངའི་མིག་ལམ་དུ་ཤིན་ཏུ་རྩ་ཆེ་ཞིང་གལ་ཆེན་པོ་ཡིན་པས། ངས་ཁྱོད་གཅེས་སུ་འཛིན་ཞིང་། ངས་ཁྱོད་ཀྱི་ཚབ་ཏུ་མི་གཞན་དང་། མི་རིགས་གཞན་ཁྱོད་ཀྱི་ཚེ་སྲོག་ལ་བརྗེས་པ་ཡིན།
ISA 43:5 ང་ཁྱོད་དང་མཉམ་དུ་ཡོད་པས་མ་འཇིགས་ཤིག ངས་ཁྱོད་ཀྱི་བུ་རྒྱུད་རྣམས་ཤར་ཕྱོགས་ནས་འཁྲིད་འོང་ཞིང་། ནུབ་ཕྱོགས་ནས་ངས་ཁྱོད་བསྡུ་འོང་ངེས་ཡིན།
ISA 43:6 ངས་བྱང་ཕྱོགས་ལ། དེ་དག་སྤྲོད་ཤོག་ཅེས་དང་། ཡང་ལྷོ་ཕྱོགས་ལ་དེ་དག་མ་འགོག་ཅིག་ཅེས་སྨྲས་ཏེ་རྒྱང་རིང་ཡུལ་ནས་ངའི་བུ་རྣམས་དང་། ས་མཐའ་ནས་ངའི་བུ་མོ་རྣམས་ཕྱིར་འཁྲིད་འོང་ངོ་། །
ISA 43:7 དེ་རྣམས་ནི་ངའི་མིང་ཐོགས་པའི་མི་ཡིན་པ་དང་། ངས་རང་གི་གཟི་བརྗིད་ཀྱི་དོན་དུ་བསྐྲུན་ལ། ངས་བཟོས་ཤིང་བཀོད་པའོ་ཞེས་གསུངས་སོ། །
ISA 43:8 ཁྱོད་ཀྱིས་མིག་དང་ལྡན་པའི་ལོང་པ་རྣམས་དང་། རྣ་བ་ཡོད་པའི་འོན་པ་རྣམས་ཕྱི་རུ་ཁྲིད་ཤོག་ཅིག
ISA 43:9 རྒྱལ་ཁམས་ཀུན་ཕྱོགས་གཅིག་ཏུ་འདུས་ནས་མི་སྡེ་ཀུན་འཛོམས་ཀྱང་། དེ་རྣམས་ལས་དོན་འདི་འཆད་ནུས་པ་སུ་ཡོད་དམ། སྔར་གྱི་དོན་རྣམས་རང་ཅག་ལ་བསྒྲག་ཐུབ་པ་སུ་ཡོད་དམ། རང་གི་དྲང་བདེན་མངོན་ཞིང་། མི་གཞན་ལ་ཐོས་སུ་བཅུག་སྟེ་འདི་ནི་བདེན་ནོ་ཞེས་སྨྲ་བའི་ཕྱིར། དེ་དག་ལ་རང་གི་དཔང་པོ་འཁྲིད་འོང་དུ་ཆུག
ISA 43:10 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་ནི་ངའི་དཔང་པོ་དང་། ངས་བདམས་པའི་ཞབས་ཕྱི་ཡིན་ཏེ། ཁྱོད་ཅག་གིས་ང་ཤེས་ཤིང་ང་ལ་བློ་གཏད་བཅོལ་བ་དང་། ང་ནི་ཁོང་ཉིད་ཡིན་པ་རྟོགས་པའི་ཕྱིར་རོ། །ངའི་སྔོན་ལ་ལྷ་གཅིག་ཀྱང་བཟོས་མེད་ལ། ངའི་རྗེས་སུའང་གང་ཡང་འབྱུང་མི་སྲིད་དོ། །
ISA 43:11 བདག་གཅིག་པུ་དཀོན་མཆོག་ཡ་ཝཱེ་ཡིན། ང་མ་གཏོགས་སྐྱབས་མགོན་གཞན་ཞིག་མེད།
ISA 43:12 ཁྱོད་ཅག་གི་ཁྲོད་དུ་ལྷ་གཞན་ཞིག་མེད་ཅེས་བདག་གིས་སྔར་ནས་ལུང་བསྟན་ཅིང་། བདག་གིས་སྔར་ནས་བསྐྱབས་པ་དང་། ཡང་བདག་གིས་སྔར་ནས་ཁྱོད་རྣམས་ལ་བསྒྲགས་པ་ཡིན་ཞེས་དཀོན་མཆོག་ཡ་ཝཱེས་གསུངས་ཤིང་། ཁྱོད་རྣམས་ངའི་བདེན་དཔང་ཡིན་ལ། ང་ནི་དཀོན་མཆོག་ཡིན།
ISA 43:13 དུས་ཀྱི་ཐོག་མ་ནས་ང་ནི་ཁོང་ཉིད་ཡིན། ངའི་ལག་ནས་ཐར་དུ་འཇུག་ཐུབ་མཁན་སུ་ཡང་མེད་ལ། ངས་དོན་སྒྲུབ་པ་སུ་ཡིས་ཟློག་ནུས་སམ་ཞེས་གསུངས་སོ། །
ISA 43:14 ཁྱོད་ཅག་གི་སྐྱབས་མགོན་དང་ཡེས་ར་ཨེལ་གྱི་དམ་པ་ཉིད་དེ་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་དོན་དུ་ངས་པཱ་པེལ་ལོན་ལ་མི་མངགས་པ་དང་། ངས་ཀལ་དི་པ་ཐམས་ཅད་ཡུལ་བྱོལ་པ་བཞིན་དུ་མར་འོང་དུ་འཇུག་པ་སྟེ། དེ་རྣམས་ནམ་རྒྱུན་ཁོ་ཚོས་རང་བསྟོད་བྱེད་པའི་གྲུ་གཟིངས་ལ་བསྡད་ནས་མར་འོང་བར་བྱ།
ISA 43:15 བདག་ནི་ཡ་ཝཱེ་སྟེ། ཁྱོད་ཅག་གི་དམ་པ་ཉིད་དང་ཡེས་ར་ཨེལ་གྱི་བྱེད་པོ། ཁྱོད་ཅག་གི་རྒྱལ་པོ་བཅས་ཡིན་ཞེས་གསུངས་སོ། །
ISA 43:16 དཀོན་མཆོག་ཡ་ཝཱེས་རྒྱ་མཚོའི་ནང་དུ་བགྲོད་ལམ་ཞིག་དང་། ཆུ་ཆེན་རྣམས་བརྒྱུད་ནས་རྐང་ལམ་ཞིག་བཏོད་ཅིང་།
ISA 43:17 ཁོང་གིས་ཤིང་རྟ་དང་རྟ། དམག དཔའ་རྒོད་བཅས་ཕྱི་རུ་དྲངས་ནས། དེ་རྣམས་སར་ཉལ་ཞིང་ཡང་བསྐྱར་ཡར་ལང་མི་ནུས་ལ། དེ་དག་སྡོང་རས་ཟད་པ་བཞིན་ཚར་ཞིང་མེད་པར་གྱུར།
ISA 43:18 ཡང་དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་འདས་ཟིན་པའི་དོན་རྣམས་མི་དྲན་པར་གྱིས། གནའ་བོའི་དོན་རྣམས་ལའང་བསམ་མནོ་མི་གཏོང་བར་བྱའོ། །
ISA 43:19 ལྟོས་དང་། ངས་དོན་གསར་པ་ཞིག་རྩོམ་སྟེ་ད་ལྟ་འབྱུང་བར་འགྱུར་ལ། ཁྱོད་རྣམས་ཀྱིས་ད་དུང་མི་རྟོགས་སམ། ངས་དབེན་སྟོང་ཡུལ་ནས་ལམ་ཞིག་གཏོད་ཅིང་ས་སྟོང་ནས་ཆུ་བོ་རྣམས་འདོན་པར་བྱ།
ISA 43:20 ས་སྟེང་གི་རི་དྭགས་ཀྱིས་ང་ལ་བཀུར་ཞིང་། ཁྱི་སྤྱང་དང་རྔ་བྱ་དག་གིས་ཀྱང་དེ་བཞིན་བྱེད་ངེས་ཡིན། གང་ལ་ཞེ་ན། རང་གིས་བདམས་པའི་མི་སྡེ་ལ་འཐུང་ཆུ་ཡོད་པའི་ཕྱིར་དུ། ངས་དབེན་སྟོང་ནས་ཆུ་དང་ས་སྟོང་ནས་གཙང་པོ་ཡོད་པར་བྱས་སོ། །
ISA 43:21 ངས་རང་གི་ཆེད་དུ་བཀོད་པའི་མི་རྣམས་ཀྱིས་ང་ལ་མངོན་པར་བསྟོད་པའི་ཕྱིར་དེ་ལྟར་བྱས་པའོ། །
ISA 43:22 ཡིན་ཡང་ཀྱེ་ཡ་ཀོབ། ཁྱོད་ཀྱིས་ང་ལ་འོ་དོད་མ་བོས། ཀྱེ་ཡེས་ར་ཨེལ། ཁྱོད་ང་ལ་སུན་སྣང་སྐྱེས་པའོ། །
ISA 43:23 ཁྱོད་ཀྱིས་སྦྱིན་སྲེག་གི་མཆོད་པར་འབུལ་བའི་ལུག་ཐུག་ང་ལ་འཁྱེར་མ་འོང་ལ། ཁྱོད་ཀྱི་མཆོད་རྫས་ཀྱིས་ང་ལ་བཀུར་བའང་མ་བྱས། ཁྱོད་ཅག་གིས་མཆོད་པ་འབུལ་བར་ངས་ཁུར་བོ་མ་བཀལ་ལ། སྤོས་དཀར་འབུལ་ཕྱིར་ཁྱོད་ལ་སུན་སྣང་མ་བསྐྱེད།
ISA 43:24 དངུལ་གྱིས་ང་ལ་ཤུ་དག་ཁྱོད་ཀྱིས་མ་ཉོས་ཤིང་། མཆོད་པའི་ཚིལ་གྱིས་ང་ཡིད་ཚིམ་པར་ཡང་མ་བྱས། ཁྱོད་ཀྱིས་རང་གི་སྡིག་པས་ང་ལ་ཁུར་བོ་བཀལ་ཞིང་། རང་གི་ཉེས་པས་ང་ལ་སུན་སྣང་བསྐྱེད་པའོ། །
ISA 43:25 ངས་རང་ཉིད་ཀྱི་དོན་དུ་ཁྱོད་ཀྱི་སྡིག་ཉེས་སེལ་ཞིང་། ཁྱོད་ཀྱི་སྡིག་པ་རྣམས་དྲན་པར་ཡང་མི་བྱ།
ISA 43:26 ཁྱོད་ཀྱིས་ང་ལ་དྲན་སྐུལ་བྱོས་དང་། ང་ཚོས་མཉམ་དུ་རྩོད་གླེང་བྱེད། ཡང་རང་ཉིད་དྲང་བདེན་ཡིན་པ་མཚོན་ཕྱིར། ཁྱོད་ཀྱི་དོན་རྐྱེན་རྣམས་མདུན་དུ་ཤོམས་དང་།
ISA 43:27 ཁྱོད་ཀྱི་ཕ་མེས་ཀྱིས་སྡིག་པ་བྱས་ཤིང་། ཁྱོད་ཀྱི་མགྲིན་ཚབ་པ་རྣམས་ཀྱིས་ང་ལ་ངོ་ལོག་བྱས།
ISA 43:28 དེ་བས་ངས་གནས་དམ་པའི་འགོ་དཔོན་རྣམས་ངོ་ཚར་གཏོད་ཅིང་། ཡ་ཀོབ་ལ་གཏོར་བཤིག་ཐེབས་པ་དང་། ཡེས་ར་ཨེལ་ནི་འཕྱ་བའི་ཡུལ་དུ་འགྱུར་བར་བྱའོ་ཞེས་གསུངས་སོ། །
ISA 44:1 ཀྱེ་བདག་གི་ཞབས་ཕྱི་ཡ་ཀོབ། བདག་གིས་བདམས་པའི་ཡེས་ར་ཨེལ། ད་ལྟ་འདི་ལ་ཉོན་ཅིག
ISA 44:2 ཁྱོད་མཛད་ཅིང་མངལ་དུ་འགོད་མཁན་དང་ཁྱོད་རང་སྐྱོབ་མཁན་གྱི་དཀོན་མཆོག་ཡ་ཝཱེས་འདི་སྐད་དུ། ཀྱེ་བདག་གི་ཞབས་ཕྱི་ཡ་ཀོབ། བདག་གིས་བདམས་པའི་ཡེ་ཤུ་རུན་ཁྱོད་མ་འཇིགས་ཤིག
ISA 44:3 ཅིའི་ཕྱིར་ཞེ་ན། སྐོམ་པས་མནར་བའི་ས་ལ་བདག་གིས་ཆུ་འདྲེན་ཞིང་། སྐམ་སར་གཙང་པོ་བཞུར་དུ་འཇུག བདག་གིས་རང་གི་སེམས་ཉིད་ཁྱོད་ཀྱི་བུ་རྒྱུད་སྟེང་འབབ་ཏུ་འཇུག་ཅིང་། བདག་གི་བྱིན་རླབས་ཁྱོད་ཀྱི་བུ་རྒྱུད་ལ་གནང་བར་བྱ།
ISA 44:4 དེ་དག་རྩྭ་གསེང་ནས་སྐྱེས་པ་དང་ཆུ་ཕྲན་འགྲམ་གྱི་ལྕང་མ་ཇི་བཞིན་ནོ། །
ISA 44:5 དེ་ནས་མི་འདིས་ན་རེ། ང་ནི་དཀོན་མཆོག་ཡ་ཝཱེ་ལ་གཏོགས་པ་ཡིན་ཞེས་དང་། དེས་ཀྱང་རང་ལ་ཡ་ཀོབ་ཀྱི་མིང་ནས་འབོད་ཅིང་། ཡང་མི་གཞན་ཞིག་གིས་དངོས་སུ་ང་རང་དཀོན་མཆོག་ཡ་ཝཱེ་ལ་གཏོགས་པ་ཡིན་ཞེས་ཡི་གེར་འགོད་ལ། ཡེས་ར་ཨེལ་གྱི་མཚན་ནས་རང་ལ་མིང་འདོགས་པར་འགྱུར།
ISA 44:6 ཡ་ཝཱེ་སྟེ་ཡེས་ར་ཨེལ་གྱི་རྒྱལ་པོ། ཡེས་ར་ཨེལ་གྱི་གཙོ་བོ་སྐྱབས་མགོན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་ནི་ཐོག་མ་ཉིད་དེ་མཐའ་མ་ཡང་ཡིན་པས། བདག་ལས་དཀོན་མཆོག་གཞན་ཞིག་མེད།
ISA 44:7 བདག་དང་འདྲ་བ་སུ་ཞིག་ཡོད་དམ། དེ་ལ་བསྒྲག་ཏུ་ཆུག དེ་ལ་བཤད་དུ་ཆུག དེ་ལ་བདག་གི་མདུན་ནས་གསལ་པོར་མངོན་དུ་ཆུག གནའ་དུས་ཀྱི་མི་སྡེ་བདག་གིས་བདམས་ཤིང་བཀོད་པ་ནས་བཟུང་མ་འོངས་པའི་དོན་དང་འབྱུང་བར་འགྱུར་བའི་དོན་རྣམས་ཁོ་ཚོར་གསལ་བསྒྲགས་བྱེད་དུ་ཆུག
ISA 44:8 ཁྱོད་རྣམས་དངངས་ཤིང་སྐྲག་མི་དགོས། བདག་གིས་སྔར་ནས་དེ་ཁྱོད་ཅག་གི་རྣ་ལ་བཞག་ཅིང་ཁྱོད་རྣམས་ལ་བརྗོད་པ་མ་ཡིན་ནམ། ཁྱོད་ཅག་ནི་བདག་གི་དཔང་པོ་ཡིན། བདག་ལས་དཀོན་མཆོག་གཞན་ཞིག་ཡོད་དམ། ཡང་ན་བྲག་རི་གཞན་ཞིག་ཡོད་དམ། བདག་གིས་གཅིག་ཀྱང་མི་ཤེས་སོ། །
ISA 44:9 སྐུ་འདྲ་བཟོ་མཁན་ཐམས་ཅད་སྙིང་པོ་མེད། ཁོ་ཚོ་དགའ་ཞིང་མོས་པ་རྣམས་ལ་ཕན་ཐོགས་མེད། ཁོ་ཚོའི་དཔང་པོས་གང་ཡང་མི་མཐོང་ཞིང་ཅི་ཡང་མི་ཤེས་པས་ཐ་ན་ཁོ་ཚོ་ངོ་ཚར་གཏོད་པ་ཡིན།
ISA 44:10 སུས་ལྷ་སྐུ་བཟོ་ཞིང་སྐུ་འདྲ་བླུག་པ་ནི་ཕན་ཐོགས་པའི་ཕྱིར་མ་ཡིན་ནམ།
ISA 44:11 ལྟོས་དང་། ཁོའི་ལས་གྲོགས་ཐམས་ཅད་ཁ་སྐྱེངས་པར་འགྱུར་ཏེ། ལག་ཤེས་པ་རྣམས་ཀྱང་མི་ལས་གང་ཡང་མ་ཡིན། དེ་དག་ཐམས་ཅད་ལྷན་དུ་འཛོམས་ནས་འགྲེང་དུ་ཆུག་དང་། དེ་དག་མཉམ་གཅིག་ཏུ་སྐྲག་ཅིང་ངོ་ཚར་གཏོད་པར་བྱའོ། །
ISA 44:12 མགར་བས་ཐོག་མར་སོལ་བའི་སྟེང་དུ་ལྕགས་ངར་བ་དང་། དེ་ནས་ལག་ཆས་ལྕགས་བརྡུང་བར་བྱ་ཞིང་། ཁོས་ལག་པའི་ཤེད་ཤུགས་ལ་བརྟེན་ནས་ཐོ་བས་ལྕགས་རྡུང་ཞིང་དབྱིབས་བཟོ་བར་བྱེད། ཁོ་རང་ལྟོགས་ན་སྟོབས་ཤུགས་ཟད་ཅིང་། ཆུ་མ་འཐུང་ན་ཉམ་ཐག་པར་འགྱུར།
ISA 44:13 མི་དང་འདྲ་བར་མཛེས་སྡུག་གི་གཟུགས་བརྙན་ལྡན་པ་དང་། དགོན་པའི་ནང་དུ་འཇོག་ཕྱིར་ཤིང་བཟོས་ཐིག་སྐུད་འཐེན་ནས་སྨྱུ་གུས་སྐྱ་རིས་ཕབ་སྟེ་ཤིང་གཞོག་གིས་འཇམ་པོར་བཟོ་བ་དང་། སྒོར་ཐིག་རྒྱག་ཆས་ཀྱིས་དབྱིབས་བྲིས་ཏེ་མིའི་རྣམ་པ་དང་འདྲ་བའི་སྐུ་འདྲ་བཟོ་བའོ། །
ISA 44:14 ཁོས་རང་ཉིད་ཀྱི་ཕྱིར་དུ་ཐང་ཤིང་གཅོད་ཅིང་། ཡང་ན་ཡོ་འབོག་དང་བེ་ཤིང་བདམས་ཏེ་ནགས་ཚལ་ཁྲོད་དུ་སྐྱེ་རུ་འཇུག དེས་གསོམ་པ་ཡང་བཙུགས་ནས་ཆར་ཆུ་ལ་དེ་ཆེར་བསྐྱེད་དུ་འཇུག
ISA 44:15 མི་ཡིས་དེ་འབུད་ཤིང་བྱེད་ཆོག་ལ། བླངས་ནས་མེ་བུས་ཏེ་དྲོད་ལེན་པ་དང་། ཡང་མེ་སྦར་ནས་བག་ལེབ་བསྲེག་ཆོག ཡིན་ཡང་མི་ཡིས་དེ་བཀོལ་ནས་ལྷ་སྐུ་བཞེང་བ་དང་དེ་ལ་བསྙེན་བཀུར་ཞུ་ཞིང་། སྐུ་འདྲ་བརྐོས་ཏེ་དེ་ལ་ཕྱག་འཚལ་བའོ། །
ISA 44:16 དེས་ཤིང་ཆའི་ཆ་ཤས་མེ་ལ་སྦར་ཏེ་སྟེང་དུ་ཤ་སྲེག་པ་དང་། སྲེག་ཤ་ཟ་ཞིང་འགྲང་བར་བྱེད། དེ་ནས་རང་ཉིད་མེ་ལ་བསྲོས་ཏེ་ན་རེ། ང་དྲོན་པོ་ཡིན། ངས་མེ་མཐོང་བྱུང་ཞེས་སྨྲའོ། །
ISA 44:17 ཤིང་གི་ལྷག་མ་ལས་རང་ལ་ལྷ་སྐུ་ཞིག་བཟོ་ཞིང་། དེ་ནི་རང་གིས་བརྐོས་པའི་སྐུ་འདྲ་སྟེ། ཁོས་སྐུ་འདྲ་དེ་ལ་ཕྱག་བཙལ་ནས་བསྙེན་བཀུར་ཞུ་ཞིང་། ཡང་དེ་ལ་གསོལ་བ་བཏབ་ནས་ན་རེ། ཁྱེད་ནི་ངའི་དཀོན་མཆོག་ཡིན་པས་ཁྱེད་ཀྱིས་ང་རང་སྐྱོབ་པར་མཛོད་ཅེས་ཞུའོ། །
ISA 44:18 དེ་དག་གིས་དོན་མི་རྟོགས་ལ་ཧ་ཡང་མི་གོ གང་ལ་ཞེ་ན། དཀོན་མཆོག་ཡ་ཝཱེས་དེ་དག་གི་མིག་ཟུང་བསྒྲིབས་པས་མིག་གིས་མི་མཐོང་ལ། དེ་དག་གི་སེམས་བཀབ་པས་རྟོགས་པར་མི་འགྱུར།
ISA 44:19 སུ་ཞིག་གིས་ཀྱང་སེམས་ཞིབ་མོས་བསམ་བློ་མི་གཏོང་ཞིང་། ཡང་ཤིང་ཆའི་དུམ་བུ་ངས་མེ་ལ་བསྲེགས། སོལ་བའི་སྟེང་དུ་ངས་བག་ལེབ་དང་ཤ་བསྲེགས་ནས་ཟོས། དེའི་ལྷག་མ་རྣམས་ཀྱིས་ངས་ཞེན་ལོག་གི་རྫས་ཤིག་བཟོས་པས། ངས་ཤིང་དུམ་དེ་ལ་ཕྱག་འཚལ་དགོས་སམ་ཞེས་བརྗོད་མཁན་གྱི་མི་ཤེས་རབ་ཅན་དང་བློ་གྲོས་ཅན་ནི་མེད།
ISA 44:20 ཁོས་བརྩོན་ལེན་བྱེད་པ་ནི་ཐལ་བ་ཡིན། བསླུ་བྲིད་ཐེབས་པའི་སེམས་ཀྱིས་ཁོ་རང་ལམ་ལོག་ཏུ་ཁྲིད་དེ། ཁོས་རང་ཉིད་སྐྱོབ་མི་ནུས་ཤིང་ཡང་ངའི་ལག་གཡས་པའི་ནང་དུ་རྫུན་ཞིག་ཡོད་པ་མ་ཡིན་ནམ་ཞེས་སྨྲ་ཡང་མི་སྲིད་དོ། །
ISA 44:21 ཀྱེ་ཡ་ཀོབ་དང་ཡེས་ར་ཨེལ། ཁྱོད་ནི་བདག་གི་ཞབས་ཕྱི་ཡིན་པས་གཏམ་འདི་དག་དྲན་པར་གྱིས། བདག་གིས་ཁྱོད་བཀོད་པ་ནི་ཁྱོད་རང་བདག་གི་ཞབས་ཕྱི་བྱེད་པའི་ཕྱིར་ཡིན། ཀྱེ་ཡེས་ར་ཨེལ། བདག་གིས་ཁྱོད་བརྗེད་པར་མི་བྱའོ། །
ISA 44:22 སྤྲིན་པ་སྟུག་པོ་ཐོར་བ་བཞིན་དུ་ངས་ཁྱོད་ཀྱི་ཉེས་སྐྱོན་རྣམས་བསལ་ཞིང་། སྤྲིན་ཡལ་བ་བཞིན་དུ་ངས་ཁྱོད་ཀྱི་སྡིག་པ་རྣམས་བསལ་བ་ཡིན། ཡང་བདག་གིས་ཁྱོད་རང་བསྐྱབས་པས་ཁྱོད་བདག་གི་ཕྱོགས་སུ་ཕྱིར་ཤོག་ཅིག
ISA 44:23 དཀོན་མཆོག་ཡ་ཝཱེས་དེ་ལྟར་མཛད་པས། ཀྱེ་ནམ་མཁའ་ཡིས་བསྟོད་གླུ་ལོངས་ཤིག ཀྱེ་ས་གཞིའི་གཏིང་རིམ་རྣམས་ཀྱིས་འབོད་སྒྲ་སྒྲོགས་ཤིག ཀྱེ་རི་ཚོགས་རྣམས་ཀྱིས་དགའ་འབོད་གྱིས་ཤིག ནགས་ཚལ་དང་དེའི་ནང་ཡོད་པའི་ལྗོན་ཤིང་གི་ཚོགས་ཀྱིས་ཀྱང་དེ་བཞིན་གྱིས་ཤིག གང་ལ་ཞེ་ན། དཀོན་མཆོག་ཡ་ཝཱེས་ཡ་ཀོབ་བསྐྱབས་ཤིང་། ཁོང་གིས་ཡེས་ར་ཨེལ་བརྒྱུད་དེ་རང་ཉིད་ལ་གཟི་བརྗིད་ཐོབ་པར་མཛད་དོ། །
ISA 44:24 ཁྱོད་རང་མ་ཡི་མངལ་དུ་བཀོད་ཅིང་། ཁྱོད་རང་སྐྱོབ་མཁན་གྱི་དཀོན་མཆོག་ཡ་ཝཱེས་འདི་སྐད་དུ། ཡ་ཝཱེ་བདག་ནི་ཐམས་ཅད་འགོད་མཁན་ཏེ། བདག་ཁོ་ནས་ནམ་མཁའ་རྒྱ་བསྐྱེད་ཅིང་ས་གཞི་བཏིངས་པ་ཡིན།
ISA 44:25 བདག་གིས་རྫུན་སྨྲ་མཁན་གྱི་རྟགས་མཚན་རྣམས་སྙིང་པོ་མེད་པར་བྱས་པ་དང་། མོ་པ་རྣམས་བླུན་པོར་བསྒྱུར། མི་བློ་གྲོས་ཅན་རྣམས་ཕྱིར་བསྣུར་སྟེག་ཏུ་བཅུག་ཅིང་། དེ་དག་གི་ཤེས་བྱ་རྣམས་རྨོངས་པར་བསྒྱུར།
ISA 44:26 བདག་གིས་རང་གི་ཞབས་ཕྱིའི་ཚིག་རྣམས་དོན་ལ་གནས་ཤིང་། བདག་གི་བང་ཆེན་རྣམས་ཀྱི་གྲོས་དོན་འགྲུབ་པར་བྱས། ཡེ་རུ་སཱ་ལེམ་ལ་ཁྱོད་ནང་སྡོད་མཁན་ཡོད་པར་འགྱུར་ཞེས་དང་། ཡ་ཧུ་དཱའི་གྲོང་ཁྱེར་དག་ལ་ཁྱོད་རྣམས་ཡང་བསྐྱར་འཛུགས་པར་འགྱུར། དེའི་ཞིག་རོ་རྣམས་ཡར་བསླང་བར་བྱའོ་ཞེས་བདག་གིས་བརྗོད་དོ། །
ISA 44:27 བདག་གིས་གཏིང་ཟབ་པའི་རྒྱ་མཚོ་ལ་ཁྱོད་སྐམ་པར་གྱུར་ཅིག ངས་ཁྱོད་ཀྱི་གཙང་པོ་རྣམས་ཀྱང་སྐམ་དུ་འཇུག་ངེས་ཡིན་ཞེས་སྨྲས་ཤིང་།
ISA 44:28 བདག་གིས་ཀོ་རེས་ལ། བདག་གི་རྫི་བོ་ཁོང་གིས་བདག་ཡིད་མོས་པ་ཐམས་ཅད་བསྒྲུབ་པར་འགྱུར་ཞེས་བརྗོད་ཅིང་། ཡང་དེས་ཡེ་རུ་སཱ་ལེམ་ལ་ན་རེ། ཁྱོད་ཡང་བསྐྱར་འཛུགས་པར་འགྱུར་ཞེས་སྨྲ་ཞིང་། དེས་མཆོད་ཁང་ལ་ན་རེ། ཁྱོད་ཀྱི་རྩིག་རྨང་འདིང་དགོས་ཞེས་སྨྲའོ། །
ISA 45:1 དཀོན་མཆོག་ཡ་ཝཱེ་བདག་གིས་སྣུམ་གྱིས་བྱུགས་པའི་ཀོ་རེས་ལ་མཚོན་ན། རྒྱལ་ཕྲན་རྣམས་ཁོས་དབང་དུ་བསྡུ་བའི་ཕྱིར། བདག་གིས་ཁོའི་ལག་གཡས་པ་ནས་དམ་པོར་བཟུང་སྟེ། ཁོའི་སྔོན་དུ་མཁར་སྒོ་ཕྱེ་བ་དང་། མཁར་སྒོ་དེ་དག་མི་རྒྱག་པའི་ཆེད་དུ། བདག་གིས་རྒྱལ་པོ་དག་གི་རྐེད་འཆིང་ལྷོད་དུ་འཇུག་པ་ཡིན།
ISA 45:2 བདག་ཁྱོད་ཀྱི་སྔོན་དུ་སོང་ནས་ལམ་མི་བདེ་བ་རྣམས་སྙོམས་པར་བྱེད། ཟངས་ཀྱི་རྒྱ་སྒོ་རྣམས་བདག་གིས་སིལ་བུར་གཅོག་ཅིང་། ལྕགས་ཀྱི་སྒོ་གཏན་རྣམས་བདག་གིས་དུམ་བུར་གཅོད་ངེས་ཡིན།
ISA 45:3 བདག་གིས་ཁྱོད་ལ་ཡིབ་པའི་གཏེར་མཛོད་རྣམས་དང་། གསང་བའི་གནས་ཀྱི་རྒྱུ་ནོར་རྣམས་སྦྱིན་པར་བྱ། དེ་ནས་ཁྱོད་ཀྱིས་བདག་ནི་ཁྱོད་ཀྱི་མིང་ནས་འབོད་མཁན་གྱི་དཀོན་མཆོག་ཡ་ཝཱེ་སྟེ། ཡེས་ར་ཨེལ་གྱི་དཀོན་མཆོག་ཡིན་པ་རྟོགས་པར་འགྱུར།
ISA 45:4 བདག་གི་ཞབས་ཕྱི་ཡ་ཀོབ་དང་། བདག་གིས་བདམས་པའི་ཡེས་ར་ཨེལ་གྱི་དབང་གིས། བདག་གིས་ཁྱོད་ཀྱི་མིང་ནས་བོས་པ་ཡིན། ཁྱོད་ཀྱིས་བདག་སུ་ཡིན་པ་མི་ཤེས་ཀྱང་ངས་ཁྱོད་ལ་གཟི་བརྗིད་ཀྱི་མཚན་གནང་ཡོད།
ISA 45:5 བདག་ནི་ཡ་ཝཱེ་ཡིན་པ་དང་བདག་ལས་དཀོན་མཆོག་གཞན་མེད་དེ། ང་མ་གཏོགས་དཀོན་མཆོག་གཞན་ནི་མེད། ཁྱོད་ཀྱིས་བདག་ངོ་མི་ཤེས་ཀྱང་ངས་ཁྱོད་རང་བརྟན་པོར་བྱེད་དེ།
ISA 45:6 ཉི་མ་ཤར་ས་ནས་ཉི་མ་ནུབ་སའི་བར་གྱི་མི་རྣམས་ཀྱིས་ང་མ་གཏོགས་དཀོན་མཆོག་གཞན་ཞིག་མེད་པ་ཤེས་པའི་ཕྱིར་ཡིན། བདག་ནི་ཡ་ཝཱེ་ཡིན། བདག་ལས་དཀོན་མཆོག་གཞན་སུ་ཡང་མེད།
ISA 45:7 བདག་གིས་འོད་བཟོས་ནས་མུན་པའང་འགོད། ཞི་བདེ་གནང་ཞིང་བར་ཆད་ཀྱང་བཟོ། དཀོན་མཆོག་ཡ་ཝཱེ་བདག་ནི་དོན་འདི་ཐམས་ཅད་སྒྲུབ་མཁན་ཡིན་ནོ། །
ISA 45:8 ཀྱེ་ནམ་མཁའི་ཚོགས། སྟེང་ཕྱོགས་ནས་དྲང་བདེན་ཕོབས་ཤོག སྤྲིན་པར་དྲང་བདེན་འབེབ་ཏུ་བཅུག ས་གཞིའི་སྒོ་ཕྱེས་ནས་ཐར་པ་སྨིན་གྱུར་ཅིག དེ་དང་མཉམ་དུ་དྲང་བདེན་གྱི་འབྲས་བུ་ཐོགས་གྱུར་ཅིག དོན་དེ་ནི་དཀོན་མཆོག་ཡ་ཝཱེ་བདག་གིས་བཀོད་པ་ཡིན་ནོ། །
ISA 45:9 རང་ཉིད་སྐྲུན་མཁན་གྱི་གཙོ་བོ་དང་རྩོད་པ་བྱེད་མཁན་དེར་ཆག་སྒོ་འབྱུང་། དེ་དག་ནི་སའི་རྫ་ལྷེབ་ནང་གི་རྫ་ལྷེབ་ཅིག་ཡིན་ཞིང་། ས་འདམ་གྱིས་རྫ་བཟོ་ལ་ཁྱོད་ཀྱིས་ཅི་ཞིག་བཟོ་བཞིན་ཡོད་ཅེས་འདྲིའམ། ཡང་ན་ཁྱོད་ཀྱིས་བསྐྲུན་པ་དེས་ཁོ་ལ་ལག་པ་མེད་ཅེས་སྨྲ་སྲིད་དམ།
ISA 45:10 རང་གི་ཕ་ལ་ཁྱེད་ལས་སྐྱེས་པ་ནི་ཅི་ཡིན་ནམ་ཞེས་དང་། ཡང་ན་རང་གི་མ་ལ་ཁྱེད་ཀྱིས་བཙས་པ་ནི་ཅི་ཡིན་ནམ་ཟེར་མཁན་དེར་ཆག་སྒོ་འབྱུང་ངོ་། །
ISA 45:11 དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དམ་པ། དེ་དག་སྐྲུན་མཁན་ཁོང་གིས་འདི་སྐད་དུ། ཕྱིས་འབྱུང་གི་དོན་རྣམས་ཁྱོད་ཀྱིས་ང་ལ་དྲིས་ཤོག བདག་གི་བུ་ཕྲུག་རྣམས་དང་བདག་གི་ལག་པས་བཀོད་པའི་སྐོར་ནས་ཀྱང་ཁྱོད་ཀྱིས་ང་ལ་བཀའ་བབས་ཆོག
ISA 45:12 བདག་གིས་ས་གཞི་བསྐྲུན་ཅིང་དེའི་སྟེང་དུ་མིའི་རིགས་བཀོད་པ་ཡིན། བདག་གིས་ནམ་མཁའི་དབྱིངས་རྣམས་བསྐྱེད་ཅིང་། ཡང་དེའི་ཚོགས་ཐམས་ཅད་ལ་བཀའ་བསྩལ་པ་ཡིན།
ISA 45:13 བདག་གིས་དྲང་བདེན་སྒོ་ནས་ཀོ་རེས་ཡར་བསླངས་ཏེ། ཁོའི་ལམ་ཐམས་ཅད་བདེ་བར་བྱེད་ཅིང་། དེ་ནས་ཁོས་བདག་གི་གྲོང་ཁྱེར་བརྩིག་པར་འགྱུར་ཞིང་། གླ་དང་རྔན་པ་མི་ལེན་པར་ངའི་བཙོན་པ་མི་སྡེ་རྣམས་ལ་རང་དབང་སྦྱིན་ངེས་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་ཞེས་གསུངས་སོ། །
ISA 45:14 དཀོན་མཆོག་ཡ་ཝཱེས་འདི་སྐད་དུ། ཨེ་ཅིབ་ལ་དཀའ་ལས་སྒོ་ནས་ཐོབ་པ་དང་གུ་ཤ་པར་ཐོབ་པའི་རྒྱུ་ནོར། གཟུགས་པོ་མཐོ་ཞིང་ཆེ་བའི་སེ་བཱ་པ་བཅས་ཐམས་ཅད་ཁྱོད་ཀྱི་མདུན་དུ་སླེབས་ནས་དེ་དག་ཁྱོད་ལ་གཏོགས་ཤིང་། དེ་དག་ལྕགས་སྒྲོག་དང་བཅས་འོངས་ནས་ཁྱོད་ཀྱི་རྗེས་སུ་འབྲང་ཞིང་ཁྱོད་ལ་ཕྱག་བཙལ་ནས་ན་རེ། དཀོན་མཆོག་ཁྱོད་ཅག་གི་ཁྲོད་དུ་བཞུགས་པ་དང་། ཁོང་མ་གཏོགས་དཀོན་མཆོག་གཞན་མེད་དེ། དཀོན་མཆོག་བདེན་པ་གཞན་ཞིག་མེད་ཅེས་ཞུ་བར་བྱའོ་ཞེས་གསུངས་སོ། །
ISA 45:15 ཀྱེ་ཡེས་ར་ཨེལ་གྱི་སྐྱབས་མགོན་དཀོན་མཆོག་ལགས། ཁྱེད་ནི་དངོས་གནས་རང་ཉིད་སྦས་པའི་དཀོན་མཆོག་དེ་ལགས་སོ། །
ISA 45:16 ལྷ་སྐུ་བཞེང་མཁན་ཐམས་ཅད་མཉམ་གཅིག་ཏུ་ངོ་ཚར་གཏོད་ཅིང་བརྙས་བཅོས་འཁེལ་བར་འགྱུར།
ISA 45:17 ཡེས་ར་ཨེལ་ཁོ་ན་དཀོན་མཆོག་ཡ་ཝཱེར་བརྟེན་ནས་ཐར་བར་འགྱུར་ཞིང་། དུས་གཏན་གྱི་ཐར་པ་འཐོབ་པར་འགྱུར། དེ་དག་ཇི་སྲིད་བར་དུ་ངོ་ཚར་མི་གཏོད་ལ་བརྙས་བཅོས་ཀྱང་མི་འཁེལ་ལོ། །
ISA 45:18 ནམ་མཁའི་དབྱིངས་རྣམས་འགོད་མཁན་ཡ་ཝཱེ་ཁོང་ནི་དཀོན་མཆོག་ལགས་ཤིང་། ཁོང་གིས་ས་གཞི་བཀོད་པས་ས་གཞི་གྲུབ་པ་དང་ས་གཞི་བརྟན་པོར་མཛད། ཁོང་གིས་ས་གཞི་བཀོད་པ་ནི་སྟོང་བར་ལུས་པའི་ཕྱིར་མིན་ལ། མི་རྣམས་དེ་ནང་གནས་པའི་ཕྱིར་ཡིན། ཁོང་གིས་འདི་སྐད་དུ། བདག་ནི་ཡ་ཝཱེ་ཡིན། ང་མ་གཏོགས་དཀོན་མཆོག་གཞན་ཞིག་གཏན་ནས་མེད།
ISA 45:19 བདག་གིས་མུན་ནག་གི་ས་ནས་གསང་བའི་གཏམ་མ་སྨྲས། ཁྱོད་ཀྱིས་ང་འཚོལ་བ་ནི་དོན་མེད་ཡིན་ཞེས་ཡ་ཀོབ་ཀྱི་བུ་རྒྱུད་ལ་བདག་གིས་མ་སྨྲས། དཀོན་མཆོག་ཡ་ཝཱེ་བདག་གིས་བདེན་པ་གླེང་ཞིང་། ཡང་དག་པ་རྣམས་འཆད་དོ། །
ISA 45:20 ཀྱེ་རྒྱལ་ཕྲན་ཀུན་ནས་ཐར་བའི་མི་རྣམས། ཁྱོད་ཅག་ལྷན་དུ་འདུས་ནས་ཐག་ཉེ་སར་ཤོག་དང་། ཤིང་གི་ལྷ་སྐུ་རྣམས་ཡར་འགྱོགས་པ་དང་། མི་སྐྱོབ་ནུས་མེད་པའི་ལྷ་ལ་གསོལ་བ་འདེབས་པ་དེ་དག་དངོས་གནས་ཤེས་རྨོངས་ཡིན།
ISA 45:21 ཁྱོད་ཀྱིས་དོན་རྣམས་ཤོད་དང་རྒྱུ་མཚན་ཐོན་ཅིག དེ་དག་ཕན་ཚུན་གྲོས་མོལ་བྱེད་དུ་ཆུག སུ་ཞིག་གིས་གནའ་བོའི་དུས་ནས་མི་ལ་དོན་འདི་ཐོས་སུ་བཅུག་གམ། སུ་ཞིག་གིས་གནའ་བོའི་དུས་ནས་དོན་འདི་འཆད་པ་ཡིན་ནམ། དེ་བཤད་མཁན་དཀོན་མཆོག་ཡ་ཝཱེ་ང་རང་མ་ཡིན་ནམ། ང་ལས་དཀོན་མཆོག་གཞན་མེད། བདག་ནི་དྲང་བདེན་གྱི་དཀོན་མཆོག་དང་མིའི་རིགས་སྐྱོབ་མཁན་ཡང་ཡིན། བདག་ལས་དཀོན་མཆོག་གཞན་མེད།
ISA 45:22 བདག་ནི་དཀོན་མཆོག་ཡིན། ང་མ་གཏོགས་དཀོན་མཆོག་གཞན་མེད། དེ་བས་ས་གཞིའི་མི་ཐམས་ཅད་ཀྱེ། བདག་གི་ཕྱོགས་སུ་འཁོར་དང་ཐར་པ་འཐོབ་པར་འགྱུར།
ISA 45:23 ངས་རང་ཉིད་དཔང་དུ་བཙུགས་ནས་མནའ་སྐྱེལ་ཞིང་། ངའི་ཁ་ནས་དྲང་བདེན་གྱི་གཏམ་སྨྲས་པ་ཕྱིར་ཟློག་པར་མི་བྱ། དེ་བས་པུས་མོ་ཐམས་ཅད་ཀྱིས་བདག་ལ་ཕྱག་འཚལ་ཞིང་། ལྕེ་ཐམས་ཅད་ཀྱིས་ང་རང་དཔང་དུ་བཙུགས་ནས་མནའ་བསྐྱལ་བར་འགྱུར།
ISA 45:24 མི་ཐམས་ཅད་ཀྱིས་དཀོན་མཆོག་ཡ་ཝཱེ་འབའ་ཞིག་གི་ནང་དུ་དྲང་བདེན་དང་སྟོབས་ཤུགས་ཡོད་དེ། ཁོང་ལ་སྡང་མཁན་ཐམས་ཅད་ཁོང་གི་དྲུང་དུ་འོངས་ཏེ་ངོ་ཚར་གཏོད་པར་འགྱུར་ཞེས་བརྗོད་ངེས།
ISA 45:25 དཀོན་མཆོག་ཡ་ཝཱེ་ལ་བརྟེན་ནས་ཡེས་ར་ཨེལ་གྱི་བུ་རྒྱུད་ཐམས་ཅད་དྲང་བདེན་དུ་བརྩི་ཞིང་གཟི་བརྗིད་འཐོབ་པར་འགྱུར་རོ། །
ISA 46:1 པེལ་གྱིས་ཕྱག་འཚལ་ཞིང་། ནེ་བོ་མར་བསྒུར་ཏེ། པཱ་པེལ་ལོན་གྱི་ལྷ་སྐུ་རྣམས་གཅན་གཟན་དང་སྒོ་ཕྱུགས་ཀྱི་སྟེང་ལ་བཀལ། ཁྱོད་ཅག་གིས་ཁུར་བ་རྣམས་ད་ལྟ་ཁུར་བོ་ལྗིད་མོ་རུ་གྱུར་ཏེ། ངལ་ཞིང་དུབ་པའི་དུད་འགྲོའི་རྒྱབ་ཀྱི་ཁལ་བཞིན་ནོ། །
ISA 46:2 དེ་རྣམས་ལྷན་ཅིག་ཏུ་མར་བསྒུར་ནས་ལུས་པོ་སར་བཏུད་ཀྱང་ཁུར་བོ་ལྗིད་མོ་དེ་བསྲུང་མ་ཐུབ་པར་མ་ཟད། རང་ཉིད་བཙོན་དུ་ཚུད་དོ། །
ISA 46:3 ཀྱེ་ཡ་ཀོབ་ཀྱི་ཁྱིམ་རྒྱུད་དང་ཡེས་ར་ཨེལ་གྱི་ལྷག་ལུས་ཐམས་ཅད། ཁྱོད་རྣམས་ཀྱིས་བདག་ལ་ཉོན་ཅིག ཁྱོད་རྣམས་མངལ་ལས་ཐོན་མ་ཐག་བདག་གིས་པང་དུ་བཟུང་ཞིང་། མངལ་ལས་སྐྱེས་མ་ཐག་བདག་གིས་ཁུར་བ་ཡིན།
ISA 46:4 ཁྱོད་ལོ་ན་བགྲེས་དུས་ཀྱང་བདག་གིས་དེ་ལྟར་བྱ་སྟེ། སྐྲ་དཀར་པོར་གྱུར་ཡང་ངས་ཁྱོད་པང་དུ་འཛིན་པ་སྟེ། ངས་ཁྱོད་བཀོད་ཅིང་རྗེས་སུ་ཁྱོད་རང་འཁུར་ངེས་ཡིན། བདག་གིས་ཁྱོད་འཛིན་ཞིང་སྐྱོབ་པར་བྱའོ། །
ISA 46:5 ཁྱོད་ཅག་གིས་ང་སུ་དང་བསྡུར་རམ། ང་དང་འདྲ་བ་སུ་ཡོད་དམ། ང་དང་དོ་མཉམ་པའི་ཕྱིར་སུ་ཞིག་བདག་དང་བསྡུར་རམ།
ISA 46:6 ཁུག་མའི་ནང་ནས་གསེར་མང་པོ་ལེན་ཞིང་། དངུལ་རྒྱ་མར་ཚད་པའི་མི་དེ་དག་གིས་གསེར་མགར་གླས་ནས་ལྷ་སྐུ་བཞེང་བ་དང་། དེ་ནས་ལྷ་སྐུ་རྣམས་ལ་པུས་མོ་བཙུགས་ཏེ་ཕྱག་འཚལ་བ་ཡིན།
ISA 46:7 དེ་ཚོས་སྐུ་འདྲ་གཉའ་བར་བཏེགས་ནས་ཁྱེར་ཏེ་རང་གནས་སུ་བཞག་པས་འགྲེང་དུ་བཅུག དེ་རང་ས་ནས་མི་འགུལ་ཞིང་། མི་ཡིས་དེར་ཞུས་ཀྱང་ཨ་ལན་འདེབས་པའི་ནུས་པ་མེད་ལ། དེས་མི་རྣམས་དཀའ་ཁག་ལས་ཀྱང་སྐྱོབ་མི་ཐུབ་བོ། །
ISA 46:8 ཁྱོད་རྣམས་ཀྱིས་དོན་དེ་ཡིད་ལ་བཟུང་ནས་བརྟན་པོར་གནས་ཤིག སྡིག་སྤྱོད་ཁྱོད་རྣམས་ཀྱིས་དེ་ལ་བསམ་བློ་ཞིབ་མོ་ཐོངས་ཤིག
ISA 46:9 ང་ནི་དཀོན་མཆོག་ཡིན་ལ་ང་ལས་དཀོན་མཆོག་གཞན་མེད་པས། གནའ་དུས་ཀྱི་དོན་རྣམས་ཁྱོད་ཅག་གིས་དྲན་པར་གྱིས། བདག་ནི་དཀོན་མཆོག་སྟེ། བདག་དང་འདྲ་བ་སུ་ཡང་མེད།
ISA 46:10 བདག་གིས་ཐོག་མའི་དུས་ནས་མཐའ་མའི་དོན་རྣམས་བསྒྲགས་ཤིང་། གནའ་བོའི་དུས་ནས་མ་བྱས་དོན་རྣམས་བརྗོད་དེ། བདག་གི་བསམ་དོན་ཐམས་ཅད་འགྲུབ་ཅིང་། ང་རང་དགའ་བའི་དོན་རྣམས་འགྲུབ་པར་འགྱུར་ཞེས་སྨྲས་སོ། །
ISA 46:11 བདག་གིས་ཐག་རིང་ཡུལ་ནས་ངའི་བསམ་དོན་བསྒྲུབ་པའི་མི་ཞིག་ཤར་ཕྱོགས་ནས་བྱ་རྒོད་བཞིན་བོས་ཤིང་། བདག་གིས་སྨྲས་པ་དེ་དག་མངོན་པར་འགྱུར་བ་སྟེ། བདག་གིས་འཆར་གཞི་བཀོད་པ་དེ་དག་བྱེད་ངེས་ཡིན།
ISA 46:12 དྲང་བདེན་ལ་རྒྱང་ཐག་རིང་བའི་བློ་རེངས་པོ་ཁྱོད་ཚོས་བདག་ལ་ཉོན།
ISA 46:13 ངས་རང་གི་དྲང་བདེན་ཉེ་བར་དྲངས་ཏེ་རྒྱང་རིང་མི་གཏོང་སྟེ། བདག་གི་ཐར་པ་ལ་འགོར་འགྱང་མེད་དོ། །བདག་གིས་ཛ་ཡན་གྱི་ནང་དུ་ཐར་པ་གནང་ཞིང་། ཡེས་ར་ཨེལ་ལ་ངའི་གཟི་བརྗིད་སྩོལ་བར་བྱའོ། །
ISA 47:1 ཀྱེ་པཱ་པེལ་ལོན་གྱི་གཞོན་ནུ་མ། མར་ཤོག་ལ་ས་རྡུལ་ནང་དུ་སྡོད་ཅིག ཀྱེ་ཀལ་དི་པའི་བུ་མོ། ཁྲི་སྟེགས་མེད་པས་ས་རུ་སྡོད་ཅིག ཅི་ལ་ཞེ་ན། ད་ནི་ཁྱོད་ལ་གཉོད་ཆུང་དང་ཉམས་ཞན་ཞེས་འབོད་པར་མི་འགྱུར་རོ། །
ISA 47:2 ཁྱོད་ཀྱིས་མཆིག་རྡོ་ཁྱེར་ཏེ་ཕྱེ་ཐོགས་ཤིག རང་གི་གདོང་ཁེབས་བླངས་ནས་སྨད་གཡོག་ཕུད་དང་། བརླ་སྒང་རྗེན་པར་སྟོན་བཞིན་གཙང་པོ་དག་བརྒལ་ནས་སོང་ཞིག
ISA 47:3 ཁྱོད་ཀྱི་ལུས་སྨད་ཕྱིར་མངོན་པར་འགྱུར། ཁྱོད་ཀྱི་ངོ་ཚ་མི་གཞན་པས་མཐོང་ཞིང་། ངས་མི་གཅིག་ཀྱང་མི་གཏོང་བར་ལན་འཇལ་ངེས།
ISA 47:4 ང་ཚོ་སྐྱོབ་མཁན་ཁོང་གི་མཚན་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཟེར། ཡེས་ར་ཨེལ་གྱི་དམ་པ་ཉིད་ཀྱིས་འདི་སྐད་དུ།
ISA 47:5 ཀྱེ་ཀལ་དི་པའི་བུ་མོ། ཁ་རོག་སྡོད་ཅིག མུན་ནག་ནང་དུ་སོང་ཞིག ཅི་ལ་ཞེ་ན། ད་ཕྱིན་ཆད་ཁྱོད་ལ་རྒྱལ་ཁམས་རྣམས་ཀྱི་བདག་མོ་ཞེས་མི་ཡིས་འབོད་པར་མི་འགྱུར།
ISA 47:6 བདག་ནི་བདག་གི་འབངས་མི་ལ་ཁྲོས་ཏེ། རང་གི་ནོར་སྐལ་བརླག་པར་བཅུག ངས་དེ་དག་ཁྱོད་ཀྱི་ལག་ཏུ་བཞག་ཀྱང་། ཁྱོད་ཀྱིས་དེ་དག་ལ་སྙིང་རྗེ་མེད་པར་གཉའ་ཤིང་ཤིན་ཏུ་ལྕི་མོ་རྒན་པོའི་ལུས་ལ་བཀལ།
ISA 47:7 ཁྱོད་ཀྱིས་ང་ནི་དུས་གཏན་དུ་རྒྱལ་མོ་ཡིན་ཞེས་སྨྲས་པས་དོན་འདི་དག་ཁྱོད་ཀྱི་སེམས་སུ་མ་བཟུང་པ་དང་། དེའི་མཇུག་འབྲས་ཀྱང་མི་དྲན་ནོ། །
ISA 47:8 དེ་བས་འདོད་གཡེམ་སྤྱོད་ཅིང་བདེ་བར་སྡོད་པ་ཁྱོད་ཀྱིས་གཏམ་འདི་ལ་ཉོན་ཅིག ཁྱོད་ཀྱིས་རང་གི་སེམས་སུ་ང་རང་ཁོ་ན་སྟེ། ང་མ་གཏོགས་གཞན་སུ་ཡང་མེད། ང་ཡུགས་མོ་ལྟར་སྡོད་པར་མི་བྱ་སྟེ། བུ་ཕྲུག་རྣམས་དང་འབྲལ་བར་ཡང་མི་བྱའོ་ཞེས་དྲན་ཡང་།
ISA 47:9 བསམ་ཡུལ་ལས་འདས་པ་ཞིག་ལ་བུ་རྣམས་ཁྱོད་དང་འབྲལ་ཞིང་ཡུགས་མོར་འགྱུར་བའི་དོན་རྐྱེན་དེ་གཉིས་ཉིན་གཅིག་གི་ནང་གློ་བུར་ཁྱོད་ཀྱི་སྟེང་དུ་འབྱུང་ངེས། ཁྱོད་ཀྱིས་སྒྱུ་འཕྲུལ་མང་དུ་སྟོན་ཞིང་གང་ཐུབ་ཀྱིས་སྔགས་བོན་པའི་དུས་སུ་དོན་དེ་གཉིས་ཁྱོད་ཀྱི་སྟེང་དུ་འབྱུང་བར་འགྱུར།
ISA 47:10 ཁྱོད་ཀྱིས་སྔར་ནས་རང་གི་སྡུག་རུལ་ལ་བརྟེན་ཏེ་ན་རེ། ང་མཐོང་མཁན་མེད་ཅེས་སྨྲས་པ་དང་། ཁྱོད་ཀྱི་ཤེས་རབ་དང་རྟོགས་པས་ཁྱོད་ལོག་ལམ་དུ་བརྫངས་ཤིང་རང་གི་སེམས་སུ་ང་རང་ཁོ་ན་སྟེ། ང་མ་གཏོགས་གཞན་སུ་ཡང་མེད་ཅེས་དྲན་པའོ། །
ISA 47:11 ཁྱོད་ལ་གནོད་འཚེ་ཐེབས་ཀྱང་ཁྱོད་ཀྱིས་དེར་ཚོད་དཔོག་བྱེད་མི་ཐུབ། ཆག་སྒོ་ཁྱོད་སྟེང་འབྱུང་ཡང་ཁྱོད་ཀྱིས་སེལ་མི་ནུས། བར་ཆད་གློ་བུར་བ་ཁྱོད་སྟེང་འབབ་ཀྱང་ཁྱོད་ཀྱིས་མི་རྟོགས་སོ། །
ISA 47:12 ཁྱོད་ཀྱིས་གཞོན་དུས་སུ་དཀའ་ལས་ངང་སྦྱངས་པའི་ངན་སྔགས་དང་སྒྱུ་འཕྲུལ་སྣ་ཚོགས་མུ་མཐུད་དུ་སྤྱོད་ཅིག དེས་ཁྱོད་ལ་ཕན་ཐོགས་ཀྱང་སྲིད། ཡང་ན་ཁྱོད་ཀྱིས་མི་རྣམས་སྐྲག་ཏུ་འཇུག་ནུས་ཀྱང་སྲིད།
ISA 47:13 ཁྱོད་རང་གི་མང་དྲགས་པའི་གྲོས་བསྡུར་ལ་ཐང་ཆད་ངེས། ད་ལྟ་གཟའ་སྐར་ལ་དཔྱད་མཁན་དང་སྐར་རྩིས་པ་དང་། ཟླ་གསར་ལ་བལྟས་ཏེ་ལུང་སྟོན་མཁན་རྣམས་ཡར་ལངས་ཏེ། ཁྱོད་སྟེང་འབྱུང་བའི་དོན་དེ་ལས་སྐྱོབ་ཏུ་ཆུག
ISA 47:14 ལྟོས་ཤིག ཁོ་ཚོ་སོག་མ་ལྟར་ཡིན་ཞིང་མེ་ཡིས་ཁྱུར་མིད་གཏོང་ངེས། ཁོ་ཚོས་རང་ཉིད་མེ་ལྕེའི་རྔམ་ཤུགས་ལས་སྐྱོབ་མི་ནུས། མེ་དེ་ནི་མེར་སྲོ་བའི་སོལ་བ་མིན་ལ། དེའི་མདུན་དུ་བསྡད་ཆོག་པའི་མེ་ཡང་མིན་ནོ། །
ISA 47:15 དེ་དང་དེ་བཞིན་དུ། ཁྱོད་ཀྱིས་དཀའ་ལས་མྱངས་པའི་དོན་རྣམས་ཁྱོད་ལ་ཕན་ཅི་ཡང་མི་ཐོགས་ཤིང་། གཞོན་པའི་དུས་སུ་ཁྱོད་ཀྱི་ཚོང་ཤག་ཡིན་པ་དག་ཀྱང་རང་སར་འགྲོ་ཞིང་། ཁོ་ཚོ་རང་རང་གི་ལམ་དུ་སོང་ནས་ཁྱོད་སྐྱོབ་མཁན་སུ་ཡང་མེད་དོ། །
ISA 48:1 ཀྱེ་ཡེས་ར་ཨེལ་ཞེས་འབོད་པའི་ཡ་ཀོབ་ཀྱི་ཁྱིམ་རྒྱུད། ཡ་ཧུ་དཱའི་ཆུ་རྒྱུན་ལས་བྱུང་བ་ དང་། དཀོན་མཆོག་ཡ་ཝཱེའི་མཚན་གྱི་སྒོ་ནས་མནའ་བསྐྱལ་ནའང་བདེན་པ་དང་དྲང་པོ་མ་ཡིན། ཡེས་ར་ཨེལ་གྱི་དཀོན་མཆོག་གླེང་པ་ཁྱོད་རྣམས་ཀྱིས་གཏམ་འདི་ལ་ཉོན་ཅིག
ISA 48:2 ཁོ་ཚོས་རང་ཉིད་གྲོང་ཁྱེར་དམ་པའི་མི་རུ་བརྩི་ཞིང་། ཡང་ཡེས་ར་ཨེལ་གྱི་དཀོན་མཆོག་སྟེ། མཚན་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཞེས་པར་བརྟེན་པ་ཡིན།
ISA 48:3 གཙོ་བོས་འདི་སྐད་དུ། སྔོན་གྱི་དོན་རྣམས་བདག་གིས་གནའ་བོའི་དུས་ནས་ལུང་བསྟན་པ་དང་། དེ་དག་ངའི་ཁ་ནས་ཐོན་ཅིང་མི་རྣམས་ལ་བསྒྲགས་ཡོད་དེ། བདག་གིས་གློ་བུར་ཉིད་ལ་བསྒྲུབས་ཤིང་གྲུབ་པ་ཡིན།
ISA 48:4 ཅི་ལ་ཞེ་ན། ཁྱོད་ནི་བློ་གྱོང་པོ་ཡིན་པ་དང་། ཁྱོད་ཀྱི་མཇིང་པའི་ཤ་རྒྱུས་ལྕགས་ལྟར་མཁྲེགས་ཤིང་། ཁྱོད་ཀྱི་ཡ་ཐོད་ར་གན་ཡིན་པ་ངས་སྔར་ནས་ཤེས།
ISA 48:5 ཁྱོད་ཀྱིས་དོན་དེ་དག་ངའི་ལྷ་སྐུས་བསྒྲུབས་ཤིང་། ངའི་བརྐོས་སྐུ་དང་བླུགས་སྐུ་ཡིས་བསྒོས་པ་ཡིན་ཞེས་མི་གླེང་ཕྱིར། གནའ་བོའི་དུས་ནས་བདག་གིས་ཁྱོད་ལ་བཤད་དེ། དོན་མ་བྱུང་སྔོན་དུ་བདག་གིས་ཁྱོད་ལ་སྨྲས་སོ། །
ISA 48:6 ཁྱོད་ཀྱིས་འདི་དག་ཐམས་ཅད་ཐོས་ཡོད་པས་ད་ནི་དེ་ཀུན་ལ་བསམ་བློ་ཐོངས་ཤིག ཁྱོད་ཀྱིས་དེ་བསྒྲག་པར་མི་བྱའམ། ད་ཕྱིན་ཆད་ངས་ཁྱོད་ལ་དོན་གསར་པ་སྟེ་ཁྱོད་ཀྱིས་མི་ཤེས་པའི་གསང་དོན་རྣམས་སྟོན་པར་བྱ།
ISA 48:7 ཁྱོད་ཀྱིས་ལྟོས་ཤིག དོན་འདི་དག་ངས་སྔ་མོ་ནས་རྟོགས་ཟིན་ཞེས་མི་བཤད་པའི་ཕྱིར། དོན་དེ་དག་སྔོན་ཆད་ནས་ཡོད་པ་མ་ཡིན་པར་ད་ལྟ་གསར་དུ་བཀོད་པ་ཡིན། དེ་རིང་ཉིན་མོའི་སྔོན་དུ་ཁྱོད་ཀྱིས་ཐོས་མྱོང་མེད།
ISA 48:8 ཁྱོད་ཀྱིས་ཐོས་མེད་ལ་རྟོགས་ཀྱང་མེད། སྔོན་ཆད་ཁྱོད་ཀྱི་རྣ་བ་ཕྱེས་མེད་པ་ཡིན། དེའི་རྒྱུ་མཚན་ནི་ཁྱོད་ཀྱིས་གཡོ་སྒྱུ་སྤྱོད་པ་ངས་སྔར་ནས་ཤེས་ཏེ། ཁྱོད་རང་མ་སྐྱེས་གོང་ནས་ཁྱོད་ལ་ངོ་ལོག་པ་ཞེས་ཐོགས་སོ། །
ISA 48:9 ངའི་མིང་གི་ཕྱིར་དུ་ང་སྐབས་སུ་མི་ཁྲོ་ཞིང་། ངའི་མཚན་སྙན་གྱི་ཕྱིར་དུ་ངས་ཁྱོད་ལ་བཟོད་པ་བསྒོམས་ནས་ཁྱོད་རང་ཚར་གཅོད་མི་བྱའོ། །
ISA 48:10 ལྟོས་ཤིག ངས་ཁྱོད་རང་བཙོ་སྦྱང་བྱས་ཀྱང་དངུལ་བཙོ་སྦྱོང་བྱེད་པ་ལྟར་མ་ཡིན་ཞིང་། བདག་གིས་ཁྱོད་སྡུག་བསྔལ་གྱི་ཚ་ཐབ་ལས་བདམས་པ་ཡིན།
ISA 48:11 ང་རང་ཉིད་ཀྱི་ཆེད་དུ་ཡིན་ཏེ། ང་རང་ཉིད་ཀྱི་ཆེད་དུ་ངས་དེ་དག་བསྒྲུབ་ངེས་ཡིན། བདག་གི་མིང་ནི་བརྫབ་ག་ལ་རུང་། ངས་རང་ཉིད་ཀྱི་གཟི་བརྗིད་གཞན་ལ་སྟེར་བར་མི་བྱའོ། །
ISA 48:12 ཀྱེ་ཡ་ཀོབ། བདག་གིས་བོས་པའི་ཡེས་ར་ཨེལ། བདག་ལ་ཉོན་དང་། བདག་ནི་དཀོན་མཆོག་ཡ་ཝཱེ་ཡིན་ཏེ། ཐོག་མ་ཡིན་ལ་མཐའ་མའང་ཡིན་ནོ། །
ISA 48:13 ངའི་ལག་པས་ས་གཞིའི་རྨང་གཞི་བཏིངས་པ་ཡིན་ལ། ངའི་ལག་གཡས་པས་ནམ་མཁའ་རྒྱ་བསྐྱེད་པ་ཡིན། ངས་དེ་དག་འབོད་དུས་དེ་དག་མཉམ་གཅིག་ཏུ་ཡར་འགྲེང་པ་ཡིན།
ISA 48:14 ཀྱེ་མི་སྡེ་རྣམས། ཁྱོད་ཅག་ཐམས་ཅད་ལྷན་ཅིག་ཏུ་འདུས་ནས་ཉོན་ཅིག དེ་དག་གི་ཁྲོད་ནས་དོན་འདི་ལུང་སྟོན་མཁན་སུ་ཞིག་ཡོད་དམ། དཀོན་མཆོག་ཡ་ཝཱེ་ནི་ཁོ་ལ་བྱམས་པས་ཁོང་གིས་ཉིད་ཀྱི་དགོངས་དོན་ཇི་བཞིན་དུ་པཱ་པེལ་ལོན་ལ་མཛད་ཅིང་། ཁོང་གི་ཕྱག་གིས་ཀལ་དི་པ་ལ་རྒོལ་བར་འགྱུར།
ISA 48:15 བདག་གིས་སྨྲས་ཤིང་ཡང་ཁོ་རང་བོས་ཏེ། བདག་གིས་ཁོ་ཁྲིད་འོངས་པ་ཡིན་པས། ཁོས་སྤྱོད་པ་ཐམས་ཅད་འགྲུབ་པར་འགྱུར།
ISA 48:16 ཁྱོད་རྣམས་བདག་གི་ཉེ་སར་ཡོང་ནས་གཏམ་འདི་ལ་ཉོན་ཅིག ཐོག་མ་ཉིད་ནས་ངས་གསང་བའི་གཏམ་སྨྲས་མེད། དོན་འདི་འབྱུང་བའི་དུས་ནས་བཟུང་ང་རང་དེ་རུ་ཡོད་ཅེས་པའོ། །ད་ལྟ་གཙོ་བོ་ཡ་ཝཱེས་ང་དང་ཁོང་གི་ཐུགས་ཉིད་མངགས་པ་ཡིན་ནོ། །
ISA 48:17 ཁྱོད་སྐྱོབ་མཁན་དཀོན་མཆོག་ཡ་ཝཱེ་སྟེ། ཡེས་ར་ཨེལ་གྱི་དམ་པ་ཉིད་ཀྱིས་འདི་སྐད་དུ། བདག་ནི་ཁྱོད་ཀྱི་དཀོན་མཆོག་ཡ་ཝཱེ་སྟེ། ཁྱོད་ལ་ཕན་ཐོགས་པའི་བསླབ་བྱ་གནང་མཁན་དང་། ཁྱོད་ལ་འགྲོ་དགོས་པའི་ལམ་སྟོན་མཁན་གྱི་དཀོན་མཆོག་ཡིན།
ISA 48:18 ཁྱོད་ཀྱིས་བདག་གི་བཀའ་ལ་མཉན་པར་གྱུར་ཅིག དེ་ལྟར་ཁྱོད་ཀྱི་ཞི་བདེ་ནི་གཙང་པོ་བཞུར་བ་དང་འདྲ་ལ། ཁྱོད་ཀྱི་དྲང་བདེན་ནི་རྒྱ་མཚོའི་རྦ་རླབས་འཕྱུར་བ་དང་མཚུངས།
ISA 48:19 ཁྱོད་ཀྱི་བུ་རྒྱུད་རྒྱ་མཚོའི་བྱེ་མ་བཞིན་མང་ལ། ཁྱོད་ཀྱི་མངལ་དུ་ཆགས་པའི་བུ་རབས་ཚ་རྒྱུད་བྱེ་རྡུལ་ཇི་བཞིན་མོད། ཁོ་ཚོའི་མིང་ནི་བདག་དྲུང་སྟོངས་ཤིང་མེད་པར་མི་འགྱུར་རོ་ཞེས་གསུངས་སོ། །
ISA 48:20 ཁྱོད་རྣམས་པཱ་པེལ་ལོན་ནས་ཕྱིར་ཤོག་དང་། ཀལ་དི་པའི་ཡུལ་ནས་བྱོལ་ཅིག ཁྱོད་རྣམས་ཀྱིས་དགའ་སྤྲོའི་འབོད་སྒྲ་དང་བཅས་སྒྲོགས་ཤིག དོན་དེ་མི་རྣམས་ལ་ཤོད། དཀོན་མཆོག་ཡ་ཝཱེས་ཁོང་གི་ཞབས་ཕྱི་ཡ་ཀོབ་བསྐྱབས་སོ་ཞེས་ས་མཐའི་བར་དུ་ཁྱོད་རྣམས་ཀྱིས་དོན་དེ་སྒྲོགས་ཤིག
ISA 48:21 དཀོན་མཆོག་ཡ་ཝཱེས་དེ་དག་དབེན་སྟོང་ཡུལ་ནས་ཁྲིད་དུས་དེ་ཚོ་སྐོམ་གདུང་གིས་མ་མནར། ཁོང་གིས་དེ་དག་གི་དོན་དུ་བྲག་གསེང་ནས་ཆུ་བཏོན་པ་རེད། ཁོང་གིས་བྲག་གཏོར་ནས་ཆུ་བརྡོལ་དུ་བཅུག
ISA 48:22 དཀོན་མཆོག་ཡ་ཝཱེས་འདི་སྐད་དུ། མི་ངན་ལ་ཞི་བདེ་མེད་ཅེས་གསུངས་སོ། །
ISA 49:1 ཀྱེ་མཚོ་གླིང་རྣམས། ཁྱོད་ཚོས་བདག་ལ་ཉོན་དང་། རྒྱང་རིང་གི་མི་རིགས་ཀུན་གྱིས་རྣ་བ་བླགས་ནས་ཉོན་ཅིག ང་རང་མངལ་ནས་ཡོད་དུས་སུ་དཀོན་མཆོག་ཡ་ཝཱེས་ང་ལ་ཞལ་འབོད་གནང་ཞིང་། ང་རང་མ་ཡི་ཁོག་ནས་སྐྱེས་དུས་སུ་ཁོང་གིས་ངའི་མིང་ནས་བོས།
ISA 49:2 ཁོང་གིས་ངའི་ཁ་ལྕེ་རྣོན་པོ་གྲི་ལྟར་མཛད་ཅིང་། ཁོང་གི་ཕྱག་འོག་ཏུ་ང་རང་སྦས། ཡང་ཁོང་གིས་ང་ནི་མདའ་རྣོན་པོ་བཞིན་མཛད་དེ། ང་རང་ཁོང་གི་མདའ་དོང་ནང་དུ་སྦས།
ISA 49:3 ཁོང་གིས་ང་ལ་འདི་སྐད་དུ། ཁྱོད་ནི་ངའི་ཞབས་ཕྱི་ཡེས་ར་ཨེལ་ཡིན་ཏེ། བདག་ལ་ཁྱོད་བརྒྱུད་ནས་གཟི་བརྗིད་འཐོབ་པར་འགྱུར་ཞེས་གསུངས།
ISA 49:4 ཡིན་ཡང་ངས་ལན་དུ། ངས་དཀའ་ལས་མྱངས་པ་དོན་མེད་ཡིན། ངའི་སྟོབས་ཤུགས་ཟད་པ་ནི་སྟོང་བ་ཉིད་དང་མི་རྟག་པའོ། །ཡིན་ཡང་ང་ལ་འཐོབ་འོས་པའི་བདེན་ལུགས་དཀོན་མཆོག་ཡ་ཝཱེའི་དྲུང་དུ་ཡོད། ངའི་རྔན་པ་ནི་ངའི་དཀོན་མཆོག་དང་ལྷན་དུ་ཡོད་ཅེས་ཞུས་སོ། །
ISA 49:5 ཡ་ཀོབ་ཕྱིར་འཁོར་ཏེ་ཁོང་ལ་གཏོགས་པ་དང་། ཡེས་ར་ཨེལ་ཁོང་གི་དྲུང་དུ་བསྡུ་བའི་ཕྱིར། ང་རང་མངལ་དུ་ཡོད་དུས་ཁོང་གིས་ང་ནི་ཉིད་ཀྱི་ཞབས་ཕྱི་རུ་བཀོད་ཅིང་། དཀོན་མཆོག་ཡ་ཝཱེའི་སྤྱན་སྔར་ང་རང་གལ་ཆེན་པོ་ཡིན་ལ། ངའི་དཀོན་མཆོག་ནི་ངའི་སྟོབས་ཤུགས་ལགས།
ISA 49:6 ད་ལྟ་དཀོན་མཆོག་ཡ་ཝཱེས་འདི་སྐད་དུ། ཁྱོད་རང་བདག་གི་ཞབས་ཕྱི་བྱས་ནས་ཡ་ཀོབ་ཀྱི་ཚོ་པ་རྣམས་ཡང་བསྐྱར་དར་ཞིང་། ཡེས་ར་ཨེལ་ནང་གི་ལྷག་ལུས་རྣམས་ཕྱིར་འཁྲིད་འོང་བ་ནི་དོན་ཆུང་ངུ་ཙམ་ཡིན། བདག་གིས་ཁྱོད་ནི་མི་སྡེ་ཀུན་གྱི་འོད་དུ་བྱེད་པ་དང་། བདག་གི་ཐར་ལམ་ས་མཐར་བསྐྱལ་བར་བྱའོ་ཞེས་གསུངས་སོ། །
ISA 49:7 ཡེས་ར་ཨེལ་གྱི་གཙོ་བོ་སྐྱབས་མགོན། ཡེས་ར་ཨེལ་གྱི་དམ་པ་ཉིད་དེ་དཀོན་མཆོག་ཡ་ཝཱེས་མི་ཡི་མཐོང་ཆུང་མྱོང་མཁན། རང་རྒྱལ་སྡང་བ། དབང་སྒྱུར་པས་བྲན་དུ་བཀོལ་བའི་མི་བཅས་ལ་འདི་སྐད་དུ། རྒྱལ་པོ་རྣམས་ཀྱིས་མཐོང་ན་ཡར་འགྲེང་ཞིང་། འགོ་དཔོན་རྣམས་ཀྱིས་མཐོང་ཡང་ཕྱག་འཚལ་ངེས། ཐམས་ཅད་བློ་གཏོད་རུང་བའི་དཀོན་མཆོག་ཡ་ཝཱེ་སྟེ། ཁྱོད་རང་འདེམས་མཁན་ཡེས་ར་ཨེལ་གྱི་དམ་པ་ཉིད་ཀྱི་རྐྱེན་གྱིས་སོ། །
ISA 49:8 དཀོན་མཆོག་ཡ་ཝཱེས་འདི་སྐད་དུ། ཐུགས་དགྱེས་དུས་ངས་ཁྱོད་ལ་ཨ་ལན་སྤྲད། སྐྱོབ་པའི་ཉིན་མོར་ངས་ཁྱོད་ལ་གྲོགས་ཀྱང་མཛད། འབངས་རྣམས་ཀྱི་བར་མི་བྱ་ཕྱིར་ངས་ཁྱོད་བསྲུང་ཞིང་། ཡུལ་དེ་ཡང་བསྐྱར་དར་བར་བྱས་ཏེ། སྟོངས་པའི་ས་ནི་མི་རྣམས་ལ་ནོར་སྐལ་དུ་གནང་བར་བྱའོ། །
ISA 49:9 བཙོན་པ་རྣམས་ལ་ཕྱི་རུ་ཤོག་ཅེས་དང་། མུན་ནག་ནང་དུ་གནས་པ་རྣམས་ལ་ཕྱིར་མངོན་ཤོག་ཅེས་བརྗོད་ཅིང་། ལམ་བར་དུ་དེ་ཚོས་བཟའ་བཏུང་རྙེད་ཅིང་། སྐྱ་ཐེར་ཐེར་གྱི་མཐོ་ས་རྣམས་དེ་ཚོར་སྤང་ཐང་དུ་འགྱུར་ངེས་ཡིན།
ISA 49:10 ཁོ་ཚོ་བཀྲེས་ཤིང་སྐོམ་པར་མི་འགྱུར་ལ། ཚ་བས་བསྲེག་ཅིང་ཉི་མས་འཚེ་མི་འགྱུར། ཅི་ལ་ཞེ་ན། ཁོ་ཚོ་བྱམས་བརྩེས་སྐྱོང་མཁན་གྱིས་དེ་དག་འཁྲིད་ཅིང་། ཆུ་མིག་དག་གི་འགྲམ་དུ་ལམ་སྣ་འདྲེན་ནོ། །
ISA 49:11 བདག་གིས་རང་གི་རི་བོ་ཀུན་ལམ་ཆེན་དུ་བཟོ་ཞིང་། ངའི་གཞུང་ལམ་རྣམས་ཀྱང་བསྙམ་པར་བྱེད།
ISA 49:12 ལྟོས་ཤིག མི་ལ་ལ་རྒྱང་རིང་ནས་འོང་ཞིང་། ལ་ལ་བྱང་ཕྱོགས་དང་ནུབ་ཕྱོགས་ནས་འོང་ལ། ལ་ལ་སི་ནེན་ཡུལ་ནས་སླེབ་པར་འགྱུར་རོ། །
ISA 49:13 ཀྱེ་ནམ་མཁའི་ཚོགས་ཁྱོད་རྣམས་ཀྱིས་དགའ་འབོད་བྱོས་དང་། ཀྱེ་ས་གཞི་ཁྱོད་དགའ་བར་གྱིས་ཤིག ཀྱེ་རི་བོའི་ཚོགས། ཁྱོད་རྣམས་ཀྱིས་སྐད་བཏོན་ཏེ་དགའ་འབོད་གྱིས་ཤིག ཅིའི་ཕྱིར་ཞེ་ན། དཀོན་མཆོག་ཡ་ཝཱེས་ཁོང་གི་མི་སྡེ་ལ་སེམས་གསོ་གནང་ནས་ཉིད་ཀྱི་སྐྱོ་བོ་རྣམས་ལ་སྙིང་རྗེ་དགོངས་སོ། །
ISA 49:14 དེ་ལྟར་ལགས་ཀྱང་ཛ་ཡན་ན་རེ། དཀོན་མཆོག་ཡ་ཝཱེས་ང་སྤངས་ཤིང་། བདག་གི་གཙོ་བོས་ང་བརྗེད་སོང་ཞེས་སྨྲས་སོ། །
ISA 49:15 བུད་མེད་ཅིག་གིས་རང་གི་ནུ་མ་ནུ་བའི་ཕྲུ་གུ་བརྗེད་པ་དང་། རང་གི་མངལ་སྐྱེས་བུ་ལ་བརྩེ་བར་མི་བྱའམ། དེ་ཚོས་བརྗེད་སྲིད་ཀྱང་བདག་གིས་ཁྱོད་རང་བརྗེད་པར་མི་འགྱུར་རོ། །
ISA 49:16 ལྟོས་ཤིག ངས་ཁྱོད་རང་བདག་གི་ལག་མཐིལ་ལ་བརྐོས་ཏེ། ཁྱོད་ཀྱི་ལྕགས་རི་རྣམས་དུས་རྟག་པར་བདག་གི་མདུན་དུ་ཡོད།
ISA 49:17 ཁྱོད་ཡང་བསྐྱར་འཛུགས་མཁན་མྱུར་དུ་འོང་ཞིང་། ཁྱོད་རང་མེད་པར་གཏོང་མཁན་དང་སྟོངས་སུ་འཇུག་མཁན་རྣམས་ཁྱོད་དང་རིང་དུ་འབྲལ་བར་འགྱུར།
ISA 49:18 ཁྱོད་ཀྱིས་མིག་ཡར་བཏེགས་ནས་ཕྱོགས་བཞིར་ལྟོས་དང་། དེ་དག་ཐམས་ཅད་ལྷན་ཅིག་ཏུ་ཁྱོད་ཀྱི་ཕྱོགས་སུ་འོང་བཞིན་འདུག དཀོན་མཆོག་ཡ་ཝཱེས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། རྒྱན་ཆ་འདོགས་པ་ཇི་བཞིན་ཁྱོད་ཀྱིས་དེ་རྣམས་འདོགས་ཤིང་། བག་གསར་གྱིས་སྐ་རགས་འཆིང་པ་བཞིན། ཁྱོད་ཀྱིས་དེ་དག་བཅིང་བར་འགྱུར།
ISA 49:19 ཁྱོད་ཀྱི་སྟོངས་ཤིང་དབེན་པའི་ཡུལ་རྣམས་དང་། རྡུལ་དུ་བརླགས་པའི་ས་ཆ་རྣམས་ཁྱོད་ཀྱི་ཡུལ་མི་རྣམས་ལ་ཆུང་དྲགས་པས། ཁྱོད་རང་ཁྱུར་མིད་གཏོང་མཁན་རྣམས་ཀྱང་ཁྱོད་དང་རིང་དུ་གྱེས་པར་འགྱུར།
ISA 49:20 ཡང་ཁྱོད་མྱ་ངན་གྱིས་མནར་བའི་རྗེས་སུ་སྐྱེས་པའི་བུ་རྒྱུད་ཀྱིས་ཁྱོད་ཀྱི་རྣ་བར། ཡུལ་འདི་ང་ལ་ཆུང་དྲགས་པས། ང་སྡོད་སའི་ས་ཞིག་སྦྱིན་རོགས་ཞེས་ཞུ་ངེས།
ISA 49:21 དུས་དེར་ཁྱོད་ཀྱིས་སེམས་སུ་ན་རེ། ང་ནི་བུ་ཚེ་ལས་འདས་ཤིང་མོ་གཤམ་དུ་ལུས། ང་རང་ཡུལ་བྱོལ་བཏང་ནས་ཕྱི་རུ་སྤྱུགས་པ་ཡིན་པས། སུ་ཞིག་གིས་ངའི་ཕྱིར་ཕྲུ་གུ་འདི་དག་བཙས་ཤིང་། སུས་ཕྲུ་གུ་འདི་དག་སྐྱོང་བར་མཛད་དམ། ལྟོས་ཤིག ང་རང་གཅིག་པུ་དོར་བས་ན། ཕྲུ་གུ་འདི་དག་གང་ནས་ཡོང་ངམ་ཞེས་བརྗོད་ངེས།
ISA 49:22 གཙོ་བོ་ཡ་ཝཱེས་འདི་སྐད་དུ། ལྟོས་ཤིག བདག་གིས་མི་རིགས་ཀུན་ལ་རང་གི་ལག་ཟུང་བཏེགས་ཏེ། མི་རྣམས་ལ་ངའི་དར་ཆ་བསྒྲེང་བར་བྱ། དེ་ནས་ཁོ་ཚོས་ཁྱོད་ཀྱི་བུ་རྣམས་པང་དུ་བཟུང་ནས་འོང་ཞིང་། ཁྱོད་ཀྱི་བུ་མོ་རྣམས་ཕྲག་ལ་ཁུར་ནས་འོང་།
ISA 49:23 རྒྱལ་པོ་རྣམས་ཁྱོད་ཀྱི་ཕ་གཡར་དང་། དེ་དག་གི་རྒྱལ་མོ་རྣམས་ཁྱོད་རང་བདག་སྐྱོང་བྱེད་པའི་མ་མ་རུ་གྱུར་ཏེ། དེ་དག་གིས་གདོང་སར་བཏུད་ནས་ཁྱོད་ལ་ཕྱག་འཚལ་ཞིང་། ཁྱོད་ཀྱི་རྐང་པའི་སྟེང་གི་རྡུལ་ལྡག་པར་བྱའོ། །དེ་ནས་ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་ཤིང་། བདག་ལ་སྒུག་མཁན་རྣམས་ངོ་ཚ་བར་ཡེ་མི་འགྱུར་རོ། །
ISA 49:24 དེ་ཡང་བཅོམ་པར་གྱུར་པ་དཔའ་བོའི་ལག་ནས་ཅི་ལྟར་ལེན་ནམ། བཙོན་པ་རྣམས་གདུག་རྩུབ་ཅན་གྱི་ལག་ནས་ཅི་ལྟར་སྐྱོབ་བམ།
ISA 49:25 ཡིན་ཡང་དཀོན་མཆོག་ཡ་ཝཱེས་འདི་སྐད་དུ། དཔའ་བོས་བཙོན་དུ་ཁྲིད་པ་ཕྱིར་འཕྲོག་ཅིང་། གདུག་རྩུབ་ཅན་གྱིས་བཅོམ་པ་ཕྱིར་སྐྱོབ་པར་འགྱུར། ཁྱོད་དང་རྩོད་མཁན་ལ་ངས་ཀྱང་དེ་དང་རྩོད་ཅིང་། ཁྱོད་ཀྱི་བུ་ཕྲུག་རྣམས་ངས་སྐྱོབ་པར་འགྱུར།
ISA 49:26 བདག་གིས་ཁྱོད་ཀྱི་གཉའ་ནས་གནོན་མཁན་རྣམས་ལ་རང་གི་ཤ་བཟའ་རུ་འཇུག་ཅིང་། དེ་ཚོ་རྒུན་ཆང་འཐུང་བ་བཞིན་དུ་རང་གི་ཁྲག་གིས་བཟི་བར་འགྱུར། དེ་ནས་མི་ཀུན་གྱིས་བདག་ནི་ཁྱོད་ཀྱི་སྐྱབས་མགོན་ཡ་ཝཱེ་སྟེ། ཁྱོད་སྐྱོབ་མཁན་དང་ཡ་ཀོབ་ཀྱི་མཐུ་བོ་ཆེ་དེ་ཡིན་པ་ཤེས་པར་འགྱུར་ཞེས་གསུངས་སོ། །
ISA 50:1 དཀོན་མཆོག་ཡ་ཝཱེས་འདི་སྐད་དུ། ངས་ཁྱོད་རྣམས་ཀྱི་མ་དོར་བས་འཐོར་ཡིག་གང་དུ་ཡོད་དམ། ཡང་ན་བདག་གིས་རང་གི་བུན་བདག་སུ་ལ་ཁྱོད་རྣམས་བཙོངས་པ་ཡིན་ནམ། ལྟོས་ཤིག ཁྱོད་རྣམས་ཀྱི་སྡིག་པའི་རྐྱེན་གྱིས་ཁྱོད་ཅག་བཙོངས་པ་ཡིན་ལ། ཁྱོད་རྣམས་ཀྱི་ཉེས་པའི་དབང་གིས་ཁྱོད་ཅག་གི་མ་ཡང་དོར་བ་ཡིན།
ISA 50:2 བདག་སླེབས་དུས་མི་སུ་ཡང་མེད་པ་ཅི་ཡིན་ནམ། བདག་གིས་འབོད་ཚེ་ལན་སྟེར་མཁན་མེད་པ་ཅི། བདག་གི་ལག་པར་ནུས་པ་མེད་པས་བླུ་མ་ཐུབ་པ་ཡིན་ནམ། ཡང་ན་བདག་ལ་སྐྱོབ་པའི་མཐུ་སྟོབས་མེད་པ་ཡིན། ལྟོས་ཤིག ངས་གཤེ་གཤེ་བཏང་བས་རྒྱ་མཚོ་སྐམ་ཞིང་། གཙང་པོ་རྣམས་དབེན་སྟོང་དུ་བསྒྱུར། ཉ་རྣམས་ལ་ཆུ་མེད་པས་དྲི་ངན་འཐུལ་ཞིང་སྐོམ་པས་འཆིའོ། །
ISA 50:3 ངས་ནམ་མཁའ་མུན་ནག་ལ་གཡོག་ཏུ་འཇུག་ཅིང་། དེ་དག་རྩིད་རས་ཀྱིས་འགེབས་པར་བྱའོ་ཞེས་གསུངས་སོ། །
ISA 50:4 ངས་ཉམ་ཐག་རྣམས་ལ་གཏམ་གླེང་ནས་ཇི་ལྟར་སྐྱོང་བ་རྟོགས་པའི་ཆེད་དུ་གཙོ་བོ་ཡ་ཝཱེས་བསླབ་བྱ་ལེན་པའི་ལྗགས་ལྕེ་ང་ལ་གནང་ཞིང་། ཁོང་གིས་ཞོགས་པ་རེ་རེར་ང་གཉིད་ལས་བསླངས་ཏེ། བསླབ་བྱ་ལེན་པའི་སྐྱེས་བུ་བཞིན་ངའི་རྣ་བ་སྤྱང་པོར་མཛད་ཡོད།
ISA 50:5 གཙོ་བོ་ཡ་ཝཱེས་ངའི་རྣ་བ་ཕྱེས་པས་ངས་རྒྱབ་འགལ་མ་བྱས་ལ། འགོག་རྒོལ་ཡང་མ་བྱས་སོ། །
ISA 50:6 རྡུང་རྡེག་གཏོང་མཁན་ལ་ངས་རང་གི་རྒྱབ་དང་། ཨག་ཚོམ་འཐེན་མཁན་ལ་རང་ཉིད་ཀྱི་མཁུར་ཚོས་གཏད་པ་ཡིན། འཕྱ་སྨོད་བྱེད་མཁན་དང་མཆིལ་མ་འདེབས་མཁན་ལ་ངས་རང་གི་ངོ་གདོང་མ་སྦས་སོ། །
ISA 50:7 ཅིའི་ཕྱིར་ཞེ་ན། གཙོ་བོ་ཡ་ཝཱེས་ང་ལ་མགོན་སྐྱབས་མཛད་པས་བདག་ངོ་ཚ་བར་མི་འགྱུར་ཞིང་། དེ་བས་ངས་རང་གི་ངོ་གདོང་མེ་རྡོ་ལྟར་བཀོད་དེ། ང་ཁ་སྐྱེངས་པར་མི་འགྱུར་བ་ངས་ཤེས་ཡོད།
ISA 50:8 ང་ལ་དག་འབུད་མཛད་མཁན་ཁོང་ཉིད་བདག་གི་ཉེ་སར་ཡོད་པས། ང་ལ་ཐུབ་ཚོད་བྱེད་མཁན་སུ་ཞིག་མཆིས། རང་ཅག་མཉམ་དུ་ཡར་ལང་བར་བྱ། ངའི་ཉེ་སར་ཤོག་དང་། ང་ལ་སྐྱོན་འདོན་མཁན་སུ་ཡོད།
ISA 50:9 ལྟོས་དང་། གཙོ་བོ་ཡ་ཝཱེས་ང་ལ་མགོན་སྐྱབས་མཛད་པས། སུས་ང་ལ་ཉེས་པ་འཛུགས་ནུས་སམ། ལྟོས་དང་། དེ་དག་ཐམས་ཅད་གོས་རྙིང་ལྟར་གྱུར་ནས་མུག་པས་བཟའ་བར་འགྱུར་རོ། །
ISA 50:10 ཁྱོད་ཅག་གི་ཁྲོད་དུ་དཀོན་མཆོག་ཡ་ཝཱེར་གུས་ཤིང་འཇིགས་པ་དང་། ཁོང་གི་ཞབས་ཕྱིའི་ངག་ལ་ཉན་མཁན་སུ་ཡོད་དམ། འོད་ཟེར་མེད་པའི་མུན་ནག་ནང་དུ་བགྲོད་མཁན་སུ་ཡོད་དམ། དེས་དཀོན་མཆོག་ཡ་ཝཱེའི་མཚན་ལ་དད་ཅིང་། རང་གི་དཀོན་མཆོག་ལ་བརྟེན་པར་འོས།
ISA 50:11 ལྟོས་ཤིག རང་གི་ཆེད་དུ་མེ་སྦར་ནས་དཔལ་འབར་གྱིས་རང་ཉིད་སྐོར་མཁན་ཁྱོད་རྣམས་སོ་སོའི་མེ་ཡི་འོད་དང་རང་གིས་སྦར་བའི་དཔལ་འབར་ཁྲོད་དུ་སྐྱོད་ཅིག དེ་ནི་བདག་གི་ལག་ནས་ཁྱོད་ཅག་ལ་ཐོབ་པར་འདོད་པ་ཡིན་ཏེ། ཁྱོད་རྣམས་སྡུག་བསྔལ་ནང་དུ་ལོག་ནས་སྡོད་པར་འགྱུར་རོ། །
ISA 51:1 དྲང་བདེན་བརྩོན་ཞིང་དཀོན་མཆོག་ཡ་ཝཱེ་འཚོལ་མཁན་དག་གིས་བདག་ལ་ཉོན་དང་། ཁྱོད་རྣམས་ཀྱིས་བྲག་རྡོ་དེ་ལ་ལྟོས་དང་། ཁྱོད་རྣམས་དེ་ལས་བརྐོས་པ་ཡིན། ཁྱོད་རྣམས་ཀྱིས་རྡོ་འདོན་པའི་ཁུངས་དེ་ལ་ལྟོས་ཤིག ཁྱོད་རྣམས་དེ་ལས་ཐོན་པའོ། །
ISA 51:2 ཁྱོད་རྣམས་ཀྱིས་རང་གི་མེས་པོ་ཨབ་ར་ཧམ་དང་ཁྱོད་རང་བཙའ་མཁན་སཱ་ར་ལ་ལྟོས་དང་། ཨབ་ར་ཧམ་གཅིག་པུ་ཡིན་དུས་ངས་ཁོ་རང་བོས་པ་དང་། ཁོ་ལ་བྱིན་རླབས་གནང་ནས་བུ་རྒྱུད་མང་དུ་འཕེལ་བར་བཅུག
ISA 51:3 དཀོན་མཆོག་ཡ་ཝཱེས་ཛ་ཡན་ལ་སེམས་གསོ་མཛད་པ་དང་། དེའི་ཞིག་རོ་རྣམས་གསོས་ཤིང་། དབེན་སྟོང་རྣམས་ཨེ་དེན་ལྡུམ་ར་ལྟ་བུར་བསྒྱུར་ལ། དེའི་མྱ་ངམ་ཐང་རྣམས་དཀོན་མཆོག་ཡ་ཝཱེའི་སྐྱེད་ཚལ་ལྟར་མཛད། གནས་དེར་དགའ་སྤྲོ་དང་སྐྱིད་སྣང་། གཏང་རག་དང་གླུ་སྐད་ཀྱིས་ཁྱབ་པར་འགྱུར་རོ། །
ISA 51:4 ཀྱེ་བདག་གི་མི་སྡེ། གཟབ་གཟབ་བྱས་ནས་ཉོན་དང་། ཀྱེ་བདག་གི་མི་རིགས། བདག་ལ་རྣ་བ་གཏོད་དང་། བདག་ནས་བཀའ་སློབ་ཅིག་འབྱུང་ཞིང་དེ་ནས་བདག་གི་དྲང་གཞག་ནི་གློ་བུར་ཉིད་ལ་མི་རྣམས་ཀྱི་འོད་སྣང་དུ་འགྱུར།
ISA 51:5 བདག་གི་དྲང་བདེན་ཉེ་བར་སླེབས་ཤིང་། བདག་གི་ཐར་པ་ལམ་དུ་ཆས་ཟིན། ངའི་དཔུང་པས་མི་སྡེ་ཀུན་ལ་ཉེས་ཁྲིམས་གཅོད་ཅིང་། གླིང་ཕྲན་སྟེང་གི་མི་ཡིས་བདག་གི་རེ་བར་སྒུག་པ་དང་། ཁོ་ཚོས་བདག་གི་དཔུང་པར་སྒུག་ཡོད།
ISA 51:6 ཁྱོད་ཅག་གི་མིག་ཟུང་ནམ་མཁར་གཏོད་ལ། མར་ས་ལའང་ལྟོས་ཤིག ནམ་མཁའི་དབྱིངས་རྣམས་དུ་བ་ལྟར་ཡལ་ཞིང་། ས་གཞི་ནི་གྱོན་གོས་ལྟར་རལ་ངེས་ཡིན། དེའི་སྟེང་གི་ཡུལ་མི་རྣམས་ཀྱང་དུག་སྦྲང་ལྟར་འཆི་ངེས་ཡིན་མོད། འོན་ཀྱང་བདག་གི་ཐར་པ་གཏན་དུ་གནས་ཤིང་། བདག་གི་དྲང་བདེན་ནམ་ཡང་འཇིག་པར་མི་འགྱུར་རོ། །
ISA 51:7 སེམས་སུ་བདག་གི་བཀའ་ཁྲིམས་གནས་ཤིང་དྲང་བདེན་ངོས་ཟིན་མཁན་རྣམས་ཀྱིས་བདག་ལ་ཉོན་དང་། མི་ཡི་སྐྱོན་བརྗོད་ལ་མ་འཇིགས་ཤིག དེ་དག་གི་དམའ་འབེབས་ཕྱིར་མ་དངངས་ཤིག
ISA 51:8 ཅིའི་ཕྱིར་ཞེ་ན། མུག་པས་གོས་འཆའ་བ་ལྟར་དེ་དག་བཟའ་ཞིང་། འབུ་ཡིས་བལ་འཆའ་བ་བཞིན་དུ་ཁོ་རྣམས་བཟའ་བར་འགྱུར། འོན་ཀྱང་བདག་གི་དྲང་བདེན་ནི་གཏན་དུ་གནས་ཤིང་། བདག་གི་ཐར་པ་མི་རབས་ཀུན་ཏུ་གནས་སོ། །
ISA 51:9 ཀྱེ་དཀོན་མཆོག་ཡ་ཝཱེའི་ཕྱག་ཁྱེད་སད་པར་མཛོད། སད་པར་མཛོད། མཐུ་སྟོབས་ཀྱི་ན་བཟའ་གསོལ་ཅིག སྔར་གྱི་ཉིན་མོ་དང་མཚུངས་པར། གནའ་བོའི་མི་རབས་བཞིན་སད་པར་མཛོད། ཁྱེད་ནི་ར་ཧབ་གཤགས་མཁན་དང་། མཚོ་འབྲུག་འབིགས་མཁན་དེ་མ་ཡིན་ནམ།
ISA 51:10 གཏིང་ཟབ་པའི་རྒྱ་མཚོའི་ཆུ་རྣམས་སྐམ་དུ་བཅུག་སྟེ། བླུས་པའི་མི་རྣམས་ཕ་རོལ་ཏུ་བགྲོད་པའི་སླད་དུ། རྒྱ་མཚོའི་གཏིང་དུ་ལམ་མཛད་མཁན་དེ་ཁྱེད་རང་མ་ཡིན་ནམ།
ISA 51:11 དཀོན་མཆོག་ཡ་ཝཱེས་བླུས་པའི་མི་རྣམས་ཕྱིར་ལོག་ཅིང་གླུ་ལེན་བཞིན་ཛ་ཡན་ལ་སླེབ་ངེས། མཐའ་མེད་པའི་དགའ་སྤྲོ་ནི་ཅོད་པན་བཞིན་དེ་དག་གི་སྟེང་དུ་འབབ་པ་དང་། དེ་དག་དགའ་ཞིང་སྤྲོ་བར་གྱུར་ནས་སྡུག་བསྔལ་དང་ཤུགས་རིང་མེད་པར་འགྱུར་རོ། །
ISA 51:12 ང་རང་སྟེ་ཡ་ཝཱེ་བདག་ནི་ཁྱོད་ཅག་ལ་སེམས་གསོ་བྱེད་མཁན་ཡིན། འཆི་བ་ཡོད་པའི་མི་དང་། རྩྭ་དང་མཚུངས་པར་བཟོས་པའི་མི་བུ་རྣམས་ལ་སྐྲག་པ་ཁྱོད་སུ་ཡིན་ནམ།
ISA 51:13 ཁྱོད་རང་མཛད་མཁན་དཀོན་མཆོག་ཡ་ཝཱེ་ནི་ནམ་མཁའ་བཏིངས་ཤིང་། ས་གཞིའི་རྨང་རྡོ་འཛུགས་མཁན་དེ་ཡིན་པ་ཁྱོད་ཀྱིས་བརྗེད་ཟིན་ནམ། ཡང་ན་ཁྱོད་མེད་པར་གཏོང་མཁན་གྱི་དབང་ཤུགས་ཅན་ཚོའི་གཏུམ་སྤྱོད་ལ་ཁྱོད་རང་ཉིན་རྒྱུན་སྐྲག་པ་ཡིན་ནམ། དོན་དུ་གཏུམ་སྤྱོད་ཆེ་བའི་དབང་ཤུགས་ཅན་དག་གང་དུ་ཡོད།
ISA 51:14 བཙོན་དུ་ཁྲིད་པ་རྣམས་ནི་ཐར་ལ་ཉེ། དེ་དག་འཆི་བར་མི་འགྱུར་ཞིང་། གཤིན་ཡུལ་དུའང་མི་ལྷུང་སྟེ། དེ་དག་ལ་ཁ་ཟས་ཀྱང་དཀོན་པར་མི་འགྱུར་རོ། །
ISA 51:15 བདག་ནི་ཁྱོད་ཀྱི་དཀོན་མཆོག་ཡ་ཝཱེ་སྟེ་རྒྱ་མཚོ་དཀྲུགས་ནས་རྦ་རླབས་ཆལ་ཆིལ་གཡོ་བར་བྱེད་མཁན་ཡིན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཞེས་པ་ཁོའི་མིང་ཡིན་ནོ། །
ISA 51:16 ནམ་མཁའ་བཀོད་ཅིང་ས་གཞིའི་རྨང་འདིང་མཁན་བདག་གིས་ཁྱོད་ཀྱི་ཁ་ནང་ལ་ངའི་བཀའ་བཞག་ཅིང་། ངའི་ལག་པའི་འོག་ཏུ་ཁྱོད་བསྐུངས་ཏེ། ཛ་ཡན་ལ་ཁྱོད་ཅག་བདག་གི་མི་སྡེ་ཡིན་ཞེས་སྨྲ་བ་ཡིན།
ISA 51:17 ཀྱེ་ཡེ་རུ་སཱ་ལེམ། སད་པར་གྱིས། སད་པར་གྱིས། ཡར་ལོངས་ཤིག ཁྱོད་ཀྱིས་དཀོན་མཆོག་ཡ་ཝཱེའི་ཕྱག་ནས་ཁོང་ཐུགས་ཁྲོས་པའི་ཕོར་བ་ནས་འཐུངས་པ་དང་། མི་འཁྱར་རེ་འཁྱོར་རེར་བསྒྱུར་བའི་ཆང་ཕོར་དེའི་ནང་གི་རྒུན་ཆང་འཐུངས་ཟིན།
ISA 51:18 མོ་ལ་སྐྱེས་པའི་བུ་ཐམས་ཅད་ལས་མོར་ལམ་ཁྲིད་མཁན་གཅིག་ཀྱང་མེད་ལ། མོས་བདག་སྐྱོང་མཛད་པའི་བུ་ཐམས་ཅད་ལས་ཀྱང་མོའི་ལག་པ་ནས་སྐྱོར་མཁན་གཅིག་ཀྱང་མེད།
ISA 51:19 ཚར་གཅོད་དང་གཏོར་བཤིག མུ་གེ་དང་རལ་གྲི་བཅས་ཀྱི་དོན་དེ་གཉིས་ཁྱོད་ལ་བྱུང་ཡང་། ཁྱོད་ཀྱི་དོན་དུ་སུས་སྙིང་རྗེ་བསྐྱེད་ཅིང་། ཁྱོད་ལ་སེམས་གསོ་བྱེད་ཐུབ་མཁན་སུ་ཡོད་དམ།
ISA 51:20 ཁྱོད་ཀྱི་བུ་རྣམས་དྲན་མེད་དུ་བརྒྱལ་ཞིང་། རྙི་ལ་ཚུད་པའི་གཙོད་བཞིན་དུ་སྲང་ལམ་དག་ནས་ཉལ། དེ་དག་གིས་དཀོན་མཆོག་ཡ་ཝཱེ་སྟེ་ཁྱོད་ཀྱི་དཀོན་མཆོག་གི་ཐུགས་ཁྲོ་དང་བཀའ་བཀྱོན་ཉམས་སུ་མྱངས་པའོ། །
ISA 51:21 དེ་བས་ཆང་གིས་བཟི་ནས་འགྱེལ་བ་མ་ཡིན་པར་སྡུག་གིས་མནར་བ་ཁྱོད་ཀྱིས་གཏམ་འདིར་ཉོན་ཅིག
ISA 51:22 ཁྱོད་ཀྱི་གཙོ་བོ་ཡ་ཝཱེ་སྟེ། ཉིད་ཀྱི་མི་སྡེའི་ཕྱིར་དུ་དག་འབུད་མཛད་པའི་དཀོན་མཆོག་གིས་འདི་སྐད་དུ། བདག་གིས་མི་ཁྱར་ཁྱོར་བྱེད་པའི་རྒུན་ཆང་སྟེ། བདག་གི་ཁོང་ཁྲོ་དྲག་པོའི་ཆང་ཕོར་ཁྱོད་ཀྱི་ལག་ནས་བླངས་ཏེ། ཁྱོད་ཀྱིས་རྒུན་ཆང་དེ་བཏུང་བར་མི་བྱའོ། །
ISA 51:23 བདག་གིས་ཁྱོད་ལ་མནར་གཅོད་གཏོང་མཁན་རྣམས་ཀྱི་ལག་ཏུ་ཕོར་བ་དེ་འཇོག་ཅིང་། དེ་དག་གིས་ཁྱོད་ལ་ན་རེ། ཁྱོད་ཀྱི་ལུས་པོ་མར་བསྒུར་ནས་སར་ཉོལ་དང་། ང་ཚོ་ཁྱོད་ཀྱི་སྟེང་ནས་ཕར་འགྲོའོ་ཞེས་བརྗོད་པ་ལ། ཁྱོད་ཀྱིས་རང་གི་རྒྱབ་ས་གཞི་དང་སྲང་ལམ་དུ་བཏིངས་ནས། ཁོ་ཚོ་དེའི་སྟེང་ནས་འགྲོ་རུ་བཅུག་ཅེས་གསུངས་སོ། །
ISA 52:1 ཀྱེ་ཛ་ཡན། སད་པར་གྱིས། སད་པར་གྱིས། རང་གི་སྟོབས་ཤུགས་ལུས་ལ་གྱོན་ཞིག ཀྱེ་གྲོང་ཁྱེར་དམ་པ་ཡེ་རུ་སཱ་ལེམ། ཁྱོད་ཀྱི་འཕྱོར་གོས་གྱོན་དང་། ཅིའི་ཕྱིར་ཞེ་ན། ད་ནི་མཚན་སྐྱི་བཅད་མེད་པ་དང་མི་གཙང་བ་གཅིག་ཀྱང་ཁྱོད་ཀྱི་ནང་དུ་འོང་བར་མི་བྱའོ། །
ISA 52:2 ཀྱེ་ཡེ་རུ་སཱ་ལེམ། ས་རྡུལ་སྤྲུགས་ནས་ཡར་ལངས་ཏེ་རང་སར་སྡོད་ཅིག ཀྱེ་བཙོན་དུ་ཡོད་པའི་ཛ་ཡན་གྱི་བུ་མོ། ཁྱོད་ཀྱི་སྐེ་ལ་བསྐོན་པའི་ལྕགས་ཐག་ལྷོད་ཅིག
ISA 52:3 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་རིན་ཅི་ཡང་མེད་པར་བཙོངས་པ་ལྟར། རིན་དངུལ་མེད་པར་བླུ་བར་འགྱུར་ཞེས་གསུངས།
ISA 52:4 གཙོ་བོ་ཡ་ཝཱེས་འདི་སྐད་དུ། བདག་གི་མི་སྡེ་ཐོག་མར་ཨེ་ཅིབ་ཡུལ་དུ་འཁྱམས་ཤིང་དེར་བྱེས་སུ་བསྡད་དེ། རྗེས་སུ་ཨ་སུར་པས་དོན་མེད་དུ་དེ་དག་ལ་གཉའ་གནོན་བྱས་པ་རེད།
ISA 52:5 དེ་བས་ད་ལྟ་བདག་གིས་འདི་ནས་ཅི་བྱེད་ཅེས་གསུངས་ཤིང་། ཡང་ཁོང་གིས་འདི་སྐད་དུ། བདག་གི་མི་རྣམས་རིན་ཅི་ཡང་མེད་པར་བཙོན་དུ་ཁྲིད། དེ་དག་དབང་དུ་སྒྱུར་མཁན་གྱིས་སྐད་ཆེན་པོས་ངར་སྐད་བསྒྲགས་ཞེས་གསུངས། ཡང་ཁོང་གིས་འདི་སྐད་དུ། བདག་གི་མིང་ལ་དུས་རྒྱུན་དུ་མཐོང་ཆུང་བྱས་སོ། །
ISA 52:6 དེའི་ཕྱིར་བདག་གི་མི་སྡེས་ངའི་མིང་རྟོགས་ཤིང་། ཉིན་དེར་དེ་བཞིན་བརྗོད་མཁན་བདག་ཡིན་པ་དེ་དག་གིས་ངོས་ཟིན་པར་འགྱུར། ལྟོས་དང་ང་ཡིན་ནོ་ཞེས་གསུངས་སོ། །
ISA 52:7 འཕྲིན་བཟང་འཆད་ཅིང་ཞི་བདེ་སྒྲོག་མཁན་དང་། བདེ་སྐྱིད་ཀྱི་འཕྲིན་བཟང་འཆད་ཅིང་ཐར་པ་སྟོན་མཁན། ཡང་ཁྱོད་ཀྱི་དཀོན་མཆོག་རྒྱལ་པོར་བཞུགས་པ་ཡིན་ཞེས་ཛ་ཡན་ལ་སྒྲོག་མཁན་དེའི་རྐང་པ་ནི་རི་བོ་རྣམས་ཀྱི་སྟེང་དུ་ཇི་འདྲའི་མཛེས་ཨང་།
ISA 52:8 ཁྱོད་ཀྱི་སོ་པ་དག་གི་འབོད་སྒྲར་ཉོན་ཅིག ཁོ་ཚོས་སྐད་ཆེན་པོས་དགའ་སྤྲོའི་ཀི་ཅོ་མཉམ་དུ་སྒྲོག་སྟེ། ཅིའི་ཕྱིར་ཞེ་ན། དཀོན་མཆོག་ཡ་ཝཱེ་ཛ་ཡན་ལ་ཕྱིར་ཕེབས་དུས་ཁོ་ཚོས་དངོས་སུ་མཇལ་ངེས་ཡིན།
ISA 52:9 ཀྱེ་ཡེ་རུ་སཱ་ལེམ་གྱི་ཞིག་རལ་རྣམས། དགའ་སྤྲོའི་ཀི་སྒྲ་མཉམ་དུ་སྒྲོགས་དང་། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་རང་གི་མི་སྡེ་ལ་སེམས་གསོ་མཛད་ཅིང་། ཁོང་གིས་ཡེ་རུ་སཱ་ལེམ་བསྐྱབས་པ་ཡིན།
ISA 52:10 རྒྱལ་ཕྲན་ཡོངས་ཀྱི་མིག་མདུན་དུ་དཀོན་མཆོག་ཡ་ཝཱེས་རང་གི་ཕྱག་ངར་དམ་པ་རྗེན་པར་ངོམ་ནས། ས་མཐའ་ཡོངས་ཀྱིས་ང་ཚོའི་དཀོན་མཆོག་གི་ཐར་པ་མཐོང་བར་འགྱུར་རོ། །
ISA 52:11 ཆས་ཤིག ཆས་ཤིག ཁྱོད་རྣམས་གནས་དེ་ནས་ཕྱི་ལ་ཆས་ཤིག མི་གཙང་བ་རྣམས་ལ་མི་རེག་པར་ཕྱི་ལ་ཆས་ཤིག དཀོན་མཆོག་ཡ་ཝཱེའི་མཆོད་ཆས་འཁུར་མཁན་ཁྱོད་རྣམས་པཱ་པེལ་ལོན་གྲོང་ཁྱེར་ནས་ཕྱི་རུ་ཡོང་སྟེ་རང་ཉིད་གཙང་མར་གྱིས་ཤིག
ISA 52:12 ཁྱོད་རྣམས་བྲེལ་འཚུབ་ངང་ནས་ཕྱི་རུ་ཡོང་མི་དགོས་ལ། ཁྱོད་རྣམས་བྲོས་བྱོལ་ཚུལ་དུའང་འགྲོ་མི་དགོས། ཅི་ལ་ཞེ་ན། དཀོན་མཆོག་ཡ་ཝཱེ་ཁྱོད་ཀྱི་མདུན་ནས་ཕེབས་ཤིང་། ཡེས་ར་ཨེལ་གྱི་དཀོན་མཆོག་ཁྱོད་ཀྱི་རྒྱབ་རྟེན་ཡིན་ནོ། །
ISA 52:13 ལྟོས་དང་། བདག་གི་ཞབས་ཕྱིས་གང་སྤྱད་འགྲུབ་པ་དང་། ཁོ་ལ་བཀུར་སྟི་འཐོབ་ཅིང་མཐོ་བར་བཏེགས་ནས་རབ་ཏུ་འཕགས་པར་འགྱུར་ཞིང་།
ISA 52:14 དེའི་བྱད་བཞིན་ལ་རྨས་སྐྱོན་ཕོག་ནས་མི་དང་མི་འདྲ་ལ། ཆ་བྱད་བརླགས་ནས་འཇིག་རྟེན་པ་དང་མཚུངས་པ་མིན་པས། མི་མང་པོས་ཁོང་ལ་བལྟས་ནས་ངོ་མཚར་བར་འགྱུར།
ISA 52:15 ཁོང་གིས་རྒྱལ་ཕྲན་རྣམས་ངོ་མཚར་བར་བྱ་སྟེ། ཁོང་གི་རྐྱེན་གྱིས་རྒྱལ་པོ་རྣམས་ཀྱིས་ཁ་བཙུམ་པར་འགྱུར། ཅི་ལ་ཞེ་ན། དེ་དག་གིས་རང་ལ་བཤད་མེད་པ་རྣམས་མཐོང་ཞིང་། ཐོས་མྱོང་མེད་པ་རྣམས་ཀྱང་རྟོགས་པར་འགྱུར་བའོ། །
ISA 53:1 རང་ཅག་གིས་བསྒྲགས་པ་ལ་སུ་ཞིག་གིས་ཡིད་ཆེས་སམ། དཀོན་མཆོག་ཡ་ཝཱེའི་ཕྱག་ངར་སུ་ལ་མངོན་པར་བྱའམ།
ISA 53:2 ཁོང་ནི་དཀོན་མཆོག་ཡ་ཝཱེའི་དྲུང་དུ་རྩི་ཤིང་གསར་བ་འབུས་པ་དང་། རྩ་བ་སྐམ་ས་ནས་རྒྱས་པ་བཞིན། ང་ཚོས་ཡིད་སྨོན་འཆོར་བའི་གཟུགས་མཛེས་དང་རྔམ་བརྗིད་དེ་ལ་མེད་ཅིང་། ང་ཚོ་འགུག་པར་འགྱུར་བའི་མཛེས་སྡུག་ཀྱང་དེ་ལ་མེད།
ISA 53:3 མི་རྣམས་ཀྱིས་ཁོང་ལ་མཐོང་ཆུང་བྱས་ནས་ཁས་མི་ལེན་ཞིང་། ཁོང་ནི་དཀའ་སྡུག་མང་དུ་མྱངས་ཤིང་སེམས་སྡུག་ཤེས་པའི་མི་ཞིག་སྟེ། མི་རྣམས་ཀྱིས་མིག་ནང་མི་འཇོག་པའི་མི་བཞིན་ཡིན། ཁོང་ལ་བརྙས་བཅོས་ཐེབས་ཏེ། ང་ཚོས་ཀྱང་བཀུར་བར་མི་བྱའོ། །
ISA 53:4 ཁོང་གིས་རང་ཅག་གི་ན་ཚ་ཉིད་ཀྱི་སྟེང་དུ་བླངས་ཤིང་། རང་ཅག་གི་སྡུག་བསྔལ་ཁུར་དུ་བཞེས། འོན་ཀྱང་རང་ཅག་གིས་ཁོང་ལ་ཉེས་རྡུང་ཐེབས་ཤིང་། དཀོན་མཆོག་གིས་བརྡེགས་ནས་སྡུག་ལ་སྦྱར་བར་འདོད།
ISA 53:5 ཡིན་ཡང་ང་ཚོའི་ཉེས་པའི་ཕྱིར་དུ་ཁོང་ལ་རྨ་ཁ་བཏོད་ཅིང་། ང་ཚོའི་སྡིག་པའི་ཕྱིར་དུ་མནན་ཞིང་རྨས། ཁོང་གིས་ཉེས་ཆད་བཞེས་པས་ང་ཚོར་ཞི་བདེ་ཐོབ། ཁོང་གིས་གཅར་རྡུང་མྱངས་པས་ང་ཚོ་དྲག་པར་གྱུར།
ISA 53:6 ང་ཚོ་ཚང་མ་ལམ་བོར་བའི་ལུག་བཞིན་རང་རང་གི་ལམ་དུ་ཞུགས། ཡིན་ཡང་དཀོན་མཆོག་ཡ་ཝཱེས་ང་ཚོའི་སྡིག་པ་ཐམས་ཅད་ཁོང་གི་སྟེང་ལ་བཀལ།
ISA 53:7 ཁོང་ལ་མནར་གཅོད་ཐེབས་ཤིང་སྡུག་བསྔལ་མྱོང་དུས་སྐད་མ་བཏོན། ཁོང་ནི་ཤན་པའི་མདུན་དུ་ཁྲིད་པའི་ལུ་གུ་དང་། བལ་འབྲེག་མཁན་མདུན་གྱི་གྲགས་འགུལ་མེད་པའི་ལུག་ཇི་བཞིན། ཁོང་གིས་ཀྱང་ཞལ་གསུང་མ་གནང་།
ISA 53:8 ཁོང་འཛིན་བཟུང་བྱས་ནས་ཁྲིམས་ཐག་བཅད་རྗེས་ཁྲིད་པར་གྱུར། ཁོང་གི་དུས་རབས་དེའི་མི་ཡིས་ཁོང་གསོན་ཡུལ་ལས་ཚར་དུ་བཅད་ཅིང་། རྡུང་རྡེག་བཏང་བ་ང་ཡི་མི་སྡེའི་སྡིག་པའི་ཕྱིར་ཡིན་པ་སུ་ཡིས་ཤེས།
ISA 53:9 ཁོང་གིས་དྲག་སྤྱོད་མ་སྤེལ་ཞིང་ཞལ་ནས་གཡོ་སྒྱུ་ཅི་ཡང་མེད་ནའང་། མི་ཡིས་ཁོང་ཉིད་སྡིག་ཅན་མཉམ་དུ་དུར་ལ་སྦས་ཤིང་། སྐུ་གཤེགས་དུས་ཕྱུག་བདག་དང་མཉམ་དུ་དུར་ལ་སྦས།
ISA 53:10 ཁོང་ལ་མནར་གཅོད་ཐེབས་ཤིང་སྡུག་བསྔལ་མྱོང་བ་ནི་དཀོན་མཆོག་ཡ་ཝཱེའི་ཐུགས་དགོངས་ཡིན་ཞིང་། དཀོན་མཆོག་ཡ་ཝཱེས་ཁོང་གི་ཚེ་སྲོག་སྡིག་བཤགས་མཆོད་པར་ཕུལ་ན། ཁོང་གིས་རང་གི་བུ་རྒྱུད་གཟིགས་ཤིང་སྐུ་ཚེ་རིང་བར་འགྱུར། དཀོན་མཆོག་ཡ་ཝཱེ་ཐུགས་དགྱེས་པའི་དོན་ཐམས་ཅད་ཁོང་གི་ཕྱག་ནས་འགྲུབ་པར་འགྱུར།
ISA 53:11 ཁོང་གིས་ཚེ་སྲོག་གི་སྡུག་བསྔལ་མྱངས་རྗེས་འོད་གཟིགས་ཤིང་ཡིད་ཚིམ་པར་འགྱུར། བདག་གི་ཞབས་ཕྱི་ཡིས་ཁོང་གི་ཤེས་ཡོན་ལ་བརྟེན་ནས་མི་མང་པོ་དྲང་བདེན་དུ་བརྩི་ཐུབ་པར་མཛད་ཅིང་། ཡང་ཁོང་གིས་དེ་རྣམས་ཀྱི་ཉེས་པ་འཁུར་བར་འགྱུར།
ISA 53:12 དེ་བས་བདག་གིས་ཁོང་ལ་མི་རླབས་ཆེན་མཉམ་དུ་ནོར་སྐལ་ཐོབ་ཏུ་འཇུག་ཅིང་། སྟོབས་ཆེན་རྣམས་དང་ལྷན་དུ་བཅོམ་ནོར་བགོ་བར་བྱ། ཅིའི་ཕྱིར་ཞེ་ན། ཁོང་གིས་རང་གི་ཚེ་སྲོག་འཆི་བའི་ཕྱོགས་སུ་ལྡུག་ཅིང་། ཉེས་ཅན་དུ་བརྩིས་ཀྱང་མི་མང་པོའི་སྡིག་པ་ཁུར་དུ་བཞེས། ཡང་ཉེས་ཅན་རྣམས་ཀྱི་ཕྱིར་དུ་གསོལ་བ་བཏབ་པའོ། །
ISA 54:1 ཀྱེ་ཕྲུ་གུ་སྐྱེ་མི་ཐུབ་པ་དང་། མངལ་ཆགས་མ་མྱོང་བ་ཁྱོད་རྣམས་ཀྱིས་དགའ་འབོད་གྱིས་ཤིག ཕྲུ་གུ་བཙས་མ་མྱོང་བ་ཁྱོད་ཀྱིས་སྐད་ཆེན་པོས་དགའ་འབོད་གྱིས། ཅིའི་ཕྱིར་ཞེ་ན། ཁྱོ་ག་ཡོད་པའི་སྐྱེས་མ་ལས་ཁེར་འདུག་མ་ལ་ཕྲུ་གུ་ལྷག་ཏུ་འཕེལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
ISA 54:2 ཁྱོད་ཀྱི་གུར་ས་རྒྱ་ཆེར་བསྐྱེད་ནས་རང་གི་སྡོད་གནས་ཀྱི་ཡོལ་བ་ཕྱི་ལ་ཚད་མེད་རྐྱོངས་ཤིག རང་གི་ཐག་པ་རིང་དུ་བཏང་ནས་ཕུར་པ་བརྟན་པོར་རྡོབས་ཤིག
ISA 54:3 གང་ལ་ཞེ་ན། ཁྱོད་རང་གཡས་དང་གཡོན་དུ་ཁྱབ་ཆེན་པོར་དར་ཞིང་། ཁྱོད་ཀྱི་བུ་རྒྱུད་ལ་རྒྱལ་ཕྲན་རྣམས་ཀྱི་ས་དབང་སྟེ། གྲོང་ཁྱེར་སྟོང་བ་རྣམས་སུ་མི་ཡིས་གང་བར་འགྱུར།
ISA 54:4 ཁྱོད་ངོ་ཚར་མི་གཏོད་པས་སྐྲག་པར་མ་གྱུར་ཅིག ཁྱོད་ལ་བརྙས་བཅོས་མི་འཁེལ་བས་ངོ་གནོང་བར་མ་བྱེད་ཅིག ཁྱོད་ཀྱིས་རང་གི་གཞོན་དུས་ཀྱི་ངོ་ཚ་བརྗེད་ཅིང་། ཁེར་འདུག་སྐབས་ཀྱི་འཕྱ་སྨོད་དྲན་པར་མི་བྱ།
ISA 54:5 གང་ལ་ཞེ་ན། ཁྱོད་རང་སྐྲུན་མཁན་ནི་ཁྱོད་ཀྱི་ཁྱོ་ག་སྟེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁོང་གི་མཚན་ལགས། ཁྱོད་རང་སྐྱོབ་མཁན་ཡེས་ར་ཨེལ་གྱི་དམ་པ་ཉིད་དང་། ས་གཞི་ཐམས་ཅད་ཀྱི་དཀོན་མཆོག་ཅེས་འབོད་པ་ཡིན།
ISA 54:6 ཁྱོད་ནི་གཞན་གྱིས་དོར་བའི་ཆུང་མ་སེམས་སྡུག་ཅན་ཏེ། ལོ་ན་གཞོན་དུས་གཞན་གྱིས་དོར་བའི་ཆུང་མ་བཞིན། དཀོན་མཆོག་ཡ་ཝཱེས་ཁྱོད་རང་བོས་སོ་ཞེས་ཁྱོད་ཀྱི་དཀོན་མཆོག་གིས་གསུངས།
ISA 54:7 བདག་གིས་ཁྱོད་གནས་སྐབས་སུ་དོར་ཡང་། ངས་སྙིང་རྗེ་ཆེན་པོས་ཁྱོད་ཕྱིར་བསྡུ་ངེས་ཡིན།
ISA 54:8 ཁོང་ཁྲོ་རབ་ཏུ་འབར་བའི་དུས་སུ། ངས་གནས་སྐབས་སུ་རང་གི་ངོ་གདོང་ཁྱོད་ཕྱོགས་མ་འཁོར་ཡང་། མཐའ་མེད་པའི་བྱམས་བརྩེ་ཡིས་ངས་ཁྱོད་ལ་སྙིང་རྗེ་སྒོམ་པར་བྱ་ཞེས་ཁྱོད་རང་སྐྱོབ་མཁན་གྱི་དཀོན་མཆོག་ཡ་ཝཱེས་དེ་སྐད་གསུངས་སོ། །
ISA 54:9 དེ་ཡང་དོན་འདི་ང་ལ་མཚོན་ན་ནོ་ཨའི་དུས་སྐབས་ཀྱི་ཆུ་ལོག་དང་འདྲ་ལ། ནོ་ཨའི་དུས་སྐབས་སུ་བྱུང་བའི་ཆུ་ལོག་གིས་ཡང་བསྐྱར་ས་གཞི་བསྣུབ་པར་མི་བྱའོ་ཞེས་བདག་གིས་མནའ་བསྐྱལ་བ་བཞིན། ཁྱོད་སྟེང་བདག་མི་ཁྲོས་ཤིང་། ཁྱོད་ལ་གཤེ་གཤེ་གཏོང་བར་མི་འགྱུར་ཞེས་མནའ་བསྐྱལ་བ་ཡིན།
ISA 54:10 རི་རྣམས་བསྣུར་ཅིང་སྒང་རྣམས་བསྒུལ་ནའང་། བདག་གིས་ཁྱོད་ལ་བཅངས་པའི་བྱམས་བརྩེ་ནི་ཁྱོད་དང་མི་འབྲལ་ཞིང་། བདག་གི་ཞི་བདེའི་དམ་བཅའ་ཡང་ཁྱོད་དང་འབྲལ་བར་མི་འགྱུར་ཞེས་ཁྱོད་ལ་སྙིང་རྗེ་དགོངས་པའི་དཀོན་མཆོག་ཡ་ཝཱེས་གསུངས་སོ། །
ISA 54:11 ཀྱེ་དཀའ་སྡུག་མྱངས་ཤིང་རླུང་དམར་གྱིས་སྒུལ་བ། སེམས་གསོ་མ་ཐོབ་པ་ཁྱོད་ཀྱིས་ལྟོས་དང་། ངས་གཡུ་ནི་ཁྱོད་ཀྱི་རྨང་རྡོ་རུ་བྱ་ཞིང་། ཁྱོད་ཀྱི་རྩིག་རྨང་ལ་དབང་སྔོན་འདིང་བར་བྱའོ། །
ISA 54:12 ཁྱོད་ཀྱི་མཁར་རྣམས་པད་མ་རཱ་ག་དང་། མཁར་སྒོ་གཡང་ཊི་དམར་པོ། ཕྱོགས་བཞིའི་རྩིག་པ་རྣམས་རྡོ་རིན་པོ་ཆེ་སྣ་ཚོགས་ཀྱིས་བཞེང་བར་བྱ།
ISA 54:13 ཁྱོད་ཀྱི་བུ་རྒྱུད་ཐམས་ཅད་ལ་དཀོན་མཆོག་ཡ་ཝཱེའི་བསླབ་བྱ་འཐོབ་ཅིང་། ཁྱོད་ཀྱི་བུ་ཕྲུག་རྣམས་ཀྱིས་ཞི་བདེ་ལོངས་སུ་སྤྱོད་པར་འགྱུར།
ISA 54:14 ཁྱོད་ནི་དྲང་བདེན་དབང་གིས་བརྟན་པོར་མཛད་ཅིང་། ཁྱོད་ནི་བརྙས་བཅོས་དང་རིང་དུ་འབྲལ་བ་དང་། ཁྱོད་ལ་འཇིགས་པ་གང་ཡང་མི་འབྱུང་ངོ་། །ཁྱོད་རང་འཇིགས་དངངས་ཀུན་དང་འབྲལ་བར་འགྱུར། གང་ལ་ཞེ་ན། འཇིགས་སྐྲག་ཁྱོད་ཀྱི་ཉེ་སར་མི་བཏུད་དོ། །
ISA 54:15 ལྟོས་ཤིག མི་ཡར་ལངས་ནས་ཁྱོད་ལ་རྒོལ་ནའང་། དེ་ནི་ང་ལས་བྱུང་བ་མིན་ལ། ཁྱོད་ཀྱི་རྐྱེན་གྱིས་དེ་སར་འགྱེལ་བར་འགྱུར།
ISA 54:16 ལྟོས་ཤིག སོལ་མེར་ཕུ་འདེབས་མཁན་དང་། སྤྱོད་གོ་ཆོད་པོའི་མཚོན་ཆ་བཟོ་མཁན་མགར་པ་དེ་ངས་མཛད་ཅིང་། མི་ལ་གནོད་པ་སྐྱེལ་ཞིང་མེད་པར་གཏོང་མཁན་དེ་ཡང་ངས་བསྐྲུན་ནོ། །
ISA 54:17 ཁྱོད་ལ་རྒོལ་ཕྱིར་བཟོས་པའི་མཚོན་ཆ་དག་ལ་ནུས་པ་མ་ལྡན་ཏེ། ཁྲིམས་ཐག་གཅོད་དུས་དར་ཞིང་རྒྱས་ནས་ཁྱོད་དང་རྒོལ་བའི་ལྕེ་རྣམས་ལ་ཡང་ཁྱོད་ཀྱིས་དགག་པ་རྒྱག་པར་འགྱུར། འདི་ནི་དཀོན་མཆོག་ཡ་ཝཱེའི་ཞབས་ཕྱི་རྣམས་ཀྱི་ནོར་སྐལ་ཡིན་ལ། དེ་དག་གི་དྲང་བདེན་ནི་བདག་ལས་ཐོབ་པ་ཡིན་ཞེས་དཀོན་མཆོག་ཡ་ཝཱེས་གསུངས་སོ། །
ISA 55:1 ཀྱེ་ཁ་སྐོམ་པ་ཁྱོད་རྣམས་ཆུ་ཡོད་སར་ཤོག་དང་། དངུལ་མེད་པ་ཁྱོད་རྣམས་ཀྱང་ཤོག་དང་ཉོས་ནས་བཟའ་བར་གྱིས། ཁྱོད་རྣམས་དངུལ་དང་རིན་མི་དགོས་པར་རྒུན་ཆང་དང་འོ་མ་ཉོ་བར་ཕེབས་ཤོག
ISA 55:2 ཁྱོད་རྣམས་ཀྱིས་ཅིའི་ཕྱིར་དངུལ་སྤྲད་དེ་བཟའ་བཏུང་མ་ཡིན་པ་དེ་ཉོ་བ་དང་། ཅིའི་ཕྱིར་དཀའ་སྡུག་སྤྱད་ནས་ཐོབ་པ་དེས་མིའི་ཡིད་ཚིམ་དུ་འཇུག་མི་ནུས་པ་དེ་ཉོའམ། ཁྱོད་རྣམས་ཀྱིས་སེམས་ཞིབ་མོས་ངའི་བཀའ་ལ་མཉན་ན་ཟས་ཞིམ་པོ་སྤྱོད་པ་དང་སེམས་པ་སྐྱིད་ཅིང་བདེའོ། །
ISA 55:3 ཁྱོད་རྣམས་ཀྱིས་རྣ་བ་གཏད་དེ་ཉོན་ལ་བདག་གི་དྲུང་དུ་ཤོག ཁྱོད་རྣམས་ཀྱིས་མཉན་ན་གསོན་པར་འགྱུར་ཞིང་། བདག་གིས་ཁྱོད་ཅག་ལ་དུས་གཏན་གྱི་ཁ་ཆད་འཇོག་པར་བྱ་སྟེ། དཱ་བིད་ལ་གནང་བར་ཁས་བླངས་པའི་བྱམས་བརྩེ་བདེན་པ་དེ་ཡིན་ནོ། །
ISA 55:4 ལྟོས་དང་། བདག་གིས་ཁོ་ནི་མི་རིགས་ཀུན་གྱི་དཔང་པོ་དང་། འགོ་དཔོན། དམག་དཔོན་དུ་བསྐོས་པ་ཡིན།
ISA 55:5 ལྟོས་ཤིག ཁྱོད་ཀྱིས་ངོ་མི་ཤེས་པའི་རྒྱལ་ཕྲན་རྣམས་བོས་ཤིག རྒྱལ་ཕྲན་དེ་དག་གིས་ཁྱོད་ངོ་མི་ཤེས་ཀྱང་ཁྱོད་ཀྱི་ཕྱོགས་སུ་རྒྱུགས་ནས་འོང་། རྒྱུ་མཚན་ནི་ཁྱོད་ཀྱི་དཀོན་མཆོག་ཡ་ཝཱེ་སྟེ། ཡེས་ར་ཨེལ་གྱི་དམ་པ་ཁོང་གིས་ཁྱོད་དཔལ་དང་ལྡན་པར་མཛད་པའི་ཕྱིར་རོ། །
ISA 55:6 ཁྱོད་རྣམས་ཀྱིས་དཀོན་མཆོག་ཡ་ཝཱེ་རྙེད་ཐུབ་དུས་ཁོང་འཚོལ་ཞིག ཁོང་ཉེ་སར་བཞུགས་དུས་ཁོང་ལ་ཞུས་ཤིག
ISA 55:7 ངན་པས་རང་གི་ལོག་ལམ་འདོར་དགོས་ཤིང་། དྲང་བདེན་མིན་པའི་མི་ཡིས་རང་གི་བསམ་ཚུལ་དོར་ནས་དཀོན་མཆོག་ཡ་ཝཱེ་ཕྱོགས་སུ་ལོག་ན། དཀོན་མཆོག་ཡ་ཝཱེས་དེ་དག་ལ་སྙིང་རྗེ་བསྒོམ་པར་འགྱུར། ཁྱོད་རྣམས་རང་ཅག་གི་དཀོན་མཆོག་ཕྱོགས་སུ་ལོག་དང་། གང་ལ་ཞེ་ན། ཁོང་གིས་མིའི་སྡིག་པ་སེལ་བའི་ཕྱིར་རོ། །
ISA 55:8 དཀོན་མཆོག་ཡ་ཝཱེས་འདི་སྐད་དུ། བདག་གི་བསམ་བློ་ནི་ཁྱོད་རྣམས་ཀྱི་བསམ་ཚུལ་མིན་ལ། ཁྱོད་ཅག་གི་ལམ་རྣམས་ཀྱང་བདག་གི་ལམ་ནི་མིན།
ISA 55:9 ནམ་མཁའ་ས་གཞི་ལས་མཐོ་བ་བཞིན། བདག་གི་གཤེགས་ལམ་ནི་ཁྱོད་ཅག་གི་བགྲོད་ལམ་ལས་མཐོ་ཞིང་། བདག་གི་བསམ་བློ་ཡང་ཁྱོད་རྣམས་ཀྱི་བསམ་ཚུལ་ལས་མཐོ་བ་ཡིན་ནོ། །
ISA 55:10 གནམ་ནས་ཆར་དང་ཁངས་བབས་ཏེ། ནམ་མཁར་ཕྱིར་མི་ལོག་པར་ས་གཞིར་རློན་བཟོས་ནས་དེའི་སྟེང་གི་སྐྱེས་དངོས་ལ་མྱུ་གུ་འབུ་བར་བྱེད་པ་དང་། ཞིང་འདེབས་མཁན་ལ་ས་བོན་ཡོད་པ་དང་། ཟས་སྤྱོད་མཁན་ལ་འབྲུ་རིགས་འཐོབ་ཏུ་འཇུག་པ་ཇི་བཞིན།
ISA 55:11 བདག་གི་ཁ་ནས་བྱུང་བའི་གཏམ་རྣམས་ཀྱང་དེ་བཞིན་ཡིན་ཏེ། དོན་མེད་དུ་བདག་གི་ཕྱོགས་སུ་ཕྱིར་ལོག་པར་མི་འགྱུར་གྱིས། བདག་གི་འདོད་བློ་བཞིན་དུ་འགྲུབ་ཅིང་། བདག་གིས་མངགས་པའི་དོན་རྣམས་སྟེང་དུ་འགྲུབ་པར་འགྱུར།
ISA 55:12 དེ་ནས་ཁྱོད་རྣམས་དགའ་དགའ་སྤྲོ་སྤྲོའི་ངང་ཕྱི་རུ་ཐོན་ཞིང་། ཞི་བདེའི་ངང་ཁྲིད་སྟོན་མཛད་པ་དང་། རི་རབ་དང་རི་སྒང་རྣམས་ཀྱིས་ཁྱོད་ཅག་གི་མདུན་ནས་དགའ་འབོད་བྱེད་ཅིང་། ཐང་གི་ལྗོན་ཤིང་རྣམས་ཀྱིས་ཀྱང་ཐལ་མོ་རྡེབ་པར་འགྱུར།
ISA 55:13 ཚེར་མའི་ཚབ་ཏུ་གསོམ་ཤིང་སྐྱེ་ཞིང་། ཤིང་ཚེར་གྱི་ཚབ་ཏུ་པ་སངས་མེ་ཏོག་སྐྱེས་ནས། དེས་དཀོན་མཆོག་ཡ་ཝཱེར་མཚན་གསོལ་བ་དང་རྟག་ཏུ་གནས་ཤིང་འཇིག་པ་མེད་པའི་རྟགས་སུ་འགྱུར་རོ། །
ISA 56:1 དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་དྲང་པོ་བསྲུང་ཞིང་དྲང་བདེན་སྤྱོད་ཅིག གང་ལ་ཞེ་ན། བདག་གི་ཐར་པ་སླེབས་ལ་ཉེ་ཞིང་། བདག་གི་དྲང་བདེན་མངོན་པར་ཉེ།
ISA 56:2 ངལ་གསོ་བའི་ཉིན་མོ་བསྲུང་ཞིང་ཉིན་དེར་ལྷད་མི་འཇུག་ལ། རང་གི་ལག་པ་བསྲུངས་ནས་ལས་ངན་པ་མི་སྤྱོད་ཅིང་། དེ་ལྟར་སྤྱོད་པའི་མི་དང་དེ་བཞིན་སྲུང་མཁན་དག་ལ་བྱིན་རླབས་འཐོབ་པར་འགྱུར།
ISA 56:3 དཀོན་མཆོག་ཡ་ཝཱེ་དང་འབྲེལ་བའི་ཕྱི་ཕྱོགས་པས། དཀོན་མཆོག་ཡ་ཝཱེས་ང་རང་ཁོང་གི་མི་སྡེ་ལས་དགར་བར་འགྱུར་ཞེས་མ་བརྗོད་ཅིག ཉུག་རུམ་པས་ཀྱང་། ལྟོས་དང་ང་ནི་སྡོང་སྐམ་ཞིག་ཡིན་ཞེས་མ་བརྗོད།
ISA 56:4 གང་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། བདག་གི་ངལ་གསོ་བའི་ཉིན་མོ་བསྲུངས་ཏེ། བདག་དགའ་བའི་དོན་རྣམས་འདེམས་ཤིང་། བདག་གི་ཁ་ཆད་བསྲུངས་ནས་ཉུག་རུམ་བཟོས་པའི་མི་དག་ལ།
ISA 56:5 བདག་གི་མཆོད་ཁང་དང་ལྕགས་རིའི་ནང་དུ་བུ་དང་བུ་མོ་ཡོད་པ་ལས་ཀྱང་ལེགས་པའི་རྗེས་དྲན་དང་མིང་ངས་གནང་བར་འགྱུར་ཞིང་། འཇིག་པ་མེད་པའི་གཏན་གནས་ཀྱི་མིང་ཞིག་གནང་བར་བྱའོ། །
ISA 56:6 ཡང་དཀོན་མཆོག་ཡ་ཝཱེ་ལ་ཞབས་ཕྱི་བསྒྲུབ་ཕྱིར་ཁོང་དང་འབྲེལ་བའི་ཕྱི་ཕྱོགས་པ་རྣམས་ཏེ། ཡ་ཝཱེའི་མིང་ལ་དགའ་ཞིང་ཁོང་གི་ཞབས་ཕྱི་བྱས་ནས། ངལ་གསོ་བའི་ཉིན་མོ་སྲུང་བ་ལས་ཉིན་དེ་མ་ལྷད་པར། བདག་གི་ཁ་ཆད་བརྟན་པོར་སྲུང་བ་རྣམས་ཀྱང་།
ISA 56:7 ངས་རང་གི་རི་བོ་དམ་པ་ལ་འཁྲིད་པར་བྱ་ཞིང་། བདག་གི་མཆོད་ཁང་སྟེ་སྨོན་ལམ་ཞུ་ས་རུ་དགའ་སྤྲོས་ཁྱབ་པ་དང་། བདག་གི་མཆོད་ཁྲིའི་ཁར་ཁོ་ཚོའི་སྦྱིན་སྲེག་དང་མཆོད་པ་དང་ལེན་བྱའོ། །ཅིའི་ཕྱིར་ཞེ་ན། བདག་གི་མཆོད་ཁང་ནི་མི་རིགས་ཀུན་གྱི་སྨོན་ལམ་ཞུ་སའི་གནས་སུ་འབོད་པར་འགྱུར་བའི་ཕྱིར་ཡིན་ཞེས་གསུངས་སོ། །
ISA 56:8 ཁ་འཐོར་དུ་སོང་བའི་ཡེས་ར་ཨེལ་པ་རྣམས་ཕྱོགས་གཅིག་ཏུ་སྡུད་མཁན་གཙོ་བོ་ཡ་ཝཱེས་འདི་སྐད་དུ། བདག་གིས་ཕྱོགས་གཅིག་ཏུ་བསྡུས་པའི་ཡེས་ར་ཨེལ་པ་འདི་རྣམས་ཕན་ཆད་ནས་གཞན་རྣམས་ཀྱང་ཁོ་ཚོའི་གྲས་སུ་བསྡུ་བར་བྱའོ་ཞེས་གསུངས་སོ། །
ISA 56:9 ཀྱེ་རི་ལུང་གི་གཅན་གཟན་ཐམས་ཅད། ནགས་ཚལ་གྱི་གཅན་གཟན་ཐམས་ཅད། ཁྱོད་ཅག་འགེམ་དུ་ཤོག་ཅིག
ISA 56:10 ཁོའི་སོ་པ་རྣམས་ནི་དམུས་ལོང་དང་། ཅི་ཡང་མི་ཤེས་པ། ཟུག་སྐད་མེད་པའི་ཁྱི་ལྐུགས་པ། རྨི་ལམ་རྨི་ཞིང་ཉལ་ནས་གཉིད་ལྡོག་པ་དག་ཡིན།
ISA 56:11 ཁྱི་དེ་དག་ཟ་རྔམ་ཆེ་ཞིང་ཧམ་པས་ཁེངས། དེ་དག་ནི་གོ་བ་མེད་པའི་ལུག་རྫི་ཡིན། དེ་དག་ལམ་ལོག་ཏུ་ཞུགས་ནས་རེ་རེས་རང་རང་གི་ཁེ་བཟང་འཚོལ་ལོ། །
ISA 56:12 དེ་དག་ན་རེ། ཚུར་ཤོག་དང་། ང་རྒུན་ཆང་ལེན་དུ་འགྲོ། ང་ཚོས་གར་ཆང་རྔམ་གྱིས་འཐུང་བར་བྱ། སང་ཉིན་ཡང་དེ་རིང་དང་མཚུངས་པར་མ་ཟད་དེ་རིང་ལས་ཀྱང་ཕུན་སུམ་ཚོགས་པ་ཡིན་ཞེས་སྨྲའོ། །
ISA 57:1 མི་དྲང་བདེན་འདས་ཀྱང་སེམས་སུ་འཛིན་མཁན་མེད། དད་ལྡན་རྣམས་ཚེ་ལས་འདས་ཀྱང་དེ་ཤེས་མཁན་མེད། མི་དྲང་པོ་འདས་པ་ནི་བར་ཆད་དང་བྲལ་བ་ཡིན།
ISA 57:2 སྤྱོད་དྲང་རྣམས་ཚེ་ལས་འདས་རྗེས་ཞི་བདེ་ནང་འགྲོ་སྟེ། རང་གི་བང་སོ་ནས་ངལ་གསོ་འཐོབ་པར་འགྱུར།
ISA 57:3 ཡིན་ཡང་པྲ་མའི་བུ་དང་། འཆལ་པོ་དང་སྨད་འཚོང་མའི་བུ་རྒྱུད་ཁྱོད་རྣམས་གཡེམ་སྦྱོར་སྤེལ་དུ་ཉེ་སར་ཤོག་དང་།
ISA 57:4 ཁྱོད་རྣམས་ཀྱིས་སུ་ལ་ཁྲེལ་དགོད་བྱེད་པ་ཡིན་ནམ། སུ་ལ་ཁ་ཆེར་གདངས་ཏེ་ལྕེ་རིང་བསྣར་བ་ཡིན་ནམ། ཁྱོད་རྣམས་ནི་སྡིག་ཉེས་ཀྱི་བུ་ཕྲུག་དང་རྫུན་གྱི་བུ་རྒྱུད་མ་ཡིན་ནམ།
ISA 57:5 ཁྱོད་རྣམས་ནི་བེ་ཤིང་གི་ནགས་དང་སྔོ་ལྗང་གི་ཤིང་སྡོང་རྣམས་ཀྱི་འོག་ཏུ་འདོད་ཆགས་ཀྱི་མེ་ལྕེ་འབར་ཏེ། ལུང་ཤུར་དང་བྲག་ཕུག་ནང་དུ་རང་གི་བྱིས་པའི་སྲོག་བཅད་ནས་མཆོད་པར་ཕུལ།
ISA 57:6 ལུང་པའི་གཡའ་རྡོའི་ཁྲོད་དུ་ཁྱོད་ཀྱི་ཐོབ་སྐལ་ཡོད། དེ་དག་ཁོ་ན་ཁྱོད་ལ་ཐོབ་པའི་སྐལ་ཡིན། ཁྱོད་ཀྱིས་དེ་དག་ལ་སྐྱེམས་མཆོད་དྲངས་ཏེ་འབྲུ་རིགས་ཀྱི་མཆོད་པ་ཡང་ཕུལ་བ་ཡིན། དོན་དེ་དག་ལ་བདག་གིས་ཅི་ལྟར་བཟོད་པ་བསྒོམས་ནས་ལན་མི་འཇལ་ལམ།
ISA 57:7 རི་མཐོན་པོའི་སྒང་ནས་ཁྱོད་ཀྱིས་རང་གི་མལ་ཁྲི་བརྒྱབ་ཅིང་། དམར་མཆོད་འབུལ་དུ་ཁྱོད་དེའི་སྟེང་དུ་འཛེགས།
ISA 57:8 ཁྱོད་ཀྱིས་སྒོ་དང་སྒོ་རུའི་རྒྱབ་ཏུ་ཕྱི་ཕྱོགས་པའི་ལྷ་ཡི་རྟགས་མཚན་བརྒྱབ། ཁྱོད་རང་བདག་དང་རྒྱང་དུ་གྱེས་ནས་རང་ཉིད་གཅེར་བུར་བུད་དེ་མལ་ཁྲིའི་སྟེང་འཛེགས་ཤིང་། ཡང་རང་ལ་མལ་ཁྲི་རྒྱ་ཆེན་པོ་བརྒྱབ། ཁྱོད་ཀྱིས་ད་དུང་དེ་དག་དང་གྲོས་ཆོད་བཞག་ནས་དེ་ཡི་མལ་ཁྲིར་སྤྲོ་ཞིང་། དེ་ཚོའི་ལུས་གཅེར་བུར་བལྟས་སོ། །
ISA 57:9 ཁྱོད་ཀྱིས་སྣུམ་ཁྱེར་ནས་རྒྱལ་པོ་བཞུགས་སར་སོང་ཞིང་རང་གི་དྲི་ཞིམ་ཇེ་མང་དུ་བཏང་། ཁྱོད་ཀྱིས་རྒྱང་ཐག་རིང་སར་བང་ཆེན་མངགས་པ་དང་། ཐ་ན་གཤིན་པོའི་ཡུལ་དུ་བབས།
ISA 57:10 ལམ་ཐག་རིང་བས་ཁྱོད་ཐང་ཆད་ཀྱང་ཁྱོད་ཀྱིས་རེ་བ་མེད་དོ་ཞེས་མི་སྨྲ་སྟེ། གང་ལ་ཞེ་ན། ཁྱོད་ཀྱིས་ཚེ་སྲོག་གི་སྟོབས་ཤུགས་རྙེད་པས་ཐང་མ་ཆད་དོ། །
ISA 57:11 ཁྱོད་སུ་ལ་སྐྲག་པ་ཡིན་ནམ། ཁྱོད་རང་སུ་ལ་འཇིགས་ནས་ང་ལ་རྫུན་སྨྲའམ། ཁྱོད་ཀྱིས་བདག་མི་དྲན་ཞིང་སེམས་ལའང་མི་འཛིན་པ་ནི་བདག་ཡུན་རིང་ཁུ་སིམ་པོར་བསྡད་པས། ཁྱོད་བདག་ལ་མི་འཇིགས་པའི་ཕྱིར་ཡིན་ནམ།
ISA 57:12 བདག་གིས་ཁྱོད་ཀྱི་དྲང་བདེན་དང་སྤྱད་པ་རྣམས་གསལ་པོར་བསྒྲགས་ཀྱང་། དེ་དག་གིས་ཁྱོད་ལ་ཕན་མི་ཐོགས།
ISA 57:13 ཁྱོད་ཀྱིས་འོ་དོད་འབོད་པའི་ཚེ། ཁྱོད་ཀྱིས་བསྡུས་པའི་སྐུ་འདྲ་རྣམས་ལ་ཁྱོད་སྐྱོབ་ཏུ་ཆུག ཡིན་ཡང་དེ་དག་རླུང་གིས་འཁུར་ཞིང་དབུགས་ཀྱིས་སྤུར་བར་འགྱུར། འོན་ཀྱང་བདག་ལ་སྐྱབས་བཅོལ་བའི་མི་ལ་ས་གཞི་དབང་ཞིང་། བདག་གི་རི་བོ་དམ་པ་ནོར་སྐལ་དུ་འཐོབ་པར་འགྱུར་རོ། །
ISA 57:14 སྐྲུན་ཞིག སྐྲུན་ཞིག ལམ་བདེ་བར་སྐྲུན་ཞིག ངའི་མི་སྡེའི་བགྲོད་ལམ་ནི་བར་ཆད་མེད་པར་བཟོ་བར་གྱིས་ཞེས་བརྗོད་ངེས།
ISA 57:15 གང་ལ་ཞེ་ན། རྟག་ཏུ་བཞུགས་ཤིང་བླ་ན་མེད་པ། མཚན་ལ་དམ་པ་ཞེས་བྱ་བ་ཁོང་གིས་འདི་སྐད་དུ། བདག་ནི་བླ་ན་མཐོ་བ་དང་དམ་པའི་གནས་སུ་སྡོད་ཀྱང་། ཁེངས་སྐྱུང་ཅན་དང་སེམས་སུ་འགྱོད་བཤགས་ལྡན་པའི་མི་དང་མཉམ་དུ་གནས་ཤིང་། ཁེངས་སྐྱུང་ཅན་དང་འགྱོད་བཤགས་ཅན་ལ་སྟོབས་ཤུགས་སྦྱིན་པར་བྱའོ། །
ISA 57:16 བདག་གིས་རྟག་ཏུ་མི་རྩོད་ཅིང་། རྒྱུན་དུ་ཁྲོ་བར་ཡང་མི་བྱ། དེ་ལྟར་བྱས་ན་མི་ཡི་སེམས་ཉིད་དེ། བདག་གིས་བཀོད་པའི་མི་ནི་ངའི་མདུན་དུ་བློ་སྟོབས་ཉམས་པར་འགྱུར།
ISA 57:17 ཁོའི་འདོད་རྔམ་གྱི་སྡིག་པའི་ཕྱིར་བདག་ཁྲོས་ཤིང་ཁོ་ལ་རྡུང་རྡེག་བཏང་། བདག་གི་ངོ་གདོང་ཁོའི་ཕྱོགས་སུ་མ་འཁོར་ཞིང་ཁྲོས་ནའང་། ཁོ་ད་དུང་རང་སེམས་ཀྱི་འདོད་པའི་རྗེས་སུ་འབྲངས་ནས་ལོག་ལམ་དུ་ཕྱིན།
ISA 57:18 ཁོའི་བགྲོད་ལམ་ངས་མཐོང་སྟེ། བདག་གིས་ཁོ་དྲག་པར་བྱས་ཏེ་ལམ་ཁྲིད་ཅིང་། དེ་དང་དེར་མྱ་ངན་ཞུ་མཁན་དག་ལ་སེམས་གསོ་གནང་བར་འགྱུར།
ISA 57:19 བདག་གིས་སྨྲ་སྒོ་རྣམས་ལས་འབྲས་བུ་བསྐྱེད་ཅིང་། རྒྱང་རིང་དང་ཐག་ཉེ་རུ་ཡོད་པ་ཐམས་ཅད་བདེ་བར་གྱུར་ཅིག བདེ་བར་གྱུར་ཅིག་ཅེས་གསུངས་སོ། །ཡང་དཀོན་མཆོག་ཡ་ཝཱེས་འདི་སྐད་དུ། བདག་གིས་དེ་གསོ་བར་བྱའོ་ཞེས་གསུངས་སོ། །
ISA 57:20 འོན་ཀྱང་མི་ངན་རྣམས་རྒྱ་མཚོ་འཕྱུར་བ་བཞིན་བདེ་བར་མི་གནས་ལ། རྒྱ་མཚོའི་ཆུ་ལས་འདམ་དང་བཙོག་པ་དཀྲུག་པར་འགྱུར།
ISA 57:21 བདག་གི་དཀོན་མཆོག་གིས་མི་ངན་པར་ཞི་བདེ་མེད་ཅེས་གསུངས་སོ། །
ISA 58:1 ཁྱོད་ཀྱིས་མཚམས་མེད་པར་སྐད་ཆེན་པོ་རྒྱོབས་ཤིག རྭ་དུང་འབུད་པ་བཞིན་སྐད་ཆེན་པོ་རྒྱོབས་ཤིག བདག་གི་མི་སྡེ་ལ་དེ་ཚོའི་ཉེས་པ་སྒྲོགས་དང་། ཡ་ཀོབ་ཀྱི་ཁྱིམ་རྒྱུད་ལ་ཁོ་ཚོའི་སྡིག་པ་རྣམས་གསལ་པོར་སྨྲོས་ཤིག
ISA 58:2 དྲང་བདེན་སྤྱོད་པའི་རྒྱལ་དམངས་ཚོས་རང་གི་དཀོན་མཆོག་གི་བཀའ་རྣམས་མི་འདོར་བ་བཞིན། དེ་དག་གིས་ཉིན་རེ་བཞིན་བདག་འཚོལ་ཞིང་། བདག་གི་ལམ་རྣམས་ཤེས་འདོད་དེ། དྲང་བདེན་གྱི་བཅད་ཁྲ་བདག་ལ་ཞུ་ཞིང་། དཀོན་མཆོག་དང་ཉེ་སར་གཅར་བ་ལ་སྤྲོའོ། །
ISA 58:3 དེ་དག་ན་རེ། ང་ཚོས་སྨྱུང་གནས་བསྲུངས་པ་ཁྱེད་ཀྱིས་མི་གཟིགས་པ་ཅི་ཡིན་ནམ། ང་ཚོས་དཀའ་སྡུག་སྤྱད་ཀྱང་ཁྱེད་ཀྱིས་མི་མཁྱེན་པ་ཅི་ཡིན་ནམ་ཞེས་ཞུས་ཀྱང་། ལྟོས་དང་། ཁྱོད་ཚོས་སྨྱུང་གནས་སྲུང་བའི་ཉིན་མོར་ཡང་རང་ཉིད་དགའ་བའི་ལས་སྤྱོད་ཅིང་། རང་གི་ལས་མི་ཀུན་ལ་གཉའ་གནོན་བྱེད་དོ། །
ISA 58:4 ལྟོས་ཤིག ཁྱོད་ཚོའི་སྨྱུང་གནས་ནི་རྩོད་གླེང་དང་འཐབ་འཁྲུག་ཡིན་ཏེ། ཁུ་ཚུར་གཏུམ་པོས་མི་ལ་རྡུང་བ་ཡིན་ཞིང་། ཁྱོད་ཚོས་དེ་རིང་གི་སྨྱུང་གནས་འདི་ལྟ་བུ་བསྲུངས་ཏེ་རང་གི་སྐད་སྒྲ་གནམ་ནས་ཐོས་པར་རེ་བ་མ་བྱེད་ཅིག
ISA 58:5 འདི་ལྟ་བུའི་སྨྱུང་གནས་ནི་བདག་གིས་བདམས་ཤིང་མི་ལ་དཀའ་ཐུབ་སྤྱོད་དུ་འཇུག་པའི་ཉིན་མོ་ཡིན་ནམ། མི་ཡི་མགོ་བོ་འདམ་རྩྭ་བཞིན་སྒུར་དུ་བཅུག་སྟེ། རྩིད་རས་དང་གོ་ཐལ་གྱི་གདན་གདིང་དགོས་པ་ཡིན་ནམ། ཁྱོད་ཀྱིས་འདི་ལ་སྨྱུང་གནས་ཞེས་དཀོན་མཆོག་ཡ་ཝཱེའི་ཐུགས་ལ་ལྡན་པའི་ཉིན་མོ་རུ་འབོད་དམ།
ISA 58:6 བདག་གིས་བདམས་པའི་སྨྱུང་གནས་ནི་གདུག་རྩུབ་ཅན་གྱི་ལྕགས་སྒྲོག་བསྒྲལ་བ་དང་། གཉའ་ཤིང་གི་ཐག་པ་ལྷོད་པ། གཉའ་གནོན་འོག་ཏུ་ཡོད་པ་རྣམས་ཐར་དུ་འཇུག་པ། གཉའ་ཤིང་ཐམས་ཅད་གཅོག་པ་མ་ཡིན་ནམ།
ISA 58:7 དེ་ནི་བཀྲེས་པའི་མི་ལ་རང་གི་ཁ་ཟས་སྟེར་བ་དང་། དབུལ་པོ་འཁྱམས་པོ་དག་རང་ཁྱིམ་དུ་སྣེ་ལེན་བྱེད་པ། གོས་མེད་གཅེར་བུ་མཐོང་ཚེ་དེ་ལ་གོས་བསྐོན་པ། རང་གི་གཉེན་ཉེ་ལས་རང་ཉིད་སྦ་སྐུང་མི་བྱེད་པ་མ་ཡིན་ནམ།
ISA 58:8 དེ་ནས་ཁྱོད་ཀྱི་འོད་ཟེར་སྐྱ་རེངས་ལྟར་འཕྲོ་ཞིང་། ཁྱོད་ཀྱི་རྨ་ཁ་མྱུར་དུ་སོས་ཏེ། དྲང་བདེན་ཁྱོད་ཀྱི་མདུན་དུ་སྐྱོད་ཅིང་། དཀོན་མཆོག་ཡ་ཝཱེའི་གཟི་བརྗིད་ཁྱོད་ཀྱི་རྒྱབ་རྟེན་དུ་འགྱུར་ངེས།
ISA 58:9 དུས་དེར་ཁྱོད་ཀྱིས་ཞུས་ན་དཀོན་མཆོག་ཡ་ཝཱེས་བཀའ་ལན་བསྩལ་ཞིང་། ཁྱོད་ཀྱིས་འོ་དོད་བོས་ན་ཁོང་གིས་ང་འདི་རུ་ཡོད་ཅེས་གསུང་བར་འགྱུར། གལ་ཏེ་ཁྱོད་ཀྱིས་རང་ཅག་གི་ཁྲོད་ནས་གཉའ་ཤིང་དང་། སྐྱོན་འཛུགས་པའི་མཛུབ་མོ། གཏམ་ངན་སྨྲ་བ་བཅས་འདོར་ཞིང་།
ISA 58:10 ཁྱོད་ཀྱིས་བཀྲེས་ལྟོགས་ཀྱིས་མནར་བ་རྣམས་ལ་སྙིང་རྗེ་བསྐྱེད་པ་དང་། དཀའ་སྡུག་ཅན་གྱི་ཡིད་ཚིམ་དུ་བཅུག་ན། ཁྱོད་ཀྱི་འོད་ནི་མུན་པའི་ཁྲོད་ནས་འཆར་ཞིང་། ཁྱོད་ཀྱི་སྨག་རུམ་ནི་ཉིན་གུང་བཞིན་དུ་འགྱུར།
ISA 58:11 དཀོན་མཆོག་ཡ་ཝཱེས་རྟག་ཏུ་ཁྱོད་ཀྱི་ལམ་སྣ་འདྲེན་ཞིང་། སྐམ་སར་ཁྱོད་ཀྱི་ཡིད་ཚིམ་པར་མཛད་ཅིང་། ཁྱོད་ཀྱི་རུས་པ་རྣམས་ལ་སྟོབས་ཤུགས་རྒྱས་པར་མཛད་དོ། །དེ་ནས་ཁྱོད་ནི་ཆུ་མང་པོ་དྲངས་པའི་སྐྱེད་ཚལ་དང་། བཞུར་རྒྱུན་མི་ཆད་པའི་ཆུ་མིག་ལྟ་བུར་འགྱུར།
ISA 58:12 ཁྱོད་ཀྱི་བུ་རྒྱུད་རྣམས་ཀྱིས་ཞིག་རལ་རྣམས་སླར་སྐྲུན་ཞིང་། ཁྱོད་ཀྱིས་གནའ་བོའི་བཤིག་རོ་རྣམས་ཀྱི་རྨང་རྡོ་འཛུགས་པས། ཁྱོད་ལ་མཁར་ཆག་ཞིག་གསོ་བྱེད་མཁན་དང་། གཞིས་ཡུལ་བསྐྲུན་པའི་ལམ་བཟོ་མཁན་ཞེས་མིང་ཐོགས་པར་འགྱུར་རོ། །
ISA 58:13 ངལ་གསོ་བའི་ཉིན་མོར་ཁྱོད་ཀྱིས་རང་གི་གོམ་སྟབས་ལ་གཟབ་གཟབ་བྱས་ཏེ། བདག་གི་ཉིན་དམ་པའི་ནང་དུ་རང་ཉིད་དགའ་བའི་ལས་མི་སྤྱོད་པར། ངལ་གསོ་བའི་ཉིན་མོ་དགའ་འོས་པའི་ཉིན་དུ་བརྩི་ཞིང་། དཀོན་མཆོག་ཡ་ཝཱེའི་ཉིན་དམ་པ་བཀུར་འོས་པར་བརྗོད་དེ། དེ་ལ་བཀུར་བ་ལས་རང་གི་ལམ་དུ་མི་སྐྱོད་ཅིང་། རང་གི་འདོད་པ་མི་འཚོལ་བ་དང་། ཕན་མེད་ཀྱི་གཏམ་ཡང་མི་སྨྲ་བ་ཡིན་ན།
ISA 58:14 ཁྱོད་ལ་དཀོན་མཆོག་ཡ་ཝཱེ་ལས་དགའ་སྤྲོ་འཐོབ་ཅིང་། བདག་གིས་ཁྱོད་ས་གཞིའི་མཐོ་སར་བསྐྱོན་ཏེ། ཁྱོད་ཀྱི་མེས་པོ་ཡ་ཀོབ་ཀྱི་ནོར་སྐལ་ལས་ཁྱོད་འཚོ་བར་འགྱུར་ཞེས་དཀོན་མཆོག་ཡ་ཝཱེས་སྐུ་དངོས་སུ་གསུངས་སོ། །
ISA 59:1 ལྟོས་ཤིག དཀོན་མཆོག་ཡ་ཝཱེའི་ཕྱག་ཐུང་དྲགས་ནས་སྐྱོབ་མི་ནུས་པ་མ་ཡིན་ལ། ཁོང་གི་སྙན་རྟུལ་ནས་གསན་མི་ནུས་པའང་མ་ཡིན་པར།
ISA 59:2 ཁྱོད་ཅག་གི་ཉེས་པས་ཁྱོད་ཅག་རང་གི་དཀོན་མཆོག་དང་ཕྲལ་ཞིང་། ཁྱོད་རྣམས་ཀྱི་སྡིག་པས་ཁོང་གི་ཞལ་རས་ཁྱོད་ཅག་གི་ཕྱོགས་སུ་སྦས་པ་དང་། ཁྱོད་རྣམས་ཀྱི་གསོལ་འདེབས་ལ་ཁོང་གིས་གསན་མ་གྱུར།
ISA 59:3 གང་ལ་ཞེ་ན། ཁྱོད་རྣམས་ཀྱི་ལག་པ་ཁྲག་གིས་བསླད་ཅིང་མཛུབ་མོ་ཉེས་པས་བཙོག་པར་བཟོས། ཁྱོད་ཅག་གི་ཁ་ནས་རྫུན་བཤད་པ་དང་། ཁྱོད་རྣམས་ཀྱི་ལྕེ་ལས་གཏམ་ངན་སྨྲས།
ISA 59:4 དྲང་བདེན་ངང་ནས་ཞུ་མཁན་གཅིག་ཀྱང་མེད། དྲང་པོས་རྩོད་མཁན་ཡང་གཅིག་ཀྱང་མེད། དེ་དག་སྟོང་བ་ཉིད་ལ་བརྟེན་ཞིང་རྫུན་ལབ། དེ་དག་ལ་གནོད་སེམས་ཆགས་ཤིང་ཉེས་པ་སྐྱེས།
ISA 59:5 དེ་དག་གིས་དུག་སྦྲུལ་གྱི་སྒོ་ང་རུམ་པ་དང་སྡོམ་དྲ་འཐག་པ་ཡིན། སུས་དེ་དག་གི་སྒོ་ང་ཟོས་ན་འཆི་བར་འགྱུར་ལ། སྒོ་ང་ཆག་སྟེ་ཐོན་པ་དུག་སྦྲུལ་ཡིན།
ISA 59:6 དེ་དག་གི་དྲ་བས་གྱོན་གོས་བཟོ་མི་ནུས་ལ། ཁོ་ཚོས་བཟོས་པས་ཀྱང་རང་ཉིད་ཁེབས་པར་མི་འགྱུར། དེ་དག་གིས་སྤྱད་པའི་ལས་ནི་སྡིག་པ་དང་། ལག་ནང་གི་སྤྱོད་པ་ནི་གཏུམ་དྲག་ཡིན།
ISA 59:7 དེ་དག་གི་རྐང་པ་ངན་པའི་ཕྱོགས་སུ་རྒྱུག་ཅིང་། ཉེས་མེད་ལ་ཁྲག་བཞུར་དུ་འཇུག་པར་འཚབ། དེ་དག་གི་བསམ་པ་ནི་ངན་སེམས་དང་། སྤྱོད་ལམ་ནི་གཏོར་བཤིག་དང་ཚར་གཅོད་ཡིན་ནོ། །
ISA 59:8 དེ་ཚོས་ཞི་བདེའི་ལམ་མི་ཤེས་ལ། དེ་དག་གི་སྤྱོད་ལམ་ནང་དྲང་བདེན་མེད། དེ་ཚོས་རང་ཉིད་ཀྱི་ཕྱིར་དུ་ཀྱག་ཀྱོག་གི་ལམ་བཟོས་པས། ལམ་དེར་འགྲུལ་མཁན་རྣམས་ཀྱིས་ཞི་བདེ་རྟོགས་པར་མི་འགྱུར་རོ། །
ISA 59:9 དེ་བས་དྲང་པོ་ང་ཚོ་དང་རིང་དུ་གྱེས་ཤིང་། དྲང་བདེན་གྱིས་ང་ཚོ་ཟིན་པ་མིན། ང་ཚོས་འོད་ལ་རེ་ཡང་མུན་པ་འཁྱིལ། འོད་ཟེར་ལ་སྒུག་ཀྱང་སྨག་རུམ་ནང་དུ་འགྲུལ་བའོ། །
ISA 59:10 ང་ཚོས་ལོང་པ་བཞིན་དུ་རྩིག་པར་ལག་མྱུལ་བྱས། མིག་མེད་བཞིན་དུ་ང་ཚོས་ལག་མྱུལ་བྱས། མུན་རུབ་བཞིན་དུ་ང་ཚོ་ཉིན་གུང་འདྲེད་བརྡབ་ཤོར་ནས། དར་མ་རྣམས་ཀྱི་ཁྲོད་དུ་ང་ཚོ་བེམ་པོ་དང་མཚུངས།
ISA 59:11 རང་ཅག་གིས་དོམ་ལྟར་ངར་སྐད་སྒྲོག་ཅིང་། ཕུག་རོན་བཞིན་དུ་སྨྲེ་སྔགས་འདོན། ང་ཚོས་དྲང་བདེན་འཚོལ་ཡང་དྲང་བདེན་མི་རྙེད། ཐར་པ་ལ་སྒུག་ཀྱང་དེ་ནི་རང་ཅག་དང་རྒྱང་ཐག་ཧ་ཅང་རིང་པོ་ཡིན།
ISA 59:12 གང་ལ་ཞེ་ན། ཁྱེད་ཀྱི་སྤྱན་སྔར་ངེད་ཅག་གི་ཉེས་སྐྱོན་མང་དུ་འཕེལ་ཞིང་། ངེད་ཅག་གི་སྡིག་པས་ང་ཚོ་ཁྲིམས་ལ་སྦྱོར། ང་ཚོའི་ཉེས་སྐྱོན་རང་དང་མཉམ་དུ་གནས་ཤིང་། ང་ཚོས་རང་གི་ཉེས་པ་རྟོགས།
ISA 59:13 ང་ཚོས་གྱེན་ལྡོག་བྱས་ནས་དཀོན་མཆོག་ཡ་ཝཱེ་ཁས་མ་བླངས། ང་ཚོ་རང་གི་དཀོན་མཆོག་གི་རྗེས་སུ་མ་འབྲངས་པར། གཉའ་གནོན་དང་ཕྱིན་ལོག་གི་གཏམ་སྨྲ་ཞིང་། སེམས་ནང་དུ་རྫུན་གཏམ་བསྒྲིགས་ནས་ལབ་པ་ཡིན།
ISA 59:14 དྲང་པོ་ཕྱིར་ནུར་ཞིང་། དྲང་བདེན་རྒྱང་རིང་དུ་འགྲེང་། བདེན་པ་ཐང་ཆེན་དུ་འདྲེད་ཅིང་། དྲང་པོར་འཛུལ་ས་མེད།
ISA 59:15 བདེན་པ་མེད་ཅིང་ངན་པ་དང་བྲལ་བ་དག་བཅོམ་ནོར་དུ་གྱུར། དཀོན་མཆོག་ཡ་ཝཱེས་དེ་ནི་ལས་ངན་པར་གཟིགས་ཏེ། གང་ལ་ཞེ་ན། དྲང་པོ་གང་ཡང་མེད་པའི་ཕྱིར་རོ། །
ISA 59:16 ཁོང་གིས་སྤྱོད་བཟང་ཅན་དང་། གཞན་གྱི་ཕྱིར་དུ་གསོལ་བ་འདེབས་མཁན་མེད་པ་མཐོང་སྟེ་ཤིན་ཏུ་ངོ་མཚར་བར་གྱུར། དེའི་ཕྱིར་ཁོང་གི་ཕྱག་ངར་གྱིས་སྐྱོབ་པར་མཛད་ཅིང་། ཁོང་གི་དྲང་བདེན་གྱིས་རང་ཉིད་སྐྱོར་ཏོ། །
ISA 59:17 ཁོང་གིས་དྲང་བདེན་གྱི་གོ་ཁྲབ་མནབས་ཤིང་། དབུ་ལ་ཐར་པའི་དབུ་རྨོག་བསྣམས། འཁོན་ལན་སློག་པའི་ན་བཟའ་མནབས། དང་ཞེན་གྱི་ཕྱི་ལྭ་གསོལ།
ISA 59:18 ཁོང་གིས་མི་རེ་རེའི་བྱ་སྤྱོད་བཞིན་ལན་འཇལ་ཞིང་། ཁོང་གི་ཐུགས་ཁྲོ་ཉིད་ཀྱི་དགྲ་ཡི་སྟེང་འབབ་ཏུ་འཇུག་ཅིང་། ཉིད་ཀྱི་འཁོན་ལན་དགྲ་ཟླའི་སྟེང་དུ་སློག་པ་དང་། གླིང་ཕྲན་སྟེང་གི་མི་རྣམས་ལ་ངན་ལན་འཇལ་ལོ། །
ISA 59:19 དེ་བས་མི་ཡིས་ཉི་མ་ནུབ་མཚམས་ནས་དཀོན་མཆོག་ཡ་ཝཱེའི་མཚན་ལ་གུས་ཤིང་འཇིགས་པར་བྱེད་ཅིང་། ཉི་མ་ཤར་མཚམས་ནས་ཀྱང་ཁོང་གི་གཟི་བརྗིད་ལ་གུས་ཤིང་འཇིགས་པར་འགྱུར་ཏེ། དགྲ་རྣམས་གཙང་པོ་བཞིན་རྒྱུག་འོང་དུས་དཀོན་མཆོག་ཡ་ཝཱེའི་དབུགས་ཀྱིས་དེ་འདེད་པར་འགྱུར།
ISA 59:20 དེ་ནས་ཛ་ཡན་དང་། ཡ་ཀོབ་ཚང་གི་ཉེས་པ་བཤགས་མཁན་རྣམས་སྐྱོབ་ཕྱིར་སྐྱབས་མགོན་ཞིག་འོང་བར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
ISA 59:21 དཀོན་མཆོག་ཡ་ཝཱེས་འདི་སྐད་དུ། ང་ལ་མཚོན་ན་དེ་དག་དང་ཁ་ཆད་བཞག་པ་འདི་ལྟ་སྟེ། བདག་གིས་ཁྱོད་རྣམས་ཀྱི་སྟེང་དུ་བཞག་པའི་ཐུགས་ཉིད་དང་། ཁྱོད་ཅག་གི་སྨྲ་སྒོ་རུ་བཞག་པའི་མན་ངག་དེ། ཁྱོད་དང་ཁྱོད་ཀྱི་བུ་རྒྱུད་དང་ཁྱོད་ཀྱི་བུ་རྒྱུད་ཀྱི་བུ་རྒྱུད་བཅས་ཀྱི་སྨྲ་སྒོ་དང་འབྲལ་བར་མི་འགྱུར་བར་རྟག་ཏུ་གནས་ཞེས་དཀོན་མཆོག་ཡ་ཝཱེས་གསུངས་སོ། །
ISA 60:1 ཀྱེ་ཛ་ཡན་ཡར་ལོངས་ལ་འོད་སྤྲོས་ཤིག ཁྱོད་ཀྱི་འོད་སླེབས་ཟིན་པས་སོ། །དཀོན་མཆོག་ཡ་ཝཱེའི་གཟི་བརྗིད་ཡར་འཕགས་ཏེ་ཁྱོད་ཀྱི་སྟེང་དུ་ཤར་བྱུང་།
ISA 60:2 ལྟོས་དང་། མུན་པས་ས་གཞི་གཡོགས་ཤིང་མི་རིགས་ཀུན་སྨག་རུམ་གྱིས་བཏུམས་ནའང་། དཀོན་མཆོག་ཡ་ཝཱེ་ཡར་བཞེངས་ཏེ་ཁྱོད་ལ་འོད་སྤྲོ་ཞིང་ཁོང་གི་གཟི་བརྗིད་ཁྱོད་ཀྱི་སྟེང་ནས་མངོན་པར་འགྱུར།
ISA 60:3 རྒྱལ་ཕྲན་རྣམས་ནི་ཁྱོད་ཀྱི་འོད་ནང་དུ་སྐྱོད་ཅིང་། རྒྱལ་པོ་རྣམས་ཁྱོད་ཀྱི་ཉི་གཞོན་འཆར་ཀའི་འོད་ནང་དུ་རྒྱུ་བར་འགྱུར།
ISA 60:4 ཁྱོད་ཀྱིས་མིག་ཟུང་ཡར་བཏེགས་ནས་ཕྱོགས་ཀུན་ལ་ལྟོས་དང་། མི་ཐམས་ཅད་མཉམ་གཅིག་ཏུ་ཁྱོད་ཀྱི་མདུན་དུ་འོང་ཞིང་། ཁྱོད་ཀྱི་བུ་རྣམས་རྒྱང་རིང་ནས་འོང་ལ། ཁྱོད་ཀྱི་བུ་མོ་རྣམས་མཆན་ལ་བཙིར་ནས་འོང་བར་འགྱུར།
ISA 60:5 དུས་དེར་ཁྱོད་ཀྱིས་མཐོང་ཞིང་འོད་མདངས་བཀྲ་བར་འགྱུར་ཏེ། ཁྱོད་ཀྱི་སེམས་ངོ་མཚར་ཞིང་སྤྲོ་བར་འགྱུར། ཅིའི་ཕྱིར་ཞེ་ན། རྒྱ་མཚོའི་གཏེར་རྣམས་ཁྱོད་ཀྱི་ཕྱོགས་སུ་འཁོར་ཞིང་། རྒྱལ་ཕྲན་རྣམས་ཀྱི་རྒྱུ་ནོར་ཁྱོད་ལ་འཐོབ་ངེས་ཡིན།
ISA 60:6 རྔ་མོང་གི་ཁྱུ་རྣམས་ཁྱོད་ཀྱི་ས་གཞིར་ཁྱབ་ཅིང་། མིད་ཡཱན་དང་ཨེ་ཕཱ་ཡི་རྔ་མོང་ཆུང་ཆུང་རྣམས་ཁྱོད་ཀྱི་རྒྱལ་ཁམས་སུ་གང་སྟེ། ཤེ་བཱའི་མི་ཀུན་གྱིས་གསེར་དང་སྤོས་དཀར་ཁྱེར་འོངས་ནས། དཀོན་མཆོག་ཡ་ཝཱེར་བསྟོད་ཅིང་བསྔགས་པའི་གཏམ་བཟང་སྒྲོག་གོ །
ISA 60:7 ཀེ་དཱར་གྱི་ལུག་ཁྱུ་ཐམས་ཅད་ཁྱོད་ཀྱི་དྲུང་དུ་འདུས་ཤིང་། ནཱ་བ་ཨོད་ཀྱི་ལུག་ཐུག་རྣམས་ཁྱོད་ཀྱི་དྲུང་དུ་འབྱོར་ངེས། དེ་དག་བདག་གི་བློར་འབབ་པའི་མཆོད་རྫས་སུ་འགྱུར་ཆེད་བདག་གི་མཆོད་ཁྲི་སྟེང་འབུལ་ཞིང་། བདག་གིས་རང་གི་གཟི་བརྗིད་ལྡན་པའི་མཆོད་ཁང་ལ་གཟི་བརྗིད་ལྡན་པར་མཛད་དོ། །
ISA 60:8 སྤྲིན་ལྟར་འཕུར་ཞིང་། ཕུག་རོན་བཞིན་རང་གི་ཚང་ནང་འཕུར་འགྲོ་བ་དེ་དག་སུ་ཡིན་ནམ།
ISA 60:9 གླིང་ཕྲན་རྣམས་ཀྱིས་བདག་ལ་བསྒུག་ཅིང་། ཁོང་གིས་ཁྱོད་ལ་གཟི་བརྗིད་བསྩལ་ཡོད་པས། ཁྱོད་ཀྱི་དཀོན་མཆོག་ཡ་ཝཱེའི་མཚན་དང་། ཡེས་ར་ཨེལ་གྱི་དམ་པ་ཉིད་ཀྱི་རྐྱེན་གྱིས། ཐཱར་ཞིས་པའི་གྲུ་གཟིངས་རྣམས་ཀྱིས་སྣེ་ཁྲིད་དེ་ཁྱོད་ཀྱི་བུ་རྣམས་གསེར་དངུལ་དང་བཅས་རྒྱང་རིང་ཡུལ་ནས་བསྐྱལ་འོང་།
ISA 60:10 ཕྱི་ཕྱོགས་པས་ཁྱོད་ཀྱི་མཁར་ཡང་བསྐྱར་བརྩིག་ཅིང་། དེ་དག་གི་རྒྱལ་པོ་རྣམས་ཀྱིས་ཁྱོད་ལ་ཞབས་ཕྱི་བསྒྲུབ་པར་འགྱུར། གང་ལ་ཞེ་ན། སྔར་བདག་གིས་ཁོང་ཁྲོ་དང་བཅས་ཁྱོད་ལ་བརྡེགས་ནའང་། ད་ལྟ་གཟིགས་སྐྱོང་ཁྲོད་ནས་ཁྱོད་ལ་སྙིང་རྗེ་བསྐྱེད་པ་ཡིན།
ISA 60:11 མི་རྣམས་ཀྱིས་ཁྱོད་ལ་རྒྱལ་ཕྲན་ཀུན་གྱི་རྒྱུ་ནོར་སྐྱེལ་འདྲེན་བྱེད་པ་དང་། དེའི་རྒྱལ་པོ་རྣམས་ཁྲིད་འོང་བའི་ཕྱིར། ཁྱོད་ཀྱི་མཁར་སྒོ་རྒྱུན་དུ་ཕྱེས་ཏེ། ཉིན་མཚན་གང་དུའང་སྒོ་རྒྱག་པར་མི་འགྱུར་རོ། །
ISA 60:12 ཡང་ཁྱོད་ལ་ཞབས་ཕྱི་མི་བསྒྲུབ་པའི་བུ་རྒྱུད་དང་རྒྱལ་སྲིད་ནི་མེད་པར་འགྱུར་ཞིང་། རྒྱལ་ཁབ་དེ་དག་རྩ་བ་ནས་འཇིག་ངེས་ཡིན།
ISA 60:13 བདག་གི་གནས་དམ་པ་མཛེས་པར་བརྒྱན་ཕྱིར་གསོམ་པ་དང་སྒྲོན་ཤིང་། ཤུག་ཤིང་བཅས་ལེ་པཱ་ནོན་གྱི་གཟི་བརྗིད་ཁྱོད་ལ་གཏོགས་པར་འགྱུར། ངས་རང་གི་རྐང་པ་སྤོ་སར་གཟི་བརྗིད་འཐོབ་པར་བྱའོ། །
ISA 60:14 ཁྱོད་དཀའ་སྡུག་ལ་སྦྱོར་མཁན་གྱི་བུ་རྒྱུད་རྣམས་མགོ་བསྒུར་ཏེ་ཁྱོད་ཀྱི་དྲུང་དུ་འོང་ཞིང་། ཁྱོད་ལ་མཐོང་ཆུང་བྱེད་མཁན་ཐམས་ཅད་ཀྱིས་ཁྱོད་ཀྱི་རྐང་འོག་ནས་ཕྱག་འཚལ་བར་འགྱུར། དེ་ཚོས་ཁྱོད་ལ་དཀོན་མཆོག་ཡ་ཝཱེའི་གྲོང་ཁྱེར་དང་། ཡེས་ར་ཨེལ་གྱི་དམ་པའི་ཛ་ཡན་ཞེས་འབོད།
ISA 60:15 སྔར་ཁྱོད་ནི་དོར་ཞིང་སྡང་བར་གྱུར་ཏེ། ཐ་ན་ཁྱོད་བརྒྱུད་ནས་འགྲོ་མཁན་མེད་ཀྱང་། བདག་གིས་ཁྱོད་ནི་དུས་གཏན་དུ་བསྟོད་པའི་ཡུལ་དུ་འགྱུར་བ་དང་། མི་རབས་ཀུན་གྱི་དགའ་སྤྲོ་རུ་བྱེད་དོ། །
ISA 60:16 ཁྱོད་ཀྱིས་རྒྱལ་ཕྲན་ཀུན་གྱི་འོ་མ་བཏུང་ཞིང་། རྒྱལ་པོ་རྣམས་ཀྱི་ནུ་ཞོ་འཇིབ་པ་དང་། དེ་ནས་ཁྱོད་ཀྱིས་དཀོན་མཆོག་ཡ་ཝཱེ་བདག་ནི་ཁྱོད་ཀྱི་མགོན་སྐྱབས་དང་། ཡ་ཀོབ་ཀྱི་མཐུ་བོ་ཆེ་སྟེ་ཁྱོད་རང་བླུ་མཁན་ཡིན་པ་རྟོགས་པར་འགྱུར།
ISA 60:17 བདག་གིས་ཟངས་ཀྱི་ཚབ་ཏུ་གསེར་དང་། ལྕགས་ཀྱི་ཚབ་ཏུ་དངུལ། ཤིང་གི་ཚབ་ཏུ་ར་གན་དང་། རྡོའི་ཚབ་ཏུ་ལྕགས་འདྲེན་པར་བྱ་སྟེ། བདག་གིས་ཁྱོད་ཀྱི་ལས་དཔོན་དུ་ཞི་བདེ་དང་། ཁྱོད་ཀྱི་དབང་སྒྱུར་མཁན་དུ་དྲང་བདེན་བསྐོ་བར་བྱའོ། །
ISA 60:18 ཁྱོད་ཀྱི་ཡུལ་ནས་དྲག་སྤྱོད་ཀྱི་དོན་ཙམ་ཡང་མི་ཐོས་ཤིང་། ཁྱོད་ཀྱི་མངའ་ཁོངས་སུ་ཉམ་རྒུད་དང་གཏོར་བཤིག་གི་སྒྲ་ཙམ་ཡང་ཐོས་པར་མི་འགྱུར། ཁྱོད་ཀྱིས་རང་གི་ལྕགས་རི་རྣམས་ལ་ཐར་པ་དང་། མཁར་སྒོ་རྣམས་ལ་བསྟོད་བསྔགས་ཞེས་འབོད་པར་འགྱུར།
ISA 60:19 ཉིན་དཀར་ཉི་འོད་ཁྱོད་ཀྱི་འོད་དུ་མི་བྱ་ཞིང་། མཚན་མོར་ཟླ་འོད་ཀྱང་ཁྱོད་སྟེང་མི་སྤྲོ། ཡིན་ཡང་དཀོན་མཆོག་ཡ་ཝཱེ་ཁྱོད་ཀྱི་དུས་གཏན་གྱི་འོད་ཟེར་དང་། ཁྱོད་ཀྱི་དཀོན་མཆོག་ཁྱོད་ཀྱི་གཟི་བརྗིད་དུ་འགྱུར་རོ། །
ISA 60:20 ཁྱོད་ཀྱི་ཉི་མ་ནམ་ཡང་མི་ནུབ་ལ། ཁྱོད་ཀྱི་ཟླ་བ་ཡང་འཁུམ་པར་མི་འགྱུར། གང་ལ་ཞེ་ན། དཀོན་མཆོག་ཡ་ཝཱེ་ཁྱོད་ཀྱི་དུས་གཏན་གྱི་འོད་ཟེར་བྱེད་ཅིང་། ཁྱོད་ཀྱི་སྡུག་བསྔལ་གྱི་ཉིན་མོ་རྣམས་རྫོགས་པར་འགྱུར།
ISA 60:21 ཁྱོད་ཀྱི་འབངས་རྣམས་དྲང་བདེན་དུ་འགྱུར་ཞིང་། དུས་གཏན་དུ་ཡུལ་དེ་ས་སྐལ་དུ་འཐོབ་པར་འགྱུར། དེ་དག་ནི་བདག་གིས་བཙུགས་པའི་མྱུ་གུ་དང་། བདག་གི་ཕྱག་གིས་བྱས་པ་ཡིན་པས་བདག་ལ་གཟི་བརྗིད་མངའ་བར་འགྱུར།
ISA 60:22 ཆེས་ཆུང་བ་རྣམས་རིགས་གཅིག་ཏུ་འགྱུར་ཞིང་། སྟོབས་ཉམས་པ་རྣམས་སྟོབས་འབྱོར་ལྡན་པའི་རྒྱལ་ཁབ་ཏུ་འགྱུར། དཀོན་མཆོག་ཡ་ཝཱེ་བདག་གིས་དུས་བཞིན་དུ་དོན་དེ་རྣམས་མྱུར་དུ་བསྒྲུབ་པར་བྱའོ། །
ISA 61:1 གཙོ་བོ་ཡ་ཝཱེའི་ཐུགས་ཉིད་ང་ཡི་སྟེང་དུ་བཞུགས་ཏེ། གང་ལ་ཞེ་ན། དབུལ་པོ་རྣམས་ལ་འཕྲིན་བཟང་སྒྲོག་པའི་ཕྱིར་ཁོང་གིས་བདག་ལ་སྣུམ་གྱིས་བྱུགས་ཤིང་བསྐོས་པའོ། །སྡུག་བསྔལ་ཅན་ལ་སེམས་གསོ་བྱེད་པ་དང་། བཙོན་པ་རྣམས་ལ་ཐར་པའི་འཕྲིན་བཟང་བསྒྲག་པ། བཀག་སྡོམ་ཐེབས་པ་རྣམས་ལ་ཐར་པ་བསྒྲག་པ།
ISA 61:2 དཀོན་མཆོག་ཡ་ཝཱེའི་ཐུགས་རྗེའི་གནམ་ལོ་དང་། ང་ཚོའི་དཀོན་མཆོག་གིས་ལན་འཇལ་བའི་ཉིན་མོ་དེ་བསྒྲག་པ་དང་། ཡིད་སྐྱོ་བ་རྣམས་ལ་སེམས་གསོ་གཏོང་བ།
ISA 61:3 ཛ་ཡན་གྱི་སྡུག་གིས་མནར་བཞིན་པ་རྣམས་བརྒྱན་ཏེ། ཁོ་ཚོར་ཐལ་རྡུལ་གྱི་ཚབ་ཏུ་ལ་ཐོད་དང་། མྱ་ངན་གྱི་ཚབ་ཏུ་དགའ་སྤྲོ་ཡི་སྣུམ། སེམས་ཤུགས་ཉམས་པའི་ཚབ་ཏུ་བསྟོད་པའི་གྱོན་ཆས་བཅས་གནང་བར་མངགས་པ་ཡིན། ཁོང་རང་ཉིད་ལ་གཟི་བརྗིད་འཐོབ་པའི་ཕྱིར་དུ། དེ་དག་ལ་དྲང་བདེན་གྱི་བེ་ཤིང་ཞེས་འབོད་ཅིང་། དཀོན་མཆོག་ཡ་ཝཱེ་ཁོང་གིས་སྐུ་དངོས་སུ་བཙུགས་པ་ཡིན།
ISA 61:4 དེ་དག་གིས་གནའ་བོའི་ཞིག་རོ་རྣམས་བརྩིགས་ཤིང་སྔོན་ཆད་རྩ་གཏོར་བཏང་བ་རྣམས་ཡར་བཞེངས་ཏེ། མི་རབས་མང་པོར་ཞིག་རོར་ལུས་པའི་གྲོང་ཁྱེར་རྣམས་སླར་གསོ་བར་བྱའོ། །
ISA 61:5 དུས་དེར་ཕྱི་ཕྱོགས་པ་རྣམས་ཀྱིས་ཁྱོད་ཚོར་ཞབས་ཕྱི་བསྒྲུབས་ཏེ། ཁྱོད་རྣམས་ཀྱི་ལུག་ཁྱུ་འཚོ་ཞིང་། ཕྱི་ཕྱོགས་པ་རྣམས་ཁྱོད་ཅག་གི་ཞིང་པ་དང་རྒུན་ཚལ་བདག་གཉེར་བྱེད་མཁན་དུ་འགྱུར་རོ། །
ISA 61:6 ཡང་ཁྱོད་ཅག་ནི་དཀོན་མཆོག་ཡ་ཝཱེའི་མཆོད་དཔོན་དུ་འབོད་པར་འགྱུར་ཏེ། མི་རྣམས་ཀྱིས་ཁྱོད་ཅག་ལ་ང་ཚོའི་དཀོན་མཆོག་གི་ཞབས་ཕྱི་ཞེས་འབོད་ཅིང་། ཁྱོད་ཚོས་རྒྱལ་ཕྲན་ཀུན་གྱི་རྒྱུ་ནོར་སྤྱོད་ཅིང་། དེ་དག་གི་གཟི་བརྗིད་ནང་དུ་ཁྱོད་ཅག་གིས་ངོམ་ཟིལ་སྟོན་ནོ། །
ISA 61:7 ཁྱོད་ཅག་ལ་ཐེབས་པའི་ངོ་ཚའི་ཚབ་ཏུ་ནོར་སྐལ་ལྡབ་གཉིས་འཐོབ་ཅིང་། ངོ་ཚའི་ཚབ་ཏུ་དེ་དག་གིས་རང་ལ་ཐོབ་པའི་ནོར་སྐལ་གྱི་ཕྱིར་དགའ་འབོད་བྱེད་པས། དེ་དག་ལ་རང་ཡུལ་ནས་ནོར་སྐལ་ལྡབ་གཉིས་འཐོབ་ཅིང་། རྟག་ཏུ་དགའ་བར་འགྱུར།
ISA 61:8 དེའི་རྒྱུ་མཚན་དཀོན་མཆོག་ཡ་ཝཱེ་བདག་ནི་དྲང་པོར་དགའ་བ་ལས་དྲང་བདེན་མིན་པའི་འཕྲོག་བཅོམ་ལ་སྡང་བ་ཡིན། བདག་གིས་བདེན་ལུགས་ཀྱིས་དེ་དག་ལ་རྔན་པ་གནང་ཞིང་། དེ་དག་དང་དུས་གཏན་གྱི་ཁ་ཆད་འཇོག་པར་བྱ།
ISA 61:9 དེ་དག་གི་བུ་རྒྱུད་རྣམས་རྒྱལ་ཕྲན་དག་གི་དབུས་ནས་ངོ་ཤེས་པར་འགྱུར་ལ། དེ་དག་གི་བུ་རབས་ཚ་རྒྱུད་རྣམས་མི་རིགས་ཀུན་གྱི་ནང་དུའང་དེ་བཞིན་ནོ། །ཁོ་ཚོ་མཐོང་མཁན་ཚང་མས་དེ་དག་དཀོན་མཆོག་ཡ་ཝཱེས་བྱིན་གྱིས་བརླབས་པའི་བུ་རྒྱུད་ཡིན་པ་ཁས་ལེན་པར་འགྱུར།
ISA 61:10 ང་རང་དཀོན་མཆོག་ཡ་ཝཱེའི་རྐྱེན་གྱིས་རབ་ཏུ་སྤྲོ་ཞིང་། བདག་གི་སེམས་རང་གི་དཀོན་མཆོག་ལ་བརྟེན་ནས་ཤིན་ཏུ་དགའོ། །ཅིའི་ཕྱིར་ཞེ་ན། མག་གསར་གྱིས་ལ་ཐོད་དཀྲི་བ་དང་། བག་གསར་གྱིས་རྒྱན་ཆ་འདོགས་པ་བཞིན། ཁོང་གིས་ང་ལ་ཐར་པའི་གོས་གྱོན་ཞིང་། དྲང་བདེན་གྱི་ཕྱི་ལྭ་ང་ལ་བསྐོན་པར་མཛད།
ISA 61:11 ས་གཞིས་རང་ལ་མྱུ་གུ་འབུ་བར་བྱེད་ཅིང་། སྐྱེད་མོས་ཚལ་གྱིས་དེའི་ནང་དུ་བཏབ་པ་རྣམས་སྐྱེ་རུ་འཇུག་པ་ལྟར། གཙོ་བོ་ཡ་ཝཱེས་ཀྱང་རྒྱལ་ཕྲན་ཀུན་གྱི་མདུན་དུ་དྲང་བདེན་དང་བསྟོད་བསྔགས་བསྐྱེད་པར་བྱའོ། །
ISA 62:1 ཛ་ཡན་གྱི་དྲང་བདེན་འོད་ཟེར་བཞིན་འཕྲོ་ཞིང་། ཡེ་རུ་སཱ་ལེམ་གྱི་ཐར་པ་དཔལ་འབར་བཞིན་མ་སྒྲོན་པའི་བར་དུ། ཛ་ཡན་གྱི་ཕྱིར་དུ་བདག་ཁུ་སིམ་མེར་མི་འདུག་ལ། ཡེ་རུ་སཱ་ལེམ་གྱི་ཕྱིར་དུ་བདག་གྲགས་མེད་དུའང་སྡོད་པར་མི་བྱའོ། །
ISA 62:2 རྒྱལ་ཕྲན་རྣམས་ཀྱིས་ཁྱོད་ཀྱི་དྲང་བདེན་དང་། རྒྱལ་པོ་ཀུན་གྱིས་ཁྱོད་ཀྱི་གཟི་བརྗིད་མཐོང་བར་འགྱུར། དེ་ནས་ཁྱོད་ལ་དཀོན་མཆོག་ཡ་ཝཱེའི་ཞལ་ནས་བཏགས་པའི་མིང་གསར་པ་ཞིག་གིས་མི་ཡིས་འབོད་ངེས་ཡིན།
ISA 62:3 ཁྱོད་རང་དཀོན་མཆོག་ཡ་ཝཱེའི་ཕྱག་གི་དབུ་རྒྱན་དང་། རང་གི་དཀོན་མཆོག་ཕྱག་གི་རྒྱལ་པོའི་གཙུག་རྒྱན་དུ་འགྱུར་ངེས།
ISA 62:4 ད་ནི་ཁྱོད་རང་གཞན་གྱིས་དོར་བ་ཡིན་ཞེས་མི་ཟེར་ལ། ཁྱོད་ཀྱི་ཡུལ་ལའང་དབེན་སྟོང་ཞེས་མི་འབོད་དེ། ཁྱོད་ནི་ང་རང་ཁོ་མོར་དགའ་བ་ཡིན་ཞེས་དང་། ཁྱོད་ཀྱི་ཡུལ་ལ་བཟའ་ཟླ་ཅན་ཞེས་འབོད་ངེས་ཡིན། ཅིའི་ཕྱིར་ཞེ་ན། དཀོན་མཆོག་ཡ་ཝཱེ་ཁྱོད་ལ་ཐུགས་དགྱེས་ཤིང་། ཁྱོད་ཀྱི་ཡུལ་ནི་བཟའ་ཟླ་དང་ལྡན་པར་འགྱུར།
ISA 62:5 གཞོན་ནུ་ཞིག་གིས་ན་ཆུང་བུ་མོ་ཞིག་ལེན་པ་བཞིན། ཁྱོད་ཀྱི་བུ་རྣམས་ཀྱིས་ཀྱང་དེ་བཞིན་ཁྱོད་ལེན་ཞིང་། མག་གསར་བག་མར་དགའ་བ་ཇི་བཞིན། ཁྱོད་ཀྱི་དཀོན་མཆོག་ཀྱང་དེ་བཞིན་ཁྱོད་ལ་ཐུགས་མཉེས་པར་འགྱུར་རོ། །
ISA 62:6 ཀྱེ་ཡེ་རུ་སཱ་ལེམ། བདག་གིས་ཁྱོད་ཀྱི་ལྕགས་རིའི་སྟེང་དུ་སོ་པ་བཞག་ཅིང་། ཁོ་ཚོ་ཉིན་མཚན་ཀུན་ཏུ་ཁུ་སིམ་མེར་མི་འདུག དཀོན་མཆོག་ཡ་ཝཱེའི་མཚན་ནས་འབོད་པ་ཁྱོད་ཅག་ཀྱང་ངལ་གསོ་བར་མི་བྱའོ། །
ISA 62:7 དཀོན་མཆོག་གིས་ཡེ་རུ་སཱ་ལེམ་བསྐྲུན་ནས་དེ་ས་སྟེང་དུ་བསྟོད་པའི་ཡུལ་དུ་འགྱུར་བའི་བར་དུ། ཁྱོད་རྣམས་ཀྱིས་ཁོང་ཉིད་ངལ་གསོ་བར་མ་འཇུག་ཅིག
ISA 62:8 དཀོན་མཆོག་ཡ་ཝཱེས་ཉིད་ཀྱི་ཕྱག་གཡས་པ་དང་དཔུང་པ་སྟོབས་པོ་ཆེ་དཔང་དུ་བཙུགས་ནས་འདི་སྐད་དུ། ཕྱིན་ཆད་ཁྱོད་ཀྱི་འབྲུ་རིགས་རྣམས་དགྲ་བོའི་ཟས་སུ་མི་སྦྱིན་ལ། ཁྱོད་ཀྱི་རྩོལ་བ་ལས་ཐོབ་པའི་རྒུན་ཆང་ཡང་ཕྱི་ཕྱོགས་པ་རྣམས་ལ་བཏུང་བར་མི་བྱ་སྟེ།
ISA 62:9 འབྲུ་རིགས་སྡུད་མཁན་ཁོ་ནས་དེ་སྤྱོད་ཅིང་། དཀོན་མཆོག་ཡ་ཝཱེ་ལ་བསྟོད་བསྔགས་བརྗོད་ངེས་ཡིན། དེ་དག་སྡུད་མཁན་རྣམས་ཀྱིས་བདག་གི་གནས་དམ་པའི་ཁྱམས་ར་ནས་དེ་བཏུང་བར་བྱའོ་ཞེས་གསུངས་སོ། །
ISA 62:10 ཁྱོད་རྣམས་སོང་ཞིག མཁར་སྒོ་བརྒྱུད་ནས་སོང་ཞིག མི་རྣམས་ལ་གཞུང་ལམ་གྲ་སྒྲིག་བྱོས་དང་། ཁྱོད་རྣམས་ཀྱིས་ཡར་སྙོམས་ཤིག ལམ་ཆེན་ཡར་སྙོམས་ཤིག རྡོ་རྣམས་ཐུས་ཤིག མི་རིགས་ཀུན་གྱི་ཕྱིར་དུ་དར་ཆེན་སྒྲེངས་ཤོག
ISA 62:11 ལྟོས་ཤིག དཀོན་མཆོག་ཡ་ཝཱེས་ས་མཐའི་བར་དུ་བསྒྲགས་ཏེ་འདི་སྐད་དུ། ཁྱོད་ཅག་གིས་ཛ་ཡན་གྱི་བུ་མོ་ལ། ལྟོས་དང་། ཁྱོད་རང་སྐྱོབ་མཁན་སླེབས་བཞིན་གདའ། ཁོང་གིས་མི་ལ་གནང་བའི་གསོལ་རས་ཁོང་དང་མཉམ་དུ་ཡོད་དེ། ཁོང་གིས་མི་ལ་འཇལ་བའི་ལན་ཡང་ཁོང་གི་དྲུང་དུ་མཆིས་སོ་ཞེས་ཤོད་ཅིག་གསུངས་སོ། །
ISA 62:12 དེ་ནས་ཁོ་ཚོར་དམ་པའི་མི་སྡེ་དང་། དཀོན་མཆོག་ཡ་ཝཱེས་བླུས་པའི་མི་རྣམས་ཞེས་འབོད་པ་དང་། ཁྱོད་ལའང་ཡིད་སྨོན་འཆོར་ས་དང་། འདོར་བར་མི་བྱ་བའི་གྲོང་ཁྱེར་ཞེས་འབོད་པར་འགྱུར་རོ། །
ISA 63:1 མཚལ་མདོག་གི་ན་བཟའ་སྐུ་ལ་གསོལ་ཏེ། རྒྱན་གྱིས་སྤྲས་ཏེ་མཐུ་སྟོབས་ཆེན་པོས་ཨེ་དོམ་ཕྱོགས་ནས་ཕེབས་ཤིང་། པོ་ཚ་རཱ་ནས་འབྱོན་འོང་བ་དེ་སུ་ཡིན་ནམ། དེ་ནི་དྲང་བདེན་གྱི་སྒོ་ནས་གཏམ་འཆད་ཀྱིན་ཐར་པའི་མཐུ་སྟོབས་རྫོགས་པ་ང་རང་ཡིན་ནོ། །
ISA 63:2 ཁྱེད་ཀྱི་ན་བཟའ་དམར་ཞིང་། གྱོན་པ་ནི་རྒུན་འབྲུམ་འཚིར་གཞོང་ལས་རྒུན་འབྲུམ་འཚིར་གནོན་བྱེད་མཁན་གྱི་ལྭ་བ་དང་མཚུངས་པ་ཅི་ཡིན་ནམ།
ISA 63:3 ང་གཅིག་པུས་རྒུན་འབྲུམ་འཚིར་གཞོང་ནང་དུ་རྐང་པས་བརྫིས་ཤིང་། མི་རྣམས་ཀྱི་ཁྲོད་དུ་ང་དང་མཉམ་དུ་འདུག་མཁན་གཅིག་ཀྱང་མེད་དེ། བདག་གིས་ཁོང་ཁྲོ་དང་བཅས་དེ་དག་ལ་རྡོག་བརྫིས་བརྒྱབ་ཅིང་། ཁྲོ་གཏུམ་དྲག་པོས་དེ་དག་རྐང་བརྫིས་བཏང་། དེ་དག་གི་ཁྲག་བདག་གི་གྱོན་གོས་སྟེང་དུ་གཏོར་ནས། བདག་གིས་རང་གི་གོས་ཐམས་ཅད་བཙོག་པར་བཟོས།
ISA 63:4 གང་ལ་ཞེ་ན། འཁོན་ལན་སློག་པའི་ཉིན་མོ་དེ་ངའི་སེམས་སུ་ཡོད་ཅིང་། བདག་གིས་སྐྱོབ་པའི་ལོ་ནི་སླེབས་པ་ཡིན།
ISA 63:5 བདག་གིས་བལྟས་ཀྱང་གྲོགས་བྱེད་མཁན་གཅིག་ཀྱང་མི་འདུག རོགས་སྐྱོར་བྱེད་མཁན་ཡང་མ་བྱུང་བས་ང་ཧ་ལས་པར་གྱུར། དེ་བས་བདག་གི་ལག་ངར་གྱིས་བདག་ལ་ཐར་པ་དྲངས་ཤིང་། བདག་གི་ཁྲོ་བས་བདག་སྐྱོར་པ་ཡིན།
ISA 63:6 བདག་གིས་རང་གི་ཁོང་ཁྲོ་དང་བཅས་མི་རིགས་ཀུན་ལ་རྡོག་བརྫིས་བཏང་ཤིང་། བདག་གི་ཁྲོ་གཏུམ་ནང་ནས་དེ་དག་བཟི་རུ་བཅུག་སྟེ། དེ་དག་གི་ཁྲག་ནི་ས་རུ་གཏོར་ཏོ། །
ISA 63:7 ངས་དཀོན་མཆོག་ཡ་ཝཱེས་ང་ཚོའི་ཕྱིར་དུ་མཛད་པའི་དོན་ཐམས་ཅད་བཞིན་ཁོང་གི་བྱམས་བརྩེ་དང་། ཁོང་གི་བསྟོད་པར་འོས་པའི་དོན་རྣམས་དང་། ཁོང་གིས་ཡེས་ར་ཨེལ་གྱི་ཁྱིམ་རྒྱུད་ལ་གནང་བའི་བྱིན་རླབས་ཏེ། ཉིད་ཀྱི་ཐུགས་རྗེ་དང་ཕུན་སུམ་ཚོགས་པའི་བྱམས་བརྩེ་ཡིས་དེ་དག་གི་ཕྱིར་དུ་མཛད་པ་རྣམས་བརྗོད་པར་བྱའོ། །
ISA 63:8 སྔར་ཁོང་གིས་འདི་སྐད་དུ། དེ་དག་ནི་བདག་གི་མི་སྡེ་དང་རྫུན་མི་བཟོ་བའི་བུ་རྒྱུད་ངོ་མ་ཡིན་ཞེས་གསུངས་པས། དེ་དག་གི་དཀའ་སྡུག་ཐམས་ཅད་ཀྱི་ཁྲོད་དུ་ཁོང་ནི་དེ་དག་གི་སྐྱབས་མགོན་དུ་གྱུར་ཏོ། །
ISA 63:9 ཁོང་ནི་དེ་དག་གི་དགྲ་རུ་ལང་མཁན་མ་ཡིན་ཞིང་། ཁོང་གི་སྤྱན་སྔའི་ཕོ་ཉ་རྣམས་ཀྱིས་དེ་དག་བསྐྱབས་ཏེ། ཁོང་གིས་ཉིད་ཀྱི་ཐུགས་རྗེ་དང་བྱམས་བརྩེ་ཡིས་དེ་དག་བླུས་ཤིང་། གནའ་བོའི་དུས་ཀུན་ཏུ་ཁོང་གིས་དེ་རྣམས་ཁུར་ནས་པང་དུ་བཟུང་ངོ་། །
ISA 63:10 འོན་ཀྱང་དེ་དག་གིས་གྱེན་ལོག་བྱས་ཏེ་ཁོང་གི་དམ་པའི་ཐུགས་ཉིད་སྡུག་ལ་སྦྱར་བས། ཁོང་དེ་དག་གི་དགྲ་རུ་ལངས་ནས་སྐུ་དངོས་སུ་དེ་དག་ལ་གཡུལ་བཤམས་པ་ཡིན།
ISA 63:11 སྐབས་དེར་ཁོ་ཚོས་གནའ་བོའི་དུས་ཏེ། མོ་ཤེ་དང་དེའི་འབངས་མི་ཡི་དུས་ཡིད་ལ་དྲན་ཏེ་ན་རེ། འབངས་དང་ཉིད་ཀྱི་ལུག་ཁྱུའི་རྫི་བོ་རྣམས་རྒྱ་མཚོའི་ཕ་རོལ་ཏུ་ཁྲིད་ཡོང་མཁན་དེ་གང་དུ་བཞུགས་སམ། དེ་དག་གི་དབུས་སུ་ཉིད་ཀྱི་ཐུགས་ཉིད་འབབ་ཏུ་འཇུག་མཁན་ཁོང་ཉིད་གང་དུ་བཞུགས་ཡོད་དམ།
ISA 63:12 ཉིད་ཀྱི་གཟི་བརྗིད་ལྡན་པའི་ཕྱག་ངར་མོ་ཤེའི་གཡས་ཕྱོགས་སུ་བསྐྱོད་པར་མཛད་མཁན་དང་། དུས་གཏན་གྱི་མཚན་འཐོབ་ཕྱིར་དེ་དག་གི་མདུན་དུ་ཆུ་བོ་ཕྱོགས་གཉིས་སུ་གྱེས་མཁན་དེ་གང་དུ་བཞུགས་སམ།
ISA 63:13 རྟ་རྒོད་ཐང་སྟོང་བརྒྱུད་པ་བཞིན་དེ་དག་རྒྱ་མཚོ་ཟབ་མོའི་ཀློང་ནས་ཁྲིད་དེ། སར་འགྱེལ་དུ་མ་བཅུག་པ་དེ་གང་དུ་བཞུགས་སམ།
ISA 63:14 ལུང་མདོ་རུ་བབས་པའི་ཕྱུགས་ཁྱུ་དང་མཚུངས་པར། དཀོན་མཆོག་ཡ་ཝཱེའི་ཐུགས་ཉིད་ཀྱིས་དེ་དག་ལ་ངལ་གསོ་སྦྱིན། དེ་བས་གཟི་བརྗིད་ཀྱི་མཚན་འཐོབ་ཕྱིར་ཁྱེད་ཀྱིས་རང་གི་མི་རྣམས་དེ་བཞིན་ཁྲིད་པ་ཡིན།
ISA 63:15 ཁྱེད་ཀྱིས་ནམ་མཁའ་ནས་གཟིགས་དང་། ཉིད་ཀྱི་བཞུགས་ཁྲི་དམ་པ་དང་གཟི་བརྗིད་ཆེན་པོའི་གནས་ནས་གཟིགས་སུ་གསོལ། ཁྱེད་ཀྱི་དང་ཞེན་དང་མཐུ་སྟོབས་གང་དུ་ཡོད། ཁྱེད་ཀྱི་དུང་སེམས་དང་སྙིང་རྗེ་ངའི་ཕྱོགས་ནས་ཕྱིར་འཐེན་ནོ། །
ISA 63:16 ཨབ་ར་ཧམ་གྱིས་ངེད་ཅག་ངོ་མི་ཤེས་ལ། ཡེས་ར་ཨེལ་གྱིས་ངེད་ཅག་ཁས་མི་ལེན་ཡང་། ཁྱེད་ནི་ངེད་ཅག་གི་ཡབ་ཡིན་ནོ། །ཀྱེ་དཀོན་མཆོག་ཡ་ཝཱེ་ལགས་ཁྱེད་ནི་ངེད་ཅག་གི་ཡབ་ཡིན་ལ། གནའ་བོའི་དུས་ནས་བཟུང་ངེད་ཅག་སྐྱོབ་མཁན་ཞེས་པ་ཁྱེད་ཀྱི་མཚན་ཡིན་ནོ། །
ISA 63:17 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཅིའི་ཕྱིར་ངེད་རྣམས་ལོག་ལམ་དུ་འགྲོ་བར་གནང་སྟེ། ཁྱེད་ཀྱི་ལམ་དང་འབྲལ་དུ་བཅུག་གམ། ཡང་ངེད་ཅག་གི་བློ་གྱོང་པོར་བྱས་ཤིང་ཁྱེད་ལ་མི་གུས་མི་འཇིགས་པར་མཛད་པ་ཅི་ཡིན་ནམ། ཁྱེད་ཀྱི་ཞབས་ཕྱི་རྣམས་དང་། ནོར་སྐལ་གྱི་ཚོ་ཁག་སོ་སོའི་ཕྱིར་དུ་ཁྱེད་ཉིད་ཚུར་འཁོར་བར་མཛོད།
ISA 63:18 ཁྱེད་ཀྱི་འབངས་མི་དམ་པར་རེ་ཞིག་ཁྱེད་ཀྱི་གནས་ཐོབ་ཅིང་། བདག་ཅག་གི་དགྲ་བོས་ཁྱེད་ཀྱི་གནས་མཆོག་ལ་རྡོག་བརྫིས་བཏང་ངོ་། །
ISA 63:19 ངེད་ཅག་ནི་ཁྱེད་ཀྱིས་ནམ་ཡང་དབང་བསྒྱུར་མ་མྱོང་བ་དང་། ཁྱེད་ཀྱི་མཚན་ལ་གཏོགས་པའི་མི་ཞེས་འབོད་མྱོང་མེད་པ་ལྟ་བུར་གྱུར་ཏོ། །
ISA 64:1 ཁྱེད་ཀྱི་སྤྱན་སྔར་རི་ཚོགས་འདར་ཞིང་། ཁྱེད་ཀྱིས་ནམ་མཁའ་གཤགས་ནས་མར་ཕེབས་ཤོག
ISA 64:2 མེ་ཡིས་བུད་ཤིང་སྐམ་པོ་འབར་དུ་འཇུག་པ་དང་། ཡང་མེ་ཡིས་ཆུ་བསྐོལ་བ་བཞིན་དུ། ཁྱེད་ཀྱི་དགྲ་རྣམས་ལ་ཁྱེད་ཀྱི་མཚན་རྟོགས་སུ་བཅུག་སྟེ། རྒྱལ་ཕྲན་རྣམས་ཁྱེད་ཀྱི་སྤྱན་སྔར་འདར་གྱུར་ཅིག
ISA 64:3 ཁྱེད་ཀྱི་ངོ་མཚར་བའི་མཛད་པ་རྣམས་ང་ཚོའི་བསམ་ཡིད་ལས་འདས་ཤིང་། ཁྱེད་ཕེབས་དུས་རི་ཚོགས་ཁྱེད་ཀྱི་དྲུང་དུ་འདར་བ་ཡིན།
ISA 64:4 གནའ་ནས་ད་ལྟའི་བར་དུ། ཁོང་ལ་སྒུག་མཁན་རྣམས་ཀྱི་ཕྱིར་དུ་དོན་མཛད་མཁན་ཁྱེད་ལས་དཀོན་མཆོག་གཞན་ཡོད་པ་མི་ཡིས་ཐོས་མེད་དེ། རྣ་བས་ཐོས་མྱོང་མེད་ལ་མིག་གིས་ཀྱང་མཐོང་མ་མྱོང་ངོ་། །
ISA 64:5 དྲང་བདེན་གྱི་དོན་རྣམས་དགའ་སྤྲོའི་ངང་སྒྲུབ་ཅིང་ཁྱེད་ཀྱི་ལམ་དུ་ཁྱེད་དྲན་མཁན་རྣམས་ལ་ཁྱེད་ཀྱིས་རོགས་རམ་གནང་བ་ཡིན། ལྟོས་དང་། ང་ཚོས་སྡིག་པ་བསགས་ཤིང་སྡིག་པ་དེའི་ཁྲོད་དུ་ཡུན་རིང་ལུས་པས་ཁྱེད་ཐུགས་ཁྲོས་པ་ཡིན། དེས་ན་ང་ཚོ་བསྐྱབ་པར་འགྱུར་རམ།
ISA 64:6 ང་ཚོ་ཐམས་ཅད་མི་གཙང་བར་གྱུར་པ་དང་། ང་ཚོའི་དྲང་བདེན་ཐམས་ཅད་ནི་གྱོན་གོས་མི་གཙང་བ་དང་མཚུངས་ཤིང་། ང་ཚོ་ཚང་མ་ལོ་འདབ་བཞིན་སྐམ་སྟེ། ང་ཚོའི་ཉེས་པས་རླུང་ལྟར་ང་ཚོ་རྒྱང་རིང་དུ་འཁུར་ངེས།
ISA 64:7 ཁྱེད་ཀྱི་མཚན་ནས་འབོད་མཁན་མེད་ལ། ཧུར་ཐག་གིས་ཡར་ལངས་ནས་ཁྱེད་འཛིན་མཁན་ཡང་མེད། ང་ཚོའི་ཉེས་པའི་རྐྱེན་གྱིས་ཁྱེད་ཀྱི་ཞལ་རས་ངེད་ཕྱོགས་སྦས་ཏེ། ངེད་རྣམས་རང་གི་སྡིག་པའི་དབང་འོག་ཏུ་བསྐྱུར།
ISA 64:8 ཀྱེ་དཀོན་མཆོག་ཡ་ཝཱེ་ལགས། ད་ལྟ་ཁྱེད་ནི་སྔར་བཞིན་ང་ཚོའི་ཡབ་ཡིན། ང་ཚོ་འཇིམ་པ་དང་ཁྱེད་ནི་འཇིམ་པ་བཟོ་མཁན་ལགས་ཏེ། ང་ཚོ་ཚང་མ་ཁྱེད་ཀྱི་ཕྱག་གིས་བཟོས་པའོ། །
ISA 64:9 ཀྱེ་དཀོན་མཆོག་ཡ་ཝཱེ་ལགས། ཐུགས་རབ་ཏུ་ཁྲོ་བར་མི་བྱ་ཞིང་། རྟག་ཏུ་ཉེས་པ་དྲན་པར་མི་མཛད་རོགས། ང་ཚོ་ཚང་མ་ཁྱེད་ཀྱི་མི་སྡེ་ཡིན་པས་ཁྱེད་ཀྱིས་གཟིགས་པར་མཛོད།
ISA 64:10 ཁྱེད་ཀྱི་གྲོང་ཁྱེར་དམ་པ་རྣམས་དབེན་སྟོང་དུ་གྱུར་ཏོ། །ཐ་ན་ཛ་ཡན་དབེན་སྟོང་དུ་གྱུར་ཅིང་། ཡེ་རུ་སཱ་ལེམ་ནི་མི་མེད་ལུང་སྟོང་དུ་གྱུར།
ISA 64:11 ངེད་ཅག་གི་ཕ་མེས་རྣམས་ཀྱིས་ཁྱེད་ལ་བསྟོད་པ་འབུལ་སའི་ང་ཚོའི་མཛེས་ཤིང་སྡུག་པའི་མཆོད་ཁང་དམ་པ་དེ་མེ་ལ་བསྲེགས་ཤིང་། ང་ཚོ་དགའ་བ་ཐམས་ཅད་ཞིག་རལ་དུ་གྱུར།
ISA 64:12 ཀྱེ་དཀོན་མཆོག་ཡ་ཝཱེ་ལགས། དོན་འདི་དག་ཐམས་ཅད་ལ་ཁྱེད་ཀྱིས་བཟོད་པར་དགོངས་སམ། ཁྱེད་རང་མུ་མཐུད་དུ་ཞལ་རོག་བཞུགས་ནས་ང་ཚོར་ཤིན་ཏུ་འཚེ་བར་བྱའམ། །
ISA 65:1 བདག་ལ་མ་ཞུ་བ་རྣམས་ལ་བདག་གིས་རྙེད་པར་བྱ་ཞིང་། བདག་མ་བཙལ་བ་རྣམས་བདག་དང་འཕྲད་པར་འགྱུར། བདག་གི་མིང་ནས་བོས་མ་མྱོང་བའི་མི་རིགས་ལ་བདག་གིས་ང་འདི་རུ་ཡོད། ང་འདི་རུ་ཡོད་ཅེས་སྨྲ་ངེས།
ISA 65:2 བདག་གིས་ཉིན་གང་པོར་རང་གི་ལག་ཟུང་མི་སྡེ་གྱེན་ལྡོག་གི་ཕྱོགས་སུ་བརྐྱངས། དེ་ཚོ་རང་གི་བསམ་པའི་རྗེས་སུ་འབྲངས་ནས་ལམ་བཟང་པོར་མ་འགྲུལ་ཏོ། །
ISA 65:3 སྐྱེད་ཚལ་ཁྲོད་ནས་སྦྱིན་སྲེག་བཏང་ཞིང་། སོ་ཕག་གི་མཆོད་ཁྲིའི་སྟེང་མཆོད་པ་ཕུལ་ནས་འབངས་དེ་དག་གིས་རྒྱུན་དུ་ངའི་མདུན་ནས་བདག་ལ་ཁོང་ཁྲོ་བསླངས།
ISA 65:4 དེ་དག་དུར་ཁྲོད་དུ་བསྡད་ནས་གསང་བའི་ཡུལ་དུ་ཞག་སྡོད་བྱས་པ་དང་ཕག་ཤ་སྤྱད་ཅིང་། དེ་དག་གི་རྫ་ཁོག་ནང་དུ་མི་གཙང་བའི་རྫས་ཀྱིས་ཤ་ཁུ་བསྐོལ་བ་དང་།
ISA 65:5 ད་དུང་མི་ལ་ན་རེ། ང་རང་ཁྱོད་ལས་གཙང་མ་ཡིན་པས། རྒྱང་ནས་སྡོད་དང་ངའི་ཉེ་སར་མ་བཏུད་ཅིག་ཅེས་སྨྲའོ། །དཀོན་མཆོག་ཡ་ཝཱེས་འདི་སྐད་དུ། མི་འདི་དག་བདག་གི་སྣ་ཁུང་ནང་གི་དུ་བ་དང་། ཉིན་ཧྲིལ་བོར་འབར་བའི་མེ་དེ་ཡིན་ནོ། །
ISA 65:6 ལྟོས་དང་། དེ་ཐམས་ཅད་བདག་གི་མདུན་དུ་བྲིས་ཡོད་པས། ང་ཁ་རོག་མི་འདུག་པར་ལན་འཇལ་ཞིང་། དངོས་སུ་དེ་དག་གི་པང་དུ་ལན་འཇལ་ངེས་ཡིན།
ISA 65:7 ཁྱོད་ཅག་གི་ཉེས་པ་དང་ཁྱོད་ཅག་གི་ཕ་མེས་རྣམས་ཀྱི་ཉེས་པའི་ལན་ཡང་ལྷན་ཅིག་ཏུ་འཇལ་དགོས་ཞེས་དཀོན་མཆོག་ཡ་ཝཱེས་གསུངས། ཅིའི་ཕྱིར་ཞེ་ན། དེ་དག་གིས་རི་མགོ་དག་ནས་མཆོད་པ་ཕུལ་ཞིང་། སྤང་རིའི་སྟེང་དུ་བདག་ཁྱད་དུ་བསད་པས། དེ་དག་གིས་སྔར་ཅི་བྱས་པ་བཞིན་ངས་དེ་ཚོའི་པང་དུ་ལན་འཇལ་ངེས་ཡིན་ཞེས་གསུངས་སོ། །
ISA 65:8 དཀོན་མཆོག་ཡ་ཝཱེས་འདི་སྐད་དུ། མི་ཡིས་རྒུན་འབྲུམ་ཆུན་པོ་ལས་རྒུན་ཆང་འབྱུང་བ་མཐོང་ནས། དེའི་ནང་དུ་དགེ་མཚན་ཡོད་པས་མེད་བརླག་གཏོང་མི་རུང་ཞེས་སྨྲ་བ་ལྟར། བདག་གིས་ཀྱང་རང་གི་ཞབས་ཕྱི་རྣམས་ཀྱི་རྐྱེན་གྱིས་དེ་བཞིན་བྱ་སྟེ། དེ་དག་ཐམས་ཅད་མེད་པར་མི་གཏོང་ངོ་། །
ISA 65:9 བདག་གིས་ཡ་ཀོབ་ལས་བུ་རྒྱུད་ཅིག་བསྐྱེད་དེ། ཡ་ཧུ་དཱའི་ཁྲོད་ནས་བདག་གི་རི་བོ་རྣམས་ལ་བདག་པོ་བདམས་ནས་དེ་རྣམས་ལ་བདག་བྱེད་དུ་འཇུག་དགོས། བདག་གི་ཞབས་ཕྱི་རྣམས་གནས་དེ་རུ་སྡོད་པར་འགྱུར།
ISA 65:10 བདག་འཚོལ་མཁན་འབངས་རྣམས་ཀྱི་ཕྱིར་དུ། ཤཱ་རོན་ཐང་ནི་ལུག་ཁྱུ་འཚོ་སའི་རྩྭ་ཐང་དང་། ཨ་ཀོར་ལུང་པ་ནི་ཕྱུགས་ཁྱུའི་མལ་ས་རུ་འགྱུར།
ISA 65:11 དེ་ལྟར་ཡིན་ཡང་དཀོན་མཆོག་ཡ་ཝཱེ་སྤངས་ཤིང་། བདག་གི་རི་བོ་དམ་པ་བརྗེད་དེ། ལྷ་གལ་དཱིའི་ ཕྱིར་དུ་གསོལ་ལྕོག་བསྒྲིགས་ཤིང་ལྷ་མིའུ་ནེའི་ཕྱིར་དུ་རྒུན་ཆང་སྡེབ་མས་ཕོར་བ་བཀང་བར་བྱེད་མཁན་ཁྱོད་ཅག་ལ་མཚོན་ན།
ISA 65:12 བདག་གིས་ཁྱོད་ཅག་རལ་གྲིའི་ཁར་གཏོད་པར་བྱ་ཞིང་། ཁྱོད་ཅག་ཚང་མས་མགོ་བསྒུར་ཏེ་གསོད་པར་འགྱུར། གང་ལ་ཞེ་ན། བདག་གིས་ཁྱོད་བོས་ཀྱང་ཨ་ལན་མ་སྤྲད་ལ། བདག་གིས་གཏམ་སྨྲས་ནའང་ཁྱོད་ཀྱིས་མ་མཉན་པར། བདག་གི་མིག་ནང་ངན་པ་གང་ཡིན་དེ་སྤྱད་ནས་བདག་མི་དགའ་བའི་དོན་རྣམས་བདམས་པས་སོ་ཞེས་གསུངས་སོ། །
ISA 65:13 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་དང་། བདག་གི་ཞབས་ཕྱི་རྣམས་ཀྱིས་ཁ་ཟས་སྤྱོད་ཀྱང་ཁྱོད་ཅག་ལྟོགས་པར་འགྱུར། ལྟོས་དང་། བདག་གི་ཞབས་ཕྱི་རྣམས་ཀྱིས་བཏུང་ཡང་ཁྱོད་ཅག་སྐོམ་པས་གདུང་། ཡང་ལྟོས་དང་། བདག་གི་ཞབས་ཕྱི་རྣམས་དགའ་ཡང་ཁྱོད་ཅག་ངོ་ཚ་བར་འགྱུར།
ISA 65:14 ལྟོས་དང་། བདག་གི་ཞབས་ཕྱི་རྣམས་ཀྱིས་སེམས་སྤྲོ་སྟེ་དགའ་འབོད་བྱེད་ཀྱང་། ཁྱོད་རྣམས་ཀྱིས་ཞེ་སྡུག་ནས་ངུ་འབོད་བྱེད་ཅིང་། སེམས་སྐྱོ་ནས་སྨྲེ་སྔགས་འདོན།
ISA 65:15 བདག་གིས་བདམས་པའི་མི་རྣམས་ལ་ཁྱོད་ཅག་གིས་རང་གི་མིང་ནི་དམོད་མོ་གཏོང་ཕྱིར་བསྐྱུར་ནས་འགྲོའོ། །གཙོ་བོ་ཡ་ཝཱེས་ཁྱོད་རྣམས་འཆི་བར་མཛད་པ་དང་། ཁོང་གི་ཞབས་ཕྱི་རྣམས་ལ་མིང་གཞན་ཞིག་གསོལ་བར་འགྱུར།
ISA 65:16 དེ་བས་ས་ནས་སུ་ཞིག་གིས་རང་ལ་བྱིན་རླབས་ཞུས་ན། བདེན་པའི་དཀོན་མཆོག་ལ་བརྟེན་ནས་བྱིན་རླབས་ཞུ་དགོས་པ་དང་། ས་ནས་སུ་ཞིག་གིས་མནའ་བསྐྱལ་ན། བདེན་པའི་དཀོན་མཆོག་ལ་བརྟེན་ནས་མནའ་བསྐྱལ་དགོས། གང་ལ་ཞེ་ན། སྔར་གྱི་དཀའ་སྡུག་རྣམས་མི་ཡིས་བརྗེད་ཅིང་། བདག་གི་མིག་མདུན་ནས་ཀྱང་དེ་དག་སྦས་པར་གྱུར་པའོ། །
ISA 65:17 ལྟོས་དང་། བདག་གིས་ནམ་མཁའ་གསར་པ་དང་ས་གཞི་གསར་པ་བཀོད་དེ། སྔར་གྱི་དོན་རྣམས་དྲན་པར་མི་བྱ་ཞིང་། ཡིད་ལ་འཆར་བར་ཡང་མི་བྱ།
ISA 65:18 བདག་གིས་བཀོད་པ་དེའི་ཕྱིར་ཁྱོད་རྣམས་ནམ་ཡང་དགའ་བར་གྱུར་ཅིག གང་ལ་ཞེ་ན། བདག་གིས་ཡེ་རུ་སཱ་ལེམ་ནི་དགའ་སྤྲོ་དང་། དེའི་མི་རྣམས་བདེ་སྐྱིད་ལ་བཀོད་དོ། །
ISA 65:19 བདག་ནི་ཡེ་རུ་སཱ་ལེམ་གྱི་ཕྱིར་དུ་སྤྲོ་ཞིང་། བདག་གི་མི་སྡེའི་ཕྱིར་དུ་དགའ་བ་ཡིན་ཏེ། ངུ་སྒྲ་དང་སྡུག་བསྔལ་གྱི་སྨྲེ་སྔགས་ཙམ་ཡང་དེ་དག་ལས་ཐོས་པར་མི་འགྱུར་རོ། །
ISA 65:20 དེར་ཉིན་འགའི་ནང་འཆི་བའི་ཕྲུ་གུ་མེད་པ་དང་། ཚེ་ལོ་མཐར་མ་ཕྱིན་པའི་བགྲེས་པོ་ཡང་མེད། གང་ལ་ཞེ་ན། ལོ་བརྒྱ་ལོན་རྗེས་འཆི་བ་རྣམས་ད་དུང་གཞོན་པར་བརྩིས་པ་དང་། ལོ་བརྒྱ་མ་ལོན་པར་འཆི་བ་རྣམས་ནི་དམོད་མོ་ཐེབས་པར་བརྩིས་པ་ཡིན།
ISA 65:21 དེ་རྣམས་ཀྱིས་ཁང་པ་བཟོས་ནས་དེའི་ནང་དུ་སྡོད་ཅིང་། རྒུན་འབྲུམ་སྐྱེད་ཚལ་བཙུགས་ནས་དེའི་འབྲས་བུ་བཟའ་བར་འགྱུར།
ISA 65:22 བདག་གི་མི་སྡེ་ཡི་ཚེ་ནི་ལྗོན་ཤིང་བཞིན་དང་། བདག་གིས་བདམས་པའི་མི་རྣམས་ཀྱིས་རང་གི་ལག་པས་བཟོས་པ་དག་ལོངས་སུ་སྤྱོད་པས། དེ་དག་གིས་ཁང་པ་བཟོས་ནས་དེའི་ནང་དུ་གནས་པ་དང་། རྒུན་འབྲུམ་ར་བ་བཙུགས་ནས་དེའི་འབྲས་བུ་ལོངས་སུ་སྤྱོད་པར་བྱེད་དོ། །
ISA 65:23 དེ་དག་གིས་དོན་མེད་ཀྱི་ངལ་རྩོལ་མི་བྱེད་ཅིང་། དེ་དག་ལ་ཕྲུ་གུ་སྐྱེས་ཀྱང་འཆི་སྐྱོན་ཐེབས་པར་མི་འགྱུར། གང་ལ་ཞེ་ན། དེ་དག་ནི་རང་གི་བུ་རྒྱུད་དང་མཉམ་དུ་དཀོན་མཆོག་ཡ་ཝཱེས་བྱིན་རླབས་བསྩལ་ཡོད་པའི་རིགས་རྒྱུད་ཡིན།
ISA 65:24 དུས་དེར། ཁོ་ཚོས་མ་ཞུས་སྔོན་ལ་བདག་གིས་བཀའ་ལན་བསྩལ་ཞིང་། དེ་དག་གི་སྐད་ཆ་མཇུག་མ་རྫོགས་སྔོན་ལ་བདག་གིས་ཉན་ངེས་ཡིན།
ISA 65:25 སྤྱང་ཀི་དང་ལུ་གུ་གཉིས་མཉམ་དུ་འཚོ་ཞིང་། སེང་གེས་གླང་ལྟར་རྩྭ་བཟའ་བ་དང་། ས་རྡུལ་ནི་སྦྲུལ་གྱི་ཁ་ཟས་ཡིན། བདག་གི་རི་བོ་དམ་པའི་གནས་སོ་སོ་རུ་དེ་དག་གིས་གནོད་པ་དང་གཏོར་བཤིག་གཏོང་བར་མི་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
ISA 66:1 དཀོན་མཆོག་ཡ་ཝཱེས་འདི་སྐད་དུ། ནམ་མཁའ་ནི་བདག་གི་བཞུགས་ཁྲི་དང་། ས་གཞི་ནི་བདག་གི་ཞབས་སྟེགས་ཡིན་པས། ཁྱོད་ཀྱིས་བདག་ལ་ས་གང་ནས་ཁང་པ་ཞིག་བཞེང་ངམ། བདག་ངལ་གསོ་སའི་གནས་ནི་གང་ཞིག་ཡིན་ནམ་ཞེས་གསུངས།
ISA 66:2 དཀོན་མཆོག་ཡ་ཝཱེས་ཡང་འདི་སྐད་དུ། འདི་ཐམས་ཅད་བདག་གི་ལག་པས་བཀོད་པ་ཡིན་པས་འདི་ཐམས་ཅད་བྱུང་བ་ཡིན། འོན་ཀྱང་སེམས་སྡུག་ཅན་དང་ཁེངས་སྐྱུང་ཅན། བདག་གི་བཀའ་ཡི་ཕྱིར་འཇིགས་པའི་མི་ལ་ངས་བལྟ་བར་བྱ།
ISA 66:3 གླང་བསད་དེ་མཆོད་པར་ཕུལ་ནས་ཡང་མི་གསོད་པ་དང་། ལུ་གུ་མཆོད་པར་ཕུལ་ནས་ཡང་ཁྱིའི་སྐེ་གཅོག་པ། འབྲུ་མཆོད་ཕུལ་ནས་ཡང་ཕག་གི་ཁྲག་ཀྱང་འབུལ་བ། དྲན་གསོའི་སྤོས་དཀར་བདུག་ཅིང་སྐུ་འདྲ་སྟོང་བ་ལ་བསྟོད་པར་བྱེད་པ་དེ་དག་ནི་རང་གི་ལམ་ནང་འགྲུལ་ཞིང་། སེམས་སུ་རང་རང་སོ་སོའི་དོན་ཞེན་ལོག་རྣམས་ལ་དགའ་བ་ཡིན།
ISA 66:4 དེ་བས་བདག་གིས་ཀྱང་དེ་དག་ལ་སྡུག་བསྔལ་འབྱུང་བར་བྱས་ཏེ། ཁོ་ཚོ་གང་ལ་འཇིགས་པ་དེ་ཁོ་ཚོའི་སྟེང་དུ་འདྲེན་པར་བྱ། གང་ལ་ཞེ་ན། བདག་གིས་བོས་ཀྱང་ཨ་ལན་སྟེར་མཁན་མེད། བདག་གིས་གཏམ་བརྗོད་པའི་ཚེ་དེ་དག་གིས་མ་མཉན་པར། བདག་གི་མིག་ནང་ངན་པ་གང་ཡིན་དེ་སྤྱད་ནས་ང་མི་དགའ་བའི་དོན་རྣམས་བདམས་པའོ། །
ISA 66:5 དཀོན་མཆོག་ཡ་ཝཱེའི་གསུང་གི་ཕྱིར་དུ་འཇིགས་པ་ཁྱོད་རྣམས་ཀྱིས་ཁོང་གི་བཀའ་ལ་མཉན་ཞིང་། ངའི་མིང་གི་རྐྱེན་གྱིས་ཁྱོད་ཅག་བསྐྲད་པའི་རང་གི་སྤུན་ཟླ་ཚོ་ན་རེ། དཀོན་མཆོག་ཡ་ཝཱེར་གཟི་བརྗིད་འཐོབ་གྱུར་ཅིག ཁྱོད་ཚོའི་དགའ་སྤྲོ་ངེད་རྣམས་ལ་མཐོང་བར་གྱིས་ཞེས་སྨྲ་མཁན་དག་ངོ་ཚར་གཏོད་པར་འགྱུར།
ISA 66:6 གྲོང་ཁྱེར་ནས་འུར་སྒྲ་གྲགས་ཤིང་མཆོད་ཁང་ནས་སྒྲ་གྲགས་བྱུང་། དེ་ནི་དཀོན་མཆོག་ཡ་ཝཱེའི་གསུང་སྐད་ཀྱིས་རང་གི་དགྲ་རྣམས་ལ་ལན་འཇལ་བ་ཡིན།
ISA 66:7 མོ་ལ་གཟེར་མ་བརྒྱབ་སྔོན་དུ་ཕྲུ་གུ་སྐྱེས་པ་དང་། ཟུག་རྔུ་མ་ལངས་གོང་དུ་བུ་ཞིག་སྐྱེས།
ISA 66:8 དོན་འདི་ལྟ་བུ་སུ་ཞིག་གིས་ཐོས་མྱོང་ངམ། དོན་འདི་འདྲ་བ་སུ་ཞིག་གིས་མཐོང་མྱོང་ངམ། ཉིན་གཅིག་གི་ཡུན་ལ་མི་རིགས་ཤིག་ཆགས་ནུས་སམ། རྒྱལ་ཁབ་ཅིག་གི་མི་ནི་སྐད་ཅིག་ཙམ་ལ་འབྱུང་ཐུབ་བམ། ཡིན་ཡང་ཛ་ཡན་ལ་ཟུག་གཟེར་བྱུང་མ་ཐག་རང་གི་ཕྲུ་གུ་རྣམས་སྐྱེས་པ་ཡིན།
ISA 66:9 བདག་གིས་དེ་ལ་བུ་བཙའ་བར་བཅུག་ན་སྐྱེ་རུ་ཅི་ལ་མི་འཇུག་གམ་ཞེས་དཀོན་མཆོག་ཡ་ཝཱེས་གསུངས་ཤིང་། བདག་གིས་དེ་ལ་བུ་བཙའ་བར་བཅུག་ན་ཅིའི་ཕྱིར་དེ་ཡི་མངལ་སྒོ་བཅད་དེ་སྐྱེ་བར་མི་འཇུག་གམ་ཞེས་ཁྱོད་ཀྱི་དཀོན་མཆོག་གིས་གསུངས།
ISA 66:10 ཀྱེ་ཡེ་རུ་སཱ་ལེམ་ལ་དགའ་བ་ཁྱོད་རྣམས་མོ་དང་མཉམ་དུ་དགའ་ཞིང་སྤྲོ་བར་གྱུར་ཅིག དེ་ཡི་ཕྱིར་དུ་དགའ་བར་གྱིས། ཀྱེ་ཡེ་རུ་སཱ་ལེམ་གྱི་ཕྱིར་དུ་མྱ་ངན་ཞུ་མཁན་ཁྱོད་རྣམས་མོ་དང་ལྷན་ཅིག་རབ་ཏུ་དགའ་བར་གྱུར་ཅིག
ISA 66:11 དེ་ནི་ཁྱོད་རྣམས་ཀྱིས་མོའི་སེམས་གསོ་གནང་བའི་པང་ནས་ནུ་ཞོ་ཡིད་ཚིམ་པར་ནུ་བ་དང་། མོའི་ཕུན་སུམ་ཚོགས་པའི་གཟི་བརྗིད་ནང་དུ་འོ་མ་བཞོས་ནས་ཁྱོད་རྣམས་ཀྱིས་འཐུང་ཞིང་སྤྲོ་སྐྱིད་ལ་རོལ་བའི་ཕྱིར་རོ་ཞེས་གསུངས་སོ། །
ISA 66:12 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་ཞི་བདེ་ནི་གཙང་པོ་བཞིན་དུ་མོ་ཡོད་སར་སླེབ་ཏུ་འཇུག་ཅིང་། རྒྱལ་ཕྲན་ཁག་གི་རྒྱུ་ནོར་མཐའ་དག་བཞུར་རྒྱུན་འཕེལ་བ་བཞིན་དུ་མོ་ཡོད་སར་འདྲེན་ངེས་ཡིན། ཁྱོད་རྣམས་ཀྱིས་ནུ་ཞོ་ནུས་དང་། མོས་ཁྱོད་རྣམས་མཆན་ལ་བཙིར་ནས་པང་དུ་འཛིན་པར་བྱའོ། །
ISA 66:13 ཨ་མས་རང་གི་བུ་ལ་སེམས་གསོ་བྱེད་པ་ལྟར། བདག་གིས་ཁྱོད་ལ་སེམས་གསོ་བྱེད་ཅིང་། ཡེ་རུ་སཱ་ལེམ་ནས་ཁྱོད་ལ་སེམས་གསོ་འཐོབ་པར་འགྱུར།
ISA 66:14 ཁྱོད་རྣམས་ཀྱིས་དེ་མཐོང་ནས་སེམས་དགའ་ཞིང་། ཁྱོད་རྣམས་ཀྱི་རུས་པ་རྣམས་རྩྭ་སྔོན་བཞིན་རྒྱས་པར་འགྱུར། དཀོན་མཆོག་ཡ་ཝཱེའི་ཕྱག་ནི་ཉིད་ཀྱི་ཞབས་ཕྱི་རྣམས་ལ་མངོན་པར་མཛད་དེ། ཁོང་གི་དགྲ་རྣམས་ལ་ཐུགས་ཁྲོ་བར་འགྱུར་རོ། །
ISA 66:15 ལྟོས་དང་། དཀོན་མཆོག་ཡ་ཝཱེ་ནི་མེའི་ནང་ནས་འབྱོན་པར་བྱ་སྟེ། ཁོང་གི་ཤིང་རྟ་རླུང་འཚུབ་བཞིན་དང་ཁོང་གི་བཀའ་བཀྱོན་མེ་ལྕེ་བཞིན་དུ་འབར་ནས་ཕེབས་པར་འགྱུར།
ISA 66:16 གང་ལ་ཞེ་ན། དཀོན་མཆོག་ཡ་ཝཱེས་མེ་ལྕེ་དང་རལ་གྲིས་ལུས་ཅན་ཐམས་ཅད་ལ་ཉེས་ཆད་གཅོད་ཅིང་། དཀོན་མཆོག་ཡ་ཝཱེས་མི་མང་པོ་འཆི་ལམ་དུ་བརྫང་བར་འགྱུར་རོ། །
ISA 66:17 སྐྱེད་ཚལ་རྣམས་ཀྱི་ནང་དུ་འགྲོ་བར་རང་ཉིད་གཙང་མ་དང་དག་པར་བཟོས་ཏེ། གཅིག་རྗེས་གཉིས་མཐུད་ཀྱིས་ཕག་དང་བྱི་བའི་ཤ་དང་། ཞེན་ཁ་ལོག་པའི་རྫས་བཅས་ཟ་མཁན་ཐམས་ཅད་ལྷན་ཅིག་ཏུ་མེད་པར་འགྲོའོ་ཞེས་དཀོན་མཆོག་ཡ་ཝཱེས་གསུངས།
ISA 66:18 བདག་གིས་དེ་དག་གི་སྤྱོད་པ་དང་བསམ་བློ་རྟོགས་ཏེ། བདག་འོང་བ་ནི་རྒྱལ་ཕྲན་ཀུན་དང་མི་རིགས་ཐམས་ཅད་བསྡུ་བའི་ཕྱིར་ཡིན། དེ་དག་བདག་གི་གཟི་བརྗིད་ལ་བལྟ་རུ་འོང་བར་འགྱུར།
ISA 66:19 བདག་གིས་དེ་དག་གི་ཁྲོད་དུ་རྟགས་ཡ་མཚན་ཅན་བསྟན་ནས། ཁོ་ཚོའི་ནང་ནས་ཐར་བ་རྣམས་རྒྱལ་ཕྲན་ཀུན་ཏེ། ཐཱར་ཞིས་དང་ཕོལ། གཞུ་འཐེན་མཁན་གྱི་ལུ༌ཏི། ཐུ་བཱལ། ཡཱ་ཝན། བདག་གི་མིང་ཐོས་མེད་ལ་བདག་གི་གཟི་བརྗིད་ཀྱང་མཐོང་མེད་པའི་རྒྱང་རིང་གི་གླིང་ཕྲན་བཅས་ལ་གཏོང་བར་བྱ། དེ་དག་གིས་རྒྱལ་ཕྲན་ཀུན་ཏུ་བདག་གི་གཟི་བརྗིད་བསྒྲག་གོ །
ISA 66:20 ཡེས་ར་ཨེལ་པས་སྣོད་གཙང་མའི་ནང་དུ་དཀོན་མཆོག་ཡ་ཝཱེའི་མཆོད་ཁང་དུ་འབྲུ་མཆོད་འཁྱེར་ཡོང་བ་ནང་བཞིན། དེ་ཚོས་རྒྱལ་ཕྲན་ཀུན་ནས་རྟ་དང་། ཤིང་རྟ་དང་། ཁྱོགས་ཤིང་དང་། དྲེལ་དང་རྔ་མོང་སོགས་ཀྱིས་ཁྱོད་ཅག་གི་སྤུན་ཟླ་ཐམས་ཅད་བདག་གི་རི་དམ་པ་ཡེ་རུ་སཱ་ལེམ་དུ་འཁྲིད་འོང་ངོ་ཞེས་དཀོན་མཆོག་ཡ་ཝཱེས་གསུངས།
ISA 66:21 བདག་གིས་དེ་དག་གི་ཁྲོད་ནས་མི་འགའ་མཆོད་དཔོན་དང་ལེ་ཝི་པར་བསྐོ་བར་བྱའོ་ཞེས་དཀོན་མཆོག་ཡ་ཝཱེས་གསུངས།
ISA 66:22 དཀོན་མཆོག་ཡ་ཝཱེས་འདི་སྐད་དུ། བདག་གིས་བསྐྲུན་པའི་ནམ་མཁའ་གསར་པ་དང་ས་གཞི་གསར་པ་ནི་བདག་གི་མདུན་དུ་ཇི་ལྟར་གནས་པ་བཞིན། ཁྱོད་ཅག་གི་བུ་རྒྱུད་དང་མིང་གཉིས་ཀྱང་དེ་ལྟར་གནས་པར་འགྱུར།
ISA 66:23 མ་འོངས་པར་ཚེས་གཅིག་དང་ངལ་གསོ་བའི་ཉིན་མོ་གང་ཡིན་རུང་། མི་ཐམས་ཅད་བདག་གི་མདུན་དུ་འོངས་ཏེ་ཕྱག་འཚལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
ISA 66:24 དེ་ནས་དེ་ཚོ་ཕྱི་རོལ་ཏུ་སོང་ནས་བདག་ལ་གྱེན་ལོག་བྱས་པའི་མི་རྣམས་ཀྱི་རོ་ལ་བལྟ་བ་ཡིན། ཅིའི་ཕྱིར་ཞེ་ན། དེ་དག་གི་འབུ་སྲིན་མི་འཆི་ལ། དེ་དག་གི་མེ་ཡང་མི་ཞིའོ། །དེ་དག་མི་ཐམས་ཅད་སྡང་བའི་རྫས་སུ་འགྱུར་རོ་ཞེས་གསུངས་སོ།། །།
JER 1:1 འདི་དག་ནི་པེན་ཡཱ་མེན་ཡུལ་གྱི་ཨ་ན་ཐོད་གྲོང་ཁྱེར་གྱི་མཆོད་དཔོན་ཏེ། ཧིལ་གི་ཡཱའི་བུ་ཡེ་རེམ་ཡཱའི་གསུང་ཡིན་ནོ། །
JER 1:2 ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱས་རྒྱལ་སྲིད་སྐྱོང་བའི་ལོ་བཅུ་གསུམ་པར། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་སྟེ།
JER 1:3 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱིས་རྒྱལ་སྲིད་བསྐྱངས་པ་ནས། ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཚིད་ཀི་ཡཱ་ཡིས་རྒྱལ་སྲིད་སྐྱོང་བའི་དུས་མཇུག་སྟེ། ལོ་བཅུ་གཅིག་པའི་ཟླ་ལྔ་པའི་ནང་ཡེ་རུ་སཱ་ལེམ་གྱི་མི་རྣམས་བཙན་བཟུང་བྱས་པའི་སྐབས་སུ། དཀོན་མཆོག་ཡ་ཝཱེའི་བཀའ་ནི་རྒྱུན་དུ་ཡེ་རེམ་ཡཱ་ལ་བྱུང་ངོ་། །
JER 1:4 ཡེ་རེམ་ཡཱ་ན་རེ། དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་བ་འདི་ལྟ་སྟེ།
JER 1:5 བདག་གིས་ཁྱོད་མ་ཡི་མངལ་ནང་མ་བཀོད་སྔོན་དུ་ཁྱོད་རང་ངོ་ཤེས་པ་དང་། ཁྱོད་རང་མ་ཡི་མངལ་ལས་མ་ཐོན་སྔོན་དུ་བདག་གིས་ཁྱོད་དམ་པར་མཛད་ཅིང་། ཁྱོད་རང་མི་རིགས་རྣམས་ཀྱི་ལུང་སྟོན་པར་བསྐོས་པ་ཡིན་ཞེས་གསུངས།
JER 1:6 དེ་ནས་ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། གཟིགས་དང་། ང་ནི་ལོ་ན་ཕྲ་བས་གཏམ་ཅི་ལྟར་སྨྲ་བའང་མི་ཤེས་སོ་ཞེས་ཞུས་པ་ན།
JER 1:7 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ང་རང་ལོ་ན་ཕྲའོ་ཞེས་མ་བཤད་ཅིག ཅི་ལ་ཞེ་ན། བདག་གིས་ཁྱོད་སུ་དང་སུ་ཞིག་གི་གམ་དུ་མངགས་ཀྱང་ཁྱོད་དེར་འགྲོ་དགོས་ལ། བདག་གིས་ཁྱོད་ལ་བཀའ་བབས་ནས་ཅི་སྨྲ་བར་བཅུག་ན་ཁྱོད་ཀྱིས་དེ་བཞིན་སྨྲ་དགོས།
JER 1:8 ཁྱོད་དེ་རྣམས་ལ་མ་འཇིགས་ཤིག ཅི་ལ་ཞེ་ན། བདག་ཁྱོད་དང་མཉམ་དུ་ཡོད་པ་དང་ཁྱོད་སྐྱོབ་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 1:9 དེ་ནས་དཀོན་མཆོག་ཡ་ཝཱེས་ཕྱག་བརྐྱངས་ནས་ངའི་ཁ་ལ་རེག་སྟེ་ང་ལ་འདི་སྐད་དུ། ལྟོས་ཤིག བདག་གིས་རང་གི་གཏམ་ཁྱོད་ཀྱི་སྨྲ་སྒོར་བཞག་པ་ཡིན།
JER 1:10 དེ་རིང་བདག་གིས་ཁྱོད་ནི་མི་རིགས་དང་རྒྱལ་ཕྲན་ཐམས་ཅད་ཀྱི་མཐོ་སར་འགོད་པ་སྟེ། ཅི་ལ་ཞེ་ན། རྩ་ནས་འབལ་བ་དང་བཤིག་པ། རྩ་མེད་གཏོང་བ། ཕམ་པར་རྒྱག་པ་བཅས་དང་། ཡང་བསྐྱར་འཛུགས་པ་དང་འདེབས་པའི་ཕྱིར་ཡིན་ཞེས་གསུངས།
JER 1:11 ཡང་དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་བ་འདི་ལྟ་སྟེ། ཡེ་རེམ་ཡཱ་ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར། ངས་འདི་ལྟར། ངས་སྟར་སྡོང་གི་ཡལ་ག་ཞིག་མཐོང་བྱུང་ཞེས་ཞུས་པ་ལ།
JER 1:12 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་མཐོང་པ་ལེགས་ཏེ། བདག་གིས་རང་གི་གཏམ་གཟབ་གཟབ་ངང་བསྲུངས་ནས་དེ་འགྲུབ་པར་བྱེད་ངེས་ཡིན་ཞེས་གསུངས།
JER 1:13 ཡང་དཀོན་མཆོག་ཡ་ཝཱེའི་བཀའ་ཐེངས་གཉིས་པ་བདག་ལ་བྱུང་བ་འདི་ལྟ་སྟེ། ཡེ་རེམ་ཡཱ་ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར། ངས་བྱང་ནས་ལྷོ་རུ་བསེགས་པའི་སྣོད་ལས་ཆུ་ཁོལ་བ་མཐོང་བྱུང་ཞེས་ཞུས་པ་ལ།
JER 1:14 དཀོན་མཆོག་ཡ་ཝཱེས་ང་ལ་འདི་སྐད་དུ། བྱང་ཕྱོགས་ནས་ཆག་སྒོ་འབྱུང་ཞིང་ཡུལ་འདིའི་མི་ཐམས་ཅད་ཀྱི་སྟེང་ལ་འབབ་པར་འགྱུར།
JER 1:15 ལྟོས་ཤིག བདག་གིས་བྱང་ཕྱོགས་རྒྱལ་ཕྲན་རྣམས་ཀྱི་མི་ཐམས་ཅད་བསྡུ་བར་བྱེད་ཅིང་། དེ་རྣམས་འོངས་ནས་རེ་རེས་ཡེ་རུ་སཱ་ལེམ་གྱི་མཁར་སྒོ་རུ་རང་རང་གི་བཞུགས་ཁྲི་འགོད་པ་དང་། ཉེ་འཁོར་གྱི་མཁར་རྣམས་ལ་རྒོལ་ཞིང་། ཡང་ཡ་ཧུ་དཱའི་གྲོང་ཁྱེར་ཐམས་ཅད་ལ་རྒོལ་བར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 1:16 མི་འདི་རྣམས་ཀྱིས་བདག་དོར་ནས་ལྷ་གཞན་རྣམས་ལ་སྤོས་བདུགས་ཏེ། རང་གི་ལག་པས་བཟོས་པ་ལ་ཕྱག་བཙལ་ཏོ། །བདག་གིས་སྤྱོད་ངན་འདི་ཐམས་ཅད་ཀྱི་ཕྱིར་དུ་དེ་རྣམས་ལ་ངའི་ཉེས་ཆད་བསྒྲག་པར་འགྱུར་རོ། །
JER 1:17 དེ་བས། ཁྱོད་རྣམས་ཀྱིས་སྐ་རགས་ཆོངས་ལ་ཡར་ལོངས་དང་། བདག་གིས་ཁྱོད་ལ་བསྒོས་པའི་བཀའ་ཐམས་ཅད་དེ་དག་ལ་ཤོད་ཅིག བདག་གིས་ཁྱོད་ནི་དེ་དག་གི་མདུན་དུ་འཇིགས་པར་མི་བྱ་བའི་ཆེད་དུ། དེ་རྣམས་ཀྱི་དབང་གིས་ཁྱོད་མ་འཇིགས་ཤིག
JER 1:18 ལྟོས་དང་། བདག་གིས་དེ་རིང་ཁྱོད་ནི་མཁར་བརྟན་པོ་དང་ལྕགས་ཀྱི་ཀ་བ། ལི་ཡི་གྱང་བཅས་སུ་བྱས་ནས་ས་གཞི་ཡོངས་ཏེ་ཡ་ཧུ་དཱའི་རྒྱལ་པོ་དང་འགོ་དཔོན། མཆོད་དཔོན། ཡུལ་འདིའི་མི་ཐམས་ཅད་བཅས་ལ་འགོག་རྒོལ་བྱེད་དུ་འཇུག་གོ །
JER 1:19 དེ་དག་གིས་ཁྱོད་ལ་རྒོལ་ན་ཡང་ཁྱོད་ལས་རྒྱལ་མི་ཐུབ། ཅི་ལ་ཞེ་ན། བདག་ཁྱོད་དང་མཉམ་དུ་ཡོད་པ་དང་ཁྱོད་སྐྱོབ་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 2:1 དཀོན་མཆོག་ཡ་ཝཱེའི་བཀའ་བདག་ལ་བྱུང་བ་འདི་ལྟ་སྟེ།
JER 2:2 ཁྱོད་སོང་ལ་ཡེ་རུ་སཱ་ལེམ་གྱི་མི་རྣམས་ཀྱི་རྣ་ལམ་དུ་འདི་ལྟར་ཤོད་ཅིག དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ལོ་ན་གཞོན་པའི་བྱམས་བརྩེ་དང་། གཉེན་སྒྲིག་བྱས་མ་ཐག་གི་མཛའ་སེམས། དབེན་སྟོང་དང་ས་བོན་མ་གཏོར་བའི་ཡུལ་དུ་ཁྱོད་བདག་གི་རྗེས་སུ་ཇི་ལྟར་འབྲངས་པ་བཅས་ཐམས་ཅད་བདག་གིས་ཡིད་ལ་བཟུང་ཡོད་དེ།
JER 2:3 དུས་དེར་ཡེས་ར་ཨེལ་ནི་ཡ་ཝཱེའི་དྲུང་དུ་དམ་པ་དང་ཁོང་གི་འབྲས་བུ་ཐོག་མ་ཡིན་ཏེ། སུ་ཞིག་གིས་དེ་ཁྱུར་མིད་བཏང་ན་ཐམས་ཅད་སྡིག་ཅན་དུ་བརྩིས་ནས། དེ་དག་གི་སྟེང་དུ་ཆག་སྒོ་འབྱུང་བར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 2:4 ཀྱེ་ཡ་ཀོབ་ཀྱི་ཁྱིམ་རྒྱུད་དང་ཡེས་ར་ཨེལ་ཁྱིམ་རྒྱུད་ཀྱི་རིགས་རྒྱུད་སོ་སོས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 2:5 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་ཕ་མེས་རྣམས་ཀྱིས་བདག་ལས་ཉེས་སྐྱོན་གང་ཞིག་མཐོང་ནས། བདག་དང་རིང་དུ་གྱེས་ཏེ་རིན་ཐང་མེད་པའི་ལྷ་རྣམས་ཀྱི་རྗེས་སུ་འབྲངས་པ་དང་། རང་ཉིད་ཀྱང་རིན་ཐང་མེད་པར་གྱུར་པ་ཡིན་ནམ།
JER 2:6 ཡང་དེ་དག་གིས། ངེད་ཅག་ཨེ་ཅིབ་ཡུལ་ནས་ཡར་བཏོན་ཏེ། སུ་ཡང་འགྲོ་འདུག་མི་བྱེད་པའི་དབེན་སྟོང་དང་། བྱེ་ཐང་ས་དོང་ཅན་དང་སྐམ་སའི་སྨག་རུམ་ལས་ལམ་སྟོན་མཛད་པའི་དཀོན་མཆོག་ཡ་ཝཱེ་གང་དུ་བཞུགས་སམ་ཞེས་མ་དྲིས་སོ། །
JER 2:7 བདག་གིས་ཁྱོད་རྣམས་ས་བཅུད་འཛོམས་པའི་གནས་སུ་ཁྲིད་དེ། ཁྱོད་ཚོས་དེའི་ནང་གི་ཤིང་ཏོག་དང་ཟས་མཆོག་སྤྱོད་པར་བྱས་ནའང་། ཁྱོད་ཚོ་གནས་དེ་རུ་སླེབས་པ་ཙམ་གྱིས་བདག་གི་ཡུལ་ནི་མི་གཙང་བར་བཟོས་པ་དང་། བདག་གི་ནོར་སྐལ་ནི་ཞེན་ཁ་ལོག་པ་ཞིག་ཏུ་བཅོས་པ་ཡིན་ནོ། །
JER 2:8 མཆོད་དཔོན་རྣམས་ཀྱིས་ཀྱང་དཀོན་མཆོག་ཡ་ཝཱེ་གང་དུ་བཞུགས་སམ་ཞེས་མ་དྲིས་ལ། བཀའ་ཁྲིམས་ཀྱི་མཁན་པོ་རྣམས་ཀྱིས་བདག་ནི་ངོ་མི་ཤེས། འགོ་དཔོན་རྣམས་ཀྱིས་ཀྱང་བདག་ལ་ངོ་ལོག་བྱས་ཏེ། ལུང་སྟོན་པ་རྣམས་ཀྱིས་པཱ་ཨལ་ལ་བརྟེན་ནས་ལུང་བསྟན་ཞིང་སྙིང་པོ་མེད་པའི་འདྲ་སྐུ་དག་གི་རྗེས་སུ་འབྲངས་སོ་ཞེས་གསུངས་པའོ། །
JER 2:9 དེ་བས་བདག་གིས་ཁྱོད་རྣམས་དང་ཡང་བསྐྱར་རྩོད་དགོས་ཏེ། ཁྱོད་རྣམས་ཀྱི་བུ་རྒྱུད་རྣམས་ལའང་རྩོད་པར་བྱ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 2:10 ཁྱོད་རྣམས་ཕར་ཀི་ཐིམ་མཚོ་ཡི་གླིང་ཕྲན་དུ་སོང་ལ་ལྟོས་ཤིག ཡང་ཀེ་དཱར་དུ་མི་མངགས་ནས་གཟབ་གཟབ་ངང་ཞིབ་དཔྱོད་གྱིས་དང་། དོན་འདི་འདྲ་སྔར་བྱུང་ཡོད་མེད་ལ་ལྟོས་ཤིག
JER 2:11 མི་རིགས་གང་ཞིག་གིས་རང་གི་ལྷ་རྣམས་བརྗེས་པ་ཡིན་ནམ། དོན་དམ་དུ་དེ་དག་ནི་ལྷ་མ་ཡིན་ནོ། །ཡིན་ཡང་བདག་གི་མི་རྣམས་ཀྱིས་རང་གི་གཟི་བརྗིད་དེ་ཕན་ཐོགས་མེད་པའི་འདྲ་སྐུ་དང་བརྗེས་པའོ། །
JER 2:12 ཀྱེ་ནམ་མཁའི་དབྱིངས་རྣམས། འདིའི་ཕྱིར་ཧ་ལས་ཤིང་བླ་འདར་ནས་རབ་ཏུ་སྐྱོ་བར་གྱིས་ཤིག་ཅེས་དཀོན་མཆོག་ཡ་ཝཱེས་གསུངས་པའོ། །
JER 2:13 ཅི་ལ་ཞེ་ན། བདག་གི་མི་རྣམས་ཀྱིས་སྤྱོད་ངན་གཉིས་སྤྱད་དེ། ཚེ་སྲོག་དང་ལྡན་པའི་ཆུ་མིག་ ཡིན་པ་ང་རང་བསྐྱུར་ནས་རང་གི་དོན་དུ་ཆུ་དོང་བརྐོས་པ་དང་། ཆུ་དོང་དེ་ནི་ཞིག་རལ་དུ་སོང་ནས་ཆུ་མི་འཚོག་པའི་ཆུ་དོང་ཞིག་ཡིན་ནོ། །
JER 2:14 ཡེས་ར་ཨེལ་ནི་གཡོག་པོའམ་ཁྱིམ་ལས་སྐྱེས་པའི་བྲན་པོ་ཡིན་ནམ། ཁོ་བཅོམ་ནོར་དུ་གྱུར་པ་ཅི་ཡིན་ནམ།
JER 2:15 སེང་གེ་དར་མ་དག་གིས་དེ་ལ་ངར་སྐད་དང་ང་རོ་བསྒྲགས་ནས་དེའི་ཡུལ་འགུལ་དུ་བཅུག་པ་དང་། གྲོང་ཁྱེར་རྣམས་བཅོམ་སྟེ་མི་མེད་ལུང་སྟོང་དུ་ལུས་སོ། །
JER 2:16 ནོབ་པ་དང་ཐ་ཕན་ཧེ་སི་པ་རྣམས་ཀྱིས་ཁྱོད་ཀྱི་མགོ་བོ་གཅོག་པར་བྱེད་དེ།
JER 2:17 འདི་ནི་ཁྱོད་ཀྱིས་རང་སྡུག་རང་གིས་ཉོས་པ་མ་ཡིན་ནམ། ཁྱོད་ཀྱི་དཀོན་མཆོག་ཡ་ཝཱེས་ཁྱོད་ལ་ལམ་སྟོན་གནང་དུས་སུ་ཁྱོད་ཀྱིས་ཁོང་ཉིད་བསྐྱུར་བ་ཡིན།
JER 2:18 ད་ལྟ་ཁྱོད་ཀྱིས་ཅིའི་ཕྱིར་ཨེ་ཅིབ་ལ་སོང་ནས་སི་ཧོར་གྱི་ཆུ་འཐུང་བ་དང་། ཨ་སུར་ལ་ཕྱིན་ཏེ་ཕི་རཱད་གཙང་པོའི་ཆུ་འཐུང་བ་ཡིན་ནམ།
JER 2:19 ཁྱོད་ཀྱི་སྤྱོད་ངན་གྱི་ཕྱིར་ཁྱོད་ལ་ཉེས་ཆད་ཕོག་ཅིང་། ཁྱོད་ལོག་ལམ་དུ་ཞུགས་པས་ཁྱོད་ལ་བཀའ་བཀྱོན་ཐེབས་ངེས་ཡིན། ཁྱོད་ཀྱིས་རང་གི་དཀོན་མཆོག་ཡ་ཝཱེ་ང་རང་དོར་ཏེ། བདག་ལ་གུས་ཤིང་འཇིགས་པའི་སེམས་མེད་པ་ནི་དངོས་གནས་ངན་པ་དང་སྡུག་བསྔལ་ཡིན་པར་མནོ་བསམ་ཐོངས་ལ་ཤེས་པར་གྱིས་ཞེས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་གསུངས་སོ། །
JER 2:20 ཁྱོད་ཀྱིས་གནའ་བོའི་དུས་ནས་རང་གི་གཉའ་ཤིང་བཅག་སྟེ་རང་གི་འཆིང་ཐག་བཅད་ནས་ན་རེ། ངས་ཁྱེད་ལ་ཞབས་ཏོག་མི་བསྒྲུབ་ཅེས་སྨྲས་པ་ལྟར། ཁྱོད་ཀྱིས་རི་མཐོན་པོ་རེ་རེའི་སྟེང་དང་སྔོ་ལྗང་གི་ལྗོན་ཤིང་རེ་རེའི་འོག་ཏུ་སྨད་འཚོང་མ་བཞིན་དུ་ལོག་གཡེམ་སྤྱད་པའོ། །
JER 2:21 བདག་གིས་ཁྱོད་འཛུགས་དུས་སུ་རྒུན་ཤིང་མཆོག་ཏུ་གྱུར་པ་དང་ས་བོན་ཆེས་དག་མ་ཡིན་ནའང་། ཁྱོད་ནི་ང་ཡི་མདུན་དུ་རི་སྐྱེས་རྒུན་ཤིང་གི་ཡལ་ག་རུལ་བ་ལྟར་གྱུར་པ་ཅི་ཡིན་ནམ།
JER 2:22 ཁྱོད་ཀྱིས་བ་ཚྭ་དང་འདག་རྫས་ཀྱིས་གཙང་འཁྲུད་བྱས་ཀྱང་། ཁྱོད་ཀྱི་སྡིག་པའི་ཤུལ་ནི་ང་ཡི་མདུན་དུ་མངོན་པར་གྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 2:23 ཁྱོད་ཀྱིས་ང་ལ་སྐྱོན་ཅི་ཡང་མེད་དེ། པཱ་ཨལ་གྱི་རྗེས་སུ་ཡང་མ་འབྲངས་ཞེས་ཅི་ལྟར་སྨྲ་ནུས་སམ། ཁྱོད་ཀྱིས་ལུང་པའི་ནང་དུ་སྤྱད་པའི་སྤྱོད་པར་ལྟོས་ཤིག རང་ཉིད་ཀྱིས་གང་ཞིག་སྤྱད་པར་བསམ་བློ་ཐོངས་དང་། ཁྱོད་ནི་མྱུར་དུ་སྐྱོད་པའི་རྔ་མོང་དང་འདྲ་ཞིང་གང་སར་ཧར་རྒྱུག་བྱེད་དེ།
JER 2:24 ཁྱོད་ནི་རྐྱང་དང་འདྲ་སྟེ་དབེན་སྟོང་ལ་གོམས་པ་དང་། འདོད་ཆགས་ལང་དུས་རླུང་གི་དྲི་སྣོམ་ཞིང་། འཁྲིག་སྲེད་ལང་དུས་སུ་ཞིག་གིས་འགོག་ནུས་སམ། དེ་འཚོལ་མཁན་རྣམས་ཀྱིས་ཤུགས་རྒྱག་མི་དགོས་ཏེ། དུས་སུ་སླེབས་ན་དེ་རྙེད་པར་འགྱུར།
JER 2:25 ཁྱོད་རང་རྐང་རྗེན་དུ་ལུས་པ་དང་མིད་པ་སྐམ་པའི་བར་དུ་མ་འདུག་ཅིག ཡིན་ཡང་ཁྱོད་ན་རེ། ད་ནི་རེ་ཐག་ཆད་སོང་། ང་ནི་ལྷ་རྒྱུས་མེད་རྣམས་ལ་ཆགས་ནས་དེ་དག་གི་རྗེས་སུ་འགྲོ་དགོས་ཞེས་སྨྲས་སོ། །
JER 2:26 རྐུན་མ་བཟུང་དུས་ངོ་ཚ་བ་བཞིན་དུ། ཡེས་ར་ཨེལ་གྱི་ཁྱིམ་རྒྱུད་དང་དེ་དག་གི་རྒྱལ་པོ། འགོ་དཔོན། མཆོད་དཔོན། ལུང་སྟོན་པ་རྣམས་ཀྱང་དེ་བཞིན་ངོ་ཚ་བར་འགྱུར།
JER 2:27 དེ་དག་གིས་ཤིང་སྡོང་ལ་ཁྱོད་ནི་ངའི་ཕ་ཡིན་ཞེས་དང་། རྡོ་ལ་ཁྱོད་ཀྱིས་ང་བཙས་པ་ཡིན་ཞེས་སྨྲ་ཞིང་། དེ་དག་གིས་བདག་ལ་རྒྱབ་གཏད་ནས་ངའི་ཕྱོགས་སུ་མ་འཁོར། ཡིན་ནའང་དཀའ་སྡུག་ལ་འཕྲད་དུས་ཡར་བཞེངས་ནས་ངེད་རྣམས་སྐྱོབ་རོགས་ཞེས་ཞུ་བ་ཡིན།
JER 2:28 ཁྱོད་ཀྱིས་རང་གི་དོན་དུ་བཟོས་པའི་ལྷ་རྣམས་གང་དུ་ཡོད་དམ། ཁྱོད་རང་དཀའ་སྡུག་ལ་འཕྲད་དུས་དེ་དག་ལ་ཁྱོད་སྐྱོབ་ཏུ་ཆུག་དང་། ཅི་ལ་ཞེ་ན། ཀྱེ་ཧོ་ཡ་ཧུ་དཱ། ཁྱོད་ལ་གྲོང་ཁྱེར་ག་ཚད་ཡོད་ན་ཁྱོད་ཀྱི་ལྷ་རྣམས་ཀྱང་དེ་བཞིན་མང་བའོ། །
JER 2:29 ཁྱོད་རྣམས་ཀྱིས་ཅིའི་ཕྱིར་བདག་དང་རྩོད་དམ། ཁྱོད་རྣམས་ཐམས་ཅད་བདག་དང་འགལ་བའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 2:30 བདག་གིས་ཁྱོད་ཀྱི་བུ་རྣམས་ལ་བརྡུངས་ནའང་དོན་མེད་ཡིན་ཏེ། དེ་དག་གིས་བསླབ་བྱ་དང་དུ་མ་བླངས། ཁྱོད་ཅག་གི་རལ་གྲིས་ལུང་སྟོན་པ་རྣམས་བསད་པ་ནི་མི་སྲོག་ལེན་པའི་སེང་གེ་བཞིན་ཡིན་ནོ། །
JER 2:31 ཀྱེ་དུས་རབས་འདི་ཡི་མི་རྣམས། ཁྱོད་ཚོས་དཀོན་མཆོག་ཡ་ཝཱེའི་གསུང་ལ་གཟབ་གཟབ་བྱས་ནས་ཉོན་དང་། ཡེས་ར་ཨེལ་ལ་མཚོན་ན་བདག་ནི་དབེན་སྟོང་དང་མུན་ནག་གི་ཁམས་སུ་གྱུར་པ་ཡིན་ནམ། ངའི་མི་རྣམས་ཀྱིས་ངེད་རྣམས་ལ་རང་དབང་ཐོབ་པས་ད་ནི་ཁྱེད་ཀྱི་དྲུང་དུ་མི་འོང་ཞེས་སྨྲ་བ་ཅི་ཡིན་ནམ།
JER 2:32 ན་ཆུང་མས་རང་གི་རྒྱན་ཆ་བརྗེད་ནུས་སམ། བག་མས་རང་གི་བག་གོས་བརྗེད་ནུས་སམ། ཡིན་ནའང་ངའི་མི་རྣམས་ཀྱིས་ཉིན་ཞག་གྲངས་མེད་དུ་ང་རང་བརྗེད་དོ། །
JER 2:33 ཁྱོད་ནི་དགའ་གྲོགས་འཚོལ་བའི་ཐབས་ལམ་ལ་འདི་ལྟར་མཁས་ཏེ། ཐ་ན་བུད་མེད་ངན་པ་ལའང་ཁྱོད་ཀྱིས་རང་གི་ཐབས་ལམ་བསླབས་སོ། །
JER 2:34 ཁྱོད་ཀྱི་གྱོན་པའི་ཐུ་བའི་སྟེང་དུ་དབུལ་པོ་ཉེས་མེད་ཀྱི་ཁྲག་ཡོད་ལ། དེ་དག་གིས་ས་ཁུང་བརྐོས་ནས་ནང་ལ་འཛུལ་ཏེ་རྐུ་བྱེད་པ་ཁྱོད་ཀྱིས་མ་མཐོང་། དེ་ལྟར་ཡིན་ནའང་།
JER 2:35 ཁྱོད་ཀྱིས་ད་དུང་ན་རེ། ང་ལ་ཉེས་པ་མེད་དེ། དཀོན་མཆོག་ཡ་ཝཱེ་ང་ལ་ཐུགས་ཁྲོས་མེད་ཅེས་ཟེར། ལྟོས་ཤིག བདག་གིས་ཁྱོད་ལ་ཉེས་ཆད་གཅོད་པར་བྱ་སྟེ། ཅི་ལ་ཞེ་ན། ཁྱོད་ཀྱིས་ངས་སྡིག་པ་མ་བྱས་ཟེར་བའི་རྐྱེན་གྱིས་སོ། །
JER 2:36 ཁྱོད་ཅིའི་ཕྱིར་ཡར་རྒྱུག་མར་རྒྱུག་བྱས་ཏེ་རང་གི་བགྲོད་ལམ་བསྒྱུར་བ་ཡིན་ནམ། སྔར་ཨ་སུར་ནས་ཁྱོད་སྐྱེངས་པར་གྱུར་པ་ལྟར། ཁྱོད་ཨེ་ཅིབ་ནས་ཀྱང་སྐྱེང་བར་འགྱུར།
JER 2:37 ཡང་ཁྱོད་ཀྱིས་ལག་པ་གཉིས་ཀས་མགོ་བསྐྱོར་ནས་ཨེ་ཅིབ་ཡུལ་དང་འབྲལ་བར་འགྱུར། ཅི་ལ་ཞེ་ན། དཀོན་མཆོག་ཡ་ཝཱེས་ཁྱོད་ཀྱི་བརྟེན་ས་དེ་དོར་བས། དེ་དག་ལ་བརྟེན་ནས་ཁྱོད་ཀྱི་དོན་མི་འགྲུབ།
JER 3:1 གལ་ཏེ་མི་ཞིག་གིས་ཆུང་མ་དོར་ནས་ཆུང་མ་དེ་ཁོ་དང་བྲལ་ཏེ་མི་གཞན་པའི་ཆུང་མ་བྱས་པ་ཡིན་ན། སྐྱེས་པ་དེ་སླར་ཡང་མོའི་གམ་དུ་འགྲོ་ནུས་སམ། གནས་དེ་རྩ་བ་ནས་བཙོག་པར་གྱུར་པ་མ་ཡིན་ནམ། ཁྱོད་ནི་དགའ་རོགས་མང་པོ་དང་ལོག་གཡེམ་སྤྱད་ཅིང་ད་ནི་བདག་གི་གམ་དུ་ལོག་འདོད་དམ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 3:2 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་མགོ་ཡར་བཀྱགས་ནས་སྐྱ་ཐེར་ཐེར་གྱི་མཐོ་སྒང་རྣམས་ལ་ལྟོས་ཤིག གནས་གང་དུ་ཁྱོད་ཀྱི་གཡེམ་སྦྱོར་མེད་དམ། ཁྱོད་ལམ་ཁར་བསྡད་དེ་དགའ་རོགས་ལ་སྒུག་པའི་ཚུལ་ནི། ཨ་རབ་པ་ཞིག་དབེན་སྟོང་དུ་འཇབ་པ་དང་འདྲ་སྟེ། ཁྱོད་ཀྱི་གཡེམ་སྦྱོར་དང་མ་རུངས་པས་ས་གཞི་ཐམས་ཅད་བཙོག་པར་བཟོས།
JER 3:3 དེ་བས་དཔྱིད་ཆར་འབབ་མཚམས་བཞག་ཅིང་སྟོན་ཁའི་ཆར་བའང་མི་འབབ་པར་གྱུར་ཡང་། ཁྱོད་ཀྱི་གདོང་ནི་ད་དུང་སྨད་འཚོང་མའི་གདོང་བཞིན་ངོ་ཚ་དང་བྲལ་ཏོ། །
JER 3:4 ཁྱོད་ཀྱིས་ད་ལྟ་བདག་ལ་ཞུས་ནས་ན་རེ། ཀྱེ་ང་ཡི་ཡབ་ལགས། ཁྱེད་ནི་ངའི་ལོ་ན་གཞོན་དུས་ཀྱི་མཛའ་གྲོགས་ཡིན།
JER 3:5 དཀོན་མཆོག་ཡ་ཝཱེ་ཇི་སྲིད་བར་དུ་ཐུགས་ཁྲོས་ནས་ཡུན་རིང་པོར་ཁྲོ་གཏུམ་འབར་ག་ལ་སྲིད་ཅེས་པའོ། །ལྟོས་ཤིག ཁྱོད་ཀྱིས་འདི་ལྟར་སྨྲས་ཀྱང་ད་དུང་ནུས་ཤུགས་ཅི་ཡོད་བཏོན་ནས་སྤྱོད་ངན་སྤྱད་པ་ཡིན་ཞེས་གསུངས་སོ། །
JER 3:6 ཡོ་ཤི་ཡཱས་རྒྱལ་སྲིད་སྐྱོང་དུས་སུ་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ལོག་ལམ་དུ་ཞུགས་པའི་ཡེས་ར་ཨེལ་གྱི་སྤྱོད་པ་མཐོང་ངམ། དེ་ནི་རི་མཐོན་པོ་རེ་རེར་སོང་སྟེ། སྔོ་ལྗང་གི་ལྗོན་ཤིང་རེ་རེའི་འོག་ཏུ་ལོག་གཡེམ་སྤྱད་པའོ། །
JER 3:7 ངས་དེ་ཡིས་སྤྱོད་པ་འདི་ཐམས་ཅད་སྤྱད་རྗེས་སླར་ཡང་བདག་གི་ཕྱོགས་སུ་འཁོར་ཡོང་སྙམ་ནའང་དེ་ཕྱིར་མ་འོང་སྟེ། དེའི་སྲིང་མོ་གཡོ་སྒྱུ་ཅན་ཡ་ཧུ་དཱས་ཀྱང་མཐོང་བ་ཡིན།
JER 3:8 ལོག་ལམ་དུ་ཞུགས་པའི་ཡེས་ར་ཨེལ་གྱིས་ལོག་གཡེམ་སྣ་ཚོགས་སྤྱད་པས་བདག་གིས་དེར་བཟའ་འཐོར་ཡི་གེ་སྤྲད་ནས་དོར་བ་ཡིན་མོད། འོན་ཀྱང་དེའི་སྲིང་མོ་གཡོ་སྒྱུ་ཅན་ཡ་ཧུ་དཱ་ནི་ད་དུང་མི་སྐྲག་པར་དེས་ཀྱང་ལོག་གཡེམ་སྤྱད།
JER 3:9 ཡེས་ར་ཨེལ་གྱིས་ལོག་གཡེམ་སྤྱོད་པ་སྣང་མེད་དུ་བཏང་ཞིང་རྡོ་དང་ཤིང་ལ་ལོག་གཡེམ་སྤྱད་ནས་ས་འདི་ཡོངས་སུ་བཙོག་པར་བྱས།
JER 3:10 དོན་འདི་ཐམས་ཅད་ཡོད་ཀྱང་། དེའི་སྲིང་མོ་གཡོ་སྒྱུ་ཅན་ཡ་ཧུ་དཱ་ནི་ང་ཡི་ཕྱོགས་སུ་ལོག་ཁུལ་བྱས་པ་ལས་སེམས་གཅིག་ལུས་གཅིག་མ་ཡིན་ནོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 3:11 དཀོན་མཆོག་ཡ་ཝཱེས་ང་ལ་འདི་སྐད་དུ། གཡོ་སྒྱུ་ཅན་གྱི་ཡ་ཧུ་དཱ་ལས་ལོག་ལམ་དུ་ཞུགས་པའི་ཡེས་ར་ཨེལ་ནི་དྲང་པོར་མངོན་ཞིང་།
JER 3:12 ཁྱོད་ནི་བྱང་ཕྱོགས་སུ་སོང་ནས་འདི་ལྟར། ཀྱེ་ལོག་ལམ་དུ་ཞུགས་པའི་ཡེས་ར་ཨེལ་ལགས། ཕྱིར་ལོག་དང་ཞེས་སྨྲོས་ཤིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །བདག་ནི་བྱམས་སྙིང་རྗེ་ཅན་ཡིན་པས་ངས་ཁྱོད་ཚོར་སྡང་མིག་གིས་མི་བལྟ་ཞེས་དཀོན་མཆོག་ཡ་ཝཱེས་གསུངས་པའོ། །བདག་ནི་ཇི་སྲིད་བར་དུ་ཁྲོ་བར་མི་བྱ་སྟེ།
JER 3:13 ཁྱོད་ཀྱིས་རང་གི་དཀོན་མཆོག་ཡ་ཝཱེ་དང་འགལ་ཏེ། སྔོ་ལྗང་གི་ལྗོན་ཤིང་རེ་རེའི་འོག་ཏུ་ཕྱི་ཕྱོགས་པའི་ལྷ་རྣམས་ཀྱི་རྗེས་སུ་འབྲངས་ནས་བདག་གི་བཀའ་ལ་མ་མཉན་པའི་སྡིག་པ་ཁས་ལོངས་ཤིག་ཅེས་དཀོན་མཆོག་ཡ་ཝཱེས་གསུངས་པའོ། །
JER 3:14 ལོག་ལམ་དུ་ཞུགས་པའི་བུ་རྣམས་ཕྱིར་ལོག་ཅིག་ཅེས་དཀོན་མཆོག་ཡ་ཝཱེས་གསུངས། ཅི་ལ་ཞེ་ན། བདག་ནི་ཁྱོད་རྣམས་ཀྱི་ཁྱོ་ག་ཡིན་ལ། ངས་ཁྱོད་རྣམས་གྲོང་ཁྱེར་གཅིག་ནས་མི་གཅིག་རེ་དང་། རིགས་རྒྱུད་གཅིག་ནས་མི་གཉིས་རེ་བླངས་ཏེ་ཛ་ཡན་དུ་འཁྲིད་རྒྱུ་ཡིན།
JER 3:15 ངས་རང་གི་བློར་འབབ་པའི་རྫི་བོ་ཁྱོད་རྣམས་ལ་གནང་སྟེ། དེ་དག་གིས་ཤེས་བྱ་དང་ཤེས་རབ་ཀྱིས་ཁྱོད་རྣམས་སྐྱོང་བར་འགྱུར།
JER 3:16 ཁྱོད་རྣམས་ནི་ཡུལ་དེ་རུ་དར་ཞིང་རྒྱས་པའི་ཉིན་དེ་དག་ལ། མི་ཡིས་སླར་ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཞེས་གླེང་བར་མི་འགྱུར་ལ། དེར་དོ་སྣང་མི་བྱེད། དེ་ཡིད་ལ་མི་དྲན། དེ་དགོས་འདོད་ཀྱང་མི་སྐྱེ། དེ་སླར་བཟོ་བར་ཡང་མི་བྱ་ཞེས་དཀོན་མཆོག་ཡ་ཝཱེས་གསུངས་པའོ། །
JER 3:17 དུས་དེར། མི་ཡིས་ཡེ་རུ་སཱ་ལེམ་ལ་དཀོན་མཆོག་ཡ་ཝཱེའི་བཞུགས་ཁྲི་ཞེས་འབོད་ཅིང་། མི་རིགས་ཐམས་ཅད་དེ་རུ་འདུ་བ་དང་། དཀོན་མཆོག་ཡ་ཝཱེའི་མཚན་གྱི་ཕྱིར་ཡེ་རུ་སཱ་ལེམ་དུ་འོང་ཞིང་། ཁོ་རྣམས་ཡང་བསྐྱར་རང་གི་སེམས་ངན་གཤིས་གྱོང་གི་རྗེས་སུ་མི་འབྲང་ངོ་། །
JER 3:18 དུས་དེར། ཡ་ཧུ་དཱའི་ཁྱིམ་རྒྱུད་དང་ཡེས་ར་ཨེལ་གྱི་ཁྱིམ་རྒྱུད་གཉིས་ལྷན་ཅིག་ཏུ་འགྲུལ་ཞིང་། བྱང་ཕྱོགས་ནས་མཉམ་དུ་བདག་གིས་ཁྱོད་ཚོའི་མེས་པོ་རྣམས་ལ་ནོར་སྐལ་དུ་གནང་བའི་ཡུལ་དུ་འོང་བར་འགྱུར།
JER 3:19 བདག་གིས་ཁྱོད་ནི་རང་གི་བུ་དང་བུ་མོར་བརྩིས་ཤིང་ཁྱོད་ལ་ཡིད་དུ་འོང་བའི་ཡུལ་ཞིག་གནང་བ་སྟེ། ཡུལ་དེ་ནི་མི་རིགས་རྣམས་ལས་ཆེས་ལེགས་པའི་ནོར་སྐལ་ཡིན་ལ། ཁྱོད་ཀྱིས་བདག་ལ་ངའི་ཡབ་ཅེས་བོས་ནས་སླར་ཡང་བདག་དང་མི་འབྲལ་བར་ང་ཡི་རྗེས་སུ་འབྲང་ངེས་ཡིན་སྙམ་ནའང་།
JER 3:20 ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ཁྱོད་ཚོས་བདག་གི་ཕྱོགས་སུ་གཡོ་སྒྱུ་ཚད་པ་དེ་ནི། ཆུང་མ་ཞིག་གིས་གཡོ་སྒྱུ་ཚད་ནས་རང་གི་ཁྱོ་གར་བྲལ་བ་དང་མཚུངས་ཞེས་དཀོན་མཆོན་ཡ་ཝཱེས་གསུངས་པའོ། །
JER 3:21 སྐྱ་ཐེར་ཐེར་གྱི་མཐོ་སྒང་ནས་སྐད་སྒྲ་ཞིག་བྱུང་བ་སྟེ། དེ་ནི་ཡེས་ར་ཨེལ་པ་རྣམས་ངུས་ནས་ནན་ཞུ་བྱེད་པའི་སྐད་སྒྲ་ཡིན་ལ། ཅི་ལ་ཞེ་ན། དེ་རྣམས་ལོག་ལམ་དུ་རྒྱུ་བ་སྟེ་རང་གི་དཀོན་མཆོག་ཡ་ཝཱེ་བརྗེད་པས་ཡིན་ནོ། །
JER 3:22 ལོག་ལམ་དུ་ཞུགས་པའི་བུ་རྣམས་ཕྱིར་ཤོག་དང་། བདག་གིས་ཁྱོད་ཚོ་ལོག་ལམ་དུ་ཞུགས་པའི་ནད་གསོ་བར་བྱ། གཟིགས་དང་ངེད་རྣམས་ཁྱེད་ཀྱི་དྲུང་དུ་འོང་བར་བྱ་སྟེ། ཅི་ལ་ཞེ་ན། ཁྱེད་ནི་ངེད་རྣམས་ཀྱི་དཀོན་མཆོག་ཡ་ཝཱེ་ཡིན་པས་སོ། །
JER 3:23 རི་སྒང་དང་རི་བོ་རྣམས་ཀྱི་འུར་སྒྲ་ལས་སྐྱབས་འཚོལ་བ་ནི་དོན་མེད་ཡིན་ལ། ཡེས་ར་ཨེལ་གྱི་ཐར་པ་ནི་དངོས་གནས་ང་ཚོའི་དཀོན་མཆོག་ཡ་ཝཱེ་ལ་ཐུག་ཡོད་དོ། །
JER 3:24 ངེད་རྣམས་ལོ་ན་གཞོན་པའི་དུས་ནས་ད་ལྟའི་བར་དུ། རང་ཅག་གི་མེས་པོས་ངལ་རྩོལ་བྱས་ནས་ཐོབ་པ་དང་། ཁོང་རྣམས་ཀྱི་ར་ལུག་དང་བ་གླང་གི་ཁྱུ། བུ་དང་བུ་མོ་བཅས་ཐམས་ཅད་ལྷ་ཁྲེལ་མེད་དག་གིས་མེད་པར་བཟོས།
JER 3:25 རང་ཅག་དང་རང་ཅག་གི་མེས་པོ་རྣམས་ཀྱིས་ང་ཚོའི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། རང་ཅག་གིས་ལོ་ན་གཞོན་པའི་དུས་ནས་ད་ལྟའི་བར་དུ་ང་ཚོའི་དཀོན་མཆོག་ཡ་ཝཱེའི་གསུང་ལ་མ་མཉན་པས་ན། རང་ཅག་ངོ་ཚའི་ནང་དུ་ཉལ་ནས་ཡོངས་སུ་ངོ་གནོང་བར་གྱུར་ཅིག
JER 4:1 དཀོན་མཆོག་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ། གལ་ཏེ་ཁྱོད་ཕྱིར་ལོག་ན་བདག་གི་ཕྱོགས་སུ་ལོག་དགོས་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །བདག་གི་མིག་མདུན་ནས་ཁྱོད་ཀྱི་ཞེན་ཁ་ལོག་པའི་སྐུ་འདྲ་མེད་པར་བཟོས་ཏེ་ལོག་ལམ་དུ་མི་འགྲོ་ཞིང་།
JER 4:2 བདེན་པ་དང་དྲང་གཞག དྲང་བདེན་བཅས་ལ་བརྟེན་ནས། གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་ན། མི་རིགས་ཐམས་ཅད་ལ་ཁོང་ནས་བྱིན་རླབས་འཐོབ་ཅིང་། ཁོང་གི་རྐྱེན་གྱིས་གཟི་བརྗིད་འཐོབ་པར་འགྱུར་ཞེས་གསུངས་སོ། །
JER 4:3 དཀོན་མཆོག་ཡ་ཝཱེས་ཡ་ཧུ་དཱ་པ་དང་ཡེ་རུ་སཱ་ལེམ་གྱི་མི་རྣམས་ལ་འདི་སྐད་དུ། ཁྱོད་ཚོས་རང་ཉིད་ཀྱི་ཆེད་དུ་ས་རྒོད་བཏོད་དགོས་ཤིང་། ས་བོན་ཚེར་མའི་གསེང་དུ་མ་འདེབས་ཤིག
JER 4:4 ཡ་ཧུ་དཱ་དང་ཡེ་རུ་སཱ་ལེམ་གྱི་མི་རྣམས། ཁྱོད་ཚོས་དཀོན་མཆོག་ཡ་ཝཱེའི་ཕྱིར་རང་གི་མཚན་སྐྱི་གཅོད་དགོས་ཏེ། སེམས་ནང་གི་མི་གཙང་བ་རྣམས་མེད་པར་བཟོས་ཤིག དེ་ལྟར་མིན་ཚེ། ཁྱོད་ཚོའི་ངན་སྤྱོད་ཀྱི་རྐྱེན་གྱིས་བདག་གི་ཁོང་ཁྲོ་མེ་ལྟར་འབར་ཞིང་། མི་སུས་ཀྱང་དེ་ཞི་བར་བྱེད་མི་ནུས་ཞེས་གསུངས་སོ། །
JER 4:5 ཁྱོད་རྣམས་ཀྱིས་ཡ་ཧུ་དཱ་རུ་སྒྲོགས་ལ་ཡེ་རུ་སཱ་ལེམ་དུ་ཁྱབ་བསྒྲགས་བྱས་ཏེ་ན་རེ། ཡུལ་ཁམས་ཀྱི་ནང་དུ་རྭ་དུང་བུས་ཤིག སྐད་ཆེན་པོས་འདི་ལྟར། རང་ཅག་མཁར་བརྟན་པོ་རྣམས་སུ་འགྲོ་བའི་ཆེད་དུ་ཕྱོགས་གཅིག་ཏུ་འདུས་ཤིག་ཅེས་སྨྲ་བར་གྱིས།
JER 4:6 ཡང་ཛ་ཡན་གྱི་ཕྱོགས་སུ་དར་ཆེན་བསྒྲེངས་ནས་ཕྲོས་ཤིག བདག་གིས་ཆག་སྒོ་དང་འཇིགས་པ་ཆེན་པོ་བྱང་ཕྱོགས་ནས་སླེབ་ཏུ་འཇུག་རྒྱུ་ཡིན་པས་དུས་འགྱངས་མ་བྱེད་ཅིག
JER 4:7 སེང་གེ་ནི་ནགས་ཚལ་སྟུག་པོ་ནས་ཡར་ཐོན་ཞིང་དེ་ནི་ཡུལ་ཁམས་རྣམས་མེད་པར་བཟོ་མཁན་ཡིན་ལ། དེ་རང་གནས་དང་བྲལ་ནས་ཡོང་བཞིན་པ་དང་ཁྱོད་ཀྱི་ཡུལ་སྟོངས་སུ་འཇུག་ལ། ཁྱོད་ཀྱི་གྲོང་ཁྱེར་དག་རྡུལ་དུ་བརླགས་ནས་མི་གཅིག་ཀྱང་ལུས་པར་མི་བྱའོ། །
JER 4:8 དེ་བས་ཁྱོད་རྣམས་ཀྱིས་རྐེད་པར་རྩིད་རས་གཡོགས་ལ་ངུ་འབོད་བྱོས་དང་། ཅི་ལ་ཞེ་ན། དཀོན་མཆོག་ཡ་ཝཱེའི་ཐུགས་ཁྲོ་ནི་རང་ཅག་དང་མ་བྲལ་བའི་ཕྱིར་རོ། །
JER 4:9 དཀོན་མཆོག་ཡ་ཝཱེས་འདི་སྐད་དུ། དུས་དེར། རྒྱལ་པོ་དང་འགོ་དཔོན་དག་གི་སེམས་དཔའ་ཞུམ་པར་འགྱུར་ལ། མཆོད་དཔོན་དག་ཧ་ལས་ཤིང་ལུང་སྟོན་པ་རྣམས་ཀྱང་ངོ་མཚར་བར་འགྱུར་ཞེས་གསུངས།
JER 4:10 དེ་ནས་ངས་འདི་ལྟར། ཅི་འདྲའི་སྐྱོ་བ་ལ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་མི་འདི་རྣམས་དང་ཡེ་རུ་སཱ་ལེམ་ལ་མགོ་སྐོར་ཆེན་པོ་བཏང་སྟེ་འདི་སྐད་དུ། ཁྱོད་རྣམས་བདེ་བར་འགྱུར་ཞེས་གསུངས་མོད། དོན་དམ་དུ་སྲོག་གི་སྟེང་ལ་རལ་གྲི་བབས་ཡོད་ཅེས་ཞུས་པ་ཡིན།
JER 4:11 དེའི་ཚེ་མི་འདི་རྣམས་དང་ཡེ་རུ་སཱ་ལེམ་ལ་འདི་སྐད་གསུང་བར་འགྱུར། དབེན་སྟོང་གི་སྐྱ་ཐེར་ཐེར་གྱི་མཐོ་སྒང་ལས་ཚ་རླུང་བདག་གི་མི་རྣམས་ཀྱི་བུ་མོའི་ཕྱོགས་སུ་གཡུགས་འོང་སྟེ། སྙིགས་མ་ཡར་ཕྱར་བའི་དོན་དུ་མ་ཡིན་ལ་གཙང་མར་བཟོ་བའི་དོན་དུའང་མ་ཡིན་ནོ། །
JER 4:12 ཡང་དེ་ལས་ཆེ་བའི་རླུང་ནི་བདག་གི་ཕྱོགས་སུ་གཡུགས་འོང་སྟེ། ད་ལྟ་བདག་གིས་ཁྲིམས་གཅོད་བསྒྲགས་ནས་དེ་དག་ལ་རྒོལ་བར་བྱའོ་ཟེར།
JER 4:13 ལྟོས་ཤིག དེ་ནི་སྤྲིན་བཞིན་དུ་ཡར་རྒྱས་ཤིང་། དེའི་ཤིང་རྟ་ནི་རླུང་འཚུབ་དང་འདྲ། དེའི་རྟ་རྣམས་ནི་གླག་ལས་ཀྱང་མགྱོགས་པས། ངེད་ཅག་ལ་ཆག་སྒོ་འབྱུང་ཞིང་ངེད་རྣམས་ཉམས་པར་གྱུར།
JER 4:14 ཀྱེ་ཡེ་རུ་སཱ་ལེམ་ལགས། ཁྱོད་ལ་ཐར་པ་འཐོབ་ཕྱིར་ཁྱོད་ཀྱིས་རང་སེམས་ཀྱི་ངན་པ་དེ་ཁྲུས་ཤིག ངན་སེམས་ཁྱོད་ཀྱི་ནང་དུ་དུས་ག་ཚོད་ལ་འདུག་གམ།
JER 4:15 སྒྲ་ཞིག་དཱན་ལས་གྲགས་འོང་ཞིང་། ཆག་སྒོ་ཨེ་ཕཱར་ཡིམ་གྱི་རི་ནས་ཀུན་ལ་བསྒྲག་འོང་།
JER 4:16 ཁྱོད་རྣམས་ཀྱིས་མི་རིགས་ཐམས་ཅད་ལ་བསྒྲགས་ནས་ཡེ་རུ་སཱ་ལེམ་ལ་འདི་ལྟར། འགོག་རྒོལ་བྱེད་པའི་མི་ནི་རྒྱང་རིང་ནས་ཡོང་སྟེ་ཡ་ཧུ་དཱའི་གྲོང་ཁྱེར་ལ་ངར་སྐད་སྒྲོག་པ་དང་།
JER 4:17 དེ་དག་གིས་ས་ཞིང་སྲུང་མཁན་དང་འདྲ་བར་ཡེ་རུ་སཱ་ལེམ་ཕྱོགས་བཞི་ནས་བསྐོར་བ་ཡིན། ཅི་ལ་ཞེ་ན། དེས་བདག་ལ་རྒྱབ་འགལ་བྱས་པ་ཡིན་ཞེས་ཤོད་ཅིག་ཅེས་དཀོན་མཆོག་ཡ་ཝཱེས་གསུངས་སོ། །
JER 4:18 ཁྱོད་ཀྱི་ཅི་བྱས་དང་སྤྱོད་ཚུལ་གྱིས་དོན་འདི་དག་བྱུང་དུ་བཅུག་ལ། འདི་ནི་ཁྱོད་ཀྱི་སྡིག་པའི་མཇུག་འབྲས་ཡིན་ཏེ། དངོས་གནས་སྡུག་བསྔལ་ཆེ་ཞིང་ཁྱོད་ཀྱི་སེམས་ལ་ཕོག་གོ །
JER 4:19 ཀྱེ་ང་ཡི་སེམས། ང་ཡི་སེམས་ལགས། ངའི་སེམས་ཤིན་ཏུ་སྐྱོ་སྟེ། ངའི་སེམས་ངའི་ནང་དུ་འཚབ་ནས་མི་བདེ་ཞིང་། ང་ཁ་རོག་སྡོད་མི་ནུས་ཏེ། ཅི་ལ་ཞེ་ན། ངས་རྭ་དུང་གི་སྐད་དང་དམག་འཐབ་པའི་སྒྲ་ཐོས་པ་ཡིན།
JER 4:20 ས་གཞི་ཡོངས་སུ་གཏོར་བརླག་ཐེབས་པས་མེད་པར་བཟོ་བའི་བརྡ་ནི་བསྟུད་མར་ཐོས་ཡོང་ཞིང་། བདག་གི་གུར་ཡང་གློ་བུར་རྩ་མེད་བཏང་བ་དང་། བདག་གི་ཡོལ་བ་གཤགས་པར་གྱུར།
JER 4:21 བདག་གིས་དར་ཆེན་མཐོང་ནས་རྭ་དུང་གི་སྐད་ཐོས་ཏེ་ནམ་ཞིག་གི་བར་དུ་སླེབ་བམ།
JER 4:22 དཀོན་མཆོག་ཡ་ཝཱེས་འདི་སྐད་དུ། བདག་གི་མི་རྣམས་ནི་གླེན་ཞིང་ཨུ་ཚུགས་ཆེ་ལ་ང་རང་ངོ་མི་ཤེས་ཏེ། དེ་དག་ནི་བླུན་རྨོངས་གོ་མེད་ཅན་གྱི་བུ་ཡིན་ཞིང་། ངན་པ་སྤྱོད་པར་ཤེས་རབ་ལྡན་ཞིང་། བཟང་པོ་སྤྱོད་པར་ཤེས་བྱ་མེད་དོ་ཞེས་གསུངས་སོ། །
JER 4:23 ངས་ས་གཞིར་བལྟས་པ་དང་། ཀྱེ་ཧོ། ས་གཞི་ནི་སྟོངས་ཤིང་གོ་རིམ་མེད་པ་དང་། ངས་ནམ་མཁར་བལྟས་པ་ལ། ནམ་མཁའ་ཡང་འོད་དང་བྲལ།
JER 4:24 ངས་རི་བོ་རྣམས་ལ་བལྟས་པ་དང་། ཀྱེ་ཧོ། དེ་དག་འདར་ཞིང་རི་སྒང་ཐམས་ཅད་ཀྱང་རབ་ཏུ་གཡོ་བཞིན་འདུག
JER 4:25 ངས་བལྟས་པ་ན། ཀྱེ་ཧོ། མི་གཅིག་ཀྱང་མི་འདུག ནམ་མཁའི་བྱ་ཐམས་ཅད་ཀྱང་ཡིབ་ནས་འདུག
JER 4:26 ངས་བལྟས་པ་ན། ཀྱེ་ཧོ། ས་ཞིང་གཤིན་པོ་དེ་དབེན་སྟོང་དུ་གྱུར་ཅིང་། གྲོང་ཁྱེར་ཐམས་ཅད་ནི་དཀོན་མཆོག་ཡ་ཝཱེ་ཐུགས་ཁྲོས་པས་ན་ཁོང་གི་དྲུང་དུ་མེད་པར་བཟོས་པའོ། །
JER 4:27 དཀོན་མཆོག་ཡ་ཝཱེས་འདི་སྐད་དུ། ཡུལ་ཁམས་ཐམས་ཅད་སྟོངས་པར་འགྱུར་ངེས། ཡིན་ཡང་བདག་གིས་ཐམས་ཅད་རྩ་མེད་དུ་མི་གཏོང་།
JER 4:28 དེ་བས། ས་གཞིས་མྱ་ངན་བྱེད་པ་དང་། ནམ་མཁའ་ལ་ཡང་མུན་ནག་འཐིབ་པར་འགྱུར། ཅི་ལ་ཞེ་ན། བདག་ནི་ཅི་ཞིག་སྨྲས་པར་འགྱོད་པ་མེད་ལ། སེམས་ཐག་བཅད་པས་ནམ་ཡང་འགྱུར་བ་མེད་ཅེས་གསུངས་པས་སོ། །
JER 4:29 གྲོང་ཁྱེར་སོ་སོའི་མི་རྣམས་ནི་རྟ་དམག་དང་མདའ་པ་རྣམས་ཀྱི་ཀི་སྒྲའི་རྐྱེན་གྱིས་གང་སར་འབྲོ་བ་སྟེ། ནགས་ཚལ་སྟུག་པོའི་ནང་དུ་འཛུལ་ནས་བྲག་ལ་འཛེགས་པ་དང་། གྲོང་ཁྱེར་རྣམས་ཀྱང་སྤངས་ནས་དེ་རུ་སྡོད་མཁན་གཅིག་ཀྱང་མེད།
JER 4:30 ཀྱེ་རྡུལ་དུ་བརླག་པར་འགྱུར་བ་ཁྱོད་ཀྱིས་ཅི་བྱེད་དམ། ཁྱོད་ཀྱིས་གོས་རྒྱ་ཚོས་ཅན་གྱོན་ཞིང་གསེར་གྱི་རྒྱན་ཆ་བཏགས་ནས། མིག་རྩི་བསྐུས་ཏེ་མིག་མཛེས་པར་བྱེད་པ་དང་། རང་ཉིད་ཡག་པར་རློམ་ནའང་ངལ་བ་དོན་མེད་ཡིན་ཏེ། ཁྱོད་ལ་ཡིད་སྨོན་བྱེད་མཁན་གྱིས་ཁྱོད་ལ་མཐོང་ཆུང་བྱས་ནས་ཁྱོད་ཀྱི་སྲོག་འཚོལ་བའོ། །
JER 4:31 བདག་གིས་བུད་མེད་ཅིག་ལ་གཟེར་རྒྱག་པའི་སྐད་ལྟ་བུ་དང་། ཕྲུ་གུ་སྐྱེས་འགོ་བཙའ་བའི་འཁུན་སྒྲ་ལྟ་བུ་ཞིག་ཐོས་བྱུང་། དེ་ནི་ཛ་ཡན་གྱི་བུ་མོའི་སྐད་ཡིན་ལ། མོས་དབུགས་རིང་འཐེན་ཏེ་ལག་པ་བརྐྱངས་ནས། ང་ལ་ཆག་སྒོ་འབྱུང་། མི་གསོད་རྣམས་ཀྱི་མདུན་དུ་ངའི་སེམས་ཀྱི་དྲན་པ་ཉམས་སོང་ཞེས་ཟེར་གྱིན་འདུག
JER 5:1 ཁྱོད་རྣམས་ཡེ་རུ་སཱ་ལེམ་གྱི་སྲང་ལམ་རེ་རེར་སོང་ནས། གྲོང་ཁྱེར་དེའི་ཐང་ཆེན་དུ་མི་སུ་ཞིག་གིས་དྲང་པོར་སྤྱོད་པ་དང་། སུ་ཞིག་གིས་དྲང་བདེན་བསྙེག་པ་འཚོལ་ཞིག གལ་ཏེ་ཡོད་ན། བདག་གིས་གྲོང་ཁྱེར་དེ་གུ་ཡངས་སུ་གཏོང་བར་བྱ།
JER 5:2 དེ་དག་གིས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་ན་ཡང་མནའ་དེ་ནི་དངོས་གནས་རྫུན་ཡིན།
JER 5:3 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱི་སྤྱན་གྱིས་དྲང་བདེན་འཚོལ་བ་མ་ཡིན་ནམ། ཁྱེད་ཀྱིས་དེ་རྣམས་ལ་བརྡུངས་ནའང་དེ་དག་སེམས་མ་སྡུག་ལ། ཁྱེད་ཀྱིས་དེ་དག་རྩ་མེད་དུ་བཏང་ནའང་དེ་དག་གིས་ད་དུང་ཁྱེད་ཀྱི་བསླབ་བྱ་དང་དུ་མ་བླངས། དེ་དག་གིས་རང་གི་ངོ་གདོང་ཕ་བོང་ལས་ཀྱང་མཁྲེགས་པར་བྱས་ནས་ཕྱིར་མི་འཁོར་བ་ཡིན་ནོ། །
JER 5:4 བདག་གིས་མི་འདི་དག་ནི་དངོས་གནས་དབུལ་ཞིང་བླུན་རྨོངས་ཡིན་པ་སྟེ། ཅི་ལ་ཞེ་ན། དེ་དག་གིས་དཀོན་མཆོག་ཡ་ཝཱེའི་ཕེབས་ལམ་མི་རྟོགས་པ་དང་། ཁོ་ཚོའི་དཀོན་མཆོག་གི་ཁྲིམས་སྲོལ་ཡང་མི་ཤེས་སོ། །
JER 5:5 ང་རང་མི་ཆེན་རྣམས་དང་འཕྲད་དུ་སོང་ནས་ཁོ་རྣམས་ལ་གཏམ་བཤད་དགོས་ཏེ། ཁོ་རྣམས་ཀྱིས་དཀོན་མཆོག་ཡ་ཝཱེའི་ཕེབས་ལམ་དང་ཁོ་ཚོའི་དཀོན་མཆོག་གི་ཁྲིམས་སྲོལ་ཤེས་པ་ཡིན་ཞེས་སྨྲས་ནའང་། མི་འདི་རྣམས་ཀྱིས་མཉམ་དུ་གཉའ་ཤིང་བཅག་སྟེ་འཆིང་ཐག་བཅད་པ་ཡིན།
JER 5:6 དེ་བས་ནགས་ཚལ་གྱི་སེང་གེས་ཁོ་རྣམས་གསོད་པར་འགྱུར་ལ། ཐང་རྒོད་ཀྱི་འཕར་སྤྱང་གིས་ཁོ་རྣམས་མེད་པར་བཟོ་ངེས། གཟིག་གིས་མཁར་སྒོ་རུ་དེ་རྣམས་ལ་འཇབ་སྒུག་བྱེད་པ་དང་། མཁར་སྒོ་ནས་ཕྱིར་འབུད་པ་ཐམས་ཅད་གཤགས་པར་འགྱུར། ཅི་ལ་ཞེ་ན། དེ་ཚོའི་ཉེས་སྐྱོན་ཧ་ཅང་མང་ཞིང་ལོག་ལམ་དུ་ཞུགས་པའི་དོན་ཡང་བགྲང་ལས་འདས་པས་སོ། །
JER 5:7 བདག་གིས་ཁྱོད་ལ་གུ་ཡངས་ཅི་ལྟར་གཏོང་ངམ། ཁྱོད་ཀྱི་བུ་རྣམས་ཀྱིས་ང་རང་བསྐྱུར་ནས། དཀོན་མཆོག་མིན་པ་དེ་དཔང་དུ་བཙུགས་ནས་མནའ་བསྐྱལ་བ་དང་། བདག་གིས་ཁོ་རྣམས་འགྲང་བར་བྱས་ནའང་དེ་དག་གིས་ལོག་གཡེམ་སྤྱད་ནས་སྨད་འཚོང་མའི་ཁྱིམ་དུ་འཚང་པའོ། །
JER 5:8 དེ་དག་ནི་ལེགས་པར་གསོས་པའི་རྟ་དང་འདྲ་སྟེ། འདོད་ཆགས་རྒྱས་ཏེ་ཁྱིམ་མཚེས་ཀྱི་ཆུང་མའི་ཕྱོགས་སུ་འཚེར་བའོ། །
JER 5:9 བདག་གིས་དོན་འདི་རྣམས་ཀྱི་ཕྱིར་ཉེས་ཆད་མི་གཅོད་དམ། མི་རིགས་འདི་ལྟ་བུ་ལ་བདག་གིས་ལན་མི་བསློག་གམ་ཞེས་དཀོན་མཆོག་ཡ་ཝཱེས་འདི་སྐད་གསུངས།
JER 5:10 ཁྱོད་རྣམས་ཡར་སོང་ནས་དེའི་རྒུན་ཚལ་རྣམས་གཏོར་བར་གྱིས་ཤིག ཡིན་ཡང་རྩ་བ་ནས་མེད་པར་མི་བཟོ་བར་དེའི་ཡལ་ག་ཆོད་ཅིག ཅི་ལ་ཞེ་ན། དེ་ནི་དཀོན་མཆོག་ཡ་ཝཱེ་ལ་མི་གཏོགས་པས་སོ། །
JER 5:11 ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ཀྱིས་བདག་ལ་གཡོ་སྒྱུ་ཚད་པ་ཡིན་ཞེས་དཀོན་མཆོག་ཡ་ཝཱེས་གསུངས་སོ། །
JER 5:12 དེ་དག་གིས་དཀོན་མཆོག་ཡ་ཝཱེ་ཁས་མི་ལེན་པར་ན་རེ། ཁོང་གིས་ཅི་ཡང་མཛད་པར་མི་འགྱུར་ཏེ། ཆག་སྒོ་ང་ཚོའི་སྟེང་ལ་ལྷུང་མི་སྲིད། ང་ཚོས་རལ་གྲི་དང་མུ་གེ་ཡང་མཐོང་བར་མི་འགྱུར།
JER 5:13 ལུང་སྟོན་པ་རྣམས་ནི་རླུང་ཙམ་ཡིན་པ་དང་དེ་དག་གི་ནང་དུ་བཀའ་ཡང་མེད་ལ། ཁོ་ཚོས་ཅི་སྨྲས་པ་དེ་རང་གི་སྟེང་དུ་འབབ་ངེས་ཡིན་ཞེས་སྨྲས།
JER 5:14 དེ་བས་དཔུང་ཚོགས་ཀྱི་དཀོན་མཆོག་ཡ་ཝཱེས་འདི་སྐད་དུ། དེ་དག་གིས་ཚིག་འདི་སྨྲས་པའི་རྐྱེན་གྱིས། ལྟོས་ཤིག བདག་གིས་རང་གི་བཀའ་ནི་ཁྱོད་ཀྱི་ངག་ཏུ་མེ་ལྟར་བྱེད་ཅིང་། འབངས་མི་ནི་ཤིང་ལྟར་བྱས་ནས་མེ་དེས་ཁོ་རྣམས་ཁྱུར་མིད་གཏོང་བར་འགྱུར་རོ། །
JER 5:15 ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། བདག་གིས་མི་སྡེ་གཞན་ཞིག་རྒྱང་རིང་ནས་ཡོང་སྟེ་ཁྱོད་ལ་རྒོལ་བར་བྱེད་ངེས་ཡིན་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །མི་སྡེ་དེ་ནི་གནའ་ནས་གནས་པ་དང་། གནའ་བོའི་མི་སྡེ་ཞིག་ཡིན་ལ། ཁོ་ཚོའི་སྐད་རིགས་ཁྱོད་ཚོས་མི་ཤེས་ལ། སྨྲ་བའི་སྐད་ཆ་ཡང་ཁྱོད་ཚོས་རྟོགས་པར་མི་འགྱུར།
JER 5:16 དེ་དག་གི་མདའ་དོང་ནི་ཁ་ཕྱེས་པའི་དུར་ཁུང་དང་འདྲ་ཞིང་། དེ་རྣམས་ཐམས་ཅད་དཔའ་བོ་ཡིན།
JER 5:17 དེ་དག་གིས་ཁྱོད་ཚོའི་ལོ་ཏོག་དང་འབྲུ་རིགས་རྣམས་ཁྱུར་མིད་གཏོང་ཞིང་། ཁྱོད་ཀྱི་བུ་དང་བུ་མོ་རྣམས་དང་། ཁྱོད་ཚོའི་ར་ལུག་དང་བ་གླང་གི་ཁྱུ། ཁྱོད་ཚོའི་རྒུན་འབྲུམ་དང་སེ་ཡབ་ཀྱི་ཤིང་རྣམས་ཀྱང་ཁྱུར་མིད་གཏོང་བ་ཡིན། ཁྱོད་ཅག་བརྟེན་སའི་མཁར་བརྟན་པོ་རྣམས་ཀྱང་རལ་གྲིས་འཇོམས་པར་འགྱུར།
JER 5:18 ཐ་ན་དུས་དེ་ལ་ཡང་། བདག་གིས་ཁྱོད་རྣམས་རྩ་མེད་དུ་མི་གཏོང་ཞེས་དཀོན་མཆོག་ཡ་ཝཱེས་གསུངས།
JER 5:19 གལ་ཏེ་མ་འོངས་པ་ན་འདི་ལྟར། བདག་ཅག་གི་དཀོན་མཆོག་ཡ་ཝཱེས་ཅིའི་ཕྱིར་རང་ཅག་ལ་དོན་འདི་རྣམས་མཛད་པ་ཡིན་ནམ་ཞེས་ཟེར་མཁན་བྱུང་ན། ཁྱོད་ཀྱིས་ཁོ་ཚོར་འདི་ལྟར། ཁྱོད་ཚོས་ཇི་ལྟར་ང་རང་དོར་ནས་རང་གི་ཡུལ་འདིར་ཕྱི་རོལ་པའི་ལྷ་རྣམས་ལ་ཞབས་ཕྱི་བསྒྲུབས་པ་ཡིན་ན། ཁྱོད་ཅག་གིས་དེ་ལྟར་རང་ལ་མི་དབང་བའི་གནས་སུ་ཕྱི་རོལ་པ་རྣམས་ལ་གཡོག་བྱེད་པར་འགྱུར་ཞེས་ཤོད་ཅིག་ཅེས་གསུངས་སོ། །
JER 5:20 ཁྱོད་རྣམས་ཀྱིས་ཡ་ཀོབ་ཀྱི་ཁྱིམ་རྒྱུད་ལ་དོན་འདི་བསྒྲགས་ནས་ཡ་ཧུ་དཱ་རུ་འདི་ལྟར་སྒྲོགས་ཤིག
JER 5:21 ཀྱེ་གླེན་ཞིང་གོ་བ་མེད་པའི་མི་རྣམས། ཁྱོད་ཚོར་མིག་ཡོད་ཀྱང་མི་མཐོང་ལ། རྣ་བ་ཡོད་ཀྱང་མི་ཐོས། ཡིན་ཡང་ད་ལྟ་གཏམ་འདི་ལ་ཉོན་ཅིག
JER 5:22 ཁྱོད་ཚོ་བདག་ལའང་མི་འཇིགས་སམ། ཁྱོད་རྣམས་བདག་གི་མདུན་དུ་མི་འདར་རམ་ཞེས་དཀོན་མཆོག་ཡ་ཝཱེས་གསུངས། བདག་གིས་དུས་གཏན་གྱི་ཁྲིམས་སྲོལ་དུ་རྒྱ་མཚོའི་ས་མཚམས་སུ་བྱེ་མ་བཞག་སྟེ། ནམ་ཡང་དེ་ལས་བརྒལ་མི་རུང་བ་དང་། རྦ་རླབས་འཕྱུར་ཡང་དེ་ལས་རྒྱལ་མི་ནུས་ལ། མཚོ་རླབས་ལང་ལོང་དུ་འཕྱུར་ཡང་དེ་ལས་བརྒལ་ཐབས་མེད་དོ། །
JER 5:23 ཡིན་ནའང་མི་འདི་དག་ནི་གཤིས་གྱོང་ངོ་ལོག་གི་སེམས་དང་བཅས་བདག་དང་བྲལ་ནས་སོང་།
JER 5:24 དེ་དག་གི་སེམས་སུ་བདག་ཅག་གིས་རང་རེའི་དཀོན་མཆོག་ཡ་ཝཱེ་ལ་གུས་ཤིང་འཇིགས་པར་བྱེད་འོས་ཏེ། ཁོང་གིས་དུས་བཞིན་ཆར་བ་གནང་སྟེ། དེ་ནི་སྟོན་དཔྱིད་གཉིས་ཀྱི་ཆར་བ་ཡིན། ཡང་རང་ཅག་གི་དོན་དུ་སྟོན་ཐོག་བསྡུ་བའི་དུས་ཚིགས་གཏན་ལ་ཕབ་པ་ཡིན་ཞེས་མི་དྲན་ནོ། །
JER 5:25 ཁྱོད་ཚོའི་ཉེས་སྐྱོན་གྱིས་འདི་རྣམས་ཁྱོད་ཚོ་དང་འབྲལ་བར་བྱས་ཤིང་། ཁྱོད་ཚོའི་སྡིག་པ་ཡིས་ཁྱོད་ཚོའི་བདེ་སྐྱིད་ཕྲོགས་པ་ཡིན།
JER 5:26 བདག་གི་འབངས་མིའི་ཁྲོད་དུ་ངན་པ་ཡོད་ལ། དེ་དག་བྱ་འཛིན་མཁན་ལྟར་ལྐོག་ཏུ་འཇབ་ནས་ལྟ་ཞིབ་བྱེད་པ་དང་། དྲ་རྒྱ་བཙུགས་ནས་མི་རྣམས་འཛིན་པ་ཡིན།
JER 5:27 བྱ་གཟེབ་ནང་དུ་བྱ་བྱེའུ་ཡིས་བཀང་པ་ལྟར། དེ་དག་གི་ཁང་པར་ཡང་གཡོ་སྒྱུས་བཀང་པས་ཁོ་རྣམས་འབྱོར་བ་རྒྱས་ཤིང་སྟོབས་ཅན་དུ་གྱུར།
JER 5:28 དེ་རྣམས་ལུས་སྟོབས་རྒྱས་ཤིང་ངན་སྤྱོད་ཚད་མེད་སྤྱད་པ་དང་། མི་ཡི་ཆེད་དུ་དཀར་མི་འདོན་ལ། དྭ་ཕྲུག་གི་ཆེད་དུ་དཀར་བཏོན་ནས་དེ་དག་གྱོད་ལས་རྒྱལ་བར་མ་བཅུག་ཅིང་། དབུལ་པོའི་ཆེད་དུ་དག་འབུད་ཀྱང་མ་བྱས་སོ། །
JER 5:29 བདག་གིས་དོན་འདི་རྣམས་ཀྱི་ཕྱིར་ཉེས་ཆད་མི་གཅོད་དམ། མི་རིགས་འདི་ལྟ་བུ་ལ་བདག་གིས་ལན་མི་བསློག་གམ་ཞེས་དཀོན་མཆོག་ཡ་ཝཱེས་གསུངས།
JER 5:30 རྒྱལ་ཁམས་ནང་དུ་འཇིགས་སུ་རུང་ཞིང་སྐྲག་སྣང་ཅན་གྱི་དོན་བྱུང་སྟེ།
JER 5:31 ལུང་སྟོན་པ་རྣམས་ཀྱིས་ལུང་བསྟན་རྫུན་མ་སྨྲ་ཞིང་། མཆོད་དཔོན་རྣམས་ཀྱིས་དབང་ཆ་རང་གི་ལག་ཏུ་འཛིན་པ་ཡིན། བདག་གི་མི་རྣམས་ཀྱང་འདི་ལ་དགའ་སྟེ། མཐའ་མའི་དུས་སུ་སླེབས་དུས་ཁྱོད་ཚོས་ཅི་ཞིག་བྱེད་དམ།
JER 6:1 ཀྱེ་པེན་ཡཱ་མེན་པ་རྣམས། སྲོག་ཐར་བར་ཡེ་རུ་སཱ་ལེམ་ནས་བྲོས་ཏེ། ཐེ་ཀོ་ཨ་རུ་རྭ་དུང་བུས་ཤིག པེད་ཧག་ཀེ་རེམ་དུ་བརྡ་མཚོན་རྒྱལ་མཚན་སྒྲེངས་ཤིག ཅི་ལ་ཞེ་ན། ཆག་སྒོ་དང་གཏོར་བརླག་ཆེན་པོ་ནི་བྱང་ཕྱོགས་ནས་སླེབས་ལ་ཉེ།
JER 6:2 ཡིད་དབང་འཕྲོག་པའི་ཛ་ཡན་གྱི་བུ་མོ་ནི་བདག་གིས་མེད་པར་བྱེད་ངེས་ཡིན།
JER 6:3 རྫི་བོས་ལུག་ཁྱུ་དེད་ནས་དེར་སླེབ་པ་དང་། དེའི་ཕྱོགས་བཞི་ནས་གུར་ཕུབ་སྟེ་རེ་རེས་རང་རང་གི་གནས་སུ་ལུག་ཁྱུ་འཚོ་བར་འགྱུར།
JER 6:4 ཁྱོད་རྣམས་ཀྱིས་དེ་ལ་རྒོལ་བར་གྲ་སྒྲིག་བྱོས་ཤིག ཡར་ལོངས་དང་། རང་ཅག་ཉིན་གུང་ལ་ཡར་འགྲོ་བར་བྱ། ཀྱེ་ཧོ། ཉི་མ་ནུབ་ལ་ཉེ་ཞིང་ས་སྲོས་གྲིབ་མ་ཇེ་རིང་དུ་སོང་།
JER 6:5 དེ་བས་ལོངས་དང་རང་ཅག་མཚན་མོའི་དུས་སུ་ཡར་སོང་ནས་དེའི་བཙན་རྫོང་རྣམས་གཏོར་དགོས།
JER 6:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་ཤིང་སྡོང་ཆོད་ཅིག ས་རགས་བརྩིགས་ནས་ཉེས་ཆད་གཅོད་འོས་པའི་གྲོང་ཁྱེར་ཏེ་ཡེ་རུ་སཱ་ལེམ་ལ་རྒོལ་བར་གྱིས་ཤིག ཅི་ལ་ཞེ་ན། གྲོང་ཁྱེར་དེ་རུ་གཉའ་གནོན་གྱིས་བཀང་བས་སོ། །
JER 6:7 ཁྲོན་པ་ནས་ཇི་ལྟར་ཆུ་འཕྱུར་བ་བཞིན་གྲོང་ཁྱེར་འདི་ལས་དེ་ལྟར་སྡིག་པ་ཐོན་ཡོང་། དེའི་ནང་དུ་གདུག་རྩུབ་དང་གཏོར་བརླག་བྱེད་པའི་དོན་རྣམས་སྦས་ཡོད་པ་དང་། ན་ཚ་དང་རྨས་སྐྱོན་ཡང་རྒྱུན་དུ་ང་ཡི་མདུན་དུ་ཡོད།
JER 6:8 ཀྱེ་ཡེ་རུ་སཱ་ལེམ། བདག་གི་སེམས་ཁྱོད་དང་རིང་དུ་མི་གྱེས་པ་དང་། ངས་ཁྱོད་དབེན་སྟོང་དུ་བསྒྱུར་ནས་མི་མེད་ལུང་སྟོང་ལ་འགྱུར་དུ་མི་འཇུག་པའི་ཆེད་དུ་ཁྱོད་ཀྱིས་བསླབ་བྱ་ལོངས་ཤིག་ཅེས་གསུངས་སོ། །
JER 6:9 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དགྲ་བོ་རྣམས་ཀྱིས་རྒུན་འབྲུམ་གཙང་མར་བཏོགས་པ་བཞིན་ཡེས་ར་ཨེལ་གྱི་མི་ལྷག་ལུས་རྣམས་ཀྱང་འཇོམས་པར་བྱེད། ཁྱོད་ནི་རྒུན་འབྲུམ་འཐོག་མཁན་དང་འདྲ་བར་ལག་པ་ཡལ་གའི་སྟེང་དུ་བསྲིངས་ནས་ཡང་ཡང་བཏོག་དགོས་ཞེས་གསུངས་སོ། །
JER 6:10 ད་ལྟ་བདག་གིས་སུ་ཞིག་ལ་གཏམ་སྨྲའམ། སུ་ཞིག་ལ་ཐ་ཚིག་བསྒྲགས་ནས་མཉན་པར་བྱའམ། ལྟོས་ཤིག དེ་དག་གི་རྣ་བ་གཙང་མར་མ་མཛད་པས་ཐོས་མི་ནུས་ལ། ལྟོས་ཤིག དེ་རྣམས་ཀྱིས་དཀོན་མཆོག་ཡ་ཝཱེའི་བཀའ་ནི་ངོ་ཚ་རུ་བརྩི་བ་ལས་དགའ་སྤྲོ་རུ་མི་བརྩི།
JER 6:11 དེ་བས། བདག་ནི་དཀོན་མཆོག་ཡ་ཝཱེའི་ཐུགས་ཁྲོ་ཡིས་བཀང་སྟེ་བཟོད་མི་ནུས་ཤིང་། ཁྱོད་ཀྱིས་ཐུགས་ཁྲོ་དེ་ནི་སྲང་གི་བྱིས་པ་དང་མཉམ་དུ་འཛོམས་པའི་ན་གཞོན་རྣམས་ཀྱི་སྟེང་ལ་འཕོ་བར་གྱིས་ཤིག ཁྱོ་ཤུག་གཉིས་ཀ་དང་བགྲེས་པོ། ཚེ་ལོ་མཐར་ཕྱིན་པ་བཅས་ཐམས་ཅད་ལྷན་ཅིག་ཏུ་འཛིན་པར་འགྱུར་རོ། །
JER 6:12 ཡང་དེ་དག་གི་ཁང་པ་དང་ཞིང་ས། ཆུང་མ་བཅས་ནི་གཞན་ལ་དབང་བར་འགྱུར། བདག་གིས་ལག་པ་བརྐྱངས་ནས་ས་འདིའི་ཡུལ་མི་རྣམས་ལ་རྒོལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 6:13 ཅི་ལ་ཞེ་ན། དེ་དག་མཆོག་དམན་སུ་ཡིན་ཡང་ཐམས་ཅད་འདོད་རྔམ་ཅན་ཡིན་ཞིང་། ལུང་སྟོན་པ་ནས་མཆོད་དཔོན་རྣམས་ཀྱི་བར་དུ་ཐམས་ཅད་ཀྱིས་གཡོ་སྒྱུའི་སྦྱོར་བ་སྤེལ་ཏོ། །
JER 6:14 དེ་རྣམས་ཀྱིས་ཧོལ་རྒྱུག་གིས་ངའི་མི་རྣམས་ཀྱི་རྨས་སྐྱོན་གསོས་ནས་ན་རེ། ད་ནི་བདེའོ་ད་ནི་བདེའོ་ཟེར་ཡང་། དོན་དམ་དུ་བདེ་བ་མེད་དོ། །
JER 6:15 དེ་རྣམས་ཀྱིས་ཞེན་ཁ་ལོག་པའི་དོན་བྱས་ཏེ་ངོ་ཚ་བར་འོས་ན་ཡང་། དེ་རྣམས་ལ་ངོ་ཚ་བའི་ཚོར་སྣང་ཙམ་ཡང་མེད་དེ་ངོ་ཚ་ཁྲེལ་མེད་རང་ཡིན་ནོ། །དེ་བས། དེ་རྣམས་ནི་སར་འགྱེལ་བའི་མི་རྣམས་དང་མཉམ་དུ་འགྱེལ་ངེས་ལ། ངས་དེ་རྣམས་ལ་ཉེས་ཆད་གཅོད་སྐབས་དེ་རྣམས་འགྱེལ་བར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 6:16 ཡང་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ལམ་ཁར་འགྲེང་ནས་ལྟོས་ཤིག གནའ་བོའི་བཞུད་ལམ་རྣམས་ལ་རྩད་ཆོད་ཅིག ལམ་བཟང་པོ་དེ་གང་དུ་ཡོད་ན་དེའི་ནང་དུ་འགྲུལ་བར་གྱིས། འདི་ལྟར་སྤྱད་ན་ཁྱོད་རྣམས་ཀྱི་སེམས་སུ་ངལ་གསོ་རྙེད་པར་འགྱུར། འོན་ཀྱང་དེ་དག་གིས་ངེད་རྣམས་དེའི་ནང་དུ་འགྲུལ་བར་མི་བྱ་ཞེས་སྨྲས་སོ། །
JER 6:17 བདག་གིས་ཁྱོད་རྣམས་ཀྱི་དོན་དུ་སོ་པ་བསྐོས་ཏེ། གཟབ་གཟབ་ངང་རྭ་དུང་གི་སྐད་ལ་ཉོན་ཅིག་ཅེས་སྨྲས་ནའང་། ཁོ་རྣམས་ཀྱིས་ངེད་ཅག་གིས་མི་མཉན་ཞེས་སྨྲས།
JER 6:18 དེ་བས། ཀྱེ་མི་རིགས་རྣམས་ཀྱིས་ཉོན་ཅིག ཀྱེ་ཡེས་ར་ཨེལ་གྱི་མི་ཚོགས་རྣམས། ཁོ་རྣམས་ལ་ཅི་ཞིག་འབྱུང་བ་རྟོགས་པར་གྱིས།
JER 6:19 ཀྱེ་ས་གཞི་ལགས་ཉོན་དང་། ལྟོས་ཤིག ཁོ་རྣམས་ཀྱིས་ངའི་བཀའ་ལ་རྣ་བ་བླགས་ནས་མ་མཉན་པ་དང་ངའི་བཀའ་ཁྲིམས་ཀྱང་དོར་བ་ཡིན་པས། བདག་གིས་མི་འདི་རྣམས་ཀྱི་སྟེང་ལ་ཆག་སྒོ་འབྱུང་བར་བྱ་སྟེ། དེ་ནི་ཁོ་རྣམས་ཀྱི་ཇུས་ངན་ལས་ཐོགས་པའི་འབྲས་བུ་ཡིན་ནོ། །
JER 6:20 ཤེ་བཱ་ནས་ཡོང་བའི་སྤོས་དཀར་དང་རྒྱང་རིང་ནས་ཐོན་པའི་དྲི་ཞིམ་ཤུ་དག་བདག་ལ་ཕུལ་བས་ཅི་ལ་ཕན། ཁྱོད་རྣམས་ཀྱི་སྦྱིན་སྲེག་གི་མཆོད་པ་ལ་བདག་མི་དགའ། ཁྱོད་ཚོའི་མཆོད་རྫས་རྣམས་ལ་ཡང་བདག་མི་མགུ་ཞེས་གསུངས་སོ། །
JER 6:21 དེ་བས་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་བཀག་རྡོ་མི་སྡེ་འདིའི་མདུན་དུ་འཇོག་པར་བྱ་སྟེ། ཕ་དང་བུ་གཉིས་ཀ་དེའི་སྟེང་དུ་འགྱེལ་བ་དང་། ཁྱིམ་མཚེས་དང་གྲོགས་པོ་ལྷན་ཅིག་ཏུ་མེད་པར་འགྱུར་ཞེས་གསུངས་སོ། །
JER 6:22 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག དམག་དཔུང་ཞིག་བྱང་ཕྱོགས་ནས་འོང་གིན་འདུག ས་གཞིའི་མཐའ་མཚམས་ནས་མི་རིགས་ཆེན་པོ་ཞིག་བསྐུལ་ནས་སླེབས་ཤིང་།
JER 6:23 དེ་དག་གི་ལག་ཏུ་གཞུ་དང་མདུང་བཟུང་སྟེ་གདུག་རྩུབ་ཆེ་ལ་སྙིང་རྗེ་མེད་པ་དང་། རྒྱ་མཚོའི་རྦ་རླབས་འཕྱུར་བ་ནང་བཞིན་དེ་དག་གིས་ང་རོ་འདོན། ཀྱེ་ཛ་ཡན་གྱི་བུ་མོ་ལགས། དེ་རྣམས་རྟ་ལ་ཞོན་ནས་བསླེབ་ཅིང་གཡུལ་ངོར་ཞུགས་པའི་དམག་མི་ནང་བཞིན་གྲལ་བསྒྲིགས་ཏེ་ཁྱོད་ལ་རྒོལ་བར་འགྱུར་ཞེས་གསུངས།
JER 6:24 རང་ཅག་གིས་དེ་ཚོའི་སྐོར་གྱི་གཏམ་ཐོས་ནས་ལག་རྩ་ལྷོད་དེ། རང་ཅག་ཟུག་རྔུ་དྲག་པོས་གདུངས་ནས་སྐྱེ་གཟེར་རྒྱག་པའི་བུད་མེད་ལྟར་ན་ཟུག་ལང་ངོ་། །
JER 6:25 ཕྱོགས་བཞིར་དགྲ་བོའི་རལ་གྲི་དང་འཇིགས་སྣང་ཡོད་པས་ཁྱོད་རྣམས་རི་ཐང་ལ་མ་འགྲོ། ལམ་བར་དུ་ཡང་མ་འགྲུལ་ཞིག
JER 6:26 བདག་གི་མི་རྣམས་ལགས། རྐེད་པར་རྩིད་རས་གཡོགས་ཏེ་ཐལ་བའི་ནང་དུ་འགྲེ་ལྡོག་རྒྱོབ་ཅིག བུ་གཅིག་པུ་ཤོར་བ་བཞིན་དུ་མྱ་ངན་བྱོས་དང་། ཅི་ལ་ཞེ་ན། རྩ་མེད་དུ་གཏོང་མཁན་ནི་གློ་བུར་རང་ཅག་གི་སྟེང་དུ་སླེབ་པར་འགྱུར།
JER 6:27 བདག་གིས་ཁྱོད་ནི་ངའི་འབངས་མིའི་ཞིབ་དཔྱོད་པ་དང་ཚོད་བརྟག་མཁན་དུ་བསྐོས་ཏེ། ཁྱོད་ཀྱིས་དེ་དག་གི་སྤྱོད་པ་ལ་ལྟ་ཞིབ་བྱས་ནས་ལེགས་ཉེས་འབྱེད་དགོས་པའོ། །
JER 6:28 དེ་དག་གིས་རབ་ཏུ་ངོ་ལོག་བྱེད་ཅིང་གང་སར་མི་ལ་དཀྲུག་ཤིང་འཕེན་པ་ཡིན། དེ་དག་ནི་ལི་དང་ལྕགས་ཡིན་ ཏེ་ཐམས་ཅད་ངན་པར་གྱུར།
JER 6:29 མེ་ལ་ཁོལ་མོ་ཤུགས་ཀྱིས་བརྒྱབ་ནས་ཞ་ཉེ་མེ་རུ་ཡང་ཡང་བཞུས་ནའང་མཐའ་མཇུག་སྟོང་བ་ཡིན། ཅི་ལ་ཞེ་ན། ངན་པ་ད་དུང་ཚར་གཅོད་མ་བྱས་པའོ། །
JER 6:30 དཀོན་མཆོག་ཡ་ཝཱེས་ཁོ་རྣམས་དོར་བ་ཡིན་པས་མི་ཡིས་དེ་དག་ལ་དོར་བའི་དངུལ་ཞེས་འབོད་པར་འགྱུར་རོ། །
JER 7:1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 7:2 ཁྱོད་རང་དཀོན་མཆོག་ཡ་ཝཱེའི་མཆོད་ཁང་གི་སྒོ་ཁར་འགྲེང་ནས་དེ་རུ་གཏམ་འདི་སྒྲོགས་ཤིག ཀྱེ་སྒོ་འདི་རྣམས་བརྒྱུད་ནས་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་འོངས་པའི་ཡ་ཧུ་དཱ་པ་ཐམས་ཅད་ལགས། དཀོན་མཆོག་ཡ་ཝཱེའི་བཀའ་ལ་ཉོན་ཅིག་ཅེས་པའོ་ཞེས་གསུངས།
JER 7:3 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་རང་གི་བྱ་བ་སྤྱོད་པ་བསྒྱུར་ན། བདག་གིས་ཁྱོད་རྣམས་ཡུལ་འདིར་སྡོད་དུ་འཇུག
JER 7:4 ཁྱོད་རྣམས་རྫུན་གཏམ་ལ་བརྟེན་ནས། འདི་ནི་དཀོན་མཆོག་ཡ་ཝཱེའི་མཆོད་ཁང་ཡིན། དཀོན་མཆོག་ཡ་ཝཱེའི་མཆོད་ཁང་ཡིན། དཀོན་མཆོག་ཡ་ཝཱེའི་མཆོད་ཁང་ཡིན་ཞེས་མ་བརྗོད་ཅིག
JER 7:5 ཁྱོད་ཚོས་དངོས་གནས་རང་གི་བྱ་བ་སྤྱོད་པ་བསྒྱུར་ཏེ། ཕན་ཚུན་བར་གཟབ་ནན་སྒོས་དྲང་གཞག་སྤྱོད་པ་དང་།
JER 7:6 བྱེས་སུ་སྡོད་པའི་མི་དང་དྭ་ཕྲུག ཡུགས་མོ་བཅས་ལ་བརྙས་བཅོས་མི་བྱེད་ཅིང་། ཡུལ་འདིར་མི་ཉེས་མེད་ཀྱི་ཁྲག་བཞུར་དུ་མི་འཇུག་པ་དང་། ལྷ་གཞན་རྣམས་ཀྱི་རྗེས་སུ་འབྲངས་ནས་རང་ལ་གནོད་བསྐྱལ་བ་མིན་ན།
JER 7:7 བདག་གིས་ཁྱོད་རྣམས་ད་དུང་ངས་གནའ་ནས་ཁྱོད་ཅག་གི་མེས་པོ་རྣམས་ལ་ཇི་སྲིད་བར་དུ་གནང་བའི་ཡུལ་འདིར་གནས་པར་བྱའོ། །
JER 7:8 འོན་ཀྱང་ལྟོས་ཤིག ཁྱོད་རྣམས་རྫུན་དང་ཕན་ཐོགས་མེད་པའི་སྨྲ་བརྗོད་ལ་བརྟེན་པ་ཡིན།
JER 7:9 ཁྱོད་རྣམས་ཀྱིས་རྐུ་བྱས་ནས་སྲོག་གཅོད་ཅིང་། ལོག་གཡེམ་བྱེད་པ་དང་། མནའ་རྫུན་མ་བསྐྱལ་བ། པཱ་ཨལ་ལ་སྤོས་བདུག་པ་བཅས་བྱེད་པར་མ་ཟད། རྒྱུས་མི་མངའ་བའི་ལྷ་རྣམས་ཀྱི་རྗེས་སུ་འབྲངས་རྗེས།
JER 7:10 ཡང་ངའི་མིང་གིས་འབོད་པའི་མཆོད་ཁང་འདིར་འོངས་ནས་བདག་གི་མདུན་དུ་ལངས་བསྡད་དེ་ན་རེ། ངེད་རྣམས་བདེའོ་ཞེས་སྨྲ་ག་ལ་རུང་། ཁྱོད་ཅག་གི་བྱ་སྤྱོད་འདི་ལྟ་བུ་ནི་ཞེན་ཁ་ལོག་པའི་དོན་འདི་རྣམས་སྤྱོད་པའི་ཕྱིར་ཡིན་ནམ།
JER 7:11 བདག་གི་མིང་གིས་འབོད་པའི་མཆོད་ཁང་འདི་ཁྱོད་ཚོའི་མིག་ནང་དུ་ཇག་ཚང་དུ་བརྩིས་པ་ཡིན་ནམ། ལྟོས་ཤིག བདག་གིས་ཐམས་ཅད་མཐོང་ངོ་ཞེས་དཀོན་མཆོག་ཡ་ཝཱེས་གསུངས།
JER 7:12 ཁྱོད་རྣམས་བདག་གིས་དེ་སྔར་རང་གི་མིང་གནས་ས་རུ་བྱས་པའི་ཞི་ལོ་ཡུལ་དུ་སོང་ལ། ངས་རང་གི་འབངས་མི་ཡེས་ར་ཨེལ་གྱི་སྡིག་ཉེས་ཀྱི་ཕྱིར་གནས་དེར་ཅི་བྱས་པར་ལྟོས་ཤིག
JER 7:13 ད་ལྟ་ཁྱོད་རྣམས་ཀྱིས་ཀྱང་དོན་འདི་ཐམས་ཅད་བྱས་པའི་ཕྱིར། བདག་གིས་ཁྱོད་རྣམས་ལ་ཉེན་བརྡ་ཡང་ཡང་བཏང་ནའང་ཁྱོད་རྣམས་ཀྱིས་མ་མཉན། བདག་གིས་ཁྱོད་རྣམས་བོས་ཀྱང་ཁྱོད་རྣམས་ཀྱིས་ཨ་ལན་མ་བྱིན་ཞེས་དཀོན་མཆོག་ཡ་ཝཱེས་འདི་སྐད་གསུངས།
JER 7:14 དེ་བས་བདག་གིས་ངའི་མིང་གིས་འབོད་པ་དང་ཁྱོད་རྣམས་བརྟེན་སའི་མཆོད་ཁང་འདི་དང་། བདག་གིས་ཁྱོད་ཅག་དང་ཁྱོད་ཅག་གི་མེས་པོ་རྣམས་ལ་གནང་བའི་ཡུལ་ལ་འདི་ལྟར་སྤྱོད་ངེས་ཏེ། སྔར་བདག་གིས་ཞི་ལོ་ལ་ཇི་ལྟར་སྤྱད་པ་བཞིན་དུ་སྤྱོད་པར་འགྱུར།
JER 7:15 ངས་ཇི་ལྟར་ཁྱོད་ཅག་གི་སྤུན་ཟླ་རྣམས་ཏེ་ཨེ་ཕཱར་ཡིམ་གྱི་བུ་རྒྱུད་ཐམས་ཅད་ཕྱི་རོལ་ཏུ་བསྐྲད་པ་བཞིན། བདག་གིས་ཁྱོད་རྣམས་ཀྱང་དེ་ལྟར་ངའི་མདུན་ནས་ཕྱི་རུ་སྐྲོད་པར་འགྱུར།
JER 7:16 དེ་བས། ཁྱོད་ཀྱིས་མི་འདི་རྣམས་ཀྱི་དོན་དུ་སྨོན་ལམ་མ་འདེབས། དེ་དག་གི་ཆེད་དུ་ཞུ་འབོད་མ་བྱེད། བདག་གིས་ཁྱོད་ལ་མི་མཉན་པས་ན་དེ་དག་གི་ཕྱིར་དུ་བདག་ལ་ཞུ་བའང་མ་བྱེད་ཅིག
JER 7:17 དེ་རྣམས་ཀྱིས་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དུ་བྱས་པའི་དོན་རྣམས་ཁྱོད་ཀྱིས་མ་མཐོང་ངམ།
JER 7:18 བྱིས་པས་བུད་ཤིང་བཏུས་ནས་ཕ་ཡིས་མེ་སྦར་བ་དང་། བུད་མེད་ཀྱིས་ཕྱེ་བརྫིས་ནས་བག་ལེབ་བཅོས་ཏེ་ནམ་མཁའི་རྒྱལ་མོར་ཕུལ་ཞིང་། ཡང་ལྷ་གཞན་རྣམས་ལ་སྐྱེམས་མཆོད་ཕུལ་ནས་ང་ཁྲོ་རུ་བཅུག
JER 7:19 དེ་དག་གིས་ང་ཁྲོ་རུ་བཅུག་པ་ག་ལ་ཡིན། རང་གིས་རང་ལ་ཆག་སྒོ་བསླངས་ཏེ་རང་ཉིད་ངོ་ཚར་སྦྱར་བ་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས།
JER 7:20 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་ཤིག བདག་གིས་རང་གི་ཁོང་ཁྲོ་དང་ཞེ་སྡང་ནི་ཡུལ་འདིའི་མི་ཕྱུགས་གཉིས་ཀ་དང་། རི་ཐང་གི་ཤིང་སྡོང་དང་ས་ལས་སྐྱེས་པའི་འབྲས་བུ་ཐམས་ཅད་ཀྱི་སྟེང་དུ་བླུག་པར་བྱ་སྟེ། མེ་ལྟར་འབར་ཞིང་སུས་ཀྱང་གསོད་མི་ནུས་ཞེས་གསུངས།
JER 7:21 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་སྦྱིན་སྲེག་གི་མཆོད་པའི་སྟེང་དུ་ཞི་བདེའི་མཆོད་པའང་སྣོན་ལ་ཤ་ཟོ་ཞིག
JER 7:22 ཅི་ལ་ཞེ་ན། བདག་གིས་ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཁྲིད་འོངས་པའི་ཉིན་མོར། སྦྱིན་སྲེག་གི་མཆོད་པ་དང་ཞི་བདེའི་མཆོད་པ་གཉིས་ཀྱི་དོན་ནི་བདག་གིས་མ་གླེང་ལ། དེ་རྣམས་ལ་བཀའ་ཡང་མ་བསྒོས།
JER 7:23 བདག་གིས་དེ་རྣམས་ལ་དོན་འདི་གཅིག་པུ་བསྒོས་ནས་འདི་ལྟར། ཁྱོད་རྣམས་ཀྱིས་ངའི་བཀའ་ལ་མཉན་ན། བདག་ནི་ཁྱོད་རྣམས་ཀྱི་དཀོན་མཆོག་ཏུ་འགྱུར་གྱིས། ཁྱོད་རྣམས་ཀྱང་ངའི་མི་རུ་འགྱུར་ངེས་ཡིན། ཁྱོད་རྣམས་བདག་གིས་བསྒོས་པའི་བཀའ་ཐམས་ཅད་ཀྱི་ནང་དུ་འགྲུལ་ན་བྱིན་རླབས་འཐོབ་པར་འགྱུར་ཞེས་སྨྲས་སོ། །
JER 7:24 ཡིན་ནའང་དེ་རྣམས་ཀྱིས་མ་མཉན་ཏེ་རྣ་བ་གཏད་ནས་མི་མཉན་པར། རང་གི་ཐབས་ཇུས་དང་སེམས་ངན་གཤིས་གྱོང་གི་རྗེས་སུ་འབྲངས་ནས་ཕྱི་བསྣུར་བྱས་པ་ལས་མདུན་དུ་མ་བསྐྱོད་དོ། །
JER 7:25 ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཕྱི་རུ་ཐོན་པའི་ཉིན་ནས་དེ་རིང་བར་དུ། བདག་གིས་རང་གི་ཞབས་ཕྱི་སྟེ་ལུང་སྟོན་པ་ཐམས་ཅད་ཡང་ནས་ཡང་དུ་ཁོ་ཚོའི་མདུན་དུ་མངགས་ཀྱང་།
JER 7:26 ཁོ་ཚོས་བདག་ལ་མ་མཉན་ཏེ་རྣ་བ་གཏད་ནས་མི་མཉན་པར་སེམས་རྒྱུད་རེངས་པོ་བྱས་ནས་ལས་ངན་པ་སྤྱད་པ་ནི་ཁོ་ཚོའི་མེས་པོ་རྣམས་ལས་ཀྱང་ཐུའོ། །
JER 7:27 ཁྱོད་ཀྱིས་གཏམ་འདི་ཐམས་ཅད་ཁོ་ཚོར་སྨྲས་ཀྱང་དེ་རྣམས་ཀྱིས་ཁྱོད་ལ་མི་མཉན་ཏེ། ཁོ་ཚོ་བོས་ཀྱང་དེ་དག་གིས་ཨ་ལན་མི་སྤྲོད།
JER 7:28 དེའི་ཕྱིར་ཁྱོད་ཀྱིས་ཁོ་རྣམས་ལ་འདི་ལྟར་སྨྲ་དགོས་ཏེ། འདི་ནི་ཁོ་ཚོའི་དཀོན་མཆོག་ཡ་ཝཱེའི་བཀའ་ལ་མི་མཉན་པ་དང་བཀའ་སློབ་དང་ལེན་མི་བྱེད་པའི་མི་རིགས་ཡིན་ལ། དེ་ཚོའི་སྨྲ་སྒོར་དྲང་བདེན་མེད་པར་གྱུར་ཏོ་ཞེས་པའོ། །
JER 7:29 ཀྱེ་ཡེ་རུ་སཱ་ལེམ། རང་གི་སྐྲ་བཞར་ནས་ཕོངས་ཤིག སྐྱ་ཐེར་ཐེར་གྱི་མཐོ་སྒང་དུ་མྱ་ངན་བྱོས་ཤིག ཅི་ལ་ཞེ་ན། དཀོན་མཆོག་ཡ་ཝཱེས་ཁོང་ཉིད་ཐུགས་ཁྲོ་རུ་འཇུག་པའི་མི་རབས་དེ་སྤངས་ནས་བསྐྱུར་བས་སོ། །
JER 7:30 ཡ་ཧུ་དཱ་པ་རྣམས་ཀྱིས་བདག་གི་མིག་ལམ་དུ་ངན་པ་གང་ཡིན་དེ་སྤྱད་ནས། བདག་གི་མིང་གིས་འབོད་པའི་མཆོད་ཁང་ནང་དུ་ཞེན་ཁ་ལོག་པའི་རྫས་རྣམས་བསླངས་ཏེ་མཆོད་ཁང་འདི་མི་གཙང་བར་བཟོས་ཞེས་དཀོན་མཆོག་ཡ་ཝཱེས་འདི་སྐད་གསུངས།
JER 7:31 དེ་རྣམས་ཀྱིས་རང་གི་བུ་བུ་མོ་རྣམས་མེའི་ནང་དུ་བསྲེག་ཕྱིར་པེན་ཧིན་ནོམ་ལུང་པའི་ཐོ་ཕེད་དུ་མཐོ་གླིང་བརྩིགས་པ་དང་། འདི་ནི་བདག་གིས་བསྒོས་པའི་བཀའ་མིན་ལ། ངའི་ཡིད་ལའང་ཤར་མ་མྱོང་ངོ་། །
JER 7:32 དེ་བས། ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། གནས་འདི་ལ་ཐོ་ཕེད་དང་པེན་ཧིན་ནོམ་ལུང་པ་ཞེས་མི་འབོད་པར་གསོད་གཅོད་ཀྱི་ལུང་པ་ཞེས་འབོད་པར་འགྱུར། དེ་རྣམས་ཀྱིས་ཐོ་ཕེད་དུ་བམ་རོ་སྦས་པ་དང་། ཐ་ན་སྦས་ས་ཡང་མེད།
JER 7:33 མི་འདི་དག་གི་བེམ་པོ་རྣམས་ནི་ནམ་མཁའི་བྱ་དང་ས་གཞིའི་གཅན་གཟན་རྣམས་ཀྱི་ཁ་ཟས་སུ་འགྱུར་ཏེ། སུས་ཀྱང་དེ་དག་དཀྲོག་པར་མི་འགྱུར།
JER 7:34 དུས་དེར་བདག་གིས་ཡ་ཧུ་དཱ་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དུ་དགའ་སྤྲོ་དང་སྐྱིད་པོའི་སྐད་སྒྲ་དང་། བག་མ་དང་མག་པའི་སྐད་སྒྲ་མཚམས་ཆད་པར་བྱའོ། །ཅི་ལ་ཞེ་ན། ཡུལ་འདི་མི་མེད་ལུང་སྟོང་དུ་འགྱུར་བས་སོ། །
JER 8:1 དཀོན་མཆོག་ཡ་ཝཱེས་འདི་སྐད་དུ། དུས་དེར། མི་ཡིས་ཡ་ཧུ་དཱའི་རྒྱལ་པོ་དང་འགོ་དཔོན། མཆོད་དཔོན། ལུང་སྟོན་པ་བཅས་དང་། ཡེ་རུ་སཱ་ལེམ་གྱི་ཡུལ་མི་རྣམས་ཀྱི་ཀེང་རུས་ཐམས་ཅད་དུར་ལས་བསློགས་ཏེ།
JER 8:2 སྔར་དེ་རྣམས་ཀྱིས་ཡིད་སྨོན་བྱས་པ་དང་། ཞབས་ཏོག་བསྒྲུབས་པ། རྗེས་སུ་འབྲངས་པ། སློབ་སྟོན་ཞུས་པ། ཕྱག་མཆོད་བྱས་པ་བཅས་ཀྱི་ཉི་མ་དང་ཟླ་བ། ནམ་མཁའི་སྐར་ཚོགས་བཅས་ཀྱི་འོག་ཏུ་གཡུག་པར་འགྱུར་ལ། དེ་ནས་ཀེང་རུས་འདི་དག་བསྡུ་བར་མི་འགྱུར་ལ་སྦ་བར་ཡང་མི་བྱ་སྟེ། ས་ཁར་ལུད་དུ་འགྱུར་བའོ། །
JER 8:3 ཁྱིམ་རྒྱུད་ངན་པ་འདི་ལས་ལུས་པའི་མི་རྣམས་ཀྱིས་སྔར་བདག་གིས་མཐར་སྐྲོད་བཏང་བའི་ཡུལ་སོ་སོར། འཚོ་བ་ལས་འཆི་བ་བདམས་པ་ཡིན་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
JER 8:4 ཁྱོད་ཀྱིས་དེ་རྣམས་ལ་ཤོད་དང་། དཀོན་མཆོག་ཡ་ཝཱེས་འདི་སྐད་དུ། མི་སར་འགྱེལ་ན་ཡང་བསྐྱར་མི་ལང་ངམ། མི་ལམ་ཁ་ནོར་ན་ཡང་བསྐྱར་ཕྱིར་མི་ལོག་གམ།
JER 8:5 མི་འདི་རྣམས་ཅིའི་ཕྱིར་ལོག་ལམ་དུ་ཞུགས་པ་ཡིན་ནམ། ཅིའི་ཕྱིར་ཡེ་རུ་སཱ་ལེམ་ནམ་ཡང་ལམ་ཁ་ནོར་བ་ཡིན་ནམ། ཁོ་ཚོས་གཡོ་སྒྱུ་སྤེལ་བར་སེམས་ཐག་བཅད་དེ་ཁ་ཕྱིར་འཁོར་བར་མ་འདོད་དོ། །
JER 8:6 བདག་གིས་གཟབ་གཟབ་བྱས་ནས་མཉན་པ་ཡིན་ཏེ། ཁོ་ཚོས་དྲང་བདེན་མ་ཡིན་པའི་གཏམ་སྨྲ་བ་ཐོས་ཤིང་། སུས་ཀྱང་ངས་ཅི་ཞིག་བྱས་པ་ཡིན་ནམ་ཞེས་རང་གི་སྤྱོད་ངན་ལ་འགྱོད་བཤགས་མི་བྱེད་པར། ཁོ་ཚོ་རྟ་གཡུལ་ངོར་རྒྱུག་པ་བཞིན་ཐམས་ཅད་རང་རང་གི་ལམ་དུ་ཞུགས་པའོ། །
JER 8:7 མཚོ་བྱ་དཀར་མོས་རང་གི་དུས་ཚིགས་ཤེས་པ་དང་། ཐི་བ་དང་ཁུག་རྟ། ཁྲུང་ཁྲུང་བཅས་ཀྱིས་ཀྱང་རང་གི་གནས་སྤོར་བའི་ནམ་ཟླ་ལ་སྒུག་པའོ། །ཡིན་ཡང་ངའི་མི་རྣམས་ཀྱིས་དཀོན་མཆོག་ཡ་ཝཱེའི་སྒྲིག་ཁྲིམས་དེ་མི་ཤེས་སོ། །
JER 8:8 ཁྱོད་རྣམས་ཀྱིས་ངེད་རྣམས་ལ་ཤེས་རབ་ལྡན་ཏེ། དཀོན་མཆོག་ཡ་ཝཱེའི་བཀའ་ཁྲིམས་ངེད་ཅག་ལ་ཡོད་ཅེས་བརྗོད་པ་ཅི་ཡིན་ནམ། ལྟོས་ཤིག དྲུང་ཡིག་རྣམས་ཀྱི་སྨྱུ་གུ་རྫུས་མས་བཀའ་ཁྲིམས་རྫུན་དུ་བསྒྱུར་བ་ཡིན།
JER 8:9 མཁས་པ་རྣམས་སྐྱེངས་ནས་འཇིགས་སྐྲག་སྐྱེ་ཞིང་འཛིན་པར་འགྱུར། ལྟོས་ཤིག དེ་དག་གིས་དཀོན་མཆོག་ཡ་ཝཱེའི་བཀའ་དོར་བས་ད་དུང་ཤེས་རབ་ཅི་ཞིག་ཡོད་དམ།
JER 8:10 དེ་བས་ཁོ་རྣམས་ཀྱི་ཆུང་མ་ནི་མི་གཞན་ལ་སྦྱིན་པ་དང་། དེ་དག་གི་ཞིང་ས་ཡང་གཞན་ལ་དབང་བར་བྱ། ཅི་ལ་ཞེ་ན། དེ་དག་མཆོག་དམན་སུ་ཡིན་ཡང་ཐམས་ཅད་འདོད་རྔམ་ཅན་ཡིན་ཞིང་། ལུང་སྟོན་པ་ནས་མཆོད་དཔོན་རྣམས་ཀྱི་བར་དུ་ཐམས་ཅད་ཀྱིས་གཡོ་སྒྱུའི་སྦྱོར་བ་སྤེལ་ཏོ། །
JER 8:11 དེ་རྣམས་ཀྱིས་ཧོལ་རྒྱུག་གིས་ངའི་མི་རྣམས་ཀྱི་རྨས་སྐྱོན་གསོས་ནས་ན་རེ། ད་ནི་བདེའོ་ད་ནི་བདེའོ་ཟེར་ཡང་། དོན་དམ་དུ་བདེ་བ་མེད་དོ། །
JER 8:12 དེ་རྣམས་ཀྱིས་ཞེན་ཁ་ལོག་པའི་དོན་བྱས་ཏེ་ངོ་ཚ་བར་འོས་ན་ཡང་། དེ་རྣམས་ལ་ངོ་ཚ་བའི་ཚོར་སྣང་ཙམ་ཡང་མེད་དེ་ངོ་ཚ་ཁྲེལ་མེད་རང་ཡིན་ནོ། །དེ་བས། དེ་རྣམས་ནི་སར་འགྱེལ་བའི་མི་རྣམས་དང་མཉམ་དུ་འགྱེལ་ངེས་ལ། ངས་དེ་རྣམས་ལ་ཉེས་ཆད་གཅོད་སྐབས་དེ་རྣམས་འགྱེལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 8:13 བདག་གིས་ཁོ་རྣམས་རྩ་བ་ནས་མེད་པར་བྱའོ། །རྒུན་ཤིང་སྟེང་དུ་རྒུན་འབྲུམ་མེད་པ་དང་། སེ་ཡབ་ཤིང་གི་སྟེང་དུ་འབྲས་བུ་མི་ཐོགས་པར་ལོ་མ་ཡང་སྐམ་ཞིང་། བདག་གིས་དེ་ཚོར་གནང་བ་རྣམས་ཁོ་ཚོར་འབྲལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 8:14 རང་ཅག་གྲགས་འགུལ་ཅི་ཡང་མེད་པར་སྡོད་པ་ཅི་ཡིན་ནམ། རང་ཅག་མཉམ་དུ་འདུས་ཏེ་མཁར་བརྟན་པོའི་ནང་དུ་འཛུལ་ནས་དེ་རུ་མེད་པར་འགྲོའོ། །ཅི་ལ་ཞེ་ན། བདག་ཅག་གིས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་པས་ན། རང་རེའི་དཀོན་མཆོག་ཡ་ཝཱེས་རང་ཅག་གྲགས་འགུལ་ཅི་ཡང་མེད་པར་མཛད་ཅིང་། ཡང་ང་ཚོར་དུག་ཆུ་འཐུང་དུ་བཅུག་གོ །
JER 8:15 རང་ཅག་གིས་ཞི་བདེ་ལ་རེ་སྨོན་བྱས་ཀྱང་ཕན་པ་ཅི་ཡང་མ་ཐོབ་སྟེ། དྲག་གསོ་གནང་བའི་དུས་ལ་རེ་སྨོན་བྱས་ཀྱང་། ལྟོས་ཤིག འཇིགས་སྐྲག་འབའ་ཞིག་ལུས་སོ། །
JER 8:16 དཱན་གྱི་ཡུལ་ནས་དགྲ་བོའི་རྟ་རྣམས་ཀྱིས་སྣ་ཤུ་རྒྱག་པའི་སྒྲ་ཐོས་ཏེ། རྟ་གསེབ་ཀྱི་ངར་སྐད་ཀྱིས་ས་གཞི་ཡོངས་སུ་འདར་བའོ། །ཅི་ལ་ཞེ་ན། དེ་དག་ནི་ཡུལ་ཁམས་དང་དེའི་ནང་དུ་ཡོད་པ་ཐམས་ཅད་དང་། གྲོང་ཁྱེར་དང་དེའི་ནང་དུ་གནས་མཁན་བཅས་མེད་པར་བཟོ་ཆེད་འོངས་པ་ཡིན།
JER 8:17 ལྟོས་ཤིག བདག་གིས་རྫུ་འཕྲུལ་གྱིས་ཀྱང་འདུལ་མི་ཐུབ་པའི་དུག་སྦྲུལ་ཁྱོད་ཅག་གི་ཁྲོད་དུ་གཏོང་བར་བྱ་སྟེ། དེ་དག་གིས་ཁྱོད་ཅག་ལ་རྨུག་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 8:18 བདག་གི་དགའ་སྤྲོ་ནི་སྡུག་བསྔལ་དུ་གྱུར་ཅིང་། བདག་གི་སེམས་ནི་ངའི་ནང་དུ་སྐྱོ་སྣང་ཚད་མེད་སྐྱེས་སོ། །
JER 8:19 ཉོན་དང་། བདག་གི་མི་རྣམས་ཀྱིས་ཞུ་འབོད་བྱེད་པའི་སྒྲ་ནི་རྒྱང་རིང་ནས་རྒྱུ་འོང་སྟེ། དཀོན་མཆོག་ཡ་ཝཱེ་ཛ་ཡན་དུ་བཞུགས་པ་མ་ཡིན་ནམ། ཛ་ཡན་གྱི་རྒྱལ་པོ་དེའི་ནང་དུ་བཞུགས་པ་མ་ཡིན་ནམ་ཞེས་པའོ། །དེ་རྣམས་ཀྱིས་རང་གིས་བརྐོས་པའི་སྐུ་འདྲ་དང་། ཕྱི་རོལ་པའི་སྙིང་པོ་མེད་པའི་ལྷ་རྣམས་ཀྱིས་བདག་ཁྲོ་རུ་འཇུག་པ་ཅི་ཡིན་ནམ།
JER 8:20 སྟོན་ཐོག་བསྡུས་ཚར་ལ་དབྱར་ཡང་རྫོགས་ཀྱང་། བདག་ཅག་ལ་ད་དུང་ཐར་པ་མ་ཐོབ།
JER 8:21 ངའི་མི་རྣམས་རྨས་པས་བདག་ཀྱང་རྨས་པ་ཡིན་ལ། བདག་གིས་སྨྲེ་སྔགས་བཏོན་ཞིང་དངངས་སྐྲག་གིས་ང་རང་ཟིན།
JER 8:22 གིལ་ཨད་དུ་སྤོས་དཀར་མེད་དམ། དེ་རུ་སྨན་པ་མེད་དམ། བདག་གི་སྤུན་ཟླར་སྨན་བཅོས་མ་ཐོབ་པ་ཅི་ཡིན་ནམ།
JER 9:1 བདག་ནི་རང་གི་མི་རྣམས་ཀྱི་ནང་དུ་གསོད་གཅོད་ཐེབས་པའི་མི་ཡི་ཆེད་དུ་ཉིན་མཚན་མེད་པར་ངུ་བའི་ཕྱིར། བདག་གི་མགོ་ནི་ཁྲོན་པ་དང་བདག་གི་མིག་ནི་མཆི་མའི་ཆུ་མིག་ཡིན་པར་སྨོན།
JER 9:2 ཡང་བདག་ནི་ང་ཡི་མི་རྣམས་དང་གྱེས་ནས་འགྲོ་ཐུབ་པའི་ཆེད་དུ་དབེན་སྟོང་དུ་ལམ་པའི་གནས་ཚང་ཞིག་ཡོད་པར་སྨོན། ཅི་ལ་ཞེ་ན། དེ་དག་ཐམས་ཅད་ལོག་གཡེམ་བྱེད་མཁན་དང་གཡོ་སྒྱུའི་སྦྱོར་བ་སྤེལ་མཁན་ཡིན་ནོ། །
JER 9:3 རྫུན་སྨྲ་བའི་ཆེད་དུ་དེ་རྣམས་ཀྱིས་ལྕེ་བཀུག་ནས་གཞུ་དང་འདྲ། དེ་རྣམས་ལ་ཡུལ་ཁམས་སུ་སྟོབས་ཤུགས་རྒྱས་པ་ནི་དྲང་བདེན་གྱི་དབང་གིས་མ་ཡིན་ལ། དེ་དག་གིས་ངན་པའི་སྟེང་དུ་ངན་བསགས་ནས་བདག་ཀྱང་ངོ་མི་ཤེས་ཞེས་དཀོན་མཆོག་ཡ་ཝཱེས་གསུངས།
JER 9:4 སྤུན་ཟླ་ཀུན་གྱིས་མི་ལ་མགོ་སྐོར་གཏོང་ཞིང་ཁྱིམ་མཚེས་ཐམས་ཅད་ཀྱིས་ཀྱང་དཀྲུག་ཤིང་འཕེན་པས་ན། ཁྱོད་ཚོས་རང་གི་ཁྱིམ་མཚེས་ལ་དོགས་ཟོན་གྱིས་ཤིག སྤུན་ཟླ་ལའང་བློ་མ་གཏོད་ཅིག
JER 9:5 དེ་དག་གིས་ཁྱིམ་མཚེས་ལ་མགོ་སྐོར་གཏོང་ཞིང་དྲང་གཏམ་མི་སྨྲ་བར། རང་གི་ལྕེ་ཡིས་རྫུན་ཚིག་སྨྲ་བར་སྦྱང་སྟེ། ནུས་ཤུགས་གང་ཡོད་བཏོན་ནས་སྤྱོད་ངན་སྤྱོད་པའོ། །
JER 9:6 ཁྱོད་ནི་གཡོ་སྒྱུ་ཅན་རྣམས་ཀྱི་དབུས་སུ་སྡོད་པ་དང་། དེ་དག་གིས་གཡོ་སྒྱུ་སྤྱད་པས་ང་རང་ངོ་ཤེས་པར་མ་འདོད་ཅེས་དཀོན་མཆོག་ཡ་ཝཱེས་གསུངས།
JER 9:7 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་དེ་རྣམས་གཙང་མར་བཟོ་བ་དང་ཚོད་བགམ་བྱེད་པར་འགྱུར། བདག་གི་འབངས་མིའི་ཆེད་དུ་ངས་དེ་ལས་གཞན་ཅི་ཞིག་སྤྱོད་འོས་སམ།
JER 9:8 དེ་དག་གི་ལྕེ་ནི་དུག་མདའ་ཡིན་ལ་ཁ་ནས་གཡོ་སྒྱུ་སྨྲ་ཞིང་། ཁྱིམ་མཚེས་ལ་ཁ་ཡག་ཚིག་འཇམ་སྨྲ་ནའང་སེམས་སུ་ཇུས་ངན་བཀོད་ནས་དེ་རྣམས་ལ་གནོད་བསྐྱལ་བ་ཡིན།
JER 9:9 བདག་གིས་དོན་འདི་ཐམས་ཅད་ཀྱི་ཕྱིར་དུ་དེ་དག་ལ་ཉེས་ཆད་མི་གཅོད་ག་ལ་རུང་། ཡུལ་ཁམས་འདི་ལྟ་བུ་ལ་བདག་གིས་ལན་མི་བསློག་གམ་ཞེས་དཀོན་མཆོག་ཡ་ཝཱེས་གསུངས།
JER 9:10 བདག་ནི་རི་རྒྱུད་རྣམས་ཀྱི་ཕྱིར་ངུ་ཞིང་སྡུག་པར་འགྱུར་ལ། དབེན་སྟོང་གི་རྩྭ་སའི་ཆེད་དུ་ངུ་འབོད་བྱེད་དོ། །ཅི་ལ་ཞེ་ན། དེ་རྣམས་སྐམ་ཞིང་དེར་བརྒྱུད་ནས་འགྲོ་མཁན་གཅིག་ཀྱང་མེད་ལ། ཕྱུགས་ཟོག་གི་སྐད་ཀྱང་མི་ཐོས་ཏེ། ནམ་མཁའི་འདབ་ཆགས་དང་ས་ཡི་གཅན་གཟན་ཡང་བྲོས་སོང་ངོ་། །
JER 9:11 བདག་གིས་ཡེ་རུ་སཱ་ལེམ་ནི་ཞིག་རོ་དང་ཁྱི་སྤྱང་གི་གནས་སུ་བསྒྱུར་དགོས་ལ། ཡ་ཧུ་དཱའི་གྲོང་ཁྱེར་རྣམས་ཀྱང་ཤུལ་མེད་དུ་བསྐྱུར་ནས་མི་སུ་ཡང་སྡོད་པར་མི་འགྱུར་རོ། །
JER 9:12 སུ་ཞིག་ལ་ཤེས་རབ་ལྡན་ཞིང་དོན་འདི་རྣམས་རྟོགས་ནུས་སམ། དཀོན་མཆོག་ཡ་ཝཱེའི་ཞལ་གྱིས་སུ་ཞིག་ལ་གསུངས་ཏེ་དོན་འདི་བསྒྲག་ནུས་པར་མཛད་དམ། གནས་འདི་ནི་མེད་པར་བཏང་ནས་དབེན་སྟོང་དུ་ལུས་པ་དང་། དེར་བརྒྱུད་ནས་འགྲོ་མཁན་གཅིག་ཀྱང་མེད་པ་ཅི་ཡིན་ནམ།
JER 9:13 དཀོན་མཆོག་ཡ་ཝཱེས་འདི་སྐད་དུ། མི་འདི་རྣམས་ཀྱིས་བདག་གིས་ཁོ་རྣམས་ཀྱི་མདུན་དུ་བཤམས་པའི་བཀའ་ཁྲིམས་དོར་ཞིང་བདག་གི་བཀའ་ལ་ཡང་མི་མཉན་པ་དང་། བདག་གི་བཀའ་ཁྲིམས་བཞིན་དུ་མ་སྤྱད་པར།
JER 9:14 གཤིས་རྒྱུད་གྱོང་པོའི་རྗེས་སུ་འབྲངས་ཏེ་སྤྱོད་པ་སྤྱད་ཅིང་། དེ་དག་གི་ཕ་མེས་རྣམས་ཀྱིས་བསླབ་པ་བཞིན་དུ་པཱ་ཨལ་རྣམས་ཀྱི་རྗེས་སུ་འབྲངས་པ་ཡིན་ཞེས་པའོ། །
JER 9:15 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག བདག་གིས་མི་འདི་རྣམས་ལ་ཟས་སུ་མཁན་པ་དང་བཏུང་བར་དུག་ཆུ་སྦྱིན་པར་བྱའོ། །
JER 9:16 བདག་གིས་ཁོ་ཚོ་ནི་ཁོ་རྣམས་དང་ཁོ་ཚོའི་མེས་པོ་རྣམས་ལ་རྒྱུས་མེད་པའི་ཡུལ་ཁམས་སུ་གཏོར་བར་བྱ་ཞིང་། དེ་དག་ཚར་མ་བཅད་བར་དུ་རལ་གྲིས་དེ་དག་འདེད་བཅོམ་བྱེད་པར་འགྱུར་ཞེས་གསུངས།
JER 9:17 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དོགས་ཟོན་གྱིས། སྐྱོ་གླུ་ལེན་པའི་བུད་མེད་རྣམས་བསྡུས་ཤིག མི་མངགས་ནས་ངུ་བར་བྱང་བའི་བུད་མེད་རྣམས་བོས་ཤིག
JER 9:18 དེ་དག་མྱུར་དུ་ཡོང་ནས་བདག་ཅག་གི་ཕྱིར་མྱ་ངན་ཞུ་བར་བྱས་ནས། རང་ཅག་གི་མིག་ལས་མཆི་མ་བཞུར་བ་དང་རང་ཅག་གི་མིག་ལྕིབས་ལས་མིག་ཆུ་ཡོང་བར་བྱེད་དགོས།
JER 9:19 ཅི་ལ་ཞེ་ན། ཛ་ཡན་ལས་སྨྲེ་སྔགས་འདོན་པའི་སྒྲ་གྲགས་འོངས་ཏེ་ན་རེ། བདག་ཅག་ཕམ་པར་གྱུར་ཅིང་ཇི་འདྲའི་ངོ་ཚ་བ་ལ། བདག་ཅག་གིས་ཡུལ་ཁམས་དོར་ནས་མི་ཡིས་རང་རེའི་ཁྱིམ་གཞིས་མེད་པར་བཟོས་སོང་ཞེས་སྨྲའོ་ཞེས་གསུངས།
JER 9:20 ཀྱེ་བུད་མེད་རྣམས། དཀོན་མཆོག་ཡ་ཝཱེའི་གསུང་ལ་ཉོན་ཅིག ཁྱོད་ཚོའི་བུ་མོ་རྣམས་ལ་མྱ་ངན་ཞུ་ལུགས་སློབས་དང་། མི་རེ་རེས་རང་གི་ཁྱིམ་མཚེས་ལ་སྐྱོ་གླུ་བསླབ་དགོས།
JER 9:21 ཅི་ལ་ཞེ་ན། འཆི་བ་དཀར་ཁུང་ནས་ཡར་འོངས་ཏེ་རང་ཅག་གི་བཙན་རྫོང་དུ་འཛུལ་བྱུང་། དེས་ཕྱི་རོལ་ཏུ་བྱིས་པ་རྣམས་ཚར་གཅོད་པ་དང་། ཐང་ཆེན་དུ་ན་གཞོན་དག་ཚར་གཅོད་པར་བྱེད་དོ། །
JER 9:22 ཁྱོད་ཀྱིས་འདི་ལྟར་སྨྲ་འོས་ཏེ། དཀོན་མཆོག་ཡ་ཝཱེས་འདི་སྐད་དུ། མི་ཡི་བེམ་པོ་ནི་ཞིང་ཁའི་ལུད་བཞིན་འཕྲེད་དུ་ཉལ་བ་དང་། ཡང་ལོ་ཏོག་རྔ་མཁན་རྣམས་ཀྱི་རྗེས་སུ་ལུས་པའི་སྙེ་མ་བཞིན་དུ་སྡུད་མཁན་མེད་ཅེས་གསུངས།
JER 9:23 དཀོན་མཆོག་ཡ་ཝཱེས་འདི་སྐད་དུ། ཤེས་རབ་ཅན་གྱིས་རང་གི་ཤེས་རབ་ཀྱི་ཕྱིར་ཁ་ཕོ་མ་གཏོང་ཞིག སྟོབས་ཤུགས་ཅན་གྱིས་རང་གི་སྟོབས་ཤུགས་ཀྱི་ཕྱིར་ཁ་ཕོ་མ་གཏོང་ཞིག ཕྱུག་པོས་ཀྱང་རང་གི་རྒྱུ་ནོར་གྱི་ཕྱིར་ཁ་ཕོ་མ་གཏོང་ཞིག
JER 9:24 བསྔགས་བརྗོད་བྱེད་མཁན་གྱིས་རང་ལ་བློ་གྲོས་ལྡན་ཞིང་བདག་ནི་ཡ་ཝཱེ་ཡིན་པ་ཤེས་པ་དང་། ཡང་བདག་ནི་ས་གཞིའི་སྟེང་དུ་བྱམས་བརྩེ་དང་དྲང་གཞག དྲང་བདེན་བཅས་སྤྱོད་པར་དགའ་བ་རྟོགས་པའི་རྐྱེན་གྱིས་བསྔགས་འོས་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 9:25 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། བདག་གིས་ལུས་ཕུང་འབའ་ཞིག་ཏུ་མཚན་སྐྱི་བཅད་པ་རྣམས་ལ་ཉེས་ཆད་གཅོད་པར་འགྱུར་ཏེ།
JER 9:26 དེ་ནི་ཨེ་ཅིབ་དང་ཡ་ཧུ་དཱ། ཨེ་དོམ། ཨམ་མོན། མོ་ཨབ་བཅས་དང་དབེན་སྟོང་དུ་གནས་ཤིང་ཡ་ཐོད་ཀྱི་སྐྲ་གཞར་མཁན་ཐམས་ཅད་དོ། །ཅི་ལ་ཞེ་ན། མི་རིགས་འདི་ཐམས་ཅད་གཙང་མར་མ་མཛད་དེ། ཡེས་ར་ཨེལ་གྱི་ཁྱིམ་རྒྱུད་ཀུན་གྱི་སེམས་ཀྱང་གཙང་མར་མ་མཛད་པའི་ཕྱིར་རོ། །
JER 10:1 ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། དཀོན་མཆོག་ཡ་ཝཱེས་ཁྱོད་ཅག་ལ་གསུང་བའི་བཀའ་ལ་ཉོན་ཅིག
JER 10:2 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་ཕྱི་རོལ་པའི་ཚུལ་བཞིན་མ་བྱེད་ཅིག ནམ་མཁའི་རྟགས་རྣམས་ཀྱིས་ཕྱི་རོལ་པའི་སེམས་དཀྲུགས་ཀྱང་། ཁྱོད་རྣམས་དེ་ལ་མི་འཇིགས་པར་གྱིས།
JER 10:3 མི་རྣམས་ཀྱི་ལུགས་སྲོལ་ལ་སྙིང་པོ་མེད་དེ། དེ་རྣམས་ཀྱིས་ནགས་ལས་ཤིང་ཞིག་སྟ་རེས་བཅད་འོངས་ནས་ལག་ཤེས་པས་ལག་རྩལ་ལ་བརྟེན་ནས་སྐུ་འདྲ་བཟོས་པ་ཡིན།
JER 10:4 མི་ཡིས་གསེར་དངུལ་གྱིས་དེ་བརྒྱན་པ་དང་། མི་འགུལ་བའི་ཕྱིར་འཛེར་མ་དང་ཐོ་བས་བརྟན་པོར་བཟོས།
JER 10:5 སྐུ་འདྲ་ནི་ཁི་རའི་ཞིང་ནང་གི་ཐོ་དང་འདྲ་ཞིང་། སྨྲ་མི་ནུས་ལ་འགྲོ་ཡང་མི་ནུས་པས་ངེས་པར་དུ་མི་ཡིས་ཡར་འགྱོག་དགོས་པ་ཡིན། དེ་རྣམས་ལ་མ་སྐྲག་ཅིག ཅི་ལ་ཞེ་ན། དེ་ཡིས་གནོད་བསྐྱལ་མི་ཐུབ་ལ། བྱིན་རླབས་གནང་བའི་ནུས་པ་ཡང་མེད་དོ་ཞེས་གསུངས།
JER 10:6 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱི་མཚུངས་ཟླ་སུ་ཡང་མེད། ཁྱེད་ནི་མཆོག་ཏུ་གྱུར་པ་དེ་ཡིན་ལ། ཁྱེད་ཀྱི་མཚན་སྙན་ལ་མཐུ་སྟོབས་ཆེའོ། །
JER 10:7 ཀྱེ་མི་རིགས་ཀུན་གྱི་རྒྱལ་པོ་ལགས། ཁྱེད་ལ་གུས་ཤིང་མི་འཇིགས་པ་སུ་ཡོད་དམ། ཁྱེད་ལ་གུས་ཤིང་འཇིགས་པར་འོས་ཏེ། མི་རིགས་ཀུན་གྱི་ཤེས་ལྡན་ཁྲོད་དང་དེ་རྣམས་ཀུན་གྱི་རྒྱལ་ཕྲན་ལའང་ཁྱེད་ཀྱི་དོ་ཟླ་སུ་ཡང་མེད་དོ། །
JER 10:8 དེ་རྣམས་ནི་དུད་འགྲོ་དང་འདྲ་ཞིང་ཐམས་ཅད་བླུན་རྨོངས་ཡིན་ཏེ། སྐུ་འདྲ་ནི་ཤིང་སྡོང་འབའ་ཞིག་ཡིན་ལ་དེའི་བཀའ་སློབ་ལ་ཕན་ཐོགས་ཅི་ཡང་མེད་དོ། །
JER 10:9 ཐཱར་ཞིས་ནས་ཁྱེར་འོངས་པའི་དངུལ་ལེབ་མོ་དང་། ཨུ་ཕཱ་ཟི་ནས་ཁྱེར་འོངས་པའི་གསེར་ཡོད་དེ། ཐམས་ཅད་ལག་ཤེས་པ་དང་དངུལ་མགར་གྱི་ལག་རྩལ་ཡིན། ཡང་མདོག་སྔོན་པོ་དང་རྒྱ་སྨུག་གི་གོས་ཡོད་དེ། དེ་ཚང་མ་ལག་རྩལ་ཅན་གྱི་ལས་ཀ་ཡིན་ནོ། །
JER 10:10 དཀོན་མཆོག་ཡ་ཝཱེ་གཅིག་པུ་ནི་དཀོན་མཆོག་བདེན་པ་ཡིན་ལ། ཁོང་ནི་རྟག་ཏུ་གསོན་པོར་བཞུགས་པའི་དཀོན་མཆོག་དང་དུས་གཏན་གྱི་རྒྱལ་པོ་ཡིན་ཏེ། ཁོང་ཐུགས་ཁྲོས་པ་ཙམ་གྱིས་ས་གཞི་འདར་ཞིང་། ཁོང་གི་ཁྲོ་གཏུམ་ནི་མི་རིགས་ཀུན་གྱིས་མི་ཐེག་གོ །
JER 10:11 ཁྱོད་ཚོས་དེ་དག་ལ་འདི་ལྟར། གནམ་ས་མཛད་མཁན་མིན་པའི་ལྷ་དེ་རྣམས་ནི། ས་སྟེང་དང་གནམ་འོག་ནས་མེད་པར་བཟོ་ངེས་ཞེས་ཤོད་དང་།
JER 10:12 དཀོན་མཆོག་ཡ་ཝཱེས་ཉིད་ཀྱི་ནུས་མཐུ་ལ་བརྟེན་ནས་ས་གཞི་བཀོད་ཅིང་། ཉིད་ཀྱི་ཤེས་རབ་ཀྱིས་འཇིག་རྟེན་མཛད་པ་དང་། ཡང་ཁོང་གི་མཁྱེན་རབ་ཀྱིས་ཨ་སྔོན་དབྱིངས་རྣམས་བཏིངས།
JER 10:13 ཁོང་གིས་གསུང་སྐད་འདོན་དུས་ནམ་མཁའ་ནས་ཆུ་རྣམས་འཕྱུར་ཞིང་། ཁོང་གིས་ས་མཐའ་ནས་སྤྲིན་དང་སྨུག་པ་ལང་བར་མཛད་པ་དང་། ཆར་བ་དང་ཆབས་ཅིག་གློག་དམར་འཁྱུག་པར་མཛད། ཉིད་ཀྱི་གཏེར་མཛོད་རྣམས་ལས་རླུང་ཡང་འདོན་ནོ། །
JER 10:14 མི་རེ་རེ་དུད་འགྲོ་དང་འདྲ་སྟེ་ཤེས་བྱ་མེད་ལ། དངུལ་མགར་རྣམས་ནི་རང་རང་གི་སྐུ་འདྲའི་རྐྱེན་གྱིས་ངོ་ཚ་བ་དང་། དེས་བླུགས་པའི་སྐུ་འདྲ་རྣམས་ནི་རྫུས་མ་ཡིན་ལ་དེ་དག་གི་ནང་དུ་དབུགས་ཀྱང་མེད་དོ། །
JER 10:15 སྐུ་འདྲ་ཐམས་ཅད་སྙིང་པོ་མེད་པ་དང་། དེ་ནི་མི་ལ་མགོ་སྐོར་གཏོང་བྱེད་ཙམ་ཡིན་ཏེ། ཉེས་ཆད་གཅོད་པའི་དུས་ལ་སླེབས་ཚེ་དེ་དག་མེད་པར་བཟོ་ངེས་ཡིན།
JER 10:16 ཡང་ཡ་ཀོབ་ཀྱི་ཐོབ་སྐལ་ནི་དེ་འདྲ་མིན་ཏེ། ཅི་ལ་ཞེ་ན། ཁོང་ནི་ཐམས་ཅད་འགོད་མཁན་གཙོ་བོ་ཡིན་པས་སོ། །ཡེས་ར་ཨེལ་ཡང་ཁོང་གི་ནོར་སྐལ་གྱི་ཚོ་ཁག་ཡིན་པ་དང་། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་སོ། །
JER 10:17 ཀྱེ་མཐའ་ནས་བསྐོར་བའི་མི་རྣམས། ཁྱོད་རྣམས་ཀྱིས་ཅ་ལག་བསྡུས་ནས་ཡུལ་འདི་དང་འབྲལ་བར་གྱིས།
JER 10:18 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ད་རེས་བདག་གིས་ཡུལ་འདིའི་མི་རྣམས་རྒྱང་དུ་གཡུག་པ་དང་། ཡང་དེ་རྣམས་ལ་གནོད་བསྐྱལ་ནས་ཁོ་ཚོའི་གོ་རྟོགས་སད་པར་བྱའོ་ཞེས་གསུངས།
JER 10:19 ང་རང་རྨས་ཤིང་བདག་གི་རྨ་ཁ་ཤིན་ཏུ་ཆེ་བས་སྐྱོ་བ་ལ། ཡིན་ཡང་ངས་འདི་ནི་བདག་གིས་ངེས་པར་བཟོད་དགོས་པའི་སྡུག་བསྔལ་ཡིན་ཞེས་སྨྲས་སོ། །
JER 10:20 ངའི་གུར་བཤིག་ཅིང་ངའི་ཐག་པ་ཐམས་ཅད་བཅད། ངའི་བུ་ཕྲུག་རྣམས་ཀྱང་ང་དང་བྲལ་ནས་མེད་པར་གྱུར་ཏེ། ད་ནི་ངའི་གུར་ཕུབ་མཁན་དང་ངའི་ཡོལ་བ་འགེལ་མཁན་སུ་ཡང་མེད།
JER 10:21 ཅི་ལ་ཞེ་ན། རྫི་བོ་རྣམས་དུད་འགྲོ་ལྟ་བུར་གྱུར་ཅིང་དཀོན་མཆོག་ཡ་ཝཱེ་མ་བཙལ་བས་དོན་མ་འགྲུབ་ལ། དེ་དག་གི་ལུག་ཁྱུ་ཡང་ཐམས་ཅད་ཁ་ཐོར་དུ་སོང་།
JER 10:22 སྐད་ཅིག་ཐོས་ཡོང་སྟེ། ལྟོས་དང་དགྲ་བོ་སླེབས་བྱུང་། ཟིང་སློང་ཆེན་པོ་ཞིག་བྱང་ཕྱོགས་ནས་འོང་ཞིང་། ཡ་ཧུ་དཱའི་གྲོང་ཁྱེར་རྣམས་ཞིག་རོ་དང་ཁྱི་སྤྱང་གི་ཚང་དུ་བསྒྱུར་བའོ། །
JER 10:23 ཀྱེ་དཀོན་མཆོག་ཡ་ཝཱེ་ལགས། མི་ཡི་འགྲོ་ལམ་རང་ལ་མི་དབང་བ་བདག་གིས་རྟོགས་ཏེ། ལམ་འགྲོ་བས་ཀྱང་རང་གི་གོམ་སྟབས་ལ་ཁ་ལོ་བསྒྱུར་མི་ནུས།
JER 10:24 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་དྲང་གཞག་ངང་བདག་གི་སྐྱོན་སེལ་བ་ལས། ཉིད་ཀྱི་ཐུགས་ཁྲོའི་ནང་དུ་བདག་ལ་ཉེས་ཆད་མི་གཅོད་རོགས། ཅི་ལ་ཞེ་ན། ཁྱེད་ཀྱིས་ང་རང་མེད་པར་མི་མཛད་པའི་ཕྱིར་དུའོ། །
JER 10:25 ཁྱེད་ཀྱིས་ཉིད་ཀྱི་ཐུགས་ཁྲོ་ནི་ཁྱེད་མི་ཤེས་པའི་རྒྱལ་ཁམས་དང་ཁྱེད་ཀྱི་མཚན་ནས་མི་འབོད་པའི་མི་རིགས་རྣམས་ཀྱི་སྟེང་དུ་ལྡུག་པར་མཛོད་ཅིག ཅི་ལ་ཞེ་ན། དེ་རྣམས་ཀྱིས་ཡ་ཀོབ་ཁྱུར་མིད་བཏང་བར་མ་ཟད་རྩ་བ་ནས་མེད་པར་བཟོས་ཤིང་། དེ་དག་གི་ཡུལ་ནི་མི་མེད་ས་སྟོང་དུ་བསྒྱུར་བའོ། །
JER 11:1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 11:2 ཁྱོད་ཀྱིས་ཞལ་ཆད་འདིའི་བཀའ་ལ་མཉན་ནས་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་ལ་འདི་ལྟར་ཤོད་ཅིག
JER 11:3 དེ་རྣམས་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་ཞལ་ཆད་འདིའི་བཀའ་ལ་མི་མཉན་པའི་མི་ལ་དམོད་པར་འགྱུར་ངེས།
JER 11:4 ཞལ་ཆད་འདི་ནི་བདག་གིས་ཁྱོད་ཚོའི་ཕ་མེས་རྣམས་ཨེ་ཅིབ་ཡུལ་ནས་ཕྱིར་ཁྲིད་འོངས་པ་དང་། ལྕགས་འཇུ་བྱེད་ཀྱི་མེ་ཐབ་ནས་བྲལ་བའི་ཉིན་མོ་དེར་ཁོ་རྣམས་ལ་བསྒོས་པའི་བཀའ་ཡིན། ཁྱོད་ཚོས་བདག་གི་བཀའ་ལ་ཉོན་ཅིག བདག་གིས་གང་ཞིག་བསྒོས་པ་ཐམས་ཅད་ལྟར་སྤྱད་པ་སྤྱོད་དང་། དེ་ནས་ཁྱོད་རྣམས་བདག་གི་འབངས་མི་དང་། ང་རང་ཁྱོད་ཅག་གི་དཀོན་མཆོག་ཏུ་འགྱུར་ངེས།
JER 11:5 བདག་གིས་ཁྱོད་རྣམས་ཀྱི་ཕ་མེས་རྣམས་ལ་བསྐྱལ་བའི་མནའ་དེ་འགྲུབ་པར་བྱས་ནས། དེ་རྣམས་ལ་དེ་རིང་དང་འདྲ་བར་འོ་མ་དང་སྦྲང་རྩི་བཞུར་བའི་ཡུལ་ཞིག་གནང་བར་བྱའོ་ཞེས་གསུངས་པ་ན། བདག་གིས་ཞུ་ལན་དུ། ཀྱེ་དཀོན་མཆོག་ཡ་ཝཱེ་ལགས། ཨ་མེན་ཞུས་པ་ཡིན།
JER 11:6 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དག་ཏུ་བཀའ་འདི་ཐམས་ཅད་བསྒྲག་དགོས་ཏེ། ཁྱོད་རྣམས་ཀྱིས་ཞལ་ཆད་འདིའི་བཀའ་རྣམས་ལ་མཉན་ནས་དེ་བཞིན་དུ་སྤྱོད་ཅིག
JER 11:7 ཅི་ལ་ཞེ་ན། བདག་གིས་ཁྱོད་ཅག་གི་ཕ་མེས་རྣམས་ཨེ་ཅིབ་ཡུལ་ནས་ཕྱིར་ཁྲིད་འོངས་པ་ནས་དེ་རིང་གི་བར་དུ། དེ་དག་ལ་ཡང་ཡང་བསླབ་བྱ་གནང་སྟེ་བདག་གི་བཀའ་ལ་ཉོན་ཅིག་ཅེས་སྨྲས་ཀྱང་།
JER 11:8 དེ་དག་གིས་མ་མཉན་ཞིང་རྣ་བ་གཏད་ནས་མ་མཉན་པར། རང་གི་སེམས་ངན་གཤིས་གྱོང་གི་རྗེས་སུ་འབྲངས་ཏེ་སྤྱོད་ངན་སྤྱད་པས། བདག་གིས་ཞལ་ཆད་འདིའི་ནང་གི་དམོད་ཚིག་ཐམས་ཅད་དེ་དག་གི་སྟེང་དུ་འབབ་པར་བྱས། བདག་གིས་དེ་སྔ་ཁོ་རྣམས་ལ་ཞལ་ཆད་འདི་བསྲུང་དགོས་པར་བསྒོས་ན་ཡང་དེ་རྣམས་ཀྱིས་མ་བསྲུངས་ཞེས་པའོ་ཞེས་གསུངས་སོ། །
JER 11:9 དཀོན་མཆོག་ཡ་ཝཱེས་ང་ལ་འདི་སྐད་དུ། ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མིའི་ནང་དུ་མཉམ་དུ་ལྐོག་ཇུས་འཐེན་ནས་རྒྱབ་འགལ་བྱེད་པའི་དོན་ཡོད་དེ།
JER 11:10 དེ་རྣམས་ཁ་ཕྱིར་འཁོར་ནས་ཁོ་ཚོའི་ཕ་མེས་རྣམས་ཀྱི་སྤྱོད་ངན་ལྟར་བྱེད་ཅིང་བདག་གི་བཀའ་ལ་མཉན་མི་འདོད་པར། ལྷ་གཞན་དག་གི་རྗེས་སུ་འབྲངས་ནས་ཞབས་ཏོག་བསྒྲུབས་པའོ། །ཡང་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་རྣམས་བདག་གིས་དེ་དག་གི་ཕ་མེས་རྣམས་ཀྱི་བར་དུ་བཞག་པའི་ཞལ་ཆད་དང་འགལ་བས།
JER 11:11 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་ཁོ་རྣམས་ལ་ཆག་སྒོ་འབྱུང་བར་བྱེད་ཅིང་དེ་རྣམས་ཐར་བར་མི་འགྱུར་ལ། དེ་རྣམས་ཀྱིས་བདག་ལ་ནན་གྱིས་ཞུས་ཀྱང་བདག་གིས་མི་མཉན་ཞེས་གསུངས།
JER 11:12 དུས་དེར་ཡ་ཧུ་དཱའི་གྲོང་ཁྱེར་གྱི་མི་རྣམས་དང་ཡེ་རུ་སཱ་ལེམ་གྱི་ཡུལ་མི་དག་གིས་ཁོ་ཚོས་སྤོས་བདུགས་ནས་ཞབས་ཏོག་སྒྲུབ་པའི་ལྷ་རྣམས་ལ་ནན་གྱིས་ཞུས་ཀྱང་། སྡུག་གིས་མནར་བའི་དུས་སུ་ལྷ་དེ་དག་གིས་ཁོ་རྣམས་སྐྱོབ་པར་མི་འགྱུར་རོ། །
JER 11:13 ཀྱེ་ཡ་ཧུ་དཱ། ཁྱོད་ཀྱི་ལྷ་ཡི་གྲངས་ནི་ཁྱོད་ཀྱི་གྲོང་ཁྱེར་གྱི་གྲངས་དང་མཉམ་ཞིང་། ཁྱོད་ཀྱིས་ངོ་ཚའི་གཞི་ཡིན་པའི་པཱ་ཨལ་རྣམས་ལ་སྤོས་བདུག་ཕྱིར་བརྩིགས་པའི་མཆོད་ཁྲི་ཡང་ཡེ་རུ་སཱ་ལེམ་གྱི་ལམ་སྲང་གི་གྲངས་བཞིན་དུ་མང་བས།
JER 11:14 ཁྱོད་ཀྱིས་མི་འདི་རྣམས་ཀྱི་ཆེད་དུ་གསོལ་བ་མ་འདེབས་ཤིག དེ་རྣམས་ཀྱི་ཕྱིར་ཞུ་འབོད་དང་ཞུ་བའང་མ་བྱེད་ཅིག ཅི་ལ་ཞེ་ན། དེ་རྣམས་སྡུག་བསྔལ་གྱིས་མནར་བའི་དུས་སུ་བདག་ལ་ཞུས་ཀྱང་བདག་གིས་ལན་མི་སྦྱིན་ནོ། །
JER 11:15 བདག་གིས་གཅེས་སུ་འཛིན་པ་ཡིས་ནག་ཉེས་ཚབས་ཆེན་བྱས་པས་བདག་གི་མཆོད་ཁང་ནང་དུ་ཅི་ཞིག་བྱེད་དམ། མཆོད་པར་ཕུལ་བའི་ཤ་ཡིས་ཁྱོད་ཀྱི་ཆག་སྒོ་བཟློགས་ནས་ཁྱོད་དགའ་བར་བྱེད་ནུས་སམ།
JER 11:16 སྔར་དཀོན་མཆོག་ཡ་ཝཱེས་ཁྱོད་ཀྱི་མིང་ལ་ཡིད་དུ་འོང་བ་དང་འབྲས་བུ་ལེགས་པོ་བསྐྱེད་པའི་སྐྱུ་རུ་ཤིང་སྔོན་པོ་ཞེས་བཏགས་མོད། འོན་ཀྱང་ད་ལྟ་ཁོང་གིས་རླུང་དམར་གྱི་སྒྲ་ཆེན་པོས་དེ་ལ་མེ་སྦར་ནས་ཡལ་ག་རྣམས་གཅོག་པར་འགྱུར།
JER 11:17 མ་གཞི་ཁྱོད་འཛུགས་མཁན་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཆག་སྒོ་བཏང་ནས་ཁྱོད་ལ་རྒོལ་བར་གསུངས། ཅི་ལ་ཞེ་ན། ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ཀྱིས་སྤྱོད་ངན་སྤྱད་པ་དང་། དེ་དག་གིས་པཱ་ཨལ་ལ་སྤོས་བདུགས་ནས་ང་རང་ཁྲོ་བར་བྱས་པས་སོ། །
JER 11:18 དཀོན་མཆོག་ཡ་ཝཱེས་ང་ལ་མཛུབ་སྟོན་གནང་བས་ངས་རྟོགས་པ་དང་། ཁྱེད་ཀྱིས་དེ་དག་གི་སྤྱོད་ལུགས་ང་ལ་བསྟན་པ་ཡིན།
JER 11:19 ང་ནི་ཞི་ཞིང་དུལ་བའི་ལུ་གུ་ཞིག་དང་འདྲ་བར་བཤའ་རུ་ཁྲིད་པ་དང་། དེ་ཚོས་རང་ཅག་གིས་ལྗོན་ཤིང་དེ་ཤིང་ཏོག་དང་བཅས་མེད་པར་བྱས་ནས། ཁོ་གསོན་ཡུལ་ནས་ཚར་གཅོད་བྱེད་པར་བྱ། ཕྱིན་ཆད་ཁོའི་མིང་ཙམ་ཡང་དྲན་པར་མི་འགྱུར་ཞེས་གྲོས་ངན་བཏབ་ནས་ང་རང་ལྐོག་གསོད་བྱེད་པར་རྩོམ་པ་ངས་མ་ཤེས།
JER 11:20 འོན་ཀྱང་དྲང་བདེན་ཀྱི་ཁྲིམས་ཐག་གཅོད་པ་དང་། མིའི་སེམས་དང་བསམ་པར་ཞིབ་དཔྱོད་མཛད་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས། ངས་རང་གི་ཁ་མཆུ་ཁྱེད་ལ་བཅོལ་བས་ན། ཁྱེད་ཀྱིས་དེ་ཚོར་ལན་གནང་བ་ང་ལ་མཐོང་བར་མཛོད་ཅིག
JER 11:21 དེ་བས་ཁྱོད་ཀྱི་སྲོག་འཚོལ་བའི་ཨ་ན་ཐོད་པ་རྣམས་ལ་དཀོན་མཆོག་ཡ་ཝཱེས་བཀའ་བཀྱོན་གནང་ངོ་། །ཁོ་རྣམས་ན་རེ། ཁྱོད་ནི་ང་ཚོའི་ལག་ཏུ་མི་འཆི་བའི་ཕྱིར་དུ་ཁྱོད་ཀྱིས་དཀོན་མཆོག་ཡ་ཝཱེའི་མཚན་གྱི་སྒོ་ནས་ལུང་མ་སྟོན་ཞེས་སྨྲས།
JER 11:22 དེའི་ཕྱིར་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་དེ་རྣམས་ལ་ཉེས་ཆད་གཅོད་ངེས་ལ། དེ་དག་གི་ན་གཞོན་རྣམས་ནི་རལ་གྲིའི་འོག་ནས་འཆི་བ་དང་། དེ་དག་གི་བུ་དང་བུ་མོ་རྣམས་ནི་མུ་གེ་ལས་འཆི་བར་འགྱུར།
JER 11:23 ཉེས་ཆད་གཅོད་པའི་དུས་དེར་བདག་གིས་ཨ་ན་ཐོད་པ་རྣམས་ལ་ཆག་སྒོ་འབྱུང་བར་བྱེད་པས། དེ་རྣམས་ལས་སུ་ཡང་ལུས་པར་མི་འགྱུར་ཞེས་གསུངས་སོ། །
JER 12:1 ཀྱེ་དཀོན་མཆོག་ཡ་ཝཱེ་ལགས། བདག་གིས་ཁྱེད་དང་རྩོད་པའི་དུས་སུ་ཁྱེད་ཉིད་ནམ་ཡང་དྲང་བདེན་ཡིན། ཡིན་ཡང་དྲང་གཞག་གི་ཐད་ངས་ད་དུང་ཁྱེད་ལ་རྩོད་དགོས་ཏེ། ངན་པའི་ལམ་ནི་ཅིའི་ཕྱིར་བདེ་བླག་ཡིན་ནམ། གཡོ་སྒྱུ་ཆེས་ཆེར་སྤེལ་མཁན་ཐམས་ཅད་ཅིའི་ཕྱིར་བདེ་བར་གནས་སམ།
JER 12:2 ཁྱེད་ཀྱིས་ཁོ་རྣམས་བཙུགས་ནས་དེ་རྣམས་རྩ་བ་རྒྱས་ཤིང་ཡར་སྐྱེས་ཏེ་འབྲས་བུའང་ཐོགས་པ་ཡིན། དེ་རྣམས་ཁ་ནས་ཁྱེད་དང་ཉེ་ཡང་སེམས་ནི་ཁྱེད་དང་རིང་དུ་གྱེས་སོ། །
JER 12:3 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་རང་མཁྱེན་ཞིང་གཟིགས་པ་དང་། ངའི་སེམས་ནི་ཁྱེད་ཀྱི་ཕྱོགས་སུ་གང་འདྲ་ཡིན་པར་ཞིབ་དཔྱོད་མཛད་པ་ཡིན། ཁྱེད་ཀྱིས་དེ་རྣམས་ཕྱི་རུ་དྲུད་ནས་བཤས་ལུག་བཞིན་དུ་གསོད་པའི་ཉིན་མོའི་བར་དུ་ལོགས་སུ་བཀར་བར་མཛོད།
JER 12:4 ཡུལ་འདིས་མྱ་ངན་བྱེད་ཅིང་རི་ཐང་གི་རྩྭ་སྔོན་ཡོད་ཚད་སྐམ་ནས་ནམ་དུས་བར་དུ་ལུས་སམ། ཅི་ལ་ཞེ་ན། དེ་རུ་སྡོད་པའི་མི་རྣམས་ཀྱི་སྤྱོད་ངན་གྱི་རྐྱེན་གྱིས། ཕྱུགས་ཟོག་དང་འདབ་ཆགས་ཐམས་ཅད་རྩ་བ་ནས་མེད་པར་གྱུར་ཏེ། སྔར་དེ་དག་གིས་ཁོང་གིས་ངེད་ཅག་གི་མཇུག་འབྲས་མི་མཐོང་ཞེས་སྨྲས་སོ། །
JER 12:5 ཡང་ཁྱོད་ནི་རྐང་ཐང་དང་མཉམ་དུ་རྒྱུག་དུས་ཐང་ཆད་པ་ཡིན་ན། རྟ་མཆོག་དང་ཅི་ལྟར་འགྲན་ནམ། ཁྱོད་ནི་བདེ་ཞིང་འཇགས་པའི་ཡུལ་དུའང་འགྱེལ་བ་ཡིན་ན། ཡོར་དན་གཙང་པོའི་ནགས་ཚལ་དུ་ཅི་ཞིག་བྱའམ།
JER 12:6 ཁྱོད་རང་གི་སྤུན་མཆེད་རྣམས་དང་ཁྱོད་ཀྱི་ཕ་རྒྱུད་ཀྱིས་ཀྱང་ཁྱོད་ལ་གཡོ་སྒྱུ་སྤྱད་དེ། ཁྱོད་ཀྱི་རྒྱབ་ནས་སྐད་ཆེན་པོས་འུར་རྒྱག་པ་དང་། དེ་ཚོས་ཁྱོད་ལ་གཏམ་སྙན་མོ་བཤད་ནའང་ཁྱོད་ཀྱིས་དེ་དག་ལ་ཡིད་ཆེས་བྱེད་མི་རུང་།
JER 12:7 ངས་རང་གི་ཕོ་བྲང་སྤངས་ཏེ་རང་གི་ནོར་སྐལ་ཡང་དོར་ནས། བདག་གི་སྙིང་ཉེ་བ་དེ་མོའི་དགྲ་ཡི་ལག་ཏུ་གཏད་པ་ཡིན།
JER 12:8 ངའི་ནོར་སྐལ་ནི་ང་ལ་མཚོན་ན་ནགས་ཚལ་གྱི་སེང་གེ་དང་འདྲ་བར་གྱུར་ཏེ། དེས་ང་རོ་དང་བཅས་ང་ལ་རྒོལ་བས་ང་དེ་ལ་སྡང་བ་ཡིན།
JER 12:9 ངའི་ནོར་སྐལ་ནི་ང་ལ་མཚོན་ན་བྱ་རྒོད་ཁྲ་བོ་དང་འདྲ་ཞིང་། བྱ་རྒོད་གཞན་རྣམས་ཀྱིས་ཕྱོགས་བཞི་ནས་མོ་ལ་རྒོལ་བ་མ་ཡིན་ནམ། ཁྱོད་རྣམས་སོང་ནས་རི་ཐང་གི་གཅན་གཟན་སྣ་ཚོགས་བསྡུས་ནས་དེ་རྣམས་ལ་ཧབ་ཟ་བྱེད་དུ་ཆུག་ཅིག
JER 12:10 ལུག་རྫི་མང་པོས་ངའི་རྒུན་འབྲུམ་ར་བ་བརླགས་ནས། ངའི་ས་ཆ་རྣམས་བརྫིས་ཤིང་ངའི་ཡིད་དུ་འོང་བའི་ས་ཆ་རྣམས་མི་མེད་ལུང་སྟོང་དུ་བསྒྱུར་ཏོ། །
JER 12:11 ཁོ་རྣམས་ཀྱིས་ཡུལ་དེ་ཐང་རྒོད་དུ་བསྒྱུར་ཅིང་། ཡུལ་དེ་ཐང་རྒོད་དུ་གྱུར་པས་བདག་གི་ཕྱོགས་སུ་ངུ་འབོད་བྱེད། ཡུལ་ཐམས་ཅད་ཐང་རྒོད་དུ་གྱུར་ནའང་དེར་དོ་ཁུར་བྱེད་མཁན་སུ་ཡང་མེད།
JER 12:12 སྲོག་ལེན་མཁན་ནི་དབེན་སྟོང་གི་སྐྱ་ཐེར་ཐེར་གྱི་མཐོ་སྒང་རྣམས་སུ་འོངས་ནས། དཀོན་མཆོག་ཡ་ཝཱེའི་རལ་གྲི་ཡིས་ཡུལ་གྱི་འདི་ཕྱོགས་ནས་ཕ་གའི་བར་དུ་ཐམས་ཅད་མེད་པར་མཛད་ཅིང་། ཤ་ཁྲག་ལས་གྲུབ་པ་གང་ལའང་བདེ་བ་མེད་དོ། །
JER 12:13 དེ་རྣམས་ཀྱིས་གྲོ་བཏབ་ཀྱང་ཚེར་མ་བསྡུས། དཀའ་ལས་ཆེན་པོ་མྱངས་ནའང་འབྲས་བུ་ཅི་ཡང་མ་ཐོབ། ཅི་ལ་ཞེ་ན། དཀོན་མཆོག་ཡ་ཝཱེའི་ཁྲོ་གཏུམ་གྱི་རྐྱེན་གྱིས་ཁྱོད་རྣམས་རང་གི་སྟོན་ཐོག་གི་ཕྱིར་ངོ་ཚ་བར་འགྱུར།
JER 12:14 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་ཁྱིམ་མཚེས་ངན་པ་སྟེ་ངས་ཡེས་ར་ཨེལ་གྱི་མི་རྣམས་ལ་གནང་བའི་ནོར་སྐལ་བཙན་བཟུང་བྱེད་མཁན་ཐམས་ཅད་ཡུལ་ཁམས་འདི་ནས་འདོན་པར་བྱ་ཞིང་། ངས་ཡ་ཧུ་དཱའི་ཁྱིམ་རྒྱུད་ཀྱང་དེ་དག་གི་ཁྲོད་ནས་འདོན་པར་འགྱུར།
JER 12:15 ངས་ཁོ་རྣམས་བཏོན་པའི་རྗེས་སུ་ཁ་ཕྱིར་འཁོར་ནས་དེ་རྣམས་སྙིང་རྗེས་བསྐྱང་བ་དང་། དེ་རྣམས་ཕྱིར་ཁྲིད་འོངས་ནས་རང་རང་གི་ནོར་སྐལ་ཏེ་རང་རང་གི་ཡུལ་དུ་ལོག་པར་བྱའོ། །
JER 12:16 གལ་སྲིད་དེ་དག་གིས་ལྷག་བསམ་རྣམ་དག་གིས་ངའི་འབངས་མིའི་ཚུལ་བསླབ་ཏེ། ངའི་མིང་གི་སྒོ་ནས་མནའ་བསྐྱལ་ནས་འདི་ལྟར། ངས་གཏན་དུ་བཞུགས་པའི་དཀོན་མཆོག་ཡ་ཝཱེའི་མཚན་གྱི་སྒོ་ནས་མནའ་སྐྱེལ་ལོ་ཞེས་སྨྲ་ཞིང་། སྔར་དེ་དག་གིས་ངའི་འབངས་མི་ལ་པཱ་ཨལ་གྱི་མིང་གི་སྒོ་ནས་མནའ་སྐྱེལ་ལུགས་བསླབས་པ་བཞིན་བྱས་ན། དེ་དག་ངའི་འབངས་མིའི་ནང་དུ་གཞི་ཚུགས་པར་འགྱུར།
JER 12:17 འོན་ཀྱང་དེ་རྣམས་ཀྱིས་མ་མཉན་ན། ངས་མི་རིགས་དེ་ནི་འདོན་པར་འགྱུར་བར་མ་ཟད་རྩ་བ་ནས་མེད་པར་གཏོང་ངེས་ཡིན་ཞེས་དཀོན་མཆོག་ཡ་ཝཱེས་གསུངས་པའོ། །
JER 13:1 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་སོང་ལ་སོ་རས་ཀྱི་སྐ་རགས་ཤིག་ཉོས་ཏེ་རྐེད་པར་དཀྲིས་ཤིག ཡང་དེ་ཆུའི་ནང་དུ་མ་སྦང་ཞིག་ཅེས་གསུངས་པས།
JER 13:2 ངས་ཀྱང་དཀོན་མཆོག་ཡ་ཝཱེའི་བཀའ་བཞིན་དུ་སྐ་རགས་ཤིག་ཉོས་ནས་རང་གི་རྐེད་པར་དཀྲིས་སོ། །
JER 13:3 ཡང་དཀོན་མཆོག་ཡ་ཝཱེའི་བཀའ་ཐེངས་གཉིས་པ་ང་ལ་བྱུང་སྟེ་འདི་སྐད་དུ།
JER 13:4 ཁྱོད་ཀྱིས་རང་གིས་ཉོས་ཡོང་ནས་རྐེད་པར་དཀྲིས་ཡོད་པའི་སྐ་རགས་ཁྱེར་ནས། ཡར་ལོངས་ལ་ཕི་རཱད་གཙང་པོའི་འགྲམ་དུ་སོང་ལ། སྐ་རགས་དེའི་བྲག་ཕུག་ནང་དུ་སྦ་བར་གྱིས་ཞེས་གསུངས་པ་ལ།
JER 13:5 དཀོན་མཆོག་ཡ་ཝཱེས་ང་ལ་བཀའ་བབས་པ་བཞིན་དུ། བདག་སོང་ནས་སྐ་རགས་དེ་ཕི་རཱད་གཙང་པོའི་འགྲམ་དུ་སྦས་སོ། །
JER 13:6 ཡང་ཉིན་མང་པོ་འགོར་རྗེས་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ལོངས་ལ་ཕི་རཱད་གཙང་པོར་སོང་ནས། བདག་གིས་ཁྱོད་ལ་བཀའ་བབས་ཏེ་སྦས་པའི་སྐ་རགས་དེ་ལོངས་ཤོག་ཅེས་གསུངས།
JER 13:7 དེ་ནས་ང་ཕི་རཱད་གཙང་པོར་སོང་ནས་སྐ་རགས་དེ་ངས་སྦས་ས་ནས་བསློགས་ཏེ་བླངས་པ་ན། ལྟོས་ཤིག སྐ་རགས་ཧྲུལ་ནས་བེད་མེད་དུ་གྱུར་ཏོ། །
JER 13:8 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།
JER 13:9 དཀོན་མཆོག་ཡ་ཝཱེས་འདི་སྐད་དུ། ངས་ཡ་ཧུ་དཱའི་ང་རྒྱལ་དང་ཡེ་རུ་སཱ་ལེམ་གྱི་རང་སྣང་ཆེན་པོ་ཡང་དེ་དང་དེ་བཞིན་དུ་ཉམས་པར་བྱའོ། །
JER 13:10 མི་ངན་པ་འདི་དག་གིས་ངའི་བཀའ་ལ་མི་མཉན་པར། རང་གི་གཤིས་རྒྱུད་གྱོང་པོ་བཞིན་དུ་སྤྱོད་པ་སྤྱད་དེ། ལྷ་གཞན་རྣམས་ཀྱི་རྗེས་སུ་འབྲངས་པ་དང་དེ་དག་ལ་ཞབས་ཏོག་བསྒྲུབས་ནས་ཕྱག་བཙལ་བས། ཁོ་རྣམས་ཀྱང་སྐ་རགས་འདི་བཞིན་དུ་སྤྱོད་ཡུལ་གང་ཡང་མེད་པར་འགྱུར།
JER 13:11 སྐ་རགས་ཅི་ལྟར་མི་ཡི་རྐེད་པར་འབྱར་བ་བཞིན། ངས་ཀྱང་ཡེས་ར་ཨེལ་ཁྱིམ་རྒྱུད་ཐམས་ཅད་དང་ཡ་ཧུ་དཱའི་ཁྱིམ་རྒྱུད་ཐམས་ཅད་ནི། ང་ལ་གཏོགས་པའི་མི་ལ་གྱུར་ནས་ང་ལ་མཚན་སྙན་གྲགས་དང་། བསྟོད་པ། གཟི་བརྗིད་བཅས་འབྱུང་བར་ངས་རང་ལ་སྦྱར་བ་ཡིན་མོད། འོན་ཀྱང་དེ་དག་གིས་མཉན་པར་མ་འདོད་དོ་ཞེས་དཀོན་མཆོག་ཡ་ཝཱེས་གསུངས་པའོ། །
JER 13:12 དེའི་ཕྱིར། ཁྱོད་ཀྱིས་དེ་དག་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། རྒུན་ཆང་གི་རྫ་མ་རེ་རེ་རྒུན་ཆང་གིས་བཀང་བར་བྱོས་ཤིག་ཅེས་པའོ་ཞེས་སྨྲོས་དང་། དེ་དག་གིས་ཁྱོད་ལ་ལན་དུ། ངེད་ཅག་གིས་རྒུན་ཆང་གི་རྫ་མ་རེ་རེ་རྒུན་ཆང་གིས་བཀང་བར་བྱེད་མི་ཤེས་སམ་ཞེས་སྨྲ་བར་འགྱུར་ལ།
JER 13:13 ཡང་ཁྱོད་ཀྱིས་དེ་དག་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་གནས་འདིའི་ཡུལ་མི་ཐམས་ཅད་དེ། དཱ་བིད་ཀྱི་ཁྲི་ལ་བཞུགས་པའི་རྒྱལ་པོ་དང་མཆོད་དཔོན། ལུང་སྟོན་པ། ཡེ་རུ་སཱ་ལེམ་གྱི་ཡུལ་མི་ཐམས་ཅད་རྒུན་ཆང་གིས་རབ་ཏུ་བཟི་བར་བྱེད་ཅིང་།
JER 13:14 བདག་གིས་དེ་རྣམས་ཕན་ཚུན་འགལ་བར་བྱེད་དེ་ཕ་དང་བུ་ཡང་ཕན་ཚུན་འགལ་བར་འགྱུར། བདག་གིས་གཅེས་སུ་མི་འཛིན་ཞིང་། ཤ་ཚ་བར་མི་བྱེད་ལ། སྙིང་རྗེ་ཡང་མི་བྱེད་པར་དེ་དག་ཚར་དུ་གཅོད་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 13:15 འདི་ནི་དཀོན་མཆོག་ཡ་ཝཱེས་གསུངས་པ་ཡིན་པས་ཁྱོད་ཚོས་ཉོན་ཅིག རྣ་བ་གཏད་ནས་ཉོན་ཅིག ང་རྒྱལ་མ་སྐྱེས་ཤིག
JER 13:16 ཁྱོད་རྣམས་ཀྱི་དཀོན་མཆོག་ཡ་ཝཱེས་ད་དུང་མུན་ནག་མ་གནང་གོང་དང་། ཁྱོད་རྣམས་ཀྱི་རྐང་པ་མུན་པ་འཐིབས་པའི་རི་བོར་མ་འགྱེལ་སྔོན་དུ། གཟི་བརྗིད་ཐམས་ཅད་ཁོང་ལ་ཕུལ་དང་། དེ་མིན་ཚེ་ཁྱོད་རྣམས་ཀྱིས་འོད་ལ་སྒུག་ཀྱང་ཁོང་གིས་འོད་ནི་སྨག་རུམ་དང་མུན་ནག་ཏུ་མཛད་དོ། །
JER 13:17 ཁྱོད་རྣམས་ཀྱིས་གཏམ་འདིར་མི་མཉན་ན། ཁྱོད་ཚོའི་ང་རྒྱལ་གྱི་ཕྱིར་ང་རང་ཕག་ནས་ངུས་ཏེ་ངའི་མིག་ལས་སྡུག་གི་མཆི་མ་བཞུར་ངེས་ཡིན། ཅི་ལ་ཞེ་ན། དཀོན་མཆོག་ཡ་ཝཱེའི་ལུག་ཁྱུ་བཙོན་དུ་ཁྱེར་བའི་ཕྱིར་རོ། །
JER 13:18 ཁྱོད་ཀྱིས་རྒྱལ་པོ་དང་རྒྱལ་ཡུམ་གཉིས་ལ་འདི་ལྟར། ཁྱོད་ཅག་གི་དཔལ་དང་ལྡན་པའི་ཅོད་པན་དེ་ཁྱོད་ཚོའི་མགོ་ནས་མར་ལྷུང་བས་ན་ཁྱོད་རྣམས་ནི་ཁེངས་སྐྱུང་ངང་སྡོད་ཅིག་ཅེས་སྨྲོས་ཤིག
JER 13:19 ནེ་གུབ་ཡུལ་གྱི་གྲོང་ཁྱེར་རྣམས་ཀྱི་སྒོ་བརྒྱབ་ནས་དེ་འབྱེད་མཁན་སུ་ཡང་མེད་ལ། ཡ་ཧུ་དཱ་ཡོངས་རྫོགས་བཙོན་དུ་ཁྱེར་ནས་ཚང་མ་བཙོན་དུ་ཁྲིད་དོ། །
JER 13:20 ཁྱོད་རྣམས་ཀྱིས་མགོ་བོ་ཡར་བཀྱགས་ཏེ་བྱང་ཕྱོགས་ནས་འོངས་པའི་མི་རྣམས་ལ་ལྟོས་ཤིག ཁྱོད་ཀྱིས་གཟི་བརྗིད་དུ་བརྩིས་པའི་ལུག་ཁྱུ་སྟེ་སྔར་ཁྱོད་ལ་གནང་བའི་ལུག་ཁྱུ་ད་ལྟ་གང་དུ་ཡོད་དམ།
JER 13:21 དཀོན་མཆོག་ཡ་ཝཱེས་ཁྱོད་ཀྱིས་བསླབས་པའི་མནའ་གྲོགས་རྣམས་འགོ་དཔོན་དུ་བསྐོས་ནས་ཁྱོད་ལ་དབང་བསྒྱུར་བར་མཛད་པས་ཁྱོད་ལ་སྨྲ་བ་ཅི་ཞིག་ཡོད་དམ། ཁྱོད་སྡུག་བསྔལ་གྱིས་བཟུང་ནས་གཟེར་རྒྱག་པའི་བུད་མེད་ལྟར་འགྱུར་བ་མ་ཡིན་ནམ།
JER 13:22 ཇི་སྟེ་ཁྱོད་ཀྱིས་སེམས་སུ་དོན་འདི་ཐམས་ཅད་བདག་གི་སྟེང་དུ་བྱུང་བ་ཅི་ཡིན་ནམ་སྙམ་ན། ཁྱོད་ཀྱི་ཐུ་བ་རྣམས་ཡར་བཀྱགས་ནས་ཁྱོད་ཀྱི་ཕྱི་རྟིང་རྨས་པ་ ནི་ཁྱོད་སྡིག་པ་ཆེ་བའི་རྐྱེན་གྱིས་ཡིན།
JER 13:23 གུ་ཤ་པས་སྐྱི་མོ་ག་ལ་བསྒྱུར་ཐུབ་བམ། གཟིག་གིས་རང་གི་ཁྲ་ཐིག་བརྗེ་ནུས་སམ། ཇི་སྟེ་ནུས་ན། སྤྱོད་ངན་ལ་གོམས་པ་ཁྱོད་ཚོས་ཀྱང་བཟང་པོ་སྤྱོད་ནུས་པ་ཡིན།
JER 13:24 དེ་བས་ངས་དེ་དག་ནི་དབེན་སྟོང་གི་རླུང་གིས་འཁྱེར་བའི་སྦུར་མ་ལྟར་འཁུར་བར་བྱའོ། །
JER 13:25 དཀོན་མཆོག་ཡ་ཝཱེས་འདི་སྐད་དུ། འདི་ནི་ཁྱོད་ལ་འཐོབ་འོས་པ་སྟེ་བདག་གིས་ཁྱོད་ལ་ཚད་པའི་ཟ་སྐལ་ཡིན། ཅི་ལ་ཞེ་ན། ཁྱོད་ཀྱིས་ང་བརྗེད་པར་གྱུར་ནས་རྫུས་མ་ལ་བརྟེན་པའི་ཕྱིར་རོ། །
JER 13:26 དེའི་ཕྱིར་ངས་ཁྱོད་ཀྱི་ཐུ་བ་ཡར་བརྫེས་ནས་ཁྱོད་ཀྱི་གདོང་ལ་བཀབ་སྟེ་ཁྱོད་ཀྱི་ངོ་ཚ་རྣམས་མངོན་པར་བྱ།
JER 13:27 ཁྱོད་ཀྱིས་ས་སྟོང་གི་རི་ཀླུང་རྣམས་སུ་ལོག་གཡེམ་སྤྱད་ནས་སྐད་ཅོར་རྒྱག་པ་དང་། གཡེམ་སྦྱོར་ལ་བརྩོན་པའི་ཞེན་ལོག་གི་ལས་འདི་རྣམས་ངས་མཐོང་བ་ཡིན། ཀྱེ་ཡེ་རུ་སཱ་ལེམ་ཁྱོད་ལ་ཆག་སྒོ་འབྱུང་། ཁྱོད་གཙང་མར་བཟོ་མི་འདོད་པར་ག་དུས་བར་དུ་བསྒུག་དགོས་སམ་ཞེས་གསུངས་སོ། །
JER 14:1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་ནས་ཐན་པའི་སྐོར་གླེང་བ་སྟེ།
JER 14:2 ཡ་ཧུ་དཱ་ཡིས་མྱ་ངན་བྱེད། དེའི་མཁར་སྒོ་རྣམས་ཉམས་པར་གྱུར་ནས་མི་ཐམས་ཅད་སར་བསྡད་དེ་མྱ་ངན་ཞུ་ཞིང་། ཡེ་རུ་སཱ་ལེམ་གྱི་ངུ་སྐད་ཡར་ཁྱབ་པ་ཡིན།
JER 14:3 དེ་དག་གི་སྐུ་དྲག་རྣམས་ཀྱིས་ཞབས་ཕྱི་རྣམས་ཆུ་ལེན་དུ་མངགས་ནས། དེ་རྣམས་རྫིང་བུའི་འགྲམ་དུ་ཕྱིན་ཡང་ཆུ་མ་རྙེད་པས་སྣོད་སྟོང་བ་ཁུར་ནས་ངོ་ཚ་ཞིང་མགོ་བསྒུར་ཏེ་ཕྱིར་ལོག་འོང་།
JER 14:4 ས་ལ་ཆར་མ་བབས་པར་ས་གཞི་སྐམ་ནས་གས་པར་གྱུར་པས། ཞིང་བ་རྣམས་ཀྱང་ངོ་ཚ་ནས་མགོ་བསྒུར་ཏོ། །
JER 14:5 དེ་ཡང་རྩྭ་མེད་པས་ན་ཐང་རྒོད་ཀྱི་ཤ་མོ་ལ་ཤ་ཕྲུག་སྐྱེས་ཀྱང་དེ་སྤང་བར་བྱེད།
JER 14:6 རྐྱང་རྣམས་སྐྱ་ཐེར་ཐེར་གྱི་རི་སྒང་དུ་འགྲེང་ཞིང་ཁྱི་སྤྱང་ལྟར་དབུགས་རྔུབ་པ་དང་། རྩྭ་མེད་པས་དེ་དག་གི་མིག་ལ་མདངས་མེད་པར་འགྱུར་ཞེས་གསུངས།
JER 14:7 ཀྱེ་དཀོན་མཆོག་ཡ་ཝཱེ་ལགས། ངེད་རྣམས་ཀྱིས་ཐེངས་མང་པོར་ངོ་ལོག་བྱས་ཏེ་ཁྱེད་དང་འགལ་བའི་སྡིག་པ་བསགས་པས། ངེད་ཅག་གི་སྡིག་པས་ངེད་རྣམས་ལ་ར་སྤྲོད་བྱེད་ནའང་། ཁྱེད་ཀྱིས་ཉིད་ཀྱི་མཚན་གྱི་དོན་དུ་ད་དུང་འཕྲིན་ལས་མཛོད་ཅིག
JER 14:8 ཀྱེ་ཡེས་ར་ཨེལ་གྱི་རེ་བ་བཅོལ་ས་དང་དཀའ་སྡུག་ལ་འཕྲད་དུས་སྐྱབས་སུ་འགྲོ་ས་ལགས། ཁྱེད་ནི་ཡུལ་ཁམས་འདིར་བྱེས་སུ་སྡོད་པའི་མི་དང་མཚུངས་ཤིང་། ཡང་ན་ཞག་གཅིག་ལ་མ་གཏོགས་མི་འདུག་པའི་མགྲོན་པོ་ཞིག་དང་འདྲ་བ་ཅི་ཡིན་ནམ།
JER 14:9 ཁྱེད་ནི་ཧོན་འཐོར་བའི་མི་ཞིག་གམ། ཡང་ན་མི་སྐྱོབ་པར་མི་ནུས་པའི་དཔའ་བོ་ཞིག་དང་འདྲ་བ་ཅི་ཡིན་ནམ། ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་སྔར་བཞིན་ངེད་ཅག་གི་དཀྱིལ་དུ་བཞུགས་ཤིང་། ངེད་རྣམས་ནི་ཁྱེད་ཀྱི་མཚན་ལ་གཏོགས་པའི་མི་ཡིན་པས། ཁྱེད་ཀྱིས་ངེད་རྣམས་འདོར་བར་མི་མཛད་རོགས།
JER 14:10 དཀོན་མཆོག་ཡ་ཝཱེས་མི་འདི་རྣམས་ལ་འདི་སྐད་དུ། མི་འདི་དག་ནི་གང་སར་འཁྱམ་པ་ལ་དགའ་ཞིང་རང་གི་གོམ་སྟབས་ལ་ཚོད་མ་བཟུང་བའི་རྐྱེན་གྱིས། དཀོན་མཆོག་ཡ་ཝཱེས་དེ་རྣམས་དང་ལེན་མི་བྱེད་པར། ད་ལྟ་ཁོང་གིས་དེ་ཚོའི་སྡིག་ཉེས་རྣམས་དྲན་ཞིང་། དེ་དག་གི་སྡིག་པའི་ཕྱིར་དུ་ཉེས་ཆད་གཅོད་དོ་ཞེས་གསུངས་སོ། །
JER 14:11 ཡང་དཀོན་མཆོག་ཡ་ཝཱེས་ང་ལ་འདི་སྐད་དུ། མི་འདི་དག་ལ་བྱིན་རླབས་འཐོབ་པའི་ཕྱིར་ཞུ་བ་མ་བྱེད་ཅིག
JER 14:12 དེ་དག་གིས་སྨྱུང་གནས་སྲུང་དུས་ངས་ཁོ་ཚོའི་ཞུ་བར་མི་མཉན་ལ། སྦྱིན་སྲེག་གི་མཆོད་པ་དང་འབྲུ་རིགས་ཀྱི་མཆོད་པ་འབུལ་དུས་ངས་དང་ལེན་མི་བྱེད་པར། ངས་དེ་དག་རལ་གྲི་དང་མུ་གེ རིམས་ནད་བཅས་ཀྱིས་མེད་པར་བྱའོ་ཞེས་གསུངས་སོ། །
JER 14:13 དེ་ནས་ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། གཟིགས་དང་། ལུང་སྟོན་པ་རྣམས་ཀྱིས་ནམ་རྒྱུན་དེ་རྣམས་ལ། ཁྱོད་ཅག་གིས་རལ་གྲི་མཐོང་བར་མི་འགྱུར། མུ་གེའང་འབྱུང་བར་མི་འགྱུར། དཀོན་མཆོག་ཡ་ཝཱེས་ཡུལ་ཁམས་འདི་ནས་ཁྱོད་རྣམས་ལ་དུས་གཏན་གྱི་ཞི་བདེ་གནང་བར་འགྱུར་ཞེས་སྨྲས་སོ་ཞུས་པ་ལ།
JER 14:14 དཀོན་མཆོག་ཡ་ཝཱེས་ང་ལ་འདི་སྐད་དུ། ལུང་སྟོན་པ་དེ་རྣམས་ཀྱིས་ངའི་མིང་གཡར་ནས་རྫུན་གྱི་ལུང་སྟོན་པ་དང་། ངས་དེ་དག་མ་མངགས་ལ་ཁོ་ཚོར་བཀའ་ཡང་མ་བསྒོས། གསུང་ཡང་མ་གནང་ངོ་། །དེ་དག་གིས་ཁྱོད་རྣམས་ལ་ལུང་བསྟན་པ་ནི་ཞལ་གཟིགས་རྫུས་མ་དང་མོ་དང་། སྙིང་པོ་མེད་པའི་དོན། རང་སེམས་ཀྱི་གཡོ་སྒྱུ་བཅས་ཡིན་པས།
JER 14:15 དཀོན་མཆོག་ཡ་ཝཱེས་འདི་སྐད་དུ། ངའི་མིང་གཡར་ནས་ལུང་སྟོན་མཁན་གྱི་ལུང་སྟོན་པ་དེ་རྣམས་གླེང་ན་ངས་དེ་རྣམས་མངགས་མེད། དེ་དག་གིས་ཡུལ་འདི་ལ་རལ་གྲི་དང་མུ་གེ་མི་འབྱུང་ཟེར་ཡང། དོན་དམ་དུ་ལུང་སྟོན་པ་དེ་དག་ནི་རལ་གྲི་དང་མུ་གེས་མེད་པར་བཟོ་ངེས་ཡིན།
JER 14:16 དེ་དག་གི་ལུང་བསྟན་ལ་ཉན་པའི་མི་རྣམས་ཀྱང་མུ་གེ་དང་རལ་གྲིའི་རྐྱེན་གྱིས། ཡེ་རུ་སཱ་ལེམ་གྱི་སྲང་ལམ་དུ་གཡུགས་ནས་དུར་ལ་འཇུག་མཁན་ཡང་མེད་དེ། ཁོ་རྣམས་ཀྱི་ཆུང་མ་དང་བུ་བུ་མོ་རྣམས་ཀྱང་དེ་བཞིན་ཡིན། ངས་དེ་དག་གི་ངན་པ་ནི་དེ་ཚོའི་སྟེང་དུ་བླུག་པར་འགྱུར།
JER 14:17 ཁྱོད་ཀྱིས་དེ་རྣམས་ལ་འདི་ལྟར། ངའི་མི་རྣམས་ལ་གནོད་པ་ཚབས་ཆེན་ཐེབས་ཏེ་རྨ་ཁ་རབ་ཏུ་ཆེ་བས། ངའི་མིག་ནས་ཉིན་མཚན་མེད་པར་མཆི་མ་བཞུར་བར་གྱུར་ཅིག
JER 14:18 གལ་ཏེ་ང་རང་ཞིང་ཁར་ཕྱིན་ན། ལྟོས་དང་། དེ་རུ་རལ་གྲིས་བསད་པ་རྣམས་མཐོང་ཞིང་། གལ་ཏེ་ང་རང་གྲོང་ཁྱེར་དུ་ཕྱིན་ན། ལྟོས་དང་། དེར་མུ་གེ་ལས་བྱུང་བའི་ནད་པ་རྣམས་འདུག ལུང་སྟོན་པ་དང་མཆོད་དཔོན་རྣམས་ཀྱང་ཡུལ་རྒྱུས་མེད་ཅིག་ལ་འགྲིམས་པ་ལས། ཅི་བྱེད་དགོས་མི་ཤེས་ཞེས་སྨྲོས་ཤིག་གསུངས་སོ། །
JER 14:19 ཁྱེད་ཀྱིས་ཡ་ཧུ་དཱ་ཡོངས་སུ་སྤངས་པ་ཡིན་ནམ། ཁྱེད་ཉིད་ཛ་ཡན་ལ་ཞེ་ལོག་པ་ཡིན་ནམ། ཁྱེད་ཀྱིས་ངེད་རྣམས་ལ་བརྡུངས་ནས་གསོ་ཐབས་མེད་པར་མཛད་པ་ཅི་ཡིན་ནམ། ངེད་ཅག་གིས་ཞི་བདེ་ལ་རེ་ཡང་ཕན་གང་ཡང་མ་ཐོགས། ནད་སངས་པར་རེ་ཡང་འཇིགས་སྐྲག་ཐེབས་བྱུང་།
JER 14:20 ཀྱེ་དཀོན་མཆོག་ཡ་ཝཱེ་ལགས། ངེད་རྣམས་ཀྱིས་ཁྱེད་ལ་འགལ་བའི་སྡིག་པ་བྱས་པས། ངེད་ཅག་གིས་རང་གི་སྡིག་ཉེས་དང་ཕ་མེས་རྣམས་ཀྱི་སྡིག་པ་རྣམས་ཁས་ལེན་པར་བྱའོ། །
JER 14:21 ཁྱེད་ཀྱིས་ཉིད་ཀྱི་མཚན་གྱི་ཕྱིར་ངེད་རྣམས་མི་འདོར་ཞིང་། རང་གི་གཟི་བརྗིད་ཀྱི་བཞུགས་ཁྲི་ལ་དམའ་འབེབ་མི་མཛད་རོགས། ཁྱེད་ཀྱིས་ངེད་རྣམས་ལ་བཞག་པའི་ཞལ་ཆད་ཐུགས་སུ་དྲན་ནས་དེ་དང་འགལ་བར་མི་མཛད་རོགས།
JER 14:22 ཕྱི་རོལ་པའི་སྙིང་པོ་མེད་པའི་ལྷ་རྣམས་ཀྱི་ནང་དུ་ཆར་བ་འབེབ་ནུས་པ་ཡོད་དམ། ནམ་མཁའ་རང་གིས་སྦྲང་ཆར་འབེབ་ནུས་སམ། ཀྱེ་ངེད་རྣམས་ཀྱི་དཀོན་མཆོག་ཡ་ཝཱེ་ལགས། དེ་བཞིན་མཛད་ནུས་པ་ནི་ཁྱེད་རང་མ་ཡིན་ནམ། དེའི་ཕྱིར་འདི་དག་ཐམས་ཅད་ཁྱེད་ཀྱིས་བཀོད་པས་ན། ངེད་ཅག་གིས་ཁྱེད་ལ་རེ་བར་བྱའོ། །
JER 15:1 དེ་ནས་དཀོན་མཆོག་ཡ་ཝཱེས་ང་ལ་འདི་སྐད་དུ། མོ་ཤེ་དང་སཱ་མུ༌ཨེལ་གཉིས་ངའི་དྲུང་དུ་ལངས་བསྡད་ནའང་། ངའི་སེམས་མི་འདི་རྣམས་ཀྱི་ཕྱོགས་སུ་བསྒྱུར་བར་མི་བྱ་སྟེ། ཁྱོད་ཀྱིས་དེ་དག་ངའི་མིག་མདུན་ནས་ཕྱིར་སྐྲོད་ཅིག དེ་དག་འགྲོ་རུ་ཆུག་ཅིག
JER 15:2 ཡང་དེ་དག་གིས་ཁྱོད་ལ་ངེད་རྣམས་གང་དུ་འགྲོའམ་ཞེས་དྲིས་ན། ཁྱོད་ཀྱིས་དེ་རྣམས་ལ། དཀོན་མཆོག་ཡ་ཝཱེས་འདི་སྐད་དུ། འཆི་དགོས་པ་རྣམས་འཆི་བར་ངེས་ལ། རལ་གྲིས་གསོད་དགོས་པ་རྣམས་གསོད་པར་འགྱུར། མུ་གེ་འབྱུང་དགོས་པ་རྣམས་ལ་མུ་གེ་འབྱུང་། བཙོན་དུ་འཁྲིད་དགོས་པ་རྣམས་བཙོན་ལ་འཁྲིད་ངེས་ཡིན་ཞེས་གསུངས་སྨྲོས་ཤིག
JER 15:3 ངས་དེ་རྣམས་ཀྱི་སྟེང་དུ་གནོད་འཚེ་རིགས་བཞི་ཐེབས་པར་བྱ་སྟེ། གསོད་དུ་རལ་གྲི་དང་འདྲུད་དུ་ཁྱི། བཟའ་བ་དང་མེད་པར་བྱེད་དུ་ནམ་མཁའི་བྱ་དང་ཐང་གི་གཅན་གཟན་བཅས་སོ་ཞེས་དཀོན་མཆོག་ཡ་ཝཱེས་གསུངས།
JER 15:4 ཧི་ཟི་ཀི་ཡཱའི་བུ་སྟེ་ཡ་ཧུ་དཱའི་རྒྱལ་པོ་མཱ་ན་ཤེ་ཡིས་ཡེ་རུ་སཱ་ལེམ་དུ་སྤྱད་པའི་ལས་ཀྱི་རྐྱེན་གྱིས། ངས་གནམ་འོག་གི་རྒྱལ་ཕྲན་ཀུན་ཏུ་དེ་རྣམས་སྐྱུག་བྲོ་བར་བྱའོ། །
JER 15:5 ཀྱེ་ཡེ་རུ་སཱ་ལེམ། སུས་ཁྱོད་ལ་སྙིང་རྗེ་བར་འགྱུར་རམ། སུས་ཁྱོད་ཀྱི་དོན་དུ་མྱ་ངན་བྱེད་དམ། སུས་ཁ་ཕྱིར་འཁོར་ནས་ཁྱོད་ལ་ཁམས་འདྲི་ཞུའམ།
JER 15:6 ཁྱོད་ཀྱིས་ང་རང་དོར་ཏེ་ཁ་ཕྱིར་འཁོར་ནས་སོང་བས། ངས་ལག་པ་བརྐྱངས་ནས་ཁྱོད་ལ་རྒོལ་ཞིང་ཁྱོད་མེད་པར་བཟོ་དགོས་ལ། བདག་བློ་ཁ་ཚུར་འཁོར་བའི་དཔེ་མེད་ཅེས་དཀོན་མཆོག་ཡ་ཝཱེས་གསུངས།
JER 15:7 ངས་ཡུལ་ཁམས་ཀྱི་མཁར་སྒོ་རྣམས་སུ་ཚེབ་ཀྱིས་ངའི་མི་རྣམས་ཕྱར་ཞིང་དེ་དག་ལ་ཕྲུ་གུ་ཤོར་དུ་བཅུག ཡང་དེ་རྣམས་མེད་པར་བཟོས་ཀྱང་དེ་དག་རང་གི་ལམ་དང་མ་བྲལ་ཏོ། །
JER 15:8 དེ་དག་གི་ཡུགས་མོ་རྣམས་ནི་ངའི་མདུན་དུ་རྒྱ་མཚོའི་བྱེ་མ་ལས་ཀྱང་མང་སྟེ། ངས་ཉིན་གུང་ལ་སྲོག་ལེན་མཁན་འོང་དུ་བཅུག་ནས། གཞོན་ནུ་རྣམས་ཀྱི་མ་རྣམས་འཇོམས་པར་བྱེད་ཅིང་། སྡུག་བསྔལ་དང་འཇིགས་སྣང་གཉིས་ཀ་གློ་བུར་མོའི་སྟེང་ལ་སླེབ་པར་བྱ།
JER 15:9 ཕྲུ་གུ་བདུན་བཙས་པའི་བུད་མེད་ནི་ཉམ་ཐག་པར་གྱུར་ཏེ། ཉིན་དཀར་ཡིན་ཡང་ཉི་མ་གློ་བུར་ནུབ་ཅིང་། མོ་སྐྱེངས་ཤིང་ངོ་ཚ་བར་འགྱུར། དེ་དག་གི་ལྷག་ལུས་རྣམས་ནི་ཁོ་ཚོའི་དགྲ་བོའི་མདུན་དུ་གྲིར་གཏོད་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 15:10 ཀྱེ་ཧུད་བདག་གི་མ་ཡུམ་ལགས། ང་ལ་ཆག་སྒོ་འབྱུང་ངོ་། །ཅི་ལ་ཞེ་ན། ས་གཞི་ཐམས་ཅད་དུ་ཀུན་དང་མི་མཐུན་པའི་མི་རུ་འགྱུར་བར་ཁྱེད་ཀྱིས་ང་བཙས་པ་ཡིན། ངས་སྔར་ནས་མི་ལ་དངུལ་མ་གཡར་ཞིང་། མི་ཡིས་ང་ལ་བུ་ལོན་ཡང་མ་བཏང་མོད། འོན་ཀྱང་མི་རེ་རེས་ང་ལ་དམོད་པ་ཡིན་ནོ། །
JER 15:11 དཀོན་མཆོག་ཡ་ཝཱེས་འདི་སྐད་དུ། ཁྱོད་ལ་ཕན་ཐོགས་པའི་ཕྱིར་ངས་ཁྱོད་སྒྲོལ་བར་འགྱུར། ཡང་བར་ཆད་དང་སྡུག་བསྔལ་འབྱུང་དུས། བདག་གིས་ཁྱོད་ཀྱི་དགྲ་བོ་རྣམས་ལ་ཁྱོད་ལ་ཞུ་བ་བྱེད་དུ་འཇུག་གོ །
JER 15:12 སུ་ཞིག་གིས་བྱང་ཕྱོགས་ཀྱི་ལྕགས་ཏེ་ལི་དང་ལྕགས་གཉིས་གཅོད་ནུས་སམ།
JER 15:13 ཁྱོད་ཀྱིས་མངའ་འོག་གི་ཡུལ་གྲུ་ཀུན་ཏུ་བྱས་པའི་སྡིག་པ་ཐམས་ཅད་ཀྱི་རྐྱེན་གྱིས། བདག་གིས་ཁྱོད་ཀྱི་རྒྱུ་ནོར་དང་རིན་པོ་ཆེ་རྣམས་བཅོམ་ནོར་ལྟར་རིན་མེད་དུ་དགྲ་བོ་རྣམས་ལ་སྤྲོད་པར་བྱ།
JER 15:14 བདག་གི་ཁོང་ཁྲོ་མེ་ལྟར་འབར་ནས་ཁྱོད་རྣམས་བསྲེག་རྒྱུ་ཡིན་པས། བདག་གིས་ཁྱོད་ཀྱི་དགྲ་རྣམས་ཁྱོད་ལ་རྒྱུས་མི་མངའ་བའི་གནས་སུ་འགྲོ་རུ་འཇུག་དགོས་ཞེས་གསུངས་སོ། །
JER 15:15 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་མཁྱེན་ཏེ། ཁྱེད་ཀྱིས་ང་ཐུགས་སུ་དྲན་ནས་གཟིགས་སྐྱོང་གནང་བར་མཛོད། བདག་ལ་གནོད་སྐྱེལ་བའི་མི་ལ་འཁོན་ལན་སློགས་ཤིག ཁྱེད་ཉིད་རང་དགར་ཐུགས་མི་ཁྲོ་བས་ང་ཡི་ཚེ་སྲོག་མི་ལེན་པར་མཛོད། ཅི་ལ་ཞེ་ན། ཁྱེད་ཀྱི་ཕྱིར་དུ་བདག་ལ་བརྙས་བཅོས་ཐེབས་པས་སོ། །
JER 15:16 དཔུང་ཚོགས་ཀྱི་དཀོན་མཆོག་ཡ་ཝཱེ་ལགས། ཁྱེད་ཀྱི་བཀའ་གསུང་བདག་ལ་ཐོབ་པས་ངས་དེ་ཟོས་པ་དང་། ང་ནི་ཁྱེད་ཀྱི་མཚན་ཐོགས་པའི་མི་ཡིན་པས་ཁྱེད་ཀྱི་བཀའ་ནི་ངའི་སེམས་ཀྱི་དགའ་སྤྲོ་ཆེན་པོ་ཡིན་ནོ། །
JER 15:17 བདག་ནི་འདོད་ཡོན་ཅན་གྱི་ཚོགས་ནང་བསྡད་ནས་དགའ་མགུ་མ་བྱས། ཁྱེད་ཀྱི་ཕྱག་གི་རྐྱེན་གྱིས་ང་རང་གཅིག་པུར་བསྡད་དེ། ཁྱེད་ཀྱིས་ངའི་སེམས་སུ་ཁོང་ཁྲོས་བཀང་བར་མཛད།
JER 15:18 ངའི་སྡུག་བསྔལ་གཏན་དུ་ལུས་པ་ཅི་ཡིན་ནམ། ངའི་རྨ་ཁ་གསོ་ཐབས་མེད་པ་དང་མི་དྲག་པ་དེ་ཅི་ཡིན་ནམ། ཁྱེད་ནི་བདག་ལ་མི་སེམས་སླུ་བའི་ཆུ་ཕྲན་ལྟ་བུ་ཡིན་ནམ།
JER 15:19 དེ་བས་དཀོན་མཆོག་ཡ་ཝཱེས་འདི་སྐད་དུ། ཇི་སྟེ་ཁྱོད་ཀྱིས་འགྱོད་བཤགས་བྱས་ན་ངས་ཀྱང་ཁྱོད་ཡང་བསྐྱར་ངའི་མདུན་དུ་འགྲེང་བར་བྱའོ། །ཡང་གལ་ཏེ་ཁྱོད་ཀྱིས་སྐད་ཆ་རྩ་ཆེན་སྨྲ་བ་ལས་རིན་ཐང་མེད་པ་དོར་ན་ཁྱོད་ངའི་སྨྲ་སྒོ་རུ་འགྱུར། དེ་དག་ཁྱོད་ཀྱི་ཕྱོགས་སུ་ལོག་འོང་ངེས་ལ། ཁྱོད་ནི་དེ་དག་གི་ཕྱོགས་སུ་མི་འགྲོའོ། །
JER 15:20 ཡང་ངས་མི་འདི་རྣམས་ཀྱི་ཕྱོགས་སུ་ཁྱོད་རང་ལི་ཡི་ལྕགས་རི་བརྟན་པོར་བྱེད་ཅིང་། དེ་ཚོས་ཁྱོད་ལ་རྒོལ་ཡང་ཁྱོད་ལས་རྒྱལ་བར་མི་འགྱུར། ཅི་ལ་ཞེ་ན། ཁྱོད་སྐྱོབ་ཅིང་སྒྲོལ་བའི་ཕྱིར་ང་རང་ཁྱོད་དང་འགྲོགས་ཡོད་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 15:21 ཡང་ངས་ཁྱོད་ནི་སྡིག་སྤྱོད་ཀྱི་ལག་ནས་སྒྲོལ་ཞིང་། གདུག་རྩུབ་ཅན་རྣམས་ཀྱི་ལག་ནས་ཐར་བར་བྱའོ། །
JER 16:1 ཡང་དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་ནས་འདི་སྐད་དུ།
JER 16:2 ཁྱོད་ཀྱིས་གནས་འདི་རུ་ཆུང་མ་བླངས་ཏེ་བུ་དང་བུ་མོ་སྐྱེས་མི་རུང་ཞེས་གསུངས།
JER 16:3 ཅི་ལ་ཞེ་ན། གནས་འདིར་བཙས་པའི་བུ་དང་བུ་མོ་རྣམས་དང་། དེ་དག་སྐྱེས་པའི་ཕ་དང་མ་རྣམས་ཀྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ།
JER 16:4 དེ་དག་སྲོག་ལ་ཐུག་པའི་ན་ཟུག་གིས་འཆི་བར་འགྱུར་ཞིང་མྱ་ངན་བྱེད་མཁན་སུ་ཡང་མེད་ལ་བསྐུང་བར་ཡང་མི་བྱ་སྟེ། དེ་རྣམས་ལུད་ལྟར་ས་རུ་ལུས་པར་འགྱུར། རལ་གྲི་དང་མུ་གེས་དེ་དག་མེད་པར་བྱེད་ཅིང་། དེ་དག་གི་བམ་རོ་ནི་ནམ་མཁའི་བྱ་དང་ས་སྟེང་གི་གཅན་གཟན་རྣམས་ཀྱི་ཁ་ཟས་སུ་འགྱུར་རོ་ཞེས་པའོ། །
JER 16:5 ཡང་དཀོན་མཆོག་ཡ་ཝཱེས་འདི་སྐད་དུ། མི་ཤི་བའི་ཁྱིམ་དུ་མ་འགྲོ། མྱ་ངན་མ་ཞུ། དེ་དག་གི་ཕྱིར་དུ་སེམས་སྡུག་ཀྱང་མ་བྱེད་ཅིག ཅི་ལ་ཞེ་ན། ངས་རང་གི་ཞི་བདེ་དང་བྱམས་བརྩེ། སྙིང་རྗེ་བཅས་ནི་མི་འདི་རྣམས་ལས་ཕྱིར་བླངས་པ་ཡིན་ཞེས་གསུངས་སོ། །
JER 16:6 དེ་དག་མཆོག་དམན་སུ་ཡིན་ཡང་ཐམས་ཅད་ས་འདི་ནས་འཆི་བར་འགྱུར་ཏེ་དུར་ལ་འཇུག་མཁན་ཡང་མེད། མི་ཡིས་དེ་དག་གི་ཕྱིར་དུ་མྱ་ངན་མི་བྱེད། དེ་དག་གི་ཕྱིར་དུ་རང་གི་ཤ་གཅོད་པར་མི་བྱེད། དེ་དག་གི་ཕྱིར་སྐྲ་བཞར་ནས་སྤྱི་ཐེར་དུ་ཡང་མི་གཏོང་།
JER 16:7 འདས་མཆོད་ཡོད་ཀྱང་མི་ཡིས་དེ་དག་གི་ཕྱིར་དུ་བག་ལེབ་མི་གཅོག་ལ། གཤིན་པོའི་ཕྱིར་དུ་དེ་དག་ལ་སེམས་གསོ་མི་བྱེད། དེ་དག་གི་ཕའམ་མ་ཚེ་ལས་འདས་ནའང་མི་ཡིས་དེ་དག་གི་ཕྱིར་དུ་ཆང་སྤྲད་ནས་སེམས་གསོ་མི་བྱེད་དོ། །
JER 16:8 ཁྱོད་ནི་མི་དང་མཉམ་དུ་བཟའ་བཏུང་ལ་རོལ་བར་སྟོན་མོའི་ཁྱིམ་དུ་ཞུགས་མི་རུང་།
JER 16:9 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ཁྱོད་རྣམས་གསོན་པའི་དུས་སུ། ངས་ཁྱོད་ཚོའི་མདུན་དུ་ཡུལ་འདིའི་དགའ་སྤྲོ་དང་དགའ་མགུ་བྱེད་པའི་སྐད། བག་གསར་དང་མག་གསར་གྱི་སྐད་ནི་མེད་པར་བྱའོ་ཞེས་གསུངས་པས་སོ། །
JER 16:10 ཁྱོད་ཀྱིས་མི་འདི་དག་ལ་གཏམ་འདི་ཡོངས་སུ་སྨྲས་ནས་དེ་དག་གིས་ཁྱོད་ལ། དཀོན་མཆོག་ཡ་ཝཱེས་བར་ཆད་ཆེན་པོས་ངེད་རྣམས་ལ་རྒོལ་བར་འགྱུར་ཞེས་གསུངས་པ་ཅི་ཡིན་ནམ། ངེད་རྣམས་ལ་ཉེས་སྐྱོན་ཅི་ཞིག་ཡོད་དམ། ངེད་ཅག་གིས་རང་གི་དཀོན་མཆོག་ཡ་ཝཱེ་ལ་སྡིག་ཉེས་ཅི་ཞིག་བསགས་པ་ཡིན་ནམ་ཞེས་འདྲི་བའི་ཚེ།
JER 16:11 ཁྱོད་ཀྱིས་དེ་དག་ལ་འདི་ལྟར་སྨྲོས་ཤིག དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་མེས་པོ་རྣམས་ཀྱིས་བདག་དོར་ཏེ་ལྷ་གཞན་རྣམས་ཀྱི་རྗེས་སུ་འབྲངས་ནས། དེ་རྣམས་ལ་ཞབས་ཏོག་བསྒྲུབས་ནས་ཕྱག་བཙལ་ཞིང་། ངའི་བཀའ་ཁྲིམས་ཀྱང་མ་བསྲུངས་པ་དང་།
JER 16:12 ཡང་ཁྱོད་ཚོའི་སྤྱོད་ངན་ནི་ཁྱོད་ཚོའི་མེས་པོ་ལས་ཀྱང་ལྷག་པའི་རྐྱེན་དང་། མི་རེ་རེ་རང་རང་གི་སེམས་ངན་གཤིས་གྱོང་གི་རྗེས་སུ་འབྲངས་ནས་ཐ་ན་བདག་གི་བཀའ་ལའང་མི་མཉན་པས་ན།
JER 16:13 བདག་གིས་ཁྱོད་རྣམས་ཡུལ་འདི་ནས་ཕྱི་རུ་སྐྲོད་པར་འགྱུར་ལ། ཁྱོད་ཚོ་དང་ཁྱོད་ཚོའི་མེས་པོ་དག་ལ་རྒྱུས་མི་མངའ་བའི་གནས་སུ་སྐྲོད་པར་འགྱུར། ཁྱོད་རྣམས་ཀྱིས་གནས་དེར་ཉིན་མཚན་མེད་པར་ལྷ་གཞན་རྣམས་ལ་ཞབས་ཏོག་བསྒྲུབ་ངེས་ཡིན། ཅི་ལ་ཞེ་ན། བདག་གིས་ཁྱོད་རྣམས་དྲིན་གྱིས་མི་སྐྱོང་ཞེས་པའོ་ཞེས་གསུངས།
JER 16:14 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། མི་རྣམས་ཀྱིས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་མི་བསྐྱལ་ལོ། །
JER 16:15 ཡིན་ཡང་མི་རྣམས་ཀྱིས་ཡེས་ར་ཨེལ་པ་རྣམས་བྱང་ཕྱོགས་ཀྱི་ཡུལ་དང་། ཁོ་རྣམས་སྐྲོད་སའི་རྒྱལ་ཁམས་སོ་སོ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བར་འགྱུར་ཏེ། ཅི་ལ་ཞེ་ན། བདག་གིས་དེ་དག་ཁྲིད་ནས་ངས་སྔར་དེ་རྣམས་ཀྱི་མེས་པོ་ལ་གནང་བའི་ཡུལ་དུ་ཕྱིར་ལོག་པར་བྱེད་དོ། །
JER 16:16 ལྟོས་ཤིག བདག་གིས་ཉ་པ་མང་པོ་མངགས་ནས་དེ་རྣམས་འཛིན་པར་བྱེད་ཅིང་། དེའི་རྗེས་སུ་བདག་གིས་རྔོན་པ་མང་པོ་མངགས་ནས་རི་བོ་རེ་རེ་དང་སྒང་རེ་རེ། བྲག་ཕུག་རེ་རེ་བཅས་ནས་དེ་རྣམས་བརྔོན་པར་བྱེད།
JER 16:17 ཅི་ལ་ཞེ་ན། བདག་གི་མིག་གིས་དེ་དག་གི་སྤྱོད་པ་ཀུན་ལ་ལྟ་ཞིབ་བྱེད་ཅིང་། དེ་དག་གིས་ངའི་མདུན་ནས་འགེབ་མི་ནུས་ལ། དེ་དག་གི་སྡིག་པའང་ངའི་མདུན་དུ་སྦ་མི་ནུས་སོ། །
JER 16:18 བདག་གིས་སྔོན་ལ་དེ་དག་གི་སྡིག་པ་དང་ཉེས་པ་རྣམས་ལ་ལྡབ་འགྱུར་གྱིས་ལན་འཇལ་བར་བྱ་སྟེ། ཅི་ལ་ཞེ་ན། དེ་རྣམས་ཀྱིས་ཞེན་ཁ་ལོག་པའི་སྐུ་འདྲའི་བམ་རོ་ཡིས་བདག་གི་ཡུལ་ཁམས་བཙོག་པར་བཟོས་པ་དང་། རྫས་མི་གཙང་བ་རྣམས་ཀྱིས་ངའི་ནོར་སྐལ་ཡིན་པའི་ཡུལ་བཀང་བར་བྱས་ཞེས་དཀོན་མཆོག་ཡ་ཝཱེས་གསུངས་སོ། །
JER 16:19 ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་ང་ཡི་སྟོབས་ཤུགས་དང་ང་ཡི་བཙན་རྫོང་། དཀའ་སྡུག་གི་དུས་སུ་ང་ཡི་སྐྱབས་བཅོལ་ས་བཅས་ཡིན་པས། མི་རིགས་ཐམས་ཅད་ས་མཐའ་ནས་ཁྱེད་ཀྱི་དྲུང་དུ་འོངས་ཏེ། ངེད་ཅག་གི་ཕ་མེས་རྣམས་ཀྱིས་རྒྱུན་འཛིན་བྱས་པ་ནི་རྫུན་དང་སྙིང་པོ་མེད་པ། ཕན་ཐོགས་ཅི་ཡང་མེད་པ་བཅས་སོ། །
JER 16:20 མི་ཡིས་རང་གི་ཕྱིར་དུ་དཀོན་མཆོག་བཟོ་ནུས་སམ། དོན་དམ་དུ་དེ་དག་ནི་དཀོན་མཆོག་མིན་ཞེས་ཞུ་བར་འགྱུར།
JER 16:21 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ད་རེས་བདག་གིས་དེ་རྣམས་ལ་སྟོན་པར་བྱ་སྟེ། ཐེངས་འདིར་ངའི་ཕྱག་དང་མཐུ་སྟོབས་སྟོན་པར་བྱ། དེ་ནས་ཁོ་ཚོས་ངའི་མིང་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
JER 17:1 ཡ་ཧུ་དཱའི་སྡིག་ཉེས་ནི་ལྕགས་སྨྱུག་དང་རྡོ་རྗེའི་རྩེ་མོས་བཀོད་པ་སྟེ། ཁོ་ཚོའི་སེམས་ནང་དང་མཆོད་ཁྲིའི་ཟུར་དུ་བརྐོས་ཡོད།
JER 17:2 དེ་དག་གི་བུ་ཕྲུག་རྣམས་ཀྱིས་ཀྱང་རི་མཐོན་པོ་རྣམས་ཀྱི་སྟེང་དང་སྔོ་ལྗང་གི་ལྗོན་ཤིང་འགྲམ་གྱི་མཆོད་ཁྲི་དང་ལྷ་མོ་ཨ་ཤེ་རཱའི་སྐུ་བརྙན་རྣམས་ཡིད་ལ་བཟུང་ཡོད།
JER 17:3 ཀྱེ་ངའི་ཐང་ལ་ཡོད་པའི་རི་བོ། ཁྱོད་ཀྱིས་མངའ་འོག་གི་ཡུལ་གྲུ་ཀུན་ཏུ་བྱས་པའི་སྡིག་པ་ཡི་རྐྱེན་གྱིས། བདག་གིས་ཁྱོད་ཀྱི་རྒྱུ་ནོར་དང་རིན་པོ་ཆེ་ཐམས་ཅད་དང་། ཁྱོད་ཀྱི་མཐོ་གླིང་བཅས་པ་བཅོམ་ནོར་ལྟར་དགྲ་བོ་རྣམས་ལ་སྤྲོད་པར་བྱའོ། །
JER 17:4 ཁྱོད་རང་གི་སྤྱོད་པའི་རྐྱེན་གྱིས་ངས་ཁྱོད་ལ་གནང་བའི་ནོར་སྐལ་ནི་འཆོར་བར་འགྱུར་ལ། ཡང་བདག་གིས་ཁྱོད་ལ་རྒྱུས་མི་མངའ་བའི་ཡུལ་དུ་རང་གི་དགྲ་བོར་གཡོག་བྱེད་དུ་འཇུག་གོ །ཅི་ལ་ཞེ་ན། ཁྱོད་རྣམས་ཀྱིས་ངའི་ཁོང་ཁྲོ་མེ་ལྟར་འབར་དུ་བཅུག་ཅིང་དེ་ནི་ཇི་སྲིད་བར་དུ་འབར་ངེས་ཡིན་ཞེས་གསུངས་སོ། །
JER 17:5 ཡང་དཀོན་མཆོག་ཡ་ཝཱེས་འདི་སྐད་དུ། མི་ཡི་སྟོབས་ཤུགས་ལ་བརྟེན་པ་དང་སེམས་ནས་དཀོན་མཆོག་ཡ་ཝཱེ་དང་འབྲལ་བའི་མི་ལ་དམོད་མོ་ཐེབས་འོས་སོ། །
JER 17:6 དེ་ནི་བྱེ་ཐང་གི་སྡོང་ཕྲན་དང་འདྲ་ཞིང་། བྱིན་རླབས་དང་དགའ་སྤྲོ་མི་མཐོང་བར་དབེན་སྟོང་གི་སྐམ་ས་དང་མི་མེད་པའི་ཡུལ་བ་ཚྭ་ཅན་དུ་གནས་པར་འགྱུར་མོད།
JER 17:7 འོན་ཀྱང་དཀོན་མཆོག་ཡ་ཝཱེ་ལ་བློ་གཏོད་པ་དང་། ཁོང་ཉིད་རང་གི་བརྟེན་ས་བྱེད་པའི་མི་དེ་ནི་བདེའོ། །
JER 17:8 དེ་ནི་ཆུ་འགྲམ་དུ་བཙུགས་པའི་ལྗོན་ཤིང་ཞིག་དང་འདྲ་བར་ཆུ་ནང་དུ་རྩ་བ་རྒྱས་པ་དང་། ཚ་བ་སླེབས་ཀྱང་འཇིགས་སྣང་མེད་ལ་ལོ་འདབ་རྒྱས་ཤིང་། ཐན་པ་འབྱུང་བའི་ལོ་ལའང་སེམས་ཁྲལ་མེད་པར་སྔར་བཞིན་འབྲས་བུ་བསྐྱེད་དོ། །
JER 17:9 མི་སེམས་ནི་ཐམས་ཅད་ལས་གཡོ་སྒྱུ་ཆེ་ཞིང་བཅོས་ཐབས་མེད་ལ། སུ་ཞིག་གིས་དེ་རྟོགས་ནུས་སམ།
JER 17:10 ཡ་ཝཱེ་བདག་ནི་མིའི་སེམས་ལ་ལྟ་ཞིབ་དང་ཚོད་བརྟག་བྱེད་མཁན་ཡིན་ཏེ། མི་ཀུན་ལ་རང་རང་གི་བྱ་སྤྱོད་དང་ཅི་བྱས་ལ་འོས་པའི་འབྲས་བུ་བཞིན་དུ་ལན་འཇལ་བར་བྱ།
JER 17:11 འཁྱོག་པོའི་ལམ་ནས་རྒྱུ་ནོར་ཐོབ་པ་དེ་ནི། སྲེག་པས་རང་གིས་བཏང་བ་མ་ཡིན་པའི་སྒོ་ང་རུམ་པ་བཞིན་ཡིན་ལ། དར་མའི་དུས་སུ་རྒྱུ་ནོར་ཁོ་དང་བྲལ་ནས་མཐར་ཁོ་རང་བླུན་པོ་རུ་འགྱུར་རོ། །
JER 17:12 རང་ཅག་གི་གནས་དམ་པ་ནི་གཟི་བརྗིད་ལྡན་པའི་བཞུགས་ཁྲི་ཡིན་ལ་གནའ་སྔ་མོ་ནས་མཐོ་སར་བཞག་ཡོད།
JER 17:13 ཀྱེ་ཡེས་ར་ཨེལ་གྱི་རེ་བ་ཡ་ཝཱེ་ལགས། ཁྱེད་འདོར་བ་ཐམས་ཅད་ངོ་ཚ་བར་འགྱུར། ཁྱེད་དང་འབྲལ་བ་ཐམས་ཅད་ཀྱི་མིང་ནི་ས་སྟེང་ཏུ་འགོད་པར་འགྱུར། ཅི་ལ་ཞེ་ན། དེ་དག་གིས་ཚེ་སྲོག་དང་ལྡན་པའི་ཆུ་མིག་སྟེ་དཀོན་མཆོག་ཡ་ཝཱེ་སྤངས་པའི་ཕྱིར་རོ། །
JER 17:14 ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་ངས་བསྟོད་བསྔགས་བརྗོད་ས་དེ་ཉིད་ཡིན་པས། ཁྱེད་ཀྱིས་ངའི་ནད་གསོ་བར་མཛོད་དང་ང་རང་སོས་པར་འགྱུར། ང་རང་སྐྱོབ་དང་ཐར་བར་འགྱུར།
JER 17:15 གཟིགས་དང་། དེ་དག་གིས་ང་ལ་དཀོན་མཆོག་ཡ་ཝཱེའི་བཀའ་ནི་གང་དུ་བཞུགས་སམ། བཀའ་དེ་ད་ལྟ་འགྲུབ་པར་མཛོད་ཅིག་ཅེས་སྨྲས་ཀྱང་།
JER 17:16 ང་རང་ཁྱེད་ཀྱི་རྗེས་སུ་འབྲངས་ནས་རྫི་བོ་བྱེད་པ་ལ་མ་བྱོལ་ཏེ། ཆག་སྒོ་འབྱུང་བའི་དུས་དེར་རེ་སྨོན་མ་བྱས་པ་ཁྱེད་ཀྱིས་མཁྱེན་ནོ། །ཡང་ངའི་སྨྲ་སྒོ་ལས་གང་ཞིག་ཐོན་པ་དེ་ཁྱེད་ཀྱི་ཞལ་ངོར་གསལ་པོ་ཡིན།
JER 17:17 ཁྱེད་ཀྱི་དབང་གིས་ང་རང་འཇིགས་པར་མ་མཛད་ཅིག བར་ཆད་འབྱུང་དུས་ཁྱེད་ནི་ང་ཡི་སྐྱབས་བཅོལ་ས་ཡིན།
JER 17:18 ང་ལ་གནོད་སྐྱེལ་མཁན་དེ་དག་ངོ་ཚར་སྦྱོར་བ་ལས་ང་རང་ངོ་ཚ་བར་མི་མཛད་རོགས། དེ་རྣམས་འཇིགས་པར་མཛད་པ་ལས་ང་རང་འཇིགས་པར་མ་མཛོད་ཅིག ཆག་སྒོའི་ཉིན་མོ་དེ་དག་གི་སྟེང་དུ་བབས་ནས། ལྡབ་འགྱུར་གྱིས་དེ་རྣམས་མེད་པར་བཟོས་ཤིག
JER 17:19 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་སོང་ལ་ཡ་ཧུ་དཱའི་རྒྱལ་པོ་རྣམས་འགྲོ་འོང་བྱེད་ས་སྟེ་ངའི་མི་རྣམས་ཀྱི་རྒྱ་སྒོ་དང་། ཡེ་རུ་སཱ་ལེམ་གྱི་མཁར་སྒོ་རེ་རེར་ལངས་བསྡད་ནས་ཁོ་རྣམས་ལ།
JER 17:20 མཁར་སྒོ་འདི་རུ་འཛུལ་བའི་ཡ་ཧུ་དཱའི་རྒྱལ་པོ་རྣམས་དང་ཡ་ཧུ་དཱའི་མི་རྣམས་དང་། ཡེ་རུ་སཱ་ལེམ་གྱི་ཡུལ་མི་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 17:21 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་སྲོག་འཚོ་བའི་ཕྱིར་གཟབ་གཟབ་གྱིས་ཤིག ངལ་གསོ་བའི་ཉིན་མོར་ཁུར་པོ་ཁུར་ནས་ཡེ་རུ་སཱ་ལེམ་གྱི་མཁར་སྒོ་ནང་དུ་མ་འཛུལ་ཞིག
JER 17:22 ངལ་གསོ་བའི་ཉིན་མོར་རང་གི་ཁྱིམ་ནས་ཁུར་པོ་ཁུར་ནས་མ་འགྲོ་ཞིག ལས་ཀ་ཅི་ཡང་མི་བྱེད་པར་ངས་ཁྱོད་ཚོའི་མེས་པོ་རྣམས་ལ་བསྒོས་པའི་བཀའ་བཞིན་དུ་ངལ་གསོ་བའི་ཉིན་མོ་ནི་དམ་པར་སྲུངས་ཤིག་ཅེས་སྨྲ་བར་གྱིས་ཞེས་གསུངས་ནའང་།
JER 17:23 དེ་དག་གིས་མ་མཉན་ལ་རྣ་བའང་མ་གཏད་དེ། སེམས་རྒྱུད་གྱོང་པོ་བྱས་ནས་མ་མཉན་ལ་བཀའ་སློབ་དང་ལེན་མི་བྱེད་དོ། །
JER 17:24 དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་སེམས་བསམ་པས་ང་ལ་ཉན་ཞིང་། ངལ་གསོ་བའི་ཉིན་མོར་ཁུར་པོ་ཁུར་ནས་མཁར་སྒོ་ནང་དུ་མི་འཛུལ་བར་ངལ་གསོ་བའི་ཉིན་མོ་དམ་པར་བསྲུངས་ཏེ། ཉིན་མོ་དེར་ལས་ཀ་ཅི་ཡང་མ་བྱས་ན།
JER 17:25 དེ་ནས་དཱ་བིད་ཀྱི་རྒྱལ་ཁྲིར་བཞུགས་པའི་རྒྱལ་པོ་རྣམས་དང་འགོ་དཔོན་རྣམས་ནི་ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་རྣམས་དང་མཉམ་དུ། ཤིང་རྟ་དང་ཆིབས་པར་བཅིབས་ནས་མཁར་སྒོ་རུ་འཛུལ་འོང་ཞིང་། གྲོང་ཁྱེར་འདི་ནི་གཏན་དུ་ལུས་པར་འགྱུར་རོ། །
JER 17:26 ཡང་ཡ་ཧུ་དཱའི་གྲོང་ཁྱེར་རྣམས་དང་ཡེ་རུ་སཱ་ལེམ་གྱི་ཉེ་འཁོར་དང་། པེན་ཡཱ་མེན་གྱི་ཡུལ། རི་ཀླུང་། རི་ཁུལ། ནེ་གུབ་ཡུལ་བཅས་ནས་མི་རྣམས་ཀྱིས་སྦྱིན་སྲེག་གི་མཆོད་པ་དང་། དམར་མཆོད། འབྲུ་རིགས་ཀྱི་མཆོད་པ། སྤོས་དཀར། གཏང་རག་གི་མཆོད་པ་བཅས་ཁྱེར་ནས་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་འགྱུར།
JER 17:27 ཇི་སྟེ་ཁྱོད་ཚོས་ང་ལ་མི་མཉན་ཞིང་ངལ་གསོ་བའི་ཉིན་མོ་དམ་པར་མི་བསྲུང་བར། ད་དུང་ངལ་གསོ་བའི་ཉིན་ལ་ཁུར་པོ་ཁུར་ནས་ཡེ་རུ་སཱ་ལེམ་གྱི་མཁར་སྒོར་ཞུགས་ན། དེ་ནས་བདག་གིས་མཁར་སྒོ་སོ་སོར་མེ་སྦར་ཞིང་། མེ་དེས་ཡེ་རུ་སཱ་ལེམ་གྱི་ཕོ་བྲང་རྣམས་ཁྱུར་མིད་གཏོང་ཞིང་གསོད་མི་ཐུབ་བོ་ཞེས་གསུངས་སོ། །
JER 18:1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 18:2 ཁྱོད་ལོངས་ལ་རྫ་བཟོའི་ཁྱིམ་དུ་མར་སོང་ཞིག དེ་རུ་ངས་ཁྱོད་ལ་བདག་གི་བཀའ་གནང་བར་བྱའོ་ཞེས་གསུངས་པས།
JER 18:3 ང་རང་མར་རྫ་བཟོའི་ཁྱིམ་དུ་སོང་བ་ན། ལྟོས་ཤིག དེས་རང་གི་འཁོར་ལོའི་སྟེང་དུ་སྣོད་བཟོ་བཞིན་འདུག
JER 18:4 འཇིམ་པས་བཟོས་པའི་སྣོད་དེར་རྫ་བཟོའི་ལག་ནས་ཆག་སྐྱོན་བྱུང་བ་ཙམ་གྱིས། ཁོས་འཇིམ་པ་དེས་སྣོད་གཞན་ཞིག་བཟོས་སོ། །
JER 18:5 དེ་ནས་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།
JER 18:6 ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ངས་ཁྱོད་རྣམས་ལ་རྫ་བཟོས་འདམ་བཟོ་བ་ལྟར་བྱེད་མི་ནུས་སམ་ཞེས་དཀོན་མཆོག་ཡ་ཝཱེས་གསུངས། ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ལྟོས་ཤིག འཇིམ་པ་རྫ་བཟོའི་ལག་ནང་དུ་ཇི་ལྟར་ཡིན་པ་བཞིན། ཁྱོད་ཀྱང་ངའི་ལག་ནང་དེ་ལྟར་ཡིན་ནོ། །
JER 18:7 ངས་མི་རིགས་དང་ཡང་ན་རྒྱལ་ཕྲན་གང་ཞིག་གི་སྐོར་ལ། དེ་རྩ་བ་ནས་བཏོན་ཏེ་བཤིག་ནས་མེད་པར་བཟོ་དགོས་ཞེས་དུས་ནམ་ཞིག་ལ་སྨྲས་པ་ཡིན་ནམ།
JER 18:8 ཇི་སྟེ་ངས་གླེང་པའི་མི་རིགས་དེས་འགྱོད་བཤགས་བྱས་ནས་རང་གི་ངན་སྤྱོད་ལས་བྲལ་ན། ངས་ཀྱང་བློ་ཁ་བསྒྱུར་ནས་ལག་བསྟར་བྱེད་འདོད་པའི་ཆག་སྒོ་ནི་དེ་རྣམས་ཀྱི་སྟེང་དུ་འབྱུང་བར་མི་བྱའོ། །
JER 18:9 ཡང་ངས་མི་རིགས་དང་ཡང་ན་རྒྱལ་ཕྲན་གང་ཞིག་གི་སྐོར་ལ། དེ་ཡར་བཙུགས་ནས་གསོ་སྐྱོང་བྱེད་དགོས་ཞེས་དུས་ནམ་ཞིག་ལ་སྨྲས་པ་ཡིན་ནམ།
JER 18:10 གལ་སྲིད་ཁོ་རྣམས་ཀྱིས་ངའི་མིག་ལམ་དུ་ངན་པ་གང་ཡིན་དེ་སྤྱད་ནས་ངའི་བཀའ་ལ་མི་མཉན་ན། ངས་ཀྱང་བློ་ཁ་བསྒྱུར་ནས་ངས་སྨྲས་པའི་བྱིན་རླབས་ནི་དེ་དག་ལ་གནང་བར་མི་བྱའོ། །
JER 18:11 ད་ལྟ། ཁྱོད་ཀྱིས་ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་རྣམས་ལ། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་རྣམས་ལ་ཆག་སྒོ་ཐེབས་པར་རྩོམ་ཞིང་། ཁྱོད་རྣམས་ལ་ཉེས་ཆད་གཅོད་པར་སེམས་ཐག་བཅད་པ་ཡིན། ཁྱོད་རྣམས་ཁ་ཕྱིར་འཁོར་ཏེ་རང་གི་སྤྱོད་ངན་དང་འབྲལ་དགོས་ལ། རང་གི་བྱ་བ་སྤྱོད་པ་སྒྱུར་ཅིག་ཅེས་སྨྲོས་དང་།
JER 18:12 དེ་དག་གིས་དེར་ཕན་ཐོགས་ཅི་ཡང་མེད་པས། ངེད་རྣམས་ཀྱིས་རང་གི་བསམ་པ་བཞིན་དུ་སོ་སོའི་སེམས་ངན་གཤིས་གྱོང་གི་རྗེས་སུ་འབྲངས་ནས་སྤྱད་པ་སྤྱོད་དགོས་ཞེས་སྨྲ་བར་འགྱུར་ཞེས་གསུངས་སོ། །
JER 18:13 དེའི་ཕྱིར་ན་ཡང་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་སོང་ནས་ཡུལ་ཁམས་ཀུན་ལ་དྲིས་ཤིག འདི་འདྲའི་དོན་རྣམས་ཐོས་མྱོང་ངམ། ན་ཆུང་བུ་མོ་ཡེས་ར་ཨེལ་གྱིས་དོན་ཤིན་ཏུ་མི་རུང་བ་ཞིག་བྱས་སོ། །
JER 18:14 ལེ་པཱ་ནོན་གྱི་བྲག་རི་སྟེང་གི་གངས་ནི་ཞི་བར་འགྱུར་རམ། རྒྱང་རིང་ནས་བཞུར་འོང་བའི་དྭངས་ཤིང་བསིལ་བའི་ཆུ་དེ་སྐམ་པར་འགྱུར་རམ།
JER 18:15 ཡིན་ཡང་ངའི་འབངས་རྣམས་ཀྱིས་ང་རང་བརྗེད་ནས་རིན་ཐང་མེད་པའི་སྐུ་འདྲ་རྣམས་ལ་སྤོས་བདུགས་ཤིང་། ཁོ་རྣམས་འགྲུལ་བའི་ལམ་ནང་དང་གནའ་བོའི་ལམ་བུར་འགྱེལ་ཞིང་། ལམ་ཆེན་ནང་དུ་མི་འགྲུལ་བར་ལམ་ཕྲན་ནང་དུ་བསྐྱོད་དོ། །
JER 18:16 དེ་དག་གི་ཡུལ་ཁམས་ནི་མི་མེད་ལུང་སྟོང་དང་ནམ་རྒྱུན་མི་ཡིས་འཕྱ་སྨོད་བྱེད་ཡུལ་དུ་འགྱུར་བ་དང་། ཡུལ་དེ་བརྒྱུད་ནས་འགྲོ་མཁན་ཐམས་ཅད་དངངས་ནས་མགོ་གཡུག་པར་འགྱུར་རོ། །
JER 18:17 ཤར་རླུང་གིས་བསྐྱོད་པ་བཞིན་ངས་དེ་དག་དགྲ་བོའི་མདུན་དུ་གཏོར་ཞིང་། ཆག་སྒོ་འབྱུང་དུས་ངས་དེ་དག་ལ་རྒྱབ་གཏོད་པ་ལས་གདོང་སྟོན་པར་མི་བྱའོ་ཞེས་གསུངས་སོ། །
JER 18:18 དེར་ཁོ་རྣམས་ན་རེ། མཆོད་དཔོན་ལས་བཀའ་ཁྲིམས་དང་། མཁས་པ་ལས་བློ་གྲོས། ལུང་སྟོན་པ་ལས་ལུང་བསྟན་བཅས་རྒྱུན་མི་ཆད་པས། ཤོག་དང་། ཡེ་རེམ་ཡཱ་ལ་གནོད་བསྐྱལ་བར་གྲོས་བྱེད་དོ། །ཤོག་དང་། རང་ཅག་གི་ལྕེ་ཡིས་ཁོ་ལ་རྒོལ་ཞིང་ཁོའི་ཚིག་གང་ལའང་མ་མཉན་ཞིག་ཅེས་སྨྲས།
JER 18:19 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་ལ་གསན་ཞིང་ང་ལ་སྐྱོན་བརྗོད་པའི་མི་དེ་དག་གི་གཏམ་ལའང་གསན་པར་མཛོད།
JER 18:20 མི་ཡིས་བཟང་ལན་ངན་འཇལ་བྱེད་འོས་སམ། དེ་དག་གིས་དོང་ཞིག་བརྐོས་ནས་ངའི་སྲོག་ལ་གནོད་བསྐྱལ་འདོད་དེ། ཁྱེད་ཀྱི་ཐུགས་ཁྲོ་དེ་དག་དང་འབྲལ་བའི་ཕྱིར་ང་ཁྱེད་ཀྱི་དྲུང་དུ་ལངས་ནས་དེ་དག་གི་ཆེད་དུ་ཞུ་བ་ཞུས་པ་ཁྱེད་ཀྱི་ཐུགས་སུ་དྲན་པར་མཛོད།
JER 18:21 དེའི་ཕྱིར་དེ་དག་གི་བུ་ཕྲུག་རྣམས་ལ་མུ་གེ་འབྱུང་ཞིང་རལ་གྲིའི་དབང་ལ་གཏོད་པར་མཛོད་ཅིག དེ་དག་གི་ཆུང་མ་རྣམས་ལ་ཕྲུ་གུ་མི་སྐྱེས་པར་ཡུགས་མོ་རུ་འགྱུར་བར་མཛོད་ཅིག དེ་དག་གི་ཁྱོ་ག་རྣམས་ནི་འཆི་བས་གསོད་ཅིང་། དེ་དག་གི་གཞོན་ནུ་རྣམས་གཡུལ་ངོར་རལ་གྲིས་འགུམ་པར་མཛོད་ཅིག
JER 18:22 ཁྱེད་ཀྱིས་དེ་དག་གི་སྟེང་དུ་གློ་བུར་ཉིད་ལ་ཆོམ་རྐུན་འདྲེན་པའི་དུས་སུ། དེ་དག་གི་ཁྱིམ་ནས་སྐྱབས་ཞུ་བའི་སྐད་ཐོས་འོང་བར་གྱུར་ཅིག ཅི་ལ་ཞེ་ན། དེ་དག་གིས་དོང་བརྐོས་ནས་ང་རང་འཛིན་འདོད་པ་དང་། ང་རྐང་འདྲེད་འཆོར་བའི་ཕྱིར་ལྐོག་ནས་རྙི་བཙུགས་སོ། །
JER 18:23 ཀྱེ་དཀོན་མཆོག་ཡ་ཝཱེ་ལགས། དེ་ཚོས་ང་གསོད་པར་འདོད་པའི་གྲོས་ངན་དེ་ཐམས་ཅད་ཁྱེད་ཀྱིས་མཁྱེན་པས། ཁྱེད་ཀྱིས་དེ་དག་གི་སྡིག་པ་བསལ་བར་མ་མཛད་ཅིག ཁྱེད་ཀྱི་གཟིགས་ངོར་དེ་དག་གི་སྡིག་ཉེས་མེད་པར་ཡང་མི་མཛད་རོགས། ཁྱེད་ཀྱི་དྲུང་དུ་དེ་དག་འགྱེལ་ཞིང་། ཁྱེད་ཐུགས་ཁྲོ་བའི་ཚེ་ན་དེ་དག་ལ་འདི་ལྟར་མཛད་དུ་གསོལ་ལོ། །
JER 19:1 དཀོན་མཆོག་ཡ་ཝཱེས་འདི་སྐད་དུ། ཁྱོད་སོང་ལ་རྫ་བཟོའི་བུམ་པ་ཞིག་ཉོས་ཏེ། མི་རྣམས་ཁྲོད་ཀྱི་རྒན་པོ་རྣམས་དང་གུས་པར་འོས་པའི་མཆོད་དཔོན་རྣམས་ལས་ཁ་ཅིག་ཁྲིད་ནས།
JER 19:2 པེན་ཧིན་ནོམ་ལུང་པ་ནང་དང་རྫ་ལེབ་ཀྱི་སྒོ་ཁར་སོང་ནས། དེ་རུ་ངས་ཁྱོད་ལ་བབས་པའི་བཀའ་རྣམས་སྒྲོགས་ལ་འདི་ལྟར།
JER 19:3 ཀྱེ་ཡ་ཧུ་དཱའི་རྒྱལ་པོ་དང་ཡེ་རུ་སཱ་ལེམ་གྱི་ཡུལ་མི་ཀུན། དཀོན་མཆོག་ཡ་ཝཱེའི་བཀའ་ལ་ཉོན་ཅིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་གནས་འདིར་ཆག་སྒོ་འབྱུང་བར་བྱེད་ཅིང་། དེ་ཐོས་མཁན་ཐམས་ཅད་ནི་རྣ་འུར་བར་འགྱུར།
JER 19:4 ཅི་ལ་ཞེ་ན། དེ་དག་དང་དེ་དག་གི་མེས་པོ་རྣམས་དང་། ཡ་ཧུ་དཱའི་རྒྱལ་པོ་བཅས་ཀྱིས་བདག་དོར་ནས། གནས་འདི་བཙོག་པར་བྱས་ཏེ་རྒྱུས་མི་མངའ་བའི་ལྷ་གཞན་རྣམས་ལ་སྤོས་བདུགས་པ་དང་། ཡུལ་འདི་རུ་ཉེས་མེད་ཁྲག་གིས་བཀང་བར་བྱས།
JER 19:5 རང་གི་བུ་མེ་རུ་བསྲེགས་ནས་པཱ་ཨལ་ལ་སྦྱིན་སྲེག་གི་མཆོད་པ་འབུལ་བའི་ཆེད་དུ། དེ་དག་གིས་པཱ་ཨལ་གྱི་མཐོ་གླིང་རྣམས་བརྩིགས། དེ་ནི་ངས་བསྒོས་པ་མ་ཡིན་ལ། ངས་གླེང་པ་ཡང་མིན་ཏེ། ངའི་ཡིད་ལའང་ཤར་མ་མྱོང་ངོ་། །
JER 19:6 དེ་བས་ལྟོས་ཤིག དུས་དེ་སླེབས་ལ་ཉེ། གནས་འདི་ལ་ཐོ་ཕེད་མི་ཟེར་ལ། པེན་ཧིན་ནོམ་ལུང་པ་ཡང་མི་ཟེར་བར། གསོད་གཅོད་ཀྱི་ལུང་པ་ཞེས་འབོད་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 19:7 ངས་ཡུལ་འདི་རུ་ཡ་ཧུ་དཱ་དང་ཡེ་རུ་སཱ་ལེམ་གྱི་ཇུས་ངན་ནི་མེད་པར་བྱེད་ཅིང་། དེ་དག་རང་གི་དགྲ་བོའི་མདུན་དུ་རལ་གྲིའི་ཁ་དང་། དེ་དག་གི་སྲོག་ལ་སྙེག་པའི་ལག་འོག་ཏུ་འགྱེལ་བར་བྱེད། ངས་དེ་དག་གི་བམ་རོ་ནི་ནམ་མཁའི་བྱ་དང་ཐང་གི་གཅན་གཟན་རྣམས་ཀྱི་ཟས་སུ་སྦྱིན་པར་བྱའོ། །
JER 19:8 ཡང་ངས་གྲོང་ཁྱེར་འདི་ནི་མི་མེད་ལུང་སྟོང་དང་མི་ཡིས་འཕྱ་སྨོད་བྱེད་ཡུལ་དུ་འགྱུར་བར་བྱེད་ཅིང་། ཡུལ་དེ་བརྒྱུད་ནས་འགྲོ་མཁན་ཐམས་ཅད་དེའི་རྐྱེན་ངན་གྱི་ཕྱིར་དངངས་ནས་འཕྱ་བར་འགྱུར།
JER 19:9 དགྲ་དང་དེ་དག་གི་སྲོག་ལ་སྙེག་མཁན་གྱིས་ཁོ་རྣམས་ཀྱི་རྗེས་དེད་ནས། དེ་དག་སྡུག་བསྔལ་བའི་དུས་སུ། ངས་དེ་རྣམས་ལ་རང་རང་གི་བུ་བུ་མོ་རྣམས་ཀྱི་ཤ་དང་གྲོགས་པོའི་ཤ་བཟའ་བར་བྱེད་དོ། །
JER 19:10 ཡང་ཁྱོད་ཀྱིས་རང་དང་མཉམ་དུ་འགྲོ་མཁན་རྣམས་ཀྱི་མདུན་དུ་བུམ་པ་དེ་ཆོགས་ལ།
JER 19:11 དེ་དག་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མི་ཡིས་རྫ་བཟོའི་སྣོད་བཅག་ནས་སྔར་བཞིན་སླར་གསོ་བྱེད་མི་ཐུབ་པ་ལྟར། ངས་མི་འདི་དག་དང་གྲོང་ཁྱེར་འདི་ཡང་གཅོག་པར་བྱ་སྟེ། སྦས་ས་མེད་པའི་བར་དུ་དེ་རྣམས་ཐོ་ཕེད་དུ་བསྐུང་བར་འགྱུར་རོ། །
JER 19:12 ངས་གནས་འདི་དང་འདིའི་ཡུལ་མི་རྣམས་ལའང་དེ་བཞིན་བྱས་ཏེ། གྲོང་ཁྱེར་འདི་ཐོ་ཕེད་ལྟ་བུར་བྱའོ་ཞེས་གསུངས་ཞེས་སྨྲོས་ཤིག
JER 19:13 ཡེ་རུ་སཱ་ལེམ་གྱི་ཁང་པ་དང་ཡ་ཧུ་དཱའི་རྒྱལ་པོ་དག་གི་ཕོ་བྲང་རྣམས་ནི་ཐོ་ཕེད་ལྟར་བཙོག་པར་འགྱུར་ཏེ། སྔར་ཁོ་ཚོས་ཁང་པ་ཐམས་ཅད་ཀྱི་སྟེང་ནས་ནམ་མཁའི་ཚོགས་ལ་སྤོས་བདུགས་པ་དང་། ལྷ་གཞན་རྣམས་ལ་སྐྱེམས་མཆོད་ཕུལ་བ་ཡིན་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 19:14 དེ་ནས་ཡེ་རེམ་ཡཱ་ནི་དཀོན་མཆོག་ཡ་ཝཱེས་ལུང་སྟོན་པར་མངགས་པའི་ཐོ་ཕེད་ཡུལ་ནས་ཕྱིར་ལོག་སྟེ། དཀོན་མཆོག་ཡ་ཝཱེའི་མཆོད་ཁང་གི་ཁྱམས་རར་ལངས་བསྡད་ནས་མི་ཀུན་ལ་ན་རེ།
JER 19:15 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག བདག་གིས་གྲོང་ཁྱེར་འདི་དང་འདིའི་ཉེ་འཁོར་ཐམས་ཅད་ལ་རྒོལ་བར་བསྒྲགས་པའི་ཆག་སྒོ་དེ་ཐམས་ཅད་འབབ་པར་བྱའོ། །ཅི་ལ་ཞེ་ན། དེ་དག་གིས་སེམས་རྒྱུད་གྱོང་པོ་བྱས་ནས་བདག་གི་བཀའ་ལ་མི་མཉན་ནོ་ཞེས་གསུངས་ཞེས་སྨྲས་པའོ། །
JER 20:1 དེ་ཡང་དཀོན་མཆོག་ཡ་ཝཱེའི་མཆོད་ཁང་གི་འགོ་དཔོན་ཏེ། ཨིམ་མེར་གྱི་བུ་མཆོད་དཔོན་ཕཱ་ཤུར་གྱིས། ཡེ་རེམ་ཡཱས་དོན་འདི་དག་ལུང་སྟོན་པ་ཐོས་ནས།
JER 20:2 ལུང་སྟོན་པ་ཡེ་རེམ་ཡཱ་ལ་བརྡུངས་ཏེ། དཀོན་མཆོག་ཡ་ཝཱེའི་མཆོད་ཁང་གི་པེན་ཡཱ་མེན་གྱི་རྒྱ་སྒོ་གོང་མར་ལྕགས་སྒྲོག་བརྒྱབ་ནས་བཞག
JER 20:3 དེའི་ཕྱི་ཉིན་ཕཱ་ཤུར་གྱིས་ལྕགས་སྒྲོག་བཀྲོལ་ནས་ཡེ་རེམ་ཡཱ་བཏང་བས། ཡེ་རེམ་ཡཱ་ཡིས་དེ་ལ་འདི་ལྟར། དཀོན་མཆོག་ཡ་ཝཱེས་ཁྱོད་ཀྱི་མིང་ལ་ཕཱ་ཤུར་ཞེས་མི་འབོད་པར། མཱ་ཁེར་མཱེ་སཱ་ ཞེས་འབོད་པ་ཡིན།
JER 20:4 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་དང་ཁྱོད་ཀྱི་གྲོགས་པོ་ཐམས་ཅད་དངངས་ནས་འཚབ་པར་བྱེད་དེ། ཁྱོད་ཀྱིས་དེ་དག་དགྲ་ཡི་རལ་གྲི་འོག་ཏུ་འཆི་བ་དངོས་སུ་མཐོང་བར་འགྱུར། ཡང་ངས་ཡ་ཧུ་དཱ་པ་ཐམས་ཅད་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་དགོས་ཤིང་། ཁོས་དེ་དག་བཙན་གྱིས་པཱ་པེལ་ལོན་དུ་འཁྲིད་པའམ་ཡང་ན་རལ་གྲིས་གསོད་པར་འགྱུར།
JER 20:5 ངས་གྲོང་ཁྱེར་འདིའི་ནོར་རྫས་ཐམས་ཅད་དང་། ངལ་རྩོལ་ལས་ཐོབ་པ་ཐམས་ཅད། རིན་པོ་ཆེ་ཐམས་ཅད། ད་དུང་ཡ་ཧུ་དཱའི་རྒྱལ་པོ་རྣམས་ཀྱི་གཏེར་མཛོད་ཐམས་ཅད་དགྲ་ཡི་ལག་ཏུ་གཏོད་པར་བྱེད་ཅིང་། དགྲ་ཡིས་དེ་དག་ཕྲོགས་ནས་བཅོམས་ཏེ་པཱ་པེལ་ལོན་དུ་འཁྱེར་བར་འགྱུར།
JER 20:6 ཀྱེ་ཕཱ་ཤུར་ཁྱོད་རང་དང་ཁྱོད་ཀྱི་ཁྱིམ་དུ་ཡོད་པ་ཐམས་ཅད་བཙོན་དུ་འཁྲིད་པར་འགྱུར་ལ། ཁྱོད་དང་ཁྱོད་ཀྱི་གྲོགས་པོ་རྣམས་ཏེ། ཁྱོད་ཀྱིས་ལུང་བསྟན་རྫུན་མ་སྨྲས་པ་དེ་ཐམས་ཅད་ནི་པཱ་པེལ་ལོན་དུ་ཁྲིད་ནས། དེ་རུ་འཆི་བ་དང་དེ་རུ་བསྐུང་བར་འགྱུར་ཞེས་པའོ་ཞེས་གསུངས་སོ། །
JER 20:7 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་བསླུས་ཤིང་ང་ལ་བསླུ་བྲིད་ཐེབས་པ་ཡིན། ཁྱེད་ནི་ང་ལས་སྟོབས་ཆེ་བས་ཁྱེད་རྒྱལ་བར་གྱུར་པ་དང་། ང་རང་ཉིན་གང་པོར་གཞན་རྣམས་ཀྱི་འཕྱ་སྨོད་བྱེད་ཡུལ་དུ་གྱུར་ཅིང་མི་ཀུན་གྱིས་ང་ལ་འཕྱའོ། །
JER 20:8 ངས་ནམ་རྒྱུན་གཏམ་སྨྲ་དུས་སྐད་ཆེན་པོ་བརྒྱབ་པ་དང་། སྐད་ཆེན་པོས་གདུག་རྩུབ་དང་འཕྲོག་བཅོམ་འབྱུང་ངོ་ཞེས་སྒྲོག་སྟེ། ཅི་ལ་ཞེ་ན། དཀོན་མཆོག་ཡ་ཝཱེའི་བཀའ་ཡིས་ང་རང་ཉིན་རེ་བཞིན་ངོ་ཚ་དང་འཕྱ་སྨོད་ལ་གཏད།
JER 20:9 གལ་ཏེ་ངས་ད་ནས་བཟུང་ཁོང་ཉིད་མི་གླེང་ལ། ཕྱིན་ཆད་ཁོང་གི་མཚན་གྱི་སྒོ་ནས་གཏམ་སྨྲ་བར་ཡང་མི་བྱ་ཞེས་སྨྲས་ན། ཁོང་གི་བཀའ་ནི་ངའི་སེམས་སུ་མེ་ལྟར་འབར་ཞིང་ངའི་རུས་པའི་ནང་དུ་སྦས་ཡོད་པར་འདྲ་སྟེ། ངས་དེ་བཟོད་མི་ཐུབ་ལ་དངོས་གནས་བཟོད་ཐབས་བྲལ་བ་ཡིན།
JER 20:10 ངས་མི་མང་པོས་འདི་ལྟར། ཕྱོགས་བཞིར་འཇིགས་སྣང་གིས་བཀང་ཡོད། ཁོ་གཏུག་དང་། རང་ཅག་གིས་ཁོ་གཏུག་པར་བྱ་ཞེས་ཤབ་ཤུབ་སྨྲ་བ་ཐོས་ཏེ། ངའི་ཡིད་གྲོགས་རྣམས་ཀྱིས་ཀྱང་ང་འགྱེལ་བ་མཐོང་བར་བསྒུགས་ནས་ན་རེ། ཁོ་གཡོ་འོག་ཏུ་ཚུད་ན་ངེད་རྣམས་ཁོ་ལས་རྒྱལ་བར་འགྱུར་ལ། ཁོའི་སྟེང་དུ་དགྲ་ཤ་ལེན་ཡང་སྲིད་ཅེས་སྨྲས་སོ། །
JER 20:11 ཡིན་ཡང་། དཀོན་མཆོག་ཡ་ཝཱེ་ནི་ང་དང་མཉམ་དུ་བཞུགས་ཏེ་འཇིགས་སུ་རུང་བའི་དཔའ་བོ་བརྗིད་ཉམས་ཅན་ཞིག་དང་མཚུངས་པས་ན། ང་ལ་གནོད་སྐྱེལ་མཁན་ཐམས་ཅད་འགྱེལ་ཞིང་རྒྱལ་བར་མི་འགྱུར་ལ། དེ་རྣམས་ཕམ་པས་ཤིན་ཏུ་ངོ་ཚ་བར་འགྱུར་ཏེ། ཡང་དེ་རྣམས་ཀྱིས་ཤེས་རབ་བཞིན་སྤྱོད་པ་མ་སྤྱད་པས་ན་ཇི་སྲིད་བར་དུ་བརྗེད་མི་ཐུབ་པའི་ངོ་ཚ་དེ་འབྱུང་བར་འགྱུར།
JER 20:12 དྲང་བདེན་མི་ལ་ཞིབ་དཔྱོད་མཛད་མཁན་དང་། མིའི་སེམས་དང་བསམ་པར་གཟིགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས། ཁྱེད་ཀྱིས་དེ་དག་ལས་དགྲ་ཤ་ལེན་པ་ང་ལ་མཐོང་བར་མཛོད་དང་། ཅི་ལ་ཞེ་ན། ངས་རང་གི་དོན་ནི་ཁྱེད་ལ་བཅོལ་བའི་ཕྱིར་རོ། །
JER 20:13 ཁྱོད་རྣམས་ཀྱིས་དཀོན་མཆོག་ཡ་ཝཱེར་བསྟོད་དབྱངས་ཕུལ་ཞིག དཀོན་མཆོག་ཡ་ཝཱེར་བསྟོད་པ་ཕུལ་ཞིག ཅི་ལ་ཞེ་ན། ཁོང་གིས་དབུལ་པོའི་སྲོག་བསྐྱབས་ཏེ་ངན་པའི་ལག་ནས་ཐར་བར་མཛད་དོ། །
JER 20:14 ང་སྐྱེས་པའི་ཉིན་དེ་ལ་དམོད་མོ་ཐེབས་གྱུར་ཅིག ངའི་མ་ཡིས་ང་བཙས་པའི་ཉིན་དེ་ལ་བྱིན་རླབས་མི་ཐོབ་པར་ཤོག
JER 20:15 ངའི་ཕ་ལ་ཁྱོད་ལ་བུ་ཞིག་སྐྱེས་བྱུང་ཞེས་འཕྲིན་བསྐྱལ་ནས་ངའི་ཕ་རབ་ཏུ་དགའ་བར་བྱེད་མཁན་དེ་ལ་དམོད་མོ་ཐེབས་གྱུར་ཅིག
JER 20:16 ཡང་མི་དེ་ནི་དཀོན་མཆོག་ཡ་ཝཱེས་སྙིང་རྗེ་མ་གནང་བར་ཕམ་པར་བཟོས་པའི་གྲོང་ཁྱེར་དང་འདྲ་བར་གྱུར་ཅིག དེ་ཡིས་ཞོགས་པར་སྨྲེ་སྔགས་དང་ཉིན་གུང་འཐབ་མོའི་ཀི་སྒྲ་ཐོས་གྱུར་ཅིག
JER 20:17 ཅི་ལ་ཞེ་ན། དེས་ངའི་མ་ནི་ངའི་དུར་ཁུང་དུ་གྱུར་ནས་ང་མ་ཡི་མངལ་ནང་དུས་གཏན་དུ་ལུས་པའི་ཆེད་དུ། ང་མངལ་ལས་མ་སྐྱེས་སྔོན་དུ་མ་བསད་པས་སོ། །
JER 20:18 ང་མ་ཡི་མངལ་ལས་ཐོན་ནས་དཀའ་ངལ་དང་སྡུག་བསྔལ་ལ་ཕྲད་དེ། ངའི་མི་ཚེ་འདི་ངོ་ཚའི་ནང་དུ་རོལ་དགོས་པ་ཅི་ཡིན་ནམ།
JER 21:1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་ཞིང་། དུས་དེར་རྒྱལ་པོ་ཚིད་ཀི་ཡཱ་ཡིས་མལ་ཀི་ཡཱ་ཞེས་བྱ་བའི་བུ་ཕཱ་ཤུར་དང་། མ་ཨ་སེ་ཡཱའི་བུ་སྟེ་མཆོད་དཔོན་ཟེ་ཕན་ཡཱ་གཉིས་ཀ་ཁོང་གི་རྩར་མངགས་ནས་ན་རེ།
JER 21:2 ཁྱེད་ཀྱིས་ངེད་རྣམས་ཀྱི་ཆེད་དུ་དཀོན་མཆོག་ཡ་ཝཱེ་ལ་ཞུ་བར་མཛོད། ཅི་ལ་ཞེ་ན། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ངེད་རྣམས་ལ་རྒོལ་དུ་འོངས་པའོ། །དཀོན་མཆོག་ཡ་ཝཱེས་མཛད་པ་ངོ་མཚར་ཅན་གྱིས་ངེད་རྣམས་ལ་རོགས་རམ་གནང་ནས། པཱ་པེལ་ལོན་གྱི་རྒྱལ་པོ་ནི་ངེད་དང་འབྲལ་བར་མཛད་ཀྱང་སྲིད་ཅེས་ཞུས་པ་ན།
JER 21:3 ཡེ་རེམ་ཡཱ་ཡིས་དེ་དག་ལ་འདི་ལྟར། ཁྱོད་རྣམས་ཀྱིས་ཚིད་ཀི་ཡཱ་ལ་འདི་སྐད་ཤོད་ཅིག
JER 21:4 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་རྣམས་ཀྱི་ལག་གི་མཚོན་ཆ་སྟེ། ཁྱོད་ཚོས་ལྕགས་རིའི་ཕྱི་རོལ་ནས་ཁྱོད་རྣམས་བསྐོར་བའི་པཱ་པེལ་ལོན་གྱི་རྒྱལ་པོ་དང་ཀལ་དི་པ་རྣམས་དང་འཐབ་བྱེད་མཚོན་ཆ་རྣམས་ཕྱིར་བསྐོར་ནས་གྲོང་ཁྱེར་འདིའི་དཀྱིལ་དུ་བསྡུ་བར་བྱའོ། །
JER 21:5 ངས་ཁོང་ཁྲོ་དང་ཁྲོ་གཏུམ་ཆེན་པོ། ཞེ་སྡང་བཅས་ཀྱི་ནང་དུ་ཕྱི་རུ་བརྐྱངས་པའི་ལག་པ་དང་ནུས་མཐུ་ལྡན་པའི་དཔུང་ངར་གྱིས་ཁྱོད་རྣམས་ལ་རྒོལ་ངེས་ཡིན།
JER 21:6 ཡང་ངས་གྲོང་ཁྱེར་འདི་རུ་གནས་པའི་མི་ཕྱུགས་གཉིས་ལ་བརྡུངས་ནས་དེ་ཐམས་ཅད་ལ་རིམས་ནད་དྲག་པོ་བྱུང་ནས་འཆི་བར་འགྱུར་རོ། །
JER 21:7 དེའི་རྗེས་སུ། ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དེའི་འཁོར་གཡོག་དང་མི་རྣམས་ཏེ། གྲོང་ཁྱེར་འདིའི་ནང་དུ་རིམས་ནད་དང་རལ་གྲིའི་ཆག་སྒོ་དང་། མུ་གེ་བཅས་ལས་ལུས་པའི་མི་རྣམས་ནི་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དང་ཁོ་ཚོའི་དགྲ་རྣམས་དང་། ཁོ་ཚོའི་སྲོག་ལ་སྙེག་མཁན་བཅས་ཀྱི་ལག་ཏུ་གཏད་དེ། པཱ་པེལ་ལོན་གྱི་རྒྱལ་པོས་དེ་རྣམས་གཅེས་སུ་མི་འཛིན་ཞིང་། ཤ་ཚ་བར་མི་བྱེད་ལ། སྙིང་རྗེ་ཡང་མི་བྱེད་པར་རལ་གྲིས་དེ་རྣམས་གསོད་པར་འགྱུར་ཞེས་དཀོན་མཆོག་ཡ་ཝཱེས་གསུངས་པའོ། །
JER 21:8 ཡང་དཀོན་མཆོག་ཡ་ཝཱེས་ཡེ་རེམ་ཡཱ་ལ་འདི་སྐད་དུ། ཁྱོད་ཀྱིས་མི་འདི་རྣམས་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཤི་གསོན་གཉིས་ཀྱི་ལམ་ནི་ཁྱོད་ཅག་གི་མདུན་དུ་བཤམ་པར་བྱ་སྟེ།
JER 21:9 གྲོང་ཁྱེར་འདི་རུ་སྡོད་པ་རྣམས་རལ་གྲི་དང་མུ་གེ རིམས་ནད་བཅས་ཀྱི་རྐྱེན་གྱིས་འཆི་བར་འགྱུར་མོད། འོན་ཀྱང་ཕྱི་རོལ་ཏུ་སོང་ནས་ཁྱོད་ཅག་བསྐོར་བའི་ཀལ་དི་པ་ལ་མགོ་སྒུར་མཁན་ནི་གསོན་པོར་ལུས་ཤིང་སྲོག་ཐར་བར་འགྱུར་རོ། །
JER 21:10 ངས་གྲོང་ཁྱེར་འདི་ལ་ཆག་སྒོ་འབྱུང་བར་མཛད་པ་ལས་བྱིན་རླབས་མི་གནང་བའི་སེམས་ཐག་བཅད་པ་དང་། གྲོང་ཁྱེར་འདི་ནི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་ཅིང་། དེས་མེ་ཡིས་བསྲེག་པར་འགྱུར་གསུངས་ཞེས་ཤོད་ཅིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 21:11 ཁྱོད་ཀྱིས་ཡ་ཧུ་དཱའི་རྒྱལ་རྒྱུད་ལ་འདི་ལྟར་ཤོད་ཅིག ཁྱོད་རྣམས་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 21:12 དཱ་བིད་ཀྱི་ཁྱིམ་རྒྱུད་ལགས། དཀོན་མཆོག་ཡ་ཝཱེས་འདི་སྐད་དུ། ང་རང་ཁྱོད་ཅག་གི་སྤྱོད་པ་ངན་པའི་རྐྱེན་གྱིས་ཁོང་ཁྲོ་ཆེན་པོ་ལངས་ཏེ། མེ་བཞིན་འབར་ནས་སུས་ཀྱང་གསོད་མི་ནུས་པ་ཞིག་མི་འབྱུང་བའི་ཆེད་དུ། ཁྱོད་རྣམས་ཀྱིས་ཞོགས་པ་རེ་རེར་དྲང་བདེན་སྤྱོད་ཅིག ཕྲོགས་ནས་ཁྱེར་བ་དག་བརྙས་བཅོས་བྱེད་མཁན་གྱི་ལག་ནས་སྒྲོལ་ཞིག
JER 21:13 སུས་རང་ཅག་ལ་རྒོལ་ཡོང་། སུ་རང་ཅག་གི་གནས་ཚང་དུ་འཇུག་པར་འགྱུར་ཞེས་སྨྲ་བའི་རི་ཁུག་དང་ཐང་གི་བྲག་ལ་གནས་པའི་ཡུལ་མི་རྣམས། ལྟོས་ཤིག ང་ནི་ཁྱོད་རྣམས་ཀྱི་དགྲ་རུ་ལང་ངོ་ཞེས་དཀོན་མཆོག་ཡ་ཝཱེས་གསུངས།
JER 21:14 ཡང་ཁྱོད་ཅག་གིས་སྤྱད་པའི་ལས་འབྲས་བཞིན་དུ་ངས་ཆད་པ་གཅོད་དེ། ངས་ཡེ་རུ་སཱ་ལེམ་གྱི་ནགས་ཚལ་ལ་མེ་སྦར་ནས་ཁྱོད་ཀྱི་མཐའ་འཁོར་གྱི་ཡོད་ཚད་ཁྱུར་མིད་གཏོང་ངོ་ཞེས་དཀོན་མཆོག་ཡ་ཝཱེས་གསུངས་སོ། །
JER 22:1 དཀོན་མཆོག་ཡ་ཝཱེས་འདི་སྐད་དུ། ཁྱོད་ཡ་ཧུ་དཱའི་རྒྱལ་པོའི་ཕོ་བྲང་དུ་མར་སོང་ནས་འདི་སྐད་ཤོད་ཅིག
JER 22:2 ཀྱེ་དཱ་བིད་ཀྱི་ཁྲི་ལ་བཞུགས་པའི་ཡ་ཧུ་དཱའི་རྒྱལ་པོ་ལགས། ཁྱེད་དང་ཁྱེད་ཀྱི་འཁོར་གཡོག་རྣམས་དང་མཁར་སྒོ་འདིའི་ནང་དུ་ཞུགས་པའི་མི་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 22:3 དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་དྲང་གཞག་དང་དྲང་བདེན་སྤྱོད་ཅིག ཕྲོགས་ནས་ཁྱེར་བ་དག་གཉའ་གནོན་གཏོང་མཁན་གྱི་ལག་ནས་སྒྲོལ་ཞིག བྱེས་སུ་སྡོད་པའི་མི་དང་དྭ་ཕྲུག་དང་ཡུགས་མོ་བཅས་ལ་མནར་གཅོད་གཏོང་བའམ་ཡང་ན་གདུག་རྩུབ་མ་སྤྱོད་ཅིག ཡང་གནས་འདི་རུ་ཉེས་མེད་ཀྱི་ཁྲག་བཞུར་མི་རུང་།
JER 22:4 ཇི་སྟེ་ཁྱོད་རྣམས་ཀྱིས་དངོས་གནས་འདི་བཞིན་སྤྱད་ན། དེ་ནས་དཱ་བིད་ཀྱི་རྒྱལ་ཁྲིར་བཞུགས་པའི་རྒྱལ་པོ་ནི་ཤིང་རྟ་དང་ཆིབས་པར་བཅིབས་ནས། རང་གི་འཁོར་གཡོག་དང་མི་རྣམས་མཉམ་དུ་ཕོ་བྲང་འདིའི་སྒོ་རྣམས་ལས་ནང་དུ་འཇུག་པར་འགྱུར།
JER 22:5 འོན་ཀྱང་ཇི་སྟེ་ཁྱོད་རྣམས་ཀྱིས་ཚིག་འདི་ལ་མ་མཉན་ན། ཕོ་བྲང་འདི་ཁང་སྟོང་དུ་འགྱུར་བར་ངས་རང་ཉིད་དཔང་དུ་བཙུགས་ནས་མནའ་སྐྱེལ་ལོ་ཞེས་པའོ་ཞེས་སྨྲོས་ཤིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 22:6 ཡ་ཧུ་དཱའི་རྒྱལ་པོའི་ཕོ་བྲང་གི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ང་ལ་མཚོན་ན་ཁྱོད་ནི་གིལ་ཨད་དང་ལེ་པཱ་ནོན་གྱི་རི་རྩེ་ལྟ་བུ་ཡིན་ནའང་། ངས་ཁྱོད་ནི་དབེན་སྟོང་དང་སྡོད་མཁན་མེད་པའི་གྲོང་ཁྱེར་དང་འདྲ་བར་བྱའོ། །
JER 22:7 ངས་བཤིག་མཁན་མངགས་པར་བྱེད་དེ། རེ་རེས་མཚོན་ཆ་ཐོགས་ནས་ཁྱོད་ལ་རྒོལ་ཞིང་། དེ་ཚོས་ཁྱོད་ཀྱི་ཐང་ཤིང་ཡག་ཤོས་རྣམས་བཅད་དེ་མེ་རུ་གཡུག་པར་འགྱུར།
JER 22:8 རྒྱལ་ཁམས་མང་པོའི་མི་རྣམས་གྲོང་ཁྱེར་འདི་བརྒྱུད་ནས་འགྲོ་ཞིང་ཕན་ཚུན་ལ། དཀོན་མཆོག་ཡ་ཝཱེས་ཅིའི་ཕྱིར་གྲོང་ཁྱེར་ཆེན་པོ་འདི་ལ་འདི་ལྟར་མཛད་པ་ཡིན་ནམ་ཞེས་འདྲི་བ་དང་།
JER 22:9 ཡང་དེ་རྣམས་ཀྱིས་འདི་ལྟར། དེ་དག་གིས་རང་གི་དཀོན་མཆོག་ཡ་ཝཱེའི་ཞལ་ཆད་དོར་ནས། ལྷ་གཞན་རྣམས་ལ་ཕྱག་བཙལ་ནས་ཞབས་ཏོག་བསྒྲུབས་པས་ཡིན་ཞེས་ལན་འདེབས་པར་འགྱུར་ཞེས་གསུངས་སོ། །
JER 22:10 གཤིན་པོའི་དོན་དུ་མ་ངུ་ཞིག དེའི་དོན་དུ་སེམས་མ་སྐྱོ་ཞིག འོན་ཀྱང་རང་ཡུལ་དང་བྲལ་བའི་མི་རྣམས་ཀྱི་ཕྱིར་དྲག་ཏུ་ངུས་ཤིག ཅི་ལ་ཞེ་ན། དེ་ཕྱིར་མི་ལོག་ལ་རང་གི་ཕ་ཡུལ་མཐོང་ཡང་མི་ནུས་སོ། །
JER 22:11 ཡ་ཧུ་དཱའི་རྒྱལ་པོ་ཡོ་ཤི་ཡཱ་ཡི་བུ་སྟེ། རང་གི་ཕ་ཡོ་ཤི་ཡཱ་ཡི་རྒྱུན་མཐུད་ནས་རྒྱལ་སྲིད་བསྐྱངས་པའི་རྒྱལ་པོ་ཤལ་ལུམ་གྱི་སྐོར་ལ། དཀོན་མཆོག་ཡ་ཝཱེས་འདི་སྐད་དུ། ཁོ་ནི་ཡུལ་འདི་དང་བྲལ་ནས་ཕྱིར་འདི་རུ་མི་འོང་སྟེ།
JER 22:12 བཙོན་དུ་བཟུང་ནས་ཁྱེར་བའི་གནས་སུ་འཆི་དགོས་ལ། ཡུལ་འདི་སླར་མཐོང་བར་མི་འགྱུར་རོ་ཞེས་གསུངས་སོ། །
JER 22:13 དྲང་བདེན་མིན་པའི་སྒོ་ནས་རང་གི་ཁང་པ་བཟོས་ཤིང་། མི་དྲང་པོའི་ཚུལ་གྱིས་རང་གི་ཐོག་ཁང་རྣམས་རྩིག་མཁན་ལ་ཆག་སྒོ་འབྱུང་། དེས་རང་གི་ཁྱིམ་མཚེས་ལ་དོན་མེད་དུ་ངལ་རྩོལ་བྱེད་དུ་འཇུག་ཅིང་དེ་རྣམས་ལ་གླ་མི་སྦྱིན་ནོ། །
JER 22:14 ཁོ་ན་རེ། ངས་རང་ལ་ཁང་ཆེན་ཞིག་དང་ཐོག་ཁང་མཐོན་པོ་ཞིག་བརྩིག་པར་བྱའོ་ཟེར་ཞིང་། དེར་དཀར་ཁུང་ཡངས་ཤིང་རྒྱ་ཆེ་བ་རྣམས་ཕྱེས་ཏེ། རྩིག་ངོས་ཐང་ཤིང་གིས་བཏུམས་ནས་མཚལ་མདོག་གི་ཚོན་བྱུགས།
JER 22:15 ཁྱོད་ཀྱིས་ཐང་ཤིང་གིས་ཐོག་ཁང་བརྩིགས་ནས་རྒྱལ་ཁ་ལོན་ཐབས་བྱས་ཏེ་རང་ཉིད་རྒྱལ་པོ་ཡིན་པ་ངོམ་མམ། ཁྱོད་ཀྱི་ཕ་ཡིས་ཀྱང་བཟའ་བཏུང་སྤྱད་ནས་དྲང་གཞག་དང་དྲང་བདེན་སྤྱད་པ་མ་ཡིན་ནམ། དུས་དེར་ཁོ་ལ་བདེ་སྐྱིད་ཐོབ་པར་གྱུར།
JER 22:16 དེས་དཀའ་ངལ་ཅན་དང་དབུལ་པོ་རྣམས་ལ་དཀར་འདོན་བྱས་པས། ཁོ་ལ་བདེ་སྐྱིད་ཐོབ་པར་གྱུར་ཏེ། འདི་ནི་བདག་ངོ་ཤེས་པའི་དོན་སྙིང་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས་སོ། །
JER 22:17 ཁྱོད་ཀྱི་མིག་དང་སེམས་ནི་མི་འོས་པའི་ཐོབ་ནོར་འབའ་ཞིག་ལ་ཆགས་ཤིང་། མི་ཉེས་མེད་ཀྱི་ཁྲག་བཞུར་དུ་བཅུག་སྟེ། བརྙས་བཅོས་དང་གདུག་རྩུབ་སྤྱད་པས།
JER 22:18 དཀོན་མཆོག་ཡ་ཝཱེས་ཡོ་ཤི་ཡཱའི་བུ་སྟེ་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་སྐོར་ལ་འདི་སྐད་དུ། མི་ཡིས་དེའི་དོན་དུ་ཀྱི་ཧུད་ངའི་གཅེན་པོ། ཀྱི་ཧུད་ངའི་གཅེན་མོ་ཟེར་བཞིན་མྱ་ངན་མི་བྱེད་ལ། ཀྱི་ཧུད་ངའི་ཇོ་བོ། ཀྱི་ཧུད་ངའི་རྒྱལ་པོ་བརྗིད་ཉམས་ཅན་ཟེར་བཞིན་མྱ་ངན་མི་བྱེད་དོ། །
JER 22:19 བོང་བུ་ཞིག་སྐུང་བ་བཞིན་དུ་དེ་བསྐུང་བར་འགྱུར་ལ། ཡེ་རུ་སཱ་ལེམ་གྱི་མཁར་སྒོའི་ཕྱི་རོལ་ཏུ་དྲུད་ནས་གཡུག་པར་འགྱུར་ཞེས་གསུངས་སོ། །
JER 22:20 ཀྱེ་ཡེ་རུ་སཱ་ལེམ། ཁྱོད་ཀྱི་མནའ་བཅད་ཐམས་ཅད་མེད་པར་བཟོས་པས། ཁྱོད་རང་ཡར་ལེ་པཱ་ནོན་དུ་སོང་ལ་འོ་དོད་བོས་ཤིག པཱ་ཤན་དུ་སྒྲ་སྒྲོགས་ཤིག ཨ་བཱ་རིམ་ནས་འོ་དོད་བོས་ཤིག
JER 22:21 ཁྱོད་རང་དར་བའི་དུས་སུ་བདག་གིས་ཁྱོད་ལ་སྨྲས་ཀྱང་ཁྱོད་ཀྱིས་ངས་མི་མཉན་ཞེས་སྨྲས། ཁྱོད་ནི་གཞོན་པའི་དུས་ནས་འདི་བཞིན་ཡིན་ཏེ་ངའི་བཀའ་ལ་མ་མཉན་ཏོ། །
JER 22:22 ཁྱོད་ཀྱི་རྫི་བོ་ཐམས་ཅད་དྲག་རླུང་གིས་འཁུར་ཞིང་ཁྱོད་ཀྱི་མནའ་བཅད་རྣམས་བཙོན་དུ་འཁྲིད་པར་འགྱུར་བས། དུས་དེར་ཁྱོད་ནི་རང་གི་སྤྱོད་ངན་གྱི་དབང་གིས་ནོངས་ཤིང་ངོ་ཚ་བར་འགྱུར།
JER 22:23 ལེ་པཱ་ནོན་དུ་སྡོད་པ་དང་ཐང་ཤིང་གི་དཀྱིལ་དུ་ཚང་བཅའ་མཁན་ཁྱོད་ལ། སྡུག་བསྔལ་བྱུང་ནས་ཕྲུ་གུ་བཙའ་བའི་བུད་མེད་ལ་ཟུག་གཟེར་རྒྱག་པ་ལྟ་བུའི་དུས་དེར་ཁྱོད་ཀྱིས་ཅི་འདྲའི་འཁུན་སྒྲ་འབྱིན་ནམ།
JER 22:24 དཀོན་མཆོག་ཡ་ཝཱེས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ཡེ་ཧོ་ཡཱ་ཀིམ་གྱི་བུ་སྟེ་ཡ་ཧུ་དཱའི་རྒྱལ་པོ་ཀོན་ཡཱ་ནི་ངའི་གཡས་ལག་གི་མཛུབ་དཀྲིས་དམ་ཕྲུག་ཅན་ ཡིན་ནའང་། ངས་ཁྱོད་ངའི་མཛུབ་མོ་ནས་མར་བླངས་ཏེ།
JER 22:25 ཁྱོད་ཀྱི་སྲོག་སྙེག་མཁན་དང་ཁྱོད་རང་འཇིགས་པའི་མི་སྟེ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དང་ཀལ་དི་པའི་ལག་ཏུ་གཏོད་པར་བྱའོ། །
JER 22:26 ཡང་ངས་ཁྱོད་རང་ཁྱོད་སྐྱེས་པའི་མ་དང་བཅས་ཁྱོད་ཅག་གི་སྐྱེ་ཡུལ་མིན་པའི་ཡུལ་དུ་སྐྲོད་པར་བྱ་ཞིང་། ཁྱོད་རྣམས་དེ་རུ་མ་སྐྱེས་ཀྱང་དེ་རུ་འཆི་བར་འགྱུར་ལ།
JER 22:27 ཁྱོད་རྣམས་སེམས་ནས་ཕྱིར་རང་ཡུལ་དུ་ལོག་འདོད་ཀྱང་ནམ་ཡང་ཕྱིར་ལོག་པར་མི་འགྱུར་ཞེས་གསུངས་སོ། །
JER 22:28 ཀོན་ཡཱ་བྱ་བའི་མི་འདི་ནི་མི་ཡིས་མཐོང་ཆུང་བྱེད་པ་དང་དུམ་བུར་བཅག་པའི་རྫ་སྣོད་དམ། སུས་ཀྱང་མི་འདོད་པའི་སྣོད་ཡིན་ནམ། དེ་དང་དེའི་བུ་རྒྱུད་དག་ནི་ཅིའི་ཕྱིར་ཆ་རྒྱུས་མེད་པའི་ཡུལ་དུ་བསྐྲད་པ་ཡིན་ནམ།
JER 22:29 ཀྱེ་ས་གཞི། ཀྱེ་ས་གཞི། ཀྱེ་ས་གཞི། དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 22:30 དཀོན་མཆོག་ཡ་ཝཱེས་འདི་སྐད་དུ། དེང་ཕྱིན་དཱ་བིད་ཀྱི་རྒྱལ་ཁྲིར་བཞུགས་ཏེ་ཡ་ཧུ་དཱ་ལ་སྲིད་བྱེད་དུ་མི་དེའི་བུ་རྒྱུད་ལས་གཅིག་ཀྱང་མི་འབྱུང་བས་ན། འདི་ལ་བུ་མེད་པའི་མི་དང་མི་ཚེ་གང་པོར་དོན་གང་ཡང་མི་འགྲུབ་པའི་མི་ཞེས་ཡི་གེར་ཁོད་ཅིག་ཅེས་གསུངས་སོ། །
JER 23:1 དཀོན་མཆོག་ཡ་ཝཱེས་འདི་སྐད་དུ། ངའི་རྩྭ་སའི་ལུག་རྣམས་བསད་ནས་ཁ་འཐོར་དུ་གཏོང་བའི་རྫི་བོ་རྣམས་ལ་ཆག་སྒོ་འབྱུང་ཞེས་གསུངས།
JER 23:2 དེ་བས་ཡེས་ར་ཨེལ་གྱི་དཀོན་མཆོག་ཡ་ཝཱེས་ཁོང་གི་འབངས་མི་འཚོ་སྐྱོང་བྱེད་པའི་རྫི་བོ་རྣམས་ཀྱི་སྐོར་ལ་འདི་སྐད་དུ། ཁྱོད་ཚོས་ངའི་ལུག་ཁྱུ་ཁ་འཐོར་དུ་བཏང་ནས་ཕར་བསྐྲད་ཅིང་དེ་དག་ལ་ལྟ་སྐྱོང་མ་བྱས་པས། ལྟོས་ཤིག བདག་གིས་ཁྱོད་རྣམས་ཀྱི་སྤྱོད་ངན་ལ་ཉེས་ཆད་གཅོད་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 23:3 བདག་གིས་དངོས་སུ་རང་གི་ལུག་ཁྱུ་ནས་ལུས་པ་རྣམས་དེད་པའི་ཡུལ་ཀུན་ནས་ཚུར་བསྡུས་ཏེ། དེ་དག་སླར་ཡང་རང་གི་ལུག་རར་ཁྲིད་ནས་རྒྱུད་འཕེལ་བར་བྱེད་དོ། །
JER 23:4 ཡང་ངས་རྫི་བོ་རྣམས་བསྐོས་ནས་དེ་དག་འཚོ་སྐྱོང་བྱེད་དུ་འཇུག་པ་དང་། དེ་རྣམས་ལ་འཇིགས་སྣང་དང་དངངས་སྐྲག་ཅི་ཡང་མེད་ལ། གཅིག་ཀྱང་བོར་མི་འགྱུར་ཞེས་དཀོན་མཆོག་ཡ་ཝཱེས་གསུངས་པའོ། །
JER 23:5 ལྟོས་ཤིག ངས་དཱ་བིད་ཀྱི་ཆེད་དུ་དྲང་བདེན་གྱི་མྱུ་གུ་བསྐྱེད་པའི་དུས་དེ་སླེབས་ལ་ཉེ། དེས་རྒྱལ་སྲིད་ཀྱི་དབང་འཛིན་ཞིང་མཁས་པར་སྤྱོད་དེ། ས་གཞིའི་སྟེང་དུ་དྲང་གཞག་དང་དྲང་བདེན་སྤྱོད་པར་འགྱུར།
JER 23:6 ཁོང་གི་སྐུ་རིང་དུ་ཡ་ཧུ་དཱ་ལ་ཐར་པ་འཐོབ་པར་འགྱུར་ཞིང་། ཡེས་ར་ཨེལ་ཡང་བདེ་བར་གནས་པར་འགྱུར་བས། ཁོང་གི་མཚན་ལ་ཡ་ཝཱེ་ངེད་ཅག་གི་དྲང་བདེན་ཞེས་འབོད་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །
JER 23:7 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། མི་རྣམས་ཀྱིས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་མི་བསྐྱལ་མོད།
JER 23:8 འོན་ཀྱང་མི་རྣམས་ཀྱིས་ཡེས་ར་ཨེལ་པ་རྣམས་བྱང་ཕྱོགས་ཀྱི་ཡུལ་དང་། ཁོ་རྣམས་སྐྲོད་སའི་རྒྱལ་ཁམས་སོ་སོ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་གནའ་བསྐྱལ་བར་འགྱུར་རོ། །
JER 23:9 ལུང་སྟོན་པ་རྣམས་གླེང་ན། ངའི་སེམས་རང་གི་ནང་དུ་སྐྱོ་ཞིང་ངའི་རུས་པ་ཐམས་ཅད་འདར་བ་ཡིན། ཅི་ལ་ཞེ་ན། དཀོན་མཆོག་ཡ་ཝཱེ་དང་ཁོང་གི་བཀའ་དམ་པའི་དབང་གིས། ང་ནི་ར་བཟི་བའི་མི་དང་རྒུན་ཆང་བླུད་ནས་བཟི་བར་གྱུར་པའི་མི་དང་འདྲའོ། །
JER 23:10 ཡུལ་ཁམས་ཡོངས་སུ་ལོག་གཡེམ་པས་ཁེངས་ཤིང་། དམོད་མོ་ཐེབས་པའི་རྐྱེན་གྱིས་ས་གཞི་ཡང་སྐྱོ་བར་གྱུར་ཏེ། དབེན་སྟོང་གི་རྩྭ་ཡང་སྐམ་མོ། །ཅི་ལ་ཞེ་ན། དེ་དག་གི་སྤྱོད་ལམ་ནི་ངན་པ་ཡིན་ལ། དེ་དག་གི་དབང་ནི་འགྲིག་སར་མ་སྤྱད་དོ། །
JER 23:11 ཐ་ན་ལུང་སྟོན་པ་དང་མཆོད་དཔོན་གཉིས་ཀ་ཡང་དད་པ་མེད་དེ། ཐ་ན་ངའི་མཆོད་ཁང་ནང་དུའང་དེ་དག་གི་སྤྱོད་ངན་མཐོང་བྱུང་ཞེས་དཀོན་མཆོག་ཡ་ཝཱེས་གསུངས་པའོ། །
JER 23:12 དེ་བས་ཁོ་རྣམས་ཀྱི་འགྲོ་ལམ་ནི་མུན་ནག་ཁྲོད་ཀྱི་འདྲེད་ས་དང་འདྲ་ཞིང་། དེ་དག་དེད་ནས་ལམ་དེར་འགྱེལ་བར་འགྱུར། ཅི་ལ་ཞེ་ན། དེ་དག་ལ་ཉེས་ཆད་གཅོད་པའི་ལོ་ཟླའི་ནང་དུ། ངས་དེ་དག་གི་སྟེང་དུ་ཆག་སྒོ་འབྱུང་བར་བྱེད་དོ་ཞེས་དཀོན་མཆོག་ཡ་ཝཱེས་གསུངས་པའོ། །
JER 23:13 ངས་སཱ་མར་ཡ་ཡི་ལུང་སྟོན་པའི་ནང་དུ་ཞེན་པ་ལོག་པའི་དོན་མཐོང་པ་སྟེ། དེ་དག་གིས་པཱ་ཨལ་ལ་བརྟེན་ནས་ལུང་བསྟན་པ་དང་། ངའི་འབངས་མི་ཡེས་ར་ཨེལ་ནི་ལོག་ལམ་དུ་བཅུག་གོ །
JER 23:14 ངས་ཡེ་རུ་སཱ་ལེམ་གྱི་ལུང་སྟོན་པའི་ནང་དུ་འཇིགས་སུ་རུང་བའི་དོན་མཐོང་སྟེ། དེ་དག་གིས་ལོག་གཡེམ་བྱེད་ཅིང་རྫུན་གྱི་ནང་དུ་སྤྱད་པ་སྤྱོད་པ་དང་། ཡང་ངན་པའི་ལག་པ་བརྟན་པོར་བྱས་ནས་དེ་དག་ལས་སུ་ཞིག་གིས་ཀྱང་རང་གི་སྤྱོད་ངན་མ་དོར་ལ། དེ་ཐམས་ཅད་ངའི་མདུན་དུ་སཱ་དོམ་བཞིན་དང་། ཡེ་རུ་སཱ་ལེམ་གྱི་ཡུལ་མི་རྣམས་ནི་གཱ་མོ་ར་དང་འདྲ་བས།
JER 23:15 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ལུང་སྟོན་པ་འདི་རྣམས་ཀྱི་སྐོར་ལ་འདི་སྐད་དུ། ཡེ་རུ་སཱ་ལེམ་གྱི་ལུང་སྟོན་པ་རྣམས་ལས་ཆོས་མིན་གྱི་དོན་བྱུང་ནས་ཡུལ་ཁམས་ཡོངས་སུ་ཁྱབ་པས། ལྟོས་ཤིག ངས་དེ་དག་ལ་ཟས་སུ་མཁན་པ་དང་བཏུང་བར་དུག་ཆུ་སྦྱིན་པར་བྱའོ་ཞེས་གསུངས།
JER 23:16 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོར་ལུང་བསྟན་སྨྲ་བའི་ལུང་སྟོན་པ་འདི་དག་གི་གཏམ་ལ་མ་མཉན་ཞིག དེ་དག་གིས་ཁྱོད་རྣམས་ལ་རེ་བ་སྟོང་བ་ཡོད་པར་བྱེད་ཅིང་། དེ་དག་གིས་སྨྲས་པའི་ཞལ་གཟིགས་ནི་རང་སེམས་ནས་བྱུང་བ་ལས་དཀོན་མཆོག་ཡ་ཝཱེའི་ཞལ་ནས་བྱུང་བ་མ་ཡིན་ནོ། །
JER 23:17 དེ་དག་གིས་བདག་ལ་མཐོང་ཆུང་བྱེད་པའི་མི་ལ་རྒྱུན་ཆད་མེད་པར་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཞི་ཞིང་བདེ་བར་གནས་པ་ཡིན་གསུངས་ཞེས་སྨྲ་ཞིང་། ཡང་རང་གི་སེམས་རྒྱུད་གྱོང་པོ་ལྟར་སྤྱད་པ་སྤྱོད་པ་ཐམས་ཅད་ལ་འདི་ལྟར། ཁྱོད་ལ་ཆག་སྒོ་འབྱུང་མི་སྲིད་ཅེས་སྨྲ་བ་ཡིན་ཞེས་གསུངས་སོ། །
JER 23:18 འོན་ཀྱང་ཁོ་རྣམས་ལས་སུ་ཞིག་དཀོན་མཆོག་ཡ་ཝཱེའི་ཚོགས་ལ་ཞུགས་ནས་ཁོང་གི་བཀའ་ལ་མཉན་ཞིང་དེ་རྟོགས་པ་ཡིན་ནམ། སུ་ཞིག་གིས་རྣ་བ་བླགས་ནས་ཁོང་གི་བཀའ་ལ་མཉན་ཞིང་དེ་ཐོས་པ་ཡིན་ནམ།
JER 23:19 ལྟོས་ཤིག དཀོན་མཆོག་ཡ་ཝཱེའི་ཐུགས་ཁྲོ་ནི་རླུང་དམར་དང་འདྲ་ཞིང་། རླུང་འཚུབ་དྲག་པོ་ཡིན་ཏེ་ངན་པའི་མགོ་ལ་འཁོར་བར་འགྱུར།
JER 23:20 དཀོན་མཆོག་ཡ་ཝཱེའི་ཐུགས་དགོངས་རྣམས་དངོས་སུ་འགྲུབ་པའི་བར་དུ། ཁོང་གི་ཐུགས་ཁྲོ་ལ་ཞི་བ་མེད་ཅིང་། མཐའ་མའི་ཉིན་མོ་དག་ལ་ཁྱོད་ཅག་གིས་དོན་འདི་ཐམས་ཅད་རྟོགས་པར་འགྱུར་རོ། །
JER 23:21 ངས་ལུང་སྟོན་པ་དེ་དག་མ་མངགས་ཀྱང་དེ་རྣམས་རང་རང་གང་སར་བརྒྱུགས་ཤིང་། ངས་དེ་དག་ལ་བཀའ་མ་བསྒོས་ཀྱང་དེ་རྣམས་རང་གིས་ལུང་བསྟན་ནོ། །
JER 23:22 ཇི་སྟེ་དེ་རྣམས་ངའི་ཚོགས་ལ་ཞུགས་པ་ཡིན་ན། བདག་གི་བཀའ་རྣམས་ངའི་འབངས་མི་ལ་བསྒྲག་པར་འགྱུར་ཞིང་། དེ་རྣམས་ངན་པའི་ལམ་ནས་བཟློགས་ཏེ་རང་གི་སྤྱོད་ངན་རྣམས་དང་འབྲལ་བར་བྱེད་དོ། །
JER 23:23 ང་ནི་ཁྱོད་རྣམས་དང་ཉེ་བའི་དཀོན་མཆོག་ཁོ་ན་ཡིན་ནམ། ཁྱོད་རྣམས་དང་རྒྱང་ཐག་རིང་བའི་དཀོན་མཆོག་ཀྱང་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས་སོ། །
JER 23:24 ངས་མི་མཐོང་བའི་ཆེད་དུ་མི་ནི་གསང་བའི་གནས་སུ་སྦ་ནུས་སམ། ང་ནི་གནམ་ས་གཉིས་ལ་ཁྱབ་ཡོད་པ་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས།
JER 23:25 ལུང་སྟོན་པ་ཚོས་ངའི་མིང་གཡར་ཏེ་རྫུན་གྱི་ལུང་སྟོན་ཞིང་། དེ་དག་གིས་ངས་རྨི་ལམ་རྨིས་སོང་། ངས་རྨི་ལམ་རྨིས་སོང་ཞེས་སྨྲ་བ་ངས་ཐོས་བྱུང་།
JER 23:26 ལུང་སྟོན་པ་དེ་དག་གིས་འདི་ལྟར་བསམ་བཞིན་ནམ་དུས་བར་དུ་ལུས་སམ། ཁོ་ཚོས་རྫུན་སྨྲ་ཞིང་སེམས་ལ་གཡོ་སྒྱུས་བཀང་ཡོད་དོ། །
JER 23:27 དེ་དག་གིས་ཕན་ཚུན་ལ་རང་གི་རྨི་ལམ་བཤད་ན། ངའི་འབངས་མིའི་མེས་པོ་རྣམས་ཀྱིས་པཱ་ཨལ་གྱི་དབང་གིས་ངའི་མིང་བརྗེད་པ་ནང་བཞིན་དེ་དག་ལའང་ང་རང་བརྗེད་དུ་འཇུག་ནུས་པར་འདོད་པ་རེད།
JER 23:28 རྨི་ལམ་ཐོབ་པའི་ལུང་སྟོན་པ་ལ་རྨི་ལམ་བཤད་དུ་ཆུག ཡིན་ནའང་ངའི་བཀའ་དང་ལེན་བྱས་ཡོད་པ་དེས་གཞུང་དྲང་སྒོས་ངའི་བཀའ་ཤོད་ཅིག སོག་མ་ནི་གྲོ་དང་བསྡུར་ནུས་སམ་ཞེས་དཀོན་མཆོག་ཡ་ཝཱེས་གསུངས་པའོ། །
JER 23:29 ངའི་བཀའ་ནི་མེ་ལྟར་མ་ཡིན་ནམ། དེ་ནི་ཕ་བོང་སིལ་བུར་གཏོར་བའི་ཐོ་བ་དང་མི་འདྲའམ་ཞེས་དཀོན་མཆོག་ཡ་ཝཱེས་གསུངས་སོ། །
JER 23:30 དེ་བས་ལྟོས་ཤིག ལུང་སྟོན་པ་དེ་དག་གིས་ཕན་ཚུན་ནས་ཚིག་བརྐུས་ཏེ་ངའི་བཀའ་རུ་བྱས་པས། ང་ནི་དེ་དག་གི་དགྲ་རུ་འགྱུར་ཞེས་དཀོན་མཆོག་ཡ་ཝཱེས་གསུངས།
JER 23:31 ལུང་སྟོན་པ་དེ་དག་གིས་རང་གི་ལྕེ་ཡིས་འདི་ནི་དཀོན་མཆོག་ཡ་ཝཱེས་གསུངས་པ་ཡིན་ཞེས་ཟེར་ཞིང་། ལྟོས་ཤིག ང་ནི་དེ་དག་གི་དགྲ་རུ་འགྱུར་ཞེས་དཀོན་མཆོག་ཡ་ཝཱེས་གསུངས།
JER 23:32 ལྟོས་ཤིག ང་ནི་རྨི་ལམ་རྫུན་མར་བརྟེན་ནས་ལུང་སྟོན་ཁུལ་བྱེད་པ་དེ་དག་གི་དགྲ་རུ་འགྱུར། ཁོ་ཚོས་རྨི་ལམ་དེ་དག་སྨྲས་ནས་རྫུན་དང་འུར་ཤོབ་ཀྱིས་ངའི་འབངས་མི་ལོག་ལམ་དུ་དྲངས་པ་ཡིན། ངས་ཁོ་རྣམས་མ་མངགས་ལ་དེ་དག་ལ་བཀའ་ཡང་མ་བསྒོས། དེ་དག་ནི་མི་འདི་རྣམས་ལ་ཕན་ཐོགས་ཅི་ཡང་མེད་ཅེས་དཀོན་མཆོག་ཡ་ཝཱེས་གསུངས་པའོ། །
JER 23:33 མི་འདི་རྣམས་དང་ཡང་ན་ལུང་སྟོན་པའམ། མཆོད་དཔོན་བཅས་ལས་སུ་ཞིག་གིས་ཁྱོད་ལ། དཀོན་མཆོག་ཡ་ཝཱེ་ནས་བཀའ་ལུང་ཅི་ཞིག་ཡོད་དམ་ཞེས་དྲིས་ན། ཁྱོད་ཀྱིས་དེ་དག་ལ་ལན་དུ། བཀའ་ལུང་ཅི་ཡོད། ངས་ཁྱོད་བསྐྱུར་བར་བྱའོ་ཞེས་ཤོད་ཅིག་ཅེས་དཀོན་མཆོག་ཡ་ཝཱེས་གསུངས་སོ། །
JER 23:34 ཡང་ལུང་སྟོན་པ་དང་ཡང་ན་མཆོད་དཔོན་ནམ། མི་རྣམས་ལས་སུ་ཞིག་གིས་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་སྨྲ་བ་ཡོད་ན། ངས་མི་དེ་དང་དེའི་ཁྱིམ་ལ་ཉེས་ཆད་གཅོད་དགོས།
JER 23:35 ཁྱོད་རྣམས་ཀྱིས་རང་རང་གི་ཁྱིམ་མཚེས་དང་སྤུན་ཟླ་རྣམས་ལ་འདི་ལྟར། དཀོན་མཆོག་ཡ་ཝཱེས་བཀའ་ལན་ཅི་གནང་བྱུང་ངམ། དཀོན་མཆོག་ཡ་ཝཱེས་ཅི་གསུང་ངམ་ཞེས་དྲིས་ཤིག
JER 23:36 ཁྱོད་རྣམས་ཀྱིས་ད་ནས་བཟུང་དཀོན་མཆོག་ཡ་ཝཱེའི་བཀའ་ལུང་ཞེས་མ་གླེང་ཞིག ཅི་ལ་ཞེ་ན། མི་རེ་རེས་སྨྲས་པའི་གཏམ་ནི་རང་རང་གི་བཀའ་ལུང་དུ་འགྱུར་ཏེ། ཁྱོད་རྣམས་ཀྱིས་གཏན་དུ་གསོན་པོར་བཞུགས་པའི་དཀོན་མཆོག་དང་། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ང་ཚོའི་དཀོན་མཆོག་གི་བཀའ་ལོག་བཤད་བྱས་པས་སོ། །
JER 23:37 ཁྱོད་རྣམས་ཀྱིས་དཀོན་མཆོག་གི་ལུང་སྟོན་པ་ལ་འདི་ལྟར། དཀོན་མཆོག་ཡ་ཝཱེས་ཁྱོད་ལ་བཀའ་ལན་ཅི་གནང་བྱུང་ངམ། དཀོན་མཆོག་ཡ་ཝཱེས་ཅི་གསུང་ངམ་ཞེས་དྲིས་ཤིག
JER 23:38 ཇི་སྟེ་ཁྱོད་ཅག་གིས་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་སྨྲས་ན། དཀོན་མཆོག་ཡ་ཝཱེས་ངེས་པར་འདི་སྐད་དུ། ངས་སྔོན་ཆད་མི་མངགས་ནས་ཁྱོད་རྣམས་ལ་ད་ནས་བཟུང་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་མ་ཟེར་ཞིག་ཅེས་འཕྲིན་བཏང་ཡང་། ཁྱོད་རྣམས་ཀྱིས་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་སྨྲས་པས་ན།
JER 23:39 ལྟོས་ཤིག ངས་ཁྱོད་རྣམས་བརྗེད་པར་འགྱུར་ཏེ། ཁྱོད་རྣམས་ནི་ངས་ཁྱོད་ཅག་དང་ཁྱོད་ཅག་གི་མེས་པོ་རྣམས་ལ་གནང་བའི་གྲོང་ཁྱེར་དང་བཅས་ངའི་མདུན་ནས་འདོར་བར་འགྱུར།
JER 23:40 ཡང་ངས་ཁྱོད་ཅག་ལ་དུས་གཏན་གྱི་བརྙས་བཅོས་དང་། དུས་ནམ་ཡང་བརྗེད་པར་མི་འགྱུར་བའི་ངོ་ཚ་འབབ་པར་བྱའོ་ཞེས་གསུང་ངེས་ཡིན།
JER 24:1 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་བུ་ཡེ་ཀོན་ཡཱ་དང་། ཡ་ཧུ་དཱའི་འགོ་དཔོན་རྣམས་དང་། ཤིང་བཟོ་དང་། མགར་པ་རྣམས་བཙོན་དུ་བཟུང་སྟེ་ཡེ་རུ་སཱ་ལེམ་ནས་པཱ་པེལ་ལོན་དུ་ཁྲིད་པ་དང་། དོན་འདིའི་རྗེས་སུ་དཀོན་མཆོག་ཡ་ཝཱེས་བདག་ལ་སྟོན་པར་མཛད་པ་ནི། ལྟོས་ཤིག དཀོན་མཆོག་ཡ་ཝཱེའི་མཆོད་ཁང་གི་མདུན་དུ་སེ་ཡབ་ཀྱི་ཤིང་ཏོག་སླེ་པོ་གཉིས་བཞག་ཡོད་དེ།
JER 24:2 སླེ་པོ་གཅིག་གི་ནང་དུ་སེ་ཡབ་ཀྱི་ཤིང་ཏོག་ཤིན་ཏུ་ཡག་པོ་ཐོག་ཕུད་རྣམས་ཡོད་པ་དང་། སླེ་པོ་ཅིག་ཤོས་དེའི་ནང་དུ་རུལ་ནས་བཟའ་ཡང་མི་རུང་བའི་སེ་ཡབ་ཀྱི་ཤིང་ཏོག་རྣམས་ཡོད་པ་ལ།
JER 24:3 དཀོན་མཆོག་ཡ་ཝཱེས་ང་ལ་འདི་སྐད་དུ། ཡེ་རེམ་ཡཱ། ཁྱོད་ཀྱིས་ཅི་ཞིག་མཐོང་ངམ་ཞེས་བཀའ་འདྲི་གནང་བ་དང་། ངས་ལན་དུ། ངས་སེ་ཡབ་ཀྱི་ཤིང་ཏོག་རྣམས་མཐོང་སྟེ། སེ་ཡབ་ཀྱི་ཤིང་ཏོག་ཡག་པོ་ནི་ཤིན་ཏུ་ཡག་ལ། རུལ་བར་གྱུར་པ་ནི་རུལ་ནས་བཟའ་ཡང་མི་རུང་ངོ་ཞེས་ཞུས་པ་ཡིན།
JER 24:4 དེ་ནས་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།
JER 24:5 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བཙོན་དུ་བཟུང་བའི་ཡ་ཧུ་དཱ་པ་སྟེ། ངས་གནས་འདི་ནས་ཀལ་དི་པའི་ཡུལ་དུ་བསྐྲད་པ་དེ་དག་ལ་ངས་སེ་ཡབ་ཀྱི་ཤིང་ཏོག་ཡག་པོ་འདི་དག་ནང་བཞིན་བདག་སྐྱོང་བྱས་ནས་བྱིན་རླབས་འཐོབ་པར་འགྱུར།
JER 24:6 ངས་དེ་དག་ལ་བདག་སྐྱོང་བྱས་ནས་བྱིན་རླབས་འཐོབ་པར་བྱེད་པ་དང་། དེ་དག་ཁྲིད་ནས་ཡུལ་འདིར་ཕྱིར་ལོག་པར་འགྱུར། ཡང་ངས་དེ་དག་འཛུགས་པར་བྱ་སྟེ་བཤིག་པར་མི་འགྱུར་ལ། ངས་དེ་དག་བཙུགས་ནས་འབྱིན་པར་མི་བྱའོ། །
JER 24:7 ཡང་བདག་ནི་ཡ་ཝཱེ་ཡིན་པ་རྟོགས་ནུས་པའི་སེམས་ཤིག་ངས་དེ་དག་ལ་གནང་ཞིང་། དེ་རྣམས་ངའི་འབངས་མི་དང་ང་དངོས་སུ་དེ་དག་གི་དཀོན་མཆོག་ཏུ་གྱུར་ནས། དེ་དག་སེམས་གཅིག་གིས་ངའི་ཕྱོགས་སུ་ལོག་པར་འགྱུར་ཞེས་གསུངས་སོ། །
JER 24:8 དཀོན་མཆོག་ཡ་ཝཱེས་འདི་སྐད་དུ། དེ་ཡང་སེ་ཡབ་ཀྱི་ཤིང་ཏོག་རུལ་ནས་བཟའ་བར་ཡང་མི་རུང་བ་དེ་བཞིན་དུ། ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དེའི་འགོ་དཔོན་རྣམས་དང་། ཡེ་རུ་སཱ་ལེམ་དུ་ལུས་པའི་ཡུལ་མི་རྣམས་ཏེ་གནས་འདིར་ལུས་པ་རྣམས་དང་། ཡང་ཨེ་ཅིབ་ཡུལ་དུ་གཞིས་ཆགས་པའི་ཡ་ཧུ་དཱ་པ་རྣམས་སྤྲོད་པར་བྱའོ། །
JER 24:9 ངས་དེ་དག་ནི་ས་སྟེང་གི་རྒྱལ་ཕྲན་ཡོངས་སུ་འཇིགས་སྣང་ཅན་དང་སྐྱུག་བྲོ་བར་བྱ་སྟེ། ངས་དེ་དག་བསྐྲད་སའི་ཡུལ་སོ་སོར་དེ་དག་ནི་མི་ཡིས་ངོ་ཚ་གཏོད་ས་དང་། གཏམ་དཔེ། ཟུར་ཟ་བྱེད་ཡུལ། དམོད་མོ་འདེབས་ཡུལ་བཅས་སུ་འགྱུར་བར་བྱ།
JER 24:10 དེ་དག་དང་དེའི་ཕ་མེས་ལ་གནང་བའི་ཡུལ་ཁམས་ནས་ཚར་གཅོད་པའི་བར་དུ། ངས་དེ་དག་གི་སྟེང་ལ་རལ་གྲི་དང་མུ་གེ རིམས་ནད་བཅས་གཏོང་བར་བྱའོ་ཞེས་གསུངས་སོ། །
JER 25:1 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་སྲིད་ལོ་དང་པོའམ། ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་བྱ་བའི་སྲིད་ལོ་བཞི་པར། ཡ་ཧུ་དཱའི་མི་ཐམས་ཅད་ཀྱི་སྐོར་དུ་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་སྟེ།
JER 25:2 ལུང་སྟོན་པ་ཡེ་རེམ་ཡཱ་ཡིས་བཀའ་འདི་རྣམས་ཡ་ཧུ་དཱའི་མི་ཐམས་ཅད་དང་ཡེ་རུ་སཱ་ལེམ་གྱི་ཡུལ་མི་ཀུན་ལ་སྦྲན་ནས་འདི་སྐད་དུ།
JER 25:3 དེ་ཡང་ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱ་བྱ་བའི་སྲིད་ལོ་བཅུ་གསུམ་པ་ནས་དེ་རིང་གི་བར་དུ་མི་ལོ་ཉེར་གསུམ་གྱི་རིང་ལ། དཀོན་མཆོག་ཡ་ཝཱེའི་བཀའ་ནི་རྒྱུན་དུ་ང་ལ་བྱུང་ཞིང་། ངས་ཀྱང་ཡང་ནས་ཡང་དུ་ཁྱོད་ཅག་ལ་སྨྲས་ཀྱང་ཁྱོད་ཅག་གིས་མ་མཉན་ཏོ། །
JER 25:4 དཀོན་མཆོག་ཡ་ཝཱེས་ཡང་ནས་ཡང་དུ་ཁོང་གི་ཞབས་ཕྱི་ལུང་སྟོན་པ་རྣམས་ཁྱོད་ཚོའི་མདུན་དུ་མངགས་ནའང་། ཁྱོད་ཚོས་མ་མཉན་ལ་རྣ་བ་གཏད་ནས་མ་མཉན་ཏོ། །
JER 25:5 ཁོང་རྣམས་ཀྱིས་ཁྱོད་ཅག་ལ་འདི་ལྟར་གསུངས་ཏེ། ཁྱོད་རྣམས་མི་རེ་རེས་འགྱོད་བཤགས་དང་བཅས་རང་རང་གི་ལོག་ལམ་དང་སྤྱོད་ངན་རྣམས་སྤངས་ན། དཀོན་མཆོག་ཡ་ཝཱེས་ཁྱོད་དང་ཁྱོད་ཀྱི་ཕ་མེས་རྣམས་ལ་གནང་བའི་ཡུལ་ཁམས་སུ་དུས་གཏན་དུ་གནས་པར་འགྱུར་ཞེས་པའོ་ཞེས་གསུངས།
JER 25:6 ལྷ་གཞན་རྣམས་ཀྱི་རྗེས་སུ་མ་འབྲང་ཞིག དེ་དག་ལ་ཞབས་ཏོག་མ་བསྒྲུབ་ཕྱག་ཀྱང་མ་བཙལ་ཞིག རང་གི་ལག་པའི་བཟོས་པ་ཡིས་བདག་ལ་ཁོང་ཁྲོ་ཡང་མ་སློང་ཞིག དེ་ནས་བདག་གིས་ཁྱོད་ཅག་ལ་གནོད་པ་འབྱུང་བར་མི་བྱའོ་ཞེས་སྨྲས་ཀྱང་།
JER 25:7 ཁྱོད་ཅག་གིས་ང་ལ་མ་མཉན་པར། རང་གི་ལག་པས་བཟོས་པ་ཡིས་ང་ལ་ཁོང་ཁྲོ་བསླངས་ནས་རང་གིས་རང་ལ་གནོད་བསྐྱལ་ཏོ་ཞེས་དཀོན་མཆོག་ཡ་ཝཱེས་གསུངས་པའོ། །
JER 25:8 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་ངའི་བཀའ་ལ་མ་མཉན་པའི་རྐྱེན་གྱིས།
JER 25:9 ལྟོས་ཤིག ངས་བྱང་ཕྱོགས་ཀྱི་མི་ཀུན་དང་རང་གི་བྲན་པོ་སྟེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ཁྲིད་འོངས་ནས། ཡུལ་འདི་དང་འདིའི་འབངས་རྣམས་དང་མཐའ་འཁོར་དུ་སྡོད་པའི་མི་ཡོངས་ལ་རྒོལ་བར་བྱེད་དོ། །ངས་དེ་དག་རྩ་བ་ནས་མེད་པར་བཏང་སྟེ། དེ་དག་ནི་མི་ལ་འཇིགས་སྣང་བསྐྱེད་པ་དང་མི་རྣམས་འཕྱ་དགོད་བྱེད་ཡུལ་དང་། དུས་གཏན་དུ་ཞིག་རོར་ལུས་པའི་གནས་བཅས་སུ་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 25:10 ཡང་ངས་དེ་དག་གི་ནང་ནས་དགའ་སྤྲོ་དང་དགོད་སྒྲ། མག་གསར་དང་བག་མའི་སྐད། རང་འཐག་གི་སྐད། མར་མེའི་འོད་བཅས་མེད་པར་བྱའོ། །
JER 25:11 ཡུལ་ཁམས་འདི་ཐམས་ཅད་ཞིག་རོར་གྱུར་ནས་མི་རྣམས་འཇིགས་སྣང་སྐྱེ་བའི་གནས་སུ་འགྱུར་ཞིང་། མི་རིགས་འདི་དག་གིས་ལོ་བདུན་ཅུའི་རིང་དུ་པཱ་པེལ་ལོན་གྱི་རྒྱལ་པོར་གཡོག་བྱེད་པར་འགྱུར་རོ། །
JER 25:12 ལོ་བདུན་ཅུ་རྫོགས་པའི་རྗེས་སུ་ངས་པཱ་པེལ་ལོན་གྱི་རྒྱལ་པོ་དང་དེའི་མི་རིགས་ཏེ། ཀལ་དི་པའི་ཡུལ་ཁམས་ལ་ཁོ་ཚོའི་སྡིག་ཉེས་ལྟར་ཆད་པ་བཅད་ནས། ཡུལ་ཁམས་དེ་དུས་གཏན་དུ་ཞིག་རོར་ལུས་པར་བྱའོ་ཞེས་དཀོན་མཆོག་ཡ་ཝཱེས་གསུངས།
JER 25:13 མདོ་འདིའི་ནང་དུ་བཀོད་པ་ཐམས་ཅད་དང་། ངས་ཡུལ་ཁམས་དེའི་སྐོར་ལ་སྨྲས་པའི་བཀའ་སྟེ། ཡེ་རེམ་ཡཱ་ཡིས་རྒྱལ་ཁམས་འདི་དག་གི་སྐོར་ལ་ལུང་བསྟན་པ་ཐམས་ཅད་དེ་དག་གི་སྟེང་དུ་འབྱུང་བར་འགྱུར་རོ། །
JER 25:14 རྒྱལ་ཁམས་མང་པོ་དང་རྒྱལ་པོ་ཆེན་པོ་རྣམས་ཀྱིས་ཀལ་དི་པ་རྣམས་བྲན་དུ་འཁོལ་ཞིང་། ངས་ཀྱང་དེ་དག་གི་སྤྱོད་པ་དང་ལག་པས་བཟོས་པ་བཞིན་ལན་འཇལ་བར་བྱའོ་ཞེས་གསུངས་སོ། །
JER 25:15 ཡེས་ར་ཨེལ་གྱི་དཀོན་མཆོག་ཡ་ཝཱེས་ང་ལ་འདི་སྐད་དུ། ངའི་ལག་ནས་ཁྲོ་གཏུམ་གྱི་ཕོར་བ་འདི་བླངས་ཏེ། ངས་ཁྱོད་མངགས་པའི་ཡུལ་ཁམས་སོ་སོའི་མི་རིགས་ཐམས་ཅད་ལ་འཐུང་དུ་ཆུག་དང་།
JER 25:16 ངས་དེ་དག་གི་ནང་དུ་རལ་གྲི་བཏང་བས། དེ་དག་གིས་འཐུང་རྗེས་ཕར་ཡོར་ཚུར་ཡོར་བྱེད་ཅིང་སྨྱོ་བར་འགྱུར་རོ་ཞེས་གསུངས་པས།
JER 25:17 ངས་ཡ་ཝཱེའི་ཕྱག་ལས་ཕོར་བ་དེ་བླངས་ནས། དཀོན་མཆོག་ཡ་ཝཱེས་བདག་མངགས་པའི་ཡུལ་ཁམས་སོ་སོའི་མི་རིགས་ཐམས་ཅད་ལ་འཐུང་དུ་བཅུག་པ་སྟེ།
JER 25:18 དེའི་ནང་དུ་ཡེ་རུ་སཱ་ལེམ་དང་ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་སཱ་ལེམ་གྱི་རྒྱལ་པོ་རྣམས་དང་། དེའི་འགོ་དཔོན་རྣམས་ཡོད་ལ། དེ་དག་གིས་གྲོང་ཁྱེར་དེ་ནི་ཞིག་རོར་ལུས་པ་དང་། འཇིགས་སུ་རུང་བ་དང་འཕྱ་དགོད་དང་དམོད་མོ་བྱེད་ཡུལ་དུ་གྱུར་ནས་དེ་རིང་གི་ཉིན་མོ་དང་འདྲ་བར་བྱས།
JER 25:19 ཡང་དེའི་ནང་དུ་ཨེ་ཅིབ་ཀྱི་རྒྱལ་པོ་ཕཱར་ཨོལ་དང་དེའི་འཁོར་གཡོག་རྣམས་དང་། རྒྱལ་བློན། དེའི་མི་ཐམས་ཅད་བཅས་དང་།
JER 25:20 མི་རིགས་གཞན་མཐའ་དག་ཡོད་པ་དང་། ཡང་ཨུ་ཟཱ་ཡུལ་གྱི་རྒྱལ་པོ་ཐམས་ཅད་དང་། ཕེ་ལེ་ཤེད་པའི་ཡུལ་གྱི་རྒྱལ་པོ་ཐམས་ཅད་དང་། ཨ་ཤཱ་ཀེ་ལོན་དང་གཱ་ཟཱ། ཨེག་རོན། ཨ་སི་དོད་བཅས་ཀྱི་ལྷག་ལུས་རྣམས་ཀྱི་རྒྱལ་པོ་དང་།
JER 25:21 ཨེ་དོམ་དང་མོ་ཨབ། ཨམ་མོན།
JER 25:22 ཐཱར་བཅས་ཀྱི་རྒྱལ་པོ་ཐམས་ཅད་དང་། ཚི་ཏུན་གྱི་རྒྱལ་པོ་ཐམས་ཅད་དང་། རྒྱ་མཚོའི་ཕ་རོལ་གྱི་གླིང་ཕྲན་རྣམས་ཀྱི་རྒྱལ་པོ་ཐམས་ཅད་དང་།
JER 25:23 དི་དན་དང་། ཐེ་མཱ་དང་། པུ་ཟཱ་དང་། ཡ་ཐོད་ཀྱི་སྐྲ་གཞར་བའི་ཚོ་པ་ཁག་དང་།
JER 25:24 ཨ་རབ་ཡུལ་གྱི་རྒྱལ་པོ་ཐམས་ཅད་དང་། དབེན་སྟོང་དུ་གནས་པའི་མི་རིགས་གཞན་རྣམས་ཀྱི་རྒྱལ་པོ་ཐམས་ཅད་དང་།
JER 25:25 ཟིམ་རེའི་རྒྱལ་པོ་ཐམས་ཅད་དང་། ཨེ་ལཱམ་གྱི་རྒྱལ་པོ་ཐམས་ཅད་དང་། མཱ་ཏི་ཡུལ་གྱི་རྒྱལ་པོ་ཐམས་ཅད་དང་།
JER 25:26 བྱང་ཕྱོགས་ཉེ་རིང་གི་རྒྱལ་པོ་ཐམས་ཅད་དང་། གནམ་འོག་དང་ས་ངོས་ལ་ཡོད་པའི་རྒྱལ་ཕྲན་ཐམས་ཅད་ཀྱི་མི་རེ་རེས་འཐུང་བ་དང་། རྗེས་སུ་ཤེ་ཤག་ གི་རྒྱལ་པོས་ཀྱང་དེ་བཏུང་དགོས་སོ། །
JER 25:27 དེའི་ཕྱིར་ཁྱོད་ཀྱིས་དེ་དག་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཁྱོད་ཀྱི་སྟེང་དུ་རལ་གྲི་ལྷུང་བར་བྱ་བས། ཁྱོད་རྣམས་ཀྱིས་འཐུང་ནས་ར་བཟི་བ་དང་། སྐྱུག་ནས་འགྱེལ་ཞིང་ཡར་ལང་མི་ཐུབ་ཅེས་སྨྲོས་ཤིག
JER 25:28 གལ་སྲིད་དེ་དག་གིས་ཁྱོད་ཀྱི་ལག་ནས་ཕོར་བ་བླངས་ཏེ་འཐུང་བར་མི་བྱེད་ན། ཁྱོད་ཀྱིས་དེ་དག་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་དེ་ཅི་ནས་ཀྱང་འཐུང་དགོས།
JER 25:29 ཅི་ལ་ཞེ་ན། ལྟོས་ཤིག ངས་རང་གི་མིང་གིས་འབོད་པའི་གྲོང་ཁྱེར་ནས་མགོ་བཙུགས་ཏེ་ཆག་སྒོ་འབྱུང་བར་བྱས་ན། ཁྱོད་ཅག་དེ་ལས་ཐར་བར་འགྱུར་རམ་ཞེ་ན་ཁྱོད་ཅག་ཐར་བར་མི་འགྱུར་ཏེ། ངས་ཡུལ་འདིའི་ཡུལ་མི་ཀུན་གྱི་སྟེང་ལ་རལ་གྲི་འབབ་པར་བྱ་ཞེས་པའོ་ཞེས་སྨྲོས་ཤིག་ཅེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས།
JER 25:30 དེ་བས་ཁྱོད་ཀྱིས་དེ་དག་ལ་གཏམ་འདི་ཐམས་ཅད་ལུང་བསྟན་ནས་འདི་ལྟར། དཀོན་མཆོག་ཡ་ཝཱེས་མཐོ་ས་ནས་ང་རོ་འདོན་ཞིང་། ཁོང་གི་བཞུགས་གནས་དམ་པ་ནས་གསུང་སྐད་བཏོན་ནས་རང་གི་ལུག་ཁྱུའི་སྟེང་དུ་ངར་སྐད་བསྒྲགས་ཏེ། རྒུན་འབྲུམ་བརྫི་མཁན་དག་དང་འདྲ་བར་ས་ལ་གནས་པ་ཐམས་ཅད་ཀྱི་སྟེང་དུ་ང་རོ་འདོན་པར་འགྱུར།
JER 25:31 ཡང་དཀོན་མཆོག་ཡ་ཝཱེས་མི་རིགས་ཐམས་ཅད་ལ་སྐྱོན་འཛུགས་ཤིང་མི་ཐམས་ཅད་ལ་འདྲི་གཅོད་བྱེད་པས་ན། ངར་སྐད་དེ་ནི་ས་མཐའི་བར་དུ་སླེབས་པ་ཡིན། ངན་པ་རྣམས་ནི་ཁོང་གིས་རལ་གྲིར་གཏོད་ངེས་ཡིན་ཞེས་སྨྲོས་ཤིག་ཅེས་དཀོན་མཆོག་ཡ་ཝཱེས་གསུངས་པའོ། །
JER 25:32 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ཆག་སྒོ་ནི་ཡུལ་ཁམས་འདི་ནས་ཡུལ་ཁམས་གཞན་པའི་བར་དུ་འབྱུང་བར་འགྱུར་ཏེ། ས་མཐའ་ནས་རླུང་ནག་འཚུབ་མ་ཞིག་གཡུག་པར་འགྱུར་ཞེས་གསུངས།
JER 25:33 ཉིན་མོ་དེར་དཀོན་མཆོག་ཡ་ཝཱེས་བསྣུན་ནས་བསད་པ་ནི་ས་གཞིའི་མཐའ་གཅིག་ནས་མཐའ་གཞན་པའི་བར་དུ་ཡོད་པར་འགྱུར་གྱི། དེ་དག་གི་ཕྱིར་མྱ་ངན་བྱེད་མཁན་སུ་ཡང་མེད་ལ། བསྡུ་མཁན་དང་དུར་ལ་སྐུང་མཁན་ཡང་མེད་པར་ལུད་ལྟར་ས་ངོས་སུ་ལུས་པར་འགྱུར་རོ། །
JER 25:34 ཀྱེ་ཁྱོད་རྫི་བོ་རྣམས་ཀྱིས་ངུ་འབོད་བྱོས་ལ་འོ་དོད་བོས་ཤིག ཁྱོད་ལུག་ཁྱུའི་འགོ་ཁྲིད་རྣམས་ཐལ་བའི་ནང་དུ་འགྲེ་ལྡོག་རྒྱོབ་ཅིག ཅི་ལ་ཞེ་ན། ཁྱོད་གསོད་པའི་ཉིན་མོ་དང་ཁྱོད་གཏོར་བའི་དུས་ལ་སླེབས་ཤིང་། ངས་ཁྱོད་རྣམས་དུམ་བུར་གཅོག་པར་བྱ་སྟེ། ཁྱོད་རྣམས་ནི་སྣོད་སྤྱད་རྩ་ཆེན་དག་སར་ལྷུང་ནས་ཆག་པ་བཞིན་དུ་འགྱེལ་བར་འགྱུར།
JER 25:35 རྫི་བོ་རྣམས་འབྲོ་ས་མེད་དེ། ལུག་ཁྱུའི་འགོ་ཁྲིད་དག་ཀྱང་ཐར་བར་མི་འགྱུར།
JER 25:36 ཉོན་ཅིག དཀོན་མཆོག་ཡ་ཝཱེས་དེ་དག་གི་རྩྭ་ས་གཏོར་བས་ན། རྫི་བོས་སྐད་རྒྱག་ཅིང་ལུག་ཁྱུའི་འགོ་ཁྲིད་དག་གིས་ངུ་འབོད་བྱེད་པའོ། །
JER 25:37 དཀོན་མཆོག་ཡ་ཝཱེའི་ཐུགས་ཁྲོ་དྲག་པོའི་རྐྱེན་གྱིས། ལྷིང་འཇགས་སུ་གནས་པའི་ལུག་ར་རྣམས་ཀྱང་རྩ་ནས་བཤིག་གོ །
JER 25:38 དེ་ནི་སེང་གེ་དར་མ་རང་གི་བྲག་ཕུག་དང་བྲལ་བར་འདྲ་ཞིང་། མི་ལ་གཉའ་གནོན་བྱེད་པའི་རལ་གྲི་དང་ཁོང་གི་ཁྲོ་གཏུམ་གྱི་དབང་གིས་དེ་དག་གི་ཡུལ་ནི་མི་མེད་ལུང་སྟོང་དུ་གྱུར་ཏོ། །
JER 26:1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་རྒྱལ་པོའི་ཁྲི་ལ་བཀོད་དུས། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 26:2 དཀོན་མཆོག་ཡ་ཝཱེས་འདི་སྐད་དུ། ཁྱོད་ནི་ཡ་ཝཱེའི་མཆོད་ཁང་གི་ཁྱམས་རར་ལངས་ནས། ཡ་ཧུ་དཱའི་གྲོང་ཁྱེར་སོ་སོ་ནས་ཡ་ཝཱེའི་མཆོད་ཁང་དུ་བསྙེན་བཀུར་བྱེད་པར་འོང་བའི་མི་ཐམས་ཅད་ལ། ངས་ཁྱོད་ལ་ཅི་དང་ཅི་བསྒོས་པ་བཞིན་ཚིག་གཅིག་ཀྱང་མ་ལུས་པར་ཤོད་ཅིག
JER 26:3 གཅིག་བྱས་ན་དེ་དག་གིས་ངའི་ཁ་ལ་མཉན་ནས་རང་རང་གི་ལོག་ལམ་དང་བྲལ་ཏེ་ཕྱིར་ལོག་ཀྱང་སྲིད་དེ། ངས་ཀྱང་རང་གི་བློ་ཁ་བསྒྱུར་ནས་དེ་དག་གིས་སྤྱོད་ངན་སྤྱད་པའི་ཕྱིར་ངས་གཏོང་འདོད་པའི་ཆག་སྒོ་ནི་དེ་དག་གི་སྟེང་ལ་འབྱུང་བར་མི་བྱའོ། །
JER 26:4 ཁྱོད་ཀྱིས་ཁོ་རྣམས་ལ་འདི་ལྟར། དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ཅག་གིས་ང་ལ་མི་མཉན་པ་དང་ངས་ཁྱོད་ཅག་གི་མདུན་དུ་བཀོད་པའི་བཀའ་ཁྲིམས་མི་བརྩི་ཞིང་།
JER 26:5 ངས་སྔར་ནས་ཡང་ཡང་ཁྱོད་ཅག་གི་རྩར་མངགས་པའི་ཞབས་ཕྱི་ལུང་སྟོན་པ་རྣམས་ཀྱི་གསུངས་པའི་བཀའ་ལ་མ་མཉན་ན། ༼ཁྱོད་ཚོས་དངོས་གནས་མ་མཉན་ཏོ། །༽
JER 26:6 ངས་མཆོད་ཁང་འདི་ཞི་ལོ་དང་འདྲ་བར་བྱ་ཞིང་། གྲོང་ཁྱེར་འདི་ནི་རྒྱལ་ཁམས་ཡོངས་ཀྱིས་དམོད་མོ་བྱེད་ས་རུ་འགྱུར་བར་བྱའོ་ཞེས་གསུངས་པ་སྨྲོས་ཤིག་ཅེས་གསུངས་སོ། །
JER 26:7 ཡེ་རེམ་ཡཱས་དཀོན་མཆོག་ཡ་ཝཱེའི་མཆོད་ཁང་དུ་གསུངས་པའི་བཀའ་འདི་དག་མཆོད་དཔོན་དང་ལུང་སྟོན་པ་རྣམས་དང་མི་ཐམས་ཅད་ཀྱིས་ཐོས་སོ། །
JER 26:8 ཡང་ཡེ་རེམ་ཡཱ་ཡིས་དཀོན་མཆོག་ཡ་ཝཱེས་མི་ཀུན་ལ་གསུང་བར་བསྒོས་པའི་བཀའ་ཐམས་ཅད་གསུངས་ཚར་བ་དང་། མཆོད་དཔོན་དང་ལུང་སྟོན་པ་རྣམས་དང་མི་ཡོངས་ཀྱིས་ཁོང་བཟུང་སྟེ་ན་རེ། ཁྱོད་འཆི་ངེས་ཡིན་ཏེ།
JER 26:9 ཁྱོད་ཀྱིས་ཅིའི་ཕྱིར་དཀོན་མཆོག་ཡ་ཝཱེའི་མཚན་ལ་བརྟེན་ནས་ལུང་བསྟན་ཏེ་ན་རེ། མཆོད་ཁང་འདི་ནི་ཞི་ལོ་ལྟར་འགྱུར་ཞིང་། གྲོང་ཁྱེར་འདི་ནི་མི་མེད་ལུང་སྟོང་དུ་འགྱུར་རོ་ཞེས་སྨྲ་བ་ཡིན་ནམ་ཞེས་སྨྲས་ཤིང་། མི་ཚང་མ་དཀོན་མཆོག་ཡ་ཝཱེའི་མཆོད་ཁང་དུ་འདུས་ཏེ་ཡེ་རེམ་ཡཱ་བསྐོར་ཏོ། །
JER 26:10 དེ་ནས་ཡ་ཧུ་དཱའི་འགོ་དཔོན་རྣམས་ཀྱིས་དོན་དེ་ཐོས་པ་དང་རྒྱལ་པོའི་ཕོ་བྲང་ནས་ཡར་དཀོན་མཆོག་ཡ་ཝཱེའི་མཆོད་ཁང་དུ་ཕྱིན་ཏེ། དཀོན་མཆོག་ཡ་ཝཱེའི་མཆོད་ཁང་གི་སྒོ་གསར་པའི་འཇུག་སྒོར་བསྡད་ནས།
JER 26:11 མཆོད་དཔོན་དང་ལུང་སྟོན་པ་རྣམས་ཀྱིས་འགོ་དཔོན་རྣམས་དང་མི་དེ་ཐམས་ཅད་ལ་འདི་ལྟར། ཁྱེད་ཅག་གི་རྣ་བས་ཐོས་པ་བཞིན་མི་འདིས་ལུང་བསྟན་ནས་གྲོང་ཁྱེར་འདི་ལ་རྒོལ་བས་ན་ཁོར་སྲོག་ཆད་གཅོད་འོས་པ་ཡིན་ཞེས་སྨྲས་པ་དང་།
JER 26:12 ཡེ་རེམ་ཡཱ་ཡིས་འགོ་དཔོན་དང་མི་རྣམས་ལ་ན་རེ། མཆོད་ཁང་འདི་དང་གྲོང་ཁྱེར་འདི་ལ་རྒོལ་བའི་གཏམ་ཁྱོད་ཅག་གི་ཐོས་པ་དེ་ཐམས་ཅད་ལུང་སྟོན་ཕྱིར་དཀོན་མཆོག་ཡ་ཝཱེས་ང་མངགས་སོ། །
JER 26:13 ད་ལྟ། ཁྱོད་ཅག་གིས་རང་གི་བྱ་བ་སྤྱོད་པ་རྣམས་ཇེ་ལེགས་སུ་བཏང་ནས་ཁྱོད་ཅག་གི་དཀོན་མཆོག་ཡ་ཝཱེའི་བཀའ་ལ་མཉན་ན། ཁོང་གིས་ཉིད་ཀྱི་ཐུགས་ཞི་ནས་གསུངས་ཟིན་པའི་ཆག་སྒོ་དེ་ཁྱོད་ཅག་གི་སྟེང་ལ་འབེབ་པར་མི་མཛད།
JER 26:14 ཡང་བདག་ལ་མཚོན་ན། ལྟོས་ཤིག བདག་ནི་ཁྱོད་ཅག་གི་ལག་ཏུ་ཡོད་པས། ཁྱོད་ཚོས་ཅི་བྱས་ན་ལེགས་ཤིང་འགྲིག་པར་འདོད་ན་དེ་བཞིན་བྱོས་ཤིག
JER 26:15 ཡིན་ཡང་ཁྱོད་ཅག་གིས་རྟོགས་དགོས་པ་ཞིག་ནི། གལ་ཏེ་ཁྱོད་ཅག་གིས་ངའི་སྲོག་བླངས་ན། ཉེས་མེད་ལ་ཁྲག་བཞུར་དུ་བཅུག་པའི་སྡིག་པ་དེ་ཁྱོད་རྣམས་དང་གྲོང་ཁྱེར་འདི་དང་། ད་དུང་གྲོང་ཁྱེར་ནང་གི་མི་རྣམས་ཀྱི་སྟེང་དུ་དྲངས་པ་ཡིན་ཏེ། ཅི་ལ་ཞེ་ན། དཀོན་མཆོག་ཡ་ཝཱེས་དངོས་གནས་ང་རང་ཁྱོད་ཚོའི་མདུན་དུ་མངགས་ཤིང་བཀའ་འདི་ཐམས་ཅད་ཁྱོད་ཚོའི་རྣ་ལམ་དུ་བསྒྲག་པར་མཛད་པ་ཡིན་ཞེས་གསུངས།
JER 26:16 དེ་ནས་འགོ་དཔོན་དང་མི་རྣམས་ཀྱིས་མཆོད་དཔོན་དང་ལུང་སྟོན་པ་དག་ལ་འདི་ལྟར། སྐྱེ་བོ་འདིས་བདག་ཅག་ལ་རང་ཅག་གི་དཀོན་མཆོག་ཡ་ཝཱེའི་མཚན་ལ་བརྟེན་ནས་ལུང་སྟོན་པ་ཡིན་པས། ཁོང་གསོད་མི་འོས་ཞེས་སྨྲས་པ་ན།
JER 26:17 ཡུལ་དེའི་རྒན་པོ་འགའ་ལངས་ནས་མི་ཚོགས་ཀུན་ལ་གཏམ་བྱས་ཏེ་ན་རེ།
JER 26:18 དེ་ཡང་ཡ་ཧུ་དཱའི་རྒྱལ་པོ་ཧི་ཟི་ཀི་ཡཱའི་དུས་སུ། མོ་རེ་ཤེད་པ་མི་ཀཱས་ཡ་ཧུ་དཱའི་མི་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཛ་ཡན་ནི་ཞིང་ལྟར་རྨོ་ཞིང་། ཡེ་རུ་སཱ་ལེམ་ནི་ཞིག་རོར་འགྱུར་བ་དང་། མཆོད་ཁང་འདིའི་རི་བོ་ནི་ནགས་ཚལ་གྱི་མཐོ་ས་དང་འདྲ་བར་འགྱུར་ཞེས་ལུང་བསྟན་ན་ཡང་།
JER 26:19 ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་དང་ཡ་ཧུ་དཱ་པ་རྣམས་ཀྱིས་ཁོང་བསད་པ་ཡིན་ནམ། ཧི་ཟི་ཀི་ཡཱ་ནི་དཀོན་མཆོག་ལ་གུས་ཤིང་འཇིགས་པ་སྟེ། དཀོན་མཆོག་ཡ་ཝཱེ་ལ་སྙིང་རྗེ་གནང་བར་ཞུས་པ་དང་། དེ་ནས་དཀོན་མཆོག་ཡ་ཝཱེས་ཉིད་ཀྱི་ཐུགས་ཞི་བར་མཛད་དེ་གསུངས་ཟིན་པའི་ཆག་སྒོ་ནི་དེ་དག་གི་སྟེང་ལ་འབེབ་པར་མ་མཛད་དོ། །ཡིན་ནའང་རང་ཅག་གིས་རང་ལ་ཆག་སྒོ་སློང་ངོ་ཞེས་སྨྲས།
JER 26:20 ཡང་མི་ཞིག་ཡོད་པ་སྟེ་ཤེ་མ་ཡཱའི་བུ་ཀིར་ཡཱད་ཡེ་ཨ་རིམ་པ་ཨུ་རི་ཡཱ་ཞེས་པས་ཀྱང་། དཀོན་མཆོག་ཡ་ཝཱེའི་མཚན་ལ་བརྟེན་ནས་ལུང་བསྟན་ཅིང་། དེས་གྲོང་ཁྱེར་འདི་དང་ཡུལ་ཁམས་འདི་ལ་རྒོལ་བར་ལུང་བསྟན་པ་ནི་ཡེ་རེམ་ཡཱའི་གསུང་ཐམས་ཅད་དང་མཐུན་ནོ། །
JER 26:21 རྒྱལ་པོ་ཡེ་ཧོ་ཡཱ་ཀིམ་དང་དེའི་དཔའ་བོ་རྣམས་དང་། འགོ་དཔོན་རྣམས་ཀྱིས་ཨུ་རི་ཡཱའི་གསུང་ཐོས་ནས་རྒྱལ་པོས་དེ་གསོད་འདོད་པ་ལ། ཨུ་རི་ཡཱས་གཏམ་དེ་ཐོས་ནས་འཇིགས་ཏེ་ཨེ་ཅིབ་ཡུལ་དུ་བྲོས་སོ། །
JER 26:22 རྒྱལ་པོ་ཡེ་ཧོ་ཡཱ་ཀིམ་གྱིས་ཨག་པོར་གྱི་བུ་ཨེལ་ན་ཐན་དང་བཅས་མི་འགའ་ཨེ་ཅིབ་ཡུལ་དུ་མངགས་ཏེ།
JER 26:23 དེ་དག་གིས་ཨུ་རི་ཡཱ་ནི་ཨེ་ཅིབ་ཡུལ་ནས་བཟུང་སྟེ་རྒྱལ་པོ་ཡེ་ཧོ་ཡཱ་ཀིམ་གྱི་དྲུང་དུ་ཁྲིད་ཅིང་། རྒྱལ་པོས་དེ་རལ་གྲིས་བསད་ནས། དེའི་བམ་པོ་ནི་མི་སེར་དཀྱུས་མའི་དུར་ས་རུ་གཡུགས་པ་ཡིན།
JER 26:24 འོན་ཀྱང་ཤཱ་ཕན་གྱི་བུ་ཨ་ཧི་ཀམ་གྱིས་ཡེ་རེམ་ཡཱ་བསྲུངས་ཏེ། མི་རྣམས་ཀྱི་ལག་ཏུ་གཏད་ནས་ཁོང་གསོད་དུ་མ་བཅུག་གོ །
JER 27:1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་རྒྱལ་ཁྲིར་འཁོད་དུས། དཀོན་མཆོག་ཡ་ཝཱེའི་བཀའ་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 27:2 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་རང་ཉིད་ལ་ཀོ་བའི་ཐག་པ་དང་གཉའ་ཤིང་བཟོས་ཏེ་རང་གི་སྐེ་ལ་སྐོན་ཅིག
JER 27:3 དེ་ནས་ཡེ་རུ་སཱ་ལེམ་དུ་ཡ་ཧུ་དཱའི་རྒྱལ་པོ་ཚིད་ཀི་ཡཱའི་དྲུང་དུ་འོངས་པའི་བང་ཆེན་དག་གི་ལག་ཏུ་ཀོ་བའི་ཐག་པ་དང་གཉའ་ཤིང་ནི། ཨེ་དོམ་གྱི་རྒྱལ་པོ་དང་། མོ་ཨབ་ཀྱི་རྒྱལ་པོ། ཨམ་མོན་གྱི་རྒྱལ་པོ། ཐཱར་གྱི་རྒྱལ་པོ། ཚི་ཏུན་གྱི་རྒྱལ་པོ་བཅས་ལྔ་པོར་རྫོངས་ཤིག
JER 27:4 ཡང་དེ་དག་གི་ཇོ་བོ་རྣམས་ལ་བརྡ་སྤྲོད་པར་འདི་ལྟར་བཅོལ་གདམས་བྱོས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་གིས་རང་གི་ཇོ་བོ་རྣམས་ལ་འདི་ལྟར་སྨྲོས་ཤིག
JER 27:5 ངས་ནུས་མཐུ་ཆེན་པོ་དང་ཕྱི་རུ་བརྐྱངས་པའི་དཔུང་ངར་གྱིས་ས་གཞི་དང་ས་ལ་ཡོད་པའི་མི་དང་གཅན་གཟན་རྣམས་བཀོད་པ་དང་། ངས་སུ་ལ་སྦྱིན་འོས་འདོད་ན་ས་གཞི་དེ་ལ་སྦྱིན་ནོ། །
JER 27:6 ད་ལྟ་ངས་ཡུལ་ཁམས་མཐའ་དག་ངའི་འཁོར་གཡོག་སྟེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏད་ཅིང་། ཐང་རྒོད་ཀྱི་རི་དྭགས་རྣམས་ཀྱང་དེ་ལ་སྤྱད་དུ་གནང་ངོ་། །
JER 27:7 དེའི་ཡུལ་ཁམས་ལ་འཁོན་ལན་ཕོག་པའི་དུས་མ་སླེབས་བར་དུ། མི་རིགས་ཀུན་གྱིས་དེ་དང་དེའི་བུ་རབས་ཚ་རྒྱུད་རྣམས་ལ་གཡོག་བྱེད་དགོས་པ་དང་། དུས་དེར། རྒྱལ་ཁམས་མང་པོ་དང་རྒྱལ་པོ་ཆེན་པོ་རྣམས་ཀྱིས་དེ་བྲན་གཡོག་ཏུ་བྱེད་པར་འགྱུར།
JER 27:8 དེ་ནས་མི་རིགས་དང་རྒྱལ་ཕྲན་གང་ཡིན་ཡང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་འདི་ལ་གཡོག་མི་བྱེད་ཅིང་། རང་གི་མཇིང་པ་དེའི་གཉའ་ཤིང་འོག་ཏུ་མི་འཇོག་ན། ངས་པཱ་པེལ་ལོན་གྱི་རྒྱལ་པོའི་ལག་པ་བརྒྱུད་ནས་དེ་དག་རྩ་མེད་གཏོང་བའི་བར་དུ། རལ་གྲི་དང་མུ་གེ རིམས་ནད་བཅས་ཀྱིས་ངས་མི་རིགས་དེ་ལ་ཉེས་ཆད་གཅོད་ངེས་ཡིན་ཞེས་དཀོན་མཆོག་ཡ་ཝཱེས་གསུངས།
JER 27:9 ཡང་ཁྱོད་རྣམས་ཀྱིས་རང་གི་ལུང་སྟོན་པ་དང་མོ་པ། རྨི་ལམ་ལ་བརྟག་མཁན། ལྷ་པ། སྒྱུ་མ་མཁན་བཅས་ལ་མ་མཉན་ཅིག དེ་དག་གིས་ཁྱོད་རྣམས་ལ། ཁྱོད་ཅག་གིས་པཱ་པེལ་ལོན་གྱི་རྒྱལ་པོར་གཡོག་བྱེད་པར་མི་འགྱུར་ཞེས་སྨྲའོ། །
JER 27:10 དེ་ཚོས་ཁྱོད་ཅག་ལ་རྫུན་གྱི་ལུང་བསྟན་ཏེ། ཁྱོད་ཅག་རང་ཡུལ་དང་བྲལ་ནས་རྒྱང་ཐག་རིང་པོར་འགྲོ་ཞིང་། ངས་ཁྱོད་ཅག་ཕྱིར་བསྐྲད་ནས་ཁྱོད་རྣམས་འཆི་བར་འགྱུར།
JER 27:11 འོན་ཀྱང་མི་རིགས་གང་ཞིག་གིས་པཱ་པེལ་ལོན་གྱི་རྒྱལ་པོའི་གཉའ་ཤིང་འོག་ཏུ་རང་གི་མཇིང་པ་བཞག་ནས་དེ་ལ་གཡོག་བྱས་ན། ངས་མི་རིགས་དེ་ནི་རང་ཡུལ་དུ་ལུས་པར་བྱེད་ཅིང་། དེར་ཞིང་རྨོས་ཏེ་གནས་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 27:12 ངས་བཀའ་འདི་རྣམས་བཞིན་དུ་ཡ་ཧུ་དཱའི་རྒྱལ་པོ་ཚིད་ཀི་ཡཱ་ལ་བསྐུལ་ནས་འདི་ལྟར། ཁྱེད་ཚོས་པཱ་པེལ་ལོན་གྱི་རྒྱལ་པོའི་གཉའ་ཤིང་འོག་ཏུ་མཇིང་པ་བཞག་ནས། དེ་དང་དེའི་འབངས་མི་ལ་གཡོག་བྱས་ན་གསོན་པོར་ལུས་པ་ཡིན།
JER 27:13 པཱ་པེལ་ལོན་གྱི་རྒྱལ་པོའི་གཡོག་མི་བྱེད་པའི་མི་རིགས་ཀྱི་སྐོར་ལ་དཀོན་མཆོག་ཡ་ཝཱེས་ཇི་སྐད་གསུངས་པ་བཞིན། ཁྱེད་དང་ཁྱེད་ཀྱི་མི་རིགས་རལ་གྲི་དང་མུ་གེ རིམས་ནད་བཅས་ཀྱིས་འཆི་བར་བྱེད་དོན་ཅི་ཡོད་དམ།
JER 27:14 ཁྱེད་རྣམས་ཀྱིས་པཱ་པེལ་ལོན་གྱི་རྒྱལ་པོར་གཡོག་བྱེད་པར་མི་འགྱུར་ཞེས་སྨྲ་མཁན་ལུང་སྟོན་པ་དག་གིས་ཁྱོད་ཅག་ལ་སྨྲས་པའི་གཏམ་ལ་མ་མཉན་ཅིག དེ་དག་གིས་ཁྱེད་ལ་ལུང་རྫུན་མ་བསྟན་ཏོ། །
JER 27:15 དཀོན་མཆོག་ཡ་ཝཱེས་འདི་སྐད་དུ། ངས་དེ་རྣམས་མངགས་པ་མིན་ཡང་། དེ་དག་གིས་ངའི་མིང་གཡར་ནས་ལུང་རྫུན་མ་བསྟན་ཏེ། ངས་ཁྱོད་རྣམས་དང་ཁྱོད་ཅག་ལ་ལུང་བསྟན་སྨྲ་བའི་ལུང་སྟོན་པ་དེ་དག་ཕྱིར་བསྐྲད་དེ། མཉམ་དུ་རྩ་མེད་གཏོང་ངོ་ཞེས་གསུངས་ཞེས་སྨྲས་སོ། །
JER 27:16 ངས་ཡང་མཆོད་དཔོན་རྣམས་དང་མི་འདི་དག་ཐམས་ཅད་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་ལུང་སྟོན་པས་ཁྱོད་རྣམས་ལ་ལུང་བསྟན་ཏེ་ན་རེ། ལྟོས་ཤིག དཀོན་མཆོག་ཡ་ཝཱེའི་མཆོད་ཁང་གི་ཡོ་བྱད་རྣམས་པཱ་པེལ་ལོན་ནས་འདིར་འདྲེན་ལ་ཉེ་ཞེས་ཟེར་ཞིང་། དེ་དག་གིས་ཁྱོད་ལ་སྨྲས་པ་ནི་ལུང་བསྟན་རྫུན་མ་ཡིན་པས་དེར་མ་མཉན་ཅིག
JER 27:17 དེ་དག་ལ་མི་མཉན་པར་པཱ་པེལ་ལོན་རྒྱལ་པོའི་གཡོག་བྱས་ན་གསོན་པོར་ལུས་ཏེ། གྲོང་ཁྱེར་འདི་ཞིག་རོར་འགྱུར་དུ་འཇུག་དོན་ཅི་ཡོད་དམ།
JER 27:18 གལ་ཏེ་ཁོ་རྣམས་ལུང་སྟོན་པ་ངོ་མ་ཡིན་ཞིང་། དཀོན་མཆོག་ཡ་ཝཱེའི་བཀའ་ཁོ་རྣམས་ལ་བྱུང་བ་ཡིན་ན། དཀོན་མཆོག་ཡ་ཝཱེའི་མཆོད་ཁང་དང་ཡ་ཧུ་དཱའི་རྒྱལ་པོའི་ཕོ་བྲང་། ཡེ་རུ་སཱ་ལེམ་བཅས་སུ་ལུས་པའི་ཡོ་བྱད་རྣམས་པཱ་པེལ་ལོན་དུ་མི་འཁྱེར་བའི་དོན་དུ། དེ་དག་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེར་ཞུས་སུ་ཆུག་ཅེས་པའོ། །
JER 27:19 ཀ་བ་དང་། ལི་ཡི་རྒྱ་མཚོ། སྟེགས་བུ། གྲོང་ཁྱེར་འདིའི་ནང་དུ་ལུས་པའི་ཡོ་བྱད་བཅས་པ་སྟེ།
JER 27:20 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་བུ་ཡེ་ཀོན་ཡཱ་དང་། ཡ་ཧུ་དཱ་དང་ཡེ་རུ་སཱ་ལེམ་གྱི་སྐུ་དྲག་ཐམས་ཅད་བཟུང་སྟེ་ཡེ་རུ་སཱ་ལེམ་ནས་པཱ་པེལ་ལོན་དུ་ཁྲིད་དུས་བཙན་འཕྲོག་མ་བྱས་པའི་ཡོ་བྱད་དག་གི་སྐོར་དང་།
JER 27:21 དཀོན་མཆོག་ཡ་ཝཱེའི་མཆོད་ཁང་དང་ཡ་ཧུ་དཱའི་རྒྱལ་པོའི་ཕོ་བྲང་། ཡེ་རུ་སཱ་ལེམ་བཅས་སུ་ལུས་པའི་ཡོ་བྱད་རྣམས་ཀྱི་སྐོར་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ།
JER 27:22 ཡོ་བྱད་དེ་རྣམས་པཱ་པེལ་ལོན་དུ་འཁྱེར་བར་འགྱུར་ཞིང་། ངས་ཡོ་བྱད་རྣམས་ལ་ལྟ་སྐྱོང་བྱས་ཏེ་འདི་དག་ཕྱིར་གནས་འདིར་སྤྲོད་པའི་བར་དུ་དེར་ལུས་པར་འགྱུར་ཞེས་གསུངས་སོ། །
JER 28:1 དེ་ཡང་ཡ་ཧུ་དཱའི་རྒྱལ་པོ་ཚིད་ཀི་ཡཱ་ཡི་སྲིད་ལོ་བཞི་པའི་ལོ་དེའི་ཟླ་ལྔ་པར། གིབ་ཡོན་པ་ཨ་ཟུར་གྱི་བུ་ཧ་ནན་ཡཱ་ཞེས་པའི་ལུང་སྟོན་པ་ཡིས་དཀོན་མཆོག་ཡ་ཝཱེའི་མཆོད་ཁང་ནང་དུ་མཆོད་དཔོན་རྣམས་དང་མི་ཀུན་གྱི་མདུན་དུ་བདག་ལ་ན་རེ།
JER 28:2 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་པཱ་པེལ་ལོན་གྱི་རྒྱལ་པོའི་གཉའ་ཤིང་བཅག་པ་སྟེ།
JER 28:3 ལོ་གཉིས་ཀྱི་ནང་དུ། ངས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་གནས་འདི་ནས་བཙན་འཕྲོག་བྱས་ཏེ་པཱ་པེལ་ལོན་དུ་ཁྱེར་བའི་ཡོ་བྱད་རྣམས་ཏེ། དཀོན་མཆོག་ཡ་ཝཱེའི་མཆོད་ཁང་ནང་གི་ཡོ་བྱད་མཐའ་དག་གནས་འདིར་ཕྱིར་འདྲེན་དགོས་ལ།
JER 28:4 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་བུ་ཡེ་ཀོན་ཡཱ་དང་བཅས་པཱ་པེལ་ལོན་དུ་བཙོན་ལ་ཁྲིད་པའི་ཡ་ཧུ་དཱ་པ་ཐམས་ཅད་ཕྱིར་འཁྲིད་འོང་བར་བྱའོ། །ཅི་ལ་ཞེ་ན། ངས་པཱ་པེལ་ལོན་གྱི་རྒྱལ་པོའི་གཉའ་ཤིང་གཅོག་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ་ཞེས་སྨྲས་པ་ལ།
JER 28:5 ལུང་སྟོན་པ་ཡེ་རེམ་ཡཱས་མཆོད་དཔོན་རྣམས་དང་དཀོན་མཆོག་ཡ་ཝཱེའི་མཆོད་ཁང་ནང་དུ་ལངས་བསྡད་ཡོད་པའི་མི་ཐམས་ཅད་ཀྱི་མདུན་དུ་ལུང་སྟོན་པ་ཧ་ནན་ཡཱ་ལ་འདི་ལྟར།
JER 28:6 ཨ་མེན། དཀོན་མཆོག་ཡ་ཝཱེས་དེ་ལྟར་མཛོད་ཅིག དཀོན་མཆོག་ཡ་ཝཱེས་ཁྱོད་ཀྱི་ལུང་བསྟན་རྣམས་འགྲུབ་པར་མཛད་ནས། དཀོན་མཆོག་ཡ་ཝཱེའི་མཆོད་ཁང་གི་ཡོ་བྱད་དང་བཙོན་དུ་ཁྲིད་ཕྱིན་པ་ཐམས་ཅད་པཱ་པེལ་ལོན་ནས་གནས་འདིར་ཕྱིར་འདྲེན་པར་ཤོག
JER 28:7 ཡིན་ནའང་ངས་ཁྱོད་དང་མི་ཀུན་གྱི་རྣ་བར་གང་ཞིག་སྨྲས་པར་ཁྱོད་ཀྱིས་ཉན་པར་མཛོད་ཅིག
JER 28:8 གནའ་ནས་ད་བར་དུ། ང་དང་ཁྱོད་གཉིས་ཡར་སྔོན་གྱི་ལུང་སྟོན་པ་རྣམས་ཀྱིས་ཀྱང་ཡུལ་དུ་མ་དང་རྒྱལ་ཕྲན་སྟོབས་ཅན་དག་ལ་དམག་འཁྲུག་དང་ཆག་སྒོ། རིམས་ནད་བཅས་འབྱུང་བར་ལུང་བསྟན་པ་ཡིན།
JER 28:9 དེ་ཡང་ཞི་བདེ་ལུང་སྟོན་མཁན་གྱི་ལུང་སྟོན་པ་ཡིན་ན་དེའི་ཚིག་ནང་བཞིན་འགྲུབ་པའི་དུས་སུ། མི་ཡིས་ད་གཟོད་དེ་ནི་དཀོན་མཆོག་ཡ་ཝཱེས་མངགས་པའི་ལུང་སྟོན་པ་ཡིན་པར་ཁས་ལེན་ནོ་ཞེས་སྨྲས།
JER 28:10 དེ་ནས་ལུང་སྟོན་པ་ཧ་ནན་ཡཱས་ལུང་སྟོན་པ་ཡེ་རེམ་ཡཱའི་མཇིང་པ་ལས་གཉའ་ཤིང་བླངས་ནས་བཅག་པ་དང་།
JER 28:11 ཡང་མི་ཐམས་ཅད་ཀྱི་མདུན་དུ་ན་རེ། དཀོན་མཆོག་ཡ་ཝཱེས་འདི་སྐད་དུ། ལོ་གཉིས་ཀྱི་ནང་དུ་ངས་དེ་དང་དེ་བཞིན་དུ་མི་རིགས་ཐམས་ཅད་ཀྱི་མཇིང་པ་ལས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་གཉའ་ཤིང་གཅོག་པར་བྱའོ་ཞེས་གསུངས་ཞེས་སྨྲས་པ་དང་། ལུང་སྟོན་པ་ཡེ་རེམ་ཡཱ་ཕྱིན་ཏོ། །
JER 28:12 ལུང་སྟོན་པ་ཧ་ནན་ཡཱས་ལུང་སྟོན་པ་ཡེ་རེམ་ཡཱའི་མཇིང་པ་ལས་གཉའ་ཤིང་དེ་བཅག་པའི་རྗེས་སུ། དཀོན་མཆོག་ཡ་ཝཱེའི་བཀའ་ནི་ཡེ་རམ་ཡཱ་ལ་བྱུང་བ་འདི་ལྟ་སྟེ།
JER 28:13 ཁྱོད་སོང་ནས་ཧ་ནན་ཡཱ་ལ་འདི་སྐད་སྦྲོན་ཅིག དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ཤིང་གི་གཉའ་ཤིང་བཅག་ནའང་དེའི་ཚབ་ཏུ་ལྕགས་ཀྱི་གཉའ་ཤིང་བཟོ་བར་འགྱུར་རོ་ཞེས་གསུངས།
JER 28:14 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་གཡོག་བྱེད་དུ། ངས་མི་རིགས་ཐམས་ཅད་ཀྱི་མཇིང་པར་ལྕགས་ཀྱི་གཉའ་ཤིང་འགེལ་ཞིང་། དེ་དག་གིས་ནམ་ཡིན་ཡང་དེ་ལ་གཡོག་བྱེད་པར་འགྱུར་ཏེ། ངས་ཐང་རྒོད་ཀྱི་རི་དྭགས་རྣམས་ཀྱང་དེ་ལ་སྤྲད་དོ་ཞེས་གསུངས་པས་སོ་ཞེས་པའོ། །
JER 28:15 དེ་ནས་ལུང་སྟོན་པ་ཡེ་རེམ་ཡཱས་ལུང་སྟོན་པ་ཧ་ནན་ཡཱ་ལ་འདི་ལྟར། ཀྱེ་ཧ་ནན་ཡཱ་ཁྱོད་ཀྱིས་ཉོན་ཅིག དཀོན་མཆོག་ཡ་ཝཱེས་ཁྱོད་མངགས་པ་མིན་ཡང་། ཁྱོད་ཀྱིས་མི་འདི་རྣམས་རྫུན་ལ་བརྟེན་པར་བྱས་པས།
JER 28:16 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ནི་ས་གཞི་ལས་འདོར་བར་བྱ་ཞིང་། ཁྱོད་ནི་ལོ་འདི་རང་ལ་འཆི་བར་འགྱུར་རོ། །ཅི་ལ་ཞེ་ན། ཁྱོད་ཀྱིས་དཀོན་མཆོག་ཡ་ཝཱེ་ལ་ངོ་ལོག་གི་གཏམ་བརྗོད་པའི་ཕྱིར་རོ་ཞེས་གསུངས།
JER 28:17 དེ་ནས་ལུང་སྟོན་པ་ཧ་ནན་ཡཱ་ལོ་དེའི་ཟླ་བདུན་པའི་ནང་ཚེ་ལས་འདས་སོ། །
JER 29:1 དེ་ཡང་བཙོན་དུ་ཁྲིད་པའི་མཆོད་དཔོན་དང་ལུང་སྟོན་པ། མི་ཐམས་ཅད་དང་། ད་དུང་ཤུལ་དུ་ལུས་པའི་རྒན་པོ་རྣམས་ཏེ། ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་ནས་པཱ་པེལ་ལོན་དུ་བཙོན་ལ་ཁྲིད་པའི་མི་ཡོངས་ལ། ལུང་སྟོན་པ་ཡེ་རེམ་ཡཱས་ཡེ་རུ་སཱ་ལེམ་ནས་འཕྲིན་ཞིག་སྤྲིངས་པ་འདི་ལྟ་སྟེ།
JER 29:2 འདི་ནི་རྒྱལ་པོ་ཡེ་ཀོན་ཡཱ་དང་རྒྱལ་ཡུམ། ཕོ་བྲང་གི་རྒྱལ་བློན། ཡ་ཧུ་དཱ་དང་ཡེ་རུ་སཱ་ལེམ་གྱི་འགོ་དཔོན། དེ་མིན་ཤིང་བཟོ་དང་མགར་པ་དང་བཅས་པ་ཡེ་རུ་སཱ་ལེམ་དང་བྲལ་བའི་རྗེས་སུ་ཡིན་ནོ། །
JER 29:3 འཕྲིན་ཡིག་འདི་ནི་ཤཱ་ཕན་གྱི་བུ་ཨེ་ལ་ཟཱ་དང་ཧིལ་ཀི་ཡཱའི་བུ་གེ་མར་ཡཱ་གཉིས་ཀ་བརྒྱུད་ནས་སྤྲིངས་པ་དང་། དེ་གཉིས་ནི་ཡ་ཧུ་དཱའི་རྒྱལ་པོ་ཚིད་ཀི་ཡཱས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ལ་འཕྲད་དུ་མངགས་པ་ཡིན་ནོ། །
JER 29:4 འཕྲིན་ཡིག་གི་ནང་དུ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་བཙོན་དུ་ཁྲིད་པའི་མི་ཐམས་ཅད་དེ། ངས་ཡེ་རུ་སཱ་ལེམ་ནས་པཱ་པེལ་ལོན་དུ་བཙོན་ལ་ཁྲིད་དུ་བཅུག་པའི་མི་ཐམས་ཅད་ལ་འདི་སྐད་དུ།
JER 29:5 ཁྱོད་རྣམས་ཀྱིས་ཁང་པ་བརྩིགས་ནས་དེའི་ནང་དུ་འདུག་དགོས་ལ། སྐྱེད་ཚལ་བཙུགས་ནས་དེའི་ནང་གི་ཤིང་ཏོག་སྤྱོད་དགོས།
JER 29:6 ཆུང་མ་བླངས་ནས་བུ་རྒྱུད་སྤེལ་བ་དང་། བུ་རྒྱུད་སྤེལ་བའི་ཕྱིར་ཁྱོད་རྣམས་ཀྱི་བུ་ལ་ཆུང་མ་ལོངས་ལ་ཁྱོད་རྣམས་ཀྱི་བུ་མོ་རྣམས་མནའ་མར་སྟེར་དགོས། ཁྱོད་རྣམས་གནས་དེར་མང་དུ་འཕེལ་བ་ལས་ཉུང་དུ་བྲི་མི་རུང་།
JER 29:7 ཡང་ངས་ཁྱོད་ཅག་བཙོན་དུ་ཁྲིད་པའི་གྲོང་ཁྱེར་དེའི་ཆེད་དུ་ཁྱོད་རྣམས་ཀྱིས་ཞི་བདེ་ཚོལ་ཞིག གྲོང་ཁྱེར་དེའི་ཕྱིར་དུ་དཀོན་མཆོག་ཡ་ཝཱེར་གསོལ་བ་ཐོབས་ཤིག ཅི་ལ་ཞེ་ན། གྲོང་ཁྱེར་དེ་ལ་ཞི་བདེ་ཐོབ་ན་ཁྱོད་རྣམས་ཀྱང་བདེ་བ་ཡིན་ནོ་ཞེས་གསུངས་སོ། །
JER 29:8 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཁྱོད་ཅག་ཁྲོད་ཀྱི་ལུང་སྟོན་པ་དང་མོ་པ་རྣམས་ཀྱི་མགོ་སྐོར་འོག་ཏུ་མི་ཚུད་པར་གྱིས། ཡང་ཁྱོད་ཅག་གིས་རྨིས་པའི་རྨི་ལམ་ལ་བློ་མ་གཏོད་ཅིག
JER 29:9 ཅི་ལ་ཞེ་ན། དེ་དག་གིས་ངའི་མིང་ལ་བརྟེན་ནས་ཁྱོད་ཅག་ལ་ལུང་བསྟན་རྫུན་མ་སྨྲས་པ་ཡིན་ལ། ངས་དེ་དག་མངགས་མེད་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 29:10 དཀོན་མཆོག་ཡ་ཝཱེས་འདི་སྐད་དུ། པཱ་པེལ་ལོན་གྱི་ཕྱིར་དུ་གཏན་ལ་ཕབ་བའི་བགྲང་བྱ་བདུན་ཅུ་རྫོགས་དུས་སུ། ངས་ཁྱོད་རྣམས་ལ་ལྟ་སྐྱོང་བྱས་ཏེ་ངའི་ཁས་ལེན་བཟང་པོ་ཁྱོད་ཅག་ལ་བསྒྲུབས་ནས། ཁྱོད་རྣམས་ཕྱིར་གནས་འདིར་འཁྲིད་འོང་དགོས།
JER 29:11 ངས་ཁྱོད་རྣམས་ལ་བཅངས་པའི་བསམ་པ་ནི་ཁྱོད་ཚོར་ཞི་བདེ་འཐོབ་པ་ལས་ཆག་སྒོ་འབྱུང་བ་མིན་པ་ངས་རྟོགས་ཡོད། མ་འོངས་པ་ན་ཁྱོད་རྣམས་ལ་འོད་སྟོང་འབར་བའི་མདུན་ལམ་དང་རེ་བ་ཡོད་པར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 29:12 ཁྱོད་ཅག་གིས་ང་ལ་འོ་དོད་བོས་ནས་ངའི་ཕྱོགས་སུ་གསོལ་བ་བཏབ་ན་ངས་དེར་མཉན་པར་བྱའོ། །
JER 29:13 ཡང་ཁྱོད་ཚོས་ང་ཚོལ་ཞིག སེམས་པ་རྩེ་གཅིག་གིས་ང་རང་བཙལ་ན་རྙེད་པར་འགྱུར་ཏེ།
JER 29:14 ཁྱོད་ཅག་གིས་ང་རང་རྙེད་པར་འགྱུར་ལ། ཡང་ངས་ཁྱོད་ཅག་བཙོན་དུ་ཁྲིད་པ་རྣམས་ཕྱིར་ལོག་པར་བྱ་སྟེ། ངས་ཁྱོད་རྣམས་སྐྲོད་སའི་རྒྱལ་ཁམས་དང་ཡུལ་ཕྱོགས་སོ་སོ་ནས་བསྡུས་ཏེ། ངས་ཁྱོད་རྣམས་བཙོན་དུ་ཁྲིད་ནས་ཁ་བྲལ་བའི་གནས་སུ་ཁྱོད་རྣམས་ཕྱིར་འཁྲིད་འོང་ངོ་ཞེས་དཀོན་མཆོག་ཡ་ཝཱེས་འདི་སྐད་གསུངས།
JER 29:15 ཁྱོད་རྣམས་ན་རེ། དཀོན་མཆོག་ཡ་ཝཱེས་པཱ་པེལ་ལོན་ནས་རང་ཅག་གི་ཕྱིར་དུ་ལུང་སྟོན་པ་རྣམས་བསྐོས་སོ་ཞེས་སྨྲ་བས་ན།
JER 29:16 དཀོན་མཆོག་ཡ་ཝཱེས་དཱ་བིད་ཀྱི་རྒྱལ་ཁྲིར་བཞུགས་པའི་རྒྱལ་པོ་དང་གྲོང་ཁྱེར་འདིར་གནས་པའི་མི་ཀུན་ཏེ། ཁྱོད་དང་ལྷན་ཅིག་པཱ་པེལ་ལོན་དུ་བཙོན་ལ་མ་ཁྲིད་པའི་སྤུན་ཟླ་རྣམས་ཀྱི་སྐོར་ལ་འདི་སྐད་གསུངས་ཏེ།
JER 29:17 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་རལ་གྲི་དང་མུ་གེ རིམས་ནད་བཅས་དེ་དག་གི་སྟེང་དུ་འབེབ་ཅིང་། དེ་དག་ནི་སེ་ཡབ་ཤིང་འབྲས་རུལ་བ་དང་མཚུངས་པར་བཟའ་ཐབས་མེད་པར་བྱའོ། །
JER 29:18 ངས་རལ་གྲི་དང་མུ་གེ རིམས་ནད་བཅས་ཀྱིས་དེ་དག་འདེད་ཅིང་། ས་སྟེང་གི་རྒྱལ་ཕྲན་ཐམས་ཅད་དེའི་ཕྱིར་འཇིགས་པར་འགྱུར་བ་དང་། ངས་དེ་དག་སྐྲོད་སའི་ཡུལ་ཁམས་རྣམས་སུ་མི་རྣམས་འཇིགས་པ་དང་། དམོད་མོ་དང་འཕྱ་དགོད་བྱེད་ས་དང་། ངོ་ཚ་གཏོད་ཡུལ་དུ་འགྱུར་རོ། །
JER 29:19 དེ་ནི་ངས་སྔོན་ཆད་རང་གི་ཞབས་ཕྱི་ལུང་སྟོན་པ་རྣམས་ཡང་ཡང་མངགས་ནས་སྨྲས་པའི་གཏམ་ལ་དེ་དག་གིས་མ་མཉན་པས་སོ། །ཁྱོད་རྣམས་ཀྱིས་ཀྱང་དེ་དང་དེ་བཞིན་དུ་མ་མཉན་ཏོ་ཞེས་དཀོན་མཆོག་ཡ་ཝཱེས་འདི་སྐད་དུ།
JER 29:20 དེ་བས་ཁྱོད་ཅག་ངས་ཡེ་རུ་སཱ་ལེམ་ནས་པཱ་པེལ་ལོན་དུ་བཏང་བའི་བཙོན་པ་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 29:21 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངའི་མིང་གཡར་ནས་ཁྱོད་རྣམས་ལ་རྫུན་གྱི་ལུང་བསྟན་སྨྲ་བའི་ཀོ་ལ་ཡཱའི་བུ་ཨ་ཧབ་དང་མ་ཨ་སེ་ཡཱའི་བུ་ཚིད་ཀི་ཡཱ་གཉིས་ལ་མཚོན་ན། ལྟོས་ཤིག ངས་དེ་གཉིས་པོ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏད་ནས། དེས་ཁྱོད་ཚོའི་མིག་མདུན་དུ་དེ་གཉིས་གསོད་པར་འགྱུར་ཞིང་།
JER 29:22 པཱ་པེལ་ལོན་དུ་བཙོན་ལ་ཁྲིད་པའི་ཡ་ཧུ་དཱ་པ་ཐམས་ཅད་ཀྱིས་དེ་གཉིས་པོ་བསྟན་ནས། དཀོན་མཆོག་ཡ་ཝཱེས་ཁྱོད་ནི་པཱ་པེལ་ལོན་གྱི་རྒྱལ་པོས་མེའི་ནང་དུ་བསྲེགས་པའི་ཚིད་ཀི་ཡཱ་དང་ཨ་ཧབ་ལྟར་མཛོད་ཅིག་ཅེས་དམོད་པར་འགྱུར་རོ། །
JER 29:23 མི་འདི་གཉིས་ཀྱིས་ཡེས་ར་ཨེལ་གྱི་ནང་དུ་ངོ་ཚ་མེད་པའི་ལས་སྤྱད་དེ། རང་གི་ཁྱིམ་མཚེས་ཀྱི་ཆུང་མ་དང་ལོག་གཡེམ་སྤྱད་ཅིང་། ཡང་ངའི་མིང་གཡར་ནས་ངས་དེ་དག་ལ་མ་བསྒོས་པའི་རྫུན་སྨྲས་སོ། །ངས་དེ་ཐམས་ཅད་རྟོགས་ཤིང་བདེན་དཔང་ཡོད་དོ་ཞེས་དཀོན་མཆོག་ཡ་ཝཱེས་གསུངས་སོ། །
JER 29:24 དཀོན་མཆོག་ཡ་ཝཱེས་ཡེ་རེམ་ཡཱ་ལ་འདི་ལྟར་བསྒོས་ཏེ། ཁྱོད་ཀྱིས་ནེ་ཧེ་ལམ་པ་ཤེ་མ་ཡཱ་ལ་འདི་ལྟར་སྨྲོས་ཤིག
JER 29:25 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། དེ་ཡང་ཁྱོད་ཀྱིས་ཡེ་རུ་སཱ་ལེམ་དུ་ཡོད་པའི་མི་ཐམས་ཅད་དང་། མཆོད་དཔོན་མ་ཨ་སེ་ཡཱའི་བུ་ཟེ་ཕན་ཡཱ་ཞེས་པ་དང་། མཆོད་དཔོན་གཞན་རྣམས་ལ་རང་གི་མིང་བཀོད་ནས་འཕྲིན་བསྐུར་ཏེ་འདི་ལྟར།
JER 29:26 དཀོན་མཆོག་ཡ་ཝཱེས་མཆོད་དཔོན་ཆེན་པོ་ཡེ་ཧོ་ཡ་དཱའི་ཚབ་ཏུ་ཁོང་གི་མཆོད་ཁང་དུ་སྤྱི་དཔོན་བྱེད་པར་ཟེ་ཕན་ཡཱ་ཁྱེད་ཉིད་མཆོད་དཔོན་དུ་བསྐོས་པ་ཡིན་པས། རང་ཉིད་ལུང་སྟོན་པ་ཡིན་ཞེས་སྨྱོ་ལབ་རྒྱག་མཁན་ཐམས་ཅད་ལ་རྐང་སྒྲོག་དང་སྐེ་སྒྲོག་རྒྱག་འོས།
JER 29:27 ད་ལྟ་ཨ་ན་ཐོད་པ་ཡེ་རེམ་ཡཱ་ཡིས་ཁྱོད་རྣམས་ལ་ལུང་བསྟན་སྨྲས་པར་ཁྱོད་ཀྱིས་ཅིའི་ཕྱིར་བཀའ་བཀྱོན་མི་གནང་ངམ།
JER 29:28 དེས་བདག་ཅག་པཱ་པེལ་ལོན་དུ་གནས་པ་རྣམས་ལ་འཕྲིན་བསྐུར་ཏེ་འདི་ལྟར། བཙོན་ལ་གནས་པའི་དུས་ཡུན་རིང་སྟེ། ཁྱོད་ཅག་གིས་ཁང་པ་བརྩིགས་ནས་དེའི་ནང་དུ་འདུག་དགོས་ལ། སྐྱེད་ཚལ་བཙུགས་ནས་དེའི་ནང་གི་ཤིང་ཏོག་སྤྱོད་དགོས་ཞེས་སྨྲས་སོ་ཞེས་པའོ། །
JER 29:29 ཡང་མཆོད་དཔོན་ཟེ་ཕན་ཡཱས་འཕྲིན་ཡིག་འདི་ལུང་སྟོན་པ་ཡེ་རེམ་ཡཱའི་རྣ་བར་བཀླགས་སོ། །
JER 29:30 དེ་ནས་ཡང་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 29:31 ཁྱོད་ཀྱིས་བཙོན་དུ་ཁྲིད་པ་ཀུན་ལ་འཕྲིན་བསྐུར་ཏེ་འདི་ལྟར། དཀོན་མཆོག་ཡ་ཝཱེས་ནེ་ཧེ་ལམ་པ་ཤེ་མ་ཡཱའི་སྐོར་ལ་འདི་སྐད་དུ། ངས་ཤེ་མ་ཡཱ་མ་མངགས་ཀྱང་དེས་ཁྱོད་ཅག་ལ་ལུང་བསྟན་ཏེ་ཁྱོད་རྣམས་རྫུན་ལ་ཡིད་ཆེས་སུ་བཅུག་པས།
JER 29:32 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ནེ་ཧེ་ལམ་པ་ཤེ་མ་ཡཱ་དང་དེའི་བུ་རྒྱུད་ལ་ཉེས་ཆད་གཅོད་པར་བྱའོ། །ཁོའི་བུ་རབས་ཚ་རྒྱུད་ལས་གཅིག་ཀྱང་མི་འདི་རྣམས་ཀྱི་ནང་དུ་མི་ལུས་ཤིང་། ངས་རང་གི་འབངས་མི་ལ་གནང་བར་འགྱུར་བའི་བྱིན་རླབས་དེ་ཡང་མཐོང་བར་མི་འགྱུར། ཅི་ལ་ཞེ་ན། དེས་ཡ་ཝཱེ་ལ་ངོ་ལོག་གི་གཏམ་སྨྲས་པས་ཡིན་ཞེས་གསུངས་པ་སྨྲོས་ཤིག་ཅེས་དཀོན་མཆོག་ཡ་ཝཱེས་འདི་སྐད་གསུངས་སོ། །
JER 30:1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 30:2 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ཀྱིས་ངས་ཁྱོད་ལ་སྨྲས་པའི་བཀའ་ཐམས་ཅད་གཞུང་ལ་ཡི་གེར་ཁོད་ཅིག
JER 30:3 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་རང་གི་འབངས་མི་ཡེས་ར་ཨེལ་དང་ཡ་ཧུ་དཱ་ནས་བཙོན་དུ་ཁྲིད་པའི་མི་རྣམས་ཕྱིར་ལོག་པར་བྱའོ། །དཀོན་མཆོག་ཡ་ཝཱེས་ཡང་འདི་སྐད་དུ། ངས་དེ་དག་གི་ཕ་མེས་རྣམས་ལ་གནང་བའི་ཡུལ་ཁམས་སུ་དེ་དག་ཕྱིར་ལོག་ཏུ་འཇུག་ཅིང་། ཡུལ་དེ་ཡང་བསྐྱར་ཁོ་རྣམས་ལ་ས་སྐལ་དུ་འཐོབ་པར་འགྱུར་ཞེས་པའོ་ཞེས་གསུངས་སོ། །
JER 30:4 ཡང་དཀོན་མཆོག་ཡ་ཝཱེས་ཡེས་ར་ཨེལ་དང་ཡ་ཧུ་དཱའི་སྐོར་ལ་གསུངས་པའི་བཀའ་ནི་འདི་ལྟ་སྟེ།
JER 30:5 དཀོན་མཆོག་ཡ་ཝཱེས་འདི་སྐད་དུ། འཇིགས་ནས་སྐད་ངན་འདོན་པའི་སྒྲ་ངས་ཐོས་བྱུང་། དེ་ནི་དངངས་སྐྲག་ལས་ཞི་བདེ་མིན།
JER 30:6 ཁྱོད་རྣམས་སོང་ནས་འདྲི་རྟོག་གྱིས་ལ་ལྟོས་ཤིག སྐྱེས་པས་ཕྲུ་གུ་བཙའ་ནུས་སམ། དར་མ་རྣམས་ཀྱིས་སྐྱེ་གཟེར་རྒྱག་པའི་བུད་མེད་དང་འདྲ་བར་ལག་པས་གྲོད་པ་བསྐྱོར་ནས་རེ་རེའི་ངོ་མདོག་སྐྱ་བོར་འགྱུར་བ་ངས་མཐོང་བ་འདི་ཅི་ཡིན་ནམ།
JER 30:7 ཀྱི་ཧུད། ཉིན་མོ་དེ་ནི་འཇིགས་སུ་རུང་བའི་རྐྱེན་གྱིས་དེ་ལ་འགྲན་ཟླ་མེད། འདི་ནི་ཡ་ཀོབ་ལ་སྡུག་བསྔལ་འབྱུང་བའི་དུས་ཡིན་ཡང་ཁོ་རང་སྡུག་བསྔལ་དེ་ལས་ཐར་བར་འགྱུར་ཞེས་པའོ་ཞེས་གསུངས།
JER 30:8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཉིན་དེར་སླེབས་ཚེ། ངས་དེ་རྣམས་ཀྱི་མཇིང་པ་ལས་དགྲ་བོའི་གཉའ་ཤིང་བཅག་ནས་ཁོ་ཚོའི་ཀོ་བའི་ཐག་པ་དེ་གཅོད་ཅིང་། མི་ཡན་རྣམས་ཀྱིས་དེ་དག་སླར་གཡོག་ཏུ་བཀོལ་བར་མི་འགྱུར་རོ། །
JER 30:9 དེ་རྣམས་ཀྱིས་རང་གི་དཀོན་མཆོག་ཡ་ཝཱེ་དང་ངས་དེ་དག་གི་དོན་དུ་བསྐོས་པའི་རྒྱལ་པོ་དཱ་བིད་ལ་གཡོག་བྱེད་པར་འགྱུར།
JER 30:10 ཀྱེ་ངའི་ཞབས་ཕྱི་ཡ་ཀོབ་ཁྱོད་རང་མ་འཇིགས་ཤིག ཀྱེ་ཡེས་ར་ཨེལ་ཁྱོད་མ་དངངས་ཤིག ཅི་ལ་ཞེ་ན། ངས་རྒྱང་རིང་ཡུལ་ནས་ཁྱོད་སྐྱོབ་ཅིང་། བཙོན་དུ་ཁྲིད་པའི་ཡུལ་ནས་ཁྱོད་ཀྱི་བུ་རྒྱུད་རྣམས་སྒྲོལ་བར་བྱའོ། །དེ་ནས་ཡ་ཀོབ་ཕྱིར་ལོག་ངེས་ཤིང་། སེམས་བདེ་ལ་བབས་ནས་བག་ཕབ་ངང་འདུག་པར་འགྱུར་ལ། སུས་ཀྱང་དེ་སྐྲག་པར་མི་བྱའོ། །
JER 30:11 ང་རང་ཁྱོད་དང་མཉམ་དུ་གནས་ཤིང་ཁྱོད་སྐྱོབ་པར་འགྱུར་ལ། ངས་ཁྱོད་ཅག་སྐྲོད་སའི་ཡུལ་གྱི་མི་རིགས་ཀུན་ཚར་བཅད་ནའང་ཁྱོད་རང་ཚར་གཅོད་པར་མི་བྱ། ངས་དྲང་གཞག་སྒོས་ཁྱོད་ལ་ཉེས་ཆད་གཅོད་པ་ལས། ཁྱོད་རྩ་བ་ནས་ཉེས་མེད་དུ་བརྩིས་པ་མིན་ཞེས་དཀོན་མཆོག་ཡ་ཝཱེས་གསུངས།
JER 30:12 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་རྨ་ཁ་གསོ་མི་ནུས་ལ་ཁྱོད་ཀྱི་རྨས་སྐྱོན་ཤིན་ཏུ་ཆེ།
JER 30:13 ཁྱོད་ཀྱི་རྩོད་པའི་ཕྱིར་ཞུ་མཁན་དང་རྨ་ཁའི་ཕྱིར་ཁྱོད་ལ་སྨན་གང་ཡང་མེད།
JER 30:14 ཁྱོད་ཀྱི་མཛའ་བོ་ཀུན་གྱིས་ཁྱོད་རང་བརྗེད་ནས་ཁྱོད་འཚོལ་ཞིབ་མི་བྱེད་དེ། ཅི་ལ་ཞེ་ན། ཁྱོད་ཀྱི་ཉེས་སྐྱོན་མང་དྲགས་པ་དང་སྡིག་པ་ཚབས་ཆེ་བས་ན། ངས་དགྲ་བོས་ཁྱོད་ལ་རྡུང་བ་ལྟར་ཁྱོད་ལ་བརྡུངས་ཤིང་། སྙིང་རྗེ་མེད་པའི་ཚུལ་དུ་ཁྱོད་ལ་ཉེས་ཆད་བཅད་པ་ཡིན།
JER 30:15 ཁྱོད་ཀྱིས་རྨ་ཁའི་ཕྱིར་འོ་དོད་ཅི་ལ་འདོན། ཁྱོད་ཀྱི་ཟུག་གཟེར་ནི་གསོ་ཐབས་མེད་དེ། ཁྱོད་ཀྱི་ཉེས་སྐྱོན་མང་དྲགས་པ་དང་སྡིག་པ་ཚབས་ཆེ་བས་ངས་ཁྱོད་ལ་འདི་ལྟར་བྱས་སོ། །
JER 30:16 ཡིན་ནའང་ཁྱོད་ཟ་མཁན་ཐམས་ཅད་ཀྱང་བཟའ་བར་འགྱུར་ལ། ཁྱོད་ཀྱི་དགྲ་གཅིག་ཀྱང་མ་ལུས་པར་བཙོན་དུ་འགྲོ་བར་འགྱུར། ཁྱོད་འཇོམས་མཁན་རྣམས་ཀྱང་འཇོམས་པ་དང་། ངས་ཁྱོད་ལས་འཕྲོག་མཁན་ཐམས་ཅད་ལས་ཀྱང་འཕྲོག་པར་བྱའོ། །
JER 30:17 མི་ཡིས་ཁྱོད་ནི་ཕྱི་རུ་སྤྱུགས་པའི་མི་དང་སུས་ཀྱང་འཚོལ་ཞིབ་མི་བྱེད་པའི་ཛ་ཡན་ཡིན་ནོ་ཞེས་ཟེར་མོད། འོན་ཀྱང་ངས་ཁྱོད་ཀྱི་ནད་སངས་པ་དང་རྨ་རྣམས་གསོ་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 30:18 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཡ་ཀོབ་ཀྱི་གུར་རྣམས་སླར་ཡང་དར་བར་བྱས་ནས་དེའི་གནས་ཚང་ལ་སྙིང་རྗེ་བསྐྱེད་ཅིང་། སྔ་མའི་ཞིག་རོའི་སྟེང་དུ་གྲོང་ཁྱེར་བརྩིག་པ་དང་ཕོ་བྲང་ནང་དུ་སྔར་བཞིན་མི་རྣམས་འདུག་པར་འགྱུར།
JER 30:19 ཡང་གཏང་རག་འབུལ་བའི་མགུར་དང་དགའ་མགུ་བྱེད་པའི་སྐད་སྒྲ་དེ་ལས་ཐོན་པར་འགྱུར་ཏེ། ངས་དེ་དག་འཕེལ་བར་བྱེད་པ་ལས་རྒུད་དུ་མི་འཇུག་ལ། ཁོ་ཚོར་དཔལ་སྦྱིན་པ་ལས་སྐྱེངས་པར་མི་བྱའོ། །
JER 30:20 དེ་དག་གི་བུ་རྒྱུད་རྣམས་ལ་སྔར་བཞིན་ཐུགས་རྗེ་འཐོབ་པ་དང་། དེ་དག་གི་མི་ཚོགས་ངའི་མདུན་དུ་བརྟན་པོར་ཚུགས་པར་འགྱུར། ཡང་ཁོ་རྣམས་ལ་གཉའ་གནོན་བྱེད་མཁན་ཐམས་ཅད་ལ་ངས་ཉེས་ཆད་གཅོད་ངེས་ཡིན།
JER 30:21 དེ་དག་གི་འགོ་དཔོན་ནི་དེ་དག་རང་གི་མི་ཡིན་ཞིང་། དབང་འཛིན་མཁན་ཡང་དེ་དག་གི་ནང་ནས་ཐོན་ནོ། །ངས་དེ་དག་ང་དང་ཉེ་བར་འདྲེན་ཞིང་དེ་ཡང་ང་དང་ཉེ་བར་བཅར་ངེས་ཡིན། དེ་མིན་ངའི་མདུན་དུ་འོང་བའི་སྙིང་སྟོབས་སུ་ལ་ཡོད་ཅེས་གསུངས་པ་དང་།
JER 30:22 ཁྱོད་ཅག་ངའི་འབངས་མི་དང་། ང་ཁྱོད་ཀྱི་དཀོན་མཆོག་ཏུ་འགྱུར་རོ་ཞེས་དཀོན་མཆོག་ཡ་ཝཱེས་གསུངས།
JER 30:23 ལྟོས་ཤིག དཀོན་མཆོག་ཡ་ཝཱེའི་ཐུགས་ཁྲོ་ནི་རླུང་དམར་དང་འདྲ་ཞིང་། རླུང་འཚུབ་དྲག་པོ་ཡིན་ཏེ་ངན་པའི་མགོ་ལ་འཁོར་བར་འགྱུར།
JER 30:24 དཀོན་མཆོག་ཡ་ཝཱེའི་ཐུགས་དགོངས་རྣམས་དངོས་སུ་འགྲུབ་པའི་བར་དུ། ཁོང་གི་ཐུགས་ཁྲོ་ལ་ཞི་བ་མེད་ཅིང་། མཐའ་མའི་ཉིན་མོ་དག་ལ་ཁྱོད་ཅག་གིས་དོན་འདི་རྟོགས་པར་འགྱུར་རོ། །
JER 31:1 དེའི་ཚེ་ང་ནི་ཡེས་ར་ཨེལ་གྱི་ཁྱིམ་རྒྱུད་སོ་སོའི་དཀོན་མཆོག་དང་དེ་དག་ངའི་འབངས་མི་རུ་འགྱུར་རོ་ཞེས་དཀོན་མཆོག་ཡ་ཝཱེས་གསུངས།
JER 31:2 དཀོན་མཆོག་ཡ་ཝཱེས་འདི་སྐད་དུ། རལ་གྲི་ལས་ཐར་བའི་མི་རྣམས་ལ་དབེན་སྟོང་ནས་གཟིགས་སྐྱོང་འཐོབ་པ་དང་། ངས་ཡེས་ར་ཨེལ་ལ་ངལ་གསོ་གནང་བར་བྱའོ་ཞེས་གསུངས།
JER 31:3 དཀོན་མཆོག་ཡ་ཝཱེ་ནི་རྒྱང་རིང་ནས་ང་ལ་མངོན་པར་གྱུར་ཏེ་འདི་སྐད་དུ། ངས་མཐའ་མེད་པའི་བྱམས་བརྩེས་ཁྱོད་ལ་བྱམས་པས། ངས་བྱམས་བརྩེ་ཡིས་ཁྱོད་རང་འགུག་པ་ཡིན།
JER 31:4 ཀྱེ་ན་ཆུང་ཡེས་ར་ཨེལ་ལགས། ངས་ཡང་བསྐྱར་ཁྱོད་བརྩིགས་ན་ཁྱོད་རང་ཚུགས་པར་འགྱུར་ལ། ཁྱོད་ཀྱིས་ཡང་བསྐྱར་སིལ་རྔ་བཟུང་ནས་དགའ་མགུའི་ངང་གར་རྩེད་ཀྱི་ཁྲོད་དུ་ཞུགས་པར་འགྱུར།
JER 31:5 ཁྱོད་ཀྱིས་སཱ་མར་ཡའི་རི་རྣམས་ལ་རྒུན་ཚལ་རྣམས་འཛུགས་ཤིང་། འཛུགས་མཁན་གྱིས་བཙུགས་ནས་དེའི་ཤིང་ཏོག་ལོངས་སུ་སྤྱོད་པར་འགྱུར་རོ། །
JER 31:6 ཉིན་ཞིག་ལ་ཨེ་ཕཱར་ཡིམ་གྱི་རི་ལས་སོ་ལྟ་པས་འདི་ལྟར། ལོངས་ཤིག་དང་། རང་ཅག་ཛ་ཡན་དུ་རང་གི་དཀོན་མཆོག་ཡ་ཝཱེའི་དྲུང་དུ་འགྲོའོ་ཞེས་འབོད་པར་འགྱུར་ཞེས་གསུངས་སོ། །
JER 31:7 ཡང་དཀོན་མཆོག་ཡ་ཝཱེས་འདི་སྐད་དུ། ཡ་ཀོབ་ཀྱི་ཕྱིར་དུ་དགའ་སྤྲོའི་སྐད་སྒྲོགས་ཤིག མི་རིགས་ཀུན་ལས་གཙོ་བོ་ཡིན་པ་དེའི་ཕྱིར་དགའ་འབོད་གྱིས་ཤིག ཁྱོད་ཚོས་ཀྱེ་དཀོན་མཆོག་ཡ་ཝཱེ་ལགས། ཉིད་ཀྱི་མི་རྣམས་སྐྱོབ་པར་མཛོད་ཅིག ཡེས་ར་ཨེལ་གྱི་ལྷག་ལུས་རྣམས་སྐྱོབ་པར་མཛོད་ཅིག་ཅེས་ཁྱབ་བསྒྲག་བྱོས་ལ་བསྟོད་ཅིག
JER 31:8 ལྟོས་ཤིག ངས་དེ་དག་བྱང་ཕྱོགས་ཀྱི་ཡུལ་ནས་ཕྱིར་འཁྲིད་འོང་བ་དང་ས་མཐའ་ནས་བསྡུ་བར་བྱ་སྟེ། དེ་དག་གི་ནང་དུ་ལོང་པ་དང་ཞ་བོ། མངལ་དང་ལྡན་པ། སྦྲུམ་མ་བཅས་ཡོད་ཅིང་མི་ཚོགས་ཆེན་པོ་ཞིག་ཚུར་ལོག་འོང་།
JER 31:9 དེ་དག་ངུ་བཞིན་འོངས་ནས་བདག་ལ་ཞུ་བ་བྱེད་པ་དང་། ངས་ཁོ་རྣམས་ཁྲིད་ནས་གཙང་པོའི་འགྲམ་དང་དྲང་པོའི་ལམ་དུ་བསྐྱོད་པར་བྱེད་ཅིང་དེ་རྣམས་འགྱེལ་བར་མི་འགྱུར་རོ། །ཅི་ལ་ཞེ་ན། ང་ནི་ཡེས་ར་ཨེལ་གྱི་ཕ་དང་། ཨེ་ཕཱར་ཡིམ་ནི་ངའི་སྐྱེས་འགོ་ཡིན་ནོ། །
JER 31:10 ཀྱེ་མི་རིགས་རྣམས། དཀོན་མཆོག་ཡ་ཝཱེའི་བཀའ་ལ་ཉོན་ཅིག རྒྱང་རིང་གི་གླིང་ཕྲན་དུ་འདི་བཞིན་སྒྲོགས་ཤིག ཡེས་ར་ཨེལ་སིལ་བུར་གཏོར་མཁན་གྱིས་དེ་སླར་ཡང་བསྡུ་ཞིང་། རྫི་བོས་རང་གི་ལུག་ཁྱུ་སྲུང་བ་ལྟར་དེ་དག་བསྲུང་བར་འགྱུར་ཞེས་པའོ། །
JER 31:11 ཅི་ལ་ཞེ་ན། དཀོན་མཆོག་ཡ་ཝཱེས་ཡ་ཀོབ་བླུས་པ་དང་། དེ་ནི་རང་ལས་སྟོབས་ཆེ་བའི་ལག་ནས་ཐར་བར་མཛད།
JER 31:12 དེ་རྣམས་ཛ་ཡན་གྱི་མཐོ་སར་འོངས་ཏེ་གླུ་ལེན་ཞིང་། དཀོན་མཆོག་ཡ་ཝཱེས་གནང་སྦྱིན་བཟང་པོ་རྣམས་ཏེ། འབྲུ་རིགས་དང་རྒུན་ཆང་། སྣུམ། ལུ་གུ། བ་ཕྲུག་བཅས་གནང་བས་དགའ་སྤྲོས་དགང་ཞིང་། དེ་དག་གི་མི་ཚེ་ནི་ཆུ་མོད་པའི་སྐྱེད་ཚལ་ལྟར་གྱུར་ནས་ནམ་ཡང་སྐམ་པར་མི་འགྱུར།
JER 31:13 དེའི་དུས་སུ་ན་ཆུང་མ་རྣམས་དགའ་ནས་བྲོ་འཁྲབ་ཅིང་། ཁ་རྒན་གཞོན་ཐམས་ཅད་མཉམ་དུ་དགའོ། །ཅི་ལ་ཞེ་ན། ངས་དེ་དག་གི་སྡུག་བསྔལ་ནི་དགའ་སྤྲོ་རུ་བསྒྱུར་ནས་ཁོ་རྣམས་ལ་སེམས་གསོ་བྱེད་པ་དང་། དེ་དག་ལ་སེམས་སྡུག་ཁྲོད་དགའ་སྤྲོ་འཐོབ་པར་བྱའོ། །
JER 31:14 ཡང་མཆོད་དཔོན་རྣམས་ཀྱི་སེམས་ནི་སྣུམ་གྱིས་ཚིམ་པར་བྱ་ཞིང་། མི་རྣམས་ངའི་གནང་སྦྱིན་གྱིས་ཚིམ་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 31:15 དཀོན་མཆོག་ཡ་ཝཱེས་འདི་སྐད་དུ། རཱ་མ་རུ་ཆོ་ངེ་འདོན་པ་དང་ངུ་འབོད་ཆེན་པོའི་སྒྲ་ཞིག་ཐོས་འོང་སྟེ། དེ་ནི་རཱ་ཧེལ་རང་གི་བུ་ཕྲུག་རྣམས་ཀྱི་ཕྱིར་ངུ་བ་ཡིན་ལ། དེ་རྣམས་མེད་པས་མོས་སེམས་གསོ་མི་འདོད་དོ་ཞེས་གསུངས།
JER 31:16 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཅི་བྱས་ལ་ལས་འབྲས་འཐོབ་ཅིང་དེ་རྣམས་དགྲ་བོའི་ཡུལ་ནས་ཕྱིར་ལོག་འོང་བས་སྐད་བརྒྱབ་ནས་མ་ངུ་ཞིག ཁྱོད་ཀྱི་མིག་ལས་མཆི་མ་མ་བཞུར་ཅིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 31:17 ཁྱོད་ཀྱི་བུ་ཕྲུག་རྣམས་སླར་རང་གི་ཡུལ་དུ་འོང་བར་འགྱུར་བས་ན། ཁྱོད་ཀྱི་མ་འོངས་པར་རེ་བ་ཡོད་ཅེས་དཀོན་མཆོག་ཡ་ཝཱེས་གསུངས།
JER 31:18 ཨེ་ཕཱར་ཡིམ་གྱིས་རང་གི་ཆེད་དུ་འདི་ལྟར་སྨྲེ་སྔགས་འདོན་པ་ངས་ཐོས་ཏེ། ཁྱེད་ཀྱིས་བདག་བཅུན་ཞིང་ང་ནི་ཁ་ལོ་མ་བཏུལ་བའི་བ་ཕྲུག་ཅིག་དང་འདྲ། ཁྱེད་ནི་ངའི་དཀོན་མཆོག་ཡ་ཝཱེ་ལགས་པས། ང་གསོ་བར་མཛོད་དང་ང་ཕྱིར་འཁོར་འོང་།
JER 31:19 ང་ཕྱིར་འཁོར་རྗེས་སེམས་གཏིང་ནས་འགྱོད་པ་སྐྱེས་ཤིང་། གོ་རྟོགས་སད་རྗེས་རང་གི་བྲང་ཁར་བརྡུངས་ ཤིང་། ངས་ན་གཞོན་དུས་ཀྱི་བརྙས་བཅོས་ཁུར་བས་འགྱོད་པ་སྐྱེས་ནས་ངོ་ཚ་བར་གྱུར་ཏོ་ཞེས་པའོ། །
JER 31:20 ཨེ་ཕཱར་ཡིམ་ནི་ངའི་གཅེས་པའི་བུ་ཡིན་ནམ། ང་དགའ་བའི་བུ་དེ་ཡིན་ནམ། ངས་དེ་ལ་བཀའ་བཀྱོན་གནང་དུས་སུ་སེམས་ལ་ཡང་བསྐྱར་དེ་དྲན་ངེས་ཡིན། དེའི་ཕྱིར་ངའི་སེམས་ནས་དེ་ལ་སེམས་ཁྲལ་བྱེད་ཅིང་། ངས་དེ་ལ་སྙིང་རྗེ་བསྐྱེད་པར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 31:21 ཀྱེ་ན་ཆུང་བུ་མོ་ཡེས་ར་ཨེལ་ལགས། རང་གི་དོན་དུ་ལམ་ཐོ་ཚུགས་ཤིག རང་ལ་ཐོ་སློངས་ཤིག ཁྱོད་རང་འགྲིམས་མྱོང་བའི་ལམ་ཆེན་ལ་ཡིད་འཇོག་ཡོད་པར་གྱིས། ཁྱོད་ཕྱིར་འཁོར་ལ་རང་གི་གྲོང་ཁྱེར་གྱི་ནང་དུ་ལོག་ཤོག
JER 31:22 དཀོན་མཆོག་ཡ་ཝཱེས་ས་གཞིའི་སྟེང་དུ་བུད་མེད་ཀྱིས་སྐྱེས་པ་བསྲུང་བའི་དོན་གསར་པ་ཞིག་མཛད་པར་འགྱུར་བས། དད་པ་མི་བརྟན་པའི་བུད་མེད་ཁྱོད་གང་སར་འཁྱམས་ནས་དུས་ག་ཙམ་ལ་འདུག་གམ།
JER 31:23 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་བཙོན་དུ་ཁྲིད་པའི་མི་རྣམས་ཕྱིར་ལོག་ཏུ་འཇུག་པའི་དུས་སུ། དེ་རྣམས་ཀྱིས་ཡ་ཧུ་དཱའི་ཡུལ་ཁམས་དང་དེའི་གྲོང་ཁྱེར་དུ། ཀ་ཡེ་དྲང་བདེན་གྱི་གནས་ཚང་། རི་བོ་དམ་པ་ལགས། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་བར་གྱུར་ཅིག་ཅེས་བརྗོད་པར་འགྱུར།
JER 31:24 དེ་ནས་ཡ་ཧུ་དཱའི་གྲོང་ཁྱེར་སོ་སོའི་མི་དང་ཞིང་པ། ཕྱུགས་འཚོ་བའི་མི་ཐམས་ཅད་ལྷན་ཅིག་ཏུ་ཡ་ཧུ་དཱ་རུ་གནས་པར་འགྱུར་རོ། །
JER 31:25 ཉམ་ཐག་པའི་མི་ཀུན་ལ་ངས་སེམས་ཤུགས་བསྐྱེད་ཅིང་། སེམས་སྡུག་པའི་མི་ནི་ངས་ཡིད་ཚིམ་པར་འཇུག་གོ་ཞེས་གསུངས།
JER 31:26 དེ་ནས་ང་གཉིད་ལས་སད་ཅིང་ཕྱོགས་བཞིར་བལྟས་པ་དང་། ངས་རང་ཉིད་གཉིད་སྐྱིད་པོ་ཞིག་ལོག་པ་ཚོར་བྱུང་།
JER 31:27 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ཀྱི་མི་ཕྱུགས་གཉིས་ཀ་འཕེལ་བར་བྱའོ། །
JER 31:28 ངས་སྔོན་ཆད་དེ་རྣམས་རྩ་བ་ནས་འདོན་པ་དང་བཤིག་པ། བརླག་པ། ཕམ་པར་བཟོ་བ། ཆག་སྒོ་འབེབ་པ་བཅས་ལ་ཇི་ལྟར་ཡིད་འཇོག་བྱས་ན། མ་འོངས་པ་ན་ངས་དེ་རྣམས་ཡར་བརྩིག་པ་དང་འཛུགས་པའི་དོན་ལའང་དེ་ལྟར་ཡིད་འཇོག་བྱེད་ངེས་ཡིན་ཞེས་དཀོན་མཆོག་ཡ་ཝཱེས་གསུངས།
JER 31:29 དེའི་དུས་སུ་མི་རྣམས་ཀྱིས་ཕ་ཡིས་རྒུན་འབྲུམ་སྐྱུར་མོ་ཟོས་པས་བུ་ཡི་སོ་བརྩེ་ཞེས་མི་ཟེར་རོ། །
JER 31:30 ཡིན་ནའང་སོ་སོ་རང་རང་གི་སྡིག་པའི་ལས་འབྲས་ཀྱིས་འཆི་ཞིང་། རྒུན་འབྲུམ་སྐྱུར་མོ་ཟ་མཁན་རང་རང་གི་སོ་བརྩེ་བར་འགྱུར་རོ། །
JER 31:31 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། བདག་གིས་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ལ་ཞལ་ཆད་གསར་པ་ཞིག་འཇོག་པར་བྱ་སྟེ།
JER 31:32 ཞལ་ཆད་འདི་ནི་བདག་གིས་དེ་དག་གི་ཕ་མེས་རྣམས་ཀྱི་ལག་པར་འཇུས་ཏེ་ཨེ་ཅིབ་ཡུལ་ནས་ཁྲིད་ཡོང་དུས་བཞག་པའི་ཞལ་ཆད་ལྟ་བུ་མ་ཡིན་ཏེ། བདག་ནི་དེ་དག་གི་ཁྱོ་བོ་ཡིན་ནའང་དེ་རྣམས་ངའི་ཞལ་ཆད་དང་འགལ་བ་ཡིན་ཞེས་དཀོན་མཆོག་ཡ་ཝཱེས་གསུངས།
JER 31:33 དུས་དེའི་རྗེས་སུ་བདག་གིས་ཡེས་ར་ཨེལ་གྱི་ཁྱིམ་རྒྱུད་རྣམས་ལ་ཞལ་ཆད་གསར་པ་ཞིག་གནང་བར་བྱ་ཞེས་དཀོན་མཆོག་ཡ་ཝཱེས་གསུངས་ཏེ། དེ་ནི་ངས་རང་གི་བཀའ་ཁྲིམས་དེ་དག་གི་ཡིད་ལ་འཇོག་ཅིང་དེ་དག་གི་སེམས་ནང་དུ་བརྐོ་བར་བྱ། བདག་ནི་དེ་དག་གི་དཀོན་མཆོག་དང་དེ་དག་བདག་གི་འབངས་མི་རུ་འགྱུར་བ་དང་།
JER 31:34 ཡང་མི་མཆོག་དམན་ཀུན་གྱིས་བདག་ངོ་ཤེས་པར་འགྱུར་ལ། ངས་དེ་དག་གི་སྡིག་པ་སེལ་ཞིང་ཕྱིན་ཆད་དེ་དག་གི་སྡིག་ཉེས་མི་དྲན་པའི་རྐྱེན་གྱིས། སུས་ཀྱང་རང་གི་ཁྱིམ་མཚེས་དང་སྤུན་ལ་དཀོན་མཆོག་ཡ་ཝཱེ་ངོ་ཤེས་པར་འོས་ཞེས་སྨྲ་ཞིང་བསླབ་པར་མི་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །
JER 31:35 ཉིན་མོའི་འོད་དུ་ཉི་མ་གནང་ཞིང་། མཚན་མོའི་འོད་དུ་ཟླ་བ་དང་སྐར་མ་རྣམས་ཀྱི་སྲོལ་མཛད་དེ། རྒྱ་མཚོའི་རྦ་རླབས་དཀྲུགས་ནས་མཚོ་རུ་རྦ་རླབས་ཆིལ་ཆིལ་གཡོ་བར་མཛད། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁོང་གི་མཚན་ལགས་པ་ཉིད་ཀྱིས་འདི་སྐད་དུ།
JER 31:36 ཇི་སྟེ་ཆོས་ཉིད་འདི་དག་ངའི་མདུན་ནས་འདོར་ནུས་པ་ཡིན་ན། ཡེས་ར་ཨེལ་གྱི་བུ་རྒྱུད་ཀྱང་ངའི་མདུན་ནས་རྒྱུད་ཆད་པར་གྱུར་ཏེ་རྒྱལ་ཁམས་ཤིག་ཏུ་གཏན་ནས་མི་གྲུབ་བོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 31:37 དཀོན་མཆོག་ཡ་ཝཱེས་འདི་སྐད་དུ། གལ་ཏེ་མི་ཡིས་སྟེང་གི་ནམ་མཁའ་གཞལ་ནུས་པ་དང་འོག་གི་རྩིག་རྨང་འཚོལ་ཞིབ་བྱེད་ཐུབ་ན། བདག་གིས་ཀྱང་ཡེས་ར་ཨེལ་གྱི་བུ་རྒྱུད་ཐམས་ཅད་ཀྱིས་བྱས་པའི་ལས་ཀུན་གྱི་ཕྱིར་ཁོ་རྣམས་འདོར་བར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 31:38 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ཧ་ནན་ཨེལ་ལྕོག་མཁར་ནས་གྲུ་ག་ཡི་རྒྱ་སྒོའི་བར་དུ་གྲོང་ཁྱེར་འདི་དཀོན་མཆོག་ཡ་ཝཱེའི་དོན་དུ་བཞེང་བའི་དུས་དེ་སླེབས་ལ་ཉེ།
JER 31:39 ཡང་ཐིག་སྐུད་ཕྱི་རུ་འཐེན་ཏེ་ག་རེབ་རི་བོ་ནས་གོ་ཨཱའི་བར་དུ་སླེབ་པར་འགྱུར།
JER 31:40 རོ་གཡུག་ས་དང་ཐལ་བ་གཏོར་སའི་ལུང་པ་ཧྲིལ་པོ་དང་བཅས་ཞིང་ས་ཐམས་ཅད་ཀིད་རོན་གྲོག་མོའི་བར་དང་། ཤར་ཕྱོགས་རྟའི་རྒྱ་སྒོ་ཡི་གྲུ་གའི་བར་དུ་དཀོན་མཆོག་ཡ་ཝཱེའི་ཕྱིར་དམ་པར་འགྱུར་ཞིང་། ཕྱིན་ཆད་ནམ་ཡང་དེ་རྩ་བ་ནས་འདོན་པ་དང་ཕམ་པར་བཟོ་བར་མི་འགྱུར་རོ། །
JER 32:1 ཡ་ཧུ་དཱའི་རྒྱལ་པོ་ཚིད་ཀི་ཡཱའི་སྲིད་ལོ་བཅུ་པ་སྟེ་ནེ་བོ་ཀད་ནེ་ཙར་གྱི་སྲིད་སྐྱོང་བའི་ལོ་བཅོ་བརྒྱད་པ་ལ། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 32:2 དུས་དེར་པཱ་པེལ་ལོན་གྱི་རྒྱལ་པོའི་དམག་དཔུང་གིས་ཡེ་རུ་སཱ་ལེམ་བསྐོར་ཅིང་། ལུང་སྟོན་པ་ཡེ་རེམ་ཡཱ་ནི་ཡ་ཧུ་དཱའི་རྒྱལ་པོའི་ཕོ་བྲང་དུ་ཡོད་པའི་སྐུ་སྲུང་གི་ཁྱམས་རར་བཟུང་ཡོད་པ་ཡིན།
JER 32:3 ཅི་ལ་ཞེ་ན། ཡ་ཧུ་དཱའི་རྒྱལ་པོ་ཚིད་ཀི་ཡཱས་ཁོང་ཉིད་བཟུང་སྟེ་འདི་ལྟར། ཁྱོད་ཀྱིས་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་གྲོང་ཁྱེར་འདི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་ཅིང་དེས་གྲོང་ཁྱེར་འདི་འཛིན་པར་འགྱུར།
JER 32:4 ཡ་ཧུ་དཱའི་རྒྱལ་པོ་ཚིད་ཀི་ཡཱ་ནི་ཀལ་དི་པའི་ལག་ནས་ཐར་བར་མི་འགྱུར་ལ། པཱ་པེལ་ལོན་གྱི་རྒྱལ་པོའི་ལག་ཏུ་གཏོད་ངེས་ཏེ། པཱ་པེལ་ལོན་གྱི་རྒྱལ་པོ་དང་ཁ་རི་ཁ་ཐུག་གིས་གཏམ་སྨྲ་ཞིང་། ཕན་ཚུན་དངོས་སུ་མཐོང་བར་འགྱུར།
JER 32:5 པཱ་པེལ་ལོན་གྱི་རྒྱལ་པོས་ཚིད་ཀི་ཡཱ་ནི་པཱ་པེལ་ལོན་དུ་ཁྲིད་དེ། ངས་ཁོ་ལ་ལྟ་སྐྱོང་བྱེད་པའི་བར་དུ་ཚིད་ཀི་ཡཱ་ནི་དེ་རུ་འདུག་པར་འགྱུར། ཁྱོད་རྣམས་ཀལ་དི་པ་དང་འཐབ་ནའང་རྒྱལ་ཁ་མི་ལོན་ཞེས་པའོ་ཞེས་ལུང་སྟོན་པ་ཅི་ཡིན་ནམ་ཞེས་སྨྲས་སོ། །
JER 32:6 དེ་ནས་ཡེ་རེམ་ཡཱ་ན་རེ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།
JER 32:7 ལྟོས་ཤིག ཁྱོད་ཀྱི་ཁུ་བོ་ཤལ་ལུམ་གྱི་བུ་ཧ་ནམ་ཨེལ་ཁྱོད་ཀྱི་གམ་དུ་འོངས་ནས་ཁྱོད་ལ་འདི་ལྟར། ཨ་ན་ཐོད་དུ་ཡོད་པའི་ངའི་ཞིང་ས་དེ་ཁྱེད་ཀྱིས་ཉོས་ཤིག ཅི་ལ་ཞེ་ན། ཁྱེད་ལ་དེ་བླུ་བའི་དབང་དང་འགན་ཡོད་ཅེས་ཟེར་བར་འགྱུར་གསུངས་པ་ན།
JER 32:8 ངའི་ཁུ་བོའི་བུ་ཧ་ནམ་ཨེལ་ནི་ཏག་ཏག་དཀོན་མཆོག་ཡ་ཝཱེའི་བཀའ་བཞིན་དུ་སྐུ་སྲུང་གི་ཁྱམས་རར་ངའི་གམ་དུ་འོངས་ནས་ང་ལ་ན་རེ། པེན་ཡཱ་མེན་མངའ་ཁོངས་ཀྱི་ཨ་ན་ཐོད་དུ་ཡོད་པའི་ངའི་ཞིང་ས་དེ་ཁྱེད་ཀྱིས་ཉོ་བར་མཛོད། ཅི་ལ་ཞེ་ན། དེ་ནི་ཁྱེད་ཀྱིས་ཁུར་དུ་ལེན་འོས་པར་མ་ཟད་ཁྱེད་ལ་དེ་བླུ་བའི་དབང་དང་འགན་ཡོད་པ་ཡིན། ཁྱེད་ཀྱིས་དེ་ཉོ་བར་མཛོད་ཅེས་སྨྲས་པ་དང་། འདི་ནི་དཀོན་མཆོག་ཡ་ཝཱེའི་བཀའ་ལགས་པ་ངས་རྟོགས་སོ། །
JER 32:9 དེ་ནས་ངས་ཨ་ན་ཐོད་དུ་ཡོད་པའི་ཞིང་ས་དེ་རང་གི་ཁུ་བོའི་བུ་ཧ་ནམ་ཨེལ་ལས་ཉོས་ཏེ། དངུལ་སྲང་བརྒྱ་དང་དགུ་བཅུ་གོ་གསུམ་དེ་ལ་སྤྲད།
JER 32:10 ངས་ཆད་ཡིག་སྟེང་དུ་མིང་བཀོད་དེ་ཐེའུ་བརྒྱབས་ནས་ཁ་སྦྱར་བ་དང་། དཔང་མི་རྣམས་བོས་ནས་དངུལ་སྲང་ལ་ཚད་དེ་ཁོ་ལ་སྤྲད།
JER 32:11 ཡང་ངས་ཁྲིམས་དང་སྒྲིག་སྲོལ་ལྟར་བཞག་པའི་ཆད་ཡིག་སྟེ་ཐེའུ་བརྒྱབས་ཡོད་པ་དང་ཁ་སྦྱར་མེད་པ་གཉིས་ཀ་བླངས་ཏེ།
JER 32:12 ངའི་ཁུ་བོའི་བུ་ཧ་ནམ་ཨེལ་དང་མིང་བཀོད་དེ་དཔང་པོ་བྱེད་མཁན་རྣམས་དང་། སྐུ་སྲུང་གི་ཁྱམས་རར་བསྡད་ཡོད་པའི་ཡ་ཧུ་དཱ་པ་ཀུན་གྱི་མདུན་དུ། ཆད་ཡིག་ནི་མ་སེ་ཡཱའི་ཚ་བོ་སྟེ་ནེར་ཡཱའི་བུ་པཱ་རུག་ལ་སྤྲད་ཅིང་།
JER 32:13 ངས་མི་ཚོགས་ཀྱི་མདུན་དུ་པཱ་རུག་ལ་བཅོལ་གདམ་བྱས་ཏེ་འདི་ལྟར།
JER 32:14 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཀྱིས་ཐེའུ་བརྒྱབས་ཡོད་པ་དང་ཁ་སྦྱར་མེད་པའི་ཆད་ཡིག་འདི་གཉིས་ཁྱེར་ནས། ཡུན་རིང་པོར་ཉར་བའི་ཕྱིར་རྫ་བུམ་ནང་དུ་ཞོག་ཅིག་ཅེས་གསུངས་སོ། །
JER 32:15 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། མ་འོངས་པ་ན་ས་འདི་རུ་མི་ཡིས་ཡང་བསྐྱར་ཁང་པ་དང་ཞིང་ས། རྒུན་ཚལ་བཅས་ཉོ་བར་འགྱུར་ཞེས་གསུངས་པའོ། །
JER 32:16 དེ་ཡང་ངས་ནེར་ཡཱའི་བུ་པཱ་རུག་ལ་ཆད་ཡིག་དེ་སྤྲད་རྗེས། དཀོན་མཆོག་ཡ་ཝཱེ་ལ་སྨོན་ལམ་བཏབ་ནས་འདི་ལྟར།
JER 32:17 ཀྱི་ཧུད། གཙོ་བོ་ཡ་ཝཱེ་ལགས། གཟིགས་དང་། ཁྱེད་ཀྱིས་སྔར་ཉིད་ཀྱི་མཐུ་སྟོབས་ཆེན་པོ་དང་ཕྱི་རུ་བརྐྱངས་པའི་དཔུང་ངར་གྱིས་གནམ་ས་གཉིས་ཀ་བཀོད་པ་སྟེ། ཁྱེད་ལ་མི་འགྲུབ་བྱ་བ་གང་ཡང་མེད།
JER 32:18 ཁྱེད་ཀྱིས་མི་ཁྲི་མ་འབུམ་ལ་ཐུགས་བརྩེ་བས་གཟིགས་ཤིང་། ཕ་མེས་ཀྱི་སྡིག་པའི་ལས་འབྲས་ནི་དེའི་བུ་རྒྱུད་རྣམས་ཀྱི་སྟེང་ལ་འབབ་པར་མཛད་པ་དང་། ཁྱེད་ནི་མཐུ་སྟོབས་ཆེ་བའི་ཀུན་དབང་གི་དཀོན་མཆོག་ཡིན་ལ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁྱེད་ཀྱི་མཚན་ལགས་སོ། །
JER 32:19 ཁྱེད་ཀྱི་ཐུགས་བཀོད་རླབས་ཆེ་བ་དང་མཛད་པ་ནུས་མཐུ་དང་ལྡན་ཞིང་། མི་རེ་རེའི་སྤྱོད་པ་དང་དེས་སྤྱད་པའི་ལས་འབྲས་བཞིན་ལན་འཇལ་ཕྱིར། ཁྱེད་ཀྱི་སྤྱན་ཟུང་གིས་མི་བུ་ཀུན་གྱི་སྤྱོད་པ་ཐམས་ཅད་ལ་ཞིབ་ཅིང་ཕྲ་བར་གཟིགས་སོ། །
JER 32:20 ཁྱེད་ཀྱིས་ཨེ་ཅིབ་ཡུལ་དུ་གྲུབ་རྟགས་དང་དོན་ངོ་མཚར་ཅན་རྣམས་མངོན་པར་མཛད་ཅིང་། དེ་རིང་གི་བར་དུ་ཡེས་ར་ཨེལ་དང་ས་སྟེང་གི་མི་རྣམས་ཀྱི་ནང་དུའང་དེ་ལྟར་མཛད་ནས། དེ་རིང་གི་ཉིན་མོ་བཞིན་ཉིད་ཀྱི་མཚན་སྙན་གྲགས་རྒྱས་པར་མཛད་དོ། །
JER 32:21 ཁྱེད་ཀྱིས་གྲུབ་རྟགས་དང་དོན་ངོ་མཚར་ཅན་རྣམས་དང་ནུས་མཐུ་ལྡན་པའི་ཕྱག ཕྱི་རུ་བརྐྱངས་པའི་དཔུང་ངར་བཅས་དང་། རབ་ཏུ་ཆེ་ཞིང་འཇིགས་སུ་རུང་བའི་སྒོ་ནས་ཉིད་ཀྱི་མི་སྡེ་ཡེས་ར་ཨེལ་ནི་ཨེ་ཅིབ་ཡུལ་ནས་ཁྲིད་འོངས་པ་དང་།
JER 32:22 ཁྱེད་ཀྱིས་དེ་དག་གི་ཕ་མེས་རྣམས་ལ་གནང་བར་དབུ་མནའ་བཞེས་པའི་ཡུལ་ཏེ་འོ་མ་དང་སྦྲང་རྩི་བཞུར་བའི་ཡུལ་འདི་དེ་དག་ལ་གནང་བ་དང་།
JER 32:23 དེ་རྣམས་འོངས་ནས་ཡུལ་འདི་ས་སྐལ་དུ་ཐོབ་ཀྱང་། ཁྱེད་ཀྱི་གསུང་ལ་མ་མཉན་པ་དང་ཁྱེད་ཀྱི་བཀའ་ཁྲིམས་ཀྱང་མ་བསྲུངས་ལ། དེ་དག་གིས་ཁྱེད་ཀྱིས་བསྒོས་པའི་བཀའ་བཞིན་དུ་མ་སྤྱད་པའི་རྐྱེན་གྱིས། ཁྱེད་ཀྱིས་དེ་དག་གི་སྟེང་ལ་ཆག་སྒོ་འདི་ཐམས་ཅད་བྱུང་བར་མཛད།
JER 32:24 གཟིགས་དང་། དགྲ་རྣམས་འོངས་ཏེ་ས་རགས་བརྩིགས་ནས་གྲོང་ཁྱེར་འདི་ལེན་པར་རྩོམ་ཞིང་། གྲོང་ཁྱེར་འདི་ནི་རལ་གྲི་དང་མུ་གེ རིམས་ནད་བཅས་ཀྱི་དབང་གིས་འདི་ལེན་མཁན་ཀལ་དི་པ་རྣམས་ཀྱི་ལག་ཏུ་སྤྲད་པ་དང་། ཁྱེད་ཀྱིས་གསུངས་པ་ལྟར་འགྲུབ་ཅིང་ཁྱེད་ཀྱིས་དེ་གཟིགས་སོ། །
JER 32:25 ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ང་ལ་འདི་སྐད་དུ། དངུལ་གྱིས་རང་གི་དོན་དུ་ས་དེ་ཉོས་ལ། དཔང་པོ་བོས་ནས་བདེན་དཔང་བྱོས་ཤིག་ཅེས་གསུངས་ན་ཡང་། དོན་དངོས་སུ་གྲོང་ཁྱེར་འདི་ནི་ཀལ་དི་པའི་ལག་ཏུ་གཏད་ཟིན་ཏོ་ཞེས་ཞུས་སོ། །
JER 32:26 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 32:27 ལྟོས་ཤིག བདག་ནི་ཡ་ཝཱེ་ཡིན་ཏེ། ཤ་ཁྲག་ཡོད་པ་ཐམས་ཅད་ཀྱི་དཀོན་མཆོག་ཡིན་པས། བདག་ལ་མི་འགྲུབ་བྱ་བ་ཡོད་སྲིད་དམ།
JER 32:28 དཀོན་མཆོག་ཡ་ཝཱེས་འདི་སྐད་དུ། ངས་གྲོང་ཁྱེར་འདི་ནི་ཀལ་དི་པ་དང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏོད་པར་བྱ་སྟེ། ཁོས་དེ་ལེན་པར་འགྱུར།
JER 32:29 གྲོང་ཁྱེར་འདིའི་ཡུལ་མི་རྣམས་ཀྱིས་སྔར་ཁང་ཐོག་ཏུ་པཱ་ཨལ་ལ་སྤོས་བདུགས་པ་དང་། ལྷ་གཞན་རྣམས་ལ་སྐྱེམས་མཆོད་ཕུལ་ནས་ཁོ་བོར་ཁོང་ཁྲོ་བསླངས་པས། གྲོང་ཁྱེར་འདི་བཙན་འཛིན་བྱེད་པའི་ཀལ་དི་པ་རྣམས་འོངས་ཏེ། མེ་སྦར་ནས་གྲོང་ཁྱེར་འདི་དང་འདིའི་ཁང་པ་རྣམས་བསྲེག་པར་འགྱུར་རོ། །
JER 32:30 ཡེས་ར་ཨེལ་པ་དང་ཡ་ཧུ་དཱ་པ་རྣམས་ཀྱིས་གཞོན་དུས་ནས་བདག་གི་མིག་ལམ་དུ་ངན་པ་གང་ཡིན་དེ་ཁོ་ན་སྤྱད་ནས། ཡེས་ར་ཨེལ་པ་རྣམས་ཀྱིས་ལག་པས་གང་ཞིག་བཟོས་པ་ཡིས་ང་ལ་ཁོང་ཁྲོ་བསླངས་ཞེས་དཀོན་མཆོག་ཡ་ཝཱེས་འདི་སྐད་གསུངས།
JER 32:31 གྲོང་ཁྱེར་འདི་བཞེངས་པ་ནས་དེ་རིང་གི་ཉིན་མོའི་བར་དུ། དེ་དག་གིས་བདག་ལ་ཁོང་ཁྲོ་དང་ཞེ་སྡང་བསླངས་ཏེ། ངས་དེ་རང་གི་མཐོང་ལམ་ནས་མེད་པར་བཟོ་དགོས་པ་བྱུང་།
JER 32:32 དེ་ནི་དེ་དག་དང་དེ་དག་གི་རྒྱལ་པོ་དང་འགོ་དཔོན། མཆོད་དཔོན། ལུང་སྟོན་པ། དེ་མིན་ཡ་ཧུ་དཱ་པ་རྣམས་དང་ཡེ་རུ་སཱ་ལེམ་གྱི་ཡུལ་མི་བཅས་ཀྱིས་གང་ཞིག་སྤྱད་པ་དང་། ཡེས་ར་ཨེལ་པ་དང་ཡ་ཧུ་དཱ་པ་རྣམས་ཀྱི་སྡིག་སྤྱོད་ཐམས་ཅད་ཀྱིས་བདག་ལ་ཁོང་ཁྲོ་བསླངས་པའི་ཕྱིར་ཡིན་ནོ། །
JER 32:33 དེ་དག་གིས་ང་ལ་རྒྱབ་གཏད་ནས་ངའི་ཕྱོགས་སུ་མ་འཁོར། ངས་དེ་དག་ལ་བསླབ་བྱ་ཡང་ཡང་བཏང་ནའང་དེ་དག་གིས་གདམས་ངག་ཁུར་དུ་ལེན་པར་རྣ་བ་མ་གཏད་པའི་ཁར།
JER 32:34 ཞེན་ཁ་ལོག་པའི་སྐུ་འདྲ་རྣམས་ངའི་མིང་གིས་འབོད་པའི་མཆོད་ཁང་དུ་བཞག་སྟེ་མཆོད་ཁང་འདི་བཙོག་པར་བཟོས་སོ། །
JER 32:35 རང་གི་བུ་དང་བུ་མོ་རྣམས་མོ་ལེག་ལ་མེ་མཆོད་གཏོང་བའི་ཕྱིར་དུ། དེ་དག་གིས་པེན་ཧིན་ནོམ་ལུང་པ་རུ་པཱ་ཨལ་གྱི་མཐོ་གླིང་རྣམས་བརྩིགས་པ་དང་། ངན་པ་འདི་རྣམས་སྤྱད་དེ་ཡ་ཧུ་དཱ་ཡང་ཉེས་སྡིག་གི་ནང་དུ་ལྷུང་བར་བྱས། འདི་ནི་ངས་བསྒོས་པ་མ་ཡིན་ལ། ངའི་ཡིད་ལའང་གཏན་ནས་ཤར་མ་མྱོང་ངོ་། །
JER 32:36 ཁྱོད་ཅག་གིས་གླེང་བའི་རལ་གྲི་དང་མུ་གེ རིམས་ནད་བཅས་ཀྱི་དབང་གིས་པཱ་པེལ་ལོན་གྱི་རྒྱལ་པོའི་ལག་ཏུ་གཏད་པའི་གྲོང་ཁྱེར་འདིའི་སྐོར་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ།
JER 32:37 ལྟོས་ཤིག དེ་སྔ་ངས་ཁོང་ཁྲོ་དང་ཁྲོ་གཏུམ། ཞེ་སྡང་ཚ་པོ་བཅས་ཀྱི་ནང་དུ་ཡེས་ར་ཨེལ་པ་རྣམས་ཡུལ་ཕྱོགས་སོ་སོར་བསྐྲད་པ་དང་། མ་འོངས་པ་ན་ངས་ཡུལ་དེ་དག་ནས་དེ་རྣམས་བསྡུས་ཏེ་སླར་ཡང་གནས་འདིར་དྲངས་ནས་བདེ་བར་གནས་སུ་འཇུག་གོ །
JER 32:38 དེ་དག་ངའི་འབངས་མི་དང་ང་དེ་རྣམས་ཀྱི་དཀོན་མཆོག་ཏུ་གྱུར་ནས།
JER 32:39 དེ་དག་མི་ཚེ་གང་པོར་ང་ལ་གུས་ཤིང་འཇིགས་པ་དང་། ཁོ་རྣམས་དང་ཁོ་ཚོའི་བུ་རབས་ཚ་རྒྱུད་རྣམས་ལ་བདེ་སྐྱིད་འཐོབ་པའི་ཕྱིར་དུ། ངས་དེ་དག་ལ་སེམས་པ་གཅིག་མཐུན་དང་སྤྱོད་ལམ་གཅིག་མཚུངས་ཡོད་པར་བྱེད་དོ། །
JER 32:40 ངས་དེ་དག་ལ་དུས་གཏན་གྱི་ཞལ་ཆད་བཞག་ནས་ཁོ་རྣམས་དང་མི་འབྲལ་ཞིང་ཁོ་ཚོར་བྱིན་རླབས་གནང་བ་དང་། ཡང་ང་ལ་གུས་ཤིང་འཇིགས་པའི་སེམས་ནི་དེ་དག་གི་ནང་དུ་བཞག་སྟེ། དེ་དག་ང་དང་འབྲལ་བར་མི་བྱའོ། །
JER 32:41 ངས་ནི་དེ་དག་ལ་དགའ་བཞིན་དུ་བྱིན་རླབས་གནང་ཞིང་། བློ་གཅིག་སེམས་གཅིག་གིས་དངོས་གནས་དེ་རྣམས་གནས་འདི་རུ་འཛུགས་པར་འགྱུར།
JER 32:42 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ངས་ཇི་ལྟར་མི་འདི་རྣམས་ཀྱི་སྟེང་དུ་ཆག་སྒོ་འདི་ཐམས་ཅད་དྲངས་པ་ཡིན་ན། ངས་དེ་དག་ལ་ཁས་བླངས་པའི་བདེ་སྐྱིད་ཐམས་ཅད་ཀྱང་དེ་ལྟར་འདྲེན་པར་བྱ་སྟེ།
JER 32:43 ཁྱོད་ཅག་གིས་འདི་ནི་ཀལ་དི་པ་རྣམས་ཀྱི་ལག་པར་གཏད་ཅིང་། མི་ཕྱུགས་གང་ཡང་མེད་པའི་ས་སྟོང་ཡིན་ཞེས་ཟེར་མོད། འོན་ཀྱང་མ་འོངས་པ་ན་ཡུལ་འདིའི་ཞིང་ས་རྣམས་ཉོ་ཚོང་བྱེད་པར་འགྱུར་ཏེ།
JER 32:44 པེན་ཡཱ་མེན་གྱི་ཡུལ་དང་། ཡེ་རུ་སཱ་ལེམ་མཐའ་འཁོར་གྱི་ཡུལ་རྣམས། ཡ་ཧུ་དཱའི་གྲོང་ཁྱེར་རྣམས། རི་ཁུལ་གྱི་གྲོང་ཁྱེར་རྣམས། རི་ཀླུང་གི་གྲོང་ཁྱེར་རྣམས། ནེ་གུབ་ཡུལ་གྱི་གྲོང་ཁྱེར་རྣམས་སུ་མི་ཡིས་དངུལ་སྤྲད་ནས་ཞིང་ས་ཉོ་བར་འགྱུར་ལ། ཆད་ཡིག་བྲིས་ནས་ཐེའུ་བརྒྱབས་ཏེ་ཁ་སྦྱོར་བ་དང་། དཔང་པོ་བཙལ་ནས་བདེན་དཔང་བྱེད་པར་འགྱུར་རོ། །ཅི་ལ་ཞེ་ན། ངས་བཙོན་དུ་ཁྲིད་པའི་མི་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 33:1 ཡེ་རེམ་ཡཱ་ད་དུང་སྐུ་སྲུང་གི་ཁྱམས་རའི་ནང་བཙོན་དུ་ཡོད་པའི་ཚེ། དཀོན་མཆོག་ཡ་ཝཱེའི་བཀའ་ནི་ཐེངས་གཉིས་པར་ཁོང་ལ་བྱུང་བ་འདི་ལྟ་སྟེ།
JER 33:2 ས་གཞི་བཀོད་ནས་དབྱིབས་བཏོད་ཅིང་དེ་བརྟན་པོར་འཛུགས་མཁན་ནི་དཀོན་མཆོག་ཡ་ཝཱེ་ཡིན་ལ། མཚན་ལ་དཀོན་མཆོག་ཡ་ཝཱེ་ཞེས་བྱ་བ་ཁོང་གིས་འདི་སྐད་དུ།
JER 33:3 ཁྱོད་ཀྱིས་ང་ལ་ཞུས་ན། ངས་ཁྱོད་ལ་བཀའ་ལན་གནང་ཞིང་། ཁྱོད་ཀྱིས་མི་རྟོགས་པའི་གསང་བ་ཆེན་པོ་རྣམས་ཁྱོད་ལ་སྟོན་པར་བྱའོ་ཞེས་གསུངས་སོ། །
JER 33:4 ཡང་གྲོང་ཁྱེར་འདིའི་ནང་གི་ཁང་པ་དང་ཡ་ཧུ་དཱ་རྒྱལ་པོའི་ཕོ་བྲང་སྟེ། གྲོང་ཁྱེར་བསྐོར་བའི་ས་རགས་དང་རལ་གྲི་འགོག་པའི་ཆེད་དུ་བཤིག་པ་དེའི་སྐོར་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ།
JER 33:5 གྲོང་ཁྱེར་འདིའི་ཡུལ་མི་རྣམས་ཕྱི་རོལ་ཏུ་སོང་ནས་ཀལ་དི་པ་དང་འཐབ་པའི་དུས་སུ། ངས་ཁོང་ཁྲོ་དང་ཞེ་སྡང་གིས་བཀུམ་པའི་བེམ་པོ་ཡིས་ཁང་པའི་ནང་བཀང་ངེས་ཡིན་ཏེ། དེ་དག་གི་སྡིག་སྤྱོད་ཀུན་གྱི་ཕྱིར་ང་ཕར་འཁོར་ནས་གྲོང་ཁྱེར་འདི་ལ་མི་བལྟའོ། །
JER 33:6 ལྟོས་ཤིག ངས་གྲོང་ཁྱེར་འདིའི་རྨ་ཁ་གསོས་ནས་ཡུལ་མི་རྣམས་དྲག་པར་བྱེད་ཅིང་། ཞི་བདེ་དང་ལྷོད་འཇགས་བསམ་གྱིས་མི་ཁྱབ་པ་དེ་རྣམས་ལ་མངོན་པར་བྱེད་དོ། །
JER 33:7 ངས་ཡ་ཧུ་དཱའི་བཙོན་པ་དང་ཡེས་ར་ཨེལ་གྱི་བཙོན་པ་རྣམས་ཕྱིར་ལོག་ཏུ་བཅུག་ནས། ཐོག་མའི་དུས་ལྟར་དེ་རྣམས་འཛུགས་པར་བྱའོ། །
JER 33:8 དེ་དག་གིས་ང་ལ་བྱས་པའི་སྡིག་པ་ཐམས་ཅད་འདག་པར་བྱས་ནས། དེ་དག་གིས་ང་ལ་བྱས་པའི་ཉེས་པ་དང་། ང་དང་རྒྱབ་འགལ་དུ་སོང་བའི་སྡིག་པ་རྣམས་སེལ་བར་བྱའོ། །
JER 33:9 གྲོང་ཁྱེར་འདི་ཡིས་ས་སྟེང་གི་མི་རིགས་ཀུན་གྱི་མདུན་དུ་ང་ལ་དགའ་སྤྲོའི་མཚན་སྙན་དང་བསྟོད་པ། གཟི་བརྗིད་བཅས་འཐོབ་པར་བྱའོ། །ཅི་ལ་ཞེ་ན། མི་རིགས་ཐམས་ཅད་ཀྱིས་ངས་གྲོང་ཁྱེར་འདིའི་ཡུལ་མི་རྣམས་ལ་གནང་བའི་བདེ་སྐྱིད་ཐོས་པར་འགྱུར། ཡང་དེ་དག་ནི་ངས་གྲོང་ཁྱེར་འདི་ལ་གནང་བའི་བདེ་སྐྱིད་དང་ཞི་བདེ་ཀུན་གྱི་རྐྱེན་གྱིས་འཇིགས་ཤིང་འདར་བར་འགྱུར་རོ་ཞེས་གསུངས།
JER 33:10 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་ཡུལ་འདི་ལ་མི་ཕྱུགས་གང་ཡང་མེད་པའི་ས་སྟོང་ཞེས་ཟེར་ཡང་། དབེན་སྟོང་དུ་ལུས་ཤིང་མི་མེད་པ་དང་། ཐ་ན་དུད་འགྲོའང་མེད་པའི་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་རྣམས་སུ།
JER 33:11 ཡང་བསྐྱར་དགའ་ཞིང་སྤྲོ་བའི་སྐད་སྒྲ་དང་། མག་གསར་དང་བག་མའི་སྐད། ད་དུང་གཏང་རག་གི་མཆོད་པ་ཁྱེར་ནས་དཀོན་མཆོག་ཡ་ཝཱེའི་མཆོད་ཁང་དུ་སླེབས་པ་རྣམས་ཀྱི་སྐད་དེ། ཁྱོད་རྣམས་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་བཀའ་དྲིན་ཞུས་ཤིག ཅི་ལ་ཞེ་ན། ཁོང་ནི་གཞི་ནས་ལེགས་ཤིང་ཁོང་གི་བྱམས་བརྩེ་རྒྱུན་ནས་རྒྱུན་དུ་གནས་ཞེས་ཟེར་བ་ཐོས་ཡོང་སྟེ། ངས་ཡུལ་འདི་ལས་བཙོན་དུ་ཁྲིད་པ་རྣམས་སྔར་བཞིན་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 33:12 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མི་ཕྱུགས་གང་ཡང་མེད་པའི་ས་སྟོང་འདི་དང་། ཡུལ་འདིའི་གྲོང་ཁྱེར་ཀུན་ཏུ་རྫི་བོ་རྣམས་ཀྱིས་ཡང་བསྐྱར་རང་གི་ལུག་ཁྱུ་འཚོ་བར་འགྱུར་ཞིང་།
JER 33:13 རི་ཁུལ་དང་རི་ཀླུང་། ནེ་གུབ་ཡུལ་བཅས་ཀྱི་གྲོང་ཁྱེར་དང་། པེན་ཡཱ་མེན་གྱི་ཡུལ་ཁམས། ཡེ་རུ་སཱ་ལེམ་མཐའ་འཁོར་གྱི་ཡུལ་རྣམས། ཡ་ཧུ་དཱའི་གྲོང་ཁྱེར་རྣམས་སུ་ལུག་ཁྱུ་རྣམས་ཁ་གྲངས་རྩི་མཁན་གྱི་ལག་འོག་ནས་རྒྱུ་བར་འགྱུར་རོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 33:14 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་རྣམས་ལ་བྱིན་རླབས་གནང་བའི་ཁས་ལེན་བཟང་པོ་དག་བསྒྲུབ་པར་བྱའོ། །
JER 33:15 ཉིན་དེ་དག་དང་དུས་དེ་ལ་དཱ་བིད་ཀྱི་རྒྱུད་ནས་མྱུ་གུ་དྲང་བདེན་བསྐྱེད་པར་བྱ་སྟེ། དེས་ས་སྟེང་དུ་དྲང་གཞག་དང་དྲང་བདེན་སྤྱོད་པར་འགྱུར།
JER 33:16 དེའི་དུས་སུ་ཡ་ཧུ་དཱ་ནི་ཐར་བར་འགྱུར་ཞིང་ཡེ་རུ་སཱ་ལེམ་བདེ་བར་གནས་པ་དང་། གྲོང་ཁྱེར་འདིའི་མིང་ལ་དཀོན་མཆོག་ཡ་ཝཱེ་ངེད་ཀྱི་དྲང་བདེན་ལགས་ཞེས་འབོད་དོ། །
JER 33:17 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། དཱ་བིད་ཀྱི་ཁྱིམ་རྒྱུད་ལས་ནམ་ཡིན་ཡང་ཡེས་ར་ཨེལ་ཁྱིམ་རྒྱུད་ཀྱི་རྒྱལ་ཁྲིར་བཞུགས་མཁན་རྒྱུན་མི་ཆད་ལ།
JER 33:18 མཆོད་དཔོན་ལེ་ཝི་པ་རྣམས་ལས་ཀྱང་ངའི་མདུན་དུ་སྦྱིན་སྲེག་དང་འབྲུ་རིགས་ཀྱི་མཆོད་པ། དུས་རྒྱུན་གྱི་མཆོད་པ་རྣམས་འབུལ་མཁན་རྒྱུན་མི་ཆད་ཅེས་གསུངས་སོ། །
JER 33:19 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 33:20 དཀོན་མཆོག་ཡ་ཝཱེས་འདི་སྐད་དུ། གལ་ཏེ་ཁྱོད་ཅག་གིས་ཉིན་མཚན་དུས་ལྟར་མི་འཁོར་བར། ངས་ཉིན་མཚན་གཉིས་ཀྱི་བར་དུ་བཞག་པའི་ཞལ་ཆད་དེ་འདོར་ནུས་པ་ཡིན་ན།
JER 33:21 དེ་ནས་ངས་རང་གི་ཞབས་ཕྱི་དཱ་བིད་ལ་བཞག་པའི་ཞལ་ཆད་ཀྱང་འདོར་ནུས་ལ། དེའི་བུ་རྒྱུད་ལས་རྒྱལ་པོའི་སྲིད་ཁྲི་ལ་བཞུགས་མཁན་མེད་པ་དང་། ཡང་ངས་བདག་ལ་ཞབས་ཏོག་སྒྲུབ་པའི་ལེ་ཝི་ཚོ་པའི་མཆོད་དཔོན་རྣམས་ལ་བཞག་པའི་ཞལ་ཆད་ཀྱང་འདོར་ནུས་པ་ཡིན།
JER 33:22 ནམ་མཁའི་ཚོགས་རྣམས་བགྲང་གིས་མི་ལང་བ་དང་རྒྱ་མཚོའི་འགྲམ་གྱི་བྱེ་མ་འཇལ་མི་ནུས་པ་ལྟར། ངས་རང་གི་ཞབས་ཕྱི་དཱ་བིད་ཀྱི་བུ་རྒྱུད་དང་ང་ལ་ཞབས་ཏོག་སྒྲུབ་པའི་ལེ་ཝི་པ་རྣམས་འཕེལ་བར་བྱའོ་ཞེས་གསུངས།
JER 33:23 ཡང་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 33:24 མི་འདི་དག་གིས་ཅི་ཟེར་བ་ཁྱོད་ཀྱིས་མི་ཐོས་སམ། དེ་དག་གིས་དཀོན་མཆོག་ཡ་ཝཱེས་བདམས་པའི་ཁྱིམ་རྒྱུད་གཉིས་པོ་ནི་ཁོང་གིས་སྤངས་སོ་ཞེས་ཟེར་ཞིང་། དེ་དག་གིས་དེ་ལྟར་ངའི་མི་སྡེ་ལ་མཐོང་ཆུང་བྱས་ནས། དེ་གཉིས་ཀ་རྒྱལ་ཕྲན་ཞིག་ཏུ་མི་བརྩིའོ་ཞེས་གསུངས།
JER 33:25 དཀོན་མཆོག་ཡ་ཝཱེས་འདི་སྐད་དུ། ངས་ཉིན་དཀར་དང་མཚན་མོའི་ཞལ་ཆད་མ་བཞག་པ་དང་། གནམ་སའི་སྲོལ་མ་བཀོད་པ་ཡིན་ན།
JER 33:26 དེ་ནས་ངས་ཡ་ཀོབ་ཀྱི་བུ་རྒྱུད་དང་བདག་གི་ཞབས་ཕྱི་དཱ་བིད་ཀྱི་བུ་རྒྱུད་རྣམས་དོར་ནས། དཱ་བིད་ཀྱི་བུ་རྒྱུད་ལས་མི་བདམས་ཏེ་ཨབ་ར་ཧམ་དང་ཨི་སཱག ཡ་ཀོབ་བཅས་ཀྱི་བུ་རྒྱུད་ལ་དབང་སྒྱུར་བར་མི་བྱའོ། །ངས་དེ་དག་ལས་བཙོན་དུ་ཁྲིད་པ་རྣམས་ཕྱིར་ལོག་ཏུ་བཅུག་ནས། དེ་དག་ལ་སྙིང་རྗེ་བསྐྱེད་པར་བྱའོ་ཞེས་གསུངས་སོ། །
JER 34:1 དེ་ཡང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཁོའི་དམག་དཔུང་ཐམས་ཅད་དང་། མངའ་འོག་ཏུ་ཡོད་པའི་ས་སྟེང་གི་རྒྱལ་ཕྲན་དང་མི་རིགས་ཐམས་ཅད་ཁྲིད་དེ། ཡེ་རུ་སཱ་ལེམ་དང་དེའི་མཐའ་འཁོར་གྱི་གྲོང་ཁྱེར་ཡོངས་རྫོགས་ལ་རྒོལ་བའི་ཚེ། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 34:2 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་སོང་ནས་ཡ་ཧུ་དཱའི་རྒྱལ་པོ་ཚིད་ཀི་ཡཱ་ལ་ཤོད་ཅིག དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་གྲོང་ཁྱེར་འདི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་དེ། དེས་གྲོང་ཁྱེར་འདི་མེ་ཡིས་བསྲེག་པར་འགྱུར་ཞིང་།
JER 34:3 ཁྱོད་ཀྱང་དེའི་ལག་ནས་ཐར་མི་ཐུབ་ལ་བཟུང་ནས་དེའི་ལག་ཏུ་གཏོད་ངེས་ཡིན། ཁྱོད་ཀྱིས་དངོས་སུ་པཱ་པེལ་ལོན་གྱི་རྒྱལ་པོ་མཐོང་ཞིང་། དེས་དངོས་སུ་ཁྱོད་ལ་གཏམ་སྨྲ་བར་འགྱུར་ལ། ཁྱོད་ཀྱང་པཱ་པེལ་ལོན་དུ་འགྲོ་ངེས་ཡིན་ཞེས་གསུངས་ཞེས་པའོ། །
JER 34:4 ཀྱེ་ཡ་ཧུ་དཱའི་རྒྱལ་པོ་ཚིད་ཀི་ཡཱ་ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག དཀོན་མཆོག་ཡ་ཝཱེས་ཁྱོད་ཀྱི་སྐོར་ལ་འདི་སྐད་དུ། ཁྱོད་ནི་རལ་གྲིའི་འོག་ཏུ་མི་འཆི་བར།
JER 34:5 བདེ་བར་ཚེ་ལས་འདས་ཏེ། མི་རྣམས་ཀྱིས་ཇི་ལྟར་ཁྱོད་ཀྱི་མེས་པོ་སྟེ་རྒྱལ་པོ་སྔ་རབས་རྣམས་ལ་སྤོས་བདུགས་པ་བཞིན་ཁྱོད་ལའང་དེ་ལྟར་སྤོས་བདུག་ཅིང་། ཀྱི་ཧུད་ཇོ་བོ་ལགས་ཞེས་ཟེར་ཞིང་ཁྱོད་ཀྱི་དོན་དུ་མྱ་ངན་ཞུ་བར་འགྱུར་ཞེས་བདག་གིས་སྨྲའོ་ཞེས་གསུངས་སོ། །
JER 34:6 དེ་ནས་ལུང་སྟོན་པ་ཡེ་རེམ་ཡཱ་ཡིས་ཡེ་རུ་སཱ་ལེམ་དུ་གཏམ་འདི་རྣམས་ཡ་ཧུ་དཱའི་རྒྱལ་པོ་ཚིད་ཀི་ཡཱ་ལ་སྨྲས་པའོ། །
JER 34:7 དུས་དེར་པཱ་པེལ་ལོན་རྒྱལ་པོའི་དམག་དཔུང་གིས་ཡེ་རུ་སཱ་ལེམ་དང་ཡ་ཧུ་དཱ་ནས་ལུས་པའི་གྲོང་ཁྱེར་ཏེ་ལཱ་ཀི་སི་དང་ཨ་ཟེ་ཀཱ་གཉིས་ཀར་དམག་བརྒྱབ་བོ། །ཅི་ལ་ཞེ་ན། ཡ་ཧུ་དཱའི་གྲོང་ཁྱེར་རྣམས་ལས་མཁར་བརྟན་པོ་ལུས་པ་འདི་གཉིས་སོ། །
JER 34:8 དེ་ཡང་རྒྱལ་པོ་ཚིད་ཀི་ཡཱ་ཡིས་ཡེ་རུ་སཱ་ལེམ་གྱི་མི་རྣམས་དང་ཁ་ཆད་བཞག་ནས་བྲན་པོ་རྣམས་ལ་རང་དབང་སྟེར་དགོས་པར་བསྒྲགས་ཤིང་། དེ་ནས་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བའོ། །
JER 34:9 མི་རེ་རེས་རང་རང་གི་ཨིབ་རི་པའི་གཡོག་པོ་དང་གཡོག་མོ་རྣམས་གཏོང་དགོས་པ་དང་། སུས་ཀྱང་རང་གི་ཡ་ཧུ་དཱའི་སྤུན་མཆེད་གཡོག་པོར་བྱེད་མི་རུང་བར་བྱས།
JER 34:10 ཁ་ཆད་བཞག་པའི་འགོ་དཔོན་དང་མི་ཐམས་ཅད་རང་གི་གཡོག་པོ་དང་གཡོག་མོ་རྣམས་གཏོང་བར་ཡིད་འཐད་པ་དང་། དེ་རྣམས་ཡང་བསྐྱར་བྲན་གཡོག་བྱེད་དུ་མ་བཅུག་གོ །ཁོ་ཚོ་ཚང་མ་དེར་ཡིད་འཐད་པར་མ་ཟད་གཡོག་པོ་གཡོག་མོ་རྣམས་ལ་རང་དབང་སྤྲད་པ་རེད།
JER 34:11 ཡིན་ནའང་རྗེས་སུ་དེ་རྣམས་བློ་འགྱོད་སྐྱེས་ནས། རང་དབང་སྤྲད་ནས་བཏང་བའི་གཡོག་པོ་གཡོག་མོ་རྣམས་ཕྱིར་བོས་ནས་དེ་དག་བྲན་གཡོག་བྱེད་དུ་བཙན་བཙུགས་སོ། །
JER 34:12 དེ་ནས་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 34:13 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། དེ་ཡང་ངས་ཁྱོད་ཅག་གི་ཕ་མེས་རྣམས་བྲན་དུ་བཀོལ་བའི་ཨེ་ཅིབ་ཡུལ་ནས་ཕྱི་རུ་ཁྲིད་འོང་དུས། དེ་དག་དང་ཞལ་ཆད་བཞག་ནས་འདི་ལྟར།
JER 34:14 གལ་ཏེ་ཨིབ་རི་པའི་སྤུན་ཞིག་ཁྱོད་ལ་བཙོངས་ནས་ལོ་དྲུག་གི་རིང་དུ་ཁྱོད་ལ་ཞབས་ཕྱི་བསྒྲུབས་པ་ཡིན་ན། ལོ་བདུན་པར་ཁྱོད་རྣམས་མི་རེ་རེས་དེར་རང་དབང་སྤྲད་ནས་ཕྱིར་གཏོང་དགོས་ཞེས་བསྒོས་ཀྱང་། ཁྱོད་ཅག་གི་མེས་པོ་རྣམས་ཀྱིས་བདག་ལ་མ་མཉན་པ་དང་དོ་སྣང་ཙམ་ཡང་མེད་དོ། །
JER 34:15 ད་ལྟ་ཁྱོད་རྣམས་ཀྱིས་འགྱོད་བཤགས་བྱས་ཏེ་ངའི་མིག་ལམ་དུ་ལེགས་པོ་གང་ཡིན་དེ་སྤྱད་ནས། མི་རེ་རེས་རང་གི་སྤུན་ཟླར་རང་དབང་བསྒྲགས་པ་དང་། ངའི་མིང་གིས་འབོད་པའི་མཆོད་ཁང་ནང་དུ་ངའི་མདུན་ནས་ཁ་ཆད་བཞག་མོད་ཀྱང་།
JER 34:16 ཁྱོད་རྣམས་བློ་འགྱོད་དེ་ངའི་མིང་ཁྱད་དུ་བསད་ནས། མི་རེ་རེས་རང་རང་གི་རང་དབང་སྤྲད་ནས་འགྲོ་རུ་བཅུག་པའི་གཡོག་པོ་གཡོག་མོ་རྣམས་ཕྱིར་ལོག་ཏུ་བཅུག་ནས་དེ་དག་བྲན་གཡོག་བྱེད་དུ་བཙན་བཙུགས་སོ། །
JER 34:17 དེ་བས་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་ང་ལ་མཉན་ནས་རེ་རེས་རང་གི་སྤུན་ཟླ་དང་ཁྱིམ་མཚེས་ལ་རང་དབང་མི་བསྒྲག་པས། ལྟོས་ཤིག ངས་ད་ལྟ་ཁྱོད་ཅག་ལ་རང་དབང་སྒྲོག་ཅིང་། ཁྱོད་རྣམས་ནི་རལ་གྲི་དང་མུ་གེ རིམས་ནད་བཅས་ལ་གཏད་དེ། ས་སྟེང་གི་རྒྱལ་ཕྲན་ཐམས་ཅད་ཁྱོད་ཅག་ལ་འཇིགས་པར་འགྱུར་རོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 34:18 ངའི་ཞལ་ཆད་དང་འགལ་བའི་མི་རྣམས་ངས་སྤྲོད་པར་བྱ་སྟེ། དེ་དག་གིས་ངའི་མདུན་དུ་བ་ཕྲུག་དུམ་བུ་གཉིས་སུ་གཤགས་ ཤིང་དུམ་བུ་དེ་གཉིས་ཀྱི་བར་ནས་རྒྱུ་དུས་སུ་ཞལ་ཆད་བཞག་ནས་བསྐྱལ་བའི་མནའ་ཚིག་མ་བསྲུངས་སོ། །
JER 34:19 ཁོ་རྣམས་ནི་བ་ཕྲུག་དུམ་བུ་གཉིས་སུ་གཤགས་པའི་བར་ནས་རྒྱུ་མཁན་ཡ་ཧུ་དཱའི་འགོ་དཔོན་དང་ཡེ་རུ་སཱ་ལེམ་གྱི་འགོ་དཔོན། ཕོ་བྲང་ནང་གི་འཁོར་གཡོག མཆོད་དཔོན། དེ་མིན་ཡུལ་དེའི་མི་སྡེ་ཐམས་ཅད་དོ། །
JER 34:20 ངས་དེ་དག་ནི་ཕ་རོལ་དགྲ་བོའི་ལག་དང་ཁོ་ཚོའི་སྲོག་སྙེག་མཁན་རྣམས་ཀྱི་ལག་པར་གཏད་ནས། དེ་དག་གི་བམ་རོ་ནི་ནམ་མཁའི་བྱ་དང་ས་སྟེང་གི་གཅན་གཟན་གྱི་ཟས་སུ་འགྱུར་རོ། །
JER 34:21 ཡང་ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དེའི་འགོ་དཔོན་རྣམས་ཀྱང་དགྲ་བོའི་ལག་དང་ཁོ་ཚོའི་སྲོག་སྙེག་མཁན་གྱི་ལག་དང་། རེ་ཞིག་ཁྱོད་རྣམས་དང་བྲལ་བའི་པཱ་པེལ་ལོན་རྒྱལ་པོའི་དམག་དཔུང་གི་ལག་ཏུ་གཏོད་པར་བྱའོ། །
JER 34:22 ལྟོས་ཤིག ངས་དེ་དག་ལ་བཀའ་བཀོད་ནས་སླར་ཡང་གྲོང་ཁྱེར་འདིར་དྲངས་ཏེ། གྲོང་ཁྱེར་འདི་ལ་འཐབ་ནས་བླངས་ཏེ་མེས་བསྲེག་པར་འགྱུར་ལ། ཡང་ངས་ཡ་ཧུ་དཱའི་གྲོང་ཁྱེར་རྣམས་ནི་ས་སྟོང་ལུང་སྟོང་དུ་འགྱུར་བར་བྱས་ནས། སྡོད་མཁན་མི་གཅིག་ཀྱང་མེད་པར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །
JER 35:1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་བྱ་བ་ཡ་ཧུ་དཱའི་རྒྱལ་པོ་བྱེད་པའི་དུས་སུ་དཀོན་མཆོག་ཡ་ཝཱེའི་བཀའ་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 35:2 ཁྱོད་རེ་ཁབ་པའི་ཁྱིམ་རྒྱུད་ཀྱི་གམ་དུ་སོང་ནས་དེ་རྣམས་ལ་གླེང་མོལ་བྱས་ཏེ། དཀོན་མཆོག་ཡ་ཝཱེའི་མཆོད་ཁང་གི་ནང་མིག་རྣམས་ལས་གཅིག་གི་ནང་དུ་ཁྲིད་ནས། དེ་དག་ལ་རྒུན་ཆང་འདྲེན་པར་གྱིས་ཞེས་གསུངས་པ་ལ།
JER 35:3 ངས་ཧ་བ་ཟིན་ཡཱའི་ཚ་བོ་སྟེ་ཡེ་རེམ་ཡཱའི་བུ་ཡ་ཨ་ཟན་ཡཱ་དང་དེའི་སྤུན་མཆེད་རྣམས། དེའི་བུ་ཐམས་ཅད། རེ་ཁབ་པའི་ཁྱིམ་རྒྱུད་ཐམས་ཅད་ཁྲིད་ནས།
JER 35:4 དཀོན་མཆོག་ཡ་ཝཱེའི་མཆོད་ཁང་དུ་ཨིག་དལ་ཡཱའི་བུ་སྟེ་དཀོན་མཆོག་གི་སྐྱེས་བུ་ཧ་ནན་གྱི་བུ་རྣམས་ཀྱི་ཁང་པར་དྲངས་ཏེ། ཁང་པ་དེ་ནི་འགོ་དཔོན་རྣམས་ཀྱི་ཁང་པ་དང་ཉེ་ཞིང་། ཤལ་ལུམ་གྱི་བུ་སྟེ་མཆོད་ཁང་གི་སྒོ་སྲུང་མཁན་མ་ཨ་སེ་ཡཱ་བྱ་བའི་ཁང་པའི་སྟེང་དུ་ཡོད།
JER 35:5 དེ་ནས་ངས་རྒུན་ཆང་གིས་བཀང་བའི་བུམ་པ་དང་ཕོར་པ་རྣམས་རེ་ཁབ་པ་རྣམས་ཀྱི་མདུན་དུ་བཤམས་ནས་དེ་དག་ལ། རྒུན་ཆང་བཞེས་རོགས་ཞེས་སྨྲས་ན་ཡང་།
JER 35:6 དེ་རྣམས་ཀྱིས་ངེད་ཅག་གི་མེས་པོ་རེ་ཁབ་ཀྱི་བུ་ཡོ་ན་དབ་ཀྱིས་ངེད་རྣམས་ལ་བཀའ་བཀོད་ཅིང་། ཁྱོད་ཅག་དང་ཁྱོད་ཅག་གི་བུ་རབས་ཚ་རྒྱུད་རྣམས་ཀྱིས་དུས་ནམ་ཡིན་ཡང་རྒུན་ཆང་མི་འཐུང་བ་དང་།
JER 35:7 ཁང་པ་མ་བརྩིག ས་བོན་ཡང་མ་འདེབས། རྒུན་འབྲུམ་ར་བ་ཡང་མ་འཛུགས་ལ་དེ་རང་ལ་ཡོད་ཀྱང་མི་རུང་བར། ཚེ་གང་པོར་གུར་དུ་བསྡད་ནས་ཁྱོད་ཅག་བྱེས་སུ་སྡོད་པའི་ས་སྟེང་དུ་ཚེ་ཐག་རིང་བར་གྱིས་ཤིག་ཅེས་གསུངས་ལ།
JER 35:8 ངེད་ཅག་གི་མེས་པོ་རེ་ཁབ་ཀྱི་བུ་ཡོ་ན་དབ་ཀྱིས་བསྒོས་པའི་བཀའ་རྣམས་ང་ཚོས་ཐམས་ཅད་བསྲུངས་ཏེ། ངེད་ཅག་དང་ངེད་ཅག་གི་ཆུང་མ་དང་བུ་དང་བུ་མོ་རྣམས་ཀྱིས་མི་ཚེ་གང་པོར་རྒུན་ཆང་མི་འཐུང་བ་དང་།
JER 35:9 འདུག་སའི་ཁྱིམ་གཞིས་ཀྱང་མི་འཛུགས་ལ། ངེད་ཅག་ལ་རྒུན་འབྲུམ་ར་བ་དང་ཞིང་ས། ས་བོན་བཅས་ཀྱང་མེད་དོ། །
JER 35:10 ངེད་རྣམས་གུར་དུ་སྡོད་ཅིང་། ངེད་ཅག་གི་མེས་པོ་ཡོ་ན་དབ་ཀྱིས་བཀའ་བཀོད་ཀུན་དང་བསྟུན་ནས་དེ་བཞིན་སྤྱད་པ་ཡིན།
JER 35:11 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ཡར་འོངས་ཏེ་ཡུལ་འདིར་དམག་དྲངས་པའི་དུས་སུ། ངེད་རྣམས་ཀྱིས་འདི་ལྟར། ཤོག་དང་། ཀལ་དི་པ་རྣམས་དང་ཨ་རམ་པའི་དམག་ཚོགས་གཉིས་ལས་ཐར་བའི་ཕྱིར་ཡེ་རུ་སཱ་ལེམ་དུ་འགྲོའོ་ཞེས་སྨྲས་པ་དང་། དེ་ལྟར་ངེད་རྣམས་ཡེ་རུ་སཱ་ལེམ་དུ་བསྡད་པ་ཡིན་ཞེས་ཞུས་སོ། །
JER 35:12 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 35:13 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་སོང་ནས་ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་རྣམས་ལ་འདི་ལྟར། ངའི་བཀའ་ལ་མི་མཉན་ཞིང་བཀའ་སློབ་དང་ལེན་མི་བྱེད་དམ་ཞེས་དྲིས་ཤིག
JER 35:14 རེ་ཁབ་ཀྱི་བུ་ཡོ་ན་དབ་ཀྱིས་ཁོའི་བུ་རྒྱུད་རྣམས་ལ་རྒུན་ཆང་འཐུང་མི་རུང་བའི་བཀའ་བསྒོས་པ་དེ་རྣམས་ཀྱིས་བསྲུངས་ཤིང་། དེ་རིང་གི་བར་དུ་རྒུན་ཆང་མ་འཐུང་བར་མེས་པོའི་བཀའ་ལ་མཉན་ཏོ། །འོན་ཀྱང་ངས་ཁྱོད་ཅག་ལ་བཀའ་སློབ་ཡང་ཡང་གནང་ནའང་ཁྱོད་རྣམས་ཀྱིས་ང་ལ་མ་མཉན།
JER 35:15 ངས་ཡང་ཡང་རང་གི་ཞབས་ཕྱི་ལུང་སྟོན་པ་རྣམས་ཁྱོད་ཅག་གི་གམ་དུ་མངགས་ཏེ། ཁྱོད་རྣམས་རེ་རེས་འགྱོད་བཤགས་དང་བཅས་རང་གི་ལོག་ལམ་སྤངས་ནས་བྱ་བ་སྤྱོད་པ་རྣམས་བཅོས་ཤིག ལྷ་གཞན་རྣམས་ལ་བསྙེན་བཀུར་བྱས་ནས་དེའི་རྗེས་སུ་མ་འབྲང་ཞིག དེ་ནས་ངས་ཁྱོད་ཅག་དང་ཁྱོད་ཅག་གི་མེས་པོར་གནང་བའི་ཡུལ་དུ་གནས་པར་འགྱུར་ཞེས་བསྒོས་ཀྱང་། ཁྱོད་ཅག་གིས་ང་ལ་རྣ་བ་གཏད་ནས་མ་མཉན་ཏོ། །
JER 35:16 རེ་ཁབ་ཀྱི་བུ་ཡོ་ན་དབ་ཀྱི་བུ་རྒྱུད་རྣམས་ཀྱིས་མེས་པོས་ཁོ་རྣམས་ལ་བསྒོས་པའི་བཀའ་རྣམས་བསྲུངས་ནའང་། མི་འདི་རྣམས་ཀྱིས་ང་ལ་མ་མཉན་ཏོ་ཞེས་སྨྲོས་ཤིག་ཅེས་གསུངས།
JER 35:17 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་དེ་དག་ལ་བཀའ་གནང་ཡང་དེ་དག་གིས་མ་མཉན་ལ། ངས་དེ་དག་བོས་ཀྱང་ཁོ་ཚོས་ཨ་ལན་མ་བྱིན་པས། ལྟོས་ཤིག ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་ཐམས་ཅད་ཀྱི་སྟེང་དུ་ངས་དེ་དག་ལ་སྔོན་ཚུད་ནས་སྨྲས་པའི་ཆག་སྒོ་ཐམས་ཅད་འབེབ་པར་བྱའོ་ཞེས་གསུངས་སོ། །
JER 35:18 ཡེ་རེམ་ཡཱ་ཡིས་རེ་ཁབ་པ་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་གིས་རང་གི་མེས་པོ་ཡོ་ན་དབ་ཀྱི་བསྒོ་བ་ལ་མཉན་ཏེ། དེའི་བཀའ་ཐམས་ཅད་བསྲུངས་ནས། དེས་ཅི་བསྒོས་པ་བཞིན་བྱས་པས་ན།
JER 35:19 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། རེ་ཁབ་ཀྱི་བུ་ཡོ་ན་དབ་ལ་ངའི་མདུན་དུ་འགྲེང་བའི་མི་ནི་དུས་ནམ་ཡིན་ཡང་རྒྱུན་མི་ཆད་ཅེས་གསུངས་ཞེས་གསུངས་སོ། །
JER 36:1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱི་སྲིད་ལོ་བཞི་པར། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 36:2 ཁྱོད་ཀྱིས་ཤོག་སྒྲིལ་ཞིག་བླངས་ནས། ཡེས་ར་ཨེལ་དང་ཡ་ཧུ་དཱ། དེ་མིན་མི་རིགས་ཐམས་ཅད་ཀྱི་སྐོར་ལ་སྨྲས་པའི་གཏམ་ཡོད་ཚད་དེ། ཡོ་ཤི་ཡཱས་སྲིད་བསྐྱངས་པའི་དུས་ནས་དེ་རིང་གི་བར་དུ་ངས་ཁྱོད་ལ་བསྒོས་པའི་བཀའ་ཐམས་ཅད་ཕྲིས་ཤིག
JER 36:3 གཅིག་བྱས་ན་ཡ་ཧུ་དཱ་ཁྱིམ་རྒྱུད་ཀྱིས་ངས་དེ་དག་ལ་འབྱུང་དུ་འཇུག་འདོད་པའི་ཆག་སྒོ་རྣམས་ཐོས་ནས། མི་རེ་རེ་རང་གི་ལོག་ལམ་དང་འབྲལ་བར་འགྱུར་ཡང་སྲིད་དེ། ངས་ཀྱང་དེ་དག་གི་ཉེས་སྐྱོན་དང་སྡིག་པ་སེལ་བར་བྱའོ་ཞེས་གསུངས།
JER 36:4 དེ་ནས་ཡེ་རེམ་ཡཱ་ཡིས་ནེར་ཡཱའི་བུ་པཱ་རུག་བོས་འོངས་པ་དང་། པཱ་རུག་གིས་ཡེ་རེམ་ཡཱའི་ཞལ་ནས་དཀོན་མཆོག་ཡ་ཝཱེས་གསུངས་པའི་བཀའ་མཆིད་ཐམས་ཅད་ཤོག་སྒྲིལ་སྟེང་དུ་བཀོད།
JER 36:5 ཡེ་རེམ་ཡཱ་ཡིས་པཱ་རུག་ལ་བཀའ་བསྒོས་ཏེ་ན་རེ། ང་རང་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་བཀག་པས།
JER 36:6 ཁྱོད་ནི་སྨྱུང་གནས་ཀྱི་དུས་སུ་དཀོན་མཆོག་ཡ་ཝཱེའི་མཆོད་ཁང་དུ་སོང་ནས་དཀོན་མཆོག་ཡ་ཝཱེའི་བཀའ་སྟེ། ཁྱོད་ཀྱིས་ངའི་ངག་ནས་ཤོག་སྒྲིལ་སྟེང་ཡི་གེར་བཀོད་པ་དེ་མི་རྣམས་དང་ཡ་ཧུ་དཱའི་གྲོང་ཁྱེར་རེ་རེ་ནས་འོངས་པའི་མི་ཐམས་ཅད་ཀྱི་རྣ་བར་སྒྲོགས་ཤིག་དང་།
JER 36:7 ཡང་ན་དེ་དག་གིས་དཀོན་མཆོག་ཡ་ཝཱེའི་དྲུང་དུ་ཞུ་བ་ཕུལ་ཏེ་མི་རེ་རེ་ཕྱིར་འཁོར་ནས་རང་གི་ལོག་ལམ་དང་འབྲལ་ཡང་སྲིད། ཅི་ལ་ཞེ་ན། དཀོན་མཆོག་ཡ་ཝཱེས་མི་འདི་རྣམས་ལ་གསུངས་པའི་ཐུགས་ཁྲོ་དང་ཁྲོ་གཏུམ་ནི་ཤིན་ཏུ་ཆེ་བའི་ཕྱིར་རོ་ཞེས་བསྒོས་སོ། །
JER 36:8 དེ་ནས་ནེར་ཡཱའི་བུ་པཱ་རུག་གིས་ལུང་སྟོན་པ་ཡེ་རེམ་ཡཱས་གང་དང་གང་གསུངས་པ་བཞིན་སྤྱད་དེ། དཀོན་མཆོག་ཡ་ཝཱེའི་མཆོད་ཁང་དུ་གླེགས་བམ་སྟེང་གི་དཀོན་མཆོག་ཡ་ཝཱེའི་བཀའ་རྣམས་བསྒྲགས་སོ། །
JER 36:9 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱི་སྲིད་ལོ་ལྔ་བའི་ཟླ་དགུ་པར། ཡེ་རུ་སཱ་ལེམ་གྱི་མི་རྣམས་དང་ཡ་ཧུ་དཱའི་གྲོང་ཁྱེར་ནས་ཡེ་རུ་སཱ་ལེམ་དུ་འོངས་པའི་མི་ཡོངས་ཀྱིས། དཀོན་མཆོག་ཡ་ཝཱེའི་དྲུང་དུ་སྨྱུང་གནས་བསྲུང་བར་བསྒྲགས་པ་དང་།
JER 36:10 པཱ་རུག་གིས་དཀོན་མཆོག་ཡ་ཝཱེའི་མཆོད་ཁང་གི་ཁྱམས་ར་གོང་མ་སྟེ། དཀོན་མཆོག་ཡ་ཝཱེའི་མཆོད་ཁང་དང་ཉེ་བའི་སྒོ་གསར་པ་རུ། ཤཱ་ཕན་གྱི་བུ་གེ་མར་ཡཱ་དྲུང་ཡིག་གི་ཁང་པའི་ནང་དུ་གླེགས་བམ་ལས་ཡེ་རེམ་ཡཱའི་བཀའ་རྣམས་མི་ཐམས་ཅད་ལ་བསྒྲགས་སོ། །
JER 36:11 ཡང་ཤཱ་ཕན་གྱི་ཚ་བོ་སྟེ་གེ་མར་ཡཱའི་བུ་མི་ཀ་ཡཱས་གླེགས་བམ་སྟེང་གི་དཀོན་མཆོག་ཡ་ཝཱེའི་བཀའ་མཆིད་རྣམས་ཐོས་པ་དང་།
JER 36:12 མར་རྒྱལ་པོའི་ཕོ་བྲང་དུ་སོང་ནས་དྲུང་ཡིག་གི་ཁང་པར་སླེབས་པ་ན། ལྟོས་ཤིག འགོ་དཔོན་ཐམས་ཅད་དེ་རུ་བསྡད་ཡོད་པ་མཐོང་བ་སྟེ། དྲུང་ཡིག་ཨེ་ལི་ཤཱ་མ་དང་། ཤེ་མ་ཡཱའི་བུ་དི་ལཱ་ཡ། ཨག་པོར་གྱི་བུ་ཨེལ་ན་ཐན། ཤཱ་ཕན་གྱི་བུ་གེ་མར་ཡཱ། ཧ་ནན་ཡཱའི་བུ་ཚིད་ཀི་ཡཱ། དེ་མིན་འགོ་དཔོན་གཞན་རྣམས་ཀྱང་ཡོད་པ་ཡིན།
JER 36:13 དེ་ནས་མི་ཀ་ཡཱ་ཡིས་ཁོ་རྣམས་ལ་རང་གིས་ཐོས་པའི་བཀའ་ཐམས་ཅད་དེ་པཱ་རུག་གིས་མི་རྣམས་ལ་གླེགས་བམ་དེ་བསྒྲགས་དུས་སུ་ཐོས་པ་རྣམས་སྨྲས་པ་ན།
JER 36:14 འགོ་དཔོན་རྣམས་ཀྱིས་ཀུ་ཤིའི་ཡང་ཚ་དང་ཤེ་ལེམ་ཡཱའི་ཚ་བོ་སྟེ་ནེ་ཐན་ཡཱའི་བུ་ཡེ་ཧུ་དི་ནི་པཱ་རུག་གི་གམ་དུ་མངགས་ནས་དེ་ལ། ཁྱོད་ཀྱིས་མི་རྣམས་ཀྱི་རྣ་བར་བསྒྲགས་པའི་གླེགས་བམ་དེ་ལག་ཏུ་ཐོགས་ནས་འདིར་ཤོག་ཅེས་སྨྲས་པས། ནེར་ཡཱའི་བུ་པཱ་རུག་གིས་གླེགས་བམ་ཁྱེར་ནས་དེ་རྣམས་ཀྱི་གམ་དུ་འོངས་པ་དང་།
JER 36:15 དེ་རྣམས་ཀྱིས་ཁོང་ལ་ན་རེ། བཞུགས་དང་། ངེད་ཅག་གི་རྣ་བར་དེ་ཀློགས་ཤིག་ཅེས་སྨྲས་པ་ལ། པཱ་རུག་གིས་དེ་དག་གི་ཆེད་དུ་བཀླགས་སོ། །
JER 36:16 དེ་དག་གིས་བཀའ་མཆིད་རྣམས་ཐོས་པ་ཙམ་གྱིས་འཇིགས་ཏེ། གཅིག་གིས་གཅིག་ལ་བལྟས་ནས་པཱ་རུག་ལ་འདི་ལྟར། རང་ཅག་གིས་འདི་ཐམས་ཅད་རྒྱལ་པོར་ཞུ་དགོས་ཞེས་སྨྲས་ཤིང་།
JER 36:17 པཱ་རུག་ལ་འདི་ལྟར། ཁྱོད་ཀྱིས་བཀའ་མཆིད་འདི་ཐམས་ཅད་ཁོང་གི་ཞལ་ནས་ཇི་ལྟར་ཡི་གེར་བཀོད་པ་དེ་ངེད་རྣམས་ལ་ཤོད་ཅིག་ཅེས་དྲིས་པ་ལ།
JER 36:18 པཱ་རུག་གིས་ལན་དུ། ཁོང་གིས་ཞལ་ནས་འདི་ཐམས་ཅད་ང་ལ་གསུངས་པ་དང་། ངས་སྣག་ཚས་གླེགས་བམ་ནང་བྲིས་པ་ཡིན་ཞེས་སྨྲས་པ་ལ།
JER 36:19 འགོ་དཔོན་རྣམས་ཀྱིས་པཱ་རུག་ལ་འདི་ལྟར། ཁྱོད་དང་ཡེ་རེམ་ཡཱ་གཉིས་སྦོས་ཤིག ཁྱོད་གཉིས་གང་དུ་སྦས་པ་མི་ལ་ཤེས་སུ་འཇུག་མི་རུང་ཞེས་བསྐུལ་ཏོ། །
JER 36:20 འགོ་དཔོན་རྣམས་ཀྱིས་གླེགས་བམ་དེ་དྲུང་ཡིག་ཨེ་ལི་ཤཱ་མའི་ཁང་པར་བཞག་རྗེས། ཁྱམས་རའི་ནང་དུ་རྒྱལ་པོའི་དྲུང་ལ་ཕྱིན་ཏེ་བཀའ་མཆིད་ཐམས་ཅད་རྒྱལ་པོར་ཞུས་པ་ཙམ་གྱིས།
JER 36:21 རྒྱལ་པོས་ཡེ་ཧུ་དི་ཞེས་བྱ་བ་གླེགས་བམ་ལེན་དུ་མངགས་ནས། དེས་དྲུང་ཡིག་ཨེ་ལི་ཤཱ་མའི་ཁང་པ་ནས་དེ་བླངས་ཏེ། རྒྱལ་པོ་དང་རྒྱལ་པོའི་གཡས་གཡོན་དུ་ལངས་བསྡད་ཡོད་པའི་འགོ་དཔོན་ཀུན་གྱི་རྣ་བར་བཀླགས་སོ། །
JER 36:22 དུས་དེར་ཟླ་དགུ་པ་ཡིན་པས། རྒྱལ་པོ་དགུན་སར་བཞུགས་ནས་དེའི་དྲུང་དུ་མེ་ཕོར་ནང་མེ་འབར་བཞིན་ཡོད་དེ།
JER 36:23 ཡེ་ཧུ་དིས་ཚན་པ་གསུམ་བཞི་ཙམ་བསྒྲགས་པ་དང་། རྒྱལ་པོས་དྲུང་ཡིག་གི་སྤུ་གྲིས་གླེགས་བམ་གཤགས་ཏེ་མེ་ཕོར་ནང་ལ་གཡུགས་ནས་གླེགས་བམ་ཡོངས་སུ་མེའི་ནང་དུ་འཚིག་པའི་བར་དུ་བསྲེགས་སོ། །
JER 36:24 བཀའ་འདི་ཐམས་ཅད་ཐོས་མཁན་རྒྱལ་པོ་འཁོར་དང་བཅས་པ་སུ་ཡང་འཇིགས་པར་མ་གྱུར་ལ། རང་གི་གོས་ཀྱང་མ་གཤག་ གོ །
JER 36:25 ཡང་ཨེལ་ན་ཐན་དང་དི་ལཱ་ཡ། གེ་མར་ཡཱ་བཅས་གསུམ་པོས་རྒྱལ་པོར་གླེགས་བམ་དེ་མི་བསྲེག་པའི་ཆེད་དུ་ཞུ་བ་ཞུས་ཀྱང་རྒྱལ་པོས་མ་མཉན་ཏོ། །
JER 36:26 རྒྱལ་པོས་རྒྱལ་སྲས་ཡེ་རཱ་མེ་ཨེལ་དང་ཨས་རི་ཨེལ་གྱི་བུ་སེ་ར་ཡཱ། ཨབ་དེ་ཨེལ་གྱི་བུ་ཤེ་ལེམ་ཡཱ་བཅས་གསུམ་ཀ་དྲུང་ཡིག་པཱ་རུག་དང་ལུང་སྟོན་པ་ཡེ་རེམ་ཡཱ་གཉིས་འཛིན་དུ་མངགས་ན་ཡང་། དཀོན་མཆོག་ཡ་ཝཱེས་དེ་གཉིས་སྦས་པར་མཛད་དོ། །
JER 36:27 ཡེ་རེམ་ཡཱའི་ཞལ་ལས་གསུངས་པ་ལྟར་པཱ་རུག་གིས་ཡི་གེར་བཀོད་པའི་བཀའ་མཆིད་ཀྱི་གླེགས་བམ་དེ་རྒྱལ་པོས་མེ་རུ་བསྲེགས་པའི་རྗེས་སུ། ཡེ་རེམ་ཡཱ་ལ་ཡང་དཀོན་མཆོག་ཡ་ཝཱེའི་བཀའ་བྱུང་བ་འདི་ལྟ་སྟེ།
JER 36:28 ཁྱོད་ཀྱིས་སླར་ཡང་ཤོག་སྒྲིལ་ཞིག་བླངས་ཏེ། ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱིས་བསྲེགས་པའི་གླེགས་བམ་སྔ་མའི་ནང་དུ་ཡོད་པའི་བཀའ་ཐམས་ཅད་དེའི་སྟེང་དུ་ཕྲིས་ཤིག
JER 36:29 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་གླེགས་བམ་དེ་བསྲེགས་ནས་ན་རེ། པཱ་པེལ་ལོན་གྱི་རྒྱལ་པོ་འོངས་ཏེ་ཡུལ་འདི་བཤིག་ནས། མི་ཕྱུགས་གཉིས་ཀ་གང་ཡང་ལུས་སུ་མི་འཇུག་ཅེས་ཁྱོད་ཀྱིས་དེའི་ནང་དུ་འབྲི་དོན་ཅི་ཡིན་ཟེར་བས།
JER 36:30 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། དེའི་བུ་རྒྱུད་རྣམས་ལས་དཱ་བིད་ཀྱི་རྒྱལ་ཁྲིར་འདུག་མཁན་སུ་ཡང་མ་ལུས་པར། དེའི་བེམ་པོ་ཕྱི་རུ་དོར་ནས་ཉིན་མོར་ཚ་བ་དང་མཚན་མོར་བད་ནག་གིས་མནར་བར་འགྱུར།
JER 36:31 ཡང་ངས་དེ་དང་དེའི་བུ་རྒྱུད་དང་། དེའི་འཁོར་གཡོག་བཅས་ཀྱི་སྡིག་པར་ཉེས་ཆད་གཅོད་ཅིང་། ངས་དེ་ཚོར་སྨྲས་ཀྱང་དེ་དག་གིས་མ་མཉན་པས། ད་ནི་ཆག་སྒོ་ཐམས་ཅད་དེ་དག་དང་ཡེ་རུ་སཱ་ལེམ་གྱི་ཡུལ་མི་རྣམས་དང་ཡ་ཧུ་དཱའི་མི་རྣམས་ཀྱི་སྟེང་དུ་འབབ་པར་བྱའོ་ཞེས་པའོ་ཞེས་སྨྲོས་ཤིག་ཅེས་གསུངས།
JER 36:32 དེ་ནས་ཡེ་རེམ་ཡཱས་ཤོག་སྒྲིལ་གཞན་ཞིག་བླངས་ནས། ནེར་ཡཱའི་བུ་དྲུང་ཡིག་པཱ་རུག་ལ་སྤྲད་དེ། ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱིས་མེ་རུ་བསྲེགས་པའི་བཀའ་ཐམས་ཅད་ཁོས་ཡེ་རེམ་ཡཱའི་ཞལ་ནས་དེའི་ནང་དུ་བཀོད་དོ། །དེར་མ་ཟད་དེ་དང་མཚུངས་པའི་བཀའ་མང་པོ་ཡང་བསྣན་པ་ཡིན་ནོ། །
JER 37:1 ཡོ་ཤི་ཡཱའི་བུ་ཚིད་ཀི་ཡཱ་བྱ་བ་ཡེ་ཧོ་ཡཱ་ཀིམ་གྱི་བུ་ཀོན་ཡཱའི་ཚབ་ཏུ་ཡ་ཧུ་དཱའི་རྒྱལ་པོར་བསྡད་ནས་སྲིད་བསྐྱངས་པ་སྟེ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དེ་ཡ་ཧུ་དཱ་རུ་རྒྱལ་པོ་བྱེད་དུ་བཅུག
JER 37:2 ཡིན་ནའང་ཚིད་ཀི་ཡཱ་དང་དེའི་འཁོར་གཡོག་རྣམས་དང་། ཡུལ་མི་དག་གིས་དཀོན་མཆོག་ཡ་ཝཱེས་ལུང་སྟོན་པ་ཡེ་རེམ་ཡཱ་བརྒྱུད་ནས་གསུངས་པའི་བཀའ་ལ་མ་མཉན་ཏོ། །
JER 37:3 དེ་ཡང་རྒྱལ་པོ་ཚིད་ཀི་ཡཱ་ཡིས་ཤེ་ལེམ་ཡཱའི་བུ་ཡེ་ཧུ་ཀལ་དང་། མཆོད་དཔོན་མ་ཨ་སེ་ཡཱའི་བུ་ཟེ་ཕན་ཡཱ་གཉིས་པོ་ལུང་སྟོན་པ་ཡེ་རེམ་ཡཱའི་དྲུང་དུ་མངགས་ནས་འདི་ལྟར། ཁྱེད་ཀྱིས་ངེད་ཅག་གི་དོན་དུ་རང་རེའི་དཀོན་མཆོག་ཡ་ཝཱེ་ལ་གསོལ་བ་འདེབས་རོགས་ཞེས་ཞུས།
JER 37:4 དུས་དེར་ཁོ་རྣམས་ཀྱིས་ཡེ་རེམ་ཡཱ་ད་དུང་བཙོན་དུ་བཅུག་མེད་པས་ན་ཁོང་མི་རྣམས་ཀྱི་ནང་དུ་འགྲོ་འོང་བྱེད་བཞིན་ཡོད།
JER 37:5 ཡང་ཕཱར་ཨོལ་གྱི་དམག་དཔུང་ཨེ་ཅིབ་ཡུལ་ནས་ཚུར་ཐོན་ཅིང་། ཡེ་རུ་སཱ་ལེམ་མཐའ་ནས་བསྐོར་བའི་ཀལ་དི་པ་རྣམས་ཀྱིས་དེ་དག་འོང་བ་ཐོས་པ་ཙམ་གྱིས། དམག་སྒར་སྤོས་ནས་ཡེ་རུ་སཱ་ལེམ་དང་བྲལ་ཏོ། །
JER 37:6 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 37:7 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་ངའི་མདུན་དུ་ཐུགས་བརྟག་ཞུ་བར་གཏོང་མཁན་ཡ་ཧུ་དཱའི་རྒྱལ་པོ་ལ་ཁྱོད་ཅག་གིས་འདི་སྐད་སྦྲོན་ཅིག ལྟོས་ཤིག ཁྱོད་ཚོར་རོགས་བྱེད་དུ་འོངས་པའི་ཕཱར་ཨོལ་གྱི་དམག་དཔུང་ནི་ཨེ་ཅིབ་རང་ཡུལ་དུ་ཕྱིར་འགྲོ་བར་འགྱུར་ཏེ།
JER 37:8 ཀལ་དི་པ་རྣམས་ཡང་བསྐྱར་འོངས་ནས་གྲོང་ཁྱེར་འདི་ལ་དམག་བརྒྱབ་སྟེ་ལེན་པ་དང་མེས་བསྲེག་པར་འགྱུར།
JER 37:9 དཀོན་མཆོག་ཡ་ཝཱེས་འདི་སྐད་དུ། ཀལ་དི་པ་རྣམས་ཅི་ནས་ཀྱང་ངེད་རྣམས་དང་འབྲལ་བར་འགྱུར་ཞེས་ཁྱོད་རྣམས་ཀྱིས་རང་མགོ་རང་གིས་མ་གཡོག་ཅིག ཅི་ལ་ཞེ་ན། དེ་རྣམས་འབྲལ་བར་མི་འགྱུར་རོ། །
JER 37:10 ཁྱོད་རྣམས་དང་འཐབ་པའི་ཀལ་དི་པའི་དམག་དཔུང་ཐམས་ཅད་ཁྱོད་ཅག་གིས་ཕམ་པར་བརྒྱབ་ཀྱང་། དེ་རྣམས་ལས་རྨས་པར་གྱུར་པའི་ལྷག་ལུས་རྣམས་རང་གི་གུར་ནས་ཡར་ལངས་ཏེ་གྲོང་ཁྱེར་འདི་མེས་བསྲེག་པར་འགྱུར་རོ་ཞེས་སྨྲོས་ཤིག་ཅེས་གསུངས་སོ། །
JER 37:11 ཀལ་དི་པའི་དམག་དཔུང་ནི་ཕཱར་ཨོལ་གྱི་དམག་དཔུང་ལ་འཇིགས་ནས། དམག་སྒར་སྤོས་ཏེ་ཡེ་རུ་སཱ་ལེམ་དང་འབྲལ་དུས།
JER 37:12 ཡེ་རེམ་ཡཱ་ཡིས་ཡུལ་མི་རྣམས་ལས་རང་གི་ས་སྐལ་ལེན་པའི་ཆེད་དུ་ཡེ་རུ་སཱ་ལེམ་དང་བྲལ་ནས་པེན་ཡཱ་མེན་ཡུལ་དུ་ཕྱིན་ཏེ།
JER 37:13 ཁོང་པེན་ཡཱ་མེན་རྒྱ་སྒོ་ཡོད་སར་སླེབས་པ་ལ། དེའི་སྐུ་སྲུང་དམག་དཔོན་མིང་ལ་ཡི་རི་ཡཱ་ཟེར་བ་སྟེ། ཧ་ནན་ཡཱའི་ཚ་བོ་དང་ཤེ་ལེམ་ཡཱའི་བུ་ཡིན་པ་དེས་ཡེ་རེམ་ཡཱ་བཟུང་སྟེ་ན་རེ། ཁྱོད་ནི་ཀལ་དི་པ་ལ་མགོ་བསྒུར་དུ་འགྲོ་བ་ཡིན་ཟེར་ཞིང་།
JER 37:14 ཡེ་རེམ་ཡཱ་ཡིས་ལན་དུ། ཁྱོད་ཀྱིས་རྫུན་སྨྲ་བ་ཡིན་ཏེ་ང་ནི་ཀལ་དི་པ་ལ་མགོ་བསྒུར་དུ་འགྲོ་བ་མིན་ཞེས་སྨྲས་ཀྱང་། ཡི་རི་ཡཱ་ཡིས་ཡེ་རེམ་ཡཱ་ལ་མ་མཉན་པར་ཁོང་བཟུང་ནས་འགོ་དཔོན་རྣམས་ཀྱི་རྩར་ཁྲིད་དོ། །
JER 37:15 དེ་ནས་འགོ་དཔོན་རྣམས་ཡེ་རེམ་ཡཱ་ལ་ཁྲོས་ནས་ཁོང་ལ་བརྡུངས་ཏེ། དྲུང་ཡིག་ཡོ་ནཱ་ཐན་གྱི་ཁང་པར་བཙོན་དུ་བཅུག་གོ །ཅི་ལ་ཞེ་ན། དེ་དག་གིས་ཁང་པ་དེ་བཙོན་ར་བྱས་ཡོད་པ་ཡིན།
JER 37:16 ཡེ་རེམ་ཡཱ་ས་འོག་གི་བཙོན་ཁང་དུ་བཅུག་སྟེ་ཉིན་ཞག་མང་པོར་དེར་ལུས་སོ། །
JER 37:17 ཡང་རྒྱལ་པོ་ཚིད་ཀི་ཡཱས་མི་མངགས་ནས་ཁོང་ཕྱི་རུ་ཡོང་བར་བཅུག་ཅིང་། རང་གི་ཕོ་བྲང་ནང་དུ་ལྐོག་ནས་ཁོང་ལ་ན་རེ། དཀོན་མཆོག་ཡ་ཝཱེའི་ཞལ་ནས་བཀའ་བྱུང་ངམ་ཞེས་དྲིས་པ་ལ། ཡེ་རེམ་ཡཱས་ལན་དུ་ཡོད་དོ་ཞེས་དང་། ཡང་ཁྱོད་ནི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་པར་འགྱུར་ཞེས་སྨྲས་པ་དང་།
JER 37:18 ཡེ་རེམ་ཡཱས་ཡང་རྒྱལ་པོ་ཚིད་ཀི་ཡཱ་ལ་འདི་ལྟར། ངས་དོན་གང་གི་ཕྱོགས་ནས་ཁྱེད་རང་ངམ་ཡང་ན་ཁྱེད་ཀྱི་འཁོར་གཡོག་དང་། མི་འདི་རྣམས་ལ་འགལ་བའི་སྡིག་པ་གང་ཞིག་བྱས་ནས། ཁྱེད་ཀྱིས་ང་རང་བཙོན་དུ་བཅུག་པ་ཡིན་ནམ།
JER 37:19 པཱ་པེལ་ལོན་གྱི་རྒྱལ་པོ་ཁྱོད་རྣམས་དང་ཡུལ་ཁམས་འདིར་རྒོལ་དུ་མི་འོང་ཞེས་ཁྱེད་ཅག་ལ་ལུང་བསྟན་པའི་ལུང་སྟོན་པ་དེ་དག་ད་ལྟ་གང་དུ་ཡོད་དམ།
JER 37:20 ཀྱེ་ཇོ་བོ་ངའི་རྒྱལ་པོ་ལགས། ད་ལྟ་ཁྱེད་ཀྱིས་གསན་རོགས་གནང་། ང་ལ་ཁྱེད་ཀྱི་དྲུང་དུ་ཞུ་བར་མཛོད་དང་། ང་རང་དྲུང་ཡིག་ཡོ་ནཱ་ཐན་གྱི་ཁང་པར་མ་བསྐྱལ་ཞིག དེ་མིན་བདག་དེར་འཆི་བར་འགྱུར་ཞེས་སྨྲས་སོ། །
JER 37:21 དེ་ནས་རྒྱལ་པོ་ཚིད་ཀི་ཡཱས་བཀའ་བབས་ནས། དེ་དག་གིས་ཡེ་རེམ་ཡཱ་ནི་སྐུ་སྲུང་དམག་གི་ཁྱམས་རར་བཅུག་པ་དང་། གྲོང་ཁྱེར་གྱི་ཁ་ཟས་ཐམས་ཅད་ཚར་བའི་བར་དུ་བག་ལེབ་ཚོང་པའི་སྲང་ལམ་ནས་ཉིན་རེ་བཞིན་བག་ལེབ་ཁོང་ལ་སྤྲད་ཅིང་། དེ་ལྟར་ཡེ་རེམ་ཡཱ་སྐུ་སྲུང་གི་ཁྱམས་རར་ལུས་སོ། །
JER 38:1 མད་ཐན་གྱི་བུ་ཤེ་ཕད་ཡཱ་དང་། ཕཱ་ཤུར་གྱི་བུ་གེ་དལ་ཡཱ། ཤེ་ལེམ་ཡཱའི་བུ་ཡུ་ཀལ། མལ་ཀི་ཡཱའི་བུ་ཕ་ཤུར་བཅས་ཀྱིས་ཡེ་རེམ་ཡཱས་མི་སྡེ་ཀུན་ལ་གཏམ་འདི་ལྟར་སྨྲས་པ་ཐོས་ཏེ།
JER 38:2 དཀོན་མཆོག་ཡ་ཝཱེས་འདི་སྐད་དུ། གྲོང་ཁྱེར་འདི་རུ་ལུས་པ་ཀུན་རལ་གྲི་དང་མུ་གེ རིམས་ནད་བཅས་ཀྱིས་སྲོག་དང་འབྲལ་བར་འགྱུར། ཡིན་ནའང་ཀལ་དི་པའི་ཕྱོགས་སུ་འཁོར་བ་རྣམས་གསོན་པོར་ལུས་ཏེ། དེ་རྣམས་སྲོག་ཐར་ནས་འཚོ་བར་འགྱུར་རོ་ཞེས་གསུངས།
JER 38:3 ཡང་དཀོན་མཆོག་ཡ་ཝཱེས་འདི་སྐད་དུ། གྲོང་ཁྱེར་འདི་ནི་པཱ་པེལ་ལོན་གྱི་རྒྱལ་པོའི་དམག་ཚོགས་ཀྱི་ལག་ཏུ་གཏོད་ངེས་ལ། དེས་གྲོང་ཁྱེར་འདི་ལེན་པར་འགྱུར་ཞེས་གསུངས་སོ་ཞེས་པའོ། །
JER 38:4 དེ་ནས་འགོ་དཔོན་རྣམས་ཀྱིས་རྒྱལ་པོ་ལ་འདི་ལྟར། ཁྱེད་ཀྱིས་མི་འདི་གསོད་རོགས་གནང་། ཅི་ལ་ཞེ་ན། ཁོས་གྲོང་ཁྱེར་འདི་རུ་ལུས་པའི་དམག་དང་མི་ཚོགས་ལ་གཏམ་འདི་ལབ་ཅིང་། དེ་རྣམས་ཀྱི་སེམས་ཤུགས་ཉམས་སུ་བཅུག་པ་སྟེ། ཁོས་མི་འདི་རྣམས་ཀྱི་དོན་དུ་ཞི་བདེ་མི་འཚོལ་བར། དེ་རྣམས་ལ་ཆག་སྒོ་བསླངས་པ་ཡིན་ཞེས་སྨྲས་པ་ན།
JER 38:5 རྒྱལ་པོ་ཚིད་ཀི་ཡཱ་ན་རེ། ལྟོས་ཤིག ཁོ་ནི་ཁྱོད་ཚོའི་ལག་ཏུ་ཡོད་དེ། ངས་ཁྱོད་ཚོས་ཁོ་ལ་ཅི་བྱེད་པར་རྒོལ་མི་ནུས་སོ་ཞེས་སྨྲས་ཤིང་།
JER 38:6 དེ་དག་གིས་ཡེ་རེམ་ཡཱ་བཟུང་སྟེ་སྐུ་སྲུང་པའི་ཁྱམས་རར་ཡོད་པའི་རྒྱལ་སྲས་མལ་ཀི་ཡཱའི་ཆུ་དོང་ནང་དུ་གཡུགས་པ་སྟེ། ཁོ་ཚོས་ཡེ་རེམ་ཡཱ་ནི་དཔྱང་ཐག་ལས་མར་ཕབ་བོ། །ཆུ་དོང་དེའི་ནང་དུ་ཆུ་མེད་པར་འདམ་རྫབ་འབའ་ཞིག་ཡོད་པས་ཡེ་རེམ་ཡཱ་འདམ་ནང་དུ་ཟུག་པ་རེད།
JER 38:7 ཡང་རྒྱལ་པོའི་ཕོ་བྲང་དུ་ཡོད་པའི་ཉུག་རུམ་པ་གུ་ཤ་པ་ཨེ་བེད་མེ་ལེག་གིས་དེ་ཚོས་ཡེ་རེམ་ཡཱ་ཆུ་དོང་གི་ནང་དུ་བཅུག་པ་ཐོས་ཤིང་། སྐབས་དེར་རྒྱལ་པོ་ནི་པེན་ཡཱ་མེན་གྱི་རྒྱ་སྒོར་བཞུགས་ཡོད་པ་དང་།
JER 38:8 ཨེ་བེད་མེ་ལེག་རྒྱལ་པོའི་ཕོ་བྲང་ནས་ཕྱི་རུ་འོངས་ཏེ་རྒྱལ་པོ་ལ་ན་རེ།
JER 38:9 ཀྱེ་ཇོ་བོ་ངའི་རྒྱལ་པོ་ལགས། མི་འདི་དག་གིས་ལུང་སྟོན་པ་ཡེ་རེམ་ཡཱ་ལ་སྤྱོད་ངན་ཚ་པོ་རྐྱང་རྐྱང་སྤྱད་དེ་ཁོང་ཆུ་དོང་ནང་དུ་གཡུགས་པ་རེད། གྲོང་ཁྱེར་ནང་དུ་ཁ་ཟས་མེད་པས་ཁོང་གིས་དེ་རུ་ལྟོགས་སྐོམ་མྱངས་ནས་འཆི་བར་ངེས་ཞེས་ཞུས་པ་དང་།
JER 38:10 རྒྱལ་པོས་གུ་ཤ་པ་ཨེ་བེད་མེ་ལེག་ལ་འདི་ལྟར། ཁྱོད་ཀྱིས་འདི་ནས་མི་སུམ་ཅུ་ཁྲིད་ནས་ལུང་སྟོན་པ་ཡེ་རེམ་ཡཱ་མ་ཤི་བའི་སྔོན་དུ་ཆུ་དོང་ལས་ཡར་འཐེན་པར་གྱིས་ཤིག་ཅེས་བཀའ་བསྩལ་པ་ན།
JER 38:11 ཨེ་བེད་མེ་ལེག་གིས་མི་དེ་རྣམས་ཁྲིད་ནས་རྒྱལ་པོའི་ཕོ་བྲང་དུ་མཛོད་ཁང་གི་འོག་ཁང་ལ་སོང་ནས། གོས་ཧྲུལ་དང་རས་ཧྲུལ་རྣམས་དེ་ནས་བླངས་ཏེ། ཆུ་དོང་གི་ནང་དུ་ཡེ་རེམ་ཡཱའི་རྩར་ཐག་པས་མར་བཏང་ནས།
JER 38:12 གུ་ཤ་པ་ཨེ་བེད་མེ་ལེག་གིས་ཡེ་རེམ་ཡཱ་ལ་འདི་ལྟར། ཁྱེད་ཀྱིས་རས་ཧྲུལ་དང་གོས་ཧྲུལ་འདི་དག་ཐག་པའི་འོག་ལ་མཆན་ཁུང་དུ་ཆུག་དང་ཞེས་ཞུས་པ་ལ་ཡེ་རེམ་ཡཱས་དེ་ལྟར་བྱས་པ་དང་།
JER 38:13 དེ་དག་གིས་ཐག་པས་ཡེ་རེམ་ཡཱ་ཆུ་དོང་ལས་ཡར་འཐེན་ནས་ཡེ་རེམ་ཡཱ་སྐུ་སྲུང་པའི་ཁྱམས་རར་བཞུགས་སོ། །
JER 38:14 ཕྱིས་སུ་རྒྱལ་པོ་ཚིད་ཀི་ཡཱས་མི་མངགས་ཏེ་ལུང་སྟོན་པ་ཡེ་རེམ་ཡཱ་ནི་དཀོན་མཆོག་ཡ་ཝཱེའི་མཆོད་ཁང་གི་སྒོ་གསུམ་པའི་ཁར་རྒྱལ་པོ་རང་གི་དྲུང་དུ་བོས་ནས། རྒྱལ་པོས་ཡེ་རེམ་ཡཱ་ལ་འདི་ལྟར། ངས་ཁྱེད་ལ་དོན་ཞིག་འདྲི་བར་བྱ་སྟེ། ཁྱེད་ཀྱིས་ང་ལ་སྦ་གསང་མེད་པར་གྱིས་ཞེས་སྨྲས་པ་དང་།
JER 38:15 ཡེ་རེམ་ཡཱ་ཡིས་ཚིད་ཀི་ཡཱ་ལ་འདི་ལྟར། ཇི་སྟེ་ངས་ཁྱེད་ལ་སྨྲས་པ་ཡིན་ན་ཁྱེད་ཀྱིས་ང་གསོད་པར་འགྱུར་བ་མ་ཡིན་ནམ། ཇི་སྟེ་ངས་ཁྱེད་ལ་ཁ་ཏ་བསླབ་བྱ་བཏང་ན། ཁྱེད་ཀྱིས་ང་ལ་མི་མཉན་ནོ་ཞེས་སྨྲས་པས།
JER 38:16 རྒྱལ་པོ་ཚིད་ཀི་ཡཱ་ཡིས་ལྐོག་ཏུ་ཡེ་རེམ་ཡཱ་ལ་མནའ་བོར་ནས་འདི་ལྟར། ངས་རང་ཅག་གི་ཚེ་སྲོག་འགོད་མཁན་གྱི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ངས་གཏན་ནས་ཁྱེད་རང་གསོད་པར་མི་འགྱུར་ལ། ཁྱེད་ཀྱི་སྲོག་སྙེག་མཁན་གྱི་ལག་ཏུ་ཁྱེད་རང་གཏོད་པར་ཡང་མི་བྱའོ་ཞེས་སྨྲས།
JER 38:17 དེ་ནས་ཡེ་རེམ་ཡཱ་ཡིས་ཚིད་ཀི་ཡཱ་ལ་འདི་ལྟར། དཔུང་ཚོགས་ཀྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཇི་སྟེ་ཁྱེད་རང་སོང་ནས་པཱ་པེལ་ལོན་གྱི་རྒྱལ་པོའི་དམག་དཔོན་རྣམས་ལ་མགོ་བསྒུར་ན། ཁྱེད་ཀྱི་སྲོག་ནི་ཐར་ཞིང་། གྲོང་ཁྱེར་འདི་ཡང་མེས་བསྲེག་པར་མི་འགྱུར་ལ། ཁྱེད་དང་ཁྱེད་ཀྱི་ཁྱིམ་རྒྱུད་ཡོངས་གསོན་པོར་ལུས་ཡོང་།
JER 38:18 གལ་ཏེ་ཁྱེད་རང་ཕྱི་རོལ་ཏུ་སོང་ནས་པཱ་པེལ་ལོན་གྱི་རྒྱལ་པོའི་དམག་དཔོན་རྣམས་ལ་མགོ་མི་བསྒུར་ན། གྲོང་ཁྱེར་འདི་ཀལ་དི་པ་རྣམས་ཀྱི་ལག་ཏུ་གཏོད་ཅིང་། ཁོ་རྣམས་ཀྱིས་གྲོང་ཁྱེར་འདི་མེས་བསྲེག་པར་འགྱུར་ཏེ། ཁྱེད་རང་ཉིད་ཀྱང་དེ་དག་གི་ལག་ནས་ཐར་བར་མི་འགྱུར་ཞེས་གསུངས་ཞེས་སྨྲས་པ་ལ།
JER 38:19 ཚིད་ཀི་ཡཱ་ཡིས་ཡེ་རེམ་ཡཱ་ལ་འདི་ལྟར། ང་ནི་ཀལ་དི་པའི་ཕྱོགས་སུ་མགོ་བསྒུར་བའི་ཡ་ཧུ་དཱ་པ་རྣམས་ལ་འཇིགས་ཏེ། ཀལ་དི་པ་རྣམས་ཀྱིས་ང་རང་དེ་དག་གི་ལག་ཏུ་གཏད་ན། དེ་དག་གིས་ང་ལ་བརྙས་པར་འགྱུར་རོ་ཞེས་སྨྲས་ཤིང་།
JER 38:20 ཡེ་རེམ་ཡཱ་ན་རེ། ཀལ་དི་པས་ཁྱེད་ནི་དེ་རྣམས་ལ་མི་གཏོད་དོ། །ངས་ཁྱེད་ལ་བསྐུལ་བའི་དཀོན་མཆོག་ཡ་ཝཱེའི་བཀའ་ལ་གསན་རོགས་མཛོད། དེ་ནས་ཁྱེད་བདེ་ཞིང་ཁྱེད་ཀྱི་སྲོག་ཀྱང་གསོན་པོར་ལུས་ཡོང་།
JER 38:21 ཇི་སྟེ་ཁྱེད་རང་ཕྱི་རུ་སོང་ནས་མགོ་མ་བསྒུར་ན། དཀོན་མཆོག་ཡ་ཝཱེས་ང་ལ་མངོན་པར་མཛད་པའི་བཀའ་ནི་འདི་ལྟ་སྟེ།
JER 38:22 ལྟོས་ཤིག ཡ་ཧུ་དཱའི་རྒྱལ་པོའི་ཕོ་བྲང་ནང་དུ་ལུས་པའི་སྐྱེས་མ་ཐམས་ཅད་ནི་པཱ་པེལ་ལོན་གྱི་རྒྱལ་པོའི་དམག་དཔོན་ཚོའི་མདུན་དུ་བསྐྱལ་བར་འགྱུར་ལ། དེ་ནས་སྐྱེས་མ་དེ་དག་ན་རེ། ཁྱེད་ཀྱི་མནའ་བཅད་རྣམས་ཀྱིས་ཁྱེད་བསླུས་ཤིང་དེ་དག་ཁྱེད་ལས་རྒྱལ་བ་དང་། ད་ལྟ་ཁྱེད་ཀྱི་རྐང་པ་འདམ་རྫབ་ནང་དུ་ལྷུང་ཞིང་དེ་དག་གིས་ཁྱེད་དོར་བ་ཡིན་ཞེས་སྨྲ་བར་འགྱུར།
JER 38:23 མི་ཡིས་ཁྱེད་ཀྱི་བཙུན་མོ་ཐམས་ཅད་དང་ཁྱེད་ཀྱི་བུ་ཕྲུག་དག་ནི་ཀལ་དི་པའི་རྩར་འཁྲིད་ཅིང་། ཁྱེད་ཀྱང་དེ་དག་གི་ལག་ནས་ཐར་བར་མི་འགྱུར་ལ། པཱ་པེལ་ལོན་གྱི་རྒྱལ་པོའི་ལག་པས་འཛིན་པར་མ་ཟད་གྲོང་ཁྱེར་འདི་ཡང་མེས་བསྲེག་པར་འགྱུར་ཞེས་སྨྲས་སོ། །
JER 38:24 དེ་ནས་ཚིད་ཀི་ཡཱ་ཡིས་ཡེ་རེམ་ཡཱ་ལ་འདི་ལྟར། གཏམ་འདི་རྣམས་སུ་ལའང་ཤེས་སུ་མ་འཇུག་དང་དེ་ནས་ཁྱེད་མི་འཆིའོ། །
JER 38:25 འགོ་དཔོན་རྣམས་ཀྱིས་ངས་ཁྱེད་ལ་གཏམ་སྨྲས་པ་ཐོས་ན་ཁྱེད་ཀྱི་རྩར་ཡོང་ནས་ཁྱེད་ལ་ན་རེ། ངེད་རྣམས་ལ་ཤོད་ཅིག ཁྱེད་ཀྱིས་རྒྱལ་པོར་ཅི་གསུངས་པ་ཡིན་ནམ། ཡང་རྒྱལ་པོས་ཁྱེད་ལ་ཅི་གསུངས་བྱུང་ངམ། ངེད་རྣམས་ལ་མ་སྦས་མ་གསང་ཞིག དེ་མིན་ངེད་ཅག་གིས་ཁྱེད་གསོད་པར་འགྱུར་ཞེས་ཟེར་བར་འགྱུར་ཞིང་།
JER 38:26 ཁྱེད་ཀྱིས་དེ་དག་ལ་འདི་ལྟར། ང་རང་ཡོ་ནཱ་ཐན་གྱི་ཁང་པར་མི་འཆི་བའི་ཕྱིར་དུ། ངས་རྒྱལ་པོའི་དྲུང་དུ་ང་རང་ཕྱིར་དེ་རུ་མི་བསྐྱལ་བའི་རེ་བ་ཞུས་པ་ཙམ་ཡིན་ཞེས་ལན་ཐོབས་ཤིག་ཅེས་བསྐུལ་ཏོ། །
JER 38:27 ཕྱིས་སུ་འགོ་དཔོན་རྣམས་ཡེ་རེམ་ཡཱའི་གམ་དུ་འོངས་ནས་ཁོང་ལ་དྲིས་པ་ན། ཁོང་གིས་རྒྱལ་པོས་རང་ཉིད་ལ་བསྒོས་པ་ཇི་བཞིན་ལན་བཏབ་པས། དེ་དག་གིས་ཁོ་ལ་ཡང་བསྐྱར་མ་དྲིས་སོ། །ཅི་ལ་ཞེ་ན། རྒྱལ་པོ་དང་ཁོང་གཉིས་བར་གྱི་གསང་བ་ཕྱི་ལ་མ་ཤོར་བའོ། །
JER 38:28 དེ་ནས་ཡེ་རུ་སཱ་ལེམ་བཙན་གྱིས་བླངས་པའི་ཉིན་མོའི་བར་དུ། ཡེ་རེམ་ཡཱ་ནི་སྔར་བཞིན་སྐུ་སྲུང་པའི་ཁྱམས་རར་བསྡད་པའོ། །ཡང་ཡེ་རུ་སཱ་ལེམ་ནི་འདི་ལྟར་བླངས་པ་སྟེ།
JER 39:1 ཡ་ཧུ་དཱའི་རྒྱལ་པོ་ཚིད་ཀི་ཡཱའི་སྲིད་ལོ་དགུ་པའི་ཟླ་བཅུ་པར། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དཔུང་ཚོགས་ཁྲིད་དེ་ཡེ་རུ་སཱ་ལེམ་ལ་རྒོལ་བར་འོངས་ནས་གྲོང་ཁྱེར་བསྐོར་བ་རེད།
JER 39:2 ཚིད་ཀི་ཡཱའི་སྲིད་ལོ་བཅུ་གཅིག་པའི་ཟླ་བཞི་པའི་ཚེས་དགུ་ཉིན་ལྕགས་རི་གཏོར་བའོ། །
JER 39:3 ཡེ་རུ་སཱ་ལེམ་ལེན་པའི་དུས་སུ། པཱ་པེལ་ལོན་གྱི་རྒྱལ་པོའི་འགོ་དཔོན་རྣམས་ཏེ་ནེར་གལ་ཤར་ཨེ་ཟེར་དང་། སམ་གར་ནེ་བོ། བློན་ཆེན་སར་སེ་ཀེམ། དམག་དཔོན་ནེར་གལ་ཤར་ཨེ་ཟེར། དེ་མིན་པཱ་པེལ་ལོན་གྱི་རྒྱལ་པོའི་འགོ་དཔོན་གཞན་ཐམས་ཅད་རྒྱ་སྒོ་བར་མ་རུ་བསྡད་དོ། །
JER 39:4 ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དམག་མི་ཐམས་ཅད་ཀྱིས་དེ་རྣམས་མཐོང་ནས། མཚན་མོའི་དུས་སུ་རྒྱལ་པོའི་སྐྱེད་ཚལ་དང་ཉེ་བའི་མཁར་གཉིས་ཀྱི་བར་སྒོ་ནས་ཕྱི་རུ་བྲོས་ཏེ་ཨ་ར་པཱ་རུ་སོང་ངོ་། །
JER 39:5 ཡིན་ནའང་ཀལ་དི་པའི་དམག་དཔུང་གིས་དེ་རྣམས་ཀྱི་རྗེས་དེད་ནས། ཡེ་རུ་ཀོའི་ཐང་དུ་ཚིད་ཀི་ཡཱའི་རྗེས་ཆོད་པ་དང་དེ་བཟུང་ནས་ཧ་མཱད་ཀྱི་གནས་རིབ་ལཱ་ཞེས་པར་པཱ་པེལ་ལོན་རྒྱལ་པོ་ནེ་བོ་ཀད་ནེ་ཙར་གྱི་མདུན་དུ་ཁྲིད་པ་དང་། ནེ་བོ་ཀད་ནེ་ཙར་གྱིས་དེ་ལ་ཁྲིམས་ཐག་བཅད་དོ། །
JER 39:6 པཱ་པེལ་ལོན་གྱི་རྒྱལ་པོས་རིབ་ལཱ་ཡུལ་དུ་ཚིད་ཀི་ཡཱའི་མདུན་ནས་ཁོའི་བུ་རྣམས་བསད་པ་དང་། ཡང་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་པར་མ་ཟད།
JER 39:7 ཚིད་ཀི་ཡཱའི་མིག་ཟུང་བཏོན་ནས་ཁོ་པཱ་པེལ་ལོན་དུ་འཁྲིད་ཕྱིར་ལི་ཡི་སྒྲོག་རྣམས་བརྒྱབ་པ་རེད།
JER 39:8 ཡང་ཀལ་དི་པ་རྣམས་ཀྱིས་རྒྱལ་པོའི་ཕོ་བྲང་དང་མི་རྣམས་ཀྱི་ཁང་པ་རྣམས་མེ་ཡིས་བསྲེགས་ཏེ། ཡེ་རུ་སཱ་ལེམ་གྱི་མཁར་རྣམས་ཀྱང་བཤིགས་པའོ། །
JER 39:9 དུས་དེར། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་གྲོང་ཁྱེར་ནང་གི་ཤུལ་ལུས་རྣམས་དང་། པཱ་པེལ་ལོན་གྱི་ཕྱོགས་སུ་མགོ་བསྒུར་བ་རྣམས། དེ་འཕྲོའི་མི་རྣམས་པཱ་པེལ་ལོན་དུ་བཙོན་ལ་ཁྲིད་དོ། །
JER 39:10 ཡིན་ནའང་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་མི་སྡེ་ལས་ཅི་ཡང་མེད་པའི་དབུལ་པོ་དག་ནི་ཡ་ཧུ་དཱའི་ཡུལ་དུ་བསྐྱུར་ནས། མཚུངས་སུ་ཁོ་རྣམས་ལ་རྒུན་འབྲུམ་ར་བ་དང་ཞིང་ས་རྣམས་གནང་བ་རེད།
JER 39:11 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡེ་རེམ་ཡཱའི་དོན་དུ་སྐུ་སྲུང་དམག་དཔོན་ནེ་བོ་ཟར་ཨ་དན་ལ་འདི་ལྟར་བཀའ་གནང་བ་སྟེ།
JER 39:12 ཁྱོད་ཀྱིས་ཁོ་ཁྲིད་ནས་སོང་དང་། དེ་དྲིན་གྱིས་བསྐྱངས་ནས་གནོད་བསྐྱལ་མི་རུང་། ཁོས་ཁྱོད་ལ་ཇི་ལྟར་ཞུས་ན་དེ་ལྟར་བྱོས་ཤིག་ཅེས་བསྒོས་པ་ན།
JER 39:13 སྐུ་སྲུང་དམག་དཔོན་ནེ་བོ་ཟར་ཨ་དན་དང་བློན་ཆེན་ནེ་བུ་ཤཱ་སི་བན། དམག་དཔོན་ནེར་གལ་ཤར་ཨེ་ཟེར། དེ་མིན་པཱ་པེལ་ལོན་གྱི་རྒྱལ་པོའི་འགོ་དཔོན་ཀུན་གྱིས།
JER 39:14 མི་མངགས་ཏེ་སྐུ་སྲུང་གི་ཁྱམས་ར་ནས་ཡེ་རེམ་ཡཱ་ཁྲིད་འོངས་པ་དང་། ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱ་ལ་གཏད་ནས་དེའི་ཁྱིམ་ལ་འཁྲིད་དུ་བཅུག་པ་དང་། ཡེ་རེམ་ཡཱ་ཡང་མི་རྣམས་ཀྱི་ཁྲོད་དུ་བཞུགས་སོ། །
JER 39:15 ཡེ་རེམ་ཡཱ་ད་དུང་སྐུ་སྲུང་གི་ཁྱམས་རར་བཙན་བཟུང་བྱས་ཡོད་པའི་དུས་སུ། དཀོན་མཆོག་ཡ་ཝཱེའི་བཀའ་ནི་ཁོང་ལ་བྱུང་བ་འདི་ལྟ་སྟེ།
JER 39:16 ཁྱོད་སོང་ནས་གུ་ཤ་པ་ཨེ་བེད་མེ་ལེག་ལ་འདི་ལྟར་སྨྲོས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ཆག་སྒོ་འབྱུང་དུ་འཇུག་པ་ལས་བྱིན་རླབས་མི་གནང་ཞེས་སྨྲས་པའི་གཏམ་ནི་གྲོང་ཁྱེར་འདི་ལ་འབྱུང་བར་འགྱུར་ཏེ། དུས་དེར་འདི་ཐམས་ཅད་ཁྱོད་ཀྱི་མདུན་དུ་དངོས་སུ་འབྱུང་བར་འགྱུར།
JER 39:17 ཡིན་ནའང་ཉིན་དེར་སླེབ་དུས་ངས་ཁྱོད་རང་སྐྱོབ་པར་འགྱུར་ལ། ཁྱོད་ནི་རང་ཉིད་འཇིགས་པའི་ལག་ཏུ་མི་གཏོད་ཅེས་དཀོན་མཆོག་ཡ་ཝཱེས་གསུངས།
JER 39:18 ངས་ཁྱོད་རང་སྐྱོབ་པར་འགྱུར་བས། ཁྱོད་ནི་རལ་གྲིའི་འོག་ཏུ་མི་འགྱེལ་བར་དམག་འཁྲུག་ལས་རང་སྲོག་ཐར་བར་འགྱུར་རོ། །ཅི་ལ་ཞེ་ན། ཁྱོད་རང་ང་ལ་བརྟེན་པས་ཡིན་ཞེས་པའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 40:1 ཡེ་རེམ་ཡཱ་ཁོང་ཉིད་ཡེ་རུ་སཱ་ལེམ་དང་ཡ་ཧུ་དཱ་ཡི་པཱ་པེལ་ལོན་དུ་བཙོན་ལ་ཁྲིད་པ་ཐམས་ཅད་ཀྱི་ཁྲོད་དུ་ལྕགས་སྒྲོག་བརྒྱབ་ཡོད་པ་ལ། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཁོང་ཉིད་རཱ་མ་ནས་བཙོན་གྲོལ་བཏང་བ་དང་། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་ངོ་། །
JER 40:2 དེར་སྐུ་སྲུང་དམག་དཔོན་གྱིས་ཡེ་རེམ་ཡཱ་གདན་དྲངས་ནས་ཁོང་ལ་འདི་ལྟར། ཁྱེད་ཀྱི་དཀོན་མཆོག་ཡ་ཝཱེས་གནས་འདི་ལ་ཆག་སྒོ་འདི་འབྱུང་བར་མཛད་པ་བསྒྲགས་ཤིང་།
JER 40:3 ད་ནི་དཀོན་མཆོག་ཡ་ཝཱེས་ཉིད་ཀྱི་བཀའ་གསུང་བཞིན་དུ་ཆག་སྒོ་འདི་འབྱུང་བར་མཛད་པ་སྟེ། ཅི་ལ་ཞེ་ན། ཁྱོད་ཚོས་དཀོན་མཆོག་ཡ་ཝཱེ་དང་འགལ་བའི་སྡིག་པ་བྱས་ཏེ། ཁོང་གི་བཀའ་ལ་མ་མཉན་པས་དོན་འདི་ཁྱོད་ཅག་གི་སྟེང་དུ་བབས་པ་ཡིན།
JER 40:4 ལྟོས་དང་། ད་ལྟ་ངས་ཁྱེད་ཀྱི་ལག་སྒྲོག་བསྒྲལ་ཟིན་པས། ཇི་སྟེ་ཁྱེད་རང་ང་དང་མཉམ་དུ་པཱ་པེལ་ལོན་དུ་ཕེབས་འདོད་ན་ཕེབས་ཤོག་དང་ངས་ཁྱེད་རང་དྲིན་གྱིས་སྐྱོང་ངོ་། །ཡང་ཇི་སྟེ་ང་དང་མཉམ་དུ་པཱ་པེལ་ལོན་དུ་ཕེབས་མི་འདོད་ན་བཞུགས་པར་མཛོད་ཅིག ལྟོས་དང་། ཡུལ་ཁམས་ཐམས་ཅད་ཁྱེད་ཀྱི་མདུན་དུ་ཡོད་པས། ཁྱེད་གང་ལ་མཉེས་ཤིང་གང་ཞིག་ཐུགས་ལ་འབབ་ན་དེ་རུ་ཕེབས་ཤིག་ཅེས་སྨྲས་པ་དང་།
JER 40:5 ཡེ་རེམ་ཡཱ་ད་དུང་མ་སོང་བའི་སྔོན་དུ་དེས་ཁོང་ལ་འདི་ལྟར། ཡང་ན་ཁྱེད་ནི་པཱ་པེལ་ལོན་རྒྱལ་པོས་ཡ་ཧུ་དཱའི་གྲོང་ཁྱེར་རྣམས་ཀྱི་འགོ་དཔོན་དུ་བསྐོས་པའི་ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱའི་རྩར་ཕེབས་ཤིག དེའི་རྩར་མི་རྣམས་ཀྱི་ཁྲོད་དུ་བཞུགས་དང་། དེ་མིན་གཞན་ཁྱེད་གང་ལ་མཉེས་ཤིང་གང་ཞིག་ཐུགས་ལ་འབབ་ན་དེ་རུ་ཕེབས་ཤིག་ཅེས་ཞུས་ཏེ། སྐུ་སྲུང་དམག་དཔོན་གྱིས་ཁོང་ལ་ཁ་ཟས་དང་གསོལ་རས་ཕུལ་ནས་བཞུད་དུ་བཅུག་པ་དང་།
JER 40:6 ཡེ་རེམ་ཡཱ་ནི་མཱས་ཟི་ཕཱ་རུ་སླེབས་ཏེ་ཨ་ཧི་ཀམ་གྱི་བུ་གེ་དལ་ཡཱ་ཡོད་སར་ཕྱིན་ནས། དེ་དང་མཉམ་དུ་ཡུལ་ནང་ལུས་ཡོད་པའི་མི་རྣམས་ཀྱི་ཁྲོད་དུ་བཞུགས་སོ། །
JER 40:7 དེ་ཡང་ཐང་དུ་ཡོད་པའི་དམག་དཔོན་རྣམས་དང་དེ་དག་གི་འཁོར་གཡོག་རྣམས་ཀྱིས། པཱ་པེལ་ལོན་གྱི་རྒྱལ་པོས་ཨ་ཧི་ཀམ་གྱི་བུ་གེ་དལ་ཡཱ་ཡུལ་དེའི་སྤྱི་དཔོན་དུ་བསྐོས་པ་དང་། པཱ་པེལ་ལོན་དུ་བཙོན་ལ་མ་ཁྲིད་པའི་སྐྱེས་པ་དང་བུད་མེད། བྱིས་པ་རྣམས། ཡུལ་དེའི་དབུལ་པོ་རྣམས་དེའི་ལག་ཏུ་གཏད་པ་ཐོས་ནས།
JER 40:8 ནེ་ཐན་ཡཱའི་བུ་ཡེས་མ་ཨེལ་དང་ཀཱ་རེ་ཨའི་བུ་ཡོ་ཧ་ནན་དང་ཡོ་ནཱ་ཐན་གཉིས་ཀ ཐན་ཧུ་མེད་ཀྱི་བུ་སེ་ར་ཡཱ། ནེ་ཏོ་ཕཱ་པའི་ཨེ་ཕཱ་ཡིའི་བུ་རྣམས། མ་ཨ་ཀཱ་པའི་བུ་ཡེ་ཟན་ཡཱ་དང་དེ་དག་གི་འཁོར་དང་བཅས་པ་མཱས་ཟི་ཕཱ་རུ་གེ་དལ་ཡཱའི་དྲུང་དུ་འོངས་པ་ལ།
JER 40:9 ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱས་དེ་དག་དང་དེ་དག་གི་འཁོར་རྣམས་ལ་མནའ་བསྐྱལ་ནས་འདི་ལྟར། ཁྱེད་ཅག་ཀལ་དི་པ་རྣམས་ལ་འཇིགས་ནས་དེ་དག་ལ་གཡོག་མ་བྱེད་ཅིག ཡུལ་འདིར་སྡོད་ལ་པཱ་པེལ་ལོན་གྱི་རྒྱལ་པོར་ཞབས་ཕྱི་སྒྲུབས་ཤིག་དང་། དེ་ནས་ཁྱེད་ཅག་བདེ་བར་གནས་ཐུབ་པ་ཡིན།
JER 40:10 ཡང་ང་རང་ནི་མཱས་ཟི་ཕཱ་རུ་བསྡད་དེ། ངེད་ཅག་གི་རྩར་འོང་བའི་ཀལ་དི་པ་རྣམས་ལ་བར་དཔང་བྱེད་དགོས། ཁྱེད་ཅག་གིས་རྒུན་ཆང་དང་དབྱར་ཀའི་ཤིང་ཏོག སྣུམ་བཅས་སྡུས་ལ་རང་གི་སྣོད་ཀྱི་ནང་གསོགས་ཤིག ད་དུང་རང་གིས་བཟུང་བའི་གྲོང་ཁྱེར་དུ་སྡོད་ཅིག་ཅེས་བསྒོས་སོ། །
JER 40:11 དེ་ནས་མོ་ཨབ་དང་ཨམ་མོན་པའི་ཁྲོད་དང་། ཨེ་དོམ། ཡུལ་ཕྱོགས་སོ་སོ་བཅས་སུ་ཡོད་པའི་ཡ་ཧུ་དཱ་པ་ཐམས་ཅད་ཀྱིས་པཱ་པེལ་ལོན་གྱི་རྒྱལ་པོས་ཡ་ཧུ་དཱ་པའི་ལྷག་ལུས་རྣམས་བསྐྱུར་བར་མ་ཟད། ད་དུང་ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱ་སྤྱི་དཔོན་དུ་བསྐོས་པའི་གཏམ་ཐོས་པ་ན།
JER 40:12 ཡ་ཧུ་དཱ་པ་ཐམས་ཅད་གང་སར་བསྐྲད་པའི་ཡུལ་ཕྱོགས་སོ་སོ་ནས་ཕྱིར་ལོག་སྟེ། ཡ་ཧུ་དཱའི་ཡུལ་གྱི་མཱས་ཟི་ཕཱ་རུ་གེ་དལ་ཡཱའི་རྩར་འོངས་ནས་རྒུན་ཆང་དང་དབྱར་ཀའི་ཤིང་ཏོག་མང་པོ་བསགས་སོ། །
JER 40:13 ཀཱ་རེ་ཨའི་བུ་ཡོ་ཧ་ནན་དང་ཐང་དུ་ཡོད་པའི་དམག་དཔོན་རྣམས་མཱས་ཟི་ཕཱ་རུ་གེ་དལ་ཡཱའི་རྩར་འོངས་ནས་དེ་ལ་ན་རེ།
JER 40:14 ཨམ་མོན་པའི་རྒྱལ་པོ་པ་ཨ་ལིས་ཀྱིས་ཁྱེད་གསོད་དུ་ནེ་ཐན་ཡཱའི་བུ་ཡེས་མ་ཨེལ་མངགས་པ་ཁྱེད་ཀྱིས་ཤེས་སམ་ཞེས་ཞུས་ཀྱང་། ཨ་ཧི་ཀམ་གྱི་བུ་གེ་དལ་ཡཱ་དེ་དག་ལ་ཡིད་མ་ཆེས་སོ། །
JER 40:15 དེ་ནས་ཀཱ་རེ་ཨའི་བུ་ཡོ་ཧ་ནན་གྱིས་མཱས་ཟི་ཕཱ་རུ་གེ་དལ་ཡཱ་ལ་ལྐོག་ཏུ་ན་རེ། ང་རང་ནེ་ཐན་ཡཱའི་བུ་ཡེས་མ་ཨེལ་གསོད་དུ་འགྲོ་བར་གནོངས་ཤིག་དང་སུས་ཀྱང་ཤེས་པར་མི་འགྱུར་རོ། །ཅི་ཞིག་ལ་དེར་ཁྱེད་གསོད་དུ་བཅུག་ནས། ཁྱེད་ཀྱི་དྲུང་དུ་འདུས་པའི་ཡ་ཧུ་དཱ་པ་ཐམས་ཅད་ཁ་འཐོར་དུ་འགྲོ་བ་དང་། ཡ་ཧུ་དཱའི་ནང་ལུས་པའི་མི་ཐམས་ཅད་འཆི་བར་བྱའམ་ཞེས་ཞུས་མོད་ཀྱང་།
JER 40:16 ཨ་ཧི་ཀམ་གྱི་བུ་གེ་དལ་ཡཱ་ཡིས་ཀཱ་རེ་ཨའི་བུ་ཡོ་ཧ་ནན་ལ་འདི་ལྟར། ཁྱོད་ཀྱིས་དེ་ལྟར་མ་བྱེད་ཅིག ཅི་ལ་ཞེ་ན། ཁྱོད་ཀྱིས་ཡེས་མ་ཨེལ་གྱི་སྐོར་དུ་སྨྲས་པ་ཐམས་ཅད་རྫུན་ཡིན་ནོ་ཞེས་སྨྲས་སོ། །
JER 41:1 དེ་ཡང་ཟླ་བ་བདུན་པར་རྒྱལ་པོའི་བློན་ཆེན་ཏེ། རྒྱལ་རྒྱུད་ཨེ་ལི་ཤཱ་མའི་ཚ་བོའམ། ནེ་ཐན་ཡཱའི་བུ་ཡེས་མ་ཨེལ་བྱ་བས་མི་བཅུ་ཁྲིད་དེ་མཱས་ཟི་ཕཱ་རུ་ཨ་ཧི་ཀམ་གྱི་བུ་གེ་དལ་ཡཱའི་རྩར་འོངས་ནས། དེ་དག་གིས་མཱས་ཟི་ཕཱ་རུ་མཉམ་དུ་ཁ་ཟས་རོལ་བ་དང་།
JER 41:2 དེ་ནས་ནེ་ཐན་ཡཱའི་བུ་ཡེས་མ་ཨེལ་དང་། ཁོ་དང་མཉམ་དུ་ཡོང་བའི་མི་བཅུ་པོ་དེ་ལངས་ནས། པཱ་པེལ་ལོན་གྱི་རྒྱལ་པོས་ཡུལ་ཁམས་ཀྱི་སྤྱི་དཔོན་དུ་བཞག་པའི་ཤཱ་ཕན་གྱི་ཚ་བོའམ། ཨ་ཧི་ཀམ་གྱི་བུ་གེ་དལ་ཡཱ་རལ་གྲིས་བཀུམ་མོ། །
JER 41:3 ཡང་ཡེས་མ་ཨེལ་གྱིས་གེ་དལ་ཡཱ་དང་མཉམ་དུ་མཱས་ཟི་ཕཱ་རུ་ཡོད་པའི་ཡ་ཧུ་དཱ་པ་ཐམས་ཅད་དང་། དེར་ཡོད་པའི་ཀལ་དི་པ་དག་དང་དམག་རྣམས་ཀྱང་བསད་དོ། །
JER 41:4 ཁོས་གེ་དལ་ཡཱ་བསད་པའི་ཉིན་གསུམ་པ་སྟེ། མི་སུས་ཀྱང་མི་ཤེས་པའི་དུས་སུ།
JER 41:5 མི་བརྒྱད་ཅུ་ནི་སི་ཀེམ་དང་། ཞི་ལོ་དང་། སཱ་མར་ཡ་བཅས་ནས་འོངས་པ་དང་། སྨ་ར་བཞར་ཏེ་གོས་བཤགས་ནས། རང་ལ་རྨ་ཕྱུང་ སྟེ་འབྲུ་མཆོད་དང་སྤོས་དཀར་ལག་ཏུ་བཟུང་ནས། དཀོན་མཆོག་ཡ་ཝཱེའི་མཆོད་ཁང་ལ་འབུལ་དུ་འོང་བ་སྟེ།
JER 41:6 ནེ་ཐན་ཡཱའི་བུ་ཡེས་མ་ཨེལ་ནི་དེ་དག་ལ་བསུ་རུ་མཱས་ཟི་ཕཱ་ནས་ཐོན་ཏེ། ངུ་ཞོར་འགྲོ་ཞོར་དེ་དག་དང་ཕྲད་ནས་ན་རེ། ཁྱོད་རྣམས་ནི་ཨ་ཧི་ཀམ་གྱི་བུ་གེ་དལ་ཡཱའི་དྲུང་དུ་ཤོག་དང་ཞེས་པ་དང་།
JER 41:7 དེ་རྣམས་གྲོང་ཁྱེར་གྱི་དབུས་སུ་ཕྱིན་པའི་ཚེ། ནེ་ཐན་ཡཱའི་བུ་ཡེས་མ་ཨེལ་དང་དེ་དང་མཉམ་དུ་ཡོད་པའི་མི་རྣམས་ཀྱིས་དེ་ཚོ་བསད་ནས་དོང་ནང་དུ་གཡུགས་སོ། །
JER 41:8 ཡིན་ཡང་དེ་རྣམས་ལས་མི་བཅུ་ཡིས་ཡེས་མ་ཨེལ་ལ་འདི་ལྟར། ངེད་ཅག་གིས་ཞིང་ཁར་སོ་བ་དང་གྲོ་དང་། སྣུམ་དང་། སྦྲང་རྩི་སོགས་སྦས་ཡོད་པས་ངེད་ཅག་མ་གསོད་ཅིག་ཞུས་པ་ན། ཡེས་མ་ཨེལ་གྱིས་དེ་དག་སྤུན་ཟླ་རྣམས་དང་མཉམ་དུ་མ་བསད་པར་བསྐྱུར་བ་རེད།
JER 41:9 ཡེས་མ་ཨེལ་གྱིས་བསད་པའི་མི་རྣམས་ཀྱི་བེམ་པོ་གེ་དལ་ཡཱའི་རྩར་གཡུགས་པ་དང་། དོང་འདི་ནི་སྔར་རྒྱལ་པོ་ཨ་སཱ་བྱ་བ་དེ་ཡེས་ར་ཨེལ་གྱི་རྒྱལ་པོ་པཱ་ཤ་ལ་སྐྲག་ནས་བརྐོས་པ་ཡིན་ལ། ནེ་ཐན་ཡཱའི་བུ་ཡེས་མ་ཨེལ་གྱིས་བེམ་པོ་ཡིས་དོང་དེ་བཀང་བར་བྱས།
JER 41:10 དེ་ནས་ཡེས་མ་ཨེལ་གྱིས་མཱས་ཟི་ཕཱ་རུ་ལུས་པའི་མི་རྣམས་ཏེ། རྒྱལ་པོའི་སྲས་མོ་རྣམས་དང་མཱས་ཟི་ཕཱ་རུ་གནས་པའི་མི་སྡེ་ཐམས་ཅད་བཙོན་དུ་ཁྲིད་དོ། །དེ་དག་ནི་སྔར་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཨ་ཧི་ཀམ་གྱི་བུ་གེ་དལ་ཡཱ་ལ་བཅོལ་བ་ཡིན་ཏེ། ནེ་ཐན་ཡཱའི་བུ་ཡེས་མ་ཨེལ་གྱིས་དེ་རྣམས་བཙོན་དུ་ཁྲིད་ནས། ཨམ་མོན་པའི་རྩར་འགྲོ་བར་བརྩམས།
JER 41:11 ཀཱ་རེ་ཨའི་བུ་ཡོ་ཧ་ནན་དང་། དེ་དང་མཉམ་དུ་ཡོད་པའི་དམག་དཔོན་རྣམས་ཀྱིས་ནེ་ཐན་ཡཱའི་བུ་ཡེས་མ་ཨེལ་གྱིས་སྤྱད་པའི་ངན་སྤྱོད་ཐམས་ཅད་ཐོས་པ་དང་།
JER 41:12 མི་རྣམས་ཁྲིད་ནས་ནེ་ཐན་ཡཱའི་བུ་ཡེས་མ་ཨེལ་དང་འཐབ་ཏུ་སོང་བ་ལ། གིབ་ཡོན་གྱི་ཆུ་ཆེན་འགྲམ་དུ་དེ་དང་ཕྲད།
JER 41:13 ཡང་ཡེས་མ་ཨེལ་དང་མཉམ་དུ་ཡོད་པའི་མི་རྣམས་ཀྱིས་ཀཱ་རེ་ཨའི་བུ་ཡོ་ཧ་ནན་དང་། དེ་དང་ལྷན་ཅིག་ཏུ་ཡོད་པའི་དམག་དཔོན་རྣམས་མཐོང་ནས་སེམས་དགའ་བར་གྱུར་ཏོ། །
JER 41:14 དེ་ལྟར་ཡེས་མ་ཨེལ་གྱིས་མཱས་ཟི་ཕཱ་ནས་བཙོན་དུ་ཁྲིད་པའི་མི་ཐམས་ཅད་ཁ་ཕྱིར་འཁོར་ནས་ཀཱ་རེ་ཨའི་བུ་ཡོ་ཧ་ནན་གྱི་དྲུང་དུ་ཕྱིན་ཏོ། །
JER 41:15 ཡང་ནེ་ཐན་ཡཱའི་བུ་ཡེས་མ་ཨེལ་ནི་མི་བརྒྱད་དང་བཅས་ཡོ་ཧ་ནན་གྱི་ལག་ནས་ཐར་ཏེ་ཨམ་མོན་པའི་རྩར་བྲོས་སོ། །
JER 41:16 ནེ་ཐན་ཡཱའི་བུ་ཡེས་མ་ཨེལ་གྱིས་ཨ་ཧི་ཀམ་གྱི་བུ་གེ་དལ་ཡཱ་བསད་དེ། མཱས་ཟི་ཕཱ་རུ་ལུས་པའི་མི་རྣམས་དང་། དམག་མི་དང་། བུད་མེད་དང་། བྱིས་པ་དང་། ཉུག་རུམ་པ་དང་བཅས་གིབ་ཡོན་དུ་བཙོན་ལ་ཁྲིད་པའི་རྗེས་སུ། ཀཱ་རེ་ཨའི་བུ་ཡོ་ཧ་ནན་དང་དེ་དང་མཉམ་དུ་ཡོད་པའི་དམག་དཔོན་དག་གིས་དེ་རྣམས་ཕྱིར་ཕྲོགས་ཏེ།
JER 41:17 ཨེ་ཅིབ་ཡུལ་དུ་འགྲོ་བར་པེད་ལེ་ཧེམ་གྱི་གེ་ལོ་ཐུ་ཀིམ་ཧམ་དུ་བསྡད་དོ། །
JER 41:18 ཅི་ལ་ཞེ་ན། ནེ་ཐན་ཡཱའི་བུ་ཡེས་མ་ཨེལ་གྱིས་པཱ་པེལ་ལོན་རྒྱལ་པོས་ཡུལ་ཁམས་ཀྱི་སྤྱི་དཔོན་དུ་བསྐོས་པའི་ཨ་ཧི་ཀམ་གྱི་བུ་གེ་དལ་ཡཱ་བསད་པའི་རྐྱེན་གྱིས་དེ་དག་ཀལ་དི་པ་ལ་འཇིགས་པས་སོ། །
JER 42:1 དེ་ནས་དམག་དཔོན་རྣམས་དང་། ཀཱ་རེ་ཨའི་བུ་ཡོ་ཧ་ནན་དང་། ཧོ་ཤ་ཡཱའི་བུ་ཡེ་ཟན་ཡཱ་དང་མི་ཐམས་ཅད་ཀྱི་མཆོག་དམན་སུ་ཡིན་ཡང་ཚང་མ་མདུན་དུ་འོངས་ནས།
JER 42:2 ལུང་སྟོན་པ་ཡེ་རེམ་ཡཱ་ལ་ན་རེ། ངེད་ཅག་ལ་ཁྱེད་ཀྱི་དྲུང་དུ་ཞུ་བར་མཛོད་ཅིག ངེད་ཅག་ཤུལ་ལུས་རྣམས་ཀྱི་ཆེད་དུ་ཁྱེད་ཀྱི་དཀོན་མཆོག་ཡ་ཝཱེ་ལ་སྨོན་ལམ་འདེབས་རོགས་ཞུ། ཅི་ལ་ཞེ་ན། ཁྱེད་ཀྱིས་དངོས་སུ་གཟིགས་པ་ལྟར་ངེད་ཅག་ནི་མང་པོའི་ནང་ནས་ཤིན་ཏུ་ཉུང་ངུ་ལས་ལུས་མེད་པས་སོ། །
JER 42:3 ཁྱེད་ཀྱི་དཀོན་མཆོག་ཡ་ཝཱེས་ངེད་ཅག་ལ་འགྲུལ་དགོས་པའི་ལམ་དང་། སྤྱོད་དགོས་པའི་དོན་རྣམས་སྟོན་པར་ཤོག་ཅེས་ཞུས་པ་དང་།
JER 42:4 ལུང་སྟོན་པ་ཡེ་རེམ་ཡཱས་འདི་ལྟར། ངས་ཁྱོད་ཅག་གི་གཏམ་ཐོས་པས། ལྟོས་ཤིག ངས་ཁྱོད་ཀྱིས་སྨྲས་པ་བཞིན་དུ་ཁྱོད་ཅག་གི་དཀོན་མཆོག་ཡ་ཝཱེ་ལ་གསོལ་བ་འདེབས་པར་བྱ་སྟེ། དཀོན་མཆོག་ཡ་ཝཱེས་ཁྱོད་ཅག་ལ་བཀའ་ལན་ཅི་ཞིག་གནང་བ་དེ་ངས་ཁྱོད་ཅག་ལ་འཆད་པར་བྱ་ཞིང་། གསང་བར་མི་འགྱུར་རོ་ཞེས་སྨྲས་སོ། །
JER 42:5 དེ་ནས་ཁོ་ཚོས་ཡེ་རེམ་ཡཱ་ལ་ན་རེ། གལ་ཏེ་ངེད་རྣམས་ཀྱིས་ཁྱེད་ཀྱི་དཀོན་མཆོག་ཡ་ཝཱེས་ཁྱེད་མངགས་ནས་གསུངས་པའི་བཀའ་ཐམས་ཅད་བཞིན་དུ་མ་སྤྱད་ན། དཀོན་མཆོག་ཡ་ཝཱེ་ཁོང་ཉིད་ངེད་ཅག་གི་ཁྲོད་དུ་ཡིད་རྟོན་རུང་བ་དང་བདེན་པའི་དཔང་པོ་རུ་འགྱུར་བར་ཤོག
JER 42:6 ད་ལྟ་ངེད་ཅག་གིས་ཁྱེད་ནི་ངེད་ཀྱི་དཀོན་མཆོག་ཡ་ཝཱེའི་དྲུང་དུ་འགྲོ་བར་ཞུ་བ་དང་། ཁོང་གིས་བཀའ་བཟང་ངན་གང་ཞིག་གསུངས་ནའང་ངེད་ཅག་གིས་མཉན་པར་བྱའོ། །ཅི་ལ་ཞེ་ན། ངེད་རྣམས་ཀྱིས་རང་ཅག་གི་དཀོན་མཆོག་ཡ་ཝཱེའི་གསུང་ལ་མཉན་ན་བྱིན་རླབས་འཐོབ་བར་འགྱུར་རོ་ཞེས་སྨྲས་སོ། །
JER 42:7 དེ་ནས་ཉིན་བཅུ་འགོར་རྗེས་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་དང་།
JER 42:8 ཁོང་གིས་ཀཱ་རེ་ཨའི་བུ་ཡོ་ཧ་ནན་དང་། དེ་དང་མཉམ་དུ་ཡོད་པའི་དམག་དཔོན་ཀུན་དང་། མཆོག་དམན་སུ་ཡིན་ཐམས་ཅད་བོས་ནས།
JER 42:9 དེ་དག་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེ་སྟེ། ཁྱོད་ཅག་གིས་ང་རང་ཁོང་གི་དྲུང་དུ་སོང་ནས་གསོལ་བ་འདེབས་དགོས་པར་ཞུས་པ་ཉིད་ཀྱིས་འདི་སྐད་དུ།
JER 42:10 ཇི་སྟེ་ཁྱོད་ཅག་ད་དུང་ཡུལ་འདིར་གནས་ན། ངས་ཁྱོད་ཡར་བཞེང་ཞིང་བཤིག་པར་མི་བྱ། ངས་ཁྱོད་འཛུགས་ཤིང་བསློག་པར་མི་བྱའོ། །ཅི་ལ་ཞེ་ན། ངས་ཁྱོད་ཅག་ལ་ཕབ་པའི་ཆག་སྒོའི་ཕྱིར་ང་འགྱོད་དོ། །
JER 42:11 ཁྱོད་ཅག་སྐྲག་པའི་པཱ་པེལ་ལོན་གྱི་རྒྱལ་པོར་མ་འཇིགས་ཤིག དེ་ལ་མ་སྐྲག་ཅིག ཅི་ལ་ཞེ་ན། ང་ནི་ཁྱོད་དང་མཉམ་དུ་གནས་ཤིང་། ཁྱོད་རྣམས་བསྐྱབས་ཏེ་ཁོའི་ལག་ནས་སྒྲོལ་བར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 42:12 ངས་ཁྱོད་ཅག་ལ་སྙིང་རྗེ་བསྒོམས་ན། ཁོས་ཀྱང་ཁྱོད་ཅག་ལ་སྙིང་རྗེ་བསྐྱེད་ནས་ཁྱོད་ཅག་རང་ཡུལ་དུ་ལོག་པར་བྱའོ་ཞེས་གསུངས།
JER 42:13 གལ་ཏེ་ཁྱོད་ཅག་གིས་ངེད་རྣམས་ཡུལ་འདིར་གནས་པར་མི་བྱའོ་ཟེར་ཞིང་། ཁྱོད་རྣམས་ཀྱི་དཀོན་མཆོག་ཡ་ཝཱེའི་བཀའ་ལའང་མི་མཉན་པར།
JER 42:14 ཡང་ངེད་ཅག་འཐབ་མོ་མི་མཐོང་བ་དང་། དམག་དུང་གི་སྒྲ་མི་ཐོས་པ། ཁ་ཟས་མེད་པས་བཀྲེས་ལྟོགས་མི་མྱང་བའི་ཨེ་ཅིབ་ཡུལ་དུ་སོང་ནས་དེར་སྡོད་དགོས་ཏེ་འདི་རུ་མི་འདུག་ཟེར་ན།
JER 42:15 ཀྱེ་ཡ་ཧུ་དཱ་པ་ཤུལ་ལུས་རྣམས། ཁྱོད་རྣམས་ཀྱིས་ད་ལྟ་དཀོན་མཆོག་ཡ་ཝཱེའི་བཀའ་ལ་ཉོན་ཅིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཇི་སྟེ་ཁྱོད་ཅག་ཨེ་ཅིབ་ཡུལ་དུ་སོང་ནས་དེར་སྡོད་པའི་སེམས་ཐག་བཅད་པ་ཡིན་ན།
JER 42:16 ཁྱོད་ཅག་འཇིགས་པའི་རལ་གྲི་ཡིས་ཨེ་ཅིབ་ཡུལ་དུ་ཁྱོད་ཅག་བཟུང་བར་འགྱུར་བ་དང་། ཡང་ཁྱོད་ཅག་སྐྲག་པའི་མུ་གེ་ཡིས་ཨེ་ཅིབ་ཡུལ་དུ་ཁྱོད་ཅག་འདེད་པར་འགྱུར་ལ། ཁྱོད་རྣམས་དེ་རུ་འཆི་ངེས་ཡིན།
JER 42:17 ཨེ་ཅིབ་ཡུལ་དུ་སོང་ནས་དེར་སྡོད་པའི་སེམས་ཐག་བཅད་པ་རྣམས་ནི། ཐམས་ཅད་རལ་གྲི་དང་མུ་གེ་དང་རིམས་ནད་བཅས་ཀྱིས་འཆི་བར་འགྱུར་ཏེ། མི་གཅིག་ཀྱང་ལུས་པར་མི་འགྱུར་ལ། ངས་དེ་དག་གི་སྟེང་དུ་འབེབ་པའི་ཆག་སྒོ་ལས་ཀྱང་ཐར་བར་མི་འགྱུར་རོ་ཞེས་གསུངས་སོ། །
JER 42:18 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཡེ་རུ་སཱ་ལེམ་གྱི་མི་རྣམས་ཀྱི་སྟེང་དུ་རང་གི་ཁོང་ཁྲོ་དང་ཁྲོ་གཏུམ་ཇི་ལྟར་བླུགས་པ་ཡིན་ན། ཁྱོད་ཅག་ཨེ་ཅིབ་ཡུལ་དུ་སླེབས་པ་ཙམ་གྱིས་ངའི་ཁྲོ་གཏུམ་ནི་ཁྱོད་ཅག་གི་སྟེང་དུ་དེ་ལྟར་བླུག་བར་བྱ་སྟེ། ཐ་ན་ཁྱོད་ཅག་ལ་ངན་སྨྲས་དང་འཇིགས་སྐྲག དམོད་མོ། ངོ་ཚ་བཅས་ཐེབས་པར་འགྱུར་ཞིང་། ཡུལ་འདི་སླར་ཡང་མཐོང་བར་མི་འགྱུར་རོ་ཞེས་གསུངས།
JER 42:19 ཀྱེ་ཡ་ཧུ་དཱ་པ་ཤུལ་ལུས་རྣམས། དཀོན་མཆོག་ཡ་ཝཱེས་ཁྱོད་ཅག་གི་སྐོར་ལ་འདི་སྐད་དུ། ཨེ་ཅིབ་ཡུལ་དུ་མ་འགྲོ་ཞིག་ཅེས་གསུངས། དེ་རིང་གི་ཉིན་མོར་ངས་ཁྱོད་ཅག་ལ་ཉེན་བརྡ་གཏོང་བ་འདི་རྟོགས་པར་གྱིས།
JER 42:20 ཁྱོད་ཅག་གིས་གཡོ་སྦྱོར་སྤེལ་ནས་རང་ལ་གནག་པའོ། །ཅི་ལ་ཞེ་ན། ཁྱོད་ཅག་གིས་ང་རང་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་བསུས་ནས་འདི་ལྟར། ཁྱེད་ཀྱིས་ངེད་ཅག་གི་དོན་དུ་ངེད་ཀྱི་དཀོན་མཆོག་ཡ་ཝཱེ་ལ་གསོལ་བ་འདེབས་རོགས་ཞུ། ཁྱེད་ཀྱིས་ངེད་ཀྱི་དཀོན་མཆོག་ཡ་ཝཱེས་ཅི་དང་ཅི་གསུང་བ་ཐམས་ཅད་ངེད་རྣམས་ལ་སྨྲ་བར་མཛོད། ངེད་ཀྱིས་དེ་བཞིན་བསྒྲུབ་པར་བྱའོ་ཞེས་སྨྲས་སོ། །
JER 42:21 ངས་དེ་རིང་གི་ཉིན་མོར་ཁྱོད་རྣམས་ལ་སྨྲས་ཀྱང་། ཁྱོད་ཅག་གིས་རང་གི་དཀོན་མཆོག་ཡ་ཝཱེས་ང་ཁྱོད་ཅག་གི་མདུན་དུ་མངགས་ནས་གསུངས་པའི་བཀའ་གཅིག་ལའང་མ་མཉན་ཏོ། །
JER 42:22 ད་ལྟ་ཁྱོད་རྣམས་ཀྱིས་དངོས་གནས་ཤེས་དགོས་པ་ཞིག་ལ། ཁྱོད་རྣམས་སོང་ནས་སྡོད་འདོད་པའི་གནས་སུ་རལ་གྲི་དང་། མུ་གེ་དང་། རིམས་ནད་ཀྱིས་འཆི་བར་འགྱུར་རོ་ཞེས་གསུངས་སོ། །
JER 43:1 ཡེ་རེམ་ཡཱ་ཡིས་མི་ཀུན་ལ་ཁོ་ཚོའི་དཀོན་མཆོག་ཡ་ཝཱེའི་བཀའ་ཐམས་ཅད་དེ། ཁོ་ཚོའི་དཀོན་མཆོག་ཡ་ཝཱེས་ཁོང་ཉིད་མངགས་ནས་སྨྲ་བར་བཅུག་པའི་བཀའ་རྣམས་བཤད་རྗེས།
JER 43:2 ཧོ་ཤ་ཡཱའི་བུ་ཨ་ཟར་ཡཱ་དང་། ཀཱ་རེ་ཨའི་བུ་ཡོ་ཧ་ནན། དེ་མིན་ང་རྒྱལ་གྱིས་ཁེངས་པའི་མི་རྣམས་ཀྱིས་ཡེ་རེམ་ཡཱ་ལ་ན་རེ། ཁྱེད་ཀྱིས་རྫུན་སྨྲས་པ་ཡིན་ཏེ། རང་ཅག་གི་དཀོན་མཆོག་ཡ་ཝཱེས་ཁྱོད་རྣམས་ཨེ་ཅིབ་ཡུལ་དུ་སྡོད་པར་མ་འགྲོ་ཞེས་སྨྲ་བར་ཁྱེད་རང་མ་མངགས་ལ།
JER 43:3 འདི་ནི་ནེར་ཡཱའི་བུ་པཱ་རུག་གིས་ཁྱེད་ལ་ངན་སྐུལ་བྱས་ནས་ངེད་ཅག་ལ་གནོད་པ་བཏང་སྟེ། ངེད་རྣམས་ཀལ་དི་པའི་ལག་ཏུ་སྤྲོད་པ་དང་། ངེད་ཅག་གསོད་པའམ་ཡང་ན་པཱ་པེལ་ལོན་དུ་བཙན་ཁྲིད་བྱེད་པའི་ཆེད་དུ་ཡིན་ཞེས་སྨྲས་པ་ལ།
JER 43:4 ཀཱ་རེ་ཨའི་བུ་ཡོ་ཧ་ནན་དང་། དམག་དཔོན་ཀུན་དང་། མི་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་མཉན་ནས་ཡ་ཧུ་དཱའི་ཡུལ་དུ་མ་བསྡད་པར།
JER 43:5 ཀཱ་རེ་ཨའི་བུ་ཡོ་ཧ་ནན་དང་། དམག་དཔོན་ཀུན་གྱིས་ཤུལ་དུ་ལུས་པའི་མི་རྣམས་ཏེ། ཡུལ་ཁམས་སོ་སོར་ཐོར་ནས་ཕྱིར་ལོག་ཅིང་ཡ་ཧུ་དཱ་ཡུལ་དུ་སྡོད་པ་རྣམས་ཡིན་ལ།
JER 43:6 སྐྱེས་པ་དང་བུད་མེད། བྱིས་པ། རྒྱལ་པོའི་སྲས་མོ་བཅས་དང་། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཤཱ་ཕན་གྱི་ཚ་བོའམ་ཨ་ཧི་ཀམ་གྱི་བུ་གེ་དལ་ཡཱའི་རྩར་བསྐྱུར་བའི་མི་ཐམས་ཅད་དང་། ལུང་སྟོན་པ་ཡེ་རེམ་ཡཱ་དང་། ནེར་ཡཱའི་བུ་པཱ་རུག་བཅས་པ་སྟེ།
JER 43:7 ཐམས་ཅད་ཨེ་ཅིབ་ཡུལ་དུ་ཁྲིད་ནས་ཐ་ཕན་ཧེ་སི་བྱ་བར་སླེབས་སོ། །དེ་ནི་ཁོ་རྣམས་ཀྱིས་དཀོན་མཆོག་ཡ་ཝཱེའི་བཀའ་ལ་མ་མཉན་པའི་ཕྱིར་རོ། །
JER 43:8 ཡང་ཐ་ཕན་ཧེ་སི་རུ་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 43:9 ཁྱོད་ཀྱིས་ཡ་ཧུ་དཱ་པའི་མིག་མདུན་དུ་ལག་ལ་རྡོ་ཆེན་པོ་འགའ་བཟུང་ནས། ཐ་ཕན་ཧེ་སིའི་ཕཱར་ཨོལ་གྱི་ཕོ་བྲང་གི་སྒོ་ཁའི་རྡོ་གཅལ་བཟོ་བྱེད་གཏུན་ཁུང་ནང་དུ་སྦོས་ཤིག
JER 43:10 ཡང་དེ་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་རང་གི་གཡོག་པོ་སྟེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་བོས་འོངས་ནས། སྦས་པའི་རྡོ་འདི་རྣམས་ཀྱི་སྟེང་དུ་ངས་དེའི་རྒྱལ་ཁྲི་འགོད་པ་དང་། ཁོས་དེའི་སྟེང་དུ་རྒྱལ་པོའི་གུར་དབུབ་ཅིང་།
JER 43:11 ཁོ་འོངས་ནས་ཨེ་ཅིབ་ཡུལ་ལ་རྒོལ་ཏེ། འཆི་དགོས་པ་དག་འཆི་བར་འགྱུར་བ་དང་། བཙོན་དུ་འཁྲིད་དགོས་པ་དག་བཙོན་དུ་འཁྲིད་ཅིང་། རལ་གྲིས་གསོད་དགོས་པ་རྣམས་གསོད་པར་འགྱུར།
JER 43:12 ངས་ཨེ་ཅིབ་པའི་ལྷ་ཁང་དག་མེས་བསྲེག་དགོས་པ་དང་། པཱ་པེལ་ལོན་གྱི་རྒྱལ་པོས་ལྷ་ཁང་རྣམས་བསྲེགས་ནས་སྐུ་འདྲ་རྣམས་བཙོན་དུ་འཁྱེར་བར་འགྱུར། ཡང་དེ་ལ་ཨེ་ཅིབ་ཡུལ་ཐོབ་ནས། ཕྱུགས་རྫིས་རང་གི་གོས་གྱོན་པ་ལྟར་བདེ་བའི་ངང་བཞུད་པར་འགྱུར།
JER 43:13 དེས་ཨེ་ཅིབ་ཡུལ་གྱི་པེད་ཤེ་མེ་སིའི་ཀ་བ་རྣམས་གཅོག་ཅིང་། ཨེ་ཅིབ་པའི་ལྷ་ཁང་རྣམས་མེས་བསྲེག་པར་འགྱུར་རོ་ཞེས་སྨྲོས་ཤིག་ཅེས་གསུངས་སོ། །
JER 44:1 དེ་ཡང་ཨེ་ཅིབ་ཡུལ་ཏེ། མིག་དོལ་དང་ཐ་ཕན་ཧེ་སི། ནོབ། ཕཱད་རུའུ་སི་བཅས་ཡུལ་འཁོར་དུ་སྡོད་པའི་ཡ་ཧུ་དཱ་པ་ཐམས་ཅད་ཀྱི་ཕྱིར་དུ། ཡེ་རེམ་ཡཱ་ལ་བྱུང་བའི་བཀའ་ནི་འདི་ལྟ་སྟེ།
JER 44:2 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཡེ་རུ་སཱ་ལེམ་དང་ཡ་ཧུ་དཱའི་གྲོང་ཁྱེར་རྣམས་ཀྱི་སྟེང་དུ་ཕབ་པའི་ཆག་སྒོ་ཐམས་ཅད་ཁྱོད་ཚོས་མཐོང་བ་ཡིན་ལ། ལྟོས་ཤིག གྲོང་ཁྱེར་དེ་རྣམས་དེ་རིང་གི་བར་དུ་ཞིག་རོར་ལུས་ནས་འདུག་མཁན་གཅིག་ཀྱང་མེད།
JER 44:3 དེ་ནི་མི་རྣམས་ཀྱིས་སྤྱོད་ངན་སྤྱད་པའི་རྐྱེན་གྱིས་ཡིན་ལ། ཁོ་ཚོས་ལྷ་གཞན་རྣམས་ཏེ་ཁོ་ཚོ་དང་ཁྱོད་ཅག དེ་མིན་ཁྱོད་ཅག་གི་ཕ་མེས་རྣམས་ལ་རྒྱུས་མི་མངའ་བའི་ལྷ་རྣམས་ལ་སྤོས་བདུགས་པ་དང་ཞབས་ཏོག་བསྒྲུབས་ནས་ང་ལ་ཁོང་ཁྲོ་བསླངས།
JER 44:4 ངས་རང་གི་ཞབས་ཕྱི་ལུང་སྟོན་པ་ཀུན་ཡང་ཡང་ཁྱོད་ཅག་གི་གམ་དུ་མངགས་ནས་འདི་ལྟར། ཁྱོད་ཚོས་ང་ཞེ་མེར་ཞིང་སྡང་བའི་དོན་འདི་མ་བྱེད་ཅིག་ཅེས་བསྒོས་ནའང་།
JER 44:5 དེ་དག་གིས་མ་མཉན་ཏེ། རྣ་བ་གཏད་ནས་མ་མཉན་ལ། རང་གི་ངན་སྤྱོད་ལས་ཀྱང་ཕྱིར་མ་འཁོར་བར་སྔར་བཞིན་ལྷ་གཞན་རྣམས་ལ་སྤོས་བདུགས་པས།
JER 44:6 ངའི་ཁོང་ཁྲོ་དང་ཁྲོ་གཏུམ་བླུགས་ཤིང་། ཡ་ཧུ་དཱའི་གྲོང་ཁྱེར་རྣམས་དང་ཡེ་རུ་སཱ་ལེམ་གྱི་སྲང་ལམ་དུ་མེ་ལྟར་འབར་བས། དེ་རིང་གི་ཉིན་མོ་ལྟར་དེ་དག་བཤིག་ནས་ཞིག་རོར་བྱས་སོ་ཞེས་གསུངས།
JER 44:7 ད་ལྟ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་གིས་སྤྱོད་ངན་འདི་དག་སྤྱད་ནས་རང་ཉིད་བརླགས་ཏེ། ཁྱོད་ཅག་གི་སྐྱེས་པ་རྣམས་དང་བུད་མེད་རྣམས། བྱིས་པ་རྣམས། འོ་འཐུང་དང་བཅས་ཡ་ཧུ་དཱ་ནས་མེད་པར་བྱས་ཏེ་གཅིག་ཀྱང་མི་ལུས་པར་བྱེད་པ་ཅི་ཡིན་ནམ།
JER 44:8 ཁྱོད་ཅག་གིས་རང་གི་ལག་པས་བཟོས་པ་ཡིས་བྱེས་སུ་སྡོད་པའི་ཨེ་ཅིབ་ཡུལ་དུ་ལྷ་གཞན་རྣམས་ལ་སྤོས་བདུགས་ནས་ང་ཁྲོ་བར་བཅུག་སྟེ། ཁྱོད་རྣམས་མེད་པར་བཟོས་པ་དང་། ས་སྟེང་གི་ཡུལ་ཁམས་ཐམས་ཅད་དུ་དམོད་པ་དང་སྨད་ར་གཏོང་བའི་གཞི་རུ་གྱུར་ཏོ། །
JER 44:9 ཡ་ཧུ་དཱའི་ཡུལ་དང་ཡེ་རུ་སཱ་ལེམ་གྱི་སྲང་ལམ་རྣམས་སུ་སྤྱད་པའི་སྤྱོད་ངན་ཏེ། ཁྱོད་ཅག་གི་མེས་པོ་རྣམས་ཀྱི་སྤྱོད་ངན་དང་། ཡ་ཧུ་དཱའི་རྒྱལ་པོ་དག་དང་བཙུན་མོ་རྣམས་ཀྱི་སྤྱོད་ངན། ཁྱོད་ཅག་དང་ཁྱོད་ཅག་གི་ཆུང་མ་རྣམས་ཀྱི་སྤྱོད་ངན་རྣམས་ཁྱོད་རྣམས་ཀྱིས་བརྗེད་སོང་ངམ།
JER 44:10 དེ་རིང་གི་བར་དུ་ཁོ་རྣམས་ད་དུང་བློ་འགྱོད་མ་སྐྱེས་ཤིང་། འཇིགས་ཀྱང་མ་འཇིགས་ལ། ངས་ཁྱོད་ཅག་དང་ཁྱོད་ཅག་གི་མེས་པོའི་མདུན་དུ་བཞག་པའི་བཀའ་ཁྲིམས་དང་སྒྲིག་སྲོལ་རྣམས་མ་བརྩིས་པས།
JER 44:11 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ཁྱོད་རྣམས་ལ་ཆག་སྒོ་འབྱུང་བར་བྱས་ཏེ་ཡ་ཧུ་དཱ་པ་རྣམས་མེད་པར་བཟོ་བའི་སེམས་ཐག་བཅད་ཟིན་ཏོ། །
JER 44:12 ཡང་ཨེ་ཅིབ་ཡུལ་དུ་འགྲོ་བར་ཐག་བཅད་པ་དང་དེ་རུ་བྱེས་སུ་སྡོད་པའི་མི་སྟེ། ཤུལ་དུ་ལུས་པའི་ཡ་ཧུ་དཱ་པ་ཐམས་ཅད་ངས་མེད་པར་བཟོ་བ་དང་། དེ་རྣམས་ནི་ཨེ་ཅིབ་ཡུལ་དུ་མེད་པར་འགྱུར་རོ། །རལ་གྲི་དང་མུ་གེའི་རྐྱེན་གྱིས་རྩ་མེད་དུ་འགྲོ་བ་དང་། མཆོག་དམན་སུ་ཡིན་ཡང་རལ་གྲི་དང་མུ་གེ་ལས་འཆི་བར་འགྱུར་ལ། ཐ་ན་ངན་སྨྲས་དང་འཇིགས་སྐྲག དམོད་མོ། ངོ་ཚ་བཅས་ཐེབས་པར་འགྱུར་རོ། །
JER 44:13 ངས་ཇི་ལྟར་རལ་གྲི་དང་མུ་གེ་དང་རིམས་ནད་བཅས་ཀྱིས་ཡེ་རུ་སཱ་ལེམ་ལ་ཉེས་ཆད་བཅད་པ་ཡིན་ན། ཨེ་ཅིབ་ཡུལ་དུ་སྡོད་པའི་ཡ་ཧུ་དཱ་པ་རྣམས་ལའང་དེ་ལྟར་ཉེས་ཆད་གཅོད་ངེས་ཡིན།
JER 44:14 ཨེ་ཅིབ་ཡུལ་དུ་སོང་ནས་དེ་རུ་སྡོད་པའི་མི་སྟེ་ཡ་ཧུ་དཱ་པ་ཤུལ་ལུས་རྣམས་ནི་སུ་ཡང་ཐར་མི་ཐུབ་ལ་གསོན་པོར་ཡང་མི་ལུས་ཏེ། ཁོ་རྣམས་ཡ་ཧུ་དཱའི་ཡུལ་དུ་ཕྱིར་ལོག་མི་ནུས་སོ། །དེ་དག་གི་སེམས་སུ་ཕྱིར་ལོག་ནས་དེ་རུ་འདུག་འདོད་ཀྱང་། བྲོས་ནས་ཐར་བའི་མི་འགའ་རེ་མ་གཏོགས་གཞན་སུ་ཡང་ཕྱིར་ལོག་མི་ནུས་ཞེས་གསུངས་སོ་ཞེས་པའོ། །
JER 44:15 དེ་ཡང་ཨེ་ཅིབ་ཀྱི་ཕཱད་རུའུ་སི་ཡུལ་དུ་སྡོད་པའི་མི་རྣམས་ཏེ། རང་གི་ཆུང་མས་ལྷ་གཞན་རྣམས་ལ་སྤོས་བདུགས་པ་ཤེས་པའི་སྐྱེས་པ་རྣམས་དང་དེར་ལངས་སྡོད་པའི་བུད་མེད་ཚོགས་ཀྱིས་མཉམ་དུ་ཡེ་རེམ་ཡཱ་ལ་ལན་བཟློགས་ནས་འདི་ལྟར།
JER 44:16 ཁྱོད་ཀྱིས་དཀོན་མཆོག་ཡ་ཝཱེའི་མཚན་གྱི་སྒོ་ནས་ངེད་ཅག་ལ་བསྒོས་པ་དེར་ངེད་རྣམས་ཀྱིས་མཉན་པར་མི་བྱ།
JER 44:17 ངེད་རྣམས་ཀྱིས་རང་གི་ངག་ནས་ཐོན་པའི་ཚིག་བཞིན་བྱེད་ངེས་ཡིན་ཏེ། ནམ་མཁའི་རྒྱལ་མོར་སྤོས་བདུགས་ནས་སྐྱེམས་མཆོད་འབུལ་བ་དང་། ངེད་ཅག་དང་ངེད་ཅག་གི་ཕ་མེས་རྣམས། རྒྱལ་པོ་རྣམས། འགོ་དཔོན་བཅས་ཀྱིས་ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་སཱ་ལེམ་གྱི་སྲང་ལམ་དུ་ཅི་ལྟར་སྤྱད་པ་བཞིན་དུ་སྤྱོད་པར་འགྱུར་ཏེ། ཅི་ལ་ཞེ་ན། དེའི་དུས་སུ་ངེད་རྣམས་ལྟོ་བ་འགྲངས་ཤིང་བདེ་སྐྱིད་ལྡན་ལ། ཆག་སྒོ་ཅི་ཡང་མ་མཐོང་བས་སོ། །
JER 44:18 འོན་ཀྱང་ངེད་རྣམས་ཀྱིས་ནམ་མཁའི་རྒྱལ་མོར་སྤོས་བདུག་པ་དང་སྐྱེམས་མཆོད་འབུལ་བ་མཚམས་བཞག་པའི་ཚུན་ལ། ངེད་རྣམས་ལ་ཅི་ཡང་མེད་པར་མ་ཟད། རལ་གྲི་དང་མུ་གེས་ཚར་བཅད་དོ་ཞེས་སྨྲས་སོ། །
JER 44:19 བུད་མེད་རྣམས་ན་རེ། ངེད་ཅག་གིས་ནམ་མཁའི་རྒྱལ་མོར་སྤོས་བདུགས་ནས་སྐྱེམས་མཆོད་ཕུལ་བ་དང་། ནམ་མཁའི་རྒྱལ་མོའི་རྟེན་གྱི་འཁུར་ར་བཟོས་ནས་དེར་ཕུལ་བ་དང་སྐྱེམས་མཆོད་ཕུལ་བ་ངེད་རྣམས་ཀྱི་སྐྱེས་པ་དག་གིས་མི་ཤེས་སམ་ཞེས་སྨྲས་པ་ན།
JER 44:20 ཡེ་རེམ་ཡཱ་ཡིས་ཁོང་ལ་དེ་ལྟར་ལན་བཟློགས་པའི་སྐྱེས་པ་དང་བུད་མེད་ཡོངས་ལ་འདི་ལྟར།
JER 44:21 ཁྱོད་ཅག་དང་ཁྱོད་ཅག་གི་ཕ་མེས་དང་། རྒྱལ་པོ། འགོ་དཔོན། དེ་མིན་ཡུལ་མི་བཅས་ཀྱིས་ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་སཱ་ལེམ་གྱི་སྲང་ལམ་རྣམས་སུ་སྤོས་བདུགས་པ་དཀོན་མཆོག་ཡ་ཝཱེས་ཐུགས་སུ་དྲན་ཞིང་དགོངས་པ་མ་ཡིན་ནམ།
JER 44:22 ཁྱོད་ཅག་གིས་སྤྱད་པའི་སྤྱོད་ངན་དང་ཞེ་མེར་བའི་དོན་རྣམས་ཀྱི་ཕྱིར་དཀོན་མཆོག་ཡ་ཝཱེས་ཐུགས་ནས་བཟོད་མ་ནུས་པས། དེ་རིང་ཉིན་མོ་ལྟར་ཁྱོད་ཅག་གི་ཡུལ་ཁམས་ཞིག་རོར་ལུས་པ་དང་། མི་རྣམས་འཇིགས་ཤིང་དམོད་མོ་འདེབས་པའི་གཞི་རུ་གྱུར་ཅིང་། སྡོད་མཁན་གཅིག་ཀྱང་མེད་པར་མཛད་དོ། །
JER 44:23 ཁྱོད་ཚོས་སྤོས་བདུགས་ནས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། དཀོན་མཆོག་ཡ་ཝཱེའི་བཀའ་ལའང་མ་མཉན་པར། ཁོང་གི་བཀའ་ཁྲིམས་དང་སྒྲིག་ལམ། དཔང་ཡིག་བཅས་བརྩི་སྲུང་མ་བྱས་པས། དེ་རིང་ཉིན་མོ་བཞིན་དུ་ཆག་སྒོ་འདི་ཁྱོད་ཅག་གི་སྟེང་དུ་བབས་པ་ཡིན་ནོ་ཞེས་གསུངས་སོ། །
JER 44:24 དེ་ནས་ཡེ་རེམ་ཡཱ་ཡིས་ཡང་མི་ཀུན་དང་བུད་མེད་རྣམས་ལ་འདི་ལྟར། ཨེ་ཅིབ་ཡུལ་དུ་གནས་པའི་ཡ་ཧུ་དཱ་པ་རྣམས་ལགས། དཀོན་མཆོག་ཡ་ཝཱེའི་བཀའ་ལ་ཉོན་ཅིག
JER 44:25 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་དང་ཁྱོད་ཅག་གི་ཆུང་མ་རྣམས་ཀྱིས་ངག་ནས་སྨྲས་ཤིང་ལག་ནས་བསྒྲུབས་ཏེ་ན་རེ། ངེད་རྣམས་ཀྱིས་ནམ་མཁའི་རྒྱལ་མོར་སྤོས་བདུགས་ནས་སྐྱེམས་མཆོད་ཕུལ་ཏེ་དམ་བཅས་པ་དག་བསྒྲུབ་པར་བྱ་ཞེས་སྨྲས་པ་དང་། ད་ལྟ་ཁྱོད་རྣམས་ཀྱིས་རང་གི་དམ་བཅའ་བསྲུངས་ནས་དེ་བཞིན་སྒྲུབས་ཤིག་ཅེས་གསུངས་སོ། །
JER 44:26 ཨེ་ཅིབ་ཡུལ་དུ་གནས་པའི་ཡ་ཧུ་དཱ་པ་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་རང་གི་མིང་ཆེན་པོ་དཔང་དུ་བཙུགས་ནས་མནའ་བསྐྱལ་ཏེ། ཨེ་ཅིབ་ཡུལ་ཐམས་ཅད་དུ་ཡ་ཧུ་དཱ་པ་སུ་དང་སུ་ཡིས་ཀྱང་འདི་ལྟར། ངའི་གཏན་དུ་བཞུགས་པའི་གཙོ་བོ་ཡ་ཝཱེ་དཔང་དུ་བཙུགས་ནས་མནའ་བསྐྱལ་ལོ་ཞེས་ངའི་མིང་ལ་ཞུ་བར་མི་འགྱུར་རོ། །
JER 44:27 ལྟོས་ཤིག ངས་དེ་དག་ལ་ཆག་སྒོ་འབྱུང་བ་ལས་བྱིན་རླབས་མི་འཐོབ་པའི་ཕྱིར་དུ་དེ་དག་ལ་ལྟོས་ཡོད། ཨེ་ཅིབ་ཡུལ་དུ་ཡོད་པའི་ཡ་ཧུ་དཱ་པ་རྣམས་ནི་རལ་གྲི་དང་མུ་གེས་ཚར་བཅད་དེ་རྩ་མེད་དུ་གཏོང་བར་འགྱུར་རོ། །
JER 44:28 ཨེ་ཅིབ་ཡུལ་ནས་རལ་གྲི་ལས་ཐར་ཏེ་ཡ་ཧུ་དཱ་རུ་ལོག་པའི་མི་གྲངས་ནི་ཤིན་ཏུ་ཉུང་བ་ཡིན། ཨེ་ཅིབ་ཡུལ་དུ་སོང་ནས་བྱེས་སུ་སྡོད་པའི་མི་སྟེ། ཡ་ཧུ་དཱ་པ་ཤུལ་ལུས་ཐམས་ཅད་ཀྱིས་ངའི་བཀའ་འམ་ཡང་ན་ཁོ་ཚོའི་གཏམ་ལས་སུ་ཞིག་གི་ཚིག་བརྟན་པོར་ཚུགས་པ་རྟོགས་པར་འགྱུར་རོ། །
JER 44:29 ཡང་གནས་འདི་རུ་ངས་ཁྱོད་ཅག་ལ་ཉེས་ཆད་གཅོད་པར་བྱ་ཞིང་དེ་ནི་སྔ་ལྟས་ཡིན་ལ། ངས་ཁྱོད་ཅག་ལ་ཆག་སྒོ་འབེབ་རྒྱུ་ཡིན་པའི་བཀའ་དེ་བརྟན་པོར་ཚུགས་པ་ཁྱོད་ཅག་གིས་ཤེས་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 44:30 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཨེ་ཅིབ་ཀྱི་རྒྱལ་པོ་ཧོབ་རཱ་ཕཱར་ཨོལ་ནི་ཁོའི་དགྲ་དང་ཁོའི་སྲོག་སྙེག་མཁན་རྣམས་ཀྱི་ལག་ཏུ་གཏོད་ཅིང་། དེ་ནི་ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་ནི་ཁོའི་དགྲ་དང་ཁོའི་སྲོག་སྙེག་མཁན་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏད་པ་དང་འདྲའོ་ཞེས་གསུངས་སོ། །
JER 45:1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་བྱ་བའི་སྲིད་ལོ་བཞི་པར། ནེར་ཡཱའི་བུ་པཱ་རུག་གིས་ལུང་སྟོན་པ་ཡེ་རེམ་ཡཱའི་ཞལ་ལས་གསུངས་པའི་བཀའ་རྣམས་གླེགས་བམ་དུ་བཀོད་པ་སྟེ། ཡེ་རེམ་ཡཱ་ཡིས་པཱ་རུག་ལ་འདི་ལྟར།
JER 45:2 ཀྱེ་པཱ་རུག་ལགས། ཡེས་ར་ཨེལ་གྱི་དཀོན་མཆོག་ཡ་ཝཱེས་ཁྱོད་ལ་འདི་སྐད་དུ།
JER 45:3 སྔར་ཁྱོད་ཀྱིས་སྐྱོ་བ་ལ། དཀོན་མཆོག་ཡ་ཝཱེས་ངའི་ཟུག་གཟེར་གྱི་སྟེང་དུ་སྡུག་བསྔལ་བསྣན་པས། ང་འཁུན་ཞིང་ཐང་ཆད་དེ་ངལ་གསོ་མི་འཐོབ་བོ་ཞེས་སྨྲས་སོ། །
JER 45:4 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་དེ་ལ་འདི་ལྟར། ལྟོས་ཤིག ངས་རང་གིས་གང་ཞིག་བརྩིགས་པ་དེ་བཤིག་པར་འགྱུར་ལ། རང་གིས་གང་ཞིག་བཙུགས་པ་དེ་བསློག་པར་བྱ་སྟེ། ངས་ཡུལ་ཁམས་ཡོངས་སུ་དེ་ལྟར་བྱའོ། །
JER 45:5 ཁྱོད་ཀྱིས་རང་གི་ཆེད་དུ་དོན་ཆེན་རྣམས་སྙེག་པ་ཡིན་ནམ། མ་སྙེག་ཅིག ལྟོས་ཤིག ངས་མིའི་རིགས་ཐམས་ཅད་ལ་ཆག་སྒོ་འབྱུང་བར་བྱེད་མོད། འོན་ཀྱང་ཁྱོད་ནི་གང་དུ་སོང་ནའང་ངས་ཁྱོད་རང་དམག་འཁྲུག་ལས་སྲོག་ཐར་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 46:1 རྒྱལ་ཁམས་རྣམས་ཀྱི་སྐོར་དུ་དཀོན་མཆོག་ཡ་ཝཱེ་ནས་ལུང་སྟོན་པ་ཡེ་རེམ་ཡཱ་ལ་བྱུང་བའི་བཀའ་ནི་འདི་ལྟ་སྟེ།
JER 46:2 ཨེ་ཅིབ་ཀྱི་སྐོར་དང་ཨེ་ཅིབ་ཀྱི་རྒྱལ་པོ་ནེ་ཀོ་ཕཱར་ཨོལ་གྱི་དམག་དཔུང་གི་སྐོར་གླེང་ན། དམག་དཔུང་འདིས་ཕི་རཱད་གཙང་པོའི་འགྲམ་གྱི་ཀར་ཀེ་མི་སི་རུ་དམག་སྒར་བཙུགས་ཤིང་། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱི་སྲིད་ལོ་བཞི་པར་དེ་ཕམ་པར་བརྒྱབ་པའོ། །
JER 46:3 ཁྱོད་རྣམས་ཀྱིས་ཕུབ་ཆེ་ཆུང་གཉིས་ཀ་གྲ་སྒྲིག་བྱོས་ལ་འཐབ་མོར་ཞུགས་ཤིག
JER 46:4 ཤིང་རྟ་གྲ་སྒྲིག་བྱས་ནས་རྟ་ལ་ཞོན་དང་། ཁྲབ་རྨོག་གྱོན་ནས་ཡར་ལོངས་དང་། མདུང་རྡོར་ལ་གོ་ཁྲབ་གྱོན་ཞིག
JER 46:5 ངས་དེ་དག་འཇིགས་ནས་ཕྱི་བསྣུར་སྟེག་པ་མཐོང་བ་ཅི་ཡིན་ནམ། དེ་དག་གི་དཔའ་བོ་རྣམས་ཕམ་པར་བརྒྱབ་ནས་མྱུར་དུ་བྲོས་ཏེ་ཁ་ཕྱིར་མི་འཁོར་ལ། ཕྱོགས་ཀུན་ཏུ་འཇིགས་སྐྲག་ཡོད་དོ་ཞེས་དཀོན་མཆོག་ཡ་ཝཱེས་གསུངས་སོ། །
JER 46:6 རྐང་པ་མྱུར་བ་རྣམས་འབྲོ་མི་ཐུབ་ལ། དཔའ་བོ་རྣམས་ཀྱང་ཐར་བར་མི་འགྱུར། ཁོ་རྣམས་བྱང་གི་ཕི་རཱད་གཙང་པོའི་འགྲམ་དུ་འདྲེད་ནས་འགྱེལ་བར་འགྱུར།
JER 46:7 ནཱ་ཡོལ་གཙང་པོ་བཞིན་རྒྱས་ཤིང་། གཙང་པོའི་ཆུ་བཞིན་འཕྱུར་ནས་འོང་བ་འདི་སུ་ཡིན་ནམ།
JER 46:8 ཨེ་ཅིབ་ནི་ནཱ་ཡོལ་གཙང་པོ་བཞིན་རྒྱས་ཤིང་། གཙང་པོའི་ཆུ་བཞིན་འཕྱུར་བ་དང་། མོ་ན་རེ། ང་ཡར་རྒྱས་ནས་ཡུལ་ཁམས་ཐམས་ཅད་འགེབ་པ་དང་། ངས་གྲོང་ཁྱེར་དང་དེའི་ནང་གི་མི་རྣམས་མེད་པར་བྱའོ་ཟེར།
JER 46:9 ཀྱེ་རྟ་རྣམས་ཡར་སོང་དང་། ཀྱེ་ཤིང་རྟ་རྣམས་སྨྱོན་པ་བཞིན་རྒྱུགས་ཤིག ལག་ཏུ་ཕུབ་བཟུང་བའི་གུ་ཤ་པ་དང་ཕུ་ཏཱའི་དཔའ་བོ་རྣམས་དང་། གཞུ་འཐེན་མཁན་ལུ་དཱ་པ་རྣམས་མདུན་དུ་སྐྱོད་ཅིག
JER 46:10 ཉིན་མོ་དེ་ནི་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འཁོན་ལན་སློག་པའི་དུས་ཡིན་ཏེ། ཁོང་གིས་དགྲ་རྣམས་ལ་འཁོན་ལན་སློག་པར་འགྱུར་བ་དང་། རལ་གྲི་ཡིས་ཚིམ་པའི་བར་དུ་ཁྱུར་མིད་གཏོང་ཞིང་། སྐོམ་པ་སེལ་བའི་བར་དུ་ཁྲག་འཐུང་བར་འགྱུར། ཅི་ལ་ཞེ་ན། བྱང་ཕྱོགས་ཀྱི་ཕི་རཱད་གཙང་པོའི་འགྲམ་དུ། དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་དམར་མཆོད་ཀྱི་ཕྱུགས་རྣམས་བཤའ་བ་བཞིན་དུ་དགྲ་རྣམས་གསོད་དགོས་པས་སོ། །
JER 46:11 ཀྱེ་ཨེ་ཅིབ་ཀྱི་ན་ཆུང་བུ་མོ་ཁྱོད་གིལ་ཨད་དུ་སྤོས་དཀར་ལེན་དུ་སོང་ཞིག ཁྱོད་ཀྱིས་སྨན་མང་པོ་བསྟེན་ཡང་དོན་མེད་ཡིན་ལ་གསོ་བར་མི་འགྱུར་རོ། །
JER 46:12 ཡུལ་ཁམས་ཀུན་གྱིས་ཁྱོད་ཀྱི་ངོ་ཚ་ཐོས་ཤིང་། ཁྱོད་ཀྱིས་སྨྲེ་སྔགས་འདོན་པའི་སྒྲ་ནི་ས་གཞི་ཡོངས་ལ་ཁྱབ་པ་དང་། དཔའ་བོ་དང་དཔའ་བོ་ཐོགས་ནས་གཉིས་ཀ་མཉམ་དུ་ས་རུ་འགྱེལ་ཏོ། །
JER 46:13 འདི་ནི་དཀོན་མཆོག་ཡ་ཝཱེས་ལུང་སྟོན་པ་ཡེ་རེམ་ཡཱ་ལ་གསུངས་པའི་བཀའ་ཡིན་ཏེ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་འོངས་ནས་ཨེ་ཅིབ་ཡུལ་ལ་ཅི་ལྟར་རྒོལ་བར་འགྱུར་བའི་སྐོར་ལ་འདི་སྐད་དུ།
JER 46:14 ཁྱོད་ཅག་གིས་ཨེ་ཅིབ་ཡུལ་དུ་ཁྱབ་བསྒྲགས་བྱོས་ལ་མིག་དོལ་དུ་ཀུན་ལ་སྒྲོགས་ཤིག ནོབ་དང་ཐ་ཕན་ཧེ་སི་རུ་གསལ་བསྒྲགས་གྱིས་ལ། དཔུང་བསྒྲིགས་ནས་དམག་རྒྱག་པར་གྲ་སྒྲིག་གྱིས་ཤིག ཅི་ལ་ཞེ་ན། རལ་གྲིས་ཁྱོད་ཀྱི་མཐའ་འཁོར་ནས་ཁྱུར་མིད་གཏོང་བའི་ཕྱིར་རོ་ཞེས་སྨྲོས་ཤིག
JER 46:15 ཁྱོད་ཀྱི་དཔའ་བོ་རྣམས་སར་བཏུད་པ་ཅི་ཡིན་ནམ། དཀོན་མཆོག་ཡ་ཝཱེས་དེ་དག་བསྒྱེལ་བས་ཁོ་རྣམས་ཚུགས་མི་ནུས་སོ། །
JER 46:16 ཁོང་གིས་མི་མང་པོ་འགྱེལ་དུ་བཅུག་པ་དང་། དེ་དག་ན་རེ། ལོངས་ཤིག གཉའ་གནོན་གཏོང་བའི་རལ་གྲི་ལས་ཐར་བའི་ཕྱིར་བདག་ཅག་རང་གི་མི་རྣམས་དང་རང་གི་སྐྱེས་ཡུལ་དུ་འགྲོ་བར་བྱའོ་ཟེར་ཞིང་།
JER 46:17 ཁོ་ཚོས་གནས་དེ་རུ་ཨེ་ཅིབ་ཀྱི་རྒྱལ་པོ་ཕཱར་ཨོལ་ནི་སྐད་ཅོར་ཙམ་ཡིན་ཏེ་ཁོས་རང་གི་གོ་སྐབས་ཤོར་ཟིན་ཞེས་འུར་རྒྱག་པ་ཡིན་ཞེས་གསུངས་སོ། །
JER 46:18 མཚན་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཞེས་འབོད་པའི་རྒྱལ་པོས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་འདི་ལྟར་མནའ་བསྐྱལ་བ་ཡིན་ཏེ། དགྲ་འོང་བའི་དུས་སུ་རི་རྒྱུད་ནང་གི་ཐ་པོར་དང་། མཚོ་འགྲམ་གྱི་ཀར་མེལ་བཞིན་ཡིན་ནོ། །
JER 46:19 ཀྱེ་ཨེ་ཅིབ་ཡུལ་དུ་སྡོད་པའི་མི་རྣམས། བཙོན་དུ་འཁྲིད་དུས་བཀོལ་བའི་དངོས་པོ་དག་གྲ་སྒྲིག་བྱོས་ཤིག ཅི་ལ་ཞེ་ན། ནོབ་ནི་ཞིག་རོར་ལུས་ནས་མེས་བསྲེག་པ་དང་སྡོད་མཁན་མེད་པར་འགྱུར་རོ། །
JER 46:20 ཨེ་ཅིབ་ནི་ཤ་ཤེད་རྒྱས་པའི་བ་གཞོན་དང་འདྲ་ཡང་། བྱང་ཕྱོགས་ནས་ཕྱུགས་སྦྲང་འོང་གིན་འདུག
JER 46:21 དེའི་གླས་དམག་རྣམས་ནི་ཕྱུགས་རའི་ནང་གི་བ་ཕྲུག་ཤ་ཤེད་ཅན་དང་མཚུངས་མོད། དེ་དག་ཀྱང་མཉམ་དུ་ཁ་ཕྱིར་འཁོར་ནས་འབྲོ་ཞིང་ཚུགས་མི་ཐུབ། ཅི་ལ་ཞེ་ན། དེ་དག་ལ་བར་ཆད་འབྱུང་བའི་ཉིན་མོ་དང་ཉེས་ཆད་གཅོད་པའི་དུས་ནི་སླེབས་ཟིན་པའི་ཕྱིར་རོ། །
JER 46:22 དེས་འབྱིན་པའི་སྒྲ་ནི་སྦྲུལ་འགྲོ་བའི་སྒྲ་དང་མཚུངས་ལ། དགྲ་རྣམས་དཔུང་བསྒྲིགས་ཏེ་འོང་བ་དང་། ཤིང་གཅོད་མཁན་བཞིན་དུ་ལག་ལ་སྟ་རེ་ཐོགས་ནས་དེར་རྒོལ་བར་འགྱུར་རོ། །
JER 46:23 དེའི་ནགས་ཚལ་སྟུག་ཅིང་རྒྱུ་དཀའ་ཡང་དགྲ་ཡིས་ཤིང་རྣམས་གཅོད་པར་འགྱུར་ཞེས་དཀོན་མཆོག་ཡ་ཝཱེས་གསུངས། ཅི་ལ་ཞེ་ན། དགྲ་ནི་ཆ་ག་འབུ་ལས་མང་ཞིང་བགྲང་གིས་མི་ལང་ངོ་། །
JER 46:24 ཨེ་ཅིབ་ཀྱི་བུ་མོ་ངོ་ཚར་གཏོད་ཅིང་བྱང་ཕྱོགས་པའི་ལག་ཏུ་སྤྲོད་པར་འགྱུར་ཞེས་གསུངས་སོ། །
JER 46:25 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ནོ་གྲོང་ཁྱེར་གྱི་ལྷ་ཨ་མོན་དང་ཕཱར་ཨོལ་དང་། ཨེ་ཅིབ་དང་དེའི་ལྷ་རྣམས་དང་། ད་དུང་རྒྱལ་པོ་རྣམས་དང་། ཕཱར་ཨོལ་དང་དེ་ལ་བརྟེན་མཁན་རྣམས་ལ་ཡང་ཉེས་ཆད་གཅོད་པར་འགྱུར།
JER 46:26 ངས་དེ་ཚོ་ནི་དེ་དག་གི་སྲོག་སྙེག་མཁན་ཏེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དང་དེའི་འཁོར་གཡོག་རྣམས་ཀྱི་ལག་ཏུ་གཏོད་པར་བྱའོ། །ཡིན་ཡང་ཕྱིས་སུ་ཨེ་ཅིབ་ཡུལ་དུ་སྔོན་ལྟར་མི་རྣམས་གནས་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །
JER 46:27 ཀྱེ་ངའི་ཞབས་ཕྱི་ཡ་ཀོབ་ཁྱོད་རང་མ་འཇིགས་ཤིག ཀྱེ་ཡེས་ར་ཨེལ་ཁྱོད་མ་དངངས་ཤིག ཅི་ལ་ཞེ་ན། ངས་རྒྱང་རིང་ཡུལ་ནས་ཁྱོད་སྐྱོབ་ཅིང་། བཙོན་དུ་ཁྲིད་པའི་ཡུལ་ནས་ཁྱོད་ཀྱི་བུ་རྒྱུད་རྣམས་སྒྲོལ་བར་བྱའོ། །དེ་ནས་ཡ་ཀོབ་ཕྱིར་ལོག་ངེས་ཤིང་། སེམས་བདེ་ལ་བབས་ནས་བག་ཕབ་ངང་སྡོད་པར་འགྱུར་ལ། སུས་ཀྱང་དེ་སྐྲག་པར་མི་བྱའོ། །
JER 46:28 ཀྱེ་ངའི་ཞབས་ཕྱི་ཡ་ཀོབ་ཁྱོད་རང་མ་འཇིགས་ཤིག ཅི་ལ་ཞེ་ན། ང་རང་ཁྱོད་དང་མཉམ་དུ་གནས་ཤིང་། ངས་ཁྱོད་ཅག་སྐྲོད་སའི་ཡུལ་གྱི་མི་རིགས་ཀུན་ཚར་བཅད་ནའང་ཁྱོད་རང་ཚར་གཅོད་པར་མི་བྱ། ངས་དྲང་གཞག་སྒོས་ཁྱོད་ལ་ཉེས་ཆད་གཅོད་པ་ལས། ཁྱོད་རྩ་བ་ནས་ཉེས་མེད་དུ་བརྩིས་པ་མིན་ཞེས་དཀོན་མཆོག་ཡ་ཝཱེས་གསུངས་སོ། །
JER 47:1 ཕཱར་ཨོལ་གྱིས་གཱ་ཟཱ་ལ་མ་རྒོལ་སྔོན་དུ། ཕེ་ལེ་ཤེད་པའི་སྐོར་ནས་ཡེ་རེམ་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་བ་འདི་ལྟ་སྟེ།
JER 47:2 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བྱང་ཕྱོགས་ནས་ཆུ་རྣམས་རྒྱས་ཏེ་ཆུ་རྒྱུན་དྲག་པོར་འགྱུར་བ་དང་། ཡུལ་ཁམས་དང་དེའི་ནང་ཡོད་པ་ཐམས་ཅད་དང་། གྲོང་ཁྱེར་དང་དེའི་ནང་གནས་པ་ཀུན་བསྣུབ་པར་འགྱུར་ཞིང་། མི་རྣམས་ཀྱིས་སྐད་རྒྱག་པ་དང་། ཡུལ་ཁམས་སུ་གནས་པའི་མི་རྣམས་ཀྱིས་ངུ་འབོད་བྱེད་པར་འགྱུར་རོ། །
JER 47:3 ཡང་དགྲ་རྣམས་ཀྱི་རྟ་མཆོག་གི་གོམ་སྒྲ་དང་། ཤིང་རྟ་རྒྱུག་པའི་སྒྲ་དང་། དེའི་འཁོར་ལོའི་སྒྲ་བྱུང་བ་ཙམ་གྱིས་ཕ་རྣམས་ཀྱི་ལག་རྩ་ལྷོད་ཅིང་། ཁ་ཕྱིར་འཁོར་ནས་རང་གི་བུ་ཕྲུག་ལ་ལྟ་སྐྱོང་མི་བྱེད་དོ། །
JER 47:4 ཅི་ལ་ཞེ་ན། དུས་དེ་སླེབས་ལ་ཉེ་སྟེ། དཀོན་མཆོག་ཡ་ཝཱེས་ཕེ་ལེ་ཤེད་པ་ཐམས་ཅད་འཇོམས་པར་མཛད་ཅིང་། ཐཱར་དང་ཚི་ཏུན་ལ་རྒྱབ་རོགས་བྱས་ནས་ཤུལ་དུ་ལུས་པ་དག་མེད་པར་གཏོང་བ་དང་། ཁོང་གིས་ཕེ་ལེ་ཤེད་པ་རྣམས་ཏེ་ཀབ་ཐོར་གྱི་གླིང་ཕྲན་དུ་ལུས་པའི་མི་རྣམས་འཇོམས་པར་འགྱུར།
JER 47:5 གཱ་ཟཱ་ནི་སྐྱ་ཐེར་ཐེར་དུ་གྱུར་པ་དང་ཨ་ཤཱ་ཀེ་ལོན་ནི་འཇམ་ཐིང་ངེར་ལུས། ཀྱེ་ཐང་དུ་ལུས་པ་ཁྱོད་རྣམས་ཀྱིས་དུས་ནམ་ཞིག་གི་བར་དུ་རང་གི་ཤ་གཅོད་པར་བྱའམ།
JER 47:6 ཀྱེ་དཀོན་མཆོག་ཡ་ཝཱེའི་རལ་གྲི་ལགས། ཁྱེད་ཀྱིས་དུས་ནམ་ཞིག་ལ་མཚམས་འཇོག་གམ། ཤུབས་ནང་ཞུགས་ལ་བདེ་བར་བཞུགས་དང་།
JER 47:7 དཀོན་མཆོག་ཡ་ཝཱེས་དེར་ཨ་ཤཱ་ཀེ་ལོན་དང་རྒྱ་མཚོའི་འགྲམ་རྒྱུད་ལ་རྒོལ་བའི་བཀའ་བཀོད་ཅིང་། ཁོང་གིས་ཁྱེད་མངགས་པ་ཡིན་ན། ཁྱེད་ནི་ཅི་ལྟར་ཁུ་སིམ་པོར་གནས་སམ་ཞེས་གསུངས་སོ། །
JER 48:1 མོ་ཨབ་ཀྱི་སྐོར་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ནེ་བོ་ནི་སྟོང་བར་འགྱུར་བས་ཆག་སྒོ་འབྱུང་། ཀིར་ཡ་ཐཱ་ཡེམ་ནི་ངོ་ཚར་སྦྱར་ཏེ་བཙན་འཛིན་བྱེད་པར་འགྱུར་ལ། མཱེ་སི་ཀ་ནི་ངོ་ཚར་སྦྱར་ནས་མེད་པར་བཟོའོ། །
JER 48:2 མོ་ཨབ་ལ་སླར་ཡང་བསྟོད་བསྔགས་མི་འབྱུང་སྟེ། ཧེ་སི་པོན་དུ་མི་ཡིས་གྲོས་ངན་བཏབ་ནས་དེ་ལ་གནོད་བསྐྱལ་ཞིང་ན་རེ། ཚུར་ཤོག་དང་ཡུལ་ཁམས་ཤིག་ཏུ་མི་ལུས་པའི་ཕྱིར་རང་ཅག་གིས་དེ་མེད་པར་བྱའོ་ཟེར་ཞིང་། ཀྱེ་མད་མེན་ན་ཁྱོད་ཀྱང་ཁུ་སིམ་པོར་བསྡད་དེ་རལ་གྲིས་ཁྱོད་འདེད་པར་འགྱུར།
JER 48:3 ཧོ་རོ་ན་ཨིམ་ལས་སྟོངས་ཤིང་གཏོར་བརླག་ཐེབས་པའི་ངུ་སྐད་བྱུང་བ་དང་།
JER 48:4 མོ་ཨབ་མེད་པར་བཟོས་ནས། དེའི་བྱིས་པ་རྣམས་ཀྱི་ངུ་སྐད་ནི་མི་ཡིས་ཐོས་སོ། །
JER 48:5 མི་རྣམས་ལུ་ཧིད་ཀྱི་ལ་ངོས་སུ་ངུ་བཞིན་ཡར་འགྲོ་བ་སྟེ། ཅི་ལ་ཞེ་ན། ཧོ་རོ་ན་ཨིམ་གྱི་ལ་ཐུར་དུ་གཏོར་བརླག་ཐེབས་པའི་ངུ་སྐད་ཐོས་པས་སོ། །
JER 48:6 ཁྱོད་རྣམས་སྲོག་ཐར་བར་ཕྲོས་ཤིག དབེན་སྟོང་གི་ཨ་རོ་ཨེར་ལྟར་གཅིག་པུར་ལུས་སོ། །
JER 48:7 ཁྱོད་ནི་རང་གིས་ཅི་བྱས་པ་དང་རྒྱུ་ནོར་ལ་བརྟེན་པའི་དབང་གིས་གཞན་གྱིས་ལེན་པར་འགྱུར་ཏེ། ཀེ་མོ་སི་ དང་དེའི་མཆོད་དཔོན་དང་འགོ་དཔོན་རྣམས་ཀྱང་བཙོན་དུ་འཁྲིད་པར་འགྱུར།
JER 48:8 ཡང་དཀོན་མཆོག་ཡ་ཝཱེས་ཅི་གསུངས་བཞིན་དུ། གཏོར་བརླག་གཏོང་མཁན་དེ་གྲོང་ཁྱེར་རེ་རེར་འོང་ཞིང་། གྲོང་ཁྱེར་གང་ཡང་ཐར་ས་མེད་པར་ལུང་པ་རྣམས་ཉམས་ཤིང་ཐང་ཆེན་རྣམས་བརླག་པར་འགྱུར་རོ། །
JER 48:9 མོ་ཨབ་འཕུར་ནས་འགྲོ་བའི་ཕྱིར་དུ། ཁྱོད་ཅག་གིས་མོ་ལ་གཤོག་པ་སྤྲོད་ཅིག དེའི་གྲོང་ཁྱེར་རྣམས་སྟོང་བར་འགྱུར་ལ་མི་གཅིག་ཀྱང་སྡོད་པར་མི་འགྱུར།
JER 48:10 སྒྱིད་ལུག་གི་དབང་དུ་སོང་ནས་དཀོན་མཆོག་ཡ་ཝཱེའི་དོན་མི་བྱེད་པ་རྣམས་ལ་དམོད་མོ་ཐེབས་པ་དང་། རལ་གྲི་ལ་ཁྲག་འགོ་བར་མི་བྱེད་པ་དེ་ལའང་དམོད་མོ་ཐེབས་པར་འགྱུར།
JER 48:11 མོ་ཨབ་ནི་ལོ་ན་གཞོན་དུས་ནས་སྐྱིད་པོར་བསྡད་དེ་བཙོན་དུའང་མ་ཕྱིན་ལ། སྙིགས་རོ་མ་དཀྲུག་པའི་རྒུན་ཆང་དྭངས་མོ་དང་འདྲ་ཞིང་། སྣོད་གཅིག་ལས་སྣོད་གཞན་དུ་བླུགས་མ་མྱོང་ལ་དེའི་བྲོ་བ་ལུས་ཤིང་དྲི་ཞིམ་ཡལ་མེད་དོ་ཞེས་གསུངས་སོ། །
JER 48:12 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་དེའི་རྩར་ཆང་ལྡུག་མཁན་མངགས་ནས་དེ་བླུག་པར་འགྱུར་ལ། དེ་དག་གིས་སྣོད་རྣམས་སྟོང་བར་བྱས་ཏེ་རྫ་མ་རྣམས་གཅོག་པར་བྱའོ། །
JER 48:13 སྔར་ཡེས་ར་ཨེལ་གྱི་ཁྱིམ་རྒྱུད་པེད་ཨེལ་ལ་བརྟེན་ཞིང་ངོ་ཚ་བར་གྱུར་པ་བཞིན་དུ། མོ་ཨབ་ཀྱང་ཀེ་མོ་སིའི་རྐྱེན་གྱིས་ངོ་ཚ་བར་འགྱུར།
JER 48:14 ཁྱོད་རྣམས་ཀྱིས་ངེད་ཅག་ནི་དཔའ་བོ་སྟེ། དམག་འཐབ་ལ་བྱང་བའི་དཔའ་བོ་ཡིན་ཟེར་བ་ཅི་ཡིན་ནམ།
JER 48:15 མོ་ཨབ་ནི་དབེན་སྟོང་དུ་གྱུར་ཏེ། དགྲ་རྣམས་ཡར་སོང་ནས་དེའི་གྲོང་ཁྱེར་རྣམས་བཟུང་བ་དང་། དེའི་དར་མའི་མཆོག་རྣམས་མར་སོང་ནས་གསོད་པར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་མངའ་བའི་རྒྱལ་པོས་གསུངས་སོ། །
JER 48:16 མོ་ཨབ་ཀྱི་ཆག་སྒོ་འབྱུང་ལ་ཉེ་སྟེ། དེའི་སྡུག་བསྔལ་ནི་མྱུར་བ་མྱུར་དུ་སླེབ་འོང་ངོ་། །
JER 48:17 དེའི་མཐའ་འཁོར་དུ་གནས་པ་དང་དེའི་མིང་ལ་གསལ་ཆ་ཡོད་པ་རྣམས་ཀྱིས་དེའི་ཕྱིར་དུ་མྱ་ངན་བྱས་ནས། སྲ་བའི་དབྱུག་པ་དང་མཛེས་པའི་འཁར་བ་དེ་ཆག་བྱུང་ཞེས་སྨྲ་བར་འགྱུར།
JER 48:18 ཀྱེ་དི་བོན་གྱི་བུ་མོ་ལགས། ཁྱོད་ནི་རང་གི་གཟི་བརྗིད་ཀྱི་བཞུགས་ཁྲི་ལས་མར་བོབས་ཤིག ཁ་སྐམ་ནས་སྡོད་ཅིག ཅི་ལ་ཞེ་ན། མོ་ཨབ་རྩ་མེད་དུ་གཏོང་མཁན་དེ་ཡར་འོངས་ནས་ཁྱོད་ལ་རྒོལ་ཞིང་ཁྱོད་ཀྱི་མཁར་བརྟན་པོ་རྣམས་གཏོར་བར་བྱེད།
JER 48:19 ཀྱེ་ཨ་རོ་ཨེར་དུ་གནས་པ་རྣམས། ལམ་ཁར་ལངས་ནས་ལྟོས་ཤིག འབྲོ་བའི་སྐྱེས་པ་དང་ཐར་བའི་བུད་མེད་རྣམས་ལ་ཅི་ཞིག་བྱུང་ངམ་ཞེས་དྲིས་ཤིག
JER 48:20 མོ་ཨབ་ལ་གཏོར་བརླག་ཐེབས་པས་ངོ་ཚར་སྦྱར་བ་དང་། ཁྱོད་ཅག་གིས་ངུ་སྐད་བཏོན་ལ་འུར་རྒྱོབ་ཅིག ཨར་ནོན་ཆུ་བོའི་འགྲམ་དུ་མོ་ཨབ་བརླགས་ཚར་ཞེས་སྒྲོགས་ཤིག
JER 48:21 ཐང་ཆེན་གྱི་ཧོ་ལོན་དང་། ཡ་ཙཱ། མེ་ཕཱ་ཨད།
JER 48:22 དི་བོན། ནེ་བོ། པེད་དིབ་ལ་ཐ་ཡིམ།
JER 48:23 ཀིར་ཡ་ཐཱ་ཡེམ། པེད་ག་མུལ། པེད་མེ་ཨོན།
JER 48:24 ཀེ་རི་ཨོད། པོ་ཚ་རཱ། མོ་ཨབ་ཡུལ་ཁམས་ཀྱི་ཐག་ཉེ་རིང་གི་གྲོང་ཁྱེར་ཀུན་དང་བཅས་པ་ལ་ཉེས་ཆད་ཐེབས་པར་འགྱུར་ཏེ།
JER 48:25 མོ་ཨབ་ཀྱི་རྭ་ཅོ་བཅད་ནས་དཔུང་པ་བཅག་ཟིན་ཞེས་དཀོན་མཆོག་ཡ་ཝཱེས་གསུངས་སོ། །
JER 48:26 མོ་ཨབ་ཀྱིས་དཀོན་མཆོག་ཡ་ཝཱེའི་ཞལ་ངོར་རང་མཐོང་ཆེན་པོ་བྱས་པས། ཁྱོད་ཅག་གིས་མོ་ཨབ་བཟི་རུ་ཆུག་ཅིག མོ་ཨབ་ནི་རང་གི་སྐྱུག་རོའི་ནང་དུ་འགྲེ་ལྡོག་བརྒྱབ་ཅིང་། མི་ཡིས་དེ་ལ་འཕྱ་དགོད་བྱེད་པར་འགྱུར་རོ། །
JER 48:27 ཡེས་ར་ཨེལ་ནི་ཁྱོད་ཀྱི་དགོད་གཞི་མ་ཡིན་ནམ། ཁྱོད་ཀྱིས་དེའི་མིང་གླེང་བ་ཙམ་གྱིས་མགོ་བོ་གཡུག་པ་ནི་དེ་ཇག་རྐུན་གྱི་གྲས་ནས་བཟུང་བ་ཡིན་ནམ་ཅི།
JER 48:28 ཀྱེ་མོ་ཨབ་ཀྱི་ཡུལ་མི་རྣམས། ཕུག་རོན་གྱིས་བྲག་ཁར་ཚང་བཅའ་བ་བཞིན་དུ། གྲོང་ཁྱེར་རྣམས་དང་བྲལ་ནས་བྲག་གཡང་དུ་སྡོད་ཅིག
JER 48:29 ངེད་ཅག་གིས་མོ་ཨབ་པའི་ང་རྒྱལ་ཐོས་མྱོང་སྟེ། ང་རྒྱལ་ཤིན་ཏུ་ཆེ་ཞིང་། དེ་དག་ནི་རང་སྣང་མཐོ་ཞིང་རང་རློམ་ཆེ་བ་དང་། ཁེངས་དྲེགས་ཆེ་ལ་སེམས་སུ་རང་མཐོང་ཆེན་པོ་ཡིན།
JER 48:30 དེའི་ཁྲོ་གཏུམ་ནི་སྟོང་བ་ཡིན་པ་ངས་རྟོགས་ཤིང་། དེའི་འུར་སྒྲོག་གི་གཏམ་ནི་གཅིག་ཀྱང་འགྲུབ་པར་མི་འགྱུར་ཞེས་དཀོན་མཆོག་ཡ་ཝཱེས་འདི་སྐད་གསུངས།
JER 48:31 དེ་བས་ངས་མོ་ཨབ་ཀྱི་དོན་དུ་འོ་དོད་འབོད་ཅིང་། མོ་ཨབ་ཁྱོན་ཡོངས་ཀྱི་དོན་དུ་ངུ་འབོད་བྱེད་པ་དང་། ཀིར་ཧེ་རེ་སིའི་ཆེད་དུ་མི་རྣམས་ཀྱིས་འཁུན་སྒྲ་འབྱིན་ནོ། །
JER 48:32 ཀྱེ་སིབ་མའི་རྒུན་ཤིང་། ང་རང་ཁྱོད་ཀྱི་དོན་དུ་ངུ་ཞིང་དེ་ནི་ཡཱ་ཟེར་གྱི་ངུ་འབོད་ལས་ཀྱང་ལྷག་པ་ཡིན། ཁྱོད་ཀྱི་ཡལ་ག་རྣམས་རྒྱ་མཚོའི་ཕ་རོལ་ཏུ་རྒྱས་ཏེ་ཡཱ་ཟེར་གྱི་རྒྱ་མཚོའི་བར་དུ་རྒྱས་མོད་ཀྱང་། འཇོམས་པར་བྱེད་མཁན་དེ་ཁྱོད་ཀྱི་དབྱར་ཐོག་གི་འབྲས་བུ་དང་རྒུན་འབྲུམ་སྟེང་དུ་སླེབས་ཟིན།
JER 48:33 ས་ཞིང་གཤིན་པོ་དང་མོ་ཨབ་ཡུལ་གྱི་དགའ་མགུ་དང་བདེ་སྐྱིད་ནི་ཕྲོགས་པ་དང་། ངས་རྒུན་འབྲུམ་འཚིར་གཞོང་ལས་རྒུན་ཆང་བཞུར་མཚམས་བཅད་པ་སྟེ། སུས་ཀྱང་དགའ་མགུ་ཡི་རང་གིས་རྒུན་ཆང་བརྫི་བར་མི་བྱེད་ལ། སྐད་རྒྱག་པའི་སྒྲ་ཡོད་ཀྱང་དེ་ནི་དགའ་མགུ་རངས་པའི་སྒྲ་མ་ཡིན་ནོ། །
JER 48:34 ངུ་འབོད་ཅིག་ཧེ་སི་པོན་ནས་ཨེལ་ཨ་ལེ་དང་དེ་ནས་ཡ་ཧ་ཙཱའི་བར་དུ་སླེབས་པ་དང་། ཚོ་ཨར་ནས་ཧོ་རོ་ན་ཨིམ་དང་དེ་ནས་ཨེག་ལད་ཤེ་ལི་ཤི་ཡཱའི་བར་དུ་སླེབས་པ་སྟེ། ཅི་ལ་ཞེ་ན། ནིམ་རིམ་གྱི་ཆུ་རྣམས་ཀྱང་སྐམ་པའི་ཕྱིར་རོ། །
JER 48:35 ངས་མོ་ཨབ་ཀྱི་མཐོ་གླིང་རྣམས་སུ་མཆོད་པ་འབུལ་མཁན་དང་། རང་གི་ལྷ་རྣམས་ལ་སྤོས་གདུག་མཁན་རྣམས་ཚར་གཅོད་བྱེད་ངེས་ཡིན་ཞེས་དཀོན་མཆོག་ཡ་ཝཱེས་གསུངས་སོ། །
JER 48:36 དེ་བས་ན་ང་ཡི་སེམས་ཀྱིས་མོ་ཨབ་ཀྱི་ཕྱིར་དུ་གླིང་བུ་དང་འདྲ་བར་སྨྲེ་སྔགས་འདོན་པ་དང་། ངའི་སེམས་ནི་ཀིར་ཧེ་རེ་སི་པའི་དོན་དུ་ངུ་བ་ཡིན་ཏེ། མོ་ཨབ་པའི་རྒྱུ་ནོར་ལོངས་སྤྱོད་ཡོད་ཚད་ཟད་ཚར་བས་སོ། །
JER 48:37 མི་རེ་རེའི་མགོ་ནི་སྤྱི་ཐེར་ཏུ་གྱུར་ཏེ་སྨ་ར་བཞར་བ་དང་། ལག་པ་གཤགས་ནས་རྐེད་པར་རྩིད་རས་གཡོགས་འདུག
JER 48:38 མོ་ཨབ་ཀྱི་ཁང་ཐོག་རེ་རེ་དང་ཐང་ཆེན་དུ་མྱ་ངན་བྱེད་མཁན་གྱིས་བཀང་བ་སྟེ། ཅི་ལ་ཞེ་ན། མི་ཡིས་གཅེས་སུ་མི་འཛིན་པའི་ཡོ་བྱད་གཅོག་པ་བཞིན་དུ་ངས་མོ་ཨབ་རྡུལ་དུ་བརླགས་པའི་ཕྱིར་རོ་ཞེས་དཀོན་མཆོག་ཡ་ཝཱེས་གསུངས་སོ། །
JER 48:39 མོ་ཨབ་ལ་ཐེབས་པའི་གཏོར་བརླག་ནི་ཅི་འདྲའི་ཚབས་ཆེའང་། དེ་དག་གི་ངུ་འབོད་ནི་ཅི་འདྲའི་སྐྱོ་བ་ལ། མོ་ཨབ་སྐྱེངས་ནས་ཁ་ཕར་འཁོར་ཞིང་དེ་ནི་ཉེ་འཁོར་གྱི་མི་ཐམས་ཅད་ཀྱིས་འཕྱ་དམོད་བྱེད་ས་དང་འཇིགས་པའི་རྒྱུ་རུ་གྱུར་པའོ། །
JER 48:40 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག དགྲ་བོ་ནི་བྱ་རྒོད་ལྟར་འཕུར་ཞིང་། གཤོག་ཟུང་བརྐྱངས་ནས་མོ་ཨབ་ལ་རྒོལ་བ་དང་།
JER 48:41 ཀེ་རི་ཨོད་ལ་རྒོལ་ནས་ལེན་པར་འགྱུར་ལ། མཁར་བརྟན་པོ་རྣམས་ཀྱང་བཙན་གྱིས་འཛིན་པ་དང་། ཉིན་མོ་དེར་མོ་ཨབ་ཀྱི་དཔའ་བོའི་སེམས་སུ་དངངས་སྐྲག་སྐྱེས་ནས་སྐྱེ་གཟེར་རྒྱག་པའི་བུད་མེད་དང་འདྲའོ། །
JER 48:42 ཡང་མོ་ཨབ་ནི་མེད་པར་བཟོ་ཞིང་མི་རིགས་ཤིག་ཏུ་མི་འགྱུར་ཏེ། ཅི་ལ་ཞེ་ན། དེས་དཀོན་མཆོག་ཡ་ཝཱེའི་ཞལ་ངོར་རང་མཐོང་ཆེན་པོ་བྱས་པའི་ཕྱིར་རོ། །
JER 48:43 ཀྱེ་མོ་ཨབ་ཀྱི་མི་རྣམས། འཇིགས་སྐྲག་དང་ས་དོང་། རྙི་རྒྱ་བཅས་ནི་ཁྱོད་དང་ཉེའོ་ཞེས་དཀོན་མཆོག་ཡ་ཝཱེས་གསུངས།
JER 48:44 འཇིགས་པ་ལས་ཐར་བ་དེ་ས་དོང་ནང་དུ་ལྷུང་བ་དང་། ཡང་ས་དོང་ལས་ཡར་འཛེག་པ་དེ་རྙི་རྒྱས་འཛིན་པར་འགྱུར། ཅི་ལ་ཞེ་ན། བདག་གིས་ཉེས་ཆད་གཅོད་པའི་དུས་ནི་མོ་ཨབ་ཀྱི་སྟེང་དུ་འབེབ་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 48:45 འབྲོ་མཁན་རྣམས་ནི་ཧེ་སི་པོན་གྱི་གྲིབ་བསིལ་འོག་ཏུ་སྟོབས་ཉམས་ཤིང་ལངས་སྡོད་པ་སྟེ། ཅི་ལ་ཞེ་ན། ཧེ་སི་པོན་ལས་མེ་ཞིག་དང་སི་ཧོན་གྱི་གྲོང་ཁྱེར་ནས་མེ་ལྕེ་ཞིག་ཐོན་ཞིང་། མོ་ཨབ་ཀྱི་དཔྲལ་བ་དང་འུར་སྒྲོག་མཁན་རྣམས་ཀྱི་སྤྱི་བོ་བསྲེགས་པ་ཡིན་ནོ། །
JER 48:46 ཀྱེ་མོ་ཨབ་ཁྱོད་ལ་ཆག་སྒོ་འབྱུང་ལ། ཀེ་མོ་སི་ལ་གཏོགས་པའི་མི་རྣམས་འཆི་བའོ། །ཅི་ལ་ཞེ་ན། ཁྱོད་ཀྱི་བུ་རྣམས་བཙོན་དུ་ཁྲིད་ཅིང་། ཁྱོད་ཀྱི་བུ་མོ་རྣམས་ཀྱང་བཙོན་དུ་ཁྲིད་དོ། །
JER 48:47 ཡིན་ཡང་མཐའ་མའི་ཉིན་མོ་དག་ལ་ངས་མོ་ཨབ་ལས་བཙོན་དུ་ཁྲིད་པ་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་པ་དང་། མོ་ཨབ་ལ་ཉེས་ཆད་གཅོད་པའི་གཏམ་ནི་འདི་རུ་མཚམས་བཞག་པའོ། །
JER 49:1 ཨམ་མོན་པའི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་ལ་བུ་མེད་དམ། དེ་ལ་བུ་རབས་ཚ་རྒྱུད་མེད་དམ། མིལ་ཀོམ་ གྱིས་གཱ་རྡུ་ས་སྐལ་དུ་བླངས་པ་ཅི་ཡིན་ནམ། ཁོའི་མི་རྣམས་དེའི་གྲོང་ཁྱེར་ནང་དུ་སྡོད་པ་ཅི་ཡིན་ནམ།
JER 49:2 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་མི་ལ་དམག་འཐབ་པའི་སྐད་སྒྲ་ཐོས་སུ་འཇུག་སྟེ། དེ་ནི་ཨམ་མོན་པའི་རབ་བཱ་ལ་རྒོལ་བའི་སྐད་སྒྲ་ཡིན་ལ། རབ་བཱ་ནི་དབེན་སྟོང་དུ་འགྱུར་ཞིང་། དེ་ལ་གཏོགས་པའི་གྲོང་ཁྱེར་དག་ནི་མེས་བསྲེག་པར་འགྱུར། དེ་སྔར་ཡེས་ར་ཨེལ་ནོར་སྐལ་དུ་འཛིན་མཁན་རྣམས་ནི་ད་ལྟ་ཡེས་ར་ཨེལ་གྱིས་ནོར་སྐལ་དུ་འཛིན་པར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 49:3 ཀྱེ་ཧེ་སི་པོན་ཁྱོད་ཀྱིས་འོ་དོད་བོས་ཤིག ཅི་ལ་ཞེ་ན། ཨེ་ཡུ་ནི་དབེན་སྟོང་དུ་གྱུར་པའོ། །ཀྱེ་རབ་བཱ་གྲོང་ཁྱེར་གྱི་བུ་མོ་རྣམས་ཀྱིས་སྐད་བརྒྱབ་ནས་རྐེད་པར་རྩིད་རས་གཡོགས་ཤིག སྨྲེ་སྔགས་འདོན་བཞིན་མཁར་གྱི་ནང་དུ་ཡར་རྒྱུག་མར་རྒྱུག་གྱིས་ཤིག ཅི་ལ་ཞེ་ན། མིལ་ཀོམ་དང་དེའི་མཆོད་དཔོན་དང་འགོ་དཔོན་རྣམས་མཉམ་དུ་བཙོན་དུ་འཁྲིད་འགྲོ་བའི་ཕྱིར་རོ། །
JER 49:4 ཀྱེ་བཀའ་དང་འགལ་བའི་མི་སྡེ་རྣམས། ཁྱོད་ཀྱིས་ཅིའི་ཕྱིར་ལུང་པ་ཡོད་པ་དང་། ཆུ་རྒྱུན་ཡོད་པའི་ལུང་པའི་ཕྱིར་དུ་ཁ་ཕོ་གཏོང་བ་ཡིན་ནམ། རང་གི་རྒྱུ་ནོར་ལ་བརྟེན་ནས་སུ་ཞིག་ངེད་ཀྱི་གནས་འདིར་སླེབས་ནུས་ཟེར་བ་ཅི་ཡིན་ནམ།
JER 49:5 དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་མཐའ་འཁོར་གྱི་ཡུལ་ཁམས་རྣམས་ལས་ཁྱོད་ཀྱི་སྟེང་དུ་འཇིགས་སྐུལ་འདྲེན་ཞིང་། ཁྱོད་ཅག་སྐྲོད་པར་འགྱུར་ལ། མི་རེ་རེ་མདུན་དུ་བསྐྱོད་ཀྱང་བྲོས་བྱོལ་བ་རྣམས་སུས་ཀྱང་མི་བསྡུའོ། །
JER 49:6 ཡིན་ཡང་རྗེས་སུ་ངས་བཙོན་དུ་ཁྲིད་པའི་ཨམ་མོན་པ་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 49:7 ཨེ་དོམ་གྱི་སྐོར་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཐེ་མཱན་གྱི་ནང་དུ་ཤེས་རབ་མི་ལྡན་ནམ། མཁས་པའི་ཐབས་ཇུས་དག་བཀོལ་ཚར་རམ། དེ་དག་གི་ཤེས་རབ་ཟད་སོང་བ་ཡིན་ནམ།
JER 49:8 ཀྱེ་དེ་དན་གྱི་མི་རྣམས། ཁ་ཕྱིར་འཁོར་ནས་བྲོས་ཏེ་ཕུག་ཏུ་སྡོད་ཅིག ཅི་ལ་ཞེ་ན། ངས་ཨེ་སཱབ་ལ་ཉེས་ཆད་གཅོད་དུས་སུ་ཆག་སྒོ་དེའི་སྟེང་དུ་འབེབ་པར་བྱའོ། །
JER 49:9 ཇི་སྟེ་རྒུན་འབྲུམ་འཐོག་མཁན་ཁྱོད་ཀྱི་རྩར་འོངས་ན་དེ་རྣམས་ཀྱིས་རྒུན་འབྲུམ་ཁ་ཤས་བསྐྱུར་བ་མ་ཡིན་ནམ། ཡང་གལ་ཏེ་མཚན་མོར་རྐུན་མ་འོངས་ན། དེ་དག་གིས་ཅི་འདོད་པ་འབའ་ཞིག་རྐུ་བ་མ་ཡིན་ནམ།
JER 49:10 འོན་ཀྱང་ངས་ཨེ་སཱབ་གཅེར་བུར་འདོན་ཞིང་དེའི་གསང་བའི་གནས་ནི་མངོན་པར་བྱེད་དེ། དེས་རང་ཉིད་སྦ་བར་མི་ནུས་ལ། དེའི་བུ་རབས་ཚ་རྒྱུད་དང་སྤུན་མཆེད། ཁྱིམ་མཚེས་དང་བཅས་མེད་པར་གྱུར་ནས། དེ་ཡང་ལུས་པར་མི་འགྱུར་རོ། །
JER 49:11 ཁྱོད་ཀྱིས་དྭ་ཕྲུག་རྣམས་བསྐྱུར་ཡང་ངས་དེ་དག་གི་ཚེ་སྲོག་བསྲུང་ཞིང་། ཁྱོད་ཀྱི་ཡུགས་མོས་ཀྱང་ང་ལ་བློ་གཏོད་རུང་བ་ཡིན་ཞེས་གསུངས་སོ། །
JER 49:12 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ཕོར་པ་དེ་ལས་འཐུང་མི་རུང་བ་དག་གིས་ཅི་ནས་ཀྱང་འཐུང་དགོས་ན། ཁྱོད་ནི་ཉེས་ཆད་ལས་ཐར་བར་འགྱུར་རམ་ཞེ་ན་ཐར་བར་མི་འགྱུར་ལ་ངེས་པར་འཐུང་དགོས་ཞེས་གསུངས།
JER 49:13 ངས་རང་ཉིད་དཔང་དུ་བཙུགས་ནས་མནའ་སྐྱེལ་ཏེ། པོ་ཚ་རཱ་ལ་འཇིགས་སྣང་དང་ངོ་ཚ། དམོད་མོ་བཅས་ཐེབས་ཤིང་རྩ་བ་ནས་སྟོང་བར་འགྱུར་ལ། དེའི་གྲོང་ཁྱེར་ཐམས་ཅད་དུས་གཏན་དུ་ཞིག་རོར་ལུས་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 49:14 ངས་དཀོན་མཆོག་ཡ་ཝཱེ་ལས་གསུང་འཕྲིན་ཞིག་ཐོས་ཏེ། ཕོ་ཉ་ཞིག་མི་རིགས་དེ་དག་གི་ཁྲོད་དུ་མངགས་ཤིང་དེ་དག་ལ་ན་རེ། ཁྱོད་ཅག་འདུས་ནས་ཨེ་དོམ་ལ་རྒོལ་བར་སོང་ཞིག འཐབ་མོར་ལོངས་ཤིག་ཅེས་སྦྲན་ནོ། །
JER 49:15 ལྟོས་ཤིག བདག་གིས་མི་རིགས་རྣམས་ཀྱི་ཁྲོད་ནས་ཁྱོད་ནི་ཆུང་བར་བྱ་ཞིང་། མི་རྣམས་ཀྱི་ཁྲོད་ནས་ཁྱོད་ལ་མཐོང་ཆུང་བྱེད་པར་འགྱུར།
JER 49:16 ཀྱེ་བྲག་སྲུབ་ཏུ་གནས་ཤིང་རི་མགོ་འཛིན་པ་ཁྱོད་ཀྱིས་རང་གི་རྔམ་བརྗིད་དང་སེམས་ཀྱི་ང་རྒྱལ་གྱི་ཕྱིར་རང་མགོ་རང་གིས་གཡོགས་པ་དང་། ཁྱོད་ཀྱིས་བྱ་རྒོད་བཞིན་དུ་མཐོ་སར་ཚང་བཅས་ཀྱང་། ངས་ཁྱོད་དེ་ནས་མར་འབེབ་པར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 49:17 ཡང་ཨེ་དོམ་ནི་འཇིགས་པའི་གནས་སུ་གྱུར་ཏེ། ཡུལ་དེ་བརྒྱུད་ནས་འགྲོ་མཁན་རྣམས་དེའི་ཆག་སྒོའི་ཕྱིར་དུ་སྐྲག་ཅིང་འཕྱ་དགོད་བྱེད་པར་འགྱུར།
JER 49:18 དཀོན་མཆོག་ཡ་ཝཱེས་འདི་སྐད་དུ། དེ་ནི་སཱ་དོམ་དང་གཱ་མོ་ར་དང་། དེའི་ཉེ་འདབས་ཀྱི་གྲོང་ཁྱེར་རྣམས་དང་འདྲ་བར་ཕམ་པར་བཟོ་ཞིང་། སུ་ཡང་དེ་རུ་མི་གནས་ཤིང་། སུ་ཡང་དེར་བྱེས་སུ་སྡོད་པར་མི་འགྱུར་ཞེས་གསུངས།
JER 49:19 ལྟོས་ཤིག སེང་གེ་ཇི་ལྟར་ཡོར་དན་གཙང་པོ་འགྲམ་གྱི་ནགས་ཚལ་ནས་ཐོན་ཏེ་གནས་ཡུལ་བརྟན་པོར་རྒོལ་བ་བཞིན། ངས་ཨེ་དོམ་པ་ནི་སྐད་ཅིག་ཙམ་ལ་གནས་འདི་ལས་སྐྲོད་པར་བྱའོ། །ངས་སུ་ཞིག་བདམས་པ་ཡིན་ན་དེ་མངགས་ནས་ཡུལ་ཁམས་འདི་སྐྱོང་བར་བྱ་སྟེ། ང་དང་འདྲ་བ་སུ་ཡོད་དམ། སུ་ཞིག་གིས་ང་ཁྲིམས་སར་བོས་ནས་འདྲི་གཅོད་བྱེད་ནུས་སམ། ངའི་མདུན་དུ་འགྲེང་ནུས་པའི་རྫི་བོ་སུ་ཡོད་དམ་ཞེས་གསུངས་སོ། །
JER 49:20 དེའི་ཕྱིར། དཀོན་མཆོག་ཡ་ཝཱེའི་ཨེ་དོམ་ལ་རྒོལ་བའི་ཐབས་ཇུས་དང་། ཐེ་མཱན་གྱི་ཡུལ་མི་རྣམས་ལ་རྒོལ་བའི་ཐུགས་དགོངས་ལ་ཁྱོད་རྣམས་ཀྱིས་ཉོན་དང་། དགྲ་བོས་དེ་དག་གི་ལུག་ཁྱུ་ནང་གི་ཉམས་ཆུང་དག་འདྲུད་པར་འགྱུར་ཞིང་། དེ་དག་གི་རྩྭ་ས་ཡང་དབེན་སྟོང་དུ་འགྱུར་རོ། །
JER 49:21 དེ་དག་འགྱེལ་བའི་སྒྲ་ཡིས་ས་གཞི་འདར་ཞིང་། འོ་དོད་འདོན་པའི་སྒྲ་ནི་རྒྱ་མཚོ་དམར་པོ་ནས་ཀྱང་ཐོས་པར་འགྱུར་རོ། །
JER 49:22 ལྟོས་ཤིག དགྲ་བོ་ནི་བྱ་རྒོད་ལྟར་འཕུར་བ་དང་། གཤོག་ཟུང་བརྐྱངས་ནས་པོ་ཚ་རཱ་ལ་རྒོལ་ཞིང་། ཉིན་མོ་དེར་ཨེ་དོམ་གྱི་དཔའ་བོའི་སེམས་སུ་དངངས་སྐྲག་སྐྱེས་ནས་སྐྱེ་གཟེར་རྒྱག་པའི་བུད་མེད་དང་འདྲའོ། །
JER 49:23 དཱ་མེ་སེག་གི་སྐོར་གླེང་ན། ཧ་མཱད་དང་ཨར་ཕད་གཉིས་ལ་ངོ་ཚ་ཐེབས་པ་ཡིན་ཏེ། ཅི་ལ་ཞེ་ན། དེ་དག་གིས་གཏམ་ངན་ཐོས་པས་དཔའ་ཞུམ་པ་དང་། སེམས་ཁྲལ་ནི་རྒྱ་མཚོའི་རྦ་རླབས་བཞིན་དུ་ཞི་བ་མེད་དོ། །
JER 49:24 དཱ་མེ་སེག་རྒུད་ནས་ཁ་ཕྱིར་འཁོར་ཏེ་བྲོས་པ་དང་། འདར་ཞུམ་དང་སྡུག་བསྔལ། སེམས་ཁྲལ་བཅས་ཀྱིས་དེ་བཟུང་ཞིང་སྐྱེ་གཟེར་རྒྱག་པའི་བུད་མེད་དང་འདྲའོ། །
JER 49:25 ང་རང་དགའ་ཞིང་བསྟོད་བསྔགས་བརྗོད་པའི་གྲོང་ཁྱེར་ནི་ད་དུང་མ་དོར་བ་ཅི་ཡིན་ནམ།
JER 49:26 དེའི་དར་མ་རྣམས་ནི་ཐང་ཆེན་དུ་འགྱེལ་བ་དང་། ཉིན་མོ་དེ་ལ་དམག་མི་ཐམས་ཅད་གྲགས་འགུལ་མེད་པར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
JER 49:27 ཡང་ངས་དཱ་མེ་སེག་གི་མཁར་རྣམས་ལ་མེ་སྦར་བ་དང་། དེས་པེན་ཧ་དཱད་ཀྱི་ཕོ་བྲང་རྣམས་ཁྱུར་མིད་གཏོང་བར་འགྱུར་རོ། །
JER 49:28 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་རྒོལ་བའི་ཀེ་དར་དང་ཧ་ཟོར་གྱི་རྒྱལ་ཕྲན་རྣམས་ཀྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ཀྱེ་ཀལ་དི་པ་ཁྱོད་རྣམས་ཡར་ལངས་ནས་ཀེ་དར་ལ་སོང་ཞིག ཤར་ཕྱོགས་པ་རྣམས་མེད་པར་བཟོས་ཤིག
JER 49:29 མི་ཡིས་དེ་རྣམས་ཀྱི་གུར་དང་ལུག་ཁྱུ་རྣམས་འཕྲོག་ཅིང་། མི་ཡིས་དེ་དག་གི་ཡོལ་བ་དང་ཡོ་བྱད་ཐམས་ཅད་དང་། རྔ་མོང་རྣམས་བདག་གིར་འཛིན་པར་འགྱུར་ལ། ཡང་མི་ཡིས་དེ་དག་གི་ཕྱོགས་སུ་ཀི་བཏབ་ནས་ན་རེ། ཕྱོགས་བཞི་རུ་འཇིགས་པ་ཡོད་དོ་ཞེས་ཟེར་རོ། །
JER 49:30 ཀྱེ་ཧ་ཟོར་གྱི་ཡུལ་མི་ཁྱོད་རྣམས་རྒྱང་རིང་ཡུལ་དུ་བྲོས་ལ་ཕུག་ཏུ་སྡོད་ཅིག ཅི་ལ་ཞེ་ན། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཇུས་ངན་བཀོད་དེ་ཁྱོད་ལ་གནོད་བསྐྱལ་བ་དང་། ཁྱོད་ལ་རྒོལ་བར་བསམ་མོ་ཞེས་དཀོན་མཆོག་ཡ་ཝཱེས་གསུངས།
JER 49:31 ཀྱེ་ཀལ་དི་པ་ཁྱོད་རྣམས་ཡར་ལོངས་ཤིག བློ་བདེ་བག་ཕེབས་ངང་སྡོད་པའི་ཡུལ་མི་རྣམས་ཀྱི་རྩར་སོང་ཞིག དེ་དག་ལ་རྒྱ་སྒོ་དང་སྒོ་གཏན་མེད་པར་གཅིག་པུར་གནས་སོ་ཞེས་དཀོན་མཆོག་ཡ་ཝཱེས་གསུངས།
JER 49:32 དེ་དག་གི་རྔ་མོང་རྣམས་བཅོམ་ནོར་དུ་འགྱུར་ཞིང་། དེ་དག་གི་སྒོ་ཕྱུགས་གྲངས་མེད་འཕྲོག་པར་འགྱུར། ཡང་ངས་ཡ་ཐོད་ཀྱི་སྐྲ་གཞར་མཁན་དེ་རྣམས་ཕྱོགས་བཞིར་གཏོར་ཞིང་། ཆག་སྒོ་ནི་ཕྱོགས་བཞི་མཚམས་བརྒྱད་ནས་དེ་དག་གི་སྟེང་དུ་འབེབ་པར་བྱའོ་ཞེས་དཀོན་མཆོག་ཡ་ཝཱེས་གསུངས།
JER 49:33 ཧ་ཟོར་ནི་ཁྱི་སྤྱང་གནས་སར་གྱུར་ཏེ་གཏན་དུ་སྟོངས་ཤིང་། སུ་ཡང་དེར་མི་གནས་ལ། དེར་བྱེས་སུ་སྡོད་མཁན་ཡང་ཡོད་མི་སྲིད་དོ། །
JER 49:34 ཡ་ཧུ་དཱའི་རྒྱལ་པོ་ཚིད་ཀི་ཡཱས་སྲིད་སྐྱོང་བའི་ཐོག་མར། ཨེ་ལཱམ་གྱི་སྐོར་ལ་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།
JER 49:35 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཨེ་ལཱམ་པའི་གཞུ་གཅོག་པར་བྱེད་ཅིང་། དེ་ནི་ཁོ་ཚོས་འཐབ་འཛིང་བྱེད་པའི་གཙོ་ཤུགས་ཡིན།
JER 49:36 ཡང་ངས་ནམ་མཁའི་ཕྱོགས་བཞི་ནས་རླུང་བཞི་ཨེ་ལཱམ་གྱི་སྟེང་དུ་དྲངས་ནས་དེ་དག་ཕྱོགས་བཞི་རུ་གཏོར་བར་བྱེད་ཅིང་། ཕྱི་རུ་བསྐྲད་པའི་ཨེ་ལཱམ་པ་རྣམས་མི་སླེབས་པའི་ཡུལ་ཁམས་གཅིག་ཀྱང་མེད་དོ། །
JER 49:37 ཡང་ངས་ཨེ་ལཱམ་པ་རྣམས་རང་གི་དགྲ་ཟླ་རྣམས་དང་དེ་དག་གི་སྲོག་སྙེག་མཁན་རྣམས་ཀྱི་མདུན་དུ་འཇིགས་པར་བྱེད་ཅིང་། དེ་དག་གི་སྟེང་དུ་ཆག་སྒོ་སྟེ་ངའི་ཁྲོ་གཏུམ་དྲག་པོ་འབེབ་པར་བྱའོ། །ཡང་ངས་དེ་རྣམས་ཚར་མ་བཅད་བར་དུ་དེ་དག་རལ་གྲིས་འདེད་པར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 49:38 ངས་རང་གི་རྒྱལ་ཁྲི་ཨེ་ལཱམ་དུ་འགོད་ཅིང་། དེ་རུ་རྒྱལ་པོ་དང་འགོ་དཔོན་རྣམས་མེད་པར་བྱའོ་ཞེས་དཀོན་མཆོག་ཡ་ཝཱེས་གསུངས།
JER 49:39 འོན་ཀྱང་མཐའ་མའི་ཉིན་མོ་དག་ལ་ངས་ཨེ་ལཱམ་གྱི་བཙོན་དུ་ཁྲིད་པ་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 50:1 པཱ་པེལ་ལོན་དང་ཀལ་དི་པའི་ཡུལ་ཁམས་ཀྱི་སྐོར་ལ་དཀོན་མཆོག་ཡ་ཝཱེས་ཡེ་རེམ་ཡཱ་བརྒྱུད་ནས་འདི་སྐད་དུ།
JER 50:2 ཁྱོད་རྣམས་ཀྱིས་ཡུལ་ཁམས་རྣམས་ཀྱི་ནང་དུ་འདི་ལྟར་སྒྲོགས་ཤིག རྒྱལ་མཚན་བསྒྲེངས་ནས་སྦ་གསང་མེད་པར་འདི་ལྟར་སྒྲོགས་ཤིག པཱ་པེལ་ལོན་ནི་བཙན་འཛིན་བྱེད་ཅིང་པེལ་ལ་ངོ་ཚ་ཐེབས་པ་དང་། མེ་རོ་དག་ནི་འཇིགས་པར་གྱུར། པཱ་པེལ་ལོན་གྱི་རྟེན་རྣམས་སྐྱེངས་ཤིང་མོའི་སྐུ་འདྲ་རྣམས་ཀྱང་འཇིགས་པར་གྱུར།
JER 50:3 ཅི་ལ་ཞེ་ན། བྱང་ཕྱོགས་ནས་མི་རིགས་ཤིག་དེར་རྒོལ་དུ་འོང་གིན་འདུག དེས་ཁོའི་ཡུལ་ཁམས་སྟོངས་སུ་བཅུག་སྟེ། མི་གཅིག་ཀྱང་གནས་པར་མི་འགྱུར་ལ། མི་ཕྱུགས་གཉིས་ཀ་བྲོས་འགྲོའོ་ཞེས་གསུངས་སོ། །
JER 50:4 ཡང་ཉིན་དེ་དང་དུས་དེ་ལ་ཡེས་ར་ཨེལ་པ་རྣམས་ནི་ཡ་ཧུ་དཱ་པ་རྣམས་དང་མཉམ་དུ་འོང་བར་འགྱུར་ལ། དེ་དག་ངུ་ཞོར་དུ་སོང་ནས་རང་གི་དཀོན་མཆོག་ཡ་ཝཱེ་འཚོལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 50:5 དེ་དག་ཛ་ཡན་གྱི་ཕྱོགས་སུ་འཁོར་ནས་དེའི་ལམ་འདྲི་ཞིང་ན་རེ། ཚུར་ཤོག་དང་། ངེད་ཅག་དུས་གཏན་གྱི་ཁ་ཆད་ཀྱི་ནང་དུ་དཀོན་མཆོག་ཡ་ཝཱེ་དང་འབྲེལ་བར་བྱའོ་ཞེས་ཟེར་བར་འགྱུར།
JER 50:6 བདག་གི་འབངས་མི་ནི་ཁ་ཐོར་དུ་སོང་བའི་ལུག་དང་འདྲ་ཞིང་། རྫི་བོ་རྣམས་ཀྱིས་དེ་རྣམས་ཀྱི་ལམ་བོར་དུ་བཅུག་པས་དེ་དག་རི་རྒྱུད་རྣམས་རྒྱུ་ཞིང་། རི་རབ་ནས་རི་སྒང་དུ་སོང་སྟེ་རང་གི་ངལ་གསོ་བའི་སྡོད་གནས་བརྗེད་པའོ། །
JER 50:7 སུ་ཞིག་དེ་དག་དང་ཕྲད་ན་ཁོ་རྣམས་ཁྱུར་མིད་བཏང་སྟེ། དགྲ་རྣམས་ན་རེ། ངེད་ཅག་ལ་ཉེས་པ་མེད་དོ། །ཅི་ལ་ཞེ་ན། དེ་དག་གིས་སྡོད་གནས་ངོ་མ་ཡིན་པའི་དཀོན་མཆོག་ཡ་ཝཱེ་སྟེ། ཁོ་ཚོའི་ཕ་མེས་རྣམས་ཀྱི་རེ་བ་ཡིན་པའི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་པའི་ཕྱིར་རོ་ཞེས་སྨྲས་སོ། །
JER 50:8 ཀྱེ་ང་ཡི་མི་རྣམས། ལུག་ཁྱུའི་མདུན་དུ་འགྲོ་བའི་ར་ཕོ་བཞིན་དུ། ཁྱོད་ཅག་ནི་པཱ་པེལ་ལོན་དང་ཀལ་དི་པའི་ཡུལ་ནས་ཕྲོས་ཤིག
JER 50:9 ལྟོས་དང་། ངས་མཉམ་འབྲེལ་བྱས་པའི་མི་རིགས་ཆེན་པོ་རྣམས་ལ་བསྐུལ་བར་བྱ་ཞིང་། དེ་རྣམས་བྱང་ཕྱོགས་ཡུལ་ནས་པཱ་པེལ་ལོན་ལ་རྒོལ་དུ་ཁྲིད་འོངས་ནས། དེ་དག་གིས་དམག་བཤམས་ནས་དེ་ལ་རྒོལ་ཞིང་དེ་བཙན་འཛིན་བྱེད་པར་འགྱུར་བ་དང་། དེ་དག་གི་མདའ་ནི་དཔའ་བོ་མདའ་པའི་མདའ་དང་འདྲ་ཞིང་། མདའ་རྐང་གཅིག་ཀྱང་དོན་མེད་དུ་ཕྱིར་མི་ལོག་གོ །
JER 50:10 དེ་ནས་ཀལ་དི་ཡུལ་ནི་བཅོམ་ནོར་དུ་འགྱུར་ཞིང་། དེ་འཇོམས་མཁན་ཀུན་གྱི་ཡིད་ཚིམ་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །
JER 50:11 ཀྱེ་ངའི་ནོར་སྐལ་འཕྲོག་མཁན་རྣམས། ཁྱོད་རྣམས་དགའ་ཞིང་མགུ་བ་ནི་གཡུལ་གཅོག་པའི་བ་གཞོན་གྱིས་རྩེད་འཇོ་བྱེད་པ་དང་། རྟ་མཆོག་འཚེར་བ་བཞིན་ཡིན་མོད་ཀྱང་།
JER 50:12 ཁྱོད་རྣམས་ཀྱི་མ་ནི་སྐྱེངས་པར་འགྱུར་ཞིང་། ཁྱོད་རྣམས་བཙའ་མཁན་དེ་ངོ་ཚ་བར་འགྱུར། ལྟོས་ཤིག མོ་ནི་མི་རིགས་རྣམས་ཀྱི་ནང་དུ་ཆུང་ཤོས་དང་། དབེན་སྟོང་དང་སྐམ་ས། བྱེ་ཐང་བཅས་སུ་འགྱུར་རོ། །
JER 50:13 དཀོན་མཆོག་ཡ་ཝཱེའི་ཐུགས་ཁྲོའི་དབང་གིས་པཱ་པེལ་ལོན་དུ་མི་སྡོད་མཁན་མེད་དེ་ཁྱོན་ནས་ས་སྟོང་དུ་འགྱུར་ཞིང་། གནས་དེ་བརྒྱུད་ནས་འགྲོ་མཁན་ཐམས་ཅད་ཞེད་སྣང་ཚ་པོ་སྐྱེ་ཞིང་། དེར་བྱུང་བའི་ཆག་སྒོ་ཡི་རྐྱེན་གྱིས་འཕྱ་དགོད་བྱེད་པར་འགྱུར།
JER 50:14 ཀྱེ་གཞུ་འཐེན་མཁན་རྣམས། ཁྱོད་ཅག་གིས་པཱ་པེལ་ལོན་གྱི་མཐའ་འཁོར་དུ་དམག་ཤོམས་ཤིག མདའ་ལ་སེར་སྣ་མི་བྱེད་པར་འཕངས་ནས་དེར་རྒོལ་ཞིག ཅི་ལ་ཞེ་ན། དེས་དཀོན་མཆོག་ཡ་ཝཱེ་དང་འགལ་བའི་སྡིག་པ་བྱས་པས་སོ། །
JER 50:15 དེའི་མཐའ་ནས་བསྐོར་ཏེ་ཀི་ཐོབས་ཤིག དེས་མགོ་བསྒུར་ཅིང་ལྕོག་མཁར་རྣམས་བརྡིབས་པ་དང་མཁར་རྣམས་བཤིག་གོ །འདི་ནི་དཀོན་མཆོག་ཡ་ཝཱེས་འཁོན་ལན་སློག་པ་ཡིན་ཏེ། ཁྱོད་ཅག་གིས་དེ་ལ་དགྲ་ཤ་ལོངས་ཤིག དེས་ཁྱོད་རྣམས་ལ་ཇི་ལྟར་སྤྱད་ན། ཁྱོད་རྣམས་ཀྱིས་ཀྱང་མོ་ལ་དེ་ལྟར་སྤྱོད་ཅིག
JER 50:16 ཁྱོད་ཅག་གིས་པཱ་པེལ་ལོན་གྱི་ནང་དུ་ཞིང་རྨོ་མཁན་དང་། སྟོན་ལེན་དུས་ལག་ཏུ་ཟོར་བ་འཛིན་མཁན་ཐམས་ཅད་ཚར་ཆོད་ཅིག དེ་རྣམས་རེ་རེ་གཉའ་གནོན་གཏོང་བའི་རལ་གྲི་ལ་གཡོལ་བའི་ཕྱིར་དུ། རང་གི་མི་རིགས་ཀྱི་རྩར་ཕྱིར་ལོག་ཅིང་། རང་གི་ཕ་ཡུལ་དུ་འབྲོ་བར་འགྱུར་རོ། །
JER 50:17 ཡེས་ར་ཨེལ་ནི་ཁ་ཐོར་དུ་སོང་བའི་ལུག་ཡིན་ཏེ། སེང་གེས་དེ་ནི་ཐོར་དུ་བཅུག་པ་ཡིན། ཐོག་མར་ཨ་སུར་རྒྱལ་པོས་དེ་ཁྱུར་མིད་བཏང་བ་དང་། ཕྱིས་སུ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དེའི་རུས་པ་རྣམས་གཅོག་གོ །
JER 50:18 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་སྔོན་ཆད་ཇི་ལྟར་ཨ་སུར་རྒྱལ་པོ་ལ་ཉེས་ཆད་བཅད་པ་ཡིན་ན། པཱ་པེལ་ལོན་གྱི་རྒྱལ་པོ་དང་དེའི་ཡུལ་ཁམས་ལའང་དེ་ལྟར་ཉེས་ཆད་གཅོད་དེ།
JER 50:19 ངས་ཡེས་ར་ཨེལ་སླར་ཡང་རང་གི་རྩྭ་ཁར་ཁྲིད་ནས། དེ་ཡིས་ཀར་མེལ་དང་པཱ་ཤན་དུ་རྩྭ་བཟའ་ཞིང་། ཨེ་ཕཱར་ཡིམ་རི་ཁུལ་དང་གིལ་ཨད་ཡུལ་དུ་ཡིད་ཚིམ་པར་འགྱུར།
JER 50:20 ཉིན་མོ་དེ་དང་དུས་དེ་ལ་ཁྱོད་ཀྱིས་ཡེས་ར་ཨེལ་གྱི་སྡིག་པ་བཙལ་ཡང་མི་རྙེད་ལ། ཡ་ཧུ་དཱའི་སྡིག་པ་བཙལ་ཡང་རྙེད་པར་མི་འགྱུར། ཅི་ལ་ཞེ་ན། ངས་ལུས་སུ་བཅུག་པ་རྣམས་ཀྱི་སྡིག་པ་བསལ་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 50:21 ཁྱོད་ཡར་སོང་ནས་མེ་རཱ་ཏ་ཡིམ་གྱི་གནས་ལ་རྒོལ་ཞིག ཡང་ཕེ་ཀོད་ཀྱི་མི་སྡེ་ལ་རྒོལ་ནས། དེ་དག་འདེད་བཅོམ་བྱས་ཏེ་རྩ་མེད་དུ་ཐོངས་ཤིག ངས་ཁྱོད་ལ་བསྒོས་པའི་བཀའ་བཞིན་དུ་བྱོས་ཤིག་ཅེས་དཀོན་མཆོག་ཡ་ཝཱེས་གསུངས།
JER 50:22 ཡུལ་ཁམས་སུ་འཐབ་མོའི་འུར་སྒྲ་དང་འཇིག་པ་ཆེན་པོ་ཡོད།
JER 50:23 ས་གཞི་ཡོངས་ལ་རྡུང་བའི་ཐོ་བ་དེ་ཅི་ལྟར་བཅག་ནས་གཏོར་བ་ཡིན་ནམ། མི་རིགས་རྣམས་ཀྱི་ཁྲོད་དུ་པཱ་པེལ་ལོན་ནི་ཅི་ལྟར་འཇིགས་པའི་གནས་སུ་གྱུར་པ་ཡིན་ནམ།
JER 50:24 ཀྱེ་པཱ་པེལ་ལོན། ངས་ཁྱོད་ཀྱི་ཕྱིར་དུ་རྙི་རྒྱ་བཙུགས་ནས། ཁྱོད་དེའི་ནང་དུ་ཚུད་ཀྱང་མ་ཚོར་ཏེ། ཁྱོད་ནི་རྙེད་ནས་བཟུང་བ་ཡིན་ནོ། །ཅི་ལ་ཞེ་ན། ཁྱོད་ཀྱིས་དཀོན་མཆོག་ཡ་ཝཱེ་ལ་འགོག་རྒོལ་བྱས་པས་སོ། །
JER 50:25 དཀོན་མཆོག་ཡ་ཝཱེས་ཉིད་ཀྱི་དམག་ཆས་ཀྱི་མཛོད་སྒོ་ཕྱེས་ནས། ཉིད་ཀྱི་ཐུགས་ཁྲོའི་མཚོན་ཆ་རྣམས་བཏོན་པ་སྟེ། ཅི་ལ་ཞེ་ན། འདི་ནི་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ཀལ་དི་པའི་ཡུལ་དུ་མཛད་དགོས་པ་ཡིན་ནོ། །
JER 50:26 ཁྱོད་རྣམས་རྒྱང་རིང་གི་ས་མཚམས་ནས་འོངས་ཏེ་རྒོལ་བར་གྱིས་ཤིག དེའི་འབྲུ་མཛོད་རྣམས་ཁ་ཕྱེས་ནས་ས་ཕུང་མཐོན་པོ་ལྟར་བརྩིགས་ལ། རྩ་བ་ནས་མེད་པར་བྱས་ཏེ་ཅི་ཡང་ལུས་པར་མ་བྱེད་ཅིག
JER 50:27 དེའི་བ་ཕྲུག་ཐམས་ཅད་སོད་ཅིག དེ་དག་གསོད་གཅོད་ཐེབས་པར་མར་འགྲོ་རུ་ཆུག དེ་རྣམས་ཀྱི་ཉིན་མོ་སྟེ་ཉེས་ཆད་ཕོག་པའི་དུས་ལ་སླེབས་པས། དེ་དག་ལ་ཆག་སྒོ་འབྱུང་བར་འགྱུར།
JER 50:28 པཱ་པེལ་ལོན་ནས་ཐར་བའི་ཡུལ་འཁྱར་པ་རྣམས་ཀྱིས། ཛ་ཡན་དུ་རང་ཅག་གི་དཀོན་མཆོག་ཡ་ཝཱེས་ཉིད་ཀྱི་མཆོད་ཁང་གི་ཕྱིར་དུ་འཁོན་ལན་ཅི་ལྟར་སློག་པ་ཁྱབ་བསྒྲགས་བྱེད་པའོ། །
JER 50:29 ཁྱོད་ཅག་གིས་མདའ་པ་ཐམས་ཅད་བསྡུས་ཏེ་པཱ་པེལ་ལོན་ལ་རྒོལ་བར་གྱིས་ཤིག པཱ་པེལ་ལོན་གྱི་མཐའ་འཁོར་དུ་དམག་སྒར་བཙུགས་ཏེ་མི་གཅིག་ཀྱང་འབྲོ་བར་མ་འཇུག དེས་གང་ཞིག་སྤྱད་པ་བཞིན་དུ་དེ་ལ་འཁོན་ལན་སློགས་ཤིག དེས་ཇི་ལྟར་བྱས་ན་ཁྱོད་ཅག་གིས་ཀྱང་དེ་ལྟར་བྱོས་ཤིག ཅི་ལ་ཞེ་ན། དེས་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དམ་པ་ཉིད་ལ་ང་རྒྱལ་བཅངས་ནས་འགོག་རྒོལ་བྱས་པས་སོ། །
JER 50:30 དེ་བས་མོའི་དར་མ་རྣམས་ནི་ཐང་ཆེན་དུ་འགྱེལ་ཞིང་། ཉིན་མོ་དེ་ལ་དམག་མི་ཐམས་ཅད་ཁ་རོག་ཏུ་སྡོད་པར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 50:31 ལྟོས་ཤིག ངས་ང་རྒྱལ་ཅན་ཁྱོད་དགྲ་རུ་འཛིན་ཏེ། ཅི་ལ་ཞེ་ན། ཁྱོད་ཀྱི་ཉིན་མོ་སྟེ་ངས་ཁྱོད་ལ་ཉེས་ཆད་གཅོད་པའི་དུས་ལ་སླེབས་པས་སོ་ཞེས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་གསུངས།
JER 50:32 ང་རྒྱལ་ཅན་ནི་འདྲེད་ཅིང་འགྱེལ་བར་འགྱུར་ལ་སུས་ཀྱང་དེ་སློང་བར་མི་བྱེད། ངས་དེའི་གྲོང་ཁྱེར་རྣམས་ལ་མེ་སྦར་ནས་མཐའ་འཁོར་ལ་ཡོད་པ་ཐམས་ཅད་ཁྱུར་མིད་གཏོང་བར་འགྱུར་རོ། །
JER 50:33 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་དང་ཡ་ཧུ་དཱ་པ་རྣམས་ལ་མཉམ་དུ་བརྙས་བཅོས་ཐེབས་པ་དང་། དེ་དག་འཛིན་མཁན་ཀུན་གྱིས་དེ་དག་དམ་པོར་བཟུང་ནས་སྒྲོལ་བར་མི་བྱའོ། །
JER 50:34 དེ་དག་སྐྱོབ་མཁན་གཙོ་བོ་ཁོང་ནི་ནུས་མཐུ་ལྡན་པ་ཡིན་ཏེ། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་པས། ཁོང་གིས་དེ་དག་གི་ཕྱིར་དུ་དག་འབུད་གསལ་ཐག་ཆོད་པ་བྱེད་ཅིང་། ས་གཞི་ཡོངས་བདེ་ལ་འགོད་པའི་ཕྱིར་ཡིན་མོད། འོན་ཀྱང་པཱ་པེལ་ལོན་གྱི་མི་རྣམས་ལ་ཁོང་གིས་དཀྲོག་རྐྱེན་སློང་བར་འགྱུར་རོ་ཞེས་གསུངས་སོ། །
JER 50:35 ཡང་རལ་གྲི་ནི་ཀལ་དི་པ་དང་པཱ་པེལ་ལོན་གྱི་མི་རྣམས་དང་། དེའི་འགོ་དཔོན་རྣམས་དང་མཁས་པ་རྣམས་ཀྱི་སྟེང་དུ་འབབ་བར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 50:36 ཁེངས་རློམ་ཅན་གྱི་སྟེང་དུ་རལ་གྲི་ཞིག་འབབ་ཅིང་ཁོ་རྣམས་རྨོངས་པར་འགྱུར། དེའི་དཔའ་བོ་རྣམས་ཀྱི་སྟེང་དུ་རལ་གྲི་ཞིག་འབབ་ཅིང་དེ་རྣམས་འཇིགས་པར་འགྱུར།
JER 50:37 དེའི་རྟ་དང་ཤིང་རྟ་དང་། དེའི་ནང་དུ་སྡོད་པའི་མི་རིགས་འདྲེས་མ་ཀུན་གྱི་སྟེང་དུ་རལ་གྲི་ཞིག་འབབ་ཅིང་དེ་རྣམས་བུད་མེད་བཞིན་དུ་འགྱུར། དེའི་རིན་པོ་ཆེ་རྣམས་ཀྱི་སྟེང་དུ་རལ་གྲི་ཞིག་འབབ་ཅིང་དེ་རྣམས་ཕྲོགས་ནས་འཁྱེར་བར་འགྱུར།
JER 50:38 དེའི་ཆུ་རྣམས་ཀྱི་སྟེང་དུ་ཐན་པ་འབྱུང་ཞིང་དེ་རྣམས་སྐམ་པར་འགྱུར། ཅི་ལ་ཞེ་ན། འདི་ནི་བརྐོས་སྐུ་རྣམས་ཀྱི་ཡུལ་ཁམས་ཡིན་ལ་མི་ནི་འཇིགས་སུ་རུང་བའི་སྐུ་འདྲའི་དབང་གིས་སྨྱོ་བས་སོ། །
JER 50:39 དེ་བས་དབེན་སྟོང་གི་རི་དྭགས་དང་འཕར་སྤྱང་དེ་རུ་གནས་ཤིང་། རྔ་བྱ་རྣམས་ཀྱང་དེར་གནས་པ་དང་། ཕྱིན་ཆད་ནམ་ཡིན་ཡང་དེ་རུ་མི་སྡོད་མཁན་མེད་ལ། མི་རབས་ནས་མི་རབས་བར་དུ་མི་སྡོད་མཁན་མེད་དོ། །
JER 50:40 དཀོན་མཆོག་གིས་ཇི་ལྟར་སཱ་དོམ་དང་གཱ་མོ་ར་དང་། དེའི་ཉེ་འཁོར་གྱི་གྲོང་ཁྱེར་རྣམས་ཕམ་པར་བཟོས་པ་བཞིན། པཱ་པེལ་ལོན་དུ་སྡོད་མཁན་མི་གཅིག་ཀྱང་མེད་ལ། སུ་ཡང་དེ་རུ་བྱེས་སུ་སྡོད་པར་མི་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
JER 50:41 ལྟོས་ཤིག དམག་དཔུང་ཞིག་བྱང་ཕྱོགས་ནས་འོང་གིན་འདུག ས་གཞིའི་མཐའ་མཚམས་ནས་མི་རིགས་ཆེན་པོ་ཞིག་དང་རྒྱལ་པོ་རྣམས་ཀྱང་བསྐུལ་ནས་སླེབས་ཤིང་།
JER 50:42 དེ་དག་གི་ལག་ཏུ་གཞུ་དང་མདུང་བཟུང་སྟེ་གདུག་རྩུབ་ཆེ་ལ་སྙིང་རྗེ་མེད་པ་དང་། རྒྱ་མཚོའི་རྦ་རླབས་འཕྱུར་བ་ནང་བཞིན་དེ་དག་གིས་ང་རོ་འདོན། ཀྱེ་པཱ་པེལ་ལོན་གྱི་བུ་མོ་ལགས། དེ་རྣམས་རྟ་ལ་ཞོན་ནས་བསླེབ་ཅིང་གཡུལ་ངོར་ཞུགས་པའི་དམག་མི་ནང་བཞིན་གྲལ་བསྒྲིགས་ཏེ་ཁྱོད་ལ་རྒོལ་བར་འགྱུར།
JER 50:43 པཱ་པེལ་ལོན་གྱི་རྒྱལ་པོས་དེ་དག་སྐོར་གྱི་གཏམ་ཐོས་པ་དང་ལག་རྩ་ལྷོད་དེ། ཟུག་རྔུ་དྲག་པོས་གདུངས་ནས་སྐྱེ་གཟེར་རྒྱག་པའི་བུད་མེད་ལྟར་ན་ཟུག་ལང་ངོ་། །
JER 50:44 ལྟོས་ཤིག སེང་གེ་ཇི་ལྟར་ཡོར་དན་གཙང་པོ་འགྲམ་གྱི་ནགས་ཚལ་ནས་ཐོན་ཏེ་གནས་ཡུལ་བརྟན་པོར་རྒོལ་བ་བཞིན། ངས་ཀལ་དི་པ་ནི་སྐད་ཅིག་ཙམ་ལ་གནས་འདི་ལས་སྐྲོད་པར་བྱའོ། །ངས་སུ་ཞིག་བདམས་པ་ཡིན་ན་དེ་མངགས་ནས་ཡུལ་ཁམས་འདི་སྐྱོང་བར་བྱ་སྟེ། ང་དང་འདྲ་བ་སུ་ཡོད་དམ། སུ་ཞིག་གིས་ང་ཁྲིམས་སར་བོས་ནས་འདྲི་གཅོད་བྱེད་ནུས་སམ། ངའི་མདུན་དུ་འགྲེང་ནུས་པའི་རྫི་བོ་སུ་ཡོད་དམ་ཞེས་གསུངས་སོ། །
JER 50:45 དེའི་ཕྱིར། དཀོན་མཆོག་ཡ་ཝཱེས་པཱ་པེལ་ལོན་ལ་རྒོལ་བའི་ཐབས་ཇུས་དང་། ཀལ་དི་པའི་ཡུལ་ལ་རྒོལ་བའི་ཐུགས་དགོངས་ལ་ཁྱོད་རྣམས་ཀྱིས་ཉོན་དང་། དགྲ་བོས་དེ་དག་གི་ལུག་ཁྱུ་ནང་གི་ཉམས་ཆུང་དག་འདྲུད་པར་འགྱུར་ཞིང་། དེ་དག་གི་རྩྭ་ས་ཡང་དབེན་སྟོང་དུ་འགྱུར་རོ། །
JER 50:46 པཱ་པེལ་ལོན་བཙན་བཟུང་བྱས་པའི་སྒྲ་ཡིས་ས་གཞི་འདར་ཞིང་། མི་ཡིས་ཡུལ་ཁམས་ཀུན་ཏུ་འོ་དོད་འདོན་པའི་སྒྲ་ཐོས་པར་འགྱུར་རོ། །
JER 51:1 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་འཇོམས་བྱེད་ཀྱི་རླུང་ཞིག་སློང་བར་བྱ་སྟེ། པཱ་པེལ་ལོན་དང་ལེ་ཀཱ་མཱེ་རུ་སྡོད་པའི་མི་རྣམས་ལ་རྒོལ་བར་བྱའོ། །
JER 51:2 ཡང་ངས་ཕྱི་ཕྱོགས་པ་རྣམས་པཱ་པེལ་ལོན་དུ་མངགས་ནས། ཁོ་ཚོས་དེ་གཏོར་ཞིང་དེའི་ཡུལ་ཁམས་རྡུལ་དུ་བརླག་པར་བྱེད། ཡང་དེ་ལ་ཆག་སྒོ་འབྱུང་བའི་དུས་སུ། ཁོ་རྣམས་ཀྱིས་དེ་ལ་ཕྱོགས་བཞི་ནས་རྒོལ་བར་འགྱུར།
JER 51:3 གཞུ་འཐེན་མཁན་ལ་གཞུ་འཐེན་དུ་མ་འཇུག་ཅིག དེ་ལ་ཁྲབ་རྨོག་གྱོན་དུ་མ་འཇུག་ཅིག པཱ་པེལ་ལོན་གྱི་དར་མ་དག་ལ་སྙིང་རྗེ་མ་སྒོམས་ཤིག དེའི་དམག་དཔུང་ནི་རྩ་བ་ནས་མེད་པར་བཟོས་ཤིག
JER 51:4 དེ་དག་ཀལ་དི་པའི་ཡུལ་དུ་བསད་ནས་འགྱེལ་བར་འགྱུར་ཞིང་། པཱ་པེལ་ལོན་གྱི་སྲང་ལམ་དུ་བསྣུན་པར་འགྱུར་ཞེས་གསུངས།
JER 51:5 ཡེས་ར་ཨེལ་དང་ཡ་ཧུ་དཱའི་ཡུལ་ཁམས་སུ་ཡེས་ར་ཨེལ་གྱི་དམ་པ་ཉིད་ལ་རྒྱབ་འགལ་བྱས་པའི་སྡིག་པ་ཡིས་བཀང་ན་ཡང་། དེའི་དཀོན་མཆོག་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་དེ་ནི་མ་དོར་རོ། །
JER 51:6 ཁྱོད་རྣམས་པཱ་པེལ་ལོན་ནས་ཕྲོས་ཤིག་དང་། རེ་རེས་རང་གི་སྲོག་སྐྱོབས་ཤིག དེའི་སྡིག་པ་ནང་དུ་ལྷུང་ནས་མཉམ་དུ་འཆི་བར་མ་འགྱུར་ཞིག ཅི་ལ་ཞེ་ན། འདི་ནི་དཀོན་མཆོག་ཡ་ཝཱེས་འཁོན་ལན་སློག་པའི་དུས་ཏེ། ཁོང་གིས་པཱ་པེལ་ལོན་གྱི་ཕྱོགས་སུ་ལན་འཇལ་ངེས་ཡིན།
JER 51:7 པཱ་པེལ་ལོན་ནི་སྔར་ནས་དཀོན་མཆོག་ཡ་ཝཱེའི་ཕྱག་གི་གསེར་ཕོར་ཞིག་ཡིན་ཏེ། དེས་ས་གཞི་ཚང་མ་བཟི་བར་བྱས། མི་རིགས་རྣམས་ཀྱིས་དེའི་རྒུན་ཆང་འཐུངས་བས་སྨྱོས་པར་གྱུར་ཏེ།
JER 51:8 པཱ་པེལ་ལོན་ནི་གློ་བུར་ཉིད་ལ་འགྱེལ་ནས་བཤིག་པར་གྱུར་ལ། དེའི་དོན་དུ་ངུ་འབོད་བྱོས་ཤིག དེའི་ཟུག་གཟེར་གྱི་ཕྱིར་སྤོས་དཀར་དྲངས་ཤིག་དང་། ཡང་ན་དེ་གསོ་བར་འགྱུར་ཡང་སྲིད།
JER 51:9 ངེད་ཀྱིས་པཱ་པེལ་ལོན་གསོ་བར་འདོད་ནའང་དེའི་ནད་མ་སངས་བས། དེ་དང་འབྲལ་བར་གྱིས་ཤིག་དང་། བདག་ཅག་རང་རང་གི་ཡུལ་དུ་ལོག་པར་བྱའོ། །ཅི་ལ་ཞེ་ན། དེར་ཐེབས་པའི་ཉེས་ཆད་ནི་བར་སྣང་དུ་སླེབས་ཤིང་། ནམ་མཁའི་བར་དུའང་སླེབས་པའོ། །
JER 51:10 དཀོན་མཆོག་ཡ་ཝཱེས་རང་ཅག་གི་དྲང་བདེན་མངོན་པར་མཛད་པས། ཤོག་དང་། རང་ཅག་གིས་ཛ་ཡན་དུ་རང་རེའི་དཀོན་མཆོག་ཡ་ཝཱེའི་མཛད་རྗེས་འཆད་པར་བྱའོ། །
JER 51:11 ཁྱོད་རྣམས་ཀྱིས་མདའ་རྩེ་རྡོར་དང་། ཕུབ་རྣམས་དམ་དུ་ཟུངས་ཤིག དཀོན་མཆོག་ཡ་ཝཱེས་པཱ་པེལ་ལོན་ནི་མེད་པར་མཛད་པའི་ཐུགས་ཐག་བཅད་པས་ན། མཱ་ཏི་པའི་རྒྱལ་པོའི་སེམས་དཀྲུགས་སོ། །ཅི་ལ་ཞེ་ན། འདི་ནི་དཀོན་མཆོག་ཡ་ཝཱེས་འཁོན་ལན་སློག་པ་སྟེ། ཁོང་གི་མཆོད་ཁང་གི་དོན་དུ་ལན་སློག་པ་ཡིན་ནོ། །
JER 51:12 ཁྱོད་ཅག་གིས་དར་རྣམས་བསྒྲེངས་ཏེ་པཱ་པེལ་ལོན་གྱི་མཁར་རྣམས་ལ་རྒོལ་ཞིག མེལ་ཚེ་བརྟན་པོ་བྱོས་ལ་སོ་པ་རྣམས་ཞོག་ཅིག འཇབ་ས་རྣམས་ཤོམས་ཤིག ཅི་ལ་ཞེ་ན། དཀོན་མཆོག་ཡ་ཝཱེས་པཱ་པེལ་ལོན་གྱི་མི་རྣམས་ཀྱི་ཆེད་དུ་གསུངས་པ་ལྟར། ཁོང་གིས་དེ་བཞིན་དགོངས་པར་མ་ཟད་དེ་བཞིན་མཛད་པར་འགྱུར་རོ། །
JER 51:13 ཀྱེ་ཆུ་རྣམས་ཀྱི་སྟེང་དུ་སྡོད་ཅིང་གཏེར་མང་པོ་ཡོད་པ་ཁྱོད་ཀྱི་མཐའ་མར་སླེབས་ཏེ། ཁྱོད་ཀྱི་འདོད་པ་ཁ་བཀང་བའོ། །
JER 51:14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་རང་ཉིད་དཔང་དུ་བཙུགས་ནས་མནའ་བཞེས་ཏེ་འདི་སྐད་དུ། ངས་ཆ་ག་འབུ་ནི་ག་ས་གང་དུ་བཀང་བ་བཞིན་དགྲ་རྣམས་ཁྱོད་ཀྱི་ཡུལ་ཁམས་སུ་ཁྱབ་པར་བྱ་སྟེ། དེ་དག་གིས་ངར་སྐད་སྒྲོག་བཞིན་ཁྱོད་ལ་རྒོལ་བར་འགྱུར་རོ་ཞེས་གསུངས་སོ། །
JER 51:15 དཀོན་མཆོག་ཡ་ཝཱེས་ཉིད་ཀྱི་ནུས་མཐུ་ལ་བརྟེན་ནས་ས་གཞི་བཀོད་ཅིང་། ཉིད་ཀྱི་ཤེས་རབ་ཀྱིས་འཇིག་རྟེན་མཛད་པ་དང་། ཡང་ཁོང་གི་མཁྱེན་རབ་ཀྱིས་ཨ་སྔོན་དབྱིངས་རྣམས་བཏིངས།
JER 51:16 ཁོང་གིས་གསུང་སྐད་འདོན་དུས་ནམ་མཁའ་ནས་ཆུ་རྣམས་འཕྱུར་ཞིང་། ཁོང་གིས་ས་མཐའ་ནས་སྤྲིན་དང་སྨུག་པ་ལང་བར་མཛད་པ་དང་། ཆར་བ་དང་ཆབས་ཅིག་གློག་དམར་འཁྱུག་པར་མཛད། ཉིད་ཀྱི་གཏེར་མཛོད་རྣམས་ལས་རླུང་ཡང་འདོན་ནོ། །
JER 51:17 མི་རེ་རེ་དུད་འགྲོ་དང་འདྲ་སྟེ་ཤེས་བྱ་མེད་ལ། དངུལ་མགར་རྣམས་ནི་རང་རང་གི་སྐུ་འདྲའི་རྐྱེན་གྱིས་ངོ་ཚ་བ་དང་། དེས་བླུགས་པའི་སྐུ་འདྲ་རྣམས་ནི་རྫུས་མ་ཡིན་ལ་དེ་དག་གི་ནང་དུ་དབུགས་ཀྱང་མེད་དོ། །
JER 51:18 སྐུ་འདྲ་ཐམས་ཅད་སྙིང་པོ་མེད་པ་དང་། དེ་ནི་མི་ལ་མགོ་སྐོར་གཏོང་བྱེད་ཙམ་ཡིན་ཏེ། ཉེས་ཆད་གཅོད་པའི་དུས་སུ་སླེབས་ཚེ་དེ་དག་མེད་པར་བཟོ་ངེས་ཡིན།
JER 51:19 ཡང་ཡ་ཀོབ་ཀྱི་ཐོབ་སྐལ་ནི་དེ་འདྲ་མིན་ཏེ། ཅི་ལ་ཞེ་ན། ཁོང་ནི་ཐམས་ཅད་འགོད་མཁན་གཙོ་བོ་ཡིན་པས་སོ། །ཡེས་ར་ཨེལ་ཡང་ཁོང་གི་ནོར་སྐལ་གྱི་ཚོ་ཁག་ཡིན་པ་དང་། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་སོ། །
JER 51:20 ཁྱོད་ནི་ངའི་རྒྱག་བྱེད་ཀྱི་སྟ་རེ་དང་འཐབ་མོའི་མཚོན་ཆ་ཡིན་ཏེ། ངས་ཁྱོད་བརྒྱུད་ནས་མི་རྣམས་རྡུལ་དུ་བརླག་ཅིང་། རྒྱལ་ཕྲན་རྣམས་མེད་པར་བྱའོ། །
JER 51:21 ངས་ཁྱོད་བརྒྱུད་ནས་རྟ་དང་སྐྱ་མི་གཉིས་པོ་རྡུལ་དུ་བརླག་ཅིང་། ཤིང་རྟ་དང་དེའི་ནང་དུ་སྡོད་མཁན་གཉིས་ཀ་རྡུལ་དུ་བརླག་པར་བྱའོ། །
JER 51:22 ངས་ཁྱོད་བརྒྱུད་ནས་སྐྱེས་པ་དང་བུད་མེད་གཉིས་ཀ་རྡུལ་དུ་བརླག་ཅིང་། རྒན་པ་དང་ན་གཞོན་གཉིས་ཀ་རྡུལ་དུ་བརླག་པ་དང་། གཞོན་ནུ་ཕོ་མོ་གཉིས་ཀའང་རྡུལ་དུ་བརླག་པར་བྱའོ། །
JER 51:23 ངས་ཁྱོད་བརྒྱུད་ནས་རྫི་བོ་དང་དེའི་ཕྱུགས་ཁྱུ་རྡུལ་དུ་བརླག་ཅིང་། ཞིང་པ་དང་དེའི་རྨོན་གླང་རྡུལ་དུ་བརླག་པ་དང་། བཀའ་བློན་དང་བློན་པོ་རྣམས་ཀྱང་རྡུལ་དུ་བརླག་པར་བྱའོ། །
JER 51:24 པཱ་པེལ་ལོན་དང་ཀལ་དི་པའི་མི་ཐམས་ཅད་ཀྱིས་ཛ་ཡན་དུ་སྤྱད་པའི་ངན་སྤྱོད་ཀུན་གྱི་ཕྱིར་དུ། ངས་ཁྱོད་ཚོའི་མིག་མདུན་དུ་དེ་དག་ལ་འཁོན་ལན་སློག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 51:25 ཀྱེ་ཚར་གཅོད་བྱེད་པའི་རི་བོ། ས་གཞི་ཐམས་ཅད་རྩ་མེད་དུ་གཏོང་བའི་རི་བོ། ལྟོས་ཤིག ངས་ཁྱོད་ནི་དགྲ་རུ་བཟུང་སྟེ། ངས་ཁྱོད་ཀྱི་སྟེང་དུ་རང་གི་ལག་པ་བརྐྱངས་ཏེ་རྒོལ་བར་འགྱུར་ལ། བྲག་རྣམས་ལས་ཁྱོད་བསྒྲིལ་བར་བཅུག་ནས། ཁྱོད་ནི་མེས་བསྲེགས་པའི་རི་བོར་བྱའོ། །
JER 51:26 དེ་ནས་མི་ཡིས་ཁང་པའི་གྲུ་རྡོ་བྱེད་དུ་ཁྱོད་ལས་མི་ལེན་པ་དང་། རྨང་རྡོ་ཡང་ཁྱོད་ལས་མི་ལེན་ནོ། །ཅི་ལ་ཞེ་ན། ཁྱོད་ནི་དུས་རྟག་ཏུ་ཞིག་རོར་ལུས་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །
JER 51:27 ཁྱོད་ཅག་གིས་ཡུལ་ཁམས་ནང་དུ་དར་རྣམས་བསྒྲེངས་ཏེ། མི་རིགས་རྣམས་ཀྱི་ཁྲོད་དུ་རྭ་དུང་བུས་ཤིག མི་རིགས་རྣམས་ཀྱིས་པཱ་པེལ་ལོན་ལ་འཐབ་པར་གྲ་སྒྲིག་བྱོས་ཤིག ཡང་ཨ་ར་རད་དང་མིན་ནི་དང་། ཨ་ཤ་ཀེ་ནཱ་ཡི་རྒྱལ་ཕྲན་རྣམས་བསྡུས་ཏེ་དམག་དཔོན་མངགས་ནས་དེར་རྒོལ་དུ་ཆུག་དང་། ཡང་ཆ་ག་འབུ་བཞིན་དུ་རྟ་རྣམས་དྲངས་ནས།
JER 51:28 མི་རིགས་རྣམས་དང་མཱ་ཏི་པའི་རྒྱལ་པོ་དང་། བཀའ་བློན་དང་བློན་པོ་རྣམས་དང་། དེ་དག་གིས་བཟུང་བའི་ཡུལ་ཁམས་ཐམས་ཅད་ཀྱིས་དེ་ལ་རྒོལ་བར་རྩོམ་དགོས།
JER 51:29 དེ་ནས་ས་གཞི་འདར་ཞིང་གཅུ་གྲིམ་རྒྱག་གོ །ཅི་ལ་ཞེ་ན། པཱ་པེལ་ལོན་ནང་དུ་མི་གཅིག་ཀྱང་མི་གནས་པ་དང་སྟོངས་པར་མཛད་དུ་དཀོན་མཆོག་ཡ་ཝཱེའི་དགོངས་པ་རྣམས་གཏན་ལ་ཕབ་པས་སོ། །
JER 51:30 པཱ་པེལ་ལོན་གྱི་དཔའ་བོ་རྣམས་ཀྱིས་དམག་འཁྲུག་མཚམས་བཞག་སྟེ་བཙན་རྫོང་ནང་དུ་སྦས་པ་དང་། དེ་དག་གི་སྟོབས་ཤུགས་ཉམས་ཏེ་བུད་མེད་ལྟ་བུར་གྱུར་ཏོ། །ཡང་པཱ་པེལ་ལོན་གྱི་སྡོད་གནས་དག་མེས་བསྲེགས་ཤིང་སྒོ་གཏན་རྣམས་བཅགས་སོ། །
JER 51:31 པཱ་པེལ་ལོན་གྱི་རྒྱལ་པོ་ལ། ཁྱེད་ཀྱི་གྲོང་ཁྱེར་གྱི་ཕྱོགས་བཞི་པོ་བླངས་ཤིང་། རབ་ཁ་རྣམས་བཙན་བཟུང་བྱས་ཏེ་འདམ་གཞུང་རྣམས་མེས་བསྲེགས་པ་དང་། དམག་རྣམས་ཀྱང་འཇིགས་པར་གྱུར་ཏོ་ཞེས་ཞུ་བའི་བང་ཆེན་རྣམས་ཕན་ཚུན་གདོང་ཐུག་རྒྱག་པ་དང་། འཕྲིན་སྐྱེལ་མཁན་རྣམས་ཀྱང་ཕན་ཚུན་འཕྲད་དོ། །
JER 51:33 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། པཱ་པེལ་ལོན་གྱི་བུ་མོ་ནི་ཚར་མ་རྡུང་སའི་གཡུལ་ཁ་དང་མཚུངས་ཏེ། ཅང་མི་འགོར་བར་དེ་བསྡུ་བའི་སྐབས་ལ་སླེབ་པར་འགྱུར་རོ་ཞེས་གསུངས།
JER 51:34 ཡེས་ར་ཨེལ་པ་རྣམས་ཀྱིས་འདི་ལྟར། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ང་རང་ཁྱུར་མིད་བཏང་ནས་ང་རང་བརྫིས་པ་དང་། ང་རང་སྣོད་སྟོང་དུ་འགྱུར་བར་བྱས། ཁོ་ནི་ཆུ་སྲིན་ཞིག་དང་འདྲ་བར་ང་ཁྱུར་མིད་བཏང་ཞིང་། ང་ནི་ཟས་མཆོག་བཞིན་ཁོའི་ཁོག་པར་བཀང་བར་བཅུག་སྟེ། ཡང་ང་རང་བསྐྲད་པ་ཡིན་ནོ་ཞེས་སྨྲའོ། །
JER 51:35 ཡང་ཛ་ཡན་གྱི་མི་རྣམས་ཀྱིས་འདི་ལྟར། ང་དང་ངའི་ཤ་ཁྲག་གིས་མྱངས་པའི་གདུག་རྩུབ་དེ་ཕྱིར་པཱ་པེལ་ལོན་གྱི་སྟེང་དུ་འབབ་པར་ཤོག་ཅེས་སྨྲ་བར་འགྱུར་ཞིང་། ཡེ་རུ་སཱ་ལེམ་གྱི་མི་རྣམས་ཀྱིས་འདི་ལྟར། ངེད་རྣམས་ལས་ཁྲག་བཞུར་བའི་ཉེས་ཆད་ནི་ཀལ་དི་པའི་སྟེང་དུ་འཕོག་གྱུར་ཅིག་ཅེས་སྨྲ་བར་འགྱུར་རོ། །
JER 51:36 དེ་བས་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ཀྱི་དོན་དུ་དཀར་འདོན་པ་དང་། ཁྱོད་ཀྱི་དོན་དུ་འཁོན་ལན་སློག་པར་བྱ་སྟེ། ངས་པཱ་པེལ་ལོན་གྱི་རྒྱ་མཚོ་སྐམ་པར་བྱེད་ཅིང་། དེའི་ཆུ་མགོ་ཡང་སྐམ་པར་བྱའོ། །
JER 51:37 པཱ་པེལ་ལོན་ནི་ཞིག་རོ་དང་ཁྱི་སྤྱང་གི་ཚང་དུ་གྱུར་ནས། འཇིགས་སུ་རུང་བ་དང་འཕྱ་དགོད་བྱེད་ཡུལ་དུ་འགྱུར་ཞིང་སྡོད་མཁན་གཅིག་ཀྱང་མེད་དོ། །
JER 51:38 དེ་དག་གིས་སེང་གེ་དར་མ་བཞིན་ང་རོ་སྒྲོག་ཅིང་། སེང་ཕྲུག་ལྟར་ངར་སྐད་འདོན་པ་ཡིན།
JER 51:39 དེ་དག་ལ་ཟ་འདོད་ཆེ་བའི་དུས་སུ། ངས་དེ་དག་ལ་གསོལ་སྟོན་བཤམས་ནས་ཁོ་ཚོ་བཟི་རུ་བཅུག་སྟེ་དགའ་བར་བྱེད་པ་དང་། དེ་དག་ལ་དུས་གཏན་དུ་གཉིད་འཐིབས་ནས་མི་སད་དོ་ཞེས་དཀོན་མཆོག་ཡ་ཝཱེས་གསུངས།
JER 51:40 ངས་དེ་དག་ནི་ལུ་གུ་བཞིན་དང་། ལུག་ཐུག་དང་ར་ཐུག་ལྟར་བཤས་རར་ཤན་པའི་དྲུང་དུ་འཁྲིད་པར་བྱའོ། །
JER 51:41 ཤེ་ཤག་ནི་ཅི་ལྟར་རྒོལ་ནས་བླངས་པ་ཡིན་ནམ། ས་གཞི་ཡོངས་ཀྱིས་བསྟོད་པ་དེ་ཅི་ལྟར་བཙན་བཟུང་བྱས་པ་ཡིན་ནམ། མི་རིགས་རྣམས་ཀྱི་ཁྲོད་དུ་པཱ་པེལ་ལོན་ནི་ཅི་ལྟར་འཇིགས་སུ་རུང་བར་གྱུར་པ་ཡིན་ནམ།
JER 51:42 རྒྱ་མཚོ་འཕྱུར་ནས་པཱ་པེལ་ལོན་བསྣུབས་ཏེ། འཕྱུར་བའི་རྦ་རླབས་ཀྱིས་དེ་འགེབ་པར་འགྱུར།
JER 51:43 དེའི་གྲོང་ཁྱེར་ནི་ས་སྟོང་དང་སྐམ་ས། བྱེ་ཐང་བཅས་སུ་གྱུར་ཏེ། སྡོད་མཁན་གཅིག་ཀྱང་མེད་ལ་དེ་བརྒྱུད་ནས་འགྲོ་མཁན་ཡང་མེད་པའི་གནས་སུ་འགྱུར་རོ། །
JER 51:44 ངས་པཱ་པེལ་ལོན་གྱི་པེལ་ལ་ཆད་པ་གཅོད་ཅིང་། དེས་ཁྱུར་མིད་བཏང་བ་རྣམས་ཁ་ནས་སྐྱུག་པར་བྱ་སྟེ། ཕྱིན་ཆད་མི་རྣམས་དེའི་མདུན་དུ་ཕྱོགས་པར་མི་བྱེད་ལ། པཱ་པེལ་ལོན་གྱི་མཁར་རྣམས་ཀྱང་ལོག་པར་འགྱུར་རོ། །
JER 51:45 ཀྱེ་བདག་གི་འབངས་མི་ལགས། ཁྱོད་རྣམས་པཱ་པེལ་ལོན་དང་འབྲལ་བར་གྱིས་ཤིག མི་རེ་རེ་སྲོག་ཐར་བར་བྲོས་ནས་དཀོན་མཆོག་ཡ་ཝཱེའི་ཐུགས་ཁྲོ་དྲག་པོ་ལ་གཡོལ་བར་གྱིས་ཤིག
JER 51:46 ཡུལ་ཁམས་སུ་ཐོས་པའི་སྐད་ཆའི་ཕྱིར་དུ་ཁྱོད་ཅག་མ་ཞུམ་མ་འཇིགས་ཤིག ཅི་ལ་ཞེ་ན། ལོ་འདིའི་ནང་དུ་སྐད་ཆ་ཞིག་དང་། ལོ་རྗེས་མར་ཡང་སྐད་ཆ་གཞན་ཞིག་ཐོས་འོང་སྟེ། ཡུལ་ཁམས་སུ་དྲག་ཤུགས་འབྱུང་བ་དང་འགོ་དཔོན་གྱིས་འགོ་དཔོན་ལ་རྒོལ་བར་འགྱུར།
JER 51:47 དེ་བས་ན་ལྟོས་ཤིག དུས་དེ་སླེབས་ལ་ཉེ། ངས་པཱ་པེལ་ལོན་གྱི་བརྐོས་སྐུ་ལ་ཉེས་ཆད་གཅོད་པར་འགྱུར་ཏེ། དེའི་ཡུལ་ཁམས་ཡོངས་རྫོགས་ངོ་ཚ་བར་འགྱུར་ལ། དེའི་བསད་པའི་མི་ཐམས་ཅད་ནི་དེའི་དབུས་སུ་འགྱེལ་བར་འགྱུར།
JER 51:48 དུས་དེར། ནམ་མཁའ་དང་ས་གཞི་དང་དེའི་ནང་ཡོད་པ་ཀུན་གྱིས་པཱ་པེལ་ལོན་གྱི་རྐྱེན་གྱིས་དགའ་འབོད་བྱེད་འོང་སྟེ། ཅི་ལ་ཞེ་ན། གཏོར་བརླག་བྱེད་མཁན་ནི་བྱང་ཕྱོགས་ཡུལ་ནས་དེར་འོང་བར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 51:49 སྔར་པཱ་པེལ་ལོན་གྱིས་ཇི་ལྟར་ཡེས་ར་ཨེལ་གྱི་བསད་པའི་མི་རྣམས་འགྱེལ་བར་བྱས་ན། དེའི་ཡུལ་ཁམས་ཡོངས་ཀྱི་བསད་པའི་མི་ཐམས་ཅད་ཀྱང་དེ་དང་དེ་བཞིན་པཱ་པེལ་ལོན་དུ་འགྱེལ་བར་འགྱུར་རོ། །
JER 51:50 རལ་གྲི་ལ་གཡོལ་བ་ཁྱོད་རྣམས་མྱུར་དུ་སོང་ཞིག་དང་། ལངས་ནས་མ་སྡོད་ཅིག རྒྱང་རིང་ཡུལ་ནས་དཀོན་མཆོག་ཡ་ཝཱེ་དྲན་པར་གྱིས། སེམས་སུ་ཡེ་རུ་སཱ་ལེམ་དྲན་གསོ་བྱོས་ཤིག
JER 51:51 ངེད་ཅག་གིས་ངན་སྨྲས་ཐོས་པས་ངོ་ཚ་བ་དང་། གདོང་དུ་ངོ་ཚ་ཡིས་བཀང་བ་སྟེ། ཅི་ལ་ཞེ་ན། ཕྱི་ཕྱོགས་པ་རྣམས་དཀོན་མཆོག་ཡ་ཝཱེའི་མཆོད་ཁང་གི་གནས་དམ་པར་ཕྱིན་པས་སོ། །
JER 51:52 དེ་བས་ན་ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་པཱ་པེལ་ལོན་གྱི་བརྐོས་སྐུ་ལ་ཉེས་ཆད་གཅོད་པར་འགྱུར་ཏེ། ཡུལ་ཁམས་ཡོངས་སུ་སྣད་པར་གྱུར་པའི་མི་ཡིས་འཁུན་སྒྲ་འདོན་པར་འགྱུར་ཞེས་དཀོན་མཆོག་ཡ་ཝཱེས་གསུངས།
JER 51:53 པཱ་པེལ་ལོན་ནི་ནམ་མཁའ་རུ་འཛེགས་པ་དང་། དེས་རང་གི་མཐོ་ས་རྣམས་བརྟན་པོར་བྱས་ན་ཡང་། ངས་འཇིག་བྱེད་རྣམས་མངགས་ནས་དེར་འགྲོ་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
JER 51:54 པཱ་པེལ་ལོན་ནས་ངུ་འབོད་ཅིག་ཐོན་ཏེ། ཀལ་དི་པའི་ཡུལ་ནས་འཇིག་པ་ཆེན་པོའི་སྒྲ་ཞིག་ཐོན།
JER 51:55 དཀོན་མཆོག་ཡ་ཝཱེས་པཱ་པེལ་ལོན་ནི་དབེན་སྟོང་དུ་མཛད་ཅིང་། དེའི་ནང་གི་ཅ་ཅོའི་སྒྲ་རྣམས་མེད་པར་མཛད་པས། དགྲ་ཟླས་ཆུ་རྣམས་བཞིན་དུ་རྦ་རླབས་འཕྱུར་ཏེ་ཅ་ཅོ་བསྒྲག་འོང་།
JER 51:56 འདི་ནི་འཇོམས་མཁན་རྣམས་པཱ་པེལ་ལོན་གྱི་སྟེང་དུ་བབས་ཏེ། པཱ་པེལ་ལོན་གྱི་དཔའ་བོ་རྣམས་བཟུང་ནས་དེ་དག་གི་གཞུ་རྣམས་དུམ་བུར་བཅག་གོ །ཅི་ལ་ཞེ་ན། དཀོན་མཆོག་ཡ་ཝཱེ་ནི་འཁོན་ལན་སློག་པའི་དཀོན་མཆོག་ལགས་པས། ཁོང་གིས་ངེས་པར་དུ་འཁོན་ལན་སློག་པའོ། །
JER 51:57 ཡང་ངས་པཱ་པེལ་ལོན་གྱི་འགོ་དཔོན་དང་མཁས་པ། བཀའ་བློན། བློན་པོ། དཔའ་བོ་བཅས་ཐམས་ཅད་བཟི་རུ་བཅུག་སྟེ། ཁོ་རྣམས་ལ་དུས་གཏན་དུ་གཉིད་འཐིབས་ནས་སད་པར་མི་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་མངའ་བའི་རྒྱལ་པོས་གསུངས་སོ། །
JER 51:58 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། པཱ་པེལ་ལོན་གྱི་ཡངས་ཤིང་རྒྱ་ཆེ་བའི་མཁར་རྣམས་ནི་རྩ་བ་ནས་ལོག་ཅིང་། དེའི་མཁར་སྒོ་མཐོན་པོ་རྣམས་མེས་བསྲེག་པར་འགྱུར། མི་རྣམས་ཀྱིས་དཀའ་ལས་ཆེན་པོ་མྱངས་པ་དོན་མེད་དུ་འགྱུར་ཞིང་། མི་རིགས་རྣམས་ཀྱིས་དཀའ་ལས་བྱེད་པ་རྣམས་མེས་བསྲེག་པར་འགྱུར་བས། དེ་དག་ཉམ་ཐག་པའོ། །
JER 51:59 ཡ་ཧུ་དཱའི་རྒྱལ་པོ་ཚིད་ཀི་ཡཱས་སྲིད་སྐྱོང་བའི་ལོ་བཞི་པར། མ་སེ་ཡཱའི་ཚ་བོའམ་ནེར་ཡཱའི་བུ་སེ་ར་ཡཱ་ནི་རྒྱལ་པོ་དང་མཉམ་དུ་པཱ་པེལ་ལོན་དུ་སོང་སྟེ། སེ་ར་ཡཱ་ནི་རྒྱལ་པོའི་ཕོ་བྲང་གི་བློན་ཆེན་ཡིན་ནོ། །ལུང་སྟོན་པ་ཡེ་རེམ་ཡཱ་ཡིས་དེ་ལ་བཀའ་བསྒོས་པ་སྟེ།
JER 51:60 དེ་ཡང་ཡེ་རེམ་ཡཱ་ཡིས་པཱ་པེལ་ལོན་གྱི་སྟེང་དུ་འབྱུང་བར་འགྱུར་བའི་ཆག་སྒོ་ཐམས་ཅད་དེ། པཱ་པེལ་ལོན་གྱི་སྐོར་དུ་བྲིས་པའི་གསུང་འདི་ཐམས་ཅད་གླེགས་བམ་ནང་དུ་བཀོད་པ་རེད།
JER 51:61 ཡེ་རེམ་ཡཱ་ཡིས་སེ་ར་ཡཱ་ལ་འདི་ལྟར། ཁྱེད་རང་པཱ་པེལ་ལོན་དུ་སླེབས་དུས་གླེགས་བམ་འདིའི་ནང་གི་བཀའ་རྣམས་བཀླག་པར་མཛོད་ཅིག
JER 51:62 ཡང་ཁྱེད་ཀྱིས་འདི་ལྟར། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་གནས་འདིའི་སྐོར་ལ་འདི་རུ་མི་དང་དུད་འགྲོ་གང་ཡང་མི་གནས་པར་དུས་རྒྱུན་དུ་སྟོང་བར་ལུས་པའི་ཕྱིར་གནས་འདི་མེད་པར་བྱའོ་ཞེས་གསུངས་པ་ཡིན་ཞེས་སྨྲོས་ཤིག
JER 51:63 ཁྱེད་ཀྱིས་མདོ་འདི་བཀླགས་ཚར་རྗེས་དེ་ལ་རྡོ་ཞིག་བཏགས་ནས་ཕི་རཱད་གཙང་པོའི་ནང་དུ་གཡུགས་ནས་འདི་ལྟར།
JER 51:64 པཱ་པེལ་ལོན་ནི་དཀོན་མཆོག་ཡ་ཝཱེས་དེའི་སྟེང་དུ་འབེབ་པར་འགྱུར་བའི་ཆག་སྒོ་ཡི་རྐྱེན་གྱིས་འདི་ལྟར་ནུབ་ནས་སླར་ལང་བར་མི་འགྱུར་ཏེ། མི་རྣམས་ཀྱང་ཉམ་ཐག་པར་འགྱུར་རོ་ཞེས་སྨྲོས་ཤིག་ཅེས་གསུངས་པ་དང་། ཡེ་རེམ་ཡཱ་ཡི་གསུང་རྣམས་འདི་ནས་རྫོགས་སོ། །
JER 52:1 ཚིད་ཀི་ཡཱ་རྒྱལ་པོ་བྱེད་དུས་ལོ་ཉེར་གཅིག་ལོན་ཡོད་དེ། ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས་པ་དང་། ཁོའི་ཡུམ་གྱི་མིང་ལ་ཧ་མུ་ཏལ་ཟེར་ཞིང་། མོ་ནི་ལིབ་ནཱ་པ་ཡེ་རེམ་ཡཱའི་བུ་མོ་ཡིན་ནོ། །
JER 52:2 ཚིད་ཀི་ཡཱ་ཡིས་ཡེ་ཧོ་ཡཱ་ཀིམ་གྱིས་གང་ཞིག་སྤྱད་པ་བཞིན། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས།
JER 52:3 དཀོན་མཆོག་ཡ་ཝཱེའི་ཐུགས་ཁྲོ་ནི་ཡེ་རུ་སཱ་ལེམ་དང་ཡ་ཧུ་དཱའི་སྟེང་ནས་བབས་ཏེ། ཐ་ན་དེ་རྣམས་ཁོང་ཉིད་ཀྱི་དྲུང་ནས་བསྐྲད་ཅིང་། ཚིད་ཀི་ཡཱ་ཡིས་པཱ་པེལ་ལོན་གྱི་རྒྱལ་པོར་རྒྱབ་འགལ་བྱས་སོ། །
JER 52:4 ཁོའི་སྲིད་ལོ་དགུ་པའི་ཟླ་བཅུ་པའི་ཚེས་བཅུ་ཉིན་ལ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དཔུང་ཚོགས་ཁྲིད་དེ་ཡེ་རུ་སཱ་ལེམ་ལ་རྒོལ་བར་འོངས་ནས་མཁར་གྱི་ཕྱོགས་སུ་དམག་སྒར་བཏབ་ཅིང་། གྲོང་ཁྱེར་ལེན་དུ་ཕྱོགས་བཞི་རུ་ས་རགས་བརྩིགས།
JER 52:5 རྒྱལ་པོ་ཚིད་ཀི་ཡཱའི་སྲིད་ལོ་བཅུ་གཅིག་པའི་བར་དུ་རྒྱལ་ས་དམག་གིས་བསྐོར་ནས་བསྡད་པ་ལ།
JER 52:6 ཟླ་བཞི་པའི་ཚེས་དགུ་ཉིན། གྲོང་ཁྱེར་ནང་གི་མུ་གེ་ནི་ཤིན་ཏུ་ཚབས་ཆེ་ཞིང་། གནས་དེའི་མི་རྣམས་ལ་ཁ་ཟས་ཅི་ཡང་མེད་པར་གྱུར།
JER 52:7 དེ་ནས་ལྕགས་རི་གཏོར་བ་དང་། དམག་མི་རྣམས་མཚན་མོའི་དུས་སུ་རྒྱལ་པོའི་སྐྱེད་ཚལ་དང་ཉེ་བའི་མཁར་གཉིས་ཀྱི་བར་སྒོ་ནས་ཕྱི་རུ་བྲོས་ཤིང་། ཀལ་དི་པས་ཕྱོགས་བཞི་ནས་གྲོང་ཁྱེར་བསྐོར་བས་དེ་རྣམས་ཨ་ར་པཱ་རུ་བྲོས་སོ། །
JER 52:8 ཀལ་དི་པའི་དམག་དཔུང་གིས་རྒྱལ་པོ་ཚིད་ཀི་ཡཱའི་རྗེས་དེད་ནས་ཡེ་རུ་ཀོའི་ཐང་དུ་ཁོའི་རྗེས་ཆོད་པ་དང་། དེའི་དམག་དཔུང་རྣམས་ཁོ་དང་བྲལ་ནས་ཁ་ཐོར་ཏུ་སོང་།
JER 52:9 ཀལ་དི་པས་ཁོ་བཟུང་ནས་ཧ་མཱད་ཀྱི་གནས་རིབ་ལཱ་ཞེས་པར་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་མདུན་དུ་ཁྲིད་པ་དང་། ནེ་བོ་ཀད་ནེ་ཙར་གྱིས་དེ་ལ་ཁྲིམས་ཐག་བཅད་དོ། །
JER 52:10 པཱ་པེལ་ལོན་གྱི་རྒྱལ་པོས་ཚིད་ཀི་ཡཱའི་མདུན་དུ་ཁོའི་བུ་རྣམས་བསད་པ་དང་། ཡང་རིབ་ལཱ་རུ་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་པར་མ་ཟད།
JER 52:11 ཚིད་ཀི་ཡཱའི་མིག་ཟུང་བཏོན་ནས་ལི་ཡི་སྒྲོག་རྣམས་བརྒྱབ་སྟེ་པཱ་པེལ་ལོན་དུ་ཁྲིད་པ་དང་། མ་ཤི་བར་དུ་བཙོན་ལ་བཅུག་གོ །
JER 52:12 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་སྲིད་ལོ་བཅུ་དགུ་པའི་ཟླ་ལྔ་པའི་ཚེས་བཅུ་ཉིན་ལ། པཱ་པེལ་ལོན་གྱི་རྒྱལ་པོའི་མདུན་དུ་སྐུ་སྲུང་བྱེད་པའི་ནེ་བོ་ཟར་ཨ་དན་བྱ་བ་ཡེ་རུ་སཱ་ལེམ་དུ་སོང་ནས།
JER 52:13 ཁོས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོའི་ཕོ་བྲང་དང་། ཡེ་རུ་སཱ་ལེམ་གྱི་ཁང་པ་ཐམས་ཅད་དང་ཁང་བརྩེགས་ཐམས་ཅད་མེར་བསྲེགས་སོ། །
JER 52:14 ཡང་སྐུ་སྲུང་དམག་དཔོན་གྱི་རྗེས་འབྲང་པ་སྟེ་ཀལ་དི་པའི་དཔུང་ཚོགས་རྣམས་ཀྱིས་ཡེ་རུ་སཱ་ལེམ་གྱི་ཕྱོགས་བཞིའི་མཁར་རྣམས་བཤིགས་པ་དང་།
JER 52:15 གྲོང་ཁྱེར་གྱི་ནང་དུ་ལུས་པའི་མི་རྣམས་དང་པཱ་པེལ་ལོན་རྒྱལ་པོར་མགོ་བཏགས་པ་རྣམས། དེ་མིན་ཡུལ་མི་ལྷག་ལུས་དང་བཅས་པ་སྐུ་སྲུང་དཔོན་པོ་ནེ་བོ་ཟར་ཨ་དན་གྱིས་བཙན་ཁྲིད་བྱས་སོ། །
JER 52:16 ཡིན་ནའང་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཡུལ་དེའི་དབུལ་པོ་དབུལ་རྐྱང་རྣམས་བསྐྱུར་ནས། དེ་རྣམས་ལ་རྒུན་འབྲུམ་ར་བ་ལེགས་བཅོས་བྱེད་པ་དང་ཞིང་རྨོ་རུ་བཅུག
JER 52:17 དཀོན་མཆོག་ཡ་ཝཱེའི་མཆོད་ཁང་དུ་ཡོད་པའི་ལི་ཡི་ཀ་བ་རྣམས་དང་། དཀོན་མཆོག་ཡ་ཝཱེའི་མཆོད་ཁང་ནང་ཡོད་པའི་སྟེགས་བུ་རྣམས། ལི་ཡི་རྒྱ་མཚོ་ཞེས་པའི་འཁྲུད་གཞོང་བཅས་ནི་ཀལ་དི་པས་དུམ་བུར་བཅག་ནས་ལི་རྣམས་པཱ་པེལ་ལོན་དུ་ཁྱེར།
JER 52:18 དེ་དག་གིས་སླ་ང་དང་མེ་ཁྱེམ། སྡོང་རས་གཅོད་བྱེད་སྐམ་ཆུང་། མཆོད་སྡེར། ཁེམ་བུ། དེ་མིན་མཆོད་ཁང་ནང་དུ་བཀོལ་བའི་ལི་ཡི་སྣོད་ཐམས་ཅད་དང་།
JER 52:19 ཡང་བུམ་པ་དང་མེ་ཕོར། ཕོར་བ། གཞོང་པ། སྒྲོན་སྟེགས། ཁེམ་བུ། སྐྱེམས་མཆོད་འབུལ་བྱེད་ཨུ་ལུ་བཅས་གསེར་དངུལ་གང་ཡིན་གྱི་སྣོད་ཐམས་ཅད་སྐུ་སྲུང་དམག་དཔོན་གྱིས་ཁྱེར་སོང་ངོ་། །
JER 52:20 རྒྱལ་པོ་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་ནང་དུ་བཟོས་པའི་ཀ་བ་གཉིས་པོ་དང་། ལི་ཡི་རྒྱ་མཚོ་གཅིག་དང་། དེའི་ཞབས་རའི་འོག་ཏུ་ཡོད་པའི་ལི་ཡི་གླང་བཅུ་གཉིས་དང་བཅས་པའི་ལི་ཡི་ལྗིད་ཚད་ནི་གཞལ་དུ་མེད་པ་ཡིན་ཏེ།
JER 52:21 ཀ་བ་རེ་རེའི་མཐོ་ཚད་ལ་ཁྲུ་བཅོ་བརྒྱད་དང་། མཐུག་ཚད་ལ་སོར་བཞི་དང་། མུ་ཁྱུད་ལ་ཁྲུ་བཅུ་གཉིས་ཡིན་ལ། དཀྱིལ་ནི་སྟོང་པ་ཡིན་ནོ། །
JER 52:22 ཀ་བའི་སྟེང་དུ་ལི་ཡི་ཀ་གཞུ་ཡོད་ལ། ཀ་གཞུ་རེ་རེའི་མཐོ་ཚད་ནི་ཁྲུ་ལྔ་ཡིན་པ་དང་། ཀ་གཞུའི་མཐའ་རུ་ལི་ཡིས་གྲུབ་པའི་དྲ་བ་དང་སེ་འབྲུས་བརྒྱན་ཡོད་དེ། ཀ་བ་ཅིག་ཤོས་དེ་ཡང་དེ་དང་དེ་བཞིན་དུ་སེ་འབྲུས་བརྒྱན་ཡོད་དོ། །
JER 52:23 ཡང་ཀ་བའི་ཕྱོགས་བཞི་རུ་སེ་འབྲུ་དགུ་བཅུ་གོ་དྲུག་གིས་བརྒྱན་ཡོད་ལ། དེ་དག་ནི་དྲ་བའི་མཐའ་རུ་ཡོད་དེ། བསྡོམས་པས་སེ་འབྲུ་བརྒྱ་ཡོད་དོ། །
JER 52:24 སྐུ་སྲུང་དམག་དཔོན་གྱིས་མཆོད་དཔོན་ཆེན་པོ་སེ་ར་ཡཱ་དང་། མཆོད་དཔོན་གཉིས་པ་ཟེ་ཕན་ཡཱ་དང་། སྒོ་སྲུང་མི་གསུམ་བཅས་བཙན་ཁྲིད་བྱས་པ་དང་།
JER 52:25 ཡང་གྲོང་ཁྱེར་ནས་དམག་མིའི་བཀོད་འདོམས་པ་ཞིག་དང་། གྲོང་ཁྱེར་དུ་རྒྱལ་པོའི་སློབ་སྟོན་པ་མི་བདུན་དང་། ཡུལ་མིའི་དམག་དཔོན་གྱི་དྲུང་ཡིག་པ་རྣམས་དང་། དེ་མིན་གྲོང་ཁྱེར་ནང་རྙེད་པའི་མི་རྣམས་ལས་སྐྱེས་པ་དྲུག་ཅུ་དང་བཅས་པའང་ཁྲིད།
JER 52:26 སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་དེ་དག་བཟུང་ནས་རིབ་ལཱ་རུ་པཱ་པེལ་ལོན་གྱི་རྒྱལ་པོའི་དྲུང་དུ་ཁྲིད་པ་ན།
JER 52:27 པཱ་པེལ་ལོན་གྱི་རྒྱལ་པོས་ཧ་མཱད་ཡུལ་གྱི་རིབ་ལཱ་རུ་དེ་དག་བསད་དོ། །དེ་ལྟར་ཡ་ཧུ་དཱ་པ་རྣམས་རང་ཡུལ་ནས་བཙོན་དུ་ཁྲིད་དོ། །
JER 52:28 ནེ་བོ་ཀད་ནེ་ཙར་གྱིས་བཙོན་དུ་ཁྲིད་པའི་མི་གྲངས་ནི་འདི་ལྟ་སྟེ། ཁོང་གིས་རྒྱལ་སྲིད་སྐྱོང་བའི་ལོ་བདུན་པར་ཡ་ཧུ་དཱ་པ་མི་སུམ་སྟོང་བརྒྱ་མེད་ཉེར་གསུམ་བཙོན་དུ་ཁྲིད།
JER 52:29 ནེ་བོ་ཀད་ནེ་ཙར་གྱི་སྲིད་ལོ་བཅོ་བརྒྱད་པར་ཡེ་རུ་སཱ་ལེམ་ནས་མི་བརྒྱད་བརྒྱ་དང་སུམ་ཅུ་སོ་གཉིས་བཙོན་དུ་ཁྲིད།
JER 52:30 ནེ་བོ་ཀད་ནེ་ཙར་གྱི་སྲིད་ལོ་ཉེར་གསུམ་པར་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཡ་ཧུ་དཱ་པ་རྣམས་ལས་མི་བདུན་བརྒྱ་དང་བཞི་བཅུ་ཞེ་ལྔ་བཙོན་དུ་ཁྲིད་དེ། བསྡོམས་པས་མི་བཞི་སྟོང་དྲུག་བརྒྱ་ཡོད་དོ། །
JER 52:31 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙོན་དུ་བཟུང་བའི་ལོ་སུམ་ཅུ་སོ་བདུན་པ་སྟེ། པཱ་པེལ་ལོན་གྱི་རྒྱལ་པོ་ཨེ་ཝིལ་མེ་རོ་དག་བྱ་བ་རྒྱལ་པོར་བསྐོས་པའི་ལོ་དང་པོ་ཡི་ཟླ་བཅུ་གཉིས་པའི་ཚེས་ཉེར་ལྔ་ཉིན། ཁོས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་གྱི་དབུ་འཕང་མཐོ་བར་བྱས་ཏེ་བཙོན་གྲོལ་བཏང་ནས།
JER 52:32 ཡང་ཁོ་ལ་བརྩེ་བའི་གཏམ་སྨྲས་ཤིང་། ཁོའི་གོ་ས་ནི་ཁོང་དང་མཉམ་དུ་པཱ་པེལ་ལོན་དུ་ཡོད་པའི་རྒྱལ་པོ་རྣམས་ལས་མཐོ་བར་བྱས།
JER 52:33 ཡང་ཁོ་ལ་བཙོན་གོས་ཕུད་དུ་བཅུག་པ་དང་མི་ཚེ་གང་པོར་པཱ་པེལ་ལོན་གྱི་རྒྱལ་པོའི་དྲུང་དུ་ཁ་ཟས་རོལ་བར་བཅུག
JER 52:34 པཱ་པེལ་ལོན་གྱི་རྒྱལ་པོས་དེ་ལ་རྒྱུན་མཁོའི་ཁ་ཟས་གནང་སྟེ། ཁོང་འཆི་བའི་བར་དུ་ཉིན་རེ་བཞིན་ཚེ་གང་པོར་དེ་ལྟར་བྱས་སོ།། །།
LAM 1:1 གནའ་དུས་མི་ཡིས་ཁེངས་པའི་གྲོང་ཁྱེར་དེ། ། ད་ལྟའི་དུས་སུ་ཅིའི་ཕྱིར་གཅིག་པུར་ལུས། ། གནའ་དུས་རྒྱལ་ཁམས་ཁྲོད་དུ་ཆེ་བ་དེ། ། ད་ལྟའི་དུས་སུ་ཅིའི་ཕྱིར་ཡུགས་མོ་བཞིན། ། གནའ་དུས་རྒྱལ་ཁམས་ཁྲོད་ཀྱི་སྲས་མོ་ དེ། ། ད་ལྟའི་དུས་སུ་བྲན་གཡོག་ཅིག་དང་འདྲ། །
LAM 1:2 ཁོ་མོ་མཚན་མོར་ངུས་ཤིང་མཁུར་ཚོས་མཆི་མས་བརླན། ། དགའ་རོགས་ཁྲོད་དུ་ཁོ་མོར་སེམས་གསོ་བྱེད་མཁན་དབེན། ། ཁོ་མོའི་གྲོགས་པོ་ཀུན་གྱིས་གཡོ་སྒྱུས་མོ་འཛིན་ཞིང་། ། གྲོགས་པོ་ཐམས་ཅད་ཁོ་མོའི་དགྲ་ཟླར་གྱུར་པ་ཡིན། །
LAM 1:3 ཡ་ཧུ་དཱ་པས་དཀའ་སྡུག་ཚད་མེད་མྱངས་མ་ཟད། ། ངལ་ལས་ཞུགས་ཏེ་ནམ་རྒྱུན་ཕྱི་ཕྱོགས་ཡུལ་དུ་འཁྱམ། ། རྒྱལ་ཁམས་ཁྲོད་དུ་ཁོ་མོས་བདེ་བ་བཙལ་མ་རྙེད། ། འདེད་མཁན་དག་གིས་གུ་དོག་གནས་སུ་ཁོ་མོ་ཟིན། །
LAM 1:4 དུས་ཆེན་སྲུང་བའི་མི་དབེན་པས། ། ཛ་ཡན་བརྒྱུད་པའི་ལམ་སྡུག་ཅིང་། ། ཁོ་མོའི་སྒོ་ཆེན་དག་སྟོངས་ཤིང་། ། མཆོད་དཔོན་རྣམས་ཀྱིས་ཤུགས་རིང་འབྱིན། ། ཁོ་མོའི་མོ་གསར་ཡིད་སྐྱོ་ཞིང་། ། ཁོ་མོས་སྡུག་བསྔལ་ཚད་མེད་མྱངས། །
LAM 1:5 ཁོ་མོའི་དགྲ་བོ་གཙོ་བོར་གྱུར། ། ཁོ་མོའི་དགྲ་ཟླ་བདེ་ལ་བབས། ། ཁོ་མོའི་སྡིག་པ་མང་དྲགས་པས། ། ཡ་ཝཱེས་ཁོ་མོ་སྡུག་ལ་སྦྱར། ། ཁོ་མོའི་བྱིས་པ་དེ་དག་ནི། ། དགྲ་བོའི་མདུན་ནས་བཙོན་དུ་ཁྲིད། །
LAM 1:6 ཛ་ཡན་བུ་མོའི་བཀུར་འོས་གཟི་བརྗིད་ཐམས་ཅད་ནི། ། ཁོ་མོའི་མི་སྡེ་རྣམས་དང་ཡོངས་སུ་བྲལ་བར་གྱུར། ། ཁོ་མོའི་མངའ་བདག་རྩྭ་ས་མ་རྙེད་ཤྭ་བ་བཞིན། ། འདེད་མཁན་རྣམས་ཀྱི་མདུན་ནས་ཐར་བའི་སྟོབས་ཤུགས་ཟད། །
LAM 1:7 ཡེ་རུ་སཱ་ལེམ་དཀའ་སྡུག་ཁྲོད་དུ་འཁྱམ་པའི་དུས། ། སྔར་གྱི་འདོད་ཡོན་ལོངས་སྤྱོད་སྣ་ཚོགས་ཀུན་ནས་དྲན། ། ཁོ་མོའི་མི་སྡེ་དགྲ་བོའི་ལག་ཏུ་ཤོར་བའི་དུས། ། ཁོ་མོར་རོགས་རམ་བྱེད་མཁན་གཅིག་ཀྱང་མ་བྱུང་སྟེ། ། དགྲ་བོས་ཁོ་མོར་བྱུང་བའི་དོན་རྣམས་མཐོང་བ་ན། ། ཁོ་མོའི་ཉམ་ཐག་ལ་ནི་འཕྱ་དགོད་བྱས་པ་འོ། །
LAM 1:8 ཡེ་རུ་སཱ་ལེམ་གྲོང་གིས་སྡིག་པ་ཆེན་པོ་བསགས་པས་ན། ། མི་གཙང་དངོས་པོར་གྱུར་ཅིང་ཁོ་མོར་བཀུར་མཁན་དག་གིས་ཀྱང་། ། ཁོ་མོ་གཅེར་བུ་ཡིན་པ་མཐོང་ནས་སྨད་ཅིང་མཐོང་ཆུང་བྱེད། ། ཁོ་མོས་ཀྱང་ནི་ཤུགས་རིང་གཏོང་བཞིན་ཁ་ཕྱིར་འཁོར་ནས་ཡིབ། །
LAM 1:9 ཁོ་མོའི་སྨད་གཡོག་ནག་ནོག་དྲི་མས་ཀུན་ནས་སྦགས་ན་ཡང་། ། ཁོ་མོས་རང་གི་མཐའ་མའི་འབྲས་བུ་ཡེ་ནས་དྲན་མ་བྱུང་། ། དེའི་ཕྱིར་ཁོ་མོ་ཡ་མཚན་ཉམས་ཀྱང་སེམས་གསོ་བྱེད་མཁན་བྲལ། ། ཡ་ཝཱེ་ཁྱེད་ཀྱིས་བདག་གི་སྡུག་བསྔལ་ཀུན་ལ་གཟིགས་པར་མཛོད། ། དགྲ་བོས་རང་ཉིད་མཐུ་སྟོབས་ཆེ་བར་མངོན་ཞེས་ཁོ་མོས་ཞུས། །
LAM 1:10 དགྲ་བོས་ལག་པ་བརྐྱངས་ཏེ་ཁོ་མོའི་གཅེས་ནོར་བཙན་གྱིས་ཕྲོགས། ། ཁོ་མོས་ཕྱི་ཕྱོགས་པ་རྣམས་གནས་མཆོག་ལ་ནི་འཛུལ་བ་མཐོང་། ། ཁྱེད་ཀྱིས་ཕྱི་ཕྱོགས་པ་རྣམས་ཉིད་ཀྱི་ཚོགས་ལ་ཞུགས་པ་དགག །
LAM 1:11 ཁོ་མོའི་འབངས་ཀྱིས་ཤུགས་ནར་འབྱིན་ཞིང་ཁ་ཟས་འཚོལ། ། སྲོག་འཚོའི་ཕྱིར་དུ་ཁོ་ཚོས་གཅེས་ནོར་འབྲུ་རིགས་བརྗེས། ། དེ་ཡང་མི་ཡིས་ང་ལ་མཐོང་ཆུང་བྱས་པས་ན། ། ཡ་ཝཱེ་ཁྱེད་ཀྱིས་ང་ལ་གསན་ཞིང་གཟིགས་པར་མཛོད། །
LAM 1:12 ཁྱོད་ཅག་ལམ་འགྲོ་དག་གིས་དོན་འདི་མི་མཐོང་ངམ། ། བདག་གི་སྟེང་དུ་བྱུང་བའི་སྡུག་བསྔལ་འདི་ལྟ་བུ། ། ཡོད་དང་མེད་ལ་ཁྱོད་ཚོས་ཞིབ་ཏུ་བལྟ་བར་གྱིས། ། དེ་ནི་ཡ་ཝཱེ་ཁོང་ཉིད་ཐུགས་ཁྲོའི་ཉིན་མོ་ལ། ། ང་ལ་སྡུག་བསྔལ་མྱངས་སུ་བཅུག་པའི་དོན་དེ་འོ། །
LAM 1:13 ཁོང་གིས་མཐོན་པོའི་གནས་ནས་མེ་ཕུང་ཆེན་པོ་འཕངས་གྱུར་ཏེ། ། ང་ཡི་རུས་པའི་གཏིང་དུ་ཟུག་ཅིང་ང་ནི་ཡོངས་སུ་བཅུན། ། ཁོང་གིས་རྙི་རྒྱ་བཏབ་སྟེ་ང་ཡི་རྐང་པ་དེའི་ནང་ཟིན། ། ང་ཡིས་ཁ་ཕྱོགས་བསྒྱུར་ནས་གཏན་དུ་སྐྱོ་ཞིང་ཉམས་པར་མཛད། །
LAM 1:14 ང་ཡི་ཉེས་པའི་གཉའ་ཤིང་ཁོང་གིས་དངོས་སུ་བསྡམས་པར་མཛད། ། དེ་ནི་ང་ཡི་སྡིག་པའི་གཉའ་ཤིང་སྐེ་ལ་བཏེགས་པ་བཞིན། ། ཁོང་གིས་ང་ཡི་ལུས་ཀྱི་སྟོབས་ཤུགས་ཐམས་ཅད་ཉམས་མཛད་དེ། ། གཙོ་བོས་ང་ནི་རྒྱལ་བར་དཀའ་བའི་དགྲ་ཡི་ལག་ཏུ་སྤྲད། །
LAM 1:15 གཙོ་བོས་ང་ཡི་འཁོར་གྱི་དཔའ་བོ་ཐམས་ཅད་དོར། ། ཁོང་གིས་མི་ཚོགས་བསྡུས་ཏེ་ང་ལ་རྒོལ་བཅུག་སྟེ། ། ང་ཡི་ན་གཞོན་དག་ལ་རྒོལ་བར་གྱུར་པ་དང་། ཁོང་གིས་རྒུན་འབྲུམ་འཚིར་གཞོང་བརྫིས་པ་ནང་བཞིན་དུ། ། ཡ་ཧུ་དཱ་ཡི་བུ་མོའི་ནང་གི་མོ་གསར་སྨད། །
LAM 1:16 དོན་དེའི་ཕྱིར་དུ་ང་ནི་ངུས་ཤིང་མིག་ལས་མཆི་མ་བཞུར། ། སེམས་གསོ་བྱས་ནས་ཚེ་སྲོག་སྐྱོབ་མཁན་ང་དང་རིང་དུ་གྱེས། ། ང་ཡི་བུ་དང་བུ་མོ་ཁེར་རྐྱང་ངང་ནས་ཡིད་སེམས་སྐྱོ། ། དེ་ནི་དགྲ་ཟླ་ཐམས་ཅད་རྣམ་པར་རྒྱལ་བའི་ཕྱིར་ཡིན་ནོ། །
LAM 1:17 ཛ་ཡན་མི་ཡིས་ལག་ཟུང་བརྐྱངས་ཀྱང་སེམས་གསོ་བྱེད་མཁན་མེད། ། ཡ་ཝཱེ་ཁོང་གིས་ཡ་ཀོབ་སྐོར་ལ་བཀའ་དག་གནང་ཟིན་ཞིང་། ། མཐའ་ནས་བསྐོར་བ་ཐམས་ཅད་ཁོ་ཡི་དགྲ་རུ་ལངས་གྱུར་ཏེ། ། དེ་དག་ཁྲོད་དུ་ཡེ་རུ་སཱ་ལེམ་མི་གཙང་རྫས་སུ་གྱུར། །
LAM 1:18 ང་རང་ཁོང་གི་བཀའ་དང་འགལ་བས་ན། ། དྲང་བདེན་ཡ་ཝཱེས་ང་ལ་དེ་ལྟར་མཛད། ། ཀྱེ་ཀྱེ་མི་ཚོགས་ང་ཡི་གཏམ་ལ་གསོན། ། ང་ཡི་སྡུག་བསྔལ་ལ་ནི་གཟིགས་པར་གྱིས། ། ང་ཡི་ན་ཆུང་མ་དང་གཞོན་ནུ་དག ། ཡོངས་སུ་བཙོན་དུ་ཁྲིད་པར་གྱུར་པ་འོ། །
LAM 1:19 ང་ཡིས་རང་གི་དགའ་རོགས་རྣམས་ལ་སྐྱབས་ཞུས་ཀྱང་། ། དེ་དག་གིས་ནི་ང་ལ་མགོ་སྐོར་བཏང་བ་དང་། ། ང་ཡི་མཆོད་དཔོན་དང་ནི་རྒན་པོ་དག་གིས་ཀྱང་། ། འཚོ་བར་འགྱུར་ཆེད་ཁ་ཟས་འཚོལ་བའི་དུས་དེ་ལ། ། གྲོང་ཁྱེར་ནང་དུ་དབུགས་རྒྱུན་ཆད་དེ་འཆི་བར་གྱུར། །
LAM 1:20 ཀྱེ་ཀྱེ་ཡ་ཝཱེ་ཁྱེད་ཀྱིས་གཟིགས་པར་མཛོད། ། དཀའ་སྡུག་ང་ཡི་སྟེང་ལ་བབས་པས་སོ། ། ང་ཡི་སེམས་ནི་སྐྱོ་ཞིང་ཡིད་ནི་འཁྲུགས། ། དེ་ནི་ང་ཡིས་ལོག་སྤྱོད་བྱས་པའི་ཕྱིར། ། ཕྱི་རུ་རལ་གྲི་ཐོགས་པས་བུ་ཤོར་ཅིང་། ། ཁྱིམ་གྱི་ནང་དུ་འཆི་བ་ཉིད་ནི་སླེབས། །
LAM 1:21 ང་ཡི་ཤུགས་སྐད་ཐོས་ཀྱང་བདག་ལ་སེམས་གསོ་བྱེད་མཁན་མེད། ། ང་ཡི་དགྲ་ཟླ་རྣམས་ཀྱིས་ང་ཡི་རྐྱེན་ངན་ཐོས་པར་གྱུར། ། ཁྱེད་ཀྱིས་དེ་ལྟར་མཛད་པས་དགྲ་ཟླ་རྣམས་ནི་དགའ་བར་གྱུར། ། ཁྱེད་ཀྱིས་ཉིད་ཀྱི་དུས་ནི་ངེས་པར་འོང་ཞེས་བསྒྲགས་པའི་དུས། ། དགྲ་ཟླ་དེ་དག་མ་ལུས་ང་དང་ཀུན་ནས་མཚུངས་པར་འགྱུར། །
LAM 1:22 ཁོ་ཚོའི་སྤྱོད་ངན་ཐམས་ཅད་ཁྱེད་ཀྱི་སྤྱན་སྔར་མངོན་གྱུར་ཅིག ། ཁྱེད་ཀྱིས་ང་ཡི་ཉེས་པར་ལན་ནི་ཇི་ལྟར་འཇལ་བ་བཞིན། ། དེ་དག་ལ་ཡང་དེ་ལྟར་ལན་ནི་འཇལ་བར་མཛོད། ། དེ་ནི་ངའི་སེམས་སྡུག་ཅིང་ཡིད་ནི་སྐྱོ་ཕྱིར་རོ། །
LAM 2:1 གཙོ་བོས་ཁྲོས་པའི་སྤྲིན་གྱིས་ཛ་ཡན་བུ་མོ་བསྒྲིབས་པར་གྱུར། ། ཁོང་གིས་ཡེས་ར་ཨེལ་གྱི་གཟི་བརྗིད་གནམ་ནས་ས་རུ་འཕངས། ། ཁོང་ཉིད་ཁྲོས་པའི་ཉིན་མོའི་ནང་དུ་ཡང་། ། རང་གི་ཞབས་སྟེགས་ ནམ་ཡང་དྲན་མ་གྱུར། །
LAM 2:2 གཙོ་བོས་ཡ་ཀོབ་ཁོ་ཡི་གནས་ཀུན་ནི། ། ཁྱུར་མིད་བཏང་ཡང་ཐུགས་ནི་ཡེ་མི་འགྱོད། ། ཁོང་གིས་ཉིད་ཀྱི་ཐུགས་ཁྲོ་ཆེན་པོའི་ནང་། ། ཡ་ཧུ་དཱ་ཡི་མི་སྡེའི་མཁར་རྣམས་བཤིག ། ཁོང་གིས་རྒྱལ་ཁབ་དང་ནི་འགོ་དཔོན་རྣམས། ། ས་ལ་བརྡབས་ཏེ་ངོ་ཚ་ཐེབས་པར་མཛད། །
LAM 2:3 ཁོང་ཉིད་ཁྲོས་པས་ཡེས་ར་ཨེལ་གྱི་རྭ་ཅོ་ཐམས་ཅད་བཅད། ། ཁོང་གི་དགྲ་ཟླའི་མདུན་ནས་ཉིད་ཀྱི་གཡས་ཕྱག་ཚུར་འཁུམས་ཤིང་། ། ཁོང་ནི་ཕྱོགས་བཞིའི་དངོས་པོ་བསྲེག་པའི་མེ་ལྕེ་བཞིན། ། ཡ་ཀོབ་ཁོ་ཡི་ནང་དུ་ཁྱུར་མིད་བཏང་བ་འོ། །
LAM 2:4 ཁོང་ནི་དགྲ་ཟླས་འཐེན་པའི་གཞུ་བཞིན་དུ། ། གཡས་ཕྱག་གིས་ནི་གྲ་སྒྲིག་བྱས་ཟིན་ཏེ། ། ཁོང་ནི་དགྲ་ཟླས་མིག་ནང་ལྷུང་བ་ཐམས་ཅད་བསད་པ་བཞིན། ། ཁོང་གི་ཐུགས་ཁྲོ་མེ་ལྟར་ཛ་ཡན་སྦྲ་གུར་སྟེང་དུ་བླུགས། །
LAM 2:5 གཙོ་བོ་དགྲ་ཟླ་བཞིན་དུ་གྱུར་པ་དང་། ། ཁོང་གིས་ཡེས་ར་ཨེལ་དང་དེའི་ཕོ་བྲང་། ། ཁྱུར་མིད་བཏང་ཞིང་བཙན་པོའི་མཁར་ཡོངས་བཤིག ། ཁོང་གིས་ཡ་ཧུ་དཱ་ཡི་མི་སྡེའི་ནང་། ། སྡུག་བསྔལ་དང་ནི་ངུ་འབོད་བསྣན་པར་མཛད། །
LAM 2:6 ཁོང་གིས་ཉིད་ཀྱི་བཞུགས་གནས་ཡོངས་སུ་བརླགས། ། ལྡུམ་ར་ཇི་བཞིན་ཉིད་ཀྱི་ཚོགས་ར་གཏོར། ། ཡ་ཝཱེའི་སྲུང་བྱའི་དུས་དང་ངལ་གསོའི་དུས། ། ཛ་ཡན་ཡུལ་དུ་མ་ལུས་བརྗེད་པར་མཛད། ། ཁོང་གིས་ཉིད་ཀྱི་ཐུགས་ཁྲོ་ཆེན་པོའི་ནང་། ། རྒྱལ་པོ་དང་ནི་མཆོད་དཔོན་དོར་བར་མཛད། །
LAM 2:7 གཙོ་བོས་ཉིད་ཀྱི་མཆོད་ཁྲི་སྤངས་ཤིང་གནས་མཆོག་དོར། ། ཁོང་གིས་ཕོ་བྲང་དེ་ཡི་ལྕགས་རི་དགྲ་ལག་གཏད། ། དུས་ཆེན་ཞིག་ལ་དགའ་བའི་རྟེན་འབྲེལ་ཞུ་བ་བཞིན། ། ཡ་ཝཱེའི་བཞུགས་གནས་ནང་དུ་དེ་ཚོས་འུར་སྒྲ་བསྒྲགས། །
LAM 2:8 ཡ་ཝཱེས་ཛ་ཡན་མི་སྡེའི་མཁར་རྣམས་བརླག་པར་དགོངས། ། ཁོང་གིས་ཐིག་སྐུད་ འཐེན་ནས་ཕྱག་ཟུང་མ་འཁུམས་ཤིང་། ། ཁོང་གིས་བཙན་མཁར་དེ་དག་གཏོར་བར་མཛད་ཕྱིར་དུ། ། བཙན་རྫོང་དང་ནི་མཁར་གྱང་མཉམ་དུ་སྡུག་ལ་སྦྱར། །
LAM 2:9 ཛ་ཡན་ཡུལ་གྱི་མཁར་སྒོ་ཐམས་ཅད་ས་རུ་ནུབ་པ་དང་། ། གཙོ་བོས་ཁོ་མོའི་སྒོ་གཏན་དག་ཀྱང་དུམ་བུར་མཛད་གྱུར་ཅིང་། ། ཁོ་མོའི་རྒྱལ་པོ་དང་ནི་འགོ་དཔོན་ཡུལ་ཁམས་སོ་སོར་ཐོར། ། དེ་ནས་ཛ་ཡན་ཡུལ་དུ་བཀའ་ཁྲིམས་གཏན་ནས་མེད་གྱུར་ཅིང་། ། ཡ་ཝཱེའི་ཞལ་གཟིགས་ལུང་སྟོན་པ་ཚོར་ནམ་ཡང་ཐོབ་མ་གྱུར། །
LAM 2:10 ཛ་ཡན་ཡུལ་གྱི་རྒན་པོ་མཐའ་དག་ས་རུ་ཁ་རོག་བསྡད། ། ཁོ་ཚོས་ཐལ་བ་མགོ་ལ་གཏོར་ཅིང་སྐེད་པར་སོ་རས་བཅིངས། ། ཡེ་རུ་སཱ་ལེམ་ཡུལ་གྱི་མོ་གསར་ཐམས་ཅད་མགོ་སར་བཏུད། །
LAM 2:11 ང་ཡི་མིག་ལས་མཆི་མ་བཞུར་བས་ལོང་བར་གྱུར་པ་དང་། ། ང་ཡི་སེམས་པ་སྐྱོ་ཞིང་ལུས་ཟུངས་ཡོངས་སུ་ཉམས་པར་གྱུར། ། དེ་དག་ཐམས་ཅད་ང་ཡི་མི་སྡེ་སྡུག་ལ་སྦྱར་བ་དང་། ། བྱིས་པ་དང་ནི་ཕྲུ་གུ་གྲོང་གི་ལམ་ནང་འགྱེལ་བའི་ཕྱིར། །
LAM 2:12 དེ་དག་མཚོན་ཆས་རྨས་པའི་མི་ལྟར་གྲོང་ཁྱེར་སྲང་ལམ་འགྱེལ། ། དེ་དག་རང་གི་མ་ཡི་པང་དུ་འཆི་ལ་ཉེ་བའི་དུས། ། ཟས་དང་རྒུན་ཆང་གང་དུ་ཡོད་ཅེས་མ་ལ་དྲིས་དང་མཚུངས། །
LAM 2:13 ཀྱེ་ཀྱེ་ཡེ་རུ་སཱ་ལེམ་ཡུལ་གྱི་མི་སྡེ་རྣམས། ། བདག་གིས་ཁྱོད་ལ་བདེན་དཔང་ཅི་ལྟར་བྱེད་དགོས་སམ། ། བདག་གིས་ཁྱོད་དང་ཅི་ལྟར་བསྡུར་བར་འགྱུར་ནུས་སམ། ། ཀྱེ་ཀྱེ་ཛ་ཡན་ཡུལ་གྱི་མི་སྡེ་ངས་ཁྱོད་ལ། ། སེམས་གསོ་བྱ་ཕྱིར་ཅི་ཞིག་གིས་ནི་ཁྱོད་དང་བསྡུར། ། ཁྱོད་ཀྱི་རྨ་ཁ་མཚོ་བཞིན་ཡངས་པས་སུ་ཡིས་གསོ། །
LAM 2:14 ཁྱོད་ཀྱི་ལུང་སྟོན་པ་ཡིས་ཁྱོད་དོན་དུ། ། མཐོང་བའི་ཞལ་གཟིགས་གཡོ་ཟོལ་བླུན་རྨོངས་ཡིན། ། ཁྱོད་ཀྱི་ཚེ་སྲོག་ཡང་བསྐྱར་དྲངས་པའི་ཕྱིར། ། དེ་ཚོས་ཁྱོད་ཀྱི་ཉེས་སྡིག་ཕྱིར་མ་མངོན། ། ཁྱོད་ཕྱིར་དེ་ཚོར་ཐོབ་པའི་བཀའ་ལུང་ནི། ། རྫུན་དང་མི་རྣམས་ལོག་ལམ་ཁྲིད་བྱེད་ཡིན། །
LAM 2:15 ཁྱོད་རང་མཐོང་བའི་ལམ་འགྲོ་པ་རྣམས་ཀྱིས། ། ལག་པ་བརྡབས་ནས་ཁྱོད་ལ་འཕྱས་པ་དང་། ། དེ་ཚོས་ཡེ་རུ་སཱ་ལེམ་ཡུལ་གྱི་མི་སྡེར་མགོ་གཡུགས་ནས། ། ཀུན་གྱིས་སྨྲ་བར་བརྗོད་པའི་སྐྱོན་བྲལ་ཡོན་ཏན་ཀུན་རྫོགས་ཤིང་། ། ཐམས་ཅད་དགའ་བྱེད་གྲོང་ཁྱེར་འདི་ནི་ཨེ་ཡིན་ནམ་ཞེས་སྨྲས། །
LAM 2:16 ཁྱོད་ཀྱི་དགྲ་བོས་ཁྱོད་ལ་རྒོལ་ཕྱིར་ཁ་གདངས་ཤིང་། ། ཁྱོད་ལ་འཕྱ་དམོད་བྱེད་ཀྱིན་སོ་ཡང་འཆོས་ནས་ནི། ། ངེད་ཅག་རྣམས་ཀྱིས་དེ་ནི་མེད་པར་མཛད་གྱུར་ཅིང་། ། དེ་ནི་ང་ཚོས་རེ་སྒུག་བྱེད་པའི་ཉིན་མོ་སྟེ། ། ངེད་ཀྱིས་མིག་གིས་དངོས་སུ་མཐོང་ངོ་ཞེས་སྨྲས་སོ། །
LAM 2:17 ཁོང་གིས་ཁྱོད་ནི་གཏོར་ཡང་སྙིང་རྗེས་གཟིགས་པ་མེད། ། ཁོང་གིས་དགྲ་ཟླ་ཁྱོད་ལས་རྒྱལ་བས་དགའ་བར་མཛད། ། ཁོང་གིས་ཁྱོད་ཀྱི་དགྲ་བོའི་རྭ་ནི་མཐོན་པོར་མཛད། ། ཡ་ཝཱེས་ཉིད་ཀྱི་ཐུགས་དགོངས་བཞིན་དུ་མཛད་པ་དང་། ། ཁོང་གིས་སྔར་ནས་གསུངས་པ་བཞིན་དུ་མཛད་པར་གྱུར། །
LAM 2:18 ཛ་ཡན་ཡུལ་གྱི་མི་སྡེའི་མཁར་གྱང་རྣམས། ། ཁྱོད་ཀྱིས་བློ་སེམས་གཅིག་གིས་གཙོ་བོར་ཞུས། ། ཁྱོད་ཀྱི་མིག་ཆུ་གཙང་པོ་ཇི་བཞིན་དུ། ། ཉིན་མཚན་དབྱེ་བ་མེད་པར་བཞུར་ནས་ནི། ། རང་ལ་ངལ་གསོ་ནམ་ཡང་ཐོབ་མི་བྱ། ། མིག་འབྲས་གཉིས་ལ་ངལ་གསོ་མེད་པར་ཤོག །
LAM 2:19 མཚན་མོ་ཐུན་མཚམས་དང་པོའི་དུས་སུ་བབས་པ་ན། ། ཁྱོད་ནི་ཡར་ལ་ལངས་ཏེ་བོས་ནས་ཞུས་ཤིག་དང་། ། གཙོ་བོའི་དྲུང་དུ་ཁྱོད་ཀྱི་སྙིང་གཏམ་ལྷུག་པོར་བརྗོད་དགོས་ཤིང་། ། ཁྱོད་ཀྱི་བྱིས་པ་རྣམས་ནི་ལམ་བར་དག་ཏུ་བཀྲེས་ཤིང་བརྒྱལ། ། ཁྱོད་ཀྱིས་བྱིས་པ་རྣམས་ཀྱི་ཚེ་སྲོག་བསྐྱབ་པའི་ཕྱིར། ། ལག་པ་ཡར་ལ་བརྐྱངས་ཏེ་གཙོ་བོར་གསོལ་བ་ཐོབས། །
LAM 2:20 ཀྱེ་ཀྱེ་ཡ་ཝཱེ་ཁྱེད་ཀྱིས་གཟིགས་དང་གཟིགས་པར་མཛོད། ། ཁྱེད་ཀྱིས་སྔོན་ཆད་འདི་ལྟར་སུ་ལ་ལན་འཇལ་ལམ། ། བུད་མེད་ཅིག་གིས་རང་གིས་བཙས་ནས་སྐྱོང་བ་ཡི། ། ཕྲུ་གུ་ཟ་ཞིང་བཟའ་བར་ཕོད་པ་སུ་ཡོད་དམ། ། གཙོ་བོའི་གནས་མཆོག་ལ་ནི་མཆོད་དཔོན་དང་ནི་ལུང་སྟོན་པ། ། གདུག་རྩུབ་ནག་པོའི་ལས་ཀྱིས་དམར་གསོད་བྱེད་ཅིང་བྱ་འོས་སམ། །
LAM 2:21 སྲང་བར་དག་ཏུ་རྒན་གཞོན་ཐམས་ཅད་ས་རུ་འགྱེལ་ནས་ཤི ། བདག་གི་བུ་མོ་དང་ནི་གསར་བུ་ཐམས་ཅད་གྲི་ཁར་འགྱེལ། ། ཁྱེད་རང་ཁྲོས་པའི་ཉིན་ལ་དེ་རྣམས་ཐམས་ཅད་གསོད་པར་མཛད། ། ཁྱེད་ཀྱིས་དེ་རྣམས་བསད་ཀྱང་སྙིང་རྗེ་ཅི་ཡང་མ་གནང་ངོ་། །
LAM 2:22 ཁྱེད་ཀྱིས་ཕྱོགས་བཞི་བསྡུས་ཏེ་ང་རང་སྐྲག་པར་མཛད་པ་ནི། ། དུས་ཆེན་རོལ་བའི་ཉིན་ལ་མི་ཚོགས་མང་པོ་བསྡུས་དང་མཚུངས། ། ཡ་ཝཱེ་ཐུགས་ཁྲོའི་དུས་སུ་ཐར་ཏེ་གསོན་མཁན་གཅིག་ཀྱང་མེད། ། བདག་གིས་བཙས་ཤིང་ཆེ་བར་བསྐྱངས་པའི་ཕྲུ་གུ་རྣམས། ། དགྲ་ཟླས་ཐམས་ཅད་བསད་དེ་གཅིག་ཀྱང་མ་ལྷག་གོ །
LAM 3:1 བདག་ནི་ཡ་ཝཱེའི་དབྱུག་པའི་འོག་ཏུ་སྡུག་བསྔལ་མྱངས་པའི་མི་ཡིན་ཏེ། །
LAM 3:2 ཁོང་གིས་བདག་ནི་མུན་པའི་ནང་དུ་ཁྲིད་ཀྱང་འོད་ནང་མ་ཁྲིད་དོ། །
LAM 3:3 ཁོང་གིས་དངོས་གནས་ཉིན་གང་བདག་ལ་ཡང་ཡང་རྒོལ་བ་དང་། །
LAM 3:4 ཁོང་གིས་བདག་གི་ཤ་པགས་ཉམས་ཤིང་རུས་པ་བཅག་པར་མཛད། །
LAM 3:5 ཁོང་གིས་བཙན་རྫོང་བརྩིགས་ཏེ་བདག་གི་མཐའ་ནས་བསྐོར། ། གནོད་པ་དང་ནི་དཀའ་སྡུག་ང་ལ་བསྐོར་བར་མཛད། །
LAM 3:6 ཁོང་གིས་ང་རང་མུན་པར་སྡོད་བཅུག་སྟེ། ། ཤི་ནས་ཡུན་རིང་འགོར་བའི་མི་ལྟར་མཛད། །
LAM 3:7 ཁོང་གིས་མཁར་རྣམས་བརྩིགས་ཏེ་བདག་བསྐོར་བས། ། བདག་ནི་དེ་ལས་ཐར་བར་མ་མཛད་དེ། ། ཁོང་གིས་བདག་གི་ལྕགས་སྒྲོག་ལྗིད་དུ་བཏང་། །
LAM 3:8 ཐ་ན་བདག་གིས་ཁོང་ལ་ཞུས་ནས་འོ་དོད་འབོད་དུས་ཀྱང་། ། ཁོང་གིས་སྙན་ཅོག་བཀབ་སྟེ་ང་ཡི་གསོལ་འདེབས་མ་གསན་ཏོ། །
LAM 3:9 ཁོང་གིས་རྡོ་བ་བཟོས་མས་བདག་གི་ལམ་བུ་བཀག ། ཁོང་གིས་བདག་གི་འགྲོ་ལམ་ཀྱག་ཀྱོག་ཏུ་མཛད་དོ། །
LAM 3:10 ཁོང་ཉིད་བདག་ལ་མཚོན་ན་ནི། ། འཇབ་སྒུག་བྱེད་པའི་དྲེད་མོང་དང་། ། གསང་བའི་གནས་ཀྱི་སེང་གེ་བཞིན། །
LAM 3:11 ཁོང་གིས་བདག་ནི་དྲང་པོའི་ལམ་དང་ཕྲལ། ། སིལ་བུར་གཏོར་ནས་དབེན་སར་བསྐྱུར་བ་ཡིན། །
LAM 3:12 ཁོང་གིས་ཉིད་ཀྱི་གཞུ་འཐེན་ཏེ། ། བདག་ནི་མདའ་ཡི་འབེན་དུ་མཛད། །
LAM 3:13 ཁོང་གིས་ཉིད་ཀྱི་མདའ་ཤུབས་ནང་གི་མདའ། ། ང་ཡི་སྙིང་ཁོང་རུས་པའི་གཏིང་དུ་བསྣུན། །
LAM 3:14 བདག་ནི་མི་སྡེ་ཀུན་གྱིས་འཕྱ་དམོད་བྱེད་སར་གྱུར། ། འཕྱ་དགོད་གླུ་རུ་གྱུར་ཏེ་ཀུན་གྱིས་ཉིན་གང་འཕྱས། །
LAM 3:15 ཁོང་གིས་བདག་ལ་སྡུག་བསྔལ་ཆེན་པོ་བཟོས། ། མཁན་པའི་ཁ་ཏིག་ཉམས་སུ་མྱོང་བར་མཛད། །
LAM 3:16 ཁོང་གིས་ཟེགས་མས་བདག་གི་སོ་ནི་ཆག་པར་མཛད། ། ཁོང་གིས་བདག་ནི་ས་རྡུལ་ནང་དུ་སྡོད་པར་མཛད། །
LAM 3:17 ཁྱེད་ཀྱིས་བདག་ལ་ཞི་བདེ་མེད་པར་མཛད་པ་དང་། ། བདག་གིས་དགའ་སྤྲོ་བྱིན་རླབས་ཅི་ཞིག་ཡིན་པ་བརྗེད། །
LAM 3:18 དེ་བས་བདག་གིས་ང་ཡི་སྟོབས་ཤུགས་ཡོངས་སུ་རྫོགས་པ་དང་། ། ཡ་ཝཱེ་ཁོང་ལས་ཐོབ་པའི་རེ་བ་བདག་དང་བྲལ་ཞེས་སྨྲས། །
LAM 3:19 བདག་གི་ཉམ་ཐག་ཡུལ་འཁྱམ་དྲན་དུས་སུ། ། དེ་ནི་མཁན་པ་དང་ནི་མཁྲིས་ཁུ་བཞིན། །
LAM 3:20 ནམ་རྒྱུན་བདག་གིས་འདས་པའི་དོན་དྲན་དུས། ། བདག་གི་སེམས་ནང་སྐྱོ་བས་ཁེངས་པ་འོ། །
LAM 3:21 ཡིན་ཡང་བདག་གིས་དོན་ཞིག་དྲན་དུས་སུ། ། བདག་གི་ཡིད་སེམས་ནང་དུ་རེ་བ་ཡོད། །
LAM 3:22 དེ་ནི་ཡ་ཝཱེའི་བྱམས་བརྩེ་ནམ་ཡང་འཇིག་ཡེ་མེད། ། ཁོང་གི་སྙིང་རྗེ་ཇི་སྲིད་བར་དུ་བཞུགས་པར་འགྱུར། །
LAM 3:23 ཞོགས་པ་རེ་རེར་གསར་པ་ཡིན་པ་བཞིན། ། ཁྱེད་ནི་ཧ་ཅང་བློ་གཏོད་རུང་བ་འོ། །
LAM 3:24 ང་ཡི་སེམས་སུ་ཡ་ཝཱེ་ཁོང་ནི་བདག་གི་ནོར་སྐལ་ཡིན། ། དེ་བས་བདག་གིས་ཁོང་ལ་རེ་སྒུག་བྱེད་ངེས་ཡིན་ཞེས་སྨྲ། །
LAM 3:25 ཁོང་ཉིད་འཚོལ་ཞིང་སེམས་ནས་སྒུག་མཁན་ལ། ། ཡ་ཝཱེས་ཐུགས་རྗེ་གནང་བར་འགྱུར་བ་དང་། །
LAM 3:26 ལྷིང་འཇགས་ངང་ནས་ཡ་ཝཱེའི་སྐྱབས་ལ་ནི། ། སྒུག་པའི་དོན་དེ་ཅི་འདྲའི་བཟང་བ་ལ། །
LAM 3:27 མི་ཡིས་ལོ་ན་གཞོན་པའི་དུས་སྐབས་སུ། ། རང་གི་གཉའ་ཤིང་འཁུར་བ་ཅི་འདྲའི་ལེགས། །
LAM 3:28 ཁོ་རང་གཅིག་པུ་ཁ་རོག་སྡོད་ཅིང་སྨྲ་བ་མེད་པ་དེ། ། ཡ་ཝཱེ་ཁོང་གིས་དེ་ཡི་ལུས་སྟེང་བཞག་པའི་ཕྱིར་ཡིན་ནོ། །
LAM 3:29 དེ་ཡིས་རང་གི་སྨྲ་སྒོ་ས་རྡུལ་ནང་། ། སྦས་པར་གྱུར་ན་རེ་བ་ཡོད་ཀྱང་སྲིད། །
LAM 3:30 དེ་ཡིས་གཞན་པར་རང་ལ་འགྲམ་ལྕག་གཞུ་བཅུག་སྟེ། ། རང་ལ་བརྙས་བཅོས་ཚད་མེད་མྱོང་བར་འཇུག་པ་དང་། །
LAM 3:31 གཙོ་བོས་མི་རྣམས་རྒྱུན་ནས་རྒྱུན་དུ་འདོར་བར་མི་འགྱུར་ཏེ། །
LAM 3:32 ཡ་ཝཱེ་ཁོང་གིས་མི་ལ་སྐྱོ་བ་བསྐྱེད་པར་མཛད་ན་ཡང་། ། བྱམས་བརྩེ་ཆེན་པོ་ལྡན་པས་མི་ལ་ཐུགས་རྗེ་གནང་འགྱུར་རོ། །
LAM 3:33 དེ་ནི་ཁོང་གི་ཐུགས་ལས་མི་ལ་དཀའ་སྡུག་མི་འབྱུང་ཞིང་། ། ཡང་ན་འཇིག་རྟེན་མི་ལ་སྐྱོ་བ་མི་འབྱུང་དགོངས་པའི་ཕྱིར། །
LAM 3:34 ས་སྟེང་བཙོན་པ་ཐམས་ཅད་རྡོག་བརྫིས་གཏོང་བ་འམ། །
LAM 3:35 ཡང་ན་བླ་མེད་དྲུང་དུ་དྲང་པོར་བསྙོན་འཛུགས་པ། །
LAM 3:36 ཞུ་གཏུག་དོན་ཐོག་དཀར་ནག་ལྡོག་གྱུར་ན། ། གཙོ་བོས་ཐམས་ཅད་གཟིགས་པ་མ་ཡིན་ནམ། །
LAM 3:37 གཙོ་བོའི་ཐུགས་དགོངས་མིན་པར་སུ་ཡིས་སྨྲ་ཞིང་བསྒྲུབ་ནུས་སམ། །
LAM 3:38 བདེ་སྡུག་ཐམས་ཅད་བླ་མེད་ཞལ་ལས་འོང་བ་མ་ཡིན་ནམ། །
LAM 3:39 གསོན་པོས་རང་ཉེས་ཁྲིམས་ཆད་འཁུར་ཕྱིར་སྨྲེ་སྔགས་ཅི་ལ་འདོན། །
LAM 3:40 རང་ཅག་རྣམས་ཀྱིས་སོ་སོའི་སྤྱོད་ལམ་ཡང་ཡང་དུ། ། ཞིབ་བཤེར་ཚོད་ལྟ་བྱས་རྗེས་ཡ་ཝཱེའི་ཕྱོགས་སུ་འཁོར། །
LAM 3:41 རང་ཅག་རྣམས་ཀྱིས་ལྷག་བསམ་རྣམ་དག་གིས། ། ནམ་མཁར་བཞུགས་པའི་དཀོན་མཆོག་ཁོང་ཕྱོགས་སུ། ། ལག་པ་ཡར་ལ་བཀྱགས་ནས་གསོལ་བ་འདེབས། །
LAM 3:42 ངེད་ཀྱིས་སྡིག་པ་སྤྱད་ནས་ངོ་ལོག་བྱས་པ་ལ། ། ཁྱེད་ཀྱིས་ཉེས་པ་དེ་དག་སེལ་བར་མི་མཛད་དེ། །
LAM 3:43 ཁྱེད་རང་ཐུགས་ཁྲོས་བཀབ་པའི་ཕྱིར། ། སྙིང་རྗེ་ཅི་ཡང་མེད་པའི་ངང་། ། ངེད་ཅག་བདས་ཤིང་བསད་པ་འོ། །
LAM 3:44 ཁྱེད་ཀྱིས་སྤྲིན་ནག་ཕུང་བོས་རང་ཉིད་ཡོངས་སུ་བསྒྲིབས་མཛད་པས། ། ངེད་ཀྱི་ཞུ་གསོལ་ཉིད་ཀྱི་སྙན་ལམ་དུ་ནི་སླེབ་མི་སྲིད། །
LAM 3:45 ཁྱེད་ཀྱིས་ངེད་རྣམས་མི་སྡེ་ཁྲོད་དུ་སྙིགས་མ་དང་ནི་ཟོག་རོར་མཛད། །
LAM 3:46 ངེད་ཀྱི་དགྲ་བོ་ཀུན་གྱིས་ངེད་ཅག་ཕྱོགས་སུ་རྒོལ་བར་ཁ་གདངས་པས། །
LAM 3:47 འཇིགས་སྐྲག་རྒྱ་རྙི་རྩ་མེད་གཏོང་བ་དང་། ། གཏོར་བརླག་བཅས་ནི་ངེད་ཀྱི་སྟེང་ལ་སླེབས། །
LAM 3:48 བདག་གི་མི་སྡེ་བརླགས་པས་ང་ཡི་མཆི་མ་ཆུ་ལྟར་བཞུར། །
LAM 3:49 བདག་གི་མིག་ལས་མཆི་མ་བཞུར་བ་རྒྱུན་ཆད་མེད་པར་གྱུར། །
LAM 3:50 ཡ་ཝཱེས་ནམ་མཁའི་དབྱིངས་ནས་གཟིགས་ཤིང་གཟིགས་པའི་བར་དུ་བཞུར། །
LAM 3:51 བདག་གི་གྲོང་ཁྱེར་མི་སྡེར་བྱུང་བའི་སྡུག་བསྔལ་མཐོང་བས་ན། ། བདག་གི་སེམས་སུ་སྡུག་བསྔལ་མང་དུ་བསྐྱེད་པར་གྱུར་པ་ཡིན། །
LAM 3:52 བྱ་དང་བྱིའུ་དེད་ནས་འཛིན་པ་ཇི་བཞིན་དུ། ། དོན་མེད་བདག་གི་དགྲ་ཟླར་གྱུར་པས་ངའི་རྗེས་དེད། །
LAM 3:53 སྲོག་དང་ཕྲལ་ཕྱིར་དེ་ཚོས་བདག་ནི་དོང་ནང་འཕངས། ། ད་དུང་བདག་གི་ལུས་སྟེང་ཕ་བོང་ཆེན་པོས་མནན། །
LAM 3:54 ཆུ་ཡིས་མགོ་ནས་བསྣུབས་པས་ང་ནི་འཆིའོ་ཞེས་ངས་སྨྲས། །
LAM 3:55 ཀྱེ་ཀྱེ་ཡ་ཝཱེ་བདག་གིས་དོང་གི་ཞབས་ངོས་སུ། ། ཁྱེད་ཀྱི་མཚན་ནི་ཡང་ཡང་བརྗོད་ནས་ཞུས་པ་དང་། །
LAM 3:56 དེ་སྔོན་ཁྱེད་ཀྱིས་བདག་གི་འབོད་སྐད་གསན་ཞིང་གསན་གྱུར་པས། ། ཁྱེད་ཀྱིས་ང་ཡི་སྐྱབས་འཇུག་ཞུ་བའི་སྐད་ལ་གསན་པར་མཛོད། །
LAM 3:57 ནམ་ཡང་བདག་གིས་ཁྱེད་ཀྱི་ཕྱོགས་སུ་ཞུ་བའི་དུས་སྐབས་སུ། ། ཁྱེད་ཉིད་བདག་གི་ཉེ་སར་ཕེབས་ཏེ་འཇིགས་པར་མི་དགོས་གསུངས། །
LAM 3:58 གཙོ་བོ་ཁྱེད་ཀྱིས་བདག་ལ་དག་འབུད་མཛད་དེ་ངའི་སྲོག་བསྐྱབས་པ་ཡིན། །
LAM 3:59 ཀྱེ་ཀྱེ་ཡ་ཝཱེ་ཁྱེད་ཀྱིས་བདག་གི་ཉེས་འགེལ་གཟིགས་གྱུར་པས། ། ཁྱེད་ཀྱིས་བདག་གི་ཕྱིར་དུ་དྲང་བདེན་ཅན་གྱི་ལམ་མཛོད་ཅིག །
LAM 3:60 ཁྱེད་ཀྱིས་དེ་ཚོའི་སྡང་ཟུག་སྣ་ཚོགས་གཟིགས་གྱུར་ཅིང་། ། ད་དུང་བདག་ལ་གནོད་པའི་ཇུས་ངན་ཐམས་ཅད་གཟིགས། །
LAM 3:61 ཀྱེ་ཀྱེ་ཡ་ཝཱེ་ཁྱེད་ཀྱིས་དེ་ཚོའི་ངན་སྨྲས་རྣམས་གསན་ཞིང་། ། ད་དུང་བདག་ལ་གནོད་པའི་ཇུས་ངན་ཐམས་ཅད་གསན་པར་གྱུར། །
LAM 3:62 བདག་ལ་རྒོལ་བའི་མི་ཚོའི་སྨྲ་བརྗོད་ཁྱེད་ཀྱིས་གསན་གྱུར་ཅིང་། ། དེ་ཚོས་ཉིན་རེར་བདག་ལ་རྒོལ་བའི་ངན་ཇུས་ཁྱེད་ཀྱིས་མཁྱེན། །
LAM 3:63 དེ་རྣམས་ས་རུ་འདུག་པའམ་ཡར་ལ་ལང་བ་གང་བྱས་ཀྱང་། ། བདག་ནི་ཀུན་གྱིས་འཕྱ་དགོད་གླུ་ཚིག་གྱུར་པ་ཁྱེད་ཀྱིས་གཟིགས། །
LAM 3:64 ཡ་ཝཱེ་ཁྱེད་ཀྱིས་ཁོ་ཚོའི་ལག་པས་སྤྱད་པ་བཞིན། ། དེ་དག་ཀུན་ལ་ཉེས་པའི་ལན་ཞིག་འཇལ་བར་མཛོད། །
LAM 3:65 ཁྱེད་ཀྱིས་ཁོ་ཚོའི་སེམས་ནི་གྱོང་པོར་མཛོད་ཅིག་དང་། ། ཁྱེད་ཀྱི་དམོད་མོ་དེ་དག་སྟེང་དུ་ཐེབས་པར་ཤོག །
LAM 3:66 ཁྱེད་ཀྱིས་ཁྲོ་གཏུམ་ཆེན་པོས་དེ་དག་བདའ་བར་མཛོད་ཅིག་དང་། ། ཡ་ཝཱེས་སྐྱོང་བའི་གནམ་འོག་ཀུན་ནས་དེ་དག་བརླག་པར་མཛོད། །
LAM 4:1 གསེར་འོད་ཉམས་ཤིང་ལྷད་མེད་གསེར་རྐྱང་ཁ་མདོག་འགྱུར་བ་ཅི། ། དམ་པའི་གནས་ཀྱི་རྡོ་དག་སྲང་ལམ་སོ་སོར་གཏོར་ཏེ་ཡོད། །
LAM 4:2 ཛ་ཡན་ཡུལ་གྱི་གུས་པར་འོས་པའི་མི་སྡེ་རྣམས། ། སྔོན་ལ་གསེར་རྐྱང་བཞིན་དུ་རྩ་ཆེན་ཡིན་པ་དང་། ། ད་ལྟ་ཅིའི་ཕྱིར་མི་ཡིས་རྫ་ཆས་བཞིན་དུ་ལྟ། ། རྫ་མཁན་ལག་པས་བཟོས་པའི་རྫ་སྣོད་འདྲ་བ་ཅི། །
LAM 4:3 ཁྱི་སྤྱང་དག་གིས་ནུ་མ་བཏོན་ཏེ་ཕྲུ་གུ་སྐྱོང་ཤེས་ཀྱང་། ། བདག་གི་མི་སྡེ་དབེན་སྟོང་ཡུལ་གྱི་རྔ་བྱ་ཇི་བཞིན་དུ། ། ཅི་འདྲའི་གདུག་རྩུབ་ཆེ་ཞིང་སྙིང་རྗེ་མེད་པར་གྱུར་པ་ཡིན། །
LAM 4:4 ཕྲུ་གུ་དམར་འབྱར་སྐོམ་ནས་ལྕེ་རྩེ་རྐན་ལ་འབྱར། ། བྱིས་པས་བག་ལེབ་བསླངས་ཀྱང་སྦྱིན་མཁན་གཅིག་ཀྱང་མེད། །
LAM 4:5 སྔོན་ཆད་མངར་བའི་ཟས་ལ་རོལ་མཁན་ད་ལྟ་ལམ་གྱི་སྤྲང་པོར་གྱུར། ། སྔོན་ཆད་མཚལ་ཁའི་ལྭ་བ་གྱོན་མཁན་ད་ལྟ་སྙིགས་རོ་ནང་དུ་ཉལ། །
LAM 4:6 བདག་གི་མི་སྡེ་ཀུན་གྱི་སྡིག་པ་ནི། ། སཱ་དོམ་ལས་ཀྱང་ཤིན་ཏུ་ཆེ་བ་དང་། ། སཱ་དོམ་སྐད་ཅིག་ཙམ་དུ་ཕམ་པར་གྱུར། ། དེ་ལ་རོགས་རམ་བྱེད་མཁན་ཡོད་མ་གྱུར། །
LAM 4:7 དེ་སྔ་ཛ་ཡན་ཡུལ་གྱི་སྐུ་དྲག་ཐམས་ཅད་ནི། ། ཁ་བ་ལས་ཀྱང་གཙང་ལ་འོ་མ་ལས་ཀྱང་དཀར། ། ལུས་པོ་པདྨ་རཱ་ག་ལས་ཀྱང་བཀྲག་མདངས་རྒྱས། ། ཞལ་རས་རིན་ཆེན་སྔོན་པོ་བཞིན་དུ་མཛེས་ཤིང་མཛེས། །
LAM 4:8 འོན་ཀྱང་ད་ལྟ་དེ་ཚོའི་ངོ་མདོག་སོལ་བ་ལས་ཀྱང་ནག ། སྲང་ལམ་ནང་དུ་དེ་དག་ཤེས་མཁན་གཅིག་ཀྱང་མ་བྱུང་སྟེ། ། དེ་རྣམས་སྐྱི་མོ་རུས་པར་འབྱར་ཏེ་ཤིང་སྐམ་ཇི་བཞིན་གྱུར། །
LAM 4:9 ལྟོགས་ཤི་ཐེབས་པར་བསྡུར་ན་རལ་གྲིས་བསད་པ་ལེགས་པར་འདུག ། བཀྲེས་ནས་ཤི་བ་དག་ནི་ཞིང་སར་ཐོན་རྫས་མ་བྱུང་བར། ། ལུས་པོ་རིམ་གྱིས་རིད་ཅིང་མཐའ་མར་ཡོངས་སུ་འཇིག་པའི་ཕྱིར། །
LAM 4:10 བདག་གི་མི་སྡེར་གནོད་པ་ཐེབས་པའི་དུས། ། བྱམས་སེམས་ལྡན་པའི་བུད་མེད་རང་ཉིད་ཀྱིས། ། དངོས་སུ་རང་གི་ཕྲུ་གུ་བཙོས་པ་དང་། ། ཕྲུ་གུ་རྣམས་ནི་ཨ་མའི་ཟས་སུ་གྱུར། །
LAM 4:11 དེ་ནས་ཡ་ཝཱེ་ཤིན་ཏུ་ཐུགས་ཁྲོས་ཏེ། ། ཉིད་ཀྱི་ཁྲོ་གཏུམ་དེ་དག་སྟེང་དུ་བླུགས། ། ཁོང་གིས་ཛ་ཡན་ཡུལ་དུ་མེ་སྦར་ནས། ། དེ་ཡི་རྩ་བ་ཡོངས་སུ་གཏོར་བ་འོ། །
LAM 4:12 ས་སྟེང་རྒྱལ་པོ་དང་ནི་ཡུལ་གྱི་མངའ་འབངས་ཐམས་ཅད་ཀྱིས། ། ཡེ་རུ་སཱ་ལེམ་མཁར་སྒོར་དགྲ་བོ་འཛུལ་བར་ཡིད་མ་ཆེས། །
LAM 4:13 ཛ་ཡན་ལུང་སྟོན་པ་ཡི་སྡིག་པ་དང་། ། མཆོད་དཔོན་དག་གི་ཉེས་པ་ཐམས་ཅད་དེ། ། གྲོང་ཁྱེར་ནང་དུ་དྲང་བདེན་མི་ཀུན་གྱི། ། སྐུ་ཁྲག་བཞུར་དུ་བཅུག་པ་དེའི་རྐྱེན་གྱིས། །
LAM 4:14 དེ་རྣམས་ལོང་བ་སྲང་ལམ་འཁྱམ་པ་བཞིན། ། དེ་དག་ཁྲག་གིས་བཙོག་པར་བཟོས་པས་ན། ། དེ་ཚོའི་ལྭ་བར་རེག་མཁན་གཅིག་ཀྱང་མེད། །
LAM 4:15 མི་རྣམས་དག་གིས་ཁོ་ཚོ་ལ། ། མི་གཙང་མི་གཙང་ཁྱོད་ཅག་རྣམས། ། ཕར་སོང་ཕར་སོང་ཞེས་པ་དང་། ། ང་ལ་མ་རེག་ཅེས་ཟེར་ཞིང་། ། དེ་དག་བྲོས་ཤིང་འཁྱམ་པའི་དུས། ། ཡུལ་ཁམས་ཀུན་གྱི་མི་རྣམས་ཀྱིས། ། དེ་དག་ད་ནི་གནས་འདི་རུ། ། སྡོད་པར་མི་རུང་ཞེས་སུ་སྨྲ། །
LAM 4:16 ཡ་ཝཱེ་ཁོང་གིས་དེ་དག་གཏོར་བར་མཛད། ། དེ་ནས་ཁོ་ཚོར་གཟིགས་སྐྱོང་མ་མཛད་ཅིང་། ། མི་ཡིས་མཆོད་དཔོན་དག་ལ་མ་བཀུར་ཏེ། ། རྒན་པོ་རྣམས་ཀྱང་དྲིན་གྱིས་མ་བསྐྱངས་སོ། །
LAM 4:17 མིག་གི་དབང་བོ་ཉམས་པར་འགྱུར་བའི་བར། ། རང་ཅག་གིས་ནི་དོན་མེད་རམ་འདེགས་སྒུག ། རང་ཅག་གིས་ནི་རྒྱང་ལྟའི་མཐོ་སྟེགས་སུ། ། བསྐྱབ་ནུས་མེད་པའི་རྒྱལ་ཁབ་ཅིག་ལ་སྒུག །
LAM 4:18 དགྲ་ཟླས་རང་རེའི་རྗེས་སུ་བསྙེགས་པས་ན། ། བདག་ཅག་རང་གི་སྲང་ལམ་བསྐྱོད་མ་ཕོད། ། བདག་ཅག་མཇུག་འབྲས་དང་ནི་དུས་ཉེ་ཞིང་། ། རང་ཅག་རྣམས་ཀྱི་མཇུག་འབྲས་དངོས་སུ་སླེབས། །
LAM 4:19 རང་ཅག་སྙེག་མཁན་ནམ་མཁའི་གླག་ལས་མགྱོགས་ཤིང་མྱུར། ། རི་བོ་རྣམས་སུ་ཁོ་ཚོས་རང་རེའི་རྗེས་དེད་ཅིང་། ། ཐང་རྒོད་ཀུན་ཏུ་ཡིབ་ནས་རང་ཅག་རྣམས་ལ་རྒོལ། །
LAM 4:20 ཡ་ཝཱེས་བྱུགས་པ་རང་རེའི་སྣ་ཁུང་དབུགས། ། དེ་ཚོའི་དོང་རྙི་ནང་དུ་ཚུད་པ་དང་། ། རང་ཅག་ངེས་པར་ཁོང་གི་བསིལ་གྲིབ་འོག ། ཡུལ་ཁམས་ནང་དུ་གསོན་ཞེས་རང་རེས་སྨྲས། །
LAM 4:21 ཨེ་དོམ་པ་དང་ཨུ་ཟཱའི་འབངས་མི་རྣམས། ། དགའ་མགུ་དང་ནི་སྤྲོ་བར་གྱིས་ཤིག་དང་། ། ཕོར་བ་ དེ་ནི་ཁྱོད་ཀྱི་གམ་དུ་བརྒྱུད་འོང་ཞིང་། ། ཁྱོད་ནི་ངེས་པར་བཟི་ཞིང་ལུས་པོ་སྒྲེན་མོར་འགྱུར། །
LAM 4:22 ཀྱེ་ཀྱེ་ཛ་ཡན་ཡུལ་གྱི་བུ་མོ་ལགས། ། ཁྱོད་ལ་ཉེས་ཆད་ཐེབས་པ་རྫོགས་གྱུར་ཏེ། ། ཡ་ཝཱེས་ད་ནི་ཁྱོད་རང་འཁྱམ་མི་འཇུག ། ཀྱེ་ཀྱེ་ཨེ་དོམ་ཡུལ་གྱི་འབངས་མི་རྣམས། ། ཁོང་གིས་ཁྱོད་ཀྱི་སྡིག་པར་ཉེས་ཆད་གཅོད། ། ཁྱོད་ཀྱི་ཉེས་པ་མངོན་པར་འགྱུར་མཛད་དོ། །
LAM 5:1 ཀྱེ་ཀྱེ་ཡ་ཝཱེ་ཁྱེད་ཀྱིས་ངེད་ཅག་སྡུག་བསྔལ་དྲན་པར་མཛོད། ། ངེད་ཅག་རྣམས་ཀྱི་ངོ་ཚ་སྣང་མེད་མི་བསྐྱུར་གཟིགས་སུ་གསོལ། །
LAM 5:2 ངེད་ཀྱི་ནོར་སྐལ་ཕྱི་པར་དབང་བ་དང་། ། ངེད་ཀྱི་ཁང་པ་དེ་ཡང་ཕྱི་པར་དབང་། །
LAM 5:3 ངེད་རྣམས་ཕ་མེད་དྭ་ཕྲུག་བཞིན་དུ་ལུས། ། ངེད་ཀྱི་མ་རྣམས་ཡུགས་མོ་ཡིན་ཚོད་འདུག །
LAM 5:4 ངེད་ཀྱིས་ཆུ་རིན་སྤྲད་ནས་ཆུ་འཐུང་ཞིང་། ། ངེད་ཀྱི་བུད་ཤིང་གཞན་གྱིས་བཙོང་བ་ཡིན། །
LAM 5:5 ངེད་ཀྱི་སྐེ་ལ་གཉའ་ཤིང་ལྕི་མོ་ཁུར་བའི་ཕྱིར། ། ངེད་ཅག་ཤིན་ཏུ་ལུས་ཐང་ཆད་ཀྱང་ངལ་གསོ་མེད། ། ད་དུང་མི་ཡིས་ངེད་ཀྱི་རྗེས་སུ་འདེད་པར་གྱུར། །
LAM 5:6 ངེད་ཅག་ཟས་ཀྱིས་འགྲང་ཕྱིར་ཨེ་ཅིབ་དང་། ། ཨ་སུར་པ་ཡི་ཕྱོགས་སུ་མགོ་བོ་བསྒུར། །
LAM 5:7 ངེད་ཀྱི་མེས་པོས་སྡིག་པ་བྱས་ན་ཡང་། ། དེ་རྣམས་སྔར་ནས་འདས་ཤིང་མི་འདུག་གོ ། དེ་ཚོའི་ཉེས་པ་ཐམས་ཅད་ངེད་ཀྱིས་ཁུར། །
LAM 5:8 བྲན་གཡོག་དག་གིས་ངེད་ལ་ཚོད་བཟུང་སྟེ། ། ངེད་རྣམས་དེ་ལས་སྐྱོབ་མཁན་སུ་ཡང་མེད། །
LAM 5:9 དབེན་སྟོང་ཡུལ་གྱི་རལ་གྲི་རྣོ་དྲགས་པས། ། ངེད་ཀྱིས་རང་སྲོག་བསྡོས་ཏེ་ཁ་ཟས་ཐོབ། །
LAM 5:10 བཀྲེས་སྐོམ་ཕྱིར་དུ་ངེད་ཀྱི་ལུས་པོར་ཚ་རྒྱས་ཤིང་། ། ངེད་ཀྱི་སྐྱི་མོ་མེ་ཐབ་བཞིན་དུ་ཚ་གདུག་ཆེ། །
LAM 5:11 བུད་མེད་རྣམས་ལ་ཛ་ཡན་ཡུལ་དུ་བརྙས་བཅོས་ཐེབས་པ་དང་། ། ཡ་ཧུ་དཱ་ཡི་གྲོང་དུ་མོ་གསར་དག་ལ་བཙན་གཡེམ་བྱས། །
LAM 5:12 འགོ་དཔོན་རྣམས་ནི་མི་ཡིས་མར་དཔྱངས་ཏེ། ། རྒན་པོ་རྣམས་ལ་གུས་བཀུར་མ་ཐོབ་བོ། །
LAM 5:13 ན་གཞོན་རྣམས་ཀྱིས་འཐག་རྡོ་བསྐོར་བས་སྡུག་མྱངས་ཤིང་། ། བྱིས་པ་དག་གིས་བུད་ཤིང་ཁུར་བས་སར་འགྱེལ་ཏོ། །
LAM 5:14 རྒན་རབས་དག་ནི་མཁར་སྒོར་མི་སྡོད་ཅིང་། ། ན་གཞོན་རྣམས་ཀྱི་གླུ་ལེན་གར་རྩེད་མེད། །
LAM 5:15 ངེད་ཅག་སེམས་ཀྱི་དགའ་མགུ་ཡལ་བ་དང་། ། བྲོ་གར་འཁྲབ་པ་སྐྱོ་གདུང་རང་དུ་གྱུར། །
LAM 5:16 ངེད་ཀྱི་ཅོད་པན་མགོ་ནས་ས་ལ་ལྷུང་། ། སྡིག་པ་བསགས་པས་ངེད་ལ་ཆག་སྒོ་བྱུང་། །
LAM 5:17 དེའི་ཕྱིར་ངེད་ཀྱི་སེམས་ནི་རྒུད་པར་གྱུར། ། ངེད་ཀྱི་མིག་ཟུང་ཡང་ནི་རབ་རིབ་གྱུར། །
LAM 5:18 ཛ་ཡན་རི་བོ་སྟོངས་ཤིང་སྟོང་གྱུར་པས། ། ཝ་མོ་དག་ཀྱང་རི་བོའི་སྟེང་དུ་རྒྱུགས། །
LAM 5:19 ཀྱེ་ཀྱེ་ཡ་ཝཱེ་ཁྱེད་ཉིད་གཏན་དུ་རྒྱལ་པོར་བཞུགས། ། ཁྱེད་ཀྱི་བཞུགས་ཁྲི་མི་རབས་ཀུན་ཏུ་གནས་པར་འགྱུར། །
LAM 5:20 ཁྱེད་ཀྱིས་ངེད་ཅག་ནམ་ཡང་བརྗེད་དོན་ཅི། ། ཁྱེད་ཀྱིས་ངེད་ཅག་ཡུན་རིང་བསྐྱུར་དོན་ཅི། །
LAM 5:21 ཀྱེ་ཀྱེ་ངེད་ཀྱིས་ཡ་ཝཱེ་ཁྱེད་ལ་ཞུ། ། ཁྱེད་ཀྱིས་ངེད་ཅག་ཡོངས་སུ་བསྐྱུར་བ་འམ། ། ངེད་ཕྱོགས་རབ་ཏུ་ཁྲོས་པ་མ་ཡིན་ཚེ། ། ཁྱེད་ཀྱིས་ངེད་རྣམས་ཁྱེད་ཕྱོགས་བསྐོར་བར་མཛོད། ། ངེད་རྣམས་ཁྱེད་ཕྱོགས་འཁོར་ཞིང་འཁོར་བར་ངེས། ། ངེད་ཀྱི་ཉིན་མོ་གནའ་ལྟར་མཛད་གསོལ་ལོ།། །།
EZE 1:1 དེ་ཡང་ལོ་སུམ་ཅུ་པའི་ཟླ་བཞི་པའི་ཚེས་ལྔ་ཉིན་ལ། ང་རང་ཀེ་བར་ཡུར་བའི་འགྲམ་དུ་ཡོད་དུས། ནམ་མཁའི་སྒོ་མོ་ཕྱེས་ནས་ངས་དཀོན་མཆོག་གི་ཞལ་གཟིགས་མཐོང་བ་དང་། དུས་དེར་ང་ནི་བཙོན་དུ་ཁྲིད་པའི་མི་རྣམས་ཀྱི་ཁྲོད་དུ་ཡོད་དོ། །
EZE 1:2 ཡང་རྒྱལ་པོ་ཡེ་ཧོ་ཡཱ་ཀིན་བཙོན་དུ་ཁྲིད་པའི་ལོ་ལྔ་པའི་ཟླ་བཞི་པ་ཡི་ཚེས་ལྔ་ཉིན་ལ།
EZE 1:3 ཀལ་དི་པའི་ཡུལ་ཁམས་ཀྱི་ཀེ་བར་ཡུར་བའི་འགྲམ་དུ། དཀོན་མཆོག་ཡ་ཝཱེའི་བཀའ་ནི་བུ་ཟིའི་བུ་སྟེ་མཆོད་དཔོན་ཨེ་ཟེ་ཀི་ཨེལ་ལ་དངོས་སུ་བྱུང་བ་སྟེ། དཀོན་མཆོག་ཡ་ཝཱེའི་ཕྱག་ནི་ཁོའི་སྟེང་དུ་བཞག་པའོ། །
EZE 1:4 དེ་ནས་ངས་བལྟས་པ་ལ། བྱང་ཕྱོགས་ནས་རླུང་དམར་ཞིག་གཡུགས་འོངས་པ་དང་བཅས། མེ་ལྕེ་ཁྱུག་པའི་སྤྲིན་ཕུང་ཆེན་པོ་ཞིག་མཐོང་བ་དང་། དེའི་མཐའ་བཞི་ནས་འོད་ཟེར་འཕྲོས་ཤིང་། སྤྲིན་གྱི་མེ་ལྕེའི་ནང་དུ་འོད་འཕྲོ་བའི་ལྕགས་རིགས་ཡོད་པ་དང་འདྲ་སྟེ།
EZE 1:5 མེ་ལྕེ་དེའི་ནང་དུ་སེམས་ཅན་བཞི་ཡི་རྣམ་པ་ཤར་བྱུང་ལ། དེ་དག་གི་རྣམ་པ་ནི་འདི་ལྟ་སྟེ། དེ་ཐམས་ཅད་ལ་མིའི་གཟུགས་དབྱིབས་ཡོད་པ་དང་།
EZE 1:6 དེ་དག་རེ་རེ་ལ་གདོང་བཞི་དང་། གཤོག་པ་བཞི་རེ་ཡོད་དེ།
EZE 1:7 དེ་དག་གི་རྐང་པ་ནི་དྲང་པོ་ཡིན་ལ། རྐང་མཐིལ་ནི་བ་ཕྲུག་གི་རྨིག་པ་དང་འདྲ་ཞིང་། ཡོད་ཚད་འོད་ཟེར་འཕྲོ་ཞིང་གཡའ་དག་པའི་ལི་དང་འདྲའོ། །
EZE 1:8 ཡང་དེ་དག་གི་ཕྱོགས་བཞི་ཡི་གཤོག་པའི་འོག་ཏུ་མི་ཡི་ལག་པ་ཡོད་དེ། སེམས་ཅན་བཞི་པོའི་གདོང་དང་གཤོག་པ་ནི་འདི་ལྟ་སྟེ།
EZE 1:9 དེ་དག་གི་གཤོག་པ་ནི་ཕན་ཚུན་འབྲེལ་ཞིང་། འགྲོ་སྐྱོད་བྱེད་དུས་ཁ་ཕྱིར་འཁོར་མི་དགོས་ལ། ཐམས་ཅད་མདུན་དུ་སྐྱོད་པ་ཡིན།
EZE 1:10 ཡང་དེ་དག་གི་གདོང་གི་རྣམ་པ་ནི། སེམས་ཅན་བཞི་པོར་མི་ཡི་གདོང་ཡོད་པ་དང་། གཡས་ཕྱོགས་སུ་རེ་རེར་སེང་གེའི་གདོང་དང་། གཡོན་ཕྱོགས་སུ་རེ་རེར་གླང་གི་གདོང་ཡོད་དེ། རྒྱབ་ཏུ་རེ་རེར་གླག་གི་གདོང་ཡོད་དོ། །
EZE 1:11 ཡང་དེ་དག་གི་གདོང་ནི་འདི་ལྟ་སྟེ། དེ་དག་རེ་རེས་གོང་གི་གཤོག་པ་གཉིས་བརྐྱངས་ཏེ་ཕན་ཚུན་སྦྲེལ་བ་དང་། འོག་གི་གཤོག་པ་གཉིས་ཀྱིས་ལུས་པོ་བསྒྲིབས་པའོ། །
EZE 1:12 དེ་དག་རེ་རེ་ནི་མདུན་དུ་སྐྱོད་པ་དང་། ཐུགས་ཉིད་གང་དུ་ཕེབས་ན་དེ་དག་ཀྱང་དེ་རུ་སྐྱོད་ཅིང་། དེ་དག་སྐྱོད་དུས་ཁ་ཕྱིར་འཁོར་མི་དགོས་སོ། །
EZE 1:13 སེམས་ཅན་བཞི་པོའི་རྣམ་པ་ནི་མེ་འབར་བའི་སོལ་བ་དང་འདྲ་ཞིང་། ཡང་དཔལ་འབར་དང་མཚུངས་པ་ཡིན། མེ་ལྕེ་དེ་ནི་སེམས་ཅན་བཞི་པོའི་དཀྱིལ་དུ་གང་སར་རྒྱུ་བ་དང་། མེ་དེ་ཤིན་ཏུ་གསལ་ཞིང་དེ་ལས་གློག་འཁྱུག་ལ།
EZE 1:14 གློག་འཁྱུག་པ་བཞིན་སེམས་ཅན་བཞི་པོ་ཕར་ཚུར་རྒྱུ་བའོ། །
EZE 1:15 ངས་སེམས་ཅན་དེ་དག་ལ་ལྟ་དུས། སེམས་ཅན་བཞི་པོའི་ལོགས་སུ་ས་ལ་ཐུག་པའི་འཁོར་ལོ་བཞི་ཡོད་པ་མཐོང་སྟེ།
EZE 1:16 འཁོར་ལོ་བཞི་པོའི་དབྱིབས་དང་གྲུབ་ཚུལ་ནི་རྣམ་པ་གཅིག་ཡིན་པ་དང་། དེ་དག་ནི་འོད་ཟེར་ལྡན་པའི་བཻཌཱུརྱ་ལྗང་སེར་དང་མཚུངས་ཤིང་། ཡང་འཁོར་ལོ་རྣམས་ཕན་ཚུན་བསྣོལ་ཡོད་པ་འདྲ།
EZE 1:17 འཁོར་ལོ་དེ་དག་སྐྱོད་དུས་སུ་ཕྱོགས་བཞི་རུ་སྐྱོད་ནུས་ཤིང་ཁ་ལོ་བསྒྱུར་མི་དགོས་ལ།
EZE 1:18 འཁོར་ལོའི་མུ་ཁྱུད་ཤིན་ཏུ་མཐོ་ཞིང་འཇིགས་སུ་རུང་བ་ཞིག་ཡིན་ཏེ། འཁོར་ལོའི་མུ་ཁྱུད་བཞི་པོའི་སྟེང་དུ་མིག་གིས་ཁེངས་ཡོད།
EZE 1:19 ཡང་སེམས་ཅན་དེ་དག་སྐྱོད་དུས་དེ་དག་གི་ལོགས་སུ་ཡོད་པའི་འཁོར་ལོ་རྣམས་ཀྱང་མཉམ་དུ་སྐྱོད་ཅིང་། སེམས་ཅན་དེ་དག་ས་ལས་འཕགས་དུས་འཁོར་ལོ་རྣམས་ཀྱང་མཉམ་དུ་འཕགས་པ་ཡིན།
EZE 1:20 ཐུགས་ཉིད་གང་དུ་ཕེབས་ན་སེམས་ཅན་རྣམས་དེ་རུ་འགྲོ་ཞིང་། འཁོར་ལོ་དག་ཀྱང་མཉམ་དུ་འཕགས་པ་ཡིན། གང་ལ་ཞེ་ན། སེམས་ཅན་རྣམས་ཀྱི་ཐུགས་ཉིད་ནི་འཁོར་ལོའི་ནང་དུ་ཡོད་པའོ། །
EZE 1:21 སེམས་ཅན་རྣམས་སྐྱོད་དུས་འཁོར་ལོ་དག་ཀྱང་མཉམ་དུ་སྐྱོད་པ་དང་། སེམས་ཅན་རྣམས་ལངས་ནས་སྡོད་དུས་འཁོར་ལོ་དག་ཀྱང་ལངས་འདུག་པ་ཡིན། སེམས་ཅན་རྣམས་ས་ལས་འཕགས་དུས་འཁོར་ལོ་རྣམས་ཀྱང་མཉམ་དུ་འཕགས་པ་ཡིན། གང་ལ་ཞེ་ན། སེམས་ཅན་རྣམས་ཀྱི་ཐུགས་ཉིད་ནི་འཁོར་ལོའི་ནང་དུ་ཡོད་པའོ། །
EZE 1:22 སེམས་ཅན་རྣམས་ཀྱི་གཙུག་ཏུ་ནམ་མཁའི་དབྱིབས་དང་འདྲ་བའི་གཟུགས་བརྙན་ཞིག་ཡོད་ཅིང་། འོད་ཟེར་འཕྲོ་བའི་ཆུ་ཤེལ་བཞིན་ཤིན་ཏུ་འཇིགས་སུ་རུང་བ་དང་། དེ་དག་ནི་སེམས་ཅན་རྣམས་ཀྱི་གཙུག་ཏུ་ཁྱབ་པ་ཡིན།
EZE 1:23 ནམ་མཁའི་འོག་ཏུ་སེམས་ཅན་རྣམས་ཀྱི་གཤོག་པ་ནི་དྲང་པོར་བརྐྱངས་ཏེ་ཕན་ཚུན་ཐུག་ནས། རེ་རེས་གཤོག་པ་གཉིས་ཀྱིས་ལུས་པོ་བསྒྲིབས་པ་ཡིན།
EZE 1:24 སེམས་ཅན་རྣམས་སྐྱོད་དུས་སུ་ངས་དེ་དག་གི་གཤོག་སྒྲ་ཐོས་པ་ནི་ཆུ་ལོག་གི་སྒྲ་དང་ཀུན་དབང་ཉིད་ཀྱི་གསུང་སྐད། དཔུང་ཚོགས་ཀྱིས་ཅ་ཅོ་སྒྲོག་པ་བཞིན་ཡིན་ནོ། །ཡང་དེ་དག་ལངས་ནས་སྡོད་དུས་གཤོག་པ་ཐུར་དུ་འཕྱང་ངོ་། །
EZE 1:25 དེ་ཚོའི་མགོ་ཐོག་གི་ནམ་མཁའ་ནས་གསུང་སྐད་ཅིག་བྱུང་ཞིང་། དེ་དག་ལངས་ནས་སྡོད་དུས་གཤོག་པ་ནི་ཐུར་དུ་འཕྱང་བ་ཡིན།
EZE 1:26 དེ་ཚོའི་མགོ་ཐོག་གི་ནམ་མཁའི་ཡང་སྟེང་དུ། རིན་ཆེན་སྔོན་པོ་དང་འདྲ་བའི་བཞུགས་ཁྲིའི་དབྱིབས་ཡོད་དེ། བཞུགས་ཁྲིའི་དབྱིབས་དེའི་སྟེང་དུ་མི་ཡི་བཟོ་ལྟ་དང་འདྲ་བའི་གཟུགས་བརྙན་ཞིག་ཡོད་དོ། །
EZE 1:27 ངས་དེའི་རྐེད་པའི་ཡན་ཆད་ནི་འོད་འཕྲོ་བའི་ལྕགས་རིགས་དང་འདྲ་ཞིང་། མེ་ཡིས་དེའི་ཕྱོགས་བཞིར་བསྐོར་ཡོད་པ་མཐོང་བ་དང་། ཡང་ངས་དེའི་རྐེད་པའི་མན་ཆད་ནི་མེ་ཡི་དབྱིབས་ལྟ་བུ་ཡོད་པ་དང་། འོད་ཟེར་གྱིས་ཁོང་གི་མཐའ་ནས་བསྐོར་ཡོད་པ་མཐོང་བྱུང་།
EZE 1:28 ཆར་དུས་སུ་སྤྲིན་པའི་ཁྲོད་ཀྱི་འཇའ་ཚོན་ཇི་ལྟར་ཡིན་ན། ཁོང་གི་མཐའ་ནས་བསྐོར་བའི་འོད་ཟེར་ཡང་དེ་ལྟར་ཡིན་ཏེ། འདི་ནི་དཀོན་མཆོག་ཡ་ཝཱེའི་གཟི་བརྗིད་ལྡན་པའི་སྣང་བརྙན་ལགས་ཏེ། ངས་དེ་མཐོང་བ་ཙམ་གྱིས་ཁ་ས་ལ་གཏད་པ་དང་། དེ་ནས་གསུང་སྐད་ཅིག་ཐོས་བྱུང་ངོ་། །
EZE 2:1 ཁོང་གིས་ང་ལ་འདི་སྐད་དུ། ཀྱེ་མིའི་བུ་ཡར་ལོངས་ཤིག ངས་ཁྱོད་ལ་གསུང་གནང་བར་བྱའོ་ཞེས་གསུངས་སོ། །
EZE 2:2 ཁོང་གིས་ང་ལ་གསུང་གནང་དུས་སུ་ཐུགས་ཉིད་ངའི་ནང་དུ་ཞུགས་ཏེ་ང་ཡར་ལངས་སུ་བཅུག་པ་དང་། ངས་ཡང་བསྐྱར་ང་ལ་གསུང་གནང་བའི་སྒྲ་ཐོས་སོ། །
EZE 2:3 ཁོང་གིས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་རང་ནི་བདག་ལ་ངོ་ལོག་བྱས་པའི་མི་མང་སྟེ་ཡེས་ར་ཨེལ་པ་རྣམས་ཀྱི་གམ་དུ་མངགས་པར་བྱ་སྟེ། དེ་དག་དང་དེ་དག་གི་ཕ་མེས་རྣམས་ཀྱིས་དེ་རིང་གི་བར་དུ་ང་ལ་རྒྱབ་འགལ་བྱས་པ་དང་།
EZE 2:4 མི་འདི་དག་ནི་ཤིན་ཏུ་གཉའ་རེངས་གཤིས་གྱོང་ཡིན་ལ། ངས་ཁྱོད་ནི་དེ་དག་གི་གམ་དུ་མངགས་ཤིང་། ཁྱོད་ཀྱིས་དེ་རྣམས་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ།
EZE 2:5 དེ་དག་ནི་ཁྱིམ་རྒྱུད་ངོ་ལོག་ཅན་ཡིན་པས། དེ་དག་གིས་མཉན་དང་མི་མཉན་གང་ཡིན་རུང་ཁོ་ཚོའི་ཁྲོད་དུ་ལུང་སྟོན་པ་ཞིག་ཡོད་པ་རྟོགས་ངེས་ཡིན།
EZE 2:6 ཀྱེ་མིའི་བུ། ཁྱོད་ལ་མཚོན་ན། ཚེར་མ་དང་གཟེ་མ་ར་མགོ་ཁྱོད་ཀྱི་མཐའ་རུ་ཡོད་པ་དང་། ཁྱོད་ནི་སྡིག་པ་ར་ཙ་ཡི་ཁྲོད་དུ་གནས་ཀྱང་། ཁྱོད་དེ་དག་ལ་མ་འཇིགས་ཤིག དེ་དག་གིས་སྨྲས་པའི་གཏམ་ལའང་ཁྱོད་མ་འཇིགས་ཤིག དེ་རྣམས་ནི་མ་གཞི་ནས་ཁྱིམ་རྒྱུད་ངོ་ལོག་ཅན་ཞིག་ཡིན་པས། དེ་ཚོས་སྨྲས་པའི་གཏམ་ལ་ཁྱོད་ནི་ནམ་ཡང་མ་འཇིགས་ཤིག དེ་དག་གི་མདུན་དུ་ཁྱོད་དངང་བར་ཡང་མི་བྱའོ། །
EZE 2:7 དེ་དག་ནི་ངོ་ལོག་ཅན་ཡིན་པས། དེ་དག་གིས་མཉན་དང་མི་མཉན་གང་ཡིན་རུང་། ཁྱོད་ཀྱིས་ངའི་བཀའ་དེ་དག་ལ་སྨྲ་བར་གྱིས་ཤིག
EZE 2:8 ཀྱེ་མིའི་བུ། ཁྱོད་ཀྱིས་ངས་གསུངས་པའི་བཀའ་ལ་མཉན་པ་ལས། ཁྱིམ་རྒྱུད་ངོ་ལོག་ཅན་དེ་བཞིན་དུ་ང་ལ་ངོ་ལོག་བྱེད་མི་རུང་། ཁྱོད་ཀྱིས་ཁ་གདངས་ནས་ངས་ཁྱོད་ལ་ཅི་སྦྱིན་པ་དེ་ཟོ་ཞིག་ཅེས་གསུངས་སོ། །
EZE 2:9 དེ་ནས་ངས་བལྟས་པ་ན། ངའི་ཕྱོགས་སུ་ལག་པ་ཞིག་བརྐྱངས་འོངས་པ་དང་། ལག་ཏུ་ཤོག་དྲིལ་ཞིག་ཡོད་པ་མཐོང་སྟེ།
EZE 2:10 ཁོང་གིས་ཤོག་དྲིལ་དེ་ངའི་མདུན་དུ་ཁ་ཕྱེས་པ་ལ། ཤོག་དྲིལ་དེའི་ཕྱི་ནང་གཉིས་སུ་ཡི་གེ་བཀོད་ཡོད་དེ། སྐྱོ་གླུ་དང་མྱ་ངན། གེགས་བར་ཆད་བཅས་བཀོད་ཡོད་དོ། །
EZE 3:1 དེ་ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ་ཁྱོད་ལ་ཐོབ་པ་དེ་ཟོ་ཞིག་དང་། ཤོག་དྲིལ་དེ་ཟོས་རྗེས་ཡེས་ར་ཨེལ་གྱི་ཁྱིམ་རྒྱུད་ལ་གཏམ་སྨྲ་བར་སོང་ཞིག་ཅེས་གསུངས་སོ། །
EZE 3:2 དེ་ནས་ངས་རང་གི་ཁ་གདངས་པ་ན་ཁོང་གིས་ང་ལ་ཤོག་དྲིལ་དེ་ཟ་རུ་བཅུག་གོ །
EZE 3:3 ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་ལ་གནང་བའི་ཤོག་དྲིལ་དེ་ཟོས་ནས་ཁྱོད་ཀྱི་ལྟོ་བ་འགེང་བར་གྱིས་ཤིག་ཅེས་གསུངས་པ་དང་། ངས་ཤོག་དྲིལ་དེ་ཟོས་པ་ན། དེ་ནི་ངའི་ཁ་ནང་དུ་སྦྲང་རྩི་བཞིན་མངར་མོ་ཡིན་ནོ། །
EZE 3:4 ཁོང་གིས་ང་ལ་འདི་སྐད་དུ། ཀྱེ་མིའི་བུ་ཁྱོད་སོང་ཞིག ཡེས་ར་ཨེལ་ཁྱིམ་རྒྱུད་ཀྱི་གམ་དུ་སོང་ནས་ངའི་བཀའ་དེ་རྣམས་ལ་སྒྲོགས་ཤིག
EZE 3:5 གང་ལ་ཞེ་ན། ཁྱོད་ནི་སྐད་རིགས་མི་གཅིག་པའམ་ཡང་ན་སྨྲ་བརྗོད་རྟོགས་དཀའ་བའི་མི་རྣམས་ཀྱི་གམ་དུ་མངགས་པ་མ་ཡིན་པར། ཡེས་ར་ཨེལ་གྱི་ཁྱིམ་རྒྱུད་ཀྱི་གམ་དུ་མངགས་པ་ཡིན།
EZE 3:6 ཁྱོད་ནི་སྐད་རིགས་མི་གཅིག་པའམ་ཡང་ན་སྨྲ་བརྗོད་རྟོགས་དཀའ་བའི་མི་མང་པོའི་གམ་དུ་མངགས་པ་མ་ཡིན་ཏེ། ཁོ་ཚོའི་སྐད་ཆ་ཁྱོད་ཀྱིས་མི་གོའོ། །ཡིན་ཡང་ངས་ཁྱོད་དེ་དག་གི་གམ་དུ་མངགས་པ་ཡིན་ན། དེ་དག་གིས་ཁྱོད་ལ་མཉན་ངེས་ཡིན།
EZE 3:7 ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ནི་གཉའ་རེངས་གཤིས་གྱོང་ཡིན་ཞིང་དེ་དག་གིས་ང་ལ་མི་མཉན་པས། ཡེས་ར་ཨེལ་གྱི་ཁྱིམ་རྒྱུད་ཀྱིས་ཁྱོད་ལའང་མཉན་པར་མི་འགྱུར་རོ། །
EZE 3:8 ལྟོས་དང་། ངས་ཁྱོད་ཀྱི་གདོང་ནི་དེ་དག་གི་གདོང་བཞིན་སྲ་བ་དང་། ཁྱོད་ཀྱི་དཔྲལ་བ་ནི་དེ་དག་གི་དཔྲལ་བ་བཞིན་དུ་མཁྲེགས་པར་བྱའོ། །
EZE 3:9 ངས་ཁྱོད་ཀྱི་དཔྲལ་བ་ནི་ཤིན་ཏུ་སྲ་བའི་རྡོ་ཕ་ལམ་བཞིན་དང་མེ་རྡོ་ལས་ཀྱང་སྲ་བར་བྱ་སྟེ། དེ་དག་ནི་ཁྱིམ་རྒྱུད་ངོ་ལོག་ཅན་ཡིན་ནའང་ཁྱོད་དེ་རྣམས་ལ་མ་འཇིགས་ཤིག དེ་དག་གི་མདུན་དུ་དངང་བར་ཡང་མ་བྱེད་ཅིག་ཅེས་གསུངས་སོ། །
EZE 3:10 ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་ལ་གསུངས་པ་ཐམས་ཅད་ཁྱོད་ཀྱི་རྣ་བས་ཉོན་དང་། སེམས་ལ་ཟུངས་ཤིག
EZE 3:11 ཁྱོད་སོང་དང་། བཙོན་དུ་ཁྲིད་པའི་མི་རྣམས་ཀྱི་གམ་དུ་སོང་ནས། དེ་ཚོས་མཉན་དང་མི་མཉན་གང་ཡིན་རུང་དེ་དག་ལ་བཀའ་སྒྲོགས་ཤིག ཁྱོད་ཀྱིས་དེ་དག་ལ། གཙོ་བོ་ཡ་ཝཱེས་འདི་ལྟར་གསུངས་ཞེས་སྨྲོས་ཤིག
EZE 3:12 དེའི་དུས་སུ་ཐུགས་ཉིད་ཀྱིས་ང་ཡར་དྲངས་ཏེ། དཀོན་མཆོག་ཡ་ཝཱེའི་བཞུགས་གནས་ལས་མངོན་པའི་གཟི་བརྗིད་ལ་བསྟོད་འོས་སོ་ཞེས་ངའི་རྒྱབ་ལོགས་སུ་འུར་སྒྲ་ཆེན་པོ་ཞིག་གྲགས་འོངས་པ་ངས་ཐོས་སོ། །
EZE 3:13 ཡང་སེམས་ཅན་རྣམས་ཀྱི་གཤོག་པ་ཕན་ཚུན་རྡེབ་པའི་སྒྲ་དང་། དེ་ཚོའི་གམ་དུ་ཡོད་པའི་འཁོར་ལོ་རྣམས་ཀྱི་སྒྲ། དེ་མིན་འུར་སྒྲ་ཆེན་པོ་བཅས་ངས་ཐོས་བྱུང་།
EZE 3:14 དེ་ནས་ཐུགས་ཉིད་ཀྱིས་ང་རང་ཡར་དྲངས་ནས་ཁྱེར་བ་དང་། དེའི་དུས་སུ་ངའི་སེམས་ནི་རབ་ཏུ་ཁྲོས་ཤིང་སྐྱོ་ན་ཡང་། དཀོན་མཆོག་ཡ་ཝཱེའི་ཕྱག་ནི་སྟོབས་ཤུགས་ལྡན་པའི་སྒོ་ནས་ངའི་སྟེང་དུ་བཞག
EZE 3:15 དེ་ནས་ང་ཐེལ་ཨ་བིབ་ཀྱི་བཙོན་པ་དག་གི་གམ་དུ་སླེབས་པ་དང་། ཁོ་རྣམས་ཀེ་བར་ཡུར་བའི་འགྲམ་དུ་གནས་ཤིང་། ང་རང་དེ་རྣམས་གནས་པའི་ས་རུ་ཧང་སངས་ནས་ཉིན་བདུན་ལ་བསྡད་པ་ཡིན།
EZE 3:16 ཡང་ཉིན་བདུན་འགོར་རྗེས། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 3:17 ཀྱེ་མིའི་བུ། ངས་ཁྱོད་ནི་ཡེས་ར་ཨེལ་ཁྱིམ་རྒྱུད་ཀྱི་བྱ་རར་བསྐོས་པས། ཁྱོད་ཀྱིས་ངའི་གསུང་ལ་མཉན་ཏེ། ངའི་ཚབ་ཏུ་དེ་དག་ལ་ཐ་ཚིག་སྒྲོགས་ཤིག
EZE 3:18 གལ་ཏེ་ངས་མི་ངན་ཞིག་ལ་ཁྱོད་ནི་འཆི་ངེས་ཡིན་ཞེས་སྨྲས་ནའང་། ཁྱོད་ཀྱིས་དེ་ལ་ཐ་ཚིག་མི་བསྒྲག་པ་དང་། ཡང་སྲོག་སྐྱོབ་ཕྱིར་དེ་ནི་སྤྱོད་ངན་དང་འབྲལ་བར་མ་བསྐུལ་ན། མི་ངན་དེ་ནི་རང་གི་སྡིག་པའི་རྐྱེན་གྱིས་འཆི་བར་འགྱུར་ན་ཡང་། དེ་འཆི་བའི་འགན་ནི་ངས་ཁྱོད་ལ་འགེལ་ངེས་ཡིན།
EZE 3:19 གལ་ཏེ་ཁྱོད་ཀྱིས་མི་ངན་དེ་ལ་ཐ་ཚིག་བསྒྲགས་ཤིང་། མི་དེ་ད་དུང་རང་གི་སྡིག་པ་དང་སྤྱོད་ངན་ལ་མ་བྲལ་ན། དེ་ནི་རང་གི་སྡིག་པའི་རྐྱེན་གྱིས་འཆི་ངེས་ཡིན་མོད། འོན་ཀྱང་ཁྱོད་ཀྱིས་རང་གི་སྲོག་བསྐྱབས་པ་ཡིན།
EZE 3:20 གལ་ཏེ་མི་དྲང་བདེན་ཅན་ཞིག་བདེན་པ་ལས་བཟློགས་ཏེ་ངན་པ་སྤྱད་ན། ངས་དེའི་མདུན་དུ་བཀག་རྡོ་འཇོག་ཅིང་དེ་ནི་འཆི་བར་འགྱུར་ཏེ། གང་ལ་ཞེ་ན། ཁྱོད་ཀྱིས་དེ་ལ་ཐ་ཚིག་མ་བསྒྲགས་པས། མི་དེ་རང་གི་སྡིག་པའི་རྐྱེན་གྱིས་འཆི་བར་འགྱུར་བ་དང་། ཁོས་རྒྱུན་དུ་སྤྱད་པའི་དྲང་བདེན་གྱི་ལས་རྣམས་ཀྱང་དྲན་པར་མི་འགྱུར་མོད། འོན་ཀྱང་དེ་འཆི་བའི་འགན་ནི་ངས་ཁྱོད་ལ་འགེལ་ངེས་ཡིན།
EZE 3:21 ཇི་སྟེ་ཁྱོད་ཀྱིས་དྲང་བདེན་ཅན་ལ་སྡིག་པ་མི་བྱེད་པའི་ཆེད་དུ་ཐ་ཚིག་བསྒྲགས་ནས་དེས་ཀྱང་སྡིག་པ་མ་བྱས་ན། མི་དེས་ཐ་ཚིག་དང་ལེན་བྱས་པས་གསོན་པར་འགྱུར་ལ། ཁྱོད་ཀྱིས་ཀྱང་རང་གི་སྲོག་བསྐྱབས་པ་ཡིན་ཞེས་གསུངས་སོ། །
EZE 3:22 དཀོན་མཆོག་ཡ་ཝཱེའི་ཕྱག་ནི་གནས་དེར་ངའི་སྟེང་དུ་བཞག་ཅིང་། ཁོང་གིས་ང་ལ་འདི་སྐད་དུ། ཁྱོད་ཡར་ལོངས་ལ་ཐང་དུ་སོང་ཞིག དེར་ངས་ཁྱོད་ལ་གསུང་གནང་བར་བྱའོ་ཞེས་བསྒོས་པས།
EZE 3:23 ང་ཡར་ལངས་ཏེ་ཐང་དུ་སོང་བ་ན། བདག་གིས་ཀེ་བར་ཡུར་བའི་འགྲམ་དུ་མཐོང་བའི་གཟི་བརྗིད་དང་འདྲ་བའི་དཀོན་མཆོག་ཡ་ཝཱེའི་གཟི་དཔལ་ནི་དེ་རུ་ཡོད་པ་མཐོང་བས། ང་རང་ཁ་སར་གཏད་ནས་བསྡད།
EZE 3:24 དེ་ནས་ཐུགས་ཉིད་ངའི་ནང་དུ་ཞུགས་ནས་ང་རང་ཡར་ལངས་སུ་བཅུག་པ་དང་། དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ནང་ལ་སོང་སྟེ་རང་ཁྱིམ་དུ་སྒོ་བརྒྱབ་ནས་སྡོད་ཅིག
EZE 3:25 ཀྱེ་མིའི་བུ། ལྟོས་དང་། མི་ཡིས་ཁྱོད་ཐག་པས་བཀྱིགས་ནས་ཁྱོད་རང་ཁོ་ཚོའི་ཁྲོད་དུ་འགྲོ་མི་ཐུབ་པར་བྱེད་ཅིང་།
EZE 3:26 དེ་རྣམས་ནི་ཁྱིམ་རྒྱུད་ངོ་ལོག་ཅན་ཡིན་པས། ཁྱོད་དེ་རྣམས་ལ་བཀའ་བཀྱོན་གནང་མཁན་དུ་མི་འགྱུར་བའི་ཕྱིར། ངས་ཁྱོད་ཀྱི་སྨྲ་ལྕེ་རྐན་ལ་འབྱར་བར་བྱས་ཏེ་ཁྱོད་ནི་ལྐུགས་པར་བྱེད་དོ། །
EZE 3:27 ཡིན་ཡང་ངས་ཁྱོད་ལ་གསུང་གནང་བའི་དུས་སུ། ངས་ཁྱོད་ཀྱིས་ཁ་གྲགས་ཐུབ་པར་བྱ་སྟེ། ཁྱོད་ཀྱིས་དེ་ཚོ་ལ་གཙོ་བོ་ཡ་ཝཱེས་འདི་སྐད་གསུངས་ཞེས་སྨྲོས་ཤིག མཉན་འདོད་པ་རྣམས་ལ་མཉན་དུ་ཆུག མཉན་མི་འདོད་པ་རྣམས་བསྐྱུར་ཞོག གང་ལ་ཞེ་ན། དེ་དག་ནི་ཁྱིམ་རྒྱུད་ངོ་ལོག་ཅན་ཡིན་པས་སོ། །
EZE 4:1 ཀྱེ་མིའི་བུ། ཁྱོད་ཀྱིས་སོ་ཕག་ཅིག་བླངས་ཏེ་རང་གི་མདུན་དུ་ཞོག་དང་། དེའི་སྟེང་དུ་ཡེ་རུ་སཱ་ལེམ་མཚོན་བྱེད་ཀྱི་གྲོང་ཁྱེར་ཞིག་རྐོས་ཤིག
EZE 4:2 དེ་ནས་མཁར་གྱི་མཐའ་བསྐོར་བའི་སྒྲིག་བཀོད་རྣམས་ཞོག་དང་། གྲོང་ཁྱེར་བསྐོར་བའི་མཁར་མཐོན་པོ་དང་། གྲོང་ཁྱེར་ལ་རྒོལ་བའི་ས་རགས་བརྩིགས་ཏེ་དམག་སྒར་བསྒྲིགས་ནས། ཕྱོགས་བཞི་རུ་མཁར་གཏོར་བའི་གདུང་མ་ཚུགས་ཤིག
EZE 4:3 ཡང་ཁྱོད་ཀྱིས་ལྕགས་ཀྱི་སླ་ང་ཞིག་བླངས་ནས་ཁྱོད་དང་གྲོང་ཁྱེར་གཉིས་ཀྱི་བར་དུ་ཞོག་ལ་ལྕགས་ཀྱི་མཁར་དུ་བྱོས་ཤིག གྲོང་ཁྱེར་བསྐོར་བ་མཚོན་བྱེད་དུ་ཁྱོད་རང་གྲོང་ཁྱེར་གྱི་ཕྱོགས་སུ་འཁོར་དང་། ཁྱོད་ནི་གྲོང་ཁྱེར་དེ་ལ་རྒོལ་ནས་སྐོར་མཁན་ཡིན་པ་དང་། དེ་ནི་ཡེས་ར་ཨེལ་ཁྱིམ་རྒྱུད་ཀྱི་སྔ་ལྟས་སུ་འགྱུར་རོ། །
EZE 4:4 དེ་ནས་ཁྱོད་རང་གཡོན་ཕྱོགས་སུ་འཁོར་ནས་ཉལ་ཏེ། ཡེས་ར་ཨེལ་ཁྱིམ་རྒྱུད་ཀྱི་སྡིག་པ་ཁུར་ཞིག་དང་། ཁྱོད་རང་གཡོན་ཕྱོགས་སུ་འཁོར་ནས་ཉིན་ག་ཚོད་ལ་ཉལ་ན། ཁོ་ཚོའི་སྡིག་པ་ཡང་ཁྱོད་ཀྱིས་དེ་ཙམ་དུ་ཁུར་བ་ཡིན་ནོ། །
EZE 4:5 ངས་ཁྱོད་ལ་ཉིན་སུམ་བརྒྱ་དང་དགུ་བཅུ་གཏན་འཁེལ་བྱས་ཤིང་། དེ་ནི་ཁོ་ཚོས་ཉེས་པ་བསགས་པའི་ལོ་གྲངས་དང་མཉམ་ཞིང་། ཉིན་འདི་དག་གི་ནང་དུ་ཁྱོད་ཀྱིས་ཡེས་ར་ཨེལ་གྱི་སྡིག་པ་འཁུར་དགོས།
EZE 4:6 དུས་དེ་ལོངས་པའི་རྗེས་སུ་ཡང་ཁྱོད་རང་གཡས་ཕྱོགས་སུ་འཁོར་ཏེ་ཉལ་ནས་ཡ་ཧུ་དཱ་ཁྱིམ་རྒྱུད་ཀྱི་སྡིག་པ་འཁུར་དགོས་ལ། ངས་ཁྱོད་ལ་ཉིན་བཞི་བཅུ་གཏན་འཁེལ་བྱས་པ་སྟེ། ཉིན་གཅིག་ནི་ལོ་གཅིག་ཏུ་བརྩིས་པའོ། །
EZE 4:7 ཁྱོད་ནི་མཐའ་ནས་བསྐོར་བའི་ཡེ་རུ་སཱ་ལེམ་གྱི་ཕྱོགས་སུ་འཁོར་ཏེ། དཔུང་རྗེན་དུ་བུད་ནས་གྲོང་ཁྱེར་དེ་ལ་རྒོལ་བའི་ལུང་སྟོན་ཅིག
EZE 4:8 ལྟོས་དང་། ཁྱོད་ཀྱིས་གྲོང་ཁྱེར་བསྐོར་བའི་ཉིན་མོ་རྣམས་ལོངས་པའི་བར་དུ། ངས་ཐག་པས་ཁྱོད་བསྡམས་ནས་ཁྱོད་རང་ཁ་ཕྱིར་འཁོར་མི་ནུས་པར་བྱའོ། །
EZE 4:9 ཁྱོད་ཀྱིས་གྲོ་དང་ནས། སྲན་མ། སྲན་དམར། ཁྲེ་ཆུང་། སོ་བ་བཅས་བླངས་ནས་སྣོད་ཅིག་གི་ནང་དུ་བཞག་སྟེ། རང་ཉིད་ལ་བག་ལེབ་སྲེགས་ཤིག་དང་། ཁྱོད་ཟུར་དུ་ལོག་ནས་ཉལ་བའི་ཉིན་སུམ་བརྒྱ་དགུ་བཅུའི་ནང་དུ། ཁྱོད་ཀྱིས་བག་ལེབ་དེ་རྣམས་བཟའ་དགོས།
EZE 4:10 ཡང་ཁྱོད་ཀྱིས་བཟའ་བའི་ཟས་ལ་ཚོད་འཛིན་དགོས་ཏེ། ཉིན་རེར་སྲང་ཉི་ཤུ་ཡིན་པ་དང་དུས་ཚོད་ལྟར་བཟའ་དགོས།
EZE 4:11 ཁྱོད་ཀྱིས་འཐུང་བའི་ཆུ་ལ་ཡང་ཚོད་འཛིན་དགོས་ཏེ། ཉིན་རེར་རྫ་བུམ་གང་གི་དྲུག་ཆའི་གཅིག་ཡིན་ལ་དུས་ཚོད་ལྟར་ཐུངས་ཤིག
EZE 4:12 ཁྱོད་ཀྱིས་ནས་ཕྱེའི་བག་ལེབ་བསྲེགས་མ་བཞིན་དུ་བག་ལེབ་དེ་རྣམས་བཟའ་དགོས་མོད། འོན་ཀྱང་མི་རྣམས་ཀྱི་མདུན་དུ་མི་བྲུན་གྱིས་བསྲེགས་ནས་བཟའ་དགོས་ཞེས་གསུངས་སོ། །
EZE 4:13 དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་ཀྱིས་ངས་དེ་དག་སྐྲོད་པར་འགྱུར་བའི་ཡུལ་ཁམས་སུའང་དེ་བཞིན་དུ་མི་གཙང་བའི་ཟས་བཟའ་བར་འགྱུར་རོ་ཞེས་གསུངས་པ་དང་།
EZE 4:14 ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། གཟིགས་དང་། ངས་ནམ་ཡིན་ཡང་རང་ཉིད་བཙོག་པར་མ་བཟོས་ཏེ། ཆུང་དུས་ནས་ད་བར་དུ་ཤི་ཤ་དང་ཡང་ན་གཅན་གཟན་གྱིས་ཕྲལ་བའི་སྲོག་ཆགས་དང་། མི་གཙང་བའི་ཤ་སོགས་ནི་ནམ་ཡང་ངའི་ཁ་ནང་དུ་སོང་མ་མྱོང་ཞེས་ཞུས་པ་ན།
EZE 4:15 ཁོང་གིས་ང་ལ་འདི་སྐད་དུ། ལྟོས་དང་། ངས་ཁྱོད་ལ་མི་བྲུན་གྱི་ཚབ་ཏུ་བ་གླང་གི་ལྕི་བ་སྦྱིན་པས། ཁྱོད་ཀྱིས་ཨོང་བའི་སྟེང་རང་གི་བག་ལེབ་སྲེགས་ཤིག་ཅེས་གསུངས།
EZE 4:16 ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ལྟོས་དང་། ངས་ཡེ་རུ་སཱ་ལེམ་གྱི་ཁ་ཟས་གཅོད་པར་འགྱུར་ལ། དེ་ནས་ཁོ་ཚོས་སེམས་ཁྲལ་བྱེད་ཅིང་བགོས་པའི་ཁ་ཟས་སྤྱོད་པ་དང་། དངངས་སྐྲག་གིས་བགོས་པའི་ཆུ་བཏུང་བ་ཡིན།
EZE 4:17 དེ་དག་ལ་བཟའ་བཏུང་དཀོན་པས་མི་རེ་རེ་དངངས་སྐྲག་སྐྱེས་ནས། རང་གི་སྡིག་པའི་རྐྱེན་གྱིས་ལུས་སྟོབས་ཉམས་ཏེ་འཆི་བར་འགྱུར་རོ། །
EZE 5:1 ཀྱེ་མིའི་བུ། སྐྲ་བཞར་མཁན་གྱི་སྤུ་གྲིའི་ཚབ་ཏུ་ཁྱོད་ཀྱིས་གྲི་རྣོན་པོ་ཞིག་བཟུང་སྟེ་རང་གི་སྐྲ་དང་སྨ་ར་བཞར་བ་དང་། སྐྲ་དང་སྨ་ར་རྒྱ་སྲང་སྟེང་དུ་བཞག་ནས་ཚོད་ལ། དེ་ནས་ཆ་ཤས་སུ་བགོས་ཤིག
EZE 5:2 གྲོང་ཁྱེར་བསྐོར་བའི་དུས་ལོངས་པའི་རྗེས་སུ་ཁྱོད་ཀྱིས་སྐྲ་དང་སྨ་ར་དེ་ལས་སུམ་ཆའི་གཅིག་བླངས་ཏེ་གྲོང་ཁྱེར་གྱི་དབུས་སུ་མེར་སྲེགས་ཤིག ཡང་སུམ་ཆའི་གཅིག་བླངས་ཏེ་གྲོང་ཁྱེར་གྱི་མཐའ་འཁོར་ནས་རལ་གྲིས་གཙོབས་ཤིག ཡང་སུམ་ཆའི་གཅིག་རླུང་ལ་བསྐུར་ཞིག ངས་ད་དུང་རལ་གྲི་ཕྱུང་ནས་དེ་དག་གི་རྗེས་འདེད་པར་བྱའོ། །
EZE 5:3 ཁྱོད་ཀྱིས་སྐྲ་དང་སྨ་ར་དེ་ལས་ཉག་མ་འགའ་རེ་བླངས་ནས་ཁྱོད་ཀྱི་གྱོན་པའི་ཐུ་བའི་ནང་དུ་ཆུག
EZE 5:4 ཡང་སྐྲ་དང་སྨ་ར་དེ་ལས་ཉག་མ་འགའ་རེ་བླངས་ཏེ་མེའི་ནང་དུ་གཡུགས་ནས་སྲེགས་ཤིག མེ་ལྕེ་ནི་དེ་ནས་ཡེས་ར་ཨེལ་གྱི་ཁྱིམ་རྒྱུད་ཀུན་ཏུ་ཁྱབ་པར་འགྱུར་ཞེས་གསུངས་སོ། །
EZE 5:5 ཡང་གཙོ་བོ་ཡ་ཝཱེས་འདི་སྐད་དུ། འདི་ནི་ངས་དེ་སྔོན་མི་རྣམས་ཀྱི་ནང་དུ་བཞག་ཅིང་། རྒྱལ་ཁབ་ཀུན་གྱིས་མཐའ་རུ་བསྐོར་བའི་ཡེ་རུ་སཱ་ལེམ་ཡིན་མོད་ཀྱང་།
EZE 5:6 དེས་ངའི་སྲོལ་ཡིག་དང་འགལ་ནས་སྤྱོད་ངན་སྤྱད་པ་ནི་མི་རིགས་ཀུན་ལས་ལྷག་ཅིང་། ངའི་སྒྲིག་ཁྲིམས་དང་འགལ་བ་ནི་དེའི་མཐའ་སྐོར་གྱི་རྒྱལ་ཁབ་ཀུན་ལས་ཀྱང་ལྷག་པའོ། །དེས་ངའི་སྲོལ་ཡིག་དོར་བ་དང་ངའི་སྒྲིག་ཁྲིམས་མ་བསྲུངས་ཞེས་གསུངས་སོ། །
EZE 5:7 ཡང་གཙོ་བོ་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་ཉེ་འཁོར་གྱི་མི་ཀུན་ལས་ཀྱང་གྱེན་ལོག་བྱས་ཏེ། ངའི་སྒྲིག་ཁྲིམས་མ་བརྩིས་པ་དང་ངའི་སྲོལ་ཡིག་མ་བསྲུངས་པར་མ་ཟད། རང་གི་ཉེ་འཁོར་གྱི་མི་རིགས་ཀུན་གྱི་ཁྲིམས་སྲོལ་ཡང་ཁྱོད་ཅག་གིས་མ་བསྲུངས་ཞེས་གསུངས།
EZE 5:8 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་རང་དགྲ་རུ་བཟུང་ནས་མི་རིགས་ཀུན་གྱི་མིག་མདུན་དུ་ཁྱོད་ཅག་གི་དབུས་སུ་ཉེས་ཆད་གཅོད་པར་བྱ།
EZE 5:9 ཁྱོད་ཀྱི་ཞེན་ལོག་གི་སྤྱོད་པ་རྣམས་ཀྱི་ཕྱིར་དུ། ངས་སྔར་ནམ་ཡང་བཅད་མ་མྱོང་བ་དང་ཕྱིས་སུའང་གཅོད་པར་མི་བྱ་བའི་ཉེས་ཆད་དེ་ཁྱོད་ཀྱི་ནང་དུ་གཅོད་པར་འགྱུར་རོ། །
EZE 5:10 དེའི་ཕྱིར་ཁྱོད་ཀྱི་ནང་དུ་ཕ་རྣམས་ཀྱིས་བུ་རྣམས་བཟའ་བར་འགྱུར་ལ། བུ་རྣམས་ཀྱིས་ཕ་རྣམས་བཟའ་བར་འགྱུར། ཡང་ངས་ཁྱོད་རྣམས་ལ་ཉེས་ཆད་བཅད་དེ་ཁྱོད་ལས་ལྷག་པའི་མི་རྣམས་ཕྱོགས་བཞིར་གཏོར་བར་བྱའོ་ཞེས་གསུངས་སོ། །
EZE 5:11 ཡང་གཙོ་བོ་ཡ་ཝཱེས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ཁྱོད་ཀྱིས་རང་གི་སྐྱུག་བྲོ་བའི་སྐུ་འདྲ་དང་ཞེན་ལོག་གི་དོན་ཐམས་ཅད་ཀྱིས་ངའི་གནས་མཆོག་བཙོག་པར་བཟོས་པས། ངས་ཀྱང་ཁྱོད་དྲིན་གྱིས་མི་སྐྱོང་ལ། ངའི་མིག་གིས་ཀྱང་ཁྱོད་ལ་ལྟ་སྐྱོང་མི་བྱེད་ཅིང་། ངས་ཁྱོད་ལ་སྙིང་རྗེ་ཡང་བསྒོམ་པར་མི་བྱའོ། །
EZE 5:12 ཁྱོད་ཀྱི་མི་རྣམས་ཀྱི་སུམ་ཆའི་གཅིག་ནི་རིམས་ནད་ཀྱིས་འཆི་བར་འགྱུར་ཞིང་། མུ་གེས་མེད་པར་འགྱུར་ལ། སུམ་ཆའི་གཅིག་ནི་ཁྱོད་ཀྱི་མཐའ་འཁོར་དུ་རལ་གྲིས་བསྣུན་ནས་འགྱེལ་བར་འགྱུར་ཞིང་། སུམ་ཆའི་གཅིག་ནི་ངས་དེ་དག་ཕྱོགས་བཞི་རུ་གཏོར་བར་མ་ཟད། ངས་ད་དུང་རལ་གྲི་ཕྱུང་ནས་དེ་དག་གི་རྗེས་འདེད་པར་བྱའོ། །
EZE 5:13 དེ་ལྟར་བྱས་ན་ངའི་ཁོང་ཁྲོ་ད་གཟོད་ཞི་བར་འགྱུར་ལ། ང་དེ་དག་གི་སྟེང་དུ་ལངས་པའི་ཁྲོ་གཏུམ་ཆེན་པོ་དེ་ཡང་ཞི་བར་འགྱུར་བས། ང་རང་ཉིད་ཀྱང་བདེ་ལ་འབབ་པའོ། །ང་དེ་དག་གི་སྟེང་དུ་ལངས་པའི་ཁྲོ་གཏུམ་ཆེན་པོ་དེ་རྫོགས་པའི་ཚེ། ཡ་ཝཱེ་བདག་གིས་འཁུར་ཞེན་དང་བཅས་དེ་བཞིན་སྨྲས་པ་དེ་དག་གིས་རྟོགས་པར་འགྱུར།
EZE 5:14 ངས་ཁྱོད་ནི་ས་སྟོང་དུ་བསྒྱུར་ཏེ། ཁྱོད་ནི་རང་གི་མཐའ་འཁོར་གྱི་མི་རིགས་ཀུན་དང་དེ་བརྒྱུད་ནས་འགྲོ་བའི་མི་ཐམས་ཅད་ཀྱི་མདུན་དུ་ངོ་ཚ་རུ་འགྱུར་བར་བྱ།
EZE 5:15 དེ་ལྟར་ངས་ཁོང་ཁྲོ་དང་ཁྲོ་གཏུམ་ཆེན་པོ། ཞེ་སྡང་དྲག་པོ་བཅས་ཀྱི་བཀའ་བཀྱོན་གྱིས་ཁྱོད་ལ་ཉེས་ཆད་གཅོད་པའི་དུས་སུ། ཁྱོད་ནི་རང་གི་ཉེ་འཁོར་གྱི་མི་རིགས་ཀུན་གྱི་ནང་དུ་ངོ་ཚ་དང་ཟུར་ཟ། མི་རྣམས་འཇིགས་སྣང་སྐྱེ་ཡུལ་དུ་འགྱུར་བ་དང་། ཡང་དེ་དག་གིས་དོགས་ཟོན་བྱེད་ཡུལ་དུ་འགྱུར་རོ་ཞེས་ཡ་ཝཱེ་བདག་གིས་སྨྲས་པའོ། །
EZE 5:16 ཁྱོད་རྣམས་ཚར་གཅོད་པའི་ཕྱིར་དུ། ངས་མུ་གེ་དང་གཏོར་བརླག་གི་དུག་མདའ་འཕངས་ཏེ། ངས་ཁྱོད་ཅག་གི་མུ་གེ་ཆེ་རུ་བཏང་ནས། ཁྱོད་ཅག་གི་ཁ་ཟས་ཀྱི་མཁོ་འདོན་གཅོད་པར་བྱའོ། །
EZE 5:17 ཡང་ངས་ཁྱོད་ཀྱི་གམ་དུ་མུ་གེ་དང་གཅན་གཟན་གཏུམ་དྲག་ཅན་མངགས་ནས། དེ་དག་གིས་ཁྱོད་ཀྱི་མི་རབས་ཀྱི་རྒྱུད་གཅོད་ཅིང་། ཁྱོད་ཀྱི་ནང་དུ་གང་སར་རིམས་ནད་དང་ཁྲག་བཞུར་བའི་དོན་རྣམས་འབྱུང་ཞིང་། ངས་ཁྱོད་ཀྱི་སྟེང་དུ་རལ་གྲི་འབེབ་པར་བྱའོ་ཞེས་ཡ་ཝཱེ་བདག་གིས་སྨྲས་པ་ཡིན་ཞེས་གསུངས་སོ། །
EZE 6:1 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 6:2 ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་རི་རྣམས་ཀྱི་ཕྱོགས་སུ་འཁོར་ནས་ལུང་སྟོན་ཅིག
EZE 6:3 དེ་དག་ལ་འདི་ལྟར། ཀྱེ་ཡེས་ར་ཨེལ་གྱི་རི་བོ་རྣམས། གཙོ་བོ་ཡ་ཝཱེའི་བཀའ་ལ་ཉོན་ཅིག གཙོ་བོ་ཡ་ཝཱེས་རི་རབ་དང་རི་སྒང་། གྲོག་ཤུར་དང་ལུང་པ་རྣམས་ལ་འདི་སྐད་དུ། ལྟོས་དང་། ངས་ཁྱོད་ཀྱི་སྟེང་དུ་རལ་གྲི་ཕབ་ནས་ཁྱོད་ཀྱི་མཐོ་གླིང་རྣམས་མེད་པར་བྱ་སྟེ།
EZE 6:4 ཁྱོད་ཅག་གི་མཆོད་ཁྲི་རྣམས་སྟོང་བར་འགྱུར་ལ། ཁྱོད་རྣམས་ཀྱི་སྤོས་ཁྲི་རྣམས་སིལ་བུར་གཏོར་བ་དང་། ངས་ཁྱོད་རྣམས་ལས་སྲོག་དང་ཕྲལ་བའི་མི་རྣམས་ཁྱོད་རྣམས་ཀྱི་སྐུ་འདྲའི་མདུན་དུ་འགྱེལ་བར་བྱའོ། །
EZE 6:5 ཡང་ངས་ཡེས་ར་ཨེལ་པའི་བེམ་པོ་རྣམས་དེ་དག་གི་སྐུ་འདྲའི་མདུན་དུ་བཞག་ནས། ཁྱོད་ཅག་གི་རུས་པ་རྣམས་ཁྱོད་རྣམས་ཀྱི་མཆོད་ཁྲིའི་མཐའ་འཁོར་དུ་གཏོར་བར་བྱའོ། །
EZE 6:6 ཁྱོད་ཅག་སྡོད་པའི་གནས་ཐམས་ཅད་ཀྱི་གྲོང་ཁྱེར་རྣམས་མི་མེད་ལུང་སྟོང་དུ་འགྱུར་ཞིང་། མཐོ་གླིང་རྣམས་བེད་མེད་དུ་བསྐྱུར་ནས། ཁྱོད་རྣམས་ཀྱི་མཆོད་ཁྲི་རྣམས་ཀྱང་དོར་ནས་མི་གཙང་བར་འགྱུར་ལ། ཁྱོད་རྣམས་ཀྱི་སྐུ་འདྲ་རྣམས་བཅག་ནས་མེད་པར་བྱེད་ཅིང་། ཁྱོད་རྣམས་ཀྱི་སྤོས་ཁྲི་རྣམས་བཅད་ནས་ཁྱོད་ཅག་གིས་བཟོས་པ་རྣམས་མེད་པར་བྱའོ། །
EZE 6:7 སྲོག་དང་ཕྲལ་བའི་མི་རྣམས་ཁྱོད་ཅག་གི་ཁྲོད་དུ་འགྱེལ་བར་འགྱུར་ལ། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 6:8 ཡིན་ཡང་མི་ལྷག་ལུས་རྣམས་ངས་འཇོག་པར་བྱ་སྟེ། ཁྱོད་ཅག་ཡུལ་སོ་སོར་ཁ་འཐོར་དུ་འགྲོ་དུས། ཁྱོད་ཅག་གི་ཁྲོད་ནས་མི་ཁ་ཤས་མི་རིགས་ཀུན་གྱི་རལ་གྲི་ལས་ཐར་བར་འགྱུར་རོ། །
EZE 6:9 དུས་དེར། ཐར་བའི་མི་རྣམས་ཀྱིས་བཙོན་དུ་ཁྲིད་པའི་མི་རིགས་རྣམས་ཀྱི་ཁྲོད་ནས་ང་རང་ཁོ་ཚོའི་ཕྱིར་དུ་ཡིད་ཅི་ལྟར་སྐྱོ་བ་དྲན་པར་འགྱུར་ཏེ། གང་ལ་ཞེ་ན། དེ་དག་གིས་གཡེམ་སྦྱོར་གྱི་སེམས་བསྐྱེད་དེ་ང་རང་དོར་བ་དང་། དེ་དག་གི་ལོག་གཡེམ་གྱི་མིག་ནི་སྐུ་འདྲར་དུངས་པ་ཡིན། དུས་དེར་ཁོ་རྣམས་ནི་རང་གིས་སྤྱད་པའི་སྤྱོད་ངན་དང་། ཁོ་ཚོའི་ཞེན་ལོག་གི་དོན་ཐམས་ཅད་ཀྱི་ཕྱིར་དུ་རང་ཉིད་ལ་སྡང་བར་འགྱུར།
EZE 6:10 དེ་ནས་དེ་དག་གིས་བདག་ནི་ཡ་ཝཱེ་ཡིན་པ་དང་། ངས་ཁོ་ཚོའི་སྟེང་དུ་གནོད་འཚེ་གཏོང་དགོས་ཞེས་སྨྲས་པ་དེ་སྟོང་བཤད་མིན་པ་རྟོགས་པར་འགྱུར་ཞེས་སྨྲོས་ཤིག་ཅེས་གསུངས་སོ། །
EZE 6:11 གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རྐང་རྡབ་ལག་རྡེབ་བྱས་ནས་འདི་ལྟར་སྨྲོས་ཤིག སྐྱོ་བ་ལ། ཡེས་ར་ཨེལ་ཁྱིམ་རྒྱུད་ཀྱི་སྐྱུག་བྲོ་བའི་སྤྱོད་ངན་དག་གི་རྐྱེན་གྱིས་ཁོ་རྣམས་རལ་གྲི་དང་མུ་གེ རིམས་ནད་བཅས་ཀྱི་འོག་ཏུ་འགྱེལ་བར་འགྱུར་ཞེས་པའོ། །
EZE 6:12 རྒྱང་རིང་དུ་གནས་པ་རྣམས་རིམས་ནད་ཀྱིས་འཆི་ཞིང་། ཉེ་སར་ཡོད་པ་རྣམས་རལ་གྲིའི་འོག་ཏུ་འགྱེལ་བར་འགྱུར་ལ། མཐའ་ནས་བསྐོར་བའི་ལྷག་ལུས་རྣམས་ཀྱང་མུ་གེས་འགེམ་པར་འགྱུར། ངས་དེ་ལྟར་རང་གི་ཁྲོ་གཏུམ་ཆེན་པོ་དེ་དག་གི་སྟེང་དུ་བླུགས་ནས་ཚར་དགོས།
EZE 6:13 དེ་དག་ལས་སྲོག་དང་ཕྲལ་བའི་མི་རྣམས་ཁོ་ཚོའི་སྐུ་འདྲའི་མདུན་དང་། ཁོ་ཚོའི་མཆོད་ཁྲིའི་མཐའ་འཁོར། རི་སྒང་རེ་རེ། རི་རྩེ་རེ་རེ། སྔོ་ལྗང་ལྗང་གི་ལྗོན་ཤིང་རེ་རེ་དང་བེ་ཤིང་སྟུག་པོའི་འོག་སྟེ། དེ་དག་གིས་སྐུ་འདྲ་ཀུན་ལ་དྲི་ཞིམ་གྱི་མཆོད་པ་འབུལ་བའི་གནས་སུ་འགྱེལ་བར་འགྱུར་ཞིང་། དུས་དེར་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 6:14 ཡང་ངས་རང་གི་ལག་པ་བརྐྱངས་ནས་དེ་དག་ལ་རྒོལ་ཞིང་། དེ་དག་སྡོད་པའི་གནས་ཏེ་དབེན་སྟོང་ནས་རིབ་ལཱ་ ཡི་བར་དུ་མི་མེད་ལུང་སྟོང་དུ་བྱེད་པ་དང་། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་པའོ། །
EZE 7:1 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 7:2 ཀྱེ་མིའི་བུ། གཙོ་བོ་ཡ་ཝཱེས་ཡེས་ར་ཨེལ་པ་རྣམས་ལ་འདི་སྐད་དུ། མཇུག་འབྲས་སླེབས་ཟིན་ཏེ་མཇུག་འབྲས་ཡུལ་ཁམས་འདིའི་ཕྱོགས་བཞིར་སླེབས་ཟིན།
EZE 7:3 ད་ལྟ་མཇུག་འབྲས་དེ་ཁྱོད་ཀྱི་སྟེང་དུ་སླེབས་ཤིང་། ངས་ཁོང་ཁྲོ་དང་བཅས་ཁྱོད་ལ་རྒོལ་ནས་ཁྱོད་ཀྱིས་ཅི་བྱས་བཞིན་ཁྲིམས་གཅོད་ཅིང་། ཁྱོད་ཀྱི་ཞེན་ལོག་གི་དོན་ཐམས་ཅད་བཞིན་དུ་ཁྱོད་ལ་ལན་འཇལ་ལོ། །
EZE 7:4 ངའི་མིག་གིས་ཁྱོད་ལ་ལྟ་སྐྱོང་མི་བྱེད་ཅིང་། ངས་ཁྱོད་ལ་སྙིང་རྗེ་ཡང་མི་བསྒོམ། ངས་ཁྱོད་ཀྱི་སྤྱོད་པ་བཞིན་དང་ཁྱོད་ཅག་ཁྲོད་ཀྱི་ཞེན་ལོག་གི་དོན་རྣམས་བཞིན་དུ་ཁྱོད་ལ་ལན་འཇལ་ཏེ། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 7:5 གཙོ་བོ་ཡ་ཝཱེས་འདི་སྐད་དུ། ལྟོས་དང་། བར་ཆད་དེ་བར་ཆད་ཁྱད་པར་ཅན་དེ་སླེབས་ཟིན།
EZE 7:6 མཇུག་འབྲས་སླེབས་པ་དང་། མཇུག་འབྲས་སླེབས་ནས་ཁྱོད་ཀྱི་དགྲ་རུ་ལངས་པའོ། །ལྟོས་དང་། དེ་ནི་སླེབས་སོ། །
EZE 7:7 ཀྱེ་ཡུལ་འདིའི་མི་རྣམས། ཁྱོད་ལ་གནོད་འཚེ་ཐེབས་པ་ཡིན། དུས་སུ་སླེབས་པ་དང་ཉི་མ་ཐོན་ལ་ཉེ་སྟེ། དེ་ནི་ཟང་ཟིང་ལང་ལོང་གི་དུས་ཡིན་པ་ལས། རི་མགོ་ནས་དགའ་མགུ་བྱེད་པའི་དུས་མིན་ནོ། །
EZE 7:8 ད་ནི་མི་འགྱངས་པར་ངས་རང་གི་ཁྲོ་གཏུམ་ཆེན་པོ་ཁྱོད་ཀྱི་སྟེང་དུ་ལྡུག་ཅིང་། ཁྱོད་ལ་ཁོང་ཁྲོ་ལངས་ནས་ཡོངས་སུ་རྫོགས་པར་བྱས་ཏེ། ངས་ཁྱོད་ཀྱི་སྤྱོད་པ་བཞིན་དུ་ཁྱོད་ལ་ཁྲིམས་གཅོད་པ་དང་། ཁྱོད་ཀྱི་ཞེན་ལོག་གི་དོན་ཐམས་ཅད་བཞིན་དུ་ཁྱོད་ལ་ལན་འཇལ་བའོ། །
EZE 7:9 ངའི་མིག་གིས་ཁྱོད་ལ་ལྟ་སྐྱོང་མི་བྱེད་ལ། ངས་ཁྱོད་ལ་སྙིང་རྗེ་ཡང་མི་བསྒོམ། ངས་ཁྱོད་ཀྱི་སྤྱོད་པ་བཞིན་དང་ཁྱོད་ཅག་ཁྲོད་ཀྱི་ཞེན་ལོག་གི་དོན་རྣམས་བཞིན་དུ་ཁྱོད་ལ་ལན་འཇལ་ཏེ། དེ་ནས་ཁྱོད་ཚོས་རང་ལ་རྒོལ་མཁན་ནི་ཡ་ཝཱེ་བདག་ཡིན་པ་རྟོགས་པར་འགྱུར་རོ། །
EZE 7:10 ལྟོས་དང་། ཉིན་མོ་དེ་སླེབས་བྱུང་། གནོད་འཚེ་ནི་བྱུང་ཟིན་ལ། དབྱུག་པར་མེ་ཏོག་བཞད་པ་དང་། རློམ་སེམས་ལ་མྱུ་གུ་འབུས་སོ། །
EZE 7:11 བཙན་ཤུགས་རྒྱས་ནས་ངན་པར་ཉེས་ཆད་གཅོད་བྱེད་དབྱུག་པ་རུ་གྱུར་ཏེ། དེ་རྣམས་ལས་གཅིག་ཀྱང་མི་ལུས་ཏེ། དེ་དག་གི་མི་རྣམས་ལས་གང་ཡང་མི་ལུས་ཤིང་། ཁོ་ཚོའི་རྒྱུ་ནོར་མི་ལུས་ལ། ཁོ་ཚོའི་ནང་དུ་གཟི་དཔལ་ཡང་མེད་དོ། །
EZE 7:12 དུས་སུ་སླེབས་པ་དང་ཉི་མ་ཐོན་ལ་ཉེ་སྟེ། མི་ཀུན་གྱི་སྟེང་དུ་ཁྲོ་གཏུམ་ཆེན་པོ་འབབ་པར་འགྱུར་བས། ཉོ་མཁན་མ་དགའ་ཞིག འཚོང་མཁན་ཡང་ཡིད་མ་སྐྱོ་ཞིག
EZE 7:13 འཚོང་མཁན་དེ་གསོན་པོར་ལུས་ཀྱང་བཙོང་ཟིན་པའི་ནོར་ནི་ཕྱིར་མི་འཐོབ། གང་ལ་ཞེ་ན། མི་ཀུན་དང་འབྲེལ་བའི་ཞལ་གཟིགས་འདི་ལ་འགྱུར་བ་མེད་དེ། སྡིག་པའི་དབང་གིས་སུས་ཀྱང་རང་སྲོག་སྐྱོབ་མི་ནུས་སོ། །
EZE 7:14 དེ་དག་གིས་དུང་བུས་ཏེ་ཡོད་ཚད་གྲ་སྒྲིག་བྱས་ཀྱང་དམག་ལ་འགྲོ་མཁན་མེད་དེ། གང་ལ་ཞེ་ན། ངའི་ཁོང་ཁྲོ་ནི་མི་ཀུན་གྱི་སྟེང་དུ་འབབ་པར་འགྱུར་བས་སོ། །
EZE 7:15 གྲོང་ཁྱེར་གྱི་ཕྱི་རོལ་ཏུ་རལ་གྲི་དང་། ནང་རོལ་ཏུ་རིམས་ནད་དང་མུ་གེ་ཡོད་པས། ཐང་དུ་ཡོད་པ་དེ་རལ་གྲིའི་འོག་ཏུ་འཆི་ཞིང་། གྲོང་ཁྱེར་ནང་དུ་ཡོད་པ་དེ་མུ་གེ་དང་རིམས་ནད་ཀྱིས་ཁྱུར་མིད་གཏོང་བར་འགྱུར་རོ། །
EZE 7:16 དེ་དག་ལས་ཐར་བ་རྣམས་ནི་རང་གི་སྡིག་པའི་དབང་གིས་རི་ལ་བསྡད་དེ་ངུ་ཞིང་། ལུང་པའི་ཕུག་རོན་བཞིན་དུ་ངུ་སྒྲ་འདོན་པར་འགྱུར།
EZE 7:17 དེ་དག་གི་ལག་པ་ཡོད་ཚད་འདར་ཞིང་། པུས་མོ་རེ་རེ་ཆུ་ལྟར་མཉེན་པར་འགྱུར།
EZE 7:18 དེ་དག་གི་རྐེད་པར་རྩིད་རས་དཀྲི་བ་དང་། འཇིགས་པ་དེ་དག་ལ་ཁྱབ་པར་འགྱུར་ཞིང་། ཚང་མའི་གདོང་ལ་ངོ་ཚས་བཀང་ནས་ཀུན་གྱི་མགོ་ནི་སྤྱི་ཐེར་དུ་འགྱུར།
EZE 7:19 དེ་དག་གིས་རང་གི་དངུལ་རྣམས་ལམ་སྲང་དུ་གཡུག་ཅིང་། རང་གི་གསེར་ནི་མི་གཙང་བར་བརྩི་བ་ཡིན་ལ། དཀོན་མཆོག་ཡ་ཝཱེའི་ཐུགས་ཁྲོའི་ཉིན་མོ་ལ། གསེར་དང་དངུལ་གྱིས་དེ་དག་སྐྱོབ་མི་ནུས་ལ། ཁོ་ཚོ་ཡིད་ཚིམ་པར་ཡང་བྱེད་མི་ནུས་ཏེ། ལྟོ་བའང་འགྲང་བར་མི་འགྱུར། གང་ལ་ཞེ་ན། གསེར་དང་དངུལ་ནི་ཁོ་ཚོ་སྡིག་པའི་ནང་དུ་ལྷུང་བྱེད་ཀྱི་བཀག་རྡོ་རུ་གྱུར་པས་སོ། །
EZE 7:20 ཁོ་ཚོས་མཛེས་སྡུག་གི་རྒྱན་ཆ་ངོམ་ཞིང་། དེ་ལས་ཞེན་ལོག་གི་སྐུ་འདྲ་རྣམས་བཟོས་པས། ངས་དེ་དག་རྫས་མི་གཙང་བར་བྱེད་ཅིང་།
EZE 7:21 ངས་དེ་དག་ཕྱི་ཕྱོགས་པའི་ལག་ཏུ་སྤྲད་དེ་བཅོམ་ནོར་དུ་བསྒྱུར་བ་དང་། ས་གཞིའི་མི་ངན་རྣམས་ཀྱི་ལག་ཏུ་སྤྲད་དེ་དགྲ་ལས་ཐོབ་པའི་དངོས་རྫས་སུ་འགྱུར་ཞིང་། ཁོ་ཚོས་དངོས་པོ་དེ་དག་བཙོག་པར་བཟོ་ངེས་ཡིན།
EZE 7:22 ང་ཕར་འཁོར་ནས་དེ་ཚོར་མི་བལྟ་ཞིང་། ཁོ་ཚོས་ངའི་དམ་པའི་གནས་བཙོག་པར་བཟོ་བ་དང་། ཇག་རྐུན་རྣམས་ཀྱང་དེར་སོང་ནས་གནས་དེ་བཙོག་པར་བཟོ་བའོ། །
EZE 7:23 ཡུལ་དེ་ལ་ཁྲག་བཞུར་བའི་ཉེས་ཆད་དང་། གྲོང་ཁྱེར་དེ་ལ་བཙན་ཤུགས་ཀྱིས་ཁེངས་པས། ཁྱོད་ཀྱིས་ལྕགས་སྒྲོག་བཟོས་ཤིག
EZE 7:24 ངས་མི་རིགས་ཀུན་ལས་ཆེས་གདུག་རྩུབ་ཅན་རྣམས་འོངས་ནས་ཁོ་ཚོའི་ཁང་པ་བཙན་བཟུང་བྱེད་དུ་འཇུག་ཅིང་། ཡང་ངས་སྟོབས་འབྱོར་ཅན་གྱི་ང་རྒྱལ་མཚམས་གཅོད་པར་བྱ་སྟེ། དེ་དག་གི་གནས་དམ་པ་རྣམས་བཙོག་པར་བཟོའོ། །
EZE 7:25 འཇིགས་པ་འོང་དུས་ཁོ་ཚོས་བདེ་བ་འདོད་ཀྱང་འཐོབ་པར་མི་འགྱུར།
EZE 7:26 གནོད་འཚེ་ཁར་གནོད་འཚེ་དང་། སྐད་ངན་ཁར་སྐད་ངན་ནི་མཚམས་མེད་པར་ཐོས་འོང་སྟེ། དེ་ནས་ཁོ་ཚོས་ལུང་སྟོན་པར་ཞལ་གཟིགས་ཞུས་ཀྱང་མཆོད་དཔོན་གྱི་བསླབ་བྱ་དང་རྒན་པོའི་ཁྲིད་སྟོན་བཅས་ཡོད་ཚད་ཆད་པར་འགྱུར་བས།
EZE 7:27 རྒྱལ་པོ་ཡིད་སྐྱོ་ཞིང་། འགོ་དཔོན་གྱིས་མྱ་ངན་གོས་སུ་གྱོན་པ་དང་། ཡུལ་དེའི་མི་རྣམས་ཀྱི་ལག་པ་འདར་བའོ། །ངས་དེ་དག་གི་སྤྱོད་པ་བཞིན་དུ་ལན་འཇལ་ཞིང་། ཁོ་ཚོའི་ཆད་པའི་སྲོལ་ལྟར་དེ་དག་ལ་ཉེས་ཆད་གཅོད་པར་བྱ་སྟེ། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 8:1 དེ་ཡང་ལོ་དྲུག་པའི་ཟླ་དྲུག་པ་ཡི་ཚེས་ལྔ་ཉིན་ང་རང་ཁྱིམ་དུ་སྡོད་དུས། ཡ་ཧུ་དཱའི་རྒན་པོ་རྣམས་ཀྱང་ངའི་མདུན་དུ་བསྡད་ཡོད་ཅིང་། དེར་གཙོ་བོ་ཡ་ཝཱེའི་ཐུགས་ཉིད་ངའི་སྟེང་དུ་བབས་པ་དང་།
EZE 8:2 ངས་བལྟས་པ་ན། གཟུགས་བརྙན་མི་དང་འདྲ་བ་ཞིག་མཐོང་སྟེ། དེའི་རྐེད་པའི་མན་ཆད་ནི་མེ་ཡི་དབྱིབས་ལྟ་བུ་ཡོད་པ་དང་། དེའི་རྐེད་པའི་ཡན་ཆད་ནི་འོད་ཟེར་གྱི་དབྱིབས་ལྟ་བུ་ཡོད་ལ། དེ་ནི་འོད་ཟེར་འཕྲོ་བའི་ལྕགས་རིགས་དང་མཚུངས་སོ། །
EZE 8:3 དེས་གཟུགས་དབྱིབས་ཕྱག་དང་འདྲ་བ་ཞིག་བརྐྱངས་ཏེ་ངའི་སྐྲ་ནས་བཟུང་སྟེ། ཐུགས་ཉིད་ཀྱིས་ང་ནི་གནམ་སའི་བར་དུ་ཡར་དྲངས་ཤིང་། དཀོན་མཆོག་གི་ཞལ་གཟིགས་ཀྱི་ནང་དུ། དེས་ང་ནི་ཡེ་རུ་སཱ་ལེམ་གྱི་མཆོད་ཁང་གི་བྱང་སྒོའི་ནང་ཁྱམས་ཀྱི་འཇུག་སྒོར་ཁྲིད་པ་དང་། དེ་རུ་དཀོན་མཆོག་ལ་ཕྲག་དོག་བསྐྱེད་པ་སྟེ། དཀོན་མཆོག་སྡང་བའི་སྐུ་འདྲའི་འདུག་གནས་ཡོད་པའོ། །
EZE 8:4 བསམ་ཡུལ་ལས་འདས་པ་ཞིག་ལ། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེ་རུ་མཆིས་ཏེ། དེའི་གཟུགས་དབྱིབས་ནི་ངས་ཐང་དུ་མཐོང་བ་དང་གཅིག་མཚུངས་ཡིན་ནོ། །
EZE 8:5 ཁོང་གིས་ང་ལ་འདི་སྐད་དུ། ཀྱེ་མིའི་བུ། མགོ་ཡར་བཀྱགས་ནས་བྱང་ཕྱོགས་སུ་ལྟོས་ཤིག་ཅེས་གསུངས་པ་དང་། ངས་མགོ་ཡར་བཀྱགས་ནས་བྱང་ཕྱོགས་སུ་བལྟས་པ་ན། མཆོད་ཁྲིའི་སྒོ་ཡི་བྱང་ཕྱོགས་ཀྱི་འཇུག་སྒོ་རུ་དཀོན་མཆོག་སྡང་བའི་སྐུ་འདྲ་ཡོད་དོ། །
EZE 8:6 ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། དེ་ཚོས་སྐྱུག་བྲོ་བའི་དོན་སྤྱད་ནས་ང་རང་གནས་དམ་པ་དང་འབྲལ་བར་བྱས་པ་ཡིན། ཡེས་ར་ཨེལ་ཁྱིམ་རྒྱུད་ཀྱིས་འདིར་གང་ཞིག་སྤྱད་པ་དག་ཁྱོད་ཀྱིས་མཐོང་ངམ། ཡིན་ཡང་ཁྱོད་ཀྱིས་དེ་ལས་ལྷག་པའི་དོན་ངན་མཐོང་བར་འགྱུར་ཞེས་གསུངས་སོ། །
EZE 8:7 ཡང་ཁོང་གིས་ང་ནི་ཁྱམས་རའི་སྒོ་ཁར་ཁྲིད་ཅིང་། ངས་བལྟས་པ་ན་རྩིག་ངོས་སུ་ཁུང་བུ་ཞིག་ཡོད་པ་མཐོང་སྟེ།
EZE 8:8 ཁོང་གིས་ང་ལ་འདི་སྐད་དུ། ཀྱེ་མིའི་བུ། རྩིག་པ་བརྐོ་བར་མཛོད་ཅེས་གསུངས་པ་དང་། ངས་བརྐོས་པ་ན་བསམ་ཡུལ་ལས་འདས་པ་ཞིག་ལ་སྒོ་ཞིག་མཐོང་བྱུང་།
EZE 8:9 དེ་ནས་ཁོང་གིས་ང་ལ་འདི་སྐད་དུ། ཁྱོད་ནང་དུ་སོང་ལ་དེ་དག་གིས་འདི་རུ་སྤྱད་པའི་ཞེན་ལོག་གི་དོན་ངན་རྣམས་ལ་ལྟོས་ཤིག་ཅེས་གསུངས་པ་དང་།
EZE 8:10 ང་ནང་དུ་སོང་ནས་བལྟས་པ་ན། ཕྱོགས་བཞིའི་རྩིག་ངོས་སུ་ལྟོ་འགྲོ་འབུ་སྲིན་རྣམ་པ་སྣ་ཚོགས་དང་། ཞེན་ཁ་ལོག་པའི་རི་དྭགས་སྣ་ཚོགས། ད་དུང་ཡེས་ར་ཨེལ་ཁྱིམ་རྒྱུད་ཀྱི་སྐུ་འདྲ་ཡོད་དོ་ཅོག་བརྐོས་ཡོད་ལ།
EZE 8:11 ཡེས་ར་ཨེལ་ཁྱིམ་རྒྱུད་ཀྱི་རྒན་པོ་རྣམས་ལས་མི་བདུན་ཅུ་དེ་དག་གི་མདུན་དུ་འགྲེང་ཡོད་དེ། ཤཱ་ཕན་གྱི་བུ་ཡ་ཨ་ཟན་ཡཱ་ཞེས་པའང་དེ་དག་གི་ཁྲོད་དུ་ལངས་བསྡད་ཡོད། ཁོ་ཚོ་རེ་རེའི་ལག་ཏུ་རང་གི་སྤོས་ཕོར་བཟུང་ཡོད་ཅིང་། སྤོས་ཀྱི་དུ་བ་ཡར་འཕྱུར་བཞིན་འདུག
EZE 8:12 དེ་ནས་ཁོང་གིས་ང་ལ་འདི་སྐད་དུ། ཀྱེ་མིའི་བུ། ཡེས་ར་ཨེལ་ཁྱིམ་རྒྱུད་ཀྱི་རྒན་པོ་རྣམས་ཀྱིས་རང་རང་གི་རྐོས་སྐུ་ཡོད་པའི་ཁང་པ་རུ་ལྐོག་ནས་ཅི་ཞིག་བྱས་པ་ཁྱོད་ཀྱིས་མཐོང་ངམ། དེ་དག་ན་རེ། དཀོན་མཆོག་ཡ་ཝཱེས་ངེད་རྣམས་མི་མཐོང་སྟེ། དཀོན་མཆོག་ཡ་ཝཱེ་ཡུལ་འདི་དང་བྲལ་ཏོ་ཞེས་སྨྲ་བ་ཡིན་ཞེས་གསུངས་སོ། །
EZE 8:13 ཡང་ཁོང་གིས་ང་ལ་འདི་སྐད་དུ། ཡང་དེ་ཚོས་སྤྱད་པའི་ཞེན་ལོག་གི་དོན་འདི་ལས་ཀྱང་ལྷག་པ་རྣམས་ཁྱོད་ཀྱིས་མཐོང་བར་འགྱུར་ཞེས་གསུངས་ནས།
EZE 8:14 ཁོང་གིས་ང་རང་དཀོན་མཆོག་ཡ་ཝཱེའི་བཞུགས་གནས་ཀྱི་བྱང་སྒོ་རུ་ཁྲིད་པ་ལ། ལྟོས་དང་། དེ་རུ་བུད་མེད་འགའ་བསྡད་ཡོད་པ་དང་། ཁོ་མོ་རྣམས་ཐམ་མུ་སིའི་ ཕྱིར་དུ་ངུ་བཞིན་འདུག
EZE 8:15 ཁོང་གིས་ང་ལ་འདི་སྐད་དུ། ཀྱེ་མིའི་བུ། ཁྱོད་ཀྱིས་མཐོང་ངམ། ཞེན་ལོག་གི་དོན་འདི་ལས་ཀྱང་ལྷག་པ་རྣམས་ཁྱོད་ཀྱིས་མཐོང་བར་འགྱུར་ཞེས་གསུངས་སོ། །
EZE 8:16 ཡང་ཁོང་གིས་ང་རང་དཀོན་མཆོག་ཡ་ཝཱེའི་བཞུགས་གནས་ཀྱི་ནང་གི་ཁྱམས་རར་ཁྲིད་ཅིང་། ལྟོས་དང་། བར་ཁྱམས་དང་མཆོད་ཁྲིའི་བར་གྱི་དཀོན་མཆོག་ཡ་ཝཱེའི་མཆོད་ཁང་གི་སྒོ་ཁར་མི་ཉེར་ལྔ་ཡོད་དེ། ཁོ་ཚོས་དཀོན་མཆོག་ཡ་ཝཱེའི་མཆོད་ཁང་གི་ཕྱོགས་སུ་རྒྱབ་བསྟན་ཡོད་པ་དང་། གདོང་ཤར་ཕྱོགས་སུ་འཁོར་ཏེ། ཁོ་ཚོས་ཤར་གྱི་ཉི་མའི་ཕྱོགས་སུ་ཕྱག་འཚལ་བཞིན་ཡོད།
EZE 8:17 ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ཁྱོད་ཀྱིས་མཐོང་བྱུང་ངམ། ཡ་ཧུ་དཱའི་ཁྱིམ་རྒྱུད་ཀྱིས་འདིར་ཞེན་ལོག་གི་དོན་རྣམས་སྤྱད་པ་ནི་དོན་ཆུང་ངུ་ཞིག་ཡིན་ནམ། གང་ལ་ཞེ་ན། དེ་དག་གིས་གནས་འདི་ལ་བཙན་ཤུགས་ཀྱིས་ཁེངས་པར་བྱས་པ་དང་། ཡང་ནས་ཡང་དུ་ང་ལ་ཁོང་ཁྲོ་བསླངས། ལྟོས་དང་། དེ་དག་གིས་ལྗོན་ཤིང་གི་ཡལ་ག་རང་གི་སྣ་མདུན་དུ་ཁྱེར་བས།
EZE 8:18 ངས་དེ་དག་ལ་ཁོང་ཁྲོ་ཆེན་པོའི་སྤྱོད་ཚུལ་འཛིན་ཞིང་། ངའི་མིག་གིས་དེ་དག་ལ་ལྟ་སྐྱོང་མི་བྱེད་ལ་སྙིང་རྗེ་ཡང་མི་བསྒོམ། དེ་ཚོས་སྐད་ཆེན་པོས་ངའི་རྣ་ལམ་དུ་ཞུས་ཀྱང་ངས་དེ་དག་ལ་མཉན་པར་མི་བྱའོ་ཞེས་གསུངས་སོ། །
EZE 9:1 ཡང་ཁོང་གིས་སྐད་ཆེན་པོ་རྒྱག་བཞིན་འདི་སྐད་དུ། གྲོང་ཁྱེར་འདི་ལ་ཉེས་ཆད་གཅོད་མཁན་ཁྱོད་རྣམས་ཀྱིས། རེ་རེས་ལག་ཏུ་སྲོག་གཅོད་བྱེད་ཀྱི་མཚོན་ཆ་བཟུང་ནས་ཉེ་སར་ཤོག་ཅིག་ཅེས་གསུངས་པ་ངས་ཐོས་ཤིང་།
EZE 9:2 གློ་བུར་ཉིད་དུ། བྱང་ཕྱོགས་ཀྱི་སྒོ་གོང་མ་ནས་མི་དྲུག་འོངས་པ་དང་རེ་རེའི་ལག་ཏུ་སྲོག་གཅོད་བྱེད་ཀྱི་མཚོན་ཆ་བཟུང་ཡོད། ཁོ་ཚོའི་ཁྲོད་དུ་གཅིག་གིས་སོ་རས་སྲབ་བུ་གྱོན་པ་དང་། རྐེད་པར་སྣག་བུམ་བཏགས་ཡོད་ལ། ཁོ་ཚོ་ནང་དུ་འོངས་ནས་ལི་ཡི་མཆོད་ཁྲིའི་མདུན་དུ་ལངས་བསྡད་དོ། །
EZE 9:3 ཡེས་ར་ཨེལ་གྱི་དཀོན་མཆོག་གི་གཟི་བརྗིད་ནི་ཀེ་རུབ་ཀྱི་གོང་དུ་མཆིས་ཀྱང་། ད་ལྟ་གནས་དེ་ནས་མཆོད་ཁང་གི་སྒོ་ཐེམ་དུ་བསྣུར་བ་དང་། ཡ་ཝཱེས་སོ་རས་སྲབ་བུ་གྱོན་པ་དང་རྐེད་པར་སྣག་བུམ་བཏགས་པའི་མི་དེ་བོས་ནས།
EZE 9:4 མི་དེ་ལ་འདི་སྐད་དུ། ཁྱོད་རང་ཡེ་རུ་སཱ་ལེམ་གྱི་གྲོང་ཁྱེར་ཡོངས་སུ་ཕྱིན་ཏེ། གྲོང་ཁྱེར་ནང་གི་ཞེན་ལོག་གི་ལས་སྤྱད་པའི་ཕྱིར་དབུགས་རིང་གཏོང་བ་དང་ཡིད་སྐྱོ་བའི་མི་ཡི་དཔྲལ་བར་ཀུར་རྟགས་ཤིག་རྒྱོབ་ཅིག་ཅེས་གསུངས་པ་དང་།
EZE 9:5 ཡང་ཁོང་གིས་མི་ལྷག་མ་རྣམས་ལ་འདི་སྐད་དུ། ཁྱོད་རྣམས་མི་དེའི་རྗེས་སུ་འབྲངས་ནས་གྲོང་ཁྱེར་ཡོངས་སུ་སོང་སྟེ་དམར་གསོད་གྱིས་ཤིག ཁྱོད་ཚོས་མིག་གིས་ལྟ་སྐྱོང་མ་བྱེད། སྙིང་རྗེ་ཡང་མ་བསྒོམ་ལ།
EZE 9:6 ཁྱོད་ཚོས་ངའི་གནས་དམ་པ་ནས་འགོ་བརྩམས་ཏེ། རྒན་པ་དང་ན་གཞོན། ན་ཆུང་མ། ཕྲུ་གུ། བུད་མེད་བཅས་ཐམས་ཅད་དམར་གསོད་གྱིས་ཤིག ཡིན་ཡང་དཔྲལ་བར་རྟགས་ཡོད་པ་རྣམས་ལ་གནོད་མ་བསྐྱལ་ཞིག་ཅེས་གསུངས་པ་ངས་ཐོས་ཤིང་། དེ་ནས་ཁོ་ཚོས་མཆོད་ཁང་མདུན་གྱི་རྒན་པོ་རྣམས་ནས་བཟུང་དམར་གསོད་བྱེད་པའི་འགོ་བརྩམས་སོ། །
EZE 9:7 ཡང་ཁོང་གིས་དེ་དག་ལ་འདི་སྐད་དུ། ཁྱོད་ཅག་གིས་མཆོད་ཁང་འདི་བཙོག་པར་བཟོས་ཤིག་དང་། ཁྱམས་རའི་ནང་དུ་བསད་པའི་མི་ཡིས་འགེང་བར་གྱིས་ཤིག ད་ནི་ཁྱོད་རྣམས་ཕྱི་རུ་སོང་ཞིག་ཅེས་གསུངས་པས། དེ་ཚོ་ཕྱི་རུ་སོང་ནས་གྲོང་ཁྱེར་ནང་དུ་དམར་གསོད་བྱས་སོ། །
EZE 9:8 དེ་ཚོས་དམར་གསོད་བྱེད་དུས་ང་གཅིག་པུ་ལུས་པ་དང་། དེ་ནས་ངས་ཁ་སར་གཏད་ནས། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱི་ཁྲོ་གཏུམ་ཆེན་པོ་དེ་ཡེ་རུ་སཱ་ལེམ་གྱི་སྟེང་དུ་བླུགས་ཏེ་ཡེས་ར་ཨེལ་གྱི་མི་ལྷག་ལུས་ཐམས་ཅད་མེད་པར་མཛད་དམ་ཞེས་འོ་དོད་བོས་པ་ན།
EZE 9:9 ཁོང་གིས་ང་ལ་འདི་སྐད་དུ། ཡེས་ར་ཨེལ་དང་ཡ་ཧུ་དཱའི་ཁྱིམ་རྒྱུད་གཉིས་ཀྱི་ཉེས་པ་ཤིན་ཏུ་ཚབས་ཆེ་སྟེ། ཡུལ་ཁམས་སུ་ཁྲག་གིས་བཀང་ཞིང་གྲོང་ཁྱེར་ནང་དུ་ལོག་སྤྱོད་ཀྱིས་བཀང་བའོ། །གང་ལ་ཞེ་ན། དེ་རྣམས་ན་རེ། དཀོན་མཆོག་ཡ་ཝཱེ་ཡུལ་འདི་དང་བྲལ་ཟིན་ཏེ་ཁོང་གིས་ངེད་རྣམས་མི་མཐོང་ངོ་ཞེས་ཟེར་རོ། །
EZE 9:10 དེ་བས། ངས་མིག་གིས་ལྟ་སྐྱོང་མི་བྱེད་ལ་སྙིང་རྗེ་ཡང་མི་བསྒོམ་ཏེ། ངས་ཁོ་ཚོས་སྤྱད་པའི་དོན་བཞིན་དུ་ཁོ་ཚོའི་སྟེང་དུ་ལན་འཇལ་ལོ་ཞེས་གསུངས།
EZE 9:11 དེ་ནས་ལུས་ལ་སོ་རས་སྲབ་བུ་གྱོན་པ་དང་རྐེད་པར་སྣག་བུམ་བཏགས་པའི་མི་དེས་འདི་ལྟར། ངས་ཁྱེད་ཀྱིས་ང་ལ་གནང་བའི་བཀའ་བཞིན་དུ་བསྒྲུབས་པ་ཡིན་ཞེས་ལན་ཞུས་སོ། །
EZE 10:1 དེ་ཡང་ངས་བལྟས་པ་ལ། ཀེ་རུབ་ཀྱི་སྟེང་གི་མཁའ་དབྱིངས་སུ། ཨིནྡྲ་ནཱི་ལའི་བཞུགས་ཁྲི་དང་མཚུངས་པའི་གཟུགས་དབྱིབས་མངོན་པར་གྱུར་ཏེ།
EZE 10:2 གཙོ་བོས་ལུས་ལ་སོ་རས་སྲབ་བུ་གྱོན་པའི་མི་དེ་ལ་འདི་སྐད་དུ། ཁྱོད་ནི་ཀེ་རུབ་ཀྱི་འོག་གི་འཁོར་ལོའི་བར་དུ་སོང་སྟེ། ཀེ་རུབ་ཀྱི་བར་ནས་ལག་པ་གཉིས་ཀས་སོལ་བ་སྤར་གང་ཡར་བླངས་ནས། དེ་གྲོང་ཁྱེར་གྱི་སྟེང་དུ་གཏོར་ཅིག་ཅེས་གསུངས་པ་ན། མི་དེ་ངའི་མདུན་ནས་ནང་དུ་སོང་།
EZE 10:3 མི་དེ་ནང་དུ་འགྲོ་དུས་ཀེ་རུབ་ནི་མཆོད་ཁང་གི་གཡས་ཕྱོགས་སུ་ལངས་སྡོད་ཅིང་། ནང་གི་ཁྱམས་རར་སྤྲིན་གྱིས་ཁེངས་པའོ། །
EZE 10:4 དཀོན་མཆོག་ཡ་ཝཱེའི་གཟི་བརྗིད་ནི་ཀེ་རུབ་ཀྱི་སྟེང་ནས་ཡར་བཞེངས་ཏེ་མཆོད་ཁང་གི་སྒོ་ཐེམ་དུ་སླེབས་ཤིང་། མཆོད་ཁང་ནང་དུ་སྤྲིན་གྱིས་ཁེངས་པ་དང་། ཁྱམས་ར་ཡང་དཀོན་མཆོག་ཡ་ཝཱེའི་གཟི་བརྗིད་ཀྱི་འོད་ཟེར་གྱིས་ཁྱབ།
EZE 10:5 ཀེ་རུབ་རྣམས་ཀྱི་གཤོག་སྒྲ་ནི་ཁྱམས་ར་ཕྱི་མར་ཡང་ཐོས་ཤིང་། དེ་ནི་ཀུན་དབང་དཀོན་མཆོག་གི་གསུང་སྐད་དང་འདྲའོ། །
EZE 10:6 དེ་ནས་ཁོང་གིས་ལུས་ལ་སོ་རས་སྲབ་བུ་གྱོན་པའི་མི་དེར་བཀའ་བསྒོས་ཤིང་འདི་སྐད་དུ། ཁྱོད་ཀྱིས་འཁོར་ལོའི་བར་ཏེ་ཀེ་རུབ་ཀྱི་བར་ནས་མེ་ལོངས་ཤིག་ཅེས་གསུངས་པ་དང་། མི་དེ་ནང་དུ་སོང་ནས་འཁོར་ལོ་ཞིག་གི་མདུན་དུ་ལངས་བསྡད་ཅིང་།
EZE 10:7 ཀེ་རུབ་རྣམས་ལས་གཅིག་གིས་ཀེ་རུབ་རྣམས་ཀྱི་དཀྱིལ་ལ་ཡོད་པའི་མེའི་ཕྱོགས་སུ་ལག་པ་བརྐྱངས་ནས་མེ་བླངས་ཏེ་སོ་རས་སྲབ་བུ་གྱོན་པའི་མི་དེའི་ལག་ཏུ་བཞག་པས། མི་དེས་མེ་ཁྱེར་ནས་ཕྱི་རུ་སོང་ངོ་། །
EZE 10:8 ཡང་ཀེ་རུབ་རྣམས་ཀྱི་གཤོག་པའི་འོག་ཏུ་མིའི་ལག་པ་ལྟ་བུའི་དབྱིབས་ཤིག་མཐོང་བྱུང་།
EZE 10:9 ངས་བལྟས་པ་དང་། ཀེ་རུབ་རྣམས་ཀྱི་ལོགས་སུ་འཁོར་ལོ་བཞི་ཡོད་དེ། ཀེ་རུབ་རེའི་ལོགས་སུ་འཁོར་ལོ་རེ་ཡོད་པ་དང་། འཁོར་ལོ་དེའི་དབྱིབས་ནི་འོད་ཟེར་ལྡན་པའི་བཻཌཱུརྱ་ལྗང་སེར་ལྟ་བུ་ཡིན་ནོ། །
EZE 10:10 འཁོར་ལོ་བཞི་པོའི་དབྱིབས་དང་གྲུབ་ཚུལ་ནི་རྣམ་པ་གཅིག་ཡིན་ཞིང་། འཁོར་ལོ་རྣམས་གཅིག་ལ་གཅིག་སྦྲེལ་ཡོད་པ་འདྲ།
EZE 10:11 འཁོར་ལོ་དེ་དག་ཕྱོགས་བཞི་རུ་སྐྱོད་ནུས་ཤིང་། སྐྱོད་པའི་དུས་སུ་ཁ་ལོ་བསྒྱུར་མི་དགོས་ལ། ཀེ་རུབ་ཀྱི་མགོ་ནི་ཕྱོགས་གང་དུ་འཁོར་ན་དེ་རྣམས་རྗེས་སུ་འབྲངས་ནས་སྐྱོད་པ་དང་། སྐྱོད་པའི་དུས་སུ་ཁ་ལོ་བསྒྱུར་མི་དགོས་སོ། །
EZE 10:12 ཡང་ཀེ་རུབ་ཀྱི་ལུས་ཡོངས་དང་རྒྱབ། ལག་པ། གཤོག་པ། ད་དུང་འཁོར་ལོ་རྣམས་ལ་མིག་གིས་བཀང་ཡོད་དེ། ཀེ་རུབ་བཞི་པོའི་འཁོར་ལོ་ཚང་མ་དེ་བཞིན་ཡིན་ནོ། །
EZE 10:13 འཁོར་ལོ་དེ་དག་ལ་མཚོན་ན། དེ་རྣམས་ལ་འཁོར་སྐྱོད་བྱེད་པའི་འཁོར་ལོ་ཞེས་འབོད་པ་ངས་ཐོས་བྱུང་།
EZE 10:14 ཀེ་རུབ་རེ་ལ་གདོང་བཞི་རེ་ཡོད་དེ། དང་པོ་ནི་ཀེ་རུབ་ཀྱི་གདོང་དང་། གཉིས་པ་མི་ཡི་གདོང་། གསུམ་པ་སེང་གེའི་གདོང་། བཞི་པ་གླག་གི་གདོང་བཅས་ཡིན་ཞིང་།
EZE 10:15 ཕྱིས་སུ་ཀེ་རུབ་རྣམས་ཀྱང་ཡར་འཕགས་ཤིང་། འདི་དག་ནི་ངས་ཀེ་བར་ཡུར་བའི་འགྲམ་དུ་མཐོང་བའི་སེམས་ཅན་དེ་རྣམས་སོ། །
EZE 10:16 ཀེ་རུབ་རྣམས་སྐྱོད་དུས་སུ་འཁོར་ལོ་རྣམས་ཀྱང་དེ་ཚོའི་གམ་དུ་སྐྱོད་པ་དང་། ཀེ་རུབ་རྣམས་ཀྱིས་གཤོག་པ་བརྐྱངས་ནས་ས་ངོས་དང་བྲལ་ཏེ་འཕུར་བའི་སྐབས་སུ་འཁོར་ལོ་རྣམས་ཀྱང་དེ་དག་དང་མི་འབྲལ་ལོ། །
EZE 10:17 དེ་རྣམས་ལངས་ནས་སྡོད་དུས་འཁོར་ལོ་དག་ཀྱང་ལངས་སྡོད་པ་ཡིན། དེ་རྣམས་ཡར་འཕགས་དུས་འཁོར་ལོ་རྣམས་ཀྱང་དེ་རྣམས་དང་མཉམ་དུ་ཡར་འཕགས། གང་ལ་ཞེ་ན། སེམས་ཅན་རྣམས་ཀྱི་ཐུགས་ཉིད་ནི་འཁོར་ལོའི་ནང་དུ་ཡོད་པའོ། །
EZE 10:18 དེ་ནས་དཀོན་མཆོག་ཡ་ཝཱེའི་གཟི་བརྗིད་ནི་མཆོད་ཁང་གི་སྒོ་ཐེམ་ལས་བཞུད་དེ་ཀེ་རུབ་རྣམས་ཀྱི་སྟེང་དུ་བཞུགས་པ་དང་།
EZE 10:19 ཀེ་རུབ་རྣམས་འབྲལ་དུས་སུ་དེ་དག་གིས་ངའི་མདུན་དུ་གཤོག་པ་བརྐྱངས་ནས་ས་ངོས་ལས་བྲལ་ཏེ་འཕུར་ཞིང་། འཁོར་ལོ་རྣམས་ཀྱང་དེ་དང་མཉམ་དུ་ཡོད་པ་དང་། དེ་རྣམས་དཀོན་མཆོག་ཡ་ཝཱེའི་མཆོད་ཁང་གི་ཤར་སྒོ་རུ་བསྡད། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེ་དག་གི་གོང་དུ་ཡོད་དོ། །
EZE 10:20 དེ་དག་ནི་ངས་ཀེ་བར་ཡུར་བའི་འགྲམ་དུ་མཐོང་བའི་ཡེས་ར་ཨེལ་གྱི་དཀོན་མཆོག་གི་གཟི་བརྗིད་འོག་ཏུ་གནས་པའི་སེམས་ཅན་ཡིན་པས། དེ་དག་ཀེ་རུབ་ཡིན་པ་ངས་རྟོགས་སོང་།
EZE 10:21 ཀེ་རུབ་བཞི་པོ་དེ་རེ་རེར་གདོང་བཞི་རེ་དང་གཤོག་པ་བཞི་རེ་ཡོད་དེ། གཤོག་པའི་འོག་ཏུ་མིའི་ལག་པ་ལྟ་བུའི་དབྱིབས་ཤིག་ཡོད།
EZE 10:22 ཁོ་ཚོའི་གདོང་གི་གཟུགས་དབྱིབས་ནི། དེ་སྔར་ངས་ཀེ་བར་ཡུར་བའི་འགྲམ་དུ་མཐོང་བ་དང་མཚུངས་ཤིང་། ཁོ་ཚོ་རེ་རེ་མདུན་དུ་སྐྱོད་ཀྱིན་ཡོད་དོ། །
EZE 11:1 དེ་ནས་ཐུགས་ཉིད་ཀྱིས་ང་རང་ཡར་དྲངས་ཏེ། དཀོན་མཆོག་ཡ་ཝཱེའི་མཆོད་ཁང་གི་ཤར་ཕྱོགས་སུ་འཁོར་བའི་ཤར་སྒོ་རུ་ཁྲིད་པ་ལ། ལྟོས་དང་། སྒོ་ཁ་རུ་མི་ཉེར་ལྔ་ཡོད་ཅིང་དེ་དག་གི་ཁྲོད་དུ་མི་རྣམས་ཀྱི་འགོ་དཔོན་ཨ་ཟུར་གྱི་བུ་ཡ་ཨ་ཟན་ཡཱ་དང་། པེ་ནཱ་ཡའི་བུ་ཕེ་ལད་ཡཱ་གཉིས་ཡོད་པ་ངས་མཐོང་བྱུང་།
EZE 11:2 དཀོན་མཆོག་ཡ་ཝཱེས་ང་ལ་འདི་སྐད་དུ། ཀྱེ་མིའི་བུ། འདི་དག་ནི་སྡིག་པའི་ཇུས་འགོད་མཁན་དང་། གྲོང་ཁྱེར་ནང་དུ་གྲོས་ངན་བྱེད་མཁན་རྣམས་ཡིན་ཏེ།
EZE 11:3 ཁོ་ཚོ་ན་རེ། ཁང་པ་བརྩིག་པའི་དུས་ནི་ད་དུང་མ་སླེབས་ཏེ། གྲོང་ཁྱེར་འདི་ནི་སླ་ང་ཡིན་ལ། རང་ཅག་ནི་ཤ་དེ་ཡིན་ཟེར་བས།
EZE 11:4 ཀྱེ་མིའི་བུ། ཁྱོད་ཀྱིས་ལུང་སྟོན་ཅིག ལུང་བསྟན་ནས་དེ་ཚོར་རྒོལ་བར་གྱིས་ཤིག་ཅེས་གསུངས་སོ། །
EZE 11:5 དཀོན་མཆོག་ཡ་ཝཱེའི་ཐུགས་ཉིད་ངའི་སྟེང་དུ་བབས་ནས་ཁོང་གིས་ང་ལ་འདི་སྐད་དུ། ཁྱོད་ཀྱིས་འདི་ལྟར་སྨྲོས་ཤིག དཀོན་མཆོག་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཚོས་ངག་ནས་བརྗོད་པ་དང་སེམས་ལ་དྲན་པ་ཐམས་ཅད་ངས་ཤེས་སོ། །
EZE 11:6 ཁྱོད་རྣམས་ཀྱིས་གྲོང་ཁྱེར་འདིའི་ནང་དུ་མི་གང་མང་བསད་དེ། སྲང་ལམ་དུ་བམ་རོས་བཀང་བར་བྱས་པས།
EZE 11:7 གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་གྲོང་ཁྱེར་ནང་དུ་གཡུགས་པའི་གཤིན་པོ་རྣམས་ནི་ཤ་དེ་ཡིན་ཞིང་། གྲོང་ཁྱེར་འདི་ནི་སླ་ང་ཡིན། ཁྱོད་ཚོ་ནི་གྲོང་ཁྱེར་ནས་ཕྱི་རུ་སྐྲོད་པར་འགྱུར།
EZE 11:8 ཁྱོད་རྣམས་རལ་གྲིར་འཇིགས་པས་ངས་ཁྱོད་ཅག་གི་སྟེང་དུ་རལ་གྲི་འབེབ་པར་བྱའོ་ཞེས་གསུངས་ཏེ། གཙོ་བོ་ཡ་ཝཱེས་འདི་སྐད་གསུངས།
EZE 11:9 ངས་ཁྱོད་རྣམས་གྲོང་ཁྱེར་ནས་ཕྱི་རུ་བསྐྲད་དེ་ཕྱི་རོལ་པའི་ལག་ཏུ་གཏོད་ཅིང་། ངས་ཁྱོད་རྣམས་ལ་ཉེས་ཆད་གཅོད་པར་བྱའོ། །
EZE 11:10 ཡེས་ར་ཨེལ་གྱི་ས་མཚམས་བར་དུ་ངས་ཁྱོད་རྣམས་ལ་ཁྲིམས་གཅོད་དེ། ཁྱོད་རྣམས་རལ་གྲིའི་འོག་ཏུ་འགྱེལ་བར་འགྱུར་ཞིང་། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 11:11 གྲོང་ཁྱེར་འདི་ནི་ཁྱོད་ཚོའི་སླ་ང་རུ་མི་འགྱུར་ཞིང་། ཁྱོད་རྣམས་ཀྱང་དེའི་ནང་གི་ཤ་རུ་མི་འགྱུར་ཏེ། ཡེས་ར་ཨེལ་གྱི་ས་མཚམས་བར་དུ་ངས་ཁྱོད་རྣམས་ལ་ཁྲིམས་གཅོད་པ་དང་།
EZE 11:12 དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར། གང་ལ་ཞེ་ན། ཁྱོད་ཚོས་ངའི་སྒྲིག་ཁྲིམས་མ་བརྩིས་ཤིང་། ངའི་སྒྲིག་སྲོལ་ཡང་བརྩི་སྲུང་མ་བྱས་པར། ཁྱོད་ཚོའི་ཉེ་འཁོར་གྱི་མི་རིགས་རྣམས་ཀྱི་ཚུལ་བཞིན་དུ་སྤྱད་པ་ཡིན་གསུངས་ཞེས་པའོ་ཞེས་གསུངས་སོ། །
EZE 11:13 ཡང་ངས་ལུང་སྟོན་བཞིན་པའི་དུས་སུ་པེ་ནཱ་ཡའི་བུ་ཕེ་ལད་ཡཱ་ཤིའོ། །དེ་ནས་ངས་ཁ་སར་གཏད་ནས་སྐད་ཆེན་པོས་འདི་ལྟར། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཡེས་ར་ཨེལ་གྱི་ལྷག་ལུས་རྣམས་ཀྱང་མེད་པར་མཛད་དམ་ཞེས་ཞུས་པ་ཡིན།
EZE 11:14 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 11:15 ཀྱེ་མིའི་བུ། ཁྱོད་ཀྱི་སྤུན་ཟླ་རྣམས་དང་། གཉེན་ཉེ་དག་དང་། ཁྱོད་དང་མཉམ་དུ་བཙོན་ལ་ཁྲིད་པ་རྣམས་དང་། ཡེས་ར་ཨེལ་གྱི་ཁྱིམ་རྒྱུད་ཀུན་གྱི་སྐོར་གླེང་ན། དེ་སྔར་ཡེ་རུ་སཱ་ལེམ་གྱི་མི་རྣམས་ན་རེ། ཁོ་རྣམས་དཀོན་མཆོག་ཡ་ཝཱེ་དང་རིང་དུ་བྲལ་ཞིང་། ཡུལ་འདི་ནི་ང་ཚོའི་ནོར་སྐལ་དུ་གནང་བ་ཡིན་ཞེས་ཟེར་བས།
EZE 11:16 ཁྱོད་ཀྱིས་འདི་ལྟར། གཙོ་བོ་ཡ་ཝཱེས་འདི་སྐད་དུ། ངས་དེ་དག་རྒྱང་རིང་ཡུལ་དུ་མི་རིགས་ཀུན་གྱི་ཁྲོད་དུ་བསྐྲད་ནས་ཁོ་རྣམས་ཡུལ་སོ་སོར་གཏོར་ན་ཡང་། དེ་རྣམས་སླེབས་པའི་ཡུལ་སོ་སོར་ང་རང་ཁོ་ཚོའི་གནས་སྐབས་ཀྱི་གནས་དམ་པ་རུ་གྱུར་པ་ཡིན་ཞེས་གསུངས་ཞེས་སྨྲོས་ཤིག
EZE 11:17 དེ་བས་ཁྱོད་ཀྱིས་འདི་ལྟར། གཙོ་བོ་ཡ་ཝཱེས་འདི་སྐད་དུ། ངས་མི་རྣམས་ཀྱི་ཁྲོད་ནས་ཁྱོད་རྣམས་བསྡུ་བར་བྱ་སྟེ། ཁྱོད་རྣམས་གཏོར་བའི་ཡུལ་སོ་སོ་ནས་བསྡུས་ཏེ་ཡེས་ར་ཨེལ་གྱི་ཡུལ་ཁམས་ཁྱོད་ཅག་ལ་གནང་བར་བྱའོ་གསུངས་ཞེས་སྨྲོས་ཤིག
EZE 11:18 དེ་ནས་ཁོ་རྣམས་ཕྱིར་ཡུལ་དེར་ལོག་ཅིང་། ཡུལ་དེའི་ཞེན་ལོག་གི་སྐུ་འདྲ་དང་སྐྱུག་བྲོ་བའི་དངོས་པོ་ཐམས་ཅད་མེད་པར་བཟོའོ། །
EZE 11:19 ངས་དེ་དག་ལ་སེམས་གཅིག་གནང་སྟེ། སེམས་ཉིད་གསར་པ་ཞིག་ཁོ་ཚོའི་ནང་དུ་བཞག་ནས། ངས་ཁོ་ཚོའི་ལུས་ནས་རྡོ་ལྟ་བུའི་སེམས་དེ་བཏོན་ནས་ཤ་ཡི་སྙིང་ཞིག་ཁོ་རྣམས་ལ་གནང་བར་བྱ་སྟེ།
EZE 11:20 དེ་དག་ལ་ངའི་སྒྲིག་ཁྲིམས་བརྩི་བ་དང་ངའི་སྒྲིག་སྲོལ་ནན་གྱིས་བསྲུང་བར་བཅུག་ནས། དེ་དག་ནི་བདག་གི་འབངས་མི་དང་ང་རང་དེ་དག་གི་དཀོན་མཆོག་ཏུ་འགྱུར་བར་བྱའོ། །
EZE 11:21 ཡིན་ནའང་སེམས་ནས་ཞེན་ལོག་གི་སྐུ་འདྲ་དང་སྐྱུག་བྲོ་བའི་དངོས་པོ་རྣམས་ཀྱི་རྗེས་སུ་འབྲངས་པའི་མི་དག་ལ། དེ་དག་གིས་སྤྱད་པའི་ལས་བཞིན་དུ་ངས་ཁོ་ཚོའི་སྟེང་དུ་ལན་འཇལ་ལོ་ཞེས་གཙོ་བོ་ཡ་ཝཱེས་གསུངས་སོ། །
EZE 11:22 དེ་ནས་ཀེ་རུབ་རྣམས་ཀྱིས་གཤོག་པ་བརྐྱངས་ཤིང་འཁོར་ལོ་རྣམས་དེ་དག་གི་ལོགས་སུ་ཡོད་དེ། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེ་དག་གི་སྟེང་དུ་མཆིས་སོ། །
EZE 11:23 དཀོན་མཆོག་ཡ་ཝཱེའི་གཟི་བརྗིད་གྲོང་ཁྱེར་ནས་ཡར་འཕགས་ཏེ། གྲོང་ཁྱེར་ཤར་ཕྱོགས་ཀྱི་རི་མགོར་བཞུགས་ཤིང་།
EZE 11:24 ཐུགས་ཉིད་ཀྱིས་ང་ཡར་དྲངས་པ་དང་། ཞལ་གཟིགས་ཀྱི་ནང་དུ་དཀོན་མཆོག་གི་ཐུགས་ཉིད་ལ་བརྟེན་ནས། ང་ནི་ཀལ་དི་རུ་བཙོན་པ་རྣམས་ཀྱི་རྩར་ཁྲིད་ཅིང་། ངས་མཐོང་བའི་ཞལ་གཟིགས་དེ་ང་དང་བྲལ་ནས་ཡར་འཕགས་སོ། །
EZE 11:25 དེ་ནས་ངས་དཀོན་མཆོག་ཡ་ཝཱེས་ང་ལ་བསྟན་པའི་དོན་ཐམས་ཅད་བཙོན་པ་རྣམས་ལ་བཤད་དོ། །
EZE 12:1 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 12:2 ཀྱེ་མིའི་བུ། ཁྱོད་ནི་གྱེན་ལོག་གི་མི་རྣམས་ཁྲོད་དུ་བསྡད་ཡོད་པ་དང་། དེ་དག་ལ་ལྟ་བའི་མིག་ཡོད་ཀྱང་མི་མཐོང་ལ། ཉན་པའི་རྣ་ཡོད་ཀྱང་མི་ཐོས་ཏེ། གང་ལ་ཞེ་ན། དེ་དག་ནི་ཁྱིམ་རྒྱུད་ངོ་ལོག་ཅན་ཡིན་པས་སོ། །
EZE 12:3 དེ་བས། ཀྱེ་མིའི་བུ། ཁྱོད་ཀྱིས་རང་གི་དོན་དུ་བཙོན་ལ་ཁྲིད་སྐབས་མཁོ་བའི་དངོས་པོ་རྣམས་གྲ་སྒྲིག་གྱིས་ཤིག ཉིན་དཀར་དེ་ཚོའི་མདུན་ནས་ཕར་སོང་ཞིག ཡང་རང་ཉིད་འདུག་ས་ནས་གནས་གཞན་དུ་སྤོས་ཤིག དེ་དག་ཁྱིམ་རྒྱུད་ངོ་ལོག་ཅན་ཡིན་ན་ཡང་མིག་གིས་མཐོང་རྗེས་ཁོ་ཚོས་རྟོགས་ཀྱང་སྲིད།
EZE 12:4 ཁྱོད་ཀྱིས་ཉིན་དཀར་ཁོ་ཚོའི་མདུན་དུ་རང་གི་དངོས་པོ་སྟེ་བཙོན་ལ་ཁྲིད་སྐབས་མཁོ་བའི་དངོས་པོ་དང་འདྲ་བ་རྣམས་སྒོའི་ཕྱི་རུ་བཞག་ནས། མཚན་མོའི་དུས་སུ་ཁྱོད་ནི་བཙོན་དུ་ཁྲིད་པའི་མི་བཞིན་དུ། དེ་དག་གི་མདུན་ནས་ཕྱི་རུ་སོང་ཞིག
EZE 12:5 ཁྱོད་ཀྱིས་ཁོ་ཚོའི་མདུན་དུ་གྱང་ལ་ཁུང་བུ་དྲུས་ཏེ་ཁྱོད་ཀྱི་དངོས་པོ་རྣམས་དེ་ནས་ཕྱི་རུ་ཁྱེར་ཞིག
EZE 12:6 མུན་རུབ་པའི་དུས་སུ་ཁྱོད་ཀྱིས་ཁོ་ཚོའི་མདུན་ནས་དངོས་པོ་དེ་དག་ཕྲག་པར་ཁུར་ཏེ་ཕྱི་རུ་ཁྱེར་ཞིག་དང་། ངས་ཁྱོད་ནི་ཡེས་ར་ཨེལ་ཁྱིམ་རྒྱུད་ཀྱི་སྔ་ལྟས་སུ་མཛད་པས། ཁྱོད་ཀྱིས་ཡུལ་འདི་མི་མཐོང་བའི་ཕྱིར་རང་གི་གདོང་ཐུམས་ཤིག་ཅེས་གསུངས་སོ། །
EZE 12:7 དེ་ནས་ངས་ཁོང་གིས་བཀའ་བསྒོས་པ་བཞིན་བྱས་ཏེ། ཉིན་དཀར་ངའི་དངོས་པོ་སྟེ་བཙོན་དུ་ཁྲིད་སྐབས་མཁོ་བའི་དངོས་པོ་དང་འདྲ་བ་རྣམས་སྒོའི་ཕྱི་རུ་བཞག་པ་དང་། ས་སྲོད་ཀྱི་དུས་སུ་ངས་ལག་པས་གྱང་ལ་ཁུང་བུ་དྲུས་ཤིང་། མཚན་མོ་ངས་ཁོ་ཚོའི་མདུན་དུ་དངོས་པོ་དེ་དག་ཕྲག་པར་ཁུར་ནས་ཕྱི་རུ་ཁྱེར་བའོ། །
EZE 12:8 ཞོགས་པའི་དུས་སུ་དཀོན་མཆོག་ཡ་ཝཱེའི་བཀའ་ང་ལ་བྱུང་ནས་འདི་སྐད་དུ།
EZE 12:9 ཀྱེ་མིའི་བུ། ཡེས་ར་ཨེལ་གྱི་ཁྱིམ་རྒྱུད་དེ་ཁྱིམ་རྒྱུད་ངོ་ལོག་ཅན་གྱིས་ཁྱོད་ལ། ཁྱོད་ཀྱིས་ཅི་བྱེད་དམ་ཞེས་འདྲི་བ་མ་ཡིན་ནམ།
EZE 12:10 ཁྱོད་ཀྱིས་དེ་དག་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། ལུང་བསྟན་འདི་ནི་ཡེ་རུ་སཱ་ལེམ་གྱི་རྒྱལ་པོ་དང་དེའི་ནང་གི་ཡེས་ར་ཨེལ་གྱི་ཁྱིམ་རྒྱུད་དང་འབྲེལ་ལོ་ཞེས་སྨྲོས་ཤིག
EZE 12:11 ཁྱོད་ཀྱིས་འདི་ལྟར། བདག་ནི་ཁྱོད་ཚོའི་སྔ་ལྟས་ཤིག་ཡིན་པས། བདག་གིས་ཅི་ལྟར་སྤྱད་ན་ཁོ་ཚོ་ལའང་དེ་བཞིན་འབྱུང་བར་འགྱུར་ཏེ། ཁོ་རྣམས་བཙོན་དུ་འཁྲིད་པར་འགྱུར་ཞེས་སྨྲོས་ཤིག
EZE 12:12 ཁོ་ཚོའི་ཁྲོད་ཀྱི་རྒྱལ་པོས་ས་སྲོད་ཀྱི་དུས་སུ་དངོས་པོ་རྣམས་ཕྲག་པར་ཁུར་ནས་འགྲོ་ལ། དེ་ཚོས་གྱང་ལ་ཁུང་བུ་དྲུས་ནས་རྒྱལ་པོ་དེ་ནས་ཕྱི་རུ་འཁྱེར་ཞིང་། ཡང་དེས་རང་གི་གདོང་བཏུམས་ནས་ཡུལ་འདི་མི་མཐོང་ངོ་། །
EZE 12:13 བདག་གིས་རང་གི་དྲ་དེའི་སྟེང་དུ་གཏོང་བར་བྱ་ཞིང་ངའི་དྲ་བས་དེ་འཛིན་པར་འགྱུར་བ་དང་། ཡང་བདག་གིས་དེ་ཀལ་དི་པའི་ཡུལ་ཏེ་པཱ་པེལ་ལོན་དུ་འཁྲིད་ཅིང་། ཁོས་ཡུལ་དེ་མི་མཐོང་ཡང་དེ་རུ་འཆི་བར་འགྱུར།
EZE 12:14 བདག་གིས་དེའི་མཐའ་འཁོར་གྱི་མི་རྣམས་ཏེ། ཁོ་ལ་རོགས་བྱེད་མཁན་དག་དང་ཁོའི་དམག་དཔུང་ཐམས་ཅད་ཕྱོགས་བཞི་རུ་གཏོར་ཏེ། རལ་གྲི་ཕྱུང་ནས་དེ་དག་གི་རྗེས་འདེད་པར་བྱའོ། །
EZE 12:15 བདག་གིས་དེ་རྣམས་ཕྱི་རོལ་པའི་མི་རིགས་སོ་སོའི་ནང་དུ་གཏོར་ཏེ། ཡུལ་ཕྱོགས་སོ་སོར་ཁ་ཐོར་དུ་འགྲོ་རུ་འཇུག་དུས་སུ། དེ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 12:16 ཡིན་ནའང་དེ་དག་གིས་རང་རང་སླེབས་སའི་མི་རིགས་ཀུན་གྱི་ནང་དུ། རང་གི་ཞེན་ཁ་ལོག་པའི་དོན་རྣམས་སྨྲ་བའི་ཕྱིར་དུ་ངས་དེ་ལས་མི་གྲངས་ཉུང་ངུ་ཞིག་ལུས་པར་བྱེད་ཅིང་། རལ་གྲི་དང་མུ་གེ རིམས་ནད་བཅས་ལས་ཐར་བར་བཅུག་ན། དེ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 12:17 དཀོན་མཆོག་ཡ་ཝཱེའི་བཀའ་ནི་ཡང་བསྐྱར་ང་ལ་བྱུང་ནས་འདི་སྐད་དུ།
EZE 12:18 ཀྱེ་མིའི་བུ། ཁྱོད་ཀྱིས་སྐྲག་སྐྲག་འདར་འདར་ངང་རང་གི་ཁ་ཟས་སྤྱོད་དང་། དངངས་འཚབ་དང་བཅས་རང་གི་ཆུ་ཐུངས་ཤིག
EZE 12:19 ཁྱོད་ཀྱིས་ཡུལ་འདིའི་མི་རྣམས་ལ་འདི་ལྟར། ཡེ་རུ་སཱ་ལེམ་གྱི་མི་རྣམས་དང་ཡེས་ར་ཨེལ་གྱི་ཡུལ་ཁམས་ཀྱི་སྐོར་ལ། གཙོ་བོ་ཡ་ཝཱེས་འདི་སྐད་དུ། ཁོ་ཚོས་སེམས་ཁྲལ་དང་བཅས་རང་གི་ཁ་ཟས་སྤྱོད་ཅིང་། འཇིགས་སྐྲག་ངང་རང་གི་ཆུ་བཏུང་བ་ཡིན་ཏེ། གང་ལ་ཞེ་ན། མི་ཀུན་གྱི་བཙན་ཤུགས་ཀྱི་དབང་གིས་ཡུལ་འདི་ནི་ཡོངས་སུ་སྟོང་བར་འགྱུར་རོ། །
EZE 12:20 མི་འདུག་སའི་གྲོང་ཁྱེར་རྣམས་སྟོང་བར་འགྱུར་ཞིང་། ཡུལ་ཁམས་འདི་ཡང་སྟོང་བར་འགྱུར་བ་དང་། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་སྨྲོས་ཤིག་ཅེས་གསུངས་སོ། །
EZE 12:21 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 12:22 ཀྱེ་མིའི་བུ། ཁྱོད་ཅག་ལ་ཡེས་ར་ཨེལ་གྱི་ཡུལ་དུ། ཞག་རྣམས་ཉིན་རེ་བཞིན་དུ་འདས། །ཞལ་གཟིགས་ཐམས་ཅད་སྟོང་བར་གྱུར། །ཞེས་པའི་ཁ་དཔེ་ཞིག་ཡོད་པ་དེ་ཅི་ཡིན་ནམ།
EZE 12:23 དེ་བས་ཁྱོད་ཀྱིས་དེ་དག་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། ངས་ཁ་དཔེ་འདི་ད་ནི་དར་བར་མི་བྱ་སྟེ། ཕྱིན་ཆད་ཡེས་ར་ཨེལ་གྱི་ནང་དུ་མི་ཡིས་ཁ་དཔེ་འདི་མི་འདྲེན་ཞེས་པའོ། །ཡིན་ནའང་ཁྱོད་ཀྱིས་དེ་རྣམས་ལ། ཉིན་མོ་དེ་ནི་སླེབས་ལ་ཉེ། །ཞལ་གཟིགས་མཐའ་དག་འགྲུབ་པར་འགྱུར་ཞེས་སྨྲོས་ཤིག
EZE 12:24 དུས་དེ་ནས་བཟུང་ཡེས་ར་ཨེལ་གྱི་ཁྱིམ་རྒྱུད་ནང་དུ་ཞལ་གཟིགས་རྫུས་མ་དང་ངོ་བསྟོད་བྱེད་པའི་མོ་བ་འབྱུང་བར་མི་འགྱུར།
EZE 12:25 གང་ལ་ཞེ་ན། བདག་ནི་ཡ་ཝཱེ་ཡིན་ཏེ་བདག་གིས་བཀའ་གསུང་བར་འགྱུར་ཞིང་གསུངས་པའི་བཀའ་དེ་གང་ཞིག་ཡིན་ཡང་འགྲུབ་ངེས་ཤིང་དུས་འགྱང་མི་བྱའོ། །ཀྱེ་ཁྱིམ་རྒྱུད་ངོ་ལོག་ཅན། ངས་གསུངས་པའི་བཀའ་རྣམས་ཁྱོད་ཚོ་ད་དུང་གསོན་པའི་དུས་སུ་འགྲུབ་པར་འགྱུར་གསུངས་ཞེས་གཙོ་བོ་ཡ་ཝཱེས་གསུངས་སོ། །
EZE 12:26 དཀོན་མཆོག་ཡ་ཝཱེའི་བཀའ་ནི་ཡང་བསྐྱར་ང་ལ་བྱུང་ནས་འདི་སྐད་དུ།
EZE 12:27 ཀྱེ་མིའི་བུ། ལྟོས་དང་། ཡེས་ར་ཨེལ་གྱི་ཁྱིམ་རྒྱུད་རྣམས་ན་རེ། མི་འདིས་མཐོང་བའི་ཞལ་གཟིགས་ནི་དུས་ཡུན་རིང་པོའི་རྗེས་ཀྱི་དོན་དང་འབྲེལ་ཏེ། ཁོས་ལུང་བསྟན་པ་དེ་ནི་རྒྱང་རིང་གི་མ་འོངས་པ་བསྟན་པ་ཡིན་ཞེས་ཟེར་བས་ན།
EZE 12:28 ཁྱོད་ཀྱིས་དེ་རྣམས་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ངའི་གསུང་ཐམས་ཅད་ཚིག་གཅིག་ཀྱང་དུས་འགྱང་བར་མི་བྱ་སྟེ། ངས་གསུངས་པ་ཐམས་ཅད་འགྲུབ་པར་འགྱུར་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 13:1 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 13:2 ཀྱེ་མིའི་བུ། ཡེས་ར་ཨེལ་གྱི་ནང་དུ་ལུང་སྟོན་མཁན་ལུང་སྟོན་པ་དེ་རྣམས་ལ་ཁྱོད་ཀྱིས་ལུང་བསྟན་ནས་རྒོལ་ཞིག་དང་། རང་གི་བསམ་འདུན་བཞིན་དུ་ལུང་སྟོན་མཁན་དེ་དག་ལ་འདི་ལྟར་སྨྲོས་ཤིག ཁྱོད་རྣམས་ཀྱིས་དཀོན་མཆོག་ཡ་ཝཱེའི་གསུང་ལ་ཉོན་ཅིག་ཅེས་པའོ་ཞེས་གསུངས།
EZE 13:3 གཙོ་བོ་ཡ་ཝཱེས་འདི་སྐད་དུ། ཞལ་གཟིགས་ཅི་ཡང་མ་མཐོང་བར་རང་གི་སེམས་ཉིད་བཞིན་དུ་ལུང་སྟོན་མཁན་གྱི་ལུང་སྟོན་པ་བླུན་པོ་དེ་དག་ལ་ཆག་སྒོ་འབྱུང་།
EZE 13:4 ཀྱེ་ཡེས་ར་ཨེལ། ཁྱོད་ཀྱི་ལུང་སྟོན་པ་རྣམས་ནི་ཞིག་རལ་སྟེང་གི་ཝ་མོ་བཞིན་ཡིན་ལ།
EZE 13:5 དཀོན་མཆོག་ཡ་ཝཱེའི་ཉིན་མོར་དམག་འཐབ་ཁྲོད་དུ་ཚུགས་ཐུབ་པའི་ཕྱིར་དུ། དེ་དག་ཡར་སོང་ནས་ཞིག་རལ་རྣམས་མ་བཅོས་ཏེ། ཡེས་ར་ཨེལ་གྱི་ཁྱིམ་རྒྱུད་ཀྱི་ཆེད་དུ་མཁར་ཡང་སླར་མ་བརྩིགས།
EZE 13:6 དེ་དག་གིས་མཐོང་བ་ནི་ཞལ་གཟིགས་རྫུས་མ་དང་། མི་ལ་མགོ་སྐོར་གཏོང་བའི་མོ་ཡིན་ཏེ། དཀོན་མཆོག་ཡ་ཝཱེས་དེ་རྣམས་མ་མངགས་ཀྱང་ཁོ་ཚོ་ན་རེ། འདི་ནི་དཀོན་མཆོག་ཡ་ཝཱེའི་གསུང་ཡིན་ཞེས་ཟེར་ཞིང་། དེ་དག་གིས་རང་གིས་ཅི་བཤད་པ་རྣམས་དེ་བཞིན་འགྲུབ་པར་རེའོ། །
EZE 13:7 ཁྱོད་ཚོས་ཞལ་གཟིགས་རྫུས་མ་མཐོང་ཞིང་། མི་ལ་མགོ་སྐོར་གཏོང་བའི་མོ་བཏབ་པ་མ་ཡིན་ནམ། ཁྱོད་ཚོས་ད་དུང་འདི་ནི་ཡ་ཝཱེའི་གསུང་ཡིན་ཟེར་ཡང་། དོན་དམ་དུ་ངས་དེ་ལྟར་མ་སྨྲས་ཞེས་གསུངས།
EZE 13:8 དེ་བས་ན་གཙོ་བོ་ཡ་ཝཱེས་འདི་སྐད་དུ། ཁྱོད་རྣམས་ཀྱིས་བཤད་པ་ནི་རྫུན་དང་། མཐོང་བ་ནི་འཕྲུལ་སྣང་ཡིན་པས། ལྟོས་དང་། ངས་ཁྱོད་རྣམས་ལ་རྒོལ་བ་ཡིན་ཞེས་གཙོ་བོ་ཡ་ཝཱེས་གསུངས་ཤིང་།
EZE 13:9 ཞལ་གཟིགས་རྫུས་མ་མཐོང་མཁན་དང་། མོ་བཏབ་ནས་མི་ལ་མགོ་སྐོར་གཏོང་བའི་ལུང་སྟོན་པ་དེ་དག་ལ་ངའི་ལག་པས་རྒོལ་བར་བྱ། དེ་དག་ངའི་མི་ཚོགས་ཀྱི་ནང་དུ་འདུག་མི་རུང་ཞིང་། ཡེས་ར་ཨེལ་ཁྱིམ་རྒྱུད་ཀྱི་མིང་ཐོ་རུའང་འགོད་མི་རུང་ལ། ཡེས་ར་ཨེལ་གྱི་ཡུལ་ཁམས་སུའང་འགྲོ་མི་ཆོག་སྟེ། དེ་ནས་ཁྱོད་ཚོས་བདག་ནི་གཙོ་བོ་ཡ་ཝཱེ་ཡིན་པ་རྟོགས་པར་འགྱུར།
EZE 13:10 གང་ལ་ཞེ་ན། ཞི་བདེ་མེད་ན་ཡང་དེ་ཚོས་བདག་གི་འབངས་མི་ལ་ཞི་བདེ་ཡོད་ཅེས་བསླུས་ཤིང་། མི་ཡིས་མཁར་གྱང་རྩིག་དུས་སུ་དེ་དག་གིས་རྩིག་པར་དཀར་རྩི་འབྱུག་པ་ཡིན།
EZE 13:11 དེ་བས་ཁྱོད་ཀྱིས་མཁར་གྱང་ལ་དཀར་རྩི་འབྱུག་མཁན་རྣམས་ལ་འདི་ལྟར། མཁར་གྱང་དེ་ནི་ལོག་པར་མ་ཟད་དྲག་ཆར་གྱིས་བསྣུབ་པར་འགྱུར། ཀྱེ་སེར་བ་ཆེན་པོ་ཁྱོད་ནི་བོབས་དང་། དྲག་རླུང་ཡང་གཡུག་པར་འགྱུར་ཞེས་སྨྲོས་ཤིག
EZE 13:12 ལྟོས་དང་། མཁར་གྱང་དེ་ལོག་རྗེས་མི་ཡིས་ཁྱོད་རྣམས་ལ། ཁྱོད་རྣམས་ཀྱིས་བྱུགས་པའི་དཀར་རྩི་དེ་གང་དུ་ཡོད་དམ་ཞེས་མི་འདྲིའམ་ཞེས་གསུངས།
EZE 13:13 དེ་བས་གཙོ་བོ་ཡ་ཝཱེས་འདི་སྐད་དུ། ངས་རང་གི་ཁོང་ཁྲོ་ཆེན་པོས་དྲག་རླུང་གཡུག་པར་བྱ་ཞིང་། ང་ཡི་ཞེ་སྡང་ནང་དུ་དྲག་ཆར་གྱིས་ནུབ་པར་འགྱུར་ལ། ཁོང་ཁྲོ་ཆེན་པོའི་སེར་བ་བབས་ནས་མཁར་གྱང་དེ་མེད་པར་བྱེད་དེ།
EZE 13:14 ཁྱོད་ཚོས་དཀར་རྩི་བྱུགས་པའི་མཁར་གྱང་དེ་ངས་བཤིགས་ནས་ས་རུ་འགྱེལ་བར་འགྱུར་ཞིང་། ཐ་ན་དེའི་རྨང་ཡང་མངོན་པར་འགྱུར་ལ། མཁར་གྱང་ལོག་ནས་ཁྱོད་རྣམས་ཀྱང་དེའི་ནང་དུ་མེད་པར་འགྱུར་བས། ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 13:15 དེ་ལྟར་ངས་མཁར་གྱང་དང་མཁར་གྱང་ལ་དཀར་རྩི་འབྱུག་པའི་མི་དེ་དག་གི་སྟེང་དུ་རང་གི་ཁོང་ཁྲོ་ཡོངས་སུ་བླུགས་ནས། ངས་དེ་དག་ལ་འདི་སྐད་དུ། མཁར་གྱང་མེད་པར་གྱུར་ཏེ། མཁར་གྱང་ལ་དཀར་རྩི་འབྱུག་མཁན་ཡང་མེད་པར་གྱུར་ཏོ་ཞེས་སྨྲ་ཞིང་།
EZE 13:16 མཁར་གྱང་ལ་དཀར་རྩི་འབྱུག་མཁན་དེ་ཚོ་ནི་ཡེས་ར་ཨེལ་གྱི་ལུང་སྟོན་པ་རྣམས་ཡིན་ཞིང་། ཁོ་ཚོས་ཡེ་རུ་སཱ་ལེམ་ལ་ལུང་བསྟན་ཏེ། ཞི་བདེ་མེད་པའི་དུས་སུ་གྲོང་ཁྱེར་དེའི་ཆེད་དུ་ཞི་བདེའི་ཞལ་གཟིགས་མཐོང་བར་གྱུར་ཞེས་གཙོ་བོ་ཡ་ཝཱེས་གསུངས་སོ། །
EZE 13:17 ཀྱེ་མིའི་བུ། ཁྱོད་ཀྱིས་མི་རྣམས་ཁྲོད་ཀྱི་རང་གི་བསམ་འདུན་བཞིན་དུ་ལུང་སྟོན་མཁན་བུད་མེད་དེ་དག་གི་ཕྱོགས་སུ་འཁོར་ནས། དེ་དག་ལ་རྒོལ་བའི་ལུང་སྟོན་ཅིག ཁྱོད་ཀྱིས་འདི་ལྟར།
EZE 13:18 གཙོ་བོ་ཡ་ཝཱེས་འདི་སྐད་དུ། མི་རྣམས་ཀྱི་སྲོག་ལེན་པའི་ཕྱིར་དུ། མི་རྣམས་ཀྱི་ལག་རྩར་སྔགས་དང་ལྡན་པའི་ཐི་གུ་བཙེམས་པ་དང་། ཡང་མི་རྣམས་ཀྱི་ཆེད་དུ་རིང་ཐུང་མི་འདྲ་བའི་མགོ་རས་བཟོ་བའི་བུད་མེད་རྣམས་ལ་ཆག་སྒོ་འབྱུང་། ཁྱོད་ཚོས་ངའི་མི་རྣམས་ཀྱི་སྲོག་བླངས་ན་རང་སྲོག་སྐྱོབ་ཐུབ་པ་ཡིན་ནམ།
EZE 13:19 ནས་སྤར་བ་ཁ་ཤས་དང་བག་ལེབ་དུམ་བུ་འགའ་ཡི་ཕྱིར་དུ། ཁྱོད་ཚོས་ངའི་འབངས་མིའི་ནང་དུ་ང་ཁྱད་དུ་བསད་པ་དང་། རྫུན་གཏམ་ལ་མཉན་འདོད་པའི་ངའི་འབངས་མི་རྣམས་ལ་ཁྱོད་ཚོས་རྫུན་གཏམ་ལབ་ཅིང་། འཆི་བར་མི་འོས་པ་རྣམས་ཁྱོད་ཚོས་བསད་དེ། གསོན་མི་འོས་པ་དེ་ཚོའི་སྲོག་ནི་ཁྱོད་ཚོས་བསྐྱབས་པ་ཡིན།
EZE 13:20 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་ཚོའི་སྔགས་དང་ལྡན་པའི་ཐི་གུ་དེ་ལ་རྒོལ་བར་བྱ་སྟེ། ཁྱོད་ཚོས་འདབ་ཆགས་བྱ་རྣམས་བཟུང་པ་བཞིན་དུ་ཐི་གུ་དེ་དག་གིས་མིའི་སྲོག་བླངས་པས། ངས་དེ་རྣམས་ཁྱོད་ཚོའི་དཔུང་པ་ནས་དབྲལ་བར་འགྱུར་ལ། ཁྱོད་ཚོས་འདབ་ཆགས་བྱ་ལྟར་བཟུང་པ་དེ་རྣམས་སྒྲོལ་བར་བྱའོ། །
EZE 13:21 ཡང་ཁྱོད་ཀྱི་མགོ་རས་རྣམས་གཤགས་ཏེ། ངའི་འབངས་མི་ཁྱོད་ཀྱི་ལག་ནས་སྒྲོལ་བར་བྱ་ཞིང་། ཕྱིན་ཆད་ཁོ་ཚོ་ནི་འཛིན་བྱའི་རི་དྭགས་བཞིན་ཁྱོད་ཀྱི་ལག་ཏུ་མི་འཚུད་པ་དང་། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 13:22 གང་ལ་ཞེ་ན། ངས་དྲང་བདེན་ཅན་རྣམས་སེམས་ཕམ་པར་མ་བྱས་ཀྱང་། ཁྱོད་ཚོས་རྫུན་གཏམ་གྱིས་དེ་དག་གི་སེམས་ཕམ་པར་བྱས་པ་དང་། ཡང་མི་ངན་གྱི་ལག་པ་བརྟན་པོར་བྱས་པར་མ་ཟད། དེ་དག་ངན་སྤྱོད་ལས་ལོག་སྟེ་ཐར་པ་འཐོབ་ཏུ་མ་བཅུག་གོ །
EZE 13:23 དེ་བས། ཁྱོད་ཚོས་ཕྱིན་ཆད་ཞལ་གཟིགས་རྫུས་མ་མཐོང་བར་མི་འགྱུར་ལ། མོ་འདེབས་པའི་དོན་ཡང་སྤྱོད་པར་མི་བྱ་སྟེ། བདག་གིས་རང་གི་འབངས་མི་ཁྱོད་ཀྱི་ལག་ནས་སྒྲོལ་བར་བྱེད་ཅིང་། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་སྨྲོས་ཤིག་ཅེས་གསུངས་སོ། །
EZE 14:1 དེ་ནས་ཡེས་ར་ཨེལ་གྱི་རྒན་པོ་འགའ་ང་དང་འཕྲད་དུ་འོངས་ནས་ངའི་མདུན་དུ་བསྡད་པ་དང་།
EZE 14:2 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 14:3 ཀྱེ་མིའི་བུ། མི་འདི་རྣམས་ཀྱིས་རང་གི་སྐུ་འདྲ་རྣམས་སེམས་སུ་བླངས་པ་དང་། ཁོ་ཚོ་སྡིག་པའི་ནང་ལྷུང་བར་བྱེད་པའི་བཀག་རྡོ་དེ་རང་གི་མདུན་དུ་བཞག་པས། ངས་ཅི་ལྟར་དེ་ཚོར་ང་ལ་ཞུ་བར་འཇུག་གམ།
EZE 14:4 དེའི་ཕྱིར་ཁྱོད་ཀྱིས་ཁོ་རྣམས་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་ཁྱིམ་རྒྱུད་ཀྱི་ནང་དུ། རང་གི་སྐུ་འདྲ་སེམས་སུ་བླངས་པ་དང་། རང་ཉིད་སྡིག་པའི་ནང་ལྷུང་བར་བྱེད་པའི་བཀག་རྡོ་དེ་རང་གི་མདུན་དུ་འཇོག་མཁན་དང་། ཡང་ལུང་སྟོན་པའི་དྲུང་དུ་ཡོང་མཁན་དེ་ལ། ང་ཡ་ཝཱེས་དེ་ཡིས་སྐུ་འདྲ་མང་པོར་ཕྱག་བཙལ་བའི་སྡིག་པ་བཞིན་དུ་ལན་འཇལ་ཏེ། ཡེས་ར་ཨེལ་ཁྱིམ་རྒྱུད་ཀྱི་སེམས་འགུག་པར་བྱའོ། །
EZE 14:5 དེ་དག་ཐམས་ཅད་ནི་རང་གི་སྐུ་འདྲའི་རྐྱེན་གྱིས་ང་དང་རིང་དུ་གྱེས་པ་ཡིན་གསུངས་ཞེས་སྨྲོས་ཤིག
EZE 14:6 དེ་བས་ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་རྣམས་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། རང་གི་སྐུ་འདྲ་རྣམས་དང་བྲལ་ནས་རང་གི་ཞེན་ལོག་གི་རྫས་ཐམས་ཅད་ནས་ཁ་ཕྱིར་འཁོར་ཏེ་སེམས་སྒྱུར་ཅིག
EZE 14:7 གང་ལ་ཞེ་ན། ཡེས་ར་ཨེལ་གྱི་ཁྱིམ་རྒྱུད་དང་ཡང་ན་ཡེས་ར་ཨེལ་གྱི་ཁྲོད་དུ་བྱེས་སུ་སྡོད་པའི་མི་རིགས་གཞན་གྱི་ནང་དུ་ང་དང་རིང་དུ་གྱེས་ནས། རང་གི་སྐུ་འདྲ་རྣམས་སེམས་སུ་བླངས་པ་དང་། རང་ཉིད་སྡིག་པའི་ནང་ལྷུང་བར་བྱེད་པའི་བཀག་རྡོ་དེ་རང་གི་མདུན་དུ་བཞག་སྟེ། ཡང་ལུང་སྟོན་པའི་དྲུང་དུ་འོངས་ཏེ་རང་གི་ཕྱིར་དུ་ང་ལ་ཞུ་མཁན་དག་ལ། ང་ཡ་ཝཱེས་དངོས་སུ་ལན་འཇལ་ངེས་ཡིན།
EZE 14:8 མི་དེའི་ཕྱོགས་སུ་ངའི་གདོང་མདོག་འགྱུར་ནས། དེ་ནི་མི་གཞན་པའི་དཔེ་མཚོན་དང་ཁ་དཔེ་རུ་འགྱུར་བར་བྱེད་ཅིང་། ཡང་བདག་གིས་རང་གི་འབངས་མི་ལས་དེ་ཚར་དུ་གཅོད་པར་བྱའོ། །དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 14:9 ཡང་ལུང་སྟོན་པ་སུ་ཞིག་གཞན་གྱིས་བསླུས་ནས་གཏམ་བཤད་པ་ཡིན་ན། དེ་ནི་ང་ཡ་ཝཱེས་ལུང་སྟོན་པ་དེ་བསླུ་རུ་བཅུག་པ་ཡིན་ཏེ། ངས་རང་གི་ལག་པ་བརྐྱངས་ནས་དེ་ལ་རྒོལ་ཞིང་། ངའི་འབངས་མི་ཡེས་ར་ཨེལ་གྱི་ཁྲོད་ནས་མི་དེ་མེད་པར་བྱའོ། །
EZE 14:10 དེ་ནས་ཁོ་རྣམས་ཀྱིས་རང་གི་སྡིག་པ་འཁུར་ཞིང་། ལུང་སྟོན་པ་རྣམས་ཀྱི་སྡིག་པ་ཅི་ལྟར་ཡིན་ན། ཞུ་མཁན་གྱི་སྡིག་པའང་དེ་ལྟར་ཡིན།
EZE 14:11 དེ་བཞིན་བྱས་ན་ད་ནི་ཡེས་ར་ཨེལ་གྱི་ཁྱིམ་རྒྱུད་ཀྱིས་ལམ་བོར་ནས་ང་དང་མི་འབྲལ་ཞིང་། རང་གི་ཉེས་སྐྱོན་ཀུན་གྱི་དབང་གིས་རང་ཉིད་བཙོག་པར་ཡང་མི་བཟོ་ལ། དེ་དག་ངའི་འབངས་མི་རུ་འགྱུར་ཞིང་། ང་ནི་དེ་དག་གི་དཀོན་མཆོག་ཏུ་འགྱུར་རོ་ཞེས་གསུངས་ཏེ། གཙོ་བོ་ཡ་ཝཱེས་དེ་སྐད་གསུངས་སོ། །
EZE 14:12 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 14:13 ཀྱེ་མིའི་བུ། གལ་ཏེ་ཡུལ་གང་ཞིག་གིས་བློ་མི་དཀར་བའི་ལས་སྤྱད་དེ་ང་ལ་འགལ་བའི་སྡིག་པ་བྱས་ན། ངས་རང་གི་ལག་པ་བརྐྱངས་ནས་ཡུལ་དེ་ལ་རྒོལ་ཞིང་། ཡུལ་དེའི་ཁ་ཟས་བཅད་དེ་ཡུལ་དེར་མུ་གེ་སླེབ་ཏུ་འཇུག་ཅིང་། མི་ཕྱུགས་གཉིས་ཀ་ཡུལ་དེ་ནས་ཚར་དུ་གཅོད་པར་བྱ།
EZE 14:14 ཇི་སྟེ་ནོ་ཨ་དང་དཱ་ནི་ཨེལ། ཨེས་ཡོབ་བཅས་པའི་སྐྱེས་བུ་གསུམ་པོ་དེ་རུ་ཡོད་ནའང་། དེ་དག་གིས་རང་ཉིད་དྲང་བདེན་ཡིན་པའི་དབང་གིས་རང་སྲོག་ལས་གཞན་སྐྱོབ་མི་ནུས་ཞེས་གཙོ་བོ་ཡ་ཝཱེས་གསུངས་སོ། །
EZE 14:15 གལ་ཏེ་ངས་ཡུལ་དེར་གཅན་གཟན་རྒྱུ་རུ་བཅུག་སྟེ། ཡུལ་དེའི་ཕྲུ་གུ་རྣམས་རྨེག་མེད་དུ་བཏང་ནས་སྟོང་བར་འགྱུར་བ་དང་། གཅན་གཟན་དེ་དག་གི་རྐྱེན་གྱིས་ཐ་ན་ཡུལ་དེར་བརྒྱུད་ནས་འགྲོ་ཕོད་མཁན་ཡང་མེད་པ་ཡིན་ན།
EZE 14:16 སྐྱེས་བུ་དེ་གསུམ་པོ་ཡུལ་དེར་ཡོད་ནའང་། དེ་དག་གིས་རང་ཉིད་ཁོ་ན་སྐྱོབ་པ་ལས། ཐ་ན་རང་གི་བུ་དང་བུ་མོའང་སྐྱོབ་མི་ནུས་ལ། ཡུལ་དེ་སྔར་བཞིན་སྟོང་བར་ལུས་པའོ་ཞེས་བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཞེས་གཙོ་བོ་ཡ་ཝཱེས་གསུངས་སོ། །
EZE 14:17 གལ་ཏེ་ངས་ཡུལ་དེར་རལ་གྲི་དྲངས་ནས་འདི་སྐད་དུ། ངས་མི་ཕྱུགས་གཉིས་ཀ་ཡུལ་དེ་ནས་ཚར་དུ་གཅོད་པའི་ཕྱིར་དུ། རལ་གྲི་ནི་ཡུལ་དེར་རྒྱུ་བར་ཤོག་ཅེས་སྨྲས་པ་ཡིན་ན།
EZE 14:18 སྐྱེས་བུ་དེ་གསུམ་པོ་ཡུལ་དེར་ཡོད་ནའང་། དེ་དག་གིས་རང་ཉིད་ཁོ་ན་སྐྱོབ་པ་ལས། ཐ་ན་རང་གི་བུ་དང་བུ་མོའང་སྐྱོབ་མི་ནུས་སོ་ཞེས་བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཞེས་གཙོ་བོ་ཡ་ཝཱེས་གསུངས་སོ། །
EZE 14:19 གལ་ཏེ་ངས་ཡུལ་དེར་རིམས་ནད་མངགས་ཏེ་ཁྲག་བཞུར་བའི་དོན་བརྒྱུད་ནས་ངའི་ཁོང་ཁྲོ་ཡུལ་དེར་བླུགས་ཏེ། མི་ཕྱུགས་གཉིས་ཀ་ཡུལ་དེ་ནས་ཚར་བཅད་པ་ཡིན་ན།
EZE 14:20 ནོ་ཨ་དང་དཱ་ནི་ཨེལ། ཨེས་ཡོབ་བཅས་པའི་སྐྱེས་བུ་གསུམ་པོ་དེ་རུ་ཡོད་ནའང་། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། དེ་དག་གིས་རང་ཉིད་དྲང་བདེན་ཡིན་པའི་དབང་གིས་རང་སྲོག་ལས་གཞན་ཐ་ན་རང་གི་བུ་དང་བུ་མོའང་སྐྱོབ་མི་ནུས་ཞེས་གཙོ་བོ་ཡ་ཝཱེས་གསུངས་སོ། །
EZE 14:21 ཡང་གཙོ་བོ་ཡ་ཝཱེས་འདི་སྐད་དུ། ངས་རལ་གྲི་དང་མུ་གེ གཅན་གཟན། རིམས་ནད་བཅས་འཇིགས་སུ་རུང་བའི་ཉེས་ཆད་བཞི་པོ་ཡེ་རུ་སཱ་ལེམ་གྱི་སྟེང་དུ་འབབ་པར་བྱས་ཏེ། མི་ཕྱུགས་གཉིས་ཀ་ཡུལ་དེ་ནས་ཚར་གཅོད་དུས། གནས་ཚུལ་ནི་དེ་ལས་ཀྱང་ཚབས་ཆེན་མ་ཡིན་ནམ།
EZE 14:22 ལྟོས་དང་། དེའི་ནང་དུ་བྲོས་ནས་ཐར་བའི་ལྷག་ལུས་རྣམས་ཡོད་ཅིང་། དེ་དག་གིས་བུ་དང་བུ་མོ་རྣམས་ཁྲིད་ནས་ཕྱིར་ཐོན་ཏེ་ཁྱོད་ཀྱི་མདུན་དུ་འོངས་པ་དང་། ཁྱོད་ཅག་གིས་དེ་ཚོའི་བྱ་བ་སྤྱོད་པ་རྣམས་མཐོང་ན། ངས་ཡེ་རུ་སཱ་ལེམ་གྱི་སྟེང་དུ་ཕབ་པའི་བར་ཆད་ཐམས་ཅད་ཀྱི་དབང་གིས་སེམས་གསོ་འཐོབ་པར་འགྱུར་ལ།
EZE 14:23 ཁྱོད་ཅག་གིས་དེ་ཚོའི་བྱ་བ་སྤྱོད་པ་རྣམས་མཐོང་ན་སེམས་གསོ་འཐོབ་པར་འགྱུར། གང་ལ་ཞེ་ན། ངས་ཡེ་རུ་སཱ་ལེམ་དུ་བྱས་པ་ཐམས་ཅད་རྒྱུ་མཚན་མེད་པ་ཞིག་མ་ཡིན་པ་ཁྱོད་རྣམས་ཀྱིས་ཤེས་པར་འགྱུར་བས་སོ་ཞེས་གཙོ་བོ་ཡ་ཝཱེས་གསུངས་པའོ། །
EZE 15:1 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 15:2 ཀྱེ་མིའི་བུ། རྒུན་འབྲུམ་ཤིང་གི་ཤིང་ཆ་ནི་ནགས་ཚལ་གྱི་ཡལ་ག་ལས་ཅི་ལྟར་བརྒལ་ལམ།
EZE 15:3 མི་ཡིས་རྒུན་འབྲུམ་ཤིང་ལས་ཤིང་ཆ་བླངས་ཏེ་དངོས་པོ་བཟོ་ཐུབ་བམ། ཡང་ན་རྒུན་འབྲུམ་ཤིང་ལས་ཤིང་ཆ་བླངས་ཏེ་འཛེར་མ་བཟོས་ནས་སྣོད་འགེལ་ཐུབ་བམ།
EZE 15:4 ལྟོས་དང་། དེ་ནི་འབུད་ཤིང་བྱས་ནས་མེའི་ནང་ལ་གཡུགས་པ་སྟེ། མེ་ཡིས་དེའི་མགོ་མཇུག་གཉིས་པོ་ཚིག་པར་མ་ཟད་གཞུང་ཡང་ཚིག་པས། དེ་ལས་ད་དུང་དངོས་པོ་བཟོ་ནུས་སམ།
EZE 15:5 ལྟོས་དང་། དེ་ཆ་ཚང་ཡིན་དུས་སུའང་དངོས་པོ་གང་ཞིག་ཀྱང་བཟོ་མི་ཐུབ་ན། མེར་བསྲེགས་ནས་ཚིག་པར་གྱུར་ཚེ་དེས་དངོས་པོ་ཅི་ཞིག་བཟོ་ཐུབ་བམ་ཞེས་གསུངས་སོ། །
EZE 15:6 དེ་བས་གཙོ་བོ་ཡ་ཝཱེས་འདི་སྐད་དུ། ངས་ནགས་ཚལ་གྱི་རྒུན་འབྲུམ་ཤིང་འབུད་ཤིང་དུ་མེ་རུ་གཡུགས་པ་བཞིན་དུ། ཡེ་རུ་སཱ་ལེམ་གྱི་མི་རྣམས་ལའང་དེ་ལྟར་བྱ་སྟེ།
EZE 15:7 ངས་གདོང་མདོག་འགྱུར་ནས་དེ་དག་ལ་རྒོལ་ཞིང་། དེ་རྣམས་མེ་ལས་ཐར་ན་ཡང་། མེས་དེ་རྣམས་སྔར་བཞིན་ཁྱུར་མིད་གཏོང་བར་འགྱུར་ཏེ། ངས་གདོང་མདོག་འགྱུར་ནས་དེ་དག་ལ་རྒོལ་དུས་སུ། ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞིང་།
EZE 15:8 དེ་དག་གིས་བློ་མི་དཀར་བའི་ལས་སྤྱད་པས། ངས་ཡུལ་འདི་ནི་སྟོང་བར་བྱའོ་ཞེས་གཙོ་བོ་ཡ་ཝཱེས་གསུངས་སོ། །
EZE 16:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 16:2 ཀྱེ་མིའི་བུ། ཁྱོད་ཀྱིས་ཡེ་རུ་སཱ་ལེམ་ལ་ཁོ་ཚོའི་ཞེན་ལོག་གི་དོན་རྣམས་སྟོན་དགོས་ཏེ།
EZE 16:3 ཁྱོད་ཀྱིས་དེ་དག་ལ། གཙོ་བོ་ཡ་ཝཱེས་ཡེ་རུ་སཱ་ལེམ་ལ་འདི་སྐད་དུ། ཁྱོད་ཀྱི་འབྱུང་ཁུངས་དང་སྐྱེས་ས་ནི་ཀ་ན་ཨན་གྱི་ཡུལ་ཡིན་ལ། ཁྱོད་ཀྱི་ཕ་ནི་ཨེ་མོར་པ་དང་མ་ནི་ཧེད་པ་ཡིན་ནོ། །
EZE 16:4 ཁྱོད་སྐྱེས་པའི་གནས་ཚུལ་བརྗོད་ན། ཁྱོད་སྐྱེས་པའི་ཉིན་ལ་མི་ཡིས་ཁྱོད་ཀྱི་ལྟེ་བ་མ་བཅད་ཅིང་། གཙང་དག་བྱེད་དུ་ཁྱོད་ཆུའི་ནང་དུ་ཡང་མ་བཀྲུས་ཏེ། ཁྱོད་ཀྱི་ལུས་སྟེང་དུ་ཚྭ་གཏོར་མཁན་ཡང་མ་བྱུང་ལ། ཁྱོད་རས་ཀྱིས་ཀྱང་མ་བཏུམས་སོ། །
EZE 16:5 ཁྱོད་ལ་ལྟ་སྐྱོང་བྱས་ཏེ་སྙིང་རྗེ་ནས་དེ་ལྟར་བྱེད་མཁན་མི་གཅིག་ཀྱང་མེད་དེ། མི་ཡིས་ཁྱོད་ནི་ས་སྟོང་དུ་དོར་བ་ཡིན། གང་ལ་ཞེ་ན། ཁྱོད་སྐྱེས་དུས་མི་རྣམས་ཁྱོད་ལ་ཞེན་ཁ་ལོག་པས་སོ། །
EZE 16:6 དེ་ཡང་ང་རང་ཁྱོད་ཀྱི་གམ་ནས་འགྲོ་དུས་སུ། ཁྱོད་ནི་ཁྲག་གི་ནང་དུ་འཕག་འཚག་རྒྱག་པ་མཐོང་བྱུང་། དུས་དེར་ངས་ཁྱོད་ལ་ཁྱོད་ཁྲག་གི་ནང་དུ་ཉལ་ཡོད་ཀྱང་གསོན་པར་གྱིས་ཤིག ཁྱོད་ཁྲག་གི་ནང་དུ་ཉལ་ཡོད་ཀྱང་གསོན་པར་གྱིས་ཤིག་ཅེས་སྨྲས་པ་དང་།
EZE 16:7 ངས་ཁྱོད་ནི་ཞིང་ཁའི་རྩི་ཤིང་བཞིན་དུ་སྐྱེ་བར་བྱས་ཤིང་། དེ་ནས་ཁྱོད་རང་རིམ་གྱིས་ཡར་སྐྱེས་ཏེ་མཛེས་ཤིང་ལྟ་ན་སྡུག་པར་གྱུར་པ་དང་། ཁྱོད་ཀྱི་ནུ་མ་གཉིས་པོ་རྒྱས་ཏེ་སྐྲ་ལོ་རིང་ན་ཡང་། ཁྱོད་ནི་སྔར་བཞིན་གཅེར་བུ་ཡིན་ནོ། །
EZE 16:8 ཡང་ང་རང་ཁྱོད་ཀྱི་གམ་ནས་སོང་པ་ན། ཁྱོད་ནི་དགའ་རོགས་སྒྲིག་པའི་དུས་སུ་བབས་ཡོད་པ་མཐོང་སྟེ། ངས་རང་གི་གོས་ཀྱི་ཐུ་བས་ཁྱོད་ཀྱི་ལུས་གཡོགས་ནས། ཁྱོད་ཀྱི་ལུས་གཅེར་བུ་དེ་བཀབ་པ་དང་། ཡང་ཁྱོད་ལ་མནའ་བསྐྱལ་ནས་ཁ་ཆད་བཞག་པས་ཁྱོད་ནི་ང་ལ་གཏོགས་པ་ཡིན་ཞེས་གཙོ་བོ་ཡ་ཝཱེས་གསུངས།
EZE 16:9 དུས་དེར་ངས་ཆུ་ཡིས་ཁྱོད་བཀྲུས་ཤིང་། ཁྱོད་ཀྱི་ལུས་སྟེང་གི་ཁྲག་རྣམས་བཀྲུས་ཏེ་ཁྱོད་ལ་སྣུམ་གྱིས་བྱུགས།
EZE 16:10 ངས་ཁྱོད་ཀྱི་ལུས་ནི་ཚེམ་དྲུབ་ཀྱི་གོས་ཀྱིས་གཡོགས་ཤིང་། རྐང་པར་ཀོ་བ་སྤུས་ལེགས་ཀྱི་ལྷམ་བསྐོན་པ་དང་། སོ་རས་སྲབ་བུས་ཁྱོད་ཀྱི་མགོ་བཏུམས་ནས་དར་གོས་ཁྱོད་ཀྱི་ལུས་ལ་བསྐོན་ཏོ། །
EZE 16:11 ངས་ཁྱོད་རང་རྒྱན་ཆས་སྤྲས་ཏེ། ལག་པར་གདུ་བུ་དང་སྐེ་ལ་སྐེ་རྒྱན།
EZE 16:12 སྣ་ལ་སྣ་ལོང་། རྣ་བར་རྣ་ལོང་། མགོ་ལ་ཡིད་དུ་འོང་བའི་ཅོད་པན་བཅས་བསྐོན་ཏོ། །
EZE 16:13 དེ་ནས་ཁྱོད་ལ་གསེར་དངུལ་གྱིས་བརྒྱན་ཏེ། གོས་སུ་སོ་རས་སྲབ་བུ་དང་། དར་གོས་དང་། ཚེམ་དྲུབ་ཀྱིས་གཡོགས་ཤིང་། ཁྱོད་ཀྱིས་ཟས་སུ་གྲོ་ཞིབ་དང་སྦྲང་རྩི། སྣུམ་བཅས་སྤྱོད་པས། ཁྱོད་ནི་རབ་ཏུ་མཛེས་ཤིང་རྒྱལ་མོའི་ཁྲི་ལའང་བཞུགས་འོས་སོ། །
EZE 16:14 ཁྱོད་རང་ཤིན་ཏུ་མཛེས་པའི་རྐྱེན་གྱིས་ཁྱོད་ཀྱི་མཚན་སྙན་ནི་ཡུལ་ཁམས་ཡོངས་སུ་ཁྱབ་ཅིང་། ཁྱོད་རང་ཡོངས་སུ་མཛེས་པ་ནི་ངས་ཁྱོད་ལ་གནང་བའི་དཔལ་དང་གཟི་བརྗིད་ཀྱི་དབང་གིས་ཡིན་ནོ་ཞེས་གཙོ་བོ་ཡ་ཝཱེས་གསུངས་སོ། །
EZE 16:15 ཡིན་ནའང་ཁྱོད་ཀྱིས་རང་གི་བྱད་གཟུགས་དང་རང་གི་མཚན་སྙན་ལ་བརྟེན་ནས་ལོག་གཡེམ་སྤྱད་དེ། ལམ་འགྲོ་རེ་རེ་ལ་ཁྱོད་ཀྱིས་ཅི་དགར་ལོག་གཡེམ་སྤྱད་ཅིང་ཁྱོད་རང་དེ་རྣམས་ལ་དབང་བར་གྱུར།
EZE 16:16 ཡང་ཁྱོད་ཀྱིས་རང་གི་གོས་རྣམས་ཁྱེར་ཏེ། རང་གི་ཆེད་དུ་ཁ་དོག་རྣམ་པར་བཀྲ་བའི་མཐོ་གླིང་བརྩིགས་ཤིང་གནས་དེར་ལོག་གཡེམ་སྤྱད་དོ། །དོན་དེ་འདྲ་འབྱུང་མི་འོས་ལ་མ་འོངས་པར་ཡང་འབྱུང་མི་སྲིད།
EZE 16:17 ཡང་ཁྱོད་ཀྱིས་ངས་ཁྱོད་ལ་གནང་བའི་ཡིད་དུ་འོང་བའི་གསེར་ཆས་དང་དངུལ་ཆས་རྣམས་ཁྱེར་ཏེ། རང་གི་ཆེད་དུ་སྐྱེས་པའི་སྐུ་འདྲ་བླུགས་ནས་དེ་དག་དང་ལོག་གཡེམ་སྤྱད་དོ། །
EZE 16:18 ཡང་ཁྱོད་ཀྱིས་རང་གི་ཚེམ་དྲུབ་ཀྱི་གོས་རྣམས་ཁྱེར་ནས་དེ་དག་གི་སྟེང་དུ་བཀབ་པར་མ་ཟད། ངའི་སྣུམ་དང་བདུག་སྤོས་ཀྱང་དེ་དག་གི་མདུན་དུ་བཤམས།
EZE 16:19 ངས་ཁྱོད་ལ་གནང་བའི་ཟས་རིགས་ཏེ་གྲོ་ཞིབ་དང་སྣུམ། སྦྲང་རྩི་བཅས་ནི་ཁྱོད་ཀྱིས་སྐུ་འདྲའི་མདུན་དུ་བཤམས་ཏེ་དྲི་ཞིམ་མཆོད་རྫས་སུ་བྱས་སོ་ཞེས་གཙོ་བོ་ཡ་ཝཱེས་གསུངས།
EZE 16:20 ཡང་ཁྱོད་ལས་བཙས་པའི་ངའི་བུ་དང་བུ་མོ་སྟེ། རང་གི་བུ་དང་བུ་མོ་རྣམས་ཀྱང་ཁྱོད་ཀྱིས་དེ་དག་ལ་ཁ་ཟས་སུ་ཕུལ་བས། ཁྱོད་ཀྱིས་སྤྱད་པའི་ལོག་གཡེམ་འདི་རྣམས་ད་དུང་དོན་ཆུང་བར་བརྩིས་སམ།
EZE 16:21 ཁྱོད་ཀྱིས་ངའི་བུ་ཕྲུག་རྣམས་བསད་དེ། མེ་བརྒྱུད་ནས་ཁོ་ཚོ་སྐུ་འདྲར་ཕུལ་ཏོ། །
EZE 16:22 ཁྱོད་ཀྱིས་རང་གི་ཞེན་ལོག་གི་དོན་དང་ལོག་གཡེམ་འདི་ཐམས་ཅད་སྤྱོད་པའི་དུས་སུ། རང་ཉིད་ལོ་ན་ཆུང་བའི་དུས་སུ་གཅེར་བུར་ཁྲག་གི་ནང་དུ་འཕག་འཚག་བརྒྱབ་པ་མི་དྲན་ནམ།
EZE 16:23 ཁྱོད་ལ་ཆག་སྒོ་འབྱུང་། ཁྱོད་ལ་ཆག་སྒོ་འབྱུང་ཞེས་གཙོ་བོ་ཡ་ཝཱེས་དེ་སྐད་གསུངས་ཤིང་། ཁྱོད་ཀྱིས་དོན་ངན་དེ་ཐམས་ཅད་སྤྱད་རྗེས།
EZE 16:24 ཡང་ཁྱོད་ཀྱིས་རང་གི་ཆེད་དུ་གཡེམ་ཁང་བརྩིགས་ཤིང་། ཐང་ཆེན་རེ་རེ་ལ་མཐོ་གླིང་བརྩིགས་པ་དང་།
EZE 16:25 ཁྱོད་ཀྱིས་ལམ་མདོ་རེ་རེ་ནས་མཐོ་གླིང་བརྩིགས་ཏེ། རང་གི་བྱད་གཟུགས་མཛེས་པོ་དེ་ཞེན་ལོག་ཏུ་བསྒྱུར་ཅིང་ལམ་འགྲོ་རེ་རེ་དང་ལོག་གཡེམ་གྱི་ལས་མང་པོ་སྤྱད།
EZE 16:26 ཡང་ཁྱོད་ཀྱིས་རང་གི་ཁྱིམ་མཚེས་ཏེ་ཅི་དགར་འདོད་ཆགས་སྤྱོད་པའི་ཨེ་ཅིབ་པ་དང་ལོག་གཡེམ་མང་པོ་སྤྱད་ནས་ང་ཁྲོ་རུ་བཅུག
EZE 16:27 དེ་བས་ངས་རང་གི་ལག་པ་བརྐྱངས་ཏེ་ཁྱོད་ལ་རྒོལ་ནས་ཁྱོད་ཀྱི་མངའ་ཁོངས་ཆུང་དུ་བཏང་སྟེ། ཁྱོད་རང་ཁྱོད་ལ་སྡང་བའི་ཕེ་ལེ་ཤེད་པའི་བུད་མེད་ཀྱི་ལག་ཏུ་གཏད་ཅིང་། དེ་ཚོས་ཁྱོད་ལ་གང་འདོད་ལྟར་བྱས་པའོ། །ཡང་ཁྱོད་ཀྱི་འདོད་གཡེམ་གྱི་དབང་གིས་དེ་དག་ངོ་ཚ་བར་གྱུར་ཏོ། །
EZE 16:28 འོན་ཀྱང་ཁྱོད་ད་དུང་ཡིད་མ་ཚིམ་པར་ཨ་སུར་པ་དང་ལོག་གཡེམ་སྤྱད་དེ། དེ་དག་དང་ལོག་གཡེམ་སྤྱད་ཀྱང་ཁྱོད་ད་དུང་ཡིད་མ་ཚིམ།
EZE 16:29 དེ་ནས་ཁྱོད་ཀྱིས་རང་གི་གཡེམ་སྤྱོད་མང་དུ་བཏང་སྟེ། ཚོང་བྱེད་པའི་ཀལ་དི་པའི་བར་དུའང་ལོག་གཡེམ་སྤྱད་ཀྱང་ད་དུང་ཡིད་མ་ཚིམ།
EZE 16:30 ཁྱོད་ཀྱིས་སྤྱད་པ་དེ་ཐམས་ཅད་ནི་རང་གཤིས་གྱོང་པོ་དང་ངོ་ཚ་མེད་པའི་གཡེམ་མ་དང་འདྲ་བས། ཁྱོད་ནི་ཅི་འདྲའི་སེམས་ཤུགས་ཞན་པ་ཤེས་ཐུབ་བོ་ཞེས་གཙོ་བོ་ཡ་ཝཱེས་གསུངས་སོ། །
EZE 16:31 ཁྱོད་ཀྱིས་ལམ་མདོ་རེ་རེ་ནས་རང་གི་གཡེམ་ཁང་བརྩིགས་ཤིང་། ཡང་ཐང་ཆེན་རེ་རེ་ལ་མཐོ་གླིང་བརྩིགས་ནའང་ཁྱོད་ནི་གཡེམ་མ་བཞིན་མིན་ནོ། །གང་ལ་ཞེ་ན། ཁྱོད་ཀྱིས་སྨད་བཙོངས་ནས་ཐོབ་པའི་རྔན་པར་མཐོང་ཆུང་བྱས་པས་སོ། །
EZE 16:32 རང་གི་ཁྱོ་བོའི་ཚབ་ཏུ་མི་ཆ་མེད་ལེན་པའི་ཆུང་མ་གཡེམ་སྦྱོར་ཅན་ཁྱོད།
EZE 16:33 མི་རྣམས་ཀྱིས་གཡེམ་མ་ཀུན་ལ་རྔན་པ་སྦྱིན་ཡང་། ཁྱོད་ཀྱིས་རང་གི་རྔན་པ་དེ་རང་ཉིད་དགའ་བའི་དགའ་རོགས་རྣམས་ལ་སྤྲད་ནས། ཁྱོད་དང་མཉམ་དུ་ལོག་གཡེམ་སྤྱོད་པར་དེ་དག་ཕྱོགས་ཀུན་ནས་འོང་བར་བསླུས་སོ། །
EZE 16:34 ཁྱོད་ཀྱི་གཡེམ་སྤྱོད་ནི་བུད་མེད་གཞན་དང་མི་མཚུངས་ཏེ། གང་ལ་ཞེ་ན། མི་ཡིས་ཁྱོད་ལ་རྔན་པ་སྤྲད་ནས་ཁྱོད་དང་ལོག་གཡེམ་སྤྱོད་པར་མ་ཞུས་ཤིང་། ཁྱོད་ཀྱིས་མི་ལ་རྔན་པ་སྤྲད་པས་ཁྱོད་ནི་དེ་ལས་ལྡོག་པ་ཞིག་གོ །
EZE 16:35 དེ་བས་སྨད་འཚོང་མ་ཁྱོད་ཀྱིས་ཡ་ཝཱེའི་བཀའ་ལ་ཉོན་ཅིག
EZE 16:36 གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རང་གི་འདོད་པ་ཡོད་ཚད་ཕྱི་རུ་མངོན་ནས་རང་གི་དགའ་རོགས་དང་ལོག་གཡེམ་སྤྱད་ནས་ཁོག་སྨད་ཕྱི་རུ་མངོན་པ་དང་། ཡང་ཁྱོད་ཀྱིས་ཞེན་ལོག་གི་སྐུ་འདྲ་ཐམས་ཅད་ལ་ཕྱག་བཙལ་ཏེ། རང་གི་བུ་ཕྲུག་གི་ཁྲག་བཞུར་ཏུ་བཅུག་ནས་ཁྲག་དེ་སྐུ་འདྲ་ལ་ཕུལ་བའི་རྐྱེན་གྱིས།
EZE 16:37 ལྟོས་དང་། ངས་ཁྱོད་རང་དགའ་བ་དང་སྡང་བའི་མི་རྣམས་ཏེ། ཁྱོད་དང་མཉམ་དུ་དགའ་མགུར་སྤྱད་པའི་དགའ་རོགས་ཚང་མ་བསྡུས་ཏེ། ངས་ཕྱོགས་ཀུན་ནས་དེ་རྣམས་བསྡུས་ཏེ་ཁྱོད་ལ་རྒོལ་བར་འགྱུར་ཞིང་། ངས་དེ་དག་གི་མདུན་དུ་ཁྱོད་ཀྱི་ཁོག་སྨད་ཕྱུང་ནས། ཁྱོད་ཀྱི་ལུས་ཡོངས་གཅེར་བུ་ཡིན་པ་དེ་ཚོར་མཐོང་དུ་འཇུག་གོ །
EZE 16:38 ལོག་གཡེམ་སྤྱད་པ་དང་མི་ལ་ཁྲག་བཞུར་དུ་བཅུག་པའི་བུད་མེད་བཞིན་དུ་ངས་ཁྱོད་ལ་ཉེས་ཆད་གཅོད་ཅིང་། ངས་རང་གི་ཁོང་ཁྲོ་ཆེན་པོ་དང་ཞེ་སྡང་གིས་མི་ལ་ཁྲག་བཞུར་དུ་བཅུག་པའི་སྡིག་པ་དེ་ཁྱོད་ལ་འཁུར་དུ་འཇུག་གོ །
EZE 16:39 ངས་ཁྱོད་རང་དེ་ཚོའི་ལག་ཏུ་གཏད་དེ། ཁོ་ཚོས་ཁྱོད་ཀྱི་གཡེམ་ཁང་བཤིག་ཅིང་། ཁྱོད་ཀྱི་མཐོ་གླིང་རྣམས་གཏོར་བ་དང་། ཁྱོད་ཀྱི་ལྭ་བ་རྣམས་བཤུས་ནས་ཁྱོད་ཀྱི་མཛེས་སྡུག་ལྡན་པའི་རིན་པོ་ཆེ་རྣམས་ཕྲོགས་ཏེ། ཁྱོད་ནི་གཅེར་བུར་ལུས་པར་འགྱུར་རོ། །
EZE 16:40 དེ་དག་གིས་མི་མང་པོ་ཁྲིད་ནས་ཡར་འོངས་ཏེ་ཁྱོད་ལ་རྒོལ་བར་བྱ་ཞིང་། ཁྱོད་ནི་རྡོ་རུབ་བཏང་སྟེ། དེ་དག་གི་རལ་གྲིས་ཁྱོད་དུམ་བུར་གཏུབ་བོ། །
EZE 16:41 ཡང་དེ་དག་གིས་ཁྱོད་ཀྱི་ཁང་པ་མེར་བསྲེགས་ཏེ། བུད་མེད་མང་པོའི་མདུན་དུ་ཁྱོད་ལ་ཉེས་ཆད་གཅོད་ཅིང་། ངས་ཁྱོད་ཀྱི་གཡེམ་སྤྱོད་མཚམས་བཅད་དེ། ཁྱོད་ཀྱིས་མི་གཡེམ་སྦྱོར་བྱེད་དུ་བསླུ་བའི་རྔན་པ་དེ་སླར་མི་ལ་སྦྱིན་པར་མི་འགྱུར་རོ། །
EZE 16:42 དེ་ལྟར་བྱས་ན་ཁྱོད་ཀྱི་སྟེང་དུ་ལངས་པའི་ངའི་ཁོང་ཁྲོ་དེ་ཞི་ཞིང་། ངའི་ཞེ་སྡང་ཡང་ཁྱོད་དང་བྲལ་ནས། ང་རང་ཞི་བར་གནས་ཤིང་སླར་ཡང་ཁྲོ་བར་མི་འགྱུར།
EZE 16:43 གང་ལ་ཞེ་ན། ཁྱོད་ཀྱིས་རང་གི་ན་ཆུང་གི་དུས་ལ་རྗེས་དྲན་མི་བྱེད་པར། ད་དུང་དོན་དེ་ཐམས་ཅད་ཀྱི་ཁར་ང་རང་ཁྲོ་རུ་བཅུག་པས། ལྟོས་དང་། ཁྱོད་ཀྱིས་སྤྱད་པ་བཞིན་དུ་ངས་ཁྱོད་ལ་ལན་འཇལ་ལོ་ཞེས་གཙོ་བོ་ཡ་ཝཱེས་གསུངས་སོ། །ཁྱོད་ཀྱི་ཞེན་ལོག་གི་དོན་རྣམས་ལས་གཞན་ཁྱོད་ཀྱིས་ད་དུང་ལོག་གཡེམ་གྱི་སྐྱུག་བྲོ་བའི་ལས་སྤྱད་པ་མ་ཡིན་ནམ།
EZE 16:44 ལྟོས་དང་། ཁ་དཔེ་འདྲེན་མཁན་རྣམས་ཀྱིས་ཁ་དཔེ་འདི་དྲངས་ཏེ་ཁྱོད་ལ། མ་གང་འདྲ་ཡིན་ན་བུ་མོའང་དེ་འདྲ་ཡིན་ཞེས་སྨྲ་བར་འགྱུར།
EZE 16:45 ཁྱོད་ནི་དངོས་གནས་རང་གི་ཁྱོ་ག་དང་བུ་ཕྲུག་རྣམས་འདོར་མཁན་གྱི་མ་ཡི་བུ་མོ་དང་། ཁྱོད་ནི་དངོས་གནས་རང་གི་ཁྱོ་ག་དང་བུ་ཕྲུག་རྣམས་འདོར་མཁན་གྱི་ལྕམ་སྲིང་གི་ཨ་ཅེ་དང་སྲིང་མོ་སྟེ། ཁྱོད་ཚོའི་མ་ནི་ཧེད་པ་དང་ཁྱོད་ཚོའི་ཕ་ནི་ཨེ་མོར་པ་ཡིན།
EZE 16:46 ཁྱོད་ཀྱི་གཅེན་མོ་ནི་སཱ་མར་ཡ་སྟེ། མོ་དང་མོའི་བུ་མོ་རྣམས་ནི་ཁྱོད་ཀྱི་བྱང་ཕྱོགས་སུ་གནས་ཤིང་། ཁྱོད་ཀྱི་སྲིང་མོ་ནི་སཱ་དོམ་ཡིན་ཏེ། མོ་དང་མོའི་བུ་མོ་རྣམས་ནི་ཁྱོད་ཀྱི་ལྷོ་ཕྱོགས་སུ་གནས་པའོ། །
EZE 16:47 ཁྱོད་ཀྱིས་དེ་ཚོས་སྤྱོད་པ་བཞིན་དུ་སྤྱད་པ་དང་། དེ་དག་གིས་ཞེན་ལོག་གི་དོན་སྤྱད་པ་བཞིན་དུ་སྤྱད་པར་མ་ཟད། ད་དུང་ཁྱོད་ཀྱིས་དེ་རྣམས་དོན་ཆུང་བར་བརྩིས་ཤིང་། ཁྱོད་ཀྱིས་སྤྱད་པའི་ལས་ཐམས་ཅད་ནི་དེ་ལས་ཀྱང་ཐུ་བ་ཡིན།
EZE 16:48 བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ཁྱོད་ཀྱི་སྲིང་མོ་སཱ་དོམ་དང་མོའི་བུ་མོ་རྣམས་ཀྱིས་ཀྱང་ཁྱོད་དང་ཁྱོད་ཀྱི་བུ་མོ་རྣམས་ཀྱིས་སྤྱད་པ་བཞིན་དུ་མ་སྤྱད་དོ་ཞེས་གཙོ་བོ་ཡ་ཝཱེས་གསུངས།
EZE 16:49 དེ་ཡང་ཁྱོད་ཀྱི་སྲིང་མོ་སཱ་དོམ་གྱི་སྡིག་ཉེས་ནི་འདི་ལྟ་སྟེ། མོ་དང་མོའི་བུ་མོ་རྣམས་ནི་ང་རྒྱལ་ཆེ་ཞིང་རང་རློམ་མཐོ་བ་སྟེ། འབྲུ་རིགས་མོད་པོ་ཡོད་ཅིང་འཚོ་བ་སྐྱིད་ནའང་། ཉམ་ཐག་པའི་མི་དང་དབུལ་ཕོངས་རྣམས་ལ་རོགས་རམ་མ་བྱས་སོ། །
EZE 16:50 དེ་དག་རང་སྣང་མཐོ་ཞིང་ང་རྒྱལ་ཆེ་བ་དང་། ངའི་མདུན་དུ་ཞེན་ལོག་གི་ལས་སྤྱད་པ་ངས་མཐོང་བས་དེ་རྣམས་མེད་པར་བྱས་པ་ཡིན།
EZE 16:51 སཱ་མར་ཡ་ཡིས་ཁྱོད་ཀྱི་སྡིག་པའི་ཕྱེད་ཀ་ཙམ་ཡང་མ་བྱས་ལ། ཁྱོད་ཀྱིས་ཞེན་ལོག་གི་ལས་སྤྱད་པ་ནི་དེ་ལས་ཀྱང་མང་སྟེ། ཐ་ན་ཁྱོད་ཀྱིས་སྤྱད་པའི་ཞེན་ལོག་གི་དོན་རྣམས་དང་བསྡུར་ན་ཁྱོད་ཀྱི་ལྕམ་སྲིང་དག་ནི་དྲང་བདེན་དུ་མངོན་པ་ཡིན།
EZE 16:52 ཁྱོད་ཀྱིས་རང་གི་ལྕམ་སྲིང་རྣམས་ནི་རང་ཉིད་ལས་དྲང་བདེན་དུ་མངོན་པར་བྱས་ན། ཁྱོད་ཀྱིས་རང་གི་ངོ་ཚ་འཁུར་དགོས་ཏེ། གང་ལ་ཞེ་ན། ཁྱོད་ཀྱིས་སྤྱད་པའི་སྡིག་པ་ནི་དེ་དག་ལས་ཀྱང་སྐྱུག་བྲོ་བ་ཡིན་ཞིང་། དེ་དག་ཁྱོད་དང་བསྡུར་ན་དྲང་བདེན་ཡིན། ཁྱོད་ཀྱིས་རང་གི་ལྕམ་སྲིང་རྣམས་དྲང་བདེན་དུ་མངོན་པར་བྱས་པས། ཁྱོད་ནི་ངོ་ཚ་བར་འགྱུར་ཞིང་རང་གི་ངོ་ཚ་འཁུར་དགོས་སོ། །
EZE 16:53 ངས་སཱ་དོམ་དང་མོའི་བུ་མོ་རྣམས་དང་། སཱ་མར་ཡ་དང་མོའི་བུ་མོ་རྣམས་ནི་དཀའ་བའི་གནས་ལས་ཕྱིར་ལོག་ཏུ་འཇུག་ཅིང་། ངས་ཁྱོད་རྣམས་ཀྱང་དེ་དག་དང་མཉམ་དུ་ཕྱིར་ལོག་ཏུ་བཅུག་ནས།
EZE 16:54 ཁྱོད་ལ་རང་གི་ངོ་ཚ་འཁུར་བར་བྱ་ཞིང་། ཁྱོད་ཀྱིས་སྤྱད་པའི་ལས་ཐམས་ཅད་ཀྱི་དབང་གིས་དེ་ཚོར་སེམས་གསོ་འཐོབ་པ་དང་། དེ་ནས་ཁྱོད་ངོ་ཚ་བར་འགྱུར་རོ། །
EZE 16:55 ཡང་ཁྱོད་ཀྱི་སྲིང་མོ་སཱ་དོམ་དང་མོའི་བུ་མོ་རྣམས་ནི་སྔར་བཞིན་གནས་ཤིང་། སཱ་མར་ཡ་དང་མོའི་བུ་མོ་རྣམས་ཀྱང་སྔར་བཞིན་གནས་པར་འགྱུར་ལ། ཁྱོད་དང་ཁྱོད་ཀྱི་བུ་མོ་རྣམས་ཀྱང་སྔར་བཞིན་གནས་པར་འགྱུར།
EZE 16:56 ཁྱོད་རང་ང་རྒྱལ་ཆེ་ཞིང་རང་སྣང་མཐོ་བའི་དུས་སུ། ཁྱོད་ཀྱི་སྲིང་མོ་སཱ་དོམ་ནི་ཁྱོད་ཀྱི་ངག་གི་དགོད་གཞི་རུ་གྱུར་པ་མ་ཡིན་ནམ།
EZE 16:57 དུས་དེར་ཁྱོད་ཀྱི་ངན་སྤྱོད་རྣམས་ད་དུང་ཕྱི་རུ་མ་མངོན་ནའང་། ད་ལྟ་ཁྱོད་ནི་ཨ་རམ་གྱི་བུ་མོ་རྣམས་དང་ཕྱོགས་བཞིའི་མི་རྣམས་དང་། ཕེ་ལེ་ཤེད་ཀྱི་བུ་མོ་རྣམས་ཀྱི་འཕྱ་དགོད་བྱེད་ཡུལ་དུ་གྱུར་པ་དང་། ཁྱོད་ཀྱི་མཐའ་འཁོར་གྱི་མི་རྣམས་ཀྱིས་ཀྱང་ཁྱོད་ལ་མཐོང་ཆུང་བྱེད་པའོ། །
EZE 16:58 ཁྱོད་ཀྱིས་རང་གི་ལོག་གཡེམ་དང་ཞེན་ལོག་གི་ལས་སྤྱད་པའི་མཇུག་འབྲས་རྣམས་འཁུར་དགོས་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
EZE 16:59 ཡང་གཙོ་བོ་ཡ་ཝཱེས་འདི་སྐད་དུ། ཀྱེ་མནའ་ཚིག་ལ་མཐོང་ཆུང་བྱེད་ཅིང་ཁ་ཆད་འདོར་མཁན་ཁྱོད་ལ། ངས་ཁྱོད་ཀྱིས་གང་ཞིག་སྤྱད་པ་དེ་བཞིན་དུ་ལན་འཇལ་བར་བྱའོ། །
EZE 16:60 ཡིན་ཡང་ངས་ད་དུང་ཁྱོད་རང་གཞོན་དུས་སུ་ཁྱོད་ལ་བཞག་པའི་ཁ་ཆད་དེ་དྲན་ཞིང་། ཁྱོད་ལ་དུས་གཏན་གྱི་ཁ་ཆད་ཅིག་འཇོག་པར་བྱ།
EZE 16:61 དེ་ནས་ཁྱོད་ཀྱིས་རང་གི་གཅེན་མོ་དང་སྲིང་མོ་དང་ལེན་བྱེད་དུས་སུ། རང་གིས་སྤྱད་པའི་ལས་རྣམས་དྲན་ཏེ་ངོ་ཚ་བར་འགྱུར་ལ། ངས་དེ་ཚོ་ནི་ཁྱོད་ལ་བུ་མོ་རུ་གནང་ཡང་། འདི་ནི་ངས་ཁྱོད་ལ་བཞག་པའི་ཁ་ཆད་གཞིར་བཟུང་བ་མ་ཡིན་ནོ། །
EZE 16:62 ངས་ཁྱོད་ལ་བཞག་པའི་ཁ་ཆད་དེ་བརྟན་པོར་བྱེད་ཅིང་། ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ལ།
EZE 16:63 ངས་ཁྱོད་ཀྱིས་ཅི་བྱས་ཐམས་ཅད་ལ་གུ་ཡངས་གཏོང་བའི་ཚེ། ཁྱོད་ཀྱིས་ཕྱིར་དྲན་བྱེད་ཅིང་ངོ་ཚ་བར་འགྱུར་ཏེ། ཡང་རང་ཉིད་ལ་ངོ་ཚ་ཐེབས་པའི་རྐྱེན་གྱིས་ད་ནི་ངག་བསྡམ་པར་བྱའོ་གསུངས་ཞེས་སྨྲོས་ཤིག་ཅེས་གཙོ་བོ་ཡ་ཝཱེས་གསུངས་སོ། །
EZE 17:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 17:2 ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་གབ་ཚིག་སྨྲས་ནས་དཔེ་བཞག་སྟེ་འདི་ལྟར་སྨྲོས་ཤིག
EZE 17:3 གཙོ་བོ་ཡ་ཝཱེས་འདི་སྐད་དུ། གཤོག་པ་ཆེ་ཞིང་གཤོག་སྒྲོ་རིང་ལ། བྱ་སྒྲོ་མང་ཞིང་ཁ་དོག་རྣམ་པར་བཀྲ་བའི་གླག་ཆེན་པོ་ཞིག་ལེ་པཱ་ནོན་དུ་བབས་ནས་ཐང་ཤིང་གི་རྩེ་མོ་བཏོགས་པ་དང་།
EZE 17:4 དེས་ལྗོན་ཤིང་གི་རྩེ་མོའི་ལྕུག་མ་གསར་པ་བཅད་ནས་དེ་ཚོང་རྒྱག་ས་དང་ཚོང་པའི་གྲོང་ཁྱེར་དུ་ཁྱེར་ཏེ་བཙུགས།
EZE 17:5 ཡང་དེས་ས་བོན་ཁྱེར་ཏེ་ལྕང་མ་འཛུགས་པ་བཞིན་དུ་ས་བཅུད་འཛོམས་ས་དང་ཆུ་རྒྱུན་གྱི་འགྲམ་དུ་གཏོར་ནས།
EZE 17:6 ས་བོན་དེ་ཆེར་སྐྱེས་ནས་གང་སར་མཆེད་པའི་རྒུན་འབྲུམ་ཤིང་ཕྲན་ཞིག་ཏུ་གྱུར་པ་དང་། ཤིང་གི་ཡལ་ག་རྣམས་གླག་གི་ཕྱོགས་སུ་འཁོར་ཞིང་རྩ་བ་དེའི་འོག་ཏུ་ཡོད། དེ་བཞིན་དུ་དེ་ནི་རྒུན་འབྲུམ་ཤིང་ཞིག་ཏུ་གྱུར་ནས། ཡལ་འདབ་རྒྱས་ཤིང་མྱུ་གུ་འབུས་པའོ། །
EZE 17:7 ཡང་གླག་གཞན་ཞིག་ཡོད་པའང་གཤོག་པ་ཆེ་ཞིང་བྱ་སྒྲོ་མང་ལ། ལྟོས་དང་། རྒུན་འབྲུམ་ཤིང་དེ་ལྗང་བུ་གསོ་ས་ནས་གླག་དེས་ཆུ་འདྲེན་པའི་ཕྱིར་རྩ་བ་གླག་གི་ཕྱོགས་སུ་བརྐྱངས་ཤིང་། གླག་དེའི་ཕྱོགས་སུ་ཡལ་འདབ་རྒྱས་པ་རེད།
EZE 17:8 དོན་དམ་དུ་རྒུན་འབྲུམ་ཤིང་དེ་ནི་སྔ་མོ་ནས་ས་བཅུད་འཛོམས་ས་དང་ཆུ་རྒྱུན་གྱི་འགྲམ་དུ་བཙུགས་ཡོད་པས། ཡལ་འདབ་རྒྱས་ཤིང་འབྲས་བུ་ཐོགས་ནས་རྒུན་འབྲུམ་ཤིང་ཡིད་དུ་འོང་བ་ཞིག་ཏུ་འགྱུར་ཐུབ་པ་ཡིན་གསུངས་ཞེས་པའོ། །
EZE 17:9 ཡང་ཁྱོད་ཀྱིས་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། རྒུན་འབྲུམ་ཤིང་འདི་ནི་ཅི་ལྟར་ལོ་འདབ་རྒྱས་སམ། གླག་གིས་དེ་རྩ་བ་ནས་འདོན་ཞིང་འབྲས་བུ་བཏོགས་ཏེ། དེ་དང་དེ་ལས་སྐྱེས་པའི་ལོ་མ་གསར་པ་རྣམས་སྐམ་པར་བྱེད་པ་མ་ཡིན་ནམ། དོན་དམ་དུ་དེ་རྩ་བ་ནས་འདོན་པར་ཤུགས་ཆེན་པོ་དང་མི་མང་པོ་ནི་མི་དགོས་སོ། །
EZE 17:10 ལྟོས་དང་། རྒུན་འབྲུམ་ཤིང་ནི་བཙུགས་ནའང་དེ་རྒྱས་པར་འགྱུར་རམ། ཤར་རླུང་གཡུགས་ནས་དེར་རྒོལ་དུས་དེ་སྐམ་པར་འགྱུར་བ་མ་ཡིན་ནམ། དེ་ནི་ལྗང་བུ་གསོ་ས་ནས་སྐམ་པར་འགྱུར་རོ་གསུངས་ཞེས་པའོ་ཞེས་གསུངས་སོ། །
EZE 17:11 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 17:12 ཁྱོད་ཀྱིས་ཁྱིམ་རྒྱུད་ངོ་ལོག་ཅན་དེ་ལ་འདི་ལྟར། ཁྱོད་རྣམས་ཀྱིས་བྱ་བ་འདིའི་དོན་ཅི་ཡིན་པ་མི་ཤེས་སམ་ཞེས་དྲིས་ཤིག་དང་། ཡང་དེ་ཚོར་འདི་ལྟར་སྨྲོས་ཤིག ལྟོས་དང་། སྔར་པཱ་པེལ་ལོན་གྱི་རྒྱལ་པོ་ཡེ་རུ་སཱ་ལེམ་དུ་འོངས་ནས། ཡུལ་དེའི་རྒྱལ་པོ་དང་འགོ་དཔོན་རྣམས་བཟུང་ནས་ཁོ་དང་མཉམ་དུ་པཱ་པེལ་ལོན་ལ་བཙོན་དུ་ཁྲིད་དེ།
EZE 17:13 ཁོས་ཡེས་ར་ཨེལ་གྱི་རྒྱལ་རྒྱུད་ལས་མི་གཅིག་བདམས་ཏེ། དེ་དང་ཁ་ཆད་བཞག་ནས་དེར་མནའ་བསྐྱལ་དུ་བཅུག་པ་དང་། ད་དུང་རྒྱལ་ཁབ་ནང་གི་སྟོབས་ཤུགས་ཡོད་པ་རྣམས་བཙོན་དུ་ཁྲིད་ཅིང་།
EZE 17:14 རྒྱལ་ཁབ་ཉམས་སུ་བཅུག་སྟེ་ཡང་བསྐྱར་དར་རྒྱས་སུ་འགྲོ་མ་ཐུབ་པས། ཁ་ཆད་བརྩི་སྲུང་གཟབ་ནན་བྱས་ན་ད་གཟོད་ཁོ་རྣམས་གནས་ཐུབ་པ་ཡིན།
EZE 17:15 འོན་ཀྱང་མི་དེས་དམག་རྟ་དང་དཔུང་ཆེན་འཐོབ་པའི་ཆེད་དུ། ཨེ་ཅིབ་ཡུལ་དུ་ཕོ་ཉ་མངགས་ནས་པཱ་པེལ་ལོན་གྱི་རྒྱལ་པོར་ངོ་ལོག་བྱས་པའོ། །མི་དེའི་བསམ་དོན་འགྲུབ་ཐུབ་བམ། དོན་དེ་འདྲ་བྱས་པའི་མི་ནི་ཅི་ལྟར་ཐར་རམ། མི་དེས་ཁ་ཆད་བརྩི་སྲུང་མ་བྱས་པས་ཅི་ལྟར་ཐར་རམ།
EZE 17:16 བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། དེས་རང་གིས་བསྐྱལ་བའི་མནའ་ལ་མཐོང་ཆུང་བྱས་ཤིང་རྒྱལ་པོ་དང་བཞག་པའི་ཁ་ཆད་དོར་བས། ཁོ་ནི་རྒྱལ་སར་བཀོད་ས་སྟེ་པཱ་པེལ་ལོན་གྱི་རྒྱལ་ཁབ་ཏུ་འཆི་བར་འགྱུར་རོ་ཞེས་གཙོ་བོ་ཡ་ཝཱེས་གསུངས།
EZE 17:17 དགྲ་ཡིས་གྲོང་ཁྱེར་བསྐོར་བའི་མཁར་མཐོན་པོ་བརྩིགས་ཤིང་། གྲོང་ཁྱེར་ལ་རྒོལ་བའི་ཆེད་དུ་ས་རགས་བརྩིགས་ནས་མི་མང་པོ་ཚར་དུ་གཅོད་དུས། ཕཱར་ཨོལ་གྱིས་དཔུང་ཆེན་དང་དམག་མང་པོ་ཁྲིད་འོངས་ཀྱང་། དེའི་དོན་དུ་གཡུལ་འགྱེད་མི་ཐུབ་བོ། །
EZE 17:18 དེས་མནའ་ཚིག་ལ་མཐོང་ཆུང་བྱས་ནས་ཁ་ཆད་དོར་བ་དང་། ཁོས་བློ་དཀར་བའི་དམ་བཅའ་བཞག་ཀྱང་དོན་དེ་ཐམས་ཅད་སྤྱད་པས། ཁོ་ནི་ཐར་བར་མི་འགྱུར་རོ། །
EZE 17:19 དེ་བས་གཙོ་བོ་ཡ་ཝཱེས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ཁོས་ངའི་མནའ་ཚིག་ལ་མཐོང་ཆུང་བྱས་ཏེ་ངའི་ཁ་ཆད་དོར་བ་ཡིན་ན། ངས་སྡིག་པ་དེ་ཁོའི་སྟེང་དུ་འགེལ་བར་བྱའོ། །
EZE 17:20 ངས་རང་གི་དྲ་དེའི་སྟེང་དུ་གཏོར་ནས་ཁོ་ངའི་དྲ་ཡི་ནང་དུ་འཚུད་པར་འགྱུར་ཞིང་། ངས་དེ་པཱ་པེལ་ལོན་དུ་ཁྲིད་དེ། ཁོ་རང་ང་ལ་བློ་མི་དཀར་བའི་སྡིག་པའི་ཆེད་དུ། ངས་གནས་དེར་ཁོ་ལ་ཉེས་ཆད་གཅོད་པར་འགྱུར།
EZE 17:21 དེ་ནས་ཁོའི་དམག་དཔུང་གི་དམག་མི་དཔའ་རྩལ་ཅན་ཚང་མ་རལ་གྲིའི་འོག་ཏུ་འཆི་བར་འགྱུར་ཞིང་། ལྷག་ལུས་རྣམས་ཀྱང་ཕྱོགས་བཞིར་ཁ་ཐོར་དུ་འགྲོ་བ་དང་། དེ་ནས་ཁྱོད་ཚོས་འདི་སྐད་སྨྲ་བ་ནི་ཡ་ཝཱེ་ང་རང་ཡིན་པ་རྟོགས་པར་འགྱུར་རོ། །
EZE 17:22 གཙོ་བོ་ཡ་ཝཱེས་འདི་སྐད་དུ། ངས་ཐང་ཤིང་མཐོན་པོའི་རྩེ་མོ་ནས་ཡལ་ག་ཞིག་བླངས་ཏེ་འཛུགས་ཤིང་། ངས་དེའི་རྩེ་མོའི་ལྕུག་མ་གསར་པ་ཞིག་བཅད་ནས་རི་མཐོན་པོའི་ཁར་འཛུགས་པར་བྱ་སྟེ།
EZE 17:23 ངས་དེ་ཡེས་ར་ཨེལ་གྱི་རི་མཐོན་པོའི་ཁར་བཙུགས་ནས། དེར་ཡལ་ག་སྐྱེས་ནས་ཤིང་ཏོག་ཐོགས་པ་དང་། ཡིད་དུ་འོང་བའི་ཐང་ཤིང་དུ་འགྱུར་ཞིང་། འདབ་ཆགས་སྣ་ཚོགས་དེའི་འོག་ཏུ་སྡོད་པ་སྟེ། དེའི་ཡལ་གའི་བསིལ་གྲིབ་འོག་ཏུ་སྡོད་པར་འགྱུར།
EZE 17:24 དེ་ནས་ང་ཡ་ཝཱེས་ལྗོན་ཤིང་མཐོན་པོ་རྣམས་དམའ་མོ་དང་དམའ་མོ་རྣམས་མཐོན་པོ། ལྗོན་ཤིང་སྔོ་ལྗང་རྣམས་སྐམ་པོ་དང་སྐམ་པོ་རྣམས་ལོ་འདབ་རྒྱས་པར་བྱེད་པ་ཐང་གི་ལྗོན་ཤིང་ཐམས་ཅད་ཀྱིས་ཤེས་པར་འགྱུར་ལ། ཡ་ཝཱེ་བདག་གིས་ཅི་ལྟར་སྨྲས་པ་ཡིན་ན་དེ་ལྟར་བསྒྲུབ་པར་འགྱུར་རོ་གསུངས་ཞེས་པའོ་ཞེས་གསུངས་སོ། །
EZE 18:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 18:2 ཡེས་ར་ཨེལ་ཡུལ་གྱི་སྐོར་གླེང་ན། ཕ་ཡིས་རྒུན་འབྲུམ་སྐྱུར་མོ་ཟོས་པས་བུ་ཡི་སོ་བརྩེ་བའི་ཁ་དཔེ་འདི་ཁྱོད་ཚོས་ཅི་ལ་འདྲེན་ནམ།
EZE 18:3 བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ཁྱོད་ཚོས་ཡེས་ར་ཨེལ་གྱི་ནང་དུ་ཁ་དཔེ་འདི་སླར་འདྲེན་པར་མི་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་གསུངས་སོ། །
EZE 18:4 ལྟོས་དང་། མི་ཐམས་ཅད་ཀྱི་ཚེ་སྲོག་ནི་ང་ལ་གཏོགས་ཤིང་། ཕ་རྣམས་ཀྱི་ཚེ་སྲོག་ཇི་ལྟར་ང་ལ་གཏོགས་པ་བཞིན་དུ། བུ་རྣམས་ཀྱི་ཚེ་སྲོག་ཀྱང་དེ་ལྟར་ང་ལ་གཏོགས་སོ། །ཡིན་ཡང་སྡིག་སྤྱོད་ཅན་རྣམས་འཆི་བར་འགྱུར་རོ། །
EZE 18:5 གལ་ཏེ་མི་ཞིག་དྲང་བདེན་ཡིན་ཞིང་། བདེན་པ་དང་དྲང་གཞག་གི་ལས་རྣམས་སྤྱད་པ་ཡིན་ཚེ།
EZE 18:6 དེས་རི་མགོར་མཆོད་རྫས་མི་ཟ་ཞིང་། མིག་གིས་ཡེས་ར་ཨེལ་ཁྱིམ་རྒྱུད་ཀྱི་སྐུ་འདྲ་རྣམས་ལ་རེ་ལྟོས་མི་བྱེད་ལ། རང་གི་ཁྱིམ་མཚེས་ཀྱི་ཆུང་མ་བཙོག་པར་མི་བྱེད་པ་དང་། ཟླ་མཚན་འབབ་པའི་བུད་མེད་དང་ཉེ་བར་མི་བཅར།
EZE 18:7 མི་སུ་ལའང་བརྙས་བཅོས་དང་གཉའ་གནོན་མི་བྱེད་ཅིང་། བུན་པའི་གཏའ་མ་ཕྱིར་སྤྲོད་པ་དང་། མི་ཡི་དངོས་ཟོག་ཁོས་མི་འཕྲོག་པའི་ཁར་བཀྲེས་ལྟོགས་ཀྱིས་མནར་བ་རྣམས་ལ་རང་གི་ཁ་ཟས་སྦྱིན་ཞིང་། གཅེར་བུ་རྣམས་ལ་གོས་བསྐོན་པར་བྱའོ། །
EZE 18:8 མི་ལ་དངོས་པོ་གཡར་ན་ཁོས་བུན་སྐྱེད་མི་ལེན་ཞིང་མང་པོའང་མི་ལེན་པ་དང་། ཁོས་རང་གི་ལག་པ་ནག་ཉེས་དང་རིང་དུ་འབྲལ་བར་བྱས་ནས། མི་དང་མི་ཡི་བར་དུ་དྲང་བདེན་གྱི་ཁྲིམས་ཐག་གཅོད་པ་ཡིན།
EZE 18:9 དེས་ངའི་སྒྲིག་ཁྲིམས་བརྩི་ཞིང་ངའི་སྒྲིག་སྲོལ་གཟབ་ནན་ངང་བསྲུངས་ནས། དྲང་བདེན་བཞིན་སྤྱོད་དེ། མི་དེ་ནི་དྲང་བདེན་ཞིག་ཡིན་པས་དེ་གསོན་པར་འགྱུར་རོ་ཞེས་གཙོ་བོ་ཡ་ཝཱེས་གསུངས་སོ། །
EZE 18:10 དེ་ཡང་ཁོ་ལ་བུ་ཞིག་སྐྱེས་ཏེ། བུ་དེ་ནི་གཏུམ་དྲག་ཅན་ཡིན་ཞིང་། མི་གཞན་ལ་ཁྲག་བཞུར་དུ་འཇུག་པ་དང་། ཡང་ན་རང་གི་སྤུན་ཟླར་གོང་དུ་སོང་བའི་ངན་སྤྱོད་རྣམས་ལས་གཅིག་སྤྱོད་པ་ཡིན་ན།
EZE 18:11 ཁོའི་ཕ་ཡིས་དོན་དེ་རྣམས་མ་བྱས་ཀྱང་། ཁོས་རི་མགོར་མཆོད་རྫས་ཟ་ཞིང་རང་གི་ཁྱིམ་མཚེས་ཀྱི་ཆུང་མ་བཙོག་པར་བྱེད་པ་དང་།
EZE 18:12 དཀའ་སྡུག་ཅན་དང་དབུལ་པོར་བརྙས་བཅོས་དང་གཉའ་གནོན་བྱས་ནས་མི་ཡི་དངོས་ཟོག་འཕྲོག་པ་དང་། བུན་པའི་གཏའ་མ་ཕྱིར་མི་སྤྲོད་པར། མིག་གིས་སྐུ་འདྲར་རེ་ལྟོས་བྱས་ནས་ཞེན་ལོག་གི་ལས་སྤྱོད་ཅིང་།
EZE 18:13 མི་ལ་དངོས་པོ་གཡར་ན་ཁོས་བུན་སྐྱེད་ལེན་ཞིང་མང་པོ་ལེན་པ་ཡིན་ན། མི་དེ་ལྟ་བུ་ནི་གསོན་པར་འགྱུར་རམ་ཞེ་ན། དེ་ནི་གསོན་པར་མི་འགྱུར་ཞིང་། ཁོས་ཞེན་ལོག་གི་ལས་འདི་ཐམས་ཅད་སྤྱད་པས་ཁོ་འཆི་བར་འགྱུར་ལ། ཁོའི་སྡིག་པ་རང་གི་སྟེང་དུ་འབབ་པར་འགྱུར།
EZE 18:14 དེ་ཡང་ཁོ་ལ་བུ་ཞིག་སྐྱེས་ཏེ། བུ་དེས་རང་གི་ཕ་ཡིས་སྤྱད་པའི་སྡིག་པ་ཐམས་ཅད་མཐོང་བ་དང་། ཁོས་དེ་རྣམས་མཐོང་ན་ཡང་དེ་བཞིན་དུ་མི་སྤྱོད་དེ།
EZE 18:15 ཁོས་རི་མགོར་མཆོད་རྫས་མི་ཟ་ཞིང་། མིག་གིས་ཡེས་ར་ཨེལ་ཁྱིམ་རྒྱུད་ཀྱི་སྐུ་འདྲ་རྣམས་ལ་རེ་ལྟོས་མི་བྱེད་ལ། རང་གི་ཁྱིམ་མཚེས་ཀྱི་ཆུང་མ་བཙོག་པར་མི་བྱེད་པ་དང་།
EZE 18:16 མི་སུ་ལའང་བརྙས་བཅོས་དང་གཉའ་གནོན་མི་བྱེད་ཅིང་། གཏའ་མ་གང་ཡང་མི་ལེན་པར། མི་ཡི་དངོས་ཟོག་མི་འཕྲོག་པའི་ཁར་བཀྲེས་ལྟོགས་ཀྱིས་མནར་བ་རྣམས་ལ་རང་གི་ཁ་ཟས་སྦྱིན་ཞིང་། གཅེར་བུ་རྣམས་ལ་གོས་བསྐོན་པ་དང་།
EZE 18:17 ཁོས་ལག་པ་བརྐྱངས་ནས་དཀའ་སྡུག་ཅན་ལ་བརྙས་བཅོས་དང་གཉའ་གནོན་མི་བྱེད་ཅིང་། མི་ལ་དངོས་པོ་གཡར་ན་ཁོས་བུན་སྐྱེད་མི་ལེན་ལ་མང་པོའང་མི་ལེན་པར། ཁོས་ངའི་སྒྲིག་སྲོལ་བསྲུངས་ནས་ངའི་སྒྲིག་ཁྲིམས་བརྩིས་ན། མི་དེ་ནི་རང་གི་ཕ་ཡི་སྡིག་པའི་རྐྱེན་གྱིས་མི་འཆི་བར་གསོན་པར་ངེས་སོ། །
EZE 18:18 ཡང་དེའི་ཕ་ལ་མཚོན་ན། ཁོས་མི་གཞན་གྱི་དངོས་པོ་བཙན་གྱིས་བླངས་ཏེ་སྤུན་ཟླའི་དངོས་ཟོག་ཕྲོགས་པ་དང་། རང་གི་མི་རྣམས་ཀྱི་ནང་དུ་དོན་ངན་པ་སྤྱད་པས། ལྟོས་དང་། ཁོ་ནི་རང་གི་སྡིག་པའི་རྐྱེན་གྱིས་འཆི་བར་འགྱུར།
EZE 18:19 ཁྱོད་ཚོས་ད་དུང་བུ་ཡིས་རང་གི་ཕ་ཡི་སྡིག་པ་ཅི་ལ་མི་འཁུར་ཞེས་འདྲིའམ། གལ་ཏེ་བུ་ཡིས་དྲང་བདེན་དང་བདེན་པའི་དོན་རྣམས་སྤྱད་དེ། ངའི་སྒྲིག་ཁྲིམས་རྣམས་བསྲུངས་ནས་དེ་བཞིན་བྱས་ན་དེ་ངེས་པར་དུ་གསོན་པར་འགྱུར་རོ། །
EZE 18:20 སྡིག་པ་བྱེད་པ་དེ་ཁོ་ན་འཆི་བར་འགྱུར་ཞིང་། བུ་ཡིས་རང་གི་ཕ་ཡི་སྡིག་པ་འཁུར་མི་དགོས་ལ། ཕ་ཡིས་ཀྱང་རང་གི་བུ་ཡི་སྡིག་པ་འཁུར་མི་དགོས་པར། དྲང་བདེན་ཅན་གྱི་དྲང་བདེན་ནི་ཁོ་རང་གི་སྟེང་དུ་འབབ་པར་འགྱུར་ལ། སྡིག་སྤྱོད་ཅན་གྱི་ངན་པ་དེ་ཡང་ཁོ་རང་གི་སྟེང་དུ་འབབ་པར་འགྱུར།
EZE 18:21 ཇི་སྟེ་སྡིག་སྤྱོད་ཅན་ཞིག་གིས་འགྱོད་བཤགས་བྱས་ཏེ་རང་གིས་སྤྱད་པའི་སྡིག་པ་ཐམས་ཅད་དང་བྲལ་ནས། ངའི་སྒྲིག་ཁྲིམས་ཐམས་ཅད་གཟབ་ནན་ངང་བསྲུངས་པ་དང་། དྲང་བདེན་དང་བདེན་པའི་དོན་རྣམས་སྤྱད་ན་གསོན་ངེས་ཡིན་ལ་འཆི་བར་མི་འགྱུར་རོ། །
EZE 18:22 ཡང་དེའི་ནག་ཉེས་བགྲང་བའི་རྒྱུ་མཚན་དུ། དེས་བྱས་པའི་སྡིག་པ་ཐམས་ཅད་ཀྱང་དྲན་པར་མི་བྱ་སྟེ། དེ་ནི་རང་གིས་སྤྱད་པའི་དྲང་བདེན་གྱི་དབང་གིས་གསོན་པར་འགྱུར།
EZE 18:23 སྡིག་སྤྱོད་ཅན་རང་གི་ལམ་ནང་འཆི་བར་ང་དགའ་བ་ཡིན་ནམ། ཁོ་རྣམས་རང་གིས་སྤྱོད་པའི་ལས་ནས་ཕྱིར་ལོག་སྟེ་གསོན་པར་གྱུར་ན་ང་མི་དགའ་འམ་ཞེས་གཙོ་བོ་ཡ་ཝཱེས་གསུངས་སོ། །
EZE 18:24 ཇི་སྟེ་མི་དྲང་བདེན་ཞིག་གིས་རང་གི་དྲང་བདེན་དང་བྲལ་ནས་ངན་པ་སྤྱད་དེ། སྡིག་སྤྱོད་བཞིན་དུ་ཞེན་ལོག་གི་དོན་རྣམས་བྱས་ན། ཁོ་ནི་གསོན་པར་འགྱུར་རམ། ཁོས་སྤྱད་པའི་དྲང་བདེན་ཐམས་ཅད་དྲན་པར་མི་བྱ་ཞིང་། རང་གི་བློ་མི་དཀར་བའི་དོན་དང་ཁོས་སྤྱད་པའི་ནག་ཉེས་ཀྱི་དབང་གིས་ཁོ་ནི་འཆི་བར་འགྱུར་རོ། །
EZE 18:25 ཁྱོད་ཚོས་ད་དུང་གཙོ་བོའི་མཛད་པ་དྲང་གཞག་མིན་ནོ་ཟེར། ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ཁྱོད་ཚོས་ཉོན་ཅིག ངས་སྤྱད་པ་གང་ཞིག་དྲང་བདེན་མ་ཡིན་ནམ། ཁྱོད་ཚོས་སྤྱད་པ་དྲང་བདེན་མ་ཡིན་པ་མིན་ནམ།
EZE 18:26 གལ་ཏེ་མི་དྲང་བདེན་ཞིག་གིས་རང་གི་དྲང་བདེན་དང་བྲལ་ཏེ་ངན་པ་སྤྱད་ན། ཁོ་ནི་དེའི་རྐྱེན་གྱིས་འཆི་བར་འགྱུར་ཞིང་། ཁོ་ནི་རང་གིས་སྤྱད་པའི་དྲང་བདེན་མ་ཡིན་པ་དེའི་རྐྱེན་གྱིས་འཆི་བར་འགྱུར།
EZE 18:27 ཡང་ཇི་སྟེ་སྡིག་སྤྱོད་ཅན་ཞིག་གིས་འགྱོད་བཤགས་བྱས་ཏེ་རང་གི་གདུག་པ་དང་བྲལ་ནས། དྲང་བདེན་དང་བདེན་པའི་དོན་རྣམས་སྤྱད་ན་དེས་རང་གི་ཚེ་སྲོག་སྐྱོབ་པར་འགྱུར་རོ། །
EZE 18:28 གང་ལ་ཞེ་ན། ཁོས་བསམ་བློ་བཏང་རྗེས་རང་གི་སྤྱད་པའི་སྡིག་པ་ཐམས་ཅད་དང་བྲལ་བས། ཁོ་ནི་གསོན་པོར་ལུས་ཤིང་འཆི་བར་མི་འགྱུར་རོ། །
EZE 18:29 ཡིན་ཡང་ཡེས་ར་ཨེལ་གྱི་ཁྱིམ་རྒྱུད་ཀྱིས་ད་དུང་གཙོ་བོའི་མཛད་པ་དྲང་གཞག་མིན་ནོ་ཟེར། ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ངས་སྤྱད་པ་གང་ཞིག་དྲང་བདེན་མ་ཡིན་ནམ། ཁྱོད་ཚོས་སྤྱད་པ་དྲང་བདེན་མ་ཡིན་པ་མིན་ནམ།
EZE 18:30 དེ་བས། ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ངས་ཁྱོད་ཚོ་རེ་རེས་སྤྱད་པའི་ལས་བཞིན་དུ་ཁྱོད་རྣམས་ལ་ཁྲིམས་ཐག་གཅོད་པར་བྱའོ། །སྡིག་པ་དེ་རང་གི་བཀག་རྡོ་རུ་མི་འགྱུར་བའི་ཆེད་དུ། ཁྱོད་ཚོས་འགྱོད་བཤགས་བྱོས་ལ་རང་གི་སྡིག་ཉེས་ཐམས་ཅད་དང་འབྲལ་བར་གྱིས་ཤིག་ཅེས་གཙོ་བོ་ཡ་ཝཱེས་གསུངས།
EZE 18:31 ཁྱོད་ཚོས་རང་གིས་སྤྱད་པའི་སྡིག་པ་ཐམས་ཅད་དོར་ནས། རང་གི་ཆེད་དུ་སེམས་གསར་པ་དང་སེམས་ཉིད་གསར་པ་ཞིག་བསྐྱེད་དགོས། ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ཁྱོད་རྣམས་འཆི་དགོས་དོན་ཅི་ཡོད་དམ།
EZE 18:32 སུ་ཞིག་འཆི་བར་གྱུར་ཡང་ང་མི་དགའ་བས། ཁྱོད་རྣམས་ཀྱིས་འགྱོད་བཤགས་བྱོས་དང་གསོན་པར་འགྱུར་ཞེས་གཙོ་བོ་ཡ་ཝཱེས་གསུངས་སོ། །
EZE 19:1 ཁྱོད་ཀྱིས་ཡེས་ར་ཨེལ་གྱི་རྒྱལ་པོ་རྣམས་ཀྱི་ཆེད་དུ་སྐྱོ་གླུ་ཞིག་བརྩམས་ནས་འདི་ལྟར།
EZE 19:2 ཁྱོད་ཀྱི་མ་ནི་སུ་ཡིན་ནམ། །སེང་ཁྱུའི་ནང་གི་མོ་སེང་ཡིན། །སེང་གེ་དར་མའི་ཁྱུ་རུ་ཉལ། །རང་གི་སེང་ཕྲུག་བསྐྱངས་པ་འོ། །
EZE 19:3 སེང་ཕྲུག་རྣམས་ལས་གཅིག་བསྐྱངས་ཏེ། །སེང་གེ་དར་མའི་གྲས་སུ་ཚུད། །བརྔོན་པའི་ཤ་རྣམས་དབྲལ་བ་བསླབ། །མི་རྣམས་ཟ་མཁན་ཞིག་ཏུ་གྱུར། །
EZE 19:4 མི་རིགས་ཀུན་གྱིས་དེ་ཐོས་ནས། །ཁོ་ཚོའི་ས་དོང་ནང་དུ་བཅུག །ཁོ་ཚོས་དེ་ནི་ལྕགས་ཀྱུ་ཡིས། །ཨེ་ཅིབ་ཡུལ་དུ་ཁྲིད་ཕྱིན་ཏོ། །
EZE 19:5 མོ་སེང་གིས་ནི་བསྒུགས་བསྒུགས་ཀྱང་། །རང་གི་རེ་བ་ཟད་པས་ན། །སེང་ཕྲུག་རྣམས་ལས་ཡང་གཅིག་བླངས། །སེང་གེ་དར་མ་ཞིག་ཏུ་ཆགས། །
EZE 19:6 དེ་ནི་སེང་ཁྱུ་ཁྲོད་དུ་རྒྱུ། །སེང་གེ་དར་མ་ཞིག་ཏུ་གྱུར། །དེས་ཀྱང་བརྔོན་ཤ་དབྲལ་བ་བསླབ། །མི་རྣམས་ཟ་མཁན་ཞིག་ཏུ་གྱུར། །
EZE 19:7 དེ་ཡིས་ཁོ་ཚོའི་མཁར་རྣམས་བཤིགས། །ཁོ་ཚོའི་གྲོང་ཁྱེར་སྟོངས་སུ་བཅུག །ཡང་དེས་བཏོན་པའི་ང་རོ་ཡིས། །ས་གཞི་དང་ནི་དེའི་ནང་དུ། །གནས་པ་ཡོད་དོ་འཇིགས་པར་གྱུར། །
EZE 19:8 དེ་ནས་ཕྱོགས་བཞིའི་མི་རིགས་ཐམས་ཅད་པོ། །ཡུལ་ཕྱོགས་ཁག་ནས་དེ་ལ་རྒོལ་དུ་འོངས། །ཁོ་ཚོའི་དྲ་རྒྱ་དེ་ཡི་སྟེང་དུ་འཕངས། །དེ་ནི་ཁོ་ཚོའི་ས་དོང་ནང་དུ་བཅུག །
EZE 19:9 ཁོ་ཚོས་དེ་ནི་ལྕགས་ཁྲའི་ནང་བཅུག་ནས། །ལྕགས་ཀྱུས་པཱ་པེལ་ལོན་གྱི་རྒྱལ་པོའི་དྲུང་། །ཁྱེར་ཏེ་བཙོན་ཁང་ནང་དུ་བཅུག་པ་དང་། །དེ་ཡི་ང་རོ་ཡེས་ར་ཨེལ་གྱི་ནི། །རི་བོ་རྣམས་སུ་སླར་ཡང་ཐོས་མ་གྱུར། །
EZE 19:10 ཁྱོད་ཀྱི་མ་ནི་རྒུན་འབྲུམ་ར་བ་ཡི། །རྒུན་འབྲུམ་ལྗོན་ཤིང་ཞིག་དང་འདྲ་བ་ཡིན། །དེ་ནི་ཆུ་བོའི་འགྲམ་དུ་བཙུགས་ཡོད་ཅིང་། །ཆུ་རྒྱུན་མོད་པས་འབྲས་བུ་རབ་ཏུ་སྨིན། །ཡལ་འདབ་ཀྱང་ནི་ཤིན་ཏུ་རྒྱས་པ་འོ། །
EZE 19:11 ལྗོན་ཤིང་དེ་ལ་ཡལ་ག་སྦོམ་པོ་ལྡན། །དབང་སྒྱུར་རྣམས་ཀྱི་ཁྲིམས་དབྱུག་བྱས་ཆོག་གོ །ལྗོན་ཤིང་དེ་ནི་ཤིན་ཏུ་མཐོ་བས་ན། །ཡལ་འདབ་རྒྱས་པའི་ལྗོན་ཤིང་གཞན་ལས་མཐོ། །ཤིན་ཏུ་མཐོ་ཞིང་ཡལ་འདབ་རྒྱས་པས་ན། །རྒྱང་རིང་ཡུལ་ནས་མིག་གིས་མཐོང་ཐུབ་བོ། །
EZE 19:12 ཡིན་ཡང་དཀོན་མཆོག་ཡ་ཝཱེའི་ཐུགས་ཁྲོའི་ཕྱིར། །རྒུན་འབྲུམ་ཤིང་དེ་ཕྱུང་ནས་ས་རུ་གཡུགས། །ཤར་རླུང་གཡུགས་ནས་དེ་ཡི་ཤིང་ཏོག་རྣམས། །སྐམ་དུ་བཅུག་ནས་ས་རུ་གཏོར་བ་དང་། །ཡལ་ག་སྦོམ་པོ་དག་ཀྱང་སྐམ་གྱུར་ནས། །མེ་ཡིས་དེ་རྣམས་ཁྱུར་མིད་བཏང་བ་འོ། །
EZE 19:13 ད་ལྟ་དེ་ནི་ཆུ་མེད་སྐམ་ས་དང་། །དབེན་སྟོང་ཡུལ་དུ་བཙུགས་པ་ཡིན་ལགས་ཤིང་། །
EZE 19:14 ཡལ་ག་རྣམས་ཀྱི་གཅིག་ལས་མེ་བྱུང་སྟེ། །དེ་ཡི་ཤིང་འབྲས་ཁྱུར་མིད་བཏང་བ་དང་། །ལྗོན་ཤིང་སྟེང་དུ་ཡལ་ག་སྦོམ་པོ་མེད། །ཅེས་སྨྲོས་ཤིག འདི་ནི་སྐྱོ་གླུ་ཞིག་སྟེ་ཤིན་ཏུ་རྒྱུགས་ཆེ་བའི་སྐྱོ་གླུ་ཞིག་གོ །
EZE 20:1 དེ་ཡང་ལོ་བདུན་པའི་ཟླ་ལྔ་པའི་ཚེས་བཅུ་ཉིན། ཡེས་ར་ཨེལ་གྱི་རྒན་པོ་འགའ་ཤས་དཀོན་མཆོག་ཡ་ཝཱེར་ཐུགས་བརྟག་ཞུ་བར་འོངས་ཏེ། ཁོ་རྣམས་ངའི་མདུན་དུ་བསྡད་པ་ན།
EZE 20:2 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 20:3 ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་རྒན་པོ་རྣམས་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཁྱོད་ཚོ་འོངས་ནས་ང་ལ་ཐུགས་བརྟག་ཞུའམ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ངས་ཁྱོད་ཚོར་ང་ལ་ཐུགས་བརྟག་ཞུ་རུ་མི་འཇུག་གོ་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 20:4 ཀྱེ་མིའི་བུ། ཁྱོད་ཀྱིས་ཁོ་རྣམས་ལ་འདྲི་གཅོད་བྱེད་དམ། ཁོ་རྣམས་ལ་འདྲི་གཅོད་བྱེད་དམ། །ཁྱོད་ཀྱིས་དེ་དག་གི་མེས་པོ་རྣམས་ཀྱིས་སྤྱད་པའི་ཞེན་ལོག་གི་དོན་རྣམས་ཁོ་ཚོར་རྟོགས་སུ་འཇུག་དགོས་ལ།
EZE 20:5 ཡང་དེ་རྣམས་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། བདག་གིས་ཡེས་ར་ཨེལ་འདེམས་པའི་དུས་སུ། བདག་གིས་ཡ་ཀོབ་ཁྱིམ་རྒྱུད་ཀྱི་ཕྱོགས་སུ་ལག་པ་བརྐྱངས་ཏེ་མནའ་བསྐྱལ་བ་དང་། ཡང་ཨེ་ཅིབ་ཡུལ་དུ་ཁོ་རྣམས་ལ་རང་ཉིད་མངོན་པར་བྱས་ནས། བདག་གིས་དེ་དག་གི་ཕྱོགས་སུ་ལག་པ་བརྐྱངས་ནས་མནའ་བསྐྱལ་ཏེ་འདི་སྐད་དུ། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་སྨྲས་སོ། །
EZE 20:6 ཉིན་མོ་དེར་བདག་གིས་དེ་དག་གི་ཕྱོགས་སུ་ལག་པ་བརྐྱངས་ནས་ཁོ་ཚོ་ཨེ་ཅིབ་ཡུལ་ནས་ཕྱི་རུ་ཁྲིད་དེ། ངས་དེ་དག་གི་ཆེད་དུ་བདམས་པའི་འོ་མ་དང་སྦྲང་རྩི་བཞུར་བའི་གནས་ཏེ། ཡུལ་ཁམས་ཀུན་ལས་ཆེས་གཟི་དཔལ་འབར་བའི་གནས་སུ་འོང་བར་མནའ་བསྐྱལ་བའོ། །
EZE 20:7 ངས་དེ་དག་ལ་འདི་སྐད་དུ། ཁྱོད་ཚོ་རེ་རེས་ཁྱོད་ཚོའི་མིག་ནང་གི་སྐུ་འདྲ་ཞེན་ལོག་ཅན་དེ་རྣམས་དོར་ཞིག་དང་། ཨེ་ཅིབ་ཀྱི་སྐུ་འདྲའི་རྐྱེན་གྱིས་རང་ཉིད་བཙོག་པར་མི་བཟོ་བར་གྱིས། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞེས་སྨྲས་ཀྱང་།
EZE 20:8 དེ་དག་གིས་ང་ལ་ངོ་ལོག་བྱས་ནས་ང་ལ་མི་མཉན་པར། ཁོ་ཚོ་རེ་རེས་རང་གི་མིག་ནང་གི་སྐུ་འདྲ་ཞེན་ལོག་ཅན་རྣམས་མ་དོར་ཞིང་། ཨེ་ཅིབ་ཀྱི་སྐུ་འདྲ་རྣམས་དང་མ་བྲལ་བས། དུས་དེར་ངས་འདི་སྐད་དུ། ངས་རང་གི་ཁོང་ཁྲོ་ཆེན་པོ་དེ་དག་གི་སྟེང་དུ་ལྡུག་པར་བྱ་སྟེ། ཨེ་ཅིབ་ཡུལ་དུ་ངས་དེ་དག་གི་སྟེང་དུ་རང་གི་ཁོང་ཁྲོ་ཡོངས་སུ་ལྡུག་དགོས་ཞེས་སྨྲས་པའོ། །
EZE 20:9 ཡིན་ཡང་དེ་དག་བྱེས་སུ་སྡོད་པའི་མི་ཀུན་གྱི་མིག་ནང་དུ་ངའི་མཚན་སྙན་མི་བརླག་པའི་ཆེད་དུ། ངའི་རང་གི་མིང་གི་ཕྱིར་དེ་ལྟར་མ་བྱས་པར། ངས་དེ་དག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་ཏེ། མི་ཀུན་གྱི་མདུན་དུ་ཁོ་ཚོར་མངོན་པར་གྱུར་ཏོ། །
EZE 20:10 དེ་བཞིན་བདག་གིས་ཁོ་ཚོ་ཨེ་ཅིབ་ཡུལ་ནས་ཕྱི་རུ་ཁྲིད་དེ་དབེན་སྟོང་དུ་སླེབས་པ་དང་།
EZE 20:11 བདག་གིས་རང་གི་སྒྲིག་ཁྲིམས་ཁོ་ཚོར་གནང་ཞིང་། རང་གི་སྒྲིག་སྲོལ་ཁོ་ཚོར་བསྟན་པ་དང་། མི་ཡིས་དེ་རྣམས་བསྲུངས་ན་དེའི་རྐྱེན་གྱིས་གསོན་པར་འགྱུར་རོ། །
EZE 20:12 ཡང་བདག་གིས་རང་གི་ངལ་གསོ་བའི་ཉིན་མོ་ཁོ་ཚོར་གནང་སྟེ། ང་དང་ཁོ་ཚོའི་བར་གྱི་བདེན་དཔང་དུ་བྱས་ནས། བདག་ནི་ཁོ་ཚོ་དམ་པར་བྱེད་མཁན་ཡ་ཝཱེ་ཡིན་པ་རྟོགས་སུ་བཅུག་གོ །
EZE 20:13 ཡིན་ནའང་ཡེས་ར་ཨེལ་གྱི་ཁྱིམ་རྒྱུད་ཀྱིས་དབེན་སྟོང་དུ་བདག་ལ་ངོ་ལོག་བྱས་ཏེ་བདག་གི་སྒྲིག་ཁྲིམས་མ་བརྩིས་ལ། བདག་གི་སྒྲིག་སྲོལ་ཡང་དོར་བས། ༼གལ་ཏེ་མི་ཡིས་དེ་རྣམས་བསྲུངས་ན་གསོན་པར་ངེས་སོ། །༽ བདག་གི་ངལ་གསོ་བའི་ཉིན་མོ་ཁྱད་དུ་བསད་པའོ། །དུས་དེར་ངས་རང་གི་ཁོང་ཁྲོ་ཆེན་པོ་དེ་ཁོ་ཚོའི་སྟེང་དུ་བླུགས་ནས་དེ་རྣམས་དབེན་སྟོང་ཡུལ་དུ་མེད་པར་བཟོ་དགོས་ཞེས་སྨྲས་ནའང་།
EZE 20:14 དེ་དག་བྱེས་སུ་སྡོད་པའི་མི་རིགས་ཀུན་གྱི་མིག་ནང་དུ་ངའི་མཚན་སྙན་མི་བརླག་པའི་ཆེད་དུ། ངས་རང་གི་མིང་གི་ཕྱིར་དེ་ལྟར་མ་བྱས། སྔར་བདག་གིས་ཁོ་ཚོའི་མིག་མདུན་ནས་ཡེས་ར་ཨེལ་པ་རྣམས་ཕྱི་རུ་ཁྲིད་འོངས་པ་ཡིན།
EZE 20:15 ངས་དེ་དག་ལ་གནང་བའི་འོ་མ་དང་སྦྲང་རྩི་བཞུར་བའི་གནས་ཏེ། ཡུལ་ཁམས་ཀུན་ལས་ཆེས་གཟི་དཔལ་འབར་བའི་གནས་སུ་ཁོ་རྣམས་འཁྲིད་པར་མི་བྱའོ་ཞེས་དབེན་སྟོང་ཡུལ་དུ་ངས་དེ་དག་གི་ཕྱོགས་སུ་ལག་པ་བརྐྱངས་ནས་མནའ་བསྐྱལ་བའོ། །
EZE 20:16 གང་ལ་ཞེ་ན། དེ་དག་གིས་བདག་གི་སྒྲིག་སྲོལ་དོར་བ་དང་བདག་གི་སྒྲིག་ཁྲིམས་མ་བརྩིས་པར། བདག་གི་ངལ་གསོ་བའི་ཉིན་མོ་ཡང་ཁྱད་དུ་བསད་ནས། དེ་དག་གི་སེམས་ནི་རང་གི་སྐུ་འདྲའི་རྗེས་སུ་འབྲངས་སོ། །
EZE 20:17 དེ་འདྲ་ཡིན་ཡང་། ངས་ད་དུང་དེ་དག་ལ་ལྟ་སྐྱོང་བྱས་ནས་དེ་དག་མེད་པར་མ་བྱས་ཏེ། དབེན་སྟོང་ཡུལ་དུ་དེ་དག་རྩ་མེད་དུ་མ་བཏང་ངོ་། །
EZE 20:18 དབེན་སྟོང་ཡུལ་དུ་ངས་དེ་དག་གི་བུ་དང་བུ་མོ་རྣམས་ལ་འདི་སྐད་དུ། ཁྱོད་ཚོའི་མེས་པོ་རྣམས་ཀྱི་སྒྲིག་ཁྲིམས་རྣམས་མ་བརྩི་ཞིག ཁོ་ཚོའི་སྒྲིག་སྲོལ་ཡང་བསྲུང་བར་མ་བྱེད། ཁོ་ཚོའི་སྐུ་འདྲ་རྣམས་ཀྱི་རྐྱེན་གྱིས་རང་ཉིད་བཙོག་པར་མ་བཟོ།
EZE 20:19 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པས། ཁྱོད་རྣམས་ཀྱིས་བདག་གི་སྒྲིག་ཁྲིམས་རྩིས་ཤིག བདག་གི་སྒྲིག་སྲོལ་བསྲུངས་ནས་དེ་བཞིན་སྤྱོད་ཅིག
EZE 20:20 ཁྱོད་ཚོས་བདག་གི་ངལ་གསོ་བའི་ཉིན་མོ་དམ་པར་བརྩིས་ནས། ང་དང་ཁྱོད་ཚོའི་བར་གྱི་བདེན་དཔང་དུ་བྱས་ཏེ་བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་ཤེས་པར་གྱིས་ཞེས་སྨྲས་ནའང་།
EZE 20:21 ཁོ་ཚོའི་བུ་དང་བུ་མོ་རྣམས་ཀྱིས་བདག་ལ་ངོ་ལོག་བྱས་ཏེ་བདག་གི་སྒྲིག་ཁྲིམས་མ་བརྩིས་ལ། བདག་གི་སྒྲིག་སྲོལ་རྣམས་བསྲུངས་ནས་དེ་བཞིན་མ་བྱས་པས། ༼གལ་ཏེ་མི་ཡིས་སྒྲིག་ཁྲིམས་དང་སྒྲིག་སྲོལ་དེ་རྣམས་བསྲུངས་པ་ཡིན་ན་དེའི་རྐྱེན་གྱིས་གསོན་པར་ངེས་སོ། །༽ བདག་གི་ངལ་གསོ་བའི་ཉིན་མོ་ཁྱད་དུ་བསད་པའོ། །དུས་དེར་བདག་གིས་རང་གི་ཁོང་ཁྲོ་ཆེན་པོ་དེ་ཁོ་ཚོའི་སྟེང་དུ་བླུགས་ནས། དབེན་སྟོང་ཡུལ་དུ་དེ་དག་གི་སྟེང་དུ་རང་གི་ཁོང་ཁྲོ་ཡོངས་སུ་ལྡུག་དགོས་ཞེས་སྨྲས་ནའང་།
EZE 20:22 དེ་དག་བྱེས་སུ་སྡོད་སའི་མི་རིགས་ཀུན་གྱི་མིག་ནང་དུ་ངའི་མཚན་སྙན་མི་བརླག་པའི་ཆེད་དུ། བདག་གིས་རང་གི་མིང་གི་ཕྱིར་ལག་པ་བསྐུམས་ནས་དེ་ལྟར་མ་བྱས། སྔར་བདག་གིས་ཁོ་ཚོའི་མིག་མདུན་ནས་ཡེས་ར་ཨེལ་པ་རྣམས་ཕྱི་རུ་ཁྲིད་འོངས་པ་ཡིན།
EZE 20:23 དེ་རྣམས་ཡུལ་ཁམས་ཀུན་ཏུ་གཏོར་ཞིང་། མི་རིགས་ཀུན་གྱི་ནང་དུ་གཏོར་བར་བྱའོ་ཞེས་ངས་དབེན་སྟོང་ཡུལ་དུ་དེ་དག་གི་ཕྱོགས་སུ་ལག་པ་བརྐྱངས་ནས་མནའ་བསྐྱལ་བ་ཡིན།
EZE 20:24 གང་ལ་ཞེ་ན། དེ་དག་གིས་ངའི་སྒྲིག་སྲོལ་མ་བརྩིས་ཤིང་། ངའི་ཁྲིམས་སྲོལ་རྣམས་དོར་ཏེ། ངའི་ངལ་གསོ་བའི་ཉིན་མོ་ཡང་ཁྱད་དུ་བསད་ནས། དེ་དག་གི་མིག་གིས་རང་གི་མེས་པོ་རྣམས་ཀྱི་སྐུ་འདྲ་དག་ལ་རེ་ལྟོས་བཅངས་པའོ། །
EZE 20:25 དེའི་ཕྱིར་ངས་ཀྱང་བཟང་པོ་མིན་པའི་ཁྲིམས་སྲོལ་དང་དེར་བརྟེན་ནས་འཚོ་བར་མི་འགྱུར་བའི་སྒྲིག་སྲོལ་རྣམས་ཁོ་ཚོར་གནང་བ་ཡིན།
EZE 20:26 དེ་དག་གིས་སྐྱེས་འགོ་ཐམས་ཅད་མེར་བསྲེགས་ནས་མཆོད་རྫས་སུ་ཕུལ་བས་ན། ངས་དེ་དག་ལ་རང་ཉིད་བཙོག་པར་བཟོ་རུ་བཅུག་པ་སྟེ། དེ་རྣམས་འཇིགས་སྣང་སྐྱེས་ནས་བདག་ནི་ཡ་ཝཱེ་ཡིན་པ་རྟོགས་པའི་ཕྱིར་ཡིན་གསུངས་ཞེས་པའོ། །
EZE 20:27 ཀྱེ་མིའི་བུ། དེའི་ཕྱིར་ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་རྣམས་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཁྱོད་ཚོའི་མེས་པོ་རྣམས་ཀྱིས་ང་ལ་བློ་མི་དཀར་བའི་དོན་འདིའི་སྟེང་ནས་ང་རང་ཁྱད་དུ་བསད་པའོ། །
EZE 20:28 ངས་དེ་དག་གི་ཕྱོགས་སུ་ལག་པ་བརྐྱངས་ནས་དེ་དག་ལ་གནང་བར་མནའ་བསྐྱལ་བའི་གནས་དེ་རུ་ཁོ་ཚོ་ཁྲིད་ནའང་། ཁོ་ཚོས་རི་སྒང་རྣམས་དང་ནགས་ཚལ་སྟུག་པོ་དག་མཐོང་སྟེ། གནས་དེ་ནས་མཆོད་པ་ཕུལ་ཏེ། ངའི་གནས་དེ་རུ་ང་ལ་ཁོང་ཁྲོ་སློང་བའི་མཆོད་པ་རྣམས་དེར་ཕུལ་ཞིང་། དྲི་ཞིམ་གྱི་མཆོད་པ་དང་བཅས་རང་གི་སྐྱེམས་མཆོད་ཀྱང་ཕུལ་ཏོ་ཞེས་གསུངས་ཞེས་པའོ། །
EZE 20:29 དེ་ནས་ངས་དེ་དག་ལ། ཁྱོད་ཅག་སོང་བའི་མཐོ་གླིང་དེ་གནས་ཅི་ཡིན་ཞེས་དྲིས་པ་དང་། ད་ལྟའི་བར་དུ་མཐོ་གླིང་དེའི་མིང་ལ་པ་མཱ་ཞེས་ཟེར་རོ། །
EZE 20:30 དེའི་ཕྱིར་ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་རྣམས་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་ད་དུང་རང་གི་ཕ་མེས་རྣམས་ཀྱིས་སྤྱད་པ་བཞིན་དུ་རང་ཉིད་བཙོག་པར་བཟོས་ཏེ། དེ་དག་གི་ཞེན་ཁ་ལོག་པའི་སྐུ་འདྲའི་རྗེས་སུ་འབྲངས་ནས་ལོག་གཡེམ་བྱེད་དམ།
EZE 20:31 ཁྱོད་ཚོས་མཆོད་པ་ཕུལ་ནས་རང་གི་བུ་རྣམས་མེར་བསྲེགས་ཏེ། ཁྱོད་ཚོའི་སྐུ་འདྲ་ཐམས་ཅད་ཀྱིས་དེ་རིང་བར་དུ་རང་ཉིད་བཙོག་པར་བཟོས་པས། ཀྱེ་ཡེས་ར་ཨེལ་གྱི་ཁྱིམ་རྒྱུད། ངས་ཅི་ལྟར་ཁྱོད་ཚོར་ང་ནས་ཐུགས་བརྟག་ཞུ་བར་འཇུག་གམ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ངས་ཁྱོད་ཚོར་ང་ལ་ཐུགས་བརྟག་ཞུ་རུ་མི་འཇུག་གོ་ཞེས་གཙོ་བོ་ཡ་ཝཱེས་གསུངས་པའོ། །
EZE 20:32 ཁྱོད་ཚོ་ན་རེ། ངེད་རྣམས་ཀྱིས་མི་རིགས་ཀུན་གྱི་མི་ཐམས་ཅད་དང་། རྒྱལ་ཁམས་ཁག་གི་མི་རིགས་སོ་སོ་བཞིན་དུ་ཤིང་དང་རྡོ་ལ་སྲི་ཞུ་བསྒྲུབ་བོ་ཟེར་ཞིང་། ཁྱོད་ཚོའི་བསམ་དོན་འདི་རྩ་བ་ནས་འགྲུབ་པར་མི་འགྱུར་རོ། །
EZE 20:33 བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ངས་ནུས་མཐུ་ཆེན་པོའི་ཕྱག་དང་ཕྱི་རུ་བརྐྱངས་པའི་དཔུང་པ། རབ་ཏུ་འབར་བའི་ཁོང་ཁྲོ་བཅས་ཀྱིས་ཁྱོད་རྣམས་དབང་དུ་བསྒྱུར་རོ་ཞེས་གཙོ་བོ་ཡ་ཝཱེས་གསུངས།
EZE 20:34 ངས་ནུས་མཐུ་ཆེན་པོའི་ཕྱག་དང་ཕྱི་རུ་བརྐྱངས་པའི་དཔུང་པ། རབ་ཏུ་འབར་བའི་ཁོང་ཁྲོ་བཅས་ཀྱིས་ཁྱོད་རྣམས་ངེས་པར་དུ་མི་རིགས་ཀུན་གྱི་ཁྲོད་ནས་ཁྲིད་འོང་ཞིང་། ཁྱོད་རྣམས་ཁ་འཐོར་དུ་ཕྱིན་པའི་ཡུལ་སོ་སོ་ནས་ཚུར་བསྡུ་བར་འགྱུར།
EZE 20:35 ངས་ཁྱོད་རྣམས་མི་སོ་སོའི་མི་མེད་ལུང་སྟོང་དུ་ཁྲིད་ནས། གནས་དེར་ངས་ཁྱོད་རྣམས་ལ་ཁ་རི་ཁ་ཐུག་ཏུ་ཁྲིམས་གཅོད་ཅིང་།
EZE 20:36 ངས་ཇི་ལྟར་ཨེ་ཅིབ་ཡུལ་གྱི་དབེན་སྟོང་ནས་ཁྱོད་ཅག་གི་མེས་པོ་རྣམས་ལ་ཁྲིམས་བཅད་པ་ཡིན་ན། ཁྱོད་ཅག་ལའང་དེ་ལྟར་ཁྲིམས་གཅོད་པར་འགྱུར་ཞེས་གཙོ་བོ་ཡ་ཝཱེས་གསུངས་སོ། །
EZE 20:37 ཡང་ངས་ཁྱོད་རྣམས་རྫི་བོའི་དབྱུག་པའི་འོག་ནས་འགྲོ་བར་བྱ་ཞིང་། ཁྱོད་རྣམས་ཁ་ཆད་ཀྱི་ནང་དུ་འཇུག་པར་འགྱུར་ལ།
EZE 20:38 ངས་ཁྱོད་ཅག་གི་ཁྲོད་ནས་ང་ལ་ངོ་ལོག་བྱེད་མཁན་དང་ང་དང་འགལ་བ་རྣམས་མེད་པར་བཟོ་སྟེ། ངས་དེ་རྣམས་བྱེས་སུ་སྡོད་པའི་ཡུལ་ནས་ཁྲིད་འོངས་ནའང་དེ་དག་ཡེས་ར་ཨེལ་གྱི་ཡུལ་དུ་འཇུག་པར་མི་འགྱུར་རོ། །དེ་ནས་ཁྱོད་ཅག་གིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 20:39 ཡེས་ར་ཨེལ་གྱི་ཁྱིམ་རྒྱུད་ཁྱོད་ལ་གཙོ་བོ་ཡ་ཝཱེས་འདི་སྐད་དུ། ཁྱོད་རྣམས་རེ་རེ་སོང་ནས་རང་གི་སྐུ་འདྲར་ཞབས་ཏོག་སྒྲུབས་ཤིག་དང་། ཡིན་ནའང་མ་འོངས་པར་ཁྱོད་ཚོས་ང་ལ་མཉན་ངེས་ཡིན་ཏེ། ཁྱོད་རྣམས་ཀྱི་མཆོད་རྫས་དང་སྐུ་འདྲ་ཡིས་ངའི་མཚན་དམ་པ་དེ་ཡང་བསྐྱར་ཁྱད་དུ་གསོད་པར་མི་བྱའོ། །
EZE 20:40 གང་ལ་ཞེ་ན། ངའི་རི་བོ་དམ་པ་སྟེ་ཡེས་ར་ཨེལ་གྱི་རི་མཐོན་པོ་རུ། ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཀྱིས་གནས་དེ་རུ་ང་ལ་ཞབས་ཏོག་བསྒྲུབ་པར་འགྱུར་ཞིང་། གནས་དེ་རུ་ངས་ཁོ་ཚོ་དང་ལེན་བྱེད་ཅིང་། གནས་དེར་ཁྱོད་ཅག་གི་འདེགས་མཆོད་དང་ཐོག་ཕུད་དང་། རྫས་དམ་པ་ཐམས་ཅད་བཅས་ངས་ལེན་པར་བྱའོ་ཞེས་གཙོ་བོ་ཡ་ཝཱེས་གསུངས་སོ། །
EZE 20:41 ངས་ཁྱོད་རྣམས་མི་རྣམས་ཀྱི་ཁྲོད་ནས་འདོན་ཞིང་ཁྱོད་རྣམས་ཁ་འཐོར་ཏུ་ཕྱིན་པའི་ཡུལ་ཀུན་ནས་བསྡུ་བའི་ཚེ། དྲི་ཞིམ་གྱི་མཆོད་པ་དང་ལེན་བྱེད་པ་བཞིན་དུ་ངས་ཁྱོད་རྣམས་དང་ལེན་བྱེད་པར་འགྱུར་ཏེ། མི་རིགས་ཀུན་གྱི་མདུན་དུ། ཁྱོད་རྣམས་ཀྱི་ཁྲོད་ནས་ང་རང་དམ་པར་མངོན་ནོ། །
EZE 20:42 ཡང་ངས་ཁྱོད་རྣམས་ཡེས་ར་ཨེལ་གྱི་ཡུལ་ཏེ། སྔར་ངས་ཁྱོད་ཚོའི་ཕ་མེས་རྣམས་ལ་གནང་བར་ལག་པ་བརྐྱངས་ནས་མནའ་བསྐྱལ་བའི་ཡུལ་དུ་ཁྱོད་ཅག་ཁྲིད་ན། ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 20:43 ཡུལ་དེ་རུ་ཁྱོད་ཚོས་རང་ཉིད་བཙོག་པར་བཟོས་པའི་བྱ་བ་སྤྱོད་པ་ཐམས་ཅད་དྲན་པར་འགྱུར་ཞིང་། ཡང་རང་གིས་སྤྱད་པའི་དོན་ངན་པ་ཐམས་ཅད་ཀྱི་རྐྱེན་གྱིས་ཁྱོད་རྣམས་རང་ལ་ཞེན་ཁ་ལོག་པར་འགྱུར་རོ། །
EZE 20:44 ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། བདག་གིས་རང་གི་མཚན་དམ་པའི་ཆེད་དུ། ཁྱོད་ཚོའི་སྤྱོད་ངན་དང་ངན་རུལ་དུ་གྱུར་པའི་བྱ་སྤྱོད་བཞིན་དུ་ཁྱོད་རྣམས་ལ་བྱས་མེད། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 20:45 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 20:46 ཀྱེ་མིའི་བུ། རང་གི་གདོང་ནེ་གུབ་ཡུལ་དུ་འཁོར་ནས་ལྷོ་ཕྱོགས་སུ་ནེ་གུབ་ཡུལ་གྱི་ཐང་གི་ནགས་ཚལ་ལ་རྒོལ་བའི་ལུང་སྟོན་པར་གྱིས་ཤིག
EZE 20:47 ནེ་གུབ་ཡུལ་གྱི་ནགས་ཚལ་ལ་འདི་ལྟར། ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་དང་། གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་ཀྱི་ནང་དུ་མེ་སྦར་ཞིང་། ཁྱོད་ཀྱི་ནང་དུ་ཡོད་པའི་ལྗོན་ཤིང་སྔོན་པོ་ཐམས་ཅད་དང་ཤིང་སྡོང་སྐམ་པོ་ཐམས་ཅད་ཁྱུར་མིད་གཏོང་བར་བྱ་སྟེ། མེ་ལྕེ་དྲག་པོ་དེ་ཞི་བར་མི་འགྱུར་ལ། བྱང་ནས་ལྷོ་ཡི་བར་དུ་ཡོངས་སུ་འཚིག་པར་འགྱུར།
EZE 20:48 དེ་ནས་མི་ཐམས་ཅད་ཀྱིས་ང་ཡ་ཝཱེས་མེ་དེ་སྦར་བ་མཐོང་བར་འགྱུར་ཞིང་། མེ་དེ་ཞི་བར་མི་འགྱུར་གསུངས་ཞེས་ལུང་སྟོན་ཅིག་ཅེས་གསུངས་པ་ལ།
EZE 20:49 ངས་འདི་ལྟར། ཀྱི་ཧུད། གཙོ་བོ་ཡ་ཝཱེ་ལགས། མི་ཐམས་ཅད་ཀྱིས་ང་བསྟན་ནས་མི་འདིས་གཏམ་དཔེ་བཤད་པ་མ་ཡིན་ནམ་ཟེར་རོ་ཞེས་ཞུས་པའོ། །
EZE 21:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 21:2 ཀྱེ་མིའི་བུ། ཁྱོད་ཡེ་རུ་སཱ་ལེམ་གྱི་ཕྱོགས་སུ་འཁོར་ནས་དམ་པའི་གནས་སུ་གཏམ་སྨྲ་དགོས་ཏེ། ཡེས་ར་ཨེལ་གྱི་ཡུལ་ལ་རྒོལ་བའི་ལུང་སྟོན་ཅིག
EZE 21:3 ཁྱོད་ཀྱིས་ཡེས་ར་ཨེལ་གྱི་ཡུལ་ལ། དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་ལ་རྒོལ་ཞིང་། ངས་རང་གི་རལ་གྲི་ཤུབས་ལས་ཕྱུང་སྟེ་མི་དྲང་བདེན་ཅན་དང་སྡིག་སྤྱོད་ཅན་གཉིས་པོ་ཁྱོད་ལས་ཚར་གཅོད་བྱེད་པར་འགྱུར།
EZE 21:4 ངས་མི་དྲང་བདེན་ཅན་དང་སྡིག་སྤྱོད་ཅན་གཉིས་པོ་ཁྱོད་ལས་ཚར་གཅོད་བྱེད་རྒྱུ་ཡིན་པས། ངའི་རལ་གྲི་ནི་ཤུབས་ལས་ཕྱུང་ངེས་ཡིན་ལ། ལྷོ་ནས་བྱང་གི་བར་དུ་མི་ཐམས་ཅད་ལ་རྒོལ་བར་བྱ་སྟེ།
EZE 21:5 དེ་ནས་མི་ཐམས་ཅད་ཀྱིས་ང་ཡ་ཝཱེས་རལ་གྲི་ཤུབས་ལས་ཕྱུང་སྟེ། རལ་གྲི་ཕྱིར་ཤུབས་ཀྱི་ནང་དུ་མི་འཇུག་པ་རྟོགས་པར་འགྱུར་ཞེས་གསུངས་ཞེས་སྨྲོས་ཤིག
EZE 21:6 ཀྱེ་མིའི་བུ། ཁྱོད་ཀྱིས་ཤུགས་རིང་ཕྱུངས་ཤིག དེ་དག་གི་མིག་མདུན་དུ་སྡུག་བསྔལ་ཆེན་པོས་ཤུགས་རིང་ནར་ནར་དུ་ཕྱུངས་ཤིག
EZE 21:7 གལ་ཏེ་ཁོ་ཚོས་ཁྱོད་ལ། ཁྱོད་ཀྱིས་ཅིའི་ཕྱིར་ཤུགས་རིང་འབྱིན་ནམ་ཞེས་དྲིས་ན། ཁྱོད་ཀྱིས་ལན་དུ། མི་རེ་རེ་དཔའ་ཞུམ་ཅིང་། ལག་རྩ་ལྷོད་ནས་སེམས་ཤུགས་ཉམས་པ་དང་། དེ་དག་གི་པུས་མོ་ནི་ཆུ་བཞིན་སྟོབས་ཞན་པར་འགྱུར་བའི་མ་འོངས་འབྱུང་འགྱུར་གྱི་འཕྲིན་གྱི་དབང་གིས་ཤུགས་རིང་འབྱིན་པ་ཡིན། ལྟོས་དང་། དེ་ནི་ཡོང་གིན་འདུག་སྟེ། དོན་འདི་ནི་འགྲུབ་ངེས་ཡིན་ཞེས་གཙོ་བོ་ཡ་ཝཱེས་དེ་སྐད་གསུངས་ཞེས་སྨྲོས་ཤིག་ཅེས་གསུངས་སོ། །
EZE 21:8 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 21:9 ཀྱེ་མིའི་བུ། ཁྱོད་ཀྱིས་ལུང་བསྟན་ཏེ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། རལ་གྲི་ཞིག་ཡོད་དེ། བརྡར་ནས་རྣོ་ཕྱུང་བའི་རལ་གྲི་ཞིག་ཡོད་པ་དེ་ནི་འོད་བཏོན་པའི་རལ་གྲིའོ། །
EZE 21:10 བརྡར་ནས་རྣོ་ཕྱུང་བ་ནི་སྲོག་གཅོད་པའི་ཕྱིར་ཡིན་ལ། འོད་བཏོན་པ་ནི་འོད་འཕྲོ་བའི་ཆེད་དུ་ཡིན་ནོ། །ངེད་རྣམས་ཅི་ལྟར་དགའ་བར་འགྱུར་རམ། ངའི་བུ་ཡིས་གཅུན་བྱེད་ཀྱི་དབྱུག་པ་དང་བསླབ་བྱ་ཀུན་ལ་མཐོང་ཆུང་བྱས་སོ། །
EZE 21:11 རལ་གྲི་འདི་ནི་མི་ལ་འོད་འདོན་པར་སྤྲད་པས་ན་ལག་པར་ཐོགས་ནས་བཀོལ་ཆོག་པ་དང་། རལ་གྲི་འདི་ནི་བརྡར་ནས་རྣོ་ཕྱུང་བ་དང་འོད་བཏོན་པ་ཡིན་པས་སྲོག་ལེན་མཁན་གྱི་ལག་ཏུ་སྤྲད་ཆོག་ཅེས་གསུངས་སོ་ཞེས་སྨྲོས་ཤིག
EZE 21:12 ཀྱེ་མིའི་བུ། ཁྱོད་ཀྱིས་སྐད་རྒྱོབ་ཅིག ངུ་འབོད་བྱོས་ཤིག གང་ལ་ཞེ་ན། རལ་གྲི་འདི་ནི་ངའི་འབངས་མི་དང་ཡེས་ར་ཨེལ་གྱི་འགོ་དཔོན་ཐམས་ཅད་ཀྱི་སྟེང་དུ་འབབ་པར་འགྱུར་ཞིང་། ཁོ་ཚོ་དང་ངའི་མི་ཐམས་ཅད་རལ་གྲིའི་འོག་ཏུ་གཏོད་རྒྱུ་ཡིན་པས། ཁྱོད་ཀྱིས་བྲང་ཁ་རྡུངས་ ལ་སྐྱོ་བའི་དབུགས་རིང་ཕྱུངས་ཤིག
EZE 21:13 གང་ལ་ཞེ་ན། ཚོད་བགམ་ནི་འོང་ངེས་ཡིན་ཏེ། ཁྱོད་ཀྱིས་ཅིའི་ཕྱིར་གཅུན་བྱེད་ཀྱི་དབྱུག་པར་མཐོང་ཆུང་བྱེད་དམ། དོན་འདི་ནི་འགྲུབ་པའི་དཔེ་མི་སྲིད་ཅེས་གཙོ་བོ་ཡ་ཝཱེས་གསུངས།
EZE 21:14 ཀྱེ་མིའི་བུ། ཁྱོད་ཀྱིས་ལག་པ་བརྡབས་ནས་ལུང་སྟོན་ཅིག སྲོག་གཅོད་པའི་རལ་གྲི་འདི་ཡང་དང་ཡང་དུ་སྤྱད་དེ། ཤི་རྨས་ཆེན་པོ་ཐེབས་པའི་རལ་གྲི་འདི་ཡིས་དེ་རྣམས་བསྐོར་ཞིག་དང་།
EZE 21:15 དེ་དག་སེམས་འཁྲུགས་ནས་མི་མང་པོ་སར་འགྱེལ་ལོ། །ངས་ཁོ་ཚོའི་མཁར་སྒོ་ཡོངས་སུ་སྲོག་ལེན་མཁན་མངགས་ཏེ། ཀྱེ་ཀྱེ། རལ་གྲི་འདི་ལས་འོད་འཕྲོ་ཞིང་བརྡར་ནས་ཤིན་ཏུ་རྣོ་བས་སྲོག་བླངས་ཆོག་ཆོག་ཡིན།
EZE 21:16 ཀྱེ་རལ་གྲི་ལགས། གཡས་ཕྱོགས་སུ་སྲོག་ཆོད་ཅིག གཡོན་ཕྱོགས་སུ་སྣུན་ཞིག ཁྱོད་ཕྱོགས་གང་དུ་འཁོར་ན་དེ་རུ་སྲོག་ལོངས་ཤིག
EZE 21:17 ངས་ཀྱང་ལག་པ་བརྡབས་ནས་རང་གི་ཁོང་ཁྲོ་ཞི་བར་བྱའོ་ཞེས་དཀོན་མཆོག་ཡ་ཝཱེས་དེ་སྐད་གསུངས་ཞེས་གསུངས་སོ། །
EZE 21:18 དེ་ཡང་དཀོན་མཆོག་ཡ་ཝཱེའི་བཀའ་ང་ལ་བྱུང་སྟེ་འདི་སྐད་དུ།
EZE 21:19 ཀྱེ་མིའི་བུ། པཱ་པེལ་ལོན་གྱི་རྒྱལ་པོའི་རལ་གྲི་འོང་བའི་ཆེད་དུ། ཁྱོད་ཀྱིས་ལམ་གཉིས་ལ་རྟགས་རྒྱོབ་ཅིག ལམ་དེ་གཉིས་ནི་ཡུལ་གཅིག་ནས་འོངས་ཏེ། ཁྱོད་ཀྱིས་གྲོང་ཁྱེར་ནང་དུ་འགྲོ་བའི་ལམ་ཁར་ཐོ་སློངས་ཤིག
EZE 21:20 ཁྱོད་ཀྱིས་ལམ་གཅིག་ལ་རྟགས་བརྒྱབ་ནས་རལ་གྲི་ཨམ་མོན་པའི་རབ་བཱ་བྱ་བའི་སྟེང་དུ་འབབ་པར་བྱེད་པ་དང་། ཡང་ལམ་གཞན་ཞིག་ལ་རྟགས་བརྒྱབ་ནས་རལ་གྲི་ཡ་ཧུ་དཱའི་སྟེང་དུ་འབབ་པར་བྱས་ནས་མཁར་བརྟན་པོ་ཡེ་རུ་སཱ་ལེམ་ལ་རྒོལ་བར་གྱུར་ཅིག
EZE 21:21 གང་ལ་ཞེ་ན། པཱ་པེལ་ལོན་གྱི་རྒྱལ་པོ་ལམ་ཁར་ལངས་བསྡད་དེ། ལམ་གཉིས་ཀྱི་ལམ་མདོ་རུ་མོ་འདེབས་ཤིང་། མདའ་ཡིས་རྒྱན་ལེན་པ་དང་སྐུ་འདྲར་ཞུ་བ། སྲོག་ཆགས་ཀྱི་མཆིན་པར་བརྟག་པ་བཅས་བྱེད་དོ། །
EZE 21:22 ཁོང་གི་ལག་པ་གཡས་པར་ཡེ་རུ་སཱ་ལེམ་གྱི་མཚན་བཟུང་ནས། གནས་དེ་རུ་གྲོང་ཁྱེར་ལ་རྒོལ་བའི་ཐོ་བ་ཆེན་པོ་བཙུགས་ཏེ་དམར་གསོད་བྱེད་པའི་བཀའ་འབབ་པ་དང་། ངར་སྐད་ཆེན་པོ་སྒྲོག་པ་དང་། གྲོང་ཁྱེར་ལ་རྒོལ་བའི་ཐོ་བ་ཆེན་པོ་བཙུགས་ཏེ། མཁར་སྒོ་ལ་དཔུང་འཇུག་བྱེད་ཅིང་། ས་རགས་བརྒྱབ་སྟེ་གྲོང་ཁྱེར་བསྐོར་བའི་མཁར་མཐོན་པོ་བརྩིགས་སོ། །
EZE 21:23 སྔར་པཱ་པེལ་ལོན་ལ་སྲི་ཞུ་བསྒྲུབ་པར་མནའ་བསྐྱལ་བའི་ཡ་ཧུ་དཱ་པ་རྣམས་ཀྱིས་བལྟས་ན་འདི་ནི་མོ་རྫུས་མ་ཞིག་ཡིན་ནའང་། པཱ་པེལ་ལོན་གྱི་རྒྱལ་པོས་དེ་དག་ལ་རང་གི་སྡིག་པ་དྲན་དུ་བཅུག་ནས་ཁོ་རྣམས་བཙོན་དུ་འཁྲིད་པར་འགྱུར་རོ། །
EZE 21:24 དེ་བས་གཙོ་བོ་ཡ་ཝཱེས་འདི་སྐད་དུ། ཁྱོད་ཚོའི་ཉེས་སྐྱོན་རྣམས་མངོན་པར་གྱུར་ཏེ། ཁྱོད་ཚོའི་སྡིག་པ་ནི་རང་གི་སྤྱོད་ལམ་མཐའ་དག་བརྒྱུད་ནས་མི་ཡིས་མཐོང་ཞིང་། ཐ་ན་ཁྱོད་ཚོའི་སྡིག་པ་རྣམས་ཀྱང་དྲན་པར་འགྱུར་རོ། །ཁྱོད་རྣམས་དྲན་པར་གྱུར་པས་མི་ཡི་ལག་པས་བཙོན་དུ་འཁྲིད་པར་འགྱུར།
EZE 21:25 ཀྱེ་འཆི་བར་འོས་པ་དང་ངན་པ་ཡིན་པའི་ཡེས་ར་ཨེལ་གྱི་རྒྱལ་པོ་ཁྱོད་ཀྱི་དུས་ལ་སླེབས་ཤིང་། མཇུག་མཐའི་ཉེས་ཆད་གཅོད་པའི་དུས་ལ་སླེབས་སོ་ཞེས་གསུངས།
EZE 21:26 གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་མགོ་རས་བླངས་ཏེ་ཅོད་པན་ཕུད་ཅིག ད་ལྟ་གནས་ཚུལ་མི་འདྲ་སྟེ། གཉོམ་ཆུང་རྣམས་མཐོན་པོར་འགྱུར་ཞིང་། མཐོན་པོ་རྣམས་དམའ་བར་འགྱུར་རོ། །
EZE 21:27 ཕམ་པར་རྒྱོབ། ཕམ་པར་རྒྱོབ། ངས་ཡུལ་འདི་ཕམ་པར་རྒྱག་ཅིང་། དབང་སྒྱུར་མཁན་དེ་འོངས་ནས་ངས་ཡུལ་འདི་ཁོ་ལ་གནང་བའི་བར་དུ། ཡུལ་འདི་ནི་ལུས་པར་མི་འགྱུར་ཞེས་གསུངས་སོ། །
EZE 21:28 ཀྱེ་མིའི་བུ། ཁྱོད་ཀྱིས་ཨམ་མོན་པ་དང་དེ་དག་གི་ངོ་ཚའི་སྐོར་ལ་འདི་ལྟར་ལུང་སྟོན་ཅིག གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་འདི་ལྟར། རལ་གྲི་ཞིག་ཡོད་དེ། སྲོག་གཅོད་པའི་ཕྱིར་དུ་རལ་གྲི་ཞིག་ཤུབས་ལས་ཕྱུང་ཡོད་ལ། བརླག་པར་བྱེད་པ་དང་འོད་འཕྲོ་བའི་ཆེད་དུ་འོད་བཏོན་ཡོད་ཅེས་སྨྲའོ། །
EZE 21:29 མི་ཡིས་ཁྱོད་ཀྱི་དོན་དུ་མཐོང་བའི་ཞལ་གཟིགས་ནི་རྫུས་མ་ཡིན་པ་དང་། ཁྱོད་ཀྱི་ཆེད་དུ་བཏབ་པའི་མོ་ནི་རྫུས་མ་ཡིན་ལ། ཁྱོད་ནི་འཆི་འོས་པ་དང་ངན་པ་དེའི་མཇིང་པར་འགྱེལ་བར་འགྱུར་ལ། དེ་དག་ལ་ཉེས་ཆད་གཅོད་པའི་དུས་དེ་སླེབས་ཤིང་། མཇུག་མཐའི་ཉེས་ཆད་གཅོད་པའི་དུས་ལ་སླེབས་སོ། །
EZE 21:30 རལ་གྲི་ཤུབས་ཀྱི་ནང་དུ་ཆུག ངས་ཁྱོད་རང་བཀོད་པའི་གནས་དང་། སྐྱེས་པའི་ཡུལ་དུ་ཁྱོད་ལ་ཉེས་ཆད་གཅོད་ངེས་ཡིན།
EZE 21:31 ངས་རང་གི་ཁོང་ཁྲོ་ཁྱོད་ཀྱི་སྟེང་དུ་བླུག་ཅིང་། ངའི་ཁོང་ཁྲོ་ཡི་མེ་ལྕེ་ཁྱོད་ཀྱི་སྟེང་དུ་གཏོར་ནས། ཁྱོད་ནི་བརླག་པར་གོམས་པའི་མི་གདུག་རྩུབ་ཅན་གྱི་ལག་ཏུ་གཏོད་པར་འགྱུར།
EZE 21:32 ཁྱོད་ནི་འབུད་ཤིང་དུ་བྱས་ནས་མེས་བསྲེག་པར་འགྱུར་ཞིང་། ཁྱོད་ཀྱི་ཁྲག་ནི་རང་གི་ཡུལ་དུ་བཞུར་བར་འགྱུར་ལ། ཁྱོད་ནི་སླར་ཡང་དྲན་པར་མི་འགྱུར་ཏེ། གང་ལ་ཞེ་ན། འདི་ནི་ཡ་ཝཱེ་བདག་གིས་སྨྲས་པས་སོ་ཞེས་པའོ་ཞེས་གསུངས་སོ། །
EZE 22:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 22:2 ཀྱེ་མིའི་བུ། ཁྱོད་ཀྱིས་ཁྲིམས་ཆད་གཅོད་དམ། ཁྱོད་ཀྱིས་མིའི་ཁྲག་བཞུར་དུ་བཅུག་པའི་གྲོང་ཁྱེར་འདི་ལ་ཁྲིམས་ཆད་གཅོད་དམ། ཁྱོད་ཀྱིས་གྲོང་ཁྱེར་འདི་ལ་རང་གི་ཞེན་ལོག་གི་དོན་རྣམས་རྟོགས་པར་གྱིས་ཤིག
EZE 22:3 ཁྱོད་ཀྱིས་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། གྲོང་ཁྱེར་འདིའི་ནང་དུ་མི་ལ་ཁྲག་བཞུར་དུ་བཅུག་པའི་དོན་ཡོད་པ་དང་། དེས་སྐུ་འདྲ་བཟོས་ནས་རང་ཉིད་བཙོག་པར་བྱས་པས། དེ་ལ་ཉེས་ཆད་གཅོད་པའི་དུས་དེ་སླེབས་སོ། །
EZE 22:4 ཁྱོད་ཀྱིས་མི་ལ་ཁྲག་བཞུར་དུ་བཅུག་པས་ཁྱོད་ཀྱིས་སྡིག་པ་བྱས་ཤིང་། ཁྱོད་ཀྱིས་སྐུ་འདྲ་བཟོས་པས་རང་ཉིད་བཙོག་པར་བཟོས་པ་ཡིན། དེ་བཞིན་ཁྱོད་ཀྱིས་རང་ཉིད་ལ་ཉེས་ཆད་ཕོག་པའི་དུས་དེ་སླེབས་ལ་ཉེ་བར་བྱས་ཤིང་། ལན་འཇལ་བའི་དུས་དེ་སླེབས་པར་བྱས་སོ། །ངས་ཁྱོད་ནི་མི་ཀུན་གྱིས་ངན་སྨྲས་བྱེད་ས་དང་། མི་ཀུན་གྱི་ཟུར་ཟའི་ཡུལ་དུ་འགྱུར་བར་བྱས།
EZE 22:5 ཀྱེ་ཟང་ཟིང་ཅན་དང་ཀུ་ཅོ་སྒྲོག་པ། མིང་ནི་བཙོག་པར་བཟོས་པའི་གྲོང་ཁྱེར་ཁྱོད། ཁྱོད་དང་ཐག་ཉེ་རིང་གང་རུང་གིས་ཁྱོད་ལ་འཕྱ་བར་བྱེད་ཅིང་།
EZE 22:6 ལྟོས་དང་། ཡེས་ར་ཨེལ་གྱི་འགོ་དཔོན་རྣམས་ཀྱིས་རང་གི་ནུས་པར་བརྟེན་ནས་ཁྱོད་ཀྱི་ནང་དུ་མི་ལ་ཁྲག་བཞུར་དུ་བཅུག་སྟེ།
EZE 22:7 ཁྱོད་ཀྱི་ནང་དུ་ཕ་མར་མཐོང་ཆུང་བྱེད་མཁན་དང་། བྱེས་པ་རྣམས་ལ་གཉའ་གནོན་བྱེད་མཁན། དྭ་ཕྲུག་དང་ཡུགས་མོར་བརྙས་བཅོས་བྱེད་མཁན་བཅས་ཡོད་ལ།
EZE 22:8 ཁྱོད་ཀྱིས་ངའི་རྫས་དམ་པར་མཐོང་ཆུང་བྱས་ཤིང་། ངའི་ངལ་གསོ་བའི་ཉིན་མོ་ཡང་ཁྱད་དུ་བསད།
EZE 22:9 ཁྱོད་ཀྱི་ནང་དུ་ཕྲ་མ་བྱེད་མཁན་དང་གཞན་ལ་སྙོན་འཛུགས་མཁན་གྱི་མི་ཡོད་དེ། དེ་དག་གིས་མི་ལ་ཁྲག་བཞུར་དུ་བཅུག་སྟེ། ཁྱོད་ཀྱི་རི་རྣམས་སུ་མཆོད་རྫས་སྤྱད་ཅིང་། ཁྱོད་ཀྱི་ནང་དུ་ལོག་གཡེམ་བྱས་སོ། །
EZE 22:10 ཁྱོད་ཀྱི་ནང་དུ་མ་གཡར་གྱི་ཁོག་སྨད་དམར་རྗེན་དུ་བཏོན་ནས་ཕ་ལ་བརྙས་བཅོས་གཏོང་མཁན་དང་། ཟླ་མཚན་འབབ་བཞིན་པའི་བུད་མེད་མི་གཙང་བ་དག་ལ་ངོ་ཚ་གཏོད་མཁན་ཡང་ཡོད་དོ། །
EZE 22:11 ཁྱོད་ཀྱི་ནང་དུ་མི་འདི་ཡིས་ཁྱིམ་མཚེས་ཀྱི་ཆུང་མ་དང་ཞེན་ལོག་གི་དོན་སྤྱོད་པ་དང་། མི་དེ་ཡིས་ལོག་གཡེམ་སྤྱད་དེ་རང་གི་མནའ་མ་བཙོག་པར་བཟོ་བ་དང་། ད་དུང་རང་གི་ཕ་རྒྱུད་གཅིག་པའི་ལྕམ་སྲིང་ལ་བརྙས་བཅོས་བྱེད་མཁན་ཡང་ཡོད་དོ། །
EZE 22:12 ཁྱོད་ཀྱི་ནང་དུ་མི་ཡིས་ལྐོག་རྔན་བླངས་ཏེ་མི་ལ་ཁྲག་བཞུར་དུ་འཇུག་མཁན་ཡོད་པ་དང་། ཁྱོད་ཀྱིས་མི་ལ་དངུལ་བུན་བཏང་ནས་སྐྱེད་ཀ་ལེན་པར་མ་ཟད་མང་པོ་བླངས་སོ། །ཁྱོད་ཀྱིས་རང་གི་ཁྱིམ་མཚེས་ལ་བརྙས་བཅོས་དང་གཉའ་གནོན་བྱས་ནས་དེ་ལས་ལྐོག་ནོར་བླངས་ཏེ། ཁྱོད་ཀྱིས་ང་ནི་བརྗེད་པར་གྱུར་ཏོ་ཞེས་གཙོ་བོ་ཡ་ཝཱེས་གསུངས་སོ། །
EZE 22:13 ལྟོས་དང་། ཁྱོད་ལ་ཐོབ་པའི་ལྐོག་ནོར་དང་། ཡང་ཁྱོད་ཀྱི་ནང་དུ་བཞུར་བའི་ཁྲག་གི་རྐྱེན་གྱིས་ངས་ལག་པ་བརྡབས་ཤིང་།
EZE 22:14 ངས་ཁྱོད་ལ་ཉེས་ཆད་གཅོད་པའི་དུས་སླེབས་ན་ཁྱོད་ཀྱི་སེམས་ཀྱིས་ད་དུང་བཟོད་ཐུབ་བམ། ཁྱོད་ཀྱི་ལག་པར་ད་དུང་ཤེད་ཡོད་དམ། ང་ཡ་ཝཱེས་ཅི་ཞིག་སྨྲས་པ་ཡིན་ན་དེ་བཞིན་དུ་བསྒྲུབ་ངེས་སོ། །
EZE 22:15 ངས་ཁྱོད་ནི་ཡུལ་ཁམས་ཀུན་ཏུ་གཏོར་ཞིང་། མི་རྣམས་ཀྱི་ནང་ཁ་ཐོར་དུ་འགྲོར་བཅུག་སྟེ། ངས་ཁྱོད་ལས་མི་གཙང་བ་རྣམས་མེད་པར་བྱའོ། །
EZE 22:16 ཁྱོད་ནི་མི་རིགས་ཀུན་གྱི་མིག་མདུན་དུ་བཙོག་པར་བྱེད་པའི་ཚེ། ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 22:17 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 22:18 ཀྱེ་མིའི་བུ། ཡེས་ར་ཨེལ་གྱི་ཁྱིམ་རྒྱུད་ནི་ངའི་མིག་ནང་དུ་སྙིགས་རོར་གྱུར་ཅིང་། དེ་ཐམས་ཅད་ནི་མེ་ཐབ་ནང་གི་ལི་དང་། གཤའ་དཀར། ལྕགས། ཞ་ཉེ་བཅས་ཡིན་ལ། དངུལ་གྱི་སྙིགས་རོ་ཡིན་ནོ། །
EZE 22:19 དེ་བས་གཙོ་བོ་ཡ་ཝཱེས་འདི་སྐད་དུ། ཁྱོད་ཅག་སྙིགས་རོར་གྱུར་ཟིན་པས། ལྟོས་དང་། ངས་ཁྱོད་ཅག་ཡེ་རུ་སཱ་ལེམ་གྱི་གྲོང་ཁྱེར་ནང་དུ་བསྡུ་བར་བྱ་སྟེ།
EZE 22:20 མི་ཡིས་དངུལ་དང་ཟངས། ལྕགས། ཞ་ཉེ། གཤའ་དཀར་བཅས་ནི་ཇི་ལྟར་མེ་ཐབ་ནང་དུ་བསྡུས་ཏེ་མེ་བཏང་ནས་དེ་རྣམས་བཞུ་བ་ཡིན་ན། ངས་ཀྱང་དེ་བཞིན་དུ་རང་གི་ཁོང་ཁྲོ་དང་ཁྲོ་གཏུམ་ཆེན་པོ་ནང་དུ་ཁྱོད་རྣམས་བསྡུས་ནས། གྲོང་ཁྱེར་ནང་དུ་བཞག་སྟེ་ཁྱོད་རྣམས་བཞུ་བར་བྱེད་དོ། །
EZE 22:21 ངས་ཁྱོད་རྣམས་བསྡུས་ནས། ངའི་ཁོང་ཁྲོ་ཆེན་པོའི་མེ་དེ་ཁྱོད་ཅག་གི་སྟེང་དུ་བཏང་ན། ཁྱོད་རྣམས་ནི་གྲོང་ཁྱེར་ནང་དུ་བཞུ་བར་འགྱུར་རོ། །
EZE 22:22 དངུལ་ཇི་ལྟར་མེ་ཐབ་ནང་དུ་བཞུ་བ་ཡིན་ན། ཁྱོད་རྣམས་ཀྱང་གྲོང་ཁྱེར་ནང་དུ་དེ་ལྟར་བཞུ་བར་འགྱུར་ཞིང་། དེ་ནས་ཁྱོད་ཚོས་ང་ཡ་ཝཱེས་རང་གི་ཁོང་ཁྲོ་ཆེན་པོ་ཁྱོད་ཅག་གི་སྟེང་དུ་བླུགས་པ་རྟོགས་པར་འགྱུར་ཞེས་པའོ་ཞེས་གསུངས་སོ། །
EZE 22:23 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 22:24 ཀྱེ་མིའི་བུ། ཁྱོད་ཀྱིས་ཡུལ་ཁམས་འདི་ལ། ཁོང་ཁྲོའི་དུས་སུ་ཁྱོད་ནི་མི་གཙང་བ་དང་སྦྲང་ཆར་མི་འབབ་པའི་ཡུལ་ཁམས་ཡིན་ཞེས་སྨྲོས་ཤིག
EZE 22:25 ང་རོ་འདོན་པའི་སེང་གེས་བརྔོན་རྫས་དབྲལ་བ་བཞིན་དུ། དེའི་ནང་དུ་ཡོད་པའི་ལུང་སྟོན་པས་ངོ་ལོག་བྱེད་ཅིང་། དེ་དག་གིས་མི་རྣམས་མིད་པ་དང་རྒྱུ་ནོར་དང་རིན་པོ་ཆེ་རྣམས་ཕྲོགས་ནས། དེའི་ནང་གི་ཡུགས་མོའི་གྲངས་ཀ་མང་དུ་སྤེལ་བར་འགྱུར།
EZE 22:26 ཡུལ་འདིའི་མཆོད་དཔོན་རྣམས་ཀྱིས་ངའི་བཀའ་ཁྲིམས་དང་འགལ་ཏེ། ངའི་རྫས་དམ་པ་རྣམས་མི་གཙང་བར་བྱས་ནས། དེ་དག་གིས་རྫས་དམ་པ་དང་རྫས་ཕལ་བའི་དབྱེ་བ་མི་འགེར་ཞིང་། མི་ལ་གང་ཞིག་གཙང་བ་དང་གང་ཞིག་མི་གཙང་བའི་དབྱེ་བ་ཇི་ལྟར་བཀར་བའི་བསླབ་བྱའང་མི་གནང་། ཡང་རང་གི་མིག་བསྒྲིབས་ནས་ངའི་ངལ་གསོ་བའི་ཉིན་མོར་ཁ་ཡ་མི་བྱེད་ཅིང་། ཐ་ན་ང་ནི་ཁོ་ཚོའི་ནང་དུ་ཁྱད་དུ་བསད་པ་ཡིན་ནོ། །
EZE 22:27 དེའི་ནང་གི་འགོ་དཔོན་དག་གིས་ལྐོག་ནོར་འཐོབ་ཕྱིར་དུ། བརྔོན་རྫས་དབྲལ་བའི་འཕར་སྤྱང་བཞིན་དུ། མི་ལ་ཁྲག་བཞུར་དུ་འཇུག་པ་དང་མིའི་སྲོག་གཅོད་དོ། །
EZE 22:28 ཡུལ་འདིའི་ལུང་སྟོན་པ་རྣམས་ཀྱིས་དེ་དག་གི་རྩིག་པར་དཀར་རྩི་བྱུགས་ཏེ། ཞལ་གཟིགས་རྫུས་མ་མཐོང་བ་དང་མི་ལ་མགོ་སྐོར་གཏོང་བའི་མོ་བཏབ་ནས་ན་རེ། གཙོ་བོ་ཡ་ཝཱེས་འདི་སྐད་གསུངས་ཞེས་ཟེར་ཞིང་། དོན་དངོས་སུ་དུས་དེར་དཀོན་མཆོག་ཡ་ཝཱེས་ཅི་ཡང་མ་གསུངས་སོ། །
EZE 22:29 ཡུལ་འདིའི་མི་རྣམས་ཀྱིས་རྒྱུན་དུ་མི་ལ་བརྙས་བཅོས་བྱེད་པ་དང་། འཕྲོག་བཅོམ་བྱེད་པར་གོམས་ཏེ་ཉམ་ཐག་ཅན་དང་དབུལ་ཕོངས་ཅན་རྣམས་སྡུག་ལ་གཏོད་ཅིང་། ལུགས་དང་མི་མཐུན་པར་བྱེས་པ་རྣམས་ལ་བརྙས་བཅོས་བྱེད་དོ། །
EZE 22:30 ཡང་ཡུལ་འདི་མེད་པར་མི་གཏོང་བའི་ཆེད་དུ། ངས་ཁོ་རྣམས་ལས་མཁར་གྱང་ཡང་བསྐྱར་རྩིག་མཁན་དང་། ཡུལ་འདིའི་ཞིག་རལ་དུ་གྱུར་པའི་གནས་སུ་ངའི་མདུན་ནས་ཡར་ལང་བའི་མི་ཞིག་བཙལ་མོད་གཅིག་ཀྱང་མ་རྙེད་དོ། །
EZE 22:31 དེ་བས་ངས་རང་གི་ཁོང་ཁྲོ་དེ་དག་གི་སྟེང་དུ་བླུགས་ཏེ། ངའི་ཁོང་ཁྲོ་ཆེན་པོའི་མེ་ལྕེ་ཡིས་དེ་རྣམས་མེད་པར་བྱེད་པ་དང་། དེ་དག་གིས་ཅི་བྱས་ལ་རང་རང་གི་སྟེང་དུ་ལན་འཇལ་ལོ་ཞེས་གཙོ་བོ་ཡ་ཝཱེས་གསུངས་སོ། །
EZE 23:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 23:2 ཀྱེ་མིའི་བུ། མ་གཅིག་ལས་སྐྱེས་པའི་བུད་མེད་གཉིས་ཡོད་དེ།
EZE 23:3 དེ་གཉིས་ཀས་ཨེ་ཅིབ་ཡུལ་ནས་ལོག་གཡེམ་བྱས་ཤིང་གཞོན་དུས་སུ་ལོག་གཡེམ་བྱས་ནས། ཡུལ་དེར་དེ་གཉིས་ཀྱི་བྲང་ཁར་འབྱར་བ་དང་། ཡུལ་དེར་དེ་གཉིས་ཀྱི་ན་ཆུང་བུ་མོའི་ནུ་མར་མི་ཡིས་རེག་པའོ། །
EZE 23:4 དེ་གཉིས་ལས་གཅེན་མོའི་མིང་ལ་ཨོ་ཧོ་ལཱ་ཞེས་དང་། གཅུང་མོའི་མིང་ལ་ཨོ་ཧོ་ལི་བཱ་ཞེས་བྱ་སྟེ། དེ་གཉིས་ཀ་ངའི་ཆུང་མ་རུ་གྱུར་ནས་བུ་དང་བུ་མོ་སྐྱེས་པ་དང་། དེ་གཉིས་ཀྱི་མིང་བརྗོད་ན། ཨོ་ཧོ་ལཱ་ནི་སཱ་མར་ཡ་དང་། ཨོ་ཧོ་ལི་བཱ་ནི་ཡེ་རུ་སཱ་ལེམ་ཡིན་ནོ། །
EZE 23:5 ཨོ་ཧོ་ལཱ་ངའི་ཆུང་མ་བྱས་རྗེས་ད་དུང་ལོག་གཡེམ་སྤྱད་ཅིང་། མོའི་དགའ་རོགས་ཏེ་ཨ་སུར་པའི་དམག་མི་ཞིག་ལ་ཆགས་པ་སྟེ།
EZE 23:6 དེ་དག་ནི་གོས་རྒྱ་སྨུག་གྱོན་པའི་སྤྱི་དཔོན་དང་འགོ་དཔོན་རྣམས་ཡིན་ལ། དེ་ཐམས་ཅད་བྱད་གཟུགས་ལེགས་པའི་ན་གཞོན་ཡིན་ཞིང་། རྟ་ལ་ཞོན་པའི་རྟ་དམག་ཡིན།
EZE 23:7 ཨོ་ཧོ་ལཱ་ནི་ཨ་སུར་པ་དེ་དག་ལས་བྱད་གཟུགས་ཆེས་ལེགས་པའི་ན་གཞོན་དང་ལོག་གཡེམ་བྱས་ཤིང་། མོས་རང་ཉིད་ཡིད་སྨོན་འཆོར་སའི་མི་རེ་རེ་དང་དེ་དག་གི་སྐུ་འདྲ་རྣམས་ཀྱི་ཕྱིར་དུ་རང་ཉིད་བཙོག་པར་བཟོས་པ་རེད།
EZE 23:8 མོ་ནི་ཨེ་ཅིབ་ཡུལ་གྱི་གཡེམ་སྤྱོད་དང་ཁ་མ་བྲལ་ཏེ། དུས་དེར་མོ་ནི་ལོ་ན་གཞོན་ཞིང་། མི་རྣམས་མོ་དང་འགྲོགས་ཏེ་ན་ཆུང་བུ་མོའི་ནུ་མར་རེག་ཅིང་། རང་རང་གི་འདོད་ཆགས་དེ་མོའི་སྟེང་དུ་བླུགས་སོ། །
EZE 23:9 དེ་བས་ངས་མོ་ནི་མོས་ཡིད་སྨོན་བྱེད་པའི་ཨ་སུར་པ་སྟེ། མོའི་དགའ་རོགས་ཀྱི་ལག་ཏུ་གཏད་པ་ཡིན།
EZE 23:10 མི་དེ་དག་གིས་མོའི་ཁོག་སྨད་རྗེན་པར་བཏོན་ནས། མོའི་བུ་དང་བུ་མོ་རྣམས་བཙོན་དུ་ཁྲིད་པ་དང་མོ་རལ་གྲིས་བསད་དེ། བུད་མེད་རྣམས་ཀྱི་ནང་དུ་མོ་ལ་མིང་ངན་ཐོགས་སོ། །གང་ལ་ཞེ་ན། དེ་དག་གིས་མོར་ཉེས་ཆད་བཅད་པས་སོ། །
EZE 23:11 མོའི་གཅུང་མོ་ཨོ་ཧོ་ལི་བཱ་ཡིས་དེ་མཐོང་ཡང་། ད་དུང་འདོད་ཆགས་ནི་རང་གི་གཅེན་མོ་ལས་ཀྱང་ཐུ་ཞིང་། མོའི་གཡེམ་སྤྱོད་ནི་གཅེན་མོའི་གཡེམ་སྤྱོད་ལས་ཀྱང་དྲགས་སོ། །
EZE 23:12 མོ་ནི་རང་གི་ཁྱིམ་མཚེས་ཨ་སུར་པ་རྣམས་ཏེ་མཆོར་ཉམས་ལྡན་པའི་གོས་གྱོན་ཞིང་རྟ་ལ་ཞོན་པའི་སྤྱི་དཔོན་དང་འགོ་དཔོན་རྣམས་ལ་ཤིན་ཏུ་ཞེན་ཆགས་པ་དང་། དེ་དག་ཐམས་ཅད་བྱད་གཟུགས་ལེགས་པའི་ན་གཞོན་ཡིན་ནོ། །
EZE 23:13 ངས་མོ་ནི་བཙོག་པར་བཟོས་པ་མཐོང་སྟེ། གཅེན་གཅུང་གཉིས་ཀྱི་སྤྱོད་ལམ་གཅིག་མཚུངས་ཡིན་ནོ། །
EZE 23:14 ཨོ་ཧོ་ལི་བཱ་ཡིས་དེ་ལས་ལྷག་པར་ལོག་གཡེམ་བྱས། མོས་རྩིག་ངོས་སུ་བྲིས་པའི་འདྲ་པར་ཏེ། ཚོན་མདོག་དམར་པོས་བྲིས་པའི་ཀལ་དི་པའི་གཟུགས་བརྙན་མཐོང་བ་དང་།
EZE 23:15 དེ་ཚོའི་རྐེད་པར་སྐེ་རགས་བཅིངས་ཤིང་། མགོ་ལ་ཐུར་དུ་འཕྱང་བའི་མགོ་དཀྲིས་ཡོད་ལ། དེ་ཚོར་བལྟས་ཚེ་ཐམས་ཅད་དམག་དཔོན་དང་འདྲ་ཞིང་། པཱ་པེལ་ལོན་གྱི་མི་དང་མཚུངས་པ་ཡིན། ཀལ་དི་ཡུལ་ནི་དེ་ཚོའི་སྐྱེས་ས་ཡིན་ནོ། །
EZE 23:16 ཨོ་ཧོ་ལི་བཱ་ཡི་མིག་གིས་མཐོང་མ་ཐག་ཏུ་དེ་རྣམས་ལ་ཆགས་ཤིང་། མོས་ཀལ་དི་ཡུལ་དུ་ཕོ་ཉ་རྣམས་མངགས་ནས་དེ་ཚོར་འཕྲད་དུ་སོང་བ་རེད།
EZE 23:17 དེ་ནས་པཱ་པེལ་ལོན་གྱི་མི་རྣམས་འོངས་ནས་མོའི་བརྩེ་དུང་གི་མལ་ཁྲིར་འཛེགས་ཏེ། མོ་དང་ལོག་གཡེམ་བྱས་ནས་མོ་བཙོག་པར་བཟོས་ཤིང་། དེ་དག་གིས་མོ་བཙོག་པར་བཟོས་རྗེས་མོའི་སེམས་ནི་དེ་དག་དང་ཁ་ཐག་ཇེ་རིང་དུ་སོང་སྟེ།
EZE 23:18 མོས་རང་གི་གཡེམ་སྤྱོད་མ་སྦས་པ་དང་། རང་གི་ཁོག་སྨད་ཕྱི་རུ་མངོན་པས་ན། སྔར་ངའི་སེམས་ནི་མོའི་གཅེན་མོ་དང་ཁ་ཐག་ཇེ་རིང་དུ་སོང་བ་བཞིན་དུ་ངའི་སེམས་མོ་དང་རིང་དུ་གྱེས།
EZE 23:19 དེའི་སྟེང་དུ་མོས་ཨེ་ཅིབ་ཡུལ་དུ་ལོག་གཡེམ་བྱས་པའི་རང་གི་ན་གཞོན་གྱི་དུས་རྣམས་དྲན་ནས་ལྷག་པར་ལོག་གཡེམ་བྱས་སོ། །
EZE 23:20 མོ་ནི་རང་གི་དགའ་རོགས་ལ་ཞེན་ཆགས་ཤིང་། དེ་དག་གི་ཁོག་སྨད་ནི་བོང་བུའི་ཁོག་སྨད་བཞིན་དང་། དེ་དག་གིས་ཁམས་དཀར་འབྱིན་པ་ནི་རྟ་བཞིན་ཡིན་ནོ། །
EZE 23:21 དེ་ལྟར་ཁྱོད་ཀྱིས་རང་ཉིད་ན་གཞོན་ཡིན་དུས་སུ་འདོད་གཡེམ་བྱས་པ་དེ་དྲན་ཞིང་། དུས་དེར། ཨེ་ཅིབ་པས་ཁྱོད་ཀྱི་བྲང་ལ་འབྱར་ཞིང་ཁྱོད་ན་གཞོན་ཡིན་དུས་ཀྱི་ནུ་མར་རེག་པའོ། །
EZE 23:22 དེ་བས་ན་ཀྱེ་ཨོ་ཧོ་ལི་བཱ། གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་ཀྱི་སེམས་སུ་ཁ་ཐག་ཇེ་རིང་དུ་སོང་བའི་ཁྱོད་ཀྱི་དགའ་རོགས་ལ་བསྐུལ་ནས། ཁྱོད་ལ་རྒོལ་དུ་ངས་དེ་དག་ཕྱོགས་བཞི་ནས་ཁྲིད་འོང་ཞིང་།
EZE 23:23 དེ་དག་ནི་པཱ་པེལ་ལོན་པ་དང་། ཀལ་དི་པ་ཐམས་ཅད། ཕེ་ཀོད་པ། ཤོ་ཨ་པ། ཀོ་ཨ་པ་བཅས་དང་། ལྷན་ཅིག་ཏུ་ད་དུང་ཨ་སུར་པ་ཡང་ཡོད་ལ། དེ་དག་ཐམས་ཅད་ནི་སྤྱི་དཔོན་དང་འགོ་དཔོན་དང་། དམག་དཔོན་སྐད་གྲགས་ཅན་དང་དམག་མི་བྱེད་པའི་ན་གཞོན་བྱད་གཟུགས་ལེགས་པོ་ཅན་ཡིན་ཞིང་། ཐམས་ཅད་རྟ་ལ་ཞོན་མཁན་ཡིན་ནོ། །
EZE 23:24 དེ་དག་གིས་མཚོན་ཆ་བཟུང་ནས་ཤིང་རྟ་དང་དམག་རྟ། དམག་དཔུང་ཆེན་པོ་དང་བཅས་འོངས་ཏེ་ཁྱོད་ལ་རྒོལ་བར་འགྱུར་ཞིང་། དེ་དག་གི་ལག་ཏུ་ཕུབ་ཆེ་ཆུང་གཉིས་ཀ་བཟུང་སྟེ། རྨོག་ཞྭ་གྱོན་ཞིང་། ཕྱོགས་བཞི་ནས་དམག་བསྒྲིགས་ཏེ་ཁྱོད་ལ་རྒོལ་བ་ཡིན། ཡང་ངས་ཉེས་ཆད་གཅོད་པའི་དབང་ནི་དེ་དག་ལ་སྦྱིན་ཞིང་། དེ་དག་གིས་རང་གི་གོམས་སྲོལ་ལྟར་ཁྱོད་ལ་ཉེས་ཆད་གཅོད་པར་འགྱུར།
EZE 23:25 ཡང་ངས་རང་གི་ཞེ་སྡང་ཁྱོད་ཀྱི་སྟེང་དུ་འབར་བར་བྱ། དེ་ཚོས་ཁྱོད་ལ་ཁོང་ཁྲོ་ཆེན་པོའི་སྤྱོད་སྟངས་འཛིན་ཞིང་། ཁྱོད་ཀྱི་སྣ་དང་རྣ་བ་གཅོད་པ་དང་། ཁྱོད་ཀྱི་ལྷག་ལུས་རྣམས་ནི་རལ་གྲིའི་འོག་ཏུ་འགྱེལ་བར་འགྱུར་ལ། དེ་ཚོས་ཁྱོད་ཀྱི་བུ་དང་བུ་མོ་རྣམས་འཛིན་པ་དང་ལྷག་ལུས་རྣམས་མེ་ཡིས་ཁྱུར་མིད་གཏོང་བར་འགྱུར།
EZE 23:26 དེ་དག་གིས་ཁྱོད་ཀྱི་གོས་རྣམས་བཤུས་ནས་ཁྱོད་ཀྱི་ཡིད་དུ་འོང་བའི་རྒྱན་ཆ་རྣམས་ཀྱང་འཕྲོག་པར་འགྱུར།
EZE 23:27 དེ་ལྟར་ངས་ཁྱོད་ཀྱི་གཡེམ་སྤྱོད་དང་ཨེ་ཅིབ་ཡུལ་ནས་ཁྱོད་ལ་འགོས་པའི་གཡེམ་སྦྱོར་ནི་ཁྱོད་དང་འབྲལ་བར་བྱེད་ཅིང་། དེ་ནས་ཁྱོད་ཀྱི་མིག་གིས་དེ་དག་ལ་རེ་ལྟོས་མི་བྱེད་ལ། ཁྱོད་ཀྱིས་ཨེ་ཅིབ་ཡུལ་དྲན་པར་ཡང་མི་འགྱུར་རོ། །
EZE 23:28 གང་ལ་ཞེ་ན། གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་ནི་ཁྱོད་རང་སྡང་བའི་མི་སྟེ་སེམས་སུ་ཁ་ཐག་ཇེ་རིང་དུ་སོང་བའི་ལག་ཏུ་གཏོད་པར་བྱ།
EZE 23:29 དེ་དག་ཁྱོད་ལ་སྡང་ཞིང་། ཁྱོད་ཀྱིས་ངལ་ལས་བརྒྱབ་ནས་ཐོབ་པ་རྣམས་འཕྲོག་པར་འགྱུར་ལ། ཁྱོད་ནི་གཅེར་བུར་ལུས་སུ་འཇུག་པ་དང་། དེ་ནས་ཁྱོད་ཀྱི་ལོག་གཡེམ་བྱས་པའི་ཁོག་སྨད་དང་། འདོད་གཡེམ་དང་གཡེམ་སྦྱོར་དག་ཕྱི་རུ་མངོན་པར་འགྱུར་རོ། །
EZE 23:30 ཁྱོད་ནི་ཕྱི་ཕྱོགས་པའི་རྗེས་སུ་འབྲངས་ཏེ་ལོག་གཡེམ་བྱས་ཤིང་། དེ་ཚོའི་སྐུ་འདྲས་རང་ཉིད་བཙོག་པར་བཟོས་པས་ན། དོན་དེ་དག་ཁྱོད་ཀྱི་སྟེང་དུ་འབྱུང་ངེས་ཡིན་ནོ། །
EZE 23:31 དེ་ཡང་ཁྱོད་ནི་རང་གི་གཅེན་མོའི་ལམ་ལ་ཞུགས་པས། ངས་མོའི་ཕོར་བ་ཁྱོད་ཀྱི་ལག་ཏུ་གཏོད་པར་འགྱུར་རོ། །
EZE 23:32 གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རང་གི་གཅེན་མོས་འཐུང་བའི་ཕོར་བ་ལས་བཏུང་བར་འགྱུར་ཞིང་། ཕོར་བ་དེ་ནི་ཆེ་ཞིང་གཏིང་ལ་མང་པོ་ཤོང་བས། ཁྱོད་ནི་འཕྱ་དགོད་དང་ཟུར་ཟའི་ཡུལ་དུ་འགྱུར་རོ། །
EZE 23:33 ཁྱོད་ནི་ཆང་གིས་རབ་ཏུ་བཟི་ནས་སྡུག་བསྔལ་གྱིས་མནར་ཞིང་། དེ་ནི་འཇིགས་སྐྲག་དང་སྟོངས་པའི་ཕོར་བ་ཡིན་ཏེ། ཁྱོད་ཀྱི་གཅེན་མོ་སཱ་མར་ཡའི་ཕོར་བ་ཡིན་ནོ། །
EZE 23:34 ཁྱོད་ཀྱིས་ཕོར་བ་འདི་ལས་བཏུང་བར་མ་ཟད་བཏུང་ཚར་བར་འགྱུར་ལ། དེ་ནས་ཕོར་བ་དེ་དུམ་བུར་གཅོག་པ་དང་རང་གི་བྲང་ཁ་རྨས་པར་བྱའོ། །གང་ལ་ཞེ་ན། དེ་ནི་ངས་སྔར་སྨྲས་ཟིན་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 23:35 དེ་བས་གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་ང་བརྗེད་དེ་ང་རང་རྒྱབ་ཏུ་དོར་བས། ཁྱོད་ཀྱིས་རང་གི་འདོད་གཡེམ་དང་གཡེམ་སྦྱོར་གྱི་མཇུག་འབྲས་འཁུར་དགོས་ཞེས་པའོ་ཞེས་གསུངས་སོ། །
EZE 23:36 ཡང་དཀོན་མཆོག་ཡ་ཝཱེས་ང་ལ་འདི་སྐད་དུ། ཀྱེ་མིའི་བུ། ཁྱོད་ཀྱིས་ཨོ་ཧོ་ལཱ་དང་ཨོ་ཧོ་ལི་བཱ་གཉིས་ལ་ཁྲིམས་ཐག་གཅོད་དམ། ཁྱོད་ཀྱིས་དེ་གཉིས་ལ་ཁོ་ཚོའི་ཞེན་ལོག་གི་དོན་རྣམས་སྟོན་ཅིག
EZE 23:37 གང་ལ་ཞེ་ན། དེ་གཉིས་ཀྱིས་ལོག་གཡེམ་བྱས་ཏེ། ལག་པར་ཁྲག་འགོས་པ་དང་། རང་གི་སྐུ་འདྲ་རྣམས་དང་མཉམ་དུ་ལོག་གཡེམ་སྤྱད་དེ། ངའི་དོན་དུ་སྐྱེས་པའི་རང་གི་བུ་ཕྲུག་རྣམས་ཀྱང་མེ་བརྒྱུད་ནས་སྐུ་འདྲའི་ཁ་ཟས་སུ་ཕུལ་ཏོ། །
EZE 23:38 དེ་ཀུན་གྱི་སྟེང་དུ་ཉིན་དེ་ལ། དེ་ཚོས་ངའི་གནས་དམ་པ་བཙོག་པར་བཟོས་པའི་དོན་འདི་ཡང་ང་ལ་བྱས་ཤིང་། ངའི་ངལ་གསོ་བའི་ཉིན་མོ་ཡང་ཁྱད་དུ་བསད་དོ། །
EZE 23:39 དེ་དག་གིས་རང་གི་བུ་ཕྲུག་རྣམས་བསད་དེ་སྐུ་འདྲར་ཕུལ་བ་དང་། ཉིན་དེར་ཡང་ངའི་གནས་དམ་པ་རུ་ཞུགས་ནས་གནས་དམ་པ་བཙོག་པར་བཟོས་པ་ཡིན། ལྟོས་དང་། དེ་ནི་ཁོ་ཚོས་ངའི་གནས་དམ་པ་རུ་སྤྱད་པའི་ལས་ཡིན་ནོ། །
EZE 23:40 དེ་མི་ཚད་ཁྱོད་ཚོས་རྒྱང་རིང་ཡུལ་ནས་སྐྱེས་པ་རྣམས་བསུ་རུ་ཕོ་ཉ་མངགས་ཏེ། ལྟོས་དང་། ཕོ་ཉ་དེར་སླེབས་ཚེ། སྐྱེས་པ་དེ་རྣམས་ཀྱང་འོངས་ཤིང་། ཁྱོད་ཚོས་དེ་དག་གི་ཕྱིར་དུ་ཁྲུས་བྱས་པ་དང་། མིག་ལ་རྩི་བསྐུས་ཤིང་རྒྱན་གྱིས་སྤྲས་ནས།
EZE 23:41 ཁྱོད་རྣམས་ཡིད་དུ་འོང་བའི་འབོལ་ཁྲི་སྟེང་དུ་བསྡད་དེ། འབོལ་ཁྲིའི་མདུན་དུ་ཅོག་ཙེ་ཞིག་བཞག་ཅིང་། ངའི་སྤོས་དང་སྣུམ་ནི་དེའི་སྟེང་དུ་བཞག་གོ །
EZE 23:42 དེར་མི་ཚོགས་ཀྱི་སྣང་བ་སྐྱིད་པའི་སྐད་སྒྲ་ཡོད་པ་དང་། མི་ཐ་མལ་བ་དང་ཆང་རྐྱལ་རྣམས་དབེན་སྟོང་ཡུལ་ནས་ཁྲིད་འོངས་ཏེ། དེ་དག་གིས་བུད་མེད་གཉིས་ཀྱི་ལག་པར་གདུབ་བུ་དང་། མཛེས་པའི་ཅོད་པན་མགོ་ལ་བསྐོན་ཏོ། །
EZE 23:43 ཡང་ལོག་གཡེམ་བྱས་ནས་ཉམས་རྒུད་དུ་གྱུར་པའི་བུད་མེད་འདིའི་སྐོར་ལ་ངས་འདི་སྐད་དུ། ད་ལྟ་མི་གཞན་རྣམས་ཀྱིས་དེ་དང་ལོག་གཡེམ་བྱེད་པར་འགྱུར་ཏེ། གང་ལ་ཞེ་ན། མོ་ནི་མ་གཞི་ནས་གཡེམ་མ་ཞིག་ཡིན་པས་སོ་ཞེས་སྨྲའོ། །
EZE 23:44 མི་རྣམས་མོ་དང་འགྲོགས་ཤིང་། མི་རྣམས་ཅི་ལྟར་སྨད་འཚོང་མ་དང་འགྲོགས་པ་ཡིན་ན། འདོད་གཡེམ་ཅན་གྱི་བུད་མེད་ཨོ་ཧོ་ལཱ་དང་ཨོ་ཧོ་ལི་བཱ་གཉིས་ལ་ཡང་དེ་ལྟར་འགྲོགས་སོ། །
EZE 23:45 ཡིན་ཡང་དྲང་བདེན་ཅན་གྱིས་གཡེམ་མ་དང་མི་ལ་ཁྲག་བཞུར་དུ་བཅུག་པའི་བུད་མེད་ཀྱི་ཁྲིམས་ཆད་བཞིན་དེ་གཉིས་ལའང་ཁྲིམས་ཐག་གཅོད་པར་འགྱུར་ཏེ། གང་ལ་ཞེ་ན། ཁོ་གཉིས་ནི་གཡེམ་མ་ཡིན་ཞིང་། ལག་པར་ཁྲག་འགོས་ཡོད་པས་སོ། །
EZE 23:46 གང་ལ་ཞེ་ན། གཙོ་བོ་ཡ་ཝཱེས་འདི་སྐད་དུ། ངས་མི་མང་པོ་ཞིག་དེ་གཉིས་ལ་རྒོལ་དུ་འོང་བར་བཅུག་སྟེ། དེ་གཉིས་འཇིགས་ཤིང་མི་ཡིས་འཕྲོག་བཅོམ་བྱེད་པར་འགྱུར།
EZE 23:47 མི་དེ་དག་གིས་དེ་གཉིས་རྡོ་རུབ་བཏང་ནས་རལ་གྲིས་གཏུབ་ཅིང་། ཡང་དེ་གཉིས་ཀྱི་བུ་དང་བུ་མོ་རྣམས་གསོད་པ་དང་། དེ་ཚོའི་ཁང་པ་རྣམས་མེས་བསྲེག་པར་འགྱུར།
EZE 23:48 དེ་ལྟར་བུད་མེད་ཀུན་ལ་དྲན་སྐུལ་ཐོབ་ནས། ཁྱོད་རྣམས་ཀྱིས་འདོད་གཡེམ་སྤྱད་པ་བཞིན་དུ་མི་སྤྱོད་པའི་ཕྱིར་དུ། ངས་འདོད་གཡེམ་དེ་ཡུལ་འདི་ནས་མཚམས་གཅོད་དོ། །
EZE 23:49 མི་ཡིས་ཁྱོད་རྣམས་ཀྱི་ལོག་གཡེམ་བྱས་པའི་ལན་ནི་ཁྱོད་ཅག་གི་སྟེང་དུ་འཇལ་ཞིང་། ཁྱོད་རྣམས་ཀྱིས་རང་གིས་སྐུ་འདྲར་ཕྱག་བཙལ་བའི་སྡིག་པ་འཁུར་དགོས་ལ། དེ་ནས་ཁྱོད་ཚོས་བདག་ནི་གཙོ་བོ་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 24:1 ཡང་ལོ་དགུ་པའི་ཟླ་བཅུ་པའི་ཚེས་བཅུ་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 24:2 ཀྱེ་མིའི་བུ། ཁྱོད་ཀྱིས་དེ་རིང་གི་ཟླ་ཚེས་འདི་ཡི་གེར་ཁོད་ཅིག དེ་རིང་གི་ཉིན་མོ་འདི་ནི་པཱ་པེལ་ལོན་གྱི་རྒྱལ་པོས་ཡེ་རུ་སཱ་ལེམ་བསྐོར་བའི་ཉིན་མོ་ཡིན།
EZE 24:3 ཁྱོད་ཀྱིས་ཁྱིམ་རྒྱུད་ངོ་ལོག་ཅན་དེ་ལ་དཔེ་དྲངས་ནས་འདི་ལྟར། གཙོ་བོ་ཡ་ཝཱེས་འདི་སྐད་དུ། སླ་ང་མེའི་སྟེང་དུ་སྐྱོན་དང་། བསྐྱོན་པའི་རྗེས་སུ་དེའི་ནང་དུ་ཆུ་བླུགས་ཤིག
EZE 24:4 དེ་ནས་ཤ་རྡོག་རྡོག་སྟེ། ཤ་ཤེད་རྒྱས་པའི་ཤ་རྡོག་རྡོག་དང་རྐང་ལག་རྣམས་སླ་ངའི་ནང་དུ་བཞག་སྟེ། རུས་པ་ལེགས་པོས་སླ་ང་ཁེངས་སུ་ཆུག་དང་།
EZE 24:5 ལུག་ཁྱུ་ལས་ཤ་ཤེད་རྒྱས་པའི་ལུག་བདམས་ནས། སླ་ངའི་འོག་ཏུ་བུད་ཤིང་བཞག་སྟེ་སླ་ངའི་ཆུ་འཁོལ་དུ་ཆུག་དང་། རུས་པ་སླ་ངའི་ནང་དུ་ཚོས་ཤིག
EZE 24:6 དེ་བས། གཙོ་བོ་ཡ་ཝཱེས་འདི་སྐད་དུ། མི་ལ་ཁྲག་བཞུར་དུ་བཅུག་པའི་གྲོང་ཁྱེར་ལ། ཡུན་རིང་དུ་བཙའ་ཆགས་པའི་སླ་ང་བཞིན་དུ་ཆག་སྒོ་འབྱུང་ཞིང་། དེའི་བཙའ་ནི་མེད་པར་བཟོས་མེད་པས། སླ་ངའི་ནང་གི་དངོས་པོ་ནི་གཅིག་རེ་གཅིག་རེ་བྱས་ནས་ལེན་དགོས་པ་ལས། དེ་དག་གི་ཕྱིར་དུ་རྒྱན་ལེན་མི་དགོས་སོ། །
EZE 24:7 གང་ལ་ཞེ་ན། གྲོང་ཁྱེར་ནང་དུ་ད་དུང་མོས་བཞུར་དུ་བཅུག་པའི་ཁྲག་ཡོད་དེ། མོས་ཁྲག་ནི་ཕ་བོང་འཇམ་པོའི་སྟེང་དུ་གཏོར་བ་ལས། ས་རྡུལ་གྱིས་འགེབ་པར་སའི་ནང་དུ་མ་བླུགས་སོ། །
EZE 24:8 དེ་ལྟར་ངས་ཁོང་ཁྲོ་ཆེན་པོ་ལངས་ནས་ལན་འཇལ་བའི་ཕྱིར་དུ། མོའི་ཁྲག་ནི་ཕ་བོང་འཇམ་པོའི་སྟེང་དུ་བླུགས་ཤིང་ཐ་ན་འགེབ་ཀྱང་མི་ནུས་པར་བྱས།
EZE 24:9 དེ་བས་གཙོ་བོ་ཡ་ཝཱེས་འདི་སྐད་དུ། མི་ལ་ཁྲག་བཞུར་དུ་བཅུག་པའི་གྲོང་ཁྱེར་དེ་ལ་ཆག་སྒོ་འབྱུང་། ངས་བུད་ཤིང་ཇེ་མང་དུ་གཏོང་བར་བྱ།
EZE 24:10 ཁྱོད་ཀྱིས་བུད་ཤིང་མང་པོ་སྤུངས་ལ་མེ་སྦར་ནས་བྲོ་སྨན་དང་བཅས་ཤ་ལེགས་པར་ཚོས་དང་། རུས་པ་རྣམས་འཚིག་ཏུ་ཆུག
EZE 24:11 དེ་ནས་སླ་ང་སྟོང་པ་མེའི་སྟེང་དུ་བཞག་ནས་སླ་ང་ངར་དུ་བཅུག་སྟེ། ཟངས་དམར་པོར་འགྱུར་བར་བྱས་ནས། དེའི་ནང་གི་མི་གཙང་བ་རྣམས་བཞུ་རུ་ཆུག་དང་། དེའི་བཙའ་རྣམས་མེད་པར་བཟོས་ཤིག
EZE 24:12 སླ་ང་འདིས་མི་ལ་ཡིད་ཆད་དུ་འཇུག་སྟེ། དེའི་སྟེང་གི་བཙའ་མཐུག་པོ་ནི་ལེན་ཐབས་མེད་ལ། མེའི་ནང་དུ་ཡང་དེའི་བཙའ་མེད་པར་བཟོ་མི་ཐུབ་བོ། །
EZE 24:13 ཁྱོད་ཀྱི་མི་གཙང་བ་དེ་ནི་འདོད་གཡེམ་ཡིན་ནོ། །ངས་ཁྱོད་གཙང་མར་བཟོ་འདོད་ཀྱང་ཁྱོད་གཙང་མར་འགྱུར་མི་འདོད་པས། ང་ཁྱོད་ཀྱི་སྟེང་དུ་ཁོང་ཁྲོ་རབ་ཏུ་འབར་ནས་མཚམས་འཇོག་པའི་བར་དུ། ཁྱོད་ཀྱི་བཙོག་པ་དེ་གཙང་མར་འགྱུར་མི་ནུས་སོ། །
EZE 24:14 ང་ཡ་ཝཱེས་གསུངས་པ་དང་དུས་སུ་སླེབས་ན་ངས་དེ་འགྲུབ་པར་བྱའོ། །ངས་ཕྱིར་འཐེན་མི་བྱེད་ལ་སྙིང་རྗེ་ཡང་མི་བསྐྱེད། བསམ་ཚུལ་ཡང་མི་བསྒྱུར་བར། ཁྱོད་ཀྱི་སྤྱོད་ལམ་བཞིན་དུ་ཁྱོད་ལ་ཁྲིམས་གཅོད་པར་འགྱུར་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 24:15 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 24:16 ཀྱེ་མིའི་བུ། ལྟོས་དང་། ངས་གློ་བུར་ཉིད་དུ་ཁྱོད་ལ་རྒོལ་ཞིང་། ཁྱོད་རང་ཅི་ལ་བལྟ་བར་དགའ་བ་དེ་འཕྲོག་པར་བྱ་སྟེ། ཁྱོད་ནི་ཡིད་སྐྱོ་མི་རུང་། ངུ་ཡང་མི་རུང་། མཆི་མ་ཡང་མི་འདོན་པར།
EZE 24:17 ཁུ་སིམ་པོར་དབུགས་རིང་ཐོངས་ཤིག གཤིན་པོའི་དོན་དུ་མྱ་ངན་མི་བྱེད་པར། ཁྱོད་ཀྱི་མགོ་ལ་ད་དུང་མགོ་རས་དཀྲིས་དང་། རྐང་པར་ད་དུང་ལྷམ་གྱོན་པ་ལས། ཁྱོད་ཀྱིས་རང་གི་གདོང་ནི་འགེབ་མི་རུང་ལ། མྱ་ངན་ཞུ་བཞིན་པའི་ཁྱིམ་ཚང་ལ་གྲ་སྒྲིག་བྱས་པའི་སྡུག་ཟས་ཀྱང་མི་ཟའོ་ཞེས་གསུངས།
EZE 24:18 དེ་ནས་ཞོགས་པ་ངས་མི་ཚོགས་ལ་དོན་འདི་སྨྲས་པ་དང་། མཚན་མོར་ངའི་ཆུང་མ་ཚེ་ལས་འདས། ཕྱི་ཉིན་ཞོགས་པ་ངས་རང་ལ་བཀའ་ཇི་ལྟར་བསྩལ་པ་བཞིན་དུ་སྤྱད་ཅིང་།
EZE 24:19 མི་ཚོགས་ཀྱིས་ང་ལ། ཁྱེད་ཀྱིས་བྱས་པ་དེ་ནི་ངེད་རྣམས་དང་འབྲེལ་བ་ཅི་ཡོད་པ་འཆད་པར་མི་བྱའམ་ཞེས་དྲིས་པ་ལ།
EZE 24:20 ངས་དེ་ཚོའི་ལན་དུ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 24:21 ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་རང་གི་གནས་དམ་པ་ནི་བཙོག་པར་བྱེད་ངེས་ཡིན། དམ་པའི་གནས་འདི་ནི་ཁྱོད་ཚོས་ངོམ་པའི་སྟོབས་ཤུགས་དང་། མིག་ནང་དུ་ཅི་ལ་དགའ་བ་དང་། སེམས་ནས་གཅེས་སུ་འཛིན་པ་དེའོ། །ཁྱོད་ཚོའི་ཤུལ་དུ་ལུས་པའི་བུ་དང་བུ་མོ་རྣམས་ནི་རལ་གྲིའི་འོག་ཏུ་འགྱེལ་བར་འགྱུར།
EZE 24:22 དུས་དེར་ཁྱོད་ཚོས་ངས་ཅི་བྱས་པ་བཞིན་དུ་སྤྱོད་པ་ལས་ཁྱོད་ཚོས་རང་གི་གདོང་འགེབ་མི་རུང་ལ། མྱ་ངན་ཞུ་བཞིན་པའི་ཁྱིམ་ཚང་ལ་གྲ་སྒྲིག་བྱས་པའི་སྡུག་ཟས་ཀྱང་ཟ་མི་རུང་ངོ་། །
EZE 24:23 ཁྱོད་ཚོའི་མགོ་ལ་སྔར་བཞིན་མགོ་རས་དཀྲིས་ཤིག རྐང་པར་ད་དུང་ལྷམ་གྱོན་ཞིག ཁྱོད་རྣམས་ཡིད་སྐྱོ་མི་རུང་། ངུ་ཡང་མི་རུང་། ཡིན་ཡང་ཁྱོད་ཚོས་རང་གི་སྡིག་པའི་དབང་གིས་གཅིག་གིས་གཅིག་ལ་བལྟ་ཞིང་དབུགས་རིང་ཕྱུང་ནས་ཉམ་ཐག་པར་འགྱུར།
EZE 24:24 འདིའི་ལུགས་སུ་ཨེ་ཟེ་ཀི་ཨེལ་ནི་ཁྱོད་ཅག་གི་སྔ་ལྟས་ཤིག་ཡིན་པས། དེས་སྤྱད་པའི་ལས་ཐམས་ཅད་ནི་མ་འོངས་པར་ཁྱོད་ཚོས་ཀྱང་སྤྱོད་དེ། དོན་དེ་འབྱུང་དུས་སུ། ཁྱོད་ཚོས་བདག་ནི་གཙོ་བོ་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ། །
EZE 24:25 ཀྱེ་མིའི་བུ། ངས་དེ་དག་གི་ཁྲོད་ནས་ཁོ་ཚོའི་བཙན་རྫོང་དང་། དེ་དག་དགའ་བའི་གཟི་བརྗིད་དང་། དེ་དག་གི་མིག་ནང་དུ་ཅི་ལ་དགའ་བ་དང་། སེམས་ནས་བརྩི་མཐོང་བྱེད་པ་དང་ཁོ་ཚོའི་བུ་དང་བུ་མོ་རྣམས་འཕྲོག་པའི་དུས་སུ།
EZE 24:26 དེ་ལས་ཐར་བའི་མི་ཞིག་ཁྱོད་ཀྱི་དྲུང་དུ་འོངས་ཏེ་ཁྱོད་ལ་དོན་དེ་ཐོས་སུ་འཇུག་པ་ཡིན།
EZE 24:27 དུས་དེར། ཁྱོད་ཀྱིས་ཁ་གྲགས་ནས་ཐར་བའི་མི་དེ་ལ་གཏམ་སྨྲ་བ་ལས་ལྐུགས་པ་མ་བྱེད་ཅིག ཁྱོད་ནི་དེ་ཚོའི་སྔ་ལྟས་ཤིག་ཏུ་འགྱུར་བ་དང་། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 25:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 25:2 ཀྱེ་མིའི་བུ། ཁྱོད་ཀྱིས་ཨམ་མོན་པར་གདོང་གཏད་ནས་ཁོ་ཚོར་རྒོལ་བའི་ལུང་སྟོན་ཅིག
EZE 25:3 ཁྱོད་ཀྱིས་ཨམ་མོན་པ་རྣམས་ལ་འདི་ལྟར་སྨྲོས་ཤིག ཁྱོད་ཚོས་གཙོ་བོ་ཡ་ཝཱེའི་གསུང་ལ་ཉོན་དང་། གཙོ་བོ་ཡ་ཝཱེས་འདི་སྐད་དུ། ངའི་གནས་དམ་པ་བཙོག་པར་བཟོས་ཤིང་། ཡེས་ར་ཨེལ་གྱི་ཡུལ་ཁམས་སྟོངས་པར་གྱུར་ནས་ཡ་ཧུ་དཱའི་ཁྱིམ་རྒྱུད་བཙོན་དུ་ཁྲིད་པའི་དུས་སུ། ཁྱོད་ཀྱིས་དེ་དག་ལ་ཁྲེལ་དགོད་བྱས་པས།
EZE 25:4 ལྟོས་དང་། ངས་ཁྱོད་ནི་ཤར་ཕྱོགས་པའི་ལག་ཏུ་ནོར་སྐལ་དུ་གཏོད་ཅིང་། དེ་དག་གིས་ཁྱོད་ཀྱི་གནས་སུ་གུར་ཕུབ་ནས་ཁྱོད་ཀྱི་དབུས་སུ་གཞིས་ཆགས་པ་དང་། དེ་དག་གིས་ཁྱོད་ཀྱི་འབྲས་བུ་བཟའ་ཞིང་ཁྱོད་ཀྱི་འོ་མ་བཏུང་བར་འགྱུར།
EZE 25:5 ངས་རབ་བཱ་ནི་རྔ་མོང་འཚོ་སར་འགྱུར་དུ་བཅུག་སྟེ། ཨམ་མོན་པའི་ཡུལ་ནི་ལུག་ཁྱུ་ཉལ་སའི་གནས་སུ་འགྱུར་བར་བྱས་ན། ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 25:6 གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རྐང་འཁྲབ་ལག་འཁྲབ་བྱས་ཏེ་སེམས་ལ་ཞེ་སྡང་གིས་ཁེངས་ནས། ཡེས་ར་ཨེལ་ལ་བྱུང་བའི་སྡུག་བསྔལ་གྱི་དབང་གིས་དགའ་མགུ་བྱས་པས།
EZE 25:7 ལྟོས་དང་། ངས་ལག་པ་བརྐྱངས་ནས་ཁྱོད་ལ་རྒོལ་ཞིང་ཁྱོད་ནི་ཕྱི་ཕྱོགས་པའི་བཅོམ་ནོར་དུ་སྦྱིན་པ་དང་། ངས་མི་ཐམས་ཅད་ལས་ཁྱོད་ཚར་གཅོད་ཅིང་། ཁྱོད་ནི་ཡུལ་ཀུན་ནས་མེད་པར་བྱའོ། །ངས་ཁྱོད་མེད་པར་བྱས་ན་ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 25:8 གཙོ་བོ་ཡ་ཝཱེས་འདི་སྐད་དུ། མོ་ཨབ་དང་སེ་ཨིར་གཉིས་ན་རེ། ལྟོས་དང་། ཡ་ཧུ་དཱའི་ཁྱིམ་རྒྱུད་ནི་ཕྱི་ཕྱོགས་པ་ཀུན་དང་འདྲའོ་ཟེར་བས།
EZE 25:9 ལྟོས་དང་། ངས་མོ་ཨབ་ཀྱི་ཕྱོགས་གཅིག་གི་འགོག་སྲུང་མེད་པར་བྱས་ཏེ། ཁོ་ཚོས་ཡུལ་དེའི་གཟི་བརྗིད་དུ་རྩི་བའི་པེད་ཡེ་ཤི་མོད་དང་། པཱ་ཨལ་མེ་ཨོན། ཀིར་ཡ་ཐཱ་ཡེམ་བཅས་པ་སྟེ། ས་མཚམས་ཀྱི་གྲོང་ཁྱེར་རྣམས་ནས་འགོ་བརྩམས་ཏེ།
EZE 25:10 ངས་མོ་ཨབ་དང་ཨམ་མོན་པ་བཅས་མཉམ་དུ་ཤར་ཕྱོགས་པའི་ནོར་སྐལ་དུ་གཏོད་ཅིང་། བུ་རྒྱུད་ཀུན་གྱི་ནང་དུ་ཨམ་མོན་པ་ནི་ཡང་བསྐྱར་དྲན་པར་མི་འགྱུར།
EZE 25:11 ངས་མོ་ཨབ་ལ་ཉེས་ཆད་གཅོད་པར་བྱ་སྟེ། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 25:12 གཙོ་བོ་ཡ་ཝཱེས་འདི་སྐད་དུ། ཨེ་དོམ་གྱིས་ཡ་ཧུ་དཱའི་ཁྱིམ་རྒྱུད་ལ་འཁོན་ལན་བསློགས་པས། ཁོ་ཚོས་དེ་བཞིན་སྤྱད་པ་ནི་སྡིག་པ་རབ་ཏུ་ཆེན་པོ་བྱས་པའོ། །
EZE 25:13 དེ་བས་གཙོ་བོ་ཡ་ཝཱེས་འདི་སྐད་དུ། ངས་ལག་པ་བརྐྱངས་ནས་ཨེ་དོམ་ལ་རྒོལ་ནས་ཡུལ་དེའི་མི་ཕྱུགས་གཉིས་ཀ་ཚར་གཅོད་ཅིང་། ངས་ཨེ་དོམ་ནི་སྟོངས་སུ་འཇུག་པ་དང་། ཐེ་མཱན་ནས་དི་དན་གྱི་བར་དུ་དེ་རྣམས་རལ་གྲིའི་འོག་ཏུ་འཆི་བར་འགྱུར།
EZE 25:14 ངས་རང་གི་འབངས་མི་ཡེས་ར་ཨེལ་པའི་ལག་པ་བརྒྱུད་ནས་ཨེ་དོམ་ལ་ལན་འཇལ་ཞིང་། ཡེས་ར་ཨེལ་པས་ངའི་ཁོང་ཁྲོ་དང་ངའི་ཁྲོ་གཏུམ་ཆེན་པོ་བཞིན་དུ་ཨེ་དོམ་ལ་སྤྱད་པ་སྤྱོད་ཅིང་། དེ་ནས་ཨེ་དོམ་པས་དེ་ནི་ངས་ལན་འཇལ་བ་རྟོགས་སོ་གསུངས་ཞེས་གཙོ་བོ་ཡ་ཝཱེས་གསུངས་སོ། །
EZE 25:15 གཙོ་བོ་ཡ་ཝཱེས་འདི་སྐད་དུ། ཡང་ཕེ་ལེ་ཤེད་པས་ཡ་ཧུ་དཱ་པ་རྣམས་ལ་འཁོན་ལན་བསློགས་ཤིང་། སེམས་ནས་མཐོང་ཆུང་བྱས་ཏེ་འཁོན་ལན་བསློགས་པ་དང་། ནམ་ཡིན་ཡང་འཁོན་སེམས་བསྐྱེད་དེ་ཡ་ཧུ་དཱ་མེད་པར་བཟོ་འདོད་པས།
EZE 25:16 གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ལག་པ་བརྐྱངས་ནས་ཕེ་ལེ་ཤེད་པ་ལ་རྒོལ་བར་འགྱུར་ཞིང་། ཀེ་རེད་པ་རྣམས་ཚར་བཅད་ནས། རྒྱ་མཚོའི་འགྲམ་གྱི་ལྷག་ལུས་རྣམས་ཀྱང་མེད་པར་བྱའོ། །
EZE 25:17 ངས་ཁྲོ་གཏུམ་ཆེན་པོས་དེ་དག་ལ་སྐྱོན་བཙུགས་ནས་འཁོན་ལན་བསློག་ཅིང་། ངས་དེ་དག་ལ་འཁོན་ལན་སློག་པའི་དུས་སུ། ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ་གསུངས་ཞེས་གསུངས་སོ། །
EZE 26:1 དེ་ཡང་ལོ་བཅུ་གཅིག་པའི་ཟླ་ག་གེ་མོའི་ཚེས་གཅིག་གི་ཉིན། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 26:2 ཀྱེ་མིའི་བུ། ཐཱར་གྱིས་ཡེ་རུ་སཱ་ལེམ་ལ་འཕྱ་དགོད་བྱས་ནས་ན་རེ། མི་རིགས་ཀུན་གྱི་སྒོ་དེ་ཆག་ནས་ངའི་ཕྱོགས་སུ་ཕྱེས་པ་དང་། དེ་ནི་སྟོངས་ཤིང་ང་ནི་བཀང་བར་འགྱུར་ཞེས་སྨྲས་པས།
EZE 26:3 གཙོ་བོ་ཡ་ཝཱེས་འདི་སྐད་དུ། ཀྱེ་ཐཱར། ལྟོས་དང་། ངས་ཁྱོད་ནི་དགྲ་རུ་འཛིན་ཞིང་། རྒྱ་མཚོས་རྦ་རླབས་ཡར་འཕྱུར་དུ་འཇུག་པ་ནང་བཞིན། ངས་ཡུལ་ཁམས་ཀུན་ཡར་འོངས་ནས་ཁྱོད་ལ་རྒོལ་བར་བྱ་སྟེ།
EZE 26:4 དེ་དག་གིས་ཐཱར་གྱི་ལྕགས་རི་རྣམས་བརླགས་ཏེ་ལྕོག་མཁར་རྣམས་བཤིག་ཅིང་། ངས་དེའི་ས་རྡུལ་རྣམས་གཙང་མར་བྲད་ནས་དེ་ནི་བྲག་རྡོ་འཇམ་པོ་རུ་འགྱུར་བར་བྱའོ། །
EZE 26:5 དེ་ནི་རྒྱ་མཚོའི་དབུས་སུ་ཉ་རྒྱ་འདིང་བའི་གནས་སུ་འགྱུར་ཏེ། གང་ལ་ཞེ་ན། གཙོ་བོ་ཡ་ཝཱེ་བདག་གིས་འདི་ལྟར་གསུངས་པ་ཡིན། དེ་ནི་མི་ཀུན་གྱི་བཅོམ་ནོར་དུ་འགྱུར་བ་དང་།
EZE 26:6 སྐམ་སར་སྡོད་པའི་ཐཱར་པ་རྣམས་ནི་རལ་གྲིས་གསོད་པར་འགྱུར་ལ། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 26:7 གང་ལ་ཞེ་ན། གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་རྒྱལ་པོ་རྣམས་ཀྱི་རྒྱལ་པོ་ཡིན་པའི་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ལ། རྟ་དང་ཤིང་རྟ། རྟ་དམག་བཅས་དམག་དཔུང་ཆེན་པོ་ཞིག་ཁྲིད་དེ་བྱང་ནས་ཐཱར་ལ་རྒོལ་དུ་འོང་བར་བྱ་ཞིང་།
EZE 26:8 དེས་ཁྱོད་ཀྱི་སྐམ་སར་སྡོད་པའི་མི་རྣམས་གསོད་ཅིང་། གྲོང་ཁྱེར་བསྐོར་བའི་མཁར་རྣམས་བརྩིག་པ་དང་། འགོག་སྲུང་བྱེད་པའི་ས་རགས་བརྩིགས་ནས་ཕུབ་རྣམས་བཟུང་སྟེ་ཁྱོད་ལ་རྒོལ་བར་འགྱུར།
EZE 26:9 དེས་གྲོང་ཁྱེར་ལ་རྒོལ་བའི་ཐོ་བ་ཆེན་པོས་ཁྱོད་ཀྱི་ལྕགས་རི་རྣམས་ལ་རྒོལ་ཞིང་། མཚོན་ཆས་ཁྱོད་ཀྱི་ལྕོག་མཁར་རྣམས་བཤིག་པར་འགྱུར།
EZE 26:10 དེ་ལ་རྟ་ཤིན་ཏུ་མང་པོ་ཡོད་པས་ན། དེ་དག་གིས་ས་རྡུལ་ལངས་སུ་བཅུག་ནས་ཁྱོད་ནི་འགེབ་པར་འགྱུར་ཞིང་། མི་ནི་གྲོང་ཁྱེར་ཞིག་རལ་ཅན་གྱི་ནང་དུ་འཛུལ་བ་བཞིན་དུ། དེ་ནི་ཁྱོད་ཀྱི་མཁར་སྒོའི་ནང་དུ་འཛུལ་བར་འགྱུར་ལ། དུས་དེར། ཁྱོད་ཀྱི་ལྕགས་རི་རྣམས་ནི་རྟ་དམག་དང་ཤིང་རྟའི་འཁོར་ལོ་དང་། ཤིང་རྟའི་སྒྲ་ཡི་རྐྱེན་གྱིས་འདར་བར་འགྱུར།
EZE 26:11 དེའི་རྟ་ཡི་རྨིག་པས་ཁྱོད་ཀྱི་སྲང་ལམ་ཐམས་ཅད་བརྫི་བར་འགྱུར་ཞིང་། དེས་རལ་གྲི་ཡིས་ཁྱོད་ཀྱི་མི་རྣམས་གསོད་པ་དང་། ཁྱོད་ཀྱི་ཀ་བ་བརྟན་པོ་རྣམས་ཀྱང་ས་ལ་འགྱེལ་བར་འགྱུར།
EZE 26:12 དེ་དག་གིས་ཁྱོད་ཀྱི་རྒྱུ་ནོར་ཕྲོགས་ནས་ཁྱོད་ཀྱི་ཚོང་ཟོག་ནི་བཅོམ་ནོར་དུ་འགྱུར་ཞིང་། ཁྱོད་ཀྱི་ལྕགས་རི་རྣམས་བརླགས་ནས་ཁྱོད་ཀྱི་མཛེས་པའི་གཟིམས་ཁང་རྣམས་བཤིག་སྟེ། ཁྱོད་ཀྱི་རྡོ་དང་ཤིང་དང་། ས་རྡུལ་བཅས་ནི་མཚོ་ནང་དུ་འདོར་བར་བྱའོ། །
EZE 26:13 ཡང་ངས་ཁྱོད་ཀྱི་གླུ་སྐད་མཚམས་གཅོད་ཅིང་། མི་ཡིས་ཁྱོད་ཀྱི་པི་ཝང་གི་སྒྲ་ཡང་བསྐྱར་ཐོས་པར་མི་འགྱུར་ཏེ།
EZE 26:14 ངས་ཁྱོད་བྲག་རྡོ་འཇམ་པོ་ཞིག་ཏུ་འགྱུར་བར་བྱ་སྟེ། ཁྱོད་ནི་ཉ་རྒྱ་འདིང་བའི་གནས་སུ་འགྱུར་ལ། ཁྱོད་ནི་སླར་བརྩིག་པར་མི་འགྱུར་རོ། །གང་ལ་ཞེ་ན། ང་ཡ་ཝཱེས་སྨྲས་པ་ཡིན་ཞེས་གཙོ་བོ་ཡ་ཝཱེས་གསུངས་སོ། །
EZE 26:15 ཡང་གཙོ་བོ་ཡ་ཝཱེས་ཐཱར་ལ་འདི་སྐད་དུ། ཁྱོད་ཀྱི་ནང་དུ་སྲོག་གཅོད་པའི་དོན་བྱུང་བ་སྟེ། རྨས་མ་རྣམས་ངུ་བའི་དུས་སུ། གླིང་ཕྲན་རྣམས་ནི་ཁྱོད་རང་འགྱེལ་བའི་སྒྲ་ཡིས་འདར་བར་མི་འགྱུར་རམ།
EZE 26:16 དུས་དེར་མཚོ་འགྲམ་དུ་ཡོད་པའི་རྒྱལ་པོ་ཐམས་ཅད་རྒྱལ་ཁྲི་ལས་མར་འབབ་ཅིང་། གཟབ་གོས་དང་ཚེམ་དྲུབ་ལྡན་པའི་གོས་ཕུད་དེ། འཇིགས་སྐྲག་གིས་ཁེངས་ནས་སར་སྡོད་ཅིང་། མཚམས་མེད་པར་འདར་ཞིང་ཁྱོད་ཀྱི་དབང་གིས་འཇིགས་པར་འགྱུར།
EZE 26:17 དེ་ཚོས་ཁྱོད་ལ་སྐྱོ་གླུ་ལེན་ཞིང་ན་རེ། མིང་དུ་གྲགས་པའི་གྲོང་ཁྱེར་ཁྱོད་རང་ནི། །གྲུ་དཔོན་རྣམས་ཀྱི་སྡོད་སའི་གནས་ཡིན་ཞིང་། །རྒྱ་མཚོའི་སྟེང་དུ་བརྟན་ཞིང་སྟོབས་ལྡན་ཁྱོད། །ཁྱོད་དང་ཁྱོད་ཀྱི་མི་ཡིས་སྔར་ནས་བཟུང་། །གནས་དེར་སྡོད་པའི་མི་ལ་དངངས་སྐྲག་ཕབ། །ད་ལྟ་ཁྱོད་ནི་ཅི་ལྟར་ཤུལ་ཆད་དམ། །
EZE 26:18 ད་ནི་ཁྱོད་རང་འགྱེལ་བའི་དུས་འདི་ལ། །གླིང་ཕྲན་རྣམས་ཀྱི་མི་ཀུན་འདར་བ་དང་། །གླིང་ཕྲན་དག་ནི་ཁྱོད་རང་བརླགས་པས་འཇིགས། །ཞེས་པའོ། །
EZE 26:19 གང་ལ་ཞེ་ན། གཙོ་བོ་ཡ་ཝཱེས་འདི་སྐད་དུ། ངས་ཁྱོད་ནི་མི་མེད་པའི་གྲོང་ཁྱེར་བཞིན་དུ་སྟོངས་སུ་འཇུག་ཅིང་། ཡང་ངས་གཏིང་གི་ཆུ་རྣམས་ཡར་འཕྱུར་དུ་བཅུག་ནས་ཁྱོད་ལས་བརྒལ་ཏེ། ཆུ་ཆེན་གྱིས་ཁྱོད་བསྣུབ་པར་བྱའོ། །
EZE 26:20 དུས་དེར། ངས་ཁྱོད་ནི་དུར་དུ་སྦས་པའི་མི་དང་བཅས་གནའ་མི་རྣམས་ཀྱི་རྩར་འབབ་ཏུ་འཇུག་ཅིང་། ངས་ཁྱོད་ནི་ཡུན་རིང་པོར་སྟོངས་པར་གྱུར་པའི་ས་ཡི་འོག་སྟེ། དུར་དུ་སྦས་པའི་མི་དེ་དག་དང་མཉམ་དུ་སྡོད་པར་འཇུག་ཅིང་། ཁྱོད་ནི་གསོན་པོའི་གནས་སུ་མངོན་པར་མི་འགྱུར། ཡིན་ནའང་ངས་གསོན་པོའི་གནས་ལ་མཛེས་སྡུག་བསྣན་པར་བྱའོ། །
EZE 26:21 ཡང་ངས་ཁྱོད་ལ་འཇིགས་སུ་རུང་བའི་ཆག་སྒོ་འབྱུང་དུ་བཅུག་སྟེ། ཁྱོད་ནི་ཡང་བསྐྱར་གནས་པར་མི་འགྱུར་ལ། མི་ཡིས་ཁྱོད་བཙལ་ནའང་ནམ་ཡང་བཙལ་ནས་མི་རྙེད་དོ་ཞེས་གཙོ་བོ་ཡ་ཝཱེས་གསུངས་སོ། །
EZE 27:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 27:2 ཀྱེ་མིའི་བུ། ཁྱོད་ཀྱིས་ཐཱར་གྱི་ཆེད་དུ་སྐྱོ་གླུ་རྩོམས་ཤིག་དང་།
EZE 27:3 གྲུ་ཁར་སྡོད་ཅིང་མཚོ་འགྲམ་གྱི་ཡུལ་ཁམས་ཀུན་དང་ཚོང་རྒྱག་པའི་ཐཱར་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཐཱར། ཁྱོད་ཀྱིས་སྔོན་ཆད་ང་ནི་ཁྱོན་ནས་ཡིད་དུ་འོང་བ་ཡིན་ཞེས་ཟེར་ཞིང་།
EZE 27:4 ཁྱོད་ཀྱི་ས་མཚམས་ནི་རྒྱ་མཚོ་རྣམས་ཀྱི་དབུས་སུ་ཆགས་ཏེ། ཁྱོད་འཛུགས་སྐྲུན་བྱེད་མཁན་གྱིས་ཁྱོད་ནི་ཁྱོན་ནས་ཡིད་དུ་འོང་བར་མཛད་ཅིང་།
EZE 27:5 དེ་དག་གིས་སེ་ནིར་གྱི་གསོམ་ཤིང་གིས་ཁྱོད་ཀྱི་ཤིང་ལེབ་ཡོངས་དང་། ལེ་པཱ་ནོན་གྱི་ཐང་ཤིང་གིས་ཁྱོད་ཀྱི་གྲུ་གཟིངས་ཀྱི་དར་ཤིང་བཟོས་པ་དང་།
EZE 27:6 པཱ་ཤན་གྱི་བེ་ཤིང་གིས་ཁྱོད་ཀྱི་གྲུ་སྐྱ་བཟོས་ཤིང་། བ་སོས་ཕྲ་བརྒྱན་ཡོད་པའི་ཀི་ཐིམ་མཚོ་འགྲམ་གྱི་ཤུག་ཤིང་གིས་ཁྱོད་ཀྱི་གྲུ་གཟིངས་ནང་གི་ཤིང་ལེབ་བྱས།
EZE 27:7 ཁྱོད་ཀྱི་རླུང་གཡོར་ནི་ཨེ་ཅིབ་ཡུལ་གྱི་ཚེམ་དྲུབ་བྱས་པའི་སོ་རས་སྲབ་བུ་ཡིས་བཟོས་ཤིང་། དེ་ནི་ཁྱོད་ཀྱི་དར་ཆ་རུ་བྱས་ཆོག་སྟེ། ཁྱོད་ཀྱི་གྲུ་ཕྱར་ནི་ཨི་ལི་ཤཱའི་མཚོ་འགྲམ་གྱི་རས་མཐིང་ག་དང་རྒྱ་སྨུག་གིས་བཟོས་པ་ཡིན།
EZE 27:8 ཚི་ཏུན་པ་དང་ཨར་བད་པའི་མི་ཡིས་ཁྱོད་ཀྱི་གྲུ་གཏོང་བ་ཡིན། ཀྱེ་ཐཱར། ཁྱོད་རྣམས་ཁྲོད་ཀྱི་ལག་རྩལ་པ་རྣམས་ཁྱོད་ཀྱི་དེད་དཔོན་བྱས་ཤིང་།
EZE 27:9 གེ་བལ་གྱི་འགོ་དཔོན་དང་བཟོ་བ་འཇོན་པོ་རྣམས་ཀྱིས་ཁྱོད་ཀྱི་དྲུང་དུ་སེར་ཁ་ཉམས་གསོ་བྱེད་ཅིང་། རྒྱ་མཚོའི་གྲུ་དང་གྲུ་པ་ཐམས་ཅད་ཀྱིས་ཁྱོད་ཀྱི་རྩར་ཁྱོད་དང་ཚོང་རྒྱག་གིན་ཡོད།
EZE 27:10 ཏ་ཟིག་པ་དང་ལུ༌ཏི་པ། ཕུ༌ཏཱ་པ་རྣམས་ཁྱོད་ཀྱི་དམག་དཔུང་ནང་དུ་དམག་བྱེད་ཅིང་། དེ་དག་གིས་ཁྱོད་ཀྱི་དྲུང་དུ་ཕུབ་དང་རྨོག་རྣམས་བཀལ་ནས་ཁྱོད་ཀྱི་གཟི་བརྗིད་མངོན་པའོ། །
EZE 27:11 ཨར་བད་པ་ནི་ཁྱོད་ཀྱི་དམག་དཔུང་དང་བཅས་ཁྱོད་ཀྱི་ལྕགས་རིའི་སྟེང་དུ་ཡོད་དེ། ཁྱོད་ཀྱི་ལྕོག་མཁར་སྟེང་དུ་དཔའ་བོ་རྣམས་ཡོད་པ་དང་། ཁྱོད་ཀྱི་ཕྱོགས་བཞིའི་ལྕགས་རིའི་སྟེང་དུ་ཁོ་ཚོས་རང་གི་ཕུབ་རྣམས་བཀལ་ནས། ཁྱོད་ནི་ཁྱོན་ནས་ཡིད་དུ་འོང་བར་གྱུར་ཏོ། །
EZE 27:12 ཐཱར་ཞིས་པ་རྣམས་ཁྱོད་ཀྱི་ཕུན་སུམ་ཚོགས་པའི་ནོར་རྫས་སྣ་ཚོགས་ཀྱི་དབང་གིས་ཁྱོད་ཀྱི་ཚོང་གྲོགས་བྱས་ཏེ། ཁོ་ཚོས་དངུལ་དང་ལྕགས། གཤའ་དཀར། ཞ་ཉེ་བཅས་ཀྱིས་ཁྱོད་དང་ཚོང་རྒྱག་པ་དང་།
EZE 27:13 ཡཱ་ཝན་པ་དང་ཐུ་བཱལ་པ། མེ་ཤེག་པ་བཅས་ཀྱིས་ཀྱང་ཁྱོད་དང་ཚོང་རྒྱག་པ་སྟེ། ཁོ་ཚོས་བྲན་གཡོག་དང་ལི་ཆས་ཀྱིས་ཁྱོད་དང་ཚོང་རྒྱག་པ་ཡིན།
EZE 27:14 པེད་ཐོ་གར་མཱའི་མི་རྣམས་ཀྱིས་རྟ་དང་དམག་རྟ། དྲེལ་བཅས་ཀྱིས་ཁྱོད་དང་ཚོང་རྒྱག་པ་ཡིན།
EZE 27:15 དི་དན་པ་རྣམས་ཀྱང་ཁྱོད་ཀྱི་ཚོང་གྲོགས་ཡིན་པ་དང་། མཚོ་འགྲམ་གྱི་ཡུལ་མང་པོ་ཁྱོད་ཀྱི་ཚོང་ར་ཡིན་ལ། ཁོ་ཚོས་བ་སོ་དང་ཤིང་ནག་གིས་ཁྱོད་ལ་དངུལ་སྤྲོད་པ་ཡིན།
EZE 27:16 ཁྱོད་ལ་ཐོན་རྫས་ཧ་ཅང་མང་བས་ན་ཨ་རམ་པ་ནི་ཁྱོད་ཀྱི་ཚོང་གྲོགས་བྱས་ཏེ། ཁོ་ཚོས་གཡུ་དང་རས་རྒྱ་སྨུག ཚེམ་དྲུབ། སོ་རས་སྲབ་བུ། བྱུ་རུ། པད་མ་རཱ་ག་བཅས་ཀྱིས་ཁྱོད་དང་ཚོང་རྒྱག་པ་ཡིན།
EZE 27:17 ཡ་ཧུ་དཱ་དང་ཡེས་ར་ཨེལ་ཡུལ་ཁམས་ཀྱང་ཁྱོད་ཀྱི་ཚོང་གྲོགས་ཡིན་ལ། དེ་དག་གིས་མིན་ནིད་ཀྱི་གྲོ་དང་བག་ལེབ། སྦྲང་རྩི། སྣུམ། སྤོས་དཀར་བཅས་ཀྱིས་ཁྱོད་དང་ཚོང་རྒྱག་པའོ། །
EZE 27:18 ཡང་ཁྱོད་ལ་ཐོན་རྫས་ཧ་ཅང་མང་བ་དང་ཕུན་སུམ་ཚོགས་པའི་ནོར་རྫས་སྣ་ཚོགས་ཀྱི་དབང་གིས། དཱ་མེ་སེག་པས་ཧེལ་བོན་གྱི་རྒུན་ཆང་དང་། བལ་དཀར་པོས་ཁྱོད་དང་ཚོང་རྒྱག་པ་ཡིན།
EZE 27:19 བེ་དན་པས་བེ་སཱ་ནས་ཐོན་པའི་རྒུན་ཆང་གིས་ཁྱོད་དང་ཚོང་རྒྱག་ཅིང་། དེ་དག་གིས་ལྕགས་བཙོ་མ་དང་ཁ་ཚི་ཡཱ། ཤུ་དག་བཅས་ཀྱིས་ཁྱོད་དང་ཚོང་རྒྱག་པའོ། །
EZE 27:20 ཡང་དི་དན་པས་རྟ་སྒ་དང་ས་གདན་གྱིས་ཁྱོད་དང་ཚོང་རྒྱག་ཅིང་།
EZE 27:21 ཨ་རབ་པ་དང་ཀེ༌དཱར་གྱི་འགོ་དཔོན་ཐམས་ཅད་ནི་ཁྱོད་ཀྱི་ཚོང་གྲོགས་ཡིན་ལ། དེ་དག་གིས་ལུ་གུ་དང་ལུག་ཐུག ར་ཐུག་བཅས་ཀྱིས་ཁྱོད་དང་ཚོང་རྒྱག་པ་ཡིན།
EZE 27:22 ཤེ་བཱ་དང་རཱ་ཨེ་མཱའི་ཚོང་པ་རྣམས་ཀྱིས་ཁྱོད་དང་ཚོང་རྒྱག་ཅིང་། དེ་དག་གིས་ཕུལ་བྱུང་གི་བསུང་རྫས་སྣ་ཚོགས་དང་རིན་པོ་ཆེའི་རིགས། གསེར་བཅས་ཀྱིས་ཁྱོད་དང་ཚོང་རྒྱག་པའོ། །
EZE 27:23 ཧཱ་རན་པ་དང་ཀན་ནེ་པ། ཨེ་དེན་པ། ཤེ་བཱ་བཅས་ཀྱི་ཚོང་པ་དང་། ཨ་སུར་པ་དང་ཀིལ་མད་པ་བཅས་ཀྱིས་ཁྱོད་དང་ཚོང་རྒྱག་ཅིང་།
EZE 27:24 དེ་དག་གིས་ཚོང་རྫས་ཡག་པོ་རྣམས་ཚེམ་དྲུབ་ཅན་གྱི་རས་སྔོན་པོས་བཏུམས་པ་དང་། མཛེས་ཤིང་ཡིད་དུ་འོང་བའི་གྱོན་གོས་རྣམས་ཐང་ཤིང་གི་སྒམ་ནང་དུ་བཅུག་ནས། ཐག་པས་དམ་པོར་བསྡམས་ཏེ་ཁྱོད་ཀྱི་ཚོང་ར་ནས་ཁྱོད་དང་ཚོང་རྒྱག་པ་ཡིན།
EZE 27:25 ཐཱར་ཞིས་ཀྱི་གྲུ་གཟིངས་རྣམས་ཀྱིས་ཁྱོད་ཀྱི་ཚོང་ཟོག་སྐྱེལ་འདྲེན་བྱེད་ཅིང་། ཁྱོད་ནི་རྒྱ་མཚོའི་དབུས་སུ་དངོས་ཟོག་བྱུར་བུར་གང་བས་རབ་ཏུ་ལྕིའོ། །
EZE 27:26 གྲུ་གཏོང་མཁན་གྱིས་ཁྱོད་ནི་རྒྱ་མཚོའི་གཏིང་སར་བཏང་སྟེ། ཤར་རླུང་གིས་ཁྱོད་རྒྱ་མཚོའི་དབུས་སུ་གཏོར་བར་བྱའོ། །
EZE 27:27 ཁྱོད་ཀྱི་རྒྱུ་ནོར་དང་ཚོང་ཟོག ཚོང་རྫས། གྲུ་པ། དེད་དཔོན། སེར་ཁ་ཉམས་གསོ་བྱེད་མཁན། ཁྱོད་དང་ཚོང་ལས་གཉེར་མཁན་བཅས་དང་། ཁྱོད་ཀྱི་དྲུང་དུ་ཡོད་པའི་དམག་མི་ཡོངས་དང་ད་དུང་ཁྱོད་ཀྱི་དྲུང་དུ་འཛོམས་པའི་མི་ཚོགས་ཚང་མ་ལྷན་ཅིག་ཏུ། ཁྱོད་འགྱེལ་བའི་ཉིན་མོར་ཐམས་ཅད་རྒྱ་མཚོའི་ནང་དུ་ནུབ་པར་འགྱུར་ཞིང་།
EZE 27:28 ཁྱོད་ཀྱི་དེད་དཔོན་རྣམས་ཀྱི་འབོད་སྐད་ཀྱིས་མཐའ་མཚམས་ཀྱང་འདར་བར་འགྱུར།
EZE 27:29 དེ་ནས་གྲུ་གཏོང་མཁན་དང་གྲུ་པ། རྒྱ་མཚོའི་དེད་དཔོན་བཅས་ཐམས་ཅད་རང་གི་གྲུ་ལས་བབས་ཏེ་སྐམ་སར་འགྲེང་ནས།
EZE 27:30 དེ་དག་གིས་ཁྱོད་ཀྱི་ཆེད་དུ་ངུ་འབོད་བྱེད་ཅིང་། ས་རྡུལ་རང་གི་མགོ་ལ་གཏོར་ནས་ཐལ་བའི་ནང་དུ་འགྲེ་ལྡོག་རྒྱག་པར་འགྱུར།
EZE 27:31 དེ་དག་གིས་ཁྱོད་ཀྱི་རྐྱེན་གྱིས་རང་གི་སྐྲ་གཞར་ཞིང་། རྐེད་པར་རྩིད་རས་བཅིངས་ནས་ཁྱོད་ཀྱི་ཆེད་དུ་སེམས་སྡུག་སྟེ་ངུ་བ་དང་ཡིད་ཤིན་ཏུ་སྐྱོ་བར་འགྱུར་རོ། །
EZE 27:32 དེ་དག་གིས་ཁྱོད་ལ་མྱ་ངན་ཞུ་དུས། ཁྱོད་ཀྱི་ཆེད་དུ་སྐྱོ་གླུ་ཞིག་ལེན་ཞིང་ན་རེ། གྲོང་ཁྱེར་གང་ཞིག་ནི་རྒྱ་མཚོའི་ནང་དུ་ནུབ་པའི་ཐཱར་དང་འདྲ་བ་ཡིན་ནམ།
EZE 27:33 ཁྱོད་ཀྱི་ཚོང་ཟོག་རྒྱ་མཚོ་ལས་སྐྱེལ་འདྲེན་བྱེད་དུས་སུ། སྔོན་ཆད་ཡུལ་ཁམས་མང་པོའི་མི་རྣམས་ཡིད་ཚིམ་དུ་བཅུག་ཅིང་། ཁྱོད་ཀྱི་ཕུན་སུམ་ཚོགས་པའི་ནོར་རྫས་དང་ཚོང་ཟོག་གི་དབང་གིས། ཁྱོད་ཀྱིས་ས་གཞིའི་རྒྱལ་པོ་རྣམས་ནི་འབྱོར་ཕྱུག་ལྡན་པར་བྱས་སོ། །
EZE 27:34 འོན་ཀྱང་ད་ལྟ་ཁྱོད་ནི་རྒྱ་མཚོའི་གཏིང་ཟབ་སར། རྒྱ་མཚོས་ཁྱོད་རང་གཏོར་བ་དང་། ཁྱོད་ཀྱི་ཚོང་ཟོག་དང་ཁྱོད་ཀྱི་དྲུང་དུ་འཛོམས་པའི་མི་ཐམས་ཅད་ཀྱང་ནུབ་པར་གྱུར་ཏོ། །
EZE 27:35 མཚོ་འགྲམ་གྱི་མི་རྣམས་ནི་ཁྱོད་ཀྱི་རྐྱེན་གྱིས་འཇིགས་སྐྲག་སྐྱེ་ཞིང་། དེ་དག་གི་རྒྱལ་པོ་རྣམས་ནི་ཤིན་ཏུ་འཇིགས་ཏེ་ངོ་མདོག་ཀྱང་འགྱུར་བའོ། །
EZE 27:36 མི་རིགས་སོ་སོའི་ཚོང་པ་རྣམས་ཀྱིས་ཁྱོད་ལ་འཕྱ་ཞིང་། ཁྱོད་ལ་གནོད་འཚེ་འཇིགས་སུ་རུང་བ་ཐེབས་པར་འགྱུར་བ་དང་། དེ་ནས་ཁྱོད་ནི་ནམ་ཡང་གནས་པར་མི་འགྱུར་ཞེས་པའོ་ཞེས་གསུངས་སོ། །
EZE 28:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 28:2 ཀྱེ་མིའི་བུ། ཁྱོད་ཀྱིས་ཐཱར་གྱི་རྒྱལ་པོ་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཁྱོད་ཀྱི་སེམས་སུ་ང་རྒྱལ་སྐྱེས་ནས་ན་རེ། ང་ནི་ལྷ་ཡིན་ཏེ། ང་ནི་རྒྱ་མཚོའི་དབུས་སུ་ལྷ་ཡི་བཞུགས་ཁྲིར་བཞུགས་ཡོད་དོ་ཞེས་སྨྲ་ཞིང་། དོན་དམ་དུ་ཁྱོད་ནི་མི་ཞིག་ཡིན་པ་ལས་ལྷ་ནི་མ་ཡིན། ཡིན་ནའང་ཁྱོད་ཀྱི་སེམས་སུ་རང་ཉིད་ནི་ལྷ་ཡིན་པར་འདོད་དོ། །
EZE 28:3 ལྟོས་དང་། ཁྱོད་ནི་དཱ་ནེ་ཨེལ་ལས་ཀྱང་ལྷག་པར་མཁས་པས། ཁྱོད་ལ་སྦ་ཐུབ་པའི་གསང་བ་གང་ཡང་མེད།
EZE 28:4 ཁྱོད་ཀྱིས་རང་གི་ཤེས་རབ་དང་བློ་གྲོས་ལ་བརྟེན་ནས། རང་གི་ཆེད་དུ་རྒྱུ་འབྱོར་བ་རྙེད་པ་དང་། རྙེད་པའི་གསེར་དང་དངུལ་རྣམས་རང་གི་བང་མཛོད་དུ་བཞག་གོ །
EZE 28:5 ཁྱོད་ཀྱིས་རང་གི་ཚོང་ལས་ཐད་ཀྱི་བློ་གྲོས་ཆེན་པོར་བརྟེན་ནས་རང་གི་རྒྱུ་ནོར་འཕེལ་བར་བྱས་ཤིང་། ཡང་རང་གི་རྒྱུ་འབྱོར་བའི་དབང་གིས་སེམས་སུ་ང་རྒྱལ་སྐྱེས་པས།
EZE 28:6 གཙོ་བོ་ཡ་ཝཱེས་འདི་སྐད་དུ། ཁྱོད་ཀྱི་སེམས་སུ་རང་ཉིད་ལྷ་ཡིན་པར་འདོད་པས།
EZE 28:7 ལྟོས་དང་། ངས་ཕྱི་ཕྱོགས་པ་སྟེ། ཡུལ་ཁམས་ཀུན་ནས་ཆེས་གདུག་རྩུབ་ཅན་དེ་ཁྱོད་ལ་རྒོལ་དུ་འོང་བར་བྱ་ཞིང་། དེ་དག་གིས་རལ་གྲི་བཏོན་ནས་ཁྱོད་ཀྱི་བློ་གྲོས་ལ་བརྟེན་ནས་ཐོབ་པའི་དངོས་པོ་ཡིད་དུ་འོང་བ་དག་ལ་རྒོལ་བར་འགྱུར་ཞིང་། ཁྱོད་ཀྱི་གཟི་བརྗིད་དེ་བཙོག་པར་བཟོའོ། །
EZE 28:8 དེ་དག་གིས་ཁྱོད་ས་དོང་དུ་གཡུགས་ཏེ། ཁྱོད་བསད་ནས་རྒྱ་མཚོའི་དབུས་སུ་འཆི་བར་འགྱུར།
EZE 28:9 ཁྱོད་རང་གསོད་མཁན་གྱི་མདུན་དུ་ཁྱོད་ཀྱིས་ད་དུང་ང་ནི་ལྷ་ཡིན་ཞེས་སྨྲ་ནུས་སམ། ཁྱོད་ལ་གྲིས་སྣུན་མཁན་གྱི་ལག་ཏུ་ཁྱོད་ནི་མི་ཡིན་པ་ལས་ལྷ་མ་ཡིན་ནོ། །
EZE 28:10 ཁྱོད་ནི་མཚན་སྐྱི་མ་བཅད་པའི་མི་བཞིན་དུ་ཕྱི་ཕྱོགས་པའི་ལག་ཏུ་འཆི་བར་འགྱུར་ཏེ། གང་ལ་ཞེ་ན། འདི་ནི་ངས་སྔོན་ཆད་ནས་སྨྲས་པ་ཡིན་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 28:11 དཀོན་མཆོག་ཡ་ཝཱེའི་བཀའ་ནི་ཡང་བསྐྱར་ང་ལ་བྱུང་ནས་འདི་སྐད་དུ།
EZE 28:12 ཀྱེ་མིའི་བུ། ཁྱོད་ཀྱིས་ཐཱར་གྱི་རྒྱལ་པོའི་ཆེད་དུ་སྐྱོ་གླུ་ཞིག་རྩོམས་ཤིག་དང་། དེ་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཁྱོད་ནི་ཆ་ཡོངས་སུ་རྫོགས་པའི་མིག་དཔེ་ཡིན་ཞིང་། ཀུན་ནས་ཤེས་རབ་ལྡན་པ་དང་། ཁྱོན་ནས་ཡིད་དུ་འོང་བ་ཡིན།
EZE 28:13 སྔར་ཁྱོད་རང་དཀོན་མཆོག་གི་ཨེ་དེན་ལྡུམ་རར་ཡོད་དུས། པད་མ་རཱ་ག་དང་སྤྲིན་རྡོ། རྡོ་རྗེ་ཕ་ལམ། བཻཌཱུརྱ་ལྗང་སེར། གཟི། གཡང་ཊི་སྔོན་པོ། ཨིནྡྲ་ནཱི་ལ། གཡུ། མ་རྒད་བཅས་རིན་པོ་ཆེ་སྣ་ཚོགས་ནི་ཁྱོད་ཀྱི་གྱོན་གོས་ཡིན་ལ། རིན་པོ་ཆེ་དེ་དག་ནི་གསེར་གྱི་འབུར་ཀོང་ལ་བཏབ་པ་དང་། དེ་ཐམས་ཅད་ནི་ཁྱོད་རང་བཀོད་པའི་ཉིན་མོར་གྲ་སྒྲིག་ཚགས་སུ་ཆུད་པའོ། །
EZE 28:14 ཁྱོད་ནི་བཞུགས་ཁྲི་སྲུང་མཁན་དང་སྣུམ་གྱིས་བྱུགས་པའི་ཀེ་རུབ་ཡིན་ཞིང་། དཀོན་མཆོག་གི་རི་དམ་པར་ངས་ཁྱོད་བསྐོས་པས། ཁྱོད་ནི་འོད་ཟེར་མེ་བཞིན་འཕྲོ་བའི་རིན་པོ་ཆེའི་དབུས་སུ་སྐྱོད་པ་དང་།
EZE 28:15 ཁྱོད་རང་བཀོད་པའི་ཉིན་མོ་ནས་བཟུང་ཁྱོད་ཀྱི་ནང་དུ་སྡིག་པ་མ་བྱུང་བར་དུ། ཁྱོད་ཀྱི་སྤྱོད་པ་ཐམས་ཅད་ལ་སྐྱོན་བརྗོད་རྒྱུ་ཅི་ཡང་མེད་དེ།
EZE 28:16 ཁྱོད་ཀྱི་ཚོང་དར་ཞིང་རྒྱས་པའི་རྐྱེན་གྱིས་ཁྱོད་ཀྱི་ནང་དུ་དོན་གདུག་རྩུབ་ཅན་གྱིས་བཀང་སྟེ། ཁྱོད་ཀྱིས་ཀྱང་སྡིག་པ་བྱས་པས། ངས་ཀྱང་ཁྱོད་ནི་མི་གཙང་བའི་རྫས་སུ་བརྩིས་ནས་དཀོན་མཆོག་གི་རི་བོ་ནས་དོར་བ་ཡིན། ཀྱེ་བཞུགས་ཁྲི་སྲུང་མཁན་གྱི་ཀེ་རུབ་ལགས། ངས་ཁྱོད་ནི་འོད་ཟེར་མེ་བཞིན་འཕྲོ་བའི་རིན་པོ་ཆེའི་དབུས་ནས་མེད་པར་བྱའོ། །
EZE 28:17 ཁྱོད་ནི་རང་ཉིད་བྱད་གཟུགས་ལེགས་པས་ང་རྒྱལ་སྐྱེས་ཤིང་། ཡང་ཁྱོད་ཀྱི་མཛེས་སྡུག་གིས་ཁྱོད་ཀྱི་ཤེས་རབ་བརླགས་པས་ངས་ཁྱོད་ནི་ས་གཞི་རུ་དོར་ནས། རྒྱལ་པོ་རྣམས་ཀྱིས་མཐོང་བའི་ཆེད་དུ་དེ་དག་གི་མདུན་དུ་བཞག་པ་ཡིན།
EZE 28:18 ཁྱོད་ལ་སྡིག་ཉེས་མང་ཞིང་། ཚོང་དོན་ཕྱོགས་ཀྱི་སྡིག་པས་ཁྱོད་ཀྱི་གནས་དམ་པ་བཙོག་པར་བཟོས་པས། ངས་ཁྱོད་ཀྱི་དཀྱིལ་ནས་མེ་ཞིག་བཏོན་ཏེ། མེ་དེས་ཁྱོད་བསྲེག་པར་འགྱུར་ལ། ཁྱོད་ལ་ལྟད་མོ་ལྟ་མཁན་ཚང་མའི་མདུན་དུ་ངས་ཁྱོད་ས་སྟེང་གི་ཐལ་བ་རུ་བསྒྱུར་བར་བྱ།
EZE 28:19 མི་རིགས་སོ་སོ་ལས་ཁྱོད་ངོ་ཤེས་མཁན་རྣམས་ཁྱོད་ཀྱི་དབང་གིས་འཇིགས་ཤིང་སྐྲག་པ་དང་། ཁྱོད་ལ་འཇིགས་སུ་རུང་བའི་གནོད་འཚེ་ཐེབས་པར་འགྱུར་ལ། དེ་ནས་ཁྱོད་ནི་ནམ་ཡང་གནས་པར་མི་འགྱུར་གསུངས་ཞེས་པའོ་ཞེས་གསུངས་སོ། །
EZE 28:20 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 28:21 ཀྱེ་མིའི་བུ། ཁྱོད་ཚི་ཏུན་གྱི་ཕྱོགས་སུ་འཁོར་ནས་དེ་ལ་རྒོལ་བའི་ལུང་སྟོན་ཅིག
EZE 28:22 ཁྱོད་ཀྱིས་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཚི་ཏུན། ལྟོས་དང་། ངས་ཁྱོད་ནི་དགྲ་རུ་འཛིན་ཞིང་། ཁྱོད་ཀྱི་ནང་ནས་ང་ལ་གཟི་བརྗིད་འཐོབ་པར་འགྱུར་ལ། ངས་དེའི་སྟེང་དུ་ཉེས་ཆད་གཅོད་ཅིང་། ང་རང་དམ་པ་ཡིན་པ་མངོན་པའི་ཚེ་མི་ཡིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 28:23 ངས་ཚི་ཏུན་གྱི་ནང་དུ་རིམས་ནད་གཏོང་སྟེ། དེའི་ལམ་སྲང་རྣམས་སུ་ཁྲག་བཞུར་བར་བྱའོ། །རལ་གྲིས་ཕྱོགས་ཀུན་ནས་དེ་ལ་རྒོལ་ཞིང་། གསོད་གཅོད་ཐེབས་པའི་མི་རྣམས་གྲོང་ཁྱེར་ནང་དུ་འགྱེལ་བར་བྱས་ན་མི་ཡིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 28:24 དེ་ནས་ཕྱོགས་བཞིའི་ཡེས་ར་ཨེལ་གྱི་ཁྱིམ་རྒྱུད་ལ་སྡང་བའི་མི་ཐམས་ཅད་ནི། ཁོ་ཚོའི་ཕྱོགས་སུ་མི་ལ་འཛེར་བའི་ཚེར་མ་དང་། མི་སྡུག་ལ་སྦྱོར་བའི་གཟེ་མ་ར་མགོ་མི་བྱའོ། །དེ་ནས་མི་ཡིས་བདག་ནི་གཙོ་བོ་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 28:25 གཙོ་བོ་ཡ་ཝཱེས་འདི་སྐད་དུ། ངས་ཡེས་ར་ཨེལ་གྱི་ཁྱིམ་རྒྱུད་ནི་མི་རིགས་སོ་སོའི་ནང་སྟེ། དེ་རྣམས་གང་ས་གང་དུ་ཁ་ཐོར་དུ་སོང་བ་ལས་བསྡུ་བའི་ཚེ་ན། ངས་དེ་དག་གི་སྟེང་དུ་མི་ཀུན་གྱི་མིག་མདུན་དུ་རང་ཉིད་དམ་པ་རུ་མངོན་པར་འགྱུར་ལ། ཡེས་ར་ཨེལ་གྱི་ཁྱིམ་རྒྱུད་ནི་རང་གི་ཡུལ་ཏེ། ངས་རང་གི་བྲན་པོ་ཡ་ཀོབ་ལ་གནང་བའི་ཡུལ་དུ་གནས་པར་འགྱུར།
EZE 28:26 ངས་དེ་དག་ལ་སྡང་བའི་ཕྱོགས་བཞིའི་མི་ཀུན་ལ་ཉེས་ཆད་བཅད་རྗེས་དེ་དག་བདེ་བར་གནས་ཤིང་། ཁྱིམ་གཞི་དང་རྒུན་འབྲུམ་ར་བ་བཙུགས་ནས། དེ་དག་བདེ་བར་གནས་པ་དང་། དེ་ནས་ཁོ་རྣམས་ཀྱིས་བདག་ནི་ཡ་ཝཱེ་སྟེ་ཁོ་ཚོའི་དཀོན་མཆོག་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 29:1 དེ་ཡང་ལོ་བཅུ་པའི་ཟླ་བཅུ་པ་ཡི་ཚེས་བཅུ་གཉིས་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 29:2 ཀྱེ་མིའི་བུ། ཁྱོད་ཨེ་ཅིབ་ཀྱི་རྒྱལ་པོ་ཕཱར་ཨོལ་ཕྱོགས་སུ་འཁོར་ནས་དེ་དང་ཨེ་ཅིབ་ཡོངས་ལ་རྒོལ་བའི་ལུང་སྟོན་ཅིག
EZE 29:3 ཁྱོད་ཀྱིས་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཨེ་ཅིབ་ཀྱི་རྒྱལ་པོ་ཕཱར་ཨོལ། ལྟོས་དང་། ངས་ཁྱོད་ནི་དགྲ་རུ་འཛིན་ཏེ། རང་གི་གཙང་པོ་རྣམས་ཀྱི་ནང་དུ་ཉལ་བའི་ཆུ་སྲིན་ཆེན་པོ་ཁྱོད་ན་རེ། གཙང་པོ་འདི་ནི་ངའི་ཡིན་ཞིང་ང་རང་གིས་བཀོད་དོ་ཞེས་སྨྲས།
EZE 29:4 ཡིན་ནའང་ཡ་ཝཱེས་ཁྱོད་ཀྱི་འགྲམ་པ་གཉིས་ལ་ལྕགས་ཀྱུ་བརྒྱབ་སྟེ། ཁྱོད་ཀྱི་གཙང་པོ་རྣམས་ཀྱི་ཉ་ཐམས་ཅད་ཁྱོད་ཀྱི་ཉ་ཁྲབ་ལ་འབྱར་དུ་འཇུག་ཅིང་། ངས་ཁྱོད་དང་ཁྱོད་ཀྱི་ཉ་ཁྲབ་ལ་འབྱར་བའི་ཉ་ཐམས་ཅད་ཁྱོད་ཀྱི་གཙང་པོ་ལས་ཡར་འབྱིན་པར་བྱའོ། །
EZE 29:5 ངས་ཁྱོད་ནི་རང་གི་གཙང་པོ་རྣམས་ཀྱི་ཉ་རྣམས་དང་བཅས་དབེན་སྟོང་དུ་འདོར་བར་བྱ་སྟེ། ཁྱོད་ནི་ས་སྟོང་དུ་འགྱེལ་ཞིང་བསྡུ་མཁན་མེད་ལ་ས་འོག་ཏུ་འཇུག་མཁན་ཡང་མེད་དོ། །ངས་ཁྱོད་ནི་ས་ཡི་གཅན་གཟན་དང་ནམ་མཁའི་བྱ་ཡི་ཁ་ཟས་སུ་སྤྲད་ཟིན།
EZE 29:6 དེ་ནས་ཨེ་ཅིབ་ཀྱི་མི་ཐམས་ཅད་ཀྱིས་བདག་ནི་ཡ་ཝཱེ་ཡིན་པ་རྟོགས་པར་འགྱུར། གང་ལ་ཞེ་ན། ཁྱོད་ནི་ཡེས་ར་ཨེལ་ཁྱིམ་རྒྱུད་ཀྱི་འདམ་རྩྭའི་འཁར་བ་རུ་གྱུར་པས་སོ། །
EZE 29:7 དེ་དག་གིས་ལག་པས་ཁྱོད་འཛིན་དུས་ཁྱོད་ནི་ཆག་ནས་གས་ཏེ་ཁོ་ཚོའི་ཕྲག་པ་ཡོད་ཚད་རྨས་པ་དང་། ཁོ་ཚོ་ཁྱོད་ལ་བརྟེན་དུས་ཁྱོད་ནི་ཆག་སྟེ་ཁོ་ཚོའི་རྐེད་ཚིགས་ཡོངས་རྫོགས་འཁྲོག་ཏུ་བཅུག་པས།
EZE 29:8 གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་རལ་གྲིར་ཁྱོད་ལ་རྒོལ་བར་བྱ་སྟེ། མི་ཕྱུགས་ཐམས་ཅད་ཁྱོད་ཀྱི་ནང་ནས་ཚར་གཅོད་ཅིང་།
EZE 29:9 ཨེ་ཅིབ་ཡུལ་ནི་སྟོངས་ཤིང་འདོར་བར་འགྱུར་ལ། དེ་ནས་མི་ཡིས་བདག་ནི་ཡ་ཝཱེ་ཡིན་པ་རྟོགས་པར་འགྱུར། གང་ལ་ཞེ་ན། སྔར་ཕཱར་ཨོལ་ན་རེ། གཙང་པོ་འདི་ནི་ངའི་ཡིན་ཞིང་ང་རང་གིས་བཀོད་དོ་ཞེས་སྨྲས་པས་ན།
EZE 29:10 ལྟོས་དང་། ངས་ཁྱོད་དང་ཁྱོད་ཀྱི་གཙང་པོ་རྣམས་དགྲ་རུ་འཛིན་ཞིང་། ཨེ་ཅིབ་ཀྱི་ཡུལ་ནི་མིག་དོལ་ནས་བཟུང་སྟེ། སེ་ནེ་དང་གུ་ཤའི་ས་མཚམས་ཀྱི་བར་དུ། ཡོངས་སུ་སྟོངས་ཤིང་འདོར་བར་འགྱུར་རོ། །
EZE 29:11 མི་ཡི་རྐང་པ་དེར་མི་རྒྱུ་ཞིང་། ཕྱུགས་ཀྱི་རྐང་པ་ཡང་དེར་མི་རྒྱུ་བར། མི་ལོ་བཞི་བཅུའི་རིང་ལ་མི་ནི་དེ་རུ་གནས་པར་མི་འགྱུར་རོ། །
EZE 29:12 ངས་ཨེ་ཅིབ་ཡུལ་ནི་ས་སྟོང་ནང་གི་ས་སྟོང་དུ་འགྱུར་བར་བྱས་ནས། མི་ལོ་བཞི་བཅུའི་རིང་ལ་དེའི་གྲོང་ཁྱེར་རྣམས་ནི་ཉེ་འཁོར་གྱི་གྲོང་ཁྱེར་ཞིག་རལ་ཅན་ནང་གི་ཞིག་རལ་དུ་འགྱུར་ལ། ངས་ཨེ་ཅིབ་པ་རྣམས་མི་རིགས་སོ་སོའི་ནང་དུ་གཏོར་ཞིང་། ཡུལ་སོ་སོ་རུ་གཏོར་བར་བྱའོ། །
EZE 29:13 གཙོ་བོ་ཡ་ཝཱེས་འདི་སྐད་དུ། ལོ་བཞི་བཅུ་འགོར་རྗེས། ཁ་ཐོར་དུ་ཕྱིན་པའི་ཨེ་ཅིབ་པ་རྣམས་ནི་ངས་མི་རིགས་སོ་སོའི་ནང་ནས་བསྡུ་བར་འགྱུར་ཞིང་།
EZE 29:14 ངས་བཙོན་དུ་ཁྲིད་པའི་ཨེ་ཅིབ་པ་རྣམས་ཕྱིར་ལོག་ཏུ་བཅུག་ནས་དེ་དག་རང་གི་ཕ་ཡུལ་ཕཱད་རུའུ་སི་བྱ་བ་ལ་ལོག་པར་འགྱུར་ཏེ། གནས་དེར་དེ་ནི་རྒྱལ་ཁམས་དམའ་མོ་ཞིག་ཏུ་འགྱུར་རོ། །
EZE 29:15 རྒྱལ་ཁམས་འདི་ནི་རྒྱལ་ཁམས་ཀུན་ལས་རབ་ཏུ་དམའ་བར་འགྱུར་ཞིང་། ཕྱིན་ཆད་རྒྱལ་ཁམས་གཞན་དག་གི་མགོ་རུ་འཆོར་མི་ནུས། གང་ལ་ཞེ་ན། དེས་སླར་ཡང་རྒྱལ་ཁམས་རྣམས་ལ་སྲིད་མི་འཛིན་པའི་ཆེད་དུ་ངས་དེ་ཉམས་པར་བྱའོ། །
EZE 29:16 དེ་ནས་ཨེ་ཅིབ་ནི་ཡེས་ར་ཨེལ་གྱི་རྒྱབ་རྟེན་དུ་མི་འགྱུར་ཞིང་། ཡེས་ར་ཨེལ་གྱི་ཁྱིམ་རྒྱུད་རྣམས་སོང་ནས་ཨེ་ཅིབ་པ་ལ་བརྟེན་པའི་ཚེ། དེ་དག་གིས་རང་གི་སྡིག་པ་དྲན་པར་འགྱུར་ལ། དེ་ནས་ཁོ་ཚོས་བདག་ནི་གཙོ་བོ་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 29:17 ཡང་ལོ་ཉེར་བདུན་པའི་ཟླ་དང་པོའི་ཚེས་གཅིག་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 29:18 ཀྱེ་མིའི་བུ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་རང་གི་དམག་དཔུང་ལ་དཀའ་སྡུག་མང་པོ་མྱོང་དུ་བཅུག་ནས་ཐཱར་ལ་དམག་བརྒྱབ་སྟེ། ཐ་ན་མི་རེ་རེ་མགོ་ཡི་སྐྲ་ལྷུང་སྟེ་སྤྱི་ཐེར་དུ་གྱུར་པ་དང་ཕྲག་པའང་བཤུས་མོད། འོན་ཀྱང་ཁོ་དང་ཁོའི་དམག་དཔུང་གིས་ཐཱར་ལ་བརྒྱབ་སྟེ་མྱངས་པའི་དཀའ་སྡུག་ལ་དེ་རུ་རྔན་པ་ཅི་ཡང་མ་ཐོབ།
EZE 29:19 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཨེ་ཅིབ་ཀྱི་ཡུལ་དེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ལ་སྦྱིན་པར་བྱ་སྟེ། དེས་ཨེ་ཅིབ་ཡུལ་གྱི་རྒྱུ་ནོར་དག་ཁྱེར་ནས་དེའི་ནང་གི་འབྱོར་བ་རྣམས་བཅོམ་ནོར་དུ་འཕྲོག་ཅིང་། དངོས་ཟོག་རྣམས་བཅོམ་ནས་ཁོའི་དམག་དཔུང་གི་གླ་ཆ་རུ་བྱའོ། །
EZE 29:20 བདག་གིས་ཨེ་ཅིབ་ཡུལ་ནི་དེ་ལ་དཀའ་སྡུག་མྱངས་པའི་རྔན་པ་རུ་སྦྱིན་པ་ཡིན། གང་ལ་ཞེ་ན། དེ་དག་གིས་ངའི་ཆེད་དུ་ཞབས་ཞུ་བསྒྲུབས་པས་སོ་ཞེས་གཙོ་བོ་ཡ་ཝཱེས་གསུངས།
EZE 29:21 ཉིན་དེར་སླེབས་ཚེ། ངས་ཡེས་ར་ཨེལ་ཁྱིམ་རྒྱུད་ཀྱི་རྭ་ཅོ་ སྐྱེ་རུ་འཇུག་ཅིང་། ངས་དེ་དག་གི་དཀྱིལ་དུ་ཨེ་ཟེ་ཀི་ཨེལ་ཁྱོད་ལ་ཁ་གྲགས་སུ་བཅུག་ན། དེ་དག་གིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 30:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 30:2 ཀྱེ་མིའི་བུ། ཁྱོད་ཀྱིས་ལུང་སྟོན་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་ངུ་འབོད་གྱིས་ཤིག ཉིན་མོ་དེ་ནི་སྐྱོ་བ་ལ།
EZE 30:3 གང་ལ་ཞེ་ན། ཉིན་དེ་ནི་སླེབས་ལ་ཉེ་སྟེ། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ། དེ་ནི་སྤྲིན་ནག་འཐིབས་པའི་ཉིན་དང་རྒྱལ་ཁམས་ཀུན་ལ་ཉེས་ཆད་གཅོད་པའི་དུས་ཡིན་ནོ། །
EZE 30:4 ཉིན་དེར་ཨེ་ཅིབ་ཀྱི་སྟེང་དུ་རལ་གྲི་འབབ་ཅིང་། སྲོག་ཤོར་བའི་མི་རྣམས་ཨེ་ཅིབ་ཡུལ་དུ་འགྱེལ་བའི་ཚེ་ན། གུ་ཤ་རུ་སྡུག་བསྔལ་འབྱུང་ཞིང་། ཨེ་ཅིབ་ཀྱི་རྒྱུ་ནོར་རྣམས་འཕྲོག་པར་འགྱུར་ལ། དེའི་རྨང་གཞི་བཤིག་པར་འགྱུར།
EZE 30:5 གུ་ཤ་པ་དང་ཕུ༌ཏཱ་པ་དང་། ལུ༌ཏི་པ་དང་། ཕྱི་ཕྱོགས་པའི་མི་ཐམས་ཅད་དང་། ཁུབ་པ་དང་། ཨེ་ཅིབ་དང་ཁ་ཆད་བཞག་པའི་མི་ཐམས་ཅད་ཨེ་ཅིབ་པ་དང་མཉམ་དུ་རལ་གྲིའི་འོག་ཏུ་འགྱེལ་བར་འགྱུར།
EZE 30:6 དཀོན་མཆོག་ཡ་ཝཱེས་འདི་སྐད་དུ། ཨེ་ཅིབ་ལ་རྒྱབ་སྐྱོར་བྱེད་མཁན་རྣམས་འགྱེལ་བར་འགྱུར་ལ། ཨེ་ཅིབ་ཀྱིས་ངོམ་བཟོ་སྟོན་པའི་སྟོབས་ཤུགས་ཉམས་ཤིང་། མིག་དོལ་ནས་སེ་ནེའི་བར་དུ་དེ་དག་རལ་གྲིའི་འོག་ཏུ་འགྱེལ་བར་འགྱུར་ཞེས་གཙོ་བོ་ཡ་ཝཱེས་གསུངས་པའོ། །
EZE 30:7 ཨེ་ཅིབ་ནི་ས་སྟོང་ནང་གི་ས་སྟོང་དུ་འགྱུར་ཞིང་། དེའི་གྲོང་ཁྱེར་རྣམས་ནི་ཉེ་འཁོར་གྱི་གྲོང་ཁྱེར་ཞིག་རལ་ཅན་ནང་གི་ཞིག་རལ་དུ་འགྱུར།
EZE 30:8 ངས་ཨེ་ཅིབ་ཡུལ་དུ་མེ་སྦར་བའི་དུས་སུ། ཨེ་ཅིབ་ལ་རོགས་བྱེད་མཁན་ཐམས་ཅད་མེད་པར་འགྱུར་ཞིང་། དུས་དེར་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 30:9 ཉིན་དེ་ལ། ཕོ་ཉ་རྣམས་ངའི་མདུན་ནས་གྲུ་ལ་བསྡད་དེ་འགྲོ་ཞིང་། བློ་བདེ་བག་ཕེབས་ངང་སྡོད་པའི་གུ་ཤ་པ་རྣམས་སྐྲག་ཏུ་འཇུག་པ་དང་། ཨེ་ཅིབ་ལ་གནོད་འཚེ་ཐེབས་པའི་ཉིན་ལ་ཁོ་ཚོར་སྡུག་བསྔལ་འབྱུང་བ་ཡིན། ལྟོས་དང་། དོན་དེ་སླེབས་ཟིན།
EZE 30:10 གཙོ་བོ་ཡ་ཝཱེས་འདི་སྐད་དུ། ངས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་པ་བརྒྱུད་དེ་ཨེ་ཅིབ་ཀྱི་རྒྱུ་ནོར་རྣམས་མེད་པར་བྱེད་ཅིང་།
EZE 30:11 དེ་དང་དེའི་རྗེས་འབྲང་པ་སྟེ། རྒྱལ་ཁམས་ཀུན་ལས་ཆེས་ཧམ་ཤེད་ཅན་ཡིན་པ་རྣམས་ཡུལ་འདི་མེད་པར་བྱེད་དུ་འདྲེན་ཞིང་། དེ་ཚོས་རལ་གྲི་བཏོན་ནས་ཨེ་ཅིབ་ཡུལ་ལ་རྒོལ་བར་འགྱུར་ལ། གང་སར་སྲོག་བཅད་པའི་བེམ་པོ་ཡིས་ཁེངས་པར་འགྱུར།
EZE 30:12 ཡང་ངས་གཙང་པོ་རྣམས་སྐམ་དུ་བཅུག་སྟེ། ཡུལ་འདི་ངན་པར་བཙོང་ཞིང་། ངས་ཕྱི་ཕྱོགས་པའི་ལག་པ་བརྒྱུད་དེ་ཡུལ་འདི་དང་འདིའི་ནང་དུ་ཡོད་པ་ཐམས་ཅད་སྟོངས་སུ་འཇུག་གོ་ཞེས་ང་ཡ་ཝཱེས་སྨྲས་པའོ། །
EZE 30:13 གཙོ་བོ་ཡ་ཝཱེས་འདི་སྐད་དུ། ངས་སྐུ་འདྲ་རྣམས་མེད་པར་བྱེད་ཅིང་། སྙིང་པོ་མེད་པའི་ལྷ་སྐུ་རྣམས་ནོབ་ནས་མེད་པར་བྱ་སྟེ། ཨེ་ཅིབ་ཡུལ་ནས་ཕྱིན་ཆད་རྒྱལ་པོ་གཅིག་ཀྱང་མི་འབྱུང་ལ། ངས་ཨེ་ཅིབ་ཡུལ་ལ་འཇིགས་སྐྲག་འོང་བར་བྱའོ། །
EZE 30:14 ངས་ཕཱད་རུའུ་སི་སྟོངས་སུ་འཇུག་ཅིང་། ཚོ་ཨན་དུ་མེ་སྦར་ནས་ནོ་ཡུལ་ལ་ཉེས་ཆད་གཅོད་དོ། །
EZE 30:15 ཡང་ཨེ་ཅིབ་ཀྱི་བཙན་རྫོང་ཡིན་པའི་སིན་གྱི་སྟེང་དུ་ངས་རང་གི་ཁོང་ཁྲོ་ཆེན་པོ་དེ་ལྡུག་པར་མ་ཟད། ནོ་ཡུལ་གྱི་མི་རྣམས་ཚར་དུ་གཅོད་དགོས།
EZE 30:16 ངས་ཨེ་ཅིབ་ཡུལ་དུ་མེ་སྦར་ཞིང་། སིན་ལ་སྡུག་བསྔལ་ཆེན་པོ་འབྱུང་བར་འགྱུར་ལ། ནོ་ཡུལ་གཞན་གྱིས་གཏོར་ནས་ནོབ་ནི་ཉིན་གང་པོར་སྡུག་བསྔལ་གྱིས་མནར་བར་འགྱུར།
EZE 30:17 ཨོ་ནཱ་དང་ཕི་བེ་སེད་གཉིས་ཀྱི་གཞོན་ནུ་རྣམས་རལ་གྲིའི་འོག་ཏུ་འགྱེལ་ཞིང་། གྲོང་ཁྱེར་འདི་དག་གི་བུད་མེད་རྣམས་བཙོན་དུ་འཁྲིད་པར་འགྱུར།
EZE 30:18 ངས་ཐ་ཕན་ཧེ་སི་རུ་ཨེ་ཅིབ་ཡུལ་གྱི་གཉའ་ཤིང་རྣམས་གཅོག་པའི་དུས་སུ། ཉིན་དཀར་ནི་མུན་པ་རུ་འགྱུར་ཞིང་། ཨེ་ཅིབ་ཀྱིས་ངོམ་བཟོ་སྟོན་པའི་སྟོབས་ཤུགས་ནི་དེའི་ནང་དུ་ཉམས་པ་དང་། གྲོང་ཁྱེར་འདི་ལ་སྤྲིན་ནག་འཐིབས་ནས་གྲོང་ཁྱེར་ནང་གི་མི་རྣམས་བཙོན་དུ་འཁྲིད་པར་འགྱུར།
EZE 30:19 ངས་དེ་ལྟར་ཨེ་ཅིབ་ལ་ཉེས་ཆད་གཅོད་ཅིང་། ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 30:20 དེ་ཡང་ལོ་བཅུ་གཅིག་པའི་ཟླ་དང་པོའི་ཚེས་བདུན་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 30:21 ཀྱེ་མིའི་བུ། ངས་ཨེ་ཅིབ་ཀྱི་རྒྱལ་པོ་ཕཱར་ཨོལ་གྱི་དཔུང་པ་བཅག་པ་ཡིན། ལྟོས་དང་། དེར་རལ་གྲི་འཛིན་པའི་སྟོབས་ཡོད་པའི་ཆེད་དུ། ཁོ་ལ་སྨན་བཅོས་བྱེད་མཁན་མེད་དེ། རྨ་རས་དཀྲི་མཁན་ཡང་མེད་དོ། །
EZE 30:22 དེ་བས་ན་གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཨེ་ཅིབ་ཀྱི་རྒྱལ་པོ་ཕཱར་ཨོལ་ནི་དགྲ་རུ་འཛིན་ཞིང་། ངས་དེའི་སྟོབས་ཤུགས་ལྡན་པའི་དཔུང་པ་དང་བཅག་པའི་དཔུང་པ་མཉམ་དུ་བཅད་ནས། རལ་གྲི་ནི་དེའི་ལག་ནས་སར་ལྷུང་བར་འགྱུར།
EZE 30:23 ངས་ཨེ་ཅིབ་པ་ནི་རྒྱལ་ཁམས་སོ་སོར་གཏོར་ཞིང་། ཡུལ་ཁམས་སོ་སོར་ཁ་ཐོར་དུ་འགྲོ་བར་བྱའོ། །
EZE 30:24 ངས་པཱ་པེལ་ལོན་གྱི་རྒྱལ་པོའི་དཔུང་པ་ལ་སྟོབས་བཅུག་ནས་ངའི་རལ་གྲི་ཁོའི་ལག་ཏུ་གཏོད་ཅིང་། ངས་ཕཱར་ཨོལ་གྱི་དཔུང་པ་བཅག་སྟེ་ཁོ་ནི་རྨས་ནས་འཆི་ལ་ཉེ་བའི་མི་བཞིན་དུ་པཱ་པེལ་ལོན་གྱི་རྒྱལ་པོའི་མདུན་དུ་འཁུན་པར་བྱའོ། །
EZE 30:25 ངས་པཱ་པེལ་ལོན་གྱི་རྒྱལ་པོའི་དཔུང་པར་སྟོབས་བཅུག་ནས། ཕཱར་ཨོལ་གྱི་དཔུང་པ་ནི་ཐུར་དུ་འཕྱང་བར་བྱ། ངས་རང་གི་རལ་གྲི་པཱ་པེལ་ལོན་གྱི་རྒྱལ་པོའི་ལག་ཏུ་གཏད་ནས། ཁོས་རལ་གྲི་བཟུང་སྟེ་ཨེ་ཅིབ་ལ་རྒོལ་བའི་དུས་སུ། དེ་དག་གིས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 30:26 ངས་ཨེ་ཅིབ་པ་ནི་རྒྱལ་ཁམས་སོ་སོར་གཏོར་ཞིང་། ཡུལ་ཁམས་སོ་སོར་ཁ་ཐོར་དུ་འགྲོ་རུ་བཅུག་ན། དེ་དག་གིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གསུངས་སོ། །
EZE 31:1 དེ་ཡང་ལོ་བཅུ་གཅིག་པའི་ཟླ་གསུམ་པའི་ཚེས་གཅིག་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 31:2 ཀྱེ་མིའི་བུ། ཁྱོད་ཀྱིས་ཨེ་ཅིབ་ཀྱི་རྒྱལ་པོ་ཕཱར་ཨོལ་དང་དེའི་མི་རྣམས་ལ་འདི་ལྟར་སྨྲོས་ཤིག ཁྱོད་རླབས་ཆེན་ཡིན་པ་བརྗོད་ན། སུ་ཞིག་ཁྱོད་དང་འགྲན་ནུས་སམ།
EZE 31:3 ལྟོས་དང་། སྔར་ཨ་སུར་ནི་ལེ་པཱ་ནོན་གྱི་ཐང་ཤིང་ཡིན་ཏེ། ལྕུག་ཕྲན་མཛེས་ཤིང་ནགས་ཚལ་སྟུག་པ་དང་། ལྗོན་ཤིང་མཐོ་ལ་ཤིང་གི་རྩེ་མོ་ནི་ཤིན་ཏུ་སྟུག་པོའི་ཡལ་འདབ་སྟེང་དུ་ཡོད་པ་ཡིན།
EZE 31:4 ཆུ་རྣམས་ཀྱིས་དེ་སྐྱེ་རུ་བཅུག་སྟེ། གཡང་རོང་གིས་དེ་མཐོན་པོར་སྐྱེ་རུ་བཅུག་ཅིང་། གཙང་པོ་ནི་གཏིང་ཟབ་ས་ནས་བཞུར་འོངས་ནས་དེ་འཛུགས་སའི་ཡུལ་བསྐོར་བ་དང་། ཆུ་ཕྲན་རྣམས་ཀྱང་ཐང་གི་ལྗོན་ཤིང་ཀུན་གྱི་སར་བཞུར་བ་ཡིན།
EZE 31:5 དེ་བས། ཤིང་དེ་ནི་མཐོ་ཞིང་ཆེ་ལ། ཐང་གི་ལྗོན་ཤིང་རྣམས་ལས་ཀྱང་མཐོ་བའོ། །དེ་སྐྱེས་ནས་ཡལ་ག་རྒྱས་པའི་དུས་སུ། ཆུ་འཛོམས་པའི་རྐྱེན་གྱིས་ཡལ་གའི་ལྕུག་ཕྲན་རིང་དུ་སྐྱེ་བའོ། །
EZE 31:6 ནམ་མཁའི་བྱ་ཐམས་ཅད་ཀྱིས་ཡལ་གའི་སྟེང་དུ་ཚང་བཅོས་པ་དང་། ཐང་གི་རི་དྭགས་ཐམས་ཅད་ཀྱིས་ཡལ་གའི་འོག་ཏུ་ཕྲུ་གུ་བཙས་ནས། མི་རིགས་ཆེན་པོ་ཐམས་ཅད་དེའི་བསིལ་གྲིབ་འོག་ཏུ་སྡོད་པ་ཡིན།
EZE 31:7 ཤིང་དེའི་རྩ་བ་ནི་ཆུ་མང་བའི་གནས་སུ་ཟུག་པས་ན། ཤིང་དེ་མཐོ་ཞིང་ལྕུག་ཕྲན་རིང་བས་མཛེས་པར་མངོན་ནོ། །
EZE 31:8 དཀོན་མཆོག་གི་ལྡུམ་རའི་ནང་གི་ཐང་ཤིང་ཡང་དེ་དང་འགྲན་ཟླ་མེད་དེ། གསོམ་ཤིང་ཡང་དེའི་ཡལ་གར་མི་དོ་ལ། ཤིང་ཙི་ནཱར་ཡང་དེའི་ལྕུག་ཕྲན་ལ་མི་དོ། དཀོན་མཆོག་གི་ལྡུམ་རའི་ནང་གི་ལྗོན་ཤིང་གང་ལའང་དེ་ལྟ་བུའི་མཛེས་སྡུག་ནི་མེད།
EZE 31:9 ངས་དེ་ནི་ལྕུག་ཕྲན་མང་བའི་སྒོ་ནས་མཛེས་པར་བྱས་ཤིང་། ཐ་ན་དཀོན་མཆོག་གི་ལྡུམ་ར་སྟེ་ཨེ་དེན་ལྡུམ་རའི་ལྗོན་ཤིང་ཐམས་ཅད་ཀྱིས་ཀྱང་དེ་ལ་ཕྲག་དོག་བྱེད་དོ། །
EZE 31:10 དེ་བས་གཙོ་བོ་ཡ་ཝཱེས་འདི་སྐད་དུ། ཤིང་དེ་ནི་མཐོ་ལ་ཤིང་གི་རྩེ་མོ་ཤིན་ཏུ་སྟུག་པོའི་ཡལ་འདབ་སྟེང་དུ་ཡོད་པའི་རྐྱེན་དང་། ཡང་མཐོ་ཞིང་ཆེ་བའི་དབང་གིས་དེར་ང་རྒྱལ་ཆེ་བས།
EZE 31:11 ངས་དེ་ནི་མི་རིགས་ཀུན་གྱི་འགོ་དཔོན་ལག་ཏུ་གཏད་ནས། དེས་དེ་ལ་ཁ་གཏད་འཇལ་ངེས་ཡིན་ཞིང་། དེའི་སྡིག་པའི་རྐྱེན་གྱིས་ངས་དེ་ཕྱི་རུ་བསྐྲད་དོ། །
EZE 31:12 ཕྱི་ཕྱོགས་པའི་ནང་གི་ཆེས་གདུག་རྩུབ་ཆེ་བའི་མི་རྣམས་ཀྱིས་དེ་བཅད་ནས་འདོར་བར་འགྱུར་ལ། དེའི་ཡལ་འདབ་ནི་རི་དང་ལུང་པ་ཐམས་ཅད་དུ་ལྷུང་ཞིང་། དེའི་ཡལ་ག་ཆག་ནས་ས་གཞིའི་གྲོག་ཤུར་ཀུན་གྱི་ནང་དུ་ལྷུང་བར་འགྱུར། ས་གཞིའི་མི་རིགས་ཐམས་ཅད་དེའི་བསིལ་གྲིབ་དང་བྲལ་ནས་དེ་སྤང་བར་འགྱུར།
EZE 31:13 ནམ་མཁའི་བྱ་ཐམས་ཅད་སར་འགྱེལ་བའི་ལྗོན་ཤིང་སྟེང་དུ་སྡོད་ཅིང་། ཐང་གི་རི་དྭགས་ཐམས་ཅད་དེའི་ལྕུག་ཕྲན་བར་དུ་གནས་པར་འགྱུར་རོ། །
EZE 31:14 དེ་ནི་ཕྱིན་ཆད་ཆུ་འགྲམ་གྱི་ལྗོན་ཤིང་ཐམས་ཅད་ལས་གང་གིས་ཀྱང་རང་ཉིད་མཐོ་བའི་རྐྱེན་གྱིས་རང་མཐོང་མི་བྱེད་པ་དང་། རང་གི་རྩེ་མོ་ཡལ་འདབ་ཤིན་ཏུ་སྟུག་པོའི་སྟེང་དུ་རྒྱས་པར་མི་བྱ་ཞིང་། ཆུ་ཡིས་བརླན་བསྐྱེད་པའི་ལྗོན་ཤིང་གང་ཡང་མགོ་འཕང་མི་མཐོ་བའི་ཆེད་དུའོ། །གང་ལ་ཞེ་ན། དེ་དག་ས་གཞིའི་མི་རྣམས་ལས་གཤིན་ཡུལ་དུ་ལྷུང་བ་དག་དང་མཉམ་དུ་འཆི་བ་དང་ས་གཞིའི་གཏིང་ཟབ་སར་གཏད་པའོ། །
EZE 31:15 གཙོ་བོ་ཡ་ཝཱེས་འདི་སྐད་དུ། དེ་གཤིན་ཡུལ་དུ་ལྷུང་བའི་ཉིན་མོར་ངས་དེའི་རྐྱེན་གྱིས་སྐྱོ་གདུང་གིས་རྒྱ་མཚོ་འགེབ་ཅིང་། གཙང་པོ་རྣམས་བཀག་ནས་ཆུ་ཆེན་པོའི་བཞུར་མཚམས་གཅོད་པ་དང་། ལེ་པཱ་ནོན་ལ་ངས་དེའི་དོན་དུ་སྡུག་བསྔལ་བྱེད་དུ་འཇུག་ཅིང་། ཐང་གི་ལྗོན་ཤིང་ཐམས་ཅད་ཀྱང་དེའི་རྐྱེན་གྱིས་སྐམ་པར་འགྱུར།
EZE 31:16 ངས་དེ་གཤིན་པོའི་གནས་སུ་གཡུགས་ནས། དེ་གཤིན་ཡུལ་དུ་ལྷུང་བའི་མི་རྣམས་དང་མཉམ་དུ་སྡོད་དུས་སུ། དེ་མར་ལྷུང་བའི་སྒྲ་ཡིས་ངས་མི་ཐམས་ཅད་འདར་དུ་བཅུག་ན། ཨེ་དེན་གྱི་ལྗོན་ཤིང་ཐམས་ཅད་དེ། ལེ་པཱ་ནོན་གྱི་ཆུ་ཡིས་བརླན་པར་བྱས་པའི་ཆེས་ལེགས་ཤིང་ཡིད་དུ་འོང་བའི་ལྗོན་ཤིང་ཐམས་ཅད་ལ་སའི་གཏིང་རིམ་དུ་སེམས་གསོ་འཐོབ་པར་འགྱུར།
EZE 31:17 ལྗོན་ཤིང་དེ་དག་ཀྱང་དེ་དང་མཉམ་དུ་གཤིན་ཡུལ་དུ་བབས་ནས་རལ་གྲིས་བཀུམ་པའི་མི་རྣམས་ཀྱི་རྩར་འགྲོ་ཞིང་། མི་དེ་རྣམས་ནི་དེའི་དཔུང་གྲོགས་ཡིན་ལ། སྔར་མི་རིགས་ཀུན་གྱི་ནང་དུ་དེའི་བསིལ་གྲིབ་འོག་ཏུ་བསྡད་པ་ཡིན།
EZE 31:18 ཁྱོད་ཀྱི་གཟི་དཔལ་དང་མཐོ་ཚད་ལ་ཨེ་དེན་གྱི་ལྗོན་ཤིང་ལས་གང་ཞིག་གིས་འགྲན་ནུས་སམ། ཡིན་ཡང་ཁྱོད་ནི་ཨེ་དེན་གྱི་ལྗོན་ཤིང་རྣམས་དང་མཉམ་དུ་ས་འོག་ཏུ་འབབ་པར་མ་ཟད། མཚན་སྐྱི་མ་བཅད་པ་རྣམས་ཀྱི་ཁྲོད་དུ་རལ་གྲིས་བཀུམ་པ་རྣམས་དང་མཉམ་དུ་ཁྱོད་ཉལ་བར་འགྱུར། ལྗོན་ཤིང་འདི་ནི་ཕཱར་ཨོལ་དང་ཁོའི་མི་རྣམས་ཡིན་ཞེས་གཙོ་བོ་ཡ་ཝཱེས་གསུངས་སོ། །
EZE 32:1 ལོ་བཅུ་གཉིས་པའི་ཟླ་བཅུ་གཉིས་ཀྱི་ཚེས་གཅིག་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 32:2 ཀྱེ་མིའི་བུ། ཁྱོད་ཀྱིས་ཨེ་ཅིབ་ཀྱི་རྒྱལ་པོ་ཕཱར་ཨོལ་གྱི་ཆེད་དུ་སྐྱོ་གླུ་ཞིག་རྩོམས་ཤིག དེ་ལ་འདི་ལྟར་སྨྲོས་ཤིག ཁྱོད་ནི་མི་རིགས་ཀུན་གྱི་ཁྲོད་ནས་སེང་གེ་དར་མ་དང་འདྲ་ཞིང་། རྒྱ་མཚོའི་ནང་གི་ཆུ་སྲིན་དང་མཚུངས་ཏེ། ཁྱོད་ནི་གཙང་པོའི་ནང་དུ་ཡར་ལྡིང་མར་ལྡིང་བྱས་ནས་རང་གི་སྡེར་མོས་ཆུ་དཀྲུགས་ཏེ་གཙང་པོ་རྙོག་པ་ཡིན།
EZE 32:3 གཙོ་བོ་ཡ་ཝཱེས་འདི་སྐད་དུ། ངས་ཡུལ་ཁམས་ཀུན་གྱི་མི་རྣམས་བསྡུས་ཏེ། ངའི་དྲ་རྒྱ་ཁྱོད་ཀྱི་སྟེང་དུ་འཕངས་ནས། དེ་དག་གིས་ངའི་དྲ་རྒྱས་ཁྱོད་ནི་ཡར་འཐེན་པར་འགྱུར།
EZE 32:4 ངས་ཁྱོད་སྐམ་སར་གཡུགས་ཏེ་ས་སྟོང་དུ་འཕངས་ནས། ནམ་མཁའི་བྱ་ཐམས་ཅད་ཁྱོད་ཀྱི་སྟེང་དུ་གནས་པར་བྱ་ཞིང་། ས་གཞིའི་གཅན་གཟན་ཐམས་ཅད་ཀྱིས་ཁྱོད་ཟོས་ནས་འགྲང་བར་བྱའོ། །
EZE 32:5 ཡང་ངས་ཁྱོད་ཀྱི་ཤ་ནི་རི་མགོར་འཕངས་ནས། ཁྱོད་ཀྱི་མཐོ་ཞིང་ཆེ་བའི་བམ་རོ་ནི་ལུང་པ་རུ་འགེང་བར་བྱ་སྟེ།
EZE 32:6 ངས་ཁྱོད་ལས་བཞུར་བའི་ཁྲག་ནི་ས་གཞིར་བླུགས་ཏེ། རི་བོར་སླེབས་པར་བྱ་ཞིང་གྲོག་ཤུར་རྣམས་སུའང་ཁྱོད་ཀྱི་ཁྲག་གིས་ཁེངས་པར་འགྱུར།
EZE 32:7 ངས་ཁྱོད་མེད་པར་བྱེད་དུས་ནམ་མཁའ་བསྒྲིབ་ཅིང་། ནམ་མཁའི་སྐར་མ་རྣམས་ཀྱང་མུན་པར་བྱ་སྟེ། ཉི་མ་སྤྲིན་གྱིས་བསྒྲིབས་ནས་ཟླ་བས་ཀྱང་འོད་མི་སྣང་ངོ་། །
EZE 32:8 ངས་ནམ་མཁའི་འོད་ཀྱི་ཕུང་བོ་རྣམས་ཁྱོད་ཀྱི་སྟེང་དུ་མུན་པར་མཛད་ནས། ཁྱོད་ཀྱི་ཡུལ་ཁམས་ནི་མུན་པས་བསྒྲིབ་པར་འགྱུར་ཞེས་གཙོ་བོ་ཡ་ཝཱེས་གསུངས་སོ། །
EZE 32:9 ངས་ཁྱོད་ནི་མི་རྣམས་ཀྱི་ཁྲོད་ནས་མེད་པར་བཏང་བའི་གནས་ཚུལ་དེ། ཁྱོད་ལ་རྒྱུས་མི་མངའ་བའི་ཡུལ་རྣམས་སུ་བསྐྱལ་དུས། ངས་མི་རིགས་ཀུན་གྱི་སེམས་དཀྲུག་པར་འགྱུར།
EZE 32:10 ངས་དེ་དག་གི་མདུན་ནས་རང་གི་རལ་གྲི་ཁྱོད་ལ་གཡུག་དུས་སུ། དེ་དག་ཁྱོད་ཀྱི་དབང་གིས་སྐྲག་ཅིང་། དེ་དག་གི་རྒྱལ་པོ་རྣམས་ཀྱང་ཁྱོད་ཀྱི་དབང་གིས་རབ་ཏུ་དངངས་པར་འགྱུར། ཁྱོད་ཕམ་པའི་ཉིན་མོར་མི་རེ་རེ་རང་སྲོག་གི་ཆེད་དུ་རྟག་ཏུ་འདར་བར་འགྱུར་རོ། །
EZE 32:11 གཙོ་བོ་ཡ་ཝཱེས་འདི་སྐད་དུ། པཱ་པེལ་ལོན་གྱི་རྒྱལ་པོའི་རལ་གྲི་ཁྱོད་ཀྱི་སྟེང་དུ་འབབ་ངེས་ཤིང་།
EZE 32:12 ངས་དཔའ་བོ་རྣམས་ཀྱི་རལ་གྲི་ལ་བརྟེན་ནས་ཁྱོད་ཀྱི་མི་རྣམས་འགྱེལ་བར་བྱ་ཞིང་། དཔའ་བོ་འདི་རྣམས་ནི་མི་རིགས་ཀུན་ལས་ཧམ་ཤེད་ཆེས་ཆེ་བ་རྣམས་ཡིན་ལ། དེ་ཚོས་ཨེ་ཅིབ་ཀྱིས་ངོམ་བཟོ་སྟོན་པ་དེ་མེད་པར་བྱེད་ཅིང་། ཨེ་ཅིབ་ཀྱི་མི་ཐམས་ཅད་མེད་པར་འགྱུར་རོ། །
EZE 32:13 ཡང་ངས་ཆུ་རྣམས་ཀྱི་འགྲམ་དུ་ཨེ་ཅིབ་ཀྱི་ཕྱུགས་རྣམས་ཚར་གཅོད་ཅིང་། ཕྱིན་ཆད་མིའི་རྐང་པས་ཆུ་འདི་དག་རྙོག་པར་མི་འགྱུར་ལ། ཕྱུགས་ཀྱི་རྨིག་པས་ཀྱང་དེ་ལྟར་མི་བྱའོ། །
EZE 32:14 དུས་དེར་ངས་ཆུ་རྣམས་དྭངས་བར་བྱེད་ཅིང་། གཙང་པོའི་ཆུ་རྣམས་ནི་སྣུམ་བཞིན་དུ་དལ་གྱིས་བཞུར་བར་བྱའོ་ཞེས་གཙོ་བོ་ཡ་ཝཱེས་གསུངས་པའོ། །
EZE 32:15 ངས་ཨེ་ཅིབ་ཀྱི་ཡུལ་སྟོངས་སུ་བཅུག་སྟེ། ཡུལ་ཁམས་དེའི་ནང་ཡོད་པ་ཐམས་ཅད་བརླགས་ནས། དེའི་ནང་ཡོད་པའི་ཡུལ་མི་ཐམས་ཅད་ཚར་བཅད་ན། དུས་དེར་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་པའོ། །
EZE 32:16 འདི་ནི་མི་ཡིས་ཨེ་ཅིབ་ཀྱི་ཆེད་དུ་བླངས་པའི་སྐྱོ་གླུ་སྟེ། མི་རིགས་སོ་སོའི་བུད་མེད་དག་གིས་སྐྱོ་གླུ་འདི་ལེན་ཞིང་། དེ་རྣམས་ཀྱིས་ཨེ་ཅིབ་དང་དེའི་མི་རྣམས་ཀྱི་ཆེད་དུ་སྐྱོ་གླུ་འདི་ལེན་ནོ་ཞེས་གཙོ་བོ་ཡ་ཝཱེས་གསུངས་སོ། །
EZE 32:17 དེ་ཡང་ལོ་བཅུ་གཉིས་པའི་ཟླ་བཅུ་གཉིས་ཀྱི་ཚེས་བཅོ་ལྔའི་ཉིན་ལ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 32:18 ཀྱེ་མིའི་བུ། ཁྱོད་ཀྱིས་ཨེ་ཅིབ་ཀྱི་མི་རྣམས་ཀྱི་ཆེད་དུ་ངུ་འབོད་གྱིས་ཤིག ཨེ་ཅིབ་དང་རྒྱལ་ཁབ་སྟོབས་དང་ལྡན་པའི་བུད་མེད་རྣམས་ནི་ས་དོང་དུ་འབབ་པའི་མི་རྣམས་དང་མཉམ་དུ་གཤིན་པོའི་ཡུལ་དུ་སྐྱོལ་ཅིག
EZE 32:19 ཁྱོད་ཀྱིས་ཨེ་ཅིབ་ལ་འདི་ལྟར། ཁྱོད་ནི་སུ་ལས་ཁྱད་དུ་འཕགས་པ་ཡིན་ནམ། ཁྱོད་རང་མར་སོང་སྟེ་མཚན་སྐྱི་མ་བཅད་པའི་མི་དེ་དག་དང་མཉམ་དུ་ཉལ་ནས་སྡོད་ཅིག་ཅེས་སྨྲོས་ཤིག
EZE 32:20 དེ་དག་ནི་རལ་གྲིས་བཀུམ་པའི་མི་རྣམས་ཀྱི་དབུས་སུ་འགྱེལ་བར་འགྱུར་ཞིང་། རལ་གྲི་བཏོན་པ་ན་ཨེ་ཅིབ་དང་དེའི་མི་རྣམས་ནི་མཉམ་དུ་མར་འཐེན་པར་འགྱུར།
EZE 32:21 དཔའ་བོ་ནང་གི་ཆེས་སྟོབས་དང་ལྡན་པ་དེས་གཤིན་ཡུལ་དུ་ཨེ་ཅིབ་དང་ཨེ་ཅིབ་ལ་རོགས་བྱེད་མཁན་རྣམས་གླེང་སྟེ་ན་རེ། དེ་དག་མར་འོངས་ཤིང་། དེ་དག་ནི་མཚན་སྐྱི་མ་བཅད་པའི་མི་སྟེ་རལ་གྲིས་བཀུམ་པའི་མི་རྣམས་དང་མཉམ་དུ་ཉལ་ལོ་ཞེས་ཟེར་རོ། །
EZE 32:22 ཨ་སུར་དང་དེའི་དམག་དཔུང་ཐམས་ཅད་དེར་ཡོད་པ་དང་། དེའི་མཐའ་འཁོར་དུ་ཁོ་ཚོའི་དུར་ཁུང་རྣམས་འདུག་སྟེ། དེ་ཐམས་ཅད་ནི་སྲོག་ཤོར་བ་དང་རལ་གྲིའི་འོག་ཏུ་འགྱེལ་བའི་མི་ཡིན་ནོ། །
EZE 32:23 དེ་དག་གི་དུར་ཁུང་ནི་ཆེས་ཟབ་པའི་དོང་ནང་དུ་བཞག་ཡོད་པ་དང་། ཨ་སུར་གྱི་དམག་དཔུང་རྣམས་ནི་དེའི་དུར་ཁུང་གི་མཐའ་འཁོར་དུ་ཡོད་ལ། ཐམས་ཅད་སྲོག་ཤོར་བ་དང་རལ་གྲིའི་འོག་ཏུ་འགྱེལ་བའི་མི་ཡིན་ཏེ། སྔར་དེ་ཚོས་གསོན་པོའི་གནས་སུ་དངངས་སྐྲག་གིས་ཁྱབ་པར་བྱས་སོ། །
EZE 32:24 ཨེ་ལཱམ་ཡང་དེར་ཡོད་པ་དང་དེའི་མི་རྣམས་ཀྱང་དེའི་དུར་ཁུང་གི་མཐའ་འཁོར་དུ་ཡོད་དེ། ཐམས་ཅད་སྲོག་ཤོར་བ་དང་རལ་གྲིའི་འོག་ཏུ་འགྱེལ་བའི་མི་ཡིན་ནོ། །ཁོ་ཚོ་ནི་མཚན་སྐྱི་མ་བཅད་པར་གཤིན་ཡུལ་དུ་ལྷུང་བ་ཡིན་ལ། སྔར་ཁོ་ཚོས་གསོན་པོའི་གནས་སུ་དངངས་སྐྲག་གིས་ཁྱབ་པར་བྱས་ཏེ། ད་ལྟ་ཁོ་ཚོས་དོང་ནང་དུ་ལྷུང་བའི་མི་རྣམས་དང་ལྷན་ཅིག་རང་གི་ངོ་ཚ་ཁུར་བ་ཡིན།
EZE 32:25 བསད་པའི་མི་རྣམས་ཀྱི་ཁྲོད་དུ་དེ་དང་དེའི་མི་ཀུན་གྱི་ཆེད་དུ་མལ་ཁྲི་བཙུགས་ཡོད་དེ། ཁོ་ཚོའི་དུར་ཁུང་ནི་དེའི་མཐའ་འཁོར་དུ་ཡོད་པ་དང་། ཁོ་ཚོ་ཚང་མ་མཚན་སྐྱི་མ་བཅད་པ་དང་རལ་གྲིས་བཀུམ་པའི་མི་ཡིན་ཏེ། སྔར་ཁོ་ཚོས་གསོན་པོའི་གནས་སུ་དངངས་སྐྲག་གིས་ཁྱབ་པར་བྱས་ཏེ། ད་ལྟ་ཁོ་ཚོས་དོང་ནང་དུ་ལྷུང་བའི་མི་རྣམས་དང་ལྷན་ཅིག་རང་གི་ངོ་ཚ་ཁུར་བ་དང་། ཨེ་ལཱམ་ནི་བསད་པའི་མི་རྣམས་ཁྲོད་དུ་བཞག་ཡོད་དོ། །
EZE 32:26 མེ་ཤེག་དང་ཐུ་བཱལ་དང་དེའི་མི་ཀུན་ཡང་དེར་ཡོད་དེ། ཁོ་ཚོའི་དུར་ཁུང་ནི་མེ་ཤེག་དང་ཐུ་བཱལ་གྱི་མཐའ་འཁོར་དུ་ཡོད་པ་དང་། ཁོ་ཚོ་ཚང་མ་མཚན་སྐྱི་མ་བཅད་པ་དང་རལ་གྲིས་བཀུམ་པའི་མི་སྟེ། སྔར་ཁོ་ཚོས་གསོན་པོའི་གནས་སུ་དངངས་སྐྲག་གིས་ཁྱབ་པར་བྱས།
EZE 32:27 ཁོ་ཚོ་ཚང་མ་ནི་མཚན་སྐྱི་མ་བཅད་པར་བསད་པའི་དཔའ་བོ་རྣམས་དང་མཉམ་དུ་ཉལ་བ་མ་ཡིན་ནམ། དཔའ་བོ་འདི་དག་གིས་མཚོན་ཆ་བཟུང་ནས་གཤིན་ཡུལ་དུ་ལྷུང་སྟེ། རལ་གྲི་རང་གི་མགོ་ཡི་འོག་ཏུ་བཞག་ཡོད་དོ། །དེ་དག་གི་སྡིག་ཉེས་ནི་རང་གི་རུས་པའི་སྟེང་དུ་ཡོད་དེ། སྔར་ཁོ་ཚོས་གསོན་པོའི་གནས་སུ་དངངས་སྐྲག་གིས་ཁྱབ་པར་བྱས་སོ། །
EZE 32:28 ཀྱེ་ཕཱར་ཨོལ། ཁྱོད་ལ་མཚོན་ན། ཁྱོད་ནི་མཚན་སྐྱི་མ་བཅད་པའི་མི་ཡི་ཁྲོད་དུ་མེད་པར་འགྱུར་ཞིང་། རལ་གྲིས་བསད་པའི་མི་དང་མཉམ་དུ་ཉལ་བར་འགྱུར།
EZE 32:29 ཨེ་དོམ་ཡང་དེར་ཡོད་དེ། ཨེ་དོམ་གྱི་རྒྱལ་པོ་རྣམས་དང་འགོ་དཔོན་ཐམས་ཅད་ལ་དཔའ་ངར་ལྡན་ཡང་། ད་དུང་རལ་གྲིས་བཀུམ་པའི་མི་རྣམས་ཀྱི་ཁོངས་སུ་བཞག་ཡོད་པ་དང་། དེ་དག་ནི་མཚན་སྐྱི་མ་བཅད་པར་དོང་དུ་ལྷུང་བའི་མི་དང་མཉམ་དུ་ཉལ་བར་འགྱུར།
EZE 32:30 གནས་དེར་བྱང་ཕྱོགས་ཀྱི་འགོ་དཔོན་རྣམས་དང་ཚི་ཏུན་པ་ཐམས་ཅད་ཀྱང་ཡོད་པ་དང་། དེ་ཐམས་ཅད་ནི་བསད་པའི་མི་དང་མཉམ་དུ་མར་ཕྱིན་པ་སྟེ། ཁོ་ཚོར་དཔའ་ངར་ལྡན་ཞིང་མི་ལ་འཇིགས་སྐུལ་ན་ཡང་། ད་དུང་ངོ་ཚ་ཐེབས་པ་དང་། ཁོ་ཚོས་མཚན་སྐྱི་མ་བཅད་པ་དང་། རལ་གྲིས་བཀུམ་པའི་མི་རྣམས་དང་མཉམ་དུ་ཉལ་ཞིང་། དོང་ནང་དུ་ལྷུང་བའི་མི་དང་ལྷན་ཅིག་རང་གི་ངོ་ཚ་ཁུར་བའོ། །
EZE 32:31 ཕཱར་ཨོལ་གྱིས་དེ་དག་མཐོང་སྟེ། ཕཱར་ཨོལ་རང་ཉིད་དང་ཁོའི་མི་རྣམས་ཏེ། རལ་གྲིས་བཀུམ་པའི་རང་གི་དཔུང་ཚོགས་ཀུན་གྱི་ཕྱིར་དུ་སེམས་གསོ་རྙེད་དོ་ཞེས་གཙོ་བོ་ཡ་ཝཱེས་གསུངས་སོ། །
EZE 32:32 ངས་ཕཱར་ཨོལ་ལ་གསོན་པོའི་གནས་སུ་དངངས་སྐྲག་གིས་ཁྱབ་པར་བྱས་ན་བྱེད་དུ་བཅུག་ཀྱང་། དེ་དང་དེའི་མི་རྣམས་ནི་མཚན་སྐྱི་མ་བཅད་པའི་མི་ཡི་ནང་དུ་རལ་གྲིས་བཀུམ་པའི་མི་དང་མཉམ་དུ་ཉལ་བར་འགྱུར་ཞེས་གཙོ་བོ་ཡ་ཝཱེས་གསུངས་སོ། །
EZE 33:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 33:2 ཀྱེ་མིའི་བུ། ཁྱོད་ཀྱིས་རང་གི་རྒྱལ་ཁམས་ཀྱི་མི་རྣམས་ལ་འདི་ལྟར་སྨྲོས་ཤིག ངས་ཡུལ་ཞིག་ལ་རལ་གྲི་སླེབས་སུ་འཇུག་དུས། ཡུལ་མི་རྣམས་ཀྱིས་རང་གི་ནང་ནས་མི་ཞིག་བདམས་ཏེ་ཁོ་ཚོའི་སོ་ལྟ་རུ་བཞག་ནས།
EZE 33:3 མི་དེས་རང་གི་ཡུལ་དུ་རལ་གྲི་སླེབས་པ་མཐོང་ཚེ། དམག་དུང་བུས་ནས་མི་རྣམས་ལ་ཉེན་བརྡ་གཏོང་དགོས་ལ།
EZE 33:4 དམག་དུང་ཐོས་ཀྱང་ཉེན་བརྡར་མི་མཉན་པའི་མི་ལ། རལ་གྲི་སླེབས་ནས་ཁོ་མེད་པར་བཟོས་ཀྱང་ཁོའི་སྲོག་ཉེས་ནི་ཁོ་རང་གིས་འཁུར་དགོས་པ་ཡིན།
EZE 33:5 ཁོས་དམག་དུང་ཐོས་ཀྱང་ཉེན་བརྡར་མ་མཉན་པས། ཁོའི་སྲོག་ཉེས་ནི་ཁོ་རང་གིས་འཁུར་དགོས་པ་ཡིན། གལ་ཏེ་ཁོས་ཉེན་བརྡ་དེ་དང་དུ་བླངས་ན་རང་སྲོག་སྐྱོབ་ཐུབ་པར་འགྱུར་རོ། །
EZE 33:6 ཡིན་ན་ཡང་གལ་ཏེ་སོ་ལྟ་དེས་རལ་གྲི་སླེབས་པ་མཐོང་བཞིན་དུ་དམག་དུང་མ་བུས་པར། ཐ་ན་མི་རྣམས་ལ་ཉེན་བརྡ་ཡང་མ་བཏང་ན། རལ་གྲི་སླེབས་ཏེ་ཁོ་ཚོའི་ནང་གི་མི་གཅིག་མེད་པར་བཟོས་ན། མི་དེ་རང་གི་སྡིག་པའི་རྐྱེན་གྱིས་མེད་པར་བཟོས་ཀྱང་། དེ་ཤི་བའི་རྐྱེན་གྱིས་ངས་སོ་ལྟ་དེ་འདེད་པར་བྱའོ་ཞེས་པའོ། །
EZE 33:7 ཀྱེ་མིའི་བུ། ངས་ཁྱོད་ནི་ཡེས་ར་ཨེལ་ཁྱིམ་རྒྱུད་ཀྱི་བྱ་ར་རུ་བསྐོས་པས། ཁྱོད་ཀྱིས་ངའི་གསུང་ལ་མཉན་ཏེ། ངའི་ཚབ་ཏུ་དེ་རྣམས་ལ་ཐ་ཚིག་སྒྲོགས་ཤིག
EZE 33:8 གལ་ཏེ་ངས་མི་ངན་ལ་འདི་སྐད་དུ། ཀྱེ་མི་ངན་ཁྱོད་ནི་འཆི་ངེས་ཡིན་ཞེས་སྨྲས་པའི་ཚེ། ཨེ་ཟེ་ཀི་ཨེལ་ཁྱོད་ཀྱིས་མི་དེ་རང་གི་སྤྱོད་ལམ་དང་འབྲལ་བར་ཉེན་བརྡ་མ་བཏང་ན། མི་ངན་དེ་རང་གི་སྡིག་པའི་རྐྱེན་གྱིས་འཆི་བར་འགྱུར་ན་ཡང་། དེ་ཤི་བའི་རྐྱེན་གྱིས་ངས་ཁྱོད་འདེད་པར་བྱའོ། །
EZE 33:9 གལ་ཏེ་ཁྱོད་ཀྱིས་མི་ངན་ལ་ཐ་ཚིག་བསྒྲགས་ཤིང་། མི་དེ་རང་གི་སྤྱོད་ལམ་ལས་འབྲལ་བར་བསྐུལ་ན་ཡང་། མི་དེ་ད་དུང་མི་འབྲལ་ན། མི་དེ་ནི་རང་གི་སྡིག་པའི་རྐྱེན་གྱིས་འཆི་བར་འགྱུར་མོད། ཁྱོད་ཀྱིས་རང་སྲོག་བསྐྱབས་པ་ཡིན།
EZE 33:10 ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་འདི་ལྟར། ཁྱོད་ཚོ་ན་རེ། ངེད་ཅག་གི་ཉེས་སྐྱོན་དང་སྡིག་པ་ནི་ང་ཚོའི་སྟེང་དུ་ཡོད་པས། ངེད་རྣམས་དེའི་རྐྱེན་གྱིས་ཉམ་ཐག་ནས་འཆི་བར་འགྱུར་བ་ལས། གསོན་པར་ཅི་ལྟར་འགྱུར་རམ་ཟེར་ཞེས་སྨྲོས་ཤིག
EZE 33:11 ཁྱོད་ཀྱིས་ཁོ་ཚོར་འདི་ལྟར། གཙོ་བོ་ཡ་ཝཱེས་འདི་སྐད་དུ། མི་ངན་ནི་རང་གི་སྤྱོད་ལམ་དང་བྲལ་ནས་གསོན་པ་མ་གཏོགས་མི་ངན་འཆི་བར་ང་རང་མི་དགའོ་ཞེས་བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བས་ན། ཀྱེ་ཡེས་ར་ཨེལ་གྱི་ཁྱིམ་རྒྱུད། ཕྱིར་འཁོར་ཞིག རང་གི་སྤྱོད་ལམ་དང་འབྲལ་བར་གྱིས་ཤིག ཁྱོད་ཅག་འཆི་དགོས་དོན་ཅི་ཡོད་དམ་གསུངས་ཞེས་སྨྲོས་ཤིག
EZE 33:12 ཀྱེ་མིའི་བུ། ཁྱོད་ཀྱིས་རང་གི་མི་རིགས་ལ་འདི་ལྟར་སྨྲོས་ཤིག མི་དྲང་བདེན་ཅན་གྱི་དྲང་བདེན་གྱིས་ཁོས་སྡིག་པ་བྱེད་པའི་དུས་སུ་ཁོ་སྐྱོབ་མི་ནུས་ལ། མི་ངན་གྱི་ངན་པས་ཀྱང་ཁོས་རང་གི་ལས་ངན་པ་འདོར་བའི་དུས་སུ་ཁོ་རང་འགྱེལ་བར་མི་བྱ། མི་དྲང་བདེན་ཅན་གྱིས་སྡིག་པ་བྱེད་པའི་དུས་སུ་རང་གི་དྲང་བདེན་གྱིས་འཚོ་བར་མི་འགྱུར་ཞེས་པའོ། །
EZE 33:13 མི་དྲང་བདེན་ཅན་ལ་ངས་དེ་ངེས་པར་དུ་གསོན་པར་འགྱུར་ཞེས་སྨྲས་ཀྱང་། དེས་རང་གི་དྲང་བདེན་ལ་བློ་གཏད་དེ་ལས་ངན་པ་སྤྱད་ན། དེའི་དྲང་བདེན་ཡོད་ཚད་དྲན་པར་མི་འགྱུར་ལ། དེ་ནི་རང་གིས་སྤྱད་པའི་སྡིག་པའི་རྐྱེན་གྱིས་འཆི་བར་འགྱུར་རོ། །
EZE 33:14 ཡང་ངས་མི་ངན་ལ་ཁྱོད་ནི་འཆི་ངེས་ཡིན་ཞེས་སྨྲས་ཀྱང་། དེ་རང་གི་སྡིག་པ་དང་བྲལ་ནས་དྲང་གཞག་དང་དྲང་བདེན་གྱི་ལས་རྣམས་སྤྱད་དེ།
EZE 33:15 གཏའ་མར་བཞག་པ་ཕྱིར་སྤྲོད་པ་དང་། མི་ལས་ཕྲོགས་པའི་རྫས་རྣམས་འཇལ་བ་དང་། སྲོག་འཚོ་བར་བྱེད་པའི་བཀའ་རྒྱ་བརྩིས་ཏེ་ལས་ངན་པ་མ་སྤྱད་ན། དེ་གསོན་པ་ལས་འཆི་བར་མི་འགྱུར་ལ།
EZE 33:16 དེས་སྤྱད་པའི་སྡིག་པ་ཡོད་ཚད་ནི་དྲན་པར་མི་འགྱུར་ཞིང་། དེས་དྲང་གཞག་དང་དྲང་བདེན་གྱི་ལས་སྤྱད་པས་གསོན་ངེས་ཡིན།
EZE 33:17 ཡང་ཁྱོད་ཀྱི་མི་རྣམས་ན་རེ། གཙོ་བོས་མཛད་པ་དྲང་གཞག་མིན་ཟེར་མོད། དོན་དངོས་སུ་ཁོ་ཚོས་སྤྱད་པ་དྲང་གཞག་མིན་ནོ། །
EZE 33:18 མི་དྲང་བདེན་ཅན་ནི་རང་གི་དྲང་བདེན་དང་བྲལ་ནས་ལས་ངན་པ་སྤྱད་ན། མི་དེ་ནི་སྤྱོད་པ་ངན་པའི་རྐྱེན་གྱིས་འཆི་བར་འགྱུར།
EZE 33:19 ཡང་མི་ངན་རང་གི་གདུག་པ་དང་བྲལ་ནས། དྲང་གཞག་དང་དྲང་བདེན་གྱི་ལས་རྣམས་སྤྱད་ན། ཁོ་ནི་དེའི་རྐྱེན་གྱིས་གསོན་པར་འགྱུར་རོ། །
EZE 33:20 ཁྱོད་ཚོས་ད་དུང་གཙོ་བོས་མཛད་པ་དྲང་གཞག་མིན་ཟེར་རམ། ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ངས་ཁྱོད་ཚོ་མི་རེ་རེས་སྤྱད་པའི་ལས་བཞིན་དུ་ཁྱོད་ལ་ཁྲིམས་གཅོད་དོ་ཞེས་གསུངས་སོ། །
EZE 33:21 ངེད་ཅག་བཙོན་དུ་ཁྲིད་པའི་ལོ་བཅུ་གཉིས་པའི་ཟླ་བཅུ་པའི་ཚེས་ལྔ་ཉིན་ལ། མི་ཞིག་ཡེ་རུ་སཱ་ལེམ་ནས་ངའི་མདུན་དུ་བྲོས་འོངས་ནས་ན་རེ། གྲོང་ཁྱེར་དགྲ་ལག་ཏུ་ཤོར་སོང་ཞེས་སྨྲས་བྱུང་།
EZE 33:22 མི་དེ་མ་སླེབས་སྔོན་གྱི་མཚན་མོ་དཀོན་མཆོག་ཡ་ཝཱེའི་ཕྱག་ནི་ངའི་སྟེང་དུ་བཞག་སྟེ། ངའི་ངག་སྒོ་ཕྱེས་པ་དང་། ཞོགས་པ་སླེབས་ནས་མི་དེ་ངའི་མདུན་དུ་འོངས་པ་ན། ང་རང་ཁ་གྲགས་ཐུབ་པར་གྱུར་ནས་ལྐུགས་པར་མ་ལུས་སོ། །
EZE 33:23 དེ་ནས་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 33:24 ཀྱེ་མིའི་བུ། ཡེས་ར་ཨེལ་ཡུལ་གྱི་གྱང་རོ་ཡི་ནང་དུ་སྡོད་པའི་མི་དེ་རྣམས་ཀྱིས་རྒྱུན་དུ་ན་རེ། ཨབ་ར་ཧམ་གཅིག་པོར་ཡུལ་འདི་ས་སྐལ་དུ་ཐོབ་པ་ཡིན་ན། ངེད་རྣམས་མི་གྲངས་མང་བས་ཡུལ་འདི་རང་ཅག་ལ་ས་སྐལ་དུ་འཐོབ་པར་གདོན་མི་ཟ་ཞེས་ཟེར་བས།
EZE 33:25 ཁྱོད་ཀྱིས་མི་དེ་དག་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་ཁྲག་ཡོད་པའི་ཤ་ཟ་ཞིང་། ཡར་རང་གི་སྐུ་འདྲ་རྣམས་ལ་བལྟ་བ་དང་། ཡང་མི་ལ་ཁྲག་བཞུར་དུ་བཅུག་པས། ཁྱོད་རྣམས་ལ་ད་དུང་ཡུལ་འདི་ས་སྐལ་དུ་འཐོབ་འོས་སམ།
EZE 33:26 ཁྱོད་ཚོས་རང་གི་རལ་གྲིར་བརྟེན་ནས་ཞེན་ལོག་གི་ལས་སྤྱད་དེ། མི་རེ་རེས་ཁྱིམ་མཚེས་ཀྱི་ཆུང་མ་བཙོག་པར་བྱས་པས། ཁྱོད་ཚོར་ད་དུང་ཡུལ་འདི་ས་སྐལ་དུ་འཐོབ་འོས་སམ་གསུངས་ཞེས་སྨྲོས་ཤིག
EZE 33:27 ཁྱོད་ཀྱིས་དེ་དག་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། གྱང་རོའི་ནང་དུ་ཡོད་པ་དག་རལ་གྲིའི་འོག་ཏུ་འགྱེལ་བར་འགྱུར། ཐང་དུ་ཡོད་པ་དག་ངས་གཅན་གཟན་ལ་གཏད་དེ་བཟའ་བར་འགྱུར། བཙན་རྫོང་དང་བྲག་ཕུག་ནང་དུ་ཡོད་པ་དག་རིམས་ནད་ཀྱིས་འཆི་བར་འགྱུར་ཞེས་བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན།
EZE 33:28 ངས་ཡུལ་འདི་མི་མེད་ལུང་སྟོང་དུ་བྱ་སྟེ། དེའི་སྟོབས་ཤུགས་ཀྱི་དབང་གིས་ཡོད་པའི་ང་རྒྱལ་རྣམས་མེད་པར་འགྱུར་ཞིང་། ཡེས་ར་ཨེལ་གྱི་རི་རྣམས་སྟོངས་ཤིང་། དེར་རྒྱུ་ནས་འགྲོ་མཁན་སུ་ཡང་མེད་དོ། །
EZE 33:29 ངས་དེ་དག་གིས་བྱས་པའི་ཞེན་ལོག་གི་དོན་རྣམས་ཀྱི་རྐྱེན་གྱིས་ཡུལ་འདི་མི་མེད་ལུང་སྟོང་དུ་བྱས་ན། ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་སྨྲོས་ཤིག
EZE 33:30 ཀྱེ་མིའི་བུ། ཁྱོད་ཀྱི་མི་རྣམས་ཀྱིས་མཁར་གྱི་འགྲམ་དང་རང་ཁྱིམ་གྱི་སྒོ་ཁར་ཁྱོད་རང་གླེང་སྟེ། སྤུན་ཟླས་སྤུན་ཟླར་ཕན་ཚུན་ན་རེ། ཤོག་དང་། དཀོན་མཆོག་ཡ་ཝཱེ་ལས་འབྱུང་བའི་གསུང་ལ་མཉན་པར་བྱའོ་ཟེར་ཞིང་།
EZE 33:31 དེ་དག་ངའི་མི་ཡིན་པ་བཞིན་དུ་ཚོ་དང་ཚོ་བྱས་ནས་ཁྱོད་ཀྱི་རྩར་འོངས་ཏེ་ཁྱོད་ཀྱི་མདུན་དུ་སྡོད་པ་ཡིན། དོན་དངོས་སུ་དེ་དག་གིས་ཁྱོད་ཀྱི་གཏམ་ལ་མཉན་ཡང་དེ་བཞིན་མི་བྱ་སྟེ། ཁོ་ཚོས་ཁ་ནས་གང་ཞིག་འདོད་པ་དེ་སྨྲ་ཞིང་། སེམས་ནི་ལྐོག་ནོར་གྱི་རྗེས་སུ་འབྲང་བའོ། །
EZE 33:32 ལྟོས་དང་། དེ་ཚོའི་མིག་ལམ་དུ་ཁྱོད་ནི་གླུ་སྙན་མོ་ཞིག་ལས་མ་འདས། གླུ་སྐད་སྙན་ཞིང་སྒྲ་སྙན་དཀྲོལ་བ་འཇེབས་པ་ཙམ་ཡིན་ཏེ། གང་ལ་ཞེ་ན། དེ་ཚོས་ཁྱོད་ཀྱི་གཏམ་ལ་མཉན་ཡང་དེ་བཞིན་དུ་མི་སྤྱོད་དོ། །
EZE 33:33 ལྟོས་དང་། དོན་འདི་འགྲུབ་པར་འགྱུར་ཞིང་། དུས་དེར་སླེབས་ཚེ་ཁོ་ཚོས་རང་གི་ཁྲོད་དུ་ལུང་སྟོན་པ་ཞིག་ཡོད་པ་རྟོགས་པར་འགྱུར་རོ་ཞེས་གསུངས་སོ། །
EZE 34:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 34:2 ཀྱེ་མིའི་བུ། ཡེས་ར་ཨེལ་གྱི་རྫི་བོ་རྣམས་ལ་རྒོལ་བའི་ལུང་སྟོན་ཅིག ཁྱོད་ཀྱིས་དེ་དག་ལ་འདི་ལྟར། གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་གྱི་རྫི་བོ་རྣམས་ལ་ཆག་སྒོ་འབྱུང་། གང་ལ་ཞེ་ན། དེ་དག་གིས་རང་ཉིད་འཚོ་བ་ཁོ་ནར་འབད་དོ། །རྫི་བོས་ལུག་ཁྱུ་འཚོ་འོས་པ་མ་ཡིན་ནམ།
EZE 34:3 ཁྱོད་ཚོས་སྣུམ་དང་ཚིལ་ཟོས་ནས་ལུག་བལ་གྱོན་པ་དང་། ཤ་རྒྱགས་པའི་ལུག་བཤས་ཀྱང་ལུག་ཁྱུ་མི་འཚོའོ། །
EZE 34:4 ཤ་ཤེད་ཞན་པ་རྣམས་ལ་ཁྱོད་ཚོས་ཤེད་འཛོམ་དུ་མ་བཅུག་ལ། ནད་ཡོད་པ་རྣམས་ལ་ཁྱོད་ཚོས་སྨན་བཅོས་མ་བྱས། རྨས་པ་རྣམས་ཁྱོད་ཚོས་མ་དཀྲིས། ཕར་བསྐྲད་ནས་ཁ་ཐོར་དུ་ཕྱིན་པ་རྣམས་ཁྱོད་ཚོས་ཕྱིར་ཁྲིད་མ་འོངས་ལ། བོར་བ་རྣམས་ཁྱོད་ཚོས་མ་བཙལ་བའི་ཁར། ཁྱོད་ཚོས་ད་དུང་དེ་དག་ལ་བཙན་ཤུགས་བཀོལ་ནས་མངའ་འོག་ཏུ་བསྡུས་སོ། །
EZE 34:5 དེ་རྣམས་ལ་རྫི་བོ་མེད་པས་ཁ་ཐོར་དུ་སོང་སྟེ། ཐང་གི་གཅན་གཟན་རྣམས་ཀྱི་ཁ་ཟས་སུ་གྱུར་ཏོ། །
EZE 34:6 ངའི་ལུག་རྣམས་རི་བོ་རྣམས་དང་རི་སྒང་དག་ཏུ་ཕྱོགས་བཞིར་འཁྱམས་པ་དང་། དེ་དག་ས་གཞི་ཡོངས་སུ་ཁ་ཐོར་དུ་སོང་ན་ཡང་འཚོལ་མཁན་མེད་ལ་ལྟ་མཁན་ཡང་མེད་དོ། །
EZE 34:7 དེ་བས་ཁྱོད་རྫི་བོ་རྣམས་ཀྱིས་ཡ་ཝཱེའི་བཀའ་ལ་ཉོན་ཅིག
EZE 34:8 བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ངའི་ལུག་ལ་རྫི་བོ་མེད་པས་བརྔོན་དངོས་སུ་གྱུར་ནས་ཐང་གི་གཅན་གཟན་རྣམས་ཀྱི་ཁ་ཟས་སུ་གྱུར་ཏོ། །ངའི་རྫི་བོ་རྣམས་ཀྱིས་ངའི་ལུག་རྣམས་མི་བཙལ་ཞིང་། ཁོ་ཚོས་རང་ཉིད་འཚོ་བར་འབད་པ་ལས་ངའི་ལུག་རྣམས་མི་འཚོའོ་ཞེས་གཙོ་བོ་ཡ་ཝཱེས་གསུངས།
EZE 34:9 དེའི་ཕྱིར་ཁྱོད་རྫི་བོ་རྣམས་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
EZE 34:10 གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་རྫི་བོ་རྣམས་དགྲ་རུ་འཛིན་ཏེ། ངས་དེ་ཚོའི་ལག་ནས་ངའི་ལུག་རྣམས་བླངས་ནས། དེ་དག་ལ་ཡང་བསྐྱར་ལུག་འཚོ་བར་མི་འཇུག་སྟེ། ཕྱིན་ཆད་རང་ཉིད་ཀྱང་འཚོ་བར་མི་འགྱུར་རོ། །གང་ལ་ཞེ་ན། དེ་དག་གི་ཁ་ཟས་སུ་མི་འགྱུར་བའི་ཆེད་དུ་ངས་རང་གི་ལུག་རྣམས་བསྐྱབས་ནས་དེ་དག་གི་ཁ་ནས་འཆོར་བར་འགྱུར་རོ། །
EZE 34:11 གང་ལ་ཞེ་ན། གཙོ་བོ་ཡ་ཝཱེས་འདི་སྐད་དུ། ལྟོས་དང་། ང་རང་གིས་ངའི་ལུག་རྣམས་བཙལ་ནས་དེ་དག་རྙེད་པར་འགྱུར་རོ། །
EZE 34:12 ལུག་རྣམས་ཕྱོགས་བཞིར་ཐོར་བའི་དུས་སུ་རྫི་བོས་རང་གི་ལུག་རྣམས་ཇི་ལྟར་འཚོལ་བ་བཞིན་དུ། ངས་ཀྱང་དེ་ལྟར་རང་གི་ལུག་རྣམས་འཚོལ་བར་བྱའོ། །ལུག་འདི་རྣམས་ནི་སྤྲིན་ནག་འཐིབས་ཤིང་མུན་པའི་དུས་སུ་ཡུལ་སོ་སོར་ཁ་ཐོར་དུ་སོང་བ་དང་། ངས་ཡུལ་དེ་ནས་དེ་དག་སྐྱོབ་པར་འགྱུར་རོ། །
EZE 34:13 ངས་དེ་རྣམས་མི་རིགས་ཀུན་ལས་ཕྱི་རུ་ཁྲིད་འོངས་ནས། མི་ཀུན་ནས་བསྡུས་ཏེ་རང་ཡུལ་དུ་འཁྲིད་པར་འགྱུར་ཞིང་། ཡེས་ར་ཨེལ་གྱི་རི་རྣམས་དང་། གྲོག་ཤུར་གྱི་འགྲམ་དང་། ཡུལ་ཁམས་ནང་རོལ་གྱི་སྡོད་གནས་ཀུན་ཏུ་དེ་དག་འཚོ་བར་བྱའོ། །
EZE 34:14 ངས་དེ་དག་རྩྭ་ཆུ་འཛོམས་པའི་གནས་སུ་འཚོ་བ་དང་། ཡེས་ར་ཨེལ་གྱི་རི་སྒང་མཐོན་པོ་རྣམས་དེ་དག་འཚོ་སའི་གནས་སུ་འགྱུར་ཞིང་། གནས་དེ་རུ་དེ་རྣམས་རྩྭ་ས་བཟང་པོའི་སྟེང་དུ་ཉལ་ནས། ཡེས་ར་ཨེལ་གྱི་རི་རྣམས་ཀྱི་རྩྭ་ཁ་བཟང་སར་རྩྭ་བཟའ་བར་འགྱུར།
EZE 34:15 ངས་རང་གི་ལུག་རྣམས་འཚོས་ནས་ཉལ་དུ་འཇུག་གོ་ཞེས་གཙོ་བོ་ཡ་ཝཱེས་གསུངས།
EZE 34:16 བོར་བ་རྣམས་ངས་ཕྱིར་འཚོལ་ཞིང་། ཁ་ཐོར་དུ་སོང་བ་རྣམས་ངས་ཕྱིར་ཁྲིད་འོང་དགོས་ལ། རྨས་པ་རྣམས་ངས་དཀྲིས་ནས་ནད་ཡོད་པ་རྣམས་ལ་ངས་ཤེད་རྒྱས་པར་བྱའོ། །ཡིན་ཡང་ཚོན་པོ་དང་ཤ་ཤེད་ཅན་རྣམས་ངས་ཚར་དུ་གཅོད་ཅིང་། ངས་དྲང་གཞག་གིས་དེ་རྣམས་འཚོ་བར་བྱའོ། །
EZE 34:17 ཀྱེ་ངའི་ལུག་ཁྱུ། ཁྱོད་ཚོའི་སྐོར་ལ་གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ལུག་དང་ལུག་གི་བར་དང་། ལུག་ཐུག་དང་ར་ཐུག་གི་བར་ནས་ཁྲིམས་གཅོད་པར་བྱའོ། །
EZE 34:18 ཁྱོད་ཚོས་རྩྭ་ཁ་བཟང་ས་ནས་རྩྭ་ཟོས་ཀྱང་ད་དུང་ཡིད་མི་ཚིམ་པ་ཡིན་ནམ། ཁྱོད་ཚོས་ཇི་མི་སྙམ་པར་རྩྭ་ཟ་འཕྲོ་རྣམས་ལ་རྡོག་བརྫིས་བརྒྱབ་ནས། ཆུ་དྭངས་མོ་འཐུང་ན་ཡང་ཆུ་ལྷག་མ་རྣམས་རྐང་པས་རྙོག
EZE 34:19 ངའི་ལུག་ཁྱུས་ཁྱོད་ཚོས་བརྫིས་པ་དེ་བཟའ་དགོས་ཤིང་། རྐང་པས་རྙོག་པ་དེ་མི་འཐུང་ཀ་མེད་ཡིན་ཞེས་གསུངས་སོ། །
EZE 34:20 དེའི་ཕྱིར་གཙོ་བོ་ཡ་ཝཱེས་དེ་རྣམས་ལ་འདི་སྐད་དུ། ལྟོས་དང་། ངས་ལུག་རྒྱགས་པ་དང་ལུག་སྐམ་པོ་གཉིས་ཀྱི་བར་ནས་ཁྲིམས་གཅོད་པར་བྱ་སྟེ།
EZE 34:21 གང་ལ་ཞེ་ན། ཁྱོད་ཚོས་རང་གི་རྩིབ་ལོགས་དང་ཕྲག་པ་ཡིས་ལུག་སྐམ་པོ་ཐམས་ཅད་བཙིར་ནས། དེ་དག་ཕྱི་རུ་མ་བསྐྲད་བར་དུ་རང་གི་རྭ་ཅོས་དེ་རྣམས་ལ་བརྡུངས་པའོ། །
EZE 34:22 དེ་བས་ན་ངས་རང་གི་ལུག་རྣམས་བརྔོན་དངོས་སུ་མི་འགྱུར་བའི་ཆེད་དུ་དེ་རྣམས་སྐྱོབ་ཅིང་། ངས་ལུག་དང་ལུག་གི་བར་ནས་ཁྲིམས་གཅོད་པར་བྱའོ། །
EZE 34:23 ངས་རང་གི་གཡོག་པོ་དཱ་བིད་རྫི་བོར་བསྐོས་ནས། དེས་ལུག་ཁྱུ་ལ་ལྟ་སྐྱོང་བྱས་ནས་འཚོ་བར་འགྱུར་ལ། ལུག་ཁྱུ་འཚོས་ནས་དེ་དག་གི་རྫི་བོ་བྱེད་དོ། །
EZE 34:24 ཡ་ཝཱེ་བདག་ནི་ཁོ་ཚོའི་དཀོན་མཆོག་དང་། ངའི་གཡོག་པོ་དཱ་བིད་ནི་ཁོ་ཚོའི་དཀྱིལ་དུ་རྒྱལ་པོ་རུ་འགྱུར་རོ་ཞེས་ང་ཡ་ཝཱེས་སྨྲས་པ་ཡིན།
EZE 34:25 ཡང་ངས་དེ་དག་དང་ཞི་བདེའི་ཁ་ཆད་བཞག་སྟེ། ཡུལ་ཁམས་ནང་རོལ་གྱི་གཅན་གཟན་ངན་པ་རྣམས་མེད་པར་བཟོས་ནས། དེ་དག་དབེན་སྟོང་དུ་བདེ་བར་གནས་ཤིང་ནགས་ཚལ་དུ་ཉལ་བར་འགྱུར།
EZE 34:26 ངས་དེ་དག་དང་ངའི་རི་སྒང་གི་མཐའ་འཁོར་ལའང་བྱིན་རླབས་གནང་ནས་དུས་ལྟར་ཆར་འབབ་ཏུ་འཇུག་སྟེ། དེ་ནི་བདེ་བ་སྩོལ་བའི་ཆར་བ་ཡིན།
EZE 34:27 ཐང་གི་ལྗོན་ཤིང་ལ་འབྲས་བུ་ཐོགས་ཤིང་ས་ལའང་ཐོན་རྫས་ཡོད་པས། དེ་དག་རང་ཡུལ་དུ་བདེ་བར་གནས་ཤིང་། ཡང་ངས་དེ་དག་གི་གཉའ་ཤིང་བཅག་སྟེ་བྲན་དུ་བཀོལ་བའི་མི་རྣམས་ཀྱི་ལག་ནས་དེ་རྣམས་སྐྱོབ་དུས་སུ། ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 34:28 དེ་དག་ཡང་བསྐྱར་མི་རྣམས་ཀྱི་བརྔོན་བྱ་རུ་མི་འགྱུར་ལ། ས་གཞིའི་གཅན་གཟན་རྣམས་ཀྱིས་ཀྱང་དེ་མི་བཟའ་བར། དེ་དག་བདེ་བར་གནས་ཤིང་། ཁོ་ཚོར་འཇིགས་སྐུལ་མཁན་སུ་ཡང་མེད་དོ། །
EZE 34:29 འདེབས་འཛུགས་ཀྱིས་མིང་དུ་གྲགས་པའི་གནས་ཤིག་ངས་ཁོ་ཚོའི་ཆེད་དུ་དར་བར་བྱ་ཞིང་། མུ་གེས་ཡུལ་ཁམས་ནང་རོལ་དུ་དེ་དག་ཡང་བསྐྱར་མེད་པར་མི་བཟོ་ལ། ཕྱིན་ཆད་མི་རྣམས་ཀྱི་ངོ་ཚ་ཡང་འཁུར་བར་མི་འགྱུར།
EZE 34:30 དེའི་དུས་སུ་ཁོ་ཚོའི་དཀོན་མཆོག་ཡ་ཝཱེ་ང་རང་ཁོ་ཚོ་དང་མཉམ་དུ་གནས་པ་རྟོགས་ཤིང་། ཡེས་ར་ཨེལ་གྱི་ཁྱིམ་རྒྱུད་ནི་ངའི་མི་ཡིན་པའང་རྟོགས་པར་འགྱུར་རོ་ཞེས་གཙོ་བོ་ཡ་ཝཱེས་གསུངས། །
EZE 34:31 ཁྱོད་ཚོ་མི་རྣམས་ནི་ངའི་ལུག་ཁྱུ་སྟེ་ངའི་རྩྭ་ར་ནང་གི་ལུག་ཁྱུ་ཡིན་ལ། ང་ནི་ཁྱོད་ཅག་གི་དཀོན་མཆོག་ཡིན་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 35:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 35:2 ཀྱེ་མིའི་བུ། ཁྱོད་སེ་ཨིར་རི་བོའི་ཕྱོགས་སུ་འཁོར་ནས་དེ་ལ་རྒོལ་བའི་ལུང་སྟོན་ཅིག
EZE 35:3 ཁྱོད་ཀྱིས་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་སེ་ཨིར་རི་བོ། ལྟོས་དང་། ངས་ཁྱོད་ནི་དགྲ་རུ་འཛིན་ཏེ། ལག་པ་བརྐྱངས་ནས་ཁྱོད་ལ་རྒོལ་བར་འགྱུར་ཞིང་། ཁྱོད་ནི་མི་མེད་ལུང་སྟོང་དུ་ལུས་པར་བྱ།
EZE 35:4 ངས་ཁྱོད་ཀྱི་གྲོང་ཁྱེར་རྣམས་སྟོངས་སུ་བཅུག་ན་ཁྱོད་ནི་ས་སྟོང་དུ་ལུས་ཤིང་། དེའི་དུས་སུ་ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 35:5 གང་ལ་ཞེ་ན། ཁྱོད་ཀྱི་སེམས་སུ་ནམ་ཡང་ཞེ་སྡང་གིས་ཁེངས་པ་ཡིན་ཏེ། ཡེས་ར་ཨེལ་པ་རྣམས་ལ་གནོད་འཚེ་བྱུང་ཞིང་ཉེས་ཆད་ཕོག་ནས་མཐར་སོན་དུས་ཀྱང་། ཁྱོད་ཀྱིས་ད་དུང་དེ་དག་རལ་གྲིའི་འོག་ཏུ་གཏད་པ་ཡིན།
EZE 35:6 དེ་བས་ན་བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ངས་ཁྱོད་ལ་ཁྲག་བཞུར་བའི་ལན་འཇལ་ཞིང་། ཁྲག་དེས་ཁྱོད་ཀྱི་རྗེས་ནས་འདེད་པར་འགྱུར། གང་ལ་ཞེ་ན། ཁྱོད་ཀྱིས་མི་ལ་ཁྲག་བཞུར་དུ་འཇུག་པར་མ་འཛེམས་པས། ཁྲག་གིས་ཁྱོད་འདེད་པར་འགྱུར་ཞེས་གཙོ་བོ་ཡ་ཝཱེས་གསུངས།
EZE 35:7 ངས་སེ་ཨིར་རི་བོ་ནི་ས་སྟོང་ལུང་སྟོང་དུ་འགྱུར་བར་བྱས་ཏེ། གནས་དེ་རྒྱུ་ནས་འགྲོ་འོང་བྱེད་མཁན་དག་ཚར་དུ་གཅོད་པར་བྱའོ། །
EZE 35:8 ཡང་ངས་སེ་ཨིར་རི་བོ་རྣམས་ཀྱི་སྟེང་དུ་བསད་པའི་མི་ཡིས་ཁེངས་པར་བྱ་སྟེ། ཁྱོད་ཀྱི་རི་སྒང་དང་ལུང་པ། གྲོག་ཤུར་བཅས་ཐམས་ཅད་ཀྱི་ནང་དུ་རལ་གྲིས་བསད་པ་རྣམས་འགྱེལ་བར་འགྱུར།
EZE 35:9 ངས་ཁྱོད་ནི་ནམ་ཡང་ས་སྟོང་དུ་ལུས་པར་བྱ་སྟེ། ཁྱོད་ཀྱི་གྲོང་ཁྱེར་རྣམས་སུ་འདུག་མཁན་གཅིག་ཀྱང་མེད་པར་གྱུར་ན། ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 35:10 གང་ལ་ཞེ་ན། ཡ་ཝཱེ་ད་དུང་དེར་བཞུགས་བཞིན་དུ་ཁྱོད་ན་རེ། མི་རིགས་འདི་གཉིས་པོ་དང་ཡུལ་ཁམས་འདི་གཉིས་པོ་ང་ལ་གཏོགས་ཤིང་། དེ་དག་ང་ལ་ས་སྐལ་དུ་འཐོབ་པར་འགྱུར་ཞེས་སྨྲས་པས་སོ། །
EZE 35:11 དེའི་ཕྱིར་བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ཁྱོད་རང་ཞེ་འཁོན་གྱི་དབང་གིས་དེ་དག་ལ་ཁོང་ཁྲོ་ཆེན་པོ་ལངས་པ་དང་ཕྲག་དོག་བྱས་པ་བཞིན་དུ་ངས་ཁྱོད་ལ་ལན་འཇལ་ཞིང་། ངས་ཁྱོད་ལ་ཁྲིམས་གཅོད་པའི་དུས་སུ་དེ་དག་གི་ཁྲོད་དུ་རང་ཉིད་གསལ་པོར་མངོན་ནོ་ཞེས་གཙོ་བོ་ཡ་ཝཱེས་གསུངས།
EZE 35:12 དེ་ནས་ཁྱོད་ཀྱིས་ཡེས་ར་ཨེལ་གྱི་རི་རྣམས་ལ་རྒོལ་བའི་གཏམ་སྨྲས་ཏེ་ན་རེ། རི་འདི་རྣམས་ས་སྟོང་དུ་ལུས་ཤིང་ངེད་ཅག་གིས་མེད་པར་བཟོས་སོ་ཞེས་སྐུར་བ་བཏབ་པ་ཐམས་ཅད་ང་ཡ་ཝཱེས་ཐོས་ཟིན་པ་ཁྱོད་ཀྱིས་རྟོགས་པར་འགྱུར།
EZE 35:13 ཁྱོད་ཚོས་ཁ་ནས་སྒྲོ་འདོགས་ཀྱི་གཏམ་བརྗོད་དེ་ང་ལ་རྒོལ་ཞིང་། གཏམ་མང་པོས་ང་ལ་ངོ་རྒོལ་བྱེད་པ་ངས་ཐོས་བྱུང་།
EZE 35:14 གཙོ་བོ་ཡ་ཝཱེས་འདི་སྐད་དུ། ས་གཞི་ཐམས་ཅད་དགའ་མགུ་རངས་པའི་དུས་སུ་ངས་ཁྱོད་ནི་ས་སྟོང་དུ་ལུས་པར་བྱའོ། །
EZE 35:15 ཡེས་ར་ཨེལ་ཁྱིམ་རྒྱུད་ཀྱི་ས་སྐལ་ས་སྟོང་དུ་ལུས་པའི་རྐྱེན་གྱིས་ཁྱོད་ཅི་ལྟར་དགའ་བ་བཞིན་དུ། ངས་ཀྱང་ཁྱོད་ལ་དེ་ལྟར་ལན་འཇལ་བར་བྱའོ། །ཀྱེ་སེ་ཨིར་རི་བོ། ཁྱོད་དང་ཨེ་དོམ་གྱི་ཡུལ་ཐམས་ཅད་ས་སྟོང་དུ་ལུས་ན། ཁོ་ཚོས་བདག་ནི་དཀོན་མཆོག་ཡ་ཝཱེ་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 36:1 ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་རི་རྣམས་ལ་འདི་ལྟར་ལུང་སྟོན་ཅིག ཀྱེ་ཡེས་ར་ཨེལ་གྱི་རི་རྣམས། ཁྱོད་ཚོས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
EZE 36:2 གཙོ་བོ་ཡ་ཝཱེས་འདི་སྐད་དུ། དགྲ་བོས་ཁྱོད་ལ་རྒོལ་ཞིང་འཕྱས་ཏེ་ན་རེ། ལོ་རྒྱུས་ཧ་ཅང་རིང་བའི་རི་སྒང་དེ་དག་ནི་ངེད་ཅག་ལ་ས་སྐལ་དུ་ཐོབ་པ་ཡིན་ཟེར་བས་ན།
EZE 36:3 ཁྱོད་ཀྱིས་འདི་ལྟར་ལུང་སྟོན་ཅིག གཙོ་བོ་ཡ་ཝཱེས་འདི་སྐད་དུ། ཁྱོད་ཅག་ནི་མི་རིགས་ཀུན་གྱི་ལྷག་ལུས་རྣམས་ལ་ས་སྐལ་དུ་དབང་ནས་མི་རྣམས་ཀྱི་གླེང་མོལ་དང་འཕྱ་དམོད་བྱེད་ཡུལ་དུ་འགྱུར་བའི་ཆེད་དུ། དགྲ་བོས་ཁྱོད་རྣམས་ས་སྟོང་དུ་ལུས་སུ་བཅུག་སྟེ་ཕྱོགས་བཞི་ནས་ཁྱོད་རྣམས་བརྫིས་པའོ། །
EZE 36:4 དེ་བས་ཡེས་ར་ཨེལ་གྱི་རི་རྣམས། ཁྱོད་རྣམས་ཀྱིས་གཙོ་བོ་ཡ་ཝཱེའི་བཀའ་ལ་ཉོན་ཅིག གཙོ་བོ་ཡ་ཝཱེས་འདི་སྐད་དུ། རི་བོ་དང་རི་སྒང་། གྲོག་ཤུར། ལུང་པ། ས་སྟོང་དུ་ལུས་པའི་ཞིག་རལ། དོར་བའི་གྲོང་ཁྱེར་བཅས་པ་སྟེ། མཐའ་འཁོར་གྱི་མི་རིགས་ཀུན་ནས་ལུས་པའི་མི་རྣམས་ཀྱིས་བཅོམ་ཞིང་འཕྱས་པ་དག་ལ་གསུངས་པ་སྟེ།
EZE 36:5 གཙོ་བོ་ཡ་ཝཱེས་འདི་སྐད་དུ། ངས་ཕྲག་དོག་གི་མེ་ལྕེའི་ཁྲོད་ནས་གཏམ་སྨྲས་ཏེ་མི་རིགས་ཀུན་ནས་ལུས་པའི་མི་རྣམས་དང་ཨེ་དོམ་པ་རྣམས་ལ་རྒོལ་བ་དང་། དེ་དག་གི་སེམས་ནི་ཡོངས་སུ་དགའ་ཞིང་སེམས་ལ་ཞེ་སྡང་གིས་ཁེངས་ནས། བཅོམ་ནོར་དུ་ལེན་པའི་ཆེད་དུ་ངའི་ས་ནི་རང་ཉིད་ལ་ས་སྐལ་དུ་བླངས་པའོ། །
EZE 36:6 དེའི་ཕྱིར་ཁྱོད་ཀྱིས་ཡེས་ར་ཨེལ་ལ་ལུང་སྟོན་ཅིག རི་བོ་དང་རི་སྒང་། གྲོག་ཤུར། ལུང་པ་བཅས་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཕྲག་དོག་དང་ཁོང་ཁྲོ་ཆེན་པོའི་ངང་ནས་སྨྲས་པ་ཡིན་ཏེ། གང་ལ་ཞེ་ན། ཁྱོད་ཚོས་མི་ཀུན་གྱི་ངོ་ཚ་ཁུར་བས་སོ། །
EZE 36:7 དེ་བས་གཙོ་བོ་ཡ་ཝཱེས་འདི་སྐད་དུ། ངས་རང་གི་ལག་པ་ཡར་བཀྱགས་ནས་མནའ་བསྐྱལ་བ་སྟེ། ཁྱོད་ཚོའི་མཐའ་འཁོར་གྱི་མི་རིགས་ཀུན་གྱིས་དངོས་སུ་རང་གི་ངོ་ཚ་འཁུར་བར་འགྱུར།
EZE 36:8 ཀྱེ་ཡེས་ར་ཨེལ་གྱི་རི་བོ་རྣམས། ཁྱོད་ཅག་ལ་ཡལ་ག་རྒྱས་ནས་བདག་གི་འབངས་མི་ཡེས་ར་ཨེལ་གྱི་དོན་དུ་འབྲས་བུ་ཐོགས་པར་འགྱུར་རོ། །གང་ལ་ཞེ་ན། དེ་དག་སླེབས་ལ་ཉེ་བས་སོ། །
EZE 36:9 ལྟོས་དང་། ང་ནི་ཁྱོད་ཅག་ལ་རོགས་རམ་བྱེད་མཁན་ཡིན་པས་ང་ཁྱོད་ཀྱི་ཕྱོགས་སུ་འཁོར་ངེས་ཤིང་། མི་ཡིས་ཁྱོད་ཀྱི་སྟེང་དུ་རྨོ་ཞིང་ས་བོན་འདེབས་པར་འགྱུར།
EZE 36:10 ངས་ཡེས་ར་ཨེལ་ཁྱིམ་རྒྱུད་ཡོངས་ཀྱི་མི་གྲངས་ཁྱོད་ཀྱི་སྟེང་དུ་འཕེལ་བར་བྱས་ནས། གྲོང་ཁྱེར་དུ་འདུག་མཁན་ཡོད་པ་དང་། ཞིག་རལ་རྣམས་ཡང་བསྐྱར་བརྩིག་པར་འགྱུར།
EZE 36:11 ངས་མི་ཕྱུགས་གཉིས་ཀ་ཁྱོད་ཀྱི་སྟེང་དུ་འཕེལ་བར་བྱས་ནས། དེ་དག་གི་རྒྱུད་འཕེལ་ཞིང་དར་བར་འགྱུར་ལ། ངས་ཁྱོད་ཅག་ནི་སྔར་བཞིན་འདུག་མཁན་ཡོད་པར་བྱ་སྟེ། ཁྱོད་ཅག་ལ་སྔར་ལས་ཀྱང་བྱིན་རླབས་འཐོབ་པར་འགྱུར། དེ་ནས་ཁྱོད་ཅག་གིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་རོ། །
EZE 36:12 ངས་མི་རྣམས་ཏེ་ངའི་འབངས་མི་ཡེས་ར་ཨེལ་པ་རྣམས་ཁྱོད་ཀྱི་སྟེང་དུ་རྒྱུ་བར་བྱ་ཞིང་། ཁྱོད་ནི་དེ་དག་ལ་ས་སྐལ་དུ་འཐོབ་ཅིང་། ཁྱོད་དེ་དག་གི་ནོར་སྐལ་དུ་གྱུར་ནས་ཕྱིན་ཆད་དེ་དག་གི་བུ་ཕྲུག་འཆོར་བར་མི་བྱའོ་ཞེས་གསུངས་སོ། །
EZE 36:13 ཡང་གཙོ་བོ་ཡ་ཝཱེས་འདི་སྐད་དུ། མི་ཡིས་ཁྱོད་ལ་ཁྱོད་ནི་མི་རྣམས་ཁྱུར་མིད་གཏོང་མཁན་དང་ཁྱོད་ཀྱི་མི་རྣམས་ལ་བུ་ཕྲུག་འཆོར་དུ་འཇུག་མཁན་ཡིན་ཞེས་ཟེར་བས།
EZE 36:14 ད་ནི་ཁྱོད་ཀྱིས་མི་རྣམས་ཁྱུར་མིད་མི་གཏོང་ལ། རང་གི་མི་རྣམས་ལ་བུ་ཕྲུག་འཆོར་དུ་ཡང་མི་འཇུག་གོ་ཞེས་གཙོ་བོ་ཡ་ཝཱེས་གསུངས།
EZE 36:15 རྗེས་སུ་ངས་ཁྱོད་ལ་མི་རིགས་ཀུན་གྱི་ངོ་ཚ་ཐོས་པར་མི་བྱ་སྟེ། མི་ཀུན་གྱི་ངན་སྨྲས་ཀྱང་ཁྱོད་ལ་མི་ཕོག ཁྱོད་ཀྱི་མི་རྣམས་ཡང་བསྐྱར་འགྱེལ་བར་ཡང་མི་བྱའོ་གསུངས་ཞེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 36:16 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 36:17 ཀྱེ་མིའི་བུ། ཡེས་ར་ཨེལ་གྱི་ཁྱིམ་རྒྱུད་རང་གི་ཡུལ་དུ་སྡོད་པའི་དུས་སུ། རང་གི་ལས་དང་སྤྱོད་པས་ཡུལ་དེ་བཙོག་པར་བཟོས་པ་དང་། དེ་དག་གི་ལས་དེ་ནི་ངའི་མདུན་དུ་ཟླ་མཚན་འབབ་བཞིན་པའི་བུད་མེད་དང་འདྲ་བར་མི་གཙང་བ་ཡིན་པས།
EZE 36:18 དེ་དག་གིས་ཡུལ་དེར་མི་ལ་ཁྲག་བཞུར་དུ་བཅུག་པ་དང་། དེ་དག་གིས་རང་གི་ཞེན་ཁ་ལོག་པའི་སྐུ་འདྲ་ཡིས་ཡུལ་དེ་བཙོག་པར་བཟོས་པས། ངས་རང་གི་ཁོང་ཁྲོ་ཆེན་པོ་ཁོ་ཚོའི་སྟེང་དུ་བླུགས་པ་ཡིན།
EZE 36:19 ངས་དེ་དག་མི་རིགས་ཀུན་གྱི་ནང་དུ་གཏོར་ཞིང་ཕྱོགས་བཞིའི་ཡུལ་སོ་སོར་ཐོར་བར་བྱས། ངས་དེ་དག་གི་ལས་དང་སྤྱོད་པ་བཞིན་དུ་ཁོ་ཚོར་ཁྲིམས་བཅད་དོ། །
EZE 36:20 དེ་དག་གང་ས་གང་གི་མི་རིགས་ཁྲོད་དུ་ཕྱིན་པའི་དུས་སུ། ངའི་མཚན་དམ་པ་ཁྱད་དུ་བསད་དོ། །གང་ལ་ཞེ་ན། མི་ཡིས་རྟག་ཏུ་ཁོ་ཚོའི་སྐོར་གླེང་སྟེ་ན་རེ། འདི་དག་ནི་དཀོན་མཆོག་ཡ་ཝཱེའི་མི་ཡིན་ནའང་། ཁོང་གི་ཡུལ་ནས་ཕྱི་རུ་བུད་དོ་ཞེས་སྨྲས་པས་སོ། །
EZE 36:21 ཡིན་ནའང་ཡེས་ར་ཨེལ་གྱི་ཁྱིམ་རྒྱུད་འགྲོ་སའི་མི་རྣམས་ཀྱི་ཁྲོད་དུ་བཙོག་པར་བཟོས་པའི་ངའི་མཚན་དམ་པ་ནི་ངས་གཅེས་སུ་འཛིན་དགོས་སོ། །
EZE 36:22 དེ་བས། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཀྱི་ཆེད་དུ་ངས་དོན་འདི་བྱེད་པ་མ་ཡིན་པར། ངའི་མཚན་དམ་པ་སྟེ་ཁྱོད་ཅག་འགྲོ་སའི་མི་ཀུན་གྱི་ཁྲོད་དུ་ཁྱད་དུ་བསད་པ་དེའི་ཆེད་དུ་བྱེད་པ་ཡིན་ནོ། །
EZE 36:23 ངས་ནི་ང་རང་གི་མཚན་ཆེན་པོ་དེ་དམ་པ་རུ་མངོན་པར་བྱ་སྟེ། མཚན་དེ་ནི་མི་རིགས་ཀུན་གྱི་ཁྲོད་དུ་ཁྱད་དུ་བསད་པ་དང་། ཁྱོད་ཚོས་ཁོ་རྣམས་ཀྱི་ཁྲོད་དུ་ཁྱད་གསོད་བྱས་པ་ཡིན། ངས་ཁྱོད་ཚོའི་སྟེང་དུ་དེ་དག་ལ་རང་ཉིད་དམ་པ་ཡིན་པར་མངོན་པའི་ཚེ། དེ་དག་གིས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་གཙོ་བོ་ཡ་ཝཱེས་གསུངས།
EZE 36:24 ངས་ཁྱོད་རྣམས་མི་རིགས་ཀུན་ལས་ཕྱི་རུ་ཁྲིད་འོང་ཞིང་། ཡུལ་ཁམས་ཀུན་ལས་ཁྱོད་རྣམས་བསྡུས་ཏེ་ཁྱོད་རྣམས་རང་ཡུལ་དུ་འཁྲིད་པར་བྱའོ། །
EZE 36:25 དེ་ནས་ངས་ཆུ་དྭངས་གཙང་ཁྱོད་ཀྱི་སྟེང་དུ་གཏོར་ན་ཁྱོད་རྣམས་གཙང་མར་འགྱུར་ཞིང་། ངས་ཁྱོད་ཚོའི་མི་གཙང་བ་ཐམས་ཅད་གཙང་མར་བྱས་ཏེ་ཁྱོད་རྣམས་རང་གི་ཞེན་ཁ་ལོག་པའི་སྐུ་འདྲ་ཐམས་ཅད་དང་འབྲལ་བར་འགྱུར།
EZE 36:26 ངས་སེམས་གསར་པ་ཞིག་ཁྱོད་རྣམས་ལ་གནང་སྟེ། སེམས་ཉིད་གསར་པ་ཞིག་ཁྱོད་ཀྱི་ནང་དུ་འཇོག་པར་བྱ། ངས་ཁྱོད་ཅག་གི་ལུས་ནས་རྡོ་ལྟ་བུའི་སེམས་དེ་འདོན་ཞིང་ཤ་ཡི་སྙིང་ཞིག་ཁྱོད་རྣམས་ལ་གནང་བར་བྱའོ། །
EZE 36:27 ཡང་ངས་རང་གི་སེམས་ཉིད་ཁྱོད་ཚོའི་ནང་དུ་བཞག་སྟེ། ཁྱོད་ཚོར་ངའི་སྒྲིག་ཁྲིམས་རྣམས་བརྩི་བ་དང་ངའི་སྒྲིག་སྲོལ་རྣམས་བསྲུང་བར་འཇུག་གོ །
EZE 36:28 ཁྱོད་རྣམས་ནི་ངས་ཁྱོད་ཚོའི་ཕ་མེས་དག་ལ་གནང་བའི་ཡུལ་དུ་གནས་པར་འགྱུར་ཞིང་། ཁྱོད་རྣམས་ནི་ངའི་མི་དང་ང་ནི་ཁྱོད་ཚོའི་དཀོན་མཆོག་ཡིན་ནོ། །
EZE 36:29 ངས་ཁྱོད་རྣམས་བསྐྱབས་ཏེ་ཁྱོད་རྣམས་རང་གི་མི་གཙང་བ་ཐམས་ཅད་དང་འབྲལ་བར་བྱ་ཞིང་། ངས་འབྲུ་རིགས་སྣ་ལྔའི་ལོ་ལེགས་ཡོང་བར་བཅུག་སྟེ། ཁྱོད་རྣམས་ལ་མུ་གེ་འབྱུང་བར་མི་བྱའོ། །
EZE 36:30 ཁྱོད་རྣམས་ལ་མི་རིགས་ཀུན་གྱི་ཁྲོད་དུ་མུ་གེའི་རྐྱེན་གྱིས་ངོ་ཚ་མི་ཐེབས་པའི་ཆེད་དུ། ངས་ལྗོན་ཤིང་གི་ཤིང་ཏོག་དང་ས་ཞིང་གི་ཐོན་རྫས་རྣམས་མང་དུ་འཕེལ་བར་བྱའོ། །
EZE 36:31 དེའི་དུས་སུ་ཁྱོད་ཚོས་རང་གི་སྤྱོད་ངན་དང་ལས་ངན་པ་དག་དྲན་ཞིང་། རང་གི་སྡིག་ཉེས་དང་ཞེན་ཁ་ལོག་པའི་དོན་རྣམས་ཀྱི་རྐྱེན་གྱིས་རང་ཉིད་ལ་ཞེན་ཁ་ལོག་པར་འགྱུར་རོ། །
EZE 36:32 ངས་འདི་བཞིན་བྱེད་པ་ནི་ཁྱོད་ཚོའི་དོན་དུ་མ་ཡིན་པ་ཁྱོད་རྣམས་ཀྱིས་རྟོགས་པར་གྱིས་ཤིག ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཚོ་རང་གི་སྤྱོད་པའི་རྐྱེན་གྱིས་རབ་ཏུ་ངོ་ཚ་བར་གྱིས་ཤིག་ཅེས་གཙོ་བོ་ཡ་ཝཱེས་གསུངས་སོ། །
EZE 36:33 ཡང་གཙོ་བོ་ཡ་ཝཱེས་འདི་སྐད་དུ། ངས་ཁྱོད་རྣམས་གཙང་མར་བྱས་ཏེ་ཁྱོད་རྣམས་རང་གི་སྡིག་ཉེས་ཀུན་དང་འབྲལ་བར་བྱ་བའི་ཉིན་མོར། ངས་གྲོང་ཁྱེར་རྣམས་སུ་མི་སྡོད་དུ་འཇུག་ཅིང་ཞིག་རལ་རྣམས་ཡང་བསྐྱར་བརྩིག་པར་བྱའོ། །
EZE 36:34 སྔར་དེ་བརྒྱུད་ནས་འགྲོ་མཁན་ཀུན་གྱིས་ས་སྟོང་དུ་བརྩིས་པའི་གནས་སུ་ད་ལྟ་ཡང་བསྐྱར་ཞིང་རྨོ་བར་འགྱུར་ལ།
EZE 36:35 ཁོ་ཚོས་འདི་ལྟར། སྔར་ས་སྟོང་དུ་ལུས་པའི་གནས་དེ་ནི་ད་ལྟ་ཨེ་དེན་ལྡུམ་ར་དང་འདྲ་ཞིང་། དོར་ནས་ས་སྟོང་དུ་ལུས་པ་དང་། བཤིག་ཚར་བའི་གྲོང་ཁྱེར་དག་ནི་ད་ལྟ་མཁར་བརྟན་པོར་གྱུར་ནས་འདུག་མཁན་ཡང་ཡོད་ཅེས་ཟེར་བའོ། །
EZE 36:36 དེའི་དུས་སུ་ཁྱོད་ཀྱི་ཕྱོགས་བཞིར་ལུས་པའི་མི་རིགས་ཀུན་གྱིས་ང་ནི་ཡ་ཝཱེ་ཡིན་པ་རྟོགས་ངེས་ཤིང་། བཤིག་ཚར་བའི་གནས་ནི་ངས་ཡང་བསྐྱར་བརྩིགས་པ་དང་། ས་སྟོང་དུ་ལུས་པའི་གནས་སུ་ཡང་བསྐྱར་འདེབས་འཛུགས་བྱས་པའང་རྟོགས་པར་འགྱུར། ང་ཡ་ཝཱེས་དེ་ལྟར་སྨྲས་པས་མཛད་པར་འགྱུར་རོ། །
EZE 36:37 ཡང་གཙོ་བོ་ཡ་ཝཱེས་འདི་སྐད་དུ། ངས་ཡེས་ར་ཨེལ་གྱི་ཁྱིམ་རྒྱུད་རྣམས་ལ་ཁོ་ཚོའི་མི་ནི་ལུག་ཁྱུ་བཞིན་དུ་སྤེལ་བའི་ཕྱིར་ང་ལ་ཞུས་ཆོག་པར་བྱའོ། །
EZE 36:38 དུས་ཆེན་གཏོང་བའི་དུས་སུ་ཡེ་རུ་སཱ་ལེམ་དུ་མཆོད་པར་འབུལ་བའི་ལུག་ཁྱུ་གང་འདྲ་མང་པོ་ཡོད་པ་ཡིན་ན། ཐང་རྒོད་དུ་ལུས་པའི་གྲོང་ཁྱེར་ནང་དུའང་དེ་བཞིན་དུ་མི་ཡིས་ཁེངས་པར་འགྱུར་ལ། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་པའོ་ཞེས་གསུངས་སོ། །
EZE 37:1 དཀོན་མཆོག་ཡ་ཝཱེའི་ཕྱག་ནི་ངའི་སྟེང་དུ་བཞག་སྟེ། ཁོང་གིས་ཉིད་ཀྱི་ཐུགས་ཉིད་ཀྱིས་ང་རང་ཕྱི་རུ་ཁྲིད་དེ། ང་རང་ཀེང་རུས་ཀྱིས་ཁེངས་པའི་ཐང་ཞིག་ཏུ་བཞག་གོ །
EZE 37:2 ཁོང་གིས་ང་ཁྲིད་ནས་ཀེང་རུས་ཀྱི་ཕྱོགས་བཞི་རུ་ཕྱིན་པ་དང་། ཐང་དེ་རུ་ཀེང་རུས་ཤིན་ཏུ་མང་པོ་ཡོད་པ་ངས་མཐོང་སྟེ། རུས་པ་དེ་དག་ཤིན་ཏུ་སྐམ་པོ་ཡིན་ནོ། །
EZE 37:3 དེ་ནས་ཁོང་གིས་ང་ལ་འདི་སྐད་དུ། ཀྱེ་མིའི་བུ། ཀེང་རུས་འདི་དག་གསོན་པོར་འགྱུར་སྲིད་དམ་ཞེས་བཀའ་འདྲི་གནང་བའི་ལན་དུ། ངས་གཙོ་བོ་ཡ་ཝཱེ་ལགས། ཁྱེད་ཀྱིས་མཁྱེན་ནོ་ཞེས་ཞུས།
EZE 37:4 ཡང་ཁོང་གིས་ང་ལ་འདི་སྐད་དུ། ཁྱོད་ཀྱིས་ཀེང་རུས་འདི་དག་ལ་འདི་ལྟར་སྨྲོས་ཤིག ཀྱེ་ཀེང་རུས་སྐམ་པོ་རྣམས། ཁྱོད་ཚོས་དཀོན་མཆོག་ཡ་ཝཱེའི་བཀའ་ལ་ཉོན་ཅིག
EZE 37:5 གཙོ་བོ་ཡ་ཝཱེས་ཀེང་རུས་འདི་དག་ལ་འདི་སྐད་དུ། ལྟོས་དང་། ངས་ཁྱོད་ཚོའི་ནང་དུ་དབུགས་ བཏང་ན་ཁྱོད་རྣམས་གསོན་པར་འགྱུར་ཞིང་།
EZE 37:6 ངས་ཁྱོད་རྣམས་ལ་ཤ་དང་རྩ་རྒྱུས་སྐྱེ་རུ་བཅུག་ནས། ཁྱོད་རྣམས་སྐྱི་མོས་གཡོགས་ཏེ་ཁྱོད་ཚོའི་ནང་དུ་དབུགས་བཏང་ན་ཁྱོད་རྣམས་གསོན་པར་འགྱུར་ལ། དེ་ནས་ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་པའོ་ཞེས་གསུངས་སོ། །
EZE 37:7 དེ་ནས་ངས་བཀའ་བཞིན་དུ་ལུང་བསྟན་ཅིང་། ངས་ལུང་སྟོན་བཞིན་པའི་དུས་སུ་སྒྲ་ཞིག་གྲགས་པ་ཐོས་བྱུང་། དེ་ནི་རུས་པ་དང་རུས་པ་ཕན་ཚུན་འབྲེལ་བའི་སྒྲ་རེད།
EZE 37:8 ངས་བལྟས་པ་ན། རུས་པར་རྩ་རྒྱུས་སྐྱེས་ནས་ཤ་རྒྱས་པ་དང་། སྐྱི་མོས་དེ་གཡོགས་ཡོད་ཀྱང་། དེ་དག་གི་ནང་དུ་ད་དུང་དབུགས་ནི་མེད་དོ། །
EZE 37:9 ཡང་ཁོང་གིས་ང་ལ་འདི་སྐད་དུ། ཁྱོད་ཀྱིས་དབུགས་ལ་ལུང་སྟོན་ཅིག ཀྱེ་མིའི་བུ། ཁྱོད་ཀྱིས་ལུང་སྟོན་ཅིག ཁྱོད་ཀྱིས་དབུགས་ལ་འདི་ལྟར་སྨྲོས་ཤིག ཀྱེ་དབུགས་ཁྱོད་ནི་ཕྱོགས་བཞི་ནས་ཚུར་ཤོག་དང་། བསད་པའི་མི་འདི་དག་ལ་དབུགས་བཏང་ནས་དེ་རྣམས་གསོན་པར་གྱིས་ཤིག་ཅེས་པའོ་ཞེས་གཙོ་བོ་ཡ་ཝཱེས་གསུངས་སོ། །
EZE 37:10 དེ་ནས་ངས་བཀའ་བཞིན་དུ་ལུང་བསྟན་པ་ན། དབུགས་ནི་བེམ་པོ་རྣམས་ཀྱི་ནང་དུ་ཞུགས་ནས་དེ་དག་གསོན་པར་གྱུར་ཏེ་ཡར་ལངས་ནས་དཔུང་ཚོགས་རབ་ཏུ་ཆེན་པོ་ཞིག་ཏུ་གྱུར་ཏོ། །
EZE 37:11 ཁོང་གིས་ང་ལ་འདི་སྐད་དུ། ཀྱེ་མིའི་བུ། ཀེང་རུས་འདི་དག་ནི་ཡེས་ར་ཨེལ་གྱི་ཁྱིམ་རྒྱུད་རྣམས་ཡིན་ཏེ། ཁོ་ཚོས་རྒྱུན་དུ་ན་རེ། ལྟོས་དང་། ང་ཚོའི་ཀེང་རུས་ནི་ཡོངས་སུ་སྐམ་ཞིང་རེ་བ་རྣམས་ཟད་དེ། ངེད་རྣམས་མེད་པར་གྱུར་ཏོ་ཟེར་བས།
EZE 37:12 ཁྱོད་ཀྱིས་དེ་ཚོར་འདི་ལྟར་ལུང་སྟོན་ཅིག གཙོ་བོ་ཡ་ཝཱེས་འདི་སྐད་དུ། ཀྱེ་བདག་གི་འབངས་མི་རྣམས། ལྟོས་དང་། ངས་ཁྱོད་ཚོའི་དུར་ཁུང་ཕྱེས་ཏེ་ཁྱོད་རྣམས་དུར་ཁུང་ནས་ཕྱི་རུ་བཏོན་ཏེ། ཕྱིར་ཡེས་ར་ཨེལ་ཡུལ་དུ་འཁྲིད་པར་བྱའོ། །
EZE 37:13 ཀྱེ་བདག་གི་འབངས་མི་རྣམས། ངས་ཁྱོད་ཚོའི་དུར་ཁུང་ཕྱེས་ཏེ་ཁྱོད་རྣམས་དུར་ཁུང་ནས་ཕྱི་རུ་འདོན་པའི་སྐབས་སུ། ཁྱོད་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 37:14 ངས་རང་གི་སེམས་ཉིད་ཁྱོད་ཚོའི་ནང་དུ་བཞག་ནས་ཁྱོད་རྣམས་གསོན་པར་འགྱུར་ཞིང་། ངས་ཁྱོད་རྣམས་རང་གི་ཡུལ་དུ་འཇོག་པར་བྱ། དེ་ནས་ཁྱོད་ཚོས་ང་ཡ་ཝཱེས་སྨྲས་པ་དེ་འགྲུབ་པར་བྱེད་པ་རྟོགས་སོ་ཞེས་དཀོན་མཆོག་ཡ་ཝཱེས་དེ་སྐད་གསུངས་ཞེས་པའོ་ཞེས་གསུངས་སོ། །
EZE 37:15 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 37:16 ཀྱེ་མིའི་བུ། ཁྱོད་ཀྱིས་དབྱུག་པ་ཞིག་བླངས་ནས་དེའི་སྟེང་དུ། ཡ་ཧུ་དཱ་དང་དེ་དང་མཉམ་དུ་ཡོད་པའི་ཡེས་ར་ཨེལ་པ་རྣམས་ཀྱི་ཕྱིར་ཞེས་ཕྲིས་ཤིག ཡང་དབྱུག་པ་གཞན་ཞིག་བླངས་ཏེ་དེའི་སྟེང་དུ་ཨེ་ཕཱར་ཡིམ་གྱི་དབྱུག་པ་སྟེ། ཡོ་སེབ་དང་དེའི་མཉམ་དུ་ཡོད་པའི་ཡེས་ར་ཨེལ་གྱི་ཁྱིམ་རྒྱུད་ཡོངས་ཀྱི་ཕྱིར་ཞེས་ཕྲིས་ཤིག
EZE 37:17 ཁྱོད་ཀྱིས་དབྱུག་པ་འདི་གཉིས་མཉམ་དུ་སྦྲེལ་ནས་དེ་གཉིས་ཁྱོད་ཀྱི་ལག་ཏུ་དབྱུག་པ་གཅིག་ཏུ་འགྱུར་བར་གྱིས་དང་།
EZE 37:18 གལ་ཏེ་ཁྱོད་ཀྱི་མི་རྣམས་ཀྱིས་ཁྱོད་ལ། ཁྱོད་ཀྱིས་ངེད་རྣམས་ལ་དབྱུག་པ་འདིས་ཅི་མཚོན་པ་མི་བཤད་དམ་ཞེས་དྲིས་ན།
EZE 37:19 ཁྱོད་ཀྱིས་ཁོ་ཚོར་འདི་ལྟར། གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཨེ་ཕཱར་ཡིམ་གྱི་ལག་ཏུ་ཡོད་པའི་དབྱུག་པ་སྟེ། ཡོ་སེབ་དང་དེ་དང་མཉམ་དུ་ཡོད་པའི་ཡེས་ར་ཨེལ་གྱི་ཚོ་པ་རྣམས་ཀྱི་དབྱུག་པ་དེ་ནི་ཨེ་ཕཱར་ཡིམ་གྱི་ལག་ཏུ་ཡོད་པའི་དབྱུག་པ་སྟེ་ཡ་ཧུ་དཱའི་དབྱུག་པ་དང་མཉམ་དུ་སྦྲེལ་ནས། ངའི་ལག་ཏུ་དེ་གཉིས་ཀ་གཅིག་ཏུ་འགྱུར་བར་བྱའོ་ཞེས་སྨྲོས་ཤིག
EZE 37:20 ཁྱོད་ཀྱིས་ཡི་གེ་བྲིས་ཡོད་པའི་དབྱུག་པ་དེ་གཉིས་ནི་ཁོ་ཚོའི་མིག་མདུན་དུ་ལག་ལ་བཟུང་ནས།
EZE 37:21 ཁོ་ཚོར་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ལྟོས་དང་། ངས་ཡེས་ར་ཨེལ་པ་རྣམས་དེ་དག་འགྲོ་སའི་མི་རིགས་ཀུན་ནས་ཕྱི་རུ་ཁྲིད་འོང་དགོས་ལ། ཡང་དེ་རྣམས་ཕྱོགས་བཞི་ནས་བསྡུས་ཏེ་ཁོ་ཚོ་རང་གི་ཡུལ་དུ་ཁྲིད་འོང་བར་བྱའོ། །
EZE 37:22 ངས་ཁོ་ཚོ་ཡུལ་དེ་རུ་ཡེས་ར་ཨེལ་གྱི་རི་བོ་རྣམས་སུ་རྒྱལ་ཁབ་གཅིག་ཏུ་བྱས་ཏེ། རྒྱལ་པོ་གཅིག་གིས་ཁོ་ཚོ་ཚང་མར་དབང་བསྒྱུར་བར་འགྱུར་བས། དེ་དག་ནམ་ཡང་རྒྱལ་ཁབ་གཉིས་སུ་མི་འགྱུར་ལ། ཡུལ་ཁམས་གཉིས་སུ་དབྱེ་བར་མི་འགྱུར་རོ། །
EZE 37:23 ཡང་དེ་རྣམས་ཀྱིས་རང་གི་སྐུ་འདྲ་རྣམས་དང་ཞེན་ཁ་ལོག་པའི་གཟུགས་བརྙན་དང་། ཉེས་སྐྱོན་གང་གིས་ཀྱང་རང་ཉིད་བཙོག་པར་མི་བྱ་སྟེ། ངས་དེ་དག་སྡིག་པ་སྤྱད་པའི་གནས་ཀུན་ནས་སྐྱོབ་ཅིང་ངས་དེ་དག་གཙང་མར་བཟོས་ནས། དེ་དག་ངའི་འབངས་མི་དང་ང་རང་དེ་དག་གི་དཀོན་མཆོག་ཏུ་འགྱུར་རོ། །
EZE 37:24 ངའི་ཞབས་ཕྱི་དཱ་བིད་ནི་ཁོ་ཚོའི་རྒྱལ་པོར་འགྱུར་ཞིང་། དེ་ཐམས་ཅད་ལ་རྫི་བོ་གཅིག་ཁོ་ན་ཡོད་པ་དང་། ཡང་དེ་དག་གིས་ངའི་སྒྲིག་སྲོལ་བརྩི་ཞིང་། ངའི་ཁྲིམས་སྲོལ་རྣམས་བསྲུང་བར་འགྱུར།
EZE 37:25 ངས་རང་གི་ཞབས་ཕྱི་ཡ་ཀོབ་ལ་གནང་བའི་ཡུལ་ཏེ་ཁྱོད་ཅག་གི་ཕ་མེས་རྣམས་བསྡད་པའི་ཡུལ་དུ་ཁོ་རྣམས་སྡོད་པར་འགྱུར། དེ་དག་དང་དེ་དག་གི་བུ་རྒྱུད་རྣམས་དང་། བུ་རྒྱུད་ཀྱི་བུ་རྒྱུད་རྣམས་དུས་གཏན་དུ་དེ་རུ་གནས་པར་འགྱུར་ཞིང་། ངའི་ཞབས་ཕྱི་དཱ་བིད་ནི་དུས་གཏན་དུ་དེ་དག་གི་འགོ་དཔོན་དུ་འགྱུར་རོ། །
EZE 37:26 ངས་དེ་དག་ལ་ཞི་བདེའི་ཁ་ཆད་ཅིག་འཇོག་པར་བྱ་སྟེ། དེ་ནི་དུས་གཏན་གྱི་ཁ་ཆད་ཅིག་ཡིན། ངས་དེ་དག་བརྟན་པོར་བཙུགས་ནས་ཁོ་ཚོའི་མི་གྲངས་འཕེལ་དུ་འཇུག་ཅིང་། ཡང་དེ་དག་གི་དབུས་སུ་ངའི་གནས་དམ་པ་ནི་དུས་གཏན་དུ་འཛུགས་པར་བྱའོ། །
EZE 37:27 ངའི་བཞུགས་གནས་ཀྱང་དེ་དག་གི་ཁྲོད་དུ་ཡོད་ཅིང་། ང་ནི་དེ་དག་གི་དཀོན་མཆོག་དང་དེ་དག་ངའི་འབངས་མི་རུ་འགྱུར་རོ། །
EZE 37:28 ངའི་གནས་དམ་པ་དེ་དུས་གཏན་དུ་ཁོ་ཚོའི་དཀྱིལ་དུ་ཡོད་པ་དང་། མི་རིགས་ཀུན་གྱིས་བདག་ནི་ཡ་ཝཱེ་ཡིན་པ་དང་། ཡེས་ར་ཨེལ་དམ་པར་མཛད་མཁན་ཡིན་པ་རྟོགས་པར་འགྱུར་གསུངས་ཞེས་པའོ་ཞེས་གསུངས་སོ། །
EZE 38:1 དེ་ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
EZE 38:2 ཀྱེ་མིའི་བུ། ཁྱོད་ཀྱིས་མ་གཱོག་ཡུལ་གྱི་གཱོག་ཅེས་པ་སྟེ། རའོ་ཤ་དང་མེ་ཤེག ཐུ་བཱལ་བཅས་ཀྱི་འགོ་དཔོན་ ཕྱོགས་སུ་འཁོར་ནས་དེར་རྒོལ་བའི་ལུང་སྟོན་ཅིག
EZE 38:3 གཙོ་བོ་ཡ་ཝཱེས་འདི་སྐད་དུ། ཀྱེ་རའོ་ཤ་དང་མེ་ཤེག་དང་ཐུ་བཱལ་བཅས་ཀྱི་འགོ་དཔོན་གཱོག་ ལགས། ལྟོས་དང་། ངས་ཁྱོད་ནི་དགྲ་རུ་འཛིན་ཞིང་།
EZE 38:4 ངས་ཁྱོད་བཟློགས་ཏེ་ཁྱོད་ཀྱི་འགྲམ་པ་གཉིས་ལ་ལྕགས་ཀྱུ་བརྒྱབ་ནས། ཁྱོད་དང་ཁྱོད་ཀྱི་དམག་དཔུང་དང་། རྟ་དང་རྟ་དམག་རྣམས་ཕྱི་རུ་ཁྲིད་འོང་ཞིང་། ཀུན་གྱིས་དམག་ཆས་ཆ་ཚང་གྱོན་པས་དཔུང་ཚོགས་ཆེན་པོ་ཞིག་ཏུ་གྱུར་ཏེ་ཕུབ་ཆེ་ཆུང་གཉིས་ཀ་ཡོད་པ་དང་། མི་རེ་རེའི་ལག་ཏུ་རལ་གྲི་བཟུང་ཡོད་པ་ཡིན།
EZE 38:5 ད་དུང་ཏ་ཟིག་པ་དང་གུ་ཤ་པ། ཕུ༌ཏཱ་པ་བཅས་ཡོད་དེ། མི་རེ་རེའི་ལག་ཏུ་ཕུབ་ཐོགས་ཤིང་མགོ་ལ་རྨོག་ཞྭ་གྱོན་ཡོད་པ་ཡིན།
EZE 38:6 ཡང་གོ་མེར་པ་དང་དེའི་དམག་དཔུང་ཀུན་དང་། བྱང་ཕྱོགས་རྒྱང་རིང་ཡུལ་གྱི་པེད་ཐོ་གར་མཱའི་མི་རིགས་དང་དེའི་དམག་དཔུང་ཐམས་ཅད་དེ་རྒྱལ་ཁབ་མང་པོའི་མི་རྣམས་ཁྱོད་དང་མཉམ་དུ་ཡོད་དོ། །
EZE 38:7 ཁྱོད་དང་ཁྱོད་ཀྱི་མདུན་དུ་འདུས་པའི་དམག་དཔུང་ཀུན་པོས་སྟ་གོན་ལེགས་པོ་བྱེད་དགོས་ལ། ཁྱོད་རང་ཉིད་ཀྱིས་ཀྱང་སྟ་གོན་ལེགས་པོ་བྱས་ནས་ཁྱོད་ནི་དེ་དག་གི་དམག་དཔོན་བྱེད་དགོས།
EZE 38:8 ཉིན་མང་པོ་འགོར་རྗེས་ཁྱོད་ནི་གཡུལ་སར་མངགས་ཏེ། མ་འོངས་པའི་ལོ་ཟླའི་ནང་དུ་ཁྱོད་ཀྱིས་རལ་གྲི་ལས་ཐར་ཞིང་ཡུལ་ཁམས་སོ་སོ་ནས་ཕྱིར་བླངས་པའི་ཡུལ་ཏེ། ཡེས་ར་ཨེལ་གྱི་ཡུན་རིང་པོར་ས་སྟོང་དུ་ལུས་པའི་རི་ལ་འཐབ་ངེས་ཡིན། ཡིན་ནའང་རྒྱལ་ཁབ་སོ་སོ་ནས་བསྡུས་འོངས་པ་ཐམས་ཅད་དེའི་སྟེང་དུ་བདེ་བར་གནས་པའོ། །
EZE 38:9 ཁྱོད་དང་ཁྱོད་ཀྱི་དམག་དཔུང་ཀུན་པོ་ཁྱོད་དང་མཉམ་དུ་ཡོད་པའི་མི་རིགས་མང་པོ་དང་བཅས་རླུང་འཚུབ་བཞིན་ཡར་འོངས་ནས་སྤྲིན་ནག་བཞིན་ས་སྟེང་འགེབ་པར་འགྱུར་རོ། །
EZE 38:10 གཙོ་བོ་ཡ་ཝཱེས་འདི་སྐད་དུ། དུས་དེར་ཁྱོད་ཀྱི་སེམས་སུ་ལྐོག་ཇུས་འདིང་བར་བསམ་ཞིང་ན་རེ།
EZE 38:11 ང་ཡར་ལྕགས་རི་མེད་པའི་གྲོང་སྡེ་ལ་རྒོལ་བར་འགྲོ་དགོས། ང་འོངས་ནས་ལྷིང་འཇགས་ངང་འཚོ་བའི་མི་ལ་རྒོལ་བར་བྱ། དེ་ཐམས་ཅད་བདེ་བར་སྡོད་ཅིང་ལྕགས་རི་མེད་ལ། སྒོ་གཏན་ཡང་མེད་དོ་ཞེས་སྨྲ་བར་འགྱུར།
EZE 38:12 དེ་ནས་ཁྱོད་ཀྱིས་རྒྱུ་ནོར་ཕྲོགས་ནས་དངོས་པོ་རྣམས་བཅོམ་ཏེ། སྔར་ས་སྟོང་དུ་གྱུར་པ་དང་ད་ལྟ་འདུག་མཁན་ཡོད་པའི་གནས་དེ་ལ་ལག་པ་བརྐྱངས་ནས་རྒོལ་བར་འགྱུར་ཞིང་། ཡུལ་ཁམས་སོ་སོ་ནས་བསྡུས་པ་དང་། ཕྱུགས་དང་རྒྱུ་ནོར་ཐོབ་ནས་ས་གཞིའི་ལྟེ་བར་གནས་པའི་མི་རྣམས་ལ་རྒོལ་བར་འགྱུར།
EZE 38:13 ཤེ་བཱ་པ་དང་དི་དན་པ། ཐཱར་ཞིས་ཀྱི་ཚོང་པ། ཐཱར་ཞིས་ཀྱི་འགོ་དཔོན་བཅས་ཀྱིས་ཁྱོད་ལ། ཁྱོད་ནི་རྒྱུ་ནོར་འཕྲོག་ཏུ་འོངས་པ་ཡིན་ནམ། ཁྱོད་ཀྱིས་དམག་དཔུང་བསྡུས་པ་ནི་དངོས་པོ་རྣམས་འཕྲོག་བཅོམ་བྱེད་པ་དང་། གསེར་དངུལ་འཁྱེར་བ། ཕྱུགས་དང་ནོར་རྫས་འཕྲོག་པ། འཕྲོག་བཅོམ་ཆེན་པོ་ཞིག་བྱེད་པའི་ཆེད་དུ་ཡིན་ནམ་ཞེས་འདྲི་བར་འགྱུར་རོ། །
EZE 38:14 དེ་བས། ཀྱེ་མིའི་བུ། ཁྱོད་ཀྱིས་གཱོག་ལ་འདི་ལྟར་ལུང་སྟོན་ཅིག གཙོ་བོ་ཡ་ཝཱེས་འདི་སྐད་དུ། ངའི་འབངས་མི་ཡེས་ར་ཨེལ་བདེ་བར་སྡོད་པའི་ཉིན་དེ་སླེབས་ཚེ་ཁྱོད་ཀྱིས་གཟབ་གཟབ་མི་བྱའམ།
EZE 38:15 ཁྱོད་ནི་རང་གི་ཡུལ་ཏེ་བྱང་ཕྱོགས་ཀྱི་ས་མཐའ་ནས་མི་རིགས་མང་པོ་དང་མཉམ་དུ་འོང་བ་སྟེ། ཐམས་ཅད་རྟ་ལ་ཞོན་ནས་སྟོབས་ཤུགས་ཅན་གྱི་དམག་དཔུང་ཆེན་པོ་ཞིག་ཏུ་འགྱུར་ཞིང་།
EZE 38:16 ཡུལ་དེར་སྤྲིན་ནག་འཐིབས་པ་བཞིན་དུ། ཁྱོད་ཡར་འོངས་ཏེ་ངའི་འབངས་མི་ཡེས་ར་ཨེལ་ལ་རྒོལ་བར་འགྱུར། ཀྱེ་གཱོག་ལགས། ང་རང་ཁྱོད་བརྒྱུད་དེ་ཁོ་ཚོར་དམ་པར་མངོན་པའི་དུས་སུ་དེ་དག་གིས་བདག་ངོ་ཤེས་པའི་ཆེད་དུ། མཐའ་མའི་ཉིན་མོ་དག་ལ་ངས་ཁྱོད་ཁྲིད་འོངས་ནས་ངའི་ཡུལ་ལ་རྒོལ་བར་འཇུག་གོ །
EZE 38:17 གཙོ་བོ་ཡ་ཝཱེས་འདི་སྐད་དུ། ངས་སྔར་རང་གི་ཞབས་ཕྱི་སྟེ་ཡེས་ར་ཨེལ་གྱི་ལུང་སྟོན་པ་རྣམས་བརྒྱུད་ནས་སྨྲས་པའི་མི་དེ་ནི་ཁྱོད་རང་མ་ཡིན་ནམ། ལོ་དེ་དག་གི་ནང་དུ། ངས་ཁྱོད་ཁྲིད་འོངས་ཏེ་ཡེས་ར་ཨེལ་ལ་རྒོལ་ངེས་ཡིན་ཞེས་ཁོ་ཚོས་ལུང་བསྟན་པ་དང་།
EZE 38:18 གཱོག་ནི་ཡེས་ར་ཨེལ་ལ་རྒོལ་དུ་འོང་བའི་དུས་སུ། ངའི་ཁོང་ཁྲོ་ནི་རང་གི་གདོང་ནས་ཕྱིར་མངོན་པར་འགྱུར་ཞེས་གཙོ་བོ་ཡ་ཝཱེས་གསུངས།
EZE 38:19 ངས་ཞེ་སྡང་དང་ཁོང་ཁྲོའི་ངང་ནས་འདི་སྐད་དུ། ཉིན་དེར་སླེབས་ཚེ་ཡེས་ར་ཨེལ་ལ་ས་འགུལ་ཆེན་པོ་ཞིག་འབྱུང་ཞིང་།
EZE 38:20 རྒྱ་མཚོ་ནང་གི་ཉ་དང་། ནམ་མཁའི་བྱ་དང་། ཐང་གི་རི་དྭགས་དང་། ས་ཡི་ལྟོ་འགྲོ་འབུ་སྲིན་སྣ་ཚོགས་དང་། ད་དུང་ས་གཞི་སྟེང་གི་མི་ཐམས་ཅད་ངའི་མདུན་དུ་འདར་ཞིང་། རི་རྣམས་བསྙིལ་ནས་བྲག་གཟར་རྣམས་བརྡིབ་ཅིང་། རྩིག་པ་ཐམས་ཅད་སར་འགྱེལ་བར་འགྱུར།
EZE 38:21 ངས་རལ་གྲིར་བསྐུལ་ནས་ངའི་རི་རྣམས་ཀྱི་སྟེང་དུ་གཱོག་ལ་རྒོལ་བར་འགྱུར་ཞིང་། མི་རེ་རེའི་རལ་གྲིས་རང་གི་སྤུན་ཟླར་རྒོལ་བར་འགྱུར་ཞེས་གཙོ་བོ་ཡ་ཝཱེས་གསུངས།
EZE 38:22 ཡང་ངས་རིམས་ནད་དང་ཁྲག་གི་སྒོ་ནས་དེ་ལ་ཉེས་ཆད་གཅོད་ཅིང་། ངས་དྲག་ཆར་དང་སེར་བ་ཆེན་པོ་དང་། མེ་དང་མུ་ཟི་ནི་དེ་དང་དེའི་དམག་དཔུང་དང་། ད་དུང་དེ་དང་མཉམ་དུ་ཡོད་པའི་མི་རིགས་རྣམས་ཀྱི་སྟེང་དུ་འབབ་བར་བྱ་སྟེ།
EZE 38:23 ངས་རང་ཉིད་ཆེན་པོ་དང་དམ་པར་མངོན་ཞིང་། མི་རིགས་མང་པོའི་མདུན་དུ་རང་ཉིད་མངོན་པར་འགྱུར་ལ། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར་ཞེས་པའོ་ཞེས་གསུངས་སོ། །
EZE 39:1 ཀྱེ་མིའི་བུ། ཁྱོད་ཀྱིས་གཱོག་ལ་འདི་ལྟར་ལུང་སྟོན་ཅིག གཙོ་བོ་ཡ་ཝཱེས་འདི་སྐད་དུ། ཀྱེ་རའོ་ཤ་དང་མེ་ཤེག ཐུ་བཱལ་བཅས་ཀྱི་འགོ་དཔོན་གཱོག་ལགས། ལྟོས་དང་། ངས་ཁྱོད་དགྲ་རུ་འཛིན་ཞིང་།
EZE 39:2 ངས་ཁྱོད་བཟློགས་ཏེ་ཁྱོད་ནི་བྱང་ཕྱོགས་ཀྱི་ས་མཐའ་ནས་ཡར་ཁྲིད་འོངས་ཏེ་ཡེས་ར་ཨེལ་གྱི་རི་རྣམས་ལ་རྒོལ་བར་འཁྲིད་དགོས།
EZE 39:3 དེ་ནས་ངས་ཁྱོད་ཀྱི་གཡོན་ལག་གི་གཞུ་ལ་བརྒྱབ་ནས་ལྷུང་དུ་བཅུག་སྟེ་ཁྱོད་ཀྱི་གཡས་ལག་གི་མདའ་སར་འཕེན་པར་བྱའོ། །
EZE 39:4 ཁྱོད་ནི་ཡེས་ར་ཨེལ་གྱི་རི་རྣམས་ཀྱི་སྟེང་དུ་འགྱེལ་བར་འགྱུར་ལ། ཁྱོད་ཀྱི་དམག་དཔུང་དང་ཁྱོད་དང་མཉམ་དུ་ཡོད་པའི་མི་རིགས་ཐམས་ཅད་ཀྱང་དེ་ལྟར་འགྱེལ་བར་འགྱུར། ངས་འདབ་ཆགས་ཤ་གཟན་སྣ་ཚོགས་དང་ཐང་གི་གཅན་གཟན་རྣམས་ལ་ཁྱོད་ཁ་ཟས་སུ་སྦྱིན་ནོ། །
EZE 39:5 ངས་འདི་ལྟར་སྨྲས་ཟིན་པས་ན་ཁྱོད་ནི་ས་སྟོང་དུ་འགྱེལ་བར་འགྱུར་རོ་ཞེས་གཙོ་བོ་ཡ་ཝཱེས་གསུངས།
EZE 39:6 ཡང་མ་གཱོག་དང་མཚོ་རྒྱུད་ས་ཁུལ་དུ་བདེ་བར་སྡོད་པའི་མི་རྣམས་ཀྱི་སྟེང་དུ་ངས་མེ་ལྡུག་པར་བྱ་སྟེ། དེ་ནས་ཁོ་ཚོས་བདག་ནི་ཡ་ཝཱེ་ཡིན་པ་རྟོགས་པར་འགྱུར།
EZE 39:7 ངས་རང་གི་འབངས་མི་ཡེས་ར་ཨེལ་གྱི་ཁྲོད་དུ་ངའི་མཚན་དམ་པ་དེ་མངོན་པར་འགྱུར་ཞིང་། ངས་རང་གི་མཚན་དམ་པ་ནི་ཡང་བསྐྱར་ཁྱད་དུ་གསོད་པར་མི་བྱའོ། །དེ་ནས་མི་རིགས་ཀུན་གྱིས་བདག་ནི་ཡ་ཝཱེ་སྟེ་ཡེས་ར་ཨེལ་གྱི་དམ་པ་ཉིད་ཡིན་པ་རྟོགས་པར་འགྱུར།
EZE 39:8 ལྟོས་དང་། ཉིན་མོ་དེ་སླེབས་ལ་ཉེ་ཞིང་དོན་རྣམས་འགྲུབ་པར་འགྱུར་ལ། དེ་ནི་ངས་སྨྲས་པའི་ཉིན་མོ་དེའོ་ཞེས་གཙོ་བོ་ཡ་ཝཱེས་གསུངས་སོ། །
EZE 39:9 དེའི་དུས་སུ་ཡེས་ར་ཨེལ་གྱི་གྲོང་ཁྱེར་སོ་སོའི་ཡུལ་མི་རྣམས་ཕྱི་རུ་ཐོན་ནས་མཚོན་ཆ་རྣམས་བུད་ཤིང་བྱས་ཏེ་མེར་བསྲེག་ཅིང་། ཕུབ་ཆེ་ཆུང་གཉིས་ཀ་དང་། གཞུ་དང་། མདའ་དང་། མདུང་ཐུང་དང་། མདུང་རིང་བཅས་ཐམས་ཅད་ལོ་བདུན་གྱི་རིང་ལ་བུད་ཤིང་བྱས་ནས་མེར་བསྲེག་པར་འགྱུར།
EZE 39:10 དེ་དག་གིས་ཐང་ནས་བུད་ཤིང་བཏུ་མི་དགོས་ལ། ནགས་ཚལ་ནས་ཤིང་ཡང་གཅོད་མི་དགོས་ཏེ། གང་ལ་ཞེ་ན། དེ་དག་གིས་མཚོན་ཆ་རྣམས་བུད་ཤིང་བྱས་ནས་མེར་བསྲེག་པའོ། །དེ་དག་གིས་སྔར་རང་ཉིད་འཕྲོག་མཁན་རྣམས་འཕྲོག་ཅིང་། རང་ཉིད་བཅོམ་མཁན་རྣམས་འཇོམས་པར་འགྱུར་ཞེས་གཙོ་བོ་ཡ་ཝཱེས་གསུངས་སོ། །
EZE 39:11 ཉིན་དེར། ཤར་གྱི་འཆི་མཚོའི་ཕྱོགས་སུ་འགྲོ་བའི་མི་རྣམས་བརྒྱུད་པའི་ལུང་པ་རུ། ངས་ཡེས་ར་ཨེལ་གྱི་ཡུལ་དུ་གཱོག་ལ་དུར་ས་ཞིག་སྦྱིན་ཏེ། དུར་ས་འདིས་ལམ་དེ་བརྒྱུད་ནས་འགྲོ་མཁན་རྣམས་ཀྱི་ལམ་འགོག་པ་ཡིན། གང་ལ་ཞེ་ན། གནས་དེར་གཱོག་དང་དེའི་དམག་དཔུང་རྣམས་དུར་དུ་སྦས་ཡོད་པས། གནས་དེ་ལ་ཧ་མོན་གཱོག་ལུང་པ་ཞེས་འདོགས་པར་འགྱུར།
EZE 39:12 གནས་དེ་གཙང་མར་བཟོ་བའི་ཆེད་དུ་ཡེས་ར་ཨེལ་ཁྱིམ་རྒྱུད་ཀྱིས་ཟླ་བདུན་གྱི་རིང་ལ་དེ་རྣམས་དུར་དུ་སྐུང་བར་འགྱུར་ཞིང་།
EZE 39:13 ཡུལ་དེའི་མི་ཀུན་གྱིས་དེ་རྣམས་དུར་དུ་སྐུང་བར་འགྱུར་བ་དང་། དེ་ནི་ང་ལ་གཟི་བརྗིད་འཐོབ་པའི་དུས་ཡིན་ལ། ཡེས་ར་ཨེལ་པ་རྣམས་ལའང་དེའི་རྐྱེན་གྱིས་མཚན་སྙན་འཐོབ་པར་འགྱུར་ཞེས་གཙོ་བོ་ཡ་ཝཱེས་གསུངས།
EZE 39:14 ཡང་དེ་དག་གིས་རྒྱུན་དུ་མི་མངགས་ཏེ་གནས་དེར་འགྲུལ་བར་བྱ་ཞིང་། གནས་དེ་གཙང་མར་བཟོ་བའི་ཆེད་དུ། ལམ་པ་དང་མཉམ་དུ་ད་དུང་གནས་དེར་ལུས་པའི་བེམ་པོ་རྣམས་དུར་དུ་སྐུང་བར་འགྱུར་བ་དང་། ཟླ་བདུན་འགོར་ཡང་ཁོ་ཚོས་ད་དུང་མུ་མཐུད་དུ་འཚོལ་བར་བྱའོ། །
EZE 39:15 དུར་དུ་སྐུང་མཁན་རྣམས་འོངས་ཏེ་ཀེང་རུས་རྣམས་ཧ་མོན་གཱོག་ལུང་པར་སྐུང་བའི་བར་དུ། ཁོ་ཚོ་གནས་དེར་འགྲུལ་ཞིང་། མི་ཡི་ཀེང་རུས་མཐོང་ཚེ་དེའི་གམ་དུ་རྟགས་རྒྱག་པ་ཡིན།
EZE 39:16 ཡང་གནས་དེ་རུ་ཧ་མོ་ནཱ་ཞེས་པའི་གྲོང་ཁྱེར་ཞིག་ཀྱང་ཡོད་དེ། ཁོ་ཚོས་ལུགས་དེ་བཞིན་དུ་ཡུལ་དེ་གཙང་མར་བཟོ་བར་བྱའོ་ཞེས་པའོ། །
EZE 39:17 ཀྱེ་མིའི་བུ། གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་བྱ་སྣ་ཚོགས་དང་ཐང་གི་གཅན་གཟན་རྣམས་ལ་འདི་ལྟར་སྒོས་ཤིག ཁྱོད་རྣམས་མཉམ་དུ་འདུས་ཤིག ཕྱོགས་བཞི་ནས་འདུས་ཏེ་ངས་ཁྱོད་ཚོའི་ཆེད་དུ་གྲ་སྒྲིག་བྱས་པའི་མཆོད་རྫས་ཟོ་ཞིག་དང་། ཁྱོད་རྣམས་ཀྱིས་ཤ་བཟའ་བ་དང་ཁྲག་འཐུང་བའི་ཆེད་དུ། ཡེས་ར་ཨེལ་གྱི་རི་རྣམས་སུ་མཆོད་པའི་མཛད་སྒོ་ཆེན་པོ་ཞིག་སྤེལ་བར་འགྱུར།
EZE 39:18 ལུག་ཐུག་དང་ལུ་གུ། ར་ཐུག བ་གླང་བཅས་ཐམས་ཅད་པཱ་ཤན་གྱི་ཕྱུགས་ཤ་ཤེད་ཅན་རྣམས་ཡིན་ལ། ཁྱོད་ཚོས་དེ་དག་གི་ཤ་བཟའ་བ་དང་ཁྲག་འཐུང་བ་བཞིན་དུ། དཔའ་བོ་རྣམས་ཀྱི་ཤ་བཟའ་ཞིང་ཡུལ་དེའི་འགོ་དཔོན་རྣམས་ཀྱི་ཁྲག་འཐུང་ངོ་། །
EZE 39:19 ངས་ཁྱོད་ཅག་གི་ཆེད་དུ་གྲ་སྒྲིག་བྱས་པའི་མཆོད་པ་ལས་ཁྱོད་ཚོས་སྣུམ་དང་ཚིལ་རྒྱགས་པ་ཟ་ཞིང་། ཁྲག་ཡིད་ཚིམ་པ་ཞིག་འཐུང་བར་འགྱུར།
EZE 39:20 ཁྱོད་ཚོས་ངའི་གསོལ་ལྕོག་སྟེང་དུ་རྟ་དང་རྟ་དམག དཔའ་བོ། དམག་ཐམས་ཅད་ཟོས་ནས་འགྲང་བར་འགྱུར་ཞེས་གཙོ་བོ་ཡ་ཝཱེས་གསུངས་པའོ། །
EZE 39:21 ངས་མི་རིགས་ཀུན་གྱི་ནང་དུ་བདག་གི་གཟི་བརྗིད་མངོན་པར་བྱ་ཞིང་། མི་རིགས་ཀུན་གྱིས་ངས་བཅད་པའི་ཉེས་ཆད་དང་ངས་ཁོ་ཚོའི་སྟེང་དུ་བཞག་པའི་ལག་པ་མཐོང་བར་འགྱུར།
EZE 39:22 དེ་བཞིན་ཉིན་དེ་ནས་བཟུང་ཡེས་ར་ཨེལ་ཁྱིམ་རྒྱུད་ཀྱིས་བདག་ནི་ཁོ་ཚོའི་དཀོན་མཆོག་ཡ་ཝཱེ་ཡིན་པ་རྟོགས་པར་འགྱུར་ལ།
EZE 39:23 མི་རིགས་ཀུན་གྱིས་ཀྱང་ཡེས་ར་ཨེལ་གྱི་ཁྱིམ་རྒྱུད་ནི་རང་གི་སྡིག་པའི་རྐྱེན་གྱིས་བཙོན་དུ་ཁྲིད་པ་རྟོགས་པར་འགྱུར། དེ་ཚོ་ང་ལ་བློ་མི་དཀར་བས་ངས་རང་གི་གདོང་ནི་དེ་དག་གི་ཕྱོགས་སུ་སྦས་ནས། དེ་དག་དགྲ་བོའི་ལག་ཏུ་གཏད་ཅིང་ཐམས་ཅད་རལ་གྲིའི་འོག་ཏུ་འགྱེལ་བའོ། །
EZE 39:24 ངས་ནི་ཁོ་ཚོའི་མི་གཙང་བ་དང་ཉེས་སྐྱོན་བཞིན་དུ་ཁོ་ཚོར་ལན་འཇལ་ཞིང་། རང་གི་གདོང་ཡང་དེ་དག་གི་ཕྱོགས་སུ་སྦས་པ་ཡིན་ནོ། །
EZE 39:25 དེའི་ཕྱིར་གཙོ་བོ་ཡ་ཝཱེས་འདི་སྐད་དུ། ད་ལྟ་ངས་ཡ་ཀོབ་ལས་བཙོན་དུ་ཁྲིད་པ་རྣམས་ཕྱིར་ལོག་པར་བྱ་ཞིང་། ངས་ཡེས་ར་ཨེལ་གྱི་ཁྱིམ་རྒྱུད་ཡོངས་ལ་སྙིང་རྗེ་བསྐྱེད་ནས། ངའི་མཚན་དམ་པའི་ཆེད་དུ་སེམས་ཤུགས་ཆེན་པོ་བསྐྱེད་པར་འགྱུར།
EZE 39:26 དེ་རྣམས་རང་གི་གནས་སུ་བདེ་བར་སྡོད་ཅིང་འཇིགས་སྐུལ་མཁན་མེད་པའི་དུས་སུ། རང་རང་གི་ངོ་ཚ་དང་ང་ལ་བློ་མི་དཀར་བའི་སྡིག་པ་ཡོད་ཚད་འཁུར་དགོས།
EZE 39:27 ངས་དེ་དག་མི་ཀུན་ལས་ཁྲིད་འོང་ཞིང་དགྲ་བོའི་ཡུལ་ནས་བསྡུ་བའི་དུས་སུ། ངས་རང་ཉིད་དམ་པ་ཡིན་པ་ཁོ་ཚོའི་སྟེང་ནས་མི་མང་པོ་ཞིག་ལ་སྟོན་པར་བྱ།
EZE 39:28 ངས་ཁོ་རྣམས་ཡུལ་སོ་སོར་བཙོན་ལ་འཁྲིད་དུ་བཅུག་པ་དང་། ཕྱིས་སུ་ཁོ་རྣམས་བསྡུས་ནས་རང་ཡུལ་དུ་ལོག་ཅིང་། གཅིག་ཀྱང་ཡུལ་ཁམས་རྣམས་སུ་སླར་ཡང་ལུས་པར་མི་བྱ། དེ་ནས་ཁོ་ཚོས་བདག་ནི་ཁོ་ཚོའི་དཀོན་མཆོག་ཡ་ཝཱེ་ཡིན་པ་རྟོགས་པར་འགྱུར།
EZE 39:29 ངས་རང་གི་ཐུགས་ཉིད་ནི་ཡེས་ར་ཨེལ་གྱི་ཁྱིམ་རྒྱུད་ནང་དུ་བླུགས་པས། ད་ཕྱིན་ཆད་རང་གི་གདོང་ནི་དེ་དག་གི་ཕྱོགས་སུ་སྦ་བར་མི་བྱའོ་ཞེས་གཙོ་བོ་ཡ་ཝཱེས་གསུངས་པའོ། །
EZE 40:1 ངེད་རྣམས་བཙོན་དུ་ཁྲིད་པའི་ལོ་ཉེར་ལྔ་པ་སྟེ། ཡེ་རུ་སཱ་ལེམ་གྲོང་ཁྱེར་གཏོར་བའི་ལོ་བཅུ་བཞི་པའི་ལོ་འགོ་ཡི་ཟླ་དེའི་ཚེས་བཅུ་ཡི་ཉིན་མོར། དཀོན་མཆོག་ཡ་ཝཱེའི་ཕྱག་ནི་ངའི་སྟེང་དུ་བཞག་སྟེ། ཁོང་གིས་ང་གནས་དེར་ཁྲིད་པ་དང་།
EZE 40:2 དཀོན་མཆོག་གི་ཞལ་གཟིགས་ཀྱི་ནང་དུ། ཁོང་གིས་ང་ཡེས་ར་ཨེལ་གྱི་ཡུལ་དུ་ཁྲིད་ནས་ང་རང་རི་ཤིན་ཏུ་མཐོན་པོ་ཞིག་གི་སྟེང་དུ་བཞག་པ་དང་། རི་བོའི་ལྷོ་ཕྱོགས་སུ་གྲོང་ཁྱེར་ལྟ་བུའི་བཟོ་བཀོད་ཅིག་ཡོད་དོ། །
EZE 40:3 ཁོང་གིས་ང་དེ་རུ་ཁྲིད་པ་དང་ངས་མི་ཞིག་མཐོང་སྟེ། དེར་བལྟས་ཚེ་ལི་ཡི་མདངས་ལྡན་ཞིང་ལག་ཏུ་སོ་ཐག་དང་ཚད་ཐིག་ལེན་བྱེད་ལྕུག་མ་ཞིག་བཟུང་སྟེ་རྒྱ་སྒོ་ཁར་ལངས་ནས་བསྡད་ཡོད།
EZE 40:4 མི་དེས་ང་ལ་འདི་ལྟར། ཀྱེ་མིའི་བུ། ངས་ཁྱོད་བསྟན་པ་རྣམས་ལ་ཁྱོད་ཀྱིས་མིག་གིས་ལྟོས་དང་། རྣ་བས་ཉོན་ཅིག ཡིད་ལ་ཟུངས་ཤིག གང་ལ་ཞེ་ན། ཁྱོད་ལ་སྟོན་པའི་ཆེད་དུ་ངས་ཁྱོད་གནས་འདིར་ཁྲིད་འོངས་པ་དང་། ཁྱོད་ཀྱིས་ཅི་མཐོང་བ་ཐམས་ཅད་ཡེས་ར་ཨེལ་གྱི་ཁྱིམ་རྒྱུད་ལ་སྨྲ་དགོས་ཞེས་བསྒོས་སོ། །
EZE 40:5 དེ་ནས་ངས་མཆོད་ཁང་གི་ཕྱོགས་བཞི་རུ་མཁར་ཡོད་པ་མཐོང་སྟེ། མི་དེའི་ལག་གི་ཚད་ཐིག་ལེན་བྱེད་ལྕུག་མའི་རིང་ཚད་ལ་ཁྲུ་དྲུག་ཡོད་ལ། ཁྲུ་རེ་ནི་ཁྲུ་གང་དང་སོར་བཞི་ཡིན། ཁོས་བཟོ་བཀོད་དེའི་ཚད་ཐིག་བླངས་པ་ན་མཁར་གྱི་མཐུག་ཚད་ལ་ལྕུག་མ་གཅིག་དང་། མཐོ་ཚད་ལའང་ལྕུག་མ་གཅིག་ཡོད་དོ། །
EZE 40:6 ཡང་མི་དེ་ཤར་ཕྱོགས་ཀྱི་རྒྱ་སྒོར་ཕྱིན་ནས་དེའི་རྡོ་སྐས་ལ་འཛེགས་ཏེ། སྒོ་ཐེམ་གྱི་ཚད་ཐིག་བླངས་པ་ན་མཐུག་ཚད་ལ་ལྕུག་མ་གཅིག་དང་། ཡང་སྒོ་ཐེམ་ཅིག་ཤོས་དེའི་མཐུག་ཚད་ལའང་ལྕུག་མ་གཅིག་ཡོད་པ་ཡིན།
EZE 40:7 ཡང་སྒོ་ཁང་ཡོད་དེ། རིང་ཚད་ལ་ལྕུག་མ་གཅིག་དང་། ཞེང་ལ་ལྕུག་མ་གཅིག་ཡོད་ཅིང་། སྒོ་ཁང་དང་ཁང་པའི་བར་ཐག་ལ་ཁྲུ་ལྔ་ཡོད་པ་དང་། མཆོད་ཁང་གི་ནང་ཕྱོགས་སུ་འཁོར་བའི་སྒོ་ཁྱམས་འགྲམ་གྱི་སྒོ་ཐེམ་གྱི་མཐུག་ཚད་ལ་ལྕུག་མ་གཅིག་ཡོད་དོ། །
EZE 40:8 ཡང་དེས་མཆོད་ཁང་གི་ནང་ཕྱོགས་སུ་འཁོར་བའི་སྒོ་ཁྱམས་ཀྱི་ཚད་ཐིག་བླངས་པ་ལ་དེའི་རིང་ཚད་ལྕུག་མ་གཅིག་ཡིན།
EZE 40:9 སྒོ་ཁྱམས་དེའི་གཏིང་ཚད་ལ་ཁྲུ་བརྒྱད་ཡོད་པ་དང་། སྒོ་སྒྲོམ་གྱི་མཐུག་ཚད་ལ་ཁྲུ་གཉིས་ཡོད་དེ། སྒོ་ཁྱམས་ནི་མཆོད་ཁང་གི་ནང་ཕྱོགས་སུ་འཁོར་ཡོད་དོ། །
EZE 40:10 ཤར་སྒོའི་ཁང་པ་རྣམས་གཡས་ཕྱོགས་སུ་གསུམ་དང་གཡོན་ཕྱོགས་སུ་གསུམ་ཡོད་ལ། ཁང་མིག་གསུམ་པོའི་རིང་ཚད་དང་ཞེང་གི་ཆེ་ཆུང་གཉིས་ཀ་གཅིག་ཡིན་ལ། འགྲམ་གཉིས་ཀྱི་སྒོ་སྒྲོམ་གྱི་མཐུག་ཚད་ཀྱང་གཅིག་ཡིན།
EZE 40:11 དེས་ཤར་སྒོའི་ཚད་ཐིག་བླངས་པ་ན། འཇུག་སྒོའི་ཞེང་ལ་ཁྲུ་བཅུ་ཡོད་པ་དང་། རྒྱུ་ལམ་གྱི་རིང་ཚད་ལ་ཁྲུ་བཅུ་གསུམ་ཡོད།
EZE 40:12 སྒོ་ཁང་རེ་རེའི་མདུན་དུ་རྩིག་པ་དམའ་མོ་རེ་ཡོད་དེ། མཐོ་ཚད་ལ་ཁྲུ་གཅིག་ཡོད་པ་ཡིན། ཕྱོགས་གཉིས་ཀྱི་ཁང་མིག་གཉིས་ཀྱང་གཅིག་མཚུངས་ཡིན་ནོ། །ཁང་པ་དེའི་རིང་ཚད་ལ་ཁྲུ་དྲུག་ཡོད་པ་དང་། ཕྱོགས་གཉིས་ནི་གཅིག་མཚུངས་ཡིན།
EZE 40:13 དེས་ཤར་སྒོའི་ཚད་ཐིག་བླངས་པ་དང་། ཁང་པ་འདིའི་ལྟག་སྒོ་ནས་ཁ་གཏད་ཀྱི་ཁང་པ་གཞན་དེའི་ལྟག་སྒོ་སྟེ། ཁང་ཀླད་འདི་ནས་ཁང་ཀླད་གཞན་དེའི་བར་གྱི་ཚད་ཐིག་བླངས་པ་ན་ཞེང་ལ་ཁྲུ་ཉེར་ལྔ་ཡོད་དོ། །
EZE 40:14 ནང་གི་སྒོ་སྒྲོམ་རེ་རེ་བརྒྱུད་ནས་ཁྱམས་རའི་ཕྱོགས་ཀྱི་སྒོ་སྒྲོམ་གྱི་བར་དུ་ཚད་ཐིག་བླངས་པ་ན། རིང་ཚད་ལ་བསྡོམས་པས་ཁྲུ་དྲུག་ཅུ་ཡོད་པ་ཡིན།
EZE 40:15 ཤར་སྒོའི་མདུན་གྱི་འཇུག་སྒོ་ནས་རྒྱབ་ཀྱི་སྒོ་ཁྱམས་བར་དུ་ཁྲུ་ལྔ་བཅུ་ཡོད།
EZE 40:16 སྒོ་ཁང་གི་ཤར་སྒོའི་ནང་ཕྱོགས་ཀྱི་སྒོ་སྒྲོམ་དང་། སྒོ་ཁྱམས་བཅས་ལ་སྒེའུ་ཁུང་དོག་མོ་རྣམས་ཡོད་དེ། ནང་གི་ཕྱོགས་བཞི་རུའང་སྒེའུ་ཁུང་ཡོད་ལ་རྩིག་པའི་སྟེང་དུ་ཤིང་ཏ་ལ་བརྐོས་ཡོད་དོ། །
EZE 40:17 དེ་ནས་དེས་ང་ཁྱམས་ར་ཕྱི་མར་ཁྲིད་པ་དང་ངས་ཁང་པ་འགའ་ཡོད་པ་མཐོང་སྟེ། ཁྱམས་རའི་ཕྱོགས་བཞིའི་ས་རུ་རྡོ་གཅལ་ཡོད་པ་དང་། དེའི་འགྲམ་དུ་ཁང་པ་སུམ་ཅུ་ཡོད་དོ། །
EZE 40:18 རྡོ་གཅལ་ནི་རྒྱ་སྒོ་རེ་རེའི་འགྲམ་དུ་ཡོད་ཅིང་སྒོ་ལས་ཅུང་དམའ་ཞིང་། ཞེང་ནི་རྒྱ་སྒོའི་རིང་ཚད་དང་གཅིག་ཡིན།
EZE 40:19 དེས་འོག་གི་རྒྱ་སྒོ་ནས་ནང་གི་ཁྱམས་རའི་རྩིག་པའི་བར་དུ་ཚད་ཐིག་བླངས་པ་ན་ཞེང་ལ་བསྡོམས་པས་ཁྲུ་བརྒྱ་ཡོད་དེ། ཤར་ཕྱོགས་དང་བྱང་ཕྱོགས་ཐམས་ཅད་གཅིག་ཡིན་ནོ། །
EZE 40:20 ཡང་དེས་ཁྱམས་ར་ཕྱི་མའི་བྱང་ལ་འཁོར་ཡོད་པའི་རྒྱ་སྒོའི་རིང་ཚད་དང་ཞེང་གི་ཆེ་ཆུང་གཉིས་ཀྱི་ཚད་ཐིག་བླངས་པ་ན།
EZE 40:21 ནང་གི་ཁང་པ་རྣམས་གཡས་སུ་གསུམ་དང་གཡོན་དུ་གསུམ་ཡོད་དེ། སྒོ་སྒྲོམ་དང་སྒོ་ཁྱམས་ཀྱི་རིང་ཐུང་ནི་ཤར་སྒོ་དང་གཅིག་མཚུངས་ཡིན་ཏེ། བྱང་སྒོ་སྤྱིའི་རིང་ཚད་ལ་ཁྲུ་ལྔ་བཅུ་དང་ཞེང་ལ་ཁྲུ་ཉེར་ལྔ་ཡོད།
EZE 40:22 དེའི་སྒེའུ་ཁུང་དང་སྒོ་ཁྱམས། ཤིང་ཏ་ལའི་བརྐོས་རིས་བཅས་ནི་ཤར་སྒོ་དང་གཅིག་མཚུངས་ཡིན་ལ། མི་རྣམས་རྡོ་སྐས་རིམ་པ་བདུན་ལ་འཛེགས་ན་ད་གཟོད་རྒྱ་སྒོ་འདིར་སླེབ་ཐུབ་པ་དང་། མདུན་གྱི་མུ་མཐའ་རུ་སྒོ་ཁྱམས་ཡིན།
EZE 40:23 ནང་གི་ཁྱམས་རར་རྒྱ་སྒོ་ཞིག་རྒྱ་སྒོ་འདིའི་ཁ་གཏད་དུ་ཡོད་པ་དང་། བྱང་ཕྱོགས་དང་ཤར་ཕྱོགས་ཐམས་ཅད་གཅིག་མཚུངས་ཡིན། དེས་རྒྱ་སྒོ་འདི་ནས་རྒྱ་སྒོ་གཞན་དེའི་བར་དུ་ཚད་ཐིག་བླངས་པ་ན་བསྡོམས་པས་ཁྲུ་བརྒྱ་ཡོད་དོ། །
EZE 40:24 ཡང་དེས་ང་ལྷོ་ཕྱོགས་སུ་ཁྲིད་པ་དང་ངས་ལྷོ་ཕྱོགས་སུ་འཁོར་བའི་རྒྱ་སྒོ་དེ་མཐོང་ཞིང་། དེས་སྒོ་སྒྲོམ་དང་སྒོ་ཁྱམས་གཉིས་ཀྱི་ཚད་ཐིག་བླངས་པ་ན་ཆེ་ཆུང་སྔར་དང་འདྲའོ། །
EZE 40:25 རྒྱ་སྒོའི་ནང་ཕྱོགས་དང་སྒོ་ཁྱམས་ཀྱི་མཐའ་སྐོར་ཀུན་ཏུ་སྒེའུ་ཁུང་ཡོད་པ་དང་། དེ་ཡང་སྔར་གྱི་སྒེའུ་ཁུང་དང་གཅིག་ཡིན་ནོ། །ལྷོ་སྒོ་སྤྱིའི་རིང་ཚད་ལ་ཁྲུ་ལྔ་བཅུ་ཡོད་པ་དང་། ཞེང་ལ་ཁྲུ་ཉེར་ལྔ་ཡོད།
EZE 40:26 མི་རྣམས་རྡོ་སྐས་རིམ་པ་བདུན་ལ་འཛེགས་ན་ད་གཟོད་རྒྱ་སྒོ་འདིར་སླེབ་ཐུབ་པ་དང་། མདུན་གྱི་མུ་མཐའ་རུ་སྒོ་ཁྱམས་ཡིན། སྒོ་སྒྲོམ་གྱི་སྟེང་དུ་ཕྱོགས་གཉིས་སུ་ཤིང་ཏ་ལ་བརྐོས་ཡོད་པ་ཡིན།
EZE 40:27 ནང་གི་ཁྱམས་རའི་ལྷོ་ཕྱོགས་སུ་ཡང་རྒྱ་སྒོ་ཡོད་པ་དང་། དེས་རྒྱ་སྒོ་འདི་ནས་ལྷོ་སྒོའི་བར་དུ་ཚད་ཐིག་བླངས་པ་ན་བསྡོམས་པས་ཁྲུ་བརྒྱ་ཡོད་དོ། །
EZE 40:28 དེས་ང་ནང་གི་ཁྱམས་རའི་ལྷོ་སྒོ་ནས་ནང་གི་ཁྱམས་རར་ཁྲིད་དེ། རྒྱ་སྒོ་དེའི་ཚད་ཐིག་བླངས་པ་ན་ཆེ་ཆུང་སྔར་དང་མཚུངས་སོ། །
EZE 40:29 སྒོ་ཁང་དང་སྒོ་སྒྲོམ། སྒོ་ཁྱམས་བཅས་ཀྱི་རིང་ཐུང་ནི་སྔར་དང་གཅིག་ཡིན་ལ། རྒྱ་སྒོའི་ནང་ཕྱོགས་དང་སྒོ་ཁྱམས་ཀྱི་མཐའ་སྐོར་ཀུན་ཏུ་སྒེའུ་ཁུང་ཡོད་པ་དང་། རྒྱ་སྒོའི་ནང་ཕྱོགས་ཀྱི་སྤྱིའི་རིང་ཚད་ལ་ཁྲུ་ལྔ་བཅུ་ཡོད་པ་དང་། ཞེང་ལ་ཁྲུ་ཉེར་ལྔ་ཡོད།
EZE 40:30 ཁྱམས་རའི་མཐའ་སྐོར་དུ་སྒོ་ཁྱམས་ཡོད་དེ། སྤྱིའི་རིང་ཚད་ལ་ཁྲུ་ལྔ་བཅུ་ཡོད་པ་དང་། ཞེང་ལ་ཁྲུ་ཉེར་ལྔ་ཡོད།
EZE 40:31 སྒོ་ཁྱམས་དེ་ཁྱམས་ར་ཕྱི་མའི་ཕྱོགས་སུ་འཁོར་ཡོད་དེ། སྒོ་སྒྲོམ་གྱི་སྟེང་དུ་ཤིང་ཏ་ལ་བརྐོས་ཡོད་པ་དང་། རྡོ་སྐས་ལ་རིམ་པ་བརྒྱད་ཡོད་དོ། །
EZE 40:32 དེས་ང་ནང་གི་ཁྱམས་རའི་ཤར་སྒོ་རུ་ཁྲིད་ནས་རྒྱ་སྒོ་དེའི་ཚད་ཐིག་བླངས་པ་ན་ཆེ་ཆུང་སྔར་དང་མཚུངས་པ་ཡིན།
EZE 40:33 སྒོ་ཁང་དང་སྒོ་སྒྲོམ། སྒོ་ཁྱམས་བཅས་ཀྱི་རིང་ཐུང་ནི་སྔར་དང་གཅིག་ཡིན་ལ། རྒྱ་སྒོའི་ནང་ཕྱོགས་དང་སྒོ་ཁྱམས་ཀྱི་མཐའ་སྐོར་ཀུན་ཏུ་སྒེའུ་ཁུང་ཡོད་པ་དང་། རྒྱ་སྒོའི་ནང་ཕྱོགས་ཀྱི་སྤྱིའི་རིང་ཚད་ལ་ཁྲུ་ལྔ་བཅུ་ཡོད་པ་དང་། ཞེང་ལ་ཁྲུ་ཉེར་ལྔ་ཡོད།
EZE 40:34 སྒོ་ཁྱམས་དེ་ཁྱམས་ར་ཕྱི་མའི་ཕྱོགས་སུ་འཁོར་ཡོད་དེ། སྒོ་སྒྲོམ་གྱི་སྟེང་དུ་ཕྱོགས་གཉིས་སུ་ཤིང་ཏ་ལ་བརྐོས་ཡོད་པ་དང་། རྡོ་སྐས་ལ་རིམ་པ་བརྒྱད་ཡོད་དོ། །
EZE 40:35 དེས་ང་ནང་གི་ཁྱམས་རའི་བྱང་སྒོ་རུ་ཁྲིད་ནས་རྒྱ་སྒོ་དེའི་ཚད་ཐིག་བླངས་པ་ན་ཆེ་ཆུང་སྔར་དང་མཚུངས་སོ། །
EZE 40:36 སྒོ་ཁང་དང་སྒོ་སྒྲོམ། སྒོ་ཁྱམས་བཅས་ཐམས་ཅད་གཅིག་མཚུངས་ཡིན་ལ། རྒྱ་སྒོའི་ནང་ཕྱོགས་དང་མཐའ་སྐོར་ཀུན་ཏུ་སྒེའུ་ཁུང་ཡོད། རྒྱ་སྒོ་དེ་ཡི་སྤྱིའི་རིང་ཚད་ལ་ཁྲུ་ལྔ་བཅུ་ཡོད་པ་དང་། ཞེང་ལ་ཁྲུ་ཉེར་ལྔ་ཡོད།
EZE 40:37 སྒོ་ཁྱམས་དེ་ཁྱམས་ར་ཕྱི་མའི་ཕྱོགས་སུ་འཁོར་ཡོད་དེ། སྒོ་སྒྲོམ་གྱི་སྟེང་དུ་ཕྱོགས་གཉིས་སུ་ཤིང་ཏ་ལ་བརྐོས་ཡོད་པ་དང་། རྡོ་སྐས་ལ་རིམ་པ་བརྒྱད་ཡོད་དོ། །
EZE 40:38 ཡང་རྒྱ་སྒོ་རྣམས་ཀྱི་སྒོ་སྒྲོམ་གྱི་འགྲམ་དུ་ཁང་པ་སྒོ་ཅན་ཞིག་ཡོད་པ་དང་། དེ་ནི་སྦྱིན་སྲེག་གི་ཕྱུགས་ཟོག་བཀྲུ་ས་ཡིན།
EZE 40:39 སྒོ་ཁྱམས་ཀྱི་ནང་དུ་གཡས་ཕྱོགས་སུ་ཅོག་ཙེ་གཉིས་དང་གཡོན་ཕྱོགས་སུ་ཅོག་ཙེ་གཉིས་ཡོད་པ་དང་། དེའི་སྟེང་དུ་སྦྱིན་སྲེག་གི་ཕྱུགས་ཟོག་དང་སྡིག་བཤགས་མཆོད་པར་འབུལ་བའི་ཕྱུགས་ཟོག ཉེས་སེལ་གྱི་མཆོད་པར་འབུལ་བའི་ཕྱུགས་ཟོག་རྣམས་ཀྱང་བཤས་ཆོག་པ་ཡིན།
EZE 40:40 བྱང་སྒོ་ལ་འཇུག་པའི་རྡོ་སྐས་ཀྱི་ཕྱི་ཕྱོགས་སུ་འཁོར་བའི་གནས་སུ་ཅོག་ཙེ་གཉིས་ཡོད་པ་དང་། སྒོ་ཁྱམས་ཀྱི་ཕྱོགས་སུ་འཁོར་བའི་གནས་གཞན་དེ་རུ་ཡང་ཅོག་ཙེ་གཉིས་ཡོད།
EZE 40:41 ཕྱུགས་ཟོག་བཤའ་བའི་ཕྱིར་དུ་རྒྱ་སྒོའི་གཡས་ཕྱོགས་སུ་ཅོག་ཙེ་བཞི་དང་། གཡོན་ཕྱོགས་སུའང་ཅོག་ཙེ་བཞི་སྟེ་བསྡོམས་པས་ཅོག་ཙེ་བརྒྱད་ཡོད།
EZE 40:42 གཞན་ཡང་ཅོག་ཙེ་བཞི་ཡོད་པ་ནི་སྦྱིན་སྲེག་གི་མཆོད་པ་འབུལ་བའི་ཕྱིར་ཡིན་པ་དང་། དེ་ནི་རྡོ་བརྐོས་མས་བཟོས་ཏེ། རིང་ཚད་ལ་ཁྲུ་གཅིག་དང་ཕྱེད་ཀ་དང་། ཞེང་ལ་ཁྲུ་གཅིག་དང་ཕྱེད་ཀ མཐོ་ཚད་ལ་ཁྲུ་གཅིག་བཅས་ཡོད་པ་དང་། སྤྱིན་སྲེག་གི་ཕྱུགས་ཟོག་དང་མཆོད་པ་གཞན་པའི་ཕྱུགས་ཟོག་རྣམས་བཤའ་དུས་སྤྱོད་པའི་སྣོད་ཆས་རྣམས་དེར་བཞག་ཡོད་དོ། །
EZE 40:43 ཕྱོགས་བཞིའི་རྩིག་ངོས་སུ་ལྕགས་ཀྱུ་རྣམས་བརྡབས་ཡོད་པ་དང་དེ་རེ་རེའི་རིང་ཚད་སོར་བཞི་ཡིན། ཡང་ཅོག་ཙེའི་སྟེང་དུ་མཆོད་པར་འབུལ་བྱའི་ཤ་རྣམས་བཞག་ཡོད་པ་ཡིན།
EZE 40:44 ནང་གི་ཁྱམས་རའི་རྒྱ་སྒོ་ཡི་ཕྱི་རོལ་ཏུ་མགུར་ལེན་མཁན་གྱི་ཁང་པ་གཉིས་ཡོད་དེ། གཅིག་ནི་བྱང་སྒོའི་འགྲམ་དུ་ལྷོ་ཕྱོགས་སུ་འཁོར་ཡོད་པ་དང་། ཅིག་ཤོས་ནི་ཤར་སྒོའི་འགྲམ་དུ་བྱང་ཕྱོགས་སུ་འཁོར་ཡོད།
EZE 40:45 དེ་ནས་ཁོས་ང་ལ་འདི་ལྟར། ལྷོ་ཕྱོགས་སུ་འཁོར་བའི་ཁང་པ་འདི་ནི་མཆོད་ཁང་གི་ལས་འགན་ཁུར་བའི་མཆོད་དཔོན་རྣམས་ཀྱི་ཆེད་དུ་བཀོད་པ་ཡིན་ལ།
EZE 40:46 བྱང་ཕྱོགས་སུ་འཁོར་བའི་ཁང་པ་དེ་ནི་མཆོད་ཁྲིའི་ལས་འགན་ཁུར་བའི་མཆོད་དཔོན་རྣམས་ཀྱི་ཆེད་དུ་བཀོད་པ་ཡིན་ཏེ། མཆོད་དཔོན་འདི་ཐམས་ཅད་ནི་ཟཱ་ཏོག་གི་བུ་རྒྱུད་ཡིན་པ་དང་། ལེ་ཝི་པའི་ཁྲོད་ནས་ཁོ་ཚོ་འབའ་ཞིག་གིས་དཀོན་མཆོག་ཡ་ཝཱེའི་སྤྱན་སྔར་ཞབས་ཕྱི་བསྒྲུབ་ཆོག་པ་ཡིན་ཞེས་ཟེར།
EZE 40:47 ཡང་དེས་ནང་གི་ཁྱམས་རའི་ཚད་ཐིག་བླངས་པ་ན་རིང་ཚད་ལ་ཁྲུ་བརྒྱ་དང་། ཞེང་ལ་ཁྲུ་བརྒྱ་ཡོད་པའི་གྲུ་བཞི་ཅན་ཞིག་ཡིན་པ་དང་། མཆོད་ཁྲི་ནི་མཆོད་ཁང་གི་མདུན་དུ་ཡོད།
EZE 40:48 དེ་ནས་ཁོས་ང་མཆོད་ཁང་གི་སྒོ་ཁྱམས་སུ་ཁྲིད་དེ། སྒོ་ཁྱམས་ཀྱི་སྒོ་སྒྲོམ་གྱི་ཚད་ཐིག་བླངས་པ་ན་གཡས་ཀྱི་མཐུག་ཚད་ལ་ཁྲུ་ལྔ་དང་། གཡོན་གྱི་མཐུག་ཚད་ལའང་ཁྲུ་ལྔ་ཡོད་པ་ཡིན། སྒོ་ཁའི་ཞེང་ལ་ཁྲུ་བཅུ་བཞི་དང་། རྒྱ་སྒོ་ནང་རོལ་གྱི་རྩིག་པར་ གཡས་སུ་ཁྲུ་གསུམ་དང་གཡོན་ལ་ཁྲུ་གསུམ་ཡོད་དོ། །
EZE 40:49 ཡང་སྒོ་ཁྱམས་ཀྱི་རིང་ཚད་ལ་ཁྲུ་ཉི་ཤུ་དང་། ཞེང་ལ་ཁྲུ་བཅུ་གཅིག་ཡོད་ཅིང་། མི་རྣམས་རྡོ་སྐས་ལ་འཛེགས་ན་ད་གཟོད་སྒོ་ཁྱམས་སུ་སླེབ་ཐུབ་པ་དང་། སྒོ་སྒྲོམ་གྱི་འགྲམ་དུ་ཡང་ཀ་བ་གཉིས་ཕྱོགས་གཉིས་སུ་ཡོད་དོ། །
EZE 41:1 ཡང་དེས་ང་མཆོད་ཁང་དུ་ཁྲིད་ནས་སྒོ་སྒྲོམ་རྣམས་ཀྱི་ཚད་ཐིག་བླངས་པ་ན་གཡས་གཡོན་གཉིས་པོའི་མཐུག་ཚད་ལ་ཁྲུ་དྲུག་རེ་ཡོད་པ་དང་། ཞེང་གི་ཆེ་ཆུང་ནི་གུར་མཆོག་དང་འདྲའོ། །
EZE 41:2 མཆོད་ཁང་གི་འཇུག་སྒོའི་ཞེང་ལ་ཁྲུ་བཅུ་ཡོད་པ་དང་། སྒོའི་ནང་འགྲམ་གྱི་རྩིག་པའི་མཐུག་ཚད་ལ་གཡས་གཡོན་གཉིས་སུ་ཁྲུ་ལྔ་རེ་ཡོད་ལ། ཡང་དེས་མཆོད་ཁང་གི་ཚད་ཐིག་བླངས་པ་ན་རིང་ཐུང་ལ་ཁྲུ་བཞི་བཅུ་དང་ཞེང་ལ་ཁྲུ་ཉི་ཤུ་ཡོད་པ་ཡིན།
EZE 41:3 དེ་མཆོད་ཁང་སྦུག་མར་ཕྱིན་ཏེ། སྒོ་ཁའི་སྒོ་སྒྲོམ་གྱི་ཚད་ཐིག་བླངས་པ་ན་རེ་རེའི་མཐུག་ཚད་ལ་ཁྲུ་གཉིས་རེ་ཡོད་པ་དང་། འཇུག་སྒོའི་ཞེང་ལ་ཁྲུ་དྲུག་དང་། སྒོའི་ནང་རོལ་གྱི་རྩིག་པའི་རིང་ཚད་ལ་ཁྲུ་བདུན་ཡོད།
EZE 41:4 དེས་མཆོད་ཁང་སྦུག་མའི་ཚད་ཐིག་བླངས་པ་ན། རིང་ཐུང་ལ་ཁྲུ་ཉི་ཤུ་དང་། ཞེང་ལ་ཁྲུ་ཉི་ཤུ་ཡོད་ཅིང་མཆོད་ཁང་ལ་གཏུག་ཡོད་པ་དང་། དེས་ང་ལ་ན་རེ། འདི་ནི་གནས་དམ་མཆོག་ཡིན་ཞེས་གསུངས་སོ། །
EZE 41:5 དེས་མཆོད་ཁང་གི་རྩིག་པའི་ཚད་ཐིག་བླངས་པ་ན་མཐུག་ཚད་ལ་ཁྲུ་དྲུག་ཡོད་དེ། མཆོད་ཁང་གི་མཐའ་འཁོར་དུ་ཞེང་ལ་ཁྲུ་བཞི་ཅན་གྱི་ཁང་མིག་མང་པོ་ཡོད་པ་ཡིན།
EZE 41:6 ཁང་མིག་དེ་དག་བསྡོམས་པས་རིམ་པ་གསུམ་ཡོད་དེ། གཅིག་གི་སྟེང་དུ་གཅིག་བརྩེགས་ཡོད་ལ། རིམ་པ་གཅིག་ལ་ཁང་མིག་སུམ་ཅུ་ཡོད་དོ། །ཁང་པའི་ཀ་གདུང་མཆོད་ཁང་གི་རྩིག་པའི་ནང་དུ་མི་འཛུལ་བའི་ཆེད་དུ། མཆོད་ཁང་གི་རྩིག་པའི་མཐའ་འཁོར་དུ་རྩིག་པའི་ས་འབུར་ཡོད་པ་དེས་ཁང་མིག་རྣམས་བསྐྱོར་ཡོད་དོ། །
EZE 41:7 མཆོད་ཁང་མཐའ་འཁོར་གྱི་ཁང་མིག་དེ་དག་ཇི་ལྟར་མཐོ་ན་ཞེང་དེ་ལྟར་ཆེ་ལ། མཆོད་ཁང་མཐའ་སྐོར་གྱི་ནང་གི་རྩིག་པ་རྣམས་རིམ་པ་གཅིག་ལས་གཅིག་སྲབ་པས་ན། ཁང་མིག་ཇི་ལྟར་མཐོ་ན་ཞེང་དེ་ལྟར་ཆེ་སྟེ། འོག་རིམ་བརྒྱུད་དེ་བར་རིམ་ནས་མཐོ་རིམ་ལ་རྒྱུ་བའི་སྐས་རྐང་ཡོད།
EZE 41:8 ཡང་ངས་སྟེགས་བུ་མཐོན་པོ་ཞིག་གིས་མཆོད་ཁང་བསྐོར་ཡོད་པ་མཐོང་སྟེ། ཁང་མིག་གི་རྨང་གཞི་ཡིན་པའི་སྟེགས་བུ་དེའི་མཐོ་ཚད་ལ་ལྕུག་མ་གཅིག་སྟེ་ཁྲུ་དྲུག་ཡོད།
EZE 41:9 ཁང་མིག་གི་ཕྱིའི་རྩིག་པའི་མཐུག་ཚད་ལ་ཁྲུ་ལྔ་ཡོད་དེ། མཆོད་ཁང་དང་མཆོད་དཔོན་གྱི་ཁང་མིག་རྣམས་ཀྱི་བར་དུ་ས་སྟོང་ཡོད་དོ། །
EZE 41:10 མཆོད་ཁང་དང་མཆོད་དཔོན་དག་གི་ཁང་མིག་རྣམས་ཀྱི་བར་དུ་མཆོད་ཁང་གི་ཕྱོགས་བཞི་རུ་ས་སྟོང་ཡོད་དེ། ཞེང་ལ་ཁྲུ་ཉི་ཤུ་ཡོད་པ་ཡིན།
EZE 41:11 ཁང་མིག་དེ་ལ་ས་སྟོང་དུ་རྒྱུ་བའི་སྒོ་ཡོད་དེ། སྒོ་གཅིག་བྱང་ཕྱོགས་དང་སྒོ་གཅིག་ལྷོ་ཕྱོགས་སུ་འཁོར་ཡོད་ལ། ཁང་པ་དང་ས་སྟོང་གཉིས་ཀྱི་བར་ཐག་ལ་ཁྲུ་ལྔ་ཡོད་ཅིང་མཐའ་འཁོར་རྣམས་ཀྱང་དེ་བཞིན་ནོ། །
EZE 41:12 ནུབ་ཕྱོགས་སུ་མཆོད་ཁང་གི་ཁྱམས་རའི་ས་སྟོང་ལ་འཁོར་བའི་ཁང་པ་ཞིག་ཡོད་དེ། ཞེང་ལ་ཁྲུ་བདུན་ཅུ་དང་རིང་ཚད་ལ་ཁྲུ་དགུ་བཅུ་ཡོད་དེ། ཁང་པའི་ཕྱོགས་བཞིའི་རྩིག་པ་ཡི་མཐུག་ཚད་ལ་ཁྲུ་ལྔ་ཡོད།
EZE 41:13 དེས་མཆོད་ཁང་གི་ཚད་ཐིག་བླངས་པ་ན་རིང་ཐུང་ལ་ཁྲུ་བརྒྱ་ཡོད་དེ། ཡང་མཆོད་ཁང་གི་ཁྱམས་རའི་ས་སྟོང་གི་ཚད་ཐིག་བླངས་པ་ན་ཁང་པ་དེ་དང་རྩིག་པ་ཡི་སྤྱིའི་རིང་ཚད་ལ་ཁྲུ་བརྒྱ་ཡོད་པ་ཡིན།
EZE 41:14 ཤར་ཕྱོགས་སུ་མཆོད་ཁང་མདུན་གྱི་ས་སྟོང་ནི་ཞེང་ལ་ཁྲུ་བརྒྱ་ཡོད་དོ། །
EZE 41:15 དེས་མཆོད་ཁང་གི་ཁྱམས་རའི་ས་སྟོང་རྒྱབ་ཕྱོགས་ཀྱི་ཁང་པ་དང་། ཁང་པའི་འགྲམ་གཉིས་ཀྱི་བར་ཁྱམས་ཀྱི་ཚད་ཐིག་བླངས་པ་ན་སྤྱིའི་རིང་ཚད་ལ་ཁྲུ་བརྒྱ་ཡོད་ལ།
EZE 41:16 ཚོམས་ཁང་དང་མཆོད་ཁང་སྦུག་མ་དང་། ནང་གི་ཁྱམས་རའི་ཕྱོགས་སུ་འཁོར་བའི་སྒོ་ཁྱམས་དང་། སྒོ་ཐེམ་དང་། སྒེའུ་ཁུང་དང་། སྒོ་ཐེམ་ཁ་གཏད་ཀྱི་བར་ཁྱམས་རིམ་པ་གསུམ་བཅས་ཀྱི་མཐའ་འཁོར་དུ་ཤིང་ལེབ་ཀྱིས་བརྒྱན་ཡོད་པ་དང་། ས་ནས་སྒེའུ་ཁུང་གི་བར་དུ་སྒེའུ་ཁུང་ཐམས་ཅད་གཡོགས་ཡོད་པ་ཡིན།
EZE 41:17 མཆོད་ཁང་སྦུག་མའི་སྒོ་སྟེང་གི་རྩིག་པ་དང་། མཆོད་ཁང་སྦུག་མ་དང་ཚོམས་ཁང་ཕྱི་ནང་གི་ཕྱོགས་བཞིའི་རྩིག་པ་ཐམས་ཅད་ཚད་གཞི་ལྟར་ཤིང་ལེབ་ཀྱིས་གཡོགས་ཡོད་དོ། །
EZE 41:18 ཀེ་རུབ་དང་ཤིང་ཏ་ལ་རྣམས་བརྐོས་ཡོད་དེ། ཀེ་རུབ་དང་ཀེ་རུབ་ཀྱི་བར་དུ་ཤིང་ཏ་ལ་རེ་ཡོད་པ་དང་། ཀེ་རུབ་རེ་ལ་ཞལ་གཉིས་ཡོད།
EZE 41:19 ཕྱོགས་གཅིག་ནས་མི་ཡི་གདོང་ཤིང་ཏ་ལའི་ཕྱོགས་སུ་འཁོར་ཡོད་པ་དང་། ཕྱོགས་གཞན་ཞིག་ནས་སེང་གེའི་གདོང་ཤིང་ཏ་ལའི་ཕྱོགས་སུ་འཁོར་ཡོད་དེ། མཆོད་ཁང་ཧྲིལ་པོའི་ཕྱོགས་བཞི་པོར་དེ་ལྟར་བརྐོས་ཡོད་དོ། །
EZE 41:20 མཆོད་ཁང་གི་རྩིག་པ་ནི་ས་ནས་སྒོ་ཡི་སྟེང་ཐམས་ཅད་ལ་ཀེ་རུབ་དང་ཤིང་ཏ་ལ་བརྐོས་ཡོད་དོ། །
EZE 41:21 མཆོད་ཁང་གི་སྒོ་སྒྲོམ་ནི་གྲུ་བཞི་ཡིན་ཞིང་། གནས་དམ་མཆོག་མདུན་གྱི་སྒོ་སྒྲོམ་ཡང་དེ་དང་གཅིག་ཡིན།
EZE 41:22 མཆོད་ཁྲི་ནི་ཤིང་གིས་བཟོས་ཡོད་པ་དང་། དེའི་མཐོ་ཚད་ལ་ཁྲུ་གསུམ་དང་རིང་ཚད་ལ་ཁྲུ་གཉིས་ཡོད། མཆོད་ཁྲིའི་གྲུ་ཟུར་དང་མཆོད་ཁྲིའི་ཕྱོགས་བཞི་ཐམས་ཅད་ཤིང་གིས་བཟོས་པ་ཡིན། དེས་ང་ལ་འདི་ལྟར། འདི་ནི་དཀོན་མཆོག་ཡ་ཝཱེའི་དྲུང་དུ་འཇོག་བྱའི་གསོལ་ལྕོག་ཡིན་ནོ་ཞེས་གསུངས་སོ། །
EZE 41:23 མཆོད་ཁང་དང་གནས་དམ་མཆོག་གཉིས་ལ་སྒོ་གླེགས་གཉིས་རེ་ཡོད་པ་དང་།
EZE 41:24 སྒོ་རེ་ལ་སྒོ་གླེགས་གཉིས་རེ་ཡོད་ལ། སྒོ་གླེགས་རེ་ལ་ངོས་གཉིས་རེ་ཡོད་པ་ལྟེབ་ཆོག་པ་ཡིན།
EZE 41:25 རྩིག་པའི་སྟེང་དུ་བརྐོས་ཡོད་པ་དང་མཚུངས་ཤིང་། མཆོད་ཁང་གི་སྒོ་གླེགས་སྟེང་དུའང་ཀེ་རུབ་དང་ཤིང་ཏ་ལ་བརྐོས་ཡོད་དེ། ཡང་ཕྱི་རོལ་གྱི་སྒོ་ཁྱམས་མདུན་དུ་ཤིང་གིས་བཟོས་པའི་མདའ་གཡབ་ཡོད་པ་ཡིན།
EZE 41:26 སྒོ་ཁྱམས་ཀྱི་འགྲམ་གཉིས་སུ་དམ་པོར་བརྒྱབ་པའི་སྒེའུ་ཁུང་དང་ཤིང་ཏ་ལ་ཡོད་ཅིང་། མཆོད་ཁང་གི་ཁང་མིག་ལའང་མདའ་གཡབ་ཡོད་དོ། །
EZE 42:1 དེས་ང་ཕྱི་རུ་ཁྲིད་ནས་བྱང་ཕྱོགས་ཀྱི་ཁྱམས་ར་ཕྱི་མར་སོང་སྟེ། ང་རང་མཆོད་དཔོན་རྣམས་ཀྱི་ཁང་པར་ཁྲིད་པ་དང་། ཁང་པ་དེ་དག་ཤུར་གཅིག་མཆོད་ཁང་གི་ཁྱམས་རའི་ས་སྟོང་ལ་ཁ་གཏད་ཡོད་པ་དང་། ཤུར་གཅིག་བྱང་ཕྱོགས་ཀྱི་བཟོ་བཀོད་ལ་ཁ་གཏད་ཡོད་པ་ཡིན།
EZE 42:2 ཁང་པ་སྤྱིའི་རིང་ཚད་ལ་ཁྲུ་བརྒྱ་ཡོད་པ་དང་། ཞེང་ལ་ཁྲུ་ལྔ་བཅུ་ཡོད་ལ། བྱང་ཕྱོགས་སུ་འཁོར་བའི་སྒོ་ཡོད་དོ། །
EZE 42:3 ཁང་པ་དེ་དག་ཤུར་གཅིག་ནི་ནང་གི་ཁྱམས་རའི་ཞེང་ལ་ཁྲུ་ཉི་ཤུ་ཡོད་པའི་ས་སྟོང་དུ་ཁ་གཏད་ཡོད་པ་དང་། ཤུར་གཅིག་ནི་ཁྱམས་ར་ཕྱི་མའི་རྡོ་གཅལ་ལ་ཁ་གཏད་ཡོད་དེ། རིམ་པ་གསུམ་པའི་ཐོག་ཁང་གི་བར་ཁྱམས་ནི་ཕན་ཚུན་ཁ་གཏད་ནས་ཡོད་པ་ཡིན།
EZE 42:4 ཁང་པའི་མདུན་དུ་ནང་གི་འཁྱམ་རར་ལམ་དོག་མོ་ཞིག་ཡོད་པ་ཞེང་ལ་ཁྲུ་བཅུ་དང་། རིང་ཚད་ལ་ཁྲུ་བརྒྱ་ཡོད་པ་དང་། ཁང་པའི་སྒོ་རྣམས་བྱང་ཕྱོགས་སུ་འཁོར་ཡོད།
EZE 42:5 སྟེང་གི་ཁང་པ་རྣམས་ཆེས་དོག་མོ་ཡིན་ཏེ། གང་ལ་ཞེ་ན། སྟེང་གི་ཁང་པའི་བར་ཁྱམས་ཀྱིས་ས་ཟིན་པ་ནི་འོག་གི་རིམ་པ་དང་བར་གྱི་རིམ་པ་ལས་ཆེ་བས་སོ། །
EZE 42:6 ཁྱམས་ར་ཕྱི་མའི་ཁང་པར་ཀ་བ་ཡོད་པ་བཞིན་དུ། རིམ་པ་གསུམ་པའི་ཁང་པར་ཀ་བ་མེད་པས། སྟེང་གི་ཁང་པ་ནི་འོག་གི་ཁང་པ་དང་བར་གྱི་ཁང་པ་ལས་ཅུང་དོག་གོ །
EZE 42:7 ཕྱི་རོལ་ཏུ་རྩིག་པ་ཞིག་ཡོད་པ་དེ་ཁང་པའི་མདུན་དུ་ཡོད་དེ། ཁང་པ་དང་ཁྱམས་ར་ཕྱི་མ་གཉིས་དང་དོ་མཉམ་ཡིན་ལ། རིང་ཚད་ལ་ཁྲུ་ལྔ་བཅུ་ཡོད་པ་ཡིན།
EZE 42:8 ཁྱམས་ར་ཕྱི་མའི་ཕྱོགས་སུ་འཁོར་བའི་ཁང་པའི་རིང་ཚད་ལ་ཁྲུ་ལྔ་བཅུ་ཡོད་པ་དང་། མཆོད་ཁང་གི་ཕྱོགས་སུ་འཁོར་བའི་ཁང་པའི་རིང་ཚད་ལ་ཁྲུ་བརྒྱ་ཡོད་དོ། །
EZE 42:9 རིམ་པ་འོག་མའི་ཁང་པར་ཤར་ཕྱོགས་སུ་འཇུག་སྒོ་ཞིག་ཡོད་དེ། མི་རྣམས་ཁྱམས་ར་ཕྱི་མ་ནས་ཁང་པར་འགྲོ་ཐུབ་བོ། །
EZE 42:10 ཤར་ཕྱོགས་སུ་ནང་གི་ཁྱམས་རའི་རྩིག་འགྲམ་དུའང་ཁང་པ་ཡོད་དེ། ཤུར་གཅིག་ནི་མཆོད་ཁང་གི་ཁྱམས་རའི་ས་སྟོང་ལ་ཁ་གཏད་ཡོད་པ་དང་། ཤུར་གཅིག་ནི་ལྷོ་ཕྱོགས་ཀྱི་བཟོ་བཀོད་ལ་ཁ་གཏད་ཡོད་པ་ཡིན།
EZE 42:11 ཁང་པ་དེ་དག་གི་མདུན་དུ་ལམ་དོག་མོ་ཞིག་ཡོད་པ་བྱང་ཕྱོགས་ཀྱི་ལམ་དེ་དང་མཚུངས་ལ། རིང་ཚད་དང་ཞེང་ཚད་ཀྱང་མཚུངས་ཏེ། ཐོན་སྒོའང་བྱང་ཕྱོགས་ཀྱི་སྒོ་དེ་དང་གཅིག་ཡིན་ནོ། །
EZE 42:12 ཡང་ལྷོ་ཕྱོགས་ཀྱི་ཁང་པའི་སྒོ་ཡང་བྱང་ཕྱོགས་ཀྱི་སྒོ་དེ་དང་མཚུངས་ལ། ཤར་གྱི་ལམ་དོག་མོའི་འགོ་སྟེ་རྩིག་པ་དང་ཁ་གཏད་ས་ནས་འཇུག་སྒོ་ཞིག་ཡོད་དོ། །
EZE 42:13 དེ་ནས་ཁོས་ང་ལ་འདི་ལྟར། མཆོད་ཁང་གི་ཁྱམས་རའི་ས་སྟོང་ལ་འཁོར་ཡོད་པའི་ལྷོ་དང་བྱང་གི་ཁང་པ་རྣམས་ནི་གཙང་མ་ཡིན་ཏེ། དཀོན་མཆོག་ཡ་ཝཱེ་དང་ཉེ་བའི་མཆོད་དཔོན་རྣམས་ཀྱིས་དེར་ཟས་དམ་མཆོག་རྣམས་བཟའ་ཞིང་། གནས་དེར་འབྲུ་མཆོད་དང་། སྡིག་བཤགས་ཀྱི་མཆོད་པ་དང་། ཉེས་སེལ་གྱི་མཆོད་པ་བཅས་ཀྱི་མཆོད་རྫས་ཏེ་རྫས་དམ་མཆོག་རྣམས་འཇོག་པ་ཡིན་ཏེ། གང་ལ་ཞེ་ན། དེ་ནི་གནས་དམ་པ་ཡིན་པས་སོ། །
EZE 42:14 མཆོད་དཔོན་རྣམས་ནང་དུ་ཕྱིན་ཚེ་གནས་དམ་པ་ནས་ཁྱམས་ར་ཕྱི་མར་འགྲོ་མི་རུང་སྟེ། ཁོ་ཚོས་ཁང་པའི་ནང་དུ་ཞབས་ཏོག་སྒྲུབ་དུས་གྱོན་པའི་གོས་རྣམས་འཇོག་དགོས་ལ། གང་ལ་ཞེ་ན། གྱོན་པ་དེ་དག་ནི་དམ་པ་ཡིན་པས་སོ། །ཁོ་ཚོས་གོས་གཞན་གྱོན་རྗེས་ད་གཟོད་མི་རྣམས་ཡོད་སར་སོང་ཆོག་ཅེས་གསུངས་སོ། །
EZE 42:15 དེས་ནང་གི་ཁྱམས་རའི་ཚད་ཐིག་བླངས་ནས་ང་རང་ཤར་སྒོ་ནས་ཕྱི་རུ་ཁྲིད་ཅིང་། ཡང་མཆོད་ཁང་ཧྲིལ་པོའི་ཕྱོགས་བཞིའི་ཚད་ཐིག་བླངས་པའོ། །
EZE 42:16 དེས་ཚད་ཐིག་ལེན་བྱེད་ཀྱི་ལྕུག་མས་ཤར་ཕྱོགས་ཀྱི་ཚད་ཐིག་བླངས་ཏེ། ཚད་ཐིག་བཞིན་བརྩིས་པར་སྤྱིའི་རིང་ཚད་ལ་ཁྲུ་ལྔ་བརྒྱ་ཡོད་པ་དང་།
EZE 42:17 ཡང་ལྕུག་མས་བྱང་ཕྱོགས་ཀྱི་ཚད་ཐིག་བླངས་ཏེ། ཚད་ཐིག་བཞིན་བརྩིས་པར་སྤྱིའི་རིང་ཚད་ལ་ཁྲུ་ལྔ་བརྒྱ་ཡོད།
EZE 42:18 ཡང་ལྕུག་མས་ལྷོ་ཕྱོགས་ཀྱི་ཚད་ཐིག་བླངས་ཏེ། ཚད་ཐིག་བཞིན་བརྩིས་པར་སྤྱིའི་རིང་ཚད་ལ་ཁྲུ་ལྔ་བརྒྱ་ཡོད།
EZE 42:19 ཡང་དེས་ཕར་སོང་ནས་ལྕུག་མས་ནུབ་ཕྱོགས་ཀྱི་ཚད་ཐིག་བླངས་ཏེ། ཚད་ཐིག་བཞིན་བརྩིས་པར་སྤྱིའི་རིང་ཚད་ལ་ཁྲུ་ལྔ་བརྒྱ་ཡོད།
EZE 42:20 དེ་ལྟར་ཁོས་ཕྱོགས་བཞི་པོའི་ཚད་ཐིག་བླངས་པ་ན། མཆོད་ཁང་གི་རིང་ཚད་ལ་ཁྲུ་ལྔ་བརྒྱ་ཡོད་པ་དང་། ཞེང་ལ་ཁྲུ་ལྔ་བརྒྱ་ཡོད་དེ། ཕྱོགས་བཞིར་མཁར་ཡོད་ཅིང་དེ་ནི་གནས་མཆོག་དང་གནས་ཕལ་བ་གཉིས་ཀ་སོ་སོར་དབྱེ་བའི་ཆེད་དུ་ཡིན་ནོ། །
EZE 43:1 དེ་ནས་ཁོས་ང་ཤར་ཕྱོགས་སུ་འཁོར་བའི་རྒྱ་སྒོ་ཡོད་སར་ཁྲིད་པ་ན།
EZE 43:2 ལྟོས་དང་། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེ་ཤར་ཕྱོགས་ནས་འོངས་ཏེ། ཁོང་གི་གསུང་སྐད་ནི་ཆུ་ལོག་གི་འུར་སྒྲ་དང་འདྲ་ཞིང་། ཁོང་གི་གཟི་བརྗིད་ཀྱི་དབང་གིས་ས་གཞི་ལས་འོད་འཕྲོས་པའོ། །
EZE 43:3 ངས་མཐོང་བའི་ཞལ་གཟིགས་དེ་ནི་ཁོང་ཉིད་གྲོང་ཁྱེར་དེ་མེད་པར་བཟོ་བར་ཕེབས་དུས་སུ་མཐོང་བའི་ཞལ་གཟིགས་དང་མཚུངས་ལ། ཡང་ངས་ཀེ་བར་གཙང་པོའི་འགྲམ་དུ་མཐོང་བའི་ཞལ་གཟིགས་དང་འདྲ་བས་ང་ལུས་སར་བཏུད་ནས་བསྡད།
EZE 43:4 དཀོན་མཆོག་ཡ་ཝཱེའི་གཟི་བརྗིད་ནི་ཤར་ཕྱོགས་སུ་འཁོར་བའི་རྒྱ་སྒོ་ལས་མཆོད་ཁང་གི་ནང་དུ་ཕེབས་སོ། །
EZE 43:5 དེ་ནས་ཐུགས་ཉིད་ཀྱིས་ང་ཡར་བཀྱགས་ཏེ་ང་རང་ནང་གི་ཁྱམས་རར་ཁྲིད་པ་ན། དཀོན་མཆོག་ཡ་ཝཱེའི་གཟི་བརྗིད་ནི་མཆོད་ཁང་ནང་དུ་ཁེངས་ཡོད་པ་ངས་མཐོང་ངོ་། །
EZE 43:6 མི་དེ་ངའི་གམ་དུ་ལངས་སྡོད་པའི་སྐབས་སུ། གཙོ་བོས་མཆོད་ཁང་ནས་ང་ལ་བཀའ་གནང་བ་ངས་ཐོས་བྱུང་སྟེ།
EZE 43:7 ཁོང་གིས་ང་ལ་འདི་སྐད་དུ། ཀྱེ་མིའི་བུ། འདི་ནི་ངའི་བཞུགས་ཁྲི་ཡོད་ས་དང་། ངའི་རྐང་པ་སྤོ་སའི་གནས་དེ་ཡིན་པས། ང་གནས་དེ་རུ་བསྡད་ནས་ཡེས་ར་ཨེལ་པ་རྣམས་ཀྱི་ནང་དུ་ཇི་སྲིད་བར་དུ་གནས་པར་འགྱུར་ལ། ད་ཕྱིན་ཆད་ཡེས་ར་ཨེལ་གྱི་ཁྱིམ་རྒྱུད་དང་དེ་དག་གི་རྒྱལ་པོ་རྣམས་ཀྱིས་རང་ཉིད་ཀྱི་ལོག་གཡེམ་དང་། རྒྱལ་པོ་རྣམས་ཀྱི་མཐོ་གླིང་གི་རྡོ་རིང་གིས་ངའི་མཚན་དམ་པ་བཙོག་པར་མི་བྱ།
EZE 43:8 དེ་དག་གི་སྒོ་ཐེམ་ནི་ངའི་སྒོ་ཐེམ་དང་ཉེ་ཞིང་། དེ་དག་གི་སྒོ་སྒྲོམ་ཡང་ངའི་སྒོ་སྒྲོམ་དང་ཉེ་བ་ཡིན། ང་དང་དེ་དག་གི་བར་དུ་རྩིག་པ་གཅིག་མ་གཏོགས་མེད་པའི་དུས་སུ། དེ་དག་གིས་རང་གིས་སྤྱད་པའི་ཞེན་ལོག་གི་ལས་ཀྱིས་ངའི་མཚན་དམ་པ་བཙོག་པར་བཟོས་པས། ངས་ཁོང་ཁྲོ་དང་བཅས་དེ་དག་རྩ་མེད་དུ་བཏང་བ་ཡིན།
EZE 43:9 ད་ལྟ་ཁོ་ཚོས་ངའི་མདུན་དུ་རང་གི་ལོག་གཡེམ་དང་ཁོ་ཚོའི་རྒྱལ་པོ་དག་གི་རྡོ་རིང་རྣམས་མེད་པར་བཟོས་ན། ང་ནི་ཇི་སྲིད་བར་དུ་ཁོ་ཚོའི་ཁྲོད་དུ་གནས་པར་འགྱུར་རོ། །
EZE 43:10 ཀྱེ་མིའི་བུ། ཁྱོད་ཀྱིས་མཆོད་ཁང་འདི་ཡེས་ར་ཨེལ་གྱི་ཁྱིམ་རྒྱུད་ལ་བསྟན་ནས་ཁོ་རྣམས་རང་གི་སྡིག་པའི་རྐྱེན་གྱིས་ངོ་ཚ་བར་གྱིས་ལ། ཡང་ཁོ་ཚོར་མཆོད་ཁང་གི་ཆེ་ཆུང་ཚད་ཐིག་ལེན་དུ་ཆུག་དང་།
EZE 43:11 གལ་ཏེ་ཁོ་རྣམས་རང་གིས་སྤྱད་པའི་ལས་ཀུན་གྱི་ཕྱིར་ངོ་ཚ་བར་གྱུར་ན། ཁྱོད་ཀྱིས་མཆོད་ཁང་གི་བཟོ་བཀོད་དང་སྒྲིག་གཞི། ནང་ལ་འགྲོ་ས་དང་ཕྱིར་ཐོན་ས། ད་དུང་བཟོ་བཀོད་དང་ལམ་སྲོལ། གུས་སྲོལ་མཛད་སྒོ། ཁྲིམས་སྲོལ་མཐའ་དག་དེ་རྣམས་ལ་སྟོན་ཅིག ཡང་དེ་དག་གི་མདུན་དུ་ཡི་གེར་བཀོད་ནས་མཆོད་ཁང་གི་བཟོ་བཀོད་དང་ལམ་སྲོལ་ཡོད་ཚད་བཞིན་དུ་ཁོ་རྣམས་ལ་བྱེད་དུ་ཆུག
EZE 43:12 མཆོད་ཁང་གི་ཁྲིམས་སྲོལ་ནི་འདི་ལྟ་སྟེ། མཆོད་ཁང་གི་རི་རྩེའི་མཐའ་འཁོར་གྱི་ས་མཚམས་ཀུན་དམ་པར་བརྩིས་པ་ནི་མཆོད་ཁང་གི་ཁྲིམས་སྲོལ་ཡིན་ནོ། །
EZE 43:13 མཆོད་ཁྲིའི་ཆེ་ཆུང་ནི་འདི་ལྟ་སྟེ། ཁྲུ་རེ་ཚད་ཐིག་ཏུ་བྱེད་དགོས་ལ་ཁྲུ་རེ་ནི་ཁྲུ་གང་དང་སོར་བཞི་ཡིན། ཝ་མཆུ་ལ་ཁྲུ་གང་དང་མུ་མཐའི་ཞེང་ལ་ཁྲུ་གང་ཡོད་དེ། ཕྱོགས་བཞི་རུ་མཐའ་ཡོད་པའི་མཐོ་ཚད་ལ་ཐོ་གང་ཡོད་པ་འདི་ནི་མཆོད་ཁྲིའི་ཞབས་ར་ཡིན་ནོ། །
EZE 43:14 ཝ་མཆུ་ནས་འོག་རིམ་གྱི་ཁྲི་སྟེགས་བར་དུ་མཐོ་ཚད་ལ་ཁྲུ་དོ་དང་། མུ་མཐའི་ཞེང་ལ་ཁྲུ་གང་ཡོད་དེ། ཁྲི་སྟེགས་ཆུང་བ་ནས་ཆེ་བའི་བར་དུ་མཐོ་ཚད་ལ་ཁྲུ་དོ་དང་། མུ་མཐའི་ཞེང་ལ་ཁྲུ་གང་ཡོད་དོ། །
EZE 43:15 མཆོད་ཁྲིའི་མཆོད་རྫས་བཤམས་སའི་མཐོ་ཚད་ལ་ཁྲུ་བཞི་ཡོད་པ་དང་། མཆོད་རྫས་བཤམས་ས་ནས་ཟུར་བཞི་པོ་ཕྱི་རུ་འབུར་ཡོད་པ་ཡིན།
EZE 43:16 མཆོད་རྫས་བཤམས་སའི་རིང་ཐུང་ལ་ཁྲུ་བཅུ་གཉིས་དང་། ཞེང་ལ་ཁྲུ་བཅུ་གཉིས་ཡོད་དེ། ཕྱོགས་བཞིའི་དབྱིབས་ནི་གྲུ་བཞི་ཡིན།
EZE 43:17 ཁྲི་སྟེགས་ཆེ་བའི་རིང་ཐུང་ལ་ཁྲུ་བཅུ་བཞི་ཡོད་པ་དང་། ཞེང་ལ་ཁྲུ་བཅུ་བཞི་ཡོད་དེ། ཕྱོགས་བཞིའི་དབྱིབས་ནི་གྲུ་བཞི་ཡིན་ལ། མཐའ་བཞི་པོའི་མཐོ་ཚད་ལ་ཁྲུ་ཕྱེད་ཀ་ཡོད་པ་དང་། ཝ་མཆུའི་ཕྱོགས་བཞི་པོའི་མུ་མཐའ་ཡི་ཞེང་ལ་ཁྲུ་གང་ཡོད། ཡང་སྐས་རྐང་ནི་ཤར་ཕྱོགས་སུ་འཁོར་ཡོད་པ་ཡིན་ཞེས་གསུངས་སོ། །
EZE 43:18 ཁོས་ང་ལ་འདི་ལྟར། ཀྱེ་མིའི་བུ། གཙོ་བོ་ཡ་ཝཱེས་འདི་སྐད་དུ། མཆོད་ཁྲིའི་ལམ་སྲོལ་ནི་འདི་ལྟ་སྟེ། མཆོད་ཁྲི་བཞེངས་ཚར་ནས་དེའི་སྟེང་དུ་སྦྱིན་སྲེག་གི་མཆོད་པ་ཕུལ་ཏེ་ཁྲག་གཏོར་བའི་དུས་སུ།
EZE 43:19 ངའི་སྤྱན་སྔར་བདག་ལ་ཞབས་ཕྱི་སྒྲུབ་པའི་ལེ་ཝི་པའི་མཆོད་དཔོན་ཏེ་ཟཱ་ཏོག་གི་བུ་རྒྱུད་རྣམས་ལ། སྡིག་བཤགས་ཀྱི་མཆོད་པ་རུ་ཁྱོད་ཀྱིས་བ་ཕྲུག་ཅིག་སྟེར་དགོས་ཞེས་གཙོ་བོ་ཡ་ཝཱེས་གསུངས་པ་དང་།
EZE 43:20 ཁྱོད་ཀྱིས་བ་ཕྲུག་གི་ཁྲག་ཅུང་ཙམ་བླངས་ཏེ་མཆོད་ཁྲིའི་ཟུར་བཞི་དང་ཁྲི་སྟེགས་ཀྱི་ཟུར་བཞི། དེ་མིན་ཕྱོགས་བཞིའི་འབུར་དུ་ཐོན་པའི་མཐའ་རྣམས་ལ་སྐུས་ཤིག ཁྱོད་ཀྱིས་དེ་ལྟར་མཆོད་ཁྲི་གཙང་མར་བྱས་ན་དེ་གཙང་མར་འགྱུར་རོ། །
EZE 43:21 ཡང་ཁྱོད་ཀྱིས་སྡིག་བཤགས་ཀྱི་མཆོད་པར་འབུལ་བའི་བ་ཕྲུག་དེ་ནི་གནས་དམ་པའི་ཕྱི་རོལ་ཏུ་མཆོད་ཁང་གི་གཏན་ལ་ཁེལ་བའི་གནས་སུ་སྲེགས་ཤིག
EZE 43:22 བ་ཕྲུག་གིས་མཆོད་ཁྲི་གཙང་མར་བྱས་པ་བཞིན་དུ་མཆོད་ཁྲི་གཙང་མར་བཟོ་བའི་ཕྱིར། དེའི་ཕྱི་ཉིན་ཁྱོད་ཀྱིས་སྐྱོན་དང་བྲལ་བའི་ར་ཐུག་ཅིག་སྡིག་བཤགས་ཀྱི་མཆོད་པར་ཕུལ་ཞིག
EZE 43:23 ཁྱོད་ཀྱིས་མཆོད་ཁྲི་གཙང་མར་བྱས་རྗེས་སྐྱོན་དང་བྲལ་བའི་བ་ཕྲུག་ཅིག་དང་ལུག་ཁྱུ་ལས་སྐྱོན་དང་བྲལ་བའི་ལུག་ཐུག་ཅིག་བླངས་ཏེ་མཆོད་པར་འབུལ་དགོས།
EZE 43:24 ཁྱོད་ཀྱིས་དེ་དག་ཡ་ཝཱེའི་ཞལ་ངོར་ཕུལ་ཞིག མཆོད་དཔོན་རྣམས་ཀྱིས་དེ་དག་གི་སྟེང་དུ་ཚྭ་གཏོར་ནས་ཡ་ཝཱེ་ལ་སྦྱིན་སྲེག་གི་མཆོད་པར་འབུལ་དགོས།
EZE 43:25 ཁྱོད་ཀྱིས་བསྟུད་མར་ཉིན་བདུན་ལ་ཉིན་རེ་བཞིན་སྡིག་བཤགས་ཀྱི་མཆོད་པའི་ཕྱིར་ར་ཐུག་ཅིག་དང་། ཡང་བ་ཕྲུག་ཅིག་དང་ལུག་ཁྱུ་ལས་ལུག་ཐུག་ཅིག་གྲ་སྒྲིག་བྱེད་དགོས་ལ། ཐམས་ཅད་སྐྱོན་དང་བྲལ་བ་ཡིན་དགོས།
EZE 43:26 བསྟུད་མར་ཉིན་བདུན་ལ་མཆོད་དཔོན་རྣམས་ཀྱིས་མཆོད་ཁྲི་གཙང་མར་བྱས་ན་མཆོད་ཁྲི་གཙང་མར་འགྱུར་ཞིང་། ཁོ་ཚོས་དེ་ལྟར་མཆོད་ཁྲི་དམ་པར་བྱས་པ་ཡིན།
EZE 43:27 ཉིན་བདུན་ཚང་རྗེས་ཀྱི་ཉིན་བརྒྱད་པ་ནས་བཟུང་། མཆོད་དཔོན་རྣམས་ཀྱིས་མཆོད་ཁྲིའི་སྟེང་དུ་ཁྱོད་ཅག་གི་སྦྱིན་སྲེག་དང་ཞི་བདེའི་མཆོད་པ་འབུལ་དགོས་པ་དང་། དུས་དེར་ངས་དགའ་མགུའི་ངང་ཁྱོད་རྣམས་དང་དུ་ལེན་ནོ་ཞེས་གཙོ་བོ་ཡ་ཝཱེས་གསུངས་ཞེས་གསུངས་སོ། །
EZE 44:1 ཡང་དེས་ང་གནས་དམ་པའི་ཤར་ཕྱོགས་སུ་འཁོར་བའི་ཕྱི་སྒོ་རུ་ཁྲིད་པ་ན་སྒོ་དེ་བརྒྱབ་ཡོད་པ་དང་།
EZE 44:2 དཀོན་མཆོག་ཡ་ཝཱེས་ང་ལ་འདི་སྐད་དུ། སྒོ་འདི་ངེས་པར་དུ་རྒྱག་དགོས་པ་ལས་འབྱེད་མི་རུང་སྟེ། མི་སུ་ཞིག་ཡིན་ཡང་དེ་ལས་ནང་དུ་འགྲོ་མི་ཆོག གང་ལ་ཞེ་ན། ཡེས་ར་ཨེལ་གྱི་དཀོན་མཆོག་ཡ་ཝཱེ་དེ་ལས་ནང་དུ་ཕེབས་པས་ན་སྒོ་འདི་ངེས་པར་དུ་རྒྱག་དགོས་པ་ཡིན།
EZE 44:3 རྒྱལ་པོ་འབའ་ཞིག་ནང་དུ་བཞུགས་ཏེ་ཡ་ཝཱེའི་དྲུང་དུ་བག་ལེབ་བཟའ་ཆོག་པ་དང་། དེ་ནི་ངེས་པར་དུ་སྒོ་ཁྱམས་ནས་ནང་དུ་འཛུལ་ཞིང་། ཡང་ལམ་དེ་བརྒྱུད་ནས་ཕྱིར་ཡོང་དགོས་པ་ཡིན་ཞེས་གསུངས་སོ། །
EZE 44:4 ཡང་ཁོས་བྱང་སྒོ་བརྒྱུད་ནས་ང་མཆོད་ཁང་གི་མདུན་ཕྱོགས་སུ་ཁྲིད་ཅིང་། ངས་བལྟས་པ་ན། དཀོན་མཆོག་ཡ་ཝཱེའི་མཆོད་ཁང་ནང་དུ་ཁོང་གི་གཟི་བརྗིད་ཀྱིས་ཁེངས་ཡོད་པ་མཐོང་བ་དང་ངས་གདོང་སར་བཏུད་ནས་བསྡད་དོ། །
EZE 44:5 དཀོན་མཆོག་ཡ་ཝཱེས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་ལ་སྨྲས་པའི་དཀོན་མཆོག་ཡ་ཝཱེའི་མཆོད་ཁང་གི་ལམ་སྲོལ་དང་ཁྲིམས་སྲོལ་ཐམས་ཅད་ལ་ཁྱོད་ཀྱིས་གཟབ་གཟབ་བྱས་ནས་མིག་གིས་ལྟོས་ལ་རྣ་བས་ཉོན་ཅིག དེར་མ་ཟད་མཆོད་ཁང་གི་འཇུག་སྒོ་དང་གནས་དམ་པའི་ཐོན་སྒོ་ཐམས་ཅད་ལ་ཡིད་འཇོག་བྱེད་དགོས།
EZE 44:6 ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ངོ་ལོག་ཅན་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཀྱིས་སྤྱད་པའི་ཞེན་ལོག་གི་དོན་ཀུན་ད་དུང་མ་ལོངས་སམ།
EZE 44:7 ཁྱོད་རྣམས་ཀྱིས་ཞེན་ལོག་གི་དོན་འདི་ཐམས་ཅད་སྤྱད་པའི་ཁར། ད་དུང་ཁྱོད་རྣམས་ཀྱིས་ཚིལ་དང་ཁྲག་ང་ལ་ཟས་སུ་འབུལ་སྐབས། ལུས་སེམས་གཉིས་ཀྱི་མཚན་སྐྱི་བཅད་མེད་པའི་ཕྱི་ཕྱོགས་པ་རྣམས་ངའི་གནས་དམ་པ་རུ་ཁྲིད་འོངས་ཏེ། ངའི་མཆོད་ཁང་བཙོག་པར་བཟོས་ནས་ངའི་ཁ་ཆད་ལའང་འགལ་བའོ། །
EZE 44:8 ཡང་ཁྱོད་ཚོས་ངའི་རྫས་དམ་པ་རྣམས་མ་བསྲུངས་པའི་ཁར། ཁྱོད་རྣམས་ཀྱི་ཚབ་ཏུ་ངའི་གནས་དམ་པར་མི་གཞན་མངགས་ནས་སྲུང་བར་བཅུག་གོ་ཞེས་གསུངས་སོ། །
EZE 44:9 ཡང་གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་ཀྱི་ཁྲོད་དུ་ལུས་སེམས་གཉིས་ཀྱི་མཚན་སྐྱི་བཅད་མེད་པའི་ཕྱི་ཕྱོགས་པ་རྣམས་སུ་ཡིན་ཡང་ངའི་གནས་དམ་པ་རུ་འོང་མི་ཆོག
EZE 44:10 ཡེས་ར་ཨེལ་པ་རྣམས་ཀྱིས་ལམ་བོར་བའི་དུས་སུ། ལེ་ཝི་པ་ཡང་ང་དང་རིང་དུ་བྲལ་ནས་ལམ་བོར་བ་དང་། དེ་དག་ང་དང་བྲལ་ནས་རང་གི་སྐུ་འདྲའི་རྗེས་སུ་འབྲངས་པས་ན་ཁོ་ཚོས་རང་གི་སྡིག་པ་འཁུར་དགོས་ངེས་ཡིན།
EZE 44:11 དེ་དག་གིས་ངའི་གནས་དམ་པ་རུ་ཞབས་ཕྱི་བསྒྲུབས་ནས་ངའི་མཆོད་ཁང་གི་སྒོ་རྣམས་བསྲུང་དགོས་ལ། ངའི་གནས་དམ་པའི་ནང་དུ་ལས་འགན་བསྒྲུབ་དགོས། དེ་དག་གིས་མི་རྣམས་ཀྱི་ཆེད་དུ་སྦྱིན་སྲེག་གི་མཆོད་པའི་ཕྱུགས་ཟོག་དང་། མཆོད་པ་གཞན་པའི་ཕྱུགས་ཟོག་རྣམས་བཤའ་དགོས་པ་དང་། ཡང་མི་རྣམས་ཀྱི་མདུན་དུ་ལངས་ནས་དེ་དག་ལ་ཞབས་ཏོག་བསྒྲུབ་དགོས་སོ། །
EZE 44:12 གང་ལ་ཞེ་ན། སྔར་ལེ་ཝི་པ་དེ་དག་གིས་ཁོ་ཚོའི་སྐུ་འདྲའི་མདུན་དུ་མི་འདི་རྣམས་ལ་ཞབས་ཏོག་བསྒྲུབས་པས། ཡེས་ར་ཨེལ་གྱི་ཁྱིམ་རྒྱུད་སྡིག་པའི་ནང་དུ་ལྷུང་བར་བྱེད་པའི་བཀག་རྡོ་རུ་གྱུར་པའོ། །དེ་བས་ངས་ཁོ་ཚོའི་ཕྱོགས་སུ་ལག་པ་བརྐྱངས་ནས་མནའ་བསྐྱལ་བ་སྟེ། དེ་དག་གིས་རང་གི་སྡིག་པ་འཁུར་དགོས་ངེས་ཡིན་ཞེས་གཙོ་བོ་ཡ་ཝཱེས་གསུངས་སོ། །
EZE 44:13 དེ་དག་ངའི་ཉེ་སར་བཅར་ནས་ངའི་མཆོད་དཔོན་བྱེད་མི་རུང་ལ། ངའི་རྫས་དམ་པ་རྣམས་དང་རྫས་དམ་མཆོག་རྣམས་ཀྱི་ཉེ་སར་ཡང་བཅར་མི་རུང་། དེ་དག་གིས་ངེས་པར་དུ་རང་གི་ངོ་ཚ་དང་རང་གིས་བྱས་པའི་ཞེན་ལོག་གི་དོན་རྣམས་ཀྱི་ལན་འཁུར་དགོས།
EZE 44:14 ཡིན་ནའང་ངས་ཁོ་ཚོ་མཆོད་ཁང་བསྲུང་བ་དང་མཆོད་ཁང་གི་ལས་དོན་རྣམས་བསྒྲུབ་པ། བྱེད་འོས་པའི་ལས་ཐམས་ཅད་བྱེད་པའི་ཆེད་དུ་བསྐོ་བར་བྱའོ། །
EZE 44:15 ཡེས་ར་ཨེལ་པ་རྣམས་ཀྱིས་ལམ་བོར་ཏེ་ང་དང་ཁ་བྲལ་དུས་སུ། ཟཱ་ཏོག་གི་བུ་རྒྱུད་དེ་ལེ་ཝི་པའི་མཆོད་དཔོན་དག་གིས་ད་དུང་ངའི་གནས་དམ་པ་བསྲུངས་པ་ཡིན། དེ་རྣམས་འབའ་ཞིག་ངའི་ཉེ་སར་བཅར་ནས་ང་ལ་ཞབས་ཕྱི་བསྒྲུབ་པ་དང་། ངའི་མདུན་དུ་ལངས་བསྡད་དེ་ཚིལ་དང་ཁྲག་ང་ལ་འབུལ་ཆོག་པ་ཡིན་ཞེས་གཙོ་བོ་ཡ་ཝཱེས་གསུངས།
EZE 44:16 དེ་དག་ནི་ངའི་གནས་དམ་པའི་ནང་དུ་འཛུལ་ནས་ངའི་སྒྲོག་ཙེ་རྩར་འོངས་ཏེ་ང་ལ་ཞབས་ཏོག་བསྒྲུབ་པ་དང་། ངས་བསྒོས་པའི་བཀའ་རྣམས་བསྲུང་ཆོག་པ་ཡིན།
EZE 44:17 དེ་དག་ནང་གི་ཁྱམས་རའི་སྒོ་རུ་འཇུག་དུས་སུ། ངེས་པར་དུ་སོ་རས་སྲབ་བུ་གྱོན་དགོས་པ་དང་། དེ་དག་གིས་ནང་གི་ཁྱམས་རའི་སྒོ་ཁ་དང་མཆོད་ཁང་ནང་དུ་ཞབས་ཏོག་སྒྲུབ་དུས་སུ་ཁོ་ཚོས་སྣམ་བུ་གྱོན་མི་རུང་སྟེ།
EZE 44:18 ཁོ་ཚོའི་མགོ་ལ་སོ་རས་སྲབ་བུ་དཀྲི་དགོས་པ་དང་། ཁོག་སྨད་ལ་སོ་རས་སྲབ་བུའི་དོར་མ་གྱོན་དགོས་པ་ལས། ལུས་སུ་རྔུལ་ཆུ་འདོན་སླ་བའི་གོས་ནི་གྱོན་མི་རུང་།
EZE 44:19 དེ་དག་ཁྱམས་ར་ཕྱི་མའི་མི་རྣམས་ཀྱི་རྩར་འགྲོ་དུས་སུ། ཞབས་ཏོག་སྒྲུབ་དུས་ཀྱི་གོས་རྣམས་ཕུད་དེ་མཆོད་ཁང་གི་ཁང་པའི་ནང་དུ་འཇོག་དགོས་ཤིང་། རང་གི་གོས་དམ་པས་མི་རྣམས་དམ་པར་མི་བྱེད་པའི་ཆེད་དུ་གོས་གཞན་རྣམས་གྱོན་དགོས་སོ། །
EZE 44:20 དེ་དག་གིས་སྐྲ་བཞར་མི་རུང་ལ་སྐྲ་ཐུང་ཐུང་འཇོག་པ་ལས་སྐྲ་རིང་པོའང་འཇོག་མི་རུང་།
EZE 44:21 མཆོད་དཔོན་ཐམས་ཅད་ནང་གི་ཁྱམས་རར་འཇུག་དུས་སུ་རྒུན་ཆང་འཐུང་མི་རུང་།
EZE 44:22 དེ་དག་གིས་ཡུགས་མོ་དང་སྐྱེས་པས་དོར་བའི་བུད་མེད་ནི་ཆུང་མར་ལེན་མི་རུང་ལ། ཡེས་ར་ཨེལ་ཁྱིམ་རྒྱུད་ཀྱི་ན་ཆུང་བུ་མོ་དང་ཡང་ན་མཆོད་དཔོན་ནས་ལུས་པའི་ཡུགས་མོ་ཆུང་མར་ལེན་དགོས།
EZE 44:23 དེ་དག་གིས་ངའི་འབངས་མི་ལ་རྫས་དམ་པ་དང་རྫས་ཕལ་བ་གཉིས་བཀར་བའི་བསླབ་བྱ་གནང་སྟེ། མི་ལ་གང་ཞིག་གཙང་བ་དང་གང་ཞིག་མི་གཙང་བའི་དབྱེ་བ་འབྱེད་དུ་འཇུག་དགོས།
EZE 44:24 ཡང་དེ་དག་གིས་གྱོད་དོན་རྣམས་ཐག་གིས་གཅོད་དགོས་ཏེ། ངའི་སྒྲིག་སྲོལ་བཞིན་དུ་ཐག་གིས་གཅོད་དགོས། ཁོ་ཚོས་ངའི་དུས་ཆེན་ཀུན་གྱི་ནང་དུ་གཟབ་གཟབ་ངང་ངའི་བཀའ་ཁྲིམས་དང་སྲོལ་ཡིག་རྣམས་བསྲུང་དགོས་ལ། ངའི་ངལ་གསོ་བའི་ཉིན་མོ་དམ་པར་བསྲུང་དགོས།
EZE 44:25 དེ་དག་ཤི་བོའི་ཉེ་སར་བཏུད་ནས་རང་ཉིད་མི་གཙང་བར་བྱེད་མི་རུང་། ཡིན་ནའང་ཤི་བོ་དེ་ནི་རང་གི་ཕའམ། མ། བུ། བུ་མོ། སྤུན་ཟླ། ཡང་ན་གནས་ལ་ཕྱིན་མེད་པའི་ལྕམ་སྲིང་ཡིན་ན། དེ་དག་གིས་རང་ཉིད་བཙོག་པར་བཟོས་ཆོག་གོ །
EZE 44:26 མཆོད་དཔོན་གྱིས་རང་ཉིད་གཙང་མར་མཛད་རྗེས་ད་དུང་ཉིན་བདུན་ལ་བསྒུག་དགོས་ཏེ།
EZE 44:27 དེ་ནང་གི་ཁྱམས་རར་ཕྱིན་ཏེ་གནས་དམ་པ་རུ་ཞབས་ཏོག་སྒྲུབ་དུས་སུ། དེས་སྡིག་བཤགས་ཀྱི་མཆོད་པ་འབུལ་དགོས་ཞེས་གཙོ་བོ་ཡ་ཝཱེས་གསུངས་སོ། །
EZE 44:28 མཆོད་དཔོན་རྣམས་ལ་ནོར་སྐལ་ཡོད་དེ་བདག་ནི་དེ་དག་གི་ནོར་སྐལ་ཡིན། ཁྱོད་རྣམས་ཀྱིས་ཡེས་ར་ཨེལ་གྱི་ནང་དུ་དེ་དག་ལ་ས་སྐལ་གང་ཡང་སྟེར་མི་རུང་སྟེ། བདག་ནི་དེ་དག་གི་ཐོབ་སྐལ་ཡིན་ནོ། །
EZE 44:29 འབྲུ་མཆོད་དང་སྡིག་བཤགས་ཀྱི་མཆོད་པ། ཉེས་སེལ་གྱི་མཆོད་པ་བཅས་ཀྱི་མཆོད་རྫས་རྣམས་ཁོ་ཚོས་བཟའ་རུང་སྟེ། ཡེས་ར་ཨེལ་གྱི་ནང་དུ་ཡ་ཝཱེ་ལ་ཕུལ་བ་ཐམས་ཅད་མཆོད་དཔོན་རྣམས་ལ་དབང་བ་ཡིན་ནོ། །
EZE 44:30 ཐོག་ཕུད་རྣམས་ལས་ཆེས་ལེགས་པའི་རྫས་དང་ཁྱོད་ཚོས་ཕུལ་བའི་མཆོད་རྫས་ཐམས་ཅད་མཆོད་དཔོན་རྣམས་ལ་དབང་བ་དང་། ཁྱོད་ཀྱི་ཁྱིམ་ལ་བྱིན་རླབས་འཐོབ་པའི་ཆེད་དུ། ཁྱོད་ཚོས་ཕྱེ་གསར་པ་དེ་མཆོད་དཔོན་ལ་འབུལ་དགོས།
EZE 44:31 འདབ་ཆགས་དང་ཡང་ན་རི་དྭགས་གང་ཡིན་ཡང་རང་བཞིན་གྱིས་ཤི་བའམ་ཡང་ན་ཐང་དུ་ཕྲལ་བའི་ཤ་གང་ཡང་མཆོད་དཔོན་རྣམས་ཀྱིས་བཟའ་མི་རུང་ངོ་ཞེས་གསུངས་སོ། །
EZE 45:1 ཁྱོད་ཚོས་རྒྱན་བླངས་ནས་ས་སྐལ་བགོ་བའི་དུས་སུ། རིང་ཚད་ལ་ཁྲུ་ཉིས་ཁྲི་ལྔ་སྟོང་དང་། ཞེང་ལ་ཁྲུ་ཆིག་ཁྲི་ཅན་གྱི་ས་སྐལ་ཞིག་གནས་གཙང་མ་རུ་ཡ་ཝཱེ་ལ་ཕུལ་ཞིག དེའི་ས་ཁུལ་ཡོངས་རྫོགས་དམ་པ་ཡིན།
EZE 45:2 དེའི་ནང་ནས་རིང་ཚད་ལ་ཁྲུ་ལྔ་བརྒྱ་དང་། ཞེང་ལའང་ཁྲུ་ལྔ་བརྒྱ་ཡོད་པའི་ཕྱོགས་བཞི་པོ་གྲུ་བཞི་ཅན་གྱི་ས་ཞིག་གནས་དམ་པའི་ཕྱིར་འཇོག་དགོས་པ་དང་། དེའི་མཐའ་འཁོར་དུ་ཁྲུ་ལྔ་བཅུ་ཡོད་པའི་ས་སྟོང་ཞིག་འཇོག་དགོས།
EZE 45:3 ཁྱོད་རྣམས་ཀྱིས་ཚད་ཐིག་བླངས་པའི་གནས་གཙང་མ་ལས་རིང་ཚད་ལ་ཁྲུ་ཉིས་ཁྲི་ལྔ་སྟོང་དང་། ཞེང་ལ་ཁྲུ་ཆིག་ཁྲི་ཡོད་པའི་ས་ཞིག་ཚད་ནས་དེའི་ནང་དུ་གནས་དམ་པ་ཡོད་དགོས་ལ། དེ་ནི་གནས་དམ་མཆོག་ཡིན་ནོ། །
EZE 45:4 དེ་ནི་ས་ཁུལ་ཡོངས་ཀྱི་གནས་མཆོག་ཅིག་ཡིན་ཏེ། གནས་དམ་པ་རུ་ཞབས་ཏོག་སྒྲུབ་པ་དང་། ཡ་ཝཱེའི་ཉེ་སར་བཏུད་ནས་ཁོང་ལ་ཞབས་ཕྱི་སྒྲུབ་པའི་མཆོད་དཔོན་རྣམས་ལ་དབང་ཞིང་། དེ་ནི་ཁོ་ཚོའི་ཁང་ས་དང་གནས་དམ་པའི་གནས་མཆོག་ཡིན།
EZE 45:5 ཡང་རིང་ཚད་ལ་ཁྲུ་ཉིས་ཁྲི་ལྔ་སྟོང་ཡོད་པ་དང་། ཞེང་ལ་ཁྲུ་ཆིག་ཁྲི་ཡོད་པའི་ས་གཞན་ཞིག་ཡོད་པ་དེ་ནི། མཆོད་ཁང་ནང་དུ་ཞབས་ཏོག་སྒྲུབ་པའི་ལེ་ཝི་པ་རྣམས་ལ་དབང་ཞིང་། ཁང་པ་ཉི་ཤུ་ནི་དེའི་ས་སྐལ་དུ་འགྱུར་རོ། །
EZE 45:6 ཁྱོད་རྣམས་ཀྱིས་ཞེང་ལ་ཁྲུ་ལྔ་སྟོང་དང་། རིང་ཚད་ལ་ཁྲུ་ཉིས་ཁྲི་ལྔ་སྟོང་ཡོད་པའི་ས་ཞིག་བགོས་ཏེ་གྲོང་ཁྱེར་གྱི་ས་སྐལ་བྱེད་དགོས་ཤིང་། དེ་ནི་ཁྱོད་ཚོས་ཕུལ་བའི་གནས་གཙང་མའི་འགྲམ་དུ་ཡེས་ར་ཨེལ་གྱི་ཁྱིམ་རྒྱུད་ཡོངས་ལ་དབང་བའོ། །
EZE 45:7 རྒྱལ་པོར་དབང་བའི་ས་ནི་ཁྱོད་ཚོས་ཕུལ་བའི་གནས་གཙང་མ་དང་གྲོང་ཁྱེར་གྱི་ས་ཡི་འགྲམ་དུ་ཡོད་དགོས་པ་དང་། གཅིག་ནི་ཁྱོད་ཚོས་ཕུལ་བའི་གནས་གཙང་མར་ཁ་གཏད་དགོས་པ་དང་། ཅིག་ཤོས་ནི་གྲོང་ཁྱེར་གྱི་ས་ལ་ཁ་གཏད་དགོས་ཏེ། ནུབ་ཕྱོགས་སུ་ས་དེའི་ནུབ་ཕྱོགས་ཀྱི་ས་མཚམས་དང་། ཤར་ཕྱོགས་སུ་ས་དེའི་ཤར་ཕྱོགས་ཀྱི་ས་མཚམས་ལ་རིང་ཚད་ནི་ཚོ་པ་ཁག་ལ་བགོས་པའི་ས་དང་གཅིག་ཡིན་དགོས།
EZE 45:8 ས་འདི་ནི་ཡེས་ར་ཨེལ་གྱི་ནང་དུ་རྒྱལ་པོ་རྣམས་ལ་དབང་ཞིང་། ངས་བསྐོས་པའི་རྒྱལ་པོ་རྣམས་ཀྱིས་ཕྱིན་ཆད་ངའི་མི་རིགས་ལ་གཉའ་གནོན་བྱེད་མི་རུང་ལ། ཚོ་ཁག་བཞིན་དུ་ཡེས་ར་ཨེལ་གྱི་ཁྱིམ་རྒྱུད་རྣམས་ལ་ས་བགོ་དགོས་སོ། །
EZE 45:9 ཡང་གཙོ་བོ་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་རྒྱལ་པོ་རྣམས། ཁྱོད་ཚོས་གང་ཞིག་སྤྱད་པ་ད་དུང་མ་ལོངས་སམ། ཁྱོད་ཚོས་བཙན་ཤུགས་དང་མེད་པར་བཟོ་བའི་དོན་རྣམས་ཚར་བཅད་ནས་དྲང་གཞག་དང་དྲང་བདེན་སྤྱོད་ཅིག ད་ནི་ངའི་མི་རྣམས་ཀྱི་ནོར་སྐལ་འཕྲོག་བཅོམ་མ་བྱེད་ཅིག་ཅེས་གཙོ་བོ་ཡ་ཝཱེས་གསུངས།
EZE 45:10 ཁྱོད་ཚོས་དྲང་བདེན་གྱི་རྒྱ་སྲང་དང་དྲང་བདེན་གྱི་ཨེ་ཕཱ། དྲང་བདེན་གྱི་ཆུ་བེན་བཅས་སྤྱོད་ཅིག
EZE 45:11 སྲ་གཟུགས་འཇལ་བྱེད་ཀྱི་ཨེ་ཕཱ་དང་གཤེར་གཟུགས་འཇལ་བྱེད་ཀྱི་ཆུ་བེན་ཞེས་པ་གཉིས་ནི་གཅིག་འདྲ་ཡིན་དགོས་ལ། ཆུ་བེན་གཅིག་ནི་ཁལ་གྱི་བཅུ་ཆའི་གཅིག་ཡིན་ཏེ། ཨེ་ཕཱ་གཅིག་ཀྱང་ཁལ་གྱི་བཅུ་ཆའི་གཅིག་ཡིན། ཐམས་ཅད་ཀྱིས་ཁལ་གྱི་འཇལ་ཆས་ཚད་གཞི་རུ་འཛིན་དགོས།
EZE 45:12 ལྗིད་ཚད་རྩིས་གཞི་ཡི་སྲང་ཞེས་པ་གཅིག་ནི་གཱེ་ར་ཉི་ཤུ་དང་། སྲང་ཉི་ཤུའི་ཁར། སྲང་ཉེར་ལྔ་དང་སྲང་བཅོ་ལྔ་བསྣན་ན་ཁྱོད་ཚོའི་མཱེ་ན་གཅིག་ཡིན།
EZE 45:13 ཁྱོད་ཚོས་འབུལ་དགོས་པའི་མཆོད་རྫས་ནི་འདི་ལྟ་སྟེ། གྲོ་ཁལ་གཅིག་ལས་ཨེ་ཕཱའི་དྲུག་ཆའི་གཅིག་དང་། སོ་བ་ཁལ་གཅིག་ལས་ཀྱང་ཨེ་ཕཱའི་དྲུག་ཆའི་གཅིག་འབུལ་དགོས་སོ། །
EZE 45:14 ཡང་སྣུམ་ནི་འདི་ལྟར་འབུལ་དགོས་ཏེ། ཆུ་བེན་གྱིས་འཇལ་ནས་ཁལ་གཅིག་ལས་ཆུ་བེན་གྱི་བཅུ་ཆའི་གཅིག་འབུལ་དགོས་ཏེ། གང་ལ་ཞེ་ན། ཁལ་གཅིག་ནི་ཆུ་བེན་བཅུ་དང་ཡང་ན་ཁལ་གཅིག་ཡིན་ནོ། །གང་ལ་ཞེ་ན། ཆུ་བེན་བཅུ་ནི་ཁལ་གཅིག་ཡིན་པས་སོ། །
EZE 45:15 ཡེས་ར་ཨེལ་གྱི་ས་བཅུད་འཛོམས་པའི་རྩྭ་ཐང་ནས་ལུག་ཉིས་བརྒྱ་ལས་ལུ་གུ་གཅིག་རེ་འབུལ་དགོས་ཏེ། མཆོད་རྫས་འདི་དག་ནི་འབྲུ་མཆོད་དང་སྦྱིན་སྲེག་གི་མཆོད་པ། ཞི་བདེའི་མཆོད་པ་བཅས་སུ་འབུལ་དགོས་པ་དང་། དེ་དག་གི་སྡིག་པ་བཤགས་པའི་ཆེད་དུ་ཡིན་ཞེས་གཙོ་བོ་ཡ་ཝཱེས་གསུངས་སོ། །
EZE 45:16 ཡུལ་ཁམས་ནང་གི་མི་ཀུན་གྱིས་ཡེས་ར་ཨེལ་གྱི་རྒྱལ་པོར་ཕྱག་རྟེན་འབུལ་དགོས་ཏེ།
EZE 45:17 རྒྱལ་པོས་དུས་ཆེན་དང་ཚེས་གཅིག ངལ་གསོ་བའི་ཉིན་མོ་བཅས་པ་སྟེ་ཡེས་ར་ཨེལ་གྱི་ཁྱིམ་རྒྱུད་རྣམས་ཀྱིས་གཏན་ལ་ཁེལ་བའི་དུས་ཆེན་ཡོངས་སུ། སྦྱིན་སྲེག་གི་མཆོད་པ་དང་འབྲུ་མཆོད། སྐྱེམས་མཆོད་བཅས་འབུལ་དགོས་ལ། ཁོང་གིས་སྡིག་བཤགས་ཀྱི་མཆོད་པ་དང་འབྲུ་མཆོད། སྦྱིན་སྲེག་གི་མཆོད་པ། ཞི་བདེའི་མཆོད་པ་བཅས་སྟ་གོན་བྱས་ཏེ་ཡེས་ར་ཨེལ་གྱི་ཁྱིམ་རྒྱུད་རྣམས་ཀྱི་སྡིག་པ་བཤགས་དགོས་ཞེས་གསུངས་སོ། །
EZE 45:18 ཡང་གཙོ་བོ་ཡ་ཝཱེས་འདི་སྐད་དུ། ཟླ་དང་པོའི་ཚེས་གཅིག་གི་ཉིན་ཁྱོད་ཀྱིས་སྐྱོན་དང་བྲལ་བའི་བ་ཕྲུག་ཅིག་བླངས་ནས་གནས་དམ་པ་གཙང་མར་བཟོ་དགོས།
EZE 45:19 མཆོད་དཔོན་གྱིས་སྡིག་བཤགས་མཆོད་པའི་ཕྱུགས་ཟོག་གི་ཁྲག་ཅུང་ཙམ་བླངས་ཏེ་མཆོད་ཁང་གི་སྒོ་སྒྲོམ་དང་མཆོད་ཁྲིའི་ཁྲི་སྟེགས་ཀྱི་ཟུར་བཞི། དེ་མིན་ནང་གི་ཁྱམས་རའི་སྒོ་སྒྲོམ་བཅས་ལ་བསྐུ་དགོས།
EZE 45:20 ཟླ་དང་པོའི་ཚེས་བདུན་གྱི་ཉིན། བསམ་བཞིན་མ་ཡིན་པར་ཉེས་པ་བཟོས་པ་དང་ཡང་ན་མ་ཤེས་པར་ཉེས་པ་བྱས་པའི་མི་ལ་ཁྱོད་ཀྱིས་དེ་ལྟར་བྱས་ནས་མཆོད་ཁང་གི་ཆེད་དུ་སྡིག་པ་བཤགས་དགོས།
EZE 45:21 ཟླ་དང་པོའི་ཚེས་བཅུ་བཞིའི་ཉིན་ཁྱོད་རྣམས་ཀྱིས་ཉིན་བདུན་གྱི་རིང་ལ་པེ་སག་གི་དུས་ཆེན་བསྲུང་དགོས་ཏེ། དུས་ཆེན་གྱི་སྐབས་སུ་ཁྱོད་ཚོས་སྐྱུར་མེད་བག་ལེབ་བཟའ་དགོས།
EZE 45:22 ཉིན་དེར་རྒྱལ་པོས་རང་ཉིད་དང་ཡུལ་ཁམས་ནང་གི་མི་ཀུན་གྱི་ཕྱིར་དུ་གླང་ཐུག་ཅིག་སྡིག་བཤགས་ཀྱི་མཆོད་པར་གྲ་སྒྲིག་བྱེད་དགོས།
EZE 45:23 དུས་ཆེན་གྱི་ཉིན་བདུན་པོར་ཁོས་ཉིན་རེར་ཡ་ཝཱེ་ལ་སྐྱོན་དང་བྲལ་བའི་གླང་ཐུག་བདུན་དང་ལུག་ཐུག་བདུན་སྦྱིན་སྲེག་གི་མཆོད་པའི་ཆེད་དུ་གྲ་སྒྲིག་བྱེད་དགོས་ཏེ། ཡང་ཉིན་རེར་ར་ཐུག་ཅིག་སྡིག་བཤགས་ཀྱི་མཆོད་པར་གྲ་སྒྲིག་བྱེད་དགོས།
EZE 45:24 ཡང་ཁོས་འབྲུ་མཆོད་ཀྱང་གྲ་སྒྲིག་བྱེད་དགོས་ཏེ། གླང་ཐུག་རེ་རེ་ནི་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་བ་དང་། ལུག་ཐུག་རེ་རེ་ནི་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་དགོས་ཏེ། ཕྱེ་བཟང་པོ་ཨེ་ཕཱ་གང་རེའི་ནང་དུ་སྐྱུ་རུ་རའི་འཚིར་སྣུམ་རྫ་བུམ་གང་བསྲེ་དགོས་པ་དང་།
EZE 45:25 ཟླ་བདུན་པའི་ཚེས་བཅོ་ལྔ་སྟེ་དུས་ཆེན་སྲུང་བའི་དུས་སུ་ཡང་ཁོས་ཉིན་བདུན་པོར་དེ་ལྟར་བྱེད་དགོས་ལ། པེ་སག་དུས་ཆེན་གྱི་སྡིག་བཤགས་ཀྱི་མཆོད་པ་དང་སྦྱིན་སྲེག་གི་མཆོད་པ། འབྲུ་མཆོད། འཚིར་སྣུམ་བཅས་ཀྱི་སྲོལ་བཞིན་དུ་སྟ་གོན་བྱེད་དགོས་ཞེས་གསུངས་སོ། །
EZE 46:1 གཙོ་བོ་ཡ་ཝཱེས་འདི་སྐད་དུ། ལས་ཀ་བྱེད་པའི་ཉིན་དྲུག་གི་ནང་དུ། ནང་གི་ཁྱམས་རའི་ཤར་སྒོ་དེ་ངེས་པར་དུ་རྒྱག་དགོས། ཡིན་ནའང་ངལ་གསོ་བའི་ཉིན་མོ་དང་ཚེས་གཅིག་གི་ཉིན་གཉིས་ལ་སྒོ་འབྱེད་དགོས།
EZE 46:2 རྒྱལ་པོ་ནི་ཕྱི་རོལ་ནས་རྒྱ་སྒོ་དེའི་སྒོ་ཁྱམས་བརྒྱུད་དེ་ནང་དུ་སོང་ནས་སྒོ་སྒྲོམ་གྱི་འགྲམ་དུ་ལངས་ནས་འདུག་དགོས་པ་དང་། མཆོད་དཔོན་རྣམས་ཀྱིས་ཁོའི་ཆེད་དུ་སྦྱིན་སྲེག་དང་ཞི་བདེའི་མཆོད་པ་རྣམས་གྲ་སྒྲིག་བྱེད་དགོས། ཡང་ཁོས་སྒོ་ཐེམ་ཡོད་སར་ཕྱག་བཙལ་ནས་ཕྱི་རོལ་ཏུ་འགྲོ་དགོས་པ་དང་། རྒྱ་སྒོ་འདི་ནི་དགོང་མོའི་བར་དུ་རྒྱག་པར་མི་བྱའོ། །
EZE 46:3 ངལ་གསོ་བའི་ཉིན་མོ་དང་ཚེས་གཅིག་ལ་ཡུལ་ཁམས་ཀྱི་མི་རྣམས་ཀྱིས་རྒྱ་སྒོ་ཁ་རུ་ཡ་ཝཱེའི་དྲུང་དུ་བསྙེན་བཀུར་འབུལ་དགོས།
EZE 46:4 ངལ་གསོ་བའི་ཉིན་མོར་རྒྱལ་པོས་ཡ་ཝཱེར་འབུལ་བྱའི་སྦྱིན་སྲེག་གི་མཆོད་པ་ནི་སྐྱོན་དང་བྲལ་བའི་ལུ་གུ་དྲུག་དང་སྐྱོན་དང་བྲལ་བའི་ལུག་ཐུག་གཅིག་བཅས་ཡིན་ཞིང་།
EZE 46:5 འབུལ་བྱའི་འབྲུ་མཆོད་ནི་འདི་ལྟ་སྟེ། ལུག་ཐུག་ནི་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་བ་དང་། ཡང་ལུ་གུ་དེ་དག་དང་མཉམ་དུ་རང་གི་འཛོམས་ཚོད་ལྟར་ཕྱེ་བཟང་པོ་འབུལ་དགོས་ལ། ཕྱེ་བཟང་པོ་ཨེ་ཕཱ་གང་རེའི་ནང་དུ་འཚིར་སྣུམ་རྫ་བུམ་གང་བསྲེ་དགོས།
EZE 46:6 ཡང་ཚེས་གཅིག་གི་ཉིན་མོར་སྐྱོན་དང་བྲལ་བའི་བ་ཕྲུག་གཅིག་དང་། ལུ་གུ་དྲུག་དང་ལུག་ཐུག་གཅིག་བཅས་འབུལ་དགོས་ཏེ། ཐམས་ཅད་སྐྱོན་དང་བྲལ་བ་ཞིག་ཡིན་དགོས།
EZE 46:7 དེས་འབྲུ་མཆོད་ཀྱི་རྫས་རྣམས་གྲ་སྒྲིག་བྱེད་དགོས་ཏེ། གླང་ཐུག་ནི་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་བ་དང་། ལུག་ཐུག་ཀྱང་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་དགོས་ལ། ཡང་ལུ་གུ་དེ་དག་དང་མཉམ་དུ་རང་གི་འཛོམས་ཚོད་ལྟར་ཕྱེ་བཟང་པོ་འབུལ་དགོས་ཏེ། ཕྱེ་བཟང་པོ་ཨེ་ཕཱ་གང་རེའི་ནང་དུ་འཚིར་སྣུམ་རྫ་བུམ་གང་བསྲེ་དགོས།
EZE 46:8 རྒྱལ་པོ་ནང་དུ་འགྲོ་དུས་སུ་རྒྱ་སྒོ་འདིའི་སྒོ་ཁྱམས་བརྒྱུད་ནས་འཛུལ་དགོས་པ་དང་། ཡང་ལམ་དེ་ནས་ཕྱིར་འགྲོ་དགོས་སོ། །
EZE 46:9 གཏན་ལ་ཁེལ་བའི་དུས་ཆེན་གྱི་སྐབས་སུ། ཡུལ་ཁམས་ཀྱི་མི་རྣམས་ཡ་ཝཱེའི་དྲུང་དུ་འོང་བའི་དུས་སུ། བྱང་སྒོ་ནས་བསྙེན་བཀུར་ཞུ་བར་འོངས་པ་རྣམས་ལྷོ་སྒོ་ནས་ཕྱི་རུ་འབུད་དགོས་པ་དང་། ལྷོ་སྒོ་ནས་འོངས་པ་རྣམས་བྱང་སྒོ་ནས་ཕྱི་རུ་འབུད་དགོས་ཏེ། མི་སུ་ཡིན་ཡང་རང་ཉིད་ནང་དུ་འཛུལ་སའི་སྒོ་དེ་ནས་ཕྱི་རུ་འབུད་མི་རུང་ལ། ཁ་གཏད་ཀྱི་སྒོ་དེ་ནས་ཕྱི་རུ་འབུད་དགོས་པ་ཡིན།
EZE 46:10 རྒྱལ་པོ་ནི་མི་རྣམས་ཀྱི་ཁྲོད་དུ་ཡོད་དགོས་ཏེ། མི་རྣམས་ཀྱི་ནང་དུ་འགྲོ་དུས་ཁོ་ཡང་མཉམ་དུ་འགྲོ་དགོས་པ་དང་། མི་རྣམས་ཕྱི་རུ་འབུད་དུས་ཁོ་ཡང་ཕྱི་རུ་འབུད་དགོས།
EZE 46:11 གཏན་ལ་ཁེལ་བའི་དུས་ཆེན་གྱི་སྐབས་སུ། འབྲུ་མཆོད་ནི་འདི་ལྟར་འབུལ་དགོས་ཏེ། གླང་ཐུག་རེ་རེ་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་བ་དང་། ལུག་ཐུག་རེ་རེ་ཡང་ཕྱེ་བཟང་པོ་ཨེ་ཕཱ་གང་དང་མཉམ་དུ་འབུལ་དགོས་ལ། ཡང་ལུ་གུ་དེ་དག་དང་མཉམ་དུ་རང་གི་འཛོམས་ཚོད་ལྟར་ཕྱེ་བཟང་པོ་འབུལ་དགོས་ཏེ། ཕྱེ་བཟང་པོ་ཨེ་ཕཱ་གང་རེའི་ནང་དུ་འཚིར་སྣུམ་རྫ་བུམ་གང་བསྲེ་དགོས།
EZE 46:12 རྒྱལ་པོས་ཡིད་མོས་མཆོད་པ་འབུལ་བའི་སྦྱིན་སྲེག་དང་ཞི་བདེའི་མཆོད་པ་ཡ་ཝཱེར་འབུལ་བའི་དུས་སུ། ཤར་ཕྱོགས་སུ་འཁོར་བའི་རྒྱ་སྒོ་དེ་ཁོའི་ཆེད་དུ་འབྱེད་དགོས་ཤིང་། དེ་ནས་ཁོས་ངལ་གསོ་བའི་ཉིན་མོར་མཆོད་པ་ཕུལ་བ་བཞིན་དུ། རང་གི་སྦྱིན་སྲེག་དང་ཞི་བདེའི་མཆོད་པ་འབུལ་དགོས། ཁོས་མཆོད་པ་ཕུལ་རྗེས་ཕྱི་རུ་འབུད་དགོས་པ་དང་། ཁོ་ཕྱི་རུ་བུད་རྗེས་རྒྱ་སྒོ་དེ་རྒྱག་དགོས་པའོ། །
EZE 46:13 ཁྱོད་ཀྱིས་ཉིན་རེར་སྐྱོན་དང་བྲལ་བའི་ལུ་གུ་ལོ་གཅིག་ཅན་ཞིག་གྲ་སྒྲིག་བྱས་ཏེ་ཡ་ཝཱེ་ལ་སྦྱིན་སྲེག་གི་མཆོད་པར་འབུལ་དགོས་ཏེ། ཞོགས་པ་རེ་རེར་དེ་ལྟར་འབུལ་དགོས།
EZE 46:14 ཡང་ཞོགས་པ་རེ་རེར་དེ་དང་མཉམ་དུ་འབུལ་བའི་འབྲུ་མཆོད་ཀྱང་གྲ་སྒྲིག་བྱེད་དགོས་ཏེ། ཕྱེ་བཟང་པོ་ཨེ་ཕཱ་གང་གི་དྲུག་ཆའི་གཅིག་ལ་འཚིར་སྣུམ་རྫ་བུམ་གང་གི་གསུམ་ཆའི་གཅིག་བསྲེས་ནས། ཡ་ཝཱེ་ལ་རྒྱུན་དུ་འབུལ་བའི་འབྲུ་མཆོད་བྱེད་དགོས་ལ། འདི་ནི་དུས་གཏན་གྱི་རྒྱུན་སྲོལ་ཡིན་པས།
EZE 46:15 ཞོགས་པ་རེ་རེར་འདི་ལྟར་ལུ་གུ་དང་འབྲུ་མཆོད། འཚིར་སྣུམ་བཅས་གྲ་སྒྲིག་བྱས་ཏེ་རྒྱུན་དུ་འབུལ་བའི་སྦྱིན་སྲེག་གི་མཆོད་པར་བྱའོ་ཞེས་གསུངས་སོ། །
EZE 46:16 ཡང་གཙོ་བོ་ཡ་ཝཱེས་འདི་སྐད་དུ། ཇི་སྟེ་རྒྱལ་པོས་རང་གི་ནོར་སྐལ་བུ་ལ་གནང་ན། ནོར་སྐལ་དེ་ནི་ཁོའི་བུ་རྣམས་ལ་དབང་ཞིང་། དེ་ནི་ཁོ་ཚོས་རྒྱུན་འཛིན་བྱས་པའི་ནོར་སྐལ་ཡིན་ནོ། །
EZE 46:17 ཇི་སྟེ་རྒྱལ་པོས་རང་གི་ནོར་སྐལ་ལས་ཆ་ཤས་ཞིག་རང་གི་བློན་འཁོར་ལ་གནང་ན། དེར་རང་དབང་ཐོབ་པའི་ལོ་ ཡི་བར་དུ་ནོར་སྐལ་དེ་བློན་འཁོར་ལ་དབང་ཞིང་། དེ་ནས་རྒྱལ་པོར་ཕྱིར་སྤྲོད་དགོས་པ་དང་། རྒྱལ་པོའི་ནོར་སྐལ་ནི་མཐར་རང་གི་བུ་ལ་དབང་དགོས།
EZE 46:18 རྒྱལ་པོས་མི་རྣམས་ཀྱི་ནོར་སྐལ་ཕྲོགས་ནས་དེ་རྣམས་རང་གི་ནོར་སྐལ་ལས་ཕྱིར་སྐྲོད་མི་རུང་ལ། བདག་གི་འབངས་རྣམས་ཁ་འཐོར་དུ་ཕྱིན་ནས་རང་གིས་རྒྱུན་འཛིན་བྱས་པའི་ནོར་སྐལ་དང་མི་འབྲལ་བའི་ཆེད་དུ། ཁོས་རང་གི་ནོར་སྐལ་ལས་རང་གི་བུ་རྣམས་ལ་ས་སྐལ་སྦྱིན་པར་བྱའོ་ཞེས་གསུངས་སོ། །
EZE 46:19 ང་ཁྲིད་མཁན་དེས་ང་རང་སྒོ་འགྲམ་དུ་ཡོད་པའི་འཇུག་སྒོར་ཁྲིད་ཅིང་། མཆོད་དཔོན་རྣམས་ཀྱིས་སྤྱོད་པའི་གཙང་ཁང་ཁ་བྱང་ལྟ་དེའི་ནང་དུ་སླེབས་པ་ན། རྒྱབ་ལོགས་ཀྱི་ནུབ་ཕྱོགས་སུ་ས་སྟོང་ཞིག་ཡོད་པ་མཐོང་བྱུང་།
EZE 46:20 དེས་ང་ལ་ན་རེ། མཆོད་རྫས་རྣམས་ཁྱམས་ར་ཕྱི་མར་ཁྱེར་ནས་མི་རྣམས་དམ་པར་མི་བྱེད་པའི་ཆེད་དུ། འདི་ནི་མཆོད་དཔོན་རྣམས་ཀྱིས་ཉེས་སེལ་གྱི་མཆོད་པ་དང་སྡིག་བཤགས་ཀྱི་མཆོད་པའི་མཆོད་ཤ་བཙོ་ས་དང་། འབྲུ་མཆོད་བསྲེག་སའང་ཡིན་ཞེས་གསུངས་སོ། །
EZE 46:21 ཡང་དེས་ང་ཁྱམས་ར་ཕྱི་མར་ཁྲིད་དེ། ང་རང་ཁྱམས་རའི་གྲུ་ཁ་བཞི་པོར་འགྲོ་རུ་བཅུག་སྟེ། ཁྱམས་རའི་གྲུ་ཁ་རེ་རེར་ཁྱམས་ར་ཆུང་ངུ་རེ་ཡོད་པ་མཐོང་བྱུང་།
EZE 46:22 ཁྱམས་རའི་གྲུ་ཁ་བཞི་པོའི་ཁྱམས་ར་ཆུང་ངུ་རྣམས་ཀྱི་ཕྱོགས་བཞི་རུ་རྩིག་པ་ཡོད་ལ། ཁྱམས་ར་རེ་རེའི་རིང་ཚད་ལ་ཁྲུ་བཞི་བཅུ་དང་། ཞེང་ལ་ཁྲུ་སུམ་ཅུ་ཡོད་པ་དང་། གྲུ་ཁ་བཞི་པོའི་ཁྱམས་ར་རྣམས་ཆེ་ཆུང་གཅིག་ཡིན་ནོ། །
EZE 46:23 ཁྱམས་ར་ཆུང་ངུ་བཞི་པོ་ནང་གི་ཕྱོགས་བཞི་རུ་རྡོའི་རྩིག་པ་རེ་ཡོད་དེ། རྡོའི་རྩིག་པ་བཞི་པོའི་འོག་ཏུ་ཐབ་ཀ་ཡོད་པ་ཡིན།
EZE 46:24 དེས་ང་ལ་ན་རེ། འདི་རྣམས་ནི་ཐབ་ཚང་ཡིན་ཏེ། མཆོད་ཁང་ནང་དུ་ཞབས་ཏོག་སྒྲུབ་མཁན་རྣམས་ཀྱིས་གནས་འདི་རུ་མི་རྣམས་ཀྱི་མཆོད་རྫས་རྣམས་བཙོ་དགོས་ཞེས་གསུངས་སོ། །
EZE 47:1 དེ་ནས་ཡང་ཁོས་ང་མཆོད་ཁང་གི་སྒོ་ཁར་ཁྲིད་པ་དང་། ལྟོས་དང་། མཆོད་ཁང་དེ་ཤར་ཕྱོགས་སུ་འཁོར་ཡོད་པས། མཆོད་ཁང་གི་སྒོ་ཐེམ་ནས་ཆུ་བཞུར་འོངས་ཏེ་ཤར་ཕྱོགས་སུ་བཞུར་བ་དང་། ཆུ་དེ་ནི་མཆོད་ཁང་གི་གཡས་སུ་ཡོད་པའི་མཆོད་ཁྲིའི་ལྷོ་ཕྱོགས་ཀྱི་ས་འོག་ནས་བཞུར་འོངས་པ་ཡིན།
EZE 47:2 དེས་ང་བྱང་སྒོ་ནས་ཕྱི་རུ་ཁྲིད་ཅིང་། ཡང་ང་ཁྲིད་དེ་ཕྱི་རོལ་ནས་ཤར་ཕྱོགས་སུ་འཁོར་བའི་ཕྱི་སྒོ་རུ་སླེབས་པ་ན། ལྟོས་དང་། གཡས་ཕྱོགས་ནས་ཆུ་ཕྲན་བཞུར་འོངས་པའོ། །
EZE 47:3 མི་དེའི་ལག་ཏུ་ཚད་ཐིག་ལེན་བྱེད་ཐག་པ་ཞིག་བཟུང་སྟེ་ཤར་ཕྱོགས་སུ་འགྲོ་བའི་སྐབས་སུ། ཁྲུ་ཆིག་སྟོང་གི་རིང་ཐུང་ཚད་པ་དང་། དེ་ནས་ང་ཆུ་ནང་ནས་ཕར་ཁྲིད་པ་ལ་ཆུ་ནི་སྲེ་ལོང་བར་དུ་སླེབས་ཤིང་།
EZE 47:4 ཡང་དེས་ཁྲུ་ཆིག་སྟོང་ཚད་དེ། ང་ཆུ་ནང་ནས་ཕར་ཁྲིད་པ་ལ་ཆུ་ནི་པུས་མོ་ཡི་མཚམས་སུ་སླེབས་པ་དང་། ཡང་དེས་ཁྲུ་ཆིག་སྟོང་ཚད་དེ། ང་ཕར་ཁྲིད་པ་ལ་ཆུ་རྐེད་པའི་མཚམས་སུ་སླེབས་སོ། །
EZE 47:5 དེས་ཡང་ཁྲུ་ཆིག་སྟོང་ཚད་པ་ན་ཆུ་དེ་ནི་གཙང་པོ་ཞིག་ཏུ་གྱུར་ཏེ། ཆུ་རྒྱས་ནས་རྐྱལ་ཆོག་པ་ལས་ཕ་རོལ་དུ་བརྒལ་མི་ཐུབ་པའི་གཙང་པོ་རུ་གྱུར་པས་ན། ང་དེར་བརྒལ་ནས་འགྲོ་མ་ཐུབ་བོ། །
EZE 47:6 དེས་ང་ལ་འདི་ལྟར། ཀྱེ་མིའི་བུ། ཁྱོད་ཀྱིས་འདི་མཐོང་ངམ་ཞེས་གསུངས་ནས། ང་ཁྲིད་དེ་སླར་ཡང་གཙང་པོའི་འགྲམ་དུ་ཕྱིན།
EZE 47:7 ང་ཕྱིར་ལོག་རྗེས་གཙང་པོའི་འགྲམ་གཉིས་སུ་ལྗོན་ཤིང་མང་པོ་ཡོད་པ་མཐོང་བྱུང་།
EZE 47:8 ཡང་དེས་ང་ལ་འདི་ལྟར། ཆུ་འདི་ནི་ཤར་ཕྱོགས་ཀྱི་གནས་སུ་བཞུར་ཏེ། མར་ཨ་ར་པཱ་རུ་བཞུར་ནས་འཆི་མཚོར་བབས་ཏེ། ཆུ་དེ་འཆི་མཚོ་ནང་དུ་བཞུར་ནས་རྒྱ་མཚོའི་ནང་གི་ཚྭ་མེད་པར་གཏོང་བ་ཡིན།
EZE 47:9 དུས་དེར། གཙང་པོ་འདི་བཞུར་ས་ཀུན་ཏུ་སྐྱེ་འཕེལ་བྱུང་བའི་སྲོག་ཆགས་ཐམས་ཅད་གསོན་ཐུབ་པ་དང་། ཆུ་དེ་གང་དུ་བཞུར་ན་དེ་རུ་ཉ་ཤིན་ཏུ་མང་བའོ། །གང་ལ་ཞེ་ན། གཙང་པོ་འདི་ གང་དུ་བཞུར་ན་རྒྱ་མཚོ་ནང་གི་ཚྭ་མེད་པར་གྱུར་ཏེ་སྲོག་ཆགས་ཐམས་ཅད་གསོན་ཐུབ་པ་ཡིན།
EZE 47:10 དེ་ནས་ཨེན་གེ་དི་ནས་ཨེན་ཨེག་ལཱ་ཡིམ་གྱི་བར་དུ་ཉ་པ་རྣམས་མཚོ་འགྲམ་དུ་ལངས་ཏེ་ཚང་མ་ཉ་རྒྱ་འདིང་ས་ཡིན་ཏེ། རྒྱ་མཚོའི་ནང་གི་ཉ་བཞིན་དུ་ཉ་རིགས་ཤིན་ཏུ་མང་ངོ་། །
EZE 47:11 ཡིན་ནའང་ན་ཁུག་དང་གཤོང་སའི་ཆུ་ནི་ཚྭ་མེད་པར་འགྱུར་མི་རུང་བར་ཚྭ་ཁ་རུ་འགྱུར་དགོས།
EZE 47:12 གཙང་པོའི་འགྲམ་གཉིས་སུ་སིལ་སྡོང་སྣ་ཚོགས་སྐྱེས་ཏེ་ཟོས་ཆོག་པ་དང་། སྡོང་པོའི་ལོ་མ་མི་སྐམ་ལ་འབྲས་བུ་ཡང་ཆད་པར་མི་འགྱུར། ལྗོན་ཤིང་ལ་མཁོ་བའི་ཆུ་ནི་གནས་དམ་པ་ནས་བཞུར་འོངས་པ་ཡིན་པས་ཟླ་རེ་རེར་འབྲས་བུ་གསར་པ་ཐོགས་པ་ཡིན། ཡང་ལྗོན་ཤིང་གི་འབྲས་བུ་ཟོས་ཆོག་པ་དང་ལོ་མས་ནད་གསོ་ཐུབ་པ་ཡིན་ཞེས་གསུངས་སོ། །
EZE 47:13 གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་ཡེས་ར་ཨེལ་གྱི་ཚོ་པ་བཅུ་གཉིས་བཞིན་དུ་ས་སྐལ་བགོ་དགོས་པ་དང་། ས་མཚམས་འདི་དག་བཞིན་དུ་ཡོ་སེབ་ལ་ཉིས་སྐལ་འཐོབ་པར་འགྱུར།
EZE 47:14 ཁྱོད་ཚོས་ས་སྐལ་འདི་ཆ་སྙོམས་ཀྱིས་བགོས་ཤིག གང་ལ་ཞེ་ན། སྔར་ངས་རང་གི་ལག་པ་བརྐྱངས་ཏེ་ཁྱོད་ཅག་གི་མེས་པོ་རྣམས་ལ་ས་འདི་སྦྱིན་པར་ཁས་བླངས་པས། ཡུལ་འདི་ནི་ཁྱོད་ཚོར་ས་སྐལ་དུ་འཐོབ་པར་འགྱུར།
EZE 47:15 ཡུལ་འདིའི་ས་མཚམས་ནི་བྱང་ཕྱོགས་སུ་རྒྱ་མཚོ་ཆེན་པོ་ནས་ཧེད་ལོན་གྱི་ལམ་བརྒྱུད་དེ་ཚེ་དད་ལ་འགྲོ་སར་སླེབས་པ་དང་།
EZE 47:16 ཡང་ཧ་མཱད་དང་པེ་རོ་ཏ། དཱ་མེ་སེག་དང་ཧ་མཱད་ཀྱི་ས་མཚམས་སུ་ཡོད་པའི་སིབ་ར་ཨིམ་བཅས་བརྒྱུད་དེ། ཧོ་རན་ས་མཚམས་ཀྱི་ཧ་ཚར་ཧད་ཏི་ཀན་ལ་སླེབས་པའོ། །
EZE 47:17 ཡང་ས་མཚམས་འདི་ནི་རྒྱ་མཚོ་ནས་ཧ་ཚར་ཨེ་ནན་དང་། བྱང་ཕྱོགས་སུ་དཱ་མེ་སེག་གི་ས་མཚམས་དང་། ཡང་དེའི་བྱང་ཕྱོགས་སུ་ཧ་མཱད་ཀྱི་ས་མཚམས་ཡིན་པ་དང་། འདི་ནི་བྱང་ཕྱོགས་ཀྱི་ས་མཚམས་ཡིན།
EZE 47:18 ཤར་ཕྱོགས་ཀྱི་ས་མཚམས་ནི་ཧོ་རན་དང་དཱ་མེ་སེག་གཉིས་ཀྱི་བར་དང་། གིལ་ཨད་དང་ཡེས་ར་ཨེལ་ཡུལ་གྱི་བར་དུ་ཡོད་པའི་ཡོར་དན་གཙང་པོ་ཡིན་པ་དང་། ཁྱོད་ཚོས་བྱང་ཕྱོགས་ཀྱི་མཚམས་ནས་ཤར་ཕྱོགས་ཀྱི་རྒྱ་མཚོའི་བར་དུ་ཚད་དགོས་ལ་དེ་ནི་ཤར་ཕྱོགས་ཀྱི་ས་མཚམས་ཡིན།
EZE 47:19 ལྷོ་ཕྱོགས་ཀྱི་ས་མཚམས་ནི་ཐལ་མཱར་ནས་མེ་རི་བཱ་ཀཱ་དེའེ་ཤཱའི་ཆུ་རྣམས་དང་། ཨེ་ཅིབ་ཀྱི་ཆུ་ཕྲན་རྣམས་བརྒྱུད་ནས་རྒྱ་མཚོ་ཆེན་པོར་སླེབས་པ་དང་། དེ་ནི་ལྷོ་ཕྱོགས་ཀྱི་ས་མཚམས་ཡིན།
EZE 47:20 ནུབ་ཕྱོགས་ཀྱི་ས་མཚམས་ནི་རྒྱ་མཚོ་ཡིན་ཞིང་། ལྷོ་ཕྱོགས་ཀྱི་ས་མཚམས་ནས་ཧ་མཱད་ཁར་གྱི་ཁ་གཏད་ས་དེ་ནི་ནུབ་ཕྱོགས་ཀྱི་ས་མཚམས་ཡིན།
EZE 47:21 ཁྱོད་ཚོས་ཡེས་ར་ཨེལ་གྱི་ཚོ་པ་བཞིན་དུ་ས་འདི་བགོས་ཤིག
EZE 47:22 ཁྱོད་རྣམས་དང་ཁྱོད་ཚོའི་ཁྲོད་དུ་ཡོད་པའི་ཕྱི་ཕྱོགས་པ་རྣམས་ལ་དབང་བའི་ཕྱིར་དུ། མ་འོངས་པར་ཁྱོད་ཚོས་རྒྱན་བླངས་ནས་ས་འདི་ནོར་སྐལ་དུ་བགོས་ཤིག དེ་དག་གིས་ཁྱོད་ཚོའི་ཁྲོད་དུ་བུ་ཕྲུག་སྐྱེ་བས། ཁྱོད་ཅག་གིས་དེ་རྣམས་ནི་གཞིས་སུ་སྐྱེས་པའི་ཡེས་ར་ཨེལ་པ་རྣམས་དང་འདྲ་བའི་ལྟ་སྟངས་འཛིན་དགོས་ཤིང་། དེ་རྣམས་ལའང་ཡེས་ར་ཨེལ་གྱི་ཚོ་པའི་ནང་དུ་ཁྱོད་ཅག་དང་མཉམ་དུ་རྒྱན་བླངས་ནས་ས་སྐལ་འཐོབ་པར་འགྱུར།
EZE 47:23 མ་འོངས་པར་ཚོ་པ་གང་ཞིག་གི་ནང་དུ་ཕྱི་ཕྱོགས་པ་གནས་ཡོད་ན། ཁྱོད་རྣམས་ཀྱིས་ཡུལ་དེ་རུ་དེ་དག་ལ་ས་སྐལ་བགོ་བར་གྱིས་ཞེས་གཙོ་བོ་ཡ་ཝཱེས་གསུངས་སོ། །
EZE 48:1 དེ་ཡང་ཚོ་པ་སོ་སོར་དབང་བའི་ས་སྐལ་ནི་འདི་ལྟ་སྟེ། བྱང་གི་མུ་མཐའི་ས་མཚམས་ནས་ཧེད་ལོན་གྱི་ལམ་བརྒྱུད་དེ། ཧ་མཱད་ཁར་ནས་དཱ་མེ་སེག་གི་ས་མཚམས་ཀྱི་ཧ་ཚར་ཨེ་ནན་ལ་སླེབས་པ་དང་། བྱང་དུ་ཧ་མཱད་ལ་འབྱར་ནས། ཤར་ནས་ནུབ་བར་གྱི་ས་དེ་ནི་དཱན་གྱི་ས་སྐལ་ཡིན།
EZE 48:2 དཱན་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་ཨ་ཤེར་གྱི་ས་སྐལ་ཡིན།
EZE 48:3 ཨ་ཤེར་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་ནཱབ་ཐ་ལིའི་ས་སྐལ་ཡིན།
EZE 48:4 ནཱབ་ཐ་ལིའི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་མཱ་ན་ཤེའི་ས་སྐལ་ཡིན།
EZE 48:5 མཱ་ན་ཤེའི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་ཨེ་ཕཱར་ཡིམ་གྱི་ས་སྐལ་ཡིན།
EZE 48:6 ཨེ་ཕཱར་ཡིམ་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་རུ་བེན་གྱི་ས་སྐལ་ཡིན།
EZE 48:7 རུ་བེན་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་ཡ་ཧུ་དཱའི་ས་སྐལ་ཡིན་ནོ། །
EZE 48:8 ཡ་ཧུ་དཱའི་ས་མཚམས་འགྲམ་རྒྱུད་ཀྱི་ཤར་ནས་ནུབ་ཀྱི་བར་ནི་ཁྱོད་རྣམས་ཀྱིས་འབུལ་དགོས་པའི་གནས་གཙང་མ་ཡིན་ཏེ། རིང་ཚད་ལ་ཁྲུ་ཉིས་ཁྲི་ལྔ་སྟོང་ཡིན། ཤར་ནས་ནུབ་བར་གྱི་རིང་ཚད་ནི་ས་སྐལ་གཞན་རྣམས་དང་གཅིག་ཡིན་ཞིང་། གནས་དམ་པ་ནི་དེའི་དབུས་སུ་ཡོད་དགོས།
EZE 48:9 ཁྱོད་རྣམས་ཀྱིས་དཀོན་མཆོག་ཡ་ཝཱེར་འབུལ་བའི་ས་ཁུལ་ནི་རིང་ཚད་ལ་ཁྲུ་ཉིས་ཁྲི་ལྔ་སྟོང་དང་ཞེང་ལ་ཁྲུ་ཆིག་ཁྲི་ཡིན་དགོས།
EZE 48:10 མཆོད་དཔོན་རྣམས་ལ་འབུལ་བའི་གནས་མཆོག་ནི་བྱང་ཕྱོགས་ཀྱི་རིང་ཚད་ལ་ཁྲུ་ཉིས་ཁྲི་ལྔ་སྟོང་དང་། ནུབ་ཕྱོགས་ཀྱི་ཞེང་ལ་ཁྲུ་ཆིག་ཁྲི་དང་། ཤར་ཕྱོགས་ཀྱི་ཞེང་ལ་ཁྲུ་ཆིག་ཁྲི་དང་། ལྷོ་ཕྱོགས་ཀྱི་རིང་ཚད་ལ་ཁྲུ་ཉིས་ཁྲི་ལྔ་སྟོང་ཡིན་དགོས་ལ། དེའི་དབུས་སུ་དཀོན་མཆོག་ཡ་ཝཱེའི་གནས་མཆོག་ཡོད་དགོས།
EZE 48:11 ས་འདི་ནི་ཟཱ་ཏོག་གི་བུ་རྒྱུད་རྣམས་ལས་དམ་པར་གྱུར་པ་རྣམས་ཏེ་མཆོད་དཔོན་རྣམས་ལ་འབུལ་དགོས་པ་དང་། དེ་དག་གིས་ངས་བསྒོས་པའི་ལས་འགན་རྣམས་བསྒྲུབས་ཤིང་། ཡེས་ར་ཨེལ་པ་རྣམས་ཀྱིས་ལམ་བོར་བའི་དུས་སུ། དེ་དག་ནི་ལེ་ཝི་པ་རྣམས་དང་འདྲ་བར་ལམ་མ་བོར་ཏོ། །
EZE 48:12 དེ་བས། གནས་གཙང་མར་ཕུལ་བ་ལས་ས་ཆ་ཞིག་ནི་མཆོད་དཔོན་རྣམས་ལ་ཕུལ་ནས་གནས་དམ་མཆོག་བྱེད་དགོས་ཏེ། ས་འདི་ནི་ལེ་ཝི་པའི་ས་མཚམས་དང་འབྲེལ་ཡོད་དོ། །
EZE 48:13 ཡང་མཆོད་དཔོན་རྣམས་ཀྱི་ས་མཚམས་འགྲམ་རྒྱུད་ཀྱི་ས་ཆ་ཞིག་ནི་ལེ་ཝི་པ་རྣམས་ལ་སྦྱིན་པ་དང་། རིང་ཚད་ལ་ཁྲུ་ཉིས་ཁྲི་ལྔ་སྟོང་དང་ཞེང་ལ་ཁྲུ་ཆིག་ཁྲི་ཡོད་དགོས་ཤིང་། མཆོད་དཔོན་རྣམས་ཀྱི་སའི་རིང་ཚད་ཀྱང་ཁྲུ་ཉིས་ཁྲི་ལྔ་སྟོང་དང་ཞེང་ལ་ཁྲུ་ཆིག་ཁྲི་ཡིན།
EZE 48:14 ས་འདིའི་ཆ་གང་ཞིག་ཀྱང་འཚོང་མི་རུང་ལ་བརྗེ་ཡང་མི་རུང་། མི་གཞན་ལ་སྤྲོད་ཀྱང་མི་རུང་ངོ་། །གང་ལ་ཞེ་ན། དེ་ནི་ས་ཡི་ནང་ནས་ཆེས་ལེགས་པོ་དེ་ཡིན་ལ་ཡ་ཝཱེའི་གནས་དམ་པ་ལགས་སོ། །
EZE 48:15 ཡང་ས་ལྷག་མ་སྟེ་ཞེང་ལ་ཁྲུ་ལྔ་སྟོང་དང་རིང་ཚད་ལ་ཁྲུ་ཉིས་ཁྲི་ལྔ་སྟོང་ཡོད་པ་སྤྱི་བའི་གནས་སུ་བྱས་ཏེ་གྲོང་ཁྱེར་དང་སྡོད་གནས། ཉེ་འཁོར་བཅས་སུ་སྤྱོད་ཅིང་གྲོང་ཁྱེར་ནི་དེའི་དབུས་སུ་ཡོད་དགོས།
EZE 48:16 གྲོང་ཁྱེར་གྱི་ཆེ་ཆུང་ནི་འདི་ལྟ་སྟེ། བྱང་ཕྱོགས་སུ་ཁྲུ་བཞི་སྟོང་ལྔ་བརྒྱ་དང་། ལྷོ་ཕྱོགས་སུ་ཁྲུ་བཞི་སྟོང་ལྔ་བརྒྱ་དང་། ཤར་ཕྱོགས་སུ་ཁྲུ་བཞི་སྟོང་ལྔ་བརྒྱ་དང་། ནུབ་ཕྱོགས་སུ་ཁྲུ་བཞི་སྟོང་ལྔ་བརྒྱ་ཡོད།
EZE 48:17 གྲོང་ཁྱེར་ལ་ཉེ་འཁོར་ཡོད་དགོས་ཏེ། བྱང་ཕྱོགས་སུ་ཁྲུ་ཉིས་བརྒྱ་ལྔ་བཅུ་དང་། ལྷོ་ཕྱོགས་སུ་ཁྲུ་ཉིས་བརྒྱ་ལྔ་བཅུ་དང་། ཤར་ཕྱོགས་སུ་ཁྲུ་ཉིས་བརྒྱ་ལྔ་བཅུ་དང་། ནུབ་ཕྱོགས་སུ་ཁྲུ་ཉིས་བརྒྱ་ལྔ་བཅུ་ཡོད།
EZE 48:18 སྤྱི་གནས་ཀྱི་ལོགས་གཉིས་སུ་ལུས་པའི་ས་ནི་གནས་གཙང་མར་ཕུལ་བའི་ས་དེའི་རིང་ཚད་ལྟར་བརྩིས་ན། ཤར་ཕྱོགས་སུ་ཁྲུ་ཆིག་ཁྲི་དང་ནུབ་ཕྱོགས་སུའང་ཁྲུ་ཆིག་ཁྲི་ཡོད་པ་དང་། གནས་གཙང་མར་ཕུལ་བའི་ས་དེའི་འགྲམ་རྒྱུད་དུ་ཡོད་དོ། །ས་འདི་དག་ལས་ཐོན་པ་རྣམས་གྲོང་ཁྱེར་ནང་གི་ལས་བཟོ་པའི་ཁ་ཟས་སུ་བྱེད་དགོས།
EZE 48:19 གྲོང་ཁྱེར་ནང་གི་ལས་བཟོ་པ་རྣམས་ནི་ཡེས་ར་ཨེལ་གྱི་ཚོ་ཁག་སོ་སོ་ནས་འོངས་ཏེ་ས་འདི་རྨོ་དགོས།
EZE 48:20 གནས་གཙང་མར་ཕུལ་བའི་ས་ཆ་ཡོངས་ནི་རིང་ཚད་ལ་ཁྲུ་ཉིས་ཁྲི་ལྔ་སྟོང་དང་ཞེང་ལ་ཁྲུ་ཉིས་ཁྲི་ལྔ་སྟོང་ཅན་གྱི་དབྱིབས་གྲུ་བཞི་མ་ཞིག་ཡིན་ཏེ། ཁྱོད་རྣམས་ཀྱིས་གནས་གཙང་མར་འབུལ་བའི་ས་དེ་ནི་གྲོང་ཁྱེར་གྱི་ས་དང་མཉམ་དུ་འབུལ་དགོས།
EZE 48:21 ཡང་གནས་གཙང་མར་ཕུལ་བའི་ས་ཆ་དང་གྲོང་ཁྱེར་གྱི་ས་ཡི་གཡས་གཡོན་གཉིས་སུ་ལུས་པ་ཐམས་ཅད་རྒྱལ་པོར་དབང་བ་ཡིན་ཏེ། ཞེང་ལ་ཁྲུ་ཉིས་ཁྲི་ལྔ་སྟོང་ཡོད་པའི་གནས་གཙང་མར་ཕུལ་བའི་ས་དེའི་ཤར་ནས་ཤར་གྱི་ས་མཚམས་བར་དང་། ཡང་ཞེང་ལ་ཁྲུ་ཉིས་ཁྲི་ལྔ་སྟོང་ཡོད་པའི་གནས་གཙང་མར་ཕུལ་བའི་ས་དེའི་ནུབ་ནས་ནུབ་ཀྱི་ས་མཚམས་དང་། ས་སྐལ་དུ་བགོས་པའི་ཡུལ་གཞན་དག་ཁ་ཚང་རྒྱལ་པོར་དབང་བ་ཡིན། དེ་བཞིན་ཡར་ཕུལ་བའི་གནས་མཆོག་དང་མཆོད་ཁང་གི་གནས་དམ་པ་ནི་ས་དེ་གཉིས་ཀྱི་དབུས་སུ་ཡོད་པ་ཡིན།
EZE 48:22 ལེ་ཝི་པའི་ས་སྐལ་དང་གྲོང་ཁྱེར་གྱི་ས་ནི་རྒྱལ་པོའི་ས་སྐལ་གྱི་དབུས་སུ་ཡོད་པ་དང་། ཡང་རྒྱལ་པོའི་ས་སྐལ་ནི་ཡ་ཧུ་དཱའི་ས་མཚམས་དང་པེན་ཡཱ་མེན་གྱི་ས་མཚམས་གཉིས་ཀྱི་བར་དུ་ཡོད་དོ། །
EZE 48:23 ཡང་དེའི་འཕྲོས་ཚོ་པ་རྣམས་ལ་མཚོན་ན། ཤར་ནས་ནུབ་བར་དུ་པེན་ཡཱ་མེན་གྱི་ས་སྐལ་ཡིན།
EZE 48:24 པེན་ཡཱ་མེན་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་སི་མུ་ཨོན་གྱི་ས་སྐལ་ཡིན།
EZE 48:25 སི་མུ་ཨོན་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་ཡེས་སི་ཀཱར་གྱི་ས་སྐལ་ཡིན།
EZE 48:26 ཡེས་སི་ཀཱར་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་ཟེ་བུ་ལུན་གྱི་ས་སྐལ་ཡིན།
EZE 48:27 ཟེ་བུ་ལུན་གྱི་ས་མཚམས་འགྲམ་རྒྱུད་ཀྱི་ཤར་ནས་ནུབ་བར་དུ་གཱ་རྡུ་ཡི་ས་སྐལ་ཡིན།
EZE 48:28 གཱ་རྡུའི་ལྷོ་ཕྱོགས་ཀྱི་ས་མཚམས་ནི་ཐལ་མཱར་ནས་མེ་རི་བཱ་ཀཱ་དེའེ་ཤཱའི་ཆུ་རྣམས་དང་། ཨེ་ཅིབ་ཀྱི་ཆུ་ཕྲན་རྣམས་བརྒྱུད་ནས་རྒྱ་མཚོ་ཆེན་པོར་སླེབས་པ་ཡིན།
EZE 48:29 འདི་ནི་ཁྱོད་ཚོས་རྒྱན་བླངས་ནས་ཡེས་ར་ཨེལ་གྱི་ཚོ་པ་སོ་སོར་བགོ་དགོས་པའི་ས་སྐལ་ཡིན་ཏེ། ས་སྐལ་འདི་དག་ནི་ཁོ་ཚོར་ཐོབ་པའི་ནོར་སྐལ་ཡིན་ནོ་ཞེས་གཙོ་བོ་ཡ་ཝཱེས་གསུངས་སོ། །
EZE 48:30 གྲོང་ཁྱེར་བྱང་ཕྱོགས་ཀྱི་རིང་ཚད་ནི་ཁྲུ་བཞི་སྟོང་ལྔ་བརྒྱ་ཡིན་ལ། གྲོང་ཁྱེར་གྱི་ཐོན་སྒོ་ནི་འདི་ལྟ་སྟེ།
EZE 48:31 མཁར་སྒོ་རྣམས་ལ་ཡེས་ར་ཨེལ་གྱི་ཚོ་པ་རེ་རེ་བཞིན་དུ་མིང་འདོགས་དགོས་པ་དང་། བྱང་ཕྱོགས་སུ་རྒྱ་སྒོ་གསུམ་ཡོད་དེ། གཅིག་ནི་རུ་བེན་གྱི་རྒྱ་སྒོ་དང་། གཅིག་ནི་ཡ་ཧུ་དཱའི་རྒྱ་སྒོ་དང་། གཅིག་ནི་ལེ་ཝིའི་རྒྱ་སྒོ་ཡིན།
EZE 48:32 ཤར་ཕྱོགས་ཀྱི་རིང་ཚད་ནི་ཁྲུ་བཞི་སྟོང་ལྔ་བརྒྱ་ཡིན་པ་དང་། རྒྱ་སྒོ་གསུམ་ཡོད་དེ། གཅིག་ནི་ཡོ་སེབ་ཀྱི་རྒྱ་སྒོ་དང་། གཅིག་ནི་པེན་ཡཱ་མེན་གྱི་རྒྱ་སྒོ་དང་། གཅིག་ནི་དཱན་གྱི་རྒྱ་སྒོ་ཡིན།
EZE 48:33 ལྷོ་ཕྱོགས་ཀྱི་རིང་ཚད་ནི་ཁྲུ་བཞི་སྟོང་ལྔ་བརྒྱ་ཡིན་པ་དང་། རྒྱ་སྒོ་གསུམ་ཡོད་དེ། གཅིག་ནི་སི་མུ་ཨོན་གྱི་རྒྱ་སྒོ་དང་། གཅིག་ནི་ཡེས་སི་ཀཱར་གྱི་རྒྱ་སྒོ་དང་། གཅིག་ནི་ཟེ་བུ་ལུན་གྱི་རྒྱ་སྒོ་ཡིན།
EZE 48:34 ནུབ་ཕྱོགས་ཀྱི་རིང་ཚད་ནི་ཁྲུ་བཞི་སྟོང་ལྔ་བརྒྱ་ཡིན་པ་དང་། དེ་རུ་ཡང་རྒྱ་སྒོ་གསུམ་ཡོད་དེ། གཅིག་ནི་གཱ་རྡུ་ཡི་རྒྱ་སྒོ་དང་། གཅིག་ནི་ཨ་ཤེར་གྱི་རྒྱ་སྒོ་དང་། གཅིག་ནི་ནཱབ་ཐ་ལིའི་རྒྱ་སྒོ་ཡིན།
EZE 48:35 གྲོང་ཁྱེར་མཐའ་འཁོར་གྱི་རིང་ཚད་ནི་ཁྲུ་ཆིག་ཁྲི་བརྒྱད་སྟོང་ཡིན་ཏེ། དུས་དེ་ནས་བཟུང་སྟེ་གྲོང་ཁྱེར་འདིའི་མིང་ལ་དཀོན་མཆོག་ཡ་ཝཱེ་གནས་དེར་བཞུགས་པ་ཡིན་ཞེས་འདོགས་པར་འགྱུར་རོ་ཞེས་གསུངས་སོ།། །།
DAN 1:1 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱིས་སྲིད་སྐྱོང་བའི་ལོ་གསུམ་པར། པཱ་པེལ་ལོན་རྒྱལ་ཁབ་ཀྱི་གོང་མ་རྒྱལ་པོ་ནེ་བོ་ཀད་ནེ་ཙར་ནི་ཡེ་རུ་སཱ་ལེམ་དུ་འོངས་ནས་གྲོང་ཁྱེར་བསྐོར་བ་དང་།
DAN 1:2 གཙོ་བོ་དཀོན་མཆོག་གིས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་དང་ཁོང་གི་མཆོད་ཁང་ལས་སྣོད་ཆས་འགའ་ནེ་བོ་ཀད་ནེ་ཙར་གྱི་ལག་ཏུ་གཏད། ཁོས་སྣོད་ཆས་དེ་རྣམས་ཤིན་ཨར་ཡུལ་ དུ་ཡོད་པའི་ལྷ་ཁང་དུ་གདན་དྲངས་ཤིང་རང་གི་ལྷ་ཡི་ནོར་མཛོད་ནང་དུ་བཞག་གོ །
DAN 1:3 དེ་ནས་རྒྱལ་པོ་ནེ་བོ་ཀད་ནེ་ཙར་གྱིས་རང་གི་ནང་བློན་ཨ་ཤུ་ཕི་ནཱ་སི་ལ་བཀའ་གནང་སྟེ། ཡེས་ར་ཨེལ་པ་རྣམས་ཀྱི་རྒྱལ་རྒྱུད་དང་སྐུ་དྲག་རྣམས་ལས་ལུས་སྟེང་དུ་སྐྱོན་ཏིལ་ཙམ་ཡང་མེད་པ་དང་བྱད་གཟུགས་མཛེས་པ། བློ་རིག་དང་ཤེས་ཡོན་སྣ་ཚོགས་ལྡན་པ། རིག་པའི་གནས་གང་ཞིག་སྦྱོང་བར་བློ་རྣོ་བ། ཤེས་རིག་གི་སྦྱངས་སྟོབས་མངའ་བ་བཅས་ཀྱི་གཞོན་ནུ་འཇོན་ཐང་ཅན་སྐོར་ཞིག་སྟེ་རྒྱལ་པོའི་སྐུ་སྲུང་དུ་འོས་པ་རྣམས་བདམས་ནས་ཁོ་རྣམས་ལ་ཀལ་དི་པའི་སྐད་ཡིག་དང་རྩོམ་རིག་ཁྲིད་ཅིག་ཅེས་སྨྲས་སོ། །
DAN 1:5 ཡང་རྒྱལ་པོས་ཁོ་རྣམས་ལ་ཉིན་རེ་བཞིན་གོང་མས་སྤྱོད་པའི་བཟའ་བཅའ་དང་བཏུང་བྱའི་རྒུན་ཆང་གནང་བར་གཏན་ཁེལ་བྱས་པ་དང་། ལོ་གསུམ་ལ་སྦྱོང་བརྡར་སྤྲད་པའི་རྗེས་སུ་ཁོ་རྣམས་ཀྱིས་རྒྱལ་པོར་ཞབས་ཕྱི་བསྒྲུབ་དགོས་པའོ། །
DAN 1:6 གཞོན་ནུ་དེ་དག་ལས་དཱ་ནེ་ཨེལ་དང་། ཧ་ནན་ཡཱ། མེ་ཤཱ་ཨེལ། ཨ་ཟར་ཡཱ་བཅས་ནི་ཡ་ཧུ་དཱའི་བུ་རྒྱུད་ཡིན།
DAN 1:7 དེ་ཡང་བློན་ཆེན་གྱིས་ཁོ་ཚོའི་མིང་བརྗེས་པ་འདི་ལྟ་སྟེ། དཱ་ནེ་ཨེལ་ལ་པེལ་ཏེ་ཤཱ་ཙར་དང་ཧ་ནན་ཡཱ་ལ་ཤད་རག མེ་ཤཱ་ཨེལ་ལ་མེ་ཤག ཨ་ཟར་ཡཱ་ལ་ཨ་བེད་ནེ་གོ་ཞེས་བཏགས་སོ། །
DAN 1:8 འོན་ཀྱང་དཱ་ནེ་ཨེལ་གྱིས་རང་ཉིད་གོང་མས་སྤྱོད་པའི་བཟའ་བཅའ་ཞིམ་པོ་དང་རྒུན་ཆང་མངར་མོ་ལ་འབག་པར་མི་བྱ་སྙམ་ནས། རང་ཉིད་འབག་པར་མི་བྱ་བའི་ཆེད་དུ་ཉུག་རུམ་པར་ཞུ་བ་ཕུལ།
DAN 1:9 དེ་བས་དཀོན་མཆོག་གིས་བློན་ཆེན་དེའི་མདུན་དུ་དཱ་ནེ་ཨེལ་ལ་གཟིགས་སྐྱོང་དང་སྙིང་རྗེ་ཐོབ་ཏུ་བཅུག་ནའང་།
DAN 1:10 བློན་ཆེན་དེས་དཱ་ནེ་ཨེལ་ལ། ང་ནི་རང་གི་ཇོ་བོ་དང་རྒྱལ་པོ་ཁོང་ལ་འཇིགས་ཏེ། ཁོང་གིས་ཁྱོད་རྣམས་ལ་བཟའ་བཏུང་བཀོད་སྒྲིག་བྱས་ཚར། གལ་ཏེ་ཁོང་གིས་ཁྱོད་རྣམས་ནི་ལོ་མཉམ་གཞན་དག་ལས་ངོ་མདངས་སྐྱ་བོ་ཡིན་པ་མཐོང་ན་མི་ལེགས་ཏེ། ཁྱོད་རྣམས་ཀྱིས་རྒྱལ་པོའི་དྲུང་དུ་ངའི་མགོ་ཤོར་དུ་བཅུག་པ་མ་ཡིན་ནམ་ཞེས་སྨྲས།
DAN 1:11 བློན་ཆེན་གྱིས་དཱ་ནེ་ཨེལ་དང་ཧ་ནན་ཡཱ། མེ་ཤཱ་ཨེལ། ཨ་ཟར་ཡཱ་བཅས་ལ་ལྟ་རྟོག་བྱེད་དུ་བསྐོས་པའི་འགོ་དཔོན་དེར་དཱ་ནེ་ཨེལ་ན་རེ།
DAN 1:12 ཁྱེད་ཀྱིས་ཞབས་ཕྱི་ངེད་ཅག་ལ་ཉིན་ཞག་བཅུའི་རིང་ལ་ཟས་སུ་སྔོ་ཚོད་དང་བཏུང་བར་ཆུ་གཙང་མ་གནང་ནས་ཚོད་ལྟ་བྱེད་པར་མཛོད།
DAN 1:13 དེ་ནས་ཁྱེད་ཀྱིས་ང་ཚོའི་བཞིན་རས་དང་རྒྱལ་པོའི་ཕོ་བྲང་ནས་ཟས་ལ་རོལ་མཁན་གཞོན་ནུ་ཚོའི་བཞིན་རས་གཉིས་ཀ་བསྡུར་ནས། ཇི་ལྟར་མཐོང་བ་བཞིན་ཐག་གཅོད་བྱེད་པར་མཛོད་ཅེས་ཞུས་པ་ན།
DAN 1:14 བསམ་འཆར་དེ་ལ་འགོ་དཔོན་འཐད་པ་བྱུང་ཞིང་ཉིན་ཞག་བཅུའི་རིང་ལ་ཚོད་ལྟ་བྱས་སོ། །
DAN 1:15 ཉིན་བཅུ་ཡི་རྗེས་སུ་དེ་དག་གི་བཞིན་རས་ནི་རྒྱལ་པོའི་ཟས་སྤྱད་པའི་གཞོན་ནུ་མཐའ་དག་ལས་ཀྱང་མཛེས་ཤིང་དར་ཡོད་པ་མཐོང་སྟེ།
DAN 1:16 ཁོ་རྣམས་ལ་ལྟ་རྟོག་བྱེད་པའི་འགོ་དཔོན་དེས་ཁོ་རྣམས་ལ་བཀོད་སྒྲིག་བྱས་པའི་བཟའ་བཅའ་ཞིམ་པོ་དང་རྒུན་ཆང་མངར་མོ་ཕྱིར་བླངས་ནས་སྔོ་ཚོད་བཟའ་བར་བཅུག་གོ །
DAN 1:17 དེ་ཡང་དཀོན་མཆོག་གིས་གཞོན་ནུ་བཞི་པོར་སྐད་ཡིག་དང་ཤེས་རབ་སྣ་ཚོགས་ལ་མཁོ་བའི་ཤེས་ཡོན་དང་རིག་པ་བསྩལ་ཞིང་། དཱ་ནེ་ཨེལ་གྱིས་ཞལ་གཟིགས་དང་རྨི་ལམ་སྣ་ཚོགས་ལ་བརྟག་ཤེས་པའོ། །
DAN 1:18 དེར་རྒྱལ་པོས་གཞོན་ནུ་ཐམས་ཅད་ཕོ་བྲང་ནང་དུ་འཁྲིད་པར་བཀའ་ཕབ་པའི་དུས་སུ་སླེབས་པ་ན། བློན་ཆེན་གྱིས་དེ་དག་རྒྱལ་པོ་ནེ་བོ་ཀད་ནེ་ཙར་གྱི་མདུན་དུ་ཁྲིད་དོ། །
DAN 1:19 རྒྱལ་པོས་དེ་རྣམས་དང་གླེང་མོལ་བྱས་པ་ལ། དེ་རྣམས་ཀྱི་ཁྲོད་དུ་དཱ་ནེ་ཨེལ་དང་ཧ་ནན་ཡཱ། མེ་ཤཱ་ཨེལ། ཨ་ཟར་ཡཱ་བཅས་བཞི་པོ་དང་འདྲ་བ་ཞིག་མ་མཐོང་བས་ཁོ་རྣམས་རྒྱལ་པོའི་བློན་པོ་སྟེ་ཞབས་ཕྱི་རུ་བསྐོས་པ་རེད།
DAN 1:20 རྒྱལ་པོས་ཁོ་རྣམས་ལ་ཤེས་རབ་དང་བློ་གྲོས་ཀུན་གྱི་ཆ་ནས་དྲི་བ་བཏོན་པ་དང་། ཁོ་ཚོ་ནི་ཡུལ་དེའི་མོ་པ་དང་སྒྱུ་མ་མཁན་ཐམས་ཅད་ལས་ཀྱང་ལྡབ་བཅུ་ཡིས་མཁས་པ་རྟོགས་སོ། །
DAN 1:21 དཱ་ནེ་ཨེལ་ནི་རྒྱལ་པོ་ཀོ་རེས་ཀྱི་སྲིད་ལོ་དང་པོའི་བར་དུ་གནས་པར་གྱུར་ཏོ། །
DAN 2:1 ནེ་བོ་ཀད་ནེ་ཙར་གྱིས་སྲིད་སྐྱོང་བའི་ལོ་གཉིས་པར་ཁོས་རྨི་ལམ་རྨིས་པ་དང་། སེམས་འཁྲུགས་ནས་གཉིད་ཀྱང་མ་ཁུགས་པས་ན།
DAN 2:2 རྒྱལ་པོས་རྨི་ལམ་དེ་དག་ལ་བརྟག་ཏུ་འཇུག་པའི་ཆེད་དུ་མི་མངགས་ནས་མོ་པ་དང་སྒྱུ་མ་མཁན། རྫུ་འཕྲུལ་ཅན། ཀལ་དི་པའི་མི་ཐམས་ཅད་འབོད་དུ་བཅུག་པ་དང་། ཁོ་རྣམས་དུས་ལྟར་རྒྱལ་པོའི་མདུན་དུ་འཛོམས་ཏེ་ཁོའི་བཀའ་བཀོད་ལ་བསྒུགས་ནས་བསྡད།
DAN 2:3 རྒྱལ་པོས་དེ་རྣམས་ལ་འདི་ལྟར། ངས་རྨི་ལམ་ཞིག་རྨིས་བྱུང་། དེས་ང་རང་སེམས་འཁྲུག་ཏུ་བཅུག་པས་དེའི་དོན་ཅི་ཡིན་པ་ཤོད་ཅིག་ཅེས་སྨྲས་པ་ན།
DAN 2:4 ཀལ་དི་པ་དག་གིས་ཨ་རམ་སྐད་ཀྱིས་རྒྱལ་པོ་ལ། ཀྱེ། རྒྱལ་པོ་ཆེན་པོ་ལགས། ཁྱེད་རང་སྐུ་ཚེ་ཡུན་རིང་བརྟན་པར་ཤོག ཁྱེད་ཀྱི་རྨི་ལམ་དེ་ངེད་ཞབས་ཕྱི་རྣམས་ལ་གསུང་བར་མཛོད་དང་། ངེད་ཅག་གིས་དེར་བརྟག་པར་བྱའོ་ཞེས་ཞུས་སོ། །
DAN 2:5 དེ་ནས་རྒྱལ་པོས་ཀལ་དི་པ་རྣམས་ལ་འདི་ལྟར། ངའི་བཀའ་ལ་འགྱུར་བ་གཏན་ནས་མེད། གལ་ཏེ་ཁྱོད་ཅག་གིས་ངས་རྨིས་པའི་རྨི་ལམ་དང་དེའི་དོན་ཅི་ཡིན་པ་གསལ་པོར་བཤད་མ་ཐུབ་ཚེ། ཁྱོད་རྣམས་དུམ་བུ་དུམ་བུར་གཏུབ་ཅིང་ཁང་པ་རྣམས་ཞིག་རོར་ལུས་པར་འགྱུར།
DAN 2:6 འོན་ཀྱང་ཁྱོད་ཅག་གིས་ངས་རྨིས་པའི་རྨི་ལམ་དང་དེའི་དོན་ཅི་ཡིན་པ་བདག་ལ་གསལ་པོར་བཤད་ཐུབ་ཚེ། ཁྱོད་ཅག་ལ་ལེགས་སྐྱེས་དང་བྱ་དགའ་གནང་ཞིང་བཀུར་སྟི་ཆེན་པོ་འཐོབ་ངེས་ཡིན་པས། ཁྱོད་ཅག་གིས་ངའི་རྨི་ལམ་དང་དེའི་དོན་ཅི་ཡིན་པ་བདག་ལ་གསལ་པོར་ཤོད་ཅིག་ཅེས་སྨྲས་སོ། །
DAN 2:7 ཁོ་ཚོས་ཡང་བསྐྱར་ལན་དུ། རྒྱལ་པོས་ཉིད་ཀྱི་རྨི་ལམ་དེ་ངེད་ཞབས་ཕྱི་རྣམས་ལ་གསུང་བར་མཛོད་དང་། ངེད་ཅག་གིས་དེར་བརྟག་པར་བྱའོ་ཞེས་ཞུས་སོ། །
DAN 2:8 དེ་ནས་རྒྱལ་པོས་འདི་ལྟར། ཁྱོད་ཅག་གིས་བདག་གི་བཀའ་ལ་འགྱུར་བ་མེད་པ་ཤེས་པས། དུས་འགྱངས་བྱེད་འདོད་པ་བདག་གིས་ཤེས་གསལ་ཡིན།
DAN 2:9 གལ་ཏེ་ཁྱོད་ཅག་གིས་ང་ལ་རྨི་ལམ་དེ་གསལ་པོར་མ་བཤད་ན་ཆད་པ་གཅོད་ངེས་ཡིན། ཁྱོད་ཅག་གིས་ལྐོག་འབྲེལ་གྱིས་ང་ལ་ཁུངས་མེད་འཆལ་གཏམ་སྨྲས་ཏེ་གནས་ཚུལ་ལ་འགྱུར་ལྡོག་འབྱུང་བར་སྒུག་པ་རེད། ངས་ཁྱོད་ཅག་གིས་རྨི་ལམ་གྱི་དོན་ཅི་ཡིན་པ་དངོས་གནས་ང་ལ་གསལ་པོར་བཤད་ཐུབ་པ་ཤེས་པའི་ཆེད་དུ་རྨི་ལམ་དེ་ད་ལྟ་རང་ང་ལ་ཤོད་ཅིག་ཅེས་སྨྲས་སོ། །
DAN 2:10 ཀལ་དི་པ་དག་གིས་རྒྱལ་པོར་ལན་དུ། ས་སྟེང་དུ་རྒྱལ་པོའི་གསང་བ་འདི་བརྟོལ་ཐུབ་པའི་སྐྱེ་བོ་སུ་ཡང་ཡོད་མ་ཡིན། རྒྱལ་པོ་རླབས་བོ་ཆེ་དང་དབང་ཐང་ཅན་གང་གིས་ཀྱང་སྒྱུ་མ་མཁན་དང་སྔགས་པ། ཀལ་དི་པ་བཅས་སུ་ལའང་དོན་དེ་འདྲ་དྲིས་མ་མྱོང་ངོ་། །
DAN 2:11 རྒྱལ་པོའི་བཀའ་འདི་ཧ་ཅང་དཀའ་བས། མི་དང་མཉམ་དུ་མི་བཞུགས་པའི་ལྷ་ཚོགས་མ་གཏོགས་སྐྱེ་བོ་སུ་ཞིག་གིས་ཀྱང་རྨི་ལམ་དེ་ཁྱེད་ཀྱི་སྐུ་དྲུང་ནས་འཆད་པར་མི་ནུས་ཞེས་ཞུས་པས།
DAN 2:12 རྒྱལ་པོ་ཤིན་ཏུ་ཁྲོས་ཏེ་པཱ་པེལ་ལོན་གྱི་མཁས་མཛངས་ཐམས་ཅད་གསོད་དགོས་པའི་བཀའ་བསྩལ་པ་དང་།
DAN 2:13 མཁས་མཛངས་རྣམས་སྲོག་ཐོག་གཏོང་བའི་བཀའ་རྒྱ་ཀུན་ལ་སྤེལ་ཞིང་དཱ་ནེ་ཨེལ་དང་ཁོའི་གྲོགས་པོ་རྣམས་ཀྱང་བཙལ་ནས་སྲོག་ཐོག་གཏོང་བར་བསྒྲགས་སོ། །
DAN 2:14 དེ་ཡང་དཱ་ནེ་ཨེལ་གྱིས་པཱ་པེལ་ལོན་གྱི་མཁས་མཛངས་རྣམས་གསོད་དུ་འོངས་པའི་སྐུ་སྲུང་དམག་དཔོན་ཨར་ཡོག་ཅེས་བྱ་བར་སྤྱང་གྲུང་ལྡན་པའི་སྒོ་ནས་ཚིག་འཇམ་པོ་སྨྲས་པ་སྟེ།
DAN 2:15 སྐུ་སྲུང་དམག་དཔོན་ཨར་ཡོག་ལ་འདི་ལྟར། རྒྱལ་པོའི་བཀའ་ནི་འདི་འདྲ་བྲེལ་མྱུར་ཆེ་བ་ཅི་ཡིན་ནམ་ཞེས་དྲིས་པ་ན། ཨར་ཡོག་གིས་དོན་དེའི་སྐོར་དཱ་ནེ་ཨེལ་ལ་རྒྱས་པར་བཤད།
DAN 2:16 དེ་ནས་དཱ་ནེ་ཨེལ་རྒྱལ་པོའི་སྐུ་མདུན་དུ་བཅར་ཏེ། ཁོས་རྨི་ལམ་དེའི་དོན་ཅི་ཡིན་པ་རྒྱལ་པོར་སྨྲ་ནུས་པའི་ཆེད་དུ་དུས་འགྱངས་བྱེད་པའི་ཞུ་བ་ཕུལ་ཏོ། །
DAN 2:17 དཱ་ནེ་ཨེལ་རང་ཁྱིམ་དུ་ལོག་སྟེ་རང་གི་གྲོགས་པོ་ཧ་ནན་ཡཱ་དང་། མེ་ཤཱ་ཨེལ། ཨ་ཟར་ཡཱ་བཅས་ལ་དོན་དེ་རྒྱས་པར་བཤད་པ་དང་།
DAN 2:18 ཡང་རང་ཉིད་དང་ཁོའི་གྲོགས་པོ་རྣམས་པཱ་པེལ་ལོན་གྱི་མཁས་མཛངས་བྱིངས་དང་མཉམ་དུ་མེད་པར་མི་འགྱུར་བའི་ཆེད་དུ། ནམ་མཁའི་དཀོན་མཆོག་གིས་སྙིང་རྗེ་དགོངས་ནས་རྟོགས་དཀའ་བའི་གསང་བ་དེ་གསལ་པོར་སྟོན་པར་སྨོན་ལམ་འདེབས་དགོས་པ་ཁོ་རྣམས་ལ་བཤད།
DAN 2:19 དེ་ནས་མཚན་མོའི་ཞལ་གཟིགས་ཁྲོད་དུ་གསང་བ་དེ་དཱ་ནེ་ཨེལ་ལ་མངོན་པར་མཛད་པས་དཱ་ནེ་ཨེལ་གྱིས་ནམ་མཁའི་དཀོན་མཆོག་ལ་འདི་ལྟར་བསྟོད་པ་ཕུལ་བ་སྟེ།
DAN 2:20 དཀོན་མཆོག་མཚན་ལ་གཏན་དུ་བསྟོད་བསྔགས་བརྗོད། ། ཤེས་རབ་ནུས་མཐུ་ཡོད་དོ་ཁོང་གི་ཡིན། །
DAN 2:21 དུས་དང་ནམ་ཟླའི་འགྱུར་བག་ཁོང་གིས་མཛད། ། ཁོང་གིས་རྒྱལ་པོ་བསྐོ་འཇོག་བྱེད་པ་དང་། ། དེ་རྣམས་རྒྱལ་པོའི་ཁྲི་ལས་འབེབ་པར་མཛད། ། མཁས་མཛངས་ལྡན་པའི་མི་བུར་ཤེས་རབ་སྦྱིན། ། ཡོན་ཏན་ལྡན་པ་རྣམས་ལ་དཔྱོད་ཤེས་སྩོལ། །
DAN 2:22 རྟོགས་དཀའ་གསང་བའི་དོན་རྣམས་མངོན་པར་མཛད། ། མུན་ནག་ཁྲོད་ཀྱི་ཡོད་ཚད་ཁོང་གིས་མཁྱེན། ། འོད་ནི་ཁོང་དང་ངོ་བོ་དབྱེར་མེད་ལགས། །
DAN 2:23 ང་ཡི་མེས་པོ་རྣམས་ཀྱི་དཀོན་མཆོག་ལགས། ། ཁྱེད་ལ་ཐུགས་རྗེ་ཞུ་ཞིང་བསྟོད་བསྔགས་བརྗོད། ། ཁྱེད་ཀྱིས་ཤེས་རབ་ནུས་མཐུ་བདག་ལ་གནང་། ། ངེད་ཀྱིས་ཁྱེད་ལ་གང་ཞིག་ཞུས་པ་དེ། ། ད་ལྟ་ཁྱེད་ཀྱིས་བདག་ལ་གསལ་པོར་མངོན། ། རྒྱལ་པོའི་རྨི་ལམ་ང་ཚོར་གསལ་པོར་བསྟན། ། ཞེས་པའོ། །
DAN 2:24 དེ་ཡང་དཱ་ནེ་ཨེལ་རྒྱལ་པོས་པཱ་པེལ་ལོན་གྱི་མཁས་མཛངས་རྣམས་གསོད་པར་བསྐོས་པའི་ཨར་ཡོག་གི་གམ་དུ་སོང་སྟེ་འདི་ལྟར། པཱ་པེལ་ལོན་གྱི་མཁས་མཛངས་རྣམས་མ་གསོད་ཅིག ང་རང་རྒྱལ་པོའི་དྲུང་དུ་འཁྲིད་པར་གྱིས་དང་ངས་རྒྱལ་པོར་རྨི་ལམ་དེའི་དོན་ཅི་ཡིན་ཞུ་དགོས་ཞེས་སྨྲས་པ་ན།
DAN 2:25 ཨར་ཡོག་གིས་དེ་མ་ཐག་ཏུ་དཱ་ནེ་ཨེལ་རྒྱལ་པོའི་སྐུ་དྲུང་དུ་ཁྲིད་དེ་ན་རེ། ངས་ཡ་ཧུ་དཱ་པའི་བཙོན་མ་རྣམས་ལས་ཁྱེད་ཀྱི་རྨི་ལམ་ལ་འགྲེལ་བཤད་རྒྱག་མཁན་ཞིག་རྙེད་བྱུང་ཞེས་སྨྲས་སོ། །
DAN 2:26 དེར་རྒྱལ་པོས་པེལ་ཏེ་ཤཱ་ཙར་ཞེས་ཀྱང་འབོད་པའི་དཱ་ནེ་ཨེལ་ལ་འདི་ལྟར། ཁྱོད་ཀྱིས་རྨི་ལམ་དེ་ང་ལ་སྟོན་ནུས་པ་དང་དེར་འགྲེལ་བཤད་ཀྱང་རྒྱག་ཐུབ་བམ་ཞེས་དྲིས་པ་ན།
DAN 2:27 དཱ་ནེ་ཨེལ་གྱིས་རྒྱལ་པོ་ལ་ལན་དུ། ཁྱེད་ཀྱིས་དྲིས་པའི་གསང་བ་ཆེན་པོ་དེ་ནི་མཁས་མཛངས་དང་། སྒྱུ་མ་མཁན། མོ་པ། རྩིས་པ་སོགས་སུ་ཞིག་གིས་ཀྱང་འགྲེལ་མི་ནུས།
DAN 2:28 འོན་ཀྱང་གསང་བ་ཐམས་ཅད་ཐོགས་མེད་དུ་མངོན་པར་མཛད་ནུས་པའི་དཀོན་མཆོག་ཅིག་ནམ་མཁའ་རུ་བཞུགས་ཡོད་པས། ཁོང་གིས་རྒྱལ་པོ་ནེ་བོ་ཀད་ནེ་ཙར་ཁྱེད་རང་ལ་མཐའ་མའི་ཉིན་མོ་དག་ལ་ཅི་ཞིག་འབྱུང་ངེས་པ་བསྟན་ཅིང་། ཁྱེད་ཀྱི་རྨི་ལམ་དང་མལ་ཁྲིའི་སྟེང་ཉིད་ཀྱི་བློ་ངོར་འཆར་བའི་ཞལ་གཟིགས་ནི་འདི་ལྟ་སྟེ།
DAN 2:29 ཀྱེ་རྒྱལ་པོ་ཆེན་པོ་ལགས། ཁྱེད་མལ་ཁྲིའི་སྟེང་དུ་ཡོད་དུས་འབྱུང་འགྱུར་གྱི་དོན་རྣམས་ཡིད་ལ་འཁོར་ཞིང་། གསང་བ་མངོན་པར་མཛད་མཁན་ཁོང་གིས་མ་འོངས་པར་ཅི་ཞིག་འབྱུང་ངེས་པ་ཁྱེད་ལ་དངོས་སུ་བསྟན་པ་ཡིན།
DAN 2:30 ད་ལྟ་གསང་བ་འདི་ང་རང་ལ་མངོན་པར་གྱུར་པ་ནི་བདག་ལ་གཞན་ལས་ལྷག་པའི་ཤེས་རབ་རྣོན་པོ་ཞིག་མངའ་བས་མ་ཡིན་པར། རྒྱལ་པོ་ཁྱེད་ཀྱིས་རྨི་ལམ་གྱི་དོན་དང་ཉིད་ཀྱི་དགོངས་ཚུལ་གཉིས་ཀ་གསལ་པོར་མཁྱེན་པའི་ཆེད་དུ་ཡིན་ནོ། །
DAN 2:31 ཀྱེ། རྒྱལ་པོ་ལགས། ཁྱེད་ཀྱིས་སྐུ་བརྙན་ཆེན་པོ་ཞིག་མཐོང་སྟེ། རྔམ་བརྗིད་ཆེ་ཞིང་འོད་མདངས་འཚེར་བ་དང་། ཁྱེད་ཀྱི་དྲུང་དུ་ཀྲོང་ངེར་ལངས་ནས་རྣམ་པ་འཇིགས་སུ་རུང་བ་ཞིག་ཡིན།
DAN 2:32 དེའི་མགོ་བོ་ནི་གསེར་བཙོ་མས་ཤན་ཞིང་བྲང་དང་དཔུང་པ་སོགས་དངུལ་གྱིས་བཞེངས་པར་མ་ཟད། ཁོག་པ་དང་རྐེད་པ་ནི་ལི་ཡིས་བཟོས་ཡོད།
DAN 2:33 ད་དུང་བརླ་ནི་ལྕགས་དང་། རྐང་པ་ནི་ཕྱེད་ཀ་ལྕགས་དང་ཕྱེད་ཀ་འཇིམ་བག་ཡིན།
DAN 2:34 ཁྱེད་ཀྱིས་ལྟ་བའི་སྐབས་སུ། མི་ཡིས་གཤགས་པ་མ་ཡིན་པའི་རྡོ་ཕ་བོང་ཞིག་གིས་སྐུ་བརྙན་དེའི་ལྕགས་དང་འཇིམ་གྱིས་བཟོས་པའི་རྐང་པར་བརྡེགས་ནས་དེ་རྡུལ་དུ་བརླག་པའོ། །
DAN 2:35 དེ་ནས་ལྕགས་དང་འཇིམ་བག ལི། དངུལ། གསེར་བཅས་ནི་དུས་གཅིག་ཏུ་དུམ་བུར་འཐོར་ཏེ་དབྱར་རླུང་གིས་རྒྱང་ཐག་རིང་པོར་འཁུར་བའི་གཡུལ་ཁའི་སྦུར་མ་ལྟར་རྗེས་ཤུལ་ཙམ་ཡང་རྙེད་མ་སོང་། འོན་ཀྱང་སྐུ་བརྙན་དེར་བརྡེགས་པའི་རྡོ་ཕ་བོང་དེ་ནི་རི་བོ་ཆེན་པོ་ཞིག་ཏུ་གྱུར་ནས་ས་སྟེང་ཡོངས་སུ་ཁྱབ་པའོ། །
DAN 2:36 དེ་ནི་ཁྱེད་ཀྱི་རྨི་ལམ་ཡིན། ད་ལྟ་བདག་གིས་རྒྱལ་པོའི་དྲུང་དུ་དེའི་དོན་འཆད་པར་བྱའོ། །
DAN 2:37 ཀྱེ་རྒྱལ་པོ་ལགས། ཁྱེད་ནི་རྒྱལ་པོ་རྣམས་ཀྱི་རྒྱལ་པོ་ལགས། ནམ་མཁའི་དཀོན་མཆོག་གིས་ཁྱེད་ལ་རྒྱལ་སྲིད་དང་དབང་ཆ། ནུས་མཐུ། གཟི་བརྗིད་བཅས་གནང་ཡོད།
DAN 2:38 དེ་མིན་ཁོང་གིས་ཡུལ་སོ་སོར་ཐར་ཐོར་དུ་གནས་པའི་མི་རྣམས་དང་ས་སྟེང་གི་དུད་འགྲོ། ནམ་མཁའི་བྱ་ལ་སོགས་པ་ཁྱེད་ཀྱི་དབང་འོག་ཏུ་གནང་ནས། ཁྱེད་ཉིད་དེ་ཐམས་ཅད་ལ་བདག་གཉེར་བྱེད་མཁན་དུ་བསྐོས། གསེར་གྱི་མགོ་བོ་ཅན་དེ་ཁྱེད་ཡིན་ནོ། །
DAN 2:39 དེ་ཡང་ཁྱེད་ཀྱི་རྗེས་སུ་ཁྱེད་ལས་སྟོབས་ཆུང་བའི་རྒྱལ་སྲིད་གཞན་ཞིག་འབྱུང་བ་དང་། དེར་མཐུད་ནས་ལི་ཡི་རྒྱལ་སྲིད་གསུམ་པ་ཞིག་གིས་ས་སྟེང་ཡོངས་སུ་སྲིད་བསྐྱང་བར་བྱའོ། །
DAN 2:40 ད་དུང་ལྕགས་ལྟར་སྲ་བའི་རྒྱལ་སྲིད་བཞི་པ་ཞིག་ཀྱང་འབྱུང་ཞིང་། ལྕགས་ཀྱིས་ཚང་མ་གཏོར་ཞིང་རྡུལ་དུ་བརླག་ནུས་པ་བཞིན་རྒྱལ་སྲིད་དེས་ཀྱང་གཞན་ཡོད་ཚད་གཅོག་ཅིང་རྡུལ་དུ་བརླག་ངེས་ཡིན།
DAN 2:41 ཁྱེད་ཀྱིས་དེའི་རྐང་པ་དང་རྐང་མཛུབ་ཀྱི་ཕྱེད་ཀ་ནི་མེར་བསྲེགས་པའི་འཇིམ་བག་དང་ཕྱེད་ཀ་ནི་ལྕགས་ཡིན་པ་མཐོང་བ་བཞིན་དུ། རྒྱལ་སྲིད་དེ་ཡང་ཁ་འཐོར་དུ་འགྲོ་རྒྱུ་ཡིན་པ་དང་། ཡང་ཁྱེད་ཀྱིས་ལྕགས་ལ་འཇིམ་བག་འདྲེས་ཡོད་པ་མཐོང་བ་བཞིན་དུ། རྒྱལ་སྲིད་དེ་ཡང་ལྕགས་ལྟར་སྲ་མཁྲེགས་ལྡན་པ་ཡིན་ནོ། །
DAN 2:42 རྐང་མཛུབ་རྣམས་ནི་ཕྱེད་ཀ་ལྕགས་དང་ཕྱེད་ཀ་འཇིམ་བག་ཡིན་པ་བཞིན་དུ། རྒྱལ་སྲིད་དེ་ཡང་ཕྱེད་ཀ་སྟོབས་དང་ལྡན་ལ་ཕྱེད་ཀ་ཉམས་ཞན་ཡིན།
DAN 2:43 ཡང་ཁྱེད་ཀྱིས་ལྕགས་དང་འཇིམ་བག་འདྲེས་ཡོད་པ་མཐོང་བ་བཞིན་དུ། རྒྱལ་སྲིད་དེའི་མི་རྣམས་ཀྱང་རིགས་རྒྱུད་གཞན་རྣམས་དང་འདྲེས་ནའང་། ལྕགས་དང་འཇིམ་བག་གཉིས་ཀ་འདྲེ་མི་སྲིད་པ་ལྟར་དེ་རྣམས་ཕན་ཚུན་འབྲེལ་བར་མི་འགྱུར་རོ། །
DAN 2:44 རྒྱལ་པོ་དེ་རྣམས་ཀྱི་ཉིན་མོ་ལ། ནམ་མཁའི་དཀོན་མཆོག་གིས་ནམ་ཡང་འཇིག་མི་སྲིད་པའི་རྒྱལ་སྲིད་ཅིག་དར་བར་མཛད་ཅིང་། སྲིད་དབང་ནམ་ཡང་མི་སྡེ་གཞན་གྱི་ལག་ཏུ་མི་འཆོར་བར་མ་ཟད། རྒྱལ་སྲིད་དེས་རྒྱལ་སྲིད་གཞན་ཐམས་ཅད་གཏོར་ནས་རྡུལ་དུ་བརླག་པར་བྱ་ཞིང་། དེ་ནི་དུས་གཏན་དུ་གནས་པར་འགྱུར་རོ། །
DAN 2:45 ཁྱེད་ཀྱིས་མི་སུས་ཀྱང་མ་གཤགས་པར་རི་བོ་ལས་ཐོན་པའི་རྡོ་ཕ་བོང་དེས་ལྕགས་དང་ལི། འཇིམ་བག དངུལ། གསེར་བཅས་རྡུལ་དུ་བརླག་པ་མཐོང་བ་བཞིན་དུ། བླ་མེད་དཀོན་མཆོག་གིས་རྒྱལ་པོ་ཁྱེད་ལ་མ་འོངས་པ་ན་ཅི་ཞིག་འབྱུང་ངེས་པ་བསྟན་པ་རེད། རྨི་ལམ་ནི་བདེན་པ་ཡིན་ཞིང་དེའི་དོན་ཡང་ཡིད་རྟོན་རུང་བ་ཡིན་ཞེས་སྨྲས་སོ། །
DAN 2:46 དེ་ནས་རྒྱལ་པོ་ནེ་བོ་ཀད་ནེ་ཙར་གྱིས་ལུས་པོ་སར་བཏུད་ནས་དཱ་ནེ་ཨེལ་ལ་གུས་ཕྱག་བཙལ་ཞིང་མཆོད་པ་དང་བདུག་སྤོས་འབུལ་བའི་བཀའ་བསྩལ་ཏོ། །
DAN 2:47 རྒྱལ་པོས་དཱ་ནེ་ཨེལ་ལ་འདི་ལྟར། ཁྱེད་ཀྱིས་གསང་བ་འདི་མངོན་པར་མཛད་པས་ན། ཁྱེད་ཀྱི་དཀོན་མཆོག་ནི་ལྷ་ཐམས་ཅད་ཀྱི་དཀོན་མཆོག་དང་རྒྱལ་པོ་ཀུན་གྱི་གཙོ་བོ། གསང་བ་མ་ལུས་མངོན་པར་མཛད་མཁན་བཅས་ལགས་སོ་ཞེས་སྨྲས་སོ། །
DAN 2:48 དེ་ནས་རྒྱལ་པོས་དཱ་ནེ་ཨེལ་གྱི་གོ་གནས་སྤར་བ་དང་། ཁོ་ལ་རིན་ཐང་ཆེ་བའི་ལེགས་སྐྱེས་མང་པོ་གནང་བར་མ་ཟད། པཱ་པེལ་ལོན་ཞིང་ཆེན་ཡོངས་ལ་བདག་གཉེར་བྱེད་དུ་བཅུག་པ་དང་། ཡང་ཁོ་རང་ནི་པཱ་པེལ་ལོན་གྱི་མཁས་མཛངས་ཀུན་ལ་བདག་གཉེར་བྱེད་པའི་སྲིད་འཛིན་དུ་བསྐོས་པའོ། །
DAN 2:49 དཱ་ནེ་ཨེལ་གྱིས་རྒྱལ་པོར་རེ་བ་ཞུས་པ་ལ། རྒྱལ་པོས་ཤད་རག་དང་མེ་ཤག ཨ་བེད་ནེ་གོ་བཅས་གསུམ་ནི་པཱ་པེལ་ལོན་ཞིང་ཆེན་གྱི་སྲིད་དོན་སྒྲུབ་མཁན་དུ་བསྐོས་པ་དང་། དཱ་ནེ་ཨེལ་རང་ཉིད་རྒྱལ་པོའི་ཕོ་བྲང་ནང་དུ་ཞབས་ཕྱི་རུ་བསྡད་དོ། །
DAN 3:1 རྒྱལ་པོ་ནེ་བོ་ཀད་ནེ་ཙར་གྱིས་མཐོ་ཚད་ལ་ཁྲུ་དྲུག་ཅུ་དང་ཞེང་ལ་ཁྲུ་དྲུག་ཅན་གྱི་གསེར་སྐུ་ཞིག་བཞེངས་ནས་པཱ་པེལ་ལོན་ཡུལ་གྱི་དོའུ་རཱ་ཐང་དུ་ཀེ་རེར་བསྒྲེངས་སོ། །
DAN 3:2 དེ་ནས་རྒྱལ་པོས་སྤྱི་དཔོན་དང་བཀའ་བློན། བློན་པོ། གྲོས་པ། དཀོར་གཉེར། ཁྲིམས་དཔོན། གཟུ་དཔང་བཅས་དང་མངའ་སྡེ་དེའི་སྐུ་དྲག་ཐམས་ཅད་ཁོས་བཞེངས་པའི་གསེར་སྐུའི་རབ་གནས་ཀྱི་ཆོ་གར་གདན་དྲངས་པས།
DAN 3:3 སྤྱི་དཔོན་དང་བཀའ་བློན། བློན་པོ། གྲོས་པ། དཀོར་གཉེར། ཁྲིམས་དཔོན། གཟུ་དཔང་བཅས་དང་མངའ་སྡེ་དེའི་སྐུ་དྲག་ཐམས་ཅད་མཉམ་དུ་འཛོམས་ནས། རྒྱལ་པོས་ཡར་བཞེངས་པའི་གསེར་སྐུ་ལ་རབ་གནས་བྱེད་པའི་ཆོ་གར་ཞུགས་ཤིང་། ཐམས་ཅད་གསེར་སྐུའི་མདུན་དུ་ལངས་ནས་བསྡད་དོ། །
DAN 3:4 དུས་དེ་ཙ་ན་བཀའ་སྒྲོག་མཁན་གྱིས་སྐད་གསང་མཐོན་པོས། ཀྱེ། རྒྱལ་ཁམས་ཁག་དང་མི་རིགས་སོ་སོ། སྐད་རིགས་སོ་སོའི་མི་ཐམས་ཅད་ཀྱིས་ཉོན་དང་། རྒྱལ་པོས་ཁྱོད་ཅག་ལ་བསྒོས་པའི་བཀའ་ནི་འདི་ལྟ་སྟེ།
DAN 3:5 ཁྱོད་ཅག་གིས་རྭ་དུང་དང་གླིང་བུ། པི་ཝང་། ཏམ་བུ་ར། གཞུ་སྦྲེང་། སྦུད་གླིང་ལ་སོགས་རོལ་མོ་སྣ་ཚོགས་ཀྱི་སྒྲ་ཐོས་ཡོང་དུས། རྒྱལ་པོ་ནེ་བོ་ཀད་ནེ་ཙར་གྱིས་བསྒྲེངས་པའི་གསེར་སྐུ་ལ་ལུས་སར་བཏུད་ནས་ཕྱག་འཚལ་དགོས།
DAN 3:6 སུ་ཞིག་གིས་ལུས་སར་བཏུད་ནས་ཕྱག་མ་བཙལ་ན། དེ་མ་ཐག་ཏུ་མེ་ལྕེ་རབ་ཏུ་འབར་བའི་ཐབ་ལ་གཡུག་པར་བྱའོ་ཞེས་བསྒྲགས་སོ། །
DAN 3:7 དེ་བས་རྒྱལ་ཁམས་ཁག་དང་མི་རིགས་སོ་སོ། སྐད་རིགས་སོ་སོའི་མི་ཐམས་ཅད་ཀྱིས་རྭ་དུང་དང་གླིང་བུ། པི་ཝང་། ཏམ་བུ་ར། གཞུ་སྦྲེང་ལ་སོགས་རོལ་མོ་སྣ་ཚོགས་ཀྱི་སྒྲ་ཐོས་མ་ཐག་ཏུ། རྒྱལ་པོ་ནེ་བོ་ཀད་ནེ་ཙར་གྱིས་བསྒྲེངས་པའི་གསེར་སྐུ་ལ་ཕྱག་བཙལ་ཏོ། །
DAN 3:8 ཡང་དེའི་དུས་སུ་ཀལ་དི་པ་ཁ་ཅིག་རྒྱལ་པོའི་མདུན་དུ་ཕྱིན་ཏེ་ཡ་ཧུ་དཱ་པ་རྣམས་ལ་གནོད་སེམས་ཆེན་པོས་སྙད་བཏགས་པ་སྟེ།
DAN 3:9 ཁོ་ཚོས་རྒྱལ་པོ་ནེ་བོ་ཀད་ནེ་ཙར་ལ་འདི་ལྟར། རྒྱལ་པོའི་སྐུ་ཚེ་ཡུན་རིང་བརྟན་པར་ཤོག
DAN 3:10 ཀྱེ་རྒྱལ་པོ་ལགས། དེ་སྔར་ཁྱེད་ཀྱིས་རྭ་དུང་དང་གླིང་བུ། པི་ཝང་། ཏམ་བུ་ར། གཞུ་སྦྲེང་། སྦུད་གླིང་ལ་སོགས་རོལ་མོ་སྣ་ཚོགས་ཀྱི་སྒྲ་ཐོས་ཚད་ཀྱིས་གསེར་སྐུའི་མདུན་དུ་ལུས་སར་བཏུད་ནས་ཕྱག་འཚལ་དགོས་པ་དང་།
DAN 3:11 སུ་ཞིག་གིས་ལུས་སར་བཏུད་ནས་ཕྱག་མ་བཙལ་ན། དེ་མ་ཐག་ཏུ་མེ་ལྕེ་རབ་ཏུ་འབར་བའི་ཐབ་ལ་གཡུག་པར་འགྱུར་བའི་བཀའ་གནང་བ་མ་ཡིན་ནམ།
DAN 3:12 འོན་ཀྱང་རྒྱལ་པོ་ལགས། ཁྱེད་ཀྱིས་པཱ་པེལ་ལོན་ཡུལ་གྱི་སྲིད་འཛིན་དུ་བསྐོས་པའི་ཡ་ཧུ་དཱ་པ་ཁ་ཅིག་སྟེ། ཤད་རག་དང་མེ་ཤག ཨ་བེད་ནེ་གོ་བཅས་གསུམ་པོས་ཁྱེད་ཀྱི་བཀའ་མི་བརྩི་བ་དང་། ཁྱེད་ཀྱི་ལྷ་ལ་ཞབས་ཏོག་མི་བསྒྲུབ་ཅིང་། ཉིད་ཀྱིས་བཞེངས་པའི་གསེར་སྐུ་ལ་གུས་ཕྱག་ཀྱང་མི་འཚལ་ལོ་ཞེས་ཞུས་པས།
DAN 3:13 ནེ་བོ་ཀད་ནེ་ཙར་ཁོང་ཁྲོ་རབ་ཏུ་འབར་ནས། ཤད་རག་དང་མེ་ཤག ཨ་བེད་ནེ་གོ་བཅས་གསུམ་པོ་འཁྲིད་འོང་བའི་བཀའ་ཕབ་པ་ན། ཁོ་རྣམས་རྒྱལ་པོའི་མདུན་དུ་ཁྲིད་ཡོང་ངོ་། །
DAN 3:14 ནེ་བོ་ཀད་ནེ་ཙར་གྱིས་ཁོ་རྣམས་ལ། ཀྱེ་ཤད་རག་དང་མེ་ཤག ཨ་བེད་ནེ་གོ ཁྱོད་ཅག་གིས་ངའི་ལྷ་ལ་ཞབས་ཏོག་མི་བསྒྲུབ་ཅིང་ངས་བཞེངས་པའི་གསེར་སྐུ་ལ་ཕྱག་ཀྱང་མི་འཚལ་ཞེས་པ་བདེན་ནམ།
DAN 3:15 ཅི་སྟེ་ད་ནི་ཁྱོད་ཅག་གིས་རྭ་དུང་དང་གླིང་བུ། པི་ཝང་། ཏམ་བུ་ར། གཞུ་སྦྲེང་། སྦུད་གླིང་ལ་སོགས་རོལ་མོ་སྣ་ཚོགས་ཀྱི་སྒྲ་ཐོས་པ་ཙམ་གྱིས། བདག་གིས་བཞེངས་པའི་གསེར་སྐུའི་མདུན་དུ་ལུས་སར་བཏུད་ནས་ཕྱག་འཚལ་བ་ཡིན་ན་ལེགས་ཤིང་། གལ་ཏེ་ཁྱོད་ཅག་གིས་དེར་ཕྱག་མ་བཙལ་ན་ད་ལྟ་ཉིད་དུ་མེ་ལྕེ་རབ་ཏུ་འབར་བའི་ཐབ་ལ་གཡུག་པར་འགྱུར། དེའི་དུས་ལྷ་སུ་ཞིག་གིས་ཁྱོད་ཅག་བདག་གི་དབང་ལས་བསྐྱབ་ནུས་སམ་ཞེས་སྨྲས་སོ། །
DAN 3:16 ཤད་རག་དང་མེ་ཤག ཨ་བེད་ནེ་གོ་བཅས་ཀྱིས་རྒྱལ་པོ་ནེ་བོ་ཀད་ནེ་ཙར་ལ་ལན་དུ། ཀྱེ་རྒྱལ་པོ་ནེ་བོ་ཀད་ནེ་ཙར་ལགས། ངེད་ཅག་གིས་འདིའི་སྐོར་ལ་ལན་འདེབས་དགོས་དོན་མི་འདུག
DAN 3:17 ངེད་ཅག་མེ་ཐབ་ནང་དུ་གཡུགས་པའི་དབང་དུ་བཏང་ནའང་། ངེད་ཅག་གིས་ཞབས་ཏོག་སྒྲུབ་པའི་དཀོན་མཆོག་གིས་མེ་ལྕེ་རབ་ཏུ་འབར་བའི་མེ་ཐབ་དང་ཁྱེད་ཀྱི་དབང་ལས་བསྐྱབ་ངེས་ཡིན།
DAN 3:18 ཀྱེ་རྒྱལ་པོ་ལགས། དེ་འདྲ་མིན་ནའང་ཁྱེད་ཀྱི་སྙན་དུ་སྒྲོན་དགོས་པ་ཞིག་ལ། ངེད་ཅག་གིས་ཁྱེད་ཀྱི་ལྷ་རྣམས་ལ་ཞབས་ཏོག་བསྒྲུབ་མི་སྲིད་ལ་ཉིད་ཀྱིས་བསྒྲེངས་པའི་གསེར་སྐུ་ལ་ཕྱག་ཀྱང་མི་འཚལ་བ་མཁྱེན་པར་གྱུར་ཅིག་ཅེས་ཞུས་སོ། །
DAN 3:19 སྐབས་དེར་རྒྱལ་པོ་ནེ་བོ་ཀད་ནེ་ཙར་ནི་ཤད་རག་དང་མེ་ཤག ཨ་བེད་ནེ་གོ་བཅས་ཀྱི་སྟེང་དུ་ཁོང་ཁྲོ་མེ་ལྟར་འབར་ནས་ཐ་ན་ངོ་མདངས་ཀྱང་འགྱུར་ཏེ། མེ་ཐབ་དེ་རྒྱུན་ལྡན་ལས་ལྡབ་བདུན་གྱིས་ཚ་བར་བཟོ་རུ་བཅུག་པ་དང་།
DAN 3:20 དམག་དཔུང་ལས་དམག་མི་སྟོབས་པོ་ཆེ་འགའ་ལ། ཤད་རག་དང་མེ་ཤག ཨ་བེད་ནེ་གོ་བཅས་དམ་པོར་བཀྱིགས་ནས་མེ་ལྕེ་རབ་ཏུ་འབར་བའི་མེ་ཐབ་ནང་དུ་གཡུག་པའི་བཀའ་གནང་ངོ་། །
DAN 3:21 དེ་ནས་སྐྱེས་བུ་དེ་གསུམ་པོས་ཕྱི་གོས་དང་རྐང་སྣམ། མགོ་རས། དེ་མིན་གྱོན་པ་གཞན་དག་ལུས་ལ་གྱོན་ནས་ཐག་པས་དམ་པོར་བཀྱིགས་ཏེ་མེ་ལྕེ་རབ་ཏུ་འབར་བའི་མེ་ཐབ་ནང་དུ་གཡུགས་སོ། །
DAN 3:22 དེ་ཡང་རྒྱལ་པོའི་བཀའ་དེ་ཛ་དྲག་ཆེ་བ་དང་། མེ་ཐབ་ནང་གི་མེ་འབར་བ་ཡང་ཤུགས་དྲག་པའི་རྐྱེན་གྱིས་ཤད་རག་དང་མེ་ཤག ཨ་བེད་ནེ་གོ་བཅས་མེ་ཐབ་ནང་དུ་རྫོང་མཁན་ཐམས་ཅད་མེས་ཚིག་པ་དང་།
DAN 3:23 ཤད་རག་དང་མེ་ཤག ཨ་བེད་ནེ་གོ་བཅས་སྐྱེས་བུ་གསུམ་པོ་ནི་ཐག་པས་བཀྱིགས་ནས་མེ་ལྕེ་རབ་ཏུ་འབར་བའི་མེ་ཐབ་ནང་དུ་ལྷུང་ངོ་། །
DAN 3:24 དེའི་ཚེ་རྒྱལ་པོ་ནེ་བོ་ཀད་ནེ་ཙར་ཤིན་ཏུ་ཧ་ལས་ཤིང་རྟབ་རྟབ་པོར་ཡར་ལངས་ཏེ་གྲོས་པ་དག་ལ་འདི་ལྟར། ང་ཚོས་སྐྱེས་བུ་གསུམ་བཀྱིགས་ནས་མེ་ཐབ་ཏུ་གཡུགས་པ་མ་ཡིན་ནམ་ཞེས་སྨྲས་པ་ན། དེ་ཚོས་ལན་དུ། ཀྱེ་རྒྱལ་པོ་ལགས། དེ་བཞིན་ཡིན་ནོ་ཞེས་ཞུས་སོ། །
DAN 3:25 དེར་རྒྱལ་པོ་ན་རེ། འོན་ཀྱང་ངས་སྐྱེས་བུ་བཞི་མེའི་ནང་དུ་རྒྱུ་བ་མཐོང་བྱུང་། དེ་རྣམས་བཀྱིགས་མེད་ལ་རྨས་སྐྱོན་ཡང་བྱུང་མེད་པར་མ་ཟད། སྐྱེས་བུ་བཞི་པ་དེའི་བྱད་བཞིན་ནི་ལྷ་སྲས་ཤིག་དང་འདྲ་བོ་འདུག་ཅེས་སྨྲས་སོ། །
DAN 3:26 དེ་ནས་ནེ་བོ་ཀད་ནེ་ཙར་ནི་མེ་ལྕེ་རབ་དུ་འབར་བའི་མེ་ཐབ་ཁར་བཅར་ཏེ། ཀྱེ་བླ་ན་མེད་པའི་དཀོན་མཆོག་གི་ཞབས་ཕྱི་ཤད་རག་དང་མེ་ཤག ཨ་བེད་ནེ་གོ་ཁྱེད་རྣམས་ཕྱི་རུ་ཐོན་ཤོག འདི་རུ་ཕེབས་དང་ཞེས་སྐད་བརྒྱབ་པ་ན། ཤད་རག་དང་མེ་ཤག ཨ་བེད་ནེ་གོ་བཅས་པ་མེའི་ཁྲོད་ནས་ཕྱི་རུ་ཐོན་ནོ། །
DAN 3:27 དེ་ནས་སྤྱི་དཔོན་དང་བཀའ་བློན། བློན་པོ། རྒྱལ་པོའི་གྲོས་པ་བཅས་མཉམ་དུ་འདུས་ཏེ་སྐྱེས་བུ་དེ་གསུམ་པོར་རུབ་ནས་བལྟས་པ་ལ། མེ་ཡིས་ཁོ་ཚོའི་ལུས་སྟེང་དུ་སྐྱོན་ཅི་ཡང་བཟོ་མ་ཐུབ་པར་མ་ཟད། མགོའི་སྐྲ་ཉག་གཅིག་ཀྱང་ཚིག་མེད་པ་དང་གྱོན་གོས་དག་ཀྱང་བསྲེགས་མེད་ལ། ཐ་ན་ཁོ་ཚོའི་ལུས་སྟེང་ལ་དུ་བའི་དྲི་མ་ཙམ་ཡང་མི་བྲོ་བ་རེད།
DAN 3:28 དེ་ནས་ནེ་བོ་ཀད་ནེ་ཙར་ན་རེ། ཤད་རག་དང་མེ་ཤག ཨ་བེད་ནེ་གོ་བཅས་ཀྱི་དཀོན་མཆོག་ནི་བསྟོད་ཅིང་བསྔགས་པར་འོས་ཏེ། ཁོང་གིས་ཕོ་ཉ་མངགས་ནས་ཁོང་ལ་བརྟེན་པའི་ཞབས་ཕྱི་རྣམས་བསྐྱབས་པ་རེད། ཁོ་ཚོས་རྒྱལ་པོའི་བཀའ་དང་འགལ་ནས་རང་སྲོག་འབེན་ལ་འཇོག་དགོས་བྱུང་ནའང་། རང་ཉིད་ཀྱི་དཀོན་མཆོག་མ་གཏོགས་ལྷ་གཞན་གང་ལ་ཡང་ཞབས་ཏོག་མི་བསྒྲུབ་ལ་ཕྱག་ཀྱང་མི་འཚལ་ལོ། །
DAN 3:29 དེ་བས་ན་བདག་གིས་བསྒོས་པའི་བཀའ་རྒྱ་ནི། རྒྱལ་ཁམས་ཁག་དང་མི་རིགས་སོ་སོ། སྐད་རིགས་སོ་སོའི་མི་ཐམས་ཅད་ཀྱིས་ཤད་རག་དང་མེ་ཤག ཨ་བེད་ནེ་གོ་བཅས་ཀྱི་དཀོན་མཆོག་ལ་སྐུར་བ་བཏབ་མི་ཆོག་ལ། གལ་ཏེ་སུ་ཞིག་གིས་སྐུར་བ་བཏབ་ན་དེ་ནི་དུམ་བུ་དུམ་བུར་གཏུབ་ཅིང་ཁང་པ་རྣམས་ཞིག་རོར་ལུས་པར་འགྱུར། གང་ལ་ཞེ་ན། འདི་ལྟར་བསྐྱབ་ནུས་པའི་དཀོན་མཆོག་གཞན་ཞིག་གཏན་ནས་ཡོད་མ་ཡིན་ཞེས་སྨྲས་སོ། །
DAN 3:30 དེ་ནས་ནེ་བོ་ཀད་ནེ་ཙར་གྱིས་ཤད་རག་དང་མེ་ཤག ཨ་བེད་ནེ་གོ་བཅས་ལ་པཱ་པེལ་ལོན་མངའ་སྡེ་ནས་གོ་གནས་མཐོན་པོ་སྤྲད་དོ། །
DAN 4:1 རྒྱལ་པོ་ནེ་བོ་ཀད་ནེ་ཙར་གྱིས་ས་སྟེང་གི་རྒྱལ་ཁམས་ཁག་དང་མི་རིགས་སོ་སོ། སྐད་རིགས་སྣ་ཚོགས་སྨྲ་མཁན་གྱི་མི་རྣམས་ལ་འདི་ལྟར་ཁྱབ་བསྒྲགས་བྱས་པ་སྟེ། ཁྱོད་རྣམས་ཞི་བདེའི་ངང་དར་ཞིང་རྒྱས་པར་ཤོག
DAN 4:2 ངས་ཁྱོད་ཅག་ལ་བླ་མེད་དཀོན་མཆོག་ཁོང་གིས་ང་ཡི་དོན་དུ་གྲུབ་རྟགས་དང་འཕྲིན་ལས་ངོ་མཚར་ཅན་ཅི་ཞིག་མཛད་པ་བརྗོད་འདོད་པ་ཡིན།
DAN 4:3 ཁོང་གི་གྲུབ་རྟགས་ཅི་འདྲའི་རླབས་ཆེ་ཨང་། ། ངོ་མཚར་འཕྲིན་ལས་ཅི་འདྲའི་མཐུ་སྟོབས་ལྡན། ། ཁོང་གི་རྒྱལ་སྲིད་ནམ་ཡང་བརྟན་ཞིང་བརླིང་། ། ཁོང་གིས་མི་རབས་ཀུན་ལ་རྒྱལ་སྲིད་སྐྱོང་། །
DAN 4:4 ནེ་བོ་ཀད་ནེ་ཙར་བདག་ནི་རང་ཁྱིམ་ནས་སྐྱིད་པོར་བསྡད་དེ་ཕོ་བྲང་ནང་དུ་ཅི་དགར་ལོངས་སྤྱོད་ཆེན་པོར་རོལ་སྐབས།
DAN 4:5 བདག་གིས་རྨི་ལམ་ཞིག་རྨིས་ཤིང་དེས་བདག་ལ་འཇིགས་སྐྲག་བསླངས་པ་དང་། བདག་མལ་ཁྲིར་ཡོད་དུས་ཀྱི་འཆར་སྣང་དང་ཡིད་ལ་འཁོར་བའི་ཞལ་གཟིགས་ཀྱིས་ང་ལ་ཞེད་སྣང་ཆེན་པོ་བསྐུལ་བས།
DAN 4:6 བདག་གིས་པཱ་པེལ་ལོན་གྱི་མཁས་མཛངས་ལྡན་པ་ཐམས་ཅད་མདུན་དུ་བོས་ཏེ་རྨི་ལམ་དེའི་དོན་གསལ་པོར་སྨྲ་དགོས་པའི་བཀའ་ཕབ་པ་ཡིན།
DAN 4:7 དེ་བས་མོ་པ་དང་སྒྱུ་མ་མཁན། ཀལ་དི་པ། རྩིས་པ་བཅས་འཛོམས་པ་དང་། ངས་དེ་རྣམས་ལ་བདག་གི་རྨི་ལམ་བརྗོད་ནའང་། ཁོ་རྣམས་ཀྱིས་བདག་གི་རྨི་ལམ་དེར་འགྲེལ་བཤད་རྒྱག་མ་ནུས།
DAN 4:8 མཐར་བདག་གིས་བརྟེན་པའི་ལྷ་ཡི་མིང་བཞིན་དུ་པེལ་ཏེ་ཤཱ་ཙར་ཞེས་ཀྱང་འབོད་པ་དང་། ལྷ་དམ་པ་རྣམས་ཀྱི་ཐུགས་ཉིད་མངའ་བའི་དཱ་ནེ་ཨེལ་བདག་གི་མདུན་དུ་འོངས་ཤིང་ངས་ཁོ་ལ་རང་གི་རྨི་ལམ་སྨྲས་པ་སྟེ།
DAN 4:9 ཀྱེ་པེལ་ཏེ་ཤཱ་ཙར། ཁྱེད་ནི་མོ་པ་རྣམས་ཀྱི་འགོ་དཔོན་ཡིན་ཏེ། ཁྱེད་ཀྱི་ནང་དུ་ལྷ་དམ་པ་རྣམས་ཀྱི་ཐུགས་ཉིད་བཞུགས་པས་ན་གསང་བའི་དོན་གང་གིས་ཀྱང་མགོ་མི་རྨོངས་པ་བདག་གིས་ཤེས། དེའི་ཕྱིར་བདག་གིས་རྨི་ལམ་དུ་མཐོང་བའི་ཞལ་གཟིགས་དང་རྨི་ལམ་གྱི་དོན་ང་ལ་སྨྲ་བར་མཛོད།
DAN 4:10 བདག་མལ་ཁྲིར་ཡོད་དུས་ཡིད་ལ་ཤར་བའི་ཞལ་གཟིགས་ནི་འདི་ལྟ་སྟེ། བདག་གིས་ས་གཞི་ཆེན་པོའི་དཀྱིལ་ལ་ཤིན་ཏུ་མཐོ་བའི་ལྗོན་ཤིང་ཞིག་ཡོད་པ་མཐོང་བྱུང་ལ།
DAN 4:11 ལྗོན་ཤིང་དེ་ཆེར་སྐྱེས་ནས་གསོན་ཤུགས་ལྡན་པ་དང་། རྩེ་མོ་ནམ་མཁར་ཟུག་ཅིང་ས་མཐའི་མི་ཐམས་ཅད་ཀྱིས་དེ་གསལ་པོར་མཐོང་ཐུབ་པ་ཞིག་འདུག
DAN 4:12 དེའི་ལོ་འདབ་རྣམས་མཛེས་ཤིང་ལྟ་ན་སྡུག་པ་དང་ཤིང་ཏོག་གིས་གང་ཞིང་། སྲོག་ལྡན་ཐམས་ཅད་ཀྱིས་དེ་ལས་ཁ་ཟས་ལོངས་སུ་སྤྱོད་ཀྱིན་འདུག ཐང་གི་རི་དྭགས་རྣམས་དེའི་བསིལ་གྲིབ་འོག་ཏུ་གནས་ཤིང་། ནམ་མཁའི་བྱ་རྣམས་ཀྱིས་དེའི་ཡལ་གའི་སྟེང་དུ་ཚང་བཟོས་ནས། སྲོག་ལྡན་ཀུན་གྱིས་ལྗོན་ཤིང་དེ་ལ་བརྟེན་ནས་འཚོ་བ་རོལ་ཏོ། །
DAN 4:13 མལ་ཁྲིར་ཡོད་དུས་བདག་གི་ཡིད་ལ་ཤར་བའི་ཞལ་གཟིགས་རྣམས་ལས། སོ་ལྟ་བྱེད་མཁན་ཕོ་ཉ་དམ་པ་ཞིག་ནམ་མཁའི་ཞིང་ཁམས་ནས་ཐད་ཀར་མི་ཡུལ་དུ་ཕེབས་བྱུང་།
DAN 4:14 ཕོ་ཉ་དེས་སྐད་གསང་མཐོན་པོས་འདི་སྐད་དུ། ཁྱོད་ཅག་གིས་ལྗོན་ཤིང་དེ་གཅོད་པར་གྱིས། ཡལ་ག་རྣམས་གཞོགས་ལ་ལོ་མ་རྣམས་སྤྲུགས་ཤིག ཤིང་ཏོག་རྣམས་ཀྱང་གཏོར་བར་གྱིས། ལྗོན་ཤིང་དེའི་འོག་ཏུ་གནས་པའི་རི་དྭགས་རྣམས་གང་སར་གཏོར་ཅིག ཡལ་གའི་སྟེང་དུ་གནས་པའི་བྱ་ཐམས་ཅད་ཕྱོགས་བཞིར་འཕུར་དུ་ཆུག
DAN 4:15 འོན་ཀྱང་ལྗོན་ཤིང་གི་ཤིང་རྡུམ་དང་རྩད་པ་ནི་ལི་དང་ལྕགས་ཀྱི་ཐག་པས་བསྡམས་ནས་ཐང་གི་རྩྭ་སྔོན་ནང་དུ་བསྐྱུར་ལ་ནམ་མཁའི་ཟིལ་པར་ཁོ་རང་སྦང་དུ་ཆུག ཁོ་རང་རྩྭ་ཟན་རྣམས་དང་ལྷན་ཅིག་རྩྭ་གསེང་དུ་གཞིས་ཆགས་པར་གྱིས་ཤིག
DAN 4:16 ཁོའི་སེམས་ལ་འགྱུར་བ་ཐེབས་སུ་བཅུག་ནས། མི་ལོ་བདུན་ འདའ་བའི་བར་དུ་ཁོ་ལ་མི་ཡི་སེམས་ནི་མི་ལྡན་ཞིང་དུད་འགྲོའི་སེམས་དང་ལྡན་པར་གྱིས།
DAN 4:17 འདི་ནི་སོ་ལྟ་བྱེད་མཁན་ཕོ་ཉ་དམ་པ་རྣམས་ཀྱིས་བསྒྲགས་པའི་བཀའ་རྒྱ་ཡིན་ལ། བླ་ན་མེད་པ་ཁོང་གིས་མི་ཡུལ་གྱི་རྒྱལ་སྲིད་ཀུན་ལ་དབང་སྒྱུར་ཞིང་། སུ་ཞིག་ལ་རྒྱལ་སྲིད་གནང་འདོད་ན་དེ་ལ་གནང་བ་དང་། ཐ་ན་ཆེས་ཉམས་ཞན་ཡིན་པ་དེར་སྲིད་དབང་ཡང་གནང་བ་ཡིན་ཞེས་གསུངས་སོ། །
DAN 4:18 འདི་ནི་རྒྱལ་པོ་ནེ་བོ་ཀད་ནེ་ཙར་བདག་གིས་རྨིས་པའི་རྨི་ལམ་ཡིན་པས། ད་ནི་པེལ་ཏེ་ཤཱ་ཙར་ཁྱེད་ཀྱིས་དེའི་དོན་བདག་ལ་སྨྲ་བར་མཛོད། གང་ལ་ཞེ་ན། བདག་གི་རྒྱལ་སྲིད་ནང་གི་མཁས་མཛངས་རྣམས་ཀྱིས་དེའི་དོན་བདག་ལ་གསལ་པོར་བཤད་མི་ཐུབ་བོ། །ཁྱེད་ཀྱི་ནང་དུ་ལྷ་དམ་པ་རྣམས་ཀྱི་ཐུགས་ཉིད་བཞུགས་པས་དེ་ལ་འགྲེལ་བཤད་རྒྱག་པའི་ནུས་པ་ཡོད་ཅེས་པའོ། །
DAN 4:19 དེ་ནས་མིང་ལ་པེལ་ཏེ་ཤཱ་ཙར་ཞེས་ཀྱང་འབོད་པའི་དཱ་ནེ་ཨེལ་ནི་ཡུད་ཙམ་ལ་ཧ་ལས་པར་གྱུར་ཅིང་། རང་གི་དྲན་ཚུལ་གྱིས་རང་ལ་འཇིགས་སྣང་བསྐུལ་བ་ཙམ་ལ། རྒྱལ་པོས་དེ་ལ། ཀྱེ་པེལ་ཏེ་ཤཱ་ཙར། རྨི་ལམ་དང་དེའི་དོན་གྱིས་འཇིགས་པར་མ་གྱུར་ཅིག་ཅེས་སྨྲས་པ་ན། པེལ་ཏེ་ཤཱ་ཙར་གྱིས་ལན་དུ། ངའི་ཇོ་བོ་ལགས། རྨི་ལམ་ནི་ཁྱེད་ཉིད་འཁོན་དུ་འཛིན་མཁན་རྣམས་དང་དེའི་དོན་ནི་ཁྱེད་ཀྱི་བསྟན་དགྲ་རྣམས་ཀྱི་སྐོར་ཡིན་ན་ཅི་མ་རུང་།
DAN 4:20 ཁྱེད་ཀྱིས་མཐོང་བའི་ལྗོན་ཤིང་དེ་ཆེར་སྐྱེས་ནས་གསོན་ཤུགས་ལྡན་པ་དང་། རྩེ་མོ་ནམ་མཁར་ཟུག་ཅིང་ས་མཐའི་མི་ཐམས་ཅད་ཀྱིས་དེ་གསལ་པོར་མཐོང་ཐུབ་པ་ཡིན།
DAN 4:21 དེའི་ལོ་འདབ་རྣམས་མཛེས་ཤིང་ལྟ་ན་སྡུག་པ་དང་ཤིང་ཏོག་གིས་གང་ཞིང་། སྲོག་ལྡན་ཐམས་ཅད་ཀྱིས་དེ་ལས་ཁ་ཟས་ལོངས་སུ་སྤྱོད་དོ། །ས་སྟེང་གི་དུད་འགྲོ་རྣམས་དེའི་བསིལ་གྲིབ་འོག་ཏུ་གནས་ཤིང་། ནམ་མཁའི་བྱ་རྣམས་ཀྱིས་དེའི་ཡལ་གའི་སྟེང་དུ་ཚང་བཟོས་པའོ། །
DAN 4:22 ཀྱེ་ཧུད་རྒྱལ་པོ། ལྗོན་ཤིང་དེ་ནི་ཁྱེད་རང་ཡིན་ཏེ། ཁྱེད་ནི་རླབས་ཆེ་ཞིང་སྟོབས་ཅན་དུ་གྱུར་ནས་ཁྱེད་ཀྱི་ཟིལ་ཤུགས་ནམ་མཁར་ཟུག་པ་དང་། ཁྱེད་ཀྱི་དབང་ཐང་ས་མཐའི་བར་དུ་སླེབས་པའོ། །
DAN 4:23 རྒྱལ་པོ་ཁྱེད་ཀྱིས་ནམ་མཁའི་ཞིང་ཁམས་ནས་སོ་ལྟ་བྱེད་མཁན་ཕོ་ཉ་དམ་པ་ཞིག་མར་ཕེབས་ཏེ་འདི་སྐད་དུ། ཁྱོད་ཅག་གིས་ལྗོན་ཤིང་དེ་བཅད་ནས་བརླག་པར་གྱིས། འོན་ཀྱང་ལྗོན་ཤིང་གི་ཤིང་རྡུམ་དང་རྩད་པ་ནི་ལི་དང་ལྕགས་ཀྱི་ཐག་པས་བསྡམས་ནས་ཐང་གི་རྩྭ་སྔོན་ནང་དུ་བསྐྱུར་ལ་ནམ་མཁའི་ཟིལ་པར་ཁོ་རང་སྦང་བར་ཆུག མི་ལོ་བདུན་འདའ་བའི་བར་དུ་ཁོ་རང་རྩྭ་ཟན་རྣམས་དང་འདྲ་བར་བསྐྱུར་ཞོག་ཅེས་སྨྲ་བ་མཐོང་ངོ་། །
DAN 4:24 ཀྱེ་རྒྱལ་པོ་ལགས། རྨི་ལམ་གྱི་དོན་ནི་འདི་ལྟ་སྟེ། འདི་ནི་བླ་ན་མེད་པའི་དཀོན་མཆོག་གིས་ངའི་ཇོ་བོ་དང་ངའི་རྒྱལ་པོ་ཁྱེད་ལ་གནང་བའི་བཀའ་རྒྱ་ཡིན།
DAN 4:25 ཁྱེད་ནི་ཕར་བསྐྲད་ནས་མི་ཚོགས་དང་འབྲལ་དགོས་ལ། ས་སྟེང་གི་རྩྭ་ཟན་གྱི་རིགས་དང་ལྷན་དུ་གནས་དགོས་པ་དང་། ཁྱེད་ཀྱིས་བ་གླང་ལྟར་རྩྭ་བཟའ་ཞིང་། གནམ་གྱི་ཟིལ་པས་ཁྱེད་རང་སྦང་བར་འགྱུར་བའོ། །ཡང་བླ་ན་མེད་པ་ཁོང་གིས་མི་ཡུལ་གྱི་རྒྱལ་སྲིད་ཀུན་ལ་དབང་སྒྱུར་བ་དང་། སུ་ཞིག་ལ་རྒྱལ་སྲིད་གནང་འདོད་ན་དེ་ལ་གནང་བ་ཁྱེད་ཀྱིས་རྟོགས་པའི་བར་དུ་མི་ལོ་བདུན་འདའ་བར་འགྱུར།
DAN 4:26 ལྗོན་ཤིང་གི་ཤིང་རྡུམ་དང་རྩད་པ་སྐྱུར་ཅིག་ཅེས་བཀའ་བསྩལ་པ་བཞིན་དུ། ཁྱེད་ཀྱིས་ནམ་མཁའི་ཞིང་ཁམས་ཀྱི་བླ་ན་མེད་པ་ཁོང་གིས་དབང་སྒྱུར་བ་རྟོགས་པའི་དུས་སུ། ཁྱེད་རང་གི་རྒྱལ་སྲིད་ཀྱང་ཕྱིར་ཁྱེད་ལ་དབང་བར་འགྱུར་རོ། །
DAN 4:27 དེའི་ཕྱིར། ཀྱེ་རྒྱལ་པོ་ལགས། བདག་གི་ཁ་ཏ་འདི་དང་དུ་ལེན་པར་མཛོད། དྲང་བདེན་སྤྱད་དེ་སྡིག་པ་སྤང་བ་དང་། གཉའ་གནོན་འོག་ཏུ་ཡོད་པ་རྣམས་ལ་སྙིང་རྗེ་བསྐྱེད་ནས་ཉེས་སྐྱོན་བསལ་བར་གྱིས་དང་། ཁྱེད་ཀྱི་མཛད་དོན་རྣམས་ལྷུན་གྱིས་འགྲུབ་ངེས་ཡིན་ཞེས་སྨྲས་སོ། །
DAN 4:28 དོན་དེ་ཐམས་ཅད་རྒྱལ་པོ་ནེ་བོ་ཀད་ནེ་ཙར་གྱི་སྟེང་དུ་བྱུང་བའོ། །
DAN 4:29 དེ་ནས་ཟླ་བ་བཅུ་གཉིས་འགོར་བའི་རྗེས་ལ་རྒྱལ་པོ་པཱ་པེལ་ལོན་གྱི་ཕོ་བྲང་གི་ཀླད་དུ་འཆམ་འཆམ་འགྲོ་བའི་སྐབས་སུ།
DAN 4:30 ཁོ་ན་རེ། གནས་མཆོག་པཱ་པེལ་ལོན་འདི་ནི་བདག་གི་དབང་སྟོབས་ཆེན་པོས་བཀོད་པ་སྟེ། ང་རང་གི་རྔམ་བརྗིད་མངོན་པའི་ཕྱིར་བརྩིགས་པའི་རྒྱལ་ས་མ་ཡིན་ནམ་ཞེས་སྨྲས་པའི་མོད་ལ།
DAN 4:31 རྒྱལ་པོས་ཁ་ནས་ཚིག་མཚམས་མ་རྫོགས་པར་ནམ་མཁའ་ནས་སྒྲ་ཞིག་བྱུང་སྟེ། ཀྱེ་རྒྱལ་པོ་ནེ་བོ་ཀད་ནེ་ཙར། ཁྱོད་ལ་ཆེད་དུ་བསྒོ་བ་ནི། ཁྱོད་ཀྱི་སྲིད་དབང་ཁྱོད་ལས་བླངས་པ་ཡིན་ནོ། །
DAN 4:32 ཁྱོད་ནི་ཕར་བསྐྲད་ནས་མི་ཚོགས་དང་འབྲལ་དགོས་ལ། ས་སྟེང་གི་རྩྭ་ཟན་གྱི་རིགས་དང་ལྷན་དུ་གནས་དགོས་པ་དང་། ཁྱོད་ཀྱིས་བ་གླང་ལྟར་རྩྭ་བཟའ་བར་འགྱུར། ཡང་བླ་ན་མེད་པ་ཁོང་གིས་མི་ཡུལ་གྱི་རྒྱལ་སྲིད་ཀུན་ལ་དབང་སྒྱུར་བ་དང་། སུ་ཞིག་ལ་རྒྱལ་སྲིད་གནང་འདོད་ན་དེ་ལ་གནང་བ་ཁྱེད་ཀྱིས་རྟོགས་པའི་བར་དུ་མི་ལོ་བདུན་འདའ་བར་འགྱུར་ཞེས་གསུངས་སོ། །
DAN 4:33 དུས་དེ་ཉིད་དུ་བཀའ་དེ་རྒྱལ་པོ་ནེ་བོ་ཀད་ནེ་ཙར་གྱི་སྟེང་དུ་འགྲུབ་པ་སྟེ། ཁོ་རང་ཕར་བསྐྲད་ནས་མི་ཚོགས་དང་བྲལ་ཞིང་། བ་གླང་ལྟར་རྩྭ་ཟོས་པ་དང་། གནམ་གྱི་ཟིལ་པས་ལུས་པོ་སྦངས། སྐྲ་རིང་པོར་སྐྱེས་ནས་གླག་གི་སྒྲོ་ལྟར་གྱུར་ཅིང་། སེན་མོ་རྣམས་འདབ་ཆགས་བྱ་ཡི་སྡེར་མོ་བཞིན་གྱུར་ཏོ། །
DAN 4:34 དེ་ནས་ལོ་བདུན་ལོངས་པ་ན། ནེ་བོ་ཀད་ནེ་ཙར་བདག་གིས་ནམ་མཁའི་ཞིང་ཁམས་སུ་ཡར་བལྟས་པ་དང་། བདག་གི་བློ་རིག་སྔར་བཞིན་གསལ་པོར་གྱུར་ནས་བླ་ན་མེད་པ་ཁོང་ཉིད་ལ་བསྟོད་བསྔགས་བརྗོད་ཅིང་། གཏན་དུ་བཞུགས་པ་ཉིད་ལ་གུས་འདུད་དང་གཟི་བརྗིད་ཕུལ་བ་ནི་འདི་ལྟ་སྟེ། ཁོང་གིས་རྒྱུན་ནས་རྒྱུན་དུ་རྒྱལ་སྲིད་སྐྱོང་། ། ཁོང་གི་རྒྱལ་སྲིད་མི་རབས་ཀུན་ཏུ་གནས། །
DAN 4:35 འཇིག་རྟེན་ཁམས་ཀྱི་མི་སྡེ་ཡོད་དོ་ཅོག ། ཁོང་གི་སྤྱན་སྔར་ཅི་ཡང་མ་ཡིན་ནོ། ། ནམ་མཁའི་དཔུང་ཚོགས་ཡོངས་ཀྱི་དཀྱིལ་དབུས་སུ། ། ཁོང་ནི་ཅི་ལ་དགྱེས་པ་དེ་བཞིན་བྱེད། ། ས་གཞིའི་མི་རྣམས་ཁྲོད་དུའང་དེ་བཞིན་ཡིན། ། སུས་ཀྱང་ཁོང་ལ་བཀག་འགོག་བྱེད་མི་ནུས། ། ཅི་དང་གང་ཞེས་འདྲི་བའི་སྤོབས་པའང་མེད། །
DAN 4:36 བདག་གི་བློ་རིག་སྔར་བཞིན་གསལ་པོར་གྱུར་པའི་དུས་དེ་ཉིད་ལ། ང་ཡི་རྒྱལ་སྲིད་ཀྱི་གཟི་བརྗིད་ཀྱི་ཆེད་དུ་བདག་གི་རྔམ་བརྗིད་དང་ཟིལ་ཤུགས་ཀྱང་སོར་ཆུད་བྱུང་ཞིང་། ངའི་གྲོས་པ་རྣམས་དང་སྐུ་དྲག་རྣམས་ཀྱིས་བདག་བཙལ་ནས་ཡང་བསྐྱར་རྒྱལ་ཁྲིར་བཀོད་པ་དང་། བདག་གི་དབང་ཐང་སྔར་ལས་དར་བར་གྱུར་ཏོ། །
DAN 4:37 ད་ནི་ནེ་བོ་ཀད་ནེ་ཙར་བདག་གིས་ནམ་མཁའི་ཞིང་ཁམས་སུ་བཞུགས་པའི་རྒྱལ་པོ་ཁོང་ལ་བསྟོད་བསྔགས་དང་གུས་འདུད། གཟི་བརྗིད་བཅས་དུས་གཅིག་ཏུ་འབུལ་ལོ། །གང་ལ་ཞེ་ན། ཁོང་གི་མཛད་པ་ཐམས་ཅད་ཡང་དག་པ་ཡིན་ཞིང་། གཤེགས་ལམ་ཐམས་ཅད་དྲང་བདེན་ཡིན་ནོ། །ང་རྒྱལ་དང་བཅས་སྤྱད་པ་སྤྱོད་པ་རྣམས་ཁོང་གིས་དམའ་བར་མཛད་ནུས་སོ་ཞེས་པའོ། །
DAN 5:1 རྒྱལ་པོ་པེལ་ཤཱ་ཙར་གྱིས་རང་ཉིད་ཀྱི་བློན་ཆེན་ཆིག་སྟོང་ལ་གསོལ་སྟོན་གཟབ་རྒྱས་བཤམས་པ་དང་ཁོས་དེ་ཚོའི་མདུན་ནས་རྒུན་ཆང་འཐུངས་པའོ། །
DAN 5:2 ཁོས་རྒུན་ཆང་ཅི་དགར་འཐུངས་ནས། ཕ་ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་གྱི་མཆོད་ཁང་ནས་བཙན་འཕྲོག་བྱས་པའི་གསེར་དང་དངུལ་གྱི་སྣོད་ཆས་རྣམས་འཁྱེར་འོང་བའི་བཀའ་བསྩལ་པ་སྟེ། གང་ལ་ཞེ་ན། རྒྱལ་པོ་རང་ཉིད་དང་བློན་ཆེན་རྣམས་དང་། བཙུན་མོ་རྣམས་དང་ཆུན་མ་བཅས་ཀྱིས་སྣོད་ཆས་དེ་དག་གིས་རྒུན་ཆང་བཏུང་བའི་ཕྱིར་རོ། །
DAN 5:3 དེ་ནས་ཁོ་རྣམས་ཀྱིས་ཡེ་རུ་སཱ་ལེམ་དུ་ཡོད་པའི་མཆོད་ཁང་སྟེ། དཀོན་མཆོག་གི་བཞུགས་གནས་ལས་བཙན་འཕྲོག་བྱས་པའི་གསེར་དང་དངུལ་གྱི་སྣོད་ཆས་རྣམས་ཁྱེར་འོངས་ནས་རྒྱལ་པོ་ཪང་ཉིད་དང་བློན་ཆེན་རྣམས། བཙུན་མོ་རྣམས། ཆུན་མ་བཅས་ཀྱིས་སྣོད་ཆས་དེ་དག་ལས་རྒུན་ཆང་འཐུངས།
DAN 5:4 ཁོ་ཚོས་རྒུན་ཆང་འཐུང་བཞིན་གསེར་དང་དངུལ། ལྕགས། ལི། ཤིང་། རྡོ་སོགས་ལས་བཟོས་པའི་ལྷ་རྣམས་ལ་བསྟོད་བསྔགས་བརྗོད་དོ། །
DAN 5:5 སྐབས་དེ་ཉིད་དུ་མི་ཡི་ལག་མཛུབ་དག་མངོན་པར་བྱུང་ནས་སྒྲོན་སྟེགས་མདུན་གྱི་ཕོ་བྲང་གི་མཁར་ངོས་སུ་ཡི་གེ་འགའ་འཁྱུག་བྲིས་བྱས་ཤིང་། རྒྱལ་པོས་ཡི་གེ་འབྲི་བའི་མཛུབ་མོ་མངོན་སུམ་དུ་མཐོང་བ་ལ།
DAN 5:6 རྒྱལ་པོའི་ངོ་མདངས་སྐྱ་བོར་གྱུར་ནས་ཞེད་སྣང་ཆེན་པོ་སྐྱེས་པ་དང་། རྐེད་ཚིགས་བུད་ཅིང་། པུས་མོ་འདར་ལྕུག་ལྕུག་བྱས་པ་རེད།
DAN 5:7 དེ་ནས་རྒྱལ་པོས་སྐད་ཆེན་པོ་བརྒྱབ་ནས་སྒྱུ་མ་མཁན་དང་ཀལ་དི་པ། དེ་མིན་རྩིས་པ་བཅས་འཁྲིད་འོང་བའི་བཀའ་བསྒོས་ཤིང་། པཱ་པེལ་ལོན་གྱི་མཁས་མཛངས་ལྡན་པ་རྣམས་ལ་བསྒྲགས་དོན། སུ་ཞིག་གིས་ཡི་གེ་འདི་རྣམས་ཀློག་ཤེས་པར་མ་ཟད་དེའི་དོན་འགྲེལ་ནུས་པ་ཡིན་ན། དེའི་ལུས་ལ་གོས་རྒྱ་སྨུག་བསྐོན་པ་དང་སྐེ་ལ་གསེར་གྱི་མགུལ་རྒྱན་བཏེགས་ནས་རྒྱལ་སྲིད་ཀྱི་གོ་གནས་ཨང་གསུམ་པ་འཐོབ་ངེས་ཡིན་ཞེས་སྨྲས་པ་ལ།
DAN 5:8 མཁས་མཛངས་ལྡན་པ་ཐམས་ཅད་དེ་རུ་སླེབས་ན་ཡང་། ཁོ་རྣམས་ལས་མཁར་ངོས་ཀྱི་ཡི་གེ་ཀློག་ཐུབ་མཁན་ཞིག་མ་ཐོན་ལ། དེའི་དོན་རྒྱལ་པོར་འགྲེལ་བཤད་རྒྱག་ནུས་མཁན་ཞིག་ཀྱང་མ་བྱུང་ངོ་། །
DAN 5:9 དེ་བས་རྒྱལ་པོ་པེལ་ཤཱ་ཙར་དངངས་སྐྲག་ཆེན་པོ་སྐྱེས་ནས་ངོ་མདངས་དེ་ལས་སྐྱ་བོར་གྱུར་པ་དང་། ཁོའི་བློན་ཆེན་རྣམས་ཀྱང་ཅི་བྱ་གཏོལ་མེད་དུ་གྱུར་ཏོ། །
DAN 5:10 དེ་ཡང་རྒྱལ་ཡུམ་གྱིས་རྒྱལ་པོ་དང་བློན་ཆེན་རྣམས་ཀྱིས་གླེང་མོལ་བྱེད་པའི་གཏམ་ཐོས་ནས་གསོལ་སྟོན་ཁང་དུ་འོངས་ཏེ་རྒྱལ་པོར་ན་རེ། ཀྱེ་རྒྱལ་པོ་ལགས། ཁྱེད་ཉིད་སྐུ་ཚེ་ཡུན་རིང་བརྟན་པར་ཤོག ཁྱེད་རང་སེམས་མ་སྔངས་ཤིག ཞལ་མདངས་ཀྱང་མི་ལོག་པར་གྱིས།
DAN 5:11 ཁྱེད་ཀྱི་རྒྱལ་སྲིད་ནང་དུ་ལྷ་དམ་པ་རྣམས་ཀྱི་ཐུགས་ཉིད་བཞུགས་པའི་སྐྱེས་བུ་ཞིག་འདུག ཁྱེད་ཀྱི་ཕ་ཡི་སྐུ་རིང་ལ་མི་འདི་ནི་ལྷ་རྣམས་དང་འདྲ་བར་རྣམ་དཔྱོད་དང་རིག་སྟོབས། ཤེས་རབ་བཅས་ལྡན་པའོ། །ཁྱེད་ཀྱི་ཕ་སྟེ་རྒྱལ་པོ་ནེ་བོ་ཀད་ནེ་ཙར་གྱིས་སྐྱེས་བུ་དེ་ནི་མོ་པ་དང་སྒྱུ་མ་མཁན། ཀལ་དི་པ། རྩིས་པ་བཅས་ཀྱི་འགོ་དཔོན་དུ་བསྐོས་པ་ཡིན།
DAN 5:12 རྒྱལ་པོས་པེལ་ཏེ་ཤཱ་ཙར་ཞེས་མིང་བཏགས་པའི་སྐྱེས་བུ་དཱ་ནེ་ཨེལ་འདི་ནི་ཁྱད་དུ་འཕགས་ཤིང་ཤེས་རྒྱ་ཆེ་ལ། གོ་རྟོགས་ལྡན་པར་མ་ཟད། རྨི་ལམ་ལ་བརྟག་ཤེས་པ་དང་གབ་ཚིག་འགྲེལ་ནུས་པ། དཀའ་གནད་བསལ་ཐུབ་པ་ཞིག་ཡིན་པས། དཱ་ནེ་ཨེལ་བོས་ཤོག་དང་ཁོས་མཁར་ངོས་ཀྱི་ཡི་གེའི་ནང་དོན་ལ་འགྲེལ་བཤད་རྒྱག་ཐུབ་ངེས་རེད་ཅེས་བསྐུལ་ཏོ། །
DAN 5:13 དེ་ནས་དཱ་ནེ་ཨེལ་རྒྱལ་པོའི་དྲུང་དུ་བོས་པ་དང་། རྒྱལ་པོས་ཁོ་ལ་འདི་ལྟར། ངའི་ཕ་སྟེ་རྒྱལ་པོ་དམ་པས་ཡ་ཧུ་དཱ་ནས་བཟུང་པའི་བཙོན་མ་རྣམས་ཀྱི་ཁྲོད་དུ་དཱ་ནེ་ཨེལ་ཞེས་པ་ཞིག་ཡོད་པ་ཁྱེད་རང་ཡིན་ནམ།
DAN 5:14 ཁྱེད་ཀྱི་ནང་དུ་ལྷའི་ཐུགས་ཉིད་བཞུགས་ཤིང་། ཁྱེད་ལ་རྣམ་དཔྱོད་དང་རིག་སྟོབས། ཤེས་རབ་ཁྱད་པར་ཅན་བཅས་ལྡན་པ་ཡིན་ཞེས་གྲགས་པ་བདག་གིས་ཐོས།
DAN 5:15 མཁས་མཛངས་ལྡན་པ་དང་སྒྱུ་མ་མཁན་ཐམས་ཅད་བདག་གི་མདུན་དུ་བོས་ནས་མཁར་ངོས་སུ་བྲིས་ཡོད་པའི་ཡི་གེ་བཀླགས་ཏེ་ང་ལ་འགྲེལ་བཤད་རྒྱག་ཏུ་བཅུག་ནའང་། དེ་དག་གིས་ཡི་གེ་དེའི་ནང་དོན་ལ་འགྲེལ་བཤད་རྒྱག་མ་ནུས།
DAN 5:16 གོ་ཐོས་ལྟར་ན་ཁྱེད་ཀྱིས་འགྲེལ་བཤད་རྒྱག་ནུས་པ་དང་དཀའ་གནད་བསལ་ཐུབ་པ་ཡིན་ཟེར། ད་ལྟ་ཁྱེད་ཀྱིས་མཁར་ངོས་སུ་བྲིས་ཡོད་པའི་ཡི་གེ་བཀླགས་ནས་དེའི་ནང་དོན་ཅི་ཡིན་པ་བདག་ལ་འགྲེལ་བཤད་རྒྱག་ནུས་པ་ཡིན་ན། ཁྱེད་ཀྱི་ལུས་ལ་གོས་རྒྱ་སྨུག་བསྐོན་པ་དང་སྐེ་ལ་གསེར་གྱི་མགུལ་རྒྱན་བཏེགས་ནས་རྒྱལ་སྲིད་ཀྱི་གོ་གནས་ཨང་གསུམ་པ་འཐོབ་ངེས་ཡིན་ཞེས་སྨྲས་སོ། །
DAN 5:17 དེ་ནས་དཱ་ནེ་ཨེལ་གྱིས་རྒྱལ་པོར་ལན་དུ། རྔན་པ་རྣམས་ཁྱེད་རང་གི་བྱོས་དང་། བྱ་དགའ་རྣམས་མི་གཞན་པར་སྦྱིན་ཞིག འོན་ཀྱང་མཁར་ངོས་སུ་བྲིས་ཡོད་པའི་ཡི་གེ་དེ་ངས་རྒྱལ་པོ་ཁྱེད་ལ་བཀླགས་ནས་དེའི་ནང་དོན་ལའང་འགྲེལ་བཤད་རྒྱག་པར་བྱའོ། །
DAN 5:18 ཀྱེ་རྒྱལ་པོ་ལགས། བླ་ན་མེད་པའི་དཀོན་མཆོག་ཁོང་གིས་ཁྱེད་ཀྱི་ཕ་ནེ་བོ་ཀད་ནེ་ཙར་ལ་རྒྱལ་སྲིད་དང་དབང་ཤུགས། གཟི་དཔལ། རྔམ་བརྗིད་བཅས་གནང་བ་དང་།
DAN 5:19 དཀོན་མཆོག་གིས་གནང་བའི་དབང་ཤུགས་ཀྱི་རྐྱེན་གྱིས་རྒྱལ་ཁམས་ཁག་དང་མི་རིགས་སོ་སོ། སྐད་རིགས་སྣ་ཚོགས་བཅས་ཁོའི་མདུན་དུ་དངངས་ཤིང་ཞེད་པར་གྱུར། ཁོས་སུ་ཞིག་གསོད་འདོད་ན་དེ་བསད་པ་དང་། སུ་ཞིག་ཚེ་ཐར་གཏོང་འདོད་ན་དེ་ཚེ་ཐར་བཏང་བ་རེད། ཡང་སུ་ཡི་གོ་གནས་སྤར་འདོད་ན་དེའི་གོ་གནས་སྤར་བ་དང་། སུ་ཞིག་དམའ་སར་འབེབ་འདོད་ན་དེ་དམའ་སར་ཕབ་བོ། །
DAN 5:20 ཡིན་ནའང་ཁོའི་སེམས་སུ་ང་རྒྱལ་སྐྱེས་ནས་ཨུ་ཚུགས་ཆེ་ཞིང་། ཐ་ན་ཁེངས་དྲེགས་ངང་སྤྱད་པ་སྤྱོད་པའི་དུས་སུ། ཁོ་རང་རྒྱལ་སྲིད་ཀྱི་གསེར་ཁྲི་ལས་ཕབ་ནས་ཁོའི་གཟི་དཔལ་ཡང་ཕྲོགས་པའོ། །
DAN 5:21 བླ་ན་མེད་པའི་དཀོན་མཆོག་གིས་མི་ཡུལ་གྱི་རྒྱལ་སྲིད་ཀུན་ལ་དབང་སྒྱུར་བ་དང་། ཡང་ཁོང་ཉིད་སུ་ཞིག་ལ་ཐུགས་མཉེས་པ་ཡིན་ན་དེ་རྒྱལ་པོར་བསྐོ་ངེས་པ་རྟོགས་པའི་བར་དུ། ཁོ་རང་མི་ཚོགས་ནས་ཕར་བསྐྲད་ཅིང་། ཁོ་ལ་དུད་འགྲོའི་སེམས་དང་ལྡན་པར་བྱས་ནས་རི་དྭགས་རྐྱང་དང་ལྷན་དུ་གནས་དགོས་པ་དང་། བ་གླང་ལྟར་རྩྭ་ཟོས་ཏེ་ལུས་པོ་གནམ་གྱི་ཟིལ་པས་སྦངས་པ་ཡིན་ནོ། །
DAN 5:22 འོན་ཀྱང་ཁོའི་བུ་པེལ་ཤཱ་ཙར་ཁྱེད་ཀྱིས་འདི་ཐམས་ཅད་ཤེས་ནའང་ད་དུང་ཁེངས་སྐྱུང་མི་བྱེད་པར།
DAN 5:23 དེ་ལས་ལྡོག་སྟེ་ང་རྒྱལ་བསྐྱེད་ནས་ནམ་མཁའི་ཞིང་ཁམས་སུ་བཞུགས་པའི་དཀོན་མཆོག་ལ་འགོག་རྒོལ་བྱས་ཤིང་། རང་གི་ཞབས་ཕྱི་རྣམས་ལ་ཁོང་གི་མཆོད་ཁང་ནས་སྣོད་ཆས་རྣམས་འཁྱེར་འོང་དུ་བཅུག་སྟེ། ཁྱེད་རང་ཉིད་དང་བློན་ཆེན་རྣམས། བཙུན་མོ་རྣམས། ཆུན་མ་བཅས་ཀྱིས་དེ་དག་ལས་རྒུན་ཆང་འཐུངས་པས། མཐོང་བ་མེད་ཅིང་ཐོས་པའང་མེད་ལ། འདུ་ཤེས་ཀྱིས་སྟོངས་པའི་གསེར་དང་དངུལ། ལི། ལྕགས། ཤིང་། རྡོ་སོགས་ཀྱིས་བྱས་པའི་ལྷ་ལ་བསྟོད་བསྔགས་བརྗོད་པ་ལས། ཁྱེད་ཀྱི་ཚེ་སྲོག་དང་འགུལ་སྐྱོད་རེ་རེར་དབང་བྱེད་པའི་དཀོན་མཆོག་ཁོང་ལ་བསྟོད་བསྔགས་མ་བརྗོད་དོ། །
DAN 5:24 དེའི་ཕྱིར། ཁོང་གིས་ཕྱག་མཛུབ་དེ་དག་མངགས་ནས་མཁར་ངོས་སུ་ཡི་གེ་བྲིས་པའོ། །
DAN 5:25 བྲིས་པའི་ཡི་གེ་རྣམས་ནི་འདི་ལྟ་སྟེ། མེ་ནེ། མེ་ནེ། ཐེ་ཀེལ། ཕར་སིན་ཞེས་པའོ། །
DAN 5:26 ཐ་སྙད་དེ་དག་གི་འགྲེལ་བ་ནི་འདི་ལྟ་སྟེ། མེ་ནེ་ཞེས་པ་ནི་དཀོན་མཆོག་གིས་ཁྱེད་ཀྱི་རྒྱལ་སྲིད་ཀྱི་ལོ་ཟླ་རྣམས་རྩིས་བླངས་ཤིང་ད་ནི་མཇུག་རྫོགས་པའི་དོན་ལ་འཇུག
DAN 5:27 ཐེ་ཀེལ་ཞེས་པ་ནི་ཁྱེད་རང་སྲང་ལ་འཇལ་བ་དང་ལྗིད་ཚད་མ་ལོངས་པའི་དོན་ལ་འཇུག
DAN 5:28 ཕར་སིན་ཞེས་པ་ནི་ཁྱེད་ཀྱི་རྒྱལ་སྲིད་བགོ་བཤའ་བརྒྱབ་སྟེ་མཱ་ཏི་པ་དང་ཏ་ཟིག་པ་རྣམས་ལ་གནང་བའི་དོན་ལ་འཇུག་ཅེས་སྨྲས་སོ། །
DAN 5:29 དེ་ནས་པེལ་ཤཱ་ཙར་གྱིས་བཀའ་བབས་པ་ལྟར། དཱ་ནེ་ཨེལ་ལ་གོས་རྒྱ་སྨུག་བསྐོན་ཞིང་སྐེ་ལ་གསེར་གྱི་མགུལ་རྒྱན་བཏེགས་ནས་རྒྱལ་སྲིད་ཀྱི་བློན་པོ་ཨང་གསུམ་པར་བསྐོས་པ་རེད།
DAN 5:30 ཏག་ཏག་མཚན་མོ་དེ་ལ། པཱ་པེལ་ལོན་གྱི་རྒྱལ་པོ་པེལ་ཤཱ་ཙར་བཀྲོངས་པ་དང་།
DAN 5:31 མཱ་ཏི་པ་དར་ཡཱ་ཡིས་དགུང་ལོ་དྲུག་ཅུ་རེ་གཉིས་སྟེང་རྒྱལ་སྲིད་དེ་ལ་དབང་བསྒྱུར་ཏོ། །
DAN 6:1 རྒྱལ་པོ་དར་ཡཱས་རང་གི་བསམ་འདུན་བཞིན་རྒྱལ་སྲིད་ཀྱི་ཡུལ་ཀུན་སྐྱོང་བར་སྤྱི་དཔོན་ཆིག་བརྒྱ་ཉི་ཤུ་བསྐོས་པ་དང་།
DAN 6:2 ཡང་སྤྱི་དཔོན་དེ་རྣམས་ལ་ལྟ་རྟོག་བྱེད་མཁན་གསུམ་བསྐོས་པ་ལས་གཅིག་ནི་དཱ་ནེ་ཨེལ་ཡིན་ལ། རྒྱལ་པོར་གྱོང་གུད་མི་ཐེབས་པའི་ཆེད་དུ་ལྟ་རྟོགས་པ་གསུམ་པོས་སྤྱི་དཔོན་རྣམས་ཀྱི་ལས་ཀར་བདག་གཉེར་བྱེད་དགོས་པ་རེད།
DAN 6:3 དཱ་ནེ་ཨེལ་ནི་ཁྱད་དུ་འཕགས་པ་ཞིག་ཡིན་པས་ལྟ་རྟོགས་པ་དང་སྤྱི་དཔོན་གཞན་ཀུན་ལས་ལྷག་པ་དང་། རྒྱལ་པོས་རྒྱལ་སྲིད་ཀྱི་དབང་ཐམས་ཅད་དཱ་ནེ་ཨེལ་ལ་གནང་བར་སྙམ་མོ། །
DAN 6:4 དེའི་རྐྱེན་གྱིས་ལྟ་རྟོགས་པ་དང་སྤྱི་དཔོན་རྣམས་ཀྱིས་དཱ་ནེ་ཨེལ་གྱིས་སྲིད་སྐྱོང་བའི་ཐད་ནས་སྐྱོན་འགེལ་བའི་སྙད་ཅིག་བཙལ་ནའང་། དེ་དག་གིས་དཱ་ནེ་ཨེལ་ལས་སྐྱོན་དང་ནོར་འཛོལ་གང་ཡང་རྙེད་མ་ཐུབ། རྒྱུ་མཚན་ཁོས་ནི་ལྷག་བསམ་རྣམ་དག་གིས་དོན་རྣམས་བསྒྲུབས་པ་ཡིན་པས་སྐྱོན་དང་ནོར་འཛོལ་གང་ཡང་མེད་པས་སོ། །
DAN 6:5 དེ་ནས་མི་དེ་དག་གིས་ང་ཚོས་དཱ་ནེ་ཨེལ་གྱི་དཀོན་མཆོག་གི་བཀའ་ཁྲིམས་དང་འབྲེལ་བའི་སྐྱོན་ཞིག་བཙལ་ན་མ་གཏོགས། ཁོ་ལ་སྐྱོན་འཛུགས་ས་གཞན་ཞིག་རྙེད་མི་སྲིད་ཅེས་སྡོམ་ཚིག་བཀོད་དོ། །
DAN 6:6 དེའི་ཕྱིར་ལྟ་རྟོགས་པ་དང་སྤྱི་དཔོན་རྣམས་མཉམ་དུ་རྒྱལ་པོའི་དྲུང་དུ་འདུས་ནས་འདི་ལྟར། ཀྱེ་རྒྱལ་པོ་དར་ཡཱ་ལགས། ཁྱེད་ཉིད་སྐུ་ཚེ་ཡུན་རིང་བརྟན་པར་ཤོག
DAN 6:7 ངེད་རྒྱལ་སྲིད་ཀྱི་ལྟ་རྟོགས་པ་དང་བཀའ་བློན། སྤྱི་དཔོན། གྲོས་པ། བློན་པོ་བཅས་ཐམས་ཅད་ཀྱིས་མཉམ་དུ་འདི་ལྟར། ཀྱེ་རྒྱལ་པོ་ལགས། ཉིན་ཞག་སུམ་ཅུའི་རིང་ལ་མི་སུ་ཞིག་གིས་རྒྱལ་པོ་ཁྱེད་ཉིད་ལས་གཞན་པའི་ལྷའམ་ཡང་ན་མི་གང་ཡིན་ལ་སྨོན་ལམ་བཏབ་ན་དེ་ནི་སེང་གེ་རྣམས་ཀྱི་དོང་དུ་བསྐྱུར་བའི་ཁྲིམས་ཞིག་བཙུགས་ནས་བཀའ་བཙན་པོ་ཞིག་གཏན་ལ་འབེབས་དགོས་པའི་གྲོས་བཏབ་ཡོད་པས།
DAN 6:8 ཀྱེ་རྒྱལ་པོ་ལགས། ད་ལྟ་མཱ་ཏི་པ་དང་ཏ་ཟིག་པ་རྣམས་ཀྱི་འགྱུར་བ་མེད་པའི་སྲོལ་ལུགས་དེ་གཞིར་བྱས་ཐོག བཟློག་ཏུ་མེད་པའི་བཀའ་རྒྱ་གཏན་ལ་ཕབ་ནས་ཐམ་ག་འདེབས་པར་མཛོད་ཅེས་ཞུས་པ་ན།
DAN 6:9 རྒྱལ་པོ་དར་ཡཱས་བཀའ་རྒྱ་བྲིས་ནས་ཐམ་ག་བཏབ་པའོ། །
DAN 6:10 དེ་ཡང་དཱ་ནེ་ཨེལ་གྱིས་རྒྱལ་པོས་བཀའ་རྒྱ་གཏན་ལ་ཕབ་པ་ཤེས་རྗེས། ཕྱིར་རང་ཁྱིམ་དུ་ལོག་ནས་སྒེའུ་ཁུང་ཡེ་རུ་སཱ་ལེམ་གྱི་ཕྱོགས་སུ་གཏད་པའི་སྟེང་ཁང་དུ་དེ་སྔར་བགྱིས་པ་ཇི་བཞིན་ཉིན་རེར་ཐེངས་གསུམ་ལ་པུས་མོ་སར་བཙུགས་ནས་རང་གི་དཀོན་མཆོག་ལ་སྨོན་ལམ་བཏབ་ཅིང་ཁོང་ལ་བཀའ་དྲིན་ཡང་ཞུས་སོ། །
DAN 6:11 དེ་ནས་སྐུ་དྲག་དེ་རྣམས་མཉམ་དུ་འོངས་ནས་དཱ་ནེ་ཨེལ་གྱིས་རང་གི་དཀོན་མཆོག་གི་སྤྱན་སྔར་སྨོན་ལམ་བཏབ་ནས་ཞུ་བ་འབུལ་བཞིན་པ་མཐོང་སྟེ།
DAN 6:12 ཁོ་རྣམས་རྒྱལ་པོའི་དྲུང་དུ་སོང་ནས་རྒྱལ་པོའི་བཀའ་རྒྱ་གླེང་སྟེ་ན་རེ། ཀྱེ་རྒྱལ་པོ་ལགས། ཁྱེད་ཀྱིས་ཉིན་ཞག་སུམ་ཅུའི་རིང་ལ་མི་སུ་ཞིག་གིས་རྒྱལ་པོ་ཁྱེད་ཉིད་ལས་གཞན་པའི་ལྷའམ་ཡང་ན་མི་གང་ཡིན་ལ་སྨོན་ལམ་བཏབ་ན་དེ་ནི་སེང་གེ་རྣམས་ཀྱི་དོང་དུ་བསྐྱུར་བའི་བཀའ་རྒྱ་གཏན་ལ་ཕབ་ནས་ཐམ་ག་བཏབ་པ་མ་ཡིན་ནམ་ཞེས་ཞུས་པ་ན། རྒྱལ་པོས་དེ་དག་ལ་ལན་དུ། དེ་ནི་བདེན་ནོ། །མཱ་ཏི་པ་དང་ཏ་ཟིག་པའི་ཁྲིམས་ལྟར་ན་བཀའ་རྒྱ་དེ་ལྟ་བུ་ལ་ཟློག་ཐབས་མེད་ཅེས་སྨྲས་སོ། །
DAN 6:13 དེ་ནས་ཁོ་རྣམས་ཀྱིས་རྒྱལ་པོ་ལ་འདི་ལྟར། ཀྱེ་རྒྱལ་པོ་ལགས། ཡ་ཧུ་དཱ་པའི་བཙོན་མ་རྣམས་ལས་དཱ་ནེ་ཨེལ་གྱིས་ཁྱེད་དང་ཁྱེད་ཀྱིས་སྤེལ་བའི་བཀའ་རྒྱ་ལ་བརྩི་བཀུར་བྱེད་ཀྱིན་མེད། ཁོས་ཉིན་རེར་ཐེངས་གསུམ་ལ་སྨོན་ལམ་འདེབས་བཞིན་ཡོད་ཅེས་ཞུས་སོ། །
DAN 6:14 རྒྱལ་པོས་གཏམ་དེ་ཐོས་པ་དང་རབ་ཏུ་སྐྱོ་བར་གྱུར་ནས་དཱ་ནེ་ཨེལ་སྐྱོབ་དགོས་སྙམ་ཞིང་། ཉི་མ་ནུབ་པའི་བར་དུ་དཱ་ནེ་ཨེལ་ཇི་ལྟར་སྐྱོབ་དགོས་པའི་སྐོར་ལ་ཐབས་བཙལ་ཏོ། །
DAN 6:15 དེ་ནས་མི་དེ་རྣམས་རྒྱལ་པོའི་དྲུང་དུ་འོངས་ཏེ་ན་རེ། ཀྱེ་རྒྱལ་པོ་ལགས། མཱ་ཏི་པ་དང་ཏ་ཟིག་པ་རྣམས་ཀྱི་ཁྲིམས་ལྟར་ན། རྒྱལ་པོས་གཏན་ལ་ཕབ་པའི་བཀའ་དང་ཁྲིམས་ནི་གང་ལའང་འགྱུར་བ་བཏང་མི་ཆོག་པ་དྲན་པར་མཛོད་ཅེས་ཞུས་པ་ལ།
DAN 6:16 རྒྱལ་པོས་བཀའ་བསྩལ་ཞིང་དཱ་ནེ་ཨེལ་རྒྱལ་པོའི་དྲུང་དུ་ཁྲིད་འོངས་པ་དང་། རྒྱལ་པོས་ཁོ་ལ་འདི་ལྟར། ཁྱོད་ཀྱིས་ནམ་རྒྱུན་ཞབས་ཏོག་སྒྲུབ་པའི་དཀོན་མཆོག་གིས་ཁྱོད་སྐྱོབ་ངེས་ཡིན་ཞེས་སེམས་གསོ་བྱས་རྗེས། དཱ་ནེ་ཨེལ་སེང་གེ་རྣམས་ཀྱི་དོང་དུ་བསྐྱུར་ཏོ། །
DAN 6:17 དེ་ནས་རྡོ་ཕ་བོང་ཞིག་གིས་དོང་དེའི་ཁ་བརྒྱབ་ནས་དཱ་ནེ་ཨེལ་ལ་ཉེས་ཆད་བཅད་པ་དེར་འགྱུར་བ་མི་གཏོང་བའི་ཆེད་དུ་དོང་ཁར་རྒྱལ་པོ་རང་ཉིད་དང་སྐུ་དྲག་རྣམས་ཀྱི་ཐམ་ག་བརྒྱབ་བོ། །
DAN 6:18 དེ་ནས་རྒྱལ་པོ་ཕྱིར་རང་གི་ཕོ་བྲང་དུ་སླེབས་ནའང་། དགུང་མོ་དེར་ཁོས་ཁ་ཟས་ཅི་ཡང་མ་སྤྱད་པ་དང་སྤྲོ་སྐྱིད་ལྡན་པའི་རོལ་ཆས་མེད་ལ། ཞག་གང་པོར་གཉིད་ཀྱང་མ་ཁུགས་པ་རེད།
DAN 6:19 ཕྱི་ཉིན་ཞོགས་པར་སྐྱ་རེངས་ཤར་མ་ཐག་ཏུ་རྒྱལ་པོ་མལ་ལས་ལངས་ཏེ་མྱུར་བ་མྱུར་དུ་སེང་གེ་རྣམས་ཀྱི་དོང་ཡོད་སར་སོང་ཞིང་།
DAN 6:20 ཁོང་དོང་དེའི་ཉེ་སར་བཏུད་ནས་སྐྱོ་གདུང་དང་བཅས་དཱ་ནེ་ཨེལ་བོས་ཏེ་ན་རེ། ཀྱེ་གཏན་དུ་གསོན་པོར་བཞུགས་པའི་དཀོན་མཆོག་གི་ཞབས་ཕྱི་དཱ་ནེ་ཨེལ་ལགས། ཁྱོད་ཀྱིས་རྒྱུན་དུ་ཞབས་ཏོག་སྒྲུབ་པའི་དཀོན་མཆོག་གིས་ཁྱོད་རང་སེང་གེ་རྣམས་ལས་སྐྱོབ་ཐུབ་པ་ཡིན་ནམ་ཞེས་སྨྲས་པ་ན།
DAN 6:21 དཱ་ནེ་ཨེལ་གྱིས་རྒྱལ་པོ་ལ་ལན་དུ། ཀྱེ་རྒྱལ་པོ་ལགས། ཁྱེད་ཉིད་སྐུ་ཚེ་ཡུན་རིང་བརྟན་པར་ཤོག
DAN 6:22 ང་ཡི་དཀོན་མཆོག་གིས་ཁོང་གི་ཕོ་ཉ་མངགས་ནས་སེང་གེ་རྣམས་ཀྱི་ཁ་བཀག་པས་བདག་ལ་གནོད་པ་ནི་མ་ཐེབས། གང་ལ་ཞེ་ན། ཁོང་གི་སྤྱན་སྔར་བདག་ལ་ཉེས་པ་མེད་པས་རེད། ཀྱེ་རྒྱལ་པོ་ལགས། ཁྱེད་ཀྱི་དྲུང་དུའང་བདག་གིས་ཉེས་པ་གང་ཡང་བྱས་མེད་ཅེས་སྨྲས་སོ། །
DAN 6:23 དེ་ནས་རྒྱལ་པོ་ཤིན་ཏུ་དགའ་སྟེ་དཱ་ནེ་ཨེལ་དོང་ལས་ཡར་འཐེན་པའི་བཀའ་བསྒོས་པ་དང་། དཱ་ནེ་ཨེལ་དོང་ལས་ཡར་འཐེན་པ་ན་ཁོའི་སྟེང་དུ་གནོད་འཚེ་ཅི་ཡང་ཐེབས་མེད་དེ། རྒྱུ་མཚན་ཁོ་ནི་རང་གི་དཀོན་མཆོག་ལ་ཡིད་ཆེས་བརྟན་པོ་ཡོད་པའི་ཕྱིར་རོ། །
DAN 6:24 ཡང་རྒྱལ་པོས་བཀའ་བསྒོས་པ་ལ། དཱ་ནེ་ཨེལ་ལ་སྙད་བཏགས་ནས་སྐྱོན་འཛུགས་མཁན་རྣམས་ནི་དེ་དག་གི་ཆུང་མ་དང་ཕྲུ་གུ་བཅས་པ་ཁྲིད་འོངས་ནས་སེང་གེའི་དོང་ནང་དུ་གཡུགས་ཤིང་། ཁོ་རྣམས་ད་དུང་དོང་ཞབས་ལ་མ་ལྷུང་གོང་སེང་གེ་རྣམས་ཀྱིས་བཟུང་སྟེ་རུས་པ་ཐམས་ཅད་བལྡད་དོ། །
DAN 6:25 རྗེས་སུ་རྒྱལ་པོ་དར་ཡཱ་ཡིས་ས་སྟེང་ཀུན་ཏུ་གནས་པའི་རྒྱལ་ཁམས་ཁག་དང་མི་རིགས་སོ་སོ། སྐད་རིགས་སྣ་ཚོགས་སྨྲ་མཁན་ཐམས་ཅད་ལ་ཡི་གེ་བྲིས་པ་འདི་ལྟ་སྟེ། ཁྱོད་རྣམས་ཤིན་ཏུ་བདེ་བར་གྱུར་ཅིག
DAN 6:26 བདག་གིས་བསྒོས་པའི་བཀའ་ནི། བདག་གི་རྒྱལ་ཁམས་སུ་འདུས་པའི་འབངས་མི་ཐམས་ཅད་དཱ་ནེ་ཨེལ་གྱི་དཀོན་མཆོག་ལ་གུས་ཤིང་འཇིགས་པར་འོས་པ་ཡིན། ཁོང་ནི་གཏན་དུ་གསོན་པོར་བཞུགས་པ་དང་། ། རྟག་ཏུ་འཚོ་ཞིང་བཞེས་པའི་དཀོན་མཆོག་ཡིན། ། རྒྱལ་སྲིད་མི་འཇིག་གཏན་དུ་གནས་པ་ཡིན། ། ཁོང་གི་སྲིད་དབང་ནམ་ཡང་འཛད་མཐའ་མེད། །
DAN 6:27 སྒྲོལ་ཞིང་སྐྱོབ་པའི་མཐུ་སྟོབས་ཁོང་ལ་ལྡན། ། ས་སྟེང་དང་ནི་ནམ་མཁའི་ཞིང་ཁམས་སུ། ། ཁོང་གིས་གྲུབ་རྟགས་ངོ་མཚར་འཕྲིན་ལས་མཛད། ། སེང་གེ་རྣམས་ཀྱི་སྡེར་མོའི་འཇིགས་པ་ལས། ། ཁོང་གིས་དཱ་ནེ་ཨེལ་ནི་བསྐྱབས་པ་ཡིན། ། ཞེས་པ་དེའོ། །
DAN 6:28 དེ་བས་དཱ་ནེ་ཨེལ་ནི་དར་ཡཱས་སྲིད་སྐྱོང་བའི་དུས་དང་ཏ་ཟིག་པ་ཀོ་རེས་ཀྱིས་སྲིད་སྐྱོང་བའི་སྐབས་སུ་དར་བར་གྱུར་ཏོ། །
DAN 7:1 པེལ་ཤཱ་ཙར་ནི་པཱ་པེལ་ལོན་གྱི་རྒྱལ་པོར་བསྡད་པའི་སྲིད་ལོ་དང་པོ་དེར། དཱ་ནེ་ཨེལ་གྱིས་རང་གི་མལ་ཁྲིའི་སྟེང་རྨི་ལམ་ཞིག་རྨིས་ཤིང་སེམས་སུ་ཞལ་གཟིགས་རྣམས་མཐོང་བ་དང་། རྨི་ལམ་ཁྲོད་ཀྱི་ཞལ་གཟིགས་རྣམས་མདོར་བསྡུས་ངང་ཡི་གེར་བཀོད་ཅིང་།
DAN 7:2 དཱ་ནེ་ཨེལ་ན་རེ། མཚན་མོའི་ཞལ་གཟིགས་ཁྲོད་དུ་བདག་གིས་མཐོང་བ་ནི་འདི་ལྟ་སྟེ། ནམ་མཁའི་ཕྱོགས་བཞི་ནས་རླུང་ཆེན་པོ་ལྡང་འོངས་ཏེ་རྒྱ་མཚོ་ཆེན་པོ་གཡོ་བར་བྱས་ལ།
DAN 7:3 དེ་ནས་རྒྱ་མཚོ་ལས་རིགས་མི་འདྲ་བའི་གཅན་གཟན་ཆེན་པོ་བཞི་ཡར་བུད་པའོ། །
DAN 7:4 གཅན་གཟན་དང་པོ་དེ་ནི་གླག་ལྟར་གཤོག་པ་ཐོགས་ཡོད་པའི་སེང་གེ་ཞིག་དང་མཚུངས་ལ། གཤོག་སྒྲོ་རྣམས་བཀོག་སྟེ་ས་ནས་ཡར་བཀྱགས་པ་ལ། མི་ལྟར་རྐང་པ་གཉིས་སར་བཙུགས་ནས་གྱེན་དུ་འགྲེངས་པ་དང་། མི་ཡི་སེམས་དེ་ལ་སྦྱིན་པའི་བར་དུ་བདག་གིས་བལྟས་སོ། །
DAN 7:5 ཡང་ངས་གཅན་གཟན་གཞན་ཞིག་མཐོང་བ་དང་དེ་ནི་གཅན་གཟན་གཉིས་པ་ཡིན་ལ། དོམ་དང་འདྲ་བའི་གཅན་གཟན་དེས་གཟུགས་པོའི་གཞོགས་གཅིག་ཡར་བཀྱགས་ནས་སོ་ཡི་བར་དུ་རྩིབ་རུས་གསུམ་བཟུང་ཡོད་པ་དེར་འདི་ལྟར། ཡར་ལོངས་ལ་ཤ་མང་པོ་བཟའ་བར་གྱིས་ཞེས་སྨྲས་སོ། །
DAN 7:6 དེ་ནས་བདག་གིས་མུ་མཐུད་དུ་བལྟས་པ་ན། གཟིག་དང་འདྲ་བའི་གཅན་གཟན་གཞན་ཞིག་མཐོང་བྱུང་ལ་དེའི་རྒྱབ་ཏུ་འདབ་ཆགས་བྱ་ཡི་གཤོག་པ་བཞི་བརྒྱངས་འདུག གཅན་གཟན་དེར་མགོ་བཞི་ཡོད་ལ་སྲིད་སྐྱོང་བའི་དབང་ཡང་དེར་སྤྲད་ཡོད།
DAN 7:7 རྗེས་སུ་བདག་གིས་མཚན་མོའི་ཞལ་གཟིགས་ཁྲོད་མུ་མཐུད་དུ་བལྟས་པ་ན། གཅན་གཟན་བཞི་པ་མཐོང་བྱུང་ལ་དེ་ནི་འཇིགས་སུ་རུང་ཞིང་སྐྱི་གཡའ་བའི་སྟོབས་པོ་ཆེ་ཞིག་ཡིན་པ་དང་། དེར་ལྕགས་ཀྱི་མཆེ་བ་དང་ལྡན་ཞིང་ཡོད་ཚད་ཁྱུར་མིད་བཏང་ནས་རྡུལ་དུ་བརླགས་པར་མ་ཟད། ཤུལ་དུ་ལུས་པ་རྣམས་རྡོག་བརྫིས་བཏང་། དེ་ནི་གཅན་གཟན་སྔོན་མ་དག་དང་གཏན་ནས་མི་འདྲ་སྟེ་རྭ་ཅོ་བཅུ་ཡར་ལ་གཟེངས་འདུག
DAN 7:8 བདག་གིས་རྭ་ཅོ་དེ་དག་ལ་ཞིབ་ཏུ་ལྟ་བའི་སྐབས་སུ། དེ་དག་གི་དབུས་སུ་གཞན་པའི་རྭ་ཅོ་ཆུང་ངུ་ཞིག་སྐྱེས་ཤིང་། རྭ་ཅོ་ཆུང་ངུ་དེ་ཡོད་སར་དེ་སྔའི་རྭ་ཅོ་གསུམ་པོ་རྩ་བ་ནས་བཏོན་ནོ། །རྭ་ཅོ་ཆུང་ངུ་དེ་ལ་མི་ཡི་མིག་དང་འདྲ་བ་ཡོད་ལ་ཁ་ཡང་འདུག་པས་དེ་ལས་འུད་ཤོབ་མང་པོ་ཐོན་ནོ། །
DAN 7:9 ངས་ཡུན་རིང་བལྟས་པ་ན། ཁྲི་མང་པོ་བརྒྱབ་ཅིང་གདོད་མ་ནས་བཞུགས་པ་ཁོང་ཉིད་ཁྲི་ལ་བཞུགས་པ་དང་། ཁོང་གི་ན་བཟའ་ནི་ཁ་བ་ལྟར་དཀར་ཞིང་དབུ་སྐྲའང་བལ་ལྟར་དྭངས་གཙང་ཡིན། ཁོང་གི་བཞུགས་ཁྲི་ནི་མེ་ལྕེ་ཡིན་ལ་དེའི་འཁོར་ལོ་རྣམས་ནི་མེ་དཔུང་དྲག་པོ་ཡིན།
DAN 7:10 ཁོང་གི་སྤྱན་སྔ་ནས་མེ་ཡི་གཙང་པོ་ཞིག་བཞུར་ཅིང་མེ་དཔུང་དྲག་པོ་འཕྱུར་བ་དང་། སྟོང་ཕྲག་མང་པོས་ཁོང་ལ་ཞབས་ཏོག་སྒྲུབ་ཀྱིན་ཡོད་པ་དང་ཁྲི་ཕྲག་མང་པོ་ཁོང་གི་དྲུང་དུ་འགྲེང་འདུག ཁྲིམས་གཅོད་འགོ་བརྩམས་པ་དང་གླེགས་བམ་རྣམས་ཁ་ཕྱེས་སོ། །
DAN 7:11 དེ་ནས་བདག་གིས་མུ་མཐུད་དུ་བལྟས་པ་ན། རྭ་ཅོ་ཆུང་ངུ་དེས་ང་རྒྱལ་གྱི་གཏམ་སྨྲ་བས་གཅན་གཟན་དེ་སྲོག་དང་ཕྲལ་ཞིང་། དེའི་ལུས་པོ་མེད་པར་བཏང་ནས་མེ་དཔུང་དྲག་པོའི་ཁྲོད་དུ་གཡུགས།
DAN 7:12 དེ་འཕྲོས་གཅན་གཟན་གསུམ་པོ་ནི་དེ་དག་གི་རྒྱལ་སྲིད་ཕྲོགས་ནའང་། དེ་རྣམས་ཀྱི་ཚེ་སྲོག་ནི་གཏན་ལ་ཕབ་པའི་དུས་ཚོད་དང་ཉི་མའི་བར་དུ་ལྷག་པར་བྱས།
DAN 7:13 བདག་གིས་མཚན་མོའི་ཞལ་གཟིགས་ཁྲོད་མུ་མཐུད་དུ་བལྟས་པ་ན། ནམ་མཁའི་སྤྲིན་གྱི་བང་རིམ་ནས་མིའི་བུ་དང་མཚུངས་པ་ཞིག་བྱོན་ནས། གདོད་མ་ནས་བཞུགས་པ་ཁོང་གི་དྲུང་དུ་གཤེགས་ཤིང་ཁོང་གི་དྲུང་དུ་དྲངས་སོ། །
DAN 7:14 ཁོང་ལ་དབང་ཐང་དང་གུས་འདུད། རྒྱལ་སྲིད་བཅས་ཐོབ་ཅིང་། རྒྱལ་ཁམས་ཁག་དང་མི་རིགས་སོ་སོ། སྐད་རིགས་སྣ་ཚོགས་སྨྲ་མཁན་ཐམས་ཅད་ཀྱིས་ཁོང་ལ་ཞབས་ཕྱི་བསྒྲུབས། ཁོང་གི་དབང་ཐང་ནི་དུས་གཏན་དུ་གནས་ཤིང་མེད་པར་མི་འགྱུར་ལ། ཁོང་གི་རྒྱལ་སྲིད་ནི་དུས་ནམ་ཡང་འཇིག་མི་སྲིད་དོ། །
DAN 7:15 དཱ་ནེ་ཨེལ་ང་རང་ནི་སེམས་འཁྲུགས་ཤིང་། བློ་ངོར་ཤར་བའི་ཞལ་གཟིགས་དེ་དག་གིས་ང་ལ་ཞེད་སྣང་ཆེན་པོ་བསྐྱེད།
DAN 7:16 དེ་ནས་ང་རང་འགྲེངས་ནས་བསྡད་ཡོད་པ་དེ་དག་གྲས་ཀྱི་གཅིག་གི་གམ་དུ་བཅར་ནས་དེ་ཡོད་ཚད་ཀྱི་ངེས་དོན་ཅི་ཡིན་དྲིས་པ་ན། ཁོང་གིས་བདག་ལ་ཞལ་གཟིགས་དེ་དག་གི་དོན་སྨྲས་པ་དང་འགྲེལ་བཤད་བརྒྱབ་པ་འདི་ལྟ་སྟེ།
DAN 7:17 གཅན་གཟན་ཆེན་པོ་འདི་བཞི་པོ་ནི་ས་སྟེང་དུ་འབྱུང་བར་འགྱུར་བའི་རྒྱལ་པོ་བཞི་ཡིན་མོད།
DAN 7:18 འོན་ཀྱང་བླ་ན་མེད་པ་ཁོང་གི་སྐྱེས་བུ་དམ་པ་རྣམས་ལ་རྒྱལ་སྲིད་ཐོབ་ནས་དུས་གཏན་དུ་རྒྱལ་སྲིད་དེ་དབང་བར་འགྱུར་རོ་ཞེས་པའོ། །
DAN 7:19 དེ་ནས་བདག་གིས་གཅན་གཟན་བཞི་པ་དེའི་ངེས་དོན་ཤེས་འདོད་པ་དང་། དེ་ནི་གཞན་པའི་གཅན་གཟན་གསུམ་པོ་དང་མི་འདྲ་ཞིང་། ཤིན་ཏུ་འཇིགས་སུ་རུང་བ་དང་ལྕགས་ཀྱི་མཆེ་བ་དང་ལི་ཡི་སྡེར་མོ་ཅན་ཞིག་ཡིན་ལ། ཡོད་ཚད་ཁྱུར་མིད་བཏང་ནས་རྡུལ་དུ་བརླགས་པར་མ་ཟད། ཤུལ་དུ་ལུས་པ་རྣམས་རྡོག་བརྫིས་བཏང་བའོ། །
DAN 7:20 དེ་མིན་མགོ་ལ་ཐོགས་པའི་རྭ་ཅོ་བཅུ་པོ་དང་དེ་དག་གི་དཀྱིལ་ནས་སྐྱེས་པའི་རྭ་ཅོ་ཆུང་ངུ་དེ་དང་། ཡང་རྭ་ཅོ་ཆུང་ངུ་དེའི་མདུན་ནས་འགྱེལ་བའི་རྭ་ཅོ་གསུམ་པོ་དེའི་ངེས་དོན་ཡང་ཤེས་འདོད་པ་ཡིན། རྭ་ཅོ་ཆུང་ངུ་དེར་མིག་ཡོད་ལ་འུད་ཤོབ་བྱེད་པའི་ཁ་ཡང་ཡོད་པ་དང་། དེའི་གཟུགས་དབྱིབས་ནི་གཞན་རྣམས་ལས་ཀྱང་དཔའ་རྔམ་ཆེ་བ་ཞིག་ཡིན།
DAN 7:21 ངས་ལྟ་བཞིན་པའི་སྒང་ལ་རྭ་ཅོ་ཆུང་ངུ་དེས་སྐྱེས་བུ་དམ་པ་རྣམས་ལ་གཡུལ་འགྱེད་པའི་འགོ་བརྩམས་ཤིང་དེ་དག་ཕམ་པར་བརྒྱབ།
DAN 7:22 འོན་ཀྱང་གདོད་མ་ནས་བཞུགས་པ་ཁོང་ཉིད་བྱོན་ཏེ། བླ་ན་མེད་པ་ཁོང་གི་སྐྱེས་བུ་དམ་པ་རྣམས་ཀྱི་ཕྱོགས་བྱས་ནས་ཁྲིམས་ཐག་བཅད་པ་ལ། སྐྱེས་བུ་དམ་པ་རྣམས་ལ་རྒྱལ་སྲིད་དབང་བའི་དུས་སུ་སླེབས་པའོ། །
DAN 7:23 ཁོང་གིས་བདག་ལ་འདི་སྐད་དུ། གཅན་གཟན་བཞི་པ་དེ་ནི་ས་སྟེང་འདི་རུ་འབྱུང་ངེས་པའི་རྒྱལ་སྲིད་བཞི་པ་ཡིན་ལ་དེ་ནི་རྒྱལ་སྲིད་གཞན་ཀུན་དང་མི་འདྲ་སྟེ། ས་སྟེང་ཧྲིལ་པོ་རྡོག་བརྫིས་བཏང་ནས་ཁྱུར་མིད་གཏོང་ཞིང་རྡུལ་དུ་བརླག་ངེས་ཡིན།
DAN 7:24 རྭ་ཅོ་བཅུ་པོ་ནི་རྒྱལ་སྲིད་དེ་ལས་རྒྱལ་པོ་བཅུ་འབྱུང་བར་འགྱུར་བ་དེ་ཡིན་ལ། དེ་དག་གི་རྗེས་སུ་རྒྱལ་པོ་གཞན་ཞིག་སླེབ་པར་འགྱུར་ཞིང་། རྒྱལ་པོ་སྔ་མ་དག་དང་མི་འདྲ་སྟེ། ཁོས་རྒྱལ་པོ་གསུམ་ཀ་དབང་དུ་བསྡུ་ངེས་སོ། །
DAN 7:25 ཁོས་བླ་ན་མེད་པ་ཁོང་ལ་འགོག་རྒོལ་བྱེད་པའི་གཏམ་སྨྲ་ཞིང་། བླ་ན་མེད་པ་ཁོང་གི་སྐྱེས་བུ་དམ་པ་རྣམས་ལ་མནར་གཅོད་གཏོང་བ་དང་། དུས་ཆེན་དང་བཀའ་ཁྲིམས་རྣམས་ཀྱང་བསྒྱུར་འདོད་པ་ཡིན། སྐྱེས་བུ་དམ་པ་རྣམས་ལོ་གསུམ་དང་ཕྱེད་ཀའི་ རིང་ལ་ཁོའི་དབང་འོག་ཏུ་གཏོད་པར་འགྱུར།
DAN 7:26 འོན་ཀྱང་ཁྲིམས་གཅོད་འགོ་རྩོམ་ཞིང་ཁོའི་དབང་ཆ་བླངས་ནས་ཁོ་རང་གཏན་དུ་རྩ་མེད་དུ་གཏོང་ངེས་ཡིན།
DAN 7:27 དེ་ནས་རྒྱལ་སྲིད་དང་དབང་ཐང་། གནམ་འོག་གི་རྒྱལ་ཁམས་ཀུན་གྱི་དབང་ཐམས་ཅད་བླ་ན་མེད་པ་ཁོང་གི་སྐྱེས་བུ་དམ་པ་རྣམས་ལ་གནང་བར་འགྱུར་ཞིང་། ཁོང་གི་རྒྱལ་སྲིད་ནི་དུས་གཏན་གྱི་རྒྱལ་སྲིད་ཡིན་པ་དང་། དབང་སྒྱུར་པ་ཡོངས་ཀྱིས་ཁོང་ལ་ཞབས་ཏོག་བསྒྲུབས་ནས་ཁོང་གི་བཀའ་ལ་མཉན་ནོ་ཞེས་སྨྲས།
DAN 7:28 དོན་དེ་ནི་འདི་རུ་མཇུག་རྫོགས་པ་ཡིན། དཱ་ནེ་ཨེལ་བདག་ནི་སེམས་ཀུན་ནས་འཁྲུགས་ཤིང་ངོ་མདངས་ཀྱང་འགྱུར་ནའང་། དོན་དེ་ཐམས་ཅད་བདག་གིས་ཡིད་ལ་བཟུང་བའོ། །
DAN 8:1 ཡང་རྒྱལ་པོ་པེལ་ཤཱ་ཙར་རྒྱལ་པོར་བསྡད་པའི་སྲིད་ལོ་གསུམ་པ་དེར། དེ་སྔ་མངོན་ཟིན་པའི་ཞལ་གཟིགས་དེའི་རྗེས་སུ་དཱ་ནེ་ཨེལ་བདག་གིས་ཡང་ཞལ་གཟིགས་གཞན་ཞིག་མཐོང་།
DAN 8:2 བདག་གིས་ཞལ་གཟིགས་དེར་བལྟས་པ་ན། ང་རང་ཉིད་ཨེ་ལཱམ་མངའ་སྡེའི་སོའུ་སཱན་མཁར་རྫོང་དུ་ཡོད་པ་མཐོང་བ་དང་། ངས་མུ་མཐུད་དུ་ཞལ་གཟིགས་དེར་བལྟས་པ་ན། རང་ཉིད་ཨུ་ལ་ཨི་ཡུར་བའི་འགྲམ་དུ་ཡོད་དོ། །
DAN 8:3 ངས་མགོ་ཡར་བཀྱགས་ནས་བལྟས་པ་ན། ལུག་ཐུག་ཅིག་ཡུར་བའི་འགྲམ་དུ་ལངས་བསྡད་ཡོད་པ་མཐོང་ཞིང་། དེར་རྭ་ཅོ་གཉིས་ཡོད་ལ་རྭ་ཅོ་གཉིས་ཀ་ཤིན་ཏུ་རིང་ནའང་གཅིག་ནི་ལྷག་ཏུ་རིང་བ་དང་། ཡང་རྭ་ཅོ་རིང་ཤོས་དེ་ནི་རྗེས་སུ་སྐྱེས་པ་ཡིན།
DAN 8:4 ཡང་ལུག་ཐུག་དེས་ནུབ་ཕྱོགས་དང་བྱང་ཕྱོགས། ལྷོ་ཕྱོགས་སོགས་སུ་བརྡུངས་པ་ལ། གཅན་གཟན་གང་ཡིན་ཡང་དེའི་མདུན་དུ་ཚུགས་མི་ཐུབ་པ་དང་སུ་ཞིག་གིས་ཀྱང་དེའི་དབང་ལས་སྐྱོབ་མི་ཐུབ། དེས་རང་འདོད་ལྟར་སྤྱོད་ཅིང་ཁེངས་དྲེགས་ཤིན་ཏུ་ཆེ།
DAN 8:5 བདག་གིས་དེར་བསམ་བློ་གཏོང་བཞིན་པའི་སྒང་ལ། ལྟོས་དང་། ར་ཕོ་ཞིག་ནུབ་ཕྱོགས་ནས་ཐོན་ཞིང་རྐང་པ་སར་མི་ཐོགས་པར་ས་ངོས་ཡོངས་སུ་ཤར་རྒྱུགས་བྱེད་ཀྱིན་འདུག ར་ཕོ་དེའི་མིག་ཟུང་གི་བར་དུ་རྭ་ཅོ་ཞིག་མངོན་གསལ་གྱིས་གཟེངས་འདུག
DAN 8:6 ར་ཕོ་དེ་ནི་ཁོང་ཁྲོ་མེ་ལྟར་འབར་བཞིན་བདག་གིས་དེ་སྔར་མཐོང་བའི་ཡུར་བའི་འགྲམ་དུ་ལངས་བསྡད་ཡོད་པ་དང་རྭ་ཅོ་ཟུང་དང་ལྡན་པའི་ལུག་ཐུག་དེའི་ཕྱོགས་སུ་ཤུགས་ཀྱིས་རྒྱུག་སོང་ངོ་། །
DAN 8:7 ར་ཕོ་དེ་ལུག་ཐུག་གི་ཉེ་སར་ཕྱིན་པ་བདག་གིས་མཐོང་ཞིང་། ལུག་ཐུག་དེའི་སྟེང་ཁོང་ཁྲོ་མེ་ལྟར་འབར་ནས་བརྡུངས་ཤིང་རྭ་ཅོ་གཉིས་ཀའང་བཅག་པའོ། །ལུག་ཐུག་གིས་ཚུགས་མ་ཐུབ་པས་ར་ཕོ་དེས་ལུག་ཐུག་ས་ལ་བརྡབས་ཤིང་རྡོག་བརྫིས་བཏང་ནའང་། སུ་ཞིག་གིས་ཀྱང་ལུག་ཐུག་དེ་ར་ཕོའི་སྟོབས་ལས་སྐྱོབ་མ་ཐུབ།
DAN 8:8 ར་ཕོ་དེ་ཁེངས་དྲེགས་ཤིན་ཏུ་ཆེ་ནའང་། སྟོབས་ཤུགས་ཆེས་ཆེ་བའི་དུས་སུ་དེའི་རྭ་ཅོ་སྦོམ་པོ་དེ་གློ་བུར་ཉིད་ལ་ཆག་པ་དང་། དེའི་ཤུལ་དུ་མངོན་གསལ་ཆེ་བའི་རྭ་ཅོ་བཞི་སྐྱེས་ཤིང་ནམ་མཁའི་ཕྱོགས་བཞི་རུ་བརྐྱངས་པའོ། །
DAN 8:9 རྭ་ཅོ་དེ་དག་ཁྲོད་ཀྱི་གཅིག་ལས་ཡང་རྭ་ཅོ་ཆུང་ངུ་ཞིག་སྐྱེས་ཤིང་། རྭ་ཅོ་ཆུང་ངུ་དེ་ཤིན་ཏུ་ཆེན་པོར་རྒྱས་ནས་ལྷོ་ཕྱོགས་དང་ཤར་ཕྱོགས། མཛེས་སྡུག་ལྡན་པའི་ཡུལ་ལྗོངས་བཅས་ཀྱི་ཕྱོགས་སུ་བརྐྱངས།
DAN 8:10 དེ་ནི་ཤིན་ཏུ་ཆེན་པོར་གྱུར་ནས་ནམ་མཁའི་དཔུང་ཚོགས་བར་དུ་སླེབས་ཤིང་། ནམ་མཁའི་དཔུང་ཚོགས་དང་སྐར་ཚོགས་ཁྱུ་ཞིག་ས་རུ་གཡུགས་ནས་རྡོག་བརྫིས་བཏང་།
DAN 8:11 དེས་ཁེངས་དྲེགས་ཆེན་པོ་དང་བཅས་ནམ་མཁའི་དཔུང་ཚོགས་ཀྱི་གཙོ་བོར་འགྲན་བཙུགས་ཤིང་། ནམ་མཁའི་དཔུང་ཚོགས་ཀྱི་གཙོ་བོར་ཕུལ་བའི་དུས་རྒྱུན་གྱི་མཆོད་པ་མེད་པར་བཟོས་པ་དང་གནས་དམ་པའང་བཤིགས་པའོ། །
DAN 8:12 སྡིག་ཉེས་ཀྱི་དབང་གིས་སྐྱེས་བུ་དམ་པས་དུས་རྒྱུན་གྱི་མཆོད་པའང་ཁོ་ལ་གཏད་པ་དང་། དེས་བདེན་པ་ཉིད་ས་ལ་བརྡབས་ཤིང་ཅི་བྱེད་འདོད་ན་དོན་ཀུན་ལྷུན་གྱིས་འགྲུབ་པའོ། །
DAN 8:13 དེ་ནས་ངས་དམ་པ་ཞིག་གིས་གཏམ་སྨྲ་བཞིན་པ་ཐོས་པ་དང་། དམ་པ་གཞན་ཞིག་གིས་དེ་ལ་འདི་སྐད་དུ། ཉིན་རྒྱུན་གྱི་མཆོད་པ་མེད་པར་བྱས་པ་དང་གཏོར་བརླག་བཟོ་བའི་སྡིག་ཉེས་ཀྱི་སྐོར་དང་། གནས་དམ་པ་དང་མི་སྡེ་དམ་པར་རྡོག་བརྫིས་གཏོང་བའི་ཞལ་གཟིགས་ནི་ག་དུས་བར་དུ་གནས་འོང་ངམ་ཞེས་དྲིས་པ་ན།
DAN 8:14 ཁོང་གིས་འདི་སྐད་དུ། ནངས་དགོང་ཉིས་སྟོང་སུམ་བརྒྱའི་རྗེས་སུ་གནས་དེ་སླར་ཡང་དམ་པར་འགྱུར་ངེས་ཡིན་ཞེས་གསུངས་སོ། །
DAN 8:15 དཱ་ནེ་ཨེལ་བདག་གིས་ཞལ་གཟིགས་དེ་མཐོང་ནས་དེར་བརྟག་ཅིང་དཔྱོད་པའི་དུས་སུ། ལྟོས་དང་། མི་ཡི་བྱད་གཟུགས་ལྡན་པ་ཞིག་བདག་གི་མདུན་དུ་ཀེ་རེར་ལངས་འདུག་ལ།
DAN 8:16 ཡང་ཨུ་ལ་ཨི་ཡུར་བའི་འགྲམ་གྱི་མཚམས་ནས་མི་སྐད་ཅིག་གྲགས་འོངས་པ་ཐོས་ཤིང་དེ་ན་རེ། ཀྱེ་གབ་རི་ཨེལ། མི་འདི་ལ་ཞལ་གཟིགས་དེའི་དོན་མངོན་པར་མཛོད་ཅིག་ཅེས་སྨྲས་པས།
DAN 8:17 ཁོང་ནི་བདག་འགྲེང་སའི་གནས་སུ་སླེབས་ཤིང་བདག་འཇིགས་སྣང་ཆེན་པོ་སྐྱེས་པ་དང་གདོང་སར་བཏུད་ནས་བསྡད་པ་ལ། ཁོང་གིས་འདི་སྐད་དུ། ཀྱེ་མིའི་བུ། ཞལ་གཟིགས་དེ་ནི་དུས་ཀྱི་མཐའ་མའི་སྐོར་ཡིན་པ་རྟོགས་པར་གྱིས་ཤིག་ཅེས་གསུངས།
DAN 8:18 ཁོང་གིས་གཏམ་སྨྲ་བའི་དུས་སུ་བདག་ནི་གཉིད་ལྕི་པོ་ཁུགས་ཏེ་གདོང་སར་གཏད་ནས་བསྡད་པ་དང་། ཁོང་གིས་བདག་ལ་ཕྱག་གིས་རེག་ནས་ཡར་བསླངས་སོ། །
DAN 8:19 ཡང་ཁོང་གིས་འདི་སྐད་དུ། ལྟོས་དང་། བདག་གིས་ཁྱོད་ལ་དུས་ཀྱི་མཐའ་མའི་ཐུགས་ཁྲོའི་སྐོར་སྨྲ་ངེས་སོ། །གང་ལ་ཞེ་ན། ཞལ་གཟིགས་དེ་ནི་གཏན་ལ་ཕབ་པའི་དུས་ཀྱི་མཐའ་མ་དེའི་སྐོར་ཡིན་པས་སོ། །
DAN 8:20 ཁྱོད་ཀྱིས་མཐོང་བའི་ལུག་ཐུག་རྭ་ཅོ་གཉིས་ཅན་དེ་ནི་མཱ་ཏི་དང་ཏ་ཟིག་གཉིས་ཀྱི་རྒྱལ་པོ་ཡིན།
DAN 8:21 ཡང་ར་ཕོ་ར་རྩིད་མང་པོ་ཅན་དེ་ནི་གྷི་རི་སི་ཡུལ་གྱི་རྒྱལ་པོ་ཡིན་པ་དང་། དེའི་མིག་ཟུང་གི་བར་དུ་ཡོད་པའི་རྭ་ཅོ་ཆེན་པོ་དེ་ནི་དེའི་རྒྱལ་པོ་དང་པོ་ཡིན།
DAN 8:22 ཡང་རྭ་ཅོ་ཞིག་ཆག་པར་གྱུར་ཅིང་དེའི་ཤུལ་དུ་རྭ་ཅོ་གཞན་པ་བཞི་སྐྱེས་པ་དེ་ནི་རྒྱལ་ཁབ་དེ་ལས་རྒྱལ་ཁམས་བཞི་འབྱུང་བར་འགྱུར་བ་དེ་ཡིན་མོད། འོན་ཀྱང་དེ་རྣམས་ནི་ཁོའི་དབང་སྟོབས་ལས་བརྒལ་མི་སྲིད།
DAN 8:23 ཡང་རྒྱལ་ཁམས་དེ་རྣམས་ཀྱི་དུས་མཇུག་གྱེན་ལོག་པ་རྣམས་ཀྱི་ངན་སྤྱོད་ཚད་ལས་བརྒལ་བའི་དུས་སུ། གདོང་རིས་འཇིགས་སུ་རུང་བའི་རྒྱལ་པོ་ཞིག་འབྱུང་ཞིང་དེ་ནི་གཡོ་སྒྱུ་ཚ་པོ་ཞིག་ཡིན།
DAN 8:24 ཁོ་རང་དབང་སྟོབས་ཧ་ཅང་ཆེ་ནའང་དེ་ནི་རང་གི་མཐུ་སྟོབས་ལས་བྱུང་བ་མ་ཡིན། ཁོས་གཏོར་བརླག་སྐྱི་གཡའ་བ་གཏོང་ངེས་ལ། ཅི་བྱེད་འདོད་ན་དོན་ཀུན་ལྷུན་གྱིས་འགྲུབ་པར་མ་ཟད། སྟོབས་ཤུགས་ཆེ་བའི་མི་དང་མི་སྡེ་དམ་པ་རྣམས་ཀྱང་ཕམ་པར་རྒྱག་ངེས་ཡིན།
DAN 8:25 ཁོས་གཡོ་སྒྱུའི་སྦྱོར་བ་སྤེལ་ནས་གཞན་ལ་བསླུ་བྲིད་གཏོང་ཞིང་། སེམས་ལ་ཁེངས་དྲེགས་ཆེན་པོ་བཅངས་ནས་མི་ལ་མཉམ་འཇོག་མེད་དུས་མི་མང་པོ་རྩ་མེད་དུ་གཏོང་བ་དང་། རྒྱལ་པོ་ཀུན་གྱི་རྒྱལ་པོ་ལའང་རྒོལ་བར་འགྱུར་ཏེ། མི་མ་ཡིན་པ་ཞིག་གིས་ཁོ་གསོད་པའི་བར་དུ་དེ་ལྟར་བྱེད་དོ། །
DAN 8:26 ནངས་དགོང་གི་ཞལ་གཟིགས་དེ་བདེན་པ་ཡིན་ནའང་། ཁྱོད་ཀྱིས་ཞལ་གཟིགས་དེ་གང་སར་མི་སྒྲོག་པར་སྦོས་ཤིག གང་ལ་ཞེ་ན། དེ་ནི་མ་འོངས་པའི་ལོ་ཟླ་མང་པོ་ཞིག་གི་སྐོར་ཡིན་པས་སོ་ཞེས་གསུངས་སོ། །
DAN 8:27 དཱ་ནེ་ཨེལ་བདག་ནི་ཤིན་ཏུ་ངལ་བ་དང་། ཉིན་འགའ་ལ་ན་བའི་རྗེས་སུ་ཡར་ལངས་ནས་རྒྱལ་པོའི་ལས་དོན་བསྒྲུབས་ནའང་། ཞལ་གཟིགས་དེ་ལ་བདག་ཧ་ལས་ཤིང་དེའི་དོན་རྟོགས་མ་ཐུབ་བོ། །
DAN 9:1 དེ་ཡང་མཱ་ཏི་པ་ཨ་ཧཱ་ཝེ་རོ་ཡི་སྲས་དར་ཡཱ་ཞེས་བྱ་བ་རྒྱལ་པོར་བསྐོས་ནས་ཀལ་དི་པའི་རྒྱལ་ཁམས་ལ་སྲིད་བསྐྱངས་པའི་ལོ་དང་པོ་སྟེ།
DAN 9:2 ཁོ་རྒྱལ་པོར་བསྡད་པའི་སྲིད་ལོ་དང་པོར། གསུང་རབ་ལས་དཀོན་མཆོག་ཡ་ཝཱེས་ལུང་སྟོན་པ་ཡེ་རེམ་ཡཱ་ལ་གནང་བའི་བཀའ་ལྟར། ཡེ་རུ་སཱ་ལེམ་གྲོང་ཁྱེར་ལོ་བདུན་ཅུའི་རིང་ལ་ཞིག་རོར་ལུས་སྲིད་པ་དཱ་ནེ་ཨེལ་བདག་གིས་རྟོགས་བྱུང་ངོ་། །
DAN 9:3 དེ་བས་བདག་གིས་བློ་རྩེ་གཅིག་སྒྲིམ་གྱིས་སྨྱུང་གནས་བསྲུངས་པ་དང་། ལུས་ལ་རྩིད་རས་གྱོན་ཏེ་མགོ་ལ་ཐལ་བ་གཏོར་ནས་གཙོ་བོ་དཀོན་མཆོག་ལ་སྨོན་ལམ་བཏབ་ཅིང་ཞུ་བ་ཞུས་པའོ། །
DAN 9:4 བདག་གིས་རང་གི་དཀོན་མཆོག་ཡ་ཝཱེ་ལ་སྨོན་ལམ་བཏབ་ཅིང་མཐོལ་བཤགས་ཕུལ་ནས་འདི་ལྟར། ཀྱེ་གཙོ་བོ་ལགས། ཁྱེད་ནི་མཆོག་ཏུ་གྱུར་པ་དང་གུས་འོས་པའི་དཀོན་མཆོག་སྟེ། ཁྱེད་ལ་དགའ་ཞིང་ཁྱེད་ཀྱི་བཀའ་སྲུང་མཁན་རྣམས་ལ་ཞལ་ཆད་བཞིན་དུ་བྱམས་པ་གནང་མཁན་ཡིན་ནོ། །
DAN 9:5 ངེད་ཅག་གིས་སྡིག་པ་བསགས་ནས་མ་རུང་བ་སྤྱད་པ་དང་། ལས་ངན་པ་དང་བཅས་ཁྱེད་ལ་ངོ་ལོག་བྱས་ནས་ཁྱེད་ཀྱི་བཀའ་རྒྱ་དང་ཁྲིམས་སྲོལ་ལ་འགལ་ཞིང་།
DAN 9:6 ཁྱེད་ཀྱི་ཞབས་ཕྱི་ལུང་སྟོན་པ་རྣམས་ཀྱིས་ཁྱེད་ཀྱི་མཚན་གྱི་སྒོ་ནས་ངེད་ཅག་གི་རྒྱལ་པོ་དང་སྐུ་དྲག ཕ་མེས། ཡུལ་མི་ཐམས་ཅད་ལ་གནང་བའི་བཀའ་ལ་མ་མཉན་ཏོ། །
DAN 9:7 ཀྱེ་གཙོ་བོ་ལགས། ཁྱེད་ནི་དྲང་བདེན་ཡིན་ནོ། །འོན་ཀྱང་དེ་རིང་ཡ་ཧུ་དཱ་པ་རྣམས་དང་ཡེ་རུ་སཱ་ལེམ་གྱི་ཡུལ་མི་རྣམས་དང་། ཁྱེད་ཀྱིས་རྒྱལ་ཁབ་སོ་སོར་གཏོར་བའི་ཡེས་ར་ཨེལ་ཡུལ་དང་ཐག་ཉེ་རིང་ཀུན་གྱི་ཡེས་ར་ཨེལ་པ་ཐམས་ཅད་དེ། ངེད་ཅག་ཤིན་ཏུ་ངོ་གནོངས་པ་ཡིན། རྒྱུ་མཚན་ནི་ངེད་ཅག་ཚང་མ་ཁྱེད་ལ་བློ་མ་དཀར་བས་སོ། །
DAN 9:8 ཀྱེ་དཀོན་མཆོག་ཡ་ཝཱེ་ལགས། ངེད་ཅག་གིས་ཁྱེད་ལ་འགལ་བའི་སྡིག་པ་བྱས་པའི་རྐྱེན་གྱིས། ངེད་ཅག་དང་ངེད་ཅག་གི་རྒྱལ་པོ། སྐུ་དྲག ཕ་མེས་བཅས་ལ་ངོ་ཚ་ཆེན་པོ་ཡོད།
DAN 9:9 ངེད་ཅག་གིས་རང་གི་གཙོ་བོ་དཀོན་མཆོག་ལ་གྱེན་ལོག་བྱས་ནའང་། ཁོང་ནི་སྔར་བཞིན་སྙིང་རྗེ་ཅན་ཡིན་ལ་བཟོད་སྒོམ་གནང་བར་མཉེས་པའོ། །
DAN 9:10 ངེད་ཅག་གིས་རང་གི་དཀོན་མཆོག་ཡ་ཝཱེའི་བཀའ་ལ་མ་མཉན་པ་དང་། ཁོང་གིས་ཉིད་ཀྱི་ཞབས་ཕྱི་ལུང་སྟོན་པ་རྣམས་བརྒྱུད་ནས་གནང་བའི་བཀའ་ཁྲིམས་མ་བརྩིས་སོ། །
DAN 9:11 ཡེས་ར་ཨེལ་པ་ཐམས་ཅད་ཁྱེད་ཀྱི་བཀའ་ཁྲིམས་དང་འགལ་ནས་ཁྱེད་དང་བྲལ་ཞིང་། ཁྱེད་ཀྱི་བཀའ་ལ་མ་མཉན་པས་ན། ཁྱེད་ཀྱི་ཞབས་ཕྱི་མོ་ཤེའི་བཀའ་ཁྲིམས་ནང་དུ་བཀོད་པའི་དམོད་པ་དང་མནའ་ཚིག་རྣམས་ངེད་ཅག་གི་སྟེང་དུ་བབས་པ་རེད། གང་ལ་ཞེ་ན། ངེད་ཅག་གིས་དངོས་གནས་ཁྱེད་དང་འགལ་བའི་སྡིག་པ་བྱས་པས་སོ། །
DAN 9:12 ཁྱེད་ཀྱིས་ཉིད་ཀྱི་ལུང་བསྟན་འགྲུབ་པར་མཛད་པ་དང་། ངེད་ཅག་དང་ངེད་ཅག་གི་འགོ་དཔོན་རྣམས་ལ་གནང་བའི་བཀའ་ལྟར་བསྒྲུབས་ཤིང་ངེད་ཅག་ལ་གོད་ཆགས་ཆེན་པོ་བྱུང་དུ་བཅུག ཡེ་རུ་སཱ་ལེམ་ལ་བྱུང་བའི་གོད་ཆགས་འདི་ལྟ་བུ་ནི་གནམ་འོག་ཀུན་ཏུ་དུས་ནམ་ཡང་བྱུང་མ་མྱོང་ངོ་། །
DAN 9:13 གོད་ཆགས་དེ་ཐམས་ཅད་ནི་ཏག་ཏག་མོ་ཤེའི་བཀའ་ཁྲིམས་ནང་དུ་བཀོད་པ་བཞིན་ངེད་ཅག་གི་སྟེང་དུ་བྱུང་ནའང་། ངེད་ཅག་གིས་ད་དུང་རང་ཉིད་སྡིག་པ་དང་བྲལ་ནས་ཁྱེད་ཀྱི་བདེན་པའི་བཀའ་རྟོགས་པའི་ཆེད་དུ་རང་གི་དཀོན་མཆོག་ཡ་ཝཱེ་ལ་སྐྱབས་འཇུག་མ་ཞུས།
DAN 9:14 དེ་བས་དཀོན་མཆོག་ཡ་ཝཱེས་ཐེ་ཚོམ་སྤུ་ཙམ་ཡང་མེད་པར་ངེད་ཅག་གི་སྟེང་དུ་གོད་ཆགས་འབྱུང་བར་མཛད་དོ། །གང་ལ་ཞེ་ན། ངེད་ཅག་གི་དཀོན་མཆོག་ཡ་ཝཱེ་ནི་དོན་ཀུན་ལ་ཐུགས་དྲང་པོ་ལགས་པ་དང་། ངེད་ཅག་གིས་ཁོང་གི་བཀའ་གསུང་ལ་རྣ་བ་མ་གཏད་དོ། །
DAN 9:15 ཀྱེ། ངེད་ཅག་གི་གཙོ་བོ་དཀོན་མཆོག་ལགས། ཁྱེད་ཀྱིས་མཐུ་སྟོབས་ཆེན་པོའི་ཕྱག་གིས་ཉིད་ཀྱི་མི་སྡེ་ཨེ་ཅིབ་ཡུལ་ནས་ཕྱི་རུ་ཁྲིད་འོངས་ནས། དེ་རིང་ཉིན་མོའི་བར་དུ་རང་ཉིད་མཚན་སྙན་གྲགས་རྒྱས་པར་མཛད་མོད། ངེད་ཅག་གིས་སྡིག་པ་བསགས་ནས་སྤྱོད་ངན་སྤྱད་པ་རེད།
DAN 9:16 ཀྱེ་གཙོ་བོ་ལགས། ཁྱེད་ཀྱི་དྲང་བདེན་ཐམས་ཅད་ལ་གཞིགས་ནས་ཁྲོ་གཏུམ་དང་ཞེ་སྡང་ཡོད་ཚད་ཉིད་ཀྱི་གྲོང་ཁྱེར་ཡེ་རུ་སཱ་ལེམ་སྟེ་ཉིད་ཀྱི་རི་བོ་དམ་པ་ལས་ཞི་བར་གྱུར་ཅིག ངེད་རྣམས་ཀྱི་སྡིག་པ་དང་ངེད་ཅག་གི་ཕ་མེས་རྣམས་ཀྱིས་མ་རུང་བ་སྤྱད་པའི་དབང་གིས། ཡེ་རུ་སཱ་ལེམ་དང་ཁྱེད་ཀྱི་མི་སྡེ་ངེད་རྣམས་ནི་ཉེ་འཁོར་ལ་གནས་པའི་མི་རྣམས་ཀྱི་འཕྱ་སྨོད་བྱེད་ཡུལ་དུ་གྱུར་ཏོ། །
DAN 9:17 ཀྱེ། ངེད་ཅག་གི་དཀོན་མཆོག་ལགས། ད་ལྟ་ཉིད་ཀྱི་ཞབས་ཕྱིའི་གསོལ་འདེབས་དང་ཞུ་བ་ལ་གསན་པར་མཛོད། ཀྱེ་གཙོ་བོ་ལགས། ཞིག་རོར་ལུས་པའི་གནས་དམ་པ་འདིར་ཉིད་ཀྱི་དོན་དུ་ཞལ་མདངས་སྤྲོ་བར་མཛོད་ཅིག
DAN 9:18 ཀྱེ་ང་ཡི་དཀོན་མཆོག་ལགས། ཁྱེད་ཀྱི་སྙན་གྱིས་གསན་པར་མཛོད། ཉིད་ཀྱི་སྤྱན་ཟུང་གིས་ངེད་ཅག་གི་ཞིག་རོ་དང་ཁྱེད་ཀྱི་མཚན་གྱིས་འབོད་པའི་གྲོང་ཁྱེར་དེ་ལ་གཟིགས་སུ་གསོལ། ངེད་རྣམས་ཀྱིས་ཁྱེད་ལ་ཞུ་གསོལ་འབུལ་བའི་རྒྱུ་མཚན་ནི་ངེད་ཅག་ལ་དྲང་བདེན་ཡོད་པས་མ་ཡིན་པར་ཁྱེད་ལ་སྙིང་རྗེ་ཆེན་པོ་མངའ་བས་ཡིན་ནོ། །
DAN 9:19 ཀྱེ་གཙོ་བོ་ལགས། ཁྱེད་ཀྱིས་གསན་རོགས་གནང་། ཀྱེ་གཙོ་བོ་ལགས། ཁྱེད་ཀྱིས་དགོངས་ཡངས་གནང་བར་ཞུ། ཀྱེ་གཙོ་བོ་ལགས། ཁྱེད་ཀྱིས་ཐུགས་མཉམ་བཞེས་ཏེ་བསྒྲུབ་པར་མཛད་རོགས། ཀྱེ་ང་ཡི་དཀོན་མཆོག་ལགས། ཁྱེད་ཉིད་ཀྱི་ཕྱིར་དུ་འགོར་འགྱང་མི་བྱེད་པར་ཞུ། རྒྱུ་མཚན་ནི་གྲོང་ཁྱེར་འདི་དང་མི་སྡེ་འདི་ནི་ཁྱེད་ཀྱི་མཚན་ནས་འབོད་པའི་ཕྱིར་རོ་ཞེས་ཞུས་པའོ། །
DAN 9:20 ངས་གཏམ་སྨྲས་ནས་གསོལ་བ་འདེབས་བཞིན་པ་དང་། རང་གི་སྡིག་པ་དང་ངའི་སྤུན་ཟླ་ཡེས་ར་ཨེལ་པ་རྣམས་ཀྱི་སྡིག་པར་མཐོལ་བཤགས་བྱས་ཏེ། ང་ཡི་དཀོན་མཆོག་གི་རི་བོ་དམ་པའི་ཆེད་དུ་རང་གི་དཀོན་མཆོག་ཡ་ཝཱེ་ལ་ཞུ་བ་འབུལ་བའི་དུས་དང་།
DAN 9:21 བདག་གིས་གསོལ་བ་འདེབས་བཞིན་པའི་སྒང་ལ། དེ་སྔར་ཞལ་གཟིགས་ཁྲོད་དུ་མཐོང་བའི་སྐྱེས་བུ་གབ་རི་ཨེལ་དེ་ཉིད་དགོང་ཁའི་མཆོད་པ་འབུལ་བའི་དུས་ཙམ་ལ་མྱུར་དུ་འཕུར་འོངས་ནས་བདག་གི་གམ་དུ་སླེབས་པ་དང་།
DAN 9:22 བདག་ལ་སློབ་སྟོན་གནང་སྟེ་འདི་སྐད་དུ། ཀྱེ་དཱ་ནེ་ཨེལ། བདག་ནི་ད་ལྟ་ཁྱོད་ལ་རྣམ་དཔྱོད་ཀྱི་རྩལ་དང་ཤེས་རབ་གནང་བར་འོངས་པ་ཡིན།
DAN 9:23 ཁྱོད་ཀྱིས་ཞུ་བའི་འགོ་བརྩམས་མ་ཐག་ཏུ་དཀོན་མཆོག་གིས་བཀའ་གནང་ངོ་། །ད་ལྟ་བདག་གིས་ཁྱོད་ལ་སྨྲ་བར་བྱ་སྟེ། ཁྱོད་ལ་ཤིན་ཏུ་གཅེས་པས་ན་ཁྱོད་ཀྱིས་གསུང་དེར་མཉམ་བཞག་ནས་ཞལ་གཟིགས་དེ་རྟོགས་པར་གྱུར་ཅིག
DAN 9:24 ཁྱོད་ཀྱི་མི་སྡེ་དང་ཁྱོད་ཀྱི་གྲོང་ཁྱེར་དམ་པའི་ཆེད་དུ་བདུན་ཕྲག་བདུན་ཅུ་གཏན་ལ་ཕབ་ཡོད་དེ། ཉེས་སྐྱོན་མཚམས་འཇོག་པ་དང་། སྡིག་པ་སྤྱོད་པ་མཇུག་བསྡུ་བ། ངན་པ་མཐོལ་བཤགས་བྱེད་པ། དུས་གཏན་གྱི་དྲང་བདེན་ནང་དུ་འདྲེན་པ། ཞལ་གཟིགས་དང་ལུང་བསྟན་གཉིས་ཀ་འགོག་པ། གནས་དམ་མཆོག་དེར་སྣུམ་གྱིས་འབྱུག་པ་བཅས་བྱའོ། །
DAN 9:25 ཡང་འདི་རྟོགས་ནས་ཧ་གོ་བར་གྱིས། ཡེ་རུ་སཱ་ལེམ་སླར་གསོ་དང་ཡང་བསྐྱར་བཞེང་བའི་བཀའ་བབས་པ་ནས་དེར་མཱ་ཤི་ཀ་སྟེ་རྒྱལ་པོ་དེ་ཉིད་ཕེབས་པའི་བར་དུ་བདུན་ཕྲག་བདུན་དང་། ཡང་བདུན་ཕྲག་དྲུག་ཅུ་རེ་གཉིས་ཡོད་པ་དང་། ཡེ་རུ་སཱ་ལེམ་ནི་ཐ་ན་ཐང་ཆེན་དང་འོབས་དོང་དང་བཅས་པ་ཡང་བསྐྱར་བཞེང་ངེས་ཡིན་ལ། དེ་ནི་དཀའ་སྡུག་ཆེ་བའི་དུས་སྐབས་ཤིག་གོ །
DAN 9:26 བདུན་ཕྲག་དྲུག་ཅུ་རེ་གཉིས་རྫོགས་རྗེས། མཱ་ཤི་ཀ་ཁོང་ཉིད་བཀྲོངས་ནས་ཅི་ཡང་མེད་པར་འགྱུར་ཞིང་། འོང་བར་འགྱུར་བའི་རྒྱལ་པོ་དེའི་འབངས་མི་རྣམས་ཀྱིས་གྲོང་ཁྱེར་འདི་དང་གནས་དམ་པ་དེ་འཇིག་པར་བྱེད་དོ། །དེའི་མཇུག་འབྲས་ནི་ཆུ་ལོག་གིས་ཁྱེར་བ་དང་འདྲ་ཞིང་། མཐའ་མའི་བར་དུ་དམག་འཁྲུག་འབྱུང་ངེས་ཡིན། ཞིག་རོར་ལུས་པའི་དོན་ལ་ཟློག་ཐབས་མེད་དོ། །
DAN 9:27 བདུན་ཕྲག་གཅིག་གི་རིང་ལ། ཁོས་མི་མང་པོར་མནའ་འབྲེལ་འཛུགས་ངེས་པ་དང་། བདུན་ཕྲག་གཅིག་གི་ཕྱེད་ཀར་མཆོད་པ་དང་མཆོད་རྫས་མེད་པར་གཏོང་ངོ་། །ཁོས་ད་དུང་མཆོད་ཁང་གི་ནང་དུ་ སྟོང་པར་བྱེད་པའི་སྐྱུག་བྲོ་བ་དེ་བཞེང་བར་འགྱུར་བ་དང་། སྟོང་པར་བྱེད་མཁན་དེའི་སྟེང་དུ་གཏན་ལ་ཁེལ་བའི་མཇུག་འབྲས་འབབ་པའི་བར་དུ་དེ་བཞིན་ནོ་ཞེས་གསུངས་སོ། །
DAN 10:1 ཏ་ཟིག་རྒྱལ་པོ་ཀོ་རེས་ཀྱི་སྲིད་ལོ་གསུམ་པར། པེལ་ཏེ་ཤཱ་ཙར་ཞེས་ཀྱང་འབོད་པའི་དཱ་ནེ་ཨེལ་ལ་དོན་ཞིག་མངོན་པར་མཛད་པ་དང་། དེ་ནི་དོན་དངོས་ཡིན་ཞིང་དམག་འཁྲུག་ཆེན་པོ་ཞིག་གི་སྐོར་ཡིན་ལ། དཱ་ནེ་ཨེལ་གྱིས་དོན་དེ་ཤེས་པ་དང་ཞལ་གཟིགས་དེར་རྒྱུས་ཡོད་པ་ཡིན།
DAN 10:2 སྐབས་དེར་དཱ་ནེ་ཨེལ་བདག་ནི་བདུན་ཕྲག་གསུམ་གྱི་རིང་ལ་སེམས་སྡུག་གིས་ཁེངས་ཤིང་།
DAN 10:3 ངས་ཟས་ཞིམ་པོ་གང་ཡང་མ་ཟོས་ལ། རྒུན་ཆང་དང་ཤ་ཚིལ་གང་ལའང་ཁ་མ་རེག བདུན་ཕྲག་ཧྲིལ་པོ་གསུམ་གྱི་རིང་དུ་རང་གི་ལུས་ལ་སྣུམ་ཡང་མ་བྱུགས་སོ། །
DAN 10:4 ཟླ་བ་དང་པོའི་ཚེས་ཉེར་བཞིའི་ཉིན། ང་རང་ཧི་དཱི་ཀེལ་གཙང་པོ་ཆེན་པོའི་འགྲམ་ངོགས་སུ་བསྡད་ཅིང་།
DAN 10:5 སྐབས་དེར་བདག་གིས་མགོ་ཡར་བཀྱགས་ནས་བལྟས་པ་ན། ཀྱེ་མ། སོ་རས་ཀྱི་ན་བཟའ་མནབས་པ་དང་སྐུ་རྐེད་ལ་ཨུ་ཕཱ་ཟིའི་གསེར་བཙོ་མའི་སྐ་རགས་བཅིངས་པའི་སྐྱེས་བུ་ཞིག་ཡོད་དེ།
DAN 10:6 ཁོང་གི་སྐུ་ལུས་ནི་བཻཌཱུརྱ་ལྗང་སེར་དང་མཚུངས་ཤིང་། ཞལ་རས་ནི་གློག་དམར་འཁྱུག་པ་དང་འདྲ་ལ། སྤྱན་ཟུང་ནི་མེ་ཡི་དཔལ་འབར་དང་མཚུངས། ཁོང་གི་ཕྱག་ངར་དང་ཞབས་རྐང་ནི་འོད་ཆེམ་ཆེམ་འཕྲོ་བའི་ལི་དང་མཚུངས། གསུང་སྨྲ་བའི་སྐད་ནི་མི་ཚོགས་ཀྱིས་སྐད་སྒྲ་སྒྲོག་པ་དང་མཚུངས་སོ། །
DAN 10:7 དཱ་ནེ་ཨེལ་བདག་གཅིག་པུས་ཞལ་གཟིགས་དེ་མཐོང་བ་ལས། བདག་དང་ལྷན་དུ་སྡོད་པའི་མི་གཞན་རྣམས་ཀྱིས་མཐོང་མ་སོང་མོད། འོན་ཀྱང་ཁོ་རྣམས་དངངས་སྐྲག་ཆེན་པོས་ཟིན་ཅིང་བྲོས་ནས་ཡིབས་པའོ། །
DAN 10:8 དེའི་ཕྱིར་བདག་གཅིག་པུ་གནས་དེར་ལུས་ཤིང་། བདག་གིས་ཞལ་གཟིགས་ངོ་མཚར་ཅན་དེ་མཐོང་བ་ན། ལུས་སྟོབས་ཟད་ཅིང་ངོ་མདངས་ཉམས་ནས་སྟོབས་ཤུགས་ཅི་ཡང་མེད་པར་གྱུར་ཏོ། །
DAN 10:9 དེ་ནས་ངས་ཁོང་གི་གསུང་སྐད་ཐོས་བྱུང་ལ། ཁོང་གི་གསུང་སྐད་ཐོས་པ་ཙམ་གྱིས་བདག་ལ་གཉིད་ལྕི་མོ་ཁུགས་ཏེ་གདོང་སར་བཏུད་ནས་བསྡད་དོ། །
DAN 10:10 ལྟོས་དང་། ཕྱག་གིས་བདག་ལ་རེག་ཅིང་། བདག་པུས་མོ་དང་ལག་མཐིལ་ལ་བརྟེན་ནས་ཡར་ལང་དུ་བཅུག
DAN 10:11 ཁོང་གིས་བདག་ལ་འདི་སྐད་དུ། ཀྱེ། ཤིན་ཏུ་གཅེས་པའི་སྐྱེས་བུ་དཱ་ནེ་ཨེལ། ངས་ཁྱོད་ལ་བརྗོད་པའི་ཚིག་རྣམས་རྟོགས་པར་གྱིས་དང་། བདག་ནི་ད་ལྟ་ཁྱོད་ཀྱི་གམ་དུ་མངགས་པ་ཡིན་པས་ཁྱོད་ཡར་ལོངས་ཤིག་ཅེས་གསུངས་སོ། །ཁོང་གིས་བདག་ལ་དེ་ལྟར་གསུང་བའི་དུས་སུ། བདག་ནི་སྐྲག་སྐྲག་འདར་འདར་ངང་ཡར་ལངས་པ་ཡིན།
DAN 10:12 ཡང་ཁོང་གིས་འདི་སྐད་དུ། དཱ་ནེ་ཨེལ་ཁྱོད་མ་སྐྲག་ཅིག གང་ལ་ཞེ་ན། ཁྱོད་ཀྱིས་དོན་འདི་རྣམས་རྟོགས་པར་སེམས་ཐག་བཅད་པ་དང་ཡང་རང་གི་དཀོན་མཆོག་གི་སྤྱན་སྔར་ཁེངས་སྐྱུང་བྱས་པའི་ཉིན་དང་པོ་ནས་བཟུང་། ཁྱོད་ཀྱིས་སྨོན་ལམ་བཏབ་པ་རྣམས་དཀོན་མཆོག་གིས་གསན་ཡོད་པས་ན། བདག་ནི་ཁྱོད་ཀྱི་སྨོན་ལམ་ལ་ལན་འདེབས་པའི་ཆེད་དུ་འདིར་འོངས་པ་ཡིན།
DAN 10:13 འོན་ཀྱང་ཏ་ཟིག་རྒྱལ་ཁམས་ཀྱི་སྐུ་སྲུང་ཕོ་ཉས་ཉིན་ཞག་ཉེར་གཅིག་གི་རིང་ལ་ང་རང་བཀག་བྱུང་། དེ་ནས་ཕོ་ཉའི་མཆོག་མེའ་ཀཱ་ཨེལ་བདག་གི་དཔུང་རོགས་སུ་འོངས་པ་དང་། ང་རང་ཏ་ཟིག་གི་རྒྱལ་པོ་རྣམས་དང་མཉམ་དུ་དེར་བསྡད་པ་ཡིན།
DAN 10:14 ད་ལྟ་བདག་འོངས་པ་ནི་ཁྱོད་ཀྱིས་རང་གི་མི་སྡེ་ལ་མཐའ་མའི་ཉིན་མོ་དག་ལ་ཅི་ཞིག་འབྱུང་བར་འགྱུར་བ་དེ་རྟོགས་པའི་ཆེད་དུ་ཡིན། རྒྱུ་མཚན་ནི་ཞལ་གཟིགས་དེ་ནི་འབྱུང་འགྱུར་གྱི་ཉིན་མོ་དག་ལ་འབྲེལ་བ་ཡོད་པས་སོ་ཞེས་གསུངས་སོ། །
DAN 10:15 ཁོང་གིས་བདག་ལ་གཏམ་འདི་དག་གླེང་བའི་སྐབས་སུ་ང་རང་གདོང་སར་བཏུད་ནས་བསྡད་ཅིང་ལྐུག་པར་གྱུར་ཏོ། །
DAN 10:16 ཡང་ལྟོས་དང་། མིའི་བུ་དང་འདྲ་བ་ཞིག་གིས་བདག་གི་མཆུ་སྒྲོས་ལ་རེག་པ་དང་། བདག་གིས་ཁ་གདངས་ནས་ངའི་མདུན་དུ་ལངས་འདུག་པ་དེ་ལ་གཏམ་སྨྲས་ཏེ། ཀྱེ་ང་ཡི་ཇོ་བོ་ལགས། ཞལ་གཟིགས་དེའི་རྐྱེན་གྱིས་བདག་ལ་སྡུག་བསྔལ་ཆེ་ཞིང་སྟོབས་ཤུགས་ཅི་ཡང་མེད་པར་གྱུར།
DAN 10:17 བདག་གི་ཇོ་བོའི་ཞབས་ཕྱི་བདག་གིས་ཇོ་བོ་ཁྱེད་ལ་གླེང་མོལ་བྱེད་ག་ལ་རུང་། ད་ལྟ་བདག་གི་ལུས་ཡོངས་ལ་སྟོབས་ཤུགས་ཅི་ཡང་མེད་ལ་དབུགས་ཀྱང་ཆད་ལ་ཁད་ཡོད་ཅེས་ཞུས་པ་ན།
DAN 10:18 ཡང་མི་ཡི་བྱད་གཟུགས་དང་མཚུངས་པ་དེས་བདག་ལ་རེག་ནས་སྟོབས་ཤུགས་ཡོད་པར་མཛད་དོ། །
DAN 10:19 ཁོང་གིས་འདི་སྐད་དུ། ཀྱེ། ཤིན་ཏུ་གཅེས་པའི་སྐྱེས་བུ་ཁྱོད་མ་འཇིགས་ཤིག ཁྱོད་རང་བདེ་བར་སྨོན། ད་ནི་ཁྱོད་རང་བློ་རྩ་བརྟན་པོ་གྱིས་ཤིག ཁྱོད་རང་བློ་རྩ་བརྟན་པོ་གྱིས་ཤིག་ཅེས་གསུངས་སོ། །ཁོང་གིས་བདག་ལ་དེ་སྐད་གསུང་བའི་མོད་ལ། བདག་ནི་སྟོབས་དང་ལྡན་པར་གྱུར་ཏེ་འདི་ལྟར། བདག་གི་ཇོ་བོ་ལགས། ཁྱེད་ལས་བདག་ལ་སྟོབས་ཤུགས་འཛོམས་པ་ཡིན་པས། ཁྱེད་ཀྱིས་གསུང་གནང་བར་མཛོད་ཅེས་ཞུས་པའོ། །
DAN 10:20 དེ་ནས་ཁོང་གིས་འདི་སྐད་དུ། ང་ཅིའི་ཕྱིར་ཁྱོད་ཀྱི་གམ་དུ་འོངས་པ་ཁྱོད་ཀྱིས་ཤེས་སམ། ད་ལྟ་བདག་ནི་ཏ་ཟིག་གི་སྐུ་སྲུང་ཕོ་ཉར་འཐབ་མོ་བྱེད་དུ་འགྲོ་བ་ཡིན། ང་རང་སོང་རྗེས་གྷི་རི་སི་ཡི་སྐུ་སྲུང་ཕོ་ཉ་ཡོང་ངེས་ཡིན།
DAN 10:21 ཐོག་མར་བདེན་པའི་གསུང་རབ་ཏུ་ཅི་ཞིག་བཀོད་ཡོད་པ་དེ་བདག་གིས་ཁྱོད་ལ་སྟོན་པར་བྱ། ཁྱོད་ཀྱི་སྐུ་སྲུང་ཕོ་ཉ་མེའ་ཀཱ་ཨེལ་ལས་གཞན་བདག་ལ་རོགས་བྱས་ནས་བདག་དང་མཉམ་དུ་དེ་དག་ལ་འགོག་རྒོལ་བྱེད་མཁན་གཅིག་ཀྱང་མེད་དོ་ཞེས་གསུངས་སོ། །
DAN 11:1 ཡང་འདི་སྐད་དུ། མཱ་ཏི་པ་དར་ཡཱ་ཡིས་སྲིད་སྐྱོང་བའི་ལོ་དང་པོ་དེར། བདག་ཡར་ལངས་ནས་མེའ་ཀཱ་ཨེལ་ལ་སྲུང་སྐྱོབ་བྱས་ཏེ་ཁོང་ལ་སྟོབས་ཤུགས་འཛོམས་པར་བྱས།
DAN 11:2 ད་ལྟ་བདག་གིས་ཁྱོད་ལ་བདེན་པ་ཉིད་དེ་འཆད་པར་བྱ་སྟེ། ལྟོས་དང་། ཏ་ཟིག་ཡུལ་ནས་ད་དུང་རྒྱལ་པོ་གསུམ་འབྱུང་བར་འགྱུར་ཞིང་། རྒྱལ་པོ་བཞི་པ་དེ་ནི་གཞན་ཀུན་ལས་ཀྱང་ཕྱུག་པོར་འགྱུར་ངེས་ཡིན། ཁོ་རང་ཕྱུག་པོ་ཡིན་པའི་རྐྱེན་གྱིས་སྟོབས་ཤུགས་ཅན་དུ་གྱུར་རྗེས། རྒྱལ་ཁབ་སོ་སོར་ངན་སྐུལ་བྱས་ཏེ་གྷི་རི་སི་རྒྱལ་ཁམས་ལ་རྒོལ་བར་བྱེད་དོ། །
DAN 11:3 དེ་ནས་རྒྱལ་པོ་དཔའ་རྒོད་ཅིག་ཐོན་ཏེ་དབང་ཆེན་པོས་སྲིད་འཛིན་ཞིང་གང་འདོད་ལྟར་བསྒྲུབ་ངེས་ཡིན།
DAN 11:4 ཁོ་རང་དར་རྒྱས་སུ་འགྲོ་བའི་དུས་སུ། ཁོའི་རྒྱལ་ཁམས་འཇིག་ནས་ཕྱོགས་བཞི་རུ་འཐོར་བར་འགྱུར་ལ། དེ་ནི་ཁོའི་རིགས་རྒྱུད་ལ་མི་གཏོགས་ཤིང་རྒྱལ་ཁམས་ཀྱི་སྟོབས་ཤུགས་ཀྱང་ཁོས་དབང་སྒྱུར་བའི་སྐབས་ལ་མི་དོའོ། །ཁོའི་རྒྱལ་ཁམས་རྩ་བ་ནས་ཕྱུང་སྟེ་རིགས་རྒྱུད་གཞན་དག་ལ་གཏོགས་པར་འགྱུར་རོ། །
DAN 11:5 དེ་ཡང་ལྷོ་ཕྱོགས་ཀྱི་རྒྱལ་པོ་དེ་སྟོབས་དང་ལྡན་པར་འགྱུར་མོད། འོན་ཀྱང་ཁོའི་དམག་དཔོན་ནང་གི་གཅིག་ནི་ཁོ་ལས་ཀྱང་སྟོབས་དང་ལྡན་པར་འགྱུར་ཞིང་། དེས་སྲིད་དབང་འཛིན་པ་དང་དབང་ཤུགས་ཤིན་ཏུ་ཆེན་པོར་འགྱུར་རོ། །
DAN 11:6 ལོ་མང་པོ་འདས་རྗེས། ལྷོ་ཕྱོགས་ཀྱི་རྒྱལ་པོའི་སྲས་མོ་ནི་བྱང་ཕྱོགས་ཀྱི་རྒྱལ་པོའི་དྲུང་དུ་སོང་སྟེ་འབྲེལ་ལམ་ཡག་པོ་བཙུགས་ནས་ཕན་ཚུན་མནའ་འབྲེལ་དུ་འགྱུར་མོད། འོན་ཀྱང་ཁོ་མོའི་དབང་སྟོབས་རྒྱུན་འཁྱོངས་བྱེད་མི་ཐུབ་པ་དང་། རྒྱལ་པོ་དང་ཁོའི་སྟོབས་ཤུགས་ཀྱང་རྒྱུན་འཁྱོངས་བྱེད་མི་ཐུབ་བོ། །བུད་མེད་འདི་དང་ཁོ་མོ་ཁྲིད་འོང་མཁན་དང་། ཁོ་མོའི་ཕ་དང་། ཁོ་མོར་རོགས་བྱེད་མཁན་བཅས་ཐམས་ཅད་གསོད་པར་འགྱུར་རོ། །
DAN 11:7 ཁོ་མོའི་ཁྱིམ་རྒྱུད་ལས་བུ་ཞིག་ཐོན་ཏེ་རྒྱལ་སྲིད་འཛིན་པར་འགྱུར་ཞིང་། ཁོས་དམག་དཔུང་ཁྲིད་ནས་བྱང་ཕྱོགས་ཀྱི་རྒྱལ་པོའི་བཙན་རྫོང་དུ་ལྷགས་ཏེ། དེ་རྣམས་ལ་རྒོལ་ནས་རྒྱལ་ཁ་ལེན་པར་འགྱུར།
DAN 11:8 ཡང་ཁོས་དེ་རྣམས་ཀྱི་ལྷ་སྐུ་དང་བླུགས་སྐུ། གསེར་དང་དངུལ་གྱི་དངོས་པོ་རྣམས་ཀྱང་ཕྲོགས་ནས་ཨེ་ཅིབ་ཡུལ་དུ་འཁྱེར་འགྲོ་ཞིང་། དེའི་རྗེས་ཀྱི་ལོ་འགའ་ཤས་རིང་བྱང་ཕྱོགས་ཀྱི་རྒྱལ་པོར་ངོ་རྒོལ་མི་བྱེད་པར་བསྐྱུར་ངེས་ཡིན།
DAN 11:9 དེའི་རྗེས་སུ་བྱང་ཕྱོགས་ཀྱི་རྒྱལ་པོས་ངེས་པར་ལྷོ་ཕྱོགས་ཀྱི་རྒྱལ་པོའི་མངའ་ཁོངས་ལ་རྒོལ་བར་བྱེད་མོད། འོན་ཀྱང་རང་གི་ཡུལ་དུ་ཕྱིར་ལོག་པར་འགྱུར།
DAN 11:10 བྱང་ཕྱོགས་ཀྱི་རྒྱལ་སྲས་རྣམས་ཀྱིས་དམག་འཁྲུག་སློང་ཞིང་དམག་དཔུང་ཆེན་པོ་བསྡུས་ཏེ། དེ་ནི་ཆུ་ལོག་རྒྱུག་པ་བཞིན་མདུན་དུ་བསྐྱོད་ཅིང་། ཡང་བསྐྱར་དམག་དྲངས་ཏེ་ལྷོ་ཕྱོགས་ཀྱི་རྒྱལ་པོའི་བཙན་རྫོང་ལེན་པའི་བར་དུ་འཐབ་པར་བྱའོ། །
DAN 11:11 དེ་ནས་ལྷོ་ཕྱོགས་ཀྱི་རྒྱལ་པོ་རབ་ཏུ་ཁྲོས་ནས་ཐོན་ཏེ་བྱང་ཕྱོགས་ཀྱི་རྒྱལ་པོར་གཡུལ་འགྱེད་པ་དང་། བྱང་ཕྱོགས་ཀྱི་རྒྱལ་པོས་དམག་དཔུང་ཆེན་པོ་བཤམས་ནའང་དེ་ནི་ལྷོ་ཕྱོགས་ཀྱི་རྒྱལ་པོའི་ལག་ཏུ་ཕམ་པར་འགྱུར།
DAN 11:12 དམག་དཔུང་དེ་རྡུལ་དུ་བརླགས་པའི་རྗེས་སུ། ལྷོ་ཕྱོགས་ཀྱི་རྒྱལ་པོའི་སེམས་ཁེངས་པར་གྱུར་ནས་མི་འབོར་ཁྲི་ཁྲི་འབུམ་འབུམ་གསོད་པར་འགྱུར་ནའང་ཁོའི་རྒྱལ་ཁ་ཡུན་རིང་མི་གནས།
DAN 11:13 བྱང་ཕྱོགས་ཀྱི་རྒྱལ་པོས་ཡང་བསྐྱར་དམག་དཔུང་སྔར་ལས་འབོར་ཆེན་བསྡུ་བར་བྱེད་ཅིང་། དུས་སུ་བབ་པ་ན་ཁོས་གོ་མཚོན་ལྡན་པའི་དམག་དཔུང་ཆེན་པོ་ཁྲིད་ནས་འོང་ངེས་ཡིན།
DAN 11:14 དུས་དེར། མི་མང་པོ་ཡར་ལངས་ནས་ལྷོ་ཕྱོགས་ཀྱི་རྒྱལ་པོར་དམག་འདྲེན་པར་མ་ཟད། ཁྱོད་ཀྱི་མི་སྡེ་ཁྲོད་ཀྱི་མི་གདུག་རྩུབ་ཅན་རྣམས་ཀྱང་དཔའ་ངར་དང་བཅས་ཡར་ལངས་ནས་ཞལ་གཟིགས་དེ་འགྲུབ་པར་བྱེད་ནའང་དེ་རྣམས་ཕམ་པར་འགྱུར་རོ། །
DAN 11:15 དེ་ནས་བྱང་ཕྱོགས་ཀྱི་རྒྱལ་པོ་འོངས་ནས་ས་རགས་བརྩིགས་ཏེ་མཁར་བརྟན་པོ་ལེན་པར་བྱེད་ཅིང་། ལྷོ་ཕྱོགས་ཀྱི་དམག་དཔུང་གིས་དེ་འགོག་མི་ཐུབ་ལ། ཐ་ན་སྟོབས་དང་ལྡན་པའི་དམག་དཔུང་གིས་ཀྱང་དེ་འགོག་མི་ཐུབ་བོ། །
DAN 11:16 ལྷོ་ཕྱོགས་ཀྱི་རྒྱལ་པོར་འཐབ་དུ་འོངས་པ་དེས་ཅི་འདོད་ལྟར་བྱེད་ཅིང་། དེའི་མདུན་དུ་མི་གཅིག་ཀྱང་ཚུགས་མི་ཐུབ། ཁོ་ནི་མཛེས་སྡུག་ལྡན་པའི་ཡུལ་ལྗོངས་སུ་སྡོད་ཅིང་ཡུལ་དེར་གཏོར་བརླག་བྱེད་པའི་དབང་ཡང་ཡོད་དོ། །
DAN 11:17 ཁོས་རྒྱལ་ཁམས་ཧྲིལ་པོའི་སྟོབས་ཤུགས་བསྡུས་ནས་འོང་བའི་བློ་ཐག་བཅད་པ་དང་། ལྷོ་ཕྱོགས་ཀྱི་རྒྱལ་པོར་མཐུན་འབྲེལ་བྱས་ཏེ་རང་གི་སྲས་མོ་ལྷོ་ཕྱོགས་ཀྱི་རྒྱལ་པོར་བཙུན་མོ་རུ་གནང་ཞིང་། དེའི་རྒྱལ་སྲིད་རྩ་མེད་དུ་གཏོང་བའི་སེམས་ངན་བཅངས་ནའང་། ཐབས་ཇུས་དེ་འགྲུབ་ཐབས་མེད་ལ་ཁོ་རང་ཉིད་ལའང་ཕན་ཐོགས་ཅི་ཡང་མེད།
DAN 11:18 དེའི་རྗེས་སུ་བྱང་ཕྱོགས་ཀྱི་རྒྱལ་པོ་ནི་མཚོ་འགྲམ་གྱི་སྐམ་ས་རྣམས་ཀྱི་ཕྱོགས་སུ་འཁོར་ནས་གླིང་ཕྲན་མང་པོ་དབང་དུ་བསྒྱུར་བར་འགྱུར། འོན་ཀྱང་དམག་སྤྱི་ཆེན་པོ་ཞིག་གིས་ཁོའི་ཁེངས་དྲེགས་མེད་པར་བཟོ་བར་མ་ཟད། ཁོའི་ཁེངས་དྲེགས་ནི་ཁོ་རང་གི་སྟེང་ལ་འཕོག་པར་བྱེད།
DAN 11:19 དེ་ནས་ཁོ་ནི་རང་ཡུལ་གྱི་བཙན་རྫོང་དུ་ཕྱིར་ལོག་ཅིང་། མཐར་འདྲེད་བརྡབ་ཤོར་ནས་སར་འགྱེལ་ཏེ་མེད་པར་འགྱུར་རོ། །
DAN 11:20 དུས་དེར་མི་གཞན་ཞིག་འོངས་ནས་ཁོའི་རྒྱལ་སྲིད་ཀྱི་རྒྱུན་འཛིན་པར་བྱེད་ཅིང་། མི་དེས་རྒྱལ་ཁམས་ཀྱི་དཔལ་ཡོན་དར་བའི་ཆེད་དུ། བློན་པོ་གདུག་རྩུབ་ཅན་ཞིག་མངགས་ནས་དཔྱ་ཁྲལ་བཙན་གྱིས་བསྡུ་བར་བྱེད། རྒྱལ་པོ་འདི་ནི་དུས་ཡུན་རིང་པོ་མི་འགྱང་བར་ཤི་བར་འགྱུར་མོད། དེ་ནི་ཁོང་ཁྲོ་དང་དམག་འཐབ་ཀྱི་རྐྱེན་གྱིས་ཤི་བ་མ་ཡིན་ནོ། །
DAN 11:21 ཕྱིས་སུ་ཁོའི་ཚབ་བྱེད་དུ་མི་ཐ་ཤལ་པ་ཞིག་སླེབ་པར་འགྱུར་ཞིང་། སུས་ཀྱང་དེ་ལ་རྒྱལ་ཁམས་ཀྱི་གཟི་བརྗིད་མ་སྤྲད་ནའང་། དེ་ནི་མི་རྣམས་ལ་མཉམ་འཇོག་མེད་པའི་དུས་སུ་སླེབས་ཏེ་གཡོ་སྒྱུར་བརྟེན་ནས་རྒྱལ་ཁམས་འཕྲོག་པར་འགྱུར་རོ། །
DAN 11:22 དམག་དཔུང་བགྲང་གིས་མི་ལང་བ་ཞིག་ཆུ་ལོག་རྒྱུག་པ་ལྟར་ཁོའི་མདུན་དུ་བཅོམ་ནས་གཏོར་བར་འགྱུར་ལ། ཐ་ན་མནའ་འབྲེལ་ཡིན་པའི་རྒྱལ་སྲས་ཀྱང་དེ་བཞིན་ཡིན་ནོ། །
DAN 11:23 ཁོས་མི་གཞན་དང་མནའ་འབྲེལ་བྱས་རྗེས་གཡོ་སྒྱུའི་སྦྱོར་བ་སྤེལ་ངེས་ཤིང་། ཁོའི་རྗེས་སུ་འབྲང་མཁན་མང་པོ་མེད་ནའང་། ཁོ་ནི་ཉིན་རེ་ལས་ཉིན་རེར་སྟོབས་ཤུགས་རྒྱས་པར་འགྱུར་རོ། །
DAN 11:24 ཁོ་ནི་མི་གཞན་གྱིས་མཉམ་འཇོག་མེད་པའི་དུས་སུ་རྒྱལ་ཁོངས་ཀྱི་འབྱོར་ཕྱུག་ཆེར་ལྡན་པའི་ཡུལ་དུ་སླེབས་ཏེ། རང་གི་ཕ་མེས་ཡང་མེས་རྣམས་ཀྱིས་བསྒྲུབས་མ་མྱོང་བའི་ལས་བསྒྲུབ་པར་བྱེད་དེ། འཕྲོག་བཅོམ་བྱས་པའི་དངོས་རྫས་དང་རྒྱུ་ནོར་རྣམས་རང་གི་མངའ་ཞབས་རྣམས་ལ་བགོ་བཤའ་རྒྱག་པ་དང་། ཡང་ཇུས་ངན་བཀོད་ནས་བཙན་རྫོང་གཏོར་བར་བྱེད་མོད། འོན་ཀྱང་དོན་འདི་ཐམས་ཅད་ནི་གནས་སྐབས་ཙམ་ཡིན་ནོ། །
DAN 11:25 ཁོས་དཔའ་ངར་བསྐྱེད་དེ་དམག་དཔུང་ཆེན་པོ་དྲངས་ནས་ལྷོ་ཕྱོགས་ཀྱི་རྒྱལ་པོར་རྒོལ་བར་འགྱུར་ལ། ལྷོ་ཕྱོགས་ཀྱི་རྒྱལ་པོས་ཀྱང་སྟོབས་ཤུགས་ཆེན་པོའི་དམག་དཔུང་གིས་གཡུལ་འགྱེད་པ་ཡིན་མོད་འོན་ཀྱང་དེ་འགོག་མི་ནུས། དེ་ནི་མི་གཞན་གྱིས་ལྷོ་ཕྱོགས་ཀྱི་རྒྱལ་པོར་ལྐོག་གཡོ་ཇུས་ངན་བཀོད་པས་སོ། །
DAN 11:26 རྒྱལ་པོའི་ཟས་སྐལ་ཐོབ་པ་རྣམས་ཀྱིས་རྒྱལ་པོ་བརླག་པར་འགྱུར་ཞིང་། རྒྱལ་པོའི་དམག་དཔུང་འཇོམས་པར་འགྱུར་བ་དང་། རྨས་སྐྱོན་ཚབས་ཆེན་ཐེབས་ནས་ས་ལ་འགྱེལ་བར་འགྱུར་རོ། །
DAN 11:27 རྒྱལ་པོ་དེ་གཉིས་ཀྱིས་སེམས་ལ་ངན་བཅངས་ཏེ། གསོལ་ལྕོག་གཅིག་གི་སྟེང་དུའང་ཕན་ཚུན་ལ་རྫུན་སྨྲ་བར་འགྱུར་ཡང་ཁོ་གཉིས་ཀྱི་ཇུས་ངན་འགྲུབ་པར་མི་འགྱུར་རོ། །རྒྱུ་མཚན་ནི་གཏན་ལ་ཁེལ་བའི་དུས་སུ་ད་གཟོད་མཇུག་འབྲས་འབྱུང་བར་འགྱུར་རོ། །
DAN 11:28 དེ་ནས་བྱང་ཕྱོགས་ཀྱི་རྒྱལ་པོས་རྒྱུ་ནོར་འབོར་ཆེན་ཁྱེར་ནས་རང་ཡུལ་དུ་ལོག་པར་འགྱུར། ཁོའི་སེམས་ནས་དམ་པའི་ཞལ་ཆད་ལ་རྒོལ་བས་ན་གང་འདོད་ལྟར་བྱེད་བཞིན་རང་ཡུལ་དུ་ལོག་པར་འགྱུར་རོ། །
DAN 11:29 གཏན་ལ་ཁེལ་བའི་དུས་སུ་སླེབས་པའི་ཚེ་ཁོ་རང་ཕྱིར་ལོག་ནས་ཡང་བསྐྱར་ལྷོ་ཕྱོགས་ལ་རྒོལ་ངེས་ཡིན། འོན་ཀྱང་ཕྱི་མ་འདི་ནི་སྔ་མ་དང་གཏན་ནས་མི་འདྲའོ། །
DAN 11:30 རྒྱུ་མཚན་ནི་ཀི་ཐིམ་གྱི་དམག་གྲུ་འོངས་ནས་ཁོ་ལ་རྒོལ་བར་བྱེད་ཅིང་ཁོ་དཔའ་ཞུམ་སྟེ་ཕྱིར་ལོག་གོ །ཁོ་ནི་དམ་པའི་ཞལ་ཆད་ལ་སྡང་སེམས་ཆེ་ཞིང་གང་འདོད་ལྟར་འཆལ་སྤྱོད་སྤེལ་བ་དང་། ཁོ་ཕྱིར་ལོག་ནས་དམ་པའི་ཞལ་ཆད་ལ་རྒྱབ་འགལ་བྱེད་མཁན་རྣམས་ལ་དགའ་མོས་ངང་མཉན་ནོ། །
DAN 11:31 ཁོའི་དམག་དཔུང་ཡར་ལངས་ནས་མཆོད་ཁང་སྟེ་བཙན་རྫོང་རྫོད་པ་དང་། དུས་རྒྱུན་གྱི་མཆོད་པའང་མེད་པར་བཟོས་ནས། སྟོང་པར་བྱེད་པའི་སྐྱུག་བྲོ་བ་དེ་བཞེང་བར་འགྱུར་རོ། །
DAN 11:32 ཁོས་ཁ་ཡག་ཚིག་གིས་ཞལ་ཆད་དང་འགལ་བའི་མི་ངན་རྣམས་ལ་ངོ་བསྟོད་བྱས་ནས་བརླག་ངེས་ཡིན་མོད། འོན་ཀྱང་དཀོན་མཆོག་ངོ་ཤེས་པའི་མི་རྣམས་ཀྱིས་བློ་རྩ་བརྟན་པོས་ལས་བྱེད་པར་འགྱུར་རོ། །
DAN 11:33 དམངས་ཁྲོད་ཀྱི་བློ་གྲོས་ཅན་དག་གིས་མི་མང་པོར་མཛུབ་སྟོན་བྱེད་ནའང་། དུས་ངེས་ཅན་ཞིག་ལ་དེ་དག་རལ་གྲིའི་འོག་ཏུ་འགྱེལ་བ་དང་། ཡང་ན་མེས་བསྲེག་པ། ཡང་ན་བཟུང་ནས་འཁྱེར་བ། ཡང་ན་འཕྲོག་བཅོམ་ཐེབས་པར་འགྱུར།
DAN 11:34 ཡང་དེ་དག་ས་ལ་འགྱེལ་བའི་དུས་སུ། རོགས་སྐྱོར་ཉུང་ཙམ་འཐོབ་ངེས་ཤིང་། མི་མང་པོ་ཞིག་གིས་ཁ་ཡག་ཚིག་གིས་དེ་དག་དང་མཉམ་འབྲེལ་བྱེད་དོ། །
DAN 11:35 བློ་གྲོས་ཅན་དག་ལས་འགའ་ཞིག་ས་རུ་འགྱེལ་བར་འགྱུར་ལ། དེ་ནི་དུས་ཀྱི་མཐའ་མའི་བར་དུ་མི་རྣམས་ལ་སྦྱང་བ་འཐོབ་པ་དང་གཙང་མར་བཟོ་བ། སྐྱོན་གྱི་དྲི་མས་མ་གོས་པ་འོང་བ་བཅས་ཀྱི་ཕྱིར་དུ་ཡིན་ཏེ། རྒྱུ་མཚན་ནི་གཏན་ལ་ཁེལ་བའི་དུས་སུ་ད་གཟོད་མཇུག་འབྲས་འབྱུང་བར་འགྱུར་རོ། །
DAN 11:36 དེ་ནས་རྒྱལ་པོ་དེས་གང་འདོད་ལྟར་བྱེད་ཅིང་ཁེངས་སེམས་བཅངས་ཏེ་རང་ཉིད་ལྷ་ཐམས་ཅད་ལས་ཁྱད་དུ་འཕགས་པར་བྱེད་ཅིང་། ཡང་འཆལ་གཏམ་སྨྲས་ཏེ་ལྷ་རྣམས་ཀྱི་དཀོན་མཆོག་ལ་རྒོལ་བར་འགྱུར། གཙོ་བོའི་ཐུགས་ཁྲོ་ཡོངས་སུ་རྫོགས་པའི་བར་དུ་ཁོས་ཅི་བྱས་དོན་ཀུན་འགྲུབ་པར་འགྱུར་ཏེ། རྒྱུ་མཚན་ནི་གཏན་ལ་ཁེལ་བའི་དོན་ནི་དེ་བཞིན་འབྱུང་ངེས་པའི་ཕྱིར་རོ། །
DAN 11:37 ཁོས་རང་གི་ཕ་མེས་ཡང་མེས་རྣམས་ཀྱི་ལྷ་ཚོགས་དང་། བུད་མེད་རྣམས་ཀྱིས་འདོད་པའི་ལྷ་ལའང་མི་བཀུར་ཞིང་། ལྷ་གཞན་གང་ལའང་བཀུར་བར་མི་བྱ་སྟེ། རང་ཉིད་ཀུན་ལས་འཕགས་པར་སྙམ་པས་སོ། །
DAN 11:38 དེ་ལས་ལྡོག་སྟེ་བཙན་རྫོང་སྲུང་བའི་ལྷ་ལ་བཀུར་ཞིང་། ཡབ་མེས་རྣམས་ལ་རྒྱུས་མེད་པའི་ལྷ་ཞིག་ལ་གསེར་དང་དངུལ། རྡོ་རིགས་ཀྱི་རིན་པོ་ཆེ་དང་རིན་ཐང་ཆེ་བའི་རྫས་གཞན་དག་གིས་མཆོད་པར་འགྱུར།
DAN 11:39 ཕྱི་ཕྱོགས་པའི་ལྷ་ཡི་སྐྱབས་ལ་བརྟེན་ནས་བཙན་རྫོང་བརྟན་པོ་རྣམས་གཏོར་བར་འགྱུར་ཞིང་། ཁོ་རང་ཁས་ལེན་མཁན་རྣམས་ལ་གཟི་བརྗིད་མང་དུ་གནང་བ་དང་། དེ་དག་མི་མང་པོར་དབང་བྱེད་དུ་བསྐོ་ཞིང་ཡུལ་རྣམས་བགོས་ནས་རྔན་པ་སྤྲོད་པར་འགྱུར་རོ། །
DAN 11:40 དུས་ཀྱི་མཐའ་མར་ལྷོ་ཕྱོགས་ཀྱི་རྒྱལ་པོས་རྒྱལ་པོ་དེ་ལ་གཡུལ་འགྱེད་པ་དང་། བྱང་ཕྱོགས་ཀྱི་རྒྱལ་པོས་ཤིང་རྟ་དང་རྟ་དམག དམག་གྲུ་མང་པོ་བཅས་བཀོལ་ནས་རླུང་ནག་འཚུབ་མ་བཞིན་འོངས་ཏེ་རྒྱལ་པོ་དེ་ལ་རྒོལ་ཞིང་། ཆུ་ལོག་རྒྱུག་པ་བཞིན་ཡུལ་ལྗོངས་མང་པོར་བཙན་འཛུལ་བྱེད་པར་འགྱུར་རོ། །
DAN 11:41 ཁོས་མཛེས་སྡུག་ལྡན་པའི་ཡུལ་ལྗོངས་དེ་ལའང་བཙན་འཛུལ་བྱེད་པ་དང་། རྒྱལ་ཁབ་མང་པོ་བརླག་པར་འགྱུར་རོ། །འོན་ཀྱང་ཨེ་དོམ་པ་དང་མོ་ཨབ་པ། ཨམ་མོན་པའི་འགོ་དཔོན་བཅས་ནི་ཁོའི་ལག་ནས་ཐར་བར་འགྱུར་རོ། །
DAN 11:42 ཁོས་ལག་པ་བརྐྱངས་ནས་རྒྱལ་ཁབ་མང་པོར་རྒོལ་བར་བྱེད་ཅིང་ཨེ་ཅིབ་ཡུལ་ཡང་དེ་ལས་ཐར་མི་ཐུབ།
DAN 11:43 ཁོས་ཨེ་ཅིབ་ཡུལ་གྱི་གསེར་དངུལ་དང་རིན་པོ་ཆེའི་གཏེར་རྣམས་བདག་གིར་འཛིན་པ་དང་། ལེབ་ཡཱ་པ་དང་གུ་ཤ་པ་རྣམས་ཀྱང་ཁོའི་རྗེས་སུ་འབྲང་བར་འགྱུར།
DAN 11:44 འོན་ཀྱང་ཤར་ཕྱོགས་དང་བྱང་ཕྱོགས་ནས་བརྡ་ཞིག་སླེབས་འོང་སྟེ་ཁོའི་སེམས་འཁྲུག་པར་བྱེད་ཅིང་། ཁོ་རང་ཤིན་ཏུ་ཁྲོས་ནས་མི་མང་པོ་དམར་གསོད་བྱེད་པར་འགྱུར།
DAN 11:45 ཁོས་རྒྱ་མཚོ་དང་བརྗིད་རྔམ་ཆེ་བའི་རི་བོ་དམ་པ་གཉིས་ཀྱི་བར་མཚམས་སུ་དམག་སྒར་ཕོ་བྲང་ལྟ་བུ་ཕུབ་ནའང་། ཁོ་ལ་རོགས་བྱེད་མཁན་སུ་ཡང་མེད་པར་གཅིག་པུ་འཆི་བར་འགྱུར་རོ་ཞེས་གསུངས་སོ། །
DAN 12:1 ཡང་ཁོང་གིས་དཱ་ནེ་ཨེལ་ལ་འདི་སྐད་དུ། དུས་དེར། ཁྱོད་ཀྱིས་མི་སྡེ་ལ་སྐྱབས་མཛད་པའི་དབང་སྒྱུར་ཆེན་པོ་མེའ་ཀཱ་ཨེལ་སླེབས་འོང་ཞིང་། མི་སྡེའི་ཐོག་མ་ནས་དུས་དེ་བར་དུ་སྔར་བྱུང་མ་མྱོང་བའི་སྡུག་བསྔལ་ཆེན་པོའི་དུས་ཤིག་སླེབ་པར་འགྱུར་ལ། དུས་དེར་ཁྱོད་ཀྱི་མི་སྡེ་ལས་གླེགས་བམ་དུ་མིང་བཀོད་ཡོད་པ་ཐམས་ཅད་ཐར་བར་འགྱུར་རོ། །
DAN 12:2 ཡང་ཐལ་རྡུལ་ནང་དུ་གཉིད་འདུག་པ་མང་པོ་སད་པར་འགྱུར་ཞིང་། འགའ་ཞིག་ལ་ཚེ་མཐའ་མེད་པ་འཐོབ་པར་འགྱུར་ལ། འགའ་ཞིག་ངོ་ཚས་གདུང་ཞིང་དུས་གཏན་དུ་གཞན་གྱིས་མཐོང་ཆུང་བྱེད་པར་འགྱུར་རོ། །
DAN 12:3 མི་བློ་གྲོས་ཅན་རྣམས་ཀྱིས་ནམ་མཁའི་འོད་ཀྱི་ཕུང་པོ་ལྟར་འོད་འཕྲོ་བ་དང་། མི་མང་པོ་དྲང་བདེན་གྱི་ཕྱོགས་སུ་འདྲེན་མཁན་རྣམས་ཀྱིས་དུས་གཏན་དུ་སྐར་ཚོགས་བཞིན་འོད་འཚེར་བར་འགྱུར།
DAN 12:4 འོན་ཀྱང་། དཱ་ནེ་ཨེལ་ཁྱོད་ཀྱིས་དུས་ཀྱི་མཐའ་མའི་བར་དུ་གསུང་འདི་དག་སྦས་ནས་པོད་དེར་ཐེལ་ཙེ་རྒྱོབས་ཤིག མི་མང་པོ་ཕར་རྒྱུག་ཚུར་རྒྱུག་བྱས་ནས་རིག་སྟོབས་འཕེལ་བར་འགྱུར་ཞེས་གསུངས་སོ། །
DAN 12:5 དེ་ནས་དཱ་ནེ་ཨེལ་བདག་གིས་བལྟས་པ་ན། ལྟོས་དང་། མི་གཞན་གཉིས་ཡར་འགྲེང་འདུག་སྟེ། གཅིག་ནི་གཙང་པོའི་ཚུ་རོལ་དང་ཅིག་ཤོས་ནི་གཙང་པོའི་ཕ་རོལ་གྱི་འགྲམ་དུ་མཆིས།
DAN 12:6 དེ་ལས་མི་གཅིག་གིས་གཙང་པོའི་ཆུ་ཡི་སྟེང་དུ་འགྲེང་ཞིང་སོ་རས་ཀྱི་གོས་གྱོན་མཁན་དེ་ལ། དོན་ངོ་མཚར་ཅན་འདི་རྣམས་ཀྱི་མཇུག་འབྲས་དུས་ནམ་ཞིག་ལ་སླེབས་ཡོང་ངམ་ཞེས་དྲིས་སོ། །
DAN 12:7 བདག་གིས་གཙང་པོའི་ཆུ་ཡི་སྟེང་དུ་འགྲེང་ཞིང་སོ་རས་ཀྱི་གོས་གྱོན་པ་དེས་ལག་ཟུང་གནམ་ལ་བཏེགས་ཏེ། གཏན་དུ་གསོན་པོར་བཞུགས་པ་དེ་ཉིད་དཔང་དུ་བཙུགས་ནས་འདི་སྐད་དུ། ད་དུང་ལོ་གཅིག་དང་། ལོ་གཉིས། ཡང་ལོ་ཕྱེད་ཀ་འགོར་ཡོང་། དེ་དག་གིས་སྐྱེས་བུ་དམ་པ་རྣམས་ཀྱི་སྟོབས་ཤུགས་རྡུལ་དུ་བརླགས་ཟིན་པའི་ཚེ། དོན་འདི་ཐམས་ཅད་འགྲུབ་པར་འགྱུར་ཞེས་མནའ་སྐྱེལ་བ་ཐོས་སོ། །
DAN 12:8 བདག་གིས་ཐོས་ནའང་དོན་མ་གོ་བས་འདི་ལྟར། ཀྱེ་བདག་གི་ཇོ་བོ་ལགས། དོན་དེ་དག་གི་མཐའ་མ་ཅི་འདྲ་ཡིན་ནམ་ཞེས་ཞུས་སོ། །
DAN 12:9 ཁོང་གིས་ལན་དུ། ཀྱེ་དཱ་ནེ་ཨེལ། ཁྱོད་རང་འགྲོ་བར་གྱིས། གང་ལ་ཞེ་ན། བཀའ་གསུང་འདི་དག་དུས་ཀྱི་མཐའ་མའི་བར་དུ་ཐེལ་ཙེ་བརྒྱབ་ནས་སྦས་ཟིིན་པའི་ཕྱིར་རོ། །
DAN 12:10 མི་མང་པོས་རང་ཉིད་གཙང་མར་བཟོ་ཞིང་སྐྱོན་གྱི་དྲི་མས་མ་གོས་པ་བྱས་ནས་སྦྱང་བ་འཐོབ་པར་བྱེད་དོ། །འོན་ཀྱང་མི་ངན་དག་གིས་སྔར་བཞིན་ལས་ངན་པ་བྱེད་ཅིང་མི་ངན་ཀུན་གྱིས་དོན་འདི་ཤེས་པར་མི་འགྱུར་ལ། བློ་གྲོས་ཅན་རྣམས་ཀྱིས་ད་གཟོད་རྟོགས་པར་འགྱུར་རོ། །
DAN 12:11 དེ་ཡང་དུས་རྒྱུན་གྱི་མཆོད་པ་མེད་པར་བྱས་ནས་སྟོང་པར་བྱེད་པའི་སྐྱུག་བྲོ་བ་དེ་བཞེངས་པ་ནས་བརྩམས་ཏེ། ཉིན་ཞག་ཆིག་སྟོང་ཉིས་བརྒྱ་དགུ་བཅུ་ཐམ་པ་ཡོད་ངེས་ཡིན།
DAN 12:12 ཉིན་ཞག་ཆིག་སྟོང་སུམ་བརྒྱ་སུམ་ཅུ་སོ་ལྔ་སླེབས་པའི་བར་དུ་སྒུག་མཁན་དེ་ནི་བདེའོ། །
DAN 12:13 ཁྱོད་ལ་མཚོན་ན། ཁྱོད་སོང་ནས་མཇུག་འབྲས་ལ་སྒུག་དང་ཁྱོད་ནི་བདེ་བར་འཆི་ངེས་ཡིན། དུས་ཀྱི་མཐའ་མར་སླེབས་ཚེ་ཁྱོད་ནི་སླར་གསོན་ནས་ཁྱོད་ཀྱི་ནོར་སྐལ་ལ་རོལ་བར་འགྱུར་རོ་ཞེས་གསུངས་སོ།། །།
HOS 1:1 ཨུ་ཟི་ཡཱ་དང་། ཡོ་ཐམ་དང་། ཨ་ཧ་ཟཱ་དང་། ཧི་ཟི་ཀི་ཡཱ་བཅས་པ་ཡ་ཧུ་དཱའི་རྒྱལ་པོ་ཡིན་པ་དང་། ཡེ་ཧོ་ཨ་སི་ཡི་བུ་ཡེ་རོབ་ཨམ་ནི་ཡེས་ར་ཨེལ་གྱི་རྒྱལ་པོར་བཞུགས་པའི་དུས་སུ། དཀོན་མཆོག་ཡ་ཝཱེའི་བཀའ་པེ་རེའི་བུ་ཧོ་ཤེ་ཨ་ལ་བྱུང་ངོ་། །
HOS 1:2 དཀོན་མཆོག་ཡ་ཝཱེའི་བཀའ་ནི་ཐོག་མར་ཧོ་ཤེ་ཨ་ལ་བྱུང་བ་སྟེ། དཀོན་མཆོག་ཡ་ཝཱེས་ཁོང་ལ་འདི་སྐད་དུ། སོང་ལ་གཡེམ་མ་ཞིག་ཁྱོད་ཀྱི་ཆུང་མར་ལོངས་དང་། ལོག་གཡེམ་ལས་བྱུང་བའི་བུ་ཕྲུག་དེ་རྣམས་ཀྱང་རང་གི་བུ་ཕྲུག་ཏུ་ལོངས་ཤིག ཅི་ལ་ཞེ་ན། ཡུལ་འདིས་དཀོན་མཆོག་སྤངས་ནས་ལོག་གཡེམ་དཔག་མེད་བྱས་པས་སོ་ཞེས་གསུངས་པ་ལ།
HOS 1:3 ཁོང་སོང་ནས་དིབ་ལ་ཡིམ་གྱི་བུ་མོ་ཀི་མཱར་བྱ་བ་ཆུང་མར་བླངས་ནས། མོ་མངལ་དང་ལྡན་པར་གྱུར་ཏེ་བུ་ཞིག་སྐྱེས་སོ། །
HOS 1:4 ཡང་དཀོན་མཆོག་ཡ་ཝཱེས་ཧོ་ཤེ་ཨ་ལ་འདི་སྐད་དུ། ཁོའི་མིང་ལ་ཡེ་སི་རེ་ཨེལ་ ཞེས་ཐོགས་ཤིག གང་ལ་ཞེ་ན། ཡུན་རིང་མི་འགོར་བར་ངས་ཡེ་ཧུའི་ཁྱིམ་ལས་ཡེ་སི་རེ་ཨེལ་གྱི་མི་ཤ་རྩོད་ཅིང་། ཡེས་ར་ཨེལ་གྱི་ཁྱིམ་རྒྱུད་ཀྱི་རྒྱལ་སྲིད་ཀྱང་ཚར་དུ་གཅོད་ངེས་ཡིན།
HOS 1:5 ཡང་ཉིན་དེར། ངས་ཡེ་སི་རེ་ཨེལ་ཐང་བདེ་རུ་ཡེས་ར་ཨེལ་གྱི་གཞུ་གཅོག་གོ་ཞེས་གསུངས་སོ། །
HOS 1:6 དེ་ནས་ཀི་མཱར་ལ་ཡང་མངལ་ཆགས་ཏེ་བུ་མོ་ཞིག་སྐྱེས་པ་དང་། དཀོན་མཆོག་ཡ་ཝཱེས་ཧོ་ཤེ་ཨ་ལ་འདི་སྐད་དུ། མོའི་མིང་ལ་ལོ་རུ་ཧ་མ་ ཞེས་ཐོགས་ཤིག ཅི་ལ་ཞེ་ན། ད་ནི་ངས་ཅིས་ཀྱང་ཡེས་ར་ཨེལ་གྱི་ཁྱིམ་རྒྱུད་ལ་སྙིང་རྗེ་བར་མི་བྱ་སྟེ། ཁོ་ཚོར་ཉེས་ཆད་གཅོད་ངེས་ཡིན་ཞེས་གསུངས་སོ། །
HOS 1:7 ཡིན་ཡང་ཡ་ཧུ་དཱའི་ཁྱིམ་རྒྱུད་ལ་ངས་སྙིང་རྗེ་གནང་སྟེ། དེ་དག་གཞུ་དང་རལ་གྲི། འཐབ་མོ། རྟ། སྐྱ་དམག་བཅས་ལ་བརྟེན་ནས་ཐར་བར་མི་བྱ་སྟེ། ཁོ་ཚོའི་དཀོན་མཆོག་ཡ་ཝཱེ་ལ་བརྟེན་ནས་ཐར་དུ་འཇུག་གོ་ཞེས་གསུངས་སོ། །
HOS 1:8 ལོ་རུ་ཧ་མ་ལ་ནུ་མ་བཀར་བའི་རྗེས་སུ་ཀི་མཱར་ཡང་མངལ་དང་ལྡན་པར་གྱུར་ཏེ་བུ་ཞིག་སྐྱེས་པ་དང་།
HOS 1:9 དཀོན་མཆོག་ཡ་ཝཱེས་འདི་སྐད་དུ། ཁོའི་མིང་ལ་ལོ་ཨམ་མཱེ་ ཞེས་ཐོགས་ཤིག ཅི་ལ་ཞེ་ན། ཁྱོད་ཚོ་ནི་ངའི་མི་མ་ཡིན་ལ། ང་ཡང་ཁྱོད་ཚོའི་དཀོན་མཆོག་མིན་ནོ་ཞེས་གསུངས་སོ། །
HOS 1:10 ཡིན་ཡང་ཡེས་ར་ཨེལ་པ་རྣམས་ཀྱི་མི་གྲངས་ནི་གཞལ་དུ་མེད་ལ་བགྲང་ལས་འདས་པའི་རྒྱ་མཚོའི་འགྲམ་གྱི་བྱེ་མ་དང་འདྲ་བར་འགྱུར་ངེས། དེ་སྔར་ཁྱོད་ཅག་བདག་གི་མི་མ་ཡིན་ཞེས་སྨྲས་པའི་གནས་དེར། རྗེས་སུ་ཁྱོད་ཅག་ནི་གཏན་དུ་གསོན་པོར་བཞུགས་པའི་དཀོན་མཆོག་གི་སྲས་དང་སྲས་མོ་རྣམས་ཡིན་ཞེས་སྨྲ་བར་འགྱུར།
HOS 1:11 ཡ་ཧུ་དཱ་པ་དང་ཡེས་ར་ཨེལ་པ་རྣམས་གནས་གཅིག་ཏུ་འཛོམས་ནས། རང་ལ་འགོ་དཔོན་ཞིག་བསྐོས་ཏེ་ཡུལ་དེ་ནས་འཐོན་འོང་། ཅི་ལ་ཞེ་ན། ཡེ་སི་རེ་ཨེལ་གྱི་ཉིན་མོ་དེ་ནི་ཆེན་པོ་ཡིན་པར་འགྱུར་རོ། །
HOS 2:1 ཁྱོད་རྣམས་ཀྱིས་རང་གི་སྤུན་ཟླ་རྣམས་ལ་ཨམ་མཱེ་ཞེས་དང་། ལྕམ་སྲིང་རྣམས་ལ་རུ་ཧ་མ་ ཞེས་བོས་ཤིག
HOS 2:2 ཁྱོད་ཅག་གིས་རང་གི་མ་དང་རྩོད་པར་གྱིས་ཤིག མོ་དང་རྩོད་པར་གྱིས། ཅིའི་ཕྱིར་ཞེ་ན། མོ་ནི་ངའི་ཆུང་མ་མིན་ལ། ང་ཡང་དེའི་ཁྱོ་ག་མ་ཡིན་ནོ། །ཡང་མོ་ལ་རང་གི་གདོང་ལས་ཤར་བའི་འདོད་སྲེད་དང་། ནུ་མ་ཟུང་གི་བར་ནས་མངོན་པའི་འདོད་ཆགས་ཀྱི་ཉམས་འགྱུར་སྤང་དུ་ཆུག་དང་།
HOS 2:3 དེ་ལྟར་མིན་ཚེ་ངས་མོ་གཅེར་བུར་ཕུད་དེ་སྐྱེས་མ་ཐག་པའི་ཉིན་དང་འདྲ་བར་དམར་རྗེན་དུ་ལུས་པར་བྱ་ཞིང་། ཡང་མོ་ནི་དབེན་སྟོང་དང་ཆུ་མེད་པའི་སྐམ་ས་ལྟར་སྐོམ་པས་འཆི་བར་བྱའོ། །
HOS 2:4 ཡང་ངས་དེའི་བུ་ཕྲུག་རྣམས་ལ་སྙིང་རྗེ་བར་མི་བྱ་སྟེ། ཅིའི་ཕྱིར་ཞེ་ན། དེ་རྣམས་ནི་ལོག་གཡེམ་ལས་བྱུང་བ་ཡིན་ནོ། །
HOS 2:5 དེ་དག་གི་མ་ཡིས་ལོག་གཡེམ་བྱས་པ་དང་། དེ་དག་མངལ་ལ་འཁུར་མཁན་གྱིས་ངོ་ཚ་བའི་ལས་བྱས་པ་སྟེ། གང་ལ་ཞེ་ན། མོ་ན་རེ། ང་ནི་རང་ལ་བག་ལེབ་དང་ཆུ། བལ། སོ་མ་ར་ཙ། སྣུམ། བཏུང་བ་བཅས་སྤྲོད་མཁན་གྱི་དགའ་རོགས་ཚོའི་རྗེས་སུ་འབྲང་བར་བྱའོ་ཞེས་སྨྲས་པས་སོ། །
HOS 2:6 དེ་བས་ན་མོས་རང་གི་ལམ་མི་རྙེད་པའི་ཆེད་དུ། ངས་མོའི་འགྲོ་ལམ་ཚེར་མས་བཀག་སྟེ། རྩིག་པ་བརྩིགས་ནས་མོ་བསྐོར་བར་བྱའོ། །
HOS 2:7 ཁོ་མོས་རང་གི་དགའ་རོགས་ཚོའི་རྗེས་དེད་ཀྱང་རྗེས་མི་ཆོད་ལ། ཁོ་རྣམས་བཙལ་ཡང་མི་རྙེད་པས། ཁོ་མོ་ན་རེ། ང་ནི་རང་གི་ཁྱོ་ག་དང་པོའི་རྩར་ཕྱིར་ལོག་པར་བྱའོ། །ཅིའི་ཕྱིར་ཞེ་ན། ད་ལྟ་ལས་སྔོན་ཆད་ལེགས་སོ་ཞེས་སྨྲ་བར་འགྱུར།
HOS 2:8 དོན་དམ་དུ་ངས་འབྲུ་རིགས་དང་རྒུན་ཆང་གསར་པ་དང་། སྣུམ་གསར་པ་བཅས་མོ་ལ་གནང་བ་དང་། ཐ་ན་དེ་དག་གིས་པཱ་ཨལ་ལ་ཕུལ་བའི་གསེར་དང་དངུལ་ཡང་བདག་གིས་ཕངས་མེད་དུ་གནང་བ་མོས་མི་ཤེས་སོ། །
HOS 2:9 དེ་བས་ང་རང་ཕྱིར་ཡོང་ནས་སྟོན་ཁའི་དུས་སུ་རང་གི་འབྲུ་རིགས་དང་། ཆང་བཙག་པའི་དུས་སུ་རང་གི་རྒུན་ཆང་ལེན་པར་བྱ་སྟེ། མོའི་ལུས་གཅེར་བུ་འགེབ་བྱེད་ཀྱི་བལ་དང་སོ་རས་ཀྱང་མོ་ལས་ལེན་པར་བྱའོ། །
HOS 2:10 ངས་མོའི་དགའ་རོགས་རྣམས་ཀྱི་མདུན་དུ་མོའི་བཟོ་ལྟ་ངན་པ་མངོན་པར་བྱ་སྟེ། སུས་ཀྱང་ངའི་ལག་ནས་མོ་ཐར་བར་བྱ་མི་ནུས་སོ། །
HOS 2:11 ཡང་ངས་མོའི་དགའ་སྟོན་དང་དུས་ཆེན། ཚེས་གཅིག ངལ་གསོ་བའི་ཉིན་མོ། ཆོས་སྟོན་ཐམས་ཅད་མཚམས་འཇོག་པར་བྱའོ། །
HOS 2:12 ཡང་མོས་འདི་ནི་ངའི་དགའ་རོགས་རྣམས་ཀྱིས་ང་ལ་གནང་བའི་རྔན་པ་ཡིན་ཞེས་ཟེར་བའི་རྒུན་ཤིང་དང་སེ་ཡབ་ཤིང་རྣམས་ངས་མེད་པར་བཟོས་ནས། དེ་རྣམས་ནགས་རྒོད་དུ་བྱས་ཏེ། ཐང་རྒོད་ཀྱི་གཅན་གཟན་རྣམས་ཀྱིས་དེ་དག་བཟའ་བར་འགྱུར་རོ། །
HOS 2:13 ཡང་མོས་ཉིན་རྒྱུན་པཱ་ཨལ་དག་ལ་བདུག་སྤོས་བདུགས་པའི་སྡིག་པར་ངས་ཉེས་ཆད་གཅོད་དགོས་ཏེ། དེའི་དུས་སུ་མོས་རྣ་ལོང་དང་རྒྱན་ཆ་བཏགས་ནས་དགའ་རོགས་རྣམས་ཀྱི་རྗེས་སུ་འབྲངས་ཤིང་། ང་རང་བརྗེད་པར་གྱུར་ཏོ་ཞེས་དཀོན་མཆོག་ཡ་ཝཱེས་གསུངས་སོ། །
HOS 2:14 དེ་བས་ཀྱེ་ཧོ། ངས་མོ་བསྐུལ་ནས་དབེན་སྟོང་དུ་དྲངས་ཏེ། ཚིག་སྙན་མོས་མོར་སེམས་འགུལ་ཐེབས་པར་བྱའོ། །
HOS 2:15 བདག་གིས་དེ་རུ་མོར་རང་གི་རྒུན་ཚལ་རྣམས་དང་། ཨ་ཀོར་ལུང་པ་ནི་རེ་བའི་སྒོ་ཞིག་ཏུ་གནང་བར་བྱའོ། །ཡུལ་དེར་མོས་ལང་ཚོ་དར་ལ་བབས་པའི་དུས་ཏེ་མོ་ཨེ་ཅིབ་ཡུལ་ནས་ཐོན་པའི་ཉིན་མོ་རྣམས་དང་འདྲ་བར་ཨ་ལན་སྤྲོད་པར་འགྱུར་རོ། །
HOS 2:16 ཡང་ཉིན་དེར་ཁྱོད་ཀྱིས་ང་ལ་ཡི་ཤི་ཞེས་འབོད་པ་ལས་པཱ་ཨལ་ཞེས་འབོད་པར་མི་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །
HOS 2:17 ཅིའི་ཕྱིར་ཞེ་ན། ངས་པཱ་ཨལ་གྱི་མིང་རྣམས་མོའི་ངག་ལས་མེད་པར་བྱས་ནས། དེ་དག་གི་མིང་ནི་སུས་ཀྱང་བརྗོད་པར་མི་འགྱུར་རོ། །
HOS 2:18 ཡང་ཉིན་མོ་དེར་ངས་རང་གི་མི་རིགས་ཀྱི་དོན་དུ་ཐང་གི་གཅན་གཟན་དང་། ནམ་མཁའི་འདབ་ཆགས་དང་། ས་སྟེང་གི་ལྟོ་འགྲོ་བཅས་ལ་ཁ་ཆད་འཇོག་རྒྱུ་ཡིན་པ་དང་། ས་གཞི་ལས་གཞུ་དང་རལ་གྲི་དང་འཐབ་མོ་བཅས་པ་མེད་པར་བྱས་ནས་ཁོ་རྣམས་བདེ་བར་འགོད་དགོས།
HOS 2:19 ངས་ཁྱོད་ནི་རང་གི་དུས་གཏན་གྱི་བག་མར་སློང་བར་བྱ་སྟེ། དྲང་བདེན་དང་དྲང་གཞག བྱམས་སྙིང་རྗེ་བཅས་ཀྱི་སྒོ་ནས་ངའི་བག་མར་སློང་བར་བྱའོ། །
HOS 2:20 ཡང་ཁྱོད་རང་གཞུང་དྲང་སྒོས་ངའི་བག་མ་བྱས་ན། ཁྱོད་ཀྱིས་དཀོན་མཆོག་ཡ་ཝཱེ་ངོ་ཤེས་པར་འགྱུར་རོ། །
HOS 2:21 དཀོན་མཆོག་ཡ་ཝཱེས་འདི་སྐད་དུ། ཉིན་མོ་དེར་ངས་ལན་སྤྲོད་པར་བྱ་སྟེ། ངས་ནམ་མཁའ་ལ་ལན་སྤྲོད་པ་དང་། ནམ་མཁའ་ཡིས་ས་གཞི་ལ་ལན་སྤྲོད་ཅིང་།
HOS 2:22 ས་གཞི་ཡིས་འབྲུ་རིགས་དང་རྒུན་ཆང་གསར་པ། སྣུམ་བཅས་ལ་ལན་སྤྲོད་པ་དང་། དེ་ཐམས་ཅད་ཀྱིས་ཡེ་སི་རེ་ཨེལ་ལ་ལན་སྤྲོད་པར་བྱའོ། །
HOS 2:23 ཡང་ངས་མོ་ནི་ཡུལ་འདི་རུ་ས་བོན་ལྟར་འདེབས་ཤིང་། ལོ་རུ་ཧ་མ་ལ་སྙིང་རྗེ་བསྐྱེད་ནས། ལོ་ཨམ་མཱེ་ལ་ཁྱོད་ནི་ངའི་མི་རིགས་ཡིན་ནོ་ཞེས་སྨྲ་བར་བྱ་སྟེ། ཡང་དེ་དག་གིས། ཁྱེད་ནི་ང་ཡི་དཀོན་མཆོག་ཡིན་ཞེས་ཞུ་བར་འགྱུར་རོ་ཞེས་གསུངས་སོ། །
HOS 3:1 དེ་ནས་དཀོན་མཆོག་ཡ་ཝཱེས་བདག་ལ་འདི་སྐད་དུ། ལྷ་གཞན་རྣམས་ལ་དད་ཅིང་རྒུན་འབྲུམ་སྐམ་པོ་ལེབ་མོར་ཆགས་པའི་ཡེས་ར་ཨེལ་པ་རྣམས་ལ་དཀོན་མཆོག་ཡ་ཝཱེས་བྱམས་བརྩེ་གནང་བ་ལྟར། ཁྱོད་ཡང་སོང་ལ་མོའི་དགའ་རོགས་ཀྱིས་གཅེས་པར་འཛིན་པའི་བུད་མེད་གཡེམ་མ་དེ་ལ་གཅེས་ཤིག་ཅེས་གསུངས་པ་དང་།
HOS 3:2 དེ་ནས་ངས་དངུལ་སྲང་བཅོ་ལྔ་དང་ནས་ཁལ་གཅིག་དང་ཕྱེད་ཀ་ཡིས་མོ་རང་གི་ཕྱིར་དུ་ཉོས་ནས།
HOS 3:3 ངས་མོ་ལ། ཁྱོད་ཉིན་ཞག་མང་པོར་ངའི་དོན་དུ་གཅིག་པུར་སྡོད་དགོས་ཏེ། ལོག་གཡེམ་བྱེད་མི་རུང་ལ་སྐྱེས་པ་གཞན་པའི་ཆུང་མ་ཡང་མ་བྱེད་ཅིག ང་རང་ཡང་ཁྱོད་ལ་དེ་བཞིན་ཡིན་ནོ་ཞེས་སྨྲས་སོ། །
HOS 3:4 ཅིའི་ཕྱིར་ཞེ་ན། ཡེས་ར་ཨེལ་པ་རྣམས་ཀྱང་ཡུན་རིང་པོར་རྒྱལ་པོ་དང་འགོ་དཔོན། མཆོད་པ། རྡོ་རིང་། བེར་ཐུལ། ཐེ་ར་ཕིམ་ བཅས་དང་བྲལ་ནས་འཚོ་ངེས་ཡིན།
HOS 3:5 དེའི་རྗེས་སུ་ཡེས་ར་ཨེལ་པ་རྣམས་ཕྱིར་ལོག་ནས་རང་གི་དཀོན་མཆོག་ཡ་ཝཱེ་དང་རང་གི་རྒྱལ་པོ་དཱ་བིད་བཙལ་ནས། མཐའ་མའི་ཉིན་མོ་དག་ལ་ཁོ་རྣམས་ཀྱིས་ཡ་ཝཱེ་ལ་གུས་ཤིང་འཇིགས་པའི་སྒོ་ནས་ཁོང་གི་ཐུགས་རྗེའི་སྐྱབས་སུ་མཆི་བར་འགྱུར་རོ། །
HOS 4:1 ཀྱེ་ཡེས་ར་ཨེལ་པ་རྣམས། དཀོན་མཆོག་ཡ་ཝཱེའི་བཀའ་ལ་ཉོན་ཅིག ཡ་ཝཱེས་ཡུལ་འདིའི་མི་རྣམས་ལ་སྐྱོན་བརྗོད་པ་སྟེ། ཡུལ་འདི་རུ་བདེན་པ་དང་བྱམས་བརྩེ། དཀོན་མཆོག་ངོ་ཤེས་མཁན་བཅས་ནི་མེད་པ་དང་།
HOS 4:2 མནའ་རྫུན་མ་སྐྱེལ་བ་དང་། སླུ་བྲིད་གཏོང་བ། སྲོག་གཅོད་པ། རྐུ་བྱེད་པ། ལོག་གཡེམ་བྱེད་པ། གདུག་རྩུབ་སྤྱོད་པ། མི་བསད་ནས་ཁྲག་བཞུར་བ་བཅས་ནི་རྒྱུན་ཆད་མེད་པས་ན།
HOS 4:3 ཡུལ་འདིར་སྡུག་བསྔལ་གྱིས་ཁེངས་འདུག་སྟེ། དེར་སྡོད་པའི་ཡུལ་མི་རྣམས་དང་ཐང་གི་གཅན་གཟན། ནམ་མཁའི་འདབ་ཆགས་བཅས་ཐམས་ཅད་ཉིན་རེ་བཞིན་ཉམས་རྒུད་དུ་འགྱུར་ཞིང་། རྒྱ་མཚོའི་ཉ་རྣམས་ཀྱང་མེད་པར་འགྱུར་རོ། །
HOS 4:4 ཡིན་ནའང་སུ་ཞིག་གིས་ཀྱང་གཞན་དང་མ་རྩོད་སྐྱོན་ཡང་མ་བརྗོད་ཅིག ཁྱོད་ཀྱི་མི་རྣམས་ནི་མཆོད་དཔོན་ལ་བཀག་འགོག་བྱེད་པ་རྣམས་དང་འདྲའོ། །
HOS 4:5 ཉིན་དཀར་ཁྱོད་རང་འགྱེལ་བར་འགྱུར་ལ། མཚན་མོར་ལུང་སྟོན་པའང་ཁྱོད་དང་མཉམ་དུ་འགྱེལ་བར་འགྱུར་ཞིང་། ངས་ཁྱོད་ཀྱི་མ་ནི་མེད་པར་བྱའོ། །
HOS 4:6 ངའི་མི་རིགས་ལ་ཤེས་བྱ་མི་ལྡན་པས་མེད་པར་གྱུར་པ་དང་། ཁྱོད་ཀྱིས་ཤེས་བྱ་དོར་བས་ན་ངས་ཀྱང་ཁྱོད་རང་འདོར་བར་བྱ་སྟེ། ཁྱོད་ངའི་དྲུང་དུ་མཆོད་དཔོན་ཏུ་བསྐོ་བར་མི་བྱ། ཁྱོད་ཀྱིས་རང་གི་དཀོན་མཆོག་གི་བཀའ་ཁྲིམས་བརྗེད་པས་ན་ངས་ཀྱང་ཁྱོད་ཀྱི་བུ་ཕྲུག་རྣམས་བརྗེད་པར་འགྱུར་རོ། །
HOS 4:7 མཆོད་དཔོན་ཇི་ལྟར་འཕེལ་ན་ང་དང་འགལ་བའི་སྡིག་པ་དེ་ལས་ལྷག་པར་བྱས་པས། ངས་དེ་དག་གི་གཟི་བརྗིད་ནི་ངོ་ཚ་རུ་བསྒྱུར་བར་བྱའོ། །
HOS 4:8 དེ་དག་གིས་ངའི་མི་རྣམས་ཀྱི་སྡིག་བཤགས་མཆོད་པ་ཁྱུར་མིད་གཏོང་ཞིང་། ངའི་མི་རྣམས་ཀྱིས་སྡིག་ཉེས་བསགས་ན་སེམས་གཏིང་ནས་དགའ་བ་ཡིན།
HOS 4:9 ཡང་མི་ཐམས་ཅད་ལ་ཅི་ཞིག་ཕོག་པ་ལྟར་མཆོད་དཔོན་རྣམས་ལའང་དེ་འཕོག་པར་འགྱུར། ངས་དེ་དག་གི་སྤྱོད་པ་ལྟར་ཆད་པ་གཅོད་ངེས་ཡིན་ལ། དེ་དག་གི་ཅི་བྱས་བཞིན་ལན་གནང་བར་བྱའོ། །
HOS 4:10 དེ་དག་གིས་ཟོས་ཀྱང་མི་ཚིམ་ལ། ལོག་གཡེམ་བྱས་ཀྱང་རྒྱུད་འཕེལ་བར་མི་འགྱུར་ཏེ། ཅི་ལ་ཞེ་ན། ཁོ་ཚོས་དཀོན་མཆོག་ཡ་ཝཱེ་སྤངས་ནས།
HOS 4:11 ནམ་རྒྱུན་ལོག་གཡེམ་བྱེད་ཅིང་། རྒུན་ཆང་གསར་རྙིང་གཉིས་ཀས་མི་སེམས་འཕྲོག་པར་བྱེད་པའོ། །
HOS 4:12 ངའི་མི་རྣམས་ཀྱིས་ཤིང་གི་སྐུ་བརྙན་ལ་བཀའ་འདྲི་ཞུས་ནས། དེའི་དབྱུག་པས་ཁོ་ཚོར་ལམ་སྟོན་གནང་བར་བསམ་པ་དང་། ལོག་གཡེམ་གྱི་སེམས་ཀྱིས་དེ་དག་གི་ལམ་ཁ་ནོར་དུ་བཅུག་ཅིང་། ལོག་གཡེམ་སྤྱད་དེ་རང་གི་དཀོན་མཆོག་སྤངས་པ་དང་།
HOS 4:13 རི་བོའི་རྩེ་མོ་རྣམས་སུ་མཆོད་པ་འབུལ་ཞིང་། མཐོ་གླིང་དག་གི་སྟེང་དུ་ལོ་འདབ་རྒྱས་ནས་བསིལ་གྲིབ་སྦྱིན་པའི་བེ་ཤིང་དང་སྦྱར་བ། ཐང་ཤིང་ཚི་བ་ཅན་བཅས་ཀྱི་འོག་ཏུ་བདུག་སྤོས་གདུག་པའོ། །དེ་བས་ཁྱོད་ཀྱི་བུ་མོ་དག་གིས་གཞང་བཙོང་ཞིང་། མནའ་མ་དག་གིས་ཀྱང་ལོག་གཡེམ་བྱེད་དོ། །
HOS 4:14 ཁྱོད་ཀྱི་བུ་མོ་རྣམས་ཀྱིས་གཞང་བཙོངས་པའི་ལས་དང་། མནའ་མ་རྣམས་ཀྱིས་ལོག་གཡེམ་སྤྱད་པའི་ལས་ལ་ངས་ཉེས་ཆད་མི་གཅོད་དེ། ཅི་ལ་ཞེ་ན། དེ་རྣམས་རང་ཉིད་སོང་ནས་སྨད་འཚོང་མ་དང་འགྲོགས་ཤིང་། མཆོད་གཤོམ་གྱི་ཆོས་རྫུ་སྨད་འཚོང་མ་དང་འགྲོགས་ནས་མཆོད་པ་འབུལ་ལོ། །དེ་བས་ཤེས་རྨོངས་ཅན་གྱི་མི་འདི་རྣམས་ནི་འཇིག་པར་འགྱུར་རོ། །
HOS 4:15 ཀྱེ་ཡེས་ར་ཨེལ་ཁྱོད་ཀྱིས་ལོག་གཡེམ་བྱས་ཀྱང་། ཡ་ཧུ་དཱས་སྡིག་པ་བྱེད་མི་རུང་ལ། གིལ་གལ་དང་པེད་ཨ་ཝེན་དུ་ཡར་མ་འགྲོ་ཞིག གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་ཡང་མ་བསྐྱལ་ཞིག
HOS 4:16 ཡེས་ར་ཨེལ་གྱི་མི་རྣམས་ནི་བ་གཞོན་བཞིན་དུ་ཨུ་ཚུགས་ཆེ་བས། ད་ལྟ་དཀོན་མཆོག་ཡ་ཝཱེས་དེ་རྣམས་ཁོད་ཡངས་སར་ལུ་གུ་བཞིན་དུ་འཚོ་ནུས་སམ།
HOS 4:17 ཨེ་ཕཱར་ཡིམ་ནི་སྐུ་འདྲར་ཆགས་པས་སྐྱུར་ཞོག
HOS 4:18 དེ་དག་གིས་བཟི་དྭངས་རྗེས་ལོག་གཡེམ་བག་མེད་བྱེད་ཅིང་། དེ་དག་གི་འགོ་དཔོན་རྣམས་ནི་ངོ་ཚའི་ལས་ལ་རབ་ཏུ་དགའོ། །
HOS 4:19 དེ་དག་རླུང་འཚུབ་མས་འཁྱེར་ཞིང་། རང་གིས་འབུལ་བའི་མཆོད་པ་རྣམས་ཀྱིས་དེ་དག་སྐྱེངས་པར་བྱའོ། །
HOS 5:1 ཀྱེ་མཆོད་དཔོན་རྣམས་ཀྱིས་འདི་ལ་ཉོན་ཅིག ཀྱེ་ཡེས་ར་ཨེལ་ཁྱིམ་རྒྱུད་ཀྱིས་གཟབ་གཟབ་བྱས་ནས་ཉོན་ཅིག ཀྱེ་རྒྱལ་རྒྱུད་ཀྱིས་རྣ་བ་བླགས་ནས་ཉོན་ཅིག མཱས་ཟི་ཕཱ་རུ་ཁྱོད་ནི་རྙི་དང་། ཐ་པོར་རི་ལ་ཁྱོད་ནི་ཁ་ཕྱེས་པའི་དྲ་རྒྱ་བཞིན་ཡིན་པས། ཁྱོད་ལ་བཀའ་ཆད་འཕོག་པར་འགྱུར།
HOS 5:2 གྱེན་ལོག་པ་འདི་རྣམས་ཀྱིས་གང་འདོད་ལྟར་དམར་གསོད་བཏང་ཞིང་། ངས་དེ་ཐམས་ཅད་ལ་བཀའ་བཀྱོན་གནང་བར་བྱའོ། །
HOS 5:3 ཨེ་ཕཱར་ཡིམ་ནི་ངས་ཤེས་པ་དང་། ཡེས་ར་ཨེལ་ནི་ང་ལས་བསྐུང་ཐབས་མེད། ཀྱེ་ཨེ་ཕཱར་ཡིམ། ད་ལྟ་ཁྱོད་ལས་ལོག་གཡེམ་བྱུང་ཞིང་། ཡེས་ར་ཨེལ་ནི་སྦགས་པ་ཡིན་ནོ། །
HOS 5:4 དེ་དག་གི་སྤྱོད་པའི་རྐྱེན་གྱིས་ཁོ་རྣམས་རང་གི་དཀོན་མཆོག་གི་དྲུང་དུ་ཕྱིར་ལོག་མི་ཐུབ། གང་ལ་ཞེ་ན། དེ་དག་གི་ནང་དུ་ལོག་གཡེམ་གྱི་སེམས་ཡོད་པས་དཀོན་མཆོག་ཡ་ཝཱེ་ངོ་མི་ཤེས་སོ། །
HOS 5:5 ཡེས་ར་ཨེལ་གྱི་ང་རྒྱལ་གྱིས་རང་གི་སྤྱོད་ངན་ལ་བདེན་དཔང་བྱས་པ་དང་། ཡེས་ར་ཨེལ་དང་ཨེ་ཕཱར་ཡིམ་གཉིས་རང་རང་གི་སྡིག་པས་འགྱེལ་ཞིང་། ཡ་ཧུ་དཱའང་དེ་དག་དང་མཉམ་དུ་འགྱེལ་ངེས་ཡིན།
HOS 5:6 དཀོན་མཆོག་ཡ་ཝཱེ་ནི་དེ་དག་དང་ཁ་བྲལ་བས་ན། དེ་དག་གིས་ར་ལུག་དང་བ་གླང་གི་ཁྱུ་དེད་ནས་ཁོང་བཙལ་ནའང་རྙེད་པར་མི་འགྱུར་རོ། །
HOS 5:7 དེ་དག་དཀོན་མཆོག་ཡ་ཝཱེར་བློ་ལོག་ནས་བྱི་ཕྲུག་བཙས་པས། ཚེས་གཅིག་ཉིན་མོར་དེ་དག་དང་དེ་དག་གི་ས་སྐལ་གཉིས་ལྷན་ཅིག་ཏུ་ཚར་གཅོད་པར་འགྱུར་རོ། །
HOS 5:8 ཁྱོད་ཚོས་གིབ་ཨ་རུ་རྭ་དུང་དང་རཱ་མ་རུ་དུང་བུས་ཤིག པེད་ཨ་ཝེན་དུ་ཉེན་བརྡ་ཐོངས་ཤིག ཀྱེ་པེན་ཡཱ་མེན་ཁྱོད་ཀྱིས་རང་གི་རྒྱབ་ལ་དོགས་ཟོན་གྱིས་ཤིག
HOS 5:9 ཉེས་ཆད་གཅོད་པའི་ཉིན་མོར་ཨེ་ཕཱར་ཡིམ་ནི་ཞིག་རོར་འགྱུར་ཏེ། ཡེས་ར་ཨེལ་གྱི་ཚོ་པ་ཁག་གི་ནང་དུ་ངས་མ་འོངས་འབྱུང་འགྱུར་གྱི་དོན་རྣམས་མངོན་པར་བྱས།
HOS 5:10 ཡ་ཧུ་དཱའི་འགོ་དཔོན་རྣམས་ནི་ས་མཚམས་ཀྱི་རྟགས་སྤོ་མཁན་རྣམས་དང་འདྲ་བས། ངས་རང་གི་ཁོང་ཁྲོ་ནི་ཆུ་ལོག་བཞིན་དུ་དེ་དག་གི་སྟེང་ལ་བླུག་པར་བྱའོ། །
HOS 5:11 ཨེ་ཕཱར་ཡིམ་ནི་སྙིང་པོ་མེད་པའི་རྗེས་སུ་འབྲང་བར་དགའ་བས། གཉའ་གནོན་ཐེབས་ཤིང་བཀའ་ཆད་ཀྱིས་བརྫིས་པའོ། །
HOS 5:12 ང་ནི་ཨེ་ཕཱར་ཡིམ་ལ་མུག་པ་དང་། ཡ་ཧུ་དཱའི་ཁྱིམ་རྒྱུད་ལ་ཉམས་རུལ་ལྟ་བུ་ཡིན།
HOS 5:13 ཨེ་ཕཱར་ཡིམ་གྱིས་རང་གི་ནད་དང་ཡ་ཧུ་དཱ་ཡིས་རང་གི་རྨ་ཁ་མཐོང་བ་ན། ཨེ་ཕཱར་ཡིམ་ནི་ཨ་སུར་ལ་ཕྱིན་ཏེ་རྒྱལ་པོ་ཡ་རབ་པི་ཡི་མདུན་དུ་མི་མངགས་ཀྱང་། དེས་ཁྱོད་གསོ་བར་མི་ནུས་ལ། རྨ་ཡང་དྲག་ཏུ་འཇུག་མི་ཐུབ་བོ། །
HOS 5:14 ང་ནི་ཨེ་ཕཱར་ཡིམ་ལ་སེང་གེ་ལྟ་བུ་དང་། ཡ་ཧུ་དཱའི་ཁྱིམ་རྒྱུད་ལ་སེང་གེ་དར་མ་ལྟ་བུར་འགྱུར་ཞིང་། ངས་སིལ་བུར་ཧྲལ་ནས་འགྲོ་བ་དང་། ངས་ཁྱེར་ནས་འགྲོ་ཞིང་སྐྱོབ་མཁན་སུ་ཡང་མེད།
HOS 5:15 དེ་དག་གིས་རང་ལ་ཉེས་སྐྱོན་ཡོད་པ་ཚོར་ནས་ངའི་ངོ་གདོང་བཙལ་བའི་བར་དུ། ང་ཕྱིར་རང་གི་གནས་སུ་ལོག་པར་བྱ་སྟེ། དཀའ་སྡུག་གི་ཁྲོད་དུ་ཁོ་ཚོས་ང་རང་འབད་པས་བཙལ་ངེས་ཡིན།
HOS 6:1 ཤོག་དང་རང་ཅག་རྣམས་དཀོན་མཆོག་ཡ་ཝཱེའི་ཕྱོགས་སུ་ཕྱིར་ལོག་པར་བྱའོ། །ཁོང་གིས་རང་ཅག་སིལ་བུར་ཧྲལ་ནའང་གསོ་བར་འགྱུར་ལ། ཁོང་གིས་རང་ཅག་ལ་བརྡུངས་ནས་རྨས་ནའང་རྨ་ཁ་བསྡམ་པར་འགྱུར་རོ། །
HOS 6:2 ཉིན་གཉིས་པར་རང་ཅག་གསོན་པར་མཛད་ཅིང་། ཉིན་གསུམ་པར་རང་ཅག་དར་བར་བྱས་ནས། ཁོང་གི་སྤྱན་དྲུང་དུ་རང་ཅག་འཚོ་བར་འགྱུར།
HOS 6:3 རང་ཅག་གིས་དཀོན་མཆོག་ཡ་ཝཱེ་ཤེས་འོས་ཏེ། ཁོང་ཉིད་ཤེས་ཐབས་བྱེད་དགོས། ཁོང་ནི་ཞོགས་པའི་ཉི་མ་ལྟར་འཆར་ཞིང་། སྦྲང་ཆར་ཟིལ་མ་བཞིན་རང་ཅག་གི་སྟེང་འབབ་པ་དང་ས་རློན་བྱེད་ཀྱི་ཆར་པ་བཞིན་ཡིན་ནོ། །
HOS 6:4 ཀྱེ་ཨེ་ཕཱར་ཡིམ། ངས་ཁྱོད་ལ་ཅི་བྱའམ། ཀྱེ་ཡ་ཧུ་དཱ། ངས་ཁྱོད་ལ་ཅི་བྱའམ། གང་ལ་ཞེ་ན། ཁྱོད་ཀྱི་བྱམས་བརྩེ་ནི་ཐོ་རངས་ཀྱི་སྨུག་པ་དང་སྐད་ཅིག་ཙམ་ལ་ཡལ་འགྲོ་བའི་ཟིལ་བ་དང་འདྲའོ། །
HOS 6:5 དེ་བས་ངས་ལུང་སྟོན་པ་བརྒྱུད་ནས་ཁྱོད་རྣམས་དུམ་བུར་བཅད་ཅིང་། ཁོ་བོའི་སྨྲ་སྒོ་ལས་ཐོན་པའི་ཚིག་གིས་ཁྱོད་ཅག་བསད་པ་དང་། བདག་གི་ཁྲིམས་གཅོད་ནི་ཁྱོད་རྣམས་ལ་འོད་ལྟར་འཕྲོས་པ་སྟེ།
HOS 6:6 ཅིའི་ཕྱིར་ཞེ་ན། བདག་ནི་མཆོད་པར་མི་དགའ་ཞིང་སྙིང་རྗེའི་སེམས་ལ་དགའ་བ་དང་། སྦྱིན་སྲེག་རྣམས་ལས་མི་རྣམས་ཀྱིས་དཀོན་མཆོག་ཤེས་པ་ལ་ལྷག་པར་དགའོ། །
HOS 6:7 འོན་ཀྱང་ཁོ་རྣམས་ནི་ཞལ་ཆད་དང་འགལ་བའི་མི་དང་འདྲ་ཞིང་དེ་རུ་ང་ལ་གཡོ་སྒྱུའི་སྦྱོར་བ་སྤེལ་ཏོ། །
HOS 6:8 གིལ་ཨད་ནི་སྡིག་ཉེས་གསོག་པའི་གྲོང་ཁྱེར་ཡིན་ལ་དེ་ཁྲག་གིས་སྦགས།
HOS 6:9 མཆོད་དཔོན་ཚོགས་ཀྱིས་ཇག་དཔུང་བཞིན་འཇབ་སྒུག་བྱས་ཏེ་སི་ཀེམ་གྱི་ལམ་དུ་སྲོག་བཅད་ནས་ངན་པ་སྤྱད།
HOS 6:10 ཡེས་ར་ཨེལ་གྱི་ཁྱིམ་རྒྱུད་ལས་ངས་འཇིགས་སུ་རུང་བའི་དོན་ཞིག་མཐོང་ཞིང་། ཨེ་ཕཱར་ཡིམ་གྱི་ནང་དུ་ལོག་གཡེམ་ཡོད་པ་དང་། ཡེས་ར་ཨེལ་སྦགས་པ་ཡིན།
HOS 6:11 ཀྱེ་ཡ་ཧུ་དཱ། ངས་རང་གི་མི་རྣམས་བཙོན་ལས་ཕྱིར་ཁྲིད་འོང་བའི་ཚེ། ཁྱོད་ལའང་སྟོན་ཐོག་ཅིག་འཐོབ་པར་མཛད་དོ། །
HOS 7:1 ངས་ཡེས་ར་ཨེལ་གསོ་བར་བརྩམས་པ་ལ། ཨེ་ཕཱར་ཡིམ་གྱི་སྡིག་པ་དང་སཱ་མར་ཡའི་ཉེས་པ་རྣམས་མངོན་པར་གསལ་བ་སྟེ། དེ་རྣམས་ཀྱིས་གཡོ་སྒྱུ་ཁྲམ་གསུམ་བྱེད་པ་དང་། ནང་དུ་རྐུན་མ་འཛུལ་ཞིང་ཕྱི་རུ་ཇག་དཔུང་གིས་འཕྲོག་གོ །
HOS 7:2 ངས་ཁོ་ཚོའི་ལས་ངན་པ་ཐམས་ཅད་སེམས་སུ་བཟུང་ཡོད་པ་དེ་ཚོས་མ་ཚོར་ལ། ད་ལྟ་ངའི་མིག་མདུན་དུ་ཁོ་རྣམས་ནི་རང་གི་ལས་རྣམས་ཀྱིས་ཁྱུར་མིད་གཏོང་བ་ཡིན།
HOS 7:3 དེ་ཚོས་སྤྱོད་ངན་སྤྱད་ནས་རྒྱལ་པོ་དགའ་བར་བྱེད་པ་དང་། རྫུན་སྨྲས་ནས་སྐུ་དྲག་རྣམས་དགའ་བར་བྱེད་དེ།
HOS 7:4 དེ་ཐམས་ཅད་ལོག་གཡེམ་བྱེད་མཁན་ཡིན་ལ། ཁོ་རྣམས་ཀྱི་འདོད་པ་ནི་མེ་ཐབ་ཚ་པོ་དང་མཚུངས་ཏེ། བག་ལེབ་སྲེག་མཁན་གྱིས་ཕྱེ་བརྫིས་ནས་སྐྱུར་ལང་བའི་བར་དུ་མེ་འབུད་མི་དགོས་སོ། །
HOS 7:5 རང་ཅག་གི་རྒྱལ་པོས་དགའ་སྟོན་ལ་རོལ་བའི་ཉིན་མོར་སྐུ་དྲག་རྣམས་ཀྱིས་ཆང་འཐུང་ནས་གང་སར་བསྐྱུགས་པ་དང་། རྒྱལ་པོ་ནི་ཁྱད་གསོད་མཁན་དག་དང་འགྲོགས་ནས་དེའི་ལག་པར་འཇུས།
HOS 7:6 ལྐོག་འཇབ་བྱེད་མཁན་རྣམས་ཀྱི་སེམས་ནི་མེ་ཐབ་བཞིན་ཡིན་ལ། ཁོ་ཚོས་བག་ལེབ་སྲེག་མཁན་མཚན་གང་པོར་གཉིད་པ་ལྟར་སྒུག་ཅིང་། ཞོགས་པ་སླེབས་དུས་མེ་ལྟར་འབར་རོ། །
HOS 7:7 དེ་ཐམས་ཅད་མེ་ཐབ་བཞིན་ཚ་ཞིང་རང་གི་ཁྲིམས་དཔོན་རྣམས་མེད་པར་བྱེད་ལ། ཁོ་ཚོའི་རྒྱལ་པོ་ཐམས་ཅད་འགྱེལ་བ་དང་། དེ་དག་གི་ཁྲོད་དུ་ང་ལ་ཞུ་བ་བྱེད་མཁན་སུ་ཡང་མེད་དོ། །
HOS 7:8 ཨེ་ཕཱར་ཡིམ་ནི་ཕྱི་རོལ་པ་རྣམས་དང་འདྲེས་ཤིང་། སྟེང་འོག་མ་བསྒྱུར་བའི་བག་ལེབ་དང་འདྲ་སྟེ།
HOS 7:9 ཕྱི་རོལ་པ་རྣམས་ཀྱིས་དེའི་སྟོབས་ཟད་དུ་བཅུག་ནའང་དེས་མ་ཤེས་ལ། སྐྲ་དཀར་པོར་གྱུར་ཡང་མ་ཚོར།
HOS 7:10 ཡེས་ར་ཨེལ་གྱི་ང་རྒྱལ་གྱིས་རང་གི་སྤྱོད་ངན་ལ་བདེན་དཔང་བྱས་པ་དང་། ཁོ་རྣམས་དོན་དེ་ཐམས་ཅད་དང་ཕྲད་ནའང་རང་གི་དཀོན་མཆོག་ཡ་ཝཱེའི་ཕྱོགས་སུ་མ་ལོག་ཅིང་། ཁོང་བཙལ་ཡང་མ་བཙལ་ཏོ། །
HOS 7:11 ཨེ་ཕཱར་ཡིམ་ནི་ཕུག་རོན་ལྟར་བླུན་རྨོངས་ཤེས་མེད་ཡིན་ཏེ། ཁོ་ཚོས་ཨེ་ཅིབ་ལ་ཞུ་བ་བྱེད་ཅིང་ཨ་སུར་ལ་རྒྱབ་རྟེན་བཅོལ་བའོ། །
HOS 7:12 དེ་དག་འགྲོ་དུས་ངས་རང་གི་རྙི་རྒྱ་ཁོ་ཚོའི་སྟེང་དུ་གཡུགས་ནས་ནམ་མཁའི་བྱ་ལྟར་འཛིན་དགོས་ལ། དེ་དག་གི་ཚོགས་ཀྱི་ནང་དུ་ཐོས་པ་བཞིན་དུ་ཁོ་རྣམས་ལ་ཆད་པ་གཅོད་ངེས།
HOS 7:13 དེ་དག་གིས་ང་རང་དོར་བས་ཆག་སྒོ་འབྱུང་། ང་ལ་རྒྱབ་འགལ་བྱས་པས་མེད་པར་བཟོ་ངེས་ཡིན། ངས་དེ་དག་སྐྱོབ་པར་འདོད་ནའང་ཁོ་ཚོས་ང་ལ་རྫུན་སྨྲའོ། །
HOS 7:14 དེ་དག་གིས་རང་གི་མལ་ནས་སྨྲེ་སྔགས་བཏོན་ནའང་སེམས་བསམ་པས་ང་རང་མི་འབོད། དེ་དག་འབྲུ་རིགས་དང་རྒུན་ཆང་འཐོབ་པའི་ཕྱིར་མཉམ་དུ་འཛོམས་ནའང་ང་ལ་ངོ་ལོག་བྱེད་པ་ཡིན།
HOS 7:15 ངས་དེ་དག་ལ་སྦྱོང་བརྡར་སྤྲད་ནས་ཁོ་ཚོའི་དཔུང་པར་སྟོབས་བཅུག་མོད། དེ་དག་གིས་ད་དུང་ང་ལ་བསམ་སྦྱོར་ངན་པ་བྱེད་དོ། །
HOS 7:16 དེ་དག་ཕྱིར་འཁོར་ཡང་བླ་ན་མེད་པ་ཁོང་གི་ཕྱོགས་སུ་མི་འཁོར་ཏེ། མཐར་དེ་རྣམས་ནི་གཞུ་རྒྱུད་ལྷོད་པའི་གཞུ་ལྟར་ཡིན་ལ། དེ་དག་གི་འགོ་དཔོན་རྣམས་ཀྱིས་ངག་འཁྱལ་བརྗོད་པས་རལ་གྲིའི་ཁར་སྲོག་འཆོར་བ་དང་། ཨེ་ཅིབ་པ་ཚོས་ཁོ་རྣམས་ལ་འཕྱ་བར་འགྱུར་རོ། །
HOS 8:1 ཁྱོད་ཀྱིས་རྭ་དུང་བུས་ཤིག དེ་དག་ངའི་ཞལ་ཆད་དང་འགལ་ནས་ངའི་བཀའ་ཁྲིམས་ལ་ངོ་ལོག་བྱས་པས། དགྲ་རྣམས་གླག་རྒོད་ལྟར་འོངས་ནས་དཀོན་མཆོག་ཡ་ཝཱེའི་ཁྱིམ་ལ་རྒོལ་བའོ། །
HOS 8:2 ཀྱེ་ངེད་ཅག་གི་དཀོན་མཆོག་ལགས། ངེད་ཡེས་ར་ཨེལ་གྱིས་ཁྱེད་ངོ་ཤེས་སོ་ཞེས་དེ་དག་གིས་ང་འབོད་པར་འགྱུར།
HOS 8:3 ཡེས་ར་ཨེལ་གྱིས་གང་ལེགས་པ་དེ་དོར་བས། དགྲ་བོས་ཁོ་རྣམས་འདེད་པར་བྱ།
HOS 8:4 དེ་དག་གིས་རྒྱལ་པོ་བསྐོས་པ་བདག་ལས་བྱུང་བ་མིན། དེ་དག་གིས་འགོ་དཔོན་རྣམས་བསྐོས་ཀྱང་ངས་མ་ཤེས། ཁོ་ཚོས་གསེར་དང་དངུལ་གྱིས་སྐུ་འདྲ་རྣམས་བཟོས་པས། མཐར་བདག་གིས་ཁོ་ཚོ་རྩ་མེད་དུ་གཏོང་ངོ་། །
HOS 8:5 ཀྱེ་སཱ་མར་ཡ། ཡ་ཝཱེས་ཁྱོད་ཀྱི་བ་ཕྲུག་གི་སྐུ་འདྲ་དོར་བ་དང་། ངའི་ཁོང་ཁྲོ་ནི་སྐུ་འདྲར་དད་མཁན་རྣམས་ཀྱི་སྟེང་ལ་བབས་ཏེ། དེ་དག་དུས་ནམ་ཞིག་ལ་ད་གཟོད་སྡིག་པ་དང་འབྲལ་བར་འགྱུར་རམ།
HOS 8:6 བ་ཕྲུག་དེ་ནི་ཡེས་ར་ཨེལ་ལས་བྱུང་བ་སྟེ། བཟོ་བས་བཟོས་པ་ལས་དཀོན་མཆོག་མ་ཡིན་པས། སཱ་མར་ཡའི་བ་ཕྲུག་ནི་རྡུལ་དུ་བརླག་པར་འགྱུར་རོ། །
HOS 8:7 དེ་དག་གིས་རླུང་བཏབ་ནས་རླུང་ནག་འཚུབ་མ་བསྡུ་བར་འགྱུར། ལོ་ཏོག་ལ་སྙེ་མ་མི་ཐོགས་ཤིང་། མྱུ་གུ་འབུས་ཀྱང་འབྲུ་རིགས་མི་སྨིན་ཏེ། འབྲུ་རིགས་སྨིན་ཡང་ཕྱི་རོལ་པས་དེ་མིད་པར་བྱ།
HOS 8:8 ཡེས་ར་ཨེལ་ནི་མིད་པར་འགྱུར་ཏེ། དེ་ནི་མི་སྡེ་རྣམས་ཀྱི་ཁྲོད་དུ་མི་འདོད་པའི་སྣོད་ལྟར་གྱུར་ཏོ། །
HOS 8:9 དེ་དག་གིས་རྐྱང་ཁེར་འགྲོ་ཞིག་དང་འདྲ་བར་ཨ་སུར་ལ་རྒྱབ་རྟེན་བཅོལ་བ་དང་། ཨེ་ཕཱར་ཡིམ་གྱིས་རང་ལ་དགའ་རོགས་གླས་ཤིང་།
HOS 8:10 དེ་དག་གིས་མི་སྡེ་རྣམས་གླས་ནའང་། ད་ནི་ངས་དེ་དག་མཉམ་དུ་བསྡུ་བར་བྱ་སྟེ། ཁོ་རྣམས་ནི་རྒྱལ་པོ་དང་འགོ་དཔོན་དག་གི་མནར་གཅོད་ཀྱིས་ཉམས་ང་བར་འགྱུར་རོ། །
HOS 8:11 ཨེ་ཕཱར་ཡིམ་གྱིས་སྡིག་པ་གཤགས་པའི་ཕྱིར་མཆོད་ཁྲི་མང་པོ་བཞེངས་པ་དང་། མཆོད་ཁྲི་དེ་དག་ནི་དེས་སྡིག་པ་བྱེད་ས་རུ་གྱུར་པའོ། །
HOS 8:12 ངས་དེའི་དོན་དུ་བཀའ་ཁྲིམས་མང་པོ་བཀོད་ཀྱང་། ཁོས་དེ་ནི་སྣང་མེད་དུ་བཞག་གོ །
HOS 8:13 དེ་དག་གིས་ང་ལ་མཆོད་རྫས་ཕུལ་ཡང་ཤ་ནི་རང་གིས་ཟའོ། །དཀོན་མཆོག་ཡ་ཝཱེ་དེ་དག་ལ་མི་དགའ། ད་ནི་ཁོང་གིས་དེ་ཚོའི་སྡིག་པ་ཐུགས་སུ་དྲན་ཞིང་། དེ་དག་གི་ཉེས་པར་ཆད་པ་བཅད་དེ། དེ་དག་ཨེ་ཅིབ་ཡུལ་དུ་ཕྱིར་ལོག་པར་འགྱུར་རོ། །
HOS 8:14 ཡེས་ར་ཨེལ་གྱིས་རང་གི་བྱེད་པོ་བརྗེད་ནས་ཕོ་བྲང་རྣམས་བརྩིགས། ཡ་ཧུ་དཱས་གྲོང་ཁྱེར་བརྟན་པོ་དུ་མ་བརྩིགས་ནའང་ངས་དེའི་གྲོང་ཁྱེར་རྣམས་ལ་མེ་བཏང་ནས་མཁར་རྣམས་འཚིག་པར་འགྱུར་རོ། །
HOS 9:1 ཀྱེ་ཡེས་ར་ཨེལ། མི་རིགས་གཞན་རྣམས་དང་འདྲ་བར་དགའ་ཞིང་ཡི་རང་བར་མ་བྱེད་ཅིག ཅི་ལ་ཞེ་ན། ཁྱོད་ཀྱིས་ལོག་གཡེམ་སྤྱད་ནས་དཀོན་མཆོག་སྤངས་པ་དང་། གཡུལ་ཁ་རེ་རེའི་ནང་དུ་ཁྱོད་ནི་སྨད་བཙོངས་ནས་ཐོབ་པའི་རྔན་པར་ཆགས་སོ། །
HOS 9:2 གཡུལ་ཁ་དང་རྒུན་འབྲུམ་འཚིར་གཞོང་གིས་དེ་དག་གི་ཁ་མི་སོས་ལ། རྒུན་ཆང་གསར་པའང་ཆད་པར་འགྱུར།
HOS 9:3 དེ་དག་དཀོན་མཆོག་ཡ་ཝཱེའི་ཡུལ་དུ་གནས་མི་ཐུབ་ལ། ཨེ་ཕཱར་ཡིམ་ནི་ཕྱིར་ཨེ་ཅིབ་ཡུལ་དུ་ལོག་ཅིང་། ཨ་སུར་དུ་ཟས་མི་གཙང་བ་བཟའ་བར་འགྱུར།
HOS 9:4 དཀོན་མཆོག་ཡ་ཝཱེར་སྐྱེམས་མཆོད་འབུལ་མི་ནུས་ཤིང་། ཁོ་ཚོའི་མཆོད་པར་ཁོང་ཐུགས་མཉེས་པར་ཡང་མི་འགྱུར། དེ་དག་གི་མཆོད་པ་ནི་གཤིན་པོར་མྱ་ངན་བྱེད་མཁན་གྱི་བག་ལེབ་ལྟར་ཡིན་ལ། དེ་ཟ་བ་ཐམས་ཅད་མི་གཙང་བར་འགྱུར་རོ། །གང་ལ་ཞེ་ན། དེ་དག་གི་བག་ལེབ་ནི་རང་གི་ལྟོ་བའི་ཕྱིར་ཡིན་པ་མ་གཏོགས། དཀོན་མཆོག་ཡ་ཝཱེའི་མཆོད་ཁང་ནང་དུ་འཁྱེར་མི་རུང་།
HOS 9:5 ཁྱོད་རྣམས་འདུ་འཛོམས་ཀྱི་ཉིན་མོ་དང་། དཀོན་མཆོག་ཡ་ཝཱེའི་དུས་ཆེན་གྱི་ཉིན་མོར་ཁྱོད་ཚོས་ཅི་བྱའམ།
HOS 9:6 ལྟོས་ཤིག དེ་དག་གོད་ཆག་ལས་བྲོས་ནའང་ཨེ་ཅིབ་པས་ཁོ་ཚོ་བསྡུས་ནས་ནོབ་པ་རྣམས་ཀྱིས་བསྐུང་བར་འགྱུར། ཁོ་ཚོའི་དངུལ་གྱི་ནོར་བུ་རྣམས་གཟེ་མ་ར་མགོ་ཡིས་བཟུང་བར་འགྱུར་ལ། ཁོ་ཚོའི་གུར་གྱི་ནང་དུ་ཚེར་མ་སྐྱེ་བར་འགྱུར་རོ། །
HOS 9:7 ཉེས་ཆད་ཀྱི་ཉིན་མོ་སླེབས་ལ་ཉེ། ལན་འཇལ་བའི་དུས་སྐབས་སླེབས་ཟིན་ཏོ། །ཡེས་ར་ཨེལ་གྱིས་དེ་རྟོགས་པར་འགྱུར་ཏེ། ལུང་སྟོན་པ་ནི་བླུན་པོ་དང་། ཐུགས་ཉིད་དང་ལྡན་པའི་མི་ནི་སྨྱོན་པ་དང་འདྲ་བར་འདོད་དོ། །ཅིའི་ཕྱིར་ཞེ་ན། ཁྱོད་ཀྱིས་སྡིག་པ་མང་པོ་བསགས་ནས་སེམས་སུ་ཞེ་སྡང་གིས་ཁེངས་པས་སོ། །
HOS 9:8 ལུང་སྟོན་པས་ངའི་དཀོན་མཆོག་དང་མཉམ་དུ་ཨེ་ཕཱར་ཡིམ་ལ་བྱ་ར་བྱེད་ཅིང་། ལུང་སྟོན་པ་འགྲོ་སའི་ལམ་ཐམས་ཅད་དུ་བྱ་རྙི་དང་། རང་གི་དཀོན་མཆོག་གི་གནས་ལ་འཁོན་སེམས་བཅངས་སོ། །
HOS 9:9 གིབ་ཨའི་ཉིན་མོ་ནང་བཞིན་དེ་དག་རྩ་བ་ནས་ཉམས་པར་བྱས་པ་དང་། ཡ་ཝཱེས་དེ་དག་གི་སྡིག་པ་ཐུགས་སུ་དྲན་ནས་ཁོ་ཚོའི་སྡིག་ཉེས་ལ་ཆད་པ་གཅོད་དོ། །
HOS 9:10 ཡེས་ར་ཨེལ་ནི་དབེན་སྟོང་གི་རྒུན་འབྲུམ་དང་། ཁྱོད་ཅག་གི་ཕ་མེས་ནི་སེ་ཡབ་ཤིང་གི་ཐོག་ཕུད་དང་འདྲ་བ་ངས་མཐོང་བྱུང་། ཡིན་ནའང་དེ་དག་པཱ་ཨལ་ཕེ་ཨོར་གྱི་རྩར་སོང་ནས་རང་ཉིད་དེར་ཕུལ་ནས་ཁྲེལ་མེད་གྱི་ལས་བྱས་ཏེ། ཁོ་རྣམས་དགའ་བ་དེ་དང་འདྲ་བར་ཞེན་ལོག་ཏུ་གྱུར་ཏོ། །
HOS 9:11 ཨེ་ཕཱར་ཡིམ་གྱི་གཟི་བརྗིད་ནི་བྱ་ལྟར་འཕུར་འགྲོ་ཞིང་། ཕྲུ་གུ་སྐྱེ་བ་དང་མངལ་དང་ལྡན་པ། ཕྲུ་གུ་འཁོར་བ་བཅས་ནི་དེའི་ནང་དུ་མེད་པར་འགྱུར།
HOS 9:12 དེ་དག་གིས་རང་གི་བུ་ཕྲུག་རྣམས་བསྐྱངས་ནའང་ངས་དེ་ཐམས་ཅད་མེད་པར་བཅུག་སྟེ་གཅིག་ཀྱང་མི་ལུས་ལ། ཡང་ངས་དེ་དག་དོར་ནས་ཁོ་ཚོར་ཆག་སྒོ་འབྱུང་ངོ་། །
HOS 9:13 ཨེ་ཕཱར་ཡིམ་ནི་ཐཱར་དང་འདྲ་བར་ས་བཟང་པོར་བཙུགས་པ་བདག་གིས་མཐོང་མོད། འོན་ཀྱང་ཨེ་ཕཱར་ཡིམ་གྱིས་རང་གི་ཕྲུ་གུ་རྣམས་གཤེད་མའི་རྩར་འཁྲིད་པར་འགྱུར།
HOS 9:14 ཀྱེ་དཀོན་མཆོག་ཡ་ཝཱེ་ལགས། དེ་དག་ལ་ཅི་ཞིག་གནང་བའི་ཕྱིར་ངས་ཞུ་བ་ཡིན་ནམ་ཞེ་ན། ཕྲུ་གུ་འཁོར་ཡང་མངལ་ཤོར་བ་དང་ནུ་མ་སྐམ་པོ་རྣམས་གནང་བར་མཛོད།
HOS 9:15 དེ་དག་གིས་གིལ་གལ་དུ་སྤྱད་པའི་ལས་ངན་པ་རྣམས་ཀྱི་དབང་གིས་ང་རང་ཁོ་རྣམས་ལ་སྡང་བ་ཡིན། དེ་དག་གིས་བསགས་པའི་སྡིག་ཉེས་རྣམས་ཀྱི་རྐྱེན་གྱིས་བདག་གིས་ཁོ་ཚོ་ངའི་གནས་ནས་སྤྱུག་པར་བྱ། ད་ནི་ངས་ཁོ་རྣམས་ལ་བྱམས་པར་མི་བྱ་སྟེ། ཁོ་ཚོའི་འགོ་དཔོན་ཐམས་ཅད་གྱེན་ལོག་མཁན་ཡིན་ནོ། །
HOS 9:16 ཨེ་ཕཱར་ཡིམ་ལ་བརྡུངས་ནས་རྩད་པ་སྐམ་ཏེ་འབྲས་བུ་ཆགས་མི་ཐུབ་ལ། ཕྲུ་གུ་བཙའ་བའི་དབང་དུ་བཏང་ནའང་། ངས་དེ་དག་གིས་གཅེས་པའི་བུ་རྣམས་གསོད་པར་བྱའོ། །
HOS 9:17 དེ་དག་གིས་བཀའ་ལ་མ་མཉན་པས་ན། ངའི་དཀོན་མཆོག་གིས་དེ་དག་སྤངས་ནས། ཁོ་ཚོ་མི་རིགས་གཞན་རྣམས་ཀྱི་ཁྲོད་དུ་འཁྱམ་པར་འགྱུར་རོ། །
HOS 10:1 ཡེས་ར་ཨེལ་ནི་ལོ་འདབ་རྒྱས་པའི་རྒུན་ཤིང་དང་འདྲ་ཞིང་འབྲས་བུ་མང་པོ་ཐོགས་པ་ཡིན། དེའི་འབྲས་བུ་ཇི་ལྟར་མང་ན་ཁོས་མཆོད་ཁྲི་ཡང་དེ་ལྟར་མང་དུ་བཞེངས་པ་དང་། དེའི་ས་ཇི་ལྟར་བཟང་ན་ཁོས་རྡོ་སྐུ་རྣམས་ཀྱང་དེ་ལས་ཡིད་དུ་འོང་བར་བཟོས་པའོ། །
HOS 10:2 དེ་རྣམས་ཀྱི་སེམས་སུ་གཡོ་སྒྱུ་བཅངས་ཡོད་པས། ད་ལྟ་སྡིག་པའི་ཉེས་ཆད་འཁུར་དགོས་ཏེ། ཡ་ཝཱེས་དེ་དག་གི་མཆོད་ཁྲི་རྣམས་བཤིག་ནས་རྡོ་སྐུ་རྣམས་གཅོག་ངེས་ཡིན།
HOS 10:3 དེ་ནས་ཁོ་ཚོས་ངེད་རྣམས་ནི་དཀོན་མཆོག་ཡ་ཝཱེ་ལ་གུས་ཤིང་འཇིགས་པ་མིན་པས། ངེད་རྣམས་ལ་རྒྱལ་པོ་མེད་དེ། རྒྱལ་པོས་ངེད་རྣམས་ཀྱི་དོན་དུ་ཅི་ཞིག་བྱ་ནུས་སམ་ཞེས་སྨྲ་བར་འགྱུར་རོ། །
HOS 10:4 དེ་དག་གིས་ཚིག་སྟོང་མང་པོ་སྨྲ་ཞིང་ཁ་ཆད་འཇོག་དུས་རྫུན་གྱི་མནའ་བསྐྱལ་བས། ཉེས་ཆད་ནི་ཞིང་གི་རོལ་བར་གྱི་དུག་རྩྭ་ལྟར་སྐྱེའོ། །
HOS 10:5 པེད་ཨ་ཝེན་གྱི་བ་ཕྲུག་རྣམས་ཀྱི་དབང་གིས་སཱ་མར་ཡ་པ་རྣམས་འཇིགས་ནས། དེའི་ཡུལ་མི་རྣམས་དང་དེ་དག་ལ་དགའ་བའི་མཆོད་དཔོན་རྣམས་ཀྱིས་མྱ་ངན་བྱེད་པར་འགྱུར་ཏེ། རྒྱུ་མཚན་ནི་དེའི་གཟི་དཔལ་ཡལ་ཟིན་པས་སོ། །
HOS 10:6 མི་རྣམས་ཀྱིས་བ་ཕྲུག་དེ་ནི་ཨ་སུར་ལ་ཁྱེར་ནས་རྒྱལ་པོ་ཡ་རབ་པི་ལ་སྐྱེས་སུ་འབུལ་བར་འགྱུར་ལ། ཨེ་ཕཱར་ཡིམ་ངོ་ཚ་ཞིང་། ཡེས་ར་ཨེལ་ནི་རང་གི་གྲོས་ཀྱིས་ཁ་སྐྱེངས་པར་འགྱུར།
HOS 10:7 སཱ་མར་ཡའི་རྒྱལ་པོ་ནི་ཆུ་ཁའི་ལྦུ་བ་ལྟར་མེད་པར་འགྱུར་ཏེ།
HOS 10:8 ཡེས་ར་ཨེལ་གྱི་སྡིག་པ་བྱེད་ས་སྟེ་ཨ་ཝེན་གྱི་མཐོ་གླིང་རྣམས་བཤིག་ནས། ཁོ་ཚོའི་མཆོད་ཁྲི་རྣམས་ཀྱི་ཁར་ཚེར་མ་དང་གཟེ་མ་ར་མགོ་སྐྱེ་བར་འགྱུར། ཡང་དེ་དག་གིས་རི་ཆེན་པོ་རྣམས་ལ་ངེད་ཅག་ཁོབས་ཤིག་ཅེས་དང་། རི་ཆུང་དག་ལ་ངེད་ཅག་གི་སྟེང་དུ་སྙིལ་ཅིག་ཅེས་ཟེར་བར་འགྱུར།
HOS 10:9 ཀྱེ་ཡེས་ར་ཨེལ། གིབ་ཨའི་ཉིན་མོ་དག་གི་ཚུན་ལ་ཁྱོད་ཀྱིས་སྡིག་པ་བསགས་ཤིང་ཁྱོད་རྣམས་ད་དུང་དེ་རུ་བསྡད་ཡོད། སྡིག་ཉེས་ཚབས་ཆེ་བའི་མི་རབས་ལ་རྒོལ་བའི་འཐབ་མོ་དེ་གིབ་ཨའི་སྟེང་དུ་མི་འབྱུང་བ་ཡིན་ནམ།
HOS 10:10 ངས་རང་གི་འདོད་པ་ལྟར་དེ་རྣམས་ལ་ཉེས་ཆད་གཅོད་པ་དང་། དེ་དག་གིས་སྡིག་པ་ཉིས་བརྩེགས་ཁུར་ཏེ། མི་རྣམས་དེ་དག་གི་སྟེང་དུ་རུབ་པར་འགྱུར་རོ། །
HOS 10:11 ཨེ་ཕཱར་ཡིམ་ནི་གཡུལ་གཅོག་པར་དགའ་བའི་བ་གཞོན་ཁ་ལོ་བཏུལ་ཟིན་པ་ཞིག་དང་འདྲ། ངས་དེའི་ཤ་ཤེད་རྒྱས་པའི་མཇིང་ལ་གཉའ་ཤིང་བཞག་ནས་ཨེ་ཕཱར་ཡིམ་འཛིན་ངེས་ལ། ཡ་ཧུ་དཱས་ཞིང་རྨོ་བ་དང་ཡ་ཀོབ་ཀྱིས་ཤལ་རྒྱག་དགོས།
HOS 10:12 ཁྱོད་རྣམས་ཀྱིས་རང་གི་དོན་དུ་དྲང་བདེན་གྱི་ས་བོན་བཏབ་ནས་ནམ་ཡང་འགྱུར་བ་མེད་པའི་བྱམས་བརྩེ་བརྔ་བར་གྱིས། ཁྱོད་ཚོས་ས་རྒོད་སློག་དགོས་ཏེ། ཁོང་ཕེབས་འོང་དུས་ཁྱོད་ཅག་གི་སྟེང་དུ་དྲང་བདེན་གྱི་ཆར་བ་འབབ་ངེས་ཤིང་། ད་ལྟ་ནི་དཀོན་མཆོག་ཡ་ཝཱེ་འཚོལ་བའི་དུས་ཡིན་ནོ། །
HOS 10:13 ཁྱོད་ཚོས་ངན་པ་རྨོས་ནས་སྡིག་ཉེས་བརྔས་པ་དང་། རྫུན་གྱི་འབྲས་བུ་ཟོས་སོ། །ཅི་ལ་ཞེ་ན། ཁྱོད་ཀྱིས་རང་གི་འདོད་པ་དང་རང་གི་དཔའ་བོའི་དཔུང་ལ་བློ་གཏད་དོ། །
HOS 10:14 དེའི་ཕྱིར་ཁྱོད་ཚོའི་མི་རིགས་ཀྱི་ནང་དུ་ཟིང་ཆ་ལངས་ནས། ཁྱོད་ཀྱི་བཙན་རྫོང་ཐམས་ཅད་བཤིག་པར་འགྱུར་ཏེ། དེ་ནི་ཤལ་མན་གྱིས་འཐབ་མོའི་ཉིན་མོར་པེད་ཨར་པེལ་བཤིག་ནས་མ་བུ་གཉིས་སར་བརྡབས་ཏེ་དུམ་བུར་བཅག་པ་བཞིན་ཡིན་ནོ། །
HOS 10:15 ཀྱེ་པེད་ཨེལ། ཁྱོད་རྣམས་ཀྱི་སྡིག་ཉེས་ཚབས་ཆེ་བས་དེ་ལྟར་འབྱུང་ངེས་ལ། སྐྱ་རེངས་ཤར་དུས་ཡེས་ར་ཨེལ་གྱི་རྒྱལ་པོ་རྩ་ནས་མེད་པར་འགྱུར་རོ། །
HOS 11:1 ཡེས་ར་ཨེལ་ན་གཞོན་ཡིན་དུས་ངས་དེ་ལ་བྱམས་ཤིང་། བདག་གིས་ཨེ་ཅིབ་ཡུལ་ནས་རང་གི་བུ་བོས་པ་ཡིན།
HOS 11:2 དེ་ཚོ་ཅི་ལྟར་བོས་ན་དེ་ལྟར་རྒྱང་བཀྱེད་ནས་པཱ་ཨལ་ལ་མཆོད་པ་ཕུལ་ཞིང་། ལྷ་སྐུ་རྣམས་ལ་བདུག་སྤོས་བདུགས།
HOS 11:3 ངས་ཨེ་ཕཱར་ཡིམ་གྱི་དཔུང་པས་བསྐྱོར་ནས་ལམ་བསྟན་ཡང་། ངས་དེ་དག་གསོས་པ་ཁོ་ཚོས་མ་ཤེས།
HOS 11:4 ངས་བྱམས་སྙིང་རྗེས་དེ་རྣམས་དྲངས་ཤིང་། ཡང་བ་གླང་གི་གཉའ་ཤིང་ལེན་མཁན་ལྟར་དེ་དག་གི་གཉའ་ཤིང་བླངས་ནས། མར་བསྒུར་ཏེ་ཁོ་ཚོའི་མདུན་དུ་ཁ་ཟས་བཞག་པ་ཡིན།
HOS 11:5 ཁོ་རྣམས་སླར་ཨེ་ཅིབ་ཡུལ་དུ་ལོག་མི་དགོས་ཀྱང་། ཁོ་རྣམས་ངའི་ཕྱོགས་སུ་མི་འཁོར་བས་ན་ཨ་སུར་པ་ནི་དེ་དག་གི་རྒྱལ་པོར་འགྱུར་རོ། །
HOS 11:6 ཡང་ཁོ་ཚོའི་གྲོང་ཁྱེར་རྣམས་ལ་རལ་གྲི་གཡུགས་ནས་སྒོ་གཏན་རྣམས་བཅག་སྟེ། དེ་དག་གི་གྲོས་ངན་པའི་དབང་གིས་ཁོ་ཚོ་མིད་པར་འགྱུར་རོ། །
HOS 11:7 ངའི་མི་རིགས་བསམ་བཞིན་ང་དང་བྲལ་ཞིང་། ཁོ་ཚོས་ངུ་འབོད་བྱས་ནའང་ཁོ་རྣམས་ཀྱིས་འཁུར་བའི་གཉའ་ཤིང་འབོགས་མཁན་ཡོད་མ་ཡིན།
HOS 11:8 ཀྱེ་ཨེ་ཕཱར་ཡིམ། ངས་ཁྱོད་རང་འདོར་ག་ལ་རུང་། ཀྱེ་ཡེས་ར་ཨེལ། ངས་ཁྱོད་རང་གཞན་གྱི་ལག་ཏུ་གཏོད་ག་ལ་སྲིད། ངས་ཁྱོད་རང་ཨད་མཱ་དང་ཚཱ་བོ་ཡིམ་ལྟར་འཇོག་ག་ལ་རུང་། ངས་བློ་ཁ་བསྒྱུར་ནས་སྙིང་རྗེ་ཡི་བསམ་པ་མེ་ལྟར་འབར་རོ། །
HOS 11:9 ང་རང་ཤིན་ཏུ་ཁྲོ་བར་མི་བྱ་ཞིང་། ཨེ་ཕཱར་ཡིམ་ཡང་མེད་པར་མི་བྱའོ། །ཅིའི་ཕྱིར་ཞེ་ན། ང་ནི་དཀོན་མཆོག་ཡིན་པ་ལས་མི་ནི་མ་ཡིན་ལ། ཁྱོད་ཀྱི་དབུས་སུ་དམ་པ་ཉིད་དེ་ཡིན་པས། ཁོང་ཁྲོ་དང་བཅས་ཁྱོད་རྣམས་ཀྱི་རྩར་འབྱོན་པར་མི་བྱའོ། །
HOS 11:10 དཀོན་མཆོག་ཡ་ཝཱེས་སེང་གེ་ལྟར་ང་རོ་འདོན་ཞིང་། ཁོང་གི་བུ་ཕྲུག་རྣམས་ཁོང་གི་རྗེས་སུ་འབྲང་ངེས་ཡིན། ཁོང་གིས་ང་རོ་འདོན་པའི་ཚེ་བུ་ཕྲུག་རྣམས་ནུབ་ཕྱོགས་ནས་སྐྲག་སྐྲག་འདར་འདར་ངང་འོང་བར་འགྱུར།
HOS 11:11 ཁོ་རྣམས་ཨེ་ཅིབ་ཡུལ་ནས་བྱ་བཞིན་དང་ཨ་སུར་ཡུལ་ནས་ཕུག་རོན་བཞིན་དུ་སྐྲག་སྐྲག་འདར་འདར་ངང་འོང་བ་དང་། ངས་དེ་དག་རང་གི་ཁང་པ་རུ་སྡོད་དུ་འཇུག་གོ་ཞེས་དཀོན་མཆོག་ཡ་ཝཱེས་གསུངས་སོ། །
HOS 11:12 ཨེ་ཕཱར་ཡིམ་གྱིས་རྫུན་གཏམ་དང་ཡེས་ར་ཨེལ་གྱི་ཁྱིམ་རྒྱུད་ཀྱིས་གཡོ་སྒྱུ་ཡིས་ང་རང་བསྐོར་ཞིང་། ཡ་ཧུ་དཱས་སྔར་བཞིན་དཀོན་མཆོག་ལ་ངོ་རྒོལ་བྱེད་དེ། བློ་གཏོད་རུང་བའི་དམ་མཆོག་ཁོང་ལ་ངོ་རྒོལ་བྱེད་པའོ། །
HOS 12:1 ཨེ་ཕཱར་ཡིམ་ནི་རླུང་ལ་བརྟེན་ནས་འཚོ་ཞིང་། ཉིན་གང་པོར་ཤར་རླུང་གི་རྗེས་སུ་བརྒྱུགས་ནས་རྫུན་དང་གདུག་རྩུབ་མང་དུ་སྤེལ་བ་དང་། ཨ་སུར་དང་ཆད་དོན་བཞག་ནས་ཨེ་ཅིབ་ཡུལ་དུ་སྣུམ་སྐྱེལ་བའོ། །
HOS 12:2 དཀོན་མཆོག་ཡ་ཝཱེས་ཡ་ཧུ་དཱ་ལ་སྐྱོན་འཛུགས་ཤིང་། ཡ་ཀོབ་ལ་ཁོ་འགྲུལ་བའི་ལམ་རྣམས་བཞིན་དུ་ཉེས་ཆད་གཅོད་པ་དང་། ཁོའི་སྤྱོད་པ་བཞིན་དུ་ལན་འཇལ་ལོ། །
HOS 12:3 ཁོ་ནི་མངལ་གྱི་ནང་དུ་རང་གི་སྤུན་གྱི་ཕྱི་རྟིང་ལ་འཇུས་པ་དང་། དར་ལ་བབས་དུས་དཀོན་མཆོག་དང་ཤུགས་འགྲན་ནོ། །
HOS 12:4 ཁོ་ནི་ཕོ་ཉ་དང་འགྲན་ནས་རྒྱལ་བ་དང་། ངུ་འབོད་དང་བཅས་ཁོང་ལ་ཞུ་བ་ཕུལ་ནས་པེད་ཨེལ་དུ་ཀུན་དབང་དཀོན་མཆོག་དང་མཇལ་ཞིང་། དེར་ཡ་ཝཱེས་ཁོ་རྣམས་ལ་བཀའ་བསྒོས་པ་རེད།
HOS 12:5 དཀོན་མཆོག་ཡ་ཝཱེ་ནི་དཔུང་ཚོགས་ཀུན་གྱི་དཀོན་མཆོག་དང་། ཁོང་ལ་དྲན་གསོ་བྱེད་པའི་མཚན་ཡིན་ནོ། །
HOS 12:6 དེ་བས་ཁྱོད་ཀྱིས་རང་གི་དཀོན་མཆོག་གི་ཕྱོགས་སུ་འཁོར་ནས་སྙིང་རྗེ་དང་དྲང་གཞག་བསྲུངས་ཏེ། རང་གི་དཀོན་མཆོག་ལ་རྒྱུན་དུ་སྒུག་པར་གྱིས་ཤིག
HOS 12:7 ཀ་ན་ཨན་པའི་ལག་ཏུ་མི་ལ་མགོ་སྐོར་གཏོང་བའི་རྒྱ་སྲང་ཡོད་ཅིང་གཞན་ལ་གཉའ་གནོན་བྱེད་པར་དགའོ། །
HOS 12:8 ཨེ་ཕཱར་ཡིམ་གྱིས་འདི་ལྟར། ད་ནི་ང་རང་ཕྱུག་པོར་གྱུར་ནས་རྒྱུ་ནོར་མང་པོ་རྙེད་ཡོད། ངས་དཀའ་ལས་བརྒྱབ་ནས་ཐོབ་པ་ཐམས་ཅད་ཀྱི་ནང་དུ་ང་ལས་ཉེས་སྐྱོན་དང་སྡིག་པ་ནི་སུས་ཀྱང་རྙེད་པར་མི་འགྱུར་ཞེས་ཟེར།
HOS 12:9 ཁྱོད་རང་ཨེ་ཅིབ་ཡུལ་ནས་ཐོན་པ་ནས་བཟུང་ང་ནི་ཁྱོད་ཀྱི་དཀོན་མཆོག་ཡ་ཝཱེ་ཡིན་ལ། དུས་ཆེན་གྱི་ཉིན་མོ་རྣམས་དང་མཚུངས་པར་ངས་ཁྱོད་རང་ཡང་བསྐྱར་གུར་གྱི་ནང་དུ་གནས་པར་བྱའོ། །
HOS 12:10 ངས་ལུང་སྟོན་པ་རྣམས་ལ་གཏམ་སྨྲས་ཏེ་ཞལ་གཟིགས་མང་པོ་བསྟན་པ་དང་། ལུང་སྟོན་པ་རྣམས་བརྒྱུད་ནས་དཔེ་ཡང་མང་པོ་བསྟན་ཏོ། །
HOS 12:11 གིལ་ཨད་ལ་སྡིག་ཉེས་མེད་དམ། དེ་དག་ནི་དངོས་གནས་ཕན་ཐོགས་མེད་པ་ཡིན། དེ་དག་གིས་གིལ་གལ་དུ་གླང་ཐུག་རྣམས་མཆོད་པར་འབུལ་ཞིང་། ཁོ་ཚོའི་མཆོད་ཁྲི་ནི་ཞིང་གི་རོལ་བར་གྱི་རྡོ་སྤུང་དང་འདྲའོ། །
HOS 12:12 སྔར་ཡ་ཀོབ་ནི་ཨ་རམ་ཡུལ་དུ་བྲོས་ནས། ཡེས་ར་ཨེལ་གྱིས་ཆུང་མ་ལེན་ཕྱིར་གཡོག་བྱས་པ་དང་། ཆུང་མ་ལེན་པའི་ཆེད་དུ་ལུག་འཚོས་ཤིང་།
HOS 12:13 རྗེས་སུ་དཀོན་མཆོག་ཡ་ཝཱེས་ལུང་སྟོན་པ་ཞིག་བརྒྱུད་དེ་ཡེས་ར་ཨེལ་ནི་ཨེ་ཅིབ་ཡུལ་ནས་ཡར་དྲངས་པ་དང་། ཡང་ལུང་སྟོན་པ་ཞིག་བརྒྱུད་ནས་ཁོ་རྣམས་ལ་གཟིགས་སྐྱོང་མཛད།
HOS 12:14 ཡིན་ནའང་ཨེ་ཕཱར་ཡིམ་གྱིས་དཀོན་མཆོག་གི་དགོངས་པ་དྲག་ཏུ་དཀྲུགས་པས་ན། ཁོས་མི་ལ་ཁྲག་བཞུར་དུ་བཅུག་པའི་སྡིག་པ་ནི་ཁོ་རང་གི་སྟེང་ལ་འབབ་ཏུ་བཅུག་ནས། གཙོ་བོས་ཁོའི་ངོ་ཚ་ཁོ་རང་གི་སྟེང་ལ་འབེབ་པར་འགྱུར་རོ། །
HOS 13:1 སྔར་ཨེ་ཕཱར་ཡིམ་གྱིས་གཏམ་གླེང་དུས་མི་རྣམས་འདར་ཞིང་། ཡེས་ར་ཨེལ་གྱི་ནང་དུ་ཁོ་མཐོ་སར་བསྡད་ཡོད། ཡིན་ནའང་པཱ་ཨལ་གྱི་རྐྱེན་གྱིས་ཁོས་སྡིག་པ་སྤྱད་ནས་ཤི་བ་རེད།
HOS 13:2 ད་ལྟ་ཁོ་ཚོས་སྡིག་པ་མང་དུ་བྱེད་ཅིང་རང་གི་དངུལ་གྱིས་རང་ཉིད་ལ་བླུགས་སྐུ་རྣམས་བཟོས་ཤིང་། རང་གི་བློ་རིག་ལ་བརྟེན་ནས་སྐུ་འདྲ་བཟོས། དེ་ཐམས་ཅད་ལག་ཤེས་པའི་ལས་ཡིན་ཏེ། དེ་དག་གི་སྐོར་ལ་ཁོ་རྣམས་ཀྱིས། མཆོད་པ་འབུལ་མཁན་དག་གིས་བ་ཕྲུག་སྐུ་འདྲ་རྣམས་ལ་ཁ་སྐྱེལ་བ་ཡིན་ཞེས་སྨྲའོ། །
HOS 13:3 དེའི་ཕྱིར་ཁོ་རྣམས་ནི་ཐོ་རངས་ཀྱི་སྨུག་པ་དང་སྐད་ཅིག་ཙམ་ལ་ཡལ་འགྲོ་བའི་ཟིལ་བ་ལྟ་བུ་ཡིན་ལ། གཡུལ་ཁ་ལས་རླུང་འཚུབ་ཀྱིས་འཁུར་བའི་ཕུབ་མ་ལྟ་བུ་དང་། སྒེའུ་ཁུང་ལས་འཕྱུར་བའི་དུ་བ་ལྟ་བུའོ། །
HOS 13:4 འོན་ཀྱང་ང་ནི་ཁྱོད་རྣམས་ཨེ་ཅིབ་ཡུལ་ནས་ཐོན་པའི་ཚུན་ལ་ཁྱོད་ཅག་གི་དཀོན་མཆོག་ཡ་ཝཱེ་ཡིན། ཁྱོད་ཀྱིས་ང་མ་གཏོགས་ལྷ་གཞན་གང་ཡང་ཁས་བླངས་མི་ཆོག་སྟེ། ང་མ་གཏོགས་སྐྱབས་མགོན་གཞན་ཞིག་མེད་དོ། །
HOS 13:5 དབེན་སྟོང་གི་ཐན་པ་ཆེ་བའི་གནས་སུ་ཁྱོད་ལ་ལྟ་སྐྱོང་བྱེད་པ་དེ་ང་ཡིན།
HOS 13:6 དེ་དག་གིས་ཟོས་ནས་འགྲངས་པ་དང་སེམས་སུ་ང་རྒྱལ་སྐྱེས་པས་ང་ནི་བརྗེད་པར་གྱུར།
HOS 13:7 དེའི་ཕྱིར་ང་ནི་སེང་གེ་བཞིན་དུ་དེ་དག་གི་སྟེང་ལ་སླེབ་ཅིང་། ཡང་གཟིག་བཞིན་དུ་ལམ་ཁར་འཇབ་སྒུག་བྱེད་དོ། །
HOS 13:8 ངས་ནི་ཕྲུ་གུ་ཕྲོགས་པའི་དོམ་མ་བཞིན་དུ་དེ་དག་ལ་རྒོལ་ནས་བྲང་ཁོག་དབྲལ་བར་བྱ་ཞིང་། ཡང་མོ་སེང་བཞིན་དུ་ཁོ་ཚོ་གནས་དེ་རུ་ཁྱུར་མིད་གཏོང་བ་དང་། གཅན་གཟན་བཞིན་དུ་དེ་རྣམས་གཤག་པར་བྱའོ། །
HOS 13:9 ཀྱེ་ཡེས་ར་ཨེལ། ཁྱོད་རང་གི་སྐྱབས་ཏེ་ང་ལ་སྡང་བ་ནི་ཁྱོད་རང་འཕུང་བའི་རྒྱུའོ། །
HOS 13:10 ད་ནི་ཁྱོད་ཀྱི་རྒྱལ་པོ་གང་དུ་ཡོད་དམ། དེས་གྲོང་ཁྱེར་སོ་སོར་ཁྱོད་རྣམས་བསྐྱབ་ཆོག་གོ །སྔར་ཁྱོད་ཀྱིས་ང་ལ་རྒྱལ་པོ་ཞིག་དང་སྐུ་དྲག་རྣམས་གནང་བར་མཛོད་ཅེས་ཞུས་པ་དང་། ཁྱོད་ལ་བདག་སྐྱོང་བྱེད་པའི་འགོ་དཔོན་རྣམས་གང་དུ་ཡོད་དམ།
HOS 13:11 ངས་ཁོང་ཁྲོ་དང་བཅས་ཁྱོད་ལ་རྒྱལ་པོ་གནང་བ་དང་། ཁྲོ་གཏུམ་འབར་བཞིན་དེ་ནི་མེད་པར་བཏང་བ་ཡིན།
HOS 13:12 ཨེ་ཕཱར་ཡིམ་གྱི་ཉེས་སྐྱོན་རྣམས་ཉར་ཞིང་། དེའི་སྡིག་པ་རྣམས་ཐོ་བརྒྱབ་ནས་བཞག་ཡོད།
HOS 13:13 བུད་མེད་ཀྱི་སྐྱེ་གཟེར་རྣམས་དེ་ལ་འབབ་པར་འགྱུར། ཁོ་ནི་བློ་རྨོངས་པའི་བུ་སྟེ། བཙའ་བའི་དུས་སུ་ཕྱིར་ཐོན་པར་མི་འདོད་པའི་སྦྲུམ་བུ་དང་འདྲའོ། །
HOS 13:14 ངས་དེ་དག་གཤིན་པོའི་ཡུལ་ལས་ཐར་བར་བྱ་སྟེ། ཁོ་རྣམས་འཆི་བ་ལས་སྐྱོབ་པར་འགྱུར། ཀྱེ་མ་འཆི་བ་ཁྱོད་ཀྱི་གནོད་འཚེ་གང་དུ་ཡོད། ཀྱེ་མ་གཤིན་ཡུལ་ཁྱོད་ཀྱི་འཇིག་པ་གང་དུ་ཡོད། སྙིང་རྗེ་ནི་ངའི་མདུན་ནས་ཡལ་བར་འགྱུར།
HOS 13:15 ཁོ་ནི་རང་གི་སྤུན་རྣམས་ཀྱི་ཁྲོད་དུ་དར་ན་ཡང་། ཤར་རླུང་སྟེ་དཀོན་མཆོག་ཡ་ཝཱེའི་རླུང་ནི་དབེན་སྟོང་ནས་གཡུགས་འོངས་ཏེ། ཁོའི་ཆུ་མིག་སྐམ་ཞིང་ཆུ་མགོ་ཟད་པར་འགྱུར་ལ། རླུང་དེས་ཁོས་བསགས་པའི་རྒྱུ་ནོར་ཐམས་ཅད་འཕྲོག་པར་འགྱུར་རོ། །
HOS 13:16 སཱ་མར་ཡས་རང་གི་དཀོན་མཆོག་ལ་ངོ་ལོག་བྱས་པས་ཁོས་རང་གི་སྡིག་པ་འཁུར་ངེས་ཤིང་། ཁོ་རྣམས་རལ་གྲིས་བརྡབས་ནས། དེ་དག་གི་ཕྲུ་གུ་རྣམས་ས་ལ་བརྡབས་ཤིང་། བུད་མེད་སྦྲུམ་མ་རྣམས་ཀྱི་ཁོག་པ་གཤག་པར་འགྱུར་རོ། །
HOS 14:1 ཀྱེ་ཡེས་ར་ཨེལ། ཁྱོད་ཀྱིས་རང་གི་དཀོན་མཆོག་ཡ་ཝཱེའི་ཕྱོགས་སུ་སེམས་སྒྱུར་ཅིག ཅིའི་ཕྱིར་ཞེ་ན། ཁྱོད་ནི་རང་གི་སྡིག་པའི་རྐྱེན་གྱིས་སར་འགྱེལ་ཏོ། །
HOS 14:2 དཀོན་མཆོག་ཡ་ཝཱེའི་ཕྱོགས་སུ་སེམས་སྒྱུར་ཅིག ཞུ་བ་དང་བཅས་ཁོང་ལ་འདི་ལྟར། ང་ཚོའི་སྡིག་པ་ཐམས་ཅད་བསལ་ནས་སྙིང་རྗེ་དང་བཅས་ང་ཚོ་ལེན་པར་མཛོད། དེ་ནས་ང་ཚོས་གླང་ཐུག་གི་ཚབ་ཏུ་ངག་གི་མཆོད་པ་འབུལ་བར་བྱའོ། །
HOS 14:3 ཨ་སུར་གྱིས་ངེད་རྣམས་སྐྱོབ་མི་ནུས། ད་ནི་ངེད་རྣམས་རྟ་ལ་མི་ཞོན་ཞིང་། དུས་ནམ་ཡིན་ཡང་རང་གིས་དངོས་སུ་བཟོས་པའི་སྐུ་འདྲ་ལ་ཁྱོད་ནི་ང་ཚོའི་ལྷ་ཡིན་ཞེས་སྨྲ་བར་མི་འགྱུར་ཏེ། ཁྱེད་ནས་དྭ་ཕྲུག་རྣམས་ལ་བྱམས་སྙིང་རྗེ་ཐོབ་པ་ཡིན་ཞེས་ཞུས་ཤིག
HOS 14:4 ངས་དེ་དག་གི་རྒྱབ་འགལ་དུ་ཕྱིན་པའི་སེམས་པ་བསྒྱུར་ཏེ། དགའ་བཞིན་སྤྲོ་བཞིན་དེ་དག་ལ་བྱམས་པར་བྱའོ། །ཅིའི་ཕྱིར་ཞེ་ན། བདག་གི་ཐུགས་ཁྲོ་ནི་ཁོ་རྣམས་ལས་ཞི་བར་གྱུར་པ་ཡིན།
HOS 14:5 ང་ནི་ཡེས་ར་ཨེལ་ལ་ཟིལ་བ་བཞིན་དུ་འགྱུར་ཞིང་། དེ་ནི་མེ་ཏོག་ཀུ་མུད་ལྟར་བཞད་དེ། ལེ་པཱ་ནོན་གྱི་ལྗོན་ཤིང་ལྟར་རྩ་བ་རྒྱས་པར་འགྱུར།
HOS 14:6 དེའི་ཡལ་ག་གསར་པ་རྣམས་རྒྱས་ཏེ། སྐྱུ་རུ་རའི་ཤིང་ལྟར་མཛེས་ལ། ལེ་པཱ་ནོན་གྱི་ཤུག་པ་ནང་བཞིན་དྲི་བསུང་དང་ལྡན་པར་འགྱུར།
HOS 14:7 སྔར་དེའི་བསིལ་གྲིབ་འོག་ཏུ་གནས་པ་རྣམས་ཕྱིར་ལོག་འོངས་ནས་འབྲུ་རིགས་བཞིན་སྐྱེ་ཞིང་། རྒུན་ཤིང་ལྟར་རྒྱས་ནས། དེའི་དྲི་བསུང་ནི་ལེ་པཱ་ནོན་གྱི་རྒུན་ཆང་ལྟ་བུར་འགྱུར་རོ། །
HOS 14:8 ཨེ་ཕཱར་ཡིམ་པ་རྣམས་ཀྱིས། ང་རང་སྐུ་འདྲ་དང་འབྲེལ་བ་ཅི་ཞིག་ཡོད་དམ་ཞེས་སྨྲ་བར་འགྱུར་ལ། ངས་དེར་མཉན་ནས་ལྟ་སྐྱོང་བྱེད་ཅིང་། ང་ནི་གསོམ་ཤིང་སྔོན་པོ་དང་འདྲ་སྟེ། ངའི་རྐྱེན་གྱིས་ཁྱོད་ལ་ཤིང་ཏོག་ཐོགས་པ་ཡིན།
HOS 14:9 མཁས་པས་དོན་འདི་རྣམས་རྟོགས་ཤིང་། བློ་རིག་ལྡན་པ་རྣམས་ཀྱིས་དོན་འདི་དག་ཤེས་པ་ཡིན། དཀོན་མཆོག་ཡ་ཝཱེའི་གཤེགས་ལམ་རྣམས་དྲང་པོ་ཡིན་ཏེ། མི་དྲང་བདེན་རྣམས་དེའི་ནང་དུ་འགྲུལ་བར་བྱ་མོད་ཀྱང་། སྡིག་སྤྱོད་རྣམས་དེའི་སྟེང་དུ་འགྱེལ་བར་འགྱུར་རོ།། །།
JOE 1:1 དཀོན་མཆོག་ཡ་ཝཱེའི་བཀའ་ཕེ་ཏུ་ཨེལ་གྱི་བུ་ཡོ་ཨེལ་ལ་བྱུང་བ་འདི་ལྟ་སྟེ།
JOE 1:2 ཀྱེ་རྒན་པ་རྣམས་ཀྱིས་གཏམ་འདི་ལ་ཉོན་ཅིག ཀྱེ་ཡུལ་འདིའི་མི་སྡེ་ཐམས་ཅད་ཀྱིས་རྣ་བ་གཏད་ནས་གཏམ་འདི་ལ་ཉོན་ཅིག ཁྱོད་རང་གི་དུས་དང་། ཁྱོད་ཚོའི་ཕ་མེས་རྣམས་ཀྱི་རིང་ལ་འདི་འདྲ་བྱུང་མྱོང་ངམ།
JOE 1:3 དོན་འདི་ནི་ཁྱོད་རྣམས་ཀྱིས་རང་གི་བུ་རྒྱུད་རྣམས་དང་། དེ་རྣམས་ཀྱིས་ཚ་རྒྱུད་རྣམས། དེ་རྣམས་ཀྱིས་བུ་རབས་ཚ་རྒྱུད་རྣམས་ལ་བཤད་དགོས།
JOE 1:4 ཆ་ག་པའི་འབུ་ཆུང་ལས་ལུས་པ་ནི་ཆ་ག་འབུ་ཡིས་ཟོས་པ་དང་། ཆ་ག་འབུ་ལས་ལུས་པ་ནི་ཆ་ག་པས་ཟོས་ཤིང་། ཆ་ག་པ་ལས་ལུས་པ་དེ་ཨ་ཚག་ཚག་པས་ཟོས།
JOE 1:5 ཀྱེ་ཆང་གིས་ར་བཟི་བ་རྣམས་ནི་གཉིད་ལས་སད་པར་གྱིས་ལ་ངུས་ཤིག ཆང་ལ་དགའ་བ་ཐམས་ཅད་ཀྱིས་རྒུན་ཆང་མངར་མོའི་ཆེད་དུ་ངུ་འབོད་གྱིས་ཤིག གང་ལ་ཞེ་ན། ཆང་དེ་ནི་ཁྱོད་ཀྱི་ཁ་དང་བྲལ་བས་སོ། །
JOE 1:6 ཆ་ག་འབུ་ཡི་དཔུང་ཚོགས་སྟོབས་ལྡན་གྲངས་ལས་འདས་པ་ཞིག་ངའི་ཡུལ་ལ་ཚུར་རྒོལ་བྱེད་དུ་ཡར་འོངས་པ་དང་། དེའི་སོ་རྣམས་ནི་སེང་གེའི་སོ་དང་འདྲ་ཞིང་མོ་སེང་གི་མཆེ་བ་དང་འདྲའོ། །
JOE 1:7 དེས་ངའི་རྒུན་ཤིང་ལ་གཏོར་བརླག་བྱས་པ་དང་། ངའི་སེ་ཡབ་ཤིང་བཅག་ནས་དེའི་སྡོང་ཤུན་བཤུས་ཏེ་གཡུགས་ཤིང་། ཡལ་ག་རྣམས་དཀར་པོར་ལུས།
JOE 1:8 ན་ཆུང་མ་ཞིག་གིས་སྐེད་པར་རྩིད་རས་གཡོགས་ཏེ། རང་གི་ལོ་ན་གཞོན་དུས་ཀྱི་ཁྱོ་གའི་ཕྱིར་དུ་ངུ་འབོད་བྱེད་པ་བཞིན་ཁྱོད་རྣམས་ཀྱིས་ཀྱང་ངུ་འབོད་གྱིས་ཤིག
JOE 1:9 དཀོན་མཆོག་ཡ་ཝཱེའི་མཆོད་ཁང་དུ་འབྲུ་མཆོད་དང་སྐྱེམས་མཆོད་རྣམས་མཚམས་ཆད་པས། དཀོན་མཆོག་ཡ་ཝཱེར་ཞབས་ཕྱི་བྱེད་མཁན་མཆོད་དཔོན་རྣམས་ཀྱང་སྡུག་གོ །
JOE 1:10 འབྲུ་རིགས་བརླགས་ནས་རྒུན་ཆང་གསར་པ་སྐམ་པ་དང་། སྣུམ་གསར་པ་ཡང་ཟད་པས་ན། ས་ཞིང་སྟོངས་ནས་ས་གཞི་ཡང་སྐྱོའོ། །
JOE 1:11 ཀྱེ་ཞིང་པ་རྣམས། ཁྱོད་ཚོ་སྐྱེངས་པར་གྱིས་ཤིག ཀྱེ་རྒུན་ཚལ་ལ་བདག་བྱེད་མཁན་རྣམས། ཁྱོད་ཚོས་ངུ་འབོད་བྱོས་དང་། ཞིང་ཁའི་སྟོན་ཐོག་ཐམས་ཅད་བརླགས་པས་ན། གྲོ་དང་ནས་ཀྱི་དོན་དུ་མྱ་ངན་བྱོས་ཤིག
JOE 1:12 རྒུན་འབྲུམ་ཤིང་ནི་སྐམ་ཞིང་སེ་ཡབ་ཤིང་ནི་རྙིད་པ་དང་། སེ་འབྲུ་དང་ཏ་ལའི་ཤིང་དང་ཀུ་ཤུའི་སྡོང་པོ་ལ་སོགས་པ་སྟེ་ཞིང་ཁའི་ལྗོན་ཤིང་ཐམས་ཅད་ཀྱང་སྐམ་ནས། མི་རྣམས་ཀྱི་དགའ་སྤྲོ་ཡོངས་སུ་མེད་པར་གྱུར་ཏོ། །
JOE 1:13 ཀྱེ་མཆོད་དཔོན་རྣམས་ཀྱིས་རྩིད་རས་དཀྲིས་ནས་མྱ་ངན་གྱིས་ཤིག ཀྱེ་མཆོད་ཁྲི་ལ་ཞབས་ཏོག་སྒྲུབ་མཁན་རྣམས་ཀྱིས་ངུ་འབོད་བྱོས་ཤིག ཀྱེ་ངའི་དཀོན་མཆོག་ལ་ཞབས་ཕྱི་བྱེད་མཁན་ཁྱོད་རྣམས་ཡར་འོངས་ནས་རྩིད་རས་གྱོན་ཏེ་མཚན་གང་པོར་མྱ་ངན་གྱིས་ཤིག གང་ལ་ཞེ་ན། ཁྱོད་ཚོའི་དཀོན་མཆོག་གི་མཆོད་ཁང་དུ་འབྲུ་མཆོད་དང་སྐྱེམས་མཆོད་མཚམས་བཞག་པས་སོ། །
JOE 1:14 ཁྱོད་ཚོས་སྨྱུང་གནས་ཀྱི་དུས་ནི་དམ་པར་རྩིས་ལ། འདུ་འཛོམས་དམ་ནན་ཡོངས་སུ་སྒྲོགས་དང་། ས་འདིའི་རྒན་པོ་རྣམས་དང་ཡུལ་མི་ཐམས་ཅད་ཁྱོད་ཅག་གི་དཀོན་མཆོག་ཡ་ཝཱེའི་མཆོད་ཁང་ནང་དུ་བསྡུས་ནས། དཀོན་མཆོག་ཡ་ཝཱེ་ལ་འོ་དོད་བོས་ཤིག
JOE 1:15 ཉིན་མོ་དེའི་ཕྱིར་སྐྱོ་བ་ལ། གང་ལ་ཞེ་ན། དཀོན་མཆོག་ཡ་ཝཱེའི་ཉིན་མོ་དེ་ནི་ཉེ་བར་སླེབས་པ་སྟེ། ཀུན་དབང་ཉིད་ཀྱི་ཕྱོགས་ནས་གཏོར་སྐྱོན་སླེབས་པ་དང་འདྲ།
JOE 1:16 འབྲུ་རིགས་ནི་ངེད་རྣམས་ཀྱི་མིག་མདུན་ནས་ཚར་བ་མིན་ནམ། རང་རེའི་དཀོན་མཆོག་གི་མཆོད་ཁང་ལས་སྤྲོ་སྐྱིད་དང་དགའ་སྣང་ཡལ་བ་མིན་ནམ།
JOE 1:17 ས་བོན་ས་འོག་ནས་རུལ་ཏེ། འབྲུ་རིགས་རྣམས་སྐམ་པས་ན་འབྲུ་མཛོད་སྟོང་བར་ལུས་ཤིང་བང་ཁང་རྣམས་ཞིག་རལ་དུ་གྱུར།
JOE 1:18 ཕྱུགས་ཟོག་གིས་སྨྲེ་སྔགས་འདོན་ཞིང་། རྩྭ་ས་མེད་པས་བ་ཁྱུ་རྣམས་གང་སར་ཉུལ། ར་ལུག་གི་ཁྱུ་རྣམས་ཀྱིས་ཀྱང་སྡུག་མྱངས་སོ། །
JOE 1:19 ཀྱེ་དཀོན་མཆོག་ཡ་ཝཱེ་ལགས། ངས་ཁྱེད་ལ་ཞུ་འབོད་བྱེད་དེ། ཅི་ལ་ཞེ་ན། ཐང་རྒོད་ཀྱི་རྩྭ་ས་རྣམས་མེས་བསྲེགས་པ་དང་། ཞིང་ཁའི་ལྗོན་ཤིང་ཐམས་ཅད་མེ་ལྕེས་ཚིག་པའོ། །
JOE 1:20 ཆུ་ཕྲན་རྣམས་སྐམ་ནས་ཐང་རྒོད་ཀྱི་རྩྭ་ས་རྣམས་མེས་བསྲེགས་པས། ཐང་གི་རི་དྭགས་རྣམས་ཀྱིས་ཀྱང་ཁྱེད་ལ་ཧལ་སྒྲ་འབྱིན་ནོ། །
JOE 2:1 ཁྱོད་ཚོས་ཛ་ཡན་དུ་རྭ་དུང་བུས་ལ། ངའི་རི་བོ་དམ་པ་ནས་ཉེན་བརྡ་ཐོངས་དང་། ཡུལ་འདིའི་མི་ཀུན་འདར་དུ་ཆུག གང་ལ་ཞེ་ན། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ་སྟེ། དེ་ནི་སླེབ་བཞིན་པས་སོ། །
JOE 2:2 དེ་ནི་མུན་པ་དང་སྨག་རུམ་འཐིབས་པའི་ཉིན་མོ་དང་། སྤྲིན་ནག་དང་མུན་ནག་འཐིབས་པའི་ཉིན་མོ་སྟེ། རི་བོ་རྣམས་ལ་སྐྱ་རེངས་ཤར་བ་བཞིན། རྒྱ་ཆེ་ཞིང་སྟོབས་དང་ལྡན་པའི་ཆ་ག་འབུ་ཡི་དཔུང་ཚོགས་ཤིག་སླེབས་འོང་སྟེ། དེ་དང་འདྲ་བ་སྔར་བྱུང་མ་མྱོང་ལ། ཕྱིས་སུའང་མི་རབས་ནས་མི་རབས་བར་ནམ་ཡང་འབྱུང་བར་མི་འགྱུར་རོ། །
JOE 2:3 དེ་དག་གི་མདུན་དུ་མེ་ཡིས་ཁྱུར་མིད་གཏོང་བ་དང་། རྒྱབ་ཏུ་སྲེག་བྱེད་ཀྱི་མེ་ལྕེ་ཡོད། དེ་དག་མ་སླེབས་སྔོན་དུ་ས་གཞི་ནི་ཨེ་དེན་ལྡུམ་ར་དང་མཚུངས་མོད། དེ་དག་སོང་རྗེས་ས་གཞི་ནི་དབེན་སྟོང་དུ་གྱུར་ཅིང་། དེ་དག་ལས་གཅིག་ཀྱང་མ་ཐར་ཏོ། །
JOE 2:4 དེ་དག་གི་གཟུགས་དབྱིབས་ནི་རྟ་དང་མཚུངས་ལ། དམག་རྟ་བཞིན་དུ་རྒྱུག་པ་ཡིན།
JOE 2:5 སྒྲ་ནི་ཤིང་རྟ་རྣམས་རི་རྩེ་ནས་མཆོང་བ་དང་། མེ་ལྕེས་སོག་རོ་འབར་བ་དང་འདྲ་སྟེ། ཡང་སྟོབས་དང་ལྡན་པའི་དམག་དཔུང་གིས་འཐབ་མོ་བཤམས་པ་དང་འདྲའོ། །
JOE 2:6 དེ་དག་གི་མདུན་དུ་མི་རྣམས་གདུང་བས་གཟིར་ནས་ངོ་མདོག་ཀྱང་འགྱུར་རོ། །
JOE 2:7 དེ་དག་ནི་དཔའ་བོ་ལྟར་རྒྱུག་ཅིང་། དམག་མི་བཞིན་དུ་མཁར་ལ་འཛེགས་ཏེ། རེ་རེ་རང་གི་ལམ་ལ་ཞུགས་ནས་གྲལ་མི་འཆོལ།
JOE 2:8 དེ་ཚོས་ཕན་ཚུན་ཕུད་རྒྱག་མི་བྱེད་པར་རང་གི་ལམ་ལ་ཞུགས་ཏེ། མཚོན་ཆ་རྣམས་ལས་བརྒལ་ནས་མདུན་དུ་བསྐྱོད་དོ། །
JOE 2:9 དེ་རྣམས་གྲོང་ཁྱེར་དུ་རྒྱུག་ཅིང་། ལྕགས་རིའི་སྟེང་མཆོང་ཞིང་ཁང་པར་འཛེགས་ཏེ། རྐུན་མ་བཞིན་དུ་སྒེའུ་ཁུང་ནས་ནང་དུ་འཛུལ།
JOE 2:10 དེ་དག་གི་མདུན་དུ་ས་ནི་འགུལ་ཞིང་ནམ་མཁའ་ཡང་གཡོ་བ་དང་། ཉི་མ་དང་ཟླ་བ་འགྲིབ་ཅིང་སྐར་ཚོགས་རྣམས་ཀྱི་འོད་སྣང་ཟད།
JOE 2:11 དཀོན་མཆོག་ཡ་ཝཱེས་ཉིད་ཀྱི་དམག་དཔུང་གི་མདུན་དུ་གསུང་སྐད་འདོན་པ་དང་། ཁོང་གི་དམག་དཔུང་རབ་ཏུ་རྒྱ་ཆེའོ། །ཁོང་གི་བཀའ་བཞིན་སྒྲུབ་མཁན་རྣམས་ནི་ནུས་མཐུ་དང་ལྡན་པ་ཡིན། དཀོན་མཆོག་ཡ་ཝཱེའི་ཉིན་མོ་རབ་ཏུ་ཆེ་ལ་འཇིགས་སུ་རུང་བ་ཡིན་པས། སུ་ཞིག་གིས་དེ་བཟོད་ནུས་སམ།
JOE 2:12 ཡིན་ཡང་ད་ལྟ་ཁྱོད་ཚོས་སྨྱུང་གནས་བསྲུངས་ཏེ། ངུ་ཞིང་འོ་དོད་འབོད་ཀྱིན་བདག་གི་ཕྱོགས་སུ་རྩེ་གཅིག་གིས་ལོག་ཤོག་ཅེས་དཀོན་མཆོག་ཡ་ཝཱེས་འདི་སྐད་གསུངས་སོ། །
JOE 2:13 ཡང་ཁྱོད་ཚོས་རང་གི་གྱོན་གོས་མི་གཤགས་པར། སེམས་འཁྲུག་ཀྱིན་ཁྱོད་ཅག་གི་དཀོན་མཆོག་ཡ་ཝཱེའི་ཕྱོགས་སུ་ལོག་དགོས་ཞེས་གསུངས་སོ། །ཅི་ལ་ཞེ་ན། ཁོང་ནི་ཐུགས་རྗེ་ཅན་དང་སྙིང་རྗེ་ཆེན་པོ་མངའ་བ། རང་དགར་ཐུགས་མི་ཁྲོ་བ། བྱམས་བརྩེ་མཐའ་ཡས་པར་མ་ཟད། བློ་ཁ་བསྒྱུར་ནས་ཆག་སྒོ་མི་མཛད་པ་ཡིན་ནོ། །
JOE 2:14 ཁྱོད་ཅག་གི་དཀོན་མཆོག་ཡ་ཝཱེ་ལ་འབུལ་བའི་འབྲུ་མཆོད་དང་སྐྱེམས་མཆོད་དུ། ཁོང་གིས་བློ་ཁ་བསྒྱུར་ནས་བྱིན་རླབས་བསྐྱུར་ཡོད་ཀྱང་སྲིད་དེ་སུ་ཞིག་གིས་ཤེས་སམ།
JOE 2:15 ཁྱོད་ཚོས་ཛ་ཡན་དུ་རྭ་དུང་བུས་ལ། སྨྱུང་གནས་ཀྱི་དུས་ནི་དམ་པར་རྩིས་དང་། འདུ་འཛོམས་དམ་ནན་ཡོངས་སུ་སྒྲོགས་ཤིག
JOE 2:16 མི་སྡེ་མཉམ་དུ་སྡུས་ལ་ཆོས་ཚོགས་དམ་པར་བྱོས། རྒན་རབས་རྣམས་སྡུས་ལ་ཕྲུ་གུ་དང་མ་ཡི་པང་དུ་ནུ་མ་ནུ་བ་རྣམས་ཀྱང་སྡུས་ཤིག་དང་། ཡང་མག་པ་རང་གི་གཉེན་ཤག་དང་། བག་མ་རང་གི་གཟིམ་ཁང་དང་འབྲལ་བར་བཅུག
JOE 2:17 ཡ་ཝཱེ་ལ་ཞབས་ཏོག་སྒྲུབ་པའི་མཆོད་དཔོན་རྣམས་སྒོ་ཁྱམས་དང་མཆོད་ཁྲིའི་བར་དུ་ངུ་ཞིང་ན་རེ། ཀྱེ་དཀོན་མཆོག་ཡ་ཝཱེ་ལགས། ཉིད་ཀྱི་མི་སྡེ་ལ་བརྩེ་བར་མཛོད་ཅིག ཉིད་ཀྱི་ནོར་སྐལ་ངོ་ཚར་སྦྱར་ནས་མི་སྡེ་རྣམས་ཀྱི་ནང་དུ་བཞད་གད་དུ་མི་འགྱུར་བར་མཛོད་ཅིག ཅིའི་ཕྱིར་མི་རྣམས་ཀྱི་ནང་དུ་ཁོ་ཚོའི་དཀོན་མཆོག་གང་དུ་ཡོད་ཅེས་སྨྲ་རུ་འཇུག་གམ།
JOE 2:18 དེ་ནས་དཀོན་མཆོག་ཡ་ཝཱེས་ཉིད་ཀྱི་ཡུལ་ལུང་ལ་ཐུགས་ཁུར་མཛད་དེ། ཉིད་ཀྱི་མི་སྡེ་ལ་སྙིང་རྗེ་དགོངས་པ་ཡིན།
JOE 2:19 དཀོན་མཆོག་ཡ་ཝཱེས་ཉིད་ཀྱི་མི་སྡེ་ལ་བཀའ་ལན་གནང་ཞིང་འདི་སྐད་དུ། ལྟོས་ཤིག བདག་གིས་ཁྱོད་རྣམས་ལ་འབྲུ་རིགས་དང་རྒུན་ཆང་གསར་པ། སྣུམ་གསར་པ་བཅས་གནང་སྟེ་ཁྱོད་ཅག་ཚིམ་པར་བྱེད་ཅིང་། ཡང་བདག་གིས་ཁྱོད་རྣམས་མི་རིགས་ཁག་གི་སྨད་པའི་ཡུལ་དུ་མི་བྱའོ། །
JOE 2:20 བདག་གིས་བྱང་གི་དམག་དཔུང་ཁྱོད་ལས་རྒྱང་དུ་བསྐྲད་དེ། དེ་དག་སྐམ་ས་དང་དབེན་སྟོང་དུ་འདེད་ཅིང་། དེའི་དཔུང་ཁག་སྔོན་མ་ཤར་མཚོ་དང་། དཔུང་ཁག་རྗེས་མ་ནུབ་མཚོའི་ནང་དུ་འདེད་པ་དང་། དེ་ལས་དྲི་ངན་བྱུང་ནས་ནམ་མཁའ་ཡོངས་ལ་འཐུལ་བར་འགྱུར་ཏེ། དཀོན་མཆོག་ཡ་ཝཱེས་དངོས་གནས་དོན་ཆེན་མཛད་པ་རེད།
JOE 2:21 ཀྱེ་ཡུལ་ཁམས། མི་འཇིགས་པར་རབ་ཏུ་དགའ་བར་གྱིས་ཤིག ཅི་ལ་ཞེ་ན། དཀོན་མཆོག་ཡ་ཝཱེས་དོན་ཆེན་མཛད་པས་སོ། །
JOE 2:22 ཐང་གི་རི་དྭགས་རྣམས་མ་འཚབ་ཅིག ཅི་ལ་ཞེ་ན། དབེན་སྟོང་གི་རྩྭ་སྔོན་སྐྱེས་ཤིང་། ལྗོན་ཤིང་ལ་འབྲས་བུ་ཐོགས་པ་དང་། སེ་ཡབ་ཤིང་དང་རྒུན་ཤིང་གིས་ཀྱང་འབྲས་བུ་མང་དུ་བསྐྱེད་དོ། །
JOE 2:23 ཀྱེ་ཛ་ཡན་གྱི་མི་སྡེ་ཁྱོད་རྣམས་དགའ་བར་གྱིས་ཤིག ཁྱོད་ཅག་གི་དཀོན་མཆོག་ཡ་ཝཱེའི་རྐྱེན་གྱིས་སྤྲོ་བར་གྱིས་ཤིག ཅི་ལ་ཞེ་ན། ཁོང་གིས་ཁྱོད་རྣམས་ལ་དུས་དང་འཚམ་པའི་སྟོན་ཀའི་ཆར་པ་གནང་ཞིང་། ཁྱོད་ཚོའི་ཆེད་དུ་དུས་ཆར་གནང་བ་སྟེ། སྔར་བཞིན་སྟོན་དཔྱིད་གཉིས་ཀྱི་ཆར་ཆུ་གནང་བར་མཛད།
JOE 2:24 གཡུལ་ཁ་འབྲུ་ཡིས་བཀང་ཞིང་། འཚིར་གཞོང་རྣམས་ལས་རྒུན་ཆང་དང་སྣུམ་གསར་པ་མེར་བར་མཛད།
JOE 2:25 བདག་གིས་ཁྱོད་ཚོའི་གམ་དུ་མངགས་པའི་དཔུང་ཚོགས་ཏེ། ཆ་ག་འབུ་དང་ཆ་ག་པ། ཨ་ཚག་ཚག་པ། ཆ་ག་པའི་འབུ་ཆུང་བཅས་ཀྱིས་ལོ་དེ་དག་གི་རིང་ལ་ཟོས་པ་ཡོད་ཚད། བདག་གིས་ཁྱོད་ཚོར་སྐྱིན་ཚབ་གནང་ངེས་ཡིན།
JOE 2:26 ཡང་ཁྱོད་རྣམས་ཀྱིས་ཟོས་ནས་ཡིད་ཚིམ་པར་འགྱུར་ཏེ། ཁྱོད་རྣམས་ལ་དོན་ངོ་མཚར་ཅན་མཛད་མཁན་ཏེ་ཁྱོད་ཅག་གི་དཀོན་མཆོག་ཡ་ཝཱེའི་མཚན་ལ་བསྟོད་བསྔགས་བརྗོད་ཅིག དེ་ཡང་ངའི་མི་སྡེ་ནི་ནམ་ཡང་སྐྱེངས་པར་མི་འགྱུར།
JOE 2:27 དེ་ནས་བདག་ནི་ཡེས་ར་ཨེལ་གྱི་ཁྲོད་དུ་གནས་པ་དང་། ཁྱོད་ཅག་གི་དཀོན་མཆོག་ཡ་ཝཱེ་ཡིན་ལ། བདག་མ་གཏོགས་དཀོན་མཆོག་གཞན་གང་ཡང་མེད་པ་ཁྱོད་རྣམས་ཀྱིས་ཤེས་པར་འགྱུར་ཞིང་། ངའི་མི་སྡེ་ནི་ནམ་ཡང་སྐྱེངས་པར་མི་འགྱུར་རོ། །
JOE 2:28 རྗེས་སུ་བདག་གིས་རང་གི་ཐུགས་ཉིད་ནི། །འཇིག་རྟེན་མི་བུ་ཀུན་ལ་སྩོལ་བར་བྱ། །ཁྱོད་ཚོའི་བུ་དང་བུ་མོས་ལུང་བསྟན་འཆད། །བགྲེས་པོ་རྣམས་ལ་རྨི་ལམ་འབྱུང་བ་དང་། །གཞོན་ནུ་རྣམས་ཀྱིས་ངོ་མཚར་ཞལ་གཟིགས་མཐོང་། །
JOE 2:29 དུས་དེར་བདག་གིས་རང་གི་ཐུགས་ཉིད་མཆོག །ང་ཡི་ཞབས་ཕྱི་དད་ལྡན་ཕོ་མོར་སྩོལ། །
JOE 2:30 ཡང་བདག་གིས་ནམ་མཁའ་དང་ས་གཞི་རུ་དོན་ངོ་མཚར་ཅན་རྣམས་སྟོན་པར་འགྱུར་ཞིང་། ཁྲག་དང་མེ་དང་དུ་བའི་ཀ་བ་འབྱུང་།
JOE 2:31 ཁྲི་གདུགས་ཉི་མ་ནག་པོ་དང་བསིལ་ཟེར་ཟླ་བ་ཁྲག་ཏུ་འགྱུར། དེ་ཐམས་ཅད་ནི་དཀོན་མཆོག་ཡ་ཝཱེའི་རབ་ཏུ་ཆེ་ཞིང་འཇིགས་སུ་རུང་བའི་ཉིན་མོ་དེ་མ་སླེབས་གོང་དུ་འབྱུང་ངེས་ཡིན།
JOE 2:32 དུས་དེར་དཀོན་མཆོག་ཡ་ཝཱེའི་མཚན་ནས་འབོད་པ་རྣམས་ཐར་བར་འགྱུར། ཅིའི་ཕྱིར་ཞེ་ན། དཀོན་མཆོག་ཡ་ཝཱེས་གསུངས་པ་བཞིན་དུ། རི་བོ་ཛ་ཡན་དང་ཡེ་རུ་སཱ་ལེམ་དུ་མི་རྣམས་ཐར་བ་དང་། དཀོན་མཆོག་ཡ་ཝཱེས་ཞལ་འབོད་གནང་བ་རྣམས་ནི་ལྷག་ལུས་རྣམས་ཀྱི་གྲས་སུ་ཚུད་པར་འགྱུར་བས་སོ། །
JOE 3:1 ལྟོས་ཤིག ཉིན་མོ་དེ་རྣམས་དང་དུས་དེ་ལ་བདག་གིས་ཡ་ཧུ་དཱ་དང་ཡེ་རུ་སཱ་ལེམ་གཉིས་ཀྱི་བཙོན་པ་རྣམས་ཕྱིར་ལོག་ཏུ་འཇུག་པའི་དུས་སུ།
JOE 3:2 བདག་གིས་མི་རིགས་ཐམས་ཅད་བསྡུས་ནས། དེ་རྣམས་ཡེ་ཧོ་ཤ་ཕད་ཀྱི་ལུང་པར་ཁྲིད་དེ། གནས་དེར་བདག་གིས་རང་གི་མི་སྡེ་སྟེ་བདག་གི་ནོར་སྐལ་ཡེས་ར་ཨེལ་གྱི་ཕྱིར་དུ་མི་རིགས་རྣམས་ལ་ཁྲིམས་ཐག་གཅོད་ངེས་ཏེ། ཅིའི་ཕྱིར་ཞེ་ན། དེ་རྣམས་ཀྱིས་ངའི་མི་སྡེ་ནི་མི་རིགས་རྣམས་ཀྱི་ཁྲོད་དུ་གཏོར་ནས་ངའི་ཡུལ་ཐམས་ཅད་བགོས་པ་དང་།
JOE 3:3 ཡང་ངའི་མི་སྡེའི་དོན་དུ་རྒྱན་འཕངས་ཏེ། བུ་ཆུང་རྣམས་སྨད་འཚོང་མ་ལ་བརྗེས་པ་དང་། བུ་མོ་རྣམས་རྒུན་ཆང་གི་དོན་དུ་བཙོངས་ནས་རྒུན་ཆང་འཐུང་བའོ། །
JOE 3:4 ཀྱེ་ཐཱར་དང་ཚི་ཏུན་དང་། ཕེ་ལེ་ཤེད་མཐའ་འཁོར་གྱི་མི་རྣམས། ཁྱོད་རྣམས་བདག་དང་འབྲེལ་བ་ཅི་ཡོད་དམ། ཁྱོད་རྣམས་ཀྱིས་བདག་ལ་འཁོན་ལན་སློག་གམ། གལ་ཏེ་བདག་ལ་འཁོན་ལན་སློག་པ་ཡིན་ན། བདག་གིས་དེའི་རྣམ་སྨིན་ནི་མྱུར་བ་མྱུར་དུ་ཁྱོད་རང་གི་མགོ་ལ་འཁོར་བར་བྱའོ། །
JOE 3:5 ཁྱོད་རྣམས་ཀྱིས་ངའི་གསེར་དང་དངུལ་རྣམས་ཕྲོགས་ནས། ངའི་རིན་པོ་ཆེ་རྩ་ཆེན་རྣམས་ཁྱེར་ཏེ་རང་གི་ལྷ་ཁང་རྣམས་སུ་བཞག་པར་མ་ཟད།
JOE 3:6 ད་དུང་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་རང་གི་ཡུལ་དང་ཁ་འབྲལ་བའི་ཕྱིར་གྷི་རི་སི་པ་རྣམས་ལ་བཙོངས།
JOE 3:7 ལྟོས་ཤིག བདག་གིས་དེ་རྣམས་ལ་བསྐུལ་ནས། ཁྱོད་རྣམས་ཀྱིས་དེ་དག་བཙོངས་པའི་གནས་དེ་དང་འབྲལ་བར་བྱ་ཞིང་། ཡང་དེའི་རྣམ་སྨིན་ནི་ཁྱོད་རང་གི་མགོ་ལ་འཁོར་བར་བྱའོ། །
JOE 3:8 ཡང་བདག་གིས་ཁྱོད་ཀྱི་བུ་དང་བུ་མོ་རྣམས་ཡ་ཧུ་དཱ་པ་རྣམས་ཀྱི་ལག་ཏུ་བཙོངས་ནས། དེ་དག་གིས་ཁོ་རྣམས་རྒྱང་རིང་ཡུལ་གྱི་ཤེ་བཱ་པ་རྣམས་ལ་བཙོང་བར་འགྱུར་རོ་ཞེས་དཀོན་མཆོག་ཡ་ཝཱེས་འདི་སྐད་གསུངས་པའོ། །
JOE 3:9 མི་རིགས་རྣམས་ཀྱི་ཁྲོད་དུ་འདི་ལྟར་ཁྱབ་བསྒྲགས་བྱེད་དགོས་ཏེ། དམག་རྒྱག་པར་གྲ་སྒྲིག་བྱོས་ཤིག དཔའ་བོ་རྣམས་ལ་ངར་བསླངས་ནས་དམག་ཐམས་ཅད་ཡར་ཡོང་དུ་ཆུག
JOE 3:10 རང་གི་ཐོང་གཤོལ་རྣམས་ཀྱིས་རལ་གྲི་བརྡུང་བ་དང་། ཟོར་བ་རྣམས་ཀྱིས་མདུང་བརྡུངས་ཏེ། ཉམས་ཆུང་དག་གིས་ང་ནི་དཔའ་བོ་ཡིན་ཞེས་བརྗོད་དགོས།
JOE 3:11 ཀྱེ་ཕྱོགས་བཞིའི་མི་རིགས་རྣམས། ཁྱོད་རྣམས་མྱུར་དུ་ཡར་ཤོག་ལ་མཉམ་དུ་འཛོམས་པར་གྱིས། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་དཔའ་བོ་རྣམས་འོང་བར་མཛོད།
JOE 3:12 མི་རིགས་རྣམས་སྙིང་སྟོབས་བསྐྱེད་ནས་ཡེ་ཧོ་ཤ་ཕད་ཀྱི་ལུང་པར་འོང་དགོས་ཏེ། ཅིའི་ཕྱིར་ཞེ་ན། ང་རང་དེར་བསྡད་ནས་ཕྱོགས་བཞིའི་མི་རིགས་ཐམས་ཅད་ལ་ཁྲིམས་ཐག་གཅོད་པར་འགྱུར་རོ། །
JOE 3:13 འབྲུ་རིགས་སྨིན་པས་ཟོར་བས་བྲོགས་ཤིག རྒུན་ཆང་འཚིར་གཞོང་བཀང་བས་ཤོག་ལ་རྫིས་ཤིག དེ་དག་གི་སྡིག་པ་ཚབས་ཤིན་ཏུ་ཆེ་བས་ན་འཚིར་གཞོང་བཀང་ནས་མེར་བའོ། །
JOE 3:14 ཐག་ཆོད་ལུང་པར་མི་ཚོགས་ཤིན་ཏུ་མང་སྟེ། ཅིའི་ཕྱིར་ཞེ་ན། དཀོན་མཆོག་ཡ་ཝཱེའི་ཉིན་མོ་དེ་ཐག་ཆོད་ལུང་པ་དང་ཉེ་བར་སླེབས་པའོ། །
JOE 3:15 ཉི་མ་དང་ཟླ་བ་འགྲིབ་ཅིང་། སྐར་ཚོགས་རྣམས་ཀྱི་འོད་སྣང་ཟད།
JOE 3:16 དཀོན་མཆོག་ཡ་ཝཱེས་ཛ་ཡན་དུ་ང་རོ་འདོན་ཞིང་། ཡེ་རུ་སཱ་ལེམ་ནས་གསུང་སྐད་སྒྲོག་པ་དང་། ནམ་མཁའ་དང་ས་གཞི་འདར་ན་ཡང་། དཀོན་མཆོག་ཡ་ཝཱེ་ནི་རང་གི་འབངས་མིའི་སྦས་ས་དང་། ཡེས་ར་ཨེལ་པ་རྣམས་ཀྱི་བཙན་རྫོང་ཡིན།
JOE 3:17 དེ་ནས་ཁྱོད་རྣམས་ཀྱིས་བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་རྟོགས་ཤིང་། བདག་ནི་ཛ་ཡན་ཏེ་ང་ཡི་རི་བོ་དམ་པ་རུ་གནས་པ་དང་། ཡེ་རུ་སཱ་ལེམ་ཡང་དམ་པར་འགྱུར་ཞིང་། མི་རྒྱུས་མེད་རྣམས་ནམ་ཡང་དེ་བརྒྱུད་ནས་འགྲོ་བར་མི་འགྱུར་རོ། །
JOE 3:18 ཉིན་མོ་དེ་ལ་རི་བོ་རྣམས་ལས་ཆང་མངར་མོ་འཛག་ཅིང་། རི་ཕྲན་རྣམས་ལས་འོ་མ་བཞུར་བ་དང་། ཡ་ཧུ་དཱའི་གྲོག་མོ་ཐམས་ཅད་ཆུ་ཡིས་བཀང་ཞིང་། དཀོན་མཆོག་ཡ་ཝཱེའི་མཆོད་ཁང་ལས་ཆུ་མིག་བཞུར་ནས་སིད་ཏིམ་ ལུང་པ་བརླན་པར་བྱའོ། །
JOE 3:19 ཨེ་ཅིབ་ནི་དབེན་སྟོང་དུ་འགྱུར་ངེས་ལ། ཨེ་དོམ་ནི་དབེན་སྟོང་གི་ཐང་རྒོད་དུ་འགྱུར་རོ། །ཅིའི་ཕྱིར་ཞེ་ན། དེ་དག་གིས་ཡ་ཧུ་དཱ་པ་རྣམས་ལ་གདུག་རྩུབ་སྤྱད་པ་དང་། ཡང་རང་གི་ཡུལ་དུ་ཉེས་མེད་རྣམས་ཀྱི་ཁྲག་བཞུར་དུ་བཅུག་པས་སོ། །
JOE 3:20 འོན་ཀྱང་ཡ་ཧུ་དཱ་ནི་རྒྱུན་ནས་རྒྱུན་དུ་གནས་པ་དང་། ཡེ་རུ་སཱ་ལེམ་ནི་མི་རབས་ནས་མི་རབས་བར་དུ་གནས་པར་འགྱུར།
JOE 3:21 ཡང་དེ་སྔར་བདག་གིས་ཁྲག་བཞུར་དུ་བཅུག་པའི་མི་ལ་འཁོན་ལན་མ་སློག ད་ནི་ངས་འཁོན་ལན་སློག་པར་བྱའོ། །དཀོན་མཆོག་ཡ་ཝཱེ་ནི་ཛ་ཡན་དུ་བཞུགས་པའོ།། །།
AMO 1:1 ཡ་ཧུ་དཱའི་རྒྱལ་པོ་ཨུ་ཟི་ཡཱ་དང་ཡེས་ར་ཨེལ་གྱི་རྒྱལ་པོ་ཡེ་ཧོ་ཨ་སི་ཡི་བུ་ཡེ་རོབ་ཨམ་གཉིས་རྒྱལ་པོར་སྡོད་པའི་དུས་སུ། ས་འགུལ་ཆེན་པོ་མ་བྱུང་བའི་ལོ་གཉིས་ཀྱི་སྔོན་ལ་ཐེ་ཀོ་ཨའི་ལུག་རྫི་ཁྲོད་ཀྱི་ཨ་མོ་སི་ཡིས་མཐོང་བའི་ཞལ་གཟིགས་ཏེ་ཡེས་ར་ཨེལ་དང་འབྲེལ་བའི་བཀའ་ནི་འདི་ལྟ་སྟེ།
AMO 1:2 ཨ་མོ་སི་ན་རེ། དཀོན་མཆོག་ཡ་ཝཱེས་ཛ་ཡན་ནས་ང་རོ་འདོན་ཞིང་། ཡེ་རུ་སཱ་ལེམ་ནས་གསུང་སྐད་བསྒྲགས་པས། ལུག་རྫི་རྣམས་ཀྱི་རྩྭ་ས་སྐྱོ་ཞིང་། ཀར་མེལ་གྱི་རི་རྩེ་སྐམ་པར་འགྱུར་ཞེས་སྨྲས་སོ། །
AMO 1:3 དཀོན་མཆོག་ཡ་ཝཱེས་འདི་སྐད་དུ། དཱ་མེ་སེག་གིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན། ཅིའི་ཕྱིར་ཞེ་ན། དེ་དག་གིས་གཡུལ་གཅོག་བྱེད་ལྕགས་ཆས་ཀྱིས་གིལ་ཨད་ལ་བརྙས་བཅོས་བྱས་པས།
AMO 1:4 ངས་ཧ་ཟཱ་ཨེལ་གྱི་ཕོ་བྲང་དུ་མེ་འཕངས་ནས། པེན་ཧ་དཱད་ཀྱི་མཁར་རྫོང་རྣམས་རྩ་མེད་དུ་གཏོང་བར་འགྱུར།
AMO 1:5 ཡང་ངས་དཱ་མེ་སེག་གི་སྒོ་གཏན་བཅག་སྟེ། ཨ་ཝེན་ཐང་ཆེན་གྱི་ཡུལ་མི་རྣམས་ཚར་དུ་གཅོད་ཅིང་། ད་དུང་པེད་ཨེ་དེན་གྱི་དབང་འཛིན་འགོ་དཔོན་དང་། ཨ་རམ་པའི་འབངས་མི་དང་བཅས་ཀིར་དུ་བཙོན་ལ་འཁྲིད་པར་འགྱུར་ཞེས་གསུངས་པ་སྟེ། དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 1:6 དཀོན་མཆོག་ཡ་ཝཱེས་འདི་སྐད་དུ། གཱ་ཟཱས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེས་མི་ཐམས་ཅད་བཟུང་ནས་ཨེ་དོམ་ལ་སྤྲད་པས།
AMO 1:7 ངས་གཱ་ཟཱའི་གྲོང་ཁྱེར་ནང་དུ་མེ་འཕངས་ནས། དེའི་མཁར་རྫོང་རྣམས་ཁྱུར་མིད་གཏོང་ཞིང་།
AMO 1:8 ཡང་ངས་ཨ་སི་དོད་ཀྱི་ཡུལ་མི་རྣམས་དང་། ཨ་ཤཱ་ཀེ་ལོན་གྱི་དབང་འཛིན་འགོ་དཔོན་རྣམས་ཚར་དུ་གཅོད་ཅིང་། ངས་ལག་པ་བརྐྱངས་ཏེ་ཨེག་རོན་ལ་རྒོལ་བར་འགྱུར་ལ། ཕེ་ལེ་ཤེད་པའི་ལྷག་ལུས་རྣམས་རྩ་མེད་དུ་གཏོང་བར་འགྱུར་ཞེས་གསུངས་ཏེ། གཙོ་བོ་ཡ་ཝཱེས་འདི་སྐད་གསུངས་སོ། །
AMO 1:9 དཀོན་མཆོག་ཡ་ཝཱེས་འདི་སྐད་དུ། ཐཱར་གྱིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེས་མི་ཐམས་ཅད་ཨེ་དོམ་ལ་སྤྲད་པར་མ་ཟད། སྤུན་ཟླ་དང་བཞག་པའི་མནའ་ཆིངས་མ་དྲན་པས།
AMO 1:10 ངས་ཐཱར་གྱི་གྲོང་ཁྱེར་ནང་དུ་མེ་འཕངས་ནས། དེའི་མཁར་རྫོང་རྣམས་ཁྱུར་མིད་གཏོང་བར་འགྱུར་ཞེས་གསུངས་སོ། །
AMO 1:11 དཀོན་མཆོག་ཡ་ཝཱེས་འདི་སྐད་དུ། ཨེ་དོམ་གྱིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་རང་གི་སྤུན་ཟླ་རྣམས་འདེད་བཅོམ་བྱེད་པར་རལ་གྲི་བཟུང་སྟེ། སྙིང་རྗེ་སྤུ་ཙམ་ཡང་མེད་པ་དང་། དེ་ཁོང་ཁྲོ་ལངས་ནས་ཐེར་ཚལ་སྦར་ཚལ་བཏང་ཞིང་། དེའི་ཁོང་ཁྲོ་ཆེན་པོ་ནམ་ཡང་ཞི་བར་མི་འགྱུར་བས།
AMO 1:12 ངས་ཐེ་མཱན་ལ་མེ་འཕངས་ནས། པོ་ཚ་རཱའི་མཁར་རྫོང་རྣམས་ཁྱུར་མིད་གཏོང་བར་འགྱུར་ཞེས་གསུངས་སོ། །
AMO 1:13 དཀོན་མཆོག་ཡ་ཝཱེས་འདི་སྐད་དུ། ཨམ་མོན་གྱིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེས་ས་མཚམས་ཇེ་ཆེར་གཏོང་བའི་ཆེད་དུ། ཐ་ན་གིལ་ཨད་ཀྱི་སྦྲུམ་མའི་ཁོག་པའང་གཤགས་པས།
AMO 1:14 འཐབ་མོའི་ངར་སྐད་སྒྲོག་པའི་དུས་དང་། ཆར་རླུང་དང་རླུང་ནག་འཚུབ་པའི་སྐབས་སུ། ངས་རབ་བཱའི་གྲོང་ཁྱེར་ནང་དུ་མེ་འཕངས་ནས། དེའི་མཁར་རྫོང་རྣམས་ཁྱུར་མིད་གཏོང་ཞིང་།
AMO 1:15 ཡང་དེའི་རྒྱལ་པོ་བཙོན་དུ་འཁྲིད་པར་འགྱུར་ཞིང་། རྒྱལ་པོ་ནི་བློན་པོ་རྣམས་དང་བཅས་བཙོན་དུ་འཁྲིད་པར་འགྱུར་ཞེས་གསུངས་པ་སྟེ། དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 2:1 དཀོན་མཆོག་ཡ་ཝཱེས་འདི་སྐད་དུ། མོ་ཨབ་ཀྱིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་ཨེ་དོམ་རྒྱལ་པོའི་རུས་པ་བསྲེགས་ནས་ཐལ་བར་བཏང་བས།
AMO 2:2 ངས་མོ་ཨབ་ལ་མེ་འཕངས་ནས། ཀེ་རི་ཨོད་ཀྱི་མཁར་རྫོང་རྣམས་ཁྱུར་མིད་གཏོང་བར་འགྱུར་ཞིང་ཟང་ཟིང་དང་། ངར་སྐད་དང་། དམག་དུང་གི་སྒྲ་བཅས་ཀྱི་ཁྲོད་དུ་མོ་ཨབ་རྩ་མེད་དུ་གཏོང་བར་འགྱུར་ལ།
AMO 2:3 ཡང་ངས་དེའི་དབང་འཛིན་མཁན་རྣམས་ཚར་དུ་གཅོད་ཅིང་། དེ་དང་ལྷན་ཅིག་ཏུ་དེའི་འགོ་དཔོན་ཐམས་ཅད་ཀྱང་འགུམས་པར་བྱའོ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 2:4 དཀོན་མཆོག་ཡ་ཝཱེས་འདི་སྐད་དུ། ཡ་ཧུ་དཱ་ཡིས་ཡང་ནས་ཡང་དུ་སྡིག་པ་བསགས་པས། ངས་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་དཀོན་མཆོག་ཡ་ཝཱེའི་བཀའ་ཁྲིམས་རྣམས་དོར་བ་དང་། ཁོང་གི་ཁྲིམས་སྲོལ་རྣམས་མ་བསྲུངས་པར་མ་ཟད། དེ་དག་གི་མེས་པོ་རྣམས་རྗེས་སུ་འབྲངས་པའི་སྐུ་འདྲ་ཡིས་ཁོ་རྣམས་ལམ་ནོར་དུ་བཅུག་པས།
AMO 2:5 ངས་ཡ་ཧུ་དཱ་ལ་མེ་འཕངས་ནས། ཡེ་རུ་སཱ་ལེམ་གྱི་མཁར་རྫོང་རྣམས་ཁྱུར་མིད་གཏོང་བར་འགྱུར་ཞེས་གསུངས་སོ། །
AMO 2:6 དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་གྱིས་ཡང་ནས་ཡང་དུ་སྡིག་པ་བསགས་པས། ངས་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་དངུལ་གྱི་ཆེད་དུ་མི་དྲང་བདེན་བཙོངས་ཤིང་། བསིལ་ལྷམ་ཆ་གཅིག་གི་ཕྱིར་དུ་དབུལ་པོ་བཙོངས།
AMO 2:7 སའི་རྡུལ་ལ་རྡོག་བརྫིས་གཏོང་བ་བཞིན། དེ་དག་གིས་དབུལ་པོའི་མགོ་ལ་རྡོག་བརྫིས་བཏང་བ་དང་། མི་དཀའ་སྡུག་ཅན་གྱི་ཁེ་དབང་ཕྲོགས་ཤིང་། བུ་དང་ཕ་གཉིས་ཀྱིས་བུད་མེད་གཅིག་སྤྱད་ནས། བསམ་བཞིན་དུ་ངའི་མཚན་དམ་པ་བཙོག་པར་བཟོས།
AMO 2:8 དེ་དག་མཆོད་ཁྲི་རེ་རེའི་མདུན་དུ་མི་གཞན་པས་གཏའ་མར་བཞག་པའི་གོས་རྣམས་ཀྱི་སྟེང་དུ་ཉལ་ཞིང་། རང་གི་ལྷ་ཡི་ལྷ་ཁང་ནང་དུ་བཤུ་གཞོག་ལས་ཐོབ་པའི་དངུལ་གྱིས་ཉོས་པའི་རྒུན་ཆང་འཐུང་ངོ་། །
AMO 2:9 ཡིན་ཡང་ངས་དེ་དག་གི་མདུན་དུ་ཨེ་མོར་པ་རྣམས་ཚར་དུ་བཅད་པ་མ་ཡིན་ནམ། ཨེ་མོར་པ་ནི་ཐང་ཤིང་བཞིན་མཐོ་ལ། བེ་ཤིང་བཞིན་བརྟན་ཡང་། ངས་དེའི་སྟེང་གི་ཤིང་ཏོག་རྣམས་རྩ་མེད་དུ་གཏོང་ཞིང་། ཤིང་སྡོང་གི་རྩད་པའང་འབྱིན་པར་འགྱུར།
AMO 2:10 ཨེ་མོར་པའི་ཡུལ་ཁམས་ནི་ཁྱོད་རྣམས་ལ་ནོར་སྐལ་དུ་འཐོབ་པའི་ཕྱིར་དུ། ངས་ཁྱོད་རྣམས་ཨེ་ཅིབ་ཡུལ་ནས་ཕྱིར་ཕྱུང་སྟེ། དབེན་སྟོང་དུ་ཁྲིད་ནས་ལོ་ངོ་བཞི་བཅུར་དེར་གནས་པ་མ་ཡིན་ནམ།
AMO 2:11 ངས་ཁྱོད་ཀྱི་བུ་རྒྱུད་ལས་ལུང་སྟོན་པ་དང་། ན་གཞོན་ལས་ན་ཟཱར་པ་རྣམས་འཕེལ་བར་བྱས། ཀྱེ་ཡེས་ར་ཨེལ་པ་རྣམས་འདི་ནི་དོན་ངོ་མ་མ་ཡིན་ནམ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 2:12 ཡིན་ཡང་ཁྱོད་ཚོས་ན་ཟཱར་པ་རྣམས་ལ་བཙན་གྱིས་ཆང་འཐུང་དུ་བཅུག་སྟེ། ལུང་སྟོན་པ་རྣམས་ལ་ལུང་མ་སྟོན་ཞེས་ནན་གྱིས་བསྐུལ་ཏོ། །
AMO 2:13 ལྟོས་ཤིག ཚར་ཕོན་བརྩིགས་པའི་ཤིང་རྟ་གཡོ་འགུལ་བྱེད་པ་བཞིན། ངས་ཁྱོད་ཀྱི་རྐང་འོག་གི་ས་གཡོ་བར་འཇུག་ཅིང་།
AMO 2:14 དེ་འགུལ་སྐྱོད་ཤིན་ཏུ་མགྱོགས་ནའང་འབྲོ་མི་ཐུབ་ལ། སྟོབས་དང་ལྡན་ནའང་ནུས་པ་འདོན་མི་ཐུབ། དཔའ་བོ་ཡིན་ཡང་རང་ཉིད་སྐྱོབ་མི་ཐུབ།
AMO 2:15 གཞུ་འཐེན་མཁན་སར་འགྲེང་མི་ནུས་ཤིང་། རྒྱུག་མཁན་ཡང་ཐར་མི་ཐུབ་ལ། སྐྱ་མི་ཡིན་ཡང་རང་ཉིད་སྐྱོབ་མི་ཐུབ།
AMO 2:16 ཉིན་དེར་སྙིང་སྟོབས་ལྡན་པའི་དམག་མི་ཡང་གཅེར་བུར་འབྲོ་ངེས་ཡིན་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 3:1 ཀྱེ་ཡེས་ར་ཨེལ་པ་རྣམས། དཀོན་མཆོག་ཡ་ཝཱེས་ཨེ་ཅིབ་ཡུལ་ནས་ཕྱིར་བཏོན་པའི་ཡེས་ར་ཨེལ་གྱི་བུ་རྒྱུད་ཡོངས་ལ་རྒོལ་བའི་གསུང་སྟེ། དཀོན་མཆོག་ཡ་ཝཱེས་ཁྱོད་ཅག་ལ་རྒོལ་བའི་གསུང་ལ་ཉོན་ཅིག ཁོང་གིས་འདི་སྐད་དུ།
AMO 3:2 ས་གཞིའི་མི་རིགས་ཀུན་ལས་ངས་ཁྱོད་ཁོ་ན་བདམས་པས། ངས་ཁྱོད་ཀྱི་སྡིག་པ་ཡོད་ཚད་འདེད་པར་འགྱུར།
AMO 3:3 གྲོས་མཐུན་མེད་ན་མི་གཉིས་ཅི་ལྟར་ལྷན་དུ་འགྲོའམ།
AMO 3:4 སེང་གེས་རི་དྭགས་མ་ཟིན་ན། ནགས་ཚལ་དུ་ང་རོ་ཅི་ལྟར་སྒྲོག སེང་གེ་དར་མས་ཅི་ཡང་མ་ཟིན་ན། ས་ཕུག་ནང་དུ་ངར་སྐད་ཅི་ལྟར་སྒྲོག
AMO 3:5 གལ་ཏེ་རྒྱ་མ་བཙུགས་ན་བྱ་བྱེའུ་རྣམས་རྙི་ཡི་ནང་དུ་ལྷུང་ངམ། རྙི་ལ་ཅི་ཡང་མ་ཐོབ་ན་དེ་ས་ནས་ཡར་ལང་ངམ།
AMO 3:6 གྲོང་ཁྱེར་ནང་དུ་དམག་དུང་བུས་ན་མི་རྣམས་མི་འདར་རམ། གྲོང་ཁྱེར་ཞིག་ལ་ཆག་སྒོ་བྱུང་ན་དེ་ནི་དཀོན་མཆོག་ཡ་ཝཱེས་གནང་བ་མ་ཡིན་ནམ།
AMO 3:7 གལ་ཏེ་གཙོ་བོ་ཡ་ཝཱེས་སྔོན་ལ་ཉིད་ཀྱི་བཀོད་པ་ཁོང་གི་ཞབས་ཕྱི་སྟེ་ལུང་སྟོན་པ་རྣམས་ལ་མ་མངོན་ན། དེས་འཕྲིན་ལས་གང་ཡང་མཛད་པར་མི་འགྱུར་རོ། །
AMO 3:8 སེང་གེས་ང་རོ་བསྒྲགས་ན་མི་འཇིགས་པ་སུ་ཡོད་དམ། གཙོ་བོ་ཡ་ཝཱེས་བཀའ་གནང་བ་ཡིན་ན་ལུང་མི་སྟོན་པ་སུ་ཡོད་དམ།
AMO 3:9 ཨ་སི་དོད་དང་ཨེ་ཅིབ་ཀྱི་མཁར་རྫོང་ནང་དུ་བཀའ་སྒྲོགས་ལ་འདི་ལྟར་སྨྲོས་ཤིག ཁྱོད་རྣམས་སཱ་མར་ཡའི་རི་བོར་འདུས་ཏེ་གྲོང་ཁྱེར་ནང་དུ་ཡོད་པའི་ཟིང་སློང་དང་གཉའ་གནོན་ལ་ལྟོས་ཤིག
AMO 3:10 ཅིའི་ཕྱིར་ཞེ་ན། རང་གི་མཁར་རྫོང་ནང་དུ་རྩུབ་སྤྱོད་དང་བརྙས་བཅོས་གཉའ་གནོན་མང་ཡང་། མི་དེ་དག་གིས་དྲང་བདེན་གྱི་དོན་ཅི་ལྟར་སྤྱོད་པ་མི་ཤེས་ཞེས་དཀོན་མཆོག་ཡ་ཝཱེས་འདི་སྐད་གསུངས།
AMO 3:11 དེ་བས་གཙོ་བོ་ཡ་ཝཱེས་འདི་སྐད་དུ། ཕ་རོལ་པོས་ཡུལ་དེའི་ཕྱོགས་བཞི་ནས་བསྐོར་ཏེ། ཁྱོད་ཀྱི་སྟོབས་ཤུགས་ཉམས་སུ་འཇུག་ཅིང་། ཁྱོད་ཀྱི་མཁར་རྫོང་རྣམས་ཀྱང་འཕྲོག་པར་འགྱུར་ཞེས་གསུངས།
AMO 3:12 དཀོན་མཆོག་ཡ་ཝཱེས་འདི་སྐད་དུ། ལུག་རྫི་ཡིས་སེང་གེའི་ཁ་ནས་ལུག་གི་རྐང་ལག་གཉིས་སམ་རྣ་བའི་དུམ་བུ་གཅིག་འཕྲོག་པ་བཞིན་དུ། སཱ་མར་ཡ་ཡུལ་དུ་སྡོད་པའི་ཡེས་ར་ཨེལ་པ་རྣམས་ལས་ཀྱང་མལ་ཁྲིའི་ཟུར་དང་། ཡང་ན་མེ་ཏོག་འཚེམ་དྲུབ་ཅན་གྱི་གདན་བཏིངས་ཡོད་པའི་གཟིམ་ཁྲིའི་སྟེང་དུ་ཉལ་བ་རྣམས་ཐར་བའང་དེ་ཙམ་ཡིན་ནོ་ཞེས་གསུངས་སོ། །
AMO 3:13 ཁྱོད་ཅག་གིས་ཉོན་དང་། ཡ་ཀོབ་ཀྱི་ཁྱིམ་རྒྱུད་ལ་ཉེན་བརྡ་ཐོངས་ཤིག་ཅེས་དཔུང་ཚོགས་ཀུན་གྱི་དཀོན་མཆོག་སྟེ་གཙོ་བོ་ཡ་ཝཱེས་གསུངས་སོ། །
AMO 3:14 ངས་ཡེས་ར་ཨེལ་གྱི་སྡིག་པ་འདེད་པའི་དུས་སུ། པེད་ཨེལ་གྱི་མཆོད་ཁྲི་རྣམས་ལའང་ཉེས་ཆད་གཅོད་ཅིང་། མཆོད་ཁྲིའི་རུ་ཐུར་ རྣམས་བཅག་སྟེ་སར་ལྷུང་བར་འགྱུར་རོ། །
AMO 3:15 ཡང་ངས་དགུན་ཁ་དང་དབྱར་ཁའི་ཁང་པ་རྣམས་བཤིག་སྟེ། བ་སོས་བརྒྱན་པའི་ཁང་པ་རྣམས་ཀྱང་རྩ་མེད་དུ་གཏོང་ཞིང་། བརྗིད་ཉམས་ཆེ་བའི་ཐོག་བརྩེགས་རྣམས་ཀྱང་མེད་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
AMO 4:1 ཁྱོད་ཅག་དབུལ་པོར་བརྙས་བཅོས་དང་། དཀའ་སྡུག་ཅན་ལ་བཙན་གནོན་བྱེད་མཁན། ཡང་རང་གི་སྐྱེས་པར་ན་རེ། ངེད་རྣམས་ཀྱིས་འཐུང་བའི་ཕྱིར་དུ་ཆང་འཁྱེར་ཤོག་ཅེས་སྨྲ་བའི་སཱ་མར་ཡའི་རི་ལ་གནས་པའི་པཱ་ཤན་གྱི་བ་མོ་དང་འདྲ་བ་དག་གིས་གཏམ་འདི་ལ་ཉོན་ཅིག
AMO 4:2 གཙོ་བོ་ཡ་ཝཱེས་ཁོང་གི་དམ་པ་ཉིད་དཔང་དུ་བཙུགས་ནས་དབུ་མནའ་བཞེས་ཏེ་འདི་སྐད་དུ། ལྟོས་ཤིག ཁྱོད་ཅག་འཛིན་པའི་ཉིན་སླེབས་ལ་ཉེ་བ་དང་། མི་ཡིས་ཁྱོད་རྣམས་ལྕགས་ཀྱུས་བཟུང་ནས་འཁྱེར་འགྲོ་ཞིང་། ཆེས་མཐའ་མ་དེ་ཡང་མི་ཡིས་ཉ་ཀྱུས་བཟུང་ནས་འཁྱེར་འགྲོའོ། །
AMO 4:3 ཁྱོད་རྣམས་མཁར་གྱང་གི་བུ་ག་བརྒྱུད་དེ་ཕྱི་རུ་འདྲུད་ཅིང་། ཧར་མོན་དུ་འདོར་བར་འགྱུར་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 4:4 ཁྱོད་རྣམས་པེད་ཨེལ་དུ་སོང་ནས་སྡིག་པ་གསོགས་དང་། གིལ་གལ་དུ་ཉེས་ཆད་ཇེ་མང་དུ་ཐོངས་ཤིག ནངས་མོ་རེ་རེར་རང་གི་མཆོད་རྫས་ཕུལ་ལ། ཉིན་མོ་གསུམ་རེར་རང་གི་བཅུ་ཆའི་གཅིག་ཕུལ་ཞིག
AMO 4:5 ཀྱེ་ཡེས་ར་ཨེལ་པ་རྣམས། བཀའ་དྲིན་གྱི་མཆོད་པ་རུ་སྐྱུར་ལྡན་པའི་བག་ལེབ་ཕུལ་ཞིག་དང་། ཡིད་མོས་མཆོད་པ་ཕུལ་བ་སྐད་མཐོན་པོས་སྒྲོགས་ཤིག ཅིའི་ཕྱིར་ཞེ་ན། འདི་ལྟར་སྤྱོད་པར་ཁྱོད་དགའོ་ཞེས་གཙོ་བོ་ཡ་ཝཱེས་གསུངས་སོ། །
AMO 4:6 ཡང་ངས་ཁྱོད་ཅག་གི་གྲོང་ཁྱེར་ཐམས་ཅད་ཀྱི་མི་ལ་བཟའ་བཏུང་མེད་པ་དང་། གནས་སོ་སོ་རུ་འབྲུ་རིགས་དཀོན་པར་བྱས་ཀྱང་། ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས་པ་དང་།
AMO 4:7 ངས་ཁྱོད་རྣམས་ལ་སྟོན་ཐོག་ལེན་པའི་ཟླ་གསུམ་གྱི་སྔོན་ལ་ཆར་ཆུ་མ་བྱིན་པར། གྲོང་ཁྱེར་གཅིག་ལ་ཆར་ཆུ་བྱིན་ཡང་། གྲོང་ཁྱེར་གཞན་པར་མ་བྱིན་ཏེ། ས་ཆ་ཞིག་ལ་ཆར་ཆུ་བྱིན་ཡང་། ས་ཆ་གཞན་པར་ཆར་ཆུ་མ་བྱིན་པར་སྐམ་པས་ན།
AMO 4:8 གྲོང་ཁྱེར་གཉིས་སམ་གསུམ་གྱི་མི་རྣམས་གྲོང་ཁྱེར་གཅིག་ལ་ཆུ་འཐུང་དུ་འོངས་ན་ཡང་ཆུས་མ་ངོམས། དེ་འདྲ་ཡིན་ཡང་ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས།
AMO 4:9 ངས་ཐེངས་མང་པོར་བཙའ་ཐན་དང་ཧམ་སྤུ་ཡིས་ཁྱོད་ཀྱི་ལྡུམ་ར་དང་རྒུན་ཚལ་ལ་བརྡུངས་ཏེ། ཆ་ག་པ་ལ་ཁྱོད་ཅག་གི་སེ་ཡབ་ཤིང་དང་། སྐྱུ་རུ་ཤིང་ཟོས་ཚར་བཅུག་ཀྱང་ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 4:10 ཨེ་ཅིབ་ཡུལ་ལ་བྱུང་བ་དང་འདྲ་བའི་རིམས་ནད་ངས་ཁྱོད་ཀྱི་ཁྲོད་དུ་སླེབས་བཅུག་སྟེ། ངས་ཁྱོད་ཀྱི་གཞོན་ནུ་རྣམས་རལ་གྲིས་བཀུམ་ཞིང་། ཁྱོད་ལས་རྟ་རྣམས་ཀྱང་ཕྲོགས་པ་དང་། ངས་ཁྱོད་ཀྱི་དམག་སྒར་ནང་དུ་རོ་ཡི་དྲི་ངན་འཐུལ་བར་བཅུག་ཀྱང་ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 4:11 ངས་སཱ་དོམ་དང་གཱ་མོ་ར་གཉིས་ཕམ་པར་བརྒྱབ་པ་བཞིན་དུ་ཁྱོད་རྣམས་ཀྱང་ཕམ་པར་རྒྱག་སྟེ། ཁྱོད་ཅག་ནི་མེ་ལས་ཕྱུང་བའི་བུད་ཤིང་ཞིག་དང་འདྲ་ཡང་ཁྱོད་རྣམས་ངའི་ཕྱོགས་སུ་མ་འཁོར།
AMO 4:12 དེ་བས་ཀྱེ་ཡེས་ར་ཨེལ། ངས་ཁྱོད་ལ་འདི་ལྟར་བྱ་སྟེ། ཀྱེ་ཡེས་ར་ཨེལ་ངས་ཁྱོད་ལ་དེ་ལྟར་བྱེད་པས། ཁྱོད་རང་གི་དཀོན་མཆོག་དང་མཇལ་བར་གྲ་སྒྲིག་བྱོས་ཤིག་ཅེས་དཀོན་མཆོག་ཡ་ཝཱེས་འདི་སྐད་གསུངས།
AMO 4:13 ལྟོས་དང་། ཁོང་ནི་རི་བོ་རྣམས་མཛད་མཁན་དང་། རླུང་མཛད་མཁན། ཉིད་ཀྱི་ཐུགས་དགོངས་མི་ལ་མངོན་པར་མཛད་མཁན་ཡིན་ཞིང་། ཁོང་ནི་ཞོགས་པ་མུན་པར་མཛད་མཁན་དང་། ས་གཞིའི་མཐོ་སར་ཞབས་འཆག་མཁན་ཡིན་པས། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་སོ། །
AMO 5:1 ཀྱེ་ཡེས་ར་ཨེལ་གྱི་ཁྱིམ་རྒྱུད། ངས་ཁྱོད་ཀྱི་དོན་དུ་བརྩམས་པའི་སྐྱོ་གླུ་ལ་ཉོན་ཅིག
AMO 5:2 བུ་མོ་གཙང་མ་དང་འདྲ་བའི་ཡེས་ར་ཨེལ་སར་འགྱེལ་ཏེ། སླར་ཡང་ལང་བར་མི་འགྱུར་ཞིང་། མོ་རང་གི་ས་རུ་བསྐྱུར་ན་ཡང་། ཡར་སྐྱོར་མཁན་སུ་ཡང་མེད།
AMO 5:3 ཅིའི་ཕྱིར་ཞེ་ན། གཙོ་བོ་ཡ་ཝཱེས་ཡེས་ར་ཨེལ་ཁྱིམ་རྒྱུད་ཀྱི་སྐོར་ལ་འདི་སྐད་དུ། ཡེས་ར་ཨེལ་མི་རིགས་ཀྱི་གྲོང་ཁྱེར་ལས་དམག་ཆིག་སྟོང་མངགས་ཀྱང་བརྒྱ་མ་གཏོགས་མ་ལུས་ཤིང་། བརྒྱ་མངགས་པ་ལས་བཅུ་མ་གཏོགས་མ་ལུས་ཞེས་གསུངས་སོ། །
AMO 5:4 ཡང་དཀོན་མཆོག་ཡ་ཝཱེས་ཡེས་ར་ཨེལ་གྱི་ཁྱིམ་རྒྱུད་ལ་འདི་སྐད་གསུངས་ཏེ། ང་ཚོལ་དང་ཁྱོད་རང་གསོན་པར་འགྱུར།
AMO 5:5 འོན་ཀྱང་པེད་ཨེལ་དུ་རོགས་རམ་མ་བཙལ། གིལ་གལ་དུ་མ་འགྲོ། པེར་ཤ་བཱ་རུ་ཕར་མ་འགྲོ་ཞིག ཅིའི་ཕྱིར་ཞེ་ན། གིལ་གལ་ལ་འཕྲོག་བཅོམ་ཐེབས་ངེས་ཤིང་། པེད་ཨེལ་ནི་མེད་པར་འགྱུར་རོ། །
AMO 5:6 དཀོན་མཆོག་ཡ་ཝཱེ་ཚོལ་དང་གསོན་པར་འགྱུར། དེ་མིན་དཀོན་མཆོག་ཡ་ཝཱེ་ཁོང་ནི་མེ་ལྟར་ཡོ་སེབ་ཀྱི་ཁྱིམ་རྒྱུད་ཡོངས་སུ་ཁྱབ་ནས་དེ་དག་རྩ་མེད་དུ་བཏང་སྟེ། མི་སུས་ཀྱང་པེད་ཨེལ་གྱི་མེ་གསོད་མི་ཐུབ་བོ། །
AMO 5:7 དྲང་གཞག་མཁན་པར་བསྒྱུར་ཞིང་། དྲང་བདེན་ས་ལ་འདོར་མཁན་ཁྱོད་རྣམས།
AMO 5:8 སྨིན་དྲུག་དང་རྔོན་པའི་སྐར་མ་མཛད་མཁན་དང་། སྨག་རུམ་ཐོ་རངས་སུ་སྒྱུར་མཁན་དང་། ཉིན་མོ་མཚན་དུ་མཛད་མཁན་དང་། ཡང་རྒྱ་མཚོར་བཀའ་བབས་ཏེ་རྒྱ་མཚོ་ས་ངོས་སུ་གཏོང་མཁན་ཁོང་གི་མཚན་ནི་ཡ་ཝཱེ་ལགས་སོ། །
AMO 5:9 ཁོང་གིས་སྟོབས་ལྡན་རྣམས་གློ་བུར་ཉིད་ལ་མེད་པར་མཛད་པས། མཁར་བརྟན་པོ་ལ་རྐྱེན་ངན་ཐེབས་པར་གྱུར།
AMO 5:10 མཁར་སྒོ་རུ་དྲང་བདེན་སྐྱོང་བའི་མི་ལ་ཁྱོད་རྣམས་སྡང་ཞིང་། བདེན་ཚིག་སྨྲ་མཁན་ལ་ཞེན་པ་ལོག
AMO 5:11 ཁྱོད་ཅག་གིས་དབུལ་པོར་བརྙས་བཅོས་བྱས་ཤིང་། དེ་ལས་འབྲུ་རིགས་བཙན་གྱིས་བསྡུས་པས། ཁྱོད་ཅག་གིས་བརྡར་བའི་རྡོ་ཡིས་ཁང་པ་བསྐྲུན་ཡང་། དེའི་ནང་དུ་གནས་པར་མི་འགྱུར། ཁྱོད་ཅག་གིས་སྙིང་ལ་སྡུག་པའི་རྒུན་ཚལ་རྣམས་བཙུགས་ཀྱང་། དེ་ལས་ཐོན་པའི་རྒུན་ཆང་འཐུང་བར་མི་འགྱུར།
AMO 5:12 ཅིའི་ཕྱིར་ཞེ་ན། ཁྱོད་ཀྱི་མི་ཚངས་པ་མང་ཞིང་། སྡིག་པ་ཤིན་ཏུ་ཆེ་བ་ངས་རྟོགས་ཏེ། ཁྱོད་ཅག་གིས་མི་དྲང་བདེན་ཅན་སྡུག་ལ་སྦྱར་ཅིང་། ལྐོག་རྔན་བླངས་ཏེ་མཁར་སྒོ་རུ་དབུལ་ཕོངས་དག་ལ་ཁྲིམས་ལོག་པར་སྤྱད་པས།
AMO 5:13 ཤེས་པའི་མི་ནི་ཁ་རོག་ཏུ་སྡོད་དེ། ཅིའི་ཕྱིར་ཞེ་ན། དུས་རབས་ངན་པ་ཡིན་པས་སོ། །
AMO 5:14 ཁྱོད་རྣམས་ཀྱིས་བཟང་པོ་བཙལ་བ་ལས་ངན་པ་མ་བཙལ་ཞིག དེ་ལྟར་ཁྱོད་རྣམས་གསོན་པར་འགྱུར་ཞིང་། ཡང་ཁྱོད་ཅག་གིས་སྨྲས་པ་བཞིན་དུ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཁྱོད་ཅག་དང་མཉམ་དུ་བཞུགས་པར་བྱའོ། །
AMO 5:15 ཁྱོད་རྣམས་བཟང་པོར་དགའ་ཞིང་། ངན་པར་སྡང་སྟེ་མཁར་སྒོ་རུ་དྲང་བདེན་སྤེལ་ཞིག དེ་ལྟར་བྱས་ན་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཡོ་སེབ་ཀྱི་ལྷག་ལུས་རྣམས་ལ་བྱིན་རླབས་གནང་ཡང་སྲིད།
AMO 5:16 དེ་བས་དཔུང་ཚོགས་ཀུན་གྱི་དཀོན་མཆོག་སྟེ་གཙོ་བོ་ཡ་ཝཱེས་འདི་སྐད་དུ། ཐང་ཆེན་ཀུན་ཏུ་ངུ་འབོད་བྱེད་པའི་སྒྲ་ཐོས་ཤིང་། སྲང་ལམ་རྣམས་སུ་སྐྱོ་བ་ལ་སྐྱོ་བ་ལ་ཞེས་བརྗོད་པར་འགྱུར་ལ། ཡང་མི་ཡིས་འོ་དོད་བྱེད་དུ་ཞིང་པ་འབོད་ཅིང་། མྱ་ངན་བྱེད་དུ་སྐྱོ་གླུ་ལེན་མཁན་འབོད་པར་འགྱུར།
AMO 5:17 རྒུན་ཚལ་ཀུན་ཏུ་ཡིད་གདུང་ངུ་འབོད་ཀྱི་སྐད་ཐོས་ཡོང་། ཅིའི་ཕྱིར་ཞེ་ན། ང་རང་ཁྱོད་ཚོའི་དཀྱིལ་ནས་རྒྱུ་བར་བྱའོ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
AMO 5:18 དཀོན་མཆོག་ཡ་ཝཱེའི་ཉིན་མོ་སླེབ་པར་རེ་སྒུག་བྱེད་པ་ཁྱོད་རྣམས་ལ་ཆག་སྒོ་འབྱུང་སྟེ། དཀོན་མཆོག་ཡ་ཝཱེའི་ཉིན་མོར་ཁྱོད་རྣམས་ལ་ཅི་འབྱུང་ངམ། ཉིན་མོ་དེ་ནི་འོད་དང་བྲལ་བའི་མུན་པ་ཡིན་ནོ། །
AMO 5:19 ཉིན་མོ་དེ་ནི་སེང་གེ་ལས་བྲོས་ནས་དོམ་དང་ཕྲད་དེ། ཁྱིམ་དུ་སླེབས་ནས་རྩིག་པར་ལག་པ་སྔས་ཏེ་སྦྲུལ་གྱིས་སོ་བཏབ་པའི་མི་དང་འདྲའོ། །
AMO 5:20 དཀོན་མཆོག་ཡ་ཝཱེའི་ཉིན་མོ་ནི་འོད་དང་བྲལ་བའི་མུན་པ་དང་། སྨག་རུམ་ཡིན་ཞིང་འོད་ཅི་ཡང་མེད་པ་མ་ཡིན་ནམ།
AMO 5:21 ཁྱོད་ཀྱི་དུས་ཆེན་རྣམས་ལ་ང་སྡང་ཞིང་ཞེན་ལོག་སྟེ། ཁྱོད་ཀྱི་འདུ་འཛོམས་དམ་ནན་རྣམས་ལའང་ང་མི་དགའོ། །
AMO 5:22 ཁྱོད་ཅག་གིས་ང་ལ་སྦྱིན་སྲེག་གི་མཆོད་པ་དང་འབྲུ་མཆོད་ཕུལ་ན་ཡང་ངས་མི་ལེན་ཏེ། ཁྱོད་ཅག་གིས་ཞི་བདེའི་མཆོད་པ་རུ་ཤ་ཤེད་རྒྱས་པའི་ཕྱུགས་ཟོག་ཕུལ་ན་ཡང་ངས་སྣང་མེད་དུ་བསྐྱུར་རོ། །
AMO 5:23 ཁྱོད་ཅག་གི་མགུར་གླུའི་འུར་སྒྲ་ནི་ང་དང་བྲལ་བར་གྱིས་ཤིག ངས་ཁྱོད་ཅག་གིས་རྒྱུད་མངས་དཀྲོལ་བ་ལའང་མི་མཉན་ནོ། །
AMO 5:24 དེ་ལས་དྲང་གཞག་ནི་རྦ་རླབས་འཕྱུར་བ་བཞིན་དང་། དྲང་བདེན་ཆུ་བོ་བཞིན་དུ་ལྷུང་ལྷུང་འབབ་པར་སྨོན།
AMO 5:25 ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཅག་དབེན་སྟོང་ཡུལ་ནས་བགྲང་བྱ་བཞི་བཅུར་བསྡད་ཀྱང་། སྦྱིན་སྲེག་གི་མཆོད་པ་དང་འབྲུ་མཆོད་བདག་ལ་ཕུལ་བ་ཡིན་ནམ།
AMO 5:26 ཁྱོད་ཅག་གིས་རང་གི་ཕྱིར་དུ་བཟོས་པའི་ལྷ་སྟེ། རང་གི་རྒྱལ་པོ་སིག་ཀུད་དང་། ཁྱོད་ཅག་གི་སྐར་ལྷ་ཁེ་ཝན་ཁུར་བས།
AMO 5:27 ངས་ཁྱོད་རྣམས་བཙོན་དུ་འཁྲིད་པར་འགྱུར་ཞིང་། དཱ་མེ་སེག་ཕྱི་རོལ་ཏུ་ཡུལ་འཁྱམ་ལ་བསྐྱལ་བར་བྱའོ་ཞེས་དཔུང་ཚོགས་ཀུན་གྱི་དཀོན་མཆོག་གི་མཚན་མངའ་བའི་དཀོན་མཆོག་ཡ་ཝཱེས་གསུངས་སོ། །
AMO 6:1 རྒྱལ་ཁམས་ཀུན་གྱི་གཙོ་བོ་དང་། མིའི་ནང་གི་སྙན་གྲགས་ཅན་དང་། ད་དུང་ཡེས་ར་ཨེལ་ཁྱིམ་རྒྱུད་ཡོང་ས་ཡིན་པའི་ཛ་ཡན་དང་སཱ་མར་ཡ་རི་བོར་བློ་བདེ་བག་ཕབ་ངང་སྡོད་པ་རྣམས་ལ་ཆག་སྒོ་འབྱུང་ཞིང་།
AMO 6:2 ཁྱོད་རྣམས་ཀལ་ནེ་རུ་ཕྱིན་ཏེ་ལྟོས་ཤིག་དང་། དེ་ནས་ཧ་མཱད་གྲོང་ཁྱེར་དུ་སོང་སྟེ། ཕེ་ལེ་ཤེད་ཀྱི་གཱད་བྱ་བར་བབས་ནས། རྒྱལ་ཁམས་དེ་དག་ཁྱོད་ཀྱི་རྒྱལ་ཁམས་ལས་སྟོབས་ལྡན་ཡིན་མིན་དང་། མངའ་ཁོངས་ནི་ཁྱོད་ཀྱི་ས་ལས་ཆེ་མིན་ལ་ལྟོས་དང་།
AMO 6:3 ཁྱོད་ཅག་གིས་གནོད་འཚེ་ཐེབས་པའི་ཉིན་མོ་ད་དུང་རྒྱང་རིང་བར་སེམས་མོད་ཀྱང་། ཁྱོད་ཅག་གི་སྤྱོད་པས་གདུག་རྩུབ་ཆེ་བའི་ཉེས་ཆད་འོང་བར་བཅུག
AMO 6:4 ཁྱོད་རྣམས་བ་སོའི་མལ་ཁྲིའི་སྟེང་དུ་ཉལ་ཞིང་། གཟིམ་ཁྲིའི་སྟེང་དུ་བསྙེས་ནས། ལུག་ཁྱུའི་ནང་གི་ལུ་གུ་དང་ཕྱུགས་རའི་ནང་གི་བ་ཕྲུག་ཟ་ཞིང་།
AMO 6:5 ཁྱོད་རྣམས་ཀྱིས་བློ་བདེ་བག་ཕབ་ངང་རྒྱུད་མངས་བརྡུངས་ཏེ་རོལ་ཆ་དཀྲོལ་བ་དང་། ཡང་དཱ་བིད་དང་འདྲ་བར་རང་ཉིད་ཀྱི་ཕྱིར་དུ་རོལ་ཆས་བཟོས་པ་ཡིན།
AMO 6:6 ཁྱོད་རྣམས་ཀྱིས་ཕོར་བ་ཆེན་པོས་ཆང་འཐུང་ཞིང་། ཆེས་ལེགས་པའི་སྣུམ་གྱིས་རང་ལུས་བྱུགས་པ་ལས། ཡོ་སེབ་ཀྱི་སྡུག་བསྔལ་ལ་སེམས་ཁྲལ་མ་བྱས།
AMO 6:7 དེའི་ཕྱིར་ཁྱོད་ཅག་ནི་ཐོག་མར་བཙོན་ལ་འཁྲིད་པ་དག་ཡིན་ཞིང་། དགའ་སྟོན་ལོངས་སུ་སྤྱོད་པའི་ཉིན་མོ་ནི་མེད་པར་འགྱུར་རོ། །དེ་དག་ལྷོད་ལྷོད་བྱས་ནས་སྡོད་པའི་དགའ་སྟོན་དེ་མེད་པར་འགྱུར།
AMO 6:8 གཙོ་བོ་ཡ་ཝཱེས་རང་ཉིད་དཔང་དུ་བཙུགས་ཏེ་དབུ་མནའ་བཞེས་ནས་འདི་སྐད་དུ། ཡ་ཀོབ་ཀྱི་གཟི་བརྗིད་ལ་ང་སྡང་ཞིང་། དེའི་མཁར་རྫོང་ངས་དོར་བས། ངས་གྲོང་ཁྱེར་དང་དེའི་ནང་གི་ཐམས་ཅད་དགྲའི་ལག་ཏུ་གཏོད་པར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
AMO 6:9 གལ་ཏེ་ཁྱིམ་གཅིག་ནས་མི་བཅུ་ལུས་ན། དེ་དག་ཀྱང་སྲོག་དང་འབྲལ་བར་འགྱུར།
AMO 6:10 བམ་རོ་སྲེག་མཁན་ཁྱིམ་མི་ཡིས་བམ་རོ་དེ་ཁྱིམ་གྱི་ཕྱི་རོལ་ཏུ་ཁྱེར་དུས། ཁང་པའི་ཕུག་ཏུ་སྦས་ཡོད་པའི་མི་ལ། ཁྱོད་ཡོད་སར་ད་དུང་མི་ཡོད་དམ་ཞེས་དྲིས་ན། མི་དེས་ན་རེ། མེད་དེ། ངེད་ཀྱིས་དཀོན་མཆོག་ཡ་ཝཱེའི་མཚན་གླེང་མི་རུང་བས། ཁ་རོག་ཏུ་སྡོད་ཅིག་ཅེས་སྨྲ་བར་འགྱུར་རོ། །
AMO 6:11 ལྟོས་ཤིག དཀོན་མཆོག་ཡ་ཝཱེས་བཀའ་བབས་ན། ཁང་ཆེན་རྣམས་གཏོར་བར་འགྱུར་ཞིང་། ཁང་བུ་རྣམས་བཤིག་པར་འགྱུར།
AMO 6:12 རྟ་ནི་གཡང་སར་རྒྱུག་ནུས་སམ། མི་ཡིས་ས་དེར་གླང་གོག་གིས་རྨོ་འདེབས་བྱེད་ནུས་སམ། ཡིན་ཡང་ཁྱོད་ཀྱིས་དྲང་གཞག་དུག་རྩྭར་བསྒྱུར་ཏེ། དྲང་བདེན་གྱི་འབྲས་བུ་མཁན་པར་བསྒྱུར།
AMO 6:13 ཁྱོད་རྣམས་ལོ་དི་བེར་གྲོང་ཁྱེར་ལ་དགའ་ཞིང་རང་བསྟོད་ཀྱིས་ན་རེ། བདག་ཅག་གིས་རང་གི་སྟོབས་ཤུགས་ལ་བརྟེན་ནས་ཀར་ནཱ་ཡིམ་གྲོང་ཁྱེར་ཡང་རང་གི་དོན་དུ་བླངས་པ་མ་ཡིན་ནམ་ཞེས་སྨྲས་ཤིང་།
AMO 6:14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ངས་རྒྱལ་ཁམས་ཤིག་དར་དུ་བཅུག་སྟེ་ཁྱོད་ལ་རྒོལ་བར་འགྱུར་ཞིང་། དེ་དག་གིས་ཧ་མཱད་ནས་ཨ་ར་པཱའི་གཙང་པོ་བར་དུ་ཁྱོད་ལ་བརྙས་བཅོས་དང་གཉའ་གནོན་བྱེད་པར་འགྱུར་ཞེས་གསུངས་སོ། །
AMO 7:1 གཙོ་བོ་ཡ་ཝཱེས་ང་ལ་དོན་ཞིག་བསྟན་ཏེ། ལྟོས་ཤིག རྒྱལ་པོའི་ཕྱིར་དུ་ལོ་ཏོག་བསྡུས་རྗེས། ས་ཞིང་དུ་མྱུ་གུ་འབུས་མ་ཐག གཙོ་བོས་འབུ་ཆ་ག་པ་མང་པོ་མཛད་པ་དང་།
AMO 7:2 འབུ་ཆ་ག་པས་ས་གཞིའི་ཐོན་རྫས་ཟོས་ཚར་དུས། ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་དགོངས་ཡངས་གནང་བར་མཛོད་ཅིག ཅིའི་ཕྱིར་ཞེ་ན། ཡ་ཀོབ་ནི་ཉམ་ཆུང་ཡིན་པས་ཅི་ལྟར་ལང་སྲིད་དམ་ཞེས་ཞུས་པ་ལས།
AMO 7:3 དཀོན་མཆོག་ཡ་ཝཱེ་དོན་དེའི་ཕྱིར་ཐུགས་འགྱོད་སྐྱེས་ཤིང་། དེ་བཞིན་འབྱུང་བར་མི་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །
AMO 7:4 ཡང་གཙོ་བོ་ཡ་ཝཱེས་ང་ལ་འདི་ལྟར་བསྟན་ཏེ། ལྟོས་ཤིག གཙོ་བོ་ཡ་ཝཱེས་ཉེས་ཆད་གཅོད་ཕྱིར་མེ་བཀུག་སྟེ། རྒྱ་མཚོ་ཆེན་པོ་དང་ཡེས་ར་ཨེལ་གྱི་ས་སྐལ་ཡང་མེར་བསྲེགས་པས།
AMO 7:5 ངས་གཙོ་བོ་ཡ་ཝཱེ་ལ་འདི་ལྟར། ཁྱེད་ཀྱིས་དེ་ལྟར་མ་མཛད་ཅིག ཅིའི་ཕྱིར་ཞེ་ན། ཡ་ཀོབ་ནི་ཉམ་ཆུང་ཡིན་པས་ཅི་ལྟར་ཚུགས་ཐུབ་བམ་ཞེས་ཞུས་པ་ལས།
AMO 7:6 དཀོན་མཆོག་ཡ་ཝཱེ་དོན་དེའི་ཕྱིར་ཐུགས་འགྱོད་སྐྱེས་ཤིང་། དེ་བཞིན་དུའང་འབྱུང་བར་མི་འགྱུར་ཞེས་གཙོ་བོ་ཡ་ཝཱེས་གསུངས་སོ། །
AMO 7:7 ཡང་ཁོང་གིས་ང་ལ་འདི་ལྟར་བསྟན་ཏེ། ལྟོས་ཤིག རྩིག་པ་ཞིག་ནི་ཐིག་སྐུད་འཐེན་ནས་བཟོས་པ་དང་། གཙོ་བོས་ཕྱག་ཏུ་ཐིག་སྐུད་ཐོགས་ཏེ་རྩིག་པ་དེའི་སྟེང་དུ་བཞེངས་ནས།
AMO 7:8 དཀོན་མཆོག་ཡ་ཝཱེས་ང་ལ་འདི་སྐད་དུ། ཨ་མོ་སི། ཁྱོད་ཀྱིས་ཅི་མཐོང་ངམ་གསུངས་པ་ན། ངས་ལན་དུ་ཐིག་སྐུད་ཅིག་མཐོང་ཞུས་པ་དང་། ཡང་གཙོ་བོས་འདི་སྐད་དུ། ངས་ཐིག་སྐུད་ངའི་མི་སྡེ་ཡེས་ར་ཨེལ་གྱི་ནང་དུ་དཔྱངས་ཏེ། ད་ཕྱིན་ཆད་ངས་དེ་དག་གུ་ཡངས་སུ་མི་གཏོང་ཞིང་།
AMO 7:9 ཨི་སཱག་གི་མཐོ་གླིང་རྣམས་སྟོངས་ཤིང་། ཡེས་ར་ཨེལ་གྱི་གནས་མཆོག་རྣམས་བརླག་པར་འགྱུར་ལ། ཡང་ངས་རལ་གྲིས་ཡེ་རོབ་ཨམ་གྱི་ཁྱིམ་རྒྱུད་ལ་རྒོལ་བར་འགྱུར་རོ་ཞེས་གསུངས་སོ། །
AMO 7:10 དེ་ནས་པེད་ཨེལ་གྱི་མཆོད་དཔོན་ཨ་མཱ་ཙི་ཡས་མི་མངགས་ནས་ཡེས་ར་ཨེལ་གྱི་རྒྱལ་པོ་ཡེ་རོབ་ཨམ་ལ་འཕྲིན་སྐུར་ཏེ་ན་རེ། ཨ་མོ་སི་ཡིས་ཡེས་ར་ཨེལ་གྱི་ཁྱིམ་རྒྱུད་ཁྲོད་དུ་ཁྱེད་ལ་ངོ་ལོག་བྱེད་པར་ལྐོག་ཇུས་འཐེན་ཞིང་། དེའི་ཚིག་ཐམས་ཅད་རྒྱལ་ཁབ་འདི་ཡིས་མི་ཐེག
AMO 7:11 ཅིའི་ཕྱིར་ཞེ་ན། ཨ་མོ་སི་ཡིས་ན་རེ། ཡེ་རོབ་ཨམ་ནི་རལ་གྲིས་འགུམས་པར་འགྱུར་ཞིང་། ཡེས་ར་ཨེལ་གྱི་མི་རྣམས་རང་ཡུལ་ལས་བྲལ་ཏེ་བཙོན་ལ་འཁྲིད་པར་འགྱུར་ཞེས་སྨྲས་པའི་ཕྱིར་སྦྲན་ཏོ། །
AMO 7:12 ཡང་ཨ་མཱ་ཙི་ཡས་ཨ་མོ་སི་ལ་འདི་ལྟར། ཀྱེ་མངོན་ཤེས་ཅན་ཁྱོད་ཡ་ཧུ་དཱ་རུ་ཕྲོས་ཤིག གནས་དེར་རང་ཁ་གསོས་དང་། གནས་དེར་ལུང་སྟོན་པ་ལས།
AMO 7:13 པེད་ཨེལ་དུ་ལུང་མ་སྟོན་ཅིག ཅིའི་ཕྱིར་ཞེ་ན། གནས་འདི་རུ་རྒྱལ་པོའི་གནས་མཆོག་ཡོད་པ་དང་། རྒྱལ་པོའི་ཕོ་བྲང་ཡོད་པའི་ཕྱིར་རོ་ཞེས་སྨྲས་པའོ། །
AMO 7:14 དེ་ནས་ཨ་མོ་སི་ཡིས་ཨ་མཱ་ཙི་ཡ་ལ་ལན་དུ། ང་ནི་ལུང་སྟོན་པ་ཡང་མིན། ལུང་སྟོན་པའི་བུ་ཡང་མིན། ང་ནི་ལུག་རྫི་ཞིག་ཡིན་ཞིང་། འོ་སེ་ཤིང་ལ་བདག་གཉེར་བྱེད་མཁན་ཞིག་ཡིན།
AMO 7:15 ཡིན་ཡང་དཀོན་མཆོག་ཡ་ཝཱེས་ང་བདམས་ཏེ། ང་ནི་ལུག་ཁྱུའི་རྗེས་སུ་འབྲང་བར་མ་མཛད་དེ། ཁོང་གིས་ང་ལ་འདི་སྐད་དུ། ཁྱོད་སོང་ནས་ངའི་མི་སྡེ་ཡེས་ར་ཨེལ་ལ་ལུང་སྟོན་ཅིག་ཅེས་གསུངས་པས།
AMO 7:16 ཀྱེ་ཨ་མཱ་ཙི་ཡ་ལགས་ད་ལྟ་ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག ཅིའི་ཕྱིར་ཞེ་ན། ཡེས་ར་ཨེལ་ལ་རྒོལ་བའི་ལུང་མ་སྟོན་ཅིག ཨི་སཱག་གི་ཁྱིམ་རྒྱུད་ལ་རྒོལ་བའི་གཏམ་མ་བརྗོད་ཅིག་ཅེས་ཁྱོད་ཀྱིས་སྨྲས་པའི་ཕྱིར།
AMO 7:17 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཆུང་མ་གྲོང་ཁྱེར་ནས་གཡེམ་མ་བྱེད་པ་དང་། ཁྱོད་ཀྱི་བུ་དང་བུ་མོ་རྣམས་རལ་གྲིའི་འོག་ནས་འགྱེལ་ཞིང་། ཁྱོད་ཀྱི་ས་ཞིང་རྣམས་མི་ཡིས་ཐག་པས་ཚད་དེ་བགོ་བར་འགྱུར་ལ། ཡང་ཁྱོད་རང་ཉིད་ནི་གནས་མི་གཙང་བ་ཞིག་ནས་འཆི་བར་འགྱུར་བ་དང་། ཡེས་ར་ཨེལ་གྱི་མི་རྣམས་ཀྱང་རང་ཡུལ་དང་བྲལ་ནས་བཙོན་ལ་འཁྲིད་པར་འགྱུར་ཞེས་གསུངས་སོ། །
AMO 8:1 ཡང་གཙོ་བོ་ཡ་ཝཱེས་ང་ལ་དོན་ཞིག་བསྟན་ཏེ། ངས་དབྱར་ཁའི་ཤིང་ཏོག་སླེ་པོ་གཅིག་མཐོང་ཞིང་།
AMO 8:2 ཁོང་གིས་ང་ལ་འདི་སྐད་དུ། ཀྱེ་ཨ་མོ་སི། ཁྱོད་ཀྱིས་ཅི་མཐོང་ངམ་གསུངས་པ་དང་། ངས་དབྱར་ཁའི་ཤིང་ཏོག་སླེ་པོ་གཅིག་མཐོང་ཞེས་ལན་ཞུས་པ་ལ། དཀོན་མཆོག་ཡ་ཝཱེས་ང་ལ་འདི་སྐད་དུ། ངའི་མི་སྡེ་ཡེས་ར་ཨེལ་གྱི་མཐའ་མའི་དུས་སུ་སླེབས་པས། ད་ཕྱིན་ཆད་ངས་དེ་དག་གུ་ཡངས་སུ་མི་གཏོང་ཞིང་།
AMO 8:3 ཉིན་དེར་ཕོ་བྲང་ནང་གི་གླུ་དབྱངས་རྣམས་ངུ་འབོད་དུ་འགྱུར་ཏེ། གནས་ཀུན་ཏུ་བམ་རོ་མང་པོ་འདོར་ཞིང་། སྐད་རྒྱག་མཁན་སུ་ཡང་མེད་དོ་ཞེས་གཙོ་བོ་ཡ་ཝཱེས་གསུངས་སོ། །
AMO 8:4 ཡང་ཁོང་གིས་འདི་སྐད་དུ། དབུལ་པོར་བརྙས་བཅོས་བྱེད་པ་དང་རྒྱལ་ཁམས་ནང་གི་དཀའ་སྡུག་ཅན་ཉམས་པར་འཇུག་པ་ཁྱོད་ཅག་གིས་བཀའ་འདི་ལ་ཉོན་དང་།
AMO 8:5 ཁྱོད་རྣམས་ན་རེ། ངེད་ཀྱིས་འབྲུ་རིགས་འཚོང་བའི་ཕྱིར་དུ་ཚེས་གཅིག་ནམ་ཞིག་འདའ་འོང་། ཚོང་རའི་སྒོ་ཕྱེས་ཏེ་ལོ་ཏོག་འཚོང་བའི་ཕྱིར་དུ་ངལ་གསོ་བའི་དུས་ནམ་ཞིག་རྫོགས་སམ། ངེད་ཅག་གིས་དངོས་པོ་འཚོང་དུས་ཨེ་ཕཱ་ཇེ་ཆུང་དུ་བཏང་སྟེ། དངུལ་སྡུད་དུས་རྒྱ་ཐུར་ཇེ་ལྗིད་དུ་བཏང་ནས་རྒྱ་སྲང་རྫུན་མས་མི་ལ་མགོ་སྐོར་བཏང་བ་དང་།
AMO 8:6 ངེད་ཅག་གིས་དངུལ་གྱིས་དབུལ་པོ་ཉོ་བ་དང་། བསིལ་ལྷམ་ཆ་གཅིག་གིས་དཀའ་སྡུག་ཅན་བརྗེ་ཞིང་། གྲོ་རུལ་བ་རྣམས་ཀྱང་མི་ལ་འཚོང་ཞེས་སྨྲས་སོ། །
AMO 8:7 དཀོན་མཆོག་ཡ་ཝཱེས་ཡ་ཀོབ་ཀྱི་གཟི་བརྗིད་བསྟན་ཏེ་དབུ་མནའ་བཞེས་ཤིང་འདི་སྐད་དུ། དེ་དག་གི་བྱ་སྤྱོད་ཡོད་ཚད་ངས་ནམ་ཡང་བརྗེད་པར་མི་བྱའོ། །
AMO 8:8 དེའི་རྐྱེན་གྱིས་ས་གཞི་འདར་བར་མི་འགྱུར་རམ། དེར་སྡོད་པའི་མི་རེ་རེས་མྱ་ངན་མི་བྱའམ། དེ་ནི་ནེ་ལོ་གཙང་པོ་བཞིན་དུ་རྒྱས་ཤིང་འཕྱུར་ལ། ཨེ་ཅིབ་གཙང་པོ་བཞིན་དུ་རྒྱས་ཤིང་འབབ་པར་འགྱུར་ཞེས་གསུངས་སོ། །
AMO 8:9 ཡང་གཙོ་བོ་ཡ་ཝཱེས་འདི་སྐད་དུ། ཉིན་མོ་དེར། ངས་ཉིན་གུང་གི་དུས་སུ་ཉི་མ་ནུབ་པར་འཇུག་ཅིང་། ཉི་མ་དཀར་པོ་ལ་ངས་ས་གཞི་མུན་ནག་ཏུ་བསྒྱུར་རོ། །
AMO 8:10 ངས་ཁྱོད་ཀྱི་དུས་ཆེན་རྣམས་ཡིད་སྐྱོ་བའི་དུས་དང་། ཁྱོད་ཀྱི་གླུ་ཐམས་ཅད་སྐྱོ་གླུ་རུ་བསྒྱུར་ཞིང་། ངས་ཁྱོད་ཚོ་མི་རེ་རེའི་རྐེད་པར་སོ་ཐག་དཀྲི་བར་འགྱུར་ལ། སྐྲ་རྣམས་བཞར་ཏེ། བུ་གཅིག་པོ་ཤོར་བ་བཞིན་དུ་ངས་ཁྱོད་རྣམས་ཡིད་སྐྱོ་བར་བྱ་ཞིང་། ནམ་ཡིན་ཡང་སྡུག་བསྔལ་གྱི་ཉིན་མོ་ལྟ་བུར་འགྱུར་ཞེས་གསུངས་སོ། །
AMO 8:11 ཡང་གཙོ་བོ་ཡ་ཝཱེས་འདི་སྐད་དུ། ལྟོས་ཤིག དུས་དེ་སླེབས་ལ་ཉེ་ཞིང་། ངས་ཡུལ་དུ་མུ་གེ་འབྱུང་བར་བྱ་སྟེ། མུ་གེ་འདི་ནི་བཟའ་ཆས་མེད་པ་མ་ཡིན་ལ། སྐོམ་པ་བསལ་བའི་ཆུ་མེད་པ་ཡང་མ་ཡིན་པར་དཀོན་མཆོག་ཡ་ཝཱེའི་བཀའ་མི་ཐོས་པ་ཡིན་ནོ། །
AMO 8:12 དེ་ནས་དཀོན་མཆོག་ཡ་ཝཱེའི་བཀའ་འཚོལ་ཕྱིར་མི་རྣམས་ཡུལ་སོ་སོར་འཁྱམ་པར་འགྱུར་ཞིང་། རྒྱ་མཚོ་ནས་རྒྱ་མཚོ་དང་། བྱང་ཕྱོགས་ནས་ཤར་ཕྱོགས་བཅས་སུ་ཕར་རྒྱུག་ཚུར་རྒྱུག་བྱས་ཀྱང་རྙེད་པར་མི་འགྱུར་རོ། །
AMO 8:13 དུས་དེར་བྱད་གཟུགས་མཛེས་པའི་ན་ཆུང་མ་དང་ན་གཞོན་རྣམས་ཁ་སྐོམ་པས་བརྒྱལ་བར་འགྱུར་ཞིང་།
AMO 8:14 སཱ་མར་ཡའི་ཨ་ཤི་མཱ་ལྷ་མོ་དཔང་དུ་བཙུགས་ཏེ་མནའ་སྐྱེལ་བ་དང་། དཱན་གྱི་ལྷ་རྣམས་དཔང་དུ་བཙུགས་ཏེ་མནའ་སྐྱེལ་བ། ཡང་ན་པེར་ཤ་བཱའི་ལྷ་རྣམས་དཔང་དུ་བཙུགས་ཏེ་མནའ་སྐྱེལ་བ་རྣམས་འགྱེལ་བར་འགྱུར་ཞིང་ནམ་ཡང་སླར་ལང་བར་མི་འགྱུར་རོ་ཞེས་གསུངས་སོ། །
AMO 9:1 གཙོ་བོ་ཡ་ཝཱེ་མཆོད་ཁྲི་མདུན་དུ་བཞེངས་པ་ངས་མཐོང་ཞིང་། ཁོང་གིས་འདི་སྐད་དུ། སྒོ་ཐེམ་རྣམས་འགུལ་བར་ཁྱོད་ཀྱིས་མཆོད་ཁང་གི་ཀ་གཞུ་ལ་བརྡུངས་ནས་མི་རྣམས་ཀྱི་མགོ་ལ་ལྷུང་དུ་ཆུག་དང་། ལྷག་ལུས་རྣམས་ངས་རལ་གྲིས་གསོད་པར་འགྱུར་ཞིང་། དེ་དག་ལས་སུ་ཡང་འབྲོ་མི་ཐུབ་ལ། སུ་ཡང་ཐར་མི་ཐུབ།
AMO 9:2 ཇི་སྟེ་དེ་དག་གིས་གཤིན་པོའི་ཡུལ་གྱི་མཐིལ་བརྟོལ་ནའང་ངའི་ལག་པས་དེ་དག་ཕྱིར་འདོན་པར་འགྱུར་ཞིང་། ཇི་སྟེ་དེ་དག་དགུང་ཨ་སྔོན་དབྱིངས་ཀྱི་རྩེ་མོར་འཛེགས་ནའང་ངས་དེ་དག་མར་འཐེན་པར་བྱའོ། །
AMO 9:3 ཇི་སྟེ་དེ་དག་ཀར་མེལ་གྱི་རི་རྩེར་སྦས་པ་ཡིན་ནའང་། དེ་ནས་ཀྱང་ངས་དེ་དག་བཙལ་ནས་འཛིན་པར་བྱ་སྟེ། ཇི་སྟེ་དེ་དག་ང་དང་གཡོལ་ཕྱིར་རྒྱ་མཚོའི་གཏིང་དུ་སྦས་རུང་། དེ་ནས་ཀྱང་ངས་ཆུ་སྲིན་ལ་བཀའ་བསྩལ་ཏེ་ཁོ་ཚོར་སོ་འདེབས་སུ་འཇུག
AMO 9:4 ཇི་སྟེ་དེ་དག་དགྲ་ཡིས་བཙོན་དུ་ཁྲིད་རུང་། དེ་ནས་ཀྱང་ངས་རལ་གྲིར་བཀའ་བསྩལ་ནས་དེ་དག་འགུམས་པར་བྱ་སྟེ། ངས་དེ་དག་ལ་དམ་པོར་གཟིགས་ཏེ་གནོད་འཚེ་ལས་བྱིན་རླབས་མི་གནང་ངོ་། །
AMO 9:5 དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ས་ལ་ཕྱག་གིས་རེག་པ་ཙམ་གྱིས་དེ་ནི་ཞུ་བ་དང་། དེའི་ནང་དུ་གནས་པ་ཐམས་ཅད་སྐྱོ་བར་འགྱུར་ལ། ཡང་གནས་དེ་ནི་ནེ་ལོ་གཙང་པོ་བཞིན་དུ་རྒྱས་པ་དང་། ཨེ་ཅིབ་གཙང་པོ་བཞིན་དུ་རྒྱས་ཤིང་འབབ་པར་འགྱུར།
AMO 9:6 ཁོང་གིས་མཁའ་དབྱིངས་སུ་ཐོག་ཁང་བརྩིགས་ཤིང་། ས་གཞིའི་སྟེང་དུ་ཨ་སྔོན་བཀོད། ཁོང་གིས་རྒྱ་མཚོའི་ཆུ་རྣམས་ལ་བཀའ་བསྩལ་ཏེ་ས་ངོས་སུ་བླུགས་པ་སྟེ། ཁོང་གི་མཚན་ནི་དཀོན་མཆོག་ཡ་ཝཱེ་ལགས་སོ། །
AMO 9:7 ཀྱེ་ཡེས་ར་ཨེལ་པ་རྣམས། ཁྱོད་ཅག་ང་ལ་གུ་ཤ་པ་དང་འདྲ་བ་མིན་ནམ། ངས་ཨེ་ཅིབ་ཡུལ་ནས་ཡེས་ར་ཨེལ་པ་རྣམས་དང་། ཀབ་ཐོར་ནས་ཕེ་ལེ་ཤེད་པ་རྣམས། ཀིར་ནས་ཨ་རམ་པ་རྣམས་དྲངས་པ་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས་པ་དང་།
AMO 9:8 ལྟོས་ཤིག གཙོ་བོ་ཡ་ཝཱེའི་སྤྱན་གྱིས་སྡིག་ཅན་གྱི་ཡུལ་ཁམས་འདིར་གཟིགས་ཤིང་། ངས་ཡུལ་འདི་ས་ལས་མེད་པར་མཛད་ཀྱང་། ཡ་ཀོབ་ཀྱི་ཁྱིམ་རྒྱུད་ནི་ཡོངས་སུ་མེད་པར་མི་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །
AMO 9:9 ཡང་དཀོན་མཆོག་ཡ་ཝཱེས་འདི་སྐད་གསུངས་ཏེ། ལྟོས་ཤིག མི་ཡིས་ཁྲོལ་ཚགས་ཀྱིས་འབྲུ་བཙགས་པ་བཞིན་དུ། ངས་བཀའ་བསྩལ་ནས་ཡེས་ར་ཨེལ་གྱི་ཁྱིམ་རྒྱུད་ནི་ཡུལ་ཁམས་སོ་སོར་ཐོར་དུ་འཇུག་ཅིང་། རྡེའུ་ཧྲུག་གཅིག་ཀྱང་སར་ལྷུང་བར་མི་འགྱུར།
AMO 9:10 ངའི་མི་སྡེ་ཁྲོད་ཀྱི་སྡིག་ཅན་ཐམས་ཅད་དེ། གནོད་འཚེས་ང་རང་མི་ཟིན་ལ་དེ་ངའི་སྟེང་དུ་འབྱུང་བར་ཡང་མི་འགྱུར་ཞེས་སྨྲ་བའི་མི་དག་ཀྱང་རལ་གྲིའི་འོག་ཏུ་འཆི་བར་འགྱུར།
AMO 9:11 ཉིན་དེར་ངས་དཱ་བིད་ཀྱི་བརྡིབས་པའི་གུར་མཆོག་ཡང་བསྐྱར་བསྒྲེངས་ནས་དེའི་བུ་ག་རྣམས་གཅོད་ཅིང་། དེའི་ཞིག་རོ་རྣམས་ཡང་བསྐྱར་བརྩིགས་ཏེ། གནའ་དུས་བཞིན་དུ་བཞེང་བར་བྱའོ། །
AMO 9:12 ཅིའི་ཕྱིར་ཞེ་ན། ཡེས་ར་ཨེལ་པ་རྣམས་ལ་ཨེ་དོམ་གྱི་ལྷག་མ་དང་། བདག་གི་མིང་ཐོགས་པའི་མི་རིགས་ཐམས་ཅད་ནོར་སྐལ་དུ་འཐོབ་པའི་ཕྱིར་དུའོ་ཞེས་དེ་བཞིན་མཛད་པའི་དཀོན་མཆོག་ཡ་ཝཱེས་གསུངས་སོ། །
AMO 9:13 ཡང་དཀོན་མཆོག་ཡ་ཝཱེས་འདི་སྐད་དུ། དུས་སླེབས་ལ་ཉེ་ཞིང་། རྨོ་མཁན་གྱིས་སྡུད་མཁན་དང་། རྒུན་འབྲུམ་རྫི་མཁན་གྱིས་ས་བོན་འདེབས་མཁན་གྱི་རྒྱུན་མཐུད་པ་དང་། རི་བོ་ཆེན་པོ་ལས་རྒུན་ཆང་མངར་མོ་ཐིགས་ཤིང་། རི་ཕྲན་རྣམས་ལས་བཞུར་བར་འགྱུར།
AMO 9:14 ངས་བཙོན་དུ་ཁྲིད་པའི་རང་གི་མི་སྡེ་ཡེས་ར་ཨེལ་ཕྱིར་ལོག་པར་བྱ་སྟེ། དེ་དག་གིས་གྲོང་ཁྱེར་གོག་པོ་རྣམས་ཡང་བསྐྱར་བཞེངས་ནས་དེའི་ནང་དུ་སྡོད་པར་འགྱུར་ཞིང་། རྒུན་ཚལ་རྣམས་བཙུགས་ནས་དེའི་རྒུན་ཆང་འཐུང་བ་དང་། ལྡུམ་ར་བཙུགས་ནས་དེའི་འབྲས་བུ་བཟའ་བར་འགྱུར།
AMO 9:15 ངས་དེ་དག་རང་ཡུལ་ནང་འཛུགས་ཤིང་། དེ་དག་ངས་སྤྲད་པའི་ཁོ་ཚོ་རང་གི་ཡུལ་ལས་ནམ་ཡང་འདོན་པར་མི་འགྱུར་ཞེས་ཁྱོད་ཀྱི་དཀོན་མཆོག་ཡ་ཝཱེས་གསུངས་སོ།། །།
OBA 1:1 ཨོ་བད་ཡཱས་མཐོང་བའི་ཞལ་གཟིགས་ནི། གཙོ་བོ་ཡ་ཝཱེས་ཨེ་དོམ་གྱི་སྐོར་ལ་བཀའ་གནང་ཞིང་། ང་ཚོས་དཀོན་མཆོག་ཡ་ཝཱེ་ནས་འཕྲིན་ཞིག་ཐོས་ཏེ། ཕོ་ཉ་ཞིག་མི་རིགས་དེ་དག་གི་ཁྲོད་དུ་མངགས་ནས་དེ་དག་ལ། ཡར་ལོངས་དང་། ངེད་རྣམས་ཡར་ལངས་ནས་ཨེ་དོམ་དང་འཐབ་དུ་འགྲོའོ་ཞེས་སྨྲས་སོ། །
OBA 1:2 ལྟོས་ཤིག བདག་གིས་ཨེ་དོམ་ཁྱོད་ནི་མི་རིགས་རྣམས་ཀྱི་ཁྲོད་དུ་ཉམ་ཞན་དུ་འགྱུར་བར་བྱ་ཞིང་། མི་ཡིས་ཁྱོད་ལ་མཐོང་ཆུང་དཔེ་མེད་བྱེད་པར་འགྱུར་རོ། །
OBA 1:3 བྲག་ཕུག་དང་མཐོ་སར་གནས་པ་ཁྱོད་ནི་རང་སེམས་ཀྱི་ང་རྒྱལ་གྱིས་བསླུས་ཏེ། སེམས་ལ་སུ་ཞིག་གིས་ང་རང་དམའ་སར་འབེབ་ནུས་སམ་ཞེས་སྨྲའོ། །
OBA 1:4 ཇི་སྟེ་ཁྱོད་ནི་གླག་ལྟར་ནམ་མཁའི་དབྱིངས་སུ་འཕུར་ཏེ། སྐར་ཚོགས་ཀྱི་དབུས་སུ་ཚང་བཅོས་ནའང་། བདག་གིས་ཁྱོད་ནི་དེ་ལས་མར་འབེབ་པར་བྱའོ་ཞེས་དཀོན་མཆོག་ཡ་ཝཱེས་འདི་སྐད་གསུངས།
OBA 1:5 གལ་ཏེ་ཁྱོད་ཀྱི་གནས་སུ་རྐུན་པོ་སླེབས་པའམ་མཚན་མོར་ཇག་པ་རྣམས་འོངས་ན། དེ་དག་གིས་རང་ལ་དགོས་འདོད་པ་འབའ་ཞིག་བརྐུ་བ་མ་ཡིན་ནམ། གལ་ཏེ་རྒུན་འབྲུམ་འཐོག་མཁན་ཁྱོད་ཀྱི་རྩར་འོངས་ན། དེ་དག་གིས་རྒུན་འབྲུམ་ཁ་ཤས་བསྐྱུར་བ་མ་ཡིན་ནམ། ཡིན་ནའང་ཁྱོད་ནི་མེད་པར་བཟོའོ། །
OBA 1:6 ཨེ་སཱབ་ལ་སྔོག་གཤེར་བྱས་ནས་དེས་སྦས་པའི་ནོར་རྣམས་ཕྱུང་བར་འགྱུར།
OBA 1:7 ཁྱོད་དང་ཁ་ཆད་བཞག་པ་རྣམས་ཀྱིས་ཁྱོད་ནི་ས་མཚམས་བར་དུ་སྐྲོད་ཅིང་། ཁྱོད་དང་འཆམ་པ་རྣམས་ཀྱིས་ཁྱོད་རང་བསླུས་ཏེ་ཁྱོད་ལས་རྒྱལ། ཁྱོད་དང་ལྷན་ཅིག་ཏུ་ཟས་སྤྱད་པ་རྣམས་ཀྱིས་ཁྱོད་ལ་རྙི་བཙུགས་ནའང་ཁྱོད་ཀྱིས་དེ་མི་ཤེས་སོ། །
OBA 1:8 ཉིན་མོ་དེ་སླེབས་དུས་སུ། བདག་གིས་ཨེ་དོམ་ཡུལ་ནས་མཁས་པ་རྣམས་དང་། ཨེ་སཱབ་རི་བོ་ལས་གྲུང་པོ་རྣམས་མེད་པར་མི་བཟོའམ་ཞེས་དཀོན་མཆོག་ཡ་ཝཱེས་གསུངས་སོ། །
OBA 1:9 ཀྱེ་ཐེ་མཱན། ཁྱོད་ཀྱི་དཔའ་བོ་རྣམས་ནི་འཇིགས་པར་འགྱུར་ངེས་ཏེ། ཨེ་སཱབ་རི་བོར་གནས་པ་རྣམས་རེ་རེ་བཞིན་སྲོག་དང་འབྲལ་བར་འགྱུར་རོ། །
OBA 1:10 ཁྱོད་ཀྱིས་རང་གི་གཅུང་པོ་ཡ་ཀོབ་ལ་དྲག་གནོན་བྱས་པས། ཁྱོད་རང་ངོ་ཚ་བར་འགྱུར་ལ་ཇི་སྲིད་བར་དུ་མེད་པར་བཟོའོ། །
OBA 1:11 མི་རིགས་གཞན་རྣམས་ཀྱིས་ཡ་ཀོབ་ཀྱི་རྒྱུ་ནོར་འཕྲོག་པ་དང་། ཕྱི་ཕྱོགས་པ་རྣམས་དེའི་མཁར་སྒོ་ནང་དུ་འཛུལ་ཏེ། ཡེ་རུ་སཱ་ལེམ་གྱི་ཕྱིར་རྒྱན་འཕངས་ནས་རྒྱུ་ནོར་བགོ་བའི་དུས་སུ། ཁྱོད་ནི་དེ་དག་གི་གམ་དུ་ལངས་བསྡད་ནས་དེ་ཚོའི་ཕྱོགས་མཐུན་ཡིན་པ་འདྲ།
OBA 1:12 ཁྱོད་ཀྱི་གཅུང་པོ་སྡུག་བསྔལ་གྱིས་མནར་དུས་ཁྱོད་ཀྱིས་དེར་བལྟས་ནས་སྡོད་ག་ལ་རུང་། ཡ་ཧུ་དཱ་པ་རྣམས་འཇིག་པའི་ཉིན་མོར་ཁྱོད་ནི་དགའ་བར་མི་འོས་ལ། དེ་ཚོ་སྡུག་བསྔལ་གྱིས་མནར་བའི་དུས་སུ་ཁྱོད་ཀྱིས་ང་རྒྱལ་གྱི་གཏམ་སྨྲ་མི་འོས་སོ། །
OBA 1:13 ངའི་མི་རིགས་ལ་ཆག་སྒོ་འབྱུང་དུས་སུ་ཁྱོད་ནི་དེ་ཚོའི་མཁར་སྒོ་ནང་དུ་འཛུལ་ག་ལ་རུང་། དེ་དག་ལ་ཆག་སྒོ་འབྱུང་དུས་ཁྱོད་ཀྱིས་དེ་ཚོས་སྡུག་བསྔལ་མྱང་བར་བལྟས་ནས་སྡོད་ག་ལ་རུང་། ཡང་དེ་དག་ལ་ཆག་སྒོ་འབྱུང་དུས་ཁྱོད་ཀྱིས་ལག་པ་བརྐྱངས་ནས་དེ་ཚོའི་ནོར་རྫས་འཕྲོག་མི་འོས་སོ། །
OBA 1:14 དེ་དག་སྡུག་བསྔལ་གྱིས་མནར་དུས། ཁྱོད་ནི་བཞི་མདོར་ལངས་བསྡད་ནས་དེ་དག་གི་བྲོས་ནས་ཐར་བའི་མི་རྣམས་ཀྱི་སྲོག་གཅོད་པའམ། དེ་དག་གི་ལྷག་ལུས་རྣམས་དགྲ་ལག་ཏུ་སྤྲོད་མི་འོས།
OBA 1:15 དཀོན་མཆོག་ཡ་ཝཱེའི་ཉིན་མོ་མི་རིགས་ཀུན་གྱི་སྟེང་དུ་འབྱོན་ཉེ་སྟེ། ཁྱོད་ཀྱིས་ཅི་བྱས་པ་བཞིན་དུ་མི་ཡིས་ཀྱང་ཁྱོད་ལ་དེ་ལྟར་བྱའོ། །ཁྱོད་ཀྱི་ལས་རྣམས་ཕྱིར་ཁྱོད་རང་གི་མགོར་འབབ་པར་འགྱུར།
OBA 1:16 ཁྱོད་ཀྱིས་ངའི་རི་བོ་དམ་པར་སྐྱོ་བའི་ཕོར་བ་ལས་བཏུངས་པ་བཞིན་དུ། མི་རིགས་ཀུན་གྱིས་རྟག་ཏུ་འཐུང་བར་འགྱུར། དེ་དག་གིས་བཏུངས་ནས་མིད་པར་བྱ་ཞིང་། ཡོད་ཚད་ནམ་ཡང་ཡོད་མ་མྱོང་བ་ལྟར་འགྱུར་རོ། །
OBA 1:17 འོན་ཀྱང་རི་བོ་ཛ་ཡན་དུ་ཐར་བའི་མི་རྣམས་གནས་ཤིང་། རི་དེ་ནི་དམ་པར་འགྱུར་ལ། ཡ་ཀོབ་ཀྱི་ཁྱིམ་རྒྱུད་ལ་སྔར་གྱི་ནོར་སྐལ་འཐོབ་པར་འགྱུར།
OBA 1:18 དེ་ནས་ཡ་ཀོབ་ཀྱི་ཁྱིམ་རྒྱུད་ནི་མེ་དང་། ཡོ་སེབ་ཀྱི་ཁྱིམ་རྒྱུད་ནི་མེ་ལྕེ་དང་། ཨེ་སཱབ་ཀྱི་ཁྱིམ་རྒྱུད་ནི་སོག་རོར་གྱུར་ཏེ། མེ་སྦར་ནས་མེད་པར་བྱ་ཞིང་། ཨེ་སཱབ་ཀྱི་ཁྱིམ་རྒྱུད་ལས་སུ་ཡང་ལུས་པར་མི་འགྱུར་ལ། དཀོན་མཆོག་ཡ་ཝཱེས་འདི་སྐད་གསུངས་སོ། །
OBA 1:19 ཡང་ནེ་གུབ་ཡུལ་གྱི་མི་རྣམས་ལ་ཨེ་སཱབ་ཀྱི་རི་བོ་འཐོབ་ཅིང་། རི་ཀླུང་གི་མི་རྣམས་ལ་ཕེ་ལེ་ཤེད་ཀྱི་ཡུལ་རྣམས་དབང་བ་དང་། ཡང་དེ་དག་ལ་ཨེ་ཕཱར་ཡིམ་གྱི་ས་དང་སཱ་མར་ཡའི་ས་རྣམས་ཀྱང་འཐོབ་པར་འགྱུར་ལ། པེན་ཡཱ་མེན་པ་རྣམས་ལ་གིལ་ཨད་འཐོབ་པར་འགྱུར།
OBA 1:20 ཡང་ཡེས་ར་ཨེལ་པ་རྣམས་ལས་བཙོན་དུ་ཁྲིད་ཡོད་པ་ཐམས་ཅད་ལ་ཀ་ན་ཨན་ཡུལ་ནས་སཱ་རེ་ཕད་ཀྱི་བར་དུ་དང་། སེ་ཕ་རཱད་དུ་ཡོད་པའི་ཡེ་རུ་སཱ་ལེམ་ནས་བཙོན་དུ་ཁྲིད་པ་རྣམས་ལ་ནེ་གུབ་ཡུལ་གྱི་གྲོང་ཁྱེར་རྣམས་འཐོབ་པར་འགྱུར།
OBA 1:21 ཡང་སྐྱོབ་མཁན་རྣམས་རི་བོ་ཛ་ཡན་གྱི་སྟེང་དུ་ཡར་ཕྱིན་ཏེ་ཨེ་སཱབ་རི་ལ་ཁྲིམས་ཐག་གཅོད་པར་འགྱུར་ལ། རྒྱལ་སྲིད་ནི་དཀོན་མཆོག་ཡ་ཝཱེར་དབང་ངོ་།། །།
JON 1:1 དེ་ཡང་དཀོན་མཆོག་ཡ་ཝཱེའི་བཀའ་ནི་ཨ་མི་ཐཱ་ཨི་བྱ་བའི་བུ་ཡོ་ནཱ་ལ་བྱུང་སྟེ་འདི་སྐད་དུ།
JON 1:2 ཁྱོད་རང་ཡར་ལངས་ནས་གྲོང་ཁྱེར་ཆེན་པོ་ནིན་ཝེ་ལ་ཐ་ཚིག་བསྒྲག་པར་སོང་ཞིག ཅིའི་ཕྱིར་ཞེ་ན། ཁོ་ཚོའི་བྱ་བ་ངན་པ་ནི་ཡར་བདག་གི་མདུན་དུ་སླེབས་པས་སོ་ཞེས་གསུངས་སོ༎
JON 1:3 འོན་ཀྱང་ཡོ་ནཱ་ནི་དཀོན་མཆོག་ཡ་ཝཱེའི་དྲུང་ནས་ཐཱར་ཞིས་གྲོང་ཁྱེར་ལ་འབྲོ་བའི་ཆེད་དུ། མར་ཡོ་ཕཱ་གྲོང་ཁྱེར་དུ་ཕྱིན་པ་དང་། ཐཱར་ཞིས་སུ་འགྲོ་བའི་གྲུ་གཟིངས་ཤིག་རྙེད་ནས་གླ་སྤྲད་ཅིང་། དེའི་ནང་མར་བསྡད་པ་དང་གྲུར་ཞུགས་པ་རྣམས་དང་ལྷན་དུ་དཀོན་མཆོག་ཡ་ཝཱེའི་དྲུང་ནས་ཐཱར་ཞིས་ལ་སོང་ངོ་།།
JON 1:4 ཡིན་ནའང་། དཀོན་མཆོག་ཡ་ཝཱེས་རྒྱ་མཚོ་ལ་དྲག་རླུང་ཆེན་པོ་ཞིག་གཡུགས་སུ་བཅུག་པ་དང་། མཚོ་སྟེང་དུ་ཆར་རླུང་དྲག་པོ་བྱུང་ཞིང་མཚོ་གྲུ་འཐོར་ལ་ཁད་བྱས།
JON 1:5 གྲུ་པ་རྣམས་ཤིན་ཏུ་འཇིགས་ཏེ་སྐད་ཆེན་པོ་བརྒྱབ་ནས་རང་རང་གི་ལྷ་ལ་འོ་དོད་བོས། ཁོ་ཚོས་གྲུ་ཇེ་ཡང་དུ་གཏོང་ཆེད་གྲུ་ནང་གི་ཚོང་རྫས་ཡོད་ཚད་མཚོའི་ནང་དུ་གཡུགས། འོན་ཀྱང་། དེ་སྔར་ཡོ་ནཱ་མར་གྲུའི་ཕུག་ཏུ་སོང་སྟེ་ཉལ་ནས་གཉིད་སྟུག་པོ་ཁུགས་པས།
JON 1:6 གྲུ་དཔོན་ཁོའི་གམ་དུ་སླེབས་ནས། ཁྱོད་རང་གཉིད་ནས་སྡོད་པ་ཅི་ཡིན་ནམ། ཡར་ལོངས་ལ་རང་གི་ལྷ་ལ་ཞུ་བ་ཕུལ་ཅིག ལྷ་དེས་འུ་ཅག་ཐུགས་སུ་དྲན་ན། རང་ཅག་འཆི་བར་མི་འགྱུར་རོ་ཞེས་སྨྲས་པ་དང་།
JON 1:7 གྲུ་པ་རེ་རེ་བཞིན་གཅིག་གིས་གཅིག་ལ་ཤོག་དང་། དོན་ངན་འདི་སུའི་རྐྱེན་གྱིས་བྱུང་བར་རྒྱན་འཕངས་ཏེ་བརྟག་པར་བྱ་ཟེར་ནས། དེ་ལྟར་བསྒྲུབས་པ་ན་ཡོ་ནཱ་ལ་བབས་པ་རེད།
JON 1:8 དེ་ནས་དེ་དག་གིས་ཡོ་ནཱ་ལ། དོན་ངན་འདི་རང་ཅག་ལ་བྱུང་བ་ནི་སུའི་རྐྱེན་ཡིན་པ་སྨྲ་བར་མཛོད། ཁྱོད་ཀྱི་བྱ་བ་ཅི་ཡིན། ས་ཆ་གང་ནས་ཡོང་། ཕ་ཡུལ་གང་གི་ཡིན། མི་རིགས་གང་ཡིན་ཞེས་དྲིས་པ་ན།
JON 1:9 ཁོས་དེ་དག་ལ། ང་རང་ཨིབ་རི་པ་ཡིན་ཏེ། རྒྱ་མཚོ་དང་སྐམ་ས་མཛད་མཁན་གྱི་ནམ་མཁའི་དཀོན་མཆོག་ཡ་ཝཱེ་ལ་ང་རང་གུས་ཤིང་འཇིགས་པ་ཡིན་ཞེས་སྨྲས་སོ།།
JON 1:10 དེ་ནས་གྲུ་པ་རྣམས་རབ་ཏུ་འཇིགས་ནས་ཡོ་ནཱ་ལ། ཁྱོད་ཀྱིས་བྱས་པའི་དོན་འདི་ཅི་ཞིག་ཡིན་ནམ་ཞེས་སྨྲས་སོ།། ཅིའི་ཕྱིར་ཞེ་ན། ཁོས་དེ་རྣམས་ལ་སྨྲས་པའི་རྐྱེན་གྱིས་དེ་དག་གིས་ཁོ་རང་དཀོན་མཆོག་ཡ་ཝཱེའི་དྲུང་ནས་བྲོས་ཡོང་བ་ཤེས་པས་སོ།།
JON 1:11 སྐབས་དེར་མཚོ་རླབས་ཆེ་རུ་འགྲོ་བཞིན་ཡོད་པ་དང་། དེ་རྣམས་ན་རེ། མཚོ་རླབས་ཞི་བའི་ཕྱིར་ཁྱོད་ལ་ཅི་ཞིག་བྱེད་དགོས་སམ་ཞེས་དྲིས་པ་ན།
JON 1:12 ཁོས་དེ་རྣམས་ལ། ཁྱོད་རྣམས་ཀྱིས་ང་རང་ཁྱེར་ནས་མཚོའི་ནང་དུ་གཡུགས་ཤིག་དང་། མཚོ་ཞི་བར་འགྱུར་ལ་བདག་གི་རྐྱེན་གྱིས་དྲག་རླུང་འདི་ཁྱོད་ཅག་ལ་བབས་པའང་ངས་ཤེས་སོ་ཞེས་སྨྲས་ནའང་།
JON 1:13 མདུན་ཕྱོགས་སུ་མཚོ་རླབས་ཤིན་ཏུ་དྲག་པོ་འཕྱུར་བཞིན་ཡོད་པས། ཁོ་རྣམས་ཀྱིས་གྲུ་སྐྱ་ཇི་ལྟར་དཀྲུགས་ཀྱང་སྐམ་སར་སླེབས་མ་ནུས།
JON 1:14 དེ་དག་གིས་དཀོན་མཆོག་ཡ་ཝཱེ་ལ་འདི་ལྟར་ཞུས་ཏེ། ཀྱེ་དཀོན་མཆོག་ཡ་ཝཱེ་ལགས། ངེད་ཅག་ནི་མི་འདིའི་སྲོག་གི་རྐྱེན་གྱིས་སྲོག་དང་འབྲལ་བར་མ་གྱུར་ཅིག ཉེས་མེད་ཀྱི་ཁྲག་བཞུར་བའི་སྡིག་པ་ངེད་ཅག་གི་མགོ་ལ་དབབ་ཏུ་མི་འཇུག་རོགས། དཀོན་མཆོག་ཡ་ཝཱེ་ལགས། ཁྱེད་ཉིད་ཇི་ལྟར་མཉེས་ན་དེ་ལྟར་མཛད་པ་ལགས་སོ་ཞེས་པའོ།།
JON 1:15 དེ་ནས་ཁོ་རྣམས་ཀྱིས་ཡོ་ནཱ་བཟུང་ནས་མཚོའི་ནང་དུ་འཕངས་པ་དང་། རྒྱ་མཚོའི་རྦ་རླབས་ཀྱང་འཕྱུར་མཚམས་བཞག་གོ།
JON 1:16 ཁོ་རྣམས་དཀོན་མཆོག་ཡ་ཝཱེ་ལ་ཤིན་ཏུ་འཇིགས་ནས། ཁོང་ལ་མཆོད་པ་ཕུལ་ཞིང་དམ་བཅས་སོ།།
JON 1:17 དེ་ནས་དཀོན་མཆོག་ཡ་ཝཱེས་ཉ་ཆེན་ཞིག་ལ་ཡོ་ནཱ་མིད་དུ་བཅུག་ཅིང་། ཡོ་ནཱ་ཉིན་ཞག་གསུམ་ལ་ཉ་ཆེན་གྱི་གྲོད་ཁོག་ནང་དུ་ལུས་སོ།།
JON 2:1 དེ་ནས་ཡོ་ནཱ་ཡིས་ཉའི་ཁོག་པ་ནས་རང་གི་དཀོན་མཆོག་ཡ་ཝཱེ་ལ་འདི་ལྟར་གསོལ་བ་བཏབ་པ་སྟེ།
JON 2:2 དཀའ་སྡུག་ནང་དུ་ང་ཡིས་ཡ་ཝཱེ་བོས༎ ཁྱེད་ཀྱིས་ང་ལ་ལན་ནི་གནང་བ་ལགས༎ གཤིན་ཡུལ་ཁོག་ནས་ང་ཡིས་ཀུ་ཅོ་བཏོན།། ཁྱེད་ཀྱིས་ང་ཡི་སྐད་སྒྲ་གསན་པ་ལགས༎
JON 2:3 ཁྱེད་ཀྱིས་ཁོ་བོ་ཤིན་ཏུ་གཏིང་ཟབ་པའི༎ རྒྱ་མཚོའི་དཀྱིལ་དུ་འཕངས་པར་མཛད་པ་ཡིན༎ ཆུ་རྒྱུན་དེ་ཡིས་ང་རང་བསྐོར་ཅིང་སྐོར༎ ཁྱེད་ཀྱི་རྦ་རླབས་དང་ནི་ཆུ་འཁྲུགས་པ༎ ང་ཡི་སྟེང་དུ་བརྒྱུགས་ཤིང་ང་རང་བསྣུབས༎
JON 2:4 དེ་ནས་ཁོ་བོས་ཁྱེད་ལ་འདི་ལྟར་ཞུས།། ང་རང་ཁྱེད་ཀྱི་དྲུང་ནས་བསྐྲད་ན་ཡང་༎ ཁྱེད་ཀྱི་མཆོད་ཁང་དམ་པའི་ཕྱོགས་སུ་ནི༎ ང་ཡིས་སླར་ཡང་བལྟ་དགོས་ཞེས་པ་འོ།།
JON 2:5 ང་ཡི་སྲོག་ནི་ཆུ་ཡིས་འཆི་ལམ་དྲངས༎ གཏིང་ཟབ་རྒྱ་མཚོས་ཁོ་བོ་བསྐོར་ཅིང་སྐོར༎ མཚོ་རྩྭ་ང་ཡི་མགོ་ལ་དཀྲིས་པར་གྱུར།།
JON 2:6 ང་རང་ཆུ་ཡི་ནང་དུ་ནུབ་པ་ན།། ཆུ་འོག་རི་ཡི་ཞབས་སུ་ཁོ་བོ་སོང་།། ང་ཡི་རྒྱབ་ཕྱོགས་ས་ཡི་སྒོ་རྣམས་ནི༎ གཏན་དུ་བརྒྱབ་པས་ང་ནི་བཙོན་དུ་ཚུད༎ ཡིན་ཡང་ང་ཡི་དཀོན་མཆོག་ཡ་ཝཱེ་ལགས༎ ཁྱེད་ཀྱིས་ང་ཡི་སྲོག་ནི་དུར་ལས་དྲངས༎
JON 2:7 ཁོ་བོའི་ཚེ་སྲོག་ཉམས་ཤིང་རྒུད་པ་ན།། ཡ་ཝཱེ་དྲན་ཏེ་བཏབ་པའི་གསོལ་བ་ནི༎ ཁྱེད་ཀྱི་མཆོད་ཁང་དམ་པར་བཞུགས་ཡོད་པའི།། ཉིད་ཀྱི་དྲུང་དུ་སླེབས་པར་གྱུར་པ་ཡིན།།
JON 2:8 འཁྲུལ་སྣང་ཙམ་གྱི་ལྷ་སྐུར་བརྟེན་པ་རྣམས༎ བསླུ་མེད་བྱམས་བརྩེ་འཐོབ་པའི་རེ་བ་སྤོང་༎
JON 2:9 འོན་ཀྱང་ཁོ་བོས་གཏང་རག་སྐད་དང་བཅས༎ ཁྱེད་ཀྱི་དྲུང་དུ་མཆོད་པ་དབུལ་བ་དང་།། ང་ཡིས་དམ་བཅའ་བཞིན་དུ་བྱེད་པར་བྱ།། ཐར་པ་ཡ་ཝཱེ་ཉིད་ནས་འབྱུང་ལགས་སོ།། ཞེས་པའོ༎
JON 2:10 དེ་ནས་དཀོན་མཆོག་ཡ་ཝཱེས་ཉ་ལ་བཀའ་གནང་བ་དང་། ཉ་ཡིས་ཀྱང་ཡོ་ནཱ་ཕྱིར་སྐམ་སར་བསྐྱུགས་པ་ཡིན་ནོ།།
JON 3:1 དེ་ནས་དཀོན་མཆོག་ཡ་ཝཱེའི་བཀའ་ནི་སླར་ཡང་ཡོ་ནཱ་ལ་བྱུང་ནས་འདི་སྐད་དུ།
JON 3:2 ཡར་ལོངས་ལ་གྲོང་ཁྱེར་ཆེན་པོ་ནིན་ཝེ་རུ་སོང་ནས། ངས་ཁྱོད་ལ་བསྒོས་པའི་ཐ་ཚིག་སྒྲོགས་ཤིག་ཅེས་གསུངས་པས།
JON 3:3 ཡོ་ནཱ་ཡར་ལངས་ནས་དཀོན་མཆོག་ཡ་ཝཱེའི་བཀའ་བཞིན་དུ་ནིན་ཝེ་རུ་ཕྱིན་པ་རེད། གྲོང་ཁྱེར་དེ་ནི་དཀོན་མཆོག་གི་ཐུགས་སུ་གལ་ཆེན་ཞིག་ཡིན་ཞིང་། ཉིན་གསུམ་གྱི་ལམ་ཐག་ཡོད་དོ།།
JON 3:4 དེ་ནས་ཁོ་རང་གྲོང་ཁྱེར་དེའི་ནང་དུ་སོང་པ་དང་། ཉིན་གཅིག་གི་རིང་ལ་སོང་ནས་སྐད་གསང་མཐོན་པོས་བཀའ་གྱེར་བ་སྟེ། ཉིན་བཞི་བཅུའི་རྗེས་སུ་ནིན་ཝེ་རྩ་མེད་མཛད་ངེས་ཡིན་ཞེས་བསྒྲགས་སོ།།
JON 3:5 དེ་ནས་ནིན་ཝེ་པ་རྣམས་དཀོན་མཆོག་ལ་དད་པར་གྱུར་པ་དང་། སྨྱུང་གནས་བསྲུང་རྒྱུའི་དོན་ཕྱོགས་ཀུན་ལ་བསྒྲགས་ཤིང་། གོང་འོག་ཚང་མས་རྩིད་རས་ཀྱི་གོས་གྱོན་ནོ།།
JON 3:6 ཡང་ནིན་ཝེའི་རྒྱལ་པོས་འཕྲིན་འདི་ཐོས་པས། ཁྲི་ལས་བབས། ན་བཟའ་ཕུད། རྩིད་རས་ཀྱི་གོས་གྱོན་པ་དང་ཐལ་བའི་ནང་དུ་བསྡད་དེ།
JON 3:7 ཆབ་ཤོག་བཏང་ནས་ནིན་ཝེའི་ས་ཕྱོགས་ཡོངས་སུ་འདི་ལྟར་དུ། རྒྱལ་པོ་དང་བློན་པོ་རྣམས་ཀྱིས་གྲོས་ཐག་བཅད་པ་བཞིན་འདི་ལྟར་སྨྲས་པ་སྟེ། མིའམ། སྒོ་ཕྱུགས་སམ། བ་ཁྱུའམ། ར་ལུག་གི་ཁྱུ་གང་གིས་ཁ་ལ་ཅི་ཡང་མྱང་དུ་མ་འཇུག དེ་རྣམས་ལ་ཅི་ཡང་སྤྱོད་དུ་མ་འཇུག ཆུ་ཡང་འཐུང་དུ་མ་འཇུག
JON 3:8 དེར་མ་ཟད་མི་དང་སྒོ་ཕྱུགས་གཉིས་ཀ་རྩིད་རས་ཀྱི་གོས་ཀྱིས་བཀླུབས་པ་དང་། དཀོན་མཆོག་ལ་ནན་གྱིས་ཞུ་བ་ཕུལ་ཏེ། རང་རང་གི་སྤྱོད་ལམ་ངན་པ་དང་། རང་རང་གི་ལག་པའི་གདུག་རྩུབ་སྤོངས་ཤིག
JON 3:9 སུ་ཞིག་གིས་ཤེས་སམ། དཀོན་མཆོག་གིས་བློ་ཁ་བསྒྱུར་ནས་ཐུགས་ཁྲོ་ཚ་པོ་ཞི་བར་མཛད་ཅིང་། རང་ཅག་རྣམས་སྲོག་ཐར་དུ་གཏོང་ཡང་སྲིད་ཅེས་བསྒྲགས་གཏམ་སྤེལ་ཏོ།།
JON 3:10 དེ་ནས་ཁོ་རྣམས་ཀྱིས་སྤྱོད་ལམ་ངན་པ་སྤངས་པ་དཀོན་མཆོག་གིས་གཟིགས་ཤིང་། ཁོང་གིས་བློ་ཁ་བསྒྱུར་ནས་སྔོན་ལ་གསུངས་པའི་ཆག་སྒོ་ཁོ་རྣམས་ལ་མཛད་ངེས་པ་དེ་ཅི་ཡང་མ་མཛད་དོ།།
JON 4:1 དོན་དེར་ཡོ་ནཱ་ཤིན་ཏུ་མ་དགའ་ཞིང་ཁྲོ་བར་གྱུར་ནས།
JON 4:2 དཀོན་མཆོག་ཡ་ཝཱེ་ལ་གསོལ་བ་བཏབ་པ་ནི། ཀྱེ་དཀོན་མཆོག་ཡ་ཝཱེ་ལགས། ང་རང་ཡུལ་དུ་ཡོད་དུས་འདི་ལྟར་ཞུས་པ་མ་ཡིན་ནམ། ཁྱེད་ནི་དཀོན་མཆོག་ཐུགས་རྗེ་ཅན་དང་། སྙིང་རྗེ་ཆེན་པོ་མངའ་བ། རང་དགར་ཐུགས་མི་ཁྲོ་བ། བྱམས་བརྩེ་མཐའ་ཡས་པ། བློ་ཁ་བསྒྱུར་ནས་ཆག་སྒོ་མི་མཛད་པའང་ངས་ཤེས་པས། སྔོན་ཆད་བདག་ཐཱར་ཞིས་གྲོང་ཁྱེར་དུ་བྲོས་པ་ཡིན།
JON 4:3 ཀྱེ་དཀོན་མཆོག་ཡ་ཝཱེ་ལགས། ད་ནི་ང་སྲོག་དང་འབྲལ་བར་མཛོད་ཅིག འདི་ལྟར་གསོན་པ་ལས་འཆི་བ་ལེགས་སོ་ཞེས་ཞུས་པ་དང་།
JON 4:4 དཀོན་མཆོག་ཡ་ཝཱེས་ཁོ་ལ། ཁྱོད་འདི་ལྟར་ཁྲོས་པར་རིགས་སམ་ཞེས་གསུངས་སོ།།
JON 4:5 དེ་ནས་ཡོ་ནཱ་གྲོང་ཁྱེར་ལས་ཐོན་ཏེ་ཤར་ཕྱོགས་སུ་སོང་ནས་བསྡད་པ་དང་། གནས་དེར་སྤྱིལ་བུ་ཞིག་བཟོས་ཤིང་དེའི་བསིལ་གྲིབ་འོག་ཏུ་བསྡད་དེ། གྲོང་ཁྱེར་དེར་དོན་དག་ཅི་འབྱུང་ལ་བསྒུགས་སོ།།
JON 4:6 དེ་ནས་དཀོན་མཆོག་ཡ་ཝཱེས་རྩི་ཤིང་ཞིག་ཡོ་ནཱའི་གོང་དུ་རིང་པོ་སྐྱེས་པར་མཛད་ནས། ཁོའི་མགོ་ལ་བསིལ་གདུགས་བཞིན་འཁོར་བར་བྱས་ཤིང་ཁོ་དཀའ་སྡུག་ལས་ཀྱང་ཐར་བར་མཛད། ཡོ་ནཱ་རྩི་ཤིང་དེ་ལ་རབ་ཏུ་དགའ་བར་གྱུར་ཏོ།།
JON 4:7 འོན་ཀྱང་ཕྱི་ཉིན་ཐོ་རངས་དཀོན་མཆོག་གིས་འབུ་ཞིག་བཀོད་པ་དང་། འབུ་དེས་རྩི་ཤིང་བརྟོལ་ཞིང་བརྙིད་པར་བྱས་སོ།།
JON 4:8 ཉི་འོད་ཤར་བ་ན་དཀོན་མཆོག་གིས་ཤར་ཕྱོགས་ནས་ཚ་རླུང་ཞིག་བརྒྱུགས་སུ་བཅུག་ནས། ཡོ་ནཱའི་མགོ་ལ་ཉི་འོད་ཕོག་སྟེ་བརྒྱལ་ལ་ཉེ་བས། ཡོ་ནཱས་ང་རང་གསོན་པ་ལས་འཆི་བ་ལེགས་སོ་ཞེས་སྨྲས་ཏེ་ཁོས་རང་ཉིད་འཆི་བར་ཞུ་བ་བྱས་སོ།།
JON 4:9 དེ་ནས་དཀོན་མཆོག་གིས་ཡོ་ནཱ་ལ་འདི་སྐད་དུ། རྩི་ཤིང་དེའི་དོན་དུ་ཁོང་ཁྲོ་ལང་འོས་སམ་ཞེས་གསུངས་པ་དང་། ཁོས་ལན་དུ། འཆི་བར་འདོད་པ་ཙམ་དུ་ཁྲོ་བར་རིགས་སོ་ཞེས་ཞུས་སོ།།
JON 4:10 ཡང་དཀོན་མཆོག་ཡ་ཝཱེས་ཁོ་ལ། མཚན་མོ་ཞིག་ལ་སྐྱེས་ནས་མཚན་མོ་ཞིག་ལ་བསྐམས་པ། ཁྱོད་ཀྱིས་མ་འབད་པ་དང་སྐྱེས་སུ་མ་བཅུག་པའི་རྩི་ཤིང་དེ་ལ་སྙིང་རྗེ་བསྐྱེད་ན།
JON 4:11 གྲོང་ཁྱེར་ཆེན་པོ་ནིན་ཝེ་འདི་རུ་ལག་པ་གཡས་གཡོན་གྱི་དབྱེ་བའང་མི་འཁོར་བའི་མི་ཁྲི་སྐོར་བཅུ་གཉིས་ལྷག་དང་། སྒོ་ཕྱུགས་ཀྱང་མང་པོ་ཡོད་ཅིང་། ངས་དེ་རྣམས་ལ་སྙིང་རྗེ་བྱེད་པར་མི་རིགས་སམ་ཞེས་གསུངས་སོ།། །།
MIC 1:1 ཡ་ཧུ་དཱའི་རྒྱལ་པོ་ཡོ་ཐམ་དང་ཨ་ཧ་ཟཱ། ཧི་ཟི་ཀི་ཡཱ་བཅས་ཀྱི་དུས་སུ་དཀོན་མཆོག་ཡ་ཝཱེའི་བཀའ་ནི་མོ་རེ་ཤེད་པ་མི་ཀཱ་ལ་བྱུང་ནས། ཁོང་གིས་སཱ་མར་ཡ་གྲོང་ཁྱེར་དང་ཡེ་རུ་སཱ་ལེམ་གཉིས་ཀྱི་སྐོར་ལ་ཞལ་གཟིགས་མཐོང་བར་གྱུར།
MIC 1:2 ཀྱེ་མི་སྡེ་ཐམས་ཅད། ཁྱོད་ཚོས་འདིར་ཉོན་དང་། ཀྱེ་ས་གཞི་དང་དེའི་སྟེང་དུ་གནས་པ་ཐམས་ཅད་ཀྱིས་རྣ་བ་གཏད་ནས་ཉོན་ཅིག གཙོ་བོ་ཡ་ཝཱེས་ཉིད་ཀྱི་མཆོད་ཁང་དམ་པ་ནས་ཁྱོད་ཅག་གི་ཉེས་སྐྱོན་ལ་བདེན་དཔང་མཛད་པར་འགྱུར།
MIC 1:3 ལྟོས་ཤིག དཀོན་མཆོག་ཡ་ཝཱེ་ཁོང་གི་བཞུགས་གནས་ལས་ཕྱི་རུ་ཐོན་ནས་མར་ཕེབས་པ་དང་། ས་གཞིའི་མཐོ་ས་རྣམས་ལ་ཞབས་ཀྱིས་བཅག་པར་འགྱུར།
MIC 1:4 རི་བོ་རྣམས་ཁོང་གི་འོག་ཏུ་བཞུ་ཞིང་། ལུང་པ་རྣམས་གས་པར་འགྱུར་ལ། དེ་ནི་པྲ་ཚིལ་མེའི་ནང་དུ་བཞུ་བ་དང་། རི་ལྡེབས་ནས་འབབ་པའི་ཆུ་དང་འདྲའོ། །
MIC 1:5 འདི་ཐམས་ཅད་ནི་ཡ་ཀོབ་ཀྱི་ཉེས་སྐྱོན་དང་། ཡེས་ར་ཨེལ་ཁྱིམ་རྒྱུད་ཀྱི་སྡིག་པའི་རྐྱེན་གྱིས་ཡིན་ཏེ། ཡ་ཀོབ་ཀྱི་ཉེས་སྐྱོན་ནི་ཅི་ཡིན་ནམ། དེ་ནི་སཱ་མར་ཡ་མ་ཡིན་ནམ། ཡ་ཧུ་དཱའི་མཐོ་གླིང་རྣམས་གང་དུ་ཡོད་དམ། དེ་རྣམས་ནི་ཡེ་རུ་སཱ་ལེམ་དུ་ཡོད་པ་མ་ཡིན་ནམ།
MIC 1:6 དེ་བས་བདག་གིས་སཱ་མར་ཡ་ནི་རི་ཐང་གི་གྱང་རོ་ལྟ་བུ་དང་། རྒུན་འབྲུམ་འཛུགས་ས་ལྟ་བུར་བསྒྱུར་བར་བྱ། བདག་གིས་དེའི་རྡོ་རྣམས་ལུང་པར་བསྒྲིལ་ཞིང་། རྨང་གཞི་རྣམས་འདོན་པར་བྱ།
MIC 1:7 གྲོང་ཁྱེར་ནང་གི་འདྲ་སྐུ་བརྐོས་མ་རྣམས་གཅོག་ཅིང་། ལོག་གཡེམ་བྱས་ནས་ཐོབ་པའི་དངུལ་ནི་མེས་བསྲེག་པ་དང་། བདག་གིས་དེའི་འདྲ་སྐུ་ཐམས་ཅད་མེད་པར་གཏོང་དགོས། ཅིའི་ཕྱིར་ཞེ་ན། སྨད་འཚོང་མ་ལ་ཐོབ་པའི་དངུལ་ལས་བསྡུས་པ་ནི་སླར་ཡང་སྨད་འཚོང་མའི་ཐོབ་དངུལ་དུ་འགྱུར།
MIC 1:8 དེའི་ཕྱིར་བདག་གིས་འོ་དོད་འདོན་ཞིང་། གོས་མེད་གཅེར་བུར་རྐང་རྗེན་དུ་རྒྱུ་བར་བྱ། ཡང་ངས་ཁྱི་སྤྱང་ལྟར་སྨྲེ་སྔགས་བཏོན་ནས་རྔ་བྱ་བཞིན་དུ་འཁུན་སྒྲ་འབྱིན་ཏེ།
MIC 1:9 ཅིའི་ཕྱིར་ཞེ་ན། སཱ་མར་ཡ་ཡི་རྨ་ཁ་ནི་གསོ་ཐབས་མེད་པར་ཡ་ཧུ་དཱ་རུ་སླེབས་ཤིང་། བདག་གི་མི་སྡེའི་མཁར་སྒོ་སྟེ་ཡེ་རུ་སཱ་ལེམ་དུ་སླེབས་སོ། །
MIC 1:10 གཱད་ཀྱི་ནང་དུ་འཕྲིན་དེ་མ་བསྒྲག་ཅིག ངུ་ཡང་མ་ངུ་ཞིག པེད་ལེ་ཨབ་རཱ་རུ་ས་རྡུལ་ནང་དུ་འགྲེ་ལོག་རྒྱག་དགོས།
MIC 1:11 ཀྱེ་ཀྱེ་ཤཱ་ཕིར་གྱི་མི་རྣམས། ལུས་གཅེར་བུར་ངོ་ཚ་དང་བཅས་རྒྱུ་བར་གྱིས། ཟཱ་ནན་གྱི་མི་རྣམས་ཕྱི་རུ་འབུད་མ་སྤོབས་ཏེ། པེད་ཨེ་ཟེལ་ཡིད་སྐྱོ་ནས་ངུ་ཞིང་ཁྱོད་རྣམས་ལ་རྒྱབ་རོགས་བྱེད་མི་ནུས་སོ། །
MIC 1:12 དཀོན་མཆོག་ཡ་ཝཱེ་ནས་ཆག་སྒོ་བྱུང་ཞིང་ཡེ་རུ་སཱ་ལེམ་གྱི་མཁར་སྒོ་རུ་སླེབས་པས། མ་རོད་ཀྱི་མི་རྣམས་སེམས་འཚབ་སྟེ་བྱིན་རླབས་ལ་རེ་སྨོན་བྱེད་དོ། །
MIC 1:13 ཀྱེ་ཀྱེ་ལཱ་ཀི་སིའི་མི་རྣམས། རྟ་འགྲོས་མར་ཤིང་རྟ་སྦྱོར་ཅིག ཛ་ཡན་གྱི་སྡིག་པ་ཁྱོད་ལས་བྱུང་སྟེ། ཡེས་ར་ཨེལ་གྱི་སྡིག་པ་རྣམས་ཁྱོད་ལས་མངོན་པ་ཡིན།
MIC 1:14 དེའི་ཕྱིར་ཁྱོད་ཀྱིས་མོ་རེ་ཤེད་གཱད་ལ་ལེགས་སྐྱེས་ཕུལ་ཏེ། ཨག་ཟིབ་ཀྱི་ཁྱིམ་རྒྱུད་རྣམས་ཀྱིས་ཡེས་ར་ཨེལ་གྱི་རྒྱལ་པོ་རྣམས་ལ་གཡོ་སྒྱུའི་སྦྱོར་བ་སྤེལ་བར་འགྱུར་རོ། །
MIC 1:15 ཀྱེ་མཱ་རེ་ཤ་ཡི་མི་རྣམས། བདག་གིས་འཕྲོག་བཅོམ་བྱེད་མཁན་རྣམས་ཁྱོད་ཀྱི་ཁྲོད་དུ་མངགས་པར་བྱེད་ཅིང་། ཡེས་ར་ཨེལ་གྱི་སྐུ་དྲག་རྣམས་ཨ་དུལ་ལཱམ་དུ་འོང་ངེས་ཡིན།
MIC 1:16 ཀྱེ་ཡ་ཧུ་དཱ། རང་གི་གཅེས་པའི་བུ་ཕྲུག་རྣམས་ཀྱི་ཕྱིར་སྐྲ་བྲེགས་ནས་གཞར་དགོས་ལ། ཁྱོད་ཀྱི་མགོ་ནི་བྱ་རྒོད་ལྟར་སྤྱི་ཐེར་ཡིན་དགོས་ཏེ། དེ་དག་བཙན་ཁྲིད་བྱས་ཏེ་ཁྱོད་དང་རིང་དུ་འབྲལ་བའི་ཕྱིར་རོ། །
MIC 2:1 མི་ཚངས་སྤྱོད་པར་རྩོམ་ཞིང་རང་གི་མལ་ཁྲིར་གྲོས་ངན་འགོད་པ་རྣམས་ལ་ཆག་སྒོ་འབྱུང་། དེ་དག་གི་ལག་ཏུ་དབང་ཡོད་པས། ནམ་ལངས་མ་ཐག་སྤྱོད་ངན་སྤྱོད་ཅིང་།
MIC 2:2 དེ་དག་གིས་ས་ཞིང་ལེན་འདོད་ན་དེ་བཙན་དབང་གིས་ལེན་ཞིང་། ཁང་པར་བརྔམས་ནས་དེ་འཕྲོག་པར་བྱེད། དེ་ཚོས་ཁྱིམ་བདག་དང་དེའི་ཁྱིམ་མི་ལ་གཉའ་གནོན་བྱེད་པ་དང། མི་དང་དེའི་ནོར་སྐལ་ཡང་ཧམ་བཟུང་བྱེད་དོ། །
MIC 2:3 དེ་བས་ན་དཀོན་མཆོག་ཡ་ཝཱེས་འདི་སྐད་གསུངས་ཏེ། ཀྱེ་ཧོ། བདག་གིས་ཆག་སྒོ་བཀོད་ནས་ཁྱིམ་རྒྱུད་འདི་ལ་ཐེབས་པར་འཇུག་དགོས། ཆག་སྒོ་འདི་ལས་ཁྱོད་ཅག་གི་མཇིང་པ་ཐར་མི་ནུས་ལ། ཁྱོད་ཚོ་མགོ་ཡར་བཀྱགས་ནས་བསྐྱོད་མི་ཐུབ་སྟེ། ཅིའི་ཕྱིར་ཞེ་ན། འདི་ནི་ཆག་སྒོའི་དུས་རབས་ཡིན་ནོ། །
MIC 2:4 ཉིན་དེར་སླེབས་ཚེ། མི་ཡིས་ཁྱོད་ཀྱི་ཕྱིར་དུ་མགུར་བརྩམས་ཏེ། ཡིད་གདུང་བའི་སྐྱོ་གླུ་བླངས་ནས་འདི་ལྟར། བདག་ཅག་ཐམས་ཅད་ཉམས་པར་གྱུར། ངའི་མི་སྡེའི་ནོར་སྐལ་གཞན་གྱིས་ཁྱེར། ཡ་ཝཱེས་དེ་ནི་བདག་དང་བྲལ་བར་མཛད། བདག་ཅག་གི་ཞིང་ས་ནི་གྱེན་ལོག་མཁན་རྣམས་ཀྱིས་བགོས་སོ་ཞེས་འཕྱ་བར་འགྱུར།
MIC 2:5 དེ་བས་ན་དཀོན་མཆོག་ཡ་ཝཱེའི་ཚོགས་ཀྱི་ནང་དུ་རྒྱན་བླངས་ནས་ས་མཚམས་བགོ་བའི་མི་ནི་མེད་དོ། །
MIC 2:6 དེ་དག་གིས་བརྗོད་མཁན་རྣམས་ལ་མ་བརྗོད་ཅིག མི་སུས་ཀྱང་དོན་འདི་དག་བརྗོད་མི་རུང་ལ། དེ་ལྟར་བྱས་ན་ངོ་ཚ་བདག་དང་འབྲལ་ངེས་ཡིན་ཞེས་སྨྲས་སོ། །
MIC 2:7 ཀྱེ་ཡ་ཀོབ་ཀྱི་ཁྱིམ་རྒྱུད་ལགས། འདི་ལྟར་བརྗོད་འོས་སམ། དཀོན་མཆོག་ཡ་ཝཱེ་ལ་བཟོད་སེམས་མེད་པ་ཡིན་ནམ། དོན་འདི་རྣམས་ཁོང་གིས་མཛད་པ་ལགས་སམ། བདག་གི་གཏམ་ནི་སྤྱོད་པ་དྲང་བའི་མི་ལ་ཕན་པ་མ་ཡིན་ནམ།
MIC 2:8 འོན་ཀྱང་ད་ལྟ་བདག་གི་མི་སྡེ་ནི་དགྲ་ལྟར་ལངས་ནས། ཁྱོད་ཚོས་བདེ་བར་ལམ་དུ་བགྲོད་ཅིང་འཐབ་མོ་ལ་མི་དགའ་བ་རྣམས་ཀྱི་ཕྱི་གོས་བཤུ་བར་བྱེད།
MIC 2:9 ངའི་མི་སྡེའི་བུད་མེད་རྣམས་དགའ་བདེའི་ཁྱིམ་ལས་ཕྱིར་བསྐྲད་ནས་དེའི་བུ་ཕྲུག་རྣམས་ལས་ངའི་གཟི་བརྗིད་གཏན་དུ་འཕྲོག་གོ །
MIC 2:10 ཡར་ལོངས་ལ་ཕར་སོང་ཞིག འདི་ནི་ཁྱོད་ངལ་གསོ་བྱེད་ས་མ་ཡིན་ནོ། །ཅིའི་ཕྱིར་ཞེ་ན། མི་གཙང་བའི་རྐྱེན་གྱིས་གཏོར་བརླག་ཐེབས་སུ་བཅུག་པ་དང་། གཏོར་བརླག་དེ་ནི་ཤིན་ཏུ་ཆེ་བས་སོ། །
MIC 2:11 ཇི་སྟེ་མི་ཞིག་གི་སེམས་ནང་བཅོས་མས་བཀང་ནས་རྫུན་སྨྲས་ཏེ་འདི་ལྟར། བདག་གིས་ཁྱོད་ལ་རྒུན་ཆང་དང་ཆང་གར་པོའི་ལུང་བསྟན་པར་བྱའོ་ཞེས་སྨྲ་བ་ཡིན་ན། མི་དེ་ནི་མི་སྡེ་འདིའི་ལུང་སྟོན་པར་འགྱུར་རོ། །
MIC 2:12 ཀྱེ་ཡ་ཀོབ་ཀྱི་ཁྱིམ་རྒྱུད་ལགས། བདག་གིས་ཁྱོད་རྣམས་བསྡུ་བར་བྱ་སྟེ། ཡེས་ར་ཨེལ་གྱི་མི་ལྷག་ལུས་རྣམས་བསྡུ་བར་བྱ། དེ་རྣམས་ནི་ལུག་ར་ནང་གི་ལུག་ལྟར་གནས་གཅིག་ཏུ་འགོད་པ་དང་། ཡང་རྩྭ་ཐང་གི་ལུག་ཁྱུ་བཞིན་གཅིག་ཏུ་བསྡུས་ནས། མི་གྲངས་མང་ཞིང་ཅ་ཅོ་ཆེན་པོ་སྒྲོག་པའོ། །
MIC 2:13 ལམ་ཕྱེ་མཁན་དེ་དག་གི་སྔོན་དུ་ཆས་ཏེ། མཁར་སྒོའི་ནང་དུ་འཛུལ་ནས་ཕྱིར་འབུད་པ་དང་། དེ་རྣམས་ཀྱི་རྒྱལ་པོ་སྔོན་དུ་སྐྱོད་ཅིང་། དཀོན་མཆོག་ཡ་ཝཱེ་ནི་དེ་རྣམས་ཀྱི་མདུན་ནས་གཤེགས་པར་འགྱུར་རོ། །
MIC 3:1 དེ་ནས་བདག་གིས་འདི་ལྟར། ཀྱེ་ཡ་ཀོབ་ཀྱི་འགོ་དཔོན་རྣམས་དང་ཡེས་ར་ཨེལ་ཁྱིམ་རྒྱུད་ཀྱི་ཁྲིམས་དཔོན་རྣམས། ཁྱོད་ཅག་གིས་ཉོན་ཅིག ཁྱོད་རྣམས་ཀྱིས་དྲང་བདེན་མི་རྟོགས་སམ།
MIC 3:2 བཟང་པོར་སྡང་ཞིང་ངན་པར་དགའ་མཁན་དེ་ཁྱོད་རྣམས་ཡིན་ལ། བདག་གི་མི་སྡེའི་ལུས་ཀྱི་པགས་པ་བཤུ་ཞིང་། རུས་པ་ནས་ཤ་ཡང་གཞོག་གོ །
MIC 3:3 ཁྱོད་རྣམས་ཀྱིས་ངའི་མི་སྡེའི་ཤ་བཟའ་ཞིང་པགས་པ་བཤུ་བར་བྱེད་པ་དང་། དེ་དག་གི་རུས་པ་རྣམས་བཅག་ནས་ཁོག་མ་ནང་ལ་འཕེན་པའི་ཤ་ལོག་དང་། སྟ་རེ་ཁ་ཡི་ཤ་དང་འདྲ་བར་གཅོད་པ་ཡིན།
MIC 3:4 ཆག་སྒོ་ཐེབས་པའི་ཉིན་མོར་དེ་དག་གིས་དཀོན་མཆོག་ཡ་ཝཱེར་ཞུས་ཀྱང་ཁོང་གིས་དེ་རྣམས་ལ་གསན་པར་མི་བྱེད། དེའི་དུས་སུ། ཁོ་རྣམས་ཀྱིས་སྤྱོད་ངན་སྤྱད་པའི་རྐྱེན་གྱིས་ཁོང་གིས་དེ་རྣམས་ལ་ཞལ་རས་མི་སྟོན་ནོ། །
MIC 3:5 ངའི་མི་སྡེ་ལམ་ནོར་ལ་འཇུག་པའི་ལུང་སྟོན་པ་སྟེ། ཁ་ལ་ཟས་རེག་ན་ཞི་བདེ་སྒྲོག་ཅིང་། སུ་ཞིག་གིས་ཁ་ཟས་མི་སྟེར་ན་རྒོལ་བར་རྩོམ་པའི་ལུང་སྟོན་པ་རྣམས་ཀྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ།
MIC 3:6 དེའི་ཕྱིར་ཁྱོད་རྣམས་མཚན་མོར་འཕྲད་པ་དང་ཞལ་གཟིགས་མི་མཐོང་ལ། མུན་ནག་ལ་འཕྲད་ཅིང་མོ་ཡང་འདེབས་མི་ནུས། ཡང་ཉི་མ་ནི་ལུང་སྟོན་པ་ལ་ནུབ་པར་འགྱུར་ལ། ཉིན་མོ་ཡང་མུན་ནག་ཏུ་འགྱུར་རོ། །
MIC 3:7 ལུང་སྟོན་པ་རྣམས་གནོང་ཞིང་མོ་པ་རྣམས་ངོ་ཚ་བར་འགྱུར་ལ། དཀོན་མཆོག་གིས་ཁོ་རྣམས་ལ་བཀའ་ལན་མ་གནང་བས་ན་དེ་ཐམས་ཅད་ཀྱིས་རང་གི་ཁ་བཏུམ་པར་བྱ།
MIC 3:8 དེ་ཡང་བདག་ལ་མཚོན་ན། བདག་ནི་དཀོན་མཆོག་ཡ་ཝཱེའི་ཐུགས་ཉིད་ལ་བརྟེན་ནས་ནུས་མཐུ་དང་དྲང་བདེན། སྤོབས་པ་བཅས་ཀྱིས་ཕྱུག་ཅིང་། ཡ་ཀོབ་ལ་དེའི་ཉེས་སྐྱོན་དང་། ཡེས་ར་ཨེལ་ལ་དེའི་སྡིག་པ་སྟོན་ནུས་སོ། །
MIC 3:9 ཀྱེ་ཡ་ཀོབ་ཁྱིམ་རྒྱུད་ཀྱི་འགོ་དཔོན་རྣམས་ཀྱིས་འདི་ལ་ཉོན་ཅིག ཀྱེ་ཡེས་ར་ཨེལ་ཁྱིམ་རྒྱུད་ཀྱི་ཁྲིམས་དཔོན་རྣམས་ཀྱིས་ཀྱང་མཉན་དགོས་ཏེ། ཁྱོད་རྣམས་ནི་དྲང་བདེན་ལ་སྡང་ཞིང་། དྲང་བདེན་ཐམས་ཅད་ལོག་པར་སྒྲུབ་པ་དང་།
MIC 3:10 ཁྲག་གིས་ཛ་ཡན་བཙུགས་པ་དང་། སྡིག་པ་ཡིས་ཡེ་རུ་སཱ་ལེམ་བཞེངས།
MIC 3:11 དེ་དག་གི་འགོ་དཔོན་རྣམས་ཀྱིས་རྔན་པའི་ཕྱིར་གཤགས་བྱེད་ཅིང་། མཆོད་དཔོན་རྣམས་ཀྱིས་གླུ་ལེན་པའི་ཕྱིར་སློབ་སྟོན་གནང་བ་དང་། ལུང་སྟོན་པ་རྣམས་ཀྱིས་དངུལ་གྱི་ཕྱིར་མོ་འདེབས་ནའང་། དེ་དག་གིས་དཀོན་མཆོག་ཡ་ཝཱེ་ལ་བརྟེན་ནས་འདི་ལྟར། དཀོན་མཆོག་ཡ་ཝཱེ་རང་ཅག་གི་དཀྱིལ་དུ་བཞུགས་པ་མིན་ནམ། རང་ཅག་གི་སྟེང་དུ་ཆག་སྒོ་གང་ཡང་འབྱུང་མི་སྲིད་ཅེས་ཟེར་རོ། །
MIC 3:12 དེ་བས་ན་ཁྱོད་ཅག་གི་རྐྱེན་གྱིས་ཛ་ཡན་ནི་ཞིང་ལྟར་སློག་པ་དང་། ཡེ་རུ་སཱ་ལེམ་ནི་གྱང་རོ་དང་། མཆོད་ཁང་གི་རི་བོ་ནི་ནགས་ཀྱི་གནས་མཐོ་ས་རྣམས་དང་འདྲ་བར་འགྱུར་རོ། །
MIC 4:1 མཐའ་མའི་ཉིན་མོ་དག་ལ་དཀོན་མཆོག་ཡ་ཝཱེའི་བཞུགས་གནས་ཀྱི་རི་བོ་དེ་རི་བོ་གཞན་དག་གི་རྩེ་མོར་བཞེང་ཞིང་། རི་སྒང་རྣམས་ཀྱི་ཡང་སྟེང་དུ་འགྱིང་བ་དང་། མི་རིགས་ཐམས་ཅད་དེའི་ཕྱོགས་སུ་བཞུར་ངེས་ཡིན།
MIC 4:2 མི་རིགས་མང་པོ་འོངས་ནས་ན་རེ། ཤོག་དང་། རང་ཅག་ཡར་དཀོན་མཆོག་ཡ་ཝཱེའི་རི་བོ་སྟེ། ཡ་ཀོབ་ཀྱི་དཀོན་མཆོག་གི་མཆོད་ཁང་ལ་འགྲོ་བར་བྱའོ། །ཁོང་གིས་ང་ཚོ་ལ་ཁོང་གི་ཕེབས་ལམ་སྟོན་ཞིང་ང་ཚོ་ཁོང་གི་ཕེབས་ལམ་དུ་འགྲུལ་བར་བྱ་ཞེས་སྨྲ་བར་འགྱུར། ཅི་ལ་ཞེ་ན། ཛ་ཡན་ནས་ཁོང་གི་བཀའ་ཁྲིམས་འབྱུང་ཞིང་། ཡེ་རུ་སཱ་ལེམ་ནས་དཀོན་མཆོག་ཡ་ཝཱེའི་བཀའ་འབྱུང་ངེས་ཡིན།
MIC 4:3 ཁོང་གིས་མི་རིགས་རྣམས་ཀྱི་བར་ལ་ཁྲིམས་གཅོད་ཅིང་། རྒྱང་ཐག་རིང་པོའི་རྒྱལ་ཁབ་སྟོབས་ལྡན་རྣམས་ལ་ལེགས་ཉེས་འབྱེད་པར་འགྱུར། ཁོ་ཚོས་རང་གི་རལ་གྲི་རྣམས་ཀྱིས་ཐོང་གཤོལ་བརྡུང་ཞིང་། མདུང་རྣམས་ཀྱིས་ཟོར་བ་བརྡུངས་ཏེ། མི་རིགས་དང་མི་རིགས་བར་ལ་རལ་གྲི་མི་འཕྱར་ཞིང་། འཐབ་འཁྲུག་ཀྱང་སློབ་པར་མི་བྱ།
MIC 4:4 མི་རེ་རེ་རང་རང་གི་རྒུན་ཤིང་དང་སེ་ཡབ་ཤིང་གི་འོག་ཏུ་བསྡད་ནས་སུས་ཀྱང་དེ་རྣམས་འཇིགས་པར་མི་བྱ། ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་པས་སོ། །
MIC 4:5 མི་རིགས་ཀུན་གྱིས་རང་གི་ལྷ་ཡི་མིང་ལ་བརྟེན་ནས་སྤྱོད་ནའང་། ངེད་རྣམས་ཀྱིས་རྒྱུན་ནས་རྒྱུན་དུ་རང་གི་དཀོན་མཆོག་ཡ་ཝཱེའི་མཚན་ལ་བརྟེན་ནས་སྤྱོད་པར་བྱའོ། །
MIC 4:6 དཀོན་མཆོག་ཡ་ཝཱེས་འདི་སྐད་དུ། ཉིན་མོ་དེར་བདག་གིས་ཞ་བོ་རྣམས་འགུག་ཅིང་། མཐར་བསྐྲད་པ་དང་ངས་སྡུག་ལ་སྦྱར་བ་རྣམས་ཚུར་བསྡུ་བར་བྱའོ། །
MIC 4:7 བདག་གིས་ཞ་བོ་རྣམས་ལུས་སུ་བཅུག་སྟེ། རྒྱང་རིང་ཡུལ་དུ་བསྐྲད་པ་རྣམས་ཀྱི་རྒྱལ་ཁབ་དར་དུ་འཇུག་ཅིང་། དུས་ད་ནས་བཟུང་ཇི་སྲིད་བར་དུ་དཀོན་མཆོག་ཡ་ཝཱེས་རི་བོ་ཛ་ཡན་དུ་དེ་དག་ལ་དབང་མཛད་པར་འགྱུར།
MIC 4:8 ཀྱེ་ཀྱེ་ལུག་ཁྱུའི་རྫི་བོ་ཡི་སོ་ལྟ་ཁང་དང་ཛ་ཡན་བུ་མོའི་རི་བོ་ལགས། སྔོན་ཆད་ཀྱི་དབང་ནི་ཁྱོད་ལ་སྤྲོད་པར་བྱ་ཞིང་། ཡེ་རུ་སཱ་ལེམ་གྱི་རྒྱལ་སྲིད་ཁྱོད་ལ་དབང་བར་འགྱུར།
MIC 4:9 ད་ལྟ་ཁྱོད་ཀྱིས་ངུ་སྐད་ཆེན་པོ་འདོན་པ་ཅི་ཡིན་ནམ། ཁྱོད་ཚོའི་ཁྲོད་དུ་རྒྱལ་པོ་མེད་པའམ་ཡང་ན་ཁྱོད་ཀྱི་གྲོས་དཔོན་མེད་པར་གྱུར་ནས། ཁྱོད་ན་ཟུག་གིས་མནར་ཏེ་ཕྲུ་གུ་བཙའ་བའི་བུད་མེད་བཞིན་ཡིན་ནམ།
MIC 4:10 ཀྱེ་ཀྱེ་ཛ་ཡན་གྱི་བུ་མོ་ལགས། ཁྱོད་ཀྱིས་བཙའ་རན་པའི་བུད་མེད་བཞིན་ཟུག་གཟེར་ལངས་ནས་ཕྲུ་གུ་བཙའ་བར་འགྱུར། ཅི་ལ་ཞེ་ན། ཁྱོད་ནི་གྲོང་ཁྱེར་ལས་ཐོན་ཏེ་རི་ཐང་ལ་གནས་ཤིང་། པཱ་པེལ་ལོན་དུ་འགྲོ་དགོས་ལ། གནས་དེ་ལས་ཁྱོད་ནི་ཐར་བར་འགྱུར། གནས་དེར་དཀོན་མཆོག་ཡ་ཝཱེས་ཁྱོད་རང་བསྐྱབས་ཏེ་དགྲ་བོའི་ལག་ནས་ཐར་བར་བྱེད་དོ། །
MIC 4:11 ད་ལྟ་རྒྱལ་ཁབ་མང་པོ་འདུས་ནས་ཁྱོད་ལ་རྒོལ་ཏེ་ན་རེ། ཛ་ཡན་ནི་བཙོག་པར་བཟོས་ནས། ངེད་རྣམས་ལ་དངོས་སུ་མཐོང་བར་བཅུག་ཅེས་སྨྲའོ། །
MIC 4:12 ཡིན་ནའང་དེ་རྣམས་ཀྱིས་དཀོན་མཆོག་ཡ་ཝཱེའི་ཐུགས་དགོངས་མ་རྟོགས་ལ་ཁོང་གི་བཀོད་པ་ཡང་མི་ཤེས་སོ། །ཁོང་གིས་གྲོ་ཡི་ཚར་ཕོན་གཡུལ་ཁར་བསྡུ་བ་བཞིན་དེ་རྣམས་བསྡུ་བར་འགྱུར་རོ། །
MIC 4:13 ཀྱེ་ཀྱེ་ཛ་ཡན་གྱི་བུ་མོ་ལགས། ཡར་ལོངས་ལ་གཡུལ་ཆོགས་ཤིག བདག་གིས་ཁྱོད་ཀྱི་རྭ་ནི་ལྕགས་དང་རྨིག་པ་ནི་ལི་རུ་འགྱུར་བར་བྱ་ཞིང་། ཁྱོད་ཀྱིས་མི་རིགས་མང་པོ་རྡུལ་དུ་བརླག་པ་དང་། དེ་དག་གི་རྒྱུ་ནོར་རྣམས་དཀོན་མཆོག་ཡ་ཝཱེ་ལ་འབུལ་ཞིང་། དེ་དག་གི་རིན་པོ་ཆེ་ནི་ས་གཞི་ཡོངས་ཀྱི་བདག་པོར་འབུལ་བར་འགྱུར།
MIC 5:1 ཀྱེ་ཀྱེ་མི་སྡེའི་རུ་ཤོག་རྣམས། ད་ལྟ་མཉམ་དུ་འདུས་ནས་དཔུང་སྒྲིལ་ཅིག དགྲ་རྣམས་འོངས་ཏེ་ང་ཚོའི་མཐའ་ནས་བསྐོར་བ་དང་། དབྱུག་པས་ཡེས་ར་ཨེལ་གྱི་སྲིད་སྐྱོང་མཁན་གྱི་གདོང་ལ་རྒྱག་པར་འགྱུར།
MIC 5:2 ཀྱེ་པེད་ལེ་ཧེམ་གྱི་ཨེབ་རཱད་ལགས། ཁྱོད་ནི་ཡ་ཧུ་དཱའི་རུས་རྒྱུད་རྣམས་ལས་ཆུང་ནའང་། རྗེས་སུ་ཁྱོད་ལས་མི་ཞིག་ཐོན་ནས་ཡེས་ར་ཨེལ་དུ་བདག་གི་ཕྱིར་དུ་དབང་མཛད་པ་དང་། ཁོང་གི་རྩ་བ་ནི་གནའ་དུས་དང་ཐོག་མ་ནས་ཡོད་པ་ཡིན།
MIC 5:3 དེ་བས་ན་ཕྲུ་གུ་བཙའ་རན་པའི་བུད་མེད་ཀྱིས་ཕྲུ་གུ་བཙའ་བའི་བར་དུ། ཡ་ཝཱེས་ཡེས་ར་ཨེལ་པ་ནི་ཡོངས་སུ་འདོར་བ་དང་། དུས་དེར། དེའི་སྤུན་ཟླ་ལྷག་ལུས་རྣམས་ཀྱང་ཕྱིར་ཡེས་ར་ཨེལ་པ་རྣམས་ཀྱི་ཁྲོད་དུ་ལོག་ངེས་ཡིན།
MIC 5:4 ཁོང་ནི་དཀོན་མཆོག་ཡ་ཝཱེའི་ནུས་མཐུ་ལ་བརྟེན་ངེས་ཡིན་ཏེ། ཁོང་གི་དཀོན་མཆོག་ཡ་ཝཱེའི་གཟི་བྱིན་ལྡན་པའི་མཚན་ལ་བརྟེན་ནས། ཡར་ལངས་ཏེ་ལུག་ཁྱུ་འཚོ་སྐྱོང་བྱེད་ཅིང་དེ་རྣམས་བདེ་བར་འགོད་པའོ། །ཅི་ལ་ཞེ་ན། ད་ནི་ས་མཐའི་བར་དུ་ཁོང་ལ་བཀུར་སྟི་ཆེན་པོ་འབྱུང་བར་འགྱུར་རོ། །
MIC 5:5 སྐྱེས་བུ་འདི་ནི་ཞི་བདེ་གནང་མཁན་ཡིན་ལ། ཨ་སུར་པས་ང་ཚོའི་ཡུལ་དུ་བཙན་འཛུལ་བྱས་ཏེ་རང་ཅག་གི་ཕོ་བྲང་ལ་རྡོག་རོལ་གཏོང་བའི་ཚེ། རང་ཅག་གིས་རྫི་བོ་བདུན་དང་འགོ་དཔོན་བརྒྱད་བསྐོས་ནས་དེ་རྣམས་ལ་རྒོལ་བར་བྱ།
MIC 5:6 ཁོང་རྣམས་ཀྱིས་ཨ་སུར་གྱི་ཡུལ་དང་ནིམ་རོད་ཡུལ་ལ་རལ་གྲི་ཡིས་སྲིད་སྐྱོང་བར་འགྱུར་ཞིང་། ཨ་སུར་པས་ང་ཚོའི་ཡུལ་དུ་བཙན་འཛུལ་བྱས་ནས་ང་ཚོའི་ས་མཚམས་ལ་རྡོག་རོལ་གཏོང་བའི་ཚེ། ཁོང་གིས་རང་ཅག་སྐྱོབ་ངེས་ཡིན།
MIC 5:7 ཡ་ཀོབ་ཀྱི་མི་ལྷག་ལུས་རྣམས་ནི་མི་རིགས་མང་པོའི་ཁྲོད་དུ་གནས་ཤིང་། དཀོན་མཆོག་ཡ་ཝཱེ་ནས་ཟིལ་བ་བབས་པ་དང་། སྦྲང་ཆར་རྩྭ་ཐང་དུ་བབས་པ་ནང་བཞིན་ཡིན་ལ། དེ་ཚོ་འགྲོ་བ་མི་ལ་མི་བརྟེན་ཞིང་འཇིག་རྟེན་མི་ལ་རེ་སྒུག་ཀྱང་མི་བྱའོ། །
MIC 5:8 ཡ་ཀོབ་མི་རིགས་ཀྱི་ལྷག་ལུས་རྣམས་ནི་རྒྱལ་ཁབ་ཁག་དང་མི་རིགས་མང་པོའི་ཁྲོད་དུ་གནས་ཤིང་། ནགས་ཚལ་གྱི་རི་དྭགས་རྣམས་ལས་སེང་གེ་ལྟ་བུ་དང་། ཡང་སེང་གེ་དར་མ་ལུག་ཁྱུ་རུ་རྒྱུ་བ་བཞིན་ཡིན། དེ་རྒྱུ་བའི་ཚེ་རྡོག་རོལ་བཏང་ནས་གཤགས་པར་འགྱུར་ལ་སུས་ཀྱང་སྐྱོབ་མི་ནུས་སོ། །
MIC 5:9 ཁྱེད་ཀྱི་ཕྱག་ནི་ཡར་བཀྱགས་ནས་དགྲ་ལས་རྒྱལ་བར་སྨོན། ཁྱེད་ཀྱི་དགྲ་རྣམས་འཇོམས་པར་གྱུར་ཅིག
MIC 5:10 དཀོན་མཆོག་ཡ་ཝཱེས་འདི་སྐད་དུ། ཉིན་མོ་དེ་ལ་ངས་ཁྱོད་ཚོའི་ནང་དུ་ཡོད་པའི་རྟ་རྣམས་བཀུམས་ནས་ཤིང་རྟ་རྣམས་མེད་པར་བྱ།
MIC 5:11 ཁྱོད་ཀྱི་ཡུལ་གྱི་གྲོང་ཁྱེར་རྣམས་ཚར་བཅད་དེ། ཁྱོད་ཀྱི་བཙན་རྫོང་ཐམས་ཅད་གཏོར་བར་བྱ།
MIC 5:12 ཁྱོད་ཀྱི་ལག་པའི་རྫུ་འཕྲུལ་རྣམས་མེད་པར་བྱ་སྟེ། ད་ནི་ཁྱོད་ཀྱི་སར་མོ་པ་ཡོད་པར་མི་འགྱུར་རོ། །
MIC 5:13 ཡང་ཁྱོད་ཚོའི་ཁྲོད་ཀྱི་རྡོ་བརྐོས་ཀྱི་སྐུ་འདྲ་དང་རྡོ་རིང་རྣམས་མེད་པར་བྱ་སྟེ། ད་ནི་ཁྱོད་ཀྱིས་རང་གི་ལག་པས་བཟོས་པར་ཕྱག་མི་འཚལ།
MIC 5:14 ངས་ཁྱོད་ཚོའི་ཁྲོད་ནས་ལྷ་མོ་ཨ་ཤེ་རཱའི་སྐུ་བརྙན་རྣམས་མེད་པར་བཟོ་སྟེ། ཁྱོད་ཀྱི་གྲོང་ཁྱེར་རྣམས་མེད་པར་བཟོ་ངེས་ཡིན།
MIC 5:15 ཡང་ངའི་བཀའ་ལ་མ་མཉན་པའི་མི་རིགས་ལ་ཁོང་ཁྲོ་དང་ཞེ་སྡང་གི་ངང་ནས་ལན་འཇལ་བར་བྱའོ་ཞེས་གསུངས་སོ། །
MIC 6:1 དཀོན་མཆོག་ཡ་ཝཱེའི་གསུང་ལ་ཉོན་ཅིག ཡར་ལོངས་ལ་རི་བོ་རྣམས་དང་རྩོད་པར་གྱིས་ཤིག རི་སྒང་རྣམས་ལ་ཁྱོད་ཀྱི་སྐད་སྒྲ་ཐོས་སུ་ཆུག་དང་།
MIC 6:2 ཀྱེ་རི་བོ་རྣམས་ཀྱིས་དཀོན་མཆོག་ཡ་ཝཱེས་སྐྱོན་འཛུགས་པར་ཉོན་ཅིག ས་གཞིའི་དུས་གཏན་གྱི་རྨང་གཞི་ཀུན་གྱིས་ཉོན་ཅིག ཅི་ལ་ཞེ་ན། དཀོན་མཆོག་ཡ་ཝཱེས་ཉིད་ཀྱི་མི་རྣམས་ལ་གྱོད་བརྒྱབ་ནས་ཡེས་ར་ཨེལ་དང་རྩོད་པར་མཛད་དོ། །
MIC 6:3 ཀྱེ་ངའི་མི་སྡེ། ངས་ཁྱོད་རྣམས་ལ་ཅི་ཞིག་བྱས་སམ། ངས་དོན་ཅི་ཞིག་གིས་ཁྱོད་རྣམས་ལ་སུན་སྣང་བསྐྱེད་པ་ཡིན་ནམ། ཁྱོད་ཀྱིས་ང་ལ་ལན་ཐོབས་ཤིག
MIC 6:4 སྔོན་ཆད་ངས་ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་དེ། བྲན་གཡོག་ཏུ་བཀོལ་བའི་གནས་ལས་ཁྱོད་རྣམས་བླུས་པ་དང་། ཡང་ངས་མོ་ཤེ་དང་ཨ་རོན། མིར་ཡམ་བཅས་ཁྱོད་རྣམས་འཁྲིད་ཕྱིར་མངགས་པའོ། །
MIC 6:5 ཀྱེ་ངའི་མི་སྡེ། ཁྱོད་ཅག་གིས་སྔོན་ཆད་མོ་ཨབ་རྒྱལ་པོ་པཱ་ལག་གིས་ཅི་ལྟར་འཆར་འགོད་བྱས་པ་དང་། པེ་ཨོར་གྱི་བུ་པེལ་ཨམ་གྱིས་དེ་ལ་ལན་ཅི་ཞིག་བཏབ་པ། ཡང་སིད་ཏིམ་ནས་གིལ་གལ་བར་དུ་དོན་ཅི་ཞིག་བྱུང་བ་རྣམས་དྲན་པར་གྱིས་ཤིག དེ་ནི་ཁྱོད་རྣམས་ཀྱིས་དཀོན་མཆོག་ཡ་ཝཱེའི་དྲང་བདེན་གྱི་མཛད་པ་རྣམས་རྟོགས་པའི་ཕྱིར་ཡིན་ནོ། །
MIC 6:6 ང་རང་དཀོན་མཆོག་ཡ་ཝཱེའི་དྲུང་དུ་སོང་ནས་བླ་མེད་དཀོན་མཆོག་གི་སྤྱན་སྔར་ཕྱག་འཚལ་བའི་དུས་སུ། ངས་ཅི་ཞིག་འབུལ་ལམ། ང་རང་ཁོང་གི་དྲུང་དུ་འགྲོ་དུས་ལོ་གཅིག་ཅན་གྱི་བ་ཕྲུག་སྦྱིན་སྲེག་གི་མཆོད་པར་འབུལ་བར་བྱའམ།
MIC 6:7 དཀོན་མཆོག་ཡ་ཝཱེ་ནི་ལུག་ཐུག་སྟོང་ཕྲག་རྣམས་དང་། སྣུམ་གྱི་གཙང་པོ་ཁྲི་ཕྲག་རྣམས་ལ་ཐུགས་མཉེས་སམ། ངས་རང་གི་ཉེས་སྐྱོན་གྱི་དོན་དུ་རང་གི་བུ་སྐྱེས་འགོ་དང་། ངའི་སྡིག་པའི་ཆེད་དུ་རང་ལས་སྐྱེས་པ་འབུལ་ལམ།
MIC 6:8 ཀྱེ་ཀྱེ་འཇིག་རྟེན་མི་རྣམས། དཀོན་མཆོག་ཡ་ཝཱེས་བཟང་པོ་གང་ཡིན་པ་ནི་ཁྱོད་ལ་བསྟན་ཟིན་ཏེ། ཁོང་གིས་ཁྱོད་རྣམས་ལ་རེ་བ་གང་ཞིག་བཅངས་པ་ཡིན་ཟེར་ན། ཁྱོད་ཀྱིས་ལས་དྲང་བདེན་སྤྱོད་པ་དང་བྱམས་སྙིང་རྗེ་ལ་དགའ་བ། ཁེངས་སྐྱུང་གི་སེམས་ཀྱིས་གཟབ་ནན་ངང་རང་གི་དཀོན་མཆོག་དང་མཉམ་དུ་སྐྱོད་པ་བཅས་ལས་མ་འདས་སོ། །
MIC 6:9 ཉོན་དང་། དཀོན་མཆོག་ཡ་ཝཱེས་གྲོང་ཁྱེར་འདི་འབོད་ཀྱིན་འདུག ཁྱེད་ཀྱི་མཚན་ལ་གུས་ཤིང་འཇིགས་པ་ནི་ཤེས་རབ་ཡིན་ལ། ཁྱོད་ཚོས་ཉེས་ཆད་དང་ཉེས་ཆད་གཅོད་པར་མངགས་པ་དེའི་གཏམ་ལ་ཉོན་ཅིག
MIC 6:10 མི་ངན་གྱི་ཁྱིམ་དུ་ད་དུང་ལྐོག་ནོར་དང་། མི་ལ་ཁོང་ཁྲོ་སློང་བའི་བྲེ་ཆུང་ངུ་དེ་ཡོད་པ་མ་ཡིན་ནམ།
MIC 6:11 མི་དྲང་བའི་སྲང་དང་ཁུག་མའི་ནང་གི་རྒྱ་རྡོ་གཡོ་སྒྱུ་ཅན་བཀོལ་ན། ངས་མི་དེ་ནོངས་མེད་དུ་རྩི་བར་འགྱུར་རམ།
MIC 6:12 གྲོང་ཁྱེར་དེའི་ཕྱུག་པོ་རྣམས་ཀྱིས་གདུག་རྩུབ་ཀྱི་ལས་སྤྱོད་པ་དང་། ཡུལ་དེའི་མི་རྣམས་ཀྱིས་རྫུན་སྨྲ་ཞིང་། དེ་དག་གི་སྨྲ་སྒོའི་ལྕེ་ནི་གཡོ་སྒྱུ་ཅན་ཡིན་ནོ། །
MIC 6:13 དེའི་ཕྱིར་ངས་ཁྱོད་ལ་བརྡུངས་ནས་སྣད་པར་བྱ་ཞིང་། ཁྱོད་ཀྱི་སྡིག་པའི་དབང་གིས་ཁྱོད་རང་བརླག་པར་བྱའོ། །
MIC 6:14 ཁྱོད་ཀྱིས་ཟོས་ཀྱང་འགྲང་བར་མི་འགྱུར་ལ། ཁྱོད་ཀྱི་ལྟོ་བ་སྔར་བཞིན་སྟོང་བར་ལུས་པ་དང་། ཁྱོད་རང་སྤར་ནའང་བྲོས་ནས་མི་ཐར་ལ། ཐར་བའི་དབང་དུ་བཏང་ནའང་བདག་གིས་རལ་གྲིར་གཏོད་ངེས་ཡིན།
MIC 6:15 ཁྱོད་ཀྱིས་ས་བོན་བཏབ་ཀྱང་ལོ་ཏོག་བསྡུ་མི་ནུས་ཤིང་། སྐྱུ་རུ་བཙིར་ཡང་སྣུམ་གྱིས་ལུས་བྱུག་པར་མི་འགྱུར་ལ། རྒུན་འབྲུམ་གྱི་ཁུ་བ་བཙིར་ཡང་རྒུན་ཆང་འཐུང་བར་མི་འགྱུར་རོ། །
MIC 6:16 ཁྱོད་ཀྱིས་ཨོམ་རིའི་སྒྲིགས་ལམ་བཞིན་བྱས་ཤིང་། ཨ་ཧབ་ཁྱིམ་རྒྱུད་ཀྱི་སྤྱོད་པ་མཐའ་དག་སྤྱད་ནས་ཁོ་ཚོའི་གྲོས་ངན་ལ་མཉན་པས་ན། ངས་ཁྱོད་སྟོང་པར་བྱ་ཞིང་དེར་གནས་པའི་ཡུལ་མི་རྣམས་ལ་གཞན་གྱིས་འཕྱ་བར་འགྱུར་ལ། ཁྱོད་ཚོས་ངའི་མི་སྡེའི་ངོ་ཚ་ཡང་འཁུར་བར་འགྱུར་རོ། །
MIC 7:1 ཀྱི་ཧུད། ང་ལ་ཆག་སྒོ་འབྱུང་། བདག་ནི་དབྱར་གྱི་དུས་སུ་བཏོགས་པའི་ཤིང་ཏོག་དང་མཚུངས་ལ། འབྲས་བུ་བསྡུས་ནས་ལུས་པའི་རྒུན་འབྲུམ་བཞིན་ཡིན་ཞིང་། བཟའ་རྒྱུ་ཅི་ཡང་མེད་པ་དང་། རང་གི་སེམས་ནས་རེ་སྨོན་བྱེད་ཅིང་སྨིན་སྔ་བའི་སེ་ཡབ་ཤིང་ཏོག་ཀྱང་མེད་དོ། །
MIC 7:2 ས་གཞིའི་སྟེང་གི་ལྷག་བསམ་ཅན་རྣམས་རྩ་མེད་དུ་བཏང་བ་དང་། མི་ཡི་ཁྲོད་དུ་གཞུང་དྲང་གཅིག་ཀྱང་མེད། མི་ལ་ཁྲག་བཞུར་དུ་འཇུག་པའི་ཕྱིར་དེ་ཐམས་ཅད་ཀྱིས་འཇབ་སྒུག་བྱེད་ཅིང་། རེ་རེས་རྙི་བཙུགས་ནས་རང་གི་སྤུན་རྣམས་འཛིན་པ་ཡིན།
MIC 7:3 དེ་དག་གི་ལག་ཟུང་ནི་ངན་པ་བྱེད་པར་མཁས་ལ། རྒྱལ་པོ་དང་ཁྲིམས་དཔོན་རྣམས་ཀྱིས་ལྐོག་རྔན་ལེན་པ་དང་། ཐོབ་གོ་ས་ཅན་གྱིས་རང་སེམས་ཀྱི་འདོད་པའི་གཏམ་སྨྲས་ནས་ཕན་ཚུན་ངན་འབྲེལ་བྱེད་དོ། །
MIC 7:4 དེ་དག་ཁྲོད་ཀྱི་མཆོག་ནི་གཟེ་མ་ར་མགོ་དང་མཚུངས་ལ། ཆེས་གཞུང་དྲང་ཡིན་པ་ཡང་ཚེར་མའི་ར་སྐྱོར་ཙམ་ལས་མ་འདས། སོ་པ་ཡིས་གསུངས་པའི་ཉེས་ཆད་གཅོད་པའི་ཉིན་མོ་སླེབས་འོང་སྟེ། དེ་དག་གི་ནང་དུ་ཟིང་ཆ་ལངས་ནས་བདེ་བ་མེད་དོ། །
MIC 7:5 ཁྱིམ་མཚེས་ལ་ཡིད་རྟོན་མ་བྱེད་ཅིག གྲོགས་མཆོག་ལ་ཡང་ཡིད་ཆེས་མ་བྱེད་ཅིག ཐ་ན་རང་གི་པང་དུ་ཉལ་བའི་ཆུང་མ་ལ་ཡང་ཁྱོད་ཀྱི་ངག་དམ་པོར་བསྡམ་དགོས།
MIC 7:6 ཅི་ལ་ཞེ་ན། བུ་ཡིས་ཕ་ལ་མཐོང་ཆུང་བྱེད་པ་དང་། བུ་མོས་མ་ལ་བཀག་འགོག་བྱེད་ཅིང་། མནའ་མས་སྒྱུག་མོར་འགོག་རྒོལ་བྱེད་པར་འགྱུར་ཏེ། མི་ཡི་དགྲ་བོ་ནི་རང་གི་ཁྱིམ་མི་ཡིན་ནོ། །
MIC 7:7 འོན་ཀྱང་བདག་གིས་དཀོན་མཆོག་ཡ་ཝཱེ་ལ་རེ་ལྟོས་བཅངས་ནས། བདག་ལ་སྐྱབས་མཛད་པའི་དཀོན་མཆོག་ལ་རེ་སྒུག་བྱེད་དེ། ངའི་དཀོན་མཆོག་གིས་ང་ལ་གསན་པར་འགྱུར།
MIC 7:8 ཀྱེ་ངའི་དགྲ་བོ། ང་ལ་ངོམ་ཟིལ་མ་སྟོན་ཅིག ང་ནི་ས་རུ་འགྱེལ་ན་ཡང་ཡར་ལང་བ་དང་། མུན་པར་བསྡད་ཀྱང་དཀོན་མཆོག་ཡ་ཝཱེ་ནི་ང་ཡི་འོད་དུ་འགྱུར་རོ། །
MIC 7:9 ཁོང་གིས་ངའི་ཆེད་དུ་དག་འབུད་དང་དཀར་འདོན་མཛད་པའི་བར་དུ། ངས་དཀོན་མཆོག་ཡ་ཝཱེའི་ཐུགས་ཁྲོ་དང་དུ་ལེན་པར་བྱའོ། །ཅི་ལ་ཞེ་ན། ངས་ཁོང་ལ་འགལ་བའི་སྡིག་པ་བྱས་པ་ཡིན། ཁོང་གིས་ང་ནི་འོད་ཟེར་ནང་དུ་འཁྲིད་པ་དང་། ངས་ཀྱང་ཁོང་གི་དྲང་བདེན་མཇལ་ངེས་ཡིན།
MIC 7:10 དེའི་དུས་སུ་ངའི་དགྲ་ཟླས་དོན་འདི་མཐོང་ནས་ངོ་ཚ་བར་འགྱུར་ལ། སྔོན་ཆད་དེས་ང་ལ་ན་རེ། ཁྱོད་ཀྱི་དཀོན་མཆོག་ཡ་ཝཱེ་གང་དུ་བཞུགས་སམ་ཞེས་སྨྲས། ངས་ཁོ་ལ་ལས་འབྲས་ཕོག་པ་དངོས་སུ་མཐོང་ངེས་ཡིན་ལ། ད་ལྟ་ཁོ་རང་ནི་སྲང་ལམ་གྱི་འདམ་བག་བཞིན་རྡོག་རོལ་གཏོང་ངེས་ཡིན།
MIC 7:11 ཁྱོད་ཀྱི་མཁར་སླར་ཡང་རྩིག་པའི་དུས་དེ་སླེབས་པ་དང་། ཉིན་མོ་དེར་ཁྱོད་ཀྱི་ས་མཚམས་རྒྱང་ཐག་རིང་པོའི་བར་དུ་རྒྱས་པར་འགྱུར་རོ། །
MIC 7:12 ཉིན་མོ་དེར་དེ་དག་ནི་ཨ་སུར་དང་ཨེ་ཅིབ་ཀྱི་གྲོང་ཁྱེར་རྣམས་དང་། ཨེ་ཅིབ་ནས་གཙང་པོ་ཆེན་པོ་དང་། རྒྱ་མཚོ་འདི་ནས་རྒྱ་མཚོ་གཞན་དང་། རི་བོ་འདི་ནས་རི་བོ་དེའི་བར་དུ་ཐམས་ཅད་ཁྱོད་ཀྱི་རྩར་སླེབས་འོང་།
MIC 7:13 འོན་ཀྱང་ཡུལ་མི་རྣམས་ཀྱི་རྐྱེན་དང་། ཁོ་ཚོས་སྤྱོད་པ་སྤྱད་པའི་མཇུག་འབྲས་ཀྱི་དབང་གིས་ས་གཞི་སྟོངས་པར་འགྱུར་རོ། །
MIC 7:14 ཁྱེད་ཀྱིས་རྩྭ་ཆུ་འཛོམས་པའི་ཡུལ་དུ་ཉིད་ཀྱི་དབྱུག་པས་ཁེར་རྐྱང་དུ་ལུས་པའི་མི་རྣམས་ཏེ་ཁྱེད་ཀྱི་ནོར་སྐལ་ཡིན་པའི་ལུག་ཁྱུ་འཚོ་བར་མཛོད། དེ་དག་ལ་གནའ་ལྟར་པཱ་ཤན་དང་གིལ་ཨད་དུ་གཟིགས་སྐྱོང་འཐོབ་པར་གྱུར་ཅིག
MIC 7:15 ཨེ་ཅིབ་ཡུལ་ནས་ཐོན་པའི་ཉིན་མོ་བཞིན་དུ། ངས་དེ་དག་ལ་ངོ་མཚར་བའི་འཕྲིན་ལས་རྣམས་སྟོན་པར་བྱའོ། །
MIC 7:16 མི་རིགས་རྣམས་ཀྱིས་དེ་མཐོང་ཞིང་། སྟོབས་ཤུགས་ཆེ་ན་ཡང་ངོ་ཚ་བར་འགྱུར་ལ། དེ་དག་གིས་རང་གི་ལག་པས་སྨྲ་སྒོ་གཅོད་ཅིང་། རྣ་བ་བཀབ་ནས་མི་མཉན་ནོ། །
MIC 7:17 དེ་དག་གིས་སྦྲུལ་ལྟར་ས་ལྡག་ཅིང་། ལྟོ་འགྲོ་བཞིན་དུ་འདར་ཞིང་འདར་བཞིན་རང་གི་ཚང་རྣམས་དང་འབྲལ་བར་འགྱུར། དེ་དག་འཇིགས་ཤིང་རང་ཅག་གི་དཀོན་མཆོག་ཡ་ཝཱེའི་ཕྱོགས་སུ་འོང་བ་དང་། ཁྱོད་ཀྱི་དབང་གིས་དངངས་པར་འགྱུར་རོ། །
MIC 7:18 མི་ལ་ཉེས་ཆད་མི་གཅོད་ཅིང་། རང་གི་ནོར་སྐལ་ནང་གི་ལྷག་ལུས་རྣམས་ལ་དགོངས་ཡངས་གནང་བའི་དཀོན་མཆོག་གཞན་སུ་ཞིག་ཡོད་དམ། ཁོང་ནི་དུས་གཏན་དུ་ཐུགས་ཁྲོ་བར་མི་བྱ་ཞིང་། དྲིན་གྱིས་སྐྱོང་བ་ལ་ཐུགས་མཉེས་པའོ། །
MIC 7:19 ཁོང་གིས་ཞལ་ཚུར་འཁོར་ནས་རང་ཅག་ལ་སྙིང་རྗེ་དགོངས་ཞིང་། རང་ཅག་གི་སྡིག་པ་རྣམས་ཞབས་འོག་ཏུ་གནོན་པར་འགྱུར་ཏེ། ཁོང་གིས་རང་ཅག་གི་ཉེས་སྐྱོན་ཐམས་ཅད་རྒྱ་མཚོའི་གཏིང་དུ་འདོར་བར་འགྱུར།
MIC 7:20 གནའ་དུས་ངེད་ཀྱི་ཕ་མེས་རྣམས་ལ་ཞལ་བཞེས་གནང་བ་བཞིན་དུ། ཡ་ཀོབ་ལ་ཐུགས་དྲང་པོ་དང་། ཨབ་ར་ཧམ་ལ་བྱམས་བརྩེ་མངོན་པར་མཛད་དོ།། །།
NAH 1:1 དེ་ཡང་ནིན་ཝེ་གྲོང་ཁྱེར་སྐོར་གྱི་བཀའ་ལུང་སྟེ། ཨེལ་ཀོ་སི་པ་ནཱ་ཧུམ་ལ་ཐོབ་པའི་ཞལ་གཟིགས་ཀྱི་མདོ་ནི་འདི་ལྟ་སྟེ།
NAH 1:2 དཀོན་མཆོག་ཡ་ཝཱེ་ནི་ཕྲག་དོག་ཅན་དང་ལན་འཇལ་བའི་དཀོན་མཆོག་ཡིན་ལ། དཀོན་མཆོག་ཡ་ཝཱེས་ལན་འཇལ་བར་མ་ཟད་ད་དུང་ཐུགས་ཁྲོ་མེ་ལྟར་འབར་ཞིང་། ཁོང་གིས་ཉིད་ཀྱི་དགྲ་ལ་ལན་འཇལ་བ་དང་། ཁོང་ནི་དགྲ་ལ་ཐུགས་རབ་ཏུ་ཁྲོ་བ་ཡིན།
NAH 1:3 དཀོན་མཆོག་ཡ་ཝཱེ་རང་དགར་ཐུགས་མི་ཁྲོ་ལ། ཁོང་ནི་མཐུ་བོ་ཆེ་ཡིན་ཞིང་། ཁོང་གིས་རྩ་བ་ནས་ཉེས་ཅན་རྣམས་ཉེས་མེད་དུ་མི་བརྩི་སྟེ། དཀོན་མཆོག་ཡ་ཝཱེ་ནི་རླུང་འཚུབ་དང་དྲག་ཆར་ཁྲོད་ནས་ཕེབས་འོང་ལ། སྤྲིན་ཕུང་རྣམས་ཁོང་གི་ཞབས་འོག་གི་ས་རྡུལ་ཡིན་ནོ། །
NAH 1:4 ཁོང་གིས་རྒྱ་མཚོར་བཀའ་བཀྱོན་གནང་བ་ཙམ་གྱིས་རྒྱ་མཚོ་སྐམ་ཞིང་། ཁོང་གིས་གཙང་པོ་ཐམས་ཅད་སྐམ་པར་མཛད་དེ། པཱ་ཤན་དང་ཀར་མེལ་གྱི་རྩྭ་ཐང་སྐམ་པ་དང་། ལེ་པཱ་ནོན་གྱི་མེ་ཏོག་ཡང་རྙིད་ནས་ལྷུང་བའོ། །
NAH 1:5 ཁོང་གི་སྤྱན་སྔར་རི་བོ་རྣམས་འདར་ཞིང་། རི་ཕྲན་རྣམས་ཞུ་བར་འགྱུར་ལ། ས་གཞི་ཁོང་གི་དྲུང་དུ་གཡོ་ཞིང་རྒུད་པར་འགྱུར་བ་དང་། ས་གཞི་དང་དེའི་སྟེང་དུ་གནས་པ་ཐམས་ཅད་ཀྱང་དེ་བཞིན་ཡིན་ནོ། །
NAH 1:6 ཁོང་གི་ཁྲོ་གཏུམ་འོག་ཏུ་སུ་ཞིག་ཚུགས་ནུས་སམ། ཁོང་གི་ཐུགས་ཁྲོ་སུ་ཞིག་གིས་བཟོད་ཐུབ་བམ། ཁོང་གི་ཐུགས་ཁྲོ་ཆེན་པོ་ནི་མེ་ལྟར་འཕྱུར་བ་དང་། བྲག་རྡོ་ཡང་ཁོང་གི་དྲུང་དུ་གས་པར་གྱུར།
NAH 1:7 དཀོན་མཆོག་ཡ་ཝཱེ་ནི་ལེགས་པོ་ཡིན་ཏེ། དཀའ་སྡུག་གི་དུས་སུ་ཁོང་ནི་མི་རྣམས་ཀྱི་སྐྱབས་གནས་ཡིན་ལ། ཁོང་ལ་བརྟེན་པའི་མི་རྣམས་ཁོང་གིས་མཁྱེན་ནོ། །
NAH 1:8 ཡིན་ན་ཡང་ཁོང་གིས་ཆུ་ལོག་ཆེན་པོས་ནིན་ཝེ་བསྣུབ་པར་མཛད་ཅིང་། ཁོང་གི་དགྲ་བོ་རྣམས་མུན་པའི་ནང་དུ་སྐྲོད་པར་འགྱུར།
NAH 1:9 ཀྱེ་ནིན་ཝེ་པ་རྣམས། ཁྱོད་རྣམས་ཀྱིས་ཇུས་ངན་གང་ཞིག་བཤམས་ནས་དཀོན་མཆོག་ཡ་ཝཱེར་རྒོལ་བ་ཡིན་ནམ། ཁོང་གིས་ཡོངས་སུ་མེད་པར་མཛད་ཅིང་། དཀའ་སྡུག་ཡང་བསྐྱར་འབྱུང་བར་མི་འགྱུར།
NAH 1:10 དེ་དག་ནི་དཀྲིས་ནས་མདུད་པ་བརྒྱབ་པའི་ཚེར་མ་བཞིན་དང་། ཆང་གིས་ར་བཟི་བའི་མི་དང་སོག་མ་སྐམ་པོ་ཡོངས་སུ་མེར་བསྲེགས་པ་དང་མཚུངས།
NAH 1:11 ངན་པ་འགོད་མཁན་ཏེ་ཇུས་ངན་བཤམས་ནས་དཀོན་མཆོག་ཡ་ཝཱེར་རྒོལ་བའི་མི་ནི་ཁྱོད་ལས་ཕྱི་རུ་ཐོན་ནོ། །
NAH 1:12 ཡང་དཀོན་མཆོག་ཡ་ཝཱེས་འདི་སྐད་དུ། ནིན་ཝེ་པའི་དམག་ཆས་ཆ་ཚང་ཞིང་མི་གྲངས་མང་མོད། འོན་ཀྱང་དེ་དག་ཚར་དུ་བཅད་ནས་མེད་པར་འགྱུར། ཀྱེ་ཡ་ཧུ་དཱ། ངས་ཁྱོད་ལ་སྡུག་བསྔལ་མྱང་དུ་བཅུག་ན་ཡང་ད་ཕྱིན་ཆད་ཁྱོད་རང་སྡུག་ལ་མི་སྦྱར་རོ། །
NAH 1:13 དེས་ཁྱོད་ཀྱི་མཇིང་ལ་བཀལ་བའི་གཉའ་ཤིང་ནི་ངས་ད་ལྟ་གཅོག་ཅིང་། ཁྱོད་ཀྱི་ལྕགས་ཐག་རྣམས་དུམ་བུར་གཅོད་པར་འགྱུར་ཞེས་གསུངས་སོ། །
NAH 1:14 ནིན་ཝེའི་སྐོར་ལ་དཀོན་མཆོག་ཡ་ཝཱེས་བཀའ་བབས་པ་སྟེ། ཁྱོད་ཀྱི་མི་རབས་ཆད་དེ་མིང་ཙམ་ཡང་ལུས་པར་མི་འགྱུར་ལ། ངས་ཁྱོད་ཀྱི་ལྷ་ཁང་ནང་གི་སྐུ་འདྲ་བརྐོས་མ་དང་བླུག་སྐུ་རྣམས་མེད་པར་བཟོ་ཞིང་། ཁྱོད་ནི་ཐ་ཤལ་ཡིན་པས། ངས་ཁྱོད་ཀྱི་ཕྱིར་དུ་དུར་ས་གྲ་སྒྲིག་བྱེད་ངེས་ཡིན།
NAH 1:15 ལྟོས་ཤིག འཕྲིན་བཟང་སྒྲོག་ཅིང་ཞི་བདེ་ཁྱབ་སྒྲོག་བྱེད་མཁན་གྱི་ཞབས་ནི་རི་བོ་སྟེང་དུ་འཛེགས་ནས་ན་རེ། ཀྱེ་ཡ་ཧུ་དཱ། ད་ནི་ཁྱོད་ཀྱིས་དུས་ཆེན་སྲུངས་ལ་རང་གི་དམ་བཅའ་སྒྲུབས་ཤིག ཅིའི་ཕྱིར་ཞེ་ན། ཕྱིན་ཆད་མི་ངན་དེ་ཁྱོད་ཀྱི་དཀྱིལ་ནས་མི་འགྲོ་ཞིང་། དེ་ནི་རྩ་བ་ནས་མེད་པར་བཟོས་པའོ་ཞེས་གསུངས་སོ། །
NAH 2:1 ཀྱེ་ནིན་ཝེ། ཡུལ་ཁམས་གཏོར་མཁན་ཡར་འོངས་ནས་ཁྱོད་ལ་རྒོལ་བར་འགྱུར་བས། ཁྱོད་ཀྱིས་བཙན་རྫོང་བརྟན་པོར་སྲུངས་ཤིག གཟབ་གཟབ་ངང་ལམ་བཀག་ནས་ཁྱོད་ཀྱི་རྐེད་རགས་དམ་པོར་བཅིངས་ཏེ་སྟོབས་ཤུགས་ཆེ་རུ་སྐྱེད་ཅིག
NAH 2:2 ཡིན་ཡང་། ཡེས་ར་ཨེལ་གྱི་གཟི་དཔལ་བཞིན་དུ། དཀོན་མཆོག་ཡ་ཝཱེས་ཡ་ཀོབ་ཀྱི་གཟི་དཔལ་ཡང་བསྐྱར་གསོ་བར་མཛད་དེ། ཅི་ལ་ཞེ་ན། འཕྲོག་བཅོམ་བྱེད་མཁན་རྣམས་ཀྱིས་སྔར་དེ་དག་བཅོམ་ནས་སྟོངས་པར་བྱས་ཏེ། དེ་དག་གི་རྒུན་འབྲུམ་ཤིང་གི་ཡལ་ག་རྣམས་ཀྱང་བརླགས་པས་སོ། །
NAH 2:3 དེའི་དཔའ་བོ་རྣམས་ཀྱི་ཕུབ་ནི་དམར་པོ་ཡིན་ཞིང་། དམག་མི་རྣམས་ཀྱིས་གྱོན་གོས་མཚལ་མདོག་གྱོན། དེས་ཕར་རྒོལ་བར་གྲ་སྒྲིག་བྱེད་པའི་དུས་སུ། ཤིང་རྟའི་རྣོ་ལྕགས་རྣམས་མེ་ལྟར་འོད་ཆེམ་ཆེམ་བྱེད་ཅིང་། རྟ་དམག་རྣམས་མགྱོགས་མྱུར་ངང་རྒྱུག་བཞིན་འདུག
NAH 2:4 ཤིང་རྟ་རྣམས་ནི་སྲང་ལམ་དུ་ཧར་རྒྱུག་བྱེད་ཅིང་། ཐང་ཆེན་དུ་ཡར་རྒྱུག་མར་རྒྱུག་བྱེད་པ་དང་། དེ་དག་ལ་བལྟས་ཚེ་དཔལ་འབར་དང་མཚུངས་ལ། རྒྱུག་དུས་སུ་གློག་འཁྱུག་པ་དང་འདྲའོ། །
NAH 2:5 དེ་ནས་ཨ་སུར་རྒྱལ་པོས་ཁོང་གི་བློན་ཆེན་རྣམས་བསྡུས་པ་ན། དེ་དག་འཁྱར་འཁྱོར་དུ་འོངས་ཤིང་། བྲེལ་འཚུབ་ཆེན་པོས་མཁར་གྱི་སྟེང་དུ་འཛེགས་ཏེ། འགེབས་སྲུང་ཡོ་ཆས་ཡར་བསྒྲེངས་པའོ། །
NAH 2:6 ཆུ་འགག་ཐམས་ཅད་ཕྱེས་པ་དང་། ཕོ་བྲང་ཡང་བསྣུབས་པར་གྱུར།
NAH 2:7 འདི་ལྟར་ཐུགས་ཐག་བཅད་ཟིན་པས་རྒྱལ་མོ་གཅེར་བུར་བཙོན་དུ་ཁྲིད་པ་དང་། ཕོ་བྲང་གི་ཞལ་ཏ་མ་རྣམས་ངུ་བའི་སྒྲ་ནི་ཕུག་རོན་བཞིན་ཡིན་ལ། མི་རེ་རེས་བྲང་ཁོག་རྡུང་བཞིན་ངུ་ཤུབ་བརྒྱབ་ཏོ། །
NAH 2:8 གནའ་ནས་བཟུང་སྟེ་ནིན་ཝེ་ནི་ཆུ་རྫིང་ཞིག་དང་འདྲ་བར་གནས་ཀྱང་། ད་ནི་མི་རྣམས་ཕྱོགས་བཞིར་འབྲོའོ། །མི་རྣམས་ཀྱིས་སྐད་བརྒྱབ་སྟེ་མཚམས་ཞོག མཚམས་ཞོག་ཅེས་སྨྲས་ཀྱང་ཕྱིར་ལོག་མཁན་མ་བྱུང་ངོ་། །
NAH 2:9 ཁྱོད་རྣམས་ཀྱིས་གསེར་དང་དངུལ་རྣམས་ཕྲོགས་ཤིག བསགས་དངུལ་རྫོགས་མཐའ་མེད་པ་དང་། མཛེས་སྡུག་ལྡན་པའི་ནོར་རྫས་རྩ་ཆེན་བགྲང་ལས་འདས་པ་ཡིན།
NAH 2:10 ད་ལྟ་སྟོང་བར་ལུས་ཤིང་དབེན་སྟོང་དུ་གྱུར་ནས་གཅིག་ཀྱང་ལུས་མེད་ལ། མི་སེམས་དཔའ་ཞུམ་པ་དང་པུས་མོ་གཉིས་འདར་ཏེ། རྐེད་པ་ཡོངས་ལ་ཟུག་གཟེར་ལངས་ནས་ངོ་མདངས་ཐམས་ཅད་སྐྱ་བོར་གྱུར་པའོ། །
NAH 2:11 སེང་གེའི་བྲག་ཕུག་གང་དུ་ཡོད་དམ། སེང་གེ་དར་མ་གསོ་བའི་གནས་གང་དུ་ཡོད་དམ། ཕོ་སེང་དང་མོ་སེང་། སེང་ཕྲུག་རྣམས་འཇིགས་སྐྲག་མེད་པར་ལྷོད་ལྷོད་བྱས་ནས་བསྡད་ཆོག་པའི་གནས་གང་དུ་ཡོད་དམ།
NAH 2:12 ཕོ་སེང་གིས་སེང་ཕྲུག་གི་ཕྱིར་དུ་ཁ་ཟས་འདང་ངེས་ཕྲལ་བ་དང་། མོ་སེང་གི་ཆེད་དུ་གསོན་པོ་རྣམས་མིད་པ་དགག་ནས་བསད་དེ། རང་གི་བྲག་ཕུག་རི་དྭགས་ཀྱི་ཤ་ཡིས་གང་བ་དང་། ཤ་པགས་ཕྲལ་བ་དེས་དོང་ཡང་བཀང་བར་བྱས།
NAH 2:13 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ལ་རྒོལ་བར་འགྱུར་ཞིང་། ངས་ཁྱོད་ཀྱི་ཤིང་རྟ་རྣམས་བསྲེགས་ནས་དུ་བར་བསྒྱུར་ལ། རལ་གྲི་ཡིས་ཁྱོད་ཀྱི་སེང་གེ་དར་མ་རྣམས་ཁྱུར་མིད་གཏོང་བ་དང་། ངས་ས་ནས་ཁྱོད་ཀྱི་གསོད་བྱ་རྣམས་མེད་པར་བཟོ་ཞིང་། ཁྱོད་ཀྱི་ཕོ་ཉའི་སྒྲ་ཡང་མི་ཡིས་ཡང་བསྐྱར་ཐོས་པར་མི་འགྱུར་རོ་ཞེས་གསུངས་སོ། །
NAH 3:1 མི་ཁྲག་བཞུར་དུ་བཅུག་པའི་གྲོང་ཁྱེར་འདི་ལ་ཆག་སྒོ་འབྱུང་བ་ཡིན། གྲོང་ཁྱེར་ཡོངས་ཀྱིས་མགོ་གཡོག་མགོ་སྐོར་གཏོང་ཞིང་གདུག་རྩུབ་ཀྱིས་ཁེངས་པ་དང་། འཕྲོག་བཅོམ་བྱེད་པའི་དོན་ནི་ནམ་ཡང་མཚམས་མ་ཆད།
NAH 3:2 རྟ་ལྕག་གི་སྒྲ་དང་འཁོར་ལོའི་སྒྲ་ནི་ཆེ་ཞིང་། རྟ་མཆོག་བང་གིས་རྒྱུག་པ་དང་ཤིང་རྟ་རྣམས་ལང་ལོང་གིས་རྒྱུག
NAH 3:3 རྟ་དམག་རྣམས་གདོང་མཆོང་བྱེད་པ་དང་། རལ་གྲིའི་འོད་ནི་ཆེམ་ཆེམ་དུ་འཕྲོ་ཞིང་། མདའ་དང་མདུང་ལས་འོད་འཕྲོས་ནས་མི་ཤིན་ཏུ་མང་པོ་བསད་དེ་མི་རོ་ཕུང་ཆེན་སྤུངས་ཡོད་ལ། མི་རོ་བགྲང་ལས་འདས་པས་མི་རྣམས་དེར་ཐོགས་ནས་སར་འགྱེལ་བ་སྟེ།
NAH 3:4 དེ་ནི་བྱད་གཟུགས་མཛེས་པའི་སྨད་འཚོང་མ་མང་པོས་ལོག་གཡེམ་བྱས་ཤིང་སྒྱུ་འཕྲུལ་སྟོན་པར་གོམས་ཡོད། དེས་གཡེམ་སྤྱོད་ལ་བརྟེན་ནས་མི་རིགས་ཀུན་བསླུས་ཤིང་སྒྱུ་འཕྲུལ་ལ་བརྟེན་ནས་མི་སྡེ་ཀུན་བྲན་དུ་བཀོལ་བས་སོ། །
NAH 3:5 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ལ་རྒོལ་བར་འགྱུར་ཞིང་། ངས་ཁྱོད་ཀྱི་སྨད་གཡོགས་ཡར་བཀྱགས་ནས་གདོང་ལ་འགེབ་ཅིང་། མི་རིགས་ཀུན་ལ་ཁྱོད་གཅེར་བུ་ཡིན་པ་མཐོང་བར་བྱ་ཞིང་། རྒྱལ་ཁམས་རྣམས་ལ་ཁྱོད་ཀྱི་ངོ་ཚ་མཐོང་བར་འཇུག་གོ །
NAH 3:6 ངས་མི་གཙང་བ་དང་ཞེན་ལོག་གི་རྫས་ནི་ཁྱོད་ཀྱི་སྟེང་དུ་འཕངས་ནས་ཁྱོད་ལ་བརྙས་བཅོས་གཏོང་ཞིང་། ཁྱོད་ནི་མི་རྣམས་ཀྱི་ངོ་མཚར་བའི་ལྟད་མོར་བསྒྱུར་བར་བྱའོ། །
NAH 3:7 དེ་ནས་ཁྱོད་མཐོང་མཁན་ཐམས་ཅད་བྲོས་ནས་ཁྱོད་དང་འབྲལ་ཞིང་ན་རེ། ནིན་ཝེ་སྟོངས་པར་གྱུར་ཏོ། །སུ་ཞིག་དེའི་ཆེད་དུ་ཡིད་སྐྱོ་བར་འགྱུར་རམ་ཞེས་ཟེར་ཞིང་། ངས་གནས་གང་ནས་ཁྱོད་ལ་སེམས་གསོ་བྱེད་མཁན་རྙེད་ཐུབ་བམ་ཞེས་གསུངས་སོ། །
NAH 3:8 ཁྱོད་རང་ནོ་ཨ་མོན་ལས་སྟོབས་དང་ལྡན་པ་ཡིན་ནམ། ནོ་ཨ་མོན་ནི་ནེ་ལོ་གཙང་པོའི་ཆུ་རྒྱུན་འབབ་ཡུལ་དུ་ཆགས་ཤིང་། ཕྱོགས་བཞི་ཆུ་ཡིས་བསྐོར་ཡོད་པ་དང་། རྒྱ་མཚོ་དེ་ཡི་འཐབ་རགས་ཡིན་ལ། ཆུ་ནི་དེའི་ལྕགས་རི་ཡིན་ནོ། །
NAH 3:9 གུ་ཤ་དང་ཨེ་ཅིབ་གཉིས་པོ་ནི་དེའི་འཛད་མཐའ་མེད་པའི་སྟོབས་ཤུགས་ཡིན་ཞིང་། །ཕུ་ཏཱ་པ་དང་ལེབ་ཡཱ་པ་གཉིས་ནི་དེའི་དཔུང་གྲོགས་ཡིན་ནོ། །
NAH 3:10 ཡིན་ན་ཡང་དེ་ནི་ད་དུང་ཕར་བསྐྲད་ནས་བཙོན་དུ་ཁྲིད་པ་དང་། མོའི་ཕྲུ་གུ་རྣམས་ལམ་མདོ་དག་ཏུ་སར་བརྒྱབ་ནས་ཤི་བ་དང་། མི་རྣམས་ཀྱིས་མོའི་བཀུར་འོས་པ་རྣམས་ཀྱི་ཕྱིར་དུ་རྒྱན་འཕངས་ནས། མོའི་མི་ཆེན་མཐའ་དག་ལ་ལྕགས་སྒྲོག་བརྒྱབ་ཏོ། །
NAH 3:11 ཡང་ཁྱོད་ནི་ཆང་གིས་བཟི་ཞིང་སྐུང་བར་འགྱུར་ཏེ། ཁྱོད་ཀྱིས་དགྲ་ཟླའི་རྐྱེན་དབང་གིས་སྐྱབས་བཅོལ་ས་འཚོལ་བར་འགྱུར།
NAH 3:12 ཁྱོད་ཀྱི་བཙན་རྫོང་ཐམས་ཅད་ནི་སྨིན་མ་ཐག་པའི་སེ་ཡབ་ཤིང་གི་ཤིང་ཏོག་དང་འདྲ་ཞིང་། གལ་ཏེ་གཡོ་བར་གྱུར་ན་ཟ་འདོད་ཀྱི་སྐྱེས་བུའི་ཁ་ནང་དུ་ལྷུང་བར་འགྱུར།
NAH 3:13 ལྟོས་ཤིག ཁྱོད་ཀྱི་དམག་མི་ཐམས་ཅད་ནི་བུད་མེད་དང་འདྲ་སྟེ། ཁྱོད་ཀྱི་མངའ་ཁོངས་ནང་གི་སྒོ་ཆེན་རེ་རེ་དགྲ་ཟླའི་ཕྱོགས་སུ་ཕྱེས་ཤིང་། ཁྱོད་ཀྱི་སྒོ་གཏན་རྣམས་མེས་བསྲེགས་པའོ། །
NAH 3:14 ཁྱོད་ཀྱིས་ཆུ་བླངས་ཏེ་རང་གི་ལྕགས་རི་རྣམས་བརྟན་པོར་བྱེད་པ་དང་དགྲ་ཡིས་མཐའ་ནས་བསྐོར་བར་གྲ་སྒྲིག་བྱས་ཏེ། འདམ་ནང་བབས་ཏེ་འཇིམ་པ་བརྫིས་ནས་སོ་ཕག་སྲེག་ཁུང་ཞིག་གསོ་བྱེད་དགོས།
NAH 3:15 གནས་དེར་མེ་ཡིས་ཁྱོད་བསྲེག་ཅིང་། རལ་གྲིས་ཁྱོད་ཚར་དུ་གཅོད་པ་དང་ཆ་ག་པ་ཟ་བ་བཞིན་དུ་ཁྱུར་མིད་གཏོང་བས། ཁྱོད་ཀྱི་མི་གྲངས་ནི་ཆ་ག་པ་དང་ཆ་ག་འབུ་བཞིན་མང་བར་གྱིས་ཤིག
NAH 3:16 ཁྱོད་ཀྱིས་རང་གི་ཚོང་པ་འཕེལ་བར་བྱས་ནས་ནམ་མཁའི་སྐར་མ་ལས་ཀྱང་མང་ནའང་། ཆ་ག་པས་ཟོས་ཚར་རྗེས་འཕུར་འགྲོ་བ་ཡིན།
NAH 3:17 ཁྱོད་ཀྱི་གཙོ་འཛིན་ནི་ཆ་ག་འབུ་བཞིན་མང་ཞིང་། ཁྱོད་ཀྱི་དམག་དཔོན་ནི་ཨ་ཚག་ཚག་པའི་ཁྱུ་ལྟར་ཡོད་དེ། ནམ་ཟླ་འཁྱག་དུས་ར་སྐྱོར་གྱི་སྟེང་དུ་སྡོད་པ་དང་། ཉི་མ་འཆར་དུས་ཚང་མ་འཕུར་འགྲོ་ཞིང་། དེ་རྣམས་གང་དུ་ཡོད་པ་མི་ཡིས་རྟོགས་པར་མི་འགྱུར་རོ། །
NAH 3:18 ཀྱེ་ཨ་སུར་གྱི་རྒྱལ་པོ། ཁྱོད་ཀྱི་ལུག་རྫི་རྣམས་གཉིད་དུ་ཡུར་བ་དང་། ཁྱོད་ཀྱི་སྐུ་དྲག་རྣམས་ངལ་གསོས་པས། ཁྱོད་ཀྱི་མི་སྡེ་རྣམས་རི་ལུང་ཀུན་ལ་ཁ་ཐོར་དུ་སོང་ནས་དེ་རྣམས་བསྡུ་མཁན་གཅིག་ཀྱང་མེད་དོ། །
NAH 3:19 ཁྱོད་ཀྱི་རྨ་ཁ་ལ་གསོ་ཐབས་མེད་དེ། ཁྱོད་ལ་བྱུང་བའི་རྨ་ཁ་ནི་ཤིན་ཏུ་ཚབས་ཆེན་ཡིན་ནོ། །ཁྱོད་ཀྱི་དོན་དེ་ཐོས་མཁན་རྣམས་ཀྱིས་ཁྱོད་ཀྱི་ཕྱོགས་སུ་ཐལ་མོ་རྡེབ་པར་འགྱུར། ཅི་ལ་ཞེ་ན། ཁྱོད་ཀྱིས་རྒྱུན་ཆད་མེད་པར་སྤྱོད་ངན་སྤྱད་པ་དེའི་གནོད་འཚེ་མ་ཐེབས་པ་སུ་ཞིག་ཡོད་དམ།། །།
HAB 1:1 དེ་ཡང་ལུང་སྟོན་པ་ཧ་བཱ་ཁུག་གིས་ཞལ་གཟིགས་ལས་མཐོང་བའི་བཀའ་ལུང་ནི་འདི་ལྟ་སྟེ།
HAB 1:2 ཀྱེ་དཀོན་མཆོག་ཡ་ཝཱེ་ལགས། བདག་གིས་ཞུས་ཀྱང་ཁྱེད་ཀྱིས་མི་གསན་པར་དུས་ཇི་ཙམ་ལ་འདུག་གམ། དོན་གདུག་རྩུབ་ཅན་གྱི་རྐྱེན་གྱིས་ངས་ཁྱེད་ཀྱི་ཕྱོགས་སུ་འོ་དོད་བོས་ནའང་ཁྱེད་ཀྱིས་ད་དུང་སྐྱོབ་པར་མ་མཛད།
HAB 1:3 ཁྱེད་ཀྱིས་ཅིའི་ཕྱིར་ང་ལ་སྡིག་ཉེས་མཐོང་བར་མཛད་དམ། ཁྱེད་ཀྱིས་སྤྱོད་ངན་གཟིགས་ཀྱང་དེར་བཟོད་སྒོམ་བྱེད་པ་ཅི་ཡིན་ནམ། གཏོར་བརླག་དང་གདུག་རྩུབ་ནི་ངའི་མདུན་དུ་ཡོད་པ་དང་། རྩོད་པ་དང་འཐབ་རྩོད་ཀྱང་རྒྱུན་དུ་འབྱུང་ངོ་། །
HAB 1:4 དེ་བས་བཀའ་ཁྲིམས་མི་བརྩི་ཞིང་། དྲང་བདེན་མི་སྲུང་ལ། མི་ངན་པས་དྲང་བདེན་ཅན་གྱི་མཐའ་ནས་བསྐོར་བས་དྲང་བདེན་གོ་ལྡོག་པ་ཡིན།
HAB 1:5 ཁྱོད་རྣམས་ཀྱིས་མི་རིགས་ཀུན་ལ་ལྟོས་དང་ཤིན་ཏུ་ཧ་ལས་པར་འགྱུར། ཅིའི་ཕྱིར་ཞེ་ན། ཁྱོད་ཀྱི་མི་ཚེའི་ནང་དུ་ངས་དོན་ཞིག་མཛད་པར་འགྱུར་ཞིང་། གཞན་གྱིས་དོན་དེའི་སྐོར་ཁྱོད་རྣམས་ལ་བཤད་ཀྱང་ཁྱོད་རྣམས་དོན་དེ་ལ་ཡིད་མི་ཆེས་སོ། །
HAB 1:6 ངས་ཀལ་དི་པ་རྣམས་དར་བར་བཅུག་ནས། གདུག་རྩུབ་ཆེ་ཞིང་བྲེལ་འཚུབ་ཅན་གྱི་མི་སྡེ་དེ་ས་ཕྱོགས་ཀུན་ལ་ཁྱབ་པར་གྱུར་ཏེ། གཞན་གྱི་ཁྱིམ་གཞིས་བཙན་འཛིན་བྱེད་པ་དང་།
HAB 1:7 དེ་དག་ནི་རྔམ་བརྗིད་ཆེ་ལ་འཇིགས་སུ་རུང་བ་ཡིན་པས་རང་ཉིད་ཚད་མར་འཛིན་པ་དང་། ང་རྒྱལ་ཁེངས་དྲེགས་ཅན་ཡིན་ཞིང་།
HAB 1:8 དེ་ཚོའི་རྟ་ནི་གཟིག་ལས་མགྱོགས་ཤིང་། མཚན་མོའི་སྤྱང་ཀི་ལས་ཀྱང་གཏུམ་དྲག་ཆེ་ལ། དེ་དག་གི་རྟ་དམག་གདོང་མཆོང་བྱེད་ཀྱིན་རྒྱང་རིང་ནས་ཐོན་པ་དང་། དེ་དག་གིས་གླག་བཞིན་ལྡིང་སྐོར་བརྒྱབ་སྟེ་མྱུར་དུ་ཁྱུར་མིད་གཏོང་བའོ། །
HAB 1:9 དེ་དག་གིས་མདུན་ཕྱོགས་སུ་གདོང་གཏད་ནས་མཉམ་དུ་གདུག་རྩུབ་སྤྱོད་པ་དང་། བཙོན་པ་བགྲང་ལས་འདས་པ་ཐོབ་པའོ། །
HAB 1:10 དེ་དག་གིས་རྒྱལ་པོར་ཟུར་ཟ་དང་འགོ་དཔོན་རྣམས་ལ་འཕྱ་དམོད་བྱེད་ཅིང་། བཙན་རྫོང་རྣམས་ལ་ཁྲེལ་དགོད་བྱས་ནས་ས་རགས་བརྩིགས་ཏེ་གནས་དེ་བཙན་འཛིན་བྱེད།
HAB 1:11 དེ་དག་གིས་རང་གི་སྟོབས་ཤུགས་ལྷ་རུ་བཀུར་བ་དང་། རླུང་འཚུབ་བཞིན་གཡུགས་ནས་འགྲོ་ཞིང་སྡིག་ཅན་ཡིན་ནོ། །
HAB 1:12 ཀྱེ་ང་ཡི་དཀོན་མཆོག་ཡ་ཝཱེ་དང་བདག་གི་དམ་པ་ཉིད་ལགས། ཁྱེད་ནི་ཐོག་མ་ཉིད་ནས་བཞུགས་པ་མ་ཡིན་ནམ། ངེད་ཅག་ནི་འཆི་བར་མི་འགྱུར་རོ། །ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཁྲིམས་ཆད་གཅོད་དུ་དེ་དག་མངགས་པ་དང་། ཀྱེ་བྲག་རྡོ་ལགས། ཁྱེད་ཀྱིས་ཉེས་ཆད་གཅོད་དུ་དེ་དག་བསྐོས་པ་ཡིན།
HAB 1:13 ཁྱེད་ཀྱི་སྤྱན་ཟུང་ནི་རྣམ་དག་ཡིན་པས་ངན་པར་མི་གཟིགས་ལ། སྤྱོད་ངན་སྣང་མེད་དུ་མི་བསྐྱུར། དེས་ན་གཡོ་སྒྱུའི་སྦྱོར་བ་སྤེལ་བའི་མི་མཐོང་ཚེ་དེར་བཟོད་པ་ཅི་ཡིན་ནམ། མི་ངན་གྱིས་རང་ཉིད་ལས་དྲང་བདེན་ཡིན་པའི་མི་མེད་པར་བཟོ་དུས་ཁྱེད་ཉིད་ཞལ་རོག་བཞུགས་པ་ཅི་ཡིན་ནམ།
HAB 1:14 ཁྱེད་ཀྱིས་མི་ནི་རྒྱ་མཚོའི་ཉ་བཞིན་དང་། བདག་སྐྱོང་བྱེད་མཁན་མེད་པའི་ལྟོ་འགྲོའི་སྲོག་ཆགས་བཞིན་མཛད་པ་ཅི་ཡིན་ནམ།
HAB 1:15 ཀལ་དི་པས་དེ་ཐམས་ཅད་ལྕགས་ཀྱུས་ཡར་དྲངས་ཏེ། དྲ་རྒྱ་ཡིས་དེ་དག་འཛིན་པ་དང་། ཉ་དྲ་ཡིས་དེ་རྣམས་མཉམ་དུ་བསྡུས་ནས་དགའ་སྤྲོ་ཆེན་པོ་སྐྱེས་པས།
HAB 1:16 ཀལ་དི་པས་རང་གི་དྲ་རྒྱར་མཆོད་པ་ཕུལ་ནས་ཉ་རྒྱར་སྤོས་བདུགས་སོ། །ཅིའི་ཕྱིར་ཞེ་ན། དེ་ལ་བརྟེན་ནས་ཁོ་ཚོར་ཁ་ཟས་ཕུན་སུམ་ཚོགས་པ་ཐོབ་སྟེ། བཟའ་བཏུང་མོད་པོ་ཡོད་པ་ཡིན།
HAB 1:17 ཁོ་ཚོས་རང་གི་དྲ་རྒྱ་སྟོང་བར་མཛད་དེ། སྙིང་རྗེ་སྤུ་ཙམ་ཡང་མེད་པར་ཡུལ་ཁམས་གཞན་པའི་མི་སྡེ་རྣམས་གསོད་པ་ཡིན་ནམ།
HAB 2:1 ང་རང་བྱ་རའི་ལྕོག་མཁར་སྟེང་ལངས་ནས་ལྕགས་རིའི་སྟེང་འཛེགས་ཏེ། དཀོན་མཆོག་ཡ་ཝཱེས་ང་ལ་ཅི་ཞིག་གསུང་བ་དང་། ངའི་སྡུག་སྐད་ལ་ཅི་ལྟར་ལན་གནང་བར་གཟབ་གཟབ་བྱས་ནས་བལྟ་བར་བྱའོ། །
HAB 2:2 དཀོན་མཆོག་ཡ་ཝཱེས་ང་ལ་བཀའ་ལན་གནང་སྟེ་འདི་སྐད་དུ། ཞལ་གཟིགས་དེ་འཇིམ་པའི་བྱང་བུའི་སྟེང་དུ་ཕྲིས་ཤིག དེ་གསལ་པོར་བཀོད་ན་ཀློག་མཁན་རྣམས་ཀྱིས་ཀློག་བདེ་བར་འགྱུར།
HAB 2:3 ཞལ་གཟིགས་འདི་ནི་དུས་ངེས་ཅན་ཞིག་དང་འབྲེལ་ཡོད་པ་དང་། དངོས་སུ་འགྲུབ་པར་འགྱུར་བས་དོན་མེད་དུ་མ་ཡིན་ལ། འགོར་འགྱངས་བྱས་པ་འདྲ་ཡང་ད་དུང་སྒུག་དགོས། ཅིའི་ཕྱིར་ཞེ་ན། དོན་དེ་ནི་སླེབ་པར་འགྱུར་ལ་དེའི་ཚེ་འགོར་འགྱངས་མི་བྱེད་དོ། །
HAB 2:4 ཁོ་ཚོ་ནི་རང་རློམ་ཆེ་ཞིང་གཞུང་རྒྱུད་མི་དྲང་། འོན་ཀྱང་མི་རྣམ་དག་ནི་དད་པའི་སྒོ་ནས་འཚོ་བར་འགྱུར།
HAB 2:5 རྒྱུ་ནོར་གྱིས་གཡོ་ཟོལ་དང་ང་རྒྱལ་བསྐྱེད་པས་བདེ་བར་གནས་མི་ཐུབ་ལ། གཤིན་ཡུལ་བཞིན་དུ་འདོད་པ་བསྐྱེད་ཅིང་། ཡང་འཆི་བ་ནང་བཞིན་ནམ་ཡང་ཚིམ་པ་མེད་ལ། དེ་དག་གིས་རང་གི་ཕྱིར་དུ་མི་རིགས་ཐམས་ཅད་བསྡུ་ཞིང་མི་སྡེ་ཀུན་རང་ལ་དབང་བར་བྱེད་དོ། །
HAB 2:6 ཡུལ་ཁམས་དེ་ཐམས་ཅད་ཀྱི་མི་སྡེ་དག་གིས་དཔེ་དང་ཟུར་ཟ། གབ་ཚིག་བཅས་ཀྱིས་དེ་དག་ལ། གང་བྱུང་དུ་མི་གཞན་པའི་རྒྱུ་ནོར་བླངས་ཏེ། བཙན་དབང་གིས་བུ་ལོན་འདེད་མཁན་དག་ལ་ཆག་སྒོ་འབྱུང་བ་ཡིན། ཁོ་ཚོས་ག་དུས་བར་དུ་དེ་བཞིན་བྱེད་ཡོང་ངམ་ཞེས་ཟེར་ཞིང་།
HAB 2:7 བུ་ལོན་ཅན་རྣམས་གློ་བུར་ཉིད་ལ་ལང་མི་འོང་ངམ། ཁྱོད་འདར་དུ་འཇུག་མཁན་རྣམས་སད་པར་མི་འགྱུར་རམ། དེ་ནས་ཁྱོད་ནི་ཁོ་ཚོའི་བཅོམ་ནོར་དུ་འགྱུར་རོ། །
HAB 2:8 ཅིའི་ཕྱིར་ཞེ་ན། ཁྱོད་ཀྱིས་ཡུལ་ཁམས་མང་པོ་བཅོམ་ནས་མི་བསད་དེ་ཁྲག་བཞུར་དུ་བཅུག་པ་དང་། ཡུལ་ཁམས་ཀུན་གྱི་གྲོང་ཁྱེར་རྣམས་དང་དེའི་ནང་དུ་སྡོད་པའི་མི་རྣམས་ལ་གདུག་རྩུབ་སྤྱད་པས། ཡུལ་ཁམས་དེའི་ལྷག་ལུས་རྣམས་ཀྱིས་ཁྱོད་རང་འཇོམས་པར་འགྱུར།
HAB 2:9 རང་གི་ཁྱིམ་གཞིས་ཀྱི་ཕྱིར་དུ་ཐོབ་མི་འོས་པའི་རྒྱུ་ནོར་བསགས་པ་དང་། མཐོ་ས་ནས་སྡོད་ཁང་ཕུབ་སྟེ་ཆག་སྒོ་ལ་གཡོལ་བསམ་པ་ཁྱོད་རྣམས་ལ་ཆག་སྒོ་འབྱུང་།
HAB 2:10 ཁྱོད་ཀྱིས་ཡུལ་ཁམས་མང་པོའི་མི་སྡེ་ཚར་གཅོད་བྱེད་པའི་ཇུས་ངན་བཤམས་ཤིང་། རང་གི་ཁྱིམ་གཞིས་ངོ་ཚར་སྦྱར་ནས་འབྲས་བུ་ངན་པ་རང་ལ་འཁོར་བ་ཡིན།
HAB 2:11 ཐ་ན་རྩིག་པའི་རྡོ་ཡིས་སྐད་རྒྱག་ཅིང་། ཁང་པའི་གདུང་མས་ཀྱང་ལན་སྤྲོད་པར་འགྱུར།
HAB 2:12 མི་ཡི་ཁྲག་གིས་མཁར་བརྩིགས་པ་དང་། གདུག་ལས་ཀྱིས་གྲོང་ཁྱེར་འཛུགས་མཁན་ལ་ཆག་སྒོ་འབྱུང་།
HAB 2:13 མི་རྣམས་ཀྱིས་ངལ་རྩོལ་བྱས་ནས་ཐོབ་པ་དག་མེས་བསྲེག་པ་དང་། ཡུལ་ཁམས་ཀུན་གྱིས་དཀའ་བ་སྤྱད་དེ་ཐོབ་པ་དག་ནི་སྟོང་བར་འགྱུར་ལ། དོན་འདི་ཐམས་ཅད་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལས་བྱུང་བ་མ་ཡིན་ནམ།
HAB 2:14 ཆུ་བོ་རྣམས་ཀྱིས་ཇི་ལྟར་རྒྱ་མཚོ་བཀང་བ་བཞིན་དུ། དཀོན་མཆོག་ཡ་ཝཱེའི་གཟི་བརྗིད་རྟོགས་པའི་ཤེས་ཡོན་ནི་ས་གཞི་ཡོངས་སུ་ཁྱབ་པར་འགྱུར།
HAB 2:15 ཁྱིམ་མཚེས་ལ་ཁོང་ཁྲོ་དང་བཅས་ཆང་གཏོད་མཁན་དང་། དེའི་ལུས་གཅེར་བུ་མཐོང་བའི་ཆེད་དུ་ར་བཟི་བར་འཇུག་མཁན་ལ་ཆག་སྒོ་འབྱུང་།
HAB 2:16 ཁྱོད་རང་ངོ་ཚས་ཁེངས་པ་ལས་བཀུར་བར་མི་བྱ་སྟེ། ཁྱོད་ཀྱིས་ཀྱང་ཆང་འཐུང་ནས་ལུས་སྨད་མངོན་པར་གྱིས་ ཤིག དཀོན་མཆོག་ཡ་ཝཱེའི་ཕྱག་གཡས་པའི་ཕོར་བ་ནི་འཁོར་ནས་ཁྱོད་ལ་སྤྲོད་ཅིང་། དེའི་ཚེ་ཁྱོད་ཀྱི་གཟི་བརྗིད་ཡོད་ཚད་ངོ་ཚ་ཆེན་པོར་འགྱུར་རོ། །
HAB 2:17 ཅིའི་ཕྱིར་ཞེ་ན། ཁྱོད་ཀྱིས་ལེ་པཱ་ནོན་གྱི་ཕྱོགས་སུ་གདུག་རྩུབ་སྤྱད་པ་དང་། འཇིགས་སྐྲག་གིས་ཟིན་པའི་རི་དྭགས་རྣམས་བསད་ཅིང་། ཡང་མིའི་སྲོག་བཅད་དེ་ཁྲག་བཞུར་དུ་བཅུག་ནས། ས་གཞི་ཡོངས་ཀྱི་གྲོང་ཁྱེར་རེ་རེའི་ནང་སྡོད་པའི་མི་ཀུན་ལ་གདུག་རྩུབ་སྤྱད་པས་ཁྱོད་ཀྱང་དབང་འོག་ཏུ་བསྡུ་ངེས་ཡིན།
HAB 2:18 སྐུ་འདྲ་བརྐོས་མ་ལ་ཕན་ཐོགས་ཅི་ཞིག་ཡོད་དམ། དེ་ནི་བཟོ་བས་བརྐོས་པ་ཙམ་ཡིན་ཞིང་། སྐུ་འདྲ་བླུགས་མ་དང་དགེ་རྒན་རྫུས་མ་ལ་ཕན་ཐོགས་ཅི་ཞིག་ཡོད་དམ། བཟོ་བས་རང་ཉིད་ལ་བརྟེན་ནས་ལྷ་ལྐུགས་པ་རྣམས་བཟོས་པའོ། །
HAB 2:19 ཤིང་གི་གཟུགས་བརྙན་ལ་ཡར་ལོངས་ཞེས་སྨྲ་བ་དང་། རྡོ་ལྐུགས་པ་ལ་སད་པར་གྱུར་ཅིག་ཅེས་སྨྲ་མཁན་ལ་ཆག་སྒོ་འབྱུང་། དེ་ཡིས་ཁྱོད་ལ་ཅི་ལྟར་བཀའ་སློབ་གནང་ངམ། ལྟོས་ཤིག དེའི་ཕྱི་ལ་གསེར་དང་དངུལ་གྱིས་བརྒྱན་ན་ཡང་ནང་དུ་དབུགས་ཀྱི་རྒྱུ་བ་ནི་གཏན་ནས་མེད་དོ། །
HAB 2:20 ཡིན་ཡང་དཀོན་མཆོག་ཡ་ཝཱེ་ནི་ཁོང་གི་མཆོད་ཁང་དམ་པའི་ནང་དུ་བཞུགས་ལ། ས་གཞི་ཡོངས་ཀྱི་མི་རྣམས་ཁོང་གི་དྲུང་དུ་ཁུ་སིམ་མེར་འདུག་འོས་པ་ཡིན་ཞེས་གསུངས་སོ། །
HAB 3:1 ལུང་སྟོན་པ་ཧ་བཱ་ཁུག་གི་ཤིས་ག་ཡོན་གྱི་དབྱངས་ལ་གྱེར་བའི་གསོལ་འདེབས།
HAB 3:2 ཀྱེ་དཀོན་མཆོག་ཡ་ཝཱེ་ལགས། ངས་ཁྱེད་ཀྱི་གསུང་སྐད་ཐོས་པས་འཇིགས་སོ། །ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིན་འདི་དག་གི་ནང་དུ་ཉིད་ཀྱི་མཛད་འཕྲིན་རྣམས་ཡང་བསྐྱར་དར་ཞིང་མངོན་པར་མཛོད་ཅིག ཐུགས་ཁྲོ་བའི་དུས་སུའང་སྙིང་རྗེ་དགོངས་པར་མཛོད།
HAB 3:3 དཀོན་མཆོག་ནི་ཐེ་མཱན་ཡུལ་ནས་ཕེབས་ཤིང་། དམ་པ་ཉིད་ནི་ཕཱ་རན་རི་བོའི་ཕྱོགས་ནས་འོངས་ཏེ། ཁོང་གི་གཟི་བརྗིད་ཀྱིས་ནམ་མཁའ་ཡོངས་སུ་ཁེབས་ཤིང་། ས་གཞི་ཐམས་ཅད་ཁོང་ལ་བསྟོད་པའི་སྒྲ་ཡིས་ཁྱབ་པ་ཡིན། ༼ སེ་ལཱ། ༽
HAB 3:4 ཁོང་གི་གཟི་བྱིན་ནི་ཉི་འོད་བཞིན་ཡིན་ལ། ཁོང་གི་ཕྱག་ལས་འོད་ཟེར་འཕྲོས་ཤིང་། དེའི་ནང་དུ་ཁོང་གི་ནུས་མཐུ་ཆེན་པོ་སྦས་ཡོད་པ་ཡིན།
HAB 3:5 རིམས་ནད་ཁོང་གི་མདུན་ནས་བརྒྱུད་ཅིང་། ཚ་ནད་ཁོང་གི་ཞབས་འོག་ནས་འབྱུང་བ་ཡིན།
HAB 3:6 ཁོང་ཡར་བཞེངས་དུས་ས་གཞི་ཐམས་ཅད་གཡོ་བ་དང་། ཁོང་གིས་གཟིགས་དུས་མི་རིགས་ཀུན་འདྲོགས་པ་ཡིན། གཏན་གནས་ཀྱི་རི་བོ་རྣམས་བསིལ་བུར་ཐོར་བ་དང་། ཡུན་གནས་ཀྱི་རི་ཕྲན་རྣམས་བརྡིབས་པ་ཡིན། ཁོང་གི་མཛད་པ་རྒྱུན་ནས་རྒྱུན་དུ་གནས།
HAB 3:7 ཀུ་ཤན་ཡུལ་གྱི་གུར་ལ་སྡུག་བསྔལ་འབྱུང་བ་ངས་མཐོང་ཞིང་། མིད་ཡཱན་ཡུལ་གྱི་ཡོལ་བ་འཇིགས་ཤིང་སྐྲག་པར་གྱུར།
HAB 3:8 ཀྱེ་དཀོན་མཆོག་ཡ་ཝཱེ་ལགས། ཁྱེད་ཉིད་རང་གི་རྟ་མཆོག་ལ་བཅིབས་ནས། རྒྱལ་ཁ་ཐོབ་པའི་ཤིང་རྟའི་ཁ་ལོ་སྒྱུར་བ་ནི་ཆུ་དང་གཙང་པོར་ཐུགས་ཁྲོས་ཤིང་། ཆུ་དང་གཙང་པོ། རྒྱ་མཚོ་བཅས་ལ་འཁོན་ལན་སློག་པ་ཡིན་ནམ་ཅི།
HAB 3:9 ཁྱེད་ཀྱི་གཞུ་ནི་ཕྱིར་མངོན་ཞིང་། ཁྱེད་ཀྱི་མདའ་རྣམས་གྲ་སྒྲིག་བྱས་ཡོད་ལ། གཙང་པོས་ས་གཞི་གས་སུ་བཅུག ༼ སེ་ལཱ། ༽
HAB 3:10 རི་བོ་རྣམས་ཀྱིས་ཁྱེད་ཉིད་མཐོང་སྟེ་གཅུ་གྲིམ་བརྒྱབ་པ་དང་། ཆུ་རྒྱུན་དྲག་པོ་བཞུར་ཅིང་། གཡང་གཟར་གྱིས་སྐད་སྒྲ་སྒྲོག་བཞིན་རྦ་རླབས་དྲག་ཏུ་འཕྱུར་བ་ཡིན།
HAB 3:11 ཁྱེད་ཀྱི་མདའ་ནི་འོད་ལྟར་འཕུར་བ་དང་། ཁྱེད་ཀྱི་མདུང་གིས་འོད་འཕྲོས་ཤིང་གཟི་བརྗིད་མངོན་པས་ན། ཉི་ཟླ་གཉིས་ཀའང་རང་གནས་སུ་བསྡད་དོ། །
HAB 3:12 ཁྱེད་ཀྱི་ཁྲོ་གཏུམ་གྱིས་ས་གཞི་ཡོངས་བརྫིས་ཤིང་། ཁྱེད་ཀྱི་ཐུགས་ཁྲོ་ཡིས་ཚར་མ་རྡུང་བ་ལྟར་ཡུལ་ཁམས་ཐམས་ཅད་ལ་བརྡེགས་པའོ། །
HAB 3:13 ཁྱེད་ནི་ཉིད་ཀྱི་འབངས་མི་རྣམས་སྒྲོལ་བ་དང་སྣུམ་གྱིས་བྱུགས་པ་དེ་ཉིད་སྐྱོབ་པར་ཕེབས་པ་དང་། ཁྱེད་ཀྱིས་ངན་པའི་ཁྱིམ་བདག་ལ་བརྡུངས་ཏེ་མཆོག་དམན་ཐམས་ཅད་མེད་པར་མཛད་ཅིང་། ༼ སེ་ལཱ། ༽
HAB 3:14 ཁྱེད་ཀྱིས་དགྲ་ཡི་མདུང་གིས་དེའི་དམག་མིའི་མགོ་ལ་བཙུགས་ཤིང་། དེ་དག་རླུང་དམར་བཞིན་དུ་ངེད་རྣམས་གཏོར་དུ་འོངས་པ་དང་། ཁོ་ཚོ་ནི་ལྐོག་ནས་དབུལ་པོ་རྣམས་མེད་པར་བཟོ་བར་དགའོ། །
HAB 3:15 ཁྱེད་ཉིད་རྟ་ལ་བཅིབས་ཏེ་རྒྱ་མཚོའི་སྟེང་དུ་བརྒྱུད་པ་ན། རྒྱ་མཚོའི་རྦ་རླབས་དྲག་ཏུ་འཕྱུར་བའོ། །
HAB 3:16 ངས་སྒྲ་དེ་ཐོས་མ་ཐག་ལུས་པོ་ཡོངས་སུ་འདར། སྒྲ་དེའི་རྐྱེན་གྱིས་ངའི་མཆུ་སྒྲོས་ཀྱང་འདར་ཞིང་། ངའི་རུས་པ་རྣམས་རུལ་བར་གྱུར་པ་དང་། ངས་རང་ཉིད་ལངས་ནས་འདུག་སར་སྐྲག་སྐྲག་འདར་འདར་ངང་ཡུལ་འདིར་རྒོལ་བའི་མི་རྣམས་ཀྱི་སྟེང་དུ་གནོད་འཚེ་འབྱུང་བའི་ཉིན་མོ་དེ་སླེབས་འོང་བར་ཡུན་གྱིས་སྒུག་གོ །
HAB 3:17 སེ་ཡབ་ཤིང་ལ་མྱུ་གུ་མ་འབུས་ཤིང་། རྒུན་འབྲུམ་ཤིང་ལ་འབྲས་བུ་མ་ཐོགས་པ་དང་། སྐྱུ་རུ་ཤིང་ལས་ཅི་ཡང་མ་ཐོན་པར། ཞིང་ལས་ལོ་ཏོག་ཅི་ཡང་མ་སྨིན་ལ། ལུག་རའི་ལུག་རྣམས་ཚར་དུ་བཅད་ནས་ནི། ཕྱུགས་རའི་ནང་དུ་བ་གླང་ཚར་ནའང་།
HAB 3:18 ང་ནི་དཀོན་མཆོག་ཡ་ཝཱེའི་རྐྱེན་གྱིས་དགའ་ཞིང་། རང་ཉིད་སྐྱོབ་པའི་དཀོན་མཆོག་གི་དབང་གིས་སྤྲོ་བར་འགྱུར།
HAB 3:19 གཙོ་བོ་ཡ་ཝཱེ་ནི་ངའི་སྟོབས་ཤུགས་ཡིན་ཏེ། ཁོང་གིས་ངའི་རྐང་པ་གཉིས་ཀ་ཤ་མོ་བཞིན་དུ་མྱུར་བར་མཛད་དེ་མཐོ་ས་ནས་བསྐྱོད་ཐུབ་པར་གྱུར་ཏོ། །འདི་ནི་དབུ་མཛད་ལ་སྤྲད་པའི་མགུར་མ་རྒྱུད་མང་རོལ་ཆས་སྤེལ༌མ་ཡིན་ནོ།། །།
ZEP 1:1 དེ་ཡང་ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱ་རྒྱལ་པོར་སྡོད་པའི་དུས་སུ། དཀོན་མཆོག་ཡ་ཝཱེའི་བཀའ་ནི་ཧི་ཟི་ཀི་ཡཱའི་གསུམ་ཚ་དང་། ཨ་མར་ཡཱའི་ཡང་ཚ་དང་། གེ་དལ་ཡཱའི་ཚ་བོ་སྟེ། ཀུ་ཤིའི་བུ་ཟེ་ཕན་ཡཱ་ལ་བྱུང་ཞིང་།
ZEP 1:2 དཀོན་མཆོག་ཡ་ཝཱེས་འདི་སྐད་དུ། བདག་གིས་ས་གཞིའི་སྟེང་གི་བྱ་དངོས་ཡོད་ཚད་མེད་པར་བྱེད་ངེས་ཡིན་ཞེས་གསུངས་སོ། །
ZEP 1:3 ཡང་དཀོན་མཆོག་ཡ་ཝཱེས་འདི་སྐད་དུ། བདག་གིས་མིའི་རིགས་དང་། དུད་འགྲོ་རྣམས་དང་། ནམ་མཁའི་བྱ་དང་། རྒྱ་མཚོའི་ཉ་ཐམས་ཅད་མེད་པར་བྱེད་དགོས་པ་དང་། བདག་གིས་མི་ངན་འགྱེལ་བར་བྱ་ཞིང་། མིའི་རིགས་ནི་ས་གཞི་ལས་མེད་པར་བྱའོ་ཞེས་གསུངས་སོ། །
ZEP 1:4 བདག་གིས་རང་གི་ལག་པ་བརྐྱངས་ཏེ་ཡ་ཧུ་དཱའི་ཡུལ་དང་ཡེ་རུ་སཱ་ལེམ་གྱི་མི་ཀུན་ལ་རྒོལ་བར་འགྱུར་ཏེ། བདག་གིས་ཡུལ་འདི་ནས་པཱ་ཨལ་གྱི་ཤུལ་ལུས་རྣམས་མེད་པར་བྱ་ཞིང་། སྐུ་འདྲར་དད་པའི་མཆོད་དཔོན་དག་གི་མིང་དང་། བསམ་པ་རྣམ་དག་མ་ཡིན་པའི་དཀོན་མཆོག་ཡ་ཝཱེའི་མཆོད་དཔོན་རྣམས་མེད་པར་བྱའོ། །
ZEP 1:5 ཁང་ཀླད་ནས་ནམ་མཁའི་སྐར་ཚོགས་ལ་བསྙེན་བཀུར་བྱེད་ཅིང་། དཀོན་མཆོག་ཡ་ཝཱེར་བསྙེན་བཀུར་ཞུས་ནས་ཁོང་ཉིད་དཔང་དུ་བཙུགས་ཏེ་མནའ་སྐྱེལ་བ་དང་། ཡང་ལྷ་མིལ་ཀོམ་དཔང་དུ་བཙུགས་ཏེ་མནའ་སྐྱེལ་མཁན་རྣམས་དང་།
ZEP 1:6 ཕར་འཁོར་ནས་དཀོན་མཆོག་ཡ་ཝཱེའི་རྗེས་སུ་མི་འབྲང་བ་རྣམས་དང་། དཀོན་མཆོག་ཡ་ཝཱེ་མི་བཙལ་ཞིང་ཁོང་གི་དྲུང་དུ་བཀའ་འདྲི་ཞུ་བར་ཡང་མི་འགྲོ་བ་རྣམས་ཀྱང་མེད་པར་བྱའོ། །
ZEP 1:7 ཁྱོད་ནི་གཙོ་བོ་ཡ་ཝཱེའི་དྲུང་དུ་ཁུ་སིམ་མེར་སྡོད་ཅིག ཅིའི་ཕྱིར་ཞེ་ན། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ་ཞིང་། དཀོན་མཆོག་ཡ་ཝཱེས་མཆོད་རྫས་རྣམས་གྲ་སྒྲིག་བྱས་ཟིན་ལ། ཁོང་གིས་གདན་དྲངས་པའི་མགྲོན་པོ་རྣམས་དམ་པར་མཛད་དོ། །
ZEP 1:8 དཀོན་མཆོག་ཡ་ཝཱེའི་མཆོད་པ་འབུལ་བའི་ཉིན་མོར་ངས་འགོ་དཔོན་དང་རྒྱལ་སྲས་རྣམས་ལ་ཆད་པ་གཅོད་པ་དང་། ཕྱི་ཕྱོགས་པའི་གོས་གྱོན་པ་ཐམས་ཅད་ལ་ཉེས་ཆད་གཅོད་ངེས་ཡིན།
ZEP 1:9 ཉིན་དེ་སླེབས་ཚེ། ངས་སྒོ་ཐེམ་ལ་བགོམས་ནས་འགྲོ་བ་ཐམས་ཅད་དང་། བཙན་ཤུགས་དང་གཡོ་འཕྲུལ་གྱིས་བླངས་པའི་རྒྱུ་ནོར་གྱིས་རང་གི་ལྷ་ཁང་བཀང་དུ་འཇུག་པ་ཐམས་ཅད་ལ་ཉེས་ཆད་གཅོད་པར་འགྱུར་ཞེས་གསུངས་སོ། །
ZEP 1:10 དཀོན་མཆོག་ཡ་ཝཱེས་འདི་སྐད་དུ། ཉིན་དེ་སླེབས་ཚེ། ཉ་སྒོ་ལས་ངུ་འབོད་བསྒྲག་འོང་ཞིང་། གནས་གསར་པ་ནས་སྨྲེ་སྔགས་འདོན་པའི་སྒྲ་ཐོས་འོང་བ་དང་། རི་རྣམས་ལས་གས་པའི་སྒྲ་ཆེན་པོ་གྲགས་འོང་ངོ་། །
ZEP 1:11 ཀྱེ་མག་ཏེ་སིའི་མི་སྡེ་རྣམས། ཁྱོད་རྣམས་ཀྱིས་སྨྲེ་སྔགས་ཐོན་ཞིག ཅིའི་ཕྱིར་ཞེ་ན། ཚོང་པ་ཐམས་ཅད་མེད་པར་བཟོས་ཤིང་། དངུལ་ཁྱེར་ནས་ཚོང་རྒྱག་མཁན་ཐམས་ཅད་ཚར་དུ་བཅད་དོ། །
ZEP 1:12 དེའི་དུས་སུ་ངས་སྒྲོན་མེ་ཡར་བཏེགས་ནས་ཡེ་རུ་སཱ་ལེམ་བསྔོགས་ཏེ། སྙིགས་རོ་མ་དཀྲུག་པའི་རྒུན་ཆང་དྭངས་མོ་དང་འདྲ་བའི་མི་ རྣམས་ལ་ཉེས་ཆད་གཅོད་པ་དང་། མི་དེ་དག་གིས་སེམས་སུ་དཀོན་མཆོག་ཡ་ཝཱེས་བྱིན་རླབས་མི་གནང་ལ། གནོད་འཚེ་ཡང་མི་མཛད་སྙམ་པ་ཡིན།
ZEP 1:13 དེ་དག་གི་རྒྱུ་ནོར་ནི་བཅོམ་ནོར་དུ་འགྱུར་ཞིང་། དེ་དག་གི་ཁང་པ་རྣམས་ཞིག་རོར་ལུས་པ་དང་། དེ་དག་གིས་ཁང་པ་བརྩིགས་ཀྱང་དེའི་ནང་དུ་སྡོད་མི་ཐུབ་ལ། རྒུན་འབྲུམ་ར་བ་བཙུགས་ཀྱང་དེས་བསྙལ་བའི་རྒུན་ཆང་འཐུང་མི་ཐུབ་བོ། །
ZEP 1:14 དཀོན་མཆོག་ཡ་ཝཱེའི་ཉིན་ཆེན་པོ་དེ་སླེབས་ལ་ཉེ་ཞིང་མྱུར་དུ་སླེབ་ངེས་ཡིན། དཀོན་མཆོག་ཡ་ཝཱེའི་དུས་ལ་སྡུག་བསྔལ་ཆེ་ཞིང་། ཉིན་དེར་དཔའ་བོ་རྣམས་ཀྱིས་ཀྱང་ངུ་འབོད་བྱེད་པར་འགྱུར།
ZEP 1:15 ཉིན་མོ་དེ་ནི་ཐུགས་ཁྲོ་བའི་ཉིན་མོ་དང་། སྡུག་བསྔལ་དང་དཀའ་ཚེགས་ཀྱི་ཉིན་མོ། ཉམས་རྒུད་དང་སྐྱོ་སྣང་གི་ཉིན་མོ། མུན་ནག་དང་སྨག་རུམ་གྱི་ཉིན་མོ། སྤྲིན་ནག་དང་མུན་པའི་ཉིན་མོ།
ZEP 1:16 དམག་དུང་འབུད་ཅིང་ངར་སྐད་སྒྲོག་པའི་ཉིན་མོ་བཅས་ཡིན་པ་དང་། མཁར་བརྟན་པོ་དང་ལྕོག་མཁར་མཐོན་པོ་རྣམས་ལ་རྒོལ་བར་འགྱུར་རོ། །
ZEP 1:17 ངས་མི་ཐམས་ཅད་ལ་སྡུག་བསྔལ་མྱང་དུ་འཇུག་ཅིང་། ཁོ་རྣམས་ལོང་པ་བཞིན་དུ་སྐྱོད་པར་བྱ་སྟེ། ཅིའི་ཕྱིར་ཞེ་ན། ཁོ་ཚོས་བདག་ལ་འགལ་བའི་སྡིག་པ་བྱས་པས་སོ། །ཁོ་ཚོའི་ཁྲག་ནི་ས་རྡུལ་བཞིན་ཕྱིར་ལྡུག་ཅིང་། ཁོ་ཚོའི་ལུས་པོ་ནི་བཙོག་པ་བཞིན་འདོར་བར་འགྱུར།
ZEP 1:18 དཀོན་མཆོག་ཡ་ཝཱེ་ཐུགས་ཁྲོ་བའི་ཉིན་མོ་ལ། ཁོ་ཚོའི་གསེར་དངུལ་གྱིས་ཁོ་ཚོ་སྐྱོབ་མི་ནུས། ས་གཞི་ཐམས་ཅད་ཁོང་གི་ཕྲག་དོག་གི་མེ་ལྕེ་ཡིས་ཁྱུར་མིད་གཏོང་ངེས་ཏེ། ཅིའི་ཕྱིར་ཞེ་ན། ཁོང་གིས་ས་གཞིའི་སྟེང་གི་མི་སྡེ་ཐམས་ཅད་རྩ་བ་ནས་མེད་པར་མཛད་ཅིང་། དེ་ནི་ཤིན་ཏུ་འཇིགས་ཆེ་བའི་ཚར་གཅོད་ཡིན་ནོ་ཞེས་གསུངས་སོ། །
ZEP 2:1 ཀྱེ་ངོ་ཚ་མེད་པའི་མི་སྡེ། ཁྱོད་རྣམས་མཉམ་དུ་འདུས་ཤིག མཉམ་དུ་འདུས་ཤིག
ZEP 2:2 བཀའ་མ་བབས་པའི་སྔོན་དང་། ཉིན་མོ་ནི་རླུང་གིས་འཁྱེར་བའི་ཕུབ་མ་བཞིན་དུ་མ་འདས་སྔོན། དཀོན་མཆོག་ཡ་ཝཱེའི་ཁྲོ་གཏུམ་ཁྱོད་ཅག་གི་སྟེང་དུ་མ་བབས་པའི་སྔོན། དཀོན་མཆོག་ཡ་ཝཱེའི་ཐུགས་ཁྲོ་བའི་ཉིན་མོ་ཁྱོད་ཅག་གི་ཐོག་ཏུ་མ་སླེབས་པའི་སྔོན་དུ་ཁྱོད་རྣམས་འདུས་ཤིག
ZEP 2:3 ཀྱེ་དཀོན་མཆོག་ཡ་ཝཱེའི་སྒྲིག་སྲོལ་རྣམས་སྲུང་བའི་ས་སྟེང་གི་མི་ཁེངས་སྐྱུང་ཅན་རྣམས། ཁྱོད་རྣམས་ཀྱིས་དཀོན་མཆོག་ཡ་ཝཱེ་ཚོལ་ཞིག ཁྱོད་རྣམས་ཀྱིས་དྲང་བདེན་དང་གུས་ཞབས་ཚོལ་ཞིག དེ་ནས་དཀོན་མཆོག་ཡ་ཝཱེ་ཐུགས་ཁྲོ་བའི་ཉིན་མོར་ཁྱོད་རྣམས་གཡོལ་ཐུབ་ཀྱང་སྲིད།
ZEP 2:4 གཱ་ཟཱ་འདོར་ཞིང་ཨ་ཤཱ་ཀེ་ལོན་སྟོང་བར་འགྱུར། ཨ་སི་དོད་ཀྱི་མི་སྡེ་ནི་ཉིན་གུང་གི་དུས་སུ་ཕྱིར་སྐྲོད་པ་དང་། ཨེག་རོན་ནི་རྩ་བ་ནས་འདོན་པར་འགྱུར་རོ། །
ZEP 2:5 མཚོ་རྒྱུད་ས་ཁུལ་དུ་སྡོད་པའི་མི་སྟེ་ཀེ་རེད་པའི་མི་རྣམས། ཁྱོད་རྣམས་ལ་ཆག་སྒོ་འབྱུང་། ཀྱེ་ཕེ་ལེ་ཤེད་ཀྱི་ཡུལ་ཀ་ན་ཨན། དཀོན་མཆོག་ཡ་ཝཱེས་འདི་སྐད་གསུངས་ཏེ། ངས་ཁྱོད་མེད་པར་བྱེད་ཅིང་ཁྱོད་ཀྱི་གནས་སུ་འདུག་མཁན་མེད་ཅེས་པའོ། །
ZEP 2:6 མཚོ་རྒྱུད་ས་ཁུལ་ནི་རྩྭ་ཐང་དུ་འགྱུར་ཞིང་། དེར་ལུག་རྫིའི་འདུག་ས་དང་ལུག་ཁྱུའི་ལྷས་ར་ཡོད་པ་ཡིན།
ZEP 2:7 ཡུལ་དེ་ནི་ཡ་ཧུ་དཱ་ཁྱིམ་རྒྱུད་ཀྱི་ལྷག་ལུས་རྣམས་ལ་དབང་ཞིང་། དེ་དག་གིས་ཡུལ་དེ་རུ་ར་ལུག་འཚོ་བ་དང་། མཚན་མོར་དེ་དག་ཨ་ཤཱ་ཀེ་ལོན་གྱི་ཁང་པ་ནང་དུ་ཉལ་བར་འགྱུར། ཅིའི་ཕྱིར་ཞེ་ན། ཁོ་ཚོའི་དཀོན་མཆོག་ཡ་ཝཱེས་ཁོ་ཚོར་གཟིགས་སྐྱོང་མཛད་དེ། ཁོ་རྣམས་བཙོན་དུ་ཁྲིད་པའི་གནས་ལས་ཕྱིར་ལོག་པར་མཛད་དོ། །
ZEP 2:8 ངས་མོ་ཨབ་པའི་འཕྱ་སྨོད་བྱེད་པའི་སྐད་དང་། ཨམ་མོན་པའི་དམའ་འབེབས་བྱེད་པའི་སྒྲ་ཐོས་ཏེ། ཁོ་ཚོས་ངའི་འབངས་མི་ལ་སྨད་ནས་དེའི་མངའ་ཁོངས་སུ་བཙན་འཛུལ་བྱེད་པའི་འཇིགས་སྐུལ་བས་ན།
ZEP 2:9 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། མོ་ཨབ་ནི་སཱ་དོམ་ལྟ་བུ་དང་། ཨམ་མོན་པ་ནི་གཱ་མོ་ར་ལྟར་ཐམས་ཅད་ལྗང་ཚེར་དང་ཚྭ་དོང་། གཏན་དུ་སྟོངས་པའི་གནས་སུ་འགྱུར་ཞིང་། ངའི་འབངས་མི་ལྷག་ལུས་རྣམས་ཀྱིས་དེ་དག་བཅོམ་ནས། ངའི་རྒྱལ་ཁམས་ནང་གི་ལྷག་ལུས་རྣམས་ལ་དེ་དག་གི་ཡུལ་ནོར་སྐལ་དུ་འཐོབ་པར་འགྱུར།
ZEP 2:10 དེ་དག་ང་རྒྱལ་ཆེ་ཞིང་རང་རློམ་ཆེན་པོས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་འབངས་མི་ལ་འཕྱ་སྨོད་བྱས་པས་དོན་དེ་ཁོ་ཚོའི་སྟེང་དུ་འབྱུང་ངེས་ཡིན།
ZEP 2:11 ཁོ་ཚོར་མཚོན་ན་དཀོན་མཆོག་ཡ་ཝཱེ་ནི་འཇིགས་སུ་རུང་བ་ཡིན་ཏེ། ཅིའི་ཕྱིར་ཞེ་ན། ཁོང་གིས་ས་སྟེང་གི་ལྷ་རྣམས་རིད་པར་མཛད་ཅིང་། དེའི་དུས་སུ་ཡུལ་ཁམས་ཀུན་གྱི་གླིང་ཕྲན་སྟེང་གི་མི་རིགས་རྣམས་ཀྱིས་རང་རང་གི་ཡུལ་ནས་ཁོང་ལ་ཕྱག་འཚལ་བར་འགྱུར་རོ། །
ZEP 2:12 ཀྱེ་གུ་ཤ་པ་རྣམས། ཁྱོད་རྣམས་ཀྱང་ངའི་རལ་གྲིས་འགུམ་པར་འགྱུར་ཏེ།
ZEP 2:13 ཡ་ཝཱེས་ཕྱག་བརྐྱངས་ཏེ་བྱང་ཕྱོགས་ལ་རྒོལ་ནས་ཨ་སུར་མེད་པར་མཛད་ཅིང་། ནིན་ཝེ་སྟོངས་པར་གྱུར་ནས་སྐམ་ཞིང་དབེན་སྟོང་དུ་ལུས་ཡོང་།
ZEP 2:14 ཕྱུགས་ཁྱུ་དང་རི་དྭགས་སྣ་ཚོགས་ནི་དེའི་ནང་དུ་ཉལ་བར་འགྱུར་ཞིང་། འུག་པ་དང་རྒང་ནི་ཀ་བའི་རྩེ་མོར་གནས་ལ། སྒེའུ་ཁུང་ནང་དུ་བྱིའུས་སྐད་སྒྲ་སྒྲོག་པ་དང་། སྒོ་ཐེམ་རྣམས་ཆག་ནས་ཤུག་ཤིང་རྩ་ནས་འགོག་པར་འགྱུར་རོ། །
ZEP 2:15 འདི་ནི་དགའ་སྤྲོ་དང་བཅས་བདེ་བར་གནས་པའི་གྲོང་ཁྱེར་ཡིན་ཏེ། སྔར་དེའི་སེམས་སུ་ང་རང་ཁོ་ན་སྟེ། ང་མ་གཏོགས་གཞན་གང་ཡང་མེད་སྙམ་པ་ཡིན། ཡིན་ན་ཡང་ད་ལྟ་དེ་ནི་དབེན་སྟོང་དང་རི་དྭགས་ཉལ་སའི་གནས་སུ་གྱུར་པ་ཅི་ཡིན་ནམ། གནས་དེ་བརྒྱུད་ནས་འགྲོ་མཁན་ཐམས་ཅད་ཀྱིས་ལག་པ་གཡུགས་ནས་འཕྱ་བར་འགྱུར།
ZEP 3:1 གྱེན་ལོག་དང་མི་གཙང་བ། མི་ལ་གཉའ་གནོན་བྱེད་པ་བཅས་ཀྱི་གྲོང་ཁྱེར་འདི་ལ་ཆག་སྒོ་འབྱུང་།
ZEP 3:2 དེས་བཀའ་ལ་མི་མཉན་ལ། བསླབ་བྱ་དང་དུ་མི་ལེན་ཞིང་། དཀོན་མཆོག་ཡ་ཝཱེར་མི་བརྟེན་ལ། རང་གི་དཀོན་མཆོག་དང་ཉེ་བར་ཡང་མི་བྱའོ། །
ZEP 3:3 གྲོང་ཁྱེར་ནང་གི་འགོ་དཔོན་རྣམས་ནི་ངར་སྐད་སྒྲོག་པའི་སེང་གེ་དང་། གྲོང་ཁྱེར་ནང་གི་ཁྲིམས་དཔོན་རྣམས་ནི་མཚན་མོའི་འཕར་སྤྱང་ཡིན་ཏེ། ཞོགས་པའི་བར་དུ་ཅི་ཡང་ལུས་པར་མི་བྱ།
ZEP 3:4 གྲོང་ཁྱེར་ནང་གི་ལུང་སྟོན་པ་རྣམས་ནི་བླང་དོར་མི་ཤེས་པ་དང་གཡོ་སྒྱུ་ཅན་ཡིན་ལ། གྲོང་ཁྱེར་ནང་གི་མཆོད་དཔོན་རྣམས་ཀྱིས་དམ་པའི་གནས་མི་གཙང་བར་བྱས་ནས་བཀའ་ཁྲིམས་དང་འགལ་བའོ། །
ZEP 3:5 དཀོན་མཆོག་ཡ་ཝཱེ་ནི་གྲོང་ཁྱེར་ནང་དུ་དྲང་བདེན་ཡིན་པས། དྲང་བདེན་མིན་པའི་དོན་ནི་གཏན་ནས་མི་མཛད། ཁོང་གིས་ཞོགས་པ་རེ་རེར་དྲང་བདེན་མངོན་ཞིང་ནམ་ཡང་མཚམས་མ་ཆད། ཡིན་ཡང་དྲང་བདེན་མིན་པའི་མི་ལ་ངོ་ཚ་མེད་དོ། །
ZEP 3:6 ང་ཡ་ཝཱེས་མི་རིགས་ཐམས་ཅད་ཚར་དུ་བཅད་པ་དང་། དེ་དག་གི་ལྕོག་མཁར་རྣམས་གཏོར་བར་གྱུར། ངས་དེ་དག་གི་སྲང་ལམ་རྣམས་སྟོངས་སུ་བཅུག་ཅིང་དེ་བརྒྱུད་ནས་འགྲོ་མཁན་མེད་ལ། དེ་དག་གི་གྲོང་ཁྱེར་སྟོང་བར་བསྐྱུར་ནས་མི་གཅིག་ཀྱང་མེད། དེར་འདུག་མཁན་ཡང་མེད་དོ། །
ZEP 3:7 དེ་ནས་ངས་འདི་སྐད་དུ། ཁྱོད་རང་བདག་ལ་གུས་ཤིང་འཇིགས་པ་དང་བསླབ་བྱ་དང་དུ་བླངས་ན། ཁྱོད་ཀྱི་སྡོད་གནས་ནི་ངས་སྔར་ཐག་གིས་བཅད་པ་བཞིན་ཚར་དུ་མི་གཅོད་ཅེས་སྨྲས་པ་ཡིན། ཡིན་ནའང་ཁྱོད་ཅག་གིས་ཞོགས་པ་སྔ་མོ་ནས་བཟུང་སྒོ་ཀུན་ནས་རང་ཉིད་རང་གིས་བརླག་པ་ཡིན་ནོ། །
ZEP 3:8 ཡང་དཀོན་མཆོག་ཡ་ཝཱེས་འདི་སྐད་དུ། དེ་བས་ཁྱོད་རྣམས་ཀྱིས་ང་ལ་སྒུགས་དང་། ང་ཡར་ལངས་ནས་འཕྲོག་བཅོམ་བྱེད་པའི་ཉིན་དེ་ལ་སྒུགས་དང་། ངས་མི་རིགས་ཐམས་ཅད་དང་ཡུལ་ཁམས་ཀུན་བསྡུ་བར་ཐག་བཅད་དེ། ངའི་ཁོང་ཁྲོ་སྟེ་ཁོང་ཁྲོ་ཆེན་པོ་ནི་ཡོངས་སུ་དེ་དག་གི་སྟེང་དུ་ལྡུག་པར་བྱའོ། །ཅིའི་ཕྱིར་ཞེ་ན། ས་གཞི་ཡོངས་ནི་ངའི་ཞེ་སྡང་གི་མེ་ཡིས་ཁྱུར་མིད་གཏོང་བར་འགྱུར་བས་སོ། །
ZEP 3:9 དེའི་དུས་སུ་མི་སྡེ་ཀུན་ལ་དཀོན་མཆོག་ཡ་ཝཱེའི་མིང་ལ་ཞུ་བ་བྱེད་པ་དང་། བློ་གཅིག་སེམས་གཅིག་གིས་ང་ལ་ཞབས་ཕྱི་བྱེད་དུ་འཇུག་པའི་ཕྱིར། བདག་གིས་མི་སྡེ་ཀུན་ལ་ངག་གཙང་མ་ཞིག་ཡོད་པར་བྱའོ། །
ZEP 3:10 དེ་ནས་བདག་གིས་ཁ་ཐོར་དུ་འགྲོ་རུ་བཅུག་པའི་མི་སྟེ། ང་ལ་གསོལ་བ་འདེབས་པའི་མི་རྣམས་ནི་གུ་ཤ་གཙང་པོའི་ཕ་རོལ་ནས་འོངས་ཏེ། ང་ལ་ཞུ་རྟེན་འབུལ་བར་འགྱུར།
ZEP 3:11 ཉིན་མོ་དེ་སླེབས་ཚེ། ཁྱོད་ནི་བདག་དང་འགལ་བའི་སྡིག་པ་ཀུན་གྱི་ཕྱིར་ངོ་ཚ་མི་དགོས་ཏེ། ཅིའི་ཕྱིར་ཞེ་ན། དུས་དེར་བདག་གིས་ཁྱོད་ཀྱི་ནང་གི་མི་རང་རློམ་ཅན་དང་ང་རྒྱལ་ཆེ་བ་རྣམས་ཚར་དུ་གཅོད་ཅིང་། བདག་གི་རི་བོ་དམ་པའི་སྟེང་དུ་ཁྱོད་ཡང་བསྐྱར་ང་རྒྱལ་སྐྱེ་བར་མི་འགྱུར་རོ། །
ZEP 3:12 ཡིན་ནའང་བདག་གིས་ཁྱོད་ནང་གི་མི་ཁེངས་སྐྱུང་ཅན་དང་སྙེམས་ཆུང་རྣམས་ལུས་པར་བྱ་སྟེ། དེ་དག་ནི་དཀོན་མཆོག་ཡ་ཝཱེའི་མིང་ལ་བརྟེན་པར་འགྱུར།
ZEP 3:13 དེ་ནས་ཡེས་ར་ཨེལ་གྱི་ལྷག་ལུས་རྣམས་ཀྱིས་སྡིག་ཉེས་མི་སྤྱོད་ལ། རྫུན་ཡང་མི་སྨྲ་ཞིང་། ཁོ་ཚོའི་སྨྲ་སྒོར་གཡོ་སྒྱུའི་ལྕེ་ཡང་མེད་པ་དང་། ཁོ་རྣམས་ཀྱིས་བཟའ་བཏུང་སྤྱད་ནས་བདེ་བར་གནས་ཤིང་འཇིགས་སྐུལ་མཁན་མེད་དོ། །
ZEP 3:14 ཀྱེ་ཛ་ཡན་གྱི་བུ་མོ། ཁྱོད་རྣམས་ཀྱིས་སྐད་གསང་མཐོན་པོས་མགུར་གླུ་ལོངས་ཤིག ཀྱེ་ཡེས་ར་ཨེལ། ཁྱོད་ཀྱིས་དགའ་འབོད་གྱིས་ཤིག ཀྱེ་ཡེ་རུ་སཱ་ལེམ་གྱི་མི་སྡེ་རྣམས། ཁྱོད་རྣམས་ཀྱི་སེམས་སུ་དགའ་སྤྲོས་ཁེངས་པར་གྱིས་ཤིག
ZEP 3:15 དཀོན་མཆོག་ཡ་ཝཱེས་ཁྱོད་རྣམས་ཀྱི་ཉེས་ཆད་མེད་པར་མཛད་དེ། ཁྱོད་ཅག་གི་དགྲ་རྣམས་ཕྱི་རུ་བསྐྲད་པ་ཡིན། ཀྱེ་ཡེས་ར་ཨེལ་གྱི་རྒྱལ་པོ་ཡ་ཝཱེ་ཁྱོད་ཀྱི་ནང་དུ་བཞུགས་པས། ད་ནི་ཁྱོད་རྣམས་གནོད་འཚེ་ལ་འཇིགས་པར་མི་འགྱུར།
ZEP 3:16 ཉིན་མོ་དེ་སླེབས་ཚེ། མི་ཡིས་ཡེ་རུ་སཱ་ལེམ་ལ་འདི་ལྟར། ཀྱེ་ཛ་ཡན་ལགས། མ་འཇིགས་ཤིག ཁྱོད་ཀྱི་ལག་ཤེད་ཉམས་པར་མ་བྱེད་ཅིག
ZEP 3:17 ཁྱོད་དང་མཉམ་དུ་བཞུགས་པའི་དཀོན་མཆོག་ཡ་ཝཱེ་ནི་ནུས་མཐུ་ཆེན་པོ་ལྡན་པའི་སྐྱབས་མགོན་ལགས་ཏེ། ཁོང་ནི་ཁྱོད་ཀྱི་དབང་གིས་ཐུགས་དགྱེས་པར་འགྱུར་ཞིང་། ཁྱོད་ལ་ཤིན་ཏུ་བྱམས་ཏེ། ཁྱོད་ཀྱི་ཕྱིར་དུ་དགྱེས་ཤིང་མགུར་གསུངས་པ་ཡིན།
ZEP 3:18 ཁྱོད་ལ་གཏོགས་ཤིང་འདུ་ཚོགས་ལ་ཡིད་སྨོན་ཤོར་ནས་ཡིད་སྐྱོ་བ་དང་། ཁྱོད་ཀྱི་ངོ་ཚ་ཁུར་བ་རྣམས་ནི་ངས་བསྡུ་བར་བྱའོ། །
ZEP 3:19 ལྟོས་ཤིག དེའི་དུས་སུ་ངས་ཁྱོད་སྡུག་ལ་གཏད་པའི་མི་རྣམས་ལ་ལན་འཇལ་ཞིང་། རྐང་པ་ཞ་བོ་ཡིན་པའི་མི་རྣམས་བསྐྱབས་ནས་ཕྱིར་བསྐྲད་པའི་མི་རྣམས་བསྡུས་ཏེ། ངས་ས་གཞི་ཡོངས་ནས་ངོ་ཚ་ཐེབས་པའི་མི་རྣམས་ལ་བསྟོད་པ་འཐོབ་པ་དང་མཚན་སྙན་ལྡན་པར་བྱའོ། །
ZEP 3:20 དེའི་དུས་སུ་ངས་ཁྱོད་རྣམས་ཕྱིར་འཁྲིད་འོང་ཞིང་ཁྱོད་རྣམས་མཉམ་དུ་བསྡུས་ནས། ངས་བཙོན་དུ་ཁྲིད་པ་ཁྱོད་རྣམས་ཕྱིར་ལོག་ཏུ་འཇུག་པའི་ཚེ། ས་སྟེང་གི་མི་སྡེ་ཀུན་གྱི་ཁྲོད་དུ་ཁྱོད་རྣམས་ལ་མཚན་སྙན་ལྡན་ཞིང་བསྟོད་པ་འཐོབ་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ།། །།
HAG 1:1 དེ་ཡང་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དྲུག་པ་ཡི་ཚེས་གཅིག་ཉིན་ལ། དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་བརྒྱུད་དེ་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་འགོ་དཔོན་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་གཉིས་ལ་བྱུང་ནས་འདི་སྐད་དུ།
HAG 1:2 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། འབངས་མི་རྣམས་ཀྱིས་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བའི་དུས་དེ་ད་དུང་སླེབས་མེད་ཟེར་ཞེས་གསུངས་པ་དང་།
HAG 1:3 དེ་ནས་དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་ནས་འདི་སྐད་དུ།
HAG 1:4 མཆོད་ཁང་འདི་སྔར་བཞིན་ཞིག་རོར་ལུས་ཡོད་ལ། ཁྱོད་རྣམས་ད་དུང་གནམ་གཅལ་ལྡན་པའི་ཁང་པར་སྡོད་པ་ཡིན་ནམ་ཞེས་གསུངས་ཤིང་།
HAG 1:5 ད་ལྟ་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་སྤྱོད་པར་རྟོགས་ཤིག
HAG 1:6 ཁྱོད་རྣམས་ཀྱིས་ས་བོན་མང་པོ་བཏབ་ཀྱང་འབྲས་བུ་བསྡུ་བ་ཉུང་ལ། ཁྱོད་ཅག་གིས་ཟོས་ཀྱང་མ་འགྲང་། འཐུང་ཡང་མ་ཚིམ། གོས་གྱོན་ཡང་ལུས་མ་དྲོས། གླ་ཆ་ཐོབ་ཀྱང་ཁུག་མ་རལ་པོའི་ནང་དུ་བཅུག་ཅེས་གསུངས་སོ། །
HAG 1:7 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་སྤྱོད་པར་རྟོགས་ཤིག
HAG 1:8 ཁྱོད་རྣམས་རི་ལ་འཛེགས་ཏེ་ཤིང་ཆ་བླངས་ནས་མཆོད་ཁང་བཞེང་བར་གྱིས་དང་། ང་རང་དེའི་རྐྱེན་གྱིས་དགའ་ཞིང་གཟི་བརྗིད་ཀྱང་འཐོབ་པར་འགྱུར་ཞེས་དཀོན་མཆོག་ཡ་ཝཱེས་གསུངས།
HAG 1:9 ཁྱོད་རྣམས་ཀྱིས་ལོ་ལེགས་འབྱུང་བར་རེ་སྒུག་བྱེད་ཀྱང་འབྲས་བུ་ཉུང་ངུ་བསྡུ་ཞིང་། ཁྱོད་ཚོས་ཁྱིམ་དུ་བསྡུས་པ་རྣམས་ངས་རླུང་ལ་བསྐུར། ཅིའི་ཕྱིར་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་གི་མཆོད་ཁང་ཞིག་རོར་ལུས་ཀྱང་ཁྱོད་རྣམས་རང་རང་གི་ཁང་པའི་ཆེད་དུ་འདུར་བའོ། །
HAG 1:10 དེ་བས་ཁྱོད་ཅག་གི་རྐྱེན་གྱིས་གནམ་ནས་ཟིལ་ཆར་མི་འབབ་ལ། ས་ནས་ལོ་ཏོག་མི་འབྱུང་ངོ་། །
HAG 1:11 ངས་ས་གཞི་དང་རི་སྒང་། འབྲུ་རིགས། རྒུན་ཆང་གསར་པ་དང་སྣུམ། ས་ཡི་ཐོན་རྫས་ཐམས་ཅད། མི་དང་ཕྱུགས། མིའི་རྩོལ་བ་ལས་ཐོབ་པ་ཐམས་ཅད་ཀྱི་སྟེང་དུ་ཐན་པ་བྱུང་དུ་བཅུག་པ་ཡིན་ཞེས་གསུངས་སོ། །
HAG 1:12 དུས་དེར་ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་དང་ལྷག་ལུས་ཐམས་ཅད་ཀྱིས་རང་གི་དཀོན་མཆོག་ཡ་ཝཱེའི་གསུང་དང་། ཁོ་ཚོའི་དཀོན་མཆོག་ཡ་ཝཱེས་མངགས་པའི་ལུང་སྟོན་པ་ཧག་གཱ་ཨིའི་བཀའ་ལ་མཉན་ནས། མི་རྣམས་ལ་དཀོན་མཆོག་ཡ་ཝཱེའི་དྲུང་དུ་གུས་ཤིང་འཇིགས་པའི་སེམས་དང་ལྡན་ནོ། །
HAG 1:13 དཀོན་མཆོག་ཡ་ཝཱེའི་ཕོ་ཉ་ཧག་གཱ་ཨི་ཡིས་ཁོང་གི་བཀའ་བཞིན་དུ་མི་རྣམས་ལ་ན་རེ། ང་ཁྱོད་རྣམས་དང་མཉམ་དུ་ཡོད་ཅེས་དཀོན་མཆོག་ཡ་ཝཱེས་གསུངས་སོ་ཞེས་སྨྲས།
HAG 1:14 དེ་ནས་དཀོན་མཆོག་ཡ་ཝཱེས་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་འགོ་དཔོན་ཟེ་རུ་པཱ་པེལ་གྱི་སེམས་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨའི་སེམས་དང་། ལྷག་ལུས་ཐམས་ཅད་ཀྱི་སེམས་ལ་སྐུལ་སློང་མཛད་པས། དེ་དག་འོངས་ནས་རང་གི་དཀོན་མཆོག་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཆོད་ཁང་ནང་དུ་ལས་ཀ་བྱེད་འགོ་བརྩམས་པ་དང་།
HAG 1:15 དེ་ནི་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དྲུག་པ་ཡི་ཚེས་ཉེར་བཞི་ཉིན་ཡིན་ནོ། །
HAG 2:1 དེ་ཡང་ཟླ་བདུན་པའི་ཚེས་ཉེར་གཅིག་ཉིན་དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་ནས་འདི་སྐད་དུ།
HAG 2:2 ཁྱོད་ཀྱིས་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་འགོ་དཔོན་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་གཉིས་དང་ལྷག་ལུས་རྣམས་ལ་འདི་ལྟར།
HAG 2:3 ཁྱོད་ཅག་ལྷག་ལུས་རྣམས་ལས་སུ་ཞིག་གིས་མཆོད་ཁང་འདིའི་སྔ་མའི་གཟི་བརྗིད་མཐོང་མྱོང་ངམ། ད་ལྟ་ཁྱོད་རྣམས་ཀྱིས་བལྟས་ན་འདི་ཅི་འདྲ་འདུག་གམ། མིག་ནང་དུ་འདི་ནི་ཅི་ལའང་མི་བརྩི་བ་མ་ཡིན་ནམ་ཞེས་སྨྲོས་ཤིག
HAG 2:4 དཀོན་མཆོག་ཡ་ཝཱེས་འདི་སྐད་དུ། ཡིན་ནའང་། ཀྱེ་ཟེ་རུ་པཱ་པེལ་ད་ལྟ་ཁྱོད་ནི་སྟོབས་དང་ལྡན་པར་གྱུར་ཅིག ཀྱེ་ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་ཁྱོད་ཀྱང་སྟོབས་དང་ལྡན་པར་གྱུར་ཅིག ཀྱེ་ས་འདིའི་འབངས་མི་ཐམས་ཅད་ཁྱོད་རྣམས་ཀྱང་སྟོབས་དང་ལྡན་པར་གྱུར་ནས་ལས་ཀ་བྱོས་ཤིག ཅིའི་ཕྱིར་ཞེ་ན། བདག་ཁྱོད་དང་མཉམ་དུ་ཡོད་པས་སོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
HAG 2:5 འདི་ནི་ཁྱོད་རྣམས་ཨེ་ཅིབ་ཡུལ་ནས་ཡོང་བའི་དུས་སུ་ངས་ཁྱོད་རྣམས་ལ་བཞག་པའི་ཞལ་ཆད་ཡིན་ལ། དེའི་དུས་སུ་ངའི་སེམས་ཉིད་ཁྱོད་ཅག་གི་ཁྲོད་དུ་གནས་པས་ཁྱོད་རྣམས་མ་འཇིགས་ཤིག
HAG 2:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མི་འགྱངས་པར་ངས་གནམ་ས་གཉིས་ཀ་དང་། རྒྱ་མཚོ། སྐམ་ས་བཅས་གཡོ་བར་བྱའོ། །
HAG 2:7 ངས་མི་རིགས་ཐམས་ཅད་བསྒུལ་ཞིང་མི་རིགས་ཀུན་གྱི་ནོར་བུ་རྣམས་དྲངས་ཏེ། མཆོད་ཁང་འདི་ལ་གཟི་བརྗིད་ཀྱིས་འགེང་བར་བྱའོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །
HAG 2:8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དངུལ་རྣམས་ངའི་ཡིན་ལ། གསེར་རྣམས་ཀྱང་ངའི་ཡིན་ནོ། །
HAG 2:9 མཆོད་ཁང་ཕྱི་མའི་གཟི་བརྗིད་ནི་མཆོད་ཁང་སྔ་མའི་གཟི་བརྗིད་ལས་ཀྱང་ཆེ་བར་འགྱུར། མཆོད་ཁང་འདིའི་ནང་དུ་བདག་གིས་ཞི་བདེ་གནང་བར་འགྱུར་ཞེས་གསུངས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །
HAG 2:10 དེ་ཡང་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དགུ་པ་ཡི་ཚེས་ཉེར་བཞི་ཉིན་དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་ནས་འདི་སྐད་དུ།
HAG 2:11 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་མཆོད་དཔོན་རྣམས་ལ་བཀའ་ཁྲིམས་ཕྱོགས་ཀྱི་དོན་རྣམས་འདི་ལྟར་འདྲི་དགོས་པ་སྟེ།
HAG 2:12 གལ་ཏེ་མི་ཞིག་གིས་རང་གི་ཐུ་བའི་ནང་དུ་ཤ་དམ་པ་ཁྱེར་རྗེས་ཡང་ཐུ་བ་དེས་བག་ལེབ་དང་ཡང་ན་ཁུ་བའམ། རྒུན་ཆང་ངམ། སྣུམ་མམ་ཡང་ན་ཟས་གང་རུང་ལ་རེག་ན། དེ་དོན་ངོ་མས་དམ་པར་བརྩིའམ་ཞེས་པའོ་ཞེས་གསུངས་པ་དང་། མཆོད་དཔོན་རྣམས་ཀྱིས་ལན་དུ་དམ་པར་མི་བརྩི་ཞེས་སྨྲས།
HAG 2:13 ཡང་ཧག་གཱ་ཨི་ཡིས་འདི་ལྟར། གལ་ཏེ་རོ་ལ་རེག་ནས་མི་གཙང་བར་གྱུར་པའི་མི་ཞིག་གིས་དངོས་པོ་འདི་དག་ལས་གཅིག་ལ་རེག་ན། དེ་དོན་ངོ་མས་མི་གཙང་བར་བརྩིའམ་ཞེས་དྲིས་པ་ན། མཆོད་དཔོན་རྣམས་ཀྱིས་ལན་དུ་དེ་ནི་མི་གཙང་བར་བརྩིའོ་ཞེས་སྨྲས་པ་དང་།
HAG 2:14 དེ་ནས་ཧག་གཱ་ཨི་ན་རེ། དཀོན་མཆོག་ཡ་ཝཱེས་འདི་སྐད་གསུངས་ཏེ། མི་སྡེ་འདི་དང་ཡུལ་ཁམས་འདི་ཡང་ངའི་མདུན་དུ་དེ་བཞིན་ཡིན་ལ། དེ་རྣམས་ལག་གི་ལས་ཀ་ཐམས་ཅད་དང་། ཁོ་ཚོས་གནས་དེར་ཕུལ་བ་ཐམས་ཅད་མི་གཙང་བ་ཡིན་ནོ། །
HAG 2:15 ད་ལྟ་ཁྱོད་ཚོས་རང་གི་གནས་ཚུལ་ལ་བརྟག་ནས་དེ་རིང་ཡར་སྔོན་གྱི་དུས་ལ་ཕྱིར་དྲན་གྱིས་ཤིག དེའི་དུས་སུ་དཀོན་མཆོག་ཡ་ཝཱེའི་མཆོད་ཁང་གི་རྡོ་རྣམས་གཅིག་ཐོག་གཅིག་བརྩེགས་མེད་པ་ཡིན།
HAG 2:16 དེའི་དུས་སུ་ཁྱོད་རྣམས་ཅི་འདྲ་ཡིན་ནམ། མི་ཞིག་འབྲུ་རིགས་མང་སར་འོངས་ཏེ་འབྲུ་རིགས་བྲེ་ཉི་ཤུ་འཐོབ་འདོད་ཀྱང་བྲེ་བཅུ་མ་གཏོགས་མ་ཐོབ་ལ། མི་ཞིག་རྒུན་འབྲུམ་འཚིར་གཞོང་ཡོད་སར་ཕྱིན་ནས་འཚིར་གཞོང་ལས་རྒུན་ཆང་ཟོ་ལྔ་བཅུ་འཐོབ་འདོད་ཀྱང་ཟོ་ཉི་ཤུ་མ་གཏོགས་མ་ཐོབ་པ་ཡིན།
HAG 2:17 ངས་ཐན་པ་དང་གཡའ་སྤུ། སེར་བ་བཅས་ཀྱིས་ཁྱོད་ཅག་ལག་གི་ལས་ཀ་ཐམས་ཅད་ཀྱི་སྟེང་དུ་ཁྱོད་རྣམས་ལ་རྒོལ་ན་ཡང་། ཁྱོད་རྣམས་ད་དུང་ངའི་ཕྱོགས་སུ་མ་ལོག་གོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
HAG 2:18 ཁྱོད་ཚོས་རང་གི་གནས་ཚུལ་ལ་བརྟག་ནས་དེ་རིང་ཡར་སྔོན་གྱི་དུས་ཏེ། ཟླ་དགུ་པའི་ཚེས་ཉེར་དགུ་ཉིན་ནས་དཀོན་མཆོག་ཡ་ཝཱེའི་མཆོད་ཁང་གི་རྩིག་གདན་བཏིངས་པའི་ཉིན་མོའི་བར་དུ་ཕྱིར་དྲན་གྱིས་ཤིག
HAG 2:19 འབྲུ་མཛོད་དུ་ད་དུང་ས་བོན་ཡོད་དམ། རྒུན་འབྲུམ་ཤིང་དང་སེ་ཡབ་ཤིང་། སེ་འབྲུ་ཤིང་། སྐྱུ་རུ་ཤིང་བཅས་ལས་འབྲས་བུ་མ་ཐོགས་པ་མིན་ནམ། དུས་དེ་རིང་ནས་བཟུང་ངས་བྱིན་རླབས་གནང་བར་འགྱུར་ཞེས་པའོ་ཞེས་སྨྲས་སོ། །
HAG 2:20 ཟླ་དེའི་ཚེས་ཉེར་བཞི་ཉིན་དཀོན་མཆོག་ཡ་ཝཱེའི་བཀའ་ནི་ཡང་བསྐྱར་ཧག་གཱ་ཨི་ལ་བྱུང་ནས་འདི་སྐད་དུ།
HAG 2:21 ཁྱོད་ཀྱིས་ཡ་ཧུ་དཱའི་འགོ་དཔོན་ཟེ་རུ་པཱ་པེལ་ལ་འདི་ལྟར་སྨྲོས་ཤིག ངས་གནམ་ས་གཉིས་ཀ་གཡོ་བར་བྱ་ཞིང་།
HAG 2:22 ངས་ཡུལ་ཁམས་ཀུན་གྱི་གསེར་ཁྲི་ལོག་ཏུ་བཅུག་ནས། ཕྱི་རོལ་པའི་རྒྱལ་ཁམས་ཀུན་གྱི་སྟོབས་ཤུགས་མེད་པར་བྱ་ཞིང་། ཡང་ངས་ཤིང་རྟ་དང་དེ་འདེད་མཁན་རྣམས་ལོག་ཏུ་འཇུག་གོ །དེ་ནས་རྟ་དང་སྐྱ་མི་རྣམས་སར་འགྱེལ་ནས་མི་རེ་རེ་རང་གི་སྤུན་གྱི་རལ་གྲིའི་འོག་ཏུ་འཆི་བར་འགྱུར་ཞེས་པའོ། །
HAG 2:23 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཀྱེ་ཞིད་ཨལ་ཐེ་ཨེལ་གྱི་བུ་སྟེ་ངའི་ཞབས་ཕྱི་ཟེ་རུ་པཱ་པེལ་ལགས། ཉིན་དེར་ངས་ཁྱོད་ནི་མཐོ་སར་དྲངས་ཏེ་ཁྱོད་རང་མཛུབ་དཀྲིས་དམ་ཕྲུག་ཅན་དུ་བྱའོ་ཞེས་དཀོན་མཆོག་ཡ་ཝཱེས་གསུངས་པ་དང་། ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཅིའི་ཕྱིར་ཞེ་ན། ངས་ཁྱོད་རང་བདམས་པས་སོ་ཞེས་གསུངས་སོ།། །།
ZEC 1:1 དེ་ཡང་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་བརྒྱད་པར་དཀོན་མཆོག་ཡ་ཝཱེའི་བཀའ་ནི་ཨིད་དོའི་ཚ་བོའམ་པེ་རེག་ཡཱའི་བུ་ཡིན་པའི་ལུང་སྟོན་པ་ཟཱ་ཀར་ཡ་ལ་བྱུང་ནས་འདི་སྐད་དུ།
ZEC 1:2 སྔར་དཀོན་མཆོག་ཡ་ཝཱེ་ཁྱོད་ཅག་གི་ཕ་མེས་རྣམས་ཀྱི་སྟེང་ཐུགས་རབ་ཏུ་ཁྲོས་སོ། །
ZEC 1:3 དེ་བས་ཁྱོད་ཀྱིས་འབངས་མི་རྣམས་ལ་འདི་ལྟར་སྨྲོས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་བདག་གི་ཕྱོགས་སུ་འཁོར་ན། བདག་ཀྱང་ཁྱོད་ཅག་གི་ཕྱོགས་སུ་འཁོར་བར་བྱའོ་ཞེས་གསུངས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 1:4 ཁྱོད་ཅག་གིས་རང་གི་མེས་པོ་རྣམས་དང་འདྲ་བར་མ་བྱེད་ཅིག སྔ་མའི་ལུང་སྟོན་པ་རྣམས་ཀྱིས་དེ་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཕྱིར་ལོག་ཤོག རང་གི་བགྲོད་ལམ་ངན་པ་དང་བྱ་སྤྱོད་ངན་པར་འབྲལ་བར་གྱུར་ཅིག་ཅེས་གསུངས་ཞེས་བོས་ནའང་དེ་དག་གིས་མ་མཉན་ལ། བདག་ལ་ཁ་ཡའང་མ་བྱས་སོ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 1:5 ཁྱོད་ཅག་གི་ཕ་མེས་རྣམས་གང་དུ་ཡོད་དམ། ལུང་སྟོན་པ་རྣམས་དུས་གཏན་དུ་གསོན་པོར་གནས་པ་ཡིན་ནམ།
ZEC 1:6 འོན་ཀྱང་ངས་བདག་གི་ཞབས་ཕྱི་ལུང་སྟོན་པ་རྣམས་ལ་བསྒོས་པའི་བཀའ་དང་སྒྲིག་སྲོལ་རྣམས་ནི་ཁྱོད་ཅག་གི་ཕ་མེས་རྣམས་ཀྱི་སྟེང་དུ་བྱུང་བ་མ་ཡིན་ནམ། དེ་བས་ཁོ་རྣམས་ཀྱིས་འགྱོད་བཤགས་བྱས་ཏེ་ན་རེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་རང་ཅག་གི་བགྲོད་ལམ་དང་བྱ་སྤྱོད་བཞིན་དུ་རང་ཅག་ལ་མཛད་པར་ཐུགས་ཐག་བཅད་པ་དང་། ཁོང་གིས་དེ་བཞིན་མཛད་ཟིན་ཞེས་སྨྲས་པའོ་ཞེས་གསུངས་སོ། །
ZEC 1:7 དེ་ཡང་རྒྱལ་པོ་དར་ཡཱའི་ལོ་གཉིས་པའི་ཟླ་བཅུ་གཅིག་པ་སྟེ་ཤེ་བད་ཟླ་བ་ཞེས་པའི་ཚེས་ཉེར་བཞི་ཉིན་དཀོན་མཆོག་ཡ་ཝཱེའི་བཀའ་ནི་ཨིད་དོའི་ཚ་བོའམ་པེ་རེག་ཡཱའི་བུ་ཡིན་པའི་ལུང་སྟོན་པ་ཟཱ་ཀར་ཡ་ལ་བྱུང་ནས་འདི་སྐད་དུ།
ZEC 1:8 ངས་མཚན་མོར་བལྟས་པ་ན། མི་ཞིག་རྟ་རྐྱང་རྐྱང་ཞིག་ལ་ཞོན་ནས། གྲོག་ཤུར་ནང་གི་པ་སངས་མེ་ཏོག་གི་དཀྱིལ་དུ་ལངས་བསྡད་ཡོད་དེ། དེའི་རྒྱབ་ཏུ་རྟ་རྐྱང་རྐྱང་དང་རྟ་ཁམ་ཁམ། རྟ་དཀར་པོ་བཅས་ཡོད་པ་མཐོང་བྱུང་།
ZEC 1:9 དེ་ནས་ངས་ཀྱེ་ང་ཡི་ཇོ་བོ་ལགས། འདི་རྣམས་ཅི་ཡིན་ནམ་ཞེས་ཞུས་པ་ན། བདག་ལ་གསུང་གནང་བའི་ཕོ་ཉ་དེས་ང་ལ་འདི་སྐད་དུ། འདི་རྣམས་ཅི་ཡིན་པ་ངས་ཁྱོད་ལ་སྟོན་པར་བྱའོ་ཞེས་གསུངས།
ZEC 1:10 པ་སངས་མེ་ཏོག་གི་དཀྱིལ་དུ་ལངས་སྡོད་པའི་མི་དེས་ང་ལ་ན་རེ། འདི་རྣམས་ནི་དཀོན་མཆོག་ཡ་ཝཱེས་ས་གཞི་ཀུན་ལ་གཟིགས་པའི་ཕྱིར་མངགས་པ་རྣམས་ཡིན་ནོ་ཞེས་སྨྲས་སོ། །
ZEC 1:11 ཡང་སྐྱ་མི་དེ་དག་གིས་པ་སངས་མེ་ཏོག་གི་དཀྱིལ་དུ་ལངས་སྡོད་པའི་དཀོན་མཆོག་ཡ་ཝཱེའི་ཕོ་ཉ་དེ་ལ་འདི་ལྟར། ངེད་ཅག་གིས་ས་གཞི་ཀུན་ལ་བལྟས་ཟིན་ཏེ། ས་གཞི་ནི་ཡོངས་སུ་ལྷིང་འཇགས་ངང་བདེ་བར་གནས་སོ་ཞེས་ཞུས་པ་དང་།
ZEC 1:12 དེ་ནས་དཀོན་མཆོག་ཡ་ཝཱེའི་ཕོ་ཉ་ན་རེ། ཀྱེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས། ཁྱེད་ཀྱིས་ཡེ་རུ་སཱ་ལེམ་དང་ཡ་ཧུ་དཱའི་གྲོང་སྡེ་རྣམས་ལ་སྙིང་རྗེས་མི་གཟིགས་པར་དུས་ནམ་ཞིག་གི་བར་དུ་ལུས་སམ། ལོ་བདུན་ཅུའི་རིང་ལ་ཁྱེད་ཉིད་དེ་རྣམས་ལ་ཐུགས་ཁྲོས་སོ་ཞེས་ཞུས་པ་ན།
ZEC 1:13 དཀོན་མཆོག་ཡ་ཝཱེས་བྱམས་བརྩེ་ངང་སེམས་གསོའི་ཚུལ་དུ་བདག་ལ་གསུང་གནང་བའི་ཕོ་ཉ་དེར་བཀའ་ལན་གནང་ངོ་། །
ZEC 1:14 དེ་ནས་བདག་ལ་གསུང་གནང་བའི་ཕོ་ཉ་དེས་ང་ལ་འདི་སྐད་དུ། ཁྱོད་ཀྱིས་འདི་ལྟར་སྒྲོགས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། བདག་ནི་ཡེ་རུ་སཱ་ལེམ་དང་ཛ་ཡན་གཉིས་ཀྱི་དོན་དུ་སེམས་པ་ཕྲག་དོག་གིས་ཁེངས་ཡོད།
ZEC 1:15 བློ་བདེ་བག་ཕེབས་ངང་གནས་པའི་མི་རིགས་རྣམས་ལ་ང་རབ་ཏུ་ཁྲོའོ། །ཅིའི་ཕྱིར་ཞེ་ན། ང་ནི་རང་གི་མི་རྣམས་ལ་ཅུང་ཙམ་ཁྲོས་ཀྱང་། དེ་དག་གིས་ངའི་མི་རྣམས་ཀྱི་སྡུག་བསྔལ་ཆེ་རུ་བཏང་ངོ་། །
ZEC 1:16 དེ་བས་ན་དཀོན་མཆོག་ཡ་ཝཱེས་འདི་སྐད་དུ། བདག་ནི་སྙིང་རྗེའི་སེམས་དང་བཅས་ཕྱིར་ཡེ་རུ་སཱ་ལེམ་དུ་ལོག་ནས། བདག་གི་མཆོད་ཁང་ནི་གྲོང་ཁྱེར་ནང་དུ་ཡང་བསྐྱར་བཞེང་བར་འགྱུར་ལ། ཡེ་རུ་སཱ་ལེམ་གྱི་སྟེང་དུ་ཐིག་སྐུད་འཐེན་པར་འགྱུར་ཞེས་གསུངས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 1:17 ཡང་ཁྱོད་ཀྱིས་འདི་ལྟར་སྒྲོགས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། བདག་གི་གྲོང་ཁྱེར་རྣམས་སླར་ཡང་དར་ཞིང་རྒྱས་པར་འགྱུར་ཏེ། དཀོན་མཆོག་ཡ་ཝཱེས་ཡང་བསྐྱར་ཛ་ཡན་ལ་སྙིང་རྗེས་གཟིགས་ནས་ཡེ་རུ་སཱ་ལེམ་འདེམས་པར་འགྱུར་ཞེས་པའོ་ཞེས་གསུངས་སོ། །
ZEC 1:18 ཡང་ངས་མགོ་ཡར་བཀྱགས་ནས་བལྟས་པ་ན། རྭ་ཅོ་བཞི་མཐོང་བྱུང་།
ZEC 1:19 དེ་ནས་ངས་བདག་ལ་གསུང་གནང་བའི་ཕོ་ཉ་དེ་ལ་འདི་ལྟར། འདི་དག་ཅི་ཡིན་ནམ་ཞེས་ཞུས་པའི་ལན་དུ་ཁོང་གིས་ང་ལ་འདི་སྐད་དུ། འདི་དག་ནི་ཡ་ཧུ་དཱ་དང་ཡེས་ར་ཨེལ། ཡེ་རུ་སཱ་ལེམ་བཅས་གཏོར་བར་བྱེད་པའི་རྭ་ཅོ་རྣམས་ཡིན་ཞེས་གསུངས་སོ། །
ZEC 1:20 ཡང་དཀོན་མཆོག་ཡ་ཝཱེས་ང་ལ་བཟོ་བ་བཞི་བསྟན་ཞིང་།
ZEC 1:21 དེ་ནས་ངས་མི་འདི་རྣམས་ཅི་བྱེད་དུ་འོངས་པ་ཡིན་ནམ་ཞེས་ཞུས་པ་ལ། ཕོ་ཉ་དེས་ང་ལ་འདི་སྐད་དུ། འདི་དག་ནི་ཡ་ཧུ་དཱ་གཏོར་མཁན་གྱི་རྭ་ཅོ་ཡིན་ཏེ། ཐ་ན་རང་གི་མགོ་ཡར་འདེགས་ནུས་མཁན་གཅིག་ཀྱང་མེད་དོ། །ཡིན་ནའང་བཟོ་བ་འདི་དག་ནི་མི་རིགས་རྣམས་ལ་འཇིགས་སྐུལ་བར་འོངས་ནས། དེ་དག་གི་རྭ་ཅོ་རྣམས་མར་གཡུག་པར་འགྱུར། མི་སྡེ་འདི་དག་ནི་སྔར་རང་གི་རྭ་ཅོ་ཡར་བཀྱགས་ནས་ཡ་ཧུ་དཱ་ལ་རྒོལ་བ་དང་། ཡ་ཧུ་དཱ་ཡུལ་གྱི་མི་རྣམས་གཏོར་མཁན་ཡིན་ནོ་ཞེས་གསུངས་སོ། །
ZEC 2:1 ཡང་ངས་མགོ་ཡར་བཀྱགས་ནས་བལྟས་ཚེ། ལག་ལ་ཐིག་སྐུད་ཐོགས་པའི་མི་ཞིག་མཐོང་།
ZEC 2:2 ངས་དེ་ལ་ཁྱོད་རང་གང་དུ་ཕེབས་སམ་ཞེས་དྲིས་པ་ན། མི་དེས་ང་ལ་ན་རེ། ང་ནི་ཡེ་རུ་སཱ་ལེམ་ལ་ཚད་ཐིག་ལེན་དུ་འགྲོ་བ་ཡིན་ཏེ། དེའི་ཞེང་ལ་ག་ཚོད་ཡོད་པ་དང་། རིང་ཚད་ག་འདྲ་ཡིན་པར་བལྟ་རུ་འགྲོ་དགོས་ཞེས་སྨྲས་སོ། །
ZEC 2:3 བདག་ལ་གསུང་གནང་བའི་ཕོ་ཉ་དེ་ཕེབས་པ་ལ། ཕོ་ཉ་གཞན་ཞིག་དེ་བསུ་བར་འོངས་ནས།
ZEC 2:4 དེ་ལ་འདི་སྐད་དུ། ཁྱེད་རང་རྒྱུགས་ནས་ན་གཞོན་དེ་ལ་འདི་ལྟར་ཤོད་ཅིག ཡེ་རུ་སཱ་ལེམ་དུ་འདུག་མཁན་ཡོད་པ་དང་། གྲོང་ཁྱེར་ནང་གི་མི་ཕྱུགས་གཉིས་ཀ་ཧ་ཅང་མང་བས་ན་དེ་ནི་ལྕགས་རིའི་ཚད་བཀག་མེད་པའི་ས་སྟོང་དང་འདྲའོ། །
ZEC 2:5 དཀོན་མཆོག་ཡ་ཝཱེས་འདི་སྐད་དུ། ང་ནི་ཡེ་རུ་སཱ་ལེམ་གྱི་ཕྱོགས་བཞི་ཡི་མེའི་ལྕགས་རི་དང་གྲོང་ཁྱེར་ནང་གི་གཟི་བརྗིད་དུ་འགྱུར་འོང་གསུངས་ཞེས་པའོ་ཞེས་གསུངས་སོ། །
ZEC 2:6 ཀ་ཡེ། ཀ་ཡེ། ཁྱོད་རྣམས་བྱང་ཕྱོགས་ཡུལ་ནས་ཕྲོས་ཤིག ཅིའི་ཕྱིར་ཞེ་ན། སྔར་ངས་ཁྱོད་རྣམས་ས་གཞིའི་ཕྱོགས་བཞི་རུ་གཏོར་བས་སོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 2:7 ཡང་དཀོན་མཆོག་ཡ་ཝཱེས་འདི་སྐད་དུ། ཀ་ཡེ། པཱ་པེལ་ལོན་གྱི་ཡུལ་མི་དང་མཉམ་དུ་སྡོད་པའི་ཛ་ཡན་གྱི་མི་རྣམས་ཕྲོས་ཤིག་ཅེས་གསུངས།
ZEC 2:8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །གཟི་བརྗིད་ཐོབ་རྗེས། ཁོང་གིས་ང་རང་ཁྱོད་རྣམས་འཕྲོག་བཅོམ་བྱས་པའི་ཡུལ་ཁམས་དེ་དག་ལ་རྒོལ་བར་མངགས་པ་ཡིན་ཏེ། གང་ལ་ཞེ་ན། སུ་ཞིག་གིས་ཁྱོད་ལ་རེག་པ་ཡིན་ན་དེས་ཁོང་གི་སྤྱན་གྱི་རྒྱལ་མོར་རེག་པའོ། །
ZEC 2:9 ལྟོས་དང་། ངས་དེ་དག་གི་ཕྱོགས་སུ་རང་གི་ལག་པ་ཕྱར་ན། དེ་དག་ནི་རང་གི་བྲན་པོའི་བཅོམ་ནོར་དུ་འགྱུར་ངེས་ཤིང་། དེ་ནས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རང་མངགས་པ་ཁྱོད་རྣམས་ཀྱིས་རྟོགས་པར་འགྱུར།
ZEC 2:10 ཀྱེ་ཛ་ཡན་གྱི་མི་སྡེ་ལགས། ཁྱོད་རྣམས་ཀྱིས་དགའ་བའི་ཀི་སྒྲ་སྒྲོགས་ཤིག ཅིའི་ཕྱིར་ཞེ་ན། ང་རང་ཡོང་ནས་ཁྱོད་ཀྱི་ཁྲོད་དུ་གནས་པར་བྱའོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 2:11 ཡང་ཉིན་མོ་དེར་མི་རིགས་མང་པོས་དཀོན་མཆོག་ཡ་ཝཱེ་སྐྱབས་སུ་བསྟེན་ནས་ཁོང་གི་མི་སྡེ་རུ་འགྱུར་བ་དང་། ཁོང་ཉིད་ཁྱོད་ཅག་གི་ཁྲོད་དུ་བཞུགས་པར་འགྱུར་རོ། །དེ་ནས་ཁྱོད་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རང་ཁྱོད་ཀྱི་གམ་དུ་མངགས་པ་རྟོགས་པར་འགྱུར་རོ། །
ZEC 2:12 ཡང་དཀོན་མཆོག་ཡ་ཝཱེ་ལ་ཡ་ཧུ་དཱ་ཐོབ་ནས་ཁོང་གི་གནས་མཆོག་གི་ནོར་སྐལ་དུ་འགྱུར་བ་དང་། ཁོང་གིས་ཡང་བསྐྱར་ཡེ་རུ་སཱ་ལེམ་འདེམས་པར་འགྱུར་རོ། །
ZEC 2:13 ཀྱེ་མིའི་རིགས་ཐམས་ཅད་དཀོན་མཆོག་ཡ་ཝཱེའི་དྲུང་དུ་ཁུ་སིམ་མེར་སྡོད་ཅིག ཅིའི་ཕྱིར་ཞེ་ན། ཁོང་ནི་ཉིད་ཀྱི་བཞུགས་གནས་དམ་པ་ནས་ཡར་བཞེངས་པའི་ཕྱིར་རོ། །
ZEC 3:1 ཡང་དཀོན་མཆོག་ཡ་ཝཱེས་མཆོད་དཔོན་ཆེན་པོ་ཡོ་ཤུ་ཨ་ནི་དཀོན་མཆོག་ཡ་ཝཱེའི་ཕོ་ཉའི་མདུན་དུ་ལངས་བསྡད་ཡོད་པ་ང་ལ་བསྟན་ཏེ། སཱ་ཏན་ ཡང་ཡོ་ཤུ་ཨའི་གཡས་སུ་ལངས་བསྡད་ནས་དེ་གཏུག་གིན་འདུག
ZEC 3:2 དཀོན་མཆོག་ཡ་ཝཱེས་སཱ་ཏན་ལ་འདི་སྐད་དུ། ཀྱེ་སཱ་ཏན། དཀོན་མཆོག་ཡ་ཝཱེས་ཁྱོད་ལ་གཤེ་གཤེ་བཏང་བ་ཡིན། ཡེ་རུ་སཱ་ལེམ་བདམས་པའི་དཀོན་མཆོག་ཡ་ཝཱེས་ཁྱོད་ལ་གཤེ་གཤེ་བཏང་བ་ཡིན། མི་འདི་ནི་མེའི་ནང་ནས་ཕྱུང་བའི་བུད་ཤིང་ཞིག་མ་ཡིན་ནམ་ཞེས་གསུངས།
ZEC 3:3 སྐབས་དེར་ཡོ་ཤུ་ཨ་ཡིས་གོས་བཙོག་པ་ཞིག་གྱོན་ནས་ཕོ་ཉའི་མདུན་དུ་ལངས་བསྡད་དོ། །
ZEC 3:4 ཕོ་ཉ་དེས་རང་གི་མདུན་དུ་ལངས་བསྡད་ཡོད་པའི་ཞབས་ཏོག་པ་རྣམས་ལ་འདི་སྐད་དུ། ཁྱོད་ཅག་གིས་དེའི་གོས་བཙོག་པ་རྣམས་ཕུད་ཅིག་ཅེས་བསྒོས་པ་དང་། ཡང་ཡོ་ཤུ་ཨ་ལ་འདི་སྐད་དུ། ལྟོས་དང་། ངས་ཁྱོད་ཀྱི་ཉེས་པ་རྣམས་བསལ་ཏེ་ཁྱོད་ལ་ཡིད་དུ་འོང་བའི་གཟབ་གོས་སྐོན་པར་བྱའོ་ཞེས་གསུངས་སོ། །
ZEC 3:5 ཡང་ངས་འདི་ལྟར། ཁྱོད་ཅག་གིས་ཅོད་པན་གཙང་མ་དེ་ཁོའི་མགོ་ལ་སྐོན་ཅིག་ཅེས་སྨྲས་པ་ལ། དེ་དག་གིས་ཅོད་པན་གཙང་མ་དེའི་མགོ་ལ་བསྐོན་ནས་དེ་ལ་གཟབ་གོས་ཡིད་དུ་འོང་བ་ཞིག་གྱོན་པ་དང་། དུས་དེར་དཀོན་མཆོག་ཡ་ཝཱེའི་ཕོ་ཉ་ནི་དེའི་འགྲམ་དུ་ལངས་བསྡད་དོ། །
ZEC 3:6 དཀོན་མཆོག་ཡ་ཝཱེའི་ཕོ་ཉ་ཡིས་ཡོ་ཤུ་ཨ་ལ་བཀའ་འདི་སྐད་གནང་བ་སྟེ།
ZEC 3:7 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། གལ་ཏེ་ཁྱོད་རང་ངའི་ལམ་ནང་འགྲུལ་ཞིང་། ངའི་བཀའ་རྣམས་གཟབ་གཟབ་ངང་བསྲུངས་ན། ཁྱོད་ཀྱིས་ངའི་མཆོད་ཁང་ལ་བདག་གཉེར་བྱེད་པ་དང་། ངའི་ར་བ་རྣམས་ལ་ལྟ་སྲུང་བྱེད་པར་འགྱུར་ལ། ངས་ཀྱང་ཁྱོད་ལ་དབང་གནང་སྟེ། ངའི་མདུན་དུ་ཞབས་ཏོག་སྒྲུབ་པའི་ཕོ་ཉ་འདི་དག་གི་ཁྲོད་ནས་རང་དབང་གིས་རྒྱུ་བར་བྱའོ། །
ZEC 3:8 ཀྱེ་མཆོད་དཔོན་ཆེན་པོ་ཡོ་ཤུ་ཨ་ལགས། ཁྱོད་དང་ཁྱོད་ཀྱི་མདུན་དུ་ཡོད་པའི་རོགས་པ་ཐམས་ཅད་ཀྱིས་ཉོན་ཅིག དེ་དག་ནི་མ་འོངས་པའི་དོན་ངོ་མཚར་ཅན་རྣམས་ཀྱི་མཚོན་རྟགས་ཡིན། ངས་རང་གི་ཞབས་ཕྱི་སྟེ་ཡལ་ག་ དེ་ནི་རྒྱས་པར་བྱའོ། །
ZEC 3:9 ངས་ཡོ་ཤུ་ཨའི་མདུན་དུ་བཙུགས་པའི་རྡོ་ལ་ལྟོས་ཤིག རྡོ་འདིའི་སྟེང་དུ་མིག་བདུན་ཡོད་དེ། ལྟོས་དང་། རྡོ་འདི་ནི་ང་རང་གིས་དངོས་སུ་བརྐོ་བར་བྱའོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །ཡང་ངས་ཡུལ་ཁམས་འདིའི་ཉེས་པ་ནི་ཉིན་གཅིག་གི་ནང་བསལ་བར་བྱའོ། །
ZEC 3:10 ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཉིན་མོ་དེར་ཁྱོད་ཅག་རེ་རེས་རང་གི་ཁྱིམ་མཚེས་རྣམས་གདན་དྲངས་ནས་རྒུན་ཤིང་དང་སེ་ཡབ་ཤིང་གི་འོག་ལ་སྡོད་དུ་ཆུག་ཅེས་གསུངས་སོ་ཞེས་གསུངས་པའོ། །
ZEC 4:1 ང་ལ་གསུང་གནང་མཁན་ཕོ་ཉ་དེ་ཕྱིར་འོངས་ནས་ང་རང་སད་དུ་བཅུག་སྟེ། ང་ནི་མི་གཞན་གྱིས་གཉིད་ལས་སད་དུ་བཅུག་པའི་མི་དང་འདྲ་ཞིང་།
ZEC 4:2 དེས་ང་ལ་འདི་སྐད་དུ། ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར་ངས་དེའི་ལན་དུ། ངས་གསེར་བཙོ་མའི་སྒྲོན་སྟེགས་ཤིག་མཐོང་ཞིང་། དེའི་རྩེ་མོར་ཏིང་ཕོར་ཞིག་ཡོད་ལ། ད་དུང་སྒྲོན་མེ་བདུན་ཡོད་པ་དང་། རྩེ་མོའི་སྒྲོན་མེ་རེ་རེར་སྡོང་རས་འཛུགས་ས་བདུན་རེ་ཡོད་ཅིང་།
ZEC 4:3 ཏིང་ཕོར་གྱི་འགྲམ་དུ་སྐྱུ་རུ་ཤིང་གཉིས་ཡོད་དེ། གཅིག་ནི་གཡས་ཕྱོགས་སུ་ཡོད་ཅིང་། ཅིག་ཤོས་ནི་གཡོན་ཕྱོགས་སུ་ཡོད་ཅེས་ཞུས་པ་དང་།
ZEC 4:4 ཡང་ངས་བདག་ལ་གསུང་གནང་བའི་ཕོ་ཉ་དེ་ལ་འདི་ལྟར། ང་ཡི་ཇོ་བོ་ལགས། འདི་དག་ཅི་ཡིན་ནམ་ཞེས་ཞུས་པ་ན།
ZEC 4:5 ང་ལ་གསུང་གནང་བའི་ཕོ་ཉ་དེས་ལན་དུ་འདི་སྐད་དུ། ཁྱོད་ཀྱིས་འདི་རྣམས་ཅི་ཡིན་མི་ཤེས་སམ་ཞེས་གསུངས་པ་ན། བདག་གིས། ང་ཡི་ཇོ་བོ་ལགས་ངས་མི་ཤེས་སོ་ཞེས་ཞུས།
ZEC 4:6 དེ་ནས་ཁོང་གིས་ང་ལ་འདི་སྐད་དུ། འདི་ནི་དཀོན་མཆོག་ཡ་ཝཱེས་ཟེ་རུ་པཱ་པེལ་ལ་གསུངས་པའི་བཀའ་ཡིན་ཏེ། དབང་ཤུགས་ལ་བརྟེན་པ་མ་ཡིན་ལ། ནུས་པར་བརྟེན་པའང་མ་ཡིན་ཏེ། ངའི་སེམས་ཉིད་ལ་བརྟེན་པ་ཡིན་ནོ་ཞེས་པའོ། །དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་པ་རེད།
ZEC 4:7 ཀྱེ་རི་རབ་ཁྱོད་ནི་སུ་ཞིག་ཡིན་ནམ། ཟེ་རུ་པཱ་པེལ་གྱི་མདུན་དུ་ཁྱོད་ནི་ཐང་བདེ་རུ་འགྱུར་བ་དང་། ཁོང་གིས་སྟེང་གི་རྡོ་ལེབ་དེ་བཞག་ནས་དགའ་སྤྲོ་དང་བཅས་སྐད་ཆེན་པོས་འདི་ལྟར། དཀོན་མཆོག་གིས་མཆོད་ཁང་འདི་ལ་ཐུགས་རྗེ་གནང་བར་ཤོག དཀོན་མཆོག་གིས་མཆོད་ཁང་འདི་ལ་ཐུགས་རྗེ་གནང་བར་ཤོག་ཅེས་བསྒྲག་པར་འགྱུར་ཞེས་གསུངས་སོ། །
ZEC 4:8 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
ZEC 4:9 ཟེ་རུ་པཱ་པེལ་གྱི་ཕྱག་གིས་མཆོད་ཁང་འདིའི་རྩིག་གདན་བཏིངས་པ་དང་། ཁོང་གི་ཕྱག་གིས་ལས་འདི་འགྲུབ་ཏུ་ཡང་འཇུག་ངེས་ཡིན། དེ་ནས་ཁྱོད་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རང་ཁྱོད་ཀྱི་གམ་དུ་མངགས་པ་རྟོགས་པར་འགྱུར།
ZEC 4:10 སུ་ཞིག་གིས་ཉིན་མོ་འདི་ལ་མཐོང་ཆུང་བྱས་ནས་སྤྱོད་པའི་ལས་རྣམས་དོན་ཆུང་དུ་བསམ་མམ། དེ་དག་གིས་ཟེ་རུ་པཱ་པེལ་གྱི་ཕྱག་ཏུ་དཔྱང་སྐུད་ཡོད་པ་མཐོང་ནས་དགའ་ཞིང་མགུ་བར་འགྱུར་ཞེས་གསུངས་པ་དང་། དེ་ནི་དཀོན་མཆོག་ཡ་ཝཱེའི་སྤྱན་བདུན་པོས་ས་གཞི་ཡོངས་ལ་གཟིགས་ཞིབ་བྱེད་པ་ཡིན་ནོ། །
ZEC 4:11 དེ་ནས་ཡང་ངས་ཕོ་ཉ་དེ་ལ་འདི་ལྟར། སྒྲོན་སྟེགས་འདིའི་གཡས་གཡོན་གཉིས་སུ་ཡོད་པའི་སྐྱུ་རུ་ཤིང་འདི་གཉིས་ཀ་ཅི་ཡིན་ནམ་ཞེས་ཞུས་པ་དང་།
ZEC 4:12 ངས་ཡང་བསྐྱར་ཕོ་ཉ་དེ་ལ་འདི་ལྟར། གསེར་མདོག་གི་སྣུམ་བཞུར་བའི་གསེར་གྱི་སྦུ་གུ་གཉིས་ཀྱི་ལོགས་སུ་སྐྱུ་རུ་ཤིང་གི་ཡལ་ག་གཉིས་ཡོད་པ་འདིའི་དོན་ཅི་ཡིན་ནམ་ཞེས་ཞུས་པ་ན།
ZEC 4:13 ཁོང་གིས་ང་ལ་འདི་སྐད་དུ། ཁྱོད་ཀྱིས་འདི་རྣམས་ཅི་ཡིན་མི་ཤེས་སམ་ཞེས་གསུངས་པ་དང་། བདག་གིས། ང་ཡི་ཇོ་བོ་ལགས་ངས་མི་ཤེས་སོ་ཞེས་ཞུས།
ZEC 4:14 དེ་ནས་ཁོང་གིས་འདི་སྐད་དུ། འདི་ནི་སྣུམ་གྱིས་བྱུགས་པའི་མི་གཉིས་ཡིན་ཏེ། ས་གཞི་ཡོངས་ཀྱི་བདག་པོའི་དྲུང་དུ་འགྲེངས་ནས་ཁོང་ལ་ཞབས་ཏོག་སྒྲུབ་མཁན་ཡིན་ནོ་ཞེས་གསུངས་སོ། །
ZEC 5:1 དེ་ནས་ཡང་ངས་མགོ་ཡར་བཀྱགས་ནས་བལྟས་པ་ན། འཕུར་སྐྱོད་བྱེད་པའི་ཤོག་དྲིལ་ཞིག་མཐོང་བྱུང་།
ZEC 5:2 ཁོང་གིས་ང་ལ་འདི་སྐད་དུ། ཁྱོད་ཀྱིས་ཅི་ཞིག་མཐོང་ངམ་ཞེས་དྲིས་པ་ལ། བདག་གིས་ཁོང་ལ་ངས་འཕུར་སྐྱོད་བྱེད་པའི་ཤོག་དྲིལ་ཞིག་མཐོང་སྟེ། དེའི་རིང་ཚད་ལ་ཁྲུ་ཉི་ཤུ་དང་ཞེང་ལ་ཁྲུ་བཅུ་འདུག་ཅེས་ཞུས་པ་དང་།
ZEC 5:3 ཁོང་གིས་ང་ལ་འདི་སྐད་དུ། འདི་ནི་ས་གཞི་ཡོངས་ལ་བཏབ་པའི་དམོད་མོ་ཡིན་ཏེ། རྐུ་བྱེད་མཁན་ཐམས་ཅད་ཤོག་དྲིལ་གྱི་ཕྱོགས་གཅིག་ལ་བཀོད་པ་བཞིན་ཡུལ་འདི་ནས་ཚར་དུ་གཅོད་པར་འགྱུར་ལ། མནའ་རྫུན་མ་སྐྱེལ་མཁན་ཐམས་ཅད་ཤོག་དྲིལ་གྱི་ཕྱོགས་ཅིག་ཤོས་སུ་བཀོད་པ་བཞིན་ཡུལ་འདི་ནས་ཚར་དུ་གཅོད་པར་འགྱུར་རོ། །
ZEC 5:4 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ངས་ཤོག་དྲིལ་འདི་ཕྱི་རུ་མངགས་ཏེ། རྐུ་བྱེད་མཁན་གྱི་ཁྱིམ་དང་ངའི་མིང་བརྗོད་ནས་མནའ་རྫུན་མ་སྐྱེལ་མཁན་གྱི་ཁྱིམ་ནང་དུ་སོང་ནས། ཤོག་དྲིལ་ནི་དེའི་ཁྱིམ་དུ་ལུས་པར་འགྱུར་ལ། དེའི་ཁྱིམ་ནང་གི་ཤིང་ཆ་དང་རྡོ་རྣམས་རྩ་བ་ནས་བརླག་པར་འགྱུར་ཞེས་གསུངས། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་ཞེས་གསུངས་སོ། །
ZEC 5:5 བདག་ལ་གསུང་གནང་བའི་ཕོ་ཉ་དེ་ཕྱི་རུ་ཐོན་ནས་ང་ལ་འདི་སྐད་དུ། ཁྱོད་ཀྱིས་མགོ་ཡར་བཀྱགས་ནས་ལྟོས་ཤིག ཕྱི་རུ་ཐོན་པ་དེ་ཅི་ཡིན་པར་ལྟོས་ཤིག་ཅེས་གསུངས་བྱུང་།
ZEC 5:6 དེར་བདག་གིས་འདི་ནི་ཅི་ཡིན་ནམ་ཞེས་ཞུས་པ་ན། ཁོང་གིས་ལན་དུ་འདི་སྐད་དུ། ཕྱི་རུ་ཐོན་པ་འདི་ནི་རྫ་བུམ་ཞིག་ཡིན་ཞེས་གསུངས་པ་དང་། ཡང་ཁོང་གིས་འདི་སྐད་དུ། འདི་ནི་དེ་དག་གི་ས་གཞི་ཡོངས་ཀྱི་སྡིག་པའི་དཔེ་ལྟ་བུ་ཡིན་ཞེས་གསུངས་སོ། །
ZEC 5:7 ལྟོས་དང་། རྫ་བུམ་གྱི་ཞ་ཉེའི་ཁ་གཅོད་ཟླུམ་པོ་ཕྱེས་པ་ལ། བུད་མེད་ཅིག་རྫ་བུམ་ནང་དུ་བསྡད་འདུག
ZEC 5:8 ཕོ་ཉ་དེས་འདི་སྐད་དུ། འདི་ནི་སྡིག་པ་ཡིན་ཞེས་གསུངས་པ་དང་། དེ་ནས་ཁོང་གིས་བུད་མེད་དེ་རྫ་བུམ་ནང་དུ་འཕངས་ཏེ། ཡང་ཞ་ཉེའི་ཁ་གཅོད་དེ་རྫ་བུམ་གྱི་ཁ་རུ་གཡུགས་སོ། །
ZEC 5:9 ཡང་ངས་མགོ་ཡར་བཀྱགས་ནས་བལྟས་པ་ན། བུད་མེད་གཉིས་ཕྱི་རུ་ཐོན་པ་མཐོང་སྟེ། ཁོ་མོ་གཉིས་ལ་གཤོག་པ་ཡོད་པ་དང་། དེ་ནི་ཁྲུང་ཁྲུང་གི་གཤོག་པ་དང་འདྲ་ཞིང་གཤོག་པའི་འོག་ཏུ་རླུང་ཡོད་དེ། ཁོ་མོ་གཉིས་ཀྱིས་རྫ་བུམ་དེ་ཡར་གནམ་ས་གཉིས་ཀྱི་བར་དུ་བཀྱགས་སོ། །
ZEC 5:10 དེ་ནས་བདག་གིས་ང་ལ་གསུང་གནང་བའི་ཕོ་ཉ་དེ་ལ་འདི་ལྟར། ཁོ་མོ་གཉིས་ཀྱིས་རྫ་བུམ་གང་དུ་འཁྱེར་རམ་ཞེས་ཞུས་པ་ན།
ZEC 5:11 ཁོང་གིས་ང་ལ་འདི་སྐད་དུ། ཤིན་ཨར་ དུ་རྫ་བུམ་ལ་ཁང་པ་ཞིག་བརྩིག་དགོས་པ་དང་། ཁང་པ་གྲ་སྒྲིག་བྱས་ཚར་རྗེས་གནས་དེ་རུ་རྫ་བུམ་སྔར་གནས་སུ་འཇོག་པར་འགྱུར་ཞེས་གསུངས་སོ། །
ZEC 6:1 ཡང་ངས་མགོ་ཡར་བཀྱགས་ནས་བལྟས་པ་ན། རི་བོ་གཉིས་ཀྱི་བར་ནས་ཤིང་རྟ་བཞི་ཐོན་པ་མཐོང་སྟེ། རི་བོ་དེ་གཉིས་ནི་ལི་ཡི་རི་བོ་ཡིན་ནོ། །
ZEC 6:2 ཤིང་རྟ་དང་པོ་རྟ་རྐྱང་རྐྱང་རྣམས་དང་། ཤིང་རྟ་གཉིས་པ་རྟ་ནག་པོ་རྣམས།
ZEC 6:3 ཤིང་རྟ་གསུམ་པ་རྟ་དཀར་པོ་རྣམས། ཤིང་རྟ་བཞི་པ་རྟ་ཁྲ་ཁྲ་རྣམས་ལ་སྦྲེལ་ཡོད་དེ། རྟ་ཐམས་ཅད་སྟོབས་དང་ལྡན་པ་ཡིན་ནོ། །
ZEC 6:4 དེ་ནས་བདག་གིས་ང་ལ་གསུང་གནང་བའི་ཕོ་ཉ་དེ་ལ་འདི་ལྟར། ང་ཡི་ཇོ་བོ་ལགས། འདི་རྣམས་ཅི་ཞིག་ཡིན་ནམ་ཞེས་ཞུས་པ་ལ།
ZEC 6:5 ཕོ་ཉ་དེས་ང་ལ་འདི་སྐད་དུ། འདི་དག་ནི་གནམ་གྱི་རླུང་བཞི་པོ་ཡིན་ཏེ། ས་གཞི་ཡོངས་ཀྱི་བདག་པོའི་དྲུང་ནས་ཐོན་པ་ཡིན་ཞེས་གསུངས།
ZEC 6:6 རྟ་ནག་པོ་རྣམས་ལ་སྦྲེལ་བའི་ཤིང་རྟ་ཕྱི་རུ་ཐོན་ནས་བྱང་ཕྱོགས་ཡུལ་དུ་བསྐྱོད་ཅིང་། རྟ་དཀར་པོ་རྣམས་ལ་སྦྲེལ་བའི་ཤིང་རྟ་ཕྱི་རུ་ཐོན་ནས་དེའི་རྗེས་སུ་བསྐྱོད་པ་དང་། རྟ་ཁྲ་ཁྲ་རྣམས་ལ་སྦྲེལ་བའི་ཤིང་རྟ་ཕྱི་རུ་ཐོན་ནས་ལྷོ་ཕྱོགས་ཡུལ་དུ་བསྐྱོད་པའོ། །
ZEC 6:7 སྟོབས་དང་ལྡན་པའི་རྟ་འདི་རྣམས་ཕྱི་རུ་ཐོན་ནས་ས་གཞི་ཡོངས་སུ་བསྐྱོད་འདོད་པས། ཕོ་ཉ་དེས་འདི་སྐད་དུ། ཁྱོད་རྣམས་སོང་ནས་ས་གཞི་ཡོངས་སུ་སྐྱོད་ཅིག་ཅེས་གསུངས་པ་ན། དེ་རྣམས་ས་གཞི་ཡོངས་སུ་བསྐྱོད་དོ། །
ZEC 6:8 ཡང་ཁོང་གིས་ང་བོས་ཏེ་འདི་སྐད་དུ། ལྟོས་དང་། ཕྱི་རུ་ཐོན་ནས་བྱང་ཕྱོགས་སུ་བསྐྱོད་པ་དེ་དག་གིས་བྱང་ཕྱོགས་ཡུལ་ནས་བདག་ལ་སེམས་གསོ་བྱས་པ་ཡིན་ཞེས་གསུངས་སོ། །
ZEC 6:9 དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
ZEC 6:10 ཁྱོད་ཀྱིས་ཧེལ་དཱ་ཨི་དང་ཏོ་བི་ཡཱ། ཡེ་དཱ་ཡ་བཅས་ཀྱི་ལག་ནས་བཙོན་དུ་ཁྲིད་པའི་མི་རྣམས་ཀྱིས་ཕུལ་བའི་གསེར་དངུལ་རྣམས་ལོངས་ཤིག་དང་། དེ་རྣམས་པཱ་པེལ་ལོན་ནས་ཕྱིར་ལོག་གོ །ཁྱོད་དེ་རིང་ཟེ་ཕན་ཡཱའི་བུ་ཡོ་ཤུ་ཨ་ཡི་ཁྱིམ་དུ་སོང་སྟེ།
ZEC 6:11 ཁྱོད་ཀྱིས་གསེར་དངུལ་འདི་དག་གིས་ཅོད་པན་ཞིག་བཟོས་ནས། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨའི་མགོ་ལ་སྐོན་ཅིག
ZEC 6:12 དེ་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། མིང་ལ་ཡལ་ག་ཞེས་འབོད་པ་དེ་ནི་རང་གི་གནས་སུ་དར་བར་མ་ཟད། དཀོན་མཆོག་ཡ་ཝཱེའི་མཆོད་ཁང་བཞེང་བར་འགྱུར་ལ།
ZEC 6:13 དེས་དཀོན་མཆོག་ཡ་ཝཱེའི་མཆོད་ཁང་བཞེངས་ནས་གཟི་བརྗིད་འཐོབ་པ་དང་། རྒྱལ་ཁྲིར་བཞུགས་ནས་རྒྱལ་སྲིད་སྐྱོང་ཞིང་། ཡང་རང་གི་རྒྱལ་ཁྲིའི་སྟེང་མཆོད་དཔོན་དུ་གྱུར་ནས་དེ་གཉིས་འགྲིག་མཐུན་ངང་གནས་པར་བྱའོ། །
ZEC 6:14 ཅོད་པན་དེ་ནི་དཀོན་མཆོག་ཡ་ཝཱེའི་མཆོད་ཁང་ནང་དུ་ཧེལ་དཱ་ཨི་དང་ཏོ་བི་ཡཱ། ཡེ་དཱ་ཡ། ཟེ་ཕན་ཡཱའི་བུ་ཧེན་བཅས་ལ་དྲན་རྟེན་དུ་སྦྱིན་པར་བྱའོ། །
ZEC 6:15 རྒྱང་རིང་གི་མི་རྣམས་དཀོན་མཆོག་ཡ་ཝཱེའི་མཆོད་ཁང་བཞེང་བར་འོངས་ན། ཁྱོད་ཅག་གིས་ང་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཁྱོད་རྣམས་ཀྱི་གམ་དུ་མངགས་པ་རྟོགས་པར་འགྱུར་ལ། ཇི་སྟེ་ཁྱོད་ཅག་གིས་ཁྱོད་ཀྱི་དཀོན་མཆོག་ཡ་ཝཱེའི་བཀའ་ལ་གཟབ་གཟབ་བྱས་ནས་མཉན་ན། དེ་བཞིན་དུ་འགྲུབ་ངེས་ཡིན་ཞེས་གསུངས་སོ། །
ZEC 7:1 དེ་ནས་རྒྱལ་པོ་དར་ཡཱའི་ལོ་བཞི་པའི་ཟླ་དགུ་པ་སྟེ། གེ་སཱི་ལེ་ཟླ་བ་ཞེས་བྱ་བའི་ཚེས་བཞི་ཉིན་དཀོན་མཆོག་ཡ་ཝཱེའི་བཀའ་ནི་ཟཱ་ཀར་ཡ་ལ་བྱུང་བ་དང་།
ZEC 7:2 དུས་དེར་པེད་ཨེལ་པས་ཤར་ཨེ་ཟེར་དང་། རེ་གེམ་མེ་ལེག་དང་དེའི་རྗེས་འབྲང་པ་རྣམས་ནི་དཀོན་མཆོག་ཡ་ཝཱེས་དྲིན་གྱིས་བསྐྱང་ཕྱིར་ཁོང་ལ་ཞུ་བར་མངགས་ཤིང་།
ZEC 7:3 དེ་དག་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཆོད་ཁང་ནང་གི་མཆོད་དཔོན་རྣམས་དང་ལུང་སྟོན་པ་རྣམས་ལ་འདི་ལྟར། ངེད་ཅག་གིས་ད་དུང་ལོ་ངོ་མང་པོའི་རིང་ལ་བྱས་པ་བཞིན་ཟླ་ལྔ་པར་མྱ་ངན་བྱས་ཏེ་སྨྱུང་གནས་བསྲུང་དགོས་སམ་ཞེས་དྲིས་པ་ལ།
ZEC 7:4 དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
ZEC 7:5 ཁྱོད་ཀྱིས་ཡུལ་འདིའི་མི་ཐམས་ཅད་དང་མཆོད་དཔོན་རྣམས་ལ་འདི་ལྟར་སྨྲོས་ཤིག ལོ་བདུན་ཅུའི་རིང་ལ་ཁྱོད་རྣམས་ཀྱིས་ཟླ་ལྔ་པ་དང་ཟླ་བདུན་པའི་ནང་དུ་མྱ་ངན་བྱས་ཏེ་སྨྱུང་གནས་བསྲུངས་པ་དང་། དེ་ནི་དངོས་གནས་ངའི་ཆེད་དུ་སྨྱུང་གནས་བསྲུངས་པ་ཡིན་ནམ།
ZEC 7:6 ཁྱོད་རྣམས་ཀྱིས་ཟ་ཞིང་འཐུང་བ་ནི་རང་གི་ཕྱིར་དུ་ཟ་བ་དང་རང་གི་ཕྱིར་དུ་འཐུང་བ་མ་ཡིན་ནམ།
ZEC 7:7 གཏམ་འདི་དག་ནི་དཀོན་མཆོག་ཡ་ཝཱེས་སྔར་ལུང་སྟོན་པ་རྣམས་བརྒྱུད་ནས་བསྒྲགས་པ་མ་ཡིན་ནམ། དུས་དེར། ཡེ་རུ་སཱ་ལེམ་དང་མཐའ་འཁོར་གྱི་གྲོང་ཁྱེར་རྣམས་སུ་འདུག་མཁན་ཡོད་ཅིང་ཤིན་ཏུ་དར་བ་དང་། ནེ་གུབ་ཡུལ་དང་རི་ཀླུང་དུ་ཡང་འདུག་མཁན་ཡོད་དོ་ཞེས་པའོ་ཞེས་གསུངས་སོ། །
ZEC 7:8 ཡང་དཀོན་མཆོག་ཡ་ཝཱེའི་བཀའ་ནི་ཟཱ་ཀར་ཡ་ལ་བྱུང་ནས་འདི་སྐད་དུ།
ZEC 7:9 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་སྔར་ཁྱོད་ཅག་གི་མེས་པོ་རྣམས་ལ་འདི་སྐད་དུ། ཁྱོད་རྣམས་ཀྱིས་ཁྲིམས་དྲང་པོར་སྤྱོད་ཅིག མི་རེ་རེས་བྱམས་དང་སྙིང་རྗེའི་སྒོ་ནས་རང་གི་སྤུན་ཟླ་སྐྱོངས་ཤིག
ZEC 7:10 ཡུགས་མོ་དང་དྭ་ཕྲུག བྱེས་པ། དབུལ་པོ་བཅས་སུ་ཡིན་ཡང་ཁྱོད་རྣམས་ཀྱིས་དེར་གཉའ་གནོན་བྱེད་མི་རུང་ལ། སོ་སོའི་སེམས་སུ་རང་གི་སྤུན་ཟླ་སུ་ཞིག་ལའང་གནོད་འཚེ་གཏོང་བའི་ལྐོག་ཇུས་བཤམ་མི་རུང་ཞེས་གསུངས་སོ། །
ZEC 7:11 ཡིན་ནའང་དེ་དག་གིས་མ་མཉན་པར་མ་ཟད་ད་དུང་གཉའ་རེངས་བྱས་ཏེ། རྣ་བ་བཀབ་ནས་མ་མཉན་པ་དང་།
ZEC 7:12 དེ་དག་གིས་རང་གི་སེམས་རྒྱུད་ནི་མེ་རྡོ་ལྟར་མཁྲེགས་པོ་བྱས་ཤིང་། བཀའ་ཁྲིམས་དང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཉིད་ཀྱི་ཐུགས་ཉིད་དང་སྔོན་མའི་ལུང་སྟོན་པ་རྣམས་བརྒྱུད་ནས་གསུངས་པའི་བཀའ་ལ་མ་མཉན་པས། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཐུགས་རབ་ཏུ་ཁྲོས་པའོ། །
ZEC 7:13 སྔར་ངས་དེ་རྣམས་བོས་ཀྱང་ཁོ་ཚོས་མ་མཉན་པ་བཞིན་དུ། མ་འོངས་པར་དེ་དག་གིས་ང་འབོད་དུས་ངས་ཀྱང་མཉན་པར་མི་བྱའོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
ZEC 7:14 ངས་རླུང་འཚུབ་ཀྱིས་དེ་རྣམས་ནི་ཁོ་ཚོས་ངོ་མི་ཤེས་པའི་ཡུལ་ཁམས་ཀུན་ཏུ་གཏོར་ཞིང་། དེ་དག་ཤུལ་གྱི་ཡུལ་ནི་མི་མེད་ལུང་སྟོང་དུ་གྱུར་ཏེ། ཐ་ན་ཡུལ་དེ་བརྒྱུད་ནས་འགྲོ་འོང་བྱེད་མཁན་ཡང་མེད་དོ། །ཅིའི་ཕྱིར་ཞེ་ན། དེ་དག་གིས་ཡིད་དུ་འོང་བའི་ཡུལ་དེ་མི་མེད་ལུང་སྟོང་དུ་བསྒྱུར་བས་སོ་ཞེས་གསུངས་སོ། །
ZEC 8:1 དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
ZEC 8:2 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ང་རང་ཛ་ཡན་གྱི་དོན་དུ་སེམས་པ་ཕྲག་དོག་གིས་ཁེངས་པ་དང་། ང་རང་ཛ་ཡན་གྱི་ཕྱིར་ཕྲག་དོག་སྐྱེས་ཤིང་རབ་ཏུ་ཁྲོས་པ་ཡིན་ཞེས་གསུངས།
ZEC 8:3 དཀོན་མཆོག་ཡ་ཝཱེས་འདི་སྐད་དུ། ང་རང་ཕྱིར་ཛ་ཡན་དུ་ལོག་ནས་ཡེ་རུ་སཱ་ལེམ་དུ་གནས་པར་བྱ་སྟེ། ཡེ་རུ་སཱ་ལེམ་ལ་དམ་ཚིག་ལྡན་པའི་གྲོང་ཁྱེར་ཞེས་དང་། དཔུང་ཚོགས་ཀུན་གྱི་ཡ་ཝཱེའི་རི་བོ་ལ་རི་བོ་དམ་པ་ཞེས་གསོལ་བར་འགྱུར།
ZEC 8:4 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། རྒན་པོ་རྒན་མོ་རྣམས་ཡེ་རུ་སཱ་ལེམ་གྱི་ཐང་ཆེན་དུ་སྡོད་ཅིང་། ཁོ་རྣམས་ལོ་ན་བགྲེས་པས་རེ་རེའི་ལག་ཏུ་འཁར་བ་བཟུང་བ་དང་།
ZEC 8:5 གྲོང་ཁྱེར་གྱི་ཐང་ཆེན་དུ་བུ་ཆུང་དང་བུ་མོས་ཁེངས་ཏེ་རྩེད་མོར་རོལ་བ་ཡིན་ཞེས་གསུངས་སོ། །
ZEC 8:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དུས་དེ་རྣམས་སུ། དོན་འདི་ནི་མི་ལྷག་ལུས་རྣམས་ཀྱི་མིག་ནང་དུ་དཔེ་མི་སྲིད་པའི་དོན་ངོ་མཚར་ཅན་དུ་བརྩིས་པ་ཡིན་མོད། འོན་ཀྱང་ངའི་མཐོང་ངོར་ཡང་དཔེ་མི་སྲིད་པའི་དོན་དུ་སྣང་བར་འགྱུར་རམ་ཞེས་གསུངས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས།
ZEC 8:7 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངས་ཤར་ཕྱོགས་དང་ནུབ་ཕྱོགས་ནས་རང་གི་མི་རྣམས་སྐྱོབ་པར་འགྱུར་ལ།
ZEC 8:8 ངས་དེ་རྣམས་ཕྱིར་ཁྲིད་འོངས་ནས་ཁོ་ཚོ་ཡེ་རུ་སཱ་ལེམ་ལ་སྡོད་དུ་འཇུག་པ་དང་། དེ་རྣམས་ང་ཡི་མི་སྡེ་རུ་འགྱུར་ཞིང་། ང་རང་ཁོ་རྣམས་ཀྱི་བློ་གཏོད་རུང་བ་དང་དྲང་བདེན་གྱི་དཀོན་མཆོག་ཏུ་འགྱུར་རོ་ཞེས་གསུངས།
ZEC 8:9 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། སྔར་དཔུང་ཚོགས་ཀུན་གྱི་ཡ་ཝཱེའི་མཆོད་ཁང་གི་རྩིག་གདན་བཏིངས་ནས་དེ་བཞེང་བར་གྲ་སྒྲིག་བྱེད་པའི་ཉིན་མོར། ལུང་སྟོན་པ་རྣམས་ཀྱིས་དངོས་སུ་བསྒྲགས་པའི་གཏམ་ཐོས་མྱོང་བ་ཁྱོད་ཅག་གི་ལག་པ་ནི་ངེས་པར་ད་ལྟ་ནས་སྟོབས་དང་ལྡན་པར་གྱིས་ཤིག
ZEC 8:10 ཅིའི་ཕྱིར་ཞེ་ན། ཉིན་དེ་དག་གི་སྔོན་ལ་མི་ཡིས་ལས་ཀ་བྱས་པར་ལས་གླ་མེད་ལ། ཕྱུགས་ཟོག་ཀྱང་དེ་བཞིན་ཡིན་པར་མ་ཟད། དགྲ་བོ་ཡོད་པའི་རྐྱེན་གྱིས་མི་རྣམས་འགྲོ་འོང་བྱེད་དུས་བདེ་འཇགས་མེད་དེ། གང་ལ་ཞེ་ན། ངས་ཁྱིམ་མཚེས་རྣམས་ཕན་ཚུན་རྒོལ་དུ་བཅུག་པས་སོ། །
ZEC 8:11 ཡིན་ནའང་ད་ལྟ་ངས་མི་ལྷག་ལུས་འདི་རྣམས་ལ་སྔར་གྱི་དུས་དེ་བཞིན་དུ་མི་བྱེད་དོ་ཞེས་གསུངས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས།
ZEC 8:12 ཅིའི་ཕྱིར་ཞེ་ན། ས་བོན་བག་ཕེབས་ཀྱིས་འདེབས་ཞིང་རྒུན་འབྲུམ་ཤིང་ལ་འབྲས་བུ་ཐོགས་པ་དང་། ས་ལས་ལོ་ཏོག་སྐྱེ་ཞིང་། གནམ་ནས་ཆར་ཟིལ་འབབ་པར་བྱ་སྟེ། ངས་མི་ལྷག་ལུས་འདི་རྣམས་ལ་དེ་ཐམས་ཅད་འཐོབ་པར་བྱའོ། །
ZEC 8:13 ཀྱེ་ཡ་ཧུ་དཱ་དང་ཡེས་ར་ཨེལ་གྱི་ཁྱིམ་རྒྱུད་ལགས། སྔར་ཁྱོད་ཅག་ཡུལ་ཁམས་རྣམས་ཀྱི་ཁྲོད་དུ་ཇི་ལྟར་དམོད་མོ་རུ་གྱུར་པ་ཡིན་ན། མ་འོངས་པར་ངས་ཁྱོད་ཅག་བསྐྱབས་ནས་དེ་ལྟར་བྱིན་རླབས་སུ་འགྱུར་བར་བྱ་སྟེ། ཁྱོད་རྣམས་དཔའ་མི་ཞུམ་པར་རང་གི་ལག་པ་སྟོབས་དང་ལྡན་པར་གྱིས་ཤིག་ཅེས་གསུངས་སོ། །
ZEC 8:14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཕ་མེས་རྣམས་ཀྱིས་ང་ལ་ཁོང་ཁྲོ་བསླངས་པའི་ཚེ། ངས་ཁྱོད་ཅག་གི་སྟེང་དུ་གནོད་འཚེ་འབྱུང་དུ་འཇུག་པའི་སེམས་ཐག་བཅད་ནས་བློ་མ་བསྒྱུར།
ZEC 8:15 ཉིན་འདི་དག་ལ་ངས་སྔར་བཞིན་ཡེ་རུ་སཱ་ལེམ་དང་ཡ་ཧུ་དཱའི་ཁྱིམ་རྒྱུད་དྲིན་གྱིས་བསྐྱང་བའི་སེམས་ཐག་བཅད་པས་ཁྱོད་རྣམས་མ་འཇིགས་ཤིག
ZEC 8:16 ཁྱོད་ཅག་གིས་དོན་འདི་རྣམས་བྱེད་དགོས་ཏེ། མི་རེ་རེས་རང་གི་ཁྱིམ་མཚེས་ལ་བདེན་གཏམ་སྨྲོས་ཤིག རང་གི་མཁར་སྒོ་རུ་དྲང་བདེན་སྤྱད་དེ་ཞི་ཞིང་བདེ་བར་བྱེད་པའི་ཁྲིམས་ཆོད་ཅིག
ZEC 8:17 ཁྱོད་ཚོ་མི་རེ་རེའི་སེམས་སུ་དོན་ངན་སྤྱོད་པར་ལྐོག་ཇུས་བཤམས་ནས་ཕན་ཚུན་ལ་གནོད་མ་བསྐྱལ་ཞིག རྫུན་གྱི་མནའ་བསྐྱལ་བར་དགའ་མི་རུང་། གང་ལ་ཞེ་ན། འདི་དག་ནི་ང་རང་སྡང་བའི་དོན་རྣམས་ཡིན་པས་སོ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 8:18 དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
ZEC 8:19 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཟླ་བཞི་པའི་སྨྱུང་གནས་དང་། ཟླ་ལྔ་པའི་སྨྱུང་གནས། ཟླ་བདུན་པའི་སྨྱུང་གནས། ཟླ་བཅུ་པའི་སྨྱུང་གནས་བཅས་ནི་ཡ་ཧུ་དཱའི་ཁྱིམ་རྒྱུད་དགའ་ཞིང་སྐྱིད་པའི་དུས་དང་། དགའ་སྤྲོའི་དུས་ཆེན་དུ་འགྱུར་བས་ན། ཁྱོད་ཅག་དྲང་བདེན་དང་ཞི་བདེ་ལ་དགའ་བར་གྱིས་ཤིག་ཅེས་གསུངས།
ZEC 8:20 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མ་འོངས་པར་མི་རིགས་ཀུན་དང་གྲོང་ཁྱེར་མང་པོའི་ཡུལ་མི་རྣམས་འོངས་ནས།
ZEC 8:21 གྲོང་ཁྱེར་དེའི་ཡུལ་མི་རྣམས་གྲོང་ཁྱེར་གཞན་དུ་སོང་ནས་དེ་དག་ལ། རང་ཅག་མྱུར་དུ་འགྲོ་ལ་དཀོན་མཆོག་ཡ་ཝཱེས་དྲིན་གྱིས་བསྐྱང་བའི་ཕྱིར་ཞུ་བ་འབུལ་བར་བྱ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་ཞུ་བ་འབུལ་བར་བྱ། ང་རང་ཉིད་ཀྱང་འགྲོའོ་ཞེས་སྨྲ་བར་འགྱུར།
ZEC 8:22 མི་རིགས་མང་པོ་དང་སྟོབས་འབྱོར་ལྡན་པའི་རྒྱལ་ཁམས་རྣམས་འོངས་ནས་ཡེ་རུ་སཱ་ལེམ་དུ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་འཚོལ་ཞིང་། ཁོང་གིས་དྲིན་གྱིས་བསྐྱང་བའི་ཕྱིར་ཞུ་བ་འབུལ་བར་འགྱུར་ཞེས་གསུངས།
ZEC 8:23 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ཉིན་དེ་དག་ལ་ཡུལ་ཁམས་རེ་རེ་དང་སྐད་རིགས་སོ་སོ་ནས་མི་བཅུ་འོངས་ནས་ཡ་ཧུ་དཱ་པའི་མི་གཅིག་གི་ལྭ་ཡི་ཐུ་བར་འཇུས་ནས་འདི་ལྟར། ངེད་ཅག་ཁྱོད་རྣམས་དང་མཉམ་དུ་འགྲོ་རུ་ཆུག་དང་། ཅི་ལ་ཞེ་ན། ངེད་ཅག་གིས་དཀོན་མཆོག་ཁྱེད་རྣམས་དང་མཉམ་དུ་བཞུགས་པ་ཐོས་བྱུང་ཞེས་ཞུ་བར་འགྱུར་ཞེས་པའོ་ཞེས་གསུངས་སོ། །
ZEC 9:1 དཀོན་མཆོག་ཡ་ཝཱེས་བཀའ་ལུང་གནང་བ་འདི་ལྟ་སྟེ། དཀོན་མཆོག་ཡ་ཝཱེའི་བཀའ་ནི་ཧད་རག་ཡུལ་གྱི་དཱ་མེ་སེག་ལ་ཆེད་དུ་བྱུང་བ་དང་། འཇིག་རྟེན་མི་རྣམས་དང་ཡེས་ར་ཨེལ་གྱི་ཚོ་པ་ཁག་གི་མིག་གིས་དཀོན་མཆོག་ཡ་ཝཱེའི་ཕྱོགས་སུ་རེ་ལྟོས་བྱེད་པའོ། །
ZEC 9:2 ཡང་དཱ་མེ་སེག་གི་ས་མཚམས་ཀྱི་ཧ་མཱད་དང་། ཐཱར། ཚི་ཏུན་གསུམ་པོ་ཤིན་ཏུ་མཁས་པ་ཡིན་ནའང་དེ་དག་གི་སྟེང་དུ་བྱུང་བ་ཡིན།
ZEC 9:3 ཐཱར་གྱིས་རང་གི་ཆེད་དུ་མཁར་བརྟན་པོ་བརྩིགས་ཏེ། དངུལ་ནི་བྱེ་མ་བཞིན་དུ་སྤུངས་པ་དང་། གསེར་བཙོ་མ་ནི་སྲང་ལམ་གྱི་འདམ་བཞིན་དུ་བསྡུས་སོ། །
ZEC 9:4 ལྟོས་དང་། གཙོ་བོས་དེའི་ཡོད་ཚད་ཕྲོགས་ནས། དེའི་རྒྱ་མཚོའི་སྟེང་གི་སྟོབས་ཤུགས་གཏོར་བ་དང་། དེ་ནི་མེས་ཁྱུར་མིད་གཏོང་བར་འགྱུར།
ZEC 9:5 ཨས་ཀ་ལོན་གྱིས་དེ་མཐོང་ནས་འཇིགས་པ་དང་། གཱ་ཟཱས་དེ་མཐོང་ནས་སྡུག་བསྔལ་ཆེན་པོས་མནར་བར་འགྱུར། ཨེག་རོན་ནི་རེ་བ་ཤོར་ནས་ངོ་ཚ་ཞིང་། གཱ་ཟཱའི་རྒྱལ་རྒྱུད་ཆད་པར་འགྱུར་ལ། ཨ་ཤཱ་ཀེ་ལོན་དུ་འདུག་མཁན་མེད།
ZEC 9:6 དེ་ནས་རྒྱུད་འདྲེས་མ་རྣམས་ཨ་སི་དོད་དུ་གནས་པར་འགྱུར་ལ། ངས་ཕེ་ལེ་ཤེད་པའི་ང་རྒྱལ་མེད་པར་བྱའོ། །
ZEC 9:7 ངས་དེ་དག་ཁ་ནང་གི་ཁྲག་དང་སོ་བར་གྱི་ཞེན་ཁ་ལོག་པའི་རྫས་ཐམས་ཅད་མེད་པར་བྱ་སྟེ། མི་ལྷག་ལུས་རྣམས་ནི་རང་ཅག་གི་དཀོན་མཆོག་ལ་གཏོགས་ཤིང་། དེ་ནི་ཡ་ཧུ་དཱའི་མི་རིགས་ཞིག་དང་འདྲ་བར་འགྱུར་ལ། ཨེག་རོན་ནི་ཡེ་བུ་སི་པ་དང་འདྲ་བར་འགྱུར།
ZEC 9:8 ངས་རང་ཁྱིམ་གྱི་མཐའ་འཁོར་དུ་དམག་སྒར་བཙུགས་ནས་དགྲ་བོའི་དམག་རྣམས་འགྲོ་འོང་བྱེད་དུ་མི་འཇུག་ལ། མི་ལ་གཉའ་གནོན་བྱེད་མཁན་གྱིས་ངའི་མི་རྣམས་ལ་བཙན་གནོན་བྱེད་མི་ནུས། ཅི་ལ་ཞེ་ན། ད་ནི་ངས་དེ་དག་ལ་དངོས་སུ་ལྟ་སྐྱོང་བྱེད་པས་སོ། །
ZEC 9:9 ཀྱེ་ཛ་ཡན་ཡུལ་གྱི་བུ་མོ་ལགས། རབ་ཏུ་དགའ་བར་གྱིས་ཤིག ཀྱེ་ཡེ་རུ་སཱ་ལེམ་གྱི་བུ་མོ་ལགས། དགའ་འབོད་བྱོས་དང་། ལྟོས་ཤིག ཁྱོད་ཀྱི་རྒྱལ་པོ་ཁྱོད་ཀྱི་གམ་དུ་ཕེབས་འོང་སྟེ། ཁོང་ནི་དྲང་བདེན་དང་སྐྱོབ་མཁན་དེ་ཉིད་ཡིན་ལ། ཁོང་ནི་ཉམས་ཆུང་གིས་བོང་བུར་བཅིབས་པ་སྟེ་བོང་ཕྲུག་ཅིག་ལ་བཅིབས་པའོ། །
ZEC 9:10 ངས་ཨེ་ཕཱར་ཡིམ་ལས་ཤིང་རྟ་དང་ཡེ་རུ་སཱ་ལེམ་ནས་དམག་རྟ་མེད་པར་བྱ་ཞིང་། དམག་གི་གཞུ་གཅོག་པར་བྱ་སྟེ། ཁོང་གིས་མི་སྡེ་རྣམས་ལ་ཞི་བདེ་བསྒྲག་ཅིང་། ཁོང་གི་སྲིད་དབང་ནི་རྒྱ་མཚོ་འདི་ནས་རྒྱ་མཚོ་གཞན་པའི་བར་དང་། ཕི་རཱད་གཙང་པོ་ནས་ས་མཐའི་བར་དུ་སླེབ་པར་འགྱུར།
ZEC 9:11 ཀྱེ་ཛ་ཡན་ལགས། ཁྱོད་རང་ནི་བདག་གིས་ཁྱོད་ལ་བཞག་པའི་ཞལ་ཆད་ཀྱི་ཁྲག་ལ་བརྟེན་ནས། ངས་ཁྱོད་ཀྱི་བཙོན་པ་རྣམས་ཆུ་མེད་པའི་དོང་ལས་སྒྲོལ་བར་བྱའོ། །
ZEC 9:12 ཀྱེ་ཁྱོད་ཅག་བཙོན་ལ་ཁྲིད་ཀྱང་ད་དུང་རེ་བ་ཡོད་པའི་མི་རྣམས་ལགས། བཙན་རྫོང་གི་ཕྱོགས་སུ་ལོག་ཅིག ངས་ཁྱོད་ལ་ལྡབ་འགྱུར་ གྱིས་ཁ་གསབ་རྒྱག་དགོས་ཞེས་དེ་རིང་ངས་བསྒྲགས་པ་ཡིན།
ZEC 9:13 ངས་ཡ་ཧུ་དཱ་ནི་ངའི་ལག་གི་འཐེན་པའི་གཞུ་དང་། ཨེ་ཕཱར་ཡིམ་ནི་ངའི་གཞུ་ཡི་ནང་གི་མདའ་རུ་བྱའོ། །ཀྱེ་ཛ་ཡན་ལགས། ངས་ཁྱོད་ཀྱི་བུ་རྣམས་ལ་ངར་བསླངས་ནས་གྷི་རི་སི་ཡི་བུ་རྣམས་ལ་རྒོལ་དུ་འགྲོ་བར་བྱ་ཞིང་། ངས་ཁྱོད་རང་དཔའ་བོའི་རལ་གྲི་དང་འདྲ་བར་བྱའོ། །
ZEC 9:14 དཀོན་མཆོག་ཡ་ཝཱེ་ནི་ཉིད་ཀྱི་མི་རྣམས་ཀྱི་སྟེང་དུ་མངོན་པ་དང་། ཁོང་གི་མདའ་ནི་གློག་འཁྱུག་པ་བཞིན་ཕྱི་རུ་འཐོན་པར་འགྱུར་ལ། གཙོ་བོ་ཡ་ཝཱེས་རྭ་དུང་བུས་ནས་ལྷོ་ཕྱོགས་ཀྱི་དྲག་རླུང་དང་བཅས་ཕེབས་པར་འགྱུར།
ZEC 9:15 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་དེ་རྣམས་བསྲུངས་ནས། དེ་རྣམས་ཀྱིས་འུར་རྡོ་འཕངས་ནས་དགྲ་བོ་འདུལ་བ་དང་། དེ་དག་གིས་འཐུང་ནས་ཀུ་ཅོ་སྒྲོག་པ་ནི་ཆང་གིས་བཟི་བའི་མི་དང་འདྲ། དེ་དག་ནི་མཆོད་པ་འབུལ་བྱེད་ཀྱི་ཕོར་བ་དང་མཚུངས་ཏེ་ནང་དུ་ཁྲག་གིས་བཀང་ཡོད་ལ། ཡང་མཆོད་ཁྲིའི་གྲུ་ག་རྣམས་དང་འདྲ་སྟེ་ཁྲག་འགོས་ཡོད་པའོ། །
ZEC 9:16 ཉིན་མོ་དེར། ཁོ་རྣམས་ཀྱི་དཀོན་མཆོག་ཡ་ཝཱེས་ཁོ་རྣམས་སྐྱོབ་ཅིང་། ཁོང་གི་མི་རྣམས་ནི་ལུག་ཁྱུ་བཞིན་དུ་སྐྱོང་བར་འགྱུར། ཅི་ལ་ཞེ་ན། དེ་དག་ནི་ཅོད་པན་སྟེང་གི་རིན་པོ་ཆེ་བཞིན་དུ་ཁོང་གི་ས་གཞི་རུ་འོད་འཕྲོ་བར་འགྱུར།
ZEC 9:17 དེ་དག་ནི་ཅི་འདྲའི་ལེགས་ཤིང་ཅི་འདྲའི་ཡིད་དུ་འོང་བ་ལ་ཨང་། འབྲུ་རིགས་སྣ་ལྔ་དང་རྒུན་ཆང་གསར་པས་ཕོ་མོ་ན་གཞོན་རྣམས་ལ་དཔལ་ཡོན་རྒྱས་པར་བྱའོ། །
ZEC 10:1 དཔྱིད་ཀའི་དུས་སུ། ཁྱོད་རྣམས་ཀྱིས་དཀོན་མཆོག་ཡ་ཝཱེར་དཔྱིད་ཆར་ཞུས་ཤིག་དང་། དཀོན་མཆོག་ཡ་ཝཱེས་གློག་དམར་འཁྱུག་པར་མཛད་དེ། མི་ལ་དཔྱིད་ཆར་གནང་ནས་མི་རེ་རེའི་ས་ཞིང་ལས་སྔོ་ཚལ་སྐྱེ་བར་མཛད།
ZEC 10:2 ཅི་ལ་ཞེ་ན། སྐུ་འདྲས་སྟོང་བཤད་རྒྱག་པ་དང་། མོ་པ་རྣམས་ཀྱིས་མཐོང་བ་ནི་འཁྲུལ་སྣང་ཡིན། ཁོ་རྣམས་ཀྱིས་རྨི་ལམ་རྫུན་མ་བཤད་དེ་མི་ལ་ཕན་ཐོགས་མེད་པའི་སེམས་གསོ་གཏོང་བས། མི་རྣམས་ནི་ལུག་རྫི་མེད་པའི་ལུག་ཁྱུ་བཞིན་འཁྱམ་ཞིང་དཀའ་སྡུག་ཆེའོ། །
ZEC 10:3 བདག་ལུག་རྫི་འདི་རྣམས་ལ་ཤིན་ཏུ་ཁྲོས་ཏེ། བདག་གིས་ར་ཐུག་དེ་རྣམས་ལ་ཉེས་ཆད་གཅོད་པར་བྱ། ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཉིད་ཀྱི་ལུག་ཁྱུ་སྟེ་ཡ་ཧུ་དཱའི་ཁྱིམ་རྒྱུད་ལ་ཐུགས་ཁུར་མཛད་པས། དེ་རྣམས་གཡུལ་སའི་དམག་རྟ་གཟི་བྱིན་ཅན་དང་འདྲ་བར་མཛད་དོ། །
ZEC 10:4 ཁང་པའི་ཟུར་རྡོ་དང་གུར་གྱི་ཕུར་པ། དམག་ལ་འཐབ་པའི་གཞུ། དབང་འཛིན་མཁན་ཐམས་ཅད་ནི་ཡ་ཧུ་དཱ་ནས་འཐོན་པར་འགྱུར།
ZEC 10:5 དེ་དག་གིས་དཔའ་བོ་བཞིན་དུ་གཡུལ་ས་ནས་དགྲ་བོ་རྣམས་སྲང་ལམ་གྱི་འདམ་ནང་དུ་བརྫི་ཞིང་། ཡང་དཀོན་མཆོག་ཡ་ཝཱེ་དེ་རྣམས་དང་མཉམ་དུ་བཞུགས་པས་ཁོ་རྣམས་འཐབ་པར་འགྱུར་ལ། དེ་དག་གིས་དགྲ་ཟླའི་སྐྱ་མི་རྣམས་ངོ་ཚ་བར་བྱེད་དོ། །
ZEC 10:6 ཡང་བདག་གིས་ཡ་ཧུ་དཱའི་ཁྱིམ་རྒྱུད་ནི་སྟོབས་དང་ལྡན་པར་བྱས་ནས་ཡོ་སེབ་ཀྱི་ཁྱིམ་རྒྱུད་སྐྱོབ་པར་བྱ། ངས་དེ་རྣམས་ལ་སྙིང་རྗེ་བས་ཁོ་རྣམས་ཕྱིར་ལོག་ཏུ་འཇུག་དགོས། དེ་དག་ནི་ངས་ནམ་ཡང་དོར་མ་མྱོང་བར་འདྲ་ཞིང་། བདག་ནི་དེ་དག་གི་དཀོན་མཆོག་ཡ་ཝཱེ་ཡིན་པས་ངས་དེ་རྣམས་ལ་ལན་གནང་བར་བྱའོ། །
ZEC 10:7 ཨེ་ཕཱར་ཡིམ་པ་རྣམས་ནི་དཔའ་བོ་དང་འདྲ་སྟེ། ཁོ་ཚོའི་སེམས་ནི་རྒུན་ཆང་འཐུང་བ་བཞིན་དགའ་ཞིང་། ཁོ་ཚོའི་བུ་རྒྱུད་རྣམས་ཀྱང་དེ་མཐོང་ནས་དགའ་བར་འགྱུར་ལ། ཁོ་ཚོའི་སེམས་ནི་དཀོན་མཆོག་ཡ་ཝཱེའི་རྐྱེན་གྱིས་དགའ་ཞིང་མགུ་བར་འགྱུར།
ZEC 10:8 བདག་གིས་དེ་དག་བོས་ནས་ཁོ་རྣམས་བསྡུ་བར་བྱ་སྟེ། གང་ལ་ཞེ་ན། བདག་གིས་དེ་དག་བསྐྱབས་པས་སོ། །ཁོ་ཚོའི་མི་གྲངས་ནི་སྔར་བཞིན་འཕེལ་བར་འགྱུར།
ZEC 10:9 བདག་གིས་དེ་དག་ནི་མི་སྡེ་རྣམས་ཀྱི་ཁྲོད་དུ་གཏོར་ན་ཡང་། དེ་དག་གིས་རྒྱང་རིང་ནས་ང་རང་དྲན་པར་འགྱུར་ལ། དེ་དག་དང་ཁོ་ཚོའི་བུ་རྒྱུད་རྣམས་ནི་གསོན་པོར་ལུས་ཤིང་ཕྱིར་ལོག་པར་འགྱུར་རོ། །
ZEC 10:10 ངས་དེ་དག་ནི་ཨེ་ཅིབ་ཡུལ་ནས་ཕྱིར་འཁྲིད་ཡོང་དགོས་ཤིང་། ཨ་སུར་ཡུལ་ནས་ཁོ་རྣམས་བསྡུས་ཏེ་གིལ་ཨད་ཀྱི་ཡུལ་དང་ལེ་པཱ་ནོན་དུ་འཁྲིད་པར་བྱ་སྟེ། དེར་ཁོ་རྣམས་མི་ཤོང་བ་ཡིན།
ZEC 10:11 དཀོན་མཆོག་ཡ་ཝཱེ་ནི་སྡུག་བསྔལ་གྱི་རྒྱ་མཚོ་རྒྱུ་ཞིང་རྒྱ་མཚོའི་རྦ་རླབས་རྣམས་ལ་བརྡེག་པ་དང་། ནཱ་ཡོལ་གཙང་པོའི་ཆུ་གཏིང་བསྐམ་པར་མཛད་ཅིང་། ཨ་སུར་གྱི་ང་རྒྱལ་ནི་དམའ་སར་འབེབ་པ་དང་། ཨེ་ཅིབ་ཀྱི་སྲིད་འཁར་ ཡང་ཉམས་པར་འགྱུར།
ZEC 10:12 བདག་གིས་རང་གི་མི་རྣམས་ནི་བདག་ལ་བརྟེན་ནས་སྟོབས་འབྱོར་ལྡན་པར་བྱེད་ཅིང་། དེ་དག་གིས་ངའི་མིང་གི་སྒོ་ནས་སྤྱད་པ་སྤྱོད་དོ་ཞེས་དཀོན་མཆོག་ཡ་ཝཱེས་གསུངས་སོ། །
ZEC 11:1 ཀྱེ་ལེ་པཱ་ནོན། མེ་ཡིས་ཁྱོད་ཀྱི་ཐང་ཤིང་བསྲེག་པའི་ཆེད་དུ་རང་གི་སྒོ་རྣམས་ཕྱེས་ཤིག
ZEC 11:2 ཀྱེ་གསོམ་ཤིང་ལགས། མྱ་ངན་བྱོས་ཤིག ཅི་ལ་ཞེ་ན། ཐང་ཤིང་རྣམས་འགྱེལ་བ་དང་། རྔམ་བརྗིད་ཆེ་བའི་ལྗོན་ཤིང་རྣམས་བརླགས་སོ། །ཀྱེ་པཱ་ཤན་གྱི་བེ་ཤིང་རྣམས། མྱ་ངན་བྱོས་ཤིག ཅི་ལ་ཞེ་ན། ནགས་ཚལ་སྟུག་པོ་རྣམས་བཅད་པས་སོ། །
ZEC 11:3 ལུག་རྫི་རྣམས་ཀྱིས་མྱ་ངན་འདོན་པའི་སྐད་ལ་ཉོན་ཅིག གང་ལ་ཞེ་ན། དེ་དག་གི་ཡིད་དུ་འོང་བའི་རྩྭ་ཐང་རྣམས་བརླགས་པ་རེད། ཡང་སེང་གེ་དར་མས་ང་རོ་འདོན་པའི་སྒྲ་ལ་ཉོན་ཅིག གང་ལ་ཞེ་ན། ཡོར་དན་གཙང་འགྲམ་གྱི་སྤང་ཐང་ཡིད་དུ་འོང་བ་བརླགས་པས་སོ། །
ZEC 11:4 ང་ཡི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་བཤའ་བར་འགྱུར་བའི་ལུག་ཁྱུ་འདི་འཚོས་ཤིག
ZEC 11:5 ལུག་ཁྱུ་ཉོ་མཁན་དག་གིས་དེ་རྣམས་བཤས་ཀྱང་སྡིག་པར་མི་བརྩི་ཞིང་། ལུག་ཁྱུ་བཙོང་མཁན་དག་ན་རེ། ང་རང་ཕྱུག་པོར་གྱུར་པས་དཀོན་མཆོག་ཡ་ཝཱེ་ནི་བསྟོད་པར་འོས་པ་ཡིན་ཞེས་ལུག་ཁྱུའི་ལུག་རྫི་རྣམས་ཀྱིས་དེ་ལ་སྙིང་རྗེ་མ་བསྐྱེད་དོ། །
ZEC 11:6 དེ་བས་ངས་ཀྱང་ཡུལ་འདིའི་མི་རྣམས་ལ་སྙིང་རྗེ་བར་མི་བྱའོ་ཞེས་དཀོན་མཆོག་ཡ་ཝཱེས་གསུངས། ལྟོས་དང་། ངས་དེ་དག་རེ་རེ་བཞིན་ཁོའི་ཁྱིམ་མཚེས་དང་རྒྱལ་པོའི་ལག་ཏུ་གཏོད་ཅིང་། དེ་དག་གིས་ཡུལ་འདི་བརླག་པར་བྱེད་པ་དང་། ངས་ཡུལ་འདིའི་མི་རྣམས་ནི་དེ་དག་གི་ལག་ནས་སྐྱོབ་པར་མི་བྱའོ་ཞེས་གསུངས།
ZEC 11:7 དེ་ལྟར་ངས་བཤས་ལུག་ཏུ་བརྩིས་པའི་ལུག་ཁྱུ་ནང་གི་ཉམ་ཐག་རྣམས་འཚོས་པ་དང་། ངས་དབྱུག་པ་གཉིས་བླངས་ནས། གཅིག་གི་མིང་ལ་དྲིན་གྱིས་སྐྱོང་བ་ཞེས་དང་། གཞན་དེ་ལ་ལྷན་འབྲེལ་ཞེས་བཏགས་ཤིང་། དེ་ནས་ངས་ལུག་ཁྱུ་འཚོས་པ་དང་།
ZEC 11:8 ཟླ་བ་གཅིག་གི་ནང་དུ་ངས་ལུག་རྫི་གསུམ་གྱི་སྲོག་བཅད་དེ། ང་སེམས་གཏིང་ནས་ལུག་ཁྱུ་ལ་སུན་སྣང་སྐྱེས་ཤིང་། དེ་དག་ཀྱང་ང་ལ་ཞེན་ཁ་ལོག་པའོ། །
ZEC 11:9 དེ་ནས་ངས་འདི་ལྟར། ད་ནི་ངས་ཁྱོད་རྣམས་འཚོ་བར་མི་བྱ་སྟེ། འཆི་བར་འགྱུར་བ་དེ་འཆི་བར་གྱུར་ཅིག མེད་པར་འགྱུར་བ་དེ་མེད་པར་གྱུར་ཅིག ལྷག་ལུས་རྣམས་ལ་ཕན་ཚུན་གྱི་ཤ་བཟའ་རུ་ཆུག་ཅེས་སྨྲས།
ZEC 11:10 དེ་ནས་མི་རིགས་ཐམས་ཅད་ལ་བཞག་པའི་ཞལ་ཆད་དེ་མེད་པར་བཟོ་བའི་ཆེད་དུ། ངས་རང་གི་དྲིན་གྱིས་སྐྱོང་བ་ཞེས་པའི་དབྱུག་པ་དེ་བླངས་ནས་བཅག་པ་དང་།
ZEC 11:11 ཞལ་ཆད་དེ་ནི་ཉིན་མོ་དེར་སྤངས་པ་ཡིན། དེ་ལྟར་ང་ལ་རེ་ལྟོས་བཅངས་པའི་ལུག་ཁྱུ་ཉམ་ཐག་རྣམས་ཀྱིས་དེ་ནི་དཀོན་མཆོག་ཡ་ཝཱེའི་བཀའ་ཡིན་པ་རྟོགས་པར་གྱུར།
ZEC 11:12 ངས་དེ་དག་ལ་འདི་ལྟར། ཁྱོད་རྣམས་ཀྱིས་ལེགས་པར་འདོད་ན་ང་ལ་ལས་གླ་སྤྲོད་ཅིག དེ་ལྟར་མིན་ཚེ་སྐྱུར་ཞོག་ཅེས་སྨྲས་པ་ལ། དེ་དག་གིས་ངའི་ལས་གླ་རུ་དངུལ་སྲང་སུམ་ཅུ་སྤྲད་བྱུང་།
ZEC 11:13 དུས་དེ་ལ་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་དངུལ་དེ་དག་རྫ་མཁན་ལ་གཡུགས་ཞོག་ཅེས་གསུངས་པ་དང་། དངུལ་དེ་དག་ནི་ཁོ་ཚོས་ང་ལ་འཐོབ་འོས་པར་འདོད་པའི་རིན་མཐོན་པོ་ཡིན་ནོ། །ངས་དངུལ་སྲང་སུམ་ཅུ་དེ་ཁྱེར་ནས་དཀོན་མཆོག་ཡ་ཝཱེའི་མཆོད་ཁང་ནང་དུ་རྫ་མཁན་ལ་གཡུགས་སོ། །
ZEC 11:14 ཡང་ཡ་ཧུ་དཱ་དང་ཡེས་ར་ཨེལ་གཉིས་ཀྱི་སྤུན་ཟླའི་འབྲེལ་ཐག་གཅོད་པའི་ཆེད་དུ། ངས་མིང་ལ་ལྷན་འབྲེལ་ཞེས་པའི་དབྱུག་པ་གཞན་དེ་བཅག་གོ །
ZEC 11:15 ཡང་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་སོང་ལ་ཡང་ལུག་རྫི་བླུན་རྨོངས་ཅན་གྱི་དབྱུག་པ་ཁྱེར་ཤོག་ཅིག
ZEC 11:16 གང་ལ་ཞེ་ན། ངས་ཡུལ་འདི་རུ་ལུག་རྫི་ཞིག་དར་བར་བྱ་སྟེ། འཆི་ལ་ཉེ་བ་དེ་དག་ལ་ཁོང་གིས་གཟིགས་སྐྱོང་མི་མཛད་ཅིང་། ཁ་འཐོར་དུ་སོང་བ་དེ་དག་ཁོང་གིས་མི་བཙལ། རྨས་ཕོག་པ་རྣམས་ཁོང་གིས་མི་གསོ། ཤ་ཤེད་ཅན་རྣམས་ཁོང་གིས་མི་འཚོ། ཡིན་ནའང་ཁོང་གིས་ལུག་ཚོན་པོའི་ཤ་བཟའ་ཞིང་། དེ་དག་གི་རྨིག་པ་རྣམས་དབྲལ་བར་འགྱུར།
ZEC 11:17 ལུག་ཁྱུ་དོར་བ་དང་ཕན་མི་ཐོགས་པའི་ལུག་རྫི་དེ་ལ་ཆག་སྒོ་འབྱུང་། དེའི་དཔུང་པ་དང་མིག་གཡས་པའི་ཁར་རལ་གྲི་འཕོག་པར་གྱུར་ཅིག དེའི་དཔུང་པ་ཟུངས་ཟད་ནས་མིག་གཡས་པ་དེ་ཡོངས་སུ་ལོང་བར་གྱུར་ཅིག་ཅེས་གསུངས་སོ། །
ZEC 12:1 དཀོན་མཆོག་ཡ་ཝཱེས་བཀའ་ལུང་གནང་བ་འདི་ལྟ་སྟེ། འདི་ནི་དཀོན་མཆོག་ཡ་ཝཱེས་ཡེས་ར་ཨེལ་གྱི་སྐོར་ལ་གསུངས་པའི་བཀའ་ཡིན་ཏེ་དཀོན་མཆོག་ཡ་ཝཱེས་གསུངས་པའོ། །ཁོང་གིས་ནམ་མཁའ་བཏིངས་པ་དང་། ས་གཞིའི་རྨང་རྡོ་བཙུགས་ཏེ། མིའི་ནང་གི་སེམས་ཉིད་བཀོད་པར་མཛད་དོ། །
ZEC 12:2 ལྟོས་དང་། བདག་གིས་ཡེ་རུ་སཱ་ལེམ་ནི་མཐའ་འཁོར་གྱི་མི་སྡེ་ཐམས་ཅད་བཟི་བར་འགྱུར་བའི་ཕོར་བ་རུ་བྱ་སྟེ། ཡེ་རུ་སཱ་ལེམ་མཐའ་ནས་བསྐོར་བའི་ཚེ། ཡ་ཧུ་དཱ་ལའང་རྒོལ་བར་འགྱུར།
ZEC 12:3 ཉིན་མོ་དེར་མི་རིགས་ཐམས་ཅད་ལ་མཚོན་ན་བདག་གིས་ཡེ་རུ་སཱ་ལེམ་ནི་ཤིན་ཏུ་ལྕི་བའི་རྡོ་ལྟ་བུར་བྱས་ནས། དེ་ཡར་འདེགས་མཁན་ཐམས་ཅད་ལ་རྨས་སྐྱོན་ཚབས་ཆེན་འབྱུང་བ་དང་། ས་སྟེང་གི་མི་རིགས་ཐམས་ཅད་ཕྱོགས་གཅིག་ཏུ་འདུས་ནས་ཡེ་རུ་སཱ་ལེམ་ལ་རྒོལ་བར་འགྱུར་རོ། །
ZEC 12:4 ཡང་དཀོན་མཆོག་ཡ་ཝཱེས་འདི་སྐད་གསུངས་ཏེ། ཉིན་མོ་དེར། བདག་གིས་རྟ་ཐམས་ཅད་ལ་བརྒྱབ་ནས་དེ་རྣམས་འདྲོག་ཏུ་འཇུག་པ་དང་། རྟ་ལ་ཞོན་མཁན་རྣམས་ལ་བརྒྱབ་ནས་དེ་རྣམས་སྨྱོ་བར་བྱའོ། །ངས་མིག་ཟུང་ཕྱེས་ནས་ཡ་ཧུ་དཱའི་ཁྱིམ་རྒྱུད་ལ་ལྟ་སྐྱོང་བྱེད་ཅིང་། བདག་གིས་མི་རིགས་ཀུན་གྱི་རྟ་ཐམས་ཅད་ལ་བརྡུངས་ནས་དེ་རྣམས་ལོང་བར་བྱའོ། །
ZEC 12:5 དུས་དེར་ཡ་ཧུ་དཱའི་ཚོ་དཔོན་གྱིས་སེམས་སུ་འདི་ལྟར། ཡེ་རུ་སཱ་ལེམ་གྱི་ཡུལ་མི་རྣམས་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་རང་གི་དཀོན་མཆོག་ལ་བརྟེན་ནས་སྟོབས་ཤུགས་འཛོམས་པ་ཡིན་སྙམ་པའོ། །
ZEC 12:6 ཉིན་མོ་དེ་ལ། བདག་གིས་ཡ་ཧུ་དཱའི་ཚོ་དཔོན་རྣམས་ནི་བུད་ཤིང་གི་དཀྱིལ་དུ་ཡོད་པའི་མེ་ཕོར་དང་། ཚར་ཕོན་ནང་གི་དཔལ་འབར་བཞིན་དུ་བྱ་སྟེ། དེ་དག་གིས་རང་གི་གཡས་གཡོན་དང་མཐའ་འཁོར་དུ་ཡོད་པའི་མི་སྡེ་ཐམས་ཅད་ཁྱུར་མིད་གཏོང་བར་འགྱུར། ཡིན་ནའང་ཡེ་རུ་སཱ་ལེམ་གྱི་མི་རྣམས་ནི་གྲོང་ཁྱེར་ནང་གི་སྔར་གནས་སུ་ཆགས་པར་འགྱུར།
ZEC 12:7 དཱ་བིད་ཀྱི་ཁྱིམ་རྒྱུད་དང་ཡེ་རུ་སཱ་ལེམ་གྱི་ཡུལ་མི་རྣམས་ཀྱི་གཟི་བརྗིད་ནི་ཡ་ཧུ་དཱ་པ་ལས་ཆེ་བར་མི་འགྱུར་བའི་ཆེད་དུ། དཀོན་མཆོག་ཡ་ཝཱེས་ཡ་ཧུ་དཱའི་གུར་རྣམས་སྔོན་ལ་སྐྱོབ་པར་འགྱུར།
ZEC 12:8 ཉིན་མོ་དེ་ལ་དཀོན་མཆོག་ཡ་ཝཱེས་ཡེ་རུ་སཱ་ལེམ་གྱི་ཡུལ་མི་རྣམས་བསྲུང་བར་མཛད་ཅིང་། དེ་དག་ཁྲོད་ཀྱི་ཉམ་ཐག་རྣམས་ནི་དཱ་བིད་དང་འདྲ་ཞིང་། དཱ་བིད་ཀྱི་ཁྱིམ་རྒྱུད་ནི་དཀོན་མཆོག་དང་འདྲ་སྟེ། དེ་དག་གི་མདུན་དུ་སྐྱོད་པའི་དཀོན་མཆོག་ཡ་ཝཱེའི་ཕོ་ཉ་དང་འདྲ་བར་འགྱུར།
ZEC 12:9 ཉིན་མོ་དེར་ངས་ཡེ་རུ་སཱ་ལེམ་ལ་རྒོལ་དུ་འོངས་པའི་མི་རིགས་རྣམས་སྲོག་དང་དབྲལ་བར་བྱའོ། །
ZEC 12:10 ཡང་བདག་གིས་དཱ་བིད་ཀྱི་ཁྱིམ་རྒྱུད་དང་ཡེ་རུ་སཱ་ལེམ་གྱི་ཡུལ་མི་རྣམས་ཀྱི་སྟེང་དུ་ཐུགས་རྗེ་དང་སྐྱབས་འཇུག་ཞུ་བའི་སེམས་ཉིད་ལྡུག་པར་བྱ་ཞིང་། དེ་དག་གིས་སྔར་རང་གི་མདུང་གིས་བསྣུན་པ་བདག་ལ་རེ་ལྟོས་བཅངས་ནས། རང་གི་བུ་གཅིག་པོ་ཤོར་བ་བཞིན་དུ་དེའི་དོན་དུ་མྱ་ངན་བྱེད་ཅིང་། ཡང་རང་གི་བུ་སྐྱེས་འགོ་ཤོར་བ་བཞིན་དུ་དེའི་ཆེད་དུ་མྱ་ངན་དྲག་པོ་བྱེད་པར་འགྱུར་རོ། །
ZEC 12:11 ཉིན་མོ་དེར། མེ་གིད་དོ་ཐང་ཆེན་གྱི་ཧ་དད་རིམ་མོན་གྱི་མྱ་ངན་དང་འདྲ་བའི་མྱ་ངན་ཆེན་པོ་ཞིག་ཡེ་རུ་སཱ་ལེམ་དུ་འབྱུང་བར་འགྱུར་ལ།
ZEC 12:12 ས་གཞི་ཐམས་ཅད་ཀྱིས་མྱ་ངན་བྱ་ཞིང་ཁྱིམ་རྒྱུད་རེ་རེས་སོ་སོར་བསྡད་ནས་མྱ་ངན་བྱ་སྟེ། དཱ་བིད་ཀྱི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་རྣམས་སོ་སོར་སྡོད་པ་ཡིན། ནཱ་ཐན་གྱི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་རྣམས་ཀྱང་སོ་སོར་སྡོད་པ་ཡིན།
ZEC 12:13 ལེ་ཝིའི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་རྣམས་སོ་སོར་སྡོད་པ་ཡིན། ཤི་མེ་ཨིའི་ཁྱིམ་རྒྱུད་སོ་སོར་སྡོད་པ་དང་། དེའི་བུད་མེད་རྣམས་ཀྱང་སོ་སོར་སྡོད་པ་ཡིན།
ZEC 12:14 དེ་འཕྲོས་ཁྱིམ་རྒྱུད་རྣམས་ཀྱང་རེ་རེ་བཞིན་སོ་སོར་སྡོད་པ་དང་། དེ་དག་གི་བུད་མེད་རྣམས་ཀྱང་སོ་སོར་སྡོད་པའོ། །
ZEC 13:1 ཉིན་མོ་དེར་དེ་དག་གི་སྡིག་པ་དང་མི་གཙང་བ་རྣམས་འདག་པའི་ཆེད་དུ། དཱ་བིད་ཀྱི་ཁྱིམ་རྒྱུད་དང་ཡེ་རུ་སཱ་ལེམ་གྱི་ཡུལ་མི་རྣམས་ལ་ཆུ་མིག་ཅིག་བརྡོལ་བར་འགྱུར།
ZEC 13:2 ཉིན་མོ་དེར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ངས་གནས་འདི་ནས་སྐུ་འདྲའི་མིང་རྣམས་མེད་པར་བྱ་སྟེ། སུས་ཀྱང་དེ་དག་དྲན་པར་མི་འགྱུར་ལ། ཡང་ངས་ལུང་སྟོན་པ་དང་སེམས་ཉིད་མི་གཙང་བ་རྣམས་གནས་འདི་ནས་སྐྲོད་པར་བྱའོ། །
ZEC 13:3 གལ་ཏེ་སུ་ཞིག་གིས་ད་དུང་ལུང་སྟོན་པ་ཡིན་ན། དེའི་ལུས་སྦྱིན་གྱི་ཕ་མ་གཉིས་ཀྱིས་དེ་ལ་འདི་ལྟར། ཁྱོད་ནི་གསོན་མི་འོས་ཏེ། གང་ལ་ཞེ་ན། ཁྱོད་ཀྱིས་དཀོན་མཆོག་ཡ་ཝཱེའི་མཚན་གྱི་སྒོ་ནས་རྫུན་སྨྲས་སོ་ཞེས་སྨྲ་བར་འགྱུར་བ་དང་། དེ་ནས་ཁོས་རྫུན་གྱིས་ལུང་སྟོན་དུས། དེའི་ལུས་སྦྱིན་གྱི་ཕ་མ་གཉིས་ཀྱིས་ཁོ་ལ་བསྣུན་ནས་གསོད་པར་འགྱུར།
ZEC 13:4 ཉིན་མོ་དེར། ལུང་སྟོན་པ་རྫུན་མས་ལུང་སྟོན་དུས་སུ། རེ་རེ་རང་གིས་གླེང་བའི་ཞལ་གཟིགས་ཀྱི་དབང་གིས་ངོ་ཚ་བར་འགྱུར་ལ། ད་ནི་དེ་དག་གིས་པགས་པའི་གྱོན་པ་གྱོན་ནས་མི་ལ་བསླུ་བར་མི་བྱ།
ZEC 13:5 སྐབས་དེར་ཁོས་འདི་ལྟར། ང་ནི་ལུང་སྟོན་པ་ཞིག་མ་ཡིན་ལ་ཞིང་པ་ཞིག་ཡིན་ཏེ། གང་ལ་ཞེ་ན། ང་ནི་ཆུང་དུས་ནས་གཡོག་པོ་བྱེད་དུ་བཙོངས་པའོ་ཞེས་སྨྲ་ངེས་ཡིན།
ZEC 13:6 ཡང་མི་ཞིག་གིས་དེ་ལ་འདི་ལྟར། ཁྱོད་ཀྱི་ལག་པ་གཉིས་ཀྱི་བར་དུ་རྨ་འདི་རྣམས་ཡོད་པ་ཅི་ཡིན་ནམ་ཞེས་དྲིས་ན། དེས་ལན་དུ། འདི་དག་ནི་ང་ལ་གཅེས་པའི་མི་ཡི་ཁྱིམ་དུ་ཕོག་པའི་རྨ་ཡིན་ནོ་ཞེས་སྨྲ་བར་འགྱུར།
ZEC 13:7 ཀྱེ་རལ་གྲི་ལགས། ངའི་ལུག་རྫི་དང་ཟླ་གྲོགས་ལ་རྒོལ་བར་གྱིས་ཤིག་ཅེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས། ལུག་རྫི་ལ་རྡུང་བརྡེག་བྱོས་དང་ལུག་ཁྱུ་ཁ་འཐོར་དུ་འགྲོ་སྟེ། ངས་ཀྱང་ལག་པ་བརྐྱངས་ནས་ལུ་གུ་ལ་བརྡེག་པར་བྱའོ། །
ZEC 13:8 དེའི་དུས་སུ་ས་གཞི་ཡོངས་ཀྱི་མི་ཡི་གསུམ་ཆ་གཉིས་བསྣུན་ནས་མེད་པར་བྱས་ཏེ་གསུམ་ཆ་གཅིག་ལུས་པར་འགྱུར་རོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
ZEC 13:9 ཡང་བདག་གིས་གསུམ་ཆ་གཅིག་དེར་མེ་བརྒྱུད་ནས་ཚོད་བརྟག་བྱེད་ཅིང་། དངུལ་གྱི་ལྷད་འདོན་པ་བཞིན་ངས་དེ་རྣམས་གཙང་མར་བཟོ་དགོས་ལ། ཡང་གསེར་ལ་བཙོ་སྦྱང་བྱེད་པ་བཞིན་ངས་དེ་རྣམས་ལ་ཚོད་བརྟག་བྱེད་དོ། །དེ་ནས་ཁོ་རྣམས་ཀྱིས་བདག་གི་མིང་ནས་འབོད་ཅིང་བདག་གིས་ཀྱང་ལན་འདེབས་པར་འགྱུར་ལ། འདི་ནི་བདག་གི་འབངས་མི་ཡིན་ཞེས་བདག་གིས་སྨྲ་བ་དང་། དེ་རྣམས་ཀྱིས་ཀྱང་དཀོན་མཆོག་ཡ་ཝཱེ་ནི་ང་ཡི་དཀོན་མཆོག་ཡིན་ཞེས་སྨྲ་བར་འགྱུར་རོ། །
ZEC 14:1 ལྟོས་དང་། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ་སྟེ། མི་ཡིས་ཁྱོད་ཚོའི་ཁྲོད་དུ་ཁྱོད་ཀྱི་རྒྱུ་ནོར་བགོ་བར་འགྱུར།
ZEC 14:2 ཅི་ལ་ཞེ་ན། ཡེ་རུ་སཱ་ལེམ་དང་འཐབ་པའི་ཕྱིར་ངས་མི་རིགས་ཐམས་ཅད་བསྡུས་ནས། གྲོང་ཁྱེར་ནི་བཙན་བཟུང་བྱེད་པ་དང་ཁང་པ་རྣམས་འཕྲོག་པར་འགྱུར་ལ། བུད་མེད་རྣམས་ལ་བཙན་གཡེམ་བྱེད་པར་འགྱུར། ཡང་གྲོང་ཁྱེར་ནང་གི་མི་གྲངས་ཕྱེད་ཀ་ནི་བཙན་ཁྲིད་བྱེད་ཅིང་། ལྷག་ལུས་རྣམས་ནི་གྲོང་ཁྱེར་ནས་ལུས་ཏེ་མེད་པར་མི་བྱའོ། །
ZEC 14:3 དུས་དེར་དཀོན་མཆོག་ཡ་ཝཱེ་ཕྱི་རུ་ཕེབས་ཏེ། སྔར་དམག་འཁྲུག་གི་དུས་སུ་ཁོང་གིས་འཐབ་པ་བཞིན་དུ་མི་རིགས་དེ་རྣམས་དང་འཐབ་པར་འགྱུར།
ZEC 14:4 ཉིན་མོ་དེར། ཁོང་གི་ཞབས་ནི་ཡེ་རུ་སཱ་ལེམ་གྱི་ཁ་གཏད་དུ་ཤར་ཕྱོགས་ཀྱི་སྐྱུ་རུ་ཤིང་གི་རི་བོར་བཞེངས་ནས། སྐྱུ་རུ་ཤིང་གི་རི་བོ་འདི་དཀྱིལ་ནས་གས་ཤིང་། ཤར་ནས་ནུབ་ཀྱི་བར་དུ་ལུང་པ་ཤིན་ཏུ་ཆེན་པོ་ཞིག་འཐོན་པར་འགྱུར། ཡང་རི་བོའི་ཕྱེད་ཀ་ནི་བྱང་ཕྱོགས་སུ་སྤོ་བ་དང་ཕྱེད་ཀ་ལྷོ་ཕྱོགས་སུ་སྤོ་བའོ། །
ZEC 14:5 ཁྱོད་རྣམས་ངའི་ལུང་པ་བརྒྱུད་ནས་འབྲོ་དགོས་ཏེ། ཅི་ལ་ཞེ་ན། ལུང་པ་དེ་ནི་ཨ་ཙེལ་བར་དུ་སླེབ་ངེས་ཡིན། ཡ་ཧུ་དཱའི་རྒྱལ་པོ་ཨུ་ཟི་ཡཱའི་དུས་སུ་ས་འགུལ་ཆེན་པོ་འབྱུང་དུས་ཇི་ལྟར་བྲོས་པ་བཞིན་ཁྱོད་རྣམས་ཕྲོས་ཤིག ང་ཡི་དཀོན་མཆོག་ཡ་ཝཱེ་ཕེབས་ངེས་ཡིན་ལ། དམ་པ་ཐམས་ཅད་ཁོང་དང་མཉམ་དུ་ཕེབས་པར་འགྱུར་རོ། །
ZEC 14:6 ཉིན་མོ་དེར་འོད་མེད་ལ། གྲང་ངར་དང་བ་མོ་ཡང་མེད་དེ།
ZEC 14:7 ཉིན་མོ་དེ་ནི་ཉིན་ཁྱད་པར་ཅན་ཞིག་ཡིན་ཏེ། དཀོན་མཆོག་ཡ་ཝཱེས་མཁྱེན་ནོ། །ཉིན་མོ་དེ་ལ་ཉིན་དཀར་དང་མཚན་མོ་ཞེས་མི་བཀར་ཏེ། གང་ལ་ཞེ་ན། དགོང་མོའི་དུས་སུའང་འོད་དང་ལྡན་པ་ཡིན་ནོ། །
ZEC 14:8 ཉིན་མོ་དེ་ལ་ཡེ་རུ་སཱ་ལེམ་ནས་ཚེ་སྲོག་དང་ལྡན་པའི་ཆུ་ཐོན་ནས། དེའི་ཕྱེད་ཀ་ནི་རྒྱ་མཚོ་ཤར་མའི་ཕྱོགས་དང་ཕྱེད་ཀ་ནི་རྒྱ་མཚོ་ནུབ་མའི་ཕྱོགས་སུ་བཞུར་ཏེ་དབྱར་དགུན་གཉིས་ཀར་དེ་ལྟར་ཡིན།
ZEC 14:9 ཡང་དཀོན་མཆོག་ཡ་ཝཱེ་ནི་ས་གཞི་ཡོངས་ཀྱི་རྒྱལ་པོར་འགྱུར་ཞིང་། ཉིན་མོ་དེ་ལ་གཙོ་བོ་ནི་གཅིག་ལས་གཉིས་མེད་ཡིན་པ་དང་ཁོང་གི་མཚན་ལ་ཡ་ཝཱེ་ཞུ་བ་མི་ཐམས་ཅད་ཀྱིས་ཁས་ལེན་པར་འགྱུར།
ZEC 14:10 ཡུལ་ཐམས་ཅད་དེ། གེ་བཱ་ནས་ཡེ་རུ་སཱ་ལེམ་ལྷོ་ཕྱོགས་ཀྱི་རིམ་མོན་དང་ཉེ་བའི་བར་དུ་ཡོད་ཚད་དམའ་སར་འགྱུར་ཡང་། ཡེ་རུ་སཱ་ལེམ་ནི་ད་དུང་སྔར་གནས་སུ་འགྱེང་ངེར་ལངས་པ་དང་། པེན་ཡཱ་མེན་གྱི་མཁར་སྒོ་ནས་རྒྱ་སྒོ་དང་པོའི་བར་དང་། གྲུ་གའི་རྒྱ་སྒོའི་བར་དུ་དང་། ཡང་ཧ་ནན་ཨེལ་གྱི་ཐོག་ཁང་ནས་རྒྱལ་པོའི་རྒུན་འབྲུམ་འཚིར་གཞོང་རྣམས་ཀྱི་བར་དུ་ཐམས་ཅད་སྔར་གནས་སུ་ལུས་པ་ཡིན།
ZEC 14:11 གྲོང་ཁྱེར་ནང་དུ་ད་དུང་འདུག་མཁན་ཡོད་པ་དང་། ད་ནི་དེ་རྩ་མེད་གཏོང་བར་མི་འགྱུར་ལ། ཡེ་རུ་སཱ་ལེམ་གྱི་མི་རྣམས་བདེ་བར་གནས་པ་ཡིན།
ZEC 14:12 དཀོན་མཆོག་ཡ་ཝཱེས་ཡེ་རུ་སཱ་ལེམ་ལ་དམག་འདྲེན་པའི་མི་རིགས་རྣམས་ལ་རྡུང་བརྡེག་བྱེད་དུ་གནོད་འཚེ་དང་རིམས་ནད་མཛད་པ་ནི་འདི་ཡིན་ཏེ། དེ་རྣམས་ད་དུང་སར་ལངས་སྡོད་པའི་དུས་སུ་ཁོ་ཚོའི་ཤ་རུལ་བར་འགྱུར་ལ། དེ་རྣམས་ཀྱི་མིག་རིལ་ཡང་མིག་ཁུང་དུ་རུལ་བར་འགྱུར་བ་དང་། དེ་དག་གི་ལྕེ་ཡང་ཁ་ནང་དུ་རུལ་བར་འགྱུར།
ZEC 14:13 ཉིན་མོ་དེ་ལ་དཀོན་མཆོག་ཡ་ཝཱེས་དེ་རྣམས་ལ་འཇིགས་སྣང་ཆེན་པོ་ཞིག་འབྱུང་བར་མཛད་དེ། ཁོ་རྣམས་རེ་རེས་ཕན་ཚུན་གྱི་ལག་པ་བཟུང་ནས། ལག་པ་ཡར་བཀྱགས་ཏེ་ཕན་ཚུན་ལ་རྒོལ་བར་འགྱུར།
ZEC 14:14 ཡ་ཧུ་དཱ་ཡང་ཡེ་རུ་སཱ་ལེམ་དུ་འཐབ་པར་འགྱུར་ཞིང་། མཐའ་འཁོར་ཡུལ་ཁམས་རྣམས་ཀྱི་རྒྱུ་ནོར་ཐམས་ཅད་བསྡུ་ངེས་ཡིན་ཏེ། གསེར་དང་དངུལ། གྱོན་གོས་བཅས་ཤིན་ཏུ་མང་ངོ་། །
ZEC 14:15 དེ་དང་དེ་བཞིན་དུ། གནོད་འཚེ་དང་རིམས་ནད་འདི་ལྟ་བུ་ནི་རྟ་དང་དྲེའུ། རྔ་མོང་། བོང་བུ། དམག་སྒར་དུ་ཡོད་པའི་ཕྱུགས་ཟོག་ཐམས་ཅད་ཀྱི་སྟེང་དུ་འཕོག་པར་འགྱུར།
ZEC 14:16 དེ་ནས་མི་རིགས་ཐམས་ཅད་ལས་ཡེ་རུ་སཱ་ལེམ་ལ་དམག་དྲངས་ནས་ལུས་པ་རྣམས་ལོ་རེ་བཞིན་ཡར་འོངས་ནས། རྒྱལ་པོ་ཆེན་པོ་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་ཕྱག་འཚལ་བ་དང་སྤྱིལ་བུའི་དུས་ཆེན་བསྲུང་བར་བྱའོ། །
ZEC 14:17 ཡང་ས་གཞིའི་མི་སྡེ་ཐམས་ཅད་ལས་སུ་ཞིག་ཡར་ཡེ་རུ་སཱ་ལེམ་དུ་འོངས་ནས་རྒྱལ་པོ་ཆེན་པོ་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་ཕྱག་མི་འཚལ་ན་དེར་ཆར་བ་མི་འབབ་བོ། །
ZEC 14:18 གལ་ཏེ་ཨེ་ཅིབ་ཀྱི་མི་རིགས་རྣམས་ཡར་འོངས་ནས་དེར་མ་ཞུགས་ན། དེ་ནས་ཁོ་རྣམས་ལའང་ཆར་བ་མི་འབབ་ལ། འདི་ནི་དཀོན་མཆོག་ཡ་ཝཱེས་སྤྱིལ་བུའི་དུས་ཆེན་བསྲུང་དུ་མི་འོང་བའི་མི་རིགས་རྣམས་ལ་བརྡེགས་ནས་ཐེབས་པར་མཛད་པའི་གནོད་འཚེ་དང་རིམས་ནད་ཡིན་ནོ། །
ZEC 14:19 འདི་ནི་ཨེ་ཅིབ་ཀྱི་ཉེས་ཆད་ཡིན་པ་དང་། སྤྱིལ་བུའི་དུས་ཆེན་བསྲུང་དུ་ཡར་མི་འོང་བའི་མི་རིགས་ཐམས་ཅད་ཀྱི་ཉེས་ཆད་ཀྱང་ཡིན་ནོ། །
ZEC 14:20 ཉིན་མོ་དེ་ལ་རྟ་རྣམས་ཀྱི་དྲིལ་བུའི་སྟེང་དུ་ཡང་དཀོན་མཆོག་ཡ་ཝཱེའི་ཕྱིར་དུ་དམ་པའོ་ཞེས་པའི་ཡི་གེ་ཡོད་པ་དང་། དཀོན་མཆོག་ཡ་ཝཱེའི་མཆོད་ཁང་གི་སླ་ང་རྣམས་ནི་མཆོད་ཁྲིའི་མདུན་གྱི་མཆོད་པ་འབུལ་བྱེད་ཕོར་བ་དང་འདྲ་སྟེ།
ZEC 14:21 ཡེ་རུ་སཱ་ལེམ་དང་ཡ་ཧུ་དཱའི་སླ་ང་ཐམས་ཅད་ཀྱང་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཕྱིར་དམ་པར་བཀོལ་བ་དང་། མཆོད་པ་འབུལ་མཁན་ཐམས་ཅད་འོངས་ནས་སླ་ང་འདི་དག་བླངས་ཏེ། དེའི་ནང་དུ་མཆོད་བྱེད་ཀྱི་ཤ་བཙོ་བ་ཡིན། ད་ནི་ཉིན་མོ་དེ་ལ་དཔུང་ཚོགས་ཀུན་གྱི་ཡ་ཝཱེའི་མཆོད་ཁང་ནང་དུ་ཀ་ན་ཨན་པ་ ཡོད་པར་མི་འགྱུར་རོ།། །།
MAL 1:1 དེ་ཡང་དཀོན་མཆོག་ཡ་ཝཱེས་མཱལ་ཨ་ཀེ་བརྒྱུད་ནས་ཡེས་ར་ཨེལ་ལ་བཀའ་ལུང་གནང་བ་འདི་ལྟ་སྟེ།
MAL 1:2 བདག་གིས་ཁྱོད་རྣམས་ལ་ཤིན་ཏུ་གཅེས་སོ་ཞེས་དཀོན་མཆོག་ཡ་ཝཱེས་གསུངས་ནའང་། ཁྱོད་ཅག་གིས་ངེད་རྣམས་ལ་ཅི་ལྟར་གཅེས་པ་ཡིན་ནམ་ཞེས་ཟེར་ཞིང་། དེ་ནས་དཀོན་མཆོག་ཡ་ཝཱེས་འདི་སྐད་དུ། ཨེ་སཱབ་ནི་ཡ་ཀོབ་ཀྱི་ཕུ་བོ་མ་ཡིན་ནམ། ཡིན་ནའང་བདག་གིས་ཡ་ཀོབ་གཅེས་སུ་འཛིན་པ༌དང༌།
MAL 1:3 ཨེ་སཱབ་ནི་བདག་གིས་འཁོན་དུ་འཛིན་པ་ཡིན་ཏེ། བདག་གིས་ཨེ་སཱབ་ཀྱི་རི་ཁུལ་རྣམས་མི་མེད་ལུང་སྟོང་དུ་བསྒྱུར་ནས་དེའི་ནོར་སྐལ་དབེན་སྟོང་གི་ཁྱི་སྤྱང་ལ་སྤྲད་པ་ཡིན།
MAL 1:4 ཇི་སྟེ་ཨེ་དོམ་གྱིས་ངེད་རྣམས་བཤིག་ན་ཡང་ཞིག་རོ་ཡང་བསྐྱར་བརྩིག་པར་བྱ་ཞེས་ཟེར་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དེ་རྣམས་ལ་བརྩིག་ཏུ་ཆུག་དང་ངས་ཡང་བསྐྱར་བཤིག་པར་བྱ། མི་རྣམས་ཀྱིས་དེ་དག་ལ་སྡིག་པའི་ཡུལ་ཁམས་དང་། དུས་གཏན་དུ་དཀོན་མཆོག་ཡ་ཝཱེ་སྡང་བའི་མི་རྣམས་ཞེས་འབོད་པར་འགྱུར་ཞེས་གསུངས།
MAL 1:5 ཡང་ཁྱོད་རྣམས་ཀྱིས་དེ་དངོས་སུ་མཐོང་ནས། ཡེས་ར་ཨེལ་ཡུལ་གྱི་ཕྱི་རོལ་ནས་ཀྱང་དཀོན་མཆོག་ཡ་ཝཱེ་རབ་ཏུ་ཆེའོ་ཞེས་ཁྱོད་ཚོས་དངོས་སུ་བརྗོད་པར་འགྱུར་རོ། །
MAL 1:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཁྱོད་རྣམས་ལ་འདི་སྐད་དུ། ཀྱེ་བདག་གི་མིང་ལ་མཐོང་ཆུང་བྱེད་པའི་མཆོད་དཔོན་རྣམས། བུ་ཡིས་ཕ་ལ་བཀུར་ཞིང་གཡོག་པོས་བདག་པོར་གུས་ཤིང་འཇིགས་པ་ཡིན། གལ་ཏེ་ང་རང་ཕ་ཡིན་ན་ཁྱོད་ཀྱི་གུས་བཀུར་གང་དུ་ཡོད་དམ། གལ་ཏེ་ང་རང་བདག་པོ་ཡིན་ན་འཐོབ་འོས་པའི་གུས་ཞུམ་གང་དུ་ཡོད་དམ། ཁྱོད་རྣམས་ན་རེ། ངེད་ཅག་གིས་ཁྱེད་ཀྱི་མཚན་ལ་ཅི་ལྟར་མཐོང་ཆུང་བྱས་སམ་ཞེས་འདྲིའོ། །
MAL 1:7 ཁྱོད་རྣམས་ཀྱིས་ཁ་ཟས་མི་གཙང་བ་བདག་གི་མཆོད་ཁྲིའི་སྟེང་དུ་ཕུལ་ནས་ད་དུང་ན་རེ། ངེད་ཅག་གིས་ཁྱེད་ཀྱི་མཆོད་ཁྲི་ཅི་ལྟར་མི་གཙང་བར་བཟོས་སམ་ཟེར་ཏེ། ཅིའི་ཕྱིར་ཞེ་ན། ཁྱོད་ཅག་གིས་དཀོན་མཆོག་ཡ་ཝཱེའི་གསོལ་ལྕོག་ལ་མཐོང་ཆུང་བྱས་ཆོག་པར་འདོད་པས་སོ་ཞེས་གསུངས་སོ། །
MAL 1:8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་ལོང་བ་མཆོད་པར་ཕུལ་ན་དེ་ངན་པ་མ་ཡིན་ནམ། ཁྱོད་རྣམས་ཀྱིས་ཞ་བོ་དང་ནད་པ་མཆོད་པར་ཕུལ་ན་དེ་སྡིག་པ་མ་ཡིན་ནམ། ཁྱོད་ཀྱིས་རང་གི་འགོ་དཔོན་ལ་ལེགས་སྐྱེས་དེ་འདྲ་ཕུལ་ན། དེས་ཁྱོད་ལ་ཐུགས་རྗེས་གཟིགས་ནས་ཁྱོད་དང་དུ་ལེན་སྲིད་པ་ཡིན་ནམ་ཞེས་གསུངས།
MAL 1:9 དཀོན་མཆོག་གིས་ཁྱོད་རྣམས་ལ་ཐུགས་རྗེས་གཟིགས་པའི་ཆེད་དུ་ད་ལྟ་ཁོང་ལ་དགོངས་དག་ཞུས་ཤིག མཆོད་རྫས་མི་གཙང་བ་འདི་དག་ནི་ཁྱོད་ཅག་གི་ལག་པ་བརྒྱུད་ནས་ཕུལ་བས་ན། ཁོང་གིས་ཁྱོད་རྣམས་ལ་ཐུགས་རྗེས་གཟིགས་ནས་ཁྱོད་དང་དུ་ལེན་པར་བྱའམ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ།
MAL 1:10 ཁྱོད་རྣམས་ཀྱིས་ངའི་མཆོད་ཁྲིའི་སྟེང་དུ་དོན་མེད་ཀྱི་མེ་མི་སྒྲོན་པའི་ཕྱིར་དུ། ཁྱོད་ཅག་གི་ཁྲོད་ནས་མི་ཞིག་གིས་མཆོད་ཁང་གི་སྒོ་བརྒྱབ་ན་ལེགས་སོ། །བདག་ནི་ཁྱོད་རྣམས་ལ་མི་དགའ་ཞིང་ཁྱོད་ཚོའི་ལག་ནས་ལེགས་སྐྱེས་ཀྱང་མི་ལེན་ནོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
MAL 1:11 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཉི་མ་ཤར་ས་ནས་ཉི་མ་ནུབ་པའི་བར་གྱི་རྒྱལ་ཁམས་ཀུན་ཏུ་བདག་གི་མིང་ནི་ཆེན་པོར་བརྩི་ཞིང་། གནས་ཀུན་ཏུ་མི་རྣམས་ཀྱིས་བདག་གི་མིང་ལ་སྤོས་བདུག་པ་དང་མཆོད་པ་གཙང་མ་འབུལ་བར་འགྱུར། ཅིའི་ཕྱིར་ཞེ་ན། བདག་གི་མིང་ནི་རྒྱལ་ཁམས་ཀུན་ཏུ་ཆེན་པོ་ཡིན་པས་སོ་ཞེས་གསུངས།
MAL 1:12 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡིན་ནའང་ཁྱོད་རྣམས་ཀྱིས་ང་རང་ཁྱད་དུ་བསད་པ་སྟེ། ཅིའི་ཕྱིར་ཞེ་ན། ཁྱོད་རྣམས་ཀྱིས་གཙོ་བོའི་གསོལ་ལྕོག་ནི་མི་གཙང་བ་དང་། གསོལ་ལྕོག་སྟེང་གི་ཁ་ཟས་ལ་མཐོང་ཆུང་བྱས་ཆོག་པར་འདོད་པས་ཡིན།
MAL 1:13 ཡང་ཁྱོད་ཅག་ན་རེ། དོན་འདི་དག་ཇི་འདྲའི་རྙོག་འཛིང་ཆེ་ཨང་ཟེར་བཞིན་ཁྲེལ་དགོད་བྱེད་དོ་ཞེས་གསུངས། དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་ཕྲོགས་ནས་འོངས་པ་དང་ཞ་བོ། ནད་པ་ལ་སོགས་པ་ཁྱེར་འོངས་ནས་ལེགས་སྐྱེས་སུ་བྱས་པས། ངས་ཁྱོད་ཚོའི་ལག་ནས་ལེན་རུང་ངམ་ཞེས་གསུངས།
MAL 1:14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། སུ་ཞིག་གིས་སྒོ་ཕྱུགས་ནང་གི་ཕོ་ཕྱུགས་འབུལ་བའི་དམ་བཅའ་བཞག་ཀྱང་། གཡོ་སྒྱུའི་ངང་ནས་གཙོ་བོར་དབང་བོ་སྐྱོན་ཅན་མཆོད་པར་ཕུལ་ན། མི་དེ་ལ་དམོད་མོ་ཐེབས་འོས་པ་ཡིན། ཅིའི་ཕྱིར་ཞེ་ན། ང་ནི་རྒྱལ་པོ་ཆེན་པོ་ཡིན་ཏེ། བདག་གི་མིང་ནི་མི་རིགས་རྣམས་ཀྱི་ཁྲོད་དུ་གུས་ཤིང་འཇིགས་འོས་པ་ཡིན་ཞེས་གསུངས་སོ། །
MAL 2:1 ཀྱེ་མཆོད་དཔོན་རྣམས། ད་ལྟའི་བཀའ་འདི་ནི་ཁྱོད་ཅག་ལ་གསུངས་པ་ཡིན།
MAL 2:2 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། གལ་ཏེ་ཁྱོད་རྣམས་ཀྱིས་མི་མཉན་ལ་སེམས་སུའང་མི་འཛིན་པ་དང་། གཟི་བརྗིད་ཐམས་ཅད་ངའི་མིང་ལ་མི་འབུལ་ན། ངས་ཁྱོད་རྣམས་ལ་དམོད་མོ་ཐེབས་པར་བྱ་སྟེ། ངས་ཁྱོད་རྣམས་ལ་འཐོབ་འོས་པའི་བྱིན་རླབས་དེ་ལ་དམོད་མོ་ཐེབས་སུ་འཇུག་པར་མ་ཟད། དམོད་མོ་ཐེབས་ཟིན་པ་ཡིན། ཅིའི་ཕྱིར་ཞེ་ན། ཁྱོད་ཅག་གིས་བཀའ་དེ་སེམས་སུ་མ་བཟུང་བས་སོ། །
MAL 2:3 ངས་ཁྱོད་ཅག་གི་བུ་རྒྱུད་རྣམས་ལ་གཤེ་གཤེ་བཏང་སྟེ། དུས་ཆེན་གྱི་སྐབས་སུ་མཆོད་པར་ཕུལ་བའི་ཕྱུགས་ཟོག་གི་ལྕི་བ་ཁྱོད་རྣམས་ཀྱི་གདོང་ལ་བྱུག་པར་འགྱུར་ཞིང་། མི་ཡིས་ཁྱོད་རྣམས་ལུད་ཕུང་ནང་དུ་འཁྱེར་ངེས་ཡིན་ཞེས་གསུངས་སོ། །
MAL 2:4 ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དེ་ནས་ཁྱོད་ཚོས་བཀའ་འདི་ནི་ངས་ཁྱོད་ཅག་ལ་གནང་བ་དང་། ངས་ལེ་ཝི་ལ་བཞག་པའི་ཞལ་ཆད་དེ་མུ་མཐུད་དུ་གནས་པའི་ཆེད་དུ་ཡིན་པ་རྟོགས་པར་འགྱུར།
MAL 2:5 ངས་ཁོ་ལ་བཞག་པའི་ཞལ་ཆད་ནི་ཚེ་སྲོག་དང་ཞི་བདེའི་ཞལ་ཆད་ཡིན་ལ། ཡང་ངས་དེ་རྣམས་ཁོ་ལ་གནང་ནས་ཁོ་རང་བདག་ལ་གུས་ཤིང་འཇིགས་པར་བྱས་ཤིང་། ཁོ་རང་བདག་ལ་གུས་ཤིང་འཇིགས་པ་དང་བདག་གི་མིང་ལ་འཇིགས་པའོ། །
MAL 2:6 ཁོའི་སྨྲ་སྒོ་རུ་བདེན་པ་ཉིད་ཀྱི་བཀའ་སློབ་ཡོད་ཅིང་། ཁོའི་མཆུ་སྒྲོས་ལས་རྫུན་གང་ཡང་ལབ་མེད་པ་ཡིན། ཁོ་ནི་ཞི་བདེ་དང་དྲང་བདེན་གྱི་ངང་ནས་ང་དང་མཉམ་དུ་སྐྱོད་ཅིང་། མི་མང་པོ་ཕྱིར་བཟློགས་ནས་སྡིག་པ་དང་བྲལ་ཏོ། །
MAL 2:7 མཆོད་དཔོན་གྱི་མཆུ་སྒྲོས་ཀྱིས་ཤེས་བྱ་སློབ་སྟོན་བྱེད་འོས་ལ། མི་ཡིས་དེའི་སྨྲ་སྒོ་ནས་བཀའ་ཁྲིམས་འཚོལ་དགོས་པ་ཡིན། ཅིའི་ཕྱིར་ཞེ་ན། དེ་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཕོ་ཉ་ཡིན་པས་སོ། །
MAL 2:8 ཡིན་ཡང་ཁྱོད་ཅག་ནི་དྲང་ལམ་དང་བྲལ་ནས་མི་མང་པོ་བཀའ་ཁྲིམས་སྟེང་འགྱེལ་བར་བཅུག་པ་དང་། ཡང་ཁྱོད་རྣམས་ཀྱིས་ངས་ལེ་ཝི་ལ་བཞག་པའི་ཞལ་ཆད་ཀྱང་མ་བསྲུངས་པས།
MAL 2:9 ངས་ཀྱང་ཁྱོད་ཅག་ལ་མི་སྡེ་ཀུན་གྱི་མདུན་དུ་མཐོང་ཆུང་དང་དམའ་འབེབས་ཐེབས་སུ་འཇུག་གོ །གང་ལ་ཞེ་ན། ཁྱོད་ཅག་གིས་ངའི་བགྲོད་ལམ་མ་བསྲུངས་པར། བཀའ་ཁྲིམས་སྟེང་མི་ལ་ངོ་དགའ་ཕྱོགས་འཐེན་བྱས་པས་སོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
MAL 2:10 རང་ཅག་ཐམས་ཅད་ལ་ཡབ་གཅིག་ཡོད་པ་མ་ཡིན་ནམ། དཀོན་མཆོག་གཅིག་གིས་རང་ཅག་བཀོད་པ་མ་ཡིན་ནམ། རང་ཅག་མི་རེ་རེས་རང་གི་སྤུན་ཟླ་ལ་གཡོ་སྒྱུའི་སྦྱོར་བ་སྤེལ་ཞིང་། རང་ཅག་གི་ཕ་མེས་རྣམས་ཀྱི་ཞལ་ཆད་ཁྱད་དུ་གསོད་པ་ཅི་ཡིན་ནམ།
MAL 2:11 ཡ་ཧུ་དཱ་པས་གཡོ་སྒྱུའི་སྦྱོར་བ་སྤེལ་ནས་ཡེས་ར་ཨེལ་དང་ཡེ་རུ་སཱ་ལེམ་གྱི་ནང་དུ་ཞེན་ཁ་ལོག་པའི་དོན་སྤྱད་པའོ། །ཅིའི་ཕྱིར་ཞེ་ན། ཡ་ཧུ་དཱ་པས་དཀོན་མཆོག་ཡ་ཝཱེ་ཐུགས་མཉེས་པའི་མཆོད་ཁང་བཙོག་པར་བཟོས་ཏེ། ཕྱི་རོལ་པའི་ལྷ་ལ་ཞབས་ཏོག་སྒྲུབ་པའི་བུད་མེད་ཆུང་མར་བླངས་སོ། །
MAL 2:12 དེ་ལྟར་སྤྱོད་མཁན་ནི་སུ་ཡིན་ཡང་། ཐ་ན་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་མཆོད་པ་འབུལ་མཁན་ཡིན་ནའང་། དཀོན་མཆོག་ཡ་ཝཱེས་མི་དེ་ནི་ཡ་ཀོབ་ཀྱི་གུར་ལས་ཚར་དུ་གཅོད་པར་འགྱུར།
MAL 2:13 ཁྱོད་རྣམས་ཀྱིས་ཡང་དོན་འདི་སྤྱད་དེ། མིག་ཆུ་དང་ངུ་འབོད། འཁུན་སྒྲ་བཅས་ཀྱིས་དཀོན་མཆོག་ཡ་ཝཱེའི་མཆོད་ཁྲི་བཀབ་པ་ཡིན། གང་ལ་ཞེ་ན། ད་ནི་དཀོན་མཆོག་ཡ་ཝཱེས་ལེགས་སྐྱེས་ལ་མི་གཟིགས་ཤིང་། ཁྱོད་ཚོའི་ལག་ནས་དེ་བཞེས་པར་ཡང་ཐུགས་མི་མཉེས།
MAL 2:14 ཁྱོད་རྣམས་ཀྱིས་ད་དུང་ཅི་ལ་མི་བཞེས་སམ་ཞེས་འདྲིའོ། །ཅིའི་ཕྱིར་ཞེ་ན། དཀོན་མཆོག་ཡ་ཝཱེས་ཁྱོད་དང་ཁྱོད་ལོ་ན་གཞོན་དུས་བླངས་པའི་ཆུང་མའི་བར་དུ་བདེན་དཔང་མཛད་དེ། མོ་ནི་ཁྱོད་ཀྱི་གཏན་གྲོགས་དང་ཁྱོད་ཀྱིས་དམ་བཅའ་བཞག་པའི་ཆུང་མ་ཡིན་ནའང་ཁྱོད་ཀྱིས་ད་དུང་དེ་ལ་གཡོ་སྒྱུའི་སྦྱོར་བ་སྤེལ་ཏོ། །
MAL 2:15 དཀོན་མཆོག་གི་སེམས་ཉིད་དང་ལྡན་པའི་མི་ཞིག་ཡིན་ཚེ་དེ་ལྟར་མི་བྱ་སྟེ། དེས་ཅི་ལྟར་སྤྱོད་དམ་ཟེར་ན། དེས་དཀོན་མཆོག་ལ་དད་པའི་བུ་རབས་ཚ་རྒྱུད་འཚོལ་བའོ། །དེ་བས་ཁྱོད་ཅག་གིས་གཟབ་གཟབ་བྱས་ནས་རང་གི་སེམས་སྲུངས་དང་། ལོ་ན་གཞོན་དུས་བླངས་པའི་ཆུང་མར་བློ་དཀར་དགོས་སོ། །
MAL 2:16 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཆུང་མ་འདོར་བ་དང་ཆུང་མར་གདུག་རྩུབ་སྤྱོད་པའི་མི་ལ་ང་རང་སྡང་ངོ་ཞེས་གསུངས་ཤིང་། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དེ་བས་ཁྱོད་ཅག་གིས་གཟབ་གཟབ་བྱས་ནས་རང་གི་སེམས་སྲུངས་དང་། གཡོ་སྒྱུའི་སྦྱོར་བ་སྤེལ་མི་རུང་ཞེས་གསུངས་སོ། །
MAL 2:17 ཁྱོད་ཅག་གིས་རང་གི་སྨྲ་བརྗོད་ཀྱིས་དཀོན་མཆོག་ཡ་ཝཱེའི་ཐུགས་ལ་སུན་སྣང་བསྐྱེད་ནས་ད་དུང་ན་རེ། ངེད་རྣམས་ཀྱིས་ཁོང་ལ་ཅི་ལྟར་སུན་སྣང་བསྐྱེད་པ་ཡིན་ནམ་ཟེར་ཏེ། ཅིའི་ཕྱིར་ཞེ་ན། ཁྱོད་རྣམས་ན་རེ། ངན་པ་བྱེད་མཁན་རྣམས་ཀྱང་དཀོན་མཆོག་ཡ་ཝཱེས་ལེགས་པར་གཟིགས་པར་མ་ཟད། ཁོང་དེ་དག་ལ་ཐུགས་མཉེས་པ་ཡིན་ཞེས་སྨྲ་ཞིང་། ཡང་ན་དྲང་བདེན་ཅན་གྱི་དཀོན་མཆོག་གང་དུ་བཞུགས་ལགས་སམ་ཞེས་སྨྲས་པས་སོ། །
MAL 3:1 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངས་རང་གི་ཕོ་ཉ་མངགས་ཏེ་ངའི་མདུན་དུ་ལམ་གྲ་སྒྲིག་བྱེད་པ་དང་། ཁྱོད་རྣམས་ཀྱིས་འཚོལ་བའི་གཙོ་བོ་ནི་གློ་བུར་ཉིད་ལ་ཁོང་གི་མཆོད་ཁང་ནང་དུ་ཕེབས་ངེས་ཤིང་། ཁྱོད་རྣམས་ཀྱིས་ཡིད་སྨོན་བྱེད་པའི་ཞལ་ཆད་ཀྱི་ཕོ་ཉ་དེ་འོང་བར་འགྱུར་ཞེས་གསུངས་སོ། །
MAL 3:2 ཡིན་ནའང་ཁོང་སླེབས་པའི་དུས་དེ་སུ་ཞིག་གིས་བཟོད་ནུས་སམ། ཁོང་མངོན་པའི་དུས་ལ་སུ་ཞིག་ཚུགས་ཐུབ་བམ། ཅིའི་ཕྱིར་ཞེ་ན། ཁོང་ནི་གསེར་བཙོ་སྦྱང་བྱེད་མཁན་གྱི་མེ་དང་། གོས་འཁྲུད་མཁན་གྱི་བ་ཚྭ་དང་འདྲའོ། །
MAL 3:3 ཡང་ཁོང་ནི་དངུལ་བཙོ་སྦྱང་བྱས་ནས་དེ་གཙང་མར་བཟོ་མཁན་གྱི་མི་དང་འདྲ་བར་བཞུགས་ཤིང་། ཁོང་གིས་ལེ་ཝི་པ་རྣམས་གཙང་མར་མཛད་ཅིང་། གསེར་དང་དངུལ་ལ་བཙོ་སྦྱང་བྱེད་པ་བཞིན་དུ་དེ་རྣམས་གཙང་མར་མཛད་པ་དང་། དེ་ནས་ཁོ་ཚོས་དྲང་བདེན་གྱི་ངང་ནས་དཀོན་མཆོག་ཡ་ཝཱེར་མཆོད་པ་འབུལ་བར་བྱའོ། །
MAL 3:4 གནའ་བོའི་དུས་དང་སྔོན་ཆད་ཀྱི་ལོ་ཟླ་ནང་བཞིན། དེའི་དུས་སུ་ཡ་ཧུ་དཱ་དང་ཡེ་རུ་སཱ་ལེམ་གྱིས་ཕུལ་བའི་མཆོད་པར་དཀོན་མཆོག་ཡ་ཝཱེ་ཐུགས་མཉེས་ནས་བཞེས་པར་འགྱུར།
MAL 3:5 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡང་ང་རང་ཉེ་བར་བཅར་ནས་ཁྱོད་རྣམས་ལ་ཉེས་ཆད་གཅོད་པར་འགྱུར་ཏེ། སྒྱུ་འཕྲུལ་སྟོན་པ་དང་ལོག་གཡེམ་བྱེད་པ། མནའ་རྫུན་མ་སྐྱེལ་བ། གླ་ཆའི་ཕྱོགས་ནས་གླ་པར་གཉའ་གནོན་བྱེད་པ། དྭ་ཕྲུག་དང་ཡུགས་མོར་གཉའ་གནོན་བྱེད་པ། བྱེས་པ་རྣམས་ལ་དྲང་བདེན་ལོག་པར་སྤྱོད་པ། བདག་ལ་གུས་ཤིང་འཇིགས་པར་མི་བྱེད་པ་བཅས་ལ་བདག་གིས་མྱུར་དུ་སྐྱོན་བརྗོད་བྱེད་ངེས་ཡིན་ཞེས་གསུངས་སོ། །
MAL 3:6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡ་ཝཱེ་བདག་ནི་འགྱུར་བ་མེད་པ་ཡིན་པས། ཡ་ཀོབ་ཀྱི་བུ་རྒྱུད་ཁྱོད་རྣམས་ཀྱང་མེད་པར་མི་འགྱུར།
MAL 3:7 ཁྱོད་ཅག་གི་ཕ་མེས་རྣམས་ཀྱི་དུས་ནས་བཟུང་སྟེ། ཁྱོད་རྣམས་བདག་གི་སྒྲིག་ཁྲིམས་དང་བྲལ་ནས་དེ་མ་བསྲུངས་པ་ཡིན། ད་ལྟ་ཁྱོད་རྣམས་བདག་གི་ཕྱོགས་སུ་འཁོར་ན། བདག་ཀྱང་ཁྱོད་ཅག་གི་ཕྱོགས་སུ་འཁོར་བར་འགྱུར། ཡིན་ནའང་ཁྱོད་ཚོ་ན་རེ། ངེད་རྣམས་ཅི་ལྟར་འཁོར་བར་བྱའམ་ཞེས་འདྲིའོ། །
MAL 3:8 མི་ཡིས་དཀོན་མཆོག་ལ་དབང་བ་གང་ཞིག་འཕྲོག་ནུས་སམ། ཡིན་ནའང་ཁྱོད་ཚོས་བདག་ལ་དབང་བ་དེ་ཕྲོགས་ནས། ད་དུང་ངེད་ཅག་གིས་ཁྱེད་ནས་ཅི་ཞིག་ཕྲོགས་སམ་ཞེས་འདྲིའོ། །དོན་དངོས་སུ་ཁྱོད་རྣམས་ཀྱིས་ཞལ་འདེབས་སུ་འབུལ་འོས་པའི་བཅུ་ཆ་གཅིག་དང་། འབུལ་དགོས་པའི་མཆོད་རྫས་ཕྲོགས་པ་ཡིན།
MAL 3:9 ཁྱོད་རྣམས་ལ་དམོད་མོ་ཚབས་ཆེན་ཐེབས་པར་འགྱུར་ཏེ། ཅིའི་ཕྱིར་ཞེ་ན། ཁྱོད་ཅག་མི་རིགས་ཡོངས་ཀྱིས་གང་ཞིག་ང་ལ་དབང་བ་དེ་ཕྲོགས་པས་སོ་ཞེས་གསུངས་སོ། །
MAL 3:10 ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་གི་མཆོད་ཁང་དུ་འབྲུ་རིགས་ཡོད་པའི་ཆེད་དུ། ཁྱོད་རྣམས་ཀྱིས་ཞལ་འདེབས་སུ་འབུལ་འོས་པའི་བཅུ་ཆ་གཅིག་ཐམས་ཅད་མཛོད་ཁང་དུ་བསྐྱལ་དགོས་པ་དང་། དེ་བརྒྱུད་ནས་བདག་ལ་བརྟག་པར་གྱིས། བདག་གིས་ཁྱོད་རྣམས་ལ་ནམ་མཁའི་སྒོ་མོ་ཕྱེས་ནས་འདང་བས་མ་ཚད་ལྷག་མའང་ཡོད་པའི་བྱིན་རླབས་ཁྱོད་རྣམས་ལ་གནང་མིན་ལ་ལྟོས་ཤིག་ཅེས་གསུངས།
MAL 3:11 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་ཁྱུར་མིད་གཏོང་མཁན་དེ་རྣམས་ལ་གཤེ་གཤེ་བཏང་ནས་ཁྱོད་རྣམས་ཀྱི་ས་སྟེང་གི་ལོ་ཏོག་བཟའ་རུ་མི་འཇུག་ལ། ཁྱོད་ཅག་གི་ཞིང་ཁའི་རྒུན་འབྲུམ་ཡང་མ་སྨིན་སྔོན་ལ་སར་ལྷུང་དུ་མི་འཇུག་གོ་ཞེས་གསུངས།
MAL 3:12 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། རྒྱལ་ཁམས་ཀུན་གྱིས་ཁྱོད་རྣམས་བདེའོ་ཞེས་སྨྲ་བར་འགྱུར་ཏེ། ཅིའི་ཕྱིར་ཞེ་ན། ཁྱོད་ཚོའི་ཡུལ་འདི་དགའ་སྤྲོའི་གནས་སུ་འགྱུར་ངེས་པས་སོ་ཞེས་གསུངས་སོ། །
MAL 3:13 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་གུས་ལུགས་མེད་པའི་སྐད་ཆས་བདག་ལ་ཁ་ལན་བསློགས་ནས་ད་དུང་ན་རེ། ང་ཚོས་སྐད་ཆ་གང་ཞིག་གིས་ཁྱེད་ལ་ཁ་ལན་བསློགས་པ་ཡིན་ནམ་ཞེས་འདྲིའོ། །
MAL 3:14 ཡང་ཁྱོད་ཚོ་ན་རེ། དཀོན་མཆོག་ལ་ཞབས་ཏོག་སྒྲུབ་པ་ནི་དོན་མེད་ཡིན་ཞིང་། ཁོང་གི་བཀའ་བརྩིས་ཏེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་དྲུང་དུ་སྡུག་བསྔལ་སྤྱད་ན་ཕན་ཐོགས་ཅི་ཞིག་ཡོད་དམ།
MAL 3:15 ད་ལྟ་ང་ཚོས་ང་རྒྱལ་ཅན་རྣམས་བདེ་ཞིང་ངན་སྤྱོད་ཅན་རྣམས་ཡར་རྒྱས་གོང་འཕེལ་དུ་འགྲོ་བ་ཡིན་ཟེར་ཞིང་། དེ་དག་གིས་དཀོན་མཆོག་ལ་ཚོད་བགམ་བྱས་ན་ཡང་ཐར་བ་ཡིན་ཟེར་ཞེས་གསུངས་སོ། །
MAL 3:16 དེའི་དུས་སུ་དཀོན་མཆོག་ཡ་ཝཱེ་ལ་གུས་ཤིང་འཇིགས་པའི་མི་རྣམས་ཀྱིས་ཕན་ཚུན་གཏམ་གླེང་བ་དང་། དཀོན་མཆོག་ཡ་ཝཱེས་གཟབ་གཟབ་ངང་ནས་གསན་ཞིང་། ཁོང་གི་དྲུང་དུ་ཟིན་ཐོ་ཡོད་ལ་དེའི་སྟེང་དུ་དཀོན་མཆོག་ཡ་ཝཱེར་གུས་ཤིང་འཇིགས་པ་དང་ཁོང་གི་མཚན་དྲན་པའི་མི་རྣམས་བཀོད་པའོ། །
MAL 3:17 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ངས་དོན་རྣམས་སྤྱོད་པའི་ཉིན་མོར། དེ་དག་ནི་ནོར་སྐལ་ཁྱད་པར་ཅན་དུ་གྱུར་ནས་ང་ལ་དབང་སྟེ། མི་ཡིས་རང་ཉིད་ལ་ཞབས་ཏོག་སྒྲུབ་པའི་བུ་ལ་སྙིང་རྗེ་བ་ནང་བཞིན་ངས་ཀྱང་དེ་རྣམས་ལ་སྙིང་རྗེ་བར་བྱའོ། །
MAL 3:18 དེའི་དུས་སུ་ཁྱོད་རྣམས་ཀྱིས་མི་དྲང་བདེན་ཅན་དང་མི་ངན་པ་གཉིས་དང་། དཀོན་མཆོག་ལ་ཞབས་ཏོག་སྒྲུབ་མཁན་དང་ཞབས་ཏོག་མི་སྒྲུབ་མཁན་གཉིས་ཀྱི་ཁྱད་པར་རྟོགས་པར་འགྱུར་ཞེས་གསུངས་སོ། །
MAL 4:1 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ཉིན་དེ་ནི་མེ་འབར་བཞིན་པའི་ཁྲོ་ཐབ་དང་འདྲ་བར་སླེབ་འོང་། ང་རྒྱལ་ཅན་དང་ངན་པ་སྤྱོད་མཁན་ཐམས་ཅད་སོག་མ་ལྟ་བུར་འགྱུར་ཞིང་། སླེབ་པར་འགྱུར་བའི་ཉིན་མོ་དེས་ཁོ་རྣམས་རྩ་བ་ནས་བསྲེག་པར་འགྱུར་ལ། ཁོ་རྣམས་ལ་རྩ་བ་གཅིག་དང་ཡལ་ག་གཅིག་ཀྱང་ལུས་པར་མི་བྱའོ། །
MAL 4:2 ཡིན་ནའང་ངའི་མིང་ལ་གུས་ཤིང་འཇིགས་པ་ཁྱོད་རྣམས་ལ་དྲང་བདེན་གྱི་ཉི་མ་འཆར་བ་དང་། དེའི་འོད་ལ་གསོ་བྱེད་ཀྱི་ནུས་པ་ལྡན་པས། ཁྱོད་ཅག་ནི་ལྷས་རའི་ནང་གི་བ་ཕྲུག་བཞིན་དུ་ཕྱི་རོལ་ཏུ་འོངས་ནས་མཆོང་ལྡིང་བྱེད་པར་འགྱུར་ཞེས་གསུངས་སོ། །
MAL 4:3 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡང་ཁྱོད་ཅག་གིས་མི་ངན་རྣམས་ལ་རྡོག་བརྫིས་གཏོང་བ་དང་། ངས་དོན་རྣམས་སྤྱོད་པའི་ཉིན་མོར་དེ་དག་ནི་ཁྱོད་ཅག་རྐང་འོག་གི་ཐལ་བར་འགྱུར་ངེས་ཡིན།
MAL 4:4 ངའི་ཞབས་ཕྱི་མོ་ཤེའི་བཀའ་ཁྲིམས་ཏེ། ངས་ཧོ་རེབ་རི་བོ་ནས་ཡེས་ར་ཨེལ་པ་ཐམས་ཅད་ཀྱི་ཆེད་དུ་བསྒོས་པའི་སྒྲིག་ཁྲིམས་དང་སྒྲིག་སྲོལ་རྣམས་ནི་ཁྱོད་ཅག་གིས་གཟབ་གཟབ་བྱས་ནས་ཡིད་ལ་འཛིན་དགོས།
MAL 4:5 ལྟོས་དང་། དཀོན་མཆོག་ཡ་ཝཱེའི་རབ་ཏུ་ཆེ་ཞིང་འཇིགས་སུ་རུང་བའི་ཉིན་མོ་མ་སླེབས་སྔོན་ལ། ངས་ལུང་སྟོན་པ་ཨེ་ལི་ཡཱ་ཁྱོད་ཅག་གི་གམ་དུ་མངག་པར་བྱ་སྟེ།
MAL 4:6 ངས་གནས་འདིར་རྒོལ་ཏེ་རྩ་བ་ནས་མེད་པར་མི་བྱ་བའི་ཆེད་དུ། ཁོས་ཕ་ཡི་སེམས་བུ་ཕྲུག་གི་ཕྱོགས་དང་། བུ་ཕྲུག་གི་སེམས་ཕ་ཡི་ཕྱོགས་སུ་འཁོར་བར་བྱའོ་ཞེས་གསུངས་སོ།། །།
MAT 1:1 དེ་ཡང་ཡེ་ཤུ་མཱ་ཤི་ཀ་ནི་དཱ་བིད་དང་ཨབ་ར་ཧམ་གྱི་རིགས་སྲས་ཡིན༌ཞིང༌། ཁོང་གི་གདུང་རྒྱུད་ནི་འདི་ལྟ༌སྟེ།
MAT 1:2 ཨབ་ར་ཧམ་ལས་ཨི་སཱག་མཆེད༌ཅིང༌། ཨི་སཱག་ལས་ཡ་ཀོབ༌མཆེད། ཡ་ཀོབ་ལས་ཡ་ཧུ་དཱ་དང་དེའི་སྤུན་རྣམས་མཆེད༌དོ།།
MAT 1:3 ཡ་ཧུ་དཱའི་བུ་ཕེ་རེལ་ཟི་དང་ཟེ་རག་གཉིས་ནི་ཐལ་མཱར་ལས་མཆེད༌ཅིང༌། ཕེ་རེལ་ཟི་ལས་ཧེས་རོན༌མཆེད། ཧེས་རོན་ལས་རཱམ༌མཆེད།
MAT 1:4 རཱམ་ལས་ཨ་མི་ནཱ་དབ༌མཆེད། ཨ་མི་ནཱ་དབ་ལས་ནཱ་སོན༌མཆེད། ནཱ་སོན་ལས་སཱལ་མོན༌མཆེད།
MAT 1:5 སཱལ་མོན་གྱི་བུ་པཱོ་ཨ་ཟི་ནི་རཱ་ཧབ་ལས༌མཆེད། པཱོ་ཨ་ཟིའི་བུ་ཨོ་བེད་ནི་རུ་ཐི་ལས༌མཆེད། ཨོ་བེད་ལས་ཡེ་སེ༌མཆེད།
MAT 1:6 ཡེ་སེ་ལས་རྒྱལ་པོ་དཱ་བིད༌མཆེད། དཱ་བིད་ཀྱི་སྲས་སོ་ལོ་མོན་ནི་ཨུ་རི་ཡཱའི་ཆུང་མ་ལས༌མཆེད།
MAT 1:7 སོ་ལོ་མོན་ལས་རེ་ཧབ་ཨམ༌མཆེད། རེ་ཧབ་ཨམ་ལས་ཨ་བི་ཡཱ༌མཆེད། ཨ་བི་ཡཱ་ལས་ཨ་སཱ༌མཆེད།
MAT 1:8 ཨ་སཱ་ལས་ཡེ་ཧོ་ཤ་ཕད༌མཆེད། ཡེ་ཧོ་ཤ་ཕད་ལས་ཡོ་རཱམ༌མཆེད། ཡོ་རཱམ་ལས་ཨུ་ཟི་ཡཱ༌མཆེད།
MAT 1:9 ཨུ་ཟི་ཡཱ་ལས་ཡོ་ཐམ༌མཆེད། ཡོ་ཐམ་ལས་ཨ་ཧ་ཟཱ༌མཆེད། ཨ་ཧ་ཟཱ་ལས་ཧི་ཟི་ཀི་ཡཱ༌མཆེད།
MAT 1:10 ཧི་ཟི་ཀི་ཡཱ་ལས་མཱ་ན་ཤེ༌མཆེད། མཱ་ན་ཤེ་ལས་ཨ་མོན༌མཆེད། ཨ་མོན་ལས་ཡོ་ཤི་ཡཱ༌མཆེད།
MAT 1:11 པཱ་པེལ་ལོན་དུ་བཙན་ཁྲིད་བྱེད་པའི་དུས༌སུ། ཡོ་ཤི་ཡཱ་ལས་ཡེ་ཀོན་ཡཱ་དང་དེའི་ནུ་བོ་རྣམས་མཆེད༌དོ།།
MAT 1:12 པཱ་པེལ་ལོན་དུ་བཙན་ཁྲིད་བྱས༌རྗེས། ཡེ་ཀོན་ཡཱ་ལས་ཞིད་ཨལ་ཐེ་ཨེལ་མཆེད༌ཅིང༌། ཞིད་ཨལ་ཐེ་ཨེལ་ལས་ཟེ་རུ་པཱ་པེལ༌མཆེད།
MAT 1:13 ཟེ་རུ་པཱ་པེལ་ལས་ཨ་བི་ཧུད༌མཆེད། ཨ་བི་ཧུད་ལས་ཨེལ་ཡ་ཀིམ༌མཆེད། ཨེལ་ཡ་ཀིམ་ལས་ཨ་ཟོར༌མཆེད།
MAT 1:14 ཨ་ཟོར་ལས་ཟཱ་ཏོག༌མཆེད། ཟཱ་ཏོག་ལས་ཨ་ཀིམ༌མཆེད། ཨ་ཀིམ་ལས་ཨེ་ལི་ཧུད༌མཆེད།
MAT 1:15 ཨེ་ལི་ཧུད་ལས་ཨེ་ལི་ཨ་ཟར༌མཆེད། ཨེ་ལི་ཨ་ཟར་ལས་མད་ཐན༌མཆེད། མད་ཐན་ལས་ཡ་ཀོབ༌མཆེད།
MAT 1:16 ཡ་ཀོབ་ལས་ཡོ་སེབ་མཆེད་ཅིང་ཁོ་ནི་མིར་ཡམ་གྱི་ཁྱོ་བོ༌ཡིན། མཱ་ཤི་ཀ་ཞེས་གྲགས་པའི་སྐྱབས་མགོན་ཡེ་ཤུ་ནི་མིར་ཡམ་ལས་སྐུ་འཁྲུངས་པ་ཡིན༌ནོ།།
MAT 1:17 དེའི༌ཕྱིར། ཨབ་ར་ཧམ་ནས་དཱ་བིད་ཀྱི་བར་དུ་གདུང་རབས་བཅུ་བཞི༌དང༌། དཱ་བིད་ནས་ཡ་ཧུ་དཱ་པ་རྣམས་པཱ་པེལ་ལོན་ལ་བཙན་ཁྲིད་བྱས་པའི་བར་དུ་གདུང་རབས་བཅུ་བཞི་ཡོད་པ༌དང༌། པཱ་པེལ་ལོན་དུ་བཙན་ཁྲིད་བྱས་པ་ནས་སྐྱབས་མགོན་མཱ་ཤི་ཀའི་བར་ལའང་གདུང་རབས་བཅུ་བཞི་ཡོད༌དོ།།
MAT 1:18 ཡེ་ཤུ་མཱ་ཤི་ཀ་སྐུ་འཁྲུངས་པའི་ལོ་རྒྱུས་ནི་འདི་ལྟ༌སྟེ། ཁོང་ཉིད་ཀྱི་ཡུམ་མིར་ཡམ་ནི་ཡོ་སེབ་དང་གཉེན་རྟགས་བརྒྱབ་ཡོད༌ཅིང༌། ཁོ་གཉིས་ཀྱི་བར་དུ་ཕོ་མོའི་ལུས་མ་འབྲེལ་བའི་སྔོན༌ལ། མིར་ཡམ་ལ་དམ་པའི་ཐུགས་ཉིད་ཀྱི་སྒོ་ནས་མངལ་སྦྲུམ་པར་གྱུར༌ཏོ།།
MAT 1:19 ཁོ་མོའི་ཁྱོ་བོ་ཡོ་སེབ་ནི་མི་གཞུང་དྲང་ཞིག་ཡིན༌པས། མི་ཚོགས་ཀྱི་མདུན་དུ་ཁོ་མོ་ངོ་གནོང་བར་བྱེད་མ་འདོད༌དེ། ལྐོག་ནས་ཁོ་མོ་དང་འཐོར་བར་བྱ་བསམས་པ༌ཡིན།
MAT 1:20 ཁོས་དེ་ལྟར་བསམས་པའི༌ཚེ། གཙོ་བོའི་ཕོ་ཉ་ཞིག་ཁོའི་རྨི་ལམ་དུ་བྱུང་སྟེ་འདི་སྐད༌དུ། ཀྱེ། དཱ་བིད་ཀྱི་རིགས་རྒྱུད་ཡོ༌སེབ། མིར་ཡམ་གྱི་མངལ་དུ་ཆགས་པ་ནི་དམ་པའི་ཐུགས་ཉིད་ནས་བྱུང་བ་ཡིན༌པས། ཁོ་མོ་ཁྱོད་ཀྱི་ཆུང་མར་ལེན་པ་ལ་མ་འཇིགས༌ཤིག
MAT 1:21 ཁོ་མོར་སྲས་ཤིག་འཁྲུངས་པར་འགྱུར༌ཞིང༌། ཁོང་གིས་རང་གི་མི་རྣམས་སྡིག་པ་ལས་སྐྱོབ་པར་འགྱུར༌བས། ཁྱོད་ཀྱིས་ཁོང་གི་མཚན་ལ་ཡེ་ཤུ་ཞེས་ཐོགས་ཤིག་ཅེས་གསུངས༌སོ།།
MAT 1:22 དོན་འདི་ཐམས་ཅད་ནི་གཙོ་བོས་ལུང་སྟོན་པ་བརྒྱུད་ནས་འདི་སྐད༌དུ།
MAT 1:23 ལྟོས༌དང༌། ན་ཆུང་བུ་མོ་ཞིག་ལ་མངལ་སྦྲུམ་སྟེ་སྲས་ཤིག་འཁྲུངས་ངེས༌ཤིང༌། མི་རྣམས་ཀྱིས་ཁོང་གི་མཚན་ལ་ཨིམ་མཱ་ནུ་ཨེལ་ཞེས་འབོད་པར་འགྱུར་ཞེས་གསུངས་པ་དེ་འགྲུབ་པའི་ཕྱིར་དེ་ལྟར༌བྱུང༌། ཨིམ་མཱ་ནུ་ཨེལ་ཞེས་པ་ནི་དཀོན་མཆོག་བདག་ཅག་དང་མཉམ་དུ་བཞུགས་པ་ཡིན་ཞེས་པའི་དོན༌ནོ།།
MAT 1:24 དེ་ནས་ཡོ་སེབ་གཉིད་ལས་སད་པ་དང་ཡར་ལངས༌ནས། གཙོ་བོའི་ཕོ་ཉས་རང་ལ་བཀའ་གནང་བ་དེ་བཞིན་དུ་མིར་ཡམ་རང་གི་ཆུང་མར་བླངས༌ཤིང༌།
MAT 1:25 སྲས་མ་འཁྲུངས་པའི་བར་དུ་ཁོ་མོ་དང་ལུས་འབྲེལ་མ་བྱས༌ལ། སྲས་དེ་སྐུ་འཁྲུངས་རྗེས་མཚན་ལ་ཡེ་ཤུ་ཞེས་བཏགས༌སོ།།
MAT 2:1 དེ་ཡང་ཧེ་རོ་དཱ་རྒྱལ་པོ་ཡིན་པའི་དུས་སུ་སྐྱབས་མགོན་ཡེ་ཤུ་ནི་ཡ་ཧུ་དཱའི་ཡུལ་གྱི་པེད་ལེ་ཧེམ་དུ་སྐུ་འཁྲུངས༌རྗེས། ཤར་ཕྱོགས་ནས་མཁས་པ་འགའ་ཞིག་ཡེ་རུ་སཱ་ལེམ་ལ་ཕེབས༌ཏེ།
MAT 2:2 ཡ་ཧུ་དཱའི་མི་རིགས་ཀྱི་རྒྱལ་པོར་སྐུ་འཁྲུངས་པ་དེ་གང་དུ་བཞུགས༌སམ། ངེད་ཅག་གིས་ཤར་ཕྱོགས་ནས་ཁོང་གི་སྐར་མ་མཐོང་སྟེ་ཁོང་ལ་མཇལ་དུ་ཡོང་ཞེས་སྨྲས༌སོ།།
MAT 2:3 རྒྱལ་པོ་ཧེ་རོ་དཱ་ཡིས་གཏམ་དེ་ཐོས་ནས་སེམས་འཁྲུགས༌ཤིང༌། ཡེ་རུ་སཱ་ལེམ་གྱི་མི་ཐམས་ཅད་ཀྱང་སེམས་འཁྲུགས་པ༌དང༌།
MAT 2:4 རྒྱལ་པོས་མཆོད་དཔོན་ཆེན་པོ་རྣམས་དང་ཡུལ་མིའི་ཁྲོད་ཀྱི་མཁན་པོ་ཐམས་ཅད་བསྡུས༌ཏེ། སྐྱབས་མགོན་མཱ་ཤི་ཀ་ནི་ཡུལ་གང་ནས་འཁྲུང་བར་འགྱུར་རམ་ཞེས་དྲིས་པ༌དང༌།
MAT 2:5 དེ་རྣམས་ན༌རེ། ཡ་ཧུ་དཱའི་ཡུལ་གྱི་པེད་ལེ་ཧེམ་དུ་སྐུ་འཁྲུང་བར༌འགྱུར། དེའི་རྒྱུ་མཚན་ནི་གསུང་རབ་ཀྱི་མདོ་ལས་ལུང་སྟོན༌པས།
MAT 2:6 ཡ་ཧུ་དཱ་ཡི་ཡུལ་གྱི་པེད་ལེ༌ཧེམ།། ཁྱོད་ནི་ཡ་ཧུ་དཱ་ཡི་དཔོན་རིགས༌ལས།། གོ་ས་ཤིན་ཏུ་ཆུང་བ་མ་ཡིན༌ཏེ།། ཁྱོད་ལས་མངའ་མཛད་པ་ཞིག་འཁྲུང་བར༌འགྱུར།། ཁོང་གིས་འབངས་མི་ཡེས་ར་ཨེལ་ནི༌སྐྱོང༌།། ཞེས་བཀོད་འདུག་ཅེས་སྨྲས༌སོ།།
MAT 2:7 དེ་ནས་ཧེ་རོ་དཱས་མཁས་པ་དེ་རྣམས་ལྐོག་ནས་བོས༌ཏེ། སྐར་མ་དེ་དུས་ནམ་ཞིག་ལ་བྱུང་བར་ཞིབ་ཏུ་རྩད་བཅད་པ༌དང༌།
MAT 2:8 དེ་རྣམས་པེད་ལེ་ཧེམ་དུ་མངགས༌ཏེ། ཕྲུ་གུ་དེའི་གནས་ཚུལ་ཞིབ་ཏུ་ཚོལ༌ཅིག ཕྲུ་གུ་དེ་རྙེད་པ་དང་བདག་ལ་ལན་སྐུར༌ཅིག ང་རང་ཡང་ཁོང་ལ་མཇལ་དུ་འགྲོ་ངེས་ཡིན་ཞེས་སྨྲས་པ༌ལ།
MAT 2:9 དེ་རྣམས་ཀྱིས་རྒྱལ་པོའི་བཀའ་ལ་མཉན་ཏེ་སོང་བ༌དང༌། ཤར་ཕྱོགས་ནས་མཐོང་བའི་སྐར་མ་དེ་ཁོ་རྣམས་ཀྱི་སྔོན་དུ་རྒྱུ་ཞིང་ཕྲུ་གུའི་བཞུགས་སར་སླེབས་པ་དང་བར་སྣང་དུ༌བསྡད།
MAT 2:10 ཁོ་རྣམས་ཀྱིས་སྐར་མ་དེ་མཐོང་བ་དང་ཤིན་ཏུ་དགའ་ཞིང་སྤྲོ་བར་གྱུར༌ཏེ།
MAT 2:11 ཁང་པའི་ནང་དུ་སོང་ནས་ཕྲུ་གུ་དང་ཁོང་གི་ཡུམ་མིར་ཡམ་གཉིས་ལ་མཇལ༌ཞིང༌། ལུས་སར་བཏུད་དེ་ཁོང་ལ་ཕྱག་བཙལ་བ་དང་རིན་པོ་ཆེའི་སྒྲོམ་ཁ་ཕྱེས་ནས་གསེར༌དང༌། སྤོས༌དཀར། གུ་གུལ་བཅས་མཇལ་རྟེན་དུ་ཕུལ༌ཏོ།།
MAT 2:12 དཀོན་མཆོག་གིས་མི་དེ་རྣམས་ལ་རྨི་ལམ་ནང༌དུ། ཧེ་རོ་དཱའི་དྲུང་དུ་ཕྱིར་ལོག་མི་འོས་པའི་བཀའ་གནང༌བས། མི་དེ་རྣམས་ཀྱང་ལམ་གཞན་ཞིག་བསྐོར་ནས་ཕྱིར་རང་ཡུལ་དུ་ལོག༌གོ།
MAT 2:13 དེ་རྣམས་སོང་བའི་རྗེས༌སུ། གཙོ་བོའི་ཕོ་ཉ་ཞིག་ཡོ་སེབ་ཀྱི་རྨི་ལམ་དུ་མངོན་པར་གྱུར༌ཏེ། ཧེ་རོ་དཱ་ཡིས་ཕྲུ་གུ་དེ་ཉིད་གསོད་པའི་ཕྱིར་འཚོལ་བར་འགྱུར༌བས། ཁྱོད་ཡར་ལོངས༌དང༌། མ་བུ་གཉིས་ཀ་ཁྲིད་ནས་ཨེ་ཅིབ་ཡུལ་དུ་འབྲོ་བར༌གྱིས། བདག་གིས་ཁྱོད་ལ་སྨྲ་བའི་བར་དུ་གནས་དེར་སྡོད་ཅིག་ཅེས་གསུངས༌སོ།།
MAT 2:14 དེ་ནས་ཁོ་ཡར་ལངས་ཏེ་མ་བུ་གཉིས་ཀ་ཁྲིད་ནས་མཚན་མོ་དེར་ཨེ་ཅིབ་ཡུལ་དུ་ལམ་ལ་ཆས༌ཤིང༌།
MAT 2:15 ཧེ་རོ་དཱ་ཤི་བའི་བར་དུ་གནས་དེར༌བསྡད། དེ་ནི་གཙོ་བོས་ལུང་སྟོན་པ་བརྒྱུད་ནས་འདི་སྐད༌དུ། བདག་གིས་ཨེ་ཅིབ་ཡུལ་ནས་རང་གི་བུ་བོས་པ་ཡིན་ཞེས་གསུངས་པ་བཞིན་དུ་འགྲུབ་པའི་ཕྱིར་དེ་ལྟར་བྱུང༌བའོ།།
MAT 2:16 ཧེ་རོ་དཱས་མཁས་པ་དེ་རྣམས་ཀྱིས་རང་ལ་མགོ་སྐོར་བཏང་བ་ཤེས་པ་དང་ཤིན་ཏུ་ཁྲོས༌ཤིང༌། མཁས་པ་རྣམས་ལ་ཞིབ་ཏུ་དྲིས་པའི་དུས་ནས་བརྩིས་ཤིང་མི་གཞན་མངགས༌ཏེ། པེད་ལེ་ཧེམ་དང་དེའི་མཐའ་འཁོར་དུ་ཡོད་པའི་བུ་ལོ་གཉིས་ཅན་དང་དེ་ལས་ཆུང་བ་ཐམས་ཅད་བསད་པ༌རེད།
MAT 2:17 དེ་ནི་ལུང་སྟོན་པ་ཡེ་རེམ་ཡཱ་བརྒྱུད་ནས་གནང་བའི་ལུང་བསྟན༌ཏེ།
MAT 2:18 མྱ་ངན་སྐད་ཅོར་རྒྱག་པའི་ངུ་སྐད༌དེ།། རཱ་མལ་ཞེས་བྱའི་ཡུལ་དུ་རྣ་བར༌ཐོས།། རཱ་ཧེལ་ཞེས་བྱ་ཕྲུ་གུའི་ཆེད་དུ༌ངུས།། ཕྲུ་གུ་མེད་པས་སེམས་གསོར་མ་མཉན༌ཏོ།། ཞེས་གསུངས་པ་བཞིན་དེའི་དུས་སུ་འགྲུབ་པར་གྱུར༌ཏོ།།
MAT 2:19 ཧེ་རོ་དཱ་ཤི་བའི་རྗེས༌སུ། གཙོ་བོའི་ཕོ་ཉ་ཞིག་ཨེ་ཅིབ་ཡུལ་ནས་ཡོ་སེབ་ཀྱི་རྨི་ལམ་དུ་མངོན༌ཏེ།
MAT 2:20 ཕྲུ་གུ་དེ་ཉིད་གསོད་འདོད་པའི་མི་རྣམས་ཤི་ཟིན༌པས། ཡར་ལོངས༌དང༌། མ་བུ་གཉིས་ཀ་ཁྲིད་ནས་ཡེས་ར་ཨེལ་ཡུལ་དུ་སོང་ཞིག་ཅེས་གསུངས་པ༌དང༌།
MAT 2:21 ཁོ་ཡར་ལངས་ཏེ་མ་བུ་གཉིས་ཀ་ཁྲིད་ནས་ཡེས་ར་ཨེལ་ཡུལ་དུ་ཕྱིན༌ཏོ།།
MAT 2:22 འོན༌ཀྱང༌། ཨར་ཀེ་ལཱ་ནི་རང་གི་ཕ་ཧེ་རོ་དཱའི་ཚབ་ཏུ་ཡ་ཧུ་དཱའི་ཡུལ་གྱི་རྒྱལ་པོ་བྱེད་བཞིན་པའི་གཏམ་དེ་ཡོ་སེབ་ཀྱིས་ཐོས་ནས་ཡུལ་དེར་འགྲོ་བར་འཇིགས་པ༌རེད། དེ་ནས་ཡང་རང་གི་རྨི་ལམ་དུ་དཀོན་མཆོག་གིས་ཡོ་སེབ་ལ་ཉེན་བརྡ་བཏང་བ་དང་ཁོ་རང་ག་ལིལ་ཡུལ་གྱི་ཕྱོགས་སུ་སོང༌ཞིང༌།
MAT 2:23 ནཱ་ཙ་རེལ་གྲོང་རྡལ་དུ་སླེབས་པ་དང་གནས་དེར༌བསྡད། དེ་ནི་ལུང་སྟོན་པ་རྣམས་ཀྱིས་འདི་སྐད༌དུ། ཁོང་ལ་ནཱ་ཙ་རེལ་གྱི་མི་ཞེས་འབོད་པར་འགྱུར་ཞེས་གསུངས་པ་བཞིན་འགྲུབ་པའི་ཕྱིར་དེ་ལྟར་བྱུང༌བའོ།།
MAT 3:1 དེའི་དུས༌སུ། ཁྲུས་གསོལ་མཁན་ཡོ་ཧ་ནན་ཞེས་བྱ་བ་ཡ་ཧུ་དཱའི་ཡུལ་གྱི་དབེན་གནས་སུ་བྱོན་ཏེ་ཆོས་བསྒྲགས༌ཤིང༌།
MAT 3:2 ནམ་མཁའི་རྒྱལ་སྲིད་ཉེ་བར་སླེབས་པས་ཁྱོད་རྣམས་ཀྱིས་འགྱོད་བཤགས་བྱོས་ཤིག་ཅེས་གསུངས༌སོ།།
MAT 3:3 ཡོ་ཧ་ནན་ནི་ལུང་སྟོན་པ་ཡེ་ཤ་ཡཱ་ཡིས། དབེན་སྟོང་ཡུལ་ནས་གྲགས་པའི་འབོད་སྒྲ༌ཡིས།། གཙོ་བོའི་ཕེབས་ལམ་སྟ་གོན་བྱེད་པ༌དང༌།། ཁོང་གི་གཤེགས་ལམ་དྲང་པོར་བཟོ་བར༌གྱིས།། ཞེས་ལུང་བསྟན་པའི་སྐྱེས་བུ་དེ་ཡིན༌ནོ།།
MAT 3:4 ཡང་ཡོ་ཧ་ནན་གྱིས་རྔ་རྩིད་ཀྱིས་བཟོས་པའི་ལྭ་བ་གྱོན་པ་དང་ཀོ་བའི་སྐ་རགས་བཅིངས་ཤིང་ཟས་ལ་འབུ་ཆ་ག་པ་དང་རི་སྐྱེས་སྦྲང་རྩི་སྤྱོད་པ༌ཡིན།
MAT 3:5 དེའི་དུས༌སུ། ཡེ་རུ་སཱ་ལེམ༌དང༌། ཡ་ཧུ་དཱའི་ཡུལ་ཡོངས༌དང༌། ཡོར་དན་གཙང་པོའི་མཐའ་འཁོར་དུ་ཡོད་པའི་མི་ཐམས་ཅད་ཁོང་གི་དྲུང་དུ་སོང༌ནས།
MAT 3:6 རང་གི་སྡིག་པ་མཐོལ་བཤགས་བྱས་པ་དང་ཡོར་དན་གཙང་པོ་ལ་ཞུགས་ཤིང་ཁོང་གིས་ཀྱང་དེ་རྣམས་ལ་ཁྲུས་གསོལ་མཛད༌དོ།།
MAT 3:7 འོན༌ཀྱང༌། ཡོ་ཧ་ནན་གྱིས་ཕ་རུ་ཤི་པ་དང་སཱ་ཅུ་སེ་པ་མང་པོ་ཞིག་རང་ཉིད་ཀྱི་ཁྲུས་གསོལ་མཛད་པའི་གནས་ལ་ཡོང་བ་གཟིགས༌ཏེ། ཁོང་གིས་མི་དེ་རྣམས་ལ་འདི་སྐད༌དུ། དུག་སྦྲུལ་གྱི་རྒྱུད་ཁྱོད་རྣམས་ལ་སུ་ཞིག་གིས་མ་འོངས་པའི་ཐུགས་ཁྲོ་ལས་འབྲོ་བར་བསྟན༌ནམ།
MAT 3:8 དེ་བས་ན་ཁྱོད་ཅག་གིས་འགྱོད་བཤགས་དང་མཐུན་པའི་འབྲས་བུ་ལེགས་པོར་སྐྱེད༌ཅིག
MAT 3:9 ཁྱོད་ཅག་གི་སེམས་སུ་ཨབ་ར་ཧམ་ནི་ངེད་ཅག་གི་ཡབ་མེས་ཡིན་ཞེས་མ་སེམས༌ཤིག ངས་ཁྱོད་ཅག་ལ་སྨྲ༌སྟེ། དཀོན་མཆོག་གིས་རྡོ་འདི་དག་ལས་ཨབ་ར་ཧམ་ལ་བུ་རྒྱུད་འབྱུང་བར་མཛད་ནུས༌སོ།།
MAT 3:10 ད་ནི་སྟ་རེ་སྡོང་རྩར་བཞག་ཡོད༌དེ། ཤིང་སྡོང་གང་ལ་འབྲས་བུ་ལེགས་པོ་མི་སྨིན་པ་དེ་བཅད་ནས་མེའི་ནང་དུ་འཕེན་པར༌ངེས།
MAT 3:11 ངས་ཁྱོད་རྣམས་ལ་ཆུ་ཡིས་ཁྲུས་གསོལ་བྱེད༌ཅིང༌། དེ་ནི་ཁྱོད་ཅག་གིས་འགྱོད་བཤགས་བྱེད་པའི་ཕྱིར་ཡིན༌མོད། འོན་ཀྱང་བདག་གི་རྗེས་སུ་བདག་ལས་ཀྱང་མཐུ་སྟོབས་ཆེ་བ་ཞིག་ཕེབས་ཡོང་ངེས༌ཏེ། ང་ནི་ཁོང་གི་ལྷམ་འཁྱེར་མཁན་དུའང་མི་འོས༌སོ། །ཁོང་གིས་ཁྱོད་ཅག་ལ་དམ་པའི་ཐུགས་ཉིད་དང་མེས་ཁྲུས་གསོལ་མཛད་པར༌འགྱུར།
MAT 3:12 ཁོང་གིས་ཕྱག་ཏུ་ཚེབ་བཟུང་ནས་རང་གི་གཡུལ་ཁ་གཙང་དག་ལེགས་པོར་མཛད་པ༌དང༌། གྲོ་བང་མཛོད་དུ་བསྡུ་བར༌འགྱུར། འོན་ཀྱང་ཕུབ་མ་དེ་དག་ཞི་བ་མེད་པའི་མེ་རུ་བསྲེག་པར་ངེས་ཞེས་གསུངས༌སོ།།
MAT 3:13 དེའི་དུས༌སུ། ཁྲུས་འཐོབ་པའི༌ཕྱིར། སྐྱབས་མགོན་ཡེ་ཤུ་ཁོང་ཉིད་ག་ལིལ་ཡུལ་ནས་ཡོར་དན་གཙང་པོའི་འགྲམ་དུ་ཁྲུས་གསོལ་མཁན་ཡོ་ཧ་ནན་གྱི་གམ་དུ་བྱོན༌ནའང༌།
MAT 3:14 ཡོ་ཧ་ནན་གྱིས་དེ་འགོག་པར་བསམས༌ཏེ། ང་རང་ལ་ཁྱེད་ནས་ཁྲུས་འཐོབ་དགོས་ཀྱང་ཁྱེད་རང་བདག་གི་གམ་དུ་ཕེབས་པ་ཡིན་ནམ་ཞེས་ཞུས་པ༌ལ།
MAT 3:15 སྐྱབས་མགོན་ཡེ་ཤུས་འདི་སྐད༌དུ། ད་ལྟ་ང་རང་ཁྲུས་ལ་ཞུགས་སུ་ཆུག༌དང༌། དྲང་བདེན་ཐམས་ཅད་བསྒྲུབ་པའི་ཕྱིར་ངེད་རྣམས་ཀྱིས་འདི་ལྟར་བྱེད་རུང་བ་ཡིན་ཞེས་གསུངས་པ་ན་ཡོ་ཧ་ནན་གྱིས་ཀྱང་ཁས་བླངས༌སོ།།
MAT 3:16 དེ་ནས་སྐྱབས་མགོན་ཡེ་ཤུར་ཁྲུས་གསོལ་ཐོབ་སྟེ་ཆུ་ལས་ཡར་བུད་མ་ཐག་ཏུ་ནམ་མཁའི་སྒོ་ཕྱེས་ཤིང༌། དཀོན་མཆོག་གི་ཐུགས་ཉིད་ནི་བྱ་ཕུག་རོན་གྱི་གཟུགས་ཀྱིས་རང་ཉིད་ཀྱི་ལུས་སྟེང་ལ་དངོས་སུ་བབས་པ་ཁོང་གིས༌གཟིགས།
MAT 3:17 ཡང་ནམ་མཁའི་ཞིང་ཁམས་ནས་སྐད་སྒྲ་ཞིག་གྲགས༌ཏེ། འདི་ནི་ང་ཡི་གཅེས་པའི་བུ་ཡིན༌ཞིང༌། ང་རང་ཁོ་ལ་ཤིན་ཏུ་དགའ་ཞེས་གསུངས༌སོ།།
MAT 4:1 དེ་ནས་བདུད་ཀྱིས་སྐྱབས་མགོན་ཡེ་ཤུར་ཉམས་ཚོད་བྱེད་པའི༌ཕྱིར། དམ་པའི་ཐུགས་ཉིད་ཀྱིས་སྐྱབས་མགོན་ཡེ་ཤུ་དབེན་སྟོང་དུ་ཁྲིད༌ཅིང༌།
MAT 4:2 ཁོང་གིས་ཉིན་ཞག་བཞི་བཅུའི་རིང་ལ་སྨྱུང་གནས་བསྲུངས༌རྗེས། ཁོང་ནི་བཀྲེས་ཤིང་ལྟོགས་པར་གྱུར༌ཏོ།།
MAT 4:3 དེ་ནས་ཉམས་ཚོད་བྱེད་མཁན་དེ་ཡོང་སྟེ་ན༌རེ། ཁྱེད་ནི་དཀོན་མཆོག་གི་སྲས་ཡིན༌ན། རྡོ་འདི་དག་ལ་བཀའ་གནང་སྟེ་བག་ལེབ་ཏུ་སྒྱུར་ཅིག་ཅེས་སྨྲས་པ༌ལ།
MAT 4:4 སྐྱབས་མགོན་ཡེ་ཤུས་འདི་སྐད༌དུ། གསུང་རབ་ཀྱི་མདོ་ལས་མི་ནི་བག་ལེབ་ཁོ་ནར་བརྟེན་ནས་འཚོ་བ་མ་ཡིན༌པར། དཀོན་མཆོག་གི་ཞལ་ནས་བྱུང་བའི་བཀའ་ཐམས་ཅད་ལ་བརྟེན་ནས་འཚོ་བ་ཡིན་ཞེས་བཀོད་ཡོད་ཅེས་གསུངས༌སོ།།
MAT 4:5 ཡང་བདུད་ཀྱིས་སྐྱབས་མགོན་ཡེ་ཤུ་ནི་དམ་པའི་གྲོང་ཁྱེར་དུ་ཁྲིད་ཅིང་མཆོད་ཁང་གི་རྩེ་རུ་སྡོད་དུ་བཅུག་སྟེ་ན༌རེ།
MAT 4:6 གལ༌ཏེ། ཁྱེད་ནི་དཀོན་མཆོག་གི་སྲས་ཡིན་ན་འདི་ནས་མར་མཆོངས༌ཤིག རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ། དཀོན་མཆོག་གིས་རང་གི་ཕོ་ཉ་རྣམས་ལ་བཀའ་གནང་སྟེ་ཁྱེད་རང་བསྲུང་ངེས༌ཤིང༌། ཁྱེད་ཀྱི་ཞབས་རྡོ་ལའང་མི་ཐོགས་པའི༌ཕྱིར། ཕོ་ཉ་རྣམས་ཀྱི་ལག་པས་ཁྱེད་རང་ཡར་འདེགས་པར་འགྱུར་ཞེས་བཀོད་འདུག་ཅེས་སྨྲས་པ༌ལ།
MAT 4:7 སྐྱབས་མགོན་ཡེ་ཤུས་འདི་སྐད༌དུ། གསུང་རབ་ཀྱི་མདོ་ལས་ཡང་ཇི་སྐད༌དུ། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་ཚོད་བགམ་མ་བྱེད་ཅེས་བཀོད་ཡོད་པ་ཡིན་ཞེས་གསུངས༌སོ།།
MAT 4:8 ཡང་བདུད་ཀྱིས་སྐྱབས་མགོན་ཡེ་ཤུ་རི་ཤིན་ཏུ་མཐོན་པོ་ཞིག་ཏུ་ཁྲིད༌དེ། འཇིག་རྟེན་གྱི་རྒྱལ་ཁམས་ཡོངས་དང་དེ་དག་གི་དཔལ་དང་འབྱོར་བ་ཐམས་ཅད་ཁོང་ལ་བསྟན་ཏེ་ན༌རེ།
MAT 4:9 གལ༌ཏེ། ཁྱེད་ཀྱིས་པུས་མོ་སར་བཙུགས་ནས་བདག་ལ་ཕྱག་བཙལ་ན། བདག་གིས་འདི་ཐམས་ཅད་ཁྱེད་ལ་འབུལ་བར་བྱ་ཞེས་སྨྲས་པ༌ལ།
MAT 4:10 ཡང་སྐྱབས་མགོན་ཡེ་ཤུས་འདི་སྐད༌དུ། བདུད་སཱ་ཏན་ཁྱོད་ཕར་སོང༌ཞིག ཅིའི་ཕྱིར་ཞེ༌ན། གསུང་རབ་ཀྱི་མདོ་ལས་ཇི་སྐད༌དུ། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་ཕྱག་འཚལ་ཞིང་ཁོང་གཅིག་པུར་བསྙེན་བཀུར་བྱེད་དགོས་ཞེས་བཀོད་འདུག་ཅེས་གསུངས༌སོ།།
MAT 4:11 དེ་ནས་བདུད་ནི་ཁོང་དང་ཁ་བྲལ༌ཏོ། །ལྟོས༌དང༌། ཕོ་ཉ་རྣམས་ཡོང་སྟེ་ཁོང་ལ་ཞབས་ཕྱི་བསྒྲུབས༌སོ།།
MAT 4:12 སྐྱབས་མགོན་ཡེ་ཤུས་ཁྲུས་གསོལ་མཁན་ཡོ་ཧ་ནན་བཙོན་དུ་བཟུང་ཡོད་པ་གསན་པ་དང་ག་ལིལ་ཡུལ་དུ་ཕེབས༌ཤིང༌།
MAT 4:13 དེ་ནས་ནཱ་ཙ་རེལ་ནས་ཀཱ་ཕར་ན་ཧུམ་དུ་གནས་སྤར་ཏེ༌བཞུགས། ཀཱ་ཕར་ན་ཧུམ་ཞེས་པ་མཚོ་ག་ལིལ་གྱི་འགྲམ་དུ། ཟེ་བུ་ལུན་དང་ནཱབ་ཐ་ལི་གཉིས་ཀྱི་ཡུལ་དུ་ཡོད༌དོ།།
MAT 4:14 དོན་འདི་ནི་ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ།
MAT 4:15 ཟེ་བུ་ལུན་དང་ནཱབ་ཐ་ལི་གཉིས༌ནི།། ག་ལིལ་མཚོ་ཡི་ཕྱོགས་སུ་བགྲོད་ལམ༌དང༌།། ཡོར་དན་གཙང་པོའི་ཕ་རོལ་ཡུལ་གྲུ༌སྟེ།། ཕྱི་ཕྱོགས་མི་རྣམས་སྡོད་པའི་ག་ལིལ༌ཡུལ།།
MAT 4:16 མུན་པའི་ནང་དུ་སྡོད་པའི་མི་རྣམས༌ཀྱིས།། འོད་ཟེར་ཆེན་པོ་ཞིག་ནི་མིག་གིས༌མཐོང༌།། འཆི་ཁའི་ཡུལ་གྱི་སྨག་རུམ་ཆེན་པོ༌རུ།། སྡོད་པའི་མི་རྣམས་ལ་ནི་གཟི་འོད༌འཕྲོས།། ཞེས་གསུངས་པ་བཞིན་འགྲུབ་པའི༌ཕྱིར། སྐྱབས་མགོན་ཡེ་ཤུས་དེ་ལྟར་མཛད་པ་ལགས༌སོ།།
MAT 4:17 དུས་དེ་ནས་བཟུང་སྐྱབས་མགོན་ཡེ་ཤུས་ཆོས་སྒྲོག་འགོ་བརྩམས་ཏེ་འདི་སྐད༌དུ། ནམ་མཁའི་རྒྱལ་སྲིད་ཉེ་བར་སླེབས་པས་ཁྱོད་རྣམས་ཀྱིས་འགྱོད་བཤགས་བྱོས་ཤིག་ཅེས་གསུངས༌སོ།།
MAT 4:18 དེ་ཡང་སྐྱབས་མགོན་ཡེ་ཤུ་ཁོང་ཉིད་མཚོ་ག་ལིལ་གྱི་མཚོ་འགྲམ་བརྒྱུད་ནས་ཕེབས་པ༌ན། སི་མོན་ཞེས་ཀྱང་འབོད་པའི་པེ་ཏྲོ་དང་ཨན་དྲི་ཡཱ་སྟེ་ཉ་པ་སྤུན་གཉིས་ཀྱིས་མཚོ་ནང་དུ་དྲ་རྒྱ་འཕེན་བཞིན་པ་གཟིགས༌ཤིང༌།
MAT 4:19 ཁོང་གིས་དེ་གཉིས་ལ་འདི་སྐད༌དུ། བདག་གི་རྗེས་སུ་ཤོག༌དང༌། ངས་ཁྱོད་གཉིས་ལ་ཉ་ཐོབ་པ་ལྟར་མི་ཡང་འཐོབ་པར་བྱའོ་གསུངས་མ༌ཐག
MAT 4:20 ཁོ་གཉིས་ཀྱིས་དྲ་རྒྱ་དོར་ནས་ཁོང་གི་རྗེས་སུ༌འབྲངས།
MAT 4:21 དེ་ནས་སྐྱབས་མགོན་ཡེ་ཤུ་མདུན་དུ་ཕེབས་པ༌དང་། ཡ་ཀོབ་དང་ཡོ་ཧ་ནན་སྤུན་གཉིས་ཀྱིས་གྲུ་སྟེང་དུ་རང་གི་ཕ་ཟེ་བད་ཡཱ་དང་མཉམ་དུ་དྲ་རྒྱ་བཟོ་བཅོས་བྱེད་བཞིན་པ་གཟིགས་ཏེ་ཁོ་གཉིས་ཚུར་བོས་པ༌ན།
MAT 4:22 ཁོ་གཉིས་ཀྱིས་དེ་མ་ཐག་རང་གི་ཕ་དང་མཚོ་གྲུ་བསྐྱུར་ནས་ཁོང་གི་རྗེས་སུ་འབྲངས༌སོ།།
MAT 4:23 སྐྱབས་མགོན་ཡེ་ཤུ་ཁོང་ཉིད་ག་ལིལ་ཡུལ་ཐམས་ཅད་ལ་ཕེབས་ཏེ་ཆོས་ཁང་དག་ཏུ་ཆོས་གསུངས་པ༌དང༌། ནམ་མཁའི་རྒྱལ་སྲིད་ཀྱི་འཕྲིན་བཟང་བསྒྲགས༌པ། ཡུལ་མི་རྣམས་ཀྱི་ནད་རིགས་དང་ལུས་ཟུངས་ཞན་པ་ཀུན་གསོས༌པས།
MAT 4:24 ཁོང་གི་མཚན་སྙན་ཡང་སིར་ཡཱ་ཡུལ་གྱི་ཕྱོགས་བཞི་ཐམས་ཅད་ལ་ཁྱབ་པར་གྱུར༌ཏོ། །མི་མང་པོས་ནད་རིགས་དང་གཟེར་མིག་སྣ་ཚོགས་ཀྱིས་མནར་བའི་ནད་པ་ཐམས་ཅད༌དང༌། གདོན་འདྲེས་བཟུང་བའི༌མི། གཟའ་ནད་ཕོག་པའི༌མི། ཞ་ནད་བྱུང་བ་རྣམས་ཁོང་གི་དྲུང་དུ་ཁྲིད་ཡོང༌ཞིང༌། ཁོང་གིས་མི་དེ་རྣམས་གསོས༌པའོ།།
MAT 4:25 ཡང་མི་ཤིན་ཏུ་མང་པོ་ག་ལིལ་ཡུལ༌དང༌། དི་ཁ་པའོ་ལེའི་མངའ༌ཁོངས། ཡེ་རུ་སཱ༌ལེམ། ཡ་ཧུ་དཱ༌ཡུལ། ཡོར་དན་གཙང་པོའི་ཕར་ཕྱོགས་བཅས་ནས་ཡོང་སྟེ་ཁོང་གི་རྗེས་སུ་འབྲངས༌སོ།།
MAT 5:1 སྐྱབས་མགོན་ཡེ་ཤུས་མི་མང་པོ་གཟིགས༌ཤིང༌། རི་བོར་ཕེབས་ནས་བཞུགས༌རྗེས། ཐུགས་སྲས་རྣམས་ཀྱང་ཁོང་གི་དྲུང་དུ་ཡོང་བ༌དང༌།
MAT 5:2 ཁོང་གིས་དེ་རྣམས་ལ་འདི་སྐད་དུ་ཆོས་གསུངས་པ༌སྟེ།
MAT 5:3 ཉམ་ཆུང་རྣམས༌བདེའོ། །རྒྱུ་མཚན་ནི་ནམ་མཁའི་རྒྱལ་སྲིད་ཁོ་རྣམས་ཀྱི་ཡིན་པའི་ཕྱིར༌རོ།།
MAT 5:4 མྱ་ངན་ཅན་རྣམས༌བདེའོ། །རྒྱུ་མཚན་ནི་མི་དེ་རྣམས་ལ་སེམས་གསོ་འཐོབ་པར་འགྱུར་བའི་ཕྱིར༌རོ།།
MAT 5:5 གཤིས་འཇམ་རྣམས༌བདེའོ། །རྒྱུ་མཚན་ནི་མི་དེ་རྣམས་ལ་ས་གཞི་འཐོབ་པར་འགྱུར་བའི་ཕྱིར༌རོ།།
MAT 5:6 དྲང་བདེན་གྱི་ཕྱིར་དུ་ལྟོགས་ཤིང་སྐོམ་པ་རྣམས༌བདེའོ། །རྒྱུ་མཚན་ནི་མི་དེ་རྣམས་ཡིད་ཚིམ་པར་འགྱུར་བའི་ཕྱིར༌རོ།།
MAT 5:7 བྱམས་སྙིང་རྗེ་ཅན་རྣམས༌བདེའོ། །རྒྱུ་མཚན་ནི་མི་དེ་རྣམས་ལ་སྙིང་རྗེ་འཐོབ་པར་འགྱུར་བའི་ཕྱིར༌རོ།།
MAT 5:8 སེམས་རྣམ་པར་དག་པ་རྣམས༌བདེའོ། །རྒྱུ་མཚན་ནི་མི་དེ་རྣམས་དཀོན་མཆོག་ལ་མཇལ་བར་འགྱུར་བའི་ཕྱིར༌རོ།།
MAT 5:9 མི་གཞན་སྡུམ་མཁན་རྣམས༌བདེའོ། །རྒྱུ་མཚན་ནི་མི་དེ་རྣམས་ལ་དཀོན་མཆོག་གི་བུ་ཞེས་འབོད་པར་འགྱུར་བའི་ཕྱིར༌རོ།།
MAT 5:10 དྲང་བདེན་གྱི་ཆེད་དུ་གནོད་འཚེ་ཕོག་པ་རྣམས༌བདེའོ། །རྒྱུ་མཚན་ནི་ནམ་མཁའི་རྒྱལ་སྲིད་མི་དེ་དག་གི་ཡིན་པའི་ཕྱིར༌རོ།།
MAT 5:11 མི་རྣམས་ཀྱིས་བདག་གི་ཕྱིར་ཁྱོད་ཅག་ལ་དམའ་འབེབས་དང་གནོད་པ་བྱེད་ཅིང་གཏམ་ངན་སྣ་ཚོགས་སྨྲ་བའི༌ཚེ། ཁྱོད་རྣམས༌བདེའོ།།
MAT 5:12 ཁྱོད་རྣམས་དགའ་ཞིང་ཡི་རངས་པར་གྱུར༌ཅིག རྒྱུ་མཚན་ནི་ནམ་མཁའི་ཞིང་ཁམས་ནས་ཁྱོད་རྣམས་ལ་བྱ་དགའ་ཆེན་པོ་ཡོད་པའི་ཕྱིར༌རོ། །ཡང་དེ་དག་གིས་ཁྱོད་ཅག་གི་སྔོན་རོལ་གྱི་ལུང་སྟོན་པ་རྣམས་ལའང་དེ་ལྟར་གནོད་འཚེ་བྱས་མྱོང་ཞེས༌པའོ།།
MAT 5:13 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་ནི་འཇིག་རྟེན་གྱི་ལན་ཚྭ་ཡིན་མོད༌ཀྱང༌། གལ་ཏེ་ལན་ཚྭའི་བྲོ་བ་ཡལ་ན་དེའི་བྲོ་བ་གང་གིས་བསྐྱེད༌དམ། དེ་ཕྱི་རོལ་ཏུ་འཕངས་ནས་མིའི་རྐང་པས་བརྫི་བ་མ་གཏོགས་ཕན་པ་ཅི་ཡང༌མེད།
MAT 5:14 ཁྱོད་ཅག་ནི་འཇིག་རྟེན་གྱི་འོད་ཟེར་ཡིན༌ལ། རི་མགོར་ཆགས་པའི་གྲོང་ཁྱེར་ནི་མཐོང་མི་ནུས་པ་གང་ཡང༌མེད།
MAT 5:15 ཡང་མིས་སྒྲོན་མེ་བསྒྲོན་པ་ནི་བྲེའི་འོག་ཏུ་འཇོག་ཕྱིར་མ་ཡིན༌པར། སྒྲོན་སྟེགས་སྟེང་བཞག་ནས་ཁྱིམ་དུ་ཡོད་པའི་མི་ཐམས་ཅད་ལ་འོད་ཟེར་སྤྲོ་བའི་ཕྱིར༌རོ།།
MAT 5:16 དེ་བཞིན་དུ་མི་གཞན་རྣམས་ཀྱིས་ཁྱོད་ཅག་གི་ལས་བཟང་པོ་མཐོང༌ཞིང༌། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ལ་བསྟོད་བསྔགས་བྱ༌ཆེད། ཁྱོད་ཅག་གིས་ཀྱང་རང་གི་འོད་ཟེར་དེ་མི་རྣམས་ཀྱི་མིག་ལམ་དུ་འཕྲོ་བར་བྱོས་ཤིག་ཅེས་གསུངས༌སོ།།
MAT 5:17 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། བདག་ནི་བཀའ་ཁྲིམས་དང་ཡང་ན་ལུང་སྟོན་པའི་མདོ་རྣམས་མེད་པར་བཟོ་ཕྱིར་ཡོང་བར་མ་འདོད༌ཅིག བདག་ནི་མེད་པར་བཟོ་ཕྱིར་ཡོང་བ་མ་ཡིན་པར་དེ་རྣམས་བསྒྲུབ་ཕྱིར་ཡོང་བ༌ཡིན།
MAT 5:18 བདག་གིས་ཁྱོད་རྣམས་ལ་བདེན་པར་སྨྲ༌སྟེ། གནམ་ས་གཉིས་འཇིག་པའི་བར༌དུ། བཀའ་ཁྲིམས་ཀྱི་མདོ་ལས་ཡིག་འབྲུ་གཅིག་གམ་ཚེག་ཐིག་གཅིག་ཀྱང་འཇིག་པར་མི་འགྱུར༌ཞིང༌། དོན་དེ་ཐམས་ཅད་འགྲུབ་པར༌ངེས།
MAT 5:19 དེ་བས་སུ་ཞིག་གིས་བཀའ་ཁྲིམས་འདི་དག་ལས་ཆུང་ཤོས་གཅིག་འདོར༌ཞིང༌། ཡང་གཞན་རྣམས་ལ་དེ་བཞིན་ལོག་ཁྲིད་བྱེད༌ན། མི་དེ་ནི་ནམ་མཁའི་རྒྱལ་སྲིད་དུ་ཆེས་ཆུང་ཤོས་ཡིན༌ཟེར། འོན༌ཀྱང༌། སུ་ཞིག་གིས་བཀའ་ཁྲིམས་དེ་དག་སྲུང༌ཞིང༌། གཞན་ལའང་དེ་བཞིན་ཁྲིད་སྟོན་བྱེད༌ན། མི་དེ་ནི་ནམ་མཁའི་རྒྱལ་སྲིད་ནང་དུ་ཆེན་པོ་ཡིན་ཟེར་བར༌འགྱུར།
MAT 5:20 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་ཅག་གི་དྲང་བདེན་ནི་མཁན་པོ་དང་ཕ་རུ་ཤི་པ་རྣམས་ཀྱི་དྲང་བདེན་ལས་ཀྱང་ལྷག་པ་མ་ཡིན༌ན། ཁྱོད་རྣམས་ཅིས་ཀྱང་ནམ་མཁའི་རྒྱལ་སྲིད་དུ་ཞུགས་མི་ཐུབ་ཅེས་གསུངས༌སོ།།
MAT 5:21 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་མི་མ་གསོད་ཅེས༌དང༌། ཡང་སུ་ཞིག་གིས་མི་བསད༌ན། མི་དེར་ཁྲིམས་ཐག་གཅོད་འོས་ཞེས་གནའ་མི་རྣམས་ལ་ཆོས་གསུངས་ཡོད་པ་ཁྱོད་རྣམས་ཀྱིས་ཐོས་མྱོང༌ངོ༌།།
MAT 5:22 འོན༌ཀྱང༌། བདག་གིས་ཁྱོད་རྣམས་ལ་སྨྲ་བར་བྱ༌སྟེ། སུ་ཞིག་དོན་མེད་དུ་རང་གི་སྤུན་ཟླར་ཞེ་སྡང་ལངས༌ན། མི་ཞེ་སྡང་ཅན་དེ་ལ་ཉེས་ཆད་གཅོད༌འོས། ཡང་སུ་ཞིག་གིས་རང་གི་སྤུན་ཟླ༌ལ། ཁྱོད་ནི་སྨྱོན་པ་རེད་ཅེས་ཟེར༌ན། མི་དེའང་ཚོགས་མི་རྣམས་ཀྱི་མདུན་དུ་ཁྲིད་ནས་ཉེས་ཆད་གཅོད༌འོས། ཡང་སུ་ཞིག་གིས་རང་གི་སྤུན་ཟླ༌ལ། ཁྱོད་ནི་གླེན་པ་རེད་ཅེས་ཟེར༌ན། མི་དེ་ནི་དམྱལ་བའི་མེའི་ནང་དུ་ལྷུང་འོས་པ༌ཡིན།
MAT 5:23 དེ་བས་ཁྱོད་ཀྱིས་མཆོད་ཁྲིའི་སྟེང་དུ་མཆོད་པ་འབུལ་བའི༌ཚེ། སྤུན་ཟླ་ཞིག་དང་ཁྱོད་ཀྱི་བར་དུ་མི་མཐུན་པ་ཞིག་ཡོད་པ་དྲན༌ན།
MAT 5:24 ཁྱོད་ཀྱིས་རང་གི་མཆོད་རྫས་དེ་མཆོད་ཁྲིའི་མདུན་དུ་བཞག༌སྟེ། ཐོག་མར་རང་གི་སྤུན་ཟླ་དང་འགྲིག་མཐུན་ཡོང་བར༌བྱོས། དེ་ནས་ཕྱིར་ལོག་སྟེ་མཆོད་པ་ཕུལ༌ཞིག
MAT 5:25 ཁྱོད་དང་ཁྱོད་རང་གཏུག་མཁན་གཉིས་མཉམ་དུ་ཁྲིམས་རར་འགྲོ་བའི་དུས༌སུ། ལམ་བར་ནས་མྱུར་དུ་འགྲིག་མཐུན་ཡོང་བར༌གྱིས། དེ་ལྟར་མ་བྱས་ན་ཁྱོད་ཀྱི་གྱོད་ཡ་དེས་ཁྱོད་རང་ཁྲིམས་དཔོན་གྱི་དྲུང་དུ་འཁྲིད༌ཅིང༌། ཁྲིམས་དཔོན་གྱིས་ཁྱོད་རང་དམག་མིར་སྤྲད༌དེ། དམག་མིས་ཁྱོད་རང་བཙོན་དུ་འཇུག་པར༌འགྱུར།
MAT 5:26 བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་ཀྱིས་དོང་ཙེ་ཐམས་ཅད་སྐྱིན་ཚབ་ཏུ་སྤྲད་ཚར་བའི་བར་དུ་ཁྱོད་རང་བཙོན་ཁང་ལས་གཏན་ནས་ཐར་མི་ནུས་ཞེས་གསུངས༌སོ།།
MAT 5:27 ཡང་སྐྱབས་མགོན་ཡེ་ཤུས་འདི་སྐད༌དུ། ལོག་གཡེམ་མ་བྱེད་ཅེས་ཆོས་གསུངས་ཡོད་པ་ཁྱོད་རྣམས་ཀྱིས་ཐོས་མྱོང་བ་ཡིན༌མོད།
MAT 5:28 འོན༌ཀྱང༌། བདག་གིས་ཁྱོད་རྣམས་ལ་སྨྲ་བར་བྱ༌སྟེ། སུ་ཞིག་གིས་འདོད་ཆགས་དང་བཅས་བུད་མེད་ཅིག་ལ་བལྟས༌ན། མི་དེས་སེམས་སུ་ལོག་གཡེམ་བྱས་ཟིན་པ་ཡིན༌ནོ།།
MAT 5:29 གལ་ཏེ་ཁྱོད་ཀྱི་མིག་གཡས་པས་ཁྱོད་ལ་སྡིག་པ་བྱེད་དུ་འཇུག༌ན། མིག་དེ་བཏོན་ནས་དོར༌ཅིག རྒྱུ་མཚན་ནི་ཁྱོད་ཀྱི་ལུས་ཡོངས་དམྱལ་བའི་གནས་སུ་ལྷུང་བ༌ལས། ཁྱོད་ལ་ཡན་ལག་གཅིག་མེད་པར་གྱུར་ཀྱང་ལེགས།
MAT 5:30 ཡང་ཁྱོད་ཀྱི་གཡས་ལག་གིས་ཁྱོད་ལ་སྡིག་པ་བྱེད་དུ་འཇུག༌ན། ལག་པ་དེ་བཅད་ནས་དོར༌ཅིག ཁྱོད་ཀྱི་ལུས་ཧྲིལ་པོ་དམྱལ་བའི་གནས་སུ་ལྷུང་བ༌ལས། ཡན་ལག་གཅིག་མེད་པར་གྱུར་ཀྱང་ལེགས།
MAT 5:31 ཡང་སྐྱེས་པ་སུ་ཞིག་གིས་རང་གི་ཆུང་མ་སྤངས༌ན། ཁོ་མོར་བཟའ་འཐོར་ཡི་གེ་སྟེར་དགོས་ཞེས་ཆོས་གསུངས་ཡོད༌མོད།
MAT 5:32 འོན༌ཀྱང༌། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ལོག་གཡེམ་བྱས་པའི་རྒྱུ་རྐྱེན་ལས༌གཞན། ཁྱོ་བོ་སུ་ཞིག་རང་གི་ཆུང་མ་དང་འཐོར༌ན། ཁྱོ་བོས་བུད་མེད་དེ་ལ་ལོག་གཡེམ་བྱེད་དུ་བཅུག་པ༌ཡིན། ཡང་སུ་ཞིག་གིས་བཟའ་འཐོར་བྱས་པའི་བུད་མེད་དེ་རང་གི་ཆུང་མར་བླངས༌ན། དེ་ཡང་ལོག་གཡེམ་བྱས་པ་ཡིན་ཞེས་གསུངས༌སོ།།
MAT 5:33 ཡང་སྐྱབས་མགོན་ཡེ་ཤུས་འདི་སྐད༌དུ། རྫུན་གྱི་མནའ་མ་སྐྱེལ༌ཅིག གཙོ་བོ་ལ་དམ་བཅའ་ཕུལ་བ་རྣམས་སྒྲུབས་ཤིག་ཅེས་གནའ་མི་རྣམས་ལ་ཆོས་གསུངས་ཡོད་པ་ཁྱོད་རྣམས་ཀྱིས་ཐོས་མྱོང་བ་ཡིན༌ནོ།།
MAT 5:34 འོན་ཀྱང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་ཀྱིས་མནའ་ཅི་ཡང་མ་སྐྱེལ༌ཅིག ནམ་མཁའི་ཞིང་ཁམས་ནི་དཀོན་མཆོག་གི་བཞུགས་ཁྲི་ཡིན༌པས། ནམ་མཁའི་ཞིང་ཁམས་དཔང་དུ་བཙུགས་ནས་མནའ་མ་སྐྱེལ༌ཅིག
MAT 5:35 ཡང་ས་གཞི་ནི་ཁོང་གི་ཞབས་སྟེགས་ཡིན་པས་ས་གཞི་དཔང་དུ་བཙུགས་ནས་མནའ་མ་སྐྱེལ༌ཅིག ཡང་ཡེ་རུ་སཱ་ལེམ་ནི་རྒྱལ་པོ་ཆེན་པོ་སྟེ་དཀོན་མཆོག་གི་གྲོང་ཁྱེར་ཡིན༌པས། ཡེ་རུ་སཱ་ལེམ་དཔང་དུ་བཙུགས་ནས་མནའ་མ་སྐྱེལ༌ཅིག
MAT 5:36 ཡང་ཁྱོད་ཀྱིས་རང་གི་སྐྲའི་ཉག་མ་གཅིག་ཀྱང་དཀར་པོའམ་ནག་པོར་བསྒྱུར་མི་ནུས༌པས། རང་གི་མགོ་བོ་དཔང་དུ་བཙུགས་ནས་མནའ་མ་སྐྱེལ༌ཅིག
MAT 5:37 འོན་ཀྱང་ཁྱོད་ཅག་གི་གཏམ་ནི་ཡིན་ན་ཡིན་ཞེས༌དང༌། མིན་ན་མིན་ཞེས་སྨྲོས༌ཤིག དེ་ལས་ལྷག་པ་གང་ཞིག་སྨྲས་ནའང་དེ་ནི་ངན་པ་ལས་བྱུང་བ་ཡིན་ཞེས་གསུངས༌སོ།།
MAT 5:38 ཡང་སྐྱབས་མགོན་ཡེ་ཤུས་འདི་སྐད༌དུ། མིག་ལ་མིག་ལན་དང་སོ་ལ་སོ་ལན་འཇལ་དགོས་ཞེས་ཆོས་གསུངས་ཡོད་པ་ཁྱོད་རྣམས་ཀྱིས་ཐོས་མྱོང་བ་ཡིན༌ནོ།།
MAT 5:39 འོན་ཀྱང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་ཀྱིས་རང་ལ་ངན་བྱེད་མཁན་ལའང་རྒོལ་བར་མི༌བྱའོ། །སུ་ཞིག་གིས་ཁྱོད་ཀྱི་འགྲམ་པ་གཡས་པར་འགྲམ་ལྕག་གཞུས༌ན། ཁྱོད་ཀྱིས་འགྲམ་པ་གཡོན་པ་ལའང་གཞུ་རུ༌ཆུག
MAT 5:40 ཡང་སུ་ཞིག་གིས་ཁྱོད་རང་ཁྲིམས་ཁང་ལ་གཏུགས་ཤིང་ཁྱོད་ཀྱི་ནང་གོས་འཕྲོག་འདོད་པ་དེ་ལ་ཁྱོད་ཀྱིས་རང་གི་ཕྱི་གོས་ཀྱང་འཁྱེར་དུ༌ཆུག
MAT 5:41 ཡང་སུ་ཞིག་གིས་ཁྱོད་རང་དཔག་ཚད་གཅིག་ལ་འགྲོ་བར་བཙན་སྐུལ་བྱེད༌ན། ཁྱོད་རང་མི་དེ་དང་མཉམ་དུ་དཔག་ཚད་གཉིས་ལ་སོང༌ཞིག
MAT 5:42 ཡང་སུ་ཞིག་གིས་ཁྱོད་ལ་ཅི་ཞིག་སློང་བར་བྱེད་ན་དེ་ལ་བྱིན༌དང༌། ཁྱོད་ལས་རྒྱུ་ནོར་བསྐྱི་བར་འདོད་མཁན་དེའི་ངོ་མ་ཟློག་ཅིག་ཅེས་གསུངས༌སོ།།
MAT 5:43 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་རང་གི་ཁྱིམ་མཚེས་ལ་བྱམས་པ་དང་དགྲ་ལ་སྡང་དགོས་ཞེས་ཆོས་གསུངས་ཡོད་པ་ཐོས་མྱོང་བ༌ཡིན།
MAT 5:44 འོན་ཀྱང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་ཅག་ནི་ནམ་མཁའི་ཞིང་ཁམས་སུ་བཞུགས་པའི་ཡབ་ཀྱི་བུ་བུ་མོ་ཡིན་པའི༌ཕྱིར། ཁྱོད་ཅག་གིས་རང་གི་དགྲ་བོ་རྣམས་ལའང་བྱམས་ཤིང་བརྩེ་བར་གྱིས༌དང༌། རང་ལ་གནོད་པ་བྱེད་མཁན་རྣམས་ཀྱི་དོན་དུ་སྨོན་ལམ་ཐོབས༌ཤིག ཅིའི་ཕྱིར་ཞེ༌ན། དཀོན་མཆོག་གིས་མི་སེམས་བཟང་སེམས་ངན་གཉིས་ལ་རང་ཉིད་ཀྱི་ཉི་མ་འཆར་དུ་འཇུག༌ཅིང༌། མི་གཞུང་དྲང་ཡིན་མིན་ཐམས་ཅད་ལ་ཆར་བ་འབབ་པར་མཛད༌དོ།།
MAT 5:46 གལ་ཏེ་ཁྱོད་ཅག་གིས་རང་ལ་བྱམས་མཁན་རྣམས་ལ་བྱམས་པར་བྱེད༌ན། ཁྱོད་ཅག་ལ་བྱ་དགའ་ཅི་ལ༌ཐོབ། ཁྲལ་ལེན་མཁན་རྣམས་ཀྱིས་ཀྱང་དེ་ལྟར་བྱེད་པ་མ་ཡིན༌ནམ།
MAT 5:47 ཡང་ཁྱོད་ཅག་གིས་རང་གི་སྤུན་ཟླ་ཁོ་ནར་འཚམས་འདྲི་ཞུ༌ན། ཁྱོད་ཅག་ལ་མི་གཞན་ལས་ཁྱད་དུ་འཕགས་པ་ཅི་ཡོད༌དམ། ཕྱི་ཕྱོགས་པ་རྣམས་ཀྱིས་ཀྱང་དེ་ལྟར་བྱེད་པ་མ་ཡིན༌ནམ།
MAT 5:48 དེའི༌ཕྱིར། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ནི་ཕུལ་དུ་བྱུང་བ་ཡིན་པ༌ལྟར། ཁྱོད་རྣམས་ཀྱང་ཕུལ་དུ་བྱུང་བར་གྱུར་ཅིག་ཅེས་གསུངས༌སོ།།
MAT 6:1 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་མཉམ་པར་ཞོག༌དང༌། མི་གཞན་རྣམས་ལ་མཐོང་དུ་འཇུག་པའི༌ཕྱིར། དེ་རྣམས་ཀྱི་མིག་མདུན་ནས་དྲང་བདེན་གྱི་ལས་བསྒྲུབ་པར་མི༌བྱའོ། །དེ་ལྟར་བྱས༌ན། ཁྱོད་ཅག་ལ་ནམ་མཁའི་ཞིང་ཁམས་སུ་བཞུགས་པའི་ཡབ་ནས་བྱ་དགའ་ཅི་ཡང་མི༌འཐོབ།
MAT 6:2 དེའི༌ཕྱིར། ཁྱོད་ཀྱིས་སྦྱིན་པ་གཏོང་བའི་དུས༌སུ། རང་གི་མདུན་ནས་དུང་འབུད་དུ་མ༌འཇུག དེ་ནི་ཚུལ་འཆོས་པ་རྣམས་ཀྱིས་མི་གཞན་དག་གི་བསྔགས་བརྗོད་འཐོབ་པའི༌ཕྱིར། ཆོས་ཁང་དང་སྲང་ལམ་དུ་དེ་ལྟར་བྱེད་པ༌ཡིན། བདག་གིས་ཁྱོད་རྣམས་ལ་བདེན་པར་སྨྲ༌སྟེ། མི་དེ་དག་ལ་སྔར་ནས་རང་གི་བྱ་དགའ་ཐོབ༌ཟིན།
MAT 6:3 འོན་ཀྱང་ཁྱོད་ཀྱི་སྦྱིན་པ་གསང་བར་གནས་པའི༌ཕྱིར། སྦྱིན་པ་གཏོང༌ཚེ། ཁྱོད་ཀྱི་གཡས་ལག་གིས་གང་ཞིག་བྱས་པ་དེ་གཡོན་ལག་ལའང་ཤེས་སུ་མ་འཇུག༌གོ །དེ་ནས་གསང་བའི་ངང་ནས་སྒྲུབ་མཁན་ལ་གཟིགས་པའི་ཡབ་ཀྱིས་ཁྱོད་ལ་བྱ་དགའ་གནང་ངེས་ཡིན་ཞེས་གསུངས༌སོ།།
MAT 6:5 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་གསོལ་བ་འདེབས༌སྐབས། ཚུལ་འཆོས་པ་རྣམས་དང་འདྲ་བར་མ་བྱེད༌ཅིག མི་གཞན་རྣམས་ལ་མཐོང་དུ་འཇུག་པའི༌ཕྱིར། དེ་རྣམས་བསམ་བཞིན་ཆོས་ཁང་དང་ཁྲོམ་སྲང་གི་བཞི་མདོ་རུ་འགྲེང་ནས་བསྡད་དེ་གསོལ་བ་འདེབས་པར༌དགའ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། དེ་རྣམས་ལ་སྔར་ནས་རང་གི་བྱ་དགའ་ཐོབ་ཟིན་པ༌ཡིན།
MAT 6:6 འོན་ཀྱང་ཁྱོད་ཀྱིས་གསོལ་བ་འདེབས་པའི་དུས༌སུ། ཁྱོད་ནི་རང་གི་ཁང་པ་སྦུག་མར་སོང་ནས་སྒོ་བརྒྱབ༌སྟེ། མིག་གི་མཐོང་ལམ་དུ་མ་གྱུར་པའི་ཁྱོད་ཀྱི་ཡབ་ལ་གསོལ་བ་ཐོབས༌ཤིག དེ་ནས་གསང་བའི་ངང་ནས་སྒྲུབ་མཁན་ལ་གཟིགས་པའི་ཁྱོད་ཀྱི་ཡབ་ཀྱིས་ཁྱོད་ལ་བྱ་དགའ་གནང་ངེས༌ཡིན།
MAT 6:7 ཡང་ཁྱོད་ཅག་གིས་གསོལ་བ་འདེབས་པའི་དུས༌སུ། ཕྱི་ཕྱོགས་པ་རྣམས་དང་འདྲ་བར་དོན་སྙིང་མེད་པའི་བསྐྱར་བཟློས་མ་བྱེད༌ཅིག དེ་དག་གི་སེམས་སུ་སྨྲ་བ་མང༌ན། དཀོན་མཆོག་གིས་རང་གི་གསོལ་འདེབས་ལ་གསན་ངེས་ཡིན་བསམ༌མོ།།
MAT 6:8 དེ་བས་ཁོ་རྣམས་དང་འདྲ་བར་མ་བྱེད༌ཅིག རྒྱུ་མཚན་ནི་ཁྱོད་ཅག་གི་ཡབ་ཀྱིས་ཁྱོད་ཅག་གིས་མ་ཞུས་སྔོན་དུ་ཁྱོད་ཀྱི་དགོས་མཁོ་མཁྱེན་པའི་ཕྱིར༌རོ།།
MAT 6:9 དེའི༌ཕྱིར། ཁྱོད་ཅག་གིས་གསོལ་བ་འདེབས་པའི་དུས་སུ་འདི་ལྟར་ཞུ་བར་བྱ༌སྟེ། ནམ་མཁར་བཞུགས་པའི་ངེད་ཀྱི༌ཡབ།། ཁྱེད་མཚན་དམ་པར་བསྲུང་བར༌ཤོག །
MAT 6:10 ཁྱེད་ཀྱི་རྒྱལ་སྲིད་འོང་བར༌ཤོག ། ཁྱེད་ཀྱི་དགོངས་པ་ནམ་མཁའ༌རུ།། གྲུབ་བཞིན་ས་ལའང་འགྲུབ་པར༌ཤོག །
MAT 6:11 ངེད་ཀྱི་ཉིན་རེའི་ཟས་ཀྱི༌སྐལ།། དེ་རིང་ཡང་ནི་གནང་བར༌མཛོད།།
MAT 6:12 ངེད་ཀྱིས་གཞན་ཉེས་བསལ་བ༌ལྟར།། ངེད་ཀྱི་སྡིག་པ་བསལ་བར༌མཛོད།།
MAT 6:13 ངན་པའི་ལས་ནས་ཐར་བ༌དང༌།། ཉམས་ཚོད་མི་ལེན་སྐྱོབ་པར༌མཛོད།། རྒྱལ་སྲིད་དབང་དང་གཟི་བརྗིད༌ནི།། རྒྱུན་ནས་རྒྱུན་དུ་ཁྱེད་ཀྱི༌ཡིན།། ཨ༌མེན། ཞེས༌པའོ།།
MAT 6:14 ཁྱོད་ཅག་གིས་མི་གཞན་གྱི་ཉེས་སྐྱོན་བསལ༌ན། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་ཀྱང་ཁྱོད་རྣམས་ཀྱི་ཉེས་པ་བསལ་ངེས༌ཡིན།
MAT 6:15 ཡང་ཁྱོད་ཅག་གིས་མི་གཞན་གྱི་ཉེས་སྐྱོན་མ་བསལ༌ན། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་ཀྱང་ཁྱོད་ཅག་གི་ཉེས་པ་བསལ་བར་མི་འགྱུར་ཞེས་གསུངས༌སོ།།
MAT 6:16 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་སྨྱུང་གནས་སྲུང་བའི་དུས༌སུ། ཚུལ་འཆོས་པ་རྣམས་དང་འདྲ་བར་སྐྱོ་བའི་ངོ་མདངས་མ་སྟོན༌ཅིག ཅིའི་ཕྱིར་ཞེ༌ན། དེ་རྣམས་ཀྱིས་སྨྱུང་གནས་སྲུང་བ་ནི་མི་གཞན་རྣམས་ཀྱིས་མཐོང་བའི་ཕྱིར༌དུ། རང་གི་ངོ་མདངས་སྡུག་པར༌སྟོན། བདག་གིས་ཁྱོད་རྣམས་ལ་བདེན་པར་སྨྲ༌སྟེ། དེ་དག་ལ་རང་གི་བྱ་དགའ་ཐོབ་ཟིན་པ༌ཡིན།
MAT 6:17 ཁྱོད་ཀྱིས་སྨྱུང་གནས་སྲུང་བ་ནི་མི་གཞན་རྣམས་ཀྱིས་མི་ཤེས་པའི་ཕྱིར༌དུ། སྨྱུང་གནས་སྲུང་བའི་དུས༌སུ། མགོ་ལ་སྣུམ་བསྐུ་ཞིང་ཁ་ངོ་གཙང་མར་ཁྲུས༌ཤིག འོན་ཀྱང་མིག་གི་མཐོང་ལམ་དུ་མ་གྱུར་པའི་ཁྱོད་ཅག་གི་ཡབ་ཀྱིས་ཁྱོད་རང་གཟིགས་པ༌དང༌། དེ་ནས་གསང་བའི་ངང་ནས་སྒྲུབ་མཁན་ལ་གཟིགས་པའི་ཁྱོད་ཀྱི་ཡབ་ཀྱིས་ཁྱོད་ལ་བྱ་དགའ་གནང་ངེས་ཡིན་ཞེས་གསུངས༌སོ།།
MAT 6:19 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་རང་གི་དོན་དུ་ས་སྟེང་དུ་རྒྱུ་ནོར་གསོག་པར་མི༌བྱའོ། །ས་སྟེང་གི་རྒྱུ་ནོར་ནི་འབུ་སྲིན་གྱིས་བཟའ་ཞིང་བཙའ་ཡིས་བརླག་པ༌དང༌། རྐུན་མས་ཀྱང་ཁུང་བུ་བྲུས་ཏེ་བརྐུ་བར༌བྱེད།
MAT 6:20 འོན་ཀྱང་ཁྱོད་རྣམས་ཀྱིས་རང་གི་དོན་དུ་ནམ་མཁའི་ཞིང་ཁམས་སུ་ནོར་བུ་གསོགས༌ཤིག གནས་དེ་རུ་འབུ་སྲིན་དང་བཙའ་ཡིས་མི་བཟའ་ཞིང་རྐུན་མས་ཀྱང་ཁུང་བུ་བྲུས་ཏེ་བརྐུ་མི༌ནུས།
MAT 6:21 རྒྱུ་མཚན་ནི་ཁྱོད་རྣམས་ཀྱི་ནོར་བུ་གང་དུ་ཡོད་ན་ཁྱོད་རྣམས་ཀྱི་སེམས་ཀྱང་དེ་རུ་ཡོད་པའི་ཕྱིར༌རོ།།
MAT 6:22 ཁྱོད་ཀྱི་མིག་ཟུང་ནི་ལུས་ཀྱི་སྒྲོན་མེ་ཡིན༌ཏེ། མིག་ཟུང་གསལ་པོ་ཡིན་ན་ལུས་པོ་ཡོངས་རྫོགས་འོད་དང་ལྡན་པར༌འགྱུར།
MAT 6:23 འོན་ཀྱང་ཁྱོད་ཀྱི་མིག་ཟུང་རབ་རིབ་ཏུ་གྱུར༌ན། ལུས་པོ་ཡོངས་རྫོགས་མུན་ནག་ཏུ༌འགྱུར། དེའི༌ཕྱིར། ཁྱོད་ཀྱི་སེམས་ནང་དུ་གནས་པའི་འོད་དེ་མུན་ནག་ཏུ་གྱུར་ན་མུན་ནག་དེ་ནི་ཅི་འདྲ་ཚབས་ཆེ༌ཨང༌།
MAT 6:24 སུ་ཞིག་གིས་ཀྱང་བདག་པོ་གཉིས་ལ་ཞབས་ཕྱི་བསྒྲུབ་མི་ནུས༌ཏེ། ཁོས་གཅིག་ལ་སྡང་ཞིང་གཅིག་ལ་གཅེས༌པའམ། ཡང་ན་གཅིག་ལ་བཀུར་ཞིང་གཅིག་ལ་སྨད་པར་བྱེད༌དོ། །དེའི༌ཕྱིར། ཁྱོད་རྣམས་ཀྱིས་དཀོན་མཆོག་དང་འཇིག་རྟེན་གྱི་རྒྱུ་ནོར་གཉིས་ལ་ཞབས་ཕྱི་བསྒྲུབ་མི་ནུས་ཞེས་གསུངས༌སོ།།
MAT 6:25 ཡང་སྐྱབས་མགོན་ཡེ་ཤུས་འདི་སྐད༌དུ། དེ་བས་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་རྣམས་ཀྱིས་རང་གི་ཚེ་སྲོག་གི་དོན་དུ་བཟའ་བཏུང་གང་ཞིག་སྤྱོད་པ༌དང༌། ལུས་པོའི་ཆེད་དུ་གོས་གང་ཞིག་གྱོན་པར་སེམས་ཁྲལ་མ་བྱེད༌ཅིག ཁ་ཟས་ལས་ཚེ་སྲོག་ནི་ཁྱད་དུ་འཕགས་ཤིང་གྱོན་ཆས་ལས་ཀྱང་མིའི་ལུས་པོ་ནི་ཁྱད་དུ་འཕགས་པ་མ་ཡིན༌ནམ།
MAT 6:26 ནམ་མཁའི་བྱ་རྣམས་ལ་ལྟོས༌དང༌། དེ་དག་གིས་ས་བོན་མི་འདེབས་ཤིང་སྟོན་ལས་མི་བྱེད༌ལ། འབྲུ་རིགས་བང་མཛོད་དུ་མི་བསྡུ༌ཡང༌། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་དེ་རྣམས་གསོ་བ༌ཡིན། ཁྱོད་རྣམས་ནི་ནམ་མཁའི་བྱ་ལས་རིན་ཐང་ཆེ་བ་མ་ཡིན༌ནམ།
MAT 6:27 ཁྱོད་རྣམས་ལས་སུ་ཞིག་གིས་སེམས་ཁྲལ་བྱས་ནས་རང་གི་ཚེ་ཐག་ཡུད་ཙམ་ཞིག་ཇེ་རིང་དུ་གཏོང་ནུས༌སམ།
MAT 6:28 ཁྱོད་ཅག་གིས་ཅིའི་ཕྱིར་གྱོན་པའི་ཆེད་དུ་སེམས་ཁྲལ་བྱེད༌དམ། སྤང་ཐང་གི་མེ་ཏོག་ཀུ་མུད་ཇི་ལྟར་སྐྱེ་བར་ལྟོས༌དང༌། དེ་དག་གིས་ལས་ཀ་མི་བྱེད་ལ་བལ་ཡང་མི་འཁེལ༌མོད།
MAT 6:29 འོན་ཀྱང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། སོ་ལོ་མོན་གྱི་བརྗིད་ཉམས་ཤིན་ཏུ་ཆེ་བའི་དུས༌སུ། ཁོང་གི་རྒྱན་གོས་མེ་ཏོག་འདི་ལའང་མི༌དོའོ།།
MAT 6:30 འོན་ཀྱང་དེ་རིང་ཡོད་ཡོད་འདྲ་ཡང་སང་ཉིན་ཐབ་ལ་སྲེག་པར་འགྱུར་བའི་སྤང་ཐང་གི་རྩྭ་ཡང་དཀོན་མཆོག་གིས་ལེགས་པར་བསྐྱངས༌ན། དད་པ་ཆུང་བ་ཁྱོད་རྣམས་དེ་ལས་ཀྱང་ལྷག་ཏུ་སྐྱོང་བར་མི་མཛད༌དམ།
MAT 6:31 དེ་བས་ཁྱོད་ཅག་གིས་བཟའ་བཏུང་གང་ཞིག་སྤྱོད་པ་དང་ལུས་ལ་གོས་གང་ཞིག་གྱོན་པར་སེམས་ཁྲལ་མ་བྱེད༌ཅིག
MAT 6:32 འདི་ཐམས་ཅད་ནི་ཕྱི་ཕྱོགས་པ་རྣམས་ཀྱིས་འཚོལ་བ་ཡིན༌ལ། ཁྱོད་རྣམས་ལ་དངོས་པོ་དེ་ཐམས་ཅད་མཁོ་བའང་ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་མཁྱེན༌ནོ།།
MAT 6:33 འོན༌ཀྱང༌། ཁྱོད་རྣམས་ཀྱིས་དཀོན་མཆོག་གི་རྒྱལ་སྲིད་དང་ཁོང་གི་རྣམ་དག་དེ་ཉིད་འཚོལ་ཞིང་སྙེགས་པར་གྱིས༌དང༌། དེ་རྣམས་ཀྱང་ཁྱོད་ཅག་ལ་གནང་བར་འགྱུར༌རོ།།
MAT 6:34 དེའི༌ཕྱིར། སང་ཉིན་གྱི་དོན་དུ་སེམས་ཁྲལ་མ་བྱེད༌ཅིག རྒྱུ་མཚན་ནི་སང་ཉིན་གྱི་དུས་སུ་སང་ཉིན་གྱི་སེམས་ཁྲལ་ཡོད༌ཅིང༌། ཉིན་རེ་རེའི་སྡུག་བསྔལ་ནི་ཉིན་རེ་རེར་འཁུར་ན་འོས་ཞེས་གསུངས༌སོ།།
MAT 7:1 ཡང་སྐྱབས་མགོན་ཡེ་ཤུས་འདི་སྐད༌དུ། གཞན་གྱིས་ཁྱོད་རྣམས་ཀྱི་མཚང་མི་འབྱིན་པའི་ཕྱིར༌དུ། ཁྱོད་ཅག་གིས་ཀྱང་མི་གཞན་གྱི་མཚང་མ་འབྲུ༌ཞིག
MAT 7:2 རྒྱུ་མཚན་ནི་ཁྱོད་ཅག་གིས་ཇི་ལྟར་མི་གཞན་གྱི་མཚང་བྲུས༌ན། ཁྱོད་རྣམས་ལའང་དེ་ལྟར་མཚང་འབྱིན་ཕོག་པ༌དང༌། ཁྱོད་ཅག་གིས་སྣོད་ཅི་ལྟ་བུ་ལས་མི་གཞན་ལ་བྱིན༌ན། སྣོད་དེ་ལྟ་བུ་ལས་ཁྱོད་ཅག་ལའང་གནང་བར་འགྱུར་བའི་ཕྱིར༌རོ།།
MAT 7:3 ཡང་ཁྱོད་ཀྱིས་རང་གི་སྤུན་ཟླའི་མིག་ནང་དུ་སྦུར་མ་ཡོད་པ་མཐོང༌ན། ཅིའི་ཕྱིར་རང་གི་མིག་ནང་དུ་ཡོད་པའི་གདུང་མ་མི་མཐོང༌ངམ།
MAT 7:4 ཡང་ཁྱོད་རང་གི་མིག་ནང་དུ་གདུང་མ་ཡོད༌ཀྱང༌། ཁྱོད་ཀྱིས་རང་གི་སྤུན་ཟླ་ལ་ངས་ཁྱོད་ཀྱི་མིག་ནང་དུ་ཡོད་པའི་སྦུར་མ་ལེན་པར་བྱེད་ཅེས་སྨྲ་ནུས༌སམ།
MAT 7:5 ཚུལ་འཆོས་པ་ཁྱོད་ཀྱིས་ཐོག་མར་རང་གི་མིག་ནང་དུ་ཡོད་པའི་གདུང་མ་ལོངས༌དང༌། དེ་ནས་རང་གི་མིག་ཟུང་གིས་གསལ་པོར་མཐོང་ཐུབ༌པས། ད་གཟོད་རང་གི་སྤུན་ཟླའི་མིག་ནང་དུ་ཡོད་པའི་སྦུར་མ་ལེན་ནུས༌པའོ།།
MAT 7:6 ཁྱོད་ཅག་གིས་གང་ཞིག་དམ་པ་ཡིན་པ་དེ་ཁྱི་ལ་སྟེར་མི་རུང༌ལ། མུ་ཏིག་ཀྱང་ཕག་གི་མདུན་དུ་འཕེན་མི༌རུང༌། དེ་ལྟར་བྱས༌ན། ཕག་གིས་མུ་ཏིག་བརྫི་བར་འགྱུར་བ༌དང༌། ཁྱིས་ཁྱོད་ཅག་ལ་སོ་བཏབ་ནས་དུམ་བུར་བྱེད་པར་འགྱུར་ཞེས་གསུངས༌སོ།།
MAT 7:7 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་གསོལ་བ་ཐོབས་དང་གནང་ངེས་ཡིན༌ལ། ཚོལ་དང་རྙེད་ངེས༌ཡིན། སྒོ་རྡུངས་དང་སྒོ་འབྱེད་པར༌ངེས།
MAT 7:8 རྒྱུ་མཚན་ནི་སུས་ཀྱང་གསོལ་བ་བཏབ་ན་ཐོབ་པ༌དང༌། བཙལ་ན་རྙེད༌པ། སྒོ་བརྡུངས་ན་སྒོ་འབྱེད་པའི་ཕྱིར༌རོ།།
MAT 7:9 ཡང་ཁྱོད་རྣམས་ལས་སུ་ཞིག་གིས་རང་གི་བུས་བག་ལེབ་ཅིག་བསླངས་ན་དེ་ལ་རྡོ་ཞིག་སྟེར༌རམ།
MAT 7:10 ཡང་ན་ཁོས་ཉ་ཞིག་བསླངས་ན་བུ་དེར་སྦྲུལ་ཞིག་སྟེར༌རམ།
MAT 7:11 སྤྱིར་ཁྱོད་རྣམས་རྒྱུད་ངན་པ་ཡིན་ཡང་རང་གི་བུ་ཕྲུག་ལ་དངོས་པོ་བཟང་པོ་སྟེར་ཤེས༌ན། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་ཁོང་ལ་ཞུ་མཁན་རྣམས་ལ་དེ་བས་ཀྱང་ལན་བཟང་པོ་གནང་ངེས༌ཡིན།
MAT 7:12 དེའི༌ཕྱིར། དོན་གང་དང་གང༌ལའང༌། ཁྱོད་ཅག་ལ་མི་གཞན་ལས་ཇི་ལྟར་འཐོབ་འདོད༌ན། ཁྱོད་ཅག་གིས་ཀྱང་མི་གཞན་ལ་དེ་ལྟར༌བྱོས། དེ་ནི་བཀའ་ཁྲིམས་དང་ལུང་སྟོན་པའི་མདོ་རྣམས་ཀྱི་ནང་དོན་མདོར་བསྡུས་ཡིན་ཞེས་གསུངས༌སོ།།
MAT 7:13 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་སྒོ་དོག་མོའི་ནང་དུ་སོང༌ཞིག ཅིའི་ཕྱིར་ཞེ༌ན། འཇིག་པར་འགྱུར་བའི་སྒོ་དེའི་འཁོབ་ནི་ཡངས་ཤིང་ལམ་ནི་རྒྱ་ཆེ༌སྟེ། ལམ་དེར་འགྲོ་བའི་མིའང་མང་བའི་ཕྱིར༌རོ།།
MAT 7:14 འོན་ཀྱང་མཐའ་མེད་པའི་ཚེ་སྲོག་ནང་དུ་འདྲེན་པར་བྱེད་པའི་སྒོ་དེའི་འཁོབ་ནི་དོག་ཅིང་ལམ་ནི་ཆུང༌སྟེ། སྒོ་དེ་རྙེད་མཁན་ཡང་ཉུང་ཞེས་གསུངས༌སོ།།
MAT 7:15 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་ལུང་སྟོན་པ་རྫུས་མ་རྣམས་ལ་དོགས་ཟོན་བྱོས༌ཤིག མི་དེ་དག་ཁྱོད་རྣམས་ཀྱི་གམ་དུ་ཡོང་ཞིང་ལུས་ལ་ལུག་ལྤགས་གྱོན་ནའང་ནང་སེམས་ནི་གདུག་རྩུབ་ཆེ་བའི་སྤྱང་ཀི༌ཡིན།
MAT 7:16 ཁྱོད་རྣམས་ཀྱིས་དེ་དག་གི་འབྲས་བུ་ལས་དེ་དག་སུ་ཡིན་པ་ཤེས་པར་འགྱུར༌ཏེ། སྤྱིར་ཚེར་མ་ལས་རྒུན་འབྲུམ༌དང༌། སྤྱང་ཚེར་ལས་བསེ་ཡབ་ཀྱི་འབྲས་བུ་འཐོག་སྲིད༌དམ།
MAT 7:17 དེ་བཞིན་དུ་ཤིང་སྡོང་བཟང་པོ་ཐམས་ཅད་ཀྱིས་འབྲས་བུ་བཟང་པོ་བསྐྱེད༌ཅིང༌། ཤིང་སྡོང་ངན་པས་འབྲས་བུ་ངན་པ༌བསྐྱེད།
MAT 7:18 ཡང་ཤིང་སྡོང་བཟང་པོས་འབྲས་བུ་ངན་པ་བསྐྱེད་མི་སྲིད༌ལ། ཤིང་སྡོང་ངན་པས་ཀྱང་འབྲས་བུ་བཟང་པོ་བསྐྱེད་མི༌སྲིད།
MAT 7:19 འབྲས་བུ་བཟང་པོ་མི་བསྐྱེད་པའི་ཤིང་སྡོང་ཐམས་ཅད་བཅད་དེ་མེའི་ནང་དུ་འཕེན་པར༌བྱེད།
MAT 7:20 དེའི༌ཕྱིར། ཁྱོད་ཅག་གིས་དེ་དག་གི་འབྲས་བུ་ལ་བལྟས་ནས་དེ་དག་སུ་ཡིན་ཤེས་པར་འགྱུར༌རོ།།
MAT 7:21 བདག་ལ་གཙོ་བོ་ལགས་གཙོ་བོ་ལགས་ཞེས་ཞུ་བའི་མི་ཐམས་ཅད་ནམ་མཁའི་རྒྱལ་སྲིད་དུ་ཞུགས་ཐུབ་པ་མིན༌ཏེ། ནམ་མཁའི་ཞིང་ཁམས་སུ་བཞུགས་པའི་བདག་གི་ཡབ་ཀྱི་ཐུགས་དགོངས་ལྟར་སྒྲུབ་མཁན་ཁོ་ན་ཞུགས་ཐུབ་པ༌ཡིན།
MAT 7:22 མ་འོངས་པའི་ཉིན་མོ༌དེར། མི་མང་པོས་བདག་ལ་གཙོ་བོ༌ལགས། གཙོ་བོ༌ལགས། ངེད་ཅག་གིས་ཁྱེད་ཀྱི་མཚན་ལ་བརྟེན་ནས་ལུང་བསྟན་པ་མ་ཡིན༌ནམ། ཁྱེད་ཀྱི་མཚན་ལ་བརྟེན་ནས་གདོན་འདྲེ་བཏུལ་བ༌དང༌། དོན་ངོ་མཚར་ཅན་མང་པོ་བསྒྲུབས་པ་མ་ཡིན་ནམ་ཞེས་ཟེར་ངེས༌ལ།
MAT 7:23 དེའི༌ཚེ། བདག་གིས་མི་དེ་རྣམས༌ལ། བདག་གིས་ཁྱོད་རྣམས་གཏན་ནས་ངོ་མི་ཤེས༌པས། ཉེས་པ་བྱེད་མཁན་ཁྱོད་རྣམས་བདག་གི་དྲུང་ནས་ཕར་སོང་ཞིག་ཅེས་ཟེར་བར་འགྱུར་ཞེས་གསུངས༌སོ།།
MAT 7:24 ཡང་སྐྱབས་མགོན་ཡེ་ཤུས་འདི་སྐད༌དུ། དེའི༌ཕྱིར། བདག་གིས་སྨྲས་པའི་བཀའ་འདི་དག་སུ་ཞིག་གིས་ཐོས་ཤིང་དེ་བཞིན་དུ་བསྒྲུབས༌ན། དེ་ནི་མི་བློ་རིག་ཅན་ཞིག་གིས་རྡོ་ཕ་བོང་གི་སྟེང་དུ་ཁང་པ་བཟོས་པ་དང༌འདྲ།
MAT 7:25 དེ་ནས་ཆར་འབབ་ཅིང་ཆུ་ལོག་འབྱུང་བ༌དང༌། རླུང་གཡུགས་ནས་ཁང་པ་དེ་ལ་ཐོགས་ཀྱང་མི་བརྡིབ༌སྟེ། རྒྱུ་མཚན་ནི་ཁང་པ་དེ་རྡོ་ཕ་བོང་གི་སྟེང་དུ་བརྩིགས་ཡོད་པའི་ཕྱིར༌རོ།།
MAT 7:26 བདག་གིས་སྨྲས་པའི་བཀའ་འདི་དག་སུ་ཞིག་གིས་ཐོས་ཀྱང་དེ་བཞིན་དུ་མི་བསྒྲུབ༌ན། དེ་ནི་མི་བླུན་པོ་ཞིག་གིས་བྱེ་མའི་སྟེང་ཏུ་ཁང་པ་བརྩིགས་པ་དང༌འདྲ།
MAT 7:27 དེ་ནས་ཆར་བ་འབབ་ཅིང་ཆུ་ལོག་འབྱུང་བ༌དང༌། རླུང་གཡུགས་ནས་ཁང་པ་དེ་ལ་ཐོགས་ཤིང་བརྡིབས་ཏེ་ཡོངས་སུ་བརླག་པར་འགྱུར་ཞེས་གསུངས༌སོ།།
MAT 7:28 དེ་ནས་སྐྱབས་མགོན་ཡེ་ཤུས་བཀའ་དེ་ཐམས་ཅད་གསུངས་ཚར་བ༌དང༌། ཁོང་གིས་མི་རྣམས་ལ་ཆོས་གསུངས་པ་ནི་མཁན་པོ་རྣམས་དང་མི་འདྲ༌བར། མི་དབང་ཐང་ཅན་ཞིག་གིས་གསུངས་པ་དང་འདྲ༌བས། ཁོང་གི་གསུང་ཐོས་པའི་མི་རྣམས་ངོ་མཚར་བར་གྱུར༌ཏོ།།
MAT 8:1 དེ་ནས་སྐྱབས་མགོན་ཡེ་ཤུ་རི་བོ་ལས་མར་བབས་ཤིང་མི་སྐོར་ཚོ་མང་པོའང་ཁོང་གི་རྗེས་སུ༌འབྲངས།
MAT 8:2 དེའི་དུས༌སུ། མཛེ་ནད་བྱུང་བའི་མི་ཞིག་ཁོང་གི་དྲུང་དུ་ཡོང་ནས་ཁོང་ལ་ཕྱག་བཙལ་ཏེ། གཙོ་བོ༌ལགས། ཁྱེད་ཐུགས་མཉེས་པ་ཡིན༌ན། ཁྱེད་ཀྱིས་ང་རང་གཙང་མར་མཛད་ནུས་པ་ཡིན་ཞེས་ཞུས་པ༌ན།
MAT 8:3 སྐྱབས་མགོན་ཡེ་ཤུས་ཕྱག་བརྐྱངས་ནས་ཁོ་ལ་རེག༌སྟེ། ང་རང་འཐད་པ༌ཡིན། ཁྱོད་རང་གཙང་མར་གྱུར་ཅིག་ཅེས་གསུངས་མ་ཐག་མི་དེའི་མཛེ་ནད་བསལ་ནས་གཙང་མར༌གྱུར།
MAT 8:4 ཡང་ཁོང་གིས་མི་དེ་ལ་འདི་སྐད༌དུ། ཁྱོད་ཀྱིས་གཟབ་གཟབ༌གྱིས། དོན་འདི་གཞན་སུ་ལའང་མི་སྨྲ་བར༌གྱིས། ཁྱོད་རང་ཕྱིར་སོང་ནས་རང་གི་ལུས་པོ་མཆོད་དཔོན་ལ་སྟོན༌ཅིག མི་རྣམས་ལ་བདེན་དཔང་བྱེད་པའི་ཆེད་དུ་མོ་ཤེ་ ཡིས་བཀའ་གནང་ཡོད་པ་བཞིན་མཆོད་པ་ཕུལ་ཅིག་ཅེས་གསུངས༌སོ།།
MAT 8:5 དེ་ནས་སྐྱབས་མགོན་ཡེ་ཤུ་ཁོང་ཉིད་ཀཱ་ཕར་ན་ཧུམ་དུ་ཕེབས་པ༌ན། བརྒྱ་དཔོན་ཞིག་ཁོང་གི་དྲུང་དུ་ཡོང༌སྟེ།
MAT 8:6 གཙོ་བོ༌ལགས། བདག་གི་གཡོག་པོ་ཞ་བོར་གྱུར་ཅིང་ཁྱིམ་ནས་ཉལ་སར་ལྷུང༌སྟེ། སྡུག་བསྔལ་ཧ་ཅང་ཆེ་ཞེས་ཞུས་པ༌ལ།
MAT 8:7 སྐྱབས་མགོན་ཡེ་ཤུས་འདི་སྐད༌དུ། ང་རང་སོང་ནས་ཁོའི་ནད་གཞོམ་པར་བྱ་ཞེས་གསུངས་པ༌དང༌།
MAT 8:8 བརྒྱ་དཔོན་ན༌རེ། གཙོ་བོ༌ལགས། ཁྱེད་རང་ཕྲན་ཆུང་བདག་ལྟ་བུ་ཞིག་གི་ཁྱིམ་དུ་ཕེབས་ན་ང་རང་མི་འོས༌པས། ཁྱེད་ཀྱིས་བཀའ་ཞིག་གསུངས༌དང༌། བདག་གི་གཡོག་པོའི་ནད་བསལ་ངེས་ཡིན༌ཏེ།
MAT 8:9 ང་ནི་གཞན་གྱི་དབང་འོག་གི་མི་ཡིན༌ལ། ངའི་དབང་འོག་ཏུའང་དམག་མི་ཡོད༌དེ། ངས་མི་འདིར་སོང་ཞིག་ཅེས་སྨྲས་ན་ཁོ་རང་ཕར་འགྲོ་དགོས༌ཤིང༌། མི་གཞན་ལ་ཤོག་ཅིག་ཅེས་སྨྲས་ན་ཁོ་རང་ཚུར་ཡོང་བ༌ཡིན། བདག་གིས་གཡོག་པོར་ལས་ཀ་འདི་སྒྲུབས་ཤིག་ཅེས་སྨྲས་ན་ཁོས་བསྒྲུབ་པར་འགྱུར་བའི་ཕྱིར་རོ་ཞེས་ཞུས༌སོ།།
MAT 8:10 དེ་ནས་སྐྱབས་མགོན་ཡེ་ཤུས་གཏམ་དེ་གསན་ནས་ཡ་མཚན་སྐྱེས༌ཏེ། ཁོང་གི་རྗེས་སུ་འབྲངས་པའི་མི་རྣམས་ལ་འདི་སྐད༌དུ། བདག་གིས་ཁྱོད་རྣམས་ལ་བདེན་པར༌སྨྲའོ། །བདག་གིས་ཡེས་ར་ཨེལ་མི་རིགས་ལས་ཀྱང་འདི་འདྲའི་དད་སེམས་ཆེན་པོ་ཅན་ཞིག་མཐོང་མ༌མྱོང༌།
MAT 8:11 ཡང་ངས་ཁྱོད་རྣམས་ལ་སྨྲ་བར་བྱ༌སྟེ། མ་འོངས་པར་ཕྱོགས་བཞི་མཚམས་བརྒྱད་ནས་མི་གཞན་མང་པོ་ཡོང༌སྟེ། ཨབ་ར་ཧམ༌དང༌། ཨི༌སཱག ཡ་ཀོབ་བཅས་དང་མཉམ་དུ་ནམ་མཁའི་རྒྱལ་སྲིད་དུ་གསོལ་སྟོན་ལ་ཞུགས་པར༌འགྱུར།
MAT 8:12 འོན༌ཀྱང༌། རྒྱལ་སྲིད་འདིའི་བུ་རྣམས་ནི་སྒོའི་ཕྱི་རོལ་གྱི་མུན་ནག་ནང་དུ་ཕུད༌ཅིང༌། གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་ཞེས་གསུངས༌སོ།།
MAT 8:13 ཡང་ཁོང་གིས་བརྒྱ་དཔོན་ལ་འདི་སྐད༌དུ། ཁྱོད་རང་ཕྱིར་སོང༌དང༌། ཁྱོད་ཀྱི་དད་པ་བཞིན་དུ་འགྲུབ་པར་འགྱུར་ཞེས་གསུངས་པ༌དང༌། དེའི་དུས་སུ་གཡོག་པོ་དེའང་ནད་ལས་ཐར༌རོ།།
MAT 8:14 དེ་ནས་སྐྱབས་མགོན་ཡེ་ཤུ་ཁོང་ཉིད་པེ་ཏྲོའི་ཁྱིམ་དུ་ཕེབས་པ༌ན། པེ་ཏྲོའི་སྒྱུག་མོར་ཚ་བརྒྱབ་སྟེ་ཉལ་ནས་བསྡད་ཡོད་པ༌གཟིགས།
MAT 8:15 ཁོང་གིས་ཁོ་མོའི་ལག་པར་རེག་པ་དང་ཚ་བཞག༌ཅིང༌། ཁོ་མོ་ཡར་ལངས་ནས་ཁོང་ལ་ཞབས་ཕྱི་བྱས༌སོ།།
MAT 8:16 ཉིན་དེའི་མཚན༌མོར། མི་རྣམས་ཀྱིས་གདོན་འདྲེས་བཟུང་བའི་མི་མང་པོ་ཁོང་གི་དྲུང་དུ་ཁྲིད་ཡོང་བ༌དང༌། ཁོང་གིས་བཀའ་གནང་སྟེ་གདོན་འདྲེ་རྣམས་ཕར་བསྐྲད་ཅིང་ནད་པ་ཐམས་ཅད་གསོས༌པའོ།།
MAT 8:17 དེ་ལ་ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ། ཁོང་གིས་ང་ཚོའི་རྒུད་པ་དག་གི་འཐུས་ཚབ༌མཛད།། ཁོང་གིས་ང་ཚོའི་ནད་རིགས་སྣ་ཚོགས་ཁུར་དུ༌བཞེས།། ཞེས་གསུངས་པ་བཞིན་འགྲུབ་པའི་ཕྱིར་དེ་ལྟར་བྱུང༌ངོ༌།།
MAT 8:18 དེ་ནས་སྐྱབས་མགོན་ཡེ་ཤུས་མི་མང་པོས་རང་ཉིད་བསྐོར་བ་གཟིགས་ཏེ་མཚོའི་ཕ་རོལ་ཏུ་འགྲོའོ་ཞེས་བཀའ་གནང་བ༌དང༌།
MAT 8:19 དེའི་དུས༌སུ། མཁན་པོ་ཞིག་ཁོང་གི་དྲུང་དུ་ཡོང༌སྟེ། སློབ་དཔོན༌ལགས། ཁྱེད་རང་གང་དུ་ཕེབས་ནའང་ང་རང་ཁྱེད་ཀྱི་རྗེས་སུ་འབྲང་ངོ་ཞེས་ཞུས་པ༌ན།
MAT 8:20 སྐྱབས་མགོན་ཡེ་ཤུས་འདི་སྐད༌དུ། ཝ་ལ་ཁུང་བུ་དང་ནམ་མཁའི་བྱ་ལའང་ཚང་ཡོད༌ཀྱང༌། མིའི་བུ་ལ་མགོ་སྔས་ས་ཙམ་ཡང་མེད་ཅེས་གསུངས༌སོ།།
MAT 8:21 ཡང་རྗེས་འབྲང་པ་རྣམས་ལས་མི་ཞིག་ན༌རེ། གཙོ་བོ༌ལགས། ང་རང་ཐོག་མར་རང་ཡུལ་དུ་ཕ་དུར་ལ་སྦ་རུ་འགྲོ་བར་མཛོད་ ཅེས་ཞུས་པ༌ལ།
MAT 8:22 སྐྱབས་མགོན་ཡེ་ཤུས་འདི་སྐད༌དུ། བེམ་པོ་དང་འདྲ་བའི་མི་དག་ལ་རང་གི་བེམ་པོ་དུར་དུ་སྦ་བར་གྱིས༌ཤིག ཁྱོད་རང་བདག་གི་རྗེས་སུ་འབྲང་བར་གྱིས་ཞེས་གསུངས༌སོ།།
MAT 8:23 དེ་ནས་སྐྱབས་མགོན་ཡེ་ཤུ་མཚོ་གྲུར་བཞུགས་ཤིང་ཐུགས་སྲས་རྣམས་ཀྱང་ཁོང་གི་རྗེས་སུ༌འབྲངས།
MAT 8:24 གློ་བུར་ཉིད་ལ་རླུང་ཆེན་གཡུགས་ཏེ་མཚོའི་རྦ་རླབས་ཀྱིས་མཚོ་གྲུ་བཀབ་ནའང་ཁོང་ཉིད་གཟིམས་འདུག༌གོ།
MAT 8:25 ཐུགས་སྲས་རྣམས་ཀྱིས་ཁོང་གཟིམས་ལས་བསླངས༌ཏེ། གཙོ་བོ༌ལགས། བདག་ཅག་འཆི་ལ་ཉེ་བས་སྐྱོབ་པར་མཛོད་ཅེས་ཞུས་པ༌ལ།
MAT 8:26 ཁོང་གིས་དེ་རྣམས་ལ་འདི་སྐད༌དུ། དད་པ་ཆུང་བ་ཁྱོད་རྣམས་ཅིའི་ཕྱིར་སྐྲག་གམ་ཞེས་གསུངས་ནས་ཡར་བཞེངས༌ཏེ། རླུང་དང་མཚོ་ལ་བཀའ་བཀྱོན་མཛད་པ༌ན། རླུང་དང་མཚོའང་ཡོངས་སུ་ཞི་བར༌གྱུར།
MAT 8:27 ཐུགས་སྲས་རྣམས་དོན་དེར་ངོ་མཚར་སྐྱེས༌ཏེ། རླུང་དང་མཚོ་ཡིས་ཀྱང་ཁོང་གི་བཀའ་ལ་མཉན་པས་མི་འདི་ནི་ཅི་ལྟ་བུ་ཞིག་ཡིན་ནམ་ཞེས་སྨྲས༌སོ།།
MAT 8:28 སྐྱབས་མགོན་ཡེ་ཤུ་མཚོའི་ཕ་རོལ་གྱི་གེ་ར་སཱ་ཡུལ་དུ་ཕེབས་པ༌ན། གདོན་འདྲེས་བཟུང་བའི་མི་གཉིས་དུར་ཁྲོད་ནས་ཐོན་ཏེ་ཁོང་ལ༌མཇལ། མི་དེ་གཉིས་ནི་ཤིན་ཏུ་གཏུམ་དྲག་ཆེ༌བས། ཐ་ན་མི་སུ་ཡང་ལམ་དེ་བརྒྱུད་ནས་འགྲོ་མི༌ཕོད།
MAT 8:29 དེ་གཉིས་ཀྱིས་སྐད་ཆེན༌པོས། ཀྱེ། དཀོན་མཆོག་གི༌སྲས། ཁྱེད་རང་ངེད་གཉིས་དང་འབྲེལ་བ་ཅི་མཆིས༌སམ། དུས་དེ་ད་དུང་མ་སླེབས་པས། ཁྱེད་ཉིད་འདིར་ཕེབས་ནས་ངེད་གཉིས་སྡུག་ལ་སྦྱོར་རམ་ཞེས༌སྨྲས།
MAT 8:30 དེ་རྣམས་དང་རྒྱང་ཐག་རིང་བའི་ས་རུ་ཕག་ཁྱུ་ཆེན་པོ་ཞིག་འཚོ་བཞིན་ཡོད༌ལ།
MAT 8:31 གདོན་འདྲེ་དག་གིས་སྐྱབས་མགོན་ཡེ་ཤུ་ལ་འདི་ལྟར་སྨྲས༌པ། གལ༌ཏེ། ཁྱེད་ཀྱིས་ངེད་རྣམས་ཕར་སྐྲོད༌ན། ཕག་ཁྱུའི་ནང་དུ་འཇུག་པར་མཛོད་ཅེས་ཞུ་བ་ཞུས་པ༌དང༌།
MAT 8:32 སྐྱབས་མགོན་ཡེ་ཤུས་གདོན་འདྲེ་དེ་རྣམས་ལ་སོང་ཞིག་ཅེས་བཀའ་གནང༌བས། གདོན་འདྲེ་དེ་དག་ཕྱི་རུ་ཐོན་ཏེ་ཕག་ཁྱུའི་ནང་དུ་ཞུགས་པ༌དང༌། ཕག་ཐམས་ཅད་གཡང་གཟར་ནས་བརྒྱུགས་ཤིང་མཚོ་ནང་དུ་ལྷུང་སྟེ་ནུབ་ནས༌ཤིའོ།།
MAT 8:33 དེ་ནས་ཕག་རྫི་རྣམས་བྲོས་ནས་གྲོང་ཁྱེར་དུ་སོང༌སྟེ། དོན་དེ་ཐམས་ཅད་དང་གདོན་འདྲེས་བཟུང་བའི་མི་གཉིས་ལ་ཅི་ཞིག་བྱུང་བ་མི་རྣམས་ལ་སྨྲས་པ༌དང༌།
MAT 8:34 གྲོང་ཁྱེར་དེའི་མི་ཐམས་ཅད་སྐྱབས་མགོན་ཡེ་ཤུ་འཚོལ་དུ་སོང༌སྟེ། ཁོང་མཐོང་ནས་ཁོ་རྣམས་ཀྱི་ཡུལ་དང་འབྲལ་དགོས་པར་ཞུ་བ་བྱས༌སོ།།
MAT 9:1 སྐྱབས་མགོན་ཡེ་ཤུ་མཚོ་གྲུར་བཞུགས་ནས་མཚོ་ལས་བརྒལ་ཏེ་རང་ཉིད་བཞུགས་སའི་གྲོང་ཁྱེར་དུ་ཕེབས་པ༌ན།
MAT 9:2 མི་རྣམས་ཀྱིས་ཞ་བོ་ཞིག་ཁྱོགས་ཤིང་སྟེང་བཞག་ནས་ཁོང་གི་དྲུང་དུ་ཁུར་ཡོང་བ༌དང༌། སྐྱབས་མགོན་ཡེ་ཤུས་དེ་རྣམས་ཀྱི་དད་སེམས་གཟིགས་ཏེ་ཞ་བོ་དེ་ལ་འདི་སྐད༌དུ། སྙིང་གི༌བུ། སེམས་བདེ་བར་གྱུར༌ཅིག ཁྱོད་ཀྱི་སྡིག་པ་བསལ་བ་ཡིན་ཞེས་གསུངས༌སོ།།
MAT 9:3 མཁན་པོ་འགའ་ཞིག་ཡོད་པའི་སེམས༌སུ། མི་འདིས་དཀོན་མཆོག་གི་དབུ་འཕང་སྨད་ཀྱིན་འདུག་བསམས་པ༌རེད།
MAT 9:4 དེ་ནས་སྐྱབས་མགོན་ཡེ་ཤུས་དེ་དག་གི་བསམ་ཚུལ་མཁྱེན་ཏེ་འདི་སྐད༌དུ། ཁྱོད་རྣམས་ཀྱིས་ཅིའི་ཕྱིར་སེམས་ངན་བཅངས་པ་ཡིན༌ནམ།
MAT 9:5 ཁྱོད་ཀྱི་སྡིག་པ་བསལ་བ་ཡིན་ཞེས་ཟེར་བ༌དང༌། ཡར་ལོངས་ལ་སྐྱོད་ཅིག་ཅེས་ཟེར་བ་གཉིས་ལས་གང་ཞིག༌སླའམ།
MAT 9:6 འོན༌ཀྱང༌། འདི་ནི་ས་སྟེང་དུ་མིའི་བུ་ལ་སྡིག་པ་བསལ་བའི་དབང་ཡོད་པ་ཁྱོད་རྣམས་ཀྱིས་ཤེས་པའི་ཕྱིར་ཡིན་ཞེས་གསུངས༌རྗེས། ཁོང་གིས་ཞ་བོ་དེ་ལ་འདི་སྐད༌དུ། ཁྱོད་རང་ཡར་ལོངས༌ལ་ཁྱོགས་ཤིང་ཁུར་ནས་རང་ཡུལ་དུ་སོང་ཞིག་ཅེས་བཀའ་གནང་བ༌དང༌།
MAT 9:7 མི་དེ་ཡར་ལངས་ནས་རང་ཡུལ་དུ་ཕྱིན་པ༌རེད།
MAT 9:8 དོན་དེ་མི་ཚོགས་ཀྱིས་མཐོང་ནས་ངོ་མཚར་སྐྱེས་ཏེ་དཀོན་མཆོག་ལ་བསྟོད་བསྔགས༌ཕུལ། རྒྱུ་མཚན་ནི་དཀོན་མཆོག་གིས་མི་ལ་དབང་དེ་ལྟ་བུ་གནང་བའི་ཕྱིར༌རོ།།
MAT 9:9 དེ་ཡང་སྐྱབས་མགོན་ཡེ་ཤུ་གནས་དེ་ནས་ཕར་ཕེབས་པ༌ལ། མད་ཐཱ་ཞེས་པ་ནི་ཁྲལ་སྡུད་སར་བསྡད་ཡོད་པ་གཟིགས་ཏེ་འདི་སྐད༌དུ། ཁྱོད་རང་ངའི་རྗེས་སུ་ཤོག་ཅེས་གསུངས་པ༌ན། ཁོ་རང་ཡར་ལངས་ཏེ་ཁོང་གི་རྗེས་སུ་འབྲངས༌སོ།།
MAT 9:10 སྐྱབས་མགོན་ཡེ་ཤུས་ཁང་པའི་ནང་དུ་ཞལ་ཟས་བཞེས་ནས་སྡོད་པའི་དུས༌སུ། ཁྲལ་ལེན་མཁན་དང་མི་སྡིག་ཅན་མང་པོ་ཡོང༌སྟེ། སྐྱབས་མགོན་ཡེ་ཤུ་དང་ཁོང་གི་ཐུགས་སྲས་རྣམས་དང་མཉམ་དུ་བཟའ་བཏུང་སྤྱད་ནས་བསྡད༌དོ།།
MAT 9:11 དོན་དེ་ཕ་རུ་ཤི་པ་རྣམས་ཀྱིས་མཐོང་སྟེ་ཁོང་གི་ཐུགས་སྲས་རྣམས་ལ་འདི་ལྟར་སྨྲས༌པ། ཁྱོད་ཅག་གི་སྟོན་པས་ཅིའི་ཕྱིར་ཁྲལ་ལེན་མཁན་དང་མི་སྡིག་ཅན་རྣམས་དང་མཉམ་དུ་བཟའ་བཏུང་ལ་རོལ་བ་ཡིན་ནམ་ཞེས་པ༌ན།
MAT 9:12 སྐྱབས་མགོན་ཡེ་ཤུས་གཏམ་དེ་ཐོས་ནས་དེ་རྣམས་ལ་འདི་སྐད༌དུ། ལུས་ཁམས་བདེ་བའི་མིས་སྨན་པ་བསྟེན་མི་དགོས༌མོད། འོན་ཀྱང་ནད་པས་ད་གཟོད་སྨན་པ་བསྟེན་དགོས་པ༌ཡིན།
MAT 9:13 ཁྱོད་རྣམས་ཕར་སོང༌ལ། བདག་ནི་མཆོད་པར་མི་དགའ་ཞིང་སྙིང་རྗེའི་སེམས་ལ་དགའ་ཞེས་གསུངས་པའི་དོན་ཅི་ཡིན་པ་སློབས༌ཤིག བདག་ནི་མི་གཞུང་དྲང་རྣམས་འབོད་དུ་འོངས་པ་མ་ཡིན༌པར། མི་སྡིག་ཅན་རྣམས་འབོད་དུ་ཡོང་བ་ཡིན་ཞེས་གསུངས༌སོ།།
MAT 9:14 དེའི་དུས༌སུ། ཁྲུས་གསོལ་མཁན་ཡོ་ཧ་ནན་གྱི་སློབ་མ་འགའ་སྐྱབས་མགོན་ཡེ་ཤུའི་དྲུང་དུ་ཡོང༌སྟེ། ངེད་ཅག་དང་ཕ་རུ་ཤི་པ་རྣམས་ཀྱིས་རྒྱུན་དུ་སྨྱུང་གནས་སྲུང་བཞིན་ཡོད༌ནའང༌། ཁྱེད་ཀྱི་ཐུགས་སྲས་རྣམས་ཀྱིས་སྨྱུང་གནས་མི་སྲུང་བ་ཅི་ཞེས་ཞུས་པ༌ན།
MAT 9:15 ཁོང་གིས་དེ་རྣམས་ལ་འདི་སྐད༌དུ། སྐུ་མགྲོན་རྣམས་མག་པ་དང་མཉམ་དུ་ཡོད་དུས་ཡིད༌སྐྱོའམ། འོན་ཀྱང་མག་པ་དེ་ཁོ་ཚོ་དང་ཁ་འབྲལ་བའི་དུས་ཤིག་སླེབ་ཡོང༌སྟེ། དུས་དེར་ཁོ་ཚོས་སྨྱུང་གནས་བསྲུང་ངེས༌ཡིན།
MAT 9:16 མི་སུ་ཡིན་ཡང་རས་གསར་པས་ལྭ་རྙིང་པར་ལྷན་པ་མི་རྒྱག༌སྟེ། རས་གསར་པས་ལྷན་པ་བརྒྱབ་ན་ལྭ་རྙིང་པ་དེ་ལས་རལ་ཞིང་སྲུབས་ཀ་ཇེ་ཆེར༌འགྲོའོ།།
MAT 9:17 ཡང་མི་སུ་ཡིན་ཡང་རྒུན་ཆང་གསར་པ་སྐྱི་ཁུག་རྙིང་པའི་ནང་དུ་མི་ལྡུག༌སྟེ། གལ་ཏེ་བླུག་ན་སྐྱི་ཁུག་རྙིང་པ་རལ་ཏེ་རྒུན་ཆང་བཞུར་འགྲོ་ཞིང་སྐྱི་ཁུག་ཀྱང་བརླག་པར་འགྱུར༌བས། རྒུན་ཆང་གསར་པ་དེ་སྐྱི་ཁུག་གསར་པའི་ནང་དུ་བླུག་ན་ད་གཟོད་དེ་གཉིས་ཀ་བརླག་པར་མི་འགྱུར་ཞེས་གསུངས༌སོ།།
MAT 9:18 སྐྱབས་མགོན་ཡེ་ཤུས་དེ་སྐད་གསུང་བའི་དུས༌སུ། ཆོས་ཁང་གི་དབུ་འཛིན་པ་ཞིག་ཡོང་ནས་ཁོང་ལ་ཕྱག་བཙལ་ཏེ། ངའི་བུ་མོ་ཅང་མ་འགོར་བའི་སྔོན་ལ་ཤི༌བས། ཁྱེད་རང་ཕེབས་ནས་ཁོ་མོའི་ལུས་ལ་ཕྱག་བཞག༌ན། བུ་མོ་སླར་གསོན་པར་ངེས་ཞེས་ཞུས་པ༌དང༌།
MAT 9:19 སྐྱབས་མགོན་ཡེ་ཤུ་ཡར་བཞེངས་ཏེ་ཐུགས་སྲས་རྣམས་དང་མཉམ་དུ་ཁོའི་རྗེས་སུ་འབྲངས་ནས་ཕེབས༌སོ།།
MAT 9:20 དེའི༌ཚེ། ཁྲག་འཛིར་བའི་མོ་ནད་བྱུང་སྟེ་ལོ་བཅུ་གཉིས་འགོར་བའི་བུད་མེད་ཅིག་ཁོང་གི་སྐུ་རྒྱབ་ཏུ་ཡོང༌སྟེ། ཁོང་གི་ན་བཟའི་འདབས་ཁར༌རེག
MAT 9:21 རྒྱུ་མཚན་ནི་ཁོ་མོའི་སེམས༌སུ། ངས་ཁོང་གི་ན་བཟའ་ལ་རེག༌ན། ང་རང་ནད་ལས་ཐར་ངེས་ཡིན་བསམས་པའི་ཕྱིར༌རོ།།
MAT 9:22 སྐྱབས་མགོན་ཡེ་ཤུ་ཕྱིར་འཁོར་ནས་བུད་མེད་དེར་གཟིགས་ཤིང་འདི་སྐད༌དུ། བུ༌མོ། སེམས་བདེ་བར༌གྱིས། ཁྱོད་ཀྱི་དད་པས་ཁྱོད་རང་བསྐྱབས་པ་ཡིན་ཞེས་གསུངས་མ་ཐག་ཏུ་བུད་མེད་དེ་ནད་ལས་ཐར༌རོ།།
MAT 9:23 ཁོང་རྣམས་ཆོས་ཁང་གི་དབུ་འཛིན་པའི་ཁྱིམ་དུ་སླེབས་པ༌དང༌། གླིང་བུ་འབུད་མཁན་དང་མི་ཚོགས་ཀྱིས་འུར་རྒྱག་བཞིན་པ་གཟིགས་ཏེ་འདི་སྐད༌དུ།
MAT 9:24 ཕར་སོང༌ཞིག བུ་མོ་འདི་ཤི་བ་མིན་པར་གཉིད་འདུག་ཅེས་གསུངས་པ༌ལ། མི་དེ་རྣམས་ཀྱིས་ཁོང་ལ་འཕྱ་དགོད༌བྱས།
MAT 9:25 འོན་ཀྱང་ཁོང་གིས་མི་ཚོགས་ཕྱི་རུ་བསྐྲད༌རྗེས། དབུ་འཛིན་པའི་ཁྱིམ་ནང་དུ་ཕེབས་ཤིང་བུ་མོ་དེའི་ལག་པར་འཇུས་པ་དང་བུ་མོ་ཡར་ལངས༌སོ།།
MAT 9:26 ཁོང་གིས་མཛད་པའི་དོན་ནི་ཡུལ་དེའི་ཕྱོགས་ཀུན་ཏུ་ཁྱབ༌བོ།།
MAT 9:27 སྐྱབས་མགོན་ཡེ་ཤུ་གནས་དེ་ནས་ཡུལ་གཞན་དུ་ཕེབས་པའི་དུས༌སུ། ལོང་བ་གཉིས་ཁོང་གི་རྗེས་སུ་འབྲངས་ཏེ་སྐད་ཆེན༌པོས། ཀྱེ། དཱ་བིད་ཀྱི་རིགས༌སྲས། ངེད་གཉིས་ལ་སྙིང་རྗེས་གཟིགས་རོགས་ཞེས་ཞུས་པ༌ལ།
MAT 9:28 ཁོང་ཉིད་ཁང་པའི་ནང་དུ་ཕེབས་པ༌ན། ལོང་བ་དེ་གཉིས་ཀྱང་ཁོང་གི་དྲུང་དུ་ཡོང་བ༌དང༌། སྐྱབས་མགོན་ཡེ་ཤུས་མི་དེ་གཉིས་ལ་འདི་སྐད༌དུ། བདག་གིས་ཁྱོད་གཉིས་ཀྱི་མིག་ཟུང་གསོ་ནུས་པར་ཁྱོད་གཉིས་ཡིད་ཆེས་སམ་ཞེས་གསུངས་པ༌ན། དེ་གཉིས་ན༌རེ། གཙོ་བོ༌ལགས། ཁྱེད་ལ་ཡིད་ཆེས་པ་ཡིན་ཞེས་ཞུས་པ༌དང༌།
MAT 9:29 ཁོང་གིས་མི་དེ་གཉིས་ཀྱི་མིག་ཟུང་ལ་ཕྱག་གིས་རེག༌སྟེ། ཁྱོད་གཉིས་ཀྱི་དད་པ་བཞིན་དུ་གྲུབ་གྱུར་ཅིག་ཅེས་གསུངས་མ་ཐག༌ཏུ།
MAT 9:30 དེ་གཉིས་ཀྱི་མིག་ཟུང་གིས་མཐོང་ཐུབ་པར༌གྱུར། སྐྱབས་མགོན་ཡེ་ཤུས་མི་དེ་གཉིས་ལ་འདི་སྐད༌དུ། ཁྱོད་གཉིས་ཀྱིས་གཟབ་པར༌གྱིས། དོན་འདི་མི་གཞན་སུ་ལའང་ཤེས་སུ་འཇུག་མི་རུང་ཞེས་ནན་གྱིས་བསྐུལ་ཞིང་བཀའ་གནང༌ཡང༌།
MAT 9:31 ཁོ་གཉིས་ཕྱི་རོལ་ཏུ་སོང་ནས་ཁོང་གི་གནས་ཚུལ་ཡུལ་དེའི་ཕྱོགས་ཀུན་ཏུ་བསྒྲགས༌སོ།།
MAT 9:32 མི་དེ་གཉིས་ཕྱི་རོལ་ཏུ་འགྲོ་བའི་དུས༌སུ། མི་འགའ་ཞིག་གིས་གདོན་འདྲེས་བཟུང་བའི་ལྐུགས་པ་ཞིག་ཁོང་གི་དྲུང་དུ་ཁྲིད་ཡོང་བ༌དང༌།
MAT 9:33 ཁོང་གིས་གདོན་འདྲེ་དེ་ཕྱིར་བསྐྲད་པ་དང་ལྐུགས་པས་སྐད་ཆ་སྨྲ་ནུས་པར་གྱུར༌པས། གནས་དེར་ཚོགས་པའི་མི་རྣམས་ངོ་མཚར་སྐྱེས༌ཏེ། ཡེས་ར་ཨེལ་གྱི་ཡུལ་ནས་དོན་འདི་འདྲ་ཞིག་གཏན་ནས་མཐོང་མ་མྱོང་ཞེས༌སྨྲས།
MAT 9:34 འོན་ཀྱང་ཕ་རུ་ཤི་པ་རྣམས་ན༌རེ། ཁོས་བདུད་ཀྱི་རྒྱལ་པོར་བརྟེན་ནས་གདོན་འདྲེ་སྐྲོད་བཞིན་འདུག་ཅེས་སྨྲས༌སོ།།
MAT 9:35 སྐྱབས་མགོན་ཡེ་ཤུ་གྲོང་ཁྱེར་དང་ཡུལ་སྡེ་ཀུན་ཏུ་ཕེབས༌ཤིང༌། ཆོས་ཁང་དག་ནས་ཆོས་གསུངས་ཤིང་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་བསྒྲགས་པ༌དང༌། ནད་རིགས་དང་ལུས་ཟུངས་ཞན་པ་སྣ་ཚོགས་ཀྱང་གསོས༌སོ།།
MAT 9:36 ཡང་ཁོང་གིས་མི་རྣམས་ཀྱི་ཡིད་གདུང་ཞིང་ཉམ་ཐག་པའི་ཚུལ་ནི་རྫི་བོ་མེད་པའི་ལུག་དང་འདྲ་བར་གཟིགས་ཏེ་ཐུགས་ལ་སྙིང་རྗེ་འཁྲུངས༌ནས།
MAT 9:37 ཐུགས་སྲས་རྣམས་ལ་འདི་སྐད༌དུ། སྟོན་ཐོག་ཤིན་ཏུ་མང་ཡང་སྡུད་མཁན་ཉུང༌བས།
MAT 9:38 སྟོན་ཐོག་གི་བདག་པོ་ལ་ཁོང་ཉིད་ཀྱི་སྟོན་ཐོག་བསྡུ་བའི་ཕྱིར་དུ་སྡུད་མཁན་རྣམས་མངག་པར་ཞུས་ཤིག་ཅེས་གསུངས༌སོ།།
MAT 10:1 སྐྱབས་མགོན་ཡེ་ཤུས་ཐུགས་སྲས་བཅུ་གཉིས་པོ་རང་ཉིད་ཀྱི་དྲུང་དུ་བོས༌ཏེ། ཁོ་རྣམས་ལ་གདོན་འདྲེ་ཕྱིར་སྐྲོད་པ་དང་ནད་རིགས་དང་ལུས་ཟུངས་ཞན་པ་སྣ་ཚོགས་གསོ་བར་བྱེད་པའི་དབང་གནང༌ངོ༌།།
MAT 10:2 སྐུ་ཚབ་པ་བཅུ་གཉིས་ཀྱི་མཚན་ནི་སི་མོན་ཞེས་ཀྱང་འབོད་པའི་པེ་ཏྲོ༌དང༌། དེའི་སྤུན་ཨན་དྲི༌ཡཱ། ཟེ་བད་ཡཱ་ཞེས་བྱ་བའི་བུ་ཡ་ཀོབ་དང་དེའི་སྤུན་ཡོ་ཧ༌ནན།
MAT 10:3 ཕི་ལིབ༌དང༌། པཱར་ཐོ་ལོ༌མཱ། ཐོ༌མཱ། ཁྲལ་ལེན་མཁན་མད༌ཐཱ། ཨལ་ཕཱའི་བུ་ཡ༌ཀོབ། ཐད༌དཱ།
MAT 10:4 བརྩོན་འགྲུས་ཅན་སི་མོན་དང་ཕྱིས་སུ་ཁོང་ལ་ངོ་ལོག་བྱེད་མཁན་ཨི་སི་ཀར་རེའི་ཡུ་དཱ་བཅས༌སོ།།
MAT 10:5 སྐྱབས་མགོན་ཡེ་ཤུས་ཐུགས་སྲས་བཅུ་གཉིས་པོ་མངགས་ཤིང་དེ་རྣམས་ལ་བཀའ་བསྩལ་ཏེ་འདི་སྐད༌དུ། ཁྱོད་རྣམས་ཕྱི་ཕྱོགས་པའི་ལམ་དུ་མ༌འགྲོ། སཱ་མར་ཡ་པའི་གྲོང་རྡལ་དུའང་མ༌འགྲོའོ།།
MAT 10:6 འོན་ཀྱང་ཡེས་ར་ཨེལ་གྱི་ཁྱིམ་རྒྱུད་དེ་བོར་ཟིན་པའི་ལུག་རྣམས་ཀྱི་གམ་དུ་སོང༌ཞིག
MAT 10:7 ཡང་ཁྱོད་རྣམས་འགྲོ་བའི་དུས༌སུ། ནམ་མཁའི་རྒྱལ་སྲིད་སླེབས་ལ་ཉེའོ་ཞེས་སྒྲོགས༌ཤིག
MAT 10:8 ནད་པ་རྣམས་གསོ་བར༌གྱིས། གཤིན་པོ་རྣམས་སླར་གསོན་དུ༌ཆུག མཛེ་ནད་ཅན་རྣམས་གཙང་མར༌གྱིས། གདོན་འདྲེ་རྣམས་ཕྱིར་སྐྲོད༌ཅིག ཁྱོད་ཅག་ལ་རིན་མི་དགོས་པར་ཐོབ༌པས། མི་གཞན་ལའང་རིན་མི་ལེན་པར་སྦྱིན་པར༌གྱིས།
MAT 10:9 ཁྱོད་རྣམས་ཀྱིས་དངུལ་ཁུག་ནང་དུ་གསེར་དངུལ་ཟངས་སོགས་མ་འཁྱེར༌ཅིག
MAT 10:10 ལམ་ལ་ཆས༌སྐབས། ཁུག་མ༌དང༌། ནང་གོས་ལྷག༌མ། བསིལ༌ལྷམ། མཁར་བ་སོགས་ཅི་ཡང་མ་འཁྱེར༌ཅིག རྒྱུ་མཚན་ནི་ལས་ཀ་བྱེད་མཁན་ལ་ཁ་ཟས་འཐོབ་འོས་པ༌ཡིན།
MAT 10:11 ཁྱོད་རྣམས་གྲོང་རྡལ་གང་དང་ཡུལ་སྡེ་གང་དུ་ཕྱིན༌ནའང༌། གནས་དེ་རུ་སུ་ཞིག་འོས་པར་རྩད་བཅད༌དེ། ཕྱིར་འགྲོ་བའི་བར་དུ་ཁྱིམ་དེར་སྡོད༌ཅིག
MAT 10:12 ཁྱིམ་ཚང་དེ་ལ་སོང༌རྗེས། ཁྱིམ་མི་རྣམས་ལ་འཚམས་འདྲི་ཞུས༌ཤིག
MAT 10:13 གལ་ཏེ་ཁྱིམ་ཚང་དེར་ཞི་བདེ་འཐོབ་འོས༌ན། ཁྱོད་ཅག་གི་ཞི་བདེ་ནི་ཁྱིམ་ཚང་དེ་ལ་ལྡན་པར་འགྱུར༌ཞིང༌། གལ་ཏེ་ཁྱིམ་ཚང་དེར་ཞི་བདེ་འཐོབ་མི་འོས༌ན། ཁྱོད་ཅག་གི་ཞི་བདེ་དེ་ནི་སླར་ཡང་ཁྱོད་རྣམས་ལ་ལྡན་པར༌འགྱུར།
MAT 10:14 སུ་ཞིག་གིས་ཁྱོད་རྣམས་ལ་སྣེ་ལེན་མི་བྱ༌ཞིང༌། ཁྱོད་ཅག་གིས་སྨྲས་པ་ལའང་མི་མཉན༌ན། ཁྱོད་རྣམས་ཁྱིམ་ཚང་དེའམ་གྲོང་རྡལ་དེ་དང་ཁ་འབྲལ་བའི་དུས་སུ་རྐང་པའི་སྟེང་གི་ས་རྡུལ་སྤྲུགས༌ཤིག
MAT 10:15 བདག་གིས་ཁྱོད་རྣམས་ལ་བདེན་པར་སྨྲ༌སྟེ། མ་འོངས་པར་ཉེས་ཆད་གཅོད་པའི་ཉིན་དེ་སླེབས་ཚེ། སཱ་དོམ་དང་གཱ་མོ་ར་ཡུལ་གཉིས་ལས་ཀྱང་གྲོང་རྡལ་དེ་ལ་ཉེས་ཆད་ལྕི་མོ་འཕོག་ངེས༌ཡིན།
MAT 10:16 བདག་གིས་ཁྱོད་རྣམས་སྤྱང་ཁྱུའི་ཁྲོད་དུ་ལུག་རྣམས་གཏོང་བ་ལྟར་མངག་པར་བྱེད༌པས། ཁྱོད་རྣམས་སྦྲུལ་ལྟར་བློ་རིག་མྱུར་ཞིང་ཕུག་རོན་བཞིན་དུ་ཞི་ཞིང་དུལ་བར༌གྱིས།
MAT 10:17 ཁྱོད་ཅག་གིས་མི་རྣམས་ལ་དོགས་ཟོན་བྱེད་པར༌གྱིས། རྒྱུ་མཚན་ནི་དེ་དག་གིས་ཁྱོད་རྣམས་ཁྲིམས་རར་སྤྲོད་ཅིང་ཆོས་ཁང་ནས་རྟ་ལྕག་གིས་གཞུ་ངེས་པར་མ༌ཟད།
MAT 10:18 བདག་གི་རྐྱེན་གྱིས་ཁྱོད་རྣམས་སྤྱི་དཔོན་དང་རྒྱལ་པོ་རྣམས་ཀྱི་དྲུང་དུའང་ཁྲིད༌ནས། དེ་དག་དང་ཕྱི་ཕྱོགས་པ་རྣམས་ལ་བདེན་དཔང་བྱེད་པར་འགྱུར༌རོ།།
MAT 10:19 འོན་ཀྱང་དེ་དག་གིས་ཁྱོད་རྣམས་སྤྲོད་པའི་དུས༌སུ། ཁྱོད་ཅག་གིས་ཅི་ལྟར་སྨྲ་བ་དང་ཅི་ཞིག་སྨྲ་དགོས་པར་སེམས་ཁྲལ་མ་བྱེད༌ཅིག ཁྱོད་རྣམས་ཀྱིས་ཅི་ཞིག་སྨྲ་དགོས་པ་ནི་དུས་དེར་ཁྱོད་ཅག་ལ་གནང་ངེས༌ཡིན།
MAT 10:20 རྒྱུ་མཚན་ནི་གཏམ་སྨྲ་མཁན་ཁྱོད་རྣམས་རང་ཉིད་མ་ཡིན༌པར། ཁྱོད་ཅག་གི་ཡབ་ཀྱི་ཐུགས་ཉིད་ཀྱིས་ཁྱོད་ཅག་བརྒྱུད་ནས་གསུང་བ་ཡིན༌ནོ།།
MAT 10:21 ཡང་སྤུན་གྱིས་སྤུན་དང་ཕ་ཡིས་བུ་ཕྲུག་ཀྱང་འཆི་ལམ་དུ་འཇུག་པར་ངེས༌ལ། བུ་ཕྲུག་དག་གིས་ཀྱང་ཕ་མ་དགྲ་རུ་བཟུང་ནས་གསོད་པར༌འགྱུར།
MAT 10:22 ངའི་མིང་གི་རྐྱེན་གྱིས་མི་ཐམས་ཅད་ཁྱོད་ཅག་ལ་སྡང་བར་འགྱུར༌ནའང༌། མཇུག་མཐའི་བར་དུ་བཟོད་བསྲན་བྱེད་མཁན་དེ་ལ་ཐར་པ་འཐོབ་ངེས༌ཡིན།
MAT 10:23 དེ་དག་གིས་ཁྱོད་རྣམས་ལ་གྲོང་རྡལ་གཅིག་ནས་གནོད་འཚེ་བཏང༌ཚེ། ཁྱོད་ཅག་གྲོང་རྡལ་གཞན་ལ་འབྲོ་བར༌གྱིས། བདག་གིས་ཁྱོད་ཅག་ལ་བདེན་པར་སྨྲ༌སྟེ། ཁྱོད་རྣམས་ཡེས་ར་ཨེལ་ཡུལ་གྱི་གྲོང་རྡལ་ཀུན་ལ་འགྲིམ་མ་ཚར་བའི་སྔོན་དུ་མིའི་བུ་ཕྱིར་སླེབ་པར་འགྱུར༌རོ།།
MAT 10:24 སློབ་བུ་ནི་རང་གི་སློབ་དཔོན་ལས་ཆེན་པོ་མ་ཡིན༌ལ། གཡོག་པོའང་རང་གི་བདག་པོ་ལས་ཆེན་པོ་མ༌ཡིན།
MAT 10:25 སློབ་བུ་ནི་རང་གི་སློབ་དཔོན་དང་འདྲ་བ་ཙམ་དུ་འགྱུར་སྲིད༌ཅིང༌། གཡོག་པོ་ནི་རང་གི་བདག་པོ་དང་འདྲ་བ་ཙམ་དུའང་འགྱུར༌སྲིད། མི་རྣམས་ཀྱིས་ཁྱིམ་བདག་ལ་ཁྱོད་ནི་པེ་ཨལ་བཟི་པད་ ཡིན་ཞེས་འཕྱ་སྨོད་བྱེད༌ན། ཁོའི་ཁྱིམ་མི་རྣམས་ལ་དེ་ལས་ལྷག་པའི་འཕྱ་སྨོད་བྱེད་པར་འགྱུར༌ཨང༌།
MAT 10:26 དེའི༌ཕྱིར། ཁྱོད་ཅག་མི་དེ་རྣམས་ལ་འཇིགས་མི་དགོས༌ཏེ། སྦས་པའི་དོན་ཐམས་ཅད་མི་མངོན་པ་ཅི་ཡང་མེད༌ལ། གསང་བའི་དོན་ཐམས་ཅད་ཀྱང་མི་ཤེས་པ་ཅི་ཡང༌མེད།
MAT 10:27 བདག་གིས་ཟུར་དུ་ཁྱོད་ཅག་ལ་ཅི་ཞིག་སྨྲས་པ༌དེ། ཁྱོད་རྣམས་ཀྱིས་མངོན་གསལ་དུ་སྨྲོས༌ཤིག ཡང་བདག་གིས་ཁྱོད་ཅག་གི་རྣ་བར་ཤུབ་ཤུབ་ཏུ་ཅི་ཞིག་སྨྲས་པ་དེའང་ཁང་པའི་ཐོག་ནས་སྒྲོགས༌ཤིག
MAT 10:28 ལུས་པོ་གཞོམ་ཡང་རྣམ་ཤེས་མེད་པར་བཟོ་མི་ནུས་པ་དེ་རྣམས་ལ་ཁྱོད་ཅག་མ་འཇིགས༌ཤིག འོན༌ཀྱང༌། ལུས་པོ་དང་རྣམ་ཤེས་གཉིས་ཀ་དམྱལ་བའི་གནས་སུ་མེད་པར་མཛད་ནུས་པ་དེ་ཉིད་ཁོ་ན་ལ་འཇིགས་དགོས༌སོ།།
MAT 10:29 ལར་བྱེའུ་གཉིས་ཀྱི་རིན་ཐང་ནི་དོང་ཙེ་གཅིག་མ་ཡིན༌ནམ། ཁྱོད་རྣམས་ཀྱི་ཡབ་ཀྱིས་མི་མཁྱེན་པར་དེ་རྣམས་ལས་གཅིག་ཀྱང་སར་ལྷུང་བར་མི་འགྱུར༌ལ།
MAT 10:30 ཁོང་གིས་ཁྱོད་རྣམས་ཀྱི་སྐྲའི་ཉག་མ་རེ་རེ་ཡང་གྲངས་སུ་བརྩིས་ཡོད༌པས།
MAT 10:31 འཇིགས་མི་དགོས༌ཏེ། བྱེའུ་མང་པོ་ལས་ཀྱང་ཁྱོད་རྣམས་ལ་རིན་ཐང་ཆེན་པོ་ལྡན༌ནོ།།
MAT 10:32 དེའི༌ཕྱིར། སུ་ཞིག་གིས་མི་གཞན་གྱི་མདུན་དུ་ང་རང་ཁས་བླངས༌ན། བདག་གིས་ཀྱང་ནམ་མཁའི་ཞིང་ཁམས་སུ་བཞུགས་པའི་ང་ཡི་ཡབ་ཀྱི་དྲུང་དུ་མི་དེ་ཁས་ལེན་པར༌འགྱུར།
MAT 10:33 འོན་ཀྱང་སུ་ཞིག་གིས་མི་གཞན་གྱི་མདུན་དུ་ང་རང་ཁས་མ་བླངས༌ན། བདག་གིས་ཀྱང་ནམ་མཁའི་ཞིང་ཁམས་སུ་བཞུགས་པའི་ང་ཡི་ཡབ་ཀྱི་དྲུང་དུ་མི་དེ་ཁས་མི་ལེན༌ནོ།།
MAT 10:34 ཁྱོད་རྣམས་ཀྱིས་ང་རང་འཇིག་རྟེན་འདིར་ཡོང་བ་ནི་མི་རྣམས་ལ་ཞི་བདེ་བསྐྱལ་ཡོང་བའི་ཆེད་དུ་ཡིན་པར་མ་སེམས༌ཤིག ངས་མི་རྣམས་ལ་ཞི་བདེ་བསྐྱལ་ཡོང་བ་མ་ཡིན་པར་རལ་གྲི་བསྐྱལ་བའི་ཕྱིར་ཡོང༌ངོ༌།།
MAT 10:35 ང་ནི་བུ་དང༌ཕ། བུ་མོ་དང༌མ། མནའ་མ་དང་སྒྱུག་མོ་རྣམས་ཕན་ཚུན་དགྲ་རུ་ལང་བའི་ཕྱིར་ཡོང་བ༌ཡིན།
MAT 10:36 མི་རྣམས་ཀྱི་དགྲ་བོ་ནི་རང་གི་ཁྱིམ་མི་དག་ཡིན་པར༌འགྱུར།
MAT 10:37 ཡང་སུ་ཞིག་གིས་བདག་ལས་ཀྱང་ཁོ་རང་གི་ཕ་མར་གཅེས༌ན། མི་དེ་ནི་བདག་གི་རྗེས་འབྲང་པ་བྱ་མི་འོས༌ཤིང༌། སུ་ཞིག་གིས་བདག་ལས་ཀྱང་རང་གི་བུ་ཕྲུག་ལ་གཅེས༌ན། མི་དེའང་བདག་གི་རྗེས་འབྲང་པ་བྱ་མི༌འོས།
MAT 10:38 ཡང་སུ་ཞིག་གིས་རང་གི་ཤིང་རྒྱ་གྲམ་ཁུར་ནས་བདག་གི་རྗེས་སུ་འབྲང་བ་མིན་ན་མི་དེའང་བདག་གི་རྗེས་འབྲང་པ་བྱ་མི༌འོས།
MAT 10:39 ཡང་མི་སུ་ལའང་རང་སྲོག་ཐོབ་པ་དེས་རང་སྲོག་འཆོར༌ཞིང༌། མི་སུས་ཀྱང་བདག་གི་དོན་དུ་རང་སྲོག་འདོར་བ་དེར་རང་སྲོག་འཐོབ་ངེས༌སོ།།
MAT 10:40 སུ་ཞིག་གིས་ཁྱོད་རྣམས་ལ་བསུ་བ་བྱས༌ན། དེ་ནི་ང་རང་ལ་བསུ་བ་བྱས་པ་ཡིན༌ལ། ཡང་སུ་ཞིག་གིས་ང་རང་ལ་བསུ་བ་བྱས༌ན། དེ་ནི་ང་རང་མངགས་མཁན་ལ་བསུ་བ་བྱས་པ༌ཡིན།
MAT 10:41 སུ་ཞིག་གིས་ལུང་སྟོན་པ་ནི་ལུང་སྟོན་པ་ཞིག་ཡིན་པའི་ཕྱིར་བསུ་བ་བྱས༌ན། མི་དེ་ལ་ལུང་སྟོན་པའི་བྱ་དགའ་འཐོབ་ངེས༌ཡིན། སུ་ཞིག་གིས་མི་གཞུང་དྲང་ལ་དེའི་མིང་གི་ཕྱིར་བསུ་བ་བྱས༌ན། མི་དེ་ལའང་མི་གཞུང་དྲང་གི་བྱ་དགའ་འཐོབ་ངེས༌ཡིན།
MAT 10:42 བདག་གིས་ཁྱོད་རྣམས་ལ་བདེན་པར་སྨྲ༌སྟེ། སུ་ཞིག་གིས་བུ་ཕྲུག་འདི་དག་ལས་གཅིག་ལ་བདག་གི་རྗེས་འབྲང་པ་ཡིན་པའི་ཕྱིར་ཆུ་གྲང་མོ་ཕོར་བ་གང་བྱིན༌ནའང༌། མི་དེའི་བྱ་དགའ་ཅི་ནས་ཀྱང་སྟོང་བར་མི་འགྱུར་ཞེས་གསུངས༌སོ།།
MAT 11:1 སྐྱབས་མགོན་ཡེ་ཤུས་ཐུགས་སྲས་བཅུ་གཉིས་ལ་བཀའ་གནང་ཚར་རྗེས་ཡུལ་དེ་དང་ཁ་བྲལ༌ཏེ། ཁོ་རྣམས་ཀྱི་གྲོང་ཁྱེར་དག་ཏུ་ཆོས་གསུང་བ་དང་ཆོས་བསྒྲག་པར་ཕེབས༌སོ།།
MAT 11:2 ཁྲུས་གསོལ་མཁན་ཡོ་ཧ་ནན་གྱིས་བཙོན་ཁང་ནས་སྐྱབས་མགོན་མཱ་ཤི་ཀའི་མཛད་པ་རྣམས་ཐོས་ནས་རང་གི་སློབ་མ་འགའ་མངགས༌ཏེ།
MAT 11:3 སྐྱབས་མགོན་ཡེ་ཤུ་ལ་འདི་ལྟར་ཞུས་པ༌སྟེ། མ་འོངས་པར་ཕེབས་ངེས་པ་དེ་ཉིད་ནི་ཁྱེད་རང་ཡིན༌ནམ། ཡང་ན་ངེད་ཅག་གིས་ད་དུང་གཞན་ཞིག་ལ་བསྒུག་དགོས་པ་ཡིན་ཞེས་པ༌ལ།
MAT 11:4 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཕྱིར་སོང༌ནས།
MAT 11:5 ལོང་བའི་མིག་གིས་མཐོང་ཞིང་གྱོལ་པོ་རྣམས་འགྲོ་བ༌དང༌། མཛེ་ནད་བསལ་ཞིང་འོན་པའི་རྣ་བས་ཐོས་པ༌དང༌། གཤིན་པོ་རྣམས་ཀྱང་སླར་གསོན་པོར་གྱུར་པ༌དང༌། དབུལ་འཕོངས་རྣམས་ལ་འཕྲིན་བཟང་བསྒྲགས་པ་སོགས་ཁྱོད་རྣམས་ཀྱི་མཐོང་ཐོས་དེ་རྣམས་ཡོ་ཧ་ནན་ལ་ཤོད༌ཅིག
MAT 11:6 བདག་གི་རྐྱེན་གྱིས་དད་པ་མི་ཉམས་པ་རྣམས་བདེའོ་ཞེས་གསུངས༌སོ།།
MAT 11:7 མི་དེ་རྣམས་ཕྱིར་སོང༌རྗེས། སྐྱབས་མགོན་ཡེ་ཤུས་ཡོ་ཧ་ནན་གྱི་སྐོར་མི་ཚོགས་ལ་འདི་སྐད་དུ་གསུངས་པ༌སྟེ། དེ་སྔོན་ཁྱོད་རྣམས་དབེན་སྟོང་དུ་ཅི་ཞིག་ལ་བལྟ་རུ་སོང༌ངམ། རླུང་གིས་གཡོས་པའི་འདམ་རྩྭ་ཞིག་ལ་བལྟ་རུ་སོང་བ་ཡིན༌ནམ།
MAT 11:8 མ་གཞི་ཁྱོད་རྣམས་ཅི་ཞིག་ལ་བལྟ་རུ་སོང༌ངམ། ཡང་ན་སྲབ་ཅིང་འཇམ་པའི་གོས་ཆེན་གྱོན་པའི་མི་ཞིག་ལ་བལྟ་རུ་སོང༌ངམ། ལུས་ལ་སྲབ་ཅིང་འཇམ་པའི་གོས་ཆེན་གྱོན་མཁན་རྣམས་ནི་རྒྱལ་པོའི་ཕོ་བྲང་དུ་ཡོད་པ༌ཡིན།
MAT 11:9 མ་གཞི་ཁྱོད་རྣམས་ཅི་ཞིག་ལ་བལྟ་རུ་སོང༌ངམ། ཡང་ན་ལུང་སྟོན་པ་ཞིག་ལ་བལྟ་རུ་སོང༌ངམ། ལགས༌སོ། །བདག་གིས་ཁྱོད་རྣམས་ལ་སྨྲ༌སྟེ། ཡོ་ཧ་ནན་ནི་ལུང་སྟོན་པ་ལས་མཆོག་ཏུ་གྱུར་པ༌ཡིན།
MAT 11:10 དེ་ལ་གསུང་རབ་ཀྱི་མདོ་ལས་ཇི་སྐད༌དུ། བདག་གི་ཕོ་ཉ་ཁྱོད་ཀྱི་མདུན་དུ༌མངགས།། ཁྱོད་ཀྱི་ལམ་ནི་གྲ་སྒྲིག་བྱེད་ལ༌ལྟོས།། ཞེས་བཀོད་པ་དེ་ནི་ཁོའི་སྐོར་ཡིན༌ནོ།།
MAT 11:11 ཡང་བདག་གིས་ཁྱོད་རྣམས་ལ་བདེན་པར་སྨྲ༌སྟེ། མ་ཡིས་བཙས་པ་ཐམས་ཅད་ཀྱི་ཁྲོད་ནས་ཁྲུས་གསོལ་མཁན་ཡོ་ཧ་ནན་ལས་མཆོག་ཏུ་གྱུར་པ་གཅིག་ཀྱང༌མེད། འོན་ཀྱང་ནམ་མཁའི་རྒྱལ་སྲིད་ཀྱི་ནང་དུ་ཐམས་ཅད་ལས་ཆུང་བ་དེའང་ཡོ་ཧ་ནན་ལས་ཆེན་པོ་ཡིན།
MAT 11:12 ཁྲུས་གསོལ་མཁན་ཡོ་ཧ་ནན་གྱི་དུས་ནས་ད་ལྟའི་བར༌དུ། ནམ་མཁའི་རྒྱལ་སྲིད་ལ་གཞན་དག་གིས་ངོ་རྒོལ་དྲག་པོ་བྱེད༌ཅིང༌། གདུག་རྩུབ་ཅན་རྣམས་ཀྱིས་ཀྱང་དེ་བཙན་བཟུང་བྱེད་པ༌ཡིན།
MAT 11:13 ཡོ་ཧ་ནན་གྱི་བར་དུ་བཀའ་ཁྲིམས་དང་ལུང་སྟོན་པ་ཐམས་ཅད་ཀྱིས་ལུང་བསྟན་གནང༌བའོ།།
MAT 11:14 གལ༌ཏེ། ཁྱོད་ཅག་གིས་ཡིད་ཆེས་པར་འདོད༌ན། ཡོ་ཧ་ནན་ནི་མ་འོངས་པར་ཕེབས་ངེས་པའི་ཨེ་ལི་ཡཱ༌ཡིན།
MAT 11:15 ཡང་རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན༌ཅིག།
MAT 11:16 བདག་གིས་མི་རབས་འདི་ནི་གང་ཞིག་ལ་བསྡུར་བར༌བྱའམ། དེ་རྣམས་ནི་ཁྲོམ་སྲང་དུ་སྡོད་པའི་བྱིས་པ་རྣམས་ཀྱིས་རང་གི་གྲོགས་པོ་རྣམས་བོས༌ཏེ།
MAT 11:17 ངེད་རྣམས་ཀྱིས་ཁྱོད་རྣམས་ལ་གླིང་བུ་བུས་ཀྱང་ཁྱོད་རྣམས་བྲོ་མི༌འཁྲབ། ངེད་རྣམས་ཀྱིས་སྐྱོ་གླུ་བླངས་ཀྱང་ཁྱོད་རྣམས་ངུ་བ་མིན་ཞེས་ཟེར་བ་དང༌འདྲའོ།།
MAT 11:18 དེ་ལྟར་ཡོ་ཧ་ནན་ཡོང་ནས་མ་ཟོས་མ་འཐུངས༌ཤིང༌། མི་རྣམས་ཀྱིས་ཁོ་རང་གདོན་འདྲེས་བཟུང་འདུག་ཅེས་ཟེར་བ༌དང༌།
MAT 11:19 དེ་ནས་མིའི་བུ་ཕེབས་ཏེ་བཟའ་བཏུང་ལོངས་སུ་སྤྱད༌ཅིང༌། མི་རྣམས་ཀྱིས་མི་འདི་ནི་ཤ་ཆང་ལ་རྔམ་པ་ཞིག་ཡིན༌ལ། ཁྲལ་ལེན་མཁན་དང་སྡིག་ཅན་རྣམས་ཀྱི་གྲོགས་པོ་ཡིན་ཟེར༌མོད། འོན་ཀྱང་ཤེས་རབ་ནི་དེའི་འབྲས་བུ་ལས་བདེན་ཅིང་ཡང་དག་པ་ཡིན་པར་ར་སྤྲོད་བྱུང་ཞེས་གསུངས༌སོ།།
MAT 11:20 སྐྱབས་མགོན་ཡེ་ཤུས་གྲོང་ཁྱེར་རྣམས་སུ་ངོ་མཚར་ཆེ་བའི་མཛད་པ་གང་མང་བསྟན༌ནའང༌། གྲོང་ཁྱེར་དེ་དག་གིས་འགྱོད་བཤགས་མ་བྱས༌པས། ཁོང་གིས་འདི་སྐད་དུ་བཀའ་བཀྱོན་གནང་བ༌སྟེ།
MAT 11:21 ཀྱེ། ཀོ་ར་ཟིན་དང་པེ་སད་དཱ་ཁྱོད་གཉིས་ལ་ཆག་སྒོ༌འབྱུང༌། རྒྱུ་མཚན་ནི་ཁྱོད་གཉིས་ཀྱི་ནང་དུ་བྱུང་བའི་དོན་ངོ་མཚར་ཅན་དེ༌རྣམས་ཐཱར་དང་ཚི་ཏུན་དུ་བྱུང་བ་ཡིན༌ན། ཡུལ་དེའི་མི་རྣམས་ཀྱིས་སྔར་ནས་འགྱོད་བཤགས་བྱས་པ༌དང༌། ལུས་ལ་རྩིད་རས་གྱོན་ཞིང་མགོ་ལ་ཐལ་བ་གཏོར་བར༌བྱེད།
MAT 11:22 འོན་ཀྱང་བདག་གིས་ཁྱོད་གཉིས་ལ་སྨྲ་བར་བྱ༌སྟེ། ཉེས་ཆད་གཅོད་པའི་ཉིན་མོ་དེ་སླེབས་ཚེ། ཐཱར་དང་ཚི་ཏུན་གཉིས༌ལས་ཁྱོད་གཉིས་ལ་ཉེས་ཆད་ལྕི་མོ་འཕོག་པར་འགྱུར༌རོ།།
MAT 11:23 ཀྱེ། ཀཱ་ཕར་ན་ཧུམ་ཁྱོད་ནི་ནམ་མཁའི་ཞིང་ཁམས་སུ་འདྲེན་པར་འགྱུར་རམ་ཞེ་ན་མི་འདྲེན༌ཏེ། གཤིན་པོའི་གནས་སུ་འཕེན་པར༌འགྱུར། རྒྱུ་མཚན་ནི་ཁྱོད་ལ་བྱུང་བའི་ངོ་མཚར་བའི་མཛད་པ༌རྣམས་སཱ་དོམ་ནས་བྱུང་བ་ཡིན༌ན། གྲོང་ཁྱེར་དེ་ནི་ད་ལྟའི་བར་དུ་གནས་ཡོད་པ༌ཡིན།
MAT 11:24 འོན་ཀྱང་བདག་གིས་ཁྱོད་ཅག་ལ་སྨྲ་བར་བྱ༌སྟེ། ཉེས་ཆད་གཅོད་པའི་ཉིན་མོ་དེ་སླེབས་ཚེ། སཱ་དོམ་ཡུལ་ལས་ཁྱོད་ལ་ཉེས་ཆད་ལྕི་མོ་འཕོག་པར་འགྱུར་ཞེས་གསུངས༌སོ།།
MAT 11:25 དེའི་དུས༌སུ། སྐྱབས་མགོན་ཡེ་ཤུས་འདི་སྐད༌དུ། ཀྱེ། བདག་གི་ཡབ་སྟེ་གནམ་ས་གཉིས་ཀྱི་བདག་པོ༌ལགས། ཁྱེད་ཀྱིས་དོན་འདི་རྣམས་མཁས་པ་དང་བློ་གྲོས་ཅན་ལ་གབ༌ཅིང༌། བྱིས་པ་ལྟ་བུའི་མི་རྣམས་ལ་མངོན་པར་མཛད་པས་བདག་གིས་ཁྱེད་ལ་བསྔགས་པར༌བྱེད།
MAT 11:26 ཀྱེ། ཡབ༌ལགས། དོན་དེ་ལ་ཁྱེད་ཐུགས་ཤིན་ཏུ་དགྱེས་པའི་ཕྱིར་ཡིན་ཞེས་གསུངས༌སོ།།
MAT 11:27 ཡང་འདི་སྐད༌དུ། བདག་གི་ཡབ་ཀྱིས་དོན་ཐམས་ཅད་བདག་ལ་གནང་བ་ཡིན༌ལ། ཡབ་ལས་གཞན་སུ་ཞིག་གིས་ཀྱང་སྲས་ངོ་མི༌ཤེས། སྲས་ཁོང་ཉིད་དང་སྲས་ཀྱིས་ཡབ་སུ་ཡིན་སྟོན་པར་འདོད་པའི་མི་ལས༌གཞན། སུས་ཀྱང་ཡབ་ངོ་མི་ཤེས༌སོ།།
MAT 11:28 དཀའ་སྡུག་ཆེན་པོ་མྱོང་བ་དང་ཁུར་བོ་ལྕི་མོས་མནན་ཡོད་པ་ཐམས་ཅད་བདག་གི་དྲུང་དུ་ཤོག༌དང༌། བདག་གིས་ཁྱོད་རྣམས་ལ་ངལ་གསོ་སྟེར་བར༌བྱའོ།།
MAT 11:29 བདག་གི་གཉའ་ཤིང་ཁུར་ལ་བདག་ནས་སློབས༌དང༌། བདག་ནི་གཤིས་རྒྱུད་འཇམ་ཞིང་སྙེམས་ཆུང༌ཡིན། དེ་ལྟར་བྱས༌ན། ཁྱོད་རྣམས་ཀྱི་སེམས་སུ་ངལ་གསོ་འཐོབ་ངེས༌ཡིན།
MAT 11:30 རྒྱུ་མཚན་ནི་བདག་གི་གཉའ་ཤིང་བདེ་ཞིང་ངའི་ཁུར་བོའང་ཡང་ངོ་ཞེས་གསུངས༌སོ།།
MAT 12:1 དེའི་དུས༌སུ། ངལ་གསོ་བའི་ཉིན་མོར་སྐྱབས་མགོན་ཡེ་ཤུ་ཞིང་བར་བརྒྱུད་ནས་ཕེབས་པ༌དང༌། ཁོང་གི་ཐུགས་སྲས་རྣམས་བཀྲེས་ཏེ་འབྲུ་ཡི་སྙེ་མ་བཏོགས་ནས་ཟོས༌སོ།།
MAT 12:2 ཕ་རུ་ཤི་པ་རྣམས་ཀྱིས་དོན་དེ་མཐོང་ཞིང་ན༌རེ། གཟིགས༌དང༌། ཁྱེད་ཀྱི་ཐུགས་སྲས་རྣམས་ཀྱིས་ངལ་གསོ་བའི་ཉིན༌ལ་བཀའ་ཁྲིམས་དང་འགལ་བའི་ལས་བྱེད་ཀྱིན་འདུག་ཅེས་ཞུས་པ༌དང༌།
MAT 12:3 ཁོང་གིས་དེ་རྣམས་ལ་འདི་སྐད༌དུ། དཱ་བིད་འཁོར་དང་བཅས་པའི་ལྟོ་བ་བཀྲེས་སྐབས་ཅི་ཞིག་བྱས་པ་ཁྱོད་རྣམས་ཀྱིས་བཀླགས་མ་མྱོང༌ངམ།
MAT 12:4 ཁོང་ཅིའི་ཕྱིར་དཀོན་མཆོག་གི་བཞུགས་གནས་སུ་སོང་སྟེ་སྤྱན་བསྟར་བག་ལེབ་ཟོས༌སམ། སྤྱིར་དེ་ནི་དཱ་བིད་འཁོར་དང་བཅས་པས་བཟའ་རུང་བ་ཞིག་མ་ཡིན༌ཏེ། མཆོད་དཔོན་ཁོ་ནས་བཟའ་རུང་བ་ཡིན༌ནོ།།
MAT 12:5 གཞན༌ཡང༌། མཆོད་དཔོན་རྣམས་ཀྱིས་ངལ་གསོ་བའི་ཉིན་མོར་མཆོད་ཁང་ནས་ངལ་གསོའི་ཁྲིམས་དང་འགལ་ནའང་ཉེས་པ་མེད་ཅེས་བཀའ་ཁྲིམས་ནང་དུ་ཡོད་པ་ཁྱོད་རྣམས་ཀྱིས་མ་བཀླགས༌སམ།
MAT 12:6 བདག་གིས་ཁྱོད་རྣམས་ལ་སྨྲ་བར་བྱ༌སྟེ། མཆོད་ཁང་ལས་ཀྱང་ཆེ་བ་ཞིག་འདི་རུ༌ཡོད།
MAT 12:7 འོན༌ཀྱང༌། ཁྱོད་རྣམས་ཀྱིས་བདག་ནི་མཆོད་པར་མི་དགའ་ཞིང་སྙིང་རྗེའི་སེམས་ལ་དགའ་ཞེས་གསུངས་པ་དེའི་དོན་རྟོགས༌ན། ཉེས་པ་མེད་པའི་མི་ལ་ཉེས་པ་ཡོད་པར་མི་བྱེད༌དེ།
MAT 12:8 མིའི་བུ་ནི་ངལ་གསོ་བའི་ཉིན་གྱི་གཙོ་བོ་ཡིན་པའི་ཕྱིར་རོ་ཞེས་གསུངས༌སོ།།
MAT 12:9 དེ་ནས་སྐྱབས་མགོན་ཡེ་ཤུ་ཡུལ་དེ་དང་ཁ་བྲལ་ནས་ཁོ་རྣམས་ཀྱི་ཆོས་ཁང་དུ་ཕེབས༌ཤིང༌།
MAT 12:10 དེ་རུ་ལག་པ་ཡ་གཅིག་ཞ་བའི་མི་ཞིག་ཡོད༌དེ། ཕ་རུ་ཤི་པ་རྣམས་ཀྱིས་ཁོང་ལ་སྙད་འཛུགས་པའི༌ཕྱིར། ངལ་གསོ་བའི་ཉིན་མོར་ནད་གསོ་བ་ནི་བཀའ་ཁྲིམས་དང་མཐུན་ནམ་ཞེས་ཞུས་པ༌ལ།
MAT 12:11 ཁོང་གིས་འདི་སྐད༌དུ། ཁྱོད་རྣམས་ལས་སུ་ཞིག་གི་ལུག་ཅིག་ངལ་གསོ་བའི་ཉིན་ལ་དོང་ནང་དུ་ལྷུང་བ༌ན། ཁོས་ལུག་དེ་ཕྱིར་མི་ལེན༌ནམ།
MAT 12:12 མི་ནི་ལུག་ལས་ཀྱང་གལ་ཆེ་བ་མ་ཡིན༌ནམ། དེའི༌ཕྱིར། ངལ་གསོ་བའི་ཉིན་ལ་ལས་བཟང་པོ་སྒྲུབ་པ་ནི་བཀའ་ཁྲིམས་དང་མཐུན་པ་ཡིན་ཞེས་གསུངས༌སོ།།
MAT 12:13 ཁོང་གིས་མི་དེར་ལག་པ་རྐྱོངས་ཤིག་ཅེས་གསུངས་པ༌དང༌། ཁོས་ལག་པ་བརྐྱངས་ཤིང་སོས་ཏེ་ལག་པ་གཞན་དང་འདྲ་བར༌གྱུར།
MAT 12:14 འོན་ཀྱང་ཕ་རུ་ཤི་པ་རྣམས་ཕྱི་རོལ་ཏུ་སོང་ནས་ཁོང་ཉིད་ཅི་ལྟར་དགྲོང་བར་གྲོས་བྱས༌སོ།།
MAT 12:15 སྐྱབས་མགོན་ཡེ་ཤུས་དོན་དེ་མཁྱེན་ནས་ཡུལ་དེ་དང་ཁ་བྲལ་བ༌དང༌། མི་མང་པོའང་ཁོང་གི་རྗེས་སུ༌འབྲངས། ཁོང་གིས་མི་དེ་རྣམས་ལས་ནད་པ་ཐམས་ཅད་ཀྱི་ནད་འཇོམས་པར་མཛད༌ཅིང༌།
MAT 12:16 ཡང་མི་རྣམས་ལ་རང་ཉིད་སུ་ཡིན་པ་མི་གཞན་ལ་བསྒྲག་པར་མི་བྱ་བའི་ཕྱིར་གདམས༌སོ།།
MAT 12:17 འདི་ནི་ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ།
MAT 12:18 ལྟོས་དང་བདག་གིས་བདམས་པའི་ཞབས་ཕྱི༌པ།། དེ་ལ་བདག་ནི་དགའ་ཞིང་ཤིན་ཏུ༌གཅེས།། བདག་གི་ཐུགས་ཉིད་ཁོང་ལ་གནང་བར༌འགྱུར།། ཁོང་གིས་ཕྱི་ཕྱོགས་མི་ལ་བདེན་ལུགས༌སྒྲོག །
MAT 12:19 ཁོང་གིས་མི་རྩོད་མི་རྒོལ་འུར་མི༌སྒྲོག ། སུས་ཀྱང་ཁྲོམ་ནས་དེའི་སྐད་ཐོས་པ༌མེད།།
MAT 12:20 ཁོང་གིས་གཞན་ལ་བདེན་ལུགས་སྒྲོག་པ༌དང༌།། བདེན་ལུགས་དེ་ནི་རྣམ་པར་རྒྱལ་བའི༌བར།། བསྣད་པའི་འདམ་རྩྭ་ཡང་ནི་གཅོད་མི༌སྲིད།། དུ་བ་འཐུལ་བའི་སྡོང་རས་གཟུམ་མི༌འགྱུར།།
MAT 12:21 ཕྱིའི་མིས་ཁོང་གི་མཚན་ལ་རེ་ལྟོས༌བཅང༌།། ཞེས་ལུང་བསྟན་གནང་བ་བཞིན་དུ་འགྲུབ་པའི་ཕྱིར༌རོ།།
MAT 12:22 དེ་ནས་མི་འགའ་ཞིག་གིས་གདོན་འདྲེས་བཟུང་ནས་མིག་ལོང་ཞིང་ལྕེ་ལྐུགས་པར་གྱུར་པ་ཞིག་སྐྱབས་མགོན་ཡེ་ཤུའི་དྲུང་དུ་ཁྲིད་ཡོང་བ༌དང༌། ཁོང་གིས་མི་དེ་ནད་ལས་ཐར་བར་མཛད༌དེ། སྨྲའང་ཤེས་ལ་མཐོང་ཡང་ནུས་པར༌མཛད།
MAT 12:23 དོན་དེར་མི་ཐམས་ཅད་ངོ་མཚར་སྐྱེས༌ཤིང༌། མི་འདི་ནི་དཱ་བིད་ཀྱི་རིགས་སྲས་མ་ཡིན་ནམ་ཞེས༌སྨྲས།
MAT 12:24 འོན་ཀྱང་ཕ་རུ་ཤི་པ་རྣམས་ཀྱིས་གཏམ་དེ་ཐོས་ནས་མི་འདིས་བདུད་ཀྱི་རྒྱལ་པོ་པེ་ཨལ་བཟི་པད་ལ་བརྟེན་ནས་གདོན་འདྲེ་སྐྲོད་བཞིན་འདུག་ཅེས་སྨྲས༌སོ།།
MAT 12:25 སྐྱབས་མགོན་ཡེ་ཤུས་ཕ་རུ་ཤི་པ་རྣམས་ཀྱི་བསམ་ཚུལ་མཁྱེན་ཏེ་འདི་སྐད༌དུ། རྒྱལ་ཁམས་ཤིག་ལ་ནང་འཁྲུག་བྱུང་ན་རྒྱལ་ཁམས་དེ་འཇིག་པར་འགྱུར༌ཞིང༌། གྲོང་ཁྱེར་རམ་ཁྱིམ་ཚང་ཞིག་ལ་ནང་འཁྲུག་བྱུང་ན་དེའང་བརྟན་པོར་གནས་མི༌ཐུབ།
MAT 12:26 གལ་ཏེ་བདུད་སཱ་ཏན་གྱིས་སཱ་ཏན་སྐྲོད༌ན། དེ་ལ་ནང་འཁྲུག་བྱུང་བས་བདུད་ཀྱི་རྒྱལ་ཁམས་ནི་ཇི་ལྟར་བརྟན་པོར་གནས་ཐུབ༌བམ།
MAT 12:27 གལ་ཏེ་བདག་གིས་པེ་ཨལ་བཟི་པད་ལ་བརྟེན་ནས་གདོན་འདྲེ་སྐྲོད་པ་ཡིན༌ན། ཁྱོད་ཅག་གི་རྗེས་འབྲང་པ་རྣམས་ཀྱིས་གང་ལ་བརྟེན་ནས་གདོན་འདྲེ་སྐྲོད༌དམ། དེའི༌ཕྱིར། རྗེས་འབྲང་པ་དེ་རྣམས་ཀྱིས་ཁྱོད་ཅག་ལ་བདེན་རྫུན་གྱི་ཤན་འབྱེད་པར༌འགྱུར།
MAT 12:28 གལ་ཏེ་བདག་གིས་དཀོན་མཆོག་གི་ཐུགས་ཉིད་ལ་བརྟེན་ནས་གདོན་འདྲེ་སྐྲོད་པ་ཡིན༌ན། དཀོན་མཆོག་གི་རྒྱལ་སྲིད་ནི་ཁྱོད་ཅག་གི་སྟེང་དུ་སླེབས་པ༌ཡིན།
MAT 12:29 ཡང་ན་སུ་ཞིག་མི་སྟོབས་ཅན་གྱི་ཁྱིམ་དུ་འཛུལ་ནས་ཅ་ལག་ཇི་ལྟར་འཕྲོག་ནུས༌སམ། ཐོག་མར་མི་དེ་བཟུང་ནས་བཀྱིགས༌ཚེ། ད་གཟོད་མི་དེའི་ཁྱིམ་ཚང་འཕྲོག་ནུས་པ༌ཡིན།
MAT 12:30 མི་སུ་ཞིག་བདག་གི་ཕྱོགས་མི་བྱེད་པ་དེ་ནི་བདག་གི་དགྲ་བོ་ཡིན༌ཞིང༌། སུ་ཞིག་གིས་བདག་དང་མཉམ་དུ་མི་བསྡུ་ན་དེ་ནི་གཏོར་མཁན༌ཡིན།
MAT 12:31 དེའི༌ཕྱིར། བདག་གིས་ཁྱོད་རྣམས་ལ་སྨྲ་བར་བྱ༌སྟེ། མི་རྣམས་ཀྱིས་བྱས་པའི་སྡིག་པ་དང་སྐུར་བ་འདེབས་པ་ཐམས་ཅད་བསལ༌ནའང༌། དམ་པའི་ཐུགས་ཉིད་ལ་སྐུར་བ་འདེབས་མཁན་གྱི་སྡིག་པ་ནི་གཏན་ནས་བསལ་བར་མི་འགྱུར༌རོ།།
MAT 12:32 ཡང་མིའི་བུ་ལ་ཚིག་ངན་སྨྲ་མཁན་དེའི་སྡིག་པ་བསལ༌ནའང༌། སུ་ཞིག་གིས་དམ་པའི་ཐུགས་ཉིད་ལ་སྐུར་བ་བཏབ༌ན། མི་དེའི་སྡིག་པ་ནི་བསྐལ་པ་འདི་དང་འབྱུང་འགྱུར་གྱི་བསྐལ་པར་ཡང་བསལ་བར་མི༌འགྱུར།
MAT 12:33 ཁྱོད་རྣམས་ཀྱིས་ལྗོན་ཤིང་དང་དེའི་འབྲས་བུ་གཉིས་ཀ་བཟང་པོར་རྩིས༌ཤིག ཡང་ན་ལྗོན་ཤིང་དང་དེའི་འབྲས་བུ་གཉིས་ཀ་ངན་པར་རྩིས༌ཤིག རྒྱུ་མཚན་ནི་འབྲས་བུ་ལས་ལྗོན་ཤིང་དེ་ག་འདྲ་ཡིན་པ་ཤེས་པའི་ཕྱིར༌རོ།།
MAT 12:34 དུག་སྦྲུལ་གྱི་རྒྱུད་ཁྱོད་ཅག་ཐ་ཤལ་ཡིན༌པས། ཁྱོད་ཅག་གིས་གཏམ་བཟང་པོ་ཇི་ལྟར་སྨྲ་ནུས༌སམ། རྒྱུ་མཚན་ནི་སེམས་ལ་ཅི་ལྟ་བུས་བཀང༌ན། ངག་ལས་ཀྱང་དེ་ལྟ་བུ་སྨྲ་བ༌ཡིན།
MAT 12:35 མི་བཟང་ཞིག་གིས་རང་གི་བང་མཛོད་བཟང་པོ་ནས་དོན་བཟང་པོ་འདོན༌ཞིང༌། མི་ངན་པས་རང་གི་བང་མཛོད་ངན་པ་ནས་དོན་ངན་པ་འདོན་པ༌ཡིན།
MAT 12:36 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། མི་རྣམས་ཀྱིས་ངག་འཆལ་སྨྲས༌ན། མ་འོངས་པའི་ཉེས་ཆད་གཅོད་པའི་ཉིན༌ལ། ཚིག་དེ་དག་ལ་རེ་རེ་བཞིན་ལན་འདེབས་དགོས་པར༌འགྱུར།
MAT 12:37 རྒྱུ་མཚན་ནི་ཁྱོད་ཀྱིས་སྨྲས་པའི་ཚིག་ལ་བརྟེན་ནས་ཁྱོད་རང་ཉེས་པ་མེད་པར་བརྩི༌ཞིང༌། ཡང་ཁྱོད་ཀྱིས་སྨྲས་པའི་ཚིག་ལ་བརྟེན་ནས་ཁྱོད་རང་ཉེས་ཅན་དུ་བརྩི་བར་འགྱུར་བའི་ཕྱིར་ཡིན་ཞེས་གསུངས༌སོ།།
MAT 12:38 དེ་ནས་མཁན་པོ་དང་ཕ་རུ་ཤི་པ་འགའ་ཞིག་གིས་སྐྱབས་མགོན་ཡེ་ཤུ་ལ་འདི་ལྟར་སྨྲས༌པ། སློབ་དཔོན༌ལགས། ཁྱེད་ཀྱིས་གྲུབ་རྟགས་ཤིག་སྟོན་དང་ངེད་རྣམས་ཀྱིས་མཐོང་འདོད་པ་ཡིན་ཞེས་ཞུས་པ༌ན།
MAT 12:39 སྐྱབས་མགོན་ཡེ་ཤུས་འདི་སྐད༌དུ། མི་རབས་ངན་པ་དང་གཡེམ་སྦྱོར་ཅན་ཞིག་གིས་གྲུབ་རྟགས་ཤིག་མཐོང་འདོད༌ནའང༌། ལུང་སྟོན་པ་ཡོ་ནཱའི་རྟགས་ངོ་མཚར་ཅན་དེ་ལས༌གཞན། ཁྱོད་རྣམས་ལ་རྟགས་ཅི་ཡང་སྟོན་པར་མི༌འགྱུར།
MAT 12:40 ཡོ་ནཱ་ཉིན་ཞག་གསུམ་ལ་ཉ་ཆེན་གྱི་གྲོད་ཁོག་ནང་དུ་ལུས་པ༌ལྟར། མིའི་བུ་ཡང་ཉིན་ཞག་གསུམ་ལ་སའི་ཁོག་ཏུ་གནས་པར༌འགྱུར།
MAT 12:41 ནིན་ཝེ་པ་རྣམས་ཀྱིས་ལུང་སྟོན་པ་ཡོ་ནཱས་བསྒྲགས་པའི་ཆོས་ལ་མཉན་ཞིང་འགྱོད་བཤགས་བྱས་མྱོང༌བས། ཉེས་ཆད་གཅོད་པའི་ཉིན༌ལ། མི་དེ་རྣམས་ཀྱང་མི་རབས་འདིའི་མི་རྣམས་དང་ལྷན་དུ་ཡར་འགྲེང་སྟེ་མི་རབས་འདི་ལ་ཉེས་སྐྱོན་བརྗོད་པར༌འགྱུར། ཡང་ལྟོས༌དང༌། འདི་རུ་ཡོ་ནཱ་ལས་ཀྱང་སྐྱེས་བུ་ཆེན་པོ་ཞིག༌ཡོད།
MAT 12:42 ལྷོ་ཕྱོགས་ཀྱི་རྒྱལ་མོ་དེ་རྒྱང་ཐག་རིང་བའི་ས་མཐའ་ནས་སོ་ལོ་མོན་གྱི་ཤེས་རབ་དང་ལྡན་པའི་གཏམ་ལ་གསན་དུ་ཡོང་མྱོང༌བས། ཉེས་ཆད་གཅོད་པའི་ཉིན༌ལ། ཁོ་མོའང་མི་རབས་འདིའི་མི་རྣམས་དང་ལྷན་དུ་ཡར་འགྲེང་སྟེ་མི་རབས་འདི་ལ་ཉེས་སྐྱོན་བརྗོད་པར༌འགྱུར། ཡང་ལྟོས༌དང༌། འདི་རུ་སོ་ལོ་མོན་ལས་ཀྱང་སྐྱེས་བུ་ཆེན་པོ་ཞིག་མཆིས༌སོ།།
MAT 12:43 སྤྱིར་གདོན་འདྲེ་ཞིག་མིའི་ལུས་ནས་ཕྱིར་བུད༌རྗེས། ཆུ་མེད་པའི་གནས་སུ་ཕར་འགྲོ་ཚུར་འོང་བྱེད༌ཅིང༌། ངལ་གསོ་བའི་གནས་ཤིག་བཙལ་ཡང་མ་རྙེད༌པས།
MAT 12:44 རང་གིས་རང་ལ་ན༌རེ། ང་རང་ཕྱིར་རང་ཉིད་ཡོང་བའི་གནས་དེར་འགྲོའོ་ཞེས་སྨྲ༌ཞིང༌། གནས་དེར་ཕྱིར་ལོག་པ༌ན། གནས་དེ་སྟོང་ཞིང་ཕྱག་དར་བྱས་ནས་ལེགས་པར་བསྒྲིགས་ཡོད་པ་མཐོང༌སྟེ།
MAT 12:45 ཕར་སོང་ནས་རང་ལས་ཀྱང་ངན་པའི་གདོན་འདྲེ་བདུན་ཁྲིད་དེ་གནས་དེར་ཡོང་ནས༌བསྡད། དེ་བས་མི་དེའི་ཕྱིས་ཀྱི་གནས་ཚུལ་ནི་སྔར་ལས་ཀྱང་ཇེ་ཞན་དང་ཇེ་སྡུག་ཏུ་འགྱུར༌ཞིང༌། མི་རབས་ངན་པ་འདི་ལའང་དེ་བཞིན་དུ་འབྱུང་བར་འགྱུར་ཞེས་གསུངས༌སོ།།
MAT 12:46 སྐྱབས་མགོན་ཡེ་ཤུས་མི་ཚོགས་ལ་དེ་ལྟར་གསུང་བཞིན་པའི་དུས༌སུ། ཁོང་གི་ཡུམ་དང་སྐུ་མཆེད་རྣམས་གནས་དེར་སླེབས་ཤིང་ཁོང་ལ་གཏམ་སྨྲ་བར་འདོད་དེ་ཕྱི་རོལ་ཏུ་ལངས་ནས་བསྡད༌དོ།།
MAT 12:47 དེ་ནས་མི་ཞིག་གིས་སྐྱབས་མགོན་ཡེ་ཤུ་ལ་འདི་ལྟར་ཞུས་པ༌སྟེ། གཟིགས༌དང༌། ཁྱེད་ཀྱི་ཡུམ་དང་སྐུ་མཆེད་རྣམས་ཀྱིས་ཁྱེད་དང་གཏམ་སྨྲ་བར་འདོད་ནས་ཕྱི་རོལ་ཏུ་ལངས་བསྡད་ཡོད་ཅེས་པ༌ལ།
MAT 12:48 ཁོང་གིས་འདི་སྐད༌དུ། ངའི་མ་དང་ངའི་སྤུན་ནི་སུ་ཡིན་ནམ་ཞེས་གསུང༌བཞིན།
MAT 12:49 ཡང་ཕྱག་གིས་ཐུགས་སྲས་རྣམས་བསྟན༌ཏེ། ལྟོས༌དང༌། ངའི་མ་དང་ངའི་སྤུན་ནི་ཁོ་ཚོ་ཡིན༌ཏེ།
MAT 12:50 ནམ་མཁའི་ཞིང་ཁམས་སུ་བཞུགས་པའི་བདག་གི་ཡབ་ཀྱི་དགོངས་པ་ལྟར་སྒྲུབ་མཁན་ཐམས་ཅད་ནི་ངའི་མ་དང༌སྤུན། ངའི་མིང་སྲིང་རྣམས་ཡིན་ཞེས་གསུངས༌སོ།།
MAT 13:1 ཉིན་དེ་ལ་སྐྱབས་མགོན་ཡེ་ཤུ་ཁང་པའི་ཕྱི་རོལ་ཏུ་ཕེབས་ཤིང་མཚོ་འགྲམ་དུ་བཞུགས༌སོ།།
MAT 13:2 དེ་ནས་མི་སྐོར་ཚོ་མང་པོ་ཁོང་གི་དྲུང་དུ་འཛོམས་པས་ཁོང་ཉིད་མཚོ་གྲུའི་ནང་དུ་ཕེབས་ཏེ་བཞུགས་པ༌དང༌། མི་ཐམས་ཅད་མཚོ་འགྲམ་དུ་ལངས་ནས༌བསྡད།
MAT 13:3 ཁོང་གིས་དཔེའི་སྒོ་ནས་ཆོས་མང་པོ་གསུངས་ཤིང་དེ་རྣམས་ལ་འདི་སྐད༌དུ། དེ་ཡང་ཞིང་འདེབས་མཁན་ཞིག་ཕྱི་རོལ་ཏུ་ཞིང་འདེབས་སུ་སོང་བ༌དང༌།
MAT 13:4 ས་བོན་གཏོར་བའི་སྐབས༌སུ། ས་བོན་ཁ་ཤས་ལམ་ཁར་ཐོར་ཞིང་བྱ་རྣམས་ཡོང་ནས༌ཟོས།
MAT 13:5 ཡང་ས་བོན་ཁ་ཤས་ས་ཉུང་སའི་རྡོ་གསེབ་ཏུ་ཐོར་ཞིང་སའི་གཏིང་མི་ཟབ་པས་ཡར་སྐྱེས་པ་མགྱོགས༌ཀྱང༌།
MAT 13:6 ཉི་མ་ཤར་ཚེ་རྙིད་ཅིང་རྩ་བ་མ་རྒྱས་པས་བསྐམས་པ༌རེད།
MAT 13:7 ས་བོན་ཁ་ཤས་ཚེར་མའི་གསེབ་ཏུ་ཐོར་ཞིང་ཚེར་མ་སྐྱེས་ཏེ་མར༌མནན།
MAT 13:8 ཡང་ས་བོན་ཁ་ཤས་ས་གཤིན་ནང་དུ་ཐོར་ཞིང་འབྲས་བུ་སྨིན༌ཏེ། དེ་དག་ལས་ཁ་ཤས་ལྡབ་བརྒྱ༌དང༌། ཁ་ཤས་ལྡབ་དྲུག༌ཅུ། ཁ་ཤས་ལྡབ་སུམ་ཅུ་བཅས་སྨིན་པ༌ཡིན།
MAT 13:9 རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
MAT 13:10 དེ་ནས་ཐུགས་སྲས་རྣམས་ཡོང་སྟེ་ཁོང་ལ་ན༌རེ། ཁྱེད་ཀྱིས་ཅིའི་ཕྱིར་མི་རྣམས་ལ་དཔེའི་སྒོ་ནས་གསུངས་པ་ཡིན་ནམ་ཞེས་ཞུས་པ༌ན།
MAT 13:11 སྐྱབས་མགོན་ཡེ་ཤུས་འདི་སྐད༌དུ། ནམ་མཁའི་རྒྱལ་སྲིད་ཀྱི་གསང་བ་རྣམས་ནི་ཁྱོད་ཅག་ལ་ཤེས་སུ་འཇུག་པ་ལས་མི་དེ་རྣམས་ལ་མངོན་པ་མ༌ཡིན།
MAT 13:12 རྒྱུ་མཚན་ནི་སུ་ཞིག་ལ་ཡོད་པ་དེ་ལ་ད་དུང་ཡང་གནང་ངེས་ཤིང་དེ་ལ་ལྷག་མའང་ཡོད་པར༌འགྱུར། འོན་ཀྱང་སུ་ཞིག་ལ་མེད་པ་དེ་ལས་ཉུང་ཙམ་ཡོད་པ་དེའང་ཕྱིར་ལེན་པར་འགྱུར་བའི་ཕྱིར༌ཡིན།
MAT 13:13 དེའི༌ཕྱིར། བདག་གིས་མི་དེ་རྣམས་ལ་དཔེའི་སྒོ་ནས་བཤད་པའི་རྒྱུ་མཚན༌ནི། དེ་རྣམས་ཀྱིས་མིག་གིས་བལྟས་ཀྱང་མི་མཐོང་བ༌དང༌། རྣ་བས་མཉན་ཡང་མི་ཐོས་ཤིང་མི་རྟོགས་པའི་ཕྱིར༌རོ།།
MAT 13:14 དེ་ལ་ལུང་སྟོན་པ་ཡེ་ཤ་ཡཱའི་ལུང་བསྟན་ལས་ཇི་སྐད༌དུ། རྣ་བས་ཐོས་ཀྱང་ཅི་ཡང་མི་ཤེས༌ཤིང༌།། མིག་གིས་མཐོང་ཡང་ཅི་ཡང་མི་རྟོགས༌པ།།
MAT 13:15 དེ་རྣམས་སེམས་ནི་གྱོང་པོར་གྱུར་པ༌དང༌།། རྣ་བས་མི་མཉན་མིག་ཟུང་བཙུམས་པས༌སོ།། དེ་ལྟར་མིན་ན་མིག་གིས་མཐོང་བ༌དང༌།། རྣ་བས་ཐོས་ཤིང་བློ་ཡིས་རྟོགས་པ༌དང༌།། ཕྱིར་དུ་འཁོར་ནས་ངས་ཀྱང་དེ་རྣམས༌ནི།། གསོ་ཞིང་དྲག་པར་བྱེད་པ་ཡིན་ལགས༌སོ།། ཞེས་ལུང་བསྟན་གནང་བ་ལྟར་ཁོ་རྣམས་ཀྱི་སྟེང་དུ་འགྲུབ་བཞིན༌འདུག
MAT 13:16 འོན༌ཀྱང༌། ཁྱོད་ཅག་གི་མིག་གིས་མཐོང་བའི༌ཕྱིར། ཁྱོད་ཅག་གི་མིག་ནི་བདེ་བ༌ཡིན། ཁྱོད་ཅག་གི་རྣ་བས་ཐོས་པའི༌ཕྱིར། ཁྱོད་ཅག་གི་རྣ་བ་བདེ༌བའོ།།
MAT 13:17 བདག་གིས་ཁྱོད་རྣམས་ལ་བདེན་པར་སྨྲ༌སྟེ། སྔར་ལུང་སྟོན་པ་དང་མི་གཞུང་དྲང་མང་པོས་ཁྱོད་རྣམས་ཀྱིས་མཐོང་བ་དེ་དག་ལ་བལྟ་འདོད་ནའང་མཐོང་མ༌མྱོང༌། ཁྱོད་རྣམས་ཀྱིས་ཐོས་པ་དེ་དག་ལ་ཉན་འདོད་ཀྱང་མ་ཐོས༌སོ།།
MAT 13:18 དེའི༌ཕྱིར། ཁྱོད་རྣམས་ཀྱིས་ས་བོན་བཏབ་པའི་དཔེ་འདིའི་དོན་ལ་ཉོན༌ཅིག
MAT 13:19 སུ་ཞིག་གིས་དཀོན་མཆོག་གི་རྒྱལ་སྲིད་ཀྱི་བཀའ་ཐོས་ཤིང་དོན་མ་རྟོགས་པར་སྡོད་པའི་དུས༌སུ། བདུད་ངན་དེ་ཡོང་ནས་ཁོའི་སེམས་སུ་བཏབ་པའི་ས་བོན་ཕྲོགས་པ༌དང༌། འདི་ནི་ས་བོན་ལམ་ཁར་ཐོར་བ་དེ་རྣམས༌ཡིན།
MAT 13:20 ས་བོན་རྡོ་གསེབ་ཏུ་ཐོར་བ་ནི་མི་ལ་ལས་བཀའ་ཐོས་པ་ཙམ་གྱིས་དགའ་ཞིང་དང་དུ་བླངས༌ནའང༌།
MAT 13:21 སེམས་སུ་རྩ་བ་མ་རྒྱས་པས་དུས་ཡུན་ཐུང་ངུ་ལ་གནས༌ཀྱང༌། བཀའ་དེའི་རྐྱེན་གྱིས་དཀའ་སྡུག་དང་གནོད་འཚེ་བྱུང་མ་ཐག་དད་པ་ལོག་པ༌རྣམས་ཡིན།
MAT 13:22 ཚེར་མའི་གསེབ་ཏུ་གཏོར་བ་ནི་མི་ལ་ལས་བཀའ་ཐོས༌ཀྱང༌། འཇིག་རྟེན་གྱི་སེམས་ཁུར་དང་རྒྱུ་ནོར་གྱི་སླུ་བྲིད་ཀྱིས་བཀའ་མནན་ནས་འབྲས་བུ་སྨིན་མ་ཐུབ་པ༌རྣམས་ཡིན།
MAT 13:23 ས་གཤིན་ནང་དུ་ཐོར་བ་ནི་མི་ལ་ལས་བཀའ་ཐོས་ནས་དོན་རྟོགས༌ཤིང༌། རྗེས་སུ་འབྲས་བུ་སྨིན་ཐུབ་པ་རྣམས་ཡིན༌ཏེ། འབྲས་བུ་ཁ་ཤས་ལྡབ་བརྒྱ༌དང༌། ཁ་ཤས་ལྡབ་དྲུག༌ཅུ། ཁ་ཤས་ལྡབ་སུམ་ཅུ་བཅས་སྨིན་པ་ཡིན་ཞེས་བཀའ་ལན་གསུངས༌སོ།།
MAT 13:24 ཡང་སྐྱབས་མགོན་ཡེ་ཤུས་དཔེའི་སྒོ་ནས་མི་ཚོགས་ལ་འདི་སྐད༌དུ། ནམ་མཁའི་རྒྱལ་སྲིད་ནི་མི་ཞིག་གིས་ཞིང་ལ་ས་བོན་བཟང་པོ་བཏབ་པ་དང་འདྲ༌སྟེ།
MAT 13:25 མི་རྣམས་གཉིད་དུ་ཡུར་བའི་དུས༌སུ། དགྲ་བོ་ཡོང་ནས་རྩྭ་ལྡུམ་གྲོ་ནང་དུ་གཏོར་ཏེ༌སོང༌།
MAT 13:26 དེ་ནས་སྙེ་མ་ཐོགས་པའི་དུས༌སུ། རྩྭ་ལྡུམ་ཡང་མངོན་པར་གྱུར༌ཏོ།།
MAT 13:27 དེ་ནས་ཞིང་བདག་གི་གཡོག་པོ་རྣམས་ཡོང་སྟེ་ན༌རེ། བདག་པོ༌ལགས། ཁྱེད་ཀྱིས་ཞིང་ལ་ས་བོན་བཟང་པོ་བཏབ་པ་མ་ཡིན༌ནམ། རྩྭ་ལྡུམ་དེ་དག་གང་ནས་བྱུང་ངམ་ཞེས་ཞུས་པ༌ན།
MAT 13:28 བདག་པོ་ན༌རེ། དེ་ནི་དགྲ་བོས་བྱས་པ་ཡིན་ཞེས་སྨྲས༌སོ། །ཡང་གཡོག་པོ་རྣམས་ན༌རེ། ངེད་རྣམས་སོང་ནས་རྩྭ་ལྡུམ་ཡུར་དགོས་སམ་ཞེས་ཞུས་པ༌ལ།
MAT 13:29 ཡང་བདག་པོ་ན༌རེ། རྩྭ་ལྡུམ་ཡུར་མི་དགོས༌ཏེ། ཁྱོད་ཅག་གིས་རྩྭ་ལྡུམ་ཡུར་སྐབས་གྲོ་ཡང་མཉམ་དུ་ཡུར་ཉེན༌ཆེའོ།།
MAT 13:30 སྟོན་ཐོག་བསྡུ་བའི་བར་དུ་དེ་གཉིས་མཉམ་དུ་སྐྱེ་རུ༌ཆུག བདག་གིས་སྟོན་ཐོག་བསྡུ་བའི་དུས༌སུ། གྲོ་རྔ་མཁན་རྣམས་ལ་ཐོག་མར་རྩྭ་ལྡུམ་བལ་ཏེ་མེ་རུ་བསྲེག་ཆེད་ཕོན་པོར་སྡོམས༌ཤིག གྲོ་ནི་བདག་གི་བང་མཛོད་དུ་སྡུས་ཤིག་ཅེས་ཟེར་བར་འགྱུར་ཞེས་གསུངས༌སོ།།
MAT 13:31 ཡང་སྐྱབས་མགོན་ཡེ་ཤུས་དཔེ་གཞན་ཞིག་དྲངས་ནས་འདི་སྐད༌དུ། ནམ་མཁའི་རྒྱལ་སྲིད་ནི་ཡུངས་འབྲུའི་ས་བོན་ཞིག་དང་འདྲ༌སྟེ། མི་ཞིག་གིས་ས་བོན་དེ་ཁྱེར་ནས་རང་གི་ཞིང་ལ༌བཏབ།
MAT 13:32 ས་བོན་དེ་ནི་ས་བོན་གྱི་རིགས་གཞན་ཐམས་ཅད་ལས་ཆུང༌ནའང༌། ཆེར་སྐྱེས་ནས་སྔོ་ཚལ་སྣ་ཚོགས་ལས་ཆེ་ཞིང་ཤིང་སྡོང་དུ་གྱུར༌ཏེ། ནམ་མཁའི་བྱའང་འཕུར་ཡོང་ནས་ཡལ་གའི་གསེབ་ཏུ་ཚང་བཟོ་བ་ཡིན་ཞེས་གསུངས༌སོ།།
MAT 13:33 ཡང་སྐྱབས་མགོན་ཡེ་ཤུས་དཔེ་གཞན་ཞིག་དྲངས་ཏེ་འདི་སྐད༌དུ། ནམ་མཁའི་རྒྱལ་སྲིད་ནི་སྐྱུར་རྩི་དང་འདྲ༌སྟེ། བུད་མེད་ཅིག་གིས་སྐྱུར་རྩི་དེ་ཕྱེ་བྲེ་གསུམ་གྱི་ནང་དུ་བསྲེས་ཤིང་བརྫིས་ཏེ་རིམ་བཞིན་ཕྱེ་ཐམས་ཅད་སྐྱུར་ལངས་པ་དང་མཚུངས་ཞེས་གསུངས༌སོ།།
MAT 13:34 གོང་གི་གསུང་དེ་ཐམས་ཅད་ནི་སྐྱབས་མགོན་ཡེ་ཤུས་མི་ཚོགས་ལ་དཔེའི་སྒོ་ནས་གསུངས་པ་ཡིན༌ཏེ། ཁོང་གིས་དཔེ་མ་བཀོད་པར་དེ་རྣམས་ལ་ཅི་ཡང་མ༌གསུངས།
MAT 13:35 དེ་ལ་ལུང་སྟོན་པའི་མདོ་བརྒྱུད་ནས་ཇི་སྐད༌དུ། བདག་གིས་ངག་གི་སྒོ་མོ་ཡངས་པོར༌ཕྱེ།། འཇིག་རྟེན་གསར་དུ་བཀོད་པའི་ཚུ་རོལ༌གྱི།། སྦས་ཤིང་གསང་བའི་དོན་དག་སྣ་ཚོགས༌ནི།། དཔེ་རུ་བཀོད་ནས་རིམ་བཞིན་བསྟན་པར༌བྱ།། ཞེས་གསུངས་པ་བཞིན་འགྲུབ་པའི་ཕྱིར་དེ་ལྟར་བྱུང་བ་ཡིན༌ནོ།།
MAT 13:36 དེ་ནས་སྐྱབས་མགོན་ཡེ་ཤུ་མི་ཚོགས་དང་ཁ་བྲལ་ནས་ཁང་པའི་ནང་དུ་ཕེབས་པ༌དང༌། ཐུགས་སྲས་རྣམས་ཁོང་གི་དྲུང་དུ་ཡོང༌སྟེ། རྩྭ་ལྡུམ་གྱི་དཔེ་དེའི་དོན་རྣམས་ངེད་ཅག་ལ་གསུང་བར་མཛོད་ཅེས་ཞུས་པ༌ལ།
MAT 13:37 སྐྱབས་མགོན་ཡེ་ཤུས་འདི་སྐད༌དུ། སོན་བཟང་འདེབས་མཁན་ནི་མིའི་བུ་ཡིན༌ལ།
MAT 13:38 ས་ཞིང་ནི་འཇིག་རྟེན་ཁམས༌ཡིན། སོན་བཟང་ནི་དཀོན་མཆོག་གི་རྒྱལ་སྲིད་ལ་གཏོགས་པའི་མི་རྣམས༌ཡིན། རྩྭ་ལྡུམ་ནི་བདུད་ངན་དེ་ལ་གཏོགས་པའི་མི་རྣམས༌ཡིན།
MAT 13:39 རྩྭ་ལྡུམ་གཏོར་མཁན་དགྲ་བོ་ནི་བདུད༌ཡིན། སྟོན་ཐོག་བསྡུ་བའི་དུས་ནི་བསྐལ་པའི་མཐའ་མ༌ཡིན། ཞིང་རྔ་མཁན་ནི་ཕོ་ཉ་རྣམས༌ཡིན།
MAT 13:40 དེའི༌ཕྱིར། རྩྭ་ལྡུམ་བལ་ནས་མེ་རུ་སྲེག་པ་བཞིན་བསྐལ་པའི་མཐའ་མ་ལའང་དེ་ལྟར་འབྱུང་བར་འགྱུར༌རོ།།
MAT 13:41 མིའི་བུ་ཡིས་ཕོ་ཉ་རྣམས་མངགས་ཤིང་དེ་དག་གིས་ཁོང་གི་རྒྱལ་སྲིད་ནས་མི་ལ་སྡིག་པ་བྱེད་དུ་འཇུག་པ་དང་ཉེས་པ་གསོག་མཁན་ཐམས་ཅད་བསྡུས༌ཏེ།
MAT 13:42 མེ་ཐབ་ནང་དུ་གཡུག་ཅིང་གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར༌འགྱུར།
MAT 13:43 དེའི་དུས༌སུ། མི་གཞུང་དྲང་རྣམས་ཀྱིས་རང་གི་ཡབ་ཀྱི་རྒྱལ་སྲིད་དུ་ཉི་མ་དང་འདྲ་བར་འོད་སྤྲོ་བར༌འགྱུར། ཡང་རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
MAT 13:44 ཡང་སྐྱབས་མགོན་ཡེ་ཤུས་འདི་སྐད༌དུ། ནམ་མཁའི་རྒྱལ་སྲིད་ནི་ཞིང་ལ་སྦས་པའི་རིན་པོ་ཆེའི་གཏེར་མཛོད་དང་འདྲ༌བར། མི་ཞིག་གིས་གཏེར་མཛོད་དེ་རྙེད་ཅིང་སྦས༌རྗེས། དགའ་སྤྲོའི་ངང་རང་ལ་ཡོད་པ་ཐམས་ཅད་བཙོངས་ནས་ས་ཞིང་དེ་ཉོས༌སོ།།
MAT 13:45 ཡང་ནམ་མཁའི་རྒྱལ་སྲིད་ནི་ཚོང་པ་ཞིག་གིས་མུ་ཏིག་བཟང་པོ་འཚོལ་བ་དང་འདྲ༌སྟེ།
MAT 13:46 ཁོས་རིན་ཐང་ཆེ་བའི་མུ་ཏིག་ཅིག་མཐོང་སྟེ་རང་ལ་ཡོད་པ་ཐམས་ཅད་བཙོངས་ནས་མུ་ཏིག་དེ་ཉོས་པ་ཡིན་ཞེས་གསུངས༌སོ།།
MAT 13:47 ཡང་སྐྱབས་མགོན་ཡེ་ཤུས་འདི་སྐད༌དུ། ནམ་མཁའི་རྒྱལ་སྲིད་ནི་རྒྱ་མཚོའི་ནང་དུ་དྲ་རྒྱ་འཕངས་ནས་ཉའི་རིགས་སྣ་ཚོགས་འཛིན་པ་དང་འདྲ༌སྟེ།
MAT 13:48 དྲ་རྒྱར་ཉས་བཀང་བ་དང་ཉ་པས་དྲ་རྒྱ་མཚོ་འགྲམ་དུ་འཐེན་ཏེ་བསྡད༌ཅིང༌། ཟས་སུ་རུང་བ་དག་སྣོད་དུ་བསྡུས་ཤིང་ཟས་སུ་མི་རུང་བ་དག་དོར༌བའོ།།
MAT 13:49 བསྐལ་པའི་མཐའ་མ་ལའང་དེ་ལྟར་འབྱུང་ངེས༌ཏེ། ཕོ་ཉ་རྣམས་ཕེབས་ནས་མི་གཞུང་དྲང་རྣམས་ཀྱི་ཁྲོད་ནས་མི་ངན་པ་རྣམས་ལོགས་སུ་བཀར༌ཏེ།
MAT 13:50 མེ་ཐབ་ནང་དུ་གཡུག་ཅིང་གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་ཞེས་གསུངས༌སོ།།
MAT 13:51 ཡང་ཁོང་གིས་འདི་སྐད༌དུ། ཁྱོད་རྣམས་ཀྱིས་དེ་ཐམས་ཅད་ཀྱི་དོན་གོའམ་ཞེས་གསུངས་པ༌དང༌། ཐུགས་སྲས་རྣམས་ཀྱིས་དོན་དེ་གོའོ་ཞེས་ཞུས༌སོ།།
MAT 13:52 ཡང་ཁོང་གིས་ཐུགས་སྲས་རྣམས་ལ་འདི་སྐད༌དུ། ནམ་མཁའི་རྒྱལ་སྲིད་ཀྱི་རྗེས་འབྲང་པར་གྱུར་པའི་མཁན་པོ་རྣམས༌ནི། ཁྱིམ་བདག་ཅིག་གིས་རང་གི་བང་མཛོད་ནས་དངོས་པོ་གསར་པ་དང་རྙིང་པ་འཁྱེར་འོང་བ་དང་འདྲ་ཞེས་གསུངས༌སོ།།
MAT 13:53 སྐྱབས་མགོན་ཡེ་ཤུས་དཔེ་དེ་དག་གསུངས༌རྗེས། ཁོང་ཉིད་གནས་དེ་དང་ཁ་བྲལ༌ཏེ།
MAT 13:54 རང་ཡུལ་དུ་ཕེབས་ཤིང་ཆོས་ཁང་དུ་ཡུལ་མི་རྣམས་ལ་ཆོས་གསུངས་པ༌ན། ཉན་མཁན་རྣམས་ངོ་མཚར་སྐྱེས༌ཏེ། མི་འདི་ལ་ཤེས་རབ་དང་ནུས་མཐུ་ཁྱད་པར་བ་དེ་ལྟ་བུ་གང་ནས་བྱུང༌ངམ།
MAT 13:55 མི་འདི་ནི་ཤིང་བཟོའི་བུ་དེ་མ་ཡིན༌ནམ། ཁོའི་མ་ནི་མིར་ཡམ་ཟེར་བ་དེ་མ་ཡིན༌ནམ། ཁོའི་ནུ་བོ་རྣམས་ནི་ཡ་ཀོབ༌དང༌། ཡོ༌སེབ། སི༌མོན། ཡུ་དཱ་བཅས་མ་ཡིན༌ནམ།
MAT 13:56 ཁོའི་སྲིང་མོ་རྣམས་ཀྱང་འདི་རུ་བདག་ཅག་དང་མཉམ་དུ་ཡོད་པ་མིན༌ནམ། དེས་ན་མི་འདིར་དོན་འདི་ལྟ་བུ་རྣམས་གང་ནས་བྱུང་ངམ་ཟེར༌ཞིང༌།
MAT 13:57 མི་དེ་རྣམས་ཁོང་ལ་མི་དགའ་བར་གྱུར༌ཏོ། །དེ་ནས་སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། ལུང་སྟོན་པ་ལ་རང་ཡུལ་དང་ཁྱིམ་མི་ལས༌གཞན། བརྩི་བཀུར་མི་བྱེད་མཁན་གཅིག་ཀྱང་མེད་ཅེས་གསུངས༌སོ།།
MAT 13:58 མི་དེ་རྣམས་ལ་དད་པ་མེད་པའི་རྐྱེན་གྱིས་སྐྱབས་མགོན་ཡེ་ཤུས་ངོ་མཚར་བའི་མཛད་པ་མང་པོ་མ་གནང༌ངོ༌།།
MAT 14:1 དེའི་དུས༌སུ། ས་གནས་དཔོན་པོ་ཧེ་རོ་དཱས་སྐྱབས་མགོན་ཡེ་ཤུའི་མཚན་སྙན་ཐོས༌ཏེ།
MAT 14:2 རང་གི་འཁོར་གཡོག་རྣམས༌ལ། མི་འདི་ནི་ཁྲུས་གསོལ་མཁན་ཡོ་ཧ་ནན་འཆི་བ་ལས་སླར་གསོན་པ་ཡིན༌པས། ཁོང་གིས་ནུས་མཐུ་འདི་དག་སྟོན་བཞིན་འདུག་ཅེས་སྨྲས༌སོ།།
MAT 14:3 དེ་སྔར་ཧེ་རོ་དཱས་རང་གི་སྤུན་ཕི་ལིབ་ཀྱི་ཆུང་མ་ཧེ་རོད་ཡཱའི་རྐྱེན༌གྱིས། མི་མངགས་ཏེ་ཡོ་ཧ་ནན་བཟུང་ནས་བཙོན་དུ༌བཅུག
MAT 14:4 དེ་ནི་སྔར་ནས་ཡོ་ཧ་ནན་གྱིས་ཧེ་རོ་དཱ༌ལ། ཁྱོད་ཀྱིས་བུད་མེད་དེ་རང་གི་ཆུང་མར་ལེན་མི་རུང་ཞེས་གསུངས་པའི་ཕྱིར༌ཡིན།
MAT 14:5 ཧེ་རོ་དཱས་ཡོ་ཧ་ནན་དགྲོང་བར་འདོད་ནའང་ཡུལ་མི་རྣམས་ཀྱིས་ཁོང་ནི་ལུང་སྟོན་པ་ཞིག་ཡིན་པར་ངོས་བཟུང་བས་ཁོ་མི་ཚོགས་ལ་འཇིགས༌སོ།།
MAT 14:6 ཧེ་རོ་དཱའི་སྐྱེས་སྐར་གྱི་ཉིན༌ལ། ཧེ་རོད་ཡཱའི་བུ་མོས་མགྲོན་པོ་རྣམས་ཀྱི་མདུན་དུ་བྲོ་འཁྲབ་སྟེ་ཧེ་རོ་དཱ་དགའ་བར་བྱས༌པས།
MAT 14:7 ཁོས་བུ་མོ་དེ་ལ་ཁོ་མོས་ཅི་འདོད་བཞིན་སྟེར་བར་དམ་བཅས་ཏེ་ཁས༌བླངས།
MAT 14:8 བུ་མོར་མ་ཡིས་བསྐུལ་བ༌ལྟར། ཁྲུས་གསོལ་མཁན་ཡོ་ཧ་ནན་གྱི་མགོ་བོ་སྡེར་མའི་ནང་དུ་བཞག་ནས་བདག་ལ་གནང་བར་མཛོད་ཅིག་ཅེས་ཞུས་པ༌ལ།
MAT 14:9 རྒྱལ་པོའི་སེམས་སྐྱོ་ནའང་མགྲོན་པོ་རྣམས་ཀྱི་མདུན་ནས་དམ་བཅས་ཟིན་པས་ཁོ་མོར་སྟེར་བའི་བཀའ་གནང༌སྟེ།
MAT 14:10 མི་མངགས་ཤིང་བཙོན་ཁང་དུ་སོང་ནས་ཁྲུས་གསོལ་མཁན་ཡོ་ཧ་ནན་གྱི་མགོ་བོ་བཅད༌དེ།
MAT 14:11 སྡེར་མའི་ནང་དུ་བཞག་ནས་ཁྱེར་ཡོང་སྟེ་ཁོ་མོར་བྱིན་པ་དང་བུ་མོ་དེས་ཀྱང་རང་གི་མ་ལ༌བྱིན།
MAT 14:12 དེ་ནས་ཁྲུས་གསོལ་མཁན་ཡོ་ཧ་ནན་གྱི་རྗེས་འབྲང་པ་རྣམས་ཡོང་སྟེ་ཁོང་གི་སྐུ་གདུང་ཁུར་ནས་དུར་དུ་བཅུག༌རྗེས། སྐྱབས་མགོན་ཡེ་ཤུའི་དྲུང་དུ་ཕྱིན་ནས་དོན་དེ་ཁོང་ལ་ཞུས༌སོ།།
MAT 14:13 སྐྱབས་མགོན་ཡེ་ཤུས་དོན་དེ་གསན༌རྗེས། མཚོ་གྲུར་བཞུགས་ཤིང་ཡུལ་དེ་དང་ཁ་བྲལ་ནས་དབེན་གནས་ཀྱི་ཕྱོགས་སུ༌ཕྱིན། མི་ཚོགས་ཀྱིས་གཏམ་དེ་ཐོས༌རྗེས། གྲོང་རྡལ་སོ་སོ་ནས་རྐང་ཐང་ལ་ཡོང་སྟེ་ཁོང་གི་རྗེས་སུ༌འབྲངས།
MAT 14:14 ཁོང་ཉིད་སྐམ་སར་ཕེབས་ཤིང་མི་ཤིན་ཏུ་མང་པོ་ཡོད་པ་གཟིགས༌ཏེ། ཐུགས་ལ་སྙིང་རྗེ་འཁྲུངས་ནས་མི་དེ་དག་ལས་ནད་པ་རྣམས་ཀྱི་ནད་འཇོམས་པར་མཛད༌དོ།།
MAT 14:15 ས་རུབ་ལ་ཉེ༌དུས། ཐུགས་སྲས་རྣམས་ཁོང་གི་དྲུང་དུ་ཡོང༌སྟེ། ས་ཆ་འདི་ནི་དབེན་གནས་ཤིག་ཡིན་ཞིང་ས་རུབ་ལ་ཉེ༌བས། མི་རྣམས་ཡུལ་སྡེ་སོ་སོར་རང་རང་གི་བཟའ་བཏུང་ཉོ་རུ་གཏོང་བར་མཛོད་ཅེས་ཞུས་པ༌ན།
MAT 14:16 སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། ཁོ་རྣམས་འགྲོ་མི་དགོས༌ཏེ། ཁྱོད་ཅག་གིས་ཁོ་རྣམས་ལ་ཁ་ཟས་བྱིན་ཅིག་ཅེས་གསུངས་པ༌ན།
MAT 14:17 ཐུགས་སྲས་རྣམས་ན༌རེ། ངེད་རྣམས་ལ་བག་ལེབ་ལྔ་དང་ཉ་གཉིས་ལས་མེད་ཅེས་ཞུས་པ༌ལ།
MAT 14:18 ཡང་ཁོང་གིས་འདི་སྐད༌དུ། ཁ་ཟས་དེ་དག་བདག་ལ་ཁྱེར་ཤོག་ཅེས་གསུངས༌སོ།།
MAT 14:19 ཁོང་གིས་མི་རྣམས་སྤང་ཐང་དུ་སྡོད་པའི་བཀའ་གནང༌ཞིང༌། བག་ལེབ་ལྔ་དང་ཉ་གཉིས་པོ་ཕྱག་ཏུ་བསྣམས་ཏེ་ནམ་མཁར་གཟིགས་ཤིང་བྱིན་རླབས་གནང༌རྗེས། བག་ལེབ་དུམ་བུར་བྱས་ནས་ཐུགས་སྲས་རྣམས་ལ་གནང་བ་དང་དེ་རྣམས་ཀྱིས་ཀྱང་མི་ཚོགས་ལ༌བྱིན།
MAT 14:20 མི་ཚང་མས་ཟོས་ནས་ལྟོ་བ་འགྲངས་པ༌དང༌། ཐུགས་སྲས་རྣམས་ཀྱིས་ཟས་ལྷག་བསྡུས་ཏེ་སླེ་བོ་བཅུ་གཉིས༌གང་།
MAT 14:21 གནས་དེར་བུད་མེད་དང་བྱིས་པ་ལས༌གཞན། ཁ་ཟས་ལོངས་སུ་སྤྱོད་པའི་སྐྱེས་པ་ལྔ་སྟོང་ཙམ་ཡོད༌དོ།།
MAT 14:22 དོན་དེའི་རྗེས༌སུ། སྐྱབས་མགོན་ཡེ་ཤུས་ཐུགས་སྲས་རྣམས་མཚོ་གྲུར་སྡོད་དུ་བཅུག༌སྟེ། ཁོང་གི་སྔོན་ལ་མཚོའི་ཕར་འགྲམ་དུ་འགྲོ་བར་བསྐུལ་ནས་ཁོང་གིས་མི་རྣམས་སོ་སོར་གྱེས་སུ༌བཅུག
MAT 14:23 མི་རྣམས་སོ་སོར་གྱེས་སུ་བཅུག༌རྗེས། ཁོང་ཉིད་གཅིག་པུ་རི་མགོར་གསོལ་བ་འདེབས་སུ་ཕེབས་པ༌དང༌། མཚན་མོའི་དུས་སུ་ཁོང་ཉིད་གཅིག་པུ་གནས་དེར༌བཞུགས།
MAT 14:24 དུས་དེར་མཚོ་གྲུ་དེ་མཚོའི་འགྲམ་ནས་རྒྱང་ཐག་རིང་པོར་སླེབས་ཤིང་རླུང་ཚུར་གཡུགས་པས་རྦ་རླབས་ཀྱིས༌གཡོའོ།།
MAT 14:25 ནམ་ལངས་ལ་ཉེ་བའི་དུས༌སུ། ཁོང་གིས་མཚོ་སྟེང་དུ་ཞབས་ཀྱིས་བཅགས་ནས་ཐུགས་སྲས་རྣམས་ཀྱི་གམ་དུ༌ཕེབས།
MAT 14:26 དེ་རྣམས་ཀྱིས་ཁོང་གིས་མཚོ་སྟེང་དུ་ཞབས་ཀྱིས་བཅགས་ནས་ཕེབས་པ་མཐོང་ནས་འཇིགས་ཤིང་སེམས་འཚབ་པར་གྱུར༌ཏེ། དེ་ནི་འདྲེ་ཞིག་མ་ཡིན་ནམ་ཞེས་སྨྲས་པ་དང་འཇིགས་ཤིང་སྐྲག་སྟེ་འུར་བརྒྱབ༌བོ།།
MAT 14:27 སྐྱབས་མགོན་ཡེ་ཤུས་འཕྲལ་དུ་ཁོ་རྣམས་ལ་འདི་སྐད༌དུ། ཁྱོད་ཅག་གི་སེམས་བདེ་བར༌གྱིས། ང་རང་ཡིན་པས་འཇིགས་མི་དགོས་ཞེས་གསུངས་པ༌དང༌།
MAT 14:28 པེ་ཏྲོ་ན༌རེ། གཙོ་བོ་ཁྱེད་རང་ལགས༌ན། བདག་ལ་ཆུའི་སྟེང་ནས་ཁྱེད་ཀྱི་དྲུང་དུ་ཡོང་བའི་བཀའ་གནང་བར་མཛོད་ཅེས་ཞུས་པ༌ན།
MAT 14:29 ཁོང་གིས་ཚུར་ཤོག་ཅིག་ཅེས་གསུངས༌པས། པེ་ཏྲོ་མཚོ་གྲུ་ལས་བབས་ཏེ་མཚོ་སྟེང་ནས་སྐྱབས་མགོན་ཡེ་ཤུའི་ཕྱོགས་སུ་ཕྱིན༌ཏོ།།
MAT 14:30 འོན་ཀྱང་ཁོས་རླུང་ཆེན་གཡུགས་པ་མཐོང་སྟེ་འཇིགས་ཤིང་མཚོ་ནང་དུ་ནུབ་བཞིན་པའི་སྐབས་སུ་སྐད་ཆེན༌པོས། གཙོ་བོ༌ལགས། ང་རང་སྐྱོབ་པར་མཛོད་ཅེས་སྐད་བརྒྱབ་པ༌དང༌།
MAT 14:31 སྐྱབས་མགོན་ཡེ་ཤུས་དེ་མ་ཐག་ཕྱག་བརྐྱངས་ནས་ཁོ་རང་བཟུང་སྟེ་འདི་སྐད༌དུ། དད་པ་ཆུང་བ་ཁྱོད་ནི་ཅིའི་ཕྱིར་ཐེ་ཚོམ་སྐྱེས་སམ་ཞེས་གསུངས༌སོ།།
MAT 14:32 ཁོང་གཉིས་མཚོ་གྲུའི་ནང་དུ་ཕེབས་པ་དང་རླུང་གཡུག་མཚམས༌ཆད།
MAT 14:33 མཚོ་གྲུ་ནང་གི་ཐུགས་སྲས་རྣམས་ཀྱིས་ཁོང་ལ་ཕྱག་བཙལ་ཞིང༌། ཁྱེད་ནི་དངོས་གནས་དཀོན་མཆོག་གི་སྲས་ཡིན་ཞེས་ཞུས༌སོ།།
MAT 14:34 དེ་ནས་ཁོང་རྣམས་མཚོ་བརྒལ་ནས་གེན་ནེ་སཱ་རེལ་ཡུལ་དུ་སླེབས་པ༌དང༌།
MAT 14:35 ཡུལ་དེའི་མི་རྣམས་ཀྱིས་སྐྱབས་མགོན་ཡེ་ཤུ་ཡིན་པ་ཤེས༌ཏེ། མཐའ་སྐོར་གྱི་ཡུལ་ཀུན་ཏུ་མི་མངགས་ཤིང་ནད་པ་ཐམས་ཅད་ཁོང་གི་དྲུང་དུ་ཁུར་ཡོང༌སྟེ།
MAT 14:36 ཁོང་ལ་ན་བཟའི་འདབས་ཁ་ཙམ་ལ་རེག་ཏུ་གནང་བར་ཞུ་བ་ཞུས༌ཤིང༌། དེར་རེག་པའི་ནད་པ་ཐམས་ཅད་ནད་ལས་ཐར་བར་གྱུར༌ཏོ།།
MAT 15:1 དེ་ནས་ཕ་རུ་ཤི་པ་དང་མཁན་པོ་རྣམས་ཡེ་རུ་སཱ་ལེམ་ནས་སྐྱབས་མགོན་ཡེ་ཤུའི་དྲུང་དུ་ཡོང༌སྟེ།
MAT 15:2 ཁྱེད་ཀྱི་ཐུགས་སྲས་རྣམས་ཀྱིས་ཅིའི་ཕྱིར་གནའ་མིའི་ལུགས་སྲོལ་དང་འགལ་བར་བྱེད༌དམ། ཁོ་རྣམས་ཀྱིས་ལག་པ་མ་བཀྲུས་པར་བག་ལེབ་ཟའོ་ཞེས་པ༌ལ།
MAT 15:3 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་རང་གི་ལུགས་སྲོལ་བསྲུང་ཕྱིར་དཀོན་མཆོག་གི་བཀའ་དང་འགལ་བར་བྱེད་པ༌ཅི།
MAT 15:4 དཀོན་མཆོག་གིས་རང་གི་ཕ་མ་གཉིས་ལ་བཀུར་བསྟི་བྱེད་དགོས་ཞེས༌དང༌། ཡང་ཕའམ་ཡང་ན་མ་ལ་ཚིག་ངན་སྨྲ་མཁན་དེ་སྲོག་དང་བྲལ་བར་གྱུར་ཅིག་ཅེས་གསུངས༌སོ།།
MAT 15:5 འོན་ཀྱང་ཁྱོད་ཅག་ལས་སུ་ཞིག་གིས་རང་གི་ཕའམ་མ༌ལ། ངས་ཁྱེད་ལ་འབུལ་འོས་པ་དེ་དཀོན་མཆོག་ལ་ཕུལ་བ་ཡིན་ཞེས་སྨྲས༌ན།
MAT 15:6 མི་དེས་རང་གི་ཕའམ་མ་ལ་བརྩི་བཀུར་མ་བྱས་ཀྱང་ཆོག་ཅེས་སྨྲ་བ༌ཡིན། ཁྱོད་ཅག་གིས་རང་གི་ལུགས་སྲོལ་ལྟར་དཀོན་མཆོག་གི་བཀའ་རིང་དུ་དོར་བ་ཡིན༌པས།
MAT 15:7 ཚུལ་འཆོས་པ་ཁྱོད་ཅག་གི་སྐོར་ལ་ཡེ་ཤ་ཡཱ་ཡིས་ལེགས་པར་གསུངས་པ་འདི་ལྟ༌སྟེ།
MAT 15:8 མི་སྡེ་འདི་ཡིས་ངག་ནས་ང་རང་བཀུར་ན༌ཡང༌།། ཁོ་ཚོའི་སེམས་ནི་ང་དང་ཡོངས་སུ་བྲལ་བ༌ཡིན།།
MAT 15:9 འཇིག་རྟེན་མི་ཡིས་བརྩམས་པའི་བསླབ་བྱ་སྣ་ཚོགས༌པ།། བདེན་པའི་ཆོས་ཀྱི་གཞུང་ལུགས་ཡིན་ཁུལ་སྟོན་བྱེད༌པས།། བདག་ལ་དེ་འདྲའི་བསྙེན་བཀུར་བྱས་ཀྱང་སྙིང་པོ༌མེད།། ཅེས་ལུང་བསྟན་པ་ཡིན་ཞེས༌པའོ།།
MAT 15:10 དེ་ནས་སྐྱབས་མགོན་ཡེ་ཤུས་མི་ཚོགས་ཚུར་བོས་ཏེ་འདི་སྐད༌དུ། ཁྱོད་ཅག་གིས་བདག་གི་གཏམ་ལ་ཉོན་དང་དོན་ཡང་ཤེས་པར༌གྱིས།
MAT 15:11 ཁ་ནས་ཁོག་ཏུ་སོང་བ་དེས་མི་མི་གཙང་བར་བྱེད་མི་ནུས༌ལ། ཁ་ནས་ཕྱིར་ཐོན་པ་དེས་མི་མི་གཙང་བར་བྱེད་པ་ཡིན་ཞེས་གསུངས༌སོ།།
MAT 15:12 དེའི་དུས༌སུ། ཐུགས་སྲས་རྣམས་ཡོང་སྟེ་ན༌རེ། ཕ་རུ་ཤི་པ་རྣམས་ཀྱིས་ཁྱེད་ཀྱི་གསུང་དེ་ཐོས་ནས་མི་དགའ་བར་གྱུར་པ་ཁྱེད་ཀྱིས་མཁྱེན་ནམ་ཞེས་ཞུས་པ༌ལ།
MAT 15:13 ཁོང་གིས་འདི་སྐད༌དུ། ནམ་མཁའི་ཞིང་ཁམས་སུ་བཞུགས་པའི་བདག་གི་ཡབ་ཀྱིས་བཙུགས་པ་མ་ཡིན་པའི་རྩི་ཤིང་ཐམས་ཅད་རྩ་བ་ནས་འབལ་བར་འགྱུར༌བས།
MAT 15:14 ཕ་རུ་ཤི་པ་རྣམས་ལ་དེ་ལྟར་བྱེད་དུ་ཆུག༌དང༌། དེ་དག་ནི་ལོང་བས་ལོང་བར་ལམ་ཁྲིད་པ་ཡིན༌ཏེ། ལོང་བས་ལོང་བར་ལམ་ཁྲིད་ན་དེ་གཉིས་ཀ་དོང་ནང་དུ་ལྷུང་བར་འགྱུར་ཞེས་གསུངས༌སོ།།
MAT 15:15 པེ་ཏྲོ་ན༌རེ། གོང་ནས་གསུངས་པའི་དཔེ་དེའི་ནང་དོན་ངེད་ཅག་ལ་གསུང་བར་མཛོད་ཅེས་ཞུས་པ༌ན།
MAT 15:16 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་ད་དུང་ཧ་མི་གོ་བ་ཡིན༌ནམ།
MAT 15:17 ཁ་ནས་ཁོག་ཏུ་གང་ཞིག་སོང་བ་དེ་ནི་མིའི་ཁོག་ཏུ་སོང་ཞིང་གཙང་སྤྱོད་དུ་ལྷུང་འགྲོ་བ་མི་ཤེས༌སམ།
MAT 15:18 མིའི་སེམས་ནས་གང་ཞིག་ཕྱིར་ཐོན་པ་དེས་ད་གཟོད་མི་མི་གཙང་བར༌བྱེད།
MAT 15:19 རྒྱུ་མཚན་ནི་མིའི་སེམས་ལས་དྲན་ཚུལ་ངན་པ༌དང༌། མིའི་སྲོག་གཅོད༌པ། ལོག༌གཡེམ། མི་ཚངས་སྤྱོད༌པ། མ་བྱིན༌ལེན། རྫུན་གྱི་དཔང༌པོ། འཕྱ་དམོད་བཅས་འབྱུང་བའི་ཕྱིར༌རོ།།
MAT 15:20 འདི་ཐམས་ཅད་ཀྱིས་མི་མི་གཙང་བར་བྱེད་པ༌ལས། ལག་པ་མ་བཀྲུས་པར་ཟས་ཟ་བ་དེས་མི་མི་གཙང་བར་བྱེད་མི་ནུས་ཞེས་གསུངས༌སོ།།
MAT 15:21 སྐྱབས་མགོན་ཡེ་ཤུ་ཡུལ་དེ་དང་ཁ་བྲལ་ནས་ཐཱར་དང་ཚི་ཏུན་གྱི་མངའ་ཁོངས་སུ་ཕེབས་པ༌ན།
MAT 15:22 དེ་རུ་ཀ་ན་ཨན་ཡུལ་གྱི་བུད་མེད་ཅིག་ཡོད་པ་ཡོང་ནས་སྐད་ཆེན༌པོས། ཀྱེ། དཱ་བིད་ཀྱི་རིགས་སྲས་གཙོ་བོ༌ལགས། བདག་གི་བུ་མོ་གདོན་འདྲེས་བཟུང་ནས་སྡུག་བསྔལ་ཆེན་པོ་མྱོང་བཞིན་འདུག༌པས། བདག་ལ་སྙིང་རྗེས་གཟིགས་པར་དགོངས་ཞེས་ཞུས༌ཀྱང༌།
MAT 15:23 སྐྱབས་མགོན་ཡེ་ཤུས་བཀའ་ལན་ཅི་ཡང་མ་གསུངས༌སོ། །དེ་ནས་ཐུགས་སྲས་རྣམས་ཁོང་གི་དྲུང་དུ་ཡོང་སྟེ་ན༌རེ། བུད་མེད་འདིས་བདག་ཅག་གི་རྗེས་འབྲངས་ནས་སྐད་རྒྱག་བཞིན་འདུག༌པས། ཁྱེད་ཀྱིས་ཁོ་མོ་ཕར་མངག་པར་མཛོད་ཅེས་ཞུས་པ༌ལ།
MAT 15:24 ཁོང་གིས་འདི་སྐད༌དུ། བདག་ནི་བོར་ཟིན་པའི་ལུག་ལྟ་བུའི་ཡེས་ར་ཨེལ་གྱི་ཁྱིམ་རྒྱུད་ཁོ་ནའི་གམ་དུ་མངགས་པ་ཡིན་ཞེས་གསུངས༌སོ།།
MAT 15:25 དེ་ནས་བུད་མེད་ཡོང་ནས་པུས་མོ་སར་བཙུགས་ཤིང་ཁོང་ལ་ཕྱག་བཙལ་ཏེ། གཙོ་བོ༌ལགས། ང་ལ་སྐྱབས་མཛོད་ཅིག་ཅེས་ཞུས་པ༌ན།
MAT 15:26 ཁོང་གིས་འདི་སྐད༌དུ། ཕྲུ་གུའི་ཟས་སྐལ་ཁྱི་ལ་སྟེར་མི་རུང་ཞེས་གསུངས༌སོ།།
MAT 15:27 ཡང་བུད་མེད་ན༌རེ། ལགས༌སོ། །གཙོ་བོ༌ལགས། འོན་ཀྱང་ཁྱི་ཡིས་བདག་པོའི་ཅོག་ཙེ་འོག་གི་ཟས་ཧྲུག་ཀྱང་ཟ་བ་ཡིན་ཞེས་ཞུས༌སོ།།
MAT 15:28 ཡང་ཁོང་གིས་འདི་སྐད༌དུ། བུད་མེད་ཁྱོད་ལ་དད་པ་ཆེ༌བས། ཁྱོད་ཀྱི་འདོད་པ་བཞིན་དུ་གྲུབ་གྱུར་ཅིག་ཅེས་གསུངས༌སོ། །དུས་དེ་ནས་བཟུང་ཁོ་མོའི་བུ་མོའང་ནད་ལས་ཐར་བར་གྱུར༌ཏོ།།
MAT 15:29 སྐྱབས་མགོན་ཡེ་ཤུ་ཡུལ་དེ་དང་ཁ་བྲལ་ནས་མཚོ་ག་ལིལ་གྱི་ཉེ་འགྲམ་དུ་བྱོན་ཏེ་རི་བོར་ཕེབས་ནས་བཞུགས༌སོ།།
MAT 15:30 མི་སྐོར་ཚོ་མང་པོས་གྱོལ་པོ༌དང༌། ལོང༌བ། ལྐུགས༌པ། དབང་བོ་སྐྱོན༌ཅན། ནད་པ་གཞན་མང་པོ་ཁོང་གི་དྲུང་དུ་བསྐྱལ༌ཞིང༌། ཁོང་གིས་ཀྱང་ནད་པ་དེ་རྣམས་ཀྱི་ནད་འཇོམས་པར༌མཛད།
MAT 15:31 ལྐུགས་པ་རྣམས་ཀྱིས་སྐད་ཆ་སྨྲ་ཤེས་པ༌དང༌། དབང་བོ་སྐྱོན་ཅན་སོས༌པ། གྱོལ་པོ་འགྲོ༌བ། ལོང་བས་མིག་གིས་མཐོང་བ་སོགས་ཀྱི་དོན་མི་རྣམས་ཀྱིས་མཐོང༌སྟེ། ངོ་མཚར་སྐྱེས་ཤིང་ཡེས་ར་ཨེལ་གྱི་དཀོན་མཆོག་ལ་བསྟོད་བསྔགས་བརྗོད༌དོ།།
MAT 15:32 དེ་ནས་སྐྱབས་མགོན་ཡེ་ཤུས་ཐུགས་སྲས་རྣམས་རང་གི་དྲུང་དུ་བོས་ཏེ་འདི་སྐད༌དུ། མི་འདི་རྣམས་བདག་དང་མཉམ་དུ་གནས་འདི་ནས་ཉིན་གསུམ་འགོར༌ཀྱང༌། ད་ལྟ་ཁ་ཟས་ཅི་ཡང་མེད་པས་བདག་གིས་ཁོ་རྣམས་ལ་སྙིང་རྗེ་བར༌འདུག ངས་ཁོ་རྣམས་བཀྲེས་པའི་ངང་ནས་ཕྱིར་འགྲོ་རུ་འཇུག་མི་འདོད༌དེ། དེ་རྣམས་ལམ་བར་དུ་ཐང་ཆད་ནས་བརྒྱལ་ཉེན་ཡོད་ཅེས་གསུངས༌སོ།།
MAT 15:33 ཐུགས་སྲས་རྣམས་ན༌རེ། དབེན་སྟོང་འདི་རུ་མི་འདི་འདྲ་མང་པོ་ཞིག་ལྟོ་བ་འགྲང་བར་བྱེད་པའི་བག་ལེབ་གང་ནས་རྙེད་ཐུབ་བམ་ཞེས་ཞུས་པ༌དང་།
MAT 15:34 ཁོང་གིས་འདི་སྐད༌དུ། ཁྱོད་ཅག་ལ་བག་ལེབ་ག་ཚོད་ཡོད་ཅེས་དྲིས་པ༌ན། ཁོ་རྣམས་ཀྱིས་བག་ལེབ་བདུན་དང་ཉ་ཆུང་ངུ་འགའ་ཡོད་ཅེས་ཞུས༌སོ།།
MAT 15:35 སྐྱབས་མགོན་ཡེ་ཤུས་མི་ཚོགས་ལ་བཀའ་གནང་སྟེ་ས་རུ་སྡོད་དུ་བཅུག༌ཅིང༌།
MAT 15:36 བག་ལེབ་བདུན་པོ་དང་ཉ་འགའ་ཤས་ཕྱག་ཏུ་བསྣམས་ཏེ་དཀོན་མཆོག་ལ་བཀའ་དྲིན་ཞུས༌རྗེས། དུམ་བུར་བྱས་ནས་ཐུགས་སྲས་རྣམས་ལ་སྤྲད་ཅིང་དེ་རྣམས་ཀྱིས་ཀྱང་མི་ཚོགས་ལ༌བཀྲམ།
MAT 15:37 མི་ཚོགས་ཀྱིས་ཟས་སྤྱད་ནས་ལྟོ་བ་འགྲངས་པ༌དང༌། ཐུགས་སྲས་རྣམས་ཀྱིས་ཟས་ལྷག་བསྡུ་གསོག་བྱས་པ་སླེ་བོ་བདུན༌བྱུང༌།
MAT 15:38 དུས་དེར་ཟས་སྤྱོད་མཁན་ནི་བུད་མེད་དང་བྱིས་པ་ལས་གཞན་སྐྱེས་པ་བཞི་སྟོང་ཙམ༌ཡོད།
MAT 15:39 དེ་ནས་སྐྱབས་མགོན་ཡེ་ཤུས་མི་རྣམས་སོ་སོར་གྱེས་སུ་བཅུག༌རྗེས། ཁོང་ཉིད་མཚོ་གྲུར་བཞུགས་ནས་མག་ད་ལཱའི་ཡུལ་ཕྱོགས་སུ་ཕེབས༌སོ།།
MAT 16:1 དེ་ནས་ཕ་རུ་ཤི་པ་དང་སཱ་ཅུ་སེ་པ་རྣམས་ཡོང་སྟེ་སྐྱབས་མགོན་ཡེ་ཤུ་ལ་ནམ་མཁའི་ཞིང་ཁམས་ཀྱི་གྲུབ་རྟགས་ཤིག་སྟོན་དང་ཞེས་ཚོད་བརྟགས་པ༌ལ།
MAT 16:2 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་ས་རུབ་ལ་ཉེ་བའི་དུས༌སུ། ནམ་མཁར་སྤྲིན་དམར་ཡོད༌ན། ཕྱི་ཉིན་ནམ་མཁའ་གཡའ་དག་པར་ངེས་ཞེས་ཟེར༌ཅིང༌།
MAT 16:3 ཞོགས་པར་ནམ་མཁར་སྤྲིན་དམར་དང་སྤྲིན་ནག་ཡོད༌ན། དེ་རིང་ཆར་རླུང་ཡོད་པར་ངེས་ཞེས༌ཟེར། ཁྱོད་རྣམས་ཀྱིས་ནམ་མཁའི་རང་བཞིན་བརྟགས་པས་ཤེས༌ཀྱང༌། དུས་འདིའི་རྟགས་ནི་རྟོག་ཀྱང་མི་ཤེས༌སོ།།
MAT 16:4 མི་རབས་ངན་པ་དང་གཡེམ་སྦྱོར་ཅན་ཞིག་གིས་གྲུབ་རྟགས་འཚོལ་གྱིན་འདུག༌མོད། འོན་ཀྱང་ཡོ་ནཱའི་རྟགས་ངོ་མཚར་ཅན་དེ་ལས༌གཞན། དེ་རྣམས་ལ་རྟགས་ཅི་ཡང་སྟོན་པར་མི་འགྱུར་ཞེས་གསུངས་པ་དང་ཁོང་ཉིད་མི་དེ་རྣམས་དང་ཁ་བྲལ་ནས་ཕེབས༌སོ།།
MAT 16:5 དེ་ནས་ཐུགས་སྲས་རྣམས་མཚོའི་ཕ་རོལ་ཏུ་བརྒལ་བ་དང་ལམ་བྲོ་འཁྱེར་བ་བརྗེད༌དོ།།
MAT 16:6 སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། ཁྱོད་ཅག་གིས་བློ་རིག་བསྒྲིམས་ནས་ཕ་རུ་ཤི་པ་དང་སཱ་ཅུ་སེ་པ་རྣམས་ཀྱི་སྐྱུར་རྩི་ལ་གཟབ་པར་གྱིས་ཞེས་བཀའ་གནང༌ཞིང༌།
MAT 16:7 ཐུགས་སྲས་རྣམས་ཀྱིས་ཕན་ཚུན་ལ་འདི་ནི་བདག་ཅག་གིས་བག་ལེབ་ཁྱེར་མེད་པའི་ཕྱིར་ཡིན་ཞེས་གླེང་མོལ་བྱས་པ༌ལ།
MAT 16:8 སྐྱབས་མགོན་ཡེ་ཤུས་དོན་དེ་མཁྱེན༌ནས། དད་པ་ཆུང་བ་ཁྱོད་རྣམས་ཀྱིས་ཅིའི་ཕྱིར་བག་ལེབ་མེད་པའི་གཏམ་གླེང་བ་ཡིན༌ནམ།
MAT 16:9 ཁྱོད་ཅག་གིས་ད་དུང་མི་ཤེས༌སམ། བག་ལེབ་ལྔ་མི་ལྔ་སྟོང་ལ་བགོས་ཤིང་ཟས་ལྷག་སླེ་བོ་ཅི་ཙམ་བསྡུས་པ་མི་དྲན༌ནམ།
MAT 16:10 བག་ལེབ་བདུན་མི་བཞི་སྟོང་ལ་བགོས་ཤིང་ཟས་ལྷག་སླེ་བོ་ཅི་ཙམ་བསྡུས་པའང་མི་དྲན༌ནམ།
MAT 16:11 བདག་གིས་ཁྱོད་རྣམས་ལ་ཕ་རུ་ཤི་པ་དང་སཱ་ཅུ་སེ་པ་རྣམས་ཀྱི་སྐྱུར་རྩི་ལ་གཟབ་པར་གྱིས་ཞེས་སྨྲས༌ལ། འདི་ནི་བག་ལེབ་སྐོར་ལ་སྨྲས་པ་མ་ཡིན༌པས། ཁྱོད་རྣམས་ཀྱིས་མི་ཤེས་པ་དེ་ཅི་ཡིན་ཞེས་གསུངས༌སོ།།
MAT 16:12 དེ་ནི་སྐྱབས་མགོན་ཡེ་ཤུས་བག་ལེབ་ཀྱི་སྐྱུར་རྩི་ལ་དོགས་ཟོན་བྱོས་ཞེས་གསུངས་པ་མ་ཡིན༌པར། ཕ་རུ་ཤི་པ་དང་སཱ་ཅུ་སེ་པ་རྣམས་ཀྱི་བསླབ་བྱ་ལ་དོགས་ཟོན་བྱོས་ཤིག་ཅེས་པའི་དོན་དེ་ཐུགས་སྲས་རྣམས་ཀྱིས་ད་གཟོད་ཤེས་པར་གྱུར༌ཏོ།།
MAT 16:13 དེ་ནས་སྐྱབས་མགོན་ཡེ་ཤུ་ནི་ཀེ་སར་ཡཱ་ཕི་ལིབ་པི་ཡི་མངའ་ཁོངས་སུ་ཕེབས་ཏེ་ཐུགས་སྲས་རྣམས་ལ་འདི་སྐད༌དུ། མི་རྣམས་ཀྱིས་མིའི་བུ་ནི་སུ་ཡིན་པར་སྨྲ་བཞིན་འདུག་གམ་ཞེས་དྲིས་པ༌ན།
MAT 16:14 ཐུགས་སྲས་རྣམས་ན༌རེ། མི་ལ་ལས་ཁྲུས་གསོལ་མཁན་ཡོ་ཧ་ནན༌དང༌། ལ་ལས་ཨེ་ལི༌ཡཱ། ཡང་མི་ལ་ལས་ཡེ་རེམ་ཡཱའམ་ལུང་སྟོན་པའི་གྲས་ཀྱི་གཅིག་ཡིན་ཟེར་གྱི་འདུག་ཅེས་ཞུས༌སོ།།
MAT 16:15 ཡང་སྐྱབས་མགོན་ཡེ་ཤུས་འདི་སྐད༌དུ། འོ༌ན། ཁྱོད་ཅག་གིས་ང་རང་ནི་སུ་ཡིན་པར་གླེང་ངམ་ཞེས་དྲིས་པ༌ལ།
MAT 16:16 སི་མོན་པེ་ཏྲོ་ན༌རེ། ཁྱེད་ནི་མཱ་ཤི་ཀ་སྟེ་གཏན་དུ་གསོན་པོར་བཞུགས་པའི་དཀོན་མཆོག་གི་སྲས་ཡིན་ཞེས་ཞུས༌སོ།།
MAT 16:17 ཡང་སྐྱབས་མགོན་ཡེ་ཤུས་འདི་སྐད༌དུ། ཡོ་ནཱའི་བུ་སི་མོན་ཁྱོད་ནི༌བདེའོ། །ཅིའི་ཕྱིར་ཞེ༌ན། དོན་འདི་ནི་ཤ་ཁྲག་གདོས་བཅས་སུ་གྲུབ་པ་དེས་ཁྱོད་ལ་བསྟན་པ་མ་ཡིན༌པར། ནམ་མཁའི་ཞིང་ཁམས་སུ་བཞུགས་པའི་བདག་གི་ཡབ་ཀྱིས་མངོན་པར་མཛད་པའི་ཕྱིར༌རོ།།
MAT 16:18 ཡང་བདག་གིས་ཁྱོད་ལ་སྨྲ་བར་བྱ༌སྟེ། ཁྱོད་ནི་པེ་ཏྲོ༌ཡིན། བདག་གིས་རང་གི་ཆོས་ཚོགས་ནི་རྡོ་ཕ་བོང་འདིའི་སྟེང་དུ་འཛུགས་པར༌བྱའོ། །གཤིན་པོའི་གནས་ཀྱི་སྒོ་རྣམས་ ཀྱང་དེ་ལས་རྒྱལ་མི༌ནུས།
MAT 16:19 བདག་གིས་ནམ་མཁའི་རྒྱལ་སྲིད་ཀྱི་ལྡེ་མིག་ཁྱོད་ལ་སྤྲོད༌ཅིང༌། ཁྱོད་ཀྱིས་ས་སྟེང་ནས་གང་ཞིག་བསྡམས་པ་དེ་ནམ་མཁའི་ཞིང་ཁམས་སུའང་བསྡམ་པར་འགྱུར༌ཞིང༌། ཁྱོད་ཀྱིས་ས་སྟེང་ནས་གང་ཞིག་བཀྲོལ་བ་དེ་ནམ་མཁའི་ཞིང་ཁམས་སུའང་དགྲོལ་བར་འགྱུར་ཞེས་གསུངས༌སོ།།
MAT 16:20 དེ་ནས་ཁོང་གིས་ཐུགས་སྲས་རྣམས་ལ་རང་ཉིད་ནི་མཱ་ཤི་ཀ་ཡིན་པ་སུ་ལའང་མི་སྨྲ་བའི་ཕྱིར་ནན་གྱིས་བསྐུལ༌ཏོ།།
MAT 16:21 དུས་དེ་ནས༌བཟུང༌། སྐྱབས་མགོན་ཡེ་ཤུས་ཐུགས་སྲས་རྣམས་ལ་དོན་འདི་རྣམས་སྟོན་པར་འགོ་བརྩམས༌ཏེ། ཁོང་ངེས་པར་ཡེ་རུ་སཱ་ལེམ་དུ་འགྲོ་བ༌དང༌། རྒན་པོ་ དང༌། མཆོད་དཔོན་ཆེན་པོ༌དག མཁན་པོ་རྣམས་ཀྱིས་ཁོང་ཉིད་ལ་སྡུག་བསྔལ་མང་པོ་མྱང་དུ་འཇུག༌ཅིང༌། ཁོང་ཉིད་དགྲོང་པ་དང་ཉིན་གསུམ་པ་ལ་སླར་གསོན་པར་འགྱུར་དགོས་པ་བཅས༌སོ།།
MAT 16:22 པེ་ཏྲོས་དེ་ཐོས་པ་དང་སྐྱབས་མགོན་ཡེ་ཤུའི་ཕྱག་ལ་འཇུས༌ཏེ། གཙོ་བོ༌ལགས། དོན་དེ་ལྟ་བུ་ཞིག་ནམ་ཡང་ཁྱེད་ལ་འབྱུང་མི་སྲིད་ཅེས་ནན་གྱིས་བསྐུལ་བ༌ན།
MAT 16:23 སྐྱབས་མགོན་ཡེ་ཤུས་ཕྱིར་འཁོར་ནས་པེ་ཏྲོ་ལ་འདི་སྐད༌དུ། བདུད་སཱ་ཏན་ཁྱོད་ངའི་རྒྱབ་ཏུ་སོང༌ཞིག ཁྱོད་ཀྱིས་དཀོན་མཆོག་གི་དགོངས་པ་མི་བསམ༌པར། མིའི་འདོད་བློ་ཁོ་ན་བསམས་པས་ཁྱོད་ནི་བདག་གི་བཀག་རྡོ་ཡིན་ཞེས་གསུངས༌སོ།།
MAT 16:24 དེ་ནས་སྐྱབས་མགོན་ཡེ་ཤུས་རང་གི་ཐུགས་སྲས་རྣམས་ལ་འདི་སྐད༌དུ། སུ་ཞིག་ང་ཡི་རྗེས་སུ་འབྲང་འདོད༌ན། རང་ཉིད་དོར་ནས་རང་གི་ཤིང་རྒྱ་གྲམ་ཁུར་ཏེ་ང་ཡི་རྗེས་སུ་འབྲང་བར༌གྱིས།
MAT 16:25 སུ་ཞིག་གིས་རང་སྲོག་སྐྱོབ་འདོད་པ་དེས་རང་སྲོག་འཆོར༌ཞིང༌། སུ་ཞིག་གིས་བདག་གི་དོན་དུ་རང་སྲོག་འདོར་བ་དེར་རང་སྲོག་འཐོབ་ངེས༌ཡིན།
MAT 16:26 སུ་ཞིག་གིས་འཇིག་རྟེན་ཧྲིལ་པོ་རག་ཀྱང་རང་སྲོག་བོར་ན་ཅི་ལ༌ཕན། མིས་རང་ལ་ཚེ་སྲོག་འཐོབ་པར་རིན་ཅི་ཞིག་སྤྲོད༌དམ།
MAT 16:27 མིའི་བུ་ནི་ཡབ་ཀྱི་གཟི་བརྗིད་ཀྱི་ངང་ནས་ཕོ་ཉ་འཁོར་དང་བཅས་པ་འཇིག་རྟེན་དུ་ཕེབས་ངེས༌ཏེ། དེའི་དུས་སུ་མིའི་བུ་ཡིས་མི་རང་རང་གི་སྤྱོད་པ་བཟང་ངན་ལྟར་བྱ་དགའ་གནང་བ་དང་ཉེས་ཆད་གཅོད་ངེས༌ཡིན།
MAT 16:28 བདག་གིས་ཁྱོད་རྣམས་ལ་བདེན་པར་སྨྲ༌སྟེ། འདི་རུ་སྡོད་པའི་མི་རྣམས་ལས་འགའ་ཞིག་གིས་འཆི་བ་དངོས་སུ་མ་མྱོང་བའི་སྔོན༌དུ། མིའི་བུ་རང་གི་རྒྱལ་སྲིད་དུ་ཕེབས་པ་མཐོང་ངེས་ཡིན་ཞེས་གསུངས༌སོ།།
MAT 17:1 དེ་ནས་ཉིན་དྲུག་འགོར༌རྗེས། སྐྱབས་མགོན་ཡེ་ཤུས་པེ་ཏྲོ༌དང༌། ཡ༌ཀོབ། ཡ་ཀོབ་ཀྱི་སྤུན་ཡོ་ཧ་ནན་བཅས་ཁྲིད་ནས་རི་མཐོན་པོ་ཞིག་ཏུ་ཕེབས་པ༌དང༌།
MAT 17:2 ཁོ་རྣམས་ཀྱི་མདུན་དུ་ཁོང་གི་རྣམ་པ་འགྱུར༌ཏེ། ཞལ་རས་ནི་ཉི་འོད་བཞིན་དུ་འཕྲོ་བ༌དང༌། ན་བཟའ་ནི་འོད་ཟེར་ལྟར་དཀར་པོར༌གྱུར།
MAT 17:3 གློ་བུར་ཉིད་ལ་མོ་ཤེ་དང་ཨེ་ལི་ཡཱ་གཉིས་མངོན་སུམ་དུ་བྱུང་སྟེ་སྐྱབས་མགོན་ཡེ་ཤུ་དང་གསུང་མོལ་མཛད༌དོ།།
MAT 17:4 པེ་ཏྲོས་སྐྱབས་མགོན་ཡེ་ཤུ༌ལ། གཙོ་བོ༌ལགས། བདག་ཅག་འདི་རུ་བསྡད་ན་དངོས་གནས་ལེགས་པོ༌འདུག ཁྱེད་རང་ཐུགས་དགྱེས་ན་བདག་གིས་འདི་ནས་གུར་གསུམ་བཟོ་བར་བྱ༌སྟེ། ཁྱེད་ལ་གཅིག༌དང༌། མོ་ཤེ་ལ༌གཅིག ཨེ་ལི་ཡཱ་ལའང་གཅིག་ཅེས་ཞུ་བཞིན་པའི་མོད༌ལ།
MAT 17:5 སྐད་ཅིག་ལ་འོད་དང་ལྡན་པའི་སྤྲིན་ཕུང་ཞིག་གིས་ཁོང་རྣམས་བསྒྲིབས་པ་དང་དེའི་ཁྲོད་ནས་སྐད་སྒྲ་ཞིག་གྲགས༌ཏེ། འདི་ནི་བདག་གི་གཅེས་པའི་བུ་ཡིན༌ཞིང༌། ང་རང་ཁོ་ལ་ཤིན་ཏུ༌དགའ། ཁྱོད་ཅག་གིས་ཁོའི་གཏམ་ལ་ཉོན་ཅིག་ཅེས་གསུངས༌སོ།།
MAT 17:6 ཐུགས་སྲས་རྣམས་ཀྱིས་གསུང་དེ་ཐོས་པ་དང་ཁ་སྦུབ་ཏུ་འགྱེལ་ཞིང་ཤིན་ཏུ༌འཇིགས།
MAT 17:7 སྐྱབས་མགོན་ཡེ་ཤུ་ཕེབས་ཡོང་སྟེ་ཁོ་རྣམས་ལ་ཕྱག་གིས་རེག༌ཅིང༌། ཡར་ལོངས་དང་མ་འཇིགས་ཤིག་ཅེས་གསུངས་པ༌དང༌།
MAT 17:8 ཐུགས་སྲས་རྣམས་ཀྱིས་ཡར་བལྟས་པ་ན་སྐྱབས་མགོན་ཡེ་ཤུ་ལས་གཞན་སུའང་མ་མཐོང༌ངོ༌།།
MAT 17:9 དེ་ནས་ཁོང་རྣམས་རི་བོ་ལས་མར་ཕེབས་པའི་དུས༌སུ། སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། མིའི་བུ་ད་དུང་འཆི་བ་ལས་སླར་གསོན་པའི་བར་དུ་ཁྱོད་རྣམས་ཀྱིས་ཅི་མཐོང་བ་དེ་གཞན་སུ་ལའང་མི་སྨྲ་བར་གྱིས་ཞེས་བཀའ་བསྒོས༌སོ།།
MAT 17:10 ཐུགས་སྲས་རྣམས་ན༌རེ། མཁན་པོ་རྣམས་ཀྱིས་ཨེ་ལི་ཡཱ་སྔོན་ལ་འབྱོན་ངེས་ཡིན་ཞེས་ཟེར་དོན་ཅི་ཞུས་པ༌ལ།
MAT 17:11 ཡང་ཁོང་གིས་འདི་སྐད༌དུ། ཨེ་ལི་ཡཱ་དངོས་སུ་སྔོན་ལ་བྱོན་ཏེ་ཐམས་ཅད་བསྐྱར་དར་བྱ་བར༌ངེས།
MAT 17:12 འོན༌ཀྱང༌། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཨེ་ལི་ཡཱ་ནི་སྔར་ནས་བྱོན་ཟིན༌ཅིང༌། མི་རྣམས་ཀྱིས་ཁོང་ཉིད་སུ་ཡིན་པ་མ་ཤེས༌པས་ཁོང་ལ་ཅི་འདོད་བཞིན༌བྱས། དེ་བཞིན༌དུ། མི་དེ་རྣམས་ཀྱིས་མིའི་བུ་ལའང་གནོད་འཚེ་བྱ་བར་འགྱུར་ཞེས་གསུངས་པ༌ན།
MAT 17:13 ད་གཟོད་ཐུགས་སྲས་རྣམས་ཀྱིས་གསུང་འདི་ནི་ཁོང་གིས་ཁྲུས་གསོལ་མཁན་ཡོ་ཧ་ནན་ལ་དམིགས་ནས་གསུངས་པ་ཤེས༌སོ།།
MAT 17:14 སྐྱབས་མགོན་ཡེ་ཤུ་དང་ཐུགས་སྲས་རྣམས་མི་ཚོགས་ཡོད་སར་ཕེབས་པ༌དང༌། མི་ཞིག་ཁོང་གི་དྲུང་དུ་ཡོང་ནས་པུས་མོ་སར་བཙུགས་ཏེ་ན༌རེ།
MAT 17:15 གཙོ་བོ༌ལགས། བདག་གི་བུ་ལ་སྙིང་རྗེ་གནང་བར༌མཛོད། ཁོ་ལ་གཟའ་ཕོག་ནས་སྡུག་བསྔལ་ཆེན་པོ་མྱངས༌ཏེ། ཐེངས་དུ་མར་མེའི་ནང་དུ་ལྷུང་བ༌དང༌། ཐེངས་དུ་མར་ཆུའི་ནང་དུའང༌ལྷུང༌།
MAT 17:16 ངས་རང་གི་བུ་ཁྱེད་ཀྱི་ཐུགས་སྲས་རྣམས་ཀྱི་དྲུང་དུ་ཁྲིད༌ནའང༌། དེ་རྣམས་ཀྱིས་ཁོ་རང་གསོ་བར་མ་ནུས་ཞེས་ཞུས་པ༌ལ།
MAT 17:17 སྐྱབས་མགོན་ཡེ་ཤུས་འདི་སྐད༌དུ། ཀྱེ། དད་པ་མེད་པ་དང་ཕྱིན་ཅི་ལོག་པའི་མི་རབས༌འདི། བདག་ནི་ཁྱོད་ཅག་དང་མཉམ་དུ་དུས་ནམ་ཞིག་གི་བར་དུ་སྡོད་དགོས༌སམ། ངས་དུས་ནམ་ཞིག་གི་བར་དུ་ཁྱོད་རྣམས་ལ་བཟོད་བསྲན་བྱེད་དགོས༌སམ། བུ་དེ་བདག་གི་མདུན་དུ་ཁྲིད་ཤོག་ཅིག་ཅེས་གསུངས་པ༌དང༌།
MAT 17:18 སྐྱབས་མགོན་ཡེ་ཤུས་གདོན་འདྲེ་དེར་བཀའ་བཀྱོན་མཛད་པ་དང་གདོན་འདྲེ་ཕྱི་རུ༌ཐོན། དེ་ནས་བཟུང་བུ་དེ་ནད་ལས་ཐར་བར་གྱུར༌ཏོ།།
MAT 17:19 ཐུགས་སྲས་རྣམས་ཟུར་དུ་སྐྱབས་མགོན་ཡེ་ཤུའི་དྲུང་ལ་ཡོང༌སྟེ། ངེད་རྣམས་ཀྱིས་ཅིའི་ཕྱིར་གདོན་འདྲེ་དེ་ཕྱིར་སྐྲོད་མ་ནུས་ཞེས་ཞུས་པ༌ལ།
MAT 17:20 ཁོང་གིས་འདི་སྐད༌དུ། དེ་ནི་ཁྱོད་རྣམས་ཀྱི་དད་པ་ཆུང་བའི་ཕྱིར༌ཡིན། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་རྣམས་ལ་ཡུངས་འབྲུའི་ས་བོན་ལྟ་བུའི་དད་པ་ཆུང་ངུ་ཙམ་ཡོད༌ན། ཁྱོད་རྣམས་ཀྱིས་རི་བོ་འདི༌ལ། ཁྱོད་འདི་ནས་ཕར་སྤོས་ཤིག་ཅེས་སྨྲས༌ན། རི་བོ་དེའང་ཕར་སྤོ་བར་འགྱུར༌བས། ཁྱོད་རྣམས་ཀྱིས་བསྒྲུབ་མི་ནུས་པ་ཅི་ཡང༌མེད།
MAT 17:21 འོན་ཀྱང་གདོན་འདྲེ་འདིའི་རིགས་སྨོན་ལམ་འདེབས་པ་དང་སྨྱུང་གནས་སྲུང་བ་ལས༌གཞན། ཐབས་གང་གིས་ཀྱང་ཕྱིར་སྐྲོད་མི་ནུས་ཞེས་གསུངས༌སོ།།
MAT 17:22 ཁོང་རྣམས་ག་ལིལ་ཡུལ་དུ་འཛོམས་པའི་དུས༌སུ། སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། མིའི་བུ་ཁོ་རང་མི་རྣམས་ཀྱི་ལག་ཏུ་སྤྲོད༌ཅིང༌།
MAT 17:23 དེ་རྣམས་ཀྱིས་ཁོ་རང་གསོད་པར་འགྱུར༌ཡང༌། ཉིན་གསུམ་པ་ལ་ཁོ་རང་སླར་གསོན་ངེས་ཡིན་ཞེས་གསུངས༌པས། ཐུགས་སྲས་རྣམས་ཀྱི་སེམས་ཤིན་ཏུ་སྐྱོ་བར་གྱུར༌ཏོ།།
MAT 17:24 དེ་ནས་ཁོང་རྣམས་ཀཱ་ཕར་ན་ཧུམ་དུ་སླེབས་པ༌ན། མཆོད་ཁང་གི་དཔྱ་ཁྲལ་ལེན་མཁན་རྣམས་པེ་ཏྲོའི་གམ་དུ་ཡོང༌སྟེ། ཁྱོད་ཀྱི་སློབ་དཔོན་གྱིས་མཆོད་ཁང་ལ་དཔྱ་ཁྲལ་མི་འཇལ་ལམ་ཞེས་དྲིས་པ༌ན།
MAT 17:25 པེ་ཏྲོས་འཇལ་བ་ཡིན་ཞེས་སྨྲས༌སོ། །པེ་ཏྲོ་ཁང་པའི་ནང་དུ་སོང་བ༌དང༌། སྐྱབས་མགོན་ཡེ་ཤུས་སྔོན་ལ་འདི་སྐད༌དུ། སི༌མོན། ཁྱོད་ཀྱིས་ཇི་ལྟར་བསམ་པ་ཡིན༌ནམ། འཇིག་རྟེན་གྱི་རྒྱལ་པོ་རྣམས་ཀྱིས་སུ་ལས་ཤོ་གམ་མམ་དཔྱ་ཁྲལ་ལེན་པ་ཡིན༌ནམ། རང་གི་སྲས་ལས་ལེན་ནམ་གཞན་ལས་ལེན་པ་ཡིན་ཞེས་གསུངས་པ༌ལ།
MAT 17:26 པེ་ཏྲོས་མི་གཞན་དག་ལས་ལེན་པ་ཡིན་ཞེས་ཞུས༌སོ། །ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་རྒྱལ་སྲས་རྣམས་ཀྱིས་དཔྱ་ཁྲལ་མ་འཇལ་ཡང༌ཆོག
MAT 17:27 འོན༌ཀྱང༌། དཔྱ་ཁྲལ་ལེན་མཁན་དེ་རྣམས་ཁྲོ་རུ་མི་འཇུག་པའི༌ཕྱིར། ཁྱོད་རང་མཚོ་འགྲམ་དུ་ལྕགས་ཀྱུ་འཕངས་ནས་ཉ་འཛིན་དུ་སོང༌ཞིག ཐོག་མར་བཟུང་བའི་ཉ་དེའི་ཁ་ཕྱེས་ཤིག་དང་དངུལ་སྒོར་གཅིག་རྙེད་པར༌འགྱུར། ཁྱོད་ཀྱིས་དངུལ་སྒོར་དེ་ཁྱེར་ནས་ངེད་གཉིས་ཀའི་དཔྱ་ཁྲལ་གྱི་ཚབ་ཏུ་དེ་རྣམས་ལ་བྱིན་ཅིག་ཅེས་གསུངས༌སོ།།
MAT 18:1 དེའི་དུས༌སུ། ཐུགས་སྲས་རྣམས་སྐྱབས་མགོན་ཡེ་ཤུའི་དྲུང་དུ་ཡོང༌སྟེ། ནམ་མཁའི་རྒྱལ་སྲིད་ནང་དུ་སུ་ཞིག་མཆོག་ཏུ་གྱུར་པ་ཡིན་ནམ་ཞེས་ཞུས་པ༌ལ།
MAT 18:2 ཁོང་གིས་བྱིས་པ་ཆུང་ངུ་ཞིག་རང་གི་དྲུང་དུ་བོས་ཤིང་དེ་རྣམས་ཀྱི་དཀྱིལ་ནས་སྡོད་དུ་བཅུག་རྗེས་འདི་སྐད༌དུ།
MAT 18:3 བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་རྣམས་ཀྱིས་སེམས་བསྒྱུར་ནས་བྱིས་པ་ལྟ་བུར་མ་གྱུར༌ན། ཅིས་ཀྱང་ནམ་མཁའི་རྒྱལ་སྲིད་དུ་ཞུགས་མི་ནུས༌སོ།།
MAT 18:4 དེའི༌ཕྱིར། ཁེངས་སྐྱུང་ངང་བྱིས་པ་འདི་ལྟ་བུར་བྱེད་མཁན་རྣམས་ནི་ནམ་མཁའི་རྒྱལ་སྲིད་ནང་དུ་ཆེས་མཆོག་ཏུ་གྱུར་པ༌ཡིན།
MAT 18:5 ཡང་སུ་ཞིག་གིས་ངའི་མིང་གི་ཕྱིར་འདི་འདྲའི་བྱིས་པ་ཆུང་ངུ་ཞིག་ལ་བསུ་བ་བྱས༌ན། དོན་དམ་དུ་བདག་ལ་བསུ་བ་བྱས་པ༌ཡིན།
MAT 18:6 ཡང་སུ་ཞིག་གིས་བདག་ལ་དད་པ་བྱེད་པའི་བྱིས་པ་ཆུང་ངུ་འདི་རྣམས་ལས་གཅིག་ལ་སྡིག་པ་བྱེད་དུ་འཇུག་པ༌ལས། མི་དེའི་སྐེ་ལ་རང་ཐག་གི་རྡོ་ཆེན་པོ་ཞིག་བཏགས༌ཏེ་རྒྱ་མཚོའི་གཏིང་རིམ་དུ་ནུབ་ན་ལེགས༌སོ།།
MAT 18:7 མི་ལ་སྡིག་པ་བྱེད་དུ་འཇུག་པའི་རྐྱེན་གྱིས་འཇིག་རྟེན་འདི་ལ་ཆག་སྒོ་འབྱུང་བ༌ཡིན། ཡང་སྡིག་པ་བྱེད་དུ་འཇུག་པའི་དོན་དེ་ནི་ཟློག་ཐབས་མེད༌ནའང༌། སྡིག་པ་བྱེད་དུ་འཇུག་མཁན་དེ་ལ་ཆག་སྒོ་འབྱུང༌ངོ༌།།
MAT 18:8 ཁྱོད་ཀྱི་ལག་པའམ་རྐང་པ་གང་རུང་གིས་ཁྱོད་ལ་སྡིག་པ་བྱེད་དུ་འཇུག༌ན། ཡན་ལག་དེ་བཅད་ནས་དོར༌ཅིག ཁྱོད་རང་རྐང་ལག་གཉིས་དང་ལྡན་པར་ནམ་ཡང་ཞི་བ་མེད་པའི་མེ་རུ་གཡུག་པ༌ལས། ལག་རྡུམ་མམ་གྱོལ་པོར་གྱུར་ཀྱང་མཐའ་མེད་པའི་ཚེ་སྲོག་ནང་དུ་ཞུགས་པ་དེ་ལེགས༌སོ།།
MAT 18:9 ཁྱོད་ཀྱི་མིག་གིས་ཁྱོད་ལ་སྡིག་པ་བྱེད་དུ་འཇུག༌ན། མིག་དེ་བཏོན་ནས་དོར༌ཅིག ཁྱོད་རང་མིག་ཟུང་དང་ལྡན་པར་དམྱལ་བའི་གནས་ཀྱི་མེ་རུ་གཡུག་པ༌ལས། མིག་ཡ་གཅིག་མེད་ནའང་མཐའ་མེད་པའི་ཚེ་སྲོག་ནང་དུ་ཞུགས་པ་དེ་ལེགས་ཞེས་གསུངས༌སོ།།
MAT 18:10 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་གཟབ་གཟབ་བྱ་དགོས༌ཏེ། བྱིས་པ་ཆུང་ངུ་འདི་རྣམས་ལས་གཅིག་ལའང་མཐོང་ཆུང་མ་བྱེད༌ཅིག བདག་གིས་ཁྱོད་རྣམས་ལ་སྨྲ་བར་བྱ༌སྟེ། བྱིས་པ་དེ་དག་གི་ཕོ་ཉ་རྣམས་ཀྱིས་ནམ་མཁའི་ཞིང་ཁམས་སུ་བདག་གི་ཡབ་ཀྱི་ཞལ་རས་རྟག་ཏུ་མཐོང་བ༌ཡིན།
MAT 18:11 ཅིའི་ཕྱིར་ཞེ༌ན། མིའི་བུ་ནི་བོར་ཟིན་པ་རྣམས་སྐྱོབ་པའི་ཕྱིར་ཕེབས༌པའོ།།
MAT 18:12 མི་ཞིག་ལ་ལུག་བརྒྱ་ཡོད་ཀྱང་དེ་ལས་ལུག་གཅིག་བོར༌ན། ཁྱོད་རྣམས་ཀྱིས་ཅི་ལྟར་བསམ༌མམ། ཁོས་ལུག་དགུ་བཅུ་གོ་དགུ་ཡོད་པ་རི་ལ་བསྐྱུར༌ཏེ། ལུག་བོར་སོང་བ་དེ་འཚོལ་བ་མ་ཡིན༌ནམ།
MAT 18:13 བདག་གིས་ཁྱོད་རྣམས་ལ་བདེན་པར་སྨྲ༌སྟེ། ལུག་དེ་བཙལ་ནས་རྙེད༌ན། བོར་མེད་པའི་ལུག་དགུ་བཅུ་གོ་དགུ་ལས་ཀྱང་ལུག་གཅིག་པོ་དེའི་ཕྱིར་ལྷག་ཏུ་དགའ་བར་འགྱུར༌རོ།།
MAT 18:14 དཔེ་དེ་བཞིན་དུ་ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱི་ཐུགས༌སུའང༌། བྱིས་པ་ཆུང་ངུ་འདི་རྣམས་ལས་གཅིག་ཀྱང་འབོར་དུ་མི་དགོངས་ཞེས་གསུངས༌སོ།།
MAT 18:15 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱི་སྤུན་ཟླས་ཁྱོད་དང་འགལ་བའི་སྡིག་པ་བྱས༌ན། ཁྱོད་ཕར་སོང༌ལ། ཁྱོད་གཉིས་ཁོ་ན་ཡིན༌དུས། ཁོའི་ཉེས་སྐྱོན་གསལ་པོར་སྟོན༌ཅིག གལ༌ཏེ་ཁོས་ཁྱོད་ཀྱི་གཏམ་ལ་མཉན་པ་ཡིན༌ན། ཁྱོད་ལ་རང་གི་སྤུན་ཟླ་སླར་ཡང་ཐོབ་པ༌ཡིན།
MAT 18:16 གལ༌ཏེ་ཁོས་ཁྱོད་ཀྱི་གཏམ་ལ་མི་ཉན༌ན། ཁྱོད་ཀྱིས་མི་གཅིག་གམ་གཉིས་ཁྲིད་འོང་བར༌བྱའོ། །དེ་ནི་མི་གཉིས་གསུམ་ཞིག་གི་ངག་ལས་བདེན་དཔང་བྱེད་པར་བརྟེན༌ནས། ཚིག་རེ་རེ་བཞིན་གཏན་ལ་དབབ་དགོས་པའི་ཕྱིར༌རོ།།
MAT 18:17 གལ༌ཏེ་ཁོས་ད་དུང་དེ་རྣམས་ཀྱི་གཏམ་ལ་མི་ཉན༌ན། ཆོས་ཚོགས་ལ་ཞུས༌ཤིག གལ༌ཏེ་ཁོས་ཆོས་ཚོགས་ཀྱི་བཀའ་ལའང་མི་ཉན༌ན། ཁོ་ནི་ཕྱི་ཕྱོགས་པ་དང་ཁྲལ་ལེན་མཁན་དང་འདྲ་བར་རྩིས༌ཤིག
MAT 18:18 ཡང་བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་རྣམས་ཀྱིས་ས་སྟེང་ནས་གང་ཞིག་བསྡམས་པ་དེ་ནམ་མཁའི་ཞིང་ཁམས་སུའང་བསྡམ་པར་འགྱུར༌ཞིང༌། ཁྱོད་རྣམས་ཀྱིས་ས་སྟེང་ནས་གང་ཞིག་བཀྲོལ་བ་དེ་ནམ་མཁའི་ཞིང་ཁམས་སུའང་དགྲོལ་བར་འགྱུར༌རོ།།
MAT 18:19 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ས་སྟེང་ནས་ཁྱོད་རྣམས་ལས་མི་གཉིས་ཀྱིས་ཁ་འཆམ་པའི་སྒོ་ནས་ཅི་ཞིག་ཞུས༌ན། ནམ་མཁའི་ཞིང་ཁམས་སུ་བཞུགས་པའི་བདག་གི་ཡབ་ཀྱིས་ཀྱང་དེ་ལྟར་གནང་བར༌འགྱུར།
MAT 18:20 རྒྱུ་མཚན་ནི་གནས་གང་རུང་དུ་མི་གཉིས་ནས་གསུམ་ཙམ་བདག་གི་མིང་ལ་བརྟེན་ནས་ལྷན་འཛོམས་བྱུང༌ན། ང་རང་ཡང་དེ་དག་གི་ཁྲོད་དུ་སྡོད་པ་ཡིན་ཞེས་གསུངས༌སོ།།
MAT 18:21 དེའི་དུས༌སུ། པེ་ཏྲོ་ཡོང་སྟེ་ན༌རེ། གཙོ་བོ༌ལགས། བདག་གི་སྤུན་ཟླས་བདག་དང་འགལ་བའི་སྡིག་པ་བྱས༌ན། ངས་ཐེངས་ཅི་ཙམ་དུ་ཁོ་ལ་གུ་ཡངས་གཏོང་དགོས༌སམ། ཐེངས་བདུན་གྱིས་ཆོག་གམ་ཞེས་ཞུས་པ༌ལ།
MAT 18:22 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ལ་སྨྲ་བར་བྱ༌སྟེ། ཐེངས་བདུན་གྱིས་མི་ཆོག༌སྟེ། བདུན་ཅུའི་ལྡབ་བདུན་བར་དུ་ཁོ་ལ་གུ་ཡངས་གཏོང༌དགོས།
MAT 18:23 ནམ་མཁའི་རྒྱལ་སྲིད་ནི་རྒྱལ་པོ་ཞིག་གིས་རང་གི་གཡོག་པོ་རྣམས་ལ་རྩིས་རྒྱག་པ་དང་འདྲ༌སྟེ།
MAT 18:24 རྩིས་རྒྱག་འགོ་བརྩམས་མ་ཐག༌ཏུ། མི་ཞིག་གིས་རྡོ་ཚད་ ཆིག་ཁྲིའི་བུ་ལོན་ཆད་པ་ཞིག་ཁོང་གི་མདུན་དུ་ཁྲིད་ཡོང༌སྟེ།
MAT 18:25 མི་དེར་སྐྱིན་ཚབ་འཇལ་རྒྱུ་ཅི་ཡང་མེད་པས་བདག་པོས་མི་དེར་རྒྱུ་རྫས་ཐམས་ཅད་བཙོང་དགོས་པ༌དང༌། ཐ་ན་ཁོ་དང་ཁོའི་ཆུང༌མ། བུ་ཕྲུག་བཅས་ཀྱང་བཙོངས་ཏེ་སྐྱིན་ཚབ་འཇལ་དགོས་པའི་བཀའ་ཕབ༌བོ།།
MAT 18:26 དེ་ནས་གཡོག་པོ་དེས་ལུས་པོ་སར་བཏུད་ནས་ཁོང་ལ་ཕྱག་བཙལ་ཏེ། བདག་པོ༌ལགས། ཁྱེད་ཀྱིས་བདག་ལ་བཟོད་པ་གནང་བར༌ཞུ། བདག་གིས་ཕྱིས་སུ་བུ་ལོན་ཐམས་ཅད་འཇལ་ངེས་ཡིན་ཞེས་ཞུས་པ༌ན།
MAT 18:27 བདག་པོས་གཡོག་པོར་སྙིང་རྗེ༌ནས། གཡོག་པོ་དེ་ཕྱིར་བཏང་ཞིང་བུ་ལོན་ཡང་མེད་པར་བྱས༌སོ།།
MAT 18:28 འོན༌ཀྱང༌། གཡོག་པོ་དེ་ཕྱི་རོལ་ཏུ་སོང༌རྗེས། རང་ལ་དངུལ་སྒོར་བརྒྱ་ཆད་པའི་ལས་གྲོགས་ཤིག་དང་ཕྲད་ཅིང༌། ཁོ་རང་བཟུང་ཞིང་མིད་པ་ནས་བསྒགས༌ཏེ། ད་ལྟ་ཁྱོད་ཀྱིས་བུ་ལོན་འཇལ་དགོས་ཞེས་སྨྲས༌སོ།།
MAT 18:29 ཁོའི་ལས་གྲོགས་ཀྱིས་ལུས་པོ་སར་བཏུད་དེ་ཞུ་བ་བྱེད་བཞིན་ན༌རེ། བདག་ལ་བཟོད་པ་གནང་བར༌མཛོད། བདག་གིས་ཕྱིས་སུ་བུ་ལོན་འཇལ་ངེས་ཡིན་ཞེས་སྨྲས༌ནའང༌།
MAT 18:30 ཁོས་དེ་ལྟར་མ་བྱས་པར་ལས་གྲོགས་དེས་བུ་ལོན་འཇལ་ཚར་བའི་བར་དུ་བཙོན་ལ༌བཅུག
MAT 18:31 ལས་གྲོགས་གཞན་རྣམས་ཀྱིས་ཁོས་བྱས་པའི་དོན་དེ་རྣམས་མཐོང་སྟེ་ཡིད་སེམས་ཤིན་ཏུ་སྐྱོ༌ཞིང༌། བདག་པོའི་དྲུང་དུ་སོང་ནས་དོན་དེ་ཐམས་ཅད་ཁོང་ལ་ཞུས༌སོ།།
MAT 18:32 བདག་པོས་གཡོག་པོ་རང་གི་དྲུང་དུ་བོས་ཏེ་ན༌རེ། གཡོག་པོ་ངན༌པ། ཁྱོད་ཀྱིས་བདག་ལ་ཞུ་བ་བྱས༌པས། བདག་གིས་ཁྱོད་ཀྱི་བུ་ལོན་ཐམས་ཅད་མེད་པར་བྱས་པ་མིན༌ནམ།
MAT 18:33 བདག་གིས་ཁྱོད་ལ་སྙིང་རྗེ་བསྐྱེད་པ་བཞིན༌དུ། ཁྱོད་ཀྱིས་ཀྱང་རང་གི་ལས་གྲོགས་ལ་སྙིང་རྗེ་བསྐྱེད་འོས་པ་མ་ཡིན་ནམ་ཞེས་སྨྲས༌སོ།།
MAT 18:34 བདག་པོ་ཐུགས་ཤིན་ཏུ་ཁྲོས་ཏེ་བུ་ལོན་ཐམས་ཅད་འཇལ་ཚར་བའི་བར༌དུ། གཡོག་པོ་དེ་མནར་གཅོད་གཏོང་མཁན་རྣམས་ཀྱི་ལག་ཏུ་སྤྲད༌དོ།།
MAT 18:35 དེའི༌ཕྱིར། ཁྱོད་རྣམས་ཀྱིས་ཀྱང་སེམས་གཏིང་ནས་རང་གི་སྤུན་ཟླ་ལ་གུ་ཡངས་མི་གཏོང༌ན། ནམ་མཁའི་ཞིང་ཁམས་སུ་བཞུགས་པའི་བདག་གི་ཡབ་ཀྱིས་ཀྱང་ཁྱོད་རྣམས་ལ་དཔེ་དེ་བཞིན་དུ་མཛད་པར་འགྱུར་ཞེས་གསུངས༌སོ།།
MAT 19:1 སྐྱབས་མགོན་ཡེ་ཤུས་དེ་ལྟར་གསུངས༌རྗེས། ག་ལིལ་ཡུལ་དང་ཁ་བྲལ་ནས་ཡོར་དན་གཙང་པོའི་ཕར་ཕྱོགས་སུ་ཡོད་པའི་ཡ་ཧུ་དཱའི་ཡུལ་དུ་ཕེབས་པ༌དང༌།
MAT 19:2 མི་སྐོར་ཚོ་མང་པོ་ཁོང་གི་རྗེས་སུ་འབྲངས༌ཤིང༌། ཁོང་གིས་ཡུལ་དེ་ནས་ནད་པ་རྣམས་གསོས༌པའོ།།
MAT 19:3 ཕ་རུ་ཤི་པ་རྣམས་ཀྱིས་སྐྱབས་མགོན་ཡེ་ཤུར་ཚོད་བགམ་པའི་ཕྱིར་ཁོང་གི་དྲུང་དུ་ཡོང་སྟེ་ན༌རེ། སྐྱེས་པ་ཞིག་གིས་རྒྱུ་རྐྱེན་གང་རུང་གི་དབང་གིས་རང་གི་ཆུང་མ་སྤངས་ན་བཀའ་ཁྲིམས་དང་མཐུན་ནམ་ཞེས་ཞུས་པ༌ན།
MAT 19:4 ཁོང་གིས་འདི་སྐད༌དུ། དེ་ཡང་ཐོག་མར་མི་སྐྲུན་མཁན་གྱིས་མི་ནི་ཕོ་དང་མོ་གཉིས་སུ་མཛད་པ༌དང༌།
MAT 19:5 ཡང་ཇི་སྐད༌དུ། དེ་བས་སྐྱེས་པ་ནི་རང་གི་ཕ་མ་དང་ཁ་བྲལ་ནས་རང་གི་ཆུང་མར་འབྲེལ་ཏེ་ཁོ་གཉིས་ལུས་པོ་གཅིག་ཏུ་འགྱུར་ཞེས་གསུངས་ཡོད་པ་བཀླགས་མ་མྱོང༌ངམ།
MAT 19:6 དེས༌ན། ཕྱིན་ཆད་ཁོ་གཉིས་ནི་མི་གཉིས་མ་ཡིན་པར་ལུས་པོ་གཅིག་རང༌ཡིན། དེའི༌ཕྱིར། དཀོན་མཆོག་གིས་སྦྲེལ་བ་དེ་མི་སུས་ཀྱང་གཏོར་མི་རུང་ཞེས་བཀའ་ལན་གསུངས༌སོ།།
MAT 19:7 ཡང་ཕ་རུ་ཤི་པ་རྣམས་ན༌རེ། དེས་ན་མོ་ཤེ་ཡིས་ཅིའི་ཕྱིར་བཟའ་འཐོར་ཡི་གེ་སྤྲད་ན་ཆུང་མ་སྤངས་ཆོག་ཅེས་བཀའ་གནང་བ་ཡིན་ནམ་ཞེས་ཞུས་པ༌ལ།
MAT 19:8 ཁོང་གིས་འདི་སྐད༌དུ། དེ་ནི་ཁྱོད་ཅག་གི་སེམས་གྱོང་པོ་ཡིན་པས་མོ་ཤེ་ཡིས་ཁྱོད་ཅག་ལ་ཆུང་མ་སྤངས་ཆོག་པའི་བཀའ་གནང༌ནའང༌། ཐོག་མ་ཉིད་ནས་དེ་ལྟར་མ་ཡིན༌ནོ།།
MAT 19:9 བདག་གིས་ཁྱོད་རྣམས་ལ་སྨྲ་བར་བྱ༌སྟེ། ལོག་གཡེམ་བྱས་པའི་རྒྱུ་རྐྱེན་ལས༌གཞན། ཁྱོ་བོ་སུ་ཞིག་གིས་རང་གི་ཆུང་མ་སྤངས་ཏེ་བུད་མེད་གཞན་ཞིག་བླངས༌ན། དེ་ནི་ལོག་གཡེམ་བྱས་པ་ཡིན་ཞེས་གསུངས༌སོ།།
MAT 19:10 ཐུགས་སྲས་རྣམས་ན༌རེ། སྐྱེས་པ་དང་ཆུང་མ་གཉིས་ཀྱི་འབྲེལ་བ་དེ་འདྲ་ཡིན༌ན། གཉེན་སྒྲིག་མ་བྱས་ན་མི་ལེགས་སམ་ཞེས་ཞུས་པ༌ལ།
MAT 19:11 ཡང་ཁོང་གིས་འདི་སྐད༌དུ། སྐད་ཆ་འདི་ནི་མི་ཐམས་ཅད་ཀྱིས་དང་དུ་ལེན་ཐུབ་པ་ཞིག་མིན༌ཏེ། སུ་ཞིག་ལ་གནང་བ་ཡིན༌ན་མི་དེ་ཁོ་ནས་དང་དུ་ལེན་ཐུབ་པ༌ཡིན།
MAT 19:12 རྒྱུ་མཚན་ནི་མི་ཁ་ཤས་སྐྱེས་མ་ཐག་ནས་མཚན་མའི་དབང་བོ་ཉམས༌ཤིང༌། ཡང་ལ་ལ་ནི་མི་གཞན་གྱིས་ཉུག་རུམ་པར་བཅོས་པ༌དང༌། ཡང་མི་ཁ་ཤས་ནི་ནམ་མཁའི་རྒྱལ་སྲིད་ཀྱི༌ཕྱིར། རང་གིས་རང་ཉིད་ཉུག་རུམ་པར་བྱས་པ༌ཡིན། སུ་ཞིག་གིས་དོན་འདི་དང་ལེན་བྱེད་ནུས་ན་དང་དུ་བླངས་ཆོག་ཅེས་གསུངས༌སོ།།
MAT 19:13 དེའི་དུས༌སུ། མི་རྣམས་ཀྱིས་བྱིས་པ་འགའ་སྐྱབས་མགོན་ཡེ་ཤུས་ཕྱག་བཞག་སྟེ་ཁོ་ཚོའི་ཆེད་དུ་གསོལ་བ་འདེབས་པའི་ཕྱིར་ཁོང་གི་དྲུང་དུ་ཁྲིད་ཡོང༌ནའང༌། ཐུགས་སྲས་རྣམས་ཀྱིས་དེ་དག་ལ་བཀའ་བཀྱོན་བྱས༌སོ།།
MAT 19:14 འོན༌ཀྱང༌། སྐྱབས་མགོན་ཡེ་ཤུས་འདི་སྐད༌དུ། ནམ་མཁའི་རྒྱལ་སྲིད་ནི་དེ་ལྟ་བུ་རྣམས་ཀྱི་ཡིན༌པས། བྱིས་པ་རྣམས་མི་འགོག་པར་བདག་གི་དྲུང་ལ་ཡོང་དུ་ཆུག་ཅེས་གསུངས༌ཤིང༌།
MAT 19:15 ཁོང་གིས་བྱིས་པ་དེ་རྣམས་ཀྱི་ལུས་ལ་ཕྱག་བཞག༌རྗེས། ཡུལ་དེ་དང་ཁ་བྲལ་ནས་ཕེབས༌སོ།།
MAT 19:16 མི་ཞིག་སྐྱབས་མགོན་ཡེ་ཤུའི་དྲུང་དུ་ཡོང་སྟེ་ན༌རེ། སྟོན་པ༌ལགས། ངས་དོན་བཟང་པོ་གང་འདྲ་བྱས༌ན་ད་གཟོད་མཐའ་མེད་པའི་ཚེ་སྲོག་འཐོབ་ཐུབ་བམ་ཞེས་ཞུས་པ༌ན།
MAT 19:17 ཁོང་གིས་འདི་སྐད༌དུ། ཁྱོད་ཀྱིས་ཅིའི་ཕྱིར་དོན་བཟང་པོའི་སྐོར་བདག་ལ༌འདྲིའམ། བཟང་པོ་དེ་ཉིད་ལས་གཞན་བཟང་པོ་གཅིག་ཀྱང༌མེད། གལ་ཏེ་ཁྱོད་ལ་མཐའ་མེད་པའི་ཚེ་སྲོག་འཐོབ་འདོད༌ན། བཀའ་ཁྲིམས་རྣམས་སྲུངས་ཤིག་ཅེས་གསུངས༌སོ།།
MAT 19:18 ན་གཞོན་ན༌རེ། བཀའ་ཁྲིམས་གང་ཞིག་བསྲུང་དགོས་སམ་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། མི་མ༌གསོད། ལོག་གཡེམ་མ༌བྱེད། རྐུ་མ༌བྱེད། རྫུན་གྱི་དཔང་པོ་མ༌བྱེད།
MAT 19:19 རང་གི་ཕ་མ་གཉིས་ལ་བཀུར་བསྟི་བྱེད་དགོས་པ༌དང༌། ཁྱིམ་མཚེས་ལའང་རང་དང་འདྲ་བར་གཅེས་ཤིག་ཅེས་གསུངས༌སོ།།
MAT 19:20 ན་གཞོན་ན༌རེ། ངས་བཀའ་དེ་ཐམས་ཅད་བསྲུངས་པ་ཡིན་ལ་ད་དུང་མི་ཚང་བ་གང་ཞིག་ཡོད་དམ་ཞེས་ཞུས་པ༌ན།
MAT 19:21 ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ཁྱོད་རང་མི་ཕུལ་དུ་བྱུང་བ་ཞིག་བྱེད་འདོད༌ན། རང་ལ་ཅི་ཡོད་པ་ཐམས་ཅད་བཙོངས་ཏེ་དབུལ་པོ་རྣམས་ལ་བྱིན༌ཅིག དེ་ནས་ནམ་མཁའི་ཞིང་ཁམས་སུ་ཁྱོད་ལ་ནོར་བུ་འཐོབ་པར༌འགྱུར། ཡང་བདག་གི་རྗེས་སུ་འབྲང་བར་གྱིས་ཞེས་གསུངས༌སོ།།
MAT 19:22 འོན༌ཀྱང༌། ན་གཞོན་གྱིས་གསུང་དེ་ཐོས་པ༌དང༌། རང་ལ་རྒྱུ་ནོར་ཤིན་ཏུ་མང་པོ་ཡོད་པས་ཡིད་སྐྱོ་བའི་ངང་ནས་ཕྱིར་སོང༌ངོ༌།།
MAT 19:23 སྐྱབས་མགོན་ཡེ་ཤུས་རང་གི་ཐུགས་སྲས་རྣམས་ལ་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཕྱུག་བདག་ཅིག་ནམ་མཁའི་རྒྱལ་སྲིད་དུ་ཞུགས་པ་ནི༌དཀའོ།།
MAT 19:24 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཕྱུག་བདག་ཅིག་དཀོན་མཆོག་གི་རྒྱལ་སྲིད་དུ་ཞུགས་པ་ལས་རྔ་མོང་ཞིག་ཁབ་མིག་ཏུ་འཛུལ་བ་སླ་ཞེས་གསུངས༌སོ།།
MAT 19:25 ཐུགས་སྲས་རྣམས་ཀྱིས་གསུང་དེ་ཐོས་པ་དང་ཤིན་ཏུ་ཧ་ལས༌ཏེ། དེས་ན་སུ་ཞིག་ལ་ཐར་པ་འཐོབ་ཐུབ་བམ་ཞེས་ཞུས་པ༌ན།
MAT 19:26 སྐྱབས་མགོན་ཡེ་ཤུས་ཁོ་རྣམས་ལ་གཟིགས་ཏེ་འདི་སྐད༌དུ། དེ་ནི་མི་ཡིས་མི་ནུས་ཀྱང་དཀོན་མཆོག་གིས་ཐམས་ཅད་བསྒྲུབ་སྲིད་ཅེས་གསུངས༌སོ།།
MAT 19:27 པེ་ཏྲོ་ན༌རེ། ཁྱེད་ཀྱིས་གཟིགས༌དང༌། ངེད་ཅག་གིས་ཐམས་ཅད་སྤངས་ནས་ཁྱེད་ཀྱི་རྗེས་སུ་འབྲངས༌པས། ཕྱིས་སུ་ངེད་ཅག་ལ་ཅི་ཞིག་འཐོབ་སྲིད་དམ་ཞེས་ཞུས་པ༌ན།
MAT 19:28 ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ཅག་ལ་བདེན་པར་སྨྲ༌སྟེ། བདག་གི་རྗེས་སུ་འབྲང་མཁན་ཁྱོད་ཅག་ལ་མཚོན༌ན། ཡོངས་རྫོགས་བསྐྱར་དར་མཛད་པའི་དུས༌སུ། མིའི་བུ་རང་གི་གཟི་བརྗིད་ལྡན་པའི་ཁྲི་ལ་བཞུགས་པ༌དང༌། ཁྱོད་རྣམས་ཀྱང་ཁྲི་བཅུ་གཉིས་ལ་བསྡད་དེ་ཡེས་ར་ཨེལ་རིགས་ཀྱི་ཚོ་ཁག་བཅུ་གཉིས་ལ་ལེགས་ཉེས་ཀྱི་ཁྲིམས་ཐག་གཅོད་པར་འགྱུར༌རོ།།
MAT 19:29 སུ་ཞིག་གིས་ངའི་མིང་གི༌ཕྱིར། རང་གི་ཁང༌པའམ། ཕུ༌ནུའམ། ལྕམ་སྲིང༌ངམ། ཕ༌མའམ། བུ་ཕྲུག༌གམ། ས་ཞིང་སོགས་སྤངས༌ན། མི་དེ་ལ་ལྡབ་བརྒྱ་འགྱུར་གྱིས་འཐོབ་ངེས༌ཤིང༌། མཐའ་མེད་པའི་ཚེ་སྲོག་ཀྱང་འཐོབ་ངེས༌ཡིན།
MAT 19:30 འོན༌ཀྱང༌། སྔ་མ་མང་པོ་ཕྱི་མར་འགྱུར༌ཞིང༌། ཕྱི་མ་མང་པོ་སྔ་མར་འགྱུར་ཞེས་གསུངས༌སོ།།
MAT 20:1 དེ་བས་ན། ནམ་མཁའི་རྒྱལ་སྲིད་ནི་ཁྱིམ་བདག་ཅིག་ནངས་སྔ་མོ་ཕྱི་རོལ་ཏུ་སོང༌ནས། ཁོའི་རྒུན་འབྲུམ་ར་བའི་ནང་དུ་ལས་ཀ་བྱེད་མཁན་གྱི་གླ་བ་འཚོལ་བ་དང༌འདྲའོ།།
MAT 20:2 བདག་པོས་གླ་བ་རྣམས་ལ་ཉིན་རེར་དངུལ་སྒོར་གཅིག་རེ་གླ་ཆ་རུ་སྟེར་རྒྱུ་ཁས་བླངས༌ཏེ། ཁོ་རྣམས་རྒུན་འབྲུམ་ར་བའི་ནང་དུ༌མངགས།
MAT 20:3 སྔ་དྲོའི་ཆུ་ཚོད་དགུ་ཡས་མས་སུ་བདག་པོ་ཕྱི་རོལ་ཏུ་སོང་བ༌ན། མི་འགའ་ཞིག་ལས་ཀ་མེད་པར་ཁྲོམ་སྲང་དུ་བསྡད་ཡོད་པ་མཐོང༌སྟེ།
MAT 20:4 དེ་རྣམས་ལ་འདི་ལྟར་སྨྲས༌པ། ཁྱོད་རྣམས་ཀྱང་རྒུན་འབྲུམ་ར་བའི་ནང་དུ་སོང༌དང༌། འཐོབ་འོས་པའི་གླ་ཆ་ཁྱོད་ཅག་ལ་སྟེར་ངེས་ཡིན་ཞེས་པ༌དང༌།
MAT 20:5 དེ་རྣམས་ཀྱང་སོང༌ངོ༌། །ཉིན་གུང་དང་ཕྱི་དྲོའི་ཆུ་ཚོད་གསུམ་ཡས་མས་སུ་བདག་པོ་ཡང་ཕྱི་རོལ་ཏུ་སོང་ནས་དེ་ལྟར༌བྱས།
MAT 20:6 ཕྱི་དྲོའི་ཆུ་ཚོད་ལྔ་ཡས་མས་སུ་བདག་པོ་ཡང་ཕྱི་རོལ་ཏུ་སོང་བ༌ན། ད་དུང་མི་འགའ་ཞིག་ཁྲོམ་སྲང་དུ་བསྡད་ཡོད་པ་མཐོང་སྟེ་ན༌རེ། ཁྱོད་ཅག་གིས་ཉིན་གང་པོར་ལས་ཀ་མི་བྱེད་པར་འདི་རུ་སྡོད་པ་ཅི་ཡིན་ནམ་ཞེས་དྲིས་པ༌ན།
MAT 20:7 དེ་རྣམས་ན༌རེ། གླ་མཁན་མེད་པས་ཡིན་ཞེས་སྨྲས་པ༌དང༌། བདག་པོ་ན༌རེ། ཁྱོད་རྣམས་ཀྱང་རྒུན་འབྲུམ་ར་བའི་ནང་དུ་སོང་ཞིག་ཅེས་སྨྲས༌སོ།།
MAT 20:8 མཚན་མོའི་དུས༌སུ། རྒུན་འབྲུམ་ར་བའི་བདག་པོས་རང་གི་གཉེར་པ་ལ་འདི་ལྟར་སྨྲས༌པ། ཁྱོད་ཀྱིས་གླ་བ་རྣམས་བོས༌དང༌། གླ་བ་གཞུག་མ་ནས་སྔ་མའི་བར་དུ་གླ་ཆ་བྱིན་ཅིག་ཅེས་པ༌དང༌།
MAT 20:9 ཕྱི་དྲོའི་ཆུ་ཚོད་ལྔ་ཡས་མས་སུ་གླས་པ་རྣམས་ཡོང་ཞིང་མི་རེར་དངུལ་སྒོར་གཅིག་རེ༌ཐོབ།
MAT 20:10 སྔོན་ལ་གླས་པ་རྣམས་ཡོང་སྟེ་ཁོ་རྣམས་ལ་ལྷག་མ་ཞིག་འཐོབ་ངེས་པར་སྙམ་ཡང་ཁོ་རྣམས་ལའང་དངུལ་སྒོར་གཅིག་རེ༌ཐོབ།
MAT 20:11 དེ་རྣམས་ཀྱིས་དངུལ་སྒོར་གཅིག་རེ་ཐོབ་པར་འཁང་ར་བྱས་ནས་ཁྱིམ་བདག༌ལ།
MAT 20:12 ངེད་རྣམས་ཀྱིས་ཉིན་གང་པོར་ཉི་འོད་ཚ་བའི་འོག་ཏུ་དཀའ་སྡུག་མྱངས་པ༌དང༌། གླ་བ་ཕྱི་མ་འདི་རྣམས་ཀྱིས་ཆུ་ཚོད་གཅིག་ཙམ་ལ་ལས་ཀ་བྱས༌ནའང༌། ཁྱོད་ཀྱིས་ངེད་ཅག་དང་ཁོ་རྣམས་ལ་ཁྱད་པར་མ་ཕྱེས་ཞེས་སྨྲས༌སོ།།
MAT 20:13 བདག་པོས་གླ་བ་སྔ་མ་རྣམས་ལས་གཅིག་ལ་འདི་སྐད༌དུ། གྲོགས་པོ༌ལགས། ངས་ཁྱོད་ལ་མི་འོས་པ་ཞིག་བྱས་མེད༌དེ། ངས་ཁྱོད་ལ་དངུལ་སྒོར་གཅིག་སྟེར་རྒྱུ་ཁས་བླངས་པ་མ་ཡིན༌ནམ།
MAT 20:14 ཁྱོད་ཀྱིས་རང་ལ་ཐོབ་པ་ཁྱེར་ནས་སོང༌ཞིག ཁྱོད་ལ་བྱིན་པ་ལྟར་གླ་བ་ཕྱི་མ་ལའང་དེ་ལྟར་སྟེར་བ་ནི་བདག་གི་འདོད་མོས༌ཡིན།
MAT 20:15 བདག་གི་རྒྱུ་ནོར་བདག་གིས་ཇི་ལྟར་བྱེད་འདོད་པ་བཞིན་བཀོལ་མི་ཆོག༌གམ། བདག་ནི་མི་བཟང་པོ་ཞིག་བྱེད་འདོད༌པས། ཁྱོད་ཀྱིས་ཕྲག་དོག་བྱེད་དམ་ཞེས་སྨྲས༌སོ།།
MAT 20:16 དེ་ལྟར་ཕྱི་མ་རྣམས་སྔ་མར་འགྱུར༌ཞིང༌། སྔ་མ་རྣམས་ཕྱི་མར་འགྱུར་ཞེས་གསུངས༌སོ།།
MAT 20:17 སྐྱབས་མགོན་ཡེ་ཤུ་ཁོང་ཉིད་ཡར་ཡེ་རུ་སཱ་ལེམ་དུ་ཕེབས་པའི་དུས༌སུ། ལམ་བར་ནས་ཐུགས་སྲས་བཅུ་གཉིས་པོ་ཟུར་དུ་ཁྲིད་དེ་འདི་སྐད༌དུ།
MAT 20:18 ལྟོས༌དང༌། བདག་ཅག་ཡར་ཡེ་རུ་སཱ་ལེམ་དུ་འགྲོ་བཞིན༌ཡོད། མིའི་བུ་ཁོ་རང་མཆོད་དཔོན་ཆེན་པོ་དག་དང་མཁན་པོ་རྣམས་ཀྱི་ལག་ཏུ་སྤྲོད༌ཅིང༌། དེ་དག་གིས་ཁོ་རང་གསོད་དགོས་པའི་ཁྲིམས་ཐག་གཅོད་པ༌དང༌།
MAT 20:19 ཡང་ཕྱི་ཕྱོགས་པ་རྣམས་ལ་སྤྲོད་ཅིང་དེ་རྣམས་ཀྱིས་ཁོ་ལ་འཕྱ་དམོད་བྱེད་པ་དང་རྟ་ལྕག་གིས་གཞུས་ཏེ་ཤིང་རྒྱ་གྲམ་གྱི་སྟེང་དུ་གསོད་པར༌འགྱུར། དེ་ནས་ཉིན་གསུམ་པ་ལ་ཁོ་རང་སླར་གསོན་པར་འགྱུར་ཞེས་གསུངས༌སོ།།
MAT 20:20 དེའི་དུས༌སུ། ཟེ་བད་ཡཱའི་བུ་གཉིས་ཀྱི་མ་ནི་རང་གི་བུ་གཉིས་དང་ལྷན་དུ་སྐྱབས་མགོན་ཡེ་ཤུའི་དྲུང་དུ་ཡོང་སྟེ་ཕྱག་བཙལ་ནས་ཞུ་བ་ཞིག་ཕུལ༌ཏོ།།
MAT 20:21 སྐྱབས་མགོན་ཡེ་ཤུས་འདི་སྐད༌དུ། ཁྱོད་ལ་ཅི་དགོས་སམ་ཞེས་གསུངས་པ༌ན། བུད་མེད་ན༌རེ། ཁྱེད་ཀྱི་རྒྱལ་སྲིད་ནང་དུ་ངའི་བུ་འདི་གཉིས་ལས་གཅིག་ནི་ཁྱེད་ཀྱི་གཡས་ཕྱོགས༌དང༌། གཅིག་ནི་ཁྱེད་ཀྱི་གཡོན་ཕྱོགས་སུ་སྡོད་དུ་འཇུག་པར་མཛོད་ཅེས་ཞུས་པ༌ལ།
MAT 20:22 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་ཅི་ཞིག་ཞུ་བའང་མི་ཤེས༌ཏེ། ངས་འཐུང་བར་འགྱུར་བའི་ཕོར་བ་དེ་ལས་ཁྱོད་གཉིས་ཀྱིས་ཀྱང་འཐུང་ནུས་སམ་ཞེས་གསུངས་པ༌ལ། ཁོ་གཉིས་ཀྱིས་འཐུང་ནུས་པ་ཡིན་ཞེས་ཞུས༌སོ།།
MAT 20:23 ཡང་ཁོང་གིས་འདི་སྐད༌དུ། ངས་འཐུང་བར་འགྱུར་བའི་ཕོར་བ་ལས་ཁྱོད་གཉིས་ཀྱིས་ཀྱང་འཐུང་ངེས༌མོད། འོན་ཀྱང་ངའི་གཡས་གཡོན་ལ་སྡོད་དུ་འཇུག་པའི་དབང་ནི་བདག་ལ་མེད༌དེ། ངའི་ཡབ་ཀྱིས་མི་སུ་ཡི་ཆེད་དུ་སྟ་གོན་མཛད་ཡོད་ན་དེ་ལ་གནང་ངེས་ཡིན་ཞེས༌གསུངས།
MAT 20:24 ཐུགས་སྲས་གཞན་བཅུ་པོས་གཏམ་དེ་ཐོས་པ་དང་སྤུན་དེ་གཉིས་ཀྱི་སྟེང་ལ་ཁོང་ཁྲོ་ལངས༌སོ།།
MAT 20:25 དེ་ནས་སྐྱབས་མགོན་ཡེ་ཤུས་ཁོ་རྣམས་རང་གི་དྲུང་དུ་བོས་ཏེ་འདི་སྐད༌དུ། ཕྱི་ཕྱོགས་པ་རྣམས་ལས་དཔོན་རིགས་སུ་བཀུར་བ་རྣམས་ཀྱིས་རང་གི་འབངས་མི་ལ་དབང་བྱེད༌ཅིང༌། བློན་ཆེན་རྣམས་ཀྱིས་རང་གི་འབངས་མི་ལ་དབང་བསྒྱུར་བ་ཁྱོད་ཅག་གིས་ཀྱང་ཤེས་གསལ་ལྟར༌ཡིན།
MAT 20:26 འོན་ཀྱང་ཁྱོད་ཅག་གི་ཁྲོད་དུ་དེ་ལྟར་བྱ་མི་རུང༌སྟེ། ཁྱོད་ཅག་ལས་སུ་ཞིག་ཆེན་པོར་འགྱུར་འདོད་པ་དེ་ཁྱོད་ཅག་གི་ཞབས་ཕྱི་པར་འགྱུར་དགོས༌ཤིང༌།
MAT 20:27 ཡང་ཁྱོད་ཅག་ལས་སུ་ཞིག་མཆོག་ཏུ་འགྱུར་འདོད་པ་དེ་ཁྱོད་རྣམས་ཀྱི་བྲན་གཡོག་ཏུ་འགྱུར༌དགོས།
MAT 20:28 དེ་བཞིན་དུ་མིའི་བུའང་མི་གཞན་གྱི་ཞབས་ཕྱི་འཐོབ་པའི་ཕྱིར་ཡོང་བ་མ་ཡིན༌པར། མི་གཞན་ལ་ཞབས་ཕྱི་བསྒྲུབ་པ་དང་རང་སྲོག་ཕུལ་ནས་མི་མང་པོ་བླུ་བའི་ཆེད་དུ་ཡོང་བ་ཡིན་ཞེས་གསུངས༌སོ།།
MAT 20:29 སྐྱབས་མགོན་ཡེ་ཤུ་འཁོར་དང་བཅས་པ་ཡེ་རུ་ཀོ་དང་ཁ་བྲལ་ནས་བྱོན་པའི་དུས༌སུ། མི་ཤིན་ཏུ་མང་པོ་ཞིག་ཁོང་གི་རྗེས་སུ༌འབྲངས།
MAT 20:30 དེའི་དུས༌སུ། ལོང་བ་གཉིས་ཀྱང་ལམ་འགྲམ་དུ་བསྡད་ཡོད༌ཅིང༌། སྐྱབས་མགོན་ཡེ་ཤུ་ལམ་བུ་དེ་བརྒྱུད་ནས་ཕེབས་ཀྱིན་ཡོད་པ་ཐོས་ནས་སྐད་ཆེན༌པོས། ཀྱེ། གཙོ་བོ༌ལགས། དཱ་བིད་ཀྱི་རིགས༌སྲས། ངེད་གཉིས་ལ་སྙིང་རྗེས་གཟིགས་རོགས་ཞེས༌ཞུས།
MAT 20:31 མི་ཚོགས་ཀྱིས་ལོང་བ་དེ་གཉིས་ཁ་རོག་ཏུ་སྡོད་པར་བསྐུལ༌ནའང༌། དེ་གཉིས་ཀྱིས་སྔར་ལས་ཀྱང་སྐད་ཆེན༌པོས། ཀྱེ། གཙོ་བོ༌ལགས། དཱ་བིད་ཀྱི་རིགས༌སྲས། ངེད་གཉིས་ལ་སྙིང་རྗེས་གཟིགས་རོགས་ཞེས༌ཞུས།
MAT 20:32 དེ་ནས་སྐྱབས་མགོན་ཡེ་ཤུས་ཀྱང་ཕེབས་མཚམས་བཞག་ཅིང་ལོང་བ་གཉིས་ཀ་ཚུར་བོས༌ཏེ། བདག་གིས་ཁྱོད་གཉིས་ལ་ཅི་བྱ་དགོས་སམ་ཞེས་གསུངས་པ༌ན།
MAT 20:33 ཁོ་གཉིས་ན༌རེ། གཙོ་བོ༌ལགས། ངེད་གཉིས་ཀྱི་མིག་གིས་མཐོང་ནུས་པར་མཛོད་ཅེས་ཞུས་པ༌ལ།
MAT 20:34 སྐྱབས་མགོན་ཡེ་ཤུས་སྙིང་རྗེ་དགོངས་ཏེ་ལོང་བའི་མིག་ཟུང་ལ་ཕྱག་གིས་རེག་པ་ཙམ་གྱིས་དེ་གཉིས་ཀྱི་མིག་གིས་མཐོང་བར་གྱུར་པ་དང་ཁོང་གི་རྗེས་སུ་འབྲངས༌སོ།།
MAT 21:1 ཁོང་རྣམས་ཡེ་རུ་སཱ་ལེམ་གྱི་ཉེ་འགྲམ༌སྟེ། སྐྱུ་རུ་རའི་རི་བོའི་ངོས་སུ་ཡོད་པའི་པེ་ཕཱ་གེ་རུ་ཕེབས་པ༌དང༌། སྐྱབས་མགོན་ཡེ་ཤུས་ཐུགས་སྲས་གཉིས་མངགས༌ཏེ།
MAT 21:2 ཁྱོད་གཉིས་ཕ་རོལ་གྱི་གྲོང་སྡེ་རུ་སོང༌དང༌། གནས་དེར་སླེབས་མ་ཐག་བོང་བུ་མ་བུ་གཉིས་མཉམ་དུ་བཏགས་ཡོད་པ་མཐོང་ངེས༌ཤིང༌། དེ་གཉིས་ཀྱི་ཐག་པ་བཀྲོལ་ནས་འདིར་ཁྲིད༌ཤོག
MAT 21:3 སུ་ཞིག་གིས་ཁྱོད་གཉིས་ལ་ཅི་ཞིག་སྨྲས་པ་ཡིན༌ན། ཁྱོད་གཉིས་ཀྱིས་འདི་ནི་གཙོ་བོ་ལ་མཁོ་བ་ཡིན་ཞེས་སྨྲོས༌དང༌། དེས་མྱུར་དུ་གཏོང་བར་འགྱུར་ཞེས་གསུངས༌སོ།།
MAT 21:4 དོན་འདི་ནི་ལུང་སྟོན་པའི་ལུང་བསྟན་ལས་ཇི་སྐད༌དུ།
MAT 21:5 ཛ་ཡན་ཡུལ་གྱི་བུ་མོར་འདི་སྐད༌དུ།། གཟིགས་དང་ཁྱོད་ཀྱི་རྒྱལ་པོ་ཁྱོད་དྲུང༌དུ།། བོང་བུའི་བོང་ཕྲུག་ཅིག་ལ་བཅིབས་ནས༌ནི།། ཞི་འཇམ་ངང་ནས་ཕེབས་བྱུང་ཞེས་སྨྲོས༌ཤིག ། ཅེས་གསུངས་པ་བཞིན་དུ་འགྲུབ་པའི་ཕྱིར་དེ་ལྟར་བྱུང༌ངོ༌།།
MAT 21:6 དེ་ནས་ཐུགས་སྲས་གཉིས་ཀྱིས་སྐྱབས་མགོན་ཡེ་ཤུའི་བཀའ་ལྟར་བསྒྲུབས༌ཏེ།
MAT 21:7 བོང་བུ་དང་བོང་ཕྲུག་གཉིས་ཀ་ཁྲིད་ཡོང༌ཞིང༌། རང་གི་ཕྱི་གོས་བོང་ཕྲུག་གི་རྒྱབ་ཏུ་བཏིངས་པ་དང་ཁོང་དེ་ལ༌བཅིབས།
MAT 21:8 མི་ཤིན་ཏུ་མང་པོས་རང་གི་ཕྱི་གོས་ལམ་དུ་བཏིངས༌ཤིང༌། ཡང་མི་གཞན་དག་གིས་སྡོང་པོའི་ཡལ་ག་བཅད་ནས་ལམ་ནང་དུ༌བཀྲམ།
MAT 21:9 ཁོང་གི་སྔོན་དུ་འགྲོ་བ་དང་རྗེས་སུ་འབྲངས་པའི་མི་ཚོགས་ཀྱིས་སྐད་ཆེན༌པོས། དཱ་བིད་ཀྱི་རིགས་སྲས་ལ་ཧོ་ཟན༌ནཱ། གཙོ་བོའི་མཚན་གྱི་སྒོ་ནས་བྱོན་པ་ནི་བྱིན་རླབས་ཅན༌ཡིན། བླ་ན་མེད་པའི་གནས་ལ་ཧོ་ཟན་ནཱ་ཞེས་ཡང་ཡང་བསྒྲགས༌སོ།།
MAT 21:10 དེ་ནས་སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཕེབས་པ་དང་གྲོང་ཁྱེར་ཡོངས་སུ་འདུ་འཛི་བྱུང༌ཞིང༌། མི་ཀུན་གྱིས་འདི་ནི་སུ་ཡིན་ནམ་ཞེས་སྨྲས་པ༌ལ།
MAT 21:11 ཡང་མི་ཚོགས་ཀྱིས་ཁོང་ནི་ག་ལིལ་ཡུལ་གྱི་ནཱ་ཙ་རེལ་ནས་བྱོན་པའི་ལུང་སྟོན་པ་ཡེ་ཤུ་ཡིན་ཞེས་སྨྲས༌སོ།།
MAT 21:12 སྐྱབས་མགོན་ཡེ་ཤུ་མཆོད་ཁང་དུ་ཕེབས༌ཏེ། མཆོད་ཁང་གི་ནང་དུ་ཡོད་པའི་ཚོང་པ་ཐམས་ཅད་སྒོའི་ཕྱི་རུ་ཕུད༌ཅིང༌། དངུལ་བརྗེ་མཁན་གྱི་ཅོག་ཙེ་དང་ཕུག་རོན་ཚོང་མཁན་གྱི་འདུག་སྟེགས་ཐམས་ཅད་ཀྱང་སར་བསྒྱེལ༌ཏོ།།
MAT 21:13 ཁོང་གིས་འདི་སྐད༌དུ། གསུང་རབ་ཀྱི་མདོ་ལས་ཇི་སྐད༌དུ། ངའི་མཆོད་ཁང་ལ་སྨོན་ལམ་ཞུ་སའི་གནས་སུ་འབོད་པར་འགྱུར་ཞེས་བཀོད་ཡོད༌ཀྱང༌། ཁྱོད་ཅག་གིས་འདི་ནི་ཇག་ཚང་ཞིག་ཏུ་བསྒྱུར་འདུག་ཅེས་གསུངས༌སོ།།
MAT 21:14 དེ་ནས་ལོང་བ་དང་གྱོལ་པོ་རྣམས་མཆོད་ཁང་དུ་སྐྱབས་མགོན་ཡེ་ཤུའི་དྲུང་དུ་ཡོང་བ༌དང༌། ཁོང་གིས་དེ་དག་གསོས༌པའོ།།
MAT 21:15 མཆོད་དཔོན་ཆེན་པོ་དག་དང་མཁན་པོ་རྣམས་ཀྱིས་ཁོང་གིས་མཛད་པའི་ངོ་མཚར་བའི་དོན་རྣམས་མཐོང་བ༌དང༌། བྱིས་པ་རྣམས་ཀྱིས་མཆོད་ཁང་དུ་སྐད་ཆེན་པོས་དཱ་བིད་ཀྱི་རིགས་སྲས་ལ་ཧོ་ཟན་ནཱ་ཞེས་ཟེར་བའང་ཐོས་ནས་ཤིན་ཏུ་ཁྲོས་ཏེ་ན༌རེ།
MAT 21:16 བྱིས་པ་རྣམས་ཀྱིས་ཅི་ཞིག་སྨྲ་བ་ཁྱོད་ཀྱིས་མ་ཐོས་སམ་ཞེས་སྐྱབས་མགོན་ཡེ་ཤུ་ལ་དྲིས་པ༌ན། ཁོང་གིས་འདི་སྐད༌དུ། བདག་གིས་ཐོས༌སོ། །དེ་ཡང་གསུང་རབ་ཀྱི་མདོ༌ལས། ཁྱེད་ཀྱིས་བྱིས་པ་དང་ཕྲུ་གུ་འོ་འཐུང་རྣམས་ཀྱི་ངག་ནས་རང་ཉིད་ལ་བསྟོད་བསྔགས་ཆ་ཚང་བར་མཛད་ཅེས་གསུངས་པ༌དེ་ཁྱོད་རྣམས་ཀྱིས་བཀླགས་མ་མྱོང་ངམ་ཞེས་གསུངས༌སོ།།
MAT 21:17 དེ་ནས་སྐྱབས་མགོན་ཡེ་ཤུ་མི་དེ་རྣམས་དང་ཁ་བྲལ་ནས་གྲོང་ཁྱེར་ཕྱི་རོལ་གྱི་པེ་ཐན་ཡཱ་རུ་ཕེབས་ཤིང་གནས་དེར་ཞག་བཞུགས་མཛད༌དོ།།
MAT 21:18 ཞོགས་པའི་དུས་སུ་སྐྱབས་མགོན་ཡེ་ཤུ་གྲོང་ཁྱེར་དུ་ཕྱིར་ཕེབས་སྐབས་ཁོང་ཉིད་བཀྲེས༌ཤིང༌།
MAT 21:19 ལམ་འགྲམ་དུ་བསེ་ཡབ་ཤིང་སྡོང་ཞིག་ཡོད་པ་གཟིགས་ནས་དེའི་གམ་དུ་ཕེབས་པ༌ན། ལོ་མ་ལས་གཞན་ཅི་ཡང་མེད་པ་གཟིགས་ཏེ་ཤིང་སྡོང་ལ་འདི་སྐད༌དུ། དུས་ད་ནས༌བཟུང༌། ཁྱོད་ལ་ནམ་ཡང་འབྲས་བུ་མི་འབྱུང་བར་གྱུར་ཅིག་ཅེས་གསུངས་མ་ཐག་བསེ་ཡབ་ཤིང་སྡོང་བསྐམས་པར་གྱུར༌ཏོ།།
MAT 21:20 ཐུགས་སྲས་རྣམས་ཀྱིས་དོན་དེ་མཐོང་ནས་ངོ་མཚར་སྐྱེས༌ཏེ། བསེ་ཡབ་ཤིང་སྡོང་འདི་སྐད་ཅིག་ཙམ་ལ་བསྐམས་སོང་བ་ཅི་ཡིན་ནམ་ཞེས་ཞུས་པ༌ལ།
MAT 21:21 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་རྣམས་ལ་དད་པ་ཡོད་ཅིང་ཐེ་ཚོམ་མེད༌ན། བསེ་ཡབ་ཤིང་སྡོང་འདིའི་སྟེང་དུ་བསྒྲུབས་པའི་དོན་འདི་ལྟ་བུ་བསྒྲུབ་ཐུབ་པར་མ༌ཟད། ཁྱོད་རྣམས་ཀྱིས་རི་བོ་འདི་ལ་ད་ལྟ་ཉིད་དུ་ཕར་སྤོས་ནས་རྒྱ་མཚོར་ལྷུང་བར་བྱོས་ཞེས་སྨྲས་ན་དེ་ལྟར་འགྲུབ་ངེས༌ཡིན།
MAT 21:22 ཁྱོད་རྣམས་ཀྱིས་གསོལ་བ་བཏབ་ནས་དོན་གང་ཞིག་ཞུས༌ཀྱང༌། དད་པ་བྱས་ན་འཐོབ་པར་འགྱུར་ཞེས་གསུངས༌སོ།།
MAT 21:23 སྐྱབས་མགོན་ཡེ་ཤུ་མཆོད་ཁང་དུ་ཕེབས་ནས་ཆོས་གསུང་བཞིན་པའི་དུས༌སུ། མཆོད་དཔོན་ཆེན་པོ་དག་དང་ཡུལ་མི་རྒན་པོ་རྣམས་ཁོང་གི་དྲུང་དུ་ཡོང་སྟེ་ན༌རེ། ཁྱོད་ཀྱིས་དབང་གང་ལ་བརྟེན་ནས་དོན་འདི་དག་མཛད་པ་ཡིན༌ནམ། སུ་ཞིག་གིས་ཁྱོད་ལ་དབང་འདི་གནང་བ་ཡིན་ཞེས་ཞུས་པ༌ན།
MAT 21:24 སྐྱབས་མགོན་ཡེ་ཤུས་འདི་སྐད༌དུ། ངས་ཀྱང་ཁྱོད་རྣམས་ལ་དྲི་བ་ཞིག་འདོན༌ཏེ། ཁྱོད་རྣམས་ཀྱིས་ལན་བཏབ༌ན། བདག་གིས་ཀྱང་དོན་འདི་རྣམས་དབང་ཅི་ལྟ་བུས་བྱས་པ་ཁྱོད་རྣམས་ལ་སྨྲ་བར༌བྱའོ།།
MAT 21:25 ཡོ་ཧ་ནན་གྱི་ཁྲུས་གསོལ་དེ་ནམ་མཁའི་ཞིང་ཁམས་དང་མི་ཡུལ་གཉིས་ཀྱི་གང་ནས་བྱུང་བ་ལ་ལན་ཐོབས་ཤིག་ཅེས་གསུངས་པ༌དང༌། དེ་རྣམས་ཀྱིས་ཕན་ཚུན་ལ་གླེང་མོལ་བྱེད༌བཞིན། གལ་ཏེ་ནམ་མཁའི་ཞིང་ཁམས་ནས་བྱུང་བ་ཡིན་ཞེ༌ན། ཁོས་འོ་ན་ཁྱོད་རྣམས་ཅིའི་ཕྱིར་ཡོ་ཧ་ནན་ལ་ཡིད་མ་ཆེས་སམ་ཞེས་སྨྲ་ངེས༌ལ།
MAT 21:26 ཡང་མི་ཡུལ་ནས་བྱུང་ཞེ༌ན། མི་ཐམས་ཅད་ཀྱིས་ཡོ་ཧ་ནན་ནི་ལུང་སྟོན་པ་ཞིག་ཏུ་བཀུར་བས་ངེད་རྣམས་མི་ཚོགས་ལ་འཇིགས་ཞེས་སྨྲས༌ཤིང༌།
MAT 21:27 དེ་ནས་ཁོ་རྣམས་ན༌རེ། ངེད་ཅག་གིས་མི་ཤེས་ཞེས་ལན་བཏབ༌བོ། །ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་བདག་གིས་ཀྱང་དབང་གང་ལ་བརྟེན་ནས་དོན་འདི་དག་བྱེད་པ་ཁྱོད་རྣམས་ལ་སྨྲ་བ་མིན་ཞེས་གསུངས༌སོ།།
MAT 21:28 དེ་ནས་སྐྱབས་མགོན་ཡེ་ཤུས་འདི་སྐད༌དུ། དོན་ཞིག་ཡོད་པ་འདིར་ཁྱོད་ཅག་གིས་ཅི་ལྟར་བསམ་པར༌བྱ། ཕ་ཞིག་ལ་བུ་གཉིས་ཡོད༌དེ། ཁོ་རང་བུ་ཆེ་བའི་གམ་དུ་སོང༌སྟེ། བདག་གི༌བུ། ཁྱོད་དེ་རིང་རྒུན་འབྲུམ་ར་བའི་ནང་དུ་ལས་ཀ་བྱེད་དུ་སོང་ཞིག་ཅེས་སྨྲས་པ༌ལ།
MAT 21:29 བུ་ན༌རེ། ང་མི་འགྲོ་ཞེས་སྨྲས༌ཤིང༌། ཕྱིས་སུ་འགྱོད་པ་སྐྱེས་ཏེ་སོང༌ངོ༌།།
MAT 21:30 དེ་ནས་ཕ་དེ་བུ་ཆུང་བའི་གམ་དུ་སོང་སྟེ་གོང་ལྟར་སྨྲས་པ༌ན། བུ་ཆུང་བ་ན༌རེ། ཕ༌ལགས། ང་རང་འགྲོའོ་ཞེས་སྨྲས་ཀྱང་མ་སོང་བ༌རེད།
MAT 21:31 བུ་དེ་གཉིས་ལས་སུ་ཞིག་གིས་ཕ་ཡི་དགོངས་པ་ལྟར་བྱས་པ་ཡིན་ནམ་ཞེས་གསུངས་པ༌ན། ཁོ་རྣམས་ཀྱིས་བུ་ཆེ་བས་བྱས་པ་ཡིན་ཞེས་ལན་བཏབ༌བོ། །ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྲལ་ལེན་མཁན་དང་སྨད་འཚོང་མ་རྣམས་ཀྱང་ཁྱོད་ཅག་གི་སྔོན་དུ་དཀོན་མཆོག་གི་རྒྱལ་སྲིད་དུ་ཞུགས་པ༌ཡིན།
MAT 21:32 རྒྱུ་མཚན་ནི་ཁྲུས་གསོལ་མཁན་ཡོ་ཧ་ནན་དྲང་བདེན་གྱི་ལམ་ནས་ཁྱོད་ཅག་གི་གམ་དུ་ཡོང༌ནའང༌། ཁྱོད་རྣམས་ཁོང་ལ་ཡིད་མ༌ཆེས། འོན་ཀྱང་ཁྲལ་ལེན་མཁན་དང་སྨད་འཚོང་མ་དག་གིས་ཁོང་ལ་ཡིད་ཆེས་བྱས་པའི་ཕྱིར༌རོ། །ཁྱོད་ཅག་གིས་དོན་དེ་མཐོང་ཡང་འགྱོད་བཤགས་མ་བྱས་ལ་ཡིད་ཆེས་ཀྱང་མ་བྱས་ཞེས་གསུངས༌སོ།།
MAT 21:33 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་ཡང་དཔེ་གཞན་ཞིག་ལ༌ཉོན་ཅིག དེ་ཡང་ཁྱིམ་བདག་ཅིག་གིས་རྒུན་ཚལ་ཞིག་བཙུགས་ཏེ་ཕྱོགས་བཞིར་ར་བས་བསྐོར་བ༌དང༌། རྒུན་འབྲུམ་འཚིར་གཞོང་ཞིག་བརྐོས་ནས་སོ་ལྟ་ཁང་ཞིག་ཀྱང་བརྩིགས༌རྗེས། རྒུན་འབྲུམ་ར་བ་མི་གཞན་ལ་གླས་ཏེ་ཁོ་རང་ཡུལ་གཞན་དུ༌སོང༌།
MAT 21:34 སྟོན་བསྡུ་བའི་དུས་ལ་བབས༌ཚེ། ཁོས་རང་གི་གཡོག་པོ་འགའ་གླ་མཁན་ཚང་ལ་འབྲས་བུ་ལེན་དུ་མངགས་པ༌ན།
MAT 21:35 དེ་རྣམས་ཀྱིས་གཡོག་པོ་རྣམས་བཟུང༌སྟེ། གཅིག་ལ་གཅར་རྡུང༌བྱས། གཅིག་ནི༌བསད། གཅིག་རྡོ་རུབ་ལ་བཏང༌ངོ༌།།
MAT 21:36 ཡང་བདག་པོ་དེས་གཡོག་པོ་སྔར་ལས་མང་པོ་ཞིག་མངགས༌ནའང༌། དེ་རྣམས་ཀྱིས་སྔར་བཞིན༌བྱས།
MAT 21:37 མཇུག་མཐར་ཁོས་རང་གི་བུའང་དེ་རྣམས་ཀྱི་གམ་དུ་མངགས༌ཤིང༌། དེ་ནི་གླ་མཁན་རྣམས་ཀྱིས་བདག་གི་བུ་ལ་བཀུར་སྟི་བྱེད་ངེས་ཡིན་བསམས༌སོ།།
MAT 21:38 འོན་ཀྱང་གླ་མཁན་རྣམས་ཀྱིས་བུ་མཐོང་སྟེ་ཕན་ཚུན༌ལ། འདི་ནི་ཕ་ཤུལ་འཛིན་མཁན་ཡིན༌པས། ཤོག་དང་གསོད་པར༌བྱའོ། །ནོར་སྐལ་ལེན་པར་བྱ་ཞེས་སྨྲས༌ཏེ།
MAT 21:39 བུ་དེའང་བཟུང་སྟེ་རྒུན་འབྲུམ་ར་བའི་ཕྱི་རུ་བཏོན་ནས་བསད༌དོ།།
MAT 21:40 དེ་ནས་རྒུན་འབྲུམ་ར་བའི་བདག་པོ་ཕྱིར་ཡོང༌ཚེ། གླ་མཁན་དེ་རྣམས་ལ་ཅི་བྱེད་པར་འགྱུར་རམ་ཞེས་གསུངས་པ༌ན།
MAT 21:41 ཁོ་རྣམས་ན༌རེ། བདག་པོས་མི་ངན་དེ་དག་ངན་གསོད་བྱས༌ཏེ། རྒུན་འབྲུམ་ར་བ་ནི་དུས་ལྟར་འབྲས་བུ་འབུལ་བའི་གླ་མཁན་གཞན་དག་ལ་སྤྲོད་པར་ངེས་ཞེས༌སྨྲས།
MAT 21:42 ཡང་སྐྱབས་མགོན་ཡེ་ཤུས་འདི་སྐད༌དུ། དེ་ལ་གསུང་རབ་ཀྱི་མདོ་ལས་ཇི་སྐད༌དུ། བཟོ་བ་རྣམས་ཀྱིས་སྤངས་པའི༌རྡོ།། ཁང་པའི་ཟུར་གྱི་རྨང་རྡོར༌གྱུར།། གཙོ་བོ་ཁོང་ནས་བྱུང་བ༌ཡིན།། བདག་ཅག་མིག་ལ་ངོ་མཚར༌ཆེ།། ཞེས་གསུངས་ཡོད་པ་ཁྱོད་རྣམས་ཀྱིས་བཀླགས་མ་མྱོང༌ངམ།
MAT 21:43 དེའི༌ཕྱིར། བདག་གིས་ཁྱོད་རྣམས་ལ་སྨྲ་བར་བྱ༌སྟེ། དཀོན་མཆོག་གི་རྒྱལ་སྲིད་ནི་ཁྱོད་རྣམས་ལས་བླངས༌ནས། དེ་དང་མཐུན་པར་འབྲས་བུ་བསྐྱེད་པའི་མི་རིགས་གཞན་ལ་གནང་བར་འགྱུར༌རོ།།
MAT 21:44 མི་སུ་ཞིག་རྡོ་དེའི་སྟེང་དུ་ལྷུང༌ན། མི་དེ་ནི་དུམ་བུར༌འགྱུར། ཡང་རྡོ་དེ་མི་སུ་ཞིག་གི་སྟེང་དུ་ལྷུང༌ན། མི་དེའང་རྡུལ་དུ་བརླག་པར་འགྱུར་ཞེས་གསུངས༌སོ།།
MAT 21:45 དེ་ནས་མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱིས་དཔེ་དེ་དག་ཐོས་ཤིང་ཁོ་རྣམས་ལ་གསུངས་པའང་ཤེས༌ཏེ།
MAT 21:46 སྐྱབས་མགོན་ཡེ་ཤུ་འཛིན་བཟུང་བྱ་བསམས༌ནའང༌། མི་ཚོགས་ཀྱིས་ཁོང་ནི་ལུང་སྟོན་པ་ཞིག་ཏུ་བཀུར༌བས་ཁོ་རྣམས་མི་ཚོགས་ལ་འཇིགས༌སོ།།
MAT 22:1 དེ་ནས་ཡང་སྐྱབས་མགོན་ཡེ་ཤུས་དཔེའི་སྒོ་ནས་དེ་རྣམས་ལ་འདི་སྐད༌དུ།
MAT 22:2 ནམ་མཁའི་རྒྱལ་སྲིད་ནི་རྒྱལ་པོ་ཞིག་གིས་རང་གི་སྲས་ལ་བག་སྟོན་བྱེད་པ་དང་འདྲ༌སྟེ།
MAT 22:3 ཁོང་གིས་རང་གི་གཡོག་པོ་འགའ་བག་སྟོན་དུ་བོས་པའི་མགྲོན་པོ་རྣམས་གདན་འདྲེན་བྱེད་དུ་མངགས༌ནའང༌། མི་དེ་རྣམས་ཡོང་བར་མ་འཐད༌དོ།།
MAT 22:4 ཡང་ཁོང་གིས་གཡོག་པོ་གཞན་དག་མངགས༌ཏེ། ཁྱོད་ཅག་གིས་མགྲོན་དུ་བོས་པ་རྣམས་ལ་འདི་ལྟར་སྨྲོས༌ཤིག བདག་གིས་བ་གླང་དང་སྒོ་ཕྱུགས་ཤ་ཤེད་ཅན་བཤས་ཏེ་ཐམས་ཅད་སྟ་གོན་བྱས་ཚར༌བས། ཁྱེད་རྣམས་བག་སྟོན་ལ་ཕེབས་པར་ཞུ་ཞེས་གསུངས༌ནའང༌།
MAT 22:5 མི་དེ་རྣམས་ཀྱིས་དོན་དེར་དོ་སྣང་མ་བྱས༌པར། མི་གཅིག་རང་གི་ཞིང་ཁར་སོང་བ༌དང༌། གཞན་ཞིག་ཚོང་རྒྱག་སར༌སོང༌།
MAT 22:6 ཡང་མགྲོན་དུ་བོས་པའི་མི་གཞན་དག་གིས་གཡོག་པོ་དེ་རྣམས་བཟུང་བ་དང་བརྙས་བཅོས་བྱས་ཏེ་བསད༌དོ།།
MAT 22:7 དེ་ནས་རྒྱལ་པོ་ཐུགས་ཤིན་ཏུ་ཁྲོས་ཏེ་དམག་བཏང་ནས་ལག་དམར་དེ་རྣམས་མེད་པར་བྱས་པ༌དང༌། མི་དེ་དག་གི་གྲོང་ཁྱེར་ཡང་མེར༌བསྲེགས།
MAT 22:8 ཡང་ཁོང་གིས་རང་གི་གཡོག་པོ་རྣམས་ལ་འདི་སྐད༌དུ། བག་སྟོན་སྟ་གོན་བྱས་ཟིན་ནའང་མགྲོན་དུ་བོས་པ་རྣམས་བག་སྟོན་ལ་ཞུགས་མི༌འོས།
MAT 22:9 དེའི༌ཕྱིར། ཁྱོད་རྣམས་ལམ་མདོ་རུ་སོང་སྟེ་མི་སུ་དང་ཕྲད་ན། དེ་རྣམས་བག་སྟོན་ལ་བོས་ཤིག་ཅེས་གསུངས༌སོ།།
MAT 22:10 གཡོག་པོ་དེ་རྣམས་ཁྲོམ་སྲང་དུ་སོང༌སྟེ། མི་བཟང་ངན་སུ་ཡིན་ཡང་ཕྲད་པ་ཐམས་ཅད་བསྡུས༌པས། བག་སྟོན་གྱི་གནས་དེར་མགྲོན་པོས་བཀང༌ངོ༌།།
MAT 22:11 དེ་ནས་རྒྱལ་པོའང་ཕེབས་ཏེ་མགྲོན་པོ་རྣམས་ལ་གཟིགས་པ༌ན། གཟབ་གོས་སྤྲས་མེད་པའི་མགྲོན་པོ་ཞིག་མཐོང་སྟེ་འདི་སྐད༌དུ།
MAT 22:12 གྲོགས་པོ༌ལགས། ཁྱོད་ཀྱིས་གཟབ་གོས་མ་སྤྲས་པར་འདིར་ཡོང་བ་ཅི་ཡིན་ནམ་ཞེས་གསུངས་པ༌ན། མགྲོན་པོ་དེ་ལ་ལན་འདེབས་རྒྱུ་མེད་པར་གྱུར༌ཏོ།།
MAT 22:13 དེ་ནས་རྒྱལ་པོས་ཞབས་ཕྱི་པ་རྣམས༌ལ། མགྲོན་པོ་འདིའི་རྐང་ལག་བཀྱིགས༌ཏེ། ཕྱི་རོལ་གྱི་མུན་ནག་ནང་དུ་གཡུག་པར༌གྱིས། གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་ཞེས་སྨྲས༌སོ།།
MAT 22:14 དེ་ནི་མགྲོན་དུ་བོས་པ་མང་ཡང་དངོས་སུ་བདམས་པ་ཉུང་བའི་ཕྱིར་ཡིན་ཞེས་གསུངས༌སོ།།
MAT 22:15 དེའི་དུས༌སུ། ཕ་རུ་ཤི་པ་རྣམས་ཕྱི་རོལ་ཏུ་སོང་ནས་ཇི་ལྟར་ཡེ་ཤུའི་གསུང་ལ་སྙད་བརྐོས་ནས་ཁོང་ལ་གནོད་པ་བྱེད་པར་གྲོས་བྱས༌ཏེ།
MAT 22:16 རང་གི་སློབ་མ་དང་ཧེ་རོ་དཱའི་ཕྱོགས་ཁག་གི་མི་འགའ་སྐྱབས་མགོན་ཡེ་ཤུའི་དྲུང་དུ་མངགས༌ཤིང༌། དེ་རྣམས་ན༌རེ། སློབ་དཔོན༌ལགས། ཁྱེད་ནི་གཞུང་རྒྱུད་དྲང་ཞིང་དཀོན་མཆོག་གི་ལམ་ཡང་དག་པར་བདེན་པར་སྟོན་པ༌དང༌། ཁྱེད་ཀྱིས་མིའི་ཁ་ངོར་མི་གཟིགས་ཤིང་ཀུན་ལ་ཕྱོགས་རིས་མེད་པ་ངེད་རྣམས་ཀྱིས༌ཤེས།
MAT 22:17 དེའི༌ཕྱིར། ཁྱེད་ཀྱིས་ཇི་ལྟར་དགོངས་པ་ངེད་རྣམས་ལ་གསུང་བར༌མཛོད། ད་ལྟ་ངེད་ཅག་གིས་སེ་བཟིར་ལ་ཁྲལ་འཇལ་རུང་ངམ་མི་རུང་ཞེས༌དྲིས།
MAT 22:18 ཁོང་གིས་དེ་རྣམས་ཀྱི་སེམས་ངན་མཁྱེན་ཏེ་འདི་སྐད༌དུ། ཚུལ་འཆོས་པ་ཁྱོད་ཅག་གིས་བདག་ལ་ཚོད་བགམ་པའི་རྒྱུ་མཚན༌ཅི།
MAT 22:19 ཁྲལ་དུ་སྤྲད་པའི་དངུལ་སྒོར་ཞིག་བདག་ལ་སྟོན་ཅིག་ཅེས་གསུངས་པ༌དང༌། དེ་རྣམས་ཀྱིས་དངུལ་སྒོར་ཞིག་ཁྱེར་ཡོང་ནས་ཁོང་ལ༌སྤྲད།
MAT 22:20 ཁོང་གིས་དེ་རྣམས་ལ་རི་མོ་དང་ཡི་གེ་འདི་སུའི་ཡིན་ནམ་ཞེས་དྲིས་པ༌ན།
MAT 22:21 དེ་རྣམས་ཀྱིས་སེ་བཟིར་གྱི་ཡིན་ཞེས་སྨྲས༌སོ། །ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་གང་ཞིག་སེ་བཟིར་གྱི་ཡིན་ན་དེ་ནི་སེ་བཟིར་ལ་ཕུལ༌དང༌། གང་ཞིག་དཀོན་མཆོག་གི་ཡིན་ན་དེ་ནི་དཀོན་མཆོག་ལ་ཕུལ་ཅིག་ཅེས་གསུངས༌སོ།།
MAT 22:22 ཁོ་རྣམས་ཀྱིས་གསུང་དེ་ཐོས་པ་དང་ངོ་མཚར་བར་གྱུར་ཏེ་ཁོང་དང་ཁ་བྲལ་ནས་སོང༌ངོ༌།།
MAT 22:23 ཉིན༌དེར། སླར་གསོན་པའི་དོན་དེ་མེད་ཟེར་མཁན་སཱ་ཅུ་སེ་པ་འགའ་ཞིག་ཁོང་གི་དྲུང་དུ་ཡོང༌སྟེ།
MAT 22:24 སློབ་དཔོན༌ལགས། མོ་ཤེའི་མདོ༌ལས། གལ་སྲིད་སྐྱེས་པ་ཞིག་ལ་བུ་ཕྲུག་མེད་པར་ཤི༌ན། དེའི་གཅུང་པོས་གཅེན་པོའི་ཆུང་མ་བླངས་ནས་གཅེན་པོའི་དོན་དུ་རིགས་རྒྱུད་སྤེལ་དགོས་ཞེས་གསུངས༌ཡོད།
MAT 22:25 སྔོན་ཆད་ངེད་ཅག་གི་ཡུལ་འདིར་སྤུན་བདུན་ཡོད་པ༌ལ། སྤུན་ཆེ་བས་ཆུང་མ་ཞིག་བླངས་ནས་བུ་ཕྲུག་མེད་པར་ཤི༌བས། ཆུང་མ་གཅུང་པོ་ལ༌བསྐྱུར།
MAT 22:26 སྤུན་གཉིས་པ་དང་གསུམ་པ་ནས་སྤུན་བདུན་པའི་བར༌དུ། ཚང་མ་དེ་བཞིན་ཡིན༌ལ།
MAT 22:27 མཇུག་མཐར་བུད་མེད་དེའང༌ཤིའོ།།
MAT 22:28 དེས་ན་གཤིན་པོ་རྣམས་སླར་གསོན་པར་འགྱུར་བའི་དུས་དེ་སླེབས་ཚེ། སྤུན་བདུན་པོས་བུད་མེད་དེ་ཆུང་མར་བླངས་མྱོང༌བས། ཁོ་མོ་ནི་སྤུན་བདུན་ལས་སུ་ཞིག་གི་ཆུང་མ་ཡིན་ནམ་ཞེས་དྲིས་པ༌ལ།
MAT 22:29 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ཁྱོད་ཅག་གིས་གསུང་རབ་ཀྱི་དོན་མི་རྟོགས་ཤིང་དཀོན་མཆོག་གི་མཐུ་སྟོབས་ཀྱང་མི་ཤེས་པས་ནོར་སོང༌ངོ༌།།
MAT 22:30 ཅིའི་ཕྱིར་ཞེ༌ན། གཤིན་པོ་རྣམས་སླར་གསོན་པའི་དུས༌སུ། མི་རྣམས་ཀྱིས་བག་མ་ཕར་བསྐྱལ་ཚུར་ལེན་མི་བྱེད་པར་ནམ་མཁའི་ཞིང་ཁམས་ཀྱི་ཕོ་ཉ་རྣམས་དང༌འདྲའོ།།
MAT 22:31 འོན་ཀྱང་གཤིན་པོ་རྣམས་སླར་གསོན་ངེས་པའི་སྐོར་ལ་དཀོན་མཆོག་གིས་གསུང་རབ་ཀྱི་མདོ་ལས་ཁྱོད་རྣམས་ལ་འདི་སྐད༌དུ།
MAT 22:32 བདག་ནི་ཨབ་ར་ཧམ་གྱི་དཀོན་མཆོག༌དང༌། ཨི་སཱག་གི་དཀོན༌མཆོག ཡ་ཀོབ་ཀྱི་དཀོན་མཆོག་ཡིན་ཞེས་གསུངས་ཡོད་པ་ཁྱོད་ཅག་གིས་བཀླགས་མ་མྱོང༌ངམ། ཁོང་ནི་གཤིན་པོ་རྣམས་ཀྱི་དཀོན་མཆོག་མ་ཡིན༌ཏེ། གསོན་པོ་རྣམས་ཀྱི་དཀོན་མཆོག་ཡིན་ཞེས་གསུངས༌སོ།།
MAT 22:33 མི་ཚོགས་ཀྱིས་གསུང་དེ་ཐོས་པ་དང་ཁོང་གིས་གསུངས་པའི་ཆོས་ལ་ངོ་མཚར་བར་གྱུར༌ཏོ།།
MAT 22:34 དེ་ནས་ཕ་རུ་ཤི་པ་རྣམས་ཀྱིས་སྐྱབས་མགོན་ཡེ་ཤུས་སཱ་ཅུ་སེ་པ་རྣམས་ཀྱི་སྨྲ་སྒོ་བཅད་པ་ཐོས་ནས་ཕྱོགས་གཅིག་ཏུ་འདུས༌ཤིང༌།
MAT 22:35 དེ་རྣམས་ལས་བཀའ་ཁྲིམས་ཀྱི་མཁས་པ་ཞིག་གིས་ཁོང་ལ་ཚོད་བགམ་པའི་ཕྱིར་ན༌རེ།
MAT 22:36 སློབ་དཔོན༌ལགས། བཀའ་ཁྲིམས་ཐམས་ཅད་ལས་གཙོ་ཤོས་གང་ཡིན་ནམ་ཞེས་དྲིས་པ༌ན།
MAT 22:37 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་བློ་གཅིག་སེམས་གཅིག་ཡིད་གཅིག་དང་སྟོབས་ཤུགས་ཡོད་རྒུས་གཅེས༌ཤིག
MAT 22:38 འདི་ནི་བཀའ་ཁྲིམས་ཐམས་ཅད་ལས་ཐོག་མ་དང་ཆེས་གཙོ་ཤོས༌ཡིན།
MAT 22:39 གཉིས་པའང་དེ་དང་འདྲ༌སྟེ། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་པ་འདི༌ཡིན།
MAT 22:40 བཀའ་ཁྲིམས་འདི་གཉིས་ནི་བཀའ་ཁྲིམས་དང་ལུང་སྟོན་པའི་མདོ་ཐམས་ཅད་ཀྱི་རྩ་བ་ཡིན་ཞེས་གསུངས༌སོ།།
MAT 22:41 ཕ་རུ་ཤི་པ་རྣམས་གནས་དེར་འཛོམས༌དུས། སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ།
MAT 22:42 མཱ་ཤི་ཀའི་སྐོར་ནས་ཁྱོད་ཅག་གི་བསམ་ཚུལ་ཅི་ཡིན༌ནམ། ཁོང་ནི་སུ་ཞིག་གི་སྲས་ཡིན་ནམ་ཞེས་བཀའ་འདྲི་གནང་བ༌ལ། དེ་རྣམས་ཀྱིས་དཱ་བིད་ཀྱི་རིགས་སྲས་ཡིན་ཞེས་ཞུས༌སོ།།
MAT 22:43 ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་དཱ་བིད་ཀྱིས་དམ་པའི་ཐུགས་ཉིད་ཀྱི་ངང་ནས་མཱ་ཤི་ཀ་ལ་གཙོ་བོ་ལགས་ཞེས་འབོད་པ་ཅི་ཡིན༌ནམ། དེ་ལ་ཇི་སྐད༌དུ།
MAT 22:44 དཀོན་མཆོག་གིས་ནི་ང་ཡི་གཙོ་བོ༌ལ།། བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་འོག་ཏུ་འཇུག་པའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས༌ཤིང༌།
MAT 22:45 དཱ་བིད་ཀྱིས་ཁོང་ལ་གཙོ་བོ་ཞེས་ཞུས༌ན། ཁོང་ནི་དཱ་བིད་ཀྱི་རིགས་སྲས་སུ་ཇི་ལྟར་གྱུར་པ་ཡིན་ནམ་ཞེས་གསུངས་པ༌ན།
MAT 22:46 མི་སུས་ཀྱང་ཁོང་ལ་ལན་འདེབས་མ་ནུས༌ལ། ཉིན་དེ་ནས་བཟུང་སུས་ཀྱང་ཁོང་ལ་དྲི་བ་ཅི་ཡང་ཞུ་མ་ཕོད༌དོ།།
MAT 23:1 དེ་ནས་སྐྱབས་མགོན་ཡེ་ཤུས་མི་ཚོགས་དང་ཐུགས་སྲས་རྣམས་ལ་གསུང་གླེང་མཛད་ཅིང་འདི་སྐད༌དུ།
MAT 23:2 མཁན་པོ་དང་ཕ་རུ་ཤི་པ་རྣམས་མོ་ཤེའི་ཁྲི་ལ་སྡོད༌ཅིང༌།
MAT 23:3 དེ་རྣམས་ཀྱིས་འཆད་པའི་བསླབ་བྱ་ཐམས་ཅད་ཁྱོད་ཅག་གིས་སྲུངས་ལ་དེ་ལྟར་བྱོས༌ཤིག འོན་ཀྱང་དེ་དག་གིས་ངག་ནས་སྨྲས་ཀྱང་ལག་ཏུ་མི་སྒྲུབ༌པས། དེ་དག་གི་སྤྱོད་ལམ་ལྟར་མ་བྱེད༌ཅིག
MAT 23:4 དེ་དག་གིས་ཁུར་བོ་ལྕི་མོ་བསྡམས་ནས་མི་རྣམས་ཀྱི་ཕྲག་ལ་འགེལ༌ནའང༌། རང་གི་མཛུབ་མོ་གཅིག་ཀྱང་འགུལ་བར་མི་འདོད༌དོ།།
MAT 23:5 དེ་དག་གིས་དོན་ཐམས་ཅད་མི་རྣམས་ལ་མཐོང་དུ་འཇུག་པའི་ཕྱིར་སྒྲུབ༌ཅིང༌། རང་གི་སྲུང་བ་དེའི་ཞེང་ཚད་ཆེ་བར་བཟོ་བ༌དང༌། གྱོན་གོས་ཀྱི་ཙོར་ལོ་ཡང་ཇེ་རིང་དུ་གཏོང༌ངོ༌།།
MAT 23:6 གསོལ་སྟོན་དང་ཆོས་ཁང་དུ་གྲལ་མགོར་སྡོད་པར་དགའ༌ཞིང༌།
MAT 23:7 ཁྲོམ་སྲང་ནས་མི་རྣམས་ཀྱི་བསྙེན་བཀུར་འཐོབ་པ༌དང༌། རང་ཉིད་ལ་རཱབ་པེ་ལགས་ཞེས་འབོད་པར་དགའ་མོས༌བྱེད།
MAT 23:8 འོན་ཀྱང་ཁྱོད་རྣམས་ཀྱིས་རང་ལ་རཱབ་པེ་ཞེས་འབོད་དུ་མ་འཇུག༌ཅིག ཁྱོད་རྣམས་ལ་སློབ་དཔོན་གཅིག་ཁོ་ན་ཡོད་ཅིང་ཁྱོད་ཅག་ཐམས་ཅད་ནི་སྤུན་ཡིན་པའི་ཕྱིར༌རོ།།
MAT 23:9 ཁྱོད་རྣམས་ཀྱིས་འཇིག་རྟེན་གྱི་མི་སུ་ལའང་ཡབ་ཅེས་འབོད་མི་རུང༌སྟེ། ཁྱོད་ཅག་གི་ཡབ་གཅིག་པུ་ནི་ནམ་མཁའི་ཞིང་ཁམས་སུ་བཞུགས་པ་དེ་ཉིད་ཡིན་པའི་ཕྱིར༌རོ།།
MAT 23:10 ཡང་ཁྱོད་རྣམས་ཀྱིས་རང་ལ་དགེ་རྒན་ཞེས་འབོད་དུ་མ་འཇུག༌སྟེ། ཁྱོད་ཅག་ལ་དགེ་རྒན་གཅིག་ཁོ་ན་ཡོད་པ་སྟེ་སྐྱབས་མགོན་མཱ་ཤི་ཀ་ཡིན་པའི་ཕྱིར༌རོ།།
MAT 23:11 ཁྱོད་རྣམས་ལས་ཆེ་ཤོས་ཡིན་པ་དེ་ཁྱོད་ཅག་གི་ཞབས་ཕྱི་པར་འགྱུར༌དགོས།
MAT 23:12 སུ་ཞིག་གིས་རང་ཉིད་མཐོ་བར་བཟུང་ན་དམན་པར༌འགྱུར། ཡང་སུ་ཞིག་གིས་རང་ཉིད་དམན་པར་བཟུང་ན་མཐོ་བར་འགྱུར་ངེས་ཡིན་ཞེས་གསུངས༌སོ།།
MAT 23:13 ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ནི་ཁྱོད་ཅག་གིས་མི་རྣམས་ཀྱི་མདུན་དུ་ནམ་མཁའི་རྒྱལ་སྲིད་དུ་ཞུགས་པའི་སྒོ་བརྒྱབ༌སྟེ། ཁྱོད་རང་ཉིད་མི་འགྲོ་ཞིང་འགྲོ་མཁན་གཞན་རྣམས་ཀྱང་བཀག་པའི་ཕྱིར༌རོ།།
MAT 23:14 ཡང་ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ནི་ཁྱོད་ཅག་གིས་ཡུགས་མོ་རྣམས་ཀྱི་ཁང་པ་དང་བཅས་པའི་རྒྱུ་རྫས་ཐམས་ཅད་ཧམ་བཟུང་བྱེད༌ཅིང༌། སྨོན་ལམ་རིང་པོ་འདེབས་ཁུལ་བྱེད༌པས། ཁྱོད་རྣམས་ལ་ལྷག་ཏུ་ཆད་པ་ལྕི་མོ་འཕོག་པར་འགྱུར༌རོ།།
MAT 23:15 ཡང་ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ནི་ཁྱོད་ཅག་གིས་མི་གཅིག་ཙམ་ཡང་རང་གི་ཆོས་སྒོར་ཞུགས་སུ་འཇུག་ཆེད་སྐམ་ས་དང་རྒྱ་མཚོ་ཀུན་ཏུ་རྒྱུ༌ཞིང༌། མི་དེ་ཁྱོད་ཅག་གི་ཆོས་ལ་ཞུགས༌རྗེས། ཁྱོད་ཅག་ལས་ཀྱང་མི་དེ་ནི་ལྷག་ཏུ་དམྱལ་བའི་གནས་སུ་ལྷུང་བར་བྱེད༌དོ།།
MAT 23:16 ཡང་ལམ་ཁྲིད་མཁན་ལོང་བ་ཁྱོད་རྣམས་ལ་ཆག་སྒོ་འབྱུང༌ངོ༌། །ཁྱོད་རྣམས་ན༌རེ། སུ་ཞིག་གིས་མཆོད་ཁང་དཔང་དུ་བཙུགས་ཏེ་མནའ་བསྐྱལ་ན་དེ་ནི་ཅི་ཡང་མ༌ཡིན། འོན་ཏེ་སུ་ཞིག་གིས་མཆོད་ཁང་ནང་གི་གསེར་དཔང་དུ་བཙུགས་ནས་མནའ་བསྐྱལ༌ན། མི་དེས་ངེས་པར་མནའ་ལྟར་བསྒྲུབ་དགོས་ཞེས་ཟེར༌རོ།།
MAT 23:17 གླེན་པ་ལོང་བ༌རྣམས། ཁྱོད་ཅག་གིས་གསེར་གལ་ཆེ་བར་འདོད༌དམ། ཡང་ན་གསེར་དམ་པར་བསྒྱུར་པའི་མཆོད་ཁང་གལ་ཆེ་བར༌སྙམ།
MAT 23:18 ཡང་ཁྱོད་རྣམས་ན༌རེ། སུ་ཞིག་གིས་མཆོད་ཁྲི་དཔང་དུ་བཙུགས་ནས་མནའ་བསྐྱལ་ན་དེ་ནི་ཅི་ཡང་མ༌ཡིན། འོན་ཀྱང་སུ་ཞིག་གིས་མཆོད་ཁྲི་སྟེང་གི་མཆོད་རྫས་དཔང་དུ་བཙུགས་ནས་མནའ་བསྐྱལ༌ན། མི་དེས་ངེས་པར་མནའ་ལྟར་བསྒྲུབ་དགོས་ཞེས་ཟེར༌རོ།།
MAT 23:19 ལོང་བ༌རྣམས། ཁྱོད་ཅག་གིས་མཆོད་རྫས་གལ་ཆེ་བར་འདོད༌དམ། ཡང་ན་མཆོད་རྫས་དམ་པར་བསྒྱུར་པའི་མཆོད་ཁྲི་གལ་ཆེ་བར་སྙམ།
MAT 23:20 དེའི༌ཕྱིར། མཆོད་ཁྲི་དཔང་དུ་བཙུགས་ནས་མནའ་སྐྱེལ་མཁན་རྣམས་ཀྱིས་མཆོད་ཁྲི་དང་དེའི་སྟེང་དུ་ཡོད་པ་ཐམས་ཅད་དཔང་དུ་བཙུགས་པ༌ཡིན།
MAT 23:21 ཡང་མཆོད་ཁང་དཔང་དུ་བཙུགས་ནས་མནའ་སྐྱེལ་མཁན་རྣམས་ཀྱིས་མཆོད་ཁང་དང་དེའི་ནང་དུ་བཞུགས་པ་ཁོང་ཉིད་དཔང་དུ་བཙུགས་པ༌ཡིན།
MAT 23:22 ཡང་ནམ་མཁའི་ཞིང་ཁམས་དཔང་དུ་བཙུགས་ནས་མནའ་སྐྱེལ་མཁན་རྣམས་ཀྱིས་དཀོན་མཆོག་གི་བཞུགས་ཁྲི་དང་དེའི་སྟེང་དུ་བཞུགས་པ་ཉིད་ཀྱང་དཔང་དུ་བཙུགས་པ་ཡིན༌ནོ།།
MAT 23:23 ཡང་ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ནི་ཁྱོད་རྣམས་ཀྱིས་དག་ཅི༌དང༌། གོ༌སྙོད། ཟི་ར་བཅས་ཀྱི་བཅུ་ཆའི་གཅིག་ཕུལ༌ནའང༌། དེ་བས་གལ་ཆེ་བའི་བཀའ་ཁྲིམས་ནང་གི་བདེན་ལུགས༌དང༌། སྙིང༌རྗེ། ཡིད་རྟོན་རུང་བ་བཅས་ནི་སྤོང་བར༌བྱེད། འོན་ཀྱང་ཁྱོད་ཅག་གིས་དེ་བས་གལ་ཆེ་བ་འདི་བསྲུང་འོས་ཤིང་གཞན་དེ་ཡང་འདོར་མི༌འོས།
MAT 23:24 ལམ་ཁྲིད་མཁན་ལོང་བ༌རྣམས། ཁྱོད་ཅག་གིས་ཆུ་ནས་འབུ་ཕྲ་མོ་བཙགས་ཏེ་ཐོན་པ༌དང༌། རྔ་མོང་ཆེན་པོ་ཁྱུར་མིད་བྱེད་ དོ།།
MAT 23:25 ཡང་ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ནི་ཁྱོད་ཅག་གིས་ཕོར་བ་དང་སྡེར་མའི་ཕྱི་ངོས་གཙང་མར་བྱེད་པ་ཙམ༌ལས། སྣོད་དེ་དག་གི་ནང་དུ་འཕྲོག་ལེན་དང་བག་མེད་ཀྱིས་བཀང༌འདུག
MAT 23:26 ཕ་རུ་ཤི་པ་ལོང་བ༌རྣམས། ཁྱོད་ཅག་གིས་ཐོག་མར་ཕོར་བ་དང་སྡེར་མའི་ནང་གཙང་མར་བྱོས༌དང༌། ཕྱི་ངོས་ཀྱང་གཙང་མར་འགྱུར༌རོ།།
MAT 23:27 ཡང་ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ཁྱོད་ཅག་ནི་ཚོན་རྩི་དཀར་པོས་སྤྲས་པའི་དུར་ས་ཞིག་དང་འདྲ༌སྟེ། ཕྱི་ནས་བལྟས་ན་མཛེས་ཀྱང་ནང་དུ་གཤིན་པོ་རྣམས་ཀྱི་ཀེང་རུས་དང་མི་གཙང་བ་མཐའ་དག་གིས་བཀང༌ངོ༌།།
MAT 23:28 དཔེ་དེ་བཞིན༌དུ། ཁྱོད་རྣམས་ནི་ཕྱིའི་རྣམ་པའི་ཆ་ནས་མི་རྣམས་ལ་དྲང་བདེན་ལྟར་སྣང༌ཡང༌། ནང་སེམས་སུ་ཚུལ་འཆོས་དང་ནག་ཉེས་ཀྱིས་བཀང་འདུག༌པའོ།།
MAT 23:29 ཡང་ཚུལ་འཆོས་མཁན་པོ་དང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌ངོ༌། །རྒྱུ་མཚན་ནི་ཁྱོད་ཅག་གིས་ལུང་སྟོན་པ་རྣམས་ལ་དུར་ས་རྩིག༌ཅིང༌། སྐྱེས་བུ་དམ་པ་རྣམས་ཀྱི་བང་སོའང་བརྒྱན་ཏེ་ན༌རེ།
MAT 23:30 གལ༌སྲིད། ངེད་རྣམས་མེས་པོའི་དུས་དང་མཉམ་པ་ཡིན༌ན། ངེད་ཅག་གིས་མེས་པོ་རྣམས་དང་འགྲོགས་ནས་ལུང་སྟོན་པ་རྣམས་གསོད་པར་མི་བྱ་ཞེས༌ཟེར།
MAT 23:31 དེ་ལས་ཁྱོད་ཅག་གིས་རང་ཉིད་ནི་ལུང་སྟོན་པ་གསོད་མཁན་རྣམས་ཀྱི་བུ་རྒྱུད་ཡིན་པར་བདེན་དཔང་བྱས༌པའོ།།
MAT 23:32 ད་ལྟ་ཁྱོད་ཅག་གིས་རང་གི་མེས་པོ་རྣམས་ཀྱི་ལས་ངན་པ་དེ་དག་ཡོངས་སུ་རྫོགས་པར་གྱིས༌ཤིག
MAT 23:33 སྦྲུལ་དང་དུག་སྦྲུལ་གྱི་རྒྱུད་ཁྱོད་ཅག་ནི་དམྱལ་བའི་གནས་ཀྱི་ཉེས་ཆད་ལས་ཐར་ཐུབ་བམ་ཞེ་ན་མི༌ཐུབ།
MAT 23:34 དེའི༌ཕྱིར། བདག་གིས་ལུང་སྟོན་པ༌དང༌། མཁས༌པ། མཁན་པོ་རྣམས་ཁྱོད་ཅག་གི་གམ་དུ་མངག་པར༌བྱའོ། །འོན་ཀྱང་ཁྱོད་ཅག་གིས་དེ་དག་ལས་ལ་ལ་གསོད་ཅིང་ལ་ལ་ཤིང་རྒྱ་གྲམ་གྱི་སྟེང་དུ་བརྡབ་པ༌དང༌། ཡང་ལ་ལ་ཆོས་ཁང་དུ་ཁྲིད་ནས་རྟ་ལྕག་གིས་གཞུས༌ཏེ། གྲོང་རྡལ་གཅིག་ནས་གྲོང་རྡལ་གཞན་དུ་དེད་ནས་གནོད་འཚེ་བྱེད་པར་འགྱུར༌ལ།
MAT 23:35 དེ་ནི་ས་སྟེང་འདིར་མི་གཞུང་དྲང་ཐམས་ཅད་ཀྱི་ཁྲག་བཞུར་བའི་སྐྱིན་ཚབ་དེ་ཁྱོད་ཅག་གི་སྟེང་ནས་ཕྱིར་ལེན་དགོས༌ཏེ། མི་གཞུང་དྲང་ཧ་བེལ་ཞེས་པའི་ཁྲག་བཞུར་བ་ནས༌བཟུང༌། མཆོད་ཁང་དང་མཆོད་ཁྲི་གཉིས་ཀྱི་བར་དུ་པཱ་རག་ཡའི་བུ་ཟ་ཀར་ཡཱའི་ཁྲག་བཞུར་བའི་བར་གྱི་སྐྱིན་ཚབ་ཐམས་ཅད་ལེན་པར་འགྱུར་བའི་ཕྱིར༌ཡིན།
MAT 23:36 བདག་གིས་ཁྱོད་རྣམས་ལ་བདེན་པར་སྨྲ༌སྟེ། འདི་དག་ཐམས་ཅད་ནི་མི་རབས་འདི་ལ་འབབ་པར་འགྱུར༌རོ།།
MAT 23:37 ཀྱེ། ཡེ་རུ་སཱ༌ལེམ། ཡེ་རུ་སཱ༌ལེམ། ཁྱོད་ཀྱིས་རྟག་ཏུ་ལུང་སྟོན་པ་རྣམས་གསོད་པར་བྱེད༌ཅིང༌། ཁྱོད་ཀྱི་གམ་དུ་མངགས་པ་རྣམས་ཀྱང་རྡོ་རུབ་གཏོང་བར༌བྱེད། བྱ་མོས་བྱ་ཕྲུག་གཤོག་འོག་ཏུ་བསྡུ་བ༌ལྟར། བདག་གིས་ཀྱང་ལན་དུ་མར་ཁྱོད་ཀྱི་བུ་ཕྲུག་རྣམས་བསྡུ་འདོད་ནའང་ཁྱོད་རྣམས་མ༌འཐད།
MAT 23:38 ལྟོས༌དང༌། ཁྱོད་ཅག་གི་སྡོད་གནས་ནི་ཁྱོད་ཅག་ལ་སྟོང་བར་བྱས་ནས་བསྐྱུར་བ༌ཡིན།
MAT 23:39 བདག་གིས་ཁྱོད་རྣམས་ལ་སྨྲ་བར་བྱ༌སྟེ། དུས་ད་ནས༌བཟུང༌། ཁྱོད་ཅག་གི་ངག་ལས་གཙོ་བོའི་མཚན་གྱི་སྒོ་ནས་བྱོན་པ་ནི་བྱིན་རླབས་ཅན་ཡིན་ཞེས་ཞུ་བའི་བར་དུ་ང་རང་མཐོང་བར་མི་འགྱུར་ཞེས་གསུངས༌སོ།།
MAT 24:1 སྐྱབས་མགོན་ཡེ་ཤུ་མཆོད་ཁང་ནས་ཕྱིར་ཕེབས༌དུས། ཐུགས་སྲས་རྣམས་ཁོང་གི་དྲུང་དུ་ཡོང་སྟེ་མཆོད་ཁང་གི་བཟོ་བཀོད་ཁོང་ལ་བསྟན་པ༌ན།
MAT 24:2 ཁོང་གིས་འདི་སྐད༌དུ། ཁྱོད་ཅག་གིས་འདི་ཐམས་ཅད་མཐོང་བ་མ་ཡིན༌ནམ། ངས་ཁྱོད་རྣམས་ལ་བདེན་པར་སྨྲ༌སྟེ། མ་འོངས་པར་འདི་རུ་རྡོ་ཕ་བོང་སྟེང་དུ་རྡོ་གཅིག་ཀྱང་མི་ལུས་པར་ཐམས་ཅད་བཤིག་པར་འགྱུར་ཞེས་གསུངས༌སོ།།
MAT 24:3 སྐྱབས་མགོན་ཡེ་ཤུ་སྐྱུ་རུ་རའི་རི་བོར་བཞུགས༌དུས། ཐུགས་སྲས་རྣམས་ཟུར་དུ་ཁོང་གི་དྲུང་ལ་ཡོང༌སྟེ། དོན་འདི་རྣམས་དུས་ནམ་ཞིག་ལ་འབྱུང༌ཞིང༌། ཁྱེད་རང་ཕེབས་ཡོང་བ་དང་བསྐལ་པའི་མཐའ་མར་རྟགས་ཅི་ཞིག་ཡོད་པ་གསུང་བར་མཛོད་ཅེས་ཞུས་པ༌ན།
MAT 24:4 སྐྱབས་མགོན་ཡེ་ཤུས་འདི་སྐད༌དུ། སུ་ཞིག་གིས་ཀྱང་ཁྱོད་རྣམས་མི་བསླུ་བའི་ཆེད་དུ་དོགས་པར༌གྱིས།
MAT 24:5 རྒྱུ་མཚན་ནི་མི་མང་པོས་ངའི་མིང་དུ་རྫུ་བཞིན་ཡོང༌སྟེ། ང་ནི་སྐྱབས་མགོན་མཱ་ཤི་ཀ་ཡིན་ཟེར་ཞིང་མི་མང་པོ་བསླུ་བར༌ངེས།
MAT 24:6 ཡང་ཁྱོད་ཅག་གིས་དམག་འཁྲུག་དང་དམག་འཁྲུག་གི་གཏམ་ཐོས་པར་འགྱུར་ཡང་འཇིགས་པར་མི༌བྱའོ། །རྒྱུ་མཚན་ནི་དོན་འདི་དག་འབྱུང་ངེས༌ཀྱང༌། དེ་ནི་མཐའ་མའི་དུས་ལ་སླེབས་པ་མ་ཡིན༌ཏེ།
MAT 24:7 མི་རིགས་དང་མི་རིགས་འཁྲུག་ཅིང་རྒྱལ་ཁབ་དང་རྒྱལ་ཁབ་འཁྲུག༌པ། ས་ཆ་མང་པོར་མུ་གེ་དང་ས་འགུལ་ཡང་འབྱུང་བར༌འགྱུར།
MAT 24:8 དོན་འདི་ཐམས་ཅད་ནི་སྦྲུམ་མའི་ཟུག་གཟེར་གྱི་ཐོག་མ༌ཡིན།
MAT 24:9 དེའི་དུས༌སུ། མི་རྣམས་ཀྱིས་ཁྱོད་ཅག་དཀའ་སྡུག་ལ་སྦྱོར་ཞིང་གསོད་པར་འགྱུར་བ༌དང༌། ངའི་མིང་གི་རྐྱེན་གྱིས་མི་རིགས་ཐམས་ཅད་ཁྱོད་ཅག་ལ་སྡང་བར༌འགྱུར།
MAT 24:10 ཡང་དེའི་དུས༌སུ། མི་མང་པོ་ཞིག་དད་པ་ལོག་པ་དང་ཕན་ཚུན་ངོ་ལོག་བྱེད་ཅིང་སྡང་བར༌འགྱུར།
MAT 24:11 ཡང་ལུང་སྟོན་པ་རྫུས་མ་མང་པོ་འབྱུང་ཞིང་མི་མང་པོ་བསླུ་བར༌འགྱུར།
MAT 24:12 ཁྲིམས་འགལ་གྱི་ལས་ཇེ་མང་དུ་སོང་བས་མི་མང་པོའི་བྱམས་སེམས་ཀྱང་ཉམས་པར༌འགྱུར།
MAT 24:13 འོན་ཀྱང་མཐར་ཐུག་ཏུ་བཟོད་བསྲན་བྱེད་མཁན་དེ་ལ་ཐར་པ་འཐོབ་ངེས་ཡིན།
MAT 24:14 དཀོན་མཆོག་གི་རྒྱལ་སྲིད་ཀྱི་འཕྲིན་བཟང་འདི་མི་རིགས་ཐམས་ཅད་ལ་བདེན་དཔང་བྱེད་པའི་ཕྱིར་འཇིག་རྟེན་ཡོངས་ལ་བསྒྲགས༌རྗེས། དུས་ཀྱི་མཐའ་མ་ད་གཟོད་སླེབ་པར་འགྱུར༌རོ།།
MAT 24:15 དེའི༌ཕྱིར། མདོ་འདི་ཀློག་མཁན་གྱིས་དོན་རྟོགས་པར་བྱ༌སྟེ། ནམ་ཞིག་ཁྱོད་ཅག་གིས་ལུང་སྟོན་པ་དཱ་ནེ་ཨེལ་གྱི་མདོ་ལས་སྟོང་པར་བྱེད་པའི་སྐྱུག་བྲོ་བ་དེ་གནས་དམ་པ་རུ་འགྲེངས་ནས་བསྡད་ཡོད་པ་མཐོང༌དུས་སུ།
MAT 24:16 ཡ་ཧུ་དཱའི་ཡུལ་དུ་ཡོད་པ་རྣམས་རི་ལ་འབྲོ་བར༌གྱིས།
MAT 24:17 ཁང་པའི་སྟེང་དུ་ཡོད་པ་རྣམས་ཀྱང་སར་བབས་ནས་རང་ཁྱིམ་དུ་དངོས་པོ་ལེན་དུ་མ༌འགྲོའོ།།
MAT 24:18 ཞིང་ཁར་ཡོད་པ་རྣམས་རང་གི་གྱོན་པ་ལེན་དུའང་ཕྱིར་མ་ལོག༌ཅིག
MAT 24:19 ཉིན་དེ་དག་གི་རིང༌ལ། བུད་མེད་སྦྲུམ་མ་དང་ཕྲུ་གུར་ནུ་མ་སྣུན་མཁན་རྣམས་སྙིང་རེ་རྗེ༌ཨང༌།
MAT 24:20 ཁྱོད་རྣམས་ཡུལ་གཞན་དུ་འབྲོ་བའི་དུས་དེ་དགུན་ཁའམ་ངལ་གསོ་བའི་ཉིན་དང་མི་འཕྲད་པའི་ཕྱིར་སྨོན་ལམ་ཐོབས༌ཤིག
MAT 24:21 རྒྱུ་མཚན་ནི་དེའི་དུས་སུ་དཀའ་སྡུག་ཆེན་པོ་འབྱུང་བར་འགྱུར༌ཏེ། དཀའ་སྡུག་དེ་ལྟ་བུ་ནི་འཇིག་རྟེན་བཀོད་པ་ནས་ད་ལྟའི་བར་དུ་བྱུང་མ་མྱོང༌ལ། རྗེས་སུའང་འབྱུང་མི༌སྲིད།
MAT 24:22 ཡང་ཉིན་དེ་དག་ཇེ་ཉུང་དུ་མཛད་པ་མིན༌ན། ཤ་ཁྲག་གདོས་བཅས་སུ་གྲུབ་པ་སུ་ཡང་ཐར་མི་ཐུབ༌མོད། འོན་ཀྱང་བདམས་པའི་མི་ རྣམས་ཀྱི་དོན་དུ་ཉིན་དེ་དག་ཇེ་ཉུང་དུ་མཛད་ངེས༌ཡིན།
MAT 24:23 དེའི་དུས༌སུ། སུ་ཞིག་གིས་ཁྱོད་ཅག་ལ་ལྟོས་དང་མཱ་ཤི་ཀ་འདི་རུ༌བཞུགས། ཡང་ན་དེ་གར་བཞུགས་ཞེས་སྨྲས་ཀྱང་དེ་ལ་ཡིད་རྟོན་བྱ་མི་རུང༌ངོ༌།།
MAT 24:24 རྒྱུ་མཚན་ནི་མཱ་ཤི་ཀ་བཅོས་མ་དང་ལུང་སྟོན་པ་རྫུས་མ་མང་པོ་འབྱུང༌ཞིང༌། གལ་ཏེ་བསླུ་ནུས་ན་བདམས་པའི་མི་རྣམས་ཀྱང་བསླུ་བའི༌ཕྱིར། གྲུབ་རྟགས་ཆེན་པོ་དང་ངོ་མཚར་བའི་དོན་རྣམས་ཀྱང་སྟོན་པར༌འགྱུར།
MAT 24:25 ལྟོས༌དང༌། བདག་གིས་སྔ་མོ་ནས་དོན་འདི་ཁྱོད་ཅག་ལ་སྨྲས་པ༌ཡིན།
MAT 24:26 ཡང་དེ་རྣམས་ཀྱིས་ཁྱོད་ཅག་ལ་ལྟོས༌དང༌། མཱ་ཤི་ཀ་དབེན་པའི་གནས་སུ་བཞུགས་ཞེས་ཟེར་ཡང་ཕྱི་རོལ་ཏུ་མ༌འགྲོའོ། །ཡང་ལྟོས༌དང༌། མཱ་ཤི་ཀ་ཁང་པའི་ཕུགས་སུ་བཞུགས་ཞེས་ཟེར་ཡང་ཡིད་ཆེས་མི༌བྱའོ།།
MAT 24:27 རྒྱུ་མཚན་ནི་ཤར་ནས་ནུབ་ཕྱོགས་སུ་གློག་དམར་འཁྱུག་པ༌བཞིན། མིའི་བུ་ཡང་དེ་ལྟར་ཕེབས་ཡོང་བར་འགྱུར༌རོ།།
MAT 24:28 བེམ་པོ་གང་དུ་ཡོད་ན་བྱ་རྒོད་དག་ཀྱང་གནས་དེར་འཁོར་ཡོང་ཞེས་གསུངས༌སོ།།
MAT 24:29 ཡང་སྐྱབས་མགོན་ཡེ་ཤུས་འདི་སྐད༌དུ། ཉིན་དེ་དག་གི་དཀའ་སྡུག་བྱུང་རྗེས་ཉི་མ་སྒྲིབ་ཅིང་ཟླ་བས་ཀྱང་འོད་མི༌སྤྲོའོ། །སྐར་ཚོགས་ནམ་མཁའ་ནས་ལྷུང་ཞིང་བར་སྣང་ཁམས་ཀྱི་དབང་ཐམས་ཅད་གཡོ་བར་འགྱུར༌རོ།།
MAT 24:30 དེའི་དུས༌སུ། མིའི་བུ་ཡི་རྟགས་ནི་ནམ་མཁའ་རུ་འབྱུང༌ཞིང༌། ས་སྟེང་གི་མི་རིགས་ཐམས་ཅད་ཀྱིས་མྱ་ངན་བྱེད་པ༌དང༌། དེ་རྣམས་ཀྱིས་མིའི་བུ་ཁོ་རང་ནུས་མཐུ་དང་གཟི་བརྗིད་ཆེན་པོའི་ངང་ནམ་མཁའི་སྤྲིན་གྱི་བང་རིམ་ནས་འབྱོན་པ་མཐོང་བར༌འགྱུར།
MAT 24:31 ཡང་ཁོས་རང་ཉིད་ཀྱི་ཕོ་ཉ་རྣམས་དུང་སྒྲ་ཆེན་པོ་དང་བཅས་མངགས་ཤིང་དེ་རྣམས་ཀྱིས་ཁོའི་བདམས་པའི་མི་ཐམས་ཅད་ནི་ནམ་མཁའི་མཐའ་མཚམས་གཅིག་ནས་མཐའ་མཚམས་གཞན་པའི་བར་དུ་ཕྱོགས་བཞི་མཚམས་བརྒྱད་ནས་བསྡུ་བར་འགྱུར༌རོ།།
MAT 24:32 ཁྱོད་ཅག་གིས་བསེ་ཡབ་ཤིང་ལས་བསླབ་བྱ་ཞིག་ལོངས་དང༌། དེའི་ཡལ་ག་མཉེན་ལྕུག་ལྡན་པར་གྱུར་ནས་ལོ་མ་འབུས་པའི་དུས༌སུ། དབྱར་ཁའི་དུས་ལ་ཉེ་བ་ཁྱོད་ཅག་གིས་ཤེས༌སོ།།
MAT 24:33 དེ་བཞིན་དུ་ཁྱོད་ཅག་གིས་དོན་དེ་དག་ཐམས་ཅད་མཐོང་བའི༌ཚེ། མིའི་བུ་སླེབས་ལ་ཉེ་བ་དང་སྒོ་འགྲམ་དུ་སླེབས་ཡོད་པ་རྟོགས་པར༌གྱིས།
MAT 24:34 བདག་གིས་ཁྱོད་ཅག་ལ་བདེན་པར་སྨྲ༌སྟེ། མི་རབས་འདི་ད་དུང་མ་འདས་པའི་སྔོན་ལ་དོན་འདི་ཐམས་ཅད་འབྱུང་བར༌འགྱུར།
MAT 24:35 གནམ་ས་གཉིས་ནི་འཇིག་སྲིད་ཀྱང་བདག་གི་བཀའ་རྣམས་འཇིག་པར་མི་འགྱུར༌རོ།།
MAT 24:36 འོན་ཀྱང་མི་སུས་ཀྱང་ཉིན་མོ་དེ་དང་དུས་དེ་ནི་ནམ་ཞིག་ཡིན་པ་མི་ཤེས༌ཤིང༌། ནམ་མཁའི་ཞིང་ཁམས་ཀྱི་ཕོ་ཉ་རྣམས་ཀྱིས་ཀྱང་མི་ཤེས༌ལ། སྲས་ཀྱིས་ཀྱང་མི་ཤེས་ཏེ་ཡབ་གཅིག་པུས་མཁྱེན༌ཏོ།།
MAT 24:37 རྒྱུ་མཚན་ནི་ནོ་ཨའི་དུས་ནི་ཇི་ལྟར་བྱུང་བ་བཞིན་མིའི་བུ་ཕེབས་ཡོང་བའི་དུས་ཀྱང་དེ་ལྟར་འབྱུང་བར༌འགྱུར།
MAT 24:38 ཆུ་ལོག་ཆེན་པོ་མ་བྱུང་བའི་ཡར་སྔོན༌དུ། མི་རྣམས་ཀྱིས་བཟའ་བཏུང་ལ་རོལ་བ་དང་བག་མ་ཚུར་ལེན་ཕར་བསྐྱལ་བྱས༌ཤིང༌། ནོ་ཨ་གྲུ་གཟིངས་ཀྱི་ནང་དུ་ཞུགས་པའི་ཉིན༌དེར།
MAT 24:39 ཆུ་ལོག་ཆེན་པོ་བྱུང་སྟེ་མི་ཐམས་ཅད་ཆུས་ཁུར་བའི་བར༌དུ། མི་རྣམས་ཀྱིས་ཅི་ཡིན་འདི་ཡིན་མ་ཤེས༌ལ། མིའི་བུ་ཕེབས་ཡོང་བའི་དོན་ཡང་དེ་ལྟར༌འབྱུང༌།
MAT 24:40 དུས༌དེར། མི་གཉིས་ཞིང་ཁར་ཡོད་པ་ལས་གཅིག་ནི་འདྲེན་ཞིང་གཅིག་ནི་བསྐྱུར་བར༌འགྱུར།
MAT 24:41 ཡང་བུད་མེད་གཉིས་ཀྱིས་ལག་སྐོར་གཅིག་བསྐོར་བ་ལས་གཅིག་ནི་འདྲེན་ཞིང་གཅིག་ནི་བསྐྱུར་བར༌འགྱུར།
MAT 24:42 དེའི༌ཕྱིར། ཁྱོད་ཅག་གི་གཙོ་བོ་ཁོང་ཉིད་ཉིན་གང་ཞིག་ལ་ཕེབས་པར་འགྱུར་བ་ཁྱོད་རྣམས་ཀྱིས་མི་ཤེས་པས་གཟབ་པར་གྱིས༌ཤིག
MAT 24:43 ཁྱིམ་བདག་གིས་མཚན་མོའི་དུས་སུ་ནམ་ཞིག་ལ་རྐུན་མ་ཡོང་ངེས་པ་ཤེས༌ན། ཁོས་གཟབ་གཟབ་བྱས་ནས་རྐུན་མ་ཁྱིམ་ལ་འཛུལ་དུ་མི་འཇུག་པ་ཁྱོད་རྣམས་ཀྱིས་ཤེས་པར༌གྱིས།
MAT 24:44 དེ་བས་ཁྱོད་རྣམས་ཀྱིས་ཀྱང་སྟ་གོན་བྱོས༌དང༌། རྒྱུ་མཚན་ནི་ཁྱོད་ཅག་གིས་སེམས་སུའང་མི་དྲན་པའི་དུས་ཤིག༌ལ་མིའི་བུ་ཕེབས་ཡོང་བར་ངེས༌སོ།།
MAT 24:45 དེས་ན་སུ་ཞིག་བློ་སེམས་དཀར་ཞིང་འཇོན་ཐང་ཅན་གྱི་གཡོག་པོ་ཡིན་པ༌དང༌། བདག་པོས་ཁོ་ནི་རང་གི་གཡོག་པོ་རྣམས་ཀྱི་འགོ་བར་བསྐོས༌ཏེ། དུས་ལྟར་དེ་རྣམས་ལ་ཟས་སྐལ་སྟེར་བ་ཡིན༌ནམ།
MAT 24:46 བདག་པོ་ཕྱིར་སླེབས་ཏེ་གཡོག་པོས་དེ་ལྟར་སྒྲུབ་བཞིན་པ་མཐོང༌ན། གཡོག་པོ་དེ་ནི༌བདེའོ།།
MAT 24:47 བདག་གིས་ཁྱོད་རྣམས་ལ་བདེན་པར་སྨྲ༌སྟེ། བདག་པོས་གཡོག་པོ་དེར་རྒྱུ་ནོར་ཐམས་ཅད་དོ་དམ་བྱེད་པའི་དབང་སྤྲོད་པར༌འགྱུར།
MAT 24:48 འོན༌ཀྱང༌། གཡོག་པོ་ངན་པ་དེས་རང་གི་སེམས་སུ་ངའི་བདག་པོ་ཕྱིར་ཡོང་བ་འཕྱིའོ་སྙམ༌སྟེ།
MAT 24:49 གཡོག་པོ་གཞན་རྣམས་ལ་གཅར་རྡུང་བྱེད་པ༌དང༌། ར་བཟི་བའི་མི་རྣམས་དང་འགྲོགས་ནས་བཟའ་བཏུང་སྤྱོད་པ་ཡིན༌ན།
MAT 24:50 ཁོས་སེམས་སུའང་མི་དྲན་པའི་ཉིན་ཞིག༌དང༌། མི་ཤེས་པའི་དུས་ཞིག༌ལ། གཡོག་པོ་དེའི་བདག་པོ་ཕྱིར་ཕེབས༌ཏེ།
MAT 24:51 ཁོ་རང་དུམ་བུར་གཅོད༌ཅིང༌། ཚུལ་འཆོས་པ་དང་མཉམ་དུ་གཏོང༌སྟེ། གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་ཞེས་གསུངས༌སོ།།
MAT 25:1 དེ་ནས་སྐྱབས་མགོན་ཡེ་ཤུས་འདི་སྐད༌དུ། དུས༌དེར། ནམ་མཁའི་རྒྱལ་སྲིད་ནི་ན་ཆུང་བུ་མོ་བཅུ་ཡིས་སྒྲོན་མེ་བཟུང་ནས་ཕྱི་རུ་མག་པ་བསུ་བར་སོང་བ་དང་འདྲ༌སྟེ།
MAT 25:2 དེ་རྣམས་ལས་ལྔ་ནི་བླུན་ཞིང་ལྔ་ནི་མཛངས་མ༌ཡིན།
MAT 25:3 བླུན་མོ་རྣམས་ཀྱིས་སྒྲོན་མེ་བཟུང་ཡང་སྣུམ་མ་ཁྱེར༌ཏོ།།
MAT 25:4 འོན༌ཀྱང༌། མཛངས་མ་རྣམས་ཀྱིས་སྒྲོན་མེ་བཟུང་ཞིང་སྣུམ་ཡང་སྣོད་ཀྱི་ནང་དུ་བླུགས་ཏེ༌ཁྱེར།
MAT 25:5 མག་པ་ཡོང་འཕྱི་བ་དང་དེ་དག་གཉིད་འཐིབས་ནས་གཉིད་ལ༌ཡུར།
MAT 25:6 ནམ་ཕྱེད་ཙམ་ལ་མི་ཞིག་གིས་སྐད་གསང་མཐོན༌པོས། ལྟོས༌དང༌། མག་པ་སླེབས༌བྱུང༌། ཁྱོད་རྣམས་ཕྱི་རོལ་ཏུ་ཁོང་བསུ་རུ་ཤོག་ཅེས་སྨྲས༌སོ།།
MAT 25:7 ན་ཆུང་བུ་མོ་ཐམས་ཅད་ཡར་ལངས་ཏེ་རང་རང་གི་སྒྲོན་མེའི་སྡོང་རས་བཅད༌ཅིང༌།
MAT 25:8 བླུན་མོ་དག་གིས་མཛངས་མ་རྣམས་ལ་སྨྲས༌པ། ངེད་རྣམས་ཀྱི་སྒྲོན་མེ་ཟད་ལ་ཉེ་བས་སྣུམ་ཅུང་ཙམ་སྟེར་རོགས་ཞེས་པ༌ལ།
MAT 25:9 མཛངས་མ་རྣམས་ན༌རེ། དེ་ལྟར་བྱས༌ན་སྣུམ་གྱིས་བདག་ཅག་ཐམས་ཅད་ལ་མི་འདང༌བས། ཁྱོད་རྣམས་སྣུམ་འཚོང་སར་ཉོ་རུ་སོང་ན་ལེགས་ཞེས་སྨྲས༌སོ།།
MAT 25:10 བླུན་མོ་རྣམས་སྣུམ་ཉོ་རུ་སོང་བའི་དུས་སུ་མག་པ་སླེབས༌ཤིང༌། སྟ་གོན་བྱས་ཟིན་པ་རྣམས་མག་པ་དང་མཉམ་དུ་བག་སྟོན་ལ་ཞུགས་པ་དང་སྒོ་བརྒྱབ་པ༌རེད།
MAT 25:11 དེ་ནས་ན་ཆུང་བུ་མོ་གཞན་རྣམས་ཀྱང་ཕྱིར་སླེབས་ཤིང་ན༌རེ། བདག་པོ༌ལགས། བདག་པོ༌ལགས། ངེད་ཅག་ལ་སྒོ་ཕྱེ་བར་མཛོད་ཅེས་སྨྲས་པ༌ན།
MAT 25:12 བདག་པོས་འདི་སྐད༌དུ། ངས་ཁྱོད་རྣམས་ལ་བདེན་པར་སྨྲ༌སྟེ། བདག་གིས་ཁྱོད་རྣམས་ངོ་མི་ཤེས་ཞེས་སྨྲས༌སོ།།
MAT 25:13 དེའི༌ཕྱིར། ཁྱོད་ཅག་གིས་ཀྱང་ཉིན་མོ་དེ་དང་དུས་དེ་ནི་ནམ་ཞིག་ཡིན་པ་མི་ཤེས་པས་གཟབ་པར་གྱིས་ཞེས་གསུངས༌སོ།།
MAT 25:14 ཡང་སྐྱབས་མགོན་ཡེ་ཤུས་འདི་སྐད༌དུ། ནམ་མཁའི་རྒྱལ་སྲིད་ནི་བདག་པོ་ཞིག་ཡུལ་གཞན་དུ་འགྲོ༌སྐབས། གཡོག་པོ་རྣམས་བོས་ཏེ་རང་གི་རྒྱུ་ནོར་ཐམས་ཅད་དེ་རྣམས་ལ་བཅོལ་བ་དང་འདྲ༌སྟེ།
MAT 25:15 གཡོག་པོ་རྣམས་ཀྱི་ནུས་པ་ལྟར་གཅིག་ལ་རྡོ་ཚད་ལྔ༌དང༌། གཅིག་ལ་རྡོ་ཚད༌གཉིས། གཅིག་ལ་རྡོ་ཚད་གཅིག་བཅས་སྤྲད་རྗེས་ཡུལ་གཞན་དུ་ཆས༌སོ།།
MAT 25:16 དེ་ནས་རྡོ་ཚད་ལྔ་ཐོབ་མཁན་དེས་མྱུར་དུ་ཚོང་ལས་བྱས་ནས་རྡོ་ཚད་ལྔའི་ཁེ་སྤོགས༌བླངས།
MAT 25:17 དེ་བཞིན་དུ་རྡོ་ཚད་གཉིས་ཐོབ་མཁན་དེས་ཀྱང་རྡོ་ཚད་གཉིས་ཀྱི་ཁེ་སྤོགས༌བླངས།
MAT 25:18 འོན་ཀྱང་རྡོ་ཚད་གཅིག་ཐོབ་མཁན་ཕར་སོང་ནས་ས་བརྐོས་ཏེ་བདག་པོའི་རྡོ་ཚད་ས་འོག་ཏུ༌སྦས།
MAT 25:19 ཡུན་རིང་འགོར༌རྗེས། གཡོག་པོ་དེ་དག་གི་བདག་པོ་ཕྱིར་ཡོང་སྟེ་ཁོ་རྣམས་དང་རྩིས་བརྒྱབ་པ༌ན།
MAT 25:20 རྡོ་ཚད་ལྔ་ཐོབ་མཁན་གྱིས་རྡོ་ཚད་ལྔ་ལྷག་མ་ཁྱེར་ཡོང༌སྟེ། བདག་པོ༌ལགས། ཁྱེད་ཀྱིས་བདག་ལ་རྡོ་ཚད་ལྔ་སྤྲད༌ཅིང༌། གཟིགས༌དང༌། བདག་གིས་རྡོ་ཚད་ལྔའི་ཁེ་སྤོགས་བླངས་པ་ཡིན་ཞེས་སྨྲས་པ༌ན།
MAT 25:21 བདག་པོ་ན༌རེ། ལེགས་པོ༌འདུག ཁྱོད་ནི་རང་གཤིས་བཟང་ཞིང་གཞུང་རྒྱུད་དྲང་བའི་གཡོག་པོ་ཞིག་ཡིན༌ལ། ཁྱོད་ནི་དོན་ཆུང་ངུའི་སྟེང་དུའང་བློ་སེམས་དཀར༌བས། བདག་གིས་ཁྱོད་རང་དོན་མང་པོ་དོ་དམ་བྱེད་པར་བསྐོ་བར༌བྱའོ། །ཁྱོད་རང་བདག་པོའི་སྤྲོ་སྐྱིད་ལ་རོལ་ཅིག་ཅེས་སྨྲས༌སོ།།
MAT 25:22 དེ་ནས་རྡོ་ཚད་གཉིས་ཐོབ་མཁན་ཡང་སླེབས༌ཏེ། བདག་པོ༌ལགས། ཁྱེད་ཀྱིས་བདག་ལ་རྡོ་ཚད་གཉིས་སྤྲད༌ཅིང༌། བདག་གིས་རྡོ་ཚད་གཉིས་ཀྱི་ཁེ་སྤོགས་བླངས་པ་ཡིན་ཞེས་སྨྲས་པ༌ན།
MAT 25:23 བདག་པོ་ན༌རེ། ལེགས་པོ༌འདུག ཁྱོད་ནི་རང་གཤིས་བཟང་ཞིང་གཞུང་རྒྱུད་དྲང་བའི་གཡོག་པོ་ཞིག་ཡིན༌ལ། ཁྱོད་ནི་དོན་ཆུང་ངུའི་སྟེང་དུའང་བློ་སེམས་དཀར༌བས། བདག་གིས་ཁྱོད་རང་དོན་མང་པོ་དོ་དམ་བྱེད་པར་བསྐོ་བར༌བྱའོ། །ཁྱོད་རང་བདག་པོའི་སྤྲོ་སྐྱིད་ལ་རོལ་ཅིག་ཅེས་སྨྲས༌སོ།།
MAT 25:24 དེ་ནས་རྡོ་ཚད་གཅིག་ཐོབ་མཁན་ཡང་སླེབས༌ཏེ། བདག་པོ༌ལགས། ཁྱེད་ནི་མི་བཙན་པོ་ཞིག་ཡིན༌ཞིང༌། མ་བཏབ་ས་ནས་སྟོན་བསྡུ་བ༌དང༌། མ་གཏོར་ས་ནས་ཀྱང་འབྲས་བུ་ལེན་ངེས་པ་བདག་གིས་ཤེས༌པས།
MAT 25:25 ང་རང་འཇིགས༌ཏེ། ཁྱེད་ཀྱི་རྡོ་ཚད་གཅིག་པོ་དེ་ས་འོག་ཏུ་སྦས་པ༌ཡིན། གཟིགས༌དང༌། ཁྱེད་ཀྱི་རྡོ་ཚད་འདི་རུ་ཡོད་ཅེས་སྨྲས༌སོ།།
MAT 25:26 བདག་པོས་འདི་སྐད༌དུ། གཡོག་པོ་ངན་པ་ལེ་ལོ་ཅན་ཁྱོད་ཀྱིས་བདག་གིས་མ་བཏབ་ས་ནས་སྟོན་བསྡུ་བ་དང་མ་གཏོར་ས་ནས་ཀྱང་འབྲས་བུ་ལེན་ངེས་པ་ཤེས༌ན།
MAT 25:27 བདག་གི་དངུལ་སྒོར་དེ་དངུལ་ཉར་མཁན་ལ་བཅོལ་དགོས་པ་ཡིན༌ཏེ། ང་རང་ཕྱིར་སླེབས་པའི་དུས༌སུ། ངས་དངུལ་སྒོར་དེའི་མ་རྩ་དང་སྐྱེད་ཀ་གཉིས་བླང༌ཆོག
MAT 25:28 དེའི༌ཕྱིར། ད་ནི་རྡོ་ཚད་གཅིག་པོ་དེ་ལོངས་ལ་རྡོ་ཚད་བཅུ་ཅན་ལ་བྱིན༌ཅིག
MAT 25:29 རྒྱུ་མཚན་ནི་སུ་ཞིག་ལ་ཡོད་པ་དེ་ལ་ད་དུང་ཡང་གནང་ངེས་ཤིང་ལྷག་མའང་ཡོད་པར་འགྱུར་བ༌དང༌། སུ་ཞིག་ལ་མེད་པ་དེ་ལས་ཉུང་ཙམ་ཡོད་པ་དེའང་ཕྱིར་ལེན་པར༌འགྱུར།
MAT 25:30 རིན་ཐང་མེད་པའི་གཡོག་པོ་དེ་ཕྱི་རོལ་གྱི་མུན་ནག་ནང་དུ་སྐྲོད༌ཅིག གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་ཞེས་སྨྲས༌པའོ།།
MAT 25:31 ཡང་སྐྱབས་མགོན་ཡེ་ཤུས་འདི་སྐད༌དུ། མིའི་བུ་རང་ཉིད་ཀྱི་གཟི་བརྗིད་ངང་ཕོ་ཉ་འཁོར་དང་བཅས་པ་ཕེབས་ཡོང༌དུས། རང་གི་གཟི་བརྗིད་ལྡན་པའི་ཁྲི་ལ་བཞུགས་པར་འགྱུར༌ཞིང༌།
MAT 25:32 མི་རིགས་ཐམས་ཅད་ཁོང་གི་དྲུང་དུ་བསྡུ་བ༌དང༌། ཁོང་གིས་དེ་རྣམས་ལ་དབྱེ་བ་མཛད༌དེ། ལུག་རྫི་ཞིག་གིས་ལུག་དང་ར་མ་གཉིས་སོ་སོར་དགར་བ༌བཞིན།
MAT 25:33 ལུག་རྣམས་གཡས་ཕྱོགས་དང་ར་མ་རྣམས་གཡོན་ཕྱོགས་སུ་ཡོད་པར་བྱེད༌དོ།།
MAT 25:34 དེ་ནས་རྒྱལ་པོས་གཡས་ཕྱོགས་སུ་ཡོད་པ་རྣམས་ལ་འདི་སྐད༌དུ། བདག་གི་ཡབ་ཀྱི་བྱིན་རླབས་ཐོབ་པ་རྣམས་ཤོག༌དང༌། འཇིག་རྟེན་བཀོད་པའི་ཚུན་དུ་ཁྱོད་ཅག་ལ་སྟ་གོན་མཛད་པའི་རྒྱལ་སྲིད་རྒྱུན་འཛིན་བྱེད་པར༌གྱིས།
MAT 25:35 རྒྱུ་མཚན་ནི་ང་རང་བཀྲེས་ཤིང་སྐོམ་པའི་དུས༌སུ། ཁྱོད་ཅག་གིས་བདག་ལ་བཟའ་བཏུང་སྤྲད་པ༌དང༌། ང་རང་ཕྱི་མི་ཡིན༌དུས། ཁྱོད་ཅག་གིས་བདག་ལ་སྣེ་ལེན་བགྱིས་པ༌ཡིན།
MAT 25:36 ང་རང་ལུས་གཅེར་བུ་ཡིན༌དུས། ཁྱོད་ཅག་གིས་བདག་ལ་གོས་བསྐོན༌ཞིང༌། བདག་ལ་ན་ཚ་བྱུང༌དུས། ཁྱོད་ཅག་གིས་བདག་སྙོར་སྐྱོང་བྱས་པ༌ཡིན། ང་རང་བཙོན་དུ་ཡོད༌དུས། ཁྱོད་ཅག་བདག་ལ་བལྟ་རུ་ཡོང་ངོ་ཞེས་གསུང་བར༌འགྱུར།
MAT 25:37 དེ་ནས་མི་གཞུང་དྲང་རྣམས་ན༌རེ། གཙོ་བོ༌ལགས། ངེད་ཅག་གིས་དུས་ནམ་ཞིག་ལ་ཁྱེད་ཀྱིས་བཀྲེས་སྐོམ་མྱངས་པ་མཐོང་ནས་བཟའ་བཏུང་བྱིན་མྱོང༌ངམ།
MAT 25:38 དུས་ནམ་ཞིག་ལ་ཁྱེད་རང་ཕྱི་མི་ཡིན་པ་མཐོང་ནས་སྣེ་ལེན་བགྱིས་མྱོང༌ངམ། ཁྱེད་རང་ལུས་གཅེར་བུ་ཡིན་པ་མཐོང་ནས་ལུས་ལ་གོས་བསྐོན་མྱོང༌ངམ།
MAT 25:39 དུས་ནམ་ཞིག་ཁྱེད་ལ་ན་ཚ་བྱུང་བའམ་བཙོན་དུ་ཡོད་པ་མཐོང་སྟེ་ཁྱེད་ལ་བལྟ་རུ་ཡོང་ངམ་ཞེས་སྨྲ་བར༌འགྱུར།
MAT 25:40 ཡང་རྒྱལ་པོས་འདི་སྐད༌དུ། བདག་གིས་ཁྱོད་ཅག་ལ་བདེན་པར་སྨྲ༌སྟེ། ཁྱོད་ཅག་གིས་བདག་གི་སྤུན་ཟླ་རྣམས་ལས་ཆེས་ཆུང་བ་ཞིག་ལ་དེ་ལྟར་བྱས༌ན། དོན་དམ་དུ་བདག་ལ་བྱས་པ་ཡིན་ཞེས་གསུང་བར་འགྱུར༌རོ།།
MAT 25:41 དེ་ནས་རྒྱལ་པོས་གཡོན་ཕྱོགས་སུ་ཡོད་པ་རྣམས་ལ་འདི་སྐད༌དུ། དམོད་མོ་ཐེབས་ཟིན་པ་ཁྱོད་རྣམས་བདག་དང་ཁ་བྲལ༌ནས། བདུད་དང་བདུད་ཀྱི་ཕོ་ཉ་དག་ལ་སྟ་གོན་མཛད་པའི་ཞི་མེད་ཀྱི་དམྱལ་བའི་མེ་ཕུང་ནང་དུ་སོང༌ཞིག
MAT 25:42 རྒྱུ་མཚན་ནི་ང་རང་བཀྲེས་ཤིང་སྐོམ་པའི་དུས༌སུ། ཁྱོད་ཅག་གིས་བདག་ལ་བཟའ་བཏུང་མ༌བྱིན།
MAT 25:43 ང་རང་ཕྱི་མི་ཡིན༌དུས། ཁྱོད་ཅག་གིས་བདག་ལ་སྣེ་ལེན་མ༌བྱས། ང་རང་ལུས་གཅེར་བུ་ཡིན༌དུས། བདག་ལ་གོས་མ༌བསྐོན། བདག་ལ་ན་ཚ་བྱུང་བའམ་བཙོན་དུ་ཡོད༌དུས། ཁྱོད་རྣམས་བདག་ལ་བལྟ་རུ་མ་ཡོང་ཞེས་གསུང་བར༌འགྱུར།
MAT 25:44 གཡོན་ཕྱོགས་སུ་ཡོད་པ་རྣམས་ན༌རེ། གཙོ་བོ༌ལགས། ངེད་ཅག་གིས་དུས་ནམ་ཞིག་ལ་ཁྱེད་རང་ལྟོགས་པའམ་སྐོམ༌པ། ཡང་ན་ཁྱེད་རང་ཕྱི་མི་ཡིན་པའམ་ལུས་གཅེར་བུར་སྡོད༌པ། ཡང་ན་ཁྱེད་ལ་ན་ཚ་བྱུང་བའམ་བཙོན་དུ་ཡོད་པ་མཐོང༌ཡང༌། ཁྱེད་ལ་ཞབས་ཕྱི་མ་བསྒྲུབས་སམ་ཞེས་སྨྲ་བར༌འགྱུར།
MAT 25:45 ཡང་རྒྱལ་པོས་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་ཅག་གིས་མི་འདི་རྣམས་ལས་ཆེས་ཆུང་བ་ཞིག་ལ་དེ་ལྟར་མ་བྱས༌ན། དོན་དམ་དུ་བདག་ལ་མ་བྱས་པ་ཡིན་ཞེས་གསུང་བར༌འགྱུར།
MAT 25:46 དེའི༌ཕྱིར། མི་འདི་དག་ནི་མཐའ་མེད་པའི་ཉེས་ཆད་ནང་དུ་འགྲོ༌ཞིང༌། མི་གཞུང་དྲང་དེ་རྣམས་ནི་མཐའ་མེད་པའི་ཚེ་སྲོག་ནང་དུ་འགྲོ་བར་འགྱུར་ཞེས་གསུངས༌སོ།།
MAT 26:1 སྐྱབས་མགོན་ཡེ་ཤུས་བཀའ་དེ་ཐམས་ཅད་གསུངས་རྗེས་ཐུགས་སྲས་རྣམས་ལ་འདི་སྐད༌དུ།
MAT 26:2 ཉིན་གཉིས་ཀྱི་རྗེས་སུ་པེ་སག་གི་དུས་ཆེན་ཡིན་པ་ཁྱོད་ཅག་གིས་ཤེས་པ༌དང༌། དུས་དེར་མིའི་བུ་གཞན་ལག་ཏུ་སྤྲོད་ཅིང་ཤིང་རྒྱ་གྲམ་གྱི་སྟེང་དུ་བརྡབས་ནས་གསོད་པར་འགྱུར་ཞེས་གསུངས༌སོ།།
MAT 26:3 དུས༌དེར། མཆོད་དཔོན་ཆེན་པོ་དག་དང་ཡུལ་མི་རྒན་པོ་རྣམས་མཆོད་དཔོན་ཆེན་པོ་ཀ་ཡ་ཕཱའི་མཁར་ཆེན་དུ་འཛོམས༌ཏེ།
MAT 26:4 གཡོ་ཐབས་ཀྱིས་སྐྱབས་མགོན་ཡེ་ཤུ་འཛིན་བཟུང་བྱས་ནས་དགྲོང་བར་གྲོས་བྱས༌ནའང༌།
MAT 26:5 མི་སེར་ཟིང་ཆ་ལངས་ཉེན་ཡོད་པས་དུས་ཆེན་ལ་དེ་ལྟར་བྱེད་མི་རུང་ཞེས་སྨྲས༌སོ།།
MAT 26:6 སྐྱབས་མགོན་ཡེ་ཤུ་ནི་པེ་ཐན་ཡཱའི་མཛེ་ནད་ཅན་སི་མོན་གྱི་ཁྱིམ་དུ་བཞུགས༌དུས།
MAT 26:7 བུད་མེད་ཅིག་གིས་རིན་ཐང་ཆེ་བའི་སྤོས་ཆུས་བཀང་བའི་རྡོ་ཀ་མ་རུའི་བུམ་པ་ཞིག་ཁྱེར་ནས་ཁོང་གི་དྲུང་དུ་ཡོང༌སྟེ། སྐྱབས་མགོན་ཡེ་ཤུས་ཞལ་ཟས་བཞེས་པའི་སྐབས་དང་བསྟུན༌ནས། ཁོང་གི་དབུ་ལ་སྤོས་ཆུ༌བླུགས།
MAT 26:8 འོན་ཀྱང་ཐུགས་སྲས་རྣམས་ཀྱིས་དོན་དེ་མཐོང་ནས་ཤིན་ཏུ་མི་དགའ་བར་གྱུར༌ཏེ། ཅིའི་ཕྱིར་འདི་ལྟར་ཆུད་ཟོས་སུ་བཏང་བ་ཡིན༌ནམ།
MAT 26:9 སྤོས་ཆུ་འདི་དངུལ་མང་པོར་བཙོངས་ཏེ་དབུལ་པོ་རྣམས་ལ་བྱིན་ན་མི་ལེགས་སམ་ཞེས་སྨྲས༌སོ།།
MAT 26:10 སྐྱབས་མགོན་ཡེ་ཤུས་ཐུགས་སྲས་རྣམས་ཀྱི་བསམ་ཚུལ་མཁྱེན་ཏེ་འདི་སྐད༌དུ། ཅིའི་ཕྱིར་ཁོ་མོར་འོ་བརྒྱལ་བྱེད༌དམ། ཁོ་མོས་བདག་ལ་དོན་བཟང་པོ་བྱས་པ༌ཡིན།
MAT 26:11 རྒྱུ་མཚན་ནི་དབུལ་པོ་རྣམས་རྟག་ཏུ་ཁྱོད་ཅག་དང་མཉམ་དུ་ཡོད༌ཀྱང༌། བདག་ནི་དུས་རྟག་ཏུ་ཁྱོད་ཅག་དང་མཉམ་དུ་མི༌གནས།
MAT 26:12 ཁོ་མོས་བདག་གི་ལུས་ལ་སྤོས་ཆུ་བླུགས་པ་ནི་ང་རང་དུར་ལ་འཇུག་པར་སྟ་གོན་བྱས་པ༌ཡིན།
MAT 26:13 བདག་གིས་ཁྱོད་ཅག་ལ་བདེན་པར་སྨྲ༌སྟེ། འཇིག་རྟེན་ཡོངས་ཀྱི་ཡུལ་གང་དུ་འཕྲིན་བཟང་འདི་བསྒྲགས༌ན། བུད་མེད་འདིས་ཅི་ལྟར་བྱས་པ་དྲན་པའི་ཕྱིར་གཏམ་དེ་ཡང་བརྗོད་པར་འགྱུར་ཞེས་གསུངས༌སོ།།
MAT 26:14 དེ་ནས་ཐུགས་སྲས་བཅུ་གཉིས་པོ་ལས་ཨི་སི་ཀར་རེའི་ཡུ་དཱ་ཞེས་པ་དེ་མཆོད་དཔོན་ཆེན་པོ་རྣམས་ཀྱི་གམ་དུ་སོང་ནས་སྨྲས༌པ།
MAT 26:15 ངས་ཡེ་ཤུ་ཁྱོད་རྣམས་ལ་སྤྲད༌ན། ཁྱོད་ཅག་གིས་བདག་ལ་དངུལ་སྲང་ག་ཙམ་སྟེར་ཞེས་པ༌ལ། དེ་རྣམས་ཀྱིས་ཁོ་ལ་དངུལ་སྲང་སུམ་ཅུ་བྱིན༌ཏོ།།
MAT 26:16 དུས་དེ་ནས༌བཟུང༌། ཁོས་སྐྱབས་མགོན་ཡེ་ཤུ་དེ་དག་གི་ལག་ཏུ་ཇི་ལྟར་སྤྲོད་པའི་གོ་སྐབས་བཙལ་བའོ།།
MAT 26:17 སྐྱུར་མེད་བག་ལེབ་དུས་ཆེན་གྱི་ཉིན་དང༌པོར། ཐུགས་སྲས་རྣམས་སྐྱབས་མགོན་ཡེ་ཤུའི་དྲུང་དུ་ཡོང༌སྟེ། ཁྱེད་ཀྱིས་པེ་སག་གི་ཞལ་ཟས་བཞེས་པའི༌ཕྱིར། ངེད་ཅག་གིས་གནས་གང་དུ་སྟ་གོན་བྱེད་དགོངས་སམ་ཞེས་ཞུས་པ༌ལ།
MAT 26:18 ཁོང་གིས་འདི་སྐད༌དུ། ཁྱོད་རྣམས་གྲོང་ཁྱེར་ནང་དུ་སོང་ནས་མི་ག་གེ་མོ་ལ་འདི་ལྟར་འཆད་པར་བྱ༌སྟེ། སློབ་དཔོན་གྱིས་བདག་གི་དུས་སླེབས་ལ་ཉེ༌བས། བདག་དང་ཐུགས་སྲས་རྣམས་ཀྱིས་ཁྱོད་ཀྱི་ཁྱིམ་ནས་པེ་སག་གི་གསོལ་སྟོན་ལ་རོལ་དགོས་ཟེར་ཞེས་སྨྲོས་ཤིག་ཅེས་གསུངས་པ༌དང༌།
MAT 26:19 དེ་ནས་སྐྱབས་མགོན་ཡེ་ཤུས་གསུངས་པ་བཞིན་ཐུགས་སྲས་རྣམས་སོང་ནས་པེ་སག་གི་གསོལ་སྟོན་བཤམས༌སོ།།
MAT 26:20 མཚན་མོའི་དུས༌སུ། སྐྱབས་མགོན་ཡེ་ཤུ་དང་ཐུགས་སྲས་བཅུ་གཉིས་པོ་མཉམ་དུ་གནས་དེར་གྲལ་ལ་བཞུགས༌ཤིང༌།
MAT 26:21 ཁོང་རྣམས་ཀྱིས་ཞལ་ཟས་བཞེས་བཞིན་པའི་དུས༌སུ། སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ཅག་ལ་བདེན་པར་སྨྲ༌སྟེ། ཁྱོད་རྣམས་ལས་མི་གཅིག་གིས་བདག་ལ་ངོ་ལོག་བྱ་ངེས་ཡིན་ཞེས་གསུངས༌སོ།།
MAT 26:22 དེ་ནས་ཁོ་རྣམས་ཀྱི་སེམས་ཤིན་ཏུ་སྐྱོ་བར་གྱུར༌ཏེ། མི་རེ་རེས་ཁོང་ལ་འདི་ལྟར། གཙོ་བོ༌ལགས། ང་རང་ཡིན་མི་སྲིད་ཅེས་ཞུས་པ༌ལ།
MAT 26:23 ཁོང་གིས་འདི་སྐད༌དུ། བདག་དང་མཉམ་དུ་སྡེར་མའི་ནང་ལ་བག་ལེབ་སྦོང་མཁན་གྱིས་ང་ལ་ངོ་ལོག་བྱེད་པར་འགྱུར།
MAT 26:24 མིའི་བུ་ནི་གསུང་རབ་ཀྱི་མདོ་ལས་ཁོའི་སྐོར་བཀོད་ཡོད་པ་བཞིན་གཤེགས་དགོས༌ཀྱང༌། མིའི་བུ་ལ་ངོ་ལོག་བྱེད་མཁན་གྱི་མི་དེར་ཆག་སྒོ་འབྱུང་བར༌ངེས། མི་དེ་སྐྱེས་པ་ལས་མ་སྐྱེས་ན་ལེགས་ཞེས་གསུངས༌སོ།།
MAT 26:25 སྐྱབས་མགོན་ཡེ་ཤུ་ལ་ངོ་ལོག་བྱེད་མཁན་ཡུ་དཱ་ན༌རེ། རཱབ་པེ༌ལགས། ང་རང་ཡིན་སྲིད་དམ་ཞེས་ཞུས་པ༌ན། ཁོང་གིས་འདི་སྐད༌དུ། ཁྱོད་ཀྱིས་སྨྲས་པ་ལྟར་ཡིན་ཞེས་གསུངས༌སོ།།
MAT 26:26 ཁོང་རྣམས་ཀྱིས་ཞལ་ཟས་བཞེས་བཞིན་པའི་དུས༌སུ། སྐྱབས་མགོན་ཡེ་ཤུས་ཕྱག་ཏུ་བག་ལེབ་བསྣམས༌ཏེ། བྱིན་རླབས་གནང་ཞིང་དུམ་བུར་བྱས་པ་དང་ཐུགས་སྲས་རྣམས་ལ་གནང་སྟེ་འདི་སྐད༌དུ། འདི་ནི་བདག་གི་ལུས་པོ་ཡིན་ཏེ་ཁྱོད་ཅག་གིས་ལོངས་ལ་ཟོ་ཞིག་ཅེས་གསུངས་པ༌དང༌།
MAT 26:27 ཡང་ཁོང་གིས་ཕོར་བ་ཕྱག་ཏུ་བསྣམས་ཤིང་དཀོན་མཆོག་ལ་བཀའ་དྲིན་ཞུས་རྗེས་ཁོ་རྣམས་ལ་གནང་སྟེ་འདི་སྐད༌དུ། ཁྱོད་ཅག་ཀུན་གྱིས་ཕོར་བ་འདི་ལས་འཐུངས༌ཤིག
MAT 26:28 འདི་ནི་བདག་གི་ཞལ་ཆད་ཀྱི་ཁྲག་ཡིན༌ཏེ། མི་མང་པོའི་སྡིག་པ་བསལ་ཆེད་བཞུར་བ༌ཡིན།
MAT 26:29 འོན༌ཀྱང༌། བདག་གིས་ཁྱོད་རྣམས་ལ་སྨྲ་བར་བྱ༌སྟེ། དུས་ད་ནས༌བཟུང༌། ངས་རང་གི་ཡབ་ཀྱི་རྒྱལ་སྲིད་ནས་ཁྱོད་ཅག་དང་མཉམ་དུ་གསར་པ་འཐུང་བའི་ཉིན་མོའི་བར༌དུ། ངས་རྒུན་འབྲུམ་གྱི་ཁུ་བ་འདི་འཐུང་བ་མིན་ཞེས་གསུངས༌སོ།།
MAT 26:30 དེ་ནས་ཁོང་རྣམས་ཀྱིས་གསུང་མགུར་བླངས་རྗེས་ཕྱི་རུ་ཐོན་ཞིང་སྐྱུ་རུ་རའི་རི་བོར་ཕེབས༌སོ།།
MAT 26:31 དུས༌དེར། སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། དོ་དགོང་གི་དུས༌འདིར། བདག་གི་རྐྱེན་གྱིས་ཁྱོད་རྣམས་ཐམས་ཅད་ས་རུ་འགྱེལ་བར༌འགྱུར། རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ། བདག་གིས་ལུག་རྫི་ལ་རྡུང་རྡེག་བྱས་ནས་ལུག་རྣམས་འཐོར་བར་འགྱུར་ ཞེས་བཀོད་པ་བཞིན༌ནོ།།
MAT 26:32 འོན་ཀྱང་བདག་ནི་སླར་གསོན་རྗེས་ཁྱོད་ཅག་གི་སྔོན་ལ་ག་ལིལ་ཡུལ་དུ་འགྲོ་ངེས་ཞེས་གསུངས༌སོ།།
MAT 26:33 པེ་ཏྲོ་ན༌རེ། ཁྱེད་ཀྱི་རྐྱེན་གྱིས་མི་ཐམས་ཅད་ས་རུ་འགྱེལ༌ནའང༌། བདག་ནི་ནམ་ཡང་ས་རུ་མི་འགྱེལ་ཞེས་ཞུས་པ༌ན།
MAT 26:34 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ལ་བདེན་པར་སྨྲ༌སྟེ། དོ་དགོང་གི་དུས་འདིར་བྱ་ཕོ་མ་གྲགས་པའི་སྔོན༌དུ། ཁྱོད་ཀྱིས་ཐེངས་གསུམ་ལ་ང་རང་ཁས་མི་ལེན་ཞེས་གསུངས༌སོ།།
MAT 26:35 ཡང་པེ་ཏྲོ་ན༌རེ། བདག་ནི་ཁྱེད་དང་མཉམ་དུ་འཆི་དགོས་ཀྱང་ཁྱེད་རང་ཁས་མི་ལེན་པ་དཔེ་མི་སྲིད་ཅེས་ཞུས༌ཤིང༌། ཐུགས་སྲས་གཞན་རྣམས་ཀྱིས་ཀྱང་དེ་ལྟར་ཞུས༌སོ།།
MAT 26:36 སྐྱབས་མགོན་ཡེ་ཤུ་དང་ཐུགས་སྲས་རྣམས་མཉམ་དུ་གེད་སེམ་མཱ་ནེ་སྐྱེད་ཚལ་དུ་ཕེབས༌ཤིང༌། ཁོང་གིས་ཐུགས་སྲས་རྣམས་ལ་འདི་སྐད༌དུ། ཁྱོད་ཅག་གནས་འདིར་སྡོད༌ཅིག བདག་ནི་ཕར་གསོལ་བ་འདེབས་སུ་འགྲོའོ་ཞེས་གསུངས༌ཏེ།
MAT 26:37 པེ་ཏྲོ༌དང༌། ཟེ་བད་ཡཱའི་བུ་གཉིས་བཅས་ཁྲིད་ནས༌ཕེབས། དུས༌དེར། ཁོང་གི་ཐུགས་ཤིན་ཏུ་སྐྱོ་ཞིང་གདུངས་པར་གྱུར་ཏེ་འདི་སྐད༌དུ།
MAT 26:38 བདག་སེམས་ཤིན་ཏུ་སྐྱོ་ནས་འཆི་ལ༌ཉེའོ། །ཁྱོད་ཅག་གིས་གནས་འདི་རུ་བསྒུགས་ནས་བདག་དང་མཉམ་དུ་དོགས་ཟོན་གྱིས་ཤིག་ཅེས་གསུངས་པ༌དང༌།
MAT 26:39 ཡང་ཁོང་མདུན་ཕྱོགས་སུ་ཅུང་ཙམ་ཕེབས་ནས་ཞལ་སར་བཏུད་དེ་འདི་སྐད༌དུ། ཀྱེ། བདག་གི་ཡབ༌ལགས། གལ་ཏེ་སྲིད་པ་ཡིན་ན་ཕོར་བ་འདི་བདག་དང་འབྲལ་བར་མཛོད༌ཅིག འོན་ཀྱང་བདག་གི་བསམ་དོན་བཞིན་དུ་མི་འགྲུབ་པར་ཁྱེད་ཀྱི་དགོངས་པ་བཞིན་དུ་གྲུབ་གྱུར་ཅིག་ཅེས་གསོལ་བ་བཏབ༌པའོ།།
MAT 26:40 དེ་ནས་ཁོང་ཉིད་ཕྱིར་ཐུགས་སྲས་རྣམས་ཀྱི་གམ་དུ་ཕེབས་པ༌ན། དེ་རྣམས་གཉིད་ལ་ཡུར་བ་གཟིགས་ཏེ་པེ་ཏྲོ་ལ་འདི་སྐད༌དུ། ཁྱོད་རྣམས་ཀྱིས་ཆུ་ཚོད་གཅིག་ཙམ་ལའང་བདག་དང་མཉམ་དུ་དོགས་ཟོན་བྱ་མི་ནུས༌སམ།
MAT 26:41 ཁྱོད་ཅག་ཉམས་ཚོད་ཀྱི་འོག་ཏུ་མི་འཚུད་པའི་ཕྱིར་དོགས་ཟོན་བྱས་ནས་གསོལ་བ་ཐོབས༌ཤིག ཁྱོད་ཅག་གི་སེམས་སུ་དེ་ལྟར་བྱ་བསམ་ཡང་ལུས་སྟོབས་ཞན་པ་ཡིན་ཞེས་གསུངས༌སོ།།
MAT 26:42 དེ་ནས་སྐྱབས་མགོན་ཡེ་ཤུ་ཐེངས་གཉིས་པར་ཕར་ཕེབས་ཏེ་འདི་སྐད༌དུ། ཀྱེ། བདག་གི་ཡབ༌ལགས། གལ་ཏེ་བདག་ནི་ཕོར་བ་འདི་དང་འབྲལ་མི་འོས་ཤིང་ཅི་ནས་ཀྱང་འདི་འཐུང་དགོས༌ན། ཁྱེད་ཀྱི་དགོངས་པ་བཞིན་དུ་གྲུབ་གྱུར་ཅིག་ཅེས་གསོལ་བ༌བཏབ།
MAT 26:43 ཡང་ཁོང་ཉིད་ཕྱིར་ཕེབས་པ་ན་ཁོ་རྣམས་ངལ་དུབ་ཆེ་བས་གཉིད་དུ་ཡུར་བ་གཟིགས༌ཤིང༌།
MAT 26:44 སྐྱབས་མགོན་ཡེ་ཤུ་ཡང་བསྐྱར་ཐུགས་སྲས་རྣམས་དང་ཁ་བྲལ་ནས་ཐེངས་གསུམ་པར་གསོལ་བ་འདེབས་སུ་ཕེབས་ཏེ་སྔར་བཞིན་གསོལ་བ༌བཏབ།
MAT 26:45 ཡང་ཁོང་ཉིད་ཕྱིར་ཕེབས་ཏེ་འདི་སྐད༌དུ། ཁྱོད་ཅག་ད་དུང་གཉིད་ནས་ངལ༌གསོའམ། ལྟོས༌དང༌། ད་ལྟ་དུས་ལ་བབས་ཤིང་མིའི་བུ་སྡིག་ཅན་རྣམས་ཀྱི་ལག་ཏུ་སྤྲོད་པར༌བྱེད།
MAT 26:46 ལྟོས༌དང༌། བདག་ལ་ངོ་ལོག་བྱེད་མཁན་དེ་ཉེ་སར་སླེབས་པས་ཡར་ལོངས་དང་འགྲོའོ་ཞེས་གསུངས༌སོ།།
MAT 26:47 ཁོང་གིས་དེ་ལྟར་གསུང་བཞིན་པའི་དུས༌སུ། ཐུགས་སྲས་བཅུ་གཉིས་ཀྱི་ཡ་གྱལ་ཏེ་ཡུ་དཱ་སླེབས་པ༌དང༌། ད་དུང་ལག་ཏུ་རལ་གྲི་དང་དབྱུག་པ་ཐོགས་ཤིང་མཆོད་དཔོན་ཆེན་པོ་རྣམས་དང་ཡུལ་མི་རྒན་པོ་དག་གིས་མངགས་པའི་མི་ཤིན་ཏུ་མང་པོ་ཞིག་ཀྱང་ཁོ་དང་མཉམ་དུ༌སླེབས།
MAT 26:48 སྐྱབས་མགོན་ཡེ་ཤུ་ལ་ངོ་ལོག་བྱེད་མཁན་དེས་མི་དེ་དག་ལ་ངས་སུ་ལ་འོ་བྱས༌ན། དེ་ནི་ཁོང་ཉིད་ཡིན་པས་ཟུངས་ཤིག་ཅེས་སྔོན་ལ་ལྐོག་བརྡ་བརྒྱབ་ཡོད༌ལ།
MAT 26:49 དེ་མ་ཐག་ཡུ་དཱ་ནི་སྐྱབས་མགོན་ཡེ་ཤུའི་དྲུང་དུ་ཡོང༌སྟེ། རཱབ་པེ༌ལགས། ཁྱེད་ཀྱི་སྐུ་ཁམས་བདེའམ་ཞེས་ཞུས་ནས་ཁོང་ལ་འོ་བྱས༌སོ།།
MAT 26:50 སྐྱབས་མགོན་ཡེ་ཤུས་དེ་ལ་འདི་སྐད༌དུ། གྲོགས་པོ་ཁྱོད་ཅི་བྱེད་དུ་ཡོང་བ་དེ་བཞིན་དུ་བྱོས་ཤིག་ཅེས་གསུངས་པ༌ན། མི་དེ་དག་ཁོང་གི་མདུན་དུ་ཡོང་ནས་ཁོང་ཉིད་བཟུང༌ངོ༌།།
MAT 26:51 འོན་ཀྱང་སྐྱབས་མགོན་ཡེ་ཤུ་དང་མཉམ་དུ་ཡོད་པ་རྣམས་ལས་གཅིག་གིས་ལག་པ་བརྐྱངས་ནས་རལ་གྲི་ཕྱུང༌སྟེ། མཆོད་དཔོན་ཆེན་པོའི་གཡོག་པོར་བརྒྱབ་ནས་རྣ་བ་ཡ་གཅིག་བཅད༌དོ།།
MAT 26:52 དེ་ནས་སྐྱབས་མགོན་ཡེ་ཤུས་དེ་ལ་འདི་སྐད༌དུ། རལ་གྲི་ཕྱིར་གྲི་ཤུབས་སུ་ཆུག༌དང༌། རལ་གྲི་འཛིན་མཁན་ཐམས་ཅད་རལ་གྲིས་གསོད་པར༌འགྱུར།
MAT 26:53 ཁྱོད་ཀྱིས་སོམས༌དང༌། བདག་གིས་ཡབ་ལ་ཞུ་བ་ཞུས་པ༌ན། ཁོང་གིས་ད་ལྟ་ཉིད་དུ་ཕོ་ཉའི་དམག་དཔུང་བཅུ་གཉིས་ལྷག་བདག་ལ་མངག་པར་མི་མཛད༌དམ།
MAT 26:54 འོན་ཀྱང་དེ་ལྟར་བྱས༌ན། ད་ལྟའི་དོན་བཞིན་འབྱུང་དགོས་པའི་གསུང་རབ་ཀྱི་མདོ་དེ་ཇི་ལྟར་འགྲུབ་བམ་ཞེས་གསུངས༌སོ།།
MAT 26:55 དུས༌དེར། སྐྱབས་མགོན་ཡེ་ཤུས་མི་ཚོགས་ལ་འདི་སྐད༌དུ། ཁྱོད་ཅག་གིས་རལ་གྲི་དང་དབྱུག་པ་བཟུང་ནས་ཇག་པ་འཛིན་པ་ལྟར་ང་རང་གཟུང་དུ་ཡོང༌ངམ། བདག་གིས་ཉིན་རེ་བཞིན་མཆོད་ཁང་ནང་དུ་བསྡད་ནས་ཆོས་བཤད་དུས་ཁྱོད་ཅག་གིས་ང་རང་མ་བཟུང༌མོད།
MAT 26:56 འོན་ཀྱང་དོན་འདི་ཐམས་ཅད་བྱུང་བ་ནི་ལུང་སྟོན་པ་རྣམས་ཀྱི་མདོ་ལས་གསུངས་པ་ལྟར་འགྲུབ་པའི་ཕྱིར་ཡིན་ཞེས་གསུངས་པ༌དང༌། ཐུགས་སྲས་ཐམས་ཅད་ཀྱིས་ཀྱང་སྐྱབས་མགོན་ཡེ་ཤུ་བསྐྱུར་ནས་བྲོས༌སོ།།
MAT 26:57 སྐྱབས་མགོན་ཡེ་ཤུ་འཛིན་བཟུང་བྱེད་མཁན་རྣམས་ཀྱིས་ཁོང་ཉིད་མཆོད་དཔོན་ཆེན་པོ་ཀ་ཡ་ཕཱའི་མདུན་དུ་ཁྲིད༌ཅིང༌། མཁན་པོ་དང་རྒན་པོ་རྣམས་ཀྱང་གནས་དེར༌འཛོམས།
MAT 26:58 པེ་ཏྲོའང་རྒྱང་རིང་ནས་སྐྱབས་མགོན་ཡེ་ཤུའི་རྗེས་འབྲངས་ཏེ་མཆོད་དཔོན་ཆེན་པོའི་ར་སྐོར་བར་དུ་སོང༌ཞིང༌། དོན་ཅི་ཞིག་འབྱུང་བར་བལྟ་ཕྱིར་ནང་དུ་སོང་ནས་སྲུང་དམག་དང་མཉམ་དུ༌བསྡད།
MAT 26:59 མཆོད་དཔོན་ཆེན་པོ་རྣམས་དང་ཚོགས་མི་ཐམས་ཅད་ཀྱིས་སྐྱབས་མགོན་ཡེ་ཤུ་གཏུགས་ཤིང་སྲོག་ཆད་གཅོད་པའི་ཕྱིར་རྫུན་གྱི་དཔང་པོ་བཙལ་བ༌དང༌།
MAT 26:60 མི་མང་པོས་རྫུན་གྱི་དཔང་པོ་བྱས་ཀྱང་ཁོ་རྣམས་ཀྱིས་སྐྱོན་ཅི་ཡང་མ༌རྙེད། མཇུག་མཐར་མི་གཉིས་སྔུན་ལ་ཡོང་སྟེ་ན༌རེ།
MAT 26:61 མི་འདིས་དཀོན་མཆོག་གི་མཆོད་ཁང་བཤིག་སྟེ་ཉིན་གསུམ་ལ་སླར་ཡང་བཞེང་ནུས་ཞེས་སྨྲས་མྱོང་ཞེས་པ༌ལ།
MAT 26:62 མཆོད་དཔོན་ཆེན་པོ་ཡར་ལངས་ནས་སྐྱབས་མགོན་ཡེ་ཤུ༌ལ། མི་འདི་རྣམས་ཀྱིས་དཔང་པོ་བྱས་ནས་ཁྱོད་རང་གཏུགས་པ་ཅི་ཡིན༌ནམ། ཁྱོད་ཀྱིས་ལན་ཅི་ཡང་མི་འདེབས་སམ་ཞེས་དྲིས༌ཀྱང༌།
MAT 26:63 སྐྱབས་མགོན་ཡེ་ཤུས་ཅི་ཡང་མ༌གསུངས། ཡང་མཆོད་དཔོན་ཆེན་པོ་ན༌རེ། ངས་གཏན་དུ་གསོན་པོར་བཞུགས་པའི་དཀོན་མཆོག་དཔང་དུ་བཙུགས་ནས་ཁྱོད་ལ་མནའ་བསྐྱལ་དུ་འཇུག༌སྟེ། ཁྱོད་ཀྱིས་རང་ཉིད་ནི་དཀོན་མཆོག་གི་སྲས་མཱ་ཤི་ཀ་ཡིན་མིན་ངེད་ཅག་ལ་སྨྲོས་ཤིག་ཅེས་སྨྲས་པ༌ན།
MAT 26:64 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་སྨྲས་པ་དེ་བཞིན༌ཡིན། འོན་ཀྱང་བདག་གིས་ཁྱོད་ཅག་ལ་སྨྲ་བར་བྱ༌སྟེ། ཕྱིན་ཆད་མིའི་བུ་ནི་ཀུན་དབང་ཉིད་ཀྱི་གཡས་ཕྱོགས་སུ་བཞུགས༌ཏེ། ནམ་མཁའི་སྤྲིན་གྱི་བང་རིམ་ནས་འབྱོན་པ་ཁྱོད་ཅག་གིས་མཐོང་བར་འགྱུར་ཞེས་གསུངས༌སོ།།
MAT 26:65 མཆོད་དཔོན་ཆེན་པོས་རང་གི་ཕྱི་གོས་གཤགས༌ཏེ། ཁོས་དཀོན་མཆོག་ལ་སྐུར་བ་བཏབ༌ཅིང༌། ད་ལྟ་བདག་ཅག་ལ་དཔང་པོ་གཞན་ཅི་ལ༌དགོས། ཁོས་སྐུར་བ་བཏབ་པ་ད་ལྟ་ཁྱོད་ཅག་གིས་རྣ་བས་དངོས་སུ་ཐོས༌པས།
MAT 26:66 ཁྱོད་ཅག་གི་བསམ་འཆར་ག་འདྲ་ཡིན་ཞེས་དྲིས་པ༌ན། དེ་རྣམས་ན༌རེ། ཁོ་གསད་ན་འོས་ཞེས༌སྨྲས།
MAT 26:67 དེ་ནས་ཁོ་རྣམས་ཀྱིས་སྐྱབས་མགོན་ཡེ་ཤུའི་གདོང་ལ་མཆིལ་མ་བཏབ་ཅིང་ཁུ་ཚུར་གཞུས་པ༌དང༌། ཡང་ལ་ལས་ཁོང་ལ་འགྲམ་ལྕག་གཞུས༌ཏེ།
MAT 26:68 ཀྱེ། མཱ་ཤི༌ཀ ངེད་རྣམས་ལ་ལུང་བསྟན་ཤོད༌ཅིག ཁྱོད་ལ་རྡུང་རྡེག་བྱེད་མཁན་སུ་ཡིན་ནམ་ཞེས་སྨྲས༌སོ།།
MAT 26:69 པེ་ཏྲོ་ཕྱིའི་ར་སྐོར་དུ་སྡོད༌དུས། གཡོག་མོ་ཞིག་ཡོང་སྟེ་ན༌རེ། ཁྱོད་ཀྱང་ག་ལིལ་པ་ཡེ་ཤུ་དང་གྲས་གཅིག་རེད་ཅེས་སྨྲས་པ༌ན།
MAT 26:70 པེ་ཏྲོས་མི་དེ་དག་གི་མདུན་ནས་དོན་དེ་ཁས་མ་བླངས་པར་ཁྱོད་ཀྱིས་ཅི་ཞིག་སྨྲ་བཞིན་པ་ངས་མི་ཤེས་ཞེས་སྨྲས༌སོ།།
MAT 26:71 ཁོ་རང་ཕྱི་རོལ་ཏུ་སོང་བ་དང་རྒྱ་སྒོའི་ཁར་སླེབས་པ༌ན། ཡང་གཡོག་མོ་གཞན་ཞིག་གིས་མཐོང་སྟེ་མི་རྣམས༌ལ། མི་འདི་ཡང་ནཱ་ཙ་རེལ་པ་ཡེ་ཤུ་དང་གྲས་གཅིག་རེད་ཅེས་པ༌དང་།
MAT 26:72 ཡང་པེ་ཏྲོས་དོན་དེ་ཁས་མ་བླངས་པར་ངས་མི་དེ་ངོ་མི་ཤེས་ཞེས་མནའ་བསྐྱལ༌ཏོ།།
MAT 26:73 ཅུང་མ་འགོར༌བར། གནས་དེར་ལངས་བསྡད་ཡོད་པའི་མི་རྣམས་པེ་ཏྲོའི་གམ་དུ་ཡོང༌སྟེ། ཁྱོད་ནི་མི་དེ་ཚོ་དང་གྲས་གཅིག་ཡིན་པར་ངེས༌ཏེ། ཁྱོད་ཀྱི་སྐད་གདངས་ལས་ཤེས་ཐུབ་ཅེས་སྨྲས་པ༌ལ།
MAT 26:74 ཡང་པེ་ཏྲོས་སྡིགས་དམོད་བྱེད་བཞིན་མནའ་བསྐྱལ༌ཏེ། ངས་མི་དེ་ངོ་མི་ཤེས་ཞེས་སྨྲས་མ་ཐག་བྱ་ཕོ༌གྲགས།
MAT 26:75 དུས༌དེར། པེ་ཏྲོས་སྐྱབས་མགོན་ཡེ་ཤུའི་གསུང༌སྟེ། བྱ་ཕོ་མ་གྲགས་པའི་སྔོན༌དུ། ཁྱོད་ཀྱིས་ཐེངས་གསུམ་ལ་ང་རང་ཁས་མི་ལེན་ཞེས་གསུངས་མྱོང་བ་དྲན༌ཏེ། ཕྱི་རོལ་ཏུ་སོང་ནས་དྲག་ཏུ་ངུས༌སོ།།
MAT 27:1 ནམ་ལངས༌རྗེས། མཆོད་དཔོན་ཆེན་པོ་དག་དང་ཡུལ་མི་རྒན་པོ་རྣམས་ཀྱིས་སྐྱབས་མགོན་ཡེ་ཤུ་དགྲོང་བར་གྲོས་བྱས༌ཤིང༌།
MAT 27:2 ཁོང་ཉིད་བཀྱིགས་ནས་ཁྲིད་དེ་སྤྱི་དཔོན་པི་ལ་ཏུ་ལ་སྤྲད༌དོ།།
MAT 27:3 དུས༌དེར། སྐྱབས་མགོན་ཡེ་ཤུར་ངོ་ལོག་བྱེད་མཁན་ཡུ་དཱ་ཡིས་སྐྱབས་མགོན་ཡེ་ཤུར་ཉེས་ཆད་བཅད་པ་མཐོང་ནས་འགྱོད་པ་སྐྱེས༌ཏེ། མཆོད་དཔོན་ཆེན་པོ་དག་དང་རྒན་པོ་རྣམས་ལ་དངུལ་སྲང་སུམ་ཅུ་བོ་ཕྱིར་བྱིན་ཏེ་ན༌རེ།
MAT 27:4 ངས་ཉེས་མེད་གཡོ་བཙོང་བྱས་པས་སྡིག་པ་བྱས་སོ་ཞེས་སྨྲས་པ༌དང༌། དེ་རྣམས་ན༌རེ། དོན་དེ་ངེད་ཅག་དང་འབྲེལ་བ་ཅི་མཆིས༌སམ། དེ་ནི་ཁྱོད་རང་གི་འགན་ཁུར་རེད་ཅེས༌སྨྲས།
MAT 27:5 ཡུ་དཱ་ཡིས་དངུལ་སྲང་དེ་དག་མཆོད་ཁང་ནང་དུ་འཕངས་རྗེས་ཕྱི་རོལ་ཏུ་སོང་ནས་ལྕེབས༌སོ།།
MAT 27:6 མཆོད་དཔོན་ཆེན་པོ་རྣམས་ཀྱིས་དངུལ་སྲང་དེ་དག་ས་ནས་བླངས༌ཤིང༌། འདི་ནི་ཁྲག་རིན་ཡིན་པས་མཆོད་ཁང་གི་དཀོར་མཛོད་དུ་འཇོག་མི་འོས་ཞེས་སྨྲས་པ༌དང༌།
MAT 27:7 དེ་དག་གིས་གྲོས་བྱས་ནས་དངུལ་སྲང་དེས་རྫ་མཁན་གྱི་ས་ཞིང་ཟེར་བ་ཉོས༌ཏེ། ཕྱི་མི་རྣམས་ཀྱི་དུར་ས་རུ་བྱས༌སོ།།
MAT 27:8 དེའི༌ཕྱིར། ད་ལྟའི་བར་དུ་ས་ཞིང་དེ་ལ་ཁྲག་གི་ས་ཞིང་ཞེས༌ཟེར།
MAT 27:9 དེ་ལ་ལུང་སྟོན་པ་ཡེ་རེམ་ཡཱ་ཡིས་གསུང་རབ་ཀྱི་མདོ་ལས་ཇི་སྐད༌དུ། དེ་རྣམས་དངུལ་སྲང་སུམ་ཅུ་བླངས་པ༌ནི།། དེ་སྔར་ཡེས་ར་ཨེལ་གྱི་བུ་རྒྱུད༌ཀྱིས།། ཁོང་གི་རིན་གོང་གཏན་ལ་ཁེལ་བ༌བཞིན།།
MAT 27:10 དངུལ་སྲང་དག་གིས་རྫ་མཁན་ས་ཞིང༌ཉོས།། དེ་སྐད་གཙོ་བོས་བདག་ལ་བཀའ་བསྩལ༌ཏོ།། ཞེས་གསུངས་པ་ལྟར་གྲུབ༌པའོ།།
MAT 27:11 སྐྱབས་མགོན་ཡེ་ཤུ་སྤྱི་དཔོན་པི་ལ་ཏུའི་མདུན་དུ་བཞེངས་པའི༌ཚེ། སྤྱི་དཔོན་ན༌རེ། ཁྱོད་ནི་ཡ་ཧུ་དཱ་པའི་རྒྱལ་པོ་ཡིན་ནམ་ཞེས་དྲིས་པ༌ན། ཁོང་གིས་འདི་སྐད༌དུ། ཁྱོད་ཀྱིས་སྨྲས་པ་བཞིན་ཡིན་ཞེས༌གསུངས།
MAT 27:12 མཆོད་དཔོན་ཆེན་པོ་དག་དང་རྒན་པོ་རྣམས་ཀྱིས་ཁོང་ལ་ཉེས་སྐྱོན་འཛུགས༌དུས། ཁོང་གིས་བཀའ་ལན་ཅི་ཡང་མ་གནང༌ངོ༌།།
MAT 27:13 ཡང་པི་ལ་ཏུ་ན༌རེ། མི་དེ་དག་གིས་དཔང་བཙུགས་ནས་ཁྱོད་རང་ཅི་ཙམ་གཏུག་པ་མི་ཐོས་སམ་ཞེས་དྲིས༌ནའང༌།
MAT 27:14 ཁོང་གིས་ལན་ཅི་ཡང་མ་བཏབ་ཅིང་ཚིག་གཅིག་ཀྱང་མ་གསུངས་པས་སྤྱི་དཔོན་ཡང་ཤིན་ཏུ་ཧ་ལས༌སོ།།
MAT 27:15 སྤྱི་དཔོན་ལ་མཚོན༌ན། དུས་ཆེན་འདི་ལ་ཁེལ༌དུས། མི་སེར་གྱི་འདོད་བློ་ལྟར་ཁོ་རྣམས་ལ་བཙོན་པ་ཞིག་བཙོན་གྲོལ་གཏོང་བའི་རྒྱུན་སྲོལ༌ཡོད།
MAT 27:16 དུས་དེར་པཱ་རབ་པཱ་ཟེར་བའི་བཙོན་པ་མི་ངན་གྲགས་ཅན་ཞིག་ཡོད༌ཅིང༌།
MAT 27:17 མི་རྣམས་གནས་དེར་འཛོམས་པ༌ན། པི་ལ་ཏུ་ན༌རེ། པཱ་རབ་པཱ་དང་མཱ་ཤི་ཀ་ཟེར་བའི་ཡེ་ཤུ་གཉིས་ལས་ཁྱོད་རྣམས་ཀྱིས་སུ་ཞིག་བཙོན་གྲོལ་གཏོང་འདོད་དམ་ཞེས༌དྲིས།
MAT 27:18 རྒྱུ་མཚན་ནི་དེ་དག་གིས་སྐྱབས་མགོན་ཡེ་ཤུར་ཕྲག་དོག་བྱས་ཏེ་ཁོ་ལ་སྤྲད་པ་ནི་སྤྱི་དཔོན་ཀྱིས་ཤེས༌པའོ།།
MAT 27:19 ཁོ་ནི་ཁྲིམས་དཔོན་གྱི་ཁྲི་ཐོག་ཏུ་སྡོད༌དུས། ཁོའི་ཆུང་མས་མི་ཞིག་བཏང་སྟེ་ན༌རེ། ངས་མདང་ནུབ་ཀྱི་རྨི་ལམ་དུ་སྐྱེས་བུ་དམ་པ་དེའི་དོན་དུ་སྡུག་བསྔལ་མང་པོ་མྱངས༌པས། ཁྱོད་ཀྱིས་མི་དེའི་དོན་ལ་ཐེ་གཏོགས་མི་བྱའོ་ཞེས་ངག་འཕྲིན་བསྐུར༌ཏོ།།
MAT 27:20 འོན་ཀྱང་མཆོད་དཔོན་ཆེན་པོ་དག་དང་རྒན་པོ་རྣམས་ཀྱིས་མི་ཚོགས་ལ་ངན་སྐུལ་བྱས་ཏེ་པཱ་རབ་པཱ་བཙོན་གྲོལ་གཏོང་བ་དང་ཡེ་ཤུ་གསོད་པར༌བསྐུལ།
MAT 27:21 སྤྱི་དཔོན་གྱིས་མི་ཚོགས༌ལ། ཁྱོད་ཅག་གིས་འདི་གཉིས་ལས་སུ་ཞིག་བཙོན་གྲོལ་གཏོང་འདོད་དམ་ཞེས་དྲིས་པ༌ན། དེ་རྣམས་ན༌རེ། པཱ་རབ་པཱ་ཞེས་ཞུས༌སོ།།
MAT 27:22 ཡང་པི་ལ་ཏུ་ན༌རེ། དེས་ན་ངས་མཱ་ཤི་ཀ་ཟེར་བའི་ཡེ་ཤུ་ལ་ཅི་བྱའམ་ཞེས་དྲིས་པ༌ན། དེ་དག་ཐམས་ཅད་ཀྱིས་ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས༌སྨྲས།
MAT 27:23 ཡང་སྤྱི་དཔོན་ན༌རེ། རྒྱུ་མཚན་ཅིའི་ཕྱིར༌རམ། ཁོས་ནག་ཉེས་ཅི་བྱས་སམ་ཞེས་སྨྲས༌ནའང༌། དེ་དག་གིས་སྔར་ལས་སྐད་གསང་མཐོན་པོས་ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་འུར་བརྒྱབ༌བོ།།
MAT 27:24 པི་ལ་ཏུས་རང་གིས་གཏམ་ཇི་ལྟར་སྨྲས་ནའང་ཕན་ཐོགས་མེད་པར་ད་དུང་ཟིང་ཆ་ལངས་བཞིན་པ་མཐོང༌སྟེ། མི་ཚོགས་ཀྱི་མདུན་ནས་ཆུ་བླངས་ཏེ་རང་གི་ལག་པ་བཀྲུས་ཤིང་ན༌རེ། སྐྱེས་བུ་འདིའི་ཁྲག་བཞུར་ ནའང་བདག་ལ་སྡིག་པ་མེད༌དེ། ཁྱོད་རྣམས་ཀྱིས་འགན་འཁུར་དགོས་ཞེས་སྨྲས་པ༌ན།
MAT 27:25 མི་ཐམས་ཅད༌ཀྱིས། ཁོའི་ཁྲག་བཞུར་བའི་དོན་དེ་ངེད་ཅག་དང་ངེད་ཅག་གི་བུ་རྒྱུད་རྣམས་ཀྱི་སྟེང་དུ་འབབ་པར་ཤོག་ཅེས་སྨྲས༌སོ།།
MAT 27:26 དེ་ནས་པི་ལ་ཏུས་པཱ་རབ་པཱ་བཙོན་གྲོལ་བཏང་ནས་ཁོ་རྣམས་ལ་སྤྲད༌ཅིང༌། སྐྱབས་མགོན་ཡེ་ཤུར་རྟ་ལྕག་གིས་གཞུས་ཏེ་ཤིང་རྒྱ་གྲམ་གྱི་སྟེང་དུ་བརྡབ་ཕྱིར་དམག་མི་རྣམས་ལ་སྤྲད༌དོ།།
MAT 27:27 སྤྱི་དཔོན་གྱི་དམག་མི་རྣམས་ཀྱིས་སྐྱབས་མགོན་ཡེ་ཤུ་སྤྱི་དཔོན་གྱི་ཕོ་བྲང་དུ་ཁྲིད་པ༌དང༌། དམག་དཔུང་ཐམས་ཅད་ཁོང་གི་དྲུང་དུ་བསྡུས༌ཏེ།
MAT 27:28 ཁོང་གི་ན་བཟའ་ཕུད་ཅིང་ལུས་ལ་ན་བཟའ་དམར་སྨུག་ཅིག༌བསྐོན།
MAT 27:29 ཚེར་མའི་ཅོད་པན་བསླེས་ཏེ་ཁོང་གི་དབུ་ལ༌བསྐོན། ཁོང་གི་ཕྱག་གཡས་པར་འདམ་རྩྭ་བསྣམས་སུ༌བཅུག ཁོང་གི་དྲུང་དུ་པུས་མོ་སར་བཙུགས་ཏེ་ཡ་ཧུ་དཱ་པའི་རྒྱལ་པོ་ཁྱོད་ལ་རྟེན་འབྲེལ་ཞུ་ཞེས་བརྙས་བཅོས༌བྱས།
MAT 27:30 ཡང་ཁོང་གི་གདོང་ལ་མཆིལ་མ་བཏབ༌ཅིང༌། ཁོང་གི་ཕྱག་ནས་འདམ་རྩྭ་བླངས་ཏེ་དབུ་ལ་བརྡེགས༌སོ།།
MAT 27:31 དམག་མི་དག་གིས་དེ་ལྟར་ཁོང་ལ་བརྙས་བཅོས་བྱས༌རྗེས། ན་བཟའ་དམར་སྨུག་ཕུད་ཅིང་ཁོང་ལ་རང་ཉིད་ཀྱི་ན་བཟའ་བསྐོན༌ཏེ། ཤིང་རྒྱ་གྲམ་གྱི་སྟེང་དུ་བརྡབ་ཆེད་ཕར་ཁྲིད༌དོ།།
MAT 27:32 ཁོ་རྣམས་ཕྱི་རོལ་ཏུ་སླེབས༌དུས། ཀི་རེ་ནེའི་མི་སྟེ་མིང་ལ་སི་མོན་ཟེར་བ་དང་ཕྲད་ནས། དེ་དག་གིས་ཁོ་ལ་བཙན་གྱིས་སྐྱབས་མགོན་ཡེ་ཤུའི་ཤིང་རྒྱ་གྲམ་འཁུར་དུ༌བཅུག
MAT 27:33 དེ་རྣམས་གོལ་གོ་ཐཱ་སྟེ་དོན་ལ་མགོ་སྐོགས་གནས་ཞེས་པའི་ས་ཆར་སླེབས་པ༌དང༌།
MAT 27:34 དམག་མི་རྣམས་ཀྱིས་ཁོང་ལ་མཁྲིས་ཁུ་འདྲེས་པའི་རྒུན་ཆང་དྲངས་པ༌ན། ཁོང་གིས་བྲོ་བ་མྱངས་ཙམ་ལས་མ༌བཞེས།
MAT 27:35 དེ་རྣམས་ཀྱིས་སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་ཤིང་ཁོང་གི་ན་བཟའ་རྒྱན་འཕངས་ཏེ་བགོ་བཤའ་བྱས༌རྗེས།
MAT 27:36 ཡང་ཁོང་ཉིད་བསྲུངས་ནས༌བསྡད།
MAT 27:37 ཁོང་གི་དབུ་ཡི་གོང་དུ་ཤིང་བྱང་ཞིག་བཀལ་ཞིང་ཁོང་ལ་བཏགས་པའི་ཉེས་སྐྱོན་ནི་འདི་ལྟར་བྲིས་ཡོད༌དེ། འདི་ནི་ཡ་ཧུ་དཱ་པའི་རྒྱལ་པོ་ཡེ་ཤུ་ཡིན་ཞེས་པ༌དེའོ།།
MAT 27:38 དུས༌དེར། ཁོང་དང་ལྷན་ཅིག་ཇག་པ་གཉིས་ཀྱང་ཁོང་གི་གཡས་གཡོན་དུ་ཤིང་རྒྱ་གྲམ་སྟེང་དུ་བརྡབས༌ཡོད།
MAT 27:39 གནས་དེར་བརྒྱུད་ནས་འགྲོ་བ་རྣམས་ཀྱིས་ཁོང་ལ་འཕྱ་སྨོད་བྱས་ཤིང་མགོ་བོ་གཡུག་བཞིན་ན༌རེ།
MAT 27:40 ཀྱེ། མཆོད་ཁང་བཤིག་ནས་ཉིན་གསུམ་གྱི་ནང་དུ་སླར་རྩིག་མཁན་ཁྱོད་ཀྱིས་རང་ཉིད་སྐྱོབས༌དང༌། ཁྱོད་ནི་དཀོན་མཆོག་གི་སྲས་ཡིན་ན་ཤིང་རྒྱ་གྲམ་སྟེང་ནས་མར་བོབས་ཤིག་ཅེས༌སྨྲས།
MAT 27:41 དེ་བཞིན་དུ་མཆོད་དཔོན་ཆེན་པོ་དག༌དང༌། མཁན་པོ་དང་རྒན་པོ་རྣམས་ཀྱིས་ཀྱང་ཁོང་ལ་འཕྱ་སྨོད་བྱེད་བཞིན་ན༌རེ།
MAT 27:42 ཁོས་གཞན་རྣམས་བསྐྱབས་མྱོང་ནའང་རང་ཉིད་སྐྱོབ་མི༌ནུས། ཁོ་ནི་ཡེས་ར་ཨེལ་གྱི་རྒྱལ་པོ་ཡིན༌པས། ད་ལྟ་ཤིང་རྒྱ་གྲམ་སྟེང་ནས་མར་བབས་ཆོག༌ལ། དེས་ན་ངེད་ཅག་གིས་ཀྱང་ཁོ་ལ་དད་པ་བྱེད༌སྲིད།
MAT 27:43 ཁོས་དཀོན་མཆོག་ལ་བློ་གཏོད་ཅིང་ང་ནི་དཀོན་མཆོག་གི་སྲས་ཡིན་ཟེར༌བས། དཀོན་མཆོག་ཁོ་ལ་དགའ༌ན། ད་ལྟ་ཁོ་རང་བསྐྱབ་ངེས་ཡིན་ཞེས་སྨྲས་པ༌དང༌།
MAT 27:44 ཁོང་དང་མཉམ་དུ་བརྡབས་པའི་ཇག་པ་གཉིས་ཀྱིས་ཀྱང་དེ་ལྟར་ཁོང་ལ་འཕྱ་སྨོད་བྱས༌སོ།།
MAT 27:45 ཉིན་གུང་ནས་ཕྱི་དྲོའི་ཆུ་ཚོད་གསུམ་བར༌དུ། ཡུལ་ཡོངས་ལ་མུན་ནག་འཐིབས༌ཤིང༌།
MAT 27:46 ཕྱི་དྲོའི་ཆུ་ཚོད་གསུམ་ཙམ་ལ་སྐྱབས་མགོན་ཡེ་ཤུས་གསུང་སྐད་ཆེན༌པོས། ཨེ༌ལེ། ཨེ༌ལེ། ལཱ་མཱ་སཱ་པཱག་ཐཱ་ནེ་ཞེས་གསུངས༌ཤིང༌། དོན་ནི་འདི་ལྟ༌སྟེ། ཀྱེ། བདག་གི་དཀོན་མཆོག༌ལགས། བདག་གི་དཀོན་མཆོག༌ལགས། ཁྱེད་ཀྱིས་ང་རང་རྒྱབ་ཏུ་བསྐྱུར་དོན་ཅི་ཞེས༌པའོ།།
MAT 27:47 གནས་དེར་ཡོད་པའི་མི་འགའ་ཞིག་གིས་གསུང་དེ་ཐོས༌རྗེས། མི་འདིས་ཨེ་ལི་ཡཱ་འབོད་ཀྱིན་འདུག་ཅེས་སྨྲས་མ༌ཐག
MAT 27:48 དེ་དག་གི་ཁྲོད་ནས་མི་ཞིག་བརྒྱུགས་སོང་ནས་འགྱིག་སོབ་ཅིག་རྒུན་ཆང་སྐྱུར་མོར་སྦངས༌ཏེ། འདམ་རྩྭའི་རྩེར་བཀལ་ནས་ཁོང་ལ་འདྲེན་པའི་དུས༌སུ།
MAT 27:49 གཞན་རྣམས་ན༌རེ། ཅུང་ཙམ་སྒུག༌དང༌། ཨེ་ལི་ཡཱ་ཁོ་རང་སྐྱོབ་ཏུ་ཡོང་མིན་ལ་བལྟ་བར་བྱའོ་ཞེས་སྨྲས༌སོ།།
MAT 27:50 སྐྱབས་མགོན་ཡེ་ཤུས་སླར་ཡང་སྐད་གསང་མཐོན་པོས་འབོད་སྒྲ་ཞིག་བསྒྲགས་པ་དང་སྐུ་སྲོག་ཕུལ༌ཏོ།།
MAT 27:51 གློ་བུར་ཉིད་ལ་མཆོད་ཁང་གི་ཡོལ་བ་དེ་ཡང་གོང་ནས་འོག་ཏུ་དུམ་བུ་གཉིས་སུ་རལ་བ༌དང༌། ས་འགུལ་བྱུང་ནས་རྡོ་ཕ་བོང་དག་ཀྱང་གས༌ཤིང༌།
MAT 27:52 དུར་ཁུང་ཕྱེས་ཏེ་སྔར་གཤེགས་ཟིན་པའི་དད་ལྡན་དམ་པའི་བེམ་པོ་མང་པོའང་སླར་གསོན་པ༌ཡིན།
MAT 27:53 སྐྱབས་མགོན་ཡེ་ཤུ་སླར་གསོན༌རྗེས། ཁོ་རྣམས་ཀྱང་དུར་ཁུང་ནས་ཕྱིར་ཡོང་སྟེ་དམ་པའི་གྲོང་ཁྱེར་དུ་ཕྱིན་པ་དང་མི་མང་པོར་མངོན་པར༌མཛད།
MAT 27:54 སྐྱབས་མགོན་ཡེ་ཤུ་སྲུང་བའི་བརྒྱ་དཔོན་དང་བཅས་པས་ས་འགུལ་བྱུང་བ་ལ་སོགས་པའི་དོན་རྣམས་མཐོང་ནས་ཤིན་ཏུ་འཇིགས༌ཏེ། སྐྱེས་བུ་འདི་ནི་དཀོན་མཆོག་གི་སྲས་ཡིན་པ་བདེན་འདུག་ཅེས་སྨྲས༌སོ།།
MAT 27:55 ག་ལིལ་ཡུལ་ནས་སྐྱབས་མགོན་ཡེ་ཤུའི་རྗེས་འབྲངས་ཏེ་ཁོང་ལ་ཞབས་ཕྱི་བསྒྲུབས་མྱོང་བའི་བུད་མེད་མང་པོ་ཡང་གནས་དེར་ཡོད་ཅིང་རྒྱང་རིང་ནས་དོན་དེར༌བལྟས།
MAT 27:56 བུད་མེད་དེ་དག་གི་ཁྲོད་དུ་མཱག་རྡལ་གྱི་མིར་ཡམ༌དང༌། ཡ་ཀོབ་དང་ཡོ་སེབ་གཉིས་ཀྱི་མ་མིར༌ཡམ། གཞན་ཡང་ཟེ་བད་ཡའི་བུ་གཉིས་ཀྱི་མ་བཅས་ཀྱང་གནས་དེར་ཡོད༌དོ།།
MAT 27:57 མཚན་མོར་སླེབས༌ཤིང༌། ཨ་རི་མ་ཐཱ་ཡི་ཡོ་སེབ་ཟེར་བའི་ཕྱུག་བདག་དེ་གནས་དེར་སླེབས་ཤིང་ཁོ་རང་ཡང་སྐྱབས་མགོན་ཡེ་ཤུའི་རྗེས་འབྲང་པ་ཞིག་ཡིན༌པས།
MAT 27:58 པི་ལ་ཏུའི་གམ་དུ་སོང་ནས་སྐྱབས་མགོན་ཡེ་ཤུའི་སྐུ་གདུང་གནང་བར་ཞུ་བ་ཞུས་པ༌ན། པི་ལ་ཏུས་ཁོ་ལ་གནང་བའི་བཀའ་བསྩལ༌པའོ།།
MAT 27:59 ཡོ་སེབ་ཀྱིས་སྐྱབས་མགོན་ཡེ་ཤུའི་སྐུ་གདུང་བླངས་ཏེ་སོ་རས་གཙང་མས་དཀྲིས༌རྗེས།
MAT 27:60 སྔ་མོ་ནས་རང་ལ་དུར་ཁུང་གསར་པ་ཞིག་བརྐོས་ཡོད་པ་དེར་སྐྱབས་མགོན་ཡེ་ཤུའི་སྐུ་གདུང་སྦས༌ཤིང༌། རྡོ་ཕ་བོང་ཞིག་བསྒྲིལ་འོངས་ནས་དུར་ཁུང་གི་སྒོ་བཅད་ནས་ཕྱིར་སོང༌ངོ༌།།
MAT 27:61 དུས༌དེར། མཱག་རྡལ་གྱི་མིར་ཡམ༌དང༌། གཞན་ཡང་མིང་ལ་མིར་ཡམ་ཟེར་བའི་བུད་མེད་དེ་གཉིས་ཀྱང་དུར་ཁུང་གི་ཁ་གཏད་དུ་བསྡད་ཡོད༌དོ།།
MAT 27:62 དེའི་ཕྱི་ཉིན༌ཏེ། སྟ་གོན་ཉིན་ཞེས་པའི་ཕྱི་ཉིན༌ལ། མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་པི་ལ་ཏུའི་མདུན་དུ་འཛོམས་ཏེ་ན༌རེ།
MAT 27:63 སྐུ་ངོ༌ལགས། བསླུ་བྲིད་པ་དེས་གསོན་པའི་དུས་སུ་འདི་སྐད༌དུ། ཉིན་གསུམ་གྱི་རྗེས་སུ་ང་རང་སླར་གསོན་ངེས་ཡིན་ཞེས་སྨྲས་པ་ངེད་ཅག་གིས་དྲན༌པས།
MAT 27:64 ཁྱེད་ཀྱིས་ཉིན་གསུམ་པའི་བར་དུ་དུར་ཁུང་ལེགས་པོར་བསྲུང་བའི་བཀའ་གནང་བར༌མཛོད། དེ་ལྟར་མ་བསྲུངས༌ན། ཁོའི་རྗེས་འབྲང་པ་རྣམས་ཀྱིས་བེམ་པོ་བརྐུས་ཏེ་ཡུལ་མི་རྣམས་ལ་ཡེ་ཤུ་སླར་གསོན་ནོ་ཞེས་སྨྲ་བར་འགྱུར༌བས། ཕྱིས་སུ་འབྱུང་བའི་བསླུ་བྲིད་ནི་སྔ་མ་ལས་ཀྱང་ཚབས་ཆེན་དུ་འགྱུར་ཉེན་ཡོད་ཅེས་ཞུས་པ༌ན།
MAT 27:65 པི་ལ་ཏུ་ན༌རེ། ཁྱོད་ཅག་ལ་སྲུང་དམག་ཡོད༌པས། ཕར་སོང་ནས་དུར་ཁུང་ལེགས་པོར་སྲུངས་ཤིག་ཅེས་བཀའ་བསྒོས༌ཤིང༌།
MAT 27:66 དེ་དག་གིས་སྲུང་དམག་ཁྲིད་ནས་སོང༌སྟེ། ཕ་བོང་ལ་རྟགས་ཐམ་བརྒྱབ་ནས་དུར་ཁུང་ལེགས་པོར་སྲུང་དུ་བཅུག༌གོ།
MAT 28:1 ངལ་གསོ་བའི་ཉིན་རྫོགས༌རྗེས། གཟའ་འཁོར་གཅིག་གི་ཉིན་དང་པོར་ ནམ་ལངས་པའི་དུས༌སུ། མཱག་རྡལ་གྱི་མིར་ཡམ་དང་གཞན་ཡང་མིང་ལ་མིར་ཡམ་ཟེར་བའི་བུད་མེད་དེ་གཉིས་དུར་ཁུང་ལ་བལྟ་རུ་ཡོང༌ངོ༌།།
MAT 28:2 གློ་བུར་ཉིད་དུ་ས་འགུལ་ཆེན་པོ༌བྱུང༌། དེ་ནི་གཙོ་བོའི་ཕོ་ཉ་ཞིག་ནམ་མཁའི་ཞིང་ཁམས་ནས་ཕེབས༌ཏེ། ཕོ་ཉས་རྡོ་ཕ་བོང་ཕར་བསྒྲིལ་ཞིང་དེའི་སྟེང་དུ་བཞུགས་པའི་ཕྱིར༌རོ།།
MAT 28:3 ཁོང་གི་གཟུགས་བརྙན་ནི་གློག་དམར་འཁྱུག་པ་དང་འདྲ༌ཞིང༌། ན་བཟའ་ནི་ཁ་བ་ལྟར་དཀར་བ༌ཡིན།
MAT 28:4 དུར་ཁུང་སྲུང་མཁན་གྱི་དམག་མི་རྣམས་ཁོང་ལ་ཤིན་ཏུ་འཇིགས་ཏེ་ལུས་ཡོངས་འདར་ཞིང་བེམ་པོ་ལྟར་གྱུར༌ཏོ།།
MAT 28:5 ཕོ་ཉས་བུད་མེད་དེ་གཉིས་ལ་འདི་སྐད༌དུ། འཇིགས་མི་དགོས༌ཏེ། ཁྱོད་གཉིས་ཤིང་རྒྱ་གྲམ་གྱི་སྟེང་དུ་བརྡབས་པའི་སྐྱབས་མགོན་ཡེ་ཤུ་འཚོལ་དུ་འོངས་པ་བདག་གིས་ཤེས་པ༌ཡིན།
MAT 28:6 ཁྱོད་གཉིས་ཀྱིས་སྐྱབས་མགོན་ཡེ་ཤུའི་སྐུ་གདུང་འཇོག་སར་ལྟོས༌དང༌། ད་ལྟ་ཁོང་གནས་འདིར་མི་བཞུགས་པར་དེ་སྔར་ཁོང་གིས་གསུངས་པ་བཞིན་སླར་གསོན་པ༌ཡིན།
MAT 28:7 ཁྱོད་གཉིས་མྱུར་དུ་སོང་ནས་ཁོང་གི་ཐུགས་སྲས་རྣམས༌ལ། སྐྱབས་མགོན་ཡེ་ཤུ་གྲོངས་པ་ནས་སླར་གསོན༌ནོ། །ཁོང་ནི་ཁྱོད་ཅག་གི་སྔོན་ལ་ག་ལིལ་ཡུལ་དུ་བྱོན་ཏེ་གནས་དེ་རུ་ཁྱོད་ཅག་ཁོང་དང་མཇལ་ངེས་ཡིན་ཞེས་སྨྲོས༌ཤིག ལྟོས༌དང༌། ངས་ཁྱོད་གཉིས་ལ་སྨྲས་ཟིན་ཞེས་གསུངས༌སོ།།
MAT 28:8 བུད་མེད་དེ་གཉིས་མྱུར་དུ་དུར་ཁུང་དང་ཁ་བྲལ་ཞིང་འཇིགས་སྐྲག་དང་དགའ་མགུའི་ངང་སྐྱབས་མགོན་ཡེ་ཤུའི་ཐུགས་སྲས་རྣམས་ལ་དོན་འདི་སྨྲ་བའི་ཕྱིར་བརྒྱུགས༌སོ།།
MAT 28:9 གློ་བུར་ཉིད་ལ་སྐྱབས་མགོན་ཡེ་ཤུ་ཁོ་མོ་གཉིས་ཀར་ཕྲད་དེ་འདི་སྐད༌དུ། ཁྱོད་གཉིས་བདེ་བར་སྨོན་ཞེས་གསུངས་པ༌དང༌། ཁོ་མོ་གཉིས་ཚུར་ཡོང་ནས་ཁོང་གི་ཞབས་ལ་འཇུས་ཏེ་ཕྱག༌བཙལ།
MAT 28:10 ཡང་སྐྱབས་མགོན་ཡེ་ཤུས་འདི་སྐད༌དུ། འཇིགས་མི་དགོས༌ཏེ། ཁྱོད་གཉིས་ཀྱིས་བདག་གི་སྤུན་ཟླ་རྣམས་ལ་ག་ལིལ་ཡུལ་དུ་སོང༌དང༌། གནས་དེ་རུ་ཁྱོད་ཅག་གིས་ང་རང་མཐོང་བར་འགྱུར་ཞེས་སྨྲོས་ཤིག་ཅེས་གསུངས༌སོ།།
MAT 28:11 བུད་མེད་དེ་གཉིས་ལམ་ལ་ཆས༌སྐབས། དུར་ཁུང་གི་སྲུང་དམག་རྣམས་ལས་འགའ་ཞིག་ཡེ་རུ་སཱ་ལེམ་དུ་སོང༌སྟེ། དོན་ཅི་བྱུང་བ་ཐམས་ཅད་མཆོད་དཔོན་ཆེན་པོ་དག་ལ་སྨྲས༌སོ།།
MAT 28:12 མཆོད་དཔོན་ཆེན་པོ་དག་དང་རྒན་པོ་རྣམས་མཉམ་དུ་འཛོམས་ནས་གྲོས་བྱས་པ༌དང༌། དམག་མི་དེ་རྣམས་ལ་དངུལ་སྒོར་མང་པོ་བྱིན་ཏེ་ན༌རེ།
MAT 28:13 ཁྱོད་ཅག་གིས་མི་གཞན་རྣམས༌ལ། ངེད་ཅག་མཚན་མོར་གཉིད་ལ་ཡུར་བའི༌ཚེ། ཡེ་ཤུའི་རྗེས་འབྲང་པ་རྣམས་ཡོང་ནས་བེམ་པོ་བརྐུས་ཏེ་ཁྱེར་ཏོ་ཞེས་སྨྲོས༌ཤིག
MAT 28:14 གལ་ཏེ་སྤྱི་དཔོན་གྱིས་དོན་འདི་ཤེས་པར་གྱུར༌ན། ངེད་ཅག་གིས་ཁོང་ལ་ཞུ་བ་ཞུས་ནས་ཁྱོད་ཅག་ལ་ཉེས་སྐྱོན་མི་འབྱུང་བར་ཁག་ཐེག་བྱེད་ངེས་ཡིན་ཞེས་སྨྲས༌སོ།།
MAT 28:15 དམག་མི་དེ་དག་གིས་ཀྱང་ལྐོག་རྔན་བླངས་ཏེ་མཆོད་དཔོན་རྣམས་ཀྱིས་སྨྲས་པ་ལྟར་བྱས༌ཤིང༌། གཏམ་འདི་ནི་ད་ལྟའི་བར་དུ་ཡ་ཧུ་དཱའི་མི་རིགས་ཀྱི་ངག་རྒྱུན་དུ་གྲགས༌སོ།།
MAT 28:16 ཐུགས་སྲས་བཅུ་གཅིག་པོ་སྐྱབས་མགོན་ཡེ་ཤུའི་བཀའ་བཞིན་དུ་ག་ལིལ་ཡུལ་གྱི་རི་མགོར་ཆས་པ༌དང༌།
MAT 28:17 ཁོ་རྣམས་ཀྱིས་སྐྱབས་མགོན་ཡེ་ཤུ་མཐོང་བ་དང་ཕྱག་བཙལ་ཏོ། །འོན་ཀྱང་ཐུགས་སྲས་ལ་ལ་ད་དུང་དོན་འདིར་ཐེ་ཚོམ་སྐྱེས༌སོ།།
MAT 28:18 སྐྱབས་མགོན་ཡེ་ཤུ་ཚུར་ཕེབས་ཏེ་ཐུགས་སྲས་རྣམས་ལ་འདི་སྐད༌དུ། གནམ་ས་གཉིས་ཀྱི་དབང་ཐམས་ཅད་བདག་ལ་གནང་ཡོད༌པས།
MAT 28:19 ཁྱོད་རྣམས་སོང་ནས་མི་རིགས་ཐམས་ཅད་བདག་གི་རྗེས་སུ་འབྲང་དུ་འཇུག་པར༌གྱིས། ཡབ༌དང༌། སྲས༌དང༌། དམ་པའི་ཐུགས་ཉིད་བཅས་ཀྱི་མཚན་ལ་བརྟེན་ནས་ཁོ་རྣམས་ལ་ཁྲུས་གསོལ་བྱོས༌ཤིག
MAT 28:20 ངས་ཁྱོད་ཅག་ལ་གནང་བའི་བཀའ་ཐམས་ཅད་ཁོ་རྣམས་ལ་ཁྲིད་སྟོན་བྱོས་ལ་བསྲུང་དུ༌བཅུག ལྟོས༌དང༌། ང་ནི་རྟག་ཏུ་བསྐལ་པའི་མཐའ་མའི་བར་དུའང་ཁྱོད་ཅག་དང་མཉམ་དུ་གནས་ཞེས་གསུངས༌སོ།། །།
MAR 1:1 དེ་ཡང་དཀོན་མཆོག་གི་སྲས་ཡེ་ཤུ་མཱ་ཤི་ཀའི་འཕྲིན་བཟང་གི་ཐོག་མ་ནི་འདི་ལྟར་ཡིན༌ཏེ།
MAR 1:2 ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ། བདག་གི་ཕོ་ཉ་ཁྱོད་ཀྱི་མདུན་དུ༌མངགས།། ཁྱོད་ཀྱི་ལམ་ནི་གྲ་སྒྲིག་བྱེད་ལ༌ལྟོས།།
MAR 1:3 དབེན་སྟོང་ཡུལ་ནས་གྲགས་པའི་འབོད་སྒྲ༌ཡིས།། གཙོ་བོའི་ཕེབས་ལམ་སྟ་གོན༌བྱེད་པ་དང་།། ཁོང་གི་གཤེགས་ལམ་དྲང་པོར་བཟོ་བར༌གྱིས།། ཞེས་བཀོད་པ༌བཞིན།
MAR 1:4 ཁྲུས་གསོལ་མཁན་ཡོ་ཧ་ནན་དབེན་སྟོང་ཞིག་ཏུ་ཕེབས་ཏེ། སྡིག་པ་བསལ་བའི༌ཕྱིར་འགྱོད་བཤགས་ཀྱི་རྟགས་སུ་ཁྲུས་གསོལ་ལ་ཞུགས་པའི་ཆོས་བསྒྲགས།
MAR 1:5 ཡ་ཧུ་དཱའི་ས་ཆ་དང་ཡེ་རུ་སཱ་ལེམ་གྱི་མི་ཐམས་ཅད་ཡོ་ཧ་ནན་གྱི་དྲུང་དུ་སོང་ནས། རང་གི་སྡིག་པ་མཐོལ་བཤགས་བྱས་པ་དང་ཡོར་དན་གཙང་པོར་ཞུགས་ཤིང་ཁོང་གིས་ཀྱང་དེ་རྣམས་ལ་ཁྲུས་གསོལ་མཛད་དོ།།
MAR 1:6 ཡོ་ཧ་ནན་གྱིས་རྔ་རྩིད་ཀྱིས་བཟོས་པའི་ལྭ་བ་གྱོན་པ༌དང༌། ཀོ་བའི་སྐ་རགས་བཅིངས་ཤིང་ཟས་ལ་འབུ་ཆ་ག་པ་དང་རི་སྐྱེས་སྦྲང་རྩི་སྤྱོད༌པ་ཡིན།
MAR 1:7 ཡོ་ཧ་ནན་གྱིས། བདག་གི་རྗེས་སུ་བདག་ལས་ཀྱང་མཐུ་སྟོབས་ཆེ་བ་ཞིག་ཕེབས་ངེས༌ཏེ། ངས་མར་སྒུར་ནས་ཁོང་གི་ལྷམ་མདུད་ཀྱང་དགྲོལ་བར་མི་འོས།
MAR 1:8 ངས་ཁྱོད་རྣམས་ལ་ཆུ་ཡིས་ཁྲུས་གསོལ་བྱེད་པ་ཡིན༌མོད། འོན་ཀྱང་ཁོང་གིས་ཁྱོད་རྣམས་ལ་དམ་པའི་ཐུགས་ཉིད་ཀྱིས་ཁྲུས་གསོལ་མཛད་པར་འགྱུར་ཞེས་ཆོས་བསྒྲགས་སོ།།
MAR 1:9 དེའི་དུས༌སུ། སྐྱབས་མགོན་ཡེ་ཤུ་ཁོང་ཉིད་ག་ལིལ་ཡུལ་གྱི་ནཱ་ཙ་རེལ་ནས་ཚུར་ཕེབས༌ཤིང༌། ཡོ་ཧ་ནན་གྱིས་ཡོར་དན་གཙང་པོ་ནས་སྐྱབས་མགོན་ཡེ་ཤུ་ལ་ཁྲུས་གསོལ་བྱས།
MAR 1:10 སྐྱབས་མགོན་ཡེ་ཤུ་ཆུ་ལས་ཡར་བུད་མ་ཐག་ཏུ་ནམ་མཁའི་སྒོ་ཕྱེས་ཤིང་། དམ་པའི་ཐུགས་ཉིད་ནི་བྱ་ཕུག་རོན་གྱི་གཟུགས་ཀྱིས་རང་ཉིད་ཀྱི་ལུས་སྟེང་ལ་བབས་པ་ཁོང་གིས་གཟིགས།
MAR 1:11 ཡང་ནམ་མཁའི་ཞིང་ཁམས་ནས་སྐད་སྒྲ་ཞིག་གྲགས༌ཏེ། ཁྱོད་ནི་ང་ཡི་གཅེས་པའི་བུ་ཡིན་ཞིང་ང་རང་ཁྱོད་ལ་ཤིན་ཏུ་དགའ་ཞེས་གསུངས༌སོ།།
MAR 1:12 དེ་ལྟར་གསུངས་མ་ཐག་ཏུ་དམ་པའི་ཐུགས་ཉིད་ཀྱིས་སྐྱབས་མགོན་ཡེ་ཤུ་བསྐུལ་ནས་ཁོང་ཉིད་དབེན་སྟོང་ཞིག་ཏུ་ཕེབས་པ༌དང༌།
MAR 1:13 དབེན་སྟོང་དེ་རུ་ཉིན་བཞི་བཅུའི་རིང་ལ་བདུད་སཱ་ཏན་གྱིས་ཁོང་ལ་ཉམས་ཚོད་བྱས༌ཤིང༌། ཁོང་ཉིད་གཅན་གཟན་དང་མཉམ་དུ་བཞུགས་པ༌དང༌། ཕོ་ཉ་རྣམས་ཕེབས་ནས་ཁོང་ལ་ཞབས་ཕྱི་བསྒྲུབས༌སོ།།
MAR 1:14 ཡོ་ཧ་ནན་བཙོན་དུ་བཅུག༌རྗེས། སྐྱབས་མགོན་ཡེ་ཤུ་ཁོང་ཉིད་ག་ལིལ་ཡུལ་དུ་ཕེབས་ནས་དཀོན་མཆོག་གི་འཕྲིན་བཟང་བསྒྲགས་ཏེ་འདི་སྐད༌དུ།
MAR 1:15 དུས་ལོངས་ཤིང་དཀོན་མཆོག་གི་རྒྱལ་སྲིད་ཉེ་བར་སླེབས་པས། ཁྱོད་ཅག་གིས་ཀྱང་འགྱོད་བཤགས་བྱས་ཏེ་འཕྲིན་བཟང་ལ་དད་པ་བྱོས་ཤིག་ཅེས་གསུངས༌སོ།།
MAR 1:16 སྐྱབས་མགོན་ཡེ་ཤུ་མཚོ་ག་ལིལ་གྱི་མཚོ་འགྲམ་བརྒྱུད་ནས་ཕེབས་པ༌ན། ཁོང་གིས་སི་མོན་དང་དེའི་སྤུན་ཨན་དྲི་ཡཱ་ཞེས་པའི་ཉ་པ་གཉིས་ཀྱིས་མཚོ་ནང་དུ་དྲ་རྒྱ་འཕེན་བཞིན་པ་གཟིགས༌ཤིང༌།
MAR 1:17 ཁོ་གཉིས་ལ་འདི་སྐད༌དུ། བདག་གི་རྗེས་སུ་ཤོག༌དང༌། ངས་ཁྱོད་གཉིས་ལ་ཉ་ཐོབ་པ་ལྟར་མི་ཡང་འཐོབ་པར་བྱའོ་ཞེས་གསུངས་མ༌ཐག
MAR 1:18 ཁོ་གཉིས་ཀྱིས་དྲ་རྒྱ་དོར་ནས་ཁོང་གི་རྗེས་སུ་འབྲངས་སོ།།
MAR 1:19 དེ་ནས་སྐྱབས་མགོན་ཡེ་ཤུ་ཅུང་ཙམ་མདུན་དུ་ཕེབས་པ༌ན། ཟེ་བད་ཡཱའི་བུ་ཡ་ཀོབ་དང་ཁོའི་སྤུན་ཡོ་ཧ་ནན་གཉིས་ཀྱིས་ཀྱང་གྲུའི་སྟེང་ནས་དྲ་རྒྱ་བཟོ་བཅོས་བྱེད་བཞིན་པ་གཟིགས་པ༌དང༌།
MAR 1:20 སྐྱབས་མགོན་ཡེ་ཤུས་ཁོ་གཉིས་ལ་ཞལ་འབོད་གནང་ཞིང་། ཁོ་གཉིས་ཀྱིས་ཕ་ཟེ་བད་ཡཱ་དང་གླ་བ་རྣམས་གྲུའི་སྟེང་ནས་བསྐྱུར་ཏེ་ཁོང་གི་རྗེས་སུ་འབྲངས་སོ།།
MAR 1:21 ཁོང་རྣམས་ཀཱ་ཕར་ན་ཧུམ་དུ་ཕེབས་པ༌དང༌། ངལ་གསོ་བའི་ཉིན་ལ་སྐྱབས་མགོན་ཡེ་ཤུ་ཆོས་ཁང་དུ་ཕེབས་ནས་མི་རྣམས་ལ་ཆོས་གསུངས་ཤིང་།
MAR 1:22 ཁོང་གིས་མི་རྣམས་ལ་ཆོས་གསུངས་པ་ནི་མཁན་པོ་རྣམས་དང་མི་འདྲ་བར་མི་དབང་ཅན་ཞིག་གིས་གསུངས་པ་དང་འདྲ༌བས་ཁོ་རྣམས་ངོ་མཚར་བར་གྱུར་ཏོ།།
MAR 1:23 དེའི་དུས༌སུ། ཆོས་ཁང་དེ་རུ་གདོན་འདྲེས་བཟུང་བའི་མི་ཞིག་ཡོད་པ་དེས་སྐད་ཆེན༌པོས།
MAR 1:24 ཀྱེ། ནཱ་ཙ་རེལ་པ་ཡེ༌ཤུ། ཁྱེད་དང་ངེད་ཅག་ལ་འབྲེལ་བ་ཅི་མཆིས༌སམ། ཁྱེད་རང་ངེད་རྣམས་འཇོམས་པར་ཕེབས༌སམ། ངས་ཁྱེད་རང་སུ་ཡིན་པ་ཤེས༌ཏེ། ཁྱེད་ནི་དཀོན་མཆོག་གི་སྐྱེས་བུ་དམ་པ་དེ་ཉིད་ཡིན་ཞེས་སྨྲས་པ༌ལ།
MAR 1:25 སྐྱབས་མགོན་ཡེ་ཤུས་གདོན་འདྲེ་དེ་ལ་འདི་སྐད༌དུ། ཁ་རོག་ཏུ་སྡོད༌ཅིག ཁོའི་ལུས་ནས་ཕྱིར་བུད་ཅིག་ཅེས་བཀའ་བཀྱོན་གནང་བ༌ན།
MAR 1:26 གདོན་འདྲེས་མི་དེ་དྲག་ཏུ་སྤྲུགས་པ་དང་སྐད་ཆེན་པོ་བརྒྱབ་སྟེ་ཕྱི་རུ་ཐོན་ནོ།།
MAR 1:27 མི་ཚང་མ་ཧ་ལས་ཏེ་ཕན་ཚུན་ལ་ཅི་ཡིན་འདྲི་བཞིན་འདི་ནི་དབང་ཐང་ཆེ་བའི་བཀའ་ཆོས་གསར་པ་ཞིག་རེད༌ཨང༌། ཁོང་གིས་གདོན་འདྲེ་ལ་བཀའ་གནང་ཞིང་དེ་དག་གིས་ཀྱང་ཁོང་གི་བཀའ་ལ་མཉན་ཞེས་སྨྲས་མ༌ཐག
MAR 1:28 སྐྱབས་མགོན་ཡེ་ཤུའི་མཚན་སྙན་གྲགས་ཀྱང་ག་ལིལ་ཡུལ་གྱི་ཕྱོགས་བཞི་ཐམས་ཅད་ལ་ཁྱབ་པར་གྱུར༌ཏོ།།
MAR 1:29 སྐྱབས་མགོན་ཡེ་ཤུ་དང་བཅས་པ་ཆོས་ཁང་ནས་ཕྱིར་བུད༌པ་དང་། ཡ་ཀོབ་དང་ཡོ་ཧ་ནན་གཉིས་དང་མཉམ་དུ་སི་མོན་དང་ཨན་དྲི་ཡཱ་གཉིས་ཀྱི་ཁྱིམ་དུ་ཕེབས་སོ།།
MAR 1:30 དེའི་དུས༌སུ། སི་མོན་གྱི་སྒྱུག་མོར་ཚ་བརྒྱབ་སྟེ་ཉལ་ནས་བསྡད་ཡོད༌པས། ཁོ་རྣམས་ཀྱིས་མྱུར་དུ་ཁོ་མོའི་གནས་ཚུལ་སྐྱབས་མགོན་ཡེ་ཤུ་ལ་ཞུས༌ཤིང༌།
MAR 1:31 ཁོང་ཉིད་ཁོ་མོའི་མདུན་དུ་ཕེབས་ཏེ་ལག་པར་འཇུས་ཤིང་ཡར་བསྐྱོར་ནས་ལངས་སུ་བཅུག་པ༌ན། ཁོ་མོའི་ཚ་བཞག་སྟེ་ཁོང་རྣམས་ལ་ཞབས་ཕྱི་བསྒྲུབས་སོ།།
MAR 1:32 ཉི་མ་ནུབ་ནས་ས་རུབ་པའི་དུས༌སུ། མི་རྣམས་ཀྱིས་ནད་པ་དང་གདོན་འདྲེས་བཟུང་བའི་མི་ཐམས་ཅད་སྐྱབས་མགོན་ཡེ་ཤུའི་དྲུང་དུ་ཁྲིད་ཡོང་བ༌དང༌།
MAR 1:33 གྲོང་ཁྱེར་གྱི་མི་ཚང་མ་ཁྱིམ་ཚང་དེའི་སྒོ་ཁར་འདུས།
MAR 1:34 ཁོང་གིས་ནད་རིགས་སྣ་ཚོགས་བྱུང་བའི་ནད་པ་མང་པོ་སོས་སུ་བཅུག༌ཅིང༌། གདོན་འདྲེ་མང་པོའང་ཕྱི་རུ་བསྐྲད། གདོན་འདྲེ་དེ་དག་གིས་ཁོང་ཉིད་སུ་ཡིན་པ་ཤེས་པས་ཁོང་གིས་དེ་དག་ལ་སྐད་ཆ་སྨྲ་རུ་མ་བཅུག་གོ།
MAR 1:35 དེའི་ཕྱི༌ཉིན། ནམ་མ་ལངས་པའི་སྔོན་ལ། སྐྱབས་མགོན་ཡེ་ཤུ་ཡར་བཞེངས་ཏེ་དབེན་གནས་ཤིག་ཏུ་ཕེབས་ནས་གསོལ་བ་བཏབ༌ཅིང་།
MAR 1:36 སི་མོན་དང་ཁོའི་ལམ་གྲོགས་རྣམས་ཁོང་ཉིད་འཚོལ་དུ་སོང་བ༌དང༌།
MAR 1:37 ཁོང་དང་མཇལ་རྗེས་མི་ཐམས་ཅད་ཀྱིས་ཁྱེད་རང་འཚོལ་བཞིན་འདུག་ཅེས་ཞུས་པ༌ན།
MAR 1:38 ཁོང་གིས་འདི་སྐད༌དུ། བདག་ཅག་ཡུལ་གཞན་དུ་འགྲོའོ།། ཉེ་འཁོར་གྱི་གྲོང་རྡལ་དུ་སོང་ནས་ཆོས་བསྒྲག་པར༌བྱའོ།། ང་རང་ཡང་དོན་འདིའི་ཆེད་དུ་ཡོང་བ་ཡིན་ཞེས་གསུངས་པ༌དང༌།
MAR 1:39 ཁོང་ཉིད་ག་ལིལ་ཡུལ་གྱི་ས་ཆ་སོ་སོར་ཕེབས་ནས། ཆོས་ཁང་དུ་ཆོས་བསྒྲགས་ཤིང་གདོན་འདྲེ་རྣམས་ཕར་བསྐྲད༌དོ།།
MAR 1:40 མཛེ་ནད་བྱུང་བའི་མི་ཞིག་སྐྱབས་མགོན་ཡེ་ཤུའི་དྲུང་དུ་ཡོང་ནས་པུས་མོ་སར་བཙུགས་ཏེ་ན༌རེ། གལ་ཏེ་ཁྱེད་ཐུགས་མཉེས་པ་ཡིན༌ན། ཁྱེད་ཀྱིས་ང་རང་གཙང་མར་མཛད་ནུས་པ་ཡིན་ཞེས་ཞུ་བ་བྱས་པ༌ལ།
MAR 1:41 སྐྱབས་མགོན་ཡེ་ཤུས་མི་དེ་ལ་སྙིང་རྗེ་དགོངས་ནས་ཕྱག་བརྐྱངས་ཤིང་རེག་སྟེ་ང་རང་འཐད་པ་ཡིན། ཁྱོད་རང་གཙང་མར་གྱུར་ཅིག་ཅེས་གསུངས་མ༌ཐག
MAR 1:42 མི་དེའི་མཛེ་ནད་སོས་ཏེ་གཙང་མར་གྱུར་ཏོ།།
MAR 1:43 དེ་ནས་སྐྱབས་མགོན་ཡེ་ཤུས་མི་དེ་ལ་འདི་སྐད༌དུ། ཁྱོད་ཀྱིས་གཟབ་པར༌གྱིས། གཞན་ལ་ཅི་ཡང་མི་སྨྲ་བར་གྱིས། ཁྱོད་རང་སོང་ནས་རང་གི་ལུས་པོ་མཆོད་དཔོན་ལ་སྟོན༌དང༌། མི་རྣམས་ལ་བདེན་དཔང་བྱེད་པའི་ཆེད་དུ་མོ་ཤེ་ཡིས་བཀའ་གནང་ཡོད་པ༌བཞིན། གཙང་མར་གྱུར་པའི་མཆོད་པ་ཕུལ་ཅིག་ཅེས་ནན་གྱིས་བཀའ་གནང་ཞིང་མྱུར་དུ་བཏང༌མོད།
MAR 1:45 འོན་ཀྱང་མི་དེ་ཕྱི་རུ་སོང་ནས་གཏམ་མང་པོ་སྨྲས་ཤིང་གནས་ཚུལ་འདིའང་ཁྱབ་བསྒྲགས་བྱས༌པས། དེའི་རྗེས༌སུ། སྐྱབས་མགོན་ཡེ་ཤུ་གྲོང་ཁྱེར་གང་ལའང་མངོན་སུམ་དུ་ཕེབས་མ་ནུས་པར་ཕྱི་རོལ་གྱི་དབེན་གནས་སུ་བཞུགས། འོན་ཏེ་མི་རྣམས་ནི་ཕྱོགས་བཞི་མཚམས་བརྒྱད་ནས་ཁོང་གི་དྲུང་དུ་ཡོང་ངོ་།།
MAR 2:1 ཉིན་འགའ་འགོར༌རྗེས། སྐྱབས་མགོན་ཡེ་ཤུ་ཕྱིར་ཀཱ་ཕར་ན་ཧུམ་དུ་ཕེབས་ཤིང་ཁོང་ཉིད་ཀྱི་བཞུགས་གནས་སུ་བཞུགས་པའི་གཏམ་དེ་མི་རྣམས་ཀྱིས་ཐོས༌ནས།
MAR 2:2 མི་མང་པོ་གནས་དེར་འཛོམས་ཤིང་ཐ་ན་སྒོ་ཁར་ཡང་སྡོད་ས་མེད་པ༌དང༌། ཁོང་གིས་མི་རྣམས་ལ་དཀོན་མཆོག་གི་བཀའ་གསུངས༌སོ།།
MAR 2:3 དུས༌དེར། མི་ཁ་ཤས་སྐྱབས་མགོན་ཡེ་ཤུའི་དྲུང་དུ་ཡོང་བ༌དང༌། དེའི་ནང་ནས་མི་བཞི་ཡིས་ཞ་བོ་ཞིག་ཁྱོགས་ཤིང་དུ་ཁུར་ཡོང་བ༌རེད།
MAR 2:4 ཡང་མི་མང་པོ་འདུས་པས་དེ་རྣམས་ཁོང་གི་སྐུ་དྲུང་དུ་འགྲོ་ཐབས་མ་བྱུང༌བར། ཁོང་ཉིད་བཞུགས་སའི་ཁང་པ་དེའི་ཁང་ཀླད་བཀོག་ནས་བརྟོལ་བ༌དང༌། མི་ཞ་བོ་དེ་ཁྱོགས་ཤིང་དང་བཅས་མར༌བཏང༌།
MAR 2:5 སྐྱབས་མགོན་ཡེ་ཤུས་དེ་རྣམས་ཀྱི་དད་སེམས་གཟིགས་ཏེ་ཞ་བོ་དེ་ལ་འདི་སྐད༌དུ། སྙིང་གི༌བུ། ཁྱོད་ཀྱི་སྡིག་པ་བསལ་བ་ཡིན་ཞེས་གསུངས༌སོ།།
MAR 2:6 འོན་ཀྱང་གནས་དེར་ཚོགས་པའི་མཁན་པོ་འགའ་ཞིག་གི་སེམས༌ལ།
MAR 2:7 མི་འདིས་ཅིའི་ཕྱིར་འདི་ལྟར༌སྨྲའམ། ཁོས་དཀོན་མཆོག་གི་དབུ་འཕང་སྨད་ཀྱིན༌འདུག དཀོན་མཆོག་ཁོ་ན་ལས་གཞན་སུ་ཞིག་གིས་སྡིག་པ་བསལ་ནུས་སམ་སྙམ་པ༌རེད།
MAR 2:8 སྐྱབས་མགོན་ཡེ་ཤུས་དེ་མ་ཐག་ཁོ་རྣམས་ཀྱི་བསམ་ཚུལ་མཁྱེན་ཏེ་འདི་སྐད༌དུ། ཅིའི་ཕྱིར་ཁྱོད་ཅག་གི་སེམས་སུ་དེ་ལྟར་བསམས་པ་ཡིན༌ནམ།
MAR 2:9 མི་ཞ་བོ་འདི་ལ་ཁྱོད་ཀྱི་སྡིག་པ་བསལ་བ་ཡིན་ཞེས་ཟེར་བ༌དང༌། ཡར་ལོངས་ལ་ཁྱོད་ཀྱི་ཁྱོགས་ཤིང་ཁུར་ནས་སྐྱོད་ཅིག་ཅེས་ཟེར་བ་གཉིས་ལས་གང་ཞིག༌སླའམ།
MAR 2:10 འོན༌ཀྱང༌། འདི་ནི་ས་སྟེང་དུ་མིའི་བུ་ལ་སྡིག་པ་བསལ་བའི་དབང་ཡོད་པ་ཁྱོད་རྣམས་ཀྱིས་ཤེས་པའི་ཕྱིར་ཡིན་ཞེས་གསུངས༌རྗེས། ཁོང་གིས་ཞ་བོ་དེ་ལ་འདི་སྐད༌དུ།
MAR 2:11 བདག་གིས་ཁྱོད་ལ་སྨྲ་བར་བྱ༌སྟེ། ཡར་ལོངས༌ལ་ཁྱོགས་ཤིང་ཁུར་ནས་ཕྱིར་རང་ཡུལ་དུ་སོང་ཞིག་ཅེས་བཀའ་གནང་མ༌ཐག
MAR 2:12 མི་དེ་ཡར་ལངས་ནས་ཁྱོགས་ཤིང་ཁུར་ཏེ་མི་ཚང་མའི་མིག་མདུན་ནས་སྒོའི་ཕྱི་རུ༌ཕྱིན། དོན་དེར་མི་ཐམས་ཅད་ངོ་མཚར་བར་གྱུར༌ཏེ། དཀོན་མཆོག་ལ་བསྟོད་བསྔགས་བརྗོད་ཅིང་བདག་ཅག་གིས་དོན་འདི་འདྲ་ཞིག་གཏན་ནས་མཐོང་མ་མྱོང་ཞེས་སྨྲས༌སོ།།
MAR 2:13 ཡང་སྐྱབས་མགོན་ཡེ་ཤུ་མཚོ་འགྲམ་དུ་ཕེབས་པ༌དང༌། མི་ཚོགས་ཐམས་ཅད་ཁོང་གི་དྲུང་དུ་འཛོམས༌ཤིང༌། ཁོང་གིས་དེ་རྣམས་ལ་ཆོས༌གསུངས།
MAR 2:14 སྐྱབས་མགོན་ཡེ་ཤུ་ཕེབས་པའི་དུས༌སུ། ཁོང་གིས་ཨལ་ཕཱའི་བུ་ལེ་ཝི་ ཟེར་བ་དེ་ཁྲལ་སྡུད་སར་བསྡད་ཡོད་པ་གཟིགས་ནས་དེ་ལ་འདི་སྐད༌དུ། ཁྱོད་རང་ངའི་རྗེས་སུ་ཤོག་ཅེས་གསུངས་པ༌དང༌། ཁོ་རང་ཡར་ལངས་ཏེ་ཁོང་གི་རྗེས་སུ་འབྲངས༌སོ།།
MAR 2:15 སྐྱབས་མགོན་ཡེ་ཤུས་མི་དེའི་ཁྱིམ་དུ་ཞལ་ཟས་བཞེས་ནས་སྡོད་པའི་དུས༌སུ། ཁྲལ་ལེན་མཁན་དང་མི་སྡིག་ཅན་མང་པོས་ཀྱང་སྐྱབས་མགོན་ཡེ་ཤུ་དང་ཁོང་གི་ཐུགས་སྲས་དང་མཉམ་དུ་བཟའ་བཏུང་སྤྱད་ནས་བསྡད༌ཅིང༌། གནས་དེར་མི་མང་པོ་ཡོད་པ་དང་མི་དེ་རྣམས་ཀྱང་སྐྱབས་མགོན་ཡེ་ཤུའི་རྗེས་སུ་འབྲངས༌སོ།།
MAR 2:16 ཕ་རུ་ཤི་པའི་མཁན་པོ་རྣམས་ཀྱིས་སྐྱབས་མགོན་ཡེ་ཤུས་མི་སྡིག་ཅན་དང་ཁྲལ་ལེན་མཁན་རྣམས་དང་མཉམ་དུ་ཞལ་ཟས་བཞེས་བཞིན་པ་མཐོང༌ཚེ། ཁོང་གི་ཐུགས་སྲས་རྣམས༌ལ། ཁོང་གིས་ཅིའི་ཕྱིར་ཁྲལ་ལེན་མཁན་དང་མི་སྡིག་ཅན་རྣམས་དང་མཉམ་དུ་བཟའ་བཏུང་ལ་རོལ་བ་ཡིན་ནམ་ཞེས༌སྨྲས།
MAR 2:17 སྐྱབས་མགོན་ཡེ་ཤུས་གཏམ་དེ་ཐོས་ནས་འདི་སྐད༌དུ། ལུས་ཁམས་བདེ་བའི་མི་ཡིས་སྨན་པ་བསྟེན་མི་དགོས༌མོད། འོན་ཀྱང་ནད་པས་ད་གཟོད་སྨན་པ་བསྟེན་དགོས་པ༌ཡིན། བདག་ནི་མི་གཞུང་དྲང་རྣམས་འབོད་དུ་འོངས་པ་མ་ཡིན༌པར། མི་སྡིག་ཅན་རྣམས་འབོད་དུ་ཡོང་བ་ཡིན་ཞེས་གསུངས༌སོ།།
MAR 2:18 དེའི་དུས༌སུ། ཡོ་ཧ་ནན་གྱི་སློབ་མ་དང་ཕ་རུ་ཤི་པ་རྣམས་ཀྱིས་སྨྱུང་གནས་སྲུང་བཞིན་ཡོད༌ཅིང༌། མི་འགའ་ཞིག་ཡོང་ནས་སྐྱབས་མགོན་ཡེ་ཤུ༌ལ། ཡོ་ཧ་ནན་གྱི་སློབ་མ་དང་ཕ་རུ་ཤི་པའི་སློབ་མ་རྣམས་ཀྱིས་སྨྱུང་གནས་སྲུང་བཞིན་ཡོད༌ནའང༌། ཁྱེད་ཀྱི་ཐུགས་སྲས་རྣམས་ཀྱིས་སྨྱུང་གནས་མི་སྲུང་བ་ཅི་ཞེས་དྲིས་པ༌ན།
MAR 2:19 སྐྱབས་མགོན་ཡེ་ཤུས་འདི་སྐད༌དུ། སྐུ་མགྲོན་རྣམས་མག་པ་དང་མཉམ་དུ་ཡོད་དུས་སྨྱུང་གནས་སྲུང་ག་ལ༌རུང༌། མག་པ་ཁོ་རྣམས་དང་མཉམ་དུ་ཡོད་དུས་ཁོ་རྣམས་ཀྱིས་ཀྱང་སྨྱུང་གནས་སྲུང་མི༌ཐུབ།
MAR 2:20 འོན་ཀྱང་མག་པ་ཁོ་རྣམས་དང་ཁ་འབྲལ་བའི་དུས་ཤིག་སླེབ་ཡོང༌སྟེ། དུས་དེར་ཁོ་རྣམས་ཀྱིས་སྨྱུང་གནས་བསྲུང་ངེས༌སོ།།
MAR 2:21 སུ་ཞིག་གིས་ཀྱང་རས་གསར་པས་ལྭ་རྙིང་པར་ལྷན་པ་མི་རྒྱག༌སྟེ། ལྷན་པ་བརྒྱབ་ན་ལྭ་རྙིང་པ་དེ་ལས་རལ་ཞིང་སྲུབས་ཀ་ཇེ་ཆེར་འགྲོ་བ༌ཡིན།
MAR 2:22 ཡང་སུ་ཞིག་གིས་ཀྱང་རྒུན་ཆང་གསར་པ་སྐྱི་ཁུག་རྙིང་པའི་ནང་དུ་མི་བླུག༌སྟེ། གལ་ཏེ་བླུགས་ན་སྐྱི་ཁུག་རྙིང་པ་རལ་ཏུ་འཇུག་པ༌དང༌། ཆང་དང་སྐྱི་ཁུག་གཉིས་ཀ་བརླག་པར་འགྱུར་ངེས༌པས། རྒུན་ཆང་གསར་པ་དེ་སྐྱི་ཁུག་གསར་པའི་ནང་དུ་བླུག་དགོས་ཞེས་གསུངས༌སོ།།
MAR 2:23 ངལ་གསོ་བའི་ཉིན༌ལ། སྐྱབས་མགོན་ཡེ་ཤུ་ཞིང་བར་བརྒྱུད་ནས་ཕེབས་པ༌དང༌། ཁོང་གི་ཐུགས་སྲས་རྣམས་ཀྱིས་འབྲུ་ཡི་སྙེ་མ་འཐོག་བཞིན་སོང༌ཞིང༌།
MAR 2:24 ཕ་རུ་ཤི་པ་རྣམས་ན༌རེ། གཟིགས༌དང༌། ཁོ་རྣམས་ཀྱིས་ཅིའི་ཕྱིར་ངལ་གསོ་བའི་ཉིན་ལ་བཀའ་ཁྲིམས་དང་འགལ་བའི་ལས་བྱེད་དམ་ཞེས་སྨྲས་པ༌ལ།
MAR 2:25 ཁོང་གིས་འདི་སྐད༌དུ། དཱ་བིད་འཁོར་དང་བཅས་པའི་ལམ་བྲོ་ཚར་བ་དང་བཀྲེས་ལྟོགས་བྱུང༌སྐབས། ཅི་ཞིག་བྱས་པ་ཁྱོད་ཅག་གིས་བཀླགས་མ་མྱོང༌ངམ།
MAR 2:26 ཨབ་ཡ་ཐཱར་མཆོད་དཔོན་ཆེན་པོ་ཡིན་པའི་དུས༌སུ། ཁོང་ཉིད་དཀོན་མཆོག་གི་བཞུགས་གནས་སུ་སོང༌ནས། སྤྱན་བསྟར་བག་ལེབ་ཟོས་ཤིང་འཁོར་གཡོག་རྣམས་ལའང་བྱིན༌ཏོ། །བག་ལེབ་དེ་ནི་མཆོད་དཔོན་ལས་གཞན་སུས་ཀྱང་བཟའ་མི་རུང་ཞེས་གསུངས་པ༌དང༌།
MAR 2:27 ཡང་འདི་སྐད༌དུ། ངལ་གསོ་བའི་ཉིན་མོ་ནི་མིའི་དོན་དུ་མཛད་པ༌ལས། མི་ནི་ངལ་གསོ་བའི་ཉིན་གྱི་དོན་དུ་མཛད་པ་མ་ཡིན༌ནོ།།
MAR 2:28 དེའི༌ཕྱིར། མིའི་བུ་ནི་ངལ་གསོ་བའི་ཉིན་གྱི་གཙོ་བོའང་ཡིན་ཞེས་གསུངས༌སོ།།
MAR 3:1 དེ་ནས་ཡང་སྐྱབས་མགོན་ཡེ་ཤུ་ཆོས་ཁང་དུ་ཕེབས་ཤིང་གནས་དེ་རུ་ལག་པ་ཡ་གཅིག་ཞ་བའི་མི་ཞིག་ཀྱང༌ཡོད།
MAR 3:2 སྐྱབས་མགོན་ཡེ་ཤུ་ལ་སྙད་འཛུགས་པར་འདོད་པའི་མི་རྣམས་ཀྱིས་ངལ་གསོ་བའི་ཉིན་ལ་ཁོང་གིས་མི་དེའི་ནད་གསོ་མིན་ལ་བརྟག་ཆེད་ལྐོག་ནས་བལྟས་ཏེ་བསྡད༌དོ།།
MAR 3:3 དེ་ནས་སྐྱབས་མགོན་ཡེ་ཤུས་ལག་པ་ཞ་བའི་མི་དེ་ལ་འདི་སྐད༌དུ། ཡར་ལོངས༌དང༌། དཀྱིལ་ནས་སྡོད་ཅིག་ཅེས་བཀའ་གནང༌ཞིང༌།
MAR 3:4 ཡང་མི་དེ་རྣམས་ལ་འདི་སྐད༌དུ། ངལ་གསོ་བའི་ཉིན་ལ་ལས་བཟང་པོའམ་ལས་ངན་པ༌དང༌། སྲོག་སྐྱོབ་པའམ་སྲོག་གཅོད་པ་ལས་གང་ཞིག་བྱས་ན་བཀའ་ཁྲིམས་དང་མཐུན་པ་ཡིན་ནམ་ཞེས་དྲིས་པ༌ན། མི་རྣམས་ཀྱིས་ཁ་ཅི་ཡང་མ་གྲགས༌སོ།།
MAR 3:5 དེ་ནས་སྐྱབས་མགོན་ཡེ་ཤུ་ཐུགས་ཁྲོས་ཏེ་རིམ་གྱིས་མི་དེ་རྣམས་ལ་གཟིགས་ཤིང་དེ་དག་གི་སེམས་གྱོང་པོ་ཡིན་པ་ལ་ཐུགས་སྐྱོ་བར་གྱུར་པ༌དང༌། མི་དེར་ལག་པ་རྐྱོངས་ཤིག་ཅེས་གསུངས་པ་དང་ཁོས་ལག་པ་བརྐྱངས་ཤིང་སོས་པར༌གྱུར།
MAR 3:6 ཕ་རུ་ཤི་པ་རྣམས་ཆོས་ཁང་ལས་ཕྱིར་སོང༌སྟེ། ཧེ་རོ་དཱའི་ཕྱོགས་ཁག་དང་མཉམ་དུ་སྐྱབས་མགོན་ཡེ་ཤུ་དགྲོང་བར་གྲོས་བྱས༌སོ།།
MAR 3:7 དེ་ནས་སྐྱབས་མགོན་ཡེ་ཤུ་དང་ཁོང་གི་ཐུགས་སྲས་རྣམས་མཚོ་འགྲམ་དུ་ཕེབས་པ༌ལ། མི་ཤིན་ཏུ་མང་པོ་ཞིག་ག་ལིལ་ཡུལ་ནས་ཁོང་གི་རྗེས་སུ་འབྲངས༌ཤིང༌།
MAR 3:8 མི་གཞན་མང་པོས་ཀྱང་ཁོང་གིས་མཛད་པའི་དོན་ངོ་མཚར་ཅན་ཐམས་ཅད་ཐོས་ཏེ་ཡ་ཧུ་དཱའི་ཡུལ༌དང༌། ཡེ་རུ་སཱ༌ལེམ། ཨི་དུམ་ཡཱ༌ཡུལ། ཡོར་དན་གཙང་པོའི་ཕ༌རོལ། ད་དུང་ཐཱར་དང་ཚི་ཏུན་སོགས་ཀྱི་ས་ཆ་ནས་ཁོང་གི་དྲུང་དུ་ཡོང༌ངོ༌།།
MAR 3:9 གནས་དེར་མི་མང་ཞིང་མི་རྣམས་འཚང་ཁ་མི་རྒྱག་པའི༌ཕྱིར། ཁོང་གིས་ཐུགས་སྲས་རྣམས་ལ་མཚོ་གྲུ་ཞིག་སྟ་གོན་བྱེད་དུ༌བཅུག
MAR 3:10 ཁོང་གིས་མི་མང་པོའི་ནད་འཇོམས་པར་མཛད༌པས། ན་ཚ་ཡོད་པ་ཐམས་ཅད་ཀྱིས་ཁོང་ལ་རེག་པའི་ཆེད་དུ་འཚང་ཁ་བརྒྱབ་པ༌རེད།
MAR 3:11 གདོན་འདྲེ་རྣམས་དུས་ནམ་ཡང་ཁོང་ལ་མཇལ་བ་ཙམ་གྱིས་ཁོང་གི་དྲུང་དུ་ཕྱག་འཚལ་བཞིན་སྐད་ཆེན་པོ་བརྒྱབ༌སྟེ། ཁྱེད་ནི་དཀོན་མཆོག་གི་སྲས་ཡིན་ཞེས༌སྨྲས།
MAR 3:12 སྐྱབས་མགོན་ཡེ་ཤུས་དེ་རྣམས་ལ་རང་ཉིད་ནི་སུ་ཡིན་པ་མི་གཞན་ལ་མི་བསྒྲག་པར་ནན་གྱིས་བསྐུལ༌ཏོ།།
MAR 3:13 དེ་ནས་སྐྱབས་མགོན་ཡེ་ཤུ་རི་བོ་ཞིག་ཏུ་ཕེབས་ཏེ་རང་ཉིད་ཀྱི་དགོངས་པ་ལྟར་མི་ལ་ཞལ་འབོད་གནང་ཞིང་མི་དེ་རྣམས་ཀྱང་ཁོང་གི་དྲུང་དུ༌ཡོང༌།
MAR 3:14 ཁོང་གིས་ཐུགས་སྲས་བཅུ་གཉིས་བསྐོས༌ཏེ། དུས་རྒྱུན་དུ་ཁོང་དང་མཉམ་དུ་སྡོད་པ༌དང༌། ཁོ་རྣམས་ཀྱང་ཆོས་བསྒྲག་པར་མངག་ངེས་པར་མ༌ཟད།
MAR 3:15 གདོན་འདྲེ་ཕྱི་རུ་སྐྲོད་པའི་དབང་ཡང་གནང་བའི་ཕྱིར༌རོ།།
MAR 3:16 ཁོང་གིས་བསྐོས་པའི་མི་བཅུ་གཉིས་པོ་ནི་པེ་ཏྲོ་ཞེས་བཏགས་པའི་སི་མོན༌དང༌།
MAR 3:17 ཟེ་བད་ཡཱ་ཞེས་བྱ་བའི་བུ་ཡ་ཀོབ༌དང༌། ཡ་ཀོབ་ཀྱི་སྤུན་ཡོ་ཧ༌ནན། དེ་གཉིས་ཀྱི་མིང་ལ་པཱ་ནེར་གེ་ཞེས་བཏགས་ཤིང་འབྲུག་སྒྲའི་བུ་ཞེས་པའི་དོན༌ཡིན།
MAR 3:18 གཞན༌ཡང༌། ཨན་དྲི་ཡཱ༌དང༌། ཕི༌ལིབ། པཱར་ཐོ་ལོ༌མཱ། མད༌ཐཱ། ཐོ༌མཱ། ཨལ་ཕཱའི་བུ་ཡ་ཀོབ༌དང༌། ཐད༌དཱ། བརྩོན་འགྲུས་ཅན་སི་མོན༌དང༌།
MAR 3:19 ཕྱིས་སུ་ཁོང་ལ་ངོ་ལོག་བྱེད་མཁན་ཨི་སི་ཀར་རེའི་ཡུ་དཱ་ཞེས་པ་བཅས་ཡིན༌ནོ།།
MAR 3:20 དེ་ནས་སྐྱབས་མགོན་ཡེ་ཤུ་རང་ཉིད་ཀྱི་བཞུགས་གནས་སུ་ཕེབས་པ༌ན། མི་ཚོགས་སླར་ཡང་འཛོམས་པས་ཁོང་རྣམས་ལ་ཞལ་ཟས་བཞེས་ཁོམ་ཡང་མ་བྱུང༌ངོ༌།།
MAR 3:21 ཁོང་གི་ཁྱིམ་མི་རྣམས་ཀྱིས་གཏམ་དེ་ཐོས་ནས་ཁོང་སྨྱོས་པ་རེད་ཅེས་སྨྲས་པ་དང་ཁོང་ཉིད་འཛིན་དུ་སོང༌།
MAR 3:22 ཡེ་རུ་སཱ་ལེམ་ནས་ཡོང་བའི་མཁན་པོ་རྣམས་ཀྱིས་ཁོང་ལ་པེ་ཨལ་བཟི་པད་ཞུགས་ཤིང་ཁོང་གིས་བདུད་ཀྱི་རྒྱལ་པོར་བརྟེན་ནས་གདོན་འདྲེ་སྐྲོད་བཞིན་འདུག་ཅེས་སྨྲས༌སོ།།
MAR 3:23 དེ་ནས་སྐྱབས་མགོན་ཡེ་ཤུས་མཁན་པོ་རྣམས་བོས་ཏེ་དཔེའི་སྒོ་ནས་འདི་སྐད༌དུ། བདུད་སཱ་ཏན་གྱིས་སཱ་ཏན་རང་ཉིད་ཇི་ལྟར་སྐྲོད་ནུས༌སམ།
MAR 3:24 གལ་ཏེ་རྒྱལ་ཁམས་ཤིག་ལ་ནང་འཁྲུག་བྱུང་ན་རྒྱལ་ཁམས་དེ་བརྟན་པོར་གནས་མི་ཐུབ༌ལ།
MAR 3:25 ཁྱིམ་ཚང་ཞིག་ལ་ནང་འཁྲུག་བྱུང་ན་ཁྱིམ་ཚང་དེ་ཡང་བརྟན་པོར་གནས་མི༌ཐུབ།
MAR 3:26 གལ་ཏེ་བདུད་སཱ་ཏན་གྱིས་རང་གིས་རང་ལ་རྒོལ་ན་བདུད་དེ་བརྟན་པོར་གནས་མི་ཐུབ་ཅིང་བརླག་པར་འགྱུར༌རོ།།
MAR 3:27 མི་སྟོབས་ཅན་གྱི་ཁྱིམ་དུ་འཛུལ་ནས་རྒྱུ་ནོར་འཕྲོག་ཐུབ་མཁན་སུ་ཡང་མེད༌དེ། ཐོག་མར་མི་དེ་བཟུང་ནས་བཀྱིགས༌ཚེ། ད་གཟོད་མི་དེའི་ཁྱིམ་ཚང་འཕྲོག་ནུས་པ༌ཡིན།
MAR 3:28 ངས་ཁྱོད་རྣམས་ལ་བདེན་པར་སྨྲ༌སྟེ། མིའི་སྡིག་པ་ཐམས་ཅད་དང་སྐུར་བ་ཅི་ཞིག་བཏབ་ཀྱང་སྡིག་པ་བསལ༌ནའང༌།
MAR 3:29 དམ་པའི་ཐུགས་ཉིད་ལ་སྐུར་བ་འདེབས་མཁན་དེའི་སྡིག་པ་ནི་ནམ་ཡང་བསལ་བར་མི་འགྱུར༌ལ། རྒྱུན་ནས་རྒྱུན་དུ་སྡིག་པ་འཁུར་དགོས་ཞེས༌གསུངས།
MAR 3:30 ཁོང་གིས་འདི་ལྟར་གསུངས་དོན་ནི་མི་དེ་རྣམས་ཀྱིས་ཁོང་ཉིད་གདོན་འདྲེས་བཟུང་འདུག་ཅེས་སྨྲས་པའི་ཕྱིར༌རོ།།
MAR 3:31 དུས༌དེར། སྐྱབས་མགོན་ཡེ་ཤུའི་ཡུམ་དང་ཁོང་གི་སྐུ་མཆེད་རྣམས་སླེབས༌ཏེ། ཕྱི་རོལ་ཏུ་བསྡད་ནས་མི་ཞིག་ཁོང་འབོད་དུ༌མངགས།
MAR 3:32 མི་མང་པོ་ཁོང་གི་མཐའ་བསྐོར་ནས་བསྡད་ཡོད༌ཅིང༌། དེ་རྣམས་ན༌རེ། ཁྱེད་ཀྱིས་གཟིགས༌དང༌། ཁྱེད་ཀྱི་ཡུམ་དང་སྐུ་མཆེད་རྣམས་ཀྱིས་སྒོའི་ཕྱི་རོལ་ནས་ཁྱེད་རང་འཚོལ་བཞིན་འདུག་ཅེས་ཞུས་པ༌ལ།
MAR 3:33 ཁོང་གིས་འདི་སྐད༌དུ། ངའི་མ་དང་ངའི་སྤུན་ནི་སུ་ཡིན་ནམ་ཞེས་གསུང༌བཞིན།
MAR 3:34 མཐའ་སྐོར་གྱི་མི་རྣམས་ལ་གཟིགས་ཏེ་འདི་སྐད༌དུ། ལྟོས༌དང༌། ངའི་མ་དང་ངའི་སྤུན་ནི་མི་འདི་དག༌ཡིན།
MAR 3:35 དཀོན་མཆོག་གི་དགོངས་པ་ལྟར་སྒྲུབ་མཁན་ཐམས་ཅད་ནི་ངའི་མ་དང༌སྤུན། ངའི་མིང་སྲིང་བཅས་ཡིན་ཞེས་གསུངས༌སོ།།
MAR 4:1 དེ་ནས་ཡང་སྐྱབས་མགོན་ཡེ་ཤུས་མཚོ་འགྲམ་ནས་མི་དེ་རྣམས་ལ་ཆོས་གསུངས༌ཤིང༌། མི་ཤིན་ཏུ་མང་པོའང་གནས་དེར་འཛོམས༌པས། ཁོང་ཉིད་གྲུའི་ནང་དུ་ཕེབས་ཏེ་བཞུགས་པ་དང་མི་ཐམས་ཅད་མཚོ་འགྲམ་དུ༌བསྡད།
MAR 4:2 ཁོང་གིས་དཔེའི་སྒོ་ནས་ཆོས་མང་པོ་གསུངས་ཤིང་དེ་རྣམས་ལ་འདི་སྐད༌དུ།
MAR 4:3 ཁྱོད་ཅག་གིས་ཉོན༌ཅིག ཞིང་འདེབས་མཁན་ཞིག་ཕྱི་རོལ་ཏུ་ཞིང་འདེབས་སུ་སོང་བ༌དང༌།
MAR 4:4 ས་བོན་གཏོར༌སྐབས། ས་བོན་ཁ་ཤས་ལམ་ཁར་ཐོར་ཞིང་བྱ་རྣམས་ཡོང་ནས་ཟོས་པ༌དང༌།
MAR 4:5 ས་བོན་ཁ་ཤས་ས་ཉུང་སའི་རྡོ་གསེབ་ཏུ་ཐོར་ཞིང་སའི་གཏིང་མི་ཟབ་པས་ཡར་སྐྱེས་པ་མགྱོགས༌ཀྱང༌།
MAR 4:6 ཉི་མ་ཤར་ཚེ་རྙིད་ཅིང་རྩ་བ་མ་རྒྱས་པས་བསྐམས་པ༌རེད།
MAR 4:7 ས་བོན་ཁ་ཤས་ཚེར་མའི་གསེབ་ལ་ཐོར་ཞིང་ཚེར་མ་སྐྱེས་ཏེ་མར་མནན་ནས་འབྲས་བུ་མ་སྨིན༌ལ།
MAR 4:8 ཡང་ས་བོན་ཁ་ཤས་ས་གཤིན་ནང་དུ་ཐོར་ཞིང་ཆེར་སྐྱེས་ནས་འབྲས་བུ་སྨིན༌ཏེ། དེ་དག་ལས་ཁ་ཤས་ལྡབ་སུམ་ཅུ༌དང༌། ཁ་ཤས་ལྡབ་དྲུག༌ཅུ། ཁ་ཤས་ལྡབ་བརྒྱ་བཅས་སྨིན་པ༌ཡིན།
MAR 4:9 རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
MAR 4:10 དེ་ནས་སྐྱབས་མགོན་ཡེ་ཤུ་གཅིག་པུ་བཞུགས་པའི་དུས༌སུ། ཁོང་གི་ཐུགས་སྲས་བཅུ་གཉིས་པོ་དང་རྗེས་འབྲང་པ་རྣམས་ཀྱིས་ཁོང་ལ་དཔེ་འདིའི་ནང་དོན་ཅི་ཡིན་དྲིས༌ཚེ།
MAR 4:11 ཁོང་གིས་འདི་སྐད༌དུ། དཀོན་མཆོག་གི་རྒྱལ་སྲིད་ཀྱི་གསང་བ་ནི་ཁྱོད་ཅག་ལ་མངོན༌ཡང༌། ཕྱི་ཕྱོགས་པ་རྣམས་ལ་དོན་ཐམས་ཅད་དཔེ་རུ་བཀོད་ནས་བརྗོད་པ༌ཡིན།
MAR 4:12 དེ་ནི་མི་དེ་རྣམས་ཀྱིས་མིག་གིས་མཐོང་ཡང་མི་ཤེས༌ལ། རྣ་བས་ཐོས་ཀྱང་དོན་མི་རྟོགས་པའི་ཕྱིར་ཡིན༌ལ། དེ་ལྟར་མིན་ཚེ་ཁོ་རྣམས་ཕྱིར་འཁོར་ཞིང་སྡིག་པའང་བསལ་ངེས་ཡིན་ཞེས་གསུངས༌སོ།།
MAR 4:13 ཡང་ཁོང་གིས་འདི་སྐད༌དུ། ཁྱོད་ཅག་གིས་དཔེ་འདིའི་དོན་ཡང་མི་ཤེས༌སམ། དེས་ན་དཔེ་ཐམས་ཅད་ཀྱི་དོན་ཇི་ལྟར་ཤེས་ཐུབ༌བམ།
MAR 4:14 དེ་ནི་ཞིང་འདེབས་མཁན་གྱིས་བཏབ་པ་ནི་དཀོན་མཆོག་གི་བཀའ༌ཡིན།
MAR 4:15 ས་བོན་ལམ་ཁར་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས་མ་ཐག་ཏུ་བདུད་སཱ་ཏན་ཡོང་ནས་མི་དེའི་སེམས་ནང་གི་བཀའ་ཕྲོགས་ཏེ་ཁྱེར་སོང་བ་རྣམས༌ཡིན།
MAR 4:16 དེ་བཞིན་དུ་ས་ཉུང་སའི་རྡོ་གསེབ་ཏུ་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས་པ་ཙམ་གྱིས་དགའ་ཞིང་དང་དུ་བླངས༌ནའང༌།
MAR 4:17 སེམས་སུ་རྩ་བ་མ་རྒྱས་པས་དུས་ཡུན་ཐུང་ངུ་ལ་གནས་ཀྱང་བཀའ་དེའི་རྐྱེན་གྱིས་དཀའ་སྡུག་དང་གནོད་འཚེ་བྱུང་མ་ཐག་དད་པ་ལོག་པ་རྣམས༌ཡིན།
MAR 4:18 ཡང་ཚེར་མའི་གསེབ་ལ་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས༌རྗེས།
MAR 4:19 འཇིག་རྟེན་གྱི་སེམས་ཁུར༌དང༌། རྒྱུ་ནོར་གྱི་བསླུ༌བྲིད། འདོད་ཆགས་སྣ་ཚོགས་བཅས་ཀྱི་དབང་གིས་བཀའ་མནན་ནས་རང་སེམས་སུ་འབྲས་བུ་སྨིན་མ་ཐུབ་པ་རྣམས༌ཡིན།
MAR 4:20 ཡང་ས་གཤིན་ནང་དུ་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས་ཤིང་སེམས་སུ་བླངས་པ་དང་འབྲས་བུ་སྨིན་ཐུབ་པ་རྣམས་ཡིན༌ཏེ། འབྲས་བུ་ཁ་ཤས་ལྡབ་སུམ་ཅུ༌དང༌། ཁ་ཤས་ལྡབ་དྲུག༌ཅུ། ཁ་ཤས་ལྡབ་བརྒྱ་བཅས་སྨིན་པ་ཡིན་ཞེས་གསུངས༌སོ།།
MAR 4:21 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། མི་ཡིས་སྒྲོན་མེ་ཁྱེར་འོངས་པ་ནི་བྲེའམ་མལ་ཁྲིའི་འོག་ཏུ་འཇོག་པའི་ཕྱིར་མ་ཡིན་པར་སྒྲོན་སྟེགས་སྟེང་དུ་འཇོག་པའི་ཕྱིར་ཡིན༌ལ།
MAR 4:22 དེ་ནི་སྦས་པའི་དོན་ཐམས་ཅད་མི་མངོན་པ་ཅི་ཡང་མེད༌ལ། གསང་བའི་དོན་ཐམས་ཅད་ཀྱང་མི་མངོན་པ་ཅི་ཡང༌མེད།
MAR 4:23 རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
MAR 4:24 ཡང་ཁོང་གིས་འདི་སྐད༌དུ། ཁྱོད་ཅག་གིས་རྣ་བས་ཐོས་པ་དག་ལའང་གཟབ་པར༌གྱིས། ཁྱོད་ཅག་གིས་སྣོད་ཅི་ལྟ་བུ་ལས་མི་གཞན་ལ་བྱིན༌ན། ཁྱོད་ཅག་ལའང་དེ་འདྲ་ཞིག་གནང་བར་མ༌ཟད། དེ་ལས་ལྷག་པ་ཞིག་ཀྱང་གནང་བར༌འགྱུར།
MAR 4:25 རྒྱུ་མཚན་ནི་སུ་ཞིག་ལ་ཡོད་པ་དེ་ལ་ད་དུང་ཡང་གནང་ངེས༌ཤིང༌། སུ་ཞིག་ལ་མེད་པ་དེ་ལས་ཉུང་ཙམ་ཡོད་པ་དེ་ཡང་ཕྱིར་ལེན་པར་འགྱུར་ཞེས་གསུངས༌སོ།།
MAR 4:26 ཡང་ཁོང་གིས་འདི་སྐད༌དུ། དཀོན་མཆོག་གི་རྒྱལ་སྲིད་ནི་མིས་ཞིང་ལ་ས་བོན་བཏབ་པ་དང་འདྲ༌སྟེ།
MAR 4:27 མཚན་མོར་གཉིད་ཅིང་ཉིན་མོར་ཡར་ལངས༌ཤིང༌། ས་བོན་ལ་རིམ་བཞིན་མྱུ་གུ་འབུས་ཏེ་སྐྱེས་པ༌དང༌། མི་དེས་ཇི་ལྟར་བྱུང་བའང་མི༌ཤེས།
MAR 4:28 ས་གཞིས་འབྲུ་རིགས་བསྐྱེད་པ་ནི་རང་བཞིན་གྱིས་ཡིན༌ཏེ། ཐོག་མར་མྱུ་གུ་འབུས་པ་དང་དེ་ནས་སྙེ་མ་ཐོགས༌པ། མཇུག་མཐར་སྙེ་མ་ལས་འབྲུ་རྡོག་སྨིན༌པ།
MAR 4:29 ཐ་མར་འབྲུ་རིགས་སྨིན་ནས་འབྲེག་རན་དུ་སླེབས༌ཚེ། ས་བོན་འདེབས་མཁན་གྱིས་ཟོར་བས་འབྲེག་པ་ཡིན་ཞེས་གསུངས༌སོ།།
MAR 4:30 ཡང་ཁོང་གིས་འདི་སྐད༌དུ། དཀོན་མཆོག་གི་རྒྱལ་སྲིད་ལ་གང་ཞིག་གིས་བསྡུར་ཐུབ༌བམ། དཔེ་གང་ཞིག་གིས་མཚོན་ནུས༌སམ།
MAR 4:31 དེ་ནི་ཡུངས་འབྲུའི་ས་བོན་ཞིག་དང་འདྲ༌སྟེ། ཞིང་འདེབས་པའི་དུས༌སུ་ས་སྟེང་གི་ས་བོན་གཞན་ཐམས་ཅད་ལས་ཆུང༌ཡང༌།
MAR 4:32 ས་བོན་བཏབ་རྗེས་ཆེར་སྐྱེས་ནས་སྔོ་ཚལ་གྱི་རིགས་སྣ་ཚོགས་ལས་ཆེ་ཞིང་ཡལ་ག་ཆེན་པོ་ཐོགས༌ཏེ། ནམ་མཁའི་བྱ་ཡིས་ཀྱང་དེའི་གྲིབ་བསིལ་འོག་ཏུ་ཚང་བཟོ་བ་ཡིན་ཞེས་གསུངས༌སོ།།
MAR 4:33 སྐྱབས་མགོན་ཡེ་ཤུས་དཔེ་དེ་ལྟ་བུ་མང་པོ་བཀོད་ནས་མི་རྣམས་ཀྱིས་དཔེ་དོན་ཅི་ཙམ་ཤེས་ནུས་པ་བཞིན་དཀོན་མཆོག་གི་བཀའ༌གསུངས།
MAR 4:34 ཁོང་གིས་དཔེ་མ་བཀོད་པར་དེ་རྣམས་ལ་ཅི་ཡང་མ་གསུངས༌མོད། འོན་ཀྱང་མི་གཞན་མེད་པའི་དུས་སུ་དཔེ་རྣམས་ཀྱི་དོན་ཐམས་ཅད་ཐུགས་སྲས་རྣམས་ལ་གསུངས༌སོ།།
MAR 4:35 ཉིན་དེའི་མཚན༌མོར། སྐྱབས་མགོན་ཡེ་ཤུས་ཐུགས་སྲས་རྣམས་ལ་བདག་ཅག་མཚོའི་ཕ་རོལ་ཏུ་འགྲོའོ་ཞེས་གསུངས༌ཤིང༌།
MAR 4:36 ཐུགས་སྲས་རྣམས་ཀྱང་མི་ཚོགས་དང་ཁ་བྲལ་ཏེ་སྐྱབས་མགོན་ཡེ་ཤུ་བཞུགས་ཡོད་པའི་མཚོ་གྲུ་བཏང་ནས་མཉམ་དུ་ཕེབས༌ཤིང༌། གྲུ་གཞན་དག་ཀྱང་ཁོང་དང་འགྲོགས་ནས་སོང༌ངོ༌།།
MAR 4:37 གློ་བུར་རླུང་ཆེན་གཡུགས་ཏེ་རྦ་རླབས་གྲུའི་ནང་དུ་བརྒྱབ་པ་དང་མཚོ་གྲུའི་ནང་དུ་ཆུས་འགེང་བཞིན༌ཡོད།
MAR 4:38 སྐྱབས་མགོན་ཡེ་ཤུ་མཚོ་གྲུའི་མཇུག་ཏུ་སྔས་མགོར་སྔས་ཏེ་གཟིམས་པ༌ལ། ཐུགས་སྲས་རྣམས་ཀྱིས་ཁོང་གཟིམས་ལས་བསླངས༌ཏེ། སློབ་དཔོན༌ལགས། བདག་ཅག་འཆི་ལ༌ཉེའོ། །ཁྱེད་ཀྱིས་ཐུགས་ཁུར་མི་མཛད་དམ་ཞེས་ཞུས་པ༌དང༌།
MAR 4:39 ཁོང་སད་དེ་རླུང་ལ་བཀའ་བཀྱོན་མཛད་ཅིང་མཚོ་ལ་མཚམས་ཞོག༌ཅིག ཞི་བར་གྱུར་ཅིག་ཅེས་གསུངས་མ༌ཐག རླུང་གཡུག་མཚམས་ཆད་ནས་ཡོངས་སུ་ཞི་བར་གྱུར༌ཏོ།།
MAR 4:40 དེ་ནས་ཁོང་གིས་ཐུགས་སྲས་རྣམས་ལ་འདི་སྐད༌དུ། ཁྱོད་རྣམས་ཅིའི་ཕྱིར་འཇིགས༌སམ། ཁྱོད་ཅག་ལ་ད་དུང་དད་པ་མེད་དམ་ཞེས་གསུངས་པ༌དང༌།
MAR 4:41 ཁོ་རྣམས་ཤིན་ཏུ་འཇིགས་ཤིང་སྐྲག་སྟེ་ཕན་ཚུན་ལ་འདི་ནི་སུ་ཡིན༌ནམ། རླུང་དང་མཚོ་ཡིས་ཀྱང་ཁོང་གི་བཀའ་ལ་མཉན་པ་རེད་ཅེས་སྨྲས༌སོ།།
MAR 5:1 དེ་ནས་ཁོང་རྣམས་མཚོའི་ཕ་རོལ་གྱི་གེ་ར་སཱ་ཡུལ་དུ་ཕེབས༌ཤིང༌།
MAR 5:2 སྐྱབས་མགོན་ཡེ་ཤུ་མཚོ་གྲུ་ལས་བབས་མ༌ཐག དུར་ཁྲོད་ནས་གདོན་འདྲེས་བཟུང་བའི་མི་ཞིག་ཐོན་ཏེ་ཁོང་ལ་མཇལ་བ༌དང༌།
MAR 5:3 མི་དེ་ནི་རྒྱུན་དུ་དུར་ཁྲོད་དུ་བསྡད་ཡོད༌ཅིང༌། མི་སུས་ཀྱང་ཁོ་བཟུང་ནས་བཀྱིགས་མ་ནུས༌ཤིང༌། ཐ་ན་ལྕགས་ཐག་གིས་ཀྱང་བཀྱིག་མི་ནུས༌སོ།།
MAR 5:4 ཅིའི་ཕྱིར་ཞེ༌ན། མི་རྣམས་ཀྱིས་ཐེངས་མང་པོར་ཁོ་རང་ལྕགས་ཐག་གིས་བཀྱིགས་ཤིང་ལྕགས་སྒྲོག་བརྒྱབ་མྱོང༌ནའང༌། ཁོས་ལྕགས་ཐག་བཅད་ཅིང་ལྕགས་སྒྲོག་ཀྱང་དུམ་བུར་བཏང་བས་སུས་ཀྱང་ཁོ་འདུལ་མ༌ནུས།
MAR 5:5 ཁོས་ཉིན་མཚན་ཀུན་ཏུ་དུར་ཁྲོད་དང་རི་གསེབ་ནས་སྐད་ངན་སྒྲོག་ཅིང་རྡོ་ཡིས་རང་གི་ལུས་ལ་རྒྱག༌གོ།
MAR 5:6 ཁོས་རྒྱང་རིང་ནས་སྐྱབས་མགོན་ཡེ་ཤུ་མཐོང་སྟེ་བརྒྱུགས་ཡོང་ནས་ཁོང་ལ་ཕྱག་བཙལ་ཏོ།།
MAR 5:7 སྐྱབས་མགོན་ཡེ་ཤུས་དེ་སྔོན་གདོན་འདྲེ་དེ་ལ་འདི་སྐད༌དུ། གདོན་འདྲེ་ཁྱོད་མི་འདི་ལས་ཕྱིར་བུད་ཅིག་ཅེས་བཀའ་བསྩལ་ཡོད༌པས། དེས་སྐད་ཆེན༌པོས། ཀྱེ། བླ་ན་མེད་པའི་དཀོན་མཆོག་གི་སྲས་ཡེ་ཤུ༌ལགས། ངེད་གཉིས་ཀྱི་བར་དུ་འབྲེལ་བ་ཅི་མཆིས༌སམ། ངས་དཀོན་མཆོག་དཔང་དུ་བཙུགས་ནས་ཁྱེད་ལ༌ཞུ། ང་རང་སྡུག་ལ་མི་སྦྱོར་བར་མཛོད་ཅེས་ཞུས༌སོ།།
MAR 5:9 དེ་ནས་ཁོང་གིས་མི་དེ་ལ་ཁྱོད་ཀྱི་མིང་ལ་ཅི་ཟེར་ཞེས་དྲིས་པ༌ན། ཁོ་ན༌རེ། ངེད་ཅག་གྲངས་ཀ་མང་བའི་རྐྱེན་གྱིས་ངའི་མིང་ལ་དཔུང་ཚོགས་ཟེར་ཞེས་ཞུས་པ༌དང༌།
MAR 5:10 གདོན་འདྲེ་རྣམས་གནས་འདི་ནས་ཡུལ་གཞན་དུ་མི་བསྐྲོད་པའི་ཕྱིར་ཁོང་ལ་ཞུ་བ་ནན་གྱིས་ཞུས༌སོ།།
MAR 5:11 དེའི་ཚེ་རི་སྒང་ནས་ཕག་ཁྱུ་ཆེན་པོ་ཞིག་འཚོ་བཞིན་ཡོད་པ༌དང༌།
MAR 5:12 གདོན་འདྲེ་རྣམས་ཀྱིས་སྐྱབས་མགོན་ཡེ་ཤུ་ལ་ངེད་ཅག་ཕག་ཁྱུའི་ནང་དུ་འཇུག་པར་མཛོད་ཅེས་ཞུ་བ་ཞུས་པ༌ན།
MAR 5:13 ཁོང་གིས་ཀྱང་དེ་རྣམས་ཀྱི་ཞུ་བ་ལྟར་གནང༌བས། གདོན་འདྲེ་རྣམས་ཕྱི་རུ་ཐོན་ཏེ་ཕག་གི་ནང་དུ་ཞུགས་པ༌དང༌། ཕག་ཉིས་སྟོང་ཙམ་ཡོད་པ་རྣམས་གཡང་གཟར་དུ་བརྒྱུགས་ཤིང་མཚོ་ནང་དུ་ལྷུང་སྟེ་ནུབ་ནས༌ཤིའོ།།
MAR 5:14 དེ་ནས་ཕག་རྫི་རྣམས་བྲོས་ནས་གྲོང་ཁྱེར་དང་ཡུལ་འཁོར་གྱི་མི་རྣམས་ལ་གནས་ཚུལ་དེ་བཤད་པས་མི་རྣམས་ཅི་བྱུང་བར་བལྟ་རུ༌ཡོང༌།
MAR 5:15 ཁོ་རྣམས་སྐྱབས་མགོན་ཡེ་ཤུའི་དྲུང་དུ་སླེབས༌དུས། དེ་སྔོན་དཔུང་ཚོགས་ཞེས་པའི་གདོན་འདྲེས་བཟུང་བའི་མི་དེ་དྲན་པ་སོས་ཤིང་ལུས་ལ་ལྭ་བ་གྱོན་ནས་ཙོག་པུར་བསྡད་ཡོད་པ་མཐོང་སྟེ་འཇིགས་སྣང་སྐྱེས༌སོ།།
MAR 5:16 གནས་ཚུལ་དེ་མཐོང་མཁན་རྣམས་ཀྱིས་གདོན་འདྲེས་བཟུང་བའི་མི་དང་ཕག་ཁྱུ་གཉིས་ལ་བྱུང་བའི་དོན་དེ་མི་ཚོགས་ལ་སྨྲས་པ༌དང༌།
MAR 5:17 མི་ཚོགས་ཀྱིས་སྐྱབས་མགོན་ཡེ་ཤུ་ཁོ་རྣམས་ཀྱི་ཡུལ་དང་འབྲལ་དགོས་པར་ཞུ་བ་བྱས༌སོ།།
MAR 5:18 དེ་ནས་སྐྱབས་མགོན་ཡེ་ཤུ་མཚོ་གྲུའི་ནང་དུ་ཕེབས་པའི་དུས༌སུ། སྔར་གདོན་འདྲེས་བཟུང་བའི་མི་དེས་ཁོང་དང་ལྷན་དུ་འགྲོ་རུ་འཇུག་པར་ཞུ་བ་ཞུས༌ཀྱང༌།
MAR 5:19 ཁོང་གིས་ཁས་མ་བླངས་པར་མི་དེ་ལ་འདི་སྐད༌དུ། ཁྱོད་རང་ཡུལ་དུ་སོང༌དང༌། གཙོ་བོས་ཁྱོད་ལ་དོན་ཆེན་ཅི་ལྟ་བུ་མཛད་པ་དང་ཇི་ལྟར་སྙིང་རྗེ་གནང་བའི་དོན་དེ་རྣམས་རང་གི་གཉེན་ཉེ་རྣམས་ལ་ཤོད་ཅིག་ཅེས་བཀའ་གནང༌ངོ༌།།
MAR 5:20 དེ་ནས་མི་དེ་དི་ཁ་པའོ་ལེའི་མངའ་ཁོངས་སུ་སོང་ནས་སྐྱབས་མགོན་ཡེ་ཤུས་ཁོ་ལ་ཕན་ཆེན་པོ་ཅི་ལྟ་བུ་བཏགས་པ་རྣམས་བསྒྲགས་ཤིང་མི་ཐམས་ཅད་ངོ་མཚར་བར་གྱུར༌ཏོ།།
MAR 5:21 ཡང་སྐྱབས་མགོན་ཡེ་ཤུ་མཚོ་གྲུར་བཞུགས་ཏེ་མཚོའི་ཕ་རོལ་ནས་ཕྱིར་ཕེབས་པ༌ན། མི་ཤིན་ཏུ་མང་པོ་ཁོང་གི་དྲུང་དུ་འདུས་ཤིང་ཁོང་ཉིད་མཚོ་འགྲམ་དུ་བཞུགས༌སོ།།
MAR 5:22 དེ་ནས་ཆོས་ཁང་གི་དབུ་འཛིན་པ་ཡ་ཨིར་ཟེར་བ་དེ་སྐྱབས་མགོན་ཡེ་ཤུར་མཇལ་དུ་ཡོང་བ་དང་ཁོང་གི་ཞབས་དྲུང་དུ་ཕྱག་བཙལ་ཏེ་ན༌རེ།
MAR 5:23 ངའི་བུ་མོ་ཆུང་བ་དེ་འཆི་ལ་ཉེ༌བས། ཁོ་མོ་ནད་ལས་ཐར་ཏེ་གསོན་པའི༌ཕྱིར། ཁྱེད་རང་ཕེབས་ནས་ཁོ་མོའི་ལུས་སྟེང་དུ་ཕྱག་འཇོག་པར་མཛོད་ཅེས་ཞུ་བ་ཡང་ཡང་བྱས་པ༌ལ།
MAR 5:24 སྐྱབས་མགོན་ཡེ་ཤུའང་ཁོ་དང་མཉམ་དུ་ཕེབས་པ་དང་མི་ཤིན་ཏུ་མང་པོའང་ཁོང་གི་རྗེས་སུ་འབྲངས་ནས་འཚང་ཁ་བརྒྱབ་ཅིང་མཐའ་བསྐོར༌ཏོ།།
MAR 5:25 དེའི༌ཚེ། ཁྲག་འཛིར་བའི་མོ་ནད་བྱུང་སྟེ་ལོ་བཅུ་གཉིས་འགོར་བའི་བུད་མེད་ཅིག་ཡོད་པ༌ལ།
MAR 5:26 སྨན་པ་མང་པོར་བསྟེན་ནས་སྡུག་བསྔལ་མང་པོ་མྱངས༌ཤིང༌། ཁོ་མོར་ཅི་ཡོད་པ་ཐམས་ཅད་བཀོལ་ཚར་ནའང་ཕན་པ་ཅི་ཡང་མེད་པར་ནད་ཇེ་སྡུག་ལ༌སོང༌།
MAR 5:27 ཁོ་མོས་སྐྱབས་མགོན་ཡེ་ཤུའི་སྐོར་ཐོས༌ཏེ། མི་ཚོགས་ཀྱི་དཀྱིལ་ནས་ཁོང་གི་སྐུ་རྒྱབ་ཏུ་ཡོང་སྟེ་ན་བཟའ་ལ་རེག༌གོ།
MAR 5:28 དེ་ནི་ཁོ་མོས་སེམས་སུ་ངས་ཁོང་གི་ན་བཟའ་ལ་རེག་ན་ང་རང་ནད་ལས་ཐར་ངེས་ཡིན་སྙམ་པ༌རེད།
MAR 5:29 དེ་མ་ཐག་ཏུ་ཁོ་མོའི་ཁྲག་འཛིར་མཚམས་ཆད་དེ་རང་ལུས་ཀྱི་ནད་སོས་པའང་ཤེས༌སོ།།
MAR 5:30 སྐྱབས་མགོན་ཡེ་ཤུས་ཀྱང་དེ་མ་ཐག་རང་གི་སྐུ་གཟུགས་ནས་ནུས་མཐུ་ཞིག་ཕྱིར་ཐོན་པ་ཐུགས་ལ་མཁྱེན༌ཏེ། མི་ཚོགས་ཀྱི་དཀྱིལ་དུ་ཞལ་ཕྱིར་འཁོར་ནས་སུས་ངའི་ལྭ་བར་རེག་པ་ཡིན་ནམ་ཞེས་གསུངས་པ༌དང༌།
MAR 5:31 ཐུགས་སྲས་རྣམས་ན༌རེ། མི་ཚོགས་ཀྱིས་འཚང་ཁ་བརྒྱབ་ནས་ཁྱེད་ཀྱི་མཐའ་བསྐོར་བ་ཁྱེད་ཀྱིས་ཀྱང་གཟིགས༌པས། ཅིའི་ཕྱིར་དེ་ལྟར་དྲིའམ་ཞེས༌སྨྲས།
MAR 5:32 དེ་ནས་ཁོང་གིས་རང་ཉིད་ལ་རེག་པའི་བུད་མེད་དེ་མཐོང་བའི་ཕྱིར་མཐའ་སྐོར་དུ་གཟིགས་པ༌ལ།
MAR 5:33 བུད་མེད་དེས་ཀྱང་རང་གི་ལུས་ལ་ཅི་ཞིག་བྱུང་བ་ཤེས༌པས། སྐྲག་ཅིང་འདར་བཞིན་ཁོང་གི་སྐུ་དྲུང་དུ་ཕྱག་བཙལ་ཏེ་གནས་ཚུལ་དངོས་ཐམས་ཅད་ཁོང་ལ་ཞུས༌སོ།།
MAR 5:34 སྐྱབས་མགོན་ཡེ་ཤུས་ཁོ་མོར་འདི་སྐད༌དུ། བུ༌མོ། ཁྱོད་ཀྱི་དད་པས་ཁྱོད་རང་བསྐྱབས་པ༌ཡིན། བདེ་བར་ཕྱིར་སོང༌དང༌། དུས་ད་ནས༌བཟུང༌། ཁྱོད་རང་ནད་འདི་ལས་ཐར་བ་ཡིན་ཞེས་གསུངས༌སོ།།
MAR 5:35 ཡང་ཁོང་གིས་དེ་ལྟར་གསུང་བཞིན་པའི་དུས༌སུ། མི་འགའ་ཞིག་ཆོས་ཁང་གི་དབུ་འཛིན་པའི་ཁྱིམ་ནས་ཡོང་སྟེ་ན༌རེ། ཁྱེད་ཀྱི་བུ་མོ་ཤི་ཟིན་པས་ད་ལྟ་སློབ་དཔོན་ལ་འོ་བརྒྱལ་ཅི་ལ་བྱེད་ཅེས་སྨྲས་པ༌ན།
MAR 5:36 སྐྱབས་མགོན་ཡེ་ཤུས་གཏམ་དེ་གསན་ནས་ཆོས་ཁང་གི་དབུ་འཛིན་པ་ལ་འདི་སྐད༌དུ། མ་འཇིགས་པར་དད་པ་ཁོ་ན་བྱོས་ཤིག་ཅེས་གསུངས་པ༌དང༌།
MAR 5:37 པེ་ཏྲོ་དང་ཡ༌ཀོབ། ཡ་ཀོབ་ཀྱི་སྤུན་ཡོ་ཧ་ནན་བཅས་ཁྲིད་པ་ལས་གཞན་སུ་ཡང་ཁོང་གི་རྗེས་སུ་འབྲང་དུ་མ་བཅུག༌གོ།
MAR 5:38 ཁོང་རྣམས་ཆོས་ཁང་གི་དབུ་འཛིན་པའི་ཁྱིམ་དུ་སླེབས་པ༌ན། སྐྱབས་མགོན་ཡེ་ཤུས་གནས་དེར་འུར་སྒྲ་ཆེ་བ་དང་མི་མང་པོ་ངུ་ཞིང་མྱ་ངན་བྱེད་བཞིན་པ་གཟིགས༌ཏེ།
MAR 5:39 ཁྱིམ་ནང་དུ་ཕེབས་ཏེ་འདི་སྐད༌དུ། འུར་བརྒྱབ་ནས་ངུ་དོན་ཅི་ཡིན༌ནམ། བུ་མོ་འདི་ཤི་བ་མ་ཡིན་པར་གཉིད་འདུག་ཅེས་གསུངས་པ༌དང༌།
MAR 5:40 མི་དེ་རྣམས་ཀྱིས་ཁོང་ལ་འཕྱ་དགོད་བྱས་མོད་ཀྱང་སྐྱབས་མགོན་ཡེ་ཤུས་ཁོ་རྣམས་ཐམས་ཅད་ཕྱི་རོལ་ཏུ་བསྐྲད༌ཅིང༌། བུ་མོ་དེའི་ཕ་མ་དང་ཁོང་དང་མཉམ་དུ་ཡོད་པ་རྣམས་ཁྲིད་ནས་བུ་མོ་ཡོད་སར་ཕེབས་པ༌དང༌།
MAR 5:41 ཁོང་གིས་བུ་མོའི་ལག་པར་འཇུས་ཏེ་འདི་སྐད༌དུ། ཏ་ལི་ཐཱ་ཀུ་མེ་ཞེས་བཀའ་གནང་ཞིང་དོན་ནི་འདི་ལྟ༌སྟེ། བུ་མོ་ཆུང༌ཆུང༌། ངས་ཁྱོད་ལ་ཡར་ལོངས་ཟེར་བ་ཡིན་ཞེས༌པའོ།།
MAR 5:42 དེ་མ་ཐག་ལོ་བཅུ་གཉིས་ལོན་པའི་བུ་མོ་དེ་ཡར་ལངས་ཤིང་འགྲོ་ཐུབ་པར་གྱུར་པས་གནས་དེར་ཡོད་པའི་མི་རྣམས་ངོ་མཚར་ཆེན་པོ༌སྐྱེས།
MAR 5:43 སྐྱབས་མགོན་ཡེ་ཤུས་མི་དེ་རྣམས་ལ་དོན་འདི་མི་གཞན་སུ་ལའང་ཤེས་སུ་མི་འཇུག་པར་ནན་གྱིས་བསྐུལ༌ཞིང༌། བུ་མོ་དེ་ལ་ཁ་ཟས་སྟེར་དགོས་པའི་བཀའ་ཡང་གནང༌ངོ༌།།
MAR 6:1 དེ་ནས་སྐྱབས་མགོན་ཡེ་ཤུ་ས་ཆ་དེ་དང་ཁ་བྲལ་ནས་རང་ཡུལ་དུ་ཕེབས་པ་དང་ཐུགས་སྲས་རྣམས་ཀྱང་ཁོང་གི་རྗེས་སུ་འབྲངས༌སོ།།
MAR 6:2 ངལ་གསོ་བའི་ཉིན༌ལ། སྐྱབས་མགོན་ཡེ་ཤུས་ཆོས་ཁང་ནས་མི་རྣམས་ལ་ཆོས་གསུངས་པ་དང་ཉན་མཁན་མང་པོས་ཆོས་ཐོས་ཤིང་ཧ་ལས༌ཏེ། མི་འདིར་ནུས་པ་དེ་ལྟ་བུ་རྣམས་གང་ནས་བྱུང་བ་ཡིན༌ནམ། ཁོང་ལ་གནང་ཡོད་པའི་ཤེས་རབ་ནི་ཅི་ཞིག་ཡིན༌ནམ། ཁོང་གི་ཕྱག་གིས་མཛད་པ་དེ་ནི་ཅི་འདྲའི་ངོ་མཚར་ཆེ༌ཨང༌།
MAR 6:3 མི་འདི་ནི་ཤིང་བཟོ་དེ་མ་ཡིན༌ནམ། ཁོ་རང་ནི་མིར་ཡམ་གྱི་བུ་སྟེ་ཡ་ཀོབ༌དང༌། ཡོ༌སེ། ཡུ༌དཱ། སི་མོན་བཅས་ཀྱི་གཅེན་པོ་མ་ཡིན༌ནམ། ཁོའི་སྲིང་མོ་རྣམས་ཀྱང་ཡུལ་འདི་རུ་བདག་ཅག་དང་མཉམ་དུ་ཡོད་པ་མ་ཡིན་ནམ་ཞེས་ཟེར༌ཞིང༌། མི་དེ་རྣམས་ཁོང་ལ་མི་དགའ་བར་གྱུར༌ཏོ།།
MAR 6:4 སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། ལུང་སྟོན་པ་ལ་རང་ཡུལ་གྱི་མི༌དང༌། གཉེན༌ཉེ། ཁྱིམ་མི་ལས་གཞན་བརྩི་བཀུར་མི་བྱེད་མཁན་གཅིག་ཀྱང་མེད་ཅེས༌གསུངས།
MAR 6:5 ཁོང་གིས་ནད་པ་ཁ་ཤས་ཀྱི་ལུས་སྟེང་ལ་ཕྱག་བཞག་སྟེ་ནད་འཇོམས་པ་ལས་ངོ་མཚར་བའི་དོན་གཞན་མཛད་མ༌ནུས།
MAR 6:6 མི་དེ་རྣམས་ལ་དད་པ་མེད་པས་ཁོང་ཡང་ཡ་མཚན་སྐྱེས་ཤིང་མཐའ་འཁོར་གྱི་ཡུལ་སྡེ་དག་ལ་ཆོས་གསུང་བར་ཕེབས༌སོ།།
MAR 6:7 དེ་ནས་སྐྱབས་མགོན་ཡེ་ཤུས་ཐུགས་སྲས་བཅུ་གཉིས་པོ་རང་གི་དྲུང་དུ་བོས༌ཏེ། ཁོ་རྣམས་ལ་གདོན་འདྲེ་འདུལ་བའི་དབང་གནང་བ་དང་མི་གཉིས་རེ་གཉིས་རེ་ཕྱི་རུ་མངགས༌ཤིང༌།
MAR 6:8 ལམ་དུ་ཆས་སྐབས་མཁར་བ་ལས་གཞན་ལམ་བྲོ་དང་ཁུག༌མ། སྒོར་ཁུག་ནང་དངུལ་སྒོར་སོགས་ཅི་ཡང་མ་འཁྱེར༌ཅིག
MAR 6:9 རྐང་པར་བསིལ་ལྷམ་གྱོན་པ༌ལས། ནང་གོས་ཉིས་བརྩེགས་མ་གྱོན་ཅིག་ཅེས་བཀའ་བསྒོས་པ༌དང༌།
MAR 6:10 ཡང་ཁྱོད་རྣམས་ཡུལ་གང་དུ་སླེབས་ནའང་མིའི་ཁྱིམ་དུ་སོང༌རྗེས། ས་ཆ་དེ་དང་ཁ་འབྲལ་བའི་བར་དུ་ཁྱིམ་དེར་སྡོད༌དང༌།
MAR 6:11 ཡུལ་གང་གི་མི་ཡིས་ཁྱོད་རྣམས་ལ་གནས་ཚང་མི་གཏོང་ཞིང་ཁྱོད་ཅག་ལ་མི་ཉན༌ན། ཁྱོད་རྣམས་ས་ཆ་དེ་དང་འབྲལ་བའི་དུས༌སུ། ཁོ་རྣམས་མི་འགྲིག་པ་སྟོན་པའི་ཆེད་དུ་རྐང་པའི་སྟེང་གི་ས་རྡུལ་སྤྲུགས་ཤིག་ཅེས་གསུངས༌སོ།།
MAR 6:12 ཐུགས་སྲས་རྣམས་ཕྱི་རོལ་ཏུ་སོང་ནས་མི་རྣམས་ལ་འགྱོད་བཤགས་བྱེད་དགོས་པའི་ཆོས་བསྒྲགས༌ཤིང༌།
MAR 6:13 གདོན་འདྲེ་མང་པོ་ཕྱིར་བསྐྲད་པ་དང་ནད་པ་མང་པོར་སྣུམ་གྱིས་བྱུགས་ཏེ་ནད་ལས་ཐར་དུ་བཅུག༌གོ།
MAR 6:14 སྐྱབས་མགོན་ཡེ་ཤུའི་མཚན་སྙན་ཡུལ་གྲུ་ཀུན་ཏུ་ཁྱབ་པ་དང་རྒྱལ་པོ་ཧེ་རོ་དཱས་ཀྱང་གཏམ་དེ་ཐོས༌སོ། །མི་གཞན་གྱིས་སྐྱབས་མགོན་ཡེ་ཤུ་ནི་ཁྲུས་གསོལ་མཁན་ཡོ་ཧ་ནན་འཆི་བ་ལས་སླར་གསོན་པ་ཡིན་པས་ཁོང་གིས་ནུས་མཐུ་འདི་དག་སྟོན་བཞིན་འདུག་ཅེས་སྨྲས༌ཤིང༌།
MAR 6:15 མི་ལ་ལས་ཁོང་ནི་ཨེ་ལི་ཡཱ་ཡིན་ཟེར་བ༌དང༌། མི་ཁ་ཤས་ཀྱིས་ཁོང་ནི་ལུང་སྟོན་པ་ཞིག༌སྟེ། གནའ་བོའི་ལུང་སྟོན་པའི་ཁྲོད་ཀྱི་གཅིག་དང་མཚུངས་ཞེས་སྨྲས༌སོ།།
MAR 6:16 འོན་ཀྱང་ཧེ་རོ་དཱས་གཏམ་དེ་དག་ཐོས་པ༌ན། དེ་ནི་ངས་མགོ་བོ་བཅད་པའི་ཡོ་ཧ་ནན་དེ་ཉིད་སླར་གསོན་པ་རེད་ཅེས་སྨྲས༌སོ།།
MAR 6:17 དེ་ཡང་སྔོན་ཆད་ཧེ་རོ་ཡཱ་ཟེར་བ་ཞིག་ཡོད་པ་དེའི་རྐྱེན༌གྱིས། ཧེ་རོ་དཱས་མི་མངགས་ནས་ཡོ་ཧ་ནན་བཟུང་སྟེ་བཙོན་དུ་བཅུག་པ༌རེད། རྒྱུ་མཚན་ཅི་ཞེ༌ན། ཧེ་རོ་ཡཱ་ནི་ཧེ་རོ་དཱའི་སྤུན་ཕི་ལིབ་ཀྱི་ཆུང་མ་ཡིན་ཡང་ཧེ་རོ་དཱས་རང་གི་ཆུང་མར་བླངས༌པས།
MAR 6:18 ཡོ་ཧ་ནན་གྱིས་དེ་སྔར་ཧེ་རོ་དཱ་ལ་འདི་སྐད༌དུ། ཁྱོད་ཀྱིས་རང་གི་སྤུན་གྱི་ཆུང་མ་རང་ལ་ལེན་མི་རུང་ཞེས་གསུངས༌སོ།།
MAR 6:19 དེ་བས་ཧེ་རོ་ཡཱས་ཡོ་ཧ་ནན་འཁོན་དུ་བཟུང་ནས་དགྲོང་བར་འདོད་ནའང་དགྲོང་མ༌ནུས།
MAR 6:20 རྒྱུ་མཚན་ནི་ཧེ་རོ་དཱས་ཡོ་ཧ་ནན་ནི་གཞུང་རྒྱུད་དྲང་ཞིང་སྐྱེས་བུ་དམ་པ་ཞིག་ཡིན་པ་ཤེས་པས་ཁོང་ལ་འཇིགས་ཤིང་ཁོང་གནོད་པ་ལས༌བསྲུངས། ཁོས་ཡོ་ཧ་ནན་གྱི་བསླབ་བྱ་ལ་ཉན་དུས་མགོ་འཐོམས་ནའང་ཉན་པར༌དགའོ།།
MAR 6:21 སྟབས་འགྲིག་པའི་ཉིན༌ཞིག་ལ། ཧེ་རོ་དཱས་རང་གི་སྐྱེས་སྐར་ལ་བློན་ཆེན༌དང༌། དམག༌དཔོན། ག་ལིལ་ཡུལ་གྱི་འགོ་དཔོན་རྣམས་མགྲོན་དུ་བོས་ཏེ་དགའ་སྟོན་བཤམས༌ཤིང༌།
MAR 6:22 ཧེ་རོ་ཡཱའི་བུ་མོའང་སྟོན་ཐོག་ཏུ་ཡོང་སྟེ་བྲོ་འཁྲབ་ནས་ཧེ་རོ་དཱ་དང་མགྲོན་པོ་རྣམས་དགའ་བར་བྱས༌པས། རྒྱལ་པོས་བུ་མོ་དེ་ལ་ཁྱོད་ཀྱིས་ཅི་དང་ཅི་འདོད་པ་བདག་ལ་སྨྲོས༌ཤིག ངས་སྟེར་ངེས་ཡིན་ཞེས་སྨྲས་པ༌དང༌།
MAR 6:23 ཡང་ཁོ་མོར་དམ་བཅས༌ཏེ། ཁྱོད་ཀྱིས་ང་རང་ལ་ཅི་ཞིག་བསླངས་ན་ངས་རྒྱལ་ཁམས་ཀྱི་ཕྱེད་ཀ་ཡིན་ཡང་ཁྱོད་ལ་སྟེར་ངེས་ཡིན་ཞེས་ཁས་བླངས༌སོ།།
MAR 6:24 དེ་ནས་བུ་མོ་དེ་ཕྱི་རུ་སོང་ནས་རང་གི་མ༌ལ། ངས་ཅི་ཞིག་བསླངས་ན་ལེགས་སམ་ཞེས་དྲིས་པ༌ལ། ཁོ་མོའི་མ་ན༌རེ། ཁྲུས་གསོལ་མཁན་ཡོ་ཧ་ནན་གྱི་མགོ་བོ་སློངས་ཤིག་ཅེས་སྨྲས་པ༌དང༌།
MAR 6:25 བུ་མོ་མྱུར་དུ་ཕྱིར་རྒྱལ་པོའི་དྲུང་དུ་ལོག༌སྟེ། ངའི་འདོད་པ་ནི་ད་ལྟ་མྱུར་དུ་ཁྲུས་གསོལ་མཁན་ཡོ་ཧ་ནན་གྱི་མགོ་བོ་སྡེར་མའི་ནང་དུ་བཞག་ནས་བདག་ལ་གནང་བར་མཛོད་ཅེས་ཞུས༌སོ།།
MAR 6:26 དེའི་ཚེ་རྒྱལ་པོ་ཧེ་རོ་དཱའི་སེམས་ཤིན་ཏུ་སྐྱོ་ནའང་མགྲོན་པོ་རྣམས་ཀྱི་མདུན་ནས་དམ་བཅས་ཟིན་པས་མི་སྟེར་ཞེས་ཟེར་མ་ཕོད༌པར།
MAR 6:27 དེ་མ་ཐག་སྲུང་དམག་ཅིག་མངགས་ཏེ་ཡོ་ཧ་ནན་གྱི་མགོ་བོ་འཁྱེར་ཡོང་བའི་བཀའ་བསྒོས༌ཤིང༌། སྲུང་དམག་དེ་ཡང་བཙོན་ཁང་དུ་སོང་ནས་ཡོ་ཧ་ནན་གྱི་མགོ་བོ་བཅད༌དེ།
MAR 6:28 སྡེར་མའི་ནང་དུ་བཞག་ནས་ཁྱེར་ཡོང་སྟེ་ཁོ་མོར་བྱིན་པ༌དང༌། བུ་མོ་དེས་ཀྱང་རང་གི་མ་ལ༌བྱིན།
MAR 6:29 ཡོ་ཧ་ནན་གྱི་རྗེས་འབྲང་པ་རྣམས་ཀྱིས་གཏམ་དེ་ཐོས་ནས་ཡུལ་དེར་སླེབས༌ཏེ། ཁོང་གི་སྐུ་གདུང་ཁུར་ནས་དུར་དུ་བཞག༌གོ།
MAR 6:30 དེ་ནས་སྐུ་ཚབ་པ་རྣམས་སླར་ཡང་སྐྱབས་མགོན་ཡེ་ཤུའི་དྲུང་དུ་འཛོམས༌ཏེ། དོན་ཅི་ཞིག་བསྒྲུབས་པ་དང་ཆོས་ཇི་ལྟར་བསྟན་པ་ཐམས་ཅད་ཁོང་ལ་ཞུས་པ༌ན།
MAR 6:31 སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། ཁྱོད་རང་ཚོ་ཁོ་ན་འདིར་ཤོག་དང་ངེད་རྣམས་ལྷན་དུ་དབེན་གནས་ཤིག་ཏུ་སོང་ནས་ཅུང་ཙམ་ངལ་གསོ་བར་བྱའོ་ཞེས་གསུངས༌སོ། །རྒྱུ་མཚན་ནི་གནས་འདིར་ཕར་འགྲོ་ཚུར་ཡོང་གི་མི་མང༌བས། ཁོང་རྣམས་ལ་ཞལ་ཟས་བཞེས་ཁོམ་ཡང་མ་བྱུང༌ངོ༌།།
MAR 6:32 དེ་ནས་ཁོང་རྣམས་མཚོ་གྲུར་བསྡད་ནས་དབེན་གནས་ཀྱི་ཕྱོགས་སུ༌ཕྱིན།
MAR 6:33 མི་ཚོགས་ཀྱིས་ཀྱང་ཁོང་རྣམས་འགྲོ་བཞིན་པ་མཐོང༌སྟེ། མི་མང་པོ་ཞིག་གིས་ཁོང་རྣམས་སུ་ཡིན་ཤེས་པས་གྲོང་སྡེ་སོ་སོ་ནས་ལྷན་དུ་རྐང་ཐང་ལ་བརྒྱུགས་ཏེ་ཁོང་རྣམས་ཀྱི་སྔོན་ལ་ཡུལ་དེར་སླེབས༌སོ།།
MAR 6:34 སྐྱབས་མགོན་ཡེ་ཤུ་གྲུ་ལས་བབས་པ༌ན། མི་ཤིན་ཏུ་མང་པོ་ནི་རྫི་བོ་མེད་པའི་ལུག་དང་འདྲ་བར་གཟིགས༌པས། ཐུགས་ལ་སྙིང་རྗེ་འཁྲུངས་ནས་དེ་དག་ལ་ཆོས་མང་པོ༌གསུངས།
MAR 6:35 ཉི་མ་ནུབ་ལ་ཉེ་བའི་དུས༌སུ། ཐུགས་སྲས་རྣམས་ཁོང་གི་དྲུང་དུ་ཡོང་སྟེ་ན༌རེ། ས་ཆ་འདི་དབེན་སྟོང་ཡིན་པ་དང་ཉི་མ་ཡང་ནུབ་ལ་ཉེ༌བས།
MAR 6:36 ཁོ་རྣམས་ཉེ་འཁོར་གྱི་གྲོང་སྡེ་དང་མཐའ་ཁུལ་དག་ལ་རང་རང་གི་ཁ་ཟས་ཉོ་རུ་གཏོང་བར་མཛོད་ཅེས་ཞུས་པ༌ན།
MAR 6:37 སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། ཁྱོད་ཅག་གིས་མི་ཚོགས་ལ་ཁ་ཟས་བྱིན་ཅིག་ཅེས༌གསུངས། ཐུགས་སྲས་རྣམས་ན༌རེ། ངེད་ཅག་གིས་དངུལ་སྒོར་ཉིས་བརྒྱ་ བཀོལ་ནས་བག་ལེབ་ཉོས༌ཏེ། ཁོ་རྣམས་ལ་ཁ་ཟས་སྟེར་ནུས་སམ་ཞེས་ཞུས་པ༌ལ།
MAR 6:38 ཡང་ཁོང་གིས་འདི་སྐད༌དུ། ཁྱོད་རྣམས་བག་ལེབ་ག་ཙམ་ཡོད་པར་བལྟ་རུ་སོང་ཞེས་གསུངས་པ༌དང༌། ཐུགས་སྲས་རྣམས་ཀྱིས་ཅི་ཙམ་ཡོད་པ་ཤེས༌ཏེ། བག་ལེབ་ལྔ་དང་ཉ་གཉིས་ཡོད་ཅེས་ཞུས༌སོ།།
MAR 6:39 དེ་ནས་སྐྱབས་མགོན་ཡེ་ཤུས་ཐུགས་སྲས་རྣམས་ལ་མི་ཐམས་ཅད་གྲལ་སྐོར་བྱས་ཏེ་སྤང་ཐང་ལ་སྡོད་དུ་འཇུག་པའི་བཀའ་གནང་བ༌དང༌།
MAR 6:40 མི་ཚོགས་བརྒྱའམ་ལྔ་བཅུ་རེ་གྲལ་སྐོར་བྱས་ནས་བསྡད༌དོ།།
MAR 6:41 སྐྱབས་མགོན་ཡེ་ཤུས་བག་ལེབ་ལྔ་དང་ཉ་གཉིས་པོ་ཕྱག་ཏུ་བསྣམས་ཏེ་ནམ་མཁར་གཟིགས་ནས་བྱིན་རླབས་གནང༌རྗེས། དུམ་བུར་བྱས་ནས་ཐུགས་སྲས་རྣམས་ལ་གནང་ཞིང་མི་ཚོགས་ཀྱི་མདུན་དུ་བཀྲམ༌པའོ། །ཁོང་གིས་ཉ་གཉིས་པོའང་མི་ཐམས་ཅད་ལ་བགོས༌པས།
MAR 6:42 མི་ཚང་མས་ཟོས་ཤིང་ལྟོ་བ་འགྲངས་པ༌དང༌།
MAR 6:43 ཐུགས་སྲས་རྣམས་ཀྱིས་བག་ལེབ་དང་ཉའི་ཟས་ལྷག་བསྡུས་ནས་སླེ་བོ་བཅུ་གཉིས་གང་ཞིང༌།
MAR 6:44 བག་ལེབ་ཟ་མཁན་གྱི་སྐྱེས་པ་བསྡོམས་པས་ལྔ་སྟོང་ཙམ་ཡོད༌དོ།།
MAR 6:45 དོན་དེའི་རྗེས་སུ་སྐྱབས་མགོན་ཡེ་ཤུས་ཐུགས་སྲས་རྣམས་མཚོ་གྲུར་སྡོད་དུ་བཅུག༌སྟེ། ཁོང་གི་སྔོན་དུ་མཚོའི་ཕ་རོལ་གྱི་པེ་སད་དཱ་རུ་འགྲོ་བར་བསྐུལ་ཞིང་མི་རྣམས་ཀྱང་སོ་སོར་གྱེས་སུ༌བཅུག
MAR 6:46 དེ་ནས་སྐྱབས་མགོན་ཡེ་ཤུ་མི་ཚོགས་དང་ཁ་བྲལ་རྗེས་རི་མགོར་གསོལ་བ་འདེབས་སུ་ཕེབས་པ༌དང༌།
MAR 6:47 མཚན་མོའི་དུས༌སུ། ཁོ་རྣམས་ཀྱི་གྲུ་དེ་མཚོ་དཀྱིལ་དུ་སླེབས་ཤིང་སྐྱབས་མགོན་ཡེ་ཤུ་གཅིག་པུ་སྐམ་སར་བཞུགས༌སོ།།
MAR 6:48 ཁོང་གིས་རླུང་ཚུར་གཡུགས་ཤིང་ཐུགས་སྲས་རྣམས་ཀྱིས་མཚོ་གྲུ་གཏོང་བ་ལ་དཀའ་ཁག་ཆེན་པོ་བྱུང་བ་གཟིགས་པ༌དང༌། ནམ་ལངས་ལ་ཉེ་བའི་དུས༌སུ། ཁོང་གིས་མཚོ་སྟེང་དུ་ཞབས་ཀྱིས་བཅགས་ནས་དེ་དག་གི་གམ་དུ་ཕེབས་པ་དང་ཕར་ཕྱོགས་སུ་འགྲོ་བར་དགོངས་པ༌ལ།
MAR 6:49 ཐུགས་སྲས་རྣམས་ཀྱིས་ཁོང་གིས་མཚོ་སྟེང་དུ་ཞབས་ཀྱིས་བཅགས་ནས་ཕེབས་པ་མཐོང༌སྟེ། འདྲེ་ཡིན་པར་བསམས་ནས་འུར་བརྒྱབ༌བོ།།
MAR 6:50 ཅིའི་ཕྱིར་ཞེ༌ན། ཁོ་རྣམས་ཚང་མས་ཁོང་ཉིད་མཐོང་བ་ཙམ་གྱིས་འཇིགས་ཤིང་སྐྲག་པས༌སོ། །དེ་ནས་སྐྱབས་མགོན་ཡེ་ཤུས་འཕྲལ་དུ་ཁོ་རྣམས་ལ་འདི་སྐད༌དུ། ཁྱོད་རྣམས་ཀྱི་སེམས་བདེ་བར་གྱིས༌དང༌། ང་རང་ཡིན་པས་འཇིགས་མི་དགོས་ཞེས་གསུངས༌སོ།།
MAR 6:51 ཁོང་ཉིད་མཚོ་གྲུའི་ནང་དུ་ཕེབས་པ་དང་རླུང་གཡུག་མཚམས་ཀྱང་ཆད་པས་ཁོ་རྣམས་ཀྱི་སེམས་སུ་ངོ་མཚར་ཆེན་པོ་སྐྱེས༌ཤིང༌།
MAR 6:52 དེ་ནི་ཁོ་རྣམས་ཀྱིས་བག་ལེབ་བགོས་པའི་དོན་ཡང་མི་རྟོགས་པའི་ཕྱིར༌དང༌། ཁོ་རྣམས་ཀྱི་སེམས་རྒྱུད་ད་དུང་གྱོང་པོ་ཡིན༌ནོ།།
MAR 6:53 དེ་ནས་ཁོང་རྣམས་མཚོ་བརྒལ་ནས་གེན་ནེ་སཱ་རེལ་གྱི་ས་ཆར་སླེབས་ཤིང་མཚོ་གྲུ་ཡང་མཚོ་འགྲམ་དུ༌བཏགས།
MAR 6:54 ཁོང་རྣམས་མཚོ་གྲུ་ལས་སར་བབས་མ་ཐག་མི་རྣམས་ཀྱིས་སྐྱབས་མགོན་ཡེ་ཤུ་ཡིན་པ་ཤེས་པ༌དང༌།
MAR 6:55 ཁོང་གང་དུ་བཞུགས་པ་ཐོས༌རྗེས། མཐའ་སྐོར་གྱི་ཡུལ་ཐམས་ཅད་ལ་བརྒྱུགས་ཏེ་ནད་པ་རྣམས་ཁྱོགས་ཤིང་དུ་བཞག་ནས་ཁུར་ཡོང༌ངོ༌།།
MAR 6:56 ཁོང་ཉིད་གྲོང་སྡེའམ་གྲོང༌ཁྱེར། ཡང་ན་མཐའ་ཁུལ་བཅས་ས་ཆ་གང་དུ་ཕེབས༌ནའང༌། མི་རྣམས་ཀྱིས་ནད་པ་རྣམས་ཁྲོམ་སྲང་དུ་བསྐྱལ༌ཏེ། སྐྱབས་མགོན་ཡེ་ཤུ་ལ་ཁོང་གི་ན་བཟའི་འདབས་ཁ་ཙམ་ལ་རེག་ཏུ་གནང་བར་ཞུ་བ་ཞུས༌ཤིང༌། དེར་རེག་པའི་ནད་པ་ཐམས་ཅད་ནད་ལས་ཐར་བར་གྱུར༌ཏོ།།
MAR 7:1 ཡེ་རུ་སཱ་ལེམ་ནས་ཡོང་བའི་ཕ་རུ་ཤི་པ་རྣམས་དང་མཁན་པོ་ཁ་ཤས་སྐྱབས་མགོན་ཡེ་ཤུའི་དྲུང་དུ་འདུས༌ཤིང༌།
MAR 7:2 དེ་རྣམས་ཀྱིས་ཁོང་གི་ཐུགས་སྲས་དག་གི་ཁྲོད་དུ་འགའ་ཞིག་གིས་ལག་པ་མི་གཙང་བ་སྟེ་ལག་པ་མ་བཀྲུས་པར་བག་ལེབ་ཟ་བཞིན་པ་མཐོང༌ངོ༌།།
MAR 7:3 མ་གཞི་ཕ་རུ་ཤི་པ་དང་བཅས་པའི་ཡ་ཧུ་དཱའི་མི་རིགས་ཐམས་ཅད་ཀྱིས་གནའ་མིའི་ལུགས་སྲོལ་སྲུང༌ཞིང༌། རང་གི་ལག་པ་གཙང་མར་མ་བཀྲུས་པར་ཟས་མི༌ཟའོ།།
MAR 7:4 ཁྲོམ་སྲང་ནས་ཕྱིར་ལོག་ནའང་གཙང་མར་མ་བཀྲུས་པར་ཟས་མི༌ཟ། ད་དུང་ལུགས་སྲོལ་གཞན་ཡང་མང་པོ་ཡོད༌དེ། ཁོ་རྣམས་ཀྱིས་མི་རབས་ནས་མི་རབས་བར་དུ་བསྲུངས༌ཤིང༌། དཔེར་ན་ཕོར་བ་དང་བུམ༌པ། ཟངས༌སྣོད། མལ་ཁྲི་བཅས་ཀྱང་བཀྲུ་བ་ཡིན༌ནོ།།
MAR 7:5 དེ་ནས་ཕ་རུ་ཤི་པ་དང་མཁན་པོ་རྣམས་ཀྱིས་སྐྱབས་མགོན་ཡེ་ཤུ༌ལ། ཁྱེད་ཀྱི་ཐུགས་སྲས་རྣམས་ཀྱིས་ཅིའི་ཕྱིར་གནའ་མིའི་ལུགས་སྲོལ་བཞིན་མི་བྱེད༌པར། ལག་པ་མི་གཙང་ནའང་བག་ལེབ་ཟའམ་ཞེས་དྲིས་པ༌དང༌།
MAR 7:6 སྐྱབས་མགོན་ཡེ་ཤུས་འདི་སྐད༌དུ། ཚུལ་འཆོས་པ་ཁྱོད་ཅག་གི་སྐོར་ལ་ཡེ་ཤ་ཡཱ་ཡིས་ལེགས་པར་གསུངས་པ་འདི་ལྟ༌སྟེ། མི་སྡེ་འདི་ཡིས་ངག་ནས་ང་རང་བཀུར་ན༌ཡང༌།། ཁོ་ཚོའི་སེམས་ནི་ང་དང་ཡོངས་སུ་བྲལ་བ༌ཡིན།།
MAR 7:7 འཇིག་རྟེན་མི་ཡིས་བརྩམས་པའི་བསླབ་བྱ་སྣ་ཚོགས༌པ།། བདེན་པའི་ཆོས་ཀྱི་གཞུང་ལུགས་ཡིན་ཁུལ་སྟོན་བྱེད༌པས།། བསྙེན་བཀུར་དེ་འདྲ་བདག་ལ་བྱས་ཀྱང་སྙིང་པོ༌མེད།། ཅེས་བཀོད་པ༌ལྟར།
MAR 7:8 ཁྱོད་རྣམས་ཀྱིས་དཀོན་མཆོག་གི་བཀའ་སྤངས་ནས་མིའི་ལུགས་སྲོལ་སྲུང་བཞིན་འདུག་ཅེས་གསུངས་པ༌དང༌།
MAR 7:9 ཡང་འདི་སྐད༌དུ། ཁྱོད་ཅག་གིས་རང་གི་ལུགས་སྲོལ་སྲུང༌ཕྱིར། དཀོན་མཆོག་གི་བཀའ་རིང་དུ༌སྤངས།
MAR 7:10 མོ་ཤེ་ཡིས་གསུངས་པ༌ལྟར། རང་གི་ཕ་མ་གཉིས་ལ་བཀུར་བསྟི་བྱེད་དགོས་ཞེས༌དང༌། ཡང་ཕའམ་ཡང་ན་མ་ལ་ཚིག་ངན་སྨྲ་མཁན་དེ་སྲོག་དང་བྲལ་བར་གྱུར་ཅིག་ཅེས༌པའོ།།
MAR 7:11 འོན༌ཀྱང༌། ཁྱོད་ཅག་ན༌རེ། གལ་ཏེ་མི་ཞིག་གིས་རང་གི་ཕའམ་མ༌ལ། ངས་ཁྱེད་ལ་འབུལ་འོས་པ་ཁཱོར་པན༌ཏེ། དོན་ནི་དཀོན་མཆོག་ལ་ཕུལ་བ་ཡིན་ཞེས་བཤད༌ན།
MAR 7:12 དེང་ཕྱིན་མི་དེར་རང་གི་ཕའམ་མ་སྙོར་སྐྱོང་བྱེད་དུ་མི༌འཇུག
MAR 7:13 ཁྱོད་རྣམས་ཀྱིས་རང་གིས་རྒྱུན་འཛིན་བྱས་པའི་ལུགས་སྲོལ་སྲུང་བ་ལས་དཀོན་མཆོག་གི་བཀའ་རིང་དུ་དོར་བ༌ཡིན། ཁྱོད་རྣམས་ཀྱིས་དེ་ལྟ་བུའི་ལས་མང་པོ་བྱེད་ཅེས་གསུངས༌སོ།།
MAR 7:14 དེ་ནས་ཡང་ཁོང་གིས་མི་ཚོགས་ཚུར་བོས་ཏེ་འདི་སྐད༌དུ། ཁྱོད་ཅག་ཚང་མས་ངའི་གཏམ་ལ་ཉོན་དང་དོན་ཡང་ཤེས་པར༌གྱིས།
MAR 7:15 ཕྱི་ནས་མིའི་ལུས་ནང་དུ་སོང་བ་དེས་མི་མི་གཙང་བར་བྱེད་ནུས་པ་ཅི་ཡང༌མེད། མིའི་ལུས་ནང་ནས་ཕྱི་ལ་ཐོན་པ་དེས་མི་མི་གཙང་བར་བྱེད༌པའོ།།
MAR 7:16 ཡང་རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
MAR 7:17 དེ་ནས་སྐྱབས་མགོན་ཡེ་ཤུ་མི་ཚོགས་དང་ཁ་བྲལ་ནས་ཁང་པའི་ནང་དུ་ཕེབས་ཙ༌ན། ཐུགས་སྲས་རྣམས་ཀྱིས་ཁོང་ལ་དཔེ་དེའི་དོན་ཅི་ཡིན་དྲིས་པ༌ལ།
MAR 7:18 ཁོང་གིས་འདི་སྐད༌དུ། ཁྱོད་ཅག་གིས་ཀྱང་དེ་བཞིན་དོན་མི༌གོའམ། ཕྱི་ནས་ལུས་ནང་དུ་གང་ཞིག་སོང་བ་དེས་མི་མི་གཙང་བར་བྱེད་ག་ལ༌ནུས།
MAR 7:19 དེ་ནི་མིའི་སེམས་ཀྱི་ནང་དུ་སོང་བ་མ་ཡིན༌པར། མིའི་ཁོག་ཏུ་སོང་ཞིང་གཙང་སྤྱོད་དུ་ལྷུང་འགྲོ་བའང་མི་ཤེས་སམ་ཞེས་གསུངས་པ་འདིས་ཟས་ཡོད་ཚད་གཙང་མ་ཡིན་པ་བསྟན༌ཏོ།།
MAR 7:20 ཡང་ཁོང་གིས་འདི་སྐད༌དུ། མིའི་ལུས་ནང་ནས་ཕྱི་ལ་ཐོན་པ་དེས་ད་གཟོད་མི་མི་གཙང་བར་བྱེད༌དེ།
MAR 7:21 མིའི་སེམས་ནས་དྲན་ཚུལ་ངན་པ་དང་མི་ཚངས་སྤྱོད་པ༌དང༌། མ་བྱིན༌ལེན། མིའི་སྲོག་གཅོད༌པ། ལོག༌གཡེམ།
MAR 7:22 བརྣབ༌སེམས། ངན༌སེམས། གཡོ༌སྒྱུ། འདོད༌ཆགས། ཕྲག༌དོག འཕྱ༌ཚིག ང༌རྒྱལ། བླུན་སེམས་བཅས་འབྱུང་ངེས་པའི་ཕྱིར༌ཡིན།
MAR 7:23 རྒྱུ་ངན་པ་འདི་ཐམས་ཅད་མིའི་སེམས་ནས་འབྱུང་ཞིང་མི་མི་གཙང་བར་བྱེད་པ་ཡིན་ཞེས་གསུངས༌སོ།།
MAR 7:24 དེ་ནས་སྐྱབས་མགོན་ཡེ་ཤུ་ཡར་བཞེངས་ཏེ་ཐཱར་དང་ཚི་ཏུན་གྱི་མངའ་ཁོངས་སུ་ཕེབས་པ༌དང༌། ཁོང་ཉིད་ཁྱིམ་ཚང་ཞིག་ཏུ་ཕེབས་ནས་མི་གཞན་སུ་ལའང་ཤེས་སུ་འཇུག་མི་འདོད་པར་དགོངས་ནའང་གསང་ཐབས་བྲལ༌ཏོ།།
MAR 7:25 གནས་དེར་བུད་མེད་ཅིག་ཡོད་པ་དེའི་བུ་མོ་གདོན་འདྲེས་བཟུང་ཡོད༌པས། སྐྱབས་མགོན་ཡེ་ཤུའི་གནས་ཚུལ་ཐོས་ཤིང་ཁོང་གི་ཞབས་དྲུང་དུ་ཡོང་སྟེ་ཕྱག༌བཙལ།
MAR 7:26 བུད་མེད་དེ་ནི་ཕྱི་ཕྱོགས་པ་ཡིན༌ཅིང༌། སིར་ཡཱ་ཡུལ་གྱི་ཕོའོ་ནེ་ཀེ་མི་རིགས་ལ་གཏོགས་པ༌དང༌། ཁོ་མོས་སྐྱབས་མགོན་ཡེ་ཤུ་ལ་གདོན་འདྲེ་དེ་ཁོ་མོའི་བུ་མོ་ལས་ཕར་སྐྲོད་པའི་ཕྱིར་ཞུ་བ་ཞུས་པ༌ན།
MAR 7:27 སྐྱབས་མགོན་ཡེ་ཤུས་འདི་སྐད༌དུ། ཐོག་མར་ཕྲུ་གུ་རྣམས་ཀྱི་ལྟོ་བ་འགྲང་བར༌བྱོས། ཕྲུ་གུའི་ཟས་སྐལ་ཁྱི་ལ་སྟེར་མི་རུང་ཞེས་གསུངས༌སོ།།
MAR 7:28 ཡང་ཁོ་མོ་ན༌རེ། ལགས༌སོ། །ཇོ་བོ༌ལགས། འོན་ཀྱང་ཁྱི་ཡིས་ཅོག་ཙེའི་འོག་ནས་ས་ལ་ལྷུང་བའི་ཕྲུ་གུ་རྣམས་ཀྱི་ཟས་ཧྲུག་ཀྱང་ཟ་བ་ཡིན་ཞེས་ཞུས་པ༌ན།
MAR 7:29 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་འདི་སྐད་སྨྲས་པའི་རྐྱེན་གྱིས་ཁྱོད་རང་ཕྱིར་སོང༌དང༌། གདོན་འདྲེ་དེ་ཁྱོད་ཀྱི་བུ་མོ་ལས་ཕར་སོང་ཟིན་ཞེས་གསུངས༌སོ།།
MAR 7:30 དེ་ནས་བུད་མེད་ཕྱིར་རང་ཡུལ་དུ་ལོག་པ༌ན། དངོས་གནས་གདོན་འདྲེ་ཕྱིར་སོང་ཟིན་ལ་བུ་མོ་མལ་ཁྲིའི་སྟེང་དུ་ཉལ་འདུག་པའང་མཐོང༌ངོ༌།།
MAR 7:31 དེ་ནས་སྐྱབས་མགོན་ཡེ་ཤུ་ཡང་ཐཱར་དང་ཁ་བྲལ༌ཏེ། ཚི་ཏུན་ཡུལ་དང་དི་ཁ་པའོ་ལེའི་མངའ་ཁོངས་བརྒྱུད་ནས་མཚོ་ག་ལིལ་གྱི་འགྲམ་དུ་ཕེབས༌ཤིང༌།
MAR 7:32 མི་འགའ་ཞིག་གིས་རྣ་བ་འོན་ཅིང་ལྕེ་ལྐུགས་པ་ཞིག་སྐྱབས་མགོན་ཡེ་ཤུའི་དྲུང་དུ་ཁྲིད་ཡོང༌སྟེ། ཁོང་ལ་མི་དེའི་ལུས་སྟེང་དུ་ཕྱག་འཇོག་པར་ཞུ་བ་ཞུས༌སོ།།
MAR 7:33 སྐྱབས་མགོན་ཡེ་ཤུས་མི་དེ་མི་ཚོགས་ཀྱི་ཁྲོད་ནས་ཟུར་དུ་ཁྲིད༌དེ། ཁོང་གིས་ཕྱག་མཛུབ་ཁོའི་རྣ་བའི་བུ་གའི་ནང་དུ་བཙུགས་ཤིང་ཡང་ཕྱག་མཛུབ་ཏུ་ལྗགས་ཆུ་གཏོར་ནས་ཁོའི་ལྕེ་ལ་རེག་པ༌དང༌།
MAR 7:34 ཡང་ནམ་མཁར་གཟིགས་ཤིང་དབུགས་རིང་ཕྱུང༌སྟེ། མི་དེ་ལ་ཨེ་ཕཱ་ཐ་ཞེས་གསུངས་པ་དང་དོན་ནི་ཕྱེས་ཤིག་ཅེས༌པའོ།།
MAR 7:35 དེ་མ་ཐག་མི་དེའི་རྣ་བ་ཕྱེས་ཤིང་ལྕེ་ཡང་ལྐུགས་པ་ལས་གྲོལ་ནས་སྐད་ཆའང་གསལ་པོར་སྨྲ་ཤེས་པར་གྱུར༌ཏོ།།
MAR 7:36 དེ་ནས་སྐྱབས་མགོན་ཡེ་ཤུས་དོན་འདི་མི་གཞན་སུ་ལའང་མི་སྨྲ་བའི་ཕྱིར༌བསྐུལ། འོན་ཀྱང་ཁོང་གིས་ཇི་ལྟར་བཀའ་གནང་ཡང་མི་དེ་དག་གིས་དེ་བས་ཀྱང་ཀུན་ལ༌བསྒྲགས།
MAR 7:37 མི་རྣམས་ཤིན་ཏུ་ངོ་མཚར་བར་གྱུར་ནས་ཁོང་གིས་མཛད་པ་ཐམས་ཅད་ལེགས༌ཏེ། ཐ་ན་ཁོང་གིས་འོན་པ་རྣམས་ཀྱིས་ཐོས་ཐུབ་པ་དང་ལྐུགས་པ་རྣམས་ཀྱིས་ཀྱང་སྨྲ་ནུས་པར་མཛད་ཅེས་སྨྲས༌སོ།།
MAR 8:1 དེའི་དུས༌སུ། ཡང་མི་ཤིན་ཏུ་མང་པོ་ཕྱོགས་གཅིག་ཏུ་འདུས་ཤིང་ཟས་ཅི་ཡང་མེད༌པས། སྐྱབས་མགོན་ཡེ་ཤུས་ཁོང་གི་ཐུགས་སྲས་རྣམས་བོས་ཏེ་འདི་སྐད༌དུ།
MAR 8:2 མི་ཚོགས་འདི་བདག་དང་མཉམ་དུ་གནས་འདི་རུ་ཉིན་གསུམ་འགོར༌ཡང༌། ད་ལྟ་ཁ་ཟས་ཅི་ཡང་མེད་པས་བདག་གིས་ཁོ་རྣམས་ལ་སྙིང་རྗེ་བར༌འདུག
MAR 8:3 ཁོ་རྣམས་ལས་མི་ཁ་ཤས་རྒྱང་རིང་ནས་ཡོང༌བས། ངས་ཁོ་རྣམས་བཀྲེས་ལྟོགས་ངང་ནས་ཕྱིར་འགྲོ་རུ་བཅུག༌ན། ལམ་བར་དུ་ཐང་ཆད་ནས་བརྒྱལ་བར་ངེས་ཞེས་གསུངས༌སོ།།
MAR 8:4 ཐུགས་སྲས་རྣམས་ན༌རེ། དབེན་སྟོང་འདི་རུ་མི་འདི་རྣམས་ཀྱི་ཕོ་བ་འགྲང་བར་བྱེད་པའི་བག་ལེབ་ཇི་ལྟར་འཚོལ་ཞེས་ཞུས་པ༌དང༌།
MAR 8:5 སྐྱབས་མགོན་ཡེ་ཤུས་ཁྱོད་ཅག་ལ་བག་ལེབ་ག་ཚོད་ཡོད་ཅེས་དྲིས་པ༌ན། ཁོ་རྣམས་ཀྱིས་བདུན་ཡོད་ཅེས་ཞུས༌སོ།།
MAR 8:6 དེ་ནས་ཁོང་གིས་མི་ཚོགས་ལ་བཀའ་གནང་སྟེ་ས་རུ་སྡོད་དུ་བཅུག༌ཅིང༌། བག་ལེབ་བདུན་པོ་ཕྱག་ཏུ་བསྣམས་ཏེ་དཀོན་མཆོག་ལ་བཀའ་དྲིན་ཞུས༌རྗེས། བག་ལེབ་དུམ་བུར་བྱས་ནས་ཐུགས་སྲས་རྣམས་ལ་སྤྲད་དེ་མི་ཚོགས་ལ་སྟེར་དུ་བཅུག་པ༌དང༌། ཐུགས་སྲས་རྣམས་ཀྱིས་ཀྱང་མི་ཚོགས་ལ༌བཀྲམ།
MAR 8:7 ཡང་ཉ་ཆུང་ངུ་ཁ་ཤས་ཡོད་པ་དེ་ལ་སྐྱབས་མགོན་ཡེ་ཤུས་བྱིན་རླབས་གནང་ནས་མི་ཚོགས་ལ་སྟེར་བའི་བཀའ་གནང༌ངོ༌།།
MAR 8:8 དེ་ནས་མི་ཚོགས་ཀྱིས་ཟས་སྤྱད་ནས་ལྟོ་བ་འགྲངས་པ༌དང༌། ཐུགས་སྲས་རྣམས་ཀྱིས་ཟས་ལྷག་བསྡུ་གསོག་བྱས་པ་སླེ་བོ་བདུན་བྱུང༌ངོ༌།།
MAR 8:9 གནས་དེར་མི་བཞི་སྟོང་ཙམ་ཡོད་པ༌དང༌། སྐྱབས་མགོན་ཡེ་ཤུས་མི་དེ་རྣམས་ཕྱིར་རང་ཡུལ་དུ་འགྲོ་རུ་བཅུག་པ་དང་ལྷན༌དུ།
MAR 8:10 ཁོང་ཉིད་ཀྱང་ཐུགས་སྲས་རྣམས་དང་མཉམ་དུ་མཚོ་གྲུར་བསྡད་ནས་དཱལ་མ་ནུ་ཐ་ཡུལ་དུ་ཕེབས༌སོ།།
MAR 8:11 ཕ་རུ་ཤི་པ་རྣམས་ཡོང་ནས་སྐྱབས་མགོན་ཡེ་ཤུ་ལ་རྩོད་གླེང་བྱས༌ཤིང༌། ཁོང་ལ་ཚོད་བགམ་བྱེད་པའི་ཕྱིར་ནམ་མཁའི་ཞིང་ཁམས་ཀྱི་གྲུབ་རྟགས་ཤིག་སྟོན་པར་ཞུས་པ༌དང༌།
MAR 8:12 སྐྱབས་མགོན་ཡེ་ཤུས་ཐུགས་ནས་དབུགས་རིང་ཞིག་ཕྱུང་སྟེ་འདི་སྐད༌དུ། མི་རབས་འདིས་ཅིའི་ཕྱིར་ངོ་མཚར་བའི་རྟགས་ཤིག་འཚོལ་བ་ཡིན༌ནམ། ངས་ཁྱོད་རྣམས་ལ་བདེན་པར་སྨྲ༌སྟེ། མི་རབས་འདི་ལ་ངོ་མཚར་བའི་རྟགས་སྟོན་པར་མི་འགྱུར་ཞེས་གསུངས་པ༌དང༌།
MAR 8:13 ཁོང་རྣམས་ཁོ་ཚོ་དང་ཁ་བྲལ་ནས་མཚོ་གྲུར་བསྡད་དེ་མཚོའི་ཕ་རོལ་ཏུ་ཕེབས༌སོ།།
MAR 8:14 དེ་ནས་ཐུགས་སྲས་རྣམས་ཀྱིས་ལམ་བྲོ་འཁྱེར་བ་བརྗེད༌པས། མཚོ་གྲུའི་ནང་དུ་བག་ལེབ་གཅིག་ལས་ཅི་ཡང་མེད༌དོ།།
MAR 8:15 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་བློ་རིག་བསྒྲིམས་ནས་ཕ་རུ་ཤི་པ་དང་ཧེ་རོ་དཱའི་སྐྱུར་རྩི་ ལ་དོགས་པར་གྱིས་ཞེས་བཀའ་གནང༌ཞིང༌།
MAR 8:16 ཐུགས་སྲས་རྣམས་ཀྱིས་ཕན་ཚུན་ལ་འདི་ནི་ངེད་ཅག་ལ་བག་ལེབ་མེད་པའི་ཕྱིར་ཡིན་ཞེས་གླེང༌ངོ༌།།
MAR 8:17 སྐྱབས་མགོན་ཡེ་ཤུས་ཐུགས་སྲས་རྣམས་ཀྱི་བསམ་ཚུལ་མཁྱེན༌ནས། ཁྱོད་ཅག་གིས་ཅིའི་ཕྱིར་བག་ལེབ་མེད་པའི་གཏམ་གླེང་བ་ཡིན༌ནམ། ཁྱོད་རྣམས་ཀྱིས་ད་དུང་མི་ཤེས་ཤིང་མི༌གོའམ། ཁྱོད་ཅག་གི་སེམས་ནི་ད་དུང་གྱོང་པོ་ཡིན༌ནམ།
MAR 8:18 ཁྱོད་རྣམས་ལ་མིག་ཡོད་ཀྱང་མི་མཐོང༌ངམ། རྣ་བ་ཡོད་ཀྱང་མི་ཐོས༌སམ། ཁྱོད་ཅག་གིས་ཡིད་ལའང་མི་དྲན༌ནམ།
MAR 8:19 ངས་བག་ལེབ་ལྔ་མི་ལྔ་སྟོང་ལ་བགོས་ཤིང་ཁྱོད་རྣམས་ཀྱིས་ཟས་ལྷག་སླེ་བོ་ཅི་ཙམ་བསྡུ་གསོག་བྱས་སམ་ཞེས་དྲིས་པ༌ལ། ཁོ་རྣམས་ཀྱིས་བཅུ་གཉིས་ཡོད་ཅེས་ཞུས༌སོ།།
MAR 8:20 ཡང་བག་ལེབ་བདུན་མི་བཞི་སྟོང་ལ་བགོས་ཤིང་ཁྱོད་ཅག་གིས་ཟས་ལྷག་བསྡུ་གསོག་བྱས་ནས་སླེ་བོ་ཅི་ཙམ་གང་ངམ་ཞེས་དྲིས་པ༌ལ། ཁོ་རྣམས་ཀྱིས་བདུན་ཡོད་ཅེས་ཞུས་པ༌དང༌།
MAR 8:21 སྐྱབས་མགོན་ཡེ་ཤུས་ཁྱོད་ཅག་གིས་ད་དུང་མི་ཤེས་སམ་ཞེས་གསུངས༌སོ།།
MAR 8:22 དེ་ནས་ཁོང་རྣམས་པེ་སད་དཱ་རུ་སླེབས༌ཤིང༌། མི་འགའ་ཞིག་གིས་ལོང་བ་ཞིག་སྐྱབས་མགོན་ཡེ་ཤུའི་དྲུང་དུ་ཁྲིད་ཡོང༌སྟེ། ཁོང་ལ་ཕྱག་གིས་རེག་པར་ཞུ་བ༌ཞུས།
MAR 8:23 ཁོང་གིས་ལོང་བ་དེའི་ལག་པར་འཇུས་ཏེ་གྲོང་སྡེའི་ཕྱི་རོལ་ཏུ་ཁྲིད༌ཅིང༌། ལོང་བའི་མིག་གཉིས་ལ་ལྗགས་ཆུ་གཏོར་བ༌དང༌། ཕྱག་མི་དེའི་ལུས་སྟེང་ལ་བཞག༌སྟེ། ཁྱོད་ཀྱི་མིག་གིས་མཐོང་ངམ་ཞེས་དྲིས་པ༌ལ།
MAR 8:24 ལོང་བས་མགོ་ཡར་བཀྱགས་ནས་བལྟས༌ཏེ། ངས་མི་རྣམས་མཐོང་ཞིང་དེ་དག་ནི་ཤིང་སྡོང་རྣམས་འགྲོ་བ་དང་མཚུངས་ཞེས་ཞུས༌སོ།།
MAR 8:25 དེ་ནས་སྐྱབས་མགོན་ཡེ་ཤུས་ཡང་བསྐྱར་ལོང་བའི་མིག་ཟུང་ལ་ཕྱག་གླན༌ཅིང༌། ལོང་བས་མིག་ཅེ་རེར་བལྟས་པ་དང་མིག་ཟུང་སོས་ཏེ་ཐམས་ཅད་གསལ་པོར་མཐོང་བར་གྱུར༌ཏོ།།
MAR 8:26 སྐྱབས་མགོན་ཡེ་ཤུས་མི་དེ་ཕྱིར་རང་ཁྱིམ་དུ་འགྲོ་རུ་བཅུག་པ་དང་གྲོང་སྡེ་འདིའི་ནང་དུ་མ་འགྲོའོ་ཞེས་གསུངས༌སོ།།
MAR 8:27 དེ་ནས་སྐྱབས་མགོན་ཡེ་ཤུ་ཐུགས་སྲས་རྣམས་དང་མཉམ་དུ་ཀེ་སར་ཡཱ་ཕི་ལིབ་པིའི་མཐའ་འཁོར་གྱི་གྲོང་སྡེ་དག་ལ་ཕེབས༌ཤིང༌། ལམ་བར་ནས་ཐུགས་སྲས་རྣམས་ལ་འདི་སྐད༌དུ། མི་རྣམས་ཀྱིས་ང་རང་སུ་ཡིན་པར་སྨྲ་བཞིན་འདུག་གམ་ཞེས་དྲིས་པ༌ལ།
MAR 8:28 ཁོ་རྣམས་ན༌རེ། མི་ལ་ལས་ཁྲུས་གསོལ་མཁན་ཡོ་ཧ་ནན༌དང༌། ལ་ལས་ཨེ་ལི༌ཡཱ། ཡང་མི་ལ་ལས་ལུང་སྟོན་པའི་གྲས་ཀྱི་གཅིག་ཡིན་ཟེར་གྱི་འདུག་ཅེས་ཞུས་པ༌དང༌།
MAR 8:29 ཡང་ཁོང་གིས་འདི་སྐད༌དུ། འོ༌ན། ཁྱོད་ཅག་གིས་ང་རང་སུ་ཡིན་པར་གླེང་ངམ་ཞེས་དྲིས་པ༌ན། པེ་ཏྲོ་ན༌རེ། ཁྱེད་ནི་སྐྱབས་མགོན་མཱ་ཤི་ཀ་ཡིན་ཞེས་ཞུས༌སོ།།
MAR 8:30 སྐྱབས་མགོན་ཡེ་ཤུས་ཁོ་རྣམས་ལ་ཁོང་ཉིད་ཀྱི་དོན་འདི་མི་གཞན་ལ་མི་སྨྲ་བའི་ཕྱིར་ནན་གྱིས་བསྐུལ༌ཏོ།།
MAR 8:31 དེ་ནས་སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། མིའི་བུ་ཡིས་ངེས་པར་སྡུག་བསྔལ་མང་དུ་མྱོང༌ཞིང༌། རྒན་པོ་དང་མཆོད་དཔོན་ཆེན་པོ༌དག མཁན་པོ་རྣམས་ཀྱིས་ཁོ་རང་དོར་ནས་གསོད་པ༌དང༌། ཡང་ཉིན་གསུམ་གྱི་རྗེས་སུ་སླར་གསོན་པར་འགྱུར་ཞེས་གསུངས༌སོ།།
MAR 8:32 ཁོང་གིས་བཀའ་དེ་གསལ་པོར་གསུངས་པ༌ན། པེ་ཏྲོས་ཁོང་གི་ཕྱག་ལ་འཇུས་ཤིང་ཟུར་དུ་ཁྲིད་ནས་ནན་གྱིས་བསྐུལ༌མོད།
MAR 8:33 འོན་ཀྱང་སྐྱབས་མགོན་ཡེ་ཤུས་ཞལ་ཕྱིར་འཁོར་ནས་ཐུགས་སྲས་རྣམས་ལ་གཟིགས་ཏེ་པེ་ཏྲོ་ལ་འདི་སྐད༌དུ། བདུད་སཱ་ཏན་ཁྱོད་ངའི་རྒྱབ་ཏུ་སོང༌ཞིག ཁྱོད་ཀྱིས་དཀོན་མཆོག་གི་དགོངས་པ་མི་བསམ་པར་མིའི་འདོད་བློ་བསམ་པ་ཡིན་ཞེས་བཀའ་བཀྱོན་གནང༌ངོ༌།།
MAR 8:34 ཁོང་གིས་མི་ཚོགས་དང་ཐུགས་སྲས་རྣམས་རང་ཉིད་ཀྱི་དྲུང་དུ་བོས༌ཏེ། སུ་ཞིག་ང་ཡི་རྗེས་སུ་འབྲང་འདོད༌ན། རང་ཉིད་དོར་ནས་རང་གི་ཤིང་རྒྱ་གྲམ་ཁུར་ཏེ་ང་ཡི་རྗེས་སུ་འབྲང་བར༌གྱིས།
MAR 8:35 སུ་ཞིག་གིས་རང་སྲོག་སྐྱོབ་འདོད་པ་དེས་རང་སྲོག་འཆོར༌ཞིང༌། སུ་ཞིག་གིས་ང་རང་དང་འཕྲིན་བཟང་གི་དོན་དུ་རང་སྲོག་འདོར་བ་དེས་རང་སྲོག་སྐྱོབ་ངེས༌ཡིན།
MAR 8:36 སུ་ཞིག་གིས་འཇིག་རྟེན་ཧྲིལ་པོ་རག་ཀྱང་རང་སྲོག་བོར་ན་ཅི་ལ༌ཕན།
MAR 8:37 མིས་རང་ལ་ཚེ་སྲོག་འཐོབ་པར་རིན་ཅི་ཞིག་སྤྲོད༌དམ།
MAR 8:38 ལོག་གཡེམ་དང་སྡིག་ཅན་ཡིན་པའི་མི་རབས་འདི་ལས་སུ་ཞིག་གིས་ང་དང་ངའི་བཀའ་ངོ་ཚ་ཞིག་ཏུ་བརྩིས༌ན། མིའི་བུ་ཡབ་ཀྱི་གཟི་བརྗིད་ངང་ཕོ་ཉ་དམ་པ་འཁོར་དང་བཅས་པ་ཕེབས་ཡོང༌དུས། མི་དེ་ཡང་ངོ་ཚ་ཞིག་ཏུ་བརྩི་ངེས་ཞེས་གསུངས༌སོ།།
MAR 9:1 དེ་ནས་ཡང་སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། ངས་ཁྱོད་རྣམས་ལ་བདེན་པར་སྨྲ༌སྟེ། འདི་རུ་སྡོད་པའི་མི་རྣམས་ལས་འགའ་ཞིག་གིས་འཆི་བ་དངོས་སུ་མ་མྱོང་བའི་སྔོན༌དུ། དཀོན་མཆོག་གི་རྒྱལ་སྲིད་མཐུ་སྟོབས་དང་ལྡན་པའི་སྒོ་ནས་སླེབ་ཡོང་བ་མཐོང་བར་ངེས་ཞེས་གསུངས༌སོ།།
MAR 9:2 དེ་ནས་ཉིན་དྲུག་འགོར་བ༌དང༌། སྐྱབས་མགོན་ཡེ་ཤུས་པེ་ཏྲོ༌དང༌། ཡ༌ཀོབ། ཡོ་ཧ་ནན་བཅས་ཁྲིད་ནས་རི་མཐོན་པོ་ཞིག་ཏུ་ཕེབས་པ༌དང༌། ཁོ་རྣམས་ཀྱི་མདུན་དུ་ཁོང་གི་རྣམ་པ་འགྱུར༌ཏེ།
MAR 9:3 ན་བཟའ་ནི་འོད་འཕྲོ་ཞིང་ཤིན་ཏུ་དཀར་བ་འཇིག་རྟེན་དུ་འཁྲུད་མཁན་སུས་ཀྱང་དེ་ལྟར་དཀར་པོ་བྱེད་མི་ཐུབ་པ་ཙམ་དུ་གྱུར༌ཏོ།།
MAR 9:4 དེའི༌ཚེ། ཨེ་ལི་ཡཱ་དང་མོ་ཤེ་གཉིས་མངོན་སུམ་དུ་བྱུང་ནས་སྐྱབས་མགོན་ཡེ་ཤུ་དང་གསུང་མོལ་མཛད༌དོ།།
MAR 9:5 དེ་ནས་ཐུགས་སྲས་གསུམ་པོ་ཤིན་ཏུ་འཇིགས་ཏེ་པེ་ཏྲོས་ཅི་ལྟར་ཞུ་དགོས་པའང་མ་ཤེས༌པས། ཁོ་ན༌རེ། རཱབ་པེ༌ལགས། བདག་ཅག་འདི་རུ་བསྡད་ན་དངོས་གནས་ལེགས་པོ༌འདུག གུར་གསུམ་ཡང་བཟོ་བར་བྱ༌སྟེ། ཁྱེད་ལ་གཅིག་དང་མོ་ཤེ་ལ༌གཅིག ཨེ་ལི་ཡཱ་ལའང་གཅིག་ཅེས་ཞུས༌སོ།།
MAR 9:7 དེ་ནས་སྤྲིན་ཕུང་ཞིག་གིས་ཁོང་རྣམས་བསྒྲིབས་པ་དང་དེའི་ཁྲོད་ནས་སྐད་སྒྲ་ཞིག་གྲགས༌ཏེ། འདི་ནི་བདག་གི་གཅེས་པའི་བུ་ཡིན༌ཞིང༌། ཁྱོད་ཅག་གིས་ཁོའི་གཏམ་ལ་ཉོན་ཅིག་ཅེས༌གསུངས།
MAR 9:8 ཐུགས་སྲས་རྣམས་ཀྱིས་མྱུར་དུ་མཐའ་འཁོར་ལ་བལྟས་པ༌ན། སྐྱབས་མགོན་ཡེ་ཤུ་གཅིག་པུ་ཁོ་རྣམས་དང་མཉམ་དུ་བཞུགས་པ་ལས་ཅི་ཡང་མ་མཐོང༌ངོ༌།།
MAR 9:9 དེ་ནས་ཁོང་རྣམས་རི་བོ་ལས་མར་ཕེབས་པའི་དུས༌སུ། སྐྱབས་མགོན་ཡེ་ཤུས་འདི་སྐད༌དུ། མིའི་བུ་ད་དུང་འཆི་བ་ལས་སླར་གསོན་པའི་བར་དུ་ཁྱོད་ཅག་གིས་ཅི་མཐོང་བ་དེ་གཞན་སུ་ལའང་མི་སྨྲ་བར་གྱིས་ཞེས་བཀའ་བསྒོས༌སོ།།
MAR 9:10 ཐུགས་སྲས་རྣམས་ཀྱིས་གསུང་དེ་ཡིད་ལ་བཟུང༌ཞིང༌། འཆི་བ་ལས་སླར་གསོན་ཞེས་གསུངས་པའི་དོན་ཅི་ཡིན་ཕན་ཚུན་གླེང༌མོལ་བྱས།
MAR 9:11 ཁོ་རྣམས་ན༌རེ། མཁན་པོ་རྣམས་ཀྱིས་ཨེ་ལི་ཡཱ་སྔོན་དུ་འབྱོན་ངེས་ཡིན་ཞེས་ཟེར་དོན་ཅི་ཞུས་པ༌ལ།
MAR 9:12 ཁོང་གིས་འདི་སྐད༌དུ། ཨེ་ལི་ཡཱ་དངོས་སུ་སྔོན་ལ་བྱོན་ཏེ་ཐམས་ཅད་བསྐྱར་དར་བྱ་བར༌ངེས། གསུང་རབ་ཀྱི་མདོ༌ལས། མིའི་བུ་ཡི་སྐོར་ལ་ཇི་ལྟར་གསུངས་ཡོད་ཅེ༌ན། ཁོང་གིས་སྡུག་བསྔལ་མང་པོ་མྱང་བར་འགྱུར་ཞིང་མི་རྣམས་ཀྱིས་མཐོང་ཆུང་བྱེད་ངེས་ཡིན་ཞེས་བསྟན་ཡོད་པ་མ་ཡིན༌ནམ།
MAR 9:13 འོན༌ཀྱང༌། བདག་གིས་ཁྱོད་རྣམས་ལ་སྨྲས་པ་ནི་གསུང་རབ་ཀྱི་མདོ་ལས་ཨེ་ལི་ཡཱའི་སྐོར་བཀོད་ཡོད་པ་ལྟར་ཁོང་ཉིད་བྱོན་ཟིན༌ལ། མི་རྣམས་ཀྱིས་ཁོང་ལ་ཅི་འདོད་བཞིན་བྱས་པ་ཡིན་ཞེས་གསུངས༌སོ།།
MAR 9:14 དེ་ནས་ཁོང་རྣམས་ཐུགས་སྲས་གཞན་རྣམས་ཀྱི་གམ་དུ་ཕེབས་པ༌ན། མི་ཤིན་ཏུ་མང་པོས་ཐུགས་སྲས་གཞན་རྣམས་ཀྱི་མཐའ་བསྐོར༌ཞིང༌། ཡང་མཁན་པོ་འགའ་ཞིག་གིས་ཁོ་རྣམས་དང་རྩོད་གླེང་བྱེད་བཞིན་པ་གཟིགས༌སོ།།
MAR 9:15 དེ་ནས་མི་ཚོགས་ཀྱིས་སྐྱབས་མགོན་ཡེ་ཤུ་མཐོང་མ་ཐག་ཐམས་ཅད་ངོ་མཚར་བ་དང་ཁོང་གི་དྲུང་དུ་བརྒྱུགས་ཡོང་ནས་ཁོང་ལ་མཇལ༌ཏོ།།
MAR 9:16 དེ་ནས་སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། ཁྱོད་ཅག་གིས་ཅི་ཞིག་རྩོད་བཞིན་ཡོད་དམ་ཞེས་དྲིས་པ༌ལ།
MAR 9:17 མི་ཚོགས་ཀྱི་ཁྲོད་ནས་མི་ཞིག་ན༌རེ། སློབ་དཔོན༌ལགས། ངས་རང་གི་བུ་ཁྱེད་ཀྱི་དྲུང་དུ་ཁྲིད་ཡོང་བ༌ཡིན། ངའི་བུ་ནི་གདོན་འདྲེ་ཞིག་གིས་བཟུང་སྟེ་ལྐུགས་པར་གྱུར༌ཅིང༌།
MAR 9:18 གང་ས་གང་དུའང་གདོན་འདྲེས་བཟུང༌ཚེ། བུ་ས་ལ་སྒྱེལ་ཞིང་ཁ་ནས་ལྦུ་བ་བཞུར་བ༌དང༌། སོ་འཆའ་ཞིང་ལུས་པོའང་རེངས་པོར་འགྱུར༌བས། ངས་ཁྱེད་ཀྱི་ཐུགས་སྲས་རྣམས་ལ་གདོན་འདྲེ་ཕྱིར་སྐྲོད་པར་ཞུས་ཀྱང་ཁོ་རྣམས་ཀྱིས་སྐྲོད་མ་ནུས་ཞེས་ཞུས༌སོ།།
MAR 9:19 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཀྱེ། དད་པ་མེད་པའི་མི་རབས༌འདི། བདག་ནི་ཁྱོད་ཅག་དང་མཉམ་དུ་དུས་ནམ་ཞིག་གི་བར་དུ་སྡོད་དགོས༌སམ། ངས་དུས་ནམ་ཞིག་གི་བར་དུ་ཁྱོད་ཅག་ལ་བཟོད་བསྲན་བྱེད་དགོས༌སམ། བུ་དེ་བདག་གི་མདུན་དུ་ཁྲིད་ཤོག་ཅེས་གསུངས་པ༌དང༌།
MAR 9:20 མི་རྣམས་ཀྱིས་བུ་དེ་ཁོང་གི་དྲུང་དུ་ཁྲིད་ཡོང་བ༌དང༌། གདོན་འདྲེ་དེས་སྐྱབས་མགོན་ཡེ་ཤུ་མཐོང་མ་ཐག་བུ་དྲག་ཏུ་སྤྲུགས༌པས། བུ་ས་ལ་འགྱེལ་ཞིང་འགྲེ་ལྡོག་བརྒྱབ་པ་དང་ཁ་ནས་ལྦུ་བ་བཞུར༌ཏོ།།
MAR 9:21 དེ་ནས་སྐྱབས་མགོན་ཡེ་ཤུས་བུ་དེའི་ཕ་ལ་དུས་ནམ་ཞིག་ཏུ་འདི་ལྟ་བུར་གྱུར་ཏམ་ཞེས་དྲིས་པ༌ལ། ཕ་ན༌རེ། ཁོ་ཆུང་དུས་ནས་བཟུང་འདི་ལྟར༌ཡིན།
MAR 9:22 གདོན་འདྲེ་དེས་ངའི་བུ་གསོད་པའི་ཆེད་དུ་ཐེངས་མང་པོར་མེ་དང་ཆུའི་ནང་དུ་འཕངས༌མྱོང༌། ཁྱེད་ཀྱིས་ཅི་ཞིག་མཛད་ནུས༌ན། ངེད་ཅག་ལ་སྙིང་རྗེ་གནང་ཞིང་སྐྱབས་སུ་འཛིན་པར་མཛོད་ཅེས་ཞུས་པ༌དང༌།
MAR 9:23 སྐྱབས་མགོན་ཡེ་ཤུས་འདི་སྐད༌དུ། ཅི་ཞིག་མཛད་ནུས་ན་ཟེར༌རམ། སུས་ཀྱང་དད་པ་བྱས་ན་དོན་ཐམས་ཅད་འགྲུབ་སྲིད་ཅེས་གསུངས༌སོ།།
MAR 9:24 བུའི་ཕ་ཡིས་དེ་མ་ཐག་སྐད་ཆེན༌པོས། ངས་དད་པ༌བྱེད། འོན་ཀྱང་ངའི་དད་པ་མི་འདང་བས་རོགས་རམ་མཛོད་ཅིག་ཅེས་ཞུས་པ༌ལ།
MAR 9:25 སྐྱབས་མགོན་ཡེ་ཤུས་མི་ཚོགས་ཐམས་ཅད་རྒྱུག་ཡོང་བ་གཟིགས་པ་དང་གདོན་འདྲེ་ལ་འདི་སྐད་བཀའ་བཀྱོན་གནང་བ༌སྟེ། འོན་ཞིང་ལྐུགས་པའི་གདོན་འདྲེ༌ཁྱོད། ཁོའི་ལུས་ནས་ཕྱིར་བུད༌ཅིག ཕྱིན་ཆད་བུ་དེའི་ལུས་ལ་ཕྱིར་མ་ལོག་ཅིག་ཅེས་བཀའ་བབས་པ་ཡིན་ཞེས་གསུངས༌སོ།།
MAR 9:26 དེ་ནས་གདོན་འདྲེས་འུར་བརྒྱབ་ཅིང་བུ་འདར་དུ་བཅུག་ནས་ཕྱི་རུ་ཐོན་པ༌ན། བུ་བེམ་པོ་ལྟར་གྱུར་པས་མི་མང་ཤོས་ཀྱིས་བུ་དེ་ཤི་ཟིན་ཞེས་སྨྲས༌སོ།།
MAR 9:27 འོན་ཀྱང་སྐྱབས་མགོན་ཡེ་ཤུས་བུའི་ལག་པར་འཇུས་ཏེ་བསྐྱོར་བ་ན་བུའང་ཡར༌ལངས།
MAR 9:28 དེ་ནས་སྐྱབས་མགོན་ཡེ་ཤུ་ཁང་པའི་ནང་དུ་ཕེབས་ཤིང་ཟུར་ནས་ཐུགས་སྲས་རྣམས་ན༌རེ། ངེད་ཅག་གིས་ཅིའི་ཕྱིར་གདོན་འདྲེ་དེ་ཕྱིར་བསྐྲོད་མ་ནུས་ཞེས་ཞུས་པ༌ལ།
MAR 9:29 ཁོང་གིས་འདི་སྐད༌དུ། གདོན་འདྲེ་འདིའི་རིགས་གསོལ་བ་འདེབས་པ་ལས་གཞན་ཐབས་གང་གིས་ཀྱང་ཕྱི་རུ་ཕུད་མི་ནུས་ཞེས་གསུངས༌སོ།།
MAR 9:30 དེ་ནས་ཁོང་རྣམས་ལམ་ལ་ཆས་ཤིང་ག་ལིལ་ཡུལ་བརྒྱུད་ནས་ཕེབས་པ༌དང༌། སྐྱབས་མགོན་ཡེ་ཤུས་དོན་དེ་མི་གཞན་ལ་ཤེས་སུ་མི་འཇུག་པར་དགོངས༌ཏེ།
MAR 9:31 ཐུགས་སྲས་རྣམས་ལ་འདི་སྐད༌དུ། མིའི་བུ་མི་རྣམས་ཀྱི་ལག་ཏུ་སྤྲོད༌ཅིང༌། དེ་དག་གིས་ཁོ་རང་གསོད་པར་འགྱུར༌ལ། བསད་ནས་ཉིན་གསུམ་གྱི་རྗེས་སུ་ཁོ་རང་སླར་གསོན་པར་ངེས་ཞེས་གདམས༌སོ།།
MAR 9:32 ཐུགས་སྲས་རྣམས་ཀྱིས་གསུང་དེའི་དོན་མ་རྟོགས་ཀྱང་ཁོང་ལ་དྲི་བ་འདོན་མ་ཕོད༌དོ།།
MAR 9:33 དེ་ནས་ཁོང་རྣམས་ཀཱ་ཕར་ན་ཧུམ་དུ་སླེབས་པ་དང་སྐྱབས་མགོན་ཡེ་ཤུ་ཁང་པའི་ནང་དུ་བཞུགས་པའི་ཚེ་ཐུགས་སྲས་རྣམས་ལ་འདི་སྐད༌དུ། ཁྱོད་ཅག་གིས་ལམ་བར་ནས་ཅི་ཞིག་གླེང་བ་ཡིན་ཞེས༌དྲིས།
MAR 9:34 ཁོ་རྣམས་ཀྱིས་ལམ་བར་དུ་ཁོ་རྣམས་ལས་སུ་ཞིག་མཆོག་ཏུ་གྱུར་པ་ཡིན་པར་རྩོད་གླེང་བྱས་པས་སུས་ཀྱང་ཁ་མ་གྲགས༌སོ།།
MAR 9:35 ཁོང་ཉིད་མར་བཞུགས་རྗེས་ཐུགས་སྲས་བཅུ་གཉིས་པོ་བོས་ཏེ་འདི་སྐད༌དུ། སུ་ཞིག་གིས་རང་ཉིད་མཆོག་གྱུར་ཡིན་པར་འདོད༌ན། དེ་ནི་མི་ཐམས་ཅད་ཀྱི་མཐའ་མ་དང་མི་ཀུན་ལ་ཞབས་ཕྱི་སྒྲུབ་མཁན་ཏུ་འགྱུར་དགོས་པ་ཡིན་ཞེས་གསུངས༌ཤིང༌།
MAR 9:36 དེ་ནས་ཁོང་གིས་བྱིས་པ་ཆུང་ངུ་ཞིག་ཁྲིད་ཡོང་སྟེ་ཁོ་རྣམས་ཀྱི་དཀྱིལ་ནས་སྡོད་དུ་བཅུག་པ༌དང༌། ཡང་བྱིས་པ་དེ་ཁོང་གི་པང་དུ་བཟུང་སྟེ་འདི་སྐད༌དུ།
MAR 9:37 སུ་ཞིག་གིས་ངའི་མིང་གི་ཕྱིར་འདི་འདྲའི་བྱིས་པ་ཆུང་ངུ་ཞིག་ལ་བསུ་བ་བྱས༌ན། དོན་དམ་དུ་བདག་ལ་བསུ་བ་བྱས་པ༌ཡིན། ཡང་སུ་ཞིག་གིས་ང་རང་ལ་བསུ་བ་བྱས་པ་ཡིན༌ན། དོན་དམ་དུ་ང་རང་ལ་བསུ་བ་བྱས་པ་མ་ཡིན་པར་ང་རང་མངགས་མཁན་ཁོང་ལ་བསུ་བ་བྱས་པ་ཡིན་ཞེས་གསུངས༌སོ།།
MAR 9:38 དེ་ནས་ཡོ་ཧ་ནན་ན༌རེ། སློབ་དཔོན༌ལགས། མི་གཞན་ཞིག་གིས་ཁྱེད་ཀྱི་མཚན་ལ་བརྟེན་ནས་གདོན་འདྲེ་སྐྲོད་བཞིན་པ་ངེད་རྣམས་ཀྱིས་མཐོང་བྱུང༌ངོ༌། །འོན་ཀྱང་མི་དེ་ནི་བདག་ཅག་གི་རྗེས་སུ་མི་འབྲང༌བས། ངེད་རྣམས་ཀྱིས་དོན་དེ་ལྟར་བྱེད་པ་བཀག་པ་ཡིན་ཞེས་ཞུས་པ༌ལ།
MAR 9:39 སྐྱབས་མགོན་ཡེ་ཤུས་འདི་སྐད༌དུ། མི་གཞན་གྱིས་བདག་གི་མིང་ལ་བརྟེན་ནས་དོན་ངོ་མཚར་ཅན་བྱས༌རྗེས། མྱུར་དུ་བདག་ལ་ཚིག་ངན་སྨྲ་བར་མི་ནུས་པས་ཁོ་རང་མ་འགོག༌ཅིག
MAR 9:40 བདག་ཅག་དགྲ་རུ་མི་འཛིན་པ་དེ་ནི་བདག་ཅག་གི་ཕྱོགས༌ཡིན།
MAR 9:41 ངས་ཁྱོད་རྣམས་ལ་བདེན་པར་སྨྲ༌སྟེ། སུ་ཞིག་གིས་ཁྱོད་ཅག་ནི་མཱ་ཤི་ཀ་ལ་གཏོགས་པའི་མི་ཡིན་པའི༌ཕྱིར། ཁྱོད་རྣམས་ལ་ཆུ་ཕོར་བ་གང་བྱིན་ནའང་མི་དེའི་བྱ་དགའ་ཅི་ནས་ཀྱང་སྟོང་བར་མི་འགྱུར་ཞེས་གསུངས༌སོ།།
MAR 9:42 དེ་ནས་སྐྱབས་མགོན་ཡེ་ཤུས་འདི་སྐད༌དུ། སུ་ཞིག་གིས་བདག་ལ་དད་པའི་བྱིས་པ་ཆུང་ངུ་འདི་རྣམས་ལས་གཅིག་ལ་སྡིག་པ་བྱེད་དུ་འཇུག་པ༌ལས། མི་དེའི་སྐེ་ལ་རང་འཐག་གི་རྡོ་ཆེན་པོ་ཞིག་བཏགས་ནས་རྒྱ་མཚོའི་ནང་དུ་འཕངས་ན་ལེགས༌སོ།།
MAR 9:43 གལ་ཏེ་ཁྱོད་ཀྱི་ལག་པས་ཁྱོད་ལ་སྡིག་པ་བྱེད་དུ་འཇུག༌ན། ལག་པ་དེ་ཆོད༌ཅིག ཁྱོད་རང་ལག་པ་གཉིས་དང་ལྡན་པར་ནམ་ཡང་ཞི་བ་མེད་པའི་དམྱལ་བའི་གནས་ཀྱི་མེ་རུ་འཇུག་པ༌ལས། ལག་རྡུམ་དུ་གྱུར་ཀྱང་མཐའ་མེད་པའི་ཚེ་སྲོག་ཐོབ་པ་དེ་ལེགས༌སོ།།
MAR 9:44 དམྱལ་བའི་གནས་སུའང་མི་དེ་དག་ཟ་བའི་འབུ་མི་འཆི་ལ་མེ་ཡང་མི༌ཞིའོ།།
MAR 9:45 གལ་ཏེ་ཁྱོད་ཀྱི་རྐང་པས་ཁྱོད་ལ་སྡིག་པ་བྱེད་དུ་འཇུག༌ན། རྐང་པ་དེ་ཆོད༌ཅིག ཁྱོད་རང་རྐང་པ་གཉིས་དང་ལྡན་པར་དམྱལ་བའི་གནས་སུ་གཡུག་པ༌ལས། གྱོལ་པོར་གྱུར་ཀྱང་མཐའ་མེད་པའི་ཚེ་སྲོག་ཐོབ་པ་དེ་ལེགས༌སོ།།
MAR 9:46 དམྱལ་བའི་གནས་སུའང་མི་དེ་དག་ཟ་བའི་འབུ་མི་འཆི་ལ་མེ་ཡང་མི༌ཞིའོ།།
MAR 9:47 གལ་ཏེ་ཁྱོད་ཀྱི་མིག་གིས་ཁྱོད་ལ་སྡིག་པ་བྱེད་དུ་འཇུག༌ན། མིག་དེ་བཏོན་ནས་དོར༌ཅིག ཁྱོད་རང་མིག་ཟུང་དང་ལྡན་པར་དམྱལ་བའི་གནས་སུ་གཡུག་པ༌ལས། མིག་ཡ་གཅིག་མེད་ནའང་དཀོན་མཆོག་གི་རྒྱལ་སྲིད་དུ་ཞུགས་པ་དེ་ལེགས༌སོ།།
MAR 9:48 དམྱལ་བའི་གནས་སུའང་མི་དེ་དག་ཟ་བའི་འབུ་མི་འཆི་ལ་མེ་ཡང་མི༌ཞིའོ།།
MAR 9:49 རྒྱུ་མཚན་ནི་མི་རེ་རེ་ལ་མེ་ནི་ལན་ཚྭ་བཞིན་དུ་འདེབས་པར༌འགྱུར།
MAR 9:50 སྤྱིར་ལན་ཚྭ་ནི་ལེགས་ཀྱང་ལན་ཚྭའི་བྲོ་བ་ཡལ༌ན། དེའི་བྲོ་བ་གང་གིས་བསྐྱེད༌དམ། ཁྱོད་ཅག་གི་ཁྲོད་དུའང་ཚྭ་ཡོད་པ་ལྟར་གྱུར༌ནས། ཕན་ཚུན་འགྲིག་མཐུན་ངང་གནས་པར་གྱིས་ཤིག་ཅེས་གསུངས༌སོ།།
MAR 10:1 དེ་ནས་སྐྱབས་མགོན་ཡེ་ཤུ་ཡར་བཞེངས་ནས་ཡོར་དན་གཙང་པོའི་ཕར་ཕྱོགས་སུ་ཡོད་པའི་ཡ་ཧུ་དཱའི་ཡུལ་དུ་ཕེབས་པ༌དང༌། མི་མང་པོ་སླར་ཡང་ཁོང་གི་དྲུང་དུ་འདུས༌ཤིང༌། ཁོང་གིས་སྔར་བཞིན་མི་དེ་རྣམས་ལ་ཆོས་གསུངས་པ༌རེད།
MAR 10:2 ཕ་རུ་ཤི་པ་འགའ་ཤས་ཁོང་ལ་ཚོད་བགམ་པའི་ཕྱིར་ཁོང་གི་དྲུང་དུ་ཡོང་སྟེ་ན༌རེ། སྐྱེས་པ་ཞིག་གིས་རང་གི་ཆུང་མ་སྤངས་ན་བཀའ་ཁྲིམས་དང་མཐུན་ནམ་ཞེས་ཞུས་པ༌ན།
MAR 10:3 ཁོང་གིས་འདི་སྐད༌དུ། མོ་ཤེ་ཡིས་ཁྱོད་རྣམས་ལ་བཀའ་ཅི་ཞིག་གནང་ཡོད་དམ་ཞེས་གསུངས་པ༌དང༌།
MAR 10:4 ཡང་ཁོ་རྣམས་ན༌རེ། མོ་ཤེ་ཡིས་བཟའ་འཐོར་ཡི་གེ་བྲིས་ན་ཆུང་མ་སྤངས་ཆོག་ཅེས་བཀའ་གནང་བ་ཡིན་ཞེས་ཞུས་པ༌ལ།
MAR 10:5 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གི་སེམས་གྱོང་པོ་ཡིན་པས་མོ་ཤེ་ཡིས་བཀའ་འདི་གནང་བ་ཡིན༌མོད།
MAR 10:6 འོན་ཀྱང་འཇིག་རྟེན་འདི་ཐོག་མར་བཀོད་དུས་དཀོན་མཆོག་གིས་མི་ནི་ཕོ་དང་མོ་གཉིས་སུ་མཛད་པ༌ཡིན།
MAR 10:7 དེའི༌ཕྱིར། སྐྱེས་པ་ནི་རང་གི་ཕ་མ་དང་ཁ་བྲལ་ནས་རང་གི་ཆུང་མར་འབྲེལ༌ཏེ།
MAR 10:8 ཁོ་གཉིས་ལུས་པོ་གཅིག་ཏུ་འགྱུར་བས་ཕྱིན་ཆད་ཁོ་གཉིས་ནི་ལུས་པོ་གཉིས་མ་ཡིན་པར་ལུས་པོ་གཅིག་རང༌ཡིན།
MAR 10:9 དེ་བས་དཀོན་མཆོག་གིས་སྦྲེལ་བ་དེ་མི་སུས་ཀྱང་གཏོར་མི་རུང་ཞེས་གསུངས༌སོ།།
MAR 10:10 དེ་ནས་ཁོང་རྣམས་ཁང་པའི་ནང་དུ་ཕེབས༌རྗེས། ཐུགས་སྲས་རྣམས་ཀྱིས་ཁོང་ལ་གསུང་དེའི་དོན་དྲིས་པ༌ན།
MAR 10:11 ཁོང་གིས་འདི་སྐད༌དུ། སུ་ཞིག་གིས་རང་གི་ཆུང་མ་སྤངས་ཏེ་གཞན་ཞིག་བླངས་ན་དེ་ནི་ཆུང་མར་འགལ་ནས་ལོག་གཡེམ་བྱས་པ༌ཡིན།
MAR 10:12 ཡང་བུད་མེད་ཅིག་གིས་རང་གི་སྐྱེས་པ་སྤངས་ནས་སྐྱེས་པ་གཞན་དང་གཉེན་བསྒྲིགས་ན་དེ་ཡང་ལོག་གཡེམ་བྱས་པ་ཡིན་ཞེས་གསུངས༌སོ།།
MAR 10:13 དེ་ནས་མི་རྣམས་ཀྱིས་བྱིས་པ་འགའ་ཁོང་གི་ཕྱག་གིས་རེག་པའི་ཆེད་དུ་ཁོང་གི་དྲུང་དུ་ཁྲིད་ཡོང༌ནའང༌། ཐུགས་སྲས་རྣམས་ཀྱིས་དེ་རྣམས་ལ་བཀའ་བཀྱོན་གནང༌ངོ༌།།
MAR 10:14 སྐྱབས་མགོན་ཡེ་ཤུས་ཚུལ་དེ་གཟིགས་པ་དང་ཐུགས་ཁྲོས་ཏེ་ཐུགས་སྲས་རྣམས་ལ་འདི་སྐད༌དུ། དཀོན་མཆོག་གི་རྒྱལ་སྲིད་ནི་དེ་ལྟ་བུ་རྣམས་ཀྱི་ཡིན༌པས། བྱིས་པ་རྣམས་མ་འགོག་པར་བདག་གི་དྲུང་ལ་ཡོང་དུ༌ཆུག
MAR 10:15 ངས་ཁྱོད་རྣམས་ལ་བདེན་པར་སྨྲ༌སྟེ། མི་སུས་ཀྱང་དཀོན་མཆོག་གི་རྒྱལ་སྲིད་ནི་བྱིས་པའི་ཚུལ་གྱིས་དང་དུ་མ་བླངས༌ན། མི་དེ་ཅིས་ཀྱང་རྒྱལ་སྲིད་དེར་ཞུགས་མི་ནུས་ཞེས་གསུངས་པ༌དང༌།
MAR 10:16 ཁོང་གིས་བྱིས་པ་དེ་རྣམས་པང་དུ་བསྣམས་ཤིང་དེ་དག་གི་སྟེང་ལ་ཕྱག་བཞག་སྟེ་བྱིན་གྱིས་བརླབས༌སོ།།
MAR 10:17 དེ་ནས་སྐྱབས་མགོན་ཡེ་ཤུ་ལམ་དུ་ཕེབས་པའི་སྐབས༌སུ། མི་ཞིག་བརྒྱུགས་ཡོང་ནས་ཁོང་གི་དྲུང་དུ་པུས་མོ་སར་བཙུགས་ཏེ་ན༌རེ། སློབ་དཔོན་བཟང་པོ༌ལགས། ངས་གང་ཞིག་བྱས༌ན་ད་གཟོད་མཐའ་མེད་པའི་ཚེ་སྲོག་འཐོབ་ཐུབ་བམ་ཞེས་ཞུས༌སོ།།
MAR 10:18 ཁོང་གིས་འདི་སྐད༌དུ། ཁྱོད་ཀྱིས་ཅིའི་ཕྱིར་བདག་ལ་བཟང་པོ་ཟེར༌རམ། དཀོན་མཆོག་ཁོ་ན་ལས་གཞན་བཟང་པོ་གཅིག་ཀྱང༌མེད།
MAR 10:19 མི་མ༌གསོད། ལོག་གཡེམ་མ༌བྱེད། རྐུ་མ༌བྱེད། རྫུན་གྱི་དཔང་པོ་མ༌བྱེད། མི་ལ་གྱོང་གུད་མ༌བཟོ། རང་གི་ཕ་མ་གཉིས་ལ་བཀུར་བསྟི་བྱེད་དགོས་ཞེས་གསུངས་པའི་བཀའ་ཁྲིམས་འདི་དག་ཁྱོད་ཀྱིས་ཤེས་པ་ཡིན་ཞེས་གསུངས༌སོ།།
MAR 10:20 ཡང་མི་དེ་ན༌རེ། སློབ་དཔོན༌ལགས། ངས་ཆུང་དུས་ནས་བཀའ་དེ་ཐམས་ཅད་བསྲུངས་པ་ཡིན་ཞེས༌ཞུས།
MAR 10:21 སྐྱབས་མགོན་ཡེ་ཤུས་ཁོ་ལ་གཟིགས་ཤིང་བྱམས་པའི་ཉམས་དང༌བཅས། ཁྱོད་ལ་ད་དུང་དོན་གཅིག་མི་ཚང༌སྟེ། ཁྱོད་རང་ཕྱིར་སོང་ནས་རང་ལ་ཡོད་པ་ཐམས་ཅད་བཙོངས་ནས་དབུལ་པོ་རྣམས་ལ་བྱིན༌ཅིག ནམ་མཁའི་ཞིང་ཁམས་སུ་ཁྱོད་ལ་ནོར་བུ་འཐོབ་པར༌འགྱུར། དེ་ནས་བདག་གི་རྗེས་སུ་འབྲང་བར་གྱིས་ཞེས་གསུངས་པ༌ན།
MAR 10:22 མི་དེ་ལ་རྒྱུ་ནོར་ཤིན་ཏུ་མང་པོ་ཡོད་པས་གསུང་དེ་ཐོས་པ་དང་ངོ་མདངས་འགྱུར་ཞིང་ཡིད་སྐྱོ་བའི་ངང་ནས་ཕྱིར་སོང༌ངོ༌།།
MAR 10:23 དེ་ནས་སྐྱབས་མགོན་ཡེ་ཤུས་རང་ཉིད་ཀྱི་མཐའ་འཁོར་ལ་གཟིགས་ཤིང་ཐུགས་སྲས་རྣམས་ལ་འདི་སྐད༌དུ། རྒྱུ་འབྱོར་བ་ཅན་རྣམས་དཀོན་མཆོག་གི་རྒྱལ་སྲིད་དུ་ཞུགས་པ་ནི་ཇི་འདྲའི་དཀའ་ཨང་ཞེས་གསུངས་པ༌དང༌།
MAR 10:24 ཐུགས་སྲས་རྣམས་ཁོང་གི་གསུང་དེར་ཧ་ལས་པ༌རེད། འོན་ཀྱང་སྐྱབས་མགོན་ཡེ་ཤུས་སླར་ཡང་ཐུགས་སྲས་རྣམས་ལ་འདི་སྐད༌དུ། བུ་ཕྲུག༌རྣམས། དཀོན་མཆོག་གི་རྒྱལ་སྲིད་དུ་ཞུགས་པ་ནི༌དཀའོ།།
MAR 10:25 ཕྱུག་བདག་ཅིག་དཀོན་མཆོག་གི་རྒྱལ་སྲིད་དུ་ཞུགས་པ༌ལས། རྔ་མོང་ཞིག་ཁབ་མིག་ཏུ་འཛུལ་བ་སླ་ཞེས་གསུངས་པ༌དང༌།
MAR 10:26 ཐུགས་སྲས་རྣམས་ཤིན་ཏུ་ཧ་ལས་ཤིང་ཁོང་ལ་དེས་ན་སུ་ཞིག་ལ་ཐར་པ་འཐོབ་ཐུབ་བམ་ཞེས་ཞུས་པ༌ན།
MAR 10:27 ཡང་སྐྱབས་མགོན་ཡེ་ཤུས་ཁོ་རྣམས་ལ་གཟིགས་ཏེ་འདི་སྐད༌དུ། དེ་ནི་མི་ཡིས་མི་ནུས་ཀྱང་དཀོན་མཆོག་གིས་ནུས་པ༌ཡིན། དཀོན་མཆོག་གིས་ཐམས་ཅད་བསྒྲུབ་སྲིད་ཅེས་གསུངས༌སོ།།
MAR 10:28 དེ་ནས་པེ་ཏྲོ་ན༌རེ། ཁྱེད་ཀྱིས་གཟིགས༌དང༌། ངེད་ཅག་གིས་ཐམས་ཅད་སྤངས་ནས་ཁྱེད་ཀྱི་རྗེས་སུ་འབྲངས་པ་ཡིན་ཞེས་ཞུས་པ༌ལ།
MAR 10:29 ཡང་སྐྱབས་མགོན་ཡེ་ཤུས་འདི་སྐད༌དུ། ངས་ཁྱོད་ཅག་ལ་བདེན་པར་སྨྲ༌སྟེ། སུ་ཞིག་གིས་བདག་དང་འཕྲིན་བཟང་གི་དོན་དུ་རང་གི་ཁང་པ༌དང༌། ཕུ༌ནུ། ལྕམ༌སྲིང༌། ཕ༌མ། བུ༌ཕྲུག ས་ཞིང་སོགས་སྤངས༌ན།
MAR 10:30 མི་དེ་ལ་བསྐལ་པ་འདིར་ཁང༌པའམ། ཕུ༌ནུའམ། ལྕམ་སྲིང༌ངམ། མའམ། བུ་ཕྲུག༌གམ། ས་ཞིང་སོགས་ལྡབ་བརྒྱ་འགྱུར་གྱིས་འཐོབ་པར་མ༌ཟད། གནོད་འཚེ་ཡང་ཐེབས་ཡོང་ཞིང་བསྐལ་པ་འབྱུང་འགྱུར་དུ་མཐའ་མེད་པའི་ཚེ་སྲོག་ཀྱང་འཐོབ་ངེས༌སོ།།
MAR 10:31 འོན༌ཀྱང༌། སྔ་མ་མང་པོ་ཕྱི་མར་འགྱུར༌ཞིང༌། ཕྱི་མ་མང་པོ་སྔ་མར་འགྱུར་ཞེས་གསུངས༌སོ།།
MAR 10:32 དེ་ནས་ཁོང་རྣམས་ལམ་ལ་ཆས་ཏེ་ཡར་ཡེ་རུ་སཱ་ལེམ་དུ་ཕེབས༌སྐབས། སྐྱབས་མགོན་ཡེ་ཤུ་སྔོན་དུ་ཕེབས་བཞིན་པ་དང་ཐུགས་སྲས་རྣམས་ཧ་ལས༌ཤིང༌། རྗེས་སུ་འབྲང་མཁན་རྣམས་ཀྱང་འཇིགས་སྣང་སྐྱེས༌སོ། །ཁོང་གིས་ཡང་བསྐྱར་ཐུགས་སྲས་བཅུ་གཉིས་པོ་ཟུར་དུ་ཁྲིད༌ཅིང༌། རང་ཉིད་ལ་འབྱུང་ངེས་པའི་དོན་རྣམས་གསུངས༌ཏེ།
MAR 10:33 ལྟོས༌དང༌། བདག་ཅག་ཡར་ཡེ་རུ་སཱ་ལེམ་དུ་འགྲོ་བཞིན༌ཡོད། མིའི་བུ་ཁོ་རང་མཆོད་དཔོན་ཆེན་པོ་དག་དང་མཁན་པོ་རྣམས་ཀྱི་ལག་ཏུ་སྤྲོད་ཅིང་དེ་དག་གིས་ཁོ་རང་གསོད་དགོས་པའི་ཁྲིམས་ཐག་གཅོད་པ་དང་ཕྱི་ཕྱོགས་པ་རྣམས་ལ་སྤྲད༌དེ།
MAR 10:34 ཁོ་རང་ལ་འཕྱ་དམོད་བྱས་ཏེ་མཆིལ་མ་འདེབས༌པ་དང་། རྟ་ལྕག་གིས་གཞུས་ནས་གསོད་པར་འགྱུར༌རོ། །དེ་ནས་ཉིན་གསུམ་གྱི་རྗེས་སུ་ཁོ་རང་སླར་གསོན་པར་འགྱུར་ཞེས་ལུང་བསྟན༌ཏོ།།
MAR 10:35 དེ་ནས་ཟེ་བད་ཡཱའི་བུ་ཡ་ཀོབ་དང་ཡོ་ཧ་ནན་གཉིས་སྐྱབས་མགོན་ཡེ་ཤུའི་དྲུང་དུ་ཡོང་སྟེ་ན༌རེ། སློབ་དཔོན༌ལགས། ངེད་གཉིས་ཀྱིས་ཁྱེད་ལ་ཅི་ཞིག་ཞུས་ན་དེ་གནང་བར་སྨོན་ཞེས་ཞུས་པ༌ན།
MAR 10:36 ཁོང་གིས་འདི་སྐད༌དུ། ངས་ཁྱོད་གཉིས་ལ་དོན་ཅི་བྱ་དགོས་སམ་ཞེས་གསུངས་པ༌དང༌།
MAR 10:37 ཡང་ཁོ་གཉིས་ན༌རེ། ཁྱེད་ཀྱི་གཟི་བརྗིད་ ནང་དུ་ངེད་གཉིས་ལས་གཅིག་ནི་ཁྱེད་ཀྱི་གཡས་ཕྱོགས་དང་གཅིག་ནི་གཡོན་ཕྱོགས་སུ་སྡོད་དུ་འཇུག་པར་མཛོད་ཅེས་ཞུས༌སོ།།
MAR 10:38 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་གཉིས་ཀྱིས་ཅི་ཞིག་ཞུ་བའང་མི་ཤེས༌ཏེ། ངས་འཐུང་བར་འགྱུར་བའི་ཕོར་བ་ལས་ཁྱོད་གཉིས་ཀྱིས་འཐུང་ནུས༌སམ། ངས་ལེན་པར་འགྱུར་བའི་ཁྲུས་གསོལ་དེ་ཁྱོད་གཉིས་ཀྱིས་ཀྱང་ལེན་ནུས་སམ་ཞེས་གསུངས་པ༌ན།
MAR 10:39 ཁོ་གཉིས་ཀྱིས་ནུས་པ་ཡིན་ཞེས་ཞུས༌སོ། །ཡང་སྐྱབས་མགོན་ཡེ་ཤུས་འདི་སྐད༌དུ། ངས་འཐུང་བར་འགྱུར་བའི་ཕོར་བ་ལས་ཁྱོད་གཉིས་ཀྱིས་ཀྱང་འཐུང་ངེས༌ལ། ངས་ལེན་པར་འགྱུར་བའི་ཁྲུས་གསོལ་དེ་ཡང་ལེན་པར༌འགྱུར།
MAR 10:40 འོན་ཀྱང་ངའི་གཡས་གཡོན་ལ་སྡོད་དུ་འཇུག་པའི་དབང་ནི་བདག་ལ༌མེད། མི་སུ་ཡི་ཆེད་དུ་སྟ་གོན་མཛད་ཡོད་ན་དེ་ལ་གནང་ངེས་ཡིན་ཞེས་གསུངས༌སོ།།
MAR 10:41 ཐུགས་སྲས་བཅུ་པོས་གཏམ་དེ་ཐོས་ཚེ་ཡ་ཀོབ་དང་ཡོ་ཧ་ནན་གཉིས་ཀྱི་སྟེང་ལ་ཁོང་ཁྲོ་ལངས་པ༌རེད།
MAR 10:42 དེ་ནས་སྐྱབས་མགོན་ཡེ་ཤུས་ཁོ་རྣམས་རང་གི་དྲུང་དུ་བོས་ཏེ་འདི་སྐད༌དུ། ཕྱི་ཕྱོགས་པ་རྣམས་ལས་དཔོན་རིགས་སུ་བཀུར་བ་རྣམས་ཀྱིས་རང་གི་འབངས་མི་ལ་དབང་བྱེད༌ཅིང༌། བློན་ཆེན་རྣམས་ཀྱིས་རང་གི་འབངས་མི་ལ་དབང་བསྒྱུར་བ་ཁྱོད་ཅག་གིས་ཀྱང་ཤེས་གསལ་ལྟར༌ཡིན།
MAR 10:43 འོན་ཀྱང་ཁྱོད་ཅག་གི་ཁྲོད་དུ་དེ་ལྟར་བྱ་མི་རུང༌སྟེ། ཁྱོད་ཅག་ལས་སུ་ཞིག་ཆེན་པོར་འགྱུར་འདོད་པ་དེ་ཁྱོད་ཅག་གི་ཞབས་ཕྱི་པར་འགྱུར་དགོས༌ཤིང༌།
MAR 10:44 ཁྱོད་ཅག་ལས་སུ་ཞིག་མཆོག་ཏུ་འགྱུར་འདོད་པ་དེ་མི་ཀུན་གྱི་བྲན་གཡོག་ཏུ་འགྱུར་དགོས༌སོ།།
MAR 10:45 ཅིའི་ཕྱིར་ཞེ༌ན། མིའི་བུ་ཡང་མི་གཞན་གྱི་ཞབས་ཕྱི་འཐོབ་པའི་ཕྱིར་ཡོང་བ་མ་ཡིན༌པར། མི་གཞན་ལ་ཞབས་ཕྱི་བསྒྲུབ་པ་དང་རང་སྲོག་ཕུལ་ནས་མི་མང་པོ་བླུ་བའི་ཆེད་དུ་ཡོང་བ་ཡིན་ཞེས་གསུངས༌སོ།།
MAR 10:46 དེ་ནས་ཁོང་རྣམས་ཡེ་རུ་ཀོ་ལ་ཕེབས་པ༌དང༌། ཡང་ཁོང་ཉིད་དང་ཐུགས་སྲས༌རྣམས། མི་མང་པོ་བཅས་ལྷན་དུ་ཡེ་རུ་ཀོ་དང་ཁ་བྲལ་ནས་འབྱོན་པའི་དུས༌སུ། ཐི་མེ་ཟིའི་བུ་སྤྲང་པོ་ལོང་བ་པཱར་ཏི་མཱ་ཞེས་པ་ལམ་འགྲམ་དུ་བསྡད་ཡོད༌ཅིང༌།
MAR 10:47 སྤྲང་པོ་དེས་ནཱ་ཙ་རེལ་པ་སྐྱབས་མགོན་ཡེ་ཤུ་ཕེབས་པའི་གཏམ་ཐོས་ནས་སྐད་ཆེན༌པོས། ཀྱེ། དཱ་བིད་ཀྱི་རིགས༌སྲས། ཡེ་ཤུ༌ལགས། བདག་ལ་སྙིང་རྗེས་གཟིགས་རོགས་ཞེས་ཞུས༌སོ།།
MAR 10:48 མི་མང་པོས་ཁོ་རང་ཁ་རོག་ཏུ་སྡོད་པར་ནན་གྱིས་བསྐུལ༌ནའང༌། ཁོས་སྔར་ལས་ཀྱང་སྐད་ཆེན༌པོས། ཀྱེ། དཱ་བིད་ཀྱི་རིགས་སྲས༌ལགས། བདག་ལ་སྙིང་རྗེས་གཟིགས་རོགས་ཞེས་འབོད་སྐད་བསྒྲགས༌སོ།།
MAR 10:49 དེ་ནས་སྐྱབས་མགོན་ཡེ་ཤུས་ཀྱང་ཕེབས་མཚམས་བཞག་སྟེ་ཁོ་རང་ཚུར་བོས་ཤིག་ཅེས་གསུངས་པ༌དང༌། ཐུགས་སྲས་རྣམས་ཀྱིས་ལོང་བ་དེ་བོས་ནས་ན༌རེ། སྐྱབས་མགོན་ཡེ་ཤུས་ཁྱོད་རང་ཚུར་ཤོག་ཅེས་གསུངས༌པས། ཁྱོད་རང་སེམས་བདེ་བའི་ངང་ནས་ཡར་ལོངས་ཤིག་ཅེས་སྨྲས་པ༌ན།
MAR 10:50 ཁོས་ཀྱང་རང་གི་ཕྱི་གོས་བསྐྱུར་ནས་མགྱོགས་པོར་ཡར་ལངས་ཏེ་ཁོང་གི་སྐུ་མདུན་དུ་སོང༌ངོ༌།།
MAR 10:51 དེ་ནས་སྐྱབས་མགོན་ཡེ་ཤུས་འདི་སྐད༌དུ། ངས་ཁྱོད་ལ་ཅི་བྱ་དགོས་སམ་ཞེས་གསུངས་པ༌དང༌། ལོང་བ་ན༌རེ། རཱབ་པོ་ནེ༌ལགས། ངའི་མིག་གིས་མཐོང་ནུས་པར་མཛོད་ཅེས་ཞུས་པ༌ན།
MAR 10:52 སྐྱབས་མགོན་ཡེ་ཤུས་ད་ལྟ་ཁྱོད་རང་ཕྱིར་སོང་དང་ཁྱོད་ཀྱི་དད་པས་ཁྱོད་རང་བསྐྱབས་པ་ཡིན་ཞེས་གསུངས་མ༌ཐག ཁོའི་མིག་གིས་མཐོང་བར་གྱུར་ཅིང་ཁོ་རང་ལམ་བར་དེ་ནས་ཁོང་གི་རྗེས་སུ་འབྲངས༌སོ།།
MAR 11:1 དེ་ནས་ཁོང་རྣམས་ཡེ་རུ་སཱ་ལེམ་གྱི་ཉེ་འགྲམ༌སྟེ། སྐྱུ་རུ་རའི་རི་བོའི་ངོས་སུ་ཡོད་པའི་པེ་ཕཱ་གེ་དང་པེ་ཐན་ཡཱ་རུ་ཕེབས༌ཚེ། སྐྱབས་མགོན་ཡེ་ཤུས་ཐུགས་སྲས་གཉིས་མངགས་ཤིང་འདི་སྐད༌དུ།
MAR 11:2 ཁྱོད་གཉིས་ཕ་རོལ་གྱི་གྲོང་སྡེ་རུ་སོང༌དང༌། གནས་དེར་སླེབས་མ་ཐག་སུས་ཀྱང་བཞོན་མ་མྱོང་བའི་བོང་ཕྲུག་ཅིག་བཏགས་ཡོད་པ་མཐོང་ངེས༌ཤིང༌། ཁྱོད་གཉིས་ཀྱིས་ཐག་པ་བཀྲོལ་ནས་འདིར་ཁྲིད༌ཤོག
MAR 11:3 གལ་ཏེ་སུ་ཞིག་གིས་ཁྱོད་གཉིས་ལ་ཅིའི་ཕྱིར་དེ་ལྟར་བྱེད་པ་ཡིན་ཞེས་དྲིས༌ན། ཁྱོད་གཉིས་ཀྱིས་གཙོ་བོ་ལ་མཁོ་བ་ཡིན་ཞེས་སྨྲོས༌དང༌། དེས་ཀྱང་མྱུར་དུ་གཏོང་བར་འགྱུར་ཞེས་གསུངས༌སོ།།
MAR 11:4 དེ་ནས་ཁོ་གཉིས་ཕར་སོང་བ་དང་སྒོའི་ཕྱི་རོལ་གྱི་སྲང་ལམ་དུ་བོང་ཕྲུག་ཅིག་བཏགས་འདུག་པ་མཐོང་སྟེ་འདོགས་ཐག་བཀྲོལ༌ཞིང༌།
MAR 11:5 གནས་དེར་ལངས་བསྡད་ཡོད་པའི་མི་རྣམས་ལས་འགའ་ཞིག་ན༌རེ། ཅིའི་ཕྱིར་བོང་ཕྲུག་དེ་འགྲོལ་བ་ཡིན་ཞེས་དྲིས་པ༌ན།
MAR 11:6 ཁོ་གཉིས་ཀྱིས་སྐྱབས་མགོན་ཡེ་ཤུའི་བཀའ་ལྟར་ལན་བཏབ༌པས། མི་དེ་རྣམས་ཀྱིས་ཀྱང་ཁོ་གཉིས་འགྲོ་རུ་བཅུག༌གོ།
MAR 11:7 དེ་ནས་བོང་ཕྲུག་ཁྲིད་དེ་སྐྱབས་མགོན་ཡེ་ཤུའི་དྲུང་དུ་སླེབས༌རྗེས། ཁོ་གཉིས་ཀྱིས་རང་གི་ཕྱི་གོས་བོང་ཕྲུག་གི་རྒྱབ་ཏུ་བཏིངས་པ་དང་ཁོང་དེ་ལ༌བཅིབས།
MAR 11:8 མི་མང་པོས་རང་གི་ཕྱི་གོས་ལམ་ནང་དུ་བཏིངས་པ༌དང༌། མི་གཞན་རྣམས་ཀྱིས་ཞིང་བར་གྱི་སྡོང་པོའི་ཡལ་ག་བཅད་ནས་ལམ་ནང་དུ་བཀྲམ༌པའོ།།
MAR 11:9 ཁོང་གི་སྔོན་དུ་འགྲོ་བ་དང་རྗེས་སུ་འབྲངས་པའི་མི་རྣམས་ཀྱིས་སྐད་ཆེན༌པོས། ཧོ་ཟན༌ནཱ། གཙོ་བོའི་མཚན་གྱི་སྒོ་ནས་བྱོན་པ་ནི་བྱིན་རླབས་ཅན༌ཡིན།
MAR 11:10 བདག་ཅག་གི་མེས་པོ་དཱ་བིད་ཀྱི་རྒྱལ་སྲིད་འབྱོན་པ་འདི་ནི་བྱིན་རླབས་ཅན༌ཡིན། བླ་ན་མེད་པའི་གནས་ལ་ཧོ་ཟན་ནཱ་ཞེས་ཡང་ཡང་བསྒྲགས༌སོ།།
MAR 11:11 དེ་ནས་ཁོང་ཉིད་ཡེ་རུ་སཱ་ལེམ་དུ་སླེབས་ནས་མཆོད་ཁང་དུ་ཕེབས་ཏེ་རིམ་གྱིས་མཐའ་འཁོར་ལ་གཟིགས༌ཤིང༌། མཚན་མོའི་དུས་ལ་སླེབས་འདུག་པས་ཐུགས་སྲས་བཅུ་གཉིས་པོ་དང་མཉམ་དུ་པེ་ཐན་ཡཱ་རུ་ཕེབས༌སོ།།
MAR 11:12 དེའི་ཕྱི༌ཉིན། ཁོང་རྣམས་པེ་ཐན་ཡཱ་ནས་ཕར་ཕེབས་པའི་དུས་སུ་སྐྱབས་མགོན་ཡེ་ཤུ་བཀྲེས༌ཤིང༌།
MAR 11:13 རྒྱང་རིང་ནས་བསེ་ཡབ་ཤིང་ལོ་མ་འབུས་ཡོད་པ་ཞིག་གཟིགས༌ཏེ། ཤིང་འབྲས་ཐོགས་ཡོད་པར་དགོངས་ནས་དེའི་གམ་དུ་ཕེབས་པ༌ན། བསེ་ཡབ་ཤིང་ལ་འབྲས་བུ་སྨིན་མ་རན་པས་ལོ་མ་ལས་གཞན་ཅི་ཡང་མེད་པ་གཟིགས༌སོ།།
MAR 11:14 དེ་ནས་སྐྱབས་མགོན་ཡེ་ཤུས་ཤིང་སྡོང་དེ་ལ་འདི་སྐད༌དུ། དུས་ད་ནས༌བཟུང༌། ཁྱོད་ཀྱི་འབྲས་བུ་མི་སུས་ཀྱང་མི་བཟའ་བར་གྱུར་ཅིག་ཅེས་གསུངས་ཤིང་ཐུགས་སྲས་རྣམས་ཀྱིས་ཀྱང་ཐོས༌སོ།།
MAR 11:15 དེ་ནས་ཁོང་རྣམས་ཡེ་རུ་སཱ་ལེམ་དུ་ཕེབས་པ་དང་ཁོང་ཉིད་མཆོད་ཁང་དུ་བྱོན༌ཏེ། མཆོད་ཁང་གི་ནང་དུ་ཡོད་པའི་ཚོང་པ་ཐམས་ཅད་སྒོའི་ཕྱི་རུ་ཕུད༌ཅིང༌། དངུལ་བརྗེ་མཁན་གྱི་ཅོག་ཙེ་དང་ཕུག་རོན་ཚོང་མཁན་གྱི་འདུག་སྟེགས་ཀྱང་སར་བསྒྱེལ༌ཏོ།།
MAR 11:16 མི་སུ་ལའང་མཆོད་ཁང་བརྒྱུད་ནས་དངོས་པོ་ཅི་ཡང་འཁྱེར་དུ་མ་བཅུག༌པར།
MAR 11:17 མི་རྣམས་ལ་འདི་སྐད༌དུ། གསུང་རབ་ཀྱི་མདོ༌ལས། ངའི་མཆོད་ཁང་ལ་མི་རིགས་ཀུན་གྱི་སྨོན་ལམ་ཞུ་སའི་གནས་སུ་འབོད་པར་འགྱུར་ཞེས་གསུངས་ཡོད་པ་མིན༌ནམ། འོན་ཀྱང་ཁྱོད་ཅག་གིས་འདི་ནི་ཇག་ཚང་ཞིག་ཏུ་བསྒྱུར་འདུག་ཅེས་གསུངས་པ༌ན།
MAR 11:18 མཁན་པོ་དང་མཆོད་དཔོན་ཆེན་པོ་རྣམས་ཀྱིས་གཏམ་དེ་ཐོས་ནས་སྐྱབས་མགོན་ཡེ་ཤུ་ཇི་ལྟར་དགྲོང་བའི་ཐབས་འཚོལ༌ལོ། །ཡང་དེ་རྣམས་ཁོང་ལ་འཇིགས་པ༌སྟེ། རྒྱུ་མཚན་ནི་མི་ཚོགས་ཐམས་ཅད་ཁོང་གིས་ཆོས་གསུངས་པ་ལ་ངོ་མཚར་བའི་ཕྱིར༌ཡིན།
MAR 11:19 ཡང་མཚན་མོ་རེ་རེར་ཁོང་རྣམས་གྲོང་ཁྱེར་ཕྱི་རོལ་ཏུ་ཕེབས༌སོ།།
MAR 11:20 ཞོགས་པའི་དུས༌སུ། ཁོང་རྣམས་ལམ་ལ་ཆས་སྐབས་བསེ་ཡབ་ཤིང་དེ་རྩ་བ་ནས་བསྐམས་ཟིན་པ་མཐོང༌ཞིང༌།
MAR 11:21 པེ་ཏྲོས་སྐྱབས་མགོན་ཡེ་ཤུའི་གསུང་དེ་དྲན༌ནས། རཱབ་པེ༌ལགས། གཟིགས༌དང༌། ཁྱེད་ཀྱིས་དམོད་པའི་བསེ་ཡབ་ཤིང་ད་ལྟ་བསྐམས་འདུག་ཅེས་ཞུས་པ༌ལ།
MAR 11:22 སྐྱབས་མགོན་ཡེ་ཤུས་འདི་སྐད༌དུ། དཀོན་མཆོག་ལ་དད་པ་བྱོས༌ཤིག
MAR 11:23 ངས་ཁྱོད་རྣམས་ལ་བདེན་པར་སྨྲ༌སྟེ། སུ་ཞིག་གིས་རི་བོ་འདི་ལ་ད་ལྟ་ཉིད་དུ་ཕར་སྤོས་ནས་རྒྱ་མཚོར་ལྷུང་བར་བྱོས་ཞེས་སྨྲས༌ཚེ། དེ་བཞིན་དུ་འགྲུབ་པར་འགྱུར་ཞེས་སེམས་སུ་ཐེ་ཚོམ་མེད་པར་དཀོན་མཆོག་ལ་དད་པ་བྱེད༌ན། དོན་དེ་འགྲུབ་པར་མཛད་ངེས༌སོ།།
MAR 11:24 དེ་བས་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་ཅག་གིས་སྨོན་ལམ་དང་གསོལ་བ་འདེབས་པ་གང་ཡིན་ཡང་ཐོབ་ངེས་པར་དད་པ་བྱོས་དང་དེ་འཐོབ་པར༌འགྱུར།
MAR 11:25 ཡང་ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་ཁྱོད་རྣམས་ཀྱི་ཉེས་པ་བསལ་བའི་ཆེད༌དུ། ཁྱོད་རྣམས་ཡར་འགྲེངས་ནས་གསོལ་བ་འདེབས་པའི་སྐབས༌སུ། མི་གཞན་གྱིས་ཁྱོད་དང་འགལ་བའི་སྡིག་པ་བྱས་ཡོད་ན་དེར་གུ་ཡངས་གཏོང་བར༌གྱིས།
MAR 11:26 གལ་སྲིད་ཁྱོད་རྣམས་ཀྱིས་གུ་ཡངས་མི་གཏོང༌ན། ནམ་མཁའི་ཞིང་ཁམས་སུ་བཞུགས་པའི་ཁྱོད་ཅག་གི་ཡབ་ཀྱིས་ཀྱང་ཁྱོད་རྣམས་ཀྱི་ཉེས་པ་བསལ་བར་མི་འགྱུར་ཞེས་གསུངས༌སོ།།
MAR 11:27 དེ་ནས་ཡང་ཁོང་རྣམས་ཡེ་རུ་སཱ་ལེམ་དུ་ཕེབས༌སོ། །སྐྱབས་མགོན་ཡེ་ཤུས་མཆོད་ཁང་ནང་དུ་ཞབས་ཀྱིས་བཅགས་པ༌ན། མཆོད་དཔོན་ཆེན་པོ་དག་དང་མཁན༌པོ། རྒན་པོ་རྣམས་ཁོང་གི་དྲུང་དུ་ཡོང་སྟེ་ན༌རེ།
MAR 11:28 ཁྱོད་ཀྱིས་དབང་གང་ལ་བརྟེན་ནས་དོན་འདི་དག་མཛད་པ་ཡིན༌ནམ། སུ་ཞིག་གིས་ཁྱོད་ལ་དོན་འདི་རྣམས་མཛད་པའི་དབང་གནང་བ་ཡིན་ཞེས་ཞུས་པ༌ལ།
MAR 11:29 སྐྱབས་མགོན་ཡེ་ཤུས་འདི་སྐད༌དུ། ངས་ཀྱང་ཁྱོད་རྣམས་ལ་དྲི་བ་ཞིག་འདོན༌ཏེ། ཁྱོད་རྣམས་ཀྱིས་ལན་བཏབ་ན་ངས་ཀྱང་དོན་འདི་རྣམས་དབང་ཅི་ལྟ་བུས་བྱས་པ་ཁྱོད་རྣམས་ལ་སྨྲ་བར༌བྱའོ།།
MAR 11:30 ཡོ་ཧ་ནན་གྱི་ཁྲུས་གསོལ་དེ་ནམ་མཁའི་ཞིང་ཁམས་དང་མི་ཡུལ་གཉིས་ཀྱི་གང་ནས་བྱུང་བ་ལ་ལན་ཐོབས་ཤིག་ཅེས་གསུངས་པ༌དང༌།
MAR 11:31 དེ་རྣམས་ཀྱིས་ཕན་ཚུན་གླེང་མོལ་བྱེད༌བཞིན། གལ་ཏེ་ནམ་མཁའི་ཞིང་ཁམས་ནས་བྱུང་བ་ཡིན་ཞེ༌ན། ཁོས་འོ་ན་ཁྱོད་རྣམས་ཅིའི་ཕྱིར་ཡོ་ཧ་ནན་ལ་ཡིད་མ་ཆེས་སམ་ཞེས་སྨྲ་ངེས༌ལ།
MAR 11:32 ཡང་མི་ཡུལ་ནས་བྱུང་བ་ཡིན་ཞེ་ན་ཞེས་སྨྲས༌ཤིང༌། མི་ཐམས་ཅད་ཀྱིས་ཡོ་ཧ་ནན་དངོས་གནས་ལུང་སྟོན་པ་ཞིག་ཏུ་བཀུར་བས་མི་ཚོགས་ལ་འཇིགས་པ༌རེད།
MAR 11:33 དེ་ནས་ཁོ་རྣམས་ན༌རེ། ངེད་ཅག་གིས་མི་ཤེས་ཞེས་ལན་བཏབ༌བོ། །ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་བདག་གིས་ཀྱང་དབང་གང་ལ་བརྟེན་ནས་དོན་འདི་དག་བྱེད་པ་ཁྱོད་ཅག་ལ་སྨྲ་བ་མིན་ཞེས་གསུངས༌སོ།།
MAR 12:1 དེ་ནས་སྐྱབས་མགོན་ཡེ་ཤུས་དཔེའི་སྒོ་ནས་ཁོ་རྣམས་ལ་འདི་སྐད༌དུ། དེ་ཡང་མི་ཞིག་གིས་རྒུན་ཚལ་ཞིག་བཙུགས་ཤིང་ཕྱོགས་བཞིར་ར་བས་བསྐོར་བ༌དང༌། རྒུན་འབྲུམ་འཚིར་གཞོང་འཇོག་སའི་ས་དོང་བརྐོས་པ་དང་སོ་ལྟ་ཁང་ཞིག་ཀྱང་བརྩིགས༌རྗེས། རྒུན་འབྲུམ་ར་བ་མི་གཞན་ལ་གླས་ཏེ་ཁོ་རང་ཡུལ་གཞན་དུ་སོང༌ངོ༌།།
MAR 12:2 དེ་ནས་དུས་ལ་བབས༌ཚེ། ཁོས་རང་གི་གཡོག་པོ་ཞིག་གླ་མཁན་ཚང་ལ་རྒུན་འབྲུམ་གྱི་འབྲས་བུ་ལེན་དུ་མངགས༌ཤིང༌།
MAR 12:3 དེ་རྣམས་ཀྱིས་གཡོག་པོ་དེ་བཟུང་ནས་གཅར་རྡུང་བྱས་རྗེས་ལག་སྟོང་དུ་ཕྱིར་བཏང༌ངོ༌།།
MAR 12:4 དེ་ནས་ཡང་ཁོས་གཡོག་པོ་གཞན་ཞིག་མངགས་པ༌ན། དེ་རྣམས་ཀྱིས་གཡོག་པོ་དེའི་མགོར་བརྒྱབ་ནས་རྨས་ཤིང་དམའ་འབེབས་བྱས༌སོ།།
MAR 12:5 དེ་ནས་ཡང་ཁོས་གཡོག་པོ་གཞན་ཞིག་མངགས་པའང་དེ་རྣམས་ཀྱིས་བསད༌དོ། །དེ་ནས་ཡང་ཁོས་གཡོག་པོ་གཞན་མང་པོ་ཞིག་བཏང་བ༌ན། དེ་རྣམས་ཀྱིས་གཡོག་པོ་ལ་ལར་གཅར་རྡུང་བྱས་ཤིང་ལ་ལ༌བསད།
MAR 12:6 ཁོ་ལ་ད་དུང་གཅེས་པའི་བུ་ཞིག་ཡོད༌དེ། མཇུག་མཐར་ཁོས་རང་གི་བུའང་དེ་རྣམས་ཀྱི་གམ་དུ་མངགས༌ཤིང༌། ཁོ་རྣམས་ཀྱིས་བདག་གི་བུ་ལ་བཀུར་སྟི་བྱེད་ངེས་ཡིན་བསམས༌སོ།།
MAR 12:7 འོན་ཀྱང་གླ་མཁན་ཚང་གི་མི་རྣམས་ཀྱིས་ཕན་ཚུན༌ལ། འདི་ནི་ཕ་ཤུལ་འཛིན་མཁན་ཡིན༌པས། ཤོག་དང་གསོད་པར༌བྱའོ། །ནོར་སྐལ་དེ་དག་བདག་ཅག་ལ་འཐོབ་པ་ཡིན་ཞེས་སྨྲས༌ཏེ།
MAR 12:8 ཁོ་རང་བཟུང་ནས་བསད་རྗེས་རྒུན་འབྲུམ་ར་བའི་ཕྱི་རོལ་ཏུ་བཏོན༌ནོ།།
MAR 12:9 དེས་ན་རྒུན་འབྲུམ་ར་བའི་བདག་པོས་ཅི་བྱེད་པར་འགྱུར་རམ་ཞེ༌ན། ཁོང་ཉིད་ཕེབས་ཡོང་ནས་གླ་མཁན་རྣམས་འཇོམས་པར་མཛད༌དེ། རྒུན་འབྲུམ་ར་བ་མི་གཞན་ལ་སྤྲོད་པར་བྱེད༌དོ།།
MAR 12:10 དེ་ལ་གསུང་རབ་ཀྱི་མདོ་ལས་ཇི་སྐད༌དུ། བཟོ་བ་རྣམས་ཀྱིས་སྤངས་པའི༌རྡོ།། ཁང་པའི་ཟུར་གྱི་རྨང་རྡོར༌གྱུར།།
MAR 12:11 གཙོ་བོ་ཁོང་ནས་བྱུང་བ༌ཡིན།། བདག་ཅག་མིག་ལ་ངོ་མཚར༌ཆེ།། ཞེས་གསུངས་ཡོད་པ་ཁྱོད་རྣམས་ཀྱིས་བཀླགས་མ་མྱོང་ངམ་ཞེས་གསུངས་པ༌དང༌།
MAR 12:12 ཁོ་རྣམས་ཀྱིས་དཔེ་དེ་རང་ཉིད་ལ་གསུངས་པ་ཤེས་ཏེ་སྐྱབས་མགོན་ཡེ་ཤུ་འཛིན་བཟུང་བྱེད་བསམས༌ཀྱང༌། མི་ཚོགས་ལ་འཇིགས་ཏེ་ཁོང་དང་ཁ་བྲལ་ནས་སོང༌ངོ༌།།
MAR 12:13 ཡང་དེ་རྣམས་ཀྱིས་སྐྱབས་མགོན་ཡེ་ཤུའི་གསུང་ལས་གླགས་བཙལ་ནས་ཁོང་ལ་གནོད་པ་བྱེད་པའི་ཆེད༌དུ། ཕ་རུ་ཤི་པ་དང་ཧེ་རོ་དཱའི་ཕྱོགས་ཁག་གི་མི་འགའ་ཞིག་ཁོང་གི་དྲུང་དུ༌མངགས།
MAR 12:14 དེ་རྣམས་ཁོང་གི་དྲུང་དུ་ཡོང་སྟེ་ན༌རེ། སློབ་དཔོན༌ལགས། ཁྱེད་ནི་གཞུང་རྒྱུད་དྲང་བ༌དང༌། ཁྱེད་ཀྱིས་མིའི་ཁ་ངོར་མི་གཟིགས༌ཤིང༌། མི་ཀུན་ལ་ཕྱོགས་རིས་མེད་པར་དཀོན་མཆོག་གི་ལམ་ཡང་དག་པར་བདེན་པར་སྟོན་པ་ངེད་རྣམས་ཀྱིས་ཤེས༌སོ། །ངེད་ཅག་གིས་སེ་བཟིར་ལ་ཁྲལ་འཇལ་རུང་ངམ་མི༌རུང༌།
MAR 12:15 ངེད་རྣམས་ཀྱིས་ཁྲལ་འབུལ་དགོས་སམ་མི་དགོས་ཞེས་དྲིས༌སོ། །སྐྱབས་མགོན་ཡེ་ཤུས་དེ་རྣམས་ཀྱི་གཡོ་སྒྱུ་མཁྱེན་ཏེ་འདི་སྐད༌དུ། ཁྱོད་ཅག་གིས་བདག་ལ་ཚོད་བགམ་པའི་རྒྱུ་མཚན་ཅི་ཡིན༌ནམ། དངུལ་སྒོར་ཞིག་འདི་རུ་ཁྱེར་ཤོག་དང་བལྟ་བར་བྱའོ་ཞེས་གསུངས།
MAR 12:16 དེ་རྣམས་ཀྱིས་དངུལ་སྒོར་ཞིག་ཁྱེར་ཡོང་བ༌དང༌། ཁོང་གིས་དེ་རྣམས་ལ་དངུལ་སྒོར་སྟེང་གི་རི་མོ་དང་ཡི་གེ་འདི་སུའི་ཡིན་ནམ་ཞེས་དྲིས་པ༌ན། དེ་རྣམས་ཀྱིས་སེ་བཟིར་གྱི་ཡིན་ཞེས་སྨྲས༌སོ།།
MAR 12:17 ཡང་ཁོང་གིས་འདི་སྐད༌དུ། གང་ཞིག་སེ་བཟིར་གྱི་ཡིན་ན་དེ་ནི་སེ་བཟིར་ལ་ཕུལ༌དང༌། གང་ཞིག་དཀོན་མཆོག་གི་ཡིན་ན་དེ་ནི་དཀོན་མཆོག་ལ་ཕུལ་ཅིག་ཅེས་གསུངས་པས་དེ་རྣམས་ངོ་མཚར་བར་གྱུར༌ཏོ།།
MAR 12:18 དེ་ཡང་སླར་གསོན་པའི་དོན་དེ་མེད་ཟེར་མཁན་སཱ་ཅུ་སེ་པ་འགའ་ཞིག་ཁོང་གི་དྲུང་དུ་ཡོང་སྟེ་ན༌རེ།
MAR 12:19 སློབ་དཔོན༌ལགས། མོ་ཤེའི་མདོ༌ལས། གལ་སྲིད་སྐྱེས་པ་ཞིག་ལ་བུ་ཕྲུག་མེད་པར་ཤི་སྟེ་ཆུང་མ་གཅིག་པུར་ལུས༌ན། དེའི་གཅུང་པོས་ཁོའི་ཆུང་མ་བླངས་ནས་གཅེན་པོའི་དོན་དུ་རིགས་རྒྱུད་སྤེལ་དགོས་ཞེས་གསུངས་ཡོད༌དོ།།
MAR 12:20 དེ་ཡང་སྔོན་ཆད་སྤུན་བདུན་ཡོད་པ་ལས་སྤུན་ཆེ་བས་ཆུང་མ་ཞིག་བླངས་ནས་བུ་ཕྲུག་མེད་པར༌ཤིའོ།།
MAR 12:21 ཡང་སྤུན་གཉིས་པས་ཆུང་མ་དེ་བླངས་ནས་བུ་ཕྲུག་མེད་པར༌ཤིའོ། །སྤུན་གསུམ་པས་ཀྱང་དེ་ལྟར་བྱས་ནས་བུ་ཕྲུག་མ་བྱུང་བར༌ཤིའོ།།
MAR 12:22 དེ་བཞིན་སྤུན་བདུན་པོར་བུ་ཕྲུག་མ་བྱུང་བར་མཇུག་མཐར་བུད་མེད་དེའང༌ཤིའོ།།
MAR 12:23 དེས་ན་གཤིན་པོ་རྣམས་སླར་གསོན་པར་འགྱུར་བའི་དུས་དེ་སླེབས་ཚེ། སྤུན་བདུན་པོས་བུད་མེད་དེ་ཆུང་མར་བླངས་མྱོང༌བས། ཁོ་མོ་ནི་སྤུན་བདུན་ལས་སུ་ཞིག་གི་ཆུང་མ་ཡིན་ནམ་ཞེས་དྲིས་པ༌ན།
MAR 12:24 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་གསུང་རབ་ཀྱི་དོན་མི་རྟོགས་ཤིང་དཀོན་མཆོག་གི་མཐུ་སྟོབས་ཀྱང་མི་ཤེས་པས་ནོར་སོང་བ་མིན༌ནམ།
MAR 12:25 ཅིའི་ཕྱིར་ཞེ༌ན། གཤིན་པོ་རྣམས་སླར་གསོན་པའི་དུས༌སུ། མི་རྣམས་ཀྱིས་བག་མ་ཕར་བསྐྱལ་ཚུར་ལེན་མི་བྱེད་པར་ནམ་མཁའི་ཞིང་ཁམས་ཀྱི་ཕོ་ཉ་རྣམས་དང༌འདྲའོ།།
MAR 12:26 འོན་ཀྱང་གཤིན་པོ་རྣམས་སླར་གསོན་ངེས་པའི་སྐོར༌ལ། མོ་ཤེའི་མདོ་ཡི་ནང་དུ་བཀོད་ཡོད་པའི་ཚེར་སྡོང་གི་སྐོར་ལས་དཀོན་མཆོག་གིས་མོ་ཤེ་ལ་འདི་སྐད་གསུངས་པ༌སྟེ། བདག་ནི་ཨབ་ར་ཧམ་ གྱི་དཀོན་མཆོག༌དང༌། ཨི་སཱག་གི་དཀོན༌མཆོག ཡ་ཀོབ་ཀྱི་དཀོན་མཆོག་ཡིན་ཞེས་གསུངས་ཡོད་པ་ཁྱོད་ཅག་གིས་བཀླགས་མ་མྱོང༌ངམ།
MAR 12:27 ཁོང་ནི་གཤིན་པོ་རྣམས་ཀྱི་དཀོན་མཆོག་མ་ཡིན༌པར། གསོན་པོ་རྣམས་ཀྱི་དཀོན་མཆོག་ཡིན་པས་ཁྱོད་ཅག་ཤིན་ཏུ་ནོར་སོང་ཞེས་གསུངས༌སོ།།
MAR 12:28 མཁན་པོ་རྣམས་ལས་གཅིག་ཡོང་ནས་ཁོང་རྣམས་ཀྱིས་རྩོད་གླེང་བྱེད་བཞིན་པ་ཐོས་པ༌དང༌། སྐྱབས་མགོན་ཡེ་ཤུས་དེ་དག་ལ་ལན་ལེགས་པོར་མཛད་པ་ཤེས་ཏེ་ན༌རེ། བཀའ་ཁྲིམས་ཐམས་ཅད་ལས་གཙོ་ཤོས་གང་ཡིན་ནམ་ཞེས་དྲིས་པ༌ན།
MAR 12:29 སྐྱབས་མགོན་ཡེ་ཤུས་འདི་སྐད༌དུ། བཀའ་ཁྲིམས་རྣམས་ལས་གཙོ་ཤོས༌ནི། ཀྱེ། ཡེས་ར་ཨེལ་པ་རྣམས་ཀྱིས་ཉོན༌ཅིག གཙོ་བོ་སྟེ་བདག་ཅག་གི་དཀོན་མཆོག་ནི་གཙོ་བོ་གཅིག་པུ་ཡིན༌ལ།
MAR 12:30 ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་བློ་གཅིག་སེམས་གཅིག་ཡིད་གཅིག་དང་སྟོབས་ཤུགས་ཡོད་རྒུས་གཅེས༌ཤིག་ཅེས་པ་འདི་ཡིན༌ནོ།།
MAR 12:31 བཀའ་ཁྲིམས་གཉིས་པ༌ནི། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་པ་འདི་ཡིན༌ནོ། །འདི་གཉིས་ལས་གཙོ་ཆེ་བའི་བཀའ་ཁྲིམས་གཞན་ཞིག་མེད་ཅེས་བཀའ་ལན་གནང༌ངོ༌།།
MAR 12:32 ཡང་མཁན་པོ་ན༌རེ། སློབ་དཔོན༌ལགས། དེ་ནི་ལེགས༌སོ། །དཀོན་མཆོག་ནི་གཅིག་པུ་ལགས་ཏེ་ཁོང་ལས་གཞན་དཀོན་མཆོག་ཡོད་པ་མིན་ཞེས་ཁྱེད་ཀྱིས་བདེན་པར་གསུངས༌སོ།།
MAR 12:33 ཁོང་ལ་བློ་རྩེ་དང་རིག་པ་བསྒྲིམས་ནས་སྟོབས་ཤུགས་ཡོད་རྒུས་གཅེས་པ༌དང༌། རང་གི་ཁྱིམ་མཚེས་ལ་རང་དང་འདྲ་བར་གཅེས་པ་ནི་སྦྱིན་སྲེག་དང་མཆོད་པ་ཐམས་ཅད་ལས་གཙོ་ཆེ་བ་ཡིན་ཞེས་ཞུས༌སོ།།
MAR 12:34 མཁན་པོ་དེས་བློ་གྲོས་ལྡན་པའི་སྒོ་ནས་ལན་བཏབ་པ་སྐྱབས་མགོན་ཡེ་ཤུས་གཟིགས་ཏེ་འདི་སྐད༌དུ། ཁྱོད་རང་དཀོན་མཆོག་གི་རྒྱལ་སྲིད་དང་བར་ཐག་མི་རིང་ཞེས་གསུངས་པ༌དང༌། དེའི་རྗེས༌སུ། མི་སུས་ཀྱང་ཁོང་ལ་དྲི་བ་ཅི་ཡང་ཞུ་མ་ཕོད༌དོ།།
MAR 12:35 དེ་ནས་སྐྱབས་མགོན་ཡེ་ཤུས་མཆོད་ཁང་ནང་དུ་ཆོས་གསུང་བའི་དུས་སུ་འདི་སྐད༌དུ། མཁན་པོ་རྣམས་ཀྱིས་མཱ་ཤི་ཀ་ནི་ཅི་ལྟར་དཱ་བིད་ཀྱི་རིགས་སྲས་ཡིན་ཟེར་རམ་ཞེ༌ན།
MAR 12:36 དཱ་བིད་ཀྱིས་དམ་པའི་ཐུགས་ཉིད་ཀྱི་ངང་ནས་ཇི་སྐད༌དུ། དཀོན་མཆོག་གིས་ནི་ང་ཡི་གཙོ་བོ༌ལ།། བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་འོག་ཏུ་འཇུག་པའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས༌ཤིང༌།
MAR 12:37 དཱ་བིད་རང་ཉིད་ཀྱིས་ཁོང་ལ་གཙོ་བོ་ཞེས་ཞུས༌ན། ཁོང་ནི་དཱ་བིད་ཀྱི་རིགས་སྲས་སུ་ཇི་ལྟར་གྱུར་པ་ཡིན་ནམ་ཞེས་གསུངས་པ་དང་མི་ཚོགས་ཀྱང་ཁོང་གི་གསུང་ལ་ཉན་པར་མོས༌སོ།།
MAR 12:38 དེ་ནས་སྐྱབས་མགོན་ཡེ་ཤུས་ཆོས་གསུང་བཞིན་འདི་སྐད༌དུ། མཁན་པོ་རྣམས་ལ་དོགས་པར༌གྱིས། དེ་རྣམས་ཀྱིས་ལྭ་རིང་པོ་གྱོན་ཏེ་ཕར་འགྲོ་ཚུར་འོང་བྱེད་པ༌དང༌། ཁྲོམ་སྲང་ནས་མི་རྣམས་ཀྱི་བསྙེན་བཀུར་འཐོབ་པར་མོས༌སོ།།
MAR 12:39 ཆོས་ཁང་དང་གསོལ་སྟོན་དུ་གྲལ་མགོ་ནས་སྡོད་པར༌དགའོ།།
MAR 12:40 མི་དེ་རྣམས་ཀྱིས་ཡུགས་མོ་རྣམས་ཀྱི་ཁང་པ་དང་བཅས་པའི་རྒྱུ་རྫས་ཧམ་བཟུང་བྱེད༌ཅིང༌། སྨོན་ལམ་རིང་པོ་འདེབས་ཁུལ་བྱེད༌པས། མི་དེ་དག་ལ་ལྷག་ཏུ་ཉེས་ཆད་ལྕི་མོ་འཕོག་པར་འགྱུར་ཞེས་གསུངས༌སོ།།
MAR 12:41 དེ་ནས་སྐྱབས་མགོན་ཡེ་ཤུས་མཆོད་ཁང་གི་དཀོར་མཛོད་ལ་ཁ་གཏད་ནས་བཞུགས༌ཤིང༌། མི་རྣམས་ཀྱིས་དངུལ་འབུལ་བ་ལ་གཟིགས་པ༌ན། ཕྱུག་བདག་རྣམས་ཀྱིས་དངུལ་མང་པོ་ཕུལ༌ཞིང༌།
MAR 12:42 ཡུགས་མོ་དབུལ་པོ་ཞིག་ཡོང་ནས་ཟངས་ཀྱི་དོང་ཙེ་ཆུང་ངུ་གཉིས་ཕུལ་བ་དང་དེ་ནི་དོང་ཙེ་ཆེན་པོ་གཅིག་གི་རིན་ཡིན༌ནོ།།
MAR 12:43 ཁོང་གིས་ཐུགས་སྲས་རྣམས་རང་གི་དྲུང་དུ་བོས་ཏེ་འདི་སྐད༌དུ། བདག་གིས་ཁྱོད་ཅག་ལ་བདེན་པར༌སྨྲའོ། །དངུལ་འབུལ་མཁན་ཐམས་ཅད་ལས་ཡུགས་མོ་དབུལ་པོ་འདིས་ཕུལ་བ་མང༌སྟེ།
MAR 12:44 ཁོ་རྣམས་ཀྱིས་རྒྱུ་ནོར་ལྷག་མ་མང་པོ་ཡོད་པ་ལས་ཕུལ་བ་ཡིན༌ཞིང༌། ཁོ་མོས་རང་ལ་མི་འདང་ཡང་ཅི་ཡོད་པ་ཐམས་ཅད་ཕུལ་བ༌དང༌། ཐ་ན་སྲོག་འཚོ་བར་མཁོ་བ་དེའང་ཕུལ་བ་ཡིན་ཞེས་གསུངས༌སོ།།
MAR 13:1 དེ་ནས་སྐྱབས་མགོན་ཡེ་ཤུ་མཆོད་ཁང་ནས་ཕྱིར་ཕེབས༌དུས། ཐུགས་སྲས་རྣམས་ལས་གཅིག་ན༌རེ། སློབ་དཔོན༌ལགས། གཟིགས༌དང༌། འདི་ནི་ཇི་འདྲའི་རྡོ་ཕ་བོང་ཆེན་པོ་ཞིག༌དང༌། ཅི་ལྟ་བུའི་ཁང་པའི་བཟོ་བཀོད་ངོ་མཚར་ཆེ་བ་ཞིག་ཡིན་ཨང་ཞེས་སྨྲས་པ༌ལ།
MAR 13:2 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་བརྗིད་རྔམ་ཆེ་བའི་ཁང་པའི་བཟོ་བཀོད་ཆེན་པོ་འདི་དག་མཐོང་བ་ཡིན༌ནམ། མ་འོངས་པའི་དུས༌སུ། འདི་རུ་རྡོ་ཕ་བོང་སྟེང་དུ་རྡོ་གཅིག་ཀྱང་མི་ལུས་པར་ཐམས་ཅད་བཤིག་པར་འགྱུར་ཞེས་གསུངས༌སོ།།
MAR 13:3 དེ་ནས་སྐྱབས་མགོན་ཡེ་ཤུ་སྐྱུ་རུ་རའི་རི་བོ་སྟེང་དུ་ཕེབས་ཏེ་མཆོད་ཁང་ལ་ཁ་གཏད་ནས་བཞུགས་པའི་དུས༌སུ། པེ་ཏྲོ༌དང༌། ཡ༌ཀོབ། ཡོ་ཧ༌ནན། ཨན་དྲི་ཡཱ་བཅས་ཀྱིས་ཟུར་དུ་ཁོང་ལ་འདི་ལྟར་དྲིས༌ཏེ།
MAR 13:4 དོན་འདི་རྣམས་དུས་ནམ་ཞིག་ལ་འབྱུང་ཞིང་དོན་འདི་རྣམས་འབྱུང་བའི་དུས་སུ་རྟགས་ཅི་ཞིག་ཡོད་པ་གསུང་བར་མཛོད་ཅེས་ཞུས་པ༌ན།
MAR 13:5 སྐྱབས་མགོན་ཡེ་ཤུས་འདི་སྐད༌དུ། སུ་ཞིག་གིས་ཀྱང་ཁྱོད་རྣམས་མི་བསླུ་བའི་ཆེད་དུ་དོགས་པར༌གྱིས།
MAR 13:6 མི་མང་པོ་ངའི་མིང་དུ་རྫུ་བཞིན་ཡོང༌སྟེ། ང་ནི་སྐྱབས་མགོན་མཱ་ཤི་ཀ་ཡིན་ཟེར་ཞིང་མི་མང་པོ་བསླུ་བར༌ངེས།
MAR 13:7 ཁྱོད་ཅག་གིས་དམག་འཁྲུག་དང་དམག་འཁྲུག་གི་གཏམ་ཐོས་པའི་དུས་སུ་མི་འཇིགས་པར༌གྱིས། དོན་འདི་དག་འབྱུང་ངེས་ཀྱང་དེ་ནི་མཐའ་མའི་དུས་ལ་སླེབས་པ་མ་ཡིན༌ནོ།།
MAR 13:8 རྒྱུ་མཚན་ནི་མི་རིགས་དང་མི་རིགས་འཁྲུག་ཅིང་རྒྱལ་ཁབ་དང་རྒྱལ་ཁབ་འཁྲུག༌པ། ས་ཆ་མང་པོར་ས་འགུལ་དང་མུ་གེ་ཡང་འབྱུང་བར༌འགྱུར། འདི་དག་ནི་སྦྲུམ་མའི་ཟུག་གཟེར་གྱི་ཐོག་མ་ཡིན༌ནོ།།
MAR 13:9 འོན་ཀྱང་རང་གི་ཆེད་དུ་ཁྱོད་ཅག་གིས་གཟབ་པར༌གྱིས། རྒྱུ་མཚན་ནི་ཁྱོད་རྣམས་ཁྲིམས་རའི་ཁྲིམས་དཔོན་རྒན་པོ་རྣམས་ཀྱི་ལག་ཏུ་སྤྲོད༌ཅིང༌། ཆོས་ཁང་ནས་རྟ་ལྕག་གིས་གཞུ་ངེས་པ༌དང༌། ཡང་བདག་གི་རྐྱེན་གྱིས་ཁྱོད་རྣམས་སྤྱི་དཔོན་དང་རྒྱལ་པོ་རྣམས་ཀྱི་མདུན་དུ་ཁྲིད༌ནས། དེ་རྣམས་ལ་བདེན་དཔང་བྱ་བར་འགྱུར༌རོ།།
MAR 13:10 ཡང་དོན་དེའི་སྔོན་དུ་མི་རིགས་ཀུན་ལ་ངེས་པར་བདག་གི་འཕྲིན་བཟང་བསྒྲག༌དགོས།
MAR 13:11 དེ་དག་གིས་ཁྱོད་རྣམས་བཟུང་སྟེ་ཁྲིམས་ཐག་གཅོད་པར་སྤྲོད་པའི་དུས༌སུ། ཁྱོད་ཅག་གིས་དོན་དེའི་སྔོན་ལ་ཅི་ཞིག་སྨྲ་བར་སེམས་ཁྲལ་བྱ་མི་དགོས༌ཏེ། དུས་དེར་ཁྱོད་ཅག་ལ་ཅི་ཞིག་གནང་བ་ཡིན་ན་དེ་ཤོད༌ཅིག རྒྱུ་མཚན་ནི་སྐབས་དེའི་གཏམ་སྨྲ་མཁན་ནི་ཁྱོད་རྣམས་རང་ཉིད་མ་ཡིན་པར་དམ་པའི་ཐུགས་ཉིད་ཡིན་པས༌སོ།།
MAR 13:12 དེའི་དུས༌སུ། གཅེན་པོས་གཅུང་པོ་དང་ཕ་ཡིས་རང་གི་བུ་ཡང་འཆི་ལམ་དུ་བསྐྱལ་བར་འགྱུར༌ཞིང༌། བུ་ཕྲུག་རྣམས་ཀྱིས་ཀྱང་ཕ་མ་དགྲ་རུ་བཟུང་སྟེ་གསོད་པར༌འགྱུར།
MAR 13:13 ཡང་ངའི་མིང་གི་རྐྱེན་གྱིས་མི་ཐམས་ཅད་ཁྱོད་ཅག་ལ་སྡང་བར་འགྱུར༌མོད། འོན་ཀྱང་མཐར་ཐུག་ཏུ་བཟོད་བསྲན་བྱེད་མཁན་དེ་ལ་ཐར་པ་འཐོབ་ངེས༌སོ།།
MAR 13:14 མདོ་འདི་ཀློག་མཁན་གྱིས་དོན་རྟོགས་པར་བྱ༌སྟེ། ནམ་ཞིག་ཁྱོད་ཅག་གིས་སྟོང་པར་བྱེད་པའི་སྐྱུག་བྲོ་བ་དེ་སྡོད་མི་འོས་པའི་གནས་སུ་འགྲེངས་ནས་བསྡད་ཡོད་པ་མཐོང་དུས༌སུ། ཡ་ཧུ་དཱའི་ཡུལ་དུ་ཡོད་པ་རྣམས་རི་ལ་འབྲོ་བར༌གྱིས།
MAR 13:15 ཁང་པའི་སྟེང་དུ་ཡོད་པ་རྣམས་སར་བབས་ནས་རང་ཁྱིམ་དུ་དངོས་པོ་ལེན་དུ་མ༌འགྲོའོ།།
MAR 13:16 ཞིང་ཁར་ཡོད་པ་རྣམས་རང་གི་གྱོན་པ་ལེན་དུའང་ཕྱིར་མ་ལོག༌ཅིག
MAR 13:17 ཉིན་དེ་དག་གི་རིང༌ལ། བུད་མེད་སྦྲུམ་མ་དང་ཕྲུ་གུར་ནུ་མ་སྣུན་མཁན་རྣམས་སྙིང་རེ་རྗེ༌ཨང༌།
MAR 13:18 དོན་དེ་དགུན་ཁར་མི་འབྱུང་བའི་ཕྱིར་ཁྱོད་ཅག་གིས་སྨོན་ལམ་ཐོབས༌ཤིག
MAR 13:19 རྒྱུ་མཚན་ནི་ཉིན་དེ་དག་གི་རིང༌ལ། དཀའ་སྡུག་འབྱུང་བར་འགྱུར་བ༌དང༌། དཀའ་སྡུག་དེ་ལྟ་བུ་དཀོན་མཆོག་གིས་འཇིག་རྟེན་བཀོད་པ་ནས་ད་ལྟའི་བར་དུ་བྱུང་མ་མྱོང་ལ་རྗེས་སུའང་འབྱུང་མི་སྲིད༌དོ།།
MAR 13:20 ཡང་གཙོ་བོས་ཉིན་དེ་དག་ཇེ་ཉུང་དུ་མཛད་པ་མིན༌ན། ཤ་ཁྲག་གདོས་བཅས་སུ་གྲུབ་པ་སུ་ཡང་ཐར་མི་ཐུབ༌མོད། འོན་ཀྱང་ཁོང་གིས་བདམས་པའི་མི་རྣམས་ཀྱི་དོན་དུ་ཉིན་དེ་དག་ཇེ་ཉུང་དུ་མཛད་པ་ཡིན༌ནོ།།
MAR 13:21 དེའི་དུས༌སུ། སུ་ཞིག་གིས་ཁྱོད་ཅག་ལ་ལྟོས་དང་མཱ་ཤི་ཀ་འདི་རུ༌བཞུགས། ཡང་ན་དེ་གར་བཞུགས་ཞེས་སྨྲས་ཀྱང་དེ་ལ་ཡིད་རྟོན་བྱ་མི་རུང༌ངོ༌།།
MAR 13:22 རྒྱུ་མཚན་ནི་མཱ་ཤི་ཀ་བཅོས་མ་དང་ལུང་སྟོན་པ་རྫུས་མ་མང་པོ་འབྱུང༌ཞིང༌། གལ་ཏེ་བསླུ་ནུས་ན་བདམས་པའི་མི་རྣམས་ཀྱང་བསླུ་བའི༌ཕྱིར། གྲུབ་རྟགས་དང་ངོ་མཚར་བའི་དོན་རྣམས་སྟོན་པར་འགྱུར༌རོ།།
MAR 13:23 བདག་གིས་གཏམ་འདི་ཐམས་ཅད་དོན་དེའི་སྔོན་དུ་ཁྱོད་ཅག་ལ་སྨྲས་པ་ཡིན་པས་གཟབ་པར་གྱིས་ཞེས་གསུངས༌སོ།།
MAR 13:24 དེ་ནས་ཡང་ཁོང་གིས་འདི་སྐད༌དུ། ཉིན་དེ་དག་གི་རིང་དང་དཀའ་སྡུག་དེའི་རྗེས་སུ་ཉི་མ་བསྒྲིབ་ཅིང་ཟླ་བས་འོད་མི༌སྤྲོའོ།།
MAR 13:25 སྐར་ཚོགས་ནམ་མཁའ་ནས་ལྷུང་ཞིང་བར་སྣང་ཁམས་ཀྱི་དབང་ཐམས་ཅད་གཡོ་བར༌འགྱུར།
MAR 13:26 དེའི་དུས༌སུ། མི་རྣམས་ཀྱིས་མིའི་བུ་ཁོ་རང་ནུས་མཐུ་དང་གཟི་བརྗིད་ཆེན་པོའི་ངང་སྤྲིན་གྱི་བང་རིམ་ནས་འབྱོན་པ་མཐོང་བར་འགྱུར༌རོ།།
MAR 13:27 དེ་ནས་ཁོས་རང་ཉིད་ཀྱི་ཕོ་ཉ་རྣམས་མངགས༌ཏེ། ས་གཞི་ཆེན་པོའི་མཐའ་ནས་ནམ་མཁའི་མཐའ་མཚམས་བར་དུ་ཁོའི་བདམས་པའི་མི་ཐམས་ཅད་ཕྱོགས་བཞི་མཚམས་བརྒྱད་ནས་བསྡུ་བར་འགྱུར༌རོ།།
MAR 13:28 ཁྱོད་ཅག་གིས་བསེ་ཡབ་ཤིང་ལས་བསླབ་བྱ་ཞིག་ལོངས་དང༌། དེའི་ཡལ་ག་མཉེན་ལྕུག་ལྡན་པར་གྱུར་ནས་ལོ་མ་འབུས་པའི་དུས༌སུ། དབྱར་ཁའི་དུས་ལ་ཉེ་བ་ཁྱོད་ཅག་གིས་ཤེས༌སོ།།
MAR 13:29 དེ་བཞིན་དུ་ཁྱོད་ཅག་གིས་དོན་དེ་དག་མཐོང་བའི༌ཚེ། མིའི་བུ་སླེབ་ལ་ཉེ་བ་དང་སྒོ་འགྲམ་དུ་སླེབས་ཡོད་པ་རྟོགས་པར༌གྱིས།
MAR 13:30 བདག་གིས་ཁྱོད་ཅག་ལ་བདེན་པར་སྨྲ༌སྟེ། མི་རབས་འདི་ད་དུང་མ་འདས་པའི་སྔོན་ལ་དོན་འདི་ཐམས་ཅད་འབྱུང་བར་འགྱུར༌རོ།།
MAR 13:31 གནམ་ས་གཉིས་ནི་འཇིག་སྲིད་ཀྱང་བདག་གི་བཀའ་རྣམས་འཇིག་པར་མི་འགྱུར༌རོ།།
MAR 13:32 འོན་ཀྱང་མི་སུས་ཀྱང་ཉིན་མོ་དེའམ་དུས་དེ་ནི་ནམ་ཞིག་ཡིན་པ་མི་ཤེས༌ཤིང༌། ནམ་མཁའི་ཞིང་ཁམས་སུ་སྡོད་པའི་ཕོ་ཉ་རྣམས་ཀྱིས་ཀྱང་མི་ཤེས༌ལ། སྲས་ཀྱིས་ཀྱང་མི་ཤེས་ཏེ་ཡབ་གཅིག་པུས་མཁྱེན༌ཏོ།།
MAR 13:33 ཡང་དུས་དེ་ནམ་ཞིག་ལ་སླེབ་པ་ཁྱོད་ཅག་གིས་མི་ཤེས་པས་དོགས་པར་གྱིས་དང་གཉིད་དུ་མ་ཡུར༌ཅིག
MAR 13:34 འདི་ནི་མི་ཞིག་གིས་རང་ཁྱིམ་བསྐྱུར་ཏེ་ཡུལ་གཞན་དུ་འགྲོ་བའི་སྐབས༌སུ། རང་གི་གཡོག་པོ་རྣམས་ལ་དབང་ཐམས་ཅད་སྤྲད་ནས་སོ་སོར་ལས་ཀ་བགོས་པ༌དང༌། སྒོ་སྲུང་མཁན་གྱིས་ཀྱང་དོགས་ཟོན་བྱེད་དགོས་པར་བཀའ་གནང་བ་དང༌འདྲའོ།།
MAR 13:35 དེ་བས་ཁྱིམ་བདག་དེ་ནི་མཚན་མོའམ་ནམ་ཕྱེད་ཀྱི་དུས༌སམ། ཡང་ན་བྱ་ཕོ་གྲགས་པའི་དུས་སམ་ཞོགས་པའི་དུས་གང་ཞིག་ལ་ཡོང་བ་ཁྱོད་ཅག་གིས་མི་ཤེས་པས་དོགས་པར༌གྱིས།
MAR 13:36 དེ་ལྟར་མ་བྱས་ན་ཁོ་རང་གློ་བུར་ཕྱིར་ལོག༌ཚེ། ཁྱོད་ཅག་གཉིད་དུ་ཡུར་བ་མཐོང་བར་འགྱུར༌རོ།།
MAR 13:37 བདག་གིས་ཁྱོད་ཅག་ལ་སྨྲས་པ་འདི་དག་ནི་མི་ཐམས་ཅད་ལའང་དོགས་པར་གྱིས་ཞེས་སྨྲས་པ་ཡིན་གསུངས༌སོ།།
MAR 14:1 དེ་ནས་ཉིན་གཉིས་ཀྱི་རྗེས་ནི་པེ་སག་གི་དུས་ཆེན་དང་སྐྱུར་མེད་བག་ལེབ་ཀྱི་དུས་ཆེན་ཡིན་པ༌དང༌། མཆོད་དཔོན་ཆེན་པོ་དག་དང་མཁན་པོ་རྣམས་ཀྱིས་གཡོ་ཐབས་ཀྱིས་སྐྱབས་མགོན་ཡེ་ཤུ་འཛིན་བཟུང་བྱས་ནས་དགྲོང་བའི་གོ་སྐབས་བཙལ་མོད༌ཀྱང༌།
MAR 14:2 དེ་དག་ན༌རེ། མི་སེར་ཟིང་ཆ་ལངས་ཉེན་ཡོད་པས་དུས་ཆེན་ལ་དེ་ལྟར་བྱེད་མི་རུང་ཞེས་སྨྲས༌སོ།།
MAR 14:3 དེ་ཡང་སྐྱབས་མགོན་ཡེ་ཤུ་ཁོང་ཉིད་པེ་ཐན་ཡཱའི་མཛེ་ནད་ཅན་སི་མོན་གྱི་ཁྱིམ་དུ་བཞུགས་ཏེ་ཞལ་ཟས་བཞེས་པའི་དུས༌སུ། བུད་མེད་ཅིག་གིས་རིན་ཐང་ཆེ་བའི་སྤོས་ཆུ་ལྷད་མེད་པ་ནཱར་དི་ ཡིས་གང་བའི་རྡོ་ཀ་མ་རུའི་བུམ་པ་ཞིག་ཁྱེར་ཡོང༌སྟེ། བུམ་པ་བཅགས་ནས་ཁོང་གི་དབུ་ལ་སྤོས་ཆུ་བླུགས༌པས།
MAR 14:4 གནས་དེར་ཡོད་པའི་མི་འགའ་ཞིག་ཁྲོས་ཏེ་ཕན་ཚུན་ན༌རེ། སྤོས་ཆུ་འདི་ཅིའི་ཕྱིར་འདི་ལྟར་ཆུད་ཟོས་སུ་བཏང་བ་ཡིན༌ནམ།
MAR 14:5 སྤོས་ཆུ་འདི་དངུལ་སྒོར་སུམ་བརྒྱ་ལྷག་ལ་བཙོངས་ཏེ་དབུལ་པོ་རྣམས་ལ་བྱིན་ན་མི་ལེགས་སམ་ཞེས་སྨྲས་ཤིང་བུད་མེད་དེར་གཤེ་གཤེ་བཏང༌ངོ༌།།
MAR 14:6 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁོ་མོར་དེ་བཞིན་བྱེད་དུ༌ཆུག ཅིའི་ཕྱིར་ཁོ་མོར་འོ་བརྒྱལ་བྱེད༌དམ། ཁོ་མོས་བདག་ལ་དོན་བཟང་པོ་བྱས་པ་ཡིན༌ཏེ།
MAR 14:7 དབུལ་པོ་རྣམས་དུས་རྟག་ཏུ་ཁྱོད་རྣམས་དང་མཉམ་དུ་ཡོད༌པས། ཁྱོད་ཅག་གིས་ནམ་ཡིན་ཡང་དེ་དག་ལ་ལས་བཟང་པོ་བྱ་ཐུབ༌མོད། འོན་ཀྱང་བདག་ནི་དུས་རྟག་ཏུ་ཁྱོད་རྣམས་དང་མཉམ་དུ་མི་གནས༌སོ།།
MAR 14:8 ཁོ་མོས་ཅི་བྱ་ནུས་པ་དེ་བཞིན་དུ་བྱས་པ༌དང༌། ཁོ་མོས་ང་རང་དུར་ལ་འཇུག་པར་སྔ་མོ་ནས་བདག་གི་ལུས་ལ་སྤོས་ཆུ་བླུགས་པ་ཡིན༌ནོ།།
MAR 14:9 ངས་ཁྱོད་རྣམས་ལ་བདེན་པར་སྨྲ༌སྟེ། འཇིག་རྟེན་ཡོངས་ཀྱི་ཡུལ་གང་དུ་འཕྲིན་བཟང་འདི་བསྒྲགས༌ན། བུད་མེད་འདིས་ཅི་ལྟར་བྱས་པ་དྲན་པའི་ཕྱིར་གཏམ་དེ་ཡང་བརྗོད་པར་འགྱུར་ཞེས་གསུངས༌སོ།།
MAR 14:10 དེ་ནས་ཐུགས་སྲས་བཅུ་གཉིས་པོ་ལས་ཨི་སི་ཀར་རེའི་ཡུ་དཱ་ངོ་ལོག་ནས་སྐྱབས་མགོན་ཡེ་ཤུ་ཁོང་ཉིད་མཆོད་དཔོན་ཆེན་པོ་རྣམས་ལ་སྤྲོད་པའི་ཕྱིར་དེ་རྣམས་ཀྱི་གམ་དུ་སོང༌ཞིང༌།
MAR 14:11 དེ་དག་གིས་ཀྱང་གཏམ་དེ་ཐོས་ནས་ཤིན་ཏུ་དགའ་བར་གྱུར་ཏེ་ཁོ་ལ་དངུལ་སྟེར་བར་ཁས་བླངས༌སོ། །དེ་ནས་ཁོས་སྐྱབས་མགོན་ཡེ་ཤུ་དེ་དག་གི་ལག་ཏུ་ཇི་ལྟར་སྤྲོད་པའི་གོ་སྐབས་བཙལ༌ཏོ།།
MAR 14:12 སྐྱུར་མེད་བག་ལེབ་དུས་ཆེན་གྱི་ཉིན་དང༌པོར། པེ་སག་གི་ལུ་གུ་ བཤའ་བའི་དུས༌སུ། ཐུགས་སྲས་རྣམས་ན༌རེ། ཁྱེད་ཀྱིས་པེ་སག་གི་ཞལ་ཟས་བཞེས་པའི༌ཕྱིར། ངེད་ཅག་གིས་གནས་གང་དུ་སྟ་གོན་བྱེད་དགོངས་སམ་ཞེས་ཞུས་པ༌ལ།
MAR 14:13 སྐྱབས་མགོན་ཡེ་ཤུས་ཐུགས་སྲས་གཉིས་མངགས་ཏེ་འདི་སྐད༌དུ། ཁྱོད་གཉིས་གྲོང་ཁྱེར་ནང་དུ་སོང༌དང༌། དེ་རུ་ཆུ་བུམ་འཁྱེར་བའི་སྐྱེས་པ་ཞིག་ཚུར་ཡོང་བར་འགྱུར་ཞིང་མི་དེའི་རྗེས་འབྲངས་ནས་སོང༌སྟེ།
MAR 14:14 ཁོ་རང་ཁྱིམ་གང་དུ་སོང་ན་ཁྱོད་གཉིས་ཀྱིས་ཁྱིམ་དེའི་བདག་པོ༌ལ། སློབ་དཔོན་གྱིས་ཁྱོད་ལ་འདི་སྐད་གསུངས་ཏེ། ང་དང་ངའི་ཐུགས་སྲས་རྣམས་ཀྱིས་མཉམ་དུ་པེ་སག་གི་ཞལ་ཟས་བཞེས་སའི་འགྲུལ་ཁང་དེ་གང་དུ་ཡོད་ཅེས་ཤོད༌ཅིག
MAR 14:15 མི་དེས་ཁྱོད་གཉིས་ལ་ཅ་ལག་ཁ་ཚང་བསྒྲིགས་ཡོད་པའི་ཐོག་ཁང་ཆེན་པོ་ཞིག་སྟོན༌སྲིད། ཁྱོད་གཉིས་ཀྱིས་ཀྱང་གནས་དེ་རུ་བདག་ཅག་གི་གསོལ་སྟོན་ལ་སྟ་གོན་བྱོས་ཤིག་ཅེས་གསུངས༌སོ།།
MAR 14:16 ཐུགས་སྲས་དེ་གཉིས་སོང་ནས་གྲོང་ཁྱེར་ནང་དུ་སླེབས༌ཏེ། ཁོང་གིས་གསུངས་པ་ལྟར་མཐོང་ཞིང་གནས་དེ་རུ་པེ་སག་གི་གསོལ་སྟོན་བཤམས༌སོ།།
MAR 14:17 མཚན་མོའི་དུས༌སུ། ཁོང་དང་ཐུགས་སྲས་བཅུ་གཉིས་པོ་མཉམ་དུ་གནས་དེར་ཕེབས༌ཤིང༌།
MAR 14:18 ཁོང་རྣམས་ལྷན་དུ་གྲལ་ལ་བཞུགས་ནས་ཞལ་ཟས་བཞེས་པའི་དུས༌སུ། སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ཅག་ལ་བདེན་པར་སྨྲ༌སྟེ། བདག་དང་མཉམ་དུ་ཟས་ཟ་མཁན་ཁྱོད་རྣམས་ལས་མི་གཅིག་གིས་ང་རང་ལ་ངོ་ལོག་བྱ་ངེས་ཞེས་གསུངས་པ༌ན།
MAR 14:19 ཁོ་རྣམས་ཀྱི་སེམས་སྐྱོ་བར་གྱུར་ཏེ་རེ་རེ་བཞིན་གྱིས་ཁོང་ལ་དྲིས༌པ། ང་རང་ཡིན་མི་སྲིད་ཅེས་ཞུས་པ༌དང༌།
MAR 14:20 ཡང་ཁོང་གིས་འདི་སྐད༌དུ། དེ་ནི་ཐུགས་སྲས་བཅུ་གཉིས་པོ་ཁྱོད་རྣམས་ལས་བདག་དང་མཉམ་དུ་སྡེར་མའི་ནང་ལ་བག་ལེབ་སྦོང་མཁན་དེ་ཡིན༌ནོ།།
MAR 14:21 མིའི་བུ་ནི་གསུང་རབ་ཀྱི་མདོ་ལས་ཁོའི་སྐོར་བཀོད་ཡོད་པ་བཞིན་གཤེགས་དགོས༌ཀྱང༌། མིའི་བུ་ལ་ངོ་ལོག་བྱེད་མཁན་གྱི་མི་དེར་ཆག་སྒོ་འབྱུང་བར༌ངེས། མི་དེ་སྐྱེས་པ་ལས་མ་སྐྱེས་ན་ལེགས་ཞེས་གསུངས༌སོ།།
MAR 14:22 ཁོང་རྣམས་ཀྱིས་ཞལ་ཟས་བཞེས་པའི་དུས༌སུ། སྐྱབས་མགོན་ཡེ་ཤུས་ཕྱག་ཏུ་བག་ལེབ་བསྣམས་ཏེ་བྱིན་རླབས་གནང༌རྗེས། དུམ་བུར་བགོས་ནས་ཁོ་རྣམས་ལ་གནང་སྟེ་འདི་སྐད༌དུ། འདི་ནི་བདག་གི་ལུས་པོ་ཡིན་ལ་ཁྱོད་ཅག་གིས་ལོངས་ཤིག་ཅེས་གསུངས་པ༌དང༌།
MAR 14:23 ཡང་ཁོང་གིས་ཕོར་བ་ཕྱག་ཏུ་བསྣམས་ཏེ་དཀོན་མཆོག་ལ་བཀའ་དྲིན་ཞུས་རྗེས་ཁོ་རྣམས་ལ་གནང་བ་དང་ཚང་མས་དེ་ལས་བཏུངས༌སོ།།
MAR 14:24 ཡང་ཁོང་གིས་འདི་སྐད༌དུ། འདི་ནི་བདག་གི་ཞལ་ཆད་ཀྱི་ཁྲག་ཡིན༌ཏེ། མི་མང་པོའི་ཆེད་དུ་བཞུར་བ༌ཡིན།
MAR 14:25 བདག་གིས་ཁྱོད་ཅག་ལ་བདེན་པར་སྨྲ༌སྟེ། ངས་དཀོན་མཆོག་གི་རྒྱལ་སྲིད་ནས་གསར་པ་ཞིག་འཐུང་བའི་ཉིན་མོའི་བར༌དུ། རྒུན་འབྲུམ་གྱི་ཁུ་བ་འདི་འཐུང་བ་མིན་ཞེས་གསུངས༌སོ།།
MAR 14:26 དེ་ནས་ཁོང་རྣམས་ཀྱིས་གསུང་མགུར་བླངས་རྗེས་ཕྱི་རུ་ཐོན་ཞིང་སྐྱུ་རུ་རའི་རི་བོར་ཕེབས༌སོ།།
MAR 14:27 དེ་ནས་ཡང་སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། གསུང་རབ་ཀྱི་མདོ་ལས་ཇི་སྐད༌དུ། བདག་གིས་ལུག་རྫི་ལ་རྡུང་རྡེག་བྱས་ནས་ལུག་རྣམས་འཐོར་བར་འགྱུར་ཞེས་བཀོད་པ༌བཞིན། ཁྱོད་ཅག་ཐམས་ཅད་ས་རུ་འགྱེལ་བར༌འགྱུར།
MAR 14:28 འོན་ཀྱང་བདག་ནི་སླར་གསོན་རྗེས་ཁྱོད་ཅག་གི་སྔོན་ལ་ག་ལིལ་ཡུལ་དུ་འགྲོ་ངེས་ཞེས་གསུངས༌སོ།།
MAR 14:29 དེ་ནས་པེ་ཏྲོ་ན༌རེ། མི་ཐམས་ཅད་ས་རུ་འགྱེལ་ནའང་བདག་ནི་འགྱེལ་བ་མིན་ཞེས་ཞུས་པ༌ན།
MAR 14:30 ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ལ་བདེན་པར་སྨྲ༌སྟེ། དོ་དགོང་གི་དུས་འདིར་བྱ་ཕོ་ཐེངས་གཉིས་མ་གྲགས་པའི་སྔོན༌དུ། ཁྱོད་ཀྱིས་ཐེངས་གསུམ་ལ་ང་རང་ཁས་མི་ལེན་ཞེས་གསུངས༌སོ།།
MAR 14:31 འོན་ཀྱང་པེ་ཏྲོས་ཁོང་ལ་བདག་ནི་ཁྱེད་དང་མཉམ་དུ་འཆི་དགོས༌ཀྱང༌། ཁྱེད་རང་ཁས་མི་ལེན་པ་དཔེ་མི་སྲིད་ཅེས་ནན་གྱིས་ཞུས་ཤིང་ཐུགས་སྲས་གཞན་རྣམས་ཀྱིས་ཀྱང་དེ་ལྟར་ཞུས༌སོ།།
MAR 14:32 དེ་ནས་ཁོང་རྣམས་གེད་སེམ་མཱ་ནེ་ཞེས་པའི་ས་ཆ་ཞིག་ལ་ཕེབས་པ༌དང༌། ཁོང་གིས་ཐུགས་སྲས་རྣམས་ལ་འདི་སྐད༌དུ། བདག་གིས་གསོལ་བ་འདེབས་པའི་བར་དུ་ཁྱོད་ཅག་གནས་འདིར་སྡོད་ཅིག་ཅེས་གསུངས༌ཤིང༌།
MAR 14:33 པེ་ཏྲོ༌དང༌། ཡ༌ཀོབ། ཡོ་ཧ་ནན་གསུམ་པོ་ཁྲིད་པ༌དང༌། དུས་དེར་ཁོང་གི་ཐུགས་ཤིན་ཏུ་འཁྲུག་ཅིང་གདུངས་པར་གྱུར་ཏེ་འདི་སྐད༌དུ།
MAR 14:34 བདག་སེམས་ཤིན་ཏུ་སྐྱོ་ནས་འཆི་ལ༌ཉེའོ། །ཁྱོད་ཅག་གིས་གནས་འདི་རུ་བསྒུགས་ནས་དོགས་ཟོན་གྱིས་ཤིག་ཅེས་གསུངས་པ༌དང༌།
MAR 14:35 ཡང་ཁོང་ཉིད་མདུན་ཕྱོགས་སུ་ཅུང་ཙམ་ཕེབས་ཤིང་སྐུ་ལུས་སར་བཏུད་དེ་འདི་སྐད༌དུ། གལ་ཏེ་སྲིད་པ་ཡིན་ན་དུས་འདི་བདག་ལས་འདའ་བར་མཛོད་ཅེས་གསོལ་བ༌བཏབ།
MAR 14:36 ཡང་ཁོང་གིས་འདི་སྐད༌དུ། ཀྱེ། ཨབ་བཱ༌ལགས། ཡབ༌ལགས། ཁྱེད་ལ་བསྒྲུབ་མི་ནུས་པའི་བྱ་བ་གང་ཡང་མེད་པས་ཕོར་བ་འདི་བདག་ལས་ཕྱིར་ལེན་པར༌མཛོད། འོན་ཀྱང་བདག་གི་བསམ་པ་བཞིན་དུ་མི་འགྲུབ་པར་ཁྱེད་ཀྱི་ཐུགས་དགོངས་བཞིན་དུ་གྲུབ་གྱུར་ཅིག་ཅེས་ཞུས༌སོ།།
MAR 14:37 དེ་ནས་ཁོང་ཉིད་ཕྱིར་ཕེབས་པ་ན་ཁོ་རྣམས་གཉིད་དུ་ཡུར་བ་གཟིགས་ཏེ་པེ་ཏྲོ་ལ་འདི་སྐད༌དུ། སི༌མོན། ཁྱོད་རང་གཉིད་ལ་ཡུར་བ་ཡིན༌ནམ། ཆུ་ཚོད་གཅིག་ཙམ་ལའང་དོགས་ཟོན་བྱ་མི་ནུས༌སམ།
MAR 14:38 ཁྱོད་ཅག་ཉམས་ཚོད་ཀྱི་འོག་ཏུ་མི་འཚུད་པའི་ཕྱིར་དོགས་ཟོན་བྱས་ནས་གསོལ་བ་ཐོབས༌ཤིག ཁྱོད་ཅག་གི་སེམས་སུ་དེ་ལྟར་བྱ་བསམ་ཡང་ལུས་སྟོབས་ཞན་པ་ཡིན་ཞེས་གསུངས༌སོ།།
MAR 14:39 ཡང་ཁོང་ཉིད་ཕར་ཕེབས་ནས་སྔར་བཞིན་གསོལ་བ་བཏབ་པ༌དང༌།
MAR 14:40 ཁོང་ཉིད་ཕྱིར་ཕེབས་པ་ན་ཡང་ཁོ་རྣམས་ངལ་དུབ་ཆེ་བས་གཉིད་དུ་ཡུར་བ་གཟིགས༌ཤིང༌། ཁོ་རྣམས་ཀྱིས་ཁོང་ལ་ཅི་ཞུ་བའང་མ་ཤེས༌སོ།།
MAR 14:41 ཁོང་ཐེངས་གསུམ་པར་ཕྱིར་ཕེབས་རྗེས་འདི་སྐད༌དུ། ཁྱོད་ཅག་ད་དུང་གཉིད་ནས་ངལ༌གསོའམ། གཉིད་པར་མི༌བྱའོ། །ད་ལྟ་དུས་ལ་བབས་པ༌རེད། ལྟོས༌དང༌། མིའི་བུ་སྡིག་ཅན་རྣམས་ཀྱི་ལག་ཏུ་སྤྲོད་པར༌བྱེད།
MAR 14:42 ལྟོས༌དང༌། ང་ལ་ངོ་ལོག་བྱེད་མཁན་དེ་ཉེ་སར་སླེབས་པས་ཡར་ལོངས་དང་འགྲོའོ་ཞེས་གསུངས༌སོ།།
MAR 14:43 ཁོང་གིས་དེ་ལྟར་གསུང་བཞིན་པའི་དུས༌སུ། གློ་བུར་ཉིད་ལ་ཐུགས་སྲས་བཅུ་གཉིས་ཀྱི་ཡ་གྱལ་ཏེ་ཡུ་དཱ་སླེབས་པ༌དང༌། ད་དུང་ལག་ཏུ་རལ་གྲི་དང་དབྱུག་པ་ཐོགས༌ཤིང༌། མཆོད་དཔོན་ཆེན་པོ་རྣམས་དང་མཁན༌པོ། རྒན་པོ་དག་གིས་མངགས་པའི་མི་ཚོགས་ཀྱང་ཁོ་དང་མཉམ་དུ་སླེབས༌སོ།།
MAR 14:44 ཁོང་ལ་ངོ་ལོག་བྱེད་མཁན་དེས་མི་དེ་དག་ལ་ངས་སུ་ལ་འོ་བྱས༌ན། དེ་ནི་ཁོང་ཉིད་ཡིན་པས་མྱུར་དུ་བཟུང་ནས་དམ་པོར་ཁྲིད་ཅིག་ཅེས་སྔོན་ལ་ལྐོག་བརྡ་བརྒྱབ་ཡོད་པ༌རེད།
MAR 14:45 དེ་ནས་ངོ་ལོག་པ་དེ་ཁོང་གི་དྲུང་དུ་སླེབས་མ་ཐག་རཱབ་པེ་ལགས་ཞེས་ཞུས་ནས་ཁོང་གི་འགྲམ་པར་འོ་བྱས་པ༌ན།
MAR 14:46 མི་དེ་དག་གིས་ཁོང་ཉིད་བཟུང༌ངོ༌།།
MAR 14:47 ཁོང་གི་ཉེ་འགྲམ་དུ་ལངས་བསྡད་ཡོད་པ་རྣམས་ལས་མི་ཞིག་གིས་རལ་གྲི་ཕྱུང༌སྟེ། མཆོད་དཔོན་ཆེན་པོའི་གཡོག་པོར་བརྒྱབ་ནས་རྣ་བ་ཡ་གཅིག་བཅད༌དོ།།
MAR 14:48 དེ་ནས་སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། ཁྱོད་ཅག་གིས་རལ་གྲི་དང་དབྱུག་པ་བཟུང་ནས་ཇག་པ་འཛིན་པ་ལྟར་ང་རང་གཟུང་དུ་ཡོང༌ངམ།
MAR 14:49 བདག་གིས་ཉིན་རེ་བཞིན་མཆོད་ཁང་ནང་དུ་ཆོས་བཤད་ཅིང་ཁྱོད་རྣམས་དང་མཉམ་དུ་སྡོད་དུས་ཁྱོད་ཅག་གིས་ང་རང་མ་བཟུང༌མོད། འོན་ཀྱང་དོན་འདི་བྱུང་བ་ནི་གསུང་རབ་ཀྱི་མདོ་ལས་གསུངས་པ་ལྟར་འགྲུབ་པའི་ཕྱིར་ཡིན་ཞེས་གསུངས་པ༌དང༌།
MAR 14:50 ཐུགས་སྲས་ཐམས་ཅད་ཀྱིས་ཀྱང་སྐྱབས་མགོན་ཡེ་ཤུ་བསྐྱུར་ནས་བྲོས༌སོ།།
MAR 14:51 ལུས་ལ་སོ་རས་གྱོན་པའི་ན་གཞོན་ཞིག་ཁོང་གི་རྗེས་སུ་འབྲངས་ཤིང་མི་ཚོགས་ཀྱིས་ཁོ་རང་ཡང་བཟུང་བ༌ན།
MAR 14:52 ཁོས་སོ་རས་གཡུགས་ཏེ་ལུས་གཅེར་བུར་བྲོས༌སོ།།
MAR 14:53 ཁོ་རྣམས་ཀྱིས་སྐྱབས་མགོན་ཡེ་ཤུ་མཆོད་དཔོན་ཆེན་པོའི་དྲུང་དུ་ཁྲིད་ཅིང་མཆོད་དཔོན་ཆེན་པོ་དག་དང་རྒན་པོ༌རྣམས། མཁན་པོ་རྣམས་ཀྱང་གནས་དེར༌འཛོམས།
MAR 14:54 པེ་ཏྲོའང་རྒྱང་རིང་ནས་ཁོང་གི་རྗེས་སུ་འབྲངས་ཏེ་མཆོད་དཔོན་ཆེན་པོའི་ར་སྐོར་དུ་སོང་ནས་སྲུང་དམག་དང་མཉམ་དུ་མེར་ལྡེ་བཞིན་བསྡད༌དོ།།
MAR 14:55 མཆོད་དཔོན་ཆེན་པོ་རྣམས་དང་དཔོན་རིགས་ཚོགས་པའི་ཚོགས་མི་ཐམས་ཅད་ཀྱིས་ཁོང་ཉིད་གཏུགས་ཤིང་སྲོག་ཆད་གཅོད་པའི་ཕྱིར་དཔང་པོ་བཙལ་ཡང་མ་རྙེད༌དོ།།
MAR 14:56 མི་མང་པོས་རྫུན་གྱི་དཔང་པོ་བྱས་ཀྱང་དཔང་པོ་བྱས་པ་ནང་མཐུན་མ་བྱུང༌ངོ༌།།
MAR 14:57 ཡང་མི་འགའ་ཞིག་ཡར་ལངས་ནས་ཁོང་ལ་རྫུན་གྱི་དཔང་པོ་བྱས་ཏེ་གཏུགས་ཤིང་འདི་ལྟར་སྨྲས༌པ།
MAR 14:58 ཁོས་མི་ཡི་ལག་པས་བཟོས་པའི་མཆོད་ཁང་འདི་བཤིག༌སྟེ། ཉིན་གསུམ་ལ་མི་ཡི་ལག་པས་བརྩིགས་པ་མ་ཡིན་པའི་མཆོད་ཁང་གཞན་ཞིག་བཞེང་ངེས་ཡིན་ཟེར་བ་ངེད་ཅག་གིས་ཐོས་བྱུང་ཞེས་སྨྲས༌མོད།
MAR 14:59 འོན་ཀྱང་དཔང་པོ་བྱས་པ་དེ་ཡང་ནང་མཐུན་མ་བྱུང༌ངོ༌།།
MAR 14:60 དེ་ནས་མཆོད་དཔོན་ཆེན་པོ་དཀྱིལ་ནས་ཡར་ལངས་ཏེ་སྐྱབས་མགོན་ཡེ་ཤུ་ལ་འདི་ལྟར་དྲིས་པ༌སྟེ། མི་འདི་རྣམས་ཀྱིས་ཁྱོད་ལ་དཔང་པོ་བྱས་ནས་གཏུག་པ་འདི་ཅི་ཡིན༌ནམ། ཁྱོད་ཀྱིས་ལན་ཅི་ཡང་མི་འདེབས་སམ་ཞེས་པ༌ན།
MAR 14:61 ཁོང་གིས་ཅི་ཡང་མ་གསུངས་ལ་བཀའ་ལན་ཡང་མ་གནང༌ངོ༌། །ཡང་མཆོད་དཔོན་ཆེན་པོ་ན༌རེ། ཁྱོད་ནི་བསྟོད་འོས་པ་དེ་ཉིད་ཀྱི་སྲས་མཱ་ཤི་ཀ་ཡིན་ནམ་ཞེས་དྲིས་པ༌ན།
MAR 14:62 སྐྱབས་མགོན་ཡེ་ཤུས་ང་རང་ཡིན༌ནོ། །ཁྱོད་ཅག་གིས་མིའི་བུ་ཁོང་ཉིད་ཀུན་དབང་ཉིད་ཀྱི་གཡས་ཕྱོགས་སུ་བཞུགས༌ཏེ། ནམ་མཁའི་སྤྲིན་དང་བཅས་ཕེབས་ཡོང་བ་མཐོང་བར་འགྱུར་ཞེས་གསུངས༌སོ།།
MAR 14:63 མཆོད་དཔོན་ཆེན་པོས་རང་གི་གྱོན་པ་གཤགས་ཏེ་ད་ལྟ་བདག་ཅག་ལ་དཔང་པོ་ཅི་ལ༌དགོས།
MAR 14:64 ཁོས་དཀོན་མཆོག་ལ་སྐུར་བ་བཏབ་པ་ཁྱོད་རྣམས་ཀྱིས་ཀྱང་ཐོས་པས་ཁྱོད་ཅག་ལ་བསམ་འཆར་ཅི་ཡོད་ཅེས་སྨྲས་པ༌ན། དེ་དག་ཐམས་ཅད་ཀྱིས་ཁོང་གསོད་དགོས་པ་ཐག་གིས་བཅད༌ཅིང༌།
MAR 14:65 མི་འགའ་ཞིག་གིས་ཁོང་ལ་མཆིལ་མ་བཏབ་ཅིང་སྤྱན་ཟུང་རས་ཀྱིས་བཏུམས་ནས་ཁུ་ཚུར་གཞུས་ཏེ་ན༌རེ། ད་ལྟ་ལུང་བསྟན་ཤོད་ཅིག་ཅེས་བརྗོད་པ་དང་སྲུང་དམག་དག་གིས་ཀྱང་ཁོང་ཚུར་དྲུད་ནས་གདོང་ལ་འགྲམ་ལྕག་གིས་གཞུས༌སོ།།
MAR 14:66 དེ་ནས་པེ་ཏྲོ་ར་སྐོར་ཞོལ་མར་སྡོད༌དུས། མཆོད་དཔོན་ཆེན་པོའི་གཡོག་མོ་ཞིག་ཡོང༌སྟེ།
MAR 14:67 པེ་ཏྲོ་མེར་ལྡེ་བཞིན་པ་མཐོང་ཞིང་ཁོ་ལ་བལྟས་ནས་ཁྱོད་ཀྱང་ནཱ་ཙ་རེལ་པ་ཡེ་ཤུ་དང་གྲས་གཅིག་རེད་ཅེས་སྨྲས་པ༌ན།
MAR 14:68 པེ་ཏྲོས་ཁས་མ་བླངས་པར་ཁྱོད་ཀྱིས་ཅི་བཤད་པ་ངས་མི་ཤེས་ལ་དོན་ཡང་མི་གོ་ཞེས་སྨྲས་ཏེ་སྒོ་ལམ་དུ་སོང་བ་དང་བྱ་ཕོ་གྲགས༌སོ།།
MAR 14:69 ཡང་གཡོག་མོ་དེས་པེ་ཏྲོ་མཐོང་ནས་སླར་ཡང་གནས་དེར་ལངས་བསྡད་ཡོད་པའི་མི་རྣམས༌ལ། མི་འདི་ཡང་དེ་དག་གི་གྲས་གཅིག་རེད་ཅེས་སྨྲས༌སོ།།
MAR 14:70 འོན་ཀྱང་པེ་ཏྲོས་ཡང་ཁས་མ་བླངས༌སོ། །དེ་ནས་ཅུང་མ་འགོར་བར་གནས་དེར་ལངས་བསྡད་ཡོད་པའི་མི་རྣམས་ཀྱིས་ཀྱང་པེ་ཏྲོ༌ལ། ཁྱོད་ནི་ག་ལིལ་པ་ཞིག་ཡིན་པས་དངོས་གནས་དེ་དག་དང་གྲས་གཅིག་རེད་ཅེས་སྨྲས་པ༌ན།
MAR 14:71 པེ་ཏྲོས་སྡིགས་དམོད་བྱེད་བཞིན་མནའ་བསྐྱལ༌ཏེ། ཁྱོད་ཅག་གིས་སྨྲས་པའི་མི་དེ་ངས་ངོ་མི་ཤེས་ཞེས་སྨྲས༌སོ།།
MAR 14:72 དེ་མ་ཐག་བྱ་ཕོ་ཐེངས་གཉིས་པའང་གྲགས༌པས། པེ་ཏྲོས་དེ་སྔར་སྐྱབས་མགོན་ཡེ་ཤུས་ཁོ་རང་ལ་བྱ་ཕོ་ཐེངས་གཉིས་མ་གྲགས་པའི་སྔོན༌དུ། ཁྱོད་ཀྱིས་ཐེངས་གསུམ་ལ་ང་རང་ཁས་མི་ལེན་ཞེས་པའི་གསུང་དེ་དྲན་ཞིང་བཟོད་གླགས་མེད་པར་ངུས༌སོ།།
MAR 15:1 དེ་ནས་ནམ་ལངས་མ་ཐག་མཆོད་དཔོན་ཆེན་པོ་རྣམས་དང་། རྒན་པོ་དང་མཁན་པོ་བཅས་དཔོན་རིགས་ཚོགས་པའི་ཚོགས་མི་ཐམས་ཅད་ཀྱིས་གྲོས་བྱས༌ཏེ། སྐྱབས་མགོན་ཡེ་ཤུ་བཀྱིགས་ནས་པི་ལ་ཏུ་ལ་སྤྲད༌ཅིང༌།
MAR 15:2 པི་ལ་ཏུ་ན༌རེ། ཁྱོད་ནི་ཡ་ཧུ་དཱ་པའི་རྒྱལ་པོ་ཡིན་ནམ་ཞེས་སྐྱབས་མགོན་ཡེ་ཤུ་ལ་དྲིས་པ༌ན། ཁོང་གིས་འདི་སྐད༌དུ། ཁྱོད་ཀྱིས་སྨྲས་པ་བཞིན་ཡིན་ཞེས་གསུངས༌སོ།།
MAR 15:3 མཆོད་དཔོན་ཆེན་པོ་རྣམས་ཀྱིས་ཁོང་གི་དོན་མང་པོ་གཏུགས༌སོ།།
MAR 15:4 ཡང་པི་ལ་ཏུ་ན༌རེ། ལྟོས་དང་མི་དེ་རྣམས་ཀྱིས་ཁྱོད་ཀྱི་དོན་འདི་འདྲ་མང་པོ་གཏུག་གིན་འདུག༌ཨང༌། ཁྱོད་ཀྱིས་ལན་ཅི་ཡང་མི་འདེབས་སམ་ཞེས་དྲིས་པ༌ལ།
MAR 15:5 སྐྱབས་མགོན་ཡེ་ཤུས་བཀའ་ལན་ཅི་ཡང་མ་གསུངས་པས་པི་ལ་ཏུའང་ངོ་མཚར་བར་གྱུར༌ཏོ།།
MAR 15:6 པི་ལ་ཏུ་ལ་དུས་ཆེན་འདིར་ཁེལ་བའི་དུས༌སུ། ཁོ་རྣམས་ཀྱི་རེ་ཞུ་ལྟར་བཙོན་པ་ཞིག་བཙོན་གྲོལ་གཏོང་བའི་རྒྱུན་སྲོལ་ཡོད༌དོ།།
MAR 15:7 དེ་ཡང་པཱ་རབ་པཱ་ཞེས་པའི་བཙོན་པ་ཞིག་ཀྱང་ཟིང་འཁྲུག་སློང་མཁན་དང་མཉམ་དུ་བཀྱིགས་ཡོད༌ལ། དེ་དག་གིས་ཟིང་འཁྲུག་ཁྲོད་དུ་མི་ཡང་བསད་མྱོང་བ༌རེད།
MAR 15:8 དེ་ནས་མི་རྣམས་པི་ལ་ཏུའི་དྲུང་དུ་སོང་ནས་རྒྱུན་སྲོལ་བཞིན་མཛོད་ཅིག་ཅེས་ཞུས་པ༌ན།
MAR 15:9 པི་ལ་ཏུས་མཆོད་དཔོན་ཆེན་པོ་རྣམས་ཀྱིས་སྐྱབས་མགོན་ཡེ་ཤུ་ལ་ཕྲག་དོག་བྱས་ནས་ཁོ་རང་ལ་སྤྲད་པ་ཤེས་ཏེ་ན༌རེ། ཁྱོད་རྣམས་ཀྱིས་ཡ་ཧུ་དཱ་པའི་རྒྱལ་པོ་འདི་ཉིད་བཙོན་གྲོལ་གཏོང་འདོད་དམ་ཞེས་དྲིས༌སོ།།
MAR 15:11 འོན་ཀྱང་མཆོད་དཔོན་ཆེན་པོ་རྣམས་ཀྱིས་མི་ཚོགས་ལ་པཱ་རབ་པཱ་བཏང་ན་ལེགས་ཞེས་ཞུ་བར་ནན་གྱིས༌བསྐུལ།
MAR 15:12 ཡང་པི་ལ་ཏུ་ན༌རེ། འོ་ན་ཁྱོད་ཅག་གིས་ཡ་ཧུ་དཱ་པའི་རྒྱལ་པོ་ཟེར་བ་འདིར་བདག་གིས་ཅི་བྱ་འོས་སམ་ཞེས་སྨྲས་པ༌ན།
MAR 15:13 དེ་དག་གིས་སླར་ཡང་སྐད་གསང་མཐོན་པོས་ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་བསྒྲགས༌སོ།།
MAR 15:14 ཡང་པི་ལ་ཏུ་ན༌རེ། རྒྱུ་མཚན་ཅིའི་ཕྱིར༌རམ། ཁོས་དོན་ངན་ཅི་བྱས་སམ་ཞེས་སྨྲས༌ནའང༌། དེ་དག་གིས་སྔར་ལས་སྐད་ཆེན་པོས་ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་འུར་བརྒྱབ༌བོ།།
MAR 15:15 པི་ལ་ཏུས་མི་ཚོགས་དགའ་བར་འཇུག་འདོད་དེ་པཱ་རབ་པཱ་བཏང་ནས་ཁོ་རྣམས་ལ་སྤྲད༌ཅིང༌། སྐྱབས་མགོན་ཡེ་ཤུར་རྟ་ལྕག་གིས་གཞུས་ཏེ་ཤིང་རྒྱ་གྲམ་གྱི་སྟེང་དུ་བརྡབ་ཕྱིར་དམག་མི་རྣམས་ལ་སྤྲད༌དོ།།
MAR 15:16 དེ་ནས་དམག་མི་རྣམས་ཀྱིས་སྐྱབས་མགོན་ཡེ་ཤུ་སྤྱི་དཔོན་གྱི་ཕོ་བྲང་གི་ར་སྐོར་དུ་ཁྲིད་ནས་རང་གི་དམག་དཔུང་ཐམས་ཅད་བསྡུས༌ཤིང༌།
MAR 15:17 དེ་དག་གིས་ཁོང་གི་ལུས་ལ་ན་བཟའ་མདོག་རྒྱ་སྨུག་ཅན་ཞིག་བསྐོན་པ་དང་ཚེར་མས་ཅོད་པན་བསླེས་ཏེ་ཁོང་གི་དབུ་ལ་བསྐོན་ནས།
MAR 15:18 ཁོང་ལ་རྟེན་འབྲེལ་ཞུ་བའི་ཟོལ་གྱིས་ཡ་ཧུ་དཱ་པའི་རྒྱལ་པོ་ཁྱོད་ལ་རྟེན་འབྲེལ་ཞུ་ཞེས་སྨྲས༌སོ།།
MAR 15:19 ཡང་ཁོང་གི་དབུ་ལ་དབྱུག་པ་ཕྲ་མོས་བརྡེག་ཅིང་གདོང་ལ་མཆིལ་མ༌བཏབ། པུས་མོ་སར་བཙུགས་ཏེ་ཁོང་ལ་ཕྱག་འཚལ་ཁུལ་བྱས༌སོ།།
MAR 15:20 དེ་ལྟར་ཁོང་ལ་བརྙས་བཅོས་བྱས་ཚར༌རྗེས། ཁ་དོག་རྒྱ་སྨུག་ཡིན་པའི་ན་བཟའ་ཕུད་ཅིང་ཁོང་ལ་རང་ཉིད་ཀྱི་ན་བཟའ་བསྐོན༌ཏེ། ཤིང་རྒྱ་གྲམ་གྱི་སྟེང་དུ་བརྡབ་ཆེད་ཕྱི་རོལ་ཏུ་ཁྲིད༌དོ།།
MAR 15:21 དེའི་དུས༌སུ། ཨ་ལིག་སན་དིར་དང་རུ་ཕུ་སྤུན་གཉིས་ཀྱི་ཕ་སྟེ་སི་མོན་ནི་ཀི་རེ་ནེ་ཡི་མི་ཡིན༌ལ། ཁོ་རང་གྲོང་གསེབ་ནས་ཡོང་ཞིང་གནས་འདི་བརྒྱུད་ནས་འགྲོ་བ༌ན། དེ་དག་གིས་ཁོ་ལ་བཙན་གྱིས་སྐྱབས་མགོན་ཡེ་ཤུའི་ཤིང་རྒྱ་གྲམ་འཁུར་དུ༌བཅུག
MAR 15:22 དེ་ནས་སྐྱབས་མགོན་ཡེ་ཤུ་ཁྲིད་ནས་གོལ་གོ་ཐཱ༌སྟེ། དོན་ལ་མགོ་སྐོགས་གནས་ཞེས་པའི་ས་ཆར་སླེབས་པ༌དང༌།
MAR 15:23 དེ་དག་གིས་སྐྱབས་མགོན་ཡེ་ཤུར་གུ་གུལ་འདྲེས་པའི་རྒུན་ཆང་དྲངས་ནའང་ཁོང་གིས་མ་བཞེས་པ༌རེད།
MAR 15:24 དེ་ནས་དམག་མི་རྣམས་ཀྱིས་ཁོང་ཉིད་ཤིང་རྒྱ་གྲམ་གྱི་སྟེང་དུ་བརྡབས༌ཤིང༌། ཁོང་གི་ན་བཟའ་བགོ་བཤའ་བྱས་ནས་རྒྱན་འཕངས་པ་དང་མི་རེ་རེར་གང་ཐོབ་པར་བལྟས༌སོ།།
MAR 15:25 སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་པའི་དུས་ནི་ཞོགས་པའི་ཆུ་ཚོད་དགུ་ཡིན༌ནོ།།
MAR 15:26 ཁོང་ལ་བཏགས་པའི་ཉེས་སྐྱོན་ནི་ཤིང་བྱང་ཞིག་གི་ངོས་སུ་ཡ་ཧུ་དཱ་པའི་རྒྱལ་པོ་ཡིན་ཞེས་བྲིས་ཡོད་པ༌དེའོ།།
MAR 15:27 ཁོང་དང་ལྷན་ཅིག་ཇག་པ་གཉིས་ཀྱང་ཁོང་གི་གཡས་གཡོན་དུ་ཤིང་རྒྱ་གྲམ་གྱི་སྟེང་དུ་བརྡབས་ཡོད༌ཅིང༌།
MAR 15:28 དེ་ནི་གསུང་རབ་ཀྱི་མདོ་ལས་ཁོང་ཉེས་ཅན་གྱི་གྲས་སུ་བརྩིས་ཡོད་ཅེས་གསུངས་པ་བཞིན་དུ་གྲུབ་པ་ཡིན༌ནོ།།
MAR 15:29 གནས་དེར་བརྒྱུད་ནས་འགྲོ་བ་རྣམས་ཀྱིས་ཁོང་ལ་འཕྱ་སྨོད་བྱས་ཤིང་མགོ་བོ་གཡུག༌བཞིན། ཀྱེ། མཆོད་ཁང་བཤིགས་ནས་ཉིན་གསུམ་གྱི་ནང་དུ་སླར་རྩིག་མཁན་ཁྱོད་ཀྱིས་རང་ཉིད་སྐྱོབས༌དང༌། ཤིང་རྒྱ་གྲམ་སྟེང་ནས་མར་བོབས་ཤིག་ཅེས་སྨྲས་པ༌དང༌།
MAR 15:31 དེ་བཞིན་མཆོད་དཔོན་ཆེན་པོ་དག་དང་མཁན་པོ་རྣམས་ཀྱིས་ཀྱང་མཉམ་དུ་ཁོང་ལ་འཕྱ་དམོད་བྱེད་ཀྱིན་ཁོས་གཞན་རྣམས་བསྐྱབས་མྱོང་ནའང་རང་ཉིད་སྐྱོབ་མི་ནུས་ཞེས་ཕན་ཚུན་གླེང་བ༌དང༌།
MAR 15:32 ཡེས་ར་ཨེལ་གྱི་རྒྱལ་པོ་མཱ་ཤི༌ཀ ད་ལྟ་ཤིང་རྒྱ་གྲམ་སྟེང་ནས་མར་བོབས༌དང༌། ངེད་ཅག་གིས་དོན་དེ་མཐོང་ན་དད་པ་བྱེད་ཅེས་སྨྲས༌སོ། །ཁོང་དང་མཉམ་དུ་ཤིང་རྒྱ་གྲམ་ལ་བརྡབས་ཡོད་པ་དེ་གཉིས་ཀྱིས་ཀྱང་ཁོང་ལ་དེ་ལྟར་སྨད༌དོ།།
MAR 15:33 དེར་ཉིན་གུང་ནས་ཕྱི་དྲོའི་ཆུ་ཚོད་གསུམ་པའི་བར་དུ་ཡུལ་དེ་ཡོངས་སུ་མུན་ནག་འཐིབས༌ཤིང༌།
MAR 15:34 ཕྱི་དྲོའི་ཆུ་ཚོད་གསུམ་གྱི་སྟེང་སྐྱབས་མགོན་ཡེ་ཤུས་གསུང་སྐད་ཆེན༌པོས། ཨེ་ལོ༌ཨི། ཨེ་ལོ༌ཨི། ལཱ་མཱ་སཱ་པཱག་ཐཱ་ནེ་ཞེས་གསུངས༌ཤིང༌། དོན་ནི་འདི་ལྟ༌སྟེ། ཀྱེ། བདག་གི་དཀོན་མཆོག༌ལགས། བདག་གི་དཀོན་མཆོག༌ལགས། ཁྱེད་ཀྱིས་ང་རང་རྒྱབ་ཏུ་བསྐྱུར་དོན་ཅི་ཞེས༌པའོ།།
MAR 15:35 ཉེ་འགྲམ་དུ་འགྲེངས་ནས་བསྡད་ཡོད་པའི་མི་འགའ་ཞིག་གིས་གསུང་དེ་ཐོས༌རྗེས། ལྟོས༌དང༌། ཁོས་ཨེ་ལི་ཡཱ་འབོད་ཀྱིན་འདུག་ཅེས་སྨྲས་པ༌དང༌།
MAR 15:36 ཡང་མི་ཞིག་བརྒྱུགས་སོང་ནས་འགྱིག་སོབ་ཅིག་རྒུན་ཆང་སྐྱུར་མོར་སྦངས༌ཏེ། འདམ་རྩྭའི་རྩེར་བཀལ་ནས་ཁོང་ལ་འདྲེན་བཞིན་པའི་དུས༌སུ། ཅུང་ཙམ་སྒུགས༌དང༌། ཨེ་ལི་ཡཱ་ཡོང་སྟེ་ཁོང་ཉིད་ཤིང་རྒྱ་གྲམ་སྟེང་ནས་ལེན་མིན་ལ་བལྟའོ་ཞེས་སྨྲས༌སོ།།
MAR 15:37 དེ་ནས་སྐྱབས་མགོན་ཡེ་ཤུས་སྐད་ཆེན་པོས་འབོད་སྒྲ་ཞིག་བསྒྲགས་པ་དང་སྐུ་དབུགས་ཆད་པར་གྱུར༌ཏོ།།
MAR 15:38 མཆོད་ཁང་གི་ཡོལ་བ་ཆེན་པོ་དེ་ཡང་གོང་ནས་འོག་ཏུ་དུམ་བུ་གཉིས་སུ་རལ་བར་གྱུར༌ཏོ།།
MAR 15:39 ཁ་གཏད་དུ་འགྲེངས་ནས་བསྡད་ཡོད་པའི་བརྒྱ་དཔོན་གྱིས་ཁོང་གི་སྐུ་དབུགས་དེ་ལྟར་ཆད་པ་མཐོང༌སྟེ། སྐྱེས་བུ་འདི་ནི་དཀོན་མཆོག་གི་སྲས་ཡིན་པ་བདེན་འདུག་ཅེས་སྨྲས༌སོ།།
MAR 15:40 རྒྱང་རིང་ནས་ལྟ་བཞིན་པའི་བུད་མེད་རྣམས་ཀྱི་ཁྲོད་དུ་མཱག་རྡལ་གྱི་མིར་ཡམ༌དང༌། ཡ་ཀོབ་ཆུང་བ་དང་ཡོ་སེ་གཉིས་ཀྱི་མ་མིར་ཡམ་དེ༌དང༌། སཱ་ལོ་མེ་བཅས་ཀྱང༌ཡོད།
MAR 15:41 དེ་རྣམས་ནི་སྐྱབས་མགོན་ཡེ་ཤུ་ཁོང་ཉིད་ག་ལིལ་ཡུལ་དུ་བཞུགས་པའི་དུས་སུ་ཁོང་གི་རྗེས་འབྲངས་ནས་ཞབས་ཕྱི་བསྒྲུབས་མྱོང་བ་རྣམས༌ཡིན། གཞན་ཡང་སྐྱབས་མགོན་ཡེ་ཤུ་དང་མཉམ་དུ་ཡར་ཡེ་རུ་སཱ་ལེམ་ལ་འོངས་པའི་བུད་མེད་གཞན་མང་པོའང་གནས་འདིར་མཆིས༌སོ།།
MAR 15:42 མཚན་མོར་སླེབས་ཤིང་ཉིན་དེ་ནི་སྟ་གོན་གྱི་ཉིན་མོ་སྟེ། ངལ་གསོ་བའི་ཉིན་གྱི་ཉིན་སྔ་མ་ཡིན༌པས།
MAR 15:43 བཀུར་འོས་པའི་དཔོན་རིགས་ཚོགས་པའི་ཚོགས་མི་སྟེ་དཀོན་མཆོག་གི་རྒྱལ་སྲིད་ལ་སྒུག་མཁན་ཨ་རི་མ་ཐཱ་ཡི་ཡོ་སེབ་ཡོང༌ནས། སྤོབས་པ་ཆེར་བསྐྱེད་དེ་པི་ལ་ཏུའི་དྲུང་དུ་སོང་ཞིང་སྐྱབས་མགོན་ཡེ་ཤུའི་སྐུ་གདུང་གནང་བར་ཞུ་བ་ཞུས་པ༌ལ།
MAR 15:44 པི་ལ་ཏུས་སྐྱབས་མགོན་ཡེ་ཤུ་སྐུ་གྲོངས་པའི་གཏམ་ཐོས་ནས་ཡ་མཚན་སྐྱེས་ཤིང་བརྒྱ་དཔོན་བོས༌ཏེ། ཁོང་གྲོངས་སམ་མ་གྲོངས་ཞེས་དྲིས་པ༌དང༌།
MAR 15:45 པི་ལ་ཏུས་བརྒྱ་དཔོན་ལས་དོན་འདི་རྩད་ཆོད་རྗེས་ཁོང་གི་སྐུ་གདུང་ཡོ་སེབ་ལ་གནང༌ངོ༌།།
MAR 15:46 དེ་ནས་ཡོ་སེབ་ཀྱིས་སོ་རས་ཞིག་ཉོས་ཤིང་ཁོང་གི་སྐུ་གདུང་ཤིང་རྒྱ་གྲམ་སྟེང་ནས་མར་བླངས་ཏེ་སོ་རས་ཀྱིས་དཀྲིས༌རྗེས། བྲག་ནང་དུ་བརྐོས་པའི་དུར་ཁུང་ཞིག་གི་ནང་དུ་སྦས་ཤིང་རྡོ་ཕ་བོང་ཞིག་བསྒྲིལ་ཡོང་ནས་དུར་ཁུང་གི་སྒོ་བཅད༌དོ།།
MAR 15:47 མཱག་རྡལ་གྱི་མིར་ཡམ་དང་ཡོ་སེ་བྱ་བའི་མ་མིར་ཡམ་གཉིས་ཀྱིས་ཀྱང་སྐུ་གདུང་གང་དུ་བཞག་པའི་གནས་མཐོང༌ངོ༌།།
MAR 16:1 དེ་ནས་ངལ་གསོ་བའི་ཉིན་རྫོགས༌རྗེས། མཱག་རྡལ་གྱི་མིར་ཡམ༌དང༌། ཡ་ཀོབ་ཀྱི་མ་མིར༌ཡམ། སཱ་ལོ་མེ་བཅས་ཀྱིས་སྐྱབས་མགོན་ཡེ་ཤུའི་སྐུ་གདུང་ལ་བྱུག་བྱའི་བསུང་རྫས་ཉོས་པ༌དང༌།
MAR 16:2 གཟའ་འཁོར་གཅིག་གི་ཉིན་དང་པོའི་ཞོགས་པར་ཉི་མ་ཤར་བའི་དུས་སུ་ཁོ་མོ་ཚོ་དུར་ཁུང་གི་གམ་དུ་སླེབས༌ཤིང༌།
MAR 16:3 ལམ་བར་དུ་ཕན་ཚུན་ལ་དུར་ཁུང་གི་སྒོ་ཁར་ཡོད་པའི་རྡོ་ཕ་བོང་དེ་སུ་ཞིག་གིས་ངེད་ཅག་གི་ཆེད་དུ་ཕར་བསྒྲིལ་བར་བྱའམ་ཞེས་སྨྲས༌ཤིང༌།
MAR 16:4 ཁོ་མོ་དག་གིས་མགོ་ཡར་དགྱེ་ནས་བལྟས་པ༌ན། རྡོ་ཕ་བོང་དེ་ནི་དངོས་གནས་ཤིན་ཏུ་ཆེན་པོ་ཞིག་ཡིན་ཡང་སྔར་ནས་ཕར་བསྒྲིལ་ཟིན་པ་མཐོང༌ངོ༌།།
MAR 16:5 དེ་ནས་ཁོ་མོ་ཚོ་དུར་ཁུང་ནང་དུ་འཛུལ་བ་དང་ལྭ་རིང་དཀར་པོ་གྱོན་པའི་ན་གཞོན་ཞིག་ཁོ་མོ་ཚོའི་གཡས་ཕྱོགས་སུ་བཞུགས་ཡོད་པ་མཐོང་ནས་ཤིན་ཏུ་འཇིགས༌སོ།།
MAR 16:6 ན་གཞོན་དེ་ན༌རེ། ཁྱོད་རྣམས་འཇིགས་མི༌དགོས། ཁྱོད་ཅག་ནི་ཤིང་རྒྱ་གྲམ་གྱི་སྟེང་དུ་བརྡབས་པའི་ནཱ་ཙ་རེལ་པ་ཡེ་ཤུ་འཚོལ་དུ་ཡོང་བ་ཡིན༌ཏེ། ཁོང་གི་སྐུ་གདུང་བཞུགས་སའི་གནས་དེར་ལྟོས་དང་ཁོང་ཉིད་སླར་གསོན་པས་གནས་འདིར་མི༌བཞུགས།
MAR 16:7 ཁྱོད་ཅག་ཕྱིར་སོང་ནས་ཁོང་གི་ཐུགས་སྲས་རྣམས་དང་པེ་ཏྲོ་ལ་འདི་སྐད་ཤོད༌ཅིག དེ་སྔར་ཁོང་གིས་ཁྱོད་རྣམས་ལ་གསུངས་པ་བཞིན་ཁོང་ཉིད་ཁྱོད་ཅག་གི་སྔོན་ལ་ག་ལིལ་ཡུལ་དུ་ཕེབས༌ཤིང༌། གནས་དེ་རུ་ཁྱོད་ཅག་ཁོང་དང་མཇལ་བར་ངེས་ཞེས་སྨྲས༌སོ།།
MAR 16:8 ཁོ་མོ་ཚོ་དུར་ཁུང་ལས་ཕྱིར་བུད་མ་ཐག་འདར་ཞིང་ཧ་ལས་ནས་བྲོས༌པས། གཏམ་དེ་མི་གཞན་སུ་ལའང་སྨྲ་བར་མ་སྤོབས༌སོ།།
MAR 16:9 གཟའ་འཁོར་གཅིག་གི་ཉིན་དང་པོའི་ཞོགས༌པར། སྐྱབས་མགོན་ཡེ་ཤུ་སླར་གསོན་པ༌དང༌། དེ་སྔར་ཁོང་གིས་གདོན་འདྲེ་བདུན་བསྐྲད་མྱོང་བའི་མཱག་རྡལ་གྱི་མིར་ཡམ་ལ་ཐོག་མར་སྐུ་གཟུགས་མངོན་སུམ་དུ་བསྟན༌པས།
MAR 16:10 ཁོ་མོ་སྔར་ནས་སྐྱབས་མགོན་ཡེ་ཤུའི་རྗེས་སུ་འབྲངས་པ་རྣམས་ཀྱི་དྲུང་དུ་སོང་ཞིང་དེ་རྣམས་ཀྱིས་མྱ་ངན་བྱེད་བཞིན་ཡོད་པར་དོན་དེ་སྨྲས༌ནའང༌།
MAR 16:11 དེ་དག་གིས་སྐྱབས་མགོན་ཡེ་ཤུ་གསོན་པོར་བཞུགས་པ་དང་མིར་ཡམ་གྱིས་མཐོང་བ་ཡིན་ཞེས་པའི་གཏམ་ལ་ཡིད་མ་ཆེས༌སོ།།
MAR 16:12 དེའི་རྗེས༌སུ། རྗེས་འབྲང་པ་རྣམས་ལས་མི་གཉིས་གྲོང་གསེབ་ལ་འགྲོ་བའི་ལམ་བར༌དུ། སྐྱབས་མགོན་ཡེ་ཤུས་རང་གི་སྐུ་གཟུགས་རྣམ་པ་གཞན་པའི་ལམ་ནས་ཁོ་གཉིས་ལ་མངོན་སུམ་དུ་བསྟན༌ཏོ།།
MAR 16:13 ཁོ་གཉིས་ཕྱིར་ལོག་ནས་རྗེས་འབྲང་པ་གཞན་རྣམས་ལ་གནས་ཚུལ་དེ་སྨྲས་ནའང་སུས་ཀྱང་ཁོ་གཉིས་ལ་ཡིད་མ་ཆེས༌སོ།།
MAR 16:14 དོན་དེའི་རྗེས༌སུ། ཐུགས་སྲས་བཅུ་གཅིག་པོས་ཟས་བཞེས་ནས་སྡོད་པའི་དུས༌སུའང༌། སྐྱབས་མགོན་ཡེ་ཤུས་དེ་རྣམས་ལ་རང་གི་སྐུ་གཟུགས་མངོན་སུམ་དུ་བསྟན༌ཏེ། ཁོང་ཉིད་སླར་གསོན་རྗེས་ཁོང་ཉིད་མཐོང་མཁན་རྣམས་ཀྱིས་སྨྲས་པའི་གཏམ་ལ་ཁོ་རྣམས་ཡིད་མ་ཆེས༌པས། ཁོང་གིས་དེ་རྣམས་ལ་དད་པ་མེད་པ་དང་སེམས་གྱོང་པོ་ཡིན་པར་བཀའ་བཀྱོན་མཛད༌དོ།།
MAR 16:15 དེ་ནས་ཁོང་གིས་འདི་སྐད༌དུ། ཁྱོད་ཅག་གནམ་འོག་ཀུན་ཏུ་སོང་ནས་མི་ཐམས་ཅད་ལ་འཕྲིན་བཟང་སྒྲོགས༌ཤིག
MAR 16:16 སུ་ཞིག་གིས་དད་པ་བྱས་ནས་ཁྲུས་གསོལ་ལ་འཇུག་པ་དེ་ལ་ཐར་པ་འཐོབ་པར་འགྱུར་ཞིང་དད་པ་མེད་པ་དེ་ལ་ཉེས་ཆད་གཅོད་པར་འགྱུར༌རོ།།
MAR 16:17 དད་པ་དང་ལྡན་པའི་མི་རྣམས་དང་ལྷན་ཅིག་ངོ་མཚར་བའི་རྟགས་འདི་རྣམས་འབྱུང་ངེས༌ཤིང༌། ངའི་མིང་ལ་བརྟེན་ནས་དེ་དག་གིས་གདོན་འདྲེ་ཕར་སྐྲོད་པ་དང་སྐད་རིགས་གསར་པ་སྨྲ༌བ།
MAR 16:18 དུག་སྦྲུལ་ལག་པས་འཛིན་ནུས༌པ། དུག་འཐུང་ནའང་སྲོག་ལ་མི་གནོད༌པ། ལག་པ་ནད་པའི་སྟེང་དུ་བཞག་ན་ནད་གཞོམ་པར་འགྱུར་ཞེས་གསུངས༌སོ།།
MAR 16:19 དེ་ནས་སྐྱབས་མགོན་ཡེ་ཤུས་ཁོ་རྣམས་ལ་བཀའ་གནང་ཚར༌རྗེས། ཁོང་ཉིད་ནམ་མཁའི་ཞིང་ཁམས་སུ་དྲངས་ཤིང་དཀོན་མཆོག་གི་གཡས་ཕྱོགས་སུ་བཞུགས༌སོ།།
MAR 16:20 ཐུགས་སྲས་རྣམས་ཀྱང་ཡུལ་ཕྱོགས་ཀུན་ཏུ་སོང་ནས་འཕྲིན་བཟང་བསྒྲགས༌ཤིང༌། གཙོ་བོས་ཀྱང་ཁོ་རྣམས་དང་མཉམ་དུ་འཕྲིན་ལས་མཛད་པ་དང་ངོ་མཚར་བའི་རྟགས་དང་ཆབས་ཅིག་བཀའ་དེ་ལ་བདེན་དཔང་མཛད༌དོ།། །།
LUK 1:1 གུས་པར་འོས་པའི་ཇོ་བོ་ཐེ་འོ་ཕེ་ལུ༌ལགས། དེ་ཡང་དཀོན་མཆོག་གི་བཀའ་ཡི་ཞབས་ཏོག་པ་རྣམས་ཀྱིས་ཐོག་མ་ནས་མིག་གིས་མཐོང་ཞིང་བདག་ཅག་ལ་གང་ཞིག་གསུངས་པ་བཞིན༌དུ། མི་མང་པོ་ཞིག་གིས་བདག་ཅག་གི་ཁྲོད་དུ་གྲུབ་པའི་དོན་རྣམས་ཡི་གེར་འགོད་འགོ་བརྩམས༌པས།
LUK 1:3 ངས་ཀྱང་ཐོག་མ་ནས་དོན་དེ་ཐམས་ཅད་ལ་བརྟག་ཅིང་དཔྱད༌དེ། ཁྱེད་ལ་གོ་རིམ་བཞིན་དུ་ཡི་གེར་འགོད་པར་ཐག་གིས༌བཅད་དོ།།
LUK 1:4 ཅིའི་ཕྱིར་ཞེ༌ན། དེ་སྔར་ཁྱེད་ལ་བསྟན་པའི་བཀའ་རྣམས་ནི་བདེན་པ་དངོས་ཡིན་པ་རྟོགས་སུ་འཇུག་པའི་ཕྱིར༌རོ།།
LUK 1:5 ཧེ་རོ་དཱ་ཞེས་བྱ་བ་ཡ་ཧུ་དཱའི་ཡུལ་གྱི་རྒྱལ་པོ་ཡིན་པའི་དུས༌སུ། ཨ་བི་ཡཱའི་སྡེ་ཚན་དུ་ཟཱ་ཀར་ཡ་ཞེས་པའི་མཆོད་དཔོན་ཞིག་ཡོད༌དེ། དེའི་ཆུང་མ་ནི་ཨ་རོན་གྱི་བུ་རྒྱུད་ཡིན་ཞིང་མིང་ལ་ཨེ་ལི་སཱ་བེད་ཟེར།
LUK 1:6 དེ་གཉིས་ནི་དཀོན་མཆོག་གི་དྲུང་དུ་མི་གཞུང་དྲང་གཉིས་ཡིན༌ཏེ། གཙོ་བོའི་བཀའ་དང་ཁྲིམས་ཐམས་ཅད་འཕྱུགས་མེད་དུ་བསྲུངས་པ་ཡིན།
LUK 1:7 འོན་ཀྱང་ཨེ་ལི་སཱ་བེད་ནི་ཕྲུ་གུ་སྐྱེ་མི་ནུས་པས་ཁོ་གཉིས་ལ་བུ་ཕྲུག་མེད་པར་རྒས༌སོ།།
LUK 1:8 ནམ་ཞིག་གི་དུས༌ལ། ཟཱ་ཀར་ཡས་རང་གི་སྡེ་ཚན་གྱི་གོ་རིམ་བཞིན་དཀོན་མཆོག་གི་དྲུང་ནས་མཆོད་དཔོན་གྱི་འོས་འགན་སྒྲུབ་པའི་སྐབས་སུ།
LUK 1:9 མཆོད་དཔོན་གྱི་ལུགས་སྲོལ་ལྟར་རྒྱན་བླངས་ཤིང་སྤོས་སྒྲོན་པའི་བྱ་བའང་ཁོ་ལ་བབས༌པས། ཁོ་རང་གཙོ་བོའི་མཆོད་ཁང་དུ་སོང་ངོ༌།།
LUK 1:10 ཁོས་སྤོས་སྒྲོན་པའི་སྐབས༌སུ། མི་ཚོགས་ཐམས་ཅད་ཀྱིས་མཆོད་ཁང་གི་ཕྱི་ནས་གསོལ་བ་བཏབ་ཅིང་བསྡད།
LUK 1:11 གཙོ་བོའི་ཕོ་ཉ༌ཞིག་སྤོས་ཁྲིའི་གཡས་ཕྱོགས་སུ་ཀྲོང་ངེར་བྱུང་སྟེ་ཁོའི་མིག་ལ་མངོན༌ཞིང༌།
LUK 1:12 ཟཱ་ཀར་ཡས་ཕོ་ཉ་དེ་མཐོང་ནས་སེམས་འཚབས་ཏེ་འཇིགས་ཤིང་སྐྲག་པར་གྱུར་ཏོ།།
LUK 1:13 འོན་ཀྱང་། ཕོ་ཉས་ཁོ་ལ་འདི་སྐད༌དུ། ཟཱ་ཀར༌ཡཱ། ཁྱོད་རང་སྐྲག་མི་དགོས༌ཏེ། ཁྱོད་ཀྱི་སྨོན་ལམ་ནི་དཀོན་མཆོག་གིས་གསན་བྱུང༌བས། ཁྱོད་ཀྱི་ཆུང་མ་ཨེ་ལི་སཱ་བེད་ལ་བུ་ཞིག་སྐྱེ་བར༌འགྱུར། ཁྱོད་ཀྱིས་བུའི་མིང་ལ་ཡོ་ཧ་ནན་ཞེས་ཐོགས༌ཤིག
LUK 1:14 ཁྱོད་གཉིས་ལ་བུ་སྐྱེས་པས་དགའ་སྤྲོ་འབྱུང་ཞིང་མི་མང་པོའང་དགའ་བར་འགྱུར༌ཏེ།
LUK 1:15 ཁོ་རང་གཙོ་བོའི་དྲུང་ནས་མི་ཆེན་པོར་འགྱུར༌ཞིང༌། རྒུན་ཆང་དང་ཨ་རག་ནམ་ཡང་མི་འཐུང༌ལ། མའི་མངལ་དུ་ཡོད་པ་ནས་བཟུང་དམ་པའི་ཐུགས་ཉིད་ཀྱིས་ཁྱབ་པར་འགྱུར་རོ།།
LUK 1:16 ཡང་ཁོས་ཡེས་ར་ཨེལ་གྱི་བུ་རྒྱུད་མང་པོ་ཞིག་གཙོ་བོ་སྟེ་ཁོ་རྣམས་ཀྱི་དཀོན་མཆོག་གི་ཕྱོགས་སུ་ཕྱིར་འགུག་པར་འགྱུར༌ཞིང༌།
LUK 1:17 ཁོ་རང་ལ་ཨེ་ལི་ཡཱ༌དང་འདྲ་བའི་སེམས་དང་ནུས་མཐུ་ལྡན་ཞིང་གཙོ་བོ༌ཕེབས་པའི་སྔོན་དུ་བསྐྱོད༌ནས། ཕ་རྣམས་ཀྱི་སེམས་བུ་ཡི་ཕྱོགས་ལ་འགུག་པ༌དང༌། དཀོན་མཆོག་གི་བཀའ་ལ་མི་ཉན་པ་རྣམས་མི་གཞུང་དྲང་གི་ཤེས་རབ་དང་བསྟུན་པར་བྱ༌སྟེ། གཙོ་བོ་ལ་འཚམ་པའི་མི་སྡེ་སྟ་གོན་བྱེད་པར་འགྱུར་ཞེས་གསུངས༌སོ།།
LUK 1:18 ཟཱ་ཀར་ཡས་ཕོ་ཉ༌ལ། ང་རང་རྒས་ཤིང་ངའི་ཆུང་མ་ཡང་རྒས་ཟིན་པས་ངས་དོན་དེ་ཇི་ལྟར་ཤེས་ཐུབ་ཅེས་དྲིས་པ༌ལ།
LUK 1:19 ཕོ་ཉས་འདི་སྐད༌དུ། ང་རང་ནི་དཀོན་མཆོག་གི་དྲུང་དུ་སྡོད་པའི་ཕོ་ཉ་གེབ་རི་ཨེལ་ཡིན༌ཏེ། ཁྱོད་ལ་གཏམ་སྨྲ་བ་དང་འཕྲིན་བཟང་འདི་འཆད་པར་མངགས་པ་ཡིན༌ལ།
LUK 1:20 ལྟོས༌དང༌། དུས་དེར་སླེབས་ཚེ། ངས་སྨྲས་པ་བཞིན་དུ་འགྲུབ་པར་འགྱུར་རོ།། འོན་ཀྱང་བདག་གིས་སྨྲས་པ་ལ་ཁྱོད་རང་ཡིད་མི་ཆེས་པས་དོན་དེ་འགྲུབ་པའི་བར་དུ་ཁྱོད་རང་ལྐུགས་པར་འགྱུར་ཞེས་གསུངས་སོ།།
LUK 1:21 མི་ཚོགས་ཀྱིས་ཟཱ་ཀར་ཡ་ལ་བསྒུགས་ནས་བསྡད་ཅིང་ཁོ་རང་མཆོད་ཁང་ནས་ཡུན་རིང་འགོར་བས་དོགས་པ་སྐྱེས༌པ་རེད།
LUK 1:22 ཁོ་རང་ཕྱི་ལ་ཐོན་དུས་སྐད་ཆ་སྨྲ་མི་ཐུབ་པས་ཁོས་མཆོད་ཁང་ནས་ཞལ་གཟིགས་ཤིག་མཐོང་བ་མི་དེ་རྣམས་ཀྱིས་ཤེས་སོ།། ཡང་ཁོས་མི་དེ་རྣམས་ལ་ལག་བརྡ་བྱས་ནའང་ལྐུགས་པར་གྱུར་ནས་བསྡད།
LUK 1:23 མཆོད་དཔོན་གྱི་འོས་འགན་སྒྲུབ་པའི་དུས་མཇུག་རྫོགས་རྗེས་ཁོ་རང་ཕྱིར་ཡུལ་དུ་ལོག་གོ།
LUK 1:24 དེའི་རྗེས༌སུ། ཁོའི་ཆུང་མ་ཨེ་ལི་སཱ་བེད་ལ་མངལ་སྦྲུམ་སྟེ་ཟླ་བ་ལྔའི་རིང་ལ་ཡིབས་ནས་བསྡད༌ཅིང༌།
LUK 1:25 གཙོ་བོས་ང་ལ་གཟིགས་སྐྱོང་མཛད་དེ་མི་ཚོགས་ཀྱི་ཁྲོད་ནས་ངའི་ངོ་ཚ་བསལ་བའི་ཕྱིར་འདི་ལྟར་མཛད་ཅེས་སྨྲས་སོ།།
LUK 1:26 དེ་ནས་ཟླ་བ་དྲུག་ལ་སླེབས་པའི་དུས༌སུ། དཀོན་མཆོག་གིས་ཕོ་ཉ་གེབ་རི་ཨེལ་བྱ་བ་ག་ལིལ་ཡུལ་གྱི་ནཱ་ཙ་རེལ་ཞེས་པའི་གྲོང་རྡལ༌དུ།
LUK 1:27 མིར་ཡམ་ཞེས་འབོད་པའི་ན་ཆུང་བུ་མོ་དེའི་གམ་དུ་མངགས༌ཤིང༌། ན་ཆུང་བུ་མོ་དེ་ནི་དཱ་བིད་ཀྱི་རིགས་རྒྱུད་ཡིན་པའི་ཡོ་སེབ་དང་གཉེན་རྟགས་བརྒྱབ་ཡོད་པ༌ཡིན།
LUK 1:28 ཕོ་ཉ་དེ་ཉིད་བུ་མོའི་གམ་དུ་སོང་ནས་འདི་སྐད༌དུ། དཀོན་མཆོག་གི་ཐུགས་རྗེ་ཆེན་པོ་ཐོབ་པའི་བུ༌མོ། ཁྱོད་རང་བདེ་བར་གྱུར༌ཅིག གཙོ་བོ་ཁོང་ཉིད་ཁྱོད་དང་མཉམ་དུ་བཞུགས་ཞེས་གསུངས་པ༌དང༌།
LUK 1:29 བུ་མོ་མིར་ཡམ་གྱི་སེམས་ཤིན་ཏུ་འཚབས་ཤིང་གཏམ་འདི་ཅི་ཡིན་ནམ་ཞེས་ཡང་དང་བསྐྱར་དུ་བསམས་སོ།།
LUK 1:30 ཡང་ཕོ་ཉས་འདི་སྐད༌དུ། མིར༌ཡམ། མ་འཇིགས༌ཤིག ཁྱོད་ལ་དཀོན་མཆོག་གི་ཐུགས་རྗེ་ཐོབ༌ཅིང་།
LUK 1:31 ལྟོས༌དང༌། ཁྱོད་ལ་མངལ་སྦྲུམ་ནས་བུ་ཞིག་སྐྱེ་བར༌འགྱུར། དེའི་མཚན་ལ་ཡེ་ཤུ་ཞེས་ཐོགས༌ཤིག
LUK 1:32 ཁོང་ནི་སྐྱེས་ཆེན་དམ་པར་འགྱུར༌ཏེ། བླ་ན་མེད་པའི་དཀོན་མཆོག་གི་སྲས་ཞེས་གསོལ་བ་དང་། གཙོ་བོ་དཀོན་མཆོག་གིས་ཁོང་ལ་རང་གི་མེས་པོ་དཱ་བིད་ཀྱི་བཞུགས་ཁྲི་གནང༌བར་འགྱུར་ཞིང༌།
LUK 1:33 ཡུན་ནས་ཡུན་དུ་ཡ་ཀོབ་ཀྱི་རིགས་རྒྱུད་ལ་དབང་བསྒྱུར་བ༌དང༌། ཁོང་གི་རྒྱལ་སྲིད་ཀྱང་མཐའ་མེད་པར་འགྱུར་ཞེས་གསུངས་པ༌ན།
LUK 1:34 མིར་ཡམ་ན༌རེ། ང་ནི་སྐྱེས་པ་སུ་ལའང་འགྲོགས་མ་མྱོང་བས་དོན་འདི་ནི་ཇི་ལྟར་འབྱུང་སྲིད་དམ་ཞེས་ཞུས་པ༌ལ།
LUK 1:35 ཡང་ཕོ་ཉས་འདི་སྐད༌དུ། དམ་པའི་ཐུགས་ཉིད་ཁྱོད་ཀྱི་སྟེང་ལ་ཁྱབ་ངེས་ཤིང་བླ་ན་མེད་པའི་དཀོན་མཆོག་གི་ནུས་མཐུ་ཡིས་ཀྱང་ཁྱོད་རང་བསྲུང་བར་འགྱུར༌བས། ཁྱོད་རང་ལས་འཁྲུང་ངེས་པའི་བུ་དམ་པ་དེ་ལ་དཀོན་མཆོག་གི་སྲས་ཞེས་གསོལ་བར་འགྱུར་རོ།།
LUK 1:36 ལྟོས༌དང༌། ཁྱོད་ཀྱི་གཉེན་ཉེ་ཨེ་ལི་སཱ་བེད་རྒས་ཤིང་ཕྲུ་གུ་སྐྱེ་མི་ནུས་ཀྱང༌། ད་ལྟ་མངལ་དུ་བུ་སྦྲུམ་ནས་ཟླ་བ་དྲུག་ལ་སླེབས༌ཡོད།
LUK 1:37 རྒྱུ་མཚན་ནི་དཀོན་མཆོག་ལ་མི་འགྲུབ་བྱ་བ་ཅི་ཡང་མེད་པའི་ཕྱིར་ཡིན་ཞེས་གསུངས་སོ།།
LUK 1:38 ཡང་མིར་ཡམ་ན༌རེ། ང་ནི་གཙོ་བོའི་གཡོག་མོ་ཡིན༌ཏེ། ཁྱེད་ཀྱིས་གསུངས་པ་བཞིན་ངའི་སྟེང་དུ་འགྲུབ་པར་སྨོན་ཞེས་ཞུས་པ་དང་ཕོ་ཉ་ཕྱིར་ཕེབས༌སོ།།
LUK 1:39 སྐབས༌དེར། མིར་ཡམ་ལམ་ལ་ཆས་ཏེ་ཡ་ཧུ་དཱའི་ཡུལ་གྱི་རི་ཁུལ་དུ་ཡོད་པའི་གྲོང་རྡལ་ཞིག་ལ་མྱུར་དུ་སོང༌ཞིང༌།
LUK 1:40 ཟཱ་ཀར་ཡའི་ཁྱིམ་དུ་སོང་ནས་ཨེ་ལི་སཱ་བེད་ལ་འཚམས་འདྲི་བྱས།
LUK 1:41 ཨེ་ལི་སཱ་བེད་ཀྱིས་མིར་ཡམ་གྱི་འཚམས་འདྲི་ཐོས་པ་དང་རང་གི་མངལ་གྱི་ཕྲུ་གུའང་གློ་བུར་འགུལ་ཞིང་ཁོ་མོ་ལ་དམ་པའི་ཐུགས་ཉིད་ཀྱིས་ཁྱབ་པར་གྱུར་ཏོ།།
LUK 1:42 ཨེ་ལི་སཱ་བེད་ཀྱིས་སྐད་གསང་མཐོན༌པོས། བུད་མེད་རྣམས་ཀྱི་ཁྲོད་དུ་ཁྱོད་ལ་དཀོན་མཆོག་གི་བྱིན་རླབས༌ཆེན་པོ་ཐོབ་པ་ཡིན། ཁྱོད་ཀྱི་མངལ་དུ་སྦྲུམ་པའི་བུ་ལའང་དཀོན་མཆོག་གི་བྱིན་རླབས༌ཆེན་པོ་ཐོབ་པ་ཡིན།
LUK 1:43 བདག་གི་གཙོ་བོའི་མ་ཡུམ་ངའི་གམ་དུ་ཕེབས་པའི་དོན་འདི་ངའི་སྟེང་དུ་ཅིའི་ཕྱིར་བྱུང་ངམ།
LUK 1:44 ལྟོས༌དང༌། ཁྱོད་ཀྱིས་འཚམས་འདྲི་བྱེད་པའི་སྐད་དེ་ངས་ཐོས་ཙ༌ན། ངའི་མངལ་གྱི་ཕྲུ་གུའང་དགའ་སྟེ་འགུལ༌བྱུང་།
LUK 1:45 གཙོ་བོས་ཁྱོད་ལ་ཅི་གསུང་ཐམས་ཅད་ཇི་བཞིན་འགྲུབ་པར་ཡིད་ཆེས་པའི་བུ་མོ་ཁྱོད་རང་བདེ་བར་སྨོན་ཞེས་སྨྲས༌སོ།།
LUK 1:46 དེ་ནས་མིར་ཡམ་གྱིས་གླུ་འདི་ལྟར་བླངས༌ཏེ། ཕྲན་གྱིས་སྙིང་ནས་གཙོ་བོ་ལགས་ལ༌བསྟོད།།
LUK 1:47 སྐྱབས་མགོན་དཀོན་མཆོག་ཉིད་ལ་སེམས་དགའོ།།
LUK 1:48 ཁོང་གིས་དམན་ཆུང་གཡོག་མོ་བདག་ལ༌གཟིགས།། གཟིགས་དང་དེང་ཕྱིན་མི་རབས་ཐམས་ཅད༌ཀྱིས།། བདག་ལ་བདེ་ལེགས་ཡིན་ཞེས་བརྗོད་པར༌འགྱུར།།
LUK 1:49 ཀུན་དབང་མཆོག་གིས་བདག་ལ་མཛད་པ༌མཚར།། ཁོང་གི་མཚན་ནི་དམ་པ་ཡིན་ལགས༌སོ།།
LUK 1:50 ཁོང་གི་ཐུགས་རྗེ་མི་རབས་ཡོངས་ལ༌གནས།། ཁོང་ལ་གུས་ཤིང་འཇིགས་པ་ཀུན་ལ༌གནང༌།།
LUK 1:51 མཚར་མཚར་གང་གི་ཕྱག་གིས་མཛད༌པ་མཚར།། ལེགས་ལེགས་རང་རློམ་ཅན་རྣམས་བདས་པ༌ལེགས།།
LUK 1:52 ལེགས་ལེགས་རྒྱལ་ངན་ཁྲི་ལས་ཕབ་པ༌ལེགས།། མཚར་མཚར་གཉོམ་ཆུང་ཅན་རྣམས་སྐྱོང་བ༌མཚར།།
LUK 1:53 དོན་བཟང་གིས་ནི་བཀྲེས་རྣམས་འགྲངས་མཛད༌ཅིང༌།། འབྱོར་བ་ཅན་རྣམས་སྟོང་བར་ཕུད་པ་ལགས།།
LUK 1:54 གང་གིས་མེས་པོ་ཨབ་ར་ཧམ་སོགས༌ནི།། རྟག་ཏུ་དྲན་ཞིང་སྙིང་རྗེ་དགོངས་པའི༌ཕྱིར།། སྔར་ནས་བདག་ཅག་མེས་པོར་གསུངས་པ༌བཞིན།། ཞབས་ཕྱི་པ་སྟེ་ཡེས་ར་ཨེལ་ལ་ནི༎ རོགས་སྐྱོར༌གནང༌བ་ཡིན་ཞེས་གྲགས་པ་འོ༎ ཞེས༌པའོ།།
LUK 1:56 མིར་ཡམ་ཟླ་བ་གསུམ་ཙམ་ལ་ཨེ་ལི་སཱ་བེད་དང་མཉམ་དུ་བསྡད་རྗེས་ཕྱིར་རང་ཡུལ་དུ་ལོག༌གོ།
LUK 1:57 ཨེ་ལི་སཱ་བེད་བཙའ་རན་པའི་དུས་ལོངས་པ་དང་བུ་ཞིག་སྐྱེས༌ཤིང༌།
LUK 1:58 ཁྱིམ་མཚེས་དང་གཉེན་ཉེ་རྣམས་ཀྱིས་ཨེ་ལི་སཱ་བེད་ལ་གཙོ་བོས་ཐུགས་རྗེ་ཆེན་པོ་དགོངས་པ་ཐོས་ནས་ཁོ་མོ་དང་མཉམ་དུ་དགའ་བར་གྱུར་ཏོ།།
LUK 1:59 ཉིན་བརྒྱད་པ་ལ། ཁོ་རྣམས་ཕྲུ་གུའི་མཚན་སྐྱི་གཅོད་པར་བལྟ་རུ་ཡོང༌སྟེ། ཕྲུ་གུའི་མིང་ལ་ཡབ་ཀྱི་མིང་ལྟར་ཟཱ་ཀར་ཡ་ཞེས་འདོགས་པར་བསམས༌ནའང༌།
LUK 1:60 བུའི་མ་ཡིས་མིང་དེ་ལྟར་གདགས་མི་ཆོག་པར་ཡོ་ཧ་ནན་འདོགས་དགོས་ཞེས་སྨྲས་པ༌ན།
LUK 1:61 དེ་རྣམས་ན༌རེ། ཁྱོད་ཀྱི་གཉེན་ཉེའི་ཁྲོད་དུ་མིང་དེ་འདྲ་ཞིག་སུ་ལའང་མེད་ཅེས་སྨྲས་པ༌དང༌།
LUK 1:62 བུའི་མིང་ལ་ཅི་ཞིག་འདོགས་འདོད་དམ་ཞེས་བུའི་ཕ་ལ་ལག་བརྡ་བྱས་པ༌ན།
LUK 1:63 ཁོས་ཤིང་ལེབ་ཅིག་ཁྱེར་འོང་དུ་བཅུག་ནས་བུའི་མིང་ལ་ཡོ་ཧ་ནན་ཟེར་ཞེས་བྲིས་པས་མི་ཐམས་ཅད་ངོ་མཚར་བར་གྱུར།
LUK 1:64 དེ་མ་ཐག་ཏུ་ཟཱ་ཀར་ཡས་ཁ་གདངས་ཤིང་ལྕེ་ཡང་གྲོལ་ནས་སྐད་ཆ་སྨྲས་པ་དང་དཀོན་མཆོག་ལ་བསྟོད་བསྔགས་བརྗོད་དོ།།
LUK 1:65 ཁྱིམ་མཚེས་ཚང་མའང་ངོ་མཚར་བ༌དང༌། དོན་དེ་རྣམས་ཡ་ཧུ་དཱའི་ཡུལ་གྱི་རི་ཁུལ་ཀུན་ཏུ་ཁྱབ་པར་གྱུར།
LUK 1:66 གནས་ཚུལ་དེ་ཐོས་པ་ཐམས་ཅད་ཀྱིས་ཀྱང་དོན་དེ་ཡིད་ལ་བཟུང༌ཞིང༌། གཙོ་བོའི་ཕྱག་གིས་ཕྲུ་གུ་དེར་སྐྱབས་འཇུག་གནང་ཡོད་པས་མ་འོངས་པ་ན་ཁོ་ནི་ཅི་ལྟ་བུ་ཞིག་ཏུ་འགྱུར་རམ་ཞེས་སྨྲས༌སོ།།
LUK 1:67 དུས༌དེར། ཕྲུ་གུའི་ཕ་ཟཱ་ཀར་ཡ་ལ་དམ་པའི་ཐུགས་ཉིད་ཀྱིས་ཁྱབ་པར་གྱུར་ནས་འདི་སྐད་དུ་ལུང་བསྟན་གནང༌ངོ༌།།
LUK 1:68 གཙོ་བོ་ལགས་ཏེ་ཡེས་ར་ཨེལ་གྱི་དཀོན་མཆོག་ལ།། བསྟོད་པ་དང་ནི་བསྔགས་བརྗོད་ཀུན་ནས་འབུལ་འོས་སོ།། གནས་འདིར་ཕེབས་ཤིང་རང་གི་མི་སྡེ་ཐར་བར་མཛད།།
LUK 1:69 ཁོང་གིས་ཞམ་རིང་དཱ་བིད་ཅེས་པའི་ཁྱིམ་རྒྱུད༌ནས།། བདག་ཅག་ཆེད་དུ༌ཐར་པའི་རྭ་དུང་བསྩལ་པ་ལགས།།
LUK 1:70 གནའ་ནས་ལུང་སྟོན་དམ་པའི་ངག་བརྒྱུད་གསུངས་པ༌བཞིན།།
LUK 1:71 བདག་ཅག་དགྲ་དང་སྡང་སེམས་ཀུན་ལས་ཐར་མཛད༌དེ།།
LUK 1:72 ཁོང་གིས་དམ་པའི་ཞལ་ཆད་དེ་ཉིད་དྲན་པ༌དང༌།། བདག་ཅག་མེས་པོ་རྣམས་ལ་ཐུགས་རྗེ་གནང་ལགས༌སོ།།
LUK 1:73 དེ་ནི་མེས་པོ་ཨབ་ར་ཧམ་ལ་དམ་བཅས༌ཏེ།།
LUK 1:74 ཁོང་གིས་བདག་ཅག་ལ་ནི་དགྲ་ལས་སྐྱོབ་ཕྱིར༌དང༌།། གང་གི་དྲུང་དུ་ཚེ་གཅིག་དུས་ཀུན༌འཇིགས་མེད་ངང་།། དྲང་བདེན་དམ་པའི་སྒོ་ནས་ཁོང་ལ་བསྙེན་བཀུར༌བྱེད།།
LUK 1:76 བདག་གི་བུ་ཁྱོད་གཙོ་བོའི་སྔོན་དུ་འགྲོ་བ༌དང༌།། ཁོང་གི་གཤེགས་ལམ་སྟ་གོན་བྱེད་ཕྱིར་ཁྱོད་ལ་ནི།། བླ་མེད་དཀོན་མཆོག་ཉིད་ཀྱི་ལུང་སྟོན༌པ་ཞེས་སྒྲོག །
LUK 1:77 མི་སྡེ་ཀུན་གྱི་སྡིག་པ་བསལ་ནས་ཐར་བའི༌དོན།། ཁྱོད་ཀྱིས་ཁོང་གི་མི་སྡེ་ལ་ཡང་ཤེས་སུ༌འཇུག །
LUK 1:78 རང་རེའི་དཀོན་མཆོག་ལ་ནི་ཐུགས་རྗེ་ཆེ་བའི༌ཕྱིར།། ཞོགས་པའི་ཉི་འོད་དགུང་ནས་ངེད་ལ་འཆར་བའི༌ཚེ།།
LUK 1:79 འཆི་ཁའི་སྨག་རུམ་ཆེན་པོར་སྡོད་པའི་མི་ཀུན༌ལ།། འོད་སྣང་འཕྲོ་ཞིང་གོམ་པ་བདེ་བའི་ལམ་དུ༌འཇུག ། ཅེས༌པའོ།།
LUK 1:80 ཕྲུ་གུ་དེ་རིམ་བཞིན་ནར་སོན་པ༌དང༌། སེམས་སུ་སྟོབས་ཤུགས་འཛོམས་ཤིང་། ཡེས་ར་ཨེལ་མི་རིགས་ཀྱི་མདུན་ལ་མངོན་པར་བྱེད་པའི་བར་དུ་དབེན་སྟོང་གི་ཡུལ་དུ་གནས༌སོ།།
LUK 2:1 དུས༌དེར། སེ་བཟིར་རྒྱལ་རབས་ཀྱི་རྒྱལ་པོ་ཨུ་རྒ་ཟི་ཏུ་ ཡིས་རོ་མཱ་གོང་མ་རྒྱལ་ཁབ་ཀྱི་འབངས་མི་ཐམས་ཅད་ཀྱིས་མིང་ཐོ་འགོད་དགོས་པའི་བཀའ་གནང༌ཞིང༌།
LUK 2:2 དེ་ནི་ཀི་རེ་ནུ་ཞེས་བྱ་བ་དེ་སིར་ཡཱ་ཡུལ་གྱི་ས་གནས་དཔོན་པོ་ཡིན་པའི་དུས་སུ་བྱུང་བའི་ཡུལ་མིའི་མིང་ཐོ་བཀོད་པའི་ཐོག་མ་ཡིན།
LUK 2:3 མི་ཐམས་ཅད་རང་གི་མིང་ཐོ་འགོད་པའི་ཕྱིར་རང་རང་གི་ཕ་ཡུལ་དུ་ལོག་པའོ།།
LUK 2:4 ཡོ་སེབ་ནི་དཱ་བིད་ཀྱི་རིགས་རྒྱུད་དང་ཁྱིམ་རྒྱུད་ཀྱི་མི་ཡིན་པས་ག་ལིལ་ཡུལ་གྱི་ནཱ་ཙ་རེལ་གྲོང་རྡལ༌ནས། ཡར་ཡ་ཧུ་དཱའི་ཡུལ་དུ་ཆས་ཏེ་དཱ་བིད་ཀྱི་གྲོང་རྡལ་པེད་ལེ་ཧེམ་དུ།
LUK 2:5 ཁོ་དང་གཉེན་རྟགས་བརྒྱབ་ཡོད་ཅིང་མངལ་དང་ལྡན་པ་མིར་ཡམ་གཉིས་མིང་འགོད་དུ་སོང༌།
LUK 2:6 ཁོ་གཉིས་གནས་དེར་སྡོད་སྐབས་ཕྲུ་གུ་བཙའ་བའི་དུས་སུ་སླེབས་ཏེ།
LUK 2:7 བུ་སྐྱེས་འགོ་བཙས་ཤིང་མགྲོན་ཁང་དུ་སྡོད་ས་མེད་པས་ཕྲུ་གུ་རས་ཀྱིས་བཏུམས་ནས་ཁ་རའི་ནང་དུ་བཞག༌གོ།
LUK 2:8 ཡུལ་དེའི་མཐའ་སྐོར་ནས་ལུག་རྫི་འགའ་ཞིག་ཐང་རྒོད་དུ་བསྡད་དེ། མཚན་མོར་རེས་བསྐོར་ནས་རང་གི་ལུག་ཁྱུ་སྲུང་བཞིན་ཡོད་ལ།
LUK 2:9 གཙོ་བོའི་ཕོ་ཉ་ཞིག་གློ་བུར་ལུག་རྫི་རྣམས་ཀྱི་གམ་དུ་ཕེབས༌ཤིང༌། གཙོ་བོའི་གཟི་བརྗིད་ཀྱི་འོད་སྣང་ཡང་ཁོ་ཚོའི་ཕྱོགས་བཞིར་ཁྱབ་པས་ཁོ་རྣམས་ཤིན་ཏུ་འཇིགས་སོ།།
LUK 2:10 ཕོ་ཉས་དེ་རྣམས་ལ་འདི་སྐད༌དུ། མ་འཇིགས༌ཤིག ངས་ཁྱོད་ཅག་ལ་ཤིན་ཏུ་དགའ་འོས་པའི་འཕྲིན་བཟང་མི་ཐམས་ཅད་དང་འབྲེལ་བ་ཞིག་འཆད༌དེ།
LUK 2:11 དེ་རིང་དཱ་བིད་ཀྱི་གྲོང་རྡལ་ནས་ཁྱོད་ཅག་གི་ཆེད་དུ་སྐྱབས་མགོན་ཞིག་འཁྲུངས༌ཤིང༌། ཁོང་ནི་གཙོ་བོ་མཱ་ཤི་ཀ་ཡིན།
LUK 2:12 ཡང་ཁྱོད་ཅག་གིས་རས་ཀྱིས་བཏུམས་ནས་ཁ་རའི་ནང་དུ་བསྙལ་བའི་ཕྲུ་གུ་ཞིག་མཐོང་ངེས་པ་དེ་ནི་ཁྱོད་ཅག་ལ་གནང་བའི་རྟགས་ཡིན་ཞེས་སྨྲས་པ༌དང༌།
LUK 2:13 གློ་བུར༌ཉིད་ལ། ནམ་མཁའི་ཞིང་ཁམས་ནས་ཕོ་ཉའི་དཔུང་ཚོགས་ལས་ཤིན་ཏུ་མང་པོ་གནས་དེར་སླེབས་ཤིང༌། ཕོ་ཉ་དེ་དང་ལྷན་ཅིག་གིས་དཀོན་མཆོག་ལ་བསྟོད་བསྔགས་བྱེད་བཞིན་འདི་སྐད༌དུ།
LUK 2:14 བླ་མེད་གནས་སུ་དཀོན་མཆོག་ཉིད་ལ་བསྟོད་པ་འབུལ་བ༌དང༌།། ས་གཞིར་ཁོང་ཉིད་དགྱེས་པའི་མི་ལ་ཞི་བདེ་འཐོབ་པར་ཤོག ། ཅེས་བསྔགས༌སོ།།
LUK 2:15 ཕོ་ཉ་རྣམས་ལུག་རྫི་དག་གི་མདུན་ནས་ཕྱིར་ནམ་མཁའི་ཞིང་ཁམས་སུ་ཕེབས་པ༌ན། ལུག་རྫི་རྣམས་ཕན་ཚུན་ན༌རེ། ངེད་ཅག་པེད་ལེ་ཧེམ་གྲོང་རྡལ་དུ་གཙོ་བོས་བདག་ཅག་ལ་གསུངས་པ་དེར་བལྟ་རུ་འགྲོའོ་ཞེས་སྨྲས༌ཏེ།
LUK 2:16 མྱུར་བ་མྱུར་དུ་སོང་ནས་བཙལ་བ་ལ་མིར་ཡམ་དང་ཡོ་སེབ་གཉིས༌དང༌། ཁ་རའི་ནང་དུ་བསྙལ་ཡོད་པའི་ཕྲུ་གུ་བཅས་རྙེད་དོ།།
LUK 2:17 ཁོ་རྣམས་ཀྱིས་དོན་དེ་མཐོང་ནས་ཕྲུ་གུ་དེའི་སྐོར་ལ་གསུངས་པའི་གཏམ་དེ་རྒྱས་པར་བསྒྲགས༌ཤིང༌།
LUK 2:18 གཏམ་ཐོས་མཁན་ཐམས་ཅད་ལུག་རྫི་རྣམས་ཀྱིས་སྨྲས་པའི་གཏམ་ལ་ངོ་མཚར་བར་གྱུར་ཏོ།།
LUK 2:19 འོན་ཀྱང་མིར་ཡམ་གྱིས་དོན་དེ་ཐམས་ཅད་སེམས་སུ་བཟུང་ཞིང་བསམ་བློ་མང་ཙམ་བཏང༌།
LUK 2:20 ལུག་རྫི་རྣམས་ཕྱིར་ལོག་ཅིང་རང་ལ་ཇི་ལྟར་གསུངས་པ་བཞིན་ཐོས་པ་དང་མཐོང་བའི་དོན་ཐམས་ཅད་ཀྱི་ཆེད་དུ་དཀོན་མཆོག་ལ་བསྟོད་བསྔགས་བརྗོད༌དོ།།
LUK 2:21 ཕྲུ་གུ་བཙས་ནས་ཉིན་བརྒྱད་པ་ལ་མཚན་སྐྱི་གཅོད་པའི་དུས༌སུ། ཕྲུ་གུ་མངལ་དུ་མ་ཆགས་པའི་སྔོན་ལ་ཕོ་ཉས་གསུངས་པ་བཞིན་མཚན་ལ་ཡེ་ཤུ་ཞེས་གསོལ༌ཏོ།།
LUK 2:22 མོ་ཤེའི་བཀའ་ཁྲིམས་ལྟར་ཁོང་རྣམས་ཀྱི་གཙང་མར་བཟོ་བའི་དུས་ལོངས༌ཏེ། ཡོ་སེབ་དང་མིར་ཡམ་གཉིས་ཀས་ཕྲུ་གུ་ཁྱེར་ནས་གཙོ་བོ་ལ་འབུལ་བའི་ཕྱིར་ཡར་ཡེ་རུ་སཱ་ལེམ་དུ་སོང༌།
LUK 2:23 དེ་ནི་གཙོ་བོའི་བཀའ་ཁྲིམས་ཀྱི་མདོ༌ལས། བུ་སྐྱེས་འགོ་རྣམས་གཙོ་བོའི་ཆེད་དུ་དམ་པ་ཡིན་དགོས་ཞེས་བཀོད་ཡོད་པའི་ཕྱིར༌ཡིན།
LUK 2:24 ཡང་ཁོང་གཉིས་གཙོ་བོའི་བཀའ་ཁྲིམས་ལས་གསུངས་པ་བཞིན་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་མཆོད་པར་འབུལ་དུ་སོང༌ངོ༌།།
LUK 2:25 ཡེ་རུ་སཱ་ལེམ་དུ་སི་མུ་ཨོན་ཟེར་བའི་མི་ཞིག་ཡོད་པ་དེ་ནི་གཞུང་རྒྱུད་དྲང་ཞིང་དད་པ་རྣམ་དག་ཅན་ཞིག་ཡིན༌ཏེ། ཡེས་ར་ཨེལ་མི་རིགས་ཀྱི་སེམས་གསོ་མཁན་ལ་སྒུག་བཞིན་པ་དང་དམ་པའི་ཐུགས་ཉིད་དང་ལྡན་པ་ཞིག་ཀྱང་ཡིན།
LUK 2:26 དམ་པའི་ཐུགས་ཉིད་ཀྱིས་ཁོ་རང་ལ་ཁྱོད་ཀྱིས་རང་ཉིད་མ་ཤི་བའི་སྔོན་ལ་གཙོ་བོའི་མཱ་ཤི་ཀ་མཐོང་བར་འགྱུར་ཞེས་མངོན་པར་བསྟན་མྱོང་བས།
LUK 2:27 དམ་པའི་ཐུགས་ཉིད་ཀྱིས་བསྐུལ་བ་བཞིན་ཁོ་རང་མཆོད་ཁང་དུ་སོང༌སྟེ། བཀའ་ཁྲིམས་ཀྱི་སྲོལ་བཞིན་བསྒྲུབ་པའི་ཕྱིར་སྲས་ཡེ་ཤུའི་ཡབ་ཡུམ་གཉིས་ཀྱིས་ཁོང་གནས་དེར་ཁྱེར་ཡོང་བར༌ཕྲད་ཅིང་།
LUK 2:28 སི་མུ་ཨོན་གྱིས་ཕྲུ་གུ་པང་དུ་བླངས་ནས་དཀོན་མཆོག་ལ་བསྟོད་ཅིང་བསྔགས་བཞིན་འདི་སྐད༌དུ།
LUK 2:29 གཙོ་བོ་ཁྱེད་ཀྱི་གསུང་བཞིན་ད༌ལྟའི་དུས་འདི་ལ།། ཁྱེད་ཀྱི་ཞབས་ཕྱི་བདག་ནི་བདེ་བར་འཆི་རུ༌མཛོད།།
LUK 2:30 ཁྱེད་ཀྱིས་མངགས་པའི་སྐྱབས་མགོན་ང་ཡི་མིག་གིས༌མཐོང༌།།
LUK 2:31 དེ་ནི་ཁྱེད་ཀྱིས་ཐམས་ཅད་ཀུན་ལ་སྟ་གོན༌དང༌།།
LUK 2:32 ཕྱི་ཕྱོགས་མི་ལ་འཕྲོ་བར་བྱེད་པའི་འོད་ཟེར༌ཡིན།། ཁྱེད་ཀྱི་འབངས་མི་ཡེས་ར་ཨེལ་གྱི་གཟི་བརྗིད༌དོ།། ཞེས་ཞུས༌སོ།།
LUK 2:33 ཕྲུ་གུའི་ཡབ་ཡུམ་གཉིས་སྐྱབས་མགོན་ཡེ་ཤུའི་སྐོར་ལ་གསུངས་པའི་གཏམ་དེར་ངོ་མཚར་སྐྱེས།
LUK 2:34 སི་མུ་ཨོན་གྱིས་ཁོ་རྣམས་ལ་བྱིན་རླབས་གནང་ཞིང་ཕྲུ་གུའི་ཡུམ༌མིར་ཡམ་ལ། ལྟོས༌དང༌། ཕྲུ་གུ་འདི་ནི་ཡེས་ར་ཨེལ་གྱི་མི་མང་པོ་ས་རུ་འགྱེལ་བ་དང་ཡར་ལངས་པའི་རྒྱུ་རྐྱེན༌དང༌། མི་མང་པོས་ཕྱིར་རྒོལ་བའི་རྟགས་བཅས་སུ་བསྐོས་ཤིང་།
LUK 2:35 དེ་ནི་མི་མང་པོའི་བསམ་ཚུལ་མངོན་པར་འགྱུར་བའི་ཕྱིར༌ཡིན། ཁྱེད་ཀྱི་སེམས་ཀྱིས་རལ་གྲི་བསྣུན་པ་ལྟ་བུའི་སྡུག་བསྔལ་ཆེན་པོ་མྱོང་ངེས་ཡིན་ཞེས་སྨྲས༌སོ།།
LUK 2:36 དེ་རུ་ལོ་ན་ཤིན་ཏུ་རྒས་པའི་བུད་མེད་ལུང་སྟོན་པ་ཨན་ནཱ་ཟེར་བ་ཞིག་ཡོད༌ལ། ཁོ་མོ་ནི་ཨ་ཤེར་ཚོ་བའི་ཕཱན་ནུ་ཨེལ་གྱི་བུ་མོ༌སྟེ། གཉེན་སྒྲིག་བྱས་ནས་ལོ་བདུན་ལ་ཁྱོ་ག་དང་མཉམ་དུ་བསྡད་ལ།
LUK 2:37 ཕྱིས་སུ་ཡུགས་མོ་རུ་ལུས་ཤིང་ད་ལྟ་དགུང་ལོ་བརྒྱད་ཅུ་གྱ་བཞིར་སོན༌པ་དང༌། ཁོ་མོ་མཆོད་ཁང་དང་མི་འབྲལ་བར་ཉིན་མཚན་ཀུན་ཏུ་སྨྱུང་གནས་སྲུང་ཞིང་གསོལ་བ་འདེབས་པའི་ངང་ནས་དཀོན་མཆོག་ལ་བསྙེན་བཀུར་བྱེད་མཁན་ཞིག་ཡིན།
LUK 2:38 དུས་དེར། བུད་མེད་ལུང་སྟོན་པ་ཨན་ནཱའང་གནས་དེར་ཡོང་ཞིང་དཀོན་མཆོག་ལ་བཀའ་དྲིན་ཞུས་པ༌དང༌། ཡེ་རུ་སཱ་ལེམ་གྱི་ཐར་པ་ལ་སྒུག་པའི་མི་ཐམས་ཅད་ལ་སྐྱབས་མགོན་ཡེ་ཤུའི་སྐོར་ཡང་ཡང་སྨྲས༌སོ།།
LUK 2:39 སྐྱབས་མགོན་ཡེ་ཤུའི་ཡབ་ཡུམ་གཉིས་ཀྱིས་གཙོ་བོའི་བཀའ་ཁྲིམས་ལྟར་ལས་ཐམས་ཅད་བསྒྲུབས་རྗེས་ག་ལིལ་ཡུལ་གྱི་ནཱ་ཙ་རེལ་གྲོང་རྡལ་དུ་ཕྱིར་ལོག༌པ་རེད།
LUK 2:40 ཕྲུ་གུ་ཡེ་ཤུ་ནར་སོན་ཏེ་སྟོབས་ཤུགས་འཛོམས་ཤིང་མཁྱེན་རབ་རྒྱས་པ་དང་། དཀོན་མཆོག་གི་ཐུགས་རྗེ་ཡང་ཁོང་གི་སྟེང་ལ་ཁྱབ་བོ།།
LUK 2:41 པེ་སག་གི་དུས་ཆེན་ལ་སྐྱབས་མགོན་ཡེ་ཤུའི་ཡབ་ཡུམ་གཉིས་ལོ་རེ་བཞིན་ཡེ་རུ་སཱ་ལེམ་དུ་འགྲོ༌ཞིང༌།
LUK 2:42 སྐྱབས་མགོན་ཡེ་ཤུ་དགུང་ལོ་བཅུ་གཉིས་ལ་སོན་ཚེ་དུས་ཆེན་གྱི་ལུགས་སྲོལ་བཞིན་ཁོང་རྣམས་ཀྱང་ཡེ་རུ་སཱ་ལེམ་དུ་ཕེབས་པ་དང་།
LUK 2:43 དུས་ཆེན་མཇུག་རྫོགས་ནས་ཕྱིར་ལོག༌སྐབས། སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་བཞུགས་པ་ནི་ཡབ་ཡུམ་གཉིས་ཀྱིས་མ་ཤེས༌པར།
LUK 2:44 སྐྱབས་མགོན་ཡེ་ཤུ་ལམ་གྲོགས་དག་གི་ཁྲོད་དུ་ཡོད་སྙམ༌སྟེ། ཉིན་གཅིག་གི་ལམ་དུ་སོང་རྗེས་གཉེན་ཉེ་དང་རྒྱུས་ཡོད་རྣམས་ཀྱི་ཁྲོད་ནས་བཙལ༌ནའང༌།
LUK 2:45 མ་རྙེད་པས་ཡང་བསྐྱར་འཚོལ་བཞིན་ཕྱིར་ཡེ་རུ་སཱ་ལེམ་དུ་ལོག་གོ།
LUK 2:46 ཉིན་གསུམ་འགོར་རྗེས་ཁོང་གིས་མཆོད་ཁང་ནང་དུ་སློབ་དཔོན་རྣམས་ཀྱི་དཀྱིལ་ནས་ཆོས་ལ་ཉན་ཞིང་དྲི་བ་འདྲི་བཞིན་བཞུགས་པ་ཡབ་ཡུམ་གཉིས་ཀྱིས་མཐོང༌།
LUK 2:47 ཁོང་གི་གསུང་ཐོས་པའི་མི་ཐམས་ཅད་ནི་ཁོང་གི་རིག་པ་རྣོ་ཞིང་ལན་བཏབ་པར་ངོ་མཚར་བར་གྱུར་ཏོ།།
LUK 2:48 ཁོང་གི་ཡབ་ཡུམ་གཉིས་ཀྱིས་ཀྱང་དོན་དེ་མཐོང་ནས་ཤིན་ཏུ་ངོ་མཚར༌བར་གྱུར། ཁོང་གི་ཡུམ་ན༌རེ། བདག་གི་བུ། ཁྱོད་ཀྱིས་ཅིའི་ཕྱིར་ངེད་གཉིས་ལ་དེ་ལྟར་བྱས༌སམ། ལྟོས༌དང༌། ཁྱོད་ཀྱི་ཕ་དང་ངེད་གཉིས་སེམས་འཚབས་ནས་ཁྱོད་རང་བཙལ་བ་ཡིན་ཞེས་ཞུས་པ༌ལ།
LUK 2:49 ཁོང་གིས་འདི་སྐད༌དུ། ཁྱེད་གཉིས་ཀྱིས་ཅིའི་ཕྱིར་ང་རང་འཚོལ་བ་ཡིན། ང་རང་བདག་གི་ཡབ་ཀྱི་བཞུགས་གནས་སུ་སྡོད་དགོས་པའང་མི་ཤེས་སམ་ཞེས་གསུངས༌ཀྱང༌།
LUK 2:50 ཡབ་ཡུམ་གཉིས་ཀྱིས་གསུང་དེའི་དོན་མ་རྟོགས༌སོ།།
LUK 2:51 དེ་ནས་ཁོང་ཉིད་ཡབ་ཡུམ་གཉིས་དང་མཉམ་དུ་ནཱ་ཙ་རེལ་གྲོང་རྡལ་དུ་མར་ཕེབས་ཏེ་ཁོང་གཉིས་ཀྱི་ཚིག་ལ་གསན་ཞིང་བཞུགས། ཁོང་གི་ཡུམ་གྱིས་ཀྱང་དོན་འདི་ཐམས་ཅད་སེམས་སུ་བཟུང༌ངོ་༎
LUK 2:52 སྐྱབས་མགོན་ཡེ་ཤུའི་མཁྱེན་རབ་དང་སྐུ་གཟུགས། ཡང་དཀོན་མཆོག་གིས་ཁོང་ལ་གཅེས་པའི་ཐུགས་དང་མི་རྣམས་ཁོང་ལ་དགའ་བའི་སེམས་བཅས་ལྷན་དུ་རྒྱས༌སོ།།
LUK 3:1 སེ་བཟིར་རྒྱལ་པོ་ཐེ་པེར་ཡུ་ཡིས་སྲིད་བཟུང་བའི་ལོ་བཅོ་ལྔ༌པར། ཡ་ཧུ་དཱའི་ཡུལ་གྱི་སྤྱི་དཔོན་ཕོན་ཏིའུ་པི་ལ་ཏུ་དང༌། ག་ལིལ་ཡུལ་གྱི་ས་གནས་དཔོན་པོ་ཧེ་རོ་དཱ་དང་དེའི་ནུ་བོ༌སྟེ། ཨེ་ཏུ་རི་ཡཱ་དང་ཏྲ་ཀོ་ནེ་ཏི་ཡུལ་གཉིས་ཀྱི་ས་གནས་དཔོན་པོ་ཕི་ལིབ༌དང༌། ཨ་བི་ལེ་ནེ་ཡུལ་གྱི་ས་གནས་དཔོན་པོ་ལི་སན་ཡཱ་ཡིན༌ལ།
LUK 3:2 ཨ་ནཱ་སི་དང་ཀ་ཡ་ཕཱ་གཉིས་མཆོད་དཔོན་ཆེན་པོ༌ཡིན་པའི་དུས༌སུ། ཟཱ་ཀར་ཡའི་བུ་ཡོ་ཧ་ནན་ལ་དབེན་སྟོང་ནས་དཀོན་མཆོག་གི་བཀའ་བབས༌པས།
LUK 3:3 ཁོང་ཉིད་ཡོར་དན་གཙང་པོ་འགྲམ་རྒྱུད་ཀྱི་ཡུལ་གྲུ་ཀུན་ཏུ་ཕེབས་ཏེ་མི་རྣམས་ལ་འདི་སྐད༌དུ། དཀོན་མཆོག་གིས་སྡིག་པ་བསལ་བའི༌ཕྱིར། འགྱོད་བཤགས་ཀྱི་རྟགས་སུ་ཁྲུས་གསོལ་ལ་ཞུགས་པའི་ཆོས་བསྒྲགས་པ༌བཞིན།
LUK 3:4 ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ། དབེན་སྟོང་ཡུལ་ནས་གྲགས་པའི་འབོད་སྒྲ༌ཡིས།། གཙོ་བོའི་ཕེབས་ལམ་སྟ་གོན༌བྱེད་པ་དང་།། ཁོང་གི་གཤེགས་ལམ་དྲང་པོར་བཟོ་བར༌གྱིས།།
LUK 3:5 ལུང་བ་ཐམས་ཅད་བཀང་བར་མཛད་ངེས༌ཤིང༌།། རི་སྒང་མཐའ་དག་སྙོམས་པར་མཛད་པ༌དང༌།། ཀྱག་ཀྱོག་ལམ་ནི་དྲང་པོར་མཛད་ངེས༌དང༌།། མཐོ་དམན་ལམ་ནི་བདེ་བར་མཛད་པར༌འགྱུར།།
LUK 3:6 དེའི་རྗེས་དཀོན་མཆོག་ཉིད་ཀྱི་ཐར་པ་ཉིད།། མི་རྣམས་ཀུན་གྱིས་དངོས་སུ་མཐོང་བར༌འགྱུར།། ཞེས་བཀོད་པ་བཞིན་བྱུང༌ངོ༌།།
LUK 3:7 ཡོ་ཧ་ནན་གྱིས་ཁྲུས་གསོལ་ལ་ཞུགས་སུ་ཡོང་བའི་མི་ཚོགས་ལ་འདི་སྐད༌དུ། དུག་སྦྲུལ་གྱི་རྒྱུད་ཁྱོད་ཅག་ལ་སུ་ཞིག་གིས་མ་འོངས་པའི་ཐུགས་ཁྲོ་ལས་འབྲོ་བར་བསྟན༌ནམ།
LUK 3:8 དེ་བས་ན་ཁྱོད་ཅག་གིས་འགྱོད་བཤགས་དང་མཐུན་པའི་འབྲས་བུ་ལེགས་པོར་སྐྱེད༌ཅིག ཁྱོད་ཅག་གི་སེམས་སུ་ཨབ་ར་ཧམ་ནི་ངེད་ཅག་གི་ཡབ་མེས་ཡིན་ཞེས་མ་སེམས༌ཤིག ངས་ཁྱོད་ཅག་ལ༌སྨྲ་སྟེ། དཀོན་མཆོག་གིས་རྡོ་འདི་དག་ལས་ཨབ་ར་ཧམ་ལ་བུ་རྒྱུད་འབྱུང་བར་མཛད་ནུས་སོ།།
LUK 3:9 ད་ནི་སྟ་རེ་སྡོང་རྩར་བཞག་ཡོད༌དེ། ཤིང་སྡོང་གང་ལ་འབྲས་བུ་ལེགས་པོ་མི་སྨིན་པ་དེ་བཅད་ནས་མེའི་ནང་དུ་འཕེན་པར་འགྱུར་ཞེས་གསུངས་པ༌དང༌།
LUK 3:10 མི་ཚོགས་ན༌རེ། འོ༌ན། ངེད་ཅག་གིས་ཅི་བྱ་འོས་སམ་ཞེས་ཞུས་པ༌ན།
LUK 3:11 ཡོ་ཧ་ནན་གྱིས་འདི་སྐད༌དུ། ནང་གོས་གཉིས་ཡོད་པའི་མི་དེས་གྱོན་པ་མེད་པ་ལ་བགོས༌དང༌། ཟས་ཡོད་པ་དེས་ཀྱང་དེ་ལྟར་བྱེད་དགོས་ཞེས་ལན་བཏབ་བོ།།
LUK 3:12 ཁྲལ་ལེན་མཁན་རྣམས་ཀྱང་ཁྲུས་གསོལ་ལ་ཞུགས་སུ་ཡོང་སྟེ་ན༌རེ། སློབ་དཔོན༌ལགས། ངེད་ཅག་གིས་ཅི་བྱ་དགོས་སམ་ཞེས་ཞུས་པ༌ན།
LUK 3:13 ཁོང་གིས་དེ་རྣམས་ལ་འདི་སྐད༌དུ། ཁྱོད་ཅག་གིས་ཁྲིམས་ཀྱི་གཏན་ཁེལ་ལྟར་ཁྲལ་ལེན་པ་ལས་ལྷག་མ་ལེན་མི་རུང་ཞེས་བཀའ་གནང་ངོ༌།།
LUK 3:14 དམག་མི་རྣམས་ན༌རེ། ངེད་ཅག་གིས་ཅི་བྱ་དགོས་སམ་ཞེས་ཞུས་པ༌དང༌། ཁོང་གིས་འདི་སྐད༌དུ། མི་སུ་ལས་ཀྱང་བཙན་ཤུགས་དང་སྙད་འདོགས་པའི་ཐབས་བཀོད་ཀྱིས་དངུལ་སྒོར་ལེན་མི༌རུང༌། ཁྱོད་ཅག་རང་གི་གླ་ཆ་ལ་ཡིད་ཚིམ་པར་གྱུར་ཅིག་ཅེས་གསུངས༌སོ།།
LUK 3:15 མི་དེ་རྣམས་ཀྱིས་དོན་ཆེན་པོ་འབྱུང་བར་རེ་སྒུག་བྱེད་བཞིན་ཡོད་ལ། མི་ཀུན་གྱི་སེམས་སུ་ཡོ་ཧ་ནན་ནི་སྐྱབས་མགོན་མཱ་ཤི་ཀ་ཡིན་སྲིད་སྙམ༌ཞིང༌།
LUK 3:16 ཡོ་ཧ་ནན་གྱིས་དེ་རྣམས་ལ་འདི་སྐད༌དུ། ངས་ཁྱོད་ཅག་ལ་ཆུ་ཡིས་ཁྲུས་གསོལ་བྱེད༌མོད། འོན་ཀྱང་བདག་གི་རྗེས་སུ་བདག་ལས་ཀྱང་མཐུ་སྟོབས་ཆེ་བ་ཞིག་ཕེབས་ངེས༌ཏེ། ངས་ཁོང་གི་ལྷམ་མདུད་ཀྱང་དགྲོལ་བར་མི་འོས། ཁོང་གིས་ཁྱོད་རྣམས་ལ་དམ་པའི་ཐུགས་ཉིད་དང་མེས་ཁྲུས་གསོལ་མཛད་པར་འགྱུར།
LUK 3:17 ཁོང་གིས་རང་གི་གཡུལ་ཁ་གཙང་དག་ལེགས་པོར་མཛད་པ༌དང༌། བང་མཛོད་དུ་གྲོ་བསྡུ་ཕྱིར་ཕྱག་ཏུ་ཚེབ་བཟུང་ཡོད། འོན་ཀྱང་ཕུབ་མ་དེ་དག་ཞི་བ་མེད་པའི་མེ་རུ་བསྲེག་པར་ངེས་ཞེས་གསུངས༌སོ།།
LUK 3:18 དེ་ལྟར་ཡོ་ཧ་ནན་གྱིས་སྐུལ་སློང་གཞན་མང་པོའང་གནང་སྟེ་མི་རྣམས་ལ་འཕྲིན་བཟང་བསྒྲགས།
LUK 3:19 འོན་ཀྱང་ས་གནས་དཔོན་པོ་ཧེ་རོ་དཱ་ནི་རང་གི་སྤུན་གྱི་ཆུང་མའི་རྐྱེན༌དང༌། ཡང་ཁོས་དོན་ངན་པ་མང་པོ་བྱས་པའི་དབང་གིས་ཡོ་ཧ་ནན་གྱིས་ཁོ་ལ་བཀའ་བཀྱོན་གནང་བ༌ན།
LUK 3:20 ཧེ་རོ་དཱས་ལས་ངན་པ་ཐམས་ཅད་ཀྱི་སྟེང་དུ་ཡང་ཉེས་པ་ཞིག་བཟོས་པ་ནི་ཡོ་ཧ་ནན་བཙོན་དུ་བཅུག་པ༌དེའོ།།
LUK 3:21 དེ་སྔར་མི་ཐམས་ཅད་ལ་ཁྲུས་གསོལ་ཐོབ་པའི་སྐབས༌སུ། སྐྱབས་མགོན་ཡེ་ཤུ་ལའང་ཁྲུས་གསོལ་ཐོབ་པ༌དང༌། ཁོང་གིས་གསོལ་བ་འདེབས་པའི་དུས་སུ་ནམ་མཁའི་སྒོ་ཕྱེས་ཤིང༌།
LUK 3:22 དམ་པའི་ཐུགས་ཉིད་ནི་བྱ་ཕུག་རོན་གྱི་གཟུགས་ཀྱིས་ཁོང་གི་ལུས་སྟེང་ལ་དངོས་སུ་བབས་པ་དང་། ཡང་ནམ་མཁའི་ཞིང་ཁམས་ནས་སྐད་སྒྲ་ཞིག་གྲགས༌ཏེ། ཁྱོད་ནི་ང་ཡི་གཅེས་པའི་བུ་ཡིན་ཞིང་ང་རང་ཁྱོད་ལ་ཤིན་ཏུ་དགའ་ཞེས་གསུངས༌སོ།།
LUK 3:23 སྐྱབས་མགོན་ཡེ་ཤུས་ཐོག་མར་བཀའ་སྒྲོག་པའི་དུས་སུ་ཁོང་ནི་དགུང་ལོ་སུམ་ཅུ་ཙམ་ཡིན༌ལ། མི་རྣམས་ཀྱིས་ཁོང་ནི་ཡོ་སེབ་ཀྱི་བུ་ཡིན་པར་བསམས་ཤིང་ཡོ་སེབ་ནི་ཨེ་ལིའི་བུ་ཡིན།
LUK 3:24 ཨེ་ལི་ནི་མད་ཐད་ཀྱི་བུ་ཡིན། མད་ཐད་ནི་ལེ་ཝིའི༌བུ་ཡིན། ལེ་ཝི་ནི་མེལ་ཁེའི༌བུ་ཡིན། མེལ་ཁེ་ནི་ཡན་ནཱའི༌བུ་ཡིན། ཡན་ནཱ་ནི་ཡོ་སེབ་ཀྱི་བུ་ཡིན།
LUK 3:25 ཡོ་སེབ་ནི་མད་ཐི་ཐིས་ཀྱི་བུ་ཡིན། མད་ཐི་ཐིས་ནི་ཨ་མོ་ཡི༌བུ་ཡིན། ཨ་མོ་ནི་ནཱ་ཧུམ་གྱི་བུ་ཡིན། ནཱ་ཧུམ་ནི་ཧེ་ཟི་ལེའི༌བུ་ཡིན། ཧེ་ཟི་ལེ་ནི་ནཱ་གེའི༌བུ་ཡིན།
LUK 3:26 ནཱ་གེ་ནི་མཱ་ཧ་ཐུའི༌བུ་ཡིན། མཱ་ཧ་ཐུ་ནི་མད་ཐི་ཐིས་ཀྱི་བུ་ཡིན། མད་ཐི་ཐིས་ནི་སེ་མེའི༌བུ་ཡིན། སེ་མེ་ནི་ཡོ་སེག་གི་བུ་ཡིན། ཡོ་སེག་ནི་ཡོ་དཱའི༌བུ་ཡིན།
LUK 3:27 ཡོ་དཱ་ནི་ཡོ་ཧན་ནཱའི༌བུ་ཡིན། ཡོ་ཧན་ནཱ་ནི་རེ་སཱའི༌བུ་ཡིན། རེ་སཱ་ནི་ཟེ་རུ་པཱ་པེལ་གྱི་བུ་ཡིན། ཟེ་རུ་པཱ་པེལ་ནི་ཞིད་ཨལ་ཐེ་ཨེལ་གྱི་བུ་ཡིན། ཞིད་ཨལ་ཐེ་ཨེལ་ནི་ནེ་རིའི༌བུ་ཡིན།
LUK 3:28 ནེ་རི་ནི་མེལ་ཁེའི༌བུ་ཡིན། མེལ་ཁེ་ནི་ཨད་དིའི༌བུ་ཡིན། ཨད་དི་ནི་ཀོ་སམ་གྱི་བུ་ཡིན། ཀོ་སམ་ནི་ཨེལ་མ་དཱམ་གྱི་བུ་ཡིན། ཨེལ་མ་དཱམ་ནི་ཨེར་གྱི་བུ་ཡིན།
LUK 3:29 ཨེར་ནི་ཡོ་ཤུ་ཨའི༌བུ་ཡིན། ཡོ་ཤུ་ཨ་ནི་ཨེ་ལི་ཨེ་བཟིར་གྱི་བུ་ཡིན། ཨེ་ལི་ཨེ་བཟིར་ནི་ཡོ་རེམ་གྱི་བུ་ཡིན། ཡོ་རེམ་ནི་མད་ཐད་ཀྱི་བུ་ཡིན། མད་ཐད་ནི་ལེ་ཝིའི༌བུ་ཡིན།
LUK 3:30 ལེ་ཝི་ནི་སི་མུ་ཨོན་གྱི་བུ་ཡིན། སི་མུ་ཨོན་ནི་ཡུ་དཱའི༌བུ་ཡིན། ཡུ་དཱ་ནི་ཡོ་སེབ་ཀྱི་བུ་ཡིན། ཡོ་སེབ་ནི་ཡོ་ནམ་གྱི་བུ་ཡིན། ཡོ་ནམ་ནི་ཨེལ་ཡ་ཀིམ་གྱི་བུ་ཡིན།
LUK 3:31 ཨེལ་ཡ་ཀིམ་ནི་མེའ་ལི་ཨཱའི༌བུ་ཡིན། མེའ་ལི་ཨཱ་ནི་མེན་ནཱའི༌བུ་ཡིན། མེན་ནཱ་ནི་མད་ཐ་ཐིའི༌བུ་ཡིན། མད་ཐ་ཐི་ནི་ནཱ་ཐན་གྱི་བུ་ཡིན། ནཱ་ཐན་ནི་དཱ་བིད་ཀྱི་བུ་ཡིན།
LUK 3:32 དཱ་བིད་ནི་ཡེ་སེའི༌བུ་ཡིན། ཡེ་སེ་ནི་ཨོ་བེད་ཀྱི་བུ་ཡིན། ཨོ་བེད་ནི་པཱོ་ཨ་ཟིའི༌བུ་ཡིན། པཱོ་ཨ་ཟི་ནི་སཱལ་མོན་གྱི་བུ་ཡིན། སཱལ་མོན་ནི་ནཱ་སོན་གྱི་བུ་ཡིན།
LUK 3:33 ནཱ་སོན་ནི་ཨ་མི་ནཱ་དབ་ཀྱི་བུ་ཡིན། ཨ་མི་ནཱ་དབ་ནི་ཨད་མན་གྱི་བུ་ཡིན། ཨད་མན་ནི་རཱམ་གྱི་བུ་ཡིན། རཱམ་ནི་ཧེས་རོན་གྱི་བུ་ཡིན། ཧེས་རོན་ནི་ཕེ་རེལ་ཟིའི༌བུ་ཡིན། ཕེ་རེལ་ཟི་ནི་ཡ་ཧུ་དཱའི༌བུ་ཡིན།
LUK 3:34 ཡ་ཧུ་དཱ་ནི་ཡ་ཀོབ་ཀྱི་བུ་ཡིན། ཡ་ཀོབ་ནི་ཨི་སཱག་གི་བུ་ཡིན། ཨི་སཱག་ནི་ཨབ་ར་ཧམ་གྱི་བུ་ཡིན། ཨབ་ར་ཧམ་ནི་ཐ་རཱའི༌བུ་ཡིན། ཐ་རཱ་ནི་ནཱ་ཧོར་གྱི་བུ་ཡིན།
LUK 3:35 ནཱ་ཧོར་ནི་སེ་རུག་གི་བུ་ཡིན། སེ་རུག་ནི་རེའེ་ཨུའི༌བུ་ཡིན། རེའེ་ཨུ་ནི་ཕེ་ལེག་གི་བུ་ཡིན། ཕེ་ལེག་ནི་ཨེ་བེར་གྱི་བུ་ཡིན། ཨེ་བེར་ནི་ཤེ་ལཱའི༌བུ་ཡིན།
LUK 3:36 ཤེ་ལཱ་ནི་ཀེ་ནན་གྱི་བུ་ཡིན། ཀེ་ནན་ནི་ཨར་པག་ཤད་ཀྱི་བུ་ཡིན། ཨར་པག་ཤད་ནི་ཤེམ་གྱི་བུ་ཡིན། ཤེམ་ནི་ནོ་ཨའི༌བུ་ཡིན། ནོ་ཨ་ནི་ལཱ་མེག་གི་བུ་ཡིན།
LUK 3:37 ལཱ་མེག་ནི་མཱ་ཐུ་ཤ་ལཱའི༌བུ་ཡིན། མཱ་ཐུ་ཤ་ལཱ་ནི་ཧ་ནོག་གི་བུ་ཡིན། ཧ་ནོག་ནི་ཡཱ་རཱད་ཀྱི་བུ་ཡིན། ཡཱ་རཱད་ནི་མཱ་ཧ་ལ་ཨེལ་གྱི་བུ་ཡིན། མཱ་ཧ་ལ་ཨེལ་ནི་ཀེ་ནན་གྱི་བུ་ཡིན།
LUK 3:38 ཀེ་ནན་ནི་ཨེ་ནོ་ཤཱའི༌བུ་ཡིན། ཨེ་ནོ་ཤཱ་ནི་སེད་ཐུའི་བུ་ཡིན། སེད་ཐུ་ནི་ཨ་དམ་གྱི་བུ་ཡིན། ཨ་དམ་ནི་དཀོན་མཆོག་གི་སྲས་ཡིན་ ནོ།།
LUK 4:1 སྐྱབས་མགོན་ཡེ་ཤུར་དམ་པའི་ཐུགས་ཉིད་ཀྱིས་ཁྱབ་ཅིང་ཡོར་དན་གཙང་པོ་ནས་ཕྱིར་ཕེབས་པ༌ན། དམ་པའི་ཐུགས་ཉིད་ཀྱིས་ཁོང་ཉིད་དབེན་སྟོང་ཞིག་ཏུ་ཁྲིད་པ༌དང༌།
LUK 4:2 ཉིན་བཞི་བཅུའི་རིང་ལ་བདུད་ཀྱིས་ཁོང་ལ་ཉམས་ཚོད་བླངས་སོ།། ཉིན་དེ་དག་གི་རིང་ལ་ཁོང་གིས་ཞལ་ཟས་ཅི་ཡང་མ་བཞེས༌པས། ཉིན་དེ་དག་མཇུག་རྫོགས་སྐབས་ཁོང་ནི་བཀྲེས་ཤིང་ལྟོགས་པར་གྱུར་ཏོ།།
LUK 4:3 བདུད་ན༌རེ། ཁྱེད་ནི་དཀོན་མཆོག་གི་སྲས་ཡིན༌ན། རྡོ་འདིར་བཀའ་གནང་ནས་བག་ལེབ་ཏུ་བསྒྱུར་ཅིག་ཅེས་སྨྲས་པ༌ལ།
LUK 4:4 སྐྱབས་མགོན་ཡེ་ཤུས་འདི་སྐད༌དུ། གསུང་རབ་ཀྱི་མདོ༌ལས། མི་ནི་བག་ལེབ་ཁོ་ནར་བརྟེན་ནས་འཚོ་བ་མ་ཡིན་ནོ་ཞེས་བཀོད་ཡོད་ཅེས་གསུངས་སོ།།
LUK 4:5 ཡང་བདུད་ཀྱིས་ཁོང་ཉིད་རི་མཐོན་པོ་ཞིག་ཏུ་ཁྲིད་ནས་སྐད་ཅིག་ཙམ་ལ་འཇིག་རྟེན་གྱི་རྒྱལ་ཁམས་ཐམས་ཅད་བསྟན་ཏེ་ན༌རེ།
LUK 4:6 ངས་དབང་ཐང་དང་གཟི་བརྗིད་འདི་མཐའ་དག་ཁྱེད་ལ་འབུལ་བར༌བྱ། རྒྱུ་མཚན་ནི་འདི་ཐམས་ཅད་སྔར་ནས་བདག་ལ་སྤྲད་ཡོད༌པས། བདག་གིས་སུ་ཞིག་ལ་སྟེར་འདོད་ན་དེ་ལ་སྟེར་ངེས༌ཡིན།
LUK 4:7 གལ་ཏེ་ཁྱེད་ཀྱིས་བདག་ལ་ཕྱག་བཙལ་ན་འདི་ཐམས་ཅད་ཁྱེད་ལ་དབང་བ་ཡིན་ཞེས་སྨྲས་པ༌ན།
LUK 4:8 ཡང་སྐྱབས་མགོན་ཡེ་ཤུས་འདི་སྐད༌དུ། གསུང་རབ་ཀྱི་མདོ༌ལས། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་ཕྱག་འཚལ་ཞིང་ཁོང་གཅིག་པུར་བསྙེན་བཀུར་བྱེད་དགོས་ཞེས་བཀོད་འདུག་ཅེས་གསུངས༌སོ།།
LUK 4:9 ཡང་བདུད་ཀྱིས་སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཁྲིད༌ནས། མཆོད་ཁང་གི་རྩེ་རུ་སྡོད་དུ་བཅུག༌སྟེ་ན་རེ། གལ་ཏེ་ཁྱེད་ནི་དཀོན་མཆོག་གི་སྲས་ཡིན་ན་འདི་ནས་མར་མཆོངས༌ཤིག
LUK 4:10 རྒྱུ་མཚན་ནི་གསུང་རབ་ཀྱི་མདོ་ལས་དཀོན་མཆོག་གིས་རང་གི་ཕོ་ཉ་རྣམས་ལ་བཀའ་གནང་སྟེ་ཁྱེད་རང་བསྲུང་བར་ངེས་ཞེས་པ༌དང༌།
LUK 4:11 ཁྱེད་ཀྱི་ཞབས་རྡོ་ལའང་མི་ཐོགས་པའི༌ཕྱིར། ཕོ་ཉ་དེ་རྣམས་ཀྱི་ལག་པས་ཁྱེད་རང་ཡར་འདེགས་པར་འགྱུར་ཞེས་ཀྱང་བཀོད་འདུག་ཅེས་སྨྲས་པ༌ལ།
LUK 4:12 ཡང་སྐྱབས་མགོན་ཡེ་ཤུས་འདི་སྐད༌གསུངས་པ་སྟེ། གསུང་རབ་ཀྱི་མདོ་ལས། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་ཚོད་བགམ་མ་བྱེད་ཅེས་གསུངས་འདུག་ཅེས་པའོ།།
LUK 4:13 བདུད་ཀྱིས་ཐབས་སྣ་ཚོགས་ཀྱི་སྒོ་ནས་ཁོང་ལ་ཉམས་ཚོད་བླངས་ཚར༌རྗེས། རེ་ཞིག་ཁོང་དང་ཁ་བྲལ་ཏོ།།
LUK 4:14 སྐྱབས་མགོན་ཡེ་ཤུ་ནི་དམ་པའི་ཐུགས་ཉིད་ཀྱི་ནུས་མཐུའི་ངང་ནས་ཕྱིར་ག་ལིལ་ཡུལ་དུ་ཕེབས་པ༌དང༌། ཁོང་གི་མཚན་སྙན་གྲགས་ཀྱང་ག་ལིལ་ཡུལ་གྱི་མཐའ་འཁོར་ཀུན་ལ་ཁྱབ།
LUK 4:15 ཁོང་གིས་ཆོས་ཁང་སོ་སོ་ནས་ཆོས་གསུངས་པ་དང་མི་ཀུན་གྱིས་ཁོང་ལ་བསྟོད་བསྔགས་བརྗོད༌དོ།།
LUK 4:16 སྐྱབས་མགོན་ཡེ་ཤུ་ཕྱིར་རང་ཉིད་ནར་སོན་པའི་གནས་ཏེ་ནཱ་ཙ་རེལ་གྲོང་རྡལ་དུ་ཕེབས་ཤིང་ངལ་གསོ་བའི་ཉིན་མོ་ལའང་རང་གི་ནམ་རྒྱུན་གྱི་སྲོལ་ལྟར་ཆོས་ཁང་དུ་ཕེབས༌པ་དང་། ཁོང་གིས་གསུང་རབ་ཀློག་ཕྱིར་ཡར་བཞེངས་པ༌ན།
LUK 4:17 མི་ཞིག་གིས་ལུང་སྟོན་པ་ཡེ་ཤ་ཡཱའི་མདོ་དེ་ཁོང་ལ་ཕུལ༌ཞིང༌། ཁོང་གིས་མདོ་དེའི་ཁ་ཕྱེས་པ༌ན། དེ་ལས་བཀོད་ཡོད་པའི་ཚན་པ་ཞིག་རྙེད་པ་ནི་འདི་ལྟ༌སྟེ།
LUK 4:18 གཙོ་བོའི་ཐུགས་ཉིད་ང་ཡི་སྟེང་དུ༌བཞུགས།། དབུལ་ཕོངས་རྣམས་ལ་འཕྲིན་བཟང་སྒྲོག་པའི༌ཕྱིར།། ཁོང་གིས་བདག་ལ་བྱུགས་ཤིང༌བསྐོས་པ་འོ།། བཙོན་པ་རྣམས་ལ་ཐར་པའི་འཕྲིན་བཟང༌དང༌།། ལོང་བ་གསོ་བའི་འཕྲིན་བཟང་སྒྲོག་ཕྱིར༌དང༌།། མནར་བ་རྣམས་ནི་སྒྲོལ་དུ་འཇུག་པ༌དང༌།།
LUK 4:19 ཁོང་གི་ཐུགས་རྗེའི་གནམ་ལོ་སྒྲོག་ཕྱིར༌དུ།། གཙོ་བོ་ཁོང་གིས་བདག་ནི་མངགས་པ༌ཡིན།། ཞེས་པ་དེ་བཀླགས༌སོ།།
LUK 4:20 ཁོང་གིས་དཔེ་ཆ་བསྒྲིལ་ནས་ཕྱིར་ཆོས་ཁང་གི་གཉེར་པ་ལ་བསྩལ་ཏེ་བཞུགས༌ཤིང༌། ཆོས་ཁང་དུ་ཡོད་པའི་མི་ཐམས་ཅད་ཀྱིས་ཁོང་ལ་མིག་ཅེ་རེར་བལྟས་པ༌དང༌།
LUK 4:21 ཁོང་གིས་དེ་རྣམས་ལ་འདི་སྐད༌དུ། གསུང་རབ་ཀྱི་མདོ་འདི་ནི་དེ་རིང་ཁྱོད་ཅག་གིས་ཐོས་པའི་དུས་སུ་གྲུབ་པ་ཡིན་ཞེས་གསུངས་སོ།།
LUK 4:22 མི་ཐམས་ཅད་ཀྱིས་ཁོང་ལ་བསྟོད་བསྔགས་བརྗོད་ཅིང་ཁོང་གི་ཞལ་ལས་གསུངས་པའི་ཚིག་སྙན་མོ་ཐོས་ནས་ངོ་མཚར་བར་གྱུར། ཁོ་རྣམས་ན༌རེ། འདི་ནི་ཡོ་སེབ་ཀྱི་བུ་མ་ཡིན་ནམ་ཞེས་སྨྲས་སོ།།
LUK 4:23 ཡང་ཁོང་གིས་དེ་རྣམས་ལ་འདི་སྐད༌དུ། ཁྱོད་ཅག་ན༌རེ། སྨན་པ༌ལགས། ཁྱོད་ཀྱིས་རང་ཉིད་གསོ་བར་བྱོས་ཞེས་པའི་ཁ་དཔེ་འདི་ང་ལ་སྦྱར་ངེས༌ཤིང༌། ཁྱོད་ཀྱིས་ཀཱ་ཕར་ན་ཧུམ་ནས་བྱས་པའི་བྱ་བ་ངེད་ཅག་གིས་ཐོས་པ་དེ་རྣམས་རང་གི་ཕ་ཡུལ་འདི་ནས་ཀྱང་བྱོས་ཤིག་ཅེས་བདག་ལ་སྨྲ་བར་འགྱུར་ཞེས་གསུངས་པ༌དང༌།
LUK 4:24 ཡང་ཁོང་གིས་འདི་སྐད༌དུ། ངས་ཁྱོད་ཅག་ལ་བདེན་པར་སྨྲ༌སྟེ། ལུང་སྟོན་པ་སུ་ཞིག་ལའང་རང་ཡུལ་ནས་བརྩི་བཀུར་མི་འཐོབ།
LUK 4:25 བདག་གིས་ཁྱོད་རྣམས་ལ་བདེན་པར་སྨྲ་སྟེ། ཡང་ཨེ་ལི་ཡཱའི་དུས་སུ། ལོ་གསུམ་དང་ཟླ་བ་དྲུག་གི་རིང་ལ་ཐན་པ་བྱུང་བས། ས་ཆ་ཡོངས་ལ་མུ་གེ་ཆེན་པོ་བྱུང་བ་དང་ཡེས་ར་ཨེལ་ཡུལ་དུ་ཡུགས་མོ་མང་པོ་ཡོད༌ནའང༌།
LUK 4:26 ཨེ་ལི་ཡཱ་ནི་ཡུགས་མོ་དེ་རྣམས་ཀྱི་གམ་དུ་མ་མངགས༌པར། ཚི་ཏུན་ཡུལ་གྱི་ཁོང་གཏོགས་སཱ་རེ་ཕད་ཀྱི་ཡུགས་མོ་དེ་ཁོ་ནའི་གམ་དུ་མངགས།
LUK 4:27 ཡང་ལུང་སྟོན་པ་ཨེ་ལི་ཤཱའི་དུས་སུ། ཡེས་ར་ཨེལ་གྱི་ས་ཆར་མཛེ་ནད་ཅན་མང་པོ་ཡོད༌ནའང༌། ཁོང་གིས་དེ་རྣམས་ལས་གཅིག་ཀྱང་གཙང་མར་མ་མཛད༌པར། སིར་ཡཱ་ཡུལ་གྱི་ནཱ་ཨ༌མན་ཁོ་ན་གཙང་མར་མཛད་ཅེས་གསུངས་པ་དང་།
LUK 4:28 ཆོས་ཁང་དུ་ཡོད་པའི་མི་ཐམས་ཅད་ཀྱིས་གཏམ་དེ་ཐོས་རྗེས་ཤིན་ཏུ་ཁྲོས༌ཏེ།
LUK 4:29 སྐྱབས་མགོན་ཡེ་ཤུ་གྲོང་རྡལ་ནས་ཕྱིར་བསྐྲད་པ༌དང༌། གྲོང་རྡལ་དེ་ནི་རི་སྟེང་དུ་ཆགས་ཡོད་ལ་མི་དེ་དག་གིས་ཁོང་ཉིད་གཡང་གཟར་དུ་འཕེན་ཕྱིར་བྲག་ཁ་རུ་ཁྲིད༌ནའང༌།
LUK 4:30 སྐྱབས་མགོན་ཡེ་ཤུ་ནི་མི་དེ་རྣམས་ཀྱི་དཀྱིལ་ནས་ཐད་ཀར་ཕེབས༌སོ།།
LUK 4:31 སྐྱབས་མགོན་ཡེ་ཤུ་མར་ག་ལིལ་ཡུལ་གྱི་གྲོང་ཁྱེར་ཀཱ་ཕར་ན་ཧུམ་དུ་ཕེབས་པ༌དང༌། ངལ་གསོ་བའི་ཉིན་མོར་མི་རྣམས་ལ་ཆོས་གསུངས༌ཤིང༌།
LUK 4:32 ཁོང་གིས་གསུངས་པའི་ཆོས་ལ་དབང་དང་ལྡན་པས་ཐོས་མཁན་རྣམས་ངོ་མཚར་བར་གྱུར་ཏོ།།
LUK 4:33 དུས༌དེར། ཆོས་ཁང་དེ་རུ་གདོན་འདྲེས་བཟུང་བའི་མི་ཞིག་ཡོད་པ་དེས་སྐད་ཆེན༌པོས།
LUK 4:34 ཀྱེ། ནཱ་ཙ་རེལ་པ་ཡེ༌ཤུ། ཁྱེད་དང་ངེད་ཅག་ལ་འབྲེལ་བ་ཅི་མཆིས༌སམ། ཁྱེད་རང་ངེད་རྣམས་འཇོམས་པར་ཕེབས༌སམ། ངས་ཁྱེད་རང་སུ་ཡིན་པ་ཤེས༌ཏེ། ཁྱེད་ནི་དཀོན་མཆོག་གི་སྐྱེས་བུ་དམ་པ་དེ་ཉིད་ཡིན་ཞེས་སྨྲས་པ༌ལ།
LUK 4:35 སྐྱབས་མགོན་ཡེ་ཤུས་གདོན་འདྲེ་དེ་ལ་འདི་སྐད༌དུ། ཁ་རོག་ཏུ་སྡོད༌ཅིག ཁྱོད་ནི་ཁོའི་ལུས་ནས་ཕྱིར་བུད་ཅིག་ཅེས་བཀའ་བཀྱོན་གནང་བ༌ན། གདོན་འདྲེ་དེས་མི་རྣམས་ཀྱི་མདུན་དུ་མི་དེ་ས་རུ་བསྒྱེལ་ནས་ཕྱི་རུ་ཐོན་ཞིང་མི་དེར་གནོད་འཚེ་ཅི་ཡང་མ་བྱས་སོ།།
LUK 4:36 མི་ཐམས་ཅད་ཧ་ལས་ཏེ་ཕན་ཚུན་ལ་བཀའ་འདི་ནི་ཅི་ཡིན༌ནམ། ཁོང་གིས་དབང་དང་མཐུ་ལ་བརྟེན་ནས་གདོན་འདྲེ་རྣམས་ལ་བཀའ་གནང་ཞིང་གདོན་འདྲེ་ཡང་ཕྱིར་བུད་དོ་ཞེས་སྨྲས་སོ།།
LUK 4:37 དེ་ནས་ཁོང་གི་མཚན་སྙན་གྲགས་མཐའ་འཁོར་གྱི་ཡུལ་གྲུ་ཀུན་ཏུ་ཁྱབ༌བོ།།
LUK 4:38 སྐྱབས་མགོན་ཡེ་ཤུ་ཡར་བཞེངས་ཤིང་ཆོས་ཁང་ནས་ཕྱིར་བུད་དེ་སི་མོན་གྱི་ཁྱིམ་དུ་ཕེབས་པ༌དང༌། སི་མོན་གྱི་སྒྱུག་མོར་ཚ་ནད་དྲག་པོ་བྱུང་ཡོད་པས་ཁྱིམ་མི་རྣམས་ཀྱིས་དོན་དེ་ཁོང་ལ་ཞུས་སོ།།
LUK 4:39 ཁོང་ཉིད་ཁོ་མོའི་གམ་དུ་ཡར་བཞེངས་ནས་ཚ་ནད་ལ་བཀའ་བཀྱོན་མཛད་པ༌ན། ཁོ་མོའི་ཚ་བཞག་ཅིང་དེ་མ་ཐག་ཡར་ལངས་ནས་ཁོང་རྣམས་ལ་ཞབས་ཕྱི་བསྒྲུབས།
LUK 4:40 ཉི་མ་ནུབ་དུས་མི་རྣམས་ཀྱིས་ནད་རིགས་སྣ་ཚོགས་ཅན་གྱི་ནད་པ་ཐམས་ཅད་ཁོང་གི་དྲུང་དུ་ཁྲིད་ཡོང་བ༌དང༌། ཁོང་གིས་དེ་དག་རེ་རེའི་ལུས་ལ་ཕྱག་བཞག་སྟེ་ནད་ལས་གསོས་པའོ།།
LUK 4:41 གདོན་འདྲེ་རྣམས་ཀྱང་མི་མང་པོའི་ལུས་ནས་ཕྱི་རུ་ཐོན་ཏེ་སྐད་ཆེན་པོས་ཁྱེད་ནི་དཀོན་མཆོག་གི་སྲས་ཡིན་ཞེས་འུར་བརྒྱབ་པ༌དང༌། གདོན་འདྲེ་དེ་དག་གིས་ཁོང་ནི་སྐྱབས་མགོན་མཱ་ཤི་ཀ་ཡིན་པ་ཤེས༌པས། སྐྱབས་མགོན་ཡེ་ཤུས་དེ་དག་ལ་བཀའ་བཀྱོན་མཛད་ཅིང་སྐད་ཆ་སྨྲ་རུ་མ་བཅུག་གོ།
LUK 4:42 ནམ་ལངས་པའི་དུས༌སུ། སྐྱབས་མགོན་ཡེ་ཤུ་ཡར་བཞེངས་ཏེ་དབེན་གནས་ཤིག་ཏུ་ཕེབས༌ཤིང༌། མི་ཚོགས་ཀྱིས་ཁོང་ཉིད་བཙལ་ནས་ཁོང་གི་དྲུང་དུ་ཡོང༌སྟེ། ཁོ་རྣམས་དང་ཁ་མི་འབྲལ་བའི་ཕྱིར་ཁོང་ཉིད་འགོག་འདོད༌ཀྱང༌།
LUK 4:43 ཁོང་གིས་དེ་རྣམས་ལ་ང་རང་ནི་དཀོན་མཆོག་གི་རྒྱལ་སྲིད་ཀྱི་ཆོས་སྒྲོག་ཏུ་མངགས་པ་ཡིན༌པས། གྲོང་རྡལ་གཞན་དག་ལའང་བསྒྲག་དགོས་ཞེས་གསུངས་པ༌དང༌།
LUK 4:44 ཁོང་གིས་ཡ་ཧུ་དཱ་པའི་ཡུལ་གྱི་ཆོས་ཁང་མང་པོ་ནས་ཀྱང་ཆོས་བསྒྲགས༌སོ།།
LUK 5:1 སྐྱབས་མགོན་ཡེ་ཤུ་མཚོ་གེན་ནེ་སཱ་རེལ་གྱི་འགྲམ་དུ་བཞུགས་པའི་སྐབས༌སུ། མི་ཚོགས་ཀྱིས་དཀོན་མཆོག་གི་བཀའ་ལ་མཉན་ཕྱིར་འཚང་ཁ་བརྒྱབ་སྟེ་ཁོང་གི་མཐའ་ནས་བསྐོར།
LUK 5:2 ཁོང་གིས་མཚོ་འགྲམ་དུ་མཚོ་གྲུ་གཉིས་ཡོད་པ་གཟིགས་ཤིང་ཉ་པ་རྣམས་མཚོ་གྲུ་དང་ཁ་བྲལ་ནས་དྲ་རྒྱ་འཁྲུད་བཞིན་ཡོད་དོ།།
LUK 5:3 མཚོ་གྲུ་རྣམས་ལས་གཅིག་ནི་སི་མོན་གྱི་ཡིན་པ་དང་། ཁོང་ཉིད་དེའི་ནང་དུ་ཕེབས༌ཤིང༌། དེ་ལ་མཚོ་འགྲམ་ནས་ཅུང་ཙམ་ཕར་སྐྱོད་ཅིག་ཅེས་གསུངས་པ༌དང༌། ཁོང་ཉིད་གྲུ་དེར་བཞུགས་ཏེ་མི་ཚོགས་ལ་ཆོས་གསུངས་སོ།།
LUK 5:4 ཁོང་གིས་ཆོས་གསུངས་ཚར་རྗེས་སི་མོན་ལ་འདི་སྐད༌དུ། མཚོ་གཏིང་ཟབ་པའི་གནས་སུ་གྲུ་སྐྱོད༌ཅིག དྲ་རྒྱ་འཕངས་ནས་ཉ་ཟུངས་ཤིག་ཅེས་གསུངས་པ༌དང༌།
LUK 5:5 སི་མོན་ན༌རེ། སྟོན་པ༌ལགས། ངེད་ཅག་གིས་ཞག་གང་བོར་དཀའ་སྡུག་མྱངས་ནའང་ཅི་ཡང་མ༌ཟིན། འོན་ཀྱང་ཁྱེད་ཀྱིས་གསུངས་པ་བཞིན་དྲ་རྒྱ་མར་གཏོང་བར་བྱ་ཞེས་སྨྲས༌ཤིང༌།
LUK 5:6 ཁོ་རྣམས་ཀྱིས་དེ་ལྟར་དྲ་རྒྱ་བཏང་བ་དང་ཉ་ཤིན་ཏུ་མང་པོ་ཟིན་ཏེ་དྲ་རྒྱའང་ཆད་ལ་ཉེ་བ་ཙམ་བྱུང༌བས།
LUK 5:7 མཚོ་གྲུ་གཞན་དུ་ཡོད་པའི་གྲོགས་རྣམས་ལ་རོགས་བྱེད་དུ་ཡོང་བར་ལག་བརྡ་བྱས་པ༌དང༌། དེ་རྣམས་ཀྱང་ཚུར་ཡོང་ཞིང་མཚོ་གྲུ་གཉིས་པོར་ཉས་བཀང་སྟེ་མཚོ་གྲུ་ཡང་ཆུ་རུ་ནུབ་ལ་ཉེ་བ་ཙམ་བྱུང༌།
LUK 5:8 སི་མོན་པེ་ཏྲོས་དོན་དེ་མཐོང་ནས་སྐྱབས་མགོན་ཡེ་ཤུའི་ཞབས་དྲུང་དུ་ཕྱག་བཙལ་ཏེ་འདི་སྐད༌དུ། གཙོ་བོ༌ལགས། བདག་ནི་མི་སྡིག་ཅན་ཞིག་ཡིན༌པས། ཁྱེད་རང་ང་དང་བྲལ་ནས་ཕེབས་རོགས་ཞེས་ཞུས་སོ།།
LUK 5:9 ཁོ་དང་མཉམ་དུ་ཡོད་པ་ཐམས་ཅད་ཀྱིས་ཐེངས་འདིར་ཉ་དེ་འདྲ་མང་པོ་ཟིན་པ་མཐོང་བས་དོན་དེར་ཤིན་ཏུ་ཧ་ལས༌ཤིང༌།
LUK 5:10 སི་མོན་གྱི་ལས་གྲོགས་ཟེ་བད་ཡཱའི་བུ་ཡ་ཀོབ་དང་ཡོ་ཧ་ནན་གཉིས་ཀྱང་དེར་ཧ་ལས༌པ་རེད། སྐྱབས་མགོན་ཡེ་ཤུས་སི་མོན་ལ་འདི་སྐད༌དུ། མ་འཇིགས༌ཤིག ཕྱིན་ཆད་ཁྱོད་ལ་མི་ཡང་འཐོབ་པར་འགྱུར་ཞེས་གསུངས༌ཤིང༌།
LUK 5:11 དེ་རྣམས་ཀྱིས་ཀྱང་མཚོ་གྲུ་གཉིས་པོ་མཚོ་འགྲམ་དུ་བསྐྱུར་བ་དང་ཐམས་ཅད་སྤངས་ནས་ཁོང་གི་རྗེས་སུ་འབྲངས༌སོ།།
LUK 5:12 སྐྱབས་མགོན་ཡེ་ཤུ་ཡུལ་དེའི་གྲོང་རྡལ་ཞིག་ཏུ་བཞུགས་པའི་དུས༌སུ། ལྟོས་དང་། ལུས་ཡོངས་ལ་མཛེ་ནད་ཀྱིས་ཟིན་པའི་མི་ཞིག་གིས་ཁོང་ཉིད་མཐོང་བ་དང་ཕྱག་བཙལ་ཏེ་ན༌རེ། གཙོ་བོ༌ལགས། གལ་ཏེ་ཁྱེད་ཐུགས་མཉེས་པ་ཡིན༌ན། ཁྱེད་ཀྱིས་ང་རང་གཙང་མར་མཛད་ནུས་པ་ཡིན་ཞེས་ཞུ་བ་བྱས་པ༌ལ།
LUK 5:13 ཁོང་གིས་ཕྱག་བརྐྱངས་ནས་མི་དེར་རེག་པ༌དང༌། ང་རང་འཐད་པ་ཡིན། ཁྱོད་རང་གཙང་མར་གྱུར་ཅིག་ཅེས་གསུངས་མ་ཐག་མི་དེའི་མཛེ་ནད་སོས་སོ།།
LUK 5:14 ཁོང་གིས་མི་དེ་ལ་འདི་སྐད་དུ། དོན་འདི་གཞན་སུ་ལའང་མི་སྨྲ་བར་གྱིས། ཁྱོད་རང་ཕྱིར་སོང་ནས་རང་གི་ལུས་པོ་མཆོད་དཔོན་ལ་སྟོན༌ཅིག མི་རྣམས་ལ་བདེན་དཔང་བྱེད་པའི་ཆེད་དུ་མོ་ཤེ་ཡིས་བཀའ་གནང་ཡོད་པ༌བཞིན། གཙང་མར་གྱུར་པའི་མཆོད་པ་ཕུལ་ཅིག་ཅེས་བཀའ་བསྒོས་སོ།།
LUK 5:15 འོན་ཀྱང་ཁོང་གི་མཚན་སྙན་གྲགས་སྔར་ལས་ཀྱང་ཤིན་ཏུ་རྒྱས༌པས། མི་སྐོར་ཚོ་མང་པོ་ཁོང་གི་གསུང་ལ་མཉན་པ་དང་རང་གི་ནད་གསོ་བའི་ཕྱིར་གནས་དེར་འདུས༌ནའང༌།
LUK 5:16 ཁོང་ནི་ནམ་རྒྱུན་ལྟར་གསོལ་བ་འདེབས་ཕྱིར་དབེན་གནས་སུ་ཕེབས༌སོ།།
LUK 5:17 ཉིན་ཞིག༌ལ། སྐྱབས་མགོན་ཡེ་ཤུས་ཆོས་གསུང་བའི་དུས༌སུ། ག་ལིལ་ཡུལ་གྱི་གྲོང་སྡེ་སོ་སོ༌དང༌། ཡ་ཧུ་དཱ༌ཡུལ། ཡེ་རུ་སཱ་ལེམ་བཅས་ནས་ཡོང་བའི་ཕ་རུ་ཤི་པ་དང་བཀའ་ཁྲིམས་ཀྱི་དགེ་རྒན་འགའ་ཤས་གནས་དེར་བསྡད་ཡོད༌ཅིང༌། གཙོ་བོའི་ནུས་མཐུ་ནི་ཁོང་དང་མཉམ་དུ་བཞུགས་པས་ཁོང་གིས་ནད་པ་རྣམས་ཀྱི་ནད་གསོ་བར་ནུས༌སོ།།
LUK 5:18 མི་འགའ་ཞིག་གིས་མི་ཞ་བོ་ཞིག་ཁྱོགས་ཤིང་དུ་ཁུར་ནས་སྐྱབས་མགོན་ཡེ་ཤུའི་དྲུང་དུ་ཡོང་བསམས༌ཀྱང༌།
LUK 5:19 གནས་དེར་མི་མང་པོ་འདུས་པའི་རྐྱེན་གྱིས་ཁང་པའི་ནང་དུ་འགྲོ་ཐབས་མ་རྙེད༌པར། ཁང་ཐོག་ཏུ་སོང་སྟེ་རྫ་གཡམ་གྱི་བར་ནས་མི་ཞ་བོ་དེ་ཁྱོགས་ཤིང་དང་བཅས་མི་ཚོགས་ཀྱི་དཀྱིལ་ལ་སྐྱབས་མགོན་ཡེ་ཤུའི་དྲུང་དུ་བཏང༌།
LUK 5:20 ཁོང་གིས་དེ་རྣམས་ཀྱི་དད་སེམས་གཟིགས་ནས་ཞ་བོ་དེ་ལ་འདི་སྐད༌དུ། སྙིང་གི༌བུ། ཁྱོད་ཀྱི་སྡིག་པ་བསལ་བ་ཡིན་ཞེས་གསུངས་སོ།།
LUK 5:21 མཁན་པོ་དང་ཕ་རུ་ཤི་པ་རྣམས་ཀྱི་སེམས༌སུ། དཀོན་མཆོག་གི་དབུ་འཕང་སྨད་མཁན་འདི་སུ་ཡིན༌ནམ། དཀོན་མཆོག་ཁོ་ན་ལས་གཞན་སུ་ཞིག་གིས་སྡིག་པ་བསལ་ནུས་སམ་ཞེས་བསམས་པར།
LUK 5:22 སྐྱབས་མགོན་ཡེ་ཤུས་དེ་དག་གི་བསམ་ཚུལ་མཁྱེན་ཏེ་འདི་སྐད༌དུ། ཁྱོད་རྣམས་ཀྱི་སེམས་སུ་ཅིའི་ཕྱིར་དེ་ལྟར་བསམས་པ་ཡིན༌ནམ།
LUK 5:23 ཁྱོད་ཀྱི་སྡིག་པ་བསལ་བ་ཡིན་ཞེས་ཟེར༌བ་དང་། ཁྱོད་ཡར་ལོངས་ལ་སྐྱོད་ཅིག་ཟེར་བ་གཉིས་ལས་གང་ཞིག༌སླའམ།
LUK 5:24 འོན་ཀྱང་། འདི་ནི་ས་སྟེང་དུ་མིའི་བུ་ལ་སྡིག་པ་བསལ་བའི་དབང་ཡོད་པ་ཁྱོད་ཅག་གིས་ཤེས་པའི་ཕྱིར་ཡིན་ཞེས་གསུངས༌རྗེས། ཁོང་གིས་ཞ་བོ་དེ་ལ་འདི་སྐད༌དུ། བདག་གིས་ཁྱོད་ལ་སྨྲ་བར་བྱ༌སྟེ། ཡར་ལོངས་ལ་ཁྱོགས་ཤིང་ཁུར་ནས་ཕྱིར་རང་ཡུལ་དུ་སོང་ཞིག་ཅེས་བཀའ་གནང་མ༌ཐག
LUK 5:25 མི་དེ་ཁོ་རྣམས་ཀྱི་མདུན་ནས་ཡར་ལངས་ཏེ་ཁྱོགས་ཤིང་ཁུར་ནས་དཀོན་མཆོག་ལ་བསྟོད་བསྔགས་བརྗོད་བཞིན་ཕྱིར་རང་ཡུལ་དུ་ལོག་པ་རེད།
LUK 5:26 མི་ཐམས་ཅད་ངོ་མཚར་སྐྱེས་ཏེ་དཀོན་མཆོག་ལ་བསྟོད་བསྔགས་བརྗོད་པ་དང་གུས་ཤིང་འཇིགས་པའི་ངང་ནས་བདག་ཅག་གིས་དེ་རིང་དོན་ཁྱད་མཚར་ཞིག་མཐོང་བྱུང་ཞེས་སྨྲས༌སོ།།
LUK 5:27 དེའི་རྗེས༌སུ། སྐྱབས་མགོན་ཡེ་ཤུ་ཕྱི་རོལ་ཏུ་ཕེབས༌ཤིང༌། མིང་ལ་ལེ་ཝི་ཟེར་བའི་ཁྲལ་ལེན་མཁན་དེ་ཁྲལ་སྡུད་སར་བསྡད་ཡོད་པ་གཟིགས་ནས་འདི་སྐད༌དུ། ཁྱོད་རང་ངའི་རྗེས་སུ་ཤོག་ཅེས་གསུངས་པ༌དང༌།
LUK 5:28 མི་དེས་ཀྱང་ཐམས་ཅད་སྤངས་ནས་ཡར་ལངས་ཏེ་ཁོང་གི་རྗེས་སུ་འབྲངས༌སོ།།
LUK 5:29 ལེ་ཝི་ཡིས་རང་གི་ཁྱིམ་ནས་ཁོང་ལ་གསོལ་སྟོན་ཆེན་པོ་བཤམས་པ༌དང༌། ཁྲལ་ལེན་མཁན་དང་མི་གཞན་མང་པོས་ཀྱང་ཁོང་རྣམས་དང་མཉམ་དུ་བཟའ་བཏུང་སྤྱད་ནས་བསྡད་དོ།།
LUK 5:30 དེའི་དུས་སུ་ཕ་རུ་ཤི་པ་དང་མཁན་པོ་རྣམས་ཀྱིས་ཁོང་གི་ཐུགས་སྲས་རྣམས་ལ་མི་དགའ་བའི་གཏམ་གླེང༌སྟེ། ཁྱོད་ཅག་གིས་ཅིའི་ཕྱིར་ཁྲལ་ལེན་མཁན་དང་མི་སྡིག་ཅན་རྣམས་དང་མཉམ་དུ་བཟའ་བཏུང་ལ་རོལ་བ་ཡིན་ནམ་ཞེས་སྨྲས་པ༌ན།
LUK 5:31 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ལུས་ཁམས་བདེ་བའི་མི་ཡིས་སྨན་པ་བསྟེན་མི་དགོས་མོད། འོན་ཀྱང་ནད་པས་ད་གཟོད་སྨན་པ་བསྟེན་དགོས་པ་ཡིན།
LUK 5:32 བདག་ནི་མི་གཞུང་དྲང་རྣམས་ཀྱིས་འགྱོད་བཤགས་བྱེད་པའི་ཕྱིར་ཁོ་རྣམས་འབོད་དུ་འོངས་པ་མ་ཡིན༌པར། མི་སྡིག་ཅན་རྣམས་ཀྱིས་འགྱོད་བཤགས་བྱེད་པའི་ཕྱིར་ཁོ་རྣམས་འབོད་དུ་ཡོང་བ་ཡིན་ཞེས་གསུངས༌སོ།།
LUK 5:33 ཡང་ཆོས་དཔོན་དེ་རྣམས་ན༌རེ། ཁྲུས་གསོལ་མཁན་ཡོ་ཧ་ནན་གྱི་སློབ་མ་རྣམས་ཀྱིས་དུས་རྒྱུན་དུ་སྨྱུང་གནས་སྲུང་ཞིང་གསོལ་བ་འདེབས༌པ་དང་། ཕ་རུ་ཤི་པའི་སློབ་མ་རྣམས་ཀྱིས་ཀྱང་དེ་ལྟར་བྱེད་པ་རེད། འོན་ཀྱང་ཁྱེད་ཀྱི་ཐུགས་སྲས་རྣམས་ཀྱིས་དེ་ལྟར་མི་བྱེད་པར་བཟའ་བཏུང་སྤྱོད་དོ་ཞེས་སྨྲས་པ༌ན།
LUK 5:34 སྐྱབས་མགོན་ཡེ་ཤུས་འདི་སྐད༌དུ། མག་པ་དང་སྐུ་མགྲོན་རྣམས་མཉམ་དུ་ཡོད་དུས་སྐུ་མགྲོན་རྣམས་ལ་སྨྱུང་གནས་སྲུང་དུ་འཇུག་ག་ལ་རུང་།
LUK 5:35 འོན་ཀྱང་མག་པ་དང་སྐུ་མགྲོན་རྣམས་ཁ་འབྲལ་བའི་དུས་ཤིག་སླེབ་ཡོང༌སྟེ། དུས་དེར་སྐུ་མགྲོན་རྣམས་ཀྱིས་སྨྱུང་གནས་བསྲུང་བར་འགྱུར་ཞེས་གསུངས་སོ།།
LUK 5:36 ཡང་ཁོང་གིས་དེ་རྣམས་ལ་དཔེ་ཞིག་སྦྱར་ནས་འདི་སྐད༌དུ། མི་སུ་ཡིན་ཡང་ལྭ་གསར་པའི་སྟེང་ནས་རས་ཞིག་བླངས་ཏེ་ལྭ་རྙིང་པར་ལྷན་པ་མི་རྒྱག༌སྟེ། དེ་ལྟར་བྱས་ན་ལྭ་གསར་པ་དེ་རལ་བར་མ༌ཟད། རས་གསར་པ་དེ་དང་ལྭ་རྙིང་པ་གཉིས་ཀྱང་ཆ་མཚུངས་པ་མ་ཡིན།
LUK 5:37 ཡང་སུ་ཡིན་ཡང་རྒུན་ཆང་གསར་པ་སྐྱི་ཁུག་རྙིང་པའི་ནང་དུ་མི་བླུག༌སྟེ། གལ་ཏེ་བླུགས་ན་རྒུན་ཆང་གསར་པ་དེས་སྐྱི་ཁུག་རྙིང་པ་རལ་ཏུ་འཇུག་པར་མ༌ཟད། ཆང་ཡང་ས་རུ་བཞུར་ནས་སྐྱི་ཁུག་ཀྱང་བརླག་པར་འགྱུར་ངེས༌པས།
LUK 5:38 རྒུན་ཆང་གསར་པ་དེ་སྐྱི་ཁུག་གསར་པའི་ནང་དུ་བླུག་དགོས།
LUK 5:39 ཡང་མི་སུ་ཡིན་ཡང་རྒུན་ཆང་རྙིང་པ་འཐུང་རྗེས་རྒུན་ཆང་གསར་པ་འཐུང་མི་འདོད༌པར། ཁོས་རྟག་ཏུ་རྒུན་ཆང་རྙིང་པ་ཞིམ་པོ་འདུག་ཅེས་ཟེར་ངེས་ཡིན་ཞེས་གསུངས༌སོ།།
LUK 6:1 ངལ་གསོ་བའི་ཉིན་ཞིག་ལ་སྐྱབས་མགོན་ཡེ་ཤུ་ཞིང་བར་བརྒྱུད་ནས་ཕེབས་པ༌དང༌། ཁོང་གི་ཐུགས་སྲས་རྣམས་ཀྱིས་འབྲུ་ཡི་སྙེ་མ་བཏོགས་ཤིང་ལག་པས་འཕུར་འཕུར་བྱས་ནས་ཟོས་སོ།།
LUK 6:2 ཕ་རུ་ཤི་པ་འགའ་ཞིག་ན༌རེ། ཁྱོད་ཅག་གིས་ཅིའི་ཕྱིར་ངལ་གསོ་བའི་ཉིན་ལ་བཀའ་ཁྲིམས་དང་འགལ་བའི་ལས་བྱེད་དམ་ཞེས་སྨྲས་པ༌ལ།
LUK 6:3 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། དཱ་བིད་འཁོར་དང་བཅས་པ་བཀྲེས་ལྟོགས་བྱུང་སྐབས་ཅི་ཞིག་བྱས་པ་ཁྱོད་རྣམས་ཀྱིས་བཀླགས་མ་མྱོང༌ངམ།
LUK 6:4 ཁོང་ཉིད་དཀོན་མཆོག་གི་བཞུགས་གནས་སུ་སོང་ནས་སྤྱན་བསྟར་བག་ལེབ་ཟོས་ཤིང་འཁོར་གཡོག་རྣམས་ལའང་བྱིན། སྤྱིར་བག་ལེབ་དེ་མཆོད་དཔོན་ལས་གཞན་སུས་ཀྱང་བཟའ་མི་རུང་ཞེས་གསུངས་པ༌དང༌།
LUK 6:5 ཡང་འདི་སྐད༌དུ། མིའི་བུ་ནི་ངལ་གསོ་བའི་ཉིན་གྱི་གཙོ་བོ་ཡིན་ཞེས་གསུངས༌སོ།།
LUK 6:6 ཡང་ངལ་གསོ་བའི་ཉིན་གཞན་ཞིག༌ལ། སྐྱབས་མགོན་ཡེ་ཤུ་ཆོས་ཁང་དུ་ཕེབས་ནས་ཆོས་གསུངས་པ༌ན། དེ་རུ་གཡས་ལག་ཞ་བའི་མི་ཞིག་ཡོད༌དེ།
LUK 6:7 མཁན་པོ་དང་ཕ་རུ་ཤི་པ་རྣམས་ཀྱིས་ཁོང་ལ་སྙད་འཛུགས་པའི༌ཕྱིར། ཁོང་གིས་ངལ་གསོ་བའི་ཉིན་ལ་ནད་གསོ་མིན་ལ་བརྟག་ཆེད་ལྐོག་ནས་བལྟས་ཏེ་བསྡད་དོ།།
LUK 6:8 འོན་ཀྱང་། སྐྱབས་མགོན་ཡེ་ཤུས་དེ་རྣམས་ཀྱི་བསམ་ཚུལ་མཁྱེན༌ཏེ། ལག་པ་ཡ་གཅིག་ཞ་བའི་མི་དེ་ལ་འདི་སྐད༌དུ། ཡར་ལོངས༌དང༌། དཀྱིལ་ནས་སྡོད་ཅིག་ཅེས་བཀའ་གནང༌ཞིང༌། མི་དེའང་ཡར་ལངས་ནས་བསྡད་དོ།།
LUK 6:9 ཡང་སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ངས་ཁྱོད་རྣམས་ལ་དྲི་བ་ཞིག་འདོན༌ཏེ། བཀའ་ཁྲིམས་ལྟར་ན་ངལ་གསོ་བའི་ཉིན་ལ་ལས་བཟང་པོ་བྱས་ཆོག༌གམ་ཡང་ན་ལས་ངན་པ་བྱས་ཆོག སྲོག་བསྐྱབས་ཆོག༌གམ་ཡང་ན་སྲོག་བཅད་ཆོག་ཅེས་གསུངས་པ༌དང༌།
LUK 6:10 ཡང་ཁོང་གིས་དེ་རྣམས་ལ་རིམ་གྱིས་གཟིགས་ཤིང་མི་ཞ་བོ་དེ་ལ་འདི་སྐད༌དུ། ཁྱོད་ཀྱིས་ལག་པ་རྐྱོངས་ཤིག་ཅེས་གསུངས་པ༌དང༌། ཁོས་ཀྱང་དེ་ལྟར་བྱས་ཤིང་ལག་པ་སོས་པར་གྱུར་ཏོ།།
LUK 6:11 འོན་ཀྱང་། མཁན་པོ་དང་ཕ་རུ་ཤི་པ་རྣམས་ཤིན་ཏུ་ཁྲོས་ཏེ་སྐྱབས་མགོན་ཡེ་ཤུར་ཅི་ཞིག་བྱ་བར་གྲོས་བྱས༌སོ།།
LUK 6:12 དུས༌དེར། སྐྱབས་མགོན་ཡེ་ཤུ་རི་བོ་ཞིག་ལ་གསོལ་བ་འདེབས་སུ་ཕེབས་ཏེ་མཚན་གང་བོར་དཀོན་མཆོག་ལ་གསོལ་བ་བཏབ་ནས་བཞུགས་པ་རེད།
LUK 6:13 ནམ་ལངས༌ཚེ། ཁོང་གིས་རྗེས་འབྲང་པ་རྣམས་རང་ཉིད་ཀྱི་དྲུང་དུ་བོས་པ་དང་དེ་ལས་མི་བཅུ་གཉིས་བདམས་ཤིང་དེ་རྣམས་ལ་སྐུ་ཚབ་པ་ཞེས་བཏགས་སོ།།
LUK 6:14 དེ་རྣམས་ནི་ཁོང་གིས་པེ་ཏྲོ་ཞེས་བཏགས་པའི་སི་མོན་དང་དེའི་ནུ་བོ་ཨན་དྲི་ཡཱ༌དང༌། གཞན་ཡང་ཡ་ཀོབ་དང་ཡོ་ཧ༌ནན། ཕི་ལིབ་དང་པཱར་ཐོ་ལོ༌མཱ།
LUK 6:15 མད་ཐཱ་དང་ཐོ༌མཱ། ཨལ་ཕཱའི་བུ་ཡ་ཀོབ་དང་བརྩོན་འགྲུས་ཅན་ཟེར་བའི་སི་མོན་དང༌།
LUK 6:16 ཡ་ཀོབ་ཀྱི་བུ་ཡུ་དཱ་དང་ཕྱིས་སུ་ངོ་ལོག་པར་གྱུར་པའི་ཨི་སི་ཀར་རེའི་ཡུ་དཱ་བཅས༌སོ།།
LUK 6:17 ཁོང་རྣམས་རི་ལས་མར་ཕེབས་ཏེ་ཐང་བདེ་མོ་ཞིག་ཏུ་བཞུགས་པ༌དང༌། ཁོང་གི་རྗེས་འབྲང་པ་གཞན་མང་པོ་ཡོད༌ལ། མི་སེར་ཤིན་ཏུ་མང་པོ་ཞིག་ཀྱང༌ཡོད། དེ་དག་ཁོང་གི་ཆོས་ལ་མཉན་པ་དང་རང་རང་གི་ནད་གསོ་བའི་ཕྱིར། ཡ་ཧུ་དཱའི་ཡུལ་ཐམས་ཅད་དང་ཡེ་རུ་སཱ་ལེམ། རྒྱ་མཚོའི་འགྲམ་གྱི་གྲོང་ཁྱེར་ཐཱར་དང་ཚི་ཏུན་བཅས་ནས་འོངས་ཤིང༌། གདོན་འདྲེས་འཁྲིལ་བ་རྣམས་ཀྱང་ཡོང་ནས་ནད་ཐམས་ཅད་སོས་པར་གྱུར་ཏོ།།
LUK 6:19 ཁོང་གི་སྐུ་ལས་ནུས་མཐུ་བྱུང་སྟེ་ཐམས་ཅད་སོས་པར་གྱུར༌པས། མི་ཀུན་གྱིས་ཁོང་ལ་རེག་པར་བསམས༌སོ།།
LUK 6:20 སྐྱབས་མགོན་ཡེ་ཤུས་དབུ་ཡར་དགྱེ་ནས་རྗེས་འབྲང་པ་རྣམས་ལ་གཟིགས་ཏེ་འདི་སྐད༌དུ། ཁྱོད་ཅག་དབུལ་པོ་རྣམས༌བདེའོ། །དཀོན་མཆོག་གི་རྒྱལ་སྲིད་ནི་ཁྱོད་ཅག་གི་ཡིན་པས༌སོ།།
LUK 6:21 ད་ལྟ་ཁྱོད་ཅག་བཀྲེས་ལྟོགས་མྱོང་བ་རྣམས༌བདེའོ། །ཁྱོད་ཅག་གི་ལྟོ་བ་འགྲང་ངེས་པས༌སོ། །ད་ལྟ་ཁྱོད་ཅག་ངུ་བ་རྣམས༌བདེའོ། །ཁྱོད་ཅག་དགོད་པར་འགྱུར་བའི་ཕྱིར༌རོ།།
LUK 6:22 མི་རྣམས་ཀྱིས་མིའི་བུ་ཡི་དོན་དུ་ཁྱོད་ཅག་ལ་སྡང་ཞིང་རྩིས་མེད་གཏོང་བ༌དང༌། ཚིག་ངན་སྨྲ༌བ། ཁྱོད་ཅག་གི་མིང་ངན་པར་བརྩིས་ནས་སྤོང་བ་བཅས་བྱེད་ན་ཁྱོད་རྣམས༌བདེའོ།།
LUK 6:23 ཉིན་དེའི་དུས༌སུ། ཁྱོད་ཅག་དགའ་བའི་ངང་ནས་མཆོང་ལྡིང་བྱོས༌ཤིག རྒྱུ་མཚན་ནི་ནམ་མཁའི་ཞིང་ཁམས་སུ་ཁྱོད་ཅག་ལ་བྱ་དགའ་ཆེན་པོ་ཡོད་པ་ཡིན། ཅིའི་ཕྱིར་ཞེ་ན། མི་དེ་དག་གི་མེས་པོ་རྣམས་ཀྱིས་ཀྱང་ལུང་སྟོན་པ་རྣམས་ལ་དེ་ལྟར་བྱས་མྱོང༌བའི་ཕྱིར་རོ།།
LUK 6:24 འོན་ཀྱང་། ཁྱོད་ཅག་ཕྱུག་པོ་རྣམས་ལ་ཆག་སྒོ་འབྱུང་ངེས༌ཏེ། ད་ལྟ་ཁྱོད་ཅག་ལ་སེམས་གསོ་ཐོབ་ཟིན་པའི་ཕྱིར༌རོ།།
LUK 6:25 ད་ལྟ་ཁྱོད་ཅག་ལྟོ་བ་འགྲངས་པ་རྣམས་ལ་ཆག་སྒོ་འབྱུང་ངེས༌ཏེ། ཁྱོད་ཅག་ལ་རྗེས་སུ་བཀྲེས་ལྟོགས་འབྱུང་བར་འགྱུར། ད་ལྟ་ཁྱོད་ཅག་དགོད་པ་རྣམས་ལ་ཆག་སྒོ་འབྱུང་ངེས༌ཏེ། ཕྱིས་སུ་ཁྱོད་ཅག་གིས་མྱ་ངན་བྱེད་ཅིང་ངུ་བར་འགྱུར།
LUK 6:26 མི་ཀུན་གྱིས་ཁྱོད་ཅག་ལ་བསྟོད་པ་བྱེད་ན་ཁྱོད་ཅག་ལ་ཆག་སྒོ་འབྱུང་ངེས༌ཏེ། མི་དེ་དག་གི་མེས་པོ་རྣམས་ཀྱིས་ཀྱང་ལུང་སྟོན་པ་རྫུས་མ་རྣམས་ལ་དེ་ལྟར་བྱས་མྱོང་བའི་ཕྱིར་ཡིན་ཞེས་གསུངས༌སོ།།
LUK 6:27 ཡང་ཁོང་གིས་འདི་སྐད༌དུ། ངས་ཁྱོད་ཅག་ཉན་མཁན་རྣམས་ལ༌སྨྲ་བར་བྱ་སྟེ། ཁྱོད་ཅག་གིས་རང་གི་དགྲ་བོ་རྣམས་ལ་བྱམས་ཤིང་བརྩེ་བར༌གྱིས། ཁྱོད་ཅག་ལ་སྡང་མཁན་རྣམས་ལའང་ལས་བཟང་པོ་བྱོས༌དང༌།
LUK 6:28 ཁྱོད་ཅག་ལ་སྡིགས་དམོད་བྱེད་མཁན་རྣམས་ཀྱི་དོན་དུའང་བྱིན་རླབས་ཞུས་ཤིག ཁྱོད་ཅག་ལ་གནོད་པ་བྱེད་མཁན་རྣམས་ཀྱི་ཆེད་དུའང་གསོལ་བ་ཐོབས༌ཤིག
LUK 6:29 སུ་ཞིག་གིས་ཁྱོད་ཀྱི་འགྲམ་པ་གཅིག་སར་འགྲམ་ལྕག་གཞུས་ན་འགྲམ་པ་གཞན་ས་ཡང་དེ་ལ་སྟོན༌ཅིག སུ་ཞིག་གིས་ཁྱོད་ཀྱི་ཕྱི་གོས་འཕྲོག་པར་བྱེད་ན་ནང་གོས་ཀྱང་འཁྱེར་དུ༌ཆུག
LUK 6:30 སུ་ཞིག་གིས་ཁྱོད་ལ་གང་ཞིག་སློང་བར་བྱེད་ན་དེ་ལ་བྱིན༌དང༌། སུ་ཞིག་གིས་ཁྱོད་ཀྱི་དངོས་པོ་ཕྲོགས་ན། དེ་ལས་ཕྱིར་ལེན་པར་མི༌བྱའོ།།
LUK 6:31 ཡང་ཁྱོད་ཅག་ལ་མི་གཞན་ལས་ཇི་ལྟར་འཐོབ་འདོད་པ་བཞིན་ཁྱོད་ཅག་གིས་ཀྱང་མི་གཞན་རྣམས་ལ་དེ་ལྟར་བྱོས༌དང༌།
LUK 6:32 ཁྱོད་ཅག་གིས་རང་ལ་བྱམས་མཁན་རྣམས་ལ་བྱམས་པར་བྱེད༌ན། ཁྱོད་ཅག་ལ་དྲིན་ལན་ཅི་ལ༌འཐོབ། མི་སྡིག་ཅན་རྣམས་ཀྱིས་ཀྱང་རང་ལ་བྱམས་མཁན་རྣམས་ལ་བྱམས་པར་བྱེད་དོ།།
LUK 6:33 ཡང་ཁྱོད་ཅག་གིས་རང་ལ་ལས་བཟང་པོ་བྱེད་མཁན་རྣམས་ལ་ལས་བཟང་པོ་བྱེད༌ན། ཁྱོད་ཅག་ལ་དྲིན་ལན་ཅི་ལ༌འཐོབ། མི་སྡིག་ཅན་རྣམས་ཀྱིས་ཀྱང་དེ་ལྟར་བྱེད་དོ།།
LUK 6:34 ཁྱོད་ཅག་གིས་ཕྱིར་འཐོབ་པར་རེ་བ་བཅངས་ནས་མི་གཞན་ལ་བསྐྱིས་པ་ཡིན༌ན། ཁྱོད་ཅག་ལ་དྲིན་ལན་ཅི་ལ༌འཐོབ། གྲངས་ཀ་ལྟར་ཕྱིར་ལེན་པའི་ཆེད་དུ་སྡིག་ཅན་རྣམས་ཀྱིས་ཀྱང་སྡིག་ཅན་གཞན་ལ་བསྐྱིས་པ༌ཡིན།
LUK 6:35 ཁྱོད་ཅག་གིས་རང་གི་དགྲ་བོ་རྣམས་ལ་བྱམས་ཤིང་ལས་བཟང་པོ་བྱོས༌དང༌། ཕྱིར་འཐོབ་པའི་རེ་བ་མི་འཛིན་པར་དེ་རྣམས་ལ་སྐྱིས༌ཤིག དཀོན་མཆོག་གིས་ཁྱོད་ཅག་ལ་བྱ་དགའ་ཆེན་པོ་གནང་ངེས་པ༌དང༌། བླ་ན་མེད་པའི་དཀོན་མཆོག་གི་བུ་དང་བུ་མོ་རུ་འགྱུར། རྒྱུ་མཚན་ནི་ཁོང་གི་བཀའ་དྲིན་མི་དྲན་པའི་མི་དང་མི་ངན་ལའང་ཁོང་གིས་ཐུགས་རྗེ་གནང་བས༌སོ།།
LUK 6:36 བདག་ཅག་གི་ཡབ་ནི་བྱམས་སྙིང་རྗེ་ཅན་ཡིན་པ་བཞིན་ཁྱོད་ཅག་ཀྱང་སྙིང་རྗེ་ཅན་ཡིན་དགོས་ཞེས་གསུངས༌སོ།།
LUK 6:37 ཡང་ཁོང་གིས་འདི་སྐད༌དུ། ཁྱོད་ཅག་གིས་མི་གཞན་གྱི་མཚང་མ་འབྲུ་ཞིག ཁྱོད་ཅག་གི་མཚང་ཡང་མི་འབྱིན། ཁྱོད་ཅག་གིས་མི་གཞན་ལ་ཉེས་ཆད་མ་གཅོད་ཅིག ཁྱོད་ཅག་ལའང་ཉེས་ཆད་མི་གཅོད། ཁྱོད་ཅག་གིས་མི་གཞན་ཐར་དུ༌ཆུག་དང་། ཁྱོད་ཅག་ཀྱང་ཐར་བར་མཛད་ངེས༌ཡིན།
LUK 6:38 ཁྱོད་ཅག་གིས་མི་གཞན་ལ་བྱིན་དང་ཁྱོད་ཅག་ལའང་གནང་ངེས༌ཏེ། དཔེར་ན་བྲེ་བཟང་པོར་འབྲུ་རིགས་བྱུར་བུར་གཏམས་ཤིང་ཡང་ཡང་གནོན་བཅག་བྱས་ཏེ་སྤྲུགས་ནས་ཁྱོད་ཅག་གི་པང་དུ་བླུག་ངེས༌ཡིན། རྒྱུ་མཚན་ནི་ཁྱོད་ཅག་གིས་སྣོད་ཅི་ལྟ་བུ་ལས་མི་གཞན་ལ་བྱིན༌ན། ཁྱོད་ཅག་ལའང་སྣོད་དེ་ལྟ་བུ་ལས་གནང་བར་འགྱུར་ཞེས་གསུངས༌སོ།།
LUK 6:39 ཡང་སྐྱབས་མགོན་ཡེ་ཤུས་དཔེ་ལ་སྦྱར་ནས་འདི་སྐད༌དུ། ལོང་བས་ལོང་བ་ཞིག་ཁྲིད་ནས་འགྲོ་ཐུབ༌བམ། དེ་ལྟར་བྱས་ན་ལོང་བ་གཉིས་ཀ་དོང་ནང་དུ་ལྷུང་བ་མ་ཡིན༌ནམ།
LUK 6:40 སློབ་བུ་ནི་རང་གི་སློབ་དཔོན་ལས་ཆེན་པོ་མ་ཡིན༌པར། ཡོན་ཏན་མཐར་ཕྱིན་པ་རྣམས་ཀྱང་རང་གི་སློབ་དཔོན་དང་འདྲ་བ་ཙམ་དུ་འགྱུར།
LUK 6:41 ཁྱོད་ཀྱིས་རང་གི་སྤུན་ཟླའི་མིག་ནང་དུ་སྦུར་མ་ཡོད་པ་མཐོང༌ན། ཅིའི་ཕྱིར་རང་གི་མིག་ནང་དུ་གདུང་མ་ཡོད་པ་མི་མཐོང༌ངམ།
LUK 6:42 ཁྱོད་ཀྱིས་རང་གི་མིག་ནང་དུ་ཡོད་པའི་གདུང་མ་མཐོང་མི་ཐུབ་ནའང་རང་གི་སྤུན་ཟླ་ལ་ངས་ཁྱོད་ཀྱི་མིག་ནང་དུ་ཡོད་པའི་སྦུར་མ་ལེན་པར་བྱེད་ཅེས་ཅི་ལྟར་སྨྲ་ནུས༌སམ། ཚུལ་འཆོས་པ་ཁྱོད་ཀྱིས་ཐོག་མར་རང་གི་མིག་ནང་དུ་ཡོད་པའི་གདུང་མ་ལོངས༌དང༌། དེ་ནས་རང་གི་མིག་ཟུང་གིས་གསལ་པོར་མཐོང་ཐུབ་པས། ད་གཟོད་རང་གི་སྤུན་ཟླའི་མིག་ནང་དུ་ཡོད་པའི་སྦུར་མ་ལེན་ནུས་པ་ཡིན་ཞེས་གསུངས༌སོ།།
LUK 6:43 ཡང་ཁོང་གིས་འདི་སྐད༌དུ། ལྗོན་ཤིང་བཟང་པོ་ལས་འབྲས་བུ་ངན་པ་མི་འབྱུང༌ལ། དེ་བཞིན་དུ་ལྗོན་ཤིང་ངན་པ་ལས་ཀྱང་འབྲས་བུ་བཟང་པོ་མི་འབྱུང༌།
LUK 6:44 རྒྱུ་མཚན་ནི་ལྗོན་ཤིང་རེ་རེ་ནི་རང་གི་འབྲས་བུ་ལས་ག་འདྲ་ཡིན་པ་ཤེས་ཐུབ༌སྟེ། སྤྱིར་མི་སུས་ཀྱང་ཚེར་མ་ལས་བསེ་ཡབ་ཀྱི་འབྲས་བུ་འཐོག་མི་སྲིད༌ལ། ཚེར་མ་ལས་ཀྱང་རྒུན་འབྲུམ་འཐོག་མི་སྲིད།
LUK 6:45 མི་བཟང་ཞིག་གིས་རང་སེམས་ཀྱི་བང་མཛོད་བཟང་པོ་ནས་དོན་བཟང་པོ་འདོན༌ཞིང༌། མི་ངན་ཞིག་གིས་རང་སེམས་ཀྱི་བང་མཛོད་ངན་པ་ནས་དོན་ངན་པ་འདོན། རྒྱུ་མཚན་ནི་སེམས་ལ་ཅི་ལྟ་བུས་བཀང༌ན། ངག་ལས་ཀྱང་དེ་ལྟ་བུ་སྨྲ་བ་ཡིན་ཞེས་གསུངས༌སོ།།
LUK 6:46 ཡང་ཁོང་གིས་འདི་སྐད༌དུ། ཁྱོད་ཅག་ན༌རེ། ཀྱེ། གཙོ་བོ་ལགས་གཙོ་བོ་ལགས་ཞེས་ཞུས༌ཀྱང༌། བདག་གིས་སྨྲས་པ་བཞིན་དུ་མི་བྱེད་པའི་རྒྱུ་མཚན༌ཅི་ཡིན།
LUK 6:47 སུ་ཞིག་བདག་གི་གམ་དུ་ཡོང་ནས་བདག་གི་བཀའ་ཐོས་ཤིང་དེ་བཞིན་དུ་བྱེད་པའི་མི་དེ་ནི་ག་འདྲ་ཡིན་པ་ངས་ཁྱོད་ཅག་ལ་སྟོན་པར་བྱའོ།།
LUK 6:48 མི་དེ་ནི་ཁང་པ་བཟོ་མཁན་ཞིག་གིས་ས་གཏིང་ཟབ་མོར་བསློགས་ཤིང་རྡོ་ཕ་བོང་གི་སྟེང་དུ་རྨང་གཞི་བཏིངས་པ་དང༌འདྲ། དེ་ནས་ཆུ་ལོག་བྱུང་ཚེ་ཁང་པ་འདིའི་རྨང་གཞི་བརྟན་པོ་ཡིན་པས་གཡོ་བར་མི་འགྱུར།
LUK 6:49 འོན་ཀྱང་། སུ་ཞིག་གིས་བདག་གི་བཀའ་ཐོས་ཀྱང་དེ་བཞིན་དུ་མི་བྱེད་པ་ནི་རྨང་གཞི་མ་བཏིངས་པར་ཁང་པ་ས་སྟེང་དུ་བརྩིགས་པའི་མི་དང༌འདྲ། དེ་ནས་ཆུ་ལོག་བྱུང་མ་ཐག་ཁང་པ་བརྡིབས་ཏེ་ཡོངས་སུ་བརླག་པ་ཡིན་ཞེས་གསུངས༌སོ།།
LUK 7:1 སྐྱབས་མགོན་ཡེ་ཤུས་མི་རྣམས་ལ་གསུང་འདི་ཐམས་ཅད་གནང་རྗེས་ཀཱ་ཕར་ན་ཧུམ་དུ་ཕེབས་པ༌དང༌།
LUK 7:2 གནས་དེར་བརྒྱ་དཔོན་ལ་རྩིས་འདང་ཆེ་བའི་གཡོག་པོ་ཞིག་ཡོད་པ་ལ་ནད་ལྕི་མོ་ཕོག་ནས་ཤི་ལ་ཉེ༌ཞིང༌།
LUK 7:3 བརྒྱ་དཔོན་གྱིས་སྐྱབས་མགོན་ཡེ་ཤུའི་གནས་ཚུལ་ཐོས་ནས་ཁོང་ཉིད་ཕེབས་ཏེ་རང་གི་གཡོག་པོའི་སྲོག་སྐྱོབ་པའི༌ཕྱིར། ཡ་ཧུ་དཱའི་མི་རིགས་ཀྱི་དཔོན་རིགས་རྒན་པོ་འགའ་ཁོང་གི་དྲུང་དུ་མངགས་སོ།།
LUK 7:4 ཁོ་རྣམས་སྐྱབས་མགོན་ཡེ་ཤུའི་དྲུང་དུ་འབྱོར་ནས་ན༌རེ། ཁྱེད་ཀྱིས་བརྒྱ་དཔོན་ལ་དོན་འདི་མཛད་འོས༌ཏེ།
LUK 7:5 ཁོས་རང་རེའི་མི་རྣམས་ལ་བྱམས་ཤིང་བརྩེ་བ་དང་ཆོས་ཁང་ཡང་བཞེངས་པའི་ཕྱིར་རོ་ཞེས་ཞུ་བ་ནན་གྱིས་ཞུས༌པས།
LUK 7:6 སྐྱབས་མགོན་ཡེ་ཤུ་ཡང་དེ་དག་དང་མཉམ་དུ་ལམ་ལ་ཆས༌པ་དང་། བརྒྱ་དཔོན་གྱི་ཁྱིམ་དང་ཉེ་བའི་དུས༌སུ། བརྒྱ་དཔོན་གྱིས་གྲོགས་འགའ་ཁོང་གི་དྲུང་དུ་མངགས་ནས་ཁོང་ལ་ན༌རེ། ཇོ་བོ༌ལགས། ཁྱེད་ལ་འོ་བརྒྱལ་མི་བཟོ་བར༌ཞུ། ཁྱེད་ཉིད་ཕྲན་ཆུང་བདག་ལྟ་བུ་ཞིག་གི་ཁྱིམ་དུ་ཕེབས་ན་ང་རང་མི་འོས།
LUK 7:7 དེའི་རྐྱེན་གྱིས་ང་རང་ཁྱེད་ཀྱི་སྐུ་དྲུང་དུ་སོང་ནས་ཁྱེད་ལ་མཇལ་ནའང་མི་འོས་པར་སྙམ་མོ།། འོན་ཀྱང་ཁྱེད་ཀྱིས་བཀའ་ཞིག་གནང་བར་མཛོད༌དང༌། བདག་གི་གཡོག་པོའི་ནད་བསལ་ངེས༌ཡིན།
LUK 7:8 ང་རང་ཡང་གཞན་གྱི་དབང་འོག་ཏུ་ཡོད་པའི་མི་ཞིག་ཡིན་ཞིང་ངའི་དབང་འོག་ཏུའང་དམག་མི་ཡོད༌དེ། ངས་མི་འདིར་སོང་ཞིག་ཅེས་བཤད་ན་ཁོ་ཕར་འགྲོ་དགོས༌ཤིང༌། མི་གཞན་ལ་ཤོག་ཅིག་ཅེས་བཤད་ན་ཁོ་ཚུར་ཡོང་བ༌ཡིན། ཡང་བདག་གིས་གཡོག་པོར་ལས་ཀ་འདི་སྒྲུབས་ཤིག་ཅེས་བཤད་ན་ཁོས་ཀྱང་བསྒྲུབ་པར་འགྱུར་ཞེས་ཞུས༌སོ།།
LUK 7:9 སྐྱབས་མགོན་ཡེ་ཤུས་གཏམ་དེ་གསན་ནས་ཡ་མཚན་སྐྱེས༌ཏེ། ཕྱིར་འཁོར་ནས་རང་གི་རྗེས་སུ་འབྲངས་པའི་མི་རྣམས་ལ་འདི་སྐད༌དུ། བདག་གིས་ཁྱོད་ཅག་ལ་སྨྲ་བར༌བྱ་སྟེ། བདག་གིས་ཡེས་ར་ཨེལ་མི་རིགས་ལས་ཀྱང་འདི་འདྲའི་དད་སེམས་ཆེན་པོ་ཅན་ཞིག་མཐོང་མ་མྱོང་ཞེས་གསུངས་སོ།།
LUK 7:10 དེ་ནས་མངགས་འོངས་པའི་མི་རྣམས་ཕྱིར་བརྒྱ་དཔོན་གྱི་ཁྱིམ་དུ་ལོག་པ༌ན། གཡོག་པོའི་ནད་སོས་ཟིན་པ་མཐོང༌ངོ༌།།
LUK 7:11 དེ་ནས་ཅང་མ་འགོར༌བར། སྐྱབས་མགོན་ཡེ་ཤུ་དང་ཐུགས་སྲས་རྣམས་དང་མི་ཧ་ཅང་མང་པོ་ལྷན་དུ་ནཱ་ཨིན་གྲོང་ཁྱེར་དུ་ཕེབས༌ཤིང༌།
LUK 7:12 ཁོང་རྣམས་གྲོང་ཁྱེར་གྱི་མཁར་སྒོར་སླེབས་པའི༌ཚེ། ཡུགས་མོ་ཞིག་ལ་བུ་གཅིག་པུ་ཡོད་པ་ཤི༌སྟེ། གྲོང་ཁྱེར་དེའི་མི་མང་པོས་ཁོ་མོ་དང་མཉམ་དུ་བེམ་པོ་ཕྱི་རུ་སྐྱེལ་བཞིན་ཡོད་པ༌དང༌།
LUK 7:13 གཙོ་བོས་ཡུགས་མོ་དེ་མཐོང་ནས་སྙིང་རྗེ་དགོངས་ཏེ་མ་ངུའོ་ཞེས་གསུངས་པ༌དང༌།
LUK 7:14 ཁོང་ཉིད་ཁྱོགས་ཤིང་གི་གམ་དུ་ཕེབས་ཤིང་དེར་ཕྱག་གིས་རེག་པ་དང་འཁུར་མཁན་རྣམས་ཀྱང་བསྡད། ཁོང་གིས་འདི་སྐད༌དུ། ཀྱེ། གསར༌བུ། ངས་ཁྱོད་ལ་སྨྲ་བར༌བྱ་སྟེ། ཡར་ལོངས་དང་ཞེས་གསུངས་པ༌ན།
LUK 7:15 གཤིན་པོ་དེ་སླར་གསོན་ཞིང་ཡར་ལངས་ནས་སྐད་ཆ་སྨྲས་སོ།། ཁོང་གིས་མི་དེ་ཕྱིར་རང་གི་མ་ལ་སྤྲད་དོ།།
LUK 7:16 མི་ཐམས་ཅད་ངོ་མཚར་སྐྱེས་ཏེ་དཀོན་མཆོག་ལ་བསྟོད་བསྔགས་བརྗོད་ཅིང་ཕན་ཚུན་ན༌རེ། ལུང་སྟོན་པ་ཆེན་པོ་ཞིག་བདག་ཅག་གི་ཁྲོད་ནས་བྱུང༌བ་རེད། དཀོན་མཆོག་གིས་རང་གི་མི་སྡེ་ལ་གཟིགས་སྐྱོང་མཛད་དོ་ཞེས་སྨྲས༌ཤིང་།
LUK 7:17 སྐྱབས་མགོན་ཡེ་ཤུའི་དོན་དེ་ཡ་ཧུ་དཱའི་ཡུལ་དང་མཐའ་འཁོར་གྱི་ས་ཆ་ཀུན་ལ་ཁྱབ༌བོ།།
LUK 7:18 ཁྲུས་གསོལ་མཁན་ཡོ་ཧ་ནན་གྱི་སློབ་མ་རྣམས་ཀྱིས་སྐྱབས་མགོན་ཡེ་ཤུའི་དོན་དེ་ཐམས་ཅད་ཡོ་ཧ་ནན་ལ་སྨྲས༌པས།
LUK 7:19 ཁོས་རང་གི་སློབ་མ་གཉིས་བོས་ནས་གཙོ་བོའི་དྲུང་དུ་མངགས་ཏེ། མ་འོངས་པར་ཕེབས་ངེས་པ་དེ་ཉིད་ནི་ཁྱེད་རང་ཡིན༌ནམ། ཡང་ན་ངེད་ཅག་གིས་ད་དུང་གཞན་ཞིག་ལ་བསྒུག་དགོས་ཞེས་ཞུས་པ་རེད།
LUK 7:20 སློབ་མ་དེ་གཉིས་ཀྱང་ཁོང་གི་དྲུང་དུ་སོང་ནས་ན་རེ། ཁྲུས་གསོལ་མཁན་ཡོ་ཧ་ནན་གྱིས་ངེད་གཉིས་མངགས་ཏེ། མ་འོངས་པར་ཕེབས་ངེས་པ་དེ་ཉིད་ནི་ཁྱེད་རང་ཡིན༌ནམ། ཡང་ན་ངེད་ཅག་གིས་ད་དུང་གཞན་ཞིག་ལ་བསྒུག་དགོས་ཞེས་ཁོང་ལ་ཞུས་སོ།།
LUK 7:21 དུས་དེར་སྐྱབས་མགོན་ཡེ་ཤུས་ནད་རིགས་སྣ་ཚོགས་འཇོམས་ནས་གནོད་སྐྱོན་བསལ་བ་དང་། གདོན་འདྲེ་ཕྱིར་བསྐྲད༌ཅིང་ལོང་བ་མང་པོར་མཐོང་བར་མཛད།
LUK 7:22 ཁོང་གིས་དེ་གཉིས་ལ་དྲིས་ལན་དུ། ཁྱོད་གཉིས་ཕྱིར་སོང༌ཞིག ལོང་བའི་མིག་གིས་མཐོང་ཞིང་གྱོལ་པོ་རྣམས་འགྲོ་བ༌དང༌། མཛེ་ནད་བསལ་ཞིང་འོན་པའི་རྣ་བས་ཐོས་པ༌དང༌། གཤིན་པོ་རྣམས་ཀྱང་སླར་གསོན་པོར་གྱུར་པ༌དང༌། དབུལ་འཕོངས་རྣམས་ལ་འཕྲིན་བཟང་བསྒྲགས་པ་སོགས་ཁྱོད་གཉིས་ཀྱི་མཐོང་ཐོས་དེ་རྣམས་ཡོ་ཧ་ནན་ལ་ཤོད༌ཅིག
LUK 7:23 བདག་གི་རྐྱེན་གྱིས་དད་པ་མི་ཉམས་པ་རྣམས་བདེའོ་ཞེས་གསུངས༌སོ།།
LUK 7:24 ཡོ་ཧ་ནན་གྱིས་མངགས་པའི་མི་དེ་གཉིས་ཕྱིར་སོང༌རྗེས། སྐྱབས་མགོན་ཡེ་ཤུས་ཡོ་ཧ་ནན་གྱི་གནས་ཚུལ་སྐོར་མི་ཚོགས་ལ་འདི་ལྟར་གསུངས་པ་སྟེ། དེ་སྔོན་ཁྱོད་རྣམས་དབེན་སྟོང་དུ་ཅི་ཞིག་ལ་བལྟ་རུ་སོང༌ངམ། རླུང་གིས་གཡོས་པའི་འདམ་རྩྭ་ཞིག་ལ་བལྟ་རུ་སོང་བ་ཡིན༌ནམ།
LUK 7:25 ཡང་ན་སྲབ་ཅིང་འཇམ་པའི་གོས་ཆེན་གྱོན་པའི་མི་ཞིག་ལ་བལྟ་རུ་སོང༌ངམ། ལུས་ལ་གོས་ཆེན་གྱོན་ཞིང་ཟས་ནོར་ལོངས་སྤྱོད་ལ་བདེ་བར་རོལ་བའི་མི་རྣམས་ནི་རྒྱལ་པོའི་ཕོ་བྲང་དུ་ཡོད་པ་ཡིན།
LUK 7:26 འོ་ན་ཁྱོད་ཅག་གནས་དེར་ཅི་ཞིག་ལ་བལྟ་རུ་སོང་བ་ཡིན༌ནམ། ཡང་ན་ལུང་སྟོན་པ་ཞིག་ལ་བལྟ་རུ་སོང༌ངམ། བདག་གིས་ཁྱོད་རྣམས་ལ་སྨྲ་བར་བྱའོ།། དེ་ལགས༌སོ། །ཡོ་ཧ་ནན་ནི་ལུང་སྟོན་པ་ལས་མཆོག་ཏུ་གྱུར་པ་ཡིན།
LUK 7:27 དེ་ལ་གསུང་རབ་ཀྱི་མདོ་ལས་ཇི་སྐད༌དུ། བདག་གི་ཕོ་ཉ་ཁྱོད་ཀྱི་མདུན་དུ༌མངགས།། ཁྱོད་ཀྱི་ལམ་ནི་གྲ་སྒྲིག་བྱེད་ལ༌ལྟོས།། ཞེས་བཀོད་པ་དེ་ནི་ཁོའི་སྐོར་ཡིན༌ནོ།།
LUK 7:28 བདག་གིས་ཁྱོད་ཅག་ལ་སྨྲ་བར༌བྱ་སྟེ། མ་ཡིས་བཙས་པ་ཐམས་ཅད་ཀྱི་ཁྲོད་ནས་ཁྲུས་གསོལ་མཁན་ཡོ་ཧ་ནན་ལས་མཆོག་ཏུ་གྱུར་པ་གཅིག་ཀྱང་མེད། འོན་ཀྱང་དཀོན་མཆོག་གི་རྒྱལ་སྲིད་ཀྱི་ནང་དུ་ཐམས་ཅད་ལས་ཆུང་བ་དེའང་ཡོ་ཧ་ནན་ལས་ཆེན་པོ་ཡིན་ཞེས་གསུངས༌པ་དང་།
LUK 7:29 མི་སེར་དང་ཁྲལ་ལེན་མཁན་རྣམས་ཡོ་ཧ་ནན་གྱི་དྲུང་དུ་ཁྲུས་གསོལ་ལ་ཞུགས་མྱོང་བས་ཁོ་ཚོས་སྐྱབས་མགོན་ཡེ་ཤུའི་གསུང་དེ་ཐོས༌རྗེས། དཀོན་མཆོག་ནི་བདེན་ཅིང་ཡང་དག་པར་ཁས་བླངས་པ་ཡིན་མོད།
LUK 7:30 འོན་ཀྱང་། ཕ་རུ་ཤི་པ་དང་བཀའ་ཁྲིམས་ཀྱི་མཁས་པ་རྣམས་ཡོ་ཧ་ནན་གྱི་དྲུང་དུ་ཁྲུས་གསོལ་ལ་ཞུགས་མ་མྱོང༌བས། རང་གི་ཆེད་དུ་དཀོན་མཆོག་གི་ཐུགས་དགོངས་རིང་དུ་དོར་བ་ཡིན།
LUK 7:31 ཡང་འདི་སྐད༌དུ། དེས་ན་བདག་གིས་དུས་རབས་འདིའི་མི་རྣམས་ནི་གང་ཞིག་ལ་བསྡུར་བར༌བྱའམ། དེ་དག་ནི་ཅི་ཞིག་དང་མཚུངས་པ་ཡིན༌ནམ།
LUK 7:32 དེ་དག་ནི་ཁྲོམ་སྲང་དུ་སྡོད་པའི་བྱིས་པ་རྣམས་ཕན་ཚུན་ན༌རེ། ངེད་ཅག་གིས་གླིང་བུ་བུས་ཀྱང་ཁྱོད་རྣམས་བྲོ་མི་འཁྲབ། ངེད་ཅག་གིས་སྐྱོ་གླུ་བླངས་ཀྱང་ཁྱོད་རྣམས་ངུ་བ་མིན་ཞེས་ཟེར་བ་དང༌འདྲའོ།།
LUK 7:33 རྒྱུ་མཚན་ནི་ཁྲུས་གསོལ་མཁན་ཡོ་ཧ་ནན་ཡོང་ནས་བག་ལེབ་མ་ཟོས་ལ་རྒུན་ཆང་ཡང་མ་འཐུངས༌མོད། འོན་ཀྱང་ཁྱོད་ཅག་གིས་མི་འདི་གདོན་འདྲེས་བཟུང་འདུག་ཅེས་ཟེར་བ༌དང༌།
LUK 7:34 ཡང་མིའི་བུ་ཕེབས་ཏེ་བཟའ་བཏུང་ལོངས་སུ་སྤྱོད༌ཀྱང༌། ཁྱོད་ཅག་ན༌རེ། ལྟོས༌དང༌། མི་འདི་ནི་ཤ་ཆང་ལ་རྔམ་པ་ཞིག་ཡིན༌ལ། ཁྲལ་ལེན་མཁན་དང་སྡིག་ཅན་རྣམས་ཀྱི་གྲོགས་པོ་ཡིན་ཟེར་མོད།
LUK 7:35 འོན་ཀྱང་། ཤེས་རབ་ཀྱི་བུ་རྣམས་ཀྱིས་ཤེས་རབ་ནི་བདེན་ཅིང་ཡང་དག་པ་ཡིན་པར་ར་སྤྲོད་བྱེད་ཅེས་གསུངས༌སོ།།
LUK 7:36 ཡང་ཕ་རུ་ཤི་པ་ཞིག་གིས་སྐྱབས་མགོན་ཡེ་ཤུ་གདན་དྲངས༌ཤིང༌། ཁོང་ཉིད་ཀྱང་དེའི་ཁྱིམ་དུ་ཕེབས་ནས་གྲལ་ལ་བཞུགས་སོ།།
LUK 7:37 གནས་ཚུལ་དེ་གྲོང་ཁྱེར་དེ་རུ་ཡོད་པའི་བུད་མེད་སྡིག་ཅན་ཞིག་གིས་ཤེས༌ནས། སྤོས་ཆུས་གང་བའི་རྡོ་ཀ་མ་རུའི་བུམ་པ་ཞིག་ཁྱེར་ཡོང༌སྟེ།
LUK 7:38 སྐྱབས་མགོན་ཡེ་ཤུའི་སྐུ་རྒྱབ་ནས་ལངས་པ་དང་། ཡང་ཁོང་གི་ཞབས་དྲུང་དུ་ངུས་ཤིང་མིག་ཆུས་ཁོང་གི་ཞབས་བརླན་པར་བྱས་པ༌དང༌། ཁོ་མོས་རང་གི་སྐྲས་ཁོང་གི་ཞབས་ཕྱིས་ནས་འོ་ཡང་ཡང་བྱས་ཏེ་སྤོས་ཆུ་བྱུགས་སོ།།
LUK 7:39 སྐྱབས་མགོན་ཡེ་ཤུ་གདན་དྲངས་པའི་ཕ་རུ་ཤི་པ་དེས་དོན་དེ་མཐོང༌ནས། གལ་ཏེ་མི་འདི་ནི་ལུང་སྟོན་པ་ཞིག་ཡིན་ན་ཁོང་ལ་རེག་པའི་བུད་མེད་འདི་ནི་སུ་དང་ག་འདྲ་ཞིག་ཡིན་པ༌དང༌། ཐ་ན་སྡིག་ཅན་ཞིག་ཡིན་པའང་མཁྱེན་ནུས་པ་ཡིན་བསམས་པའོ།།
LUK 7:40 སྐྱབས་མགོན་ཡེ་ཤུས་ཕ་རུ་ཤི་པ་དེ་ལ་འདི་སྐད༌དུ། སི༌མོན། བདག་གིས་ཁྱོད་ལ་དོན་ཞིག་སྨྲ་བར་བྱའོ་ཞེས་གསུངས༌ཤིང༌། ཁོས་ཀྱང་སློབ་དཔོན་ལགས་གསུང་བར་མཛོད་ཅེས་ཞུས་པ༌དང༌།
LUK 7:41 ཡང་ཁོང་གིས་འདི་སྐད༌དུ། དེ་ཡང་བུན་བདག་ཅིག་ལ་བུ་ལོན་པ་གཉིས་ཡོད༌དེ། གཅིག་གིས་དངུལ་སྒོར་ལྔ་བརྒྱ་དང་ཅིག་ཤོས་ཀྱིས་དངུལ་སྒོར་ལྔ་བཅུའི་བུ་ལོན་ཆད་ཡོད༌ནའང༌།
LUK 7:42 མི་དེ་གཉིས་ཀྱིས་བུ་ལོན་འཇལ་མ་ཐུབ༌པས། བུན་བདག་གིས་སྙིང་རྗེ་སྐྱེས་ནས་མི་དེ་གཉིས་ཀྱི་བུ་ལོན་མེད་པར་བྱས་སོ།། དེས་ན་མི་དེ་གཉིས་ལས་སུ་ཞིག་གིས་ཁོ་ལ་ལྷག་པར་གཅེས་སམ་ཞེས་གསུངས་པ༌ལ།
LUK 7:43 སི་མོན་གྱིས་བུ་ལོན་མང་པོ་མེད་པར་བྱས་པ་དེས་ཁོ་ལ་ལྷག་ཏུ་གཅེས་སོ་སྙམ་ཞེས་ཞུས༌ཤིང༌། སྐྱབས་མགོན་ཡེ་ཤུས་ཁྱོད་ཀྱིས་སྨྲས་པ་ལེགས་སོ་ཞེས་གསུངས་པ༌དང༌།
LUK 7:44 ཡང་ཞལ་ཕྱིར་འཁོར་ཏེ་བུད་མེད་དེར་གཟིགས་ནས་སི་མོན་ལ་འདི་སྐད༌དུ། ཁྱོད་ཀྱིས་བུད་མེད་འདི་མཐོང་བྱུང༌ངམ། ང་རང་ཁྱོད་ཀྱི་ཁྱིམ་དུ་ཡོང་ནའང་ཁྱོད་ཀྱིས་ང་རང་ལ་རྐང་པ་བཀྲུ་བྱེད་ཀྱི་ཆུ་ཡང་མ་བླུགས༌མོད། འོན་ཀྱང་ཁོ་མོའི་མིག་ཆུས་བདག་གི་རྐང་པ་བརླན་ཞིང་སྐྲ་ཡིས་ཕྱིས།
LUK 7:45 ཡང་ཁྱོད་ཀྱིས་བདག་ལ་འོ་མ་བྱས༌ཀྱང༌། ཁོ་མོས་ང་རང་འདིར་ཡོང་བ་ནས་བཟུང་བདག་གི་རྐང་པར་མཚམས་མེད་པར་འོ་བྱས།
LUK 7:46 ཡང་ཁྱོད་ཀྱིས་བདག་གི་མགོར་སྣུམ་གྱིས་མ་བྱུགས༌ནའང༌། ཁོ་མོས་བདག་གི་རྐང་པར་སྤོས་ཆུ་བྱུགས་སོ།།
LUK 7:47 དེའི༌ཕྱིར། བདག་གིས་ཁྱོད་ལ་སྨྲ་བར་བྱ༌སྟེ། ཁོ་མོས་བདག་ལ་ཤིན་ཏུ་གཅེས་པས། ཁོ་མོར་སྡིག་པ་མང་པོ་ཡོད་ཀྱང་ཐམས་ཅད་བསལ་བ་ཡིན། འོན་ཀྱང་སུ་ཡི་སྡིག་པ་ཉུང་ངུ་བསལ་བ་དེས་ཉུང་ངུ་ཞིག་གཅེས་པ་ཡིན་ཞེས་གསུངས་སོ།།
LUK 7:48 དེ་ནས་ཁོང་གིས་བུད་མེད་དེ་ལ་ཁྱོད་ཀྱི་སྡིག་པ་བསལ་བ་ཡིན་ཞེས་གསུངས་པ༌ན།
LUK 7:49 ཁོང་དང་མཉམ་དུ་བཟའ་བཏུང་སྤྱད་ནས་སྡོད་པའི་མི་རྣམས་ཀྱི་སེམས་སུ་མི་འདི་ནི་སུ་ཡིན༌ནམ། ཁོང་གིས་སྡིག་པའང་བསལ་བ་ཡིན་ཞེས་བསམས་སོ།།
LUK 7:50 ཡང་སྐྱབས་མགོན་ཡེ་ཤུས་བུད་མེད་དེ་ལ་འདི་སྐད༌དུ། ཁྱོད་ཀྱི་དད་པས་ཁྱོད་རང་བསྐྱབས་པ་ཡིན། བདེ་བའི་ངང་ནས་ཕྱིར་སོང་ཞིག་ཅེས་གསུངས༌སོ།།
LUK 8:1 ཡུན་རིང་མ་འགོར༌བར། སྐྱབས་མགོན་ཡེ་ཤུ་གྲོང་ཁྱེར་དང་གྲོང་སྡེ་སོ་སོར་ཕེབས་ནས་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་བསྒྲགས་ཤིང་སྤེལ་ཏོ།། ཁོང་དང་ལྷན་དུ་ཐུགས་སྲས་བཅུ་གཉིས་ཡོད༌ལ།
LUK 8:2 དེ་སྔར་གདོན་འདྲེས་བཟུང་བ་དང་ནད་ཀྱིས་མནར་བ་ལས་ཐར་བའི་བུད་མེད་འགའ་ཡང་མཆིས། དེ་དག་ནི་གདོན་འདྲེ་བདུན་ཕྱིར་སྤྲད་ཟིན་པའི་མཱག་རྡལ་གྱི་མིར་ཡམ༌དང༌།
LUK 8:3 ས་གནས་དཔོན་པོ་ཧེ་རོ་དཱའི་གཉེར་པ་ཀུ་སཱའི་ཆུང་མ་ཡོ་ཨན་ནཱ༌དང༌། གཞན་ཡང་སི་སན་ནཱ་སོགས་བུད་མེད་མང་པོ་ཡོད༌དེ། ཁོ་མོ་རྣམས་ཀྱིས་རང་གི་རྒྱུ་ནོར་སྤྱད་ནས་ཁོང་རྣམས་ལ་རྒྱབ་རོགས་བྱས༌སོ།།
LUK 8:4 གྲོང་རྡལ་སོ་སོ་ནས་མི་རྣམས་སྐྱབས་མགོན་ཡེ་ཤུར་མཇལ་དུ་ཡོང་སྟེ་མི་ཤིན་ཏུ་མང་པོ་འཛོམས་པ༌ན། ཁོང་གིས་དཔེའི་སྒོ་ནས་འདི་སྐད༌དུ།
LUK 8:5 ཞིང་འདེབས་མཁན་ཞིག་ཕྱི་རོལ་ཏུ་ཞིང་འདེབས་སུ་སོང་བ༌དང༌། ས་བོན་གཏོར་དུས། ས་བོན་ཁ་ཤས་ལམ་ཁར་ཐོར་བ་རྐང་པས་བརྫིས་ཤིང་ནམ་མཁའི་བྱ་ཡིས་ཟོས།
LUK 8:6 ས་བོན་ཁ་ཤས་ས་ཉུང་སའི་རྡོ་གསེབ་ཏུ་ཐོར་ཞིང་ཡར་སྐྱེས་པ་ན་བརླན་གཤེར་མེད་པས་བསྐམས།
LUK 8:7 ས་བོན་ཁ་ཤས་ཚེར་མའི་གསེབ་ལ་ཐོར་ཞིང་ཚེར་མ་དང་མཉམ་དུ་སྐྱེས་པས་ཚེར་མས་མནན།
LUK 8:8 ཡང་ས་བོན་ཁ་ཤས་ས་གཤིན་ནང་དུ་ཐོར་ཞིང་ཆེར་སྐྱེས་ཏེ་འབྲས་བུ་ལྡབ་བརྒྱ་སྨིན་པ་ཡིན་ཞེས་གསུང་བཞིན་སྐད་ཆེན༌པོས། རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
LUK 8:9 ཐུགས་སྲས་རྣམས་ཀྱིས་ཁོང་ལ་དཔེ་དེའི་དོན་ཅི་ཡིན་ཞེས་ཞུས་པ༌ན།
LUK 8:10 ཁོང་གིས་དེ་རྣམས་ལ་འདི་སྐད༌དུ། དཀོན་མཆོག་གི་རྒྱལ་སྲིད་ཀྱི་གསང་བ་རྣམས་ནི་ཁྱོད་ཅག་ལ་ཤེས་སུ་འཇུག་པ་ཡིན་ཡང༌། མི་གཞན་རྣམས་ལ་དཔེ་རུ་བཀོད་ནས་བརྗོད་པ་ཡིན། དེ་ནི་མི་དེ་རྣམས་ཀྱིས་མིག་གིས་བལྟས་ཀྱང་མི་མཐོང་བ་དང་རྣ་བས་ཐོས་ཀྱང་དོན་མི་རྟོགས་པའི་ཕྱིར་ཡིན་ཞེས་གསུངས་སོ།།
LUK 8:11 ཡང་ཁོང་གིས་དཔེ་དེའི་དོན་འདི་ལྟ༌སྟེ། ས་བོན་ནི་དཀོན་མཆོག་གི་བཀའ་ཡིན།
LUK 8:12 ས་བོན་ལམ་ཁར་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས༌ནའང༌། བདུད་ཡོང་ནས་དད་པ་མི་བྱེད་ཅིང་ཐར་པའང་མི་འཐོབ་པའི༌ཕྱིར། མི་དེ་རྣམས་ཀྱི་སེམས་ལས་བཀའ་ཕྲོགས་ཏེ་ཁྱེར་སོང་བ་རྣམས་ཡིན།
LUK 8:13 དེ་བཞིན་དུ་ས་ཉུང་སའི་རྡོ་གསེབ་ཏུ་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས་ཚེ་དགའ་ཞིང་དང་དུ་བླངས༌ནའང༌། སེམས་སུ་རྩ་བ་མ་རྒྱས་པས་དུས་ཡུན་ཐུང་ངུ་ལ་དད་པ་བྱེད་ཀྱང་ཉམས་ཚོད་དང་འཕྲད་དུས་དད་པ་ལོག་པ་རྣམས་ཡིན།
LUK 8:14 ཡང་ཚེར་མའི་གསེབ་ལ་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས་ཀྱང་རིམ་གྱིས་ཚེ་འདིའི་སེམས་ཁུར༌དང༌། རྒྱུ་ནོར་དང་འདོད་ཡོན་ལ་ཆགས་པའི་དབང་གིས་བཀའ་མནན་ཏེ་རང་སེམས་སུ་འབྲས་བུ་སྨིན་མ་ཐུབ་པ་རྣམས་ཡིན།
LUK 8:15 ཡང་ས་གཤིན་ནང་དུ་ཐོར་བ་ནི་མི་ལ་ལས་དཀོན་མཆོག་གི་བཀའ་ཐོས་ཏེ། གཞུང་རྒྱུད་དྲང་ཞིང་ངང་རྒྱུད་བཟང་པོའི་ངང་ནས་སེམས་སུ་དམ་པོར་བཟུང་ཞིང་བཟོད་བསྲན་གྱིས་འབྲས་བུ་སྨིན་དུ་འཇུག་པ་རྣམས་ཡིན་ཞེས་གསུངས༌སོ།།
LUK 8:16 ཡང་ཁོང་གིས་འདི་སྐད༌དུ། མི་སུས་ཀྱང་སྒྲོན་མེ་བསྒྲོན་རྗེས་སྣོད་ཀྱིས་མི་འགེབས༌ལ། མལ་ཁྲིའི་འོག་ཏུའང་མི་འཇོག༌པར། ནང་དུ་ཡོང་བའི་མི་རྣམས་ཀྱིས་འོད་མཐོང་བའི་ཕྱིར་སྒྲོན་སྟེགས་སྟེང་དུ་འཇོག་པ་ཡིན་ནོ།།
LUK 8:17 རྒྱུ་མཚན་ནི་སྦས་པའི་དོན་ཐམས་ཅད་མི་མངོན་པ་ཅི་ཡང་མེད༌ལ། གསང་བའི་དོན་ཐམས་ཅད་ཀྱང་མངོན་པར་མི་འགྱུར་བའམ་མི་ཤེས་པ་ཅི་ཡང་མེད།
LUK 8:18 དེའི༌ཕྱིར། ཁྱོད་ཅག་གིས་ཅི་ལྟར་མཉན་པ་ལ་གཟབ་པར༌གྱིས། རྒྱུ་མཚན་ནི་སུ་ཞིག་ལ་ཡོད་པ་དེ་ལ་ད་དུང་ཡང་གནང་ངེས༌ཤིང༌། སུ་ཞིག་ལ་མེད་པ་དེ་ལས་རང་ལ་ཡོད་འདོད་པ་དེའང་ཕྱིར་ལེན་པར་འགྱུར་ཞེས་གསུངས༌སོ།།
LUK 8:19 སྐྱབས་མགོན་ཡེ་ཤུའི་ཡུམ་དང་ཁོང་གི་སྐུ་མཆེད་རྣམས་ཁོང་ལ་མཇལ་དུ་ཡོང༌ནའང༌། གནས་དེར་མི་མང་པོ་འཛོམས་པས་ཁོང་གི་དྲུང་དུ་འགྲོ་མ་ཐུབ།
LUK 8:20 མི་ཞིག་གིས་ཁོང་ལ་ཁྱེད་ཀྱི་ཡུམ་དང་སྐུ་མཆེད་རྣམས་སླེབས་ཏེ་ཕྱི་རོལ་ཏུ་ལངས་བསྡད་ཡོད༌ལ། ཁྱེད་ལ་མཇལ་འདོད་ཟེར་ཞེས་ཞུས་སོ།།
LUK 8:21 འོན་ཀྱང་། ཁོང་གིས་དེ་རྣམས་ལ་འདི་སྐད༌དུ། དཀོན་མཆོག་གི་བཀའ་ལ་ཉན་ཞིང་དེ་ལྟར་བྱེད་པ་རྣམས་ནི་བདག་གི་མ་དང་སྤུན་རྣམས་ཡིན་ཞེས་གསུངས༌སོ།།
LUK 8:22 ཡང་ཉིན་ཞིག༌ལ། སྐྱབས་མགོན་ཡེ་ཤུ་དང་ཐུགས་སྲས་རྣམས་མཚོ་གྲུར་བསྡད༌ཅིང༌། ཁོང་གིས་ཐུགས་སྲས་རྣམས་ལ་འདི་སྐད༌དུ། ངེད་ཅག་མཚོའི་ཕ་རོལ་ཏུ་འགྲོའོ་ཞེས་གསུངས་ཤིང་ཁོ་རྣམས་ཀྱིས་གྲུ་གཏོང་འགོ་བརྩམས།
LUK 8:23 མཚོ་གྲུ་མདུན་དུ་སྐྱོད་བཞིན་པའི་དུས་སུ་སྐྱབས་མགོན་ཡེ་ཤུ་མནལ་ལ་གཟིམས། གློ་བུར༌ཉིད་ལ། མཚོ་ཐོག་ནས་རླུང་ཆེན་གཡུགས་ཤིང་མཚོ་གྲུའི་ནང་དུ་ཆུས་འགེང་བཞིན་སྣུབ་ཉེན་ཆེ་བའི་སྐབས༌སུ།
LUK 8:24 ཐུགས་སྲས་རྣམས་ཡོང་ནས་སྐྱབས་མགོན་ཡེ་ཤུ་གཟིམས་ལས་བསླངས༌ཏེ། སྟོན་པ༌ལགས། སྟོན་པ་ལགས། བདག་ཅག་འཆི་ལ་ཉེའོ་ཞེས་ཞུས་པ༌ན། ཁོང་ཡར་བཞེངས་ཏེ་རླུང་དང་རྦ་རླབས་ལ་བཀའ་བཀྱོན་མཛད༌པས། མཚོ་རླུང་གཡུག་མཚམས་ཆད་ཅིང་རྦ་རླབས་ཞི་བར་གྱུར་ཏོ།།
LUK 8:25 ཁོང་གིས་ཐུགས་སྲས་རྣམས་ལ་འདི་སྐད༌དུ། ཁྱོད་ཅག་གི་དད་སེམས་གང་དུ་ཡོད་ཅེས་གསུངས་པ༌དང༌། དེ་རྣམས་འཇིགས་ཤིང་སྐྲག་པ་དང་ངོ་མཚར་བར་གྱུར་ནས་ཕན་ཚུན་ལ་འདི༌ལྟར་དུ། འདི་ནི་སུ་ཡིན༌ནམ། ཁོང་གིས་རླུང་དང་མཚོ་ལ་བཀའ་གནང༌ཞིང༌། དེས་ཀྱང་ཁོང་གི་བཀའ་ལ་ཉན་ཞེས་སྨྲས༌སོ།།
LUK 8:26 ཁོང་རྣམས་མཚོ་གྲུར་བསྡད་ནས་མཚོ་ག་ལིལ་ཕ་རོལ་གྱི་གེ་ར་སཱ་ཡུལ་དུ་སོང་ངོ་།།
LUK 8:27 སྐྱབས་མགོན་ཡེ་ཤུ་གྲུ་ལས་སྐམ་སར་ཕེབས༌པའི་ཚེ། ཡུལ་དེའི་གྲོང་ཁྱེར་གྱི་གདོན་འདྲེས་བཟུང་བའི་མི་ཞིག་ཁོང་ལ་མཇལ། མི་དེ་ནི་ཡུན་རིང་པོར་གོན་པ་མ་གྱོན་ཞིང་ཁང་པའི་ནང་དུའང་མ་བསྡད་པར་དུར་ཁྲོད་དུ་སྡོད་པ་ཞིག་ཡིན།
LUK 8:28 མི་དེས་སྐྱབས་མགོན་ཡེ་ཤུ་མཐོང་བ་དང་ཁོང་གི་དྲུང་དུ་ཕྱག་བཙལ་ནས་སྐད་ཆེན༌པོས། ཀྱེ། བླ་ན་མེད་པའི་དཀོན་མཆོག་གི་སྲས་ཡེ་ཤུ༌ལགས། ངེད་གཉིས་ཀྱི་བར་དུ་འབྲེལ་བ་ཅི་མཆིས༌སམ། ངས་ཁྱེད་ལ་ཞུ་བ་བྱེད༌དེ། ཁྱེད་ཀྱིས་ང་རང་སྡུག་ལ་མི་སྦྱོར་བར་མཛོད་ཅེས་ཞུས་སོ།།
LUK 8:29 རྒྱུ་མཚན་ནི་ཁོང་གིས་དེ་སྔར་གདོན་འདྲེ་ལ་མི་དེའི་ལུས་ནས་ཕྱིར་འབུད་དགོས་པའི་བཀའ་གནང་མྱོང་བས༌སོ།། མ་གཞི་གདོན་འདྲེས་མི་དེ་ཐེངས་དུ་མར་བཟུང་བ༌དང༌། མི་རྣམས་ཀྱིས་མི་དེ་ལྕགས་ཐག་གིས་བཀྱིགས་ཤིང་ལྕགས་སྒྲོག་བརྒྱབ་སྟེ་རྒྱུན་དུ་བསྲུངས་ནའང་གདོན་འདྲེ་དེས་ལྕགས་ཐག་དང་ལྕགས་སྒྲོག་ཐམས་ཅད་བཅད་ནས་མི་དེ་དབེན་སྟོང་དུ་བསྐྲད་པ་ཡིན།
LUK 8:30 སྐྱབས་མགོན་ཡེ་ཤུས་མི་དེ་ལ་ཁྱོད་ཀྱི་མིང་ལ་ཅི་ཟེར་ཞེས་དྲིས་པ༌ན། ཁོ་ན༌རེ། ངའི་མིང་ལ་དཔུང་ཚོགས་ཟེར་ཞེས་ཞུས་སོ།། རྒྱུ་མཚན་ནི་མི་དེར་ཞུགས་པའི་གདོན་འདྲེ་ཤིན་ཏུ་མང་བས༌སོ།།
LUK 8:31 གདོན་འདྲེ་རྣམས་ཀྱིས་ཁོ་རྣམས་ཞབས་མེད་པའི་དོང་ནང་དུ་འཕེན་པའི་བཀའ་མི་གནང་བའི་ཕྱིར་ཁོང་ལ་ཞུ་བ་ཞུས།
LUK 8:32 དེའི་ཚེ་རི་སྒང་ནས་ཕག་ཁྱུ་ཆེན་པོ་ཞིག་འཚོ་བཞིན་ཡོད་པ༌དང༌། གདོན་འདྲེ་དག་གིས་ཁོ་རྣམས་ཕག་ཁྱུའི་ནང་དུ་འཇུག་པར་མཛོད་ཅེས་ཞུ་བ་ཞུས་པ༌ལ། ཁོང་གིས་ཀྱང་དེ་རྣམས་ཀྱི་ཞུ་བ་ལྟར་གནང༌བས།
LUK 8:33 གདོན་འདྲེ་རྣམས་མི་དེའི་ལུས་ནས་ཕྱིར་བུད་དེ་ཕག་གི་ནང་དུ་ཞུགས་པ༌དང༌། ཕག་ཁྱུ་དེའང་གཡང་གཟར་དུ་བརྒྱུགས་ཤིང་མཚོ་ནང་དུ་ལྷུང་སྟེ་ནུབ་ནས༌ཤིའོ།།
LUK 8:34 ཕག་རྫི་རྣམས་ཀྱིས་དོན་དེ་མཐོང་ནས་བྲོས་པ༌དང༌། གྲོང་ཁྱེར་དང་གྲོང་སྡེའི་མི་རྣམས་ལ་གནས་ཚུལ་དེ་སྨྲས༌པས།
LUK 8:35 མི་རྣམས་ཅི་ཞིག་བྱུང་བར་བལྟ་རུ་ཡོང་བ་དང་སྐྱབས་མགོན་ཡེ་ཤུའི་དྲུང་དུ་སླེབས་དུས། སྔར་གདོན་འདྲེ་ཕྱིར་བསྐྲད་ཟིན་པའི་མི་དེ་དྲན་པ་སོས་ཤིང་ལུས་ལ་གོས་གྱོན་ཏེ་སྐྱབས་མགོན་ཡེ་ཤུའི་ཞབས་དྲུང་དུ་ཙོག་པུར་བསྡད་ཡོད་པ་མཐོང་ནས་ཁོ་རྣམས་འཇིགས༌པ་རེད།
LUK 8:36 དོན་དེ་མཐོང་མཁན་རྣམས་ཀྱིས་གདོན་འདྲེས་བཟུང་བའི་མི་དེ་ཇི་ལྟར་སོས་པའི་གནས་ཚུལ་མི་ཚོགས་ལ་སྨྲས་པ༌དང༌།
LUK 8:37 གེ་ར་སཱ་ཡུལ་དང་དེའི་མཐའ་འཁོར་གྱི་ཡུལ་མི་ཐམས་ཅད་ཤིན་ཏུ་འཇིགས་པར་གྱུར༌ཏེ། སྐྱབས་མགོན་ཡེ་ཤུ་ཁོ་རྣམས་དང་འབྲལ་དགོས་པར་ཞུ་བ་ཞུས༌པས། སྐྱབས་མགོན་ཡེ་ཤུ་དང་བཅས་པ་མཚོ་གྲུར་བཞུགས་ནས་ཕྱིར་ཕེབས་སོ།།
LUK 8:38 འོན༌ཀྱང༌། ལུས་ནས་གདོན་འདྲེ་ཕྱིར་བསྐྲད་ཟིན་པའི་མི་དེས་སྐྱབས་མགོན་ཡེ་ཤུ་དང་ལྷན་དུ་འགྲོ་རུ་འཇུག་པར་ཞུ་བ་ཞུས༌ནའང༌། སྐྱབས་མགོན་ཡེ་ཤུས་འདི་སྐད༌དུ།
LUK 8:39 ཁྱོད་རང་ཕྱིར་རང་ཡུལ་དུ་སོང༌དང༌། དཀོན་མཆོག་གིས་ཁྱོད་ལ་དོན་ཆེན་ཅི་ལྟ་བུ་མཛད་པ་རྣམས་ཤོད་ཅིག་ཅེས་བཀའ་གནང་བ༌དང༌། མི་དེ་ཕྱིར་སོང་ནས་སྐྱབས་མགོན་ཡེ་ཤུས་ཁོ་རང་ལ་ཕན་ཆེན་པོ་ཅི་ལྟ་བུ་བཏགས་པ་རྣམས་གྲོང་ཁྱེར་ཡོངས་ལ་བསྒྲགས་སོ།།
LUK 8:40 སྐྱབས་མགོན་ཡེ་ཤུ་ཕྱིར་ཕེབས་པའི་སྐབས༌སུ། ཁོང་ལ་སྒུག་བཞིན་པའི་མི་ཚོགས་ཀྱིས་ཁོང་ལ་བསུ་བ༌བྱས་སོ།།
LUK 8:41 གནས་དེར་ཆོས་ཁང་གི་དབུ་འཛིན་པ་ཡ་ཨིར་ཟེར་བ་ཞིག་ཡོད་པ་ཡོང་ནས་སྐྱབས་མགོན་ཡེ་ཤུའི་ཞབས་དྲུང་དུ་ཕྱག་བཙལ་ཏེ་ཁོའི་ཁྱིམ་དུ་ཕེབས་དགོས་པར་ཞུ་བ་ཞུས་སོ།།
LUK 8:42 རྒྱུ་མཚན་ནི་མི་དེར་ལོ་བཅུ་གཉིས་ཙམ་གྱི་བུ་མོ་གཅིག་ཡོད་པ་ད་ལྟ་འཆི་ལ་ཉེ་བས༌སོ།། སྐྱབས་མགོན་ཡེ་ཤུ་ཁྱིམ་དེར་ཕེབས་བཞིན་པའི་དུས༌སུ། མི་ཚོགས་ཀྱིས་ཁོང་གི་མཐའ་ནས་བསྐོར་ཅིང་འཚང་ཁ་བརྒྱབ་བོ།།
LUK 8:43 དེའི་ཚེ། ཁྲག་འཛིར་བའི་མོ་ནད་བྱུང་སྟེ་ལོ་བཅུ་གཉིས་འགོར་བའི་བུད་མེད་ཅིག་ཡོད་པ༌ལ། སྨན་པ་བསྟེན་ནས་ཁོ་མོར་ཅི་ཡོད་པ་ཐམས་ཅད་བཀོལ་ཚར༌ནའང༌། སུས་ཀྱང་ནད་དེ་འཇོམས་མ་ནུས་སོ།།
LUK 8:44 བུད་མེད་དེ་སྐྱབས་མགོན་ཡེ་ཤུའི་སྐུ་རྒྱབ་ཏུ་ཡོང་སྟེ་ཁོང་གི་ན་བཟའི་འདབས་ཁར་རེག་མ་ཐག་ཁོ་མོའི་ཁྲག་བཞུར་མཚམས་རྦད་དེ་ཆད།
LUK 8:45 སྐྱབས་མགོན་ཡེ་ཤུས་འདི་སྐད༌དུ། བདག་ལ་རེག་མཁན་སུ་ཡིན་ནམ་ཞེས་དྲིས་ནའང་མི་སུས་ཀྱང་ཁས་མ་བླངས་པ༌ན། པེ་ཏྲོ་ན༌རེ། སྟོན་པ༌ལགས། མི་མང་པོས་ཁྱེད་ཀྱི་མཐའ་ནས་བསྐོར་ཞིང་འཚང་ཁ་བརྒྱབ་ཅེས་ཞུས༌ནའང༌།
LUK 8:46 སྐྱབས་མགོན་ཡེ་ཤུས་འདི་སྐད༌དུ། བདག་གི་ལུས་ནས་ནུས་མཐུ་ཞིག་ཕྱིར་ཐོན་པ་ཚོར་བྱུང་བས་མི་ཞིག་གིས་བདག་ལ་རེག་ཅེས་གསུངས་སོ།།
LUK 8:47 བུད་མེད་དེས་དོན་འདི་གསང་མི་ཐུབ་པ་ཤེས༌ཏེ། སྐྲག་ཅིང་འདར་བཞིན་སྐྱབས་མགོན་ཡེ་ཤུའི་དྲུང་དུ་ཡོང་ནས་ཕྱག་བཙལ་ཞིང༌། ཁོང་གི་ན་བཟའ་ལ་རེག་པའི་རྒྱུ་མཚན་དང་རེག་པ་ཙམ་གྱིས་ཁོ་མོའི་མོ་ནད་ཇི་ལྟར་སོས་པའི་དོན་དེ་མི་ཐམས་ཅད་ཀྱི་མདུན་ནས་སྨྲས་སོ།།
LUK 8:48 སྐྱབས་མགོན་ཡེ་ཤུས་བུད་མེད་དེ་ལ་འདི་སྐད༌དུ། བུ༌མོ། ཁྱོད་ཀྱི་དད་པས་ཁྱོད་རང་བསྐྱབས་པ༌ཡིན། བདེ་བར་ཕྱིར་སོང་ཞིག་ཅེས་གསུངས༌སོ།།
LUK 8:49 ཁོང་གིས་དེ་ལྟར་གསུང་བཞིན་པའི་དུས༌སུ། མི་ཞིག་ཆོས་ཁང་གི་དབུ་འཛིན་པའི་ཁྱིམ་ནས་ཡོང་སྟེ་ན༌རེ། ཁྱེད་ཀྱི་བུ་མོ་ཤི་ཟིན་པས་ད་ལྟ་སློབ་དཔོན་ལ་འོ་བརྒྱལ་མ་བྱེད་ཅེས་སྨྲས༌ཤིང༌།
LUK 8:50 སྐྱབས་མགོན་ཡེ་ཤུས་གཏམ་དེ་གསན་ནས་ཆོས་ཁང་གི་དབུ་འཛིན་པ་ལ་འདི་སྐད༌དུ། མ་འཇིགས་པར་དད་པ་ཁོ་ན་བྱོས༌དང༌། བུ་མོ་བསྐྱབ་པར་འགྱུར་ཞེས་གསུངས་པ༌དང༌།
LUK 8:51 དབུ་འཛིན་པའི་ཁྱིམ་དུ་ཕེབས༌སྐབས། ཁོང་གིས་པེ་ཏྲོ་དང་། ཡ༌ཀོབ། ཡོ་ཧ༌ནན། གཞན་ཡང་བུ་མོའི་ཕ་མ་ལས་གཞན་མི་སུ་ཡང་ཁྱིམ་དུ་མི་ཡོང་བར་བྱས།
LUK 8:52 མི་ཐམས་ཅད་ཀྱིས་བུ་མོ་དེར་མྱ་ངན་བྱེད་ཅིང༌ངུའོ༎ ཁོང་གིས་འདི་སྐད༌དུ། མ་ངུ༌ཞིག བུ་མོ་ཤི་བ་མ་ཡིན་པར་གཉིད་འདུག་ཅེས་གསུངས་པ༌ན།
LUK 8:53 དེ་རྣམས་ཀྱིས་བུ་མོ་ཤི་ཟིན་པ་ཤེས་ནས་ཁོང་ལ་འཕྱ་དགོད་བྱས་སོ།།
LUK 8:54 འོན་ཀྱང་། སྐྱབས་མགོན་ཡེ་ཤུས་བུ་མོ་དེའི་ལག་པར་འཇུས༌ཏེ། བུ་མོ། ཡར་ལོངས་ཤིག་ཅེས་བཀའ་གནང་བ༌ན།
LUK 8:55 བུ་མོའི་རྣམ་ཤེས་ཕྱིར་ལོག་ཅིང་དེ་མ་ཐག་ཡར་ལངས། ཁོང་གིས་བུ་མོ་དེར་ཁ་ཟས་སྟེར་དགོས་པའི་བཀའ་གནང་བ༌དང༌།
LUK 8:56 བུ་མོའི་ཕ་མ་གཉིས་ཤིན་ཏུ་ངོ་མཚར་བར་གྱུར། འོན་ཀྱང་། སྐྱབས་མགོན་ཡེ་ཤུས་མི་དེ་རྣམས་ལ་དོན་འདི་མི་གཞན་སུ་ལའང་མི་སྨྲ་བའི་བཀའ་གནང༌ངོ༌།།
LUK 9:1 སྐྱབས་མགོན་ཡེ་ཤུས་ཐུགས་སྲས་བཅུ་གཉིས་པོ་རང་གི་དྲུང་དུ་བོས༌ཏེ། ཁོ་རྣམས་ལ་གདོན་འདྲེ་མཐའ་དག་འདུལ་བ་དང་ནད་འཇོམས་པའི་ནུས་མཐུ་དང་དབང་གནང༌ཞིང༌།
LUK 9:2 ཡང་དཀོན་མཆོག་གི་རྒྱལ་སྲིད་ཀྱི་ཆོས་སྒྲོག་པ་དང་ནད་གསོ་བའི་ཆེད་དུ་མངགས་སོ།།
LUK 9:3 ཁོང་གིས་ཐུགས་སྲས་རྣམས་ལ་འདི་སྐད༌དུ། ལམ་དུ་ཆས་སྐབས་མཁར་བ༌དང༌། ཁུག༌མ། ལམ༌བྲོ། དངུལ༌སྒོར། ནང་གོས་ལྷག་མ་ཅི་ཡང་མ་འཁྱེར༌ཅིག
LUK 9:4 ཁྱོད་ཅག་ཁྱིམ་གང་ལ་སོང་ནའང་དེ་རུ་སྡོད༌ཅིག ཡང་དེ་ནས་ལམ་ལ་ཆས༌ཤིག
LUK 9:5 ཡང་ཡུལ་གང་གི་མི་ཡིས་ཁྱོད་ཅག་ལ་གནས་ཚང་མི་གཏོང༌ན། ཁྱོད་ཅག་གྲོང་རྡལ་དེ་དང་ཁ་འབྲལ་བའི་དུས༌སུ། ཁོ་རྣམས་མི་འགྲིག་པ་སྟོན་པའི་ཆེད་དུ་རྐང་པའི་སྟེང་གི་ས་རྡུལ་སྤྲུགས་ཤིག་ཅེས་གསུངས༌སོ།།
LUK 9:6 ཐུགས་སྲས་རྣམས་གྲོང་སྡེ་སོ་སོར་སོང་ནས་འཕྲིན་བཟང་བསྒྲགས་ཤིང་ཡུལ་གྲུ་ཀུན་གྱི་ནད་པ་རྣམས་གསོ་བར་བྱས་སོ།།
LUK 9:7 ས་གནས་དཔོན་པོ་ཧེ་རོ་དཱ་ཡིས་དོན་དེ་ཐམས་ཅད་ཐོས་ཏེ་སེམས་ལ་ཐེ་ཚོམ་ཆེན་པོ་སྐྱེས། རྒྱུ་མཚན་ནི་མི་ལ་ལས་ཁྲུས་གསོལ་མཁན་ཡོ་ཧ་ནན་ཤི་བ་ལས་སླར་གསོན་པ་རེད་ཅེས་དང༌།
LUK 9:8 ཡང་ལ་ལས་ཨེ་ལི་ཡཱ་དངོས་སུ་མངོན་བྱུང་ཞེས༌དང་། ཡང་ལ་ལས་གནའ་བོའི་ལུང་སྟོན་པ་ཞིག་ཤི་བ་ལས་སླར་གསོན་པ་རེད་ཅེས༌སྨྲས་པའི་ཕྱིར་རོ།།
LUK 9:9 ཧེ་རོ་དཱ་ན༌རེ། བདག་གིས་ཁྲུས་གསོལ་མཁན་ཡོ་ཧ་ནན་གྱི་མགོ་བཅད་ཟིན༌ནའང༌། ངས་ད་དུང་དོན་དེ་འདྲ་ཐོས་པའི་མི་དེ་སུ་ཡིན་ནམ་ཞེས་སྨྲས་ཤིང་སྐྱབས་མགོན་ཡེ་ཤུར་མཇལ་འདོད་དོ།།
LUK 9:10 སྐུ་ཚབ་པ་རྣམས་ཕྱིར་ལོག་སྟེ་ཁོ་རྣམས་ཀྱིས་དོན་ཅི་ཞིག་བསྒྲུབས་པ་ཐམས་ཅད་སྐྱབས་མགོན་ཡེ་ཤུར་ཞུས་སོ།། ཁོང་གིས་དེ་རྣམས་ཁྲིད་ནས་པེ་སད་དཱ་གྲོང་རྡལ་དུ་ཕེབས༌ནའང༌།
LUK 9:11 མི་ཚོགས་ཀྱིས་དོན་དེ་ཤེས་ནས་ཁོང་གི་རྗེས་སུ་འབྲངས། ཁོང་གིས་དེ་རྣམས་བསུས་ཤིང་དཀོན་མཆོག་གི་རྒྱལ་སྲིད་ཀྱི་སྐོར་གསུངས་པ༌དང༌། ནད་གསོ་དགོས་པ་རྣམས་ཀྱི་ནད་གསོས་པའོ།།
LUK 9:12 ཉི་མ་ནུབ་ལ་ཉེ་བའི་དུས༌སུ། ཐུགས་སྲས་བཅུ་གཉིས་པོ་ཁོང་གི་དྲུང་དུ་ཡོང་སྟེ་ན༌རེ། ས་ཆ་འདི་ནི་དབེན་སྟོང་ཡིན་པས་མི་རྣམས་ཉེ་འཁོར་གྱི་གྲོང་སྡེ་དང་མཐའ་ཁུལ་དག་ལ་གནས་ཚང་གཡར་བ་དང་བཟའ་བཏུང་འཚོལ་ཕྱིར་གཏོང་བར་མཛོད་ཅེས་ཞུས་པ༌ན།
LUK 9:13 ཁོང་གིས་འདི་སྐད༌དུ། ཁྱོད་ཅག་གིས་མི་ཚོགས་ལ་ཁ་ཟས་བྱིན་ཅིག་ཅེས་གསུངས་པ༌དང༌། ཐུགས་སྲས་རྣམས་ཀྱིས་བདག་ཅག་ལ་བག་ལེབ་ལྔ་དང་ཉ་གཉིས་ལས་མེད༌པས། གལ་ཏེ་ངེད་ཅག་མི་ཚོགས་ལ་ཁ་ཟས་ཉོ་རུ་མ་སོང་ན་འདང་བ་མིན་ཞེས་ཞུས་སོ།།
LUK 9:14 དེའི་དུས་སུ་གནས་དེར་སྐྱེས་པ་ཁོ་ན་བསྡོམས་པས་ལྔ་སྟོང་ཙམ་ཡོད། སྐྱབས་མགོན་ཡེ་ཤུས་ཐུགས་སྲས་རྣམས་ལ་མི་ཚོགས་དེ་དག་མི་ལྔ་བཅུ་ཙམ་རེ་གྲལ་སྐོར་གཅིག་ཏུ་བྱས་ནས་སྡོད་དུ་ཆུག་ཅེས་གསུངས་པ༌དང༌།
LUK 9:15 ཐུགས་སྲས་རྣམས་ཀྱིས་ཀྱང་བཀའ་བཞིན་དུ་མི་ཚོགས་དེ་ལྟར་སྡོད་དུ་བཅུག
LUK 9:16 སྐྱབས་མགོན་ཡེ་ཤུས་བག་ལེབ་ལྔ་དང་ཉ་གཉིས་པོ་ཕྱག་ཏུ་བསྣམས་ཏེ་ནམ་མཁར་གཟིགས་ནས་བྱིན་རླབས་གནང༌རྗེས། དུམ་བུར་བྱས་ནས་ཐུགས་སྲས་རྣམས་ལ་གནང་ཞིང་མི་ཚོགས་ཀྱི་མདུན་དུ་བཀྲམ་པའོ༎
LUK 9:17 མི་ཐམས་ཅད་ཀྱིས་ཀྱང་ཟོས་ཤིང་ལྟོ་བ་འགྲངས་པ༌དང༌། ཐུགས་སྲས་རྣམས་ཀྱིས་ཟས་ལྷག་བསྡུས་ཏེ་སླེ་བོ་བཅུ་གཉིས་གང༌ངོ༌།།
LUK 9:18 སྐྱབས་མགོན་ཡེ་ཤུ་གཅིག་པུས་གསོལ་བ་འདེབས་དུས་ཐུགས་སྲས་རྣམས་ཀྱང་ཁོང་དང་མཉམ་དུ་ཡོད་པ༌ལ། ཁོང་གིས་འདི་སྐད༌དུ། མི་རྣམས་ཀྱིས་ང་རང་སུ་ཡིན་པར་སྨྲ་བཞིན་འདུག་གམ་ཞེས་དྲིས་པ༌ན།
LUK 9:19 ཐུགས་སྲས་རྣམས་ན༌རེ། མི་ལ་ལས་ཁྲུས་གསོལ་མཁན་ཡོ་ཧ་ནན་རེད་ཅེས༌དང༌། ཡང་ལ་ལས་ཨེ་ལི་ཡཱ་རེད་ཅེས༌ཟེར། གཞན༌ཡང༌། གནའ་བོའི་ལུང་སྟོན་པ་རྣམས་ལས་གཅིག་སླར་གསོན་པ་རེད་ཟེར་བའང་ཡོད་ཅེས་ཞུས།
LUK 9:20 ཡང་ཁོང་གིས་འདི་སྐད༌དུ། ཁྱོད་ཅག་གིས་ང་རང་སུ་ཡིན་པར་གླེང་ངམ་ཞེས་དྲིས་པ༌ན། པེ་ཏྲོ་ན༌རེ། ཁྱེད་ནི་དཀོན་མཆོག་གི་སྐྱབས་མགོན་མཱ་ཤི་ཀ་ཡིན་ཞེས་ཞུས༌སོ།།
LUK 9:21 སྐྱབས་མགོན་ཡེ་ཤུས་དོན་དེ་གཞན་ལ་མི་སྨྲ་བའི་ཕྱིར་ཐུགས་སྲས་རྣམས་ལ་ནན་གྱིས་བསྐུལ༌ཅིང་བཀའ་གནང་སྟེ།
LUK 9:22 ཁོང་གིས་འདི་སྐད༌དུ། མིའི་བུ་ཡིས་ངེས་པར་སྡུག་བསྔལ་མང་པོ་མྱོང་ཞིང་དཔོན་རིགས་རྒན་པོ་དང་མཆོད༌དཔོན་ཆེན་པོ་དག མཁན་པོ་རྣམས་ཀྱིས་ཁོ་རང་དོར་ནས་གསོད་པ༌དང༌། ཡང་ཉིན་གསུམ་པ་ལ་སླར་གསོན་པར་འགྱུར་ཞེས་གསུངས༌སོ།།
LUK 9:23 ཡང་སྐྱབས་མགོན་ཡེ་ཤུས་མི་ཐམས་ཅད་ལ་འདི་སྐད༌དུ། སུ་ཞིག་ང་ཡི་རྗེས་སུ་འབྲང་འདོད༌ན། རང་ཉིད་དོར་ནས་ཉིན་རེ་བཞིན་རང་གི་ཤིང་རྒྱ་གྲམ་ཁུར་ཏེ་ང་ཡི་རྗེས་སུ་འབྲང་བར་གྱིས།
LUK 9:24 སུ་ཞིག་གིས་རང་སྲོག་སྐྱོབ་འདོད་པ་དེས་རང་སྲོག་འཆོར་བ༌དང༌། སུ་ཞིག་གིས་བདག་གི་དོན་དུ་རང་སྲོག་འདོར་བ་དེས་རང་སྲོག་སྐྱོབ་ངེས་ཡིན།
LUK 9:25 སུ་ཞིག་གིས་འཇིག་རྟེན་ཧྲིལ་པོ་རག་ཀྱང་རང་སྲོག་བོར་བའམ་བརླག་ན་ཅི་ལ༌ཕན།
LUK 9:26 སུ་ཞིག་གིས་ང་དང་ངའི་བཀའ་ངོ་ཚ་ཞིག་ཏུ་བརྩིས༌ན། མིའི་བུ་རང་ཉིད་ཀྱི་གཟི་བརྗིད༌དང༌། ཡབ་དང་ཕོ་ཉ་དམ་པ་རྣམས་ཀྱི་གཟི་བརྗིད་ངང་ཕེབས་ཡོང༌དུས། མི་དེ་ཡང་ངོ་ཚ་ཞིག་ཏུ་བརྩི་ངེས༌ཡིན།
LUK 9:27 བདག་གིས་ཁྱོད་ཅག་ལ་བདེན་པར་སྨྲ༌སྟེ། འདི་རུ་སྡོད་པའི་མི་རྣམས་ལས་འགའ་ཞིག་གིས་འཆི་བ་དངོས་སུ་མ་མྱོང་བའི་སྔོན་དུ་དཀོན་མཆོག་གི་རྒྱལ་སྲིད་མཐོང་བར་ངེས་ཞེས་གསུངས༌སོ།།
LUK 9:28 སྐྱབས་མགོན་ཡེ་ཤུས་གོང་གི་བཀའ་དེ་དག་གསུངས་ནས་ཉིན་བརྒྱད་ཙམ་འགོར༌རྗེས། ཁོང་གིས་པེ་ཏྲོ༌དང༌ཡོ་ཧ༌ནན། ཡ་ཀོབ་བཅས་ཁྲིད་ནས་རི་མགོར་གསོལ་བ་འདེབས་སུ་ཕེབས༌ཤིང༌།
LUK 9:29 གསོལ་བ་འདེབས་བཞིན་པའི་སྐབས༌སུ། ཁོང་གི་ཞལ་རས་འགྱུར་ཞིང་ན་བཟའ་དཀར་པོར་གྱུར་པ་དང་འོད་འཕྲོ་བ་རེད།
LUK 9:30 གློ་བུར༌ཉིད་ལ་མོ་ཤེ་དང་ཨེ་ལི་ཡཱ་གཉིས་གཟི་བརྗིད་ངང་དངོས་སུ་མངོན༌ཅིང༌། སྐྱབས་མགོན་ཡེ་ཤུ་དང་གསུང་མོལ་མཛད་པ་དང་ཁོང་ཉིད་སྐུ་གཤེགས་པར་འགྱུར་བའི་དོན༌ཏེ། ཁོང་གིས་ཡེ་རུ་སཱ་ལེམ་དུ་བསྒྲུབ་ངེས་པའི་སྐོར་གསུངས་སོ།།
LUK 9:32 དེའི་དུས༌སུ། པེ་ཏྲོ་སོགས་རེ་ཞིག་གཉིད་ལ་ཡུར༌ཡང༌། ཁོ་རྣམས་གཉིད་ལས་སངས་ཏེ་སྐྱབས་མགོན་ཡེ་ཤུའི་གཟི་འོད༌དང༌། ཁོང་དང་མཉམ་དུ་སྐྱེས་བུ་གཉིས་ལངས་ཡོད་པའང་མཐོང༌བ་རེད།
LUK 9:33 མི་དེ་གཉིས་ཁོང་དང་ཁ་གྱེས་པའི་དུས༌སུ། པེ་ཏྲོ་ན༌རེ། སྟོན་པ༌ལགས། བདག་ཅག་འདི་རུ་བསྡད་ན་དངོས་གནས་ལེགས་པོ་འདུག གུར་གསུམ་ཡང་བཟོ་བར་བྱ༌སྟེ། ཁྱེད་ལ་གཅིག༌དང༌། མོ་ཤེ་ལ༌གཅིག ཨེ་ལི་ཡཱ་ལའང་གཅིག་གོ་ཞེས་ཅི་ཞིག་ཞུ་བཞིན་པ་གསལ་པོར་མ་ཤེས་པར་དེ་ལྟར་ཞུས་སོ།།
LUK 9:34 པེ་ཏྲོས་དེ་ལྟར་ཞུ་བཞིན་པའི་དུས༌སུ། སྤྲིན་ཕུང་ཞིག་བྱུང་ནས་ཁོང་རྣམས་བསྒྲིབས་ཤིང་སྤྲིན་ཕུང་ནང་དུ་འཇུག་པའི་ཚེ་ཐུགས་སྲས་གསུམ་པོ་འཇིགས་ཤིང་སྐྲག་པར་གྱུར།
LUK 9:35 སྤྲིན་ཕུང་ལས་སྐད་སྒྲ་ཞིག་གྲགས༌ཏེ། འདི་ནི་བདག་གི་བུ་ཡིན་ཞིང་། བདག་གིས་བདམས་པ་ཡིན་པས། ཁྱོད་རྣམས་ཀྱིས་ཁོའི་གཏམ་ལ་ཉོན་ཅིག་ཅེས་གསུངས་སོ།།
LUK 9:36 སྐད་སྒྲ་དེ་གྲགས་མཚམས་བཞག་པ་དང་སྐྱབས་མགོན་ཡེ་ཤུ་གཅིག་པུ་གནས་དེར་བཞུགས། ཉིན་དེ་དག་གི་རིང༌ལ། ཐུགས་སྲས་གསུམ་པོས་མཐོང་བའི་དོན་དེ་མི་གླེང་ཞིང་མི་གཞན་ལའང་མ་སྨྲས༌སོ།།
LUK 9:37 དེའི་ཕྱི༌ཉིན། ཁོང་རྣམས་རི་ལས་མར་ཕེབས་པ་དང་མི་ཤིན་ཏུ་མང་པོས་ཁོང་གི་མདུན་བསུས་ཤིང་མཇལ་ལོ།།
LUK 9:38 དེ་རྣམས་ལས་མི་ཞིག་གིས་སྐད་ཆེན༌པོས། སློབ་དཔོན༌ལགས། ངའི་བུ་ལ་གཟིགས་སྐྱོང་གནང་བར༌མཛོད། ཁོ་ནི་བདག་གི་བུ་གཅིག་པུ་ཡིན།
LUK 9:39 གདོན་འདྲེས་ཁོ་རང་བཟུང་མ་ཐག་གློ་བུར་ཉིད་ལ་འུར་རྒྱག་ཅིང་ལུས་པོ་དྲག་ཏུ་སྤྲུགས་པ་དང་ཁ་ནས་ལྦུ་བ་བཞུར༌བ། ལུས་ལ་གནོད་པ་ཆེན་པོ་འབྱུང་བའི་བར་དུ་གདོན་འདྲེ་དེ་ཁོའི་ལུས་ནས་ཕྱིར་འབུད༌དཀའ་བ་རེད།
LUK 9:40 ངས་ཁྱེད་ཀྱི་ཐུགས་སྲས་རྣམས་ལ་གདོན་འདྲེ་དེ་ཕྱིར་བསྐྲོད་པར་ཞུ་བ་ཞུས་ཀྱང་ཁོ་རྣམས་ཀྱིས་བསྐྲོད་མ་ནུས་ཞེས་ཞུས་སོ།།
LUK 9:41 སྐྱབས་མགོན་ཡེ་ཤུས་འདི་སྐད༌དུ། ཀྱེ། དད་པ་མེད་པ་དང་ཕྱིན་ཅི་ལོག་པའི་མི་རབས་འདི། ང་རང་དུས་ནམ་ཞིག་གི་བར་དུ་ཁྱོད་ཅག་དང་མཉམ་དུ་གནས་ཤིང་བཟོད་བསྲན་བྱེད་དགོས༌སམ། ཁྱོད་ཀྱི་བུ་དེ་འདིར་ཁྲིད་ཤོག་ཅིག་ཅེས་གསུངས་སོ།།
LUK 9:42 བུ་དེ་ཚུར་ཁྲིད་ཡོང༌དུས། གདོན་འདྲེས་བུ་དེ་ས་ལ་བསྒྱེལ་བ་དང་ལུས་པོ་དྲག་ཏུ་སྤྲུགས། འོན་ཀྱང་སྐྱབས་མགོན་ཡེ་ཤུས་གདོན་འདྲེ་ལ་བཀའ་བཀྱོན་མཛད་ཅིང་བུ་བསྐྱབས་ཏེ་ཕྱིར་ཁོའི་ཕ་ལ་སྤྲད།
LUK 9:43 མི་ཀུན་ཀྱང་དཀོན་མཆོག་གི་ནུས་མཐུ་ལ་ཤིན་ཏུ་ངོ་མཚར་བར་གྱུར༌ཏོ།། མི་རྣམས་སྐྱབས་མགོན་ཡེ་ཤུས་མཛད་པའི་དོན་ཐམས་ཅད་ལ་ངོ་མཚར་སྐྱེ་བཞིན་པའི་དུས༌སུ། ཁོང་གིས་ཐུགས་སྲས་རྣམས་ལ་འདི་སྐད༌དུ།
LUK 9:44 ཁྱོད་ཅག་གིས་རྣ་བ་བླགས་ནས་གཏམ་འདིར་ཉན་དགོས། ཕྱིས་སུ་མིའི་བུ་ཁོ་རང་མི་རྣམས་ཀྱི་ལག་ཏུ་སྤྲོད་པར་འགྱུར་ཞེས་གསུངས་ནའང་།
LUK 9:45 ཐུགས་སྲས་རྣམས་ཀྱིས་གསུང་དེའི་དོན་མ་རྟོགས་སོ།། དེ་ནི་མི་སུ་ལའང་ཤེས་སུ་མི་འཇུག་པའི་ཕྱིར་གབ་པ་ཡིན། ཐུགས་སྲས་རྣམས་ཀྱིས་ཀྱང་གསུང་འདིའི་དོན་ཅི་ཡིན་ཁོང་ལ་འདྲི་མ་ཕོད༌དོ།།
LUK 9:46 ཐུགས་སྲས་རྣམས་ཀྱི་ཁྲོད་དུ་ཁོ་རྣམས་ལས་སུ་ཞིག་མཆོག་ཏུ་གྱུར་པ་ཡིན་པར་རྩོད་གླེང་བྱུང་ངོ༌།།
LUK 9:47 སྐྱབས་མགོན་ཡེ་ཤུས་ཀྱང་ཁོ་རྣམས་ཀྱི་བསམ་ཚུལ་མཁྱེན་ཏེ་བྱིས་པ་ཆུང་ངུ་ཞིག་རང་ཉིད་ཀྱི་དྲུང་དུ་ཁྲིད་ནས་སྡོད་དུ་བཅུག༌སྟེ།
LUK 9:48 ཁོང་གིས་འདི་སྐད༌དུ། སུ་ཞིག་གིས་ངའི་མིང་གི་ཕྱིར་བྱིས་པ་ཆུང་ངུ་འདི་ལྟ་བུར་བསུ་བ་བྱས་ན། དོན་དམ་དུ་བདག་ལ་བསུ་བ་བྱས་པ་ཡིན་ལ། སུ་ཞིག་གིས་ང་རང་ལ་བསུ་བ་བྱས་པ་ཡིན་ན། དོན་དམ་དུ་ང་རང་མངགས་མཁན་ཁོང་ལ་བསུ་བ་བྱས་པ་ཡིན། རྒྱུ་མཚན་ནི་ཁྱོད་ཅག་ལས་ཆུང་ཤོས་དེ་ནི་ཁྱོད་རྣམས་ལས་མཆོག་ཏུ་གྱུར་པ་ཡིན་ཞེས་གསུངས༌སོ།།
LUK 9:49 ཡོ་ཧ་ནན་ན༌རེ། སྟོན་པ༌ལགས། མི་གཞན་ཞིག་གིས་ཁྱེད་ཀྱི་མཚན་ལ་བརྟེན་ནས་གདོན་འདྲེ་སྐྲོད་བཞིན་པ་ངེད་རྣམས་ཀྱིས་མཐོང༌བྱུང་ངོ་།། འོན༌ཀྱང༌། མི་དེ་ནི་ངེད་རྣམས་དང་མཉམ་དུ་ཁྱེད་ཀྱི་རྗེས་སུ་མི་འབྲང་བས། ངེད་རྣམས་ཀྱིས་དོན་དེ་ལྟར་བྱེད་པ་བཀག་པ་ཡིན་ཞེས་ཞུས་པ༌ན།
LUK 9:50 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་དགྲ་རུ་མི་འཛིན་པ་དེ་ནི་ཁྱོད་ཅག་གི་ཕྱོགས་ཡིན་པས་ཁོ་རང་མ་འགོག་ཅིག་ཅེས་གསུངས༌སོ།།
LUK 9:51 སྐྱབས་མགོན་ཡེ་ཤུ་ནམ་མཁའི་ཞིང་ཁམས་སུ་འཕགས་པའི་དུས་སླེབས་ལ་ཉེ༌སྐབས། ཁོང་ཐུགས་མ་གཡེངས་པར་ཡེ་རུ་སཱ་ལེམ་དུ་ཕེབས་པར་རྩོམ་མོ།།
LUK 9:52 ཁོང་གིས་ཐོག་མར་བང་ཆེན་སྔོན་དུ་མངགས༌ཤིང༌། མི་དེ་རྣམས་སཱ་མར་ཡ་ཡུལ་གྱི་གྲོང་སྡེ་ཞིག་ལ་ཁོང་ཉིད་ཕེབས་འགྱུར་ལ་སྟ་གོན་བྱེད་དུ་སོང༌།
LUK 9:53 འོན༌ཀྱང༌། ཁོང་རྣམས་ཡེ་རུ་སཱ་ལེམ་གྱི་ཕྱོགས་སུ་ཕེབས་བཞིན་པའི་རྐྱེན་གྱིས་སཱ་མར་ཡ་པ་རྣམས་ཀྱིས་ཁོང་ལ་བསུ་བ་མ་བྱས་སོ།།
LUK 9:54 ཁོང་གི་ཐུགས་སྲས་ཡ་ཀོབ་དང་ཡོ་ཧ་ནན་གཉིས་ཀྱིས་གནས་ཚུལ་དེ་མཐོང་ནས་ན༌རེ། གཙོ་བོ༌ལགས། ངེད་ཅག་གིས་ནམ་མཁའ་ལས་མེ་ཕབ་སྟེ་མི་དེ་རྣམས་བསྲེག་པར་བྱས་ན་ཁྱེད་རང་ཐུགས་དགྱེས་སམ་ཞེས་ཞུས་པ༌ན།
LUK 9:55 སྐྱབས་མགོན་ཡེ་ཤུ་ཞལ་ཕྱིར་འཁོར་ནས་དེ་གཉིས་ལ་བཀའ་བཀྱོན་གནང༌། ཁྱོད་གཉིས་ཀྱིས་རང་གི་སེམས་ནི་ག་འདྲ་ཡིན་པ་མི་ཤེས།
LUK 9:56 མིའི་བུ་ནི་མིའི་སྲོག་མེད་པར་བཟོ་བའི་ཕྱིར་འོངས་པ་མ་ཡིན༌པར། མིའི་སྲོག་སྐྱོབ་པའི་ཕྱིར་འོངས་པ་ཡིན་ཞེས་གསུངས་སོ།། དེ་ནས་ཁོང་རྣམས་ལྷན་དུ་གྲོང་སྡེ་གཞན་ཞིག་ལ་ཕེབས༌སོ།།
LUK 9:57 ཡང་ཁོང་རྣམས་ལམ་དུ་ཆས༌སྐབས། མི་ཞིག་གིས་སྐྱབས་མགོན་ཡེ་ཤུ༌ལ། ཁྱེད་རང་གང་དུ་ཕེབས་ནའང་ང་རང་ཁྱེད་ཀྱི་རྗེས་སུ་འབྲང་ངོ་ཞེས་ཞུས་པ༌ན།
LUK 9:58 ཁོང་གིས་འདི་སྐད༌དུ། ཝ་ལ་ཁུང་བུ་དང་ནམ་མཁའི་བྱ་ལའང་ཚང་ཡོད༌ཀྱང༌། མིའི་བུ་ལ་མགོ་སྔས་ས་ཙམ་ཡང་མེད་ཅེས་གསུངས་སོ།།
LUK 9:59 ཡང་ཁོང་གིས་མི་གཞན་ཞིག་ལ་འདི་སྐད༌དུ། ང་ཡི་རྗེས་སུ་ཤོག་ཅེས་གསུངས་པ༌ན། མི་དེ་ན༌རེ། གཙོ་བོ༌ལགས། ང་རང་ཐོག་མར་རང་ཡུལ་དུ་ཕ་དུར་ལ་སྦ་རུ་འགྲོ་བར་མཛོད་ཅེས་ཞུས་པ༌དང༌།
LUK 9:60 ཡང་ཁོང་གིས་འདི་སྐད༌དུ། བེམ་པོ་དང་འདྲ་བའི་མི་རྣམས་ལ་རང་གི་བེམ་པོ་དུར་ལ་སྦ་བར་གྱིས་ཤིག འོན་ཀྱང་ཁྱོད་རང་དཀོན་མཆོག་གི་རྒྱལ་སྲིད་ཀྱི་ཆོས་བསྒྲག་ཏུ་སོང་ཞིག་ཅེས་གསུངས་སོ།།
LUK 9:61 ཡང་མི་གཞན་ཞིག་ན༌རེ། གཙོ་བོ༌ལགས། ང་རང་ཁྱེད་ཀྱི་རྗེས་སུ་འབྲང་འདོད༌མོད། འོན་ཀྱང་ང་རང་སྔོན་དུ་ཁྱིམ་ལ་སོང་ནས་ཡུལ་མི་རྣམས་དང་གྱེས་མཇལ་ཞུ་བར་མཛོད་ཅེས་ཞུས་པ༌དང༌།
LUK 9:62 ཡང་སྐྱབས་མགོན་ཡེ་ཤུས་འདི་སྐད༌དུ། ལག་པས་གཤོལ་མདའ་བཟུང་ནས་ཕྱིར་མིག་གིས་ལྟ་མཁན་སུ་ཡིན་ཡང་དཀོན་མཆོག་གི་རྒྱལ་སྲིད་ལ་ཞུགས་མི་འོས་པ་ཡིན་ཞེས་གསུངས༌སོ།།
LUK 10:1 དོན་དེའི་རྗེས༌སུ། ཡང་གཙོ་བོས་རྗེས་འབྲང་པ་བདུན་ཅུ་ བསྐོས༌ཤིང༌། མི་གཉིས་རེ་གཉིས་རེ་ཁོང་ཉིད་གང་དུ་ཕེབས་པར་འགྱུར་བའི་གྲོང་རྡལ་དང་ས་ཆ་སོ་སོར་མངགས་པ༌དང༌།
LUK 10:2 དེ་རྣམས་ལ་འདི་སྐད༌དུ། སྟོན་ཐོག་ཤིན་ཏུ་མང་ཡང་སྡུད་མཁན་ཉུང༌བས། སྟོན་ཐོག་གི་བདག་པོ་ལ་ཁོང་ཉིད་ཀྱི་སྟོན་ཐོག་བསྡུ་བའི་ཕྱིར་དུ་སྡུད་མཁན་རྣམས་མངག་པར་ཞུས་ཤིག་ཅེས་གསུངས༌སོ།།
LUK 10:3 ཁྱོད་རྣམས་སོང༌དང༌། བདག་གིས་ཁྱོད་རྣམས་སྤྱང་ཁྱུའི་ཁྲོད་དུ་ལུ་གུ་གཏོང་བ་ལྟར་མངག་པར་བྱེད།
LUK 10:4 ཁྱོད་རྣམས་ཀྱིས་དངུལ་ཁུག༌དང༌། ཁུག༌མ། བསིལ་ལྷམ་བཅས་ཅི་ཡང་མ་འཁྱེར༌ཅིག ལམ་བར་དུ་མི་སུ་ལའང་འཚམས་འདྲི་བྱ་མི་རུང༌།
LUK 10:5 ཁྱིམ་གང་དུ་སོང་ནའང་ཐོག་མར་ཁྱིམ་འདི་བདེ་བར་གྱུར་ཅིག་ཅེས་སྨྲོས༌ཤིག
LUK 10:6 གལ་ཏེ་ཁྱིམ་དེར་སྐྱེས་བུ་ཞི་བདེ་ཅན་ཞིག་མཆིས༌ན། ཁྱོད་རྣམས་ཀྱི་ཞི་བདེ་ཡང་མི་དེ་ལ་ལྡན་པར༌འགྱུར། མི་དེ་འདྲ་མེད་ན་ཞི་བདེ་དེ་ཕྱིར་ཁྱོད་ཅག་ལ་ལྡན་པར་འགྱུར།
LUK 10:7 ཁྱོད་རྣམས་ཁྱིམ་གང་དུ་སོང་ན་དེ་རུ་སྡོད༌དང༌། བཟའ་བཏུང་གང་ཞིག་སྤྲད་ན་དེ་སྤྱོད༌ཅིག རྒྱུ་མཚན་ནི་ལས་ཀ་བྱེད་མཁན་ལ་གླ་ཆ་སྟེར་འོས་སོ།། ཡང་ཁྱིམ་གཅིག་ནས་ཁྱིམ་གཞན་ལའང་གནས་མ་སྤོར་ཅིག
LUK 10:8 ཁྱོད་རྣམས་གྲོང་རྡལ་གང་དུ་སོང༌ནའང༌། གྲོང་རྡལ་དེའི་མི་རྣམས་ཀྱིས་ཁྱོད་ཅག་ལ་བསུ་བ་བྱེད་ཅིང་མདུན་དུ་ཟས་རིགས་གང་ཞིག་དྲངས་ན་དེ་བཟའ་བར༌བྱའོ།།
LUK 10:9 གྲོང་རྡལ་དེ་རུ་ཡོད་པའི་ནད་པ་རྣམས་གསོ་བར་བྱོས་དང་། དེ་རྣམས་ལ་དཀོན་མཆོག་གི་རྒྱལ་སྲིད་ཁྱོད་རྣམས་དང་ཉེ་བར་སླེབས་ཞེས་སྨྲོས༌ཤིག
LUK 10:10 འོན་ཀྱང་ཁྱོད་རྣམས་གྲོང་རྡལ་གང་དུ་སོང༌ནའང༌། གྲོང་རྡལ་དེའི་མི་རྣམས་ཀྱིས་ཁྱོད་ཅག་ལ་བསུ་བ་མི་བྱེད༌ན། ཁྱོད་རྣམས་གྲོང་རྡལ་དེའི་སྲང་ལམ་དུ་སོང་སྟེ་འདི་ལྟར་ཤོད༌ཅིག
LUK 10:11 ཁྱོད་ཅག་གི་གྲོང་རྡལ་གྱི་ས་རྡུལ་འདི་ངེད་ཅག་གི་རྐང་པར་འགོས༌ནའང༌། ངེད་ཅག་གིས་ཁྱོད་རྣམས་ཀྱི་མཐོང་སར་ས་རྡུལ་སྤྲུགས་པར༌བྱེད། འོན་ཀྱང་ཁྱོད་རྣམས་ཀྱིས་དཀོན་མཆོག་གི་རྒྱལ་སྲིད་ཉེ་བར་སླེབས་པ་ཤེས་པར༌གྱིས་ཞེས་པའོ།།
LUK 10:12 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། མ་འོངས་པར་ཉེས་ཆད་གཅོད་པའི་ཉིན་དེ་སླེབས་ཚེ། སཱ་དོམ་ལས་ཀྱང་གྲོང་རྡལ་དེ་ལ་ཉེས་ཆད་ལྕི་མོ་འཕོག་པར་འགྱུར་རོ།།
LUK 10:13 ཀོ་ར་ཟིན་དང་པེ་སད་དཱ་ཁྱོད་གཉིས་ལ་ཆག་སྒོ་འབྱུང་ངོ༌།། རྒྱུ་མཚན་ནི་ཁྱོད་གཉིས་ཀྱི་ནང་དུ་བྱུང་བའི་དོན་ངོ་མཚར་ཅན་དེ་རྣམས་ཐཱར་དང་ཚི་ཏུན་དུ་བྱུང་བ་ཡིན༌ན། ཡུལ་དེའི་མི་རྣམས་ཀྱིས་སྔར་ནས་འགྱོད་བཤགས་བྱས་པ་དང་། ལུས་ལ་རྩིད་རས་གྱོན་ཞིང་མགོ་ལ་ཐལ་བ་གཏོར་ནས་སར་སྡོད་པར་བྱེད།
LUK 10:14 ཉེས་ཆད་གཅོད་པའི་ཉིན་སླེབས་ཚེ། ཐཱར་དང་ཚི་ཏུན་གཉིས་ལས་ཁྱོད་གཉིས་ལ་ཉེས་ཆད་ལྕི་མོ་འཕོག་པར་འགྱུར།
LUK 10:15 ཡང་ཀཱ་ཕར་ན་ཧུམ་ཁྱོད་ནི་ནམ་མཁའི་ཞིང་ཁམས་སུ་འདྲེན་པར་འགྱུར་རམ་ཞེ་ན་མི་འདྲེན༌ཏེ། གཤིན་པོའི་གནས་སུ་འཕེན་པར་འགྱུར་ཞེས་གསུངས༌སོ།།
LUK 10:16 ཡང་ཁོང་གིས་འདི་སྐད༌དུ། སུ་ཞིག་གིས་ཁྱོད་རྣམས་ལ་ཉན་པ་ཡིན་ན་དེས་བདག་ལའང་ཉན་པ་ཡིན། ཡང་སུ་ཞིག་གིས་ཁྱོད་རྣམས་རྒྱབ་ཏུ་དོར་བ་ཡིན་ན་མི་དེས་ང་རང་ཡང་རྒྱབ་ཏུ་དོར་བ་ཡིན། ང་རང་རྒྱབ་ཏུ་དོར་བ་ཡིན་ན་ང་རང་མངག་མཁན་ཡང་རྒྱབ་ཏུ་དོར་བ་ཡིན་ཞེས་གསུངས༌སོ།།
LUK 10:17 རྗེས་འབྲང་པ་བདུན་ཅུ་དགའ་སྤྲོའི་ངང་ནས་ཕྱིར་ལོག་སྟེ་ན༌རེ། གཙོ་བོ༌ལགས། ཁྱེད་ཀྱི་མཚན་བརྗོད་པར་བརྟེན་ནས་གདོན་འདྲེ་དག་གིས་ཀྱང་ངེད་རྣམས་ལ་མཉན་ཞེས་ཞུས་པ༌ན།
LUK 10:18 ཁོང་གིས་འདི་སྐད༌དུ། བདུད་སཱ་ཏན་གློག་དམར་འཁྱུག་པ་བཞིན་ནམ་མཁའི་ཞིང་ཁམས་ལས་ས་ལ་ལྷུང་བ་བདག་གིས་ཀྱང་མཐོང༌བ་ཡིན།
LUK 10:19 ལྟོས༌དང༌། བདག་གིས་ཁྱོད་རྣམས་ལ་དུག་སྦྲུལ་དང་སྡིག་པ་རྭ་ཙ་རྐང་འོག་ཏུ་གནོན་པ༌དང༌། དགྲ་བོ་དེ་ཉིད་ཀྱི་མཐུ་སྟོབས་ཐམས་ཅད་ལས་རྣམ་པར་རྒྱལ་བའི་དབང་བསྩལ༌པས། གང་ཞིག་གིས་ཀྱང་ཁྱོད་རྣམས་ལ་གནོད་པ་བྱ་མི་ནུས་སོ།།
LUK 10:20 འོན་ཀྱང་གདོན་འདྲེ་དག་གིས་ཁྱོད་རྣམས་ལ་མཉན་པ་དེར་ཁྱོད་ཅག་དགའ་མི་འོས༌ཤིང༌། ཁྱོད་རྣམས་ཀྱི་མིང་ནམ་མཁའི་ཞིང་ཁམས་སུ་བཀོད་ཡོད་པའི་ཕྱིར་དགའ་བར་གྱིས་ཞེས་གསུངས༌སོ།།
LUK 10:21 དེའི་དུས༌སུ། དམ་པའི་ཐུགས་ཉིད་ཀྱི་ངང་ནས་སྐྱབས་མགོན་ཡེ་ཤུ་ཐུགས་ཤིན་ཏུ་དགྱེས༌ཤིང་འདི་སྐད་དུ། ཀྱེ། བདག་གི་ཡབ་སྟེ་གནམ་ས་གཉིས་ཀྱི་བདག་པོ༌ལགས། ཁྱེད་ཀྱིས་དོན་འདི་རྣམས་མཁས་པ་དང་བློ་གྲོས་ཅན་ལ་གབ༌ཅིང༌། བྱིས་པ་ལྟ་བུའི་མི་རྣམས་ལ་མངོན་པར་མཛད་པས་བདག་གིས་ཁྱེད་ལ་བསྔགས་པར༌བྱེད། ཀྱེ། ཡབ་ལགས། དོན་དེ་ལ་ཁྱེད་ཐུགས་ཤིན་ཏུ་དགྱེས་པའི་ཕྱིར་ཡིན་ཞེས་གསུངས་སོ།།
LUK 10:22 ཡང་ཁོང་གིས་མི་རྣམས་ལ་འདི་སྐད༌དུ། བདག་གི་ཡབ་ཀྱིས་དོན་ཐམས་ཅད་བདག་ལ་གནང་བ་ཡིན༌ལ། ཡབ་ལས་གཞན་སུས་ཀྱང་སྲས་ནི་སུ་ཞིག་ཡིན་པ་མི་ཤེས༌ཤིང༌། སྲས་ཁོང་ཉིད་དང་སྲས་ཀྱིས་ཡབ་སུ་ཡིན་སྟོན་པར་འདོད་པའི་མི་ལས༌གཞན། སུས་ཀྱང་ཡབ་ནི་སུ་ཞིག་ཡིན་པའང་མི་ཤེས་ཞེས་གསུངས༌སོ།།
LUK 10:23 སྐྱབས་མགོན་ཡེ་ཤུས་ཐུགས་སྲས་རྣམས་ལ་ཟུར་དུ་ཞལ་གཏད་དེ་འདི་སྐད༌དུ། ཁྱོད་རྣམས་ཀྱིས་མཐོང་བའི་དོན་དེ་དག་མཐོང་བར་འགྱུར་བའི་མི་རྣམས༌བདེའོ།།
LUK 10:24 ཡང་བདག་གིས་ཁྱོད་རྣམས་ལ་སྨྲ་བར༌བྱ་སྟེ། ལུང་སྟོན་པ་དང་རྒྱལ་པོ་མང་པོས་ཀྱང་ཁྱོད་རྣམས་ཀྱིས་མཐོང་བ་དེ་དག་ལ་བལྟ་འདོད་ནའང་མཐོང་མ་མྱོང༌། ཁྱོད་རྣམས་ཀྱིས་ཐོས་པ་དེ་དག་ལ་མཉན་འདོད་ཀྱང་མ་ཐོས་ཞེས་གསུངས༌སོ།།
LUK 10:25 བཀའ་ཁྲིམས་ཀྱི་མཁས་པ་ཞིག་གིས་སྐྱབས་མགོན་ཡེ་ཤུར་ཚོད་བགམ་པའི་ཕྱིར་ཡར་ལངས་ཏེ་ན༌རེ། སློབ་དཔོན༌ལགས། བདག་ལ་མཐའ་མེད་པའི་ཚེ་སྲོག་འཐོབ་པའི་ཆེད་དུ་ངས་ཅི་བྱ་དགོས་སམ་ཞེས་ཞུས་པ༌ན།
LUK 10:26 སྐྱབས་མགོན་ཡེ་ཤུས་འདི་སྐད༌དུ། བཀའ་ཁྲིམས་ནང་དུ་ཅི་ཞིག་བྲིས་འདུག༌གམ། ཁྱོད་ཀྱིས་བཀླགས་པ་ག་འདྲ་ཡིན་ཞེས་དྲིས་པ༌ན།
LUK 10:27 ཁོ་ན༌རེ། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་བློ་གཅིག་སེམས་གཅིག་ཡིད་གཅིག་དང་སྟོབས་ཤུགས་ཡོད་རྒུས་གཅེས་དགོས༌ཤིང༌། ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་པ་དེ་ཡིན་ཞེས་ལན་བཏབ་བོ།།
LUK 10:28 ཡང་ཁོང་གིས་འདི་སྐད༌དུ། ཁྱོད་ཀྱིས་ལན་བཏབ་པ་འགྲིག༌གོ །དེ་ལྟར་བྱས་ན་ཁྱོད་ལ་མཐའ་མེད་པའི་ཚེ་སྲོག་འཐོབ་པར་འགྱུར་ཞེས་གསུངས་སོ།།
LUK 10:29 འོན་ཀྱང་། མི་དེས་རང་ཉིད་ལ་བདེན་ལུགས་ཡོད་པར་སྟོན་འདོད་དེ། སྐྱབས་མགོན་ཡེ་ཤུར་འདི་ལྟར། ངའི་ཁྱིམ་མཚེས་སུ་ཡིན་ནམ་ཞེས་ཞུས་པ༌ན།
LUK 10:30 ཡང་སྐྱབས་མགོན་ཡེ་ཤུས་འདི་སྐད༌དུ། དེ་ཡང་མི་ཞིག་ཡེ་རུ་སཱ་ལེམ་ནས་ཡེ་རུ་ཀོ་ལ་འགྲོ་བའི་ལམ་བར༌དུ། ཇག་པའི་ལག་ཏུ་ཤོར་ཏེ་ཁོའི་གྱོན་པ་བཤུས་ཤིང་གཅར་རྡུང་བཏང་ནས་འཆི་ལ་ཉེ་བ་ཙམ་བྱས་རྗེས་ཇག་པ་རྣམས་སོང་ངོ་།།
LUK 10:31 སྟེས་དབང་གིས་མཆོད་དཔོན་ཞིག་ལམ་དེ་བརྒྱུད་ནས་འགྲོ་བ་དང་མི་དེ་མཐོང་ནའང་རྒྱང་བསྐོར་ནས་སོང༌།
LUK 10:32 ཡང་ལེ་ཝི་པ་ཞིག་ཀྱང་ལམ་དེ་བརྒྱུད་ནས་འགྲོ་དུས་མི་དེ་མཐོང་ནའང་རྒྱང་བསྐོར་ནས་སོང༌།
LUK 10:33 འོན་ཀྱང་སཱ་མར་ཡ་པ་ཞིག་ལམ་བུ་དེ་བརྒྱུད་ནས་འགྲོ་ཞིང་མི་དེ་མཐོང་བ་དང་སྙིང་རྗེ་སྐྱེས༌ཏེ།
LUK 10:34 ཁོའི་གམ་དུ་སོང་ནས་རྨ་ཁའི་ཐོག་ཏུ་སྣུམ་དང་རྒུན་ཆང་བྱུགས་ཤིང་རས་ཀྱིས་བཏུམས་པ༌དང༌། རང་གི་བཞོན་པར་བསྐྱོན་ཏེ་མགྲོན་ཁང་ཞིག་ཏུ་བསྐྱལ་ནས་སྙོར་སྐྱོང་བྱས།
LUK 10:35 དེའི་ཕྱི་ཉིན། ཁོས་དངུལ་སྒོར་གཉིས་ཁང་བདག་ལ་སྤྲད༌དེ། ཁྱོད་ཀྱིས་རྨས་མ་འདི་ལ་སྙོར་སྐྱོང་བྱོས༌དང༌། གལ་ཏེ་དངུལ་འདིས་མ་འདང་ན་ང་རང་ཕྱིར་ལོག་ཚེ་ཁྱོད་ལ་སྟེར་ངེས་ཡིན་ཞེས་སྨྲས་སོ།།
LUK 10:36 དེས་ན་ཁྱོད་ཀྱིས་སོམས༌དང༌། མི་དེ་གསུམ་ལས་ཇག་པའི་ལག་ཏུ་ཤོར་བའི་མི་དེའི་ཁྱིམ་མཚེས་སུ་ཡིན་ནམ་ཞེས་གསུངས་པ༌ན།
LUK 10:37 ཁོ་ན༌རེ། རྨས་མ་ལ་སྙིང་རྗེ་བྱེད་མཁན་དེ་ཡིན་ཞེས་ཞུས་པ༌དང༌། སྐྱབས་མགོན་ཡེ་ཤུས་ཁྱོད་རང་ཡང་སོང་ནས་དེ་ལྟར་བྱོས་ཤིག་ཅེས་གསུངས༌སོ།།
LUK 10:38 ཁོང་རྣམས་ཡེ་རུ་སཱ་ལེམ་ལ་ཕེབས་བཞིན་པའི་ལམ་བར༌དུ། སྐྱབས་མགོན་ཡེ་ཤུ་གྲོང་སྡེ་ཞིག་ཏུ་ཕེབས་པ་དང་མཱར་ཐ་ཟེར་བའི་བུད་མེད་ཅིག་གིས་རང་ཁྱིམ་དུ་བསུས་སོ།།
LUK 10:39 བུད་མེད་དེ་ལ་མིར་ཡམ་ཟེར་བའི་གཅུང་མོ་ཞིག་ཡོད་པ་གཙོ་བོའི་ཞབས་དྲུང་དུ་བསྡད་ནས་ཁོང་གི་གསུང་ལ་ཉན།
LUK 10:40 འོན་ཀྱང་མཱར་ཐ་ནི་སྣེ་ལེན་གྱི་ལས་ལ་བྲེལ་ཞིང་སེམས་ཀྱང་འཚབས༌པས། ཁོང་གི་དྲུང་དུ་ཡོང་སྟེ་ན༌རེ། གཙོ་བོ༌ལགས། ང་ཡི་ནུ་མོས་ང་རང་གཅིག་པུར་བསྐྱུར་ཏེ་སྣེ་ལེན་བྱེད་དུ་འཇུག་པ་ཁྱེད་ཀྱིས་མི་གཟིགས༌སམ། ཁྱེད་ཀྱིས་ཁོ་མོར་བཀའ་གནང་སྟེ་བདག་ལ་རོགས་རམ་བྱེད་དུ་མཛོད་ཅེས་ཞུས་པ༌ན།
LUK 10:41 སྐྱབས་མགོན་ཡེ་ཤུས་འདི་སྐད༌དུ། མཱར༌ཐ། མཱར་ཐ། ཁྱོད་ཀྱིས་སེམས་ལ་དོན་སྣ་ཚོགས་དྲན་ཞིང་སེམས་ཁྲལ་བྱེད་པ་རེད།
LUK 10:42 འོན་ཀྱང་མེད་དུ་མི་རུང་བའི་དོན་ནི་གཅིག༌སྟེ། མིར་ཡམ་གྱིས་བདམས་པ་དེ་སྐལ་བ་བཟང་པོ་ཡིན། སུས་ཀྱང་ཁོ་མོ་ལས་སྐལ་བ་དེ་འཕྲོག་པར་མི་ནུས་ཞེས་གསུངས༌སོ།།
LUK 11:1 སྐྱབས་མགོན་ཡེ་ཤུས་གནས་གཞན་ཞིག་ཏུ་གསོལ་བ་འདེབས་བཞིན་བཞུགས་ཏེ་མཇུག་རྫོགས༌རྗེས། ཁོང་གི་ཐུགས་སྲས་ཤིག་ན༌རེ། གཙོ་བོ༌ལགས། ཁྲུས་གསོལ་མཁན་ཡོ་ཧ་ནན་གྱིས་རང་གི་སློབ་མ་རྣམས་ལ་གསོལ་འདེབས་ཁྲིད་པ༌ལྟར། ཁྱེད་ཀྱིས་ཀྱང་ངེད་རྣམས་ལ་གསོལ་བ་འདེབས་ཚུལ་འཁྲིད་པར་མཛོད་ཅེས་ཞུས་པ༌ན།
LUK 11:2 ཁོང་གིས་འདི་སྐད༌དུ། ཁྱོད་རྣམས་ཀྱིས་གསོལ་བ་འདེབས་སྐབས་འདི༌ལྟར། ཡབ་ལགས། ཁྱེད་མཚན་དམ་པར་བསྲུང་བར༌ཤོག ། ཁྱེད་ཀྱི་རྒྱལ་སྲིད་འོང་བར༌ཤོག །
LUK 11:3 ངེད་ཀྱི་ཉིན་རེའི་ཟས་ཀྱི༌སྐལ།། ཉིན་རེ་བཞིན་དུ་གནང་བར༌མཛོད།།
LUK 11:4 ངེད་ཀྱིས་གཞན་ཉེས་བསལ་བ༌ལྟར།། ངེད་ཀྱི་སྡིག་པའང་བསལ་བར༌མཛོད།། ཉམས་ཚོད་མི་ལེན་སྐྱོབ་པར༌མཛོད།། ཅེས་གསོལ་བ་ཐོབས་ཞེས་གསུངས༌སོ།།
LUK 11:5 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ལས་མི་གཅིག་ནམ་ཕྱེད་ཙམ་ལ་རང་གི་གྲོགས་པོའི་ཁྱིམ་དུ་སོང༌སྟེ། གྲོགས་པོ༌ལགས། བདག་ལ་བག་ལེབ་གསུམ་བསྐྱི་བར༌མཛོད།
LUK 11:6 རྒྱུ་མཚན་ནི་ངའི་གྲོགས་པོ་ཞིག་ཐག་རིང་ནས་སླེབས་ནའང་བདག་ལ་སྔུན་དུ་འཇོག་རྒྱུ་ཅི་ཡང་མེད་པས་སོ་ཞེས་སྨྲས་པ༌ན།
LUK 11:7 ཁྱིམ་དུ་ཡོད་པའི་གྲོགས་པོ་ན༌རེ། བདག་ལ་འོ་བརྒྱལ་མ༌བྱེད། ད་ལྟ་སྒོ་བརྒྱབ་ཟིན་པ༌དང༌། བྱིས་པ་རྣམས་ཀྱང་བདག་དང་མཉམ་དུ་ཉལ་ཟིན༌པས། བདག་ཡར་ལངས་ནས་ཁྱོད་ལ་ཅི་ཡང་སྟེར་མི་ཐུབ་ཅེས་སྨྲས་སོ།།
LUK 11:8 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱིམ་དུ་ཡོད་པའི་མི་དེས་སྒོ་རྡུང་མཁན་དེ་ནི་རང་གི་གྲོགས་པོ་ཡིན་པའི་ཕྱིར་ཡར་ལངས་ནས་ཅི་ཡང་མི་སྟེར༌ནའང༌། སྒོ་རྡུང་མཁན་གྱིས་ཞུ་བ་ནན་གྱིས་ཞུས་པས། ཁྱིམ་དུ་ཡོད་པའི་མི་དེ་ཡར་ལངས་ནས་ཁོ་ལ་གང་མཁོ་རྣམས་སྟེར་ངེས་ཡིན་ཞེས་གསུངས༌སོ།།
LUK 11:9 དེས་ན་བདག་གིས་ཁྱོད་རྣམས་ལ༌སྨྲ་བར་བྱ་སྟེ། ཁྱོད་རྣམས་ཀྱིས་གསོལ་བ་ཐོབས་དང་གནང་ངེས་ཡིན༌ལ། ཚོལ་དང་རྙེད་ངེས༌ཡིན། སྒོ་རྡུངས་དང་སྒོ་འབྱེད་པར༌ངེས།
LUK 11:10 རྒྱུ་མཚན་ནི་སུས་ཀྱང་གསོལ་བ་བཏབ་ན་ཐོབ་པ༌དང༌། བཙལ་ན་རྙེད༌པ། སྒོ་བརྡུངས་ན་སྒོ་འབྱེད་པའི་ཕྱིར༌རོ།།
LUK 11:11 ཁྱོད་རྣམས་ལས་སུ་ཞིག་ཕ་ཡིན་པ་དེས་རང་གི་བུས་ཉ་ཞིག་བསླངས་ན་བུ་དེར་སྦྲུལ་ཞིག་སྟེར༌རམ།
LUK 11:12 ཡང་ན་བུས་སྒོ་ང་ཞིག་བསླངས་ན་སྡིག་པ་རྭ་ཙ་ཞིག་སྟེར༌རམ།
LUK 11:13 སྤྱིར་ཁྱོད་རྣམས་རྒྱུད་ངན་པ་ཡིན་ཡང་རང་གི་བུ་ཕྲུག་ལ་དངོས་པོ་བཟང་པོ་སྟེར་ཤེས༌ན། ནམ་མཁའི་ཞིང་ཁམས་སུ་བཞུགས་པའི་ཡབ་ཀྱིས་དེ་བས་ཀྱང་ཁོང་ལ་ཞུ་མཁན་རྣམས་ལ་དམ་པའི་ཐུགས་ཉིད་གནང་བ་མ་ཡིན་ནམ་ཞེས་གསུངས༌སོ།།
LUK 11:14 སྐྱབས་མགོན་ཡེ་ཤུས་གདོན་འདྲེ་ལྐུགས་པ་ཞིག་ཕྱིར་བསྐྲད་པ༌དང༌། གདོན་འདྲེ་ཕྱིར་ཐོན་ཅིང་ལྐུགས་པ་དེས་སྐད་ཆ་སྨྲ་ཐུབ་པར་གྱུར་པ་དང་མི་རྣམས་ཀྱང་དོན་དེར་ངོ་མཚར་བར་གྱུར་ཏོ།།
LUK 11:15 འོན་ཀྱང་མི་ཚོགས་ཁྲོད་ནས་མི་འགའ་ཞིག་ན༌རེ། ཁོང་གིས་བདུད་ཀྱི་རྒྱལ་པོ་པེ་ཨལ་བཟི་པད་ལ་བརྟེན་ནས་གདོན་འདྲེ་སྐྲོད་བཞིན་འདུག་ཅེས་སྨྲས་པ༌དང༌།
LUK 11:16 ཡང་མི་གཞན་རྣམས་ཀྱིས་ཁོང་ལ་ཚོད་བགམ་པའི་ཕྱིར། ནམ་མཁའི་ཞིང་ཁམས་ཀྱི་གྲུབ་རྟགས་ཤིག་སྟོན་པར་ཞུས༌ནའང༌།
LUK 11:17 ཁོང་གིས་དེ་རྣམས་ཀྱི་བསམ་ཚུལ་མཁྱེན་ཏེ་འདི་སྐད༌དུ། རྒྱལ་ཁམས་ཤིག་ལ་ནང་འཁྲུག་བྱུང་ན་རྒྱལ་ཁམས་དེ་འཇིག་པར་འགྱུར༌ཞིང༌། ཁྱིམ་ཚང་ཞིག་ལ་ནང་འཁྲུག་བྱུང་ན་ཁྱིམ་ཚང་དེའང་ཉམས་པར་འགྱུར།
LUK 11:18 ཁྱོད་རྣམས་ན༌རེ། བདག་གིས་པེ་ཨལ་བཟི་པད་ལ་བརྟེན་ནས་གདོན་འདྲེ་བསྐྲད་ཅེས་ཟེར་བ་ལྟར་ཡིན༌ན། གལ་ཏེ་བདུད་སཱ་ཏན་ལའང་ནང་འཁྲུག་བྱུང༌ཚེ། དེའི་རྒྱལ་ཁམས་ཅི་ལྟར་གནས་ཐུབ༌བམ།
LUK 11:19 ཡང་གལ་ཏེ་བདག་གིས་པེ་ཨལ་བཟི་པད་ལ་བརྟེན་ནས་གདོན་འདྲེ་སྐྲོད་པ་ཡིན༌ན། ཁྱོད་ཅག་གི་རྗེས་འབྲང་པ་རྣམས་ཀྱིས་གང་ལ་བརྟེན་ནས་གདོན་འདྲེ་སྐྲོད༌དམ། དེའི༌ཕྱིར། རྗེས་འབྲང་པ་དེ་རྣམས་ཀྱིས་ཁྱོད་ཅག་ལ་བདེན་རྫུན་གྱི་ཤན་འབྱེད་པར་འགྱུར།
LUK 11:20 གལ་ཏེ་བདག་གིས་དཀོན་མཆོག་གི་ནུས་མཐུར་བརྟེན་ནས་གདོན་འདྲེ་སྐྲོད་པ་ཡིན༌ན། དཀོན་མཆོག་གི་རྒྱལ་སྲིད་དེ་ཁྱོད་ཅག་གི་མདུན་དུ་སླེབས་ཟིན་ཏོ།།
LUK 11:21 དཔེར་ན་མི་སྟོབས་ལྡན་ཞིག་གིས་ལུས་ལ་གོ་ཆ་གྱོན་ཏེ་རང་ཁྱིམ་བདེ་བར་བསྲུངས༌ན། ཁྱིམ་དེའི་རྒྱུ་ནོར་ལ་གནོད་པ་འབྱུང་མི་སྲིད༌མོད།
LUK 11:22 འོན་ཀྱང་དེ་ལས་ཀྱང་སྟོབས་དང་ལྡན་པ་ཞིག་ཡོང་ནས་ཁོ་ལས་རྣམ་པར་རྒྱལ༌ན། ཁོས་བརྟེན་པའི་གོ་ཆ་དང་མཚོན་ཆ་དག་འཕྲོག་ཅིང་། རྒྱུ་ནོར་ཐམས་ཅད་ཀྱང་བགོ་བཤའ་བྱེད་པར་འགྱུར།
LUK 11:23 སུ་ཞིག་བདག་གི་ཕྱོགས་མི་བྱེད་པ་དེ་ནི་བདག་གི་དགྲ་བོ་ཡིན༌ཞིང༌། སུ་ཞིག་གིས་བདག་དང་མཉམ་དུ་མི་བསྡུ་ན་དེ་ནི་གཏོར་མཁན་ཡིན་ཞེས་གསུངས༌སོ།།
LUK 11:24 གདོན་འདྲེ་ཞིག་མིའི་ལུས་ནས་ཕྱིར་བུད༌རྗེས། ཆུ་མེད་པའི་གནས་སུ་ཕར་འགྲོ་ཚུར་འོང་བྱེད༌ཅིང༌། ངལ་གསོ་བའི་གནས་ཤིག་བཙལ་ཡང་མ་རྙེད༌པས། རང་གིས་རང་ལ་ན༌རེ། ང་རང་ཕྱིར་རང་ཉིད་ཡོང་བའི་གནས་དེར་འགྲོའོ་ཞེས་སྨྲ༌ཞིང༌།
LUK 11:25 གནས་དེར་ཕྱིར་ལོག་པ༌ན། གནས་དེ་ཕྱག་དར་བྱས་ནས་ལེགས་པར་བསྒྲིགས་ཡོད་པ་མཐོང༌སྟེ།
LUK 11:26 ཕར་སོང་ནས་རང་ལས་ཀྱང་ངན་པའི་གདོན་འདྲེ་བདུན་ཁྲིད་དེ་གནས་དེར་ཡོང་ནས་བསྡད་དོ།། དེ་བས་མི་དེའི་ཕྱིས་ཀྱི་གནས་ཚུལ་ནི་སྔར་ལས་ཀྱང་ཇེ་ཞན་དང་ཇེ་སྡུག་ཏུ་འགྱུར་ཞེས་གསུངས༌སོ།།
LUK 11:27 སྐྱབས་མགོན་ཡེ་ཤུས་དེ་ལྟར་གསུང་བཞིན་པའི་དུས༌སུ། མི་ཚོགས་ཀྱི་ཁྲོད་ནས་བུད་མེད་ཅིག་གིས་སྐད་ཆེན༌པོས། ཁྱེད་རང་ལྷུམས་སུ་སྦྲུམ་པ་དང་ནུ་མ་སྣུན་མཁན་དེ་བདེའོ་ཞེས་ཞུས༌ཀྱང༌།
LUK 11:28 ཁོང་གིས་འདི་སྐད༌དུ། ཡིན་ནའང་དཀོན་མཆོག་གི་བཀའ་ཐོས་ཤིང་བཀའ་སྲུང་མཁན་རྣམས་ནི་དེ་ལས་ཀྱང་བདེའོ་ཞེས་གསུངས༌སོ།།
LUK 11:29 མི་སྐོར་ཚོ་མང་པོ་སྐྱབས་མགོན་ཡེ་ཤུའི་དྲུང་དུ་འདུས་པའི་སྐབས༌སུ། ཡང་ཁོང་གིས་འདི་སྐད༌དུ། ད་ལྟའི་མི་རབས་འདི་ནི་མི་རབས་ངན་པ་ཞིག༌གོ །ཁོ་རྣམས་ཀྱིས་རྟགས་ངོ་མཚར་ཅན་འཚོལ་ཡང༌། ཡོ་ནཱའི་རྟགས་ངོ་མཚར་ཅན་དེ་ལས༌གཞན། ཁོ་རྣམས་ལ་རྟགས་ཅི་ཡང་སྟོན་པར་མི་འགྱུར།
LUK 11:30 རྒྱུ་མཚན་ནིན་ཝེ་པ་རྣམས་ལ་ཡོ་ནཱ་ཅི་ལྟར་ངོ་མཚར་བའི་རྟགས་སུ་གྱུར་པ༌ལྟར། མིའི་བུའང་མི་རབས་འདི་ལ་ངོ་མཚར་བའི་རྟགས་སུ་འགྱུར་ངེས༌ཡིན།
LUK 11:31 ལྷོ་ཕྱོགས་ཀྱི་རྒྱལ་མོ་དེ་རྒྱང་ཐག་རིང་བའི་ས་མཐའ་ནས་སོ་ལོ་མོན་གྱི་ཤེས་རབ་དང་ལྡན་པའི་གཏམ་ལ་གསན་དུ་ཡོང་མྱོང༌བས། མ་འོངས་པའི་ཉེས་ཆད་གཅོད་པའི་དུས་ལ་སླེབས་ཚེ། ཁོ་མོའང་མི་རབས་འདིའི་མི་རྣམས་དང་ལྷན་དུ་ཡར་འགྲེང་སྟེ་ཁོ་རྣམས་ལ་ཉེས་སྐྱོན་བརྗོད་པར་འགྱུར། ལྟོས༌དང༌། འདི་རུ་སོ་ལོ་མོན་ལས་ཀྱང་སྐྱེས་བུ་ཆེན་པོ་ཞིག་མཆིས་སོ།།
LUK 11:32 ནིན་ཝེ་པ་རྣམས་ཀྱིས་ཡོ་ནཱ་ཡིས་བསྒྲགས་པའི་ཆོས་ལ་མཉན་ཞིང་འགྱོད་བཤགས་བྱས་མྱོང༌བས། ཉེས་ཆད་གཅོད་པའི་དུས་ལ་སླེབས་པའི༌ཚེ། མི་དེ་རྣམས་ཀྱང་མི་རབས་འདིའི་མི་རྣམས་དང་ལྷན་དུ་ཡར་འགྲེང་སྟེ་མི་རབས་འདི་ལ་ཉེས་སྐྱོན་བརྗོད་པར་འགྱུར། ཡང་ལྟོས༌དང༌། འདི་རུ་ཡོ་ནཱ་ལས་ཀྱང་སྐྱེས་བུ་ཆེན་པོ་ཞིག་མཆིས་ཞེས་གསུངས༌སོ།།
LUK 11:33 ཡང་ཁོང་གིས་འདི་སྐད༌དུ། སུ་ཡིན་ཡང་སྒྲོན་མེ་བསྒྲོན་རྗེས་ས་དོང་ནང་དུའམ་ཡང་ན་བྲེའི་འོག་ཏུ་འཇོག་མི་སྲིད༌དེ། ཁྱིམ་དུ་ཡོང་བ་རྣམས་ཀྱིས་འོད་མཐོང་བའི་ཕྱིར་སྒྲོན་སྟེགས་སྟེང་དུ་འཇོག
LUK 11:34 ཁྱོད་ཀྱི་མིག་ཟུང་ནི་ལུས་ཀྱི་སྒྲོན་མེ་ཡིན༌ཏེ། མིག་ཟུང་གསལ་པོ་ཡིན་ན་ལུས་པོ་ཡོངས་རྫོགས་འོད་དང་ལྡན་པར་འགྱུར། གལ་ཏེ་ཁྱོད་ཀྱི་མིག་ཟུང་རབ་རིབ་ཡིན་ན་ལུས་པོ་ཡོངས་རྫོགས་མུན་ནག་ཡིན།
LUK 11:35 དེའི༌ཕྱིར། ཁྱོད་ཀྱིས་རང་གི་སེམས་ནང་གི་འོད་དེ་མུན་ནག་ཡིན་མིན་ལ་རྟོག་དཔྱོད༌གྱིས་ཤིག
LUK 11:36 གལ་ཏེ་ཁྱོད་ཀྱི་ལུས་ཧྲིལ་པོ་མུན་ནག་དང་བྲལ་ཞིང་འོད་དང་ལྡན༌ན། ཁྱོད་ལའང་སྒྲོན་མེའི་འོད་ཟེར་འཕྲོས་པ་ལྟར་ཡོངས་སུ་འོད་དང་ལྡན་པར་འགྱུར་ཞེས་གསུངས༌སོ།།
LUK 11:37 སྐྱབས་མགོན་ཡེ་ཤུས་དེ་ལྟར་གསུངས་པའི་རྗེས༌སུ། ཕ་རུ་ཤི་པ་ཞིག་གིས་ཁོང་ཉིད་ཞལ་ཟས་བཞེས་པར་གདན་དྲངས་པ་དང་ཁོང་ཡང་ཕེབས་ཏེ་གྲལ་ལ་བཞུགས་སོ།།
LUK 11:38 ཁོང་གིས་ཞལ་ཟས་མ་བཞེས་སྔོན༌དུ། ཕྱག་ཟུང་གཙང་མར་མ་བཀྲུས་པའི་དོན་དེ་ཕ་རུ་ཤི་པས་མཐོང་ནས་ཡ་མཚན་སྐྱེས།
LUK 11:39 དེ་ནས་གཙོ་བོས་འདི་སྐད༌དུ། ད་ལྟ་ཕ་རུ་ཤི་པ་ཁྱོད་རྣམས་ཀྱིས་ཕོར་བ་དང་སྡེར་མའི་ཕྱི་ངོས་གཙང་མར་འཁྲུད༌ཀྱང༌། ཁྱོད་རྣམས་ཀྱི་ནང་དུ་འཕྲོག་བཅོམ་དང་ངན་སེམས་ཀྱིས་ཁེངས་འདུག
LUK 11:40 བླུན་པོ༌རྣམས། ཕྱི་ངོས་ལེགས་པར་མཛད་མཁན་དེས་ནང་ཡང་ལེགས་པར་མཛད་པ་མ་ཡིན༌ནམ།
LUK 11:41 དེའི༌ཕྱིར། ཁྱོད་རྣམས་ཀྱིས་ནང་དུ་གང་ཞིག་ཡོད་པ་དེ་མི་གཞན་ལ་སྦྱིན་པ་ཐོངས༌དང༌། ཁྱོད་ཅག་ལ་མཚོན་ན་དངོས་པོ་ཐམས་ཅད་ཀྱང་གཙང་མར་འགྱུར་རོ།།
LUK 11:42 ཀྱེ། ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌སྟེ། རྒྱུ་མཚན་ནི་ཁྱོད་རྣམས་ཀྱིས་དག་ཅི་དང༌སྤོས་དཀར། གཞན་ཡང་སྔོ་ཚོད་སྣ་ཚོགས་ཀྱི་བཅུ་ཆའི་གཅིག་འབུལ་བར་ཕུལ༌ནའང༌། བདེན་ལུགས་དང་དཀོན་མཆོག་ལ་བྱམས་པའི་དོན་སྤོང་བའི་ཕྱིར༌རོ།། འོན་ཀྱང་ཁྱོད་ཅག་གིས་དོན་འདི་དག་བསྲུང་འོས་པ་དང་གཞན་དེ་ཡང་འདོར་མི་འོས་སོ།།
LUK 11:43 ཡང་ཕ་རུ་ཤི་པ་ཁྱོད་རྣམས་ལ་ཆག་སྒོ་འབྱུང༌སྟེ། རྒྱུ་མཚན་ནི་ཁྱོད་རྣམས་ཆོས་ཁང་གི་གྲལ་མགོར་དགའ༌ཞིང༌། ཁྲོམ་སྲང་ནས་ཀྱང་མི་རྣམས་ཀྱི་བསྙེན་བཀུར་འཐོབ་པར་མོས་པའི་ཕྱིར༌རོ།།
LUK 11:44 ཡང་ཁྱོད་རྣམས་ལ་ཆག་སྒོ་འབྱུང༌སྟེ། རྒྱུ་མཚན་ཁྱོད་རྣམས་ནི་མིག་ལ་མི་མངོན་པའི་དུར་ས་ཞིག་དང་འདྲ༌ཞིང༌། མི་རྣམས་ཀྱིས་དོན་དེ་མི་ཤེས་པར་དུར་སའི་སྟེང་དུ་འགྲོ་བ་ཡིན་ཞེས་བཀའ་བཀྱོན་གནང༌ངོ༌།།
LUK 11:45 བཀའ་ཁྲིམས་ཀྱི་མཁས་པ་རྣམས་ལས་མི་གཅིག་ན༌རེ། སློབ་དཔོན༌ལགས། ཁྱེད་ཀྱིས་དེ་ལྟར་གསུངས་ནས་ངེད་རྣམས་ལའང་སྨད་པ་ཡིན་ཞེས་ཞུས་པ༌ལ།
LUK 11:46 ཁོང་གིས་འདི་སྐད༌དུ། བཀའ་ཁྲིམས་ཀྱི་མཁས་པ་ཁྱོད་རྣམས་ལའང་ཆག་སྒོ་འབྱུང༌སྟེ། ཁྱོད་རྣམས་ཀྱིས་ཁུར་བོ་ལྕི་མོ་མི་གཞན་ལ་འགེལ༌ཞིང༌། རང་གི་མཛུབ་མོ་གཅིག་གིས་ཀྱང་ཁུར་བོ་དེ་ལ་རེག་པར་མི་བྱ་བའི་ཕྱིར༌རོ།།
LUK 11:47 ཡང་ཁྱོད་རྣམས་ལ་ཆག་སྒོ་འབྱུང༌སྟེ། རྒྱུ་མཚན་ནི་ཁྱོད་རྣམས་ཀྱིས་ལུང་སྟོན་པ་རྣམས་ལ་བང་སོ་བརྩིགས༌ཤིང༌། ཁྱོད་རྣམས་ཀྱི་མེས་པོས་ཁོང་རྣམས་བསད་པ་ཡིན།
LUK 11:48 དེ་ལས་ཁྱོད་ཅག་གི་མེས་པོ་རྣམས་ཀྱིས་ཅི་བྱས་པ་དེར་ད་ལྟ་ཁྱོད་རྣམས་ཀྱང་ཡིད་འཐད་ཅིང་བདེན་དཔང་བྱེད་དེ། རྒྱུ་མཚན་ནི་ཁྱོད་ཅག་གི་མེས་པོ་རྣམས་ཀྱིས་ལུང་སྟོན་པ་རྣམས་བསད་མྱོང་བ་དང་ཁྱོད་རྣམས་ཀྱིས་ལུང་སྟོན་པར་བང་སོ་བརྩིགས།
LUK 11:49 དེའི༌ཕྱིར། དཀོན་མཆོག་གི་མཁྱེན་རབ་ཀྱིས་ཀྱང་འདི་སྐད་གསུངས་མྱོང༌སྟེ། བདག་གིས་ལུང་སྟོན་པ་དང་སྐུ་ཚབ་པ་རྣམས་ཁོ་ཚོའི་གམ་དུ་མངགས་ཀྱང་དེ་རྣམས་ཀྱིས་ལ་ལ་གསོད་ཅིང་ལ་ལར་གནོད་འཚེ་བྱེད་པར་འགྱུར་ཞེས༌པའོ།།
LUK 11:50 དེ་བས་འཇིག་རྟེན་བཀོད་པའི་ཚུན་ལ། ལུང་སྟོན་པ་ཐམས་ཅད་ཀྱི་ཁྲག་བཞུར་བའི་སྐྱིན་ཚབ་དེ་མི་རབས་འདི་ནས་ལེན་དགོས༌ཏེ།
LUK 11:51 ཧ་བེལ་གྱི་ཁྲག་བཞུར་བ་ནས༌བཟུང༌། མཆོད་ཁང་དང་མཆོད་ཁྲི་གཉིས་ཀྱི་བར་དུ་བསད་མྱོང་བའི་ལུང་སྟོན་པ་ཟ་ཀར་ཡཱ་བར་གྱི་སྐྱིན་ཚབ་ཐམས་ཅད་ལེན་པར་འགྱུར། ཡང་བདག་གིས་ཁྱོད་རྣམས་ལ་སྨྲ་བར་བྱ་སྟེ། དོན་འདི་ཐམས་ཅད་མི་རབས་འདིས་འགན་འཁུར་དགོས་སོ།།
LUK 11:52 ཡང་བཀའ་ཁྲིམས་ཀྱི་མཁས་པ་ཁྱོད་རྣམས་ལ་ཆག་སྒོ་འབྱུང༌སྟེ། རྒྱུ་མཚན་ནི་ཁྱོད་རྣམས་ཀྱིས་ཤེས་བྱའི་ལྡེ་མིག་ཕྲོགས་ཤིང་ཤེས་བྱའི་ནང་དུ་མ་ཞུགས་པར། དེའི་ནང་ལ་འཇུག་པའི་མི་གཞན་རྣམས་ཀྱང་བཀག་པའི་ཕྱིར་རོ་ཞེས་བཀའ་བཀྱོན་གནང༌ངོ༌།།
LUK 11:53 སྐྱབས་མགོན་ཡེ་ཤུ་སྒོའི་ཕྱི་རོལ་ཏུ་ཕེབས་པ༌དང༌། མཁན་པོ་དང་ཕ་རུ་ཤི་པ་རྣམས་ཀྱིས་ཁོང་ལ་ངོ་རྒོལ་ཆེན་པོ་བྱེད་ཅིང་རྩོད་པའི་དྲི་བ་སྣ་ཚོགས་དྲིས་པ༌དང༌།
LUK 11:54 དེ་རྣམས་ཀྱིས་ཁོང་གི་གསུང་ལས་ཉེས་སྐྱོན་འཚོལ་ཕྱིར་ལྐོག་ཏུ་ཐབས་བཙལ༌ཏོ།།
LUK 12:1 དེའི་དུས༌སུ། མི་གྲངས་སྟོང་ཕྲག་དུ་མ་འདུས་ཤིང་འཚང་ཁ་ཤིག་ཤིག་བརྒྱབ་ནས་ཐ་ན་ཕན་ཚུན་ཡང་བརྫིས་སོ།། སྐྱབས་མགོན་ཡེ་ཤུས་ཐོག་མར་ཐུགས་སྲས་རྣམས་ལ་འདི་སྐད༌དུ། ཁྱོད་རྣམས་ཀྱིས་ཕ་རུ་ཤི་པའི་སྐྱུར་རྩི་སྟེ་ཚུལ་འཆོས་ལ་དོགས་པར༌གྱིས།
LUK 12:2 སྦས་པའི་དོན་ཐམས་ཅད་མི་མངོན་པ་ཅི་ཡང་མེད༌ལ། གསང་བའི་དོན་ཐམས་ཅད་ཀྱང་ཤེས་པར་མི་འགྱུར་བ་ཅི་ཡང་མེད།
LUK 12:3 དེ་བཞིན་དུ་ཁྱོད་རྣམས་ཀྱིས་ལྐོག་ནས་ཅི་ཞིག་སྨྲས་པ་དེ་མི་རྣམས་ཀྱིས་མངོན་གསལ་དུ་ཐོས་པར་འགྱུར། ཁང་པའི་སྦུག་མར་ཁ་རྣ་བར་གཏད་དེ་ཤུབ་ཤུབ་ཏུ་གང་ཞིག་སྨྲས་པ་དེའང་ཁང་པའི་ཐོག་ནས་བསྒྲག་པར་འགྱུར་རོ།།
LUK 12:4 བདག་གི་གྲོགས་པོ༌རྣམས། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ལུས་པོ་འཇོམ་ཡང༌དེ་ལས་གཞན་ཅི་ཡང་བྱེད་མི་ཐུབ་པ་དག་ལ་འཇིགས་པར་མི༌བྱའོ།།
LUK 12:5 འོན་ཀྱང་། བདག་གིས་ཁྱོད་རྣམས་གང་ལ་འཇིགས་དགོས་པ་དེ་སྟོན་པར༌བྱའོ།། ཁྱོད་ཀྱི་སྲོག་ལེན་ནུས་པ་དང་ཕྱིས་སུ་དམྱལ་བའི་གནས་སུ་འཕེན་པར་མཛད་པའི་དབང་ཡང་ཡོད་པ་དེ་ཉིད་ལ་འཇིགས་དགོས། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་རྣམས་དེ་ཉིད་ལ་འཇིགས་པར༌གྱིས།
LUK 12:6 བྱེའུ་ལྔ་ནི་དོང་ཙེ་གཉིས་ལ་འཚོང་ཐུབ་པ་མ་ཡིན༌ནམ། འོན་ཀྱང་དཀོན་མཆོག་གི་སྤྱན་སྔར་བྱེའུ་རྣམས་ལས་གཅིག་ཀྱང་བརྗེད་མི་སྲིད།
LUK 12:7 དཀོན་མཆོག་གིས་ཐ་ན་ཁྱོད་རྣམས་ཀྱི་སྐྲ་ཡི་ཉག་མ་རེ་རེ་ཡང་གྲངས་སུ་བརྩིས་ཡོད་པས། འཇིགས་མི་དགོས་ཏེ། བྱེའུ་མང་པོ་ལས་ཀྱང་ཁྱོད་རྣམས་ལ་རིན་ཐང་ཆེན་པོ་ལྡན་ནོ།།
LUK 12:8 ཡང་བདག་གིས་ཁྱོད་རྣམས་ལ༌སྨྲའོ།། སུ་ཞིག་གིས་མི་གཞན་གྱི་མདུན་དུ་ང་རང་ཁས་བླངས༌ན། མིའི་བུ་ཡིས་ཀྱང་དཀོན་མཆོག་གི་ཕོ་ཉ་རྣམས་ཀྱི་མདུན་ནས་མི་དེ་ཁས་ལེན་པར་འགྱུར།
LUK 12:9 འོན་ཀྱང་། སུ་ཞིག་གིས་མི་གཞན་གྱི་མདུན་དུ་ང་རང་ཁས་མ་བླངས༌ན། དཀོན་མཆོག་གི་ཕོ་ཉ་རྣམས་ཀྱི་མདུན་ནས་མི་དེའང་ཁས་ལེན་པར་མི་འགྱུར།
LUK 12:10 ཡང་སུ་ཞིག་གིས་མིའི་བུ་ལ་གཏམ་ངན་སྨྲས་ན་མི་དེའི་སྡིག་པ་བསལ་བར་འགྱུར༌ཡང༌། དམ་པའི་ཐུགས་ཉིད་ལ་སྐུར་བ་བཏབ་ན་མི་དེའི་སྡིག་པ་གཏན་ནས་བསལ་བར་མི་འགྱུར་རོ།།
LUK 12:11 མི་གཞན་གྱིས་ཁྱོད་རྣམས་ཆོས་ཁང་གི་ཁྲིམས༌རའམ། ཁྲིམས་དཔོན་ནམ་མི་དབང་དང་ལྡན་པ་བཅས་ཀྱི་མདུན་དུ་ཁྲིད་པའི་དུས༌སུ། ཁྱོད་རྣམས་ཀྱིས་ལན་ཇི་ལྟར་འདེབས་པ་དང་གང་ཞིག་བརྗོད་པ་ལ་སེམས་ཁྲལ་མ་བྱེད༌ཅིག
LUK 12:12 རྒྱུ་མཚན་ནི་དེའི་དུས་སུ་དམ་པའི་ཐུགས་ཉིད་ཀྱིས་ཁྱོད་རྣམས་ལ་གང་ཞིག་སྨྲ་དགོས་པ་སྟོན་པར་འགྱུར་ཞེས་གསུངས༌སོ།།
LUK 12:13 མི་ཚོགས་ཀྱི་ཁྲོད་དུ་མི་ཞིག་གིས་སྐྱབས་མགོན་ཡེ་ཤུ༌ལ། སློབ་དཔོན༌ལགས། ཁྱེད་ཀྱིས་ངའི་ཕུ་བོར་བཀའ་གནང་སྟེ་ཤུལ་བཞག་རྒྱུ་ནོར་བདག་ལའང་བགོ་བཤའ་བྱེད་པར་མཛོད་ཅེས་ཞུས་པ༌ན།
LUK 12:14 ཁོང་གིས་འདི་སྐད༌དུ། གྲོགས༌པོ། སུ་ཞིག་གིས་ང་རང་ཁྱོད་གཉིས་ཀྱི་ཤུལ་བཞག་རྒྱུ་ནོར་བགོ་བཤའ་བྱེད་པའི་བར་འདུམ་པའམ་འགོ་པར་བསྐོས་པ་ཡིན་ནམ་ཞེས་གསུངས་པ༌དང༌།
LUK 12:15 ཡང་སྐྱབས་མགོན་ཡེ་ཤུས་མི་ཚོགས་ལ་འདི་སྐད༌དུ། ཁྱོད་རྣམས་ཀྱིས་རང་ཉིད་བསྲུང་ཞིང་མཉམ་པར་བཞག་སྟེ་བརྣབ་སེམས་ཅན་གྱི་རིགས་ཐམས་ཅད་ལ་དོགས་པར༌གྱིས། རྒྱུ་མཚན་མི་ཡི་ཚེ་སྲོག་ནི་རྒྱུ་ནོར་ལོངས་སྤྱོད་མང་པོ་ཡོད་མེད་ལ་རག་མི་ལས་པའི་ཕྱིར་ཡིན་ཞེས་གསུངས༌སོ།།
LUK 12:16 ཡང་ཁོང་གིས་དཔེའི་སྒོ་ནས་འདི་སྐད༌དུ། དེ་ཡང་མི་ཕྱུག་པོ་ཞིག་ཡོད་པར་ཞིང་ལ་ལོ་ལེགས་བྱུང༌ཞིང༌།
LUK 12:17 ཁོའི་སེམས་སུ་འབྲུ་རིགས་ལ་འབྲུ་མཛོད་མེད་པས་བདག་གིས་ཅི་བྱའམ་ཞེས་བསམས་པ༌དང༌།
LUK 12:18 ཡང་ཁོ་ན༌རེ། བདག་གིས་རང་གི་བང་མཛོད་རྣམས་བཤིག་ཅིང་དེ་ལས་ཀྱང་ཆེ་བ་རྣམས་བཟོས༌ཏེ། རང་གི་འབྲུ་རིགས་དང་རྒྱུ་ནོར་ཐམས་ཅད་དེ་རུ་འཇོག་པར་བྱའོ་སྙམ་པ༌དང༌།
LUK 12:19 དེའི་རྗེས་སུ་ཡང་རང་གིས་རང༌ལ། ཁྱོད་ཀྱིས་ལོ་མང་པོའི་རིང་ལ་རྒྱུ་ནོར་འབོར་ཆེན་བསགས་ཡོད༌པས། ད་ལྟ་ངལ་གསོ་བྱོས་དང་བློ་བདེ་བག་ཕེབས་ངང་ནས་བཟའ་བཏུང་ལོངས་སུ་སྤྱད་དེ་སྤྲོ་སྐྱིད་ལ་རོལ་ཅིག་ཅེས་སྨྲ་བར་བྱའོ་བསམས༌མོད།
LUK 12:20 འོན་ཀྱང་དཀོན་མཆོག་གིས་ཁོ་རང་ལ་འདི་སྐད༌དུ། གླེན་པ༌ཁྱོད། དོ་དགོང་གི་དུས་འདི་ལ་ཁྱོད་ཀྱི་ཚེ་སྲོག་ལེན་པར༌འགྱུར། ཁྱོད་ཀྱིས་སྟ་གོན་བྱས་ནས་བསགས་པའི་རྒྱུ་ནོར་དེ་སུ་ལ་དབང་ངམ་བལྟ་ཞེས་གསུངས༌པའོ།།
LUK 12:21 དེ་བཞིན་མི་སུས་ཀྱང་རང་གི་དོན་དུ་རྒྱུ་ནོར་མང་པོ་བསགས་ཀྱང་དཀོན་མཆོག་གི་སྤྱན་སྔར་ཕྱུག་པོ་མ་ཡིན་ཞེས་གསུངས༌སོ།།
LUK 12:22 ཡང་སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། དེས་ན་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་རྣམས་ཀྱིས་རང་གི་ཚེ་སྲོག་གི་དོན་དུ་ཟས་གང་ཞིག་སྤྱོད་པ་དང་ལུས་པོའི་ཆེད་དུ་གོས་གང་ཞིག་གྱོན་པ་ལའང་སེམས་ཁྲལ་མ་བྱེད༌ཅིག
LUK 12:23 རྒྱུ་མཚན་ནི་ཁ་ཟས་ལས་ཚེ་སྲོག་ཁྱད་དུ་འཕགས་ཤིང་གྱོན་ཆས་ལས་ཀྱང་མིའི་ལུས་པོ་ནི་ཁྱད་དུ་འཕགས་པ་ཡིན།
LUK 12:24 བྱ་ཕོ་རོག་དག་ལ་ལྟོས༌དང༌། དེ་དག་གིས་ས་བོན་མི་འདེབས༌ལ། སྟོན་ཡང་མི་བསྡུ་ཞིང་བང་མཛོད་དང་འབྲུ་མཛོད་ཅི་ཡང་མེད༌མོད། འོན་ཀྱང་དཀོན་མཆོག་གིས་དེ་དག་གསོ་བ་ཡིན། ཁྱོད་རྣམས་ནི་བྱ་ལས་ཇི་འདྲའི་རིན་ཐང་ཆེ༌ཨང༌།
LUK 12:25 ཁྱོད་རྣམས་ལས་སུ་ཞིག་གིས་སེམས་ཁྲལ་བྱས་ནས་རང་གི་ཚེ་ཐག་ཡུད་ཙམ་ཞིག་ཇེ་རིང་དུ་གཏོང་ནུས༌སམ།
LUK 12:26 ཁྱོད་རྣམས་ཀྱིས་དོན་ཆུང་ངུ་འདི་ལྟ་བུ་ཞིག་ཀྱང་བསྒྲུབ་མི་ནུས༌ན། དོན་དག་གཞན་ལ་སེམས་ཁྲལ་བྱ་དགོས་དོན༌ཅི།
LUK 12:27 མེ་ཏོག་ཀུ་མུད་ཇི་ལྟར་སྐྱེ་བར་ལྟོས༌དང༌། དེ་དག་གིས་ལས་ཀ་མི་བྱེད་ལ་བལ་ཡང་མི་འཁེལ་མོད། འོན་ཀྱང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། སོ་ལོ་མོན་གྱི་བརྗིད་ཉམས་ཤིན་ཏུ་ཆེ་བའི་དུས༌སུ། ཁོང་གི་རྒྱན་གོས་མེ་ཏོག་འདི་ལའང་མི༌དོའོ།།
LUK 12:28 དེའི༌ཕྱིར། དེ་རིང་ཡོད་ཡོད་འདྲ་ཡང་སང་ཉིན་ཐབ་ལ་བསྲེག་པར་འགྱུར་བའི་སྤང་ཐང་གི་རྩྭ་ཡང་དཀོན་མཆོག་གིས་ལེགས་པར་བསྐྱངས༌ན། དད་པ་ཆུང་བ་ཁྱོད་རྣམས་དེ་ལས་ལྷག་པར་སྐྱོང་བར་མི་མཛད༌དམ།
LUK 12:29 ཁྱོད་རྣམས་ཀྱིས་བཟའ་བཏུང་གང་ཞིག་ལོངས་སུ་སྤྱོད་པར་མ་སྙེག་ལ་སེམས་ཁྲལ་ཡང་མ་བྱེད༌ཅིག
LUK 12:30 རྒྱུ་མཚན་ནི་དེ་ཐམས་ཅད་འཇིག་རྟེན་པ་དག་གིས་བརྩོན་ས་ཡིན༌ལ། ཁྱོད་རྣམས་ལ་དེ་དག་མཁོ་བ་ཁྱོད་ཅག་གི་ཡབ་ཀྱིས་མཁྱེན༌ནོ།།
LUK 12:31 ཁྱོད་རྣམས་ཀྱིས་དཀོན་མཆོག་གི་རྒྱལ་སྲིད་འཚོལ་ཞིང་སྙེགས་པར་གྱིས་དང་། དེ་རྣམས་ཀྱང་ཁྱོད་ཅག་ལ་གནང་བར་འགྱུར།
LUK 12:32 ཁྱོད་ཅག་གི་ཡབ་ཀྱིས་རང་གི་རྒྱལ་སྲིད་ཀྱང་ཁྱོད་རྣམས་ལ་གནང་བར་ཐུགས་དགྱེས༌པས། ཀྱེ། ཚོགས་ཆུང་ཁྱོད་རྣམས་མ་སྐྲག༌ཅིག
LUK 12:33 ཁྱོད་ཅག་གིས་རང་གི་རྒྱུ་རྫས་རྣམས་བཙོང་སྟེ་མི་གཞན་ལ་སྦྱིན་པར༌གྱིས། དེ་ནི་རུལ་བར་མི་འགྱུར་བའི་དངུལ་ཁུག་རང་ལ་འབྱོར་བ་དང་མཚུངས༌ཤིང༌། འཛད་མཐའ་མེད་པའི་ནོར་བུ་ནམ་མཁའི་ཞིང་ཁམས་སུ་གསོག་པ་དང་འདྲ༌སྟེ། གནས་དེར་རྐུན་མ་མི་ཐོན་ཞིང་འབུ་སྲིན་གྱིས་ཀྱང་བཟའ་བར་མི་འགྱུར།
LUK 12:34 རྒྱུ་མཚན་ནི་ཁྱོད་རྣམས་ཀྱི་ནོར་བུ་གང་དུ་ཡོད་ན་ཁྱོད་རྣམས་ཀྱི་སེམས་ཀྱང་དེ་རུ་ཡོད་པའི་ཕྱིར་ཡིན་ཞེས་གསུངས༌སོ།།
LUK 12:35 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་ལུས་ལ་སྐ་རགས་བཅིངས་ཤིང་སྒྲོན་མེ་བསྒྲོན༌ཏེ།
LUK 12:36 རང་ཉིད་ནི་རང་གི་བདག་པོ་གཉེན་སྟོན་ལས་ཕྱིར་ལོག་པར་སྒུག་པའི་གཡོག་པོ་རྣམས་དང་འདྲ་བར་བྱོས་ཤིག བདག་པོ་ཕྱིར་ཕེབས་ཏེ་སྒོ་བརྡུང་དུས་གཡོག་པོ་རྣམས་ཀྱིས་ཀྱང་མྱུར་དུ་སྒོ་འབྱེད་ཐུབ་པ་ཡིན།
LUK 12:37 བདག་པོ་ཕྱིར་ཕེབས་དུས་གཡོག་པོ་རྣམས་ཀྱིས་མཉམ་པར་བཞག་ནས་སྒུག་སྡོད་པ་ཁོང་གིས་གཟིགས་ན་གཡོག་པོ་རྣམས༌བདེའོ།། བདག་གིས་ཁྱོད་རྣམས་ལ་བདེན་པར་སྨྲ༌སྟེ། བདག་པོས་ལུས་ལ་སྐ་རགས་བཅིངས་ཤིང་གཡོག་པོ་རྣམས་གྲལ་ལ་སྡོད་དུ་འཇུག་པ་དང་དེ་དག་གི་མདུན་དུ་ཡོང་ནས་ཞབས་ཕྱི་བསྒྲུབ་པ་ཡིན།
LUK 12:38 ཡང་ནམ་ཕྱེད་དམ་སྐྱ་རེངས་ཀྱི་དུས་གང་ཞིག་ལ་ཁོང་ཉིད་ཕྱིར་སླེབས་ཚེ། གཡོག་པོ་རྣམས་ཀྱིས་དེ་ལྟར་སྒུག་བཞིན་པ་གཟིགས༌ན། གཡོག་པོ་དེ་རྣམས་ཀྱང༌བདེའོ།།
LUK 12:39 ཁྱིམ་བདག་གིས་དུས་ནམ་ཞིག་ལ་རྐུན་མ་ཡོང་ངེས་པ་ཤེས༌ན། ཁོས་རྐུན་མ་ཁྱིམ་ལ་འཛུལ་དུ་མི་འཇུག་པ་ཁྱོད་རྣམས་ཀྱིས་ཤེས་པར་གྱིས།
LUK 12:40 དེ་བས་ཁྱོད་རྣམས་ཀྱིས་ཀྱང་སྟ་གོན་བྱོས༌དང༌། རྒྱུ་མཚན་ནི་ཁྱོད་རྣམས་ཀྱིས་སེམས་སུའང་མི་དྲན་པའི་དུས་ཤིག༌ལ། མིའི་བུ་ཕེབས་ཡོང་ངེས་ཡིན་ཞེས་གསུངས༌སོ།།
LUK 12:41 ཐུགས་སྲས་པེ་ཏྲོ་ན༌རེ། གཙོ་བོ༌ལགས། དཔེ་འདི་ནི་ངེད་རྣམས་ཀྱི་དོན་དུ་གསུངས་པ་ཡིན༌ནམ། ཡང་ན་མི་ཀུན་ལ་གསུངས་པ་ཡིན་ཞེས་ཞུས་པ༌ན།
LUK 12:42 གཙོ་བོས་འདི་སྐད༌དུ། དེས་ན་སུ་ཞིག་བློ་སེམས་དཀར་ཞིང་འཇོན་ཐང་ཅན་གྱི་གཉེར་པ་ཡིན༌པ་དང་། བདག་པོས་ཁོ་ནི་རང་གི་གཡོག་པོ་རྣམས་ཀྱི་འགོ་པར་བསྐོས༌ཏེ། དུས་ལྟར་དེ་རྣམས་ལ་ཟས་སྐལ་སྟེར་བ་ཡིན་ནམ།
LUK 12:43 བདག་པོ་ཕྱིར་སླེབས་ཏེ་གཡོག་པོས་དེ་ལྟར་སྒྲུབ་བཞིན་པ་མཐོང༌ན། གཡོག་པོ་དེ་ནི༌བདེའོ།།
LUK 12:44 བདག་གིས་ཁྱོད་རྣམས་ལ་བདེན་པར༌སྨྲ་སྟེ། བདག་པོས་གཡོག་པོ་དེར་རྒྱུ་ནོར་ཐམས་ཅད་དོ་དམ་བྱེད་པའི་དབང་སྤྲོད་པར་འགྱུར་རོ།།
LUK 12:45 འོན་ཀྱང་། གཡོག་པོའི་སེམས་སུ་ངའི་བདག་པོ་ཕྱིར་ཡོང་བ་འཕྱིའོ་སྙམ༌སྟེ། གཡོག་པོ་དང་གཡོག་མོ་གཞན་རྣམས་ལ་གཅར་རྡུང་བྱེད་པ་དང་། བཟའ་བཏུང་སྤྱོད་ཅིང་ར་བཟི་བར་གྱུར༌ན།
LUK 12:46 ཁོས་སེམས་སུའང་མི་དྲན་པའི་ཉིན་ཞིག་དང་། མི་ཤེས་པའི་དུས་ཤིག་ལ། གཡོག་པོ་དེའི་བདག་པོ་ཕྱིར་ཕེབས་ཏེ། ཁོ་རང་དུམ་བུར་གཅོད་ཅིང་། དད་པ་མེད་པ་རྣམས་དང་མཉམ་དུ་གཏོང་བར་འགྱུར།
LUK 12:47 ཡང་གཡོག་པོ་དེས་བདག་པོའི་བསམ་དོན་ཤེས་བཞིན་དུ་སྟ་གོན་མི་བྱེད་པ་དང་བདག་པོའི་བསམ་དོན་ལྟར་མ་བསྒྲུབས༌ན། ཁོས་རྡུང་རྡེག་མང་པོ་མྱང་བར་འགྱུར་རོ།།
LUK 12:48 འོན་ཀྱང་བདག་པོའི་བསམ་དོན་མི་ཤེས་པའི་གཡོག་པོས་རྡུང་རྡེག་བྱེད་འོས་པའི་ཉེས་སྐྱོན་བཟོས་ཀྱང་དེས་རྡུང་རྡེག་ཉུང་ཙམ་མྱང་བར་འགྱུར། རྒྱུ་མཚན་ནི་མི་སུ་ཞིག་ལ་མང་པོ་གནང་བ་ཡིན༌ན། མི་དེ་ལས་ཀྱང་ཕྱིར་མང་པོ་ལེན་པ་དང༌། ཡང་སུ་ཞིག་ལ་མང་པོ་བཅོལ་བ་ཡིན༌ན། མི་དེས་ཀྱང་ཕྱིར་མང་པོ་སྤྲོད་པར་འགྱུར་ཞེས་གསུངས༌སོ།།
LUK 12:49 ཡང་སྐྱབས་མགོན་ཡེ་ཤུས་འདི་སྐད༌དུ། བདག་ནི་ས་གཞི་ཆེན་པོར་མེ་འཕེན་དུ་ཡོང༌བ་ཡིན་ནོ།། མེ་འབར་ཟིན་ན་ཅི་མ༌རུང་།
LUK 12:50 བདག་གིས་ཁྲུས་གསོལ་ལེན་དགོས་པ་ད་དུང་བླངས་མེད་ཅིང་། དོན་དེ་འགྲུབ་པའི་བར་དུ་བདག་ནི་ཇི་འདྲའི་སེམས་འཚབ་ཨང་།
LUK 12:51 ཁྱོད་རྣམས་ཀྱིས་ང་རང་འཇིག་རྟེན་འདིར་ཡོང་བ་ནི་མི་རྣམས་ལ་ཞི་བདེ་འཐོབ་པའི་ཆེད་དུ་ཡིན་སྙམ་མམ། བདག་གིས་ཁྱོད་རྣམས་ལ་སྨྲ་བར༌བྱའོ།། དེ་ལྟར་མ་ཡིན༌ཏེ། ང་ནི་དབྱེན་འབྱེད་དུ་འོངས་པ་ཡིན།
LUK 12:52 དུས་ད་ནས༌བཟུང༌། ཁྱིམ་ཚང་གཅིག་གི་བཟའ་མི་ལྔ་བོར་རྩོད་གླེང་བྱུང༌སྟེ། མི་གསུམ་ཅན་གྱིས་མི་གཉིས་ཅན་དང་མི་གཉིས་ཅན་གྱིས་མི་གསུམ་ཅན་ལ་ཕན་ཚུན་རྒོལ་བར་འགྱུར།
LUK 12:53 ཡང་ཕ་ཡིས་བུ༌དང༌བུ་ཡིས་ཕ་ལ་རྒོལ་བ༌དང༌། མ་ཡིས་བུ་མོ༌དང༌བུ་མོས་མ་ལ་རྒོལ་བ༌དང༌། སྒྱུག་མོས་མནའ་མ༌དང༌མནའ་མས་སྒྱུག་མོ་ལ་རྒོལ་བར་འགྱུར་ཞེས་གསུངས༌སོ།།
LUK 12:54 ཡང་སྐྱབས་མགོན་ཡེ་ཤུས་མི་ཚོགས་ལ་འདི་སྐད༌དུ། ཁྱོད་རྣམས་ཀྱིས་ནུབ་ཕྱོགས་ནས་སྤྲིན་འཁྲིགས་པ་མཐོང་མ་ཐག༌ཏུ། ཆར་བ་འབབ་ངེས་རེད་ཟེར་ཞིང་དངོས་གནས་དེ་ལྟར་དུ་འབྱུང༌།
LUK 12:55 ཡང་ལྷོ་ཕྱོགས་ནས་རླུང་གཡོས་པ་མཐོང་བ་ན། ཚ་བ་འབྱུང་ངེས་རེད་ཟེར་བ་དང་དེ་ལྟར་དུ་འབྱུང༌།
LUK 12:56 འོན་ཀྱང་ཚུལ་འཆོས་ཅན་ཁྱོད་རྣམས་ཀྱིས་གནམ་སའི་རང་བཞིན་བརྟགས་པས་ཤེས༌ཀྱང་། དུས་འདིར་ཅིའི་ཕྱིར་རྟོག་མི་ཤེས་སམ།
LUK 12:57 ཁྱོད་རྣམས་ཀྱིས་གང་ཞིག་འོས་མཐུན་ཡིན་མིན་ལ་ཅིའི་ཕྱིར་རང་གིས་ཐག་གཅོད་མི་བྱེད༌དམ།
LUK 12:58 དཔེར་ན་ཁྱོད་དང་ཁྱོད་རང་གཏུག་མཁན་གཉིས་མཉམ་དུ་ཁྲིམས་དཔོན་གྱི་དྲུང་དུ་འགྲོ་བའི་དུས༌སུ། ལམ་བར་དུ་ཁོ་དང་འགྲིག་མཐུན་ཡོང་བར་བརྩོན་པར༌གྱིས། དེ་ལྟར་མ་བྱས་ཚེ་ཁྱོད་ཀྱི་གྱོད་ཡས་ཁྱོད་རང་ཁྲིམས་དཔོན་གྱི་དྲུང་དུ་ཁྲིད༌ཅིང༌། ཁྲིམས་དཔོན་གྱིས་ཁྱོད་རང་དམག་མིར་སྤྲོད་པ་དང་དམག་མིས་ཁྱོད་རང་བཙོན་དུ་འཇུག་པར་འགྱུར།
LUK 12:59 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་ཀྱིས་དོང་ཙེ་ཐམས་ཅད་སྐྱིན་ཚབ་ཏུ་སྤྲད་ཚར་བའི་བར་དུ་ཁྱོད་རང་བཙོན་ཁང་ལས་གཏན་ནས་ཐར་མི་ནུས་ཞེས་གསུངས༌སོ།།
LUK 13:1 སྐབས་དེ་ཉིད་དུ། གནས་དེར་ཡོད་པའི་མི་འགའ་ཞིག༌གིས། དེ་སྔར་པི་ལ་ཏུ་ཡིས་ག་ལིལ་པ་ཁ་ཤས་བསད་ནས་དེ་རྣམས་ཀྱི་ཁྲག་མཆོད་པའི་ནང་དུ་བསྲེས་པའི་ལོ་རྒྱུས་ཁོང་ལ་ཞུས་པ༌དང༌།
LUK 13:2 ཁོང་གིས་འདི་སྐད༌དུ། ག་ལིལ་པ་དེ་དག་གིས་སྡུག་བསྔལ་ཆེན་པོ་མྱངས༌པས། ཁྱོད་ཅག་གིས་ཁོ་རྣམས་ག་ལིལ་ཡུལ་གྱི་མི་གཞན་ཐམས་ཅད་ལས་ཀྱང་སྡིག་ཅན་ཡིན་པར་སྙམ་མམ།
LUK 13:3 བདག་གིས་ཁྱོད་རྣམས་ལ་སྨྲ་བར༌བྱའོ།། དེ་འདྲ་མ་ཡིན༌ཏེ། གལ་སྲིད་ཁྱོད་རྣམས་ཀྱིས་འགྱོད་བཤགས་མ་བྱས་ན་ཁྱོད་རྣམས་ཀྱང་དེ་ལྟར་འཆི་བར་འགྱུར།
LUK 13:4 ཡང་སྔོན་ཆད་སི་ལོ་ཨམ་གྱི་མཁར་གློ་བུར་བརྡིབས་ཏེ་མི་བཅོ་བརྒྱད་ཤི་བ་དེ་དག༌ནི། ཁྱོད་རྣམས་ཀྱིས་ཡེ་རུ་སཱ་ལེམ་དུ་གནས་པའི་མི་ཐམས་ཅད་ལས་ཀྱང་ཉེས་ཅན་ཡིན་པར་སྙམ་མམ།
LUK 13:5 ཡང་བདག་གིས་ཁྱོད་རྣམས་ལ་སྨྲ་བར༌བྱའོ།། དེ་འདྲ་མ་ཡིན༌ཏེ། གལ་སྲིད་ཁྱོད་རྣམས་ཀྱིས་འགྱོད་བཤགས་མ་བྱས་ན་ཁྱོད་རྣམས་ཀྱང་དེ་ལྟར་འཇིག་པར་འགྱུར་ཞེས་གསུངས༌སོ།།
LUK 13:6 ཡང་སྐྱབས་མགོན་ཡེ་ཤུས་དཔེ་ལ་སྦྱར་ནས་འདི་སྐད༌གསུངས་པ་སྟེ། དེ་ཡང་མི་ཞིག་ལ་བསེ་ཡབ་ཤིང་སྡོང་ཞིག་ཡོད་པ་དེ་རང་གི་རྒུན་འབྲུམ་ར་བའི་ནང་དུ་བཙུགས་ཡོད། ཁོ་རང་ཤིང་སྡོང་དེའི་གམ་དུ་ཤིང་འབྲས་འཚོལ་དུ་སོང་ནའང་ཅི་ཡང་མ་རྙེད༌པས།
LUK 13:7 རྒུན་འབྲུམ་ར་བ་སྲུང་མཁན༌ལ། ཁྱོད་ཀྱིས་ལྟོས༌དང༌། བདག་ལོ་གསུམ་གྱི་རིང་ལ་བསེ་ཡབ་ཤིང་སྡོང་གི་ཤིང་འབྲས་འཚོལ་དུ་ཡོང་ནའང་ཅི་ཡང་མ་རྙེད། ད་ལྟ་ཤིང་སྡོང་དེ་ཆོད༌དང༌། ས་འདི་ཆུད་ཟོས་བྱེད་དགོས་དོན་མི་འདུག་ཅེས་སྨྲས་པ༌ན།
LUK 13:8 རྒུན་འབྲུམ་ར་བ་སྲུང་མཁན་ན༌རེ། བདག་པོ༌ལགས། ཤིང་སྡོང་འདི་ད་ལོ་རེ་ཞིག་སྐྱུར༌དང༌། ངས་ཤིང་སྡོང་མཐའ་འཁོར་གྱི་ས་བསློགས་ནས་ལུད་འཇོག་པར་བྱའོ།།
LUK 13:9 ལོ་རྗེས་མར་འབྲས་བུ་ཐོགས་ན་ལེགས། གལ་ཏེ་ད་དུང་འབྲས་བུ་མི་ཐོགས་ན་གཅོད་པར་བྱའོ་ཞེས་ལན་བཏབ་བོ།།
LUK 13:10 ངལ་གསོ་བའི་ཉིན་ལ་སྐྱབས་མགོན་ཡེ་ཤུས་ཆོས་ཁང་ཞིག་ཏུ་ཆོས་གསུང་བའི༌ཚེ།
LUK 13:11 གནས༌དེར་གདོན་འདྲེས་བཟུང་ནས་ལུས་པོ་བསྒུར༌ཅིང་། ལོ་བཅོ་བརྒྱད་ཀྱི་རིང་ལ་རྐེད་པ་ཡར་དགྱེ་མི་ནུས་པའི་བུད་མེད་ནད་པ་ཞིག་ཡོད༌པ་རེད།
LUK 13:12 སྐྱབས་མགོན་ཡེ་ཤུས་ཁོ་མོ་གཟིགས་པ་དང་ཚུར་བོས༌ཏེ། ཀྱེ། བུད་མེད། ཁྱོད་རང་ནད་འདི་ལས་ཐར་བ་ཡིན་ཞེས་གསུངས་པ༌དང༌།
LUK 13:13 ཁོང་གིས་ཕྱག་བུད་མེད་དེའི་ལུས་ལ་བཞག་པ༌ན། ཁོ་མོས་དེ་མ་ཐག་རྐེད་པ་ཡར་དགྱེ་ཞིང་དཀོན་མཆོག་ལ་བསྟོད་བསྔགས་ཕུལ་ཏོ།།
LUK 13:14 འོན་ཀྱང་ཆོས་ཁང་གི་དབུ་མཛིན་པ་ཞིག་ཡོད་པ༌དེས། སྐྱབས་མགོན་ཡེ་ཤུས་ངལ་གསོ་བའི་ཉིན་མོར་ནད་གསོས་པའི་རྐྱེན༌གྱིས། ཁོང་ཁྲོའི་ངང་ནས་མི་ཚོགས་ལ་འདི་ལྟར་སྨྲས་པ། གཟའ་འཁོར་གཅིག་ལ་བྱ་བ་སྒྲུབ་ཆོག་པའི་ཉིན་དྲུག་ཡོད༌པས། ཉིན་དེ་དག་ལ་ནད་གསོ་བའི་ཕྱིར་འདི་རུ་ཤོག༌དང༌། ངལ་གསོ་བའི་ཉིན་ལ་མ་ཡོང་ཞིག་ཅེས༌སོ།།
LUK 13:15 གཙོ་བོས་འདི་སྐད༌དུ། དེས་ན་ཚུལ་འཆོས་ཅན་ཁྱོད་རྣམས་མི་རེ་རེས་ངལ་གསོ་བའི་ཉིན་ལ་བ་གླང་ངམ་བོང་བུ་རང་གི་ཕྱུགས་ར་ལས་ཆུ་ཁར་མི་འཁྲིད༌དམ།
LUK 13:16 བུད་མེད་འདི་ནི་ཨབ་ར་ཧམ་གྱི་རིགས་རྒྱུད་ཡིན༌ཞིང༌། ལོ་བཅོ་བརྒྱད་ཀྱི་རིང་ལ་བདུད་སཱ་ཏན་གྱིས་བཟུང་བ་ཡིན་ཡང་ངལ་གསོ་བའི་ཉིན་ལ་ཁོ་མོ་ནད་ལས་ཐར་བར་བྱ་མི་འོས་སམ་ཞེས་གསུངས་པ༌དང༌།
LUK 13:17 དགྲ་ཟླ་ཐམས་ཅད་ངོ་གནོངས་པར་གྱུར་པ༌དང༌། སྐྱབས་མགོན་ཡེ་ཤུས་མཛད་པའི་གཟི་བརྗིད་དང་ལྡན་པའི་དོན་རྣམས་ལ་མི་ཐམས་ཅད་དགའ་བར་གྱུར༌ཏོ།།
LUK 13:18 སྐྱབས་མགོན་ཡེ་ཤུས་འདི་སྐད༌དུ། དཀོན་མཆོག་གི་རྒྱལ་སྲིད་ནི་གང་ཞིག་དང༌འདྲའམ། བདག་གིས་དཔེ་གང་ཞིག་དང་བསྡུར་བར༌བྱའམ།
LUK 13:19 དེ་ནི་ཡུངས་འབྲུའི་ས་བོན་ཞིག་དང་འདྲ༌སྟེ། མི་ཞིག་གིས་རང་གི་ར་བའི་ནང་དུ་ས་བོན་དེ་བཏབ་པ་དང་ཆེར་སྐྱེས་ནས་ཤིང་སྡོང་དུ་གྱུར༌ཅིང་། ནམ་མཁའི་བྱ་རྣམས་ཀྱིས་ཀྱང་ཡལ་གའི་གསེབ་ཏུ་ཚང་བཟོ་བ་ཡིན་ཞེས་གསུངས་པ༌དང༌།
LUK 13:20 ཡང་ཁོང་གིས་འདི་སྐད༌དུ། བདག་གིས་དཀོན་མཆོག་གི་རྒྱལ་སྲིད་ནི་གང་ཞིག་དང་བསྡུར༌རམ།
LUK 13:21 དེ་ནི་སྐྱུར་རྩི་ཞིག་དང་འདྲ༌སྟེ། བུད་མེད་ཅིག་གིས་སྐྱུར་རྩི་དེ་ཕྱེ་བྲེ་གསུམ་གྱི་ནང་དུ་བསྲེས་ནས་བརྫིས་ཏེ་རིམ་བཞིན་ཕྱེ་ཐམས་ཅད་སྐྱུར་ལངས་པ་དང་མཚུངས་ཞེས་གསུངས༌སོ།།
LUK 13:22 སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཕེབས་པའི་ལམ་བར༌དུ། གྲོང་རྡལ་དང་གྲོང་སྡེ་སོ་སོ་བརྒྱུད་ནས་ཆོས་གསུངས་སོ།།
LUK 13:23 མི་ཞིག་གིས་སྐྱབས་མགོན་ཡེ་ཤུ༌ལ། ཇོ་བོ༌ལགས། ཐར་པ་འཐོབ་པར་འགྱུར་བའི་མི་ཉུང་ངམ་ཞེས་ཞུས་པ༌ན། ཁོང་གིས་གནས་དེར་ཡོད་པའི་མི་རྣམས་ལ་འདི་སྐད༌དུ།
LUK 13:24 སྒོ་དོག་མོའི་ནང་དུ་འགྲོ་བར་བརྩོན་པར༌གྱིས། བདག་གིས་ཁྱོད་རྣམས་ལ་སྨྲ་བར་བྱ༌སྟེ། མ་འོངས་པ་ན་མི་མང་པོ་ཞིག་དེའི་ནང་དུ་འཇུག་འདོད་ཀྱང་འགྲོ་མི་ནུས་ལ།
LUK 13:25 ཁྱིམ་བདག་ཡར་ལངས་ནས་སྒོ་བརྒྱབ༌རྗེས། ཁྱོད་རྣམས་ཕྱི་རུ་ལངས་ནས་སྒོ་བརྡུངས་ཏེ། བདག་པོ༌ལགས། ངེད་རྣམས་ལ་སྒོ་ཕྱེ་བར་མཛོད་ཅེས་ཞུ་བ་བྱས་པ༌ན། ཁྱིམ་བདག་གིས་འདི་སྐད༌དུ། བདག་གིས་ཁྱོད་རྣམས་གང་ནས་ཡོང་བ་མི་ཤེས་ཞེས་བརྗོད་པར་འགྱུར།
LUK 13:26 ཁྱོད་རྣམས་ཀྱིས་འདི་ལྟར་བརྗོད་ངེས༌ཏེ། ངེད་ཅག་གིས་ཁྱེད་དང་ལྷན་དུ་བཟའ་བཏུང་སྤྱད་མྱོང༌ལ། ཁྱེད་ཀྱིས་ཀྱང་ངེད་ཅག་གི་སྲང་ལམ་ནས་མི་རྣམས་ལ་ཆོས་གསུངས་མྱོང་ཞེས་ཟེར༌ཞིང་།
LUK 13:27 ཡང་ཁྱིམ་བདག་གིས་འདི་སྐད༌དུ། ངས་ཁྱོད་རྣམས་ལ་སྨྲ་བར༌བྱ་སྟེ། ངས་ཁྱོད་རྣམས་གང་ནས་ཡོང་བ་མི་ཤེས། ལས་ངན་པ་བྱེད་མཁན་ཁྱོད་རྣམས་བདག་གི་དྲུང་ནས་ཕར་སོང་ཞིག་ཅེས་གསུང་བར་འགྱུར།
LUK 13:28 ཁྱོད་རྣམས་ཀྱིས་ཨབ་ར་ཧམ༌དང༌། ཨི༌སཱག ཡ༌ཀོབ། ལུང་སྟོན་པ་ཐམས་ཅད་དཀོན་མཆོག་གི་རྒྱལ་སྲིད་དུ་བཞུགས་ཡོད་པ་མཐོང་བར་འགྱུར༌ནའང༌། ཁྱོད་རྣམས་སྒོའི་ཕྱི་རོལ་ཏུ་ཕུད་ནས་གནས་དེ་རུ་ངུ་འབོད་བྱས་ནས་ཨམ་གཙིགས་བསྡམ་པར་འགྱུར་རོ།།
LUK 13:29 ཡང་ཕྱོགས་བཞི་མཚམས་བརྒྱད་ནས་ཡོང་བའི་མི་རྣམས་ཀྱང་དཀོན་མཆོག་གི་རྒྱལ་སྲིད་དུ་གསོལ་སྟོན་ལ་ཞུགས་པར་འགྱུར།
LUK 13:30 ལྟོས༌དང༌། ཕྱི་མ་ཡིན་པའི་མི་རྣམས་སྔ་མར་འགྱུར༌ཞིང༌། སྔ་མ་ཡིན་པའི་མི་རྣམས་ཕྱི་མར་འགྱུར་ཞེས་གསུངས༌སོ།།
LUK 13:31 དེའི་དུས༌སུ། ཕ་རུ་ཤི་པ་འགའ་ཡོང་སྟེ། ཧེ་རོ་དཱས་ཁྱེད་རང་གསོད་འདོད་པས་ཁྱེད་རང་གནས་གཞན་དུ་ཕེབས་པར་ཞུ་ཞེས་སྨྲས་སོ།།
LUK 13:32 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་སོང་ནས་གཡོ་སྒྱུ་ཅན་གྱི་ཝ་མོ་དེ་ལ་འདི་ལྟར༌དུ། ཉོན༌དང་། དེ་རིང་དང་སང་ཉིན་གྱི་དུས༌སུ། བདག་གིས་གདོན་འདྲེ་སྐྲོད་པ་དང་ནད་པ་གསོ་བར་བྱེད༌ཅིང༌། ཉིན་གསུམ་པར་བདག་གི་དོན་འགྲུབ་པར་འགྱུར་ཞེས་སྨྲོས༌ཤིག
LUK 13:33 འོན་ཀྱང་དེ་རིང་དང་སང༌ཉིན། གནངས་ཉིན་བཅས་ལ་ང་རང་ལམ་དུ་ཆས་དགོས༌ཏེ། ལུང་སྟོན་པ་ཞིག་ཡེ་རུ་སཱ་ལེམ་གྱི་ཕྱི་རོལ་ཏུ་འཆི་མི་རུང་བའི་ཕྱིར༌རོ།།
LUK 13:34 ཀྱེ། ཡེ་རུ་སཱ་ལེམ། ཡེ་རུ་སཱ་ལེམ། ཁྱོད་ཀྱིས་དུས་རྟག་ཏུ་ལུང་སྟོན་པ་རྣམས་གསོད་པར་བྱེད༌ཅིང༌། ཁྱོད་ཀྱི་གམ་དུ་མངགས་པའང་རྡོ་རུབ་གཏོང་བར་བྱེད། བྱ་མོས་བྱ་ཕྲུག་གཤོག་འོག་ཏུ་རུམ་པ༌ལྟར། བདག་གིས་ཀྱང་ལན་དུ་མར་ཁྱོད་ཀྱི་བུ་ཕྲུག་རྣམས་བསྡུ་འདོད་ནའང་ཁྱོད་རྣམས་མ་འཐད་དོ།།
LUK 13:35 ལྟོས༌དང༌། ཁྱོད་ཅག་གི་སྡོད་གནས་ནི་ཁྱོད་ཅག་ལ་སྟོང་བར་བྱས་ནས་བསྐྱུར་བ་ཡིན། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྱོད་རྣམས་ཀྱི་ངག་ལས་གཙོ་བོའི་མཚན་གྱི་སྒོ་ནས་བྱོན་པ་ནི་བྱིན་རླབས་ཅན་ཡིན་ཞེས་ཞུ་བའི་བར་དུ་ང་རང་མཐོང་བར་མི་འགྱུར་ཞེས་གསུངས༌སོ།།
LUK 14:1 ཡང་ངལ་གསོ་བའི་ཉིན་ཞིག༌ལ། སྐྱབས་མགོན་ཡེ་ཤུ་ཁོང་ཉིད་ཕ་རུ་ཤི་པའི་དཔོན་ཚང་ཞིག་ལ་ཞལ་ཟས་བཞེས་པར་ཕེབས་པ༌དང༌། དེ་རྣམས་ཀྱིས་ལྐོག་ནས་བལྟས་ཤིང་བརྟག་གོ།
LUK 14:2 ཁོང་གི་མདུན་དུ་དམུ་ཆུ་བྱུང་བའི་མི་ཞིག་ཡོད༌ཅིང༌།
LUK 14:3 སྐྱབས་མགོན་ཡེ་ཤུས་བཀའ་ཁྲིམས་ཀྱི་མཁས་པ་དང་ཕ་རུ་ཤི་པ་རྣམས་ལ་འདི་སྐད༌དུ། ངལ་གསོ་བའི་ཉིན་ལ་ནད་གསོ་བ་ནི་བཀའ་ཁྲིམས་དང་མཐུན་ནམ་མི་མཐུན་ཞེས་དྲིས༌ཀྱང༌།
LUK 14:4 དེ་རྣམས་ཀྱིས་ལན་ཅི་ཡང་མ་བཏབ་བོ།། སྐྱབས་མགོན་ཡེ་ཤུས་མི་དེ་བསྐྱོར་ནས་ནད་གསོས་ཏེ་ཕྱིར་འགྲོ་རུ་བཅུག་པ་དང་།
LUK 14:5 ཡང་ཁོང་གིས་འདི་སྐད༌དུ། ངལ་གསོ་བའི་ཉིན་ལ་ཁྱོད་རྣམས་ལས་སུ་ཞིག་གིས་རང་གི་བུའམ་བ་གླང་ཞིག་དོང་ཆུའི་ནང་དུ་ལྷུང་ན་དེ་མྱུར་བ་མྱུར་དུ་ཕྱིར་ལེན་པར་མི་བྱེད་དམ་ཞེས་གསུངས་པ༌ན།
LUK 14:6 དེ་རྣམས་ཀྱིས་ལན་འདེབས་མ་ནུས༌སོ།།
LUK 14:7 སྐྱབས་མགོན་ཡེ་ཤུས་མགྲོན་པོ་རྣམས་གྲལ་མགོ་རུ་སྡོད་པར་དགའ་བ་གཟིགས་ཏེ་དཔེ་ལ་སྦྱར་ནས་འདི་སྐད༌དུ།
LUK 14:8 སུ་ཞིག་གིས་ཁྱོད་རང་གཉེན་སྟོན་དུ་མགྲོན་ལ་བོས་པ༌ན། གྲལ་མགོ་རུ་མ་འདུག་ཅིག ཧ་ལམ་ཁྱོད་ལས་ཀྱང་གོ་གནས་མཐོ་བའི་མི་གཞན་ཡང་བོས་ཡོད༌སྲིད།
LUK 14:9 དེ་ལྟར་ཡིན་ན། ཁྱོད་དང་མི་གཞན་གདན་འདྲེན་ཞུ་མཁན་ཡོང༌སྟེ། ཁྱོད་ཀྱི་སྡོད་གནས་མི་འདི་ལ་སྤྲོད་པར་གྱིས་ཞེས་ཁྱོད་ལ་སྨྲ་ངེས༌པས། ཁྱོད་རང་ངོ་གནོང་ཞིང་གྲལ་མཇུག་ཏུ་སྡོད་དགོས་པར་འགྱུར་རོ།།
LUK 14:10 འོན་ཀྱང་མི་གཞན་གྱིས་ཁྱོད་རང་མགྲོན་དུ་བོས་ན། དེ་ལ་སོང་ནས་གྲལ་མཇུག་ཏུ་སྡོད༌དང༌། རྒྱུ་མཚན་ནི་ཁྱོད་རང་གདན་འདྲེན་ཞུ་མཁན་དེ་ཉིད་ཡོང་ནས། གྲོགས་པོ༌ལགས། ཁྱེད་རང་གྲལ་མགོ་རུ་བཞུགས་ཞེས་ཟེར་བའི་ཕྱིར༌རོ།། དེའི་དུས༌སུ། མགྲོན་པོ་གཞན་རྣམས་ཀྱི་མདུན་དུ་ཁྱོད་ལ་བརྩི་བཀུར་འཐོབ་པར་འགྱུར་རོ།།
LUK 14:11 རྒྱུ་མཚན་ནི་སུ་ཞིག་གིས་རང་ཉིད་མཐོ་བར་བཟུང་ན་དམན་པར་འགྱུར་བ༌དང༌། སུ་ཞིག་གིས་རང་ཉིད་དམན་པར་བཟུང་ན་མཐོ་བར་འགྱུར་བའི་ཕྱིར་རོ་ཞེས་གསུངས་སོ།།
LUK 14:12 ཡང་སྐྱབས་མགོན་ཡེ་ཤུས་རང་ཉིད་གདན་འདྲེན་ཞུ་མཁན་ལ་འདི་སྐད༌དུ། ཁྱོད་ཀྱིས་གུང་ཚིགས་དང་ཡང་ན་དགོང་ཇ་བཤམ་པའི་སྐབས༌སུ། རང་གི་གྲོགས༌པོའམ། སྤུན། གཉེན༌ཉེ། ཁྱིམ་མཚེས་ཕྱུག་པོ་རྣམས་མ་འབོད༌ཅིག དེ་ལྟར་བྱས་ན་ཕལ་ཆེར་དེ་དག་གིས་ཀྱང་ཁྱོད་རང་ཕྱིར་གདན་དྲངས་ནས་དྲིན་ལན་འཇལ་བར་འགྱུར།
LUK 14:13 འོན་ཀྱང་ཁྱོད་ཀྱིས་གསོལ་སྟོན་བཤམས་ན་དབུལ་པོ༌དང༌། དབང་བོ་སྐྱོན༌ཅན། གྱོལ་པོ། ལོང་བ་སོགས་བོས༌དང༌།
LUK 14:14 ཁྱོད་ལ་བདེ་བ་འཐོབ་པར་འགྱུར་རོ།། རྒྱུ་མཚན་ནི་མི་དེ་རྣམས་ཀྱིས་ཁྱོད་ལ་དྲིན་ལན་འཇལ་ཐབས་མེད༌ནའང༌། མི་རྣམ་དག་རྣམས་སླར་གསོན་པར་འགྱུར་བའི་དུས་སུ་ཁྱོད་ལ་དྲིན་ལན་འཐོབ་པར་འགྱུར་ཞེས་གསུངས༌སོ།།
LUK 14:15 དེ་ནས་སྐྱབས་མགོན་ཡེ་ཤུ་དང་ལྷན་དུ་གྲལ་ལ་བཞུགས་པའི་མི་གཅིག་གིས་གསུང་དེ་ཐོས་པ་དང་སྐྱབས་མགོན་ཡེ་ཤུ་ལ། དཀོན་མཆོག་གི་རྒྱལ་སྲིད་དུ་ཞལ་ཟས་བཞེས་མཁན་ཐམས་ཅད་བདེའོ་ཞེས་སྨྲས་པ༌དང༌།
LUK 14:16 སྐྱབས་མགོན་ཡེ་ཤུས་འདི་སྐད་དུ། དེ་ཡང་མི་ཞིག་གིས་གསོལ་སྟོན་ཕུན་སུམ་ཚོགས་པ་བཤམས་ཏེ་མི་མང་པོ་མགྲོན་དུ་བོས༌ཤིང༌།
LUK 14:17 དགོང་ཟས་ཀྱི་དུས༌སུ། རང་གི་གཡོག་པོ་མངགས་ཏེ་བོས་པའི་མགྲོན་པོ་རྣམས༌ལ། ཤོག༌དང༌། ཐམས་ཅད་སྟ་གོན་བྱས་ཚར་ཞེས་སྨྲས་སོ།།
LUK 14:18 འོན་ཀྱང་དེ་རྣམས་ཚང་མས་མགྲིན་གཅིག་ཏུ་གཡོལ་ཐབས་བྱས་ཤིང་། མི་སྔ་མ་དེ་ན༌རེ། ངས་ས་ཞིང་ཞིག་ཉོས་ཤིང་དེ་ལ་བལྟ་རུ་འགྲོ་དགོས་པས་དགོངས་འགལ་མེད་པར་ཞུ་ཞེས་སྨྲས་པ་དང༌།
LUK 14:19 མི་གཞན་ན༌རེ། ངས་བ་གླང་དོར་ལྔ་ཉོས་ཤིང་ག་འདྲ་ཡིན་པར་བལྟ་རུ་འགྲོ་དགོས་པས་དགོངས་འགལ་མེད་པར་ཞུ་ཞེས་སྨྲས་པ་དང་།
LUK 14:20 ཡང་མི་གཞན་ན༌རེ། ངས་ཆུང་མ་བླངས་མ་ཐག་ཡིན་པས་འགྲོ་མི་ཐུབ་ཅེས་སྨྲས་སོ།།
LUK 14:21 དེ་ནས་གཡོག་པོ་ཕྱིར་ལོག་སྟེ་དོན་རྣམས་བདག་པོར་བཤད་པ༌ན། བདག་པོ་ཁྲོས་ཏེ་ད་ལྟ་མྱུར་དུ་གྲོང་ཁྱེར་གྱི་ཁྲོམ་སྲང་ཆེ་ཆུང་ཀུན་ཏུ་སོང་ནས་དབུལ་པོ༌དང༌། དབང་བོ་སྐྱོན༌ཅན། ལོང༌བ། གྱོལ་པོ་སོགས་འདིར་ཁྲིད་ཤོག་ཅེས་གཡོག་པོ་ལ་བཀའ་གནང༌།
LUK 14:22 གཡོག་པོ་ན༌རེ། བདག་པོ༌ལགས། ཁྱེད་ཀྱི་བཀའ་ལྟར་བསྒྲུབས་ཀྱང་ད་དུང་སྡོད་གནས་སྟོང་བ་མང་ངོ་ཞེས་ཞུས་པ༌ལ།
LUK 14:23 ཡང་བདག་པོ་ན༌རེ། ཁྱོད་རང་གཞུང་ལམ་དང་ཞིང་བར་གྱི་ལམ་ཕྲན་དག་ཏུ་སོང་ནས་བདག་གི་ཁང་པར་མགྲོན་པོས་བཀང་བའི་ཕྱིར་དུ་ནན་གྱིས་བོས༌ཤིག
LUK 14:24 བདག་གིས་ཁྱོད་ལ་སྨྲ་བར་བྱ༌སྟེ། སྔར་མགྲོན་དུ་བོས་པའི་མི་རྣམས་ལས་གཅིག་ཀྱང་བདག་གི་གསོལ་སྟོན་ལ་ཞུགས་པར་མི་འགྱུར་ཞེས་སྨྲས་སོ།།
LUK 14:25 ཡང་མི་སྐོར་ཚོ་མང་པོ་སྐྱབས་མགོན་ཡེ་ཤུ་དང་ལྷན་དུ་ལམ་ལ་ཆས༌ཤིང༌། ཁོང་གིས་ཞལ་ཕྱིར་འཁོར་ནས་མི་ཚོགས་ལ་འདི་སྐད༌དུ།
LUK 14:26 གལ་ཏེ་བདག་གི་མདུན་དུ་འོངས་པའི་མི་སུ་ཞིག་ཡིན་ཡང་རང་གི་ཕ་མ༌དང༌། ཆུང༌མ། བུ༌ཕྲུག ཕུ༌ནུ། ལྕམ་སྲིང་། ཐ་ན་རང་གི་སྲོག་ལས་ཀྱང་བདག་ལ་གཅེས་པར་མི་བྱེད༌ན། བདག་གི་རྗེས་འབྲང་པ་བྱ་མི་རུང༌ངོ་༎
LUK 14:27 ཡང་མི་སུས་ཀྱང་རང་གི་ཤིང་རྒྱ་གྲམ་ཁུར་ནས་བདག་གི་རྗེས་སུ་འབྲང་བ་མིན་ན་མི་དེའང་བདག་གི་རྗེས་འབྲང་པ་བྱ་མི་རུང༌ངོ་༎
LUK 14:28 ཡང་ཁྱོད་རྣམས་ལས་སུ་ཞིག་གིས་མཁར་ཞིག་བཟོ་འདོད༌ན། སྔོན་ལ་སར་བསྡད་ནས་འགྲོ་སོང་ག་ཙམ་དགོས་པ་རྩིས་བརྒྱབ་སྟེ་བཟོ་ཐུབ་མིན་ལ་བལྟ་བར་མི་བྱེད༌དམ།
LUK 14:29 གལ་ཏེ། དེ་ལྟར་མ་བྱས༌ཚེ། མཁར་གྱི་རྨང་གཞི་བཏིངས་ཟིན་ནའང་བཟོ་མ་ཐུབ་ན། དོན་དེ་མཐོང་བའི་མི་ཀུན་གྱིས་མི་དེ་ལ་འཕྱ་དགོད་བྱེད༌ཅིང༌།
LUK 14:30 མི་འདིས་མཁར་རྩིག་འགོ་བརྩམས་ཀྱང་འགྲུབ་མ་ཐུབ་ཅེས་ཟེར་བར་འགྱུར་རོ།།
LUK 14:31 ཡང་རྒྱལ་པོ་ཞིག་རྒྱལ་པོ་གཞན་ཞིག་ལ་འཐབ་ཏུ་འགྲོ་བའི་དུས༌ན། སྔོན་ལ་སར་བསྡད་ནས་རང་དམག་ཆིག་ཁྲིས་ཕ་རོལ་པོའི་དམག་མི་ཉིས་ཁྲི་འཇོམས་ཐུབ་མིན་ལ་གྲོས་བྱ་མི་དགོས༌སམ།
LUK 14:32 གལ་ཏེ་དགྲའི་དམག་དཔུང་འཇོམས་མི་ནུས༌ན། དགྲའི་དམག་དཔུང་རྒྱང་རིང་དུ་ཡོད་པའི་སྐབས་དང་བསྟུན་ནས་བང་ཆེན་མངགས༌ཏེ། འདུམ་འགྲིག་ཡོང་བའི་གྲོས་བྱ་དགོས།
LUK 14:33 དེ་བཞིན་དུ་ཁྱོད་རྣམས་ལས་སུ་ཞིག་ཡིན་ཡང་རང་ལ་ཡོད་པ་ཐམས་ཅད་སྤོང་བར་མི་བྱེད་ན་བདག་གི་རྗེས་འབྲང་པ་བྱ་མི་རུང༌ངོ་།།
LUK 14:34 སྤྱིར་ལན་ཚྭ་ནི་ལེགས་ཀྱང་དེའི་བྲོ་བ་ཡལ་བར་གྱུར༌ན། ལན་ཚྭའི་བྲོ་བ་གང་གིས༌བསྐྱེད་དམ།
LUK 14:35 དེ་ནི་ས་ཞིང་ངམ་ལུད་ཀྱི་ནང་དུ་བཞག་ཀྱང་ཕན་མི་ཐོགས་པས་ཕྱི་རུ་འདོར་བར་འགྱུར་རོ།། ཡང་རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན་ཅིག་ཅེས་གསུངས༌སོ།།
LUK 15:1 དེ་ཡང་ཁྲལ་ལེན་མཁན་དང་མི་སྡིག་ཅན་ཐམས་ཅད་སྐྱབས་མགོན་ཡེ་ཤུའི་ཆོས་ལ་མཉན་པར་ཁོང་གི་དྲུང་དུ་བཅར་པ་དང་།
LUK 15:2 ཕ་རུ་ཤི་པ་དང་མཁན་པོ་རྣམས་ཀྱིས་ཤབ་ཤུབ་ཏུ་འདི་ལྟར་སྨྲས༌པ། ཁོ་རང་མི་སྡིག་ཅན་རྣམས་དང་འགྲོགས་ཤིང་དེ་དག་དང་ལྷན་དུ་བཟའ་བཏུང་སྤྱོད་པ་ཡིན་ཞེས༌པའོ།།
LUK 15:3 སྐྱབས་མགོན་ཡེ་ཤུས་དཔེའི་སྒོ་ནས་འདི་སྐད༌དུ།
LUK 15:4 ཁྱོད་རྣམས་ལས་མི་སུ་ཞིག་ལ་ལུག་བརྒྱ་ཡོད་ཀྱང་དེ་ལས་ལུག་གཅིག་བོར་ན། ལུག་དགུ་བཅུ་གོ་དགུ་ཡོད་པ་དེ་དབེན་སྟོང་དུ་བསྐྱུར༌ཏེ། བོར་སོང་བའི་ལུག་དེ་རྙེད་པའི་བར་དུ་འཚོལ་བ་མ་ཡིན༌ནམ།
LUK 15:5 ཁོས་ལུག་དེ་རྙེད་རྗེས་ཤིན་ཏུ་དགའ་ཞིང་ཕྲག་ཏུ་ཁུར༌ནས།
LUK 15:6 ཕྱིར་རང་ཁྱིམ་དུ་ལོག་པ་དང་རང་གི་གྲོགས་པོ་དང་ཁྱིམ་མཚེས་རྣམས་བོས༌ཏེ། ངའི་ལུག་གཅིག་བོར་ཟིན་པ་དེ་སླར་ཡང་རྙེད་བྱུང་བས་ང་དང་མཉམ་དུ་སྤྲོ་སྤྲོ་བྱའོ་ཞེས་ཟེར༌བ་ཡིན།
LUK 15:7 བདག་གིས་ཁྱོད་རྣམས་ལ་སྨྲ་བར་བྱ༌སྟེ། དཔེ་དེ་བཞིན་དུ་འགྱོད་བཤགས་བྱེད་མི་དགོས་པའི་མི་གཞུང་དྲང་དགུ་བཅུ་གོ་དགུ༌ལས། མི་སྡིག་ཅན་གཅིག་གིས་འགྱོད་བཤགས་བྱས༌ན། ནམ་མཁའི་ཞིང་ཁམས་སུ་དེ་ལས་ལྷག་པར་དགའ་སྤྲོ་ཆེན་པོ་སྐྱེ་བར་འགྱུར་ཞེས་གསུངས༌སོ།།
LUK 15:8 ཡང་ཁོང་གིས་འདི་སྐད༌དུ། བུད་མེད་ཅིག་ལ་དངུལ་སྒོར་བཅུ་ཡོད་ཀྱང་གཅིག་བོར་བ༌ན། ཁོ་མོས་སྒྲོན་མེ་བསྒྲོན་ཏེ་ཁང་པ་ལ་གད་བདར་བྱེད་ཅིང་དངུལ་སྒོར་རྙེད་པའི་བར་དུ་ཞིབ་ཏུ་འཚོལ་བ་མ་ཡིན༌ནམ།
LUK 15:9 ཡང་དངུལ་སྒོར་བཙལ་ནས་རྙེད་རྗེས་རང་གི་གྲོགས་པོ་དང་ཁྱིམ་མཚེས་རྣམས་བོས༌ཏེ། ངའི་དངུལ་སྒོར་བོར་ཟིན་པ་དེ་ཕྱིར་རྙེད་བྱུང་བས་ང་དང་མཉམ་དུ་སྤྲོ་སྤྲོ་བྱའོ་ཞེས་ཟེར༌བ་ཡིན།
LUK 15:10 བདག་གིས་ཁྱོད་རྣམས་ལ་སྨྲ་བར་བྱ༌སྟེ། དེ་བཞིན་དུ་མི་སྡིག་ཅན་ཞིག་གིས་འགྱོད་བཤགས་བྱས༌ན། དཀོན་མཆོག་གི་ཕོ་ཉ་རྣམས་ཀྱང་མི་དེའི་རྐྱེན་གྱིས་དགའ་སྤྲོ་སྐྱེ་བར་འགྱུར་ཞེས་གསུངས༌སོ།།
LUK 15:11 ཡང་སྐྱབས་མགོན་ཡེ་ཤུས་འདི་སྐད་དུ། དེ་ཡང་ཕ་ཞིག་ལ་བུ་གཉིས་ཡོད༌ཅིང༌།
LUK 15:12 བུ་ཆུང་བ་ན༌རེ། ཕ༌ལགས། ང་རང་ལ་འཐོབ་འོས་པའི་ནོར་སྐལ་གནང་བར་མཛོད་ཅེས་བཤད་པ༌དང༌། ཕ་ཡིས་བུ་གཉིས་ལ་རྒྱུ་ནོར་བགོས་སོ།།
LUK 15:13 ཉིན་མང་པོ་མ་འགོར་བར་བུ་ཆུང་བས་རང་ལ་ཅི་ཡོད་པ་ཐམས་ཅད་བསྡུས༌ཏེ། རྒྱང་རིང་ཡུལ་དུ་སོང་ནས་གང་འདོད་དུ་སྤྱོད་པ་ངན་པའི་ལས་བྱས་ཤིང་རྒྱུ་ནོར་ཐམས་ཅད་ཆུད་ཟོས་སུ་བཏང༌།
LUK 15:14 དེ་ལྟར་རྒྱུ་ནོར་ཐམས་ཅད་བཀོལ་སྤྱོད་བཏང་ཚར་བ་དང་ས་ཆ་དེ་ལའང་མུ་གེ་ཆེན་པོ་བྱུང་སྟེ་ཁོ་ཡང་བཀྲེས་ཤིང་འུ་ཐུག་པ་བྱུང་།
LUK 15:15 ཁོས་ས་ཆ་དེ་གའི་མི་གཞན་ཞིག་ལ་རང་གི་འཚོ་བ་བརྟེན་ཅིང་མི་དེས་ཀྱང་ཁོ་རང་ཞིང་ཁར་ཕག་འཚོ་བར་མངགས།
LUK 15:16 ཁོ་རང་ལྟོགས་ནས་མ་བཟོད་པར་ཕག་གིས་ཟ་བའི་གང་བུ་ཟོས་ནས་རང་གི་ལྟོ་བ་འགྲང་བར་བྱེད་འདོད་ནའང་སུས་ཀྱང་མ་བྱིན་པ་རེད།
LUK 15:17 དེ་ནས་ཁོ་རང་རྨོངས་གཉིད་ལས་སད་དེ་ངའི་ཕ་ཡི་གླ་བ་དེ་ཙམ་མང་པོར་ཟས་ཀྱི་ལྷག་མ་ཡོད་ཀྱང་། ང་རང་གནས་འདི་རུ་བཀྲེས་ལྟོགས་མྱངས་ཏེ་འཆི་ལ༌ཉེའོ།།
LUK 15:18 ང་རང་ཡར་ལངས་ཏེ་ཕ་ཡི་དྲུང་དུ་སོང༌ནས། ཕ༌ལགས། ངས་ནམ་མཁའི་ཞིང་ཁམས་དང་ཁྱེད་གཉིས་ལ་འགལ་བའི་སྡིག་པ་བྱས༌པས།
LUK 15:19 དུས་ད་ནས་བཟུང་ང་ལ་ཁྱེད་ཀྱི་བུ་ཞེས་འབོད་མི་འོས༌ནའང༌། ང་རང་ཁྱེད་ཀྱི་གླ་བ་ཞིག་ཏུ་བྱེད་པར་མཛོད་ཅེས་ཞུ་དགོས་པར་བསམས་སོ།།
LUK 15:20 དེ་ནས་ཁོ་རང་ཡར་ལངས་ནས་ཕ་ཡི་དྲུང་དུ་སོང༌ཞིང༌། ཕ་ཡིས་ཀྱང་ཐག་རིང་ནས་བུ་ཡོང་བཞིན་པ་མཐོང༌སྟེ། སྙིང་རྗེ་སྐྱེས་པ་དང་བུའི་མདུན་དུ་བརྒྱུགས་ནས་བུ་ལ་འཐམས་ཤིང་བརྩེ་བའི་འོ་བྱས།
LUK 15:21 བུ་ན༌རེ། ཕ༌ལགས། ངས་ནམ་མཁའི་ཞིང་ཁམས་དང་ཁྱེད་གཉིས་ལ་འགལ་བའི་སྡིག་པ་བྱས༌པས། དུས་ད་ནས་བཟུང་ང་ལ་ཁྱེད་ཀྱི་བུ་ཞེས་འབོད་པར་མི་འོས་ཞེས་སྨྲས་སོ།།
LUK 15:22 འོན་ཀྱང་ཕ་ཡིས་གཡོག་པོ་རྣམས༌ལ། ད་ལྟ་མྱུར་དུ་ཕྱི་གོས་ཆེས་ལེགས་ཤོས་དེ་ཁྱེར་ཤོག་དང་ཁོའི་ལུས་ལ་སྐོན༌ཅིག མཛུབ་མོའི་སྟེང་དུ་མཛུབ་དཀྲིས་དང་རྐང་པར་ལྷམ་སྐོན༌ཅིག
LUK 15:23 བ་ཕྲུག་ཤ་ཤེད་ཅན་དེ་བཤོས༌དང༌། ངེད་རྣམས་ཀྱིས་དགའ་སྐྱིད་ངང་བཟའ་བཏུང་ལོངས་སུ་སྤྱོད་པར༌བྱའོ།།
LUK 15:24 རྒྱུ་མཚན་ནི་བདག་གི་བུ་འདི་འཆི་བ་ལས་སླར་གསོན་པ་དང་བོར་ནས་ཕྱིར་རྙེད་པ་ཡིན་ཞེས་སྨྲས་ཤིང་ཁོ་རྣམས་དགའ་སྐྱིད་ལ་རོལ༌ཏོ།།
LUK 15:25 དུས་དེར་བུ་ཆེ་བ་ཞིང་ཁར་ཡོད་ཅིང་ཕྱིར་ཡུལ་དུ་ལོག་སྟེ་ཁྱིམ་དང་ཉེ་སར་སླེབས་པ༌ན། རོལ་དབྱངས་དང་གར་འཁྲབ་པའི་སྒྲ་ཐོས༌པས།
LUK 15:26 ཁོས་གཡོག་པོ་ཞིག་བོས་ནས་དེའི་དོན་ཅི་ཡིན་དྲིས་པ༌ལ།
LUK 15:27 གཡོག་པོ་ན༌རེ། ཁྱེད་ཀྱི་ནུ་བོ་སླེབས༌བྱུང༌། ཁྱེད་ཀྱི་ཕ་ཡིས་བུ་ཆུང་བ་བདེ་བའི་ངང་ཕྱིར་ཡོང་བའི་རྐྱེན་གྱིས་ཤ་ཤེད་ཅན་གྱི་བ་ཕྲུག་ཀྱང་བཤས་པ་ཡིན་ཞེས་སྨྲས་སོ།།
LUK 15:28 འོན་ཀྱང་བུ་ཆེ་བ་ཁྲོས་ཏེ་ཁྱིམ་ནང་དུ་འགྲོ་བར་མ་དགའ་བས། ཁོའི་ཕ་ཕྱི་རོལ་ཏུ་ཡོང་ནས་བུ་ཆེ་བར་ཞུ་བ་བྱས༌ཀྱང༌།
LUK 15:29 བུ་ཆེ་བ་ན༌རེ། ཁྱོད་ཀྱིས་ལྟོས༌དང༌། ངས་ལོ་འདི་འདྲ་མང་པོའི་རིང་ལ་གཡོག་པོ་ལྟར་ཁྱོད་ལ་ལས་ཀ་བྱས་ཤིང་ནམ་ཡང་ཁྱོད་ཀྱི་བཀའ་ལས་འགལ་མ་མྱོང༌ནའང༌། ཁྱོད་ཀྱིས་ང་དང་གྲོགས་པོ་རྣམས་ལྷན་དུ་སྤྲོ་སྐྱིད་བྱ་ཆེད་རེའུ་ཞིག་ཀྱང་གནང་མ་མྱོང༌།
LUK 15:30 འོན་ཀྱང་ཁྱོད་ཀྱི་བུ་ཆུང་བ་དེ་སྨད་འཚོང་མ་རྣམས་དང་འགྲོགས་ཏེ་ཁྱོད་ཀྱི་རྒྱུ་ནོར་ཕྱེད་ཀ་ཙམ་ཆུད་ཟོས་སུ་བཏང་། ད་ལྟ་ཁོ་རང་ཕྱིར་ཡུལ་དུ་ལོག་མ་ཐག་ཁྱོད་ཀྱིས་ཁོའི་དོན་དུ་བ་ཕྲུག་ཤ་ཤེད་ཅན་དེའང་བཤས་པ་ཡིན་ཞེས་སྨྲས་པ༌ལ།
LUK 15:31 ཕ་ན༌རེ། བདག་གི༌བུ། ཁྱོད་རང་དུས་རྒྱུན་བདག་དང་ལྷན་དུ་ཡོད༌ཅིང༌། བདག་ལ་ཅི་ཡོད་པ་ཐམས་ཅད་ཁྱོད་ཀྱི་ཡིན།
LUK 15:32 འོན༌ཀྱང༌། ཁྱོད་ཀྱི་ནུ་བོ་ནི་འཆི་བ་ལས་སླར་གསོན་པ་དང་བོར་ནས་ཕྱིར་རྙེད་པ་ཡིན༌པས། ངེད་རྣམས་ཀྱིས་དགའ་ཞིང་སྐྱིད་པོ་བྱ་འོས་སྨྲས༌ཞེས་གསུངས་སོ།།
LUK 16:1 ཡང་སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། དེ་ཡང་ཕྱུག་པོ་ཞིག་ལ་གཉེར་པ་ཞིག་ཡོད༌ལ། གཉེར་པས་ནོར་རྫས་ཆུད་ཟོས་སུ་བཏང་བ་མི་གཞན་གྱིས་བདག་པོ་ལ་གཏུགས་སོ།།
LUK 16:2 བདག་པོས་གཉེར་པ་བོས་ཏེ་བདག་གིས་ཐོས་པའི་ཁྱོད་ཀྱི་དོན་དེ་ཅི་ཡིན༌ནམ། ཁྱོད་ཀྱིས་གཉེར་པའི་ལས་རྣམས་རྩིས་སྤྲོད་གསལ་པོ་བྱོས༌དང༌། དུས་ད་ནས་བཟུང་ཁྱོད་ནི་བདག་གི་གཉེར་པ་བྱ་མི་རུང་ཞེས་སྨྲས་པ༌ན།
LUK 16:3 གཉེར་པའི་སེམས༌ལ། ད་ལྟ་བདག་པོས་ངའི་ལག་ནས་གཉེར་པའི་དབང་ཆ་ཕྱིར་ལེན་པས་ངས་ཅི༌བྱའམ། ས་རྐོ་བར་བྱེད་ན་ལུས་ལ་སྟོབས་ཤུགས་མེད་ཅིང་ཟས་སློང་བར་བྱེད་ན་ངོ་གནོང༌བ་རེད།
LUK 16:4 བདག་པོས་རང་གི་གཉེར་པའི་དབང་ཆ་ཕྱིར་བླངས༌རྗེས། མི་གཞན་གྱིས་ང་ལ་དགའ་བསུ་བྱེད་ཅིང་ཁོ་རྣམས་ཀྱི་ཁྱིམ་དུ་འཁྲིད་པའི་ཆེད༌དུ། ངས་ཅི་ཞིག་བྱེད་དགོས་པ་ཤེས་པ་ཡིན་སྙམ༌ནས།
LUK 16:5 ཁོས་རང་གི་བདག་པོར་བུ་ལོན་ཆད་ཡོད་པ་རྣམས་རེ་རེ་བཞིན་བོས༌ཏེ། མི་སྔ་མ་དེ༌ལ། ཁྱོད་ཀྱིས་ངའི་བདག་པོར་བུ་ལོན་ག་ཙམ་ཆད་དམ་ཞེས་དྲིས་པ༌དང༌།
LUK 16:6 མི་དེས་འཚིར་སྣུམ་རྫ་མ་བརྒྱའི་བུ་ལོན་ཡོད་ཅེས་སྨྲས་པ༌ན། ཡང་ཁོ་ན༌རེ། ཁྱོད་ཀྱིས་སྔོན་གྱི་ཆད་ཐོ་ལོངས་ཤིག སར་སྡོད་ལ་མྱུར་དུ་འཚིར་སྣུམ་རྫ་མ་ལྔ་བཅུའི་ཆད་ཐོ་ཕྲིས་ཞེས་སྨྲས་སོ།།
LUK 16:7 ཁོས་མི་གཞན་ཞིག༌ལ། ཁྱོད་ལ་བུ་ལོན་ག་ཙམ་ཡོད་དམ་ཞེས་དྲིས་པ༌དང༌། མི་དེས་གྲོ་སྒྱེ་མོ་བརྒྱ་ཡོད་ཅེས་སྨྲས་པ༌ན། ཡང་ཁོ་ན༌རེ། ཁྱོད་ཀྱིས་སྔོན་གྱི་ཆད་ཐོ་ལོངས་དང་སྒྱེ་མོ་བརྒྱད་ཅུའི་ཆད་ཐོ་ཕྲིས་ཞེས་སྨྲས་སོ།།
LUK 16:8 བདག་པོས་རང་གཤིས་མི་དྲང་བའི་གཉེར་པ་འདིས་བློ་རིག་ངང་ལས་བསྒྲུབས་པར་བསྟོད་བསྔགས་བྱས། རྒྱུ་མཚན་ནི་རང་གི་རིགས་ཀྱི་ཐད་ནས་བྱ་བ་བསྒྲུབ་ན་འོད་ལ་གཏོགས་པའི་མི་རྣམས་ལས་འཇིག་རྟེན་པ་རྣམས་བློ་རིག་གསལ་བ་ཡིན་ནོ།།
LUK 16:9 ཡང་བདག་གིས་ཁྱོད་རྣམས་ལ་སྨྲ་བར༌བྱ་སྟེ། འཇིག་རྟེན་གྱི་རྒྱུ་ནོར་ལ་བརྟེན་ནས་གྲོགས་སྒྲིགས༌དང༌། དེ་ནས་རྒྱུ་ནོར་རྣམས་ཟད་པའི་དུས༌སུ། དེ་རྣམས་ཀྱིས་ཁྱོད་ཅག་མཐའ་མེད་པའི་སྡོད་གནས་སུ་བསུ་བ་བྱེད་པར་འགྱུར།
LUK 16:10 ཡང་མི་སུ་ཞིག་ཡིན་ཡང་དོན་ཆུང་ངུ་དག་ལ་སེམས་དྲང་པོར་བྱས་ན་དོན་ཆེན་པོ་དག་ལ་ཕྲད་ནའང་སེམས་དྲང༌བ་ཡིན། འོན་ཀྱང་དོན་ཆུང་ངུ་དག་ལ་སེམས་དྲང་པོར་མི་བྱེད་ན་དོན་ཆེན་པོ་དག་ལ་ཕྲད་ནའང་སེམས་མི་དྲང་ངོ༌།།
LUK 16:11 དེའི་ཕྱིར། ཁྱོད་རྣམས་ཀྱིས་འཇིག་རྟེན་གྱི་རྒྱུ་ནོར་བཀོལ་བ་ལ་སེམས་དྲང་པོར་མི་བྱེད༌ན། སུ་ཞིག་གིས་ཁྱོད་རྣམས་ལ་རྒྱུ་ནོར་དངོས་མ་བཅོལ་ངེས༌སམ།
LUK 16:12 ཡང་ཁྱོད་རྣམས་ཀྱིས་མི་གཞན་གྱི་རྒྱུ་ནོར་ཐད་སེམས་དྲང་པོར་མི་བྱེད༌ན། ཁྱོད་རྣམས་ཀྱི་ཡིན་པ་དེ་སུ་ཞིག་གིས་ཁྱོད་ཅག་ལ་སྤྲོད་ངེས༌སམ།
LUK 16:13 ཡང་གཡོག་པོ་གཅིག་གིས་བདག་པོ་གཉིས་ལ་ཞབས་ཕྱི་བསྒྲུབ་མི་ནུས༌ཏེ། ཁོས་གཅིག་ལ་སྡང་ཞིང་གཅིག་ལ་གཅེས༌པའམ། ཡང་ན་གཅིག་ལ་བཀུར་ཞིང་གཅིག་ལ་སྨད་པར་བྱེད་དོ།། དེའི༌ཕྱིར། ཁྱོད་རྣམས་ཀྱིས་དཀོན་མཆོག་དང་འཇིག་རྟེན་གྱི་རྒྱུ་ནོར་གཉིས་ལ་ཞབས་ཕྱི་བསྒྲུབ་མི་ནུས་ཞེས་གསུངས༌སོ།།
LUK 16:14 ཕ་རུ་ཤི་པ་རྣམས་ནི་རྒྱུ་ནོར་ལ་འདོད་རྔམ་ཆེ་བས་གོང་གི་གསུངས་དེ་ཐོས་ནས་སྐྱབས་མགོན་ཡེ་ཤུར་འཕྱ་དམོད་བྱས་སོ།།
LUK 16:15 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ཁྱོད་ཅག་གིས་མི་གཞན་གྱི་མདུན་དུ་རང་ཉིད་གཞུང་དྲང་ཡིན་ཁུལ་བྱེད་མོད། འོན་ཀྱང་དཀོན་མཆོག་གིས་ཁྱོད་རྣམས་ཀྱི་སེམས་ག་འདྲ་ཡིན་པ་མཁྱེན༌ཏེ། མི་ཡིས་མཆོག་ཏུ་གྱུར་པར་འདོད་པ་དེ་དཀོན་མཆོག་གི་སྤྱན་སྔར་སྐྱུག་བྲོ་བ་ཡིན་པའི་ཕྱིར་རོ་ཞེས་གསུངས་སོ།།
LUK 16:16 ཡང་ཁོང་གིས་འདི་སྐད་དུ། བཀའ་ཁྲིམས་དང་ལུང་སྟོན་པའི་མདོ་རྣམས་ནི་ཁྲུས་གསོལ་མཁན་ཡོ་ཧ་ནན་གྱི་བར་དུ་བསྒྲགས་མྱོང༌། དུས་དེ་ནས༌བཟུང༌། དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་བཞིན་ཡོད༌ལ། མི་ཐམས་ཅད་དཀོན་མཆོག་གི་རྒྱལ་སྲིད་དུ་ཞུགས་པར་ནན་གྱིས་བརྩོན་ནོ།།
LUK 16:17 འོན༌ཀྱང༌། དཀོན་མཆོག་གི་བཀའ་ཁྲིམས་ཀྱི་མདོ་ལས་ཚེག་ཐིག་གཅིག་འཇིག་པ་ལས་གནམ་ས་གཉིས་འཇིག་པ༌སླའོ།།
LUK 16:18 སུ་ཞིག་གིས་རང་གི་ཆུང་མ་སྤངས༌ཏེ་གཞན་ཞིག་བླངས་ན་དེ་ནི་ལོག་གཡེམ་བྱས་པ་ཡིན༌ལ། ཡང་སུ་ཞིག་གིས་བཟའ་ཐོར་བྱུང་བའི་བུད་མེད་ཅིག་བླངས་ན་དེ་ཡང་ལོག་གཡེམ་བྱས་པ་ཡིན་ཞེས་གསུངས༌སོ།།
LUK 16:19 ཡང་སྐྱབས་མགོན་ཡེ་ཤུས་འདི་སྐད་དུ་གསུངས༌པ། དེ་ཡང་ལུས་ལ་མདོག་རྒྱ་སྨུག་ཅན་དང་སོ་རས་ཀྱི་གོས་ཆེན་གྱོན་པ༌དང༌། ཉིན་རེ་བཞིན་བཟའ་བཏུང་མཆོག་ལ་སྤྱོད་ཅིང་རྩེ་དགར་རོལ་བའི་ཕྱུག་པོ་ཞིག་ཡོད་པ་རེད།
LUK 16:20 ཡང་མིང་ལ་ལཱ་ཟར་ཞེས་འབོད་ཅིང་ལུས་ཡོངས་སུ་རྨ་ཡིས་ཁྱབ་པའི་སྤྲང་པོ་ཞིག་ཡོད་པ་དེ་ཕྱུག་པོ་ཚང་གི་སྒོ་མདུན་དུ་བཞག་གོ།
LUK 16:21 སྤྲང་པོ་དེས་ཕྱུག་པོ་ཚང་གི་ཅོག་ཙེའི་སྟེང་ནས་ས་ལ་ལྷུང་བའི་ཟས་ཧྲུག་བཟའ་འདོད་པ༌ལ། ཁྱི་ལྡོམ་འགའ་ཡོང་ནས་སྤྲང་པོའི་ལུས་སྟེང་གི་རྨ་ཁ་བལྡགས༌པ་རེད།
LUK 16:22 ནམ་ཞིག༌ལ། སྤྲང་པོ་ཤི་བ་དང་ཕོ་ཉ་རྣམས་ཀྱིས་སྤྲང་པོ་དེ་ཨབ་ར་ཧམ་གྱི་པང་དུ་བསྐྱལ། ཕྱིས་སུ་མི་ཕྱུག་པོ་དེ་ཡང་ཤི་བ་དང་དུར་དུ་བཅུག་གོ།
LUK 16:23 མི་ཕྱུག་པོ་དེས་གཤིན་པོའི་གནས་ལས་སྡུག་བསྔལ་ཆེན་པོ་མྱངས་ཤིང་ཡར་བལྟས་པ༌ན། རྒྱང་རིང་ནས་ཨབ་ར་ཧམ་དང་ཁོང་གི་པང་དུ་ལཱ་ཟར་ཡོད་པ་མཐོང༌སྟེ།
LUK 16:24 བདག་གི་ཡབ་མེས་ཨབ་ར་ཧམ༌ལགས། བདག་གིས་མེ་དཔུང་ནང་དུ་སྡུག་བསྔལ་ཆེན་པོ་མྱོང་བཞིན༌ཡོད་པས། བདག་ལ་སྙིང་རྗེས་གཟིགས༌དང༌། ལཱ་ཟར་གྱི་མཛུབ་མོ་ཆུ་ལ་བསྒྲེས༌ཏེ། བདག་གི་ལྕེ་བསིལ་དུ་མངག་པར་མཛོད་ཅེས་སྐད་ཆེན་པོ་བརྒྱབ་བོ།།
LUK 16:25 འོན༌ཀྱང༌། ཨབ་ར་ཧམ་གྱིས་འདི་སྐད༌དུ། བདག་གི༌བུ། ཁྱོད་རང་གསོན་པའི་དུས༌སུ་དགའ་སྐྱིད་ལ་རོལ་བ་དང་ལཱ་ཟར་གྱིས་གསོན་པའི་དུས་སུ་སྡུག་བསྔལ་མྱངས་པ་དེ་དག་ཕྱིར་དྲན་པར༌གྱིས། ད་ལྟ་ལཱ་ཟར་ལ་སེམས་གསོ་ཐོབ་ཅིང་ཁྱོད་ཀྱིས་སྡུག་བསྔལ་མྱོང༌བ་ཡིན།
LUK 16:26 གཞན༌ཡང༌། ཁྱོད་དང་ངེད་གཉིས་བར་དུ་གཡང་ས་ཆེན་པོ་ཞིག་ཡོད༌པས། འདི་ནས་ཁྱོད་ཀྱི་གམ་དུ་འགྲོ་འདོད་པ་རྣམས་ཕར་འགྲོ་མི་ཐུབ༌ལ། ཕར་ཕྱོགས་ཁྱོད་ཀྱི་གནས་དེ་ནས་ཀྱང་ཚུར་ངེད་རྣམས་ཀྱི་གམ་དུ་ཡོང་མི་ཐུབ་ཅེས་སྨྲས་སོ།།
LUK 16:27 ཕྱུག་པོ་ན༌རེ། བདག་གི་ཡབ་མེས་ལགས། དེ་འདྲ་ཡིན་ན། ལཱ་ཟར་བདག་གི་ཁྱིམ་དུ་མངག་པར༌མཛོད།
LUK 16:28 རྒྱུ་མཚན་ནི་བདག་ལ་ད་དུང་སྤུན་ལྔ་ཡོད་པ་དེ་རྣམས་ཀྱང་སྡུག་བསྔལ་ཆེན་པོའི་གནས་འདིར་མི་ཡོང་བའི་ཕྱིར་ལཱ་ཟར་ལ་ཉེན་བརྡ་གཏོང་དུ་འཇུག་པར་མཛོད་ཅེས་ཞུས་སོ།།
LUK 16:29 འོན༌ཀྱང༌། ཨབ་ར་ཧམ་གྱིས་འདི་སྐད༌དུ། དེ་རྣམས་ལ་མོ་ཤེ་དང་ལུང་སྟོན་པ་གཞན་དག་གི་མདོ་རྣམས་ཡོད་པས་དེ་དག་ལ་མཉན་དགོས་ཞེས་སྨྲས་ནའང་།
LUK 16:30 ཕྱུག་པོ་ན༌རེ། བདག་གི་ཡབ་མེས་ཨབ་ར་ཧམ༌ལགས། དེ་ལྟར་མི་བྱེད་པར༌འཚལ། གལ་ཏེ་གཤིན་པོ་རྣམས་ལས་སླར་གསོན་པ་གཅིག་དེ་དག་གི་གམ་དུ་སོང་ན་ཁོ་རྣམས་ཀྱིས་སྡིག་པ་ལས་འགྱོད་བཤགས་བྱེད་པར་ངེས་ཞེས་ཞུས་སོ།།
LUK 16:31 ཡིན་ནའང་། ཨབ་ར་ཧམ་གྱིས་འདི་སྐད༌དུ། མོ་ཤེ་དང་ལུང་སྟོན་པ་རྣམས་ཀྱི་བཀའ་ལའང་མི་ཉན༌ན། མི་གཅིག་འཆི་བ་ལས་སླར་གསོན་ནའང་དེ་རྣམས་ཀྱིས་ཡིད་ཆེས་བྱེད་པར་མི་འགྱུར་ཞེས་སྨྲས༌པའོ།།
LUK 17:1 ཡང་སྐྱབས་མགོན་ཡེ་ཤུས་རྗེས་འབྲང་པ་རྣམས་ལ་འདི་སྐད༌དུ། མི་ལ་སྡིག་པ་བྱེད་དུ་འཇུག་པའི་དོན་དེ་ནི་ཟློག་ཐབས་མེད་ནའང་། སྡིག་པ་བྱེད་དུ་འཇུག་མཁན་དེ་ལ་ཆག་སྒོ་འབྱུང་ངོ་།།
LUK 17:2 བྱིས་པ་ཆུང་ངུ་འདི་རྣམས་ལས་གཅིག་ལ་སྡིག་པ་བྱེད་དུ་འཇུག་པ༌ལས། མི་དེའི་སྐེ་ལ་རང་འཐག་གི་རྡོ་ཆེན་པོ་བཏགས་ནས་རྒྱ་མཚོའི་ནང་དུ་འཕངས་ན་ལེགས་སོ།།
LUK 17:3 ཁྱོད་རྣམས་ཀྱིས་གཟབ་པར་གྱིས། ཁྱོད་ཀྱི་སྤུན་གྱིས་ཁྱོད་ལ་འགལ་བའི་སྡིག་པ་བྱས་ན་དེ་ལ་ཁ་ཏ་བྱོས༌དང༌། གལ་ཏེ་ཁོས་འགྱོད་བཤགས་བྱས་ན་དེ་ལ་གུ་ཡངས་ཐོངས།
LUK 17:4 གལ་ཏེ་ཁོས་ཉིན་གཅིག་ལ་ཐེངས་བདུན་ཙམ་དུ་ཁྱོད་ལ་འགལ་བའི་སྡིག་པ་བྱས༌ཤིང༌། ཡང་ཁྱོད་ཀྱི་གམ་དུ་ཐེངས་བདུན་ལ་ཡོང༌སྟེ། ངས་འགྱོད་བཤགས་བྱེད་ཅེས་སྨྲས༌ན། ཁྱོད་ཀྱིས་དེ་ལའང་གུ་ཡངས་གཏོང་དགོས་ཞེས་གསུངས༌སོ།།
LUK 17:5 སྐུ་ཚབ་པ་རྣམས་ན༌རེ། གཙོ་བོ༌ལགས། ངེད་ཅག་གི་དད་སེམས་ད་དུང་བརྟན་པོར་མཛོད་ཅེས་ཞུས་པ༌ལ།
LUK 17:6 ཡང་གཙོ་བོས་འདི་སྐད༌དུ། གལ་ཏེ་ཁྱོད་རྣམས་ལ་ཡུངས་འབྲུའི་ས་བོན་ལྟ་བུའི་དད་པ་ཆུང་ངུ་ཙམ་ཡོད༌ན། འོ་སེ་ཤིང་འདི༌ལ། ཁྱོད་ཀྱིས་རང་ཉིད་རྩ་བ་ནས་བལ་ཏེ་རྒྱ་མཚོའི་ནང་དུ་ཚུགས་ཤིག་ཅེས་སྨྲས་ན་དེས་ཀྱང་ཁྱོད་རྣམས་ཀྱི་ངག་ལ་མཉན་ནོ།།
LUK 17:7 རང་གི་གཡོག་པོས་ཞིང་ས་སློག་པའམ་ལུག་འཚོས་ནས་ཕྱིར་ལོག་པ༌ན། ཁྱོད་རྣམས་ལས་སུ་ཞིག་གིས་ཁོ་ལ་མྱུར་དུ་སྡོད་ལ་ཁ་ཟས་བཞེས་རོགས་ཞེས་ཟེར༌རམ།
LUK 17:8 ཡང་ན་གཡོག་པོ༌ལ། ཁྱོད་ཀྱིས་བདག་ལ་དགོང་ཟས་གྲ་སྒྲིག་བྱོས༌དང༌། སྐ་རགས་བཅིངས་ནས་བདག་ལ་ཞབས་ཕྱི་སྒྲུབས༌ཤིག བདག་གིས་བཟའ་བཏུང་སྤྱད་ཚར༌རྗེས། ད་གཟོད་ཁྱོད་ཀྱིས་བཟའ་བཏུང་སྤྱོད་ཆོག་ཟེར་བ་མིན༌ནམ།
LUK 17:9 གཡོག་པོས་བཀའ་ལྟར་བསྒྲུབས་ནའང་བདག་པོས་དེ་ལ་བཀའ་དྲིན་ཞུ་བ་མིན།
LUK 17:10 དེ་ལྟར་ཁྱོད་རྣམས་ཀྱིས་ཀྱང་བཀའ་བཞིན་དུ་ལས་ཐམས་ཅད་བསྒྲུབས༌རྗེས། ངེད་རྣམས་ནི་ཕན་ཐོགས་མེད་པའི་གཡོག་པོ་ཡིན༌ཏེ། ངེད་རྣམས་ཀྱིས་རང་གིས་བསྒྲུབ་དགོས་པའི་ལས་ཁོ་ན་བསྒྲུབས་པ་ཡིན་ཞེས་སྨྲ་དགོས་གསུངས་སོ།།
LUK 17:11 སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་ལ་ཕེབས་པའི་ལམ་བར་དུ་སཱ་མར་ཡ་ཡུལ་དང་ག་ལིལ་ཡུལ་གཉིས་ཀྱི་ས་མཚམས་བརྒྱུད༌ནས།
LUK 17:12 གྲོང་སྡེ་ཞིག་ཏུ་ཕེབས་པ༌ན། མཛེ་ནད་ཅན་མི་བཅུ་ཁོང་ལ་མཇལ་དུ་ཡོང་ཞིང་རྒྱང་རིང་དུ་འགྲེངས་ནས་བསྡད༌དེ།
LUK 17:13 སྐད་ཆེན༌པོས། སྟོན་པ་ཡེ་ཤུ༌ལགས། ངེད་རྣམས་ལ་ཐུགས་རྗེའི་སྤྱན་གྱིས་གཟིགས་རོགས་མཛོད་ཅེས་ཞུས་སོ།།
LUK 17:14 ཁོང་གིས་དེ་རྣམས་ལ་གཟིགས་ནས་འདི་སྐད༌དུ། ཁྱོད་རྣམས་ཕྱིར་སོང་སྟེ་རང་གི་ལུས་པོ་མཆོད་དཔོན་ལ་སྟོན་ཅིག་ཅེས་བཀའ་གནང༌ཞིང༌། དེ་རྣམས་ཕྱིར་འགྲོ་བའི་དུས༌སུ་གཙང་མར་གྱུར།
LUK 17:15 དེ་རྣམས་ལས་མི་གཅིག་གིས་རང་གི་མཛེ་ནད་སོས་པ་ཤེས་ནས་ཕྱིར་ལོག༌སྟེ། སྐད་ཆེན་པོས་དཀོན་མཆོག་ལ་བསྟོད་བསྔགས་བྱས་ཤིང་།
LUK 17:16 ཡང་སྐྱབས་མགོན་ཡེ་ཤུའི་ཞབས་དྲུང་དུ་ཡོང་ནས་ཕྱག་བཙལ་ཏེ་ཁོང་ལ་བཀའ་དྲིན་ཞུས་སོ།། མི་དེ་ནི་སཱ་མར་ཡ་པ་ཡིན༌ནོ།།
LUK 17:17 སྐྱབས་མགོན་ཡེ་ཤུས་འདི་སྐད༌དུ། མཛེ་ནད་ཅན་མི་བཅུ་པོ་གཙང་མར་གྱུར་པ་མ་ཡིན༌ནམ། གཞན་དགུ་པོ་དེ་གང་དུ་འདུག༌གམ།
LUK 17:18 ཕྱི་ཕྱོགས་པ་འདི་ལས༌གཞན་སུ་ཡང་ཕྱིར་དཀོན་མཆོག་ལ་བསྟོད་བསྔགས་བརྗོད་དུ་མི་ཡོང་ངམ་ཞེས་གསུངས༌ཤིང༌།
LUK 17:19 ཡང་ཁོང་གིས་མི་དེ་ལ་འདི་སྐད༌དུ། ཡར་ལངས་ནས་ཕྱིར་སོང༌དང༌། ཁྱོད་ཀྱི་དད་པས་ཁྱོད་རང་བསྐྱབས་པ་ཡིན་ཞེས་གསུངས༌སོ།།
LUK 17:20 ཕ་རུ་ཤི་པ་རྣམས་ཀྱིས་སྐྱབས་མགོན་ཡེ་ཤུ༌ལ། དཀོན་མཆོག་གི་རྒྱལ་སྲིད་དུས་ནམ་ཞིག་ལ་སླེབ་ཡོང་ངམ་ཞེས་ཞུས་པ༌དང༌། ཁོང་གིས་འདི་སྐད༌དུ། དཀོན་མཆོག་གི་རྒྱལ་སྲིད་སླེབ་པ་ནི་མིག་གིས་མཐོང་ཐུབ་པ་ཞིག་མིན༌ལ།
LUK 17:21 མི་སུས་ཀྱང་ལྟོས་དང་འདི་རུ་ཡོད། ཡང་ན་དེ་རུ་ཡོད་ཅེས་སྨྲ་མི་ནུས༌ཏེ། དཀོན་མཆོག་གི་རྒྱལ་སྲིད་ནི་ཁྱོད་རྣམས་ཀྱི་དབུས་སུ་བཞུགས་པའི་ཕྱིར་ཡིན་ཞེས་གསུངས༌སོ།།
LUK 17:22 ཡང་ཁོང་གིས་ཐུགས་སྲས་རྣམས་ལ་འདི་སྐད༌དུ། ཁྱོད་རྣམས་ཀྱིས་མིའི་བུ་ཡི་ཉིན་མོ་དག་ ལས་ཉིན་གཅིག་མཐོང་འདོད་ན་མཐོང་མི་ཐུབ་པའི་དུས་ཤིག་སླེབ་ངེས༌ཏེ།
LUK 17:23 མི་རྣམས་ཀྱིས་ཁྱོད་ཅག༌ལ། ལྟོས་དང་དེ་རུ་ཡོད། ཡང་ན་ལྟོས་དང་འདི་རུ་འདུག་ཅེས་ཟེར་ངེས༌ཀྱང༌། ཁྱོད་རྣམས་ཕར་འགྲོ་བར་མི༌བྱ་ཞིང་། དེའི་རྗེས་སུ་འབྲང་བར་ཡང་མི༌བྱའོ།།
LUK 17:24 རྒྱུ་མཚན་ནི་གློག་དམར་འཁྱུག་སྟེ་ནམ་མཁའི་ཕྱོགས་གཅིག་ནས་ཕྱོགས་གཞན་དུ་འོད་འཕྲོ་བ༌བཞིན། མིའི་བུ་རང་གི་ཉིན་མོ་ལའང་དེ་ལྟར་འབྱུང་བར་འགྱུར་རོ།།
LUK 17:25 འོན་ཀྱང་ཁོས་ཐོག་མར་སྡུག་བསྔལ་མང་པོ་མྱང༌བར་འགྱུར་ཞིང༌། ཡང་དུས་རབས་འདིའི་མི་རྣམས་ཀྱིས་ཁོ་རང་འདོར་བར་འགྱུར།
LUK 17:26 ནོ་ཨའི་དུས་སུ་ཇི་ལྟར་བྱུང་བ༌བཞིན། མིའི་བུ་ཡི་དུས་སུའང་དེ་ལྟར་འབྱུང་བ༌སྟེ།
LUK 17:27 ནོ་ཨ་གྲུ་གཟིངས་ཀྱི་ནང་དུ་ཞུགས་པའི་ཉིན་མོའི་བར༌དུ། མི་རྣམས་ཀྱིས་ད་དུང་བཟའ་བཏུང་ལ་རོལ་བ་དང་བག་མ་ཚུར་ལེན་ཕར་བསྐྱལ་བྱས༌ཤིང༌། ཆུ་ལོག་ཆེན་པོ་བྱུང་སྟེ་མི་ཐམས་ཅད་མེད་པར་བཏང༌ངོ་།།
LUK 17:28 དེ་བཞིན་དུ་ལོད་ཐུའི་དུས༌སུའང༌། མི་རྣམས་བཟའ་བཏུང་ལ་རོལ་ཞིང་ཉོ་འཚོང༌དང༌། ཞིང་འདེབས༌པ། ཁང་པ་བཟོ་བ་ལ་སོགས་བྱེད༌པ་ཡིན།
LUK 17:29 འོན་ཀྱང་ལོད་ཐུ་ཁོ་རང་སཱ་དོམ་ནས་ཕྱིར་སོང་བའི་ཉིན༌ལ། ནམ་མཁའ་ནས་མེ་དང་མུ་ཟིའི་ཆར་བ་བབས་ཏེ་མི་ཐམས་ཅད་མེད་པར་བཏང༌བ་རེད།
LUK 17:30 དེ་བཞིན་དུ་མིའི་བུ་མངོན་པར་འགྱུར་བའི་ཉིན་མོ་ལའང་དེ་ལྟར་འབྱུང་བར་འགྱུར༌ཏེ།
LUK 17:31 ཉིན༌དེར། ཁང་ཐོག་ཏུ་ཡོད་པ་རྣམས་སར་བབས་ནས་རང་ཁྱིམ་དུ་དངོས་པོ་ལེན་དུ་མ༌འགྲོའོ།། དེ་བཞིན་དུ་ཞིང་ཁར་ཡོད་པ་རྣམས་ཀྱང་ཕྱིར་མ་ལོག༌ཅིག
LUK 17:32 ཡང་ཁྱོད་རྣམས་ཀྱིས་ལོད་ཐུའི་ཆུང་མ་ཕྱིར་དྲན་པར༌གྱིས།
LUK 17:33 སུ་ཞིག་གིས་རང་སྲོག་སྐྱོབ་འདོད་པ་དེས་རང་སྲོག་འཆོར་བ༌དང༌། སུ་ཞིག་གིས་རང་སྲོག་འདོར་བ་དེས་རང་སྲོག་སྐྱོབ་ངེས་ཡིན།
LUK 17:34 ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཉིན་དེའི་མཚན༌མོར། མལ་ཁྲི་གཅིག་ལ་མི་གཉིས་ཡོད་པ་ལས་གཅིག་ནི་འདྲེན་ཞིང་གཅིག་ནི་བསྐྱུར་བར་འགྱུར།
LUK 17:35 བུད་མེད་གཉིས་ཀྱིས་ལག་སྐོར་གཅིག་བསྐོར་བ་ལས་གཅིག་ནི་འདྲེན་ཞིང་གཅིག་ནི་བསྐྱུར་བར་འགྱུར།
LUK 17:36 མི་གཉིས་ཞིང་ཁར་ཡོད་པ་ལས་གཅིག་ནི་འདྲེན་ཞིང་གཅིག་ནི་བསྐྱུར་བར་འགྱུར་ཞེས་གསུངས༌སོ།།
LUK 17:37 ཐུགས་སྲས་རྣམས་ན༌རེ། གཙོ་བོ༌ལགས། དོན་འདི་རྣམས་གནས་གང་དུ་འབྱུང་ངེས་སམ་ཞེས་ཞུས་པ༌ལ། ཁོང་གིས་འདི་སྐད༌དུ། བེམ་པོ་གང་དུ་ཡོད་ན་བྱ་རྒོད་དག་ཀྱང་གནས་དེར་འཁོར་ཡོང་ ཞེས་གསུངས༌སོ།།
LUK 18:1 ཡང་སྐྱབས་མགོན་ཡེ་ཤུས་ཁོ་རྣམས་ལ་ཡིད་མི་ཕམ་པར་དུས་རྟག་ཏུ་གསོལ་བ་འདེབས་དགོས་པའི་ཆེད་དུ་དཔེ་ཞིག་གསུངས་པ་འདི་ལྟ༌སྟེ།
LUK 18:2 དེ་ཡང་གྲོང་ཁྱེར་ཞིག་ཏུ་དཀོན་མཆོག་ལ་མི་གུས་མི་འཇིགས་ཤིང་མི་རྣམས་ལའང་བརྩི་མཐོང་མི་བྱེད་པའི་ཁྲིམས་དཔོན་ཞིག་ཡོད༌ལ།
LUK 18:3 ཡང་གྲོང་ཁྱེར་དེ་རུ་ཡུགས་མོ་ཞིག་ཡོད་པ་དེ་རྒྱུན་དུ་ཁྲིམས་དཔོན་གྱི་དྲུང་དུ་ཡོང༌སྟེ། ང་རང་ལ་གྱོད་ཡ་ཞིག་ཡོད་ཅིང་། ཁྱེད་ཀྱིས་ང་ལ་བདེན་ལུགས་གནང་བར་མཛོད་ཅེས་ཞུས་པ༌དང༌།
LUK 18:4 ཁྲིམས་དཔོན་གྱིས་ཡུན་རིང་ཞིག་ལ་དོན་དེ་ཁས་མ་བླངས། ཕྱིས་སུ་ཁྲིམས་དཔོན་གྱི་སེམས༌ལ། བདག་ནི་དཀོན་མཆོག་ལ་མི་གུས་མི་འཇིགས་ཤིང་མི་རྣམས་ལའང་བརྩི་མཐོང་མི་བྱེད་པ་ཞིག་ཡིན༌མོད།
LUK 18:5 འོན་ཀྱང་ཡུགས་མོ་འདིས་ང་ལ་སུན་སྣང་བསྐྱེད་པས་བདག་གིས་ཁོ་མོར་བདེན་ལུགས་སྟེར་བར་བྱའོ།། དེ་ལྟར་མིན་ཚེ་ཁོ་མོ་རྒྱུན་དུ་ཡོང་ནས་ང་རང་འུ་ཐུག་པར་བྱེད་སྙམ་པའོ།།
LUK 18:6 ཡང་གཙོ་བོས་འདི་སྐད༌དུ། ཁྱོད་རྣམས་ཀྱིས་རང་གཤིས་མི་དྲང་བའི་ཁྲིམས་དཔོན་དེས་ཅི་སྨྲས་པ་ལ་བསམ་བློ་ཐོངས༌ཤིག
LUK 18:7 འོ་ན་དཀོན་མཆོག་གི་བདམས་པའི་མི་རྣམས་ཀྱིས་ཉིན་མཚན་མེད་པར་ཁོང་ལ་འོ་དོད་བོས་ན། ཁོང་གིས་འགོར་འགྱངས་མི་མཛད་པར་དེ་རྣམས་ལ་བདེན་ལུགས་གནང་བ་མ་ཡིན་ནམ།
LUK 18:8 དེས་ན་བདག་གིས་ཁྱོད་རྣམས་ལ་སྨྲ་བར་བྱ༌སྟེ། དཀོན་མཆོག་གིས་མྱུར་བ་མྱུར་དུ་དེ་རྣམས་ལ་བདེན་ལུགས་གནང་བར་འགྱུར་རོ།། འོན་ཀྱང་མིའི་བུ་ཕེབས་ཡོང་བའི་དུས་སུ་འཇིག་རྟེན་འདི་རུ་ཁོང་ལ་དད་པའི་སྐྱེ་བོ་སུ་ཞིག་རྙེད་པར་འགྱུར་རམ་ཞེས་གསུངས༌སོ།།
LUK 18:9 ཡང་སྐྱབས་མགོན་ཡེ་ཤུས་མི་འགའ་ཞིག་གིས་རང་ཉིད་གཞུང་དྲང་ཡིན་པར་བསམས་ནས་མི་གཞན་དག་ལ་མཐོང་ཆུང་བྱེད་པ་ལ་དཔེ་འདི་ལྟར་གསུངས༌པ་རེད།
LUK 18:10 མི་གཉིས་ཡར་མཆོད་ཁང་དུ་གསོལ་བ་འདེབས་སུ་སོང་སྟེ། གཅིག་ནི་ཕ་རུ་ཤི་པ་དང་ཅིག་ཤོས་ནི་ཁྲལ་ལེན་མཁན་ཡིན།
LUK 18:11 ཕ་རུ་ཤི་པ་ཡར་ལངས་ནས་བསྡད་ཅིང་སེམས་སུ་འདི༌ལྟར། ཀྱེ། དཀོན་མཆོག༌ལགས། བདག་ནི་མི་གཞན་རྣམས་ལྟར་མགོ་སྐོར་གཏོང་མཁན་དང་རང་གཤིས་མི་དྲང༌བ། ལོག་གཡེམ་བྱེད་པ་རྣམས་དང་མི་འདྲ༌ཞིང༌། ཁྲལ་ལེན་མཁན་འདི་དང་ཡང་མི་འདྲ༌བས། བདག་གིས་ཁྱེད་ལ་ཐུགས་རྗེ་ཆེ༌ཞུ།
LUK 18:12 བདག་གིས་གཟའ་འཁོར་རེ་རེར་སྨྱུང་གནས་ཐེངས་གཉིས་ལ་བསྲུངས་པ༌དང༌། ཡོང་སྒོ་ཐམས་ཅད་ལས་བཅུ་ཆའི་གཅིག་ཀྱང་འབུལ་བ་ཡིན་ཞེས་གསོལ་བ་བཏབ་བོ།།
LUK 18:13 འོན༌ཀྱང༌། ཁྲལ་ལེན་མཁན་དེ་རྒྱང་ནས་ཡར་ལངས་ཏེ་བསྡད༌ཅིང༌། མིག་གིས་ནམ་མཁའི་ཕྱོགས་སུ་བལྟ་ཡང་མི་ཕོད་པར་ལག་པས་བྲང་ཁར་རྡུང་བཞིན་སེམས་ཤིན་ཏུ་སྐྱོ་བའི་ངང༌ནས། ཀྱེ། དཀོན་མཆོག༌ལགས། མི་སྡིག་ཅན་ང་ལ་ཐུགས་རྗེ་གནང་བར་མཛོད་ཅེས་ཞུས་པའོ།།
LUK 18:14 བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཁྲལ་ལེན་མཁན་འདི་ནི་ཕ་རུ་ཤི་པ་དེ་ལས་དཀོན་མཆོག་གི་དྲུང་དུ་རྣམ་པར་དག་ཅིང་ཕྱིར་རང་ཁྱིམ་དུ་ལོག སུ་ཞིག་གིས་རང་ཉིད་མཐོ་བར་བཟུང་ན་དམན་པར་འགྱུར༌ཞིང༌། རང་ཉིད་དམན་པར་བཟུང་ན་མཐོ་བར་འགྱུར་ཞེས་གསུངས༌སོ།།
LUK 18:15 མི་རྣམས་ཀྱིས་ཐ་ན་རང་ཉིད་ཀྱི་ཁྱེའུ་ཡང་སྐྱབས་མགོན་ཡེ་ཤུས་ཕྱག་གིས་རེག་ཕྱིར་ཁོང་གི་དྲུང་དུ་ཁྱེར་ཡོང༌ནའང༌། ཐུགས་སྲས་རྣམས་ཀྱིས་དེ་རྣམས་མཐོང་ནས་བཀའ་བཀྱོན་གནང༌།
LUK 18:16 འོན་ཀྱང་སྐྱབས་མགོན་ཡེ་ཤུས་དེ་རྣམས་ཚུར་བོས་ཏེ་འདི་སྐད༌དུ། དཀོན་མཆོག་གི་རྒྱལ་སྲིད་ནི་དེ་ལྟ་བུ་རྣམས་ཀྱི་ཡིན༌པས། བྱིས་པ་རྣམས་མ་འགོག་པར་བདག་གི་དྲུང་ལ་ཡོང་དུ༌ཆུག
LUK 18:17 བདག་གིས་ཁྱོད་རྣམས་ལ་བདེན་པར་སྨྲ༌སྟེ། མི་སུས་ཀྱང་དཀོན་མཆོག་གི་རྒྱལ་སྲིད་ནི་བྱིས་པའི་ཚུལ་གྱིས་དང་དུ་མ་བླངས༌ན། མི་དེ་ཅིས་ཀྱང་རྒྱལ་སྲིད་དེར་ཞུགས་མི་ནུས་ཞེས་གསུངས༌སོ།།
LUK 18:18 འགོ་དཔོན་ཞིག་གིས་སྐྱབས་མགོན་ཡེ་ཤུ༌ལ། སློབ་དཔོན་བཟང་པོ༌ལགས། ངས་གང་ཞིག་བྱས་ན་ད་གཟོད་མཐའ་མེད་པའི་ཚེ་སྲོག་འཐོབ་ཐུབ་བམ་ཞེས་ཞུས་པ༌ལ།
LUK 18:19 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་ཅིའི་ཕྱིར་བདག་ལ་བཟང་པོ་ཟེར༌རམ། དཀོན་མཆོག་ཁོ་ན་ལས་གཞན་བཟང་པོ་གཅིག་ཀྱང་མེད།
LUK 18:20 ལོག་གཡེམ་མ༌བྱེད། མི་མ་གསོད། རྐུ་མ༌བྱེད། རྫུན་གྱི་དཔང་པོ་མ༌བྱེད། རང་གི་ཕ་མ་གཉིས་ལ་བཀུར་བསྟི་བྱེད་དགོས་ཞེས་པའི་བཀའ་ཁྲིམས་འདི་དག་ཁྱོད་ཀྱིས་ཤེས་པ་ཡིན་ཞེས་གསུངས་སོ།།
LUK 18:21 ཡང་མི་དེ་ན༌རེ། ངས་ཆུང་དུས་ནས་བཀའ་དེ་ཐམས་ཅད་བསྲུངས་པ་ཡིན་ཞེས་ཞུས་སོ།།
LUK 18:22 སྐྱབས་མགོན་ཡེ་ཤུས་གཏམ་དེར་གསན་རྗེས་ཡང་འདི་སྐད༌དུ། ཁྱོད་ལ་ད་དུང་དོན་གཅིག་མི་ཚང༌བས། ཁྱོད་ཀྱིས་རང་ལ་ཡོད་པ་ཐམས་ཅད་བཙོངས་ཏེ་དབུལ་པོ་རྣམས་ལ་བྱིན༌ཅིག ཁྱོད་ལ་ནམ་མཁའི་ཞིང་ཁམས་སུ་ནོར་བུ་འཐོབ་པར་འགྱུར། དེ་ནས་བདག་གི་རྗེས་སུ་འབྲང་བར་གྱིས་ཞེས་གསུངས་པ༌ན།
LUK 18:23 མི་དེ་ནི་ཧ་ཅང་ཕྱུག་པོ་ཞིག་ཡིན་པས་གསུང་དེ་ཐོས་པ་དང་སེམས་ཤིན་ཏུ་སྐྱོ་བར་གྱུར།
LUK 18:24 སྐྱབས་མགོན་ཡེ་ཤུས་ཁོ་ལ་གཟིགས་ཏེ་འདི་སྐད༌དུ། རྒྱུ་འབྱོར་བ་ཅན་རྣམས་དཀོན་མཆོག་གི་རྒྱལ་སྲིད་དུ་ཞུགས་པ་ནི་ཇི་འདྲའི་དཀའ༌ཨང་།
LUK 18:25 ཕྱུག་བདག་ཅིག་དཀོན་མཆོག་གི་རྒྱལ་སྲིད་དུ་ཞུགས་པ་ལས་རྔ་མོང་ཞིག་ཁབ་མིག་ཏུ་འཛུལ་བ་སླ་ཞེས་གསུངས་སོ།།
LUK 18:26 གསུང་དེ་ཐོས་པའི་མི་རྣམས༌ཀྱིས། དེས་ན་སུ་ཞིག་ལ་ཐར་པ་འཐོབ་ཐུབ་བམ་ཞེས་ཞུས་པ༌དང༌།
LUK 18:27 ཡང་ཁོང་གིས་འདི་སྐད༌དུ། མིས་བསྒྲུབ་མི་ནུས་པའི་དོན་རྣམས་དཀོན་མཆོག་གིས་མཛད་ནུས་པ་ཡིན་ཞེས་གསུངས་སོ།།
LUK 18:28 པེ་ཏྲོ་ན༌རེ། གཟིགས༌དང༌། ངེད་རྣམས་ཀྱིས་རང་ལ་ཡོད་པ་ཐམས་ཅད་སྤངས་ནས་ཁྱེད་ཀྱི་རྗེས་སུ་འབྲངས་པ་ཡིན་ཞེས་ཞུས་པ༌དང༌།
LUK 18:29 ཡང་ཁོང་གིས་འདི་སྐད༌དུ། བདག་གིས་ཁྱོད་རྣམས་ལ་བདེན་པར༌སྨྲ་སྟེ། སུ་ཞིག་གིས་དཀོན་མཆོག་གི་རྒྱལ་སྲིད་ཀྱི་ཆེད་དུ་ཁང་པའམ། ཆུང༌མའམ། ཕུ་ནུའམ། ལྕམ་སྲིང་ངམ། ཕ༌མའམ། བུ་ཕྲུག་སོགས་སྤངས༌ན།
LUK 18:30 མི་དེ་ལ་བསྐལ་པ་འདིར་ལྡབ་འགྱུར་གྱིས་མང་པོ་འཐོབ་ཅིང་བསྐལ་པ་འབྱུང་འགྱུར་དུ་མཐའ་མེད་པའི་ཚེ་སྲོག་ཀྱང་འཐོབ་པར་འགྱུར་ཞེས་གསུངས༌སོ།།
LUK 18:31 དེ་ནས་སྐྱབས་མགོན་ཡེ་ཤུས་ཐུགས་སྲས་བཅུ་གཉིས་པོ་ཟུར་དུ་ཁྲིད་དེ་འདི་སྐད༌དུ། ལྟོས༌དང༌། བདག་ཅག་ཡར་ཡེ་རུ་སཱ་ལེམ་དུ་འགྲོ་བཞིན༌ཡོད། ལུང་སྟོན་པ་རྣམས་ཀྱིས་མིའི་བུ་ཡི་སྐོར་ལ་བྲིས་ཡོད་པ་ཐམས་ཅད་འགྲུབ་པར་འགྱུར༌ཏེ།
LUK 18:32 ཁོ་རང་ཕྱི་ཕྱོགས་པ་རྣམས་ཀྱི་ལག་ཏུ་སྤྲད་ནས་དེ་དག་གིས་འཕྱ་དམོད་དང་སྨད་པ་བྱེད༌ཅིང༌། གདོང་ལ་མཆིལ་མ་འདེབས་པ༌དང༌།
LUK 18:33 ལུས་ལ་རྟ་ལྕག་གིས་གཞུས་རྗེས་གསོད་པར་འགྱུར། དེ་ནས་ཉིན་གསུམ་པ་ལ་ཁོ་རང་སླར་གསོན་པར་འགྱུར་ཞེས་གསུངས།
LUK 18:34 དོན་འདི་ནི་ཐུགས་སྲས་རྣམས་ཀྱིས་ཅི་ཡང་མ་རྟོགས་ཤིང་། དེ་ནི་གབ་པའི་ཚུལ་གྱིས་བརྗོད་པས་ཅི་ཡང་མ་ཤེས༌སོ།།
LUK 18:35 སྐྱབས་མགོན་ཡེ་ཤུ་ཁོང་ཉིད་ཡེ་རུ་ཀོ་དང་ཉེ་བར་ཕེབས་པའི༌ཚེ། ལོང་བ་ཞིག་གིས་ཟས་སློང་བཞིན་ལམ་འགྲམ་དུ་བསྡད་ཡོད༌ཅིང༌།
LUK 18:36 མི་མང་པོ་ཕར་འགྲོ་བཞིན་པའི་སྒྲ་ཐོས་ཏེ་དོན་ཅི་ཡིན་དྲིས་པ༌ལ།
LUK 18:37 ལམ་འགྲོ་པ་རྣམས་ཀྱིས་ནཱ་ཙ་རེལ་གྱི་ཡེ་ཤུ་ཕེབས་ཀྱིན་འདུག་ཅེས་སྨྲས།
LUK 18:38 ལོང་བས་སྐད་ཆེན༌པོས། ཀྱེ། དཱ་བིད་ཀྱི་རིགས༌སྲས། ཡེ་ཤུ༌ལགས། བདག་ལ་སྙིང་རྗེས་གཟིགས་རོགས་ཞེས་ཞུས༌པ་ན།
LUK 18:39 སྔོན་དུ་འགྲོ་བའི་ལམ་འགྲོ་པ་རྣམས་ཀྱིས་ཁོ་རང་ཁ་རོག་ཏུ་སྡོད་པར་བསྐུལ༌ནའང༌། ལོང་བས་སྔར་ལས་ཀྱང་སྐད་ཆེན༌པོས། ཀྱེ། དཱ་བིད་ཀྱི་རིགས་སྲས༌ལགས། བདག་ལ་སྙིང་རྗེས་གཟིགས་རོགས་ཞེས་འབོད་སྐད་བསྒྲགས་སོ།།
LUK 18:40 དེ་ནས་སྐྱབས་མགོན་ཡེ་ཤུས་ཀྱང་ཕེབས་མཚམས་བཞག་སྟེ་ཁོ་རང་ཚུར་ཁྲིད་ཡོང་བའི་བཀའ་གནང༌ཞིང༌། དེ་ཁོང་གི་སྐུ་མདུན་དུ་སླེབས་པ་དང་ཁོང་གིས་འདི་སྐད༌དུ།
LUK 18:41 ངས་ཁྱོད་ལ་ཅི་བྱ་དགོས་སམ་ཞེས་གསུངས་པ༌དང༌། ཁོ་ན༌རེ། གཙོ་བོ༌ལགས། ངའི་མིག་གིས་མཐོང་ནུས་པར་མཛོད་ཅེས་ཞུས་པ༌ན།
LUK 18:42 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱི་མིག་གིས་མཐོང་ཐུབ་པར་གྱུར༌ཅིག ཁྱོད་ཀྱི་དད་པས་ཁྱོད་རང་བསྐྱབས་པ་ཡིན་ཞེས་གསུངས་པ༌དང༌།
LUK 18:43 དེ་མ་ཐག་ཏུ་ལོང་བའི་མིག་གིས་མཐོང་བར་གྱུར་ནས་དཀོན་མཆོག་ལ་བསྟོད་བསྔགས་བརྗོད་ཅིང་ཁོང་གི་རྗེས་སུ་འབྲངས་སོ།། མི་ཐམས་ཅད་ཀྱིས་ཀྱང་དོན་དེ་མཐོང་ནས་དཀོན་མཆོག་ལ་བསྟོད་བསྔགས་བརྗོད༌དོ།།
LUK 19:1 སྐྱབས་མགོན་ཡེ་ཤུ་ཁོང་ཉིད་ཡེ་རུ་ཀོ་བརྒྱུད་ནས་ཕེབས་པའི༌ཚེ།
LUK 19:2 གནས་དེར་སཱ་ཀ་ཟེར་བའི་ཕྱུག་བདག་ཅིག་ཡོད་ཅིང་དེ་ནི་ཁྲལ་ལེན་མཁན་གྱི་འགོ་དཔོན་ཡང་ཡིན་ནོ།།
LUK 19:3 སཱ་ཀས་སྐྱབས་མགོན་ཡེ་ཤུ་སུ་ཡིན་པར་བལྟ་འདོད༌ཀྱང༌། ཁོའི་གཟུགས་ཐུང་ཞིང་མི་མང་པོ་འཚོགས་པའི་རྐྱེན་གྱིས་མཐོང་མ་ཐུབ༌པས།
LUK 19:4 སྐྱབས་མགོན་ཡེ་ཤུའི་གཤེགས་ལམ་གྱི་མདུན་དུ་བརྒྱུགས་པ་དང་འོ་སེ་ཤིང་ཞིག་ལ་འགོས་ནས་བལྟས་པ་ལ།
LUK 19:5 སྐྱབས་མགོན་ཡེ་ཤུ་གནས་དེར་ཕེབས་པ་དང་ཡར་གཟིགས་ཏེ་འདི་སྐད༌དུ། སཱ༌ཀ ཁྱོད་རང་མྱུར་དུ་མར་བོབས༌དང༌། དེ་རིང་ང་ནི་ཁྱོད་ཀྱི་ཁྱིམ་དུ་སྡོད་དགོས་ཞེས་གསུངས་པ༌དང༌།
LUK 19:6 སཱ་ཀ་མྱུར་དུ་མར་བབས་ཏེ་དགའ་སྤྲོའི་ངང་ནས་སྐྱབས་མགོན་ཡེ་ཤུ་གདན་དྲངས༌སོ།།
LUK 19:7 མི་རྣམས་ཀྱིས་དོན་དེ་མཐོང་སྟེ་མ་དགའ་བར་ཤབ་ཤུབ་ཏུ་ཕན་ཚུན་ན༌རེ། ཁོང་ཉིད་མི་སྡིག་ཅན་གྱི་ཁྱིམ་ལ་མགྲོན་དུ་ཕེབས་ཞེས་སྨྲས་སོ།།
LUK 19:8 སཱ་ཀ་ཡར་ལངས་ཏེ་སྐྱབས་མགོན་ཡེ་ཤུ༌ལ། ཇོ་བོ༌ལགས། ཁྱེད་ཀྱིས་གཟིགས༌དང༌། ངས་རང་གི་རྒྱུ་ནོར་གྱི་ཕྱེད་ཀ་དབུལ་པོ་རྣམས་ལ་སྟེར་ངེས་ཡིན། གལ་ཏེ་ངས་སྔོན་ཆད་མི་སུ་ཞིག་ནས་སླུ་བྲིད་ཀྱིས་རྒྱུ་ནོར་བླངས་ཡོད༌ན། ཕྱིར་ལྡབ་བཞིས་འཇལ་ངེས་ཡིན་ཞེས་ཞུས་སོ།།
LUK 19:9 སྐྱབས་མགོན་ཡེ་ཤུས་འདི་སྐད༌དུ། མི་འདི་ཡང་ཨབ་ར་ཧམ་གྱི་བུ་རབས་ཚ་རྒྱུད་ཡིན༌པས། དེ་རིང་ཐར་པ་ཁྱིམ་འདིར་སླེབས༌པ་ཡིན།
LUK 19:10 ཅིའི་ཕྱིར་ཞེ༌ན། མིའི་བུ་ནི་བོར་ཟིན་པ་རྣམས་འཚོལ་བ་དང་སྐྱོབ་པའི་ཕྱིར་ཡོང་བ་ཡིན་ཞེས་གསུངས༌སོ།།
LUK 19:11 མི་རྣམས་ཀྱིས་གཏམ་དེ་དག་ལ་ཉན་པའི་དུས༌སུ། སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་ལ་ཉེ་བར་སླེབས་པའི་རྐྱེན༌དང༌། མི་རྣམས་ཀྱི་སེམས་སུའང་དཀོན་མཆོག་གི་རྒྱལ་སྲིད་མྱུར་དུ་མངོན་པར་འགྱུར་ངེས་ཡིན་བསམས༌པས། ཁོང་གིས་དཔེའི་སྒོ་ནས་འདི་སྐད༌དུ།
LUK 19:12 དེ་ཡང་རྒྱལ་པོའི་རིགས་རྒྱུད་ཅིག་ཡོད་པར་རྒྱལ་སྲིད་འཐོབ་ཆེད་རྒྱང་རིང་ཡུལ་དུ་འགྲོ་བའི་འཆར་གཞི་བཀོད༌དེ། རྒྱལ་སྲིད་ཐོབ་རྗེས་ཕྱིར་ལོག་པར་འདོད་ཅིང་།
LUK 19:13 རང་གི་གཡོག་པོ་བཅུ་ཚུར་བོས་ནས་མི་རེ་རེར་དངུལ་རྡོ་ཚད་གཅིག་རེ་སྤྲད༌དེ། ཁྱོད་རྣམས་ཀྱིས་ང་རང་ཕྱིར་ཡོང་བའི་བར་དུ་ཚོང་ལས་གཉེར་ཞིག་ཅེས་སྨྲས་སོ།།
LUK 19:14 འོན་ཀྱང་ཁོའི་འབངས་མི་རྣམས་ཁོ་ལ་སྡང་སེམས་སྐྱེས་པས་མི་ཁ་ཤས་ཁོའི་རྗེས་སུ་བཏང༌སྟེ། ངེད་རྣམས་མི་དེ་རྒྱལ་པོ་བྱེད་པར་མི་འཐད་ཅེས་སྨྲས་སོ།།
LUK 19:15 ཁོ་ལ་རྒྱལ་སྲིད་ཐོབ་ནས་ཕྱིར་ཡོང་སྟེ་དངུལ་སྤྲད་པའི་གཡོག་པོ་རྣམས་ཀྱིས་ཚོང་ལས་བྱས་ནས་ཁེ་སྤོགས་ཅི་ཙམ་ཡོད་པར་བལྟ་ཕྱིར་དེ་རྣམས་འབོད་དགོས་པའི་བཀའ་གནང་ངོ་།།
LUK 19:16 གཡོག་པོ་སྔ་མ་དེ་ཁོའི་དྲུང་དུ་ཡོང༌སྟེ། བདག་པོ༌ལགས། ཁྱེད་ཀྱིས་གནང་བའི་རྡོ་ཚད་གཅིག་གིས་རྡོ་ཚད་བཅུའི་ཁེ་སྤོགས་རེག་ཡོད་ཅེས་ཞུས་པ༌དང༌།
LUK 19:17 བདག་པོ་ན༌རེ། ལེགས་པོ༌འདུག ཁྱོད་ནི་གཡོག་པོ་བཟང་པོ་ཡིན་ལ། ཁྱོད་ནི་དོན་ཆུང་ངུ་ལའང་བློ་སེམས་དཀར་བས། གྲོང་ཁྱེར་བཅུའི་མངའ་དབང་ཁྱོད་ལ་སྤྲོད་ཅེས་སྨྲས་སོ།།
LUK 19:18 གཡོག་པོ་གཞན་ཞིག་ཡོང་སྟེ་ན༌རེ། བདག་པོ༌ལགས། ཁྱེད་ཀྱིས་གནང་བའི་རྡོ་ཚད་གཅིག་གིས་རྡོ་ཚད་ལྔའི་ཁེ་སྤོགས་རེག་ཡོད་ཅེས་ཞུས་པ༌དང༌།
LUK 19:19 ཡང་བདག་པོ་ན༌རེ། ཁྱོད་ལ་ཡང་གྲོང་ཁྱེར་ལྔའི་མངའ་དབང་སྤྲོད་ཅེས་སྨྲས་སོ།།
LUK 19:20 ཡང་གཡོག་པོ་གཞན་ཞིག་ཡོང་སྟེ་ན༌རེ། བདག་པོ༌ལགས། ངས་ཁྱེད་ཀྱི་རྡོ་ཚད་གཅིག་པོ་དེ་རས་ཀྱིས་བཏུམས་ནས་བདག་གཉེར་བྱས་པས་འདི་རུ་ཡོད༌དེ།
LUK 19:21 ཁྱེད་རང་ནི་མི་བཙན་པོ་ཞིག་ཡིན་ཞིང་རྒྱུ་ནོར་མ་བཞག་པར་ལེན་པ་དང་མ་བཏབ་ས་ནས་སྟོན་བསྡུ་བས་ང་རང་ཁྱེད་ལ་འཇིགས་ཞེས་ཞུས་པ༌ལ།
LUK 19:22 ཡང་བདག་པོ་ན༌རེ། གཡོག་པོ་ངན་པ་ཁྱོད་ལ་རང་གི་ཁ་ནས་ཅི་སྨྲས་བཞིན་ཉེས་ཆད་གཅོད་པར༌བྱའོ།། ཁྱོད་ཀྱིས་ང་རང་མི་བཙན་པོ་ཞིག་ཡིན་ཞིང་རྒྱུ་ནོར་མ་བཞག་པར་ལེན་པ་དང་ས་བོན་མ་བཏབ་པར་ལོ་ཏོག་རྔ་བ་ཤེས༌ན།
LUK 19:23 ཅིའི་ཕྱིར་ངའི་རྡོ་ཚད་གཅིག་པོ་དེ་དངུལ་ཁང་དུ་མ་བཞག༌གམ། ཁྱོད་ཀྱིས་དེ་ལྟར་བྱས་ན་ང་རང་ཕྱིར་སླེབས་པའི་དུས་སུ། མ་རྩ་དང་སྐྱེད་ཀ་གཉིས་བླངས་ཆོག་པ་མ་ཡིན་ནམ་ཞེས་སྨྲས༌ཤིང༌།
LUK 19:24 ཡང་གནས་དེར་ཡོད་པའི་མི་རྣམས༌ལ། ཁོའི་རྡོ་ཚད་གཅིག་པོ་ཕྱིར་ལོངས༌དང༌། རྡོ་ཚད་བཅུ་ཡོད་པ་ཅན་ལ་བྱིན་ཅིག་ཅེས་སྨྲས་སོ།།
LUK 19:25 དེ་རྣམས་ན༌རེ། བདག་པོ༌ལགས། མི་དེ་ལ་རྡོ་ཚད་བཅུ་ཡོད་པ་མ་ཡིན་ནམ་ཞེས་ཞུས་པ༌ལ།
LUK 19:26 ཡང་བདག་པོ་ན༌རེ། ངས་ཁྱོད་ཅག་ལ་སྨྲ་བར༌བྱ་སྟེ། སུ་ཞིག་ལ་ཡོད་པ་དེ་ལ་ད་དུང་ཡང་གནང་ངེས༌ཤིང༌། སུ་ཞིག་ལ་མེད་པ་དེ་ལས་ཉུང་ཙམ་ཡོད་པ་དེ་ཡང་ཕྱིར་ལེན་པར་འགྱུར།
LUK 19:27 འོན༌ཀྱང༌། ང་རང་ཁོ་རྣམས་ཀྱི་རྒྱལ་པོ་བྱེད་པར་མི་དགའ་བའི་དགྲ་བོ་དེ་རྣམས་འདིར་ཁྲིད་ཤོག༌དང༌། བདག་གི་མདུན་ནས་སོད་ཅིག་སྨྲས་པའོ་ཞེས་གསུངས་སོ།།
LUK 19:28 སྐྱབས་མགོན་ཡེ་ཤུས་གོང་གི་གསུང་དེ་དག་གནང༌རྗེས། ཡར་ཡེ་རུ་སཱ་ལེམ་དུ་ཆས་པ༌དང༌།
LUK 19:29 ཁོང་ཉིད་སྐྱུ་རུ་རའི་རི་བོའི་ངོས་སུ་ཡོད་པའི་པེ་ཕཱ་གེ་དང་པེ་ཐན་ཡཱ་ཡུལ་དང་ཉེ་བར་ཕེབས་པའི༌ཚེ། ཁོང་གིས་ཐུགས་སྲས་གཉིས་མངགས༌ཏེ།
LUK 19:30 ཁྱོད་གཉིས་ཕ་རོལ་གྱི་གྲོང་སྡེ་རུ་སོང༌དང༌། དེའི་ནང་དུ་འགྲོ་སྐབས་སུས་ཀྱང་བཞོན་མ་མྱོང་བའི་བོང་ཕྲུག་ཅིག་བཏགས་ཡོད་པ་མཐོང་ངེས༌ཤིང་། ཁྱོད་གཉིས་ཀྱིས་ཐག་པ་བཀྲོལ་ནས་འདིར་ཁྲིད༌ཤོག
LUK 19:31 གལ་ཏེ་སུ་ཞིག་གིས་ཅིའི་ཕྱིར་འགྲོལ་བ་ཡིན་ཞེས་ཟེར༌ན། ཁྱོད་གཉིས་ཀྱིས་བོང་ཕྲུག་འདི་གཙོ་བོ་ལ་མཁོ་བ་ཡིན་ཞེས་སྨྲོས་ཤིག་ཅེས་བཀའ་གནང༌ངོ་།།
LUK 19:32 གྲོང་སྡེའི་ནང་དུ་མངགས་པའི་ཐུགས་སྲས་གཉིས་པོ་ཕར་སོང་བ་དང་ཁོང་གིས་ཇི་ལྟར་གསུངས་པ་བཞིན་དུ་མཐོང༌ཞིང༌།
LUK 19:33 ཁོ་གཉིས་ཀྱིས་བོང་ཕྲུག་གི་འདོགས་ཐག་འགྲོལ་བཞིན་པའི་སྐབས༌སུ། བོང་ཕྲུག་གི་བདག་པོ་རྣམས་ན༌རེ། ཅིའི་ཕྱིར་བོང་ཕྲུག་འགྲོལ་བ་ཡིན་ཞེས་དྲིས་པ༌ན།
LUK 19:34 ཁོ་གཉིས་ཀྱིས་བོང་ཕྲུག་འདི་ངེད་ཅག་གི་གཙོ་བོ་ལ་མཁོ་བ་ཡིན་ཞེས་སྨྲས་སོ།།
LUK 19:35 ཁོ་གཉིས་ཀྱིས་དེ་ཁྲིད་ནས་སྐྱབས་མགོན་ཡེ་ཤུའི་དྲུང་དུ་སླེབས་པ༌དང༌། རང་གི་ཕྱི་གོས་བོང་ཕྲུག་གི་རྒྱབ་ཏུ་བཏིངས་ཤིང་ཁོང་ཉིད་བསྐྱོར་ནས་དེ་ལ་བཅིབས་སུ་བཅུག་པ་རེད།
LUK 19:36 ཁོང་ཉིད་ཕེབས་པའི་དུས་སུ་མི་རྣམས་ཀྱིས་རང་གི་ཕྱི་གོས་ལམ་ནང་དུ་བཀྲམ་པའོ།།
LUK 19:37 ཡང་ཁོང་ཉིད་ཡེ་རུ་སཱ་ལེམ་དུ་ཉེ་བར་ཕེབས་པ་དང་སྐྱུ་རུ་རའི་རི་བོ་ལས་མར་འབབ་པའི༌ཚེ། རྗེས་སུ་འབྲང་བའི་མི་ཚོགས་ཀྱིས་ངོ་མཚར་བའི་མཛད་པ་རྣམས་མཐོང་མྱོང༌བས། ཤིན་ཏུ་དགའ་ཞིང་སྐད་ཆེན་པོས་དཀོན་མཆོག་ལ་བསྟོད་པ་འབུལ་བཞིན།
LUK 19:38 གཙོ་བོའི་མཚན་གྱི་སྒོ་ནས་བྱོན་པའི་རྒྱལ་པོ་ནི་བྱིན་རླབས་ཅན་ཡིན། ནམ་མཁའི་ཞིང་ཁམས་ལ་ཞི་བདེ་དང་། བླ་ན་མེད་པའི་གནས་སུ་གཟི་བརྗིད་ཡོད་པར་གྱུར་ཅིག་ཅེས་ཡང་ཡང་བསྒྲགས་སོ།།
LUK 19:39 མི་ཚོགས་ཀྱི་ཁྲོད་དུ་ཡོད་པའི་ཕ་རུ་ཤི་པ་འགའ་ཞིག་གིས་སྐྱབས་མགོན་ཡེ་ཤུ༌ལ། སློབ་དཔོན༌ལགས། ཁྱེད་ཀྱིས་རང་གི་རྗེས་འབྲང་པ་རྣམས་ལ་བཀའ་བཀྱོན་གནང་བར་མཛོད་ཅེས་ཞུས་པ༌ལ།
LUK 19:40 ཁོང་གིས་འདི་སྐད༌དུ། བདག་གིས་ཁྱོད་རྣམས་ལ་སྨྲ་བར༌བྱ་སྟེ། གལ་ཏེ་མི་འདི་རྣམས་ཀྱིས་ཁ་ཅི་ཡང་མི་གྲགས༌ན། རྡོ་འདི་དག་གིས་སྐད་རྒྱག་པར་འགྱུར་ཞེས་གསུངས༌སོ།།
LUK 19:41 སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དང་ཉེ་བར་ཕེབས་པ༌དང༌། གྲོང་ཁྱེར་དེ་གཟིགས་ནས་ཐུགས་སྐྱོ་བའི་ངང་བཤུམས་ཤིང་གྲོང་ཁྱེར་དེའི་སྐོར་ལ་འདི་སྐད༌དུ།
LUK 19:42 གལ་སྲིད་དེ་རིང་ཁྱོད་ཀྱིས་ཞི་བདེ་གང་ལ་རག་ལས་པའི་དོན་དེ་ཤེས་ན་ཅི་མ༌རུང་། འོན་ཀྱང་ད་ལྟ་དོན་དེ་སྦས་པ་ཡིན་པས་ཁྱོད་ཀྱིས་མཐོང་བར་མི་འགྱུར།
LUK 19:43 དུས་ཤིག་སླེབ་ངེས༌ཏེ། ཁྱོད་ཀྱི་དགྲ་བོས་ཕྱོགས་བཞིར་འཐབ་རགས་བརྩིག་ཅིང༌། ཁྱོད་ཀྱི་མཐའ་ནས་བསྐོར་ཏེ་ཕྱོགས་བཞི་ནས་ཁྱོད་ལ་རྒོལ་བར་འགྱུར།
LUK 19:44 ཁྱོད་ཀྱིས་དཀོན་མཆོག་གི་གཟིགས་སྐྱོང་མཛད་པའི་དུས་དེ་མ་རྟོགས༌པས། ཁྱོད་དང་ཁྱོད་ཀྱི་ར་བའི་ནང་དུ་ཡོད་པའི་བུ་ཕྲུག་རྣམས་རྩ་མེད་དུ་བཏང༌ནས། རྡོ་ཕ་བོང་སྟེང་དུ་རྡོ་གཅིག་ཀྱང་མི་ལུས་པར་བཤིག་པར་འགྱུར་ཞེས་གསུངས༌སོ།།
LUK 19:45 སྐྱབས་མགོན་ཡེ་ཤུ་མཆོད་ཁང་ནང་དུ་ཕེབས་ཤིང་གནས་དེར་ཡོད་པའི་ཚོང་པ་རྣམས་སྒོའི་ཕྱི་རུ་ཕུད༌དེ།
LUK 19:46 འདི་སྐད༌དུ། གསུང་རབ་ཀྱི་མདོ༌ལས། ངའི་མཆོད་ཁང་ནི་སྨོན་ལམ་ཞུ་སའི་གནས་སུ་འགྱུར་ཞེས་བཀོད་ཡོད༌ཀྱང༌། ཁྱོད་ཅག་གིས་འདི་ནི་ཇག་ཚང་ཞིག་ཏུ་བསྒྱུར་འདུག་ཅེས་གསུངས་སོ།།
LUK 19:47 ཁོང་གིས་ཉིན་རེ་བཞིན་མཆོད་ཁང་ནས་ཆོས་གསུངས། འོན་ཀྱང་མཆོད་དཔོན་ཆེན་པོ་རྣམས་དང་མཁན༌པོ། ཡུལ་མིའི་འགོ་དཔོན་བཅས་ཀྱིས་ཁོང་ཉིད་དགྲོང་འདོད༌ཀྱང༌།
LUK 19:48 མི་ཐམས་ཅད་ཀྱིས་ཁོང་གི་གསུང་ལ་ཞིབ་ཏུ་ཉན་འདུག༌པས། དེ་དག་གིས་ཐབས་ཅི་ཡང་མ་རྙེད༌དོ།།
LUK 20:1 ཡང་ཉིན་ཞིག༌ལ། སྐྱབས་མགོན་ཡེ་ཤུས་མཆོད་ཁང་ནང་དུ་མི་ཚོགས་ལ་ཆོས་གསུངས་ཤིང་དཀོན་མཆོག་གི་འཕྲིན་བཟང་སྒྲོག་པའི་དུས༌སུ། མཆོད་དཔོན་ཆེན་པོ་རྣམས་དང་མཁན༌པོ། དཔོན་རིགས་རྒན་པོ་བཅས་མཉམ་དུ་ཁོང་གི་དྲུང་དུ་ཡོང༌སྟེ།
LUK 20:2 ཁྱོད་ཀྱིས་དབང་གང་ལ་བརྟེན་ནས་དོན་འདི་དག་མཛད་པ་ཡིན༌ནམ། སུ་ཞིག་གིས་ཁྱོད་ལ་དབང་འདི་གནང་བ་ཡིན་པ་ངེད་ཅག་ལ་སྨྲ་བར་མཛོད་ཅེས་ཞུས་པ༌ལ།
LUK 20:3 ཁོང་གིས་འདི་སྐད༌དུ། བདག་གིས་ཀྱང་ཁྱོད་རྣམས་ལ་དྲི་བ་ཞིག་འདོན༌ཏེ།
LUK 20:4 ཡོ་ཧ་ནན་གྱི་ཁྲུས་གསོལ་དེ་ནམ་མཁའི་ཞིང་ཁམས་དང་མི་ཡུལ་གཉིས་ཀྱི་གང་ནས་བྱུང་བ་ལ་ལན་ཐོབས་ཤིག་ཅེས་གསུངས་པ༌དང༌།
LUK 20:5 དེ་རྣམས་ཀྱིས་ཕན་ཚུན་གླེང་མོལ་བྱེད༌བཞིན། གལ་ཏེ་ནམ་མཁའི་ཞིང་ཁམས་ནས་བྱུང་བ་ཡིན་ཞེ༌ན། ཁོས་ཁྱོད་རྣམས་ཅིའི་ཕྱིར་ཡོ་ཧ་ནན་ལ་ཡིད་མ་ཆེས་སམ་ཞེས་སྨྲ་ངེས༌ལ།
LUK 20:6 ཡང་མི་ཡུལ་ནས་བྱུང་བ་ཡིན་ཞེ༌ན། མི་ཐམས་ཅད་ཡོ་ཧ་ནན་དངོས་གནས་ལུང་སྟོན་པ་ཞིག་ཡིན་པར་ཡིད་ཆེས༌པས། མི་རྣམས་ཀྱིས་བདག་ཅག་རྡོ་རུབ་གཏོང་བར་ངེས་ཞེས་སྨྲས་ཤིང་།
LUK 20:7 ཁོ་རྣམས་ན༌རེ། ངེད་ཅག་གིས་གང་ནས་བྱུང་བ་མི་ཤེས་ཞེས་ལན་བཏབ་བོ།།
LUK 20:8 ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་བདག་གིས་ཀྱང་དབང་གང་ལ་བརྟེན་ནས་དོན་འདི་དག་བྱེད་པ་ཁྱོད་ཅག་ལ་སྨྲ་བ་མིན་ཞེས་གསུངས༌སོ།།
LUK 20:9 སྐྱབས་མགོན་ཡེ་ཤུས་དཔེའི་སྒོ་ནས་མི་རྣམས་ལ་འདི་སྐད༌དུ། དེ་ཡང་མི་ཞིག་གིས་རྒུན་ཚལ་ཞིག་བཙུགས་རྗེས་མི་གཞན་ལ་གླས་ཏེ་ཁོ་རང་ཡུལ་གཞན་དུ་སོང་ནས་ཡུན་རིང་ལ་བསྡད་དོ།།
LUK 20:10 དུས་ལ་བབས༌ཚེ། ཁོང་གིས་གཡོག་པོ་ཞིག་གླ་མཁན་ཚང་ལ་རྒུན་འབྲུམ་གྱི་འབྲས་བུ་ལེན་དུ་མངགས༌ནའང༌། གླ་མཁན་རྣམས་ཀྱིས་གཡོག་པོ་དེ་ལ་གཅར་རྡུང་བྱས་ནས་ལག་སྟོང་དུ་ཕྱིར་བཏང༌།
LUK 20:11 ཡང་ཁོང་གིས་གཡོག་པོ་གཞན་ཞིག་མངགས་པ༌ན། གླ་མཁན་རྣམས་ཀྱིས་གཡོག་པོ་དེ་ལའང་གཅར་རྡུང་དང་དམའ་འབེབས་བྱས་ཏེ་ལག་སྟོང་དུ་ཕྱིར་བཏང༌།
LUK 20:12 ཡང་གཡོག་པོ་གསུམ་པ་དེ་མངགས་པ༌ན། གླ་མཁན་རྣམས་ཀྱིས་དེ་ལའང་གཅར་རྡུང་བྱས་ནས་རྨས་ཏེ་ཕྱི་རུ་བསྐྲད།
LUK 20:13 རྒུན་འབྲུམ་ར་བའི་བདག་པོ་ན༌རེ། ད་ནི་ཅི༌བྱའམ། བདག་གི་གཅེས་པའི་བུ་དེ་མངགས་ན་གླ་མཁན་རྣམས་ཀྱིས་བཀུར་སྟི་བྱེད་ཀྱང་སྲིད་བསམས༌སོ།།
LUK 20:14 འོན་ཀྱང་གླ་མཁན་རྣམས་ཀྱིས་བུ་དེ་མཐོང་ནས་ཕན་ཚུན༌ལ། འདི་ནི་ཕ་ཤུལ་འཛིན་མཁན་ཡིན། ནོར་སྐལ་དེ་དག་བདག་ཅག་ལ་འཐོབ་པའི་ཕྱིར། ཁོ་རང་གསོད་པར་བྱའོ་ཞེས་སྨྲས༌ཏེ།
LUK 20:15 བུ་དེ་རྒུན་འབྲུམ་ར་བའི་ཕྱི་རུ་བཏོན་ནས་བསད་དོ།། དེས་ན་རྒུན་འབྲུམ་ར་བའི་བདག་པོས་དེ་དག་ལ་ཅི་བྱེད་པར་འགྱུར་རམ་ཞེ༌ན།
LUK 20:16 ཁོང་ཉིད་ཕེབས་ཡོང་ནས་གླ་མཁན་རྣམས་འཇོམས་པར་མཛད༌དེ། རྒུན་འབྲུམ་ར་བ་མི་གཞན་རྣམས་ལ་སྤྲོད་པར་བྱེད་ཅེས་གསུངས་པ༌དང༌། མི་རྣམས་ཀྱིས་གསུང་དེ་ཐོས་ནས་དེ་ལྟར་བྱ་མི་རུང་ཞེས་སྨྲས་པ༌ལ།
LUK 20:17 སྐྱབས་མགོན་ཡེ་ཤུས་དེ་རྣམས་ལ་གཟིགས་ནས་འདི་སྐད༌དུ། གསུང་རབ་ཀྱི་མདོ་ལས་ཇི་སྐད༌དུ། བཟོ་བ་རྣམས་ཀྱིས་སྤངས་པའི༌རྡོ།། ཁང་པའི་ཟུར་གྱི་རྨང་རྡོ༌ཡིན།། ཞེས་གསུངས་ཡོད་པའི་དོན་ཅི་ཡིན༌ནམ།
LUK 20:18 མི་སུ་ཞིག་རྡོ་དེའི་སྟེང་དུ་ལྷུང༌ན། མི་དེ་ནི་དུམ་བུར་འགྱུར། ཡང་རྡོ་དེ་མི་སུ་ཞིག་གི་སྟེང་དུ་ལྷུང༌ན། མི་དེའང་རྡུལ་དུ་བརླག་པར་འགྱུར་ཞེས་གསུངས༌སོ།།
LUK 20:19 དེ་ནས་མཁན་པོ་དང་མཆོད་དཔོན་ཆེན་པོ་རྣམས་ཀྱིས་གོང་གི་དཔེ་དེ་ནི་རང་ཉིད་ལ་གསུངས་པ་ཤེས༌ནས། དེ་མ་ཐག་ཏུ་ཁོང་ཉིད་འཛིན་པར་བསམས་ཀྱང་མི་ཚོགས་ལ་འཇིགས༌སོ།།
LUK 20:20 སྐྱབས་མགོན་ཡེ་ཤུར་ལྐོག་ལྟ་བྱས་ནས་ཁོང་གི་གསུང་ལས་གླགས་བཙལ་ཏེ་སྤྱི་དཔོན་གྱི་ཁྲིམས་དང་དབང་ལ་སྤྲོད༌ཆེད། མི་གཞུང་དྲང་ཡིན་ཁུལ་བྱེད་པའི་མྱུལ་མ་འགའ་ཁོང་གི་དྲུང་དུ་བཏང༌ངོ་།།
LUK 20:21 དེ་རྣམས་ན༌རེ། སློབ་དཔོན༌ལགས། ཁྱེད་ཀྱིས་གསུངས་པ་དང་བསྟན་པ་ནི་བདེན་པ་ཡིན་ཞིང་མི་ཀུན་ལ་ཕྱོགས་རིས་མེད་པར་དཀོན་མཆོག་གི་ལམ་ཡང་དག་པར་བདེན་པར་སྟོན་པ་ངེད་རྣམས་ཀྱིས་ཤེས་པ་ཡིན།
LUK 20:22 ད་ལྟ་ངེད་ཅག་གིས་སེ་བཟིར་ལ་ཁྲལ་འཇལ་རུང་ངམ་མི་རུང་ཞེས་ཞུས་པ༌ལ།
LUK 20:23 ཁོང་གིས་དེ་རྣམས་ཀྱི་གཡོ་སྒྱུ་མཁྱེན་ཏེ་འདི་སྐད༌དུ།
LUK 20:24 བདག་ལ་དངུལ་སྒོར་ཞིག་སྟོན༌ཅིག དངུལ་སྒོར་སྟེང་གི་རི་མོ་དང་ཡི་གེ་འདི་སུའི་ཡིན་ནམ་ཞེས་དྲིས་པ༌ན། དེ་རྣམས་ཀྱིས་སེ་བཟིར་གྱི་ཡིན་ཞེས་སྨྲས་སོ།།
LUK 20:25 ཡང་ཁོང་གིས་འདི་སྐད༌དུ། དེས་ན་གང་ཞིག་སེ་བཟིར་གྱི་ཡིན་ན་དེ་ནི་སེ་བཟིར་ལ་ཕུལ༌དང༌། གང་ཞིག་དཀོན་མཆོག་གི་ཡིན་ན་དེ་ནི་དཀོན་མཆོག་ལ་ཕུལ་ཅིག་ཅེས་གསུངས་སོ།།
LUK 20:26 དེ་རྣམས་ཀྱིས་མི་ཚོགས་ཀྱི་མདུན་ནས་ཁོང་ལ་ལོག་བཤད་བྱེད་དུ་འཇུག་མ་ནུས༌ཤིང༌། ཁོང་གི་བཀའ་ལན་ལ་ངོ་མཚར་བར་གྱུར་པས་ཁ་ཅི་ཡང་མ་གྲགས༌སོ།།
LUK 20:27 སླར་གསོན་པའི་དོན་དེ་མེད་ཟེར་མཁན་སཱ་ཅུ་སེ་པ་རྣམས་ཁོང་གི་དྲུང་དུ་ཡོང་སྟེ་ན༌རེ།
LUK 20:28 སློབ་དཔོན༌ལགས། མོ་ཤེའི་མདོ༌ལས། གལ་སྲིད་སྐྱེས་པ་ཞིག་ལ་བུ་ཕྲུག་མེད་པར་ཤི་སྟེ་ཆུང་མ་གཅིག་པུར་ལུས༌ན། དེའི་གཅུང་པོས་ཆུང་མ་དེ་བླངས་ནས་གཅེན་པོའི་དོན་དུ་རིགས་རྒྱུད་སྤེལ་དགོས་ཞེས་གསུངས་ཡོད།
LUK 20:29 སྔོན་ཆད་སྤུན་བདུན་ཡོད་པ་ལས་སྤུན་ཆེ་བས་ཆུང་མ་ཞིག་བླངས་ནས་བུ་ཕྲུག་མེད་པར༌ཤི་བ་དང་།
LUK 20:30 སྤུན་གཉིས་པ་དང་གསུམ་པས་ཀྱང་བུད་མེད་དེ་ཆུང་མར་བླངས་མྱོང་བ༌དང༌། དེ་བཞིན་དུ་སྤུན་བདུན་པོས་དེ་ལྟར་བྱས་ནས་བུ་ཕྲུག་མ་བྱུང་བར༌ཚང་མ་ཤི་བ་རེད།
LUK 20:32 མཇུག་མཐར་བུད་མེད་དེའང༌ཤིའོ།།
LUK 20:33 དེས་ན་གཤིན་པོ་རྣམས་སླར་གསོན་པར་འགྱུར་བའི་དུས་དེ་སླེབས༌ཚེ། སྤུན་བདུན་པོས་བུད་མེད་དེ་ཆུང་མར་བླངས་མྱོང་བས་ཁོ་མོ་ནི་སྤུན་བདུན་ལས་སུ་ཞིག་གི་ཆུང་མ་ཡིན་ནམ་ཞེས་དྲིས་པ༌ན།
LUK 20:34 སྐྱབས་མགོན་ཡེ་ཤུས་འདི་སྐད༌དུ། བསྐལ་པ་འདི་ལ་གཏོགས་པའི་མི་རྣམས་ཀྱིས་བག་མ་ཕར་བསྐྱལ་ཚུར་ལེན་བྱེད༌ཀྱང༌།
LUK 20:35 བསྐལ་པ་འབྱུང་འགྱུར་འཐོབ་པ་དང་གཤིན་པོ་སླར་གསོན་པར་འོས་པ་རྣམས་ཀྱིས་བག་མ་ཕར་བསྐྱལ་ཚུར་ལེན་མི་བྱེད།
LUK 20:36 རྒྱུ་མཚན་ནི་དེ་རྣམས་ལ་ནམ་ཡང་འཆི་བ་མེད་པར་ཕོ་ཉ་རྣམས་དང་མཚུངས༌ཤིང༌། སླར་གསོན་པ་རྣམས་ཡིན་པས་དཀོན་མཆོག་གི་བུ་ཕྲུག་ཏུ་འགྱུར་བའི་ཕྱིར༌རོ།།
LUK 20:37 འོན་ཀྱང་གཤིན་པོ་རྣམས་སླར་གསོན་ངེས་པའི་སྐོར༌ལ། མོ་ཤེ་ཡིས་ཚེར་སྡོང་གི་སྐོར་བཀོད་པའི་མདོ་ལས། གཙོ་བོ་ལ་ཨབ་ར་ཧམ་གྱི་དཀོན་མཆོག༌དང༌། ཨི་སཱག་གི་དཀོན༌མཆོག ཡ་ཀོབ་ཀྱི་དཀོན་མཆོག་ཅེས་གསོལ་བ་ལས་གསལ་པོར་བསྟན་པ་ཡིན།
LUK 20:38 དཀོན་མཆོག་ནི་གཤིན་པོ་རྣམས་ཀྱི་དཀོན་མཆོག་མ་ཡིན༌པར། གསོན་པོ་རྣམས་ཀྱི་དཀོན་མཆོག་ཡིན༌ཏེ། ཁོང་གི་དྲུང་དུ་མི་ཐམས་ཅད་གསོན་པོ་ཡིན་པའི་ཕྱིར་རོ་ཞེས་གསུངས་སོ།།
LUK 20:39 ཡང་མཁན་པོ་འགའ་ཞིག་ན༌རེ། སློབ་དཔོན༌ལགས། ཁྱེད་ཀྱིས་ལེགས་པར་གསུངས་པ་ཡིན་ཞེས་ཞུས༌ཤིང༌།
LUK 20:40 ཕྱིས་སུ་དེ་རྣམས་ཀྱིས་ཁོང་ལ་དྲི་བ་ཅི་ཡང་ཞུ་མ་ཕོད༌དོ།།
LUK 20:41 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། མཱ་ཤི་ཀ་ནི་ཇི་ལྟར་དཱ་བིད་ཀྱི་རིགས་སྲས་ཡིན་པར་སྨྲའམ།
LUK 20:42 དཱ་བིད་ཀྱིས་གསུང་མགུར་གྱི་མདོ་ལས་ཇི་སྐད༌དུ། དཀོན་མཆོག་གིས་ནི་ང་ཡི་གཙོ་བོ༌ལ།།
LUK 20:43 བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་སྟེགས་སུ་བསྒྱུར་བའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས་པ༌དང༌།
LUK 20:44 དཱ་བིད་ཀྱིས་ཁོང་ལ་གཙོ་བོ་ཞེས་ཞུས༌ན། ཁོང་ནི་དཱ་བིད་ཀྱི་རིགས་སྲས་སུ་ཇི་ལྟར་གྱུར་པ་ཡིན་ནམ་ཞེས་གསུངས༌སོ།།
LUK 20:45 མི་ཐམས་ཅད་ཀྱིས་སྐྱབས་མགོན་ཡེ་ཤུའི་གསུང་ལ་ཉན་བཞིན་པའི་དུས༌སུ། ཁོང་གིས་ཐུགས་སྲས་རྣམས་ལ་འདི་སྐད༌དུ།
LUK 20:46 མཁན་པོ་རྣམས་ལ་དོགས་པར༌གྱིས། དེ་རྣམས་ཀྱིས་ལྭ་རིང་པོ་གྱོན་ཏེ་ཕར་འགྲོ་ཚུར་འོང་བྱེད་པ༌དང༌། ཁྲོམ་སྲང་ནས་མི་རྣམས་ཀྱི་བསྙེན་བཀུར་འཐོབ་པར་དགའ་ཞིང་། ཆོས་ཁང་དང་གསོལ་སྟོན་དུ་གྲལ་མགོ་ནས་སྡོད་པར་མོས་པ་ཡིན།
LUK 20:47 མི་དེ་རྣམས་ཀྱིས་ཡུགས་མོ་རྣམས་ཀྱི་ཁང་པ་དང་བཅས་པའི་རྒྱུ་རྫས་ཧམ་བཟུང་བྱེད་ཅིང་སྨོན་ལམ་རིང་པོ་འདེབས་ཁུལ་བྱེད༌པས། མི་དེ་དག་ལ་ལྷག་ཏུ་ཉེས་ཆད་ལྕི་མོ་འཕོག་པར་འགྱུར་ཞེས་གསུངས༌སོ།།
LUK 21:1 སྐྱབས་མགོན་ཡེ་ཤུས་དབུ་ཡར་དགྱེ་ནས་གཟིགས་པ༌ན། ཕྱུག་བདག་རྣམས་ཀྱིས་མཆོད་ཁང་གི་དཀོར་མཛོད་ནང་དུ་ཞལ་འདེབས་འབུལ་བཞིན་པ་མཐོང༌ཞིང༌།
LUK 21:2 ཡུགས་མོ་དབུལ་པོ་ཞིག་གིས་ཀྱང་ཟངས་ཀྱི་དོང་ཙེ་ཆུང་ངུ་གཉིས་ཕུལ་བ་གཟིགས་ཏེ་འདི་སྐད༌དུ།
LUK 21:3 བདག་གིས་ཁྱོད་རྣམས་ལ་བདེན་པར༌སྨྲ་སྟེ། དངུལ་འབུལ་མཁན་ཐམས་ཅད་ལས་ཡུགས་མོ་དབུལ་པོ་འདིས་ཕུལ་བ་མང༌སྟེ།
LUK 21:4 ཁོ་རྣམས་ཀྱིས་རྒྱུ་ནོར་ལྷག་མ་མང་པོ་ཡོད་པ་ལས་ཕུལ་བ༌ཡིན་ཞིང༌། ཁོ་མོས་རང་ལ་མི་འདང་ཡང་སྲོག་འཚོ་བར་མཁོ་བ་ཐམས་ཅད་ཕུལ་བ་ཡིན་ཞེས་གསུངས༌སོ།།
LUK 21:5 མི་འགའ་ཞིག་གིས་མཆོད་ཁང་དེ་ནི་རྡོ་ཕ་བོང་ཡིད་དུ་འོང་བ་དང་རིན་པོ་ཆེའི་ཞལ་འདེབས་དག་གིས་བརྒྱན་འདུག་ཨང་ཞེས་གླེང་བ༌དང༌།
LUK 21:6 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་མཐོང་བ་ཐམས་ཅད་ནི་མ་འོངས་པའི་དུས་དེ་སླེབས༌ཚེ། རྡོ་ཕ་བོང་སྟེང་དུ་རྡོ་གཅིག་ཀྱང་མི་ལུས་པར་ཐམས་ཅད་བཤིག་པར་འགྱུར་ཞེས་གསུངས་སོ།།
LUK 21:7 ཁོ་རྣམས་ན༌རེ། སློབ་དཔོན༌ལགས། དོན་འདི་རྣམས་དུས་ནམ་ཞིག་ལ་འབྱུང་ཞིང་དོན་འདི་རྣམས་འབྱུང་བའི་དུས་སུ་རྟགས་ཅི་ཞིག་ཡོད་དམ་ཞེས་ཞུས་པ༌ན།
LUK 21:8 ཡང་ཁོང་གིས་འདི་སྐད༌དུ། སུ་ཞིག་གིས་ཀྱང་ཁྱོད་ཅག་མི་བསླུ་བའི་ཆེད་དུ་དོགས་པར༌གྱིས། རྒྱུ་མཚན་ནི་མི་མང་པོས་བདག་གི་མིང་དུ་རྫུ་བཞིན་ཡོང་སྟེ། ང་རང་ནི་སྐྱབས་མགོན་མཱ་ཤི་ཀ་ཡིན་ཟེར་བ་དང་དུས་དེ་སླེབས་ལ་ཉེའོ་ཟེར་ངེས་ཤིང་། ཁྱོད་རྣམས་དེ་རིགས་ཀྱི་རྗེས་སུ་འགྲོ་བར་མི༌བྱའོ།།
LUK 21:9 ཡང་ཁྱོད་ཅག་གིས་དམག་འཁྲུག་དང་ཟིང་ཆ་ལངས་པའི་གཏམ་ཐོས་པའི་སྐབས་སུ་འཇིགས་མི་དགོས༌ཏེ། དོན་འདི་རྣམས་སྔོན་ལ་འབྱུང་ངེས་ཀྱང་མཐའ་མའི་དུས་དེ་མ་ཐག་ཏུ་སླེབས་པ་མ་ཡིན་པའི་ཕྱིར་རོ་ཞེས་གསུངས༌སོ།།
LUK 21:10 ཡང་སྐྱབས་མགོན་ཡེ་ཤུས་ཁོ་རྣམས་ལ་འདི་སྐད༌དུ། དེའི་དུས་སུ་མི་རིགས་དང་མི་རིགས་འཁྲུག་ཅིང་རྒྱལ་ཁབ་དང་རྒྱལ་ཁབ་འཁྲུག་པར་འགྱུར་བ༌དང༌།
LUK 21:11 ས་འགུལ་ཆེན་པོ་འབྱུང་བ༌དང༌། ས་ཆ་མང་པོར་མུ་གེ་དང་ནད་ཡམས་སྣ་ཚོགས་འབྱུང༌ཞིང༌། ནམ་མཁའ་ནས་ཀྱང་ལྟས་ངོ་མཚར་ཅན་དང་འཇིགས་སུ་རུང་བ་སྣ་ཚོགས་འབྱུང་བར་འགྱུར།
LUK 21:12 འོན་ཀྱང་དོན་འདི་ཐམས་ཅད་མ་བྱུང་བའི་སྔོན༌ལ། ངའི་མིང་གི་རྐྱེན་གྱིས་ཁྱོད་རྣམས་འཛིན་པར་འགྱུར༌ཏེ། འཚེ་བར་བྱེད་ཅིང་ཆོས་ཁང་ལ་སྤྲོད་པ་དང་བཙོན་ཁང་དུའང་འཇུག་པར་བྱེད། ཡང་ཁྱོད་རྣམས་རྒྱལ་པོ་དང་སྤྱི་དཔོན་རྣམས་ཀྱི་དྲུང་དུ་འཁྲིད་པར་འགྱུར༌ཡང༌།
LUK 21:13 མཇུག་མཐར་དོན་འདི་རྣམས་ཁྱོད་ཅག་གིས་བདེན་དཔང་བྱེད་པའི་མཐུན་རྐྱེན་དུ་འགྱུར།
LUK 21:14 དེ་བས་ཁྱོད་རྣམས་ཀྱིས་སྔོན་ལ་ཅི་ལྟར་ལན་འདེབས་པར་བསམ་བློ་མི་གཏོང་བར་སེམས་ཐག་ཆོད༌ཅིག
LUK 21:15 རྒྱུ་མཚན་ནི་བདག་གིས་ཁྱོད་རྣམས་ལ་ཁ་ལྕེ་དང་ཤེས་རབ་གནང་ངེས་ཡིན༌པས། དགྲ་བོ་སུས་ཀྱང་ཁྱོད་རྣམས་ལ་རྒོལ་བའམ་དགག་པར་བྱ་མི་ནུས་སོ།།
LUK 21:16 ཐ་ན་ཁྱོད་རྣམས་ཀྱི་ཕ་མ༌དང༌སྤུན་མཆེད། གཉེན༌ཉེ། གྲོགས་པོ་དག་གིས་ཀྱང་ཁྱོད་རྣམས་དགྲའི་ལག་ཏུ་སྤྲོད་ཅིང་ཁྱོད་རྣམས་ལས་འགའ་ཞིག་གསོད་པར་འགྱུར།
LUK 21:17 གཞན་ཡང་ངའི་མིང་གི་རྐྱེན་གྱིས་མི་ཐམས་ཅད་ཁྱོད་ཅག་ལ་སྡང་བར་འགྱུར།
LUK 21:18 འོན་ཀྱང་ཁྱོད་རྣམས་ཀྱི་སྐྲའི་ཉག་མ་གཅིག་ཀྱང་འཇིག་པར་མི་འགྱུར།
LUK 21:19 ཁྱོད་ཅག་གི་བཟོད་བསྲན་གྱིས་ཀྱང་ཁྱོད་རྣམས་ཀྱི་སྲོག་སྐྱོབ་པར་ངེས་ཞེས་གསུངས༌སོ།།
LUK 21:20 ཡང་འདི་སྐད༌དུ། དེ་ཡང་དགྲའི་དམག་དཔུང་གིས་ཡེ་རུ་སཱ་ལེམ་གྱི་ཕྱོགས་བཞི་ནས་བསྐོར་བ་ཁྱོད་རྣམས་ཀྱིས་མཐོང་བའི༌ཚེ། གྲོང་ཁྱེར་དེ་འཇིག་པའི་དུས་ལ་སླེབས་པར་ཉེ་བའང་ཤེས་པར༌གྱིས།
LUK 21:21 དེའི་དུས༌སུ། ཡ་ཧུ་དཱའི་ཡུལ་དུ་ཡོད་པའི་མི་རྣམས་རི་ལ་འབྲོ་བར་གྱིས། གྲོང་ཁྱེར་དེའི་ནང་དུ་ཡོད་པ་རྣམས་ཕྱིར་འབུད་དགོས་པ༌དང༌། གྲོང་སྡེའི་ནང་དུ་ཡོད་པ་རྣམས་ཀྱང་གྲོང་ཁྱེར་དེར་འགྲོ་བར་མི༌བྱའོ།།
LUK 21:22 རྒྱུ་མཚན་ནི་དུས་དེ་ནི་ལན་འཇལ་བའི་ཉིན་མོ་དག་ཡིན༌ཏེ། དཀོན་མཆོག་གི་མདོ་ལས་གསུངས་པ་བཞིན་ཐམས་ཅད་འགྲུབ་པར་འགྱུར་བའི་ཕྱིར༌ཡིན།
LUK 21:23 ཡང་ཉིན་དེ་དག་གི་རིང༌ལ། ས་གཞི་ལ་སྡུག་བསྔལ་ཆེན་པོ་འབྱུང་ཞིང་། དཀོན་མཆོག་ཀྱང་མི་རིགས་འདི་ལ་ཐུགས་ཁྲོ་བར་འགྱུར༌བས། བུད་མེད་སྦྲུམ་མ་དང་ཕྲུ་གུར་ནུ་མ་སྣུན་མཁན་རྣམས་སྙིང་རེ་རྗེ༌ཨང༌།
LUK 21:24 ཡ་ཧུ་དཱ་པ་མང་པོ་ཞིག་རལ་གྲིའི་ཁ་ནས་གསོད་པར་འགྱུར་བ༌དང༌། གཞན་རྣམས་བཟུང་སྟེ་རྒྱལ་ཁབ་སོ་སོར་བཙན་ཁྲིད་བྱས་ནས་འཐོར་བར་འགྱུར། ཕྱི་ཕྱོགས་པ་རྣམས་ཀྱི་དུས་ཚང་བའི་བར་དུ། ཕྱི་ཕྱོགས་པ་རྣམས་ཀྱིས་ཡེ་རུ་སཱ་ལེམ་ཡང་བརྫི་བར་འགྱུར་ཞེས་གསུངས༌སོ།།
LUK 21:25 ཡང་འདི་སྐད༌དུ། དེ་ཡང་ཉི་ཟླ་སྐར་གསུམ་ལས་ལྟས་ངོ་མཚར་ཅན་རྣམས་འབྱུང༌ཞིང༌། རྒྱ་མཚོའི་རྦ་རླབས་འཕྱུར་བའི་སྒྲ་ཆེན་པོ་ཐོས་པ༌ལས། ས་གཞིའི་སྟེང་གི་མི་རིགས་ཐམས་ཅད་ལ་དཀའ་སྡུག་བྱུང་སྟེ་ཅི་བྱ་གཏོལ་མེད་དུ་འགྱུར།
LUK 21:26 བར་སྣང་ཁམས་ཀྱི་དབང་ཐམས་ཅད་ཀྱང་གཡོ་བར་འགྱུར༌བས། མི་རྣམས་ཀྱིས་འཇིག་རྟེན་ཁམས་ལ་ཅི་འབྱུང་བར་འགྱུར་བ་བསམས་ཚེ་འཇིགས་ཤིང་སྐྲག་ནས་དབང་བོ་འཆོར་བར་འགྱུར།
LUK 21:27 དེའི་དུས༌སུ། མི་དེ་རྣམས་ཀྱིས་མིའི་བུ་ཁོང་ཉིད་ནུས་མཐུ་དང་གཟི་བརྗིད་ཆེན་པོའི་ངང་སྤྲིན་གྱི་བང་རིམ་ནས་འབྱོན་པ་མཐོང་བར་འགྱུར་རོ།།
LUK 21:28 དོན་འདི་རྣམས་འབྱུང༌བའི་ཚེ། ཁྱོད་རྣམས་ལ་ཐར་པའི་དུས་སླེབས་ལ་ཉེ་བ་ཡིན་པས་ཁྱོད་རྣམས་འགྲེངས་ནས་མགོ་བོ་ཡར་འདེགས་དགོས་ཞེས་གསུངས༌སོ།།
LUK 21:29 ཡང་སྐྱབས་མགོན་ཡེ་ཤུས་ཁོ་རྣམས་ལ་དཔེའི་སྒོ་ནས་འདི་སྐད༌དུ། ཁྱོད་རྣམས་ཀྱིས་བསེ་ཡབ་ཤིང་དང་ལྗོན་ཤིང་སྣ་ཚོགས་ལ་ལྟོས༌དང༌།
LUK 21:30 དེ་དག་ལ་མྱུ་གུ་འབུས་པ་མཐོང་ཚེ་དབྱར་ཁའི་དུས་ལ་ཉེ་བ་རང་ཤུགས་ཀྱིས་ཤེས༌ཡོང་།
LUK 21:31 དེ་བཞིན་དུ་ཁྱོད་ཅག་གིས་ཀྱང་དོན་འདི་རྣམས་འབྱུང་བ་མཐོང༌བའི་ཚེ། དཀོན་མཆོག་གི་རྒྱལ་སྲིད་དང་ཉེ་བར་སླེབས་པའང་ཤེས་པར༌གྱིས།
LUK 21:32 བདག་གིས་ཁྱོད་ཅག་ལ་བདེན་པར་སྨྲ༌སྟེ། མི་རབས་འདི་ད་དུང་མ་འདས་པའི་སྔོན་ལ་དོན་འདི་ཐམས་ཅད་འབྱུང་བར་འགྱུར།
LUK 21:33 གནམ་ས་གཉིས་ནི་འཇིག་སྲིད་ཀྱང་བདག་གི་བཀའ་རྣམས་འཇིག་པར་མི་འགྱུར་ཞེས་གསུངས༌སོ།།
LUK 21:34 ཡང་འདི་སྐད༌དུ། ཟས་ཆང་ལ་རྔམ་པ་དང་ཚེ་འདིའི་སེམས་ཁུར་སྣ་ཚོགས་ཀྱི་དབང་གིས་ཁྱོད་ཅག་གི་སེམས་མི་སྒྲིབ་པའི་ཆེད་དུ་བློ་གཟུ་བོར་གནས་པར༌གྱིས། དེ་ལྟར་མ་བྱས༌ཚེ། ཉིན་མོ་དེས་ཞགས་པས་བཟུང་བ་ལྟར་གློ་བུར་ཉིད་ལ་ཁྱོད་ཅག་འཛིན་པར་བྱེད།
LUK 21:35 རྒྱུ་མཚན་ནི་ཉིན་མོ་དེ་ནི་ས་གཞི་ཡོངས་སུ་གནས་པའི་མི་ཐམས་ཅད་ཀྱི་སྟེང་ལ་སླེབ་པར་འགྱུར་བའི་ཕྱིར༌ཡིན།
LUK 21:36 དེ་བས་ཁྱོད་རྣམས་ཀྱིས་དུས་རྟག་ཏུ་དོགས་ཟོན་བྱོས་དང་། འབྱུང་འགྱུར་གྱི་དོན་དེ་ཐམས་ཅད་ལས་ཐར༌ཞིང་མིའི་བུ་ཡི་དྲུང་དུ་ཚུགས་ནུས་པའི་ཆེད༌དུ། ནམ་རྒྱུན་གསོལ་བ་ཐོབས་ཤིག་ཅེས་གསུངས༌སོ།།
LUK 21:37 ཡང་སྐྱབས་མགོན་ཡེ་ཤུས་ཉིན་རེ་བཞིན་མཆོད་ཁང་ནང་དུ་མི་རྣམས་ལ་ཆོས་གསུངས༌ཤིང༌། ཞག་མ་རེ་རེར་ཕྱི་རོལ་ཏུ་ཕེབས་ནས་སྐྱུ་རུ་རའི་རི་བོ་ལ་བཞུགས་པ་རེད།
LUK 21:38 ཡང་ནམ་ལངས་མ་ཐག་མི་ཐམས་ཅད་མཆོད་ཁང་ནང་དུ་ཁོང་གི་དྲུང་དུ་ཡོང་ནས་ཆོས་ལ་མཉན༌ཏོ།།
LUK 22:1 སྐྱུར་མེད་བག་ལེབ་ཀྱི་དུས་ཆེན་ཏེ་པེ་སག་གི་དུས་ཆེན་ཟེར་བ་སླེབས་ལ་ཉེ་བའི་དུས༌སུ།
LUK 22:2 མཆོད་དཔོན་ཆེན་པོ་དག་དང་མཁན་པོ་རྣམས་མི་སེར་ལ་འཇིགས་ཏེ་སྐྱབས་མགོན་ཡེ་ཤུ་ཇི་ལྟར་དགྲོང་བར་བྱེད་པའི་ཐབས་བཙལ༌ཏོ།།
LUK 22:3 བདུད་སཱ་ཏན་ཐུགས་སྲས་བཅུ་གཉིས་ལས་ཨི་སི་ཀར་རེའི་ཡུ་དཱའི་སེམས་ནང་དུ་ཞུགས༌ཏེ།
LUK 22:4 མཆོད་དཔོན་ཆེན་པོ་རྣམས་དང་མཆོད་ཁང་སྲུང་བའི་དམག་དཔོན་རྣམས་ཀྱི་དྲུང་དུ་སོང་ནས་སྐྱབས་མགོན་ཡེ་ཤུ་ཇི་ལྟར་དེ་དག་ལ་སྤྲོད་པར་གྲོས་བྱས།
LUK 22:5 དེ་དག་ཤིན་ཏུ་དགའ་ནས་ཡུ་དཱ་ལ་དངུལ་སྟེར་བར་ཡིད་འཐད་བྱུང་།
LUK 22:6 ཡུ་དཱས་ཀྱང་ཁས་བླངས་ནས་མི་ཚོགས་མེད་པའི་དུས་སུ་སྐྱབས་མགོན་ཡེ་ཤུ་དེ་དག་གི་ལག་ཏུ་ཇི་ལྟར་སྤྲོད་པའི་གོ་སྐབས་བཙལ༌ཏོ།།
LUK 22:7 པེ་སག་གི་ལུ་གུ་བཤའ་དགོས་པའི་སྐྱུར་མེད་བག་ལེབ་དུས་ཆེན་གྱི་ཉིན་མོ་དེ་སླེབས་པ༌དང༌།
LUK 22:8 སྐྱབས་མགོན་ཡེ་ཤུས་པེ་ཏྲོ་དང་ཡོ་ཧ་ནན་གཉིས་མངགས༌ཏེ། བདག་ཅག་གིས་པེ་སག་གི་གསོལ་སྟོན་རོལ་ཕྱིར་ཁྱོད་གཉིས་སྟ་གོན་བྱེད་དུ་སོང་ཞེས་བཀའ་གནང་ངོ༌།།
LUK 22:9 དེ་གཉིས་ན༌རེ། ངེད་གཉིས་ཀྱིས་གནས་གང་དུ་སྟ་གོན་བྱེད་དགོངས་སམ་ཞེས་ཞུས་པ༌ན།
LUK 22:10 ཡང་ཁོང་གིས་འདི་སྐད༌དུ། ཁྱོད་གཉིས་གྲོང་ཁྱེར་ནང་དུ་སླེབས༌རྗེས། དེ་རུ་ཆུ་བུམ་འཁྱེར་བའི་སྐྱེས་པ་ཞིག་ཚུར་ཡོང་བར་འགྱུར་ཞིང་དེའི་རྗེས་སུ་འབྲངས་ནས་ཁྱིམ་དེར་སོང༌སྟེ།
LUK 22:11 ཁྱིམ་དེའི་བདག་པོ༌ལ། སློབ་དཔོན་གྱིས་ཁྱོད་ལ་འདི་སྐད་གསུངས་ཏེ། ང་དང་ཐུགས་སྲས་རྣམས་ཀྱིས་མཉམ་དུ་པེ་སག་གི་ཞལ་ཟས་བཞེས་སའི་འགྲུལ་ཁང་དེ་གང་དུ་ཡོད་ཅེས་ཤོད༌ཅིག
LUK 22:12 དེས་ཀྱང་ཁྱོད་གཉིས་ལ་ཅ་ལག་ཁ་ཚང་ཡོད་པའི་ཐོག་ཁང་ཆེན་པོ་ཞིག་སྟོན༌སྲིད། ཁྱོད་གཉིས་ཀྱིས་གནས་དེ་རུ་སྟ་གོན་བྱོས་ཤིག་ཅེས་གསུངས༌ཤིང༌།
LUK 22:13 ཐུགས་སྲས་གཉིས་པོ་སོང་སྟེ་ཁོང་གིས་གསུངས་པ་བཞིན་མཐོང་ཞིང་གནས་དེ་རུ་པེ་སག་གི་གསོལ་སྟོན་བཤམས༌སོ།།
LUK 22:14 དུས་དེ་ལ་སླེབས༌པའི་ཚེ། སྐྱབས་མགོན་ཡེ་ཤུ་དང་སྐུ་ཚབ་པ་རྣམས་མཉམ་དུ་གནས་དེར་གྲལ་ལ་བཞུགས༌ཤིང༌།
LUK 22:15 ཁོང་གིས་འདི་སྐད༌དུ། ངས་སྡུག་བསྔལ་མ་མྱང་བའི་སྔོན་ལ་ཁྱོད་ཅག་དང་ལྷན་དུ་པེ་སག་གི་གསོལ་སྟོན་འདི་ལོངས་སུ་སྤྱོད་འདོད་ཤིན་ཏུ༌ཆེ།
LUK 22:16 བདག་གིས་ཁྱོད་རྣམས་ལ་སྨྲ་བར་བྱ༌སྟེ། དཀོན་མཆོག་གི་རྒྱལ་སྲིད་ནས་པེ་སག་གི་གསོལ་སྟོན་གྱི་དོན་དེ་འགྲུབ་རག་བར་དུ་ངས་གསོལ་སྟོན་འདི་ལོངས་སུ་མི་སྤྱོད་ཅེས་གསུངས་སོ།།
LUK 22:17 ཁོང་གིས་ཕོར་བ་ཕྱག་ཏུ་བསྣམས་ཏེ་བཀའ་དྲིན་ཞུས་རྗེས་འདི་སྐད༌དུ། ཁྱོད་རྣམས་ཀྱིས་ཕོར་བ་འདི་ལོངས་ལ་བགོས་ཏེ་ཐུངས༌ཤིག
LUK 22:18 བདག་གིས་ཁྱོད་རྣམས་ལ་སྨྲ་བར་བྱ༌སྟེ། ད་ནས་བཟུང་། དཀོན་མཆོག་གི་རྒྱལ་སྲིད་སླེབས་རག་བར༌དུ། ངས་རྒུན་འབྲུམ་གྱི་ཁུ་བ་འདི་འཐུང་བ་མིན་ཞེས་གསུངས༌ཤིང༌།
LUK 22:19 ཡང་ཁོང་གིས་ཕྱག་ཏུ་བག་ལེབ་བསྣམས་ཤིང་བཀའ་དྲིན་ཞུས་རྗེས་དུམ་བུར་བགོས་ནས་ཐུགས་སྲས་རྣམས་ལ་གནང་སྟེ་འདི་སྐད༌དུ། འདི་ནི་བདག་གི་ལུས་པོ་ཡིན་ཏེ་ཁྱོད་རྣམས་ཀྱི་ཆེད་དུ་སྦྱིན་པ༌ཡིན། ང་རང་རྗེས་སུ་དྲན་པའི་ཕྱིར་ཁྱོད་རྣམས་ཀྱིས་ཀྱང་འདི་ལྟར་བྱོས་ཤིག་ཅེས་གསུངས་སོ།།
LUK 22:20 ཡང་ཞལ་ཟས་བཞེས་ཚར་རྗེས་ཁོང་གིས་སྔར་བཞིན་ཕོར་བ་ཕྱག་ཏུ་བསྣམས་ཏེ་འདི་སྐད༌དུ། ཕོར་བ་འདི་ནི་བདག་གི་ཁྲག་གིས་བཞག་པའི་ཞལ་ཆད་གསར་པ་ཡིན་ཞིང་ཁྱོད་རྣམས་ཀྱི་དོན་དུ་བཞུར༌བ་ཡིན།
LUK 22:21 ལྟོས༌དང༌། བདག་ལ་ངོ་ལོག་བྱེད་མཁན་གྱི་ལག་པ་དེའང་ང་རང་དང་མཉམ་དུ་ཅོག་ཙེའི་སྟེང་དུ་མཆིས།
LUK 22:22 མིའི་བུ་ནི་སྔར་ཐག་གིས་བཅད་པ་བཞིན་གཤེགས་དགོས༌ཀྱང༌། མིའི་བུ་ལ་ངོ་ལོག་བྱེད་མཁན་དེར་ཆག་སྒོ་འབྱུང་བར་ངེས་ཞེས་གསུངས་སོ།།
LUK 22:23 ཐུགས་སྲས་རྣམས་ཀྱིས་ཕན་ཚུན་ལ་སུ་ཞིག་གིས་དོན་འདི་བྱེད་པར་འགྱུར་རམ་ཞེས་དྲིས༌སོ།།
LUK 22:24 དེ་ནས་ཐུགས་སྲས་རྣམས་ལས་སུ་ཞིག་མཆོག་ཏུ་གྱུར་པ་ཡིན་པར་རྩོད་གླེང་བྱུང་བ༌དང༌།
LUK 22:25 སྐྱབས་མགོན་ཡེ་ཤུས་འདི་སྐད༌དུ། ཕྱི་ཕྱོགས་ཀྱི་རྒྱལ་པོ་དག་གིས་མི་དེ་རྣམས་ལ་དབང་བྱེད༌དེ། དབང་སྒྱུར་མཁན་རྣམས་ལ་བཀའ་དྲིན་ཅན་ཟེར༌ཡང༌།
LUK 22:26 ཁྱོད་རྣམས་ཀྱིས་དེ་ལྟར་བྱ་མི་རུང༌སྟེ། ཁྱོད་རྣམས་ལས་སུ་ཞིག་ཆེ་ཤོས་ཡིན་པ་དེ་ལོ་ན་ཆུང་ཤོས་དང་འདྲ༌ཞིང༌། སུ་ཞིག་འགོ་དཔོན་ཡིན་པ་དེ་ཞབས་ཕྱི་བྱེད་མཁན་དང་འདྲ་བར་གྱུར༌ཅིག
LUK 22:27 གསོལ་བ་བཞེས་མཁན་དང་ཞབས་ཕྱི་བྱེད་མཁན་གཉིས་ལས་གང་ཞིག༌ཆེའམ། དོན་དམ་དུ་གསོལ་བ་བཞེས་མཁན་དེ་ཆེ་བ་མ་ཡིན༌ནམ། འོན༌ཀྱང༌། ང་རང་ནི་ཁྱོད་རྣམས་ཀྱི་ཁྲོད་དུ་ཞབས་ཕྱི་བྱེད་མཁན་ཞིག་དང༌འདྲ་བ་ཡིན།
LUK 22:28 བདག་ལ་དཀའ་སྡུག་བྱུང་བའི་དུས༌སུ། ཁྱོད་རྣམས་རྒྱུན་དུ་བདག་དང་ལྷན་དུ་བསྡད༌པས།
LUK 22:29 བདག་གི་ཡབ་ཀྱིས་ང་ལ་རྒྱལ་སྲིད་སྤྲད་པ་ལྟར་བདག་གིས་ཀྱང་ཁྱོད་རྣམས་ལ་སྤྲོད་པར་བྱེད༌དེ།
LUK 22:30 ཁྱོད་རྣམས་ཀྱིས་བདག་གི་རྒྱལ་སྲིད་དུ་ངའི་མདུན་ཅོག་སྟེང་ནས་བཟའ་བཏུང་སྤྱོད༌ཅིང༌། བཞུགས་ཁྲིར་བསྡད་ནས་ཡེས་ར་ཨེལ་རིགས་ཀྱི་ཚོ་ཁག་བཅུ་གཉིས་ལ་ལེགས་ཉེས་ཀྱི་ཁྲིམས་ཐག་གཅོད་པར་འགྱུར་རོ༎
LUK 22:31 སི་མོན། སི་མོན་ཁྱོད་ཀྱིས་ལྟོས༌དང༌། བདུད་སཱ་ཏན་གྱིས་ཁྱོད་རྣམས་གྲོ་འཚག་པ་ལྟར་བྱེད་ཆེད་ཁྱོད་ཅག་འཐོབ་འདོད་ནའང༌།
LUK 22:32 བདག་གིས་ཁྱོད་ཀྱི་དད་པ་མི་ཉམས་པའི་ཕྱིར་དཀོན་མཆོག་ལ་གསོལ་བ་བཏབ༌ཅིང་། ཡང་ཁྱོད་ཀྱིས་སེམས་བསྒྱུར་བའི་རྗེས་སུ་རང་གི་སྤུན་རྣམས་ཀྱི་དད་སེམས་བརྟན་པར་གྱིས་ཞེས་གསུངས་པ༌དང༌།
LUK 22:33 པེ་ཏྲོ་ན༌རེ། གཙོ་བོ༌ལགས། བདག་ནི་ཁྱེད་དང་ལྷན་དུ་བཙོན་དུ་འགྲོ་བ་དང་འཆི་བ་ཉམས་སུ་མྱང་དགོས་ཀྱང་འགྱོད་པ་མེད་ཅེས་ཞུས་སོ།།
LUK 22:34 ཡང་ཁོང་གིས་འདི་སྐད༌དུ། པེ༌ཏྲོ། ངས་ཁྱོད་ལ་སྨྲ་བར་བྱ༌སྟེ། དེ་རིང་བྱ་ཕོ་མ་གྲགས་པའི་སྔོན་དུ། ཁྱོད་ཀྱིས་ང་རང་ངོ་མི་ཤེས་ཞེས་ཐེངས་གསུམ་ལ་སྨྲ་བར་ངེས་ཞེས་གསུངས༌སོ།།
LUK 22:35 ཡང་ཁོང་གིས་ཐུགས་སྲས་རྣམས་ལ་འདི་སྐད༌དུ། དེ་སྔོན་བདག་གིས་ཁྱོད་རྣམས་དངུལ་ཁུག་དང་ཁུག༌མ། བསིལ་ལྷམ་བཅས་མེད་པར་ཕྱི་རུ་མངགས༌དུས། མི་འདང་ས་ཅི་ཡོད་དམ་ཞེས་དྲིས་པ༌ན། ཐུགས་སྲས་རྣམས་ཀྱིས་ཅི་ཡང་མེད་ཅེས་ཞུས་སོ།།
LUK 22:36 ཡང་ཁོང་གིས་འདི་སྐད༌དུ། འོན་ཀྱང་ད་ལྟ་དངུལ་ཁུག་དང་ཁུག་མ་སོགས་ཡོད་ན་ཁྱེར༌དང༌། རལ་གྲི་མེད་པ་རྣམས་ཀྱིས་རང་གི་གྱོན་པ་བཙོངས་ཏེ་རལ་གྲི་ཉོས༌ཤིག
LUK 22:37 བདག་གིས་ཁྱོད་རྣམས་ལ་སྨྲ་བར༌བྱ་སྟེ། གསུང་རབ་ཀྱི་མདོ་ལས་ཁོང་ནི་ཉེས་ཅན་གྱི་གྲས་སུ་བརྩིས་པ་ཡིན་ཞེས་གསུངས་པ་འདི་ནི་བདག་གི་སྟེང་དུ་འགྲུབ་དགོས༌ཤིང༌། བདག་གི་སྐོར་ལ་བཀོད་ཡོད་པ་དེའང་འགྲུབ་པར་ངེས་ཞེས་གསུངས་ལ།
LUK 22:38 ཐུགས་སྲས་རྣམས་ན༌རེ། གཙོ་བོ༌ལགས། ཁྱེད་ཀྱིས་གཟིགས༌དང༌། འདིར་རལ་གྲི་གཉིས་ཡོད་ཅེས་ཞུས་པ་ལ། ཁོང་གིས་དེ་སྐྱུར་ཅིག་ཅེས་གསུངས༌སོ།།
LUK 22:39 སྐྱབས་མགོན་ཡེ་ཤུ་སྔར་བཞིན་ཕྱི་རོལ་ཏུ་བྱོན་ནས་སྐྱུ་རུ་རའི་རི་བོར་ཕེབས་ཤིང་ཐུགས་སྲས་རྣམས་ཀྱང་རྗེས་སུ་འབྲངས་པ་རེད།
LUK 22:40 གནས་དེར་སླེབས་པ་དང་ཁོང་གིས་ཐུགས་སྲས་རྣམས་ལ་འདི་སྐད༌དུ། ཁྱོད་རྣམས་ཉམས་ཚོད་ཀྱི་འོག་ཏུ་མི་ཚུད་པའི་ཕྱིར་གསོལ་བ་ཐོབས་ཞེས་གསུངས༌ཤིང༌།
LUK 22:41 ལག་རྡོ་འཕེན་ཐེངས་ཤིག་གི་རིང་ཚད་ཀྱི་གནས་ལ་ཕེབས༌ཏེ། པུས་མོ་སར་བཙུགས༌ནས།
LUK 22:42 ཀྱེ། བདག་གི་ཡབ་ལགས། ཁྱེད་ཐུགས་དགྱེས་ན་བདག་ལས་ཕོར་བ་འདི་ཕྱིར་ལེན་པར༌མཛོད། འོན་ཀྱང་བདག་གི་བསམ་དོན་བཞིན་དུ་མི་འགྲུབ་པར་ཁྱེད་ཀྱི་དགོངས་པ་བཞིན་དུ་གྲུབ་གྱུར་ཅིག་ཅེས་གསོལ་བ་བཏབ།
LUK 22:43 ནམ་མཁའི་ཞིང་ཁམས་ལས་ཕོ་ཉ་ཞིག་ཁོང་གི་དྲུང་དུ་སླེབས་ཏེ་ཁོང་ལ་མཐུ་སྟོབས་བསྩལ༌ཏོ།།
LUK 22:44 ཡང་ཁོང་གི་ཐུགས་ཤིན་ཏུ་སྐྱོ་བར་གྱུར་ཏེ་གསོལ་བ་ཤུགས་དྲག་ཏུ་བཏབ་ཅིང་། ཁོང་གི་སྐུ་ལས་བཞུར་བའི་རྔུལ་ཆུ་ཁྲག་ཐིགས་བཞིན་ས་ལ་ཟགས་སོ།།
LUK 22:45 ཁོང་གིས་གསོལ་བ་བཏབ་པའི་རྗེས་སུ་ཡར་བཞེངས་ཏེ་ཐུགས་སྲས་རྣམས་ཀྱི་གམ་དུ་ཕེབས་པ༌ན། དེ་རྣམས་སེམས་སྡུག་ཆེན་པོའི་དབང་གིས་གཉིད་དུ་ཡུར་བ་གཟིགས༌ཏེ།
LUK 22:46 འདི་སྐད༌དུ། ཁྱོད་རྣམས་ཅིའི་ཕྱིར་གཉིད་དུ་ཡུར་བ་ཡིན༌ནམ། ཁྱོད་རྣམས་ཉམས་ཚོད་ཀྱི་འོག་ཏུ་མི་ཚུད་པའི་ཕྱིར་ཡར་ལོངས་ལ་གསོལ་བ་ཐོབས་ཤིག་ཅེས་གསུངས༌སོ།།
LUK 22:47 སྐྱབས་མགོན་ཡེ་ཤུས་དེ་ལྟར་གསུང་བཞིན་པའི་སྒང་ལ། ལྟོས་དང་། མི་སྐོར་ཞིག་གནས་དེར་སླེབས་པ་དང་ཁོང་གི་ཐུགས་སྲས་བཅུ་གཉིས་ལས་ཡུ་དཱ་ཟེར་བ་དེ་སྔོན་དུ་འགྲོ་བ༌དང༌། སྐྱབས་མགོན་ཡེ་ཤུ་ལ་འོ་བྱེད་པའི་ཕྱིར་ཁོང་གི་དྲུང་དུ་བཅར།
LUK 22:48 འོན༌ཀྱང༌། སྐྱབས་མགོན་ཡེ་ཤུས་འདི་སྐད༌དུ། ཡུ༌དཱ། ཁྱོད་ཀྱིས་བདག་ལ་འོ་བྱས་ནས་མིའི་བུ་ལ་ངོ་ལོག་བྱེད་དམ་ཞེས་གསུངས་སོ།།
LUK 22:49 ཐུགས་སྲས་རྣམས་ཀྱིས་ཅི་ཞིག་འབྱུང་རྒྱུ་ཡིན་པ་མཐོང་སྟེ་ན༌རེ། གཙོ་བོ༌ལགས། རལ་གྲིས་རྒྱག་རུང་ངམ་ཞེས་ཞུས་སོ།།
LUK 22:50 ཐུགས་སྲས་རྣམས་ལས་གཅིག་གིས་མཆོད་དཔོན་ཆེན་པོའི་གཡོག་པོར་རལ་གྲིས་བརྒྱབ་ནས་རྣ་བ་གཡས་པ་བཅད༌པ་དང་།
LUK 22:51 སྐྱབས་མགོན་ཡེ་ཤུས་ཐུགས་སྲས་དེ་ལ་དེ་ལྟར་མ་བྱེད་སྐྱུར་ཞོག་ཅེས་གསུངས་ཤིང་མི་དེའི་རྣ་བར་རེག་སྟེ་སོས་པར་མཛད་དོ།།
LUK 22:52 ཡང་ཁོང་གིས་རང་ཉིད་འཛིན་དུ་ཡོང་བའི་མཆོད་དཔོན་ཆེན་པོ་རྣམས་དང་མཆོད་ཁང་སྲུང་བའི་དམག༌དཔོན་དང་དཔོན་རིགས་རྒན་པོ་རྣམས་ལ་འདི་སྐད༌དུ། ཁྱོད་ཅག་གིས་རལ་གྲི་དང་དབྱུག་པ་བཟུང་ནས་ཇག་པ་འཛིན་པ་ལྟར་འདིར་ཡོང༌ངམ།
LUK 22:53 བདག་ནི་ཉིན་རེ་བཞིན་མཆོད་ཁང་ནང་དུ་ཁྱོད་ཅག་དང་མཉམ་དུ་སྡོད་སྐབས། ཁྱོད་ཅག་གིས་ང་རང་མ་བཟུང༌མོད། འོན་ཀྱང་ད་ལྟ་ནི་ཁྱོད་ཅག་གི་དུས་ལ་བབས་ཤིང་མུན་པས་དབང་བཟུང་བ་ཡིན་ཞེས་གསུངས༌སོ།།
LUK 22:54 སྐྱབས་མགོན་ཡེ་ཤུ་བཟུང་སྟེ་མཆོད་དཔོན་ཆེན་པོའི་ཁང་ཆེན་དུ་ཁྲིད་པ་དང་། པེ་ཏྲོའང་རྒྱང་རིང་ནས་ཁོང་གི་རྗེས་སུ་འབྲངས་ཤིང་།
LUK 22:55 དེ་རྣམས་ཀྱིས་ཁང་ཆེན་དེའི་ར་བའི་དཀྱིལ་ནས་མེ་སྦར་ཞིང་ལྷན་དུ་བསྡད་པ༌ན། པེ་ཏྲོ་ཡང་དེ་དག་དང་མཉམ་དུ་བསྡད་དོ།།
LUK 22:56 གཡོག་མོ་ཞིག་གིས་མེ་འོད་ལས་པེ་ཏྲོ་བསྡད་ཡོད་པ་མཐོང་ཞིང་ཞིབ་ཏུ་བལྟས༌ཏེ། ཁོ་ཡང་མི་དེ་དང་གྲས་གཅིག་རེད་ཅེས་སྨྲས་པ༌ལ།
LUK 22:57 པེ་ཏྲོ་ན༌རེ། བུད་མེད། ངས་མི་དེ་ངོ་མི་ཤེས་ཞེས་སྨྲས་སོ།།
LUK 22:58 ཅང་མ་འགོར་བར་མི་གཞན་ཞིག་གིས་ཀྱང་པེ་ཏྲོ་མཐོང༌སྟེ། ཁྱོད་རང་ཡང་དེ་རྣམས་དང་གྲས་གཅིག་ཡིན་ཞེས་སྨྲས་པ༌དང༌། པེ་ཏྲོ་ན༌རེ། ཀྱེ་ཧོ། ང་རང་གཏན་ནས་མིན་ཞེས་སྨྲས་སོ།།
LUK 22:59 ཡང་ཆུ་ཚོད་གཅིག་ཙམ་འགོར་རྗེས་མི་གཞན་ཞིག་གིས་ཀྱང་ཁོ་ནི་ག་ལིལ་པ་ཞིག་ཡིན་པས། དངོས་གནས་མི་དེ་དང་གྲས་གཅིག་རེད་ཅེས་ནན་གྱིས་སྨྲས༌ཀྱང༌།
LUK 22:60 པེ་ཏྲོ་ན༌རེ། ཀྱེ་ཧོ། ཁྱོད་ཀྱིས་ཅི་ཞིག་སྨྲ་བ་ངས་མི་ཤེས་ཞེས་སྨྲ་བཞིན་པའི་དུས་སུ་བྱ་ཕོ་གྲགས༌པ་རེད།
LUK 22:61 དུས༌དེར། གཙོ་བོས་ཞལ་ཕྱིར་འཁོར་ནས་པེ་ཏྲོར་གཟིགས་པ༌ན། པེ་ཏྲོས་དེ་མ་ཐག་གཙོ་བོས་དེ་སྔར་ཁོ་ལ་དེ་རིང་ཞོགས་པར་བྱ་ཕོ་མ་གྲགས་པའི་སྔོན༌དུ། ཁྱོད་ཀྱིས་ང་རང་ཐེངས་གསུམ་ལ་ཁས་མི་ལེན་ཞེས་པའི་གསུང་དེ་དྲན༌ཞིང་།
LUK 22:62 ཕྱི་རོལ་ཏུ་སོང་ནས་དྲག་ཏུ་ངུས༌སོ།།
LUK 22:63 སྐྱབས་མགོན་ཡེ་ཤུ་འཛིན་མཁན་རྣམས་ཀྱིས་ཁོང་ལ་འཕྱ་སྨོད་དང་གཅར་རྡུང་བྱེད༌བཞིན།
LUK 22:64 ཁོང་གི་སྤྱན་ཟུང་རས་ཀྱིས་བཏུམས་ཏེ་ན༌རེ། ཁྱོད་ཀྱིས་ལུང་བསྟན་ཤོད་ཅིག ཁྱོད་ལ་རྡུང་རྡེག་བྱེད་མཁན་སུ་ཡིན་ནམ་ཞེས་སྨྲས་སོ།།
LUK 22:65 དེ་རྣམས་ཀྱིས་གཏམ་ངན་གཞན་མང་པོའང་སྨྲས་ཤིང་ཁོང་ལ་དམའ་འབེབས་བྱས༌སོ།།
LUK 22:66 ནམ་ལངས་མ་ཐག་མཆོད་དཔོན་ཆེན་པོ་རྣམས་དང་། མཁན་པོའི་རིགས་སུ་གཏོགས་པའི་དཔོན་རིགས་ཚོགས་པའི་ཚོགས་མི་རྣམས་མཉམ་དུ་འཛོམས་པ་དང་སྐྱབས་མགོན་ཡེ་ཤུ་དེ་རྣམས་ཀྱི་མདུན་དུ་ཁྲིད༌དེ།
LUK 22:67 ཁྱོད་ནི་སྐྱབས་མགོན་མཱ་ཤི་ཀ་ཡིན་ན་ངེད་ཅག་ལ་སྨྲོས་ཤིག་ཅེས་སྨྲས་པ༌ལ། ཁོང་གིས་འདི་སྐད༌དུ། གལ་ཏེ་བདག་གིས་ཁྱོད་ཅག་ལ་སྨྲས་ཀྱང་ཁྱོད་རྣམས་ཡིད་མི་ཆེས༌ལ།
LUK 22:68 ཡང་བདག་གིས་ཁྱོད་ཅག་ལ་དྲི་བ་བཏོན་ནའང་ཁྱོད་ཅག་གིས་ལན་འདེབས་མི་སྲིད།
LUK 22:69 ཕྱིན་ཆད་མིའི་བུ་ཁོང་ཉིད་ཀུན་དབང་དཀོན་མཆོག་གི་གཡས་ཕྱོགས་སུ་སྡོད་པར་འགྱུར་ཞེས་གསུངས་པ༌དང༌།
LUK 22:70 དེ་རྣམས་ན༌རེ། འོ་ན་ཁྱོད་ནི་དཀོན་མཆོག་གི་སྲས་ཡིན་ནམ་ཞེས་དྲིས་པ༌ལ། ཁོང་གིས་འདི་སྐད༌དུ། ཁྱོད་ཅག་གིས་སྨྲས་པ་བཞིན་ང་རང་ཡིན་ཞེས་གསུངས།
LUK 22:71 ཁོ་རྣམས་ན༌རེ། བདག་ཅག་གིས་ཁོའི་ཁ་ནས་གཏམ་དངོས་སུ་ཐོས་པས་དཔང་པོ་གཞན་དག་དགོས་དོན་མེད་ཅེས་སྨྲས༌སོ།།
LUK 23:1 དེ་ནས་ཚོགས་མི་ཐམས་ཅད་ཡར་ལངས་པ་དང་སྐྱབས་མགོན་ཡེ་ཤུ་པི་ལ་ཏུའི་མདུན་ལ་ཁྲིད་དེ་ན༌རེ།
LUK 23:2 མི་འདིས་འབངས་མི་རྣམས་ལ་སླུ་བྲིད་བྱས་ནས་སེ་བཟིར་ལ་ཁྲལ་འཇལ་མི་དགོས་པ༌དང༌། ཁོས་རང་ཉིད་མཱ་ཤི་ཀ་སྟེ་རྒྱལ་པོ་ཡིན་ཞེས་ཟེར་བ་ངེད་ཅག་གིས་ཐོས་ཞེས་བསྙོན་བཙུགས་པ་རེད།
LUK 23:3 པི་ལ་ཏུ་ན༌རེ། ཁྱོད་ནི་ཡ་ཧུ་དཱ་པའི་རྒྱལ་པོ་ཡིན་ནམ་ཞེས་དྲིས་པ༌ན། སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་སྨྲས་པ་བཞིན་ཡིན་ཞེས་གསུངས།
LUK 23:4 ཡང་པི་ལ་ཏུས་མཆོད་དཔོན་ཆེན་པོ་དག་དང་མི་རྣམས༌ལ། ངས་མི་འདིར་ཉེས་སྐྱོན་ཅི་ཡང་མི་རྙེད་ཅེས་སྨྲས་མོད།
LUK 23:5 འོན༌ཀྱང༌། དེ་རྣམས་ཀྱིས་ཨུ་ཚུགས་ཆེན༌པོས། མི་འདི་ཡ་ཧུ་དཱའི་ཡུལ་ཀུན་ཏུ་བརྒྱུད་ཅིང་ཁོས་ག་ལིལ་ཡུལ་ནས་ས་ཆ་འདིའི་བར་དུ་ཆོས་གསུངས༌པ་དང༌། མི་ཐམས་ཅད་ལ་ངན་སྐུལ་བྱས་ནས་ཟིང་ཆ་བཟོས་ཞེས་སྨྲས་སོ།།
LUK 23:6 པི་ལ་ཏུས་གཏམ་དེ་ཐོས་ནས་མི་འདི་ནི་ག་ལིལ་པ་ཡིན་ནམ་ཞེས་དྲིས༌ཤིང༌།
LUK 23:7 སྐྱབས་མགོན་ཡེ་ཤུ་ནི་ཧེ་རོ་དཱའི་མངའ་ཁོངས་ལ་གཏོགས་པ་ཤེས་རྗེས་ཧེ་རོ་དཱའི་དྲུང་ལ་ཁྲིད་དུ་བཅུག དེའི་དུས༌སུ། ཧེ་རོ་དཱའང་ཡེ་རུ་སཱ་ལེམ་དུ་བཞུགས༌སོ།།
LUK 23:8 ཧེ་རོ་དཱས་སྐྱབས་མགོན་ཡེ་ཤུ་མཐོང་བ་དང་ཤིན་ཏུ་དགའ་བར་གྱུར་ཏོ།། རྒྱུ་མཚན་ནི་ཁོས་སྔར་ནས་སྐྱབས་མགོན་ཡེ་ཤུའི་གནས་ཚུལ་ཐོས་མྱོང༌བས། སྔ་མོ་ནས་ཁོང་ཉིད་མཐོང་འདོད་ཅིང་ཁོང་གིས་ངོ་མཚར་བའི་རྟགས་ཤིག་སྟོན་པ་མཐོང་བར་ཡང་རེ་བ༌ཆེའོ།།
LUK 23:9 དེ་བས་ཁོས་དྲི་བ་མང་པོ་བཏོན་ནའང་ཁོང་གིས་བཀའ་ལན་ཅི་ཡང་མ་གནང༌།
LUK 23:10 མཆོད་དཔོན་ཆེན་པོ་དག་དང་མཁན་པོ་རྣམས་ཡར་ལངས་བསྡད་ནས་ཁོང་གཏུག་ཅི་ཐུབ་བྱས༌ཤིང༌།
LUK 23:11 ཧེ་རོ་དཱ་དང་ཁོའི་དམག་མི་དག་གིས་ཀྱང་ཁོང་ལ་བརྙས་བཅོས་དང་འཕྱ་དམོད་བྱས་པ༌དང༌། ཁོང་གི་ལུས་ལ་གོས་ཆེན་བསྐོན་ཏེ་ཕྱིར་པི་ལ་ཏུའི་གམ་ལ་འཁྲིད་དུ་བཅུག
LUK 23:12 ལར་པི་ལ་ཏུ་དང་ཧེ་རོ་དཱ་གཉིས་ཕན་ཚུན་དགྲ་ཟླར་གྱུར་ཡོད་ནའང་ཉིན་དེ་ནས་བཟུང་ཁོ་གཉིས་གྲོགས་སུ་གྱུར༌ཏོ།།
LUK 23:13 པི་ལ་ཏུས་མཆོད་དཔོན་ཆེན་པོ་རྣམས་དང་དཔོན༌རིགས། མི་ཚོགས་བཅས་བསྡུས་ཏེ་ན༌རེ།
LUK 23:14 ཁྱོད་རྣམས་ཀྱིས་མི་འདིས་མི་དག་ལ་ངན་སྐུལ་བྱས་ནས་ཟིང་ཆ་བཟོས་སོང་ཟེར་ཞིང་ངའི་མདུན་དུ་ཁྲིད་ཡོང༌བས། ངས་ཀྱང་ཁྱོད་ཅག་གི་མདུན་དུ་ཁོའི་ཉེས་སྐྱོན་ལ་རྩད་བཅད་ནའང་ཁྱོད་རྣམས་ཀྱིས་སྨྲས་པ་ལྟ་བུའི་ཉེས་སྐྱོན་ཅི་ཡང་མ་རྙེད།
LUK 23:15 ཧེ་རོ་དཱས་ཀྱང་ཉེས་སྐྱོན་མ་རྙེད་པར་ཕྱིར་བདག་གི་གམ་དུ་བཏང༌བ་རེད། ལྟོས༌དང༌། ཁོས་སྲོག་ཆད་ཁུར་དགོས་པའི་ཉེས་པ་ཅི་ཡང་བྱས་མེད།
LUK 23:16 དེའི་ཕྱིར་བདག་གིས་ཁོ་ལ་རྟ་ལྕག་གིས་གཞུས་རྗེས་ཕྱིར་གཏོང་རྒྱུ་ཡིན་ཞེས་སྨྲས་སོ།།
LUK 23:17 སྐྱུར་མེད་བག་ལེབ་ཀྱི་དུས་ཆེན་ལ་ཁེལ༌ཚེ། པི་ལ་ཏུ་ཡིས་ཁོ་རྣམས་ཀྱི་རེ་ཞུ་ལྟར་བཙོན་པ་ཞིག་བཙོན་གྲོལ་དུ་གཏོང་དགོས་པ་རེད།
LUK 23:18 འོན་ཀྱང་མི་ཚོགས་ཀྱིས་མཉམ་དུ་པཱ་རབ་པཱ་ངེད་ཅག་ལ་སྤྲོད་དང་མི་དེ་སོད་ཅིག་ཅེས་འབོད་སྒྲ་བསྒྲགས།
LUK 23:19 པཱ་རབ་པཱ་ནི་གྲོང་ཁྱེར་གྱི་ཟིང་འཁྲུག་ལ་ཞུགས་པ་དང་མི་ཡང་བསད་མྱོང་བས་བཙོན་དུ་བཅུག་པ་ཞིག་ཡིན༌ནོ།།
LUK 23:20 པི་ལ་ཏུས་སྐྱབས་མགོན་ཡེ་ཤུ་ཕྱིར་གཏོང་འདོད་དེ་སླར་ཡང་མི་ཚོགས་ལ་གཏམ་སྨྲས༌ཀྱང༌།
LUK 23:21 དེ་རྣམས་ཀྱིས་སྐད་ཆེན༌པོས། ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་ཡང་ཡང་འུར་བརྒྱབ་བོ།།
LUK 23:22 ཐེངས་གསུམ་པར་ཡང་པི་ལ་ཏུ་ན༌རེ། རྒྱུ་མཚན་ཅི་ཡིན༌ནམ། མི་འདིས་དོན་ངན་ཅི་བྱས་པ་ཡིན༌ནམ། བདག་གིས་ཁོ་གསོད་དགོས་པའི་ཉེས་སྐྱོན་ཅི་ཡང་མ་རྙེད༌པས། ཁོ་ལ་རྟ་ལྕག་གིས་གཞུས་རྗེས་ཕྱིར་གཏོང་ངེས་ཡིན་ཞེས་སྨྲས་སོ།།
LUK 23:23 འོན་ཀྱང་དེ་རྣམས་ཀྱིས་འུར་ཆེན་པོས་ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་པི་ལ་ཏུ་ལ་ནན་གྱིས་བརྗོད༌ཅིང༌། དེ་རྣམས་ཀྱིས་འུར་ཆེན་པོ་བརྒྱབ་པས་ཁོ་རྣམས་ཀྱི་འདོད་མོས་དང་མཐུན་པར་གྱུར།
LUK 23:24 པི་ལ་ཏུས་མི་དེ་རྣམས་ཀྱི་རེ་ཞུ་ལྟར་ཁྲིམས་ཐག་བཅད༌དེ།
LUK 23:25 ཟིང་འཁྲུག་ལ་ཞུགས་པ་དང་མི་ཡང་བསད་མྱོང་བའི་བཙོན་པ་དེ་ཕྱིར་བཏང༌ཞིང༌། སྐྱབས་མགོན་ཡེ་ཤུ་མི་དེ་རྣམས་ལ་འདོད་མོས་ལྟར་བྱེད་དུ་བཅུག་གོ།
LUK 23:26 སྐྱབས་མགོན་ཡེ་ཤུ་ཕར་ཁྲིད་ནས་འགྲོ་སྐབས། ཀི་རེ་ནེ་པ་སྟེ་མིང་ལ་སི་མོན་ཟེར་བ་ཞིག་ཡོད་པ་དེ་གྲོང་གསེབ་ནས་ཡོང་བ༌ན། དེ་རྣམས་ཀྱིས་ཁོ་ལ་ཤིང་རྒྱ་གྲམ་ཁུར་ནས་སྐྱབས་མགོན་ཡེ་ཤུའི་རྗེས་སུ་འབྲང་དུ་བཅུག
LUK 23:27 མི་ཤིན་ཏུ་མང་པོ་ཞིག་ཀྱང་ཁོང་གི་རྗེས་སུ་འབྲངས་ཤིང་། དེ་རྣམས་ལས་བུད་མེད་འགའ་ཡོད་པ་ཁོང་གི་ཆེད་དུ་སེམས་སྡུག་ཆེན་པོས་ངུས་སོ།།
LUK 23:28 འོན་ཀྱང་སྐྱབས་མགོན་ཡེ་ཤུས་ཞལ་ཕྱིར་འཁོར་ནས་དེ་རྣམས་ལ་འདི་སྐད༌དུ། ཡེ་རུ་སཱ་ལེམ་གྱི་བུ་མོ༌རྣམས། བདག་གི་དོན་དུ་མི་ངུ་བར་ཁྱོད་རང་ཉིད་དང་ཁྱོད་ཀྱི་བུ་ཕྲུག་རྣམས་ཀྱི་དོན་དུ་ངུས༌ཤིག
LUK 23:29 རྒྱུ་མཚན་ནི་མི་རྣམས་ཀྱིས། ཕྲུ་གུ་སྐྱེ་མི་ནུས་པ་དང་མངལ་ཡང་སྦྲུམ་མ་མྱོང༌བ། ཕྲུ་གུར་ནུ་མའང་སྣུན་མ་མྱོང་མཁན་རྣམས་བདེའོ་ཞེས་ཟེར་བའི་དུས་ཤིག་སླེབ་ངེས༌ཡིན།
LUK 23:30 དེའི་དུས༌སུ། ཡང་མི་རྣམས་ཀྱིས་རི་ཆེན་པོ་དག་ལ་ན་རེ། ངེད་ཅག་གི་སྟེང་དུ་སྙིལ་ཅིག་ཅེས༌དང༌། ཡང་རི་སྒང་ཆུང་བ་དག་ལ་ངེད་ཅག་གི་ལུས་འདི་ཁོབ་ཅིག་ཅེས་ཟེར་བར་འགྱུར།
LUK 23:31 རྒྱུ་མཚན་ནི་ཁོ་རྣམས་ཀྱིས་སྡོང་པོ་སྔོན་པོ་ཡིན་དུས་འདི་ལྟར་བྱེད༌ན། རྗེས་སུ་སྡོང་སྐམ་ཡིན་དུས་ཅི་ཞིག་བྱེད་པར་འགྱུར་རམ་ཞེས་གསུངས༌སོ།།
LUK 23:32 ཡང་མི་ཉེས་ཅན་གཞན་གཉིས་ཀྱང་སྐྱབས་མགོན་ཡེ་ཤུ་དང་མཉམ་དུ་གསོད་པར་ཁྲིད༌ཅིང༌།
LUK 23:33 མགོ་སྐོགས་གནས་ཟེར་བའི་ས་ཆར་སླེབས་པ༌དང༌། སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་པ་དང་། མི་ཉེས་ཅན་དེ་གཉིས་ཀའང་ཁོང་གི་གཡས་གཡོན་དུ་དེ་ལྟར་ཤིང་རྒྱ་གྲམ་གྱི་སྟེང་དུ་བརྡབས་སོ།།
LUK 23:34 དུས༌དེར། སྐྱབས་མགོན་ཡེ་ཤུས་འདི་སྐད༌དུ། ཀྱེ། ཡབ་ལགས། ཁོ་རྣམས་ཀྱིས་རང་གིས་ཅི་བྱེད་བཞིན་པའང་མི་ཤེས་པས་ཉེས་སྐྱོན་བསལ་བར་མཛོད་ཅེས་གསུངས་སོ༎ དེ་ནས་དམག་མི་རྣམས་ཀྱིས་རྒྱན་འཕངས་ནས་ཁོང་གི་ན་བཟའ་བགོ་བཤའ་བརྒྱབ།
LUK 23:35 མི་རྣམས་ཀྱང་གནས་དེར་འགྲེངས་ནས་ལྟ་བཞིན་འདུག༌ལ། འགོ་དཔོན་རྣམས་ཀྱང་ན༌རེ། ཁོས་མི་གཞན་རྣམས་བསྐྱབས་མྱོང༌མོད། འོན་ཀྱང་ཁོ་ནི་དཀོན་མཆོག་གིས་བདམས་པའི་སྐྱབས་མགོན་མཱ་ཤི་ཀ་ཡིན༌ན། རང་ཉིད་སྐྱོབ་ཐུབ་པ་ལོས་ཡིན་ཞེས་འཕྱ་སྨོད་བྱས་པ༌དང༌།
LUK 23:36 དམག་མི་རྣམས་ཀྱང་ཁོང་གི་དྲུང་དུ་ཡོང་ནས་རྒུན་ཆང་སྐྱུར་མོ་ཕུལ་ཏེ་ན༌རེ།
LUK 23:37 གལ་ཏེ་ཁྱོད་རང་ཡ་ཧུ་དཱ་པའི་རྒྱལ་པོ་ཡིན༌ན། ཁྱོད་ཀྱིས་རང་ཉིད་སྐྱོབས་དང་ཞེས་འཕྱ་དམོད་བྱས།
LUK 23:38 སྐྱབས་མགོན་ཡེ་ཤུའི་གོང་དུ་ཤིང་བྱང་ཞིག་གི་ངོས་སུ་འདི་ནི་ཡ་ཧུ་དཱ་པའི་རྒྱལ་པོ་ཡིན་ཞེས་བྲིས་ཡོད༌དོ།།
LUK 23:39 ཤིང་རྒྱ་གྲམ་གྱི་སྟེང་དུ་བརྐྱངས་པའི་མི་ཉེས་ཅན་གཉིས་ལས་གཅིག་ན༌རེ། ཁྱོད་རང་སྐྱབས་མགོན་མཱ་ཤི་ཀ་མ་ཡིན༌ནམ། ཁྱོད་ཀྱིས་རང་ཉིད་དང་ངེད་གཉིས་སྐྱོབས་ཤིག་ཅེས་སྨྲས་ཏེ་འཕྱ་དམོད་བྱས་སོ།།
LUK 23:40 འོན་ཀྱང་ཉེས་ཅན་ཅིག་ཤོས་ཀྱིས་ཉེས་ཅན་དེ་ལ་སྡིགས་མོ་བྱེད་བཞིན་ན༌རེ། ཁྱོད་ལའང་ཉེས་ཆད་དེ་འདྲ་བཅད་པ་ཡིན་པས་ད་དུང་དཀོན་མཆོག་ལ་མི་འཇིགས༌སམ།
LUK 23:41 འུ་གཉིས་ལ་ཆད་པ་འཕོག་འོས༌ཏེ། འུ་གཉིས་ཀྱིས་ཆད་པ་མྱོང་བ་ནི་ཅི་བྱས་དོན་དང་མཐུན༌པ་ཡིན། འོན་ཀྱང་མི་འདིས་ཉེས་སྐྱོན་ཅི་ཡང་མ་བྱས་ཞེས་སྨྲས་པ༌དང༌།
LUK 23:42 ཡང་ཁོས་སྐྱབས་མགོན་ཡེ་ཤུ་ལ། ཡེ་ཤུ༌ལགས། ཁྱེད་རང་རྒྱལ་སྲིད་ཀྱི་ནང་དུ་ཕེབས་ཡོང་བའི་དུས༌སུ། ང་རང་ཡང་ཐུགས་ལ་འཛིན་པར་མཁྱེན་ཞེས་ཞུས་སོ།།
LUK 23:43 ཁོང་གིས་ཉེས་ཅན་དེ་ལ་འདི་སྐད༌དུ། བདག་གིས་ཁྱོད་ལ་བདེན་པར་སྨྲ༌སྟེ། དེ་རིང་ཁྱོད་ནི་བདག་དང་མཉམ་དུ་ནམ་མཁའི་ཞིང་ཁམས་ཀྱི་དགའ་བདེའི་ལྡུམ་རའི་ནང་དུ་ཡོད་པར་འགྱུར་ཞེས་གསུངས༌སོ།།
LUK 23:44 ཉིན་གུང་གི་སྐབས༌སུ། ཡུལ་དེ་ཡོངས་སུ་ཕྱི་དྲོའི་ཆུ་ཚོད་གསུམ་པའི་བར་དུ་མུན་ནག་འཐིབས་ཤིང་།
LUK 23:45 ཉི་མའི་འོད་ཀྱང་བསྒྲིབས་པ༌དང༌། མཆོད་ཁང་གི་ཡོལ་བ་ཆེན་པོ་དེའང་དུམ་བུ་གཉིས་སུ་རལ་བར་གྱུར་ཏོ།།
LUK 23:46 སྐྱབས་མགོན་ཡེ་ཤུས་གསུང་སྐད་ཆེན༌པོས། ཀྱེ། ཡབ་ལགས། ངས་རང་གི་རྣམ་ཤེས་ཁྱེད་ཀྱི་ཕྱག་ཏུ་བཅོལ་བ་ཡིན་ཞེས་གསུངས་པ་དང་སྐུ་དབུགས་ཆད་པར་གྱུར་ཏོ།།
LUK 23:47 བརྒྱ་དཔོན་གྱིས་དོན་དེ་ཐམས་ཅད་མཐོང་ནས་དཀོན་མཆོག་ལ་བསྟོད་བསྔགས་བྱེད༌བཞིན། སྐྱེས་བུ་འདི་ནི་དངོས་གནས་མི་རྣམ་དག་ཅིག་ཡིན་ཞེས་སྨྲས་སོ།།
LUK 23:48 གནས་དེར་འཛོམས་པའི་ལྟ་མཁན་ཐམས་ཅད་ཀྱིས་ཀྱང་དོན་དེ་དག་མཐོང༌སྟེ། སེམས་སྐྱོ་བའི་ངང་ནས་ལག་པས་བྲང་ཁར་རྡུང་བཞིན་ཕྱིར་ལོག༌ཅིང༌།
LUK 23:49 ཁོང་ལ་རྒྱུས་མངའ་བའི་མི་ཐམས་ཅད་དང་། ག་ལིལ་ཡུལ་ནས་ཁོང་གི་རྗེས་སུ་འབྲངས་པའི་བུད་མེད་རྣམས་ཀྱང་རྒྱང་རིང་ནས་བསྡད་དེ་དོན་དེ་དག་ལ་ལྟ་བཞིན་འདུག༌གོ།
LUK 23:50 མིང་ལ་ཡོ་སེབ་ཟེར་བ་དེ་ནི་དཔོན་རིགས་ཚོགས་པའི་ཚོགས་མི་ཞིག་ཡིན༌ལ། ཁོ་ནི་རང་གཤིས་བཟང་ཞིང་གཞུང་རྒྱུད་དྲང་བ་ཞིག་ཀྱང་ཡིན༌པས།
LUK 23:51 དཔོན་རིགས་ཚོགས་པའི་གྲོས་གཞི་དང་བྱ་སྤྱོད་དག་ལ་ཡིད་མ་འཐད་དོ།། ཁོ་ནི་ཡ་ཧུ་དཱ་པའི་ཨ་རི་མ་ཐཱ་གྲོང་རྡལ་གྱི་མི་ཡིན་ཞིང་རྟག་ཏུ་དཀོན་མཆོག་གི་རྒྱལ་སྲིད་ལ་སྒུག་མཁན་ཡང་ཡིན།
LUK 23:52 ཁོ་རང་པི་ལ་ཏུའི་གམ་དུ་སོང་སྟེ་སྐྱབས་མགོན་ཡེ་ཤུའི་སྐུ་གདུང་གནང་ཕྱིར་ཞུ་བ་ཞུས༌ཤིང་།
LUK 23:53 ཁོས་སྐྱབས་མགོན་ཡེ་ཤུའི་སྐུ་གདུང་མར་བླངས་ཏེ་སོ་རས་ཀྱིས་དཀྲིས༌རྗེས། སྔར་བེམ་པོ་བཞག་མ་མྱོང་བའི་དུར་ཁུང་བརྐོས་མ་ཞིག་ཏུ་དུར་ལ་སྦས་སོ།།
LUK 23:54 ཉིན་དེ་ནི་སྟ་གོན་གྱི་ཉིན་མོ་ཡིན་ཞིང་ངལ་གསོ་བའི་ཉིན་མོ་ཡང་སླེབས་ལ༌ཉེའོ།།
LUK 23:55 སྐྱབས་མགོན་ཡེ་ཤུ་དང་ལྷན་དུ་ག་ལིལ་ཡུལ་ནས་ཡོང་བའི་བུད་མེད་རྣམས་ཀྱང་ཡོ་སེབ་ཀྱི་རྗེས་སུ་འབྲངས༌ཤིང༌། དུར་ཁུང་དེ་དང་ཁོང་གི་སྐུ་གདུང་ཇི་ལྟར་དུར་ལ་སྦས་པ་མཐོང༌བ་རེད།
LUK 23:56 བུད་མེད་དེ་རྣམས་ཕྱིར་ལོག་སྟེ་བསུང་རྫས་དང་བྱུགས་རྫས་སྟ་གོན་བྱས་པ༌དང༌། ངལ་གསོ་བའི་ཉིན་ལ་དཀོན་མཆོག་གི་བཀའ་ཁྲིམས་བཞིན་ངལ་གསོས༌སོ།།
LUK 24:1 གཟའ་འཁོར་གཅིག་གི་ཉིན་དང་པོར་སྐྱ་རེངས་ཤར་བའི་དུས༌སུ། བུད་མེད་དེ་རྣམས་ཀྱིས་སྟ་གོན་བྱས་པའི་བསུང་རྫས་ཁྱེར་ནས་དུར་ཁུང་གི་མདུན་དུ་ཕྱིན་པ༌ན།
LUK 24:2 དུར་ཁུང་གི་སྒོ་གཅོད་བྱེད་ཀྱི་རྡོ་ཕ་བོང་དེ་ཕར་བསྒྲིལ་ཟིན་པ་མཐོང༌ཞིང༌།
LUK 24:3 ཁོ་མོ་རྣམས་དེའི་ནང་དུ་སོང༌ཚེ། སྐྱབས་མགོན་ཡེ་ཤུའི་སྐུ་གདུང་མ་མཐོང༌ངོ༌།།
LUK 24:4 ཁོ་མོ་རྣམས་དོགས་པ་སྐྱེ་བཞིན་པའི་སྒང༌ལ། གློ་བུར༌ཉིད་དུ། མི་གཉིས་ ཁོ་མོ་རྣམས་ཀྱི་གམ་དུ་མངོན་ཅིང་དེ་གཉིས་ཀྱི་གྱོན་པ་ལས་འོད་འཕྲོ་བར་བྱེད།
LUK 24:5 བུད་མེད་དེ་རྣམས་ཤིན་ཏུ་འཇིགས་ཏེ་མགོ་བོ་སར་བཏུད་པ༌ན། མི་དེ་གཉིས་ཀྱིས་འདི་སྐད༌དུ། ཅིའི་ཕྱིར་གསོན་པོར་བཞུགས་པ་དེ་ཉིད་གཤིན་པོའི་ཁྲོད་དུ་འཚོལ་བ་ཡིན༌ནམ།
LUK 24:6 སྐྱབས་མགོན་ཡེ་ཤུ་སླར་གསོན་པས་གནས་འདིར་མི་བཞུགས། ཁོང་ཉིད་ག་ལིལ་ཡུལ་ནས་བཞུགས་སྐབས་ཁྱོད་རྣམས་ལ་ཅི་ལྟར་གསུངས་པ་དྲན་པར༌གྱིས།
LUK 24:7 སྔར་ཁོང་གིས་འདི་སྐད་དུ། མིའི་བུ་ངེས་པར་མི་སྡིག་ཅན་རྣམས་ཀྱི་ལག་ཏུ་སྤྲོད་ཅིང་། ཤིང་རྒྱ་གྲམ་གྱི་སྟེང་དུ་བརྡབས་ནས། ཉིན་གསུམ་པ་ལ་སླར་གསོན་པར་འགྱུར་དགོས་ཞེས་གསུངས༌པའོ།།
LUK 24:8 ཁོ་མོ་རྣམས་ཀྱིས་སྐྱབས་མགོན་ཡེ་ཤུའི་གསུང་དེ་ཕྱིར་དྲན་པ༌དང༌།
LUK 24:9 དུར་ཁུང་ནས་ཕྱིར་ལོག་སྟེ་དོན་དེ་ཐམས་ཅད་སྐུ་ཚབ་པ་བཅུ་གཅིག་པོ་དང་རྗེས་འབྲང་པ་གཞན་རྣམས་ལ་སྨྲས་སོ།།
LUK 24:10 གནས་ཚུལ་དེ་སྐུ་ཚབ་པ་རྣམས་ལ་བཤད་མཁན༌ནི། མཱག་རྡལ་གྱི་མིར་ཡམ་དང་ཡོ་ཨན༌ནཱ། ཡ་ཀོབ་ཀྱི་ཡུམ་སྟེ་མིར་ཡམ་བཅས་ཡིན༌ལ། ཁོ་མོ་རྣམས་དང་མཉམ་དུ་འགྲོགས་པའི་བུད་མེད་གཞན་ཡང་ཡིན།
LUK 24:11 འོན་ཀྱང་དེ་རྣམས་ཀྱིས་ཁོ་མོ་རྣམས་ཀྱི་གཏམ་ནི་སྨྱོ་གཏམ་ཡིན་པར་སྙམ་ནས་ཡིད་མ་ཆེས་ནའང་།
LUK 24:12 ཐུགས་སྲས་པེ་ཏྲོ་ཡར་ལངས་ནས་དུར་ཁུང་གི་སྒོ་ཁར་བརྒྱུགས་ཏེ་མགོ་བོ་བསྒུར་ནས་བལྟས༌ཚེ། སྐུ་གདུང་བཏུམ་བྱེད་ཀྱི་སོ་རས་རྐྱང་རྐྱང་ཤུལ་དུ་ལུས་ཡོད་པ་མཐོང་སྟེ་དོན་དེར་ངོ་མཚར་སྐྱེ་བཞིན་ཕྱིར་ལོག༌གོ།
LUK 24:13 ཡང་ཉིན་དེ་ལ་རྗེས་འབྲང་པ་རྣམས་ལས་མི་གཉིས་ཡེ་རུ་སཱ་ལེམ་ནས་བར་ཐག་སྤྱི་ལེ་བཅུ་གཅིག་ཙམ་ཡོད་པའི་ཨེ་མཱ་ཨུ་བྱ་བའི་གྲོང་སྡེར་འགྲོ༌སྐབས།
LUK 24:14 དོན་ཅི་བྱུང་བ་རྣམས་ཀྱི་སྐོར་ཕན་ཚུན་ལ་གླེང༌བ་རེད།
LUK 24:15 ཡང་མི་དེ་གཉིས་ཀྱིས་ཕན་ཚུན་ལ་དེ་ལྟར་གླེང་མོལ་བྱེད་བཞིན་པའི་དུས༌སུ། སྐྱབས་མགོན་ཡེ་ཤུ་དངོས་སུ་དེ་གཉིས་ཀྱི་གམ་དུ་ཉེ་བར་བྱོན་ཏེ་ལྷན་དུ་ཕེབས།
LUK 24:16 འོན་ཀྱང་མི་དེ་གཉིས་ཀྱི་མིག་བསྒྲིབས་པ་ཡིན་པས་ཁོང་སུ་ཡིན་པ་མ་ཤེས་སོ།།
LUK 24:17 སྐྱབས་མགོན་ཡེ་ཤུས་མི་དེ་གཉིས་ལ་འདི་སྐད༌དུ། ཁྱོད་གཉིས་ལམ་ལ་ཆས་སྐབས། ཕན་ཚུན་ལ་དོན་ཅི་ཞིག་གླེང་བཞིན་ཡོད་དམ་ཞེས་གསུངས་པ༌དང༌། མི་དེ་གཉིས་འགྲོ་མཚམས་བཞག་ཅིང་གདོང་ལ་སྐྱོ་ཉམས་ཤར།
LUK 24:18 མི་དེ་གཉིས་ལས་མིང་ལ་ཀཱ་ལོ་ཕུ་ཟེར་བ་ན༌རེ། ཡེ་རུ་སཱ་ལེམ་གྱི་མཇལ་པ་རྣམས་ལས་གནས་དེར་ཉེ་ཆར་དོན་ཅི་བྱུང་བའང་མི་ཤེས་པ་ཁྱོད་རང་ཁོ་ན་ཡིན་ནམ་ཞེས་སྨྲས་པ༌དང༌།
LUK 24:19 ཡང་ཁོང་གིས་འདི་སྐད༌དུ། དོན་ཅི་ཞིག་བྱུང་ངམ་ཞེས་གསུངས་པ༌ལ། ཁོ་གཉིས་ན༌རེ། ནཱ་ཙ་རེལ་པ་ཡེ་ཤུའི་དོན་རྣམས་ཡིན༌ཏེ། ཁོང་ནི་ལུང་སྟོན་པ་ཞིག་ཡིན་ཞིང་དཀོན་མཆོག་དང་མི་ཐམས་ཅད་ཀྱི་མདུན་དུ། ཁོང་གི་བཀའ་དང་འཕྲིན་ལས་རྣམས་མཐུ་སྟོབས་དང་ལྡན་པ་ཞིག་ཡིན༌ནའང༌།
LUK 24:20 མཆོད་དཔོན་ཆེན་པོ་དག་དང་བདག་ཅག་གི་དཔོན་རིགས་རྣམས་ཀྱིས་ཁོང་ལ་སྲོག་ཆད་གཅོད་པའི་ཕྱིར་སྤྲད་པ་དང་ཤིང་རྒྱ་གྲམ་གྱི་སྟེང་དུ་བརྡབས་སོ།།
LUK 24:21 འོན༌ཀྱང༌། ངེད་ཅག་གིས་སྔར་ནས་ཁོང་ཉིད་ནི་ཡེས་ར་ཨེལ་མི་རིགས་བླུ་མཁན་ཡིན་པར་རེ་བ་བཅངས༌ཤིང༌། ད་ལྟ་དོན་དེ་ཐམས་ཅད་བྱུང་ནས་ཉིན་གསུམ་འགོར་བ༌དང༌།
LUK 24:22 ཡང་ངེད་ཅག་གི་ཁྲོད་ནས་བུད་མེད་འགའ་ཞིག་ཞོགས་པའི་དུས་སུ་དུར་ཁུང་དུ་སོང་བ༌ན།
LUK 24:23 ཁོང་གི་སྐུ་གདུང་མ་རྙེད་པར་ཕྱིར་ལོག༌སྟེ། ཕོ་ཉ་རྣམས་ཀྱི་ཞལ་གཟིགས་མཇལ་ཞིང་། དེ་རྣམས་ཀྱིས་ཁོང་ཉིད་སླར་གསོན་པ་ཡིན་ཞེས་སྨྲས་བྱུང་ཟེར་བས་ངེད་རྣམས་ངོ་མཚར་བར་གྱུར།
LUK 24:24 ཡང་ངེད་ཅག་གི་ཁྲོད་ནས་མི་འགའ་ཞིག་ཀྱང་དུར་ཁུང་དུ་སོང་བ་དང་། བུད་མེད་རྣམས་ཀྱིས་སྨྲས་པ་བཞིན་མཐོང་ནའང་སྐྱབས་མགོན་ཡེ་ཤུ་མ་མཐོང་ཞེས་སྨྲས་སོ།།
LUK 24:25 ཡང་སྐྱབས་མགོན་ཡེ་ཤུས་འདི་སྐད༌དུ། བླུན་པོ༌གཉིས། ལུང་སྟོན་པ་རྣམས་ཀྱིས་གསུངས་པ་ཐམས་ཅད་ལ་ཡིད་མི་ཆེས༌ཨང༌།
LUK 24:26 སྐྱབས་མགོན་མཱ་ཤི་ཀས་སྡུག་བསྔལ་དེ་འདྲ་མྱངས་ཤིང་། རང་ཉིད་ཀྱི་གཟི་བརྗིད་དུ་ཞུགས་དགོས་པའང་མི་ཤེས་སམ་ཞེས་གསུངས༌པ་དང་།
LUK 24:27 ཡང་མོ་ཤེའི་མདོ་ནས་བཟུང་ལུང་སྟོན་པ་གཞན་དག་གི་མདོ་རེ་རེ༌བཞིན། གསུང་རབ་ཀྱི་མདོ་ཐམས་ཅད་ལས་ཁོང་རང་ཉིད་ཀྱི་སྐོར་ལ་གསུངས་པ་རྣམས་གསལ་པོར་གསུངས༌སོ།།
LUK 24:28 ཁོང་རྣམས་འགྲོ་སའི་གྲོང་སྡེ་དེར་སླེབས་ལ་ཉེ་བ༌ན། སྐྱབས་མགོན་ཡེ་ཤུས་ད་དུང་ཕར་ལ་ཕེབས་པའི་ཚུལ་མཛད།
LUK 24:29 འོན་ཀྱང་དེ་གཉིས་ན༌རེ། དུས་འགྱངས་ཤིང་ཉི་མ་ཡང་ནུབ་ལ་ཉེ་བས་ཁྱེད་ནི་ངེད་ཅག་དང་མཉམ་དུ་བཞུགས་པར་ཞུ་ཞེས་ནན་གྱིས་ཞུས་སོ།། དེ་ནས་སྐྱབས་མགོན་ཡེ་ཤུ་ཁྱིམ་ཚང་ཞིག་ཏུ་ཕེབས་ནས་ཁོ་རྣམས་དང་མཉམ་དུ་བཞུགས༌པ་རེད།
LUK 24:30 དེ་གཉིས་དང་མཉམ་དུ་དགོང་ཟས་བཞེས་པའི་དུས་སུ། ཁོང་གིས་ཕྱག་ཏུ་བག་ལེབ་བསྣམས་ཏེ། བྱིན་རླབས་གནང་རྗེས་དུམ་བུར་བགོས་ནས་ཁོ་རྣམས་ལ་གནང་བ༌དང༌།
LUK 24:31 མི་དེ་གཉིས་ཀྱི་མིག་ཟུང་གསལ་པོར་གྱུར་པ་དང་ཁོང་ཉིད་སུ་ཡིན་པའང་ཤེས་མོད། འོན་ཀྱང་གློ་བུར་ཉིད་ལ་སྐྱབས་མགོན་ཡེ་ཤུ་མི་མཐོང་བར་གྱུར།
LUK 24:32 མི་དེ་གཉིས་ཕན་ཚུན་ན༌རེ། ཁོང་གིས་ལམ་བར་ནས་འུ་གཉིས་ལ་གསུང་གནང་ཞིང་གསུང་རབ་ཀྱི་དོན་འགྲེལ༌སྐབས། འུ་གཉིས་ཀྱི་སེམས་ནི་ཇི་འདྲའི་དགའ་སྐྱིད་དང་ལྡན་པ་ཞིག་ཡིན་ཨང་ཞེས་སྨྲས་སོ།།
LUK 24:33 ཁོ་གཉིས་མྱུར་དུ་ཡར་ལངས་ཏེ་ཡེ་རུ་སཱ་ལེམ་དུ་ཕྱིར་ལོག་པ༌དང༌། ཐུགས་སྲས་བཅུ་གཅིག་པོ་དང་རྗེས་འབྲང་པ་གཞན་དག་མཉམ་དུ་གནས་དེར་འདུས་ཡོད་པར་ཕྲད་ཅིང༌ན་རེ།
LUK 24:34 སྐྱབས་མགོན་ཡེ་ཤུ་དངོས་གནས་སླར་གསོན་ཏེ་སི་མོན་གྱི་མིག་མདུན་དུ་མངོན་ནོ་ཞེས་སྨྲས་པ༌དང༌།
LUK 24:35 ཁོ་གཉིས་ཀྱིས་ཀྱང་ལམ་བར་དུ་ཕྲད་པའི་དོན་དག༌དང༌། སྐྱབས་མགོན་ཡེ་ཤུས་བག་ལེབ་དུམ་བུར་བགོ་བའི་སྐབས༌སུ། ཁོང་ཉིད་སུ་ཡིན་པ་རྟོགས་པའི་གནས་ཚུལ་རྣམས་སྨྲས༌སོ།།
LUK 24:36 ཁོ་རྣམས་ཀྱིས་དོན་དེ་དག་གླེང་བཞིན་པའི་སྒང༌ལ། སྐྱབས་མགོན་ཡེ་ཤུ་དངོས་སུ་ཁོ་རྣམས་ཀྱི་དཀྱིལ་དུ་བཞེངས༌ཏེ། ཁྱོད་རྣམས་བདེ་བར་སྨོན་ཞེས་གསུངས༌ནའང༌།
LUK 24:37 ཁོ་རྣམས་འཇིགས་ཤིང་སྐྲག་སྟེ་འདྲེ་ཡིན་པར་བསམས།
LUK 24:38 ཁོང་གིས་འདི་སྐད༌དུ། ཁྱོད་ཅག་ཅིའི་ཕྱིར་འཇིགས༌སམ། ཅིའི་ཕྱིར་སེམས་སུ་དོགས་པ་སྐྱེས༌སམ།
LUK 24:39 ཁྱོད་ཅག་གིས་བདག་གི་རྐང་པ་དང་ལག་པར་ལྟོས་དང་དངོས་གནས་ང་རང་ཡིན། བདག་གི་ལུས་ལ་རེག་སྟེ་ལྟོས༌དང༌། འདྲེ་ལ་ཤ་དང་རུས་པའི་ཕུང་བོ་ནི་མེད༌དེ། བདག་ལ་ཡོད་པ་ཡིན་ཞེས་གསུངས་པ༌དང༌།
LUK 24:40 ཁོ་རྣམས་ལ་རང་ཉིད་ཀྱི་ཕྱག་དང་ཞབས་སྟོན་པར་མཛད་དོ།།
LUK 24:41 ཁོ་རྣམས་ཤིན་ཏུ་དགའ་བར་གྱུར་ཅིང་ཡིད་ཆེས་མི་ཕོད་པར་ངོ་མཚར་ཆེན་པོ་སྐྱེས་པ༌ན། ཡང་ཁོང་གིས་འདི་སྐད༌དུ། ཁྱོད་ཅག་གི་གནས་འདིར་བཟའ་བྱའི་ཟས་ཡོད་དམ་ཞེས་གསུངས་པ༌དང༌།
LUK 24:42 ཁོ་རྣམས་ཀྱིས་ཁོང་ལ་ཉ་ཤ་བསྲེག་མ་དུམ་བུ་ཞིག་ཕུལ༌ཞིང༌།
LUK 24:43 ཁོང་གིས་ཕྱག་ཏུ་བསྣམས་ཏེ་ཁོ་རྣམས་ཀྱི་མིག་མདུན་ནས་བཞེས༌སོ།།
LUK 24:44 ཁོང་གིས་མི་དེ་རྣམས་ལ་འདི་སྐད༌དུ། དེ་སྔར་ང་རང་ཁྱོད་ཅག་དང་མཉམ་དུ་གནས་པའི་དུས༌སུ། ངས་ཁྱོད་རྣམས་ལ་སྨྲས་པའི་དོན་འདི༌ནི། མོ་ཤེའི་བཀའ་ཁྲིམས༌དང༌། ལུང་སྟོན་པའི༌མདོ། གསུང་མགུར་བཅས་སུ་བདག་གི་སྐོར་ལུང་བསྟན་པ༌ལྟར། ཐམས་ཅད་འགྲུབ་པར་འགྱུར་དགོས་ཞེས་པ་དེ་ཡིན་ཞེས་གསུངས་སོ།།
LUK 24:45 ཁོང་གིས་མི་དེ་རྣམས་ལ་གསུང་རབ་ཀྱི་དོན་རྣམས་རྟོགས་པའི༌ཕྱིར། ཁོ་རྣམས་ཀྱི་བློ་སྒོ་གསལ་པོར༌ཕྱེས་སོ།།
LUK 24:46 ཡང་ཁོང་གིས་འདི་སྐད༌དུ། གསུང་རབ་ཀྱི་མདོ༌ལས། སྐྱབས་མགོན་མཱ་ཤི་ཀས་སྡུག་བསྔལ་མྱོང་ཞིང་། ཉིན་གསུམ་པ་ལ་གྲོངས་པ་ནས་སླར་གསོན་པར་འགྱུར་བ༌དང༌།
LUK 24:47 ཆོས་སྒྲོག་མཁན་རྣམས་ཀྱིས་ཡེ་རུ་སཱ་ལེམ་ནས༌བཟུང༌། ཁོང་གི་མཚན་གྱི་སྒོ་ནས་མི་རིགས་ཐམས་ཅད་ལ་འགྱོད་བཤགས་དང་སྡིག་པ་བསལ་བའི་ཆོས་བསྒྲག་པར་འགྱུར་ཞེས་བཀོད་པ༌དང༌།
LUK 24:48 དོན་དེ་རྣམས་ལ་དཔང་པོ་བྱེད་མཁན་ནི་ཁྱོད་རྣམས་ཡིན།
LUK 24:49 ཡང་ལྟོས༌དང༌། ངས་བདག་གི་ཡབ་ཀྱི་ཞལ་བཞེས་གནང་ཡོད་པ་དེ་ཉིད་ཁྱོད་རྣམས་ཀྱི་སྟེང་ལ་ཁྱབ་པར་བྱ༌སྟེ། ཁྱོད་རྣམས་ལ་ནམ་མཁའི་ཞིང་ཁམས་ནས་ནུས་མཐུ་དེ་ཉིད་འཐོབ་པའི་བར༌དུ། ཁྱོད་ཅག་གིས་གྲོང་ཁྱེར་དུ་བསྒུག་ནས་སྡོད་ཅིག་ཅེས་གསུངས༌སོ།།
LUK 24:50 སྐྱབས་མགོན་ཡེ་ཤུས་མི་དེ་རྣམས་པེ་ཐན་ཡཱ་གྲོང་སྡེའི་ཉེ་འགྲམ་དུ་ཁྲིད༌དེ། ཕྱག་ཟུང་ཡར་བཏེགས་ནས་མི་དེ་རྣམས་ལ་བྱིན་གྱིས་བརླབས་སོ།།
LUK 24:51 ཁོང་གིས་མི་དེ་རྣམས་ལ་བྱིན་གྱིས་རླབས་བཞིན་པའི་དུས༌ལ། ཁོང་ཉིད་དེ་རྣམས་དང་ཁ་བྲལ་ནས་ཕར་ཅུང་ཟད་སོང་བ་དང་ནམ་མཁའི་ཞིང་ཁམས་སུ་དྲངས༌པ་རེད།
LUK 24:52 མི་རྣམས་ཀྱིས་ཁོང་ལ་གུས་ཕྱག་ཕུལ༌རྗེས། དགའ་སྤྲོ་ཆེན་པོའི་ངང་ཕྱིར་ཡེ་རུ་སཱ་ལེམ་དུ་ལོག༌ཅིང༌།
LUK 24:53 དུས་རྟག་ཏུ་མཆོད་ཁང་དུ་དཀོན་མཆོག་ལ་བསྟོད་བསྔགས་བརྗོད༌དོ།། །།
JOH 1:1 ཐོག་མར་བཀའ་ནི་ཡོད་ཅིང་བཀའ་དེ༌ཉིད།། དཀོན་མཆོག་ཉིད་དང་ལྷན་ཅིག་ཉིད་དུ༌བཞུགས།། བཀའ་ཞེས་གྲགས་པ་དཀོན་མཆོག་ཡིན་ལགས༌ཤིང༌།།
JOH 1:2 བཀའ་དང་དཀོན་མཆོག་གདོད་ནས་ལྷན་དུ༌བཞུགས།།
JOH 1:3 དེ་ཡང་འཇིག་རྟེན་སྣོད་བཅུད་མ་ལུས༌པ།། བཀའ་དེ་བརྒྱུད་ནས་དཀོན་མཆོག་ཉིད་ཀྱིས༌བསྐྲུན།། ཁོང་གིས་བཟོས་པའི་དངོས་པོ་མཐའ་དག༌ལས།། བཀའ་དེ་མ་བརྒྱུད་བསྐྲུན་པ་ཅི་ཡང༌མེད།།
JOH 1:4 ཁོང་གི་ནང་དུ་ཚེ་སྲོག་བཞུགས་པ་དང༌།། ཚེ་སྲོག་དེ་ནི་མི་ཡི་གཟི་འོད་དོ།།
JOH 1:5 གཟི་འོད་ཉིད་ནི་མུན་པར་འཕྲོ་བྱེད༌ཀྱང༌།། མུན་པ་དེ་ལས་རྒྱལ༌བར་མ་གྱུར་ཏོ།།
JOH 1:6 དེ་ཡང་ཡོ་ཧ་ནན་ཞེས་སྐྱེས་བུ༌དེ།། དཀོན་མཆོག་གིས་ནི་མངགས་ཤིང་འོངས་པ༌སྟེ།།
JOH 1:7 གཟི་འོད་དེ་ལ་བདེན་དཔང་བྱེད་པ༌དང༌།། སྐྱེ་བོ་ཀུན་གྱིས་ཁོ་རང་བརྒྱུད་ནས་ནི།། དད་པ་བྱེད་ཕྱིར་ཁོ་རང་འོངས་པ་ཡིན།།
JOH 1:8 ཡོ་ཧ་ནན་ནི་གཟི་འོད་མིན་ན༌ཡང༌།། གཟི་འོད་དེ་ལ་བདེན་དཔང་བྱེད་པར༌འོངས།།
JOH 1:9 གཟི་འོད་དེ་ཉིད་འོད་ཟེར་དངོས་མ༌སྟེ།། འཇིག་རྟེན་ཡོངས་སུ་འཕྲོས་ནས་མི་ཀུན༌གསལ།།
JOH 1:10 དེ་ཡང་ཁོང་ཉིད་འཇིག་རྟེན་འདིར་བཞུགས༌ཤིང༌།། ཁོང་ཉིད་བརྒྱུད་ནས་འཇིག་རྟེན་བསྐྲུན་ན༌ཡང༌།། འཇིག་རྟེན་མི་ཡིས་ཁོང་ཉིད་ཤེས་མ༌གྱུར།།
JOH 1:11 ཁོང་ནི་རང་ཡུལ་ཕྱོགས་སུ་ཕེབས་ན༌ཡང༌།། རང་ཡུལ་མི་ཡིས་ཁོང་ལ་བསུ་བ༌མེད།།
JOH 1:12 ཁོང་ཉིད་བསུ་ཞིང་ཁོང་གི་མཚན་ལ་ནི།། དད་པའི་མི་རྣམས་དཀོན་མཆོག་བུ་ཕྲུག་ལ༎ འགྱུར་བར་མཛད་པའི་དབང་ཡང་ཁོང་གིས༌གནང༌།།
JOH 1:13 དད་ལྡན་སྐྱེ་བོ་སོ་སོ་དེ་རྣམས༌ནི།། མི་ཡི་ཁྲག་ལས་སྐྱེས་པ་མ་ཡིན༌ལ།། མི་ཡི་འདོད་ཆགས་དབང་གིས་མ་སྐྱེས༌ཤིང༌།། མི་ཡི་འདོད་མོས་བཞིན་དུ་སྐྱེས་པའང༌མིན།། དེ་ནི་དཀོན་མཆོག་ཉིད་ལས་སྐྱེས་པ་ལགས།།
JOH 1:14 དེ་ཡང་བཀའ་དེ་མི་ཡི་གཟུགས་པོར་གྱུར།། ང་ཚོའི་ཁྲོད་དུ་ཁོང་ནི་བཞུགས་པ༌དང༌།། ཁོང་གི་གཟི་བརྗིད་ང་ཚོས་དངོས་སུ༌མཐོང༌།། དེ་ནི་ཡབ་ལས་བྱུང་བའི་སྲས་གཅིག་པུའི༎ གཟི་བརྗིད་ཡིན་ཞིང་སྲས་པོ་ཁོང་ལ་འང༎ ཐུགས་རྗེ་དང་ནི་བདེན་པ་ཉིད་ཀྱིས་ཁེངས༎
JOH 1:15 དེ་ཡང་ཡོ་ཧ་ནན་ཞེས་གྲགས་པ༌ཡིས།། རང་གི་རྗེས་སུ་འབྱོན་པ་ཁོང་ཉིད༌ནི།། བདག་གི་སྔོན་དུ་བཞུགས་པས་བདག་ལས༌མཆོག ། དེ་སྐད་བསྒྲགས་ཤིང་ཁོང་ལ་བདེན་དཔང༌བྱས།།
JOH 1:16 ཁོང་གི་ཕུན་སུམ་ཚོགས་པ་ཉིད་དེ༌ལས།། བདག་ཅག་ལ་ནི་ཐུགས་རྗེ་ཡང་ཡང༌ཐོབ།།
JOH 1:17 མོ་ཤེ་བརྒྱུད་ནས་བཀའ་ཁྲིམས༌གནང་བ་དང༌།། ཡེ་ཤུ་མཱ་ཤི་ཀ་ཉིད་བརྒྱུད༌ནས་ནི།། ཐུགས་རྗེ་དང་ནི་བདེན་པ་ཉིད་དེ༌བྱུང༌།།
JOH 1:18 ཡབ་ཆེན་དཀོན་མཆོག་སུས་ཀྱང་མཐོང་བ༌མེད།། ཡབ་ཀྱི་སྐུ་ཡི་པང་དུ་བཞུགས་པ༌ཡི།། སྲས་པོ་གཅིག་པུས་ཡབ་ཆེན་ཁོང་ཉིད་ནི།། འཇིག་རྟེན་ཀུན་ལ་གསལ་པོར་བསྟན་པ༌ཡིན།།
JOH 1:19 དེ་ཡང་ཁྲུས་གསོལ་མཁན་ཡོ་ཧ་ནན་གྱིས་བདེན་དཔང་བྱས་པའི་ཚིག་ནི་འདི་ལྟ༌སྟེ། ཡ་ཧུ་དཱ་པ་རྣམས་ཀྱིས་ཡེ་རུ་སཱ་ལེམ་ནས་མཆོད་དཔོན་དང་ལེ་ཝི་པ་རྣམས་ཁྲུས་གསོལ་མཁན་ཡོ་ཧ་ནན་གྱི་དྲུང་དུ་མངགས༌ཏེ། ཁྱེད་རང་སུ་ཡིན་ནམ་ཞེས་ཞུས་པ༌ན།
JOH 1:20 ཡོ་ཧ་ནན་གྱིས་སྦ་གསང་ཅི་ཡང་མེད་པར་འདི་སྐད༌དུ། ང་ནི་སྐྱབས་མགོན་མཱ་ཤི་ཀ་མིན་ཞེས་གསལ་པོར་གསུངས་སོ།།
JOH 1:21 ཡང་དེ་རྣམས་ན༌རེ། དེས་ན་ཁྱེད་རང་སུ་ཡིན༌ནམ། ཁྱེད་ནི་ཨེ་ལི་ཡཱ་ཡིན་ནམ་ཞེས་དྲིས་པ༌ལ། ཁོང་གིས་ང་མིན་ཞེས་གསུངས་པ༌དང༌། ཡང་དེ་རྣམས་ཀྱིས་ཁྱེད་རང་ནི་ལུང་སྟོན་པ་དེ་ཉིད་ ཡིན་ནམ་ཞེས་དྲིས་པའི༌ཚེ། ཡང་ཁོང་གིས་མིན་ཞེས་གསུངས་སོ།།
JOH 1:22 ཡང་དེ་རྣམས་ན༌རེ། འོ་ན་ཁྱེད་རང་སུ་ཡིན༌ནམ། ངེད་ཅག་གིས་ཀྱང་ངེད་རྣམས་མངགས་མཁན་ལ་ལན་ཞིག་འཁྱེར་དགོས༌པས། ཁྱེད་ཀྱིས་རང་ཉིད་སུ་ཡིན་པ་གསུང་རོགས་ཞེས་ཞུས་པ༌ན།
JOH 1:23 ཁོང་གིས་འདི་སྐད༌དུ། ལུང་སྟོན་པ་ཡེ་ཤ་ཡཱ་ཡི་མདོ་ལས་ཇི་སྐད༌དུ། དབེན་སྟོང་ཡུལ་ནས་གྲགས་པའི་འབོད་སྒྲ༌ཡིས།། གཙོ་བོའི་གཤེགས་ལམ་དྲང་པོར་བཟོ་བར༌གྱིས།། ཞེས་གསུངས་པའི་མི་དེ་ཡིན་ཞེས་གསུངས༌སོ།།
JOH 1:24 ཡང་དེ་དག་ནི་ཕ་རུ་ཤི་པ་རྣམས་ཀྱིས་མངགས་པ་ཡིན༌ཏེ།
JOH 1:25 ཁོ་རྣམས་ཀྱིས་ཀྱང་ཡོ་ཧ་ནན་ལ་ཁྱེད་རང་ནི་སྐྱབས་མགོན་མཱ་ཤི་ཀ་མིན༌ལ། ཨེ་ལི་ཡཱའང༌མིན། ལུང་སྟོན་པ་དེ་ཉིད་ཡང་མ་ཡིན༌པས། ཅིའི་ཕྱིར་ཁྲུས་གསོལ་བྱེད་དམ་ཞེས་དྲིས་པ༌ལ།
JOH 1:26 ཡོ་ཧ་ནན་ན༌རེ། བདག་གིས་ཆུས་ཁྲུས་གསོལ་བྱེད༌མོད། འོན་ཀྱང་སྐྱེས་བུ་ཞིག་ཁྱོད་ཅག་གི་ཁྲོད་དུ་བཞུགས་ནའང་ཁྱོད་རྣམས་ཀྱིས་ཁོང་སུ་ཡིན་པ་མི་ཤེས།
JOH 1:27 ཁོང་ནི་ང་ཡི་རྗེས་སུ་འབྱོན་པ་ཡིན༌ཏེ། བདག་གིས་ཁོང་གི་ལྷམ་མདུད་ཀྱང་དགྲོལ་བར་མི་འོས་ཞེས་གསུངས་སོ།།
JOH 1:28 དོན་འདི་རྣམས་ནི་ཡོར་དན་གཙང་པོ་ཕ་རོལ་གྱི་པེ་ཐན་ཡཱའི་ཡུལ༌ཏེ། ཡོ་ཧ་ནན་གྱིས་ཁྲུས་གསོལ་མཛད་པའི་གནས་སུ་བྱུང་བ་ཡིན༌ནོ།།
JOH 1:29 དེའི་ཕྱི༌ཉིན། ཁྲུས་གསོལ་མཁན་ཡོ་ཧ་ནན་གྱིས་སྐྱབས་མགོན་ཡེ་ཤུ་རང་གི་གམ་དུ་ཕེབས་པ་མཐོང་སྟེ་འདི་སྐད༌དུ། ལྟོས༌དང༌། དཀོན་མཆོག་གི་ལུ་གུ་ སྟེ་འཇིག་རྟེན་མི་རྣམས་ཀྱི་སྡིག་པ་སེལ་མཁན་ནི་ཁོང་ཉིད་ཡིན།
JOH 1:30 བདག་གི་རྗེས་སུ་འབྱོན་པ་ཁོང་ཉིད་ནི་བདག་གི་སྔོན་དུ་བཞུགས་པས། བདག་ལས་མཆོག་གྱུར་ཡིན་ཞེས་དེ་སྔར་བདག་གིས་སྨྲས་མྱོང་བའི་སྐྱེས་བུ་དེ་ནི་ཁོང་ཉིད་ཡིན་ནོ།།
JOH 1:31 དེ་སྔར་བདག་གིས་ཁོང་ཉིད་མི་ཤེས༌ཀྱང༌། ཡེས་ར་ཨེལ་གྱི་མི་ཀུན་ལ་ཤེས་སུ་འཇུག༌ཆེད། བདག་ནི་མི་རྣམས་ལ་ཆུས་ཁྲུས་གསོལ་བྱེད་དུ་འོངས་པ་ཡིན་ཞེས་གསུངས་སོ།།
JOH 1:32 ཡང་ཡོ་ཧ་ནན་གྱིས་འདི་སྐད་དུ་བདེན་དཔང་བྱས་པ༌སྟེ། དེ་ཡང་ནམ་མཁའ་ནས་དམ་པའི་ཐུགས་ཉིད་ནི། བྱ་ཕུག་རོན་གྱི་གཟུགས་ཀྱིས་ཁོང་གི་ལུས་སྟེང་དུ་བབས་ཤིང་གནས་པ་བདག་གིས་མཐོང༌བྱུང་ངོ་།།
JOH 1:33 དེ་སྔར་བདག་གིས་ཀྱང་ཁོང་ཉིད་མི་ཤེས༌ནའང༌། ང་རང་ཆུ་ཡིས་ཁྲུས་གསོལ་བྱེད་པར་མངགས་མཁན་གྱིས་འདི་སྐད༌དུ། དམ་པའི་ཐུགས་ཉིད་སུའི་སྟེང་དུ་བབས་ཤིང་གནས་པ་ཁྱོད་ཀྱིས་མཐོང་བར་འགྱུར་བའི་སྐྱེས་བུ་དེ་ནི། དམ་པའི་ཐུགས་ཉིད་ཀྱིས་ཁྲུས་གསོལ་མཛད་མཁན་ཡིན་ཞེས་གསུངས་པ༌དང༌།
JOH 1:34 བདག་གིས་ཀྱང་དེ་བཞིན་དུ་བྱུང་བ་མཐོང་བས། སྐྱེས་བུ་འདི་ནི་དཀོན་མཆོག་གི་སྲས་ཡིན་ཞེས་བདེན་དཔང་བྱས་པ་ཡིན་ཞེས་གསུངས༌སོ།།
JOH 1:35 དེའི་ཕྱི༌ཉིན། ཁྲུས་གསོལ་མཁན་ཡོ་ཧ་ནན་དང་ཁོང་གི་རྗེས་འབྲང་པ་གཉིས་བཅས་མཉམ་དུ་བསྡད་ཡོད་པ༌ལ།
JOH 1:36 ཡོ་ཧ་ནན་གྱིས་སྐྱབས་མགོན་ཡེ་ཤུ་ཕར་ཕེབས་བཞིན་པ་མཐོང༌སྟེ། ལྟོས༌དང༌། འདི་ནི་དཀོན་མཆོག་གི་ལུ་གུ་ཡིན་ཞེས་གསུངས་སོ།།
JOH 1:37 རྗེས་འབྲང་པ་གཉིས་ཀྱིས་གཏམ་དེ་ཐོས་ནས་སྐྱབས་མགོན་ཡེ་ཤུའི་རྗེས་སུ་འབྲངས།
JOH 1:38 དེ་ནས་སྐྱབས་མགོན་ཡེ་ཤུས་ཞལ་ཕྱིར་འཁོར༌ཏེ། མི་དེ་གཉིས་ཁོང་གི་རྗེས་སུ་འབྲངས་པ་གཟིགས་ནས་ཁྱོད་གཉིས་ཀྱིས་ཅི་ཞིག་འཚོལ་བ་ཡིན་ཞེས་གསུངས་པ༌ལ། དེ་གཉིས་ན༌རེ། རཱབ་པེ་ཞེས་སྨྲས་ཤིང་དེ་ནི་སློབ་དཔོན་ལགས་ཞེས་པའི་དོན་ཡིན༌ལ། ཁྱེད་རང་གནས་གང་དུ་བཞུགས་སམ་ཞེས་ཞུས་པ༌དང༌།
JOH 1:39 ཡང་ཁོང་གིས་འདིར་ཤོག་ལ་ལྟོས་ཤིག་ཅེས་གསུངས་པ༌ལ། མི་དེ་གཉིས་ཁོང་དང་མཉམ་དུ་ཁོང་ཉིད་བཞུགས་པའི་གནས་སུ་སོང༌ཞིང༌། གནས་དེ་མཐོང་བ་དང་ཉིན་དེར་ཁོང་དང་ལྷན་དུ་བསྡད་དོ།། སྐབས་དེ་ནི་ཕྱི་དྲོའི་ཆུ་ཚོད་བཞི་ཙམ་ ཡིན༌པ་རེད།
JOH 1:40 དེ་ཡང་ཡོ་ཧ་ནན་གྱི་གསུང་དེ་ཐོས་ཤིང་སྐྱབས་མགོན་ཡེ་ཤུའི་རྗེས་སུ་འབྲང་མཁན་དེ་གཉིས་ལས་གཅིག་ནི་སི་མོན་པེ་ཏྲོའི་སྤུན་ཨན་དྲི་ཡཱ་ཡིན།
JOH 1:41 ཨན་དྲི་ཡཱ་ཡིས་ཐོག་མར་རང་གི་སྤུན་སི་མོན་བཙལ་ཏེ་ན༌རེ། ངེད་ཅག་སྐྱབས་མགོན་མཱ་ཤི་ཀར་མཇལ་བྱུང་ཞེས་སྨྲས་སོ།། མཱ་ཤི་ཀ་ཞེས་པ་ནི་བྱུགས་པའི་མི་ཞེས་པའི་དོན༌ཡིན།
JOH 1:42 དེ་ནས་ཁོས་རང་གི་སྤུན་སི་མོན་སྐྱབས་མགོན་ཡེ་ཤུའི་དྲུང་དུ་ཁྲིད་པ༌དང༌། སྐྱབས་མགོན་ཡེ་ཤུས་སི་མོན་ལ་གཟིགས་ནས་འདི་སྐད༌དུ། ཁྱོད་ནི་ཡོ་ཧ་ནན་ གྱི་བུ་སི་མོན་ཡིན༌ཏེ། ཁྱོད་ཀྱི་མིང་ལ་ཀེ་ཕཱ་ཞེས་འབོད་པར་འགྱུར་ཞེས་གསུངས༌ཤིང་། ཀེ་ཕཱ་ ཞེས་པ་ནི་པེ་ཏྲོའི་དོན༌ཡིན་ནོ།།
JOH 1:43 ཡང་དེའི་ཕྱི༌ཉིན། སྐྱབས་མགོན་ཡེ་ཤུ་ཁོང་ཉིད་ག་ལིལ་ཡུལ་དུ་ཕེབས་པར་དགོངས༌ཤིང༌། ཕི་ལིབ་དང་ཕྲད་དེ་བདག་གི་རྗེས་སུ་ཤོག་ཅེས་གསུངས་སོ།།
JOH 1:44 ཕི་ལིབ་ཅེས་པ་འདི་ནི་པེ་སད་དཱ་ཡི་མི་ཡིན༌ལ། ཨན་དྲི་ཡཱ་དང་པེ་ཏྲོ་བཅས་དང་གྲོང་ཁྱེར་གཅིག་གི་མི་ཡིན༌པ་རེད།
JOH 1:45 དེ་ནས་ཕི་ལིབ་ཀྱིས་ནཱ་ཐན་ཨེལ་བཙལ་ཏེ་ན༌རེ། མོ་ཤེ་ཡིས་བཀའ་ཁྲིམས་ཀྱི་མདོ་ནང་དུ་བཀོད་ཡོད་པ༌དང༌། ལུང་སྟོན་པ་རྣམས་ཀྱིས་ཀྱང་ལུང་བསྟན་ལས་སྐྱེས་བུ་དེའི་སྐོར་བཀོད་ཡོད༌པ་སྟེ། དེ་ནི་ཡོ་སེབ་ཀྱི་བུ་ནཱ་ཙ་རེལ་པ་སྐྱབས་མགོན་ཡེ་ཤུ་ཡིན་ཞིང་། བདག་ཅག་མཇལ་མྱོང་བ་ཡིན་ཞེས་སྨྲས་པ༌ན།
JOH 1:46 ནཱ་ཐན་ཨེལ་ན༌རེ། ནཱ་ཙ་རེལ་ནས་དོན་བཟང་པོ་ཞིག་འབྱུང་སྲིད་དམ་ཞེས་སྨྲས་པ༌དང༌། ཕི་ལིབ་ཀྱིས་ཚུར་ཤོག་དང་བལྟ་བར་བྱའོ་ཞེས་སྨྲས་སོ།།
JOH 1:47 དེ་ནས་སྐྱབས་མགོན་ཡེ་ཤུས་ནཱ་ཐན་ཨེལ་ཚུར་ཡོང་བ་གཟིགས༌ཏེ། ལྟོས་དང་མི་འདི་ནི་དངོས་སུ་སེམས་ལ་གཡོ་སྒྱུ་མེད་པའི་ཡེས་ར་ཨེལ་པ་ཞིག་ཡིན་ཞེས་གསུངས་པ༌དང༌།
JOH 1:48 ནཱ་ཐན་ཨེལ་གྱིས་ཁོང་ལ་ཁྱེད་ཀྱིས་ང་རང་ཇི་ལྟར་མཁྱེན་ནམ་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། ཕི་ལིབ་ཀྱིས་ཁྱོད་རང་མ་བོས་པའི་སྔོན་དུ་ཁྱོད་རང་བསེ་ཡབ་ཤིང་གི་སྡོང་རྩར་སྡོད་དུས་བདག་གིས་མཐོང་ཞེས་གསུངས་སོ།།
JOH 1:49 ཡང་ནཱ་ཐན་ཨེལ་ན༌རེ། རཱབ་པེ་ལགས། ཁྱེད་རང་ནི་དཀོན་མཆོག་གི་སྲས་ཡིན་ཞིང་ཡེས་ར་ཨེལ་གྱི་རྒྱལ་པོའང་ཡིན་ཞེས་ཞུས་པ༌ལ།
JOH 1:50 ཡང་ཁོང་གིས་འདི་སྐད༌དུ། བདག་གིས་ཁྱོད་རང་བསེ་ཡབ་ཤིང་གི་སྡོང་རྩར་སྡོད་པ་མཐོང་ཞེས་སྨྲས་པས་ཁྱོད་ཀྱིས་བདག་ལ་ཡིད་ཆེས་བྱེད༌དམ། ཁྱོད་ཀྱིས་དོན་འདི་ལས་ཀྱང་དོན་ཆེན་དག་མཐོང་བར་འགྱུར་ཞེས་གསུངས༌ཤིང༌།
JOH 1:51 ཡང་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར༌སྨྲའོ། །ནམ་མཁའི་སྒོ་ཕྱེས་ཏེ་དཀོན་མཆོག་གི་ཕོ་ཉ་རྣམས་མིའི་བུ་ལ་བརྟེན་ནས་ཡར་འཕགས་པ་དང་མར་ཕེབས་པ་ཁྱོད་ཅག་གིས་ཀྱང་མཐོང་བར་འགྱུར་ཞེས་གསུངས༌སོ།།
JOH 2:1 དེ་ནས་ཉིན་གསུམ་པ་ལ་ག་ལིལ་ཡུལ་གྱི་ཀ་ནཱ་རུ་གཉེན་སྟོན་ཞིག་ཡོད༌ལ། སྐྱབས་མགོན་ཡེ་ཤུའི་ཡུམ་ཡང་གནས་དེར་བཞུགས༌ཤིང༌།
JOH 2:2 སྐྱབས་མགོན་ཡེ་ཤུ་དང་ཁོང་གི་ཐུགས་སྲས་རྣམས་ཀྱང་གཉེན་སྟོན་དུ་གདན་འདྲེན་ཞུས༌ཡོད་དོ།།
JOH 2:3 དུས༌དེར། སྟོན་ཆང་ཐམས་ཅད་བཏུང་ཚར་བ་དང་སྐྱབས་མགོན་ཡེ་ཤུའི་ཡུམ་གྱིས་ཁོང༌ལ། ཁོ་རྣམས་ལ་རྒུན་ཆང་མེད་ཅེས་ཞུས་པ༌ན།
JOH 2:4 སྐྱབས་མགོན་ཡེ་ཤུས་འདི་སྐད༌དུ། ཡུམ༌ལགས། དོན་དེ་བདག་དང་འབྲེལ་བ་ཅི་ཡོད་དམ། བདག་གི་དུས་ནི་ད་དུང་སླེབས་མེད་ཅེས་གསུངས་སོ།།
JOH 2:5 ཁོང་གི་ཡུམ་གྱིས་གནས་དེར་ཡོད་པའི་གཡོག་པོ་རྣམས༌ལ། ཁོང་གིས་ཁྱོད་ཅག་ལ་ཇི་ལྟར་གསུངས་ན་ཁྱོད་ཅག་གིས་དེ་ལྟར་བྱོས་ཤིག་ཅེས་སྨྲས།
JOH 2:6 ཡ་ཧུ་དཱ་པའི་ལུགས་སྲོལ་བཞིན་གཙང་སྦྲ་བྱེད་པ༌ལ། རྡོ་ཡིས་བཟོས་པའི་ཆུ་རྫ་དྲུག་ཀྱང་གནས་དེར་བཞག་ཡོད༌དེ། དེ་རེ་རེའི་ནང་དུ་ཧ་ལམ་ཆུ་ཟོ་གཉིས་གསུམ་ཙམ་ཤོང༌ཐུབ་བོ།།
JOH 2:7 དེ་ནས་སྐྱབས་མགོན་ཡེ་ཤུས་གཡོག་པོ་དེ་རྣམས་ལ་ཆུ་རྫ་འདི་དག་ཆུས་གང་བར་བྱོས་ཞེས་བཀའ་བསྩལ་པ་དང་ཁོ་རྣམས་ཀྱིས་ཀྱང་ཆུས་བལྟམས་པར་བྱས།
JOH 2:8 ཡང་ཁོང་གིས་འདི་སྐད༌དུ། ད་ལྟ་བཅུས་ཏེ་གཉེན་སྟོན་གྱི་གཉེར་པ་ལ་སྤྲོད་ཅིག་ཅེས་གསུངས་པ་དང་གཡོག་པོ་རྣམས་ཀྱིས༌བསྐྱལ་ཏོ།།
JOH 2:9 དེ་ནས་གཉེར་པས་ཆུ་ནས་བསྒྱུར་བའི་རྒུན་ཆང་གི་བྲོ་བ་མྱངས་ནའང་གང་ནས་བཅུས་ཤིང་གང་ནས་ཁྱེར་ཡོང་བ་མི་ཤེས། འོན་ཀྱང་ཆུ་བཅུ་མཁན་གཡོག་པོ་རྣམས་ཀྱིས་གང་ནས་ཁྱེར་འོངས་པ་ཤེས༌པ་རེད། དེ་ནས་གཉེར་པས་མག་གསར་ཚུར་བོས་ཏེ་ན༌རེ།
JOH 2:10 མི་ཚང་མས་རྒུན་ཆང་ཞིམ་པོ་སྔོན་ལ་ལྡུད་ཅིང་མགྲོན་པོ་རྣམས་བཟི་བར་གྱུར༌ཚེ། རྒུན་ཆང་ཕལ་བ་གཞུག་ནས་ལྡུད་པར༌བྱེད། འོན་ཀྱང་ཁྱོད་ཀྱིས་དེ་ལྟར་མི་བྱེད་པར་རྒུན་ཆང་ཞིམ་པོ་གཞུག་ཏུ་བསྐྱུར་ཞེས་སྨྲས་སོ།།
JOH 2:11 དེ་ལྟར་གྲུབ་རྟགས་དང་པོ་དེ་སྐྱབས་མགོན་ཡེ་ཤུས་ག་ལིལ་ཡུལ་གྱི་ཀ་ནཱ་རུ་བསྟན་ཏེ། རང་གི་གཟི་བརྗིད་མངོན་པར་མཛད་པས་ཐུགས་སྲས་རྣམས་ཀྱང་ཁོང་ལ་དད་པར་གྱུར་ཏོ།།
JOH 2:12 དེའི་རྗེས༌སུ། སྐྱབས་མགོན་ཡེ་ཤུ་རང་གི་ཡུམ་དང་སྐུ༌མཆེད། ཐུགས་སྲས་རྣམས་དང་མཉམ་དུ་ཀཱ་ཕར་ན་ཧུམ་དུ་མར་ཕེབས་ཤིང་གནས་དེ་རུ་ཉིན་འགར་བཞུགས༌སོ།།
JOH 2:13 དེ་ཡང་ཡ་ཧུ་དཱ་པའི་པེ་སག་གི་དུས་ཆེན་སླེབས་ལ་ཉེ་བ༌ན། སྐྱབས་མགོན་ཡེ་ཤུ་ཡར་ཡེ་རུ་སཱ་ལེམ་དུ་ཕེབས་པ༌དང༌།
JOH 2:14 མཆོད་ཁང་ནང་དུ་བ་གླང༌དང༌། ལུག ཕུག་རོན་བཅས་ཚོང་མཁན་དང་དངུལ་བརྗེ་མཁན་རྣམས་བསྡད་ཡོད་པ་གཟིགས༌ཏེ།
JOH 2:15 ཁོང་གིས་ཐག་པས་རྟ་ལྕག་ཅིག་མཛད༌དེ། བ་གླང་དང་ལུག་དང་བཅས་པ་ཐམས་ཅད་མཆོད་ཁང་ལས་ཕྱིར་ཕུད་པ༌དང༌། དངུལ་བརྗེ་མཁན་གྱི་དངུལ་སྒོར་ཡང་ས་རུ་གཏོར་བ་དང་དེ་དག་གི་ཅོག་ཙེའང་སར་བསྒྱེལ་ཏོ།།
JOH 2:16 དེ་ནས་ཕུག་རོན་ཚོང་མཁན་རྣམས་ལ་འདི་སྐད༌དུ། ཕུག་རོན་འདི་དག་ཕྱིར་ཁྱེར༌ཅིག བདག་གི་ཡབ་ཀྱི་ཕོ་བྲང་འདི་ནི་ཚོང་རར་བྱེད་མི་རུང་ཞེས་གསུངས་སོ།།
JOH 2:17 དེ་ནས་ཁོང་གི་ཐུགས་སྲས་རྣམས་ཀྱིས་གསུང་རབ་ཀྱི་མདོ༌ལས། ཁྱེད་ཀྱི་བཞུགས་གནས་ཀྱི་དོན་དུ་ང་རང་སེམས་པ་ཤིན་ཏུ་འཚབ་ནས་མེ་ལྟར༌འབར་ཞེས་བཀོད་ཡོད་པ་དེ་དྲན་ནོ།།
JOH 2:18 དེ་ནས་ཡ་ཧུ་དཱ་པ་རྣམས་ན༌རེ། ཁྱེད་ལ་དོན་འདི་རྣམས་མཛད་པའི་དབང་ཡོད་པར་བདེན་དཔང་བྱ་ཆེད་གྲུབ་རྟགས་གང་ཞིག་སྟོན་ནུས་སམ་ཞེས་སྨྲས་པ༌ལ།
JOH 2:19 སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ཁྱོད་ཅག་གིས་མཆོད་ཁང་འདི་བཤིག་ན། བདག་གིས་ཉིན་གསུམ་ལ་སླར་ཡང་བརྩིག་པར་བྱ་ཞེས་གསུངས་སོ།།
JOH 2:20 ཡང་དེ་རྣམས་ན༌རེ། མཆོད་ཁང་འདི་ནི་ལོ་ངོ་བཞི་བཅུ་ཞེ་དྲུག་གི་རིང་ལ་བརྩིགས་པ་ཡིན་ཡང་ཁྱོད་ཀྱིས་ཉིན་གསུམ་ལ་བརྩིག་ཐུབ་བམ་ཞེས་དྲིས།
JOH 2:21 འོན་ཀྱང་དེ་ནི་སྐྱབས་མགོན་ཡེ་ཤུས་རང་གི་སྐུ་ལུས་ཡིན་པའི་མཆོད་ཁང་ལ་དམིགས་ཏེ་གསུངས་པ་ཡིན།
JOH 2:22 དེའི༌ཕྱིར། ཁོང་ཉིད་སྐུ་གཤེགས་པ་ནས་སླར་གསོན་པའི་རྗེས༌སུ། ཐུགས་སྲས་རྣམས་ཀྱིས་ཁོང་གི་གསུང་དེ་དྲན༌ནས། གསུང་རབ་ཀྱི་མདོ་དང་སྐྱབས་མགོན་ཡེ་ཤུས་གསུངས་པའི་བཀའ་ལ་དད་པར་གྱུར༌ཏོ།།
JOH 2:23 དེ་ཡང་པེ་སག་གི་དུས་ཆེན་ལ་སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་བཞུགས༌ཤིང༌། མི་མང་པོས་ཁོང་གིས་མཛད་པའི་གྲུབ་རྟགས་རྣམས་མཐོང་སྟེ་ཁོང་གི་མཚན་ལ་དད་པར་གྱུར་ཏོ།།
JOH 2:24 འོན་ཀྱང་སྐྱབས་མགོན་ཡེ་ཤུས་མི་ཐམས་ཅད་མཁྱེན་པས་དེ་དག་ལ་བློ་མི་གཏོད༌ཅིང༌།
JOH 2:25 ཁོང་གིས་མིའི་སེམས་སུ་ཅི་ཡོད་པའང་མཁྱེན་པས་སུས་ཀྱང་མི་གཞན་ཅི་འདྲ་ཡིན་པར་བདེན་དཔང་བྱེད་དགོས་དོན་ཅི་ཡང་མེད༌དོ།།
JOH 3:1 དེ་ཡང་ནེ་ཀོ་དེམ་ཞེས་པའི་ཕ་རུ་ཤི་པ་ཞིག་ཡོད་པ་དེ་ནི་ཡ་ཧུ་དཱ་པའི་ཆོས་དཔོན་ཞིག་ཡིན༌ལ།
JOH 3:2 ནམ་ཞིག་གི་མཚན༌མོར། མི་དེ་སྐྱབས་མགོན་ཡེ་ཤུར་མཇལ་དུ་ཡོང༌སྟེ། རཱབ་པེ་ལགས། དཀོན་མཆོག་ནི་ཁྱེད་དང་ལྷན་དུ་མི་བཞུགས༌ན། ཁྱེད་ཀྱིས་མཛད་པའི་གྲུབ་རྟགས་རྣམས་མི་གཞན་སུས་ཀྱང་སྟོན་པར་མི་ནུས༌པས། ཁྱེད་ནི་དཀོན་མཆོག་གི་དྲུང་ནས་ཕེབས་པའི་སློབ་དཔོན་ཞིག་ཡིན་པ་ངེད་རྣམས་ཀྱིས་ཤེས་ཞེས་ཞུས་པ༌ན།
JOH 3:3 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ལ་ཡང་དག་པར་བདེན་པར་སྨྲ༌སྟེ། གལ་ཏེ་མི་ཞིག་ཡང་བསྐྱར་མ་སྐྱེས་ན་དཀོན་མཆོག་གི་རྒྱལ་སྲིད་མཐོང་མི་ནུས་ཞེས་གསུངས་སོ།།
JOH 3:4 ཡང་ནེ་ཀོ་དེམ་ན༌རེ། མི་ཞིག་ཆེར་སྐྱེས་ནས་རྒས་ཚེ་ཡང་བསྐྱར་ཇི་ལྟར་སྐྱེ་ནུས༌སམ། སླར་ཡང་མའི་མངལ་དུ་ཞུགས་ཏེ་ལན་གཉིས་པར་སྐྱེ་སྲིད་དམ་ཞེས་ཞུས་པ༌ལ།
JOH 3:5 ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ལ་ཡང་དག་པར་བདེན་པར་སྨྲ༌སྟེ། གལ་ཏེ་མི་ཞིག་ཆུ་ དང་དམ་པའི་ཐུགས་ཉིད་ཀྱི་སྒོ་ནས་མ་སྐྱེས་ན་དཀོན་མཆོག་གི་རྒྱལ་སྲིད་དུ་ཞུགས་མི་ཐུབ་བོ།།
JOH 3:6 ཤ་ཁྲག་གི་ཕུང་བོ་ལས་སྐྱེས་པ་ནི་ཤ་ཁྲག་གི་ཕུང་བོ་ཡིན་ཞིང་དམ་པའི་ཐུགས་ཉིད་ལས་སྐྱེས་པ་ནི་སེམས་ཉིད་ཡིན།
JOH 3:7 བདག་གིས་ཁྱོད་རང་ཡང་བསྐྱར་སྐྱེ་དགོས་པ་ཡིན་ཞེས་སྨྲས་པ་ལ་ཁྱོད་ཀྱིས་ངོ་མཚར་བར་མ་འདོད༌ཅིག
JOH 3:8 རླུང་ནི་རང་བཞིན་དུ་གཡུག་ཅིང་ཁྱོད་ཀྱིས་རླུང་གི་སྒྲ་ཐོས་ཀྱང་རླུང་དེ་གང་ནས་ཡོང་ཞིང་གང་དུ་རྒྱུ་བ་མི་ཤེས་པ༌ལྟར། དམ་པའི་ཐུགས་ཉིད་ལས་སྐྱེས་པ་ཐམས་ཅད་ཀྱང་དེ་བཞིན་ཡིན་ཞེས་གསུངས་པ༌དང༌།
JOH 3:9 ཡང་ནེ་ཀོ་དེམ་ན༌རེ། དེས་ན་དོན་འདི་རྣམས་ཇི་ལྟར་འབྱུང་སྲིད་དམ་ཞེས་ཞུས་པ༌ལ།
JOH 3:10 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ནི་ཡེས་ར་ཨེལ་མི་རིགས་ཀྱི་སློབ་དཔོན་ཡིན་ཡང་དོན་དེ་རྣམས་ཀྱང་མི་ཤེས༌སམ།
JOH 3:11 བདག་གིས་ཁྱོད་ལ་ཡང་དག་པར་བདེན་པར་སྨྲ༌སྟེ། ངེད་ཅག་གིས་ཅི་ཤེས་པ་སྨྲས་ཤིང་དངོས་སུ་མཐོང་བ་དེར་བདེན་དཔང་བྱས་པ༌ཡིན། འོན༌ཀྱང༌། ཁྱོད་ཅག་གིས་ངེད་རྣམས་ཀྱི་བདེན་དཔང་ཁས་མི་ལེན༌པ་རེད།
JOH 3:12 བདག་གིས་ཁྱོད་རྣམས་ལ་ས་གཞིའི་སྟེང་གི་དོན་རྣམས་བཤད་པར་ཁྱོད་ཅག་ཡིད་མི་ཆེས༌ན། ནམ་མཁའི་ཞིང་ཁམས་ཀྱི་དོན་རྣམས་སྨྲས་ཀྱང་ཁྱོད་ཅག་ཇི་ལྟར་ཡིད་ཆེས་པར་འགྱུར༌རམ།
JOH 3:13 དེ་ཡང་ནམ་མཁའི་ཞིང་ཁམས་ནས་ཕེབས་པའི་མིའི་བུ་ལས༌གཞན། སུ་ཞིག་ཀྱང་ནམ་མཁའི་ཞིང་ཁམས་སུ་འཕགས་མ་མྱོང༌།
JOH 3:14 སྔོན་ཆད་མོ་ཤེ་ཡིས་དབེན་སྟོང་ཡུལ་ནས་སྦྲུལ་ཞིག་གྱེན་དུ་བསྒྲེངས་པ༌ལྟར། མིའི་བུ་ཡང་གྱེན་དུ་བསྒྲེང་བར་འགྱུར་དགོས༌ཏེ།
JOH 3:15 མིའི་བུ་ལ་དད་པ་བྱེད་མཁན་ཐམས་ཅད་ལ་མཐའ་མེད་པའི་ཚེ་སྲོག་འཐོབ་པར་འགྱུར་བའི་ཕྱིར༌ཡིན།
JOH 3:16 དཀོན་མཆོག་གིས་འཇིག་རྟེན་ལ་གཅེས་ཤིང་བྱམས༌ཏེ། ཁོང་གི་སྲས་ལ་དད་པ་བྱེད་མཁན་ཐམས་ཅད་ལ་ནམ་ཡང་འཇིག་པ་མེད་ཅིང་མཐའ་མེད་པའི་ཚེ་སྲོག་འཐོབ་པའི་ཕྱིར། ཁོང་གིས་རང་ཉིད་ཀྱི་སྲས་གཅིག་པོའང་མི་ཀུན་ལ་གནང༌བའོ།།
JOH 3:17 དཀོན་མཆོག་གིས་རང་གི་སྲས་འཇིག་རྟེན་དུ་མངགས་པ་ནི་འཇིག་རྟེན་གྱི་མི་ཐམས་ཅད་སྐྱོབ་པར་མཛད་པ་ལས་ཉེས་ཆད་གཅོད་པར་མངགས་པ་མ་ཡིན་ནོ།།
JOH 3:18 དཀོན་མཆོག་གི་སྲས་ལ་དད་པ་བྱེད་མཁན་རྣམས་ལ་ཉེས་ཆད་གཅོད་པར་མི་འགྱུར༌ཡང༌། དཀོན་མཆོག་གི་སྲས་གཅིག་པོའི་མིང་ལ་དད་པ་མི་བྱེད་པ་རྣམས་ཀྱིས་དད་པ་མ་བྱས་པས་ཉེས་ཆད་བཅད་ཟིན༌པ་ཡིན།
JOH 3:19 ཉེས་ཆད་གཅོད་པ་ནི་འདི་ལྟ༌སྟེ། གཟི་འོད་དེ་ཉིད་འཇིག་རྟེན་དུ་ཕེབས་ནའང་མི་རྣམས་ཀྱི་སྤྱོད་པ་ངན༌པས། དེ་རྣམས་གཟི་འོད་ལ་མི་དགའ་བར་མུན་ནག་ལ་ཞེན་ཅིང་ཆགས་པའི་ཕྱིར༌ཡིན།
JOH 3:20 ངན་པ་སྤྱོད་མཁན་ཐམས་ཅད་ཀྱིས་རང་གི་སྤྱོད་པ་ངན་པ་དེ་ཕྱིར་མངོན་པར་དོགས༌ནས། གཟི་འོད་ལ་སྡང་ཞིང་གཟི་འོད་ཀྱི་དྲུང་དུའང་མི་ཡོང༌།
JOH 3:21 འོན༌ཀྱང༌། བདེན་དོན་ཉམས་ལེན་བྱེད་མཁན་རྣམས་རང་གིས་བྱེད་པ་ཐམས་ཅད་དཀོན་མཆོག་ལ་བརྟེན་ནས་ཕྱིར་མངོན་པའི་ཆེད༌དུ། གཟི་འོད་ཀྱི་དྲུང་དུ་ཡོང་བ་ཡིན་ཞེས་གསུངས༌སོ།།
JOH 3:22 དོན་དེ་དག་བྱུང་བའི་རྗེས༌སུ། སྐྱབས་མགོན་ཡེ་ཤུ་དང་ཐུགས་སྲས་རྣམས་ཡ་ཧུ་དཱའི་ཡུལ་དུ་ཕེབས༌ཤིང༌། ཡུལ་དེར་ལྷན་དུ་བཞུགས་པ་དང་ཁོང་གིས་མི་རྣམས་ལ་ཁྲུས་གསོལ་མཛད།
JOH 3:23 ཁྲུས་གསོལ་མཁན་ཡོ་ཧ་ནན་གྱིས་ཀྱང་སཱ་ལིམ་ཡུལ་དང་ཉེ་བའི་ཨེ་ནོན་ཞེས་པའི་གནས་སུ་ཁྲུས་གསོལ་བྱེད་བཞིན་ཡོད༌དེ། གནས་དེ་རུ་ཆུ་མང་པོ་ཡོད་པས་མི་རྣམས་ཀྱང་གནས་དེར་ཕྱིན་ནས་ཁྲུས་གསོལ་ལ་ཞུགས་སོ།།
JOH 3:24 དེའི་དུས་སུ་ཡོ་ཧ་ནན་ད་དུང་བཙོན་དུ་བཅུག་མེད༌པའོ།།
JOH 3:25 དུས༌དེར། ཡོ་ཧ་ནན་གྱི་སློབ་མ་རྣམས་དང་ཡ་ཧུ་དཱ་པ་ཞིག་གཙང་སྦྲའི་ལུགས་སྲོལ་ཐད་ལ་རྩོད་པ་བྱུང༌བས།
JOH 3:26 ཡོ་ཧ་ནན་གྱི་དྲུང་དུ་ཡོང་སྟེ་ན༌རེ། རཱབ་པེ་ལགས། དེ་སྔོན་ཡོར་དན་གཙང་པོའི་ཕ་རོལ་ཏུ་ཁྱེད་དང་མཉམ་དུ་བཞུགས་ཤིང་། ཁྱེད་ཀྱིས་བདེན་དཔང་བྱས་པ་དེས་ད་ལྟ་ཁྲུས་གསོལ་མཛད་ཀྱིན༌འདུག མི་ཀུན་ཀྱང་ཁོང་གི་དྲུང་དུ་འགྲོ་བཞིན་ཡོད་ཅེས་ཞུས་པ༌ལ།
JOH 3:27 ཡོ་ཧ་ནན་གྱིས་འདི་སྐད༌དུ། གལ་ཏེ་ནམ་མཁའི་ཞིང་ཁམས་ནས་གནང་བ་མིན་ན་མི་ཞིག་ལ་ཅི་ཡང་འཐོབ་མི་སྲིད།
JOH 3:28 ཡང་དེ་སྔོན་བདག་གིས་འདི་སྐད༌དུ། ང་ནི་སྐྱབས་མགོན་མཱ་ཤི་ཀ་མིན༌ཏེ། སྐྱབས་མགོན་མཱ་ཤི་ཀའི་སྔོན་དུ་མངགས་པ་དེ་ཡིན་ཞེས་སྨྲས་མྱོང་བ༌ལྟར། ད་ལྟ་ཁྱོད་ཅག་གིས་ཀྱང་ང་རང་ལ་བདེན་དཔང་བྱས་ཆོག༌པ་ཡིན།
JOH 3:29 བག་མ་ལེན་མཁན་ནི་མག་པ་ཡིན༌ཏེ། ཁོའི་གྲོགས་པོ་ལངས་ནས་བསྡད་ཅིང་མག་པའི་སྐད་ཐོས་པས་སེམས་ཤིན་ཏུ༌དགའ། གྲོགས་པོ་དེ་བཞིན་དུ་བདག་ཀྱང་དགའ་སྤྲོས་ཁེངས༌པ་ཡིན།
JOH 3:30 དེ་བས་ཁོང་ཉིད་འཕེལ་ཞིང་ང་རང་འགྲིབ་པར་འགྱུར་དགོས་སོ།།
JOH 3:31 ཡང་སྟེང་ནས་བྱོན་པ་དེ་ཉིད་ཐམས་ཅད་ལས་བླ་ན༌མཐོ་བ་ཡིན། ས་གཞི་ལ་གཏོགས་པ་དེ་རྣམས་ས་ཐོག་ཏུ་གནས་ཤིང་ས་ཐོག་གི་གཏམ་ཁོ་ན་གླེང་ངོ༌།། འོན་ཀྱང་སྟེང་ནས་བྱོན་པ་དེ་ཉིད་ཐམས་ཅད་ལས་བླ་ན༌མཐོ་བ་ཡིན།
JOH 3:32 སྐྱབས་མགོན་ཡེ་ཤུས་རང་ཉིད་ཀྱི་མཐོང་ཐོས་རྣམས་ལ་བདེན་དཔང་མཛད་ནའང་མི་གཞན་སུས་ཀྱང་ཁས་མ་བླངས།
JOH 3:33 ཁོང་གིས་མཛད་པའི་བདེན་དཔང་ཁས་ལེན་མཁན་རྣམས་ཀྱིས་དཀོན་མཆོག་ནི་བདེན་པ་ཡིན་པ་ར་སྤྲོད་བྱས་སོ།།
JOH 3:34 དེ་ཡང་དཀོན་མཆོག་གིས་མངགས་པ་དེས་དཀོན་མཆོག་གི་བཀའ་གསུང༌ཞིང༌། དེ་ནི་དཀོན་མཆོག་གིས་ཁོང་ལ་དམ་པའི་ཐུགས་ཉིད་རྫོགས་མཐའ་མེད་པ་ཞིག་གནང་བའི་ཕྱིར༌རོ།།
JOH 3:35 ཡང་ཡབ་ཀྱིས་རང་གི་སྲས་ལ་བྱམས་ཤིང་བརྩེ་བར་མཛད་ནས་ཐམས་ཅད་སྲས་ཀྱི་ལག་ཏུ་སྤྲད།
JOH 3:36 ཡང་སྲས་དེ་ལ་དད་པ་བྱེད་མཁན་ལ་མཐའ་མེད་པའི་ཚེ་སྲོག་འཐོབ་ཅིང༌། སྲས་ལ་དད་པ་མི་བྱེད་པ་ལ་མཐའ་མེད་པའི་ཚེ་སྲོག་མི་འཐོབ༌པར། དཀོན་མཆོག་གི་ཐུགས་ཁྲོ་ནི་ནམ་ཡང་མི་དེའི་སྟེང་དུ་གནས་པར་འགྱུར་ཞེས་གསུངས༌སོ།།
JOH 4:1 དེ་ཡང་གཙོ་བོས་རྗེས་འབྲང་པ་བསྡུས་པ་དང་ཁྲུས་གསོལ་མཛད་པ་ནི་ཁྲུས་གསོལ་མཁན་ཡོ་ཧ་ནན་ལས་ཀྱང་མང་པོ་ཡིན་པ་ཕ་རུ་ཤི་པ་རྣམས་ཀྱིས་ཐོས་སོ།།
JOH 4:2 དོན་དམ་དུ་སྐྱབས་མགོན་ཡེ་ཤུས་དངོས་སུ་ཁྲུས་གསོལ་མཛད་པ་མ་ཡིན་པར་ཁོང་གི་ཐུགས་སྲས་རྣམས་ཀྱིས་ཁྲུས་གསོལ་བྱས་པ༌ཡིན།
JOH 4:3 དེ་ནས་སྐྱབས་མགོན་ཡེ་ཤུ་ཁོང་ཉིད་ཡ་ཧུ་དཱའི་ཡུལ་དང་ཁ་བྲལ་ནས་ག་ལིལ་ཡུལ་དུ་ཕྱིར་ཕེབས༌སོ།།
JOH 4:4 ཁོང་ཉིད་སཱ་མར་ཡ་ཡུལ་བརྒྱུད་ནས་ཕེབས་དགོས༌ཤིང༌།
JOH 4:5 སཱ་མར་ཡ་ཡུལ་གྱི་སི་གར་གྲོང་རྡལ་དུ་སླེབས་པ༌དང༌། གྲོང་རྡལ་དེ་སྔོན་ཆད་ཡ་ཀོབ་ཀྱིས་རང་གི་བུ་ཡོ་སེབ་ལ་གནང་བའི་ས་ཆ་དེ་དང་ཐག་ཉེ༌ཞིང༌།
JOH 4:6 དེ་རུ་ཡ་ཀོབ་ཀྱི་ཁྲོན་པའང༌ཡོད། དེའི་ཚེ་སྐྱབས་མགོན་ཡེ་ཤུའང་སྐུ་ངལ་ནས་ཁྲོན་པ་དེའི་འགྲམ་དུ་བཞུགས་པ༌དང༌། དུས་དེ་ནི་ཉིན་གུང་ཙམ་ ཡིན༌ནོ།།
JOH 4:7 སྐབས༌དེར། ཁོང་གི་ཐུགས་སྲས་རྣམས་གྲོང་རྡལ་དེ་ལ་ཁ་ཟས་ཉོ་རུ་སོང་ངོ༌།། དེ་ནས་སཱ་མར་ཡ་ཡུལ་གྱི་བུད་མེད་ཅིག་ཆུ་ལེན་དུ་ཡོང་བ༌དང༌། སྐྱབས་མགོན་ཡེ་ཤུས་བུད་མེད་དེ་ལ་འདི་སྐད༌དུ། བདག་ལ་འཐུང་ཆུ་ཉུང་ཙམ་སྟེར་བར་མཛོད་ཅེས་གསུངས་པ༌ན།
JOH 4:9 སཱ་མར་ཡ་ཡུལ་གྱི་བུད་མེད་ན༌རེ། ཁྱེད་ནི་ཡ་ཧུ་དཱ་པ་ཞིག་ཡིན་པས་སཱ་མར་ཡ་ཡུལ་གྱི་བུད་མེད་བདག་ལྟ་བུ་ལས་ཆུ་སློང་ངམ་ཞེས་སྨྲས་སོ།། དེ་ནི་མ་གཞི་ཡ་ཧུ་དཱ་པ་རྣམས་ཀྱིས་སཱ་མར་ཡ་པ་རྣམས་དང་འབྲེལ་འདྲིས་མི་བྱེད་པའི་ཕྱིར༌རོ།།
JOH 4:10 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་དཀོན་མཆོག་གི་གནང་སྦྱིན་དང་ཁྱོད་ལ་ཆུ་གནང་བར་མཛོད་ཅེས་ཟེར་མཁན་དེ་སུ་ཡིན་པ་ཤེས༌ན། ཁྱོད་ཀྱིས་སྔ་མོ་ནས་མི་དེ་བསྟེན་ཅིང་ཁོས་ཀྱང་སྔ་མོ་ནས་ཁྱོད་ལ་ཚེ་སྲོག་དང་ལྡན་པའི་ཆུ་ གནང་ངེས་ཡིན་ཞེས་གསུངས་སོ།།
JOH 4:11 ཡང་བུད་མེད་ན༌རེ། ཇོ་བོ་ལགས། ཁྲོན་པ་འདི་གཏིང་ཟབ་ཅིང་ཁྱེད་ལ་ཆུ་བཅུ་བྱེད་ཀྱི་ཡོ་བྱད་ཀྱང་མེད་པས་ཚེ་སྲོག་དང་ལྡན་པའི་ཆུ་དེ་གང་ནས་ལེན༌ནམ།
JOH 4:12 ངེད་ཅག་གི་མེས་པོ་ཡ་ཀོབ་ཀྱིས་ཁྲོན་པ་འདི་ངེད་རྣམས་ལ་གནང༌ཞིང༌། ཁོང་དང་རང་གི་བུ་རྣམས་དང་གཞན་ཡང་ཕྱུགས་ཟོག་ཐམས་ཅད་ཀྱིས་ཀྱང་ཁྲོན་པའི་ཆུ་འདི་འཐུངས་པ་ཡིན། འོན་ཀྱང་ཁྱེད་ནི་ཡ་ཀོབ་ལས་ཀྱང་ཆེན་པོ་ཞིག་ཡིན་ནམ་ཞེས་སྨྲས་སོ།།
JOH 4:13 ཡང་སྐྱབས་མགོན་ཡེ་ཤུས་འདི་སྐད༌དུ། ཆུ་འདི་འཐུང་བ་རྣམས་སླར་ཡང་སྐོམ་པར་འགྱུར༌མོད།
JOH 4:14 འོན་ཀྱང་སུ་ཞིག་གིས་ངས་གནང་བའི་ཆུ་འཐུངས་ན་ནམ་ཡང་སྐོམ་པར་མི་འགྱུར། ངས་གནང་བའི་ཆུ་འདི་མི་སུ་ཞིག་གི་སེམས་སུ་ཆུ་མིག་འཕྱུར་བ་ལྟ་བུ་ཞིག་ཏུ་གྱུར་ཏེ་མཐའ་མེད་པའི་ཚེ་སྲོག་འཐོབ་པར་བྱེད་ཅེས་གསུངས་སོ།།
JOH 4:15 ཡང་བུད་མེད་ན༌རེ། ཇོ་བོ་ལགས། དེས་ན་ཆུ་དེ་བདག་ལ་གནང་བར༌མཛོད། ངས་ཆུ་དེ་འཐུངས་ན་ང་རང་སྐོམ་མི་སྲིད་ལ་ལམ་རིང་པོ་འདི་ལྟ་བུར་ཆུ་ལེན་དུའང་ཡོང་མི་དགོས་ཞེས་སྨྲས་སོ།།
JOH 4:16 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རང་སོང་ནས་རང་གི་སྐྱེས་པའང་འདིར་བོས་ཤིག་ཅེས་གསུངས་པ༌ན།
JOH 4:17 བུད་མེད་ན༌རེ། ང་ལ་སྐྱེས་པ་མེད་ཅེས་སྨྲས་སོ།། ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་སྐྱེས་པ་མེད་ཅེས་ཟེར་བ་བདེན་འདུག
JOH 4:18 སྔོན་ཆད་ཁྱོད་ལ་སྐྱེས་པ་ལྔ་ཡོད་མྱོང༌། ད་ལྟ་ཡོད་པ་དེའང་ཁྱོད་ཀྱི་སྐྱེས་པ་མ་ཡིན་པས་ཁྱོད་ཀྱིས་གཏམ་བདེན་པར་སྨྲས་ཞེས་གསུངས་པ་ན།
JOH 4:19 བུད་མེད་ན༌རེ། ཇོ་བོ་ལགས། བདག་གིས་ཁྱེད་རང་ནི་ལུང་སྟོན་པ་ཞིག་ཡིན་པ་ཤེས།
JOH 4:20 ངེད་ཅག་གི་ཕ་མེས་ཀྱིས་རི་བོ་འདིའི་སྟེང་ནས་དཀོན་མཆོག་ལ་བསྙེན་བཀུར་བྱས་པ༌ཡིན། འོན་ཀྱང་། ཡ་ཧུ་དཱ་པ་ཁྱོད་རྣམས་ཀྱིས་དཀོན་མཆོག་ལ་བསྙེན་བཀུར་བྱེད་དགོས་ཟེར་བའི་གནས་ནི་ཡེ་རུ་སཱ་ལེམ་ཡིན་ཞེས་སྨྲས་སོ།།
JOH 4:21 ཡང་སྐྱབས་མགོན་ཡེ་ཤུས་འདི་སྐད༌དུ། བུད་མེད་ཁྱོད་ཀྱིས་བདག་ལ་ཡིད་ཆེས་པར༌གྱིས། རི་བོ་འདི་དང་ཡེ་རུ་སཱ་ལེམ་གང་ཡང་མ་ཡིན༌པར། ཡབ་ལ་བསྙེན་བཀུར་བྱེད་པའི་དུས་ཤིག་སླེབ་པར་འགྱུར།
JOH 4:22 ཁྱོད་རྣམས་ཀྱིས་རྒྱུས་མེད་པ་དེ་ལ་བསྙེན་བཀུར་བྱེད་པ༌དང༌། ངེད་རྣམས་ཀྱིས་རྒྱུས་ཡོད་པ་དེ་ལ་བསྙེན་བཀུར་བྱེད་པ་ཡིན༌ཏེ། ཅིའི་ཕྱིར་ཞེ་ན། ཐར་པ་ནི་ཡ་ཧུ་དཱ་པ་ལས་བྱུང་བ་ཡིན།
JOH 4:23 འོན་ཀྱང་། ཡབ་ལ་བསྙེན་བཀུར་བྱེད་པའི་དུས་ཤིག་སླེབ་ངེས་ཤིང་ད་ལྟའི་དུས༌ཡིན་ཏེ། བསྙེན་བཀུར་རྣམ་དག་བྱེད་མཁན་རྣམས་ཀྱིས་ཡབ་ལ་དམ་པའི་ཐུགས་ཉིད་དང་བདེན་པ་ཉིད་ཀྱི་སྒོ་ནས་བསྙེན་བཀུར་བྱེད་པར་འགྱུར་རོ།། ཅིའི་ཕྱིར་ཞེ་ན། ཡབ་ཀྱིས་བསྙེན་བཀུར་བྱེད་མཁན་མི་དེ་ལྟ་བུ་རྣམས་འཚོལ་བའི་ཕྱིར་ཡིན།
JOH 4:24 དཀོན་མཆོག་ནི་ཐུགས་ཉིད་ཡིན་པས་ཁོང་ལ་བསྙེན་བཀུར་བྱེད་མཁན་རྣམས་ཀྱིས་དམ་པའི་ཐུགས་ཉིད་དང་བདེན་པ་ཉིད་ཀྱི་སྒོ་ནས་བསྙེན་བཀུར་བྱེད་དགོས་ཞེས་གསུངས་སོ།།
JOH 4:25 ཡང་བུད་མེད་ན༌རེ། ངས་སྐྱབས་མགོན་མཱ་ཤི་ཀ་སྟེ་ཁི་རིའི་སི་ཐོ་ཟེར་བ་དེ་ཕེབས་ངེས་པ་ཤེས༌ལ། ཁོང་ཉིད་ཕེབས་ནས་ངེད་རྣམས་ལ་དོན་ཐམས་ཅད་གསུང་བར་འགྱུར་ཞེས་སྨྲས་པ༌ལ།
JOH 4:26 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་གླེང་བཞིན་པའི་མི་དེ་ནི་ང་རང་ཡིན་ཞེས་གསུངས༌སོ།།
JOH 4:27 དེའི་ཚེ་ཐུགས་སྲས་རྣམས་ཕྱིར་ལོག་པ༌དང་། སྐྱབས་མགོན་ཡེ་ཤུས་བུད་མེད་ཅིག་ལ་གསུང་གླེང་མཛད་ཀྱིན་ཡོད་པ་མཐོང་སྟེ་ཧ་ལས༌པ་རེད། འོན་ཀྱང་སུས་ཀྱང་ཁོང་ལ་ཁྱེད་ཀྱིས་ཅི་དགོངས༌སམ། བུད་མེད་དེ་ལ་གསུང་གླེང་མཛད་དོན་ཅི་ཞེས་འདྲི་མ་ཕོད་དོ།།
JOH 4:28 དེ་ནས་བུད་མེད་དེས་རང་གི་ཆུ་ཟོ་བསྐྱུར་ཏེ་གྲོང་རྡལ་དུ་སོང་ནས་མི་རྣམས་ལ་ན༌རེ།
JOH 4:29 ཁྱོད་རྣམས་ཤོག་དང་། འདིར་མི་ཞིག་ཡོད་པར་ལྟོས་ཤིག དེས་ངས་བྱས་པའི་དོན་ཐམས་ཅད་རེ་རེ་བཞིན་གསུངས་པས་ཁོ་རང་ནི་སྐྱབས་མགོན་མཱ་ཤི་ཀ་ཡིན་ཀྱང་སྲིད་ཅེས་སྨྲས་པ༌དང༌།
JOH 4:30 མི་དེ་རྣམས་ཀྱང་གྲོང་རྡལ་ལས་ཕྱིར་ཐོན་ཏེ་སྐྱབས་མགོན་ཡེ་ཤུའི་ཕྱོགས་སུ་ཆས༌སོ།།
JOH 4:31 དེའི་དུས༌སུ། ཐུགས་སྲས་རྣམས་ན༌རེ། རཱབ་པེ་ལགས། ཞལ་ཟས་བཞེས་རོགས་ཞེས་ནན་གྱིས་ཞུས་ནའང་།
JOH 4:32 ཁོང་གིས་ཐུགས་སྲས་རྣམས་ལ་འདི་སྐད༌དུ། བདག་ལ་ཁ་ཟས་ཡོད་ཀྱང་ཁྱོད་ཅག་གིས་ཟས་དེ་ཅི་ཡིན་མི་ཤེས་ཞེས་གསུངས་པས།
JOH 4:33 ཐུགས་སྲས་རྣམས་ཕན་ཚུན་ན༌རེ། ཡང་ན་མི་ཞིག་གིས་ཁོང་ལ་ཁ་ཟས་ཕུལ་བ་ཡིན་ནམ་ཞེས་སྨྲས་སོ།།
JOH 4:34 དེ་ནས་སྐྱབས་མགོན་ཡེ་ཤུས་འདི་སྐད༌དུ། ང་རང་མངགས་མཁན་གྱི་དགོངས་པ་བཞིན་དུ་བྱེད་པ་དང་ཁོང་གི་ཆོས་དོན་སྒྲུབ་པ་དེ་ནི་བདག་གི་ཁ་ཟས་ཡིན།
JOH 4:35 ཁྱོད་ཅག་གི་ཁ་དཔེ༌ལ། ཞིང་འབྲེག་པའི་དུས་ལ་ད་དུང་ཟླ་བ་བཞི་ཡོད་ཅེས་ཟེར་བ་མིན༌ནམ། འོན་ཀྱང་བདག་གིས་ཁྱོད་རྣམས་ལ་འདི་སྐད་སྨྲ༌སྟེ། ཁྱོད་ཅག་གིས་ཞིང་ལ་ལྟོས༌དང༌། ལོ་ཏོག་སྨིན་པར་གྱུར་པས་ཞིང་འབྲེག་རན༌ཏེ།
JOH 4:36 ཞིང་འབྲེག་མཁན་ལ་གླ་ཆ་ཐོབ་ཟིན་པ༌དང༌། མཐའ་མེད་པའི་ཚེ་སྲོག་གི༌ཆེད་དུ་འབྲས་བུ་བསྡུ་གསོག་བྱེད་བཞིན་ཡོད་ལ། དེ་ནི་ས་བོན་འདེབས་མཁན་དང་ཞིང་འབྲེག་མཁན་གཉིས་ཀ་མཉམ་དུ་དགའ་ཞིང་སྤྲོ་བར་འགྱུར་བའི་ཕྱིར་རོ།།
JOH 4:37 ཡང་ཁ་དཔེ༌ལ། མི་དེ་ཡིས་ས་བོན༌བཏབ།། མི་འདི་ཡིས་འབྲུ་རིགས༌བསྡུས།། ཞེས་པ་དེ་བདེན༌ནོ།།
JOH 4:38 བདག་གིས་ཁྱོད་རྣམས་ངལ་བའི་ལས་ལ་མ་བརྟེན་པ་གང་དེ་བསྡུ་བར་མངགས་པ་ཡིན། མི་གཞན་གྱིས་ངལ་བའི་ལས་ལ་བརྟེན་ཅིང་ཁྱོད་ཅག་གིས་ངལ་བའི་འབྲས་བུ་དེ་ལོངས་སུ་སྤྱད་པ་ཡིན་ཞེས་གསུངས༌སོ།།
JOH 4:39 དེ་ཡང་སྐྱབས་མགོན་ཡེ་ཤུས་བདག་གིས་ཅི་བྱས་ཐམས་ཅད་གསུངས་བྱུང་ཞེས་བུད་མེད་དེས་བདེན་དཔང་བྱས༌པས། སི་གར་གྲོང་རྡལ་གྱི་སཱ་མར་ཡ་པ་མང་པོ་ཞིག་གིས་ཀྱང་སྐྱབས་མགོན་ཡེ་ཤུ་ལ་དད་པ་བྱས་པ་རེད།
JOH 4:40 དེ་ནས་སཱ་མར་ཡ་པ་རྣམས་སྐྱབས་མགོན་ཡེ་ཤུའི་དྲུང་དུ་ཡོང་ནས་ཁོ་རྣམས་དང་མཉམ་དུ་བཞུགས་པར་ཞུས་པ༌ན། ཁོང་ཡང་ཉིན་གཉིས་ཀྱི་རིང་ལ་གནས་དེར་བཞུགས།
JOH 4:41 ཁོང་གིས་ཆོས་གསུངས་པས་དད་པ་བྱེད་མཁན་ཡང་སྔར་ལས་ཇེ་མང་དུ་གྱུར་ཏོ།།
JOH 4:42 དེ་ནས་སཱ་མར་ཡའི་དད་ལྡན་རྣམས་ཀྱིས་བུད་མེད་དེ༌ལ། ད་ལྟ་ངེད་རྣམས་ཀྱིས་དད་པ་བྱེད་པ་ནི་ཁྱོད་ཀྱི་གཏམ་ཐོས་པས་མ་ཡིན༌ཏེ། ངེད་ཅག་གིས་རང་གི་རྣ་བས་དངོས་སུ་ཐོས་པས་ཁོང་ནི་དངོས་གནས་འཇིག་རྟེན་གྱི་སྐྱབས་མགོན་ཡིན་པ་ཤེས་ཞེས་སྨྲས༌སོ།།
JOH 4:43 དེ་ཡང་ཉིན་གཉིས་ཀྱི་རྗེས་སུ། སྐྱབས་མགོན་ཡེ་ཤུ་གནས་དེ་དང་བྲལ་ནས་ག་ལིལ་ཡུལ་དུ་ཕེབས་པ་རེད།
JOH 4:44 ཅིའི་ཕྱིར་ཞེ་ན། སྐྱབས་མགོན་ཡེ་ཤུས་སྔ་མོ་ནས་འདི་སྐད༌དུ། ལུང་སྟོན་པ་ལ་རང་ཡུལ་ནས་བརྩི་བཀུར་མི་བྱེད་ཅེས་བདེན་དཔང་མཛད་པས༌སོ།།
JOH 4:45 དེ་ནས་ཁོང་ཉིད་ག་ལིལ་ཡུལ་དུ་བྱོན་པའི༌ཚེ། སྔོན་ཆད་ཡུལ་དེའི་མི་རྣམས་ཡེ་རུ་སཱ་ལེམ་གྱི་པེ་སག་གི་དུས་ཆེན་ལ་སོང༌ཞིང༌། ཁོང་གིས་གནས་དེ་རུ་མཛད་པའི་ངོ་མཚར་བའི་དོན་ཐམས་ཅད་ཀྱང་མཐོང་མྱོང་བས་ཁོང་ལ་བསུ་བ་བྱས་སོ།།
JOH 4:46 དེ་ནས་སྐྱབས་མགོན་ཡེ་ཤུ་སླར་ཡང་ཆུ་རྒུན་ཆང་དུ་བསྒྱུར་མྱོང་བའི་ག་ལིལ་ཡུལ་གྱི་ཀ་ནཱ་རུ་ཕེབས་པ༌དང༌། གནས་དེར་བློན་ཆེན་ཞིག་ཡོད་པའི་བུ་ནི་ཀཱ་ཕར་ན་ཧུམ་དུ་ཡོད་ཅིང་ན་ཚ་བྱུང་བ་རེད།
JOH 4:47 བློན་ཆེན་དེས་སྐྱབས་མགོན་ཡེ་ཤུ་ཁོང་ཉིད་ཡ་ཧུ་དཱའི་ཡུལ་ནས་ག་ལིལ་ཡུལ་དུ་ཕེབས་པ་ཐོས་ཏེ་ཁོང་གི་དྲུང་དུ་ཕྱིན༌ཅིང༌། རང་གི་བུ་འཆི་ལ་ཉེ་བས་ཁོང་ཉིད་ཕེབས་ནས་བུ་ཡི་ནད་འཇོམས་པར་ཞུ་བ་ཞུས་པ༌ལ།
JOH 4:48 སྐྱབས་མགོན་ཡེ་ཤུས་བློན་ཆེན་དེ་ལ་འདི་སྐད༌དུ། ཁྱོད་རྣམས་ཀྱིས་གྲུབ་རྟགས་དང་ངོ་མཚར་བའི་དོན་རྣམས་མ་མཐོང་ན་དད་པ་མི་བྱེད་ཅེས་གསུངས་སོ།།
JOH 4:49 ཡང་བློན་ཆེན་ན༌རེ། ཇོ་བོ༌ལགས། ཁྱེད་རང་བདག་གི་བུ་མ་ཤི་སྔོན་ལ་ཕེབས་པར་མཛོད་ཅེས་ཞུས་སོ།།
JOH 4:50 ཡང་སྐྱབས་མགོན་ཡེ་ཤུས་འདི་སྐད༌དུ། ཕྱིར་སོང་དང་ཁྱོད་ཀྱི་བུ་གསོན་པོར་གནས་ཞེས་གསུངས་པ༌དང༌། བློན་ཆེན་གྱིས་སྐྱབས་མགོན་ཡེ་ཤུས་གསུངས་པའི་བཀའ་ལ་ཡིད་ཆེས་ཏེ་ཕྱིར་ལོག་ཅིང་།
JOH 4:51 ལམ་བར་དུ་བློན་ཆེན་དེའི་གཡོག་པོ་རྣམས་ཁོ་རང་བསུ་རུ་ཡོང་ནས་ཁྱེད་ཀྱི་བུ་གསོན་པོར་འདུག་ཅེས་སྨྲས་སོ།།
JOH 4:52 དེ་ནས་ཁོས་དུས་ནམ་ཞིག་ལ་སོས་པར་གྱུར་རམ་ཞེས་དྲིས་པ༌ལ། དེ་རྣམས་ན༌རེ། ཁ་སང་ཉིན་གུང་གི་ཆུ་ཚོད་གཅིག་ཙམ་ ལ་བུའི་ལུས་ཀྱི་ཚ་བཞག་པའོ་ཞེས་སྨྲས་སོ།།
JOH 4:53 དེ་ནས་བློན་ཆེན་གྱིས་ཁ་སང་སྐྱབས་མགོན་ཡེ་ཤུས་ཁྱོད་ཀྱི་བུ་གསོན་པོར་གནས་ཞེས་གསུངས་པའི་དུས་དེར་རང་གི་བུ་སོས་པར་གྱུར་པའང་ཤེས༌ཏེ། ཁོ་དང་ཁྱིམ་མི་ཐམས་ཅད་སྐྱབས་མགོན་ཡེ་ཤུ་ལ་དད་པར་གྱུར་ཏོ།།
JOH 4:54 དོན་འདི་ནི་སྐྱབས་མགོན་ཡེ་ཤུ་ཁོང་ཉིད་ཡ་ཧུ་དཱའི་ཡུལ་ནས་སླར་ཡང་ག་ལིལ་ཡུལ་དུ་ཕེབས་ཏེ་མཛད་པའི་གྲུབ་རྟགས་གཉིས་པ་ཡིན༌ནོ།།
JOH 5:1 དོན་དེ་དག་བྱུང་བའི་རྗེས༌སུ། ཡ་ཧུ་དཱ་པའི་དུས་ཆེན་ཞིག་ཡོད༌ཅིང༌། སྐྱབས་མགོན་ཡེ་ཤུའང་ཡར་ཡེ་རུ་སཱ་ལེམ་དུ་ཕེབས་པ་རེད།
JOH 5:2 དེ་ཡང་ཡེ་རུ་སཱ་ལེམ་གྱི་ལུག་སྒོ་དང་ཉེ་སར་རྫིང་བུ་ཞིག་ཡོད༌ལ། དེའི་མིང་ལ་ཨིབ་རིའི་མི་རིགས་ཀྱི་སྐད་དུ་པེ་ཐེས་དཱ་ཞེས་ཟེར་ཞིང་དེ་ལ་ཁྱམས་ར་ལྔ་ཡོད་དོ།།
JOH 5:3 དེའི་ནང་དུ་ལོང་བ་དང་གྱོལ་པོ། ལུས་གཟུགས་རིད་པོ་ལ་སོགས་པའི་ནད་པ་མང་པོ་ཉལ་འདུག༌ཅིང༌། རྫིང་ཆུ་དེ་འཕྱུར་བར་སྒུག་ཡོད༌དེ།
JOH 5:4 རྒྱུ་མཚན་ནི་དཀོན་མཆོག་གི་ཕོ་ཉ་ཞིག་དུས་ལྟར་ནམ་མཁའ་ལས་བབས་ཏེ་ཆུ་དཀྲུགས་པ༌ན། ནད་པ་གང་ཞིག་སྔོན་ལ་ཆུའི་ནང་དུ་འཛུལ་བ་དེ་ནད་ལས་ཐར་བ་ཡིན།
JOH 5:5 དེ་རུ་ལོ་ངོ་སོ་བརྒྱད་རིང་ལ་ནད་ཀྱིས་མནར་བའི་མི་ཞིག་ཀྱང་ཡོད༌ལ།
JOH 5:6 སྐྱབས་མགོན་ཡེ་ཤུས་ནད་པ་དེ་ཉལ་ནས་བསྡད་ཡོད་པ་གཟིགས༌ཤིང༌། ནད་ཀྱིས་མནར་ནས་ཡུན་རིང་འགོར་བའང་མཁྱེན་ཏེ་འདི་སྐད༌དུ། ཁྱོད་རང་ནད་ལས་ཐར་འདོད་དམ་ཞེས་གསུངས་པ༌ན།
JOH 5:7 ནད་པ་ན༌རེ། ཇོ་བོ༌ལགས། ཆུ་འཕྱུར་བའི་དུས་སུ་ང་རང་རྫིང་བུའི་ནང་དུ་སྐྱེལ་མཁན་མེད༌པས། ང་རང་ཆུའི་ནང་དུ་འཛུལ་བར་རྩོམ་པ་ན་མི་གཞན་ཞིག་བདག་གི་སྔོན་ལ་ཆུའི་ནང་དུ་འཛུལ་ཟིན་ཞེས་སྨྲས་སོ།།
JOH 5:8 དེ་ནས་སྐྱབས་མགོན་ཡེ་ཤུས་ནད་པ་དེ་ལ་འདི་སྐད༌དུ། ཡར་ལོངས་ལ་རང་གི་ཁྱོགས་ཤིང་ཁུར་ནས་སྐྱོད་ཅིག་ཅེས་གསུངས་པ༌དང༌།
JOH 5:9 དེ་མ་ཐག་ནད་པ་དེ་ནད་ལས་ཐར་ཞིང་ཁྱོགས་ཤིང་ཁུར་ནས་འགྲོ་ཐུབ་པར་གྱུར་ཏོ།། ཉིན་དེ་ནི་ངལ་གསོ་བའི་ཉིན་མོ་ཡིན༌པས།
JOH 5:10 ཡ་ཧུ་དཱ་པ་རྣམས་ཀྱིས་ནད་ལས་ཐར་བའི་མི་དེ༌ལ། དེ་རིང་ནི་ངལ་གསོ་བའི་ཉིན་མོ་ཡིན་པས་ཁྱོད་ཀྱིས་ཁྱོགས་ཤིང་འཁུར་བ་ནི་བཀའ་ཁྲིམས་དང་མི་མཐུན་པ་ཡིན་ཞེས་སྨྲས་པ༌དང༌།
JOH 5:11 མི་དེ་ན༌རེ། བདག་གི་ནད་འཇོམས་པར་མཛད་མཁན་དེས་བདག་ལ་འདི་སྐད༌དུ། རང་གི་ཁྱོགས་ཤིང་ཁུར་ནས་སྐྱོད་ཅིག་གསུངས་པ་ཡིན་ཞེས་སྨྲས་པ༌དང༌།
JOH 5:12 ཡང་དེ་རྣམས་ན༌རེ། ཁྱོད་ལ་རང་གི་ཁྱོགས་ཤིང་ཁུར་ནས་སྐྱོད་ཅིག་ཅེས་ཟེར་མཁན་དེ་སུ་ཡིན་ནམ་ཞེས་དྲིས་སོ།།
JOH 5:13 འོན༌ཀྱང༌། ནད་ལས་ཐར་བའི་མི་དེས་ནད་འཇོམས་མཁན་དེ་སུ་ཡིན་པ་མི་ཤེས༌ཏེ། གནས་དེར་མི་ཚོགས་མང་ཞིང་སྐྱབས་མགོན་ཡེ་ཤུའང་ཁོ་རྣམས་ཀྱི་གྲས་སུ་ཕེབས་པས༌སོ།།
JOH 5:14 དེའི་རྗེས༌སུ། སྐྱབས་མགོན་ཡེ་ཤུས་མཆོད་ཁང་དུ་ནད་ལས་ཐར་བའི་མི་དེ་རྙེད་ནས་འདི་སྐད༌དུ། ལྟོས་དང་། ཁྱོད་རང་ད་ལྟ་ནད་ལས་ཐར་ཏེ་ལུས་ཁམས་བདེ༌བས། ཕྱིས་སུ་དེ་ལས་ལྷག་པའི་སྡུག་བསྔལ་ཆེན་པོ་མི་མྱང་བའི་ཕྱིར་སྡིག་པ་མ་བྱེད་ཅེས་གསུངས་སོ།།
JOH 5:15 དེ་ནས་མི་དེ་ཡ་ཧུ་དཱ་པ་རྣམས་ཀྱི་གམ་དུ་སོང༌སྟེ། རང་གི་ནད་འཇོམས་པར་མཛད་མཁན་དེ་ནི་སྐྱབས་མགོན་ཡེ་ཤུ་ཡིན་པར་སྨྲས༌སོ།།
JOH 5:16 སྐྱབས་མགོན་ཡེ་ཤུས་ངལ་གསོ་བའི་ཉིན་ལ་དེ་ལྟར་མཛད་པས་ཡ་ཧུ་དཱ་པ་རྣམས་ཀྱིས་ཁོང་ལ་གནོད་འཚེ་བྱས།
JOH 5:17 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། བདག་གི་ཡབ་ཀྱིས་ད་ལྟའི་བར་དུ་འཕྲིན་ལས་སྣ་ཚོགས་མཛད༌ཅིང༌། བདག་གིས་ཀྱང་འཕྲིན་ལས་མཛད་པ་ཡིན་ཞེས་གསུངས་པ༌ན།
JOH 5:18 ཡ་ཧུ་དཱ་པ་རྣམས་ཀྱིས་སྔར་ལས་ལྷག་པར་ཁོང་ཉིད་དགྲོང་འདོད༌པ་རེད། རྒྱུ་མཚན་ནི་ཁོང་ཉིད་ངལ་གསོ་བའི་ཉིན་མོའི་ཆོས་ཁྲིམས་དང་འགལ་བར་མ༌ཟད། དཀོན་མཆོག་ནི་རང་གི་ཡབ་ཡིན་ཞེས་ཀྱང་གསུངས༌ཏེ། ཁོང་དང་དཀོན་མཆོག་གཉིས་འདྲ་མཉམ་ཡིན་པར་བྱས་པའི་ཕྱིར༌རོ།།
JOH 5:19 དེ་ནས་སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར༌སྨྲ་སྟེ། ཡབ་ཀྱིས་དོན་གང་ཞིག་མཛད་པ་བཞིན་སྲས་ཀྱིས་ཀྱང་དེ་ལྟར་མཛད༌པས། སྲས་རང་ཉིད་ཀྱིས་ཡབ་ལ་མ་བརྟེན་པར་ལས་ཅི་ཡང་བྱ་མི་ནུས༌ཤིང༌། ཡབ་ཀྱིས་དོན་གང་ཞིག་མཛད་པ་སྲས་ཀྱིས་མཐོང་གྱུར་ན་སྲས་རང་གིས་ཀྱང་དེ་ལྟར་བྱ་ནུས༌སོ།།
JOH 5:20 རྒྱུ་མཚན་ནི་ཡབ་ཀྱིས་སྲས་གཅེས་སུ་འཛིན༌ཞིང་། ཁོང་ཉིད་ཀྱིས་མཛད་བཞིན་པའི་དོན་ཐམས་ཅད་སྲས་ལ་སྟོན་པར་མ༌ཟད། ཁྱོད་རྣམས་ངོ་མཚར་བའི་ཆེད་དུ་འདི་རྣམས་ལས་ཆེ་བའི་འཕྲིན་ལས་ཀྱང་སྟོན་པར་མཛད་ངེས་སོ།།
JOH 5:21 ཡང་ཡབ་ཀྱིས་གཤིན་པོ་རྣམས་ཇི་ལྟར་སླར་གསོན་པར་མཛད་དེ་ཚེ་སྲོག་གནང་བ༌བཞིན། སྲས་ཀྱིས་ཀྱང་རང་གི་འདུན་པ་བཞིན་མི་རྣམས་ལ་ཚེ་སྲོག་གནང་བ་ཡིན།
JOH 5:22 ཡང་ཡབ་ཀྱིས་མི་སུ་ལའང་ལེགས་ཉེས་ཀྱི་ཁྲིམས་ཐག་མི་གཅོད་པར་དབང་དེ་ཐམས་ཅད་སྲས་ལ་སྤྲད་པ་ཡིན་ནོ།།
JOH 5:23 དེ་ནི་མི་ཐམས་ཅད་ཀྱིས་ཡབ་ལ་མོས་གུས་བྱེད་པ་ལྟར་སྲས་ལའང་མོས་གུས་བྱེད་པའི་ཕྱིར༌ཡིན། འོན་ཀྱང་སུ་ཞིག་གིས་སྲས་ལ་མོས་གུས་མི་བྱེད་ན། སྲས་མངགས་མཁན་ཏེ་ཡབ་ལའང་མོས་གུས་མི་བྱེད།
JOH 5:24 ཡང་བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། སུ་ཞིག་གིས་བདག་གི་བཀའ་ལ་ཉན་ཞིང་ང་རང་མངགས་མཁན་ལ་དད་པ་བྱས་ཡོད་པ་ཡིན༌ན། མི་དེ་རྣམས་ལ་མཐའ་མེད་པའི་ཚེ་སྲོག་ཐོབ་ཡོད་པ༌དང༌། ཉེས་ཆད་གཅོད་པར་མི་འགྱུར་ཞིང་། མི་དེ་རྣམས་འཆི་བ་ལས་གྲོལ་ནས་ཚེ་སྲོག་གི་ནང་དུ་ཞུགས་པ་ཡིན་ནོ།།
JOH 5:25 ཡང་བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། གཤིན་པོ་རྣམས་ཀྱིས་དཀོན་མཆོག་གི་སྲས་ཀྱི་གསུང་སྐད་ཐོས་པའི་དུས་ཤིག་སླེབ་པར་འགྱུར་ཞིང་དུས་དེ་ནི་ད་ལྟ་ཡིན། གསུང་དེར་མཉན་པ་རྣམས་ཀྱང་གསོན་པར་འགྱུར་རོ།།
JOH 5:26 རྒྱུ་མཚན་ནི་ཡབ་ཀྱི་ནང་དུ་ཚེ་སྲོག་བཞུགས་པ་བཞིན་ཁོང་གིས་སྲས་ལའང་དེ་ལྟར་ཚེ་སྲོག་ཡོད་པར་མཛད་པ་ལགས་སོ།།
JOH 5:27 སྲས་དེ་ནི་མིའི་བུ་ཡིན་པས་ལེགས་ཉེས་ཀྱི་ཁྲིམས་ཐག་གཅོད་པའི་དབང་ཡང་སྲས་ལ་གནང༌བ་ཡིན།
JOH 5:28 ཁྱོད་རྣམས་དོན་འདིར་ངོ་མཚར་བར་མི༌བྱའོ།། དེ་ཡང་དུར་ཁུང་དུ་སྡོད་པ་ཐམས་ཅད་ཀྱིས་སྲས་ཀྱི་གསུང་སྐད་ཐོས་ནས། དེ་རྣམས་སླར་གསོན་པར་འགྱུར་བའི་དུས་ཤིག་སླེབ་ངེས༌ཤིང༌།
JOH 5:29 ལས་བཟང་པོ་བྱས་པ་ཐམས་ཅད་ཚེ་སྲོག་འཐོབ་པའི་ཕྱིར་སླར་གསོན་པ༌དང༌། ལས་ངན་པ་བྱས་པ་ཐམས་ཅད་ལ་ཉེས་ཆད་གཅོད་པའི༌ཕྱིར་སླར་གསོན་པར་འགྱུར་རོ།།
JOH 5:30 ང་རང་ཁོ་ན་ལ་བརྟེན་ནས་ལས་ཅི་ཡང་བྱ་མི་ནུས༌ཤིང༌། རང་གི་ཡབ་ཀྱི་བཀའ་ཇི་ལྟར་ཐོས་པ་བཞིན་བདག་གིས་ཀྱང་ལེགས་ཉེས་ཀྱི་ཁྲིམས་ཐག་གཅོད་པར་བྱེད། བདག་གིས་རང་གི་བསམ་ཚུལ་བཞིན་དུ་མི་བྱ༌བར། ང་རང་མངགས་མཁན་ཡབ་ཀྱི་དགོངས་པ་བཞིན་དུ་སྒྲུབ་པ་ཡིན༌པས། བདག་གིས་གཅོད་པར་བྱེད་པའི་ཁྲིམས་ཐག་དེ་ནི་དྲང་བདེན་ཡིན་ཞེས་གསུངས་སོ།།
JOH 5:31 ཡང་འདི་སྐད་དུ། གལ་ཏེ་ངས་རང་གིས་རང་ལ་བདེན་དཔང་བྱས་ན་བདག་གི་དཔང་པོ་དེ་ནི་བདེན་པ་མ་ཡིན།
JOH 5:32 བདག་ལ་བདེན་དཔང་མཛད་མཁན་གཞན་ཞིག་ཡོད་ཅིང་བདག་གིས་ཀྱང་ཁོང་གིས་བདེན་དཔང་མཛད་པ་དེ་བདེན་པ་ཡིན་པར་རྟོགས་སོ།།
JOH 5:33 གཞན༌ཡང༌། ཁྱོད་རྣམས་ཀྱིས་ཁྲུས་གསོལ་མཁན་ཡོ་ཧ་ནན་གྱི་དྲུང་དུ་མི་འགའ་ཞིག་མངགས་མྱོང༌ཞིང༌། ཡོ་ཧ་ནན་གྱིས་ཀྱང་བདེན་པ་ཉིད་ལ་བདེན་དཔང་བྱས་པ་ཡིན།
JOH 5:34 དོན་དམ་དུ་བདག་ལ་འཐོབ་པའི་བདེན་དཔང་ནི་མི་ཡི་རིགས་ལས་འཐོབ་པ་མ་ཡིན་ཡང་ཁྱོད་རྣམས་སྐྱོབ་པའི་ཆེད༌དུ་བདག་གིས་གཏམ་འདི་རྣམས་སྨྲས༌པ་ཡིན།
JOH 5:35 ཁྲུས་གསོལ་མཁན་ཡོ་ཧ་ནན་ནི་འབར་ཞིང་འོད་སྣང་འཕྲོ་བའི་སྒྲོན་མེ་ཞིག་དང་མཚུངས༌ཤིང༌། ཁྱོད་རྣམས་རེ་ཞིག་ཁོང་གི་སྒྲོན་མེའི་འོད་སྣང་ལ་རང་གི་མོས་པ་བཞིན་དུ་དགའ་བར་བྱེད༌དོ།།
JOH 5:36 འོན་ཀྱང་བདག་ལ་ཁྲུས་གསོལ་མཁན་ཡོ་ཧ་ནན་གྱི་བདེན་དཔང་ལས་ཀྱང་ཆེ་བའི་བདེན་དཔང་ཞིག་ཡོད༌དེ། ཡབ་ཀྱིས་བདག་ལ་བསྒྲུབ་པར་བཅོལ་བའི་དོན་རྣམས་ནི་བདག་གིས་སྒྲུབ་བཞིན་པའི་ལས་ཡིན༌ལ། ལས་འདི་རྣམས་ཀྱིས་བདག་ནི་ཡབ་ཀྱིས་མངགས་པ་ཡིན་པར་བདེན་དཔང་བྱེད་པ་ཡིན་ནོ།།
JOH 5:37 ང་རང་མངགས་མཁན་ཡབ་ཀྱིས་ཀྱང་བདག་ལ་བདེན་དཔང་མཛད༌པ་ཡིན། ཁྱོད་རྣམས་ཀྱིས་ཁོང་གི་གསུང་སྐད་ནམ་ཡང་ཐོས་པ་མེད་ཅིང་ཁོང་གི་གཟུགས་བརྙན་ཡང་མཐོང་བ་མེད།
JOH 5:38 ཁོང་གིས་མངགས་པ་དེ་ལ་ཁྱོད་རྣམས་ཀྱིས་དད་པ་མི་བྱེད༌པས། ཡབ་ཀྱི་བཀའ་ཡང་ཁྱོད་ཅག་གི་སེམས་ཁོང་དུ་མི་གནས་སོ།།
JOH 5:39 ཁྱོད་རྣམས་ཀྱིས་གསུང་རབ་ལས་མཐའ་མེད་པའི་ཚེ་སྲོག་ཡོད་པར་བསམས་ཤིང་ནན་གྱིས་བརྟགས༌ནའང༌། གསུང་རབ་དེ་ལས་བདག་ལ་བདེན་དཔང་བྱས་ཡོད།
JOH 5:40 འོན་ཀྱང་ཁྱོད་རྣམས་བདག་གི་གམ་དུ་མཐའ་མེད་པའི་ཚེ་སྲོག་འཐོབ་པའི་ཆེད་དུའང་ཡོང་མི་འདོད༌དོ།།
JOH 5:41 དེ་ཡང་བདག་ནི་མི་རྣམས་ལས་བཀུར་སྟི་འཐོབ་མི་འདོད་དོ།།
JOH 5:42 འོན་ཀྱང་དཀོན་མཆོག་གི་བྱམས་པ་ཁྱོད་ཅག་གི་སེམས་ནང་དུ་མེད་པ་བདག་གིས་ཤེས།
JOH 5:43 བདག་ནི་རང་གི་ཡབ་ཀྱི་མཚན་ལ་བརྟེན་ནས་ཡོང་ནའང་ཁྱོད་རྣམས་ཀྱིས་ང་རང་ལ་བསུ་བ་མི་བྱེད་ཅིང་། གལ་ཏེ་མི་གཞན་ཞིག་རང་གི་མིང་ལ་བརྟེན་ནས་ཡོང་ན་ཁྱོད་རྣམས་ཀྱིས་བསུ་བ་བྱེད༌པ་ཡིན་ནོ།།
JOH 5:44 ཁྱོད་རྣམས་ཀྱིས་ཕན་ཚུན་ལ་བཀུར་སྟི་བྱེད་པ༌ལས། དཀོན་མཆོག་ཁོ་ན་ཉིད་ནས་བྱུང་བའི་བསྟོད་བསྔགས་དེ་ལའང་མི་དགའ༌ན། ཁྱོད་ཅག་གིས་ཇི་ལྟར་བདག་ལ་དད་པ་བྱའམ།
JOH 5:45 འོན༌ཀྱང༌། ངས་རང་གི་ཡབ་ཀྱི་དྲུང་ནས་ཁྱོད་རྣམས་ལ་སྐྱོན་བརྗོད་པར་ངེས་ཞེས་ཁྱོད་ཅག་གིས་མ་སེམས༌ཤིག ཁྱོད་རྣམས་ལ་ཉེས་སྐྱོན་བརྗོད་མཁན་ནི་ཁྱོད་རྣམས་ཀྱིས་རེ་ལྟོས་བྱས་པའི་མོ་ཤེ་ཡིན་ནོ།།
JOH 5:46 གལ་ཏེ་ཁྱོད་རྣམས་མོ་ཤེ་ལ་ཡིད་ཆེས་ཡོད་ན་བདག་ལའང་ཡིད་ཆེས་ཡོད་དགོས༌ཏེ། ཁོང་གིས་བདག་གི་སྐོར་ཡི་གེར་བཀོད་ཡོད་པའི་ཕྱིར༌རོ།།
JOH 5:47 འོན༌ཀྱང༌། ཁྱོད་རྣམས་མོ་ཤེའི་མདོ་རྣམས་ལ་ཡིད་ཆེས་མེད་ན་བདག་གིས་སྨྲས་པའི་གཏམ་ལ་ཇི་ལྟར་ཡིད་ཆེས་སམ་ཞེས་གསུངས༌སོ།།
JOH 6:1 དོན་དེ་དག་བྱུང་བའི་རྗེས༌སུ། སྐྱབས་མགོན་ཡེ་ཤུ་ཁོང་ཉིད་ཐེ་པེར་ཡཱ་སྟེ་ག་ལིལ་ཞེས་པའི་མཚོ་བརྒལ་ནས་མཚོའི་ཕ་རོལ་ཏུ་ཕེབས།
JOH 6:2 ཡང་ཁོང་གིས་ནད་པ་དག་ལ་མཛད་པའི་གྲུབ་རྟགས་རྣམས་མི་ཧ་ཅང་མང་པོས་མཐོང་སྟེ་ཁོང་གི་རྗེས་སུ་འབྲངས་སོ།།
JOH 6:3 དེ་ནས་སྐྱབས་མགོན་ཡེ་ཤུ་རི་མགོར་ཕེབས་ཤིང་རང་ཉིད་ཀྱི་ཐུགས་སྲས་རྣམས་དང་ལྷན་དུ་གནས་དེ་རུ་བཞུགས།
JOH 6:4 སྐབས་དེ་ནི་ཡ་ཧུ་དཱ་པའི་པེ་སག་གི་དུས་ཆེན་ལའང་སླེབས་ལ༌ཉེའོ།།
JOH 6:5 དེ་ནས་སྐྱབས་མགོན་ཡེ་ཤུས་ཡར་བལྟས་པ་ན་མི་ཤིན་ཏུ་མང་པོ་ཁོང་གི་དྲུང་དུ་ཡོང་བཞིན་པ་གཟིགས་ཏེ་ཕི་ལིབ་ལ་འདི་སྐད༌དུ། ངེད་རྣམས་ཀྱིས་མི་འདི་རྣམས་ལ་ཁ་ཟས་སྟེར་བའི་བག་ལེབ་ཡུལ་གང་ནས་ཉོ་བར་བྱེད་དམ་ཞེས་གསུངས༌ཤིང༌།
JOH 6:6 ཁོང་གིས་ཇི་ལྟར་མཛད་དགོས་པ་མཁྱེན་ནའང་ཕི་ལིབ་ལ་བརྟག་ཆེད་དེ་ལྟར་གསུངས་སོ།།
JOH 6:7 ཕི་ལིབ་ན༌རེ། དངུལ་སྒོར་ཉིས་བརྒྱ་བཀོལ་ནས་ཉོས་པའི་བག་ལེབ་དེ་དག་ཁོ་རྣམས་ལ་ཅུང་ཙམ་རེ་བགོས་ཀྱང་འདང་བ་མིན་ཞེས་ཞུས་སོ།།
JOH 6:8 དེ་ནས་ཐུགས་སྲས་རྣམས་ལས་སི་མོན་པེ་ཏྲོའི་སྤུན་ཏེ་ཨན་དྲི་ཡཱ་ན༌རེ།
JOH 6:9 འདིར་བྱིས་པ་ཞིག་ཡོད་པ་དེའི་ལག་ཏུ་ནས་ཕྱེའི་བག་ལེབ་ལྔ་དང་ཉ་གཉིས་ཡོད་ནའང་མི་འདི་འདྲ་མང་པོ་ཞིག་ལ་བགོས་ཀྱང་འདང་ངམ་ཞེས་ཞུས་པ༌ན།
JOH 6:10 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་མི་རྣམས་ས་རུ་སྡོད་དུ་ཆུག་ཅེས་གསུངས་སོ།། གནས་དེར་རྩྭ་སྔོན་སྐྱེས་པ་བཟང་ལ་མི་རྣམས་ས་རུ་བསྡད༌ཅིང༌། སྐྱེས་པའི་གྲངས་ཀ་མི་ལྔ་སྟོང་ཙམ་ཡོད༌པ་རེད།
JOH 6:11 དེ་ནས་སྐྱབས་མགོན་ཡེ་ཤུས་ཕྱག་ཏུ་བག་ལེབ་བསྣམས་ཏེ་བཀའ་དྲིན་ཞུས་པ༌དང༌། ས་རུ་བསྡད་ཡོད་པའི་མི་རྣམས་ལ་བགོ་རུ་བཅུག་ཅིང་། ཉ་གཉིས་ཡོད་པ་ཡང་དེ་བཞིན་མཛད་དེ་མི་རྣམས་ཀྱི་འདོད་མོས་བཞིན་བགོ་རུ་བཅུག་གོ།
JOH 6:12 དེ་ནས་མི་རྣམས་ཀྱི་ལྟོ་བ་འགྲངས༌རྗེས། ཁོང་གིས་ཐུགས་སྲས་རྣམས་ལ་འདི་སྐད༌དུ། ཟས་ལྷག་ཆུད་ཟོས་སུ་མི་གཏོང་བའི་ཕྱིར་ཐམས་ཅད་སྡུས་ཤིག་ཅེས་གསུངས་པས།
JOH 6:13 དེ་རྣམས་ཀྱིས་ཀྱང་ནས་ཕྱེའི་བག་ལེབ་ལྔའི་ཟས་ལྷག་བསྡུས་ཏེ་སླེ་བོ་བཅུ་གཉིས་གང་ངོ༌།།
JOH 6:14 ཡང་མི་ཚོགས་ཀྱིས་སྐྱབས་མགོན་ཡེ་ཤུས་མཛད་པའི་གྲུབ་རྟགས་དེ་མཐོང༌རྗེས། ཁོང་ནི་དངོས་གནས་འཇིག་རྟེན་དུ་འབྱོན་ངེས་པའི་ལུང་སྟོན་པ་དེ་ཉིད་ཡིན་ཞེས་སྨྲས་སོ།།
JOH 6:15 དེ་ནས་སྐྱབས་མགོན་ཡེ་ཤུས་མི་དེ་རྣམས་ཡོང་བ་དང་ནན་གྱིས་རང་ཉིད་རྒྱལ་པོར་བསྐོ་ངེས་པ་མཁྱེན༌ཏེ། རང་ཉིད་གཅིག་པུ་སླར་ཡང་རི་བོར་ཕེབས༌སོ།།
JOH 6:16 མཚན་མོའི་དུས་སུ། ཐུགས་སྲས་རྣམས་མར་ག་ལིལ་མཚོ་ཡི་འགྲམ་དུ་སོང༌ཞིང༌།
JOH 6:17 གྲུར་བསྡད་ནས་ཀཱ་ཕར་ན་ཧུམ་དུ་འགྲོ་བཞིན་པའི་དུས་སུ་མུན་རུབ་པ༌དང༌། སྐྱབས་མགོན་ཡེ་ཤུ་ད་དུང་ཁོ་རྣམས་ཀྱི་གམ་དུ་ཕེབས་མེད༌པ་ཡིན།
JOH 6:18 གློ་བུར༌ཉིད་ལ་རླུང་ཆེན་གཡུགས་ནས་རྦ་རླབས་དྲག་ཏུ་འཕྱུར་ཏོ།།
JOH 6:19 ཡང་ཐུགས་སྲས་རྣམས་ཀྱིས་མཚོ་གྲུ་བཏང་ནས་རྒྱང་གྲགས་ལྔའམ་དྲུག་ཙམ་དུ་ཕྱིན་པ༌ན། སྐྱབས་མགོན་ཡེ་ཤུས་མཚོ་སྟེང་དུ་ཞབས་ཀྱིས་བཅགས་ཤིང་མཚོ་གྲུ་དང་ཉེ་བར་ཕེབས་པ་ཁོ་རྣམས་ཀྱིས་མཐོང་ནས་ཤིན་ཏུ་འཇིགས་སོ།།
JOH 6:20 དེ་ནས་སྐྱབས་མགོན་ཡེ་ཤུས་འདི་སྐད༌དུ། འཇིགས་མི་དགོས༌ཏེ། ང་རང་ཡིན་ཞེས་གསུངས་པ༌ན།
JOH 6:21 ཐུགས་སྲས་རྣམས་ཀྱིས་དགའ་མགུའི་ངང་ནས་ཁོང་ཉིད་མཚོ་གྲུའི་ནང་དུ་བསུས་པ༌དང༌། མཚོ་གྲུའང་དེ་མ་ཐག་ཏུ་ཁོང་རྣམས་འགྲོ་སའི་ཡུལ་དུ་སླེབས་སོ།།
JOH 6:22 དེའི་ཕྱི༌ཉིན། མཚོའི་ཕར་འགྲམ་དུ་བསྡད་ཡོད་པའི་མི་རྣམས་ཀྱིས་སྔོན་རོལ་དུ་གནས་དེར་གྲུ་ཆུང་གཅིག་ལས་གཞན་མེད་པ༌དང༌། མཚོ་གྲུ་དེའི་ནང་དུ་ཐུགས་སྲས་རྣམས་ལས༌གཞན། སྐྱབས་མགོན་ཡེ་ཤུ་བཞུགས་མེད་པ་དང་ཐུགས་སྲས་རྣམས་སོང་ཟིན་པ་ཤེས༌པ་རེད།
JOH 6:23 དེ་ནས་མཚོ་གྲུ་འགའ་ཞིག་ཐེ་པེར་ཡཱ་ཡུལ་ཕྱོགས་ནས་སླེབས་ཏེ། སྐྱབས་མགོན་ཡེ་ཤུས་བཀའ་དྲིན་ཞུས་ནས་བག་ལེབ་བགོས་པའི་གནས་དེ་དང་ཉེ་བར་བཅར་བ༌ན།
JOH 6:24 མི་ཚོགས་ཀྱིས་སྐྱབས་མགོན་ཡེ་ཤུ་དང་ཐུགས་སྲས་རྣམས་མ་མཐོང༌བས། མཚོ་གྲུ་དེ་དག་ལ་བསྡད་ནས་ཀཱ་ཕར་ན་ཧུམ་དུ་སྐྱབས་མགོན་ཡེ་ཤུ་འཚོལ་དུ་ཕྱིན༌ཏོ།།
JOH 6:25 དེ་ནས་མི་ཚོགས་མཚོའི་ཕར་འགྲམ་ནས་སྐྱབས་མགོན་ཡེ་ཤུར་མཇལ༌ཏེ། རཱབ་པེ་ལགས། ཁྱེད་རང་དུས་ག་ཚོད་འདིར་ཕེབས་པ་ཡིན་ནམ་ཞེས་ཞུས་པ༌ལ།
JOH 6:26 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཁྱོད་ཅག་གིས་ང་རང་འཚོལ་དོན་ནི་གྲུབ་རྟགས་རྣམས་མཐོང་བ་མ་ཡིན་པར་བག་ལེབ་ཟོས་ནས་ལྟོ་བ་འགྲངས་པའི་ཕྱིར༌རོ།།
JOH 6:27 ཁྱོད་རྣམས་ཀྱིས་མི་རྟག་པའི་ཁ་ཟས་ཀྱི་དོན་དུ་འབད་པ་མི་བྱེད༌པར། མཐའ་མེད་པའི་ཚེ་སྲོག་འཐོབ་པའི་བར་དུ་གནས་པའི་ཁ་ཟས་དེའི་དོན་དུ་བརྩོན་པར༌གྱིས། མིའི་བུ་ཡིས་ཁྱོད་རྣམས་ལ་ཁ་ཟས་དེ་གནང་ངེས་ཡིན། མིའི་བུ་ལ་ཡབ་དཀོན་མཆོག་གིས་ཕྱག་རྒྱ་བཏབ་ཡོད་པ་ཡིན་ཞེས་གསུངས་སོ།།
JOH 6:28 ཡང་མི་ཚོགས་ན༌རེ། ངེད་རྣམས་ཀྱིས་ལས་གང་ཞིག་བྱས་ན་དཀོན་མཆོག་གི་དོན་སྒྲུབ་པ་ཡིན་ནམ་ཞེས་ཞུས་པ༌ལ།
JOH 6:29 ཡང་སྐྱབས་མགོན་ཡེ་ཤུས་འདི་སྐད༌དུ། དཀོན་མཆོག་གིས་མངགས་པ་དེ་ལ་དད་པ་བྱས༌ན། འདི་ནི་དཀོན་མཆོག་གི་དོན་སྒྲུབ་པ་ཡིན་ཞེས་གསུངས་སོ།།
JOH 6:30 ཡང་དེ་རྣམས་ན༌རེ། འོ་ན་ཁྱེད་ཀྱིས་ངེད་རྣམས་ལ་གྲུབ་རྟགས་ཤིག་སྟོན༌དང༌། ངེད་ཅག་གིས་མཐོང་བ་དང་ཁྱེད་ལ་ཡིད་ཆེས༌བྱ། ཁྱེད་ཀྱིས་ལས་གང་ཞིག་བྱེད་པ་ཡིན༌ནམ།
JOH 6:31 ངེད་ཅག་གི་ཕ་མེས་ཡང་མེས་རྣམས་ཀྱིས་དབེན་སྟོང་ཡུལ་ནས་མཱན་ནཱ་ཟོས་མྱོང་བ་ནི་གསུང་རབ་ཀྱི་མདོ་ལས་ཇི་སྐད༌དུ། ཁོང་གིས་དེ་རྣམས་ལ་ནམ་མཁའི་ཞིང་ཁམས་ནས་བག་ལེབ་ཁ་ཟས་སུ་གནང་ཞེས་བཀོད་པ་བཞིན་ཡིན་ཞེས་པ༌ལ།
JOH 6:32 ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། མོ་ཤེ་ཡིས་ཁྱོད་རྣམས་ལ་ནམ་མཁའི་ཞིང་ཁམས་ནས་བག་ལེབ་གནང་བ་མ་ཡིན༌པར། བདག་གི་ཡབ་ཀྱིས་ནམ་མཁའི་ཞིང་ཁམས་ནས་བདེན་པའི་བག་ལེབ་ཁྱོད་ཅག་ལ་གནང༌བ་ཡིན།
JOH 6:33 རྒྱུ་མཚན་ནི་དཀོན་མཆོག་གི་བག་ལེབ་ནི་ནམ་མཁའི་ཞིང་ཁམས་ནས་འོངས་ཤིང་། འཇིག་རྟེན་གྱི་མི་ཀུན་ལ་མཐའ་མེད་པའི་ཚེ་སྲོག་གནང་མཁན་ཡང་ཡིན་ཞེས་གསུངས་པ་ན།
JOH 6:34 དེ་རྣམས་ན༌རེ། ཇོ་བོ༌ལགས། དེས་ན་བག་ལེབ་དེ་རྟག་ཏུ་ངེད་ཅག་ལ་གནང་བར་མཛོད་ཅེས་ཞུས༌སོ།།
JOH 6:35 དེ་ནས་སྐྱབས་མགོན་ཡེ་ཤུས་འདི་སྐད༌དུ། བདག་ནི་ཚེ་སྲོག་གི་བག་ལེབ་ཡིན༌ཏེ། ངའི་གམ་དུ་ཡོང་བ་རྣམས་ལ་བཀྲེས་ལྟོགས་མི་འབྱུང༌ཞིང༌། ཡང་ང་རང་ལ་དད་པ་བྱེད་མཁན་རྣམས་ནམ་ཡང་སྐོམ་མི་སྲིད།
JOH 6:36 འོན་ཀྱང་བདག་གིས་སྨྲས་པ་བཞིན་ཁྱོད་རྣམས་ཀྱིས་ང་རང་མཐོང་ནའང་དད་པ་མི་བྱེད་དོ།།
JOH 6:37 དེ་ཡང་ཡབ་ཀྱིས་ང་རང་ལ་བསྩལ་བའི་མི་ཐམས་ཅད་བདག་གི་དྲུང་དུ་ཡོང་ངེས༌ཤིང༌། བདག་གི་གམ་དུ་ཡོང་བའི་མི་སུ་ཡིན་ཡང་བདག་གིས་ནམ་ཡང་འདོར་མི་སྲིད་དོ།།
JOH 6:38 རྒྱུ་མཚན་ནི་ང་རང་ནམ་མཁའི་ཞིང་ཁམས་ནས་ཡོང་དོན་ནི་རང་གི་བསམ་དོན་བཞིན་བསྒྲུབ་པའི་ཕྱིར་འོངས་པ་མིན༌ཏེ། ང་རང་མངགས་མཁན་གྱི་དགོངས་པ་བཞིན་དུ་བསྒྲུབ་པའི་ཕྱིར་ཡོང༌བ་ཡིན།
JOH 6:39 ང་རང་མངགས་མཁན་ཁོང་གི་དགོངས་པ་ནི་ཁོང་གིས་བདག་ལ་གནང་བ་ཐམས་ཅད་ལས་བདག་གིས་གཅིག་ཀྱང་མི་སྟོར༌བར། མཐའ་མའི་ཉིན་མོ་ལ་དེ་རྣམས་སླར་གསོན་དུ་འཇུག་པ་དེ་ཡིན་ནོ།།
JOH 6:40 རྒྱུ་མཚན་ནི་སྲས་དེ་ཉིད་མཇལ་ནས་དད་པ་བྱེད་མཁན་ཐམས་ཅད་ལ་མཐའ་མེད་པའི་ཚེ་སྲོག་འཐོབ་པ༌དང༌། མཐའ་མའི་ཉིན་མོར་ཡང་བདག་གིས་དེ་རྣམས་སླར་གསོན་དུ་འཇུག་དགོས་པ་ནི་བདག་གི་ཡབ་ཀྱི་དགོངས་པའང་ཡིན་ཞེས་གསུངས༌སོ།།
JOH 6:41 དེ་ཡང་སྐྱབས་མགོན་ཡེ་ཤུས་ང་རང་ནི་ནམ་མཁའི་ཞིང་ཁམས་ནས་འོངས་པའི་བག་ལེབ་ཡིན་ཞེས་གསུངས་པ་དེར་ཡ་ཧུ་དཱ་པ་རྣམས་ཀྱིས་ལྐོག་ནས་གླེང༌སྟེ་ན་རེ།
JOH 6:42 ཁོ་རང་ནི་ཡོ་སེབ་ཀྱི་བུ་ཡེ་ཤུ་མ་ཡིན༌ནམ། ཁོའི་ཕ་མ་གཉིས་བདག་ཅག་གིས་ངོ་ཤེས་པ་མ་ཡིན༌ནམ། ད་ལྟ་ཁོས་ང་རང་ནི་ནམ་མཁའི་ཞིང་ཁམས་ནས་འོངས་པ་ཡིན་ཞེས་ཟེར་དོན་ཅི་ཡིན་ནམ་ཞེས་སྨྲས་སོ།།
JOH 6:43 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་ལྐོག་ནས་གཏམ་དེ་དག་གླེང་བར་མི༌བྱའོ།།
JOH 6:44 གལ་ཏེ་ང་རང་མངགས་མཁན་ཡབ་ཀྱིས་སུ་ཞིག་བདག་གི་ཕྱོགས་སུ་དྲངས་པ་མིན༌ན། མི་སུ་ཡང་བདག་གི་གམ་དུ་ཡོང་མི་ནུས། བདག་གིས་མཐའ་མའི་ཉིན་མོར་མི་དེ་སླར་གསོན་དུ་འཇུག༌པ་ཡིན།
JOH 6:45 ལུང་སྟོན་པའི་མདོ་ལས་ཇི་སྐད༌དུ། དཀོན་མཆོག་གིས་མི་དེ་ཐམས་ཅད་ལ་ཆོས་གསུང་བར་འགྱུར་ཞེས་བཀོད་ཡོད། ཡབ་ཀྱི་བཀའ་རྣམས་ཐོས་ཤིང་སྦྱངས་པ་ཐམས་ཅད་བདག་གི་དྲུང་དུ་ཡོང༌ངོ་།།
JOH 6:46 འོན་ཀྱང་མི་སུ་ཞིག་གིས་ཡབ་མཐོང་མྱོང་བ་མིན༌ཏེ། དཀོན་མཆོག་གི་དྲུང་ནས་ཡོང་མཁན་ལས་གཞན་སུས་ཀྱང་ཁོང་ཉིད་མཐོང་བ་མེད།
JOH 6:47 བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། དད་པ་བྱེད་མཁན་རྣམས་ལ་མཐའ་མེད་པའི་ཚེ་སྲོག་ཐོབ་ཡོད་དོ།།
JOH 6:48 བདག་ནི་ཚེ་སྲོག་གི་བག་ལེབ་ཡིན།
JOH 6:49 ཁྱོད་ཅག་གི་ཕ་མེས་ཡང་མེས་རྣམས་ཀྱིས་དབེན་པའི་ཡུལ་ནས་མཱན་ནཱ་ཟོས་ཀྱང་མཐའ་མར་ཤི་བར་གྱུར་ཏོ།།
JOH 6:50 འོན་ཀྱང་འདི་ནི་ནམ་མཁའི་ཞིང་ཁམས་ནས་འོངས་པའི་བག་ལེབ་ཡིན༌པས། སུ་ཞིག་གིས་བག་ལེབ་འདི་ཟོས་ན་ནམ་ཡང་འཆི་བ་མེད།
JOH 6:51 བདག་ནི་ནམ་མཁའི་ཞིང་ཁམས་ནས་འོངས་པའི་ཚེ་སྲོག་གི་བག་ལེབ་ཡིན༌ཏེ། སུ་ཞིག་གིས་བག་ལེབ་འདི་ཟོས་ན་གཏན་དུ་གསོན་པར་འགྱུར། བག་ལེབ་འདི་ནི་བདག་གི་ཤ་ཡིན༌ཏེ། ངས་འཇིག་རྟེན་མི་ཀུན་གྱི་ཚེ་སྲོག་གི་དོན་དུ་གནང་བར་འགྱུར་ཞེས་གསུངས༌སོ།།
JOH 6:52 དེ་ནས་ཡ་ཧུ་དཱ་པ་རྣམས་ན༌རེ། མི་འདིས་ཁོའི་ཤ་ནི་བདག་ཅག་གི་ཟས་སུ་ཅི་ལྟར་སྟེར་ནུས་སམ་ཞེས་རྩོད་གླེང་བྱས་པ༌ན།
JOH 6:53 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ཀྱིས་མིའི་བུ་ཁོང་གི་ཤ་མི་བཟའ་ཞིང་ཁྲག་ཀྱང་མི་འཐུང༌ན། ཁྱོད་ཅག་ལ་མཐའ་མེད་པའི་ཚེ་སྲོག་འཐོབ་མི་སྲིད།
JOH 6:54 བདག་གི་ཤ་ཟ་ཞིང་ཁྲག་འཐུང་མཁན་རྣམས་ལ་མཐའ་མེད་པའི་ཚེ་སྲོག་ཐོབ་ཡོད་པ་དང་མཐའ་མའི་ཉིན་མོར་ཡང་བདག་གིས་དེ་རྣམས་སླར་གསོན་དུ་འཇུག༌རྒྱུ་ཡིན།
JOH 6:55 བདག་གི་ཤ་ནི་ཁ་ཟས་དངོས་ཡིན་ཞིང་བདག་གི་ཁྲག་ནི་བཏུང་བ་དངོས་ཀྱང་ཡིན།
JOH 6:56 བདག་གི་ཤ་ཟ་ཞིང་ཁྲག་འཐུང་མཁན་དེ་ནི་བདག་གི་ནང་དུ་གནས༌ཤིང༌། ང་རང་ཡང་ཁོའི་ནང་དུ་མཆིས་སོ།།
JOH 6:57 གཏན་དུ་གསོན་པོར་བཞུགས་པའི་ཡབ་ཀྱིས་ང་རང་འཇིག་རྟེན་དུ་མངགས་ཤིང་ང་རང་ཡང་ཁོང་ལ་བརྟེན་ནས་གསོན་པོར་གནས་པ༌བཞིན། བདག་གི་ཤ་ཟ་མཁན་ཡང་བདག་ལ་བརྟེན་ནས་གསོན་པོར་གནས༌པ་ཡིན།
JOH 6:58 འདི་ནི་ནམ་མཁའི་ཞིང་ཁམས་ནས་འོངས་པའི་བག་ལེབ་སྟེ། བག་ལེབ་འདི་ཟ་མཁན་རྣམས་ལ་ནམ་ཡང་འཆི་བ་མེད་ཅིང་གཏན་དུ་གསོན་པོར་གནས༌པ་ཡིན། དེ་ནི་ཁྱོད་ཅག་གི་ཕ་མེས་ཡང་མེས་རྣམས་ཀྱིས་མཱན་ནཱ་ཟོས་ཀྱང་ཐ་མར་ཤི་བ་དང་མི་འདྲ་ཞེས་གསུངས་སོ།།
JOH 6:59 གསུང་དེ་དག་ནི་སྐྱབས་མགོན་ཡེ་ཤུས་ཀཱ་ཕར་ན་ཧུམ་གྱི་ཆོས་ཁང་དུ་ཆོས་གསུང་བའི་དུས་སུ་གསུངས་པ་ཡིན༌ནོ།།
JOH 6:60 སྐྱབས་མགོན་ཡེ་ཤུའི་རྗེས་འབྲང་པ་རྣམས་ལས་མི་མང་པོས་ཁོང་གི་གསུང་དེ་ཐོས༌ནས། གསུང་འདི་ནི་མི་སུས་ཀྱང་ཁས་ལེན་དཀའ་བ་མ་ཡིན་ནམ་ཞེས་སྨྲས་སོ།།
JOH 6:61 དེ་ནས་སྐྱབས་མགོན་ཡེ་ཤུས་རྗེས་འབྲང་པ་རྣམས་ཀྱིས་ཁོང་གི་གསུང་དེར་ལྐོག་ནས་གཏམ་གླེང་བ་མཁྱེན་ཏེ་འདི་སྐད༌དུ། བདག་གིས་སྨྲས་པ་དེས་ཁྱོད་རྣམས་སར་འགྱེལ་དུ་འཇུག་གམ།
JOH 6:62 འོ་ན་ཁྱོད་རྣམས་ཀྱིས་མིའི་བུ་ཕྱིར་ཁོ་རང་སྔར་བཞུགས་པའི་གནས་སུ་འཕགས་པ་མཐོང་ན་ཅི༌བྱའམ།
JOH 6:63 མི་རྣམས་ལ་ཚེ་སྲོག་གནང་མཁན་ནི་དམ་པའི་ཐུགས་ཉིད་ཡིན་པ་ལས་ཤ་གཟུགས་ཀྱི་ཕུང་བོ་ཡིས་ཕན་ཅི་ཡང་མི་ཐོགས་ཏེ། བདག་གིས་ཁྱོད་ཅག་ལ་སྨྲས་པ་ནི་དམ་པའི་ཐུགས་ཉིད་དང་ཚེ་སྲོག་ཡིན་ནོ།།
JOH 6:64 འོན་ཀྱང་ཁྱོད་རྣམས་ལས་ཁ་ཅིག་གིས་བདག་ལ་དད་པ་མི་བྱེད་ཅེས་གསུངས་སོ།། རྒྱུ་མཚན་ནི་སྐྱབས་མགོན་ཡེ་ཤུས་ཐོག་མ་ཉིད་ནས་རང་ལ་དད་པ་མི་བྱེད་པ་རྣམས་དང་རང་ཉིད་ལ་ངོ་ལོག་བྱེད་མཁན་སུ་ཡིན་པ་མཁྱེན༌ནོ།།
JOH 6:65 ཡང་སྐྱབས་མགོན་ཡེ་ཤུས་འདི་སྐད༌དུ། དེའི༌ཕྱིར། བདག་གིས་ཁྱོད་རྣམས་ལ་སྨྲས་མྱོང་བ༌ལྟར། ཡབ་ཀྱིས་བྱིན་རླབས་གནང་བ་མིན་ན་མི་སུ་ཡང་བདག་གི་གམ་དུ་ཡོང་མི་ནུས་ཞེས་གསུངས༌སོ།།
JOH 6:66 སྐྱབས་མགོན་ཡེ་ཤུས་དེ་ལྟར་གསུངས༌རྗེས། ཁོང་གི་རྗེས་འབྲང་པ་རྣམས་ལས་མི་མང་པོ་ཞིག་ཕྱིར་བུད་ཅིང་ཁོང་གི་རྗེས་སུ་མ་འབྲངས་སོ།།
JOH 6:67 དེ་ནས་སྐྱབས་མགོན་ཡེ་ཤུས་ཐུགས་སྲས་བཅུ་གཉིས་པོ་ལ་འདི་སྐད༌དུ། ཁྱོད་རྣམས་ཀྱིས་ཀྱང་ང་རང་བསྐྱུར་ནས་འགྲོ་འདོད་དམ་ཞེས་གསུངས་པ༌ལ།
JOH 6:68 སི་མོན་པེ་ཏྲོ་ན༌རེ། གཙོ་བོ༌ལགས། ངེད་རྣམས་སུ་ཡི་དྲུང་དུ་འགྲོའམ། ཁྱེད་ལ་མཐའ་མེད་པའི་ཚེ་སྲོག་གི་བཀའ་རྣམས་མངའ་བའོ༎
JOH 6:69 ངེད་རྣམས་ཁྱེད་ལ་དད་ཅིང་ཁྱེད་ནི་དཀོན་མཆོག་གི་སྐྱེས་བུ་དམ་པ་དེ་ཉིད་ཡིན་པའང་ཤེས་ཞེས་ཞུས་སོ།།
JOH 6:70 དེ་ནས་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ཐུགས་སྲས་བཅུ་གཉིས་སུ་བདམས་པ་མ་ཡིན༌ནམ། འོན༌ཀྱང༌། ཁྱོད་རྣམས་ལས་གཅིག་ནི་བདུད་ཅིག་ཡིན་ཞེས་གསུངས་སོ།།
JOH 6:71 ཁོང་གི་གསུང་འདི་ནི་ཨི་སི་ཀར་རེའི་སི་མོན་ཞེས་པའི་བུ་ཡུ་དཱ་ལ་དམིགས་ནས་གསུངས༌ཤིང༌། ཡུ་དཱ་ནི་ཐུགས་སྲས་བཅུ་གཉིས་ལས་གཅིག༌སྟེ། མ་འོངས་པར་སྐྱབས་མགོན་ཡེ་ཤུ་ལ་ངོ་ལོག་བྱེད་མཁན་ཡིན༌ནོ།།
JOH 7:1 དོན་དེ་དག་བྱུང་བའི་རྗེས༌སུ། ཡ་ཧུ་དཱ་པ་རྣམས་ཀྱིས་སྐྱབས་མགོན་ཡེ་ཤུ་དགྲོང་འདོད་པའི་རྐྱེན༌གྱིས། ཁོང་ཉིད་ཡ་ཧུ་དཱའི་ཡུལ་དུ་ཕེབས་མ་འདོད་པར་ག་ལིལ་ཡུལ་དུ་ཕེབས་པ་རེད།
JOH 7:2 དུས་དེར་ཡ་ཧུ་དཱ་པའི་སྤྱིལ་བུའི་དུས་ཆེན་ཡང་སླེབས་ལ་ཉེ༌བས།
JOH 7:3 ཁོང་གི་སྐུ་མཆེད་རྣམས་ན༌རེ། ཁྱེད་ཀྱིས་མཛད་པའི་ངོ་མཚར་བའི་ལས་ཐམས་ཅད་ཁྱེད་ཀྱི་རྗེས་འབྲང་པ་རྣམས་ཀྱིས་ཀྱང་མཐོང་བའི༌ཕྱིར། ཁྱེད་རང་གནས་འདི་དང་ཁ་བྲལ་ནས་ཡ་ཧུ་དཱའི་ཡུལ་དུ་སོང༌དང༌།
JOH 7:4 མི་སུས་ཀྱང་རང་གི་སྙན་གྲགས་རྒྱས་འདོད༌ན། དོན་གང་ཡང་ལྐོག་ཏུ་བསྒྲུབ་མི༌འོས། གལ་ཏེ་ཁྱེད་ཀྱིས་ལས་འདི་རྣམས་བྱེད༌ན། རང་ཉིད་འཇིག་རྟེན་གྱི་མི་ཀུན་ལ་གསལ་པོར་སྟོན་དགོས་ཞེས་ཞུས་སོ།།
JOH 7:5 ཁོང་གི་སྐུ་མཆེད་རྣམས་ཀྱང་ཁོང་ལ་དད་པ་མེད་པས་དེ་ལྟར་སྨྲས༌པ་རེད།
JOH 7:6 དེ་ནས་སྐྱབས་མགོན་ཡེ་ཤུས་རང་གི་སྐུ་མཆེད་རྣམས་ལ་འདི་སྐད༌དུ། ཁྱོད་ཅག་གི་དུས་ལ་ནམ་ཡང་ངེས་གཏན་མེད་ཅིང་བདག་གི་དུས་ནི་ད་དུང་སླེབས་མེད།
JOH 7:7 འཇིག་རྟེན་གྱི་མི་རྣམས་བདག་ལ་སྡང་བ་ལས་ཁྱོད་ཅག་ལ་སྡང་མི་སྲིད༌དེ། བདག་གིས་འཇིག་རྟེན་གྱི་མི་རྣམས་ཀྱིས་ལས་ངན་པ་བྱས་པ་ལ་དཔང་པོ་བྱེད་པ་ཡིན་པས༌སོ།།
JOH 7:8 ཁྱོད་རྣམས་ཡར་སོང་ནས་དུས་ཆེན་ལ་ཞུགས༌དང༌། བདག་གི་དུས་ནི་ད་དུང་མ་སླེབས་པས་ད་ལྟ་ང་རང་ཡར་མི་འགྲོ་ཞེས་གསུངས་པ༌དང༌།
JOH 7:9 སྐྱབས་མགོན་ཡེ་ཤུ་སྔར་བཞིན་ག་ལིལ་ཡུལ་དུ་བཞུགས་སོ།།
JOH 7:10 འོན་ཀྱང་ཁོང་གི་སྐུ་མཆེད་རྣམས་ཡར་སྤྱིལ་བུའི་དུས་ཆེན་ལ་སོང༌རྗེས། ཁོང་ཉིད་ཡར་མངོན་སུམ་དུ་མ་ཕེབས་པར་གསང་བའི་ཚུལ་གྱིས་ཕེབས་པ་རེད།
JOH 7:11 སྤྱིལ་བུའི་དུས་ཆེན་གྱི་སྐབས་སུ་ཡ་ཧུ་དཱ་པ་རྣམས་ཀྱིས་ཁོ་རང་གང་དུ་འདུག་ཅེས་ཟེར་ཞིང་སྐྱབས་མགོན་ཡེ་ཤུ་བཙལ་ཏོ།།
JOH 7:12 ཡང་མི་ཚོགས་ཀྱི་ཁྲོད་དུ་ཁོང་གི་སྐོར་ལ་གཏམ་སྣ་ཚོགས་སྨྲས་ཏེ། ལ་ལས་ཁོང་ནི་མི་བཟང་པོ་ཞིག་གོ་ཞེས༌དང༌། ལ་ལས་དེ་འདྲ་ཞིག་མ་ཡིན་པར་མི་མང་པོ་བསླུ་མཁན་ཞིག་ཡིན་ཞེས་པའོ།།
JOH 7:13 འོན་ཀྱང་མི་རྣམས་ཡ་ཧུ་དཱ་པ་རྣམས་ལ་འཇིགས་ཏེ་སུས་ཀྱང་སྐྱབས་མགོན་ཡེ་ཤུའི་སྐོར་མངོན་སུམ་དུ་གླེང་མ་ཕོད༌དོ།།
JOH 7:14 སྤྱིལ་བུའི་དུས་ཆེན་གྱི་དཀྱིལ་ཙམ་ལ་སླེབས་པའི་སྐབས༌སུ། སྐྱབས་མགོན་ཡེ་ཤུ་ཡར་མཆོད་ཁང་དུ་ཕེབས་ནས་ཆོས་གསུངས་སོ།།
JOH 7:15 དེ་ནས་ཡ་ཧུ་དཱ་པ་རྣམས་ངོ་མཚར་བར་གྱུར་ཏེ་ན༌རེ། མི་འདིས་ཆོས་བསླབས་མ་མྱོང་ཡང་ཆོས་དེ་འདྲ་མང་པོ་ཤེས་པར་གྱུར་པ་ཅི་ཞེས་སྨྲས་པ༌དང༌།
JOH 7:16 ཡང་སྐྱབས་མགོན་ཡེ་ཤུས་འདི་སྐད༌དུ། ངས་གསུངས་པའི་ཆོས་འདི་ནི་བདག་གི་ཆོས་མ་ཡིན་པར་ང་རང་མངགས་མཁན་ལས་བྱུང་བ་ཡིན་ནོ།།
JOH 7:17 སུ་ཞིག་གིས་དཀོན་མཆོག་གི་དགོངས་པ་བཞིན་དུ་བསྒྲུབ་འདོད་ན། བདག་གི་ཆོས་འདི་ནི་དཀོན་མཆོག་ནས་བྱུང༌བའམ། ཡང་ན་བདག་གིས་རང་ཉིད་ལ་བརྟེན་ནས་སྨྲས་པ་ཡིན་པའང་ཤེས་པར་འགྱུར།
JOH 7:18 སུ་ཞིག་གིས་རང་ཉིད་ལ་བརྟེན་ནས་སྨྲ་བ་དེས་རང་གི་སྙན་གྲགས་འཚོལ་བ་ཡིན༌མོད། འོན་ཀྱང་རང་ཉིད་མངགས་མཁན་གྱི་གཟི་བརྗིད་འཚོལ་བ་ནི་མི་དྲང་བདེན་ཅན་ཡིན་ཞིང་ཁོའི་སེམས་སུ་བཅོས་མ་ཅི་ཡང་མེད་དོ།།
JOH 7:19 ཡང་མོ་ཤེ་ཡིས་ཁྱོད་རྣམས་ལ་བཀའ་ཁྲིམས་གནང་བ་མ་ཡིན༌ནམ། ཁྱོད་རྣམས་ཀྱི་ཁྲོད་དུ་བཀའ་ཁྲིམས་སྒྲུབ་མཁན་གཅིག་ཀྱང་མི་འདུག ཁྱོད་ཅག་གིས་ཅིའི་ཕྱིར་ང་རང་དགྲོང་འདོད་པ་ཡིན་ནམ་ཞེས་གསུངས་པ༌ན།
JOH 7:20 མི་ཚོགས་ན༌རེ། ཁྱོད་ལ་གདོན་འདྲེ་ཞུགས་འདུག སུ་ཞིག་གིས་ཁྱོད་རང་དགྲོང་འདོད་དམ་ཞེས་སྨྲས༌སོ།།
JOH 7:21 ཡང་སྐྱབས་མགོན་ཡེ་ཤུས་འདི་སྐད༌དུ། དེ་སྔོན་བདག་གིས་ལས་གཅིག་བསྒྲུབས་མྱོང་བས་ཁྱོད་རྣམས་དོན་དེར་ཧ་ལས༌པ་རེད།
JOH 7:22 མོ་ཤེ་ཡིས་ཁྱོད་རྣམས་ལ་མཚན་སྐྱི་གཅོད་པའི་བཀའ་ཁྲིམས་གནང་ཡོད༌པས། ངལ་གསོ་བའི་ཉིན་ལ་ཁྱོད་རྣམས་ཀྱིས་ཀྱང་རང་གི་བུ་རྣམས་ཀྱི་མཚན་སྐྱི་གཅོད་པར་བྱེད་དོ།། འོན་ཀྱང་བཀའ་ཁྲིམས་དེ་ནི་མོ་ཤེ་ནས་བྱུང་བ་མ་ཡིན༌ཏེ། ཁྱོད་རྣམས་ཀྱི་ཕ་མེས་ཡང་མེས་ནས་བྱུང་བ་ཡིན།
JOH 7:23 མི་རྣམས་ཀྱིས་མོ་ཤེའི་བཀའ་ཁྲིམས་དང་མི་འགལ་བའི་ཆེད༌དུ། ངལ་གསོ་བའི་ཉིན་ལ་བུ་རྣམས་ཀྱི་མཚན་སྐྱི་བཅད་ཆོག༌ན། བདག་གིས་ངལ་གསོ་བའི་ཉིན་ལ་ནད་པ་ཞིག་ཡོངས་སུ་གསོས་པར་ཁྱོད་རྣམས་བདག་ལ་ཁྲོས་དོན༌ཅི།
JOH 7:24 ཕྱི་ཚུལ་ཙམ་ལ་བལྟས་ནས་བདེན་རྫུན་གྱི་ཐ་ཚིག་མ་སྒྲོག༌ཅིག དྲང་བདེན་གྱི་སྒོ་ནས་བདེན་རྫུན་གྱི་ཤན་ཕྱེས་ཤིག་ཅེས་གསུངས༌སོ།།
JOH 7:25 དེ་ནས་ཡེ་རུ་སཱ་ལེམ་གྱི་མི་ཁ་ཅིག་ན༌རེ། མི་འདི་ནི་ཁོ་རྣམས་ཀྱིས་དགྲོང་བར་རྩོམ་པ་དེ་མ་ཡིན༌ནམ།
JOH 7:26 ལྟོས༌དང༌། ཁོང་གིས་མངོན་གསལ་དུ་ཆོས་གསུངས་པ་ལ་ཁོ་རྣམས་ཀྱིས་ཅི་ཡང་མ་སྨྲས་ཤིང་། ཆོས་དཔོན་རྣམས་ཀྱིས་དངོས་གནས་འདི་ནི་སྐྱབས་མགོན་མཱ་ཤི་ཀ་ཡིན་པ་རྟོགས༌སམ།
JOH 7:27 འོན་ཀྱང་མི་འདི་གང་ནས་བྱུང་བ་བདག་ཅག་གིས་ཤེས༌ཏེ། མ་འོངས་པའི་དུས༌སུ། སྐྱབས་མགོན་མཱ་ཤི་ཀ་འཇིག་རྟེན་དུ་ཕེབས་པའི༌ཚེ། མི་སུས་ཀྱང་ཁོང་ཉིད་གང་ནས་བྱུང་བ་རྟོགས་མི་ནུས་ཞེས་སྨྲས་སོ།།
JOH 7:28 དུས་དེར་སྐྱབས་མགོན་ཡེ་ཤུས་མཆོད་ཁང་ནས་ཆོས་གསུངས་ཤིང་གསུང་སྐད་མཐོན༌པོས། ཁྱོད་རྣམས་ཀྱིས་ང་རང་སུ་ཡིན་པ་ཤེས་ཤིང་གང་ནས་བྱུང་བའང་ཤེས༌པ་ཡིན། བདག་ནི་རང་བཞིན་གྱིས་ཡོང་བ་མ་ཡིན༌ཏེ། ང་རང་མངགས་མཁན་ནི་བདེན་པ་ལགས། ཁྱོད་རྣམས་ཀྱིས་ཁོང་ཉིད་ངོ་མི་ཤེས་སོ།།
JOH 7:29 འོན་ཀྱང་བདག་ནི་ཁོང་ནས་བྱུང་ཞིང་ཁོང་གིས་ང་རང་མངགས་པས་བདག་གིས་ཁོང་ཉིད་ངོ་ཤེས་ཞེས་གསུངས་སོ།།
JOH 7:30 དེ་ནས་ཡ་ཧུ་དཱ་པ་དེ་རྣམས་ཀྱིས་སྐྱབས་མགོན་ཡེ་ཤུ་འཛིན་པར་བརྩམས༌ཀྱང་། ཁོང་གི་དུས་དེ་ད་དུང་མ་སླེབས་པས་མི་སུས་ཀྱང་ཁོང་ལ་ལག་པས་རེག་མ་ཐུབ་བོ།།
JOH 7:31 འོན་ཀྱང་མི་ཚོགས་ཀྱི་ཁྲོད་ནས་མི་མང་པོ་ཞིག་སྐྱབས་མགོན་ཡེ་ཤུར་དད་པར་གྱུར་ཏེ་ན༌རེ། སྐྱབས་མགོན་མཱ་ཤི་ཀ་ཕེབས་པའི་དུས༌སུ། ཁོང་གིས་མཛད་པར་འགྱུར་བའི་གྲུབ་རྟགས་རྣམས་ནི་མི་འདི་ལས་ཀྱང་མང་སྲིད་དམ་ཞེས་སྨྲས༌སོ།།
JOH 7:32 དེ་ནས་མི་ཚོགས་ཀྱིས་སྐྱབས་མགོན་ཡེ་ཤུའི་སྐོར་ལ་གཏམ་སྣ་ཚོགས་གླེང་བཞིན་པ་ཕ་རུ་ཤི་པ་རྣམས་ཀྱིས་ཐོས༌ཤིང༌། མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱིས་སྲུང་དམག་འགའ་ཁོང་ཉིད་འཛིན་དུ་མངགས་སོ།།
JOH 7:33 དེ་ནས་སྐྱབས་མགོན་ཡེ་ཤུས་འདི་སྐད༌དུ། བདག་ལ་ཁྱོད་ཅག་དང་མཉམ་དུ་སྡོད་པའི་དུས་ཐུང་ངུ་ལས་མེད༌ཅིང༌། རྗེས་སུ་ང་རང་ཕྱིར་ང་རང་མངགས་མཁན་གྱི་དྲུང་དུ༌འགྲོ་བ་ཡིན།
JOH 7:34 ཕྱིས་སུ་ཁྱོད་རྣམས་ཀྱིས་ང་རང་བཙལ་ཡང་མི་རྙེད། ང་རང་སྡོད་སའི་གནས་སུའང་ཁྱོད་ཅག་སླེབ་མི་ནུས་ཞེས་གསུངས་སོ།།
JOH 7:35 དེ་ནས་ཡ་ཧུ་དཱ་པ་རྣམས་ཀྱིས་ཕན་ཚུན་ན་རེ། མི་འདི་བདག་ཅག་གིས་བཙལ་ཡང་མི་རྙེད་པའི་ས་ཆ་གང་ཞིག་ཏུ༌འགྲོའམ། ཡང་ན་ཁོ་རང་གྷི་རིག་པའི་ཁྲོད་དུ་ཁ་ཐོར་དུ་གནས་པའི་ཡ་ཧུ་དཱ་པ་རྣམས་ཀྱི་གམ་དུ་སོང༌སྟེ། གྷི་རིག་པ་རྣམས་ལ་ཆོས་གསུང་དུ་འགྲོའམ།
JOH 7:36 ཁོས་ཕྱིས་སུ་ཁྱོད་རྣམས་ཀྱིས་ང་རང་བཙལ་ཡང་མི་རྙེད། ང་རང་སྡོད་སའི་གནས་སུའང་ཁྱོད་ཅག་སླེབ་མི་ནུས་ཞེས་གསུངས་པའི་དོན་ཅི་ཡིན་ནམ་ཞེས་སྨྲས༌སོ།།
JOH 7:37 དེ་ཡང་སྤྱིལ་བུའི་དུས་ཆེན་གྱི་ཉིན་རྗེས་མ་སྟེ་གཟབ་རྒྱས་ཆེ་བའི་དུས་སྟོན་གྱི་ཉིན་མོ༌དེར། སྐྱབས་མགོན་ཡེ་ཤུ་ཡར་བཞེངས་ཏེ་གསུང་སྐད་ཆེན་པོས་འདི་སྐད་དུ། གལ་ཏེ་སུ་ཞིག་སྐོམ་ན་བདག་གི་གམ་དུ་འཐུང་བར་ཤོག
JOH 7:38 སུ་ཞིག་གིས་བདག་ལ་དད་པ་བྱེད་ན། གསུང་རབ་ལས་གསུངས་པ་ལྟར་མི་དེའི་ཁོག་ནས་ཚེ་སྲོག་དང་ལྡན་པའི་ཆུ་ནི་གཙང་པོ་བཞིན་དུ་འབབ་པར་འགྱུར་ཞེས་གསུངས་སོ།།
JOH 7:39 སྐྱབས་མགོན་ཡེ་ཤུས་དེ་ལྟར་གསུངས་དོན་ནི་ཁོང་ལ་དད་པ་བྱེད་མཁན་རྣམས་ལ་དམ་པའི་ཐུགས་ཉིད་འཐོབ་ངེས་པ་བསྟན་ཏོ།། འོན་ཀྱང་སྐྱབས་མགོན་ཡེ་ཤུ་ད་དུང་གཟི་བརྗིད་དང་ལྡན་པར་མ་གྱུར་པས་ དད་ལྡན་རྣམས་ལའང་དམ་པའི་ཐུགས་ཉིད་གནང་མེད་པ་རེད།
JOH 7:40 མི་ཚོགས་ཀྱིས་གཏམ་དེ་ཐོས་པ་དང་ཁ་ཅིག་ན༌རེ། མི་འདི་ནི་དངོས་གནས་ལུང་སྟོན་པ་དེ་ཉིད་ཡིན་ཞེས༌དང༌།
JOH 7:41 ཁ་ཅིག་གིས་མི་འདི་ནི་སྐྱབས་མགོན་མཱ་ཤི་ཀ་ཡིན་ཞེས་སྨྲས་པ༌དང༌། ཡང་ཁ་ཅིག་གིས་སྐྱབས་མགོན་མཱ་ཤི་ཀ་ནི་ག་ལིལ་ཡུལ་ནས་འབྱུང་མི་སྲིད་དོ།།
JOH 7:42 གསུང་རབ་ལས་སྐྱབས་མགོན་མཱ་ཤི་ཀ་ནི་དཱ་བིད་ཀྱི་གདུང་རྒྱུད་དང༌། དཱ་བིད་ཀྱི་ཕ་ཡུལ་ཏེ་པེད་ལེ་ཧེམ་གྲོང་རྡལ་ནས་འབྱུང་བར་འགྱུར་ཞེས་གསུངས་ཡོད་པ་མ་ཡིན་ནམ་ཞེས་སྨྲས་སོ།།
JOH 7:43 དེའི༌ཕྱིར། མི་ཚོགས་ཁྲོད་ནས་སྐྱབས་མགོན་ཡེ་ཤུའི་སྐོར་ལ་ལྟ་ཚུལ་མི་མཐུན་པ་བྱུང༌།
JOH 7:44 དེ་རྣམས་ལས་ཁ་ཅིག་གིས་ཁོང་ཉིད་འཛིན་འདོད་ནའང་མི་སུས་ཀྱང་ཁོང་ལ་ལག་པས་རེག་མ་ཐུབ་བོ།།
JOH 7:45 དེ་ནས་སྲུང་དམག་རྣམས་མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱི་གམ་དུ་ཕྱིར་ལོག་པ༌ན། དེ་རྣམས་ན༌རེ། ཁྱོད་རྣམས་ཀྱིས་ཅིའི་ཕྱིར་མི་དེ་བཙན་ཁྲིད་མ་བྱས་སམ་ཞེས་དྲིས་པ༌ལ།
JOH 7:46 སྲུང་དམག་རྣམས་ན༌རེ། ཁོང་གིས་གསུངས་པ་དེ་ལྟ་བུ་མི་སུས་ཀྱང་གསུངས་མ་མྱོང་ཞེས་ཞུས་སོ།།
JOH 7:47 ཡང་ཕ་རུ་ཤི་པ་རྣམས་ན༌རེ། ཁོས་ཁྱོད་རྣམས་ཀྱང་བསླུ་བྲིད་བྱས༌སམ།
JOH 7:48 ཆོས་དཔོན་ནམ་ཕ་རུ་ཤི་པ་ལས་སུ་ཞིག་དེ་ལ་དད་པར་གྱུར༌རམ།
JOH 7:49 འོན་ཀྱང་བཀའ་ཁྲིམས་མི་ཤེས་པའི་མི་ཚོགས་འདི་ལ་སྡིགས་དམོད་ཆེན་པོ་ཕོག་པ་ཡིན་ཞེས་སྨྲས་སོ།།
JOH 7:50 དེ་ནས་ཕ་རུ་ཤི་པའི་ཁྲོད་དུ་ནེ་ཀོ་དེམ་ཟེར་བ་སྔོན་ཆད་སྐྱབས་མགོན་ཡེ་ཤུར་མཇལ་མྱོང་བ་དེས་ཆོས་དཔོན་རྣམས་ལ་འདི་ལྟར་སྨྲས་ཏེ།
JOH 7:51 བདག་ཅག་གི་བཀའ་ཁྲིམས་ལྟར་ངེད་ཅག་གིས་མི་དེའི་ངག་ལས་ཉེས་པ་ཅི་བྱས་པ་ལ་མ་བརྟག་མ་ཤེས་པར་ཁྲིམས་ཐག་གཅོད་པར་བྱེད་དམ་ཞེས་པ༌ལ།
JOH 7:52 ཆོས་དཔོན་རྣམས་ན༌རེ། ཁྱོད་རང་ཡང་ག་ལིལ་ཡུལ་ནས་འོངས་པའི་མི་ཞིག་ཡིན༌ནམ། ཁྱོད་ཀྱིས་རྟོག་དཔྱོད་བྱོས༌དང༌། ག་ལིལ་ཡུལ་ནས་ལུང་སྟོན་པ་ཞིག་འབྱུང་མི་སྲིད་ཅེས་སྨྲས་སོ།།
JOH 7:53 དེ་ནས་མི་དེ་རྣམས་རེ་རེ་བཞིན་ཕྱིར་རང་ཁྱིམ་དུ་ལོག༌གོ།
JOH 8:1 དེ་ནས་སྐྱབས་མགོན་ཡེ་ཤུ་སྐྱུ་རུ་རའི་རི་བོར་ཕེབས༌ཤིང༌།
JOH 8:2 སྐྱ་རེངས་ཤར་བའི་དུས་སུ་སླར་ཡང་མཆོད་ཁང་དུ་ཕེབས་པ༌ལ། མི་མང་པོ་ཁོང་གི་དྲུང་དུ་འཛོམས་ཤིང་ཁོང་ཉིད་ཀྱང་བཞུགས་ཏེ་མི་རྣམས་ལ་ཆོས་གསུངས་པ་རེད།
JOH 8:3 དེ་ནས་མཁན་པོ་དང་ཕ་རུ་ཤི་པ་རྣམས་ཀྱིས་ལོག་གཡེམ་བྱེད་པའི་དུས་སུ་བཟུང་བའི་བུད་མེད་ཅིག་སྐྱབས་མགོན་ཡེ་ཤུའི་དྲུང་དུ་ཁྲིད་ཡོང་བ༌དང༌། མི་ཚོགས་ཀྱི་མདུན་ནས་ཁོ་མོ་ཡར་བསླངས་ཏེ་སྐྱབས་མགོན་ཡེ་ཤུ་ལ་འདི་ལྟར་སྨྲས་པ་སྟེ།
JOH 8:4 སློབ་དཔོན༌ལགས། བུད་མེད་འདི་ནི་ལོག་གཡེམ་བྱེད་བཞིན་པའི་དུས་སུ་བཟུང་བ༌ཡིན།
JOH 8:5 དེ་ཡང་བཀའ་ཁྲིམས་ལས་མོ་ཤེ་ཡིས་བུད་མེད་འདི་ལྟ་བུ་རྡོ་རུབ་གཏོང་དགོས་ཞེས་བཀའ་གནང༌ཡོད། ཁྱེད་ཀྱིས་བལྟས༌ན། ཅི་ལྟར་བྱས་ན་ལེགས་སམ་ཞེས་ཞུས་པ་དང་།
JOH 8:6 དེ་རྣམས་ཀྱིས་ཁོང་ལ་བསྙོན་འཛུགས་ཕྱིར་ཚོད་བགམས་ནས་དེ་ལྟར་ཞུས་སོ།། འོན་ཀྱང་སྐྱབས་མགོན་ཡེ་ཤུ་མར་སྒུར་ནས་ཕྱག་མཛུབ་ཀྱིས་ས་ལ་ཡི་གེ་བྲིས་སོ།།
JOH 8:7 དེ་རྣམས་ཀྱིས་ཁོང་ལ་ཡང་ཡང་ཞུས་པ་ན་ཁོང་གིས་དབུ་ཡར་དགྱེ་ནས་འདི་སྐད༌དུ། ཁྱོད་རྣམས་ལས་སྡིག་པའི་དྲི་མས་མ་གོས་པ་དེས་ཐོག་མར་བུད་མེད་དེ་ལ་རྡོ་ཡིས་རྒྱག་རུང་ཞེས་གསུངས་པ༌དང༌།
JOH 8:8 ཡང་མར་སྒུར་ནས་ཕྱག་མཛུབ་ཀྱིས་ས་ལ་ཡི་གེ་བྲིས༌སོ།།
JOH 8:9 དེ་རྣམས་ཀྱིས་གསུང་དེ་ཐོས་པ་དང་རྒན་པོ་ནས་ན་གཞོན་བར་རེ་རེ་བཞིན་ཕྱིར་སོང་བ༌དང༌། སྐྱབས་མགོན་ཡེ་ཤུ་ཁོ་ན་ལུས་ཤིང་ད་དུང་བུད་མེད་དེ་དཀྱིལ་དབུས་སུ་ལངས་བསྡད་ཡོད་པ་རེད།
JOH 8:10 དེ་ནས་སྐྱབས་མགོན་ཡེ་ཤུ་ཡར་ལངས་ནས་བུད་མེད་དེ་ལ་འདི་སྐད༌དུ། བུད་མེད། མི་དེ་རྣམས་གང་དུ་སོང༌ངམ། སུས་ཀྱང་ཁྱོད་ལ་ཉེས་ཆད་མ་བཅད་དམ་ཞེས་གསུངས་པ༌ལ།
JOH 8:11 བུད་མེད་ན༌རེ། ཇོ་བོ༌ལགས། བདག་ལ་ཉེས་ཆད་མ་བཅད་ཅེས་ཞུས་སོ།། དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁྱོད་རང་ཕྱིར་སོང༌དང༌། བདག་གིས་ཀྱང་ཁྱོད་ལ་ཉེས་ཆད་གཅོད་པར་མི༌བྱའོ།། ཁྱོད་ཀྱིས་དེང་ཕྱིན་སྡིག་པ་མ་བྱེད་ཅིག་ཅེས་གསུངས༌སོ།།
JOH 8:12 དེ་ནས་སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། བདག་ནི་འཇིག་རྟེན་གྱི་འོད་ཟེར་ཡིན༌ཞིང༌། ངའི་རྗེས་སུ་འབྲང་མཁན་རྣམས་མུན་པའི་ནང་དུ་བགྲོད་པ་མ་ཡིན་པར་ཚེ་སྲོག་གི་འོད་དང་ལྡན་པར་འགྱུར་ཞེས་གསུངས་པ༌དང༌།
JOH 8:13 ཕ་རུ་ཤི་པ་རྣམས་ན༌རེ། ཁྱོད་ཀྱིས་རང་ཉིད་ལ་བདེན་དཔང་བྱེད་པ་ཡིན་པས་ཁྱོད་ཀྱི་བདེན་དཔང་དེ་བདེན་པ་མིན་ཞེས་སྨྲས་པ༌ལ།
JOH 8:14 སྐྱབས་མགོན་ཡེ་ཤུས་འདི་སྐད༌དུ། བདག་གིས་རང་ཉིད་ལ་བདེན་དཔང་བྱས་ནའང་བདག་གི་བདེན་དཔང་ནི་བདེན་པ་ཡིན༌ཏེ། ངས་ང་རང་གང་ནས་ཡོང་བ་དང་གང་དུ་འགྲོ་བའང་ཤེས༌ཤིང༌། ཁྱོད་རྣམས་ཀྱིས་ང་རང་གང་ནས་ཡོང་བ་དང་གང་དུ་འགྲོ་བའང་མི་ཤེས་པའི་ཕྱིར༌རོ།།
JOH 8:15 ཡང་ཁྱོད་རྣམས་ཀྱིས་མིའི་ལུགས་སྲོལ་ལྟར་ཁ་ཚོན་གཅོད་ཅིང་ངས་མི་སུ་ལའང་ཁ་ཚོན་མི་གཅོད་དོ།།
JOH 8:16 འོན༌ཀྱང༌། ངས་ཁ་ཚོན་གཅོད་པའི་དབང་དུ་བཏང་ནའང་དེ་ནི་བདེན་པ་ཡིན༌ཏེ། ངས་རང་ཉིད་གཅིག་པུར་བརྟེན་ནས་ཁ་ཚོན་བཅད་པ་མ་ཡིན༌པར། ང་རང་མངགས་མཁན་ཡབ་དང་ངེད་གཉིས་ཀྱིས་ལྷན་དུ་ཁ་ཚོན་གཅོད་པའི་ཕྱིར༌རོ།།
JOH 8:17 དེ་ཡང་ཁྱོད་ཅག་གི་བཀའ་ཁྲིམས་ནང་དུ་མི་གཉིས་ཀྱི་བདེན་དཔང་དེ་གཞི་གཅིག་ལ་འཁེལ་ན་དེ་ནི་བདེན་པ་ཡིན་ཞེས་བྲིས་འདུག༌ལ།
JOH 8:18 ངས་རང་ཉིད་ལ་བདེན་དཔང་བྱེད་ཅིང་ང་རང་མངགས་མཁན་ཏེ་ཡབ་ཀྱིས་ཀྱང་ང་རང་ལ་བདེན་དཔང་མཛད་ཅེས་གསུངས་སོ།།
JOH 8:19 ཡང་ཕ་རུ་ཤི་པ་རྣམས་ན༌རེ། ཁྱོད་ཀྱི་ཡབ་དེ་གང་དུ་ཡོད་ཅེས་དྲིས་པ༌ལ། སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་ང་རང་ངོ་མི་ཤེས་ཤིང་བདག་གི་ཡབ་ཀྱང་ངོ་མི་ཤེས། གལ་ཏེ་ང་རང་ངོ་ཤེས་ན་ངའི་ཡབ་ཀྱང་ངོ་ཤེས་པ་ཡིན་ཞེས་གསུངས་སོ།།
JOH 8:20 གསུང་འདི་དག་ནི་སྐྱབས་མགོན་ཡེ་ཤུས་མཆོད་ཁང་གི་དཀོར་མཛོད་དུ་ཆོས་བསྟན་སྐབས་གསུངས་པ༌ཡིན། ཁོང་གི་དུས་དེ་མ་སླེབས་པས་མི་སུས་ཀྱང་ཁོང་ཉིད་མ་བཟུང་ངོ་།།
JOH 8:21 ཡང་སྐྱབས་མགོན་ཡེ་ཤུས་མི་དེ་རྣམས་ལ་འདི་སྐད༌དུ། བདག་ནི་འགྲོ་ཞིང་ཁྱོད་ཅག་གིས་ང་རང་བཙལ་ནའང་ཁྱོད་རྣམས་རང་གི་སྡིག་པའི་ནང་དུ་འཆི་བར་འགྱུར་རོ།། ང་རང་འགྲོ་བའི་གནས་སུ་ཁྱོད་རྣམས་འགྲོ་མི་ནུས་ཞེས་གསུངས་པ༌དང༌།
JOH 8:22 ཡ་ཧུ་དཱ་པ་རྣམས་ཕན་ཚུན་ན༌རེ། ཁོང་གིས་ང་རང་འགྲོ་བའི་གནས་སུ་ཁྱོད་རྣམས་འགྲོ་མི་ནུས་ཞེས་གསུངས་དོན༌ནི། ཁོང་གིས་རང་སྲོག་གཅོད་འདོད་པ་ཡིན་ནམ་ཞེས་སྨྲས་སོ།།
JOH 8:23 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་འོག་ནས་བྱུང་ཞིང་བདག་ནི་སྟེང་ནས་བྱུང་བ་ཡིན། ཁྱོད་ཅག་ནི་འཇིག་རྟེན་འདིར་གཏོགས་ཤིང་ང་རང་ནི་མི་གཏོགས་སོ།།
JOH 8:24 དེའི༌ཕྱིར། བདག་གིས་ཁྱོད་རྣམས་རང་གི་སྡིག་པའི་ནང་དུ་འཆི་བར་འགྱུར་ཞེས་སྨྲས་པ་ཡིན། གལ་ཏེ་ཁྱོད་རྣམས་ཀྱིས་ང་རང་ནི་གཏན་དུ་གནས་པ་དེ་ཉིད་ཡིན་པར་དད་པ་མི་བྱེད༌ན། ཁྱོད་རྣམས་རང་གི་སྡིག་པའི་ནང་དུ་འཆི་བར་འགྱུར་ཞེས་གསུངས་པ༌ལ།
JOH 8:25 མི་དེ་རྣམས་ན༌རེ། ཁྱོད་རང་སུ་ཡིན་ནམ་ཞེས་དྲིས། དེ་ནས་སྐྱབས་མགོན་ཡེ་ཤུས་འདི་སྐད༌དུ། བདག་ནི་ཐོག་མ་ཉིད་ནས་ཁྱོད་རྣམས་ལ་སྨྲས་པ་དེ་ཉིད་ཡིན་ནོ།།
JOH 8:26 བདག་གིས་ཁྱོད་ཅག་ལ་ཉེས་སྐྱོན་བརྗོད་པ་དང་བདེན་རྫུན་གྱི་ཤན་འབྱེད་པའི་དོན་མང་པོ་ཡོད༌ནའང༌། ང་རང་མངགས་མཁན་དེ་ནི་བདེན་པ་ཡིན༌པས། ངས་ཁོང་གི་དྲུང་ནས་གང་ཞིག་ཐོས་པ་དེ་ཁོ་ན་འཇིག་རྟེན་གྱི་མི་རྣམས་ལ་སྨྲ་བ་ཡིན་ཞེས་གསུངས་སོ།།
JOH 8:27 དེ་རྣམས་ཀྱིས་སྐྱབས་མགོན་ཡེ་ཤུས་རང་གི་ཡབ་བསྟན་པ་མ་རྟོགས༌པས།
JOH 8:28 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་མིའི་བུ་གྱེན་དུ་བསྒྲེངས༌པའི་དུས་སུ། ང་རང་ནི་གཏན་དུ་གནས་པ་དེ་ཉིད་ཡིན་པ་རྟོགས་ངེས་པ༌དང༌། ངས་རང་ཉིད་ལ་བརྟེན་ནས་དོན་ཅི་ཡང་མི་བྱེད༌པར། ཡབ་ཀྱིས་བསླབས་པ་བཞིན་དུ་དེ་ལྟར་སྨྲས་པའང་ཁྱོད་རྣམས་ཀྱིས་ཤེས་པར་འགྱུར་རོ།།
JOH 8:29 ང་རང་མངགས་མཁན་ནི་བདག་དང་ལྷན་དུ་བཞུགས༌ཏེ། ངས་དུས་རྟག་ཏུ་ཁོང་ཉིད་ཐུགས་དགྱེས་པའི་ལས་ཁོ་ན་བྱེད་པས་ཁོང་ཉིད་ང་རང་དང་ཁ་མི་འབྲལ་ཞེས་གསུངས་སོ།།
JOH 8:30 སྐྱབས་མགོན་ཡེ་ཤུས་དེ་ལྟར་གསུང་བའི་དུས་སུ་མི་མང་པོ་ཁོང་ལ་དད་པར་གྱུར༌ཏོ།།
JOH 8:31 དེ་ནས་སྐྱབས་མགོན་ཡེ་ཤུས་རང་ཉིད་ལ་དད་པ་ཡོད་པའི་ཡ་ཧུ་དཱ་པ་རྣམས་ལ་འདི་སྐད༌དུ། གལ་ཏེ་ཁྱོད་རྣམས་བདག་གི་བཀའ་ཡི་ནང་དུ་གནས་ན། ཁྱོད་ཅག་ནི་དངོས་གནས་བདག་གི་རྗེས་འབྲང་པ་ཡིན༌ལ།
JOH 8:32 ཁྱོད་རྣམས་ཀྱིས་བདེན་པ་ཉིད་དེ་ཤེས་པར་འགྱུར་ཞིང་བདེན་པ་ཉིད་ཀྱིས་ཀྱང་ཁྱོད་རྣམས་ལ་རང་དབང་ལྡན་པར་མཛད་ངེས་ཡིན་ཞེས་གསུངས་སོ།།
JOH 8:33 ཡང་དེ་རྣམས་ན༌རེ། ངེད་རྣམས་ནི་ཨབ་ར་ཧམ་གྱི་རིགས་རྒྱུད་ཡིན་ཞིང་ནམ་ཡང་མི་གཞན་གྱི་བྲན་གཡོག་བྱས་མ་མྱོང་བས། ཁྱོད་རྣམས་ལ་རང་དབང་ལྡན་པར་མཛད་ངེས་ཡིན་ཞེས་བརྗོད་དོན་ཅི་ཞེས་དྲིས་པ༌ན།
JOH 8:34 ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། སྡིག་པ་བྱེད་མཁན་ཐམས་ཅད་ནི་སྡིག་པའི་བྲན་གཡོག་ཡིན།
JOH 8:35 བྲན་གཡོག་ནི་རྟག་ཏུ་བདག་པོའི་ཁྱིམ་ལ་མི་གནས་ཤིང་བུ་ནི་རྟག་ཏུ་རང་གི་ཁྱིམ་ལ་གནས་སོ།།
JOH 8:36 དེའི༌ཕྱིར། སྲས་ཀྱིས་ཁྱོད་རྣམས་ལ་རང་དབང་ལྡན་པར་མཛད་ན་ཁྱོད་ཅག་ལ་དངོས་གནས་རང་དབང་ལྡན་པ་ཡིན།
JOH 8:37 བདག་གིས་ཁྱོད་རྣམས་ཨབ་ར་ཧམ་གྱི་རིགས་རྒྱུད་ཡིན་པ་ཤེས༌ཀྱང༌། བདག་གི་བཀའ་ཁྱོད་རྣམས་ཀྱི་སེམས་སུ་གནས་ས་མེད་པས་ང་རང་དགྲོང་འདོད༌པ་ཡིན།
JOH 8:38 ངས་རང་གི་ཡབ་ཀྱི་དྲུང་ནས་གང་ཞིག་མཐོང་བ་དེ་སྨྲ་བ་ཡིན༌ལ། ཁྱོད་རྣམས་ཀྱིས་རང་གི་ཕ་ཡི་ངག་ནས་ཐོས་པ་བཞིན་བྱེད་ཅེས་གསུངས༌སོ།།
JOH 8:39 ཡང་དེ་རྣམས་ན༌རེ། ངེད་ཅག་གི་ཕ་མེས་ནི་ཨབ་ར་ཧམ་ཡིན་ནོ་ཞེས་སྨྲས་པ༌ལ། སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ཁྱོད་རྣམས་ནི་ཨབ་ར་ཧམ་གྱི་བུ་རྒྱུད་ཡིན༌ན། ཁྱོད་ཅག་གིས་ཀྱང་ཨབ་ར་ཧམ་གྱི་སྤྱོད་པ་བཞིན་དུ་བྱེད་དགོས།
JOH 8:40 བདག་གིས་དཀོན་མཆོག་གི་དྲུང་ནས་ཐོས་པའི་བདེན་པ་དེ་ཁྱོད་ཅག་ལ་སྨྲས༌ཀྱང༌། ད་ལྟ་ཁྱོད་རྣམས་ཀྱིས་ང་རང་གསོད་འདོད་དོ།། འོན་ཀྱང་ཨབ་ར་ཧམ་གྱིས་དེ་ལྟར་མ་བྱས།
JOH 8:41 ཁྱོད་ཅག་གིས་རང་རང་གི་ཕ་ཡི་སྤྱོད་ལུགས་བཞིན་བྱེད་པ་ཡིན་ཞེས་གསུངས་པ༌ལ། ཡང་དེ་རྣམས་ན༌རེ། ངེད་ཅག་ནི་ནལ་ཕྲུག་མིན༌ཏེ། ངེད་ཅག་ལ་ཡབ་གཅིག་རང་ཡོད་པ་ནི་དཀོན་མཆོག་ཡིན་ཞེས་སྨྲས་སོ།།
JOH 8:42 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་དཀོན་མཆོག་ནི་དངོས་གནས་ཁྱོད་ཅག་གི་ཡབ་ཡིན་ན་ཁྱོད་ཅག་གིས་བདག་ལ་གཅེས་དགོས༌ཏེ། ང་རང་ནི་དཀོན་མཆོག་ནས་བྱུང་ཞིང་ད་ལྟ་འདི་རུ་བསྡད་ཡོད། རང་བཞིན་གྱིས་ཡོང་བ་མ་ཡིན་པར་ཁོང་གིས་མངགས་པ་ཡིན་པའི་ཕྱིར༌རོ།།
JOH 8:43 ཁྱོད་རྣམས་ཀྱིས་བདག་གི་གཏམ་འདིའི་དོན་མི་གོ་བ་ཅི་ཡིན་ཞེ༌ན། དེ་ནི་ངའི་བཀའ་ལ་ཉན་མི་ཐུབ་པའི་ཕྱིར༌རོ།།
JOH 8:44 ཁྱོད་ཅག་ནི་རང་གི་ཕ་སྟེ་བདུད་ལ་གཏོགས༌ཤིང༌། རང་གི་ཕ་ཡི་འདོད་པ་བཞིན་བྱེད་པར༌དགའོ།། བདུད་ནི་ཐོག་མ་ནས་མི་གསོད་མཁན་ཡིན་པ༌དང༌། བདེན་པ་ཉིད་དང་འབྲེལ་བ་ཅི་ཡང་མེད། རྒྱུ་མཚན་ནི་བདུད་དེའི་སེམས་སུ་བདེན་པ་ཉིད་མེད་པའི་ཕྱིར༌རོ།། ཡང་བདུད་དེ་ནི་རྫུན་སྨྲ་མཁན་དང་རྫུན་སྨྲ་བ་རྣམས་ཀྱི་ཕ་རྒན་ཡང་ཡིན༌པས། དེས་རྫུན་བརྗོད་པའི་དུས་སུ་རང་གི་གཤིས་ཀ་ལྟར་སྨྲ་བར་བྱེད་དོ།།
JOH 8:45 འོན་ཀྱང་བདག་གིས་ཁྱོད་ཅག་ལ་བདེན་པ་སྨྲས་པའི་རྐྱེན་གྱིས་ཁྱོད་རྣམས་བདག་ལ་ཡིད་མི་ཆེས།
JOH 8:46 ཡང་ཁྱོད་རྣམས་ལས་སུ་ཞིག་གིས་བདག་ལ་སྡིག་པ་ཡོད་ཅེས་བདེན་དཔང་བྱེད་ནུས༌སམ། བདག་གིས་ཁྱོད་རྣམས་ལ་བདེན་པ་སྨྲས༌ནའང༌། ཁྱོད་ཅག་བདག་ལ་ཡིད་མི་ཆེས༌པ་ཅི་ཡིན་ནམ།
JOH 8:47 དཀོན་མཆོག་ལ་གཏོགས་པའི་མི་རྣམས་ཀྱིས་དཀོན་མཆོག་གི་བཀའ་ལ་མཉན༌ཞིང༌། ཁྱོད་རྣམས་དཀོན་མཆོག་ལ་མི་གཏོགས་པས་དཀོན་མཆོག་གི་བཀའ་ལའང་མི་མཉན་ཞེས་གསུངས༌སོ།།
JOH 8:48 དེ་ནས་ཡ་ཧུ་དཱ་པ་རྣམས་ན༌རེ། ངེད་རྣམས་ཀྱིས་ཁྱོད་ནི་སཱ་མར་ཡ་པ་ཡིན་ཞིང་གདོན་འདྲེ་ཞུགས་འདུག་ཅེས་སྨྲས་པ་མི་བདེན་ནམ་ཞེས་སྨྲས་པ༌ལ།
JOH 8:49 སྐྱབས་མགོན་ཡེ་ཤུས་འདི་སྐད༌དུ། བདག་ལ་གདོན་འདྲེ་ཞུགས་པ་མ་ཡིན། བདག་གིས་རང་གི་ཡབ་ལ་གུས་པ་བྱེད་ཀྱང་ཁྱོད་རྣམས་ཀྱིས་བདག་ལ་སྨད༌པ་རེད།
JOH 8:50 བདག་གིས་རང་ལ་བཀུར་སྟི་མི་འཚོལ༌ཞིང༌། བདག་ལ་བཀུར་སྟི་འཚོལ་མཁན་ནི་བདེན་རྫུན་འབྱེད་མཁན་ཏེ་དཀོན་མཆོག༌ཡིན་ནོ།།
JOH 8:51 བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། བདག་གི་བཀའ་སྲུང་མཁན་སུ་ལའང་ནམ་ཡང་འཆི་བ་མེད་ཅེས་གསུངས་པ༌ན།
JOH 8:52 ཡ་ཧུ་དཱ་པ་རྣམས་ན༌རེ། ཁྱོད་རང་ལ་གདོན་འདྲེ་ཞུགས་ཡོད་པ་ད་ལྟ་ངེད་རྣམས་ཀྱིས་ཤེས་བྱུང་། ཨབ་ར་ཧམ་དང་ལུང་སྟོན་པ་རྣམས་སྔ་མོ་ནས་ཚེ་ལས་འདས་ཟིན༌མོད། འོན་ཀྱང་ཁྱོད་ཀྱིས་ད་དུང་བདག་གི་བཀའ་སྲུང་མཁན་སུ་ལའང་ནམ་ཡང་འཆི་བ་མེད་ཅེས་སྨྲས༌པས།
JOH 8:53 ཁྱོད་ནི་ངེད་ཅག་གི་མེས་པོ་ཨབ་ར་ཧམ་ལས་ཀྱང་ཆེན་པོ་ཞིག་ཡིན༌ནམ། ཨབ་ར་ཧམ་དང་ལུང་སྟོན་པ་རྣམས་ཀྱང་གཤེགས་ཟིན༌མོད། འོན་ཀྱང་ཁྱོད་ཀྱིས་རང་ཉིད་ནི་སུ་ཡིན་པར་རློམ་མམ་ཞེས་སྨྲས་སོ།།
JOH 8:54 ཡང་སྐྱབས་མགོན་ཡེ་ཤུས་འདི་སྐད༌དུ། ངས་རང་ལ་བཀུར་སྟི་བྱེད་ན་བཀུར་སྟི་དེ་ལ་དོན་སྙིང་ཅི་ཡང་མེད། བདག་ལ་བཀུར་སྟི་མཛད་མཁན་ནི་བདག་གི་ཡབ་ལགས། ཁྱོད་རྣམས་ཀྱིས་སྨྲ་བཞིན་པའི་ཁྱོད་ཅག་གི་དཀོན་མཆོག་ཡིན་ཞེས་ཟེར་བ་དེ་ཡིན།
JOH 8:55 འོན་ཀྱང་ཁྱོད་རྣམས་ཀྱིས་དཀོན་མཆོག་ངོ་མི་ཤེས་ཀྱང་བདག་གིས་ངོ་ཤེས། གལ་ཏེ་བདག་གིས་དཀོན་མཆོག་ངོ་མི་ཤེས་ཟེར་ན་བདག་ནི་ཁྱོད་ཅག་དང་འདྲ་བར་རྫུན་སྨྲ་བ་ཡིན། འོན་ཀྱང་བདག་གིས་ཁོང་ཉིད་ངོ་ཤེས་པ་དང་ཁོང་གི་བཀའ་ཡང་སྲུང་བ་ཡིན།
JOH 8:56 ཁྱོད་ཅག་གི་མེས་པོ་ཨབ་ར་ཧམ་གྱིས་དགའ་དགའ་སྤྲོ་སྤྲོའི་ངང་ནས་བདག་གི་ཉིན་མོ་མཐོང་བར་ཡིད་སྨོན་བྱས་པ༌དང༌། མཐོང་བ་དང་དགའ་བར་གྱུར་ཞེས་གསུངས་སོ།།
JOH 8:57 ཡང་ཡ་ཧུ་དཱ་པ་རྣམས་ན༌རེ། ཁྱོད་ནི་ལོ་ལྔ་བཅུ་ལའང་མ་སོན་པར་ཨབ་ར་ཧམ་མཐོང་མྱོང་ངམ་ཞེས་དྲིས༌ཚེ།
JOH 8:58 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཨབ་ར་ཧམ་མ་སྐྱེས་པའི་སྔོན་ལ་བདག་ནི་གཏན་དུ་གནས་པ་དེ་ཉིད་ཡིན་ཞེས་གསུངས༌པས།
JOH 8:59 དེ་དག་གིས་ས་ནས་རྡོ་བླངས་ཏེ་སྐྱབས་མགོན་ཡེ་ཤུ་ལ་རྒྱག་པར་རྩོམ་པ༌ན། ཁོང་ཉིད་གསང་བའི་སྒོ་ནས་མཆོད་ཁང་དང་ཁ་བྲལ༌ཏོ།།
JOH 9:1 སྐྱབས་མགོན་ཡེ་ཤུ་ཕར་ཕེབས་པའི་ལམ་བར་དུ་དམུས་ལོང་ཞིག་དང་ཕྲད༌ཅིང༌།
JOH 9:2 ཐུགས་སྲས་རྣམས་ན༌རེ། རཱབ་པེ་ལགས། མི་འདི་ནི་སྐྱེས་མ་ཐག་ནས་ལོང་བ་ཞིག་ཡིན༌པས། ལོང་བ་རང་ཉིད་དམ་ཁོའི་ཕ་མས་སྡིག་པ་བྱས་པའི་རྐྱེན་གང་ཞིག་ཡིན་ནམ་ཞེས་ཞུས་པ༌ལ།
JOH 9:3 སྐྱབས་མགོན་ཡེ་ཤུས་འདི་སྐད༌དུ། ལོང་བ་འདིས་སྡིག་པ་བྱས་པའི་རྐྱེན་མིན༌ལ། ཁོའི་ཕ་མས་སྡིག་པ་བྱས་པའི་རྐྱེན་ཡང་མིན༌པར། དེ་ནི་དཀོན་མཆོག་གི་ངོ་མཚར་བའི་མཛད་པ་ཁོའི་སྟེང་ནས་མངོན་པའི་ཕྱིར་དེ་ལྟར་བྱུང༌ངོ་།།
JOH 9:4 བདག་ཅག་གིས་ཉིན་མོའི་དུས་སུ་ང་རང་མངགས་མཁན་གྱི་བསྒྲུབ་འོས་པའི་དོན་བྱེད་དགོས༌ཤིང༌། མི་སུས་ཀྱང་ལས་ཅི་ཡང་བྱེད་མི་ཐུབ་པའི་མཚན་མོའི་དུས་ཤིག་སླེབ་ངེས༌ཡིན།
JOH 9:5 ང་རང་འཇིག་རྟེན་དུ་བཞུགས་དུས་བདག་ནི་འཇིག་རྟེན་གྱི་འོད་ཟེར་ཡིན་ཞེས་གསུངས༌རྗེས།
JOH 9:6 སྐྱབས་མགོན་ཡེ་ཤུས་མཆིལ་མ་ས་ལ་གཏོར་ནས་འཇིམ་པ་ཞིག་བརྫིས་ཤིང་ལོང་བའི་མིག་ཟུང་ལ་བསྐུས་ཏེ་འདི་སྐད༌དུ།
JOH 9:7 ཁྱོད་རང་སི་ལོ་ཨམ་རྫིང་བུའི་ནང་དུ་མིག་ཟུང་བཀྲུ་བར་སོང་ཞིག་ཅེས་གསུངས་སོ།། སི་ལོ་ཨམ་ཞེས་པ་ནི་མངགས་པ་ཞེས་པའི་དོན༌ཡིན། དེ་ནས་ལོང་བ་དེ་སོང་ནས་མིག་ཟུང་བཀྲུས་ཤིང་མིག་གིས་མཐོང་བར་གྱུར་པ་དང་ཕྱིར་རང་ཡུལ་དུ་ལོག༌གོ།
JOH 9:8 དེ་ནས་ཁོའི་ཁྱིམ་མཚེས་དང་སྔར་ཁོ་སྤྲང་པོ་ཡིན་པ་མཐོང་མྱོང་མཁན་རྣམས་ན༌རེ། མི་འདི་ནི་སྔོན་ཆད་སློང་མོ་བྱེད་མཁན་དེ་མ་ཡིན་ནམ་ཞེས་སྨྲས༌ཤིང༌།
JOH 9:9 མི་འགའ་ཞིག་གིས་ཁོ་རང་ཡིན་ཞེས་སྨྲས་པ༌དང༌། ཡང་འགའ་ཞིག་གིས་ཁོ་རང་མ་ཡིན་ཏེ་ཁོ་རང་དང་བྱད་གཟུགས་འདྲ་བ་ཞིག་རེད་ཅེས་སྨྲས་པ༌ན། ཁོས་ང་རང་ཡིན་ཞེས་ཡང་ཡང་སྨྲས་པ༌དང༌།
JOH 9:10 མི་རྣམས་ན༌རེ། ཁྱོད་ཀྱི་མིག་ཟུང་ཇི་ལྟར་སོས་སམ་ཞེས་དྲིས་པ༌ལ།
JOH 9:11 ཁོ་ན༌རེ། ཡེ་ཤུ་ཟེར་བའི་སྐྱེས་བུ་དེས་འཇིམ་པ་བརྫིས་ཏེ་ངའི་མིག་ཟུང་ལ་བསྐུས༌རྗེས། སི་ལོ་ཨམ་རྫིང་བུའི་ནང་དུ་མིག་ཟུང་བཀྲུ་བར་སོང་ཞིག་ཅེས་སྨྲས་པ༌དང༌། ང་རང་སོང་སྟེ་བཀྲུས་པ་ན་མིག་གིས་མཐོང་བར་གྱུར་ཞེས་སྨྲས་སོ།།
JOH 9:12 དེ་ནས་མི་དེ་རྣམས་ཀྱིས་མི་དེ་གང་དུ་ཡོད་ཅེས་དྲིས་པ༌ལ། ཁོས་མི་ཤེས་ཞེས་སྨྲས༌སོ།།
JOH 9:13 དེ་ནས་མི་དེ་རྣམས་ཀྱིས་སྔོན་ཆད་དམུས་ལོང་ཡིན་པ་དེ་ཉིད་ཕ་རུ་ཤི་པ་རྣམས་ཀྱི་དྲུང་དུ་ཁྲིད་པ་རེད།
JOH 9:14 སྐྱབས་མགོན་ཡེ་ཤུས་འཇིམ་པ་བརྫིས་ནས་དམུས་ལོང་གི་མིག་ཟུང་གསོས་པར་མཛད་པའི་ཉིན་ནི་ངལ་གསོ་བའི་ཉིན་མོ་ཡིན་ནོ།།
JOH 9:15 དེ་ནས་ཕ་རུ་ཤི་པ་རྣམས་ཀྱིས་ཀྱང་ཁོའི་མིག་གིས་ཇི་ལྟར་མཐོང་བར་གྱུར་པ་དྲིས་པ༌ལ། ཁོ་ན༌རེ། མི་དེས་འཇིམ་པ་བརྫིས་ཏེ་ངའི་མིག་ལ་བསྐུས་ཤིང་། ངས་འཇིམ་པ་བཀྲུས་པ་དང་མིག་གིས་མཐོང་བར་གྱུར་ཞེས་སྨྲས་སོ།།
JOH 9:16 དེ་ནས་ཕ་རུ་ཤི་པ་རྣམས་ལས་འགའ་ཞིག་ན༌རེ། མི་དེས་ངལ་གསོ་བའི་ཉིན་མོའི་བཀའ་ཁྲིམས་སྲུང་བཞིན་མེད་པས་དཀོན་མཆོག་ནས་བྱུང་བ་མ་ཡིན་ནོ་ཞེས་སྨྲས་པ༌དང༌། ཡང་འགའ་ཞིག་ན༌རེ། མི་སྡིག་ཅན་གྱིས་དེ་ལྟ་བུའི་གྲུབ་རྟགས་རྣམས་སྟོན་ག་ལ་སྲིད་ཅེས་སྨྲས་པས་དེ་རྣམས་ལ་ལྟ་བ་མི་མཐུན་པ་བྱུང༌ངོ་༎
JOH 9:17 ཡང་ཕ་རུ་ཤི་པ་དེ་རྣམས་ཀྱིས་སྔོན་ཆད་དམུས་ལོང་ཡིན་པ་དེ༌ལ། མི་དེས་ཁྱོད་ཀྱི་མིག་ཟུང་གསོས་པར་མཛད༌པས། ཁྱོད་ཀྱིས་མི་དེ་ནི་ཅི་ལྟ་བུ་ཡིན་བསམ་མམ་ཞེས་དྲིས་པ༌ལ། ཁོ་ན༌རེ། མི་དེ་ནི་ལུང་སྟོན་པ་ཞིག་ཡིན་ཞེས་སྨྲས་སོ།།
JOH 9:18 དེ་ནས་ཡ་ཧུ་དཱ་པ་དེ་རྣམས་ཀྱིས་སྔོན་ཆད་དམུས་ལོང་ཡིན་ཞིང་རྗེས་སུ་མིག་གིས་མཐོང་བར་གྱུར་པའི་དོན་དེ་ལ་ཡིད་མ་ཆེས༌པར། ཁོའི་ཕ་མ་གཉིས་བོས་ཏེ་ན༌རེ།
JOH 9:19 མི་འདི་ནི་ཁྱོད་གཉིས་ཀྱི་བུ་ཡིན༌ནམ། ཁྱོད་ཕ་མ་གཉིས་ཀྱིས་བཤད་པ་ལྟར་ན་ཁོ་ནི་སྐྱེས་མ་ཐག་ནས་ལོང་བ་ཡིན༌ཟེར། འོ་ན་ད་ལྟ་ཁོའི་མིག་གིས་ཇི་ལྟར་མཐོང་བར་གྱུར་རམ་ཞེས་དྲིས་པ༌ལ།
JOH 9:20 ཕ་མ་གཉིས་ན༌རེ། ཁོ་ནི་ངེད་གཉིས་ཀྱི་བུ་ཡིན་ཞིང་སྐྱེས་མ་ཐག་ནས་ལོང་བ་ཡིན་པ་ངེད་གཉིས་ཀྱིས་ཤེས་སོ།།
JOH 9:21 འོན་ཀྱང་ད་ལྟ་ཁོའི་མིག་གིས་ཇི་ལྟར་མཐོང་བར་གྱུར་པ་དང་། སུ་ཞིག་གིས་ཁོའི་མིག་ཟུང་གསོས་པར་མཛད་པའི་དོན་ནི་ངེད་གཉིས་ཀྱིས་མི་ཤེས༌ཏེ། ཁོ་རང་ནར་སོན་པས་ཁོ་རང་ལ་དྲིས་དང་སྨྲ་ངེས་ཡིན་ཞེས་སྨྲས་སོ།།
JOH 9:22 ཁོའི་ཕ་མ་གཉིས་ཀྱིས་དེ་སྐད་སྨྲས་པ་ནི་ཡ་ཧུ་དཱ་པ་རྣམས་ལ་འཇིགས༌པ་རེད། རྒྱུ་མཚན་ནི་ཡ་ཧུ་དཱ་པ་རྣམས་ཀྱིས་མི་སུ་ཞིག་གིས་ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་ཟེར༌ན། མི་དེ་ཆོས་ཁང་ནས་ཕྱི་རུ་འདོན་པར་གྲོས་ཐག་བཅད་ཡོད་པའི་རྐྱེན༌གྱིས།
JOH 9:23 ཁོའི་ཕ་མ་གཉིས་ཀྱིས་ཀྱང་ཁོ་རང་ནར་སོན་པས་ཁོ་ལ་དྲིས་ཤིག་ཅེས་སྨྲས་པ་ཡིན༌ནོ།།
JOH 9:24 དེའི༌ཕྱིར། ཕ་རུ་ཤི་པ་རྣམས་ཀྱིས་སླར་ཡང་སྔོན་ཆད་ལོང་བ་ཡིན་པ་དེ་ཉིད་བོས་ཡོང་སྟེ་ན༌རེ། ཁྱོད་ཀྱིས་དཀོན་མཆོག་ལ་བསྔགས་བརྗོད་བྱོས༌ཤིག མི་དེ་ནི་སྡིག་ཅན་ཞིག་ཡིན་པ་ངེད་རྣམས་ཀྱིས་ཤེས་པ་ཡིན་ཞེས་སྨྲས་པ༌ལ།
JOH 9:25 ཁོ་ན༌རེ། མི་དེ་ནི་སྡིག་ཅན་ཞིག་ཡིན་མིན་ངས་མི་ཤེས༌ལ། སྔོན་ཆད་ང་རང་ནི་དམུས་ལོང་ཡིན་ཡང་ད་ལྟ་མིག་གིས་མཐོང་བ་འདི་བདག་གིས་ཤེས་ཞེས་སྨྲས་སོ།།
JOH 9:26 ཡང་ཕ་རུ་ཤི་པ་རྣམས་ན༌རེ། མི་དེས་ཁྱོད་ལ་ཅི་བྱས་པ་ཡིན༌ནམ། ཁྱོད་ཀྱི་མིག་ཟུང་ཇི་ལྟར་སོས་པ་ཡིན་ནམ་ཞེས་དྲིས་པ༌ན།
JOH 9:27 ཡང་ཁོ་ན༌རེ། ངས་ཁྱོད་རྣམས་ལ་ལན་གཅིག་བཤད་ཀྱང་ཁྱོད་རྣམས་ཀྱིས་མ་མཉན། ད་ནི་ཅིའི་ཕྱིར་མཉན་འདོད༌དམ། ཁྱོད་རྣམས་ཀྱང་མི་དེའི་རྗེས་འབྲང་པ་བྱེད་འདོད་པ་ཡིན་ནམ་ཞེས་སྨྲས་པ༌ལ།
JOH 9:28 དེ་རྣམས་ན༌རེ། ཁྱོད་ནི་མི་དེའི་རྗེས་འབྲང་པ་ཡིན་ཞིང་ངེད་ཅག་ནི་མོ་ཤེའི་རྗེས་འབྲང་པ་ཡིན།
JOH 9:29 དཀོན་མཆོག་གིས་མོ་ཤེ་ལ་གསུང་གླེང་མཛད་མྱོང་བའི་དོན་དེ་ངེད་རྣམས་ཀྱིས་ཤེས་སོ།། འོན་ཀྱང་མི་དེ་ཡུལ་གང་ནས་ཡོང་བ་མི་ཤེས་ཞེས་སྡིགས་དམོད་བྱས་སོ།།
JOH 9:30 ཡང་ཁོ་ན༌རེ། ཁོང་གིས་ངའི་མིག་གསོས་པར་མཛད་ཅིང་ཁྱོད་རྣམས་ཀྱིས་ཁོང་ནི་ཡུལ་གང་ནས་ཡོང་བའང་མི་ཤེས་པས་ཡ་མཚན༌ཆེ།
JOH 9:31 དཀོན་མཆོག་གིས་མི་སྡིག་ཅན་གྱི་གསོལ་འདེབས་ལ་མི་གསན་ཞིང༌། དཀོན་མཆོག་ལ་དད་གུས་ལྡན་པ་དང་ཁོང་གི་དགོངས་པ་བཞིན་དུ་བྱེད་མཁན་རྣམས་ཀྱིས་གསོལ་བ་བཏབ་པ་ལ་ཁོང་གིས་གསན་ངེས་པ་བདག་ཅག་གིས་ཤེས་སོ།།
JOH 9:32 འཇིག་རྟེན་བཀོད་པའི་ཚུན་ལ་མི་སུས་ཀྱང་དམུས་ལོང་གི་མིག་ཟུང་གསོས་པར་མཛད་པའི་དོན་ཐོས་མ་མྱོང༌།
JOH 9:33 གལ་ཏེ་མི་དེ་ནི་དཀོན་མཆོག་ནས་བྱུང་བ་མིན༌ན། དོན་ཅི་ཡང་མཛད་མི་ནུས་ཞེས་སྨྲས་པ༌ལ།
JOH 9:34 ཡང་དེ་རྣམས་ན༌རེ། ཁྱོད་ནི་སྐྱེས་པའི་དུས་ནས་སྡིག་ཅན་ཤ་སྟག་ཡིན་ཞིང་ད་དུང་ངེད་རྣམས་ལ་བསླབ་བྱ་གཏོང་འདོད་དམ་ཞེས་སྨྲས་ཏེ་ཁོ་རང་ཕྱི་རུ་བཏོན༌ཏོ།།
JOH 9:35 དེ་ནས་སྐྱབས་མགོན་ཡེ་ཤུས་མིག་ཟུང་གསོས་པའི་མི་དེ་ཕྱི་རུ་བཏོན་པའི་གཏམ་ཐོས༌ཤིང༌། མི་དེ་བཙལ་ནས་རྙེད་དེ་འདི་སྐད༌དུ། ཁྱོད་ཀྱིས་མིའི་བུ་ལ་དད་པ་བྱེད་དམ་ཞེས་གསུངས་པ༌དང༌།
JOH 9:36 ཁོ་ན༌རེ། ཇོ་བོ༌ལགས། ཁོང་སུ་ཡིན༌ནམ། ཁྱོད་ཀྱིས་གསུངས་དང་བདག་གིས་དད་པ་བྱའོ་ཞེས་ཞུས་པ༌ལ།
JOH 9:37 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་ཁོང་ཉིད་མཐོང་མྱོང་ཞིང་ད་ལྟ་ཁྱོད་དང་གཏམ་སྨྲ་བཞིན་པ་འདི་ནི་ཁོ་རང་ཡིན་ཞེས་གསུངས་པ༌ན།
JOH 9:38 ཡང་ཁོ་ན༌རེ། གཙོ་བོ༌ལགས། ངས་དད་པ་བྱེད་ཅེས་ཞུས་པ་དང་ཁོང་ལ་ཕྱག་བཙལ་ཏོ།།
JOH 9:39 དེ་ནས་སྐྱབས་མགོན་ཡེ་ཤུས་འདི་སྐད༌དུ། ང་ནི་འཇིག་རྟེན་འདི་ལ་ལེགས་ཉེས་ཀྱི་ཤན་འབྱེད་དུ་ཡོང་བ་ཡིན༌ཏེ། ལོང་བ་རྣམས་ལ་མཐོང་བར་བྱེད་ཅིང་མཐོང་བ་རྣམས་ནི་ལོང་བར་འགྱུར་བའི་ཕྱིར་རོ་ཞེས་གསུངས་སོ།།
JOH 9:40 དེ་ནས་སྐྱབས་མགོན་ཡེ་ཤུའི་དྲུང་དུ་ཡོད་པའི་ཕ་རུ་ཤི་པ་འགའ་ཞིག་གིས་ཀྱང་གསུངས་དེ་ཐོས་ནས་འདི༌ལྟར། དེས་ན་ངེད་རྣམས་ཀྱང་ལོང་བ་ཡིན་ནམ་ཞེས་དྲིས་པ༌ན།
JOH 9:41 ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ཁྱོད་རྣམས་ལོང་བ་ཡིན་ན་སྡིག་པའང་མེད། འོན་ཀྱང་ད་ལྟ་ཁྱོད་རྣམས་ཀྱིས་མིག་གིས་མཐོང་བ་ཡིན་ཞེས་ཟེར༌བས། ཁྱོད་ཅག་གི་རྒྱུད་དུ་ད་དུང་སྡིག་པ་ཡོད་ཅེས་གསུངས༌སོ།།
JOH 10:1 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། མི་སུ་ཞིག་ལུག་རའི་ནང་དུ་སྒོ་ལམ་བརྒྱུད་ནས་མི་འགྲོ༌བར། གནས་གཞན་ནས་ཡར་འགོས་ཏེ་འགྲོ་བ་ནི་ཇག་རྐུན་ཡིན།
JOH 10:2 འོན་ཀྱང་སྒོ་ལམ་བརྒྱུད་ནས་ལུག་རའི་ནང་དུ་འགྲོ་བ་དེ་ནི་ད་གཟོད་ལུག་རྫི་ཡིན༌ཏེ།
JOH 10:3 སྒོ་སྲུང་གིས་དེ་ལ་སྒོ་འབྱེད་ཅིང་ལུག་དག་གིས་ཀྱང་དེའི་སྐད་ལ་མཉན༌པ་དང་། དེས་ཀྱང་རང་གི་ལུག་དག་གི་མིང་ནས་བོས་ཏེ་ཕྱི་རོལ་ཏུ་ཁྲིད༌ཅིང༌།
JOH 10:4 རང་གི་ལུག་རྣམས་ཕྱིར་གཏོང་ཞིང་ཁོ་ནི་མདུན་དུ་འགྲོ་བའི་དུས། ལུག་དག་གིས་ཀྱང་ཁོའི་སྐད་ཤེས་པས་རྗེས་སུ་འབྲང་བ་ཡིན་ནོ།།
JOH 10:5 ལུག་དེ་དག་མི་རྒྱུས་མེད་ཀྱི་རྗེས་སུ་མི་འབྲང༌ལ། མི་དེའི་སྐད་ཀྱང་མི་ཤེས་པས་འབྲོ་བར་འགྱུར་ཞེས་གསུངས་སོ།།
JOH 10:6 དེ་ལྟར་སྐྱབས་མགོན་ཡེ་ཤུས་དཔེའི་སྒོ་ནས་དེ་རྣམས་ལ་གསུང་གནང་ནའང་ཁོ་རྣམས་ཀྱིས་འདིའི་དོན་ཅི་ཡིན་མ་རྟོགས༌སོ།།
JOH 10:7 དེའི༌ཕྱིར། ཡང་སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ངས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ལུག་རྣམས་ཀྱི་སྒོ་ནི་ང་རང་ཡིན།
JOH 10:8 ངའི་སྔོན་དུ་ཡོང་བ་ཐམས་ཅད་ཇག་རྐུན་ཡིན་ཏེ་ལུག་རྣམས་ཀྱིས་ཀྱང་དེ་དག་གི་ངག་ལ་མ་མཉན་ཏོ།།
JOH 10:9 ང་རང་ནི་སྒོ་ཡིན༌ཏེ། ང་རང་བརྒྱུད་ནས་ནང་དུ་འགྲོ་བ་ཐམས་ཅད་སྐྱོབ་པར་འགྱུར༌ཞིང༌། ཕྱི་ནང་གང་དུ་སོང་ནའང་བཟའ་བྱའི་རྩྭ་འཐོབ་པར་འགྱུར།
JOH 10:10 སྤྱིར་རྐུན་མ་ཐམས་ཅད་ནི་རྐུ་བྱེད་པ་དང་སྲོག་གཅོད་པའམ་མེད་པར་བྱེད་པ་བཅས་ཁོ་ནའི་ཆེད་དུ་ཡོང༌བ་ཡིན། འོན་ཀྱང་ང་རང་ནི་དེ་རྣམས་ལ་ཚེ་སྲོག་དཔག་ཏུ་མེད་པ་སྩོལ་བའི་ཕྱིར་ཡོང༌ངོ༌།།
JOH 10:11 ང་རང་ནི་ལུག་རྫི་བཟང་པོ༌ཡིན་ཏེ། ལུག་རྫི་བཟང་པོས་ལུག་རྣམས་ཀྱི་དོན་དུ་རང་སྲོག་ཀྱང་བློས་གཏོང་བ༌ཡིན།
JOH 10:12 གླ་བ་ནི་ལུག་རྫི་དངོས་མིན་ལ་ལུག་གི་བདག་པོའང་མ་ཡིན༌པས། ཁོས་སྤྱང་ཀི་ཡོང་བ་མཐོང་ཚེ་ལུག་རྣམས་བསྐྱུར་ནས་འབྲོ་བ༌དང༌། སྤྱང་ཀིས་ལུག་འཛིན་པ་དང་ལུག་ཁྱུའང་གཏོར་བར་བྱེད།
JOH 10:13 དེས་ན་གླ་བ་དེ་བྲོས་འགྲོ་བའི་རྒྱུ་མཚན་ཅི་ཞེ༌ན། གླ་བ་ནི་གླས་པ་ཡིན་པས་ཁོས་ལུག་ལ་སེམས་ཁུར་མི་བྱེད་དོ།།
JOH 10:14 ང་རང་ནི་ལུག་རྫི་བཟང་པོ༌ཡིན་ཏེ། ངས་རང་གི་ལུག་རྣམས་ངོ་ཤེས༌ཤིང༌། ངའི་ལུག་རྣམས་ཀྱིས་ཀྱང་ང་རང་ངོ་ཤེས༌པ་ཡིན།
JOH 10:15 བདག་གི་ཡབ་ཀྱིས་ང་རང་ངོ་ཤེས་པ་དང་ངས་ཀྱང་ཁོང་ཉིད་ངོ་ཤེས་པ༌ལྟར། བདག་གིས་ལུག་རྣམས་ཀྱི་དོན་དུ་རང་སྲོག་བློས་གཏོང་བ་ཡིན།
JOH 10:16 བདག་ལ་ལུག་ར་འདིའི་ལུག་ལས་གཞན་པའི་ལུག་ཀྱང་ཡོད༌དེ། ངས་ལུག་དེ་དག་ཚུར་འཁྲིད་དགོས་ཤིང་དེ་དག་གིས་ཀྱང་ངའི་སྐད་ལ་མཉན་ངེས་ཡིན། ལུག་དེ་ཐམས་ཅད་ལུག་ཁྱུ་གཅིག་ཏུ་འགྱུར་བ་དང་ལུག་རྫིའང་གཅིག་ལ་གཏོགས་པར་འགྱུར་རོ།།
JOH 10:17 བདག་གི་ཡབ་ཀྱིས་ང་རང་ལ་བྱམས་ཤིང་གཅེས༌ཏེ། བདག་གིས་རང་སྲོག་བློས་གཏོང་བ་དང་རང་སྲོག་བཏང་རྗེས་སླར་ཡང་གསོན་པར་བྱེད་པའི་ཕྱིར༌ཡིན།
JOH 10:18 བདག་ནི་རང་སྲོག་རང་གིས་བློས་གཏོང་བ་ལས་གཞན་སུས་ཀྱང་འཕྲོག་མི་ནུས༌ཏེ། བདག་ལ་རང་སྲོག་བློས་གཏོང་བའི་དབང་ཡོད་ལ་སླར་གསོན་པའི་དབང་ཡང་ཡོད། དེ་ནི་བདག་གི་ཡབ་ཀྱིས་ང་རང་ལ་བསྩལ་བའི་བཀའ་ཡིན་ཞེས་གསུངས༌སོ།།
JOH 10:19 སྐྱབས་མགོན་ཡེ་ཤུས་དེ་ལྟར་གསུངས་པས་ཡ་ཧུ་དཱ་པ་རྣམས་ཀྱི་ཁྲོད་དུ་སླར་ཡང་རྩོད་གླེང་བྱུང་བ༌དང༌།
JOH 10:20 མི་མང་པོ་ཞིག་ན༌རེ། མི་འདི་ལ་གདོན་འདྲེ་ཞུགས་ཏེ་སྨྱོས་འདུག་པས་ཅིའི་ཕྱིར་ཁོའི་ཚིག་ལ་ཉན་ནམ་ཞེས་སྨྲས་སོ།།
JOH 10:21 ཡང་གཞན་རྣམས་ན༌རེ། འདི་ནི་གདོན་འདྲེས་བཟུང་བ་ཞིག་གིས་གསུངས་པ་མ་ཡིན༌ཏེ། གདོན་འདྲེ་ཞིག་གིས་ལོང་བའི་མིག་ཟུང་གསོ་ནུས་སམ་ཞེས་སྨྲས༌སོ།།
JOH 10:22 དེ་ནས་ཡེ་རུ་སཱ་ལེམ་གྱི་བསྔོ་བའི་དུས་ཆེན་ལ་སླེབས་ཤིང་། དུས༌དེ་ནི་དགུན་དུས་ཡིན།
JOH 10:23 སྐྱབས་མགོན་ཡེ་ཤུ་མཆོད་ཁང་ནས་སོ་ལོ་མོན་ཞེས་པའི་ཁྱམས་རར་ཞབས་ཀྱིས་བཅགས་ཤིང་།
JOH 10:24 ཡ་ཧུ་དཱ་པ་རྣམས་ཀྱིས་ཁོང་གི་མཐའ་བསྐོར་ཏེ་ན༌རེ། ཁྱེད་ཀྱིས་དུས་ནམ་ཞིག་གི་བར་དུ་ངེད་ཅག་ལ་ཐེ་ཚོམ་སྐྱེས་སུ་འཇུག༌གམ། ཁྱེད་རང་སྐྱབས་མགོན་མཱ་ཤི་ཀ་ཡིན་ན་ངེད་ཅག་ལ་གསལ་པོར་གསུང་བར་མཛོད་ཅེས་ཞུས་སོ།།
JOH 10:25 དེ་ནས་སྐྱབས་མགོན་ཡེ་ཤུས་འདི་སྐད༌དུ། བདག་གིས་སྔ་མོ་ནས་སྨྲས་ཀྱང་ཁྱོད་རྣམས་ཡིད་མ་ཆེས། བདག་གིས་རང་གི་ཡབ་ཀྱི་མཚན་གྱི་སྒོ་ནས་མཛད་པའི་ལས་དེ་དག་གིས་ང་རང་ལ་བདེན་དཔང་བྱེད༌པ་ཡིན།
JOH 10:26 འོན་ཀྱང་ཁྱོད་རྣམས་ནི་བདག་གི་ལུག་མིན་པས་བདག་ལ་ཡིད་མི་ཆེས༌ཤིང་།
JOH 10:27 ངའི་ལུག་རྣམས་ཀྱིས་ངའི་སྐད་ལ་ཉན་པ༌དང༌། ངས་ཀྱང་ལུག་དེ་དག་ངོ་ཤེས་ཏེ་ལུག་རྣམས་ཀྱང་བདག་གི་རྗེས་སུ་འབྲང༌ངོ་།།
JOH 10:28 ཡང་བདག་གིས་དེ་རྣམས་ལ་མཐའ་མེད་པའི་ཚེ་སྲོག་སྩོལ༌བས། དེ་དག་ནམ་ཡང་འཇིག་པར་མི་འགྱུར་ཞིང་སུས་ཀྱང་བདག་གི་ལག་ནས་དེ་རྣམས་འཕྲོག་མི་ནུས།
JOH 10:29 བདག་གི་ཡབ་ཀྱིས་ལུག་དེ་རྣམས་བདག་ལ་གནང་ཞིང་ཁོང་ཉིད་ནི་ཐམས་ཅད་ལས་མཆོག་ཏུ་གྱུར་པ་ཡིན༌ཏེ། སུ་ཞིག་གིས་ཀྱང་བདག་གི་ཡབ་ཀྱི་ཕྱག་ནས་ལུག་དེ་རྣམས་འཕྲོག་པར་མི་ནུས།
JOH 10:30 བདག་དང་ཡབ་ནི་ངོ་བོ་གཅིག་རང་ཡིན་ཞེས་གསུངས༌སོ།།
JOH 10:31 དེ་ནས་ཡ་ཧུ་དཱ་པ་རྣམས་ཀྱིས་སླར་ཡང་ས་ནས་རྡོ་བླངས་ཏེ་སྐྱབས་མགོན་ཡེ་ཤུ་ལ་རྒྱག་པར་རྩོམ་པ༌ན།
JOH 10:32 ཁོང་གིས་དེ་རྣམས་ལ་འདི་སྐད༌དུ། བདག་གིས་རང་གི་ཡབ་ནས་བྱུང་བའི་ལས་བཟང་པོ་གང་མང་ཁྱོད་ཅག་ལ་བསྟན་ཡང༌། ཁྱོད་ཅག་གིས་ལས་བཟང་པོ་དེ་དག་ལས་གང་ཞིག་གི་ཕྱིར་དུ་ང་རང་ལ་རྡོ་ཡིས་རྒྱག་འདོད་པ་ཡིན་ནམ་ཞེས་གསུངས་པ༌ན།
JOH 10:33 ཡ་ཧུ་དཱ་པ་རྣམས་ན༌རེ། ངེད་རྣམས་ཀྱིས་ལས་བཟང་པོར་དམིགས་ཏེ་ཁྱོད་ལ་རྡོ་ཡིས་རྒྱག་པར་རྩོམ་པ་མ་ཡིན༌ཏེ། ཁྱོད་ནི་མི་ཡིན་ཡང་རང་ཉིད་ནི་དཀོན་མཆོག་ཡིན་ཞེས་དཀོན་མཆོག་ལ་སྐུར་བ་བཏབ་པའི་ཕྱིར་ཡིན་ཞེས་སྨྲས༌སོ།།
JOH 10:34 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གི་བཀའ་ཁྲིམས་ནང་དུ་ངས་ཁྱོད་རྣམས་ནི་ལྷ་རྣམས་ཡིན་ ཞེས་གསུངས་མྱོང་བ་མ་ཡིན༌ནམ།
JOH 10:35 གསུང་རབ་ལས་བྱུང་བའི་བཀའ་རྣམས་རྟག་ཏུ་ཡང་དག་ཅིང་བདེན་པ་ཡིན༌ལ། གལ་ཏེ་དཀོན་མཆོག་གིས་རང་ཉིད་ཀྱི་བཀའ་ཐོབ་པའི་མི་རྣམས་ལ་ལྷ་ཞེས་གསུངས༌ན།
JOH 10:36 ཡབ་ཀྱིས་ང་རང་མཆོག་ཏུ་བདམས་ཤིང་འཇིག་རྟེན་དུ་མངགས་པ༌དང༌། ངས་རང་ཉིད་ནི་དཀོན་མཆོག་གི་སྲས་ཡིན་ཞེས་སྨྲས༌པས། ཁྱོད་རྣམས་ན༌རེ། ཁྱོད་ཀྱིས་དཀོན་མཆོག་ལ་སྐུར་བ་བཏབ་ཅེས་ཟེར་དོན༌ཅི།
JOH 10:37 གལ་ཏེ་ངས་རང་གི་ཡབ་ཀྱི་དོན་རྣམས་མི་སྒྲུབ༌ན། ཁྱོད་ཅག་གིས་ཀྱང་ང་རང་ལ་ཡིད་ཆེས་བྱེད་དགོས་དོན་མི་འདུག
JOH 10:38 གལ་ཏེ་ངས་རང་གི་ཡབ་ཀྱི་དོན་དེ་བསྒྲུབས་པ༌དང༌། ཁྱོད་ཅག་བདག་ལ་ཡིད་མི་ཆེས༌ནའང༌། དོན་དེ་རྣམས་ལ་ཡིད་ཆེས་བྱེད་དགོས༌ཏེ། བདག་གི་ཡབ་ནི་ང་ཡི་ནང་དུ་གནས་ཤིང་། ང་རང་ཡང་ཡབ་ཀྱི་ནང་དུ་གནས་པའི་དོན་དེ་ཁྱོད་ཅག་གིས་གསལ་པོར་ཤེས་པར་འགྱུར་བའི་ཕྱིར་ཡིན་ཞེས་གསུངས་སོ།།
JOH 10:39 དེ་ནས་ཡང་ཡ་ཧུ་དཱ་པ་རྣམས་ཀྱིས་སྐྱབས་མགོན་ཡེ་ཤུ་འཛིན་བཟུང་བྱེད་པར་རྩོམ་པ༌ན། ཁོང་ནི་མི་དེ་དག་གི་ལག་ནས་ཐར༌བ་རེད།
JOH 10:40 དེ་ནས་སྐྱབས་མགོན་ཡེ་ཤུ་ཁོང་ཡོར་དན་གཙང་པོའི་ཕ་རོལ༌ཏེ། སྔར་ཁྲུས་གསོལ་མཁན་ཡོ་ཧ་ནན་གྱིས་ཁྲུས་གསོལ་བྱས་མྱོང་བའི་གནས་དེར་ཕེབས་ནས་བཞུགས་པ་རེད།
JOH 10:41 དེ་ནས་མི་མང་པོ་ཁོང་གི་དྲུང་དུ་ཡོང་སྟེ་ཕན་ཚུན་ན༌རེ། ཁྲུས་གསོལ་མཁན་ཡོ་ཧ་ནན་གྱིས་གྲུབ་རྟགས་ཅི་ཡང་མ་བསྟན༌ཀྱང་། ཁོས་སྐྱེས་བུ་འདིའི་སྐོར་ལ་སྨྲས་པ་ཐམས་ཅད་བདེན་པ་རེད་ཅེས་སྨྲས་པ༌དང༌།
JOH 10:42 ཡུལ་དེ་རུ་མི་མང་པོ་སྐྱབས་མགོན་ཡེ་ཤུ་ལ་དད་པར་གྱུར༌ཏོ།།
JOH 11:1 དེ་ཡང་མིང་ལ་ལཱ་ཟར་ཞེས་འབོད་པའི་ནད་པ་ཞིག་ཡོད་པ་དེ་ནི་པེ་ཐན་ཡཱ་གྲོང་སྡེ་རུ་གནས༌ཤིང༌། དེ་ནི་མིར་ཡམ་དང་ཁོ་མོའི་ལྕམ་མོ་མཱར་ཐ་གཉིས་ཀའི་གྲོང་སྡེ་ཡིན།
JOH 11:2 མིར་ཡམ་ཞེས་པ་དེ་ནི་སྐྱབས་མགོན་ཡེ་ཤུའི་སྐུ་ལ་སྤོས་ཆུ་བྱུགས་ཤིང་སྐྲ་ཡིས་ཁོང་གི་ཞབས་ཟུང་ཕྱི་མཁན་དེ་ཡིན༌ལ། ཁོ་མོའི་སྤུན་ལཱ་ཟར་ལ་ན་ཚ་བྱུང་བ་ཡིན༌པས།
JOH 11:3 ལྕམ་སྲིང་གཉིས་ཀྱིས་མི་གཞན་ཞིག་སྐྱབས་མགོན་ཡེ་ཤུའི་དྲུང་དུ་མངགས༌ཏེ། གཙོ་བོ༌ལགས། ཁྱེད་ཀྱིས་བྱམས་ཤིང་གཅེས་པའི་མི་དེ་ད་ལྟ་ནད་ཀྱིས་མནར་ཞེས་ངག་འཕྲིན་བསྐུར༌ཏོ།།
JOH 11:4 དེ་ནས་སྐྱབས་མགོན་ཡེ་ཤུས་གཏམ་དེ་གསན་ནས་འདི་སྐད༌དུ། ནད་དེ་ནི་འཆི་བའི་རྒྱུ་མ་ཡིན་པར་དཀོན་མཆོག་གི་གཟི་བརྗིད་མངོན་པར་འགྱུར་བའི༌ཕྱིར་ཡིན་ལ། ནད་པ་དེ་ཉིད་བརྒྱུད་ནས་སྲས་དཀོན་མཆོག་གཟི་བརྗིད་དང་ལྡན་པར་འགྱུར་ཞེས་གསུངས་སོ།།
JOH 11:5 སྐྱབས་མགོན་ཡེ་ཤུས་མཱར་ཐ་དང་ཁོ་མོའི་ནུ་མོ་མིར་ཡམ། ལཱ་ཟར་བཅས་ལ་བྱམས་ཤིང་གཅེས༌ནའང༌།
JOH 11:6 སྐྱབས་མགོན་ཡེ་ཤུས་ལཱ་ཟར་ན་བའི་གཏམ་དེ་གསན་ནས་སྔར་བཞིན་རང་ཉིད་ཀྱི་བཞུགས་གནས་སུ་ཉིན་གཉིས་ལ་བཞུགས༌རྗེས།
JOH 11:7 ཁོང་གིས་ཐུགས་སྲས་རྣམས་ལ་འདི་སྐད༌དུ། བདག་ཅག་སླར་ཡང་ཡ་ཧུ་དཱའི་ཡུལ་དུ་འགྲོའོ་ཞེས་གསུངས་པ༌ལ།
JOH 11:8 ཐུགས་སྲས་རྣམས་ན༌རེ། རཱབ་པེ་ལགས། ཁ་སང་ཙམ་ནས་ཡ་ཧུ་དཱ་པ་རྣམས་ཀྱིས་ཁྱེད་རྡོ་རུབ་གཏོང་བར་རྩོམ༌ཡང༌། ཁྱེད་རང་ད་དུང་ཡུལ་དེར་ཕེབས་སམ་ཞེས་ཞུས་པ༌ན།
JOH 11:9 ཡང་སྐྱབས་མགོན་ཡེ་ཤུས་འདི་སྐད༌དུ། ཉིན་དཀར་གཅིག་ལ་ཆུ་ཚོད་བཅུ་གཉིས་ཡོད་པ་མ་ཡིན༌ནམ། ཉིན་མོར་ལམ་ལ་སྐྱོད་མཁན་དེས་འཇིག་རྟེན་གྱི་འོད་སྣང་མཐོང་བས་སར་མི་འགྱེལ༌ཡང༌།
JOH 11:10 མཚན་མོར་ལམ་ལ་སྐྱོད་མཁན་དེར་འོད་སྣང་མེད་པས་སར་འགྱེལ་བར་འགྱུར་ཞེས་གསུངས་པ༌དང༌།
JOH 11:11 ཡང་ཁོང་གིས་འདི་སྐད༌དུ། བདག་ཅག་གི་གྲོགས་ལཱ་ཟར་གཉིད་དུ་ཡུར་བས་ང་རང་ཁོ་བསླང་དུ་འགྲོ་ཞེས་གསུངས་སོ།།
JOH 11:12 དེ་ནས་ཐུགས་སྲས་རྣམས་ན༌རེ། གཙོ་བོ༌ལགས། ལཱ་ཟར་གཉིད་དུ་ཡུར་བ་ཡིན་ན་ནད་སོས་པར་འགྱུར་ཞེས་སྨྲས་སོ།།
JOH 11:13 སྐྱབས་མགོན་ཡེ་ཤུས་ལཱ་ཟར་ཤི་ཟིན་པ་མཁྱེན་ནས་དེ་སྐད་གསུངས་ནའང་ཐུགས་སྲས་རྣམས་ཀྱིས་ལཱ་ཟར་དངོས་གནས་གཉིད་དུ་ཡུར་བ་ལ༌གོ་བ་རེད།
JOH 11:14 དེའི༌ཕྱིར། སྐྱབས་མགོན་ཡེ་ཤུས་ཐུགས་སྲས་རྣམས་ལ་འདི་སྐད༌དུ། ལཱ་ཟར་ཤི་ཟིན༌ཏོ།།
JOH 11:15 འོན་ཀྱང་ཁྱོད་རྣམས་དད་པར་འགྱུར་བའི༌ཕྱིར། ང་རང་སྔར་དེར་མེད་པ་ལ་དགའོ།། ད་ལྟ་བདག་ཅག་ལཱ་ཟར་སྡོད་པའི་ཡུལ་དུ་འགྲོའོ་ཞེས་གསལ་པོར་གསུངས་སོ།།
JOH 11:16 དེ་ནས་ཐུགས་སྲས་རྣམས་ཀྱི་ཁྲོད་དུ་མིང་གཞན་ལ་མཚེ་མ་ཞེས་འབོད་པའི་ཐོ་མཱ་ཡིས་ཐུགས་སྲས་གཞན་རྣམས་ལ། བདག་ཅག་ཀྱང་ཁོང་དང་ལྷན་དུ་འཆི་རུ་འགྲོའོ་ཞེས་སྨྲས༌སོ།།
JOH 11:17 དེ་ནས་སྐྱབས་མགོན་ཡེ་ཤུ་གནས་དེར་ཕེབས་པ་དང་། ལཱ་ཟར་གྱི་བེམ་པོ་དུར་ཁུང་དུ་བཞག་ནས་ཉིན་བཞི་འགོར་བའང་མཁྱེན་ནོ།།
JOH 11:18 པེ་ཐན་ཡཱ་ནི་ཡེ་རུ་སཱ་ལེམ་དང་བར་ཐག་ཉེ་ཞིང་ཧ་ལམ་རྒྱང་གྲགས་གསུམ་ཙམ་ཡོད༌པས།
JOH 11:19 ཡ་ཧུ་དཱ་པ་མི་མང་པོ་ཞིག་མཱར་ཐ་དང་མིར་ཡམ་གྱི་སྤུན་ཚེ་ལས་འདས་པ་ལ་སེམས་གསོ་བྱེད་དུ་ཡོང༌བ་རེད།
JOH 11:20 དེ་ནས་མཱར་ཐས་སྐྱབས་མགོན་ཡེ་ཤུ་ཕེབས་བཞིན་པའི་གནས་ཚུལ་ཐོས་ཏེ། ཁོང་བསུ་བར་ཕྱིན་ཅིང་མིར་ཡམ་རང་ཁྱིམ་དུ་བསྡད་པ་དང་།
JOH 11:21 དེ་ནས་མཱར་ཐ་ན༌རེ། གཙོ་བོ༌ལགས། ཁྱེད་རང་སྔ་མོ་ནས་འདིར་ཕེབས་པ་ཡིན་ན་ངའི་སྤུན་འཆི་མི་སྲིད་དོ།།
JOH 11:22 འོན་ཀྱང་ད་ལྟའང་ཁྱེད་ཀྱིས་དཀོན་མཆོག་ལ་དོན་གང་ཞིག་ཞུ་བ་དེ་བཞིན་གནང་བར་འགྱུར་བ་བདག་གིས་ཤེས་ཞེས་ཞུས་པ༌ལ།
JOH 11:23 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱི་སྤུན་ལཱ་ཟར་སླར་གསོན་ངེས་ཡིན་ཞེས་གསུངས་པ༌ན།
JOH 11:24 མཱར་ཐ་ན༌རེ། མཐའ་མའི་ཉིན་མོར་གཤིན་པོ་རྣམས་སླར་གསོན་དུས་ལཱ་ཟར་ཡང་སླར་གསོན་པར་འགྱུར་བ་བདག་གིས་ཤེས་ཞེས་ཞུས་སོ།།
JOH 11:25 ཡང་སྐྱབས་མགོན་ཡེ་ཤུས་འདི་སྐད༌དུ། སླར་གསོན་པ་དང་ཚེ་སྲོག་གནང་མཁན་ནི་ང་རང་ཡིན༌ཏེ། བདག་ལ་དད་པ་བྱེད་མཁན་སུ་ཞིག་ཤི་ནའང་ད་དུང་གསོན་པར་འགྱུར་བ༌དང༌།
JOH 11:26 གསོན་པོར་གནས་ཤིང་བདག་ལ་དད་མཁན་ཐམས་ཅད་ནམ་ཡང་འཆི་བར་མི་འགྱུར། ཁྱོད་ནི་དོན་འདི་ལ་ཡིད་ཆེས་སམ་ཞེས་གསུངས་པ༌ལ།
JOH 11:27 མཱར་ཐ་ན༌རེ། ལགས༌སོ།། གཙོ་བོ༌ལགས། བདག་གིས་ཁྱེད་རང་ནི་སྐྱབས་མགོན་མཱ་ཤི་ཀ་སྟེ། དཀོན་མཆོག་གི་སྲས་འཇིག་རྟེན་དུ་བྱོན་པ་དེ་ཉིད་ཡིན་པར་དད་པ་བྱེད་ཅེས་ཞུས༌སོ།།
JOH 11:28 མཱར་ཐས་དེ་ལྟར་ཞུས་རྗེས་ཕྱིར་ཁྱིམ་དུ་སོང་ནས་རང་གི་ནུ་མོ་མིར་ཡམ་ཟུར་དུ་བོས་ཏེ་ན༌རེ། སློབ་དཔོན་ཕེབས་བྱུང༌། ཁོང་གིས་ཁྱོད་རང་ཡང་འབོད་ཀྱིན་འདུག་ཅེས་སྨྲས་པ༌དང༌།
JOH 11:29 མིར་ཡམ་གྱིས་སྐད་དེ་ཐོས་ནས་མྱུར་དུ་ཡར་ལངས་ཏེ་སྐྱབས་མགོན་ཡེ་ཤུའི་དྲུང་དུ་སོང༌ངོ་༎
JOH 11:30 དུས༌དེར། སྐྱབས་མགོན་ཡེ་ཤུ་ད་དུང་ཡུལ་སྡེ་ནང་དུ་ཕེབས་མེད་པར་མཱར་ཐས་ཁོང་ལ་བསུ་བ་བྱས་པའི་གནས་དེར་བཞུགས་ཡོད༌པ་རེད།
JOH 11:31 མིར་ཡམ་དང་མཉམ་དུ་ཁྱིམ་ལ་སྡོད་ཅིང་སེམས་གསོ་བྱེད་པའི་ཡ་ཧུ་དཱ་པ་རྣམས་ཀྱིས་ཀྱང་ཁོ་མོ་མྱུར་དུ་ཡར་ལངས་ནས་ཕྱི་རོལ་ཏུ་འགྲོ་བ་མཐོང༌རྗེས། ཁོ་མོ་ནི་དུར་ཁུང་གི་སྒོ་ཁར་ངུ་རུ་འགྲོ་བར་བསམས་ཏེ་ཁོ་མོའི་རྗེས་སུ་འབྲངས་སོ།།
JOH 11:32 དེ་ནས་མིར་ཡམ་ཡང་སྐྱབས་མགོན་ཡེ་ཤུ་བཞུགས་སར་སླེབས་ཤིང་། ཁོང་མཇལ་བ་དང་ཁོང་གི་ཞབས་དྲུང་དུ་ཕྱག་བཙལ་ཏེ་ན༌རེ། གཙོ་བོ༌ལགས། ཁྱེད་རང་སྔ་མོ་ནས་གནས་འདིར་ཕེབས་པ་ཡིན་ན་ངའི་སྤུན་ཡང་འཆི་མི་སྲིད་ཅེས་ཞུས་པ༌དང༌།
JOH 11:33 སྐྱབས་མགོན་ཡེ་ཤུས་མིར་ཡམ་དང་བཅས་པའི་ཡ་ཧུ་དཱ་པ་རྣམས་ངུ་བ་གཟིགས་པ༌དང༌། ཁོང་གི་ཐུགས་ཤིན་ཏུ་སྐྱོ་ཞིང་གདུང་བར་གྱུར་ཏེ་འདི་སྐད༌དུ།
JOH 11:34 ལཱ་ཟར་གྱི་བེམ་པོ་གང་དུ་བཞག་ཡོད་དམ་ཞེས་གསུངས་པ༌ལ། དེ་རྣམས་ན༌རེ། གཙོ་བོ་ཁྱེད་ཉིད་ཕེབས་ཏེ་གཟིགས་རོགས་མཛོད་ཅེས་ཞུས་པ༌དང༌།
JOH 11:35 སྐྱབས་མགོན་ཡེ་ཤུ་བཤུམས༌སོ།།
JOH 11:36 དེ་ནས་ཡ་ཧུ་དཱ་པ་རྣམས་ཕན་ཚུན་ན༌རེ། ལྟོས༌དང༌། ཁོང་གིས་ལཱ་ཟར་ལ་ཇི་འདྲའི་བྱམས་ཤིང་གཅེས་ཨང་ཞེས་སྨྲས་པ༌དང༌།
JOH 11:37 ཡང་འགའ་ཞིག་ན༌རེ། མི་འདིས་ལོང་བའི་མིག་ཟུང་གསོ་བར་ནུས༌ན། ལཱ་ཟར་ཡང་འཆི་རུ་མ་བཅུག་ན་མི་ཆོག་གམ་ཞེས་སྨྲས༌སོ།།
JOH 11:38 སྐྱབས་མགོན་ཡེ་ཤུའང་ཐུགས་སྐྱོ་བཞིན་དུར་ཁུང་གི་མདུན་དུ་ཕེབས་པ༌དང༌། དུར་ཁུང་དེ་ནི་བྲག་ཁུང་ཞིག་ཡིན་ཞིང་རྡོ་ཕ་བོང་ཞིག་གིས་ཁུང་སྒོ་བཅད་ཡོད༌པ་རེད།
JOH 11:39 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་རྡོ་ཕ་བོང་དེ་ཕར་སྒྲིལ་ཞིག་ཅེས་གསུངས་པ༌ན། གཤིན་པོའི་ལྕམ་སྲིང་མཱར་ཐ་ན༌རེ། གཙོ་བོ༌ལགས། ལཱ་ཟར་ཤི་ནས་ཉིན་བཞི་འགོར་བས་ད་ལྟ་དྲི་ངན་བྲོ་བར་ངེས་ཞེས་ཞུས་པ༌ལ།
JOH 11:40 སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་དད་པ་བྱས་ན་དཀོན་མཆོག་གི་གཟི་བརྗིད་མཐོང་ངེས་ཡིན་ཞེས་བདག་གིས་སྨྲས་མྱོང་བ་མ་ཡིན་ནམ་ཞེས་གསུངས་སོ།།
JOH 11:41 དེ་ནས་མི་རྣམས་ཀྱིས་རྡོ་ཕ་བོང་ཕར་བསྒྲིལ་བ་དང་། སྐྱབས་མགོན་ཡེ་ཤུས་དབུ་ཡར་དགྱེ་ནས་འདི་སྐད༌དུ། བདག་གི་ཡབ༌ལགས། ཁྱེད་ཀྱིས་བདག་གི་གསོལ་བ་ལ་གསན་པར་ཐུགས་རྗེ༌ཆེ་ཞུ།
JOH 11:42 ཁྱེད་ཀྱིས་རྟག་ཏུ་བདག་གི་གསོལ་བ་ལ་གསན་པ་ངས་ཀྱང་ཤེས༌མོད། འོན་ཀྱང་ཐེངས་འདིར་ཞུ་དོན་ནི་འདི་རུ་ཡོད་པའི་མི་རྣམས་བདག་ནི་ཁྱེད་ཀྱིས་མངགས་པ་ཡིན་པར་ཡིད་ཆེས་པའི་ཕྱིར་རོ་ཞེས་གསུངས་སོ།།
JOH 11:43 སྐྱབས་མགོན་ཡེ་ཤུས་དེ་ལྟར་གསུངས་རྗེས་སྐད་གསང་མཐོན་པོས་འདི་སྐད༌དུ། ལཱ༌ཟར། ཁྱོད་རང་ཕྱི་རོལ་ཏུ་ཤོག་ཅིག་ཅེས་གསུངས་མ༌ཐག
JOH 11:44 ཤི་ཟིན་པའི་མི་དེ་ཕྱི་རོལ་ཏུ་ཐོན་ནོ།། ལཱ་ཟར་གྱི་རྐང་ལག་དང་གདོང་ལ་རས་ཀྱིས་དཀྲིས་ཡོད༌པས། སྐྱབས་མགོན་ཡེ་ཤུས་དེ་རྣམས་ལ་རས་གྲོལ་ཏེ་ཁོ་རང་འགྲོ་རུ་ཆུག་ཅེས་གསུངས༌སོ།།
JOH 11:45 དེ་ནས་མིར་ཡམ་གྱི་གམ་དུ་ཡོང་བའི་ཡ་ཧུ་དཱ་པ་མང་པོས་སྐྱབས་མགོན་ཡེ་ཤུས་མཛད་པའི་དོན་དེ་མཐོང་ནས་ཁོང་ལ་དད་པར་གྱུར་ཏོ།།
JOH 11:46 འོན་ཀྱང་དེ་རྣམས་ལས་འགའ་ཞིག་ཕ་རུ་ཤི་པ་རྣམས་ཀྱི་གམ་དུ་སོང་སྟེ། སྐྱབས་མགོན་ཡེ་ཤུས་མཛད་པའི་དོན་རྣམས་བཤད༌པས།
JOH 11:47 མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱིས་ཚོགས་མི་རྣམས་བསྡུས་ཤིང་གྲོས་བྱས་ཏེ་ན༌རེ། མི་འདིས་གྲུབ་རྟགས་མང་པོ་སྟོན་བཞིན་ཡོད་པས་བདག་ཅག་གིས་ཅི༌བྱའམ།
JOH 11:48 གལ་ཏེ་འདི་ལྟར་བསྐྱུར་ན་མི་ཐམས་ཅད་ཁོ་ལ་དད་པར་འགྱུར༌ཞིང༌། རོ་མཱ་པ་རྣམས་ཀྱང་ཡོང་ནས་བདག་ཅག་གི་ས་དང་འབངས་རྣམས་འཕྲོག་ངེས་ཡིན་ཞེས་སྨྲས་སོ།།
JOH 11:49 དེ་རྣམས་ཀྱི་གྲས་སུ་ཀ་ཡ་ཕཱ་ཞེས་བྱ་བ་ལོ་དེར་མཆོད་དཔོན་ཆེན་པོའི་གོ་གནས་བཟུང་ཡོད་པ་ན༌རེ། ཁྱོད་རྣམས་ཀྱིས་ཅི་ཡང་མི་ཤེས༌ཏེ།
JOH 11:50 འབངས་མི་ཐམས་ཅད་བརླག་པ་ལས། མི་རྣམས་ཀྱི་ཆེད༌དུ་མི་གཅིག་འཆི་བར་འགྱུར་བ་དེ་མི་ལེགས་སམ་ཞེས་སྨྲས་སོ།།
JOH 11:51 འོན་ཀྱང་གཏམ་དེ་ནི་རང་བཞིན་གྱིས་སྨྲས་པ་མ་ཡིན༌ཏེ། ཁོས་མཆོད་དཔོན་ཆེན་པོའི་གོ་གནས་བཟུང་བའི་ལོ༌དེར། སྐྱབས་མགོན་ཡེ་ཤུའང་ཡ་ཧུ་དཱ་པ་ཐམས་ཅད་ཀྱི་དོན་དུ་སྐུ་གཤེགས་པར་འགྱུར་བར་མ༌ཟད།
JOH 11:52 ཕྱོགས་བཞི་སོ་སོར་གྱེས་པའི་དཀོན་མཆོག་གི་བུ་དང་བུ་མོ་རྣམས་ཕྱོགས་གཅིག་ཏུ་བསྡུ་བའི༌ཕྱིར། ཁོང་ཉིད་སྐུ་གཤེགས་དགོས་པའང་དཀོན་མཆོག་གིས་བསྐུལ་བ་བརྒྱུད༌ནས། ཀ་ཡ་ཕཱས་ཀྱང་ལུང་བསྟན་པ་ཡིན།
JOH 11:53 ཉིན་དེ་ནས༌བཟུང༌། མི་དེ་རྣམས་ཀྱིས་སྐྱབས་མགོན་ཡེ་ཤུ་དགྲོང་བར་གྲོས་བྱས༌སོ།།
JOH 11:54 དེའི༌ཕྱིར། སྐྱབས་མགོན་ཡེ་ཤུའང་ཡ་ཧུ་དཱ་པ་རྣམས་ཀྱི་ཁྲོད་དུ་མངོན་སུམ་དུ་མ་ཕེབས༌པར། ཐུགས་སྲས་རྣམས་དང་མཉམ་དུ་དབེན་གནས་དང་ཉེ་བའི་ཨེ་ཕཱར་ཡིམ་གྲོང་སྡེར་ཕེབས་ཏེ་བཞུགས་སོ།།
JOH 11:55 དེ་ནས་ཡ་ཧུ་དཱའི་མི་རིགས་ཀྱི་པེ་སག་གི་དུས་ཆེན་སླེབས་ལ་ཉེ་བ༌ན། དུས་ཆེན་གྱི་སྔོན་ལ་མི་མང་པོ་ཞིག་གྲོང་སྡེ་དག་ནས་ཐོན༌ཏེ། ཡར་ཡེ་རུ་སཱ་ལེམ་དུ་ཆོས་ཀྱི་གཙང་སྦྲའི་ཆོ་ག་བསྒྲུབ་ཏུ་སོང༌།
JOH 11:56 དེ་ནས་མི་དེ་རྣམས་སྐྱབས་མགོན་ཡེ་ཤུ་འཚོལ་དུ་ཕྱིན་ཅིང་མཆོད་ཁང་ནས་ཕན་ཚུན་ན༌རེ། ཁྱོད་རྣམས་ཀྱིས་ཅི་བསམ་པ་ཡིན༌ནམ། ཡེ་ཤུ་དུས་ཆེན་ལ་ཕེབས་མི་ཡོང་ངམ་ཞེས་སྨྲས།
JOH 11:57 ཡང་མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱིས་སྐྱབས་མགོན་ཡེ་ཤུ་འཛིན་བཟུང་བྱ་ཆེད། སུ་ཞིག་གིས་ཡེ་ཤུ་གང་དུ་བཞུགས་པ་ཤེས་ན་ངེས་པར་གསལ་པོར་འཆད་དགོས་ཞེས་བཀའ་བསྒོས་ཡོད༌དོ།།
JOH 12:1 དེ་ཡང་པེ་སག་གི་དུས་ཆེན་སྔོན་གྱི་ཉིན་དྲུག་པ་ལ་སྐྱབས་མགོན་ཡེ་ཤུ་ཁོང་ཉིད་པེ་ཐན་ཡཱ་སྟེ། དེ་སྔར་ཁོང་གིས་ལཱ་ཟར་འཆི་བ་ལས་སླར་གསོན་པར་མཛད་པའི་གྲོང་སྡེ་དེར་བྱོན་པ༌དང༌།
JOH 12:2 མི་རྣམས་ཀྱིས་གནས་དེ་རུ་ཁོང་ལ་གསོལ་སྟོན་བཤམས་ཤིང་མཱར་ཐས་སྣེ་ལེན་བྱས་པ༌དང༌། ལཱ་ཟར་ཡང་སྐྱབས་མགོན་ཡེ་ཤུ་དང་བཅས་པའི་མགྲོན་པོའི་གྲས་སུ་ཡོད་དོ།།
JOH 12:3 དེ་ནས་མིར་ཡམ་གྱིས་རིན་ཐང་ཆེ་བའི་སྤོས་ཆུ་ལྷད་མེད་པ་ནཱར་དི་རྒྱ་མ་གང་ཙམ་ཁྱེར་ཡོང༌ནས། སྐྱབས་མགོན་ཡེ་ཤུའི་ཞབས་ལ་བྱུགས་ཤིང་རང་གི་སྐྲས་ཕྱིས་པ༌ན། ཁང་པའི་ནང་དུའང་སྤོས་ཆུའི་དྲི་ཞིམ་ཁྱབ་པ་རེད།
JOH 12:4 དེ་ནས་སྐྱབས་མགོན་ཡེ་ཤུའི་ཐུགས་སྲས༌ཏེ། ཕྱིས་སུ་ཁོང་ཉིད་ལ་ངོ་ལོག་བྱེད་མཁན་ཨི་སི་ཀར་རེའི་ཡུ་དཱ་ཞེས་པ་ན༌རེ།
JOH 12:5 སྤོས་ཆུ་འདི་དངུལ་སྒོར་སུམ་བརྒྱར་བཙོངས་ཏེ་དབུལ་པོ་རྣམས་ལ་བྱིན་ན་ལེགས་ཞེས་སྨྲས་སོ།།
JOH 12:6 དེ་ནི་ཁོས་དབུལ་པོ་རྣམས་ལ་སྙིང་རྗེ་ནས་དེ་ལྟར་སྨྲས་པ་མ་ཡིན༌ཏེ། ཁོ་ནི་རྐུན་མ་ཡིན་ཞིང་དངུལ་ཁུག་ཉར་ཚགས་བྱེད་མཁན་ཡང་ཡིན༌པས། ཁོས་རྟག་ཏུ་ལྐོག་ལེན་བྱེད་པའི་ཕྱིར༌རོ།།
JOH 12:7 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁོ་མོར་དེ་བཞིན་བྱེད་དུ༌ཆུག ཁོ་མོས་ང་རང་དུར་དུ་འཇུག་པའི་ཉིན་མོ་ལ་བཞག་པ་ཡིན།
JOH 12:8 དབུལ་པོ་རྣམས་རྟག་ཏུ་ཁྱོད་ཅག་དང་མཉམ་དུ་ཡོད་ཀྱང་། ང་རང་ནི་དུས་རྟག་ཏུ་ཁྱོད་ཅག་དང་མཉམ་དུ་མི་གནས་ཞེས་གསུངས༌སོ།།
JOH 12:9 དེ་ནས་ཡ་ཧུ་དཱ་པ་ཧ་ཅང་མང་པོས་སྐྱབས་མགོན་ཡེ་ཤུ་ཁོང་ཉིད་པེ་ཐན་ཡཱ་རུ་བཞུགས་པ་ཐོས༌ཏེ། སྐྱབས་མགོན་ཡེ་ཤུ་ལ་མཇལ་དུ་ཡོང་བར་མ་ཟད། ཁོང་གིས་འཆི་བ་ལས་སླར་གསོན་པར་མཛད་པའི་ལཱ་ཟར་ལའང་བལྟ་རུ་ཡོང༌བ་རེད།
JOH 12:10 འོན་ཀྱང་མཆོད་དཔོན་ཆེན་པོ་རྣམས་ཀྱིས་ལཱ་ཟར་གསོད་པར་ཡང་གྲོས་བྱས་སོ།།
JOH 12:11 རྒྱུ་མཚན་ནི་ལཱ་ཟར་གྱི་རྐྱེན༌གྱིས། ཡ་ཧུ་དཱ་པ་མང་པོ་ཞིག་ཁོ་རྣམས་དང་ཁ་བྲལ་ནས་སྐྱབས་མགོན་ཡེ་ཤུ་ལ་དད་པར་གྱུར་པས༌སོ།།
JOH 12:12 དེའི་ཕྱི༌ཉིན། པེ་སག་གི་དུས་ཆེན་ལ་ཡོང་བའི་མི་ཧ་ཅང་མང་པོས་སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཕེབས་བཞིན་ཡོད་པ་ཐོས༌ནས།
JOH 12:13 ཤིང་ཏ་ལའི་ཡལ་ག་ཁུར་ཏེ་ཁོང་ཉིད་བསུ་རུ་སོང་ཞིང་སྐད་མཐོན༌པོས། ཧོ་ཟན༌ནཱ། ཡེས་ར་ཨེལ་གྱི་རྒྱལ་པོ་སྟེ། གཙོ་བོའི་མཚན་གྱི་སྒོ་ནས་བྱོན་པ་ནི་བྱིན་རླབས་ཅན་ཡིན་ཞེས་ཡང་ཡང་བསྒྲགས་སོ།།
JOH 12:14 དེ་ནས་སྐྱབས་མགོན་ཡེ་ཤུར་བོང་ཕྲུག་ཅིག་འབྱོར་ཞིང་ཁོང་དེ་ལ་བཅིབས་སོ།། དེ་ནི་གསུང་རབ་ཀྱི་མདོ་ལས་ཇི་སྐད༌དུ།
JOH 12:15 ཛ་ཡན་ཡུལ་གྱི་མི་སྡེ༌རྣམས།། འཇིགས་པའི་ངལ་བ་བྱ་མི༌འོས།། ཁྱོད་ཀྱི་རྒྱལ་པོ་ད་ལྟ་ཉིད༎ བོང་ཕྲུག་བཞོན་ནས་ཕེབས་ལ༌ལྟོས།། ཞེས་བཀོད་པ་བཞིན༌ནོ།།
JOH 12:16 ཐུགས་སྲས་རྣམས་ཀྱིས་སྔ་མོ་ནས་དོན་འདི་དག་མ་རྟོགས༌ལ། སྐྱབས་མགོན་ཡེ་ཤུ་གཟི་བརྗིད་དང་ལྡན་པར་གྱུར༌རྗེས། ད་གཟོད་གསུང་དེ་ནི་ཁོང་གི་སྐོར་ལ་བྲིས་པ་དང་དེ་རྣམས་ཀྱིས་ཀྱང་ཁོང་ལ་དེ་བཞིན་དུ་བྱས་པ་དྲན༌ནོ།།
JOH 12:17 སྐྱབས་མགོན་ཡེ་ཤུས་ལཱ་ཟར་དུར་ཁུང་ལས་ཕྱི་རུ་བོས་ཤིང་འཆི་བ་ལས་སླར་གསོན་པར་མཛད་པའི་དུས༌སུ། ཁོང་དང་མཉམ་དུ་ཡོད་པའི་མི་དེ་རྣམས་ཀྱིས་དོན་དེ་ལ་བདེན་དཔང་ཡང་ཡང་བྱས༌པས།
JOH 12:18 མི་ཚོགས་ཀྱིས་ཀྱང་ཁོང་གིས་མཛད་པའི་གྲུབ་རྟགས་དེའི་སྐོར་ཐོས་ནས་ཁོང་ཉིད་བསུ་རུ་ཕྱིན་ཏོ།།
JOH 12:19 དེ་ནས་ཕ་རུ་ཤི་པ་རྣམས་ཕན་ཚུན་ན༌རེ། ལྟོས༌དང༌། འཇིག་རྟེན་མི་ཀུན་ཁོའི་རྗེས་སུ་འབྲངས་པས་བདག་ཅག་གིས་ཅི་བྱས་ཐམས་ཅད་སྟོང་བ་རེད་ཅེས་སྨྲས༌སོ།།
JOH 12:20 ཡང་དུས༌དེར། པེ་སག་གི་དུས་ཆེན་ལ་ཞུགས་པ་དང་དཀོན་མཆོག་ལ་བསྙེན་བཀུར་བྱེད་དུ་ཡོང་བའི་མི་རྣམས༌ལས། ཡ་ཧུ་དཱ་པའི་ཆོས་ལ་དད་གུས་ཡོད་པའི་གྷི་རིག་པ་འགའ་ཞིག་ཡོད་པ༌དང༌།
JOH 12:21 དེ་རྣམས་ནི་ག་ལིལ་ཡུལ་གྱི་ཁོངས་གཏོགས་པེ་སད་དཱ་ནས་ཕི་ལིབ་ཅེས་པའི་དྲུང་དུ་སོང་སྟེ་ན༌རེ། ཇོ་བོ༌ལགས། ངེད་རྣམས་ཡེ་ཤུར་མཇལ་འདོད་ཅེས་ཞུས་པ༌དང༌།
JOH 12:22 ཕི་ལིབ་ཀྱིས་དོན་དེ་ཨན་དྲི་ཡཱ་ལ་སྨྲས༌ཤིང༌། ཨན་དྲི་ཡཱ་དང་ཕི་ལིབ་གཉིས་སྐྱབས་མགོན་ཡེ་ཤུའི་དྲུང་དུ་སོང་ནས་དོན་དེ་ཁོང་ལ་ཞུས་སོ།།
JOH 12:23 དེ་ནས་སྐྱབས་མགོན་ཡེ་ཤུས་འདི་སྐད༌དུ། མིའི་བུ་གཟི་བརྗིད་དང་ལྡན་པར་འགྱུར་བའི་དུས་དེ་སླེབས་བྱུང་།
JOH 12:24 བདག་གིས་ཁྱོད་ཅག་ལ་ཡང་དག་པར་བདེན་པར་སྨྲ༌སྟེ། གྲོའི་འབྲུ་རྡོག་གཅིག་ལ་མཚོན༌ན། སའི་ནང་དུ་ལྷུང་ནས་མ་ཤི་ན་འབྲུ་རྡོག་གཅིག་རང་ལུས༌ཤིང་། སའི་ནང་དུ་ལྷུང་སྟེ་ཤི་བ༌ན། འབྲུ་རྡོག་དེ་ལས་ཀྱང་འབྲས་བུ་མང་པོ་བསྐྱེད༌པ་ཡིན།
JOH 12:25 འཇིག་རྟེན་འདིར་སུ་ཞིག་གིས་རང་སྲོག་གཅེས་སུ་འཛིན་པ་དེས་ཚེ་སྲོག་འཆོར་བ༌དང༌། སུ་ཞིག་གིས་རང་སྲོག་འདོར་བ་དེས་མཐའ་མེད་པའི་ཚེ་སྲོག་འཐོབ་པའི་ཕྱིར་རང་སྲོག་སྐྱོབ་པར་འགྱུར་རོ།།
JOH 12:26 ཡང་སུ་ཞིག་གིས་བདག་ལ་ཞབས་ཕྱི་བྱེད་འདོད་པ་རྣམས་བདག་གི་རྗེས་སུ་འབྲང་བར་གྱིས། ང་རང་གང་དུ་ཡོད་ན་བདག་གི་ཞབས་ཕྱི་པའང་གནས་དེ་རུ་ཡོད་པར་འགྱུར་རོ།། ཡང་སུ་ཞིག་གིས་བདག་ལ་ཞབས་ཕྱི་བྱེད་འདོད༌ན། བདག་གི་ཡབ་ཀྱིས་ཀྱང་མི་དེ་ལ་བཀུར་སྟི་མཛད་ངེས་སོ།།
JOH 12:27 ད་ནི་བདག་གི་སེམས་སྐྱོ་བས་ཅི་སྨྲའམ་ཞེ༌ན། ཀྱེ། ཡབ་ལགས། ཁྱེད་ཀྱིས་བདག་ནི་དུས་འདི་ལས་སྐྱོབ་པར༌མཛོད། འོན་ཀྱང་བདག་ནི་དུས་འདིའི་ཆེད་དུ་འཇིག་རྟེན་ལ་ཡོང་བ་ཡིན།
JOH 12:28 ཀྱེ། ཡབ༌ལགས། ཁྱེད་ཀྱིས་རང་ཉིད་ཀྱི་མཚན་ལ་གཟི་བརྗིད་ལྡན་པར་མཛོད་ཅིག་ཅེས་གསུངས༌སོ། །དེ་མ་ཐག་ནམ་མཁའི་ཞིང་ཁམས་ནས་སྐད་སྒྲ་ཞིག་བྱུང༌སྟེ། བདག་གིས་རང་ཉིད་ཀྱི་མཚན་ལ་གཟི་བརྗིད་ལྡན་པར་མཛད་ཅིང་སླར་ཡང་མཛད་པར་བྱ་ཞེས་གསུངས་སོ།།
JOH 12:29 སྐབས་དེར་ཉེ་འགྲམ་དུ་ལངས་ནས་སྡོད་པའི་མི་ཚོགས་ཀྱིས་ཀྱང་སྐད་སྒྲ་དེ་ཐོས་པས་མི་ལ་ལས་འབྲུག་སྒྲ་གྲགས་བྱུང་ཞེས་ཟེར་བ༌དང༌། ཡང་ལ་ལས་ཕོ་ཉ་ཞིག་གིས་ཁོང་ལ་གསུང་གླེང་མཛད་ཅེས་སྨྲས་སོ།།
JOH 12:30 དེ་ནས་སྐྱབས་མགོན་ཡེ་ཤུས་འདི་སྐད༌དུ། སྐད་སྒྲ་འདི་ནི་བདག་གི་དོན་དུ་བྱུང་བ་མ་ཡིན་པར་ཁྱོད་རྣམས་ཀྱི་དོན་དུ་བྱུང༌བ་ཡིན།
JOH 12:31 ད་ནི་འཇིག་རྟེན་འདིར་ཆད་པ་གཅོད་པའི་དུས་ལ་སླེབས་པ༌དང༌། འཇིག་རྟེན་འདིའི་དབང་སྒྱུར་མཁན་ ཕྱི་རུ་བསྐྲོད་པར་འགྱུར།
JOH 12:32 གལ་ཏེ་ང་རང་ས་གཞི་ལས་གྱེན་དུ་བསྒྲེངས༌ན། མི་ཐམས་ཅད་བདག་གི་དྲུང་དུ་བསྡུ་བར་བྱེད་ཅེས་གསུངས་སོ།།
JOH 12:33 སྐྱབས་མགོན་ཡེ་ཤུས་དེ་ལྟར་གསུངས་པ་ནི་རང་ཉིད་ཇི་ལྟར་དགྲོང་བར་འགྱུར་བ་བསྟན་པ་རེད།
JOH 12:34 དེ་ནས་མི་ཚོགས་ན༌རེ། ངེད་རྣམས་ཀྱིས་བཀའ་ཁྲིམས་ཀྱི་མདོ་ལས་སྐྱབས་མགོན་མཱ་ཤི་ཀ་ནི་གཏན་དུ་བཞུགས་པ་ཡིན་ཞེས་བཀོད་ཡོད་པ་ཐོས༌ཀྱང༌། ཁྱོད་ཀྱིས་མིའི་བུ་གྱེན་དུ་བསྒྲེང་དགོས་ཞེས་གསུངས་དོན༌ཅི། མིའི་བུ་ཞེས་བྱ་བ་དེ་སུ་ཡིན་ནམ་ཞེས་དྲིས་པ༌ལ།
JOH 12:35 སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱི་ཁྲོད་དུ་དུས་ཐུང་ངུ་ཙམ་ལ་ད་དུང་འོད་ཟེར་ཡོད༌པས། ཁྱོད་རྣམས་མུན་པའི་དབང་འོག་ཏུ་མི་ཚུད་པའི་ཆེད་དུ་འོད་དང་ལྡན་པའི་དུས་དེ་ལ་སྐྱོད༌ཅིག མུན་པའི་ནང་དུ་བགྲོད་པ་དེས་གང་དུ་འགྲོ་བའང་མི་ཤེས།
JOH 12:36 ཁྱོད་རྣམས་འོད་དང་ལྡན་པར་འགྲོགས་དུས་འོད་ཟེར་དེ་ལ་དད་པ་བྱོས༌དང༌། དེ་ནས་ཁྱོད་རྣམས་ཀྱང་འོད་ལ་གཏོགས་པའི་མི་རུ་འགྱུར་ཞེས་གསུངས་རྗེས་ཡུལ་དེ་དང་ཁ་བྲལ་བ་དང་ཡིབས་ནས་བཞུགས༌སོ།།
JOH 12:37 སྐྱབས་མགོན་ཡེ་ཤུས་མི་དེ་རྣམས་ཀྱི་མིག་མདུན་དུ་གྲུབ་རྟགས་མང་པོ་བསྟན་ཀྱང་དེ་རྣམས་ཀྱིས་ཁོང་ལ་དད་པ་མ་བྱས་སོ།།
JOH 12:38 དོན་དེ་ནི་ལུང་སྟོན་པ་ཡེ་ཤ་ཡཱའི་མདོ་ལས་ཇི་སྐད༌དུ། གཙོ་བོ་ལགས་ཀྱིས༌འདི་ལ་གསན་རོགས་གནང་།། ངེད་ཚོས་བསྒྲགས་པའི་གཏམ་ལ་སུ་ཡིས་དད།། ཁྱེད་ཀྱི་ཕྱག་ཀྱང་སུ་ལ༌མངོན་ལགས་སམ།། ཞེས་གསུངས་པ་བཞིན་འགྲུབ་པའི་ཕྱིར་དེ་ལྟར་བྱུང༌ངོ༌།།
JOH 12:39 ཡང་མི་དེ་རྣམས་ཀྱིས་དད་པ་བྱེད་མི་ནུས་པའི་རྒྱུ་མཚན་ནི་ཡེ་ཤ་ཡཱ་ཡི་མདོ་ལས་ཇི་སྐད༌དུ།
JOH 12:40 གཙོ་བོ་ལགས་ཀྱིས་མི་དེ་རྣམས༌ཀྱི་ནི།། མིག་ནི་ལོང་ཞིང་སེམས་ནི་གྱོང་པོར༌མཛད།། དེ་ལྟར་མིན་ན་མིག་གིས་མཐོང་བ་དང་༎ བློ་ཡིས་རྟོགས་ཤིང་ཕྱིར་ལ་འཁོར་བ་ན༎ ངས་ཀྱང་དེ་རྣམས་གསོ་ཞིང་དྲག་པར་བྱེད༎ ཅེས་གསུངས་ཡོད་པའི་ཕྱིར༌རོ།།
JOH 12:41 དེ་ནི་ཡེ་ཤ་ཡཱ་ཡིས་སྐྱབས་མགོན་ཡེ་ཤུའི་གཟི་བརྗིད་མངོན་པར་མཁྱེན་ནས་དེ་སྐད་གསུངས༌པ་ཡིན།
JOH 12:42 དེ་ལྟར་ལུང་བསྟན་གསུངས་ཡོད་ནའང་ཆོས་དཔོན་རྣམས་ཀྱི་ཁྲོད་དུ་ཁོང་ལ་དད་པར་གྱུར་པའི་མི་མང་པོ་འདུག འོན་ཀྱང་དེ་རྣམས་ཕ་རུ་ཤི་པ་རྣམས་ཀྱིས་ཆོས་ཁང་ནས་ཕྱིར་འཕུད་པར་འཇིགས་པས་དོན་དེ་དངོས་སུ་ཁས་ལེན་མ་ནུས༌པ་རེད།
JOH 12:43 རྒྱུ་མཚན་ནི་མི་དེ་རྣམས་དཀོན་མཆོག་གི་བསྟོད་བསྔགས་ལས་ཀྱང་མིའི་བསྟོད་བསྔགས་ལ་ལྷག་པར་དགའ་བས༌སོ།།
JOH 12:44 དེ་ནས་སྐྱབས་མགོན་ཡེ་ཤུས་གསུང་སྐད་ཆེན་པོས་འདི་སྐད༌དུ། སུ་ཞིག་གིས་བདག་ལ་དད་པ་བྱེད་པ་ནི་ང་རང་ལ་དད་པ་མ་ཡིན་པར་ང་རང་མངགས་མཁན་ལ་དད་པ་བྱེད་པ་ཡིན།
JOH 12:45 ཡང་སུ་ཞིག་གིས་ང་རང་མཐོང་བ་ཡིན་ན་ང་རང་མངགས་མཁན་མཐོང༌བ་ཡིན།
JOH 12:46 ང་རང་འོད་ཟེར་བཞིན་འཇིག་རྟེན་དུ་འོངས་དོན་ནི་བདག་ལ་དད་མཁན་རྣམས་མུན་པའི་ནང་དུ་མི་ལུས་པའི་ཕྱིར༌རོ།།
JOH 12:47 ཡང་བདག་གི་བཀའ་སུ་ཞིག་གིས་ཐོས་ཀྱང་དེ་ལྟར་མི་བསྒྲུབ༌ན། ངས་མི་དེ་ལ་ཉེས་ཆད་མི་གཅོད༌དེ། ང་རང་ནི་འཇིག་རྟེན་གྱི་མི་ཐམས་ཅད་སྐྱོབ་པར་བྱེད་པ་ལས་ཉེས་ཆད་གཅོད་དུ་འོངས་པ་མ་ཡིན།
JOH 12:48 སུ་ཞིག་གིས་བདག་ནི་འདོར་ཞིང་བདག་གི་བཀའ་ཡང་ཁས་མི་ལེན༌ན། མི་དེ་ལ་ཉེས་ཆད་གཅོད་མཁན་ཡང་ཡོད༌དེ། བདག་གིས་སྨྲས་པའི་བཀའ་ཡིས་མཐའ་མའི་ཉིན་མོར་དེ་རྣམས་ལ་ཉེས་ཆད་གཅོད་པར་འགྱུར་རོ།།
JOH 12:49 རྒྱུ་མཚན་ནི་ངས་རང་ཉིད་ལ་བརྟེན་ནས་སྨྲས་པ་མ་ཡིན༌ཏེ། གང་ཞིག་སྨྲ་ཞིང་བསྒྲག་དགོས་པ་ནི་ང་རང་མངགས་མཁན་ཏེ་ཡབ་ཀྱིས་བདག་ལ་བཀའ་གནང་ཡོད་པའི་ཕྱིར༌རོ།།
JOH 12:50 བདག་གི་ཡབ་ཀྱིས་གནང་བའི་བཀའ་ནི་མཐའ་མེད་པའི་ཚེ་སྲོག་ཡིན་པ་ངས་ཀྱང་ཤེས༌པས། བདག་གིས་སྨྲས་པ་ཐམས་ཅད་ཀྱང་ངའི་ཡབ་ཀྱིས་བདག་ལ་གསུངས་པ་བཞིན་སྨྲས་པ་ཡིན་ཞེས་གསུངས༌སོ།།
JOH 13:1 པེ་སག་གི་དུས་ཆེན་གྱི་སྔོན༌ལ། སྐྱབས་མགོན་ཡེ་ཤུས་རང་ཉིད་འཇིག་རྟེན་འདི་དང་ཁ་བྲལ་ནས་ཡབ་ཀྱི་དྲུང་དུ་གཤེགས་དགོས་པའི་དུས་ལ་བབས་པ་མཁྱེན་པ༌དང༌། ཁོང་གིས་འཇིག་རྟེན་འདིའི་རང་ཉིད་ལ་གཏོགས་པའི་རྗེས་འབྲང་པ་རྣམས་ལ་གཏན་དུ་བྱམས་ཤིང་གཅེས་ལ། དུས་མཐའ་མའི་བར་དུའང་བྱམས་པར་མཛད༌དོ།།
JOH 13:2 དེ་ནས་དགོང་ཟས་བཞེས་པའི་དུས༌སུ། བདུད་ཀྱིས་སྐྱབས་མགོན་ཡེ་ཤུ་ལ་ངོ་ལོག་བྱེད་པའི་བསམ་ཚུལ༌དེ་ནི་སྔར་ནས་ཨི་སི་ཀར་རེའི་སི་མོན་གྱི་བུ་ཡུ་དཱའི་སེམས་སུ་བཞག༌ཡོད་པ་རེད།
JOH 13:3 ཡབ་ཀྱིས་དབང་ཐམས་ཅད་རང་གི་ཕྱག་ལ་སྤྲད་པ་དང་རང་ཉིད་ནི་དཀོན་མཆོག་ནས་འོངས་ཤིང་སླར་ཡང་དཀོན་མཆོག་གི་དྲུང་དུ་གཤེགས་དགོས་པ་སྐྱབས་མགོན་ཡེ་ཤུས་མཁྱེན༌ཏེ།
JOH 13:4 བཞུགས་གྲལ་ནས་ཡར་བཞེངས་ཤིང་ཕྱི་གོས་ཕུད་དེ་རས་ལེབ་ཅིག་རྐེད་པར་དཀྲིས༌རྗེས།
JOH 13:5 གཞོང་པའི་ནང་དུ་ཆུ་བླུགས་ཏེ་ཐུགས་སྲས་རེ་རེའི་རྐང་པ་བཀྲུས་པ་དང་རྐེད་པའི་རས་ལེབ་བླངས་ནས་ཕྱིས༌པ་རེད།
JOH 13:6 དེ་ནས་ཐུགས་སྲས་སི་མོན་པེ་ཏྲོའི་རྐང་པ་བཀྲུ་བར་ཕྲད་པ་ན་ཁོ་ན༌རེ། གཙོ་བོ༌ལགས། ཁྱེད་ཀྱིས་བདག་གི་རྐང་པ་བཀྲུ་འདོད་དམ་ཞེས་ཞུས་པ༌ན།
JOH 13:7 སྐྱབས་མགོན་ཡེ་ཤུས་འདི་སྐད༌དུ། བདག་གིས་གང་ཞིག་བྱེད་པ་འདི་ད་ལྟ་ཁྱོད་ཀྱིས་མི་རྟོགས་ཀྱང་རྗེས་སུ་རྟོགས་པར་ངེས་ཞེས་གསུངས་སོ།།
JOH 13:8 ཡང་པེ་ཏྲོ་ན༌རེ། ཁྱེད་ཀྱིས་ནམ་ཡང་བདག་གི་རྐང་པ་བཀྲུ་མི་འོས་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ངས་ཁྱོད་མ་བཀྲུས༌ན། ཁྱོད་ནི་བདག་དང་འབྲེལ་བ་མེད་ཅེས་གསུངས་སོ།།
JOH 13:9 ཡང་སི་མོན་པེ་ཏྲོ་ན༌རེ། གཙོ་བོ༌ལགས། ཁྱེད་ཀྱིས་ངའི་རྐང་པ་ཙམ་མ༌ཟད། ངའི་ལག་པ་དང་མགོ་བོའང་བཀྲུ་བར་མཛོད་ཅེས་ཞུས་པ༌ན།
JOH 13:10 སྐྱབས་མགོན་ཡེ་ཤུས་འདི་སྐད༌དུ། ཁྲུས་བྱས་མྱོང་བ་རྣམས་ཀྱི་ལུས་ཧྲིལ་པོ་གཙང༌བ་ཡིན། རྐང་པ་ལས་གཞན་རང་གི་ལུས་པོ་བཀྲུ་མི་དགོས༌ལ། ཁྱོད་རྣམས་ནི་གཙང་མ་ཡིན་ཡང་ཐམས་ཅད་གཙང་མ་མིན་ཞེས་གསུངས་སོ།།
JOH 13:11 དོན་ནི་སྐྱབས་མགོན་ཡེ་ཤུས་རང་ཉིད་ལ་ངོ་ལོག་བྱེད་མཁན་སུ་ཡིན་པ་མཁྱེན༌པས། ཁྱོད་རྣམས་ཐམས་ཅད་གཙང་བ་མ་ཡིན་ཞེས་པའོ།།
JOH 13:12 དེ་ནས་སྐྱབས་མགོན་ཡེ་ཤུས་ཐུགས་སྲས་རྣམས་ཀྱི་རྐང་པ་བཀྲུས་ཚར༌རྗེས། ཕྱི་གོས་མནབས་ཤིང་སླར་ཡང་བཞུགས་ཏེ་འདི་སྐད༌དུ། ངས་ཁྱོད་རྣམས་ལ་ཅི་བྱས་པ་འདི་ཁྱོད་རྣམས་ཀྱིས་ཤེས༌སམ།
JOH 13:13 ཁྱོད་རྣམས་ཀྱིས་བདག་ལ་སློབ་དཔོན་ནམ་གཙོ་བོ་ཞེས་འབོད་ཅིང༌། བདག་ནི་དངོས་གནས་དེ་ཉིད་ཡིན་པས་ཁྱོད་ཅག་གིས་སྨྲས་པའང་བདེན༌པ་ཡིན།
JOH 13:14 བདག་ནི་ཁྱོད་རྣམས་ཀྱི་གཙོ་བོ་དང་སློབ་དཔོན་ཡིན་ཡང་ངས་ཁྱོད་རྣམས་ཀྱི་རྐང་པ་བཀྲུས༌པས། ཁྱོད་ཅག་གིས་ཀྱང་ཕན་ཚུན་གྱི་རྐང་པ་བཀྲུ་འོས།
JOH 13:15 ངས་ཁྱོད་རྣམས་ལ་མིག་དཔེ་བསྟན༌ཅིང༌། ཁྱོད་རྣམས་ཀྱིས་ཀྱང་བདག་བཞིན་དུ་བྱ་འོས༌པ་ཡིན།
JOH 13:16 བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། གཡོག་པོ་ནི་བདག་པོ་ལས་ཆེན་པོ་ཡིན་མི་སྲིད༌ཅིང༌། མངག་བྱའི་མི་སྣའང་མངགས་མཁན་ལས་ཆེན་པོ་མིན།
JOH 13:17 ད་ལྟ་ཁྱོད་རྣམས་ཀྱིས་ཀྱང་དོན་དེ་རྟོགས་པས་དེ་བཞིན་དུ་བྱེད་ན་ཁྱོད་རྣམས་ལའང་བདེ་བ་དང་ལྡན་པར༌ངེས།
JOH 13:18 བདག་གིས་གཏམ་འདི་ཁྱོད་ཅག་ཐམས་ཅད་ལ་སྨྲས་པ་མིན༌ལ། བདག་གིས་སུ་ཞིག་བདམས་པ་ངས་ཀྱང་ཤེས་སོ།། དེ་ནི་གསུང་རབ་ཀྱི་མདོ་ལས་ཇི་སྐད༌དུ། བདག་དང་མཉམ་དུ་ཁ་ཟས་སྤྱོད་མཁན༌གྱིས།། བདག་ལ་རྐང་པའི་ཕྱི་རྟིང་བསྟན་པ་ཡིན།། ཞེས་གསུངས་པ་བཞིན་འགྲུབ་པའི་ཕྱིར༌ཡིན།
JOH 13:19 ད་ལྟ་དོན་དེ་མ་འགྲུབ་པའི་སྔོན༌དུ། བདག་གིས་ཐོག་མར་ཁྱོད་རྣམས་ལ་སྨྲ་བར་བྱ༌སྟེ། དོན་དེ་འགྲུབ་པའི་དུས་སུ་ཁྱོད་རྣམས་ཀྱིས་ང་རང་དེ་ཉིད་ཡིན་པ་ལ་དད་པ་བྱེད་པའི་ཕྱིར༌རོ།།
JOH 13:20 བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། མི་སུས་ཀྱང་ངས་མངགས་པ་གང་ཞིག་ལ་བསུ་བ་བྱས་ན་ང་རང་ལའང་བསུ་བ་བྱས་པ༌ཡིན། ང་རང་ལ་བསུ་བ་བྱས་ན་དོན་དམ་དུ་ང་རང་མངགས་མཁན་ལའང་བསུ་བ་བྱས་པ་ཡིན་ཞེས་གསུངས༌སོ།།
JOH 13:21 སྐྱབས་མགོན་ཡེ་ཤུས་དེ་སྐད་གསུངས་པ་དང་ཐུགས་སྐྱོ་བར་གྱུར་ནས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ལས་མི་གཅིག་གིས་ང་རང་ལ་ངོ་ལོག་བྱ་ངེས་ཡིན་ཞེས་གསུངས་པ༌དང༌།
JOH 13:22 ཐུགས་སྲས་རྣམས་ཀྱིས་ཕན་ཚུན་ལ་བལྟས་ཀྱང་ཁོང་གིས་གསུངས་པའི་མི་དེ་སུ་ཡིན་མ་ཤེས་པར་ཐེ་ཚོམ་སྐྱེས་སོ།།
JOH 13:23 སྐྱབས་མགོན་ཡེ་ཤུའི་སྐུ་བྲང་དུ་སྔས་པའི་ཁོང་གི་གཅེས་པའི་ཐུགས་སྲས་དེ༌ལ།
JOH 13:24 སི་མོན་པེ་ཏྲོས་བརྡ་བསྟན་ཏེ་ན༌རེ། ཁྱོད་ཀྱིས་ཤོད༌དང༌། སྐྱབས་མགོན་ཡེ་ཤུས་སུ་ཞིག་ལ་གསུངས་པ་ཡིན་ནམ་ཞེས་དྲིས་སོ།།
JOH 13:25 ཐུགས་སྲས་དེས་རང་གི་མགོ་བོ་སྐྱབས་མགོན་ཡེ་ཤུའི་སྐུ་བྲང་ལ་བསྔས༌ཏེ། གཙོ་བོ༌ལགས། མི་དེ་སུ་ཡིན་ནམ་ཞེས་ཞུས་པ༌ན།
JOH 13:26 སྐྱབས་མགོན་ཡེ་ཤུས་འདི་སྐད༌དུ། ངས་བག་ལེབ་དུམ་བུ་འདི་སྡེར་མའི་ནང་ལ་སྦངས་ནས་སུ་ཞིག་ལ་བྱིན་ན་དེ་ཡིན་ཞེས་གསུངས༌རྗེས། ཁོང་གིས་བག་ལེབ་དུམ་བུ་དེ་སྡེར་མའི་ནང་ལ་སྦངས་རྗེས་ཨི་སི་ཀར་རེའི་སི་མོན་གྱི་བུ་ཡུ་དཱ་ལ་གནང༌ངོ་༎
JOH 13:27 ཡུ་དཱས་ཀྱང་བག་ལེབ་སྦངས་མ་དེ་ཚུར་བླངས་མ་ཐག་བདུད་སཱ་ཏན་ཡང་ཁོའི་སེམས་ནང་དུ་ཞུགས་པ་རེད། དེ་ནས་སྐྱབས་མགོན་ཡེ་ཤུས་ཡུ་དཱ་ལ་འདི་སྐད༌དུ། ཁྱོད་ཀྱིས་བྱ་བ་གང་ཞིག་འདོད་པ་དེ་མྱུར་དུ་སྒྲུབས་ཤིག་ཅེས་གསུངས༌ནའང༌།
JOH 13:28 སྐྱབས་མགོན་ཡེ་ཤུ་དང་ལྷན་དུ་གྲལ་ལ་བཞུགས་པའི་མི་སུས་ཀྱང་ཁོང་གིས་ཅིའི་ཕྱིར་དེ་ལྟར་གསུངས་པའི་དོན་མ་རྟོགས་སོ།།
JOH 13:29 རྒྱུ་མཚན་ནི་ཐུགས་སྲས་ལ་ལས་ཡུ་དཱའི་ལག་ཏུ་དངུལ་ཁུག་བཟུང་ཡོད༌པས། སྐྱབས་མགོན་ཡེ་ཤུས་ཁོ་རང་ནི་དུས་ཆེན་ལ་མཁོ་བའི་དངོས་རྫས་ཉོ་བར་བསྐུལ༌བའམ། ཡང་ན་དབུལ་པོ་རྣམས་ལ་གང་ཞིག་སྦྱིན་པར་གསུངས་པར་བསམས་སོ།།
JOH 13:30 དེ་ནས་ཡུ་དཱས་བག་ལེབ་སྦངས་མ་དེ་བླངས་མ་ཐག་ཕྱི་རོལ་ཏུ་སོང་བ་དང་དུས་དེ་ནི་མཚན་མོ་ཡིན༌ནོ།།
JOH 13:31 དེ་ནས་ཡུ་དཱ་ཕྱི་རོལ་ཏུ་སོང་བ་དང་སྐྱབས་མགོན་ཡེ་ཤུས་འདི་སྐད༌དུ། ད་ནི་མིའི་བུ་གཟི་བརྗིད་དང་ལྡན་པར་འགྱུར་ཞིང་དཀོན་མཆོག་གི་གཟི་བརྗིད་ཀྱང་མིའི་བུ་བརྒྱུད་ནས་མངོན་པར་འགྱུར༌ལ།
JOH 13:32 ཡང་དཀོན་མཆོག་གི་གཟི་བརྗིད་མིའི་བུ་བརྒྱུད་ནས་མངོན་པར་འགྱུར་བས༌ན། དཀོན་མཆོག་རང་ཉིད་ཀྱིས་ཀྱང་མིའི་བུ་གཟི་བརྗིད་དང་ལྡན་པར་མཛད་དེ་མྱུར་བ་མྱུར་དུ་མཛད་ངེས༌ཡིན།
JOH 13:33 བདག་གི་གཅེས་པའི་བུ༌རྣམས། བདག་ནི་ད་དུང་དུས་ཐུང་ངུ་ཙམ་ལ་ཁྱོད་ཅག་དང་མཉམ་དུ་ཡོད༌དེ། རྗེས་སུ་ཁྱོད་ཅག་གིས་ང་རང་འཚོལ་བར་འགྱུར་ནའང་། བདག་གིས་དེ་སྔར་ཡ་ཧུ་དཱ་པ་རྣམས་ལ་སྨྲས་པ་བཞིན་ད་ནི་ཁྱོད་རྣམས་ལའང་སྨྲ་བར་བྱ༌སྟེ། ང་རང་འགྲོ་བའི་གནས་སུ་ཁྱོད་རྣམས་འགྲོ་མི་ནུས་སོ།།
JOH 13:34 བདག་གིས་ཁྱོད་ཅག་ལ་བཀའ་གསར་པ་ཞིག་གནང་བར༌བྱའོ།། དེ་ནི་ཁྱོད་རྣམས་ཀྱིས་ཕན་ཚུན་ལ་བྱམས་ཤིང་གཅེས་པར་བྱེད་དགོས་པ༌དེ་ཡིན། ངས་ཁྱོད་རྣམས་ལ་བྱམས་ཤིང་གཅེས་པ་བཞིན་ཁྱོད་རྣམས་ཀྱིས་ཀྱང་ཕན་ཚུན་ལ་གཅེས་དགོས།
JOH 13:35 ཁྱོད་རྣམས་ཀྱིས་ཕན་ཚུན་ལ་བྱམས་ཤིང་གཅེས་པར་བྱས༌ན། མི་ཐམས་ཅད་ཀྱིས་ཀྱང་ཁྱོད་རྣམས་བདག་གི་རྗེས་འབྲང་པ་ཡིན་པ་ཤེས་པར་འགྱུར་ཞེས་གསུངས༌སོ།།
JOH 13:36 དེ་ནས་སི་མོན་པེ་ཏྲོ་ན༌རེ། གཙོ་བོ༌ལགས། ཁྱེད་ཉིད་གང་དུ་ཕེབས་སམ་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། ང་རང་འགྲོ་བའི་གནས་སུ་ད་ལྟ་ཁྱོད་རང་བདག་གི་རྗེས་སུ་འབྲངས་ནས་འགྲོ་མི་ཐུབ༌ཀྱང༌། ཕྱིས་སུ་བདག་གི་རྗེས་སུ་འབྲང་བར་འགྱུར་ཞེས་གསུངས་སོ།།
JOH 13:37 ཡང་པེ་ཏྲོ་ན༌རེ། གཙོ་བོ༌ལགས། ད་ལྟ་ང་རང་ཅིའི་ཕྱིར་ཁྱེད་ཀྱི་རྗེས་སུ་འབྲང་མི་ཐུབ༌བམ། ངས་ཁྱེད་ཀྱི་དོན་དུ་རང་སྲོག་ཀྱང་བློས་གཏོང་བར་བྱའོ་ཞེས་ཞུས་པ༌ན།
JOH 13:38 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་བདག་གི་དོན་དུ་རང་སྲོག་ཀྱང་བློས་གཏོང་ཐུབ༌བམ། ངས་ཁྱོད་ལ་ཡང་དག་པར་བདེན་པར་སྨྲ༌སྟེ། བྱ་ཕོ་མ་གྲགས་པའི་སྔོན༌དུ། ཁྱོད་ཀྱིས་ང་རང་ཐེངས་གསུམ་ལ་ཁས་མི་ལེན་ཞེས་གསུངས༌སོ།།
JOH 14:1 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་སེམས་སྐྱོ་བར་མི༌བྱའོ། །དཀོན་མཆོག་ལ་ཡིད་ཆེས་བྱོས༌དང༌། བདག་ལའང་ཡིད་ཆེས་བྱ་འོས།
JOH 14:2 བདག་གི་ཡབ་ཀྱི་བཞུགས་གནས་སུ་སྡོད་གནས་མང་པོ་ཡོད༌ཅིང༌། གལ་ཏེ་སྡོད་གནས་མེད་ན་ངས་སྔ་མོ་ནས་ཁྱོད་རྣམས་ལ་སྨྲས་ཟིན། ད་ལྟ་ང་རང་ཁྱོད་རྣམས་ཀྱི་ཆེད་དུ་སྡོད་གནས་སྟ་གོན་བྱེད་དུ༌འགྲོ་བ་ཡིན།
JOH 14:3 ང་རང་གནས་དེར་སོང་ནས་སྡོད་གནས་སྟ་གོན་བྱས་ཚར༌རྗེས། ཕྱིར་ལོག་སྟེ་ཁྱོད་རྣམས་ཀྱང་བདག་དང་ལྷན་དུ་སྡོད་པའི་ཕྱིར་ངའི་གམ་དུ་འདྲེན་པར༌བྱའོ།།
JOH 14:4 ང་རང་གང་དུ་འགྲོ་བའི་ལམ་དེ་ནི་ཁྱོད་རྣམས་ཀྱིས་ཀྱང་ཤེས་པ་ཡིན་ཞེས་གསུངས༌སོ།།
JOH 14:5 དེ་ནས་ཐོ་མཱ་ན༌རེ། གཙོ་བོ༌ལགས། ངེད་རྣམས་ཀྱིས་ཁྱེད་ཉིད་གང་དུ་ཕེབས་པའང་མི་ཤེས་པས་ལམ་དེ་ཇི་ལྟར་ཤེས་སམ་ཞེས་ཞུས་པ༌ན།
JOH 14:6 སྐྱབས་མགོན་ཡེ་ཤུས་འདི་སྐད༌དུ། བདག་ནི་ལམ་དེ་ཉིད་དང༌། བདེན་པ༌ཉིད། ཚེ་སྲོག་ཉིད་བཅས་ཡིན༌ནོ། །ང་རང་མ་བརྒྱུད་པར་མི་སུའང་ཡབ་ཀྱི་དྲུང་དུ་འགྲོ་མི་ཐུབ་བོ།།
JOH 14:7 སྔར་ཁྱོད་རྣམས་ཀྱིས་ང་རང་ངོ་ཤེས་ན་བདག་གི་ཡབ་ཀྱང་ངོ་ཤེས༌པ་དང་། དུས་ད་ནས་བཟུང་ཁྱོད་རྣམས་ཀྱིས་ཁོང་ཉིད་ངོ་ཤེས་པ་དང་མཐོང་བ་ཡིན་ཞེས་གསུངས་སོ།།
JOH 14:8 དེ་ནས་ཕི་ལིབ་ན༌རེ། གཙོ་བོ༌ལགས། ཁྱེད་ཀྱིས་ངེད་རྣམས་ལ་ཡབ་མངོན་པར་མཛོད༌དང༌ངེད་ཅག་ཡིད་ཚིམ་པར་འགྱུར་ཞེས་ཞུས་པ༌ན།
JOH 14:9 ཡང་འདི་སྐད༌དུ། ཕི་ལིབ། ང་རང་ཁྱོད་ཅག་དང་མཉམ་དུ་ཡུན་རིང་པོར་བསྡད༌ཀྱང༌། ཁྱོད་ཀྱིས་ད་དུང་ང་རང་ངོ་མི་ཤེས༌སམ། སུ་ཞིག་གིས་ང་རང་མཐོང་བ་ཡིན་ན་ཡབ་ཀྱང་མཐོང་བ་ཡིན༌པས། ཁྱོད་ཀྱིས་ཅིའི་ཕྱིར་ཡབ་མངོན་པར་མཛོད་ཅེས༌སྨྲའམ།
JOH 14:10 བདག་ནི་ཡབ་ཀྱི་ནང་དུ་གནས་ཤིང་ཡབ་ཀྱང་བདག་གི་ནང་དུ་གནས་པའི་དོན་འདིར་ཁྱོད་རང་ཡིད་མི་ཆེས༌སམ། ངས་རང་ཉིད་ལ་བརྟེན་ནས་གཏམ་འདི་དག་ཁྱོད་རྣམས་ལ་སྨྲས་པ་མ་ཡིན༌ཏེ། བདག་གི་ནང་དུ་གནས་པའི་ཡབ་ཀྱིས་རང་ཉིད་ཀྱི་འཕྲིན་ལས་རྣམས་མཛད༌པ་ལགས།
JOH 14:11 བདག་ནི་ཡབ་ཀྱི་ནང་དུ་གནས་ཤིང་ཡབ་ཀྱང་བདག་གི་ནང་དུ་གནས་ཞེས་སྨྲས་པ་ལ་ཁྱོད་རྣམས་ཀྱིས་ཡིད་ཆེས་བྱོས༌ཤིག གལ་ཏེ་ཁྱོད་རྣམས་དོན་འདིར་ཡིད་མི་ཆེས༌ནའང༌། བདག་གིས་མཛད་པའི་དོན་དེ་རྣམས་ལ་བརྟེན་ནས་བདག་ལ་ཡིད་ཆེས་བྱོས༌དང༌།
JOH 14:12 ཡང་བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། བདག་ལ་དད་མཁན་རྣམས་ཀྱིས་བདག་གིས་མཛད་པ་བཞིན་བྱེད་ཅིང་དེ་ལས་ཆེན་པོའང་བྱེད་པར་འགྱུར༌ཏེ། ང་རང་ནི་དཀོན་མཆོག་གི་དྲུང་དུ་འགྲོ་བའི་ཕྱིར༌ཡིན།
JOH 14:13 ཁྱོད་རྣམས་ཀྱིས་བདག་གི་མིང་ལ་བརྟེན་ནས་དོན་གང་ཞིག་ཞུས་ཀྱང་ངས་དེ་ལྟར་བསྒྲུབ་ངེས༌ཏེ། སྲས་བརྒྱུད་ནས་ཡབ་ཀྱི་གཟི་བརྗིད་མངོན་པར་འགྱུར་བའི་ཕྱིར༌རོ།།
JOH 14:14 དེའི༌ཕྱིར། ཁྱོད་རྣམས་ཀྱིས་བདག་གི་མིང་ལ་བརྟེན་ནས་དོན་གང་ཞིག་ཞུས་ནའང་བདག་གིས་དེ་ལྟར་བསྒྲུབ་པ་ཡིན་ཞེས་གསུངས༌སོ།།
JOH 14:15 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ཁྱོད་རྣམས་ཀྱིས་བདག་གཅེས་པར་འཛིན་ན་བདག་གི་བཀའ་རྣམས་ཀྱང་བསྲུང་བར་འགྱུར།
JOH 14:16 བདག་གིས་ཡབ་ལ་ཞུ་བ་བྱེད་ཅིང་། ཁོང་གིས་ཁྱོད་རྣམས་ལ་སྡོངས་གྲོགས་གཞན་ཞིག་གནང་ཞིང་རྟག་ཏུ་ཁྱོད་རྣམས་དང་མཉམ་དུ་གནས་པར་འགྱུར་རོ།།
JOH 14:17 དེ་ནི་བདེན་པ་ཉིད་ཀྱི་དམ་པའི་ཐུགས་ཉིད་ཡིན༌ལ། འཇིག་རྟེན་གྱི་མི་རྣམས་ཀྱིས་ཁོང་ཉིད་མི་མཐོང་ཞིང་ངོ་མི་ཤེས་པས་དང་དུའང་ལེན་མི་ནུས་སོ།། འོན་ཀྱང་དམ་པའི་ཐུགས་ཉིད་ནི་ཁྱོད་རྣམས་དང་མཉམ་དུ་གནས་ཤིང་ཁྱོད་ཅག་གི་སེམས་སུ་ཡོད་པར་འགྱུར༌བས། ཁྱོད་རྣམས་ཀྱིས་དམ་པའི་ཐུགས་ཉིད་ངོ་ཤེས༌པ་ཡིན།
JOH 14:18 ངས་ཁྱོད་རྣམས་དྭ་ཕྲུག་བཞིན་དུ་མི་བསྐྱུར་བར་ང་རང་ཁྱོད་རྣམས་ཀྱི་གམ་དུ་ཡོང་ངེས༌ཡིན།
JOH 14:19 ཡང་དེ་ནས་ཅང་མ་འགོར་བའི་རྗེས་སུ། འཇིག་རྟེན་གྱི་མི་རྣམས་ཀྱིས་ང་རང་མི་མཐོང་ཡང་ཁྱོད་རྣམས་ཀྱིས་ང་རང་མཐོང་བར༌འགྱུར། ང་རང་གསོན་པོར་གནས་པས་ཁྱོད་རྣམས་ཀྱང་གསོན་པོར་གནས་ཐུབ༌ཅིང་།
JOH 14:20 ཉིན་མོ་དེར་བདག་ནི་ཡབ་ཀྱི་ནང་དུ་གནས་ཤིང་ཁྱོད་རྣམས་བདག་གི་ནང་དུ་གནས་པ༌དང༌། ང་རང་ཡང་ཁྱོད་རྣམས་ཀྱི་ནང་དུ་གནས་པའི་དོན་དེ་ཁྱོད་རྣམས་ཀྱིས་ཤེས་པར་འགྱུར།
JOH 14:21 བདག་གི་བཀའ་ཐོབ་པ་དང་བཀའ་དེ་རྣམས་སྲུང་མཁན་ནི་ང་རང་ལ་བྱམས་ཤིང་གཅེས་མཁན་ཡིན། ང་རང་ལ་གཅེས་མཁན་དེར་བདག་གི་ཡབ་ཀྱིས་ཀྱང་གཅེས༌ཤིང༌། ངས་ཀྱང་མི་དེ་ལ་བྱམས་ཤིང་གཅེས་པ་དང་ང་རང་ཡང་མི་དེ་ལ་མངོན་པར་བྱ་ཞེས་གསུངས༌སོ།།
JOH 14:22 དེ་ནས་ཨི་སི་ཀར་རེའི་ཡུ་དཱ་མ་ཡིན་པར་ཡང་ཡུ་དཱ་ཞེས་འབོད་པའི་ཐུགས་སྲས་གཞན་ཞིག་ཡོད་པ་ན༌རེ། གཙོ་བོ༌ལགས། ཁྱེད་ཀྱིས་རང་ཉིད་ངེད་ཅག་ལ་མངོན་པར་མཛད་ཅིང་འཇིག་རྟེན་གྱི་མི་ཀུན་ལ་མངོན་པར་མི་མཛད་པ་ཅི་ཡིན་ནམ་ཞེས་ཞུས་པ༌ན།
JOH 14:23 སྐྱབས་མགོན་ཡེ་ཤུས་འདི་སྐད༌དུ། གལ་ཏེ་མི་ཞིག་གིས་བདག་གཅེས་པར་འཛིན༌ན། ངའི་བཀའ་ཡང་བསྲུང་ངེས་ཤིང་བདག་གི་ཡབ་ཀྱིས་ཀྱང་དེ་ལ་གཅེས་པ༌དང༌། ངེད་ཅག་ཀྱང་ཁོའི་གམ་དུ་ཡོང་ནས་ཁོ་དང་ལྷན་དུ་གནས་པར་འགྱུར།
JOH 14:24 བདག་གཅེས་པར་མི་འཛིན་པ་དེས་བདག་གི་བཀའ་ཡང་མི་བསྲུང༌ལ། ཁྱོད་ཅག་གིས་ཐོས་པའི་བཀའ་ནི་བདག་གི་བཀའ་མ་ཡིན་པར། ང་རང་མངགས་མཁན་ཏེ་ཡབ་ཀྱི་བཀའ་ཡིན།
JOH 14:25 ང་རང་ཁྱོད་ཅག་དང་མཉམ་དུ་སྡོད་དུས་བདག་གིས་གཏམ་དེ་དག་ཁྱོད་རྣམས་ལ་སྨྲས་ཟིན་ཏོ།།
JOH 14:26 འོན༌ཀྱང༌། སྡོངས་གྲོགས་ཏེ་དམ་པའི་ཐུགས་ཉིད་ནི་ཡབ་ཀྱིས་ངའི་མིང་ལ་བརྟེན་ནས་མངག་ངེས་ཤིང་། ཁོང་གིས་ཁྱོད་རྣམས་ལ་ཡོངས་སུ་བསླབ་ཅིང་ངས་སྨྲས་པ་ཐམས་ཅད་དྲན་སྐུལ་བྱེད་པར་འགྱུར་རོ།།
JOH 14:27 བདག་གིས་ཁྱོད་རྣམས་ཀྱི་སེམས་ལ་ཞི་བདེ་འཐོབ་པར་བྱེད་ཅིང་རང་ཉིད་ཀྱི་ཞི་བདེའང་ཁྱོད་རྣམས་ལ་གནང༌ཞིང་། བདག་གིས་གནང་བའི་ཞི་བདེ་ནི་འཇིག་རྟེན་མི་ཡིས་གནང་བ་དང་མི༌འདྲ། ཁྱོད་ཅག་གི་སེམས་མི་སྐྱོ་མི་འཇིགས་པར༌གྱིས།
JOH 14:28 བདག་གིས་ཁྱོད་རྣམས་ལ་ང་རང་འགྲོ་ཞིང་སླར་ཡང་ཁྱོད་ཅག་གི་གམ་དུ་ཡོང་ངེས་ཡིན་ཞེས་སྨྲས་པ་ཁྱོད་རྣམས་ཀྱིས་ཐོས་མྱོང༌ལ། ཁྱོད་ཅག་གིས་དངོས་གནས་ང་རང་གཅེས་པར་འཛིན༌ན། ང་རང་ཡབ་ཀྱི་དྲུང་དུ་འགྲོ་བ་ལ་ཁྱོད་རྣམས་དགའ་ཡང་འོས༌ཏེ། ཡབ་ནི་ང་རང་ལས་ཀྱང་ཆེན་པོ་ཡིན་པའི་ཕྱིར༌རོ།།
JOH 14:29 ད་ལྟ་དོན་དེ་རྣམས་མ་བྱུང་ཡང་ངས་སྔ་མོ་ནས་ཁྱོད་ཅག་ལ་སྨྲས་པ་ནི། དོན་དེ་རྣམས་འབྱུང་བ་དང་ཁྱོད་ཅག་གིས་ཡིད་ཆེས་བྱེད་པའི་ཕྱིར༌ཡིན།
JOH 14:30 འཇིག་རྟེན་འདིའི་དབང་སྒྱུར་མཁན་སླེབས་ལ་ཉེ༌བས། ཕྱིས་སུ་ངས་ཁྱོད་ཅག་ལ་གཏམ་མང་པོ་གླེང་བར་མི༌བྱའོ།། དབང་སྒྱུར་མཁན་དེར་བདག་ལ་རྒོལ་བའི་ནུས་པ་ཅི་ཡང་མེད།
JOH 14:31 འོན་ཀྱང་ངས་ཡབ་ཀྱི་བཀའ་བཞིན་དུ་སྒྲུབ་པ་ཡིན༌ཏེ། ངས་ཡབ་གཅེས་པར་འཛིན་པ་འཇིག་རྟེན་མི་ཡིས་ཀྱང་ཤེས་དགོས་པའི་ཕྱིར༌ཡིན། ཡར་ལོངས་དང་བདག་ཅག་འགྲོའོ་ཞེས་གསུངས༌སོ།།
JOH 15:1 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། ང་རང་ནི་རྒུན་འབྲུམ་ཤིང་དངོས་ཡིན་ཏེ། བདག་གི་ཡབ་ནི་རྒུན་འབྲུམ་ཤིང་གི་བདག་པོ་ཡིན།
JOH 15:2 ཁོང་གིས་བདག་ལ་འབྲེལ་བའི་ཡལ་ག་ལས་འབྲས་བུ་མི་ཐོགས་པ་ཐམས་ཅད་གཅོད་པར་བྱེད༌ཅིང༌། འབྲས་བུ་ཐོགས་པའི་ཡལ་ག་ལ་འབྲས་བུ་དེ་ལས་ཀྱང་ལྷག་པ་ཞིག་སྨིན་པའི་ཕྱིར་ཡལ་ག་འབྲེག་བཅོས་མཛད་དོ།།
JOH 15:3 ད་ལྟ་བདག་གིས་ཁྱོད་རྣམས་ལ་བཀའ་གསུངས༌པས། ཁྱོད་རྣམས་ཀྱང་གཙང་མར་གྱུར༌པ་ཡིན།
JOH 15:4 ཁྱོད་རྣམས་བདག་གི་ནང་དུ་གནས་པར་གྱིས། ང་རང་ཡང་ཁྱོད་ཅག་གི་ནང་དུ་གནས་པར༌བྱའོ།། ཡལ་ག་གང་ཞིག་རྒུན་འབྲུམ་ཤིང་གི་སྟེང་དུ་མ་གནས་ན་རང་ཉིད་ལ་འབྲས་བུ་མི་ཐོགས་པ༌ལྟར། ཁྱོད་རྣམས་ཀྱང་བདག་གི་ནང་དུ་མི་གནས་ན་ཁྱོད་ཅག་ལའང་འབྲས་བུ་མི་འབྱུང་ངོ༌།།
JOH 15:5 ང་རང་ནི་རྒུན་འབྲུམ་ཤིང་ཡིན་ཞིང་ཁྱོད་ཅག་ནི་ཡལ་ག༌སྟེ། སུ་ཞིག་ངའི་ནང་དུ་གནས་ཤིང་ང་རང་ཡང་ཁོའི་ནང་དུ་གནས་ན་མི་དེ་ལ་འབྲས་བུ་མང་པོ་འབྱུང༌བ་ཡིན། གལ་ཏེ་ང་རང་དང་ཁ་བྲལ་ན་ཁྱོད་རྣམས་ཀྱིས་ཅི་ཡང་བྱ་མི་ནུས་སོ།།
JOH 15:6 ངའི་ནང་དུ་མི་གནས་པ་དེ་ཕྱི་རུ་འཕངས་པའི་ཡལ་ག་བཞིན་དུ་བསྐམ་པར་འགྱུར་བ་དང༌། མི་ཡིས་བཏུས་ནས་མེ་ལ་བསྲེག་པར་འགྱུར།
JOH 15:7 གལ་ཏེ་ཁྱོད་རྣམས་ངའི་ནང་དུ་གནས་ཤིང་ང་ཡི་བཀའ་ཡང་ཁྱོད་ཅག་གི་ནང་དུ་གནས༌ན། ཁྱོད་རྣམས་ཀྱིས་གང་ཞིག་ཞུས་དང་འགྲུབ་པར་འགྱུར་རོ།།
JOH 15:8 ཁྱོད་ཅག་ལ་འབྲས་བུ་མང་པོ་འཐོག་ན། ཁྱོད་རྣམས་ཀྱང་བདག་གི་རྗེས་འབྲང་པ་ཡིན་པར་མངོན་ཞིང་། དེའི་སྒོ་ནས་ངའི་ཡབ་ཀྱི་གཟི་བརྗིད་མངོན་པར་འགྱུར།
JOH 15:9 ཡབ་ཀྱིས་བདག་ལ་བྱམས་པ་བཞིན་ངས་ཀྱང་ཁྱོད་རྣམས་ལ་བྱམས༌པ་ཡིན། ཁྱོད་རྣམས་ཀྱང་བདག་གི་བྱམས་པའི་ནང་དུ་གནས་པར༌གྱིས།
JOH 15:10 བདག་གིས་ཡབ་ཀྱི་བཀའ་རྣམས་བསྲུངས་ཤིང་ཁོང་གི་བྱམས་པའི་ནང་དུ་གནས་པ༌བཞིན། ཁྱོད་རྣམས་ཀྱིས་ཀྱང་བདག་གི་བཀའ་རྣམས་བསྲུངས་ན། ཁྱོད་ཅག་བདག་གི་བྱམས་པའི་ནང་དུ་གནས་པར་འགྱུར་རོ།།
JOH 15:11 དེ་ཡང་བདག་གིས་དོན་དེ་རྣམས་ཁྱོད་ཅག་ལ་སྨྲས་པ༌ནི། བདག་གི་དགའ་སྤྲོ་ཁྱོད་ཅག་གི་སེམས་ནང་དུ་གནས་ཤིང་ཁྱོད་རྣམས་ལའང་དགའ་སྤྲོས་ཁེངས་པའི་ཕྱིར༌ཡིན།
JOH 15:12 ངས་ཁྱོད་རྣམས་ལ་བྱམས་ཤིང་གཅེས་པ་ལྟར་ཁྱོད་རྣམས་ཀྱིས་ཀྱང་ཕན་ཚུན་ལ་གཅེས་དགོས་པ་ནི་བདག་གི་བཀའ་ཡིན༌ཏེ།
JOH 15:13 མཛའ་གྲོགས་ཀྱི་དོན་དུ་རང་སྲོག་བློས་གཏོང་བ་དེ་ལས་ལྷག་པའི་བྱམས་པ་ཞིག་མེད།
JOH 15:14 གལ་ཏེ་ཁྱོད་རྣམས་ཀྱིས་བདག་གི་བཀའ་ལྟར་བསྒྲུབས༌ན། ཁྱོད་རྣམས་ཀྱང་བདག་གི་མཛའ་གྲོགས་ཡིན།
JOH 15:15 ད་ནས༌བཟུང༌། ངས་ཁྱོད་རྣམས་ལ་ཞབས་ཕྱི་བྱེད་མཁན་ཞེས་མི་ཟེར། རྒྱུ་མཚན་ནི་ཞབས་ཕྱི་བྱེད་པ་རྣམས་ཀྱིས་རང་གི་བདག་པོས་ཅི་བྱེད་པ་མི་ཤེས་པའི་ཕྱིར༌ཡིན། འོན་ཀྱང་ངས་རང་གི་ཡབ་ཀྱི་དྲུང་ནས་གང་ཞིག་ཐོས་པ་ཐམས་ཅད་ཁྱོད་རྣམས་ལ་སྨྲས༌པས། བདག་གིས་ཀྱང་ཁྱོད་རྣམས་ལ་མཛའ་གྲོགས་ཞེས་ཟེར་རོ།།
JOH 15:16 ཁྱོད་རྣམས་ཀྱིས་ང་རང་བདམས་པ་མ་ཡིན༌པར། ཁྱོད་རྣམས་སོང་ནས་འབྲས་བུ་སྨིན་པར་བྱེད་པ་དང་འབྲས་བུ་དེ་རྟག་ཏུ་གནས་པའི༌ཕྱིར། བདག་གིས་ཁྱོད་རྣམས་བདམས་ཤིང་བསྐོས༌སོ།། དེ་ནི་བདག་གི་མིང་ལ་བརྟེན་ནས་ཡབ་ལ་གང་ཞིག་ཞུས༌ན། ཁོང་གིས་ཁྱོད་རྣམས་ལ་དེ་གནང་བར་འགྱུར་བའི་ཕྱིར་ཡིན།
JOH 15:17 ཁྱོད་རྣམས་ཀྱིས་ཕན་ཚུན་ལ་བྱམས་ཤིང་གཅེས་དགོས་པ་འདི༌ནི་བདག་གིས་གནང་བའི་བཀའ་ཡིན་ཞེས་གསུངས༌སོ།།
JOH 15:18 ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་འཇིག་རྟེན་གྱི་མི་རྣམས་ཁྱོད་ཅག་ལ་སྡང་བ་ཡིན༌ན། ཁྱོད་རྣམས་ལ་མ་སྡང་བའི་སྔོན་དུ་ང་རང་ལ་སྡང་བ་ཁྱོད་རྣམས་ཀྱིས་ཤེས་དགོས།
JOH 15:19 གལ་ཏེ་ཁྱོད་རྣམས་འཇིག་རྟེན་ལ་གཏོགས་པ་ཡིན༌ན། འཇིག་རྟེན་གྱི་མི་རྣམས་ཀྱིས་རང་ལ་གཏོགས་པ་བཞིན་ཁྱོད་ཅག་ལ་བྱམས་ཤིང་བརྩེ་བ་ཡིན༌མོད། འོན་ཀྱང་ཁྱོད་རྣམས་འཇིག་རྟེན་ལ་མི་གཏོགས་ཤིང་། ངས་འཇིག་རྟེན་འདི་ལས་ཁྱོད་རྣམས་བདམས་པ་ཡིན་པས་འཇིག་རྟེན་གྱི་མི་རྣམས་ཁྱོད་ཅག་ལ་སྡང༌བ་ཡིན།
JOH 15:20 བདག་གིས་དེ་སྔར་ཁྱོད་རྣམས་ལ་གཡོག་པོ་ནི་བདག་པོ་ལས་ཆེན་པོ་ཡིན་མི་སྲིད་ཅེས་སྨྲས་པ་དེ་དྲན་པར༌གྱིས། འཇིག་རྟེན་གྱི་མི་རྣམས་ཀྱིས་བདག་ལ་གནོད་འཚེ་བྱས་ན། ཁྱོད་རྣམས་ལའང་གནོད་འཚེ་བྱེད་པར་འགྱུར་བ༌དང༌། དེ་དག་གིས་ངའི་བཀའ་བསྲུངས་ཡོད་ན། ཁྱོད་ཅག་གི་བཀའ་ཡང་བསྲུང་བར་འགྱུར་རོ།།
JOH 15:21 འོན་ཀྱང་འཇིག་རྟེན་གྱི་མི་རྣམས་ཀྱིས་ངའི་མིང་གི་རྐྱེན་གྱིས་ཁྱོད་ཅག་ལ་དོན་དེ་ཐམས་ཅད་བྱེད་པར་འགྱུར་རོ།། རྒྱུ་མཚན་ནི་མི་དེ་རྣམས་ཀྱིས་ང་རང་མངགས་མཁན་ངོ་མི་ཤེས་པའི་ཕྱིར༌ཡིན།
JOH 15:22 གལ་ཏེ་ང་རང་ཡོང་ནས་མི་དེ་རྣམས་ལ་ཆོས་མ་བཤད་ན་ཁོ་རྣམས་ལ་སྡིག་པ་མེད༌མོད། འོན་ཀྱང་ད་ལྟ་མི་དེ་རྣམས་ཀྱི་སྡིག་པ་གཞན་ལ་སྙད་འདོགས་ཐབས་མེད།
JOH 15:23 ང་རང་ལ་སྡང་མཁན་ནི་བདག་གི་ཡབ་ལའང་སྡང་བ་ཡིན།
JOH 15:24 གལ་ཏེ་ངས་མི་གཞན་སུས་ཀྱང་བྱས་མ་མྱོང་བའི་དོན་རྣམས་ཁོ་རྣམས་ཀྱི་ཁྲོད་དུ་མ་བྱས་ན། དེ་རྣམས་ལའང་སྡིག་པ་མེད་དོ།། འོན་ཀྱང་ཁོ་རྣམས་ཀྱིས་དོན་དེ་རྣམས་མཐོང་མྱོང་ཡང་བདག་དང་བདག་གི་ཡབ་ལ་སྡང་བ་ཡིན།
JOH 15:25 དོན་དེ་ནི་ཁོ་ཚོའི་བཀའ་ཁྲིམས་ཀྱི་མདོ་ལས་ཇི་སྐད༌དུ། ཁོ་རྣམས་དོན་མེད་བདག་ལ་སྡང་ཞེས་པ་དེ་ཉིད་འགྲུབ་པའི་ཕྱིར་དེ་ལྟར་བྱུང་བ་ཡིན༌ནོ།།
JOH 15:26 དེ་ཡང་བདག་གིས་ཡབ་ནས་བྱུང་བའི་སྡོངས་གྲོགས་ཏེ། བདེན་པ་ཉིད་ཀྱི་དམ་པའི་ཐུགས་ཉིད་ནི་ཡབ་ཀྱི་དྲུང་ནས་ཁྱོད་ཅག་ལ་མངགས་ཤིང་བྱོན༌ཚེ། ཁོང་གིས་བདག་ལ་བདེན་དཔང་མཛད་པར་འགྱུར།
JOH 15:27 ཁྱོད་རྣམས་ཀྱིས་ཀྱང་བདག་ལ་བདེན་དཔང་བྱེད་པར་འགྱུར་རོ།། ཅིའི་ཕྱིར་ཞེ་ན་ཐོག་མ་ནས་ཁྱོད་རྣམས་བདག་དང་ལྷན་དུ་འགྲོགས་པའི་ཕྱིར་ཡིན་ཞེས་གསུངས༌སོ།།
JOH 16:1 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་དོན་འདི་དག་ཁྱོད་རྣམས་ལ་སྨྲས་པ་ནི་ཁྱོད་ཅག་གི་དད་པ་མི་ལོག་པའི་ཕྱིར༌ཡིན།
JOH 16:2 མི་རྣམས་ཀྱིས་ཁྱོད་ཅག་ཆོས་ཁང་ནས་ཕྱིར་འཕུད་པར་མ་ཟད། ཁྱོད་ཅག་གསོད་མཁན་རྣམས་ཀྱིས་དེ་ནི་དཀོན་མཆོག་ལ་བསྙེན་བཀུར་བྱེད་པ་ཡིན་སྙམ་པའི་དུས་ཤིག་སླེབ་པར་འགྱུར་རོ།།
JOH 16:3 དེ་རྣམས་ཀྱིས་དེ་ལྟར་བྱེད་པ་ནི་ཡབ་ངོ་མི་ཤེས༌ཤིང༌། ང་རང་ཡང་ངོ་མི་ཤེས་པའི་ཕྱིར༌ཡིན།
JOH 16:4 འོན༌ཀྱང༌། ངས་དོན་འདི་དག་ཁྱོད་ཅག་ལ་སྨྲ་བ་ནི་དུས་དེ་སླེབས་ཚེ། ཁྱོད་ཅག་གིས་ངས་སྨྲས་པ་རྣམས་དྲན་པའི་ཕྱིར༌ཡིན་ཞིང་། ངེད་རྣམས་མཉམ་དུ་འགྲོགས་ཡོད་པས་ངས་དོན་འདི་དག་སྔར་ཁྱོད་ཅག་ལ་མ་སྨྲས་པ་ཡིན།
JOH 16:5 ད་ལྟ་བདག་ནི་ང་རང་མངགས་མཁན་གྱི་དྲུང་དུ༌འགྲོ་ཞིང་། ཁྱོད་རྣམས་ལས་སུས་ཀྱང་ཁྱེད་རང་གང་དུ་འགྲོའམ་ཞེས་མི༌འདྲིའོ།།
JOH 16:6 ངས་དོན་འདི་དག་སྨྲས་པས་ཁྱོད་ཅག་གི་སེམས་སུ་སྐྱོ་སྡུག་གིས་ཁེངས༌པ་རེད།
JOH 16:7 འོན༌ཀྱང༌། ངས་ཁྱོད་ཅག་ལ་བདེན་པར་སྨྲ༌སྟེ། ང་རང་འགྲོ་བ་ནི་ཁྱོད་རྣམས་ལ་ཕན༌པ་ཡིན། ང་རང་མ་སོང་ན་སྡོངས་གྲོགས་དེ་ཁྱོད་ཅག་གི་གམ་དུ་ཕེབས་མི་སྲིད༌ཅིང༌། ང་རང་སོང་ན་ངས་ཁོང་ཉིད་ཁྱོད་ཅག་གི་གམ་དུ་མངག་པར༌བྱའོ།།
JOH 16:8 ཕྱིས་སུ་དམ་པའི་ཐུགས་ཉིད་ཕེབས་ཏེ། འཇིག་རྟེན་གྱི་མི་རྣམས་ལ་སྡིག་པ༌དང༌། དྲང༌བདེན། ཉེས་ཆད་གཅོད་པ་བཅས་ཀྱི་ཕྱོགས་ནས་མི་ལ་ཉེས་སྐྱོན་ཡོད་པ་སྟོན་པར་འགྱུར་རོ།།
JOH 16:9 དེས་ན་སྡིག་པའི་ཐད་ནས་མི་དེ་རྣམས་བདག་ལ་དད་པ་མེད་པའི་ཕྱིར༌དང༌།
JOH 16:10 དྲང་བདེན་གྱི་ཐད་ནས་ང་རང་ཡབ་ཀྱི་དྲུང་དུ་འགྲོ་བས་ཕྱིས་སུ་ཁྱོད་ཅག་གིས་ང་རང་མི་མཐོང་བའི་ཕྱིར༌དང༌།
JOH 16:11 ཉེས་ཆད་གཅོད་པའི་ཐད་ནས་འཇིག་རྟེན་འདིའི་དབང་སྒྱུར་མཁན་ལའང་ཉེས་ཆད་བཅད་ཟིན་པས༌སོ།།
JOH 16:12 བདག་ལ་ད་དུང་གཏམ་མང་ཡང་ད་ལྟ་ཁྱོད་ཅག་གི་སེམས་ཀྱིས་མི་བཟོད༌པ་ཡིན།
JOH 16:13 འོན་ཀྱང་བདེན་པ་ཉིད་ཀྱི་དམ་པའི་ཐུགས་ཉིད་ཕེབས༌ཚེ། ཁོང་གིས་ཁྱོད་རྣམས་ལ་བདེན་པ་ཐམས་ཅད་ཤེས་སུ་འཇུག༌ཅིང༌། གང་ཞིག་ཐོས་པ་རྣམས་ཇི་བཞིན་དུ་གསུངས་པ་ལས་རང་འདོད་དུ་མི་གསུང༌ཞིང༌། མ་འོངས་པའི་དོན་རྣམས་ཀྱང་ཁྱོད་ཅག་ལ་གསུང་བར་འགྱུར་རོ།།
JOH 16:14 ཡང་དམ་པའི་ཐུགས་ཉིད་ཀྱིས་བདག་ལ་གཟི་བརྗིད་སྩོལ་ངེས༌ཏེ། ཁོང་གིས་བདག་གི་ཡིན་པ་གང་ཞིག་བླངས་ནས་ཁྱོད་རྣམས་ལ་མངོན་པར་འགྱུར་བས༌སོ།།
JOH 16:15 དེའི༌ཕྱིར། ཡབ་ལ་གང་ཞིག་ལྡན་པ་ཐམས་ཅད་བདག་ལའང་དབང༌བས། དམ་པའི་ཐུགས་ཉིད་ཀྱིས་བདག་གི་ཡིན་པ་གང་ཞིག་བླངས་ནས་ཁྱོད་རྣམས་ལ་གསུང་བར་འགྱུར་ཞེས་བདག་གིས་སྨྲས་པ་ཡིན།
JOH 16:16 ད་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་མི་འགྱུར༌ཞིང༌། ཡང་དེ་ནས་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་འགྱུར་ཞེས་གསུངས་སོ།།
JOH 16:17 དེ་ནས་ཐུགས་སྲས་ཁ་ཤས་ཀྱིས་ཕན་ཚུན་ལ་འདི་ལྟར་སྨྲས༌པ། ཁོང་གིས་ད་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་མི་འགྱུར༌ཞིང༌། ཡང་དེ་ནས་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་འགྱུར་ཞེས༌དང༌། ཡང་ཁོང་གིས་ང་རང་ཡབ་ཀྱི་དྲུང་དུ་འགྲོ་བའི་ཕྱིར་ཡིན་ཞེས་གསུངས་པའི་དོན་ཅི་ཡིན་ནམ་ཞེས་སྨྲས༌ཤིང༌།
JOH 16:18 ཡང་ཐུགས་སྲས་རྣམས་ན༌རེ། ཁོང་གིས་ཅང་མི་འགོར་བར་ཞེས་གསུངས་པའི་དོན་ཅི་ཡིན༌ནམ། ཁོང་གིས་ཅི་གསུངས་པ་བདག་ཅག་གིས་མི་ཤེས་ཞེས་སྨྲས་སོ།།
JOH 16:19 དེ་ནས་ཐུགས་སྲས་རྣམས་ཀྱིས་ཁོང་ལ་བཀའ་འདྲི་ཞུ་འདོད་པ་སྐྱབས་མགོན་ཡེ་ཤུས་མཁྱེན་ཏེ་འདི་སྐད༌དུ། ངས་ད་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་མི་འགྱུར༌ཞིང༌། ཡང་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་འགྱུར་ཞེས་སྨྲས་པ་འདིར་ཁྱོད་རྣམས་ཕན་ཚུན་ལ་དྲི་བ་ཡོད༌དམ།
JOH 16:20 ངས་ཁྱོད་ཅག་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ངུ་ཞིང་མྱ་ངན་བྱེད་ནའང་འཇིག་རྟེན་གྱི་མི་རྣམས་དགའ་བར༌འགྱུར། ཁྱོད་ཅག་ལ་སྡུག་བསྔལ་འབྱུང་ཡང་ཁྱོད་རྣམས་ཀྱི་སྡུག་བསྔལ་དེ་དགའ་སྤྲོ་རུ་འགྱུར་ངེས༌ཡིན།
JOH 16:21 བུད་མེད་ཅིག་གིས་ཕྲུ་གུ་བཙའ༌དུས། ཁོ་མོའི་ཕྲུ་གུ་བཙའ་བའི་དུས་དེ་སླེབས་ཚེ་ན་ཟུག་འབྱུང༌ནའང༌། ཕྲུ་གུ་བཙས་རྗེས་མི་ཞིག་འཇིག་རྟེན་དུ་སྐྱེས་པ་ཡིན་པས་ཁོ་མོ་དགའ་སྟེ་ན་ཟུག་མི་དྲན༌ནོ།།
JOH 16:22 ད་ལྟ་ཁྱོད་རྣམས་ལ་སྡུག་བསྔལ་ཡོད་ནའང་བདག་ནི་སླར་ཡང་ཁྱོད་ཅག་དང་འཕྲད་པར་འགྱུར༌ཞིང༌། ཁྱོད་ཅག་གི་སེམས་དགའ་བར་འགྱུར་ལ། ཁྱོད་རྣམས་ཀྱི་དགའ་སྤྲོ་སུས་ཀྱང་འཕྲོག་མི་ནུས།
JOH 16:23 ཉིན་དེ་སླེབས་ཚེ། ཁྱོད་ཅག་གིས་ང་རང་ལ་དོན་ཅི་ཡང་མི༌འདྲི། ངས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ཀྱིས་ངའི་མིང་ལ་བརྟེན་ནས་ཡབ་ལ་གང་ཞིག་ཞུས་ཀྱང་ཁོང་གིས་གནང་བར་འགྱུར་རོ།།
JOH 16:24 སྔོན་ཆད་ཁྱོད་ཅག་གིས་བདག་གི་མིང་ལ་བརྟེན་ནས་ཅི་ཡང་ཞུས་མ་མྱོང༌ལ། ཁྱོད་ཅག་ལ་དགའ་སྤྲོས་ཁེངས་པའི༌ཕྱིར། ད་ལྟ་གསོལ་བ་ཐོབས་དང་འཐོབ་ངེས་སོ།།
JOH 16:25 བདག་གིས་དོན་དེ་རྣམས་དཔེའི་སྒོ་ནས་ཁྱོད་ཅག་ལ་སྨྲས༌ཀྱང༌། ཁྱོད་ཅག་ལ་དཔེའི་སྒོ་ནས་མི་སྨྲ་བའི་དུས་ཤིག་སླེབས་པར་ཉེ་བ༌ན། ངས་ཡབ་ཀྱི་སྐོར་ཁྱོད་ཅག་ལ་གསལ་པོར༌སྨྲ་བར་བྱའོ།།
JOH 16:26 ཉིན་དེ་སླེབས་ཚེ། ཁྱོད་རྣམས་ཀྱིས་ངའི་མིང་ལ་བརྟེན་ནས་གསོལ་བ་འདེབས་པར་འགྱུར། ངས་ཁྱོད་ཅག་གི་དོན་དུ་ཡབ་ལ་ཞུ་བར་བྱ་ཞེས་ཁྱོད་རྣམས་ལ་མི༌སྨྲ་སྟེ།
JOH 16:27 རྒྱུ་མཚན་ནི་ཁྱོད་ཅག་གིས་ང་རང་ལ་བྱམས་ཤིང་གཅེས་པ༌དང༌། ང་རང་ཡབ་ཀྱི་དྲུང་ནས་བྱུང་བ་ལའང་དད་པ་བྱས་པས། ཡབ་ཀྱིས་ཀྱང་ཁྱོད་རྣམས་ལ་བྱམས་ཤིང་གཅེས་པའི་ཕྱིར༌རོ།།
JOH 16:28 ང་རང་ཡབ་ཀྱི་དྲུང་ནས་བྱུང་སྟེ་འཇིག་རྟེན་དུ་ཡོང་བ༌དང༌། ཡང་འཇིག་རྟེན་དང་ཁ་བྲལ་ནས་ཡབ་ཀྱི་དྲུང་དུ་འགྲོ་བ་ཡིན་ཞེས་གསུངས་སོ།།
JOH 16:29 དེ་ནས་ཐུགས་སྲས་རྣམས་ན༌རེ། ལགས༌སོ།། ད་ནི་ཁྱེད་ཀྱིས་དཔེའི་སྒོ་ནས་མ་གསུངས་པར་གསལ་པོར་གསུངས།
JOH 16:30 ད་ལྟ་ངེད་ཅག་གིས་ཁྱེད་ནི་དོན་ཀུན་མཁྱེན་པ་དང་སུས་ཀྱང་ཁྱེད་ལ་བཀའ་འདྲི་ཞུ་མི་དགོས་པ་ཤེས༌པས། ཁྱེད་རང་ནི་དཀོན་མཆོག་གི་དྲུང་ནས་ཕེབས་པ་ཡིན་པར་དད་པ་བྱེད་ཅེས་ཞུས་པ༌ལ།
JOH 16:31 སྐྱབས་མགོན་ཡེ་ཤུས་འདི་སྐད༌དུ། ད་ལྟ་ཁྱོད་རྣམས་ཀྱིས་དད་པ་བྱེད༌དམ།
JOH 16:32 ལྟོས༌དང༌། དུས་ཤིག་སླེབ་ངེས་ཤིང་ད་ལྟ་དངོས་སུ་སླེབས་ཟིན་ཏེ། ཁྱོད་རྣམས་སོ་སོར་གྱེས་ནས་རང་ཡུལ་དུ་འགྲོ་ཞིང་ང་རང་ཁོ་ན་བསྐྱུར་ངེས༌ཡིན། འོན་ཀྱང་ཡབ་ནི་བདག་དང་མཉམ་དུ་བཞུགས་པས་ང་རང་གཅིག་པུ་མ་ཡིན།
JOH 16:33 བདག་གི་ནང་དུ་ཁྱོད་རྣམས་ལ་ཞི་བདེ་འཐོབ་པའི་ཕྱིར། ངས་ཁྱོད་ཅག་ལ་དོན་དེ་རྣམས་སྨྲས༌པ་ཡིན། འཇིག་རྟེན་འདིར་ཁྱོད་རྣམས་ལ་དཀའ་སྡུག་ཡོད་ནའང༌། ང་རང་ནི་འཇིག་རྟེན་ ལས་རྣམ་པར་རྒྱལ་བས་ཁྱོད་ཅག་གི་སེམས་བདེ་བར་གྱིས་ཞེས་གསུངས༌སོ།།
JOH 17:1 སྐྱབས་མགོན་ཡེ་ཤུས་དེ་སྐད་གསུངས་རྗེས་ནམ་མཁའི་ཕྱོགས་སུ་གཟིགས་ཏེ་འདི་སྐད༌དུ། ཡབ་ལགས། ད་ནི་དུས་དེ་སླེབས༌པ་ཡིན། དེ་ཡང་སྲས་ཀྱིས་ཁྱེད་ཀྱི་གཟི་བརྗིད་མངོན་པར་བྱེད༌ཆེད། ཁྱེད་ཀྱིས་སྲས་གཟི་བརྗིད་དང་ལྡན་པར༌མཛོད།
JOH 17:2 ཅིའི་ཕྱིར་ཞེ་ན། ཁྱེད་ཀྱིས་ཤ་ཁྲག་གདོས་བཅས་ཀྱི་མི་ཐམས་ཅད་ལ་དབང་བསྒྱུར་བའི་དབང་ཆ་ནི་སྲས་ལ་གནང་ཞིང་། དེ་ནི་ཁྱེད་ཀྱིས་ཁོ་ལ་གནང་བའི་མི་ཀུན་ལ་ཁོས་མཐའ་མེད་པའི་ཚེ་སྲོག་སྩོལ་བའི་ཕྱིར༌རོ།།
JOH 17:3 དད་ལྡན་རྣམས་ཀྱིས་ཁྱེད་རང་ནི་བདེན་པའི་དཀོན་མཆོག་ཁོ་ན་དང་ཁྱེད་ཀྱིས་མངགས་པའི་ཡེ་ཤུ་མཱ་ཤི་ཀ་གཉིས་ངོ་ཤེས་པ་ནི་མཐའ་མེད་པའི་ཚེ་སྲོག་ཡིན་ནོ།།
JOH 17:4 ཁྱེད་ཀྱིས་བདག་ལ་གནང་བའི་ལས་ཐམས་ཅད་བདག་གིས་བསྒྲུབས་ཟིན་ཏེ། ས་གཞིའི་སྟེང་དུ་ཁྱེད་ཀྱི་གཟི་བརྗིད་ཀྱང་མངོན་པར་བྱས།
JOH 17:5 ཡབ་ལགས། འཇིག་རྟེན་མ་བསྐྲུན་པའི་སྔོན༌ལ། ང་རང་ཁྱེད་དང་ལྷན་དུ་བཞུགས་པའི་དུས་ཀྱི་གཟི་བརྗིད་དེ་ཉིད། ད་ལྟ་ཁྱེད་ཀྱི་དྲུང་དུ་སླར་ཡང་བདག་ལ་གནང་བར་མཛོད་ཅེས་གསུངས༌སོ།།
JOH 17:6 ཡང་ཁོང་གིས་འདི་སྐད༌དུ། ཁྱེད་ཀྱིས་འཇིག་རྟེན་ལས་བདག་ལ་གནང་བའི་མི་རྣམས་ལ་ངས་ཀྱང་ཁྱེད་ཀྱི་མཚན་མངོན་པར་བྱས། དེ་རྣམས་སྔར་ནས་ཁྱེད་ལ་གཏོགས་ཤིང་ཁྱེད་ཀྱིས་བདག་ལ་གནང་བ་དང་དེ་རྣམས་ཀྱིས་ཀྱང་ཁྱེད་ཀྱི་བཀའ་བསྲུངས༌སོ།།
JOH 17:7 ད་ལྟ་དེ་རྣམས་ཀྱིས་ཀྱང་ཁྱེད་ཀྱིས་བདག་ལ་གནང་བ་ཐམས་ཅད་ཁྱེད་རང་ནས་བྱུང་བ་ཤེས་སོ།།
JOH 17:8 རྒྱུ་མཚན་ནི་ཁྱེད་ཀྱིས་བདག་ལ་གནང་བའི་བཀའ་རྣམས་ངས་ཀྱང་ཁོ་རྣམས་ལ་བསྩལ་ཅིང་དེ་དག་གིས་ཀྱང་དང་དུ་བླངས་པ༌དང༌། ཡང་ང་རང་ནི་དངོས་གནས་ཁྱེད་ཀྱི་དྲུང་ནས་ཡོང་བ་ཤེས་པ་དང་། ཁྱེད་ཀྱིས་ང་རང་མངགས་པ་ལའང་དེ་རྣམས་ཡིད་ཆེས༌སོ།།
JOH 17:9 ངས་ད་ལྟ་འཇིག་རྟེན་གྱི་མིའི་དོན་དུ་གསོལ་བ་འདེབས་པ་མ་ཡིན༌པར། ཁྱེད་ཀྱིས་བདག་ལ་གནང་བའི་མི་དེ་རྣམས་ཀྱི་དོན་དུ་གསོལ་བ་འདེབས་པ་ཡིན། རྒྱུ་མཚན་ནི་ཁོ་རྣམས་ཁྱེད་ལ་གཏོགས་པའི་ཕྱིར༌རོ།།
JOH 17:10 ཡང་བདག་གི་ཡིན་པ་ཐམས་ཅད་ཁྱེད་ལ་གཏོགས༌ཤིང༌། ཁྱེད་ལ་གཏོགས་པ་ཐམས་ཅད་བདག་ལའང་གཏོགས༌པ་དང་། དེ་དག་བརྒྱུད་ནས་བདག་གི་གཟི་བརྗིད་མངོན་པར་གྱུར་ཏོ།།
JOH 17:11 ད་ནས་བཟུང་བདག་ནི་ཁྱེད་ཀྱི་དྲུང་དུ་ཡོང་བཞིན་ཡོད་པས་འཇིག་རྟེན་དུ་མི་གནས་ཀྱང་ཁོ་རྣམས་འཇིག་རྟེན་དུ་གནས༌པ་ཡིན། ཡབ་དམ་པ༌ལགས། འུ་གཉིས་ངོ་བོ་གཅིག་ཡིན་པ་བཞིན་ཁོ་རྣམས་ཀྱང་ངོ་བོ་གཅིག་ཏུ་འགྱུར་བའི༌ཕྱིར། ཁྱེད་ཀྱིས་བདག་ལ་གནང་བའི་ཁྱེད་ཀྱི་མཚན་དེའི་ནང་དུ་ཁོ་རྣམས་ཀྱང་བསྲུང་བར༌མཛོད།
JOH 17:12 ང་རང་ཁོ་རྣམས་དང་མཉམ་དུ་ཡོད༌དུས། བདག་གིས་ཀྱང་ཁོ་རྣམས་ནི་ཁྱེད་ཀྱིས་བདག་ལ་གནང་བའི་མཚན་གྱི་ནང་དུ་བསྲུངས་ཤིང་བསྐྱངས༌ཏེ། ཁྱེད་ཀྱི་གསུང་རབ་ཀྱི་མདོ་འགྲུབ་པའི༌ཕྱིར། འཇིག་པའི་བུ་ ལས་གཞན་གཅིག་ཀྱང་འཇིག་པར་མ་གྱུར༌ཏོ།།
JOH 17:13 ང་རང་ད་ལྟ་ཁྱེད་ཀྱི་དྲུང་དུ་ཡོང་ལ་ཉེ་ཡང་ད་དུང་འཇིག་རྟེན་དུ་བསྡད་ནས་འདི་ལྟར་བརྗོད་དོན་ནི་བདག་གི་དགའ་སྤྲོ་དེ་ཁོ་རྣམས་ཀྱི་སེམས་སུ་ཁྱབ་པའི་ཕྱིར༌ཡིན།
JOH 17:14 ངས་ཁྱེད་ཀྱི་བཀའ་ཁོ་རྣམས་ལ་བསྩལ་ཅིང་འཇིག་རྟེན་གྱི་མི་དག་ཁོ་རྣམས་ལ༌སྡང༌། རྒྱུ་མཚན་ནི་ང་རང་འཇིག་རྟེན་ལ་མི་གཏོགས་པ༌བཞིན། ཁོ་རྣམས་ཀྱང་འཇིག་རྟེན་ལ་མི་གཏོགས་པའི་ཕྱིར༌རོ།།
JOH 17:15 ཁོ་རྣམས་འཇིག་རྟེན་ནས་འདྲེན་པའི་ཕྱིར་ངས་ཁྱེད་ལ་གསོལ་བ་མི་འདེབས༌པར། ཁྱེད་ཀྱིས་ཁོ་རྣམས་བདུད་ངན་དེ་ལས་བསྲུང་ཞིང་སྐྱོབ་པའི་ཕྱིར་གསོལ་བ་འདེབས༌པ་ཡིན།
JOH 17:16 ང་རང་འཇིག་རྟེན་ལ་མི་གཏོགས་པ་བཞིན་ཁོ་རྣམས་ཀྱང་འཇིག་རྟེན་ལ་མི་གཏོགས་སོ།།
JOH 17:17 ཁྱེད་ཀྱིས་བདེན་པ་ཉིད་བརྒྱུད་ནས་ཁོ་རྣམས་དམ་པར་མཛོད༌ཅིག ཁྱེད་ཀྱི་བཀའ་ནི་བདེན་པ་ཉིད་ལགས་སོ།།
JOH 17:18 ཁྱེད་ཀྱིས་ང་རང་འཇིག་རྟེན་དུ་ཇི་ལྟར་མངགས་པ༌བཞིན། ངས་ཀྱང་ཁོ་རྣམས་འཇིག་རྟེན་ལ་མངགས༌ཤིང་།
JOH 17:19 ཁོ་རྣམས་ཀྱང་བདེན་པ་ཉིད་ཀྱི་སྒོ་ནས་དམ་པར་འགྱུར་བའི༌ཕྱིར། ངས་ཁོ་རྣམས་ཀྱི་ཆེད་དུ་རང་ཉིད་དམ་པར་བྱ་ཞེས་གསུངས༌སོ།།
JOH 17:20 ཡང་སྐྱབས་མགོན་ཡེ་ཤུས་འདི་སྐད༌དུ། ངས་འདི་རྣམས་ཁོ་ནའི་ཆེད་དུ་གསོལ་བ་མི་འདེབས་པར་ཁོ་རྣམས་ཀྱིས་སྤེལ་བའི་ཆོས་ལ་མཉན་ནས་བདག་ལ་དད་པ་བྱེད་མཁན་ཐམས་ཅད་ཀྱི་དོན་དུའང་གསོལ་བ་འདེབས༌པ་ཡིན།
JOH 17:21 འཇིག་རྟེན་གྱི་མི་རྣམས་ཀྱིས་ང་རང་ནི་ཁྱེད་ཀྱིས་མངགས་པ་ཡིན་པར་ཡིད་ཆེས་པའི༌ཕྱིར། ཡབ་ལགས། ཁྱེད་རང་ནི་ངའི་ནང་དུ་གནས་ཤིང་བདག་ཀྱང་ཁྱེད་ཀྱི་ནང་དུ་གནས་པ༌བཞིན། དད་པ་དང་ལྡན་པ་ཐམས་ཅད་ངོ་བོ་གཅིག་ཏུ་འགྱུར་བ་དང་དེ་རྣམས་ཀྱང་འུ་གཉིས་ཀྱི་ནང་དུ་གནས་པར༌ཞུའོ།།
JOH 17:22 འུ་གཉིས་ངོ་བོ་གཅིག་ཡིན་པ་ལྟར་དད་ལྡན་རྣམས་ཀྱང་ངོ་བོ་གཅིག་ཏུ་འགྱུར་བའི༌ཕྱིར། ཁྱེད་ཀྱིས་བདག་ལ་གནང་བའི་གཟི་བརྗིད་དེ་ངས་ཀྱང་ཁོ་རྣམས་ལ་བསྩལ་ཟིན༌པ་ཡིན།
JOH 17:23 ང་རང་ནི་ཡབ་ཁྱེད་ཀྱིས་མངགས་པ་དང་ཁྱེད་ཀྱིས་བདག་ལ་གཅེས་པ་བཞིན། དད་ལྡན་རྣམས་ལའང་བྱམས་ཤིང་གཅེས་པ་དེ་འཇིག་རྟེན་གྱི་མི་རྣམས་ལ་ཤེས་སུ་འཇུག༌པའི་ཕྱིར། བདག་ནི་དད་ལྡན་རྣམས་ཀྱི་ནང་དུ་གནས་ཤིང་ཡབ་ཁྱེད་རང་ཡང་བདག་གི་ནང་དུ་གནས་པ་བཞིན། དད་ལྡན་རྣམས་ཀྱང་དངོས་གནས་ངོ་བོ་གཅིག་ཏུ་འགྱུར་བར༌ཞུའོ།།
JOH 17:24 ཡབ་ལགས། ཁྱེད་ཀྱིས་འཇིག་རྟེན་མ་བསྐྲུན་སྔོན་དུ་བདག་ལ་བྱམས་ཤིང་གཅེས༌པས། ཁྱེད་ཀྱིས་བདག་ལ་གནང་བའི་གཟི་བརྗིད་དེ་དད་ལྡན་རྣམས་ཀྱིས་མཐོང་བའི༌ཕྱིར། ང་རང་གནས་གང་དུ་ཡོད་ན་ཁྱེད་ཀྱིས་བདག་ལ་གནང་བའི་དད་ལྡན་རྣམས་ཀྱང་བདག་དང་ལྷན་དུ་ཡོད་པར༌མཛོད།
JOH 17:25 ཀྱེ། དྲང་བདེན་གྱི་ཡབ་ལགས། འཇིག་རྟེན་གྱི་མི་རྣམས་ཀྱིས་ཁྱེད་རང་ངོ་མི་ཤེས་ནའང་ངས་ཁྱེད་རང་ངོ་ཤེས༌ཏེ། དད་ལྡན་རྣམས་ཀྱིས་ང་རང་ནི་ཁྱེད་ཀྱིས་མངགས་པའང་ཤེས་སོ།།
JOH 17:26 ཁྱེད་ཀྱིས་བདག་ལ་བྱམས་ཤིང་གཅེས་པ་དེ་དད་ལྡན་རྣམས་ཀྱི་སེམས་སུ་གནས་པ༌དང༌། ང་རང་ནི་ཁོ་རྣམས་ཀྱི་ནང་དུ་གནས་པའི༌ཕྱིར་དུ། བདག་གིས་དད་ལྡན་རྣམས་ལ་ཁྱེད་ཀྱི་མཚན་མངོན་པར་བྱས་ཤིང་ད་དུང་མངོན་པར་འགྱུར་ཞེས་གསོལ་བ་བཏབ༌བོ།།
JOH 18:1 སྐྱབས་མགོན་ཡེ་ཤུས་དེ་སྐད་གསུངས༌རྗེས། ཐུགས་སྲས་རྣམས་དང་མཉམ་དུ་ཕྱི་རོལ་ཏུ་ཕྱིན༌ཅིང༌། ཀིད་རོན་གྲམ་པ་བརྒལ་ནས་གནས་དེར་ཡོད་པའི་སྐྱེད་ཚལ་ཞིག་ཏུ་ཕེབས༌སོ།།
JOH 18:2 སྐྱབས་མགོན་ཡེ་ཤུ་དང་ཐུགས་སྲས་རྣམས་གནས་དེར་ཐེངས་མང་པོར་ཕེབས་ཏེ་ལྷན་དུ་འདུས་མྱོང༌བས། ཁོང་ཉིད་ལ་ངོ་ལོག་བྱེད་མཁན་ཡུ་དཱས་ཀྱང་གནས་དེ་ཤེས༌པ་རེད།
JOH 18:3 དེ་ནས་ཡུ་དཱས་མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱིས་མངགས་པའི་རོ་མཱ་གོང་མའི་རྒྱལ་ཁབ་ཀྱི་དམག་དཔུང་དང་སྲུང་དམག་འགའ་ཁྲིད༌དེ། ལག་ཏུ་སྒྲོན་མེ༌དང༌དཔལ་འབར། མཚོན་ཆ་བཅས་བཟུང་ནས་གནས་དེར་སླེབས་སོ།།
JOH 18:4 དེ་ནས་སྐྱབས་མགོན་ཡེ་ཤུས་རང་ཉིད་ལ་འབྱུང་ངེས་པའི་དོན་ཐམས་ཅད་མཁྱེན༌ཏེ། མདུན་ཕྱོགས་སུ་ཕེབས་ཤིང་དེ་རྣམས་ལ་འདི་སྐད༌དུ། ཁྱོད་རྣམས་ཀྱིས་སུ་ཞིག་འཚོལ་བ་ཡིན་ཞེས་གསུངས་པ༌ན།
JOH 18:5 དེ་དག་ན༌རེ། ནཱ་ཙ་རེལ་པ་ཡེ་ཤུ་འཚོལ་བ་ཡིན་ཞེས་སྨྲས་པ༌ན། སྐྱབས་མགོན་ཡེ་ཤུས་དེ་ནི་ང་རང་ཡིན་ཞེས་གསུངས་སོ།། ཁོང་ལ་ངོ་ལོག་བྱེད་མཁན་ཡུ་དཱའང་དེ་དག་དང་མཉམ་དུ་ལངས་ནས་བསྡད་ཡོད༌པ་རེད།
JOH 18:6 སྐྱབས་མགོན་ཡེ་ཤུས་དེ་ནི་ང་རང་ཡིན་ཞེས་གསུངས་མ་ཐག་དེ་རྣམས་ཕྱི་ནུར་སྟེག་བཞིན་ས་རུ་འགྱེལ་ཏོ།།
JOH 18:7 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་སུ་ཞིག་འཚོལ་བ་ཡིན་ནམ་ཞེས་གསུངས་པ༌ལ། ཡང་དེ་རྣམས་ན༌རེ། ནཱ་ཙ་རེལ་པ་ཡེ་ཤུ་འཚོལ་བ་ཡིན་ཞེས་སྨྲས་སོ།།
JOH 18:8 ཡང་སྐྱབས་མགོན་ཡེ་ཤུས་འདི་སྐད༌དུ། ངས་དེ་ནི་ང་རང་ཡིན་ཞེས་སྨྲས་ཟིན། ཁྱོད་ཅག་གིས་ང་རང་འཚོལ་བ་ཡིན་ན་འདི་རྣམས་འགྲོ་རུ་ཆུག་ཅེས་གསུངས་སོ།།
JOH 18:9 དེ་ནི་ཁྱེད་ཀྱིས་བདག་ལ་གནང་བ་ལས་ངས་གཅིག་ཀྱང་མ་སྟོར་ཞེས་སྐྱབས་མགོན་ཡེ་ཤུས་གསུངས་མྱོང་བ་དེ་བཞིན་འགྲུབ་པའི་ཕྱིར༌ཡིན།
JOH 18:10 དེ་ནས་སི་མོན་པེ་ཏྲོས་རལ་གྲི་ཞིག་ཡོད་པ་ཕྱུང༌སྟེ། མཆོད་དཔོན་ཆེན་པོའི་གཡོག་པོར་བརྒྱབ་ནས་རྣ་བ་གཡས་པ་བཅད་ཅིང་། གཡོག་པོ་དེའི་མིང་ལ་མཱལ་ཀུ་ཟེར།
JOH 18:11 དེ་ནས་སྐྱབས་མགོན་ཡེ་ཤུས་པེ་ཏྲོ་ལ་འདི་སྐད༌དུ། རལ་གྲི་ཤུབས་སུ་ཆུག་དང༌། ཡབ་ཀྱིས་བདག་ལ་གནང་བའི་ཕོར་བ་ ནི་བདག་གིས་མི་འཐུང་ཅི་སྟེ་འཐུང་དགོས་ཞེས་གསུངས་སོ།།
JOH 18:12 དེ་ནས་རོ་མཱ་གོང་མའི་རྒྱལ་ཁབ་ཀྱི་དམག་དཔུང༌དང༌དམག༌དཔོན། ཡ་ཧུ་དཱ་པའི་སྲུང་དམག་རྣམས་ཀྱིས་སྐྱབས་མགོན་ཡེ་ཤུ་འཛིན་བཟུང་བྱས་ཏེ་བཀྱིགས་པ༌དང༌།
JOH 18:13 ཐོག་མར་ཨ་ནཱ་སིའི་དྲུང་དུ་ཁྲིད་དོ།། རྒྱུ་མཚན་ཨ་ནཱ་སི་ནི་ལོ་དེར་མཆོད་དཔོན་ཆེན་པོའི་འགན་འཁུར་བའི་ཀ་ཡ་ཕཱའི་གྱོས་པོ་ཡིན་པའི་ཕྱིར༌ཡིན།
JOH 18:14 ཀ་ཡ་ཕཱ་ནི་སྔོན་ཆད་ཡ་ཧུ་དཱ་པ་རྣམས་ལ་མི་རྣམས་ཀྱི་ཆེད་དུ་མི་གཅིག་འཆི་བར་འགྱུར་བ་དེ་ལེགས་ཞེས་བགྲོ་གླེང་བྱེད་མཁན་དེ་ཡིན༌ནོ།།
JOH 18:15 སི་མོན་པེ་ཏྲོ་དང་ཐུགས་སྲས་གཞན་ཞིག་ཀྱང་སྐྱབས་མགོན་ཡེ་ཤུའི་རྗེས་སུ་འབྲངས་པ༌དང༌། ཐུགས་སྲས་གཞན་དེ་ཉིད་མཆོད་དཔོན་ཆེན་པོ་དང་ཕན་ཚུན་ངོ་ཤེས༌པས། ཁོ་རང་སྐྱབས་མགོན་ཡེ་ཤུ་དང་ལྷན་དུ་མཆོད་དཔོན་ཆེན་པོའི་ར་སྐོར་ནང་དུ་ཕྱིན་ཏོ།།
JOH 18:16 འོན་ཀྱང་པེ་ཏྲོ་སྒོའི་ཕྱི་རོལ་ཏུ་ལངས་ནས་བསྡད། དེ་ནས་མཆོད་དཔོན་ཆེན་པོ་ངོ་ཤེས་པའི་ཐུགས་སྲས་དེ་ཕྱིར་ཡོང༌སྟེ། སྒོ་སྲུང་གཡོག་མོ་ལ་ཚིག་འགའ་སྨྲས་རྗེས་པེ་ཏྲོའང་ནང་དུ་ཁྲིད།
JOH 18:17 དེ་ནས་སྒོ་སྲུང་གཡོག་མོ་དེས་པེ་ཏྲོ༌ལ། ཁྱོད་ཀྱང་མི་དེའི་ཐུགས་སྲས་མ་ཡིན་ནམ་ཞེས་སྨྲས་པ༌ན། ཁོས་ང་རང་མིན་ཞེས་སྨྲས་སོ།།
JOH 18:18 ཉིན་དེར་ནམ་ཟླ་འཁྱགས་པས་གཡོག་པོ་དང་སྲུང་དམག་རྣམས་ཀྱིས་སོལ་བའི་མེ་སྦར་ཏེ་གནས་དེར་ལངས་ནས་མེར་ལྡེ་བ༌ལ། པེ་ཏྲོ་ཡང་དེ་དག་དང་མཉམ་དུ་མེར་ལྡེས༌སོ།།
JOH 18:19 དེ་ནས་མཆོད་དཔོན་ཆེན་པོས་སྐྱབས་མགོན་ཡེ་ཤུ་ལ་རང་ཉིད་ཀྱི་ཐུགས་སྲས་དང་ཁོང་གིས་ཆོས་གསུངས་པའི་སྐོར་ནས་འདྲི་རྩད་བྱས་པ༌ན།
JOH 18:20 སྐྱབས་མགོན་ཡེ་ཤུས་འདི་སྐད༌དུ། ངས་མངོན་སུམ་དུ་འཇིག་རྟེན་གྱི་མི་རྣམས་ལ་ཆོས་བཤད་པ་ཡིན༌ཏེ། རྟག་ཏུ་ཡ་ཧུ་དཱ་པ་རྣམས་འཛོམས་སའི་ཆོས་ཁང་དང་མཆོད་ཁང་ནས་མི་རྣམས་ལ་ཆོས་བཤད་པ༌ཡིན། གསང་བའི་ངང་ནས་ཅི་ཡང་མ་སྨྲས།
JOH 18:21 ཅིའི་ཕྱིར་བདག་ལ༌འདྲིའམ། བདག་གི་གཏམ་ཐོས་པའི་མི་རྣམས་ཀྱིས་ངས་ཅི་ཞིག་སྨྲས་པ་ཤེས་པས་དེ་དག་ལ་དྲིས་ཤིག་ཅེས་གསུངས་སོ།།
JOH 18:22 ཁོང་གིས་དེ་སྐད་གསུངས་པ༌ལ། ཉེ་འགྲམ་དུ་ལངས་ནས་སྡོད་པའི་སྲུང་དམག་ཅིག་གིས་ཁོང་ལ་འགྲམ་ལྕག་གཞུས་ཏེ་ན༌རེ། ཁྱོད་ཀྱིས་མཆོད་དཔོན་ཆེན་པོར་འདི་ལྟར་ལན་སློག་གམ་ཞེས་སྨྲས་སོ།།
JOH 18:23 དེ་ནས་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ངས་མི་འོས་པའི་གཏམ་སྨྲས་ཡོད་ན་མི་འོས་པ་དེ་སྟོན༌ཅིག གལ་ཏེ་ངས་སྨྲས་པ་དེ་བདེན་པ་ཡིན་ན་ཁྱོད་ཀྱིས་ཅིའི་ཕྱིར་བདག་ལ་རྡུང་རྡེག་བྱེད་དམ་ཞེས་གསུངས་སོ།།
JOH 18:24 དེ་ནས་ཨ་ནཱ་སི་ཡིས་སྐྱབས་མགོན་ཡེ་ཤུ་སྔར་བཞིན་བཀྱིགས༌ཏེ། མཆོད་དཔོན་ཆེན་པོ་ཀ་ཡ་ཕཱའི་མདུན་ལ་ཁྲིད་དུ་བཅུག༌གོ།
JOH 18:25 སི་མོན་པེ་ཏྲོ་ལངས་ནས་མེར་ལྡེ་བཞིན་པའི་དུས༌སུ། མི་དེ་རྣམས་ན༌རེ། ཁྱོད་རང་ཡང་ཁོང་གི་ཐུགས་སྲས་མ་ཡིན་ནམ་ཞེས་དྲིས་པ༌ན། ཁོས་ང་རང་མིན་ཞེས་ཁས་མ་བླངས༌སོ།།
JOH 18:26 དེ་སྔོན་པེ་ཏྲོས་རྣ་བ་བཅད་ཟིན་པ་དེའི་གཉེན་ཉེ་དང་མཆོད་དཔོན་ཆེན་པོའི་གཡོག་པོ་ཡིན་པ་ཞིག་ན༌རེ། ངས་སྐྱེད་ཚལ་ནང་དུ་ཁྱོད་རང་ཡེ་ཤུ་དང་མཉམ་དུ་ཡོད་པ་མཐོང་བ་མ་ཡིན་ནམ་ཞེས་སྨྲས་པ༌ན།
JOH 18:27 ཡང་པེ་ཏྲོས་ཁས་མ་བླངས༌ཤིང་། དེ་མ་ཐག་བྱ་ཕོའང་གྲགས༌སོ།།
JOH 18:28 ནམ་མ་ལངས་པའི་དུས༌སུ། ཡ་ཧུ་དཱ་པ་རྣམས་ཀྱིས་སྐྱབས་མགོན་ཡེ་ཤུ་མཆོད་དཔོན་ཆེན་པོ་ཀ་ཡ་ཕཱའི་གམ་ནས་སྤྱི་དཔོན་གྱི་ཕོ་བྲང་དུ་ཁྲིད༌ཅིང༌། ཆོས་དཔོན་རྣམས་རང་ཉིད་མི་གཙང་བར་གྱུར༌ན། པེ་སག་གི་དུས་ཆེན་གྱི་ཟས་བཟའ་མི་ཐུབ་པར་དོགས་ཏེ་ཕོ་བྲང་ནང་དུ་མ་སོང༌ངོ་༎
JOH 18:29 དེ་ནས་སྤྱི་དཔོན་པི་ལ་ཏུ་ཕོ་བྲང་ནས་ཐོན་ཏེ་ན༌རེ། ཁྱོད་རྣམས་ཀྱིས་མི་འདི་ཁྲིམས་ལ་གཏུགས་དོན་ཅི་ཞེས་དྲིས་པ༌དང༌།
JOH 18:30 དེ་རྣམས་ན༌རེ། གལ་ཏེ་མི་འདི་ལས་ངན་པ་བྱེད་མཁན་ཞིག་མིན་ན་ངེད་ཅག་གིས་ཁྱེད་རང་ལ་སྤྲོད་མི་སྲིད་ཅེས་སྨྲས་སོ།།
JOH 18:31 དེ་ནས་པི་ལ་ཏུ་ན༌རེ། ཁྱོད་རྣམས་ཀྱིས་ཁོ་རང་ཕྱིར་ཁྲིད་དེ་ཁྱོད་ཅག་གི་ཆོས་ཁྲིམས་བཞིན་དུ་ཁྲིམས་ཐག་ཆོད་ཅིག་ཅེས་སྨྲས་པ༌ལ། ཡ་ཧུ་དཱ་པ་རྣམས་ན༌རེ། ངེད་ཅག་ལ་ཁྲིམས་ཐག་བཅད་ནས་མི་གསོད་པའི་དབང་ཆ་མེད་ཅེས་སྨྲས་སོ།།
JOH 18:32 དེ་ནི་སྔར་སྐྱབས་མགོན་ཡེ་ཤུས་རང་ཉིད་ཇི་ལྟར་སྐུ་གཤེགས་དགོས་པའི་སྐོར་ལུང་བསྟན་པ་བཞིན་དུ་འགྲུབ་པའི་ཕྱིར་བྱུང་བ་ཡིན།
JOH 18:33 དེ་ནས་པི་ལ་ཏུ་སླར་ཡང་ཕོ་བྲང་གི་ནང་དུ་སོང༌སྟེ། སྐྱབས་མགོན་ཡེ་ཤུའང་ཕོ་བྲང་ནང་དུ་འཁྲིད་པའི་བཀའ་གནང་ཞིང་ཁྱོད་རང་ཡ་ཧུ་དཱ་པའི་རྒྱལ་པོ་ཡིན་ནམ་ཞེས་དྲིས་པ༌ལ།
JOH 18:34 སྐྱབས་མགོན་ཡེ་ཤུས་འདི་སྐད༌དུ། འདི་ནི་ཁྱོད་རང་གིས་བཤད་པ་ཡིན༌ནམ། ཡང་ན་མི་གཞན་གྱིས་བདག་གི་སྐོར་ཁྱོད་ལ་སྨྲས་པ་ཡིན་ཞེས་གསུངས་པ༌ན།
JOH 18:35 ཡང་པི་ལ་ཏུ་ན༌རེ། ང་རང་ནི་ཡ་ཧུ་དཱ་པ་ཞིག་ག་ལ༌ཡིན། ཁྱོད་ཀྱི་ཡུལ་མི་དང་མཆོད་དཔོན་ཆེན་པོ་རྣམས་ཀྱིས་ཁྱོད་རང་བདག་ལ་སྤྲད༌པ་ཡིན། ཁྱོད་ཀྱིས་ཉེས་པ་ཅི་བྱས་སམ་ཞེས་སྨྲས་སོ།།
JOH 18:36 ཡང་སྐྱབས་མགོན་ཡེ་ཤུས་འདི་སྐད༌དུ། བདག་གི་རྒྱལ་སྲིད་ནི་འཇིག་རྟེན་འདིར་མི་གཏོགས༌ཏེ། གལ་སྲིད་གཏོགས་ན་ངའི་འཁོར་གཡོག་རྣམས་ཀྱིས་ང་རང་ཡ་ཧུ་དཱ་པ་རྣམས་ཀྱི་ལག་ཏུ་མི་སྤྲོད་པའི་ཆེད་དུ་འཐབ་འཛིང་བྱེད་ངེས༌ཡིན། དོན་དམ་དུ་བདག་གི་རྒྱལ་སྲིད་ནི་གནས་འདི་ལ་མི་གཏོགས་ཞེས་གསུངས་སོ།།
JOH 18:37 དེ་ནས་པི་ལ་ཏུ་ན༌རེ། དེས་ན་ཁྱོད་ནི་རྒྱལ་པོ་ཞིག་ཡིན་ནམ་ཞེས་དྲིས་པ༌ལ། སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་སྨྲས་པ་བཞིན་ང་རང་ནི་རྒྱལ་པོ་ཞིག༌སྟེ། བདེན་པ་ཉིད་ལ་བདེན་དཔང་བྱེད་ཆེད་འཇིག་རྟེན་འདི་རུ་སྐྱེས༌ཤིང༌། དོན་དེའི་ཆེད་དུ་འཇིག་རྟེན་འདི་རུ་ཡོང༌བ་ཡིན། བདེན་པ་ཉིད་ལ་གཏོགས་པའི་མི་རྣམས་ཀྱིས་བདག་གི་གསུང་ལ་ཉན་ཞེས་གསུངས་སོ།།
JOH 18:38 ཡང་པི་ལ་ཏུ་ན༌རེ། བདེན་པ་ཉིད་ནི་ཅི་ཡིན་ནམ་ཞེས་སྨྲས་པ་དང་ཕྱི་རོལ་གྱི་ཡ་ཧུ་དཱ་པ་རྣམས་ཀྱི་གམ་དུ་སོང༌སྟེ། ངས་མི་འདིའི་ཉེས་སྐྱོན་ཅི་ཡང་མ་རྙེད་དོ།།
JOH 18:39 འོན་ཀྱང་པེ་སག་གི་དུས་ཆེན་ལ། ཁྱོད་ཅག་གི་རྒྱུན་སྲོལ་ལྟར་བཙོན་པ་ཞིག་བཙོན་གྲོལ་གཏོང་དགོས༌པས། ཁྱོད་རྣམས་ཀྱིས་ཡ་ཧུ་དཱ་པའི་རྒྱལ་པོ་འདི་ཉིད་བཙོན་གྲོལ་གཏོང་འདོད་དམ་ཞེས་སྨྲས་པ༌ན།
JOH 18:40 དེ་དག་གིས་སྐད་ཆེན༌པོས། མི་འདི་གཏོང་མི༌དགོས། པཱ་རབ་པཱ་གཏོང་བར་མཛོད་ཅེས་ཞུས་སོ།། པཱ་རབ་པཱ་ནི་ཇག་པ་ཞིག་ཡིན༌ནོ།།
JOH 19:1 དེ་ནས་པི་ལ་ཏུས་སྐྱབས་མགོན་ཡེ་ཤུར་རྟ་ལྕག་གིས་གཞུ་དགོས་པའི་བཀའ་གནང་བ༌དང༌།
JOH 19:2 དམག་མི་རྣམས་ཀྱིས་ཚེར་མའི་ཅོད་པན་བསླེས་ཏེ་ཁོང་གི་དབུ་ལ་བསྐོན་ཞིང་ལུས་ལ་ཁ་དོག་རྒྱ་སྨུག་ཡིན་པའི་ན་བཟའ་ཞིག་ཀྱང་བསྐོན་ཏོ།།
JOH 19:3 ཡང་ཁོ་རྣམས་ཁོང་གི་དྲུང་དུ་བཅར༌ཏེ། ཁོང་ལ་ན་རེ། ཡ་ཧུ་དཱ་པའི་རྒྱལ་པོ་ཁྱོད་ལ་རྟེན་འབྲེལ་ཞུའོ་ཞེས་སྨྲས་ཤིང་ཁོང་ལ་འགྲམ་ལྕག་གཞུས་སོ།།
JOH 19:4 དེ་ནས་ཡང་པི་ལ་ཏུ་ཕྱི་རོལ་ཏུ་ཕྱིན་ཏེ་མི་རྣམས་ལ་ན༌རེ། ལྟོས༌དང༌། བདག་གིས་ཁོ་རང་ལ་ཉེས་པ་ཅི་ཡོད་པ་བཙལ་ཀྱང་མི་རྙེད༌པས། ཁྱོད་རྣམས་ཀྱིས་ཀྱང་དོན་དེ་ཤེས་པའི༌ཕྱིར། ཁྱོད་རྣམས་ཀྱི་མདུན་དུ་བདག་གིས་ཁོ་རང་ཕྱི་རུ་འཁྲིད་པ་ཡིན་ཞེས་སྨྲས་སོ།།
JOH 19:5 དེ་ནས་སྐྱབས་མགོན་ཡེ་ཤུས་ཚེར་མའི་ཅོད་པན་དང་ཁ་དོག་རྒྱ་སྨུག་ཡིན་པའི་ན་བཟའ་གསོལ་ནས་ཕྱི་རོལ་ཏུ་ཕེབས་པ༌དང༌། པི་ལ་ཏུས་མི་རྣམས་ལ་མི་འདིར་ལྟོས་ཤིག་ཅེས་སྨྲས་སོ།།
JOH 19:6 དེ་ནས་མཆོད་དཔོན་ཆེན་པོ་དག་དང་སྲུང་དམག་རྣམས་ཀྱིས་སྐྱབས་མགོན་ཡེ་ཤུ་མཐོང་བ་དང་སྐད་ཆེན༌པོས། ཁོ་རང་ཤིང་རྒྱ་གྲམ་གྱི་སྟེང་དུ་རྡོབས་ཤིག ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་སྨྲས་པ༌ན། པི་ལ་ཏུ་ན༌རེ། བདག་གིས་ཁོ་རང་ལ་ཉེས་པ་ཅི་ཡོད་པ་བཙལ་ཀྱང་མ་རྙེད༌པས། ཁྱོད་ཅག་གིས་ཁོ་རང་ཁྲིད་ནས་བརྡབ་པར་བྱའོ་ཞེས་སྨྲས༌པ་རེད།
JOH 19:7 ཡང་ཡ་ཧུ་དཱ་པ་རྣམས་ན༌རེ། ཁོས་རང་ཉིད་ནི་དཀོན་མཆོག་གི་སྲས་ཡིན་པར་བཤད༌པས། ངེད་ཅག་གི་བཀའ་ཁྲིམས་ལྟར་ན་ཁོ་རང་གསོད་དགོས་ཞེས་སྨྲས་པ༌དང༌།
JOH 19:8 པི་ལ་ཏུས་གཏམ་དེ་ཐོས་ནས་ལྷག་པར་འཇིགས་པ༌དང༌།
JOH 19:9 ཡང་ཕོ་བྲང་ནང་དུ་སོང༌སྟེ་སྐྱབས་མགོན་ཡེ་ཤུ་ལ། ཁྱོད་རང་གང་ནས་ཡོང་ངམ་ཞེས་དྲིས་ནའང་སྐྱབས་མགོན་ཡེ་ཤུས་བཀའ་ལན་ཅི་ཡང་མ་གནང་ངོ༌།།
JOH 19:10 ཡང་པི་ལ་ཏུ་ན༌རེ། ཁྱོད་ཀྱིས་ང་རང་ལ་གཏམ་མི་གླེང༌ངམ། བདག་ལ་ཁྱོད་རང་བཙོན་གྲོལ་གཏོང་བའི་དབང་ཆ་ཡོད་ལ། ཤིང་རྒྱ་གྲམ་གྱི་སྟེང་དུ་བརྡབ་པའི་དབང་ཆའང་ཡོད་པ་ཁྱོད་ཀྱིས་མི་ཤེས་སམ་ཞེས་དྲིས་པ༌ན།
JOH 19:11 སྐྱབས་མགོན་ཡེ་ཤུས་འདི་སྐད༌དུ། གལ་ཏེ་སྟེང་ནས་གནང་བ་མིན༌ན། ཁྱོད་ལ་ངའི་ཕྱོགས་སུ་དབང་ཆ་ཅི་ཡང་མེད༌པས། ཁྱོད་དང་བསྡུར་ན་ང་རང་ཁྱོད་ལ་སྤྲོད་མཁན་དེར་སྡིག་པ་ལྷག་ཏུ་ཆེ་ཞེས་གསུངས་སོ།།
JOH 19:12 དུས་དེ་ནས་བཟུང་པི་ལ་ཏུས་སྐྱབས་མགོན་ཡེ་ཤུ་བཙོན་ལས་གཏོང་འདོད་ཀྱང་ཡ་ཧུ་དཱ་པ་རྣམས་ཀྱིས་སྐད་ཆེན༌པོས། གལ་ཏེ་ཁྱོད་ཀྱིས་མི་འདི་བཙོན་ལས་བཏང་ན་ཁྱོད་ནི་སེ་བཟིར་གྱི་མཛའ་གྲོགས་མིན་ལ། མི་སུས་ཀྱང་རང་ཉིད་རྒྱལ་པོ་ཡིན་ཞེས་བཤད་ན་མི་དེ་སེ་བཟིར་གྱི་ངོ་རྒོལ་པ་ཡིན་ཞེས་སྐད་ཅོར་བརྒྱབ་བོ།།
JOH 19:13 པི་ལ་ཏུས་གཏམ་དེ་ཐོས་པ་དང་སྐྱབས་མགོན་ཡེ་ཤུ་ཕྱི་རོལ་ཏུ་ཁྲིད༌དེ། རྡོ་གཅལ་ཞེས་པ་ཨིབ་རིའི་མི་རིགས་ཀྱི་སྐད་དུ་ཀ་པི་ཐཱ་ཟེར་བའི་གནས་སུ་སོང་སྟེ་རང་ཉིད་ཁྲིམས་དཔོན་གྱི་ཁྲི་ལ་བསྡད།
JOH 19:14 ཉིན་དེ་ནི་པེ་སག་གི་དུས་ཆེན་གྱི་སྟ་གོན་ཉིན་མོའི་ཉིན་གུང་ཙམ་ཡིན། པི་ལ་ཏུས་ཡ་ཧུ་དཱ་པ་རྣམས༌ལ། ལྟོས༌དང༌། མི་འདི་ནི་ཁྱོད་རྣམས་ཀྱི་རྒྱལ་པོ་ཡིན་ཞེས་སྨྲས་པ༌ན།
JOH 19:15 དེ་རྣམས་ན༌རེ། ཁོ་རང་སོད༌ཅིག སོད་ཅིག ཤིང་རྒྱ་གྲམ་གྱི་སྟེང་དུ་རྡོབས་ཤིག་ཅེས་སྐད་ཅོར་བརྒྱབ་བོ།། དེ་ནས་པི་ལ་ཏུ་ན༌རེ། བདག་གིས་ཁྱོད་རྣམས་ཀྱི་རྒྱལ་པོ་ཤིང་རྒྱ་གྲམ་གྱི་སྟེང་དུ་བརྡབ་ཆོག་གམ་ཞེས་དྲིས་པ༌ན། མཆོད་དཔོན་ཆེན་པོ་རྣམས་ན༌རེ། ངེད་རྣམས་ལ་སེ་བཟིར་ལས་གཞན་རྒྱལ་པོ་གཅིག་ཀྱང་མེད་ཅེས་སྨྲས་སོ།།
JOH 19:16 དེ་ནས་པི་ལ་ཏུས་ཀྱང་སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབ་པའི་ཕྱིར་དམག་མི་རྣམས་ལ་སྤྲད༌དོ།།
JOH 19:17 དེ་ནས་དམག་མི་རྣམས་ཀྱིས་སྐྱབས་མགོན་ཡེ་ཤུ་ཁྲིད་པ༌དང༌། ཁོང་གིས་ཀྱང་རང་ཉིད་ཀྱི་ཤིང་རྒྱ་གྲམ་ཁུར་ནས་ཕྱི་རོལ་ཏུ་ཕེབས༌ཤིང༌། མགོ་སྐོགས་གནས་ཞེས་པ་ཨིབ་རིའི་མི་རིགས་ཀྱི་སྐད་དོད་དུ་གོལ་གོ་ཐཱ་ཟེར་བའི་ས་ཆར་སླེབས་སོ།།
JOH 19:18 དེར་དམག་མི་དེ་རྣམས་ཀྱིས་སྐྱབས་མགོན་ཡེ་ཤུ་དཀྱིལ་དབུས་དང་། ཁོང་གི་གཡས་གཡོན་དུ་མི་གཞན་གཉིས་ཤིང་རྒྱ་གྲམ་གྱི་སྟེང་དུ་བརྡབས༌པ་རེད།
JOH 19:19 ཡང་པི་ལ་ཏུས་ཤིང་བྱང་ཞིག་གི་ངོས་སུ་ཡ་ཧུ་དཱ་པའི་རྒྱལ་པོ་ནཱ་ཙ་རེལ་པ་ཡེ་ཤུའོ་ཞེས་འབྲི་དགོས་པའི་བཀའ་བསྒོས་པ་དང་ཤིང་བྱང་དེའང་ཤིང་རྒྱ་གྲམ་གྱི་གོང་དུ་བརྡབས་སོ།།
JOH 19:20 སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་པའི་གནས་དེ་ནི་གྲོང་ཁྱེར་དང་བར་ཐག་ཉེ༌ཞིང༌། ཤིང་བྱང་གི་ངོས་སུ་ཨིབ་རིའི་མི་རིགས་ཀྱི་ཡི་གེ་དང་ལཱ་ཏིན་གྱི་ཡི༌གེ གྷི་རིག་པའི་ཡི་གེ་བཅས་ཡིག་རིགས་གསུམ་གྱིས་བྲིས་ཡོད༌པས། ཡ་ཧུ་དཱ་པ་མང་པོས་ཀྱང་ཡི་གེ་དེ་བཀླགས་པ་རེད།
JOH 19:21 དེ་ནས་ཡ་ཧུ་དཱ་པའི་མཆོད་དཔོན་ཆེན་པོ་རྣམས་ཀྱིས་པི་ལ་ཏུ༌ལ། ཡ་ཧུ་དཱ་པའི་རྒྱལ་པོ་ཞེས་མི་འབྲི༌བར། ཁོས་ང་རང་ནི་ཡ་ཧུ་དཱ་པའི་རྒྱལ་པོ་ཡིན་ཞེས་སྨྲས་པ་ལྟར་འབྲི་བར་མཛོད་ཅེས་ཞུས་པ༌ལ།
JOH 19:22 པི་ལ་ཏུ་ན༌རེ། བདག་གིས་ཇི་ལྟར་བྲིས་པ་དེ་བྲིས་ཟིན་ཞེས་སྨྲས༌སོ།།
JOH 19:23 དེ་ནས་དམག་མི་རྣམས་ཀྱིས་སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས༌རྗེས། ཁོང་གི་ཕྱི་གོས་སྐལ་བཞི་རུ་བགོས་ནས་དམག་མི་རེ་རེར་ཐོབ་པ༌དང༌། ཁོང་གི་ནང་གོས་ཀྱང་བླངས་པ༌དང༌། ནང་གོས་དེ་ལ་བཙེམ་སྲུབས་ཅི་ཡང་མེད་པར་མགོ་ནས་མཇུག་བར་ཐག་བཏགས་ནས་གྲུབ་པ་ཞིག་ཡིན༌པས།
JOH 19:24 དེ་རྣམས་ཀྱིས་ཕན་ཚུན༌ལ། ནང་གོས་འདི་དུམ་བུར་མི་གཤག་པར་རྒྱན་འཕངས་ནས་སུ་ལ་འཐོབ་པར་བལྟའོ་ཞེས་སྨྲས་སོ།། དེ་ནི་གསུང་རབ་ཀྱི་མདོ་ལས་ཇི་སྐད༌དུ། ང་ཡི་ཕྱི་གོས་ཁོ་ཚོས་བགོས་ཏེ༌ཁྱེར།། ང་ཡི་གྱོན་གོས་ཕྱིར་དུ་རྒྱན་འཕངས༌སོ།། ཞེས་གསུངས་པ་བཞིན་འགྲུབ་པའི་ཕྱིར་དེ་ལྟར་བྱུང་བ་ཡིན༌ལ།
JOH 19:25 དམག་མི་རྣམས་ཀྱིས་ཀྱང་དེ་བཞིན་དུ་བྱས་སོ།། དེ་ཡང་སྐྱབས་མགོན་ཡེ་ཤུའི་ཤིང་རྒྱ་གྲམ་གྱི་ཉེ་འགྲམ་དུ་ཁོང་གི་ཡུམ་དང་ཨ༌ནེ། གཞན༌ཡང༌། ཀ་ལོ་ཕཱའི་ཆུང་མ་མིར་ཡམ་དང་མཱག་རྡལ་གྱི་མིར་ཡམ་བཅས་ལངས་ནས་བསྡད་ཡོད༌ཅིང༌།
JOH 19:26 སྐྱབས་མགོན་ཡེ་ཤུས་རང་གི་ཡུམ་དང་གཅེས་པའི་ཐུགས་སྲས་གཉིས་ཀ་ཉེ་འགྲམ་དུ་ལངས་ནས་བསྡད་ཡོད་པ་གཟིགས་ཏེ་འདི་སྐད༌དུ། ཡུམ༌ལགས། ཁྱེད་ཀྱི་བུ་ལ་གཟིགས་དང་ཞེས་གསུངས༌ཤིང༌།
JOH 19:27 ཡང་ཐུགས་སྲས་དེ་ལ་འདི་སྐད༌དུ། ཁྱོད་ཀྱི་ཡུམ་ལ་ལྟོས་དང་ཞེས་གསུངས། དུས་དེ་ནས༌བཟུང༌། ཐུགས་སྲས་དེས་སྐྱབས་མགོན་ཡེ་ཤུའི་ཡུམ་རང་ཁྱིམ་དུ་བསུས་སོ།།
JOH 19:28 དེ་ནས་སྐྱབས་མགོན་ཡེ་ཤུས་དོན་ཐམས་ཅད་གྲུབ་ཟིན་པ་མཁྱེན༌ཏེ། གསུང་རབ་ཀྱི་མདོ་ལས་གསུངས་པ་ལྟར་འགྲུབ་པའི༌ཕྱིར། བདག་ལ་སྐོམ་པ་བྱུང་ཞེས་གསུངས་པ༌ན།
JOH 19:29 རྒུན་ཆང་སྐྱུར་མོས་བཀང་བའི་སྣོད་ཅིག་གནས་དེར་བཞག་ཡོད་པ༌ལ། ཁོ་རྣམས་ཀྱིས་འགྱིག་སོབ་ཅིག་རྒུན་ཆང་སྐྱུར་མོར་སྦངས༌ཏེ། ཨི་སོབ་ཅེས་པའི་རྩྭ་ཤིང་གི་རྩེ་མོར་བཀལ་ནས་ཁོང་གི་ཞལ་ལ་དྲངས་སོ།།
JOH 19:30 དེ་ནས་སྐྱབས་མགོན་ཡེ་ཤུས་རྒུན་ཆང་སྐྱུར་མོ་དེ་བཞེས་པ་དང་དོན་གྲུབ་བོ་ཞེས་གསུངས༌རྗེས། ཁོང་གི་དབུ་དུད་ཅིང་སྐུ་སྲོག་ཕུལ་ཏོ།།
JOH 19:31 ཉིན་དེ་ནི་སྟ་གོན་གྱི་ཉིན་མོ་ཡིན་པ༌དང༌། ངལ་གསོ་བའི་ཉིན་མོ་དེ་ནི་དུས་གལ་ཆེན་ཞིག་ཡིན་པས། ཡ་ཧུ་དཱ་པ་རྣམས་ཀྱིས་ངལ་གསོ་བའི་ཉིན༌ལ་ཤིང་རྒྱ་གྲམ་གྱི་སྟེང་དུ་བེམ་པོ་ལུས་ན་མི་འོས་པར་བསམས༌ཏེ། པི་ལ་ཏུའི་དྲུང་དུ་སོང་ནས་དེ་དག་གི་རྐང་པ་བཅག་ནས་བེམ་པོ་རྣམས་འཁྱེར་དགོས་པར་ཞུས་སོ།།
JOH 19:32 དེའི༌ཕྱིར། དམག་མི་རྣམས་ཡོང་སྟེ་སྐྱབས་མགོན་ཡེ་ཤུ་དང་ལྷན་དུ་ཤིང་རྒྱ་གྲམ་གྱི་སྟེང་དུ་བརྡབས་ཡོད་པའི་མི་གཉིས་ཀྱི་རྐང་པ་རིམ་བཞིན་བཅག
JOH 19:33 འོན༌ཀྱང༌། དམག་མི་རྣམས་སྐྱབས་མགོན་ཡེ་ཤུའི་སྐུ་གདུང་གི་དྲུང་དུ་སླེབས་ནས་ཁོང་ཉིད་སྐུ་གཤེགས་ཟིན་པ་མཐོང་བས་རྐང་པ་མ་བཅག་གོ།
JOH 19:34 དེ་ནས་དམག་མི་གཅིག་གིས་སྐྱབས་མགོན་ཡེ་ཤུའི་སྐུ་གདུང་གི་གཞོགས་ལ་མདུང་གིས་བསྣུན་པ་དང་འཕྲལ་དུ་ཁྲག་དང་ཆུ་བཞུར༌བ་རེད།
JOH 19:35 ཁྱོད་རྣམས་ཀྱིས་སྐྱབས་མགོན་ཡེ་ཤུ་ལ་དད་པ་བྱེད་པའི༌ཕྱིར། དོན་དེ་མཐོང་བའི་མི་དེས་ དོན་དེར་བདེན་དཔང་བྱས་ཤིང་བདེན་དཔང་དེ་ཡང་བདེན་པ་ཡིན་པར་མ༌ཟད། ཁོས་རང་གི་བཤད་པ་དེ་ཡང་བདེན་པ་ཡིན་པ་ཤེས་སོ།།
JOH 19:36 དོན་དེ་རྣམས་ནི་གསུང་རབ་ཀྱི་མདོ་ལས་ཁོང་གི་གདུང་རུས་གཅིག་ཀྱང་གཅོག་པར་མི་འགྱུར་ཞེས༌དང༌།
JOH 19:37 ཡང་མདོ་གཞན་ལས་ཇི་སྐད༌དུ། དེ་རྣམས་ཀྱིས་མདུང་གིས་བསྣུན་པ་དེ་ལ་ཡར་བལྟ་བར་འགྱུར་ཞེས་གསུངས་པ་དེ་འགྲུབ་པའི་ཕྱིར་བྱུང་བ་ཡིན༌ནོ།།
JOH 19:38 དེ་ཡང་ཨ་རི་མ་ཐཱ་ཡི་ཡོ་སེབ་ཅེས་པ་ནི་ཡ་ཧུ་དཱ་པ་རྣམས་ལ་འཇིགས༌ཏེ། གསང་བའི་ངང་སྐྱབས་མགོན་ཡེ་ཤུའི་རྗེས་འབྲང་པ་བྱས་པ་ཞིག༌ཡིན། དོན་དེ་དག་བྱུང་བའི་རྗེས༌སུ། ཁོས་སྤྱི་དཔོན་པི་ལ་ཏུ་ལ་སྐྱབས་མགོན་ཡེ་ཤུའི་སྐུ་གདུང་ལེན་པར་ཞུ་བ་ཞུས་ཤིང་པི་ལ་ཏུས་ཀྱང་ཆོག་མཆན་བཀོད༌པས། ཁོས་སྐྱབས་མགོན་ཡེ་ཤུའི་སྐུ་གདུང་མར་བླངས་ཏེ་ཁྱེར་ཏོ།།
JOH 19:39 གཞན༌ཡང༌། ནེ་ཀོ་དེམ་ཞེས་བྱ་བ་དེ་སྔར་མཚན་མོའི་དུས་སུ་སྐྱབས་མགོན་ཡེ་ཤུར་མཇལ་དུ་ཡོང་བ་དེས་ཀྱང་བྱུགས་རྫས་གུ་གུལ་དང་ཨ་ག་རུ་རྒྱ་མ་བརྒྱ་ཙམ་ཁུར་འོངས༌ཏེ།
JOH 19:40 ཁོ་གཉིས་ཀྱིས་ཡ་ཧུ་དཱ་པའི་དུར་འཇུག་གི་ལུགས་སྲོལ༌བཞིན། བསུང་རྫས་བྱུགས་ཡོད་པའི་སོ་རས་ཀྱིས་སྐྱབས་མགོན་ཡེ་ཤུའི་སྐུ་གདུང་ལེགས་པོར་བཏུམས་སོ།།
JOH 19:41 སྐྱབས་མགོན་ཡེ་ཤུ་ཤིང་རྒྱ་གྲམ་གྱི་སྟེང་དུ་བརྡབས་པའི་གནས་དེར་སྐྱེད་ཚལ་ཞིག་ཡོད༌ཅིང༌། སྐྱེད་ཚལ་དེའི་ནང་དུ་བེམ་པོ་བཞག་མ་མྱོང་བའི་དུར་ཁུང་གསར་པ་ཞིག་ཀྱང་ཡོད།
JOH 19:42 ཉིན་དེ་ནི་ཡ་ཧུ་དཱ་པའི་སྟ་གོན་གྱི་ཉིན་མོ་ཡིན་པ་དང་དུར་ཁུང་དེ་དང་བར་ཐག་ཉེ༌བས། ཁོ་གཉིས་ཀྱིས་སྐྱབས་མགོན་ཡེ་ཤུའི་སྐུ་གདུང་དུར་ཁུང་དེའི་ནང་དུ་སྦས༌སོ།།
JOH 20:1 གཟའ་འཁོར་གཅིག་གི་ཉིན་དང་པོར་ནམ་མ་ལངས་པའི་སྔོན༌ལ། མཱག་རྡལ་གྱི་མིར་ཡམ་དུར་ཁུང་གི་གམ་དུ་སླེབས་པ༌ན། དུར་ཁུང་གི་སྒོ་གཅོད་བྱེད་ཀྱི་རྡོ་ཕ་བོང་དེ་ཕར་བསྒྲིལ་ཟིན་པ་མཐོང༌བས།
JOH 20:2 མྱུར་དུ་སི་མོན་པེ་ཏྲོ་དང་སྐྱབས་མགོན་ཡེ་ཤུས་བྱམས་ཤིང་གཅེས་པའི་ཐུགས་སྲས་ཅིག་ཤོས་དེའི་མདུན་དུ་སོང་སྟེ་ན༌རེ། གཙོ་བོའི་སྐུ་གདུང་མི་གཞན་རྣམས་ཀྱིས་དུར་ཁུང་ནས་ཁྱེར་ཞིང་ངེད་རྣམས་ཀྱིས་གང་དུ་བཞག་ཡོད་པའང་མ་ཤེས་ཞེས་སྨྲས་པ༌དང༌།
JOH 20:3 པེ་ཏྲོ་དང་ཐུགས་སྲས་གཞན་དེ་ཕྱི་རོལ་ཏུ་ཐོན༌ནས།
JOH 20:4 མཉམ་དུ་དུར་ཁུང་གི་ཕྱོགས་སུ་བརྒྱུགས་པ་དང་ཐུགས་སྲས་ཅིག་ཤོས་པེ་ཏྲོ་ལས་མགྱོགས་པས་སྔོན་ལ་དུར་ཁུང་ཡོད་སར་སླེབས༌ཤིང༌།
JOH 20:5 མགོ་བོ་སྒུར་ནས་དུར་ཁུང་ནང་དུ་བལྟས་པ་ན། སྐྱབས་མགོན་ཡེ་ཤུའི་སྐུ་གདུང་བཏུམ་བྱེད་ཀྱི་སོ་རས་ཤུལ་དུ་ཡོད་པ་མཐོང་བ་དང་ཁོ་རང་ནང་དུ་མ་སོང་ངོ་།།
JOH 20:6 དེ་ནས་སི་མོན་པེ་ཏྲོ་ཡང་སླེབས་ཏེ་དུར་ཁུང་ནང་དུ་སོང་བ༌ན། སོ་རས་ཤུལ་དུ་ལུས་ཡོད་པ༌དང༌།
JOH 20:7 སྐྱབས་མགོན་ཡེ་ཤུའི་དབུ་བཏུམ་བྱེད་ཀྱི་རས་དེ་སོ་རས་དང་མཉམ་དུ་མེད༌པར། གནས་གཞན་ཞིག་ཏུ་དཀྲིས་ཏེ་བཞག་ཡོད་པ་མཐོང༌།
JOH 20:8 སྔོན་ལ་སླེབས་པའི་ཐུགས་སྲས་དེ་ཡང་དུར་ཁུང་ནང་དུ་སོང་སྟེ་གནས་ཚུལ་དེ་དག་མཐོང་བ་དང་ཡིད་ཆེས་པར་གྱུར་ཏོ།།
JOH 20:9 རྒྱུ་མཚན་ནི་དེ་གཉིས་ཀྱིས་གསུང་རབ་ཀྱི་མདོ་ལས་སྐྱབས་མགོན་ཡེ་ཤུ་གྲོངས་པ་ནས་སླར་གསོན་པར་འགྱུར་དགོས་ཞེས་པའི་དོན་དེ་ད་དུང་མ་རྟོགས༌པ་རེད།
JOH 20:10 དེ་ནས་ཐུགས་སྲས་དེ་གཉིས་ཕྱིར་རང་གནས་སུ་ལོག༌གོ།
JOH 20:11 དེ་ནས་མཱག་རྡལ་གྱི་མིར་ཡམ་དུར་ཁུང་གི་ཕྱི་རོལ་ཏུ་ལངས་བསྡད་དེ་ངུས༌ཤིང༌། ངུ་བཞིན་མགོ་བོ་སྒུར་ནས་དུར་ཁུང་ནང་དུ་བལྟས་པ༌ན།
JOH 20:12 སྐྱབས་མགོན་ཡེ་ཤུའི་སྐུ་གདུང་བཞག་སའི་ཤུལ་དུ་གོས་དཀར་པོ་གྱོན་པའི་ཕོ་ཉ་གཉིས་ཡོད་ཅིང་གཅིག་ནི་དབུ་དང་གཅིག་ནི་ཞབས་ཀྱི་ཕྱོགས་སུ་བཞུགས་པ་མཐོང་ངོ༌།།
JOH 20:13 དེ་ནས་ཕོ་ཉ་དེ་གཉིས་ན༌རེ། ཀྱེ། བུད༌མེད། ཁྱོད་རང་ཅིའི་ཕྱིར་ངུ་བ་ཡིན་ནམ་ཞེས་དྲིས་པ༌ལ། ཁོ་མོ་ན༌རེ། ང་ཡི་གཙོ་བོའི་སྐུ་གདུང་མི་གཞན་རྣམས་ཀྱིས་ཁྱེར་ཞིང་གང་དུ་བཞག་པ་མི་ཤེས་པའི་ཕྱིར་ཡིན་ཞེས་སྨྲས་པ༌དང༌།
JOH 20:14 ཁོ་མོ་ཁ་ཕྱིར་འཁོར་བ༌ན། སྐྱབས་མགོན་ཡེ་ཤུ་གནས་དེར་བཞེངས་ཡོད་པ་མཐོང༌ཡང༌། ཁོ་མོས་སྐྱབས་མགོན་ཡེ་ཤུ་ཡིན་པ་མ་ཤེས་སོ།།
JOH 20:15 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཀྱེ། བུད༌མེད། ཁྱོད་རང་ཅིའི་ཕྱིར་ངུ་བ་ཡིན༌ནམ། ཁྱོད་ཀྱིས་སུ་ཞིག་འཚོལ་ལམ་ཞེས་གསུངས་པ༌ན། མིར་ཡམ་གྱིས་མི་དེ་ནི་སྐྱེད་ཚལ་སྲུང་མཁན་ཡིན་པར་སྙམ༌སྟེ། ཇོ་བོ༌ལགས། ཁྱེད་ཀྱིས་ཁོང་གི་སྐུ་གདུང་ཁྱེར་བ་ཡིན་ན་གང་དུ་བཞག་པ་བདག་ལ་སྨྲོས་དང་ང་རང་ལེན་དུ་འགྲོ་ཞེས་སྨྲས་སོ།།
JOH 20:16 དེ་ནས་སྐྱབས་མགོན་ཡེ་ཤུས་མིར་ཡམ་ཞེས་ཁོ་མོའི་མིང་ནས་བོས༌ཤིང༌། མིར་ཡམ་ཁོང་གི་ཕྱོགས་སུ་འཁོར༌ཏེ། ཨིབ་རིའི་མི་རིགས་ཀྱི་སྐད༌དུ། རཱབ་པོ་ནེ་ཞེས་ཞུས་ཤིང་སློབ་དཔོན་ལགས་ཞེས་པའི་དོན་ཡིན་ནོ།།
JOH 20:17 ཡང་སྐྱབས་མགོན་ཡེ་ཤུས་འདི་སྐད༌དུ། ང་རང་ད་དུང་ཡབ་ཀྱི་དྲུང་དུ་མ་འཕགས༌པས། ང་རང་དམ་པོར་འཛིན་པར་མི༌བྱའོ།། ཁྱོད་རང་བདག་གི་སྤུན་ཟླ་རྣམས་ཀྱི་གམ་དུ་སོང་ནས་དེ་རྣམས་ལ་འདི་སྐད༌དུ། ང་རང་ནི་བདག་གི་ཡབ་དང༌། ཁྱོད་ཅག་གི་ཡབ། བདག་གི་དཀོན༌མཆོག་སྟེ་ཁྱོད་ཅག་གི་དཀོན་མཆོག་གི་དྲུང་དུ་འགྲོ་བ་ཡིན་ཞེས་སྨྲོས་ཤིག་ཅེས་གསུངས་སོ།།
JOH 20:18 དེ་ནས་མཱག་རྡལ་གྱི་མིར་ཡམ་ཕྱིར་སོང་ནས་ཐུགས་སྲས་རྣམས་ལ་ང་རང་གཙོ་བོ་ལ་མཇལ་བྱུང་ཞེས་སྨྲས་པ་དང་ཁོང་གིས་ཁོ་མོར་གསུངས་པ་རྣམས་ཀྱང་སྨྲས༌སོ།།
JOH 20:19 གཟའ་འཁོར་གཅིག་གི་ཉིན་དང་པོའི་མཚན༌མོར། ཐུགས་སྲས་རྣམས་ཡ་ཧུ་དཱ་པ་རྣམས་ལ་འཇིགས་ཏེ་སྒོ་བརྟན་པོར་བརྒྱབ་ནས་སྡོད་པ༌ལ། སྐྱབས་མགོན་ཡེ་ཤུ་གནས་དེར་བྱོན་ནས་ཁོ་རྣམས་ཀྱི་དཀྱིལ་དབུས་སུ་ཡར་བཞེངས་ཏེ་ཁྱོད་རྣམས་བདེ་བར་སྨོན་ཞེས་གསུངས་པ༌དང༌།
JOH 20:20 རང་ཉིད་ཀྱི་ཕྱག་དང་གཞོགས་བསྟན་པ་དང་ཐུགས་སྲས་རྣམས་གཙོ་བོ་ལ་སླར་ཡང་མཇལ་བས་སེམས་དགའ་བར་གྱུར་ཏོ།།
JOH 20:21 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་བདེ་བར་གྱུར༌ཅིག ཡབ་ཀྱིས་ང་རང་ཇི་ལྟར་མངགས་པ་བཞིན་བདག་གིས་ཀྱང་ཁྱོད་རྣམས་དེ་ལྟར་མངག་པར་བྱ་ཞེས་གསུངས༌ཤིང༌།
JOH 20:22 དེ་རྣམས་ལ་ཞལ་ཕུ་བཏབ་སྟེ་འདི་སྐད༌དུ། ཁྱོད་རྣམས་ཀྱིས་དམ་པའི་ཐུགས་ཉིད་ལོངས་ཤིག
JOH 20:23 ཁྱོད་ཅག་གིས་མིའི་སྡིག་པ་བསལ་བ་ཡིན་ན་མིའི་སྡིག་པའང་དག་པ༌ཡིན། ཁྱོད་རྣམས་ཀྱིས་སུ་ཞིག་གི་སྡིག་པ་མི་བསལ་ན་མི་དེའི་སྡིག་པའང་ལུས་པ་ཡིན་ཞེས་གསུངས༌སོ།།
JOH 20:24 སྐྱབས་མགོན་ཡེ་ཤུ་ཕེབས་ཡོང་བའི་དུས༌སུ། ཐུགས་སྲས་བཅུ་གཉིས་པོ་ལས་མིང་གཞན་ལ་མཚེ་མ་ཞེས་ཀྱང་འབོད་པའི་ཐོ་མཱ་ནི་ཁོ་ཚོ་དང་མཉམ་དུ་མེད༌པས།
JOH 20:25 ཐུགས་སྲས་གཞན་རྣམས་ཀྱིས་ངེད་ཅག་གཙོ་བོ་ལ་མཇལ་བྱུང་ཞེས་སྨྲས་པ༌ན། ཐོ་མཱ་ན༌རེ། ཁོང་ཉིད་ཀྱི་ཕྱག་ཟུང་སྟེང་གི་གཟེར་མས་བསྣད་པའི་རྨ་ཤུལ་མཐོང་བ་དང་བདག་གི་མཛུབ་མོས་རྨ་ཤུལ་ལ་རེག༌ཅིང༌། ཡང་ངའི་ལག་པ་ཁོང་གི་གཞོགས་སུ་བཞག་ན་མ་གཏོགས་ང་རང་ཡིད་མི་ཆེས་ཞེས་སྨྲས་སོ།།
JOH 20:26 དེ་ནས་ཉིན་བརྒྱད་འགོར་བའི་རྗེས༌སུ། ཐོ་མཱའང་ཐུགས་སྲས་གཞན་རྣམས་དང་མཉམ་དུ་སླར་ཡང་ཁང་པ་དེའི་ནང་དུ་བསྡད་ཅིང་སྒོ་བརྟན་པོར་བརྒྱབ་པ༌ལ། སྐྱབས་མགོན་ཡེ་ཤུ་གནས་དེར་བྱོན་ནས་ཁོ་རྣམས་ཀྱི་དཀྱིལ་དབུས་སུ་བཞེངས་ཏེ་ཁྱོད་རྣམས་བདེ་བར་སྨོན་ཞེས་གསུངས་པ༌དང༌།
JOH 20:27 ཐོ་མཱ་ལ་འདི་སྐད༌དུ། ཁྱོད་ཀྱིས་རང་གི་མཛུབ་མོ་བརྐྱངས་ནས་བདག་གི་ལག་པ་ལ་རེག་པར༌གྱིས། ཁྱོད་ཀྱིས་རང་གི་ལག་པ་བརྐྱངས་ནས་བདག་གི་གཞོགས་ལ་ཞོག༌དང༌། མི་དད་པའི་སེམས་སྤོངས་ལ་དད་པ་བྱོས་ཤིག་ཅེས་གསུངས་སོ།།
JOH 20:28 དེ་ནས་ཐོ་མཱས་ང་ཡི་གཙོ་བོ༌ལགས། ང་ཡི་དཀོན་མཆོག་ལགས་ཞེས་ཞུས་སོ།།
JOH 20:29 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་ང་རང་མཐོང་ནས་ད་གཟོད་དད་པ་བྱས་པ༌ཡིན། ང་རང་མ་མཐོང་བར་དད་པ་བྱེད་མཁན་རྣམས་ནི་བདེའོ་ཞེས་གསུངས༌སོ།།
JOH 20:30 སྐྱབས་མགོན་ཡེ་ཤུས་ཐུགས་སྲས་རྣམས་ཀྱི་མདུན་དུ་གྲུབ་རྟགས་གཞན་མང་པོ་མཛད་ཀྱང་མདོ་འདིའི་ནང་དུ་མ་བཀོད་དོ།།
JOH 20:31 འོན་ཀྱང་འདིར་བཀོད་པའི་དོན་རྣམས་ཁྱོད་ཅག་གིས་ཡེ་ཤུ་ནི་སྐྱབས་མགོན་མཱ་ཤི་ཀ་སྟེ་དཀོན་མཆོག་གི་སྲས་ཡིན་པར་དད་པ་བྱེད་ཅིང་། ཁོང་ལ་དད་པ་བྱས་ཏེ་ཁོང་གི་མཚན་གྱི་སྒོ་ནས་མཐའ་མེད་པའི་ཚེ་སྲོག་འཐོབ་པའི་ཕྱིར་ཡིན༌ནོ།།
JOH 21:1 དོན་དེ་དག་བྱུང་བའི་རྗེས༌སུ། སྐྱབས་མགོན་ཡེ་ཤུས་ཐེ་པེར་ཡཱ་མཚོ་འགྲམ་དུ་སླར་ཡང་ཐུགས་སྲས་རྣམས་ལ་རང་ཉིད་ཀྱི་སྐུ་གཟུགས་མངོན་པར་མཛད། ཇི་ལྟར་མངོན་པ་ནི་འདི་ལྟ༌སྟེ།
JOH 21:2 སི་མོན་པེ་ཏྲོ༌དང༌། མཚེ་མ་ཞེས་ཀྱང་འབོད་པའི་ཐོ་མཱ༌དང༌། ག་ལིལ་ཡུལ་གྱི་ཀ་ནཱ་ཡི་ནཱ་ཐན་ཨེལ༌དང༌། ཟེ་བད་ཡའི་བུ་གཉིས་དང༌། ཁོང་གི་ཐུགས་སྲས་གཞན་གཉིས་བཅས་མཉམ་དུ་ཡོད༌པ་རེད།
JOH 21:3 དེ་ནས་སི་མོན་པེ་ཏྲོ་ན༌རེ། ང་རང་ཉ་འཛིན་དུ་འགྲོའོ་ཞེས་སྨྲས་པ༌ལ། དེ་རྣམས་ཀྱིས་ངེད་ཅག་ཀྱང་ཁྱོད་དང་ལྷན་དུ་འགྲོ་དགོས་ཞེས་སྨྲས་སོ།། དེ་ནས་ཁོ་རྣམས་གྲུར་བསྡད་ནས་སོང༌ཡང༌མཚན་མོ་དེར་ཉ་ཅི་ཡང་མ་ཟིན་ཏོ།།
JOH 21:4 ནམ་ལངས་པའི་དུས༌སུ། སྐྱབས་མགོན་ཡེ་ཤུ་མཚོ་འགྲམ་དུ་བཞུགས༌ཤིང༌། དེ་རྣམས་ཀྱིས་ཁོང་ནི་སྐྱབས་མགོན་ཡེ་ཤུ་ཡིན་པ་ཤེས་མ་བྱུང་།
JOH 21:5 སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ཀྱེ། བུ་ཕྲུག༌རྣམས། ཁྱོད་ཅག་ལ་ཉ་ཡོད་དམ་ཞེས་གསུངས་པ༌ན། དེ་དག་གིས་མེད་ཅེས་སྨྲས་སོ།།
JOH 21:6 ཡང་ཁོང་གིས་འདི་སྐད༌དུ། ཁྱོད་རྣམས་ཀྱིས་གྲུའི་གཡས་ཕྱོགས་སུ་དྲ་རྒྱ་གཏོར་དང་ཉ་ཟིན་པར་འགྱུར་ཞེས་གསུངས་སོ།། དེ་ནས་ཁོ་རྣམས་ཀྱིས་དྲ་རྒྱ་འཕངས༌ཏེ་ཉ་མང་པོ་བཟུང་བས་དྲ་རྒྱ་ཕྱིར་མཚོ་གྲུའི་ནང་དུ་འཐེན་མ་ཐུབ༌བོ།།
JOH 21:7 དེ་ནས་སྐྱབས་མགོན་ཡེ་ཤུའི་གཅེས་པའི་ཐུགས་སྲས་དེས་པེ་ཏྲོ༌ལ། ཁོང་ནི་གཙོ་བོ་ལགས་ཞེས་སྨྲས་སོ།། སི་མོན་པེ་ཏྲོས་ནང་གོས་གྱོན་ནས་སྡོད་པ༌ལ། ཁོང་ནི་གཙོ་བོ་ལགས་ཞེས་པ་ཐོས་མ༌ཐག ཕྱི་གོས་རྐེད་པར་བཅིངས་ཏེ་མཚོ་ནང་དུ་མཆོངས་སོ།།
JOH 21:8 ཐུགས་སྲས་གཞན་རྣམས་གྲུར་བསྡད་ནས། མཚོ་འགྲམ་དང་ཧ་ལམ་བར་ཐག་གཞུ་འདོམ་ལྔ་བཅུ་ཙམ་མ་གཏོགས་མེད་པའི་མཚོ་སྟེང་ནས་ཉ་ཡིས་གང་བའི་དྲ་རྒྱ་དྲུད་ཡོང༌ངོ་།།
JOH 21:9 དེ་ནས་ཁོ་རྣམས་མཚོ་འགྲམ་དུ་སླེབས་པ༌ན། གནས་དེར་སོལ་བའི་མེ་སྦར་བ་དང་མེའི་སྟེང་དུ་ཉ་ཤ་བཞག་འདུག་ལ་བག་ལེབ་ཀྱང་ཡོད་པ་མཐོང༌།
JOH 21:10 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་བཟུང་བའི་ཉ་ཁ་ཤས་འདིར་ཁྱེར་ཤོག་ཅེས་གསུངས་པ༌དང༌།
JOH 21:11 སི་མོན་པེ་ཏྲོ་གྲུའི་ནང་དུ་སོང་ནས་མཚོ་འགྲམ་དུ་དྲ་རྒྱ་འཐེན་པ༌ན། དྲ་རྒྱའི་ནང་དུ་ཉ་ཆེན་པོ་བསྡོམས་པས་བརྒྱ་དང་ང་གསུམ་གྱིས་ཁེངས་ཡོད༌ལ། ཉ་དེ་འདྲ་མང་ཡང་དྲ་རྒྱ་མ་ཆད༌པ་རེད།
JOH 21:12 དེ་ནས་སྐྱབས་མགོན་ཡེ་ཤུས་འདི་སྐད༌དུ། ཚུར་ཤོག་ལ་ནངས་ཇ་བཞེས་ཤིག་ཅེས་གསུངས་པ༌དང༌། དེ་རྣམས་ཀྱིས་གཙོ་བོ་ཡིན་པ་ཤེས༌ཏེ། སུས་ཀྱང་ཁོང་ལ་ཁྱེད་རང་སུ་ཡིན་ནམ་ཞེས་ཞུ་མ་ཕོད་དོ།།
JOH 21:13 དེ་ནས་སྐྱབས་མགོན་ཡེ་ཤུ་ཕེབས་ཡོང་ཞིང་ཕྱག་ཏུ་བག་ལེབ་བསྣམས་ཏེ་ཁོ་རྣམས་ལ་གནང༌ཞིང་། ཉ་ཡང་དེ་བཞིན་དུ་གནང་བ་རེད།
JOH 21:14 འདི་ནི་སྐྱབས་མགོན་ཡེ་ཤུ་སྐུ་གཤེགས་པ་ནས་སླར་གསོན་རྗེས་ཐེངས་གསུམ་པར་ཐུགས་སྲས་རྣམས་ལ་རང་ཉིད་ཀྱི་སྐུ་གཟུགས་མངོན་པར་མཛད་པ་ཡིན༌ནོ།།
JOH 21:15 དེ་ནས་ཁོང་རྣམས་ཀྱིས་ནངས་ཇ་བཞེས་ཚར་བ༌དང༌། སྐྱབས་མགོན་ཡེ་ཤུས་སི་མོན་པེ་ཏྲོ་ལ་འདི་སྐད༌དུ། ཀྱེ། ཡོ་ཧ་ནན་གྱི་བུ་སི༌མོན། ཁྱོད་ཀྱིས་ང་རང་ལ་འདི་རྣམས་ལས་ཀྱང་ལྷག་པར་གཅེས་སམ་ཞེས་གསུངས་པ༌ལ། པེ་ཏྲོ་ན༌རེ། གཙོ་བོ༌ལགས། གཅེས༌པ་ཡིན། བདག་གིས་ཁྱེད་ལ་གཅེས་པ་ཁྱེད་ཀྱིས་མཁྱེན་པ་ཡིན་ཞེས་ཞུས་པ༌དང༌། ཡང་ཁོང་གིས་འདི་སྐད༌དུ། ཁྱོད་ཀྱིས་བདག་གི་ལུ་གུ་རྣམས་སྐྱོངས་ཤིག་ཅེས་གསུངས་སོ།།
JOH 21:16 དེ་ནས་སྐྱབས་མགོན་ཡེ་ཤུས་ཁོ་ལ་ཐེངས་གཉིས་པར་འདི་སྐད༌དུ། ཀྱེ། ཡོ་ཧ་ནན་གྱི་བུ་སི༌མོན། ཁྱོད་ཀྱིས་ང་རང་ལ་གཅེས་སམ་ཞེས་གསུངས་པ༌ན། པེ་ཏྲོ་ན༌རེ། གཙོ་བོ༌ལགས། གཅེས༌པ་ཡིན། བདག་གིས་ཁྱེད་ལ་གཅེས་པ་ཁྱེད་ཀྱིས་མཁྱེན་པ་ཡིན་ཞེས་ཞུས་པ༌དང༌། ཡང་ཁོང་གིས་འདི་སྐད༌དུ། ཁྱོད་ཀྱིས་བདག་གི་ལུག་རྣམས་སྐྱོངས་ཤིག་ཅེས་གསུངས་སོ།།
JOH 21:17 དེ་ནས་སྐྱབས་མགོན་ཡེ་ཤུས་ཐེངས་གསུམ་པར་ཡང་ཁོ་ལ་འདི་སྐད༌དུ། ཀྱེ། ཡོ་ཧ་ནན་གྱི་བུ་སི༌མོན། ཁྱོད་ཀྱིས་ང་རང་ལ་གཅེས་སམ་ཞེས་ཐེངས་གསུམ་ལ་གསུངས་པས་པེ་ཏྲོའི་སེམས་སྐྱོ་བར་གྱུར་ཏེ་ན༌རེ། གཙོ་བོ༌ལགས། ཁྱེད་ནི་དོན་ཀུན་མཁྱེན་པ་ཡིན༌པས། ངས་ཁྱེད་ལ་གཅེས་པ་ཁྱེད་ཀྱིས་མཁྱེན་ནོ་ཞེས་ཞུས་པ༌ལ། ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་བདག་གི་ལུག་རྣམས་སྐྱོངས༌ཤིག
JOH 21:18 ངས་ཁྱོད་ལ་ཡང་དག་པར་བདེན་པར་སྨྲ༌སྟེ། ཁྱོད་རང་ལོ་ན་གཞོན་དུས་རང་གི་སྐ་རགས་རང་གིས་བཅིངས་ཏེ་གང་དགར་བསྐྱོད༌པ་ཡིན། འོན་ཀྱང་ལོ་ན་རྒས་དུས་ཁྱོད་ཀྱིས་ལག་པ་བརྐྱངས་ཤིང་མི་གཞན་གྱིས་ཁྱོད་རང་བསྡམས་ཏེ་འགྲོ་འདོད་མེད་པའི་གནས་སུ་འཁྲིད་པར་འགྱུར་ཞེས་གསུངས་སོ།།
JOH 21:19 སྐྱབས་མགོན་ཡེ་ཤུའི་གསུང་འདིས་པེ་ཏྲོ་ཇི་ལྟར་འཆི་བའི་སྒོ་ནས་དཀོན་མཆོག་གི་གཟི་བརྗིད་མངོན་པར་འགྱུར་བའི་སྐོར་ལུང་བསྟན་གནང༌བ་རེད། དེ་ནས་ཡང་སྐྱབས་མགོན་ཡེ་ཤུས་པེ་ཏྲོ་ལ་འདི་སྐད༌དུ། ཁྱོད་རང་བདག་གི་རྗེས་སུ་ཤོག་ཅེས་གསུངས་སོ།།
JOH 21:20 དེ་ནས་པེ་ཏྲོས་ཁ་ཕྱིར་འཁོར་ནས་བལྟས་པ༌ན། སྐྱབས་མགོན་ཡེ་ཤུའི་གཅེས་པའི་ཐུགས་སྲས་དེའང་རྗེས་སུ་འབྲངས་ཡོད་པ་མཐོང༌། ཐུགས་སྲས་དེ་ནི་སྔར་དགོང་ཟས་བཞེས་དུས་རང་གི་མགོ་བོ་སྐྱབས་མགོན་ཡེ་ཤུའི་སྐུ་བྲང་ལ་བསྔས༌ཏེ། གཙོ་བོ༌ལགས། ཁྱེད་རང་ལ་ངོ་ལོག་བྱེད་མཁན་དེ་སུ་ཡིན་ནམ་ཞེས་འདྲི་མཁན་དེ་ཡིན་ནོ།།
JOH 21:21 དེ་ནས་པེ་ཏྲོས་ཁོ་རང་མཐོང་སྟེ་ན༌རེ། གཙོ་བོ༌ལགས། མི་འདི་ལ་དོན་ཅི་ཞིག་འབྱུང་ངམ་ཞེས་ཞུས་པ༌དང༌།
JOH 21:22 སྐྱབས་མགོན་ཡེ་ཤུས་འདི་སྐད༌དུ། གལ་ཏེ་མ་འོངས་པར་ང་རང་ཕྱིར་ཡོང་བའི་བར༌དུ། ཁོ་རང་ད་དུང་གསོན་པོར་གནས་ཤིང་ང་རང་ཡང་དོན་དེར་དགའ་བ་ཡིན༌ན། ཁྱོད་ལ་འབྲེལ་བ་ཅི་ཡོད༌དམ། ཁྱོད་རང་བདག་གི་རྗེས་སུ་འབྲང་བར་གྱིས་ཞེས་གསུངས་སོ།།
JOH 21:23 དེའི༌ཕྱིར། སྐྱབས་མགོན་ཡེ་ཤུའི་གསུང་དེ་སྤུན་ཟླའི་ཁྲོད་དུ་གྲགས་ཤིང་ཐུགས་སྲས་དེ་མི་འཆི་བ་ཡིན་ཞེས་སྨྲས་སོ།། འོན༌ཀྱང༌། དེ་ནི་སྐྱབས་མགོན་ཡེ་ཤུས་ཐུགས་སྲས་དེ་མི་འཆི་བ་ཡིན་ཞེས་གསུངས་པ་མ་ཡིན༌པར། གལ་ཏེ་མ་འོངས་པར་ང་རང་ཕྱིར་ཡོང་བའི་བར༌དུ། ཁོ་རང་ད་དུང་གསོན་པོར་གནས་ཤིང་ང་རང་ཡང་དོན་དེར་དགའ་བ་ཡིན༌ན། ཁྱོད་དང་འབྲེལ་བ་ཅི་ཡོད་དམ་ཞེས་གསུངས༌པའོ།།
JOH 21:24 དོན་འདི་རྣམས་ལ་བདེན་དཔང་བྱེད་པ་དང་དོན་འདི་རྣམས་ཡི་གེར་འགོད་མཁན་ནི་ཐུགས་སྲས་ཁོ་རང་ཡིན། ངེད་རྣམས་ཀྱིས་ཀྱང་ཁོང་གི་བདེན་དཔང་དེ་བདེན་པ་ཡིན་པའང་ཤེས་སོ།།
JOH 21:25 སྐྱབས་མགོན་ཡེ་ཤུས་མཛད་པའི་འཕྲིན་ལས་ཤིན་ཏུ་མང་ཡང་བདག་གི་བསམ་ཚུལ༌ལ། གལ་སྲིད་མཛད་འཕྲིན་ཐམས་ཅད་རེ་རེ་བཞིན་ཡི་གེར་བཀོད༌ན། བྲིས་པའི་དཔེ་ཆ་རྣམས་འཇིག་རྟེན་འདིར་ཡང་མི་ཤོང་ངོ་།། །།
ACT 1:1 ཀྱེ། ཐེ་འོ་ཕེ་ལུ༌ལགས། ངས་ བཀོད་པའི་མདོ་སྔ་མ༌ལས། སྐྱབས་མགོན་ཡེ་ཤུས་ཐོག་མར་དོན་ཅི་མཛད་པ་དང་ཆོས་ཅི་གསུངས་པ་ཐམས་ཅད་ནས༌བཟུང༌།
ACT 1:2 ཁོང་གིས་དམ་པའི་ཐུགས་ཉིད་ཀྱི་ངང་ནས་བདམས་པའི་སྐུ་ཚབ་པ༌རྣམས་ལ་བཀའ་གནང་བ༌དང༌། ཁོང་ཉིད་ནམ་མཁའི་ཞིང་ཁམས་སུ་དྲངས་པའི་ཉིན་མོའི་བར་གྱི་ལོ་རྒྱུས་ཡི་གེར་བཀོད་ཡོད༌ཅིང༌།
ACT 1:3 ཁོང་གིས་སྡུག་བསྔལ་མྱངས་རྗེས་རྟགས་མང་པོར་བརྟེན་ནས་རང་ཉིད་གསོན་པོར་སྐུ་ཚབ་པ་རྣམས་ལ་བསྟན༌ཏེ། ཉིན་བཞི་བཅུའི་རིང་ལ་མངོན་པར་མཛད་ཅིང་དཀོན་མཆོག་གི་རྒྱལ་སྲིད་སྐོར་གྱི་དོན་ཡང་གསུངས་སོ།།
ACT 1:4 དེ་ཡང་ཁོང་ཉིད་སྐུ་ཚབ་པ་རྣམས་དང་མཉམ་དུ་བཞུགས་པའི་དུས་ཤིག༌ལ། ཁོང་གིས་བཀའ་གནང་སྟེ་འདི་སྐད༌དུ། ཁྱོད་རྣམས་ཡེ་རུ་སཱ་ལེམ་དང་ཁ་མི་འབྲལ་བར་ཡབ་ཀྱིས་ཞལ་བཞེས་གནང་ཡོད་པ་སྟེ། ངས་སྔ་མོ་ནས་ཁྱོད་ཅག་ལ་སྨྲས་མྱོང་བའི་དོན་དེར་སྒུགས་ཤིག
ACT 1:5 ཡོ་ཧ་ནན་གྱིས་ཆུ་ཡིས་ཁྲུས་གསོལ་བྱས༌མོད། འོན་ཀྱང་ཉིན་མང་པོ་མ་འགོར་བར་ཁྱོད་རྣམས་ལ་དམ་པའི་ཐུགས་ཉིད་ཀྱིས་ཁྲུས་གསོལ་མཛད་པར་འགྱུར་ཞེས་གསུངས༌སོ།།
ACT 1:6 དེ་ནས་སྐྱབས་མགོན་ཡེ་ཤུ་དང་སྐུ་ཚབ་པ་རྣམས་ལྷན་དུ་འཛོམས་པའི་དུས་ལ་སྐུ་ཚབ་པ་རྣམས་ན༌རེ། གཙོ་བོ༌ལགས། ཁྱེད་ཀྱིས་ཡེས་ར་ཨེལ་གྱི་རྒྱལ་སྲིད་བསྐྱར་དར་མཛད་པའི་དུས་ནི་ད་ལྟ་ཡིན་ནམ་ཞེས་ཞུས་པ༌ལ།
ACT 1:7 ཁོང་གིས་འདི་སྐད༌དུ། ཡབ་ཀྱིས་རང་ཉིད་ཀྱི་དབང་ལ་བརྟེན་ནས་གཏན་དུ་ཁེལ་བའི་དུས་དང་ཟླ་ཚེས་ནི་ཁྱོད་རྣམས་ཀྱིས་ཤེས་མི་རུང༌ངོ་།།
ACT 1:8 འོན་ཀྱང་ཁྱོད་རྣམས་ཀྱི་སྟེང་ལ་དམ་པའི་ཐུགས་ཉིད་ཁྱབ་པ་ན་དབང་ཐོབ༌སྟེ། ཡེ་རུ་སཱ་ལེམ༌དང༌། ཡ་ཧུ་དཱ་དང༌སཱ་མར་ཡ་ཡུལ་ཐམས་ཅད༌དང༌། ས་མཐའི་བར་དུའང་བདག་ལ་དཔང་པོ་བྱེད་པར་འགྱུར་ཞེས་གསུངས་སོ།།
ACT 1:9 དེ་ནས་སྐྱབས་མགོན་ཡེ་ཤུས་དེ་སྐད་གསུངས་པ་དང་སྐུ་ཚབ་པ་རྣམས་ཀྱིས་ཁོང་ཉིད་ལ་ལྟ་བའི་དུས༌སུ། ཁོང་ཉིད་ནམ་མཁའི་ཞིང་ཁམས་སུ་དྲངས་པ༌དང༌། སྤྲིན་ཕུང་ཞིག་གིས་ཁོང་ཉིད་བསྒྲིབས་ཏེ་མི་མཐོང་བར་གྱུར་ཏོ།།
ACT 1:10 སྐྱབས་མགོན་ཡེ་ཤུ་ནམ་མཁའི་ཞིང་ཁམས་སུ་འཕག་བཞིན་པ༌དང༌། སྐུ་ཚབ་པ་རྣམས་ཀྱིས་མིག་ཅེ་རེར་ནམ་མཁར་ལྟ༌སྐབས། གློ་བུར་ཉིད་དུ་གོས་དཀར་པོ་གྱོན་པའི་མི་གཉིས་ ཁོ་རྣམས་ཀྱི་གམ་དུ་བྱུང་སྟེ་འདི་སྐད༌དུ།
ACT 1:11 ཀྱེ། ག་ལིལ་པ༌རྣམས། ཅིའི་ཕྱིར་ཡར་ལངས་ནས་ནམ་མཁར་ལྟ་བ་ཡིན༌ནམ། ཁྱོད་ཅག་གི་མདུན་ནས་ནམ་མཁའི་ཞིང་ཁམས་སུ་དྲངས་པའི་ཡེ་ཤུ་ཁོང་ཉིད༌ནི། ཁྱོད་རྣམས་ཀྱིས་ཁོང་ཉིད་ཇི་ལྟར་ནམ་མཁའི་ཞིང་ཁམས་སུ་དྲངས་པ་མཐོང་བ་བཞིན་སླར་ཡང་དེ་ལྟར་འབྱོན་པར་འགྱུར་ཞེས་གསུངས༌སོ།།
ACT 1:12 དེ་ནས་སྐུ་ཚབ་པ་རྣམས་ཡེ་རུ་སཱ་ལེམ་དང་ཐག་ཉེ་སར་ཡོད་པ་སྟེ། ངལ་གསོ་བའི་ཉིན་མོ་གཅིག་གི་ལམ་ཐག་ཙམ་གྱི་སྐྱུ་རུ་རའི་རི་བོ་ཞེས་པ་ནས་ཕྱིར་ཡེ་རུ་སཱ་ལེམ་དུ་ལོག༌པ་རེད།
ACT 1:13 དེ་རྣམས་ཡེ་རུ་སཱ་ལེམ་དུ་སླེབས་པ་དང་རང་ཉིད་སྡོད་སའི་ཐོག་ཁང་གི་ནང་དུ་ཕྱིན༌ཅིང༌། གནས་དེར་བསྡད་ཡོད་པ་རྣམས༌ནི། པེ་ཏྲོ༌དང༌། ཡོ་ཧ༌ནན། ཡ༌ཀོབ། ཨན་དྲི༌ཡཱ། ཕི་ལིབ། ཐོ༌མཱ། པཱར་ཐོ་ལོ༌མཱ། མད༌ཐཱ། ཨལ་ཕཱའི་བུ་ཡ་ཀོབ༌དང༌། བརྩོན་འགྲུས་ཅན་སི༌མོན། ཡ་ཀོབ་ཀྱི་བུ་ཡུ་དཱ་བཅས་ཡིན།
ACT 1:14 དེ་རྣམས་བུད་མེད་འགའ་དང་སྐྱབས་མགོན་ཡེ་ཤུའི་ཡུམ་སྟེ་མིར་ཡམ་དང༌། ཡང་སྐྱབས་མགོན་ཡེ་ཤུའི་གཅུང་པོ་རྣམས་དང་མཉམ་དུ་འགྲོགས༌ཤིང༌། ཀུན་གྱིས་ཉིན་རེ་བཞིན་བློ་སེམས་གཅིག་མཐུན་སྒོས་གསོལ་བ་འདེབས་བཞིན་བསྡད་དོ།།
ACT 1:15 དེའི་དུས༌སུ། སྤུན་ཟླ་བརྒྱ་དང་ཉི་ཤུ་ཙམ་ཚོགས་ཡོད༌ཅིང༌། པེ་ཏྲོ་དེ་རྣམས་ཀྱི་ཁྲོད་ནས་ཡར་ལངས་ཏེ་འདི་སྐད་དུ།
ACT 1:16 སྤུན་ཟླ༌རྣམས། སྔར་གསུང་རབ་ཀྱི་མདོ་ལས་དམ་པའི་ཐུགས་ཉིད་ཀྱིས་དཱ་བིད་ཀྱི་ངག་ལ་བརྟེན༌ནས། ཡུ་དཱའི་སྐོར་ལ་ལུང་བསྟན་པ་ནི་ངེས་པར་འགྲུབ་དགོས༌ཏེ། ཁོ་རང་སྐྱབས་མགོན་ཡེ་ཤུ་འཛིན་མཁན་རྣམས་ཀྱི་ལམ་ཁྲིད་པར་གྱུར།
ACT 1:17 སྤྱིར་ཁོ་རང་ནི་བདག་ཅག་གི་གྲས་སུ་གཏོགས་ཤིང་ལས་འགན་འདིར་ཞུགས་པའི་སྐལ་བའང་ཐོབ་པ་ཡིན་ཞེས་གསུངས་སོ།།
ACT 1:18 འོན༌ཀྱང༌། ཡུ་དཱས་ལས་ངན་པ་བྱས་པའི་རིན་དོད་ཀྱིས་ས་ཞིང་ཞིག་ཉོས་པ༌དང༌། ཕྱིས་སུ་གནས་དེར་ཁ་སར་བརྒྱབ་སྟེ་ཁོག་པ་བཀད་ཅིང་རྒྱུ་མའང་ཕྱིར་རླུགས་པ་རེད།
ACT 1:19 ཡེ་རུ་སཱ་ལེམ་དུ་གནས་པའི་མི་ཐམས་ཅད་ཀྱིས་དོན་དེ་ཤེས༌པས། དེ་རྣམས་ཀྱི་སྐད་རིགས་ལྟར་ས་ཞིང་དེའི་མིང་ལའང་ཧ་ཀེལ་ད་མཱ་ཞེས་བཏགས༌ཤིང༌། དོན་ནི་ཁྲག་གི་ས་ཞིང་ཞེས༌པ་ཡིན་ནོ།།
ACT 1:20 ཡང་པེ་ཏྲོས་འདི་སྐད་དུ། དེ་ནི་གསུང་མགུར་གྱི་མདོ་ལས་ཇི་སྐད༌དུ། དེ་ཡི་སྡོད་གནས་སྟོངས་ཤིང་སྟོང་བར༌ཤོག ། གནས་དེར་སུ་ཡང་གནས་པར་མ་གྱུར༌ཅིག ། ཅེས༌དང༌། ཡང་ཇི་སྐད༌དུ། མི་དེའི་གོ་ས་གཞན་ལ་འཐོབ་པར༌ཤོག ། ཅེས་བཀོད་པའི་ཕྱིར༌རོ།།
ACT 1:21 དེ་བས་གཙོ་བོ་ཡེ་ཤུ་དུས་ཀུན་ཏུ་བདག་ཅག་གི་ཁྲོད་ནས་འགྲོ་འོང་མཛད་པའི་སྐབས་ཏེ། ཡོ་ཧ་ནན་གྱིས་ཁྲུས་གསོལ་བྱས་པ་ནས༌བཟུང༌། གཙོ་བོ་ཡེ་ཤུ་བདག་ཅག་དང་ཁ་བྲལ་ནས་ནམ་མཁའི་ཞིང་ཁམས་སུ་དྲངས་པའི་བར་གྱི་དུས་དེར། རྟག་ཏུ་བདག་ཅག་དང་འགྲོགས་པ་རྣམས་ལས་གཅིག་འདེམས་དགོས་ཤིང་། དེ་ནི་བདག་ཅག་དང་མཉམ་དུ་སྐྱབས་མགོན་ཡེ་ཤུ་སླར་གསོན་པ་ལ་བདེན་དཔང་བྱེད་མཁན་དུ་འགྱུར་ཞེས་གསུངས་སོ།།
ACT 1:23 དེ་ནས་མི་ཚོགས་ཀྱིས་མིང་ལ་པཱར་ས་པཱའམ་ཡུས་ཐོ་ཞེས་འབོད་པའི་ཡོ་སེབ་དང་མད་ཐི་ཡཱ་གཉིས་བདམས་ཏེ་དཀོན་མཆོག་ལ།
ACT 1:24 ཀྱེ། གཙོ་བོ༌ལགས། ཁྱེད་ཀྱིས་མི་ཐམས་ཅད་ཀྱི་སེམས་མཁྱེན༌པས། རང་འགན་བསྐྱུར་ཏེ་རང་གནས་སུ་ཕྱིན་པའི་དད་ལོག་པ་ཡུ་དཱའི་ཚབ༌ཏུ། ཁྱེད་ཀྱིས་མི་འདི་གཉིས་ལས་སུ་ཞིག་ཁྱེད་ཀྱི་སྐུ་ཚབ་པའི་ལས་འགན་སྒྲུབ་མཁན་དུ་བདམས་པ་ངེད་ཅག་ལ་སྟོན་པར་མཛོད་ཅེས་གསོལ་བ་བཏབ་བོ།།
ACT 1:26 དེ་ནས་ཁོ་རྣམས་ཀྱིས་རྒྱན་བླངས་ནས་མད་ཐི་ཡཱ་ལ་བབས་པས་ཁོ་རང་ཡང་སྐུ་ཚབ་པ་བཅུ་གཅིག་པོའི་གྲས་སུ་བཞག༌གོ།
ACT 2:1 དེ་ནས་ལྔ་བཅུའི་དུས་ཆེན་ལ་སླེབས་པ༌ན། དད་ལྡན་ཐམས་ཅད་གནས་གཅིག་ཏུ་འཛོམས་པ༌དང༌།
ACT 2:2 གློ་བུར་ཉིད་དུ་ནམ་མཁའ་ནས་རླུང་ཆེན་གཡུགས་པ་ལྟ་བུའི་སྒྲ་ཞིག་བྱུང༌སྟེ། ཁོ་རྣམས་སྡོད་པའི་ཁང་པའི་ནང་དུ་ཁྱབ་པ་རེད།
ACT 2:3 དེ་ནས་མེ་ལྟ་བུའི་ལྕེ་རྣམས་མངོན་ཞིང་སོ་སོར་མི་རེ་རེའི་སྟེང་དུ་བབས་ཏེ་གནས་པ་ལ།
ACT 2:4 མི་དེ་ཐམས་ཅད་ལ་དམ་པའི་ཐུགས་ཉིད་ཀྱིས་ཁྱབ་པར་གྱུར༌ཏེ། དམ་པའི་ཐུགས་ཉིད་ཀྱིས་གནང་བའི་ནུས་པ་བཞིན་སྐད་རིགས་གཞན་དག་སྨྲས༌སོ།།
ACT 2:5 དེའི་དུས༌སུ། དཀོན་མཆོག་ལ་དད་མོས་ཡོད་པའི་ཡ་ཧུ་དཱ་པ་མང་པོ་ཞིག་གནམ་འོག་གི་རྒྱལ་ཁབ་སོ་སོ་ནས་ཡོང་སྟེ་ཡེ་རུ་སཱ་ལེམ་དུ་གནས་སོ།།
ACT 2:6 ཡང་དེ་དག་གིས་སྒྲ་གྲགས་པ་དེ་ཐོས་ནས་མི་མང་པོ་ལྷན་དུ་འདུས་ཤིང་། མི་རེ་རེས་དད་ལྡན་རྣམས་ཀྱིས་ཁོ་རྣམས་རང་རང་གི་སྐད་རིགས་སྨྲས་པ་ཐོས་པས་ཐེ་ཚོམ་སྐྱེས་པ་རེད།
ACT 2:7 མི་ཚོགས་ཧ་ལས་ཤིང་ངོ་མཚར་བར་གྱུར་ཏེ་ན༌རེ། གཏམ་བཤད་མཁན་འདི་རྣམས་ག་ལིལ་པ་མ་ཡིན༌ནམ།
ACT 2:8 ཁོ་རྣམས་ཀྱིས་རང་རེའི་ཕ་སྐད་སྨྲས་པ་ངེད་ཅག་གིས་ཐོས་པ་དེ་ཅི་ཡིན༌ནམ།
ACT 2:9 ངེད་རྣམས་ནི་པཱར་ཐ་པ་དང༌། མཱ་ཏི༌པ། ཨེ་ལཱམ༌པ་བཅས་དང་། ཡང་མོ་སོ་པའོ་ཐ་མེ་ཡཱ་དང་། ཡ་ཧུ་དཱ། ཀ་པ་ཏོ་ཡཱ། ཕོན་ཐུ། ཨེ་ཞི་ཡཱ།
ACT 2:10 ཕུ་ཀེ་ཡཱ། ཕཱམ་ཕིལ་ཡ། ཨེ་ཅིབ་བཅས་སུ་སྡོད་པ་ཡིན༌ཞིང༌། ཀི་རེ་ནེ་དང་ཉེ་བའི་ལེབ་ཡཱ་ས་ཁུལ་གྱི་མི༌དང༌། རོ་མཱ་ནས་ཡོང་བའི་སྐུ་མགྲོན་ཁྲོད་ཀྱི་ཡ་ཧུ་དཱ་པ་དང་ཡ་ཧུ་དཱ་པའི་ཆོས་ལུགས་ལ་ཞུགས་པའི་མི་རྣམས་དང་།
ACT 2:11 ཀཱ་རེ་ཏ་པ་དང་ཨ་རབ་པ་བཅས་ཡིན༌ཏེ། མི་དེ་རྣམས་ཀྱིས་རང་རེའི་ཕ་སྐད་སྨྲས་ནས་དཀོན་མཆོག་གི་མཛད་པ་རླབས་ཆེན་སྒྲོག་པ་ངེད་ཅག་གིས་ཐོས་ཞེས་སྨྲས༌ཤིང༌།
ACT 2:12 ཡང་མི་ཐམས་ཅད་དོན་དེར་ཧ་ལས་ཤིང་ཐེ་ཚོམ་སྐྱེ་བཞིན་ཕན་ཚུན་ན༌རེ། འདིའི་དོན་ཅི་ཡིན་ནམ་ཞེས་གླེང༌ནའང་།
ACT 2:13 མི་གཞན་འགའ་ན༌རེ། མི་དེ་རྣམས་རྒུན་ཆང་གསར་པས་བཟི་བ་རེད་ཅེས་འཕྱ་དམོད་བྱས༌སོ།།
ACT 2:14 དེ་ནས་པེ་ཏྲོ་དང་སྐུ་ཚབ་པ་གཞན་བཅུ་གཅིག་པོ་ཡར་ལངས་ཤིང་པེ་ཏྲོས་སྐད་ཆེན་པོས་མི་ཚོགས་ལ་འདི་སྐད༌དུ། ཡ་ཧུ་དཱའི་ཡུལ་མི་དང་ཡེ་རུ་སཱ་ལེམ་དུ་གནས་པའི་མི་རྣམས༌ཀུན། ཁྱོད་ཅག་གིས་དོན་འདི་རྟོགས་འོས་ཤིང་ངས་སྨྲས་པ་ལའང་རྣ་བ་བླགས་ནས་ཉོན༌ཅིག
ACT 2:15 ད་ལྟ་སྔ་དྲོའི་ཆུ་ཚོད་དགུ་ཙམ་ཡིན་པས་ཁྱོད་རྣམས་ཀྱིས་མི་འདི་དག་ཆང་གིས་བཟི་བ་རེད་བསམས་ནའང་དེ་བཞིན་མ་ཡིན༌ཏེ།
ACT 2:16 འདི་ནི་ལུང་སྟོན་པ་ཡོ་ཨེལ་བརྒྱུད་ནས་ཇི་སྐད༌དུ།
ACT 2:17 དེ་ཡང་དཀོན་མཆོག་ཉིད་ཀྱིས་འདི་སྐད༌དུ།། མཐའ་མའི་ཉིན་མོ་དག་ལ་སླེབས་དུས་སུ།། བདག་གིས་རང་གི་ཐུགས་ཉིད་ཀུན་ལ༌སྩོལ།། ཁྱོད་ཀྱི་བུ་དང་བུ་མོས་ལུང་བསྟན༌འཆད།། ཁྱོད་ཀྱི་གཞོན་ནུས་ངོ་མཚར་ཞལ་གཟིགས༌མཐོང༌།། ཁྱོད་ཀྱི་བགྲེས་པོར་རྨི་ལམ་འབྱུང་བ་ཡིན།།
ACT 2:18 དུས་དེར་བདག་གིས་རང་གི་ཐུགས་ཉིད༌མཆོག ། ང་ཡི་ཞབས་ཕྱི་དད་ལྡན་ཕོ་མོ༌ལ།། སྩོལ་ཞིང་དེ་ཚོས་ལུང་བསྟན་འཆད་པར༌ངེས།།
ACT 2:19 བདག་གིས་ནམ་མཁའི་དབྱིངས་སུ་ངོ་མཚར༌དང༌།། ས་གཞིར་ཁྱད་རྟགས་ཅི་ཡང་སྟོན་པར༌འགྱུར།། ཁྲག་དང་མེ་དང་དུད་སྨུག་འབྱུང་བར༌ངེས།།
ACT 2:20 ཁྲི་གདུགས་ཉི་མ་སྐད་ཅིག་ནག་པོར༌བསྒྱུར།། བསིལ་ཟེར་ཟླ་བ་སྐད་ཅིག་ཁྲག་ཏུ༌བསྒྱུར།། གཙོ་བོའི་ཉིན་མོ་ངོ་མཚར་འགངས་ཆེན༌དེ།། མ་སླེབས་གོང་དུ་དོན་ཆེན་དེ་རྣམས༌འབྱུང༌།།
ACT 2:21 དུས་དེར་གཙོ་བོའི་མཚན་ནས་འབོད་པ༌ཚོར།། ཁོང་གིས་སྐྱོབ་ཅིང་ཐར་པ་གནང་ངེས༌ཡིན།། ཞེས་གསུངས་པ་ལྟར་ལགས་སོ།།
ACT 2:22 ཡང་ཡེས་ར་ཨེལ་པ་རྣམས་ཀྱིས་ངའི་གཏམ་ལ་ཉོན༌ཅིག ནཱ་ཙ་རེལ་པ་ཡེ་ཤུ་ནི་དཀོན་མཆོག་གིས་ཁོང་བརྒྱུད་ནས་ཁྱོད་རྣམས་ཀྱི་ཁྲོད་དུ་ནུས་མཐུ༌དང༌། ངོ་མཚར་བའི་དོན༌དང༌། གྲུབ་རྟགས་བཅས་མཛད་དེ་བདེན་དཔང་མཛད་པའི་མི་དེ་ཡིན་ལ། ཁྱོད་ཅག་གིས་ཀྱང་ཤེས༌པ་ཡིན།
ACT 2:23 ཁོང་ནི་དཀོན་མཆོག་གི་དགོངས་པ་དང་མངོན་མཁྱེན་བཞིན་ཁྱོད་རྣམས་ལ་གཏད༌ཅིང༌། ཁྱོད་རྣམས་ཀྱིས་ཀྱང་ཁོང་ཉིད་ཁྲིམས་མེད་ལུགས་མེད་རྣམས་ཀྱི་ལག་ཏུ་སྤྲད་དེ་ཤིང་རྒྱ་གྲམ་གྱི་སྟེང་དུ་བརྡབས་ནས་བཀྲོངས༌མོད།
ACT 2:24 འོན་ཀྱང་དཀོན་མཆོག་གིས་ཁོང་ཉིད་འཆི་བའི་སྡུག་བསྔལ་ལས་བསྐྱབས་ཏེ་སླར་གསོན་པར་མཛད་དོ།། རྒྱུ་མཚན་ནི་འཆི་བས་ཁོང་ཉིད་གཟུང་མི་ནུས་པའི་ཕྱིར༌རོ།།
ACT 2:25 དེ་ཡང་དཱ་བིད་ཀྱིས་སྐྱབས་མགོན་ཡེ་ཤུའི་སྐོར་ལ་ཇི་སྐད༌དུ། བདག་གི་མིག་སྔར་གཙོ་བོ་ཁོང་ཉིད་རྒྱུན་དུ༌མཐོང༌།། བདག་གི་གཡས་སུ་བཞུགས་པས་ང་རང་གཡོ་བ༌མེད།།
ACT 2:26 དེའི་ཕྱིར་རང་སེམས་དགའ་ཞིང་ངག་ནས་སྤྲོ་བ༌བརྗོད།། བདག་གི་ལུས་པོ་འདི་ཡང་རེ་འདུན་ནང་དུ༌གནས།།
ACT 2:27 ང་ཡི་རྣམ་ཤེས་གཤིན་པོའི་གནས་སུ་མི་བསྐྱུར༌ཞིང༌།། ཁྱེད་ཀྱི་སྐྱེས་བུ་དམ་པའི་ལུས་པོའང་རུལ་མི༌འཇུག །
ACT 2:28 ཁྱེད་ཀྱིས་སྲོག་གི་འགྲོ་ལམ་བདག་ལ་བསྟན་མཛད༌པས།། ཁྱེད་ཀྱི་དྲུང་དུ་ང་རང་དགའ་བས་མྱོས་པར༌འགྱུར།། ཞེས་གསུངས་མྱོང༌ངོ༌།།
ACT 2:29 ཡང་སྤུན་ཟླ༌རྣམས། ངས་མེས་པོ་དཱ་བིད་ཀྱི་སྐོར་ཁྱོད་རྣམས་ལ་གསལ་པོར༌སྨྲ་བར་བྱ་སྟེ། ཁོང་སྐུ་གྲོངས་ནས་དུར་དུ་སྦས༌ཤིང༌། ཁོང་གི་དུར་ས་ད་ལྟའི་བར་དུ་བདག་ཅག་གི་གནས་འདིར་ཡོད།
ACT 2:30 དེའི་ཕྱིར་དཱ་བིད་ནི་ལུང་སྟོན་པ་ཞིག་ཡིན་ཞིང་དཀོན་མཆོག་གིས་དེ་སྔར་ཁོ་ལ་དམ་བཅས་པ༌དང༌། དཱ་བིད་ཀྱི་རིགས་རྒྱུད་ལས་བུ་གཅིག་ཁོའི་རྒྱལ་ཁྲིའི་སྟེང་དུ་བསྐོ་ངེས་པ་ཤེས༌པས།
ACT 2:31 ཁོས་མངོན་པར་རྟོགས་ཤིང་སྐྱབས་མགོན་མཱ་ཤི་ཀ་སླར་གསོན་པའི་སྐོར་གསུངས༌ཏེ། མཱ་ཤི་ཀ་ཁོང་ཉིད་གཤིན་པོའི་གནས་སུ་མ་བསྐྱུར་ལ་ལུས་པོའང་རུལ་དུ་མ་བཅུག་ཅེས༌པའོ།།
ACT 2:32 སྐྱབས་མགོན་ཡེ་ཤུ་ཁོང་ཉིད་ནི་དཀོན་མཆོག་གིས་སླར་གསོན་པར་མཛད་ཅིང་ངེད་ཅག་ཐམས་ཅད་ཀྱིས་ཀྱང་དོན་དེ་ལ་བདེན་དཔང་བྱེད༌པ་ཡིན།
ACT 2:33 དེའི༌ཕྱིར། དཀོན་མཆོག་གིས་སྐྱབས་མགོན་ཡེ་ཤུ་རང་གི་གཡས་ཕྱོགས་སུ་དྲངས་ཤིང་། ཁོང་ལ་རང་གི་ཡབ་ནས་ཞལ་བཞེས་གནང་ཡོད་པ་བཞིན་དམ་པའི་ཐུགས་ཉིད་ཐོབ་སྟེ། ཁྱོད་རྣམས་ཀྱིས་མཐོང་ཐོས་སུ་གྱུར་པ་བཞིན་ངེད་རྣམས་ལ་གནང་བ་ཡིན་ནོ།།
ACT 2:34 ཡང་དཱ་བིད་ནམ་མཁའི་ཞིང་ཁམས་སུ་འཕགས་མ་མྱོང་ཡང་འདི་སྐད༌དུ། དཀོན་མཆོག་གིས་ནི་ང་ཡི་གཙོ་བོ༌ལ།།
ACT 2:35 བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་སྟེགས་སུ་བསྒྱུར་བའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས་མྱོང༌ངོ༌།།
ACT 2:36 དེ་བས་ཡེས་ར་ཨེལ་ཁྱིམ་རྒྱུད་ཀྱི་མི་ཐམས་ཅད་ཀྱིས་དངོས་གནས་ཤེས་དགོས་པ་ནི་ཁྱོད་ཅག་གིས་ཤིང་རྒྱ་གྲམ་གྱི་སྟེང་དུ་བརྡབས་པའི་སྐྱབས་མགོན་ཡེ་ཤུ༌ནི། དཀོན་མཆོག་གིས་གཙོ་བོ་དང་སྐྱབས་མགོན་མཱ་ཤི་ཀ་རུ་བསྐོས་པ་ལགས་ཞེས་གསུངས༌སོ།།
ACT 2:37 དེ་ནས་མི་ཚོགས་ཀྱིས་གཏམ་དེ་ཐོས་པ་དང་སེམས་ལ་ན་ཟུག་སྐྱེས༌ཏེ། པེ་ཏྲོ་དང་སྐུ་ཚབ་པ་གཞན་རྣམས་ལ་འདི་ལྟར་དྲིས༌པ་སྟེ། སྤུན་ཟླ༌རྣམས། དེས་ན་ངེད་ཅག་གིས་ཅི་ཞིག་བྱ་འོས་སམ་ཞེས་པ༌ལ།
ACT 2:38 པེ་ཏྲོས་འདི་ལྟར༌གསུངས་པ་སྟེ། སྡིག་བསལ་འཐོབ་པའི༌ཕྱིར། ཁྱོད་ཅག་རེ་རེས་འགྱོད་བཤགས་བྱོས་ཤིག ཡེ་ཤུ་མཱ་ཤི་ཀའི་མཚན་ལ་བརྟེན་ནས་ཁྲུས་གསོལ་ལ་ཞུགས༌དང༌། དཀོན་མཆོག་གི་གནང་སྦྱིན་ཏེ་དམ་པའི་ཐུགས་ཉིད་འཐོབ་ངེས༌ཡིན།
ACT 2:39 ཅིའི་ཕྱིར་ཞེ༌ན། ཞལ་བཞེས་དེ་ནི་ཁྱོད་ཅག་དང་ཁྱོད་ཅག་གི་བུ་རབས་ཚ༌རྒྱུད། རྒྱང་རིང་དུ་གནས་པའི་མི་ཐམས་ཅད༌དེ། གཙོ་བོ་སྟེ་རང་རེའི་དཀོན་མཆོག་གིས་རང་ཉིད་ཀྱི་དྲུང་དུ་འབོད་པར་འགྱུར་བའི་མི་ཀུན་ལའང་གནང་བ་ཡིན་ཞེས་པའོ།།
ACT 2:40 ཡང་པེ་ཏྲོས་གཏམ་གཞན་མང་པོ་སྨྲས་ནས་བདེན་དཔང་བྱས༌ཏེ། ཁྱོད་ཅག་གིས་རང་ཉིད་བསྐྱབས་ནས་མི་རབས་ངན་པ་འདི་ལས་ཐར་བར་གྱུར་ཅིག་ཅེས་བསྐུལ།
ACT 2:41 དེ་ནས་པེ་ཏྲོའི་གཏམ་དང་དུ་བླངས་པ་རྣམས་ལ་ཁྲུས་གསོལ་ཐོབ༌ཅིང༌། ཉིན༌དེར་མི་གྲངས་སུམ་སྟོང་ཙམ་དད་ལྡན་གྱི་གྲས་སུ་ཞུགས༌སོ།།
ACT 2:42 ཡང་དེ་རྣམས་ཀྱིས་སྙིང་རུས་བསྐྱེད་ནས་རྟག་ཏུ་སྐུ་ཚབ་པ་རྣམས་ཀྱི་ཆོས་བསླབ་པ་དང༌། ཕན་ཚུན་ལ་འབྲེལ་འདྲིས་བྱས་པ༌དང༌། བག་ལེབ་ལོངས་སུ་སྤྱད༌ཅིང་། གསོལ་བ་བཏབ་ནས་བསྡད་དོ།།
ACT 2:43 སྐུ་ཚབ་པ་རྣམས་བརྒྱུད་ནས་ངོ་མཚར་བའི་དོན་དང་གྲུབ་རྟགས་མང་པོ་བསྟན༌པས། མི་ཐམས་ཅད་གུས་ཞུམ་ལྡན་པར་གྱུར་ཏོ།།
ACT 2:44 ཡང་དད་ལྡན་ཐམས་ཅད་ལྷན་དུ་གནས་ཤིང་དངོས་པོ་ཡོད་ཚད་སྤྱི་གཞུང་ལ་དབང་བར་བྱས༌ཏེ།
ACT 2:45 ནོར་རྫས་དང་ས་ཞིང་བཙོངས་ནས་སུ་ཞིག་ལ་དགོས་མཁོ་ཡོད་ན་དེ་བཞིན་སོ་སོར་བགོས་སོ།།
ACT 2:46 ད་དུང་ཁོ་རྣམས་ཀྱིས་ཉིན་རེ་བཞིན་བློ་སེམས་གཅིག་མཐུན་ངང་མཆོད་ཁང་དུ་འཛོམས་པ༌དང༌། ཁྱིམ་གང་དུའང་བག་ལེབ་ལོངས་སུ་སྤྱད༌ཅིང་། དགའ་སྤྲོ་དང་གཞུང་དྲང་གི་སེམས་བཅངས་ནས་མཉམ་དུ་ཟས་སྤྱད༌པ་དང་།
ACT 2:47 དཀོན་མཆོག་ལ་བསྟོད་ཅིང་བསྔགས་པ་དང་མི་ཐམས་ཅད་ཀྱང་ཁོ་རྣམས་ལ་དགའ་བར༌གྱུར། གཙོ་བོས་ཀྱང་ཉིན་རེ་བཞིན་ཁོང་གིས་བསྐྱབས་པ་རྣམས་དད་ལྡན་གྱི་གྲས་སུ་ཞུགས་པར་མཛད༌དོ།།
ACT 3:1 དེ་ནས་ཉིན་ཞིག་གི་ཕྱི་དྲོའི་ཆུ་ཚོད་གསུམ་གྱི་སྟེང་སྨོན་ལམ་འདེབས༌སྐབས། པེ་ཏྲོ་དང་ཡོ་ཧ་ནན་གཉིས་ཡར་མཆོད་ཁང་དུ་སོང་བ༌དང༌།
ACT 3:2 སྐྱེས་མ་ཐག་ནས་གྱོལ་པོ་ཡིན་པའི་མི་ཞིག་ཡོད་པ་དེ་མི་གཞན་རྣམས་ཀྱིས་ཉིན་རེ་བཞིན་ཁུར་ཡོང་སྟེ། མཆོད་ཁང་དུ་འགྲོ་མཁན་རྣམས་ལ་སློང་མོ་བྱེད་བདེ་བའི༌ཕྱིར། མཆོད་ཁང་གི་ལྟ་ན་སྡུག་པ་ཞེས་པའི་སྒོ་འགྲམ་དུ་འཇོག་པ་ཡིན།
ACT 3:3 ཁོས་པེ་ཏྲོ་དང་ཡོ་ཧ་ནན་གཉིས་མཆོད་ཁང་དུ་འགྲོ་གྲབས་ཡོད་པ་མཐོང་སྟེ་སློང་མོ་བྱས་པ༌ལ།
ACT 3:4 པེ་ཏྲོ་དང་ཡོ་ཧ་ནན་གཉིས་ཀྱིས་ཁོ་ལ་ཞིབ་ཏུ་བལྟས༌ཤིང༌། པེ་ཏྲོས་འདི་སྐད་དུ། ཁྱོད་ཀྱིས་ངེད་གཉིས་ལ་ལྟོས་ཤིག་ཅེས་གསུངས་པ༌དང༌།
ACT 3:5 མི་དེས་རང་ལ་ཅི་འཐོབ་པར་རེ་བ་བྱས་ནས་མིག་ཅེ་རེར་ཁོ་གཉིས་ལ་བལྟས་སོ།།
ACT 3:6 ཡང་པེ་ཏྲོས་འདི་སྐད་དུ། བདག་ལ་གསེར་དངུལ་སོགས་ཅི་ཡང༌མེད། གང་ཞིག་ཡོད་པ་དེ་ཁྱོད་ལ་སྟེར་བར༌བྱ་སྟེ། ནཱ་ཙ་རེལ་པ་ཡེ་ཤུ་མཱ་ཤི་ཀའི་མཚན་ལ་བརྟེན་ནས་ཁྱོད་ཡར་ལོངས་ལ་སྐྱོད་ཅིག་ཅེས་གསུངས་པ༌དང༌།
ACT 3:7 མི་དེའི་ལག་གཡས་པར་འཇུས་ནས་ཡར་བསྐྱོར་ཏེ་ལངས་སུ་བཅུག་མ༌ཐག ཁོའི་རྐང་པ་དང་རྐང་པའི་ཚིགས་རྡོག་ལ་ཤེད་རྒྱས་པར་གྱུར༌པས།
ACT 3:8 ཁོ་རང་ཡར་ལྡིང་སྟེ་ལངས་ནས་འགྲོ་ཐུབ་པར་གྱུར་པ༌དང༌། ཡང་པེ་ཏྲོ་དང་ཡོ་ཧ་ནན་གཉིས་དང་འགྲོགས་ནས་མཆོངས་ལྡིང་བྱེད་བཞིན་འགྲོ་བ་དང་དཀོན་མཆོག་ལ་བསྟོད་བསྔགས་བརྗོད་བཞིན་མཆོད་ཁང་དུ་སོང༌ངོ་།།
ACT 3:9 དེ་ནས་མི་ཀུན་གྱིས་ཀྱང་ཁོ་རང་འགྲོ་བཞིན་དཀོན་མཆོག་ལ་བསྟོད་བསྔགས་བརྗོད་པ་མཐོང་བ༌དང༌།
ACT 3:10 ཁོ་ནི་སྔོན་ཆད་མཆོད་ཁང་གི་ལྟ་ན་སྡུག་པ་ཞེས་པའི་སྒོ་འགྲམ་དུ་བཙོག་སྟེ་སློང་མོ་བྱེད་བཞིན་པའི་མི་དེ་ཡིན་པ་ཤེས༌ནས། ཁོ་རང་ལ་ཅི་ཞིག་བྱུང་བར་ཤིན་ཏུ་ཧ་ལས་ཤིང་ངོ་མཚར་བར་གྱུར༌ཏོ།།
ACT 3:11 དེ་ནས་མི་དེས་སོ་ལོ་མོན་གྱི་ཁྱམས་ར་ནས་པེ་ཏྲོ་དང་ཡོ་ཧ་ནན་གཉིས་ལ་འཇུས་ཏེ་འགྲོ་བཞིན་པའི་སྐབས༌སུ། མི་ཐམས་ཅད་ཁོ་རྣམས་ཀྱི་གམ་དུ་བརྒྱུགས་ཡོང་བ་དང་ཤིན་ཏུ་ཧ་ལས་པ་རེད།
ACT 3:12 པེ་ཏྲོས་དོན་དེ་མཐོང་ནས་མི་རྣམས་ལ་འདི་སྐད་དུ། ཡེས་ར་ཨེལ་པ༌རྣམས། ཅིའི་ཕྱིར་དོན་འདི་ངོ་མཚར་ཅན་དུ་བརྩིས༌སམ། ཅིའི་ཕྱིར་ངེད་ཅག་ལ་ཞིབ་ཏུ༌ལྟའམ། ངེད་གཉིས་ཀྱིས་རང་གི་ནུས་མཐུའམ་དད་སེམས་ལ་བརྟེན་ནས་ཁོ་རང་འགྲོ་རུ་བཅུག་པ་རེད་སྙམ༌མམ།
ACT 3:13 ཨབ་ར་ཧམ༌དང༌། ཨི༌སཱག ཡ་ཀོབ་བཅས་ཀྱི་དཀོན་མཆོག་ནི་བདག་ཅག་གི་ཕ་མེས་ཡང་མེས་ཀྱི་དཀོན་མཆོག་ཡིན༌ཞིང༌། ཁོང་གིས་རང་གི་ཞབས་ཕྱི་པ་ཡེ་ཤུ་གཟི་བརྗིད་དང་ལྡན་པར་མཛད། འོན་ཀྱང་ཁྱོད་ཅག་གིས་ཁོང་ཉིད་པི་ལ་ཏུ་ཡི་ལག་ཏུ་སྤྲད་ཅིང་པི་ལ་ཏུས་ཁོང་ཉིད་བཙོན་ལས་དགྲོལ་བར་ཐག་བཅད་ཀྱང་ཁྱོད་ཅག་གིས་དེའི་མདུན་ནས་ཁོང་ཉིད་རིང་དུ་དོར༌བ་ཡིན།
ACT 3:14 ཁྱོད་ཅག་གིས་སྐྱེས་བུ་རྣམ་དག་དེ་ཉིད་དོར་ཅིང་། ཉེས་ཅན་ལག་དམར་བཙོན་ལས་གཏོང་བར་ཞུས་པ༌དང༌།
ACT 3:15 ཚེ་སྲོག་སྐྲུན་མཁན་དེ་ཉིད་གསོད་དུ་བཅུག་གོ། འོན་ཀྱང་དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་ཅིང་ངེད་རྣམས་ཀྱིས་ཀྱང་དོན་དེར་བདེན་དཔང་བྱེད་པ༌ཡིན།
ACT 3:16 ཁོང་གི་མཚན་ལ་དད་པ་བྱས་པས་ཁོང་གི་མཚན་གྱིས་ཁྱོད་ཅག་གིས་མཐོང་ཞིང་ངོ་ཤེས་པའི་མི་འདི་ལུས་སྟོབས་རྒྱས་པར་མཛད་པ༌དང༌། ཁོང་ཉིད་བརྒྱུད་ནས་བྱུང་བའི་དད་པས་ཁྱོད་ཅག་གི་མིག་མདུན་ནས་མི་འདི་ཡོངས་སུ་སོས་པར་མཛད༌དོ།།
ACT 3:17 སྤུན་ཟླ༌རྣམས། ཁྱོད་རྣམས་ཀྱིས་དོན་དེ་ཅི་ཡིན་མ་ཤེས་པར་བྱས་པ༌དང༌། ཁྱོད་ཅག་གི་འགོ་དཔོན་གྱིས་ཀྱང་དེ་ལྟར་བྱས་པ་བདག་གིས་ཤེས་སོ།།
ACT 3:18 འོན་ཀྱང་དཀོན་མཆོག་གིས་སྔར་ནས་ལུང་སྟོན་པ་ཐམས་ཅད་ཀྱི་ངག་བརྒྱུད་ནས་ཁོང་གི་མཱ་ཤི་ཀས་སྡུག་བསྔལ་མྱང་དགོས་ཞེས་ལུང་བསྟན་གནང་བ་བཞིན་ཁོང་གིས་དེ་ལྟར་བསྒྲུབས༌པ་ཡིན།
ACT 3:19 དེ་བས་ཁྱོད་ཅག་གི་སྡིག་པ་བསལ༌ཕྱིར། འགྱོད་བཤགས་བྱས་ནས་ཕྱིར་འཁོར༌ཅིག
ACT 3:20 དེ་ནི་ངལ་གསོ་བའི་དུས་དེ་གཙོ་བོའི་སྤྱན་སྔ་ནས་སླེབ་པར་འགྱུར༌ཞིང༌། ཁོང་གིས་ཁྱོད་ཅག་གི་དོན་དུ་བསྐོས་པའི་སྐྱབས་མགོན་མཱ་ཤི་ཀ་སྟེ་ཡེ་ཤུའང་མངག་སྲིད་པའི་ཕྱིར༌རོ།།
ACT 3:21 སྐྱབས་མགོན་ཡེ་ཤུ་ནི་འཇིག་རྟེན་གྱི་དངོས་པོ་མཐའ་དག་བསྐྱར་དར་མཛད་པའི་དུས་དེ་སླེབས་པའི་བར་དུ་ནམ་མཁའི་ཞིང་ཁམས་སུ་བཞུགས་དགོས་པ༌དང༌། དེ་ནི་དཀོན་མཆོག་གིས་གནའ་བོའི་དུས་ནས་ལུང་སྟོན་པ་དམ་པ་རྣམས་ཀྱི་ངག་བརྒྱུད་ནས་གསུངས་པ་བཞིན་ཡིན་ནོ།།
ACT 3:22 མོ་ཤེ་ཡིས་ཇི་སྐད༌དུ། གཙོ་བོ་དཀོན་མཆོག་གིས་ཁྱོད་ཅག་གི་དོན་དུ་བདག་དང་འདྲ་བའི་ལུང་སྟོན་པ་ཞིག་ཁྱོད་ཅག་གི་སྤུན་ཟླ་རྣམས་ཀྱི་ཁྲོད་དུ་བཞུགས་པར་མཛད༌ཅིང༌། ཁོང་གིས་ཅི་གསུངས་པ་ཐམས་ཅད་ལ་ཁྱོད་ཅག་གིས་ཉོན༌ཅིག
ACT 3:23 ལུང་སྟོན་པ་དེའི་གསུང་ལ་མི་ཉན་པ་ཐམས་ཅད་མི་སྡེའི་ཁྲོད་ནས་བཏོན་ཏེ་རྩ་མེད་དུ་གཏོང་བར་ངེས་ཞེས་གསུངས་སོ།།
ACT 3:24 སཱ་མུ༌ཨེལ་དང་ཁོང་གི་རྗེས་སུ་བྱོན་པའི་ལུང་སྟོན་པ་ཐམས་ཅད་ཀྱིས་ཀྱང་ལུང་བསྟན་གནང་བ་ལས་ཉིན་མོ་དེ་རྣམས་ཀྱི་སྐོར་གླེང་མྱོང༌།
ACT 3:25 ཁྱོད་ཅག་ནི་ལུང་སྟོན་པ་རྣམས་ཀྱི་བུ་རབས་ཚ་རྒྱུད་ཡིན༌ལ། དཀོན་མཆོག་གིས་ཁྱོད་ཅག་གི་ཕ་མེས་ཡང་མེས་ལ་བཞག་པའི་ཞལ་ཆད་ཐོབ་མཁན་ཡང་ཡིན༌ཏེ། ཁོང་གིས་ཨབ་ར་ཧམ་ལ་འདི་སྐད༌དུ། ཁྱོད་ཀྱི་བུ་རྒྱུད་བརྒྱུད་ནས་ས་སྟེང་གི་མི་རིགས་ཐམས་ཅད་ལ་བྱིན་རླབས་འཐོབ་པར་འགྱུར་ཞེས་གསུངས་པ༌བཞིན།
ACT 3:26 དཀོན་མཆོག་གིས་རང་ཉིད་ཀྱི་ཞབས་ཕྱི་པ་འབྱོན་པར་མཛད་ཅིང་། ཁྱོད་ཅག་ཐམས་ཅད་རང་རང་གི་སྤྱོད་ངན་ལས་སེམས་བསྒྱུར་བར་མཛད་པའི་སྒོ་ནས་ཐོག་མར་ཁྱོད་རྣམས་ལ་བྱིན་གྱིས་རླབས་པར་མངགས་པ་ཡིན་ཞེས་གསུངས༌སོ།།
ACT 4:1 དེ་ཡང་སྐུ་ཚབ་པ་པེ་ཏྲོ་དང་ཡོ་ཧ་ནན་གཉིས་ཀྱིས་མི་རྣམས་ལ་དེ་ལྟར་བརྗོད་པའི་དུས༌སུ། མཆོད་དཔོན་རྣམས་དང་མཆོད་ཁང་གི་སྲུང་དམག་འགོ་དཔོན༌དང༌། སཱ་ཅུ་སེ་པ་དག་ཀྱང་ཁོང་གཉིས་ཀྱི་དྲུང་དུ་སླེབས༌པ་རེད།
ACT 4:2 ཁོང་གཉིས་ཀྱིས་མི་རྣམས་ལ་ཆོས་གསུངས༌ཤིང༌། སྐྱབས་མགོན་ཡེ་ཤུར་བརྟེན་ནས་གཤིན་པོ་རྣམས་སླར་གསོན་པར་འགྱུར་བའི་དོན་དེ་བསྒྲགས༌པས། དཔོན་རིགས་རྣམས་སུན་སྣང་ཆེན་པོ་སྐྱེས༌ཏེ།
ACT 4:3 ཁོང་གཉིས་བཟུང་ཞིང་མཚན་མོའི་དུས་ལ་སླེབས་པས་ཕྱི་ཉིན་བར་དུ་བཙོན་ལ་བཅུག་གོ།
ACT 4:4 འོན་ཀྱང་ཆོས་ལ་ཉན་མཁན་རྣམས་ལས་མི་མང་པོ་དད་པར་གྱུར༌ཏེ། དད་ལྡན་པ་སྐྱེས་པའི་གྲངས་ནི་ལྔ་སྟོང་ཙམ་ལ་སླེབས༌སོ།།
ACT 4:5 དེའི་ཕྱི༌ཉིན། འགོ་དཔོན་དང་རྒན༌པོ། མཁན་པོ་བཅས་རྣམས་ཡེ་རུ་སཱ་ལེམ་དུ་འདུས༌ཤིང༌།
ACT 4:6 མཆོད་དཔོན་ཆེན་པོ་ཨ་ནཱ་སི༌དང༌། ཀ་ཡ༌ཕཱ། ཡོ་ཧ༌ནན། ཨ་ལིག་སན་དིར་བཅས༌དང༌། མཆོད་དཔོན་ཆེན་པོའི་ཉེ་འབྲེལ་གཞན་རྣམས་ཀྱང་གནས་དེར་ཡོད༌པ་རེད།
ACT 4:7 དེ་དག་གིས་སྐུ་ཚབ་པ་ཁོང་གཉིས་དཀྱིལ་དབུས་སུ་བསླངས༌ཏེ། ཁྱོད་གཉིས་ཀྱིས་དབང་གང༌ངམ། ཡང་ན་སུའི་མིང་ལ་བརྟེན་ནས་དོན་འདི་བྱས་པ་ཡིན་ནམ་ཞེས་དྲིས་སོ།།
ACT 4:8 དེ་ནས་པེ་ཏྲོ་ལ་དམ་པའི་ཐུགས་ཉིད་ཀྱིས་ཁྱབ་པར་གྱུར་ཏེ་འདི་སྐད་དུ། འབངས་མི་སེར་གྱི་འགོ་དཔོན་དང་རྒན་པོ༌རྣམས།
ACT 4:9 དེ་རིང་ངེད་གཉིས་ཀྱིས་དབང་བོ་སྐྱོན་ཅན་གྱི་ལུས་སྟེང་དུ་བསྒྲུབས་པའི་དོན་བཟང་གི་རྐྱེན་གྱིས། མི་འདི་ཅི་ལྟར་སོས་པར་རྩད་གཅོད་བྱེད་ན།
ACT 4:10 ཁྱོད་ཅག་གི་མིག་མདུན་དུ་ལངས་ནས་སྡོད་པའི་མི་འདི༌ནི། ཁྱོད་ཅག་གིས་ཤིང་རྒྱ་གྲམ་གྱི་སྟེང་དུ་བརྡབས་པ༌དང༌། དཀོན་མཆོག་གིས་གྲོངས་པ་ནས་སླར་གསོན་པར་མཛད་པའི་ནཱ་ཙ་རེལ་པ་ཡེ་ཤུ་མཱ་ཤི་ཀའི་མཚན་ལ་བརྟེན་ནས་ལུས་ཁམས་བདེ་བར་གྱུར་པ་ཁྱོད་ཅག་དང་བཅས་པའི་ཡེས་ར་ཨེལ་གྱི་མི་ཐམས་ཅད་ཀྱིས་ཤེས་དགོས་སོ།།
ACT 4:11 སྐྱབས་མགོན་ཡེ་ཤུ་ནི། ཁྱོད་ཅག་བཟོ་བ་རྣམས་ཀྱིས་སྤངས་པའི་རྡོ་ནི་ཁང་པའི་ཟུར་གྱི་རྨང་རྡོར་གྱུར་ཅེས་པ་དེ་ཡིན།
ACT 4:12 ཁོང་ཉིད་ལས་གཞན་ཐར་པ་མེད་དེ། རྒྱུ་མཚན་ནི་གནམ་འོག་ཀུན་ཏུ་ཁོང་ལས་གཞན་བདག་ཅག་ཐར་བར་མཛད་ནུས་པའི་མིང་ཞིག་མིའི་རིགས་ལ་གནང་མེད་པའི་ཕྱིར་ཡིན་ཞེས་གསུངས༌སོ།།
ACT 4:13 དེ་ནས་དཔོན་རིགས་རྣམས་ཀྱིས་པེ་ཏྲོ་དང་ཡོ་ཧ་ནན་གཉིས་ཀྱི་སྤོབས་པ་མཐོང་བ༌དང༌། ཡང་ཁོང་གཉིས་ནི་རིག་པ་མ་བསླབས་པ་དང་མི་སེར་ཡིན་པ་ཤེས་ནས་ངོ་མཚར་བར་གྱུར་ཅིང༌། དེ་གཉིས་སྐྱབས་མགོན་ཡེ་ཤུ་དང་ལྷན་དུ་འགྲོགས་མྱོང་བའང་གསལ་པོར་རྟོགས་སོ།།
ACT 4:14 ཡང་ནད་གསོས་པའི་མི་དེའང་ཁོང་གཉིས་ཀྱི་གམ་དུ་ལངས་སྡོད་པ་མཐོང༌སྟེ། དེ་དག་གིས་སྐྱོན་ཅི་ཡང་བརྗོད་མ་ནུས་སོ།།
ACT 4:15 དེ་ནས་ཁོང་གཉིས་དཔོན་རིགས་ཚོགས་པའི་ཚོགས་ར་ལས་ཕྱིར་ཕུད་ཅིང་ན༌རེ།
ACT 4:16 བདག་ཅག་གིས་མི་འདི་གཉིས་ལ་ཅི༌བྱའམ། ཁོ་གཉིས་ཀྱིས་དངོས་གནས་ངོ་མཚར་བའི་མཛད་པ་མངོན་གསལ་དུ་བསྟན༌ཅིང་། ཡེ་རུ་སཱ་ལེམ་དུ་གནས་པའི་མི་ཐམས་ཅད་ཀྱིས་ཀྱང་དོན་དེ་ཤེས་པས་བདག་ཅག་གིས་དེ་ལྟར་མ་བྱུང་ཟེར་མི་ནུས།
ACT 4:17 འོན་ཀྱང་དོན་འདི་དམངས་ཁྲོད་དུ་སྔར་ལས་ལྷག་པར་ཁྱབ་ཉེན་ཡོད་པས། ཁོ་གཉིས་ལ་ཕྱིན་ཆད་མི་དེའི་མིང་ལ་བརྟེན་ནས་མི་གཞན་ལ་གླེང་མོལ་མི་བྱེད་པའི་ཕྱིར་ནན་གྱིས་བསྐུལ་བར་བྱའོ་ཞེས་ཕན་ཚུན་གྲོས་བསྡུར་བྱས་སོ།།
ACT 4:18 དེ་ནས་ཁོང་གཉིས་བོས༌ཏེ། ཡེ་ཤུའི་མིང་ལ་བརྟེན་ནས་མི་གཞན་ལ་ནམ་ཡང་གླེང་མོལ་བྱེད་པའམ་ཆོས་གསུང་མི་ཆོག་པའི་བཀའ་བབས༌པ་རེད།
ACT 4:19 འོན༌ཀྱང༌། པེ་ཏྲོ་དང་ཡོ་ཧ་ནན་གཉིས་ཀྱིས་འདི་སྐད་དུ། དཀོན་མཆོག་གི་བཀའ་ལ་མི་ཉན་པར་ཁྱོད་ཅག་གི་གཏམ་ལ་ཉན་པ་ནི་དཀོན་མཆོག་གི་སྤྱན་སྔར་འོས་འཚམ་ཡིན་མིན་ཁྱོད་ཅག་གིས་སོམས༌ཤིག
ACT 4:20 ངེད་གཉིས་ཀྱིས་གང་ཞིག་མཐོང་ཞིང་ཐོས་པ་ཐམས་ཅད་མི་བཤད་ཐབས་མེད་ཡིན་ཞེས་གསུངས་སོ།།
ACT 4:21 དེ་ནས་དཔོན་རིགས་རྣམས་ཀྱིས་ཁོང་གཉིས་ལ་ཡང་བསྐྱར་འཇིགས་བསྐུལ་རྗེས་ཕྱིར་བཏང༌། རྒྱུ་མཚན་ནི་མི་རྣམས་ཀྱིས་དོན་ངོ་མཚར་ཅན་དེ་མཐོང་ནས་དཀོན་མཆོག་ལ་བསྟོད་བསྔགས་ཕུལ་བས་དཔོན་རིགས་རྣམས་ཀྱང་མི་རྣམས་ལ་འཇིགས་པ་དང་ཁོང་གཉིས་ལ་ཉེས་ཆད་གཅོད་པའི་རྒྱུ་ཡང་མ་རྙེད་པའི་ཕྱིར༌ཡིན།
ACT 4:22 ངོ་མཚར་བའི་ལས་ཀྱིས་གསོས་པའི་མི་དེ་ནི་ལོ་བཞི་བཅུ་ལྷག་ལ་སོན་པ་ཞིག་ཡིན༌ནོ།།
ACT 4:23 དེ་ནས་པེ་ཏྲོ་དང་ཡོ་ཧ་ནན་གཉིས་ཕྱིར་བཏང་བ་དང་ཆོས་གྲོགས་རྣམས་ཀྱི་གམ་དུ་ཕྱིན༌ཏེ། མཆོད་དཔོན་ཆེན་པོ་དག་དང་རྒན་པོ་རྣམས་ཀྱིས་ཅི་སྨྲས་པ་ཐམས་ཅད་ཁོ་རྣམས་ལ་སྨྲས་སོ།།
ACT 4:24 ཁོ་རྣམས་ཀྱིས་ཀྱང་གཏམ་དེ་ཐོས་ནས་བློ་སེམས་གཅིག་མཐུན་སྒོས་སྐད་གསང་མཐོན་པོས་དཀོན་མཆོག་ལ་འདི་སྐད༌དུ། ཀྱེ། གཙོ་བོ༌ལགས། ཁྱེད་ནི་ནམ་མཁའ་དང་ས་གཞི་རྒྱ་མཚོ་བཅས་པ་དང་དེ་དག་ཏུ་ཡོད་པ་ཐམས་ཅད་འགོད་མཁན་ལགས།
ACT 4:25 ཁྱེད་ཀྱིས་དམ་པའི་ཐུགས་ཉིད་ཀྱི་སྒོ་ནས་ཉིད་ཀྱི་ཞབས་ཕྱི་པ༌སྟེ། ངེད་ཅག་གི་མེས་པོ་དཱ་བིད་ཀྱི་ངག་བརྒྱུད་ནས་ཇི་སྐད༌དུ། ཅིའི་ཕྱིར་ཕྱི་ཕྱོགས་པ་རྣམས་འཁོན་ཅིང༌འཛིང༌།། ཅིའི་ཕྱིར་མི་རྣམས་དོན་མེད་ཐབས་ལ༌འཇུག །
ACT 4:26 དེ་ཡང་གཙོ་བོ་དཀོན་མཆོག་ཁོང་ཉིད༌དང༌།། ཁོང་གིས་བསྐོས་པའི་སྐྱབས་མགོན་མཱ་ཤི༌ཀར།། རྒོལ་ཕྱིར་འཇིག་རྟེན་སྐྱོང་བའི་རྒྱལ་པོ༌དང༌།། མངའ་བདག་དཔོན་རིགས་རྣམས་ཀྱང་ལྷན་དུ༌འདུས།། ཞེས་གསུངས་མྱོང༌ངོ༌།།
ACT 4:27 དེ་བཞིན་ཧེ་རོ་དཱ་དང་ཕོན་ཏིའུ་པི་ལ༌ཏུ། ཕྱི་ཕྱོགས་པ་དང་ཡེས་ར་ཨེལ་གྱི་མི་དང་བཅས་པ་དངོས་གནས་གྲོང་ཁྱེར་འདིར་འདུས་ཏེ་ཁྱེད་ཀྱིས་བྱུགས་པའི་ཞབས་ཕྱི་དམ་པ་ཡེ་ཤུ་ལ་རྒོལ༌བཞིན་ནོ།།
ACT 4:28 དེ་ནི་ཁྱེད་ཀྱི་དབང་དང་ཐུགས་དགོངས་ཀྱིས་དོན་ཆེན་གང་དེ་སྔར་ནས་འབྱུང་བར་ཐག་གིས་བཅད་པ་བཞིན་དེ་རྣམས་ཀྱིས་ཀྱང་འགྲུབ་པར་བྱས་པ་ཡིན།
ACT 4:29 ད་ལྟ་དེ་རྣམས་ཀྱིས་ངེད་ཅག་ལ་འཇིགས་བསྐུལ་བས་གཙོ་བོ་ཁྱེད་ཀྱིས་གཟིགས་པར༌ཞུ། ཁྱེད་ཀྱིས་རང་གི་ཞབས་ཕྱི་པ་ངེད་རྣམས་ལ་ཁྱེད་ཀྱི་བཀའ་སྒྲོག་པའི་སྤོབས་པ་གནང་བ༌དང༌།
ACT 4:30 ཕྱག་བརྐྱངས་ནས་ནད་རིགས་སྣ་ཚོགས་འཇོམས༌ཤིང༌། གྲུབ་རྟགས་དང་ངོ་མཚར་ཅན་གྱི་དོན་རྣམས་རང་གི་ཞབས་ཕྱི་དམ་པ་ཡེ་ཤུའི་མཚན་ལ་བརྟེན་ནས་འགྲུབ་པར་ཤོག་ཅེས་གསོལ་བ་བཏབ་བོ།།
ACT 4:31 ཁོ་རྣམས་ཀྱིས་དེ་ལྟར་གསོལ་བ་བཏབ་རྗེས་འཚོགས་སའི་གནས་དེ་གཡོ་བར་གྱུར་པ་དང༌། མི་དེ་ཐམས་ཅད་ལའང་དམ་པའི་ཐུགས་ཉིད་ཀྱིས་ཁྱབ་པར་གྱུར་པས་སྤོབས་པ་བསྐྱེད་ནས་དཀོན་མཆོག་གི་བཀའ་བསྒྲགས༌སོ།།
ACT 4:32 དེ་ཡང་དད་ལྡན་དེ་ཐམས་ཅད་བློ་སེམས་གཅིག་མཐུན་ཡིན་པ༌དང༌། སུས་ཀྱང་རང་གི་རྒྱུ་རྫས་རང་ཉིད་ཀྱི་ཡིན་མི་ཟེར་བར་དེ་ཐམས་ཅད་སྤྱི་གཞུང་གིས་སྤྱོད༌པ་རེད།
ACT 4:33 སྐུ་ཚབ་པ་རྣམས་ཀྱིས་ནུས་མཐུ་ཆེན་པོའི་ངང་ནས་གཙོ་བོ་ཡེ་ཤུ་སླར་གསོན་པའི་དོན་དེ་ལ་བདེན་དཔང་བྱས་པ༌དང༌། མི་ཐམས་ཅད་ལའང་ཐུགས་རྗེ་ཆེན་པོ་ཐོབ།
ACT 4:34 ཡང་ཁོ་རྣམས་ཀྱི་ཁྲོད་དུ་དབུལ་པོ་གཅིག་ཀྱང་མེད༌དེ། རྒྱུ་མཚན་ནི་རང་ལ་དབང་བའི་ས་ཞིང་དང་ཁང་པ་ཐམས་ཅད་བཙོངས༌ཏེ་རིན་དོད་ཚང་མ་ཁྱེར་ཡོང་ནས།
ACT 4:35 སྐུ་ཚབ་པ་རྣམས་ཀྱི་ཞབས་དྲུང་དུ་བཞག་པ༌དང༌། ཁོང་རྣམས་ཀྱིས་ཀྱང་སུ་ཞིག་ལ་དགོས་མཁོ་ཡོད་ན་དེ་བཞིན་སོ་སོར་བགོས་སོ།།
ACT 4:36 གནས་དེར་མིང་ལ་ཡོ་སེབ་བྱ་བ་ཀིབ་རིས་ནས་སྐྱེས་པའི་ལེ་ཝི་པ་ཞིག་ཡོད་པ་ལ་སྐུ་ཚབ་པ་རྣམས་ཀྱིས་པཱར་ན་པཱ་ཞེས་འབོད་ཅིང་། དོན་ནི་སེམས་གསོ་མཁན་ཞེས༌པ་ཡིན།
ACT 4:37 ཁོ་ལ་ས་ཞིང་ཡོད་པའང་བཙོངས་ཏེ་རིན་ཚང་མ་སྐུ་ཚབ་པ་རྣམས་ཀྱི་ཞབས་དྲུང་དུ་བཞག་གོ།
ACT 5:1 དེ་ཡང་ཨ་ནན་ཡཱ་ཟེར་བའི་མི་ཞིག་ཡོད་པ་དེས་རང་གི་ཆུང་མ་སབ་ཕི་རཱ་དང་མཉམ་དུ་ས་ཞིང་བཙོངས༌ཤིང༌།
ACT 5:2 ས་རིན་ཁག་ཅིག་རང་ལ་བཞག་ཅིང་ཆུང་མས་ཀྱང་དོན་དེ་ཤེས༌ལ། ས་རིན་ཁག་གཞན་པ་ཁྱེར་ཡོང་ནས་སྐུ་ཚབ་པ་རྣམས་ཀྱི་ཞབས་དྲུང་དུ་བཞག་གོ།
ACT 5:3 དེ་ནས་པེ་ཏྲོས་འདི་སྐད༌དུ། ཨ་ནན༌ཡཱ། ཁྱོད་ཀྱི་སེམས་ནི་བདུད་སཱ་ཏན་གྱིས་ཁྱབ༌སྟེ། དམ་པའི་ཐུགས་ཉིད་ལ་རྫུན་སྨྲས་ཤིང་ས་རིན་ཁ་ཤས་རང་ལ་བཞག་པ་དེ་ཅི༌ཡིན།
ACT 5:4 ས་ཞིང་མ་བཙོངས་པའི་སྔོན་དུ་ཁྱོད་རང་གི་ཡིན༌ཞིང༌། བཙོངས་རྗེས་ས་རིན་ཡང་ཁྱོད་ལ་དབང་བ་མ་ཡིན༌ནམ། ཁྱོད་ཀྱིས་སེམས་ལ་འདི་ལྟར་དྲན་པ་ཅི་ཡིན༌ནམ། ཁྱོད་ཀྱིས་མི་ལ་རྫུན་སྨྲས་པ་མ་ཡིན་པར་དཀོན་མཆོག་ལ་རྫུན་སྨྲས་པ་ཡིན་ཞེས་གསུངས་པ༌དང༌།
ACT 5:5 ཨ་ནན་ཡཱས་གསུང་དེ་ཐོས་མ་ཐག་སར་འགྱེལ་ཏེ་དབུགས་ཆད་ཅིང་གཏམ་འདི་ཐོས་པའི་མི་ཐམས་ཅད་ཤིན་ཏུ་འཇིགས་སོ།།
ACT 5:6 དེ་ནས་ན་གཞོན་འགའ་ཞིག་ཡོང་ནས་ཁོའི་བེམ་པོ་རས་ཀྱིས་བཏུམས་ཏེ་ཕྱི་རོལ་ཏུ་ཁུར་ནས་དུར་ལ་བཅུག༌གོ།
ACT 5:7 དེ་ནས་ཆུ་ཚོད་གསུམ་ཙམ་འགོར་བ༌ན། ཨ་ནན་ཡཱའི་ཆུང་མ་སླེབས་ཤིང་ཁོ་མོས་དོན་དེ་མི་ཤེས༌པ་དང་།
ACT 5:8 པེ་ཏྲོས་འདི་སྐད༌དུ། ཁྱོད་ཀྱིས་ཤོད༌དང༌། ས་ཞིང་བཙོངས་པའི་ས་རིན་འདི་ཙམ་ཡིན་ནམ་ཞེས་དྲིས་པ༌ལ། ཁོ་མོ་ན༌རེ། དེ་ཙམ་ཡིན་ཞེས་སྨྲས་སོ།།
ACT 5:9 ཡང་པེ་ཏྲོས་འདི་སྐད༌དུ། ཁྱོད་གཉིས་ཀྱིས་ཅིའི་ཕྱིར་བློ་གཅིག་སེམས་གཅིག་གིས་གཙོ་བོའི་ཐུགས་ཉིད་ལ་ཚོད་བགམས་པ་ཡིན༌ནམ། ཁྱོད་ཀྱི་སྐྱེས་པ་དུར་དུ་འཇུག་མཁན་རྣམས་ཕྱིར་སྒོ་ཁར་སླེབས་ཟིན༌ལ། དེ་དག་གིས་ཁྱོད་རང་ཡང་ཕྱི་རུ་འཁྱེར་ངེས་ཡིན་ཞེས་གསུངས་མ༌ཐག
ACT 5:10 བུད་མེད་དེའང་པེ་ཏྲོའི་ཞབས་དྲུང་དུ་སར་འགྱེལ་ཏེ་དབུགས་ཆད་ཅིང༌། ན་གཞོན་དེ་རྣམས་ནང་དུ་སླེབས་ཏེ་ཁོ་མོ་ཤི་ཟིན་པ་མཐོང༌ནས། ཕྱི་རོལ་ཏུ་ཁུར་ཞིང་སྐྱེས་པའི་དུར་སའི་ཉེ་འགྲམ་དུ་དུར་ལ་བཅུག་གོ།
ACT 5:11 དེ་ནས་ཆོས་ཚོགས་ཀྱི་མི་རྣམས་དང་དོན་དེ་ཐོས་པའི་མི་ཐམས་ཅད་ཤིན་ཏུ་འཇིགས༌སོ།།
ACT 5:12 དེ་ཡང་སྐུ་ཚབ་པ་རྣམས་ཀྱི་ལག་པ་བརྒྱུད་ནས་མི་རྣམས་ཀྱི་ཁྲོད་དུ་གྲུབ་རྟགས་དང་དོན་ངོ་མཚར་ཅན་མང་པོ་བསྟན༌ཅིང་། དད་ལྡན་ཐམས་ཅད་བློ་སེམས་གཅིག་མཐུན་སྒོས་སོ་ལོ་མོན་གྱི་ཁྱམས་ར་ནས་བསྡད་དོ།།
ACT 5:13 མི་གཞན་རྣམས་ལས་སུ་ཞིག་ཀྱང་དད་ལྡན་རྣམས་དང་འགྲོགས་མ་ཕོད༌ནའང༌། མི་རྣམས་ཀྱིས་དེ་རྣམས་ལ་བརྩི་བཀུར་བྱས་པ་རེད།
ACT 5:14 ཡང་གཙོ་བོ་ལ་དད་པའི་མི་གྲངས་དེ་བས་འཕེལ་ཞིང་སྐྱེས་པ་དང་བུད་མེད་ཤིན་ཏུ་མང་པོ་ཡོད་པ༌དང༌།
ACT 5:15 ཐ་ན་མི་རྣམས་ཀྱིས་ནད་པ་རྣམས་ཁྲོམ་སྲང་དུ་ཁུར་ཡོང་ནས་ཉལ་ཁྲི་དང་ཉལ་སྟན་གྱི་སྟེང་དུ་བཞག༌སྟེ། པེ་ཏྲོ་ཕེབས་སྐབས་ཁོང་གི་གྲིབ་མ་ཙམ་ཡང་དེ་རྣམས་ལས་ནད་པ་ཁ་ཤས་ལ་ཕོག་པར་རེ་ལྟོས་བྱས།
ACT 5:16 ཡང་མི་མང་པོས་ནད་པ་དང་གདོན་འདྲེས་བཟུང་བའི་མི་རྣམས་ཡེ་རུ་སཱ་ལེམ་མཐའ་འཁོར་གྱི་གྲོང་རྡལ་དག་ནས་ཁྲིད་ཡོང༌ཞིང༌། དེ་ཐམས་ཅད་སོས་པར་གྱུར༌ཏོ།།
ACT 5:17 དེ་ནས་མཆོད་དཔོན་ཆེན་པོ་ཡར་ལངས་ཤིང་། ཁོ་དང་མཉམ་དུ་ཡོད་པའི་མི་ནི་སཱ་ཅུ་སེ་པའི་གྲུབ་མཐའ་ལ་གཏོགས་པ་རྣམས་ཡིན༌ཞིང༌། དེ་རྣམས་དོན་དེར་མ་དགའ་བར་ཕྲག་དོག་གིས་ཁེངས༌ཏེ།
ACT 5:18 སྐུ་ཚབ་པ་རྣམས་བཟུང་ནས་སྤྱི་བའི་བཙོན་ཁང་དུ་བཅུག་གོ།
ACT 5:19 འོན༌ཀྱང༌། མཚན༌མོར་གཙོ་བོའི་ཕོ་ཉ་ཞིག་ཡོང་ནས་བཙོན་ཁང་གི་སྒོ་ཕྱེས་ཤིང་ཁོང་རྣམས་ཕྱི་རོལ་ཏུ་ཁྲིད་དེ་འདི་སྐད༌དུ།
ACT 5:20 ཁྱོད་རྣམས་མཆོད་ཁང་དུ་སོང་ནས་ཚེ་སྲོག་གི་བཀའ་འདི་མི་རྣམས་ལ་ཤོད་ཅིག་ཅེས་གསུངས་སོ།།
ACT 5:21 སྐུ་ཚབ་པ་རྣམས་ཀྱིས་ཀྱང་གསུང་དེ་ཐོས་ནས་སྐྱ་རེངས་ཤར་བའི་དུས་སུ་མཆོད་ཁང་དུ་སོང་སྟེ་མི་རྣམས་ལ་ཆོས་གསུངས་སོ།། དེ་ནས་མཆོད་དཔོན་ཆེན་པོ་དང་མཉམ་དུ་འགྲོགས་པའི་མི་རྣམས་ཡོང༌སྟེ། དཔོན་རིགས་ཚོགས་པའི་ཚོགས་མི་དང་ཡེས་ར་ཨེལ་མི་རིགས་ཀྱི་རྒན་པོ་ཐམས་ཅད་བསྡུས་ནས་མི་ཁ་ཤས་བཙོན་ཁང་ལ་སྐུ་ཚབ་པ་རྣམས་ཕྱིར་འཁྲིད་དུ་མངགས།
ACT 5:22 འོན༌ཀྱང༌། དམག་མི་རྣམས་བཙོན་ཁང་དུ་སླེབས་ཀྱང་སྐུ་ཚབ་པ་རྣམས་མ་མཐོང་བས་ཕྱིར་ལོག་སྟེ་ན༌རེ།
ACT 5:23 ངེད་ཅག་གིས་བཙོན་ཁང་གི་སྒོ་དམ་པོར་བརྒྱབ༌ཅིང༌། སྒོ་སྲུང་མཁན་ཡང་སྒོ་འགྲམ་དུ་ལངས་ནས་བསྡད་པ་མཐོང༌ནའང༌། སྒོ་ཕྱེས་དུས་བཙོན་ཁང་ནང་དུ་མི་གཅིག་ཀྱང་མཐོང་མ་བྱུང་ཞེས་ཞུས་སོ།།
ACT 5:24 དེ་ནས་མཆོད་ཁང་གི་སྲུང་དམག་དཔོན་པོ་དང་མཆོད་དཔོན་ཆེན་པོ་རྣམས་ཀྱིས་གཏམ་དེ་ཐོས་ནས་དོན་འདི་མ་འོངས་པར་ཅི་ལྟ་བུ་ཞིག་ཏུ་འགྱུར་རམ་སྙམ་སྟེ་ཅི་བྱ་གཏོལ་མེད་དུ་གྱུར་པ༌ན།
ACT 5:25 ཡང་མི་ཞིག་ཡོང་སྟེ་ན༌རེ། ཁྱོད་ཅག་གིས་བཙོན་དུ་བཅུག་པའི་མི་དེ་དག་གིས་ད་ལྟ་མཆོད་ཁང་དུ་མི་རྣམས་ལ་ཆོས་གསུང་བཞིན་འདུག་ཅེས་ཞུས་སོ།།
ACT 5:26 དེ་ནས་མཆོད་ཁང་གི་སྲུང་དམག་དཔོན་པོ་དང་དམག་མི་རྣམས་ཕྱིར་སོང་བ༌དང༌། མི་རྣམས་ཀྱིས་ཁོ་རྣམས་ལ་རྡོས་རྒྱག་པར་འཇིགས་ནས་བཙན་ཤེད་མ་བཀོལ་བར་སྐུ་ཚབ་པ་རྣམས་ཁྲིད་ཡོང༌སྟེ།
ACT 5:27 དཔོན་རིགས་ཚོགས་པའི་ཚོགས་མི་རྣམས་ཀྱི་མདུན་དུ་ཡར་བསླངས་པ་དང་མཆོད་དཔོན་ཆེན་པོ་ན༌རེ།
ACT 5:28 ངེད་ཅག་གིས་ཁྱོད་རྣམས་ལ་མི་དེའི་མིང་ལ་བརྟེན་ནས་མི་གཞན་དག་ལ་ཆོས་མ་བརྗོད་ཅེས་ནན་བཤད་བྱས་ནས་བཀའ་བསྒོས་པ་མ་ཡིན༌ནམ། འོན་ཀྱང་ཁྱོད་རྣམས་ཀྱིས་ཡེ་རུ་སཱ་ལེམ་ཡོངས་ལ་ཁྱོད་ཅག་རང་གི་ཆོས་ཁྱབ་ཏུ་བཅུག༌སྟེ། མི་དེའི་ཁྲག་ལན་ངེད་ཅག་ལ་དགལ་བར་འདོད་ཅེས་སྨྲས་པ༌ལ།
ACT 5:29 པེ་ཏྲོ་དང་སྐུ་ཚབ་པ་གཞན་རྣམས་ཀྱིས། ངེད་རྣམས་ཀྱིས་དཀོན་མཆོག་གི་བཀའ་ལ་མཉན་པ་ལས་མིའི་ངག་ལ་མཉན་མི་འོས་སོ།།
ACT 5:30 ཁྱོད་ཅག་གིས་སྡོང་པོའི་སྟེང་དུ་བརྐྱངས་ཏེ་བཀྲོངས་པའི་ཡེ་ཤུ་ཁོང་ཉིད་ནི་བདག་ཅག་གི་མེས་པོའི་དཀོན་མཆོག་གིས་སླར་གསོན་པར་མཛད།
ACT 5:31 དཀོན་མཆོག་གིས་སྐྱབས་མགོན་ཡེ་ཤུ་རང་གི་གཡས་ཕྱོགས་སུ་འཕགས་པར་མཛད་ནས་དབུ་ཁྲིད་དང་སྐྱབས་མགོན་དུ་བསྐོས༌ཏེ། ཡེས་ར་ཨེལ་གྱི་མི་རྣམས་ལ་འགྱོད་བཤགས་བྱེད་པ་དང་སྡིག་པ་བསལ་བའི་ཐུགས་རྗེ་གནང་བའི་ཕྱིར༌རོ།།
ACT 5:32 ངེད་རྣམས་ཀྱིས་ཀྱང་དོན་འདི་དག་ལ་བདེན་དཔང་བྱེད༌ཅིང༌། དཀོན་མཆོག་གིས་རང་ཉིད་ཀྱི་བཀའ་ལ་ཉན་པ་ཐམས་ཅད་ལ་གནང་བའི་དམ་པའི་ཐུགས་ཉིད་ཀྱིས་ཀྱང་བདེན་དཔང་མཛད་ཅེས་གསུངས༌སོ།།
ACT 5:33 དེ་ནས་དཔོན་རིགས་ཚོགས་པའི་ཚོགས་མི་རྣམས་ཀྱིས་གཏམ་དེ་ཐོས་ནས་ཤིན་ཏུ་ཁྲོས་ཏེ་སྐུ་ཚབ་པ་རྣམས་གསོད་པར་སྙམ༌མོད།
ACT 5:34 འོན་ཀྱང་གནས་དེར་མི་ཐམས་ཅད་ཀྱིས་གུས་བཀུར་བྱེད་པའི་བཀའ་ཁྲིམས་ཀྱི་དགེ་རྒན་ཏེ། མིང་ལ་གཱ་མ་ཨེལ་ཟེར་བའི་ཕ་རུ་ཤི་པ་ཞིག་ཡོད་པ་དེ་ཚོགས་མིའི་ཁྲོད་དུ་ཡར་ལངས༌ནས། སྐུ་ཚབ་པ་རྣམས་རེ་ཞིག་ཕྱི་རོལ་ཏུ་འཁྲིད་དགོས་པའི་བཀའ་གནང་བ༌དང༌།
ACT 5:35 དཔོན་རིགས་དེ་རྣམས་ལ་འདི་སྐད༌དུ། ཀྱེ། ཡེས་ར་ཨེལ་པ༌རྣམས། ཁྱོད་ཅག་གིས་མི་འདི་དག་ལ་ཅི་ལྟར་ཐག་གཅོད་བྱེད་པར་གཟབ་གཟབ་བྱོས༌ཤིག
ACT 5:36 རྒྱུ་མཚན་ནི་སྔོན་ཆད་ཐེའུ་དཱ་བྱ་བ་ཞིག་ཡོད་པ་དེས་ངོ་རྒོལ་བྱས་ཤིང་རང་རློམ་ཆེ་བས་མི་བཞི་བརྒྱ་ཙམ་འཁོར་དུ་བསྡུས༌མྱོང༌། མཇུག་མཐར་གཞན་གྱིས་ཁོ་རང་བསད་པ་དང་ཁོའི་ཕྱོགས་ཀྱི་མི་ཐམས་ཅད་ཀྱང་ཁ་ཐོར་དུ་སོང་ནས་དོན་དེ་མེད་པར་གྱུར་ཏོ།།
ACT 5:37 དེའི་རྗེས༌སུ། མི་གྲངས་ལེན་པའི་སྐབས༌སུ། ག་ལིལ་ཡུལ་གྱི་ཡུ་དཱས་ངོ་རྒོལ་བྱས༌ཏེ། མི་མང་ཙམ་སླུ་བྲིད་བྱས་ནས་ཁོའི་ཕྱོགས་སུ་བསྐོར༌ཀྱང་། མཇུག་མཐར་ཁོ་རང་ཡང་མེད་པར་བྱས་པ་དང་ཁོའི་ཕྱོགས་ཀྱི་མི་ཐམས་ཅད་ཀྱང་ཁ་ཐོར་དུ་སོང༌།
ACT 5:38 དེའི༌ཕྱིར། ངས་ཁྱོད་རྣམས་ལ་སྨྲ་བར༌བྱ་སྟེ། མི་འདི་དག་ལ་ཅི་ཡང་མི་བྱེད་པར་སྐྱུར༌ཅིག གལ༌ཏེ། ཁོ་རྣམས་ཀྱིས་ཅི་བསམས་པ་དང་ཅི་བྱེད་པ་འདི་ནི་མི་ནས་བྱུང་བ་ཡིན་ན་ཉམས་པར་འགྱུར་ངེས།
ACT 5:39 གལ༌ཏེ། དཀོན་མཆོག་ནས་བྱུང་བ་ཡིན༌ན། ཁྱོད་ཅག་གིས་དེ་རྣམས་མེད་པར་བྱེད་མི་ནུས༌ཤིང༌། ཐ་ན་ཁྱོད་ཅག་དཀོན་མཆོག་ལ་ངོ་རྒོལ་བྱེད་མཁན་དུ་འགྱུར་ཉེན་ཡོད་ཅེས་སྨྲས་སོ།།
ACT 5:40 དེ་ནས་ཚོགས་མི་རྣམས་ཀྱིས་གཱ་མ་ཨེལ་གྱི་ཁ་ལ་མཉན་ནས་སྐུ་ཚབ་པ་རྣམས་བོས་ཏེ། གཅར་རྡུང་བྱས་རྗེས་ཡེ་ཤུའི་མིང་ལ་བརྟེན་ནས་གཏམ་སྨྲ་མི་ཆོག་པའི་བཀའ་བསྒོས་ཏེ་ཕྱིར་བཏང༌ངོ་༎
ACT 5:41 དེ་ནས་སྐུ་ཚབ་པ་རྣམས་ཚོགས་མི་དང་ཁ་བྲལ་ཞིང་རང་ཉིད་ནི་སྐྱབས་མགོན་ཡེ་ཤུའི་མཚན་གྱི་ཕྱིར་སྡུག་བསྔལ་མྱོང་འོས་པར་བརྩིས་པས་སེམས་ཤིན་ཏུ༌དགའ་བ་རེད།
ACT 5:42 སྐུ་ཚབ་པ་རྣམས་ཀྱིས་ཉིན་རེ་བཞིན་མཆོད་ཁང་དང་ཁྱིམ་ཚང་གང་དུའང་མི་རྣམས་ལ་རྒྱུན་ཆད་མེད་པར་ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པའི་ཆོས་གསུངས་ཤིང་དོན་དེ་བསྒྲགས༌སོ།།
ACT 6:1 དེའི་དུས༌སུ། རྗེས་འབྲང་པ་མང་དུ་འཕེལ་བ༌ན། གྷི་རིག་པའི་སྐད་རིགས་སྨྲ་མཁན་གྱི་ཨིབ་རི་པས་ནི་ཨིབ་རིའི་མི་རིགས་རང་གི་སྐད་སྨྲ་མཁན་ལ་སྨྲེ་ངག་བཏོན་ནོ།། རྒྱུ་མཚན་ནི་ཉིན་རེ་བཞིན་བགོ་སྐལ་གནང་སྐབས་ཨིབ་རི་པའི་ཡུགས་མོ་རྣམས་སྣང་མེད་དུ་བསྐྱུར་བའི་ཕྱིར༌ཡིན།
ACT 6:2 དེ་ནས་སྐུ་ཚབ་པ་བཅུ་གཉིས་པོས་ཆོས་ཚོགས་ཀྱི་རྗེས་འབྲང་པ་ཐམས་ཅད་བོས་ཏེ་འདི་སྐད༌དུ། ངེད་ཅག་གིས་དཀོན་མཆོག་གི་བཀའ་བསྐྱུར་ནས་ཟས་སྐལ་གཉེར་པ་ནི་མི་འོས་སོ།།
ACT 6:3 དེའི༌ཕྱིར། སྤུན་ཟླ༌རྣམས། ཁྱོད་ཅག་གི་ཁྲོད་ནས་མཚན་སྙན་གྲགས་ལྡན་པ་དང་དམ་པའི་ཐུགས་ཉིད་དང་ཤེས་རབ་ཀྱིས་ཁྱབ་པའི་སྐྱེས་པ་བདུན་འདེམས༌དང༌། ངེད་ཅག་གིས་མི་དེ་རྣམས་དོན་འདི་བདག་གཉེར་བྱེད་མཁན་དུ༌བསྐོ་བར་བྱའོ།།
ACT 6:4 འོན༌ཀྱང༌། ངེད་ཅག་གིས་དཀོན་མཆོག་ལ་གསོལ་བ་འདེབས་པ་དང་དཀོན་མཆོག་གི་བཀའ་སྒྲོག་པའི་ཞབས་ཏོག་ལ་བརྩོན་པར་བྱའོ་ཞེས་གསུངས༌སོ།།
ACT 6:5 དེ་ནས་མི་ཚོགས་ཐམས་ཅད་གསུང་དེར་ཡི་རང་བར་གྱུར༌ཏེ། དད་པ་ཆེ་ཞིང་དམ་པའི་ཐུགས་ཉིད་ཀྱིས་ཁྱབ་པའི་སི་ཏེ་ཕཱན་དང༌། གཞན༌ཡང༌། ཕི་ལིབ༌དང༌། ཕོ་རོ་ཁོ༌རུ། ནེ་ཀཱ༌ནོར། ཐི༌མོན། ཕར་མེན༌ནཱ། དེ་སྔར་ཡ་ཧུ་དཱ་པའི་ཆོས་ལུགས་ལ་ཞུགས་པའི་ཨན་ཏི་ཡོག་ཡཱ་ཡུལ་གྱི་ནེ་ཀོ་ལཱ་བཅས་བདམས༌ཤིང༌།
ACT 6:6 དེ་རྣམས་སྐུ་ཚབ་པ་རྣམས་ཀྱི་དྲུང་དུ་ཁྲིད༌ཅིང༌། ཁོང་རྣམས་ཀྱིས་གསོལ་བ་འདེབས་བཞིན་དེ་དག་གི་ལུས་ལ་ཕྱག་བཞག་ པ་དང་།
ACT 6:7 དེ་ནས་དཀོན་མཆོག་གི་བཀའ་རིམ་བཞིན་དར་བ་དང་ཡེ་རུ་སཱ་ལེམ་དུ་རྗེས་འབྲང་པའི་མི་གྲངས་ཤིན་ཏུ་མང་པོར་འཕེལ༌ཞིང༌། མཆོད་དཔོན་མང་པོ་ཞིག་གིས་ཀྱང་དད་པ་འདི་ལ་བསྟུན་ནོ།།
ACT 6:8 དེ་ཡང་སི་ཏེ་ཕཱན་ལ་ཐུགས་རྗེ་དང་མཐུ་སྟོབས་ཀྱིས་ཁྱབ༌པས། མི་རྣམས་ཀྱི་ཁྲོད་དུ་ངོ་མཚར་ཆེ་བའི་དོན་དང་གྲུབ་རྟགས་བསྟན་ཏོ།།
ACT 6:9 འོན༌ཀྱང༌། རང་དབང་ཅན་ཟེར་བའི་ཆོས་ཁང་ལ་གཏོགས་པའི་ཀི་རེ་ནེ་དང་ཨ་ལིག་སན་དྲི་ཡཱའི་མི་འགའ་ཤས༌དང་། གཞན༌ཡང༌། ཀི་ལིག་ཡཱ་དང་ཨེ་ཞི་ཡཱའི་ཡུལ་མི་ཁ་ཤས་ཀྱིས་སི་ཏེ་ཕཱན་ལ་རྩོད་པ་བྱས༌ནའང༌།
ACT 6:10 སི་ཏེ་ཕཱན་གྱིས་ཤེས་རབ་དང་དམ་པའི་ཐུགས་ཉིད་ཀྱི་སྒོ་ནས་གཏམ་སྨྲས་པ་ལ་དེ་དག་གིས་རྒོལ་མ་ནུས་པས།
ACT 6:11 མི་གཞན་ལ་ལྐོག་ནས་ངན་བསྐུལ་ཏེ་མི་འདིས་མོ་ཤེ་དང་དཀོན་མཆོག་ལ་སྐུར་བ་འདེབས་པའི་གཏམ་སྨྲས་པ་ངེད་ཀྱིས་ཐོས་པ་ཡིན་ཞེས་སྨྲ་རུ་བཅུག་གོ།
ACT 6:12 ཡང་དེ་དག་གིས་མི་རྣམས༌དང༌། རྒན༌པོ། མཁན་པོ་བཅས་ལ་ངན་སྐུལ་བྱས་ཤིང་གློ་བུར་ཡོང་ནས་ཁོ་རང་བཟུང་སྟེ་དཔོན་རིགས་ཚོགས་པའི་ཚོགས་མིའི་མདུན་དུ་བཙན་ཁྲིད་བྱས་པ༌དང༌།
ACT 6:13 དཔང་པོ་རྫུན་མ་བཙལ་ཏེ་ན༌རེ། མི་འདིས་རྟག་ཏུ་གནས་མཆོག་འདི་དང་བཀའ་ཁྲིམས་ལ་དམའ་འབེབས་བྱེད༌ཅིང༌།
ACT 6:14 སྔོན་ཆད་ནཱ་ཙ་རེལ་པ་ཡེ་ཤུ་དེས་གནས་འདི་བཤིག་སྟེ་མོ་ཤེ་ཡིས་ངེད་རྣམས་ལ་སྤྲད་པའི་གོམས་སྲོལ་རྣམས་ཀྱང་བསྒྱུར་བར་བྱའོ་ཞེས་ཟེར་བ་ངེད་ཀྱིས་ཐོས་པ་ཡིན་ཞེས་སྨྲས་པ༌དང༌།
ACT 6:15 ཚོགས་རའི་ནང་དུ་སྡོད་པའི་མི་ཐམས་ཅད་ཀྱིས་མིག་ཅེ་རེར་སི་ཏེ་ཕཱན་ལ་བལྟས་པ༌ན། ཁོའི་གདོང་ནི་ཕོ་ཉའི་ཞལ་རས་དང་མཚུངས་པ་མཐོང༌ངོ༌།།
ACT 7:1 དེ་ནས་མཆོད་དཔོན་ཆེན་པོས་སི་ཏེ་ཕཱན་ལ་དོན་འདི་དག་བདེན་ནམ་ཞེས་དྲིས་པ༌ལ།
ACT 7:2 ཁོ་ན༌རེ། ཕ་ཁུ་དང་སྤུན་ཟླ་རྣམས་ཀྱིས་ཉོན༌ཅིག སྔོན་ཆད་བདག་ཅག་གི་མེས་པོ་ཨབ་ར་ཧམ་ནི་ཧཱ་རན་དུ་ཁྱིམ་གཞི་མ་སྤར་བའི་སྔོན༌ལ། མོ་སོ་པའོ་ཐ་མེ་ཡཱ་ཡུལ་དུ་སྡོད་པའི་དུས༌དེར། གཟི་བརྗིད་དང་ལྡན་པའི་དཀོན་མཆོག་མངོན་སུམ་དུ་སྣང་སྟེ་ཨབ་ར་ཧམ་ལ་འདི་སྐད༌དུ།
ACT 7:3 ཁྱོད་ནི་རང་གི་ཕ་ཡུལ་དང་ཉེ་འབྲེལ་རྣམས་དང་ཁ་བྲལ་ནས་བདག་གིས་ཁྱོད་ལ་སྟོན་པར་འགྱུར་བའི་ཡུལ་དེར་སོང༌ཞིག་ཅེས་གསུངས་མྱོང༌བ་དང་།
ACT 7:4 དེ་ནས་ཨབ་ར་ཧམ་ནི་ཀལ་དི་པ་རྣམས་ཀྱི་ཡུལ་དེ་དང་བྲལ་ནས་ཧཱ་རན་དུ་གནས་བཅས་སོ།། ཁོའི་ཕ་སྐུ་གྲོངས་རྗེས་དཀོན་མཆོག་གིས་ཁོ་རང་གནས་དེ་ནས་ད་ལྟ་ཁྱོད་རྣམས་སྡོད་པའི་ཡུལ་འདིར་གནས་སྤར༌ཞིང༌།
ACT 7:5 ཡུལ་འདིར་དཀོན་མཆོག་གིས་ཁོ་རང་ལ་བགོ་སྐལ་ཅི་ཡང་མ་གནང༌ཞིང༌། རྐང་པ་འཇོག་སའི་ས་ཙམ་ཡང་མ་གནང་ངོ༌།། འོན༌ཀྱང༌། ཁོང་གིས་ཡུལ་འདི་ནི་ཁོ་དང་ཁོའི་བུ་རབས་ཚ་རྒྱུད་ལ་ས་སྐལ་དུ་གནང་ངེས་པ་ཞལ་གྱིས་བཞེས་པ༌དང༌། སྐབས་དེར་ཁོ་རང་ལ་བུའང་མེད༌པ་རེད།
ACT 7:6 དེ་ཡང་དཀོན་མཆོག་གིས་ཁོའི་བུ་རབས་ཚ་རྒྱུད་ཡུལ་གཞན་དུ་བྱེས་སུ་སྡོད་ཅིང་། ཡུལ་དེའི་མི་རྣམས་ཀྱིས་ཁོ་རྣམས་བྲན་གཡོག་ཏུ་བྱས་ནས་ལོ་བཞི་བརྒྱའི་རིང་ལ་མནར་གཅོད་གཏོང་བར་འགྱུར་ཞེས་གསུངས་མྱོང་བ༌དང༌།
ACT 7:7 ཡང་དཀོན་མཆོག་གིས་འདི་སྐད༌དུ། ཁོ་རྣམས་བྲན་གཡོག་ཏུ་བྱེད་པའི་རྒྱལ་ཁབ་དེ་ལ་ངས་ཉེས་ཆད་གཅོད༌ཅིང༌། རྗེས་སུ་ཁོ་རྣམས་ཕྱིར་བུད་དེ་གནས་འདི་ནས་བདག་ལ་བསྙེན་བཀུར་བྱེད་པར་འགྱུར་ཞེས་གསུངས་མྱོང༌བ་ཡིན།
ACT 7:8 ཡང་ཁོང་གིས་ཨབ་ར་ཧམ་ལ་མཚན་སྐྱི་གཅོད་པའི་ཞལ་ཆད་ཀྱང་གནང་མྱོང༌བས། ཨབ་ར་ཧམ་ལ་བུ་ཨི་སཱག་བྱུང་སྟེ་ཉིན་བརྒྱད་པ་ལ་བུ་དེའི་མཚན་སྐྱི་བཅད་པ༌དང༌། ཨི་སཱག་ལ་བུ་ཡ་ཀོབ་སྐྱེས༌ཤིང༌། ཡ་ཀོབ་ལས་མེས་པོ་བཅུ་གཉིས་བྱུང༌ངོ༌།།
ACT 7:9 དེ་ནས་མེས་པོ་གཞན་རྣམས་ཡོ་སེབ་ལ་ཕྲག་དོག་སྐྱེས་ནས་ཁོ་རང་ཨེ་ཅིབ་རྒྱལ་ཁབ་ཏུ་བཙོངས༌ནའང༌། དཀོན་མཆོག་ནི་ཁོ་དང་མཉམ་དུ་བཞུགས༌ཏེ།
ACT 7:10 ཁོ་རང་དཀའ་སྡུག་ཐམས་ཅད་ལས་བསྐྱབས་པ༌དང༌། ཁོ་ལ་ཨེ་ཅིབ་རྒྱལ་པོ་ཕཱར་ཨོལ་གྱི་དྲུང་དུ་ཐུགས་རྗེ་དང་ཤེས་རབ་གནང༌བས། རྒྱལ་པོས་ཁོ་རང་ཨེ་ཅིབ་རྒྱལ་ཁབ་ཀྱི་སྤྱི་དཔོན་དང་ཕོ་བྲང་ཡོངས་ཀྱི་གཉེར་པར་བསྐོས་སོ།།
ACT 7:11 དེའི་རྗེས༌སུ། ཨེ་ཅིབ་དང་ཀ་ན་ཨན་ཡུལ་ཀུན་ཏུ་མུ་གེ་བྱུང་སྟེ་མི་རྣམས་ཀྱིས་དཀའ་སྡུག་ཆེན་པོ་མྱངས༌ཤིང་། བདག་ཅག་གི་ཕ་མེས་ཡང་མེས་རྣམས་ལ་ཟས་ཀྱང་ཆད་པ་ཡིན།
ACT 7:12 དེ་ནས་ཡ་ཀོབ་ཀྱིས་ཨེ་ཅིབ་ཏུ་འབྲུ་རིགས་ཡོད་པ་ཐོས༌ཏེ། ཕ་མེས་ཡང་མེས་རྣམས་ཐེངས་དང་པོར་ཡུལ་དེར་བཏང༌ངོ་།།
ACT 7:13 དེ་ནས་ཐེངས་གཉིས་པར་ཡོང་དུས་ཡོ་སེབ་ཀྱིས་རང་གི་སྤུན་རྣམས་ལ་ཁོ་སུ་ཡིན་པ་སྨྲས་ཤིང་ཕཱར་ཨོལ་གྱིས་ཀྱང་ཁོའི་གཉེན་ཉེ་རྣམས་ཤེས༌པ་རེད།
ACT 7:14 དེ་ནས་ཡོ་སེབ་ཀྱིས་རང་གི་སྤུན་རྣམས་མངགས་ནས་རང་གི་ཕ་ཡ་ཀོབ་དང་ཁྱིམ་མི་བདུན་ཅུ་དོན་ལྔ་བཅས་གདན་དྲངས༌པ་དང་།
ACT 7:15 དེ་ནས་ཡ་ཀོབ་ཨེ་ཅིབ་ཡུལ་དུ་ཕྱིན་པ་དང་རྗེས་སུ་ཁོང་དང་བདག་ཅག་གི་མེས་པོ་རྣམས་ཀྱང་དེ་རུ་ཚེ་ལས་འདས༌ཤིང༌།
ACT 7:16 ཁོང་རྣམས་ཀྱིས་སི་ཀེམ་ཡུལ་དུ་བེམ་པོ་ཁུར༌ཏེ། སྔོན་ཆད་ཨབ་ར་ཧམ་གྱིས་སི་ཀེམ་ཡུལ་གྱི་ཧ་མོར་གྱི་བུ་རབས་ཚ་རྒྱུད་རྣམས་ལས་ཉོས་པའི་དུར་དེར་བཅུག༌གོ།
ACT 7:17 དེ་ཡང་དཀོན་མཆོག་གིས་ཨབ་ར་ཧམ་ལ་ཞལ་གྱིས་བཞེས་པའི་དུས་སླེབས་ལ་ཉེ་བའི་སྐབས༌དེར། ཡེས་ར་ཨེལ་མི་རིགས་ནི་ཨེ་ཅིབ་ཡུལ་ནས་མང་དུ་འཕེལ་ལོ།།
ACT 7:18 དེ་ནས་ཡོ་སེབ་ལ་རྒྱུས་མི་མངའ་བའི་ཨེ་ཅིབ་ཀྱི་རྒྱལ་པོ་གསར་པ་ཞིག་བྱུང༌སྟེ།
ACT 7:19 དེས་བདག་ཅག་གི་རུས་རྒྱུད་ལ་གཡོ་སྒྱུ་བྱེད༌ཅིང༌། རང་རེའི་ཕ་མེས་ལའང་གནོད་འཚེ་བཏང་བ༌དང༌། ཁོ་རྣམས་ཀྱི་ཕྲུ་གུ་རྣམས་གསོད་པའི་ཆེད་དུ་ཕྱི་རོལ་ཏུ་འདོར་དགོས་པའི་བཀའ་གནང༌ངོ་།།
ACT 7:20 དེའི་དུས༌སུ། མོ་ཤེ་འཁྲུངས་པ་དང་ཁོང་ནི་དཀོན་མཆོག་གི་སྤྱན༌སྔར་ཤིན་ཏུ་མཛེས་སོ༎ ཕ་གཞིས་སུ་ཟླ་བ་གསུམ་ལ་བསྐྱངས༌ཏེ།
ACT 7:21 ཕྱི་རོལ་ཏུ་འདོར་སྐབས་ཕཱར་ཨོལ་གྱི་སྲས་མོས་ཚུར་བླངས་ཏེ་རང་གི་བུ་སྐལ་དུ་བསྙོར་བའོ།།
ACT 7:22 དེ་ནས་མོ་ཤེ་ཡིས་ཨེ་ཅིབ་པ་རྣམས་ཀྱི་ཤེས་བྱ་ཐམས་ཅད་བསླབས་ནས་གཏམ་སྤྱོད་གཉིས་ཀྱི་ཆ་ལ་འཇོན་ཐང་ལྡན་པར་གྱུར༌ཏོ།།
ACT 7:23 དེ་ནས་མོ་ཤེ་ལོ་བཞི་བཅུར་སོན་པ༌ན། ཁོང་གི་སེམས་སུ་རང་གི་སྤུན་ཟླ་སྟེ་ཡེས་ར་ཨེལ་གྱི་བུ་རྒྱུད་ལ་བལྟ་རུ་འགྲོ་བར་བསམས་པ་རེད།
ACT 7:24 ཁོང་གནས་དེར་སླེབས་ཚེ་ཨེ་ཅིབ་ཀྱི་མི་ཞིག་གིས་དོན་མེད་དུ་ཡེས་ར་ཨེལ་གྱི་མི་ཞིག་ལ་གནོད་འཚེ་བྱེད་པ་མཐོང་བ་དང་མི་དེ་བསྐྱབས༌ཤིང༌། གནོད་འཚེ་བྱས་པའི་ལན་དུ་ཨེ་ཅིབ་ཀྱི་མི་དེ་བསད་དོ།།
ACT 7:25 ཁོང་གི་སེམས་སུ་རང་ཉིད་ཀྱི་ལག་པ་བརྒྱུད་ནས་དཀོན་མཆོག་གིས་ཁོ་རྣམས་སྐྱོབ་བཞིན་པའི་དོན་དེ་སྤུན་ཟླ་རྣམས་ཀྱིས་ཤེས་ངེས་ཡིན་སྙམ་ནའང་དེ་རྣམས་ཀྱིས་མ་ཤེས་སོ།།
ACT 7:26 དེའི་ཕྱི༌ཉིན། ཁོང་ཉིད་ཡེས་ར་ཨེལ་པ་གཉིས་ཀྱིས་འཛིང་རེས་བྱེད་བཞིན་ཡོད་པའི་གམ་དུ་སླེབས་ཤིང་འགྲིག་མཐུན་ཡོང་བར་ཁ་བསྒོ་འདི་ལྟར་བཏང༌བ་སྟེ། ཁྱོད་གཉིས་ནི་སྤུན་ཟླ་ཡིན་པས་ཅིའི་ཕྱིར་ཕན་ཚུན་ལ་བརྙས་བཅོས་བྱེད་པ་ཡིན་ཞེས་སྨྲས་པ༌ན།
ACT 7:27 སྤུན་ཟླ་ལ་བརྙས་བཅོས་བྱེད་མཁན་དེས་མོ་ཤེ་ལ་ཕུད་རྒྱག་བྱས་ཏེ་ན༌རེ། སུ་ཞིག་གིས་ཁྱོད་རང་ངེད་ཅག་གི་འགོ་པ་དང་ཁྲིམས་དཔོན་དུ་བསྐོས་པ་ཡིན༌ནམ།
ACT 7:28 ཁྱོད་ཀྱིས་ཁ་སང་ཨེ་ཅིབ་ཀྱི་མི་དེ་བསད་པ་བཞིན་དུ་ང་རང་ཡང་གསོད་འདོད་པ་ཡིན་ནམ་ཞེས་སྨྲས་པ༌དང༌།
ACT 7:29 མོ་ཤེས་གཏམ་དེ་ཐོས་མ་ཐག་མིད༌ཡཱན་ཡུལ་དུ་བྲོས་ཏེ་བྱེས་སུ་བསྡད་པ༌དང༌། ཡུལ་དེ་རུ་ཁོང་ལ་བུ་གཉིས་སྐྱེས༌སོ།།
ACT 7:30 དེ་ནས་ལོ་བཞི་བཅུ་འགོར་བ༌དང༌། སི་ནཱ་རི་བོའི་དབེན་སྟོང་དུ་ཚེར་སྡོང་འབར་བའི་མེ་ལྕེ་ཁྲོད་ནས་ཕོ་ཉ་ཞིག་ཁོང་ལ་གསལ་པོར་མངོན༌ཞིང་།
ACT 7:31 མོ་ཤེ་ཡིས་དོན་དེ་མཐོང་བ་དང་ངོ་མཚར་སྐྱེས་ནས་ཉེ་སར་བལྟ་རུ་བཅར་བ༌ལ། གཙོ་བོའི་གསུང་སྐད་བྱུང༌སྟེ།
ACT 7:32 བདག་ནི་ཁྱོད་ཀྱི་མེས་པོ་རྣམས་ཀྱི་དཀོན་མཆོག༌སྟེ། ཨབ་ར་ཧམ༌དང༌། ཨི༌སཱག ཡ་ཀོབ་བཅས་ཀྱི་དཀོན་མཆོག་ཡིན་ཞེས་གསུངས་པ༌དང༌། མོ་ཤེ་ཤིན་ཏུ་སྐྲག་ཅིང་འདར་ནས་བལྟ་ཡང་མ་ནུས་སོ།།
ACT 7:33 དེ་ནས་གཙོ་བོས་ཁོང་ལ་འདི་སྐད༌དུ། ཁྱོད་རང་ལངས་ནས་འདུག་ས་འདི་ནི་གནས་དམ་པ་ཡིན་པས། ཁྱོད་ཀྱིས་བསིལ་ལྷམ་དེ་ཕུད་ཅིག
ACT 7:34 ངའི་མི་རྣམས་ཀྱིས་ཨེ་ཅིབ་ཡུལ་དུ་མྱངས་པའི་དཀའ་སྡུག་དེ་ངས་དངོས་སུ་མཐོང༌ཞིང༌། དེ་དག་གིས་སྐྱོ་གདུང་གི་ངུ་སྐད་འབྱིན་པའང་ཐོས། ད་ལྟ་ང་རང་མར་ཁོ་རྣམས་སྐྱོབ་ཏུ་ཡོང༌བས། ཤོག༌དང༌། ངས་ཁྱོད་རང་ཨེ་ཅིབ་ཡུལ་དུ་མངག་པར་བྱའོ་ཞེས་གསུངས་མྱོང༌ངོ༌།།
ACT 7:35 དེ་ཡང་མི་རྣམས་ཀྱིས་མོ་ཤེ་རིང་དུ་སྤངས་ཏེ་ན༌རེ། སུ་ཞིག་གིས་ཁྱོད་རང་ངེད་ཅག་གི་འགོ་པ་དང་ཁྲིམས་དཔོན་དུ་བསྐོས་པ་ཡིན་ནམ་ཞེས་སྨྲས༌ནའང༌། དཀོན་མཆོག་གིས་ཚེར་སྡོང་གི་ཁྲོད་དུ་ཁོང་གི་ཕོ་ཉ་གསལ་པོར་མངོན་པའི་སྒོ་ནས་མོ་ཤེ་ནི་འགོ་པ་དང་མགོན་སྐྱབས་སུ་མངགས་སོ།།
ACT 7:36 ཡང་མོ་ཤེས་མི་རྣམས་ཕྱི་རོལ་ཏུ་ཁྲིད༌དེ། ཨེ་ཅིབ༌དང༌། རྒྱ་མཚོ་དམར༌པོ། དབེན་སྟོང་ཡུལ་བཅས་ནས་ལོ་ངོ་བཞི་བཅུའི་རིང་ལ་ངོ་མཚར་བའི་དོན་དང་གྲུབ་རྟགས་སྣ་ཚོགས་བསྟན་ཏོ།།
ACT 7:37 ཡང་མོ་ཤེ་ནི་སྔོན་ཆད་ཡེས་ར་ཨེལ་གྱི་མི་རྣམས་ལ་འདི་ལྟར། དཀོན་མཆོག་གིས་ཁྱོད་ཅག་གི་དོན་དུ་བདག་དང་འདྲ་བའི་ལུང་སྟོན་པ་ཞིག་ཁྱོད་ཀྱི་སྤུན་ཟླ་རྣམས་ཀྱི་ཁྲོད་དུ་བཞུགས་པར་མཛད་ཅེས་གསུངས་མཁན་དེ་ཉིད་ཡིན།
ACT 7:38 ཡང་མོ་ཤེ་ནི་དབེན་སྟོང་ཡུལ་དུ་མི་ཚོགས་ནང་དུ་གནས༌ཤིང༌། ཡང་སི་ནཱ་རི་བོའི་རི་མགོར་ཕོ་ཉ་དང་མཉམ་དུ་བསྡད་ནས་ཕོ་ཉས་ཁོང་ལ་གསུང་མོལ་གནང༌ཞིང་། ཁོང་ཉིད་བདག་ཅག་གི་མེས་པོ་དང་ལྷན་དུ་བཞུགས་པ༌དང༌། ཡང་ཁོང་གིས་གསོན་ཤུགས་ལྡན་པའི་བཀའ་དང་དུ་བླངས་ནས་བདག་ཅག་ལའང་བསྒྲགས་སོ།།
ACT 7:39 འོན༌ཀྱང༌། བདག་ཅག་གི་མེས་པོ་རྣམས་ཀྱིས་ཁོང་གི་གསུང་དེ་ལ་མི་ཉན་པར་ཁོང་ཉིད་སྤངས་ཤིང་ཡིད་སེམས་ཨེ་ཅིབ་ཀྱི་ཕྱོགས་སུ་འཁོར༌ཏེ།
ACT 7:40 ཨ་རོན་ལ་ན་རེ། ངེད་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་ཡོང་བའི་མོ་ཤེ་དེ་ལ་ཅི་བྱུང་བ་མི་ཤེས༌པས། ཁྱོད་ཀྱིས་ངེད་ཅག་ལ་ལམ་འཁྲིད་པའི་ཆེད་དུ་ལྷ་སྐུ་འགའ་བཞེང་བར་མཛོད་ཅེས་ཞུས་མྱོང་།
ACT 7:41 དེའི་དུས༌སུ། ཁོ་རྣམས་ཀྱིས་བ་ཕྲུག་ཅིག་གི་བླུགས་བརྙན་བྱས༌ཤིང༌། དེ་ལ་མཆོད་པ་ཕུལ་ཏེ་རང་གི་ལག་པས་བཟོས་པ་ལ་དགའ་སྣང་ཆེན་པོ་སྐྱེས།
ACT 7:42 དེའི༌ཕྱིར། དཀོན་མཆོག་གིས་དེ་དག་ལ་རྒྱབ་ཕྱོགས་ནས་རང་འདོད་དུ་ནམ་མཁའི་ཉི་ཟླ་སྐར་གསུམ་ལ་དད་མོས་བྱེད་དུ་བཅུག དེ་ནི་ལུང་སྟོན་པའི་མདོ་ལས་ཇི་སྐད༌དུ། ཀྱེ་ཀྱེ་ཡེས་ར་ཨེལ་གྱི་ཁྱིམ་རྒྱུད༌ཁྱོད།། དབེན་སྟོང་ཡུལ་ནས་བགྲང་བྱ་བཞི་བཅུའི༌རིང༌།། དམར་མཆོད་དང་ནི་མཆོད་པ་སྣ་ཚོགས༌པ།། བདག་ལ་ཕུལ་བ་གཏན་ནས་མ་ཡིན༌ནོ།།
ACT 7:43 མའོ་ལག་ཅེས་པའི་ལྷ་སྐུའི་གུར་ཁང༌དང༌།། གཟའ་སྐར་རེམ་ཕཱའི་ལྷ་སྐུ་གྱེན་དུ༌བཏེགས།། ཁྱོད་རྣམས་ལྷ་སྐུ་བཟོས་པར་ཕྱག་འཚལ༌ཕྱིར།། བདག་གིས་ཁྱོད་དང་ཁྱོད་ཀྱི་མི་རྣམས༌ཀུན།། པཱ་པེལ་ལོན་གྱི་མཐའ་ལ་སྤྱུག་པར༌བྱ།། ཞེས་བཀོད་པ་བཞིན༌ནོ།།
ACT 7:44 དབེན་སྟོང་ཡུལ་དུ་བདག་ཅག་གི་མེས་པོ་ལ་དཔང་པོའི་གུར་མཆོག་ཡོད༌ཅིང༌། དེ་ནི་དཀོན་མཆོག་གིས་མོ་ཤེ་ལ་བཀའ་གནང་བ་དང་དཔེ་བསྟན་པ་བཞིན་མེས་པོ་རྣམས་ཀྱིས་བཟོས༌པའང་ཡིན།
ACT 7:45 མེས་པོ་དེ་དག་གི་བུ་རབས་ཚ་རྒྱུད་ལའང་གུར་མཆོག་དེ་ཐོབ་པ་དང་དཀོན་མཆོག་གིས་ཁོ་རྣམས་ཀྱི་མདུན་ནས་ཕྱི་ཕྱོགས་ཀྱི་མི་རིགས་སོ་སོ་ས་མཐར་སྤྱུགས༌ཤིང༌། མེས་པོ་རྣམས་ཀྱིས་ཀྱང་མི་རིགས་དེ་དག་ལ་བཙན་འཛུལ་བྱེད་པའི་སྐབས༌སུ། ཁོ་རྣམས་ཀྱིས་ཡོ་ཤུ་ཨ་དང་མཉམ་དུ་གུར་མཆོག་དེ་ཡུལ་འདིར་ཁུར་ཅིང་། དེ་ནི་དཱ་བིད་ཀྱི་བར་དུ་གནས་པར་གྱུར་ཏོ།།
ACT 7:46 དེ་ནས་དཱ་བིད་ལ་དཀོན་མཆོག་གི་ཐུགས་རྗེ་ཐོབ༌ཅིང༌། ཁོས་མེས་པོ་ཡ་ཀོབ་ཀྱིས་དད་པ་བྱེད་པའི་དཀོན་མཆོག་ལ་བཞུགས་གནས་ཤིག་བཞེང་རྒྱུའི་རེ་འདུན་ཞུས༌མོད།
ACT 7:47 འོན་ཀྱང་དཀོན་མཆོག་ལ་བཞུགས་གནས་བཞེང་མཁན་ནི་སོ་ལོ་མོན་ཡིན།
ACT 7:48 དོན་དམ་དུ་བླ་ན་མེད་པའི་དཀོན་མཆོག་ནི་མིའི་ལག་པས་བརྩིགས་པའི་ཁང་པར་མི་བཞུགས༌ཏེ། དེ་ནི་ལུང་སྟོན་པས་ཇི་སྐད༌དུ།
ACT 7:49 ནམ་མཁའི་བང་རིམ་ང་ཡི་བཞུགས་ཁྲི༌དང༌།། དོག་མོ་ས་གཞི་ང་ཡི་ཞབས་སྟེགས༌ཏེ།། ཁྱོད་ཀྱིས་བདག་ལ་བཞུགས་གནས་ཅི་འདྲ༌བཞེང་།། བདག་གི་བསྟི་གནས་དེ་ནི་གང་དུ༌འདུག །
ACT 7:50 འཇིག་རྟེན་ཐམས་ཅད་བདག་གིས་བཟོས་མིན༌ནམ།། གཙོ་བོ་ལགས་ཀྱིས་དེ་སྐད༌གསུངས་པ་ཡིན།། ཞེས་གསུངས་པ་བཞིན༌ནོ།།
ACT 7:51 ཁྱོད་རྣམས་ནི་ཇི་འདྲའི་ཨུ་ཚུགས་ཆེ་བ༌དང༌། སེམས་དང་རྣ་བ་བཏུལ་མེད་པ་རྣམས་ཀྱིས་རྟག་ཏུ་དམ་པའི་ཐུགས་ཉིད་ལ་རྒོལ་བར་བྱེད༌དེ། ཁྱོད་ཅག་གི་མེས་པོས་ཅི་ལྟར་བྱས་ན་ཁྱོད་རྣམས་ཀྱིས་ཀྱང་དེ་ལྟར་བྱེད༌པ་ཡིན།
ACT 7:52 ལུང་སྟོན་པ་སུ་ཞིག་ལ་ཁྱོད་ཅག་གི་མེས་པོ་རྣམས་ཀྱིས་གནོད་འཚེ་མ་བྱས་སམ། སྔ་མོ་ནས་སྐྱེས་བུ་རྣམ་དག་དེ་ཉིད་ཕེབས་པར་འགྱུར་ཚུལ་སྒྲོག་མཁན་ཡང་ཁྱོད་ཅག་གི་མེས་པོས་བསད་པ་མ་ཡིན༌ནམ། ད་ལྟའང་ཁྱོད་ཅག་གིས་སྐྱེས་བུ་རྣམ་དག་དེ་ཉིད་ལ་ངོ་ལོག་བྱས་ཤིང་བཀྲོངས༌པ་དང་།
ACT 7:53 གཞན་ཡང་ཁྱོད་ཅག་ལ་ཕོ་ཉ་ལས་བཀའ་ཁྲིམས་ཐོབ་ནའང་དེ་མ་བསྲུངས་པ་རེད་ཅེས་གསུངས༌སོ།།
ACT 7:54 དེ་ནས་མི་རྣམས་ཀྱིས་གཏམ་དེ་དག་ཐོས་པ་དང་ཤིན་ཏུ་ཁྲོས་ཏེ་སི་ཏེ་ཕཱན་གྱི་ཐོག་ཨམ་གཙིགས་བསྡམས༌པ་རེད།
ACT 7:55 འོན༌ཀྱང༌། སི་ཏེ་ཕཱན་ལ་དམ་པའི་ཐུགས་ཉིད་ཀྱིས་ཁྱབ༌ཅིང༌། ཁོང་གིས་ནམ་མཁའི་ཞིང་ཁམས་ལ་ཅེ་རེར་བལྟས་པ༌ན། དཀོན་མཆོག་གི་གཟི་བརྗིད་མཐོང་ཞིང་སྐྱབས་མགོན་ཡེ་ཤུའང་དཀོན་མཆོག་གི་གཡས་ཕྱོགས་སུ་བཞེངས་འདུག་པ་མཐོང༌བས། ཁོ་ན༌རེ།
ACT 7:56 ལྟོས་དང་། ནམ་མཁའི་ཞིང་ཁམས་ཀྱི་སྒོ་ཕྱེས་ཡོད༌ཅིང༌། མིའི་བུ་དཀོན་མཆོག་གི་གཡས་ཕྱོགས་སུ་བཞེངས་འདུག་པའང་བདག་གིས་མཐོང་ཞེས་གསུངས་པ༌ལ།
ACT 7:57 མི་དེ་རྣམས་ཀྱིས་གཏམ་དེར་ཉན་འདོད་མེད་པར་སྐད་ཆེན་པོས་འུར་བརྒྱབ༌ཅིང༌། ལག་པས་རྣ་བ་བཀབ་པ་དང་མཉམ་དུ་སི་ཏེ་ཕཱན་གྱི་མདུན་དུ་བརྒྱུགས༌ཏེ།
ACT 7:58 ཁོང་ཉིད་གྲོང་ཁྱེར་ཕྱི་རོལ་ཏུ་བསྐྲད་ནས་རྡོ་རུབ་བཏང་བ༌དང༌། དཔང་པོ་བྱེད་མཁན་རྣམས་ཀྱིས་ཀྱང་རང་གི་ཕྱི་གོས་ཕུད་དེ་སོ་ལོ་ཞེས་པའི་ན་གཞོན་ཞིག་གི་མདུན་དུ་བཞག་གོ།
ACT 7:59 དེ་རྣམས་ཀྱིས་སི་ཏེ་ཕཱན་རྡོ་རུབ་གཏོང་བཞིན་པའི་དུས༌སུ། སི་ཏེ་ཕཱན་གྱིས། ཀྱེ། གཙོ་བོ་ཡེ་ཤུ༌ལགས། བདག་གི་རྣམ་ཤེས་ཁུར་དུ་བཞེས་པར་མཛོད་ཅེས་གསོལ་བ་བཏབ་པ༌དང༌།
ACT 7:60 ཡང་པུས་མོ་སར་བཙུགས་ཏེ་སྐད་ཆེན༌པོས། ཀྱེ། གཙོ་བོ་ལགས། ཉེས་པ་འདི་ཁོ་རྣམས་ལ་མི་འགེལ་བར་མཛོད་ཅེས་གསུངས་པ་དང་གཟིམས༌སོ།།
ACT 8:1 སི་ཏེ་ཕཱན་བསད་པའི་དོན་དེར་སོ་ལོའང་ཡིད་འཐད༌དོ།། ཉིན༌དེར། ཡེ་རུ་སཱ་ལེམ་གྱི་ཆོས་ཚོགས་ལ་གནོད་འཚེ་ཆེན་པོ་ཐེབས༌ཏེ། སྐུ་ཚབ་པ་རྣམས་ལས་གཞན་རྗེས་འབྲང་པ་ཐམས་ཅད་ཡ་ཧུ་དཱ་དང་སཱ་མར་ཡ་ཡུལ་སོ་སོར་ཁ་ཐོར་དུ་སོང༌བ་རེད།
ACT 8:2 དད་གུས་ཡོད་པའི་མི་རྣམས་ཀྱིས་སི་ཏེ་ཕཱན་གྱི་བེམ་པོ་དུར་ལ་སྦས་ཤིང་མྱ་ངན་དྲག་ཏུ་ཞུས་སོ།།
ACT 8:3 འོན༌ཀྱང༌། སོ་ལོ་ཡིས་ཆོས་ཚོགས་ལ་གནོད་པ་ཆེན་པོ་བཟོས༌ཤིང༌། ཁྱིམ་ཚང་རེ་རེར་སོང་ནས་སྐྱེས་ཕོ་མོ་རྣམས་བཙན་ཁྲིད་བྱས་ཏེ་བཙོན་དུ་བཅུག༌གོ།
ACT 8:4 དེ་ནས་ཁ་ཐོར་དུ་སོང་བའི་མི་དེ་རྣམས་ཡུལ་སོ་སོར་སོང་ནས་དཀོན་མཆོག་གི་བཀའ་བསྒྲགས་སོ།།
ACT 8:5 ཕི་ལིབ་ཀྱང་མར་སཱ་མར་ཡ་གྲོང་ཁྱེར་དུ་སོང་ནས་སྐྱབས་མགོན་མཱ་ཤི་ཀའི་ཆོས་བསྒྲགས༌ཤིང༌།
ACT 8:6 མི་ཚོགས་ཀྱིས་ཆོས་ཐོས་པ་དང་ཕི་ལིབ་ཀྱིས་བསྟན་པའི་གྲུབ་རྟགས་རྣམས་ཀྱང་མཐོང་སྟེ་བློ་སེམས་གཅིག་མཐུན་གྱིས་ཁོང་གི་གསུང་ལ་མཉན་ཏོ།།
ACT 8:7 མི་མང་པོ་གདོན་འདྲེས་བཟུང་ཡོད་ཅིང་གདོན་འདྲེ་དེ་དག་གིས་སྐད་ཆེན་པོ་བརྒྱབ༌སྟེ། ཁོ་རྣམས་ཀྱི་ལུས་ནས་ཕྱིར་བུད་པ༌དང༌། གཞན༌ཡང༌། ཞ་བོ་དང་གྱོལ་པོ་མང་པོ་ཡོད་པ་རྣམས་ཀྱང་ནད་ལས་ཐར་བས།
ACT 8:8 གྲོང་ཁྱེར་དེའི་ནང་དུ་དགའ་སྤྲོ་ཆེན་པོ་བྱུང༌ངོ༌།།
ACT 8:9 དེ་ཡང་མིང་ལ་སི་མོན་ཟེར་བའི་མི་ཞིག་ཡོད་པ༌དེས། སྔར་ནས་གྲོང་ཁྱེར་དེ་རུ་རྫུ་འཕྲུལ་བསྟན་ཅིང་རང་རློམ་ཆེ་བས་སཱ་མར་ཡ་པ་རྣམས་ཧ་ལས་སུ་བཅུག་གོ།
ACT 8:10 རྒན་གཞོན་ཡོངས་ཀྱིས་ཀྱང་ཁོའི་གཏམ་ལ་ཉན༌ཞིང༌། མི་འདི་ནི་དཀོན་མཆོག་གི་ནུས་མཐུ་ཆེན་པོ་ཟེར་བ་དེ་ཡིན་ཞེས་སྨྲས་སོ།།
ACT 8:11 ཁོས་ཡུན་རིང་པོར་མི་དེ་རྣམས་ལ་རྫུ་འཕྲུལ་བསྟན་ནས་ཁོ་རྣམས་ཧ་ལས་སུ་བཅུག་པས་མི་རྣམས་ཀྱིས་ཁོའི་གཏམ་ལའང་མཉན་པ་རེད།
ACT 8:12 འོན་ཀྱང་ཕི་ལིབ་ཀྱིས་དཀོན་མཆོག་གི་རྒྱལ་སྲིད་སྐོར་གྱི་འཕྲིན་བཟང་དང་ཡེ་ཤུ་མཱ་ཤི་ཀའི་མཚན་བསྒྲགས་པ་ལ་མི་དེ་རྣམས་ཀྱིས་དད་པ་བྱས་ཏེ་སྐྱེས་ཕོ་མོ་རྣམས་ཁྲུས་གསོལ་ལ་ཞུགས་པ༌དང༌།
ACT 8:13 སི་མོན་རང་ཉིད་ཀྱང་དད་པར་གྱུར་ནས་ཁྲུས་གསོལ་ལ་ཞུགས་ཤིང་རྟག་ཏུ་ཕི་ལིབ་ལ་འགྲོགས་པ༌དང༌། ཕི་ལིབ་ཀྱིས་བསྟན་པའི་གྲུབ་རྟགས་དང་ངོ་མཚར་ཆེ་བའི་དོན་རྣམས་མཐོང་ནས་ཧ་ལས་པར་གྱུར༌ཏོ།།
ACT 8:14 དེ་ཡང་ཡེ་རུ་སཱ་ལེམ་དུ་སྡོད་པའི་སྐུ་ཚབ་པ་རྣམས་ཀྱིས་སཱ་མར་ཡ་པ་རྣམས་ཀྱིས་དཀོན་མཆོག་གི་བཀའ་དང་དུ་བླངས་པ་ཐོས༌ཏེ། པེ་ཏྲོ་དང་ཡོ་ཧ་ནན་གཉིས་དེ་དག་གི་གམ་དུ་མངགས་སོ།།
ACT 8:15 དེ་ནས་ཁོང་གཉིས་གནས་དེར་སླེབས་པ་དང་མི་དེ་རྣམས་ལ་དམ་པའི་ཐུགས་ཉིད་འཐོབ་པའི་ཕྱིར་གསོལ་བ་བཏབ།
ACT 8:16 རྒྱུ་མཚན་ནི་ཁོ་རྣམས་གཙོ་བོ་ཡེ་ཤུའི་མཚན་ལ་བརྟེན་ནས་ཁྲུས་གསོལ་ལ་ཞུགས༌ཀྱང༌། སྐབས༌དེར། དམ་པའི་ཐུགས་ཉིད་ད་དུང་མི་སུ་ཞིག་གི་སྟེང་དུའང་མ་བབས༌སོ།།
ACT 8:17 དེ་ནས་སྐུ་ཚབ་པ་གཉིས་ཀྱིས་མི་དེ་རྣམས་ཀྱི་ལུས་ལ་ཕྱག་བཞག་པ་དང་དེ་རྣམས་ལ་དམ་པའི་ཐུགས་ཉིད་ཐོབ་པ་རེད།
ACT 8:18 དེ་ནས་སྐུ་ཚབ་པ་གཉིས་ཀྱིས་མི་རྣམས་ཀྱི་ལུས་ལ་ཕྱག་བཞག་ནས། དམ་པའི་ཐུགས་ཉིད་ཐོབ་པ་སི་མོན་གྱིས་ཀྱང་མཐོང་བས། ཁོང་གཉིས་ལ་དངུལ་འབུལ་གྲབས་བྱས་ཏེ་ན༌རེ།
ACT 8:19 ངས་ཀྱང་མི་སུ་ཞིག་གི་ལུས་ལ་ལག་པ་བཞག༌ན། དེ་ལ་དམ་པའི་ཐུགས་ཉིད་འཐོབ་ཕྱིར་དབང་འདི་བདག་ལ་གནང་བར་མཛོད་ཅེས་ཞུས་པ༌ལ།
ACT 8:20 པེ་ཏྲོས་འདི་སྐད༌དུ། ཁྱོད་ཀྱིས་དཀོན་མཆོག་གི་གནང་སྦྱིན་ནི་དངུལ་ལ་བརྟེན་ནས་ཉོ་ཐུབ་པར་བསམས༌པས། ཁྱོད་ཀྱི་དངུལ་དང་ཁྱོད་རང་གཉིས་མཉམ་དུ་མེད་པར་གྱུར༌ཅིག
ACT 8:21 དཀོན་མཆོག་གི་དྲུང་དུ་ཁྱོད་ནི་སེམས་རྒྱུད་མི་དྲང་བས་ཁྱོད་ལ་ལས་འགན་འདིའི་སྟེང་དུ་སྐལ་བ་དང་འབྲེལ་བ་ཅི་ཡང་མེད།
ACT 8:22 ཁྱོད་ཀྱིས་རང་གི་ནག་ཉེས་འདི་ལས་འགྱོད་བཤགས་བྱོས་དང་། གཙོ་བོ་ལ་གསོལ་བ་ཐོབས་ཤིག དེ་ནས་ཁྱོད་ཀྱི་སེམས་ཁོང་གི་བསམ་ཚུལ་ལ་གུ་ཡངས་འཐོབ་ཀྱང་སྲིད་དོ།།
ACT 8:23 ཁྱོད་ནི་ཕྲག་དོག་གིས་ཁེངས་ཤིང་སྡིག་པས་བཅིངས་ཡོད་པའང་ངས་མཐོང་བ་ཡིན་ཞེས་གསུངས་སོ།།
ACT 8:24 དེ་ནས་སི་མོན་ན༌རེ། ཁྱོད་ཅག་གིས་བཤད་པ་རྣམས་ངའི་སྟེང་དུ་ཅི་ཡང་མི་འབྱུང་བའི༌ཕྱིར། ངའི་དོན་དུ་གཙོ་བོ་ལ་གསོལ་བ་འདེབས་པར་མཛོད་ཅེས་ཞུས་སོ།།
ACT 8:25 དེ་ནས་སྐུ་ཚབ་པ་པེ་ཏྲོ་དང་ཡོ་ཧ་ནན་གཉིས་ཀྱིས་གཙོ་བོའི་བཀའ་ལ་བདེན་དཔང་དང་བརྒྱུད་སྒྲོག་བྱས༌ཤིང༌། ཕྱིར་ཡེ་རུ་སཱ་ལེམ་དུ་ལོག་པ་དང་ལམ་བར་དུ་སཱ་མར་ཡ་ཡུལ་གྱི་གྲོང་སྡེ་མང་པོ་ལ་འཕྲིན་བཟང་བསྒྲགས༌སོ།།
ACT 8:26 དེ་ཡང་གཙོ་བོའི་ཕོ་ཉ་ཞིག་གིས་ཕི་ལིབ་ལ་འདི་སྐད༌དུ། ཡར་ལོངས༌དང༌། ལྷོ་ཕྱོགས་སུ་ཡོད་པའི་ཡེ་རུ་སཱ་ལེམ་ནས་ག་ཟཱ་རུ་འགྲོ་བའི་དབེན་སྟོང་གི་ལམ་དེར་སོང་ཞིག་ཅེས་བཀའ་བསྩལ་ཏོ།།
ACT 8:27 དེ་ནས་ཕི་ལིབ་ལམ་ལ་ཆས་པ༌ན། ལམ་བར༌དུ། ཨེ་ཐི་ཨོ་པི་ཡཱ་རྒྱལ་ཁབ་ཀྱི་དབང་ཐང་ཅན་གྱི་ཉུག་རུམ་པ༌སྟེ། རྒྱལ་ཁབ་དེའི་ཀན་དཱ་ཀེ་བྱ་བའི་རྒྱལ་མོའི་དངུལ་མཛོད་ཁང་གི་སྤྱི་གཉེར་པ་དེ་ཉིད་ཡེ་རུ་སཱ་ལེམ་ལ་མཇལ་དུ་སོང༌ཞིང༌།
ACT 8:28 ད་ལྟ་ཤིང་རྟར་བསྡད་ནས་ཕྱིར་ལོག་པའི་ལམ་དུ་ལུང་སྟོན་པ་ཡེ་ཤ་ཡཱའི་མདོ་ཀློག་གིན་ཡོད་པ་རེད།
ACT 8:29 དེ་ནས་དམ་པའི་ཐུགས་ཉིད་ཀྱིས་ཕི་ལིབ་ལ་འདི་སྐད༌དུ། ཁྱོད་རང་ཤིང་རྟ་དེའི་གམ་དུ་སོང་ཞིག་ཅེས་གསུངས་པ༌དང༌།
ACT 8:30 ཕི་ལིབ་ཀྱང་དེ་བཞིན་དུ་ཉུག་རུམ་པའི་གམ་དུ་བརྒྱུགས༌ཤིང༌། དེས་ལུང་སྟོན་པ་ཡེ་ཤ་ཡཱའི་མདོ་ཀློག་གིན་ཡོད་པ་ཐོས་ཏེ་ན༌རེ། ཁྱོད་ཀྱིས་ཀློག་བཞིན་པའི་དོན་དེ་རྟོགས་སམ་ཞེས་དྲིས་པ༌ན།
ACT 8:31 ཁོ་ན༌རེ། བདག་ལ་ཁྲིད་སྟོན་བྱེད་མཁན་མེད༌པས། ངས་ཅི་ལྟར་རྟོགས་ནུས་ཞེས་སྨྲས༌ཤིང༌། ཕི་ལིབ་ཤིང་རྟའི་ནང་དུ་ཁོ་དང་མཉམ་དུ་བཞུགས༌པར་གདན་དྲངས་པ་དང་།
ACT 8:32 ཁོས་ཀློག་བཞིན་པའི་མདོ་ནི་འདི་ལྟ༌སྟེ། ཁོང་ནི་ཤན་པའི་མདུན་དུ་ལུག་ལྟར༌ཁྲིད།། བལ་འབྲེག་པ་ཡི་གམ་གྱི་ལུ་གུ༌བཞིན།། སྐད་སྒྲ་མེད་པར་ཁོང་གིས་ཅང་མི༌སྨྲ།།
ACT 8:33 གཞན་གྱིས་ཁོང་ལ་འཕྱ་ཞིང་དམོད་པ༌དང༌།། བདེན་པའི་ཁྲིམས་ཐག་གཏན་ནས་མེད་པར༌བཟོས།། ཁོང་གི་ཚེ་སྲོག་ས་ལས་བཅད་པའི༌ཕྱིར།། ཁོང་གི་གདུང་རྒྱུད་སུ་ཡིས་འཆད་ནུས༌སམ།། ཞེས་གསུངས་ཡོད་པ༌དེའོ།།
ACT 8:34 དེ་ནས་ཉུག་རུམ་པ་ན༌རེ། ལུང་སྟོན་པས་ལུང་བསྟན་འདི་ནི་རང་གཞན་སུ་ལ་གསུངས་པ་བདག་ལ་གསུང་བར་མཛོད་ཅེས་སྨྲས་པ༌དང༌།
ACT 8:35 ཕི་ལིབ་ཀྱིས་མདོ་དེ་ནས་འགོ་བཟུང་སྟེ་སྐྱབས་མགོན་ཡེ་ཤུའི་དོན་རྣམས་ཉུག་རུམ་པར་གསུངས་སོ།།
ACT 8:36 དེ་ནས་ཁོ་གཉིས་མདུན་དུ་སྐྱོད་བཞིན་ཆུ་ཡོད་པའི་ས་ཆ་ཞིག་ཏུ་སླེབས་པ༌ན། ཉུག་རུམ་པ་ན༌རེ། ལྟོས༌དང༌། འདི་རུ་ཆུ་ཡོད༌དེ། ང་རང་ཁྲུས་གསོལ་ལ་ཞུགས་ན་མི་འོས་པ་ཅི་ཡོད་ཅེས་སྨྲས་པ༌ལ།
ACT 8:37 ཕི་ལིབ་ན༌རེ། ཁྱོད་ཀྱིས་བློ་སེམས་རྩེ་གཅིག་གིས་དད་པ་བྱས་ན་ཆོག་པ་ཡིན་ཞེས་བཤད་ཅིང༌། ཁོས་ཀྱང་ཡེ་ཤུ་མཱ་ཤི་ཀ་ནི་དཀོན་མཆོག་གི་སྲས་ཡིན་པར་ངས་དད་པ་བྱེད་ཅེས་སྨྲས་པ༌དང༌།
ACT 8:38 ཤིང་རྟ་བགྲོད་མཚམས་འཇོག་པར་བཀའ་བསྒོས༌ཏེ། ཁོ་གཉིས་ཆུ་རུ་ཞུགས་ཤིང་ཕི་ལིབ་ཀྱིས་ཁོ་ལ་ཁྲུས་གསོལ་མཛད་དོ།།
ACT 8:39 དེ་ནས་ཁོ་གཉིས་ཆུ་ལས་ཕྱིར་འབུད་པའི་དུས༌སུ། གཙོ་བོའི་ཐུགས་ཉིད་ཀྱིས་གློ་བུར་ཉིད་ལ་ཕི་ལིབ་གནས་གཞན་དུ་དྲངས༌ཤིང༌། ཉུག་རུམ་པས་ཕི་ལིབ་མ་མཐོང་ཡང་དགའ་སྤྲོའི་ངང་ལམ་ལ་ཆས་སོ།།
ACT 8:40 ཕྱིས༌སུ། ཨ་ཟོད་ཅེས་པའི་གྲོང་ཁྱེར་ལ་ཕི་ལིབ་མངོན་སུམ་དུ་སླེབས་པ་དང་། ཁོ་རང་གྲོང་ཁྱེར་ཀུན་ཏུ་རྒྱུ་ཞིང་ཀེ་སར་ཡཱ་རུ་སླེབས་པའི་བར་དུ་འཕྲིན་བཟང་བསྒྲགས༌སོ།།
ACT 9:1 དེའི་དུས༌སུ། སོ་ལོ་ཡིས་མུ་མཐུད་དུ་གཙོ་བོའི་རྗེས་འབྲང་པ་རྣམས་ལ་འཇིགས་སྐུལ་བྱས་ནས་དམར་གསོད་ཀྱི་གཏམ་སྨྲ་བཞིན་ཡོད་པ༌དང༌། མཆོད་དཔོན་ཆེན་པོའི་དྲུང་དུ་སོང༌སྟེ།
ACT 9:2 མཱ་ཤི་ཀའི་ཆོས་ཀྱི་ལམ་དེ་ལ་ཞུགས་མཁན་ཡོད༌ན། ཕོ་མོ་གང་ཡིན་ཡང་བཙན་བཟུང་བྱས་ནས་ཡེ་རུ་སཱ་ལེམ་དུ་འཁྲིད་ཆོག་པའི༌ཕྱིར། དཱ་མེ་སེག་ཏུ་ཡོད་པའི་ཆོས་ཁང་སོ་སོ་ལ་འཕྲིན་ཡིག་གནང་བར་ཞུས།
ACT 9:3 དེ་ནས་སོ་ལོ་ལམ་ལ་ཆས་ཏེ་དཱ་མེ་སེག་གི་ཉེ་སར་སླེབས་པ༌ན། གློ་བུར༌ཉིད་དུ་ནམ་མཁའི་ཞིང་ཁམས་ནས་ཁོའི་ཕྱོགས་བཞིར་འོད་འཁྱུགས་ཤིང་འཚེར་བ༌དང༌།
ACT 9:4 ཁོ་རང་སར་འགྱེལ་ཞིང་སྐད་སྒྲ་ཞིག་གིས་འདི་སྐད་དུ། ཀྱེ། སོ༌ལོ། སོ་ལོ། ཁྱོད་ཀྱིས་བདག་ལ་གནོད་འཚེ་བྱེད་དོན་ཅི་ཡིན་ནམ་ཞེས་གསུངས་པ་ཐོས༌ནས།
ACT 9:5 ཁོ་ན༌རེ། ཀྱེ་གཙོ་བོ༌ལགས། ཁྱེད་རང་སུ་ཡིན་ནམ་ཞེས་ཞུས་པ༌ལ། ཁོང་གིས་འདི་སྐད༌དུ། བདག་ནི་ཁྱོད་ཀྱིས་གནོད་འཚེ་བྱེད་བཞིན་པའི་ཡེ་ཤུ་ཡིན།
ACT 9:6 ཁྱོད་ཡར་ལངས་ནས་གྲོང་ཁྱེར་དེར་སོང༌དང༌། ཁྱོད་ཀྱིས་ཅི་བྱ་དགོས་པ་དེ་མི་གཞན་གྱིས་ཁྱོད་ལ་སྨྲ་བར་ངེས་ཞེས་གསུངས་སོ།།
ACT 9:7 ལམ་གྲོགས་རྣམས་ཀྱིས་ཀྱང་སྐད་དེ་ཐོས་པ་ལས་མི་སུ་ཡང་མ་མཐོང་བས་ཡར་ལངས་ནས་བསྡད་ཅིང་ཅི་ཡང་སྨྲ་མ་ནུས་སོ།།
ACT 9:8 དེ་ནས་སོ་ལོ་ས་ནས་ཡར་ལངས་ཏེ་མིག་ཕྱེས་ཚེ་ཅི་ཡང་མ་མཐོང༌ཞིང་། ལམ་གྲོགས་རྣམས་ཀྱིས་ཁོའི་ལག་པར་འཇུས་ནས་དཱ་མེ་སེག་ཏུ་ཁྲིད་པ༌དང༌།
ACT 9:9 ཁོས་ཉིན་གསུམ་གྱི་རིང་ལ་མིག་གིས་ཅི་ཡང་མ་མཐོང་ཞིང་བཟའ་བཏུང་ཅི་ཡང་མ་སྤྱད༌དོ།།
ACT 9:10 དེ་ཡང་དཱ་མེ་སེག་ཏུ་མིང་ལ་ཨ་ནན་ཡཱ་ཟེར་བའི་རྗེས་འབྲང་པ་ཞིག་ཡོད༌ཅིང༌། ཁོ་ལ་ཞལ་གཟིགས་གནང་ནས་གཙོ་བོས་ཁོ་རང་ལ་ཨ་ནན་ཡཱ་ཞེས་བོས་པ༌དང༌། ཁོས་གཙོ་བོ༌ལགས། ང་རང་འདི་རུ་ཡོད་ཅེས་ཞུས་སོ།།
ACT 9:11 ཡང་གཙོ་བོས་འདི་སྐད༌དུ། ཡར་ལངས་ནས་སྲང་ལམ་དྲང་པོ་དེར་སོང༌སྟེ། ཡུ་དཱའི་ཁྱིམ་ནས་ཐཱར་ཟི་ཡི་མི་སྟེ། མིང་ལ་སོ་ལོ་ཟེར་བ་དེ་ཚོལ༌དང༌། ད་ལྟ་ཁོས་གསོལ་བ་འདེབས་ཀྱིན་ཡོད་པ༌དང༌།
ACT 9:12 རང་གི་མིག་གིས་སླར་ཡང་མཐོང་ཐུབ་པའི༌ཕྱིར། སོ་ལོ་ལ་གནང་བའི་ཞལ་གཟིགས་ནས་ཨ་ནན་ཡཱ་ཞེས་པའི་མི་ཞིག་ཁོའི་སྡོད་སར་ཡོང་སྟེ་ལག་པ་ཁོའི་ལུས་སྟེང་ལ་བཞག་པ་མཐོང་ཡོད་ཅེས་གསུངས་ནའང་།
ACT 9:13 ཨ་ནན་ཡཱ་ན༌རེ། གཙོ་བོ༌ལགས། ངས་མི་གཞན་མང་པོའི་ངག་ལས་མི་འདིའི་སྐོར་གོ་བྱུང་སྟེ་ཡེ་རུ་སཱ་ལེམ་དུ་ཁྱེད་ཀྱི་དད་ལྡན་དམ་པ་རྣམས་ལ་གནོད་འཚེ་ཅི་ཙམ་བཏང་བ༌དང༌།
ACT 9:14 ཡང་ཁོས་མཆོད་དཔོན་ཆེན་པོ་རྣམས་ཀྱི་དྲུང་ནས་ཁྱེད་ཀྱི་མཚན་ནས་འབོད་མཁན་གྱི་མི་རྣམས་བཟུང་ཆོག་པའི་དབང་ཆ་བླངས་ཏེ་འདི་རུ་ཡོད་པའང་ཐོས་ཞེས་ཞུས་ཀྱང༌།
ACT 9:15 གཙོ་བོས་འདི་སྐད༌དུ། ཁྱོད་རང་སོང༌དང༌། ཁོ་ནི་ངས་བདམས་པའི་སྣོད་ལྡན་ཞིག༌སྟེ། ཁོས་ཕྱི་ཕྱོགས་པ་རྣམས༌དང༌། རྒྱལ་པོ༌རྣམས། གཞན་ཡང་ཡེས་ར་ཨེལ་གྱི་བུ་རྒྱུད་བཅས་ཀྱི་མདུན་དུ་བདག་གི་མིང་བསྒྲག་པར་འགྱུར༌ཞིང༌།
ACT 9:16 ངས་ཀྱང་ཁོ་རང་ལ་ངའི་མིང་གི་ཆེད་དུ་ངེས་པར་སྡུག་བསྔལ་ཇི་ཙམ་མྱང་དགོས་པ་སྟོན་པར་བྱའོ་ཞེས་གསུངས་སོ།།
ACT 9:17 དེ་ནས་ཨ་ནན་ཡཱ་ཁྱིམ་དེར་སོང་ནས་སོ་ལོའི་ལུས་ལ་ལག་པ་བཞག༌སྟེ། སྤུན་ཟླ་སོ་ལོ༌ལགས། ལམ་བར་དུ་ཁྱོད་ལ་གསལ་པོར་མངོན་པའི་གཙོ་བོ་ཡེ་ཤུ་ཁོང་ཉིད་ཀྱིས་ཁྱོད་ཀྱི་མིག་གིས་སླར་ཡང་མཐོང་ཐུབ་པ༌དང༌། ཁྱོད་ལ་དམ་པའི་ཐུགས་ཉིད་ཀྱིས་ཁྱབ་པའི་ཕྱིར་ང་རང་མངགས་པ་ཡིན་ཞེས་སྨྲས༌ཤིང༌།
ACT 9:18 དེ་མ་ཐག་སོ་ལོའི་མིག་ལས་ཤུན་སྐོགས་ལྟ་བུ་རེ་ལྷུང་བ་དང་མིག་གིས་སླར་ཡང་མཐོང་ཐུབ་པར་གྱུར་ཏོ།། དེ་ནས་སོ་ལོ་ཡར་ལངས་ནས་ཁྲུས་གསོལ་ལ་ཞུགས་པ༌དང༌།
ACT 9:19 ཁ་ཟས་ལ་རོལ་རྗེས་ལུས་སྟོབས་རྒྱས༌པ་རེད། སོ་ལོ་དང་དཱ་མེ་སེག་ཏུ་ཡོད་པའི་རྗེས་འབྲང་པ་རྣམས་མཉམ་དུ་ཉིན་ཁ་ཤས་ལ་བསྡད༌པ་དང་།
ACT 9:20 དེ་མ་ཐག་ཁོང་ཉིད་ཆོས་ཁང་སོ་སོར་སོང་ནས་སྐྱབས་མགོན་ཡེ་ཤུ་ནི་དཀོན་མཆོག་གི་སྲས་ཡིན་པ་བསྒྲགས༌ཤིང༌།
ACT 9:21 གཏམ་དེ་ཐོས་པའི་མི་ཐམས་ཅད་ངོ་མཚར་སྐྱེས་ཏེ་ན༌རེ། མི་འདི་ནི་ཡེ་རུ་སཱ་ལེམ་ནས་སྐྱབས་མགོན་ཡེ་ཤུའི་མཚན་ལ་ཞུ་མཁན་རྣམས་ལ་གནོད་འཚེ་ཆེན་པོ་བཏང་བ༌དང༌། དད་ལྡན་རྣམས་བཟུང་སྟེ་མཆོད་དཔོན་ཆེན་པོ་རྣམས་ཀྱི་གམ་དུ་འཁྲིད་པའི་ཕྱིར་འདིར་ཡོང་བ་དེ་མ་ཡིན་ནམ་ཞེས་སྨྲས་སོ།།
ACT 9:22 འོན་ཀྱང་སོ་ལོ་ལ་ནུས་མཐུ་ཇེ་ཆེ་ནས་ཇེ་ཆེར་གྱུར་པ༌དང༌། ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་བདེན་དཔང་བྱས་ཏེ་དཱ་མེ་སེག་ཏུ་ཡོད་པའི་ཡ་ཧུ་དཱ་པ་རྣམས་དགག་པས་བཏུལ་བའོ།།
ACT 9:23 དེ་ནས་ཉིན་མང་པོ་འགོར་བ་དང་ཡ་ཧུ་དཱ་པ་རྣམས་ཀྱིས་སོ་ལོ་གསོད་པར་གྲོས་བྱས༌ནའང༌།
ACT 9:24 སོ་ལོས་ཁོ་རྣམས་ཀྱི་ཇུས་ངན་ཤེས༌པ་དང་། དེ་དག་གིས་སོ་ལོ་གསོད་པའི་ཕྱིར་ཉིན་མཚན་མེད་པར་གྲོང་ཁྱེར་གྱི་མཁར་སྒོ་ཐམས་ཅད་བསྲུངས་མོད།
ACT 9:25 འོན་ཀྱང་སོ་ལོའི་རྗེས་འབྲང་པ་རྣམས་ཀྱིས་མཚན་མོའི་དུས་སུ་ཁོང་ཉིད་སླེ་བོའི་ནང་དུ་བཞག་སྟེ་མཁར་གྱང་ནས་མར་དཔྱངས་སོ།།
ACT 9:26 དེ་ནས་སོ་ལོ་ཁོང་ཉིད་ཡེ་རུ་སཱ་ལེམ་དུ་སླེབས་ནས་རྗེས་འབྲང་པ་རྣམས་དང་འགྲོགས་འདོད༌ཀྱང༌། དེ་རྣམས་ཁོང་ལ་འཇིགས་ཤིང་རྗེས་འབྲང་པ་ཡིན་པར་ཡིད་མ་ཆེས་པ་རེད།
ACT 9:27 འོན༌ཀྱང༌། པཱར་ན་པཱ་ཡིས་ཁོང་ཉིད་སྐུ་ཚབ་པ་རྣམས་ཀྱི་མདུན་དུ་ཁྲིད༌ཅིང༌། དེ་སྔར་སོ་ལོས་ལམ་བར་ནས་གཙོ་བོ་ཁོང་ཉིད་ཇི་ལྟར་མཐོང་ཞིང་ཁོང་གིས་ཁོ་རང་ལ་གསུང་གླེང་ཅི་གནང་བ༌དང༌། ཡང་སོ་ལོས་དཱ་མེ་སེག་ནས་སྙིང་སྟོབས་ཆེན་པོས་སྐྱབས་མགོན་ཡེ་ཤུའི་མཚན་ལ་བརྟེན་ནས་ཆོས་བསྒྲགས་པ་སོགས་སྨྲས་སོ།།
ACT 9:28 དེ་ནས་སོ་ལོ་དང་སྐུ་ཚབ་པ་རྣམས་མཉམ་དུ་འགྲོགས༌ཏེ། ཡེ་རུ་སཱ་ལེམ་དུ་རྒྱུ་ཞིང་གཙོ་བོའི་མཚན་ལ་བརྟེན་ནས་སྤོབས་པ་ཆེན་པོས་ཆོས་བསྒྲགས་པ༌དང༌།
ACT 9:29 གྷི་རིག་སྐད་སྨྲ་མཁན་ཡ་ཧུ་དཱ་པ་རྣམས་ལའང་རྩོད་གླེང་བྱས་ཤིང་དེ་རྣམས་ཀྱིས་སོ་ལོ་གསོད་པའི་ཐབས་བཙལ།
ACT 9:30 སྤུན་ཟླ་རྣམས་ཀྱིས་དོན་དེ་ཤེས་ནས་ཁོང་ཉིད་མར་ཀེ་སར་ཡཱ་རུ་བསྐྱལ་ཏེ་ཐཱར་ཟི་ལ་འགྲོ་རུ་བཅུག་གོ།
ACT 9:31 དེའི་དུས༌སུ། ཡ་ཧུ་དཱ༌དང༌། ག༌ལིལ། སཱ་མར་ཡ་བཅས་ཡུལ་སོ་སོའི་ཆོས་ཚོགས་རྣམས་ལ་ཞི་བདེ་ཡོད་ཅིང་ཡར་བསྐྱེད་ཐོབ་པ༌དང༌། གཙོ་བོ་ལ་གུས་ཤིང་འཇིགས་པ་དང་དམ་པའི་ཐུགས་ཉིད་ཀྱིས་སེམས་གསོ་མཛད་པའི་ངང་ནས་མི་གྲངས་ཀྱང་ཇེ་མང་དུ་འཕེལ་ཏོ།།
ACT 9:32 དེ་ཡང་པེ་ཏྲོ་ཡུལ་ཕྱོགས་ཀུན་ཏུ་རྒྱུ་བའི་དུས་སུ་ལད་རྡ་རུ་གནས་པའི་དད་ལྡན་དམ་པ་རྣམས་ཀྱི་དྲུང་དུ་ཕྱིན་པ༌དང༌།
ACT 9:33 དེ་རུ་མིང་ལ་ཨེ་ནེ་ཡཱ་བྱ་བ་ནད་བྱུང་ནས་ལོ་བརྒྱད་ལ་ཉལ་སར་ལྷུང་བའི་ཞ་བོ་ཞིག་ཡོད་པ་དང་ཕྲད་ཅིང༌།
ACT 9:34 པེ་ཏྲོ་ན༌རེ། ཨེ་ནེ༌ཡཱ། ཡེ་ཤུ་མཱ་ཤི་ཀས་ཁྱོད་ཀྱི་ནད་གསོས་པས་ཡར་ལངས་ནས་རང་གི་མལ་སྟན་བདག་གཉེར་གྱིས་ཞེས་གསུངས་མ་ཐག་ཁོ་རང་ཡར་ལངས་པ་དང་།
ACT 9:35 ལད་རྡ་དང་ཤཱ་རོན་དུ་གནས་པའི་མི་ཐམས་ཅད་ཀྱིས་ཨེ་ནེ༌ཡཱ་མཐོང་སྟེ་གཙོ་བོའི་ཕྱོགས་སུ་འཁོར༌ཏོ།།
ACT 9:36 དེ་ནས་ཡོ་ཕཱ་རུ་མིང་ལ་ཐཱ་པི་ཐ་ཟེར་བའི་བུད་མེད་རྗེས་འབྲང་པ་ཞིག་ཡོད༌ཅིང༌། མིང་དེ་གྷི་རིག་སྐད་དུ་བསྒྱུར་ན་དོར་ཀི་ཞེས་ཀྱང༌ཟེར། ཁོ་མོས་རྟག་ཏུ་ལས་བཟང་པོ་བསྒྲུབས་པ་དང་སྦྱིན་པ་མང་པོ་བཏང་ངོ༌།།
ACT 9:37 དུས༌དེར། ཁོ་མོར་ན་ཚ་བྱུང་ནས་ཚེ་ལས་འདས་པ་དང་མི་རྣམས་ཀྱིས་ཁོ་མོའི་བེམ་པོ་བཀྲུས་ཏེ་ཐོག་ཁང་ཞིག་གི་ནང་དུ་བཞག་གོ།
ACT 9:38 ཡོ་ཕཱ་ནི་ལད་རྡ་དང་བར་ཐག་ཉེ་བས་རྗེས་འབྲང་པ་རྣམས་ཀྱིས་པེ་ཏྲོ་ཁོང་ཉིད་ལད་རྡ་རུ་ཡོད་པ་ཐོས་ནས་མི་གཉིས་ཁོང་གི་དྲུང་དུ་མངགས༌ཏེ། དུས་མི་འགྱངས་པར་ངེད་ཅག་གི་གམ་དུ་ཕེབས་རོགས་ཞེས་ནན་གྱིས་ཞུས་སོ།།
ACT 9:39 དེ་ནས་པེ་ཏྲོ་ཡར་ལངས་ནས་དེ་དག་དང་མཉམ་དུ་ལམ་ལ་ཆས། ཡོ་ཕཱ་རུ་སླེབས་ཤིང་མི་རྣམས་ཀྱིས་ཁོང་ཉིད་ཐོག་ཁང་ནང་དུ་ཁྲིད་པ༌དང༌། ཡུགས་མོ་རྣམས་ཁོང་གི་གམ་དུ་ཡར་ལངས་ནས་ངུས༌ཤིང༌། བུད་མེད་དོར་ཀི་དེ་སྔར་ཁོ་མོ་རྣམས་དང་མཉམ་དུ་ཡོད་དུས་བཟོས་པའི་ནང་གོས་དང་ཕྱི་གོས་རྣམས་ཁོང་ལ་བསྟན་པ་རེད།
ACT 9:40 འོན་ཀྱང་པེ་ཏྲོས་ཁོ་མོ་རྣམས་ཕྱིར་འགྲོ་རུ་བཅུག༌རྗེས། པུས་མོ་སར་བཙུགས་ཏེ་དཀོན་མཆོག་ལ་གསོལ་བ་བཏབ༌ཅིང༌། ཞལ་ཕྱིར་འཁོར་ནས་བེམ་པོ་ལ་འདི་སྐད༌དུ། ཐཱ་པི༌ཐ། ཡར་ལོངས་ཤིག་ཅེས་གསུངས་པ༌ན། ཁོ་མོས་མིག་ཕྱེས་ཏེ་པེ་ཏྲོ་མཐོང་བ་དང་ཡར་ཙོག་པུར་བསྡད་དོ།།
ACT 9:41 དེ་ནས་པེ་ཏྲོས་ཁོ་མོའི་ལག་པར་འཇུས་ནས་ཡར་བསླངས་ཤིང་དད་ལྡན་དམ་པ་དང་ཡུགས་མོ་རྣམས་ནང་ལ་བོས༌ཏེ། ཁོ་མོ་གསོན་པོར་དེ་རྣམས་ལ་སྤྲད།
ACT 9:42 དོན་དེ་ཡོ་ཕཱ་ཡོངས་སུ་ཁྱབ་པ་དང་མི་མང་པོས་གཙོ་བོ་ལ་དད་པ་བྱས་སོ།།
ACT 9:43 དོན་དེ་བྱུང་བའི་རྗེས༌སུ། པེ་ཏྲོ་ཁོང་ཉིད་ཡོ་ཕཱ་ཡི་སི་མོན་ཟེར་བའི་ཀོ་བཟོ་བ་ཞིག་གི་ཁྱིམ་དུ་ཉིན་མང་པོར་བཞུགས༌སོ།།
ACT 10:1 དེ་ཡང་ཀེ་སར་ཡཱ་ཞེས་པར་ཨི་ཏ་ལི་དཔུང་ཁག་གི་བརྒྱ་དཔོན་མིང་ལ་ཀོར་ནེ་ལིའུ་ཞེས་པ་ཞིག་ཡོད༌དེ།
ACT 10:2 ཁོ་ནི་དད་མོས་ཡོད་པ་ཞིག་ཡིན༌ལ། ཁོ་དང་བཟའ་མི་ཐམས་ཅད་ཀྱང་དཀོན་མཆོག་ལ་དད་གུས་ཆེ༌བས། མི་རྣམས་ལ་སྦྱིན་པ་མང་པོ་བཏང་བ་དང་དུས་རྟག་ཏུ་དཀོན་མཆོག་ལ་གསོལ་བ་བཏབ་བོ།།
ACT 10:3 དེ་ཡང་ཉིན་ཞིག་གི་ཕྱི་དྲོའི་ཆུ་ཚོད་གསུམ་ཡས་མས་སུ་ཁོ་ལ་ཞལ་གཟིགས་གནང་ནས། དཀོན་མཆོག་གི་ཕོ་ཉ་ཞིག་རང་གི་གམ་དུ་ཕེབས་པ་གསལ་པོར་མཐོང་བ་དང་ཕོ་ཉས་ཀོར་ནེ་ལིའུ་ཞེས་བོས།
ACT 10:4 དེ་ནས་ཁོས་མིག་ཅེ་རེར་ཕོ་ཉ་ལ་བལྟས་ཤིང་དངངས་སྐྲག༌ངང༌། ཇོ་བོ༌ལགས། དོན་ཅི་ཡོད་ཅེས་ཞུས་པ༌ལ། ཕོ་ཉ་ན༌རེ། ཁྱོད་ཀྱི་གསོལ་འདེབས་དང་སྦྱིན་པ་ནི་དཀོན་མཆོག་གི་དྲུང་དུ་དྲན་རྟེན་བཞིན་དུ་སླེབས༌འདུག
ACT 10:5 ད་ལྟ་ཁྱོད་ཀྱིས་ཡོ་ཕཱ་རུ་མི་མངགས་ཏེ་པེ་ཏྲོ་ཞེས་ཀྱང་འབོད་པའི་སི་མོན་གདན་དྲོངས༌ཤིག
ACT 10:6 ཁོ་རང་ནི་རྒྱ་མཚོའི་འགྲམ་དུ་གནས་པའི་ཀོ་བཟོ་བ་སི་མོན་གྱི་ཁྱིམ་དུ་བཞུགས་པ་ཡིན་ཞེས་གསུངས་པ༌དང༌།
ACT 10:7 ཁོ་ལ་གཏམ་གླེང་བའི་ཕོ་ཉ་ཕྱིར་ཕེབས༌རྗེས། ཁོས་རང་ཁྱིམ་གྱི་ཞབས་ཕྱི་པ་གཉིས་དང་རྟག་ཏུ་རང་གི་མདུན་དུ་སྡོད་པའི་དམག་མི་རྣམས་ལས་དད་མོས་ཡོད་པ་ཞིག་བོས༌ཏེ།
ACT 10:8 དོན་དེ་ཐམས་ཅད་ཁོ་རྣམས་ལ་བཤད་པ་དང་ཡོ་ཕཱ་རུ་མངགས༌སོ།།
ACT 10:9 དེའི་ཕྱི༌ཉིན། ཁོ་རྣམས་ལམ་དུ་ཆས་ཤིང་ཡོ་ཕཱ་གྲོང་ཁྱེར་དང་ཉེ་བར་སླེབས་པ༌དང༌། ཉིན་གུང་ཙམ་གྱི་དུས༌སུ། པེ་ཏྲོ་ཁང་ཐོག་ཏུ་གསོལ་བ་འདེབས་སུ་སོང་བ༌དང༌།
ACT 10:10 ཁོང་གི་ལྟོ་བ་བཀྲེས་པ་དང་ཁ་ཟས་སྤྱོད་འདོད༌ཅིང༌། ཁྱིམ་ཚང་དེས་ཀྱང་ཁ་ཟས་གྲ་སྒྲིག་བྱེད་བཞིན་པའི་དུས༌སུ། པེ་ཏྲོའི་དྲན་པ་འཆལ་ནས།
ACT 10:11 ནམ་མཁའི་སྒོ་ཕྱེས་པ་དང་སྣེ་བཞི་བསྡམས་པའི་རས་གྲུ་བཞི་ཆེན་པོ་དང་འདྲ་བའི་དངོས་པོ་ཞིག་ས་སྟེང་ལ་མར་དཔྱངས་པ་མཐོང༌།
ACT 10:12 དེའི་ནང་དུ་ས་སྟེང་གི་སུག་བཞི་ཅན་གྱི་སྲོག་ཆགས༌དང༌། ལྟོ་འགྲོའི༌རིགས། གཞན་ཡང་ནམ་མཁའི་བྱ་རྣམས་ཡོད༌ཅིང༌།
ACT 10:13 ཡང་སྐད་སྒྲ་ཞིག་གྲགས༌ཏེ། པེ༌ཏྲོ། ཡར་ལོངས༌དང༌། དེ་དག་བཤས་ནས་ཟོ་ཞིག་ཅེས་གསུངས་སོ།།
ACT 10:14 འོན༌ཀྱང༌། པེ་ཏྲོ་ན༌རེ། གཙོ་བོ༌ལགས། དེ་ལྟར་བྱེད་ག་ལ༌རུང༌། ངས་ཁ་ཟས་སུ་མི་རུང་བ་དང་མི་གཙང་བ་ཞིག་གཏན་ནས་ཟོས་མ་མྱོང་ཞེས་སྨྲས་པ༌ལ།
ACT 10:15 ཡང་སྐད་སྒྲ་ཞིག་གྲགས་ཏེ་འདི་སྐད༌དུ། དཀོན་མཆོག་གིས་གཙང་མར་མཛད་པ་རྣམས་ཁྱོད་ཀྱིས་མི་གཙང་བར་བརྩི་མི་འོས་ཞེས་གསུངས་སོ།།
ACT 10:16 དེ་ལྟར་བསྟུད་མར་ཐེངས་གསུམ་ལ་སྐད་སྒྲ་བྱུང་མ་ཐག་རས་ལེབ་ཆེན་པོ་དེ་ཕྱིར་ནམ་མཁར་དྲངས༌སོ།།
ACT 10:17 དེ་ནས་པེ་ཏྲོས་རང་ལ་ཞལ་གཟིགས་གནང་བ་ལས་མཐོང་བའི་དོན་དེ་རྣམས་ཅི་ཡིན་མ་ཤེས་པར་ཐེ་ཚོམ་སྐྱེ་བའི་སྐབས༌སུ། ཀོར་ནེ་ལིའུ་ཡིས་མངགས་པའི་མི་དེ་རྣམས་ཀོ་བཟོ་བ་སི་མོན་གྱི་ཁྱིམ་ཚང་གང་ཡིན་དྲིས་ནས་སྒོ་ཁར་སླེབས་ཏེ།
ACT 10:18 སྐད་མཐོན་པོས་པེ་ཏྲོ་ཟེར་བའི་སི་མོན་འདིར་བཞུགས་སམ་ཞེས་དྲིས་སོ།།
ACT 10:19 པེ་ཏྲོས་ད་དུང་ཞལ་གཟིགས་དེའི་སྐོར་ལ་བསམ་བློ་གཏོང་བཞིན་པའི་དུས་སུ་དམ་པའི་ཐུགས་ཉིད་ཀྱིས་འདི་སྐད༌དུ། ལྟོས༌དང༌། མི་གསུམ་གྱིས་ཁྱོད་རང་འཚོལ་བཞིན་ཡོད༌པས།
ACT 10:20 ཡར་ལངས་ནས་མར་བབས་ཏེ་ཐེ་ཚོམ་མི་བྱེད་པར་དེ་དག་དང་མཉམ་དུ་སོང༌ཞིག རྒྱུ་མཚན་ནི་ཁོ་རྣམས་ངས་མངགས་པ་ཡིན་ཞེས་གསུངས་སོ།།
ACT 10:21 དེ་ནས་པེ་ཏྲོ་མར་བབས་ནས་མི་དེ་རྣམས་དང་ཕྲད་དེ་འདི་སྐད་དུ། ང་རང་ནི་ཁྱོད་ཅག་གིས་འཚོལ་བཞིན་པའི་མི་དེ་ཡིན། ཁྱོད་ཅག་འདིར་ཡོང་དོན་ཅི་ཡིན་ནམ་ཞེས་གསུངས་པ༌ལ།
ACT 10:22 དེ་རྣམས་ན༌རེ། བརྒྱ་དཔོན་ཀོར་ནེ་ལིའུ་ནི་མི་གཞུང་རྒྱུད་དྲང་ཞིང་དཀོན་མཆོག་ལ་དད་གུས་ཆེ་བ་དང་ཡ་ཧུ་དཱའི་མི་རིགས་ཐམས་ཅད་ཀྱིས་གཟེངས་བསྟོད་བྱེད་ས་ཞིག་ཡིན། དེ་སྔར་ཕོ་ཉ་དམ་པ་ཞིག་གིས་ཀོར་ནེ་ལིའུ་ལ། ཁྱེད་རང་ཁོའི་ཁྱིམ་དུ་གདན་དྲངས་ཏེ་ཁྱེད་ཀྱིས་གང་གསུང་ལ་ཉན་དགོས་པའི་བཀའ་བསྩལ་ཞེས་ཞུས་སོ།།
ACT 10:23 དེ་ནས་པེ་ཏྲོས་དེ་རྣམས་ཁྱིམ་དུ་བོས་ཏེ་ཞག་གཅིག་ལ་སྡོད་དུ་བཅུག་པ༌དང༌། དེའི་ཕྱི༌ཉིན་ཁོ་རྣམས་དང་མཉམ་དུ་ལམ་ལ་ཆས༌ཤིང༌། ཡོ་ཕཱ་ཡི་སྤུན་ཟླ་ཁ་ཤས་ཀྱང་ཁོ་རྣམས་དང་ལྷན་དུ་སོང༌ངོ༌།།
ACT 10:24 ཡང་དེའི་ཕྱི་ཉིན་ཁོང་རྣམས་ཀེ་སར་ཡཱ་རུ་སླེབས་པ༌དང༌། ཀོར་ནེ་ལིའུ་ཡིས་རང་གི་གཉེན་ཉེ་དང་གྲོགས་དམ་པ་རྣམས་བསྡུས་ཏེ་བསྒུགས་ཡོད་པ་རེད།
ACT 10:25 དེ་ནས་པེ་ཏྲོ་སླེབས་མ་ཐག་ཀོར་ནེ་ལིའུ་ཡིས་ཁོང་ལ་དགའ་བསུ་བྱས་པ་དང་ཁོང་གི་ཞབས་དྲུང་དུ་ཕྱག་བཙལ་ཏོ།།
ACT 10:26 འོན་ཀྱང་པེ་ཏྲོས་ཁོ་རང་ཡར་བསླངས་ཏེ་ཁྱོད་ཡར་ལོངས༌དང༌། ང་རང་ཡང་མི་ཡིན་ནོ་ཞེས་གསུངས་པ༌དང༌།
ACT 10:27 ཁོང་གཉིས་ཀྱིས་གཏམ་གླེང་བཞིན་ཁྱིམ་དུ་སོང་བ༌ན། པེ་ཏྲོས་མི་མང་པོའང་གནས་དེར་འཛོམས་ཡོད་པ་མཐོང༌སྟེ།
ACT 10:28 དེ་རྣམས་ལ་འདི་ལྟར། ཆོས་ཁྲིམས་ལྟར་ན་ཡ་ཧུ་དཱ་པ་རྣམས་མི་རིགས་གཞན་དང་འགྲོགས་པའམ་དེ་དག་གི་ཁྱིམ་དུ་འགྲོ་མི་རུང་བ་ནི་ཁྱོད་རྣམས་ཀྱིས་ཤེས༌པ་ཡིན། འོན་ཀྱང་དཀོན་མཆོག་གིས་ང་ལ་མི་སུ་ཡིན་ཡང་འགྲོགས་མི་རུང་བའམ་མི་གཙང་བར་བརྩི་མི་འོས་པར་བསྟན་ཏོ།།
ACT 10:29 དེའི་ཕྱིར་ང་རང་ཡང་ཐེ་ཚོམ་མེད་པར་གདན་ཞུ་ལྟར་ཡོང་བ་ཡིན༌ཏེ། ཁྱོད་ཅག་གིས་ང་རང་འབོད་དོན་ཅི་ཡིན་ནམ་ཞེས་གསུངས་པ༌ན།
ACT 10:30 ཀོར་ནེ་ལིའུ་ན༌རེ། ཉིན་བཞིའི་སྔོན་གྱི་དུས༌འདིར། ངས་ཕྱི་དྲོའི་ཆུ་ཚོད་གསུམ་གྱི་སྟེང་རང་ཁྱིམ་ནས་གསོལ་བ་འདེབས་པའི༌ཚེ། གློ་བུར་ཉིད་དུ་འོད་མདངས་འཕྲོ་བའི་གོས་གྱོན་པའི་མི་ ཞིག་ངའི་མདུན་དུ་སླེབས་ཏེ་འདི་སྐད༌དུ།
ACT 10:31 ཀོར་ནེ་ལིའུ། དཀོན་མཆོག་གིས་ཁྱོད་ཀྱི་གསོལ་འདེབས་ལ་གསན་པ༌དང༌། ཁྱོད་ཀྱིས་སྦྱིན་པ་བཏང་བའང་ཁོང་གི་ཐུགས་སུ་བཟུང་འདུག
ACT 10:32 དེའི་ཕྱིར། ཁྱོད་ཀྱིས་ཡོ་ཕཱ་རུ་མི་མངགས་ཏེ་པེ་ཏྲོ་ཞེས་ཀྱང་འབོད་པའི་སི་མོན་གདན་དྲོངས༌ཤིག ཁོ་རང་ནི་རྒྱ་མཚོའི་འགྲམ་གྱི་ཀོ་བཟོ་བ་སི་མོན་གྱི་ཁྱིམ་དུ་བཞུགས་ཞེས་གསུངས་པས།
ACT 10:33 ངས་མྱུར་བར་ཁྱེད་ཀྱི་དྲུང་དུ་མི་མངགས་པ་ཡིན། ཁྱེད་རང་འདིར་ཕེབས་པ་ལེགས་སོ།། གཙོ་བོས་ཁྱེད་ལ་གནང་བའི་བཀའ་ཐམས་ཅད་ལ་མཉན་པའི༌ཕྱིར། ད་ལྟ་ངེད་ཅག་ཚང་མ་དཀོན་མཆོག་གི་སྤྱན་སྔར་འཛོམས་པ་ཡིན་ཞེས་ཞུས༌སོ།།
ACT 10:34 དེ་ནས་པེ་ཏྲོས་འདི་སྐད༌དུ། དཀོན་མཆོག་གིས་ཕྱོགས་རིས་མི་མཛད་པ་ངས་དངོས་གནས་རྟོགས༌ཤིང་།
ACT 10:35 མ་གཞི་མི་རིགས་སོ་སོའི་ཁྲོད་དུ་ཁོང་ལ་དད་གུས་བྱེད་པ་དང་བདེན་དོན་སྒྲུབ་མཁན་རྣམས་ལ་ཁོང་ཐུགས་མཉེས༌པ་ཡིན་ནོ།།
ACT 10:36 དཀོན་མཆོག་གིས་ཐམས་ཅད་ཀྱི་གཙོ་བོ་སྟེ་ཡེ་ཤུ་མཱ་ཤི་ཀ་བརྒྱུད་ནས་ཞི་བདེའི་འཕྲིན་བཟང་བསྒྲགས་ཤིང་བཀའ་དེ་ཡེས་ར་ཨེལ་གྱི་བུ་རྒྱུད་ལ་གནང༌།
ACT 10:37 ཡང་ཡོ་ཧ་ནན་གྱིས་ཁྲུས་གསོལ་གྱི་ཆོས་བསྒྲགས་པའི་རྗེས༌སུ། ག་ལིལ་ཡུལ་ནས་ཡ་ཧུ་དཱའི་ཡུལ་ཀུན་ཏུ་ཁྱབ་པའི་དོན་ཆེན་དང་།
ACT 10:38 ནཱ་ཙ་རེལ་གྱི་ཡེ་ཤུ་ལ་དཀོན་མཆོག་གིས་དམ་པའི་ཐུགས་ཉིད་དང་ནུས་མཐུས་ཅི་ལྟར་བྱུགས་པར་མཛད་པ་དེ་ནི་ཁྱོད་རྣམས་ཀྱིས་ཤེས་ཏེ། དཀོན་མཆོག་ནི་སྐྱབས་མགོན་ཡེ་ཤུ་དང་ལྷན་དུ་བཞུགས༌པས། ཁོང་ཉིད་ཡུལ་ཕྱོགས་ཀུན་ཏུ་ཕེབས་ནས་དོན་བཟང་མཛད༌ཅིང༌། བདུད་ཀྱི་དབང་འོག་ཏུ་མནན་པའི་མི་ཐམས་ཅད་ཀྱང་གསོས་པའོ།།
ACT 10:39 ངེད་རྣམས་ནི་ཡེ་ཤུ་ཁོང་གིས་ཡ་ཧུ་དཱ་པའི་ཡུལ་དང་ཡེ་རུ་སཱ་ལེམ་དུ་མཛད་པའི་དོན་འདི་ཐམས་ཅད་ལ་བདེན་དཔང་བྱེད་མཁན་ཡིན། མི་རྣམས་ཀྱིས་ཁོང་ཉིད་སྡོང་པོའི་སྟེང་དུ་བརྡབས་ནས་བཀྲོངས༌ཤིང༌།
ACT 10:40 ཉིན་གསུམ་པར་དཀོན་མཆོག་གིས་ཁོང་ཉིད་སླར་གསོན་པར་མཛད་དེ་ཁོང་གི་སྐུ་གཟུགས་མངོན་སུམ་དུ་བསྟན་པའོ།།
ACT 10:41 དེ་ནི་མི་ཐམས་ཅད་ལ་མངོན་སུམ་དུ་བསྟན་པ་མ་ཡིན༌པར། དཀོན་མཆོག་གིས་སྔ་མོ་ནས་དཔང་པོ་རུ་བདམས་པའི་མི༌སྟེ། ཁོང་ཉིད་གྲོངས་པ་ནས་སླར་གསོན་རྗེས་ཁོང་དང་ལྷན་དུ་བཟའ་བཏུང་སྤྱད་པ་ངེད་རྣམས་ལ་མངོན་སུམ་དུ་བསྟན༌པ་ཡིན།
ACT 10:42 ཁོང་གིས་གནང་བའི་བཀའ་ལྟར་ངེད་ཅག་གིས་མི་རྣམས་ལ་འཕྲིན་བཟང་བསྒྲག་པ་དང་། ཁོང་ནི་དཀོན་མཆོག་གིས་ཤི་གསོན་གཉིས་ལ་ལེགས་ཉེས་ཀྱི་ཁྲིམས་ཐག་གཅོད་པའི་གཙོ་བོར་བསྐོས་པ་ལ་བདེན་དཔང་བྱེད་དགོས༌པ་ཡིན།
ACT 10:43 ལུང་སྟོན་པ་ཀུན་གྱིས་སྐྱབས་མགོན་ཡེ་ཤུར་དད་པ་བྱེད་མཁན་ཐམས་ཅད་ལ་ཁོང་གི་མཚན་ལ་བརྟེན་ནས་སྡིག་པ་བསལ་ངེས་པར་བདེན་དཔང་མཛད་པ་ཡིན་ཞེས་གསུངས་ཤིང་།
ACT 10:44 པེ་ཏྲོས་དེ་ལྟར་གསུང་བཞིན་པའི་དུས༌སུ། དམ་པའི་ཐུགས་ཉིད་ནི་བཀའ་དེར་ཉན་པའི་མི་ཐམས་ཅད་ཀྱི་སྟེང་དུ་བབས༌སོ།།
ACT 10:45 པེ་ཏྲོ་དང་མཉམ་དུ་ཡོང་བའི་མཚན་སྐྱི་བཅད་པའི་དད་ལྡན་རྣམས་ཀྱིས་ཕྱི་ཕྱོགས་པ་རྣམས་ལའང་དམ་པའི་ཐུགས་ཉིད་ཀྱི་གནང་སྦྱིན་ཐོབ་པ་མཐོང་ནས་ངོ་མཚར་སྐྱེས།
ACT 10:46 རྒྱུ་མཚན་ནི་མི་དེ་རྣམས་ཀྱིས་སྐད་གཞན་སྨྲ་བ་དང་དཀོན་མཆོག་ལ་བསྟོད་ཅིང་བསྔགས་པའང་ཐོས་པས༌སོ། །དེ་ནས་པེ་ཏྲོས་འདི་སྐད་དུ།
ACT 10:47 མི་འདི་རྣམས་ནི་ངེད་ཅག་དང་མཚུངས་པར་དམ་པའི་ཐུགས་ཉིད་ཐོབ་པ་ཡིན༌པས། ཁོ་རྣམས་ལ་ཆུས་ཁྲུས་གསོལ་བྱེད་པ་སུ་ཞིག་གིས་འགོག་ནུས་སམ་ཞེས་གསུངས་པ༌དང༌།
ACT 10:48 ཡེ་ཤུ་མཱ་ཤི་ཀའི་མཚན་ལ་བརྟེན་ནས་ཁོ་རྣམས་ལ་ཁྲུས་གསོལ་བྱེད་པའི་བཀའ་གནང༌ཞིང་། དེ་ནས་ཁོ་རྣམས་ཀྱིས་པེ་ཏྲོ་གནས་དེར་ཉིན་འགར་བཞུགས་པར་ཞུས༌སོ།།
ACT 11:1 དེ་ཡང་སྐུ་ཚབ་པ་དང་ཡ་ཧུ་དཱའི་ཡུལ་དུ་ཡོད་པའི་སྤུན་ཟླ་རྣམས་ཀྱིས་ཕྱི་ཕྱོགས་པ་རྣམས་ཀྱིས་ཀྱང་དཀོན་མཆོག་གི་བཀའ་དང་དུ་བླངས་པ་ཐོས༌ཤིང༌།
ACT 11:2 སྐུ་ཚབ་པ་པེ་ཏྲོ་ཡར་ཡེ་རུ་སཱ་ལེམ་དུ་སླེབས་པ་དང་མཚན་སྐྱི་བཅད་པའི་དད་ལྡན་འགའ་ཞིག་ན༌རེ།
ACT 11:3 ཁྱོད་རང་ཕྱི་ཕྱོགས་པའི་ཁྱིམ་དུ་སོང་བ་དང་དེ་དག་དང་མཉམ་དུ་ཁ་ཟས་ལ་རོལ་བ་རེད་ཅེས་རྩོད་པ་བྱས་སོ།།
ACT 11:4 དེ་ནས་པེ་ཏྲོས་དོན་དེ་རིམ་བཞིན་ཁོ་རྣམས་ལ་འགྲེལ་བཤད་བྱས་པ་འདི་ལྟ༌སྟེ།
ACT 11:5 ངས་ཡོ་ཕཱ་གྲོང་ཁྱེར་ནས་གསོལ་བ་བཏབ་པའི་དུས༌སུ། དྲན་པ་འཆལ་ཞིང་ངོ་མཚར་བའི་ཞལ་གཟིགས་བྱུང་བ་འདི༌ལྟར། སྣེ་བཞི་བསྡམས་པའི་རས་གྲུ་བཞི་ཆེན་པོ་དང་འདྲ་བའི་དངོས་པོ་ཞིག་ནམ་མཁའ་ནས་མར་དཔྱངས་པ་དང་ངའི་མདུན་དུ་བབས་པ་མཐོང༌བྱུང་།
ACT 11:6 ངས་ཞིབ་ཏུ་བལྟས་པ་ན་དེའི་ནང་དུ་ས་སྟེང་གི་སུག་བཞི་ཅན་གྱི་སྲོག་ཆགས་དང་། གཅན་གཟན། ལྟོ་འགྲོའི༌རིགས། གཞན་ཡང་ནམ་མཁའི་བྱ་རྣམས་ཡོད༌ཅིང༌།
ACT 11:7 ཡང་སྐད་སྒྲ་ཞིག་གྲགས༌ཏེ། པེ༌ཏྲོ། ཡར་ལོངས་ལ་དེ་དག་བཤས་ནས་ཟོ་ཞིག་ཅེས་བདག་ལ་གསུངས་པ་ཐོས༌བྱུང་ངོ་།།
ACT 11:8 དེ་ནས་ངས་གཙོ་བོ༌ལགས། དེ་ལྟར་བྱེད་ག་ལ༌རུང༌། ཟས་སུ་མི་རུང་བའམ་མི་གཙང་བ་ཞིག་ངའི་ཁ་ནང་དུ་གཏན་ནས་སོང་མ་མྱོང་ཞེས་ཞུས་པ༌ལ།
ACT 11:9 ཡང་ནམ་མཁའ་ནས་སྐད་སྒྲ་ཞིག་བྱུང༌སྟེ། དཀོན་མཆོག་གིས་གཙང་མར་མཛད་པ་རྣམས་ཁྱོད་ཀྱིས་མི་གཙང་བར་བརྩི་མི་འོས་ཞེས་གསུངས་སོ།།
ACT 11:10 དེ་ལྟར་བསྟུད་མར་ཐེངས་གསུམ་ལ་སྐད་སྒྲ་བྱུང་རྗེས་ཐམས་ཅད་ཕྱིར་ནམ་མཁར་དྲངས་སོ།།
ACT 11:11 དུས་དེ་ཉིད་ལ། ཀེ་སར་ཡཱ་ནས་བདག་གི་གམ་དུ་མངགས་པའི་མི་གསུམ་པོའང་ངེད་ཅག་སྡོད་སའི་ཁང་པའི་སྒོ་མདུན་དུ་སླེབས་ཤིང༌།
ACT 11:12 དམ་པའི་ཐུགས་ཉིད་ཀྱིས་ང་རང་ལ་ཐེ་ཚོམ་མི་བྱེད་པར་དེ་རྣམས་དང་མཉམ་དུ་འགྲོ་དགོས་པའི་བཀའ་བསྩལ་པ༌དང༌། སྤུན་ཟླ་དྲུག་པོ་འདི་དག་ཀྱང་བདག་དང་མཉམ་དུ་ཀོར་ནེ་ལིའུ་ཡི་ཁྱིམ་དུ་སོང༌ངོ་༎
ACT 11:13 དེ་ནས་ཁོས་ཕོ་ཉ་ཞིག་རང་གི་ཁང་པའི་ནང་དུ་ཇི་ལྟར་ལངས་བསྡད་ཡོད་པ་མཐོང་བ༌དང༌། ཕོ་ཉས་ཁོ་རང་ལ་འདི་སྐད༌དུ། ཁྱོད་ཀྱིས་ཡོ་ཕཱ་རུ་མི་མངགས་ཏེ་པེ་ཏྲོ་ཞེས་ཀྱང་འབོད་པའི་སི་མོན་གདན་དྲོངས༌ཤིག
ACT 11:14 ཁོང་གིས་ཁྱོད་དང་ཁྱོད་ཀྱི་ཁྱིམ་མི་ཐམས་ཅད་ཐར་བར་བྱེད་པའི་གཏམ་ཁྱོད་ལ་སྨྲ་བར་འགྱུར་ཞེས་གསུངས་པའི་གཏམ་དེ་ངེད་རྣམས་ལ་སྨྲས།
ACT 11:15 ངས་དེ་རྣམས་ལ་གཏམ་སྨྲ་བར་བརྩམས་པའི༌ཚེ། དམ་པའི་ཐུགས་ཉིད་ཐོག་མར་ངེད་ཅག་གི་སྟེང་དུ་ཅི་ལྟར་བབས་པ་བཞིན་ཁོ་རྣམས་ཀྱི་སྟེང་དུའང་བབས་སོ།།
ACT 11:16 དེ་སྔར་གཙོ་བོས་འདི་སྐད༌དུ། ཡོ་ཧ་ནན་གྱིས་ཆུས་ཁྲུས་གསོལ་བྱས༌མོད། འོན་ཀྱང་ཁྱོད་རྣམས་ལ་དམ་པའི་ཐུགས་ཉིད་ཀྱི་ཁྲུས་གསོལ་འཐོབ་པར་འགྱུར་ཞེས་གསུངས་པ་བདག་གིས་དྲན་ནོ།།
ACT 11:17 བདག་ཅག་གིས་གཙོ་བོ་ཡེ་ཤུ་མཱ་ཤི་ཀ་ལ་དད་པ་བྱེད་པའི༌ཚེ། དཀོན་མཆོག་གིས་བདག་ཅག་ལ་ཇི་ལྟར་གནང་སྦྱིན་གནང་བ་བཞིན་དེ་རྣམས་ལའང་གནང་བ་ཡིན༌པས། ངས་དཀོན་མཆོག་ཅི་ལྟར་འགོག་ནུས་སམ་ཞེས་གསུངས་སོ།།
ACT 11:18 མི་རྣམས་ཀྱིས་གསུང་དེ་ཐོས་ནས་གཏམ་ཅི་ཡང་མི་སྨྲ༌བར། དཀོན་མཆོག་གིས་ད་ལྟ་ཕྱི་ཕྱོགས་པ་རྣམས་ལའང་མཐའ་མེད་པའི་ཚེ་སྲོག་འཐོབ་པའི༌ཕྱིར། འགྱོད་བཤགས་ཀྱི་སེམས་གནང་བ་རེད་ཅེས་དཀོན་མཆོག་ལ་བསྟོད་བསྔགས་བརྗོད༌དོ།།
ACT 11:19 དེ་ཡང་སི་ཏེ་ཕཱན་གྱི་དོན་རྐྱེན་གྱི་དབང་གིས་གནོད་འཚེ་མྱངས་ཤིང་ཕྱོགས་བཞིར་ཐོར་བའི་དད་ལྡན་རྣམས་ཕོའོ་ནེ་ཀེ་དང་ཀིབ་རིས། གཞན་ཡང་ཨན་ཏི་ཡོག་ཡཱ་རུ་ཕྱིན༌ནས། གཞན་སུ་ལའང་དཀོན་མཆོག་གི་བཀའ་མ་བསྒྲགས་པར་ཡ་ཧུ་དཱ་པ་ཁོ་ནར་བསྒྲགས་སོ།
ACT 11:20 འོན༌ཀྱང༌། དེ་དག་གི་ཁྲོད་དུ་ཡོད་པའི་ཀིབ་རིས་དང་ཀི་རེ་ནེ་ཡི་མི་ཁ་ཤས་ཨན་ཏི་ཡོག་ཡཱ་རུ་སླེབས༌ཏེ། གྷི་རིག་པ་རྣམས་ལའང་གཙོ་བོ་ཡེ་ཤུའི་སྐོར་བསྒྲགས་པ༌དང༌།
ACT 11:21 གཙོ་བོའི་ཕྱག་ནི་མི་དེ་རྣམས་དང་ལྷན་དུ་བཞུགས༌ཤིང༌། མི་ཤིན་ཏུ་མང་པོའང་དད་ཅིང་གཙོ་བོའི་ཕྱོགས་སུ་འཁོར་བར་གྱུར་ཏོ།།
ACT 11:22 དོན་དེ་ཡེ་རུ་སཱ་ལེམ་དུ་ཡོད་པའི་ཆོས་ཚོགས་ཀྱི་རྣ་བས་ཐོས་ཏེ་པཱར་ན་པཱ་བྱ་བ་ཨན་ཏི་ཡོག་ཡཱ་རུ་མངགས༌པ་དང་།
ACT 11:23 ཁོ་རང་ཡུལ་དེར་སླེབས་ནས་དཀོན་མཆོག་གིས་མི་རྣམས་ལ་གནང་བའི་ཐུགས་རྗེ་མཐོང་སྟེ་སེམས་དགའ་བར་གྱུར་ནས། མི་རྣམས་ལ་བློ་སེམས་འགྱུར་མེད་ཀྱིས་གཙོ་བོ་ལ་བརྟེན་པར་སྐུལ་མ་གནང་ངོ༌།།
ACT 11:24 པཱར་ན་པཱ་ནི་རང་གཤིས་བཟང་ཞིང་དམ་པའི་ཐུགས་ཉིད་ཀྱིས་ཁྱབ་ཡོད་པ་དང་དད་སེམས་ཆེ་བ་ཞིག་ཡིན་པས་མི་མང་པོས་ཀྱང་གཙོ་བོ་ལ་དད་པ་བྱས༌པ་རེད།
ACT 11:25 དེ་ནས་ཁོ་རང་ཐཱར་ཟི་ཞེས་པར་སོ་ལོ་འཚོལ་དུ་སོང༌ཞིང༌།
ACT 11:26 ཁོང་བཙལ་ནས་རྙེད་པ་དང་ཨན་ཏི་ཡོག་ཡཱ་རུ་ཁྲིད་ཡོང་ཞིང་། དེ་ནས་ཁོང་གཉིས་ལོ་གཅིག་གི་རིང་ལ་ཆོས་ཚོགས་དང་མཉམ་དུ་འཚོགས་ཏེ་མི་མང་པོར་ཆོས་གསུངས་སོ།། རྗེས་འབྲང་པ་རྣམས་ལ་མཱ་ཤི་ཀ་པ་ཞེས་པའི་མིང་ནི་ཐོག་མར་ཨན་ཏི་ཡོག་ཡཱ་ནས་ཐོགས༌པའོ།།
ACT 11:27 ཉིན་དེ་དག་གི་རིང༌ལ། ལུང་སྟོན་པ༌ཁ་ཤས་ཡེ་རུ་སཱ་ལེམ་ནས་མར་ཨན་ཏི་ཡོག་ཡཱ་རུ་བྱོན་པ༌དང༌།
ACT 11:28 དེ་རྣམས་ཀྱི་ཁྲོད་དུ་ཨ་གཱ་པུ་བྱ་བ་ཞིག་ཡོད་པ་དེས་དམ་པའི་ཐུགས་ཉིད་ཀྱི་ནུས་མཐུར་བརྟེན་ནས་ས་གཞི་ཐམས་ཅད་ལ་མུ་གེ་ཆེན་པོ་འབྱུང་ངེས་པའི་ལུང་བསྟན་གནང༌། དོན་དེ་ཀཱ་ལོ་དི་རྒྱལ་པོའི་དུས་སུ་དངོས་གནས་བྱུང་མྱོང༌བ་ཡིན་ནོ།།
ACT 11:29 དེ་ནས་རྗེས་འབྲང་པ་རྣམས་ཀྱིས་རང་རང་གི་ཅི་ནུས་བཞིན་ཞལ་འདེབས་ཕུལ་ནས་ཡ་ཧུ་དཱའི་ཡུལ་དུ་གནས་པའི་སྤུན་ཟླ་རྣམས་ལ་རོགས་སྐྱོར་བྱེད་རྒྱུ་ཐག་གིས་བཅད༌ཅིང༌།
ACT 11:30 ཁོ་རྣམས་ཀྱིས་རྒྱུ་ནོམ་པ་ཅི་ཙམ་བསྡུས་པ་ཐམས་ཅད་པཱར་ན་པཱ་དང་སོ་ལོ་གཉིས་ལ་བཅོལ༌ཏེ། ཆོས་ཚོགས་ཀྱི་རྒན་པོ་རྣམས་ལ་སྤྲོད་དུ་བཅུག༌གོ།
ACT 12:1 དུས་དེར། ས་གནས་རྒྱལ་པོ་ཧེ་རོ་དཱས་ཆོས་ཚོགས་ཀྱི་མི་ཁ་ཤས་ལ་གདུག་རྩུབ་བཀོལ་བ༌དང༌།
ACT 12:2 ཡོ་ཧ་ནན་གྱི་གཅེན་པོ་ཡ་ཀོབ་ཟེར་བ་ལ་རལ་གྲིས་བརྒྱབ་ནས་བསད་དོ།།
ACT 12:3 ཧེ་རོ་དཱས་ཡ་ཧུ་དཱ་པ་རྣམས་དོན་དེར་དགའ་བ་མཐོང་ནས་པེ་ཏྲོའང་བཟུང༌ཞིང་། དུས་དེ་ནི་སྐྱུར་མེད་བག་ལེབ་ཀྱི་ཉིན་མོ་དག་ཡིན།
ACT 12:4 དེ་ཡང་པེ་སག་གི་དུས་ཆེན་མཇུག་རྫོགས༌རྗེས། མི་རྣམས་ཀྱི་མིག་མདུན་ནས་ཁོང་ཉིད་ཁྲིམས་ལ་སྦྱོར་བའི་ཆེད༌དུ། ཧེ་རོ་དཱས་པེ་ཏྲོ་བཟུང་སྟེ་བཙོན་དུ་བཅུག༌ཅིང༌། དམག་མི་བཞི་རེ་ཅན་གྱི་དམག་ཁག་བཞི་ལ་སྲུང་དུ་བཅུག
ACT 12:5 དེ་བས་པེ་ཏྲོ་བཙོན་དུ་བཅུག་ནའང་ཆོས་ཚོགས་ཀྱིས་ཁོང་གི་དོན་དུ་དཀོན་མཆོག་ལ་གསོལ་བ་ཤུགས་དྲག་གིས་བཏབ༌བོ།།
ACT 12:6 དེ་ཡང་ཧེ་རོ་དཱས་པེ་ཏྲོ་ཁྲིམས་ལ་མ་སྦྱར་སྔོན་གྱི་ཉིན་དེའི་མཚན༌མོར། པེ་ཏྲོ་ནི་ལྕགས་ཐག་གཉིས་ཀྱིས་བཀྱིགས་པ་དང་དམག་མི་གཉིས་ཀྱི་བར་དུ་གཉིད་ལ་ཡུར༌ཅིང་། སྲུང་དམག་རྣམས་ཀྱིས་ཀྱང་སྒོའི་ཕྱི་རོལ་ཏུ་བསྲུངས་ཡོད༌པ་རེད།
ACT 12:7 གློ་བུར༌ཉིད་དུ་གཙོ་བོའི་ཕོ་ཉ་ཞིག་མངོན་སུམ་དུ་བྱུང་བ་དང་ཁང་པའི་ནང་དུ་འོད་འཚེར་བར་གྱུར་ཏོ།། དེ་ནས་ཕོ་ཉས་པེ་ཏྲོའི་གཞོགས་ནས་བསྒུལ་ཏེ་ཁོང་གཉིད་ལས་བསླངས་རྗེས་འདི་སྐད༌དུ། མྱུར་དུ་ཡར་ལོངས་ཤིག་ཅེས་གསུངས་པ་དང་ལྕགས་ཐག་རང་ཤུགས་ཀྱིས་ཁོང་གི་ལག་པ་ནས་གྲོལ་ཏོ།།
ACT 12:8 ཡང་ཕོ་ཉས་ཁོང་ལ་སྐེ་རགས་ཆོངས་ཤིག བསིལ་ལྷམ་གྱོན་ཞིག་ཅེས་གསུངས་པ་བཞིན་ཁོང་གིས་ཀྱང་དེ་ལྟར་བྱས། ཡང་ཕོ་ཉས་ཁྱོད་ཀྱིས་ཕྱི་གོས་གྱོན་ནས་ངའི་རྗེས་སུ་ཤོག་ཅིག་ཅེས་གསུངས་སོ།།
ACT 12:9 དེ་ནས་པེ་ཏྲོ་ཕྱི་རུ་བུད་དེ་ཁོང་གི་རྗེས་སུ་འབྲངས༌ནའང༌། ཕོ་ཉས་མཛད་པའི་དོན་དེ་བདེན་པ་ཡིན་པ་མ་ཤེས་པར་ཞལ་གཟིགས་མཐོང་བ་རེད་སྙམ།
ACT 12:10 དེ་ནས་ཁོང་གཉིས་སྲུང་དམག་རིམ་པ་དང་པོ་དང་གཉིས་པ་བརྒལ་ནས་གྲོང་ཁྱེར་དུ་འགྲོ་བའི་ལྕགས་སྒོར་སླེབས་པ་དང་སྒོ་ཆེན་དེ་ཡང་རང་ཤུགས་ཀྱིས་ཕྱེས༌ཤིང༌། ཁོང་གཉིས་ཕྱི་རོལ་ཏུ་བུད་དེ་སྲང་ལམ་ཞིག་ཏུ་འགྲོ་བ་ན་ཕོ་ཉ་དེ་ཁོང་དང་བྲལ་ནས་སོང་ངོ་།།
ACT 12:11 དེ་ནས་པེ་ཏྲོ་གོ་རྟོགས་སད་དེ་ན་རེ། ད་ལྟ་ངས་གཙོ་བོས་རང་གི་ཕོ་ཉ་མངགས་ཏེ་ཧེ་རོ་དཱའི་དབང་ཤེད་དང་ཡ་ཧུ་དཱ་པ་རྣམས་ཀྱི་རེ་དོན་ཐམས་ཅད་ལས་ང་རང་བསྐྱབས་པ་དངོས་གནས་ཤེས་ཞེས་གསུངས་སོ།།
ACT 12:12 དེ་ནས་ཁོང་གིས་དོན་དེ་ཤེས་ནས་མཱར་ཀུ་ཞེས་ཀྱང་འབོད་པའི་ཡོ་ཧ་ནན་གྱི་ཡུམ༌སྟེ། མིར་ཡམ་ཟེར་བ་དེའི་ཁྱིམ་དུ་སོང་བ་དང་གནས་དེར་མི་མང་པོ་འཛོམས་ཤིང་གསོལ་བ་འདེབས་ཀྱིན་འདུག
ACT 12:13 པེ་ཏྲོས་ཁྱིམ་དེའི་རྒྱལ་སྒོ་བརྡུངས་པ་ན་རའོ་དཱ་ཟེར་བའི་གཡོག་མོ་ཞིག་ཡོང་ནས་སུ་ཡིན་པར་བརྟགས་སོ།།
ACT 12:14 ཁོ་མོས་པེ་ཏྲོའི་སྐད་ཡིན་པ་ཤེས་ཏེ་ཤིན་ཏུ་དགའ་བར་གྱུར་ནས་སྒོ་འབྱེད་ཁོམ་ཡང་མ་བྱུང་བར་ཁྱིམ་ནང་དུ་བརྒྱུགས༌ནས། པེ་ཏྲོ་སྒོ་ཁར་སླེབས་འདུག་ཅེས་སྨྲས་པ༌ལ།
ACT 12:15 དེ་རྣམས་ཀྱིས་ཁྱོད་རང་སྨྱོས་པ་རེད་ཅེས་སྨྲས༌ནའང༌། གཡོག་མོས་དངོས་གནས་ཁོང་རེད་ཅེས་ནན་གྱིས་བརྗོད་པ༌དང༌། དེ་དག་གིས་ཁོང་གི་ཕོ་ཉ་ཡིན་པར་ངེས་ཞེས་སྨྲས་སོ།།
ACT 12:16 པེ་ཏྲོས་མུ་མཐུད་དུ་སྒོ་བརྡུངས་པ་ན་ཁོ་རྣམས་ཀྱིས་སྒོ་ཕྱེས་ཤིང་པེ་ཏྲོ་མཐོང་བ་དང་ངོ་མཚར་བར་གྱུར་ཏོ།།
ACT 12:17 དེ་ནས་པེ་ཏྲོས་ཁོ་རྣམས་ལ་ཅི་ཡང་མི་སྨྲ་བའི་ལག་བརྡ་བྱས༌ཏེ། གཙོ་བོས་ཁོང་ཉིད་ཇི་ལྟར་བཙོན་ཁང་ལས་ཕྱི་རུ་ཁྲིད་ཚུལ་སྨྲས༌ཤིང༌། ཡང་ཁྱོད་རྣམས་ཀྱིས་དོན་འདི་ཡ་ཀོབ་ དང་སྤུན་ཟླ་རྣམས་ལ་ཤོད་ཅིག་ཅེས་གསུངས་པ་དང་སྒོའི་ཕྱི་རུ་བུད་དེ་ཡུལ་གཞན་དུ་སོང༌ངོ༌།།
ACT 12:18 དེ་ནས་ནམ་ལངས་པ་དང་སྲུང་དམག་རྣམས་ཀྱིས་པེ་ཏྲོ་གང་དུ་ཕྱིན་པ་མ་ཤེས་པས་ཟང་ཟིང་ལང་ལོང་དུ་གྱུར་ཏོ།།
ACT 12:19 ཧེ་རོ་དཱས་ཀྱང་ཁོང་བཙལ་ཀྱང་མ་རྙེད་པས་སྲུང་དམག་ལ་འདྲི་རྩད་བྱས་ཤིང་དེ་རྣམས་གསོད་དགོས་པའི་བཀའ་ཕབ། དེའི་རྗེས༌སུ། ཧེ་རོ་དཱ་ཁོ་རང་ཡང་ཡ་ཧུ་དཱའི་ཡུལ་དང་བྲལ་ནས་མར་ཀེ་སར་ཡཱ་རུ་སོང་སྟེ་གནས་བཅས༌སོ།།
ACT 12:20 ཐཱར་དང་ཚི་ཏུན་པ་རྣམས་ལ་ཧེ་རོ་དཱ་ཤིན་ཏུ་ཁྲོས་པར་གྱུར༌ཅིང་། གྲོང་ཁྱེར་དེ་དག་གི་འབྲུ་རིགས་ནི་ས་གནས་རྒྱལ་པོ་ཧེ་རོ་དཱའི་ཡུལ་ནས་ཐོབ་པ་ཡིན༌པས། མི་དེ་རྣམས་འདུས་ནས་རྒྱལ་པོའི་ནང་བློན་པཱ་ལོས་ཐོ་ལ་བློ་བཅོལ་ཞིང་རྒྱལ་པོའི་དྲུང་དུ་སོང་ནས་བློ་གཅིག་སེམས་གཅིག་གིས་འདུམ་འགྲིག་བྱེད་པའི་ཞུ་བ་ཞུས་སོ།།
ACT 12:21 དེ་ཡང་ཧེ་རོ་དཱས་ཐག་གིས་བཅད་པའི་ཉིན་མོར་རྒྱལ་པོའི་གོས་ཆེན་མནབས་ནས་ཁྲི་ལ་བཞུགས་ཏེ་མི་རྣམས་ལ་གཏམ་སྨྲས་པ༌དང༌།
ACT 12:22 མི་རྣམས་ཀྱིས་སྐད་གསང་མཐོན་པོས་འདི་ནི་ལྷའི་གསུང་སྐད་ཡིན་པ་ལས་མིའི་སྐད་མིན་ཞེས་བརྗོད་དོ།།
ACT 12:23 ཧེ་རོ་དཱས་དཀོན་མཆོག་ལ་བསྟོད་པ་མ་ཕུལ༌བས། དེ་མ་ཐག་གཙོ་བོའི་ཕོ་ཉ་ཞིག་གིས་ཁོ་ལ་ཉེས་ཆད་བཅད་པ༌དང༌། ཁོ་རང་འབུ་སྲིན་གྱིས་ཟོས་ནས་ཤི་བར་གྱུར་ཏོ།།
ACT 12:24 འོན་ཀྱང་དཀོན་མཆོག་གི་བཀའ་རིམ་བཞིན་དར་ཞིང་རྒྱས༌པ་རེད།
ACT 12:25 པཱར་ན་པཱ་དང་སོ་ལོ་གཉིས་ཀྱིས་མངག་བཅོལ་ལྟར་རོགས་སྐྱོར་གྱི་ལས་འགན་བསྒྲུབས་རྗེས། ཡེ་རུ་སཱ་ལེམ་ནས་མཱར་ཀུ་ཞེས་ཀྱང་འབོད་པའི་ཡོ་ཧ་ནན་ཁྲིད་ནས་ཕྱིར་ལོག༌གོ།
ACT 13:1 དེ་ཡང་ཨན་ཏི་ཡོག་ཡཱ་ཡི་ཆོས་ཚོགས་ཀྱི་ནང་དུ་ལུང་སྟོན་པ་དང་སློབ་དཔོན་འགའ་ཡོད༌དེ། པཱར་ན་པཱ༌དང༌། ནེ་གེར་ཞེས་ཀྱང་འབོད་པའི་སི་མུ༌ཨོན། ཀི་རེ་ནེ་ཞེས་པའི་ལོ་ཀེ༌ཨོ། ས་གནས་དཔོན་པོ་ཧེ་རོ་དཱ་དང་མཉམ་དུ་བསྙོར་བའི་མཱ་ན་ཧེན་དང་སོ་ལོ་བཅས༌ཡིན་ནོ།།
ACT 13:2 ཁོང་རྣམས་ཀྱིས་གཙོ་བོ་ལ་བསྙེན་བཀུར་བྱེད༌ཅིང༌སྨྱུང་གནས་སྲུང་བའི་དུས་སུ། དམ་པའི་ཐུགས་ཉིད་ཀྱིས་འདི་སྐད༌དུ། བདག་གི་ཆེད་དུ་ཁྱོད་རྣམས་ཀྱིས་པཱར་ན་པཱ་དང་སོ་ལོ་གཉིས་བདག་གིས་བསྐུལ་བའི་ཆོས་དོན་བསྒྲུབ་པར་སྐོས་ཤིག་ཅེས་གསུངས་སོ།།
ACT 13:3 དེ་ནས་ཁོང་རྣམས་ཀྱིས་ཀྱང་སྨྱུང་གནས་བསྲུངས་ཏེ་གསོལ་བ་བཏབ་པ་དང་ཁོང་གཉིས་ཀྱི་ལུས་ལ་ཕྱག་བཞག་རྗེས་ཡུལ་གཞན་དུ་བཏང༌ངོ༌།།
ACT 13:4 དེ་ནས་ཁོང་གཉིས་དམ་པའི་ཐུགས་ཉིད་ཀྱིས་མངགས་ཏེ་མར་སི་ལོ་ཡཱ་རུ་སོང༌ཞིང༌། དེ་ནས་གྲུ་གཟིངས་ལ་བསྡད་དེ་ཀིབ་རིས་ལ་ཕྱིན་པ་རེད།
ACT 13:5 ཁོང་གཉིས་སཱ་ལ་མུ་རུ་སླེབས༌ཏེ། ཡ་ཧུ་དཱ་པའི་ཆོས་ཁང་སོ་སོ་ནས་དཀོན་མཆོག་གི་བཀའ་བསྒྲགས༌ཤིང༌། ཡོ་ཧ་ནན་ཡང་ཁོང་གཉིས་ཀྱི་ལས་གྲོགས་སུ་གྱུར་ཏོ།།
ACT 13:6 ཁོང་རྣམས་གླིང་ཕྲན་ཡོངས་སུ་བརྒྱུད་པའི༌མཐར། པཱ་ཕོ་རུ་སླེབས་པ་དང་དེ་རུ་སྒྱུ་མ་མཁན་ཡིན་པའི་ཡ་ཧུ་དཱ་པའི་ལུང་སྟོན་པ་རྫུས་མ་ཞིག་དང་ཕྲད་ཅིང་དེའི་མིང་ལ་པཱར་ཡེ་ཤུ་ཟེར།
ACT 13:7 མི་དེ་ནི་དུས་རྒྱུན་སྤྱི་དཔོན་སུར་ཀེ་ཕོལ་ལོལ་དང་མཉམ་དུ་གནས༌ཤིང༌། སྤྱི་དཔོན་དེ་ནི་བློ་གྲོས་དང་ལྡན་པ་ཞིག་ཡིན༌ཏེ། ཁོས་དཀོན་མཆོག་གི་བཀའ་ལ་མཉན་པའི༌ཕྱིར། པཱར་ན་པཱ་དང་སོ་ལོ་གཉིས་གདན་དྲངས༌པ་རེད།
ACT 13:8 འོན༌ཀྱང༌། གྷི་རིག་སྐད་ཀྱི་ཨི་ལི་མཱ་བྱ་བའི་སྒྱུ་མ་མཁན་ དེས་སྤྱི་དཔོན་ཁོང་ཉིད་དད་པ་ལས་བཟློག་པར་བསམས་ནས་ཁོང་གཉིས་ལ་འགོག་རྒོལ་བྱས་སོ།།
ACT 13:9 དེ་ནས་ཕོལ་ལོལ་ཞེས་ཀྱང་འབོད་པའི་སོ་ལོ་ལ་དམ་པའི་ཐུགས་ཉིད་ཀྱིས་ཁྱབ༌ཅིང༌། ཁོང་གིས་མི་དེ་ལ་ཞིབ་ཏུ་བལྟས་ཏེ་འདི་སྐད༌དུ།
ACT 13:10 གཡོ་སྒྱུ་དང་ཁྲམ་སེམས་ཀྱིས་ཁེངས་པའི་བདུད་ཀྱི༌བུ། དྲང་བདེན་ཐམས་ཅད་ཀྱི་དགྲ་བོ་ཁྱོད་ཀྱིས་དཀོན་མཆོག་གི་ལམ་ཡང་དག་པ་དེ་འཁྱོག་བཤད་བྱས་ནས་ད་དུང་མཚམས་མི་འཇོག༌གམ།
ACT 13:11 ད་ལྟ་གཙོ་བོའི་ཕྱག་གིས་ཁྱོད་ཀྱི་མིག་ལོང་བར་བྱས་ནས་རེ་ཞིག་ཉི་མའི་འོད་མི་མཐོང་བར་འགྱུར་ཞེས་སྨྲས་མ་ཐག ཁོའི་མིག་ལ་མུན་ནག་འཐིབས་ཏེ་ཅི་ཡང་མ་མཐོང་བས་ཕྱོགས་བཞིར་ལམ་ཁྲིད་པ་འཚོལ་བཞིན་གདའོ།།
ACT 13:12 དེ་ནས་སྤྱི་དཔོན་གྱིས་དོན་དེ་མཐོང་ནས་གཙོ་བོའི་བཀའ་ཆོས་ལ་ཤིན་ཏུ་ངོ་མཚར་ཞིང་དད་པར་གྱུར༌ཏོ།།
ACT 13:13 དེ་ནས་ཕོལ་ལོལ་དང་ཁོང་གི་ཆོས་གྲོགས་རྣམས་པཱ་ཕོ་ནས་གྲུ་གཟིངས་ལ་བསྡད་དེ་ཕཱམ་ཕིལ་ཡ་ཡུལ་གྱི་ཕིར་གེ་རུ་སླེབས༌རྗེས། ཡོ་ཧ་ནན་ཁོང་རྣམས་དང་ཁ་བྲལ་ནས་ཡེ་རུ་སཱ་ལེམ་དུ་ལོག་གོ།
ACT 13:14 དེ་ནས་ཁོང་རྣམས་ཕིར་གེ་དང་ཁ་བྲལ་ནས་ཕུ་སིད་ཡཱ་ཡུལ་གྱི་ཨན་ཏི་ཡོག་ཡཱ་རུ་ཕྱིན༌ཏེ། ངལ་གསོ་བའི་ཉིན་མོར་ཆོས་ཁང་དུ་སོང་ནས་བཞུགས་པ་རེད།
ACT 13:15 དེ་ནས་བཀའ་ཁྲིམས་དང་ལུང་སྟོན་པའི་མདོ་ལས་ཚན་པ་ཞིག་བཀླགས་ཚར་བ༌ན། ཆོས་ཁང་གི་དབུ་འཛིན་པས་མི་མངགས་ཏེ་ན༌རེ། སྤུན་ཟླ༌རྣམས། གལ་ཏེ་ཁྱེད་ཅག་ལ་མི་རྣམས་ཀྱི་སེམས་སྐུལ་བའི་གཏམ་ཡོད་ན་གསུང་རོགས་ཞུ་ཞེས་ངག་འཕྲིན་བསྐུར༌ཏོ།།
ACT 13:16 དེ་ནས་ཕོལ་ལོལ་ཡར་ལངས་ནས་ལག་བརྡ་བྱས་ཏེ་འདི་སྐད༌དུ། ཡེས་ར་ཨེལ་པ་རྣམས་དང་དཀོན་མཆོག་ལ་དད་གུས་ཡོད་པའི་མི་ཐམས་ཅད་ཀྱིས་ཉོན༌ཅིག
ACT 13:17 རང་རེ་ཡེས་ར་ཨེལ་མི་རིགས་ཀྱི་དཀོན་མཆོག་གིས་བདག་ཅག་གི་ཕ་མེས་རྣམས་བདམས༌ཤིང༌། མི་དེ་རྣམས་ཨེ་ཅིབ་ཡུལ་དུ་སྡོད་པའི༌ཚེ་ཁོ་རྣམས་ཆེན་པོར་མཛད་པ༌དང༌། ནུས་མཐུ་ལྡན་པའི་སྒོ་ནས་ཡུལ་དེ་ནས་ཕྱིར་ཁྲིད༌ཅིང༌།
ACT 13:18 ཡང་དབེན་སྟོང་ཡུལ་ནས་ལོ་ངོ་བཞི་བཅུ་ལྷག་གི་རིང༌ལ་མེས་པོ་རྣམས་ལ་བཟོད་སྒོམ་མཛད༌པ་དང་།
ACT 13:19 ཡང་ཁོང་གིས་ཀ་ན་ཨན་ཡུལ་གྱི་མི་རིགས་བདུན་པོ་རྡུལ་དུ་བརླག༌ཅིང༌། ཡུལ་དེ་ཡེས་ར་ཨེལ་པ་རྣམས་ལ་བགོ་སྐལ་དུ་གནང༌བ་ཡིན།
ACT 13:20 དོན་དེ་ཐམས་ཅད་ནི་ལོ་ངོ་བཞི་བརྒྱ་ལྔ་བཅུ་ཙམ་གྱི་རིང་ལ་བྱུང་བ་ཡིན། དེའི་རྗེས༌སུ། ཁོང་གིས་ལུང་སྟོན་པ་སཱ་མུ༌ཨེལ་གྱི་བར་དུ་མེས་པོ་དག་ལ་ཁྲིམས་དཔོན་བསྐོས༌པ་དང་།
ACT 13:21 ཕྱིས་སུ། ཁོ་རྣམས་ཀྱིས་རྒྱལ་པོ་ཞིག་གནང་བར་ཞུ་བ་ཞུས་པ༌ལ། དཀོན་མཆོག་གིས་པེན་ཡཱ་མེན་གྱི་ཚོ་པར་གཏོགས་པའི་ཁི་སི་ཞེས་པའི་བུ༌སྟེ། སོ་ལོ་ཟེར་བ་དེ་ལོ་བཞི་བཅུའི་རིང་ཁོ་རྣམས་ཀྱི་རྒྱལ་པོར་གནང༌ངོ་།།
ACT 13:22 ཡང་ཁོང་གིས་སོ་ལོ་ཕྱིར་བཏོན་པར་མཛད་ནས་དཱ་བིད་ཁོ་རྣམས་ཀྱི་རྒྱལ་པོར་བསྐོས༌ཤིང༌། དེ་ལ་དཔང་པོ་མཛད་ནས་འདི་སྐད༌དུ། ངས་ཡེ་སེའི་བུ་དཱ་བིད་རྙེད་དེ་ཁོ་ནི་ངའི་ཐུགས་སུ་འབྱོན་པའི་མི་ཞིག་ཡིན་ཞིང༌། ཁོས་བདག་གི་དགོངས་དོན་ཐམས་ཅད་ཇི་བཞིན་དུ་བསྒྲུབ་པར་འགྱུར་ཞེས་གསུངས་སོ།།
ACT 13:23 དཱ་བིད་ཀྱི་རིགས་རྒྱུད་ལས་དཀོན་མཆོག་གིས་རང་ཉིད་ཀྱི་ཞལ་བཞེས༌ལྟར། ཡེས་ར་ཨེལ་པ་རྣམས་ལ་སྐྱབས་མགོན་དུ་ཡེ་ཤུ་མངགས་པ་ཡིན་ནོ།།
ACT 13:24 ཁོང་མ་བྱོན་པའི་སྔོན༌ལ། ཡོ་ཧ་ནན་གྱིས་ཡེས་ར་ཨེལ་པ་ཐམས་ཅད་ལ་འགྱོད་བཤགས་ཀྱི་རྟགས་སུ་ཁྲུས་གསོལ་གྱི་ཆོས་བསྒྲགས༌ཤིང༌།
ACT 13:25 ཡོ་ཧ་ནན་གྱིས་དོན་འདི་བསྒྲུབས་ཚར་ལ་ཉེ་བའི་དུས་སུ་འདི་ལྟར་གསུངས་པ་སྟེ། ཁྱོད་ཅག་གིས་ང་རང་སུ་རེད་འདོད༌དམ། ང་ནི་སྐྱབས་མགོན་མཱ་ཤི་ཀ་མིན། ངས་རང་གི་རྗེས་སུ་ཕེབས་ངེས་པ་ཁོང་གི་ལྷམ་མདུད་ཀྱང་དགྲོལ་བར་མི་འོས་ཞེས་པའོ།།
ACT 13:26 ཡང་ཕོལ་ལོལ་ན༌རེ། སྤུན་ཟླ་རྣམ་པ། ཨབ་ར་ཧམ་གྱི་བུ་རྒྱུད༌དང་། ཁྱོད་ཅག་ལས་དཀོན་མཆོག་ལ་དད་གུས་ཡོད་པའི་མི༌རྣམ་པ། དཀོན་མཆོག་གིས་འཇིག་རྟེན་སྐྱོབ་པར་བྱེད་པའི་བཀའ་འདི་བདག་ཅག་ལ་གནང་བ་ཡིན་ནོ།།
ACT 13:27 ཡེ་རུ་སཱ་ལེམ་དུ་སྡོད་པའི་མི་རྣམས་དང་དེ་དག་གི་དཔོན་རིགས་རྣམས་ཀྱིས་གཙོ་བོ་ཡེ་ཤུ་སུ་ཡིན་མ་ཤེས༌ལ། ངལ་གསོ་བའི་ཉིན་རེ་རེར་བཀླགས་པའི་ལུང་སྟོན་པ་རྣམས་ཀྱི་གསུང་ཡང་མ་གོ༌བར། ཁོང་ལ་སྲོག་ཆད་བཅད་ནས་ལུང་བསྟན་ལྟར་འགྲུབ་པར་བྱས་པ་རེད།
ACT 13:28 དེ་དག་གིས་ཁོང་ལ་སྲོག་ཆད་གཅོད་དགོས་པའི་ཉེས་སྐྱོན་ཅི་ཡང་མ་རྙེད༌ནའང༌། པི་ལ་ཏུ་ལ་ཁོང་ཉིད་དགྲོང་དགོས་པའི་རེ་བ་ཞུས་སོ།།
ACT 13:29 དེ་ཡང་ཁོ་རྣམས་ཀྱིས་གསུང་རབ་ལས་སྐྱབས་མགོན་ཡེ་ཤུའི་སྐོར་བཀོད་ཡོད་པའི་དོན་ཐམས་ཅད་བསྒྲུབས༌རྗེས། མི་གཞན་རྣམས་ཀྱིས་ཁོང་གི་སྐུ་པུར་སྡོང་པོ་ལས་མར་བླངས་ཏེ་དུར་ཁུང་ཞིག་ཏུ་དུར་ལ་བཅུག་གོ།
ACT 13:30 འོན༌ཀྱང༌། དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་པ༌དང༌།
ACT 13:31 དེ་སྔར་ག་ལིལ་ཡུལ་ནས་ཁོང་དང་མཉམ་དུ་ཡེ་རུ་སཱ་ལེམ་ལ་ཡོང་མཁན་རྣམས་ཀྱིས་ཀྱང་ཉིན་མང་པོར་ཁོང་ཉིད་མཐོང་མྱོང་བ༌དང༌། མི་དེ་དག་ནི་ད་ལྟ་མི་རྣམས་ཀྱི་མདུན་དུ་ཁོང་ལ་བདེན་དཔང་བྱེད་མཁན་ཡང་ཡིན་ནོ།།
ACT 13:32 ངེད་རྣམས་ཀྱིས་ཀྱང་ཁྱོད་ཅག་ལ་འཕྲིན་བཟང་འཆད་པར༌བྱ་སྟེ། དེ་སྔར་དཀོན་མཆོག་གིས་བདག་ཅག་གི་ཕ་མེས་ཡང་མེས་ལ་ཞལ་བཞེས་གནང་བ་དེ༌ནི།
ACT 13:33 དཀོན་མཆོག་གིས་ཀྱང་བདག་ཅག་བུ་རབས་ཚ་རྒྱུད་རྣམས་ཀྱི་དུས་འདིར་སྐྱབས་མགོན་ཡེ་ཤུ་སླར་གསོན་པར་མཛད་པའི་སྒོ་ནས་བསྒྲུབས༌པ་ལགས། དེ་ལ་གསུང་མགུར་གཉིས་པ༌ལས། ཁྱོད་ནི་བདག་གི་སྲས་ཡིན༌ཞིང༌།། དེ་རིང་བདག་ལ་འཁྲུངས་པ་ཡིན།། ཞེས་གསུངས་པ་བཞིན༌ནོ།།
ACT 13:34 ཡང་དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་ཅིང་དུས་ནམ་ཡང་མི་འཇིག་པའི་སྐོར་ལ་ཇི་སྐད༌དུ། ཡང་དག་བདེན་པའི་བྱིན་གྱིས་བརླབས་པ༌ནི།། དཱ་བིད་ཁོང་ལ་ཇི་ལྟར་གནང་བ༌བཞིན།། བདག་གིས་ཁྱོད་ཚོར་དེ་ལྟར་སྦྱིན་པར༌བྱ།། ཞེས་གསུངས༌པའོ།།
ACT 13:35 དེའི༌ཕྱིར། གསུང་མགུར་གཞན་ལས་ཀྱང་ཇི་སྐད༌དུ། ཁྱོད་ཀྱིས་རང་གི་སྐྱེས་བུ་དམ་པ༌ནི།། ནམ་ཡང་རུལ་དུ་འཇུག༌པ་མ་ཡིན་ནོ།། ཞེས་གསུངས༌སོ།།
ACT 13:36 དཱ་བིད་འཚོ་གཞེས་ཀྱི་དུས༌སུ། དཀོན་མཆོག་གི་དགོངས་པ་བཞིན་དུ་ཞབས་ཕྱི་བསྒྲུབས༌རྗེས། ཁོང་ཚེ་ལས་འདས་པ་དང་རང་གི་ཕ་མེས་ཡང་མེས་དང་མཉམ་དུ་དུར་ལ་བཅུག་པ་དང་བེམ་པོའང་འཇིག་པར་གྱུར་ཏོ།།
ACT 13:37 འོན༌ཀྱང༌། དཀོན་མཆོག་གིས་སླར་གསོན་པར་མཛད་པ་དེ་ཉིད་འཇིག་པར་མ་གྱུར་ཏོ།།
ACT 13:38 དེའི༌ཕྱིར། སྤུན་ཟླ༌རྣམས། དོན་འདི་ཤེས་པར༌གྱིས། སྡིག་པ་སེལ་བའི་བཀའ་ནི་སྐྱབས་མགོན་ཡེ་ཤུ་བརྒྱུད་ནས་ཁྱོད་རྣམས་ལ་སྒྲོག་པར་བྱེད།
ACT 13:39 མོ་ཤེའི་བཀའ་ཁྲིམས་ལ་བརྟེན་ནས་ཁྱོད་ཅག་རྣམ་དག་ཏུ་བརྩི་མི་ནུས༌ཤིང༌། སྐྱབས་མགོན་ཡེ་ཤུ་བརྒྱུད༌ནས་དད་པ་བྱེད་མཁན་ཐམས་ཅད་རྣམ་དག་ཏུ་རྩི་བར་མཛད་དོ།།
ACT 13:40 དེ་བས་ལུང་སྟོན་པའི་ལུང་བསྟན་ལས་གསུངས་པ་རྣམས་ཁྱོད་ཅག་ལ་མི་འཕོག་པའི་ཕྱིར་གཟབ་པར༌གྱིས།
ACT 13:41 དེ་ལ་ཇི་སྐད༌དུ། བདག་གིས་ཁྱོད་ཚོའི་དུས་འདི༌རུ།། དོན་ཞིག་བསྒྲུབ་ཀྱང་ཁྱོད་རྣམས༌ལ།། གཞན་གྱིས་དོན་དེ་བརྗོད་ན༌ཡང༌།། ཁྱོད་ཅག་ཡིད་ཆེས་མེད་པའི༌ཕྱིར།། འཕྱ་མཁན་ཁྱོད་རྣམས་ལྟོས་ཤིག༌ཀྱེ།། ངོ་མཚར་བ་དང་འཇིག་པར༌ཤོག ། ཅེས་པའོ་ཞེས་གསུངས༌སོ།།
ACT 13:42 དེ་ནས་ཁོང་རྣམས་ཆོས་ཁང་ལས་ཕྱིར་བུད་པ༌དང༌། མི་དེ་རྣམས་ཀྱིས་ངལ་གསོ་བའི་ཉིན་རྗེས་མར་ཡང་དོན་འདིའི་སྐོར་ཁོང་རྣམས་ལ་གསུང་བའི་རེ་བ་ཞུས༌ཤིང་།
ACT 13:43 ཆོས་ཁང་གི་ཚོགས་གྲོལ༌རྗེས། ཡ་ཧུ་དཱ་པ་དང་ཡ་ཧུ་དཱ་པའི་ཆོས་ལུགས་ལ་ཞུགས་པའི་མི་མང་པོ་ཞིག་ཕོལ་ལོལ་དང་པཱར་ན་པཱ་གཉིས་ཀྱི་རྗེས་སུ་འབྲངས་པ༌དང༌། ཁོང་གཉིས་ཀྱིས་ཀྱང་མི་དེ་རྣམས་ལ་དུས་རྟག་ཏུ་དཀོན་མཆོག་གི་ཐུགས་རྗེའི་ནང་གནས་པར་སྐུལ་མ་མཛད༌དོ།།
ACT 13:44 དེ་ནས་གཟའ་འཁོར་རྗེས་མའི་ངལ་གསོ་བའི་ཉིན་མོར་གྲོང་ཁྱེར་གྱི་མི་མང་ཤོས་ནི་དཀོན་མཆོག་གི་བཀའ་ལ་མཉན་ཕྱིར་ལྷན་དུ་འདུས༌པ་རེད།
ACT 13:45 འོན༌ཀྱང༌། ཡ་ཧུ་དཱ་པ་རྣམས་ཀྱིས་མི་དེ་འདྲ་མང་བ་མཐོང་ནས་ཕྲག་དོག་སྐྱེས༌ཏེ། ཕོལ་ལོལ་གྱིས་གསུངས་པ་ལ་དགག་ཅིང་དམའ་འབེབས་བྱས་སོ།།
ACT 13:46 དེ་ནས་ཕོལ་ལོལ་དང་པཱར་ན་པཱ་གཉིས་ཀྱིས་སྤོབས་པ་ཆེན་པོས་འདི་སྐད༌དུ། དཀོན་མཆོག་གི་བཀའ་ནི་ཐོག་མར་ཁྱོད་རྣམས་ལ་བསྒྲག་འོས་པ་ཡིན༌མོད། འོན་ཀྱང་ཁྱོད་རྣམས་ཀྱིས་བཀའ་དེ་སྤངས༌ཤིང༌། རང་ཉིད་ལ་མཐའ་མེད་པའི་ཚེ་སྲོག་འཐོབ་མི་འོས་པའི་ཁ་ཚོན་བཅད༌པས། ལྟོས་དང་། ངེད་ཅག་ཕྱི་ཕྱོགས་པ་རྣམས་ལ་བཀའ་བསྒྲག་པར༌འགྲོའོ།།
ACT 13:47 རྒྱུ་མཚན་ནི་གཙོ་བོས་ངེད་ཅག་ལ་འདི་སྐད༌དུ། ས་མཐའི་བར་དུ་ཐར་པའི་ཆོས་བསྒྲག༌ཕྱིར།། བདག་གིས་ཁྱོད་ནི་ཕྱི་ཕྱོགས་མི་རྣམས༌ལ།། འཕྲོ་བར་བྱེད་པའི་འོད་དུ་བསྐོས་པ༌ཡིན།། ཞེས་བཀའ་གནང༌ངོ༌།།
ACT 13:48 དེ་ནས་ཕྱི་ཕྱོགས་པ་རྣམས་ཀྱིས་གསུང་དེ་ཐོས་ནས་ཤིན་ཏུ་དགའ་བར་གྱུར་ཏེ་གཙོ་བོའི་བཀའ་ལ་བསྟོད་ཅིང་བསྔགས་པ༌དང༌། དཀོན་མཆོག་ཉིད་ཀྱིས་སྔར་ནས་མཐའ་མེད་པའི་ཚེ་སྲོག་འཐོབ་པར་ཅི་ཙམ་ཐག་གིས་བཅད་པ་བཞིན་མི་རྣམས་ཁོང་ལ་དད་པར་གྱུར༌པས།
ACT 13:49 གཙོ་བོའི་བཀའ་ཡུལ་དེ་ཐམས་ཅད་ལ་ཁྱབ་པར་གྱུར་ཏོ།།
ACT 13:50 འོན་ཀྱང་ཡ་ཧུ་དཱ་པ་རྣམས་ཀྱིས་གྲོང་ཁྱེར་ནང་གི་དད་མོས་ཡོད་པ་དང་བཀུར་འོས་པའི་བུད་མེད་དང་དཔོན་རིགས་རྣམས་ལ་ངན་སྐུལ་བྱས༌ཏེ། ཕོལ་ལོལ་དང་པཱར་ན་པཱ་གཉིས་ལ་བཙན་ཤུགས་བཀོལ་ནས་ཡུལ་དེ་ལས་ཕྱིར་བཏོན་ནོ།།
ACT 13:51 དེ་བས་ཁོང་གཉིས་ཀྱིས་མི་དེ་དག་གི་ཕྱོགས་སུ་རྐང་པའི་སྟེང་གི་ས་རྡུལ་སྤྲུགས་ཏེ་ཨི་ཀོན་ཡུ་རུ་ཕྱིན༌པ་དང་།
ACT 13:52 རྗེས་འབྲང་པ་རྣམས་ཀྱི་སེམས་ལ་དགའ་སྤྲོས་ཁེངས་ཤིང་དམ་པའི་ཐུགས་ཉིད་ཀྱིས་ཁྱབ་པར་གྱུར༌ཏོ།།
ACT 14:1 དེ་ནས་ཕོལ་ལོལ་དང་པཱར་ན་པཱ་གཉིས་མཉམ་དུ་ཨི་ཀོན་ཡུ་ལ་ཡོད་པའི་ཡ་ཧུ་དཱ་པའི་ཆོས་ཁང་ལ་སོང་ནས། དེར་བཀའ་ལེགས་པར་གསུངས་པས་ཡ་ཧུ་དཱ་པ་དང་གྷི་རིག་པ་ཤིན་ཏུ་མང་པོ་དད་པར་གྱུར་ཏོ།།
ACT 14:2 འོན༌ཀྱང༌། དད་པ་མེད་པའི་ཡ་ཧུ་དཱ་པ་རྣམས་ཀྱིས་ཕྱི་ཕྱོགས་པ་རྣམས་ལ་ངན་སྐུལ་བྱས་ཏེ། སྤུན་ཟླ་རྣམས་དང་དེ་རྣམས་ཀྱི་བར་ལ་ཕྲ་མ་བཅུག
ACT 14:3 ཁོང་གཉིས་ཡུལ་དེར་ཡུན་རིང་དུ་བཞུགས༌ཤིང༌། གཙོ་བོ་ལ་བརྟེན་ནས་སྤོབས་པ་ཆེན་པོས་བཀའ་གསུངས་པ༌དང༌། གཙོ་བོས་ཀྱང་ཁོང་གཉིས་བརྒྱུད་ནས་གྲུབ་རྟགས་དང་ངོ་མཚར་བའི་དོན་བསྟན་ཏེ་རང་ཉིད་ཀྱི་ཐུགས་རྗེའི་བཀའ་ལ་བདེན་དཔང་མཛད་དོ།།
ACT 14:4 དེ་ནས་གྲོང་ཁྱེར་གྱི་མི་དེ་རྣམས་ཕྱོགས་གཉིས་སུ་གྱེས༌ཏེ། ལ་ལ་ནི་ཡ་ཧུ་དཱ་པའི་ཕྱོགས༌དང༌། ལ་ལ་ནི་སྐུ་ཚབ་པའི་ཕྱོགས་སུ་འཁོར།
ACT 14:5 དུས༌དེར། ཕྱི་ཕྱོགས་པ་དང་ཡ་ཧུ་དཱ་པ་རྣམས༌དང༌། གཞན༌ཡང༌། དེ་དག་གི་འགོ་དཔོན་རྣམས་དང་བཅས་པས་ཕོལ་ལོལ་དང་པཱར་ན་པཱ་གཉིས་ལ་བརྙས་བཅོས་བྱེད་པ་དང་རྡོ་རུབ་གཏོང་བར་རྩོམ་པ༌ལ།
ACT 14:6 ཁོང་གཉིས་ཀྱིས་དོན་དེ་ཤེས་ནས་ལི་ཀ་ཨོན་ཡཱ་ཡུལ་གྱི་ལིས་ཏྲ་དང་དིར་སྦེ་གྲོང་ཁྱེར་གཉིས་དང་དེའི་མཐའ་འཁོར་གྱི་ཡུལ་དུ་བྲོས༌ཤིང༌།
ACT 14:7 གནས་དེ་ནས་ཀྱང་མུ་མཐུད་དུ་འཕྲིན་བཟང་བསྒྲགས༌སོ།།
ACT 14:8 དེ་ཡང་ལིས་ཏྲ་གྲོང་ཁྱེར་དུ་རྐང་པར་ཤེད་ཤུགས་མེད་ཅིང་སྐྱེས་མ་ཐག་ནས་རྐང་པ་ཞ་བ་དང་གོམ་པའི་འདེགས་འཇོག་བསྒྱུར་མ་མྱོང་བའི་མི་ཞིག་ཡོད༌དེ།
ACT 14:9 ཁོས་ཕོལ་ལོལ་གྱིས་ཆོས་འཆད་པ་ལ་མཉན༌ཞིང༌། ཕོལ་ལོལ་གྱིས་ཀྱང་ཞ་བོ་དེ་ལ་ཞིབ་ལྟ་བྱས་པ༌ན། ཞ་བོ་དེ་ལ་རང་གི་ནད་གསོ་ཐུབ་པའི་དད་པ་ཡོད་པ་མཐོང༌སྟེ།
ACT 14:10 གསུང་སྐད་ཆེན་པོས་འདི་ལྟར། ཁྱོད་ཀྱིས་རང་གི་རྐང་པ་སར་བཙུགས་ནས་དྲང་མོར་ལོངས་ཤིག་ཅེས་གསུངས་པ༌ལ། ཞ་བོ་དེ་ཡར་ལྡིང་ཞིང་འགྲོ་བར་བྱས་སོ།།
ACT 14:11 དེ་ནས་ཕོལ་ལོལ་གྱིས་མཛད་པའི་དོན་དེ་མི་ཚོགས་ཀྱིས་མཐོང་ནས་སྐད་ཆེན་པོས་ལི་ཀ་ཨོན་ཡཱ་ཞེས་པའི་ཡུལ་སྐད༌དུ། ལྷ་རྣམས་མི་རུ་སྤྲུལ་ནས་བདག་ཅག་གི་ཁྲོད་དུ་བབས་ཞེས་བཤད་པ༌དང༌།
ACT 14:12 པཱར་ན་པཱའི་མིང་ལ་བཟོའུ་ཟི་ཞེས་བཏགས་པ༌དང༌། ཕོལ་ལོལ་ནི་གསུང་མཁན་གཙོ་བོ་ཡིན་པས་མིང་ལ་ཧུར་མེ་ ཞེས་བཏགས༌སོ།།
ACT 14:13 གྲོང་ཁྱེར་གྱི་ཕྱི་རོལ་ཏུ་ཡོད་པའི་བཟོའུ་ཟི་ལྷ་ཁང་གི་མཆོད་དཔོན་གྱིས་མི་རྣམས་དང་མཉམ་དུ་སྐུ་ཚབ་པ་ལ་མཆོད་པ་འབུལ་བའི༌ཕྱིར། བ་གླང་འགའ་ཁྲིད་ཅིང་མེ་ཏོག་གི་ཕྲེང་བ་བཟུང་ནས་སྒོ་འགྲམ་དུ་སླེབས་སོ།།
ACT 14:14 འོན༌ཀྱང༌། སྐུ་ཚབ་པ་པཱར་ན་པཱ་དང་ཕོལ་ལོལ་གཉིས་ཀྱིས་དོན་དེ་ཤེས་ནས་རང་གི་ཕྱི་གོས་གཤགས་ཏེ་མི་ཚོགས་ཀྱི་ཁྲོད་དུ་བརྒྱུགས་ཤིང་སྐད་གསང་མཐོན་པོས་འདི་སྐད༌དུ།
ACT 14:15 མི་ཚོགས༌ཀྱེ། ཁྱོད་ཅག་གིས་འདི་ལྟར་བྱེད༌དོན་ཅི་ཡིན་ནམ། ངེད་གཉིས་ཀྱང་ཁྱོད་རྣམས་དང་འདྲ་བར་མིའི་རང་བཞིན་དང་ལྡན༌ཞིང༌། ཁྱོད་རྣམས་ལ་འཕྲིན་བཟང་སྒྲོག་དོན་ནི་ཁྱོད་རྣམས་ཀྱིས་ཁུངས་ལུང་མེད་པའི་དོན་འདི་རྣམས་སྤངས༌ཏེ། གཏན་དུ་གསོན་པོར་བཞུགས་པའི་དཀོན་མཆོག་གི་ཕྱོགས་སུ་འཁོར་དགོས་པ་དེ་ཡིན། དཀོན་མཆོག་ནི་ནམ་མཁའ་དང་ས༌གཞི། རྒྱ་མཚོ་བཅས་དང་དེ་དག་ལ་ཡོད་པའི་དངོས་པོ་ཐམས་ཅད་སྐྲུན་མཁན་ཡིན༌ལ།
ACT 14:16 ཁོང་གིས་འདས་ཟིན་པའི་དུས་དེར་མི་རིགས་ཀུན་ལ་རང་རང་གི་འདོད་མོས་བཞིན་བྱེད་ན་བྱེད་དུ་བཅུག་གོ།
ACT 14:17 འོན་ཀྱང་ཁོང་གིས་ཁྱོད་རྣམས་ལ་དུས་རྟག་ཏུ་ཐུགས་རྗེ་གནང་ཞིང་གནམ་ལས་ཆར་བ་དང་ས་ལས་ལོ་ལེགས་གནང༌སྟེ། ཁྱོད་རྣམས་ལ་བཟའ་བཏུང་རང་གྲུབ་དང་ཡིད་སེམས་དགའ་སྤྲོས་ཁེངས་པར་མཛད་པའི་སྒོ་ནས་ཁོང་རང་ཉིད་ལ་བདེན་དཔང་མཛད་ཅེས་གསུངས་སོ།།
ACT 14:18 ཁོང་གཉིས་ཀྱིས་དེ་ལྟར་གསུངས་ནས་མཆོད་པ་འབུལ་བའི་ལས་དེ་དཀའ་ཚེགས་དང་བཅས་བཀག་པ་རེད།
ACT 14:19 དེ་ནས་ཨན་ཏི་ཡོག་ཡཱ་དང་ཨི་ཀོན་ཡུ་ནས་ཡོང་བའི་ཡ་ཧུ་དཱ་པ་ཁ་ཤས་ཀྱིས་མི་རྣམས་ལ་ངན་སྐུལ་བྱས༌ཤིང༌། དེ་རྣམས་ཀྱིས་ཕོལ་ལོལ་རྡོ་རུབ་བཏང་སྟེ་ཤི་བར་གྱུར་སྙམ་ནས་གྲོང་ཁྱེར་ཕྱི་རོལ་ཏུ་དྲུད་ནས་བཞག་གོ།
ACT 14:20 འོན༌ཀྱང༌། རྗེས་འབྲང་པ་རྣམས་ཀྱིས་ཁོང་གི་མཐའ་བསྐོར་ནས་སྡོད་པ་ལ། ཕོལ་ལོལ་ཡར་ལངས་ཏེ་ལིས་ཏྲ་གྲོང་ཁྱེར་དུ་ཕེབས༌ཤིང་། དེའི་ཕྱི༌ཉིན། པཱར་ན་པཱ་དང་མཉམ་དུ་དིར་སྦེ་རུ་ཕྱིན༌ཏོ།།
ACT 14:21 ཕོལ་ལོལ་དང་པཱར་ན་པཱ་གཉིས་ཀྱིས་གྲོང་ཁྱེར་དེའི་མི་རྣམས་ལ་འཕྲིན་བཟང་བསྒྲགས་ཏེ་མི་མང་པོ་སྐྱབས་མགོན་ཡེ་ཤུའི་རྗེས་སུ་འབྲང་དུ་བཅུག་གོ། དེ་ནས་ཁོ་གཉིས་ལིས་ཏྲ་དང་ཨི་ཀོན༌ཡུ། ཨན་ཏི་ཡོག་ཡཱ་བཅས་སུ་ཕྱིར་ལོག༌སྟེ།
ACT 14:22 རྗེས་འབྲང་པ་རྣམས་ཀྱི་སེམས་བརྟན་པོར་བྱས་ཤིང་དད་པ་ལ་གཏན་དུ་གནས་པར་བསྐུལ་ཏེ། བདག་ཅག་ནི་དཀོན་མཆོག་གི་རྒྱལ་སྲིད་དུ་ཞུགས༌ན། ངེས་པར་དཀའ་སྡུག་མང་པོ་མྱང་དགོས་ཞེས་གསུངས་སོ།།
ACT 14:23 དེ་ནས་ཁོང་གཉིས་ཀྱིས་ཆོས་ཚོགས་སོ་སོར་རྒན་པོ་འགའ་རེ་བསྐོས་ཤིང་སྨྱུང་གནས་བསྲུངས་པ་དང་གསོལ་བ་བཏབ༌ནས། དེ་རྣམས་རང་གི་དད་པ་བྱེད་ཡུལ་ཏེ་གཙོ་བོ་ལ་བཅོལ༌བ་རེད།
ACT 14:24 དེ་ནས་ཁོང་གཉིས་ཕུ་སིད་ཡཱ་ཡུལ་བརྒྱུད་ནས་ཕཱམ་ཕིལ་ཡ་ཡུལ་དུ་འབྱོར་པ༌དང༌།
ACT 14:25 ཕིར་གེ་རུ་དཀོན་མཆོག་གི་བཀའ་བསྒྲགས༌རྗེས། མར་ཨ་ཏལ་ཡཱ་རུ་ཕེབས༌ཤིང༌།
ACT 14:26 དེར་གྲུ་གཟིངས་ལ་བསྡད་ཅིང་ཨན་ཏི་ཡོག་ཡཱ་གྲོང་ཁྱེར་དུ་ཕྱིར་ལོག ཨན་ཏི་ཡོག་ཡཱ་ནི་དེ་སྔར་ཁོང་གཉིས་ཀྱིས་བསྒྲུབས་ཟིན་པའི་དོན་དེ་དག་གི༌ཕྱིར་དུ་མི་རྣམས་ཀྱིས་ཁོང་གཉིས་དཀོན་མཆོག་གི་ཐུགས་རྗེ་ལ་བཅོལ་བའི་ཡུལ་ཡིན།
ACT 14:27 ཁོང་གཉིས་དེར་སླེབས༌རྗེས་ཆོས་ཚོགས་ཀྱི་མི་རྣམས་བསྡུས༌ཏེ། དཀོན་མཆོག་གིས་ཁོང་གཉིས་དང་ལྷན་དུ་མཛད་པའི་དོན་ཐམས་ཅད༌དང༌། གཞན༌ཡང༌། ཕྱི་ཕྱོགས་པ་རྣམས་ལ་དད་པའི་སྒོ་ཇི་ལྟར་ཕྱེ་བར་མཛད་པའི་ཚུལ་རྣམས་སྨྲས་ཤིང་།
ACT 14:28 ཁོང་གཉིས་གྲོང་ཁྱེར་དེ་རུ་རྗེས་འབྲང་པ་རྣམས་དང་མཉམ་དུ་ཡུན་རིང་པོར་བཞུགས༌སོ།།
ACT 15:1 དེ་ཡང་ཡ་ཧུ་དཱའི་ཡུལ་ནས་ཡོང་བའི་མི་ཁ་ཤས་ཀྱིས་སྤུན་ཟླ་རྣམས་ལ་ཁྱོད་རྣམས་ཀྱིས་མོ་ཤེའི་བཀའ་ཁྲིམས་བཞིན་དུ་མཚན་སྐྱི་མ་བཅད་ན་ཐར་པ་འཐོབ་མི་སྲིད་ཅེས་བསླབ་བྱ་བཏང་ངོ༌།།
ACT 15:2 ཕོལ་ལོལ་དང་པཱར་ན་པཱ་གཉིས་ཀ་དེ་རྣམས་དང་ཤིན་ཏུ་མ་མཐུན་པར་རྩོད་པ་བྱས་པ༌ལ། རྗེས་འབྲང་པ་རྣམས་ཀྱིས་ཕོལ་ལོལ་དང་པཱར་ན་པཱ་གཉིས་དང་རང་གི་ཆོས་ཚོགས་ཀྱི་མི་འགའ་ཞིག་རྩོད་གླེང་དེའི་དོན་སྐུ་ཚབ་པ་དང་རྒན་པོ་རྣམས་ལ་འདྲི་བའི༌ཕྱིར། ཡེ་རུ་སཱ་ལེམ་དུ་འགྲོ་རུ་འཇུག་རྒྱུ་ཐག་གིས༌བཅད་དོ།།
ACT 15:3 དེ་ནས་ཆོས་ཚོགས་ཀྱིས་མི་དེ་རྣམས་ལམ་དུ་བརྫངས་པ༌དང༌། དེ་རྣམས་ཕོའོ་ནེ་ཀེ་དང་སཱ་མར་ཡ་ཡུལ་གཉིས་བརྒྱུད་ནས་གང་སར་ཕྱིན་ཅིང་ཕྱི་ཕྱོགས་པ་རྣམས་སྐྱབས་མགོན་ཡེ་ཤུ་ལ་དད་པར་གྱུར་པའི་གནས་ཚུལ་བཤད་དེ་སྤུན་ཟླ་རྣམས་ཤིན་ཏུ་སྤྲོ་བར་བྱས།
ACT 15:4 དེ་ནས་ཁོང་རྣམས་ཡེ་རུ་སཱ་ལེམ་དུ་སླེབས་པ་དང་ཆོས་ཚོགས༌དང༌། སྐུ་ཚབ༌པ། རྒན་པོ་རྣམས་ཀྱིས་སྣེ་ལེན་བྱས༌ཤིང༌། ཁོང་རྣམས་ཀྱིས་ཀྱང་དཀོན་མཆོག་གིས་ཁོང་རྣམས་དང་ལྷན་དུ་མཛད་པའི་དོན་ཐམས་ཅད་བཤད་མོད།
ACT 15:5 འོན་ཀྱང་ཕ་རུ་ཤི་པའི་གྲུབ་མཐའ་ལ་གཏོགས་པའི་དད་ལྡན་འགའ་ཞིག་ཡར་ལངས་ཏེ་ན༌རེ། ངེས་པར་ཕྱི་ཕྱོགས་པ་རྣམས་ལ་མཚན་སྐྱི་གཅོད་དགོས་པ་དང་མོ་ཤེའི་བཀའ་ཁྲིམས་ལྟར་བསྲུང་དགོས་ཚུལ་བསྐུལ་འོས་ཞེས་སྨྲས༌སོ།།
ACT 15:6 དེ་ནས་སྐུ་ཚབ་པ་དང་རྒན་པོ་རྣམས་དོན་དེར་གྲོས་བྱེད་པའི་ཕྱིར་ལྷན་དུ་འདུས༌པ་རེད།
ACT 15:7 དེ་རྣམས་ཀྱིས་རྩོད་གླེང་བྱས་ནས་དུས་རིང་པོ་འགོར་བ༌ན། པེ་ཏྲོ་ཡར་ལངས་ཏེ་འདི་སྐད༌དུ། སྤུན་ཟླ༌རྣམ་པ། ཁྱོད་ཅག་གིས་ཤེས་གསལ༌ལྟར། དཀོན་མཆོག་གིས་ཕྱི་ཕྱོགས་པ་རྣམས་ལ་ངའི་ངག་ནས་འཕྲིན་བཟང་ཐོས་ཤིང་སྐྱབས་མགོན་ཡེ་ཤུ་ལ་དད་པ་བྱ༌ཆེད། ཁོང་གིས་སྔ་མོ་ནས་ཁྱོད་རྣམས་ཀྱི་ཁྲོད་ནས་ང་རང་བདམས༌པ་ཡིན་ནོ།།
ACT 15:8 ཡང་མི་སེམས་མཁྱེན་པའི་དཀོན་མཆོག་གིས་བདག་ཅག་ལ་དམ་པའི་ཐུགས་ཉིད་གནང་བ་བཞིན༌དུ། ཕྱི་ཕྱོགས་པ་རྣམས་ལའང་དམ་པའི་ཐུགས་ཉིད་གནང༌སྟེ། ཁོ་རྣམས་ལ་བདེན་དཔང་མཛད་དོ།།
ACT 15:9 ཡང་ཁོང་གིས་བདག་ཅག་དང་ཁོ་རྣམས་ཀྱི་བར་དུ་ཁྱད་པར་ཅི་ཡང་མ་ཕྱེས་པར། དད་པའི་སྒོ་ནས་ཕྱི་ཕྱོགས་པ་རྣམས་ཀྱི་སེམས་ཀྱང་འདག་པར་མཛད་དོ།།
ACT 15:10 ད་ལྟ་ཅིའི་ཕྱིར་བདག་ཅག་གི་ཕ་མེས་ཡང་མེས་དང་བདག་ཅག་གིས་ཀྱང་འཁུར་དཀའ་བའི་གཉའ་ཤིང་དེ་རྗེས་འབྲང་པ་རྣམས་ཀྱི་གཉའ་ལ་བཀལ་ནས་དཀོན་མཆོག་ལ་ཚོད་བགམ་མམ།
ACT 15:11 བདག་ཅག་ཀྱང་ཕྱི་ཕྱོགས་པ་དང་འདྲ་བར་གཙོ་བོ་ཡེ་ཤུའི་ཐུགས་རྗེའི་སྒོ་ནས་ཐར་པ་ཐོབ་པ་ལ་ཡིད་ཆེས་པ་ཡིན་ཞེས་གསུངས་སོ།།
ACT 15:12 དེ་ནས་མི་རྣམས་ཀྱིས་ཅི་ཡང་མི་སྨྲ་བར། པཱར་ན་པཱ་དང་ཕོལ་ལོལ་གཉིས་ཀྱིས་གསུངས་པའི་གཏམ༌སྟེ། དེ་སྔར་དཀོན་མཆོག་གིས་ཁོང་གཉིས་བརྒྱུད་ནས་ཕྱི་ཕྱོགས་པའི་ཁྲོད་དུ་མཛད་པའི་གྲུབ་རྟགས་དང་ངོ་མཚར་བའི་དོན་ཐམས་ཅད་ལ་མཉན༌ཏོ།།
ACT 15:13 དེ་ནས་ཁོང་གཉིས་ཀྱིས་དེ་ལྟར་གསུངས་རྗེས་ཡ་ཀོབ་ཀྱིས་འདི་སྐད༌དུ། སྤུན་ཟླ་རྣམས་ཀྱིས་བདག་ལ་ཉོན༌ཅིག
ACT 15:14 དཀོན་མཆོག་གིས་ཐོག་མར་ཇི་ལྟར་ཕྱི་ཕྱོགས་པ་རྣམས་ལ་ཐུགས་རྗེས་གཟིགས༌ཤིང༌། དེ་རྣམས་ལས་མི་རྣམས་རང་ཉིད་ཀྱི་མཚན་གྱི་འོག་ཏུ་ཇི་ལྟར་དྲངས་པའི་སྐོར་སི་མོན་གྱིས་གསུངས༌ཤིང་།
ACT 15:15 དེ་ནི་ལུང་སྟོན་པ་རྣམས་ཀྱི་ལུང་བསྟན་དང་མཐུན༌ཏེ།
ACT 15:16 གསུང་རབ་ཀྱི་མདོ་ལས་ཇི་སྐད༌དུ། དེ་ཡང་རྗེས་སུ་ང་རང་ཕྱིར་ལོག༌སྟེ།། དཱ་བིད་གུར་མཆོག་བརྡིབས་པ་བསྐྱར་བཟོ༌བྱེད།། གཏོར་ཅིང་བརླག་པའི་གུར་མཆོག་རྗེས་ཤུལ༌དེ།། ང་ཡིས་སླར་ཡང་བཟོ་ཞིང་བསྐྲུན་པར༌བྱེད།།
ACT 15:17 དེ་ནི་མིའི་རིགས་གཞན་རྣམས་ཐམས་ཅད༌དེ།། ངའི་མིང་ཐོགས་པའི་ཕྱི་ཕྱོགས་མི་ཀུན༌གྱིས།། གཙོ་བོ་ཁོང་ཉིད་འཚོལ་བའི་ཕྱིར༌ཡིན་ནོ།།
ACT 15:18 མངོན་མཛད་འདི་དག་གདོད་ནས་གཙོ་བོས་གསུངས།། ཞེས་བཀོད་པའོ།།
ACT 15:19 དེའི༌ཕྱིར། བདག་གི་བསམ་ཚུལ་ནི། བདག་ཅག་གིས་དཀོན་མཆོག་གི་ཕྱོགས་སུ་འཁོར་བཞིན་ཡོད་པའི་ཕྱི་ཕྱོགས་པ་རྣམས་ལ་འོ་བརྒྱལ་མི་བཟོ༌བར།
ACT 15:20 ཁོ་རྣམས་ལ་ལྷ་སྐུ་དང་འབྲེལ་བའི་མི་གཙང་བ་དང༌། མི་ཚངས་སྤྱོད་པ། མིད་པ་བསྒགས་ནས་བསད་པའི་ཕྱུགས་ཟོག་གི་ཤ་དང་ཁྲག་བཅས་སྤང་དགོས་པའི་འཕྲིན་ཡིག་འབྲི་འོས༌ཏེ།
ACT 15:21 རྒྱུ་མཚན་ནི་མོ་ཤེའི་མདོ་རྣམས་ནི་སྔ་མོ་ནས་མི་རྣམས་ཀྱིས་གྲོང་ཁྱེར་སོ་སོ་ནས་བསྒྲགས༌ཏེ། ངལ་གསོ་བའི་ཉིན་མོ་རེ་རེར་ཆོས་ཁང་ནས་ཀློག་འདོན་བྱེད་པའི་ཕྱིར་ཡིན་ཞེས་གསུངས༌སོ།།
ACT 15:22 དུས་དེར་སྐུ་ཚབ་པ་དང་རྒན༌པོ། ཆོས་ཚོགས་ཡོངས་བཅས་ཀྱིས་རང་གི་ཚོགས་པ་ལས་དད་ལྡན་བདམས༌ཏེ། ཕོལ་ལོལ་དང་པཱར་ན་པཱ་གཉིས་དང་མཉམ༌དུ། སིར་ཡཱ་ཡུལ་གྱི་ཨན་ཏི་ཡོག་ཡཱ་རུ་མངག་རྒྱུ་ཐག་གིས་བཅད་དོ།། ཁོ་རྣམས་ཀྱིས་བདམས་པའི་མི་ནི་སྤུན་ཟླ་རྣམས་ཀྱི་ཁྲོད་ནས་དཔོན་རིགས་སུ་གྱུར་པའི་པཱར་ས་པཱ་ཞེས་ཀྱང་འབོད་པའི་ཡུ་དཱ་དང་སི་ལཱའོ།།
ACT 15:23 ཁོ་གཉིས་ལ་སྤྲད་པའི་འཕྲིན་ཡིག་གི་ནང་དུ་འདི་ལྟར་བྲིས་ཡོད༌དེ། ༄༅། །ཨན་ཏི་ཡོག་ཡཱ༌དང༌། སིར་ཡཱ༌ཡུལ། ཀི་ལིག་ཡཱ་ཡུལ་བཅས་སུ་གནས་པའི་ཕྱི་ཕྱོགས་ཀྱི་སྤུན་ཟླ་རྣམས༌ཀྱེ། ཐོག་མར་ཁྱོད་རྣམས་ལ་འཚམས་འདྲི་ཞུ་ཞེས་ཁྱོད་ཅག་གི་སྤུན་ཟླ་སྟེ་སྐུ་ཚབ་པ་དང་རྒན་པོ་བཅས་ནས་བསྐུར༌དོན།
ACT 15:24 དེ་ཡང་ངེད་རྣམས་ཀྱིས་གོ་ཐོས་ལྟར༌ན། ངེད་ཅག་གི་ཆོས་ཚོགས་འདི་ནས་སོང་བའི་མི་ཁ་ཤས་ཀྱིས་ཁྱོད་རྣམས་ལ་ངེས་པར་མཚན་སྐྱི་གཅོད་དགོས་པ༌དང༌། མོ་ཤེའི་བཀའ་ཁྲིམས་བསྲུང་དགོས་ཞེས་པའི་གཏམ་བརྗོད་དེ་ཁྱོད་རྣམས་ཀྱི་སེམས་ཤིན་ཏུ་དཀྲུགས་འདུག་ཟེར། འོན༌ཀྱང༌། ངེད་ཅག་གིས་དེ་ལྟར་མ་མངགས་སོ།།
ACT 15:25 དེ་བས་ངེད་ཅག་གིས་བློ་སེམས་གཅིག་མཐུན་སྒོས་དད་ལྡན་པ་འགའ་ཤས་བདམས་ཤིང༌། བདག་ཅག་གིས་སྙིང་ནས་བརྩེ་བའི་པཱར་ན་པཱ་དང་ཕོལ་ལོལ་གཉིས་དང་མཉམ་དུ་ཁྱོད་རྣམས་ཀྱི་དྲུང་དུ་མངག་རྒྱུ་ཐག་གིས་བཅད་དོ།།
ACT 15:26 ཁོ་གཉིས་ཀྱིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཆེད་དུ་རང་སྲོག་ལའང་མ་འཛེམས་པ་ཡིན།
ACT 15:27 དེའི༌ཕྱིར། ངེད་ཅག་གིས་ཡུ་དཱ་དང་སི་ལཱ་གཉིས་མངགས༌ཤིང༌། ཁོ་གཉིས་ཀྱིས་དངོས་སུ་དོན་འདི་དག་ཁྱོད་རྣམས་ལ་སྨྲ་བར་འགྱུར།
ACT 15:28 རྒྱུ་མཚན་ནི་ངེད་ཅག་གི་སེམས་ནི་དམ་པའི་ཐུགས་ཉིད་དང་མཐུན་པར་དོན་གལ་ཆེན་འདི་རྣམས་ལས༌གཞན། ཁུར་བོ་ལྷག་མ་ཞིག་ཁྱོད་ཅག་གི་ཕྲག་ལ་མི་དགལ་བར་ཐག་གིས་བཅད༌ཅིང༌།
ACT 15:29 དེ་ནི་ལྷ་སྐུའི་མདུན་དུ་ཕུལ་བའི་མཆོད་རྫས་དང༌། ཁྲག དེ་མིན་མིད་པ་བསྒགས་ནས་བསད་པའི་ཕྱུགས་ཟོག་གི༌ཤ་དང༌མི་ཚངས་སྤྱོད་པ་བཅས་སྤང་དགོས། གལ༌ཏེ། ཁྱོད་རྣམས་ཀྱིས་ལས་དེ་དག་སྤངས་ནས་དོན་དེ་དང་མི་འགལ་བར་བྱེད་པ་ཡིན་ན་ལེགས། མཇུག་མཐར་ཁྱོད་རྣམས་བདེ་བར༌སྨོན། ཞེས༌པའོ།།
ACT 15:30 དེ་ནས་མངག་བཅོལ་ལྟར་ཁོང་རྣམས་སིར་ཡཱ་ཡུལ་གྱི་ཨན་ཏི་ཡོག་ཡཱ་རུ་ཕྱིན་ཏེ་དད་ལྡན་རྣམས་བསྡུས་ཤིང་འཕྲིན་ཡིག་སྤྲད་པ༌དང༌།
ACT 15:31 དེ་རྣམས་ཀྱིས་ཀྱང་འཕྲིན་ཡིག་བཀླགས་པ་དང་སེམས་གསོའི་གཏམ་གྱིས་ཡིད་དགའ་བར་གྱུར་ཏོ།།
ACT 15:32 ཡུ་དཱ་དང་སི་ལཱ་གཉིས་ནི་ལུང་སྟོན་པ་ཡང་ཡིན༌པས། གཏམ་མང་པོ་སྨྲས་ཏེ་སྤུན་ཟླ་རྣམས་ལ་སྐུལ་མ་མཛད་ཅིང་དད་པ་བརྟན་པོར་བྱས་སོ།།
ACT 15:33 དེ་ནས་གནས་དེར་ཉིན་ཞག་དུ་མར་བཞུགས༌རྗེས། སྤུན་ཟླ་རྣམས་ཀྱིས་ཁོང་གཉིས་ཕྱིར་མངགས་མཁན་རྣམས་ཀྱི་དྲུང་དུ་བདེ་བར་ལོག་ཏུ་བཅུག
ACT 15:34 འོན་ཀྱང་སི་ལཱ་ཡིས་ད་དུང་གནས་འདིར་སྡོད་པའི་སེམས་ཐག་བཅད༌དོ།།
ACT 15:35 ཕོལ་ལོལ་དང་པཱར་ན་པཱ་གཉིས་སྔར་བཞིན་ཨན་ཏི་ཡོག་ཡཱ་རུ་བཞུགས༌ཤིང༌། ཆོས་གྲོགས་གཞན་མང་པོ་དང་ལྷན་དུ་མི་རྣམས་ལ་གཙོ་བོའི་བཀའ་གསུངས་པ་དང་ཆོས་བསྒྲགས༌སོ།།
ACT 15:36 དེ་ནས་ཉིན་འགའ་འགོར༌རྗེས། ཕོལ་ལོལ་གྱིས་པཱར་ན་པཱ་ལ་འདི་སྐད༌དུ། འུ་གཉིས་གཙོ་བོའི་བཀའ་བསྒྲགས་མྱོང་སའི་གྲོང་ཁྱེར་སོ་སོའི་སྤུན་ཟླ་རྣམས་ཀྱི་གནས་ཚུལ་ཅི་འདྲ་ཡིན་པར་ཡང་བསྐྱར་བལྟ་རུ་འགྲོའོ་ཞེས་སྨྲས་པ༌ལ།
ACT 15:37 པཱར་ན་པཱ་ཡིས་མཱར་ཀུ་ཞེས་ཀྱང་འབོད་པའི་ཡོ་ཧ་ནན་འཁྲིད་འདོད༌པ་རེད།
ACT 15:38 འོན༌ཀྱང༌། ཕོལ་ལོལ་གྱི་སེམས་ལ་མཱར་ཀུ་ནི་སྔོན་ཆད་ཕཱམ་ཕིལ་ཡ་ཡུལ་ནས་ཁོང་གཉིས་དང་མཉམ༌དུ་ཆོས་དོན་བསྒྲུབ་ཏུ་མ་སོང་བར་ཁ་བྲལ་བའི་རྐྱེན་གྱིས་ད་ལྟ་ཁོ་རང་ཁྲིད་ན་མི་འོས་སྙམ་མོ།།
ACT 15:39 དེ་ནས་ཁོང་གཉིས་དོན་དེར་སེམས་མ་མཐུན་པར་རྩོད་གླེང་དྲག་པོ་བྱུང་བ་དང་ཐ་ན་སོ་སོར་གྱེས་པ་རེད། དེ་ནས་པཱར་ན་པཱ་ཡིས་མཱར་ཀུ་ཁྲིད་དེ་གྲུ་གཟིངས་ལ་བསྡད་ནས་ཀིབ་རིས་ལ་ཕྱིན་པ༌དང༌།
ACT 15:40 ཕོལ་ལོལ་གྱིས་ཀྱང་སི་ལཱ་བདམས་ཤིང་སྤུན་ཟླ་རྣམས་ཀྱིས་ཁོང་ཉིད་གཙོ་བོའི་ཐུགས་རྗེ་ལ་བཅོལ༌རྗེས། ཁོང་གཉིས་ལམ་ལ་ཆས༌ཏེ།
ACT 15:41 སིར་ཡཱ་ཡུལ་དང་ཀི་ལིག་ཡཱ་ཡུལ་བརྒྱུད་ནས་ཆོས་ཚོགས་རྣམས་ཀྱི་དད་པ་བརྟན་པོར་བྱས༌སོ།།
ACT 16:1 ཕྱིས་སུ་ཕོལ་ལོལ་ནི་དིར་སྦེ་དང་དེ་ནས་ལིས་ཏྲ་རུ་ཕེབས་པ༌ལ། གནས་དེར་ཐི་མོ་ཐེ་ཟེར་བའི་རྗེས་འབྲང་པ་ཞིག་ཡོད་ཅིང་། ཁོ་ནི་སྐྱབས་མགོན་ཡེ་ཤུར་དད་པ་ཡོད་པའི་ཡ་ཧུ་དཱ་པའི་བུད་མེད་ཅིག་གི་བུ་ཡིན་ཡང་ཁོའི་ཕ་ནི་གྷི་རིག་པ་ཡིན།
ACT 16:2 ལིས་ཏྲ་དང་ཨི་ཀོན་ཡུ་རུ་ཡོད་པའི་སྤུན་ཟླ་རྣམས་ཀྱིས་ཐི་མོ་ཐེ་ལ་བསྟོད་པ་བྱས་པ་རེད།
ACT 16:3 ཕོལ་ལོལ་གྱིས་ཐི་མོ་ཐེ་ཡང་འཁྲིད་འདོད་ཀྱང་ཡུལ་དེའི་ཡ་ཧུ་དཱ་པ་རྣམས་ཀྱིས་ཁོའི་ཕ་ནི་གྷི་རིག་པ་ཡིན་པ་ཤེས་པས། ཕོལ་ལོལ་གྱིས་ཁོའི་མཚན་སྐྱི་བཅད་དོ།།
ACT 16:4 དེ་ནས་ཁོང་རྣམས་གྲོང་ཁྱེར་སོ་སོ་བརྒྱུད་ནས་ཡེ་རུ་སཱ་ལེམ་གྱི་སྐུ་ཚབ་པ་དང་རྒན་པོ་རྣམས་ཀྱིས་གཏན་ལ་ཕབ་པའི་ཁྲིམས་སྲོལ་དད་ལྡན་རྣམས་ལ་སྤྲད་ནས་བསྲུང་དུ་བཅུག༌པས།
ACT 16:5 ཆོས་ཚོགས་རྣམས་ཀྱི་དད་སེམས་དེ་བས་ཇེ་བརྟན་དུ་གྱུར་ཅིང་མི་གྲངས་ཀྱང་ཉིན་རེ་བཞིན་ཇེ་མང་དུ་འཕེལ་ཏོ།།
ACT 16:6 དེ་ཡང་དམ་པའི་ཐུགས་ཉིད་ཀྱིས་ཁོང་རྣམས་ལ་ཨེ་ཞི་ཡཱ་ཡུལ་ནས་དཀོན་མཆོག་གི་བཀའ་བསྒྲག་མི་རུང་བར་མཛད༌པས། ཁོང་རྣམས་ཕུ་ཀེ་ཡཱ་དང་ག་ལད་ཡཱ་ཡུལ་གཉིས་ཀྱི་ས་ཕྱོགས་བརྒྱུད༌ནས།
ACT 16:7 མོ་སི་ཡཱ་ཡུལ་གྱི་ས་མཚམས་སུ་སླེབས་ཏེ་པི་ཐིན་ཡཱ་ཡུལ་དུ་འགྲོ་འདོད༌ནའང༌། སྐྱབས་མགོན་ཡེ་ཤུའི་ཐུགས་ཉིད་ ཀྱིས་འགྲོ་རུ་མ་བཅུག་གོ།
ACT 16:8 དེ་ནས་ཁོང་རྣམས་མོ་སི་ཡཱ་ཡུལ་བརྒྱུད་ནས་ཏྲོ་ཡཱ་ཞེས་པར་ཕྱིན་པ་རེད།
ACT 16:9 གནས་དེར་ཞག་སྡོད་བྱེད་པའི༌ཚེ། ཕོལ་ལོལ་ལ་ཞལ་གཟིགས་གནང་བ༌སྟེ། མ་ཀེ་དོན་ཡཱ་ཡུལ་གྱི་མི་ཞིག་ལངས་ནས་བསྡད་དེ་འདི་ལྟར། ཁྱེད་རང་མ་ཀེ་དོན་ཡཱ་ཡུལ་དུ་ཕེབས་ནས་ངེད་ཅག་ལ་རོགས་རམ་བྱེད་པར་མཛོད་ཅེས་ཞུ་བ་ཞུས།
ACT 16:10 ཁོང་གིས་ཞལ་གཟིགས་དེ་མཐོང་བ༌དང༌། ངེད་ཅག་ མྱུར་དུ་མ་ཀེ་དོན་ཡཱ་ཡུལ་དུ་འགྲོ་བར༌བརྩམས། རྒྱུ་མཚན་ནི་དཀོན་མཆོག་གིས་ངེད་རྣམས་ཡུལ་དེའི་མི་རྣམས་ལ་འཕྲིན་བཟང་བསྒྲག་པར་བཀའ་གནང་བ་ངེད་ཅག་གིས་ཐག་གིས་ཆོད་པས༌སོ།།
ACT 16:11 དེ་ནས་ངེད་ཅག་ཏྲོ་ཡཱ་ནས་གྲུ་གཟིངས་ལ་བསྡད་དེ་ཐད་ཀར་སཱ་མོ་ཏྲེ་ཀེ་རུ་སླེབས་པ༌དང༌། དེའི་ཕྱི༌ཉིན། ནེ་ཨ་པོ་ལི་རུ་སླེབས་པ་ཡིན།
ACT 16:12 དེ་ནས་ཕི་ལིབ་པི་རུ་སོང་བ་དང་དེ་ནི་མ་ཀེ་དོན་ཡཱ་ཡུལ་གྱི་གྲོང་ཁྱེར་ཆེན་པོ་ཞིག༌སྟེ། རོ་མཱ་གོང་མའི་རྒྱལ་ཁོངས་ཀྱི་གྲོང་ཁྱེར་ཡིན། ངེད་ཅག་གྲོང་ཁྱེར་དེ་རུ་ཉིན་འགར་བསྡད༌པ་ཡིན།
ACT 16:13 དེ་ཡང་ངལ་གསོ་བའི་ཉིན་ལ་ངེད་རྣམས་གྲོང་ཁྱེར་གྱི་མཁར་སྒོའི་ཕྱི་རོལ་ཏུ་ཕྱིན༌ཅིང༌། ཆུ་འགྲམ་དུ་གསོལ་བ་འདེབས་ས་ཞིག་ཡོད་པར་བསམས༌ཏེ། གནས་དེར་སོང་ནས་བསྡད་པ༌དང༌། དེར་འཛོམས་པའི་བུད་མེད་རྣམས་ལ་བཀའ་གསུངས་སོ།།
ACT 16:14 ཡང་གནས་དེར་རས་རྒྱ་སྨུག་ཚོང་མཁན་མིང་ལ་ལིད་ཡཱ་ཞེས་པའི་བུད་མེད་ཅིག་ཡོད༌ལ། ཁོ་མོ་ནི་ཐི་ཨ་ཏེ་རཱ་གྲོང་ཁྱེར་གྱི་མི་ཡིན་པ་དང་དཀོན་མཆོག་ལ་བསྙེན་བཀུར་བྱེད་མཁན་ཞིག་ཀྱང༌ཡིན། ཁོ་མོས་ངེད་ཅག་གི་གཏམ་ཐོས་ཤིང་དཀོན་མཆོག་གིས་ཁོ་མོའི་བློ་སྒོ་ཕྱེས་པ་དང་ཁོ་མོས་ཀྱང་སེམས་གཏད་ནས་ཕོལ་ལོལ་གྱི་གསུང་ལ་མཉན་ཏོ།།
ACT 16:15 དེ་ནས་ཁོ་མོ་དང་ཁོ་མོའི་ཁྱིམ་མི་རྣམས་ཁྲུས་གསོལ་ལ་ཞུགས་རྗེས་ཁོ་མོ་ན༌རེ། གལ་ཏེ་ཁྱེད་རྣམས་ཀྱིས་ང་རང་གཙོ་བོ་ལ་དད་པ་ཡོད་པ་བདེན་པར་དགོངས༌ན། ངའི་ཁྱིམ་དུ་ཕེབས་ཏེ་བཞུགས་པར་མཛོད་ཅེས་ཞུས་ཤིང་ངེད་ཅག་ནན་གྱིས་བཀག་པའོ།།
ACT 16:16 དེའི་རྗེས༌སུ། ངེད་ཅག་གསོལ་བ་འདེབས་པའི་གནས་དེར་འགྲོ༌སྐབས། མངོན་ཤེས་ཀྱི་གདོན་འདྲེས་བཟུང་བའི་གཡོག་མོ་ཞིག་ངེད་ཅག་གི་མདུན་སར་སླེབས་ཤིང་། ཁོ་མོས་མོ་འདེབས་པ་ལ་བརྟེན་ནས་རང་གི་བདག་པོ་རྣམས་ལ་རྒྱུ་ནོར་མང་པོ་ཐོབ་པར་བྱས་མྱོང་།
ACT 16:17 ཁོ་མོ་ཕོལ་ལོལ་དང་ངེད་ཅག་གི་རྗེས་སུ་འབྲངས་ནས་སྐད་ཆེན༌པོས། མི་འདི་རྣམས་ནི་བླ་ན་མེད་པའི་དཀོན་མཆོག་གི་ཞབས་ཕྱི་པ་ཡིན༌ཏེ། ཁོང་རྣམས་ཀྱིས་ཁྱོད་ཅག་ལ་ཐར་པའི་ལམ་གསུང་བཞིན་ཡོད་ཅེས་ཡང་ཡང་སྨྲས་པ༌དང༌།
ACT 16:18 ཁོ་མོས་དེ་ལྟར་ཉིན་མང་པོར་འུར་བརྒྱབ་པས་ཕོལ་ལོལ་སུན་སྣང་ཆེན་པོ་སྐྱེས༌ཏེ། ཁ་ཕྱིར་འཁོར་ནས་གདོན་འདྲེ་དེ་ལ་འདི་ལྟར། ངས་ཡེ་ཤུ་མཱ་ཤི་ཀའི་མཚན་ལ་བརྟེན་ནས་ཁྱོད་རང་ཁོ་མོ་ལས་ཕྱིར་བུད་ཅིག་ཅེས་བཀའ་བསྒྲགས་པ་ཡིན་ཞེས་གསུངས་མ་ཐག་གདོན་འདྲེ་དེ་ཁོ་མོ་ལས་ཕྱིར་ཐོན་ནོ།།
ACT 16:19 དེ་ནས་གཡོག་མོ་དེའི་བདག་པོ་རྣམས་ཀྱིས་རྒྱུ་ནོར་འཐོབ་པའི་རེ་བ་མེད་པར་གྱུར་པ་མཐོང༌ནས། ཕོལ་ལོལ་དང་སི་ལཱ་གཉིས་བཟུང་སྟེ། གྲོང་ཁྱེར་གྱི་ཁྲོམ་རའི་ནང་དུ་ཡོད་པའི་འགོ་དཔོན་དག་གི་མདུན་དུ་བཙན་ཁྲིད་བྱས་པ་དང་།
ACT 16:20 ཡང་ཁྲིམས་དཔོན་རྣམས་གྱི་མདུན་དུ་ཁྲིད་ནས་ན་རེ། མི་འདི་གཉིས་ནི་ཡ་ཧུ་དཱ་པ་ཡིན་ཞིང་རང་རེའི་གྲོང་ཁྱེར་ནང་དུ་ཟིང་ཆ་བསླངས༌ཏེ།
ACT 16:21 བདག་ཅག་རོ་མཱ་པ་རྣམས་ཀྱིས་ཁྲིམས༌ལྟར་ན་དང་དུ་ལེན་མི་རུང་བའམ་བསྲུང་མི་རུང་བའི་གོམས་སྲོལ་རྣམས་བསྒྲགས་པ་ཡིན་ཞེས་སྨྲས་པ༌ལ།
ACT 16:22 མི་ཚོགས་ཀྱིས་ཀྱང་ལྷན་དུ་ཁོང་གཉིས་ལ་རྒོལ་ཅིང་དགག་པ༌དང༌། ཁྲིམས་དཔོན་དེ་དག་གིས་ཁོང་གཉིས་ཀྱི་ཕྱི་གོས་བཤུས་ཏེ་དབྱུག་པས་རྡེག་པའི་བཀའ་བསྒོས་སོ།།
ACT 16:23 དེ་ནས་ཁོང་གཉིས་ལ་དབྱུག་པས་མང་དུ་བརྡེགས་པ་དང་བཙོན་དུ་བཅུག་ཅིང་བཙོན་སྲུང་དམག་ལ་དམ་པོར་བསྲུང་དགོས་པར་གདམས།
ACT 16:24 བཙོན་སྲུང་དམག་གིས་ཀྱང་བཀའ་ལྟར་ཁོང་གཉིས་བཙོན་ཁང་གི་ཕུགས་སུ་བཅུག་པ་དང་ཨན་གཏད་བརྒྱབ་ནས་བཞག༌གོ།
ACT 16:25 དེ་ནས་ནམ་ཕྱེད་ཙམ་ལ་ཕོལ་ལོལ་དང་སི་ལཱ་གཉིས་ཀྱིས་དཀོན་མཆོག་ལ་གསོལ་བ་བཏབ་པ་དང་བསྟོད་དབྱངས་ཕུལ་བ༌ན། བཙོན་པ་གཞན་རྣམས་ཀྱིས་ཀྱང་རྣ་བ་བླགས་ཏེ་ཉན།
ACT 16:26 གློ་བུར༌ཉིད་དུ་ས་འགུལ་དྲག་པོ་ཞིག་བྱུང་སྟེ་བཙོན་ཁང་གི་རྨང་གཞི་ཡང་ཤིན་ཏུ་གཡོས༌ཤིང༌། བཙོན་ཁང་གི་སྒོ་ཚང་མའང་དེ་མ་ཐག་ཕྱེས་ནས་བཙོན་པ་ཡོངས་ཀྱི་ལྕགས་ཐག་ཀྱང་ལྷོད་པར་གྱུར་ཏོ།།
ACT 16:27 དེ་ནས་བཙོན་སྲུང་དམག་གཉིད་ལས་སད་དེ་བཙོན་ཁང་གི་སྒོ་ཐམས་ཅད་ཕྱེས་ཡོད་པ་མཐོང༌ནས། བཙོན་པ་ཐམས་ཅད་བྲོས་སོ་སྙམ་སྟེ་རལ་གྲི་ཕྱུང་ནས་རང་སྲོག་གཅོད་པར་རྩོམ་པ༌ལ།
ACT 16:28 ཕོལ་ལོལ་གྱིས་སྐད་ཆེན་པོས་འདི་སྐད༌དུ། རང་ལ་གནོད་པ་མ༌བྱེད་ཅིག ངེད་ཅག་ཐམས་ཅད་འདི་རུ་ཡོད་ཅེས་བོས༌པ་རེད།
ACT 16:29 དེ་ནས་བཙོན་སྲུང་དམག་གིས་མི་གཞན་ལ་སྒྲོན་མེ་འཁྱེར་ཡོང་བར་བསྐུལ༌ཏེ། མྱུར་དུ་བཙོན་ཁང་ནང་དུ་སོང་ནས་སྐྲག་བཞིན་འདར་བཞིན་ཕོལ་ལོལ་དང་སི་ལཱ་གཉིས་ཀྱི་དྲུང་དུ་པུས་མོ་སར་བཙུགས༌ཤིང༌།
ACT 16:30 ཡང་ཁོང་གཉིས་བཙོན་ཁང་གི་ཕྱི་རོལ་ཏུ་ཁྲིད་དེ་ན༌རེ། ཇོ་བོ༌ལགས། བདག་ལ་ཐར་པ་འཐོབ་ཆེད་ངས་ཅི་ཞིག་བྱ་འོས་སམ་ཞེས་ཞུས་པ༌ལ།
ACT 16:31 ཁོང་གཉིས་ཀྱིས་འདི་སྐད༌དུ། གཙོ་བོ་ཡེ་ཤུ་ལ་དད་པ་བྱོས༌དང༌། ཁྱོད་དང་ཁྱིམ་མི་ཐམས་ཅད་ལ་ཐར་པ་འཐོབ་ངེས་ཡིན་ཞེས་གསུངས་པ༌དང༌།
ACT 16:32 ཁོང་གཉིས་ཀྱིས་གཙོ་བོའི་བཀའ་དེ་བཙོན་སྲུང་དམག་དང་ཁོའི་ཁྱིམ་མི་ཐམས་ཅད་ལ་གསུངས་སོ།།
ACT 16:33 ཉིན་དེའི་མཚན་མོར། བཙོན་སྲུང་དམག་དེས་ཕོལ་ལོལ་དང་སི་ལཱ་གཉིས་ཕྱིར་ཁྲིད་དེ་ལུས་སྟེང་གི་རྨ་ཁ་བཀྲུས༌ཤིང་། བཙོན་སྲུང་དམག་དང་ཁོའི་ཁྱིམ་མི་ཐམས་ཅད་ལའང་དེ་མ་ཐག་ཁྲུས་གསོལ་ཐོབ་པ་རེད།
ACT 16:34 དེ་ནས་བཙོན་སྲུང་དམག་གིས་ཁོང་གཉིས་རང་ཁྱིམ་དུ་ཁྲིད་དེ་ཞལ་ཟས་དྲངས་པ༌དང༌། ཁོ་དང་ཁོའི་ཁྱིམ་མི་ཐམས་ཅད་དཀོན་མཆོག་ལ་དད་པར་གྱུར་པས་ཀུན་པོ་ཤིན་ཏུ་དགའ་བར་གྱུར༌ཏོ།།
ACT 16:35 དེ་ཡང་ཕྱི་ཉིན་ནམ་ལངས་པ་དང་ཁྲིམས་དཔོན་དག་གིས་རང་རང་གི་ཁྲིམས་གཡོག་མངགས༌ཏེ། མི་དེ་གཉིས་བཙོན་ལས་ཐོངས་ཤིག་ཅེས་བཀའ་གནང་བ༌དང༌།
ACT 16:36 བཙོན་སྲུང་དམག་གིས་ཀྱང་གཏམ་དེ་ཕོལ་ལོལ་ལ་འདི་ལྟར་སྨྲས༌པ། ཁྲིམས་དཔོན་དག་གིས་མི་མངགས་ཡོང་སྟེ་ཁྱེད་གཉིས་བཙོན་ལས་གཏོང་བའི་བཀའ་གནང༌བྱུང་། ད་ལྟ་ཉིད་དུ་བཙོན་ཁང་ནས་ཕྱིར་བུད་དེ་བདེ་བར་ཕེབས་རོགས་ཞེས་ཞུས་སོ།།
ACT 16:37 འོན་ཀྱང་ཕོལ་ལོལ་གྱིས་འདི་ལྟར༌གསུངས་པ་སྟེ། ངེད་གཉིས་ནི་རོ་མཱ་པ་ཡིན༌ཡང༌། ཁྲིམས་དཔོན་དེ་དག་གིས་ངེད་གཉིས་ལ་ཉེས་སྐྱོན་མེད་པར་མི་གཞན་རྣམས་ཀྱི་མིག་མདུན་ནས་གཅར་རྡུང་བཏང་སྟེ་བཙོན་དུ༌བཅུག ད་ལྟ་གསང་བའི་ངང་ནས་ངེད་གཉིས་ཕྱི་རུ་འདོན༌ནམ། དེ་ལྟར་གཏན་ནས་བྱ་མི་ཆོག༌སྟེ། ཁོ་རྣམས་རང་ཉིད་ཡོང་ནས་ངེད་གཉིས་བཙོན་ཁང་ལས་ཕྱིར་འཁྲིད་དགོས་ཞེས་པ༌དང༌།
ACT 16:38 ཁྲིམས་གཡོག་དེ་དག་གིས་ཀྱང་གསུང་དེ་ཁྲིམས་དཔོན་རྣམས་ལ་ཞུས༌ཤིང༌། དེ་རྣམས་ཀྱིས་ཀྱང་ཁོང་གཉིས་ནི་རོ་མཱ་པ་ཡིན་པ་ཐོས་ནས་འཇིགས་པར་གྱུར༌ཏེ།
ACT 16:39 ཁོང་གཉིས་ཀྱི་དྲུང་དུ་ཡོང་ནས་བསྐུལ་མ་བཏང་ཞིང་བཙོན་ཁང་ལས་ཕྱི་རོལ་ཏུ་ཁྲིད་པ་དང་གྲོང་ཁྱེར་དེ་དང་ཁ་འབྲལ་དགོས་ཞེས་ཞུས་སོ།།
ACT 16:40 དེ་ནས་ཁོང་གཉིས་བཙོན་ཁང་ལས་ཕྱི་རུ་བུད་པ་དང་ལིད་ཡཱའི་ཁྱིམ་དུ་ཕེབས་ཤིང་སྤུན་ཟླ་རྣམས་དང་ལྷན་དུ༌འདུས། དེ་དག་ལ་སེམས་གསོ་བྱས་རྗེས་ཁ་བྲལ༌ཏོ།།
ACT 17:1 དེ་ནས་ཕོལ་ལོལ་དང་སི་ལཱ་གཉིས་ཨམ་ཕི་པོ་ལི་དང་ཨ་པོལ་ལོན་ཡཱ་བརྒྱུད་ནས་ཐེ་སཱ་ལོ་ནེ་ཀེ་རུ་ཕྱིན་པ༌དང༌། དེ་རུ་ཡ་ཧུ་དཱ་པའི་ཆོས་ཁང་ཞིག་ཡོད༌ལ།
ACT 17:2 ཕོལ་ལོལ་ནི་རང་གི་རྒྱུན་གྱི་གོམས་སྲོལ་ལྟར་ཆོས་ཁང་དེར་ཕེབས༌ཤིང༌། ངལ་གསོ་བའི་ཉིན་མོ་གསུམ་ལ་བསྟུད་མར་གསུང་རབ་ལ་བརྟེན་ནས་མི་དེ་རྣམས་ལ་རྩོད་གླེང་བྱས་པ༌དང༌།
ACT 17:3 སྐྱབས་མགོན་མཱ་ཤི་ཀས་ངེས་པར་སྡུག་བསྔལ་མྱངས༌ཤིང༌། སྐུ་གྲོངས་པ་ནས་སླར་གསོན་པའི་སྐོར་འགྲེལ་བཤད་བྱས་པ་དང་རྒྱུ་མཚན་བསྟན་ཏེ་ཡང་འདི་སྐད༌དུ། ངས་ཁྱོད་རྣམས་ལ་སྨྲས་པའི་ཡེ་ཤུ་ཞེས་པ་འདི་ནི་སྐྱབས་མགོན་མཱ་ཤི་ཀ་ཡིན་ཞེས་གསུངས་སོ།།
ACT 17:4 མི་དེ་རྣམས་ལས་འགའ་ཞིག་ལ་སེམས་འགུལ་ཐེབས་ནས་ཕོལ་ལོལ་དང་སི་ལཱ་གཉིས་ཀྱི་རྗེས་སུ་འབྲངས་པ་དང་། གཞན་ཡང་དཀོན་མཆོག་ལ་དད་གུས་ཆེ་བའི་གྷི་རིག་པ་མང་པོ༌དང༌། བཀུར་འོས་པའི་བུད་མེད་ཀྱང་མི་ཉུང་བ་ཞིག་ཡོད་དོ།།
ACT 17:5 འོན༌ཀྱང༌། ཡ་ཧུ་དཱ་པ་རྣམས་ཕྲག་དོག་སྐྱེས་ནས་ཁྲོམ་སྲང་གི་མི་ངན་འགའ་བསྡུས་ཤིང་དཔུང་ཁག་བསྒྲིགས༌ཏེ། གྲོང་ཁྱེར་དེ་ལ་ཟིང་ཆ་བཟོས་པ་དང་ཡཱ་སོན་གྱི་ཁྱིམ་དུ་བཙན་གྱིས་འཛུལ༌ཏེ། ཕོལ་ལོལ་དང་སི་ལཱ་གཉིས་བཙན་བཟུང་བྱས་ནས་མི་རྣམས་ཀྱི་མདུན་དུ་འཁྲིད་འདོད༌ཀྱང༌།
ACT 17:6 ཁོང་གཉིས་བཙལ་ནས་མ་རྙེད་པས་ཡཱ་སོན་དང་སྤུན་ཟླ་ཁ་ཤས་བཟུང༌སྟེ། གྲོང་ཁྱེར་དེའི་དཔོན་རིགས་དག་གི་མདུན་དུ་བཙན་ཁྲིད་བྱས་ཏེ་སྐད་ཆེན་པོས་འདི་ལྟར་སྨྲས༌པ། གནམ་འོག་ཀུན་དཀྲུགས་པར་བྱེད་པའི་མི་དེ་རྣམས་རང་རེའི་ཡུལ་འདི་ལའང་སླེབས༌ཤིང༌།
ACT 17:7 ཡཱ་སོན་ཟེར་བ་འདིས་མི་དེ་རྣམས་ལ་སྣེ་ལེན་བྱས་ཏེ་སྡོད་དུ་བཅུག༌པ་རེད། མི་འདི་ཐམས་ཅད་སེ་བཟིར་གྱི་བཀའ་དང་འགལ༌ནས། ཡེ་ཤུ་བྱ་བའི་རྒྱལ་པོ་གཞན་ཞིག་ཡོད་ཟེར་ཞེས༌པའོ།།
ACT 17:8 དེ་ནས་མི་ཚོགས་དང་གྲོང་ཁྱེར་དེའི་དཔོན་རིགས་རྣམས་ཀྱིས་གཏམ་དེ་ཐོས་པ་དང་སེམས་འཁྲུགས་པར་གྱུར༌པས།
ACT 17:9 ཡཱ་སོན་དང་མི་གཞན་རྣམས་ལས་གཏའ་མ་བླངས་ཏེ་ཁོ་རྣམས་ཕྱིར་བཏང༌ངོ༌།།
ACT 17:10 དེ་ནས་སྤུན་ཟླ་རྣམས་ཀྱིས་མཚན་མོའི་དུས་ལ་སླེབས་མ་ཐག་ཕོལ་ལོལ་དང་སི་ལཱ་གཉིས་པུ་རེ་ཡཱ་རུ་འགྲོ་བར་བཅུག་གོ། ཁོང་གཉིས་གནས་དེར་སླེབས་པ་དང་ཡ་ཧུ་དཱ་པའི་ཆོས་ཁང་དུ་ཕྱིན༌ཅིང་།
ACT 17:11 གནས་འདིའི་མི་རྣམས་ནི་ཐེ་སཱ་ལོ་ནེ་ཀེའི་མི་རྣམས་དང་བསྡུར༌ན་སེམས་རྒྱ་ཆེ་བ་དང་། དཀོན་མཆོག་གི་བཀའ་ལ་མཉན་པར་ཤིན་ཏུ་དགའ༌ཞིང༌། ཉིན་རེ་བཞིན་ཕོལ་ལོལ་གྱིས་གསུངས་པ་དེ་ནི་གསུང་རབ་དང་མཐུན་མིན་ལ་བརྟག་ཅིང་དཔྱོད་པ་རེད།
ACT 17:12 དེ་བས་ཁོ་རྣམས་ལས་མི་མང་པོ་ཞིག༌དང༌། གྷི་རིག་གི་མི་རིགས་ལས་བཀུར་འོས་པའི་བུད་མེད་དང་སྐྱེས་པ་འགའ་ཤས་ཀྱང་དད་པར་གྱུར་ཏོ།།
ACT 17:13 འོན༌ཀྱང༌། ཐེ་སཱ་ལོ་ནེ་ཀེ་ཞེས་པའི་ཡ་ཧུ་དཱ་པ་རྣམས་ཀྱིས་ཕོལ་ལོལ་གྱིས་པུ་རེ་ཡཱ་རུའང་དཀོན་མཆོག་གི་བཀའ་སྒྲོག་བཞིན་པ་ཤེས༌ཏེ། ཡང་གནས་དེར་སོང་ནས་མི་ཚོགས་ལ་ངན་སྐུལ་བྱས་ཤིང་ཟིང་ཆ་བཟོས་སོ།།
ACT 17:14 དེ་ནས་སྤུན་ཟླ་རྣམས་ཀྱིས་ཕོལ་ལོལ་རྒྱ་མཚོའི་འགྲམ་དུ་བསྐྱལ་བ༌དང༌། སི་ལཱ་དང་ཐི་མོ་ཐེ་གཉིས་སྔར་བཞིན་པུ་རེ་ཡཱ་རུ་བསྡད།
ACT 17:15 དེ་ཡང་སྐྱེལ་མ་བྱེད་མཁན་རྣམས་ཀྱིས་ཕོལ་ལོལ་བྱ་བ་ཡ་ཏེན་དུ་བསྐྱལ་བ་དང་། ཕོལ་ལོལ་གྱིས་སི་ལཱ་དང་ཐི་མོ་ཐེ་གཉིས་ཀྱང་མྱུར་དུ་ཁོང་གི་དྲུང་དུ་ཡོང་དགོས་པའི་བཀའ་གནང་ཞིང་སྐྱེལ་མ་རྣམས་ཕྱིར་ལོག༌གོ།
ACT 17:16 དེ་ཡང་ཕོལ་ལོལ་གྱིས་ཡ་ཏེན་དུ་སི་ལཱ་དང་ཐི་མོ་ཐེ་གཉིས་ལ་སྒུག་པའི་དུས༌སུ། གྲོང་ཁྱེར་ཡོངས་སུ་ལྷ་སྐུ་སྣ་ཚོགས་ཀྱིས་གང་ཡོད་པ་མཐོང་སྟེ་སེམས་འཁྲུག་པར་གྱུར༌པས།
ACT 17:17 ཡ་ཧུ་དཱ་པའི་ཆོས་ཁང་ནས་ཡ་ཧུ་དཱ་པ་དང་དཀོན་མཆོག་ལ་དད་གུས་ཡོད་པའི་ཕྱི་ཕྱོགས་པ༌དང༌། གཞན་ཡང་ཉིན་རེ་བཞིན་ཁྲོམ་སྲང་ནས་ཕྲད་པའི་མི་རྣམས་ལ་རྩོད་གླེང་བྱས་སོ།།
ACT 17:18 ཡང་གནས་དེར་ཨེ་པི་ཀུར་དང་སི་ཏོ་ཀེ་ཞེས་གྲགས་པའི་མཚན་ཉིད་རིག་པའི་གྲུབ་མཐའི་ལྟ་བ་འཛིན་མཁན་འགའ་ཞིག་གིས་ཕོལ་ལོལ་ལ་རྩོད་གླེང་འདི་ལྟར་བྱས་པ༌སྟེ། ལ་ལ་ན༌རེ། མི་བཤད་དགུ་བཤད་བྱེད་མཁན་འདིས་ཅི་སྨྲའམ་ཞེས་ཟེར་བ༌དང༌། ཡང་ལ་ལ་ན༌རེ། ཁོས་ཕལ་ཆེར་ཕྱི་ཕྱོགས་ཀྱི་ལྷའི་སྐོར་སྨྲ་བ་རེད་ཅེས་སྨྲས་སོ།། དེ་ནི་ཕོལ་ལོལ་གྱིས་སྐྱབས་མགོན་ཡེ་ཤུ་དང་ཁོང་གྲོངས་པ་ནས་སླར་གསོན་པའི་སྐོར་གྱི་ཆོས་བསྒྲགས་པའི་རྐྱེན་ཡིན་ནོ།།
ACT 17:19 དེ་ནས་མི་དེ་རྣམས་ཀྱིས་ཕོལ་ལོལ་ཁོང་ཉིད་ཨེ་རུ་ཕ་ཀའོ་ཚོགས་པ་དེར་ཁྲིད་དེ་ན༌རེ། ཁྱོད་ཀྱིས་སྨྲ་བཞིན་པའི་ལྟ་བ་གསར་པ་འདི་དག་ངེད་ཅག་གིས་ཤེས་རུང༌ངམ།
ACT 17:20 རྒྱུ་མཚན་ནི་ཁྱོད་ཀྱི་ངོ་མཚར་བའི་དོན་འགའ་ངེད་རྣམས་ཀྱི་རྣ་བས་ཀྱང་ཐོས་བྱུང༌བས། ད་ལྟ་དོན་དེ་ཅི་ཡིན་པ་ཤེས་འདོད་ཅེས་སྨྲས་སོ།།
ACT 17:21 སྤྱིར་ཡ་ཏེན་གྱི་མི་དང་ཡུལ་དེར་གནས་སྐོར་དུ་ཡོང་བའི་མི་རྣམས་ཀྱིས་དོན་གཞན་ཅི་ཡང་མི་སྒྲུབ་པར་གཏམ་གསར་པ་ཁོ་ནར་ཉན་ཞིང༌སྨྲའོ།།
ACT 17:22 དེ་ནས་ཕོལ་ལོལ་ཁོང་ཉིད་ཨེ་རུ་ཕ་ཀའོ་ཚོགས་པའི་དབུས་སུ་ཡར་བཞེངས་ཏེ་འདི་སྐད༌དུ། ཡ་ཏེན་གྱི་མི༌རྣམས། ངས་ཁྱོད་རྣམས་ཕྱོགས་ཀུན་ནས་ཆོས་ལ་ཤིན་ཏུ་དགའ་བ་མཐོང༌།
ACT 17:23 ང་རང་ཕྱོགས་བཞིར་འགྲིམས་པའི་དུས༌སུ། ཁྱོད་རྣམས་ཀྱིས་བསྙེན་བཀུར་བྱེད་པའི་རྟེན་དེ་དག་ལ་བལྟས༌ཚེ། མཆོད་ཁྲི་ཞིག་གི་སྟེང་དུ་རྒྱུས་མི་མངའ་བའི་དཀོན་མཆོག་གི་ཕྱིར་ ཞེས་ཡི་གེ་བརྐོས་འདུག་པ་མཐོང༌བྱུང༌། ཁྱོད་ཅག་གིས་མ་ཤེས་པར་བསྙེན་བཀུར་བྱེད་ཅིང་བདག་གིས་དོན་དེ་ཁྱོད་རྣམས་ལ་སྨྲ་བར༌བྱ་སྟེ།
ACT 17:24 དེ་ཡང་འཇིག་རྟེན་ཁམས་དང་གནས་དེར་ཡོད་པའི་དངོས་པོ་ཐམས་ཅད་སྐྲུན་མཁན་དཀོན་མཆོག་ནི་གནམ་ས་གཉིས་ཀྱི་བདག་པོ་ཡིན༌པས། ཁོང་ནི་མིའི་ལག་པས་བཟོས་པའི་མཆོད་ཁང་དུ་བཞུགས་པ་མིན་ནོ།།
ACT 17:25 ཡང་ཁོང་གིས་མི་རྣམས་ལ་ཚེ་སྲོག༌དང༌། དབུགས། དངོས་པོ་ཐམས་ཅད་བཅས་གནང༌བས། ཁོང་ལ་དགོས་མཁོ་ཅི་ཡང་མེད་ཅིང་མིའི་ལག་པས་ཁོང་ལ་ཞབས་ཕྱི་ཅི་ཡང་བསྒྲུབ་མི་དགོས་སོ།།
ACT 17:26 ཁོང་གིས་མི་གཅིག་ནས་མིའི་རིགས་ཐམས་ཅད་བསྐྲུན་ཏེ་ས་གཞིའི་སྟེང་དུ་ཡོངས་སུ་གནས་པར་མཛད༌ཅིང༌། དེ་རྣམས་ཀྱི་ཚེ་ཚད་དང་སྡོད་མཚམས་ཀྱང་སྔར་ནས་ཐག་གིས་བཅད༌པ་ཡིན།
ACT 17:27 དཀོན་མཆོག་གིས་དེ་ལྟར་མཛད་དོན་ནི་མི་རྣམས་ཀྱིས་ཁོང་ཉིད་འཚོལ་ཞིང་ཡང་ཡང་བཙལ་ན་རྙེད་སྲིད་པའི་ཕྱིར་ཡིན༌ལ། དོན་དམ་དུ་ཁོང་ནི་བདག་ཅག་མི་རེ་རེ་དང་རྒྱང་ཐག་མི་རིང་བའི་གནས་སུ་བཞུགས་ཡོད།
ACT 17:28 དེ་ཡང་ཇི་སྐད༌དུ། ངེད་རྣམས་འཚོ་ཞིང་འགུལ་སྐྱོད་བྱེད་པ༌དང༌།། གནས་པ་འདི་ནི་ཁོང་ལ་བརྟེན་པ༌ཡིན།། ཞེས༌པའོ།། དེ་ཡང་ཁྱོད་ཅག་ལས་སྙན་ངག་པ་ལ་ལ་ན༌རེ། བདག་ཅག་ཀྱང་ནི་ཁོང་གི་བུ་ཕྲུག་ཡིན།། ཞེས་སྨྲས་པ་དང་མཚུངས་སོ།།
ACT 17:29 དེའི༌ཕྱིར། བདག་ཅག་ནི་དཀོན་མཆོག་གི་བུ་ཕྲུག་ཡིན་པས་དཀོན་མཆོག་གི་ངོ་བོ་ནི་མིས་རང་གི་ལག་རྩལ་དང་བློ་རིག་ལ་བརྟེན་ནས་གསེར༌དང༌དངུལ། རྡོ་སོགས་ལ་བརྐོས་པའི་སྐུ་དང་འདྲ་བར་བསམ་མི་རུང་ངོ༌།།
ACT 17:30 དེ་ཡང་འཇིག་རྟེན་པ་རྣམས་རྨོངས་པའི་དུས་སུ་དཀོན་མཆོག་གིས་དེ་དག་ལ་རྩད་ཞིབ་མ་མཛད༌ཀྱང༌། ད་ལྟ་ཡུལ་ཕྱོགས་སོ་སོའི་མི་ཐམས་ཅད་ལ་འགྱོད་བཤགས་བྱེད་དགོས་པའི་བཀའ་གནང༌བ་རེད།
ACT 17:31 རྒྱུ་མཚན་ནི་ཁོང་གིས་སྔ་མོ་ནས་ཐག་གིས་བཅད་པ་བཞིན། ཉིན་ཞིག་ལ་རང་གིས་བསྐོས་པའི་སྐྱེས་བུ་དམ་པ་དེ་བརྒྱུད༌ནས། འཇིག་རྟེན་གྱི་མི་ཀུན་ལ་དྲང་བདེན་གྱི་ངང་ནས་ལེགས་ཉེས་ཀྱི་ཁྲིམས་ཐག་གཅོད་པར་འགྱུར་བ༌དང༌། སྐྱེས་བུ་དམ་པ་དེ་གྲོངས་པ་ནས་སླར་གསོན་པར་མཛད་པའི་སྒོ་ནས་མི་ཐམས་ཅད་ལ་བདེན་དཔང་མཛད་མྱོང་ཞེས་གསུངས༌སོ།།
ACT 17:32 མི་དེ་རྣམས་ཀྱིས་གྲོངས་པ་ནས་སླར་གསོན་པའི་གཏམ་དེ་ཐོས་ནས་མི་འགའ་ཞིག་གིས་འཕྱ་ཞིང་སྨོད་པ༌དང༌། ཡང་མི་འགའ་ཞིག་གིས་ཁྱོད་ཀྱི་གཏམ་དེ་ལ་ངེད་ཅག་གིས་ཡང་བསྐྱར་མཉན་པར་བྱའོ་ཞེས་སྨྲས་སོ།།
ACT 17:33 དེ་ནས་ཕོལ་ལོལ་མི་ཚོགས་ཀྱི་ཁྲོད་ནས་ཕྱི་རོལ་ཏུ་ཕེབས་སོ།།
ACT 17:34 འོན༌ཀྱང༌། མི་ཁ་ཤས་ཁོང་དང་འགྲོགས་ཤིང་གཙོ་བོ་ལ་དད་པར་གྱུར་ཏོ།། དེ་དག་གི་ཁྲོད་དུ་ཨེ་རུ་ཕ་ཀའོ་ཚོགས་པ་ལ་གཏོགས༌ཤིང༌མིང་ལ་ཏཱ་ཨོ་ནེ་སི་ཞེས་འབོད་པ་དེ༌དང༌། ཡང་མིང་ལ་ཏཱ་མ་རོས་ཞེས་འབོད་པའི་བུད་མེད་ཅིག༌དང༌། གཞན་ཡང་མི་འགའ་ཤས་ཡོད༌དོ།།
ACT 18:1 དོན་དེའི་རྗེས༌སུ། ཕོལ་ལོལ་བྱ་བ་ཡ་ཏེན་དང་ཁ་བྲལ་ནས་ཀོ་རིན་ཐུ་རུ་ཕྱིན་པ༌ལ།
ACT 18:2 མིང་ལ་ཨ་ཀུ་ལཱ་ཞེས་པའི་ཡ་ཧུ་དཱ་པ་ཞིག་དང་ཕྲད་ཅིང་ཁོ་ནི་ཕོན་ཐུ་ཡུལ་ནས་སྐྱེས༌ཤིང་། དེ་ཡང་ཀཱ་ལོ་དི་ཞེས་པ་དེས་ཡ་ཧུ་དཱ་པ་ཐམས་ཅད་རོ་མཱ་རུ་སྡོད་མི་ཆོག་པའི་བཀའ་ཕབ་པས། ཨ་ཀུ་ལཱ་ཞེས་པས་རང་གི་ཆུང་མ་ཕུར་སི་ལཱ་ཁྲིད་དེ་ཨི་ཏ་ལི་ཡུལ་ནས་ཀོ་རིན་ཐུ་རུ་ཡོང་ངོ༌།། དེ་ནས་ཕོལ་ལོལ་བཟའ་ཟླ་དེ་གཉིས་ཀྱི་གམ་དུ་ཕྱིན་པ་རེད།
ACT 18:3 ཁྱོ་ཤུག་དེ་གཉིས་གུར་བཟོ་མཁན་ཡིན་ཞིང་ཕོལ་ལོལ་ཡང་དེ་གཉིས་དང་ལས་རིགས་མཚུངས་པས་ན་མཉམ་དུ་བསྡད་ནས་ལས་ཀ་བསྒྲུབས་སོ།།
ACT 18:4 དེ་ནས་ཕོལ་ལོལ་གྱིས་ངལ་གསོ་བའི་ཉིན་རེ་རེར་ཆོས་ཁང་ནས་ཡ་ཧུ་དཱ་པ་དང་གྷི་རིག་པ་རྣམས་ལ་རྩོད་གླེང་བྱས་ཏེ་སྐུལ་མ་མཛད༌དོ།།
ACT 18:5 དེ་ནས་སི་ལཱ་དང་ཐི་མོ་ཐེ་གཉིས་མ་ཀེ་དོན་ཡཱ་ཡུལ་ནས་སླེབས་པ༌ལ། ཕོལ་ལོལ་ནི་དཀོན་མཆོག་གི་བཀའ་སྒྲོག་པ་ཁོ་ནར་བྲེལ༌ཞིང༌། ཡ་ཧུ་དཱ་པ་རྣམས་ལ་ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་བདེན་དཔང་མཛད་ཀྱིན་འདུག
ACT 18:6 འོན༌ཀྱང༌། མི་དེ་རྣམས་ཀྱིས་ཁོང་ལ་ངོ་རྒོལ་དང་འཕྱ་དམོད་བྱས་པ༌ན། ཕོལ་ལོལ་གྱིས་རང་གི་གྱོན་གོས་སྤྲུགས་ཀྱིན་འདི་སྐད༌དུ། ཁྱོད་ཅག་གི་ཁྲག་རང་རང་གི་མགོ་ལ་འཕོག་པར་གྱུར༌ཅིག བདག་ལ་ཉེས་པ་ཅི་ཡང༌མེད། དུས་ད་ནས༌བཟུང༌། ང་རང་ཕྱི་ཕྱོགས་པ་རྣམས་ཡོད་སར་འགྲོ་ཞེས་གསུངས་སོ།།
ACT 18:7 དེ་ནས་ཕོལ་ལོལ་གནས་དེ་དང་ཁ་བྲལ་ནས་མིང་ལ་ཐེ་ཏུ་ཡུས་ཐོ་ཞེས་འབོད་པའི་མི་ཞིག་གི་ཁྱིམ་དུ་སོང་བ༌དང༌། མི་དེ་ནི་དཀོན་མཆོག་ལ་བསྙེན་བཀུར་བྱེད་མཁན་ཞིག་ཡིན༌ཞིང༌། ཁོའི་ཁྱིམ་ཚང་ཡང་ཆོས་ཁང་དེའི་འགྲམ་དུ་ཡོད།
ACT 18:8 ཡང་ཆོས་ཁང་དེའི་དབུ་འཛིན་པ་ཀཱ་རིས་པི་ཞེས་པ་ཞིག་ཡོད་པ་དེ་དང་ཁོའི་ཁྱིམ་མི་ཐམས་ཅད་གཙོ་བོ་ལ་དད་པར་གྱུར་པ༌དང༌། གཞན༌ཡང༌། ཀོ་རིན་ཐུ་པ་མང་པོས་ཀྱང་ཆོས་ལ་མཉན་ནས་དད་པར་གྱུར་ཅིང་ཁྲུས་གསོལ་ལ་ཞུགས་སོ།།
ACT 18:9 ཡང་མཚན་མོ་ཞིག༌ལ། ཞལ་གཟིགས་གནང་བ་ལས་གཙོ་བོས་ཕོལ་ལོལ་ལ་འདི་སྐད༌དུ། མ་འཇིགས༌ཤིག ཁ་རོག་ཏུ་མི་འདུག་པར་བདག་གི་བཀའ་མཚམས་མེད་པར་སྒྲོགས༌ཤིག
ACT 18:10 གྲོང་ཁྱེར་འདི་རུ་བདག་ལ་མི་མང་པོ་ཡོད་ཅིང་ང་རང་ཡང་ཁྱོད་དང་མཉམ་དུ་གནས༌པས། སུ་ཞིག་གིས་ཀྱང་ཁྱོད་ལ་རྒོལ་བ་དང་གནོད་འཚེ་བྱ་མི་ནུས་ཞེས་གསུངས་སོ།།
ACT 18:11 ཕོལ་ལོལ་ཡང་ལོ་གཅིག་དང་ཟླ་བ་དྲུག་གི་རིང༌ལ་གནས་དེར་བསྡད་ནས་མི་རྣམས་ལ་དཀོན་མཆོག་གི་བཀའ་བསླབས༌སོ།།
ACT 18:12 དེ་ཡང་གལ་ལེ་ཨོན་བྱ་བ་ཨ་ཀ་ཡཱ་ཡུལ་གྱི་སྤྱི་དཔོན་ཡིན་པའི་དུས༌སུ། ཡ་ཧུ་དཱ་པ་རྣམས་ཀྱིས་ངན་སེམས་གཅིག་མཐུན་གྱིས་ཕོལ་ལོལ་ལ་ངོ་རྒོལ་བྱས་ནས་ཁྲིམས་དཔོན་གྱི་ཁྲིའི་མདུན་དུ་ཁྲིད་དེ་ན༌རེ།
ACT 18:13 འདིས་མི་རྣམས་ལ་བཀའ་ཁྲིམས་དང་མི་མཐུན་པའི་སྒོ་ནས་དཀོན་མཆོག་ལ་བསྙེན་བཀུར་བྱེད་པར་བསྐུལ་བ་རེད་ཅེས་སྨྲས་པ༌ན།
ACT 18:14 ཕོལ་ལོལ་གྱིས་གཏམ་བརྗོད་པར་རྩོམ་པ༌ལ། གལ་ལེ་ཨོན་གྱིས་ཡ་ཧུ་དཱ་པ་དེ་རྣམས་ལ་འདི་ལྟར། ཀྱེ། ཡ་ཧུ་དཱ་པ་ཁྱོད༌རྣམས། གལ་ཏེ་གཏུགས་བཤེར་བྱས་པའི་དོན་འདི་ངན་པའམ་ཡང་ན་ཉེས་སྐྱོན་ཆེ་ཆུང་གང་ཞིག་ཡིན་ན་ཁྱོད་ཅག་གི་ཞུ་བར་ངས་མཉན་སྲིད་མོད།
ACT 18:15 འོན་ཀྱང་ཁྱོད་ཅག་གི་རྩོད་གཞི་ནི་ཚིག་རྩོད༌དང༌། མིང༌ངམ། ཡང་ན་ཁྱོད་ཅག་གི་ཆོས་ཁྲིམས་བཅས་ཀྱི་སྐོར་ཡིན༌ན། དོན་དེ་ཁྱོད་ཅག་རང་གིས་སྒྲུབས༌ཤིག བདག་གིས་དོན་འདི་ལྟ་བུ་ལ་ཁྲིམས་གཅོད་བྱེད་མི་འདོད་ཅེས་སྨྲས༌ཏེ།
ACT 18:16 མི་དེ་རྣམས་ཁྲིམས་དཔོན་གྱི་ཁྲིའི་རྩ་ནས་ཕྱི་རོལ་ཏུ་བསྐྲད་དོ།།
ACT 18:17 དེ་ནས་མི་དེ་རྣམས་ཀྱིས་ཆོས་ཁང་གི་དབུ་འཛིན་པ་སའོ་ཐེ་ནེ་ཞེས་པ་བཙན་བཟུང་བྱས་ཏེ་ཁྲིམས་དཔོན་གྱི་ཁྲིའི་མདུན་དུ་གཅར་རྡུང་བྱས། འོན་ཀྱང་གལ་ལེ་ཨོན་གྱིས་དོན་དེ་རྣམས་ལ་དོ་སྣང་མ་བྱས༌སོ།།
ACT 18:18 ཡང་ཕོལ་ལོལ་ཁོང་ཉིད་ཀོ་རིན་ཐུ་རུ་ཉིན་མང་པོར་བཞུགས་རྗེས་སྤུན་ཟླ་རྣམས་དང་ཁ་གྱེས༌ཏེ། གྲུ་གཟིངས་ལ་བསྡད་ནས་སིར་ཡཱ་ཡུལ་གྱི་ལམ་ལ་ཆས་ཤིང་། ཕུར་སི་ལཱ་དང་ཨ་ཀུ་ལཱ་གཉིས་ཀྱང་ཁོང་དང་མཉམ་དུ་ཕྱིན་ཏོ།། ཁོང་གིས་དེ་སྔར་དམ་བཅས་པ་བཞིན་ཀེན་གྲེ་ཞེས་པའི་གྲུ༌ཁ་ནས་དབུ་སྐྲ་བྲེགས་པ་རེད།
ACT 18:19 དེ་ནས་ཨེ་ཕེ་སི་རུ་སླེབས་པ་དང་ཕོལ་ལོལ་གྱིས་ཁོ་གཉིས་གནས་དེར་བསྐྱུར༌ཏེ། རང་ཁོ་ན་ཡ་ཧུ་དཱ་པའི་ཆོས་ཁང་དུ་ཕྱིན་ནས་ཡ་ཧུ་དཱ་པ་རྣམས་ལ་རྩོད་གླེང་བྱས་སོ།།
ACT 18:20 མི་རྣམས་ཀྱིས་ཁོང་ཉིད་ཉིན་འགར་བཞུགས་པར་ཞུས་ཀྱང་ཁོང་འཐད༌པ་མ་བྱུང་།
ACT 18:21 འོན་ཀྱང་ཁོང་ཉིད་དེ་རྣམས་དང་ཁ་འབྲལ་སྐབས་འདི་སྐད༌དུ། གལ་ཏེ་དཀོན་མཆོག་གི་ཐུགས་དགོངས་ཡིན་ན་ང་རང་སླར་ཡང་གནས་འདིར་ཡོང་ངེས་པ་ཡིན་ཞེས་གསུངས་རྗེས་གྲུ་གཟིངས་ལ་བསྡད་དེ་ཨེ་ཕེ་སི་དང་བྲལ་ཏོ།།
ACT 18:22 དེ་ནས་ཀེ་སར་ཡཱ་རུ་སླེབས་པ་དང་ཁོང་ཉིད་གྲུ་ལས་བབས་ཏེ་ཡར་ཆོས་ཚོགས་ལ་འཚམས་འདྲི་ཞུ་བར་ཕྱིན་པ༌དང༌། དེ་རྗེས་མར་ཨན་ཏི་ཡོག་ཡཱ་རུ་བྱོན༌ཏོ།།
ACT 18:23 གནས་དེར་ཉིན་འགར་བསྡད༌རྗེས། དེ་དང་ཁ་བྲལ་ནས་རིམ་བཞིན་ག་ལད་ཡཱ་དང་ཕུ་ཀེ་ཡཱ་ཡུལ་བརྒྱུད་ནས་རྗེས་འབྲང་པ་རྣམས་ཀྱི་དད་སེམས་བརྟན་པོར་བྱས༌སོ།།
ACT 18:24 དེ་ཡང་མིང་ལ་ཨ་པོལ་ལོ་ཟེར་བའི་ཡ་ཧུ་དཱ་པ་ཞིག་ཡོད་པ་དེ་ཨེ་ཕེ་སི་རུ་སླེབས། ཁོང་ནི་ཨ་ལིག་སན་དྲི་ཡཱ་ནས་སྐྱེས་ཤིང་ཁ་ལྕེ་ཅན་ཞིག་སྟེ་གསུང་རབ་ལའང་མཁས༌པ་རེད།
ACT 18:25 ཁོང་གིས་སྐྱབས་མགོན་ཡེ་ཤུའི་ཆོས་ཀྱི་སྐོར་བསླབས༌པས། སེམས་ལ་སྟོབས་ཤུགས་རྒྱས་ཤིང་སྐྱབས་མགོན་ཡེ་ཤུའི་མཛད་དོན་སྐོར་མི་གཞན་ལ་ཞིབ་ཏུ་སྨྲས་ཤིང་བསྟན་མོད། འོན༌ཀྱང༌། ཁོང་གིས་ཡོ་ཧ་ནན་གྱི་ཁྲུས་གསོལ་ཁོ་ན་ཤེས༌པ་རེད།
ACT 18:26 དེ་ནས་ཁོང་གིས་ཡ་ཧུ་དཱ་པའི་ཆོས་ཁང་ནས་སྤོབས་པ་ཆེན་པོས་སྐྱབས་མགོན་ཡེ་ཤུའི་ཆོས་གསུངས་པ༌ན། ཕུར་སི་ལཱ་དང་ཨ་ཀུ་ལཱ་གཉིས་ཀྱིས་གསུང་དེ་ཐོས་ནས་ཁོང་ཉིད་རང་ཁྱིམ་དུ་གདན་དྲངས༌ཏེ། དཀོན་མཆོག་གི་ཆོས་དེ་ཉིད་སྔར་ལས་ཀྱང་ཁོང་ལ་ཞིབ་ཏུ་སྨྲས་སོ།།
ACT 18:27 དེ་ནས་ཁོང་ཉིད་ཨ་ཀ་ཡཱ་ཡུལ་དུ་འགྲོ་འདོད་པ༌ན། སྤུན་ཟླ་རྣམས་ཀྱིས་ཀྱང་སྐུལ་མ་མཛད་པ་དང་ཡུལ་དེའི་རྗེས་འབྲང་པ་རྣམས་ལ་ཁོང་ལ་སྣེ་ལེན་བྱེད་དགོས་པའི་འཕྲིན་ཡིག་བྲིས་སོ།། དེ་ནས་ཁོང་ཉིད་ཡུལ་དེར་སླེབས་ཏེ་ཐུགས་རྗེ་བརྒྱུད་ནས་དད་པར་གྱུར་པ་རྣམས་ལ་རོགས་རམ་མང་དུ་མཛད།
ACT 18:28 རྒྱུ་མཚན་ནི་ཁོང་གིས་མི་ཚོགས་ཀྱི་མདུན་དུ་མཐུ་སྟོབས་ལྡན་པའི་ངང་ནས་ཡ་ཧུ་དཱ་པ་རྣམས་དགག་པས་བཏུལ་ཏེ། གསུང་རབ་ལས་ལུང་དྲངས་ནས་ཡེ་ཤུ་ཁོང་ཉིད་ནི་སྐྱབས་མགོན་མཱ་ཤི་ཀ་ཡིན་པ་གསལ་པོར་བསྟན་ཏོ།།
ACT 19:1 དེ་ཡང་ཨ་པོལ་ལོ་ཞེས་བྱ་བ་ཀོ་རིན་ཐུ་རུ་བཞུགས་པའི་དུས༌དེར། ཕོལ་ལོལ་ཁོང་ཉིད་ག་ལད་ཡཱ་དང་ཕུ་ཀེ་ཡཱ་ཡུལ་བརྒྱུད་ནས་ཨེ་ཕེ་སི་རུ་སླེབས་པ༌དང༌། གནས་དེ་རུ་རྗེས་འབྲང་པ་འགར་ཕྲད་ཅིང༌།
ACT 19:2 ཁོང་གིས་དེ་རྣམས་ལ་འདི་སྐད༌དུ། ཁྱོད་ཅག་གིས་དད་པ་བྱེད་པའི་དུས་སུ་དམ་པའི་ཐུགས་ཉིད་ཐོབ་མྱོང་ངམ་ཞེས་དྲིས་པ༌ལ། དེ་རྣམས་ན༌རེ། ཐོབ་མ་མྱོང་ལ། དམ་པའི་ཐུགས་ཉིད་ཅེས་པ་ཞིག་ཡོད་པ་ཐོས་ཀྱང་མ་མྱོང་ཞེས་ཞུས་སོ།།
ACT 19:3 དེ་ནས་ཕོལ་ལོལ་གྱིས་འདི་སྐད༌དུ། དེས་ན་ཁྱོད་རྣམས་ལ་ཁྲུས་གསོལ་གང་ཐོབ་པ་ཡིན་ནམ་ཞེས་གསུངས་པ༌ན། དེ་རྣམས་ཀྱིས་ཡོ་ཧ་ནན་གྱི་ཁྲུས་གསོལ་ཐོབ་པ་ཡིན་ཞེས་ཞུས་སོ།།
ACT 19:4 ཡང་ཕོལ་ལོལ་གྱིས་འདི་སྐད༌དུ། ཡོ་ཧ་ནན་གྱིས་འགྱོད་བཤགས་ཀྱི་རྟགས་སུ་ཁྲུས་གསོལ་བྱས་པ༌དང༌། མི་རྣམས་ལ་རང་གི་རྗེས་སུ་འབྱོན་ངེས་པ་སྟེ་སྐྱབས་མགོན་ཡེ་ཤུ་ལ་དད་པ་བྱེད་དགོས་པར་བསྐུལ་བ་ཡིན་ཞེས་གསུངས་སོ།།
ACT 19:5 དེ་རྣམས་ཀྱིས་གསུང་དེ་ཐོས་པ་དང་གཙོ་བོ་ཡེ་ཤུའི་མཚན་ལ་བརྟེན་ནས་ཁྲུས་གསོལ་ལ་ཞུགས་ཤིང༌།
ACT 19:6 ཕོལ་ལོལ་གྱིས་དེ་རྣམས་ཀྱི་ལུས་ལ་ཕྱག་བཞག་པ་དང་དེ་རྣམས་ལ་དམ་པའི་ཐུགས་ཉིད་ཐོབ་ཅིང༌། ངག་ནས་སྐད་གཞན་སྨྲ་ཞིང་ལུང་ཡང་བསྟན་ཏོ།།
ACT 19:7 བསྡོམས་པས་མི་བཅུ་གཉིས་ཙམ་ཡོད༌དོ།།
ACT 19:8 དེ་ནས་ཕོལ་ལོལ་ཆོས་ཁང་དུ་ཕྱིན་ཏེ། ཟླ་བ་གསུམ་གྱི་རིང༌ལ་རྒྱུན་ཆད་མེད་པར་སྙིང་སྟོབས་ཆེན་པོས་ཆོས་གསུངས་པ༌དང༌། དཀོན་མཆོག་གི་རྒྱལ་སྲིད་སྐོར་ལ་རྩོད་གླེང་བྱས་ཏེ་མི་རྣམས་ལ་སྐུལ་མ་གནང༌མོད།
ACT 19:9 འོན༌ཀྱང༌། ཕྱིས་སུ་མི་ལ་ལའི་སེམས་རྒྱུད་གྱོང་པོར་གྱུར་པ་དང་དད་པའང་མ་བྱས༌པས། མི་ཚོགས་ཀྱི་མདུན་དུ་མཱ་ཤི་ཀའི་ཆོས་ཀྱི་ལམ་དེ་ལ་འཕྱ་སྨོད་བྱས་སོ།། དེ་ནས་ཕོལ་ལོལ་གྱིས་རྗེས་འབྲང་པ་རྣམས་ཁྲིད་ཅིང་དེ་དག་དང་ཁ་བྲལ༌ནས། ཉིན་རེ་བཞིན་ཐཱ་རན་ནུ་ཞེས་པའི་སློབ་གླིང་དུ་རྩོད་གླེང་བྱས།
ACT 19:10 ཁོང་གིས་ལོ་གཉིས་ཀྱི་རིང་ལ་དེ་ལྟར་མཛད་པས་ཨེ་ཞི་ཡཱ་ཡུལ་དུ་གནས་པའི་ཡ་ཧུ་དཱ་པ་དང་གྷི་རིག་པ་ཐམས་ཅད་ཀྱིས་ཀྱང་གཙོ་བོའི་བཀའ་ཐོས༌སོ།།
ACT 19:11 དེ་ཡང་དཀོན་མཆོག་གིས་ཕོལ་ལོལ་གྱི་ཕྱག་བརྒྱུད་ནས་ཤིན་ཏུ་ངོ་མཚར་ཆེ་བའི་དོན་རྣམས་མཛད་པ༌དང༌།
ACT 19:12 ཐ་ན་མི་ལ་ལས་ཕོལ་ལོལ་གྱི་ལུས་ནས་ལག་ཕྱིས་དང་པང་ཁེབས་བླངས༌ཏེ། ནད་པའི་ལུས་སྟེང་དུ་བཀབ་མ་ཐག་ནད་བསལ་ཞིང་གདོན་འདྲེའང་ཕྱིར་ཐོན་པ་རེད།
ACT 19:13 དུས༌དེར། ཡུལ་ཕྱོགས་ཀུན་ཏུ་འགྲིམས་ཤིང་སྔགས་བརྒྱབ་སྟེ་གདོན་འདྲེ་ཕྱིར་སྐྲོད་པའི་ཡ་ཧུ་དཱ་པ་འགའ་ཞིག་གིས་གདོན་འདྲེས་བཟུང་བའི་མི་རྣམས་ལ་རང་དགར་གཙོ་བོ་ཡེ་ཤུའི་མཚན་བརྗོད་ཅིང་འདི་ལྟར་སྨྲས༌པ། ངས་ཕོལ་ལོལ་གྱིས་བསྒྲགས་པའི་སྐྱབས་མགོན་ཡེ་ཤུའི་མཚན་ལ་བརྟེན་ནས་གདོན་འདྲེ་ཁྱོད་རྣམས་ཕྱིར་བུད་ཅིག་ཅེས་སྨྲས་པ་ཡིན་ཞེས༌པའོ།།
ACT 19:14 དེ་ལྟར་བྱེད་མཁན་ནི་ཡ་ཧུ་དཱ་པའི་མཆོད་དཔོན་ཆེན་པོ་སི་རྐེ་བཱ་ཞེས་པའི་བུ་བདུན་ཡིན༌ལ།
ACT 19:15 གདོན་འདྲེས་ཁོ་རྣམས་ལ་ངས་སྐྱབས་མགོན་ཡེ་ཤུ་དང་ཕོལ་ལོལ་གཉིས་ཀ་སུ་ཡིན་པ་ཤེས། འོན༌ཀྱང༌ཁྱོད་ཅག་སུ་ཡིན་ནམ་ཞེས་སྨྲས་པ༌དང༌།
ACT 19:16 གདོན་འདྲེས་བཟུང་བའི་མི་དེ་ཁོ་རྣམས་ཀྱི་ལུས་སྟེང་དུ་མཆོངས་པ་དང་དེ་དག་ལས་རྣམ་པར་རྒྱལ་ཞིང་ཁོ་རྣམས་ལ་དབང་བསྒྱུར༌བས། དེ་རྣམས་ལ་རྨས་ཕོགས་ཤིང་ལུས་གཅེར་བུར་ཁང་པ་ལས་ཕྱིར་བྲོས་སོ།།
ACT 19:17 ཨེ་ཕེ་སི་རུ་སྡོད་པའི་ཡ་ཧུ་དཱ་པ་དང་གྷི་རིག་པ་ཐམས་ཅད་ཀྱིས་དོན་དེ་ཤེས་ནས་འཇིགས་པར་གྱུར་པ༌དང༌། གཙོ་བོ་ཡེ་ཤུའི་མཚན་སྙན་གྲགས་ཀྱང་ཤིན་ཏུ་རྒྱས་པར་གྱུར་ཏོ།།
ACT 19:18 དེ་ནས་དད་པ་བྱེད་མཁན་གསར་པ་མང་པོ་ཞིག་ཡོང་ནས་རང་གིས་བྱས་པའི་ཉེས་སྐྱོན་ཁས་བླངས་ཤིང་མཐོལ་བཤགས་བྱས་པ་རེད།
ACT 19:19 ཡང་སྒྱུ་མ་མཁན་མང་པོས་ཀྱང་མི་རྣམས་ཀྱི་མདུན་དུ་རང་གི་དཔེ་ཆ་སྤུངས་ནས་མེར་བསྲེགས་ཤིང་། དེ་དག་གིས་མེར་བསྲེགས་པའི་དཔེ་རིན་བརྩིས་པ་ལ་བསྡོམས་པས་དངུལ་སྒོར་ཁྲི་ལྔ་ཡོད་པ་ཤེས་སོ།།
ACT 19:20 དེ་ལྟར་གཙོ་བོའི་བཀའ་ཤིན་ཏུ་དར་ཞིང་རྒྱས་པ་དང་མི་མཐུན་ཕྱོགས་ལས་རྣམ་པར་རྒྱལ༌ཏོ།།
ACT 19:21 དོན་དེ་རྣམས་མཇུག་རྫོགས༌རྗེས། ཕོལ་ལོལ་གྱིས་རང་ཉིད་མ་ཀེ་དོན་ཡཱ་དང་ཨ་ཀ་ཡཱ་ཡུལ་བརྒྱུད་ནས་ཡེ་རུ་སཱ་ལེམ་དུ་འགྲོ་བར་སེམས་ཐག་བཅད་དེ། ང་རང་དེ་རུ་སླེབས་རྗེས་ངེས་པར་རོ་མཱ་ལ་བལྟ་རུ་འགྲོའོ་ཞེས་གསུངས་སོ།།
ACT 19:22 དེ་ནས་ཁོང་ལ་རོགས་བྱེད་མཁན་རྣམས་ལས་ཐི་མོ་ཐེ་དང་ཨེ་རས་ཏི་གཉིས་མ་ཀེ་དོན་ཡཱ་ཡུལ་དུ་མངགས༌ཤིང༌། རང་ཉིད་རེ་ཞིག་ཨེ་ཞི་ཡཱ་ཡུལ་དུ་བཞུགས༌སོ།།
ACT 19:23 དུས༌དེར། མཱ་ཤི་ཀའི་ཆོས་ཀྱི་ལམ་དེའི་རྐྱེན་གྱིས་ཟིང་ཆ་ཆེན་པོ་བྱུང༌བ་རེད།
ACT 19:24 མིང་ལ་ཏི་མེ་ཏྲེ་ཟེར་བའི་དངུལ་མགར་ཞིག་ཡོད་པ་དེ་ནི་རྒྱུན་དུ་ལྷ་མོ་ཨར་ཏེ་མེ་ཞེས་པའི་མཆོད་ཁང་གི་འདྲ་གཟུགས་དངུལ་གྱིས་བཟོ་མཁན་ཞིག་ཡིན༌པས། དངུལ་མགར་རྣམས་ལ་ཁེ་བཟང་ཆེན་པོ་ཐོབ༌པར་བྱས།
ACT 19:25 ཁོས་ལས་གྲོགས་དེ་དག་དང་དངུལ་མགར་གཞན་རྣམས་བསྡུས་ཏེ་ན༌རེ། གྲོགས་པོ༌རྣམ་པ། བདག་ཅག་ལས་ཀ་འདི་ཁོ་ནར་བརྟེན་ནས་འབྱོར་བ་རྒྱས་པ་ཁྱོད་རྣམས་ཀྱིས་ཤེས༌པ་ཡིན།
ACT 19:26 ཕོལ་ལོལ་གྱིས་ཨེ་ཕེ་སི་ལས༌གཞན། ད་དུང་ཨེ་ཞི་ཡཱ་ཡུལ་གྱི་སྐྱེ་བོ་ཕལ་མོ་ཆེ་ནས་མིའི་ལག་པས་བཟོས་པ་དེ་དག་ལྷ་ནི་མ་ཡིན་ཞེས་སྨྲས་ཤིང་མི་མང་པོར་བསླུ་བྲིད་བྱས་པ་ཁྱོད་ཅག་གིས་ཀྱང་མཐོང་ཐོས་སུ་མྱོང༌ངོ་།།
ACT 19:27 དེ་ལྟར་བྱས་ན་བདག་ཅག་གི་ལས་ཀ་འདིར་མི་གཞན་རྣམས་ཀྱིས་མཐོང་ཆུང་བྱེད་སྲིད་པར་མ༌ཟད། ལྷ་མོ་ཆེན་མོ་ཨར་ཏེ་མེའི་མཆོད་ཁང་ཡང་སྣང་མེད་དུ་འཇོག་སྲིད༌ཅིང༌། ཨེ་ཞི་ཡཱ་ཡུལ་དང་བཅས་པའི་འཇིག་རྟེན་གྱི་མི་ཐམས་ཅད་ཀྱིས་བསྙེན་བཀུར་བྱེད་པའི་ལྷ་མོ་ཆེན་མོའི་གཟི་བརྗིད་ཀྱང་ཉམས་པར་འགྱུར་ཞེས་སྨྲས་པ༌དང༌།
ACT 19:28 མི་རྣམས་ཀྱིས་གཏམ་དེ་ཐོས་པ་དང་ཤིན་ཏུ་ཁྲོས་ཏེ་སྐད་ཆེན༌པོས། ཀྱེ། ཨེ་ཕེ་སི་ཞེས་པའི་ལྷ་མོ་ཨར་ཏེ་མེ་མཆོག་ཏུ་གྱུར་པ་ཡིན་ཞེས་འུར་བརྒྱབ་བོ།།
ACT 19:29 དེ་ལྟར་གྲོང་ཁྱེར་ཡོངས་ལ་ཟིང་ཆ་ལངས་པ༌དང༌། མི་དེ་རྣམས་ཀྱིས་ཕོལ་ལོལ་གྱི་ལམ་གྲོགས་ཏེ་མ་ཀེ་དོན་ཡཱ་ཡུལ་གྱི་ཀེ་ཡུ་དང་ཨ་རི་སྟར་ཀུ་གཉིས་བཟུང་ནས་ཟློས་གར་ཚོགས་རའི་ནང་མཉམ་དུ་བཙན་གྱིས་ཁྲིད།
ACT 19:30 ཕོལ་ལོལ་ཡང་མི་དེ་རྣམས་ཀྱི་ཁྲོད་དུ་འགྲོ་བསམས་ཀྱང་རྗེས་འབྲང་པ་རྣམས་ཀྱིས་ཁོང་ཉིད་འགྲོ་རུ་མ་བཅུག་གོ།
ACT 19:31 ཕོལ་ལོལ་གྱི་གྲོགས་པོ་ཨེ་ཞི་ཡཱ་ཡུལ་གྱི་ས་གནས་དཔོན་པོ་ཁ་ཤས་ཀྱིས་ཀྱང་མི་མངགས་ཏེ་ཁོང་ཉིད་ཟློས་གར་ཚོགས་རར་མི་འགྲོ་བར་ནན་གྱིས་བསྐུལ་བ་རེད།
ACT 19:32 དེ་ནས་ཚོགས་ར་དེར་འདུས་པའི་མི་དེ་རྣམས་ཟང་ཟིང་ལང་ལོང་དུ་གྱུར༌པས། མི་མང་ཤོས་ཀྱིས་ཅིའི་ཕྱིར་འདུས་པ་མ་ཤེས་པར་ཅི་བཤད་འདི་བཤད་མེད་པར་སྐད་ཅོར་བརྒྱབ་བོ།།
ACT 19:33 ཡ་ཧུ་དཱ་པ་རྣམས་ཀྱིས་ཨ་ལིག་སན་དིར་ཞེས་པ་མདུན་དུ་གཏད༌ཅིང༌། མི་ཚོགས་ལས་འགའ་ཞིག་གིས་ཀྱང་ཁོ་རང་ལ་ངན་སྐུལ་བྱས་པས། ཨ་ལིག་སན་དིར་གྱིས་མི་ཚོགས་ལ་དག་འབུད་བྱེད་པར་ལག་བརྡ་བྱས༌ནའང༌།
ACT 19:34 མི་དེ་རྣམས་ཀྱིས་ཁོ་རང་ཡ་ཧུ་དཱ་པ་ཡིན་པ་ཤེས་ནས་ཚང་མས་མགྲིན་གཅིག༌ཏུ། ཀྱེ། ཨེ་ཕེ་སི་ཡི་ལྷ་མོ་ཨར་ཏེ་མེ་མཆོག་ཏུ་གྱུར་པ་ཡིན་ཞེས་ཆུ་ཚོད་གཉིས་ཙམ་རིང་ལ་འུར་བརྒྱབ་བོ།།
ACT 19:35 དེ་ནས་གྲོང་ཁྱེར་དེའི་དྲུང་ཡིག་པས་མི་དེ་རྣམས་ཁ་རོག་ལ་སྡོད་དུ་བཅུག་སྟེ་འདི་ལྟར། ཀྱེ། ཨེ་ཕེ་སི་པ༌རྣམས། ཨེ་ཕེ་སི་ནི་ལྷ་མོ་ཆེན་མོ་ཨར་ཏེ་མེའི་མཆོད་ཁང་དང་ནམ་མཁའ་ནས་ལྷུང་བའི་ཨར་ཏེ་མེའི་ལྷ་སྐུ་སྲུང་མཁན་ཡིན་པ་སུས་མི་ཤེས༌སམ།
ACT 19:36 དོན་དེ་སུས་ཀྱང་བཟློག་ཐབས་མེད་པས་ཁྱོད་རྣམས་ལྷོད་འཇགས་སུ་སྡོད་པ་ལས་ཧོལ་རྒྱུག་བྱ་མི་རུང༌།
ACT 19:37 ཁྱོད་ཅག་གིས་འདིར་བཙན་ཁྲིད་བྱས་པའི་མི་འདི་རྣམས་ཀྱིས་མཆོད་ཁང་ནས་དངོས་རྫས་མ་བརྐུས་ལ་བདག་ཅག་གི་ལྷ་མོར་སྐུར་བའང་མ་བཏབ།
ACT 19:38 གལ༌ཏེ། ཏི་མེ་ཏྲེ་དང་ཁོའི་ལས་གྲོགས་རྣམས་ལ་གཏུག་བཤེར་བྱེད་པའི་དོན་ཡོད༌ན། ཁྲིམས་ར་དང་ཁྲིམས་དཔོན་རྣམས་ཀྱང་ཡོད་པས་ཕན་ཚུན་གཏུག་རེས་བྱས་ཆོག
ACT 19:39 གལ༌ཏེ། ཁྱོད་རྣམས་ལ་དོན་གཞན་ཡོད༌ན། རྒྱུན་སྲོལ་ལྟར་ཁྲིམས་རར་འདུས་ནས་ཐག་གཅོད་བྱ༌དགོས།
ACT 19:40 དེ་རིང་གི་ཟིང་ཆ་འདི་ལ་རྒྱུ་རྐྱེན་ཅི་ཡང་མེད་པས་ངེད་ཅག་ལའང་གོང་རིམ་གྱིས་འདྲི་གཅོད་བྱེད་ཉེན༌ཆེ། མི་ཚོགས་འདུས་པའི་ཟིང་ཆ་འདིར་ངེད་ཅག་ལའང་རྒྱུ་མཚན་བཤད་རྒྱུ་མེད་ཅེས་སྨྲས་པ༌དང༌།
ACT 19:41 མི་དེ་རྣམས་སོ་སོར་གྱེས་སུ་བཅུག༌གོ།
ACT 20:1 དེ་ཡང་ཟིང་ཆ་ཞི་འཇགས་སུ་གྱུར་རྗེས་ཕོལ་ལོལ་གྱིས་རྗེས་འབྲང་པ་རྣམས་བོས་ཏེ་སྐུལ་མ་གནང༌རྗེས། དེ་རྣམས་དང་ཁ་གྱེས་ནས་མ་ཀེ་དོན་ཡཱ་ཡུལ་དུ་ལམ་ལ་ཆས་སོ།།
ACT 20:2 ཁོང་ཉིད་ཡུལ་དེ་དག་བརྒྱུད་ནས་མི་དེ་རྣམས་ལ་བཀའ་མང་པོས་སྐུལ་མ་གནང་རྗེས་གྷི་རི་སི་ཡུལ་དུ་ཕེབས༌པ་རེད།
ACT 20:3 གནས་དེར་ཟླ་བ་གསུམ་རིང་བཞུགས་རྗེས། གྲུ་གཟིངས་ལ་བརྟེན་ནས་སིར་ཡཱ་ཡུལ་དུ་བཞུད་པར་རྩོམ་པ༌ལ། ཡ་ཧུ་དཱ་པ་རྣམས་ཀྱིས་ཁོང་ལ་གནོད་འཚེ་བྱེད་པའི་ཇུས་ངན་བཀོད༌པས། ཁོང་ཉིད་མ་ཀེ་དོན་ཡཱ་ཡུལ་བརྒྱུད་ནས་ཕྱིར་ཕེབས་པར་ཐག་གིས་བཅད་དོ།།
ACT 20:4 ཁོང་དང་ལྷན་དུ་འགྲོ་མཁན་རྣམས་ནི་པུ་རེ་ཡཱ་པ་ཕོར་རོའི་བུ་སའོ་པ་ཏེར༌དང༌། ཐེ་སཱ་ལོ་ནེ་ཀེ་པ་ཨ་རི་སྟར་ཀུ་དང་སེ་ཀིན་ཏི༌དང༌། གཞན༌ཡང༌། དིར་སྦེ་ཡུལ་གྱི་ཀེ་ཡུ་དང་། ཐི་མོ༌ཐེ། ཨེ་ཞི་ཡཱ་པ་ཐི་ཀེ་ཀུ་དང་ཏྲོ་ཕེ་མུ་བཅས་ཡོད༌ལ།
ACT 20:5 མི་དེ་རྣམས་སྔོན་དུ་སོང་སྟེ་ཏྲོ་ཡཱ་ནས་ངེད་རྣམས་ལ་བསྒུགས་སོ། །
ACT 20:6 དེ་ནས་སྐྱུར་མེད་བག་ལེབ་ཀྱི་དུས་ཆེན་མཇུག་རྫོགས༌རྗེས། ངེད་རྣམས་ཕི་ལིབ་པི་ནས་གྲུ་གཟིངས་ལ་བསྡད་དེ་ཉིན་ལྔ་ལ་སོང་བ་དང་ཏྲོ་ཡཱ་རུ་སླེབས་ཤིང༌། ཁོ་རྣམས་ལ་ཕྲད་པ་དང་དེ་རུ་ཉིན་བདུན་ལ་བསྡད༌དོ།།
ACT 20:7 གཟའ་འཁོར་གཅིག་གི་ཉིན་དང་པོར་བག་ལེབ་ལོངས་སུ་སྤྱོད་པའི༌ཕྱིར། ངེད་རྣམས་ལྷན་དུ་འཛོམས་པའི་དུས༌སུ། ཕོལ་ལོལ་གྱིས་ཕྱི་ཉིན་ཡུལ་གཞན་དུ་འགྲོ་དགོས་པས༌དེ་རྣམས་ལ་ནམ་ཕྱེད་ཀྱི་བར་དུ་ཆོས་གསུངས་སོ།།
ACT 20:8 ངེད་ཅག་ལྷན་དུ་འཛོམས་སའི་ཐོག་ཁང་དེའི་ནང་དུ་སྒྲོན་མེ་མང་པོ་བསྒྲོན་ཡོད༌ཅིང༌།
ACT 20:9 སྐབས༌དེར། མིང་ལ་ཨིའུ་ཏི་ཀུ་ཟེར་བའི་གཞོན་ནུ་ཞིག་ཡོད་པ་དེ་སྒེའུ་ཁུང་གི་སྟེགས་བུའི་སྟེང་དུ་བསྡད་ཡོད་ཅིང་གཉིད་དུ་ཡུར་བ༌དང༌། ཕོལ་ལོལ་གྱིས་ཆོས་གསུངས་ཏེ་ཡུན་རིང་འགོར་བ༌ན། གཞོན་ནུ་དེར་གཉིད་སྟུག་པོ་ཁུག་པ་དང་སུམ་ཐོག་ནས་སར་ལྷུང༌ངོ་༎ དེ་ནས་ཡར་བསྐྱོར་བ་ན་ཁོ་རང་ཤི་ཟིན༌པ་རེད།
ACT 20:10 ཕོལ་ལོལ་ཡང་མར་སོང་སྟེ་རང་ལུས་ཀྱིས་བེམ་པོ་བཀབ་ཅིང་དེ་ལ་འཐམས་ནས་འདི་སྐད༌དུ། ཁྱོད་རྣམས་དངངས་སྐྲག་མ༌སྐྱེས། གཞོན་ནུ་འདིར་ད་དུང་སྲོག་ཡོད་ཅེས་གསུངས༌ཤིང༌།
ACT 20:11 སླར་ཡང་ཐོག་ཁང་དུ་ཕེབས་ཏེ་མི་གཞན་དང་ལྷན་དུ་བག་ལེབ་ལོངས་སུ་སྤྱད་པ༌དང༌། ནམ་ལངས་པའི་བར་དུ་གསུང་གླེང་མང་པོ་མཛད་རྗེས་ད་གཟོད་ཡུལ་གཞན་དུ་ཕེབས་སོ།།
ACT 20:12 དེ་ནས་མི་དེ་རྣམས་ཀྱིས་གཞོན་ནུ་དེ་གསོན་པོར་ཁྲིད་སོང་བས་སེམས་གསོ་ཆེན་པོ་ཐོབ༌བོ།།
ACT 20:13 དེ་ནས་ངེད་རྣམས་ཐོག་མར་གྲུ་གཟིངས་ལ་བསྡད་དེ་ཨ་ཟི་རུ་སོང༌ཞིང༌། ཡུལ་དེ་ནས་ཕོལ་ལོལ་གྲུ་ལ་བཞུགས་པར་བསུ་བ་བྱེད་པར་བརྩམས་སོ།། རྒྱུ་མཚན་ནི་ཁོང་གིས་སྔར་ནས་དེ་ལྟར་བཀོད་སྒྲིག་བྱས་ཤིང་ཁོང་རང་ཉིད་རྐང་ཐང་ལ་འགྲོ་རྩིས་ཡོད་པ་རེད།
ACT 20:14 དེ་ནས་ཨ་ཟི་རུ་ཁོང་ཉིད་ངེད་ཅག་དང་ཕྲད༌ནས། གྲུ་གཟིངས་ནང་དུ་གདན་དྲངས་ཏེ་མུ་ཏི་ལེ་ནེ་རུ་སོང༌།
ACT 20:15 ཡང་དེར་སླེབས་པའི་ཕྱི༌ཉིན། ངེད་རྣམས་གྲུར་བསྡད་ནས་ཀེའུ་ཡོ་ཡི་ཕར་ཕྱོགས་སུ་སླེབས་པ༌དང༌། ཡང་དེའི་ཕྱི་ཉིན་སཱ་མོ་རུ་སླེབས་ཤིང༌། དེའི་ཕྱི་ཉིན་མུ་ལེ་ཐུ་རུ་སླེབས་སོ།།
ACT 20:16 རྒྱུ་མཚན་ནི་ཕོལ་ལོལ་གྱིས་ཨེ་ཞི་ཡཱ་ཡུལ་དུ་དུས་འགྱངས་པར་བསམས་ནས་ཨེ་ཕེ་སི་རུ་མི་འགྲོ་བར་ཐག་གིས་བཅད༌དེ། མྱུར་བ་མྱུར་དུ་ལྔ་བཅུའི་དུས་ཆེན་གྱི་སྐབས་སུ་ཡེ་རུ་སཱ་ལེམ་དུ་སླེབ་ཐུབ་ན་ཅི་མ་རུང་དགོངས་སོ།།
ACT 20:17 དེ་ནས་ཕོལ་ལོལ་གྱིས་མུ་ལེ་ཐུ་ནས་ཨེ་ཕེ་སི་རུ་མི་མངགས་ཏེ་ཆོས་ཚོགས་ཀྱི་རྒན་པོ་རྣམས་བོས༌ཤིང༌།
ACT 20:18 མི་དེ་རྣམས་སླེབས་རྗེས་ཁོང་གིས་འདི་སྐད༌དུ། ང་རང་ཨེ་ཞི་ཡཱ་ཡུལ་དུ་སླེབས་པའི་ཉིན་ནས༌བཟུང༌། ཁྱོད་རྣམས་ཀྱི་ཁྲོད་དུ་བདག་གི་སྤྱོད་ལམ་ནམ་རྒྱུན་ཅི་འདྲ་ཡིན་པ་ཁྱོད་ཅག་གིས་ཤེས༌ཏེ།
ACT 20:19 ངས་ཕྱོགས་ཀུན་ནས་ཁེངས་སྐྱུང་གིས་གཙོ་བོ་ལ་ཞབས་ཕྱི་བསྒྲུབས་པ་དང་མིག་ལས་མཆི་མ་བཞུར་ཞིང༌། ཡ་ཧུ་དཱ་པའི་ཇུས་ངན་དེ་དག་བདག་ལ་ཕོག་ནས་ཚོད་བགམ་ཡང་མྱངས༌པ་ཡིན་ནོ།།
ACT 20:20 ངས་ཁྱོད་རྣམས་ལ་ཕན་ཐོགས་པའི་དོན་གང་ཞིག་འཛེམ་བག་མེད་པར་སྨྲས༌ཤིང༌། མི་ཚོགས་ཀྱི་མདུན་དང་ཡང་ན་མི་རེ་རེའི་ཁྱིམ་ཚང་དུའང་ཆོས་གསུངས་མྱོང༌བ་ཁྱོད་རྣམས་ཀྱིས་ཀྱང་ཤེས་སོ།།
ACT 20:21 ཡང་དཀོན་མཆོག་གི་ཕྱོགས་སུ་འགྱོད་བཤགས་བྱེད་པ༌དང༌། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ལ་དད་པ་བྱེད་དགོས་པ་དེ་ཡ་ཧུ་དཱ་པ་དང་གྷི་རིག་པ་རྣམས་ལ་བདེན་དཔང་བྱས་མྱོང༌།
ACT 20:22 ད་ལྟ་ལྟོས༌དང༌། དམ་པའི་ཐུགས་ཉིད་ཀྱིས་བསྐུལ་བ་བཞིན་ང་རང་ཡེ་རུ་སཱ་ལེམ་དུ་འགྲོ་བཞིན་ཡོད༌ཅིང༌། གནས་དེར་དོན་ཅི་ཞིག་དང་འཕྲད་ངེས་པ་མི་ཤེས༌ཀྱང༌།
ACT 20:23 དམ་པའི་ཐུགས་ཉིད་ཀྱིས་དེ་སྔར་གྲོང་ཁྱེར་སོ་སོ་ནས་བདག་ལ་བདེན་དཔང་མཛད་པ་ལྟར། ང་རང་བཙོན་དུ་འཇུག་པ་དང་དཀའ་སྡུག་སྣ་ཚོགས་དང་འཕྲད་ངེས་པའང་བདག་གིས་ཤེས་སོ།།
ACT 20:24 འོན༌ཀྱང༌། ང་རང་སྲོག་ལ་ཞེན་མི་ཆགས་ཞིང་དེ་རིན་ཐང་དང་ལྡན་པ་ཞིག་ཏུའང་མི་བརྩི༌བར། རང་གི་ལམ་ཐག་མཇུག་རྫོགས་དགོས༌ཏེ། དེ་ནི་གཙོ་བོ་ཡེ་ཤུས་བདག་ལ་གནང་བའི་དཀོན་མཆོག་གི་ཐུགས་རྗེའི་འཕྲིན་བཟང་ལ་བདེན་དཔང་བྱེད་པའི་ཆོས་ཀྱི་ལས་འགན་ཡིན༌ནོ།།
ACT 20:25 ཡང་ལྟོས༌དང༌། ང་རང་རྒྱུན་དུ་ཁྱོད་ཅག་གི་ཁྲོད་ནས་འགྲོ་འོང་བྱས་ཏེ་དཀོན་མཆོག་གི་རྒྱལ་སྲིད་སྐོར་བསྒྲགས་མྱོང་ལ། ད་ལྟ་ངས་ཤེས་པ་ནི་ཕྱིས་སུ་ཁྱོད་ཅག་ཐམས་ཅད་ཀྱིས་ང་རང་མཐོང་བར་མི་འགྱུར༌བས།
ACT 20:26 ངས་དེ་རིང་ཁྱོད་ཅག་ལ་བདེན་དཔང་བྱེད༌དེ། བདག་ལ་མི་ཐམས་ཅད་ཀྱི་ཁྲག་བཞུར་བའི་ཐད་ཉེས་པ་ཅི་ཡང་མེད་དོ།།
ACT 20:27 རྒྱུ་མཚན་ནི་ངས་དཀོན་མཆོག་གི་དགོངས་པ་ཐམས་ཅད་འཛེམ་བག་མེད་པར་ཁྱོད་རྣམས་ལ་སྨྲས༌པ་ཡིན།
ACT 20:28 དམ་པའི་ཐུགས་ཉིད་ཀྱིས་ཁྱོད་རྣམས་ནི་དད་ལྡན་ཀུན་ལ་དོ་དམ་བྱེད་པར་བསྐོས༌པས། ཁྱོད་ཅག་གིས་རང་ཉིད་དང་དད་ལྡན་རྣམས་ཀྱི་ཕྱིར་གཟབ་གཟབ་གྱིས། དཀོན་མཆོག་གིས་རང་ཉིད་ཀྱི་སྐུ་ཁྲག་གིས་བླུས་པའི་ཆོས་ཚོགས་དེ་ཁྱོད་ཅག་གིས་བདག་སྐྱོང་བྱེད་དགོས་སོ།།
ACT 20:29 ཡང་ང་རང་སོང་བའི་རྗེས༌སུ། གདུག་རྩུབ་ཆེ་བའི་སྤྱང་ཀི་ལྟ་བུ་རྣམས་ཁྱོད་ཅག་གི་ཁྲོད་དུ་འཛུལ་ཏེ་ཆོས་ཚོགས་ལ་མི་ཕངས་པའང་བདག་གིས་ཤེས་པ༌དང༌།
ACT 20:30 ཐ་ན་ཁྱོད་ཅག་གི་ཁྲོད་དུའང་མི་འགའ་ཞིག་འབྱུང་ངེས༌ཤིང༌། རྗེས་འབྲང་པ་རྣམས་ཀྱང་དེ་དག་གི་རྗེས་སུ་འབྲང་དུ་འཇུག་པའི༌ཕྱིར། ཁུངས་ལུང་མེད་པའི་གཏམ་སྨྲ་བར་འགྱུར་རོ།།
ACT 20:31 དེ་བས་ཁྱོད་ཅག་གིས་གཟབ་པར༌གྱིས། ངས་ལོ་གསུམ་གྱི་རིང་ལ་ཉིན་མཚན་ཀུན་ཏུ་མཆི་མ་དང་བཅས་ཁྱོད་ཅག་མི་རེ་རེར་བསླབ་བྱ་གནང་བ་དེ་དག་མི་བརྗེད་པར་ཡིད་ལ༌ཟུངས།
ACT 20:32 ད་ལྟ་ངས་ཁྱོད་རྣམས་དཀོན་མཆོག་དང་ཁོང་གི་ཐུགས་རྗེའི་བཀའ་ལ་བཅོལ་བར༌བྱའོ།། བཀའ་འདིས་ཁྱོད་རྣམས་ཀྱི་དད་པ་བརྟན་པོར་བྱེད་ནུས་པ༌དང༌། དམ་པར་གྱུར་པའི་མི་ རྣམས་དང་མཉམ་དུ་ཁྱོད་རྣམས་ལའང་བགོ་སྐལ་འཐོབ་པར་མཛད་ནུས༌པ་ཡིན་ནོ།།
ACT 20:33 ངས་མི་སུ་ཞིག་གི་གསེར་རམ༌དངུལ། ཡང་ན་གྱོན་གོས་བཅས་ལ་ཧམ་སེམས་བཅངས་མ་མྱོང༌ལ།
ACT 20:34 རང་གི་ལག་པ་འདི་གཉིས་ལ་བརྟེན་ནས་ང་རང་དང་མཉམ་དུ་ཡོད་པའི་མི་གཞན་རྣམས་ཀྱི་དགོས་མཁོ་བསྐངས་པ་ནི་ཁྱོད་རྣམས་ཀྱིས་ཀྱང་ཤེས༌པ་ཡིན།
ACT 20:35 ངས་ཕྱོགས་ཀུན་ནས་འདི་ལྟར་ལས་ལ་བརྩོན་ནས་མི་གཉོམ་ཆུང་ཀུན་ལ་རོགས་རམ་བྱེད་དགོས་ཚུལ་ཁྱོད་རྣམས་ལ་མིག་དཔེ་བསྟན༌ཅིང༌། གཞན་ཡང་གཙོ་བོ་ཡེ་ཤུའི་གསུང༌སྟེ། ཚུར་ལེན་པ་ལས་ཕར་སྦྱིན་པ་བྱིན་རླབས་ཆེ་ཞེས་གསུངས་པ་དེ་ཉིད་ཡིད་ལ་འཛིན་པར་འོས་ཞེས་གསུངས༌སོ།།
ACT 20:36 ཕོལ་ལོལ་གྱིས་དེ་སྐད་གསུངས༌རྗེས། པུས་མོ་ས་ལ་བཙུགས་ནས་མི་ཐམས་ཅད་དང་མཉམ་དུ་གསོལ་བ་བཏབ་བོ།།
ACT 20:37 དེ་ནས་མི་ཀུན་ངུ་ཞིང་ཕོལ་ལོལ་ལ་འཐམས་ནས་འགྲམ་པར་འོ་བྱས་སོ།།
ACT 20:38 མི་དེ་རྣམས་ཆེས་ཡིད་སྐྱོ་བ་ནི་ཁོང་གིས་འདི་སྐད༌དུ། ཕྱིས་སུ་ཁྱོད་ཅག་ཐམས་ཅད་ཀྱིས་ང་རང་མཐོང་བར་མི་འགྱུར་ཞེས་གསུངས་པ་དེ་ཡིན་ནོ།། དེ་ནས་མི་དེ་རྣམས་ཀྱིས་ཁོང་ཉིད་གྲུ་གཟིངས་ནང་དུ་བསྐྱལ༌ཏོ།།
ACT 21:1 དེ་ནས་ངེད་ཅག་མི་རྣམས་དང་ཁ་བྲལ༌ཏེ། གྲུ་གཟིངས་ལ་བསྡད་ནས་ཐད་ཀར་ཀོ་ཟི་རུ་ཕྱིན་པ་ཡིན། དེའི་ཕྱི༌ཉིན་རའོ་ཏི་རུ་སླེབས་ཤིང་དེ་ནས་ཕཱ་ཏ་ར་རུ་སླེབས་པ༌དང༌།
ACT 21:2 དེར་ཕོའོ་ནེ་ཀེ་ཡུལ་དུ་འགྲོ་བའི་གྲུ་གཟིངས་ཤིག་དང་ཕྲད་ནས་དེ་ལ་བསྡད་དེ་སོང་ངོ༌།།
ACT 21:3 ཀིབ་རིས་ཀྱི་མཐོང་སར་ཕྱིན༌ཅིང༌། དེའི་ལྷོ་ཕྱོགས་བརྒྱུད་ནས་སིར་ཡཱ་ཡུལ་དུ་སོང་སྟེ་ཐཱར་ཞེས་པར་སླེབས་པ༌དང༌། གྲུ་གཟིངས་ནང་གི་ཚོང་རྫས་རྣམས་དེ་རུ་མར་དབོག་དགོས་པས་ངེད་རྣམས་ཀྱང་གྲུ་ལས་བབས་སོ།།
ACT 21:4 དེ་ནས་ངེད་ཅག་གིས་རྗེས་འབྲང་པ་རྣམས་བཙལ་ནས་རྙེད་ཅིང་གནས་དེར་ཉིན་བདུན་ལ་བསྡད་པ༌དང༌། རྗེས་འབྲང་པ་རྣམས་ཀྱིས་དམ་པའི་ཐུགས་ཉིད་ཀྱི་སྒོ་ནས་ཕོལ་ལོལ་ལ་ཡེ་རུ་སཱ་ལེམ་དུ་མི་ཕེབས་པར་ཞུ་བ་ནན་གྱིས་ཞུས་སོ།།
ACT 21:5 ཉིན་དེ་དག་གི་རྗེས་སུ་ངེད་ཅག་ལམ་དུ་ཆས་པ༌ལ། རྗེས་འབྲང་པ་ཐམས་ཅད་དང་ཁོ་རྣམས་ཀྱི་ཆུང་མ་བུ་ཕྲུག་བཅས་ཀྱིས་ངེད་རྣམས་གྲོང་ཁྱེར་ཕྱི་རོལ་བར་སྐྱེལ་མ་བྱས༌ཤིང༌། ངེད་ཅག་གིས་རྒྱ་མཚོའི་འགྲམ་ནས་པུས་མོ་སར་བཙུགས༌ཏེ་གསོལ་བ་བཏབ་པ་དང་ཕན་ཚུན་ལ་གྱེས་ཕྱག་ཕུལ་བ་ཡིན།
ACT 21:6 དེ་ནས་ངེད་རྣམས་སླར་ཡང་གྲུ་གཟིངས་དེར་བསྡད་ནས་སོང་བ་དང་ཁོ་རྣམས་ཕྱིར་རང་ཁྱིམ་དུ་ལོག༌གོ།
ACT 21:7 ངེད་རྣམས་ཐཱར་ཞེས་པ་ནས་མཚོ་ལམ་བརྒྱུད༌དེ། ཕེ་ཏོ་ལེ་མཱ་རུ་སླེབས་པ་དང་མཚོ་ཐོག་གི་འགྲོ་ལམ་མཇུག་རྫོགས་པ་རེད། དེ་ནས་གནས་དེའི་སྤུན་ཟླ་རྣམས་ལ་འཚམས་འདྲི་བྱས༌ཤིང༌། ཁོ་རྣམས་དང་མཉམ་དུ་ཉིན་གཅིག་ལ་བསྡད།
ACT 21:8 དེའི་ཕྱི༌ཉིན། ངེད་ཅག་གནས་དེ་དང་ཁ་བྲལ་ནས་ཀེ་སར་ཡཱ་རུ་སླེབས་ཤིང༌། འཕྲིན་བཟང་སྒྲོག་མཁན་ཕི་ལིབ་ཀྱི་ཁྱིམ་དུ་སོང་ནས་ཁོ་དང་མཉམ་དུ་བསྡད། ཕི་ལིབ་ཅེས་བྱ་བ་ནི་ལས་འཛིན་པ་བདུན་ཡོད་པ་ལས་གཅིག་ཡིན།
ACT 21:9 ཁོ་ལ་ན་ཆུང་བུ་མོ་བཞི་ཡོད་པ་རེ་རེ་བཞིན་ལུང་སྟོན་མཁན་ཡིན༌པ་རེད།
ACT 21:10 ངེད་རྣམས་དེ་ནས་ཉིན་འགར་བསྡད་པ་ལ་ཨ་གཱ་པུ་ཞེས་པའི་ལུང་སྟོན་པ་ཞིག་ཡ་ཧུ་དཱའི་ཡུལ་ནས་ཡོང་བ༌དང༌།
ACT 21:11 ཁོ་རང་ངེད་ཅག་གི་གནས་འདིར་སླེབས་རྗེས། ཕོལ་ལོལ་གྱི་སྐེ་རགས་བླངས་ནས་རང་གི་རྐང་ལག་བསྡམས་ཏེ་ན༌རེ། དམ་པའི་ཐུགས་ཉིད་ཀྱིས་འདི་སྐད་དུ་གསུངས་པ་སྟེ། ཡ་ཧུ་དཱ་པ་རྣམས་ཀྱིས་ཡེ་རུ་སཱ་ལེམ་དུ་སྐེ་རགས་འདིའི་བདག་པོའང་འདི་ལྟར་བསྡམས༌ཏེ་ཕྱི་ཕྱོགས་པ་རྣམས་ཀྱི་ལག་ཏུ་སྤྲོད་པར་འགྱུར་ཞེས་པའོ་ཞེས་སྨྲས་སོ།།
ACT 21:12 ངེད་ཅག་དང་གནས་དེའི་མི་རྣམས་ཀྱིས་ལུང་བསྟན་འདི་ཐོས༌རྗེས། ཕོལ་ལོལ་ཁོང་ཉིད་ཡེ་རུ་སཱ་ལེམ་དུ་མི་འགྲོ་བར་ཞུ་བ་ནན་གྱིས་ཞུས༌ནའང༌།
ACT 21:13 ཕོལ་ལོལ་གྱིས་འདི་སྐད༌དུ། ཁྱོད་རྣམས་འདི་ལྟར་ངུས་ཏེ་ངའི་སེམས་སྐྱོ་རུ་འཇུག༌པ་ཅི་ཡིན་ནམ། ང་རང་ནི་གཙོ་བོ་ཡེ་ཤུའི་མཚན་གྱི་དོན་དུ་མི་གཞན་གྱིས་བཙན་བཟུང་བྱེད་པ༌དང༌། ཐ་ན་ཡེ་རུ་སཱ་ལེམ་ནས་རང་སྲོག་འཆོར་དགོས་ཀྱང་འགྱོད་པ་སྤུ་ཙམ་ཡང་མེད་ཅེས་གསུངས་སོ།།
ACT 21:14 ཁོང་གིས་མི་གཞན་གྱི་ངག་ལ་མི་ཉན་པས་ངེད་རྣམས་ཀྱང་འུ་ཐུག༌ནས། གཙོ་བོའི་དགོངས་པ་བཞིན་དུ་འགྲུབ་པར་སྨོན་ཞེས་སྨྲས་པ་དང་ཞུ་བ་བྱེད་མཚམས་བཞག༌གོ།
ACT 21:15 ཡང་ཉིན་དེ་དག་གི་རྗེས༌སུ། ངེད་རྣམས་ཀྱིས་གྲ་སྒྲིག་བྱས་ཏེ་ཡེ་རུ་སཱ་ལེམ་དུ་ཆས་པའི་ཚེ།
ACT 21:16 ཀེ་སར་ཡཱ་ཡི་རྗེས་འབྲང་པ་འགའ་ཡང་ངེད་ཅག་དང་མཉམ་དུ་སོང༌ཞིང༌། ངེད་ཅག་ཀིབ་རིས་གླིང་ཕྲན་གྱི་མཱ་སིན་ཞེས་པའི་ཁྱིམ་དུ་སྡོད་པའི་ཕྱིར་ཁྲིད་པ་ཡིན། མཱ་སིན་ནི་སྔ་རོལ་ནས་རྗེས་འབྲང་པ་ཞིག་ཡིན༌ནོ།།
ACT 21:17 དེ་ནས་ངེད་རྣམས་ཡེ་རུ་སཱ་ལེམ་དུ་སླེབས་པ་དང་སྤུན་ཟླ་རྣམས་ཀྱིས་དགའ་སྤྲོའི་ངང་ནས་བསུ་བ་བྱས་སོ།།
ACT 21:18 དེའི་ཕྱི༌ཉིན། ཕོལ་ལོལ་དང་ངེད་རྣམས་ལྷན་དུ་ཡ་ཀོབ་ཀྱི་དྲུང་དུ་ཕྱིན་པ་དང་ཆོས་ཚོགས་ཀྱི་རྒན་པོ་ཐམས་ཅད་ཀྱང་དེར་བཞུགས༌པ་རེད།
ACT 21:19 ཕོལ་ལོལ་གྱིས་དེ་རྣམས་ལ་འཚམས་འདྲི་བྱས་ཤིང་དཀོན་མཆོག་གིས་ཕོལ་ལོལ་གྱི་ལས་འགན་བརྒྱུད་ནས་ཕྱི་ཕྱོགས་པའི་ཁྲོད་དུ་དོན་ཇི་ལྟར་མཛད་པ་རྣམས་རེ་རེ་བཞིན་སྨྲས་སོ།།
ACT 21:20 རྒན་པོ་རྣམས་ཀྱིས་གཏམ་དེ་ཐོས་ནས་དཀོན་མཆོག་ལ་བསྟོད་བསྔགས་བརྗོད་ཅིང་ཕོལ་ལོལ་ལ་འདི་སྐད༌དུ། སྤུན་ཟླ༌ལགས། ཁྱེད་ཀྱིས་གཟིགས༌དང༌། ཡ་ཧུ་དཱ་པའི་ཁྲོད་དུ་གཙོ་བོ་ཡེ་ཤུ་ལ་དད་པ་བྱེད་མཁན་ཁྲི་ཕྲག་མང་ཙམ་ཡོད་པ༌དང༌། དེ་ཐམས་ཅད་ཀྱིས་བརྩོན་སེམས་སྒོས་བཀའ་ཁྲིམས་སྲུང་བཞིན་ཡོད།
ACT 21:21 ཡ་ཧུ་དཱ་པའི་དད་ལྡན་དེ་རྣམས་ཀྱིས་ཁྱེད་ཀྱི་སྐོར་ཐོས༌འདུག་སྟེ། ཁྱེད་ཀྱིས་ཕྱི་ཕྱོགས་སུ་ཡོད་པའི་ཡ་ཧུ་དཱ་པ་ཐམས་ཅད་ལ་མོ་ཤེ་འདོར་རུང༌ཞིང་། བྱིས་པ་རྣམས་ཀྱི་མཚན་སྐྱི་མ་གཅོད་ཅེས་པ་དང༌། གོམས་སྲོལ་ཡང་བསྲུང་མི་དགོས་ཞེས་སྨྲས་པ་དེ་ཡིན།
ACT 21:22 ཡ་ཧུ་དཱ་པ་དེ་དག་གིས་ད་ལྟ་ཁྱེད་རང་འདིར་ཕེབས་པའང་ཤེས་ངེས་པས་ཅི༌བྱའམ།
ACT 21:23 དེ་བས་ཁྱེད་ཀྱིས་ངེད་ཅག་གིས་སྨྲས་པ་བཞིན་དུ་བསྒྲུབ་པར༌མཛོད། འདིར་དམ་བཅའ་པ་བཞི་ཡོད༌དེ།
ACT 21:24 ཁྱེད་ཀྱིས་དམ་བཅའ་པ་དེ་རྣམས་ཁྲིད་ནས་མཉམ་དུ་ཆོས་ཀྱི་གཙང་སྦྲ་བྱོས༌དང༌། ཁོ་རྣམས་ཀྱི་སྐྲ་གཞར་བའི༌ཕྱིར། ཁོ་རྣམས་ཀྱི་ཚབ་ཏུ་འགྲོ་སོང་ཐམས་ཅད་ཕུལ༌ཅིག དེ་ལྟར་བྱས་ན་མི་ཐམས་ཅད་ཀྱིས་དེ་སྔར་ཁྱེད་ཀྱི་སྐོར་ཐོས་པའི་གཏམ་དེ་མི་བདེན་པ༌དང༌། ཁྱེད་རང་བག་ཡོད་ཚུལ་ལྡན་ཡིན་པ་དང་ཁྱེད་ཀྱིས་ཀྱང་མོ་ཤེའི་བཀའ་ཁྲིམས་བཞིན་སྒྲུབ་པ་ཤེས་ཐུབ་བོ།།
ACT 21:25 ཡང་ངེད་ཅག་གིས་གཙོ་བོ་ཡེ་ཤུར་དད་པ་ཡོད་པའི་ཕྱི་ཕྱོགས་པ་རྣམས་ཀྱི་སྐོར་སྨྲ་བར༌བྱ་སྟེ། ལྷ་སྐུའི་མདུན་དུ་ཕུལ་བའི་མཆོད་རྫས་དང༌ཁྲག མིད་པ་བསྒགས་ནས་བསད་པའི་ཕྱུགས་ཟོག་གི་ཤ༌དང༌མི་ཚངས་སྤྱོད་པ་བཅས་སྤང་དགོས་པར་ཐག་གིས་བཅད་པ་ལྟར་འཕྲིན་ཡིག་བྲིས་ཟིན་ཞེས་སྨྲས།
ACT 21:26 དེ་ནས་ཕོལ་ལོལ་གྱིས་མི་དེ་བཞི་པོ་ཁྲིད་ཅིང་དེའི་ཕྱི་ཉིན་ཁོ་རྣམས་དང་མཉམ་དུ་ཆོས་ཀྱི་གཙང་སྦྲའི་ལས་བསྒྲུབས༌རྗེས། མཆོད་ཁང་དུ་སོང༌སྟེ་ཁོ་རྣམས་རེ་རེའི་ཆེད་དུ་མཆོད་པ་འབུལ་བ་དང་གཙང་སྦྲ་འགྲུབ་པའི་དུས་སླེབས་ལ་ཉེ་བའི་དོན་དེ་མཆོད་དཔོན་ལ་སྨྲས༌སོ།།
ACT 21:27 དེ་ཡང་ཉིན་བདུན་པོ་མཇུག་རྫོགས་ལ་ཉེ་བའི་དུས༌སུ། ཨེ་ཞི་ཡཱ་ཡུལ་ནས་ཡོང་བའི་ཡ་ཧུ་དཱ་པ་རྣམས་ཀྱིས་ཕོལ་ལོལ་མཆོད་ཁང་དུ་ཡོད་པ་མཐོང༌སྟེ། མི་ཚོགས་ཐམས་ཅད་ལ་ངན་སྐུལ་བྱས་ཤིང་ཁོང་ཉིད་འཛིན༌པའི་ཚེ།
ACT 21:28 སྐད་ཆེན་པོ་བརྒྱབ་སྟེ་ན༌རེ། ཡེས་ར་ཨེལ་པ་རྣམས་ཀྱིས་ངེད་ཅག་ལ་རོགས་རམ་བྱོས༌ཤིག མི་འདི་ནི་ཡུལ་ཕྱོགས་ཀུན་གྱི་མི་ཐམས་ཅད་ལ་ཆོས་བསྒྲགས་ནས་བདག་ཅག་གི་མི་སེར་དང་བཀའ༌ཁྲིམས། གནས་འདི་བཅས་ལ་དམའ་འབེབས་བྱེད་མཁན་ཞིག་གོ། ཡང་ཁོས་གྷི་རིག་པ་རྣམས་མཆོད་ཁང་ནང་དུ་ཁྲིད་ནས་གནས་མཆོག་འདི་མི་གཙང་བར་བྱས་ཞེས་སྨྲས་སོ།།
ACT 21:29 ཡ་ཧུ་དཱ་པ་རྣམས་ཀྱིས་དེ་སྔར་ཨེ་ཕེ་སི་པ་ཏྲོ་ཕེ་མུ་ཞེས་པ༌དང༌ཕོལ་ལོལ་གཉིས་མཉམ་དུ་གྲོང་ཁྱེར་འདིར་ཡོད་པ་མཐོང༌བས། ཕོལ་ལོལ་གྱིས་ཁོ་རང་མཆོད་ཁང་དུ་ཁྲིད་པ་ཡིན་པར་བསམས་ཏེ་འདི་ལྟར་སྨྲས༌པ་རེད།
ACT 21:30 དེ་ནས་གྲོང་ཁྱེར་ཡོངས་ལ་ཟིང་ཆ་བྱུང་ཞིང་མི་རྣམས་བརྒྱུགས་ནས་ཕོལ་ལོལ་བཟུང་སྟེ། མཆོད་ཁང་ལས་ཕྱིར་དྲུད་མ་ཐག་ཏུ་མཆོད་ཁང་གི་སྒོ་ཐམས་ཅད་བརྒྱབ།
ACT 21:31 མི་ཚོགས་དེས་ཕོལ་ལོལ་གསོད་རྩིས་བྱས་པ༌ལ། མི་གཞན་གྱིས་སྟོང་དཔོན་ལ་ཡེ་རུ་སཱ་ལེམ་ཡོངས་སུ་ཟིང་ཆ་བྱུང་བའི་གཏམ་ཞུས་པ༌དང༌།
ACT 21:32 སྟོང་དཔོན་གྱིས་མྱུར་དུ་བརྒྱ་དཔོན་འགའ་དང་དམག་མི་ཁྲིད་ནས་བརྒྱུགས་ཏེ་མི་ཚོགས་ཀྱི་གམ་དུ་སླེབས། དེ་རྣམས་ཀྱིས་སྟོང་དཔོན་དང་དམག་མི་མཐོང་བ་དང་ཕོལ་ལོལ་ལ་གཅར་རྡུང་བྱེད་མཚམས་བཞག་གོ།
ACT 21:33 དེ་ནས་སྟོང་དཔོན་གྱིས་ཕོལ་ལོལ་བཟུང་བ་དང་ལྕགས་སྒྲོག་གཉིས་ཀྱིས་བསྒྲོག་པའི་བཀའ་བསྒྲགས༌ཤིང༌། ཁོང་སུ་ཡིན་པ་དང་ལས་ཅི་ཞིག་བྱས་པའི་གཏམ་དྲིས་སོ།།
ACT 21:34 མི་ཚོགས་ཀྱི་ཁྲོད་ནས་ཅི་བཤད་འདི་བཤད་མེད་པར་སྐད་ཅོར་བརྒྱབ་པ༌ལ། སྟོང་དཔོན་གྱིས་འུར་སྒྲའི་ཁྲོད་ནས་གནས་ཚུལ་དངོས་དེ་ཤེས་མ་ཐུབ༌པས། ཕོལ་ལོལ་དམག་སྒར་དུ་འཁྲིད་པའི་བཀའ་བབས་སོ།།
ACT 21:35 དེ་ནས་ཕོལ་ལོལ་ཁྲིད་དེ་རྡོ་སྐས་ཡོད་སར་སླེབས་པ༌དང༌། མི་ཚོགས་ཀྱིས་ཀྱང་རྗེས་དེད་ནས་འཚང་ཁ་ཤིག་ཤིག་བརྒྱབ་པས། དམག་མི་རྣམས་ཀྱིས་ཁོང་ཉིད་ཡར་བཏེགས་ནས་མི་འགྲོ་ཐབས་མེད་བྱུང༌།
ACT 21:36 མི་ཚོགས་རྗེས་སུ་འབྲངས་པ་དང་ཁོ་རང་སོད་ཅིག་ཅེས་འུར་བརྒྱབ་པའོ།།
ACT 21:37 ཕོལ་ལོལ་དམག་སྒར་གྱི་ནང་དུ་འཁྲིད་བཞིན་པའི་དུས༌སུ། ཁོང་གིས་སྟོང་དཔོན་ལ་འདི་སྐད༌དུ། ངས་ཁྱེད་ལ་གཏམ་ཞིག་ཞུས་ན་ཆོག་གམ་ཞེས་གསུངས་པ༌ན། དམག་དཔོན་ན༌རེ། ཁྱོད་ཀྱིས་གྷི་རིག་སྐད་སྨྲ་ཤེས༌སམ།
ACT 21:38 དེས་ན་ཁྱོད་ནི་སྔོན་ཆད་མི་རྣམས་ལ་ཟིང་ཆ་ལངས་སུ་བཅུག་པ་དང་། ལག་དམར་བཞི་སྟོང་དབེན་གནས་སུ་ཁྲིད་པའི་ཨེ་ཅིབ་པ་དེ་མ་ཡིན་ནམ་ཞེས་དྲིས༌སོ།།
ACT 21:39 ཡང་ཕོལ་ལོལ་གྱིས་འདི་སྐད༌དུ། ང་རང་ཀི་ལིག་ཡཱ་ཡུལ་གྱི་ཐཱར་ཟི་ནས་སྐྱེས་པའི་ཡ་ཧུ་དཱ་པ་ཞིག་ཡིན༌ལ། གྲོང་ཁྱེར་ཕལ་བ་ཞིག་གི་མི་མ་ཡིན༌ནོ།། ང་མི་འདི་རྣམས་ལ་གཏམ་ཞིག་བརྗོད་དུ་འཇུག་པར་མཛོད་ཅེས་ཞུས་པ༌ལ།
ACT 21:40 སྟོང་དཔོན་གྱིས་ཀྱང་ཆོག་མཆན་གནང༌བས། ཕོལ་ལོལ་རྡོ་སྐས་ཀྱི་སྟེང་དུ་ཡར་ལངས་ནས་མི་རྣམས་ལ་ཕྱག་བརྡ་བྱས་པ་དང་མི་ཐམས་ཅད་དལ་ཅག་གེར་བསྡད༌དོ།།
ACT 22:1 དེ་ནས་ཕོལ་ལོལ་གྱིས་ཨིབ་རིའི་མི་རིགས་ཀྱི་སྐད་ཀྱིས་མི་ཚོགས་ལ་འདི་ལྟར་གསུངས་པ་སྟེ། ཕ་ཁུ་སྤུན་ཟླ༌རྣམ་པ། ངས་ད་ལྟ་ཁྱོད་རྣམས་ལ་དག་འབུད་བྱེད་པར་ཉོན་ཅིག་ཅེས་གསུངས་པ༌དང༌།
ACT 22:2 མི་རྣམས་ཀྱིས་ཁོང་གིས་ཨིབ་རིའི་མི་རིགས་ཀྱི་སྐད་སྨྲས་པ་ཐོས་ནས་སྔར་ལས་ཀྱང་གྲགས་འགུལ་མེད་པར་གྱུར་ཏོ།། ཡང་ཕོལ་ལོལ་གྱིས་འདི་སྐད༌དུ།
ACT 22:3 ང་རང་ཡང་ཡ་ཧུ་དཱའི་མི་རིགས་ཡིན་ཞིང་ཀི་ལིག་ཡཱ་ཡུལ་གྱི་ཐཱར་ཟི་རུ་སྐྱེས༌ལ། གྲོང་ཁྱེར་འདི་ནས་ནར་སོན་པ༌དང༌། གཱ་མ་ཨེལ་གྱི་ཞབས་དྲུང་ནས་བདག་ཅག་གི་ཕ་མེས་ཀྱི་བཀའ་ཁྲིམས་དམ་པོ་བཞིན་སྦྱངས༌པ་བྱས་ཤིང༌། ཁྱོད་རྣམས་ཀྱིས་དེ་རིང་ཅི་ལྟར་བྱེད་པ་བཞིན་ངས་ཀྱང་དཀོན་མཆོག་ལ་བརྩོན་སེམས་ཆེན་པོ་བཅངས་མྱོང༌བ་ཡིན།
ACT 22:4 ངས་ཀྱང་མཱ་ཤི་ཀའི་ཆོས་ཀྱི་ལམ་དེ་ལ་ཞུགས་པའི་མི་རྣམས་ལ་གནོད་འཚེ་བྱས་ཤིང་འཆི་ལམ་དུ་བརྫངས་པ༌དང༌། སྐྱེས་ཕོ་མོ་སུ་ཡིན་ཡང་བཙན་བཟུང་བྱས་ནས་བཙོན་དུའང་བཅུག་མྱོང༌།
ACT 22:5 བདག་གི་དོན་འདིར་མཆོད་དཔོན་ཆེན་པོ་དང་རྒན་པོ་ཐམས་ཅད་ཀྱིས་ཀྱང་བདེན་དཔང་བྱས་ཆོག༌ལ། ངས་ཁོང་རྣམས་ཀྱིས་དཱ་མེ་སེག་གི་སྤུན་ཟླ་རྣམས་ལ་བྲིས་པའི་འཕྲིན་ཡིག་ཁྱེར༌ཏེ། དེར་ཡོད་པའི་རྗེས་འབྲང་པ་རྣམས་བཙན་བཟུང་བྱས་ནས་ཉེས་ཆད་གཅོད་པ་དང་དེ་དག་ཡེ་རུ་སཱ་ལེམ་དུ་ཚུར་འཁྲིད་པའི་ཕྱིར་དཱ་མེ་སེག་ལ་ཆས་པ་དང༌།
ACT 22:6 ང་རང་དཱ་མེ་སེག་ཏུ་སླེབས་ལ་ཉེ་བའི་ལམ་དུ་ཉིན་གུང་ཙམ་ལ། གློ་བུར་ཉིད་ལ་ནམ་མཁའི་ཞིང་ཁམས་ནས་འོད་ཆེན་པོ་ཞིག་བདག་གི་ཕྱོགས་བཞིར་འཁྱུགས་ཤིང་འཚེར་བ་དང་།
ACT 22:7 ང་རང་སར་འགྱེལ་ཞིང་སྐད་སྒྲ་ཞིག་གྲགས་པ༌སྟེ། ཀྱེ། སོ༌ལོ། སོ་ལོ། ཁྱོད་ཀྱིས་བདག་ལ་གནོད་འཚེ་བྱེད་དོན་ཅི་ཡིན་ནམ་ཞེས་གསུངས་པ་ཐོས་ཤིང༌།
ACT 22:8 ངས་གཙོ་བོ་ལགས་ཁྱེད་རང་སུ་ཡིན་ནམ་ཞེས་ཞུས་པ༌ལ། ཁོང་གིས་འདི་སྐད༌དུ། བདག་ནི་ཁྱོད་ཀྱིས་གནོད་འཚེ་བྱེད་བཞིན་པའི་ནཱ་ཙ་རེལ་པ་ཡེ་ཤུ་ཡིན་ཞེས་གསུངས་སོ།།
ACT 22:9 ངའི་ལམ་གྲོགས་རྣམས་ཀྱིས་ཀྱང་འོད་དེ་མཐོང༌ནའང༌། བདག་ལ་བཀའ་གསུང་མཁན་གྱི་སྐད་དེའི་དོན་མ་ཤེས་སོ།།
ACT 22:10 དེ་ནས་ངས་གཙོ་བོ༌ལགས། ངས་ཅི་བྱ་འོས་སམ་ཞེས་ཞུས་པ༌ལ། ཡང་ཁོང་གིས་འདི་སྐད༌དུ། ཁྱོད་ཡར་ལངས་ནས་དཱ་མེ་སེག་ལ་སོང༌དང༌། དེ་རུ་ཁྱོད་ཀྱིས་ཅི་བྱ་དགོས་པ་ཐམས་ཅད་ཁྱོད་ལ་སྟོན་ངེས་ཡིན་ཞེས་གསུངས་སོ།།
ACT 22:11 འོད་ཆེན་པོ་དེའི་གཟི་མདངས་ཀྱི་རྐྱེན་གྱིས་ངའི་མིག་གིས་ཅི་ཡང་མཐོང་མ་ཐུབ༌པས། ལམ་གྲོགས་དག་གིས་ངའི་ལག་པར་འཇུས་ཏེ་ང་རང་དཱ་མེ་སེག་ལ་ཁྲིད་དོ།།
ACT 22:12 གནས་དེར་མིང་ལ་ཨ་ནན་ཡཱ་བྱ་བ་བཀའ་ཁྲིམས་ལྟར་དཀོན་མཆོག་ལ་དད་མོས་ཡོད་པ༌དང༌། ཁོ་རང་ནི་གནས་དེའི་ཡ་ཧུ་དཱ་པ་ཐམས་ཅད་ཀྱིས་བསྟོད་བསྔགས་བྱེད་པའི་མི་ཞིག་ཀྱང༌ཡིན།
ACT 22:13 དེ་ནས་ཁོ་རང་བདག་གི་གམ་དུ་ཡོང་སྟེ་ན༌རེ། སྤུན་ཟླ་སོ་ལོ༌ལགས། ཁྱོད་ཀྱི་མིག་གིས་མཐོང་ནུས་པར་གྱུར་ཅིག་ཅེས་གསུངས་པའི་དུས་དེ་ཉིད་ལ་ངས་ཀྱང་ཁོ་རང་མཐོང་བར་གྱུར་ཏོ།།
ACT 22:14 ཡང་ཨ་ནན་ཡཱ་ན༌རེ། བདག་ཅག་གི་མེས་པོའི་དཀོན་མཆོག་གིས་རང་ཉིད་ཀྱི་དགོངས་པ་རྟོགས་པ་དང་སྐྱེས་བུ་རྣམ་དག་དེ་ཉིད་ལ་མཇལ་བ་དང་ཁོང་གི་ཞལ་ནས་གསུངས་པའི་བཀའ་ཐོས་པའི་ཕྱིར་ཁྱོད་རང་བདམས་པར་མཛད།
ACT 22:15 རྒྱུ་མཚན་ནི་ཁྱོད་ཀྱིས་གང་ཞིག་མཐོང་ཐོས་སུ་གྱུར་པ་རྣམས་མི་ཐམས་ཅད་ལ་སྨྲས་ཏེ་ཁོང་ཉིད་ལ་བདེན་དཔང་བྱེད་ངེས་པའི་ཕྱིར༌རོ།།
ACT 22:16 ད་ལྟ་ཁྱོད་ཀྱིས་དུས་འགྱངས་བྱེད་དོན༌ཅི། ཡར་ལོངས༌དང༌། ཁྲུས་གསོལ་ལ་ཞུགས༌དང༌། སྐྱབས་མགོན་ཡེ་ཤུའི་མཚན་ལ་ཞུས་ནས་རང་གི་སྡིག་པ་འདག་པར་གྱིས་ཞེས་སྨྲས༌སོ།།
ACT 22:17 དེའི་རྗེས་སུ་ང་རང་ཡེ་རུ་སཱ་ལེམ་དུ་ཕྱིར་ལོག༌སྟེ། མཆོད་ཁང་ནས་གསོལ་བ་འདེབས་པའི་ཚེ༌ན། དྲན་པ་འཆལ་བར་གྱུར་ཅིང༌།
ACT 22:18 གཙོ་བོས་བདག་ལ་འདི་སྐད༌དུ། ཁྱོད་ཀྱིས་ང་རང་ལ་བདེན་དཔང་བྱེད་པའི་དོན་འདི་མི་དེ་རྣམས་ཀྱིས་དང་དུ་མི་ལེན༌པས། ཁྱོད་རང་མྱུར་དུ་ཡེ་རུ་སཱ་ལེམ་དང་འབྲལ་བར་གྱིས་ཞེས་གསུངས་པ་མཐོང་ལམ་དུ་མངོན་ནོ།།
ACT 22:19 དེ་ནས་ངས་འདི་ལྟར་ཞུས༌པ་སྟེ། ཀྱེ་གཙོ་བོ་ལགས། ངས་དེ་སྔར་ཁྱེད་ལ་དད་པའི་མི་རྣམས་ཆོས་ཁང་རེ་རེ་ནས་བཙོན་དུ་བཅུག་ཅིང་གཅར་རྡུང་བྱས་མྱོང་བ༌དང༌།
ACT 22:20 ཁྱེད་ལ་བདེན་དཔང་བྱེད་མཁན་སི་ཏེ་ཕཱན་གྱི་ཁྲག་བཞུར་བའི་དུས༌སུ། ང་རང་ཡང་གནས་དེར་ལངས་བསྡད་ཡོད་པ་དང་དགའ་སྤྲོ་སྐྱེས། ངས་ཁོ་རང་གསོད་མཁན་དག་གི་གྱོན་གོས་བདག་གཉེར་བྱས་པའང་མི་དེ་རྣམས་ཀྱིས་ཤེས་པ་ཡིན་ཞེས་ཞུས་པ༌ན།
ACT 22:21 ཡང་ཁོང་གིས་བདག་ལ་འདི་སྐད༌དུ་གསུངས་པ་སྟེ། ཁྱོད་རང་སོང༌དང༌། ངས་ཁྱོད་རང་རྒྱང་ཐག་རིང་བའི་ཕྱི་ཕྱོགས་པ་རྣམས་ཀྱི་གམ་དུ་མངག་པར་བྱའོ་ཞེས་པའོ་ཞེས་གསུངས་སོ།།
ACT 22:22 དེ་ནས་ཕོལ་ལོལ་གྱིས་དེ་སྐད་གསུངས་ནས་མཚམས་འདིར་སླེབས་ཤིང་མི་ཚོགས་ཀྱིས་གཏམ་དེར་མཉན་པ་དང་སྐད་ཆེན་པོ་བརྒྱབ་སྟེ་ན༌རེ། མི་འདི་ལྟ་བུ་ནི་འཇིག་རྟེན་འདིར་གསོན་མི་འོས་པས་སོད་ཅིག་ཅེས་སྨྲས༌ཤིང༌།
ACT 22:23 འུར་རྒྱག་བཞིན་རང་གི་ཕྱི་གོས་གཡུགས་པ་དང་ས་རྡུལ་བར་སྣང་ལ་གཏོར་ཏོ།།
ACT 22:24 དེ་ནས་སྟོང་དཔོན་གྱིས་ཁོང་ཉིད་དམག་སྒར་གྱི་ནང་ལ་འཁྲིད་དུ་བཅུག་པ༌དང༌། མི་ཚོགས་ཀྱིས་ཁོང་ཉིད་ལ་དེ་ལྟར་འུར་རྒྱག་པའི་དོན་ཅི་ཡིན་པ་ཤེས་པའི༌ཕྱིར། རྟ་ལྕག་གིས་གཞུས་ཏེ་ནན་འདྲི་བྱེད་པའི་བཀའ་བསྒོས་སོ།།
ACT 22:25 དེ་ནས་ཕོལ་ལོལ་ཁོང་ཉིད་རྒྱུན་བུས་བཀྱིགས་མ་ཐག་རང་ཉིད་ཀྱི་གམ་དུ་ལངས་སྡོད་པའི་བརྒྱ་དཔོན་ལ་འདི་སྐད༌དུ། ཁྱོད་ཅག་གིས་བཅའ་ཁྲིམས་ལྟར་རོ་མཱ་པ་ཞིག་ལ་ཉེས་ཆད་མ་བཅད་ནའང་གཅར་རྡུང་བྱས་ཆོག་གམ་ཞེས་གསུངས་པ༌ལ།
ACT 22:26 བརྒྱ་དཔོན་གྱིས་གཏམ་དེ་ཐོས་པ་དང་སྟོང་དཔོན་གྱི་དྲུང་དུ་སོང་སྟེ་ན༌རེ། མི་འདི་ནི་རོ་མཱ་པ་ཞིག་ཡིན་པས་ཁྱེད་ཀྱིས་ཅི་བྱེད་འདོད་དམ་ཞེས་སྨྲས་སོ།།
ACT 22:27 དེ་ནས་སྟོང་དཔོན་ཕོལ་ལོལ་གྱི་དྲུང་དུ་སོང་སྟེ་ན་རེ། ཁྱོད་ནི་རོ་མཱ་པ་ཞིག་ཡིན་མིན་བདག་ལ་ཤོད་ཅིག་ཅེས་དྲིས་པ༌དང༌། ཁོང་གིས་ཡིན་ཞེས་གསུངས་སོ།།
ACT 22:28 ཡང་སྟོང་དཔོན་ན༌རེ། བདག་ནི་དངུལ་གྱི་རྫོངས་པ་མང་པོ་བཏང་ནས་རོ་མཱ་རྒྱལ་ཁབ་ཀྱི་རྒྱལ་ཁོངས་སུ་ཞུགས་པ་ཞིག་ཡིན་ཞེས་སྨྲས་པ༌ན། ཕོལ་ལོལ་གྱིས་ང་རང་ནི་སྐྱེས་དུས་ནས་རོ་མཱ་པ་ཞིག་ཡིན་ཞེས་གསུངས་སོ།།
ACT 22:29 དེ་མ་ཐག་ཕོལ་ལོལ་ལ་འདྲི་གཅོད་བྱེད་པའི་དམག་མི་རྣམས་ཁོང་དང་རྒྱང་བཀྱེད༌པ་རེད། སྟོང་དཔོན་གྱིས་ཀྱང་ཕོལ་ལོལ་ནི་རོ་མཱ་པ་ཞིག་ཡིན་པ་ཤེས་པ་དང་ཐག་པས་བཀྱིགས་པའི་རྐྱེན་གྱིས་འཇིགས་པར་གྱུར༌ཏོ།།
ACT 22:30 དེའི་ཕྱི༌ཉིན། སྟོང་དཔོན་གྱིས་ཡ་ཧུ་དཱ་པ་རྣམས་ཀྱིས་ཕོལ་ལོལ་གཏུག་བཤེར་བྱེད་པའི་རྒྱུ་རྐྱེན་གང་ཡིན་པ་ངེས་པར་ཤེས་ཕྱིར། ཁོང་ཉིད་བཙོན་ལས་ཕྱིར་ཁྲིད༌ཅིང༌། མཆོད་དཔོན་ཆེན་པོ་རྣམས་དང་དཔོན་རིགས་ཚོགས་པའི་ཚོགས་མི་ཐམས་ཅད་ལྷན་དུ་འདུ་དགོས་པའི་བཀའ་བསྒོས་པ༌དང༌། ཕོལ་ལོལ་ཡང་དེ་རྣམས་ཀྱི་མདུན་དུ་ཁྲིད་དེ་ཡར་བསླངས་པའོ།།
ACT 23:1 དེ་ནས་ཕོལ་ལོལ་གྱིས་དཔོན་རིགས་ཚོགས་པའི་ཚོགས་མི་རྣམས་ལ་མིག་གིས་ཕུར་ཚུགས་སུ་གཟིགས་ཏེ་འདི་སྐད༌དུ། སྤུན་ཟླ༌རྣམ་པ། ངས་དཀོན་མཆོག་གི་སྤྱན་སྔ་ནས་བྱ་བ་ཀུན་ལ་ད་ལྟའི་བར་དུ་བསམ་པ་རྣམ་དག་བཅངས་པ་ཡིན་ཞེས་གསུངས་པ༌ལ།
ACT 23:2 མཆོད་དཔོན་ཆེན་པོ་ཨ་ནན་ཡཱ་ཡིས་ཕོལ་ལོལ་གྱི་ཉེ་འགྲམ་དུ་ལངས་ནས་སྡོད་པའི་མི་རྣམས༌ལ། ཕོལ་ལོལ་གྱི་ཞལ་ལ་རྡེག་དགོས་པའི་བཀའ་བསྒོས༌ཤིང༌།
ACT 23:3 ཕོལ་ལོལ་གྱིས་ཁོ་རང་ལ་འདི་སྐད༌དུ། ཚོན་རྩི་དཀར་པོས་བརྒྱན་པའི་རྩིག་ངོས་དང་འདྲ་བ་ཁྱོད་ལའང་དཀོན་མཆོག་གིས་རྡེག་པར་འགྱུར༌ཏེ། ཁྱོད་རང་བཀའ་ཁྲིམས་ལྟར་བདག་ལ་འདྲི་གཅོད་བྱེད་པར་བསྡད་ཡོད་དམ། ཡང་ན་བཀའ་ཁྲིམས་དང་འགལ་ནས་བདག་ལ་རྡུང་བའི་བཀའ་བསྒོ་བ་ཡིན་ཞེས་གསུངས།
ACT 23:4 ཉེ་འགྲམ་དུ་ལངས་སྡོད་པའི་མི་རྣམས་ན༌རེ། ཁྱོད་ཀྱིས་དཀོན་མཆོག་གི་མཆོད་དཔོན་ཆེན་པོ་ལ་དམའ་འབེབས་བྱེད་དམ་ཞེས་སྨྲས་པ༌དང༌།
ACT 23:5 ཡང་ཕོལ་ལོལ་གྱིས་འདི་སྐད༌དུ། སྤུན་ཟླ༌རྣམ་པ། ངས་ཁོ་རང་མཆོད་དཔོན་ཆེན་པོ་ཡིན་པ་མ་ཤེས༌ལ། གསུང་རབ་ཀྱི་མདོ་ལས་ཇི་སྐད༌དུ། ཁྱོད་ཀྱིས་རང་གི་ཡུལ་མིའི་འགོ་དཔོན་ལ་འཕྱ་དམོད་བྱ་མི་འོས་ཞེས་བཀོད་ཡོད་ཅེས་སྨྲས༌སོ།།
ACT 23:6 དེ་ནས་ཕོལ་ལོལ་གྱིས་མི་དེ་རྣམས་ལས་འགའ་ཤས་ནི་སཱ་ཅུ་སེ་པ་དང་འགའ་ཤས་ནི་ཕ་རུ་ཤི་པ་ཡིན་པ་ཤེས༌ཏེ། དཔོན་རིགས་ཚོགས་པའི་ཚོགས་མིའི་ཁྲོད་དུ་སྐད་ཆེན་པོས་འདི་སྐད༌དུ། སྤུན་ཟླ༌རྣམ་པ། ང་རང་ནི་ཕ་རུ་ཤི་པ་ཡིན་པ་དང་ཕ་རུ་ཤི་པའི་བུ་རྒྱུད་ཀྱང་ཡིན༌ཏེ། ངས་ད་ལྟ་འདྲི་གཅོད་མྱོང་བ་ནི་གཤིན་པོ་རྣམས་སླར་གསོན་པར་འགྱུར་བའི་དོན་དེ་ལ་རེ་སྨོན་བྱེད་པའི་ཕྱིར་ཡིན་ཞེས་གསུངས་པ༌དང༌།
ACT 23:7 ཕ་རུ་ཤི་པ་དང་སཱ་ཅུ་སེ་པ་གཉིས་ཀྱི་བར་ལ་རྩོད་པ་བྱུང་སྟེ་ཚོགས་པ་འདི་ཕྱོགས་ཁག་གཉིས་སུ་གྱུར་ཏོ།།
ACT 23:8 རྒྱུ་མཚན་ནི་སཱ་ཅུ་སེ་པ་རྣམས་ཀྱིས་གཤིན་པོ་རྣམས་སླར་གསོན་པར་འགྱུར་བའི་དོན་དེ་མེད༌ཅིང༌། ཕོ་ཉ་དང་སེམས་ཉིད་ཀྱང་མེད་ཅེས་སྨྲ་བ༌དང༌། ཕ་རུ་ཤི་པ་རྣམས་ཀྱིས་དོན་དེ་ཐམས་ཅད་ཡོད་པར་སྨྲ་བའི་ཕྱིར༌ཡིན།
ACT 23:9 དེ་ནས་རྩོད་པའི་འུར་སྒྲ་ཇེ་ཆེར་སོང་ཞིང་ཕ་རུ་ཤི་པའི་ཕྱོགས་ཀྱི་མཁན་པོ་འགའ་ཡར་ལངས་ཏེ་ན༌རེ། ངེད་ཅག་གིས་མི་འདི་ལས་ཉེས་སྐྱོན་ཅི་ཡང་མ་རྙེད། གལ་ཏེ་སེམས་ཉིད་དམ་ཕོ་ཉ་ཞིག་གིས་ཁོ་རང་ལ་གཏམ་སྨྲས་ན་ག་འདྲ་ཡིན་ཞེས་སྨྲས་སོ།།
ACT 23:10 སྐབས༌དེར། རྩོད་པ་ཆེན་པོ་བྱུང་བས་སྟོང་དཔོན་གྱིས་ཕོལ་ལོལ་རས་བཞིན་དུམ་བུར་གཤག་པར་དོགས་ནས། དམག་མི་རྣམས་ལ་ཁོང་ཉིད་མི་ཚོགས་ལས་བཙན་གྱིས་ཕྲོགས་ཏེ་དམག་སྒར་དུ་འཁྲིད་དགོས་པའི་བཀའ་གནང༌ངོ༌།།
ACT 23:11 མཚན་མོ༌དེར། གཙོ་བོ་ཁོང་ཉིད་ཕོལ་ལོལ་གྱི་གམ་དུ་ཕེབས་ཏེ་འདི་སྐད༌དུ། སེམས་བདེ་བར༌གྱིས། ཁྱོད་ཀྱིས་ཡེ་རུ་སཱ་ལེམ་ནས་བདག་ལ་ཇི་ལྟར་བདེན་དཔང་བྱས་པ་བཞིན་རོ་མཱ་རུའང་དེ་བཞིན་དུ་བདེན་དཔང་བྱེད་དགོས་ཞེས་གསུངས༌སོ།།
ACT 23:12 དེ་ཡང་ནམ་ལངས་པ་དང་ཡ་ཧུ་དཱ་པ་རྣམས་ཀྱིས་མཉམ་དུ་གྲོས་བྱས༌ཏེ། ཕོལ་ལོལ་མ་བསད་ན་བཟའ་བཏུང་ཅི་ཡང་མི་སྤྱོད་ཅེས་དམ་བཅས༌པ་རེད།
ACT 23:13 དེ་ལྟར་བློ་སེམས་གཅིག་མཐུན་སྒོས་དམ་བཅའ་འཇོག་མཁན་མི་བཞི་བཅུ་ལྷག་ཡོད་དོ།།
ACT 23:14 དེ་ནས་མི་དེ་རྣམས་མཆོད་དཔོན་ཆེན་པོ་དག་དང་རྒན་པོ་རྣམས་ཀྱི་གམ་དུ་སོང་སྟེ་ན༌རེ། ངེད་ཅག་གིས་ཕོལ་ལོལ་མ་བསད་ན་ཟས་ཅི་ཡང་མི་སྤྱོད་ཅེས་དམ་བཅའ་ཆེན་པོ་བཞག་ཅིང་།
ACT 23:15 ད་ལྟ་ཁྱོད་ཅག་དང་དཔོན་རིགས་ཚོགས་པའི་ཚོགས་མི་རྣམས་ཀྱིས་སྟོང་དཔོན༌ལ། ཕོལ་ལོལ་ལ་ཞིབ་ཏུ་རྟོག་དཔྱོད་བྱ་ཁུལ་བྱེད་པའི་ཆེད་དུ་འདིར་འཁྲིད་ཡོང་དགོས་པའི་སྐད་གཏོང་བར༌གྱིས། ངེད་ཅག་གིས་གྲ་སྒྲིག་བྱས་ཟིན་པས་ཁོ་རང་གནས་འདིར་མ་སླེབས་པའི་སྔོན་ལ་གསོད་པར་བྱའོ་ཞེས་སྨྲས་སོ།།
ACT 23:16 འོན་ཀྱང་། ཕོལ་ལོལ་གྱི་ཚ་བོས་དེ་དག་གིས་ལྐོག་འཇབ་བྱེད་རྩིས་ཡོད་པ་ཐོས་ཏེ་དམག་སྒར་དུ་སོང་ནས་དོན་དེ་ཕོལ་ལོལ་ལ་སྨྲས་པ་རེད།
ACT 23:17 དེ་ནས་ཕོལ་ལོལ་གྱིས་བརྒྱ་དཔོན་ཞིག་བོས་ཏེ་འདི་སྐད༌དུ། ཁྱོད་ཀྱིས་ན་གཞོན་འདི་སྟོང་དཔོན་གྱི་དྲུང་དུ་ཁྲིད༌ཅིག ཁོ་ལ་ཞུ་རྒྱུའི་དོན་ཞིག་ཡོད་ཅེས་གསུངས་པ༌དང༌།
ACT 23:18 དེས་ཀྱང་ན་གཞོན་དེ་སྟོང་དཔོན་གྱི་དྲུང་དུ་ཁྲིད་དེ་ན༌རེ། བཙོན་པ་ཕོལ་ལོལ་གྱིས་ང་རང་ཁོའི་གམ་དུ་བོས་ཏེ་ན་གཞོན་འདི་ཁྱེད་ཀྱི་དྲུང་དུ་ཁྲིད༌ཅིག ཁོ་ལ་ཞུ་རྒྱུའི་དོན་ཞིག་ཡོད་པར་ཞུས་བྱུང་ཞེས་སྨྲས་པ༌དང༌།
ACT 23:19 སྟོང་དཔོན་གྱིས་ན་གཞོན་དེའི་ལག་པར་འཇུས་ནས་ཟུར་དུ་ཁྲིད་དེ་ན༌རེ། བདག་ལ་ཞུ་རྒྱུའི་དོན་ཅི་ཞིག་ཡོད་ཅེས་ལྐོག་ཏུ་དྲིས་པ༌ལ།
ACT 23:20 ན་གཞོན་ན༌རེ། ཡ་ཧུ་དཱ་པ་རྣམས་ཀྱིས་སང་ཉིན་ཁྱེད་ལ་ཕོལ་ལོལ་དཔོན་རིགས་ཚོགས་པའི་ཚོགས་མི་རྣམས་ཀྱི་གམ་དུ་འཁྲིད༌པའི་རེ་བ་ཞུས་ནས། ཁོང་གི་དོན་ལ་ཞིབ་ཏུ་རྟོག་དཔྱོད་བྱ་ཁུལ་བྱེད་པར་གྲོས་བྱས༌ཟིན།
ACT 23:21 མི་བཞི་བཅུ་ལྷག་གིས་ཕོལ་ལོལ་མ་བསད་ན་བཟའ་བཏུང་ཅི་ཡང་མི་སྤྱོད་ཅེས་དམ་བཅས་ནས་ལྐོག་འཇབ་བྱེད་རྩིས་ཡོད༌ཅིང༌། ད་ལྟ་གྲ་སྒྲིག་ཀྱང་བྱས་ཚར་ནས་ཁྱེད་ཀྱིས་ཆོག་མཆན་འགོད་པ་ཁོ་ནར་བསྒུགས་ཡོད༌པས། ཁྱེད་ཀྱིས་དེ་དག་གི་འདོད་ལ་མི་བསྟུན་པར་འཚལ་ཞེས་ཞུས་སོ།།
ACT 23:22 དེ་ནས་སྟོང་དཔོན་གྱིས་ན་གཞོན་དེ༌ལ། ཁྱོད་ཀྱིས་དོན་འདི་བདག་ལ་སྨྲས་པ་ནི་མི་གཞན་སུ་ལའང་སྨྲ་བར་མི་བྱའོ་ཞེས་གདམས་ཏེ་འགྲོ་རུ་བཅུག༌གོ།
ACT 23:23 དེ་ནས་སྟོང་དཔོན་གྱིས་བརྒྱ་དཔོན་གཉིས་བོས་ཏེ་ན༌རེ། རྐང་དམག་ཉིས་བརྒྱ༌དང༌། རྟ་དམག་བདུན༌ཅུ། མདུང་རིང་ཐོགས་པའི་རྐང་དམག་ཉིས་བརྒྱ་བཅས་སྟ་གོན་བྱོས༌དང༌། མཚན་མོའི་ཆུ་ཚོད་དགུའི་སྟེང་དུ་ཀེ་སར་ཡཱ་རུ་སྐྱོད༌ཅིག
ACT 23:24 གཞན༌ཡང༌། ཕོལ་ལོལ་ལ་ཞོན་པ་འགའ་གྲ་སྒྲིག་བྱས་ནས་སྤྱི་དཔོན་ཕེ་ལིག་གི་དྲུང་དུ་བདེ་བར་སྐྱོལ་ཅིག་ཅེས་བཀའ་བསྒོས་པ༌དང༌།
ACT 23:25 འཕྲིན་ཡིག་ཅིག་བྲིས་ཤིང་ནང་དོན་མདོར་བསྡུས་འདི་ལྟ༌སྟེ། ༄༅། །གུས་པར་འོས་པའི་སྤྱི་དཔོན་ཕེ་ལིག་གི་སྤྱན་དྲུང༌དུ། ཐོག་མར་ཁྱེད་ལ་འཚམས་འདྲི་ཞུ་ཞེས་ཀཱ་ལོ་དི་ལི་སི་ཨ་ནས་སྤྲིངས༌དོན།
ACT 23:27 དེ་ཡང་མི་འདི་ནི་ཡ་ཧུ་དཱ་པ་དག་གིས་བཙན་གྱིས་བཟུང་ཞིང་གསོད་པར་རྩོམ་པའི་དུས༌སུ། བདག་གིས་ཁོ་རང་ནི་རོ་མཱ་པ་ཞིག་ཡིན་པ་ཤེས་ནས་དམག་མི་དང་བཅས་པ་གནས་དེར་སོང་སྟེ་ཁོ་རང་བསྐྱབས༌པ་དང་།
ACT 23:28 ཡ་ཧུ་དཱ་པ་དག་གིས་ཁོ་རང་གཏུག་བཤེར་བྱེད་པའི་རྒྱུ་མཚན་ཅི་ཡིན་པ་བདག་གིས་ཤེས་འདོད༌དེ། ཡ་ཧུ་དཱ་པའི་དཔོན་རིགས་ཚོགས་པའི་ཚོགས་མིའི་མདུན་དུ་ཁྲིད་པ༌ན།
ACT 23:29 ཁོ་རང་གཏུགས་དོན་ནི་ཡ་ཧུ་དཱ་པའི་ཆོས་ཀྱི་བཀའ་ཁྲིམས་ཐད་ལ་རྩོད་པ་བྱུང་བ་ཙམ༌ལས། བཙོན་དུ་འཇུག་པའམ་སྲོག་ཆད་གཅོད་དགོས་པའི་ཉེས་སྐྱོན་ཅི་ཡང་མེད་པ་ཤེས་སོ།།
ACT 23:30 ཕྱིས་སུ་ཁོ་རང་ལྐོག་གསོད་བྱེད་པའི་ཇུས་ངན་དེ་མི་ཞིག་གིས་བདག་ལ་སྨྲས་པ་དང་ངས་ཀྱང་འཕྲལ་དུ་ཁོ་རང་ཁྱེད་ཀྱི་དྲུང་དུ་བསྐྱལ༌ཞིང༌། ཁོ་རང་གཏུག་མཁན་རྣམས་ལའང་ཁྱེད་ཀྱི་དྲུང་ནས་ཁོ་རང་གཏུགས་ཤིག་ཅེས་ཁ་བསྒོ་བྱས་པ་ཡིན། མཇུག་མཐར་ཁྱེད་ཀྱི་སྐུ་ཁམས་བདེ་བར༌སྨོན། ཞེས༌པའོ།།
ACT 23:31 དེ་ནས་དམག་མི་རྣམས་ཀྱིས་བཀའ་བཞིན་དུ་མཚན་མོའི་དུས༌སུ་ཕོལ་ལོལ་ཁྲིད་ནས་ཨན་ཏི་པཱ་ཏྲི་རུ་སླེབས།
ACT 23:32 དེའི་ཕྱི༌ཉིན། རྟ་དམག་རྣམས་ཀྱིས་ཕོལ་ལོལ་བསྐྱལ་བ་དང་གཞན་རྣམས་ཕྱིར་དམག་སྒར་དུ་ལོག་གོ།
ACT 23:33 རྟ་དམག་རྣམས་ཀྱིས་ཕོལ་ལོལ་བསྐྱལ་ནས་ཀེ་སར་ཡཱ་རུ་སླེབས་པ་དང་འཕྲིན་ཡིག་དེ་སྤྱི་དཔོན་ལ་ཕུལ་ཞིང་ཕོལ་ལོལ་ཡང་ཁོའི་མདུན་དུ་བསླངས་སོ།།
ACT 23:34 སྤྱི་དཔོན་གྱིས་འཕྲིན་ཡིག་བཀླགས༌རྗེས། ཕོལ་ལོལ་ཡུལ་གང་ནས་ཡིན་པ་དྲིས་པ་དང་ཀི་ལིག་ཡཱ་ཡུལ་གྱི་ཡིན་པ་ཤེས༌ཏེ།
ACT 23:35 ཁྱོད་རང་གཏུག་མཁན་གྱི་མི་རྣམས་ཀྱང་སླེབས་པའི་ཚེ། ངས་ཁྱོད་ཀྱི་དོན་ལ་ཞིབ་ཏུ་མཉན་པར་བྱའོ་ཞེས་སྨྲས་པ༌དང༌། ཧེ་རོ་དཱའི་ཕོ་བྲང་དུ་ཕོལ་ལོལ་བཙོན་ལ་འཇུག་དགོས་པའི་བཀའ་གནང༌ངོ༌།།
ACT 24:1 དེ་ནས་ཉིན་ལྔ་འགོར༌རྗེས། མཆོད་དཔོན་ཆེན་པོ་ཨ་ནན་ཡཱ་དང་རྒན་པོ་འགའ་ཤས་ཁྲིམས་རྩོད་པ་ཐུར་ཐོ་ལོ་དང་མཉམ་དུ་སླེབས་ཏེ། སྤྱི་དཔོན་གྱི་དྲུང་དུ་ཕོལ་ལོལ་གཏུག་བཤེར་བྱས་སོ།།
ACT 24:2 དེ་ནས་ཕོལ་ལོལ་བོས་ཡོང་བ་དང་ཐུར་ཐོ་ལོ་ན༌རེ། དཔོན་ཆེན་ཕེ་ལིག༌ལགས། ཁྱེད་ཀྱི་བཀའ་དྲིན་ལས་ངེད་རྣམས་ཀྱིས་ཡུན་རིང་ལ་ཞི་བདེའི་དཔལ་ལ་རོལ་བ༌དང༌། ཡུལ་འདིའི་ཞན་ཆ་ཡང་ཁྱེད་ཀྱི་མངོན་ཤེས་ཀྱིས་རྟོགས་ཏེ་ཡོ་བསྲང་བྱས༌པས།
ACT 24:3 ངེད་ཅག་གིས་ཀྱང་དུས་དང་རྣམ་པ་ཀུན་ཏུ་དོན་འདི་ཁས་ལེན་པ་དང་སེམས་གཏིང་ནས་ཁྱེད་ལ་བཀའ་དྲིན་ཞུའོ།།
ACT 24:4 འོན༌ཀྱང༌། ཁྱེད་ལ་ལྷག་ཏུ་སུན་སྣང་མི་བསྐྱེད་པའི༌ཕྱིར། ཁྱེད་ཀྱིས་ཐུགས་བག་ཕེབས་ངང་ངེད་ཅག་གི་ཚིག་འགའ་ལ་གསན་རོགས༌ཞུ།
ACT 24:5 མི་འདི་ནི་འགོས་ནད་ལྟ་བུ་ཞིག་ཡིན༌ཏེ། མི་འདིས་ས་གཞི་ཡོངས་སུ་སྡོད་པའི་ཡ་ཧུ་དཱ་པ་ཐམས་ཅད་ལ་ངན་སྐུལ་བྱས་ཤིང་ཟིང་ཆ་བཟོས་པ༌དང༌། ཁོ་ནི་ནཱ་ཙ་རེལ་གྱི་གྲུབ་མཐའི་འགོ་པའང༌ཡིན་ནོ།།
ACT 24:6 ཐ་ན་ཁོས་མཆོད་ཁང་ཡང་མི་གཙང་བར་བྱེད་འདོད་པས། སྔར་ངེད་ཅག་གིས་ཁོ་རང་བཟུང༌སྟེ། རང་གི་བཀའ་ཁྲིམས་བཞིན་ཐག་གིས་གཅོད་པར་བསམས༌མོད།
ACT 24:7 འོན་ཀྱང་སྟོང་དཔོན་ལི་སི་ཨ་སླེབས་ཏེ། བཙན་ཤེད་ཀྱིས་ཕོལ་ལོལ་ངེད་ཅག་གི་ལག་ནས་ཕྲོགས་ཤིང༌། ཁོ་རང་གཏུགས་པའི་མི་རྣམས་ལ་ཁྱེད་ཀྱི་དྲུང་དུ་སོང་ཞེས་བཀའ་བསྒོས་པ་དང་།
ACT 24:8 ཁྱེད་ཀྱིས་ཁོ་ལ་ཞིབ་ཏུ་འདྲི་གཅོད་མཛད༌ན། ངེད་ཅག་གིས་ཁོ་རང་གཏུགས་པའི་རྒྱུ་མཚན་ཐམས་ཅད་རྟོགས་ནུས་པ་ཡིན་ཞེས་གཏུགས།
ACT 24:9 ཡ་ཧུ་དཱ་པ་རྣམས་ཀྱིས་ཀྱང་དེ་དང་བསྟུན་ནས་དངོས་གནས་དེ་ལྟར་ཡིན་ཞེས་ཁོང་ཉིད་གཏུགས་སོ།།
ACT 24:10 དེ་ནས་སྤྱི་དཔོན་ཕེ་ལིག་གིས་ཕོལ་ལོལ་ལ་གཏམ་སྨྲ་རུང་བའི་བརྡ་བསྟན་པ༌ན། ཁོང་ན་རེ། ངས་ཁྱེད་རང་ནི་ལོ་མང་པོར་མི་རིགས་འདིའི་ཁྲིམས་དཔོན་ཡིན་པ་ཤེས༌པས། དགའ་སྤྲོའི་ངང་ནས་རང་ཉིད་ལ་དག་འབུད་བྱེད་པའོ།།
ACT 24:11 ཁྱེད་ཀྱིས་རྩད་གཅོད་བྱས་ན་རྟོགས་ནུས༌ཏེ། ང་རང་ཡེ་རུ་སཱ་ལེམ་ལ་མཇལ་དུ་སོང་བ་དང་ད་ལྟའི་བར་དུ་ཉིན་བཅུ་གཉིས་ལས་མ་འགོར༌ལ།
ACT 24:12 ངས་མཆོད་ཁང་དང་ཆོས༌ཁང༌། ཡང་ན་གྲོང་ཁྱེར་བཅས་ནས་མི་གཞན་དང་རྩོད་གླེང་མ་བྱས་ཤིང་ཟིང་ཆ་བཟོས་མ་མྱོང་ལ་ཁོ་རྣམས་ཀྱིས་ཀྱང་མ་མཐོང༌བ་ཡིན་ནོ།།
ACT 24:13 ད་ལྟ་ང་རང་ཁྱེད་ལ་གཏུགས་པའི་དོན་དེར་ཁོ་རྣམས་ཀྱིས་ཀྱང་བདེན་དཔང་བྱེད་མི་ནུས་སོ།།
ACT 24:14 འོན་ཀྱང་ངས་ཁྱེད་ལ་དོན་ཞིག་ཁས་ལེན་པར་བྱེད༌དེ། ཁོ་རྣམས་ཀྱིས་མཱ་ཤི་ཀའི་ཆོས་ཀྱི་ལམ་དེ་ལོག་ལྟ་ཡིན་ཟེར༌ཡང༌། ངས་ཆོས་དེ་བཞིན་དུ་ངེད་ཅག་གི་ཕ་མེས་ཀྱི་དཀོན་མཆོག་ལ་བསྙེན་བཀུར་བྱེད༌ཅིང༌། བཀའ་ཁྲིམས་དང་ལུང་སྟོན་པའི་མདོ་ལས་བཀོད་ཡོད་པ་ཐམས་ཅད་ལའང་མཐུན་པར་དད་པ་བྱེད་དོ།།
ACT 24:15 གཞན༌ཡང༌། ཡ་ཧུ་དཱ་པ་འདི་རྣམས་དང་འདྲ་བར་ངས་དཀོན་མཆོག་ལ་རེ་སྨོན་བྱེད༌དེ། མི་རྣམ་དག་དང་མི་ངན་པ་གང་ཡིན་ཡང་གཤིན་པོ་རྣམས་སླར་གསོན་པར་འགྱུར་ངེས༌ཡིན་ནོ།།
ACT 24:16 དེའི༌ཕྱིར། ངས་དུས་རྟག་ཏུ་དཀོན་མཆོག་དང་མི་གཞན་དག་གི་མདུན་དུ་བསམ་པ་རྣམ་དག་འཆང་བར་བརྩོན༌ཞིང་།
ACT 24:17 ལོ་འགའི་རྗེས༌སུ། ངས་རང་གི་མི་རིགས་ལ་རོགས་སྐྱོར་བྱེད་པའི་ཞལ་འདེབས་འབུལ་བ་དང༌། དཀོན་མཆོག་ལ་མཆོད་པ་འབུལ་ཆེད་ཡེ་རུ་སཱ་ལེམ་དུ་སོང་བ༌དང༌།
ACT 24:18 མཆོད་པ་འབུལ་བཞིན་པའི་སྒང༌ལ། ངས་མཆོད་ཁང་ནས་ཆོས་ཀྱི་གཙང་སྦྲའི་ཆོ་ག་བསྒྲུབས་ཟིན་པ་དེ་ཨེ་ཞི་ཡཱ་ཡུལ་ནས་ཡོང་བའི་ཡ་ཧུ་དཱ་པ་འགའ་ཞིག་གིས་མཐོང༌ཡང༌། གནས་དེར་མི་མང་པོ་མ་འདུས་ཤིང་འུར་ཡང་མ་བརྒྱབ་བོ།།
ACT 24:19 གལ་ཏེ་ཁོ་རྣམས་ལ་ང་རང་གཏུག་རྒྱུའི་དོན་ཞིག་ཡོད༌ན། ཁྱེད་ཀྱི་དྲུང་དུ་ཡོང་ནས་གཏུག་འོས༌ཤིང༌།
ACT 24:20 ཡང་ན་ང་རང་དཔོན་རིགས་ཚོགས་པའི་ཚོགས་མི་རྣམས་ཀྱི་མདུན་དུ་སྡོད་པའི་སྐབས༌སུ། མི་འདི་རྣམས་ཀྱིས་བདག་ལ་ཉེས་སྐྱོན་གང་ཞིག་ཡོད་པ་རྙེད་ན་ཁོ་ཚོ་རང་གིས་གསལ་བཤད་བྱས་ཆོག
ACT 24:21 གལ་ཏེ་ཉེས་སྐྱོན་ཡོད་པའི་དབང་དུ་བཏང༌ནའང༌། སྔར་ནས་ང་རང་ཁོ་རྣམས་ཀྱི་ཁྲོད་དུ་ཡར་ལངས་ཏེ་སྐད་ཆེན༌པོས། དེ་རིང་གི་དུས་འདིར་ཁྱོད་རྣམས་ཀྱི་མདུན་ནས་ངས་འདྲི་གཅོད་མྱོང་བ་ནི། གཤིན་པོ་རྣམས་སླར་གསོན་པར་འགྱུར་བའི་དོན་དེའི་གནས་ལུགས་ཀྱི་ཕྱིར་རོ་ཞེས་སྨྲས་པའི་གཏམ་དེ་ཁོ་ན་ཡིན་ཞེས་གསུངས༌སོ།།
ACT 24:22 དེ་ནས་ཕེ་ལིག་ནི་མཱ་ཤི་ཀའི་ཆོས་ཀྱི་ལམ་དེ་ལ་ཆ་རྒྱུས་གསལ་པོ་ཡོད་ནའང་ཁོ་ན༌རེ། སྟོང་དཔོན་ལི་སི་ཨ་འདིར་ཕེབས༌ཚེ། ངས་ཁྱོད་རྣམས་ཀྱི་དོན་འདིར་ཁྲིམས་ཐག་གཅོད་ངེས་ཡིན་ཞེས་སྨྲས་རྗེས་གྲོལ་བ༌དང༌།
ACT 24:23 བརྒྱ་དཔོན་ལ་ཕོལ་ལོལ་སྲུང་སྐྱོབ་བྱེད་པ་དང་རང་དབང་ཅུང་ཙམ་ཡོད་པར་བྱེད་པ་དང༌། ཁོང་གི་གྲོགས་རྣམས་ཀྱང་ཁོང་ལ་ཞབས་ཏོག་བསྒྲུབ་ཏུ་ཡོང་ཆོག་པའི་བཀའ་བསྒོས༌པ་རེད།
ACT 24:24 དེ་ནས་ཉིན་འགའ་འགོར༌རྗེས། ཕེ་ལིག་དང་ཁོའི་ཡ་ཧུ་དཱ་པའི་ཆུང་མ་དྲུ་སིལ་ལཱ་གཉིས་མཉམ་དུ་ཕེབས་ཤིང་ཕོལ་ལོལ་བོས༌ཏེ། ཁོང་གིས་མཱ་ཤི་ཀ་ཡེ་ཤུ་ལ་དད་པ་བྱེད་པའི་སྐོར་གྱི་ཆོས་གསུངས་པ་ལ་མཉན།
ACT 24:25 ཕོལ་ལོལ་གྱིས་དྲང་བདེན་གྱི་ལས་དང་རང་ཚོད་ཟིན་དགོས༌ཚུལ། མ་འོངས་པར་ཁྲིམས་ཐག་གཅོད་པའི་སྐོར་བཅས་ཀྱི་ཆོས་གསུངས་པ༌ན། ཕེ་ལིག་དོན་དེ་དག་ལ་འཇིགས་ཏེ་ན༌རེ། ཁྱེད་རང་གནས་སྐབས་སུ་ཕྱིར་ལོག༌དང༌། བདག་ལ་ཁོམ་ལོང་བྱུང་ན་ཁྱེད་ཉིད་ཡང་བསྐྱར་འབོད་པར་བྱའོ་ཞེས་སྨྲས་སོ།།
ACT 24:26 ཡང་དུས་དེ་ལ་ཕེ་ལིག་གིས་ཕོལ་ལོལ་ལས་ལྐོག་རྔན་ལེན་པར་རེ་བ་བཅངས་པས་ཐེངས་མང་པོར་ཁོང་ཉིད་བོས་ནས་གླེང་མོལ་བྱས་སོ།།
ACT 24:27 དེ་ནས་ལོ་གཉིས་འགོར༌རྗེས། ཕོར་ཀེའུ་ཨོ་ཕེ་ཏི་ཞེས་པ་ཕེ་ལིག་གི་ཚབ་ལ་སྤྱི་དཔོན་དུ་བསྐོས། འོན་ཀྱང་ཕེ་ལིག་གིས་ཡ་ཧུ་དཱ་པ་རྣམས་ཀྱི་ངོ་སོ་ལེན་པའི་ཕྱིར་ཕོལ་ལོལ་མ་བཏང་བར་བཙོན་དུ་བཞག༌གོ།
ACT 25:1 དེ་ཡང་སྤྱི་དཔོན་ཕེ་ཏི་ཡུལ་ལྗོངས་དེར་སླེབས་ནས་ཉིན་གསུམ་གྱི་རྗེས༌སུ། ཀེ་སར་ཡཱ་ནས་ཡར་ཡེ་རུ་སཱ་ལེམ་དུ་སོང་བ༌དང༌།
ACT 25:2 མཆོད་དཔོན་ཆེན་པོ་དག་དང་ཡ་ཧུ་དཱ་པའི་དཔོན་རིགས་རྣམས་ཀྱིས་ཁོ་ལ་ཕོལ་ལོལ་གཏུགས༌ཤིང༌།
ACT 25:3 ཕོལ་ལོལ་ཁོང་ཉིད་ཡེ་རུ་སཱ་ལེམ་དུ་འཁྲིད་ཡོང་བར་རེ་བ་ཡང་ཡང་ཞུས། ཅིའི་ཕྱིར་ཞེ་ན། ཡ་ཧུ་དཱ་པའི་དཔོན་རིགས་དེ་དག་གིས་ལམ་བར་དུ་ཁོང་ཉིད་གསོད་པར་ལྐོག་འཇབ་བྱས་ཡོད་པའི་ཕྱིར༌ཡིན།
ACT 25:4 འོན༌ཀྱང༌། ཕེ་ཏི་ན༌རེ། ཕོལ་ལོལ་བྱ་བ་ཀེ་སར་ཡཱ་ནས་བཙོན་ལ་བཅུག་ཡོད་ཅིང་ང་རང་ཅང་མ་འགོར་བར་དེ་རུ་འགྲོ་བ་ཡིན།
ACT 25:5 དེ་བས་ཁྱོད་རྣམས་ལས་མི་དབང་ཐང་ཅན་རྣམས་བདག་དང་མཉམ་དུ༌འགྲོའོ།། གལ་ཏེ་མི་དེ་ལ་ཉེས་སྐྱོན་ཡོད་ན་གཏུག་ཆོག་ཅེས་སྨྲས༌སོ།།
ACT 25:6 དེ་ནས་ཕེ་ཏི་བྱ་བ་ཡེ་རུ་སཱ་ལེམ་དུ་ཉིན་བརྒྱད་ནས་བཅུ་ཙམ་ལ་བསྡད་པ་དང་མར་ཀེ་སར་ཡཱ་རུ་སོང༌ཞིང༌། དེའི་ཕྱི་ཉིན་ཁྲིམས་དཔོན་གྱི་ཁྲིའི་སྟེང་དུ་བཞུགས་ཤིང་ཕོལ་ལོལ་འཁྲིད་ཡོང་དགོས་པའི་བཀའ་གནང༌ངོ་།།
ACT 25:7 ཕོལ་ལོལ་ཁྲིམས་ཁང་དུ་ཡོང་བ་དང་ཡེ་རུ་སཱ་ལེམ་ནས་མར་ཡོང་བའི་ཡ་ཧུ་དཱ་པ་རྣམས་ཀྱང་སླེབས་ཏེ། ཕོལ་ལོལ་གྱི་མཐའ་བསྐོར་ཞིང་དོན་རྐྱེན་ཚབས་ཆེན་མང་པོ་གླེང་ནས་ཁོང་ཉིད་གཏུགས་ནའང་བདེན་དཔང་བྱེད་མ་ནུས་སོ།།
ACT 25:8 ཕོལ་ལོལ་གྱིས་དག་འབུད་བྱས་ནས་འདི་ལྟར་སྨྲས༌པ་སྟེ། ང་རང་ནི་ཡ་ཧུ་དཱ་པའི་བཀའ་ཁྲིམས༌དང༌མཆོད༌ཁང༌། ཡང་ན་སེ་བཟིར་བཅས་གང་ལའང་འགལ་མ་མྱོང་ཞེས་པའོ།།
ACT 25:9 འོན༌ཀྱང༌། ཕེ་ཏིས་ཡ་ཧུ་དཱ་པ་རྣམས་ཀྱི་ངོ་སོ་ལེན་པའི་ཕྱིར་ན༌རེ། ཁྱོད་རང་ཡར་ཡེ་རུ་སཱ་ལེམ་དུ་སོང༌ནས། བདག་གིས་ཁྱོད་ཀྱི་དོན་འདིར་ཁྲིམས་ཐག་བཅད་ན་ཁྱོད་རང་འཐད་པ་ཡིན་ནམ་ཞེས་དྲིས་པ༌དང༌།
ACT 25:10 ཕོལ་ལོལ་གྱིས་འདི་སྐད༌དུ། ང་རང་ནི་སེ་བཟིར་གྱི་ཁྲིའི་མདུན་དུ་བསྡད་ཡོད༌ཅིང༌། འདི་ནི་བདག་ལ་འདྲི་གཅོད་བྱེད་འོས་པའི་གནས་ཀྱང༌ཡིན། ངས་ཡ་ཧུ་དཱ་པ་རྣམས་ལ་གནོད་པའི་བྱ་བ་ཅི་ཡང་བྱས་མ་མྱོང་བ་ཁྱེད་ཀྱིས་ཀྱང་གསལ་པོར་ཤེས༌པ་ཡིན་ནོ།།
ACT 25:11 གལ་ཏེ་ང་རང་ཉེས་ཅན་ཡིན་པ་དང་ངས་སྲོག་ཆད་གཅོད་འོས་པའི་ཉེས་པ་གང་ཞིག་བྱས་ཡོད༌ན། ང་རང་འཆི་དགོས་ཀྱང་རང་སྲོག་ལ་འཛེམ་པར་མི༌བྱའོ།། གལ་ཏེ་ཁོ་རྣམས་ཀྱིས་ང་རང་གཏུགས་པའི་དོན་དེ་རྣམས་བདེན་པ་མ་ཡིན་ན་སུས་ཀྱང་ང་རང་ཁོ་རྣམས་ལ་སྤྲོད་མི་རུང༌སྟེ། ངས་ཀྱང་སེ་བཟིར་ལ་གཏུག་བཤེར་ཞུ་རྒྱུ་ཡིན་ཞེས་གསུངས༌ཤིང༌།
ACT 25:12 ཕེ་ཏིས་རང་གི་གྲོས་ཚོགས་ཀྱི་མི་རྣམས་དང་གྲོས་བྱས་ཏེ་ན༌རེ། ཁྱོད་ཀྱིས་སེ་བཟིར་ལ་གཏུག་བཤེར་ཞུ་འདོད་ན་ཁོང་གི་དྲུང་དུ་འགྲོ་དགོས་ཞེས་སྨྲས༌སོ།།
ACT 25:13 དེ་ནས་ཉིན་ཁ་ཤས་འགོར༌རྗེས། ས་གནས་རྒྱལ་པོ་ཨག་རི་པཱ་དང་པུར་ནེ་ཀེ་གཉིས་ཀེ་སར་ཡཱ་རུ་ཕེབས་ཏེ་ཕེ་ཏི་ལ་འཚམས་འདྲི་བྱས༌ཤིང༌།
ACT 25:14 ཁོ་གཉིས་ཉིན་མང་པོར་བཞུགས་པ་དང་ཕེ་ཏི་ཡིས་ཕོལ་ལོལ་གྱི་གནས་ཚུལ་ས་གནས་རྒྱལ་པོ་ལ་འདི་ལྟར་ཞུས་པ༌སྟེ། འདིར་ཕེ་ལིག་གིས་བཙོན་དུ་བཅུག་པའི་མི་ཞིག་ཡོད་པ༌དང༌།
ACT 25:15 ང་རང་ཡེ་རུ་སཱ་ལེམ་དུ་སྡོད་པའི་དུས༌སུ། མཆོད་དཔོན་ཆེན་པོ་དག་དང་ཡ་ཧུ་དཱ་པའི་རྒན་པོ་རྣམས་ཀྱིས་མི་དེ་གཏུགས་ཤིང་ཁོ་རང་ལ་ཉེས་ཆད་གཅོད་པའི་རེ་བ་ཞུས།
ACT 25:16 ངས་དེ་རྣམས་ལ་འདི་ལྟར་སྨྲས་པ༌སྟེ། མི་སུ་ཞིག་ཡིན་ཡང་གྱོད་ཡ་དང་གཏུག་མཁན་གཉིས་ཀྱིས་གདོང་ཐུག་ནས་ར་སྤྲོད་མ་བྱས་པ༌དང༌། རང་ཉིད་གཏུགས་པའི་དོན་དེར་དག་འབུད་བྱེད་པའི་གོ་སྐབས་མ་བྱུང་སྔོན༌དུ། མི་དེར་ཉེས་ཆད་གཅོད་པ་ནི་རོ་མཱ་པའི་སྲོལ་མིན་ཞེས་བཤད་པ༌ཡིན།
ACT 25:17 དེ་ནས་གཏུག་མཁན་རྣམས་འདིར་སླེབས་པ་དང་ངས་དུས་འགྱངས་མ་བྱས༌པར། དེའི་ཕྱི་ཉིན་ང་རང་ཁྲིམས་དཔོན་གྱི་ཁྲིའི་སྟེང་དུ་བསྡད་ནས་མི་དེ་འཁྲིད་ཡོང་དགོས་པའི་བཀའ་བསྒོས་པ༌དང༌།
ACT 25:18 གཏུག་མཁན་རྣམས་ཡར་ལངས་ཏེ་ཁོ་རང་གཏུགས༌ཤིང༌། དེ་རྣམས་ཀྱིས་གཏུགས་པའི་དོན་དེ་དག་ནི་ངས་ཚོད་དཔག་བྱས་པའི་ཉེས་པ་དེའི་རིགས་ནི་མིན་ནོ།།
ACT 25:19 འོན༌ཀྱང༌། ཁོ་རྣམས་ཀྱི་བར་དུ་རང་གི་ཆོས་ལུགས་ཐད་ནས་རྩོད་པ༌འགའ་ཤས་བྱུང་བ་སྟེ། ཡེ་ཤུ་ཟེར་བའི་མི་ཞིག་ཡོད་པ་ཤི་ཟིན་ནའང་ཕོལ་ལོལ་གྱིས་དེ་གསོན་པོ་ཡིན་ཞེས་ཟེར།
ACT 25:20 ངས་དོན་འདིའི་རིགས་ལ་ཇི་ལྟར་རྩད་གཅོད་བྱེད་པ་མ་ཤེས་པས་ཁོ་ལ་འདི་ལྟར་དྲིས༌པ་སྟེ། ཁྱོད་རང་ཡེ་རུ་སཱ་ལེམ་དུ་སོང་ནས་བདག་གིས་ཁྱོད་ཀྱི་དོན་འདི་ཐག་བཅད་ན་ཁྱོད་རང་འཐད་དམ་ཞེས༌པའོ།།
ACT 25:21 འོན༌ཀྱང༌། ཕོལ་ལོལ་གྱིས་རང་ཉིད་འདི་རུ་བཙོན་དུ་བཅུག་ནས་བསྲུང་བ་དང་གོང་མ་རྒྱལ་པོས་ཁྲིམས་ཐག་གཅོད་པར་རེ་བ་ཞུས༌པས། ངས་ཀྱང་ཁོ་རང་སེ་བཟིར་གྱི་དྲུང་དུ་བསྐྱལ་བའི་བར་དུ་འདི་ནས་བཙོན་དུ་བཅུག་ནས་བསྲུང་དགོས་པའི་བཀའ་གནང་བ་ཡིན་ཞེས་སྨྲས་སོ།།
ACT 25:22 དེ་ནས་ཨག་རི་པཱས་སྤྱི་དཔོན་ཕེ་ཏི༌ལ། ང་རང་ཡང་མི་འདིའི་གཏམ་ལ་མཉན་པར་དགའ་ཞེས་སྨྲས་པ༌དང༌། ཕེ་ཏི་ན༌རེ། དེས་ན་སང་ཉིན་ཁྱེད་ཀྱིས་ཀྱང་གསན་པར་འགྱུར་ཞེས་སྨྲས༌སོ།།
ACT 25:23 དེའི་ཕྱི༌ཉིན། ཨག་རི་པཱ་དང་པུར་ནེ་ཀེ་གཉིས་བརྗིད་ཉམས་ཆེན་པོའི་ངང་ནས་ཕེབས༌ཤིང༌། སྟོང་དཔོན་དང་གྲོང་ཁྱེར་གྱི་སྐུ་དྲག་རྣམས་དང་མཉམ་དུ་ཚོགས་ཁང་དུ་ཕྱིན་པ༌དང༌། ཕེ་ཏིས་བཀའ་བསྒྲགས་པ་དང་ཕོལ་ལོལ་ཁྲིད་ཡོང༌བ་རེད།
ACT 25:24 དེ་ནས་ཕེ་ཏི་ན༌རེ། འདིར་བཞུགས་པའི་རྒྱལ་པོ་ཨག་རི་པཱ་དང་སྐུ་ཞབས་རྣམ༌པ། ཁྱེད་ཅག་གིས་གཟིགས༌དང༌། མི་འདི་ནི་བདག་ལ་ཡ་ཧུ་དཱ་པ་ཐམས་ཅད་ཀྱིས་ཡེ་རུ་སཱ་ལེམ་དང་གནས་འདི་ནས་ཁོ་རང་གསོན་པོར་བསྐྱུར་མི་རུང་ཞེས་ནན་ཞུ་བྱས་ཤིང་འུར་བརྒྱབ་པ་དེ་ཡིན།
ACT 25:25 འོན༌ཀྱང༌། ངས་མི་འདིར་སྲོག་ཆད་གཅོད་འོས་པའི་ཉེས་པ་ཅི་ཡང་མ་རྙེད་པ༌དང༌། ཁོས་གོང་མ་རྒྱལ་པོ་ལ་གཏུག་བཤེར་ཞུ་རྒྱུ་ཡིན་ཞེས་སྨྲས༌པས། ངས་ཀྱང་ཁོ་རང་གོང་མ་རྒྱལ་པོའི་དྲུང་དུ་གཏོང་རྒྱུ་ཐག་གིས་བཅད་དོ།།
ACT 25:26 བདག་ལ་མི་འདིའི་སྐོར་གྱི་གནས་ཚུལ་གསལ་པོ་ཞིག་ཡི་གེར་བཀོད་ནས་བདག་གི་རྗེ་བོར་འབུལ་རྒྱུ་མེད༌པས། ཁོ་རང་ཁྱེད་རྣམས་དང་ལྷག་པར་རྒྱལ་པོ་ཨག་རི་པཱ་ཁྱེད་ཀྱི་དྲུང་དུ་ཁྲིད་ཡོང༌ཞིང༌། དེ་ནི་མི་འདི་ལ་འདྲི་གཅོད་བྱས་རྗེས་ཡར་ཞུ་བྱེད་བདེ་བའི་ཆེད་དུ༌ཡིན།
ACT 25:27 ངས་བལྟས་ན་བཙོན་པ་ཞིག་ལ་ཉེས་པ་ཅི་ཡོད་པ་མ་བསྟན་པར་གོང་མ་རྒྱལ་པོའི་དྲུང་དུ་འཁྲིད་པ་ནི་གནས་ལུགས་དང་མི་མཐུན་ཞེས་སྨྲས༌སོ།།
ACT 26:1 དེ་ནས་ཨག་རི་པཱ་བྱ་བས་ཕོལ་ལོལ་ལ། ཁྱོད་ཀྱིས་རང་གི་རྒྱུ་མཚན་བཤད་ཆོག་ཅེས་སྨྲས་པ༌དང༌། ཕོལ་ལོལ་གྱིས་ལག་བརྡ་བྱེད་བཞིན་དག་འབུད་བྱེད་པའི་གཏམ་འདི་ལྟར་སྨྲས༌པ།
ACT 26:2 ཀྱེ། རྒྱལ་པོ་ཨག་རི་པཱ༌ལགས། ངས་དེ་རིང་གི་དུས་འདིར་ཡ་ཧུ་དཱ་པ་རྣམས་ཀྱིས་ང་རང་གཏུགས་པའི་དོན་དེ་ཐམས་ཅད་ཁྱེད་ཀྱི་དྲུང་དུ་དག་འབུད་བྱེད་ཐུབ་པ་ནི་དངོས་གནས་སྟབས་ལེགས༌པ་རེད།
ACT 26:3 དེ་ལས་ཀྱང་ཤིན་ཏུ་ལེགས་པ་ནི་ཁྱེད་ཀྱིས་ཡ་ཧུ་དཱ་པའི་ལུགས་སྲོལ་དང་ཁོ་རྣམས་ཀྱི་རྩོད་གླེང་གི་ནང་དོན་ཡང་རྟོགས་པས་ཁྱེད་ཀྱིས་ཐུགས་མི་སུན་པར་བདག་ལ་གསན་རོགས༌ཞུ།
ACT 26:4 ང་རང་ནི་ཆུང་དུས་ནས༌བཟུང༌། རང་ཡུལ་གྱི་མི་རྣམས་ཀྱི་ཁྲོད་དང་ཡེ་རུ་སཱ་ལེམ་དུ་སྤྱོད་ལམ་ག་འདྲ་ཡིན་པ་ཡ་ཧུ་དཱ་པ་ཐམས་ཅད་ཀྱིས་ཤེས༌པ་ཡིན།
ACT 26:5 གལ་ཏེ་ཁོ་རྣམས་ཀྱིས་བདེན་དཔང་བྱེད་འདོད༌ན། ང་ནི་སྔོན་ཆད་ངེད་ཅག་གི་ཆོས་ལུགས་ལྟར་ཆོས་ཁྲིམས་ཆེས་དམ་པོའི་ཕ་རུ་ཤི་པའི་གྲུབ་མཐའ་རུ་ཞུགས་མྱོང་བ་རྟོགས་སོ།།
ACT 26:6 ད་ལྟ་ངས་གནས་འདི་ནས་འདྲི་གཅོད་མྱོང་བ་ནི་དཀོན་མཆོག་གིས་བདག་ཅག་གི་ཕ་མེས་ལ་ཞལ་གྱིས་བཞེས་པར་རེ་སྨོན་བཅངས་པའི་ཕྱིར་ཡིན༌ཏེ།
ACT 26:7 ངེད་ཅག་ཚོ་པ་བཅུ་གཉིས་ཐམས་ཅད་ཀྱིས་ཉིན་མཚན་ཀུན་ཏུ་འབད་པ་ལྷུར་ལེན་སྒོས་དཀོན་མཆོག་ལ་བསྙེན་བཀུར་བྱས་ནས་ཞལ་བཞེས་དེ་འཐོབ་པར་རེ་སྨོན་བྱེད། རྒྱལ་པོ༌ལགས། ཡ་ཧུ་དཱ་པས་ང་རང་གཏུགས་པ་ནི་རེ་སྨོན་འདིའི་རྐྱེན་ཡིན།
ACT 26:8 དཀོན་མཆོག་གིས་གཤིན་པོ་རྣམས་སླར་གསོན་པར་མཛད་པའི་དོན་དེར་ཁྱོད་རྣམས་ཀྱིས་ཅིའི་ཕྱིར་ཡིད་རྟོན་མི་བྱེད་དམ།
ACT 26:9 སྔོན་ཆད་ངས་ཀྱང་ཕྱོགས་གང་མང་ནས་ནཱ་ཙ་རེལ་གྱི་ཡེ་ཤུའི་མཚན་ལ་ངོ་རྒོལ་བྱ་འོས་པར་སྙམ༌ཞིང༌།
ACT 26:10 ཡེ་རུ་སཱ་ལེམ་དུའང་དེ་ལྟར་བྱས་མྱོང༌སྟེ། མཆོད་དཔོན་ཆེན་པོ་རྣམས་ལས་དབང་ཆ་ཐོབ་པ་དང་དད་ལྡན་དམ་པ་མང་པོ་བཙོན་དུ་བཅུག་ཅིང་དེ་རྣམས་དམར་གསོད་བྱེད་པ་ལའང་ཡིད་འཐད་བྱུང་བ༌ཡིན།
ACT 26:11 ངས་ཆོས་ཁང་སོ་སོ་ནས་ཐེངས་མང་པོར་ལུས་ཆད་བཅད་པ་དང་བཙན་ཤེད་ཀྱིས་དེ་རྣམས་ལ་གཙོ་བོ་ཡེ་ཤུར་སྐུར་འདེབས་ཀྱི་གཏམ་སྨྲ་བར་བསྐུལ་བ༌དང༌། ཡང་དད་ལྡན་དམ་པ་དེ་རྣམས་ལ་ཞེ་སྡང་གིས་སྤྱོས་ཤིང་ཕྱི་ཕྱོགས་ཀྱི་གྲོང་ཁྱེར་དག་ལ་དེད་ནས་སོང་མྱོང༌ངོ་།།
ACT 26:12 སྐབས༌དེར། ངས་མཆོད་དཔོན་ཆེན་པོ་རྣམས་ཀྱི་དབང་ཆ་དང་བཀའ་དང་དུ་བླངས་ཏེ་དཱ་མེ་སེག་ཏུ་སོང་བ༌ཡིན།
ACT 26:13 རྒྱལ་པོ་ལགས། ལམ་དུ་ཆས་པའི་ཉིན་གུང་གི་དུས༌སུ། ངས་ནམ་མཁའི་ཞིང་ཁམས་ནས་ཉི་མ་ལས་ཀྱང་ཤིན་ཏུ་གསལ་བའི་འོད་ཅིག་འཕྲོས་པ་མཐོང༌ཞིང༌། འོད་དེ་ང་དང་ངའི་ལམ་གྲོགས་རྣམས་ཀྱི་ཕྱོགས་བཞིར་ཤར་ཏོ།།
ACT 26:14 དེ་མ་ཐག་ངེད་རྣམས་ས་རུ་འགྱེལ་བ་དང་ཨིབ་རིའི་མི་རིགས་ཀྱི་སྐད་ཀྱིས་བདག་ལ་འདི་སྐད༌དུ། ཀྱེ། སོ༌ལོ། སོ་ལོ། ཁྱོད་ཀྱིས་བདག་ལ་གནོད་འཚེ་བྱེད་དོན་ཅི་ཡིན༌ནམ། དབྱུག་ལྕག་ལ་རྡོག་ཐོས་བརྒྱབ་ན་ཁྱོད་ཀྱིས་དཀའ་ཞེས་པའི་སྐད་སྒྲ་ཞིག་གྲགས་པ་ཐོས༌བྱུང་ངོ༌།།
ACT 26:15 དེ་ནས་ངས་གཙོ་བོ༌ལགས། ཁྱེད་རང་སུ་ཡིན་ནམ་ཞེས་ཞུས་པ༌ན། གཙོ་བོས་འདི་སྐད༌དུ། བདག་ནི་ཁྱོད་ཀྱིས་གནོད་འཚེ་བྱེད་བཞིན་པའི་ཡེ་ཤུ་ཡིན།
ACT 26:16 ཁྱོད་ཡར་ལངས་ནས་སྡོད༌ཅིག ང་རང་ཆེད་དུ་ཁྱོད་ལ་མངོན་པར་བྱེད༌དེ། ཁྱོད་ཀྱིས་བདག་ལ་ཞབས་ཕྱི་བྱེད་པ༌དང༌། ཁྱོད་ཀྱིས་མཐོང་བའི་དོན་འདི་དག༌དང༌། ངས་རྗེས་སུ་ཁྱོད་ལ་སྟོན་པར་འགྱུར་བའི་དོན་ཐམས་ཅད་ལ་བདེན་དཔང་བྱེད་པར་བསྐོ་བའི་ཕྱིར༌ཡིན།
ACT 26:17 ཡང་ངས་ཁྱོད་རང་ཡ་ཧུ་དཱ་པ་དང་ཕྱི་ཕྱོགས་པ་རྣམས་ཀྱི་ལག་ནས་སྐྱོབ་ཅིང༌། ད་ལྟ་མི་དེ་རྣམས་ཀྱི་གམ་དུ་མངག་པར་བྱ༌སྟེ།
ACT 26:18 ཁྱོད་ཀྱིས་མི་དེ་རྣམས་ཀྱི་མིག་འབྱེད་པའི་ཕྱིར༌རོ།། དེ་ནས་དེ་རྣམས་མུན་པ་ལས་འོད་སྣང་གི་ཕྱོགས་སུ་འཁོར་བ༌དང༌། བདུད་སཱ་ཏན་གྱི་དབང་འོག་ནས་དཀོན་མཆོག་གི་ཕྱོགས་སུ་བསྒྱུར་བ༌དང༌། སྡིག་པ་བསལ་བ༌དང༌། བདག་ལ་དད་པའི་སྒོ་ནས་དམ་པར་གྱུར་པའི་མི་རྣམས་དང་ལྷན་དུ་བགོ་སྐལ་འཐོབ་པར་འགྱུར་ཞེས་གསུངས་མྱོང་ངོ་།།
ACT 26:19 རྒྱལ་པོ་ཨག་རི་པཱ༌ལགས། དེའི་ཕྱིར་ང་རང་ནམ་མཁའི་ཞིང་ཁམས་ལས་གནང་བའི་ཞལ་གཟིགས་དེ་དང་འགལ་མ་མྱོང༌།
ACT 26:20 ངས་ཐོག་མར་དཱ་མེ་སེག་དང༌། ཕྱིས་སུ་ཡེ་རུ་སཱ་ལེམ༌དང༌། ཡ་ཧུ་དཱའི་ཡུལ་ཐམས་ཅད༌དང༌། གཞན་ཡང་ཕྱི་ཕྱོགས་པ་རྣམས་ལ་ཆོས་བསྒྲགས༌ཏེ། དེ་རྣམས་ཀྱིས་འགྱོད་བཤགས་བྱེད་དགོས་པ་དང་རང་སེམས་དཀོན་མཆོག་གི་ཕྱོགས་སུ་འཁོར་བ༌དང༌། འགྱོད་བཤགས་ཀྱི་སེམས་དང་མཐུན་པའི་ལས་བྱེད་པར་བསྐུལ་ཏོ།།
ACT 26:21 དེའི༌ཕྱིར། ཡ་ཧུ་དཱ་པ་རྣམས་ཀྱིས་ང་རང་མཆོད་ཁང་གི་ནང་དུ་སྡོད་དུས་བཟུང་ནས་གསོད་པར་བརྩམས་མོད།
ACT 26:22 འོན༌ཀྱང༌། དཀོན་མཆོག་གིས་ང་རང་སྐྱབས་སུ་བཟུང་བས་དེ་རིང་གི་བར་དུ་བདག་ནི་གསོན་པོར་བསྡད་ཡོད་པ་དང་མི་མཐོ་དམན་རྒན་གཞོན་ཀུན་ལ་བདེན་དཔང་བྱེད་པ༌ཡིན། ངས་ལུང་སྟོན་པ་རྣམས་དང་མོ་ཤེ་ཡིས་གསུངས་པ་ལྟར་རྗེས་སུ་འབྱུང་ངེས་པའི་དོན་དེ་ཁོ་ན་སྨྲས་པ་ཡིན༌ལ།
ACT 26:23 དེ་ནི་སྐྱབས་མགོན་མཱ་ཤི་ཀས་སྡུག་བསྔལ་མྱང་དགོས་པ་དང་ཁོང་ནི་གྲོངས་པ་ནས་སླར་གསོན་པའི་ཐོག་མའང་ཡིན༌ཏེ། འོད་ཟེར་དང་ལྡན་པའི་བཀའ་དེ་ཡ་ཧུ་དཱ་པ་དང་ཕྱི་ཕྱོགས་པ་རྣམས་ལ་སྒྲོག་པར་འགྱུར་བ་དེ་ཡིན་ཞེས་གསུངས༌སོ།།
ACT 26:24 དེ་ནས་ཕོལ་ལོལ་གྱིས་དེ་ལྟར་དག་འབུད་བྱས་པ༌ལ། ཕེ་ཏིས་སྐད་ཆེན༌པོས། ཕོལ་ལོལ་ཁྱོད་རང་སྨྱོས་པ་མིན༌ནམ། ཁྱོད་ལ་ཡོན་ཏན་མང་དྲགས་པས་ཁྱོད་རང་སྨྱོས་པ་རེད་ཅེས་སྨྲས་པ༌དང༌།
ACT 26:25 ཡང་ཕོལ་ལོལ་གྱིས་འདི་སྐད༌དུ། གུས་པར་འོས་པའི་སྤྱི་དཔོན་ཕེ་ཏི༌ལགས། ང་རང་སྨྱོས་པ་མིན༌ཏེ། ངས་བདེན་གཏམ་གསལ་པོར་སྨྲས་པ་ཡིན།
ACT 26:26 རྒྱལ་པོ་ཁོང་གིས་ཀྱང་དོན་འདི་དག་རྟོགས་པས་ངས་སྙིང་སྟོབས་བསྐྱེད་ནས་འཛེམ་བག་མེད་པར་ཁོང་ལ་ཞུས་པ༌ཡིན། དོན་འདི་ཐམས་ཅད་ལྐོག་ཏུ་བསྒྲུབས་པ་མ་ཡིན་པས་རྒྱལ་པོ་ཁོང་ལ་སྦ་གསང་བྱས་པ་གཅིག་ཀྱང་མེད་པར་ང་རང་ཡིད་ཆེས༌ཟབ་མོ་ཡོད།
ACT 26:27 རྒྱལ་པོ་ཨག་རི་པཱ༌ལགས། ཁྱེད་རང་ལུང་སྟོན་པ་རྣམས་ལ་ཡིད་ཆེས༌སམ། ཁྱེད་རང་ཡིད་ཆེས་པ་བདག་གིས་ཤེས་ཞེས་གསུངས༌སོ།།
ACT 26:28 ཡང་ཨག་རི་པཱ་ན༌རེ། ཁྱོད་ཀྱིས་དུས་ཐུང་ངུ་ལ་བསྐུལ་བ་ཙམ་གྱིས་ང་རང་མཱ་ཤི་ཀ་པ་ཞིག་ཏུ་འགྱུར་འདོད་དམ་ཞེས་སྨྲས་པ༌ལ།
ACT 26:29 ཡང་ཕོལ་ལོལ་གྱིས་འདི་སྐད༌དུ། དུས་རིང་ཐུང་ཅི་ཙམ་ལ་བསྐུལ་ནའང་བདག་གིས་དཀོན་མཆོག་ལ་གསོལ་བ་འདེབས་པ་ནི་ཁྱེད་ཁོ་ནའི་ཆེད་དུ་མ་ཡིན༌པར། དེ་རིང་བདག་གི་གཏམ་ལ་ཉན་པ་ཐམས་ཅད་ཀྱི་ཆེད་དུ་ཡིན༌ཏེ། ཁྱོད་རྣམས་ལ་བདག་ལྟར་དུ་ལྕགས་སྒྲོག་མི་རྒྱག་པ་ལས་གཞན། བདག་དང་འདྲ་བར་གྱུར་ཅིག་ཅེས་གསུངས༌སོ།།
ACT 26:30 དེ་ནས་ས་གནས་རྒྱལ་པོ་དང་སྤྱི་དཔོན། གཞན་ཡང་པུར་ནེ་ཀེ་དང་མཉམ་དུ་སྡོད་པའི་མི་ཐམས་ཅད་ཡར་ལངས༌ཏེ།
ACT 26:31 ཟུར་དུ་བུད་ནས་ཕན་ཚུན་ན༌རེ། མི་འདིས་བཙོན་དུ་སྦྱོར་བ་དང་གསོད་དགོས་པའི་ཉེས་པ་གང་ཡང་བྱས་མེད་ཅེས་སྨྲས་སོ།།
ACT 26:32 དེ་ནས་ཨག་རི་པཱ་བྱ་བས་ཕེ་ཏི་ལ་འདི་ལྟར༌སྨྲས་པ། གལ་ཏེ་མི་འདིས་སེ་བཟིར་ལ་གཏུག་བཤེར་མ་ཞུས་ན་བཙོན་གྲོལ་བཏང་ཆོག་ཅེས་པའོ།།
ACT 27:1 དེ་ནས་ཕེ་ཏི་ཡིས་ངེད་རྣམས་གྲུ་གཟིངས་ལ་བསྡད་ནས་ཨི་ཏ་ལི་ཡུལ་དུ་འགྲོ་རུ་འཇུག་པར་ཐག་གིས་བཅད་པ༌ན། ཕོལ་ལོལ་དང་བཙོན་པ་གཞན་རྣམས་སེ་བཟིར་རྒྱལ་པོའི་དམག་དཔུང་གི་བརྒྱ་དཔོན་ཡུ་ལི་ཞེས་པ་ལ་སྤྲད་དོ།།
ACT 27:2 དེ་ཡང་ཨ་དྲ་མིད་ཅེས་པའི་གྲུ་ཁ་ནས་ཡོང་བའི་གྲུ་གཟིངས་ཤིག་ཨེ་ཞི་ཡཱ་ཡུལ་གྱི་མཚོ་འགྲམ་གྱི་གནས་རྣམས་བརྒྱུད་ནས་བསྐྱོད་པ༌ལ། ངེད་རྣམས་ཀྱང་གྲུ་དེར་བསྡད་ནས་འགྲོ་བར་བརྩམས་ཤིང་མ་ཀེ་དོན་ཡཱ་ཡུལ་གྱི་ཐེ་སཱ་ལོ་ནེ་ཀེ་གྲོང་ཁྱེར་གྱི་ཨ་རི་སྟར་ཀུའང་ངེད་ཅག་དང་མཉམ་དུ་ཕྱིན་ཏོ།།
ACT 27:3 དེའི་ཕྱི༌ཉིན། ཚི་ཏུན་དུ་སླེབས་པ་དང་ཡུ་ལི་བྱ་བས་ཕོལ་ལོལ་གུ་ཡངས་བཏང༌སྟེ། ཁོང་ཉིད་རང་གི་གྲོགས་པོའི་གམ་དུ་བདག་སྐྱོང་འཐོབ་པའི་ཕྱིར་འགྲོ་ཆོག་པར་བྱས་པ་ཡིན།
ACT 27:4 ཡང་དེ་ནས་གྲུ་གཟིངས་ལ་བསྡད་དེ་འགྲོ་བར་བརྩམས་པ༌ལ། ལྡོག་རླུང་དང་ཕྲད་པས་ཀིབ་རིས་ཀྱི་མཚོ་སྐྱིབས་བརྒྱུད་ནས་སོང༌ངོ་།།
ACT 27:5 དེ་ནས་ཀི་ལིག་ཡཱ་དང་ཕཱམ་ཕིལ་ཡ་ཡུལ་གཉིས་ཀྱི་མདུན་ཕྱོགས་ཀྱི་རྒྱ་མཚོ་བརྒལ་ནས་ལིག་ཡཱ་ཡུལ་གྱི་མུ་ར་བྱ་བར་སླེབས༌ཤིང༌།
ACT 27:6 གནས་དེ་ནས་བརྒྱ་དཔོན་གྱིས་ཨི་ཏ་ལི་ཡུལ་དུ་འགྲོ་བའི་ཨ་ལིག་སན་དྲི་ཡཱ་ཡི་གྲུ་གཟིངས་ཤིག་རྙེད་ཅིང་ངེད་རྣམས་ཀྱང་གྲུ་དེར་སྡོད་དུ་བཅུག་གོ།
ACT 27:7 དེ་ནས་ཉིན་མང་པོར་གྲུ་གཟིངས་དལ་གྱིས་བསྐྱོད་ཅིང་དཀའ་ཚེགས་ཀྱི་ངང་ནས་ཀེ་ནེ་ཏི་ཡི་མདུན་ཕྱོགས་སུ་སླེབས་པ༌དང༌། ཡང་མཚོ་རླུང་གི་བཀག་རྒྱ་ཐེབས་ཏེ་མདུན་དུ་འགྲོ་མ་ནུས༌པས། ཀཱ་རེ་ཏ་གླིང་ཕྲན་གྱི་མཚོ་སྐྱིབས་བརྒྱུད་ནས་སོང་བ༌དང་། སཱལ་མོ་ནེ་ཕར་ཕྱོགས་སུ་སྐྱོད་ཅིང་།
ACT 27:8 ངེད་རྣམས་ཀྱང་དཀའ་ཚེགས་ངང་མཚོ་འགྲམ་བརྒྱུད་ནས་སོང་བ༌དང༌། གྲོང་ཁྱེར་ལཱ་ས་ཡ་དང་ཉེ་བའི་བདེ་ཅན་ཞེས་པའི་གྲུ་ཁར་སླེབས་སོ།།
ACT 27:9 དེ་ལྟར་དུས་ཡུན་རིང་པོ་འགོར་བ་དང་སྨྱུང་གནས་དུས་ཆེན་གྱི་ཉིན་ཡང་སྔར་ནས་བརྒལ་བ༌དང༌། གྲུ་གཟིངས་བསྐྱོད་པ་ལའང་ཉེན་ཁ་ཡོད་པས་ཕོལ་ལོལ་གྱིས་མི་རྣམས་ལ་འདི་ལྟར་བསྐུལ་བ་སྟེ།
ACT 27:10 རྣམ་པ་ཚོ། ཐེངས་འདིར་གྲུ་གཟིངས་བསྐྱོད་པ་ལ་ཉེན་ཁ་ཆེ༌སྟེ། ཚོང་རྫས་དང་གྲུ་གཟིངས་ལ་གྱོང་གུད་དང་གཏོར་བཤིག་ཐེབས་ངེས༌ཤིང༌། ཐ་ན་བདག་ཅག་གི་ཚེ་སྲོག་ལའང་བར་ཆད་འབྱུང་ངེས་པར་བསམ་ཞེས་སྨྲས༌མོད།
ACT 27:11 འོན་ཀྱང་བརྒྱ་དཔོན་ནི་གྲུ་གཟིངས་གཏོང་མཁན་དང་གྲུ་བདག་ལ་ཡིད་ཆེས་པ་ལས་ཕོལ་ལོལ་གྱི་གསུང་ལ་ཡིད་མ་ཆེས།
ACT 27:12 གྲུ་ཁ་འདི་ནས་དགུན་བསྐྱལ་ན་མི་ལེགས་པས་གྲུ་གཟིངས་ནང་གི་མི་མང་ཤོས་ན༌རེ། ཅི་ལྕོགས་ཀྱིས་གནས་འདི་དང་ཁ་བྲལ་ནས་ཕེ་ནིག་ཅེས་པའི་གྲུ་ཁར་སོང་ན་ལེགས་ཞེས་གཏམ༌སྨྲས། ཕེ་ནིག་ཅེས་པ་ནི་ཀཱ་རེ་ཏ་ཡི་གྲུ་ཁ་ཞིག་སྟེ་སྣེ་མོ་གཅིག་ནི་ལྷོ་ནུབ་ཀྱི་མཚམས་དང་གཅིག་ནི་ནུབ་བྱང་གི་ཕྱོགས་སུ་འཁོར་ཡོད༌དོ།།
ACT 27:13 དུས༌དེར། ལྷོ་རླུང་དལ་གྱིས་ལྡང་བ་དང་ཁོ་རྣམས་ཀྱིས་བསམ་དོན་གྲུབ་བོ་སྙམ༌སྟེ། གཏིང་རྡོ་བླངས་ནས་ཀཱ་རེ་ཏ་ཡི་ཉེ་སར་འགྲོ་བཞིན་ཡོད་དོ།།
ACT 27:14 དེ་ནས་ཅང་མ་འགོར་བར་གླིང་ཕྲན་གྱི་ངོས་ནས་ཨེའུ་ར་ཀི་ལོ་ཞེས་པའི་ཤར་བྱང་གི་དྲག་རླུང་གཡུགས་སོ།།
ACT 27:15 ཡང་གྲུ་གཟིངས་རླུང་ཆེན་དྲག་པོའི་དབང་དུ་སོང་བ༌དང༌། རླུང་གི་ཕྱོགས་སུ་གྲུ་ལ་ཁ་ལོ་བསྒྱུར་མ་ནུས་པས་རླུང་གིས་གང་སར་དེད་དོ།།
ACT 27:16 དེ་ནས་ཀོ་ཏཱ་ཞེས་པའི་གླིང་ཕྲན་ཆུང་ངུ་ཞིག་གི་མཚོ་སྐྱིབས་སུ་ཁུར་ཞིང་། གྲུ་གཟིངས་ཀྱི་རྗེས་སུ་དྲུད་པའི་གྲུ་ཆུང་ཡང་དཀའ་ཚེགས་ངང་འཛིན་ཐུབ་པ་བྱུང་།
ACT 27:17 གྲུ་ཆུང་བླངས་པའི་རྗེས་སུ་གྲུ་ཆེན་གྱི་ཞབས་ཐག་པས་བསྡམས་པ༌དང༌། ཡང་སིར་ཏི་ཞེས་པའི་མཚོ་ཞབས་ཀྱི་བྱེ་འདམ་དུ་གྲུ་གཟིངས་ཟུག་པར་དོགས་ནས་གཡོར་མོ་མར་ཕབ་སྟེ་གྲུ་གཟིངས་གང་སར་བསྐྱོད་དུ་བཅུག་གོ།
ACT 27:18 དེའི་ཕྱི༌ཉིན། རླུང་ཆེན་དྲག་པོས་གྲུ་གཟིངས་ཡོམ་ཡོམ་དུ་གཡུགས༌པས། མི་རྣམས་ཀྱིས་ཚོང་རྫས་མཚོ་ནང་དུ་འཕང་བར་བརྩམས་པ༌དང༌།
ACT 27:19 ཉིན་གསུམ་པར་ཡང་ཁོ་རྣམས་ཀྱིས་གྲུ་གཟིངས་སྟེང་གི་ཡོ་བྱད་རྣམས་ཀྱང་དངོས་སུ་མཚོ་ནང་དུ་འཕངས་སོ།།
ACT 27:20 དེ་ལྟར་ཉི་མ་དང་སྐར་མ་མ་མཐོང་བར་ཉིན་མང་པོ་འགོར་བ་དང་རླུང་འཚུབ་དྲག་པོས་ཀྱང་ངེད་རྣམས་སྡུག་ལ་སྦྱར་བས་སྲོག་ཐར་བའི་རེ་བ་ཡོངས་སུ་ཟད་དོ།།
ACT 27:21 དེ་ནས་མི་རྣམས་ཀྱིས་ཉིན་མང་པོར་བཟའ་བཏུང་ཡང་སྤྱད་མེད༌པས། ཕོལ་ལོལ་དེ་དག་གི་དཀྱིལ་ནས་ཡར་ལངས་ཏེ་འདི་སྐད༌དུ། རྣམ་པ་ཚོ། ཁྱོད་རྣམས་ཀྱིས་སྔར་ནས་བདག་གི་གཏམ་ལ་མཉན༌ཏེ། ཀཱ་རེ་ཏ་རུ་བསྡད་པ་ཡིན་ན་འདི་ལྟ་བུའི་གྱོང་གུད་དང་གཏོར་བཤིག་བྱུང་མེད་དོ།།
ACT 27:22 ངས་ད་ལྟའང་ཁྱོད་རྣམས་ཀྱི་སེམས་བདེ་བར་བསྐུལ༌ཏེ། གྲུ་གཟིངས་ཁོ་ན་མ་གཏོགས་ཁྱོད་རྣམས་ཀྱི་ཚེ་སྲོག་གཅིག་ཀྱང་འཆོར་བར་མི་འགྱུར།
ACT 27:23 ཅིའི་ཕྱིར་ཞེ་ན། བདག་ནི་དཀོན་མཆོག་ལ་གཏོགས་པ་དང་ངས་ཁོང་ལ་བསྙེན་བཀུར་བྱེད༌ཅིང༌། ཁོང་གི་ཕོ་ཉ་ཞིག་མདང་དགོང་བདག་གི་གམ་དུ་ཕེབས་ཏེ་འདི་སྐད༌དུ།
ACT 27:24 ཕོལ་ལོལ་ཁྱོད་རང་འཇིགས་མི་དགོས༌ཏེ། ཁྱོད་རང་ཅིས་ཀྱང་སེ་བཟིར་གྱི་མདུན་དུ་ལངས་དགོས་པ་ཡིན། ལྟོས༌དང༌། ཁྱོད་དང་མཉམ་དུ་གྲུ་གཟིངས་ནང་དུ་ཡོད་པའི་མི་ཐམས་ཅད་ཀྱང་དཀོན་མཆོག་གིས་སྐྱོབ་པར་མཛད་ཅེས་གསུངས་པའི་ཕྱིར༌རོ།།
ACT 27:25 དེའི༌ཕྱིར། ཁྱོད་རྣམས་ཀྱི་སེམས་བདེ་བར༌གྱིས། དཀོན་མཆོག་གིས་བདག་ལ་ཇི་ལྟར་གསུངས་པ་དེ་ལྟར་འགྲུབ་པར་མཛད་པ་ལ་ང་རང་ཡིད་ཆེས༌པ་ཡིན།
ACT 27:26 འོན༌ཀྱང༌། བདག་ཅག་གི་གྲུ་འདི་ངེས་པར་གླིང་ཕྲན་ཞིག་ལ་ཐོགས་པར་འགྱུར་ཞེས་གསུངས༌སོ།།
ACT 27:27 རླུང་ཆེན་གཡུགས་ནས་ཉིན་བཅུ་བཞི་པའི་མཚན་མོ་དེར་གྲུ་གཟིངས་ཀྱང་ཨ་དྲི་ཡཱ་རྒྱ་མཚོའི་སྟེང་ནས་ཡོམ་ཡོམ་དུ་འགུལ་ཏོ།། ནམ་ཕྱེད་ཙམ་ལ་གྲུ་པ་དག་གིས་སྐམ་ས་དང་ཉེ་བར་སླེབས་པ་རེད་སྙམ༌སྟེ།
ACT 27:28 རྒྱ་མཚོའི་ཟབ་ཚད་འཇལ་བ་ན་འདོམ་ཉི་ཤུ་ཡོད་པ༌དང༌། ཡང་གྲུ་གཟིངས་ཅུང་ཙམ་མདུན་དུ་བསྐྱོད་པ་དང་ཟབ་ཚད་འཇལ་བ་ན་འདོམ་བཅོ་ལྔ་ཡོད་པ་ཤེས༌ཏེ།
ACT 27:29 གྲུ་གཟིངས་རྡོ་ཕ་བོང་ལ་ཐོགས་པར་འཇིགས་ཏེ་གྲུའི་མཇུག་ནས་གཏིང་རྡོ་བཞི་མཚོ་ནང་དུ་འཕངས་རྗེས་ནམ་ལངས་པར་རེ་སྒུག་བྱས་སོ།།
ACT 27:30 དེ་ནས་གྲུ་པ་རྣམས་གྲུ་གཟིངས་ལས་འབྲོ་བར་བསམས༌ཏེ། གྲུ་ཆུང་ཞིག་མཚོ་ནང་དུ་དཔྱངས་པ་དང་གྲུའི་མགོ་ནས་ཀྱང་གཏིང་རྡོ་འགའ་འཕེན་ཁུལ་བྱས་པ༌ལ།
ACT 27:31 ཕོལ་ལོལ་གྱིས་བརྒྱ་དཔོན་དང་དམག་མི་རྣམས་ལ་འདི་སྐད༌དུ། གལ་ཏེ་མི་འདི་རྣམས་གྲུ་གཟིངས་ཀྱི་སྟེང་ནས་མ་བསྡད༌ན། ཁྱོད་ཅག་སུ་ཡིན་ཡང་ཉེན་ཁ་ལས་ཐར་མི་ཐུབ་ཅེས་གསུངས༌པས།
ACT 27:32 དམག་མི་རྣམས་ཀྱིས་གྲུ་ཆུང་གི་ཐག་པ་བཅད་དེ་ཆུར་བཏང༌ངོ༌།།
ACT 27:33 དེ་ནས་སྐྱ་རེངས་ཤར་བའི་དུས༌སུ། ཕོལ་ལོལ་གྱིས་མི་ཀུན་ལ་བཟའ་བཏུང་སྤྱོད་འོས་ཚུལ་འདི་ལྟར་བསྐུལ་བ་སྟེ། ཁྱོད་རྣམས་བཀྲེས་ཤིང་ལྟོགས་ནའང་སེམས་ཁྲལ་བྱས་ནས་བཟའ་བཏུང་མ་སྤྱད་པར་ཉིན་བཅུ་བཞི་སོང༌།
ACT 27:34 དེའི༌ཕྱིར། ངས་ཁྱོད་རྣམས་ལ་བཟའ་བཏུང་སྤྱོད་པར་བསྐུལ༌ཏེ། འདི་ནི་ཁྱོད་ཅག་གི་སྲོག་སྐྱོབ་པའི་ཕྱིར་ཡིན། རྒྱུ་མཚན་ནི་ཁྱོད་ཅག་གི་སྐྲའི་ཉག་མ་གཅིག་ལའང་གནོད་པ་མི་འབྱུང་ཞེས་གསུངས་སོ།།
ACT 27:35 ཕོལ་ལོལ་གྱིས་དེ་སྐད་གསུངས་པ་དང་བག་ལེབ་ཅིག་བླངས་ཏེ། མི་རྣམས་ཀྱི་མདུན་ནས་དཀོན་མཆོག་ལ་བཀའ་དྲིན་ཞུས་ཤིང་དུམ་བུར་བྱས་ནས་ཟོས་པ༌དང༌།
ACT 27:36 མི་ཐམས་ཅད་ཀྱང་སེམས་བདེ་བར་གྱུར་ཏེ་བག་ལེབ་ཟོས།
ACT 27:37 ངེད་ཅག་གི་གྲུ་གཟིངས་ནང་དུ་བསྡོམས་པས་མི་ཉིས་བརྒྱ་དང་བདུན་ཅུ་དོན་དྲུག་ཡོད༌ཅིང༌།
ACT 27:38 ཁོ་རྣམས་ཀྱི་ལྟོ་བ་འགྲངས་རྗེས་གྲུ་གཟིངས་ཇེ་ཡང་དུ་གཏོང༌ཆེད། གྲུ་གཟིངས་ནང་གི་གྲོ་ནི་རྒྱ་མཚོའི་ནང་དུ་འཕངས་སོ།།
ACT 27:39 དེ་ནས་ནམ་ལངས་པ་ན་ཁོ་རྣམས་ཀྱིས་གནས་དེ་གང་ཡིན་མ་ཤེས་ཀྱང་བྱེ་མ་ཡོད་པའི་མཚོ་ཁུག་ཅིག་མཐོང་བ༌དང༌། གྲུ་གཟིངས་དེ་རུ་བསྐྱོད་ཐུབ་མིན་ལ་བལྟ་བར་གྲོས་བྱས་ཏེ་ཐག་བཅད་དོ།།
ACT 27:40 དེ་ནས་གཏིང་རྡོ་དག་བཀྲོལ་ནས་མཚོ་ནང་དུ་བསྐྱུར་བ་དང་མཉམ༌དུ། གྲུ་སྐྱའི་ཐག་པ་ལྷོད་ཅིང་གཡོར་མོ་བསྒྲེངས་ཏེ་རླུང་དང་བསྟུན་ནས་མཚོ་འགྲམ་གྱི་ཕྱོགས་སུ་བསྐྱོད་དོ།།
ACT 27:41 འོན༌ཀྱང༌། གློ་བུར་ཉིད་ལ་ཆུ་འཁོར་གཉིས་ཀྱི་བར་དུ་གྲུ་གཟིངས་བྱེ་འདམ་ནང་དུ་ཟུག་སྟེ། གྲུ་མགོ་འགུལ་རྒྱུ་མེད་པར་གྱུར་ཅིང་གྲུ་མཇུག་མཚོ་རླབས་དྲག་པོས་གཏོར་བའོ།།
ACT 27:42 དེ་ནས་བཙོན་པ་རྣམས་ཆུ་ལ་རྐྱལ་ནས་འབྲོ་བར་དོགས་ཏེ་དམག་མི་རྣམས་ཀྱིས་དེ་དག་གསོད་དགོས་པར་སྙམ་མོད།
ACT 27:43 འོན༌ཀྱང༌། བརྒྱ་དཔོན་གྱིས་ཕོལ་ལོལ་སྐྱོབ་བསམས་ནས་དམག་མི་དག་གི་ལྟ་ཚུལ་བཀག་སྟེ། ཆུ་ལ་རྐྱལ་ཤེས་པ་རྣམས་སྔོན་ལ་ཆུའི་ནང་དུ་མཆོངས་ནས་སྐམ་སར་འགྲོ་བ༌དང༌།
ACT 27:44 གཞན་རྣམས་ཤིང་ལེབ་དང་གྲུའི་སྟེང་གི་བཀོལ་ཐུབ་པའི་དངོས་པོ་རྩག་རྩིག་ལ་བརྟེན་ནས་སྐམ་སར་འགྲོ་དགོས་པའི་བཀའ་གནང༌བས། ངེད་ཐམས་ཅད་དེ་ལྟར་ཉེན་ཁ་ལས་ཐར་ཏེ་སྐམ་སར་སོང༌ངོ༌།།
ACT 28:1 ངེད་རྣམས་ཉེན་ཁ་ལས་ཐར་བ་དང་ད་གཟོད་གླིང་ཕྲན་དེའི་མིང་ལ་མཱལ་ཏ་ཞེས་ཟེར་བ་ཤེས་སོ།།
ACT 28:2 གླིང་ཕྲན་དེའི་ཡུལ་མི་རྣམས་ཀྱིས་ངེད་ཅག་ལ་དགའ་བསུ་ཆེན་པོ༌བྱས་ཤིང་། དུས༌དེར། ཆར་བ་བབས་པ་དང་གནམ་གཤིས་ཀྱང་འཁྱགས་པས་མི་དེ་རྣམས་ཀྱིས་མེ་སྦར་ནས་ངེད་ཅག་ལ་སྣེ་ལེན་བྱས་སོ།།
ACT 28:3 སྐབས༌དེར། ཕོལ་ལོལ་གྱིས་མེ་ཤིང་ཕོན་པོ་ཞིག་བླངས་ནས་མེའི་སྟེང་དུ་བཞག་པ་དང་། དུག་སྦྲུལ་ཞིག་ཚ་བས་མ་བཟོད་པར་ཕྱིར་ཐོན་ཏེ་ཁོང་གི་ཕྱག་ལ་སོ་བཏབ་ནས་འབྱར་བ་རེད།
ACT 28:4 ཡུལ་མི་རྣམས་ཀྱིས་དུག་སྦྲུལ་དེ་ཁོང་གི་ཕྱག་ནས་མར་དཔྱངས་ཡོད་པ་མཐོང་སྟེ་ཕན་ཚུན་ན༌རེ། མི་འདི་ནི་ལག་དམར་ཞིག་ཡིན་པར་གདོན་མི་ཟ༌སྟེ། ཁོ་རང་རྒྱ་མཚོ་ལས་ཐར་ནའང་བདེན་ལུགས་ཀྱིས་ཁོ་རང་གསོན་དུ་མི་འཇུག་ཅེས་སྨྲས་སོ།།
ACT 28:5 འོན༌ཀྱང༌། ཕོལ་ལོལ་གྱིས་དུག་སྦྲུལ་དེ་མེའི་ནང་དུ་གཡུགས་ཤིང་རང་ལ་གནོད་པ་ཅི་ཡང་མ་བྱུང༌བ་རེད།
ACT 28:6 ཡུལ་མི་རྣམས་ཀྱིས་ཁོང་གི་ལུས་པོ་སྐྲངས༌པའམ། ཡང་ན་གློ་བུར་ས་ལ་འགྱེལ་ནས་འཆི་ངེས་པར་སྙམ༌ཞིང༌། ཡུན་རིང་ལ་བལྟས་ཀྱང་ཁོང་ལ་གནོད་པ་ཅི་ཡང་མེད་པ་མཐོང༌རྗེས། བློ་འགྱུར་ནས་ཁོང་ནི་ལྷ་ཞིག་རེད་ཅེས་སྨྲས་སོ།།
ACT 28:7 གནས་དེ་དང་ཐག་མི་རིང་བའི་སར། གླིང་ཕྲན་འདིའི་འགོ་དཔོན་ཕུབ་ལེ་ཨོ་བྱ་བའི་ས་ཞིང་ཞིག་ཡོད༌ཅིང༌། ཁོས་ངེད་ཅག་བསུས་ཏེ་ཉིན་གསུམ་ལ་སྣེ་ལེན་གཟབ་རྒྱས་བྱས།
ACT 28:8 དུས༌དེར། ཕུབ་ལེ་ཨོ་ཡི་ཕ་ལ་ཚ་ནད་དང་བཤལ་ནད་བྱུང་སྟེ་ཉལ་ཡོད༌པས། ཕོལ་ལོལ་ཁྱིམ་ནང་དུ་ཕེབས་ནས་དཀོན་མཆོག་ལ་གསོལ་བ་བཏབ༌ཅིང༌། ཁོའི་ལུས་ལ་ཕྱག་ཟུང་བཞག་སྟེ་ནད་གསོས་སོ།།
ACT 28:9 དེ་ནས་གླིང་ཕྲན་སྟེང་གི་ནད་པ་གཞན་རྣམས་ཀྱང་ཡོང་བ་དང་ནད་ལས་ཐར་བ་རེད།
ACT 28:10 མི་དེ་རྣམས་ཀྱིས་གང་ཅིའི་ཐད་ནས་ངེད་ཅག་ལ་གུས་པ་བྱས་ཤིང༌། གྲུ་གཟིངས་སྐྱོད་རན་པའི་དུས་སུའང་ངེད་ཅག་ལ་མཁོ་བ་ཐམས་ཅད་གྲུའི་ནང་དུ་བསྐྱལ་ཡོང༌ངོ༌།།
ACT 28:11 དེ་ནས་ཟླ་བ་གསུམ་འགོར༌རྗེས། ངེད་རྣམས་ཨ་ལིག་སན་དྲི་ཡཱ་ཡི་གྲུ་གཟིངས་ལ་བསྡད་དེ་སོང་བ་ཡིན། གྲུ་དེའི་གྲུ་མགོར་ལྷའི་བུ་མཚེ་མ་ ཞེས་པའི་རྟགས་བཀོད༌ཡོད། དགུན་ཁར་གྲུ་གཟིངས་དེ་གླིང་ཕྲན་འདི་རུ་བསྡད་ཅིང་།
ACT 28:12 དེ་ནས་སི་ར་ཀུར་སླེབས་ནས་ཉིན་གསུམ་ལ་བསྡད་དོ།།
ACT 28:13 ཡང་དེ་ནས་མཚོ་ལམ་བརྒྱུད་དེ་རཱ་ག་ཨུམ་དུ་སླེབས་ནས་ཉིན་གཅིག་ལ་བསྡད་པ་དང་ལྷོ་རླུང་གཡུགས༌པས། དེའི་ཕྱི༌ཉིན་ཕུ་ཏོ་ལེ་རུ་ཕྱིན་པ་རེད།
ACT 28:14 གནས་དེར་སྤུན་ཟླ་རྣམས་དང་ཕྲད་ཅིང་ཁོ་རྣམས་ཀྱི་གདན་ཞུ༌ལྟར། ངེད་རྣམས་ཉིན་བདུན་ལ་ཁོ་རྣམས་དང་མཉམ་དུ་བསྡད་རྗེས་རོ་མཱ་ཡི་ལམ་ལ་ཆས་སོ།།
ACT 28:15 དེ་ནས་རོ་མཱ་ཡི་སྤུན་ཟླ་རྣམས་ཀྱིས་ངེད་ཅག་གི་གནས་ཚུལ་ཐོས༌ཏེ། ཨ་ཕེ་ཨོ་ཁྲོམ་ར་དང་མགྲོན་ཁང་གསུམ་ཞེས་པའི་གནས་སུ་ཡོང་ནས་ངེད་ཅག་ལ་བསུ་བ་བྱས། དེ་ནས་ཕོལ་ལོལ་གྱིས་མི་དེ་རྣམས་མཐོང་སྟེ་དཀོན་མཆོག་ལ་བཀའ་དྲིན་ཞུས་པ་དང་བློ་སེམས་བདེ་ཞིང་སྤོབས་པ་དང་ལྡན་པར་གྱུར་ཏོ།།
ACT 28:16 དེ་ནས་རོ་མཱ་གྲོང་ཁྱེར་དུ་སླེབས་པ་དང་ཕོལ་ལོལ་ལ་ཆོག་མཆན་ཐོབ་སྟེ། སྲུང་དམག་གཅིག་དང་མཉམ་དུ་མི་སྒེར་གྱི་ཁང་པ་ཞིག་ལ་སྡོད་དུ་བཅུག༌གོ།
ACT 28:17 དེ་ནས་ཉིན་གསུམ་འགོར༌རྗེས། ཕོལ་ལོལ་གྱིས་ཡ་ཧུ་དཱ་པའི་དཔོན་རིགས་རྣམས་བོས་ཤིང་དེ་རྣམས་ལྷན་དུ་འདུས་ཚེ་འདི་སྐད༌དུ། སྤུན་ཟླ༌རྣམ་པ། ངས་རང་རེའི་ཡུལ་གྱི་མི་རྣམས་དང་བདག་ཅག་གི་ཕ་མེས་ཀྱི་ལུགས་སྲོལ་དང་འགལ་བའི་ལས་ཅི་ཡང་མ་བྱས༌ཀྱང༌། ང་རང་ཡེ་རུ་སཱ་ལེམ་ནས་བཙོན་དུ་བཅུག་ཅིང་རོ་མཱ་པའི་ལག་ཏུ་སྤྲད་པ༌དང༌།
ACT 28:18 ང་རང་ལ་སྲོག་ཆད་གཅོད་དགོས་པའི་ཉེས་པ་ཅི་ཡང་མེད༌པས། དེ་དག་གིས་འདྲི་གཅོད་བྱས་རྗེས་ང་རང་བཙོན་ལས་དགྲོལ་བར་བསམས༌ནའང༌།
ACT 28:19 ཡ་ཧུ་དཱ་པ་རྣམས་ཀྱིས་དོན་དེར་དགྲ་བྱས༌པས། ངས་ཀྱང་སེ་བཟིར་ལ་གཏུག་བཤེར་མི་ཞུ་ཀ་མེད༌བྱུང༌། འོན༌ཀྱང༌། རང་གི་མི་རིགས་གཏུག་བཤེར་བྱེད་པའི་དོན་ཅི་ཡང༌མེད་དོ།།
ACT 28:20 དེའི༌ཕྱིར། ངས་ཁྱོད་རྣམས་བོས་ཏེ་ཁ་རི་ཁ་ཐུག་ཏུ་གཏམ་སྨྲ་བར་འདོད། སྤྱིར་ང་རང་ནི་ཡེས་ར་ཨེལ་གྱི་མི་རྣམས་ཀྱི་རེ་བ་དེའི་ཆེད་དུ་ལྕགས་སྒྲོག་གིས་བཀྱིགས་པ་ཡིན་ཞེས་གསུངས་པ༌ན།
ACT 28:21 དེ་རྣམས་ན༌རེ། ངེད་ཅག་ལ་ཡ་ཧུ་དཱའི་ཡུལ་ནས་ཁྱོད་ཀྱི་སྐོར་གླེང་བའི་འཕྲིན་ཡིག་མ་འབྱོར༌ལ། གནས་འདིར་ཡོང་བའི་སྤུན་ཟླ་གཞན་གྱིས་ཀྱང་ཁྱོད་ཀྱི་སྐོར་ལ་གཏམ་ངན་སྨྲས་པ་མེད།
ACT 28:22 འོན་ཀྱང་ངེད་རྣམས་ཀྱིས་ད་ལྟ་ཁྱོད་ཀྱི་བསམ་འཆར་ག་འདྲ་ཡིན་པར་མཉན་འདོད༌དེ། རྒྱུ་མཚན་ནི་ཆོས་ལུགས་གྲུབ་མཐའ་དེ་ལ་ཡུལ་ཀུན་གྱི་མི་རྣམས་ཀྱིས་དམའ་འབེབས་བྱེད་བཞིན་ཡོད་པ་ངེད་ཅག་གིས་ཤེས་པ་ཡིན་ཞེས་སྨྲས༌སོ།།
ACT 28:23 དེ་ནས་དཔོན་རིགས་རྣམས་ཀྱིས་ཕོལ་ལོལ་དང་ཉི་ཆད་བགོས༌ཤིང༌། ཉིན་དེར་མི་མང་པོའང་ཁོང་གི་ཤག་ཏུ་ཡོང་བ༌དང༌། ཕོལ་ལོལ་གྱིས་ཞོགས་པའི་དུས་ནས་མཚན་མོའི་བར་དུ་དོན་རྣམས་འགྲེལ་ཞིང་དཀོན་མཆོག་གི་རྒྱལ་སྲིད་ལ་བདེན་དཔང་བྱས་པ༌དང༌། མོ་ཤེའི་བཀའ་ཁྲིམས་དང་ལུང་སྟོན་པ་རྣམས་ཀྱི་མདོ་ལས་སྐྱབས་མགོན་ཡེ་ཤུའི་སྐོར་གྱི་ཆོས་གསུངས་ཏེ་ཁོ་རྣམས་ལ་སྐུལ་མ་མཛད་དོ།།
ACT 28:24 ཁོང་གི་གསུང་དེར་ལ་ལ་ཡིད་ཆེས་ཤིང་ལ་ལ་ཡིད་མ་ཆེས་སོ།།
ACT 28:25 དེ་རྣམས་ཕན་ཚུན་ལྟ་བ་མ་མཐུན་པར་སོ་སོར་གྱེས༌ཤིང༌། སོ་སོར་མ་གྱེས་པའི་སྔོན་ལ་ཕོལ་ལོལ་གྱིས་འདི་སྐད༌དུ། དམ་པའི་ཐུགས་ཉིད་ཀྱིས་ལུང་སྟོན་པ་ཡེ་ཤ་ཡཱ་བརྒྱུད་ནས་ཁྱོད་ཅག་གི་ཕ་མེས་ལ་ལེགས་པར་གསུངས༌ཤིང༌།
ACT 28:26 འདི་སྐད༌དུ། ཁྱོད་ཀྱིས་མི་རྣམས་དེ་ལ་འདི་ལྟར༌ཤོད།། ཁྱོད་ཚོས་རྣ་བས་ཐོས་ཀྱང་དོན་མི༌རྟོགས།། འདྲེན་བྱེད་མིག་གིས་མཐོང་ཡང་ཤེས་མི༌འགྱུར།།
ACT 28:27 དེ་རྣམས་སེམས་ནི་གྱོང་པོར་གྱུར་པ༌དང༌།། རྣ་བས་མི་མཉན་མིག་ཟུང་བཙུམས་པས༌སོ།། དེ་ལྟར་མིན་ཚེ་མིག་གིས་མཐོང་བ་དང་༎ རྣ་བས་ཐོས༌ཤིང་བློ་ཡིས་རྟོགས་པ་དང་༎ ཕྱིར་དུ་འཁོར་ནས་ངས་ཀྱང་དེ་རྣམས་ནི༎ གསོ་ཞིང་དྲག་པར་བྱེད་པ་ཡིན་ལགས་སོ༎ ཞེས༌པའོ།།
ACT 28:28 དེའི༌ཕྱིར། དཀོན་མཆོག་གི་ཐར་པའི་ཆོས་འདི་ནི་ད་ལྟ་ཕྱི་ཕྱོགས་པ་རྣམས་ལ་གསུངས༌ཤིང༌། དེ་རྣམས་ཀྱིས་ཀྱང་མཉན་ཞིང་དང་དུ་ལེན་ངེས་པ་ཁྱོད་ཅག་གིས་ཤེས་དགོས་ཞེས་གསུངས་སོ།།
ACT 28:29 ཁོང་གིས་དེ་སྐད་གསུངས་པ་དང་ཡ་ཧུ་དཱ་པ་རྣམས་ཀྱིས་དོན་དེར་རྩོད་གླེང་ཆེན་པོ་བྱེད་བཞིན་སོང༌ངོ༌།།
ACT 28:30 དེ་ནས་ཕོལ་ལོལ་མཆོག་རང་གིས་གླས་པའི་ཁང་པ་ནས་ལོ་གཉིས་ཏག་ཏག་ལ་བཞུགས༌ཤིང༌། རང་གི་ཁང་པའི་ནང་དུ་ཡོང་བའི་མི་ཐམས་ཅད་ལ་སྣེ་ལེན་བྱས་པ༌དང༌།
ACT 28:31 སྙིང་རུས་བསྐྱེད་ནས་དཀོན་མཆོག་གི་རྒྱལ་སྲིད་ཀྱི་ཆོས་བསྒྲགས་པ༌དང༌། གཙོ་བོ་ཡེ་ཤུ་མཱ་ཤི་ཀའི་སྐོར་གསུངས་པ་ལ་བར་ཆད་ཅི་ཡང་མ་བྱུང༌ངོ༌།། །།
ROM 1:1 དེ་ཡང་ཕོལ་ལོལ་ང་རང་ནི་མཱ་ཤི་ཀ་ཡེ་ཤུའི་ཞབས་ཕྱི་པ་ཞིག་ཡིན༌ཞིང༌། སྐུ་ཚབ་པར་ཞལ་འབོད་གནང་སྟེ་དཀོན་མཆོག་གི་འཕྲིན་བཟང་བསྒྲག་པར་ཆེད་དུ་བསྐོས་པ་ལགས།
ROM 1:2 འཕྲིན་བཟང་འདི་ནི་དཀོན་མཆོག་གིས་སྔོན་ཆད་རང་ཉིད་ཀྱི་ལུང་སྟོན་པ་རྣམས་བརྒྱུད་ནས་དམ་པའི་གསུང་རབ་ཏུ་ཞལ་བཞེས་གནང༌ཞིང་།
ROM 1:3 ཁོང་གི་སྲས་ཀྱི་སྐོར་ཡང་ཡིན་ལ། ལུས་ཕུང་ལྟར་སྨྲས་ན། ཁོང་ནི་དཱ་བིད་ཀྱི་གདུང་རྒྱུད་ནས་སྐུ་འཁྲུངས་ཤིང་།
ROM 1:4 དམ་པའི་ཐུགས་ཉིད་ལྟར་སྨྲས་ན། གྲོངས་པ་ནས་སླར་གསོན་པར་གྱུར་པའི་རྐྱེན་གྱིས། མཐུ་སྟོབས་ཆེན་པོའི་ངང་ནས་དཀོན་མཆོག་གི་སྲས་ཡིན་པར་བསྟན༌ཅིང་། ཁོང་ཉིད་ནི་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ལགས་སོ༎
ROM 1:5 ངེད་ཅག་ལ་ཁོང་ཉིད་བརྒྱུད་ནས་ཐུགས་རྗེ་དང་སྐུ་ཚབ་པའི་འགན་འཁྲི་ཐོབ༌ཅིང་། དེ་ནི་ཁོང་གི་མཚན་གྱི༌ཕྱིར་ཕྱི་ཕྱོགས་ཀྱི་མི་རིགས་ཐམས་ཅད་ཀྱི་ཁྲོད་དུ། ཁོ་རྣམས་དད་པའི་བཀའ་ལ་མཉན་དུ་འཇུག་པའི་ཆེད་ཡིན།
ROM 1:6 དེ་ལས་ཡེ་ཤུ་མཱ་ཤི་ཀར་གཏོགས་པར་ཞལ་འབོད་ཐོབ་མཁན་ཁྱོད་རྣམས་ཀྱང་མཆིས།
ROM 1:7 བདག་གིས་འཕྲིན་ཡིག་འདི་ནི་དཀོན་མཆོག་གིས་གཅེས་ཤིང་དད་ལྡན་དམ་པར་ཞལ་འབོད་གནང་བའི་རོ་མཱའི་མི་རྣམས་ལ་འདི་ལྟར་སྤྲིངས་པ༌སྟེ། བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
ROM 1:8 དེ་ཡང་ཐོག་མར་ཁྱོད་ཅག་གི་དད་པ་ནི་འཇིག་རྟེན་ཡོངས་ལ་ཁྱབ་ཡོད༌པས། བདག་གིས་ཡེ་ཤུ་མཱ་ཤི་ཀར་བརྟེན་ནས་ཁྱོད་ཅག་ཐམས་ཅད་ཀྱི་ཆེད་དུ་རང་གི་དཀོན་མཆོག་ལ་བཀའ་དྲིན་ཞུའོ།།
ROM 1:9 ངས་ཁོང་གི་སྲས་ཀྱི་འཕྲིན་བཟང་སྒྲོག་ཅིང་དེ་ལ་བརྟེན་ནས། སེམས་གཏིང་ནས་བསྙེན་བཀུར་བྱེད་པའི་དཀོན་མཆོག་ནི་བདག་གིས་གསོལ་བ་འདེབས་པའི་དུས༌སུ་རྒྱུན་ཆད་མེད་པར་ཁྱོད་ཅག་གླེང་བའི་དོན་དེར་བདེན་དཔང་མཛད་མཁན་ཡིན་ལ།
ROM 1:10 ངས་རྟག་ཏུ་ཞུ་བ་བྱེད་པ་དེ་དཀོན་མཆོག་གི་དགོངས་པ་ལྟར་ཡིན༌ན། ང་རང་མཐའ་མར་ཁྱོད་ཅག་གི་གམ་དུ་འགྲོ་བར་ལམ་བདེ་མོ་ཞིག་ཡོད་པར་འགྱུར།
ROM 1:11 ང་ལ་ཁྱོད་རྣམས་མཐོང་འདོད་ཆེན་པོ་ཡོད་དེ། དམ་པའི་ཐུགས་ཉིད་ཀྱི་གནང་སྦྱིན་གང་ཞིག་ཁྱོད་ཅག་ལ་སྦྱིན་པ༌དང༌། ཁྱོད་ཅག་གི་དད་པ་ཇེ་བརྟན་དུ་གཏོང༌བའི་ཕྱིར་ཡིན།
ROM 1:12 དེ་ལྟར་བྱས༌ན། ང་ནི་ཁྱོད་ཅག་གི་ཁྲོད་དུ་གནས༌ཤིང༌། བདག་ཅག་ཕན་ཚུན་བར་གྱི་དད་སེམས་ཀྱི་རྐྱེན༌གྱིས། བདག་ཅག་ལ་མཉམ་དུ་སེམས་གསོ་འཐོབ་པར་འགྱུར་རོ།།
ROM 1:13 སྤུན་ཟླ༌རྣམས། ངས་ཁྱོད་རྣམས་ལ་གང་ཞིག་ཤེས་སུ་འཇུག་འདོད་པ༌ནི། ང་རང་ཁྱོད་ཅག་གི་གམ་དུ་ཡང་ཡང་འགྲོ་བར་རྩོམ༌ཞིང༌། ཁྱོད་རྣམས་ཀྱི་ཁྲོད་ནས་འབྲས་བུ་འགའ་རེ་འཐོབ་འདོད་ཅིང་། དེ་ནི་ཕྱི་ཕྱོགས་པ་གཞན་དག་ལས་འཐོབ་འདོད་པ་དང་མཚུངས་ནའང་ད་ལྟའི་བར་དུ་བཀག་རྒྱ༌ཡོད་པ་ཡིན།
ROM 1:14 གྷི་རིག་པ་དང་མཐའ་འཁོབ༌པ། རིག་པ་ཅན་དང་རིག་རྟུལ་ཅན་བཅས་གང་ཡིན༌ཡང༌། བདག་གིས་དེ་དག་ལ་འགན་འཁུར་དགོས༌པས།
ROM 1:15 ངས་རང་ནུས་ཅི་ལྕོགས་ཀྱིས་རོ་མཱ་རུ་ཡོད་པ་ཁྱོད་རྣམས་ལའང་དཀོན་མཆོག་གི་འཕྲིན་བཟང་བསྒྲག་འདོད་དོ༎
ROM 1:16 རྒྱུ་མཚན་ནི་བདག་གིས་འཕྲིན་བཟང་ངོ་ཚ་ཞིག་ཏུ་མི་བརྩིའོ།། འཕྲིན་བཟང་ནི་ཐོག་མར་ཡ་ཧུ་དཱ་པ་དང་ཕྱིས་སུ་གྷི་རིག་པ་སྟེ། དད་པ་ཅན་ཐམས་ཅད་སྐྱོབ་པར་བྱེད་པའི་དཀོན་མཆོག་གི་ནུས་མཐུ་ཆེན་པོ་ཡིན༌པའི་ཕྱིར་རོ།།
ROM 1:17 དེ་ནི་དཀོན་མཆོག་གི་རྣམ་པར་དག་པ་ནི་འཕྲིན་བཟང་ལ་བརྟེན་ནས་མངོན་པ་ཡིན༌ཞིང་། དད་པ་ལས་བྱུང་ཞིང་སླར་ཡང་དད་པ་ལ་བརྟེན་པའི་ཕྱིར་ཡིན། དེ་ལ་གསུང་རབ་ཀྱི་མདོ་ལས་ཇི་སྐད༌དུ། མི་རྣམ་དག་ནི་དད་པའི་སྒོ་ནས་འཚོ་བར་འགྱུར་ ཞེས་བཀོད་ཡོད་པ་བཞིན༌ནོ།།
ROM 1:18 དེ་ཡང་དཀོན་མཆོག་གི་ཐུགས་ཁྲོ་ནི་ནམ་མཁའི་ཞིང་ཁམས་ནས་དད་གུས་མེད་པ་དང་རང་གཤིས་མི་དྲང་བ་ཐམས་ཅད་ཀྱི་སྟེང་དུ་མངོན་པར་བྱེད་པ་ཡིན་ནོ།། དེ་དག་ནི་ལས་ངན་པ་བྱས་ནས་དཀོན་མཆོག་གི་བདེན་པ་ཉིད་མར་གནོན་མཁན་ཡིན།
ROM 1:19 རྒྱུ་མཚན་ནི་དཀོན་མཆོག་གི་སྐོར་ཤེས་ཐུབ་པ་ནི་མི་དེ་དག་གི་སེམས་ཁོང་དུ་མངོན་ཡོད་པ་ཡིན༌ལ། དེ་ནི་དཀོན་མཆོག་གིས་མི་དེ་དག་ལ་མངོན་པར་མཛད་ཡོད་པའི་ཕྱིར་ཡིན་ཞིང་།
ROM 1:20 འཇིག་རྟེན་ཁམས་བསྐྲུན་པའི་ཚུན༌ལ། དཀོན་མཆོག་གི་ཐོག་མཐའ་མེད་པའི་མཐུ་སྟོབས་དང་ཁྱད་དུ་འཕགས་པའི་རང་གཤིས་ནི་མཐོང་དུ་མེད་ནའང་། དངོས་གནས་གསལ་པོར་ཤེས་ཐུབ༌སྟེ། དངོས་པོ་བསྐྲུན་ཡོད་པ་དེ་དག་ལ་བལྟས་ནས་ཤེས་ཐུབ་པས་མི་དེ་ཐམས་ཅད་ལ་ཁག་དཀྲི་ས་མེད་དོ།།
ROM 1:21 ཅིའི་ཕྱིར་ཞེ་ན། མི་དེ་དག་གིས་དཀོན་མཆོག་ངོ་ཤེས་ནའང་། ཁོང་ནི་དཀོན་མཆོག་ཏུ་མ་བརྩིས་ཤིང་ཁོང་ལ་འབུལ་འོས་པའི་བསྟོད་པ་མ་ཕུལ་བ་དང་བཀའ་དྲིན་ཡང་མ་ཞུས་པ་རེད། ཁོ་རྣམས་ཀྱི་དྲན་ཚུལ་ནི་སྟོང་བར་གྱུར་པ་དང་བླུན་པོའི་སེམས་ལའང་མུན་པས་ཁེངས་ཡོད་པའི་ཕྱིར༌རོ།།
ROM 1:22 རང་ཉིད་རིག་པ་ཅན་དུ་རློམ་ནའང་དོན་དུ་བླུན་པོ་རུ་གྱུར་པ༌དང༌།
ROM 1:23 རྟག་པའི་དཀོན་མཆོག་གི་གཟི་བརྗིད་རིང་དུ་སྤངས་ཏེ། དེའི་ཚབ་ཏུ་མི་རྟག་པའི་མི༌དང༌། འདབ༌ཆགས། སུག་བཞི་ཅན་གྱི་སྲོག་ཆགས། ལྟོ་འགྲོ་སོགས་ཀྱི་གཟུགས་བརྙན་ལ་བརྟེན་པའོ།།
ROM 1:24 དེའི༌ཕྱིར། མི་དེ་དག་གིས་སེམས་ནང་གི་འདོད་ཆགས་ལྟར་མི་གཙང་བ་བྱེད་པ་དང༌། ཐ་ན་ཁོ་རྣམས་ཀྱིས་ཕན་ཚུན་གྱི་ལུས་པོ་བཙོག་པར་བཟོས་པའང་དཀོན་མཆོག་གིས་སྣང་མེད་དུ་བསྐྱུར་ཏོ།།
ROM 1:25 དེ་ནི་ཁོ་རྣམས་ཀྱིས་དཀོན་མཆོག་གི་བདེན་པ་ཉིད་སྤངས༌ཏེ། དེའི་ཚབ་ཏུ་རྫུན་ལ་བརྟེན་ནས་དཀོན་མཆོག་གིས་བསྐྲུན་པའི་དངོས་པོ་ལ་བསྙེན་བཀུར་བྱེད་པ༌ལས། འཇིག་རྟེན་ཁམས་འགོད་མཁན་དཀོན་མཆོག་ལ་དད་པ་མི་བྱེད་པའི་ཕྱིར༌ཡིན། དཀོན་མཆོག་ལ་ནམ་ཡང་བསྔགས་བརྗོད་བྱ་འོས༌སོ།། ཨ༌མེན།
ROM 1:26 དེ་བས་ན་མི་དེ་རྣམས་ཀྱིས་ངོ་གནོང་བའི་འདོད་ཆགས་བག་མེད་དུ་སྤྱོད་པའང་དཀོན་མཆོག་གིས་སྣང་མེད་དུ་བསྐྱུར་ཏོ།། མི་དེ་དག་གི་བུད་མེད་རྣམས་ཀྱིས་ལས་སུ་རུང་བ་སྤངས་ཏེ། དེའི་ཚབ་ཏུ་ལས་མི་རུང་བ་སྤྱོད༌པ་རེད།
ROM 1:27 སྐྱེས་པ་རྣམས་ཀྱང་དེ་བཞིན༌ཏེ། བུད་མེད་སྤྱོད་འོས་པ་རིང་དུ་སྤངས་ནས། འདོད་ཆགས་ཀྱི་མེ་ལྕེ་སེམས་སུ་འབར་ཞིང་། སྐྱེས་པ་ཕན་ཚུན་ལ་ཞེན་ཆགས་པ༌དང༌། སྐྱེས་པས་སྐྱེས་པ་ལ་ངོ་གནོང་དགོས་པའི་ལས་བྱས་པས། རང་གི་ལུས་སྟེང་དུ་ལོག་སྤྱོད་དེ་ལྟ་བུ་བྱེད་པ་ལ་ཉེས་ཆད་བྱུང༌ངོ༌།།
ROM 1:28 མི་དེ་དག་གིས་བསམ་བཞིན་དཀོན་མཆོག་ཤེས་མི་འདོད༌པས། ཁོང་གིས་དེ་དག་གི་སེམས་སུ་ལོག་སེམས་བཅངས་པ་དང་ལུགས་དང་འགལ་བའི་ལས་བྱེད་པའང་སྣང་མེད་དུ་བསྐྱུར་ཏོ།།
ROM 1:29 མི་དེ་དག་གི་སེམས་སུ་དྲང་བདེན་མ་ཡིན་པ༌དང༌། སྡིག༌པ། བརྣབ༌སེམས། ངན༌སེམས། ཕྲག༌དོག མི་གསོད་པ། འགྲན༌རྩོད། གཡོ༌སྒྱུ། གདུག་རྩུབ་བཅས་སྣ་ཚོགས་ཀྱིས་བཀང་བ༌དང༌། ཡང་མི་དེ་དག་ནི་ཕྲ་མ་བྱེད་མཁན༌དང༌།
ROM 1:30 ལྐོག་ནས་གཏམ་ངན་སྨྲ༌མཁན། དཀོན་མཆོག་ལ་སྡང༌མཁན། བརྙས་བཅོས་བྱེད༌མཁན། ང་རྒྱལ༌ཅན། རང་བསྟོད༌མཁན། ལས་ངན་པ་བཟོ༌མཁན། ཕ་མའི་ངག་ལ་མི་ཉན་པ།
ROM 1:31 ཤེས་པས་རྨོངས་ཤིང་ཡིད་རྟོན་མེད་པ། བརྩེ་སེམས་དང་སྙིང་རྗེ་མེད་པ་བཅས་ཡིན་ནོ།།
ROM 1:32 དེ་རྣམས་ཀྱིས་སྡིག་པའི་ལས་དེ་ལྟ་བུ་བྱེད་མཁན་ནི་འཆི་འོས་པ་ཡིན་ཞེས་དཀོན་མཆོག་གི་བཀའ་ལས་གསུངས་ཡོད་པ་ཤེས༌ནའང༌། རང་རང་གིས་སྡིག་པའི་ལས་བྱེད་པར་མ༌ཟད། མི་གཞན་གྱིས་དེ་བཞིན་བྱེད་པ་ལའང༌དགའོ།།
ROM 2:1 དེ་བས་ན་མི་ལ་ཁ་ཚོན་གཅོད་མཁན་ཁྱོད་ནི་སུ་ཡིན་ཡང་ཁག་དཀྲི་ས་མེད༌དེ། ཁྱོད་ཀྱིས་དོན་གང་གི་ཆ་ནས་མི་ལ་ཁ་ཚོན་བཅད༌ན། དོན་དེའི་སྟེང་ནས་ཁྱོད་ཀྱིས་རང་གིས་རང་ལའང་ཉེས་ཆད་བཅད༌དོ།། ཅིའི་ཕྱིར་ཞེ་ན། ཁྱོད་ཀྱིས་མི་ལ་ཁ་ཚོན་གཅོད་ནའང་། རང་གི་སྤྱོད་པ་ནི་མི་གཞན་དང་མཚུངས་པའི་ཕྱིར༌རོ།།
ROM 2:2 དཀོན་མཆོག་གིས་ལས་དེ་ལྟར་བྱེད་མཁན་ལ་ཁྲིམས་ཐག་གཅོད་པ་ནི་བདེན་པ་དང་མཐུན་པ་བདག་ཅག་གིས་ཤེས༌སོ།།
ROM 2:3 ཀྱེ་ཧོ། ཁྱོད་ཀྱིས་ལས་དེ་ལྟར་བྱེད་མཁན་ལ་ཁ་ཚོན་བཅད༌ནའང༌། རང་གི་སྤྱོད་པ་ནི་མི་གཞན་དང་མཚུངས༌པས། ཁྱོད་ནི་དཀོན་མཆོག་གི་ཁྲིམས་ཐག་ལས་ཤོར་ཐུབ་པར་འདོད་དམ།
ROM 2:4 ཡང་ན་ཁྱོད་ཀྱིས་དཀོན་མཆོག་གི་ཐུགས་རྗེ་ཆེན་པོ༌དང༌། བཟོད་སྒོམ། ངང་རྒྱུད་རིང་པོ་བཅས་ལ་མཐོང་ཆུང་བྱེད་པ༌དང༌། ཁོང་གི་ཐུགས་རྗེ་ཡིས་ཁྱོད་ནི་འགྱོད་བཤགས་ཀྱི་ལམ་དུ་ཁྲིད་པའང་མི་ཤེས༌སམ།
ROM 2:5 འོན༌ཀྱང༌། ཁྱོད་ཀྱིས་རང་གི་རྒྱུད་གྱོང་ཞིང་འགྱོད་བཤགས་མི་བྱེད་པའི་སེམས་རྒྱ་ཡན་དུ་བཏང་བས། དཀོན་མཆོག་གི་ཐུགས་ཁྲོའི་ཉིན་མོའི་ཆེད༌དུ། རང་གིས་རང་ལ་ཐུགས་ཁྲོ་གསོག་པར་བྱེད་ཅིང་། ཉིན་དེར་དཀོན་མཆོག་གི་དྲང་བདེན་གྱི་ཁྲིམས་ཐག་མངོན་པར་འགྱུར་ངེས༌ཤིང༌།
ROM 2:6 ཁོང་གིས་མི་རེ་རེའི་སྤྱོད་པ་བཞིན་དུ་ལན་གནང་བར་འགྱུར༌ཏེ།
ROM 2:7 སྙིང་རུས་ལ་བརྟེན་ནས་དོན་ལེགས་པོ་སྒྲུབ་ཅིང༌། གཟི་བརྗིད་དང་བཀུར༌བསྟི། འཇིག་པ་མེད་པ་བཅས་འཚོལ་མཁན་རྣམས་ལ་མཐའ་མེད་པའི་ཚེ་སྲོག་གནང་བར་འགྱུར་མོད།
ROM 2:8 འོན༌ཀྱང༌། སྒེར་སེམས་བཅངས་ནས་བདེན་པ་ཉིད་ལ་བློ་མི་བསྟུན༌པར། དྲང་བདེན་མ་ཡིན་པར་བློ་བསྟུན་མཁན་རྣམས་ལ་ཐུགས་ཁྲོ་དང་ཁྲོ་གཏུམ་འཕོག་པར་འགྱུར་རོ།།
ROM 2:9 དེ་ཡང་དཀའ་སྡུག་དང་དཀའ་ངལ་ནི་ངན་པའི་ལས་བྱེད་མཁན་ཐམས་ཅད༌དེ། ཐོག་མར་ཡ་ཧུ་དཱ་པ་དང་ཕྱིས་སུ་གྷི་རིག་པ་རྣམས་ལ་སྦྱོར་བར་འགྱུར༌མོད།
ROM 2:10 འོན༌ཀྱང༌། གཟི་བརྗིད་དང་བཀུར༌བསྟི། ཞི་བདེ་བཅས་ནི་ལས་བཟང་པོ་བྱེད་མཁན་ཐམས་ཅད༌དེ། ཐོག་མར་ཡ་ཧུ་དཱ་པ་དང་ཕྱིས་སུ་གྷི་རིག་པ་རྣམས་ལ་གནང་བར་འགྱུར།
ROM 2:11 རྒྱུ་མཚན་ནི་དཀོན་མཆོག་ལ་ཕྱོགས་རིས་མེད་པའི་ཕྱིར༌རོ།།
ROM 2:12 བཀའ་ཁྲིམས་མེད་པར་ཉེས་པ་བྱེད་མཁན་ཐམས་ཅད་ནི་བཀའ་ཁྲིམས་དང་བྲལ་ནས་འཇིག་པར་འགྱུར་བ༌དང༌། བཀའ་ཁྲིམས་ཡོད་ཀྱང་ཉེས་པ་བྱེད་མཁན་ཐམས་ཅད་ལ་བཀའ་ཁྲིམས་ལྟར་ཉེས་ཆད་གཅོད་པར་འགྱུར།
ROM 2:13 ཅིའི་ཕྱིར་ཞེ་ན། དཀོན་མཆོག་གི་དྲུང་ནས་བཀའ་ཁྲིམས་ཐོས་པ་རྣམས་མི་རྣམ་དག་ཏུ་བརྩི་བ་མིན༌ལ། བཀའ་ཁྲིམས་ལྟར་བྱེད་པ་རྣམས་མི་རྣམ་དག་ཏུ་བརྩི་བར་འགྱུར་བའི་ཕྱིར་རོ།།
ROM 2:14 སྤྱིར་བཀའ་ཁྲིམས་མེད་པའི་ཕྱི་ཕྱོགས་པ་རྣམས་ཀྱིས་བཀའ་ཁྲིམས་ཀྱི་ནང་དོན་དག་རང་བཞིན་གྱིས་བསྒྲུབས་པ༌ན། མི་དེ་དག་ལ་བཀའ་ཁྲིམས་མེད༌ནའང༌། མི་རང་རང་ནི་རང་ཉིད་ཀྱི་བཀའ་ཁྲིམས་ཡིན་ལ།
ROM 2:15 མི་དེ་རྣམས་ཀྱིས་རང་གི་སེམས་སུ་བཀའ་ཁྲིམས་ཀྱི་ཕན་ནུས་བརྐོས་ཡོད་པ་མངོན་ཞིང་། ཁོ་རྣམས་ཀྱི་བསམ་པས་རང་ཉིད་ལ་བདེན་དཔང་བྱེད་ཅིང་། ཁོ་རྣམས་ཀྱི་དྲན་པས་སྐབས་འགར་རང་ལ་རང་སྐྱོན་བརྗོད་པ་དང་སྐབས་འགར་རང་ལ་དག་འབུད་བྱེད་པ་ཡིན་ནོ།།
ROM 2:16 བདག་གིས་སྒྲོག་པའི་འཕྲིན་བཟང༌བཞིན། དཀོན་མཆོག་གིས་མཱ་ཤི་ཀ་ཡེ་ཤུ་བརྒྱུད་ནས་མིའི་རིགས་ཀྱི་གསང་བའི་ལས་ལ་ཁྲིམས་ཐག་གཅོད་པའི་ཉིན་མོར་དེ་ལྟར་མཛད་པར་འགྱུར༌རོ།།
ROM 2:17 ཁྱོད་ཀྱིས་རང་ཉིད་ལ་ཡ་ཧུ་དཱ་པ་ཟེར་བ་དང་བཀའ་ཁྲིམས་ལ་བརྟེན༌ཅིང༌། ངག་ལས་དཀོན་མཆོག་གི་ཕྱོགས་ནས་ཁ་ཕོ་བརྗོད་པ་དང་།
ROM 2:18 ཁྱོད་ལ་བཀའ་ཁྲིམས་ལས་བསླབ་བྱ་ཐོབ་ཅིང་། དཀོན་མཆོག་གི་དགོངས་པ་ཤེས་ཤིང་ཡིན་མིན་བདེན་རྫུན་ཡང་ཤེས༌པ་དང་།
ROM 2:19 ཡང་རང་ཉིད་ནི་ལོང་བ་རྣམས་ཀྱི་ལམ་ཁྲིད་པ་དང་། མུན་ནག་ནང་དུ་སྡོད་པའི་མི་རྣམས་ཀྱི་འོད་ཟེར༌དང༌།
ROM 2:20 བླུན་པོ་དག་གི་སློབ༌དཔོན། བྱིས་པ་རྣམས་ཀྱི་དགེ༌རྒན། བཀའ་ཁྲིམས་ཀྱི་ཐད་ནས་ཤེས་ཡོན་ཕུན་སུམ་ཚོགས་པ་ལྡན་པ་དང་བདེན་པ་ཉིད་ཀྱི་མིག་དཔེ་བཅས་ཡིན་པར་ཡིད་ཆེས་བརྟན་པོ་ཡོད།
ROM 2:21 དེས་ན། ཁྱོད་ཀྱིས་མི་གཞན་ལ་ཁྲིད་སྟོན་བྱེད་ཀྱང་རང་ལ་ཁྲིད་སྟོན་མི་བྱེད་པ༌ཅི། ཁྱོད་ཀྱིས་མི་གཞན་ལ་རྐུ་མ་བྱེད་ཅེས་སྒྲོག་ཀྱང་རང་གིས་རྐུ་བྱེད་པ༌ཅི།
ROM 2:22 ཁྱོད་ཀྱིས་མི་གཞན་ལ་ལོག་གཡེམ་མ་བྱེད་ཅེས་སྨྲས་ཀྱང་རང་གིས་ལོག་གཡེམ་བྱེད་པ༌ཅི། ཁྱོད་ནི་ལྷ་སྐུར་ཞེན་པ་ལོག་ཀྱང་ལྷ་ཁང་ལས་དངོས་པོ་རྐུ་བ༌ཅི།
ROM 2:23 ཁྱོད་ཀྱིས་ངག་ལས་བཀའ་ཁྲིམས་ཀྱི་ཕྱོགས་ནས་ཁ་ཕོ་བརྗོད་ཀྱང་། བཀའ་ཁྲིམས་དང་འགལ་བའི་ལས་བྱས་ནས་དཀོན་མཆོག་ལ་དམའ་འབེབས་བྱེད་པ་ཡིན་ནམ།
ROM 2:24 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱོད་ཅག་གི་རྐྱེན་གྱིས་ཕྱི་ཕྱོགས་པ་རྣམས་ཀྱིས་དཀོན་མཆོག་གི་མཚན་ལ་སྐུར་བ་བཏབ་པ་ཡིན་ཞེས༌བཀོད་ཡོད་པ་བཞིན༌ནོ།།
ROM 2:25 གལ༌ཏེ། ཁྱོད་ཀྱིས་བཀའ་ཁྲིམས་ལྟར་བྱེད་ན་མཚན་སྐྱི་གཅོད་པ་ནི་ཁྱོད་ལ་ཕན་ཐོགས་ཡོད༌ལ། ཁྱོད་ཀྱིས་བཀའ་ཁྲིམས་དང་འགལ་བར་བྱེད་ན། ཁྱོད་ཀྱིས་མཚན་སྐྱི་བཅད་པ་ནི་མཚན་སྐྱི་གཅོད་པ་དངོས་མིན།
ROM 2:26 དེའི༌ཕྱིར། མཚན་སྐྱི་མ་བཅད་པ་ཞིག་གིས་བཀའ་ཁྲིམས་ཀྱི་ནང་དོན་བསྲུངས༌ན། མི་དེ་ཡིས་མཚན་སྐྱི་མ་བཅད་ནའང་མཚན་སྐྱི་བཅད་པ་ཞིག་ཏུ་བརྩི་བ་མ་ཡིན༌ནམ།
ROM 2:27 གལ༌ཏེ། མཚན་སྐྱི་མ་བཅད་པ་ཞིག་གིས་བཀའ་ཁྲིམས་བསྲུངས༌ན། ཁྲིམས་ཡིག་ཡོད་པ་དང་མཚན་སྐྱི་གཅོད་པའི་ལུགས་སྲོལ་ཡོད་བཞིན༌དུ། ད་དུང་བཀའ་ཁྲིམས་དང་འགལ་བར་བྱེད་མཁན་ཁྱོད་ལ་མི་དེ་ཡིས་ཁྲིམས་ཐག་གཅོད་པར་འགྱུར་བ་མ་ཡིན༌ནམ།
ROM 2:28 ཅིའི་ཕྱིར་ཞེ་ན། ཕྱིའི་རྣམ་པ་ཡ་ཧུ་དཱ་པ་ཡིན་ན་ཡ་ཧུ་དཱ་པ་དངོས་མིན༌ལ། ཕྱིའི་ལུས་ཕུང་ལ་མཚན་སྐྱི་གཅོད་པ་ནི་མཚན་སྐྱི་བཅད་པ་དངོས་མིན་པའི་ཕྱིར༌རོ།།
ROM 2:29 འོན༌ཀྱང༌། ནང་སེམས་ནས་ཡ་ཧུ་དཱ་པ་ཡིན་པ་ནི་ད་གཟོད་ཡ་ཧུ་དཱ་པ་དངོས་ཡིན༌ལ། མཚན་སྐྱི་གཅོད་པའང་ནང་སེམས་དང་དམ་པའི་ཐུགས་ཉིད་ལ་བརྟེན་པ་ལས་ཁྲིམས་ཡིག་ལ་བརྟེན་པ་མ་ཡིན་པས། མི་དེའི་རིགས་ཀྱི་བསྟོད་པ་ནི་མི་ལས་བྱུང་བ་མ་ཡིན་པར་དཀོན་མཆོག་ནས་བྱུང་བའོ།།
ROM 3:1 དེས་ན་ཡ་ཧུ་དཱ་པ་རྣམས་ལ་བཟང་ཆ་ཅི་ཡོད་པ༌དང༌། མཚན་སྐྱི་གཅོད་པ་ལ་ཕན་ཡོན་ཅི་ཡོད་ཅེ༌ན།
ROM 3:2 ཕྱོགས་གང་གི་ཆ་ནས་ཀྱང་ཕན་ནུས་ཆེན་པོ་ཡོད༌དེ། ཕན་ནུས་གཙོ་བོ་ནི་དཀོན་མཆོག་གི་གསུང་མོལ་ཡ་ཧུ་དཱ་པ་རྣམས་ལ་བཅོལ་བ༌དེ་ཡིན་ནོ།།
ROM 3:3 དཀོན་མཆོག་ལ་དད་པ་མི་བྱེད་པ་འགའ་ཤས་ཡོད་ན་མི་འགྲིག་པ་ཅི་ཡོང་། མི་དེ་རྣམས་ལ་དད་པ་མེད་པའི་རྐྱེན་གྱིས་དཀོན་མཆོག་གི་ལྷག་བསམ་ཡང་མེད་པར་བཟོའམ་ཞེ༌ན།
ROM 3:4 གཏན་ནས་མི་བཟོ༌སྟེ། དཀོན་མཆོག་ནི་དངོས་གནས་བདེན་པ་ཡིན༌ཞིང་མིའི་རིགས་ཐམས་ཅད་ནི་རྫུན་བཤད་མཁན་ཡིན་པར་ངེས་སོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱེད་ཀྱིས་བཀའ་བཀྱོན་གནང་བའི་དུས།། ལྷག་བསམ་རྣམ་དག་མངོན་པར༌འགྱུར།། ཁྱེད་ལ་ཁ་ཚོན་གཅོད་པའི༌དུས།། ཁྱེད་ནི་རྣམ་པར་རྒྱལ་བར༌འགྱུར།། ཞེས༌བཀོད་པའོ།།
ROM 3:5 བདག་གིས་མིའི་བཤད་སྲོལ་ལྟར་སྨྲ་བར་བྱ༌སྟེ། བདག་ཅག་གི་རང་གཤིས་མི་དྲང་བ་འདིས་དཀོན་མཆོག་གི་རྣམ་པར་དག་པ་མངོན་པར་གྱུར༌ན། བདག་ཅག་གིས་ཅི་ལྟར༌སྨྲའམ། ཐུགས་ཁྲོ་འབེབ་པར་མཛད་པའི་དཀོན་མཆོག་ནི་རྣམ་དག་མིན་ནམ་ཞེ་ན།
ROM 3:6 དེ་ལྟར་གཏན་ནས་སྨྲ་མི་རུང༌། གལ་ཏེ་རྣམ་དག་མིན་ཚེ། དཀོན་མཆོག་གིས་འཇིག་རྟེན་ཡོངས་ལ་ཁྲིམས་ཆད་ཅི་ལྟར་གཅོད༌དམ།
ROM 3:7 གལ་ཏེ་ངའི་རྫུན་གྱི་སྒོ་ནས་དཀོན་མཆོག་གི་བདེན་པ་ལྷག་ཏུ་མངོན་ཞིང་ཁོང་གི་གཟི་བརྗིད་ཀྱང་འཕེལ་བར་བྱེད༌ན། ཅིའི་ཕྱིར་བདག་ལ་ཉེས་ཅན་བཞིན་དུ་ཉེས་ཆད་གཅོད༌དམ།
ROM 3:8 ཅིའི་ཕྱིར་ངེད་ཅག་གིས་དོན་བཟང་འབྱུང་བའི་ཕྱིར་དོན་ངན་སྒྲུབ་པ་ཡིན་ཞེས་མི༌སྨྲའམ། དེ་ནི་ཕྲ་མ་བྱེད་མཁན་དུ་མས་ངེད་ཅག་ལ་དེ་ལྟར་སྨྲས་པ་ཡིན༌ལ། མི་དེ་ལྟ་བུ་རྣམས་ལ་ཁྲིམས་ཆད་འཕོག་འོས༌སོ།།
ROM 3:9 དེས་ན་ཅི་ལྟར་ཡིན་ནམ། བདག་ཅག་ནི་ཁོ་རྣམས་ལས་ཀྱང་བཟང་པོ་ཡིན་ནམ་ཞེ༌ན། གཏན་ནས་མ་ཡིན་ནོ།། རྒྱུ་མཚན་ནི་ངེད་ཅག་གིས་བདེན་དཔང་བྱས་ཟིན༌ཏེ། ཡ་ཧུ་དཱ་པ་དང་གྷི་རིག་པ་ཐམས་ཅད་སྡིག་པའི་འོག་ཏུ་ཡོད་པ་ཡིན།
ROM 3:10 དེ་ལ་གསུང་རབ་ཀྱི་མདོ་ལས་ཇི་སྐད༌དུ། གཞུང་དྲང་མི་ནི་ཡོད་པ་མ་ཡིན་ལ༎ དེ་འདྲ་གཅིག་ཀྱང༌ཡོད་པ་མ་ཡིན་ནོ༎
ROM 3:11 གོ་བ་ཡོད་པའི་མི་ནི་གཅིག་ཀྱང་མེད།། དཀོན་མཆོག་འཚོལ༌མཁན་མི་ཡང་གཅིག་ཀྱང་མེད།།
ROM 3:12 ཐམས་ཅད་ཁོང་དང་བྲལ་ནས་ལོག་ལམ༌ཞུགས།། དེ་འདྲའི་སྐྱེ་བོ་ཚང་མ་མཁོ་མེད་གྱུར།། ལས་བཟང་སྒྲུབ་མཁན་ཡོད་པ་མ་ཡིན་ལ༎ དེ་འདྲ་གཅིག་ཀྱང༌ཡོད་པ་མ་ཡིན་ནོ།།
ROM 3:13 སྐྱེ་བོ་དེ་ཡི་མིད་ཐག་ཕྲ་མོ༌ནི།། སྒོ་ཆེན་ཕྱེ་བའི་དུར་ཁུང་དང༌མཚུངས་ཤིང་།། ལྕེ་ལ་བརྟེན་ནས་གཡོ་སྒྱུའི་སྦྱོར་བ༌སྤེལ།། ཁ་ཡི་ནང་དུ་དུག་སྦྲུལ་རླངས་པ༌འཕྱུར།།
ROM 3:14 ངག་ཏུ་སྡིགས་དམོད་དང་ནི་ཚིག་རྩུབ་གང་།།
ROM 3:15 དམར་གསོད་ལས་ལ་རྐང་པ་ཕྱོགས་བཞིར༌བྲེལ།།
ROM 3:16 བརྒྱུགས་ཤུལ་ཀུན་ཏུ་དྲག་རྩུབ་སྡུག་གིས༌ཁྱབ།།
ROM 3:17 ཞི་བདེའི་ལམ་ནི་དེ་ཚོས་མི་རྟོགས་ཤིང་།།
ROM 3:18 དེ་ཚོའི་མིག་མདུན་དཀོན་མཆོག་འཇིགས་པ་མེད།། ཅེས་བཀོད་པའོ།།
ROM 3:19 དེ་ཡང་བཀའ་ཁྲིམས་ཀྱི་གསུང་མོལ་ཐམས་ཅད་ནི་བཀའ་ཁྲིམས་འོག་ཏུ་གནས་པ་རྣམས་ལ་གསུངས་པ་བདག་ཅག་གིས་ཤེས༌ཤིང་། དེ་ནི་མི་རེ་རེའི་སྨྲ་སྒོ་བཅད་ནས་འཇིག་རྟེན་པ་ཐམས་ཅད་དཀོན་མཆོག་གི་ཉེས་ཁྲིམས་འོག་ཏུ་འཇུག་པའི་ཕྱིར༌ཡིན།
ROM 3:20 དེ་བས་བཀའ་ཁྲིམས་ནི་མི་ལ་སྡིག་པ་ཤེས་སུ་འཇུག་པའི་ཕྱིར་ཡིན༌པས། མི་སུ་ཡིན་ཡང་བཀའ་ཁྲིམས་ལྟར་བསྒྲུབས༌པ་ལ་བརྟེན་ནས། དཀོན་མཆོག་གི་སྤྱན་སྔར་རྣམ་དག་ཏུ་བརྩི་ཐུབ་པ་གཅིག་ཀྱང་མེད༌དོ།།
ROM 3:21 འོན་ཀྱང་། ད་ལྟ་དཀོན་མཆོག་གི་རྣམ་པར་དག་པ་ནི་བཀའ་ཁྲིམས་ལ་མི་བརྟེན་པ་གསལ་པོར་མངོན་པ༌དང༌། བཀའ་ཁྲིམས་དང་ལུང་སྟོན་པའི་མདོ་རྣམས་ཀྱིས་ཀྱང་བདེན་དཔང་བྱེད༌དེ།
ROM 3:22 དཀོན་མཆོག་གི་རྣམ་པར་དག་པ་ནི་ཡེ་ཤུ་མཱ་ཤི་ཀར་དད་པ་བྱས་པ་བརྒྱུད་ནས་ཐོབ་ཅིང་། དད་པ་བྱེད་མཁན་ཐམས་ཅད་ལ་ཁྱད་པར་མེད་པར་གནང༌ངོ་༎
ROM 3:23 ཅིའི་ཕྱིར་ཞེ་ན། མི་ཐམས་ཅད་ཀྱིས་སྡིག་པ་བྱས་ཏེ་དཀོན་མཆོག་གི་གཟི་བརྗིད་དང་བྲལ༌ནའང༌།
ROM 3:24 ད་ལྟ་ཁོང་གི་ཐུགས་རྗེའི་རྐྱེན་དང་། མཱ་ཤི་ཀ་ཡེ་ཤུས་བླུས་པ་ལ་བརྟེན་ནས་རིན་མེད་དུ་མི་རྣམ་དག་ཏུ་བརྩིས་པའི་ཕྱིར༌ཡིན།
ROM 3:25 དཀོན་མཆོག་གིས་སྐྱབས་མགོན་ཡེ་ཤུའི་སྐུ་ཁྲག་ལ་བརྟེན་ཅིང་མིའི་དད་པ་བརྒྱུད་ནས། སྐྱབས་མགོན་ཡེ་ཤུ་ནི་མིའི་མིག་མདུན་དུ་ཉེས་ཆད་བསལ་བའི་མཆོད་རྫས་སུ་གསལ་པོར་བཤམས་སོ།། དེ་ནི་དཀོན་མཆོག་གི་རྣམ་པར་དག་པ་གསལ་པོར་མངོན༌པའི་ཕྱིར་ཡིན། རྒྱུ་མཚན་ནི་དཀོན་མཆོག་གིས་བཟོད་པ་བསྒོམས་ནས་མིས་སྔར་བྱས་ཀྱི་སྡིག་པར་གུ་ཡངས་གནང་བ་སྟེ།
ROM 3:26 ད་ལྟ་ཁོང་གི་རྣམ་པར་དག་པ་གསལ་པོར་མངོན་པ་དང་། མི་རྣམས་ལ་ཁོང་ཉིད་ནི་རྣམ་པར་དག་པ་ཡིན་ཞིང༌། སྐྱབས་མགོན་ཡེ་ཤུ་ལ་དད་པ་བྱེད་མཁན་རྣམས་མི་རྣམ་དག་ཏུ་བརྩི་མཁན་ཡང་ཡིན་པ་ཤེས་སུ་འཇུག་པའི་ཕྱིར༌རོ།།
ROM 3:27 དེ་འདྲ་ཡིན་ན་རང་གིས་རང་ལ་བསྟོད་འོས་པ་ཅི་ཡོད་དམ་ཞེ༌ན། རང་བསྟོད་བྱ་འོས་པ་ཅི་ཡང་མེད་དོ།། འོ་ན་རང་བསྟོད་བྱ་མི་འོས་པ་ཐབས་གང་ཞིག་ལ་བརྟེན་པ་ཡིན༌ནམ། རང་བྱས་ཀྱི་ལས་ལ་བརྟེན་པའི་ཐབས་བཀོལ་བ་ཡིན་ནམ་ཞེ༌ན། དེ་ཡང་མིན༌ཏེ། དད་པ་ལ་བརྟེན་པའི་ཐབས་བཀོལ་བ་ཡིན།
ROM 3:28 དེའི༌ཕྱིར། ངེད་ཅག་གིས་མཐའ་གཅིག་ཏུ་ངོས་བཟུང་བ་ནི། མི་རྣམ་དག་ཏུ་བརྩི་བ་ཐམས་ཅད་དད་པ་ལ་བརྟེན་པ་ལས་བཀའ་ཁྲིམས་བརྩི་སྲུང་བྱས་པར་རག་ལས་པ་མ་ཡིན་ནོ།།
ROM 3:29 དེ་ཡང་དཀོན་མཆོག་ནི་ཡ་ཧུ་དཱའི་མི་རིགས་ཁོ་ནའི་དཀོན་མཆོག་ཡིན༌ནམ། ཁོང་ནི་ཕྱི་ཕྱོགས་པ་རྣམས་ཀྱི་དཀོན་མཆོག་ཀྱང་མ་ཡིན་ནམ་ཞེ༌ན། ཁོང་ནི་ཕྱི་ཕྱོགས་པ་རྣམས་ཀྱི་དཀོན་མཆོག་ཀྱང་ཡིན་ནོ།།
ROM 3:30 དཀོན་མཆོག་ནི་གཅིག་རང་ཡིན་པས། ཁོང་གིས་མཚན་སྐྱི་བཅད་པ་རྣམས་དད་པའི་དབང་གིས་མི་རྣམ་དག་ཏུ་བརྩི༌ཞིང༌། མཚན་སྐྱི་མ་བཅད་པ་རྣམས་ཀྱང་དད་པའི་དབང་གིས་མི་རྣམ་དག་ཏུ་བརྩི་ངེས༌ཡིན་ནོ།།
ROM 3:31 དེས་ན་བདག་ཅག་གིས་དད་པ་བརྒྱུད་ནས་བཀའ་ཁྲིམས་མེད་པར་བཟོའམ་ཞེ༌ན། གཏན་ནས་མི་བཟོ་སྟེ། བཀའ་ཁྲིམས་དེ་ལས་ཀྱང་བརྟན་པོར་བྱེད་པ་ཡིན༌ནོ།།
ROM 4:1 དེས་ན་ངེད་ཅག་གིས་ཅི་ཞིག་སྨྲའམ། ལུས་པོའི་ཆ་ནས་བདག་ཅག་གི་མེས་པོ་ཡིན་པའི་ཨབ་ར་ཧམ་ལ་ཅི་ཞིག་ཐོབ་བམ།
ROM 4:2 གལ༌ཏེ། ཨབ་ར་ཧམ་ནི་བྱ་སྤྱོད་ལ་བརྟེན་ནས་མི་རྣམ་དག་ཏུ་བརྩིས་པ་ཡིན༌ན། ཁོང་ལ་བསྟོད་འོས་པ་ཡིན། འོན༌ཀྱང༌། དཀོན་མཆོག་གི་སྤྱན་སྔར་བསྟོད་འོས་པ་ཅི་ཡང་མེད་དོ།།
ROM 4:3 གསུང་རབ་ཀྱི་མདོ་ལས་ཇི་ལྟར་གསུངས་སམ་ཞེ༌ན། འདི་སྐད༌དུ། ཨབ་ར་ཧམ་གྱིས་དཀོན་མཆོག་ལ་དད་པ་བྱས་པ༌དང༌། དཀོན་མཆོག་གིས་ཀྱང་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་གསུངས་སོ།།
ROM 4:4 སྤྱིར་ལས་ཀ་བྱེད་མཁན་ལ་གླ་ཆ་འཐོབ་འོས་པ༌དང༌། དེ་ནི་བཀའ་དྲིན་མ་ཡིན་པར་ལས་ཀ་ལྟར་གླ་ཆ་འཐོབ་འོས་པ་ཡིན།
ROM 4:5 འོན༌ཀྱང༌། ངལ་དུབ་མི་བྱེད་ཅིང་དད་གུས་མེད་པ་ཞིག་མི་རྣམ་དག་ཏུ་བརྩི་བའི་དཀོན་མཆོག་ལ་དད་པ་བྱས༌ན། དད་པའི་དབང་གིས་ཁོ་ནི་མི་རྣམ་དག་ཏུ་བརྩིས་པ་ཡིན་ནོ།།
ROM 4:6 དེ་ཡང་དཀོན་མཆོག་གིས་བྱ་སྤྱོད་ལ་མ་གཟིགས༌པར། རྣམ་དག་ཏུ་བརྩིས་ཤིང་བྱིན་གྱིས་བརླབས་པའི་མི་ཡི་སྐོར་ལ་དཱ་བིད་ཀྱིས་ཀྱང་འདི་སྐད༌དུ།
ROM 4:7 གང་གི་ཉེས་པ་བསལ་བས་བྱིན་རླབས༌ཆེ།། གང་གི་སྡིག་པ་བཀབ་པས་མི་དེ༌བདེ།།
ROM 4:8 དཀོན་མཆོག་ཉིད་ཀྱིས་སྡིག་པར་མི་བརྩི༌བའི།། མི་དེ་རྣམས་ནི་བྱིན་རླབས༌ཆེ་བ་ཡིན།། ཞེས་པའོ།།
ROM 4:9 དེས༌ན། བྱིན་རླབས་དེ་ནི་མཚན་སྐྱི་བཅད་པའི་མི་རྣམས་ཁོ་ནར་གནང༌ངམ། མཚན་སྐྱི་མ་བཅད་པའི་མི་རྣམས་ལའང་གནང་བ་མ་ཡིན༌ནམ། ངེད་ཅག་གིས། ཨབ་ར་ཧམ་གྱི་དད་པས་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་སྨྲ་བས་སོ།།
ROM 4:10 དེ་ནི་ཅི་ལྟར་བརྩིས༌སམ། ཁོང་ལ་མཚན་སྐྱི་གཅོད་པའི་དུས་ཡིན༌ནམ། ཡང་ན་ཁོང་ལ་མཚན་སྐྱི་མ་བཅད་པའི་དུས་ཡིན་ནམ་ཞེ༌ན། མཚན་སྐྱི་གཅོད་པའི་དུས་མ་ཡིན་པར་མཚན་སྐྱི་མ་བཅད་པའི་དུས་ཡིན་ལ།
ROM 4:11 ཁོང་ལ་མཚན་སྐྱི་བཅད་པའི་དཔང་རྟགས་ཐོབ་པ་ཡིན། དེ་ནི་མཚན་སྐྱི་མ་བཅད་པའི་དུས་སུ་དད་པ་ལ་བརྟེན་ནས་མི་རྣམ་དག་ཏུ་བརྩིས་པའི་རྟགས་མཚན་ཞིག་ཡིན་ཏེ། ཁོང་ནི་མཚན་སྐྱི་མ་བཅད་ཅིང་དད་པ་ཡོད་པའི་མི་ཐམས་ཅད་ཀྱི་མེས་པོར་གྱུར་པ༌དང༌། མི་དེ་རྣམས་ཀྱང་མི་རྣམ་དག་ཏུ་བརྩི་བར་མཛད་པའི་ཕྱིར༌ཡིན།
ROM 4:12 ཡང་ཁོང་ནི་མཚན་སྐྱི་བཅད་པ་རྣམས་ཀྱི་མེས་པོར་གྱུར་ཏེ། མཚན་སྐྱི་བཅད་ཟིན་པར་མ༌ཟད། ཁོང་གི་དད་པའི་རྗེས་སུ་འབྲངས་པའི་མི་རྣམས་ཀྱི་མེས་པོ་ཡང་ཡིན་ལ། བདག་ཅག་གི་མེས་པོ་ཨབ་ར་ཧམ་ལ་མཚན་སྐྱི་མ་བཅད་པའི་དུས་སུ་དད་པ་དེ་ཡོད་པའོ།།
ROM 4:13 རྒྱུ་མཚན་ནི་དཀོན་མཆོག་གིས་ཨབ་ར་ཧམ་དང་ཁོང་གི་རིགས་རྒྱུད་ཕྱི་མ་རྣམས་ལ་འཇིག་རྟེན་གྱི་རྒྱུན་འཛིན་མཁན་དུ་འགྱུར་བའི་ཞལ་བཞེས་གནང༌ཞིང༌། དེ་ནི་བཀའ་ཁྲིམས་ལ་བརྟེན་པ་མ་ཡིན་པར། དད་པའི་དབང་གིས་མི་རྣམ་དག་ཏུ་བརྩིས་པ་དེ་ལ་བརྟེན་པའི་ཕྱིར༌རོ།།
ROM 4:14 གལ༌ཏེ། བཀའ་ཁྲིམས་ལ་གཏོགས་པའི་མི་དེ་ད་བཟོད་རྒྱུན་འཛིན་མཁན་ཡིན༌ན། དད་པ་ནི་སྟོང་བར་འགྱུར་ཞིང་ཞལ་བཞེས་ཀྱང་མེད་པར་འགྱུར།
ROM 4:15 ཅིའི་ཕྱིར་ཞེ་ན། བཀའ་ཁྲིམས་ནི་ཁྲོ་བའི་རྒྱུ་ཡིན༌ཏེ། བཀའ་ཁྲིམས་མེད་ན་དེ་དང་འགལ་བའི་ལས་ཀྱང་མེད་པའི་ཕྱིར༌རོ།།
ROM 4:16 དེ་བས་རྒྱུན་འཛིན་མཁན་དུ་གྱུར་པ་ནི་དད་པའི་དབང་གིས་ཡིན༌ཏེ། ཐུགས་རྗེ་ལ་གཏོགས་པའི་ཕྱིར༌རོ།། དེ་ནི་རིགས་རྒྱུད་ཕྱི་མ་ཐམས་ཅད་ལས་བཀའ་ཁྲིམས་ལ་གཏོགས་པའི་མི་རྣམས་ལ་ཞལ་བཞེས་གནང་ངེས་པར་མ༌ཟད། ཨབ་ར་ཧམ་གྱི་དད་པ་ལྟར་དད་པ་བྱེད་མཁན་ལའང་ཞལ་བཞེས་གནང༌བ་ཡིན། ཨབ་ར་ཧམ་ནི་བདག་ཅག་ཐམས་ཅད་ཀྱི་མེས་པོ་ཡིན་ནོ།།
ROM 4:17 དེ་ལ་གསུང་རབ་ཀྱི་མདོ་ལས་ཇི་སྐད༌དུ། བདག་གིས་ཁྱོད་ནི་མི་རིགས་མང་པོའི་མེས་པོར་བྱེད་ཅེས་བཀོད་པ་བཞིན། ཁོང་ཉིད་ནི་དཀོན་མཆོག་གི་སྤྱན་སྔ་ནས་བདག་ཅག་གི་མེས་པོར་མཛད༌པ་དང་། ཁོང་གི་དད་ཡུལ་ནི་འཆི་བ་ལ་ཚེ་སྲོག་གནང་བ་དང་། མེད་པ་ནི་ཡོད་པར་མཛད་པའི་དཀོན་མཆོག་ཡིན།
ROM 4:18 ཁོང་ལ་རེ་སྒུག་མེད་པའི་དུས༌སུ། དད་པའི་དབང་གིས་རེ་སྒུག་བྱེད༌ཅིང༌། དེ་སྔར་ཁྱོད་ཀྱི་རིགས་རྒྱུད་ཀྱང་དེ་བཞིན་དུ་འབྱུང་བར་འགྱུར་ཞེས་གསུངས་པ་ལྟར་མི་རིགས་མང་པོའི་མེས་པོར་གྱུར་ཏོ།།
ROM 4:19 ཁོང་ཉིད་དགུང་ལོ་བརྒྱ་ཙམ་དུ་སོན་པའི་དུས༌སུ། རང་གི་ལུས་པོ་ནི་འཆི་བ་དང་མཚུངས་པར་བསམས༌ཏེ། སཱ་ར་ལ་མངལ་སྦྲུམ་མཚམས་ཆད་འདུག༌ནའང༌། ཁོང་གི་དད་པ་ནི་ད་དུང་བརྟན་པོ་ཡིན༌ལ།
ROM 4:20 དཀོན་མཆོག་གི་ཞལ་བཞེས་ལ་རེ་སྒུག་བྱེད་ཅིང་དད་པ་མེད་པའི་དབང་གིས་དེ་ལ་ཐེ་ཚོམ་སྐྱེས་པ༌མིན། དད་སེམས་བརྟན་པོར་གྱུར་ནས་དཀོན་མཆོག་ལ་བསྟོད་བསྔགས་བརྗོད༌ཅིང་།
ROM 4:21 སེམས་གཏིང་ནས་དཀོན་མཆོག་གིས་ཞལ་བཞེས་གནང་བ་ལྟར་མཛད་ནུས་པར་ཡིད་ཆེས༌པ་ཡིན་ནོ།།
ROM 4:22 དེའི༌ཕྱིར། དད་པའི་རྐྱེན་གྱིས་དཀོན་མཆོག་གིས་ཁོང་ནི་མི་རྣམ་དག་ཏུ་བརྩིས་པ་ཡིན།
ROM 4:23 དེ་ལྟར་བརྩིས་པ་ཡིན་ཞེས་པའི་ཚིག་ནི་ཁོང་ཉིད་ཁོ་ནའི་ཕྱིར་ཡི་གེར་བཀོད་པ་མིན༌པར།
ROM 4:24 བདག་ཅག་གི་ཆེད་དུའང་ཡི་གེར་བཀོད་པ་ཡིན༌ཏེ། རང་རེའི་གཙོ་བོ་ཡེ་ཤུ་གྲོངས་པ་ནས་སླར་གསོན་པར་མཛད་མཁན་དཀོན་མཆོག་ལ་དད་པ་བྱེད་པ་དང་། ཕྱིས་སུ་མི་རྣམ་དག་ཏུ་བརྩི་བར་འགྱུར་བ་ནི་བདག་ཅག་ཡིན།
ROM 4:25 གཙོ་བོ་ཡེ་ཤུ་ནི་བདག་ཅག་གི་སྡིག་པའི་ཕྱིར་མི་གཞན་ལ་སྤྲད༌ཅིང༌། ཁོང་ཉིད་སླར་གསོན་པའང་བདག་ཅག་མི་རྣམ་དག་ཏུ་བརྩི་བའི་ཕྱིར་ཡིན༌ནོ།།
ROM 5:1 དེ་བས་ན། བདག་ཅག་དད་པའི་དབང་གིས་མི་རྣམ་དག་ཏུ་བརྩིས༌པས། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་འདུམ་འགྲིག་བྱུང་ངོ༌།།
ROM 5:2 ཡང་བདག་ཅག་ཁོང་ལ་བརྟེན་ནས་དད་པའི་དབང་གིས་ད་ལྟ་ཐུགས་རྗེའི་ནང་དུ་ལངས་ནས་སྡོད་ཅིང་། དགའ་དགའ་སྤྲོ་སྤྲོའི་ངང་དཀོན་མཆོག་གི་གཟི་བརྗིད་ལ་རེ་སྨོན་བྱེད༌པ་ཡིན།
ROM 5:3 དེ་ལས༌གཞན། དཀའ་སྡུག་ལ་ཕྲད་པའི་དུས་སུའང་དགའ་སྤྲོས་ཁེངས༌ཏེ། དཀའ་སྡུག་གི་དབང་གིས་བཟོད་པ་དང༌།
ROM 5:4 བཟོད་པའི་དབང་གིས་ཚོད་བགམ་ཐེག་ཐུབ་པ། ཚོད་བགམ་ཐེག་ཐུབ་པའི་དབང་གིས་རེ་བ་འབྱུང་བ་བཅས་ཡིན།
ROM 5:5 རེ་བ་ཡིས་ངོ་གནོང་བར་མི་བྱེད༌པ་བདག་ཅག་གིས་ཤེས་ཤིང་། དེ་ནི་བདག་ཅག་ལ་གནང་བའི་དམ་པའི་ཐུགས་ཉིད་ཀྱིས་དཀོན་མཆོག་གི་བྱམས་པ་བདག་ཅག་གི་སེམས་སུ་ལྷག་པར་བླུགས་པའི་ཕྱིར༌རོ།།
ROM 5:6 དེ་ཡང་བདག་ཅག་ཉམ་ཐག་པའི་དུས༌སུ། སྐྱབས་མགོན་མཱ་ཤི་ཀ་ནི་དུས་བཅད་ལྟར་སྡིག་ཅན་རྣམས་ཀྱི་དོན་དུ་སྐུ་གྲོངས༌པ་ཡིན་ནོ།།
ROM 5:7 སྤྱིར་མི་གཞུང་དྲང་གི་དོན་དུ་འཆི་བ་ཉུང་ཞིང་མི་བཟང་པོའི་དོན་དུ་འཆི་ཕོད་པ་ཡོད་སྲིད་མོད།
ROM 5:8 འོན་ཀྱང་སྐྱབས་མགོན་མཱ་ཤི་ཀ་ནི་བདག་ཅག་ད་དུང་སྡིག་ཅན་ཡིན་པའི་དུས༌སུ། བདག་ཅག་གི་དོན་དུ་སྐུ་གྲོངས༌པ་ཡིན། དེ་ལས་དཀོན་མཆོག་གིས་ཁོང་གི་བྱམས་པ་ནི་བདག་ཅག་ལ་མངོན་པར་མཛད༌དོ།།
ROM 5:9 ད་ལྟ་བདག་ཅག་ནི་སྐྱབས་མགོན་ཡེ་ཤུའི་སྐུ་ཁྲག་བརྒྱུད་ནས་མི་རྣམ་དག་ཏུ་བརྩིས་ཡོད༌པས། དེ་ལས་ལྷག་པར་ཁོང་ལ་བརྟེན་ནས་དཀོན་མཆོག་གི་ཐུགས་ཁྲོ་ལས་བདག་ཅག་ཐར་བར་འགྱུར་རོ།།
ROM 5:10 ཅིའི་ཕྱིར་ཞེ་ན། བདག་ཅག་དགྲ་བོ་ཡིན་པའི་དུས༌སུ། དཀོན་མཆོག་གི་སྲས་སྐུ་གྲོངས་པ་བརྒྱུད་ནས་དཀོན་མཆོག་དང་འདུམ་འགྲིག་བྱུང༌བས་ན། དེ་ལས་ལྷག་པར་ཁོང་ཉིད་སླར་གསོན་པ་ལ་བརྟེན་ནས་བདག་ཅག་ཐར་བར་མཛད་ངེས་ཡིན།
ROM 5:11 དེར་མ་ཟད། བདག་ཅག་ནི་རང་རེའི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་འདུམས་པ་དང་། ཡང་ཁོང་ཉིད་བརྒྱུད་ནས་བདག་ཅག་དཀོན་མཆོག་ལ་དགའ་མགུ་བྱུང་ངོ་།།
ROM 5:12 དེའི༌ཕྱིར། སྡིག་པ་ནི་མི་གཅིག་བརྒྱུད་ནས་འཇིག་རྟེན་འདིར་བྱུང་བ་དང་འཆི་བའང་སྡིག་པ་ལས་བྱུང་བ༌ལྟར། མི་ཐམས་ཅད་ཀྱིས་སྡིག་པ་བྱས་པའི་དབང་གིས་མི་ཀུན་ལ་འཆི་བ་བྱུང་ངོ༌།།
ROM 5:13 བཀའ་ཁྲིམས་མ་གནང་བའི་སྔོན་ལ་འཇིག་རྟེན་དུ་སྡིག་པ་ཡོད༌ནའང༌། བཀའ་ཁྲིམས་མེད་པའི་རྐྱེན་གྱིས་སྡིག་པའང་སྡིག་པ་རུ་མ༌བརྩིས་སོ།།
ROM 5:14 འོན༌ཀྱང༌། ཨ་དམ་ནས་མོ་ཤེའི་བར༌དུ། ཨ་དམ་ལྟ་བུའི་སྡིག་པ་མ་བྱས་པ་རྣམས་ཀྱང་འཆི་བའི་དབང་འོག་ཏུ་ལྷུང༌། ཨ་དམ་ནི་ཁོའི་རྗེས་སུ་ཕེབས་པར་འགྱུར་བ་དེ་ཉིད་ཀྱི་དཔེ་གཞི་ཡིན།
ROM 5:15 འོན༌ཀྱང༌། སྡིག་པ་ནི་ཐུགས་རྗེའི་གནང་སྦྱིན་དང་མི་མཚུངས༌པར། མི་གཅིག་གི་སྡིག་པའི་རྐྱེན་གྱིས་མི་ཐམས་ཅད་འཆི་བ་ཡིན༌ན། མི་གཅིག་སྟེ་ཡེ་ཤུ་མཱ་ཤི་ཀའི་ཐུགས་རྗེའི་དབང་གིས་དཀོན་མཆོག་གི་ཐུགས་རྗེ་དང་གནང་སྦྱིན་ནི་དེ་ལས་ལྷག་པར་མི་རྣམས་ལ་འཐོབ་པ་མ་ཡིན༌ནམ།
ROM 5:16 ཡང་གནང་སྦྱིན་ནི་མི་གཅིག་གི་སྡིག་པའི་འབྲས་བུ་དང་མི་འདྲ༌སྟེ། ཁྲིམས་ཐག་གཅོད་པ་ནི་མི་གཅིག་གི་རྐྱེན་གྱིས་ཉེས་ཆད་ཕོག་པ་ཡིན༌ལ། ཐུགས་རྗེའི་གནང་སྦྱིན་ནི་ཉེས་པ་མང་པོའི་ཁྲོད་ནས་བྱུང་ཞིང་མཇུག་མཐར་མི་རྣམ་དག་ཏུ་མཛད་པ་ཡིན་ནོ།།
ROM 5:17 ཡང་མི་གཅིག་གི་ཉེས་པའི་རྐྱེན་གྱིས་འཆི་བའི་དབང་འོག་ཏུ་ལྷུང༌ན། ཐུགས་རྗེ་ཆེན་པོ་དང་གནང་སྦྱིན་རྣམ་པར་དག་པ་ཐོབ་པ་རྣམས་ཀྱིས་དེ་ལས་ལྷག་པར་ཡེ་ཤུ་མཱ་ཤི་ཀ་ཁོ་ན་བརྒྱུད་ནས་ཚེ་སྲོག་ལ་དབང་བསྒྱུར༌བའོ།།
ROM 5:18 དེའི༌ཕྱིར། ཉེས་པ་ཐེངས་གཅིག་བྱས་པའི་རྐྱེན་གྱིས་མི་ཐམས་ཅད་ལ་ཉེས་ཆད་ཕོག་པ༌དང༌། དེ་བཞིན་དུ་སྤྱོད་བཟང་ཐེངས་གཅིག་གིས་མི་ཐམས་ཅད་རྣམ་དག་ཏུ་བརྩིས་ནས་ཚེ་སྲོག་ཐོབ་པ་ཡིན།
ROM 5:19 མི་གཅིག་གིས་བཀའ་མ་བརྩིས་པས་མི་མང་པོ་སྡིག་ཅན་དུ་གྱུར་པ༌དང༌། དེ་བཞིན༌དུ། མི་གཅིག་གིས་བཀའ་ལ་མཉན་པས་མི་མང་པོ་མི་རྣམ་དག་ཏུ་འགྱུར༌བ་ཡིན།
ROM 5:20 བཀའ་ཁྲིམས་ནི་ཉེས་པ་མང་དུ་མངོན་པའི་ཕྱིར་བསྣན་པ༌སྟེ། གང་ནས་སྡིག་པ་མང་དུ་མངོན་ན། ཐུགས་རྗེའང་དེ་ལས་མང༌དུ་མངོན་ནོ།།
ROM 5:21 དེའི་ཕྱིར། སྡིག་པས་དབང་བཟུང་སྟེ་མི་རྣམས་འཆི་རུ་བཅུག་པ༌དང༌། དེ་བཞིན་དུ་ཐུགས་རྗེས་ཀྱང་རྣམ་པར་དག་པ་བརྒྱུད་ནས་དབང་བཟུང༌ཞིང༌། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་མི་རྣམས་ལ་མཐའ་མེད་པའི་ཚེ་སྲོག་འཐོབ་པར་མཛད་པའོ།།
ROM 6:1 དེས་ན་ངེད་ཅག་གིས་ཅི་ཞིག༌སྨྲའམ། ཐུགས་རྗེ་སྔར་ལས་མང་དུ་འཐོབ་ཕྱིར་བདག་ཅག་ནི་སྔར་བཞིན་སྡིག་པའི་ནང་དུ་གནས་པར་བྱེད་དམ་ཞེ༌ན།
ROM 6:2 གཏན་ནས་མི་བྱེད༌དེ། བདག་ཅག་ནི་སྡིག་པའི་ཆ་ནས་ཤི་ཟིན་པ་ཡིན༌པས། སྔར་བཞིན་སྡིག་པའི་ནང་དུ་འཚོ་ག་ལ༌རུང་།
ROM 6:3 མཱ་ཤི་ཀ་ཡེ་ཤུའི་ནང་དུ་ཁྲུས་གསོལ་ལ་ཞུགས་མཁན་བདག་ཅག་ཐམས་ཅད་ནི། ཁོང་གི་སྐུ་གྲོངས་པའི་ཁྲུས་གསོལ་ལའང་ཞུགས་པ་ཁྱོད་ཅག་གིས་མི་ཤེས་སམ།
ROM 6:4 དེའི༌ཕྱིར། བདག་ཅག་ཁོང་གི་སྐུ་གྲོངས་པའི་ཁྲུས་གསོལ་བརྒྱུད་ནས་ཁོང་དང་མཉམ་དུ་དུར་ལ་བཅུག ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་ནི་ཡབ་ཀྱི་གཟི་བརྗིད་བརྒྱུད་ནས་སྐུ་གྲོངས་པ་ལས་སླར་གསོན་པ༌བཞིན། བདག་ཅག་གིས་ཀྱང་མི་ཚེ་གསར་པ་ཞིག་རོལ་དགོས་པའི་ཕྱིར་ཡིན།
ROM 6:5 གལ༌ཏེ། བདག་ཅག་ནི་ཁོང་ཉིད་སྐུ་གྲོངས་པ་དང་མཚུངས་པར་ཁོང་དང་མཉམ་འབྲེལ་བྱས་པ་ཡིན༌ན། ཁོང་ཉིད་སླར་གསོན་པ་དང་མཚུངས་པར་ཡང་ཁོང་དང་མཉམ་འབྲེལ་བྱེད་ངེས་ཡིན།
ROM 6:6 བདག་ཅག་སྡིག་པའི་བྲན་དུ་མི་ཚུད་པ་དང་སྡིག་པ་ཅན་གྱི་ལུས་པོ་དབང་མེད་པར་བཟོ་བའི༌ཕྱིར། རང་གཤིས་རྙིང་པ་ནི་ཁོང་དང་མཉམ་དུ་ཤིང་རྒྱ་གྲམ་གྱི་སྟེང་དུ་བརྡབས་ཟིན་པ་བདག་ཅག་གིས་ཤེས༌ཏེ།
ROM 6:7 ཤི་ཟིན་པ་རྣམས་སྡིག་པ་ལས་ཐར་བའི་ཕྱིར༌རོ།།
ROM 6:8 བདག་ཅག་སྐྱབས་མགོན་མཱ་ཤི་ཀ་དང་ལྷན་དུ་ཤི་བ་ཡིན༌པས་ན། ཁོང་དང་མཉམ་དུ་གསོན་པོར་གནས་པ་ལའང་ཡིད་ཆེས༌ཡོད།
ROM 6:9 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་སྐུ་གྲོངས་པ་ནས་སླར་གསོན་པ་ཡིན་པས། སླར་ཡང་སྐུ་གྲོངས་པར་མི་འགྱུར༌ཞིང༌། འཆི་བས་ཀྱང་ཡང་བསྐྱར་ཁོང་ལ་དབང་བསྒྱུར་མི་ནུས་པ་བདག་ཅག་གིས་ཤེས་པའི་ཕྱིར༌ཡིན།
ROM 6:10 ཁོང་ཉིད་སྐུ་གྲོངས་པ་ནི་སྡིག་པའི་ཕྱོགས་སུ་ཐེངས་གཅིག་ལ་སྐུ་གྲོངས་ཤིང་། ཁོང་ཉིད་སྐུ་གསོན་པོར་བཞུགས་པ་ནི་དཀོན་མཆོག་གི་ཕྱོགས་སུ་གནས་པ་ཡིན༌ནོ།།
ROM 6:11 དེ་ལྟར་ཁྱོད་ཅག་གིས་ཀྱང་སྡིག་པའི་ཕྱོགས་ནས་རང་ཉིད་ཤི་ཟིན་པར་བརྩི་དགོས་པ༌དང༌། དཀོན་མཆོག་གི་ཕྱོགས་ནས་ཁྱོད་ཅག་ནི་མཱ་ཤི་ཀ་ཡེ་ཤུའི་ནང་དུ་གནས་པས་རང་ཉིད་གསོན་པོ་ཡིན་པར་བརྩི་དགོས་སོ།།
ROM 6:12 དེའི༌ཕྱིར། ལུས་ཀྱི་འདོད་པའི་དབང་དུ་མི་འགྲོ་བའི་ཕྱིར། ཁྱོད་ཅག་གི་འཆི་བར་འགྱུར་བའི་ལུས་སྟེང་དུ་སྡིག་པས་གང་འདོད་དུ་དབང་མི་བསྒྱུར་བར༌གྱིས།
ROM 6:13 དྲང་བདེན་མིན་པའི་ལས་བྱེད་པ་ལ་ཁྱོད་ཅག་གི་ཡན་ལག་རྣམས་སྡིག་པའི་ཡོ་བྱད་དུ་མི་སྤྲོད༌པར། ཤི་ནས་སླར་གསོན་པ་ལྟར་རང་ཉིད་ནི་དཀོན་མཆོག་ལ་འབུལ་དགོས་པར་མ༌ཟད། ཡན་ལག་རྣམས་ཀྱང་དྲང་བདེན་གྱི་ལས་བྱེད་པའི་ཡོ་བྱད་དུ་དཀོན་མཆོག་ལ་འབུལ་དགོས།
ROM 6:14 རྒྱུ་མཚན་ནི་ཁྱོད་རྣམས་བཀའ་ཁྲིམས་ཀྱི་འོག་ཏུ་མི་འདུག་པར་ཐུགས་རྗེའི་འོག་ཏུ་ཡོད་པའི་རྐྱེན༌གྱིས། སྡིག་པས་ཁྱོད་རྣམས་ལ་དབང་བསྒྱུར་མི་ནུས་པའི་ཕྱིར༌རོ།།
ROM 6:15 དེས་ན་ཅི་ལྟར་ཡིན་ནམ། བདག་ཅག་ནི་ཐུགས་རྗེའི་འོག་ཏུ་ཡོད་པ༌ལས། བཀའ་ཁྲིམས་ཀྱི་འོག་ཏུ་མི་འདུག་པས་སྡིག་པ་བྱེད་རུང་ངམ་ཞེ༌ན། གཏན་ནས་མི་རུང༌སྟེ།
ROM 6:16 ཁྱོད་རྣམས་ཀྱིས་རང་ཉིད་གཡོག་པོ་བྱེད་པར་འབུལ༌ཞིང༌། སུ་ཡི་བཀའ་ལ་མཉན་ན་དེའི་གཡོག་པོ་ཡིན་པ་མི་ཤེས༌སམ། སྡིག་པའི་གཡོག་པོ་བྱས་ན་འཆི་བར་འགྱུར་བ༌དང༌། བཀའ་ལ་ཉན་པའི་གཡོག་པོ་བྱས་ན་མི་རྣམ་དག་ཏུ་འགྱུར༌བ་ཡིན་ནོ།།
ROM 6:17 སྔོན་ཆད་ཁྱོད་རྣམས་ནི་སྡིག་པའི་གཡོག་པོ་ཡིན༌ཡང༌། ད་ལྟ་ཁྱོད་ཅག་ལ་བསྟན་པའི་ཆོས་དེ་སེམས་གཏིང་ནས་ཁས་བླངས་པའི་རྐྱེན་གྱིས་དཀོན་མཆོག་ལ་བཀའ་དྲིན་ཞུ་བར༌བྱའོ།།
ROM 6:18 ཁྱོད་རྣམས་སྡིག་པ་ནས་ཐར་ཏེ་རྣམ་པར་དག་པའི་གཡོག་པོར་གྱུར༌པ་ཡིན།
ROM 6:19 ཁྱོད་ཅག་གི་ཤ་གཟུགས་ཀྱི་ཕུང་བོར་ནུས་ཤུགས་ཞན་པས། བདག་གིས་མིའི་བཤད་སྲོལ་ལྟར་ཁྱོད་ཅག་ལ་སྨྲ་བར་བྱ་སྟེ། ཁྱོད་ཅག་གིས་སྔོན་ཆད་རང་གི་ཡན་ལག་རྣམས་ཇི་ལྟར་མི་གཙང་བ༌དང༌། ཁྲིམས་མེད་ལུགས་མེད་ཀྱི་གཡོག་པོ་བྱེད་པར་སྤྲད་པས་ཁྲིམས་མེད་ལུགས་མེད་དུ་གྱུར་པ༌བཞིན། ད་ལྟ་དམ་པར་འགྱུར་བའི༌ཕྱིར། ཡང་རང་གི་ཡན་ལག་རྣམས་རྣམ་པར་དག་པའི་བྲན་གཡོག་ཏུ་ཕུལ༌ཞིག
ROM 6:20 ཅིའི་ཕྱིར་ཞེ་ན། ཁྱོད་རྣམས་སྡིག་པའི་བྲན་གཡོག་ཡིན་དུས། རྣམ་དག་གིས་གཅུན་པར་མཛད་མེད་དོ།།
ROM 6:21 དེས་ན་ད་ལྟ་ཁྱོད་ཅག་གིས་ངོ་ཚར་བརྩིས་པའི་དོན་རྣམས་མཐོང༌དུས། འབྲས་བུ་ཅི་ཡོད་ཅེ༌ན། དོན་དེ་དག་གི་མཇུག་འབྲས་ནི་འཆི་བ་ཡིན་ནོ།།
ROM 6:22 འོན༌ཀྱང༌། ད་ལྟ་ཁྱོད་རྣམས་སྡིག་པ་ལས་ཐར་ཞིང་དཀོན་མཆོག་གི་གཡོག་པོར་གྱུར༌པས། ཁྱོད་རྣམས་ལ་དམ་པར་འགྱུར་བའི་འབྲས་བུ་ཐོབ༌པ་དང་། དེའི་མཇུག་འབྲས་ནི་མཐའ་མེད་པའི་ཚེ་སྲོག་ཡིན་ནོ།།
ROM 6:23 དེས་ན་སྡིག་པའི་གླ་ཆ་འཆི་བ་ཡིན༌ཡང༌། དཀོན་མཆོག་གི་ཐུགས་རྗེའི་གནང་སྦྱིན་ནི་བདག་ཅག་གི་གཙོ་བོ་མཱ་ཤི་ཀ་ཡེ་ཤུའི་ནང་དུ་ཡོད༌པའི་མཐའ་མེད་པའི་ཚེ་སྲོག་དེ་ཡིན་ནོ།།
ROM 7:1 སྤུན་ཟླ༌རྣམས། བདག་གིས་ད་ལྟ་བཀའ་ཁྲིམས་ཀྱི་དོན་རྟོགས་མཁན་རྣམས་ལ་སྨྲ་བར་བྱ༌སྟེ། བཀའ་ཁྲིམས་ཀྱིས་མི་གསོན་པའི་དུས་སུ་བདག་སྐྱོང་མཛད་པ་ནི་ཁྱོད་ཅག་གིས་མི་ཤེས༌སམ།
ROM 7:2 དཔེར༌ན། བུད་མེད་ཅིག་ལ་ཁྱོ་ག་ཡོད་པ་དང་ཁྱོ་ག་གསོན་པའི་དུས༌སུ། ཁོ་མོ་ནི་བཀའ་ཁྲིམས་ཀྱིས་གཅུན་པ་དང༌། གལ་ཏེ་ཁྱོ་ག་ཚེ་ལས་འདས༌ན། བུད་མེད་དེ་ནི་ཁྱོ་གའི་སྐོར་གྱི་བཀའ་ཁྲིམས་དང་ཁ་བྲལ་བ་དང་འདྲའོ།།
ROM 7:3 དེའི༌ཕྱིར། ཁྱོ་ག་གསོན་པའི་དུས་སུ་ཁོ་མོ་སྐྱེས་པ་གཞན་དང་འགྲོགས༌ན། བུད་མེད་དེ་ལ་གཡེམ་མ་ཟེར། གལ༌ཏེ་ཁྱོ་ག་ཚེ་ལས་འདས་ན་ཁོ་མོ་ནི་ཁྱོ་གའི་སྐོར་གྱི་བཀའ་ཁྲིམས་དང་ཁ་བྲལ་བས་སྐྱེས་པ་གཞན་དང་འགྲོགས༌ནའང༌། བུད་མེད་དེ་ལ་གཡེམ་མ་མི་ཟེར༌རོ།།
ROM 7:4 དེའི་ཕྱིར། བདག་གི་སྤུན་ཟླ༌རྣམས། དེ་ལྟར་སྨྲས༌ན། སྐྱབས་མགོན་མཱ་ཤི་ཀའི་སྐུ་ལུས་ལ་བརྟེན་ནས་ཁྱོད་རྣམས་ཀྱང་བཀའ་ཁྲིམས་ཀྱི་ཆ་ནས་ཤི༌བ་ཡིན་ནོ།། དེ་ནི་ཁྱོད་རྣམས་གཞན་ལ་གཏོགས་པ་དང་། ངེད་ཅག་ལ་འབྲས་བུ་བྱུང་ནས་དཀོན་མཆོག་ལ་འབུལ་བའི༌ཕྱིར། སྐུ་གྲོངས་པ་ནས་སླར་གསོན་པ་དེ་ཉིད་ལ་གཏོགས་སོ།།
ROM 7:5 ཅིའི་ཕྱིར་ཞེ་ན། བདག་ཅག་ནི་ཤ་གཟུགས་ཀྱི་ཕུང་བོར་གཏོགས་པའི་དུས༌སུ། བཀའ་ཁྲིམས་ཀྱི་རྒྱུ་རྐྱེན་ལས་བྱུང་བའི་འདོད་ངན་གྱིས་བདག་ཅག་གི་ཡན་ལག་ལ་སྐུལ་སློང་བྱས་ཏེ་འཆི་བའི་འབྲས་བུ་བསྐྱེད༌པའི་ཕྱིར་ཡིན།
ROM 7:6 འོན༌ཀྱང༌། བདག་ཅག་འཆིང་བར་བྱེད་པའི་བཀའ་ཁྲིམས་སྟེང་ནས་ཤི་བར་གྱུར༌ཏེ། ད་ལྟ་བཀའ་ཁྲིམས་ལས་གྲོལ་བ་ཡིན༌པས། བདག་ཅག་གིས་དམ་པའི་ཐུགས་ཉིད་ཀྱི་སྲོལ་གསར་པ་ལྟར་ཞབས་ཕྱི་བསྒྲུབ་པ༌ལས། ཁྲིམས་ཡིག་གི་སྲོལ་རྙིང་པ་ལྟར་ཞབས་ཕྱི་བསྒྲུབ་པར་མི༌བྱའོ།།
ROM 7:7 དེས་ན་ངེད་ཅག་གིས་ཅི་ཞིག༌སྨྲའམ། བཀའ་ཁྲིམས་ནི་སྡིག་པ་ཡིན་ནམ་ཞེ༌ན། གཏན་ནས་མིན༌ནོ།། འོན་ཀྱང་བཀའ་ཁྲིམས་མེད་ན་ངས་སྡིག་པ་ནི་ཅི་ཞིག་ཡིན་པ་མི་ཤེས། བཀའ་ཁྲིམས་ལས་ཇི་སྐད༌དུ། འདོད་ཧམ་བཅང་མི་རུང་ཞེས་གསུངས་པ་མིན༌ན། བདག་གིས་འདོད་ཧམ་ནི་ཅི་ཞིག་ཡིན་པ་མི་ཤེས་སོ།།
ROM 7:8 འོན༌ཀྱང༌། སྡིག་པས་གོ་སྐབས་དང་བསྟུན་ཞིང་བཀའ་དེ་ལ་བརྟེན༌ནས། བདག་གི་སེམས་ནང་དུ་འདོད་ཧམ་སྣ་ཚོགས་སྐྱེ་བར་སྐུལ་སློང་བྱས་པ་ཡིན། ཅིའི་ཕྱིར་ཞེ་ན། བཀའ་ཁྲིམས་མེད་ན་སྡིག་པ་ནི་ཤི༌བ་ཡིན་པའི་ཕྱིར་རོ།།
ROM 7:9 སྔོན་ཆད་བཀའ་ཁྲིམས་མེད་པའི་དུས་སུ་བདག་ནི་གསོན་པོར་འཚོ༌ཡང༌། བཀའ་དེ་ཉིད་བྱུང་བ་དང་སྡིག་པ་ནི་གསོན་པར་གྱུར་པ་དང་། བདག་ནི་ཤི༌བར་གྱུར།
ROM 7:10 མ་གཞི་མི་གསོན་དུ་འཇུག་པའི་བཀའ་དེ་ཡིས་བདག་ནི་འཆི་བར་མཛད་དོ།།
ROM 7:11 རྒྱུ་མཚན་ནི་སྡིག་པས་གོ་སྐབས་དང་བསྟུན་ཞིང་བཀའ་དེ་ལ་བརྟེན་ནས་ང་རང་བསླུས་ཏེ་བསད༌པ་ཡིན།
ROM 7:12 དེ་ལྟར་བལྟས༌ན། བཀའ་ཁྲིམས་ནི་དམ་པ་ཡིན༌ལ། བཀའ་དེ་ཡང་དམ་པ༌དང༌བདེན༌དྲང༌། ལེགས་པོ་བཅས་ཡིན༌ནོ།།
ROM 7:13 དེ་འདྲ་ཡིན༌ན། ལེགས་པོ་ཡིན་པ་དེ་ཉིད་ནི་ང་རང་འཆི་བའི་རྒྱུ་རྐྱེན་ཡིན་ནམ་ཞེ༌ན། གཏན་ནས་མིན༌ཏེ། ང་རང་འཆི་བར་བྱེད་པའི་རྒྱུ་རྐྱེན་ནི་སྡིག་པ་ཡིན་ནོ།། འོན༌ཀྱང༌། སྡིག་པས་ལེགས་པོ་ཡིན་པ་དེ་ཉིད་བརྒྱུད་ནས་ང་རང་འཆི་བར་བྱས༌པས། དེ་ནི་སྡིག་པ་ཡིན་པ་དངོས་སུ་བསྟན༌ཞིང༌། བཀའ་དེ་ཡིས་སྔར་ལས་ཀྱང་སྡིག་པ་ནི་ཤིན་ཏུ་ངན་པ་ཡིན་པར་མཚོན༌པའོ།།
ROM 7:14 བདག་ཅག་གིས་བཀའ་ཁྲིམས་ནི་ཐུགས་ཉིད་ལ་གཏོགས་པ་ཤེས༌ནའང༌། བདག་ནི་ཤ་གཟུགས་ཀྱི་ཕུང་བོར་གཏོགས་ཤིང་སྡིག་པའི་བྲན་གཡོག་ཏུ་བཙོངས་པ་ཡིན་ནོ།།
ROM 7:15 རྒྱུ་མཚན་ནི་ངས་ཅི་བྱེད་པ་རང་གིས་ཀྱང་མི་ཤེས༌ཏེ། ངས་རང་གིས་བྱེད་འདོད་པའི་ལས་དེ་མི་བྱེད༌པར། རང་ཉིད་སྡང་བའི་ལས་དེ་བྱེད་དོ།།
ROM 7:16 གལ༌ཏེ། ངས་བྱས་པའི་ལས་དེ་ནི་རང་གིས་བྱེད་མི་འདོད་པ་ཡིན༌ན། ངས་བཀའ་ཁྲིམས་ནི་ལེགས་པོ་ཡིན་པ་ཁས་བླངས༌པ་ཡིན།
ROM 7:17 དེ་བས། དེ་ལྟར་བྱེད་མཁན་ནི་ང་རང་མིན༌ཏེ། ངའི་སེམས་ནང་དུ་གནས་པའི་སྡིག་པས་བྱས་པ་ཡིན་ནོ།།
ROM 7:18 ངས་དོན་བཟང་བསྒྲུབ་པའི་སེམས་ཐག་གཅོད་ནུས་ཀྱང་དེ་ལྟར་བསྒྲུབ་མི་ཐུབ༌པས། ངའི་ཤ་གཟུགས་ཀྱི་ཕུང་བོའི་ནང་དུ་ལེགས་པོ་ཅི་ཡང་མེད་པ་བདག་གིས་ཤེས་སོ།།
ROM 7:19 དེའི༌ཕྱིར། ངས་རང་གིས་བསྒྲུབ་འདོད་པའི་དོན་བཟང་མི་བསྒྲུབ༌པར། བསྒྲུབ་མི་འདོད་པའི་དོན་ངན་བསྒྲུབ་པར་བྱེད།
ROM 7:20 གལ༌ཏེ། ངས་རང་གིས་བསྒྲུབ་མི་འདོད་པའི་ལས་ཤིག་བསྒྲུབས༌ན། ལས་དེ་ནི་བདག་གིས་བྱས་པ་མ་ཡིན༌པར། ངའི་སེམས་ནང་དུ་གནས་པའི་སྡིག་པས་བྱས་པ་ཡིན༌ནོ།།
ROM 7:21 དེའི༌ཕྱིར། ངས་ཆོས་ཉིད་ཅིག་ཡོད་པ་ཤེས༌ཏེ། ངས་དོན་བཟང་བསྒྲུབ་འདོད་པའི་དུས༌སུ། ངན་པའང་བདག་དང་མཉམ་དུ་གནས་སོ།།
ROM 7:22 ངའི་ནང་གི་བསམ་པ་ལྟར༌ན། བདག་ནི་དཀོན་མཆོག་གི་ཆོས་ཉིད་ལ༌དགའ་བ་ཡིན།
ROM 7:23 འོན༌ཀྱང༌། བདག་གི་ཡན་ལག་ཁྲོད་དུ་ཆོས་ཉིད་གཞན་ཞིག་ཡོད༌དེ། ངའི་སེམས་ནང་གི་ཆོས་ཉིད་དང་འཐབ་སྟེ། ང་ནི་ཡན་ལག་ནང་གི་སྡིག་པའི་ཆོས་ཉིད་ཀྱི་དབང་དུ་གྱུར་པ་དང་། དེས་ང་རང་བཙན་བཟུང་བྱས་པ་བདག་གིས་ཤེས་སོ།།
ROM 7:24 བདག་ནི་ཇི་འདྲའི་ཐ་ཤལ་བ་ཞིག་རེད་ཨང་། སུ་ཞིག་གིས་ང་རང་འཆི་བར་འགྱུར་བའི་ལུས་པོ་འདི་ལས་སྐྱོབ་པར་བྱེད༌དམ་ཞེ་ན།
ROM 7:25 བདག་ཅག་གི་གཙོ་བོ་ཡེ་ཤུ་མཱ་ཤི་ཀར་བརྟེན་ནས་དཀོན་མཆོག་ལ་ཐུགས་རྗེ༌ཆེ་ཞུའོ།། མདོར་ན། བདག་གི་སེམས་སུ་དཀོན་མཆོག་གི་ཆོས་ཉིད་ལ་བསྟུན་ན་ཡང༌། བདག་གི་ཤ་གཟུགས་ཀྱི་ཕུང་བོས་སྡིག་པའི་ཆོས་ཉིད་ལ་བསྟུན་པའོ།།
ROM 8:1 དེ་བས་ན། ད་ལྟ་མཱ་ཤི་ཀ་ཡེ་ཤུའི་ནང་དུ་གནས་པ་རྣམས་ལ་ཉེས་ཆད་ཕོག་པ་ཅི་ཡང་མེད་དོ།།
ROM 8:2 ཅིའི་ཕྱིར་ཞེ་ན། མཱ་ཤི་ཀ་ཡེ་ཤུའི་ནང་དུ་ཡོད་པའི་ཚེ་སྲོག་གནང་མཁན་ཏེ་དམ་པའི་ཐུགས་ཉིད་ཀྱི་ཆོས་ཉིད་ཀྱིས། ཁྱོད་རང་ སྡིག་པ་དང་འཆི་བའི་ཆོས་ཉིད་ལས་ཐར་བར་མཛད་པའི་ཕྱིར༌ཡིན།
ROM 8:3 ཤ་གཟུགས་ཀྱི་ཕུང་བོའི་ནུས་ཤུགས་ཞན་པའི་དབང་གིས་བཀའ་ཁྲིམས་ཀྱིས་བསྒྲུབ་མ་ཐུབ་པ་དེ་དཀོན་མཆོག་གིས་བསྒྲུབས་ཏེ། ཁོང་གིས་རང་གི་སྲས་ནི་སྡིག་པའི་ལུས་ཀྱི་རྣམ་པ་དང་འདྲ་བའི་སྡིག་པའི་བཤགས་མཆོད་དུ་མངགས༌ཤིང་། ཤ་གཟུགས་ཀྱི་ཕུང་བོའི་ནང་དུ་སྡིག་པར་ཉེས་ཆད་བཅད་དོ།།
ROM 8:4 དེ་ནི་བཀའ་ཁྲིམས་ཀྱིས་བཏོན་པའི་རྣམ་པར་དག་པའི་བླང་བྱ་ནི་བདག་ཅག་གིས་ཤ་གཟུགས་ཀྱི་ཕུང་བོ་དང་མི་བསྟུན་པར། དམ་པའི་ཐུགས་ཉིད་ལ་བསྟུན་ནས་སྐྱོད་མཁན་རྣམས་ཀྱི་སྟེང་དུ་འགྲུབ་པར་མཛད་པའི་ཕྱིར༌ཡིན།
ROM 8:5 ཅིའི་ཕྱིར་ཞེ་ན། ཤ་གཟུགས་ཀྱི་ཕུང་བོར་བསྟུན་མཁན་གྱིས་ཤ་གཟུགས་ཀྱི་ཕུང་བོའི་དོན་བསམ༌ཞིང༌། དམ་པའི་ཐུགས་ཉིད་ལ་བསྟུན་མཁན་གྱིས་དམ་པའི་ཐུགས་ཉིད་ཀྱི་དོན་བསམ་པས༌སོ།།
ROM 8:6 ཡང་ཤ་གཟུགས་ཀྱི་ཕུང་བོ་བསམ་པའི་མཇུག་འབྲས་ནི་འཆི་བ༌དང༌། དམ་པའི་ཐུགས་ཉིད་བསམ་པའི་མཇུག་འབྲས་ནི་ཚེ་སྲོག་དང་ཞི་བདེ་ཡིན།
ROM 8:7 མ་གཞི་ཤ་གཟུགས་ཀྱི་ཕུང་བོ་བསམ་པ་རྣམས་ཀྱིས་དཀོན་མཆོག་གི་བཀའ་ཁྲིམས་ལ་མི་བསྟུན་པ་དང་བསྟུན་ཡང་མི་ནུས་པས་དཀོན་མཆོག་ནི་དགྲ་རུ་བཟུང༌བ་ཡིན་ནོ།།
ROM 8:8 དེར་མ༌ཟད། ཤ་གཟུགས་ཀྱི་ཕུང་བོར་གཏོགས་པ་རྣམས་ཀྱིས་དཀོན་མཆོག་གི་ཐུགས་དགྱེས་པར་བྱ་མི་ནུས་སོ།།
ROM 8:9 འོན་ཀྱང་། དཀོན་མཆོག་གི་ཐུགས་ཉིད་ནི་དངོས་གནས་ཁྱོད་ཅག་གི་ནང་དུ་བཞུགས་པ་ཡིན༌ན། ཁྱོད་ཅག་ཤ་གཟུགས་ཀྱི་ཕུང་བོར་མི་གཏོགས་པར་དམ་པའི་ཐུགས་ཉིད་ལ་གཏོགས༌ཤིང་། མི་ཞིག་ལ་སྐྱབས་མགོན་མཱ་ཤི་ཀའི་ཐུགས་ཉིད་མི་ལྡན༌ན། མི་དེ་ནི་ཁོང་ལ་མི་གཏོགས༌པ་ཡིན་ནོ།།
ROM 8:10 སྐྱབས་མགོན་མཱ་ཤི་ཀ་ཁྱོད་ཅག་གི་ནང་དུ་བཞུགས༌ན། ཁྱོད་ཅག་གི་ལུས་པོ་ནི་སྡིག་པའི་རྐྱེན་གྱིས་ཤི་ཡང༌། ཁྱོད་ཅག་གི་སེམས་ནི་རྣམ་པར་དག་པའི་དབང་གིས་གསོན༌པ་ཡིན་ནོ།།
ROM 8:11 འོན༌ཀྱང༌། མཱ་ཤི་ཀ་ཡེ་ཤུ་སྐུ་གྲོངས་པ་ནས་སླར་གསོན་པར་མཛད་མཁན༌དཀོན་མཆོག་གི་ཐུགས་ཉིད་ནི་ཁྱོད་ཅག་གི་ནང་དུ་བཞུགས་པ་ཡིན༌ན། ཁོང་གིས་ཀྱང་ཁྱོད་ཅག་གི་ནང་དུ་བཞུགས་པའི་དམ་པའི་ཐུགས་ཉིད་བརྒྱུད༌ནས། ཁྱོད་ཅག་གི་འཆི་བར་འགྱུར་བའི་ལུས་པོ་དེ་སླར་ཡང་གསོན་པར་མཛད་ངེས༌སོ།།
ROM 8:12 སྤུན་ཟླ༌རྣམས། འདི་ལྟར་བལྟས༌ན། བདག་ཅག་གིས་ཤ་གཟུགས་ཀྱི་ཕུང་བོར་བུ་ལོན་ཆད་པ་མ་ཡིན་ལ་དེར་བསྟུན་ནས་འཚོ་བའང་མིན་ནོ།།
ROM 8:13 གལ༌ཏེ། ཁྱོད་རྣམས་ཤ་གཟུགས་ཀྱི་ཕུང་བོར་བསྟུན་ནས་འཚོ་བ་ཡིན་ན་ངེས་པར༌འཆི་བ་དང་། གལ༌ཏེ། དམ་པའི་ཐུགས་ཉིད་ལ་བརྟེན་ནས་ལུས་པོའི་སྤྱོད་ངན་བཅོམ་ན་གསོན་པར་འགྱུར་རོ།།
ROM 8:14 རྒྱུ་མཚན་ནི་དཀོན་མཆོག་གི་ཐུགས་ཉིད་ཀྱིས་ཁྲིད་པར་མཛད་པའི་མི་ཐམས་ཅད་ནི་དཀོན་མཆོག་གི་བུ་དང་བུ་མོ་ཡིན་པའི་ཕྱིར༌རོ།།
ROM 8:15 ཁྱོད་རྣམས་ལ་སྔར་བཞིན་འཇིགས་སྣང་དུ་འཇུག་པའི་བྲན་གཡོག་གི་སེམས་ཐོབ་པ་མ་ཡིན་པས། ཁྱོད་རྣམས་ལ་དཀོན་མཆོག་གི་བུ་སྐལ་དུ་གྱུར་པའི་སེམས་ཐོབ་ཅིང་དེ་ལ་བརྟེན་ནས། བདག་ཅག་གིས་དཀོན་མཆོག་ལ་ཨབ་བཱ་ལགས། ཡབ་ལགས་ཞེས་འབོད་པའོ།།
ROM 8:16 དམ་པའི་ཐུགས་ཉིད་ཀྱིས་བདག་ཅག་གི་སེམས་དང་མཉམ་འབྲེལ་བྱས་ནས་བདག་ཅག་ནི་དཀོན་མཆོག་གི་བུ་ཕྲུག་ཡིན་པར་བདེན་དཔང་མཛད།
ROM 8:17 ཡང་བུ་ཕྲུག་ཡིན་ན་ཕྱིས་སུ་རྒྱུན་འཛིན་མཁན་ཡང་ཡིན་ཏེ། དཀོན་མཆོག་གི་རྒྱུན་འཛིན་མཁན་ཡིན༌ཞིང་། སྐྱབས་མགོན་མཱ་ཤི་ཀ་དང་མཉམ་དུ་རྒྱུན་འཛིན་མཁན་ཡིན། བདག་ཅག་ལ་ཁོང་དང་མཉམ་དུ་གཟི་བརྗིད་འཐོབ་པར་འགྱུར་ན། བདག་ཅག་གིས་ཁོང་དང་མཉམ་དུ་སྡུག་བསྔལ་མྱང་དགོས་སོ།།
ROM 8:18 བདག་གིས་བསམས༌ན། ད་ལྟའི་སྡུག་བསྔལ་འདི་ནི་མ་འོངས་པའི་དུས་སུ་བདག་ཅག་ལ་མངོན་པར་འགྱུར་བའི་གཟི་བརྗིད་དང་བསྡུར་མི་འོས་སོ།།
ROM 8:19 བསྐྲུན་པའི་དངོས་པོ་ཐམས་ཅད་ཀྱིས་དཀོན་མཆོག་གི་བུ་ཕྲུག་རྣམས་མངོན་པར་རེ་བ་ཆེན་པོས་སྒུག་འདུག
ROM 8:20 རྒྱུ་མཚན་ནི་བསྐྲུན་པའི་དངོས་པོ་རྣམས་སྙིང་པོ་མེད་པའི་དབང་དུ་ཚུད་པ་ནི་རང་ཉིད་ཀྱི་འདོད་པ་ལྟར་མ་ཡིན༌པར། དེ་ལྟར་མཛད་མཁན་དཀོན་མཆོག་གི་ཐུགས་དགོངས་བཞིན་ཡིན་པས༌སོ།།
ROM 8:21 འོན༌ཀྱང༌། བསྐྲུན་པའི་དངོས་པོ་དག་གིས་ངན་རུལ་གྱི་དབང་ཤེད་ལས་ཐར་ནས། དཀོན་མཆོག་གི་བུ་ཕྲུག་རྣམས་ཀྱི་ཐར་པའི་གཟི་བརྗིད་ལོངས་སུ་སྤྱོད་ཐུབ་པར་རེ་སྒུག་བྱེད༌དོ།།
ROM 8:22 ད་ལྟའི་བར་དུ་དངོས་པོ་བསྐྲུན་པ་ཐམས་ཅད་ཀྱིས་ལྷན་དུ་དབུགས་རིང་ཕྱུང་ཞིང་དཀའ་སྡུག་མྱངས་པ་བདག་ཅག་གིས་ཤེས་སོ།།
ROM 8:23 དེར་མ༌ཟད། དམ་པའི་ཐུགས་ཉིད་ཀྱི་འབྲས་བུ་ཐོག་མ་ཡོད་པ་བདག་ཅག་གིས་ཀྱང་སེམས་སུ་དབུགས་རིང་འབྱིན༌པ་དང༌། བུ་སྐལ་འཐོབ་པར་རེ་སྒུག་བྱེད་ཅིང་། དེ་ནི་བདག་ཅག་གི་ལུས་པོ་ཐར་བ་ཡིན་ནོ།།
ROM 8:24 ཡང་བདག་ཅག་ནི་རེ་བ་ལ་བརྟེན་ནས་ཐར༌ཞིང་། མིག་གིས་མཐོང་བའི་རེ་བ་ནི་རེ་བ་མིན༌ཏེ། སུ་ཞིག་གིས་མིག་གིས་མཐོང་བ་དེ་ལ་རེ་བ་བྱེད༌དམ།
ROM 8:25 འོན༌ཀྱང༌། བདག་ཅག་གིས་མིག་གིས་མི་མཐོང་བ་དེ་ལ་རེ་བ་བྱེད༌ན། ངང་རྒྱུད་རིང་པོས་སྒུག་པ་ཡིན་ནོ།།
ROM 8:26 དེ་བཞིན༌དུ། དམ་པའི་ཐུགས་ཉིད་ཀྱིས་བདག་ཅག་གི་ཉམས་ཞན་ཡིན་པའི་ཆ་ལ་རོགས་སྐྱོར་གནང༌སྟེ། བདག་ཅག་གིས་ཅི་ལྟར་གསོལ་བ་འདེབས་པ་མི་ཤེས༌ཀྱང་། དམ་པའི་ཐུགས་ཉིད་ཀྱིས་དངོས་སུ་སྨྲ་མི་ནུས་པའི་དབུགས་རིང་ལ་བརྟེན་ནས་བདག་ཅག་གི་ཚབ་ཏུ་གསོལ་བ་འདེབས་པ་ཡིན་ནོ།།
ROM 8:27 དམ་པའི་ཐུགས་ཉིད་ཀྱིས་དཀོན་མཆོག་གི་ཐུགས་དགོངས་བཞིན་དུ་དད་ལྡན་དམ་པ་རྣམས་ཀྱི་ཚབ་ཏུ་གསོལ་བ་བཏབ༌པས། མིའི་སེམས་ལ་རྟོག་དཔྱོད་མཛད་མཁན་གྱིས་དམ་པའི་ཐུགས་ཉིད་ཀྱི་དགོངས་པ་མཁྱེན༌ནོ།།
ROM 8:28 དཀོན་མཆོག་ལ་གཅེས་པའི་མི་སྟེ་ཁོང་གི་ཐུགས་དགོངས་བཞིན་ཞལ་འབོད་ཐོབ་པའི་མི་རྣམས་ཀྱི་དོན་ཐམས་ཅད་ནི། དཀོན་མཆོག་གིས་ཕན་ཚུན་ལ་ཕན་ཐོགས་པར་མཛད་ཡོད་པ་བདག་ཅག་གིས་ཤེས་སོ།།
ROM 8:29 རྒྱུ་མཚན་ནི་དཀོན་མཆོག་གིས་སྔར་ནས་མཁྱེན་པའི་མི་རྣམས་རང་གི་སྲས་ཀྱི་སྣང་བརྙན༌དང་འདྲ་བར་འགྱུར༌ཆེད་སྔ་མོ་ནས་ཐག་གིས་བཅད་ཅིང༌། སྲས་དེ་ཉིད་སྤུན་ཟླ་མང་པོའི་ཁྲོད་དུ་སྐྱེས་འགོ་རུ་མཛད་པའི་ཕྱིར༌ཡིན།
ROM 8:30 ཡང་སྔ་མོ་ནས་ཐག་གིས་བཅད་པ་རྣམས་ལའང་ཞལ་འབོད་གནང༌ཞིང༌། ཞལ་འབོད་གནང་བ་རྣམས་ཀྱང་རྣམ་པར་དག་པར་བརྩིས་པ༌དང༌། རྣམ་པར་དག་པར་བརྩིས་པ་རྣམས་ཀྱང་གཟི་བརྗིད་དང་ལྡན་པར་མཛད༌དོ།།
ROM 8:31 དེ་འདྲ་ཡིན༌ན། ད་དུང་ཅི་ཞིག་སྨྲ་བར༌བྱའམ། དཀོན་མཆོག་ནི་བདག་ཅག་གི་ཕྱོགས་ཡིན༌ན། སུ་ཞིག་གིས་བདག་ཅག་ལ་རྒོལ་ནུས༌སམ།
ROM 8:32 དཀོན་མཆོག་གིས་རང་ཉིད་ཀྱི་སྲས་ལ་མ་ཕངས་པར་བདག་ཅག་ཐམས་ཅད་ཀྱི་ཆེད་དུ་བློས་བཏང་བས་ན། དངོས་པོ་ཐམས་ཅད་དང་སྲས་ཁོང་ཉིད་དང་བཅས་པ་བདག་ཅག་ལ་ཕངས་མེད་དུ་གནང་བར་འགྱུར་བ་མ་ཡིན༌ནམ།
ROM 8:33 སུ་ཞིག་གིས་དཀོན་མཆོག་གི་བདམས་པ་རྣམས་ཁྲིམས་ལ་སྦྱོར་ནུས༌སམ། དཀོན་མཆོག་ནི་མི་རྣམ་དག་ཏུ་བརྩི་མཁན་ཡིན་ནོ།།
ROM 8:34 མཱ་ཤི་ཀ་ཡེ་ཤུ་སྐུ་གྲོངས་པར་མ་ཟད། སླར་ཡང་གསོན༌ཞིང༌ད་ལྟ་དཀོན་མཆོག་གི་གཡས་ཕྱོགས་སུ་བཞུགས༌ཏེ། བདག་ཅག་གི་དོན་དུ་གསོལ་བ་འདེབས་བཞིན་ཡོད༌པས། སུ་ཞིག་གིས་བདག་ཅག་ལ་ཉེས་ཆད་གཅོད་ནུས༌སམ།
ROM 8:35 ཡང་སུ་ཞིག་གིས་བདག་ཅག་སྐྱབས་མགོན་མཱ་ཤི་ཀའི་བྱམས་པ་དང་ཕྲལ་ནུས༌སམ། དེ་ནི་དཀའ་སྡུག་ཡིན༌ནམ། ཡང་ན་སེམས་ཁྲལ་ཡིན༌ནམ། ཡང་ན་བཙན་གནོན་ཡིན༌ནམ། ཡང་ན་བཀྲེས་ལྟོགས་ཡིན༌ནམ། ཡང་ན་གོས་མེད་གཅེར་བུ་ཡིན༌ནམ། ཡང་ན་ཉེན་ཁ་ཡིན༌ནམ། ཡང་ན་རལ་གྲི་ཡིན་ནམ།
ROM 8:36 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱེད་ཀྱི་རྐྱེན་གྱིས་ངེད་རྣམས་ཉིན་རྒྱུན་གསོད༎ གཞན་གྱིས་ངེད་རྣམས་བཤས་ལུག་ལྟ་བུར་བརྩིས།། ཞེས་བཀོད་པ་བཞིན༌ནོ།།
ROM 8:37 འོན༌ཀྱང༌། བདག་ཅག་གཅེས་སུ་འཛིན་མཁན་ཁོང་ཉིད་ལ་བརྟེན་ནས། དོན་འདི་ཐམས་ཅད་ཀྱི་སྟེང་ནས་བདག་ཅག་རྣམ་པར་རྒྱལ༌བ་ལས་ཀྱང་ལྷག་པ་ཡིན་ནོ།།
ROM 8:38 ཅིའི་ཕྱིར་ཞེ་ན། བདག་ལ་ཡིད་ཆེས་བརྟན་པོ་ཡོད་པ༌ནི། འཆི་བ༌དང༌། གསོན༌པ། ནམ་མཁའི་ཕོ༌ཉ། དབང་འཛིན༌མཁན། ད་ལྟའི༌དོན་རྣམས། མ་འོངས་པའི༌དོན་དག མཐུ་སྟོབས༌ཅན།
ROM 8:39 མཐོ་སར་གནས༌པ། དམའ་སར་གནས༌པ། བསྐྲུན་པའི་དངོས་པོ་གཞན་གང་གིས༌ཀྱང༌། བདག་ཅག་དཀོན་མཆོག་གི་བྱམས་པ་དང་ཕྲལ་མི་ནུས༌ཏེ། བྱམས་པ་འདི་ནི་བདག་ཅག་གི་གཙོ་བོ་མཱ་ཤི་ཀ་ཡེ་ཤུའི་ནང་དུ་གནས་པས་སོ།།
ROM 9:1 བདག་གིས་སྐྱབས་མགོན་མཱ་ཤི་ཀའི་ནང་དུ་བདེན་གཏམ་བརྗོད་པ་ལས་རྫུན་མི་སྨྲ༌ཞིང༌། བདག་གི་སེམས་ཀྱིས་དམ་པའི་ཐུགས་ཉིད་ལ་བརྟེན་ནས་བདག་ལ་བདེན་དཔང་བྱེད་པ་ཡིན་ཏེ།
ROM 9:2 བདག་གི་སེམས་སུ་སྡུག་བསྔལ་ཆེ་ཞིང་རྟག་ཏུ༌སྐྱོའོ།།
ROM 9:3 བདག་དང་རིགས་རྒྱུད་གཅིག་པའི་སྤུན་ཟླའི་དོན༌དུ། རང་ཉིད་ལ་དམོད་པ་ཐེབས་ཞིང་སྐྱབས་མགོན་མཱ་ཤི་ཀ་དང་བྲལ་ནའང་བདག་ལ་འགྱོད་པ་མེད༌དེ།
ROM 9:4 མི་དེ་རྣམས་ནི་ཡེས་ར་ཨེལ་གྱི་མི་རིགས་ཡིན༌ཞིང༌། བུ་སྐལ་གྱི་མིང་དང་། གཟི༌བརྗིད། ཞལ༌ཆད་རྣམས། བཀའ༌ཁྲིམས་གཏན་ལ་འབེབས་པ། གུས་སྲོལ། ཞལ་བཞེས་ཐམས་ཅད་དེ་དག་གི་ཡིན༌ལ།
ROM 9:5 མེས་པོ་རྣམས་ཀྱང་དེ་དག་གི་མེས་པོ་ཡིན། ལུས་ཕུང་གི་ཆ་ནས་སྨྲས༌ནའང༌། སྐྱབས་མགོན་མཱ་ཤི་ཀ་ཡང་དེ་རྣམས་ལས་བྱུང༌ཞིང༌། ཁོང་ནི་ཀུན་ལས་བླ་ན་འཕགས་པ་དང་དུས་རྟག་ཏུ་བསྔགས་པར་འོས་པའི་དཀོན་མཆོག་ལགས༌སོ། །ཨ༌མེན།
ROM 9:6 དེ་ལྟར་སྨྲས་པ་ནི་དཀོན་མཆོག་གི་བཀའ་སྟོང་བར་གྱུར་པ་མ་ཡིན་ནོ།། རྒྱུ་མཚན་ནི་ཡེས་ར་ཨེལ་ནས་སྐྱེས་པ་ཐམས་ཅད་ཡེས་ར་ཨེལ་གྱི་མི་ཡིན་པའི་ངེས་པ་མེད༌ལ།
ROM 9:7 ཨབ་ར་ཧམ་གྱི་རིགས་རྒྱུད་ཡིན་པ་ཐམས་ཅད་ཀྱང་ཁོང་གི་བུ་ཕྲུག་ཡིན་པར་མ་ངེས་པའི་ཕྱིར༌རོ། །དེ་ལ་ཇི་སྐད༌དུ། ཨི་སཱག་བརྒྱུད་ནས་ཁྱོད་ཀྱི་རིགས་རྒྱུད་ཀྱི་མིང་ཐོན་པར་འགྱུར་ཞེས་གསུངས་སོ།།
ROM 9:8 དེ་ནི་ལུས་ཕུང་ལས་སྐྱེས་པའི་བུ་དང་བུ་མོ་རྣམས་དཀོན་མཆོག་གི་བུ་ཕྲུག་མ་ཡིན༌ཞིང༌། ཞལ་བཞེས་ཐོབ་པ་རྣམས་ནི་ད་གཟོད་རིགས་རྒྱུད་དུ་བརྩིས༌པ་ཡིན།
ROM 9:9 ཅིའི་ཕྱིར་ཞེ་ན། ཞལ་བཞེས་གནང་བའི་བཀའ་ནི་འདི་ལྟ༌སྟེ། སང་ལོའི་དུས་འདི༌ལ་ང་རང་ཡོང་ངེས༌ཤིང༌། སཱ་ར་ལ་བུ་ཞིག་སྐྱེ་བར་འགྱུར་ཞེས་གསུངས་པའི་ཕྱིར༌རོ།།
ROM 9:10 གཞན༌ཡང༌། རིབ་ཀཱ་ནི་བདག་ཅག་གི་མེས་པོ་ཨི་སཱག་གཅིག་པུ་ལས་མངལ་ཆགས༌ཏེ།
ROM 9:11 སྐབས་དེར་བུ་མཚེ་མ་སྐྱེས་མེད་ཅིང་ལས་བཟང་ངན་གང་ཡང་མ་བྱས་པའི་སྔོན་ལ། དཀོན་མཆོག་གིས་བདམས་པར་མཛད་པའི་ཐུགས་དགོངས་མངོན་ཞིང་བརྟན་པོར་གནས་པའི༌ཕྱིར། མིའི་བྱ་སྤྱོད་ལ་འབྲེལ་བ་མེད་ཅིང་མི་ལ་ཞལ་འབོད་གནང་མཁན་དཀོན་མཆོག་ལ་རག་ལས༌པ་ཡིན་ལ།
ROM 9:12 དཀོན་མཆོག་གིས་རིབ་ཀཱ་ལ་འདི་སྐད༌དུ། མ་འོངས་པར་བུ་ཆེ་བས་བུ་ཆུང་བ་ལ་ཞབས་ཕྱི་བྱེད་པར་འགྱུར་ཞེས་གསུངས་སོ།།
ROM 9:13 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཡ་ཀོབ་ནི་བདག་གིས་གཅེས་སུ་འཛིན་པ༌དང༌། ཨེ་སཱབ་ནི་བདག་གིས་འཁོན་དུ་འཛིན་པ་ཡིན་ཞེས་བཀོད་ཡོད་པ་བཞིན༌ནོ།།
ROM 9:14 དེས་ན་ངེད་ཅག་གིས་ཅི་ཞིག་སྨྲའམ། དཀོན་མཆོག་ལ་དྲང་བདེན་མ་ཡིན་པ་ཡོད་དམ་ཞེ༌ན། གཏན་ནས་མེད་དོ།།
ROM 9:15 ཅིའི་ཕྱིར་ཞེ་ན། དཀོན་མཆོག་གིས་མོ་ཤེ་ལ་འདི་སྐད༌དུ། ངས་སུ་ཞིག་ལ་སྙིང་རྗེ་བར་འདོད་ན་དེ་ལ་སྙིང་རྗེ་བར༌བྱའོ།། ཡང་སུ་ཞིག་ལ་བརྩེ་བར་བསམ་ན་དེ་ལ་བརྩེ་བར་བྱའོ་ཞེས་གསུངས་པས༌སོ།།
ROM 9:16 དེའི༌ཕྱིར། དོན་དེ་ནི་ཐུགས་རྗེ་གནང་མཁན་དཀོན་མཆོག་ལ་རག་ལས་པ༌ལས། མིའི་འདོད་པའམ་རྩོལ་བ་ལ་རག་མི་ལས་པ་ཡིན།
ROM 9:17 རྒྱུ་མཚན་ནི་གསུང་རབ་ཀྱི་མདོ༌ལས། ཕཱར་ཨོལ་ལ་འདི་སྐད༌དུ། ཁྱོད་ཀྱི་སྟེང་ནས་བདག་གི་མཐུ་སྟོབས་མངོན་པར་བྱེད༌ཅིང༌། བདག་གི་མིང་ནི་གནམ་འོག་ཀུན་ཏུ་བསྒྲག་པའི་ཕྱིར་བདག་གིས་ཁྱོད་དར་བར་བྱས༌པ་ཡིན་ཞེས་གསུངས་པའི་ཕྱིར༌རོ།།
ROM 9:18 དེ་བས༌ན། དཀོན་མཆོག་གིས་སུ་ཞིག་ལ་ཐུགས་རྗེ་གནང་བར་དགོངས་ན་དེ་ལ་ཐུགས་རྗེ་གནང་བ༌དང༌། སུ་ཞིག་གི་སེམས་རྒྱུད་གྱོང་པོར་མཛད་པར་དགོངས༌ན་དེའི་སེམས་རྒྱུད་གྱོང་པོར་མཛད༌པའོ།།
ROM 9:19 དེ་ལྟར༌ཡིན་ན། དཀོན་མཆོག་གིས་ཅིའི་ཕྱིར་ད་དུང་མི་ལ་སྐྱོན་བརྗོད་གནང་བ་ཡིན༌ནམ། སུ་ཞིག་གིས་ཁོང་གི་ཐུགས་དགོངས་ལ་རྒོལ་ནུས་སམ་ཞེས་ཁྱོད་ཀྱིས་བདག་ལ་སྨྲ་ངེས་པ་ཡིན་ནོ།།
ROM 9:20 འོན་ཀྱང་། ཁྱོད་ནི་མི་སུ་ཞིག་ཡིན༌འདོད་དམ། ཁྱོད་ཀྱིས་དཀོན་མཆོག་ལ་ཚིག་ལོག་བརྗོད་ནུས༌སམ། དཔེར་ན། བསྐྲུན་པའི་དངོས་པོ་དེས་སྐྲུན་མཁན༌ལ། ཁྱེད་ཀྱིས་ཅིའི་ཕྱིར་ང་རང་འདི་ལྟར་བཟོས་སམ་ཞེས༌སྨྲའམ།
ROM 9:21 ཡང་ན་རྫ་ཆས་བཟོ་མཁན་གྱིས་འདམ་ཉུང་ཙམ་བླངས་ནས་སྣོད་ཆས་བཟོས་ཏེ་མཆོག་དམན་གང་ཞིག་ཏུ་བཀོལ་བའི་དབང་ཆ་ཁོ་ལ་མེད༌དམ།
ROM 9:22 འོན་ཀྱང་། དཀོན་མཆོག་གིས་རང་ཉིད་ཀྱི་ཐུགས་ཁྲོ་དང་ནུས་མཐུ་མངོན་པར་དགོངས༌ན། ཐུགས་ཁྲོ་བར་རུང་ཞིང་འཇིག་པར་འགྱུར་བར་སྟ་གོན་མཛད་པའི་སྣོད་ཆས་དག་ལ་ངང་རྒྱུད་རིང་པོས་བཟོད་སྒོམ་ཆེན་པོ་གནང་བ༌དང༌།
ROM 9:23 ཡང་ཁོང་གིས་ཕུན་སུམ་ཚོགས་པའི་གཟི་བརྗིད་དེ་ནི་ཐུགས་རྗེ་འཐོབ་པར་འགྱུར་བའི་སྣོད་ཆས་དག་གི་སྟེང་དུ་མངོན་པའི་ཕྱིར་དེ་ལྟར་མཛད༌ཅིང༌། ཁོང་གིས་སྔ་མོ་ནས་དེ་དག་གཟི་བརྗིད་ལྡན་པར་འགྱུར་བའི་ཕྱིར་སྟ་གོན་མཛད༌པ་ཡིན་ཏེ།
ROM 9:24 སྣོད་ཆས་དེ་ནི་དཀོན་མཆོག་གིས་ཡ་ཧུ་དཱ་པ་ཙམ་མ༌ཟད། ཕྱི་ཕྱོགས་ཀྱི་མི་རིགས་དག་ལས་བདག་ཅག་ལ་ཞལ་འབོད་གནང་བ་ཡིན༌པས། དེ་ལ་མི་རུང་བ་ཅི་ཡོད་དམ་ཞེ༌ན།
ROM 9:25 དཀོན་མཆོག་གིས་ཧོ་ཤེ་ཨ་ཡི་མདོ་ལས་འདི་སྐད༌དུ། གཞི་ནས་བདག་གི་མི་སྡེ་མིན༌པ་རྣམས།། བདག་གི་མི་སྡེ་ཡིན་ཞེས་བདག་གིས༌སྒྲོག ། གཞི་ནས་བརྩེ་བ་མེད་པའི་ཁོ་མོ༌ལ།། བདག་གིས་བརྩེ་བས་སྐྱོང་ཞེས་བདག་ནི༌སྨྲ།།
ROM 9:26 ཁྱོད་རྣམས་བདག་གི་མི་སྡེ་མ་ཡིན༌ཞེས།། སྔོན་ཆད་ཡུལ་སྡེ་གང་ནས་སྨྲས་གྱུར་ན།། རྟག་བརྟན་དཀོན་མཆོག་ཁོང་གི་བུ་ཡིན༌ཞེས།། མ་འོངས་པར་ཡང་ཡུལ་དེར་དེ་ལྟར༌སྨྲ།། ཞེས༌པའོ།།
ROM 9:27 དེ་ཡང་ཡེ་ཤ་ཡཱ་ཡིས་ཡེས་ར་ཨེལ་གྱི་མི་རྣམས་ལ་སྐད་ཆེན་པོས་འདི་སྐད༌དུ། ཡེས་ར་ཨེལ་གྱི་བུ་རྒྱུད་ནི་མཚོ་འགྲམ་གྱི་བྱེ་མ་ལྟར་མང༌ནའང༌། དེ་རྣམས་ལས་ཐར་པ་ཐོབ་མཁན་ནི་ལྷག་འཕྲོ་ཙམ༌ཡིན།
ROM 9:28 ཅིའི་ཕྱིར་ཞེ་ན། གཙོ་བོས་འཇིག་རྟེན་སྟེང་དུ་རང་ཉིད་ཀྱི་བཀའ་ཡོངས་སུ་རྫོགས་ཤིང་མྱུར་བ་མྱུར་དུ་ལག་བསྟར་མཛད༌ངེས་ཡིན་ཞེས་གསུངས་པའི་ཕྱིར༌རོ།།
ROM 9:29 དེ་ལ་ཡང་ཡེ་ཤ་ཡཱ་ཡིས་དེ་སྔར་འདི་སྐད༌དུ། དཔུང་ཚོགས་ཀུན་གྱི་གཙོ་བོས་བདག་ཅག༌ལ།། རྒྱུད་ཀྱི་ས་བོན་བསྐྱུར་བ་མ་ཡིན༌ན།། སཱ་དོམ་དང་ནི་གཱ་མོ་ར་ཇི་བཞིན།། བདག་ཅག་ཀྱང་ནི་དེ་བཞིན་གྱུར་པ༌ཡིན།། ཞེས་གསུངས༌པའོ།།
ROM 9:30 དེས་ན་ངེད་ཅག་གིས་ཅི་ཞིག་སྨྲའམ། གཏན་ནས་རྣམ་དག་ལ་བརྩོན་པར་མི་བྱེད་པའི་ཕྱི་ཕྱོགས་པ་རྣམས་ལ་དད་པ་ལས་བྱུང་བའི་རྣམ་དག་ཐོབ༌ཀྱང༌།
ROM 9:31 ཡེས་ར་ཨེལ་གྱི་མི་རིགས་ཀྱིས་བཀའ་ཁྲིམས་ཀྱི་རྣམ་དག་དེ་ཉིད་བརྩོན་ལེན་བྱས་ནའང་རྣམ་དག་དེ་ཉིད་མ་ཐོབ་བོ།།
ROM 9:32 རྒྱུ་མཚན་ཅི་ཞེ༌ན། དེ་དག་གིས་དད་པ་ལ་བརྟེན་ནས་བརྩོན་ལེན་མི་བྱེད༌པར། མིའི་ལས་ཁོ་ནར་བརྟེན་ནས་བརྩོན་ལེན་བྱེད་པ་ཡིན༌པས། མི་དེ་རྣམས་ཀྱི་རྐང་པ་ནི་འདྲེད་པའི་རྡོ་དེར་ཐོགས༌པ་ཡིན་ནོ།།
ROM 9:33 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ལྟོས་དང་། བདག་གིས་ཛ་ཡན་ཡུལ་དུ་རྡོ་ཞིག༌བཞག ། དེ་ནི་རྐང་པ་འདྲེད་པའི་རྡོ་ཞིག༌དང༌།། ས་ལ་སྒྱེལ་བའི་ཕ་བོང་ཡང་ཡིན་ཏེ།། ཁོང་ལ་བརྟེན་ཅིང་དད་པ་བྱེད་མཁན༌ཀུན།། ཁ་ནི་མི་སྐྱེངས་ངོ་ཡང་མི་གནོང༌ངོ༌།། ཞེས་བཀོད་པ་བཞིན༌ནོ།།
ROM 10:1 སྤུན་ཟླ༌རྣམས། ངའི་སེམས་ཀྱི་འདོད་མོས་དང་དཀོན་མཆོག་ལ་གསོལ་བ་འདེབས་པ་ནི་ཡེས་ར་ཨེལ་གྱི་མི་རིགས་ལ་ཐར་པ་འཐོབ་རྒྱུ་དེ་ཡིན་ནོ།།
ROM 10:2 མི་དེ་རྣམས་དཀོན་མཆོག་ལ་སྤྲོ་སེམས་ཆེ་ནའང་ཤེས་བྱ་བཞིན་དུ་མ་ཡིན་པ་ནི་བདག་གིས་བདེན་དཔང་བྱེད་དོ།།
ROM 10:3 རྒྱུ་མཚན་ནི་དཀོན་མཆོག་གི་རྣམ་དག་མ་ཤེས་པར་རང་ཉིད་ཀྱི་རྣམ་དག་གཏན་ལ་འབེབ་འདོད་པས་དཀོན་མཆོག་གི་རྣམ་དག་ལ་མི་བསྟུན་པའི་ཕྱིར༌རོ།།
ROM 10:4 བཀའ་ཁྲིམས་ཀྱི་མཐར་ཐུག་ནི་སྐྱབས་མགོན་མཱ་ཤི་ཀ་ཡིན༌ཞིང༌། ཁོང་ལ་དད་པ་བྱེད་མཁན་ཐམས་ཅད་རྣམ་དག་ཏུ་བརྩི་བར་འགྱུར་རོ།།
ROM 10:5 དེ་ལ་མོ་ཤེ་ཡིས་འདི་ལྟར་བྲིས་ཡོད་དེ། སུ་ཞིག་གིས་བཀའ་ཁྲིམས་ལས་བྱུང་བའི་རྣམ་དག་བཞིན་དུ་བྱེད༌ན། མི་དེའང་དེ་ལ་བརྟེན་ནས་སྲོག་འཚོ་བར་ངེས་ཞེས་པའོ།།
ROM 10:6 འོན༌ཀྱང༌། དད་པ་ལས་བྱུང་བའི་རྣམ་དག་གིས་འདི་སྐད༌དུ་གསུངས་པ་སྟེ། ཁྱོད་ཀྱིས་རང་གི་སེམས་ནང༌དུ། སུ་ཞིག་ནམ་མཁའི་ཞིང་ཁམས་སུ་འཕགས་པར་འགྱུར་རམ་ཞེས་སྨྲ་བར་མི་བྱའོ༎ དེ་ནི་སྐྱབས་མགོན་མཱ་ཤི་ཀ་མར་སྤྱན་དྲངས་ཡོང༌བ་ཡིན་ཞེས་པ་དང་།
ROM 10:7 ཡང་ན་འདི་སྐད་དུ། སུ་ཞིག་མར་ཞབས་མེད་པའི་དོང་དུ་འགྲོ་བར་འགྱུར་རམ་ཞེས་སྨྲ་བར་མི་བྱའོ༎ དེ་ནི་སྐྱབས་མགོན་མཱ་ཤི་ཀ་གཤིན་པོའི་ཡུལ་ནས་ཡར་སྤྱན་དྲངས་ཡོང་བ་ཡིན་ཞེས་པའོ།།
ROM 10:8 དོན་དམ་དུ་ཇི་ལྟར་གསུང་ངམ་ཞེ༌ན། བཀའ་དེ་ནི་ཁྱོད་དང་ཉེ༌ཞིང༌། ཁྱོད་ཀྱི་སྨྲ་སྒོ་དང་ཡ་ཆུང་སེམས་ཀྱི་ནང་དུ་བཞུགས་ཞེས་གསུངས་སོ།། དེ་ནི་ངེད་ཅག་གིས་སྒྲོག་པའི་དད་པའི་བཀའ་ཡིན༌ཏེ།
ROM 10:9 ཁྱོད་ཀྱིས་ངག་ནས་སྐྱབས་མགོན་ཡེ་ཤུ་ནི་གཙོ་བོ་ཡིན་པར་ཁས་ལེན༌ཞིང༌། དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་པ་ལ་སེམས་ནས་དད་པ་བྱེད་ན་ཁྱོད་རང་ཐར་བར་འགྱུར་རོ།།
ROM 10:10 ཅིའི་ཕྱིར་ཞེ་ན། སེམས་ནས་དད་པ་བྱས་ན་རྣམ་དག་ཏུ་བརྩི༌ཞིང༌། ངག་ནས་ཁས་བླངས་ན་ཐར་པ་འཐོབ་ངེས་པའི་ཕྱིར༌རོ།།
ROM 10:11 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁོང་ལ་བརྟེན་ཅིང་དད་པ་བྱེད་མཁན༌ཀུན།། ཁ་ནི་མི་སྐྱེངས་ངོ་ཡང་མི་གནོང༌ངོ༌།། ཞེས་གསུངས༌པའོ།།
ROM 10:12 རྒྱུ་མཚན་ནི་ཡ་ཧུ་དཱའི་མི་རིགས་དང་གྷི་རིག་གི་མི་རིགས་གཉིས་ལ་ཁྱད་པར་མེད༌དེ། མི་ཐམས་ཅད་ལ་གཙོ་བོ་གཅིག་ཁོ་ན་ཡོད༌ཅིང༌། ཁོང་གིས་རང་ཉིད་ལ་ཞུ་བ་འབུལ་མཁན་ཀུན་ལ་དཔག་ཏུ་མེད་པ་གནང་བའི་ཕྱིར་རོ༎
ROM 10:13 དེ་ནི་ཇི་སྐད་དུ། གཙོ་བོའི་མཚན་ནས་འབོད་མཁན་ཐམས་ཅད་ཐར་བར་འགྱུར་ཞེས་གསུངས་པས་སོ།།
ROM 10:14 འོ་ན། ཁོང་ལ་དད་པ་མ་བྱས་པ་རྣམས་ཀྱིས་ཁོང་ལ་ཞུ་བ་ཇི་ལྟར༌འབུལ་ལམ། ཁོང་ཉིད་ཐོས་མ་མྱོང་བ་རྣམས་ཀྱིས་ཁོང་ལ་དད་པ་ཇི་ལྟར་བྱེད༌དམ། བཀའ་སྒྲོག་མཁན་མེད་ན་ཇི་ལྟར་ཐོས༌སམ།
ROM 10:15 མངགས་པ་མིན༌ན་འཕྲིན་བཟང་ཇི་ལྟར་སྒྲོག༌གམ། དེ་ལ་གསུང་རབ་ཀྱི་མདོ་ལས་ཇི་སྐད༌དུ། དོན་ལེགས་པོའི་འཕྲིན་བཟང་སྒྲོག་མཁན་གྱི་རྐང་པ་ནི་ཇི་འདྲའི་མཛེས་ཤིང་སྡུག་པ་ལ་ཨང་ཞེས་བཀོད་པ་ལྟར༌རོ།།
ROM 10:16 འོན༌ཀྱང༌། ཡེ་ཤ་ཡཱ་ཡིས་འདི་སྐད༌དུ། གཙོ་བོ་ལགས་ཀྱིས༌འདི་ལ་གསན་རོགས་གནང་།། ངེད་ཚོས་བསྒྲགས་པའི་གཏམ་ལ་སུ་ཡིས་དད།། ཞེས་གསུངས་པས། མི་དེ་རྣམས་ལས་ཐམས་ཅད་ཀྱིས་འཕྲིན་བཟང་ལ་ཉན༌པ་མ་ཡིན།
ROM 10:17 དེའི༌ཕྱིར། དད་པ་ནི་ཐོས་པ་ལས་འབྱུང་ཞིང༌། ཐོས་པ་དེ་ནི་སྐྱབས་མགོན་མཱ་ཤི་ཀའི་བཀའ་ལས་འབྱུང༌བ་ཡིན་ནོ།།
ROM 10:18 འོན༌ཀྱང༌། བདག་གིས་འདི་ལྟར་སྨྲ་བར་བྱ༌སྟེ། མི་དེ་རྣམས་ཀྱིས་འཕྲིན་བཟང་མ་ཐོས་སམ་ཞེ༌ན། ཁོ་རྣམས་ཀྱིས་ཐོས་མྱོང་བར་གདོན་མི་ཟ༌སྟེ། དེ་ཚོའི་སྐད་གདངས་གནམ་འོག་ཀུན་ཏུ༌ཁྱབ།། དེ་ཚོའི་སྨྲ་བརྗོད་ས་མཐའི་བར་དུ༌སླེབས།། ཞེས་གསུངས་པ་བཞིན༌ནོ།།
ROM 10:19 ཡང་བདག་གིས་འདི་ལྟར་སྨྲ་བར་བྱ༌སྟེ། ཡེས་ར་ཨེལ་མི་རིགས་ཀྱིས་དོན་དེ་མི་ཤེས་སམ་ཞེ༌ན། དེ་ལ་སྔར་ནས་མོ་ཤེ་ཡིས་འདི་སྐད༌དུ། དེ་བས་བདག་གིས་འབངས་མི་མ་ཡིན་པའི།། རིགས་ལ་བརྟེན་ནས་ཁྱོད་ཚོར་ཕྲག་དོག༌སློང་།། བླུན་རྨོངས་མི་རིགས་རྣམས་ཀྱིས་ཁོང་ཁྲོ་སློང་།། ཞེས་གསུངས་པ་བཞིན༌ནོ།།
ROM 10:20 ཡང་ཡེ་ཤ་ཡཱ་ཡིས་སྤོབས་པ་ཆེན་པོས་འདི་སྐད༌དུ། ང་རང་མི་འཚོལ་མཁན་གྱིས་བདག་ནི་རྙེད།། ང་ལ་མི་ཞུ་མཁན་ལ་བདག་ནི༌མངོན།། ཞེས་གསུངས༌པའོ།།
ROM 10:21 འོན༌ཀྱང༌། ཁོང་གིས་ཡེས་ར་ཨེལ་གྱི་མི་རིགས་ཀྱི་སྐོར་ལ་འདི་སྐད༌དུ། བཀའ་དང་འགལ་བའི་གྱེན་ལྡོག༌དང༌།། གཉའ་རེངས་ཅན་གྱི་མི་སྡེ་ལ།། བདག་གིས་ཉིན་རྒྱུན་ལག་ཟུང་བརྐྱངས།། ཞེས་གསུངས༌པའོ།།
ROM 11:1 བདག་གིས་འདི་ལྟར་སྨྲ་བར་བྱ༌སྟེ། དཀོན་མཆོག་གིས་རང་ཉིད་ཀྱི་མི་རྣམས་སྤངས་སམ་ཞེ༌ན། གཏན་ནས་མ་སྤངས༌ཏེ། ང་རང་ཡང་ཡེས་ར་ཨེལ་གྱི་མི་ཡིན་པ་དང་ཨབ་ར་ཧམ་གྱི་རིགས་རྒྱུད་ཡིན༌ལ། པེན་ཡཱ་མེན་གྱི་ཚོ་པ་ལ་གཏོགས་པའི་ཕྱིར༌རོ།།
ROM 11:2 དཀོན་མཆོག་གིས་སྔར་ནས་མཁྱེན་པའི་རང་ཉིད་ཀྱི་མི་རྣམས་མ་སྤངས་སོ།། ཁྱོད་ཅག་གིས་གསུང་རབ་ལས་ཨེ་ལི་ཡཱའི་སྐོར་ལ་ཇི་ལྟར་གསུངས་པ་མི་ཤེས༌སམ། ཁོང་གིས་དཀོན་མཆོག་གི་སྤྱན་སྔ་ནས་ཡེས་ར་ཨེལ་པ་རྣམས་འདི་ལྟར་གཏུགས་བཤེར་བྱས་མྱོང་བ༌སྟེ།
ROM 11:3 གཙོ་བོ༌ལགས། ཁོ་རྣམས་ཀྱིས་ཁྱེད་ཀྱི་ལུང་སྟོན་པ་རྣམས་བསད་པ༌དང༌། ཁྱེད་ཀྱི་མཆོད་ཁྲི་དག་ཀྱང་བཤིགས་ཏེ་ང་རང་གཅིག་པུར༌ལུས། ད་ལྟ་བདག་གི་སྲོག་ཀྱང་ལེན་པར་འདོད་པ་རེད་ཅེས་ཞུས་པ༌ལ།
ROM 11:4 དཀོན་མཆོག་གིས་ལན་ཇི་ལྟར་བཏབ་བམ་ཞེ༌ན། འདི་སྐད་དུ། ངས་པཱ་ཨལ་ལ་ཕྱག་མ་བཙལ་བའི་མི་བདུན་སྟོང་རང་ཉིད་ཀྱི་དོན་དུ་བསྐྱུར་ཡོད་ཅེས་གསུངས་སོ།།
ROM 11:5 ད་ལྟའང་དེ་བཞིན་དུ་ཐུགས་རྗེ་ཡིས་བདམས་པ་འཕྲོ་མའང་ཡོད༌པ་ཡིན།
ROM 11:6 ཐུགས་རྗེ་ལས་བྱུང་བ་ཡིན་ན་མིའི་ལས་ལ་རག་ལས་པ་མིན། དེ་ལྟར་མིན་ཚེ་ཐུགས་རྗེ་ནི་ཐུགས་རྗེ་མ་ཡིན་ནོ།།
ROM 11:7 དེས་ན་ཅི་ལྟར་ཡིན་ནམ། ཡེས་ར་ཨེལ་པ་རྣམས་ཀྱིས་བརྩོན་ལེན་བྱས་ཀྱང་མ་ཐོབ༌པར། ཐུགས་རྗེ་ཡིས་བདམས་པའི་མི་དེ་དག་ཁོ་ནར་ཐོབ་པ༌དང༌། གཞན་དག་ནི་སེམས་རྒྱུད་གྱོང་པོར་མཛད་དོ།།
ROM 11:8 དེ་ལ་གསུང་རབ་ཀྱི་མདོ་ལས་ཇི་སྐད༌དུ། དཀོན་མཆོག་གིས་ནི་དེ་རྣམས༌ལ།། རྨོངས་པའི་བློ་དང་མིག་ལོང༌བ།། རྣ་བས་མི་ཐོས་འོན་པ༌བཅས།། ད་ལྟའི་བར་དུ་འདི་ལྟར༌མཛད།། ཅེས་བཀོད༌པ་བཞིན༌ནོ།།
ROM 11:9 དེ་ལ་དཱ་བིད་ཀྱིས་ཀྱང་འདི་སྐད༌དུ། དེ་རྣམས་གསོལ་ལྕོག་དེ་ཚོར་རྙི་རྒྱ༌དང༌།། ལྕགས་ཀྱུ་དང་ནི་ས་རུ་འགྱེལ་བ༌ཡི།། བཀག་རྡོར་གྱུར་ཅིང་ངན་འབྲས་ཐོབ་པ་དང་།།
ROM 11:10 དེ་རྣམས་མིག་ནི་ལོང་སྟེ་མི་མཐོང༌ཞིང༌།། རྟག་ཏུ་སྒལ་ཚིགས་སྨད་དུ་བསྒུར་བར༌མཛོད།། ཅེས་གསུངས༌པའོ།།
ROM 11:11 བདག་གིས་འདི་ལྟར་སྨྲ་བར་བྱ༌སྟེ། ཡེས་ར་ཨེལ་པ་རྣམས་ཀྱི་རྐང་པ་འདྲེད་པ་ནི་ས་ལ་འགྱེལ་བའི་ཕྱིར་ཡིན་ནམ་ཞེ༌ན། གཏན་ནས་མིན༌ཏེ། ཁོ་རྣམས་ཀྱི་ཉེས་སྐྱོན་གྱི་དབང་གིས་ཕྱི་ཕྱོགས་པ་རྣམས་ལ་ཐར་པ་འཐོབ་པའི་གོ་སྐབས་བྱུང་བ༌དང༌། ཁོ་རྣམས་ལ་ཕྲག་དོག་བསྐྱེད་པའི་ཕྱིར༌ཡིན།
ROM 11:12 ཁོ་རྣམས་ཀྱི་ཉེས་སྐྱོན་ནི་འཇིག་རྟེན་ལ་ཐོབ་པའི་ནོར་བུ་དང༌། ཁོ་རྣམས་ཀྱི་གྱོང་གུད་ནི་ཕྱི་ཕྱོགས་པ་རྣམས་ལ་ཐོབ་པའི་ནོར་བུ་ཡིན༌ན། ཁོ་རྣམས་ཁ་ཚང་བར་ཡོང་བ་ནི་ལྟ་ཅི༌སྨོས།
ROM 11:13 ངས་ཁྱོད་ཅག་ཕྱི་ཕྱོགས་པ་རྣམས་ལ་འདི་ལྟར་སྨྲ་བ༌ནི། ང་རང་ཡང་ཕྱི་ཕྱོགས་པ་རྣམས་ཀྱི་ཆེད་དུ་སྐུ་ཚབ་པ་ཡིན༌པས། ངས་རང་གི་ལས་འགན་ལ་བརྩི་འཇོག་བྱེད་པ་ཡིན༌ལ།
ROM 11:14 ང་དང་ཤ་རུས་གཅིག་པའི་སྤུན་ཟླ་རྣམས་ལ་འགྲན་སེམས་བསྐྱེད་དུ་བཅུག་སྟེ། ཁོ་རྣམས་ལས་མི་ཁ་ཤས་སྐྱོབ་ནུས་ཀྱང་སྲིད།
ROM 11:15 ཁོ་རྣམས་སྤངས་པ་ནི་འཇིག་རྟེན་གྱི་མི་ཐམས་ཅད་དཀོན་མཆོག་དང་འདུམ་པའི་རྒྱུ་ཡིན༌ན། ཁོ་རྣམས་ཁས་ལེན་པ་ནི་འཆི་བ་ལས་སླར་གསོན་པ་མ་ཡིན༌ནམ།
ROM 11:16 བག་ཕྱེ་ཐོག་མ་ནི་དམ་པ་ཡིན༌ན་བག་ཕྱེ་ཐམས་ཅད་ཀྱང་དམ་པ་ཡིན། ཤིང་སྡོང་གི་རྩ་བ་དམ་པ་ཡིན༌ན་ཡལ་གའང་དམ་པ་ཡིན་ནོ།།
ROM 11:17 འོན་ཀྱང་། ཡལ་ག་ཁ་ཤས་བཅད་པ་དང་། དེའི་ཤུལ་དུ་རི་སྐྱེས་སྐྱུ་རུ་ར་ཁྱོད་རང་ནི་ཁོ་རྣམས་དང་མཐུད་པ་དང་། ཁོ་རྣམས་དང་ལྷན་དུ་སྐྱུ་རུ་རའི་ཤིང་གི་རྩ་བའི་བཅུད་བཟང་ཐོབ་པ་ཡིན་ན།
ROM 11:18 ཁྱོད་ཀྱིས་ཡལ་ག་རྣམས་ལ་ཁ་ཕོ་མ་བྱེད་ཅིག གལ་ཏེ་ཁ་ཕོ་བྱེད་ན། ཁྱོད་རང་རྩ་བར་བརྟེན་པ་ལས་རྩ་བ་ཁྱོད་ལ་བརྟེན་པ་མ་ཡིན་པ་ཤེས་དགོས་སོ།།
ROM 11:19 ཁྱོད་ན་རེ། ང་རང་དེའི་ཤུལ་དུ་མཐུད་པའི་ཕྱིར་ཡལ་ག་དེ་རྣམས་བཅད་པ་ཡིན་ཟེར་ན།
ROM 11:20 དེ་ནི་བདེན་པ་ཡིན། ཁོ་རྣམས་ཀྱིས་དད་པ་མ་བྱས་པའི་རྐྱེན་གྱིས་བཅད་པ་དང་། ཁྱོད་ཀྱིས་དད་པ་བྱེད་པའི་དབང་གིས་བརྟན་པོར་ཚུགས་པ་ཡིན་པས། ཁྱོད་ཀྱིས་ང་རྒྱལ་མི་བྱེད་པར་དཀོན་མཆོག་ལ་འཇིགས་པར་གྱིས་ཤིག
ROM 11:21 དཀོན་མཆོག་གིས་ཡལ་ག་དངོས་མ་དེ་རྣམས་མ་བསྐྱུར་བར་བཅད་པ་ཡིན་ན། ཁྱོད་རང་ཡང་མི་བསྐྱུར་བར་གཅོད་ཀྱང་སྲིད།
ROM 11:22 ལྟོས་དང་། དཀོན་མཆོག་གི་བྱམས་སྙིང་རྗེ་དང་དྲག་རྩུབ་ནི་འདི་ལྟ་སྟེ། ས་རུ་འགྱེལ་པ་རྣམས་ལ་དྲག་རྩུབ་ཡིན་པ་དང་། ཁྱོད་ནི་རྟག་ཏུ་ཁོང་གི་བྱམས་སྙིང་རྗེའི་ནང་དུ་གནས་ན། ཁྱོད་ལ་བྱམས་སྙིང་རྗེ་ལྡན་པར་འགྱུར། དེ་ལས་ལྡོག་ན་ཁྱོད་རང་ཡང་གཅོད་པར་འགྱུར་རོ།།
ROM 11:23 གལ་ཏེ། ཡེས་ར་ཨེལ་གྱི་མི་རིགས་ནི་རྟག་ཏུ་དད་པ་མེད་པར་བསྡད་པ་མ་ཡིན་ན། དཀོན་མཆོག་གིས་ཁོ་རྣམས་ཡང་བསྐྱར་མཐུད་ནུས་པས་སྔར་བཞིན་མཐུད་པར་འགྱུར།
ROM 11:24 ཁྱོད་ནི་རང་བཞིན་གྱི་རི་སྐྱེས་སྐྱུ་རུ་རའི་ཤིང་ལས་བཅད་ནས། རང་བཞིན་ལས་ལྡོག་སྟེ་བདག་གཉེར་བྱེད་པའི་སྐྱུ་རུ་རའི་ཤིང་ལ་མཐུད་པ་ཡིན་ན། ཡལ་ག་དངོས་མ་དེ་ནི་ལྷག་པར་རང་གི་རིགས་ཀྱི་སྐྱུ་རུ་རའི་ཤིང་ལ་མཐུད་ངེས་སོ།།
ROM 11:25 སྤུན་ཟླ༌རྣམས། ཁྱོད་ཅག་གིས་རང་ཉིད་གྲུང་པོ་ཡིན་པར་མི་བསམ་པའི༌ཕྱིར། བདག་གིས་གསང་བ་འདི་ཁྱོད་རྣམས་ལ་ཤེས་སུ་འཇུག་པར་འདོད་དེ། ནང་དུ་ཡོང་བའི་ཕྱི་ཕྱོགས་པའི་གྲངས་ཀ་ཚང་བའི་བར༌དུ། ཡེས་ར་ཨེལ་མི་རིགས་ལས་སྐོར་ཞིག་གི་སེམས་རྒྱུད་གྱོང་པོ་ཡིན༌ནའང་།
ROM 11:26 ཕྱིས་སུ་ཡེས་ར་ཨེལ་གྱི་མི་ཐམས་ཅད་ཐར་བར་འགྱུར་རོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཛ་ཡན་ཡུལ་ནས་སྐྱབས་མགོན་ཕེབས་ངེས༌ཤིང༌།། ཡ་ཀོབ་ཚང་གི་དད་གུས་མེད་པ་བསལ།། ཞེས༌དང༌། ཡང་ཇི་སྐད༌དུ།
ROM 11:27 བདག་གིས་དེ་དག་སྡིག་པ་བསལ་བའི༌དུས།། དེ་ནི་ཁོ་ཚོའི་བར་གྱི་ཁ་ཆད༌ཡིན།། ཞེས་བཀོད་པ་བཞིན༌ནོ།།
ROM 11:28 འཕྲིན་བཟང་གི་གསུང་ཚུལ་ལྟར་སྨྲས༌ན། ཁོ་རྣམས་ནི་ཁྱོད་ཅག་གི་ཕྱིར་དུ་དགྲ་རུ་གྱུར་པ༌དང༌། དཀོན་མཆོག་གིས་བདམས་པའི་གསུང་ཚུལ་ལྟར་སྨྲས༌ན། ཁོ་རྣམས་ནི་མེས་པོ་རྣམས་ཀྱི་ཕྱིར་དུ་གཅེས་སུ་འཛིན༌པ་ཡིན་ནོ།།
ROM 11:29 ཅིའི་ཕྱིར་ཞེ་ན། དཀོན་མཆོག་གིས་རང་གི་གནང་སྦྱིན་དང་ཞལ་འབོད་མཛད་པ་ནི་ཕྱིར་མི་ལེན་པའི་ཕྱིར༌རོ།།
ROM 11:30 སྔོན་ཆད་ཁྱོད་ཅག་གིས་དཀོན་མཆོག་གི་བཀའ་ལ་མ་མཉན་ཞིང༌། ད་ལྟ་ཁོ་རྣམས་ཀྱིས་མ་མཉན་པའི་རྐྱེན་གྱིས་ཁྱོད་ཅག་ལ་ཐུགས་རྗེ་གནང་བ༌བཞིན།
ROM 11:31 དེ་དག་གིས་ཀྱང་ཁོང་གི་བཀའ་ལ་མི་ཉན༌ཞིང༌། ཁྱོད་རྣམས་ལ་ཐུགས་རྗེ་གནང་བའི་རྐྱེན་གྱིས། ཁོ་རྣམས་ལའང་ཐུགས་རྗེ་གནང་བར་འགྱུར་རོ།།
ROM 11:32 རྒྱུ་མཚན་ནི་དཀོན་མཆོག་གིས་མི་ཐམས་ཅད་ལ་ཐུགས་རྗེ་གནང་བའི༌ཕྱིར། མི་ཐམས་ཅད་ནི་བཀའ་ལ་མི་ཉན་པའི་གྲས་སུ་བཞག༌པའོ།།
ROM 11:33 ཀྱེ་ཀྱེ་བླ་མེད་དཀོན་མཆོག༌གི། མཁྱེན་རབ་དང་ནི་ཡོན་ཏན༌དེ།། ཇི་འདྲའི་ཕུན་སུམ་ཚོགས་པ༌དང༌།། རྒྱ་ནི་ཆེ་ཞིང་གཏིང་ནི་ཟབ།། ཁོང་གི་དཔྱད་ཁྲ་དཔག་དཀའ༌ཞིང༌།། ཁོང་གི་འཕྲིན་ལས་བསམ་མི་ཁྱབ།།
ROM 11:34 སུ་ཡིས་ཁོང་གི་ཐུགས་རྟོགས༌ཤིང༌།། སུ་ཡིས་ཁོང་ལ་བློ་བཏོན༌ནམ།།
ROM 11:35 ཁོང་གིས་མི་ལ་སྐྱིན་ཚབ་གནང་བའི༌ཕྱིར།། སྔོན་དུ་ཁོང་ལ་ཕུལ་བ་སུ་ཡོད་དམ།།
ROM 11:36 ཅི་ཡོད་ཐམས་ཅད་ཁོང་ལས་བྱུང་བ༌དང༌།། ཁོང་ལ་བརྟེན་ཅིང་ཁོང་ལ་དབང་བའི༌ཕྱིར།། གཏན་དུ་ཁོང་ལ་བསྟོད་བསྔགས་བརྗོད་པར༌སྨོན།། ཨ༌མེན།།
ROM 12:1 སྤུན་ཟླ༌རྣམས། དེ་ལྟར་ཡིན་པས། ངས་དཀོན་མཆོག་གི་ཐུགས་རྗེ་ལ་བརྟེན་ནས་ཁྱོད་རྣམས་ལ་བསྐུལ་བར་བྱ༌སྟེ། ཁྱོད་ཅག་གིས་རང་གི་ལུས་པོ་ནི་གསོན་མཆོད་དུ་ཕུལ༌ཞིག དེ་ནི་དམ་པ་ཡིན་ཞིང་དཀོན་མཆོག་ཐུགས་མཉེས༌པ་དང་། ཁྱོད་ཅག་གི་སེམས་ཉིད་ཀྱི་བསྙེན་བཀུར་ཡིན་ནོ།།
ROM 12:2 དཀོན་མཆོག་གི་ཐུགས་དགོངས་བཟང་པོ༌དང༌། ཡིད་དུ་འོང༌བ། ཕུན་སུམ་ཚོགས་པ་བཅས་རྟོགས་པའི༌ཕྱིར། འཇིག་རྟེན་འདིའི་ལུགས་བཞིན་མི་བྱེད་པར། སེམས་གསར་པར་བསྒྱུར་པ་ལ་བརྟེན་ནས་གཤིས་སྤྱོད་ཀྱང་སྒྱུར་ཅིག
ROM 12:3 ངས་རང་ཉིད་ལ་གནང་བའི་ཐུགས་རྗེར་བརྟེན་ནས་ཁྱོད་ཅག་མི་རེ་རེར་འདི་ལྟར་སྨྲ་བར་བྱ༌སྟེ། མི་སུས་ཀྱང་རང་ཉིད་ཇི་འདྲ་ཡིན་པར་བསམ་འོས་པ་ལས་མཐོ་བར་མི་བསམ་པར། དཀོན་མཆོག་གིས་མི་རེ་རེར་གནང་བའི་དད་པའི་ཆེ་ཆུང་བཞིན་ཚད་དང་མཐུན་པར་བསམ་དགོས་སོ།།
ROM 12:4 དཔེར༌ན། བདག་ཅག་གི་ལུས་པོ་གཅིག་ལ་ཡན་ལག་མང་པོ་ཡོད་པ༌དང༌། ཡན་ལག་ཐམས་ཅད་ཀྱི་བྱེད་ནུས་མི་མཚུངས་པ་བཞིན།
ROM 12:5 བདག་ཅག་མི་མང་པོ་ནི་སྐྱབས་མགོན་མཱ་ཤི་ཀའི་ནང་དུ་སྐུ་ལུས་གཅིག་ཡིན་ཞིང་ཡན་ལག་ཕན་ཚུན་ལ་འབྲེལ༌བ་ཡིན་ནོ།།
ROM 12:6 བདག་ཅག་མི་རེ་རེར་ཐུགས་རྗེ་གནང་བ་བཞིན་དུ་གནང་སྦྱིན་ཡང་མི་འདྲ༌སྟེ། ལུང་སྟོན་པས་དད་པ་བཞིན་ལུང་བསྟན་གནང་བ༌དང༌།
ROM 12:7 ཞབས་ཕྱི་པས་ཞབས་ཕྱི་བྱེད་པ༌དང༌། སློབ་སྟོན་པས་བསླབ་བྱ་གནང་བ༌དང༌།
ROM 12:8 སྐུལ་མ་གནང་མཁན་གྱིས་སྐུལ་བར་བྱེད་པ༌དང༌། སྦྱིན་པ་གཏོང་མཁན་གྱིས་ལྷག་བསམ་རྣམ་དག་གིས་སྦྱིན་པ་གཏོང་བ༌དང༌། འགོ་དཔོན་གྱིས་ཧུར་བརྩོན་བྱེད་པ༌དང༌། སྙིང་རྗེ་བྱེད་མཁན་གྱིས་དགའ་མགུའི་ངང་ནས་སྙིང་རྗེ་བྱེད་དགོས་པ་བཅས༌སོ།།
ROM 12:9 བྱམས་པ་ནི་བཅོས་མ་ཡིན་མི་རུང༌ལ། ངན་པར་ཞེ་མེར་ཞིང་བཟང་པོར་ཉེ་འབྲེལ་བྱེད་དགོས་སོ།།
ROM 12:10 སྤུན་ཟླའི་གཅེས་སེམས་ཀྱིས་ཕན་ཚུན་ལ་སྙིང་ཉེ་བ་དང་། མི་གཞན་ལ་བཀུར་ཏེ་ཕན་ཚུན་ལ་བག་ཡོད་པར་བྱ་དགོས་སོ།།
ROM 12:11 སྒྱིད་ལུག་མི་བྱེད་པར་ཡིད་སེམས་སྤྲོ་བའི་ངང་ནས་རྟག་ཏུ་གཙོ་བོ་ལ་བསྙེན་བཀུར་བྱེད་དགོས།
ROM 12:12 རེ་སྒུག་གི་ཁྲོད་ནས་དགའ་བ་དང་དཀའ་སྡུག་གི་ཁྲོད་དུ་བཟོད་བསྲན་ཡོད་པ༌དང༌། གསོལ་བ་འདེབས་པར་བརྩོན་འགྲུས་ཡོད་དགོས།
ROM 12:13 དད་ལྡན་དམ་པ་རྣམས་ཀྱི་དགོས་མཁོ་སྐོང་ཞིང་མགྲོན་ལ་སྣེ་ལེན་བྱེད་པར་བརྩོན་དགོས༌སོ།།
ROM 12:14 ཁྱོད་ཅག་ལ་བཙན་གནོན་བྱེད་མཁན་དག་གི་ཆེད་དུ་བྱིན་རླབས་ཞུས་ཤིག་དང་། བྱིན་རླབས་ཞུ་བ་ཁོ་ན་ལས་སྡིགས་དམོད་མ་བྱེད༌ཅིག
ROM 12:15 སེམས་སྤྲོ་བ་རྣམས་དང་མཉམ་དུ་སྤྲོ་བར་བྱེད༌ཅིང༌། ཡིད་སྐྱོ་ནས་ངུ་བ་རྣམས་དང་མཉམ་དུ་ངུ་བར༌བྱའོ།།
ROM 12:16 ཕན་ཚུན་བློ་སེམས་གཅིག་ཏུ་མཐུན་ཞིང་ང་རྒྱལ་མི་བྱེད་པར། གོ་གནས་དམའ་བའི་མི་ལ་བསྟུན་དགོས་པ༌ལས། རང་ཉིད་གྲུང་པོ་ཡིན་པར་མ་སེམས༌ཤིག
ROM 12:17 ངན་ལན་ངན་འཇལ་མ་བྱེད༌ཅིག མི་ཀུན་གྱིས་ལེགས་པར་སྙམ་པའི་དོན་དེ་གཟབ་གཟབ་ཀྱིས་བསྒྲུབ་དགོས།
ROM 12:18 གལ༌ཏེ། རང་གིས་བསྒྲུབ་ནུས་པ་ཡིན་ན། གང་ནུས་ཅི་ཐུབ་ཀྱིས་མི་ཐམས་ཅད་ལ་འགྲིག་མཐུན་ཡོང་བར་བྱ༌དགོས།
ROM 12:19 སྙིང་ཉེ་བའི་སྤུན་ཟླ༌རྣམས། ཁྱོད་ཅག་གིས་གནོད་ལན་གནོད་འཇལ་མི་བྱེད་པར། བཟོད་པ་བསྒོམས་ནས་དཀོན་མཆོག་གི་ཐུགས་ཁྲོ་བའི་བར་དུ་སྒུགས་ཤིག ཅིའི་ཕྱིར་ཞེ་ན། གསུང་རབ་ཀྱི་མདོ༌ལས། གཙོ་བོས་འདི་སྐད༌དུ། གནོད་ལན་གནོད་འཇལ་ནི་བདག་ལ་རག་ལས་ཤིང་ངས་ལན་འཇལ་ངེས་ཡིན་ཞེས་གསུངས་པ་བཀོད་ཡོད་པའི་ཕྱིར༌རོ།།
ROM 12:20 དེ་ལས་ལྡོག་སྟེ་ཇི་སྐད༌དུ། དགྲ་ཟླ་བཀྲེས་ཤིང་ལྟོགས་པ༌ན།། དེ་ལ་ཁ་ཟས་གནང་བར༌གྱིས།། དགྲ་ཟླ་སྐོམ་ཞིང་གདུང་བ༌ན།། དེ་ལ་བཏུང་བ་གནང་བར༌གྱིས།། ཅིའི་ཕྱིར་དེ་ལྟར་བསྒྲུབ་ཟེར༌ན།། མགོ་ལ་སོལ་མེ་སྤུངས་པ་བཞིན།། ཞེས༌པའོ།།
ROM 12:21 ཁྱོད་ནི་ངན་པས་ཕམ་དུ་མི་འཇུག་པར། ལས་བཟང་པོར་བརྟེན་ནས་ངན་པ་ལས་རྒྱལ་བར༌བྱའོ།།
ROM 13:1 མི་ཀུན་གྱིས་མངའ་བདག་གི་བཀའ་བརྩི་དགོས༌ཏེ། དབང་ཆ་གང་ཞིག་ཡིན་ཡང་དཀོན་མཆོག་ལས་མ་བྱུང་བ་མེད༌ལ། མངའ་བདག་ཐམས་ཅད་ནི་དཀོན་མཆོག་གིས་བསྐོས་པའི་ཕྱིར༌ཡིན།
ROM 13:2 དེའི༌ཕྱིར། སུ་ཞིག་གིས་མངའ་བདག་ལ་ངོ་རྒོལ་བྱེད༌ན། དེས་དཀོན་མཆོག་གི་ཁྲིམས་ལ་ངོ་རྒོལ་བྱེད་པ་ཡིན༌ལ། རང་གིས་རང་ལ་ཉེས་ཆད་སློང་བའང་ཡིན་ནོ།།
ROM 13:3 སྤྱིར་ལས་ངན་པ་བྱེད་མཁན་མ༌གཏོགས། ལས་བཟང་པོ་བྱེད་མཁན་ནི་དཔོན་རིགས་ལ་འཇིགས་མི་དགོས། ཁྱོད་རང་མངའ་བདག་ལ་འཇིགས་མི་འདོད༌དམ། ཁྱོད་ཀྱིས་ལས་བཟང་པོ་བྱས༌ན་ཁོང་གིས་ཁྱོད་ལ་གཟེངས་བསྟོད་བྱེད་པར་འགྱུར་རོ།།
ROM 13:4 ཅིའི་ཕྱིར་ཞེ་ན། དཔོན་རིགས་དེ་ནི་དཀོན་མཆོག་གི་ཞབས་ཕྱི་པ་ཡིན་ཞིང་ཁྱོད་ལ་ཕན་ཐོགས་པ༌དང༌། ཁྱོད་ཀྱིས་ལས་ངན་པ་བྱེད་ན་འཇིགས་འོས༌ཏེ། ཁོང་ནི་དོན་མེད་དུ་རལ་གྲི་འདོགས་མཁན་མ་ཡིན༌པར། དེ་ནི་དཀོན་མཆོག་གི་ཞབས་ཕྱི་པ༌དང༌། གནོད་ལན་གནོད་འཇལ་བྱེད་མཁན་ཏེ་ལས་ངན་པ་བྱེད་མཁན་ལ་ཉེས་ཆད་གཅོད་མཁན་བཅས་ཡིན་པའི་ཕྱིར༌རོ།།
ROM 13:5 དེའི༌ཕྱིར། ཁྱོད་ཀྱིས་ངེས་པར་དཔོན་རིགས་ཀྱི་བཀའ་བརྩི་དགོས༌ཤིང༌། དེ་ནི་ཉེས་ཆད་ཁོ་ནའི་ཆེད་དུ་མ་ཡིན༌པར། སེམས་ཀྱི་ཆེད་དུའང་ཡིན།
ROM 13:6 ཁྱོད་ཅག་གིས་མངའ་བདག་ལ་ཁྲལ་འཇལ་བའང་འདིའི་རྐྱེན་ཡིན༌ཏེ། ཁོང་རྣམས་ནི་དཀོན་མཆོག་གི་ཞབས་ཕྱི་པ་ཡིན་པས་རྟག་པར་ཆེད་དུ་དོན་དེ་གཉེར༌བ་ཡིན།
ROM 13:7 མི་སུ་ཞིག་ལ་འཐོབ་འོས་ན་འབུལ་བ༌དང༌། ཁྲལ་འཐོབ་འོས་ན་ཁྲལ་འཇལ་བ༌དང༌། ཚོང་ཁྲལ་འཐོབ་འོས་ན་ཚོང་ཁྲལ་འཇལ་བ༌དང༌། འཇིགས་འོས་ན་འཇིགས་པ༌དང༌། བཀུར་འོས་ན་བཀུར་བར༌བྱའོ།།
ROM 13:8 སྤྱིར་ཕན་ཚུན་གཅེས་སུ་འཛིན་པ་ལས༌གཞན། དོན་གང་གི་ཆ་ནས་ཀྱང་མི་གཞན་ལ་བུ་ལོན་ཆད་མི་རུང༌། རྒྱུ་མཚན་ནི་མི་གཞན་ལ་བྱམས་ཤིང་གཅེས་མཁན་གྱིས་བཀའ་ཁྲིམས་བསྒྲུབས་པའི་ཕྱིར༌རོ།།
ROM 13:9 དེ་ནི་ཇི་སྐད༌དུ། ལོག་གཡེམ་མ༌བྱེད། མི་མ་གསོད། རྐུ་མ༌བྱེད། འདོད་ཧམ་མ་བཅང་ཞེས་གསུངས༌པ་དང་། ཡང་ན་བཀའ་ཁྲིམས་གཞན་གང་ཡོད་པ་ཐམས་ཅད༌ནི། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་པའི་བཀའ་འདིའི་ནང་དུ་འདུས༌ཡོད།
ROM 13:10 བྱམས་པས་ཁྱིམ་མཚེས་ལ་གནོད་པ་མི་བྱེད༌པས། བྱམས་པས་བཀའ་ཁྲིམས་འགྲུབ་པར་བྱས༌སོ།།
ROM 13:11 གཞན༌ཡང༌། ཁྱོད་ཅག་གིས་ད་ནི་སྔ་མོ་ནས་གཉིད་ལས་སད་འོས་པའི་དུས་ཡིན་པ་ཤེས་དགོས༌ཏེ། ད་ལྟ་ནི་ཐོག་མར་དད་པའི་དུས་ལས་བརྒལ་ནས་ཐར་པའི་དུས་དེ་ཉེ་བར་སླེབས་པས༌སོ།།
ROM 13:12 མཚན་མོ་འདས་ཤིང་ཉིན་མོ་སླེབས་ལ་ཉེ༌བས། བདག་ཅག་གིས་མུན་ནག་གི་བྱ་སྤྱོད་སྤངས་ནས་འོད་ཟེར་གྱི་གོ་མཚོན་སྤྲ་དགོས།
ROM 13:13 ཉིན་མོར་བགྲོད་པ་བཞིན་སྤྱོད་ལམ་དྲང་པོ་ཡིན་དགོས་ལ། བག་མེད་དང་ར༌བཟི། གཡེམ་སྦྱོར་དང་འདོད་ཆགས། རྩོད་གླེང་དང་ཕྲག་དོག་བཅས་མི་བྱེད༌པར།
ROM 13:14 གཙོ་བོ་ཡེ་ཤུ་མཱ་ཤི་ཀ་ནི་གོས་བཞིན་དུ་ལུས་ལ་གྱོན༌ཏེ། ཤ་གཟུགས་ཀྱི་ཕུང་བོའི་འདོད་པ་ཚིམ་པར་བྱེད་པའི་བསམ་པ་སྤོངས་ཤིག།།
ROM 14:1 ཁྱོད་ཅག་གིས་དད་སེམས་ཆུང་བ་རྣམས་རང་གི་གྲས་སུ་ལོངས༌དང༌། འོན༌ཀྱང༌། བསམ་ཚུལ་མི་འདྲ་བ་ལ་རྩོད་པ་མ་བྱེད༌ཅིག
ROM 14:2 མི་ལ་ལ་དངོས་པོ་མཐའ་དག་ཟ་རུང་བར་ཡིད་ཆེས༌ནའང༌། དད་སེམས་ཆུང་བ་རྣམས་ཀྱིས་སྔོ་ཚལ་ལས་གཞན་ཅི་ཡང་མི༌ཟའོ།།
ROM 14:3 ཅི་ཡང་ཟ་བའི་མི་དག་གིས་མི་ཟ་བའི་མི་ལ་མཐོང་ཆུང་བྱེད་མི་རུང༌ལ། མི་ཟ་བའི་མི་དེ་ཡིས་ཅི་ཡང་ཟ་བའི་མི་ལ་ཁ་ཚོན་ཡང་གཅོད་མི་རུང༌སྟེ། རྒྱུ་མཚན་ནི་དཀོན་མཆོག་སྔར་ནས་མི་དེ་ལ་དགྱེས་པའི་ཕྱིར༌རོ།།
ROM 14:4 ཁྱོད་ནི་སུ་ཞིག་ཡིན༌འདོད་དམ། ཁྱོད་ཀྱིས་མི་གཞན་གྱི་ཞབས་ཕྱི་པ་ལ་ཁ་ཚོན་གཅོད༌དམ། ཁོ་ནི་བརྟན་པོར་སྡོད་པའམ་ས་རུ་འགྱེལ་ནའང་ཁོ་ལ་བདག་པོ་ཡོད༌པ་དང་། ཁོ་ནི་བརྟན་པོར་སྡོད་སྲིད༌དེ། གཙོ་བོས་ཁོ་རང་བརྟན་པོར་མཛད་ནུས་པས་ཁོ་ནི་བརྟན་པོར་སྡོད་ངེས༌སོ།།
ROM 14:5 མི་ལ་ལས་ཉིན་མོ་འདི་ནི་ཉིན་མོ་དེ་ལས་ལེགས་པར་འདོད༌ཅིང༌། ཡང་མི་ལ་ལས་ཉིན་མོ་ཐམས་ཅད་གཅིག་མཚུངས་ཡིན་པར་འདོད༌པ་རེད། འོན༌ཀྱང་མི་རེ་རེའི་སེམས་པ་བརྟན་པོ་ཡིན་དགོས།
ROM 14:6 ཉིན་མོ་སྲུང་མཁན་གྱིས་གཙོ་བོའི་དོན་དུ་སྲུང༌ཞིང༌། ཟས་ཟ་མཁན་གྱིས་དཀོན་མཆོག་ལ་བཀའ་དྲིན་ཞུ་བ་ཡིན་པས་གཙོ་བོའི་དོན་དུ་ཟ་བ༌དང༌། ཟས་མི་ཟ་བ་དེས་ཀྱང་གཙོ་བོའི་དོན་དུ་མི་ཟ་ཞིང་དཀོན་མཆོག་ལ་བཀའ་དྲིན་ཞུ་བའོ།།
ROM 14:7 བདག་ཅག་ལས་རང་གི་དོན་དུ་འཚོ་བ་ནི་གཅིག་ཀྱང་མེད༌ལ། རང་གི་དོན་དུ་འཆི་བའང་གཅིག་ཀྱང་མེད།
ROM 14:8 བདག་ཅག་འཚོ་ན་གཙོ་བོའི་དོན་དུ་འཚོ༌ཞིང༌། ཤི་ནའང་གཙོ་བོའི་དོན་དུ་ཤི་བ་ཡིན༌པས། བདག་ཅག་ནི་ཤི་གསོན་གང་ཡིན་ཡང་གཙོ་བོའི་མི་ཡིན་ནོ།།
ROM 14:9 དེའི༌ཕྱིར། གསོན་པོ་དང་གཤིན་པོ་གཉིས་ཀྱི་གཙོ་བོར་འགྱུར་བའི༌ཕྱིར། སྐྱབས་མགོན་མཱ་ཤི་ཀ་ནི་སྐུ་གྲོངས་པ་ནས་སླར་གསོན༌པ་ཡིན།
ROM 14:10 དེས་ན། ཁྱོད་ཀྱིས་ཅིའི་ཕྱིར་སྤུན་ཟླ་ལ་ཁ་ཚོན་གཅོད༌དམ། ཡང་ཅིའི་ཕྱིར་སྤུན་ཟླ་ལ་མཐོང་ཆུང་བྱེད༌དམ། རྒྱུ་མཚན་ནི་བདག་ཅག་ཐམས་ཅད་དཀོན་མཆོག་གི་ལེགས་ཉེས་ཀྱི་ཁྲིམས་ཐག་གཅོད་པའི་བཞུགས་ཁྲིའི་མདུན་དུ་ལངས་ནས་སྡོད་ངེས་སོ།།
ROM 14:11 དེ་ལ་གསུང་རབ་ཀྱི་མདོ་ལས་ཇི་སྐད༌དུ། གཙོ་བོ་དཀོན་མཆོག་གིས་ནི་འདི་སྐད༌དུ།། བདག་གིས་རང་གི་ཚེ་སྲོག་དཔངས་བཙུགས་ནས།། དམ་བཅའ་འདི་ལྟར་བཞག་པ་ཡིན་ལགས་ཏེ།། པུས་མོ་ཀུན་གྱིས་བདག་ལ་ཕྱག་འཚལ༌ཞིང༌།། ཀུན་གྱི་ངག་ནས་བདག་ནི་ཁས་ལེན༌བྱེད།། ཅེས༌བཀོད་པའོ།།
ROM 14:12 དེའི༌ཕྱིར། བདག་ཅག་མི་རེ་རེས་རང་གི་དོན་རྣམས་དཀོན་མཆོག་གི་དྲུང་དུ་རྒྱུ་མཚན་གསལ་པོར་བཤད་པར་ངེས་སོ།།
ROM 14:13 དེ་ལྟར་ཡིན་པས། ཕྱིན་ཆད་བདག་ཅག་གིས་ཕན་ཚུན་ལ་ཁ་ཚོན་གཅོད་མི་རུང༌ལ། སུས་ཀྱང་སྤུན་ཟླའི་མདུན་དུ་བཀག་རྒྱའམ་ས་ལ་འགྱེལ་བྱེད་ཀྱི་དངོས་པོ་ཅི་ཡང་མི་འཇོག་པར་སེམས་ཐག་ཆོད༌ཅིག
ROM 14:14 མི་གཙང་བའི་དངོས་པོ་གཞི་ནས་མེད་པ་ནི་བདག་གིས་གཙོ་བོ་ཡེ་ཤུར་བརྟེན་ནས་ཤེས་ཤིང་དོན་དེར་ཡིད་ཆེས་བརྟན་པོ་ཡོད་དོ།། འོན༌ཀྱང༌། སུ་ཞིག་གིས་དངོས་པོ་གང་ཞིག་མི་གཙང་བར་བསམས༌ན། མི་དེའི་རྐྱེན་གྱིས་དངོས་པོ་དེ་ནི་མི་གཙང་བ་ཡིན།
ROM 14:15 གལ༌ཏེ། ཁྱོད་ཀྱི་ཁ་ཟས་ཀྱིས་སྤུན་ཟླའི་ཡིད་སྐྱོ་བར་བྱེད༌ན། དེ་ནི་བྱམས་པ་བཞིན་དུ་སྤྱད་པ་སྤྱོད་པ་མ་ཡིན། སྐྱབས་མགོན་མཱ་ཤི་ཀ་ནི་ཁོའི་དོན་དུ་སྐུ་གྲོངས༌པས། ཁྱོད་ཀྱི་ཁ་ཟས་ཀྱིས་སྤུན་ཟླ་དེ་ནི་འཕུང་དུ་འཇུག་མི་རུང་ངོ༌།།
ROM 14:16 དེའི་ཕྱིར། མི་གཞན་ལ་ཁྱོད་ཀྱི་བཟང་དེར་དམའ་འབེབས་བྱེད་དུ་འཇུག་མི་རུང༌སྟེ།
ROM 14:17 དཀོན་མཆོག་གི་རྒྱལ་སྲིད་ནི་བཟའ་བཏུང་ལ་བརྟེན་པ་མིན༌པར། དེ་ནི་དྲང༌བདེན་དང་ཞི༌བདེ། དམ་པའི་ཐུགས་ཉིད་ནང་གི་དགའ་སྤྲོ་བཅས་ལ་རག་ལས་པའི་ཕྱིར༌ཡིན།
ROM 14:18 དོན་འདི་ལྟ་བུའི་སྟེང་ནས་སྐྱབས་མགོན་མཱ་ཤི་ཀར་ཞབས་ཕྱི་བྱས་ན། དཀོན་མཆོག་གི་ཐུགས་དགྱེས་ཤིང་མི་རྣམས་ཀྱིས་ཀྱང་ཁས་ལེན་ནོ།།
ROM 14:19 དེའི༌ཕྱིར། བདག་ཅག་གིས་ངེས་པར་འགྲིག་མཐུན་ཡོང་བ་དང་ཕན་ཚུན་ཡར་བསྐྱེད་པའི་དོན་དེར་བརྩོན་དགོས་པ༌ལས།
ROM 14:20 ཁ་ཟས་ཀྱི་དབང་གིས་དཀོན་མཆོག་གི་མཛད་འཕྲིན་ལ་གཏོར་བརླག་གཏོང་མི་རུང་ངོ༌།། དངོས་པོ་ཐམས་ཅད་གཙང་བ་ནི་སྨོས་མ་དགོས༌ཀྱང༌། སུ་ཞིག་གིས་ཁ་ཟས་ཀྱི་རྐྱེན་གྱིས་མི་གཞན་སར་འགྱེལ་དུ་འཇུག་པ་ཡིན༌ན། དེ་ནི་ཁོའི་ཉེས་སྐྱོན་ཡིན་ནོ།།
ROM 14:21 ཡང་ན་ཤ་ཟ་བ་དང་ཆང་འཐུང་བ་སོགས་དོན་གཞན་གང་ཡིན༌ཡང༌། སྤུན་ཟླ་སར་འགྱེལ་དུ་འཇུག་པ་ཡིན༌ན། དོན་དེ་ཐམས་ཅད་སྤང་ན་ལེགས།
ROM 14:22 ཁྱོད་ལ་ཡོད་པའི་དད་པ་དེ་དཀོན་མཆོག་གི་དྲུང་ནས་སེམས་སུ་ཟུངས༌ཤིག སུས་ཀྱང་རང་ཉིད་ཀྱིས་སྒྲུབ་ཆོག་པར་འདོད་པའི་དོན་གྱི་ཆ༌ནས། རང་གིས་རང་ལ་ཉེས་སྐྱོན་མི་འཛུགས་མཁན་ལ་བྱིན་རླབས་ཐོབ༌པ་ཡིན་ནོ།།
ROM 14:23 གལ༌ཏེ། དོགས་པ་ཅན་གྱིས་ཟོས་ན། དེ་ནི་དད་པའི་སྒོ་ནས་ཟོས་པ་མ་ཡིན་པས་ཉེས་སྐྱོན་ཡོད་ངེས༌ལ། དད་པ་ལས་བྱུང་བ་མིན་པ་ཐམས་ཅད་ནི་སྡིག་པ་ཡིན༌ནོ།།
ROM 15:1 དེ་ཡང་བདག་ཅག་བརྟན་པོ་རྣམས་ཀྱིས་བརྟན་པོ་མིན་པ་རྣམས་ཀྱི་ཉམས་ཞན་ལ་བཟོད་བསྲན་བྱེད་འོས་པ༌ལས། རང་ཉིད་དགའ་བར་མི༌བྱའོ།།
ROM 15:2 བདག་ཅག་མི་རེ་རེས་རང་གི་ཁྱིམ་མཚེས་ལ་ཕན་འདོགས་པ་དང་ཡར་སྐྱེད་ཡོང་བའི༌ཕྱིར། ཁྱིམ་མཚེས་དགའ་བར་གྱིས༌ཤིག
ROM 15:3 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀས་ཀྱང་རང་ཉིད་དགའ་བར་མ་མཛད་པའི་ཕྱིར༌རོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱོད་ལ་དམའ་འབེབས་བྱེད་མཁན་གྱི་སྨྲ་བརྗོད་མཐའ་དག་ནི་བདག་ལ་ཕོག་པ་ཡིན་ཞེས་བཀོད་པ༌བཞིན་ནོ།།
ROM 15:4 རྒྱུ་མཚན་ནི་སྔོན་ཆད་ཡི་གེར་བཀོད་པ་ཐམས་ཅད་བདག་ཅག་ལ་བསླབ་བྱ་གནང་བའི་ཕྱིར་ཡིན༌ཏེ། བཟོད་པ་དང་གསུང་རབ་ལས་བྱུང་བའི་སེམས་གསོ་བརྒྱུད་ནས་བདག་ཅག་ལ་རེ་བ་ཐོབ་པའི་ཕྱིར༌རོ།།
ROM 15:5 དེ་ཡང་བཟོད་པ་དང་སེམས་གསོ་གནང་མཁན་དཀོན་མཆོག་གིས་མཱ་ཤི་ཀ་ཡེ་ཤུ་བཞིན་དུ་ཁྱོད་རྣམས་ཕན་ཚུན་མཐུན་པར་མཛད་པར༌སྨོན།
ROM 15:6 དེ་ནི་ཁྱོད་ཅག་གིས་ཁ་ཞེ་གཉིས་མེད་སྒོས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་བསྔགས་བརྗོད་པའི་ཕྱིར༌རོ།།
ROM 15:7 དེའི༌ཕྱིར། སྐྱབས་མགོན་མཱ་ཤི་ཀས་ཁྱོད་རྣམས་བསུས་པ༌བཞིན། ཁྱོད་ཅག་གིས་ཀྱང་ཕན་ཚུན་བསུས་ནས་དཀོན་མཆོག་གི་གཟི་བརྗིད་མངོན་པར༌བྱའོ།།
ROM 15:8 བདག་གིས་སྨྲ་བར་བྱ༌སྟེ། སྐྱབས་མགོན་མཱ་ཤི་ཀ་ནི་དཀོན་མཆོག་གི་བདེན་པ་ཉིད་ཀྱི༌ཆེད་དུ། མཚན་སྐྱི་བཅད་པ་རྣམས་ལ་ཞབས་ཕྱི་སྒྲུབ་མཁན་དུ་གྱུར་ཅིང་། དེ་ནི་ཕ་མེས་ཡང་མེས་རྣམས་ལ་གནང་བའི་ཞལ་བཞེས་ཀྱི་བཀའ་རྣམས་ལ་བདེན་དཔང་མཛད༌པའི་ཕྱིར་དང་།
ROM 15:9 ཕྱི་ཕྱོགས་པ་རྣམས་ཀྱིས་དཀོན་མཆོག་གི་ཐུགས་རྗེའི་རྐྱེན་གྱིས་ཁོང་ལ་བསྟོད་བསྔགས་བརྗོད་པའི་ཕྱིར་ཡང་ཡིན་ནོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ། དེ་ཡི་ཕྱིར་ན་བདག་གིས༌ནི།། ཕྱི་ཕྱོགས་པ་ཡི་ནང་ཁུལ༌དུ།། ཁྱོད་ལ་བསྔགས་བརྗོད་བྱེད་པ་དང་།། ཁྱོད་མཚན་བསྟོད་དབྱངས་འབུལ་བར་བྱ།།
ROM 15:10 ཡང་ཇི་སྐད༌དུ། ཁྱོད་ཅག་ཕྱི་ཕྱོགས་མི་རྣམས༌ནི།། གཙོ་བོ་དཀོན་མཆོག༌ཁོང་ཉིད་ཀྱི།། འབངས་མི་རྣམས་དང་ལྷན་ཅིག༌ཏུ།། དགའ་ཞིང་སྤྲོ་བར་གྱུར་ཅིག༌གུ།།
ROM 15:11 ཡང་ཇི་སྐད༌དུ། ཕྱི་མི་ཚང་མས་གཙོ་བོ༌ལ།། བསྟོད་ཅིང་བསྔགས་པར་འོས་སོ༌ལོ།། མི་རིགས་ཀུན་གྱིས་གཙོ་བོ༌ལ།། བསྟོད་ཅིང་བསྔགས་པར་འོས་སོ༌ལོ།།
ROM 15:12 ཡང་ཡེ་ཤ་ཡཱ་ཡིས་འདི་སྐད༌དུ། མ་འོངས་པ་ན་ཡེ་སེ༌ཡི།། རྩ་བ་དེ་ཡིས་ཕྱི་ཕྱོགས༌པར།། དབང་སྒྱུར་བྱེད་ཅིང་དེ་རྣམས༌ཀྱིས།། ཁོང་ལ་རེ་བ་འཛིན་པར༌ངེས།། ཞེས༌གསུངས་པའོ།།
ROM 15:13 ཁྱོད་ཅག་ལ་དམ་པའི་ཐུགས་ཉིད་ཀྱི་མཐུ་སྟོབས་བརྒྱུད་ནས་རེ་བ་ཆེན་པོ་འཐོབ་པའི༌ཕྱིར། ད་ནི་རེ་བ་གནང་མཁན་དཀོན་མཆོག་གིས་ཁྱོད་རྣམས་ཀྱི་དད་པ་བརྒྱུད་ནས་ཁྱོད་ཅག་ལ་དགའ་སྤྲོ་དང་ཞི་བདེ་ཕུན་སུམ་ཚོགས་པ་གནང་བར༌སྨོན།
ROM 15:14 སྤུན་ཟླ༌རྣམས། ཁྱོད་ཅག་ནི་བཟང་པོས་བལྟམས་ཤིང་། ཤེས་ཡོན་ཀུན་གྱིས་ཁྱབ་པ་དང་། ཕན་ཚུན་ལ་སྐུལ་མའང་གཏོང་ཐུབ་པར་བདག་ལ་ཡིད་ཆེས་བརྟན་པོ་ཡོད༌མོད།
ROM 15:15 འོན་ཀྱང་ངས་ཁྱོད་ཅག་ལ་དྲན་སྐུལ་བྱེད་པའི༌ཕྱིར། དོན་ཁ་ཤས་ཀྱི་ཆེད་དུ་སྤོབས་པ་བསྐྱེད་ནས་འཕྲིན་ཡིག་འདི་བྲིས་པ༌དང༌། ཁྱད་པར་དཀོན་མཆོག་གིས་ང་རང་ལ་ཐུགས་རྗེ་གནང་བ་བཞིན༌དུ།
ROM 15:16 མཆོད་དཔོན་ལྟར་དཀོན་མཆོག་གི་འཕྲིན་བཟང་ལ་ཞབས་ཕྱི་བྱས་ནས། བདག་ནི་ཕྱི་ཕྱོགས་པ་རྣམས་ཀྱི་དོན་དུ་མཱ་ཤི་ཀ་ཡེ་ཤུའི་ཞབས་ཕྱི་པ་ཡིན་ལ། དེ་ནི་ཕྱི་ཕྱོགས་པ་རྣམས་དམ་པའི་ཐུགས་ཉིད་ཀྱི་སྒོ་ནས་དམ་པར་མཛད༌དེ། དཀོན་མཆོག་ཐུགས་མཉེས་པའི་མཆོད་རྫས་སུ་འགྱུར་བའི་ཕྱིར་རོ།།
ROM 15:17 དེ་བས་དཀོན་མཆོག་གི་མཛད་དོན་སྐོར་གླེང༌ན། མཱ་ཤི་ཀ་ཡེ་ཤུའི་ནང་དུ་བདག་ལ་ངོམ་ཆོག་པ་ཞིག་ཡོད་ལ།
ROM 15:18 སྐྱབས་མགོན་མཱ་ཤི་ཀས་ང་རང་བརྒྱུད་ནས་མཛད་པའི་དོན་དག་ལས༌གཞན། ངས་ཅི་ཡང་གླེང་མི་ཕོད༌དེ། ཁོང་གིས་ངའི་སྨྲ་བརྗོད་དང་བྱ་སྤྱོད་བརྒྱུད༌ནས།
ROM 15:19 གྲུབ་རྟགས་དང་ངོ་མཚར་ཅན་གྱི་དོན་རྣམས་ཀྱི་ནུས་མཐུ་དང༌། དམ་པའི་ཐུགས་ཉིད་ཀྱི་ནུས་མཐུའི་སྒོ་ནས། ཕྱི་ཕྱོགས་པ་རྣམས་དཀོན་མཆོག་གི་བཀའ་ལ་བསྟུན་པར་མཛད། ཐ་ན་བདག་གིས་ཡེ་རུ་སཱ་ལེམ་ནས་ཨིལ་ལི་རི་ཀུམ་ཡུལ་བར་དུ་སྐྱབས་མགོན་མཱ་ཤི་ཀའི་འཕྲིན་བཟང་ཡོངས་སུ་བསྒྲགས་སོ།།
ROM 15:20 ཡང་མི་གཞན་གྱིས་བཙུགས་པའི་རྨང་གཞིའི་སྟེང་དུ་མི་བརྩིག་པའི༌ཕྱིར། བདག་གིས་སྐྱབས་མགོན་མཱ་ཤི་ཀའི་མཚན་ཐོས་མ་མྱོང་བའི་ཡུལ་གྲུར་འཕྲིན་བཟང་བསྒྲག་རྒྱུའི་བློ་ཐག་བཅད་པ་ཡིན།
ROM 15:21 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁོང་ལ་རྒྱུས་མེད་རྣམས་ཀྱིས་མཐོང་འགྱུར༌ཞིང༌།། གོ་ཐོས་མེད་པ་རྣམས་ཀྱིས་རྟོགས་པར༌འགྱུར།། ཞེས་བཀོད་པ་བཞིན༌ནོ།།
ROM 15:22 ང་རང་ཐེངས་མང་པོར་བཀག་བྱུང་བས། ཁྱོད་ཅག་གི་མདུན་དུ་གཏན་ནས་འགྲོ་མ་ནུས༌སོ།།
ROM 15:23 འོན་ཀྱང་། ད་ལྟ་ཡུལ་འདི་དག་ཏུ་ང་ལ་ལས་དོན་སྒྲུབ་ས་གཞན་མེད༌དེ། ལོ་དུ་མའི་རིང༌ལ། བདག་ནི་སི་ཕེན་ཡཱ་ཡུལ་དུ་འགྲོ་བའི་དུས་སུ་ཁྱོད་ཅག་གི་མདུན་དུ་ཡོང་འདོད་པ༌དང༌།
ROM 15:24 ཁྱོད་ཅག་གི་ཡུལ་དེ་བརྒྱུད་ནས་ཁྱོད་རྣམས་ལ་འཕྲད་པར་འགྱུར་བ་དང༌། ཐོག་མར་ཕན་ཚུན་འབྲེལ་འདྲིས་བྱས་ཏེ་ཅུང་ཙམ་ཡིད་ཚིམས༌རྗེས། ཁྱོད་རྣམས་ཀྱིས་ང་རང་ལ་སྐྱེལ་མ་བྱེད་པར་རེ་བ་བྱེད།
ROM 15:25 འོན༌ཀྱང༌། ད་ནི་ང་རང་ཡེ་རུ་སཱ་ལེམ་དུ་དད་ལྡན་དམ་པ་རྣམས་ལ་རོགས་རམ་བྱེད་དུ༌འགྲོའོ།།
ROM 15:26 ཅིའི་ཕྱིར་ཞེ་ན། མ་ཀེ་དོན་ཡཱ་དང་ཨ་ཀ་ཡཱ་ཡུལ་གཉིས་ཀྱི་མི་རྣམས་ཀྱིས་ཡེ་རུ་སཱ་ལེམ་དུ་ཡོད་པའི་དད་ལྡན་དམ་པ་རྣམས་ཀྱི་ཁྲོད་ནས་དབུལ་པོ་རྣམས་ལ་སྦྱིན་པ་གཏོང་འདོད་པའི་ཕྱིར༌རོ།།
ROM 15:27 དེ་ནི་ཁོ་རྣམས་དགའ་བར་གྱུར་པ་སྨོས་མ་དགོས༌ཏེ། དོན་ལ་དེ་ནི་བུ་ལོན་ལྟ་བུའང་ཡིན། ཅིའི་ཕྱིར་ཞེ་ན། ཕྱི་ཕྱོགས་པ་རྣམས་ལ་ཡ་ཧུ་དཱ་པའི་སེམས་ཉིད་ཀྱི་བགོ་སྐལ་བཟང་པོ་ཐོབ་ཡོད༌ན། དེ་ཚོས་ཀྱང་ཡ་ཧུ་དཱ་པ་རྣམས་ལ་འཚོ་བྱེད་ཀྱི་དངོས་པོ་སྦྱིན་པ་གཏོང་འོས་སོ།།
ROM 15:28 དེའི༌ཕྱིར། བདག་གིས་དོན་འདི་བསྒྲུབས་ཏེ་ཞལ་འདེབས་འདི་ཁོ་རྣམས་ལ་རྩིས་གསལ་པོར་སྤྲད༌རྗེས། ང་རང་ཁྱོད་ཅག་གི་ཡུལ་བརྒྱུད་ནས་སི་ཕེན་ཡཱ་ཡུལ་དུ་འགྲོ་བར༌བྱ།
ROM 15:29 ང་རང་ཁྱོད་ཅག་གི་ཡུལ་དེར་ཡོང་བའི་དུས༌སུ། སྐྱབས་མགོན་མཱ་ཤི་ཀའི་ཕུན་སུམ་ཚོགས་པའི་བྱིན་རླབས་དང་བཅས་ཏེ་ཡོང་ངེས་པ་ནི་བདག་གིས་ཤེས༌སོ།།
ROM 15:30 སྤུན་ཟླ༌རྣམས། ངས་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་དང་དམ་པའི་ཐུགས་ཉིད་ཀྱི་བྱམས་པར་བརྟེན༌ནས། ཁྱོད་རྣམས་ཀྱིས་བདག་གི་དོན༌དུ། བདག་དང་ལྷན་དུ་དཀོན་མཆོག་ལ་གསོལ་བ་འདེབས་པར་བརྩོན་དགོས་ཞེས་བསྐུལ༌ཏེ།
ROM 15:31 བདག་ནི་ཡ་ཧུ་དཱའི་ཡུལ་གྱི་བཀའ་ལ་མི་ཉན་པའི་མི་རྣམས་ལས་ཐར་བ༌དང༌། ངས་ཡེ་རུ་སཱ་ལེམ་གྱི་དོན་དུ་བསྡུས་པའི་ཞལ་འདེབས་དེ་དད་ལྡན་དམ་པ་རྣམས་ཀྱིས་དགའ་སྤྲོའི་ངང་ནས་ལེན་པ༌དང༌།
ROM 15:32 བདག་ནི་དཀོན་མཆོག་གི་ཐུགས་དགོངས་བཞིན༌དུ། དགའ་དགའ་སྤྲོ་སྤྲོའི་ངང་ཁྱོད་ཅག་གི་ཡུལ་དེར་ཡོང་སྟེ། ཁྱོད་རྣམས་དང་མཉམ་དུ་ངལ་གསོ་འཐོབ་པ་བཅས་ཀྱི་ཕྱིར་གསོལ་བ་འདེབས་པར༌གྱིས།
ROM 15:33 ཞི་བདེ་གནང་མཁན་དཀོན་མཆོག་ནི་ཁྱོད་ཅག་ཐམས་ཅད་དང་མཉམ་དུ་བཞུགས་པར༌སྨོན། ཨ༌མེན།
ROM 16:1 བདག་གིས་ཁྱོད་རྣམས་ལ་ངེད་ཅག་གི་ལྕམ་སྲིང་ཕོའོ་པེ་མཚམས་སྦྱོར་བྱ་སྟེ། ཁོ་མོ་ནི་ཀེན་གྲེའི་ཆོས་ཚོགས་ཀྱི་ལས་འཛིན་མཁན་ཡིན༌ལ།
ROM 16:2 ཁྱོད་ཅག་གིས་དད་ལྡན་དམ་པའི་ལུགས་དང་མཐུན་པར་ཁོ་མོར་གཙོ་བོའི་ནང་དུ་སྣེ་ལེན་བྱེད་པར༌འཚལ། ཁོ་མོས་སྔར་ནས་མི་མང་པོ་དང་ང་རང་ལའང་རོགས་རམ་བྱས༌པས། ཁོ་མོར་ཕྱོགས་གང་ནས་རོགས་རམ་བྱེད་དགོས༌ན། ཁྱོད་རྣམས་ཀྱིས་ཁོ་མོར་རོགས་རམ་གྱིས༌ཤིག།
ROM 16:3 ཕུར་སི་ལཱ་དང་ཨ་ཀུ་ལཱ་གཉིས་ལ་འཚམས་འདྲི༌ཞུའོ།། ཁོ་གཉིས་ནི་མཱ་ཤི་ཀ་ཡེ་ཤུའི་ནང་དུ་བདག་གི་ཆོས་གྲོགས་ཡིན༌ལ།
ROM 16:4 ཁོ་གཉིས་ཀྱིས་བདག་གི་དོན་དུ་རང་སྲོག་བློས་གཏོང་བར་ཡང་འཛེམས་མ་མྱོང༌། བདག་གིས་ཁོ་གཉིས་ལ་བཀའ་དྲིན་ཞུ་བར་མ༌ཟད། ཕྱི་ཕྱོགས་པ་རྣམས་ཀྱི་ཆོས་ཚོགས་དག་གིས་ཀྱང་ཁོ་གཉིས་ལ་བཀའ་དྲིན༌ཞུས་སོ།།
ROM 16:5 དེ་ནས་ཁོ་གཉིས་ཀྱི་ཁྱིམ་དུ་ཡོད་པའི་ཆོས་ཚོགས་ལའང་འཚམས་འདྲི༌ཞུའོ།། བདག་གིས་གཅེས་སུ་འཛིན་པའི་ཨེ་པེ་ནེ་ཐུ་ལ་འཚམས་འདྲི་བྱོས་ཤིག ཁོ་རང་ནི་ཨེ་ཞི་ཡཱ་ཡུལ་ནས་སྐྱབས་མགོན་མཱ་ཤི་ཀར་དད་པ་བྱེད་མཁན་ཐོག་མ་ཡིན།
ROM 16:6 མིར་ཡམ་ལའང་འཚམས་འདྲི༌ཞུའོ།། ཁོ་མོས་ཁྱོད་རྣམས་ཀྱི་དོན་དུ་དཀའ་ཚེགས་མང་པོ་མྱངས༌པ་ཡིན།
ROM 16:7 བདག་གི་ཡུལ་མི་སྟེ་བཙོན་གྲོགས་ཨན་དྲོ་ནེ་ཀུ་དང་ཡུན་ཡཱ་གཉིས་ལའང་འཚམས་འདྲི༌ཞུའོ།། ཁོ་གཉིས་ནི་སྐུ་ཚབ་པ་རྣམས་ཀྱི་ཁྲོད་དུ་མིང་གྲགས་ཆེ༌ཞིང༌། བདག་གི་སྔོན་དུ་སྐྱབས་མགོན་མཱ་ཤི་ཀའི་ནང་དུ་ཡོད་པ་ཡིན།
ROM 16:8 བདག་གིས་གཙོ་བོའི་ནང་དུ་སྙིང་ནས་གཅེས་པའི་ཨམ་པིལ་ཨ་ལའང་འཚམས་འདྲི༌བྱོས་ཤིག
ROM 16:9 སྐྱབས་མགོན་མཱ་ཤི་ཀའི་ནང་གི་བདག་ཅག་གི་ཆོས་གྲོགས་ཨུར་པཱ་ནོ་སི༌དང༌། བདག་གིས་གཅེས་སུ་འཛིན་པའི་སིར་ཏི་གཉིས་ལའང་འཚམས་འདྲི༌ཞུའོ།།
ROM 16:10 སྐྱབས་མགོན་མཱ་ཤི་ཀའི་ནང་དུ་ཚོད་བགམ་ཐེག་མཁན་ཨ་པེལ་ལེ་ལའང་འཚམས་འདྲི༌ཞུའོ།། ཨ་རིས་ཏོ་བུལ་གྱི་ཁྱིམ་མི་རྣམས་ལ་འཚམས་འདྲི༌ཞུའོ།།
ROM 16:11 བདག་གི་ཡུལ་མི་ཧེ་རོད་ཡོན་ལའང་འཚམས་འདྲི༌ཞུའོ།། གཙོ་བོའི་ནང་དུ་ནར་ཀིས་ཀྱི་ཁྱིམ་མི་རྣམས་ལ་འཚམས་འདྲི༌ཞུའོ།།
ROM 16:12 གཙོ་བོའི་ནང་དུ་དཀའ་སྡུག་མྱོང་མཁན་ཏྲི་ཕེ་ནཱ་དང་ཏྲི་ཕོ་སཱ་གཉིས་ལའང་འཚམས་འདྲི༌ཞུའོ།། གཅེས་སུ་འོས་ཤིང་གཙོ་བོའི་ནང་དུ་དཀའ་ཚེགས་མང་པོ་མྱངས་མཁན་པེར་སི་ལའང་འཚམས་འདྲི༌ཞུའོ།།
ROM 16:13 གཙོ་བོའི་ནང་དུ་བདམས་པའི་རུ་ཕུ་དང་ཁོའི་ཡུམ་གཉིས་ལའང་འཚམས་འདྲི༌ཞུའོ།། ཁོའི་ཡུམ་ནི་བདག་གི་ཡུམ་ལྟ་བུའང་ཡིན༌ནོ།།
ROM 16:14 ཨ་སིན་ཀྲི་ཏི༌དང༌། ཕི་ལེ༌ཀོན། ཧུར༌མེ། པ་ཏྲོ༌པཱ། ཧེར་མཱ་བཅས༌དང༌། ཁོ་རྣམས་དང་མཉམ་དུ་ཡོད་པའི་སྤུན་ཟླ་རྣམས་ལའང་འཚམས་འདྲི༌ཞུའོ།།
ROM 16:15 ཕི་ལོ་ལོ་ཀི་དང་ཡུ་ལེ༌ཡཱ། ནེ་རེ་དང་ཁོའི་སྲིང༌མོ། ཨོ་ལིམ་པཱ་བཅས༌དང༌། ཁོ་རྣམས་དང་མཉམ་དུ་ཡོད་པའི་དད་ལྡན་དམ་པ་རྣམས་ལའང་འཚམས་འདྲི༌ཞུའོ།།
ROM 16:16 ཁྱོད་རྣམས་ཀྱིས་ཕན་ཚུན་ལ་དམ་པའི་འོ་བྱས་ནས་འཚམས་འདྲི་བྱེད་པར༌གྱིས། སྐྱབས་མགོན་མཱ་ཤི་ཀའི་ཆོས་ཚོགས་ཐམས་ཅད་ཀྱིས་ཁྱོད་རྣམས་ལའང་འཚམས་འདྲི༌ཞུ་བའོ།།
ROM 16:17 སྤུན་ཟླ༌རྣམས། བསླབས་པའི་བཀའ་དང་འགལ་བའི་མི་རྣམས་ཀྱིས་ཁྱོད་ཅག་ལ་དབྱེན་བྱེད་པ་དང་སར་འགྱེལ་དུ་འཇུག༌པས། ཁྱོད་ཅག་གིས་མི་དེ་རྣམས་ལ་དོགས་ཟོན་བྱས་ནས་གཡོལ་དགོས་པར་བདག་གིས་བསྐུལ༌བ་ཡིན་ནོ།།
ROM 16:18 རྒྱུ་མཚན་ནི་མི་དེ་ལྟ་བུ་རྣམས་ཀྱིས་བདག་ཅག་གི་སྐྱབས་མགོན་མཱ་ཤི་ཀ་ལ་ཞབས་ཕྱི་མི་བྱེད༌པར། རང་ཉིད་ཀྱི་འདོད་བློ་ཁོ་ནར་ཞབས་ཕྱི་བྱེད་ཅིང་ཁ་ཡག་ཚིག་སྙན་གྱིས་གཡོ་སྒྱུ་མེད་པ་རྣམས་བསླུ་བར་བྱེད་པ་ཡིན།
ROM 16:19 ཁྱོད་ཅག་གིས་བཀའ་ལ་ཉན་པའི་གཏམ་ནི་མི་ཐམས་ཅད་ལ་ཁྱབ་པར་གྱུར༌པས། བདག་ནི་ཁྱོད་ཅག་གི་ཕྱིར་སྤྲོ་བར་གྱུར་ཏོ།། འོན༌ཀྱང༌། བདག་གི་སེམས་སུ་ཁྱོད་རྣམས་དོན་བཟང་པོའི་ཆ་ནས་གྲུང་པོ༌དང༌། དོན་ངན་པའི་ཆ་ནས་བླུན་པོ་ཡིན་པར་འདོད༌དོ།།
ROM 16:20 ཞི་བདེ་གནང་མཁན་དཀོན་མཆོག་གིས་མི་འགྱང་བར་བདུད་སཱ་ཏན་ནི་ཁྱོད་ཅག་གི་རྐང་འོག་ཏུ་བརྫི་བར་འགྱུར༌ཞིང༌། བདག་ཅག་གི་གཙོ་བོ་ཡེ་ཤུའི་ཐུགས་རྗེ་ནི་ནམ་ཡང་ཁྱོད་ཅག་དང་མཉམ་དུ་བཞུགས་པར༌སྨོན།
ROM 16:21 བདག་གི་ཆོས་གྲོགས་ཐི་མོ་ཐེ༌དང༌། བདག་གི་ཡུལ་མི་ལོ་ཀེ༌ཨོ༌དང༌། ཡཱ༌སོན། སོ་སི་པཱ་ཏེར་བཅས་ཀྱིས་ཁྱོད་རྣམས་ལ་འཚམས་འདྲི༌ཞུ་བ་ཡིན་ནོ།།
ROM 16:22 འཕྲིན་ཡིག་འབྲི་མཁན་ཏེར་ཏི་ང་ཡིས་ཀྱང་གཙོ་བོའི་ནང་དུ་ཁྱོད་རྣམས་ལ་འཚམས་འདྲི༌ཞུ་བ་ཡིན།
ROM 16:23 བདག་དང་ཆོས་ཚོགས་ཡོངས་ལ་སྣེ་ལེན་བྱེད་མཁན་ཀེ་ཡུ་ཡིས་ཀྱང་ཁྱོད་ཅག་ལ་འཚམས་འདྲི༌ཞུའོ།།
ROM 16:24 གྲོང་ཁྱེར་ནང་གི་དངུལ་མཛོད་ལ་དོ་དམ་བྱེད་མཁན་ཨེ་རས་ཏི་དང་སྤུན་ཟླ་ཁིར་ཐི་གཉིས་ཀྱིས་ཁྱོད་རྣམས་ལ་འཚམས་འདྲི༌ཞུའོ།།
ROM 16:25 དེ་ཡང་བདག་གིས་སྒྲོག་པའི་འཕྲིན་བཟང་དང་ཡེ་ཤུ་མཱ་ཤི་ཀ་སྒྲོག་པ་བཞིན་དང་། གནའ་ནས་གབ་པའི་གསང་བ་དེ་ཉིད་བསྟན་པ་བཞིན། དཀོན་མཆོག་ཁོང་ཉིད་ཀྱིས་ཁྱོད་ཅག་གི་སེམས་ཀྱང་བརྟན་པོར་མཛད་ནུས༌པ་དང་།
ROM 16:26 གསང་བ་དེ་ནི་ད་ལྟ་མངོན་པར་གྱུར་པ༌དང༌། ཐོག་མཐའ་མེད་པའི་དཀོན་མཆོག་གི་བཀའ་བཞིན་དང་ལུང་སྟོན་པ་དག་གི་མདོ་རྣམས་བརྒྱུད་ནས་མི་རིགས་ཀུན་ལ་བསྟན༌ཞིང༌། དེ་ནི་མི་རིགས་དེ་རྣམས་ཀྱིས་དད་པའི་ཁས་ལེན་བྱེད་དགོས་པའི་ཕྱིར༌རོ།།
ROM 16:27 ཡེ་ཤུ་མཱ་ཤི་ཀ་བརྒྱུད་ནས་ཀུན་མཁྱེན་དཀོན་མཆོག་ཁོ་ན་ལ་ཇི་སྲིད་བར་དུ་བསྟོད་བསྔགས་བརྗོད་པར༌སྨོན། ཨ༌མེན།། །།
1CO 1:1 དེ་ཡང་ཕོལ་ལོལ་ང་རང་ནི་དཀོན་མཆོག་གི་ཐུགས་དགོངས་བཞིན་མཱ་ཤི་ཀ་ཡེ་ཤུའི་སྐུ་ཚབ་པར་ཞལ་འབོད་གནང་བ་ཞིག༌ཡིན། ང་རང་དང་བདག་ཅག་གི་སྤུན་ཟླ་སའོ་ཐེ་ནེ་གཉིས༌ཀྱིས།
1CO 1:2 ཀོ་རིན་ཐུ་རུ་གནས་པའི་དཀོན་མཆོག་གི་ཆོས་ཚོགས༌ཏེ། མཱ་ཤི་ཀ་ཡེ་ཤུའི་ནང་དུ་དམ་པར་གྱུར་ཅིང་དད་ལྡན་དམ་པར་ཞལ་འབོད་གནང་བའི་མི་རྣམས༌དང༌། ཡུལ་སོ་སོ་ནས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་མཚན་ནས་འབོད་མཁན་ཐམས་ཅད་ལ་འཕྲིན་ཡིག་འདི་སྤྲིངས༌པ་ཡིན། གཙོ་བོ་ཡེ་ཤུ་མཱ་ཤི་ཀ་ནི་ཁོ་རྣམས་ཀྱི་གཙོ་བོ་ཡིན༌ལ། ངེད་གཉིས་ཀྱི་གཙོ་བོའང་ཡིན༌ནོ།།
1CO 1:3 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
1CO 1:4 ཁྱོད་ཅག་གི་ཆེད་དུ་ངས་དུས་རྟག་ཏུ་རང་གི་དཀོན་མཆོག་ལ་བཀའ་དྲིན༌ཞུ་བ་ཡིན་ནོ།། ཅིའི་ཕྱིར་ཞེ་ན། དཀོན་མཆོག་གིས་མཱ་ཤི་ཀ་ཡེ་ཤུའི་ནང་དུ་ཁྱོད་རྣམས་ལ་ཐུགས་རྗེ་གནང་བ༌དང༌།
1CO 1:5 ཡང་ཁོང་གི་ནང་དུ་རྣམ་པ་ཀུན་ཏུ་ཁྱོད་རྣམས་ལ་སྨྲ་བར་མཁས༌ཤིང་ཡོན་ཏན་ཕུན་སུམ་ཚོགས་པའི་འབྱོར་བ་བཅས་གནང་བའི་ཕྱིར༌རོ།།
1CO 1:6 དེ་ནི་ངེད་ཅག་གིས་སྐྱབས་མགོན་མཱ་ཤི་ཀའི་སྐོར་བདེན་དཔང་བྱས་པ༌ནི་ཁྱོད་རྣམས་ཀྱི་སེམས་ནང་དུ་བརྟན་པོར་གྱུར༌པ་བཞིན་ནོ།།
1CO 1:7 དེའི༌ཕྱིར། ཁྱོད་རྣམས་ཀྱིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཕྱིར་མངོན་པར་རེ་བ་ཆེན་པོས་སྒུག་བཞིན་པའི་དུས་སུ། ཁྱོད་རྣམས་ལ་གནང་སྦྱིན་གྱི་ཆ་ནས་མི་འདང་བ་མེད།
1CO 1:8 ཁོང་གིས་ཀྱང་དུས་ཀྱི་མཐའ་མའི་བར་དུ་ཁྱོད་རྣམས་བརྟན་པོར་མཛད༌པས། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཕེབས་ཡོང་བའི་ཉིན༌མོར། ཁྱོད་རྣམས་ལ་སྐྱོན་ཅི་ཡང་མེད་དོ།།
1CO 1:9 དཀོན་མཆོག་ནི་ཡིད་རྟོན་རུང་བ་ཡིན༌ཞིང་། ཁོང་གིས་ཁྱོད་རྣམས་ནི་རང་ཉིད་ཀྱི་སྲས་ཏེ་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་དང་འབྲེལ་བར་ཞལ་འབོད་གནང༌ངོ༌།།
1CO 1:10 སྤུན་ཟླ༌རྣམས། བདག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་མཚན་ལ་བརྟེན་ནས་ཁྱོད་རྣམས་ལ་གདམས་པར་བྱ༌སྟེ། ཁྱོད་རྣམས་ཀྱིས་གཏམ་མཐུན་པར་སྨྲ་ཞིང་དབྱེན་མི་བྱེད་པར་བློ་སེམས་མཐུན་ཞིང་ཕན་ཚུན་འགྲིག་དགོས་སོ།།
1CO 1:11 ཅིའི་ཕྱིར་ཞེ་ན། ཀི་ལོར་ཚང་གི་མི་རྣམས་ཀྱིས་ངའི་སྤུན་ཟླ་རྣམས་གླེང་སྟེ། ཁྱོད་ཅག་གི་ཁྲོད་དུ་རྩོད་གླེང་བྱུང་ཡོད་ཅེས་བདག་ལ་སྨྲས་མྱོང༌བའི་ཕྱིར་རོ།།
1CO 1:12 བདག་གི་བརྗོད་དོན་ནི་འདི་ལྟ་སྟེ། ཁྱོད་རྣམས་ལས་ཁ་ཅིག༌གིས། ང་ནི་སྐུ་ཚབ་པ་ཕོལ་ལོལ་གྱི་ཡིན་ཞེས༌དང༌། ཡང་ཁ་ཅིག༌གིས། ང་ནི་སློབ་དཔོན་ཨ་པོལ་ལོའི་ཡིན་ཞེས༌དང༌། ཡང་ཁ་ཅིག༌གིས། ང་ནི་སྐུ་ཚབ་པ་ཀེ་ཕཱའི་ཡིན་ཞེས༌དང༌། ཡང་ཁ་ཅིག༌གིས། ང་ནི་སྐྱབས་མགོན་མཱ་ཤི་ཀའི་ཡིན་ཞེས་ཟེར།
1CO 1:13 སྐྱབས་མགོན་མཱ་ཤི་ཀ་ནི་སོ་སོར་གྱེས་པ་ཡིན༌ནམ། ཕོལ་ལོལ་ཁྱོད་རྣམས་ཀྱི་དོན་དུ་ཤིང་རྒྱ་གྲམ་གྱི་སྟེང་དུ་བརྡབས༌སམ། ཁྱོད་རྣམས་ཀྱང་ཕོལ་ལོལ་གྱི་མིང་ལ་བརྟེན་ནས་ཁྲུས་གསོལ་ཐོབ་པ་ཡིན་ནམ་ཞེ༌ན། གཏན་ནས་མ་ཡིན་ནོ།།
1CO 1:14 བདག་གིས་སྔོན་ཆད་ཀཱ་རིས་པི་དང་ཀེ་ཡུ་གཉིས་མ༌གཏོགས། ཁྱོད་རྣམས་ལས་མི་གཅིག་ལའང་ཁྲུས་གསོལ་བྱས་མ་མྱོང༌བས། བདག་གིས་དཀོན་མཆོག་ལ་བཀའ་དྲིན་ཞུ༌སྟེ།
1CO 1:15 མི་གཞན་རྣམས་ན༌རེ། ཁྱོད་ཅག་ནི་བདག་གི་མིང་ལ་བརྟེན་ནས་ཁྲུས་གསོལ་བྱས་པ་ཡིན་ཞེས་མི་སྨྲ་བའི་ཕྱིར༌རོ།།
1CO 1:16 འོ། ངས་སི་ཕ་ནཱའི་ཁྱིམ་མི་རྣམས་ལའང་ཁྲུས་གསོལ་བྱས་མྱོང་བ༌ལས། མི་གཞན་དག་ལ་ཁྲུས་གསོལ་བྱས་མྱོང་མིན་ཡིད་ལ་མི་དྲན་ནོ།།
1CO 1:17 དོན་དམ་དུ་སྐྱབས་མགོན་མཱ་ཤི་ཀས་ང་རང་ནི་ཁྲུས་གསོལ་བྱེད་དུ་མངགས་པ་མ་ཡིན༌པར། འཕྲིན་བཟང་སྒྲོག་པར་མངགས་པ་ཡིན༌ཏེ། སྐྱབས་མགོན་མཱ་ཤི་ཀ་ཁོང་ཉིད་ཤིང་རྒྱ་གྲམ་གྱི་སྟེང་དུ་སྐུ་གྲོངས་པའི་དོན་དེ་སྟོང་བར་མི་འགྱུར་བའི༌ཆེད་དུ་སྤྱང་གྲུང་ལ་བརྟེན་ནས་གཏམ་མི་སྨྲའོ།།
1CO 1:18 ཅིའི་ཕྱིར་ཞེ་ན། ཤིང་རྒྱ་གྲམ་གྱི་དོན་དེ་ནི་འཇིག་པར་འགྱུར་བཞིན་པའི་མི་རྣམས་ཀྱིས་བླུན་པོའི་རྫུན་གཏམ་དུ་བརྩི༌ཞིང༌། བདག་ཅག་ཐར་པ་འཐོབ་བཞིན་པ་རྣམས་ལ་མཚོན༌ན། དོན་དེ་ནི་དཀོན་མཆོག་གི་མཐུ་སྟོབས་ཆེན་པོ་ཡིན་པའི་ཕྱིར༌རོ།།
1CO 1:19 དེ་ལ་གསུང་རབ་ཀྱི་མདོ་ལས་ཇི་སྐད༌དུ། ང་ཡིས་ཤེས་རབ་ཅན་གྱི་ཤེས་རབ༌མེད་པར་བྱ།། ང་ཡིས་རིག་པ་ཅན་གྱི་རིག་པ་འདོར་བར༌བྱ།། ཞེས་བཀོད་པའོ།།
1CO 1:20 མི་ཤེས་རབ་ཅན་ནི་གང་དུ་མཆིས༌སམ། མཁན་པོ་ནི་གང་དུ་ཡོད༌དམ། འཇིག་རྟེན་འདིའི་རྩོད་པར་མཁས་པ་ནི་གང་དུ་འདུག༌གམ། དཀོན་མཆོག་གིས་འཇིག་རྟེན་འདིའི་ཤེས་རབ་ནི་རྨོངས་པར་མཛད་པ་མ་ཡིན༌ནམ།
1CO 1:21 འཇིག་རྟེན་གྱི་མི་རྣམས་ཀྱིས་རང་གི་ཤེས་རབ་ལ་བརྟེན་ནས་དཀོན་མཆོག་ངོ་མི་ཤེས༌པས། དཀོན་མཆོག་གིས་བླུན་པོའི་ཆོས་ཞེས་ཟེར་བ་དེ་བསྒྲགས་པ་ལ་བརྟེན༌ནས། ཁོང་ལ་དད་པ་བྱེད་མཁན་རྣམས་ལ་ཐར་པ་འཐོབ་པར་བྱེད་ཅིང་ཐུགས་དགྱེས༌ལ། དེ་ནི་དཀོན་མཆོག་གི་མཁྱེན་རབ་ལགས་སོ།།
1CO 1:22 ཡ་ཧུ་དཱ་པ་རྣམས་ཀྱིས་ངོ་མཚར་བའི་དོན་ལ་རེ་བ་བྱེད༌ཅིང༌། གྷི་རིག་པ་རྣམས་ཀྱིས་ཤེས་རབ་འཚོལ་འདོད༌མོད།
1CO 1:23 འོན་ཀྱང་ངེད་ཅག་གིས་སྐྱབས་མགོན་མཱ་ཤི་ཀ་ཤིང་རྒྱ་གྲམ་གྱི་སྟེང་དུ་བརྡབས་པའི་ཆོས་དེ་སྒྲོག༌པ་ཡིན། དོན་དེ་ནི་ཡ་ཧུ་དཱ་པ་རྣམས་ལ་མཚོན་ན་བཀག་རྡོ༌དང༌། ཕྱི་ཕྱོགས་པ་རྣམས་ལ་མཚོན་ན་གླེན་རྟགས་ཡིན་པར་སྙམ་མོ།།
1CO 1:24 འོན་ཀྱང་ཡ་ཧུ་དཱ་པ་དང་གྷི་རིག་པའི་མི་སུ་ཞིག་ཡིན༌ཡང༌། ཞལ་འབོད་གནང་བ་རྣམས་ལ་མཚོན༌ན། སྐྱབས་མགོན་མཱ་ཤི་ཀ་ནི་དཀོན་མཆོག་གི་མཐུ་སྟོབས་དང་མཁྱེན་རབ་ལགས་སོ།།
1CO 1:25 ཅིའི་ཕྱིར་ཞེ་ན། དཀོན་མཆོག་གི་གླེན་རྟགས་ཟེར་བ་དེ་ནི་མིའི་ཤེས་རབ་ལས་མཆོག་ཏུ་གྱུར་པ་དང༌། དཀོན་མཆོག་གི་ཉམ་ཐག་ཟེར་བ་དེ་ནི་མི་ལས་ཀྱང་སྟོབས་ཤུགས་ཆེ་བའི་ཕྱིར༌རོ།།
1CO 1:26 སྤུན་ཟླ༌རྣམས། ཁྱོད་རྣམས་ལ་ཞལ་འབོད་གནང་བའི་དོན་ལ་སོམས་དང་། མིའི་ལྟ་ཚུལ་ལྟར༌ན། ཤེས་རབ་ཅན༌དང༌། ནུས་མཐུ༌ཅན། གོ་ས་ཅན་མང་པོ་མེད་པའང་ཤེས་ཐུབ་བོ།།
1CO 1:27 འོན༌ཀྱང༌། དཀོན་མཆོག་གིས་ཤེས་རབ་ཅན་རྣམས་ལ་ངོ་གནོང་བར་མཛད་པའི༌ཕྱིར། འཇིག་རྟེན་གྱི་བླུན་པོ་ཡིན་པ་རྣམས་བདམས་པ༌དང༌། ཡང་སྟོབས་ལྡན་རྣམས་ལ་ངོ་གནོང་བར་མཛད་པའི༌ཕྱིར། འཇིག་རྟེན་གྱི་ཉམ་ཐག་ཡིན་པ་རྣམས་བདམས་པ༌དང༌།
1CO 1:28 ཡང་ཡོད་པ་རྣམས་ལ་མེད་པར་མཛད་པའི༌ཕྱིར། འཇིག་རྟེན་གྱི་མི་ཐ་མལ་བ་དང༌། ཉམ་ཆུང༌པ། དམན་པ་རྣམས་ཀྱང་བདམས༌ཏེ།
1CO 1:29 ཤ་ཁྲག་གདོས་བཅས་སུ་གྲུབ་པ་སུ་ཞིག་གིས་ཀྱང་དཀོན་མཆོག་གི་དྲུང་ནས་རང་རློམ་བྱེད་མི་ཐུབ་པའི་ཕྱིར༌རོ།།
1CO 1:30 འོན༌ཀྱང༌། དཀོན་མཆོག་གི་རྐྱེན་གྱིས་ཁྱོད་རྣམས་ནི་མཱ་ཤི་ཀ་ཡེ་ཤུའི་ནང་དུ་གནས༌པ་ཡིན་ནོ།། ཡང་ཡེ་ཤུ་མཱ་ཤི་ཀ་ནི་བདག་ཅག་གི་ཤེས་རབ༌དང༌། རྣམ་པར་དག་པ། དམ༌པ། ཐར་ལམ་བཅས་སུ་གྱུར་པ་ལགས་སོ།།
1CO 1:31 དེ་ལ་གསུང་རབ་ཀྱི་མདོ་ལས་ཇི་སྐད༌དུ། བསྔགས་བརྗོད་བྱེད་མཁན་སུས་ཀྱང་གཙོ་བོ་ལ་བསྔགས་པར་གྱིས་ཞེས་བཀོད་པ་བཞིན་ནོ།།
1CO 2:1 སྤུན་ཟླ༌རྣམས། སྔོན་ཆད་ང་རང་ཁྱོད་ཅག་གི་གམ་དུ་ཡོང་བའི་དུས༌སུ། ཁྱོད་ཅག་ལ་དཀོན་མཆོག་གི་གསང་བ་ནི་མཁས་པའི་གཏམ་དང་ཤེས་རབ་ཀྱི་སྒོ་ནས་བསྒྲགས་པ་མིན་ནོ།།
1CO 2:2 ཅིའི་ཕྱིར་ཞེ་ན། ངས་སྔར་ནས་ཡེ་ཤུ་མཱ་ཤི་ཀ་དང་ཁོང་ཉིད་ཤིང་རྒྱ་གྲམ་གྱི་སྟེང་དུ་བརྡབས་པའི་དོན་དེ་ཤེས་པ་ལས༌གཞན། ཁྱོད་རྣམས་ཀྱི་ཁྲོད་དུ་ཅི་ཡང་མི་ཤེས་ཞེས་སེམས་ཐག་བཅད་པའི་ཕྱིར༌རོ།།
1CO 2:3 བདག་ནི་ཁྱོད་ཅག་དང་མཉམ་དུ་ཡོད་པའི་དུས༌སུ། ཉམ་ཐག་པ༌དང༌། འཇིགས་ཤིང་སྐྲག༌པ། འདར་འདར་ཞུམ་ཞུམ་གྱི་ངང་ནས་བསྡད་པ༌དང༌།
1CO 2:4 བདག་གིས་གཏམ་སྨྲས་པ་དང་ཆོས་བསྒྲགས་པ་ནི་ཤེས་རབ་དང་གནས་ལུགས་ལ་བརྟེན་པ་མ་ཡིན༌པར། དམ་པའི་ཐུགས་ཉིད་དང་མཐུ་སྟོབས་ཆེན་པོའི་བདེན་དཔང་ཡིན༌ལ།
1CO 2:5 དེ་ནི་ཁྱོད་ཅག་གི་དད་པ་ནི་མིའི་ཤེས་རབ་ལ་རག་མི་ལས༌པར། དཀོན་མཆོག་གི་མཐུ་སྟོབས་ཆེན་པོར་རག་ལས་པའི་ཕྱིར༌རོ།།
1CO 2:6 དེ་ལྟར་སྨྲས༌ནའང༌། ངེད་ཅག་གིས་དད་པ་བརྟན་པོ་རྣམས་ཀྱི་ཁྲོད་ནས་ཤེས་རབ་སྐོར༌སྨྲ་བ་ཡིན་མོད། འོན་ཀྱང་དེ་ནི་འཇིག་རྟེན་འདིའི་ཤེས་རབ་མ་ཡིན༌ལ། འཇིག་རྟེན་འདིའི་དབང་དང་གོ་གནས་ཡོད་ཀྱང་ཕྱིས་སུ་ཕམ་ཞིང་འཇིག་པར་འགྱུར་བ་རྣམས་ཀྱི་ཤེས་རབ་ཀྱང་མིན༌ཏེ།
1CO 2:7 ངེད་ཅག་གིས་སྨྲ་བའི་ཤེས་རབ་ནི་ཐོག་མ་ཉིད་ཀྱི་སྔ་རོལ་ནས་དཀོན་མཆོག་གིས་ཐག་གིས་བཅད་ཅིང་། བདག་ཅག་ལ་གཟི་བརྗིད་འཐོབ་པའི༌ཕྱིར། ཁོང་གིས་གསང་བར་མཛད་པའི་ཤེས་རབ་དེ་ཉིད་ཡིན་ནོ།།
1CO 2:8 འཇིག་རྟེན་འདིའི་དབང་དང་གོ་གནས་ཡོད་པ་རྣམས་ལས་ཤེས་རབ་དེ་ཉིད་རྟོགས་མཁན་གཅིག་ཀྱང་མ་མཆིས། གལ༌ཏེ། དེ་རྣམས་ཀྱིས་རྟོགས་པ་ཡིན༌ན། གཟི་བརྗིད་ལྡན་པའི་གཙོ་བོ་ནི་ཤིང་རྒྱ་གྲམ་གྱི་སྟེང་དུ་བརྡབས་མེད་དོ།།
1CO 2:9 དེ་ལ་གསུང་རབ་ཀྱི་མདོ་ལས་ཇི་སྐད༌དུ། དཀོན་མཆོག་གིས་ནི་རང་ཉིད༌ལ།། གཅེས་མཁན་དག་ལ་སྟ་གོན༌མཛད།། དེ་ནི་མིག་གིས་མ་མཐོང་ཞིང་།། རྣ་བས་ཐོས་པར་མ་གྱུར་ལ།། སེམས་སུ་དྲན་ཡང་མ་མྱོང་ངོ་།། ཞེས་བཀོད་པ་བཞིན་ནོ།།
1CO 2:10 འོན༌ཀྱང༌། དོན་དེ་རྣམས་ནི་དཀོན་མཆོག་གིས་དམ་པའི་ཐུགས་ཉིད་ཀྱི་ངང་ནས་བདག་ཅག་ལ་གསལ་པོར་མངོན་པར་མཛད༌པ་ཡིན། ཅིའི་ཕྱིར་ཞེ་ན། དམ་པའི་ཐུགས་ཉིད་ཀྱིས་དོན་ཀུན་མཁྱེན༌ཞིང་། དཔོག་པར་དཀའ་བའི་དཀོན་མཆོག་གི་གསང་བའི་དོན་རྣམས་ཀྱང་མཁྱེན་པའི་ཕྱིར༌རོ།།
1CO 2:11 མིའི་སེམས་ནང་གི་སེམས་ཉིད་ལས༌གཞན། སུ་ཞིག་གིས་མི་དེའི་བསམ་པ་ཤེས༌སམ། དེ་བཞིན་དུ་དཀོན་མཆོག་གི་དམ་པའི་ཐུགས་ཉིད་ལས༌གཞན། སུ་ཞིག་གིས་ཀྱང་དཀོན་མཆོག་གི་ཐུགས་དགོངས་མི་རྟོགས་སོ།།
1CO 2:12 བདག་ཅག་ལ་ཐོབ་པ་ནི་འཇིག་རྟེན་གྱི་སེམས་ཉིད་མ་ཡིན༌པར། དཀོན་མཆོག་ནས་བྱུང་བའི་ཐུགས་ཉིད་ཡིན༌ཏེ། དཀོན་མཆོག་གིས་བདག་ཅག་ལ་གནང་བའི་གནང་སྦྱིན་དེ་དག་བདག་ཅག་གིས་རྟོགས་ཐུབ་པའི་ཕྱིར་ཡིན༌ལ།
1CO 2:13 ངེད་ཅག་གིས་དོན་དེ་རྣམས་སྨྲ་བ་ཡིན་ཞིང་། དེ་ནི་མིའི་ཤེས་རབ་ཀྱིས་བསྟན་པའི་ཚིག་བཞིན་མ་ཡིན༌པར། དམ་པའི་ཐུགས་ཉིད་ཀྱིས་བསྟན་པ༌བཞིན། དམ་པའི་ཐུགས་ཉིད་དང་ལྡན་པའི་མི་རྣམས་ལ་དམ་པའི་ཐུགས་ཉིད་ཀྱི་དོན་འགྲེལ་བ་ཡིན་ནོ།།
1CO 2:14 འོན་ཀྱང་ཤ་ཁྲག་གི་ཕུང་བོར་གཏོགས་པའི་མི་རྣམས་ཀྱིས་དཀོན་མཆོག་གི་དམ་པའི་ཐུགས་ཉིད་ཀྱི་དོན་རྣམས་ཁས་མི་ལེན་ཞིང་། དེ་ནི་རྨོངས་པར་འདོད་པ་ལས་ཅི་ཡང་ཤེས་མི་ནུས་སོ།། ཅིའི་ཕྱིར་ཞེ་ན། དོན་དེ་དག་ནི་དམ་པའི་ཐུགས་ཉིད་ཁོ་ནར་བརྟེན་ནས་རྟོགས་ཐུབ་པའི་ཕྱིར་རོ།།
1CO 2:15 འོན༌ཀྱང༌། དམ་པའི་ཐུགས་ཉིད་ལྡན་པའི་མི་རྣམས་ཀྱིས་དོན་ཀུན་གསལ་པོར་རྟོགས་ཐུབ༌ནའང༌། གཞན་སུས་ཀྱང་མི་དེ་ནི་གསལ་པོར་རྟོགས་མི་ནུས་ལ།
1CO 2:16 དེ་ལ་ཇི་སྐད༌དུ། གཙོ་བོའི་ཐུགས་ནི་སུ་ཡིས༌རྟོགས། ཁོང་ལ་བསླབ་བྱ་སུ་ཡིས༌སྟོན་ཞེས་གསུངས་པ་ལྟར༌ཡིན། འོན༌ཀྱང༌། བདག་ཅག་ནི་སྐྱབས་མགོན་མཱ་ཤི་ཀའི་ཐུགས་དང་ལྡན་པར་གྱུར༌པའོ།།
1CO 3:1 སྤུན་ཟླ༌རྣམས། ངས་སྔོན་ཆད་ཁྱོད་རྣམས་དམ་པའི་ཐུགས་ཉིད་ལྡན་པའི་མི་རྣམས་དང་འདྲ་བར་སྨྲ་མ་ནུས་ལ། ཁྱོད་ཅག་ནི་ཤ་གཟུགས་ཀྱི་ཕུང་བོར་གཏོགས་ཤིང༌། སྐྱབས་མགོན་མཱ་ཤི་ཀའི་ནང་དུ་ཕྲུ་གུ་དང་འདྲ་བར་སྨྲས་སོ།།
1CO 3:2 བདག་གིས་ཁྱོད་རྣམས་འོ་མས་གསོས་པ་ལས་བཟའ་བཏུང་གིས་གསོས་པ་མ་ཡིན། དེའི་དུས་སུ་ཁྱོད་རྣམས་ཀྱིས་ཟས་ཟ་བར་མ་ནུས༌ལ། ད་ལྟའང་སྔར་བཞིན་ཟ་བར་མི་ནུས་སོ།།
1CO 3:3 ཁྱོད་ཅག་ནི་ད་དུང་ཤ་གཟུགས་ཀྱི་ཕུང་བོར་གཏོགས་ཏེ། ཁྱོད་ཅག་གི་ཁྲོད་དུ་ཕྲག་དོག་དང་རྩོད་གླེང་ཡོད༌པས། དེ་ནི་ཤ་གཟུགས་ཀྱི་ཕུང་བོ་དང་མཚུངས་ཤིང་། འཇིག་རྟེན་གྱི་མིའི་སྤྱོད་ཚུལ་བཞིན་དུ་བྱེད་པ་མ་ཡིན༌ནམ།
1CO 3:4 མི་ལ་ལ་ན༌རེ། ང་ནི་ཕོལ་ལོལ་གྱི་ཡིན་ཞེས༌དང༌། ཡང་མི་ལ་ལ་ན༌རེ། ང་ནི་ཨ་པོལ་ལོའི་ཡིན་ཞེས་ཟེར༌ན། ཁྱོད་རྣམས་ནི་འཇིག་རྟེན་གྱི་མི་དང་མཚུངས་པ་མ་ཡིན༌ནམ།
1CO 3:5 ཨ་པོལ་ལོ་དང་ཕོལ་ལོལ་གཉིས་ནི་མི་ག་འདྲ་ཞིག་ཡིན་ཞེ༌ན། དེ་ནི་གཙོ་བོས་ངེད་ཅག་མི་རེ་རེར་ལས་འགན་གནང་བ༌བཞིན། ཁྱོད་རྣམས་དད་པའི་ལམ་དུ་ཁྲིད་པའི་ཞབས་ཕྱི་པ་ཡིན།
1CO 3:6 བདག་གིས་ས་བོན་བཏབ་ཅིང་ཨ་པོལ་ལོ་ཡིས་ཆུ་བཏང༌ནའང༌། ས་བོན་སྐྱེ་རུ་འཇུག་མཁན་ནི་དཀོན་མཆོག་ཡིན་ནོ།།
1CO 3:7 དེའི༌ཕྱིར། ས་བོན་འདེབས་མཁན་ནམ་ཆུ་གཏོང་མཁན་ནི་ཅི་ཡང་མིན༌ཏེ། ས་བོན་སྐྱེ་རུ་འཇུག་མཁན་དཀོན་མཆོག་ནི་གལ་ཆེའོ།།
1CO 3:8 ས་བོན་འདེབས་མཁན་དང་ཆུ་གཏོང་མཁན་གཉིས་ནི་གཅིག་མཚུངས་ཡིན༌ཡང༌། ཕྱིས་སུ་རང་རང་གི་རྩོལ་བ་བཞིན་དུ་བྱ་དགའ་འཐོབ་པར་འགྱུར་རོ།།
1CO 3:9 ཅིའི་ཕྱིར་ཞེ་ན། ངེད་ཅག་ནི་དཀོན་མཆོག་གི་ལས་གྲོགས་ཡིན༌ལ། ཁྱོད་རྣམས་ནི་དཀོན་མཆོག་གིས་རྨོས་པའི་ས་ཞིང༌དང༌། ཁོང་གིས་བཀོད་པ་དེ་ཡིན་པའི་ཕྱིར༌རོ།།
1CO 3:10 དཀོན་མཆོག་གིས་བདག་ལ་གནང་བའི་ཐུགས་རྗེ་བཞིན༌དུ། བདག་གིས་སྤྱང་གྲུང་ལྡན་པའི་བཟོ་དཔོན་ཞིག་དང་འདྲ་བར་རྨང་གཞི་བཙུགས་པ༌དང༌། རྨང་གཞི་དེའི་སྟེང་ནས་མི་གཞན་ཞིག་གིས་བཟོ༌བཞིན་ཡོད། འོན༌ཀྱང༌། མི་སོ་སོས་རྨང་གཞིའི་སྟེང་ནས་ཅི་ལྟར་བཟོ་བར་གཟབ་དགོས་སོ།།
1CO 3:11 ཅིའི་ཕྱིར་ཞེ་ན། རྨང་གཞི་བཏིངས་ཟིན་པ་དེ་ནི་ཡེ་ཤུ་མཱ་ཤི་ཀ་འབའ་ཞིག༌ཡིན། ཁོང་ཉིད་ལས་གཞན་མི་སུས་ཀྱང་རྨང་གཞི་གཞན་འཛུགས་མི་ནུས་པའི་ཕྱིར༌རོ།།
1CO 3:12 གལ༌ཏེ། སུ་ཞིག་གིས་རྨང་གཞི་དེའི་སྟེང་དུ་གསེར༌རམ། ཡང་ན་དངུལ། རིན་པོ༌ཆེ། ཤིང༌། རྩྭ། སོག་མ་བཅས་ཀྱིས་བཟོས༌ན།
1CO 3:13 མི་རྣམས་ཀྱིས་བཟོས་པ་དེ་ནི་ག་འདྲ་ཡིན་པ་གསལ་པོར་མངོན་པར་འགྱུར་ངེས༌ཡིན། རྒྱུ་མཚན་ནི་ཉིན་མོ་དེ་ཡིས་མངོན་པར་མཛད་པ་དང་། མེ་བྱུང་ནས་མི་རེ་རེས་བཟོས་པའི་བཟོ་བཀོད་དེ་ཅི་འདྲ་ཡིན་པར་མེ་ཡིས་ཚོད་བགམ་བྱེད་པར་འགྱུར་བའི་ཕྱིར༌རོ།།
1CO 3:14 གལ༌ཏེ། སུ་ཞིག་གིས་རྨང་གཞི་དེའི་སྟེང་དུ་བསྐྲུན་པའི་བཟོ་བཀོད་གནས་པ་ཡིན༌ན། ཁོ་རང་ལ་བྱ་དགའ་འཐོབ་པར་འགྱུར།
1CO 3:15 འོན༌ཀྱང༌། སུ་ཞིག་གིས་བསྐྲུན་པའི་བཟོ་བཀོད་དེ་མེར་ཚིག་པ་ཡིན༌ན། གྱོང་གུད་ཐེབས་ཀྱང་ཁོ་རང་ནི་ཐར་བར་འགྱུར། དེ་ནི་མེ་ཕུང་བརྒྱུད་ནས་འགྲོ་བ་ལྟར་ཐར་བར་འགྱུར་རོ།།
1CO 3:16 ཁྱོད་རྣམས་ནི་དཀོན་མཆོག་གི་མཆོད་ཁང་ཡིན༌ཞིང༌། དཀོན་མཆོག་གི་དམ་པའི་ཐུགས་ཉིད་ཁྱོད་ཅག་གི་ནང་དུ་བཞུགས་པ་མི་ཤེས༌སམ།
1CO 3:17 གལ༌ཏེ། སུ་ཞིག་གིས་མཆོད་ཁང་དེ་བཤིག༌ན། དཀོན་མཆོག་གིས་མི་དེའང་མེད་པར་མཛད་ངེས༌ཡིན། རྒྱུ་མཚན་ནི་དཀོན་མཆོག་གི་མཆོད་ཁང་ནི་དམ་པ་ཡིན༌ལ། མཆོད་ཁང་དེ་ནི་ཁྱོད་རྣམས་ཡིན་པའི་ཕྱིར༌རོ།།
1CO 3:18 མི་སུས་ཀྱང་རང་མགོ་རང་གིས་གཡོག་མི་འོས་སོ།། ཁྱོད་རྣམས་ཀྱི་ཁྲོད་ནས་སུ་ཞིག་གིས་འཇིག་རྟེན་འདིར་རང་ཉིད་ནི་མཁས་པ་ཡིན་པར་འདོད་ན། ཤེས་རབ་ལྡན་པར་འགྱུར་བའི༌ཕྱིར། བླུན་པོ་ཞིག་ཏུ་བྱས་ན་ལེགས།
1CO 3:19 ཅིའི་ཕྱིར་ཞེ་ན། འཇིག་རྟེན་འདིའི་ཤེས་རབ་ནི་དཀོན་མཆོག་གི་སྤྱན་སྔར་བླུན་རྨོངས་ཡིན༌ཏེ། གསུང་རབ་ཀྱི་མདོ་ལས་ཇི་སྐད༌དུ། དཀོན་མཆོག་གིས་ནི་ཤེས་རབ་ཅན་དེ་རྣམས།། རང་ཉིད་རང་གི་གཡོ་སྒྱུར་ཚུད་པར༌མཛད།། ཅེས་བཀོད་པའི་ཕྱིར༌རོ།།
1CO 3:20 ཡང་ཇི་སྐད༌དུ། ཤེས་རབ་ཅན་གྱི་འདོད་བློ་སྟོང་བ༌དེ།། གཙོ་བོ་ལགས་ཀྱིས་ཇི་བཞིན༌མཁྱེན་པའོ། ། ཞེས་གསུངས༌སོ།།
1CO 3:21 དེའི༌ཕྱིར། སུས་ཀྱང་མི་གཞན་ལ་བསྔགས་བརྗོད་བྱ་མི་རུང་སྟེ། དངོས་པོ་མཐའ་དག་ནི་ཁྱོད་ཅག་ལ་གཏོགས་པས་སོ།།
1CO 3:22 ཕོལ་ལོལ༌ལམ། ཡང་ན་ཨ་པོལ་ལོ། ཀེ་ཕཱ། འཇིག་རྟེན། གསོན་པ། འཆི༌བ། ད་ལྟའི་དོན། མ་འོངས་པའི་དོན་བཅས་ཐམས་ཅད་ཁྱོད་ཅག་ལ་གཏོགས་ཤིང༌།
1CO 3:23 ཁྱོད་ཅག་ནི་སྐྱབས་མགོན་མཱ་ཤི་ཀར་གཏོགས་པ༌དང༌། སྐྱབས་མགོན་མཱ་ཤི་ཀ་ནི་དཀོན་མཆོག་ལ་གཏོགས༌སོ།།
1CO 4:1 མི་སུས་ཀྱང་ངེད་ཅག་ནི་སྐྱབས་མགོན་མཱ་ཤི་ཀའི་ཞབས་ཕྱི་པ་དང་དཀོན་མཆོག་གི་གསང་བའི་དོན་རྣམས་ཀྱི་གཉེར་པ་རུ་བརྩི་རུང༌ཞིང༌།
1CO 4:2 ལྷག་པར་གཉེར་པ་ནི་བསམ་པ་རྣམ་དག་ཡིན་དགོས་སོ།།
1CO 4:3 ཁྱོད་ཅག་གམ་མིའི་ཁྲིམས་ར་གང་ཞིག་གིས་བདག་ལ་ཁ་ཚོན་བཅད༌ཀྱང༌། བདག་གིས་དེ་ནི་དོན་ཆུང་ངུ་ཞིག་ཏུ་རྩི་ཞིང་རང་གིས་ཀྱང་རང་ལ་ཁ་ཚོན་མི་གཅོད་དེ།
1CO 4:4 ངས་རང་ཉིད་ལ་ནོར་འཁྲུལ་ཡོད་པ་མ་ཚོར༌ཡང༌། དེའི་རྐྱེན་གྱིས་ང་རང་ནི་སྐྱོན་མེད་པ་ཞིག་མིན༌ཏེ། བདག་ལ་བརྡར་ཤ་གཅོད་པར་མཛད་མཁན་ནི་གཙོ་བོ་ལགས་སོ།།
1CO 4:5 དེའི༌ཕྱིར། དུས་མ་རན་པར་མི་སུས་ཀྱང་ཁ་ཚོན་གཅོད་པར་མི༌བྱའོ།། གཙོ་བོ་ཁོང་ཉིད་ཕེབས་ཡོང་བར་སྒུག༌སྟེ། ཁོང་གིས་མུན་པའི་ནང་གི་གསང་བའི་གནས་ཚུལ་ཐམས་ཅད་ཕྱིར་མངོན་པར་མཛད་ཅིང༌། མིའི་སེམས་ནང་གི་དམིགས་ཡུལ་ཡང་ཕྱིར་མངོན་པར་མཛད། དེའི་དུས༌སུ། མི་རེ་རེར་དཀོན་མཆོག་ནས་གཟེངས་བསྟོད་འཐོབ་པར་འགྱུར༌རོ།།
1CO 4:6 སྤུན་ཟླ༌རྣམས། ཁྱོད་ཅག་གི་ཕྱིར་དུ། ངས་དོན་དེ་རྣམས་ང་རང་དང་ཨ་པོལ་ལོ་གཉིས་ལ་སྦྱར་བ་ཡིན༌ཏེ། ཁྱོད་རྣམས་ཀྱིས་ངེད་གཉིས་མིག་དཔེར་འཛིན་དགོས༌ཤིང༌། གསུང་རབ་ཀྱི་ནང་དུ་གསུངས་ཡོད་པ་དེ་ལས་བརྒལ་མི་རུང་། དེ་ནི་ཁྱོད་རྣམས་ཀྱིས་ཕན་ཚུན་ལ་ང་རྒྱལ་ཁེངས་དྲེགས་མི་བྱེད་པ༌དང༌། ཕྱོགས་རིས་མི་འཛིན་པའི་ཕྱིར༌རོ།།
1CO 4:7 ཁྱོད་རྣམས་མི་གཞན་དང་མི་འདྲ་བར་བྱེད་མཁན་ནི་སུ་ཡིན༌ནམ། ཁྱོད་ཅག་ལ་ཡོད་པ་ཐམས་ཅད་ཐོབ་ནས་ཡོང་བ་མ་ཡིན༌ནམ། ཐོབ་ནས་ཡོང་བ་ཡིན༌ན། ཅིའི་ཕྱིར་ཐོབ་ནས་ཡོང་བ་མ་ཡིན་པ་ལྟར་རང་རློམ་བྱེད་པ་ཡིན༌ནམ།
1CO 4:8 ད་ལྟ་ཁྱོད་རྣམས་ཡིད་ཚིམ་པ་དང་ཕུན་སུམ་ཚོགས་པར་གྱུར་ལ། ངེད་ཅག་ལ་མི་བརྟེན་པར་རང་ཉིད་རྒྱལ་པོ་བཞིན་སྡོད་པ་མ་ཡིན༌ནམ། ངེད་ཅག་གིས་ཁྱོད་རྣམས་ནི་དངོས་གནས་རྒྱལ་པོར་བྱེད༌ཅིང༌། ངེད་ཅག་གིས་ཀྱང་ཁྱོད་རྣམས་དང་མཉམ་དུ་རྒྱལ་པོའི་སྲིད་དབང་བཟུང་ན་ཅི་མ་རུང་སྙམ།
1CO 4:9 དཀོན་མཆོག་གིས་སྐུ་ཚབ་པ་ངེད་རྣམས་ནི་མི་ཀུན་ལས་ཐ་མ་དང་སྲོག་ཆད་བཅད་པའི་བཙོན་པ་ལྟ་བུར་མཛད་ཅེས་བདག་གིས་བསམས་སོ།། ཅིའི་ཕྱིར་ཞེ་ན། ངེད་ཅག་ནི་འཇིག་རྟེན་གྱི་མི་རྣམས་དང་ཕོ་ཉ་དག་གི་ལྟད་མོར་གྱུར་པས་སོ།།
1CO 4:10 སྐྱབས་མགོན་མཱ་ཤི་ཀའི༌ཕྱིར། ངེད་ཅག་ནི་བླུན་པོ་ཡིན་ཡང་ཁྱོད་ཅག་ནི་སྐྱབས་མགོན་མཱ་ཤི་ཀའི་ནང་དུ་ཤེས་རབ་ལྡན༌པ་ཡིན། ངེད་ཅག་ནི་ཉམ་ཐག་ཀྱང་ཁྱོད་ཅག་ནི་སྟོབས་དང་ལྡན་པ་ཡིན། ཁྱོད་ཅག་ལ་གཟི་བརྗིད་ཐོབ་ཀྱང་ངེད་ཅག་ལ་མཐོང་ཆུང་བྱེད་པ་མ་ཡིན༌ནམ།
1CO 4:11 ད་ལྟའི་བར༌དུ། ངེད་ཅག་ནི་བཀྲེས་ཤིང་སྐོམ་ལ། གོས་ཧྲལ་ཧྲུལ་གྱོན་པ༌དང༌། གཅར་རྡུང་མྱངས་པ༌དང༌། སྡོད་སའི་ཁང་པ་མེད་པ༌དང༌།
1CO 4:12 དཀའ་སྡུག་ཆེན་པོའི་ངང་རང་གི་ལག་པར་བརྟེན་ནས་ལས་ཀ་བྱེད༌པ་དང་། མི་གཞན་གྱིས་སྡིགས་དམོད་བྱེད་དུས་ངེད་ཅག་གིས་བྱིན་རླབས་ཞུ་ཞིང༌། མི་གཞན་གྱིས་གཉའ་གནོན་བྱེད་དུས་ངེད་ཅག་གིས་བཟོད་བསྲན་བྱེད༌པ་ཡིན།
1CO 4:13 མི་གཞན་གྱིས་འཕྱ་སྨོད་བྱེད་དུས། ངེད་ཅག་གིས་སེམས་པ་བཟང་པོས་འདུམ་པར་བསྐུལ་བ་ཡིན། ད་ལྟའི་བར༌དུ། ད་དུང་མི་གཞན་དག་གིས་ངེད་ཅག་ནི་འཇིག་རྟེན་གྱི་གད་སྙིགས་དང་དངོས་པོ་ནང་གི་སྙིགས་མར་བརྩིས༌པའོ།།
1CO 4:14 བདག་གིས་དོན་འདི་རྣམས་ཡི་གེར་འགོད་པའི་དམིགས་ཡུལ་ནི་ཁྱོད་རྣམས་ལ་ངོ་གནོང་དུ་འཇུག་པ་མ་ཡིན༌ཏེ། ངས་སྙིང་ནས་གཅེས་པའི་བུ་ཕྲུག་ལ་བསྐུལ་བ༌བཞིན། ཁྱོད་ཅག་ལ་ཉེན་བརྡ་གཏོང་བའི་ཕྱིར་ཡིན།
1CO 4:15 བདག་ནི་མཱ་ཤི་ཀ་ཡེ་ཤུའི་ནང་དུ་ཁོང་གི་འཕྲིན་བཟང་བརྒྱུད་ནས་ཁྱོད་ཅག་གི་ཕ་རུ་གྱུར་པས། ཁྱོད་རྣམས་ལ་སྐྱབས་མགོན་མཱ་ཤི་ཀའི་ཆོས་གཞུང་གི་ཟུར་ཁྲིད་སློབ་དཔོན་ཆིག་ཁྲི་ཙམ་ཡོད་ཀྱང་ཕ་ལ་རུང་བ་ནི་མང་པོ་མེད༌དོ།།
1CO 4:16 དེ་བས་ཁྱོད་རྣམས་ཀྱིས་ང་རང་མིག་དཔེར་འཛིན་པར་བདག་གིས་བསྐུལ༌བ་ཡིན།
1CO 4:17 དེའི་རྐྱེན༌གྱིས། ངས་ཐི་མོ་ཐེ་ཁྱོད་ཅག་གི་གམ་དུ་མངགས༌ཤིང༌། ཁོ་རང་ནི་གཙོ་བོའི་ནང་དུ་བདག་གིས་སྙིང་ནས་གཅེས་ཤིང་བློ་སེམས་དཀར་བའི་བུ་ཕྲུག་ཅིག་ཀྱང་ཡིན། བདག་གིས་སྐྱབས་མགོན་མཱ་ཤི་ཀའི་ནང་དུ་ཅི་ལྟར་སྤྱད་པ་སྤྱོད་པ༌དང༌། ཡུལ་ཀུན་དང་ཆོས་ཚོགས་སོ་སོ་ནས་ཅི་ལྟར་སློབ་སྟོན་བྱས་པའི་ཚུལ༌ནི། ཁོས་ཁྱོད་རྣམས་ལ་དྲན་སྐུལ་བྱེད་པར་འགྱུར༌རོ།།
1CO 4:18 ཁྱོད་རྣམས་ལས་འགའ་ཞིག་གིས་རང་རློམ་བྱེད༌ཅིང༌། བདག་ནི་ཁྱོད་ཅག་གི་གམ་དུ་མི་ཡོང་བར་བསམས༌མོད།
1CO 4:19 འོན་ཀྱང་གཙོ་བོའི་ཐུགས་དགོངས་བཞིན་ཡིན༌ན། ང་རང་མྱུར་བ་མྱུར་དུ་ཁྱོད་ཅག་གི་གམ་དུ་ཡོང་ངེས་པར་མ༌ཟད། བདག་གིས་ཤེས་འདོད་པ་ནི་རང་རློམ་བྱེད་མཁན་རྣམས་ཀྱི་ངག་ཚིག་མ་ཡིན་པར། ཁོ་རྣམས་ཀྱི་དབང་ཤུགས་ནི་ཅི་ལྟ་བུ་ཡིན་པ་དེའོ།།
1CO 4:20 ཅིའི་ཕྱིར་ཞེ་ན། དཀོན་མཆོག་གི་རྒྱལ་སྲིད་ནི་སྨྲ་བརྗོད་ལ་རག་ལས་པ་མ་ཡིན་པར་མཐུ་སྟོབས་ལ་རག་ལས་པའི་ཕྱིར༌རོ།།
1CO 4:21 ཁྱོད་ཅག་གིས་ཅི་ཞིག་བྱེད་འདོད༌དམ། བདག་གིས་དབྱུག་པ་བཟུང་ནས་ཁྱོད་ཅག་གི་གམ་དུ་ཡོང་འདོད༌དམ། ཡང་ན་བྱམས་བརྩེ་དང་ཞི་འཇམ་གྱི་བསམ་པ་བཅངས་ནས་ཁྱོད་རྣམས་ཀྱི་གམ་དུ་ཡོང་འདོད༌པ་ཡིན།
1CO 5:1 དེ་ཡང་གོ་ཐོས༌ལྟར་ན་ཁྱོད་ཅག་གི་ཁྲོད་དུ་ལོག་གཡེམ་བྱེད་པའི་དོན་བྱུང་ཡོད་ལ། ལོག་གཡེམ་གྱི་སྤྱོད་པ་དེ་ལྟ་བུ་ནི་ཕྱི་ཕྱོགས་པའི་ཁྲོད་དུའང་མེད་དེ། ཁྱོད་ཅག་གི་ཁྲོད་ནས་མི་ཞིག་གིས་རང་གི་མ་གཡར་ལ་ལུས་འབྲེལ་བྱེད་བཞིན་འདུག་པའོ།།
1CO 5:2 ཁྱོད་ཅག་གིས་ད་དུང་རང་རློམ་བྱེད་པ་ལས་འགྱོད་གདུང་བྱས་ནས། དེ་ལྟར་བྱེད་མཁན་ནི་ཁྱོད་ཅག་གི་ཁྲོད་ནས་ཕྱིར་སྐྲོད༌དགོས་པ་མ་ཡིན་ནམ།
1CO 5:3 བདག་གི་ལུས་པོ་ཁྱོད་ཅག་དང་མཉམ་དུ་མེད༌ནའང༌། བདག་གི་སེམས་ཁྱོད་རྣམས་དང་ལྷན་དུ་ཡོད༌དེ། བདག་ནི་དངོས་སུ་ཁྱོད་ཅག་དང་མཉམ་དུ་ཡོད་པ༌བཞིན། དེ་ལྟར་བྱེད་མཁན་ལ་ཐག་བཅད༌པ་ཡིན།
1CO 5:4 ཁྱོད་རྣམས་འཚོགས་པའི་དུས༌སུ། བདག་གི་སེམས་ནི་ཁྱོད་ཅག་དང་མཉམ་དུ་མཆིས༌ཤིང༌། བདག་ཅག་གི་གཙོ་བོ་ཡེ་ཤུའི་མཚན་དང་ཁོང་གི་མཐུ་སྟོབས་ལ་བརྟེན༌ནས།
1CO 5:5 མི་དེ་ལྟ་བུ་ནི་བདུད་སཱ་ཏན་ལ་སྤྲད༌དེ། གཙོ་བོའི་ཉིན་མོར་ཁོའི་རྣམ་ཤེས་ལ་ཐར་པ་འཐོབ་པའི་ཕྱིར། ཁོའི་ལུས་ཕུང་ཉམས་དམས་སུ་གཏོང་བར་བྱའོ།།
1CO 5:6 ཁྱོད་ཅག་གིས་རང་རློམ་བྱེད་པ་ནི་མི་ལེགས༌ཏེ། སྐྱུར་རྩི་ཉུང་ཙམ་གྱིས་བག་ཕྱེ་ཚང་མ་སྐྱུར་ལང་དུ་འཇུག་པ་དེ་ཁྱོད་ཅག་གིས་མི་ཤེས༌སམ།
1CO 5:7 ཁྱོད་ཅག་ནི་སྐྱུར་རྩི་མེད་པའི་བག་ཕྱེ་གསར་པ་ཞིག་ཏུ་འགྱུར་བའི༌ཕྱིར། སྐྱུར་རྩི་རྙིང་པ་དེ་རྩ་བ་ནས་དོར་ཅིག དོན་དམ་དུ་ཁྱོད་ཅག་ནི་སྐྱུར་རྩི་མེད་པའི་བག་ཕྱེ་ཡིན་ནོ།། ཅིའི་ཕྱིར་ཞེ་ན། བདག་ཅག་གི་པེ་སག་དུས་ཆེན་གྱི་མཆོད་པའི་ལུ་གུ༌སྟེ། སྐྱབས་མགོན་མཱ་ཤི་ཀ་ནི་མཆོད་པར་ཕུལ་ཟིན་པའི་ཕྱིར༌རོ།།
1CO 5:8 དེ་བས་བདག་ཅག་དུས་ཆེན་དེ་ལ་རོལ་བ༌ན། སྐྱུར་རྩི་རྙིང་པ་དང་། ངན་སེམས་དང་གདུག་རྩུབ་ཀྱི་སྐྱུར་རྩི་མི་བཀོལ༌བར། ལྷག་བསམ་དང་བདེན་པ་ཡིན་པའི་སྐྱུར་མེད་བག་ལེབ་བཀོལ་ནས་རོལ་དགོས༌སོ།།
1CO 5:9 དེ་སྔོན་བདག་གིས་ཁྱོད་ཅག་ལ་ལོག་གཡེམ་བྱེད་པའི་མི་དང་འགྲོག་པར་མི་བྱའོ་ཞེས་རང་གི་འཕྲིན་ཡིག་ནང་དུ་བྲིས་མྱོང༌ལ།
1CO 5:10 གཏམ་དེ་ནི་འཇིག་རྟེན་འདི་རུ་ལོག་གཡེམ་བྱེད་པའི་མི༌དང༌། འདོད་རྔམ༌ཅན། མགོ་སྐོར་གཏོང༌མཁན། ཡང་ན་སྐུ་འདྲར་བརྟེན་མཁན་བཅས་ལ་འགྲོག་མི་རུང་ཞེས་པའི་དོན་མིན༌ཏེ། དེ་ལྟར་བྱས༌ན། ཁྱོད་ཅག་ནི་འཇིག་རྟེན་འདི་དང་ཁ་འབྲལ་དགོས་པ་ཡིན་ནོ།།
1CO 5:11 འོན༌ཀྱང༌། ད་ལྟ་ངས་ཁྱོད་ཅག་ལ་འཕྲིན་ཡིག་བྲིས༌ཏེ། དད་ལྡན་སྤུན་ཟླའི་མིང་ཐོགས་པ་ཞིག་གིས་ལོག་གཡེམ་བྱེད་པ༌དང༌། འདོད་རྔམ་བཅངས་པ། ཡང་ན་སྐུ་འདྲར་བརྟེན་པ། ཚིག་ངན་སྨྲ༌བ། ཆང་གིས་ར་རོར་གྱུར༌པ། མགོ་སྐོར་གཏོང་བ་བཅས་བྱེད༌ན། མི་དེ་ལྟ་བུ་དང་འགྲོག་པར་མི་བྱ༌ཞིང༌། མི་དེ་དང་མཉམ་དུ་ཁ་ཟས་ཀྱང་ཟ་མི་འོས་ཞེས་སྨྲས༌པའོ།།
1CO 5:12 ཅིའི་ཕྱིར་ཞེ་ན། ཆོས་ཚོགས་ཕྱི་རོལ་གྱི་མི་རྣམས་ལ་ཁྲིམས་ཐག་གཅོད་པ་ནི་བདག་དང་འབྲེལ་བ་མེད༌ལ། ཆོས་ཚོགས་ནང་གི་མི་རྣམས་ལ་ཁྱོད་ཅག་གིས་ཁྲིམས་ཐག་གཅོད་དགོས་པ་མ་ཡིན་ནམ།
1CO 5:13 འོན༌ཀྱང༌། དཀོན་མཆོག་གིས་ཆོས་ཚོགས་ཕྱི་རོལ་གྱི་མི་རྣམས་ལ་ཁྲིམས་ཐག་གཅོད་པར་འགྱུར། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱོད་རྣམས་ཀྱིས་སྡིག་ཅན་དེ་ཁྱོད་ཅག་གི་ཁྲོད་ནས་ཕྱིར་སྐྲོད་ཅིག་ཅེས་གསུངས་པ་བཞིན༌ནོ།།
1CO 6:1 དེ་ཡང་ཁྱོད་ཅག་གི་ཁྲོད་དུ་ཕན་ཚུན་བར་ལ་རྩོད་གཞི་བྱུང་ན་དད་ལྡན་དམ་པ་རྣམས་ལ་མི་ཞུ༌བར། དྲང་བདེན་མིན་པའི་མི་རྣམས་ཀྱི་མདུན་ནས་ཁྲིམས་རར་གཏུག་ནུས༌སམ།
1CO 6:2 མ་འོངས་པའི་དུས༌སུ། དད་ལྡན་དམ་པ་རྣམས་ཀྱིས་འཇིག་རྟེན་ལ་ཁྲིམས་ཐག་གཅོད་པར་འགྱུར་བ་ཁྱོད་ཅག་གིས་མི་ཤེས༌སམ། ཁྱོད་ཅག་གིས་འཇིག་རྟེན་ལ་ཁྲིམས་ཐག་གཅོད་པར་བྱེད༌ན། ཁྱོད་ཅག་གིས་ཀྱང་རྩོད་གཞི་ཆུང་ངུ་ཞིག་ཐག་གཅོད་བྱེད་མི་ཐུབ་བམ།
1CO 6:3 མ་འོངས་པའི་དུས༌སུ། བདག་ཅག་གིས་ཕོ་ཉ་དག་ལ་ཁྲིམས་ཐག་གཅོད་པར་འགྱུར་བ་དེ་ཁྱོད་ཅག་གིས་མི་ཤེས༌སམ། དེ་ལྟར་ཡིན༌ན། ད་ལྟའི་དོན་རྣམས་སྨོས་ཅི༌དགོས།
1CO 6:4 དེའི༌ཕྱིར། ཁྱོད་ཅག་གིས་ད་ལྟའི་དོན་རྣམས་ལ་ཁྲིམས་ཐག་གཅོད༌ན། ཆོས་ཚོགས་ཀྱིས་མཐོང་ཆུང་བྱེད་པའི་མི་ཞིག་བདམས་ནས་ཁྲིམས་ཐག་གཅོད་པར་མངག༌གམ།
1CO 6:5 བདག་གིས་འདི་སྐད་སྨྲས་པ༌ནི། ཁྱོད་རྣམས་ལ་ངོ་གནོང་དུ་འཇུག་པའི་ཕྱིར་ཡིན༌ཏེ། ཁྱོད་ཅག་གི་ཁྲོད་དུ་སྤུན་ཟླའི་བར་གྱི་རྩོད་གཞི་རྣམས་ཐག་གིས་གཅོད་ནུས་པའི་ཤེས་རབ་ཅན་གཅིག་ཀྱང་མེད༌དམ།
1CO 6:6 ཁྱོད་རྣམས་ཀྱིས་སྤུན་ཟླ་དང་སྤུན་ཟླའི་བར་དུ་གཏུག་རེས་བྱེད་པར་མ༌ཟད། དད་མེད་རྣམས་ཀྱི་མདུན་ནས་གཏུག་པར་བྱེད༌དོ།།
1CO 6:7 ཁྱོད་ཅག་གིས་ཕན་ཚུན་གཏུག་རེས་བྱེད་པ་ནི་རྩ་བ་ནས་ནོར་བ་ཡིན། ཁྱོད་ཅག་གིས་ཅིའི་ཕྱིར་བརྙས་བཅོས་དང་གྱོང་གུད་འཁུར་མི་རུང་ངམ།
1CO 6:8 དེ་ལས་ལྡོག་སྟེ། ཁྱོད་ཅག་གིས་མི་གཞན་ལ་བརྙས་བཅོས་བྱེད་པ་དང་གྱོང་གུད་བཟོ་བར་མ་ཟད། དེ་ལྟར་བྱེད་ཡུལ་ནི་རང་གི་སྤུན་ཟླ་རྣམས་ཡིན༌ནོ།།
1CO 6:9 དྲང་བདེན་མིན་པའི་མི་རྣམས་ལ་དཀོན་མཆོག་གི་རྒྱལ་སྲིད་འཐོབ་མི་སྲིད་པ་ནི་ཁྱོད་ཅག་གིས་མི་ཤེས༌སམ། རང་གིས་རང་ལ་མགོ་སྐོར་མི་གཏོང་བར༌གྱིས། མི་ཚངས་སྤྱོད་པ༌དང༌། སྐུ་འདྲར་བརྟེན་པ། ལོག་གཡེམ་བྱེད༌པ། སྐྱེས་པ་སྨད་འཚོང་མཁན། ཕོ་ཡིས་ཕོ་ལ་འཁྲིག་པ་སྤྱོད་པ།
1CO 6:10 རྐུ་བྱེད༌པ། འདོད་རྔམ་བཅངས༌པ། ཆང་གིས་ར་རོར་གྱུར༌པ། ཚིག་ངན་སྨྲ༌བ། མགོ་སྐོར་གཏོང་མཁན་རྣམས་ལ་དཀོན་མཆོག་གི་རྒྱལ་སྲིད་འཐོབ་པར་མི་འགྱུར་རོ།།
1CO 6:11 ཁྱོད་ཅག་གི་ཁྲོད་དུའང་མི་ཁ་ཤས་ནི་སྔོན་ཆད་དེ་ལྟ་བུ་ཡིན༌མོད། འོན་ཀྱང་ད་ལྟ་གཙོ་བོ་ཡེ་ཤུ་མཱ་ཤི་ཀའི་མཚན་ལ་བརྟེན་པ༌དང༌། བདག་ཅག་གི་དཀོན་མཆོག་གི་དམ་པའི་ཐུགས་ཉིད་ལ་བརྟེན༌ནས། ཁྱོད་ཅག་ནི་གཙང་མར་བཀྲུས་པ༌དང༌། དམ་པར་གྱུར༌པ། མི་རྣམ་དག་ཏུ་གྱུར༌པའོ།།
1CO 6:12 ངས་ལས་ཅི་ཡང་བྱ་རུང་བ་ཡིན་ཟེར་ཡང་། ལས་ཐམས་ཅད་ལ་ཕན་ཐོགས་ཡོད་པ་མ་ཡིན། ངས་ལས་ཅི་ཡང་བྱ་རུང་བ་ཡིན་ཟེར་ཡང་། ལས་གང་ཞིག་ཡིན་ཡང་བདག་ནི་དེའི་དབང་དུ་མི༌འགྲོའོ།།
1CO 6:13 ཟས་ནི་ལྟོ་བའི་ཕྱིར་དང་ལྟོ་བ་ནི་ཟས་ཀྱི་ཕྱིར་ཡིན་ཟེར༌ནའང་། དཀོན་མཆོག་གིས་དེ་གཉིས་མེད་པར་མཛད་ངེས་སོ།། འོན༌ཀྱང༌། ལུས་པོ་ནི་ལོག་གཡེམ་བྱེད་པའི་ཕྱིར་མ་ཡིན་པར་གཙོ་བོའི་ཕྱིར་ཡིན༌ལ། གཙོ་བོ་ཁོང་ཉིད་ཀྱང་ལུས་པོའི་ཕྱིར་ཡིན།
1CO 6:14 དེར་མ༌ཟད། དཀོན་མཆོག་གིས་གཙོ་བོ་སླར་གསོན་པར་མཛད་པ༌དང༌། བདག་ཅག་ཀྱང་ཁོང་གི་མཐུ་སྟོབས་ཀྱིས་སླར་གསོན་པར་མཛད་ངེས༌ཡིན།
1CO 6:15 ཁྱོད་རྣམས་ཀྱིས་རང་གི་ལུས་པོ་ནི་སྐྱབས་མགོན་མཱ་ཤི་ཀའི་ཡན་ལག་ཡིན་པ་མི་ཤེས༌སམ། བདག་གིས་སྐྱབས་མགོན་མཱ་ཤི་ཀའི་ཡན་ལག་དེ་ནི་སྨད་འཚོང་མའི་ཡན་ལག་ཏུ་བྱེད་རུང་ངམ་ཞེ༌ན། གཏན་ནས་མི་རུང༌ངོ་།།
1CO 6:16 དེ་ཡང་གསུང་རབ་ཀྱི་མདོ་ལས་ཇི་སྐད༌དུ། ཁོ་གཉིས་ཀྱི་ལུས་པོ་གཅིག་ཏུ་འགྱུར་བ་ཡིན་ཞེས་གསུངས་ཡོད༌པས། མི་ཞིག་སྨད་འཚོང་མ་དང་འགྲོགས༌ན། དེ་གཉིས་ཀྱི་ལུས་པོ་གཅིག་ཏུ་འགྱུར་བའང་ཁྱོད་ཅག་གིས་མི་ཤེས༌སམ།
1CO 6:17 འོན༌ཀྱང༌། མི་ཞིག་གིས་གཙོ་བོ་ལ་འབྲེལ་བ་བཙུགས༌ན། མི་དེ་ནི་ཁོང་གི་ཐུགས་ཉིད་དང་གཅིག་ཏུ་གྱུར༌པའོ།།
1CO 6:18 དེའི༌ཕྱིར། ཁྱོད་རྣམས་ཀྱིས་ལོག་གཡེམ་རྩ་བ་ནས་སྤོངས༌ཤིག མི་རྣམས་ཀྱིས་ནག་ཉེས་གང་ཞིག་བྱེད་ཀྱང་དེ་དག་ཐམས་ཅད་ནི་ལུས་པོའི་ཕྱི་རོལ་ཡིན༌མོད། འོན་ཀྱང་ལོག་གཡེམ་བྱས་ན་རང་གི་ལུས་པོར་འགལ་བའི་སྡིག་པ་བྱེད༌པ་ཡིན་ནོ།།
1CO 6:19 ཁྱོད་ཅག་གི་ལུས་པོ་ནི་དམ་པའི་ཐུགས་ཉིད་ཀྱི་མཆོད་ཁང་ཡིན་པ་མི་ཤེས༌སམ། དམ་པའི་ཐུགས་ཉིད་ནི་དཀོན་མཆོག་གིས་གནང་ཞིང་ཁྱོད་ཅག་གི་སེམས་ནང་དུ་བཞུགས་པ་ཡིན། ཁྱོད་ཅག་ནི་རང་ཉིད་ལ་དབང་བ་མ་ཡིན༌ཏེ།
1CO 6:20 རིན་ཆེན་པོ་བཏང་ནས་ཉོས་པ་ཡིན༌པས། ཁྱོད་ཅག་གི་ལུས་སྟེང་ནས་དཀོན་མཆོག་ལ་བཀུར་སྟི་བྱེད་པར་གྱིས་ཤིག།
1CO 7:1 དེ་ཡང་ཁྱོད་རྣམས་ཀྱིས་བདག་ལ་བསྐུར་བའི་འཕྲིན་ཡིག་གི་ནང་དུ་བྲིས་པའི་དོན༌དེར་མཚོན་ན། ད་ལྟ་བདག་གིས་ཀྱང་དོན་དེའི་སྐོར་ཁྱོད་ཅག་ལ་སྨྲ་བར་བྱ༌སྟེ། སྤྱིར་སྐྱེས་པ་ནི་བུད་མེད་དང་མ་འགྲོགས་ན་བཟང་མོད།
1CO 7:2 འོན་ཀྱང་ལོག་གཡེམ་གྱི་དོན་དག་མི་འབྱུང་བའི༌ཕྱིར། སྐྱེས་པ་རེ་ལ་ཆུང་མ་རེ་དང་། བུད་མེད་རེ་ལའང་སྐྱེས་པ་རེ་ཡོད་ན་འོས་སོ།།
1CO 7:3 བྱ་འོས་པའི་ཆགས་པ་ནི་ཁྱོ་གས་ཆུང་མ་ལ་དེ་བཞིན་བྱེད་དགོས༌ལ། ཆུང་མས་ཀྱང་ཁྱོ་ག་ལ་དེ་ལྟར་བྱེད་འོས་པ་ཡིན།
1CO 7:4 ཆུང་མའི་ལུས་པོ་ནི་རང་ཉིད་ལ་མི་དབང་བར་ཁྱོ་ག་ལ་དབང་བ༌དང༌། དེ་བཞིན་དུ་ཁྱོ་གའི་ལུས་པོའང་རང་ཉིད་ལ་མི་དབང་བར་ཆུང་མ་ལ་དབང༌བ་ཡིན།
1CO 7:5 དེའི༌ཕྱིར། ཁྱོད་རྣམས་ལས་སུ་ཞིག་བཟའ་ཟླ་ཡིན༌ན་སོ་སོར་སྡོད་པར་མི༌བྱའོ།། ཁོ་གཉིས་གྲོས་མཐུན་བྱུང་ནས་བློ་སེམས་རྩེ་གཅིག་གིས་གསོལ་བ་འདེབས་པའི་ཕྱིར་རེ་ཞིག་སོ་སོར་སྡོད་རུང༌ལ། དེའི་རྗེས་སུ་ཁོ་གཉིས་སླར་ཡང་མཉམ་དུ་སྡོད་དགོས་པ་ཡིན། དེ་ནི་ཁྱོད་རྣམས་ཀྱིས་རང་ཚོད་མི་ཟིན་པ་དང་། བདུད་སཱ་ཏན་གྱིས་གོ་སྐབས་དང་བསྟུན་ནས་ཁྱོད་ཅག་མི་བསླུ་བའི་ཕྱིར༌རོ།།
1CO 7:6 བདག་གིས་འདི་ལྟར་སྨྲས་པ་ནི་ཁྱོད་ཅག་ལ་བཟོད་སྒོམ་གནང་བ༌ལས་བཀའ་ཕབ་པ་མ་ཡིན།
1CO 7:7 སྤྱིར་མི་ཐམས་ཅད་ནི་བདག་དང་མཚུངས་ན་ལེགས་སྙམ༌མོད། འོན་ཀྱང་མི་རེ་རེར་དཀོན་མཆོག་ནས་ཐོབ་པའི་གནང་སྦྱིན་མི་མཚུངས༌ཏེ། མི་ལ་ལར་འདི་ལྟར་ཐོབ་པ་དང་ལ་ལར་དེ་ལྟར་ཐོབ༌པའོ།།
1CO 7:8 བདག་གིས་གཉེན་སྒྲིག་བྱས་མེད་པའི་མི་དང་ཡུགས་མོ་རྣམས་ལ་སྨྲ་བར་བྱ༌སྟེ། ཁོ་རྣམས་རྒྱུན་དུ་བདག་དང་མཚུངས་ན་ལེགས།
1CO 7:9 འོན་ཀྱང་། རང་ཚོད་རང་གིས་མི་ཟིན་ན་གཉེན་སྒྲིག་བྱེད་རུང༌ཞིང་། འདོད་ཆགས་ཀྱི་དབང་གིས་སྨྱོ་བ་ལས་གཉེན་སྒྲིག་བྱས་ན་ལེགས༌སོ།།
1CO 7:10 བདག་གིས་གཉེན་སྒྲིག་བྱས་ཟིན་པ་རྣམས་ལ་འདི་ལྟར་བཀའ་བསྒོ་བར༌བྱ་སྟེ། དོན་དམ་དུ་བདག་གི་བཀའ་མ་ཡིན་པར་གཙོ་བོའི་བཀའ་ཡིན༌ཏེ། ཆུང་མ་ནི་རང་གི་ཁྱོ་ག་དང་བཟའ་ཐོར་བྱེད་མི་རུང༌ལ།
1CO 7:11 གལ༌ཏེ། བཟའ་ཐོར་བྱས་ན་སྐྱེས་པ་གཞན་དང་གཉེན་སྒྲིག་བྱེད་མི་རུང༌། ཡང་ན་རང་གི་ཁྱོ་གར་འགྲིག་མཐུན་ཡོང་ན་ལེགས། དེ་བཞིན་དུ་ཁྱོ་གའང་རང་གི་ཆུང་མ་དང་བཟའ་ཐོར་བྱེད་མི་རུང༌ངོ༌།།
1CO 7:12 བདག་གིས་མི་གཞན་དག་ལ་སྨྲ་བར༌བྱ་སྟེ། དོན་དམ་དུ་གཙོ་བོས་གསུངས་པ་མིན༌ཏེ། དད་ལྡན་ཞིག་ལ་དད་པ་མེད་པའི་ཆུང་མ་ཞིག་ཡོད༌པ་དང་། ཁོ་མོའང་དད་ལྡན་དེ་དང་མཉམ་དུ་སྡོད་པར་འདོད༌ན། ཁོས་ཆུང་མ་དེ་དང་བཟའ་ཐོར་བྱེད་མི་རུང་ངོ༌།།
1CO 7:13 ཡང་དད་ལྡན་བུད་མེད་ཅིག་ལ་དད་པ་མེད་པའི་ཁྱོ་ག་ཞིག་ཡོད༌པ་དང་། ཁྱོ་ག་དེའང་ཁོ་མོ་དང་མཉམ་དུ་སྡོད་པར་འདོད༌ན། ཁོ་མོས་ཀྱང་ཁྱོ་ག་དེ་དང་བཟའ་ཐོར་བྱེད་མི་རུང་ངོ༌།།
1CO 7:14 ཅིའི་ཕྱིར་ཞེ་ན། དད་པ་མེད་པའི་ཁྱོ་ག་དེ་ནི་ཆུང་མའི་རྐྱེན་གྱིས་དམ་པར་གྱུར་པ༌དང༌། དད་པ་མེད་པའི་ཆུང་མ་དེའང་ཁྱོ་གའི་རྐྱེན་གྱིས་དམ་པར་གྱུར་པའི་ཕྱིར༌རོ།། དེ་ལྟར་མིན༌ཚེ། ཁྱོད་ཅག་གི་བུ་ཕྲུག་ནི་གཙང་མ་མིན༌མོད་ཀྱང༌། ད་ལྟ་ཁོ་རྣམས་ནི་དམ་པར་གྱུར༌པའོ།།
1CO 7:15 འོན་ཀྱང་། དད་པ་མེད་པའི་མི་སུ་ཞིག་རང་གི་བཟའ་ཟླ་དང་ཁ་འབྲལ་འདོད་ན་དེ་ལྟར་བྱེད་པར༌གྱིས། དད་པ་དང་ལྡན་པའི་ཁྱོ་གའམ་ཆུང་མ་སུ་ཞིག་ཡིན༌ཡང༌། དོན་དེ་ལྟ་བུར་ཕྲད་ནའང་རང་དབང་ཡོད་པར༌གྱིས། དཀོན་མཆོག་གིས་བདག་ཅག་འགྲིག་མཐུན་ངང་ནས་འཚོ་ཞིང་གཞེས་པར་ཞལ་འབོད་གནང་བ་ཡིན།
1CO 7:16 ཁྱོད་ཆུང་མ་རྣམས་ཀྱིས་རང་གི་ཁྱོ་ག་སྐྱོབ་མི་ནུས་པ་ཅི་ལྟར་ཤེས༌སམ། ཁྱོད་ཁྱོ་ག་རྣམས་ཀྱིས་ཀྱང་རང་གི་ཆུང་མ་སྐྱོབ་མི་ནུས་པ་ཅི་ལྟར་ཤེས༌སམ།
1CO 7:17 དེ་ཡང་གཙོ་བོས་མི་རེ་རེར་གནང་བའི་བགོ་སྐལ་དང་དཀོན་མཆོག་གིས་མི་རེ་རེར་ཞལ་འབོད་གནང་བ་བཞིན་དུ་སྤྱད་པ་སྤྱོད༌ཅིག བདག་གིས་ཀྱང་ཆོས་ཚོགས་ཐམས་ཅད་ལ་དེ་ལྟར་ཁ་བསྒོ་གནང༌བ་ཡིན་ནོ།།
1CO 7:18 མི་སུ་ཡིན་ཡང་མཚན་སྐྱི་བཅད་རྗེས་ཞལ་འབོད་ཐོབ་པ་ཡིན༌ན། མཚན་སྐྱི་བཅད་པའི་རྟགས་ནི་འདོར་བར་མི༌བྱའོ།། མི་སུ་ཡིན་ཡང་མཚན་སྐྱི་མ་བཅད་པའི་དུས་སུ་ཞལ་འབོད་ཐོབ་པ་ཡིན༌ན། མཚན་སྐྱི་གཅོད་པར་མི༌བྱའོ།།
1CO 7:19 མཚན་སྐྱི་གཅོད་མིན་གང་ཡང༌རུང༌། དེ་ནི་ཅི་ཡང་མིན༌ཏེ། དཀོན་མཆོག་གི་བཀའ་བསྲུང་བར་བྱ་རྒྱུ་ནི་གལ༌ཆེ་བ་ཡིན།
1CO 7:20 དོན་དམ་དུ་ཁྱོད་ཅག་མི་རེ་རེ་ནི་ཞལ་འབོད་ཐོབ་པའི་དུས༌སུ་ཅི་འདྲ་ཡིན་ན་དེ་ལྟར་སྡོད་པར༌བྱའོ།།
1CO 7:21 དད་ལྡན་པ་ཁྱོད་ནི་བྲན་གཡོག་ཡིན་པའི་དུས་སུ་ཞལ་འབོད་ཐོབ་པ་ཡིན༌ན། དེ་ལ་སེམས་ཁུར་བྱ་མི་འོས། གལ༌ཏེ། ཁྱོད་ལ་བྲན་གཡོག་ལས་ཐར་བའི་གོ་སྐབས་བྱུང༌ན། དེ་ནི་ཤིན་ཏུ་ལེགས་སོ།།
1CO 7:22 ཅིའི་ཕྱིར་ཞེ་ན། སུ་ཡང་བྲན་གཡོག་ཡིན་པའི་དུས་སུ་གཙོ་བོའི་ཞལ་འབོད་ཐོབ་པ་ཡིན༌ན། བྲན་གཡོག་དེ་ནི་གཙོ་བོའི་རང་དབང་ལྡན་པ་ཡིན༌ལ། དེ་ལྟར་སུ་ཡང་རང་དབང་ལྡན་པ་ཡིན་པའི་དུས་སུ་ཞལ་འབོད་ཐོབ་པ་ནི་སྐྱབས་མགོན་མཱ་ཤི་ཀའི་བྲན་གཡོག་ཡིན་པའི་ཕྱིར༌རོ།།
1CO 7:23 ཁྱོད་ཅག་ནི་རིན་ཆེན་པོ་བཏང་ནས་ཉོས་པ་ཡིན༌པས། འཇིག་རྟེན་གྱི་མིའི་བྲན་གཡོག་ནི་མི༌བྱའོ།།
1CO 7:24 སྤུན་ཟླ༌རྣམས། ཁྱོད་ཅག་ལ་ཞལ་འབོད་གནང་བའི་དུས༌སུ་རང་རང་ཅི་འདྲ་ཡིན་ན། དཀོན་མཆོག་གི་དྲུང་དུའང་དེ་བཞིན་དུ་སྡོད་པར༌བྱའོ།།
1CO 7:25 དེ་ཡང་ན་ཆུང་བུ་མོ་རྣམས་ཀྱི་སྐོར་ལ་གཙོ་བོའི་བཀའ་ནི་བདག་ལ་མེད༌ཀྱང༌། ངས་གཙོ་བོའི་ཐུགས་རྗེའི་ངང་རང་ཉིད་ནི་བློ་སེམས་དཀར་བའི་མི་ཡིན་པའི་ཆ༌ནས། རང་གི་བསམ་ཚུལ་ཁྱོད་ཅག་ལ་སྨྲ་བར༌བྱ་སྟེ།
1CO 7:26 ཅིའི་ཕྱིར་ཞེ་ན། བདག་གིས་ད་ལྟའི་དཀའ་སྡུག་ལ་བལྟས༌ན། མི་སུ་ཞིག་ཡིན་ཡང་རང་གི་རྒྱུན་ལྡན་གྱི་འཚོ་བ་ཅི་འདྲ་ཡིན་པ་དེ་ལྟར་བསྡད་ན་ལེགས་སྙམ།
1CO 7:27 ཁྱོད་ལ་ཆུང་མ་ཡོད་ན་ཁོ་མོ་དང་བཟའ་ཐོར་མི༌བྱའོ།། ཁྱོད་ལ་ཆུང་མ་མེད་ན་ཆུང་མ་འཚོལ་བར་མི༌བྱའོ།།
1CO 7:28 གལ༌ཏེ། ཁྱོད་ཀྱིས་ཆུང་མ་བླངས་ན་དེ་ནི་ཉེས་པ་མིན༌ལ། ན་ཆུང་བུ་མོ་བག་མར་སོང་ནའང་ཉེས་པ་མིན། འོན༌ཀྱང༌། གཉེན་བསྒྲིགས་ཟིན་པ་རྣམས་ཀྱིས་མི་ཚེ་འདིར་སྡུག་བསྔལ་མྱང་ངེས༌པས། ངས་ཁྱོད་ཅག་ནི་སྡུག་བསྔལ་དེ་ལས་སྐྱོབ་འདོད༌དོ།།
1CO 7:29 སྤུན་ཟླ༌རྣམས། བདག་གིས་ཁྱོད་ཅག་ལ་སྨྲ་བར་བྱ༌སྟེ། དུས་ཚོད་ཐུང་ཐུང་ཡིན་པས། ད་ནས༌བཟུང༌སྟེ་ཆུང་མ་ཡོད་པ་རྣམས་ཀྱིས་ཆུང་མ་མེད་པ་ལྟར་བྱེད༌ཅིང༌།
1CO 7:30 ངུ་མཁན་རྣམས་ཀྱིས་མི་ངུ་བ་ལྟར་བྱེད་པ༌དང༌། དགའ་སྤྲོ་དང་ལྡན་པ་རྣམས་ཀྱིས་དགའ་སྤྲོ་མེད་པ་ལྟར་བྱེད་པ༌དང༌། ཉོ་མཁན་རྣམས་ཀྱིས་ཅི་ཡང་མ་ཐོབ་པ་ལྟར་བྱེད་པ༌དང༌།
1CO 7:31 འཇིག་རྟེན་གྱི་དངོས་པོ་བཀོལ་མཁན་རྣམས་ཀྱིས་མི་བཀོལ་བ་བཞིན་དུ་བྱེད་པར༌གྱིས། ཅིའི་ཕྱིར་ཞེ་ན། འཇིག་རྟེན་འདིའི་རྣམ་པ་ནི་མེད་པར་འགྱུར་བའི་ཕྱིར༌རོ།།
1CO 7:32 བདག་གིས་ཁྱོད་རྣམས་ལ་སེམས་ཁུར་ཅི་ཡང་མེད་པར་འདོད༌དེ། ཆུང་མ་མེད་པ་རྣམས་ཀྱིས་གཙོ་བོའི་དོན་ལ་སེམས་ཁུར་བྱེད༌ཅིང༌། དེ་ནི་གཙོ་བོ་ཇི་ལྟར་ཐུགས་དགྱེས་སུ་འཇུག་པར་སེམས་ཁུར་བྱེད༌པ་ཡིན་ནོ།།
1CO 7:33 ཆུང་མ་ཡོད་པ་རྣམས་ཀྱིས་འཇིག་རྟེན་གྱི་དོན་ལ་སེམས་ཁུར་བྱེད༌ཅིང༌། དེ་ནི་རང་གི་ཆུང་མ་ཇི་ལྟར་དགའ་རུ་འཇུག་པར་སེམས་ཁུར་བྱེད་པས།
1CO 7:34 ཁོའི་སེམས་ནི་སོ་སོར་གྱེས༌པའོ།། གཉེན་སྒྲིག་མ་བྱས་པའི་བུད་མེད་དང་ན་ཆུང་བུ་མོ་གཉིས་ཀྱིས་གཙོ་བོའི་དོན་ལ་སེམས་ཁུར་བྱེད༌ཅིང༌། དེ་ནི་ལུས་སེམས་གཉིས་ཀ་གཙང་མ་ཡིན་པར་དམིགས༌པ་དང་། གཉེན་སྒྲིག་བྱས་པའི་བུད་མེད་ཀྱིས་འཇིག་རྟེན་གྱི་དོན་ལ་སེམས་ཁུར་བྱེད༌ཅིང༌། དེ་ནི་རང་གི་སྐྱེས་པ་ཇི་ལྟར་དགའ་རུ་འཇུག་པར་སེམས་ཁུར་བྱེད༌པ་ཡིན།
1CO 7:35 བདག་གིས་དེ་ལྟར་སྨྲས་པ་ནི་ཁྱོད་རྣམས་ལ་ཕན་འདོགས་པའི་ཕྱིར་ཡིན་པ་ལས་ཁྱོད་ཅག་འཆིང་བའི་ཕྱིར་མིན༌ཏེ། ཁྱོད་ཅག་གིས་སྤྱོད་ལམ་བཟང་ཞིང་སེམས་མི་གཡེང་བར་ནན་ཏན་ངང་གཙོ་བོ་ལ་ཞབས་ཕྱི་བསྒྲུབ་དགོས་པའི་ཕྱིར་ཡིན༌ནོ།།
1CO 7:36 གལ་ཏེ། སུ་ཞིག་གིས་རང་གི་ན་ཆུང་བུ་མོར་ ལྟ་ཚུལ་མི་འོས་པ་བཟུང་ཡོད་པར་འདོད་ཅིང༌། བུ་མོ་དེའང་ན་ཚོད་ལས་བརྒལ་ཚེ། གཉེན་སྒྲིག་བྱེད་དུ་འཇུག་འདོད་ན་དེ་ལྟར་བྱས་ཀྱང་ཉེས་པ་མེད༌པས། ཁོ་གཉིས་གཉེན་སྒྲིག་བྱེད་དུ་བཅུག་ན་ལེགས།
1CO 7:37 གལ༌ཏེ། མི་སུ་ཞིག་གི་བསམ་པ་བརྟན་ཅིང་བསྒྲུབ་དགོས་པའི་དོན་གཞན་མེད་པ༌དང༌། རང་གི་སེམས་ལ་རང་དབང་ཡོད༌ཅིང་། བུ་མོ་དེ་མནའ་མ་མི་སྟེར་བའི་སེམས་ཐག་བཅད་ན་དེ་ལྟར་བྱས་ཀྱང་ལེགས།
1CO 7:38 དེ་ལྟར་ཡིན་ན། རང་གི་ན་ཆུང་བུ་མོ་མནའ་མར་སྟེར་བ་ནི་བཟང༌ཡང༌། མ་བྱིན་ན་ལྷག་ཏུ་བཟང༌ངོ༌།།
1CO 7:39 དེ་ཡང་ཁྱོ་ག་གསོན་པའི་དུས་སུ་ཆུང་མ་ལ་ཚོད་འཛིན་ཐེབས་ཡོད༌ཀྱང༌། ཁྱོ་ག་ཤི་བར་གྱུར་ན། ཆུང་མར་གཙོ་བོ་ནང་གི་མི་དང་གཉེན་སྒྲིག་བྱེད་པའི་རང་དབང་ཡོད།
1CO 7:40 འོན༌ཀྱང༌། བདག་གི་བསམ་ཚུལ་ནི། ཁོ་མོ་ནི་ནམ་རྒྱུན་ལྟར་བསྡད་ན་ལྷག་ཏུ་བདེ༌ཞིང༌། ངས་རང་ཉིད་ཀྱི་སེམས་སུ་དཀོན་མཆོག་གི་དམ་པའི་ཐུགས་ཉིད་ཡོད་པར་བསམས༌སོ།།
1CO 8:1 དེ་ཡང་སྐུ་འདྲ་ལ་ཕུལ་བའི་མཆོད་རྫས་སྐོར་སྨྲས་ན། བདག་ཅག་ཐམས་ཅད་ལ་ཤེས་བྱ་ངེས་ཅན་ཞིག་ཡོད་པ་དེ་བདག་ཅག་གིས་ཤེས་སོ།། འོན༌ཀྱང༌། ཤེས་བྱ་ཡིས་ང་རྒྱལ་སྐྱེ་རུ་འཇུག༌ཅིང༌། བྱམས་པ་ཡིས་མི་སྐྱེད་བསྲིང་བྱེད༌པ་ཡིན།
1CO 8:2 མི་ཞིག་གིས་རང་ཉིད་ནི་ཤེས་མཁན་ཞིག་ཡིན་སྙམ༌ན། ཁོས་ཤེས་དགོས་པ་ལྟར་ད་དུང་ཅི་ཡང་མི་ཤེས།
1CO 8:3 མི་ཞིག་གིས་དཀོན་མཆོག་ལ་གཅེས་པར་བྱེད༌ན། དཀོན་མཆོག་གིས་མི་དེ་ཉིད་མཁྱེན༌ཏོ།།
1CO 8:4 ད་ལྟ་སྐུ་འདྲ་ལ་ཕུལ་བའི་མཆོད་རྫས་བཟའ་བའི་སྐོར་བརྗོད༌ན། འཇིག་རྟེན་འདིའི་སྐུ་འདྲ་ལ་སྙིང་པོ་ཅི་ཡང་མེད་པ༌དང༌། དཀོན་མཆོག་གཅིག་རང་ལས་གཞན་མེད་པ་བདག་ཅག་གིས་ཤེས༌སོ།།
1CO 8:5 ཅིའི་ཕྱིར་ཞེ་ན། གནམ་ས་གཉིས་སུ་ལྷ་བྱ་བ་ཞིག་ཡོད་ཟེར་ཀྱང་། ལྷ་མང་པོ་དང་གཞི་བདག་མང་པོ་ཡོད༌པའི་དབང་དུ་བཏང་ནའང༌།
1CO 8:6 བདག་ཅག་ལ་དཀོན་མཆོག་གཅིག་རང་ཡོད་པ་ནི་ཡབ་ལགས༌ཏེ། འཇིག་རྟེན་གྱི་དངོས་པོ་ཐམས་ཅད་ནི་ཁོང་ནས་བྱུང་ཞིང་། བདག་ཅག་ཀྱང་ཁོང་གི་ཆེད་དུ་གནས་པ་ཡིན། བདག་ཅག་ལ་གཙོ་བོ་གཅིག་རང་ཡོད་པ་ནི་ཡེ་ཤུ་མཱ་ཤི་ཀ་ཡིན༌ཏེ། དངོས་པོ་ཐམས་ཅད་ནི་ཡེ་ཤུ་མཱ་ཤི་ཀ་བརྒྱུད་ནས་བྱུང་བ་དང་། བདག་ཅག་ཀྱང་ཁོང་ལ་བརྟེན་ནས་གནས་པ་ཡིན་ནོ།།
1CO 8:7 འོན༌ཀྱང༌། མི་ཐམས་ཅད་ལ་ཤེས་བྱ་འདི་ཡོད་པ་མིན༌ཏེ། མི་ལ་ལ་ནི་ད་ལྟའི་བར་དུ་སྐུ་འདྲ་ལ་དད་གུས་བྱས་ནས་གོམས་ཡོད༌པས། ཁོ་རྣམས་ཀྱིས་ཟོས་པ་ནི་སྐུ་འདྲ་ལ་ཕུལ་བའི་མཆོད་རྫས་ཡིན་པར་འདོད༌དེ། ཁོ་རྣམས་ཀྱི་སེམས་ཉམས་པ་དང་རང་ཉིད་ཀྱང་མི་གཙང་བར་གྱུར་པ་རེད་སྙམ།
1CO 8:8 དོན་དམ་དུ་ཟས་ལ་བརྟེན་ནས་བདག་ཅག་དཀོན་མཆོག་གི་ཐུགས་སུ་འཛིན་པ་མིན༌ཏེ། བདག་ཅག་གིས་ཟས་མ་ཟོས་ཀྱང་གནོད་པ་མེད་ལ་ཟོས་ནའང་ཕན་ཐོགས་མེད་པའི་ཕྱིར༌རོ།།
1CO 8:9 འོན༌ཀྱང༌། ཁྱོད་ཅག་གི་རང་དབང་འདི་དད་པ་བརྟན་པོ་མེད་པ་རྣམས་ལ་བཀག་རྡོ་རུ་མི་འགྱུར་བའི་ཕྱིར་གཟབ་གཟབ༌གྱིས།
1CO 8:10 གལ་ཏེ། དད་པ་མི་བརྟན་པ་ཞིག་གིས་ཤེས་བྱ་དེ་ལྟ་བུ་ལྡན་མཁན་ཁྱོད་ཀྱིས་ལྷ་ཁང་ནས་མཆོད་རྫས་ཟ་བཞིན་ཡོད་པ་མཐོང༌ཞིང་མི་དེའི་སེམས་ཉམས་ཞན་ཡིན་ཚེ། ཁོས་སྙིང་སྟོབས་བསྐྱེད་ནས་སྐུ་འདྲ་ལ་ཕུལ་བའི་མཆོད་རྫས་བཟའ་བ་མ་ཡིན་ནམ།
1CO 8:11 དེ་བས་ཁྱོད་ཀྱི་ཤེས་བྱའི་དབང་གིས་དད་པ་མི་བརྟན་པའི་སྤུན་ཟླ་དེ་འཇིག་པར་བྱས་པ༌དང༌། སྐྱབས་མགོན་མཱ་ཤི་ཀ་ནི་ཁོའི་དོན་དུ་སྐུ་གྲོངས་པ་ཡིན།
1CO 8:12 ཁྱོད་ཀྱིས་དེ་ལྟར་སྤུན་ཟླ་རྣམས་ལ་འགལ་བའི་སྡིག་པ་བྱེད་ཅིང༌། ཁོ་རྣམས་ཀྱི་ཉམས་ཞན་དུ་གྱུར་པའི་སེམས་ལ་གནོད་པ་བསྐྱལ༌ན། སྐྱབས་མགོན་མཱ་ཤི་ཀ་ལ་འགལ་བའི་སྡིག་པའང་བྱས༌པ་ཡིན།
1CO 8:13 དེའི༌ཕྱིར། ཁ་ཟས་ཀྱིས་བདག་གི་སྤུན་ཟླ་སར་འགྱེལ་དུ་འཇུག༌ན། ངས་རང་གི་སྤུན་ཟླ་སར་འགྱེལ་དུ་མི་འཇུག་པའི་ཕྱིར་ནམ་ཡང་ཤ་མི༌ཟའོ།།
1CO 9:1 བདག་ལ་རང་དབང་ཡོད་པ་མིན༌ནམ། བདག་ནི་སྐུ་ཚབ་པ་མ་ཡིན༌ནམ། བདག་ནི་བདག་ཅག་གི་གཙོ་བོ་ཡེ་ཤུར་མཇལ་མྱོང་བ་མིན༌ནམ། ཁྱོད་ཅག་ནི་གཙོ་བོའི་ནང་དུ་ང་ཡི་ལེགས་པར་བཅོས་པ་མ་ཡིན་ནམ།
1CO 9:2 མི་གཞན་ལ་མཚོན་ན་བདག་ནི་སྐུ་ཚབ་པ་མིན༌ནའང༌། ཁྱོད་ཅག་ལ་མཚོན་ན་བདག་ནི་སྐུ་ཚབ་པ་ཡིན་ཏེ། ཁྱོད་ཅག་ནི་གཙོ་བོའི་ནང་དུ་ང་རང་སྐུ་ཚབ་པ་ཡིན་པའི་དཔང་རྟགས་ཡིན༌ནོ།།
1CO 9:3 ངས་རང་ལ་འདྲི་རྩད་བྱེད་པའི་མི་རྣམས་ལ་འདི་ལྟར་དག་འབུད་བྱེད་པ༌སྟེ།
1CO 9:4 ངེད་ཅག་ལ་བཟའ་བཏུང་སྤྱོད་པའི་དབང་ཆ་ཡོད་པ་མིན༌ནམ།
1CO 9:5 ངེད་ཅག་ལ་སྐུ་ཚབ་པ་གཞན་དག་དང་གཙོ་བོའི་སྤུན་ཟླ་རྣམས། ཀེ་ཕཱ་བཅས་དང་འདྲ་བར་དད་ལྡན་ཆུང་མ་ཁྲིད་ནས་མཉམ་དུ་འགྲོ་བའི་དབང་ཆ་ཡོད་པ་མིན༌ནམ།
1CO 9:6 བདག་དང་པཱར་ན་པཱ་ཁོ་ནར་ངལ་རྩོལ་མི་བྱེད་པའི་དབང་ཆ་མེད་པ་ཡིན༌ནམ།
1CO 9:7 སུ་ཞིག་དམག་ལ་ཞུགས་ཤིང་འགྲོ་སོང་རང་གིས་གཏོང༌ངམ། སུ་ཞིག་གིས་རྒུན་ཚལ་བཙུགས་ཀྱང་འབྲས་བུ་མི༌ཟའམ། སུ་ཞིག་གིས་ཕྱུགས་ཁྱུ་འཚོས་ཀྱང་དེའི་འོ་མ་མི་འཐུང༌ངམ།
1CO 9:8 བདག་གིས་དེ་ལྟར་སྨྲས་པ་ནི་མིའི་བསམ་ཚུལ་བཞིན་སྨྲས་པ་ཡིན༌ནམ། བཀའ་ཁྲིམས་ལས་ཀྱང་དེ་ལྟར་གསུངས་པ་མིན༌ནམ།
1CO 9:9 མོ་ཤེའི་བཀའ་ཁྲིམས་ལས་ཇི་སྐད༌དུ། གཡུལ་ཁ་གཅོག་པའི་དུས༌སུ། ། བ་གླང་མཆུ་ཏོ་མ༌སྡོམ། ། ཞེས་བཀོད་པའི་དཔེ་དེ༌ལས། དཀོན་མཆོག་གིས་བ་གླང་ལ་ཐུགས་ཁུར་མཛད་པ་ཡིན༌ནམ།
1CO 9:10 དེ་ཐམས་ཅད་ནི་བདག་ཅག་གི་དོན་དུ་གསུངས་པ་མ་ཡིན་ནམ་ཞེ་ན་ཡིན་ཏེ། ཞིང་རྨོ་མཁན་དང་གཡུལ་གཅོག་མཁན་གྱིས་ལོ་ཏོག་གི་སྐལ་འཐོབ་པར་རེ་བ་བཅངས་ནས་ཞིང་རྨོ་བ་དང་གཡུལ་གཅོག་པའི་ཕྱིར༌རོ།།
1CO 9:11 དེ་བཞིན་དུ་ངེད་ཅག་གིས་ཐུགས་ཉིད་དང་ལྡན་པའི་ས་བོན་དེ་ཁྱོད་ཅག་གི་སེམས་སུ་བཏབ༌ཅིང༌། ཁྱོད་ཅག་ལས་འཇིག་རྟེན་གྱི་རྒྱུ་ནོར་བསྡུས་པ་དེ་ནི་དོན་ཆེན་ཞིག་མ་ཡིན།
1CO 9:12 མི་གཞན་ལ་ཁྱོད་རྣམས་ལས་འཇིག་རྟེན་གྱི་རྒྱུ་ནོར་འཐོབ་པའི་དབང་ཆ་ཡོད༌ན། ངེད་ཅག་ལ་དབང་ཆ་དེ་ལྟ་བུ་ནི་ལྷག་པར་ཡོད། འོན༌ཀྱང༌། ངེད་ཅག་གིས་དབང་ཆ་དེ་ནི་བཀོལ་མ་མྱོང༌སྟེ། སྐྱབས་མགོན་མཱ་ཤི་ཀའི་འཕྲིན་བཟང་སྒྲོག་པར་བར་ཆད་མི་བཟོ་བའི༌ཕྱིར། ངེད་ཅག་གིས་དོན་ཀུན་ལའང་བཟོད་བསྲན་བྱས་སོ༎
1CO 9:13 དེ་ཡང་མཆོད་ཁང་གི་གཉེར་པས་མཆོད་རྫས་ཟས་སུ་བྱེད་པ༌དང༌། མཆོད་རྫས་འབུལ་མཁན་ལ་མཆོད་ཁྲི་ནས་བགོ་སྐལ་འཐོབ་པ་ནི་ཁྱོད་རྣམས་ཀྱིས་མི་ཤེས༌སམ།
1CO 9:14 དེ་བཞིན་དུ་གཙོ་བོས་ཀྱང་འཕྲིན་བཟང་སྒྲོག་མཁན་རྣམས་ནི་འཕྲིན་བཟང་སྒྲོག་པའི་ལས་ལ་བརྟེན་ནས་འཚོ་དགོས་པའི་བཀའ་གནང༌ངོ༌།།
1CO 9:15 འོན༌ཀྱང༌། བདག་གིས་དབང་ཆ་དེ་དག་བཀོལ་མ་མྱོང༌། ཁྱོད་རྣམས་ཀྱིས་བདག་ལ་དེ་ལྟར་བྱེད་པའི༌ཕྱིར། ངས་དོན་དེ་རྣམས་བྲིས་པ་མིན༌ཏེ། བདག་གིས་བསྔགས་པའི་དོན་དེ་མི་གཞན་གྱིས་སྟོང་བར་བྱེད་པ༌ལས། ང་རང་འཆི་བར་གྱུར་ན་ལེགས་པས༌སོ།།
1CO 9:16 འོན༌ཀྱང༌། བདག་གིས་འཕྲིན་བཟང་སྒྲོག་ན་ང་ལ་ངོམ་པའི་རྒྱུ་མེད༌དེ། བདག་ནི་དེ་ལྟར་མི་བྱེད་ཐབས་མེད་ཡིན། བདག་གིས་འཕྲིན་བཟང་མ་བསྒྲགས་ན་བདག་ལ་ཆག་སྒོ་འབྱུང་ངེས༌ཡིན།
1CO 9:17 ང་རང་འཕྲིན་བཟང་སྒྲོག་པར་འཐད་པ་བྱུང༌ན་བདག་ལ་བྱ་དགའ་འཐོབ་སྲིད༌ཅིང༌། ང་རང་དོན་དེར་འཐད་པ་མ་བྱུང༌ཡང་ལས་འགན་བདག་ལ་བཅོལ༌ཟིན་པ་ཡིན།
1CO 9:18 དེའི༌ཕྱིར། བདག་གི་བྱ་དགའ་ནི་ཅི་ཡིན་ཞེ༌ན། ངས་འཕྲིན་བཟང་སྒྲོག་པའི་དུས༌སུ། འཕྲིན་བཟང་སྒྲོག་པའི་དབང་ཆ་དེ་ཉིད་མི་ཟད་པའི༌ཕྱིར། རིན་མེད་པར་མི་རྣམས་ལ་འཕྲིན་བཟང་འཐོབ་པར་བྱེད་པ༌དེའོ།།
1CO 9:19 བདག་ལ་རང་དབང་ཡོད་ཅིང་མི་གཞན་གྱི་མངའ་འོག་ཏུ་མེད༌མོད། འོན་ཀྱང་མི་མང་པོའི་སེམས་འགུག་པའི༌ཕྱིར། བདག་ནི་དགའ་བའི་ངང་མི་རྣམས་ཀྱི་གཡོག་པོར་གྱུར་པ༌དང་།
1CO 9:20 ཡ་ཧུ་དཱ་པ་རྣམས་ཀྱི་སེམས་འགུག་པའི༌ཕྱིར། བདག་གིས་ཡ་ཧུ་དཱ་པ་དང་འདྲ་བར་བྱས༌ཤིང་། བཀའ་ཁྲིམས་ཀྱི་འོག་ཏུ་ཡོད་པ་རྣམས་ཀྱི་སེམས་འགུག་པའི༌ཕྱིར། བདག་ནི་བཀའ་ཁྲིམས་འོག་ཏུ་མེད་ཀྱང་བཀའ་ཁྲིམས་འོག་ཏུ་ཡོད་པ་ལྟར་བྱས༌པ་དང་།
1CO 9:21 བཀའ་ཁྲིམས་མེད་པ་རྣམས་ཀྱི་སེམས་འགུག་པའི༌ཕྱིར། བདག་གིས་བཀའ་ཁྲིམས་མེད་པའི་མི་ལྟར་བྱས༌པ་ཡིན། དོན་དམ་དུ་བདག་ནི་དཀོན་མཆོག་གི་བཀའ་ཁྲིམས་མེད་པ་མིན༌ཏེ། སྐྱབས་མགོན་མཱ་ཤི་ཀའི་བཀའ་ཁྲིམས་འོག་ཏུ་གནས༌པ་ཡིན།
1CO 9:22 ཉམ་ཆུང་རྣམས་ཀྱི་སེམས་འགུག་པའི༌ཕྱིར། བདག་གིས་ཉམ་ཆུང་ལྟར་བྱས་སོ།། ཐབས་སྣ་ཚོགས་ཀྱི་སྒོ་ནས་མི་ཁ་ཤས་སྐྱོབ་པའི༌ཕྱིར། བདག་གིས་མི་གང་དང་ཅི་ལྟ་བུ་ཡིན་པ་དེ་བཞིན་དུ་བྱས༌པ་ཡིན།
1CO 9:23 བདག་གིས་ལས་བྱེད་པ་ཐམས་ཅད་ནི་འཕྲིན་བཟང་གི་རྐྱེན༌དང༌། མི་གཞན་རྣམས་དང་མཉམ་དུ་འཕྲིན་བཟང་གི་དགེ་མཚན་འཐོབ་པའི་ཕྱིར་ཡིན༌ནོ།།
1CO 9:24 དེ་ཡང་རྒྱུགས་ར་ནས་འགྲན་རྒྱུག་བྱེད་མཁན་ཐམས་ཅད་བརྒྱུགས༌ནའང༌། བྱ་དགའ་འཐོབ་མཁན་ནི་གཅིག་ཁོ་ན་ཡིན་པ་ཁྱོད་ཅག་གིས་མི་ཤེས༌སམ། ཁྱོད་རྣམས་ཀྱང་བྱ་དགའ་འཐོབ་པའི་ཕྱིར་དེ་ལྟར་རྒྱུགས༌ཤིག
1CO 9:25 འགྲན་སྡུར་ལ་ཞུགས་མཁན་ཐམས་ཅད་ཀྱིས་རྒྱལ་ཁ་ལེན་པའི༌ཕྱིར། བྱ་བ་ཀུན་ལ་རང་ཚོད་ཟིན་པར་བྱེད༌ཅིང༌། དེ་རྣམས་ཀྱིས་འཇིག་པར་འགྱུར་བའི་ཅོད་པན་འཐོབ་པའི་ཕྱིར་དེ་ལྟར་བྱེད༌མོད། འོན་ཀྱང་བདག་ཅག་གིས་འཇིག་པ་མེད་པའི་ཅོད་པན་འཐོབ་ཕྱིར་དེ་ལྟར་བྱེད༌པ་ཡིན་ནོ།།
1CO 9:26 དེའི༌ཕྱིར། ང་རང་རྒྱུགས་པ་ལ་དམིགས་འབེན་མེད་པ་མིན༌ཞིང༌། ཁུ་ཚུར་གྱིས་རྒྱག་པའང་བར་སྣང་ལ་རྒྱག་པ་ལྟར་མིན༌ཏེ།
1CO 9:27 བདག་གི་ལུས་པོ་རང་ལ་བསྟུན་པའི༌ཕྱིར། རང་གིས་རང་ཉིད་འདུལ་བར་བྱེད། དེ་ནི་བདག་གིས་མི་གཞན་རྣམས་ལ་འཕྲིན་བཟང་བསྒྲགས་རྗེས་རང་ཉིད་མི་འདོར་བའི་ཕྱིར་ལགས༌སོ།།
1CO 10:1 སྤུན་ཟླ༌རྣམས། བདག་གིས་ཁྱོད་རྣམས་ལ་ཤེས་སུ་འཇུག་འདོད་པ་ནི། སྔོན་ཆད་བདག་ཅག་གི་ཕ་མེས་ཡང་མེས་ཐམས་ཅད་སྤྲིན་འོག་ཏུ་གནས་ཤིང་ཐམས་ཅད་རྒྱ་མཚོ་བརྒྱུད་ནས་སོང་སྟེ།
1CO 10:2 ཐམས་ཅད་སྤྲིན་དང་རྒྱ་མཚོ་བརྒྱུད་ནས་ཁྲུས་གསོལ་ལ་ཞུགས་ཤིང་མོ་ཤེ་ལ་གཏོགས་པར་གྱུར་པ་དང་།
1CO 10:3 ཡང་ཐམས་ཅད་ཀྱིས་ཐུགས་ཉིད་ཀྱི་ཁ་ཟས་གཅིག་མཚུངས་ཟོས༌ཤིང༌།
1CO 10:4 ཡང་ཐམས་ཅད་ཀྱིས་ཐུགས་ཉིད་ཀྱི་བཏུང་བྱ་གཅིག་མཚུངས་བཏུངས་མྱོང༌བ་ཡིན། ཐུགས་ཉིད་ཀྱི་བཏུང་བྱ་དེ་ནི་ཁོ་རྣམས་དང་ལྷན་དུ་བྱོན་པའི་ཐུགས་ཉིད་ཀྱི་བྲག་རྡོ་ལས་བྱུང་བ་ཡིན༌ཏེ། བྲག་རྡོ་དེ་ནི་སྐྱབས་མགོན་མཱ་ཤི་ཀ་ལགས་སོ།།
1CO 10:5 འོན༌ཀྱང༌། ཕ་མེས་ཡང་མེས་ཁྲོད་ཀྱི་མི་མང་ཤོས་ལ་དཀོན་མཆོག་ཐུགས་མ་དགྱེས་པས་དེ་དག་གི་བེམ་པོ་དབེན་སྟོང་དུ་བསྐྱུར་བ་ཡིན་ནོ།།
1CO 10:6 དོན་དེ་དག་ནི་བདག་ཅག་གི་ཕྱི་འདོམས་ཀྱི་མེ་ལོང་ཡིན༌ཏེ། བདག་ཅག་གིས་འདོད་ངན་མི་བྱེད་པའི༌ཕྱིར། ཁོ་རྣམས་ཀྱིས་འདོད་ངན་བྱེད་པ་བཞིན་བྱ་མི་རུང་ངོ༌།།
1CO 10:7 མི་དེ་དག་ལས་འགའ་ཞིག་གིས་སྐུ་འདྲར་བརྟེན་པ༌བཞིན། ཁྱོད་ཅག་གིས་སྐུ་འདྲར་བརྟེན་མི་རུང་། དེ་ལ་གསུང་རབ་ཀྱི་མདོ་ལས་ཇི་སྐད༌དུ། འབངས་རྣམས་བཟའ་བཏུང་རོལ་ཕྱིར༌བསྡད།། རྩེད་མོར་གཡེང་ཕྱིར་ཡར་ལངས༌སོ།། ཞེས་བཀོད་པ་བཞིན༌ཡིན།
1CO 10:8 མི་དེ་རྣམས་ལས་ཁ་ཤས་ཀྱིས་ལོག་གཡེམ་བྱས་པས་ཉིན་གཅིག་ལ་མི་ཉིས་ཁྲི་སུམ་སྟོང་ཤི་བ༌བཞིན། བདག་ཅག་གིས་ལོག་གཡེམ་མི༌བྱའོ།།
1CO 10:9 ཡང་མི་ཁ་ཤས་ཀྱིས་གཙོ་བོ་ལ་ཚོད་བགམ་བྱས་པས་དེ་རྣམས་དུག་སྦྲུལ་དག་གིས་བསད་པ༌བཞིན། བདག་ཅག་གིས་ཁོང་ལ་ཚོད་བགམ་མི༌བྱའོ།།
1CO 10:10 ཡང་མི་འགའ་ཞིག་གིས་འཁང་ར་བྱས་པས་ཁོ་རྣམས་སྲོག་གཅོད་མཁན་གྱིས་བསད་པ༌བཞིན། བདག་ཅག་གིས་འཁང་ར་མི༌བྱའོ།།
1CO 10:11 དོན་དམ་དུ་མི་དེ་རྣམས་ཕྲད་པའི་དོན་འདི་དག་ནི་བདག་ཅག་གི་ཕྱི་འདོམས་ཀྱི་མེ་ལོང་ཡིན༌ཏེ། གསུང་རབ་ཀྱི་ནང་དུ་བཀོད་ཅིང་བདག་ཅག་ལ་བསྐལ་པའི་མཐའ་མ་དེ་སླེབས་པར་ཉེན་བརྡ་བརྒྱབ་པའང་ཡིན་ནོ།།
1CO 10:12 དེའི༌ཕྱིར། སུ་ཞིག་གིས་རང་ཉིད་ཀྱི་དད་པ་བརྟན་པོ་ཡིན་སྙམ༌ན། རང་ཉིད་སྡིག་པའི་ནང་དུ་མི་ལྷུང་བའི་ཕྱིར་གཟབ་གཟབ་བྱ་དགོས།
1CO 10:13 ཁྱོད་ཅག་ལ་ཐེབས་པའི་ཉམས་ཚོད་ནི་མི་གཞན་རྣམས་ལའང་ཐེབས་མྱོང༌བ་ཡིན། དཀོན་མཆོག་ནི་ཡིད་རྟོན་རུང་བ་ཡིན༌ཏེ། ཁྱོད་རྣམས་ལ་བཟོད་བསྲན་བྱ་མི་ནུས་པའི་ཉམས་ཚོད་ཐེབས་སུ་མི་འཇུག ཉམས་ཚོད་ཐེབས་པའི་དུས༌སུ། ཁྱོད་ཅག་གིས་བཟོད་བསྲན་བྱེད་ཐུབ་པའི༌ཕྱིར། ཁྱོད་རྣམས་ལ་ཐར་པའི་ལམ་ཞིག་གནང་ངེས༌སོ།།
1CO 10:14 དེ་བས་ན། བདག་གི་སྙིང་ཉེ་བའི་སྤུན་ཟླ༌རྣམས། ཁྱོད་ཅག་གིས་སྐུ་འདྲ་ལ་ཅི་ནས་ཀྱང་མ་བརྟེན༌ཅིག
1CO 10:15 བདག་གིས་ཤེས་རབ་ཅན་རྣམས་ལ་དོན་འདི་སྨྲས་པ་ཡིན༌ཏེ། ཁྱོད་རྣམས་ཀྱིས་བདག་གི་གཏམ་ལ་ལེགས་ཉེས་འབྱེད་པར༌གྱིས།
1CO 10:16 བདག་ཅག་གིས་བཀའ་དྲིན་ཞུས་པའི་ཕོར་བ་ནི་སྐྱབས་མགོན་མཱ་ཤི་ཀའི་སྐུ་ཁྲག་ལྷན་དུ་འཐུང་བ་མ་ཡིན་ནམ། བདག་ཅག་གིས་བག་ལེབ་དུམ་བུར་བགོས་པ་ནི་སྐྱབས་མགོན་མཱ་ཤི་ཀའི་སྐུ་ལུས་མཉམ་དུ་དང་ལེན་བྱེད་པ་མ་ཡིན་ནམ།
1CO 10:17 བདག་ཅག་གི་མི་གྲངས་ཇི་འདྲ་མང་ཡང་བག་ལེབ་གཅིག་ཡོད༌པས། བདག་ཅག་ནི་སྐུ་ལུས་གཅིག་ཡིན༌ཏེ། བདག་ཅག་ཡོངས་ལ་བག་ལེབ་དེ་དུམ་བུར་བགོས་ནས་ཐོབ༌པ་ཡིན་ནོ།།
1CO 10:18 ཁྱོད་རྣམས་ཀྱིས་ཡེས་ར་ཨེལ་པ་རྣམས་ལ་ལྟོས་དང་། མཆོད་རྫས་ཟ༌མཁན་དེ་རྣམས་མཆོད་ཁྲི་ནས་བགོ་སྐལ་འཐོབ་མཁན་མ་ཡིན༌ནམ།
1CO 10:19 བདག་གིས་འདི་ལྟར་སྨྲས་པའི་དོན་ཅི་ཡིན་ཟེར༌ན། སྐུ་འདྲར་ཕུལ་བའི་མཆོད་རྫས་ལ་སྙིང་པོ་ལྡན༌ནམ། ཡང་ན་སྐུ་འདྲ་དེ་ལ་སྙིང་པོ་ཡོད་དམ་ཞེ་ན་མེད༌པ་ཡིན།
1CO 10:20 བདག་གིས་འདི་ལྟར་སྨྲ་བ་ནི། ཕྱི་ཕྱོགས་པ་རྣམས་ཀྱིས་དཀོན་མཆོག་ལ་མཆོད་པ་ཕུལ་བ་མ་ཡིན༌པར། གདོན་འདྲེ་ལ་མཆོད་པ་ཡིན། ཁྱོད་རྣམས་གདོན་འདྲེ་དང་འབྲེལ་བ་བྱེད་པར་ང་རང་མི༌དགའོ།།
1CO 10:21 ཁྱོད་རྣམས་ཀྱིས་གཙོ་བོའི་ཕོར་བ་དང་གདོན་འདྲེའི་ཕོར་བ་གཉིས་ཀ་ལས་འཐུང་མི་རུང༌ལ། གཙོ་བོའི་ཞལ་ཟས་དང་གདོན་འདྲེའི་ཁ་ཟས་གཉིས་ཀ་མཉམ་དུ་ཟ་མི་རུང༌།
1CO 10:22 བདག་ཅག་གིས་གཙོ་བོ་ལ་ཕྲག་དོག་སློང་བར་མི་འགྱུར་རམ། བདག་ཅག་ཁོང་ལས་ཀྱང་མཐུ་སྟོབས་ཆེའམ་ཞེ་ན་མི་ཆེའོ།།
1CO 10:23 ལས་ཅི་ཡང་བྱེད་རུང་ཟེར་ཡང་། ལས་ཐམས་ཅད་ལ་ཕན་ཐོགས་ཡོད་པ་མིན། ལས་ཅི་ཡང་བྱེད་རུང་ཟེར་ཡང་། ལས་ཐམས་ཅད་ཀྱིས་མི་གསོ་སྐྱོང་བྱེད་པ་མིན་ནོ།།
1CO 10:24 མི་སུ་ཡིན་ཡང་རང་གི་ཁེ་ཕན་མི་སེམས་པར་མི་གཞན་གྱི་ཁེ་ཕན་བསམ་དགོས།
1CO 10:25 ཤ་བཙོང་བའི་ཁྲོམ་ར་ནས་ཉོས་པ་ཐམས་ཅད་བཟའ་རུང༌བ་ཡིན། དེ་ལ་སེམས་ཀྱི་རྐྱེན་གྱིས་དོན་ཅི་ཡང་འདྲི་བར་མི༌བྱེད་དོ།།
1CO 10:26 ཅིའི་ཕྱིར་ཞེ་ན། ཇི་སྐད༌དུ། ས་གཞི་དང་ནི་སྣོད་བཅུད་མ་ལུས་པ་ཐམས་ཅད་གཙོ་བོ་ལ་དབང་བ་ཡིན་ཞེས་གསུངས་ཡོད་པའི་ཕྱིར༌རོ།།
1CO 10:27 གལ༌ཏེ། དད་པ་མེད་པ་ཞིག་གིས་ཁྱོད་ཅག་མགྲོན་དུ་བོས་པ༌དང༌། ཁྱོད་རྣམས་ཀྱང་མགྲོན་ལ་འགྲོ་འདོད་པ་ཡིན༌ན། ཁྱོད་ཅག་གིས་རང་གི་མདུན་དུ་བཤམས་པ་ཐམས་ཅད་བཟའ་རུང༌། དེ་ལ་སེམས་ཀྱི་རྐྱེན་གྱིས་དོན་ཅི་ཡང་འདྲི་བར་མི༌བྱའོ།།
1CO 10:28 གལ༌ཏེ། མི་ཞིག་གིས་ཁྱོད་རྣམས་ལ་འདི་ནི་མཆོད་པར་ཕུལ་བའི་མཆོད་རྫས་ཡིན་ཟེར༌ན། དེ་ལྟར་སྨྲ་མཁན་དང་དེའི་སེམས་ཀྱི་ཕྱིར་བཟའ་བར་མི༌བྱའོ།།
1CO 10:29 བདག་གིས་སེམས་ཞེས་སྨྲས་པ་ནི་ཁྱོད་ཅག་གི་ཆེད་དུ་མ་ཡིན་པར་མི་གཞན་གྱི་ཕྱིར་ཡིན། ཅིའི་ཕྱིར་བདག་གི་རང་དབང་འདི་ལ་མི་གཞན་གྱི་སེམས་ཀྱིས་ཚོད་འཛིན་བྱེད༌དམ།
1CO 10:30 གལ༌ཏེ། བདག་གིས་དཀོན་མཆོག་ལ་བཀའ་དྲིན་ཞུས་རྗེས་མཆོད་རྫས་ཟོས་པར་གྱུར༌ན། ཅིའི་ཕྱིར་མི་གཞན་གྱིས་བདག་ལ་སྡིགས་དམོད་བྱེད་པ་ཡིན༌ནམ།
1CO 10:31 དེའི༌ཕྱིར། ཁྱོད་རྣམས་ཀྱིས་བཟའ་བཏུང་ངམ་ལས་གང་ཞིག་བྱེད་ཀྱང་དཀོན་མཆོག་ལ་བསྟོད་བསྔགས་བརྗོད་པའི་ཕྱིར་བསྒྲུབ་པར༌བྱའོ།།
1CO 10:32 ཡ་ཧུ་དཱ་པའམ་གྷི་རིག་པ། ཡང་ན་དཀོན་མཆོག་གི་ཆོས་ཚོགས་བཅས་གང་ཡིན༌ཡང༌། ཁྱོད་ཅག་གིས་དེ་རྣམས་སར་འགྱེལ་དུ་འཇུག་པར་མི༌བྱའོ།།
1CO 10:33 དེ་ནི་བདག་གིས་ལས་གང་ཞིག་བྱེད་ཀྱང་མི་གཞན་ཐམས་ཅད་དགའ་བར་བྱེད་པ༌དང༌། མི་དེ་རྣམས་ལ་ཐར་པ་འཐོབ་པའི་ཕྱིར། རང་གི་ཁེ་ཕན་མི་སེམས་པར་མི་གཞན་ཐམས་ཅད་ཀྱི་ཁེ་ཕན་བསམས༌པ་བཞིན༌ནོ།།
1CO 11:1 དེ་ཡང་བདག་གིས་སྐྱབས་མགོན་མཱ་ཤི་ཀ་མིག་ལྟོས་སུ་བཟུང་བ༌ལྟར། ཁྱོད་རྣམས་ཀྱིས་ཀྱང་ང་རང་མིག་ལྟོས་སུ་འཛིན་པར༌གྱིས།
1CO 11:2 ཁྱོད་རྣམས་ཀྱིས་དོན་ཀུན་གྱི་ཐད་ནས་ང་རང་དྲན༌ཞིང༌། བདག་གིས་ཁྱོད་ཅག་ལ་གནང་བའི་སྲོལ་རྒྱུན་རྣམས་ཀྱང་བརྟན་པོར་སྲུང་བའི༌ཕྱིར། ངས་ཁྱོད་ཅག་ལ་བསྔགས་བརྗོད༌བྱེད་པའོ།།
1CO 11:3 བདག་གིས་དོན་འདི་ཁྱོད་རྣམས་ལ་ཤེས་སུ་འཇུག་འདོད༌དེ། སྐྱབས་མགོན་མཱ་ཤི་ཀ་ནི་སྐྱེས་པ་རྣམས་ཀྱི་དབུ་ཡིན༌ཞིང༌། སྐྱེས་པ་ནི་སྐྱེས་མ་རྣམས་ཀྱི་མགོ་ཡིན༌ལ། དཀོན་མཆོག་ནི་སྐྱབས་མགོན་མཱ་ཤི་ཀའི་དབུ་ཡིན་ནོ།།
1CO 11:4 སྐྱེས་པ་རྣམས་ཀྱིས་གསོལ་བ་འདེབས་པའམ་ལུང་བསྟན་གནང་བའི་དུས༌སུ། རང་གི་མགོའི་སྐྲ་བཏུམས་པར་བྱེད༌ན། དེ་ནི་རང་གི་མགོ་ངོ་གནོང་བར་བྱེད༌པ་ཡིན།
1CO 11:5 སྐྱེས་མ་རྣམས་ཀྱིས་གསོལ་བ་འདེབས་པའམ་ལུང་བསྟན་གནང་བའི་དུས༌སུ། རང་གི་མགོའི་སྐྲ་མ་བཏུམས༌ན། དེ་ནི་རང་གི་མགོ་ངོ་གནོང་བར་བྱེད༌པ་ཡིན། ཅིའི་ཕྱིར་ཞེ་ན། དེ་ནི་སྐྲ་བཞར་བ་དང་མཚུངས་ པའི་ཕྱིར༌རོ།།
1CO 11:6 གལ༌ཏེ། སྐྱེས་མ་རྣམས་ཀྱིས་མགོའི་སྐྲ་བཏུམ་པར་མི་བྱེད༌ན། ཁོ་མོའི་སྐྲ་ནི་བཞར་འོས༌ཏེ། སྐྱེས་མ་རྣམས་ཀྱིས་སྐྲ་འབྲེག་པའམ་སྐྲ་བཞར་བ་ནི་ངོ་ཚ་ཞིག་ཏུ་འདོད་ན་མགོའི་སྐྲ་བཏུམ་དགོས་སོ།།
1CO 11:7 སྐྱེས་པ་རྣམས་ནི་དཀོན་མཆོག་གི་སྣང་བརྙན་དང་གཟི་བརྗིད་ཡིན༌པས། སྐྱེས་པ་རྣམས་ཀྱིས་མགོའི་སྐྲ་བཏུམ་པར་མི་འོས་སོ།། འོན༌ཀྱང༌། སྐྱེས་མ་རྣམས་ནི་སྐྱེས་པའི་གཟི་བརྗིད་ཡིན༌ཏེ།
1CO 11:8 ཐོག་མར་སྐྱེས་པ་ནི་སྐྱེས་མ་ལས་བྱུང་བ་མ་ཡིན༌པར། སྐྱེས་མ་ནི་སྐྱེས་པ་ལས་བྱུང་བ་ཡིན༌ལ།
1CO 11:9 སྐྱེས་པ་ནི་སྐྱེས་མའི་ཆེད་དུ་བཀོད་པ་མ་ཡིན༌པར། སྐྱེས་མ་ནི་སྐྱེས་པའི་ཆེད་དུ་བཀོད༌པ་ཡིན།
1CO 11:10 དེའི༌ཕྱིར། སྐྱེས་མ་དག་ནི་ཕོ་ཉའི་རྐྱེན༌གྱིས། ཁོ་མོ་རྣམས་ཀྱི་མགོ་ལ་དབང་ཆར་གཏོགས་པའི་རྟགས་ཤིག་བརྒྱན་ན་འོས༌སོ།།
1CO 11:11 འོན༌ཀྱང༌། གཙོ་བོའི་ཐུགས་བཀོད་ལྟར་ན་སྐྱེས་མ་ནི་སྐྱེས་པ་དང་འབྲེལ་བ་མེད་པ་མིན༌ལ། སྐྱེས་པའང་སྐྱེས་མ་དང་འབྲེལ་བ་མེད་པ་མིན་ནོ།།
1CO 11:12 ཅིའི་ཕྱིར་ཞེ་ན། སྐྱེས་མ་ནི་སྐྱེས་པ་ལས་བྱུང་བ༌དང༌། སྐྱེས་པ་ནི་བུད་མེད་ཀྱིས་བཙས་པ་ཡིན༌མོད། འོན་ཀྱང་དངོས་པོ་ཐམས་ཅད་ནི་དཀོན་མཆོག་ནས་བྱུང་བའི་ཕྱིར༌རོ།།
1CO 11:13 དེས་ན་ཁྱོད་ཅག་གིས་བརྟག་པར་བྱ༌སྟེ། སྐྱེས་མ་རྣམས་ཀྱིས་དཀོན་མཆོག་ལ་གསོལ་བ་འདེབས་པའི་དུས༌སུ། མགོའི་སྐྲ་མ་བཏུམས་ན་འོས༌སམ།
1CO 11:14 རང་གཤིས་ཀྱིས་ཀྱང་ཁྱོད་ཅག་ལ་བསྟན་པ་བཞིན། སྐྱེས་པ་རྣམས་ཀྱི་མགོའི་སྐྲ་རིང་ན་དེ་ནི་ཁོ་རྣམས་ཀྱི་ངོ་ཚ་མ་ཡིན་ནམ།
1CO 11:15 འོན༌ཀྱང༌། སྐྱེས་མ་རྣམས་ལ་སྐྲ་རིང་པོ་ཡོད༌ན། དེ་ནི་སྐྱེས་མ་རྣམས་ཀྱི་གཟི་བརྗིད་ཡིན༌ཏེ། སྐྲ་རིང་པོ་ནི་སྐྱེས་མ་རྣམས་ལ་མགོ་བཏུམ་བྱེད་དུ་གནང་བའི་ཕྱིར༌ཡིན།
1CO 11:16 གལ༌ཏེ། མི་ཞིག་གིས་འདིའི་སྐོར་ལ་རྩོད་པ་བྱེད་འདོད༌ན། ངེད་ཅག་ལ་ལུགས་སྲོལ་དེ་ལྟ་བུ་མེད༌ལ། དཀོན་མཆོག་གི་ཆོས་ཚོགས་དག་ལའང་ལུགས་སྲོལ་དེ་ལྟ་བུ་མེད༌དོ།།
1CO 11:17 ད་ལྟ་བདག་གིས་ཁྱོད་རྣམས་ལ་ཁ་བསྒོ་གནང་བ་ནི་ཁྱོད་ཅག་ལ་བསྔགས་པ་མིན༌ཏེ། ཁྱོད་ཅག་མཉམ་དུ་འཚོགས་པ་ལ་དགེ་མཚན་ལས་གནོད་པ་ཡོད་དོ།།
1CO 11:18 བདག་གིས་གོ་ཐོས་ལྟར༌ན། ཁྱོད་རྣམས་ཀྱི་ཆོས་ཚོགས་མཉམ་དུ་འཚོགས་པའི་དུས་སུ་ནང་མཐུན་མེད་ཟེར། བདག་ཀྱང་དོན་དེར་ཅུང་ཙམ་ཡིད་ཆེས་པ་ཡིན།
1CO 11:19 ཁྱོད་ཅག་གི་ཁྲོད་དུ་ཚོད་བགམ་འཐེག་པའི་དད་ལྡན་རྣམས་གསལ་པོར་མངོན་པའི༌ཕྱིར། ཕྱོགས་ཁག་སྒྲིག་པའི་དོན་དེ་འབྱུང་ངེས༌པ་ཡིན།
1CO 11:20 དེ་ལྟར་ཡིན་པས། ཁྱོད་ཅག་མཉམ་དུ་འཚོགས་པའི་དུས༌སུ། ཁྱོད་ཅག་གིས་ཟ་བ་ནི་གཙོ་བོའི་རྗེས་དྲན་གྱི་ཞལ་ཟས་མིན།
1CO 11:21 ཅིའི་ཕྱིར་ཞེ་ན། ཁ་ཟས་བཟའ་བའི་དུས་སུ་མི་རྣམས་ཀྱིས་རང་གི་ཁ་ཟས་སྔོན་ལ་ཟ་བ༌དང༌། ཐ་ན་མི་ལ་ལ་ལྟོགས་ཤིང་ལ་ལ་ཆང་གིས་བཟི་བའི་ཕྱིར༌རོ།།
1CO 11:22 ཁྱོད་རྣམས་བཟའ་བཏུང་ལ་རོལ་ན་ཁྱོད་ཅག་ལ་ཁྱིམ་ཚང་མེད༌དམ། ཡང་ན་དཀོན་མཆོག་གི་ཆོས་ཚོགས་ལ་མཐོང་ཆུང་དང་དབུལ་པོ་རྣམས་ངོ་ཚ་བར་བྱེད་དམ། བདག་གིས་ཁྱོད་ཅག་ལ་ཅི་ལྟར་སྨྲའམ། བདག་གིས་ཁྱོད་ཅག་ལ་བསྟོད་བསྔགས་བྱེད་དམ་ཞེ༌ན། བསྟོད་བསྔགས་གཏན་ནས་མི་བྱེད༌དོ།།
1CO 11:23 དེ་ཡང་བདག་གིས་སྔོན་ཆད་ཁྱོད་ཅག་ལ་ཆོས་གསུངས་མྱོང་བ་དེ་ནི་གཙོ་བོ་ནས་ཐོབ་པ་ཡིན༌ཏེ། གཙོ་བོ་ཡེ་ཤུ་ལ་ངོ་ལོག་བྱེད་པའི་མཚན་མོ་དེར་ཁོང་གིས་ཕྱག་ཏུ་བག་ལེབ་བསྣམས༌ཤིང༌།
1CO 11:24 བཀའ་དྲིན་ཞུས་རྗེས་དུམ་བུར་བགོས་ཏེ་འདི་སྐད༌དུ། འདི་ནི་བདག་གི་ལུས་པོ་ཡིན་ཏེ་ཁྱོད་རྣམས་ཀྱི་ཆེད་དུ་སྦྱིན་པ༌ཡིན། ང་རང་རྗེས་སུ་དྲན་པའི་ཕྱིར་ཁྱོད་རྣམས་ཀྱིས་ཀྱང་འདི་ལྟར་བྱོས་ཤིག་ཅེས་གསུངས་སོ།།
1CO 11:25 དེ་ནས་ཁོང་གིས་ཞལ་ཟས་བཞེས་ཚར་རྗེས་སྔར་བཞིན་ཕོར་བ་ཕྱག་ཏུ་བསྣམས་ཏེ་འདི་སྐད༌དུ། ཕོར་བ་འདི་ནི་བདག་གི་ཁྲག་གིས་བཞག་པའི་ཞལ་ཆད་གསར་པ་ཡིན༌ལ། ཁྱོད་རྣམས་ཀྱིས་འཐུང་ཐེངས་རེ་རེར་ང་རང་རྗེས་སུ་དྲན་པའི་ཕྱིར་འདི་ལྟར་བྱོས་ཤིག་ཅེས་གསུངས༌པའོ།།
1CO 11:26 དེ་ནི་གཙོ་བོ་ཡེ་ཤུ་ཁོང་ཉིད་ཕེབས་ཡོང་བའི་བར༌དུ། ཁྱོད་ཅག་གིས་བག་ལེབ་འདི་ཉིད་ཟ་ཞིང་ཕོར་བ་འདི་ལས་འཐུང་ཐེངས་རེ༌རེར་གཙོ་བོ་སྐུ་གྲོངས་པའི་གནས་ཚུལ་དེ་གསལ་པོར་སྟོན་པའི་ཕྱིར༌རོ།།
1CO 11:27 དེའི༌ཕྱིར། མི་སུས་ཀྱང་ལུགས་དང་མི་མཐུན་པར་གཙོ་བོའི་བག་ལེབ་ཟ་ཞིང་ཕོར་བ་ལས་འཐུང་བ་ཡིན༌ན། མི་དེ་གཙོ་བོའི་སྐུ་ལུས་དང་སྐུ་ཁྲག་གཉིས་ཀྱི་དོན་དང་འགལ༌བའོ།།
1CO 11:28 མི་སུས་ཀྱང་རང་ལ་བརྟགས་རྗེས་བག་ལེབ་དེ་ཟ་ཞིང་ཕོར་བ་དེ་ལས་འཐུང་འོས་པ་ཡིན།
1CO 11:29 ཅིའི་ཕྱིར་ཞེ་ན། གཙོ་བོའི་སྐུ་ལུས་ཡིན་པ་མ་རྟོགས༌པར། བག་ལེབ་ཟ་ཞིང་ཕོར་བ་ལས་འཐུངས་ན་རང་ལ་ཉེས་ཆད་འཕོག་པའི་ཕྱིར༌ཡིན།
1CO 11:30 དེ་བས་ཁྱོད་ཅག་གི་ཁྲོད་དུ་ལུས་སྟོབས་ཞན་པ་དང་ནད༌པ། ཚེ་ལས་འདས་པའང་མང་ངོ་།།
1CO 11:31 བདག་ཅག་གིས་སྔོན་དུ་རང་ལ་བརྟགས་ན་ཉེས་ཆད་འཕོག་པར་མི་འགྱུར་རོ།།
1CO 11:32 འོན༌ཀྱང༌། བདག་ཅག་ལ་ཁྲིམས་ཐག་གཅོད་པའི་དུས༌སུ། གཙོ་བོས་འཇིག་རྟེན་པ་དང་བདག་ཅག་ལ་མཉམ་དུ་ཉེས་ཆད་མི་གཅོད་པའི་ཕྱིར། ཁོང་གིས་བདག་ཅག་ལ་ཆད་པ་གནང་ངོ་།།
1CO 11:33 བདག་གི་སྤུན་ཟླ༌རྣམས། ཁྱོད་ཅག་མཉམ་དུ་འཚོགས་ནས་གཙོ་བོའི་རྗེས་དྲན་གྱི་ཞལ་ཟས་ལ་རོལ་བའི་དུས༌སུ། ཕན་ཚུན་ལའང་སྒུག་དགོས་སོ།།
1CO 11:34 གལ༌ཏེ། མི་ལ་ལ་བཀྲེས་ཤིང་ལྟོགས་པ་ཡིན༌ན། ཁྱོད་ཅག་མཉམ་དུ་འཚོགས་ནས་དཀོན་མཆོག་གི་ཉེས་ཆད་མི་འཕོག་པའི༌ཕྱིར། རང་ཁྱིམ་དུ་སྔོན་ལ་ཁ་ཟས་བཟའ་རུང༌། དོན་གཞན་དག་ནི་ང་རང་ཁྱོད་ཅག་གི་གམ་དུ་ཡོང་བའི་དུས་སུ་བཀོད་སྒྲིག༌བྱའོ།།
1CO 12:1 སྤུན་ཟླ༌རྣམས། ཁྱོད་ཅག་ལ་དམ་པའི་ཐུགས་ཉིད་ཀྱི་གནང་སྦྱིན་སྐོར་ལེགས་པར་ཤེས་སུ་འཇུག་འདོད་དོ།།
1CO 12:2 དེ་ཡང་ཁྱོད་རྣམས་ཀླ་ཀློ་ཡིན་པའི་དུས༌སུ། གཞན་གྱིས་ཁྲིད་ཅིང་བསླུ་བྲིད་ཐེབས་པ༌དང༌། སྐུ་འདྲ་ལྐུགས་པ་དག་ལ་བསྙེན་བཀུར་བྱས་པ་ནི་ཁྱོད་ཅག་གིས་ཤེས༌པ་ཡིན།
1CO 12:3 དེའི༌ཕྱིར། ངས་ཁྱོད་རྣམས་ལ་སྨྲ་བར་བྱ༌སྟེ། དཀོན་མཆོག་གི་དམ་པའི་ཐུགས་ཉིད་ལ་བརྟེན་ནས་སྨྲ་མཁན་སུ་ཞིག་གིས་ཀྱང་སྐྱབས་མགོན་ཡེ་ཤུ་ལ་དམོད་པ་བྱའོ་ཞེས་སྨྲ་མི་ནུས༌ལ། ཡང་དམ་པའི་ཐུགས་ཉིད་ལ་བརྟེན་ནས་སྨྲ་བ་ལས་གཞན། སུ་ཞིག་གིས་ཀྱང་སྐྱབས་མགོན་ཡེ་ཤུ་ནི་གཙོ་བོ་ལགས་ཞེས་སྨྲ་མི་ནུས་སོ།།
1CO 12:4 གནང་སྦྱིན་གྱི་རྣམ་པ་ཐ་དད་ཡིན༌ཡང༌། དམ་པའི་ཐུགས་ཉིད་ནི་གཅིག་པུ་ལགས།
1CO 12:5 ཞབས་ཕྱི་སྒྲུབ་ཚུལ་གྱི་རྣམ་པ་ཐ་དད་ཡིན༌ཡང༌། གཙོ་བོ་ནི་གཅིག་པུ་ཡིན།
1CO 12:6 ཕན་ནུས་ཀྱི་རྣམ་པ་ཐ་དད་ཡིན༌ཡང༌། དཀོན་མཆོག་ནི་གཅིག་པུ་ལགས༌པས། མི་ཚོགས་ཀྱི་ནང་དུ་འཕྲིན་ལས་ཐམས་ཅད་མཛད༌པའོ།།
1CO 12:7 མི་རེ་རེ་ལ་དམ་པའི་ཐུགས་ཉིད་མངོན་པ་ནི་མི་ཐམས་ཅད་ལ་ཕན་ཐོགས་པའི་ཕྱིར་ཡིན།
1CO 12:8 ཅིའི་ཕྱིར་ཞེ་ན། མི་ཞིག་ལ་དམ་པའི་ཐུགས་ཉིད་ཀྱིས་ཤེས་རབ་ལྡན་པའི་སྨྲ་བརྗོད་གནང་བ༌དང༌། མི་གཞན་ཞིག་ལ་དམ་པའི་ཐུགས་ཉིད་གཅིག་ཁོ་ནས་ཤེས་རྟོགས་ལྡན་པའི་སྨྲ་བརྗོད་གནང༌བ་དང་།
1CO 12:9 མི་གཞན་ཞིག་ལ་དམ་པའི་ཐུགས་ཉིད་གཅིག་ཁོ་ནས་དད་པ་བརྟན་པོ་གནང་བ༌དང༌། མི་གཞན་ཞིག་ལ་དམ་པའི་ཐུགས་ཉིད་གཅིག་ཁོ་ནས་ནད་གསོ་བའི་གནང་སྦྱིན་བསྩལ༌པ་དང་།
1CO 12:10 མི་གཞན་ཞིག་ལ་དོན་ངོ་མཚར་ཅན་སྒྲུབ་པའི་ནུས་མཐུ་གནང་བ༌དང༌། མི་གཞན་ཞིག་ལ་ལུང་བསྟན་གནང་བའི་ནུས་པ་བསྩལ་པ་དང་། མི་གཞན་ཞིག་ལ་སེམས་ཉིད་སྣ་ཚོགས་ལ་རྣམ་པར་བརྟག་པའི་ནུས་པ་གནང་བ༌དང༌། མི་གཞན་ཞིག་ལ་སྐད་སྣ་ཚོགས་སྨྲ་བའི་ནུས་པ་གནང་ཞིང༌། མི་གཞན་ཞིག་ལ་སྐད་སྒྱུར་བའི་ནུས་པ་གནང་བའི་ཕྱིར༌རོ།།
1CO 12:11 དེ་དག་ཐམས་ཅད་ནི་དམ་པའི་ཐུགས་ཉིད་གཅིག་ཁོ་ན་ཡིས་མཛད་ཅིང་ཁོང་གི་ཐུགས་དགོངས་བཞིན་དུ་མི་སོ་སོར་གནང༌བའོ།།
1CO 12:12 དེ་ཡང་ལུས་པོ་ནི་གཅིག་ཡིན་ཡང་དེ་ལ་ཡན་ལག་དུ་མ་ཡོད༌ཅིང༌། ཡན་ལག་ཐམས་ཅད་ནི་མང་ཡང་ལུས་པོ་གཅིག་གི་ཆ་ཤས་ཡིན༌ཏེ། སྐྱབས་མགོན་མཱ་ཤི་ཀའང་དེ་བཞིན་ལགས་སོ།།
1CO 12:13 བདག་ཅག་ནི་ཡ་ཧུ་དཱ༌པའམ། གྷི་རིག་པའམ། བྲན་གཡོག༌གམ། རང་དབང་ཅན་བཅས་གང་ཞིག་ཡིན༌ཡང༌། ཐམས་ཅད་ལ་དམ་པའི་ཐུགས་ཉིད་གཅིག་ནས་སྐུ་ལུས་གཅིག་གི་ནང་ཁྲུས་གསོལ་ལ་ཞུགས་ཤིང་དམ་པའི་ཐུགས་ཉིད་གཅིག་ཁོ་ནའི་བཏུང་བྱ་གནང་བའོ༎
1CO 12:14 དེ་ཡང་ལུས་པོ་ནི་ཡན་ལག་གཅིག་ཁོ་ན་མ་ཡིན་པར་དེ་ལ་ཡན་ལག་མང་པོ་ཡོད༌དེ།
1CO 12:15 རྐང་པ་ན༌རེ། བདག་ནི་ལག་པ་མིན༌པས། ལུས་པོར་མི་གཏོགས་ཞེས་ཟེར༌བའི་དབང་དུ་བཏང་ན། དེའི་རྐྱེན་གྱིས་རྐང་པ་དེ་ནི་ལུས་པོར་མི་གཏོགས་པ་ཞིག་མིན་ནོ།།
1CO 12:16 ཡང་རྣ་བ་ན༌རེ། བདག་ནི་མིག་མིན༌པས། ལུས་པོར་མི་གཏོགས་ཞེས་ཟེར༌བའི་དབང་དུ་བཏང་ན། དེའི་རྐྱེན་གྱིས་རྣ་བ་དེ་ནི་ལུས་པོར་མི་གཏོགས་པ་ཞིག་མིན།
1CO 12:17 ཡང་ལུས་ཧྲིལ་པོ་མིག་ཡིན༌ན། སྒྲ་ལ་ཉན་པའི་དབང་པོ་གང་དུ་ཡོད༌དམ། ཡང་ལུས་ཧྲིལ་པོ་རྣ་བ་ཡིན༌ན། དྲི་མ་སྣོམ་པའི་དབང་པོ་གང་དུ་ཡོད༌དམ།
1CO 12:18 འོན༌ཀྱང༌། དཀོན་མཆོག་གིས་རང་ཉིད་ཀྱི་ཐུགས་དགོངས༌ལྟར། ཡན་ལག་རེ་རེ་བཞིན་ལུས་ཀྱི་གནས་སོ་སོར་བཞག༌པ་ཡིན་ནོ།།
1CO 12:19 གལ༌ཏེ། ཡན་ལག་ཐམས་ཅད་ནི་ཡན་ལག་གཅིག་ཡིན༌ན། ལུས་པོ་ནི་གང་དུ་ཡོད༌དམ།
1CO 12:20 འོན༌ཀྱང༌། ད་ལྟ་ཡན་ལག་ནི་མང་པོ་ཡོད་ཀྱང་ལུས་པོ་ནི་གཅིག་པུ་ལགས༌སོ།།
1CO 12:21 ཡང་མིག་ན༌རེ། བདག་ལ་ཁྱོད་དགོས་དོན་མེད་ཅེས་ལག་པ་ལ་དེ་ལྟར་ཟེར་མི་ནུས༌ལ། མགོ་བོ་ན༌རེ། བདག་ལ་ཁྱོད་དགོས་དོན་མེད་ཅེས་རྐང་པ་ལའང་དེ་ལྟར་ཟེར་མི་ནུས་སོ།།
1CO 12:22 དེ་ལས་ལྡོག་སྟེ། མི་རྣམས་ཀྱིས་ལུས་སྟེང་གི་ཡན་ལག་ཁ་ཤས་ལ་ནུས་པ་མེད་པར་བསམས༌ཀྱང༌། དོན་ལ་ཡན་ལག་དེ་དག་ནི་ལྷག་ཏུ་མེད་མི་རུང་བ་ཞིག་ཡིན།
1CO 12:23 བདག་ཅག་གིས་ལུས་སྟེང་གི་ངོ་ཚར་རྩི་བའི་ཡན་ལག་ནི་དེ་ལས་ཀྱང་མཛེས་པར་བརྩིས་པ་དང་། ཡན་ལག་མི་མཛེས་པ་དག་ནི་ལྷག་ཏུ་མཛེས་ཤིང་སྡུག་པར་བྱེད་པ་ཡིན།
1CO 12:24 བདག་ཅག་གི་མཛེས་ཤིང་སྡུག་པའི་ཡན་ལག་ལ་རྒྱན་ཆས་བརྒྱན་དགོས་དོན་མེད་མོད། འོན༌ཀྱང༌དཀོན་མཆོག་གིས་ལུས་པོ་ལེགས་པར་བསྒྲིགས་ཤིང་། ཡན་ལག་ཉམས་ཞན་ཡིན་པ་དེ་ལྡབ་འགྱུར་གྱིས་མཛེས་ཤིང་སྡུག་པར་མཛད་དེ།
1CO 12:25 ལུས་པོའི་ནང་དུ་རིགས་མི་མཐུན་པ་མི་འབྱུང༌ཞིང༌། ཡན་ལག་དང་ཡན་ལག་བར་ལ་གཟིགས་སྐྱོང་བྱེད་པའི་ཕྱིར༌རོ།།
1CO 12:26 གལ༌ཏེ། ཡན་ལག་གཅིག་གིས་སྡུག་བསྔལ་མྱོང་ན། ཡན་ལག་ཐམས་ཅད་ཀྱིས་ཀྱང་ལྷན་དུ་སྡུག་བསྔལ་མྱོང་བ་ཡིན། གལ༌ཏེ། ཡན་ལག་གཅིག་ལ་གཟི་བརྗིད་ཐོབ་ན། ཡན་ལག་ཐམས་ཅད་ཀྱང་མཉམ་དུ་སྤྲོ་བར་འགྱུར༌རོ།།
1CO 12:27 ཁྱོད་ཅག་ནི་སྐྱབས་མགོན་མཱ་ཤི་ཀའི་སྐུ་ལུས་ཡིན༌ཞིང༌། མི་རེ་རེ་ནི་ཁོང་གི་ཡན་ལག་ཡིན་ནོ།།
1CO 12:28 དེ་ཡང་དཀོན་མཆོག་གིས་ཆོས་ཚོགས་ནང་དུ་བསྐོས་པ་དང་པོ་ནི་སྐུ་ཚབ་པ༌དང༌། གཉིས་པ་ནི་ལུང་སྟོན༌པ། གསུམ་པ་ནི་སློབ་དཔོན་བཅས་ཡིན༌ལ། དེ་ནས་རིམ་བཞིན་ངོ་མཚར་བའི་དོན་བྱེད་མཁན༌དང༌། ནད་གསོ་བའི་གནང་སྦྱིན་ཐོབ་མཁན། རོགས་རམ་བྱེད༌མཁན། བྱ་བ་གཉེར་མཁན། སྐད་སྣ་ཚོགས་སྨྲ་མཁན་བཅས་ལགས་སོ།།
1CO 12:29 འོན༌ཀྱང༌། དེ་དག་ཐམས་ཅད་ནི་སྐུ་ཚབ་པ་ཡིན༌ནམ། དེ་དག་ཐམས་ཅད་ནི་ལུང་སྟོན་པ་ཡིན༌ནམ། དེ་དག་ཐམས་ཅད་ནི་སློབ་དཔོན་ཡིན༌ནམ། དེ་དག་ཐམས་ཅད་ནི་ངོ་མཚར་བའི་དོན་བྱེད་མཁན་ཡིན་ནམ་ཞེ་ན་མ་ཡིན།
1CO 12:30 ཡང་དེ་དག་ཐམས་ཅད་ལ་ནད་གསོ་བའི་གནང་སྦྱིན་ཐོབ་ཡོད༌དམ། དེ་དག་ཐམས་ཅད་ནི་སྐད་གཞན་སྨྲ་བ་ཡིན༌ནམ། དེ་དག་ཐམས་ཅད་ནི་སྐད་སྒྱུར་པ་ཡིན་ནམ་ཞེ་ན་མ་ཡིན་ནོ།།
1CO 12:31 འོན༌ཀྱང༌། ཁྱོད་ཅག་གིས་ངེས་པར་གནང་སྦྱིན་ཆེན་པོར་དམིགས་དགོས་ལ། བདག་གིས་ད་ལྟ་ཁྱོད་ཅག་ལ་ལམ་ཕུལ་དུ་བྱུང་བ་ཞིག་སྟོན་པར༌བྱའོ།།
1CO 13:1 དེ་ཡང་བདག་གིས་མི་དང་ཕོ་ཉ་རྣམས་ཀྱི་སྐད་སྣ་ཚོགས་སྨྲ་ཡང་བྱམས་པ་མེད༌ན། བདག་ནི་འཁར་རྔ་དང་སྦུབ་ཆ་རྡུང་བའི་སྒྲ་གྲགས་པ་ལྟ་བུར་གྱུར་པ་ཡིན་ནོ།།
1CO 13:2 གལ༌ཏེ། བདག་ལ་ལུང་བསྟན་གནང་བའི་ནུས་པ་ལྡན༌ཞིང༌། གསང་བ་དང་ཤེས་བྱ་ཐམས་ཅད་རྟོགས་པ་དང་། རི་བོ་སྤོར་ནུས་པའི་དད་པ་ཡོད་ཀྱང་བྱམས་པ་མེད༌ན། བདག་ནི་ཅི་ཡང་མ་ཡིན།
1CO 13:3 གལ༌ཏེ། བདག་གིས་རང་ལ་ཡོད་པ་ཐམས་ཅད་དབུལ་པོ་རྣམས་ལ་སྦྱིན༌ཞིང༌། རང་ལུས་སྤངས་ནས་མེ་རུ་བསྲེགས༌ཀྱང༌། བྱམས་པ་མེད༌ན། བདག་ལ་ཕན་ཐོགས་ཅི་ཡང་མེད༌དོ།།
1CO 13:4 བྱམས་པ་ནི་རྟག་བརྟན་གྱི་བཟོད་བསྲན༌དང༌། སྙིང་རྗེ་ལྡན༌པ། ཕྲག་དོག་མེད༌པ། རང་བསྟོད་མི་བྱེད༌པ། ང་རྒྱལ་མེད༌པ།
1CO 13:5 ངོ་གནོང་བའི་ལས་མི་བྱེད༌པ། རང་དོན་མི་སེམས༌པ། རང་དགར་མི་ཁྲོ༌བ། གཞན་གྱི་ཉེས་སྐྱོན་སེམས་སུ་མི་འཛིན༌པ།
1CO 13:6 དྲང་བདེན་མིན་པར་མི་དགའ་ཞིང་བདེན་པ་ཁོ་ནར་དགའ༌བ།
1CO 13:7 དོན་ཀུན་ལ་ཐུགས་རྒྱ་ཡངས༌པ། དོན་ཀུན་ལ་ཡིད་ཆེས༌པ། དོན་ཀུན་ལ་རེ་སྒུག་བྱེད༌པ། དོན་ཀུན་ལ་བཟོད་བསྲན་བྱེད་པ་ཞིག་ཡིན༌ནོ།།
1CO 13:8 བྱམས་པ་ལ་ཟད་མཐའ་མེད༌ཀྱང༌། ལུང་བསྟན་གནང་བའི་ནུས་པ་ནི་མཐའ་མར་རྫོགས་པར་འགྱུར༌ལ། སྐད་གཞན་སྨྲ་བའི་ནུས་པ་མཐའ་མར་མཚམས་ཆད་པ༌དང༌། ཤེས་བྱ་ཡང་མཐའ་མར་མེད་པར་འགྱུར་ངེས༌ཡིན།
1CO 13:9 རྒྱུ་མཚན་ནི་ད་ལྟ་བདག་ཅག་གིས་རྟོགས་པའི་ཤེས་བྱ་ཆ་མི་ཚང༌ལ། ལུང་བསྟན་གནང་བའང་ཆ་མི་ཚང་ངོ་།།
1CO 13:10 འོན་ཀྱང་། ཕུན་སུམ་ཚོགས་པ་དེ་ཉིད་ཡོང་བའི་ཚེ། ཆ་མི་ཚང་བ་དེ་དག་མེད་པར་འགྱུར།
1CO 13:11 ང་རང་བྱིས་པ་ཡིན་དུས། བདག་གི་སྨྲ་བརྗོད༌དང༌སེམས༌པ། བསམ་གཞིགས་བཅས་ནི་བྱིས་པ་དང་འདྲ༌ཞིང༌། ན་ཚོད་ཇེ་ཆེར་སོང་བ་ན་བྱིས་པའི་ངང་ཚུལ་སྤངས༌པ་ཡིན།
1CO 13:12 ད་ལྟ་བདག་ཅག་གིས་མེ་ལོང་གི་ངོས་ལས་རབ་རིབ་ཀྱི་གཟུགས་བརྙན་མཐོང་བ་དང་མཚུངས༌མོད། འོན༌ཀྱང༌། དུས༌དེ་སླེབས་པ་ན། བདག་ཅག་གིས་ཁ་རི་ཁ་ཐུག་ཏུ་མཐོང་བར་ངེས། ད་ལྟ་བདག་གིས་ཤེས་པ་ནི་ཆ་མི་ཚང་ཡང༌། ཁོང་གིས་ང་རང་ཡོངས་སུ་མཁྱེན་པ༌བཞིན། དུས་དེ་ལ་བདག་གིས་ཡོངས་སུ་རྟོགས་པར་འགྱུར་རོ།།
1CO 13:13 ད་ལྟ་ནམ་རྒྱུན་ཡོད་པ་ནི་དད་པ༌དང༌། རེ༌བ། བྱམས་པ་གསུམ་པོ་ཡིན༌ལ། དེ་ལས་ཆེས་མཆོག་ཏུ་གྱུར་པ་ནི་བྱམས་པ་ཡིན༌ནོ།།
1CO 14:1 ཁྱོད་ཅག་གིས་བྱམས་པ་ལ་བརྩོན་པར་བྱ༌ཞིང༌། དམ་པའི་ཐུགས་ཉིད་ཀྱི་གནང་སྦྱིན་ལའང་བརྩོན་པ༌དང༌། དེ་ལས་ཀྱང་ལུང་བསྟན་གནང་བར་བརྩོན་པར༌བྱའོ།།
1CO 14:2 རྒྱུ་མཚན་ནི་སྐད་གཞན་སྨྲ་མཁན་གྱིས་མི་གཞན་དག་ལ་སྨྲས་པ་མ་ཡིན༌པར། དཀོན་མཆོག་ལ་ཞུས་པ་ཡིན་པས་མི་སུས་ཀྱང་དོན་གོ་མ་ཐུབ༌ནའང༌། ཁོས་དམ་པའི་ཐུགས་ཉིད་ལ་བརྟེན་ནས་གསང་བ་སྣ་ཚོགས་སྨྲ་བར་བྱེད།
1CO 14:3 འོན༌ཀྱང༌། ལུང་སྟོན་པར་བྱེད་པ་ནི་མི་གཞན་རྣམས་ལ་སྨྲ་བ་ཡིན༌ཏེ། མི་སྐྱེད་སྲིང་བྱེད་པ༌དང༌། མི་ལ་སྐུལ་མ་གནང་བ། མི་ལ་སེམས་གསོ་བྱེད༌པ་བཅས༌ཡིན།
1CO 14:4 སྐད་གཞན་སྨྲ་མཁན་གྱིས་རང་ཉིད་ཡར་སྐྱེད་བྱེད༌ཅིང༌། ལུང་སྟོན་པས་ཆོས་ཚོགས་ཡར་སྐྱེད་བྱེད༌པ་ཡིན་ནོ།།
1CO 14:5 བདག་གི་རེ་བ་ནི་ཁྱོད་ཅག་ཚང་མས་སྐད་གཞན་སྨྲ་བ༌དང༌། དེ་བས་ཀྱང་ལུང་བསྟན་གནང་མཁན་དུ་བྱས་ན་ལེགས་སོ།། ཅིའི་ཕྱིར་ཞེ་ན། སྐད་གཞན་སྨྲ་མཁན་གྱི་ཚིག་དོན་ལ་སྐད་སྒྱུར་མ་བྱས༌ན། ཆོས་ཚོགས་སྐྱེད་སྲིང་བྱེད་པར་མི་ཕན༌པས། ལུང་སྟོན་པ་ནི་སྐད་གཞན་སྨྲ་མཁན་ལས་མཆོག་ཏུ་གྱུར་པའི་ཕྱིར༌རོ།།
1CO 14:6 སྤུན་ཟླ༌རྣམས། གལ༌ཏེ། ང་རང་ཁྱོད་ཅག་གི་གམ་དུ་ཡོང་ནས་སྐད་གཞན་ཁོ་ན་སྨྲ༌ཞིང༌། གསང་བ་མངོན་པའམ། ཤེས་རྟོགས་སམ། ལུང༌བསྟན་ནམ། ཁྲིད་སྟོན་བཅས་ཀྱི་སྒོ་ནས་གསལ་བཤད་མ་བྱས༌ན། བདག་ནི་ཁྱོད་རྣམས་ལ་ཕན་ཐོགས་ཅི་ཡོད་དམ།
1CO 14:7 སེམས་མེད་ཀྱི་དངོས་པོ་གླིང་བུའམ་རྒྱུད་མངས་སོགས་ལས་བྱུང་བའི་སྒྲ་དབྱངས་དང་ཁྱད་པར་མེད༌ན། གང་ཞིག་གླིང་བུའི་སྒྲ་དང་གང་ཞིག་རྒྱུད་མངས་ཀྱི་སྒྲ་ཡིན་པ་ཇི་ལྟར་ཤེས༌སམ།
1CO 14:8 གལ༌ཏེ། དུང་བརྡ་མི་གསལ་བ་ཞིག་བཏང༌ན། སུ་ཞིག་གིས་དམག་འཐབ་ལ་སྟ་གོན་བྱེད༌དམ།
1CO 14:9 དེ་བཞིན་དུ་ཁྱོད་ཅག་གིས་ཀྱང་སྨྲ་བརྗོད་གསལ་པོར་མ་སྨྲས༌ན། ཁྱོད་ཅག་གིས་ཅི་ཞིག་སྨྲ་བ་སུ་ཞིག་གིས་ཤེས༌སམ། དེ་ནི་བར་སྣང་ལ་གཏམ་བཤད་པ་བཞིན༌ནོ།།
1CO 14:10 འཇིག་རྟེན་དུ་སྐད་རིགས་ཅི་འདྲ་མང༌ཡང༌། ནང་དོན་མེད་པའི་སྐད་རིགས་གཅིག་ཀྱང་མེད།
1CO 14:11 གལ༌ཏེ། ངས་མི་གཞན་གྱིས་སྨྲས་པའི་སྐད་རིགས་མ་གོ༌ན། སྨྲ་མཁན་དེ་ནི་ངའི་མདུན་དུ་མཐའ་འཁོབ་པ་ལྟ་བུ་ཡིན༌ཞིང༌། སྨྲ་མཁན་དེའི་མདུན་དུ་ང་རང་ཡང་མཐའ་འཁོབ་པ་ལྟ་བུ་ཡིན་ནོ།།
1CO 14:12 དེ་བས་ཁྱོད་རྣམས་ཀྱང་དེ་བཞིན༌ཏེ། དམ་པའི་ཐུགས་ཉིད་ཀྱི་གནང་སྦྱིན་འཐོབ་པར་བརྩོན༌པས། ཆོས་ཚོགས་སྐྱེད་སྲིང་བྱེད་པའི་གནང་སྦྱིན་འཐོབ་པ་ལ་ལྷག་ཏུ་བརྩོན་པར་གྱིས༌ཤིག།
1CO 14:13 དེའི༌ཕྱིར། སྐད་གཞན་སྨྲ་མཁན་གྱིས་དེ་ལ་སྐད་སྒྱུར་བྱེད་ནུས་པའི་ཕྱིར་གསོལ་བ་འདེབས་པར༌བྱའོ།།
1CO 14:14 གལ༌ཏེ། བདག་གིས་སྐད་གཞན་སྨྲ་བའི་ངང་ནས་གསོལ་བ་བཏབ༌ན། ངའི་སེམས་ཉིད་ཀྱི་ངང་ནས་གསོལ་བ་བཏབ་པ་ཡིན༌ཡང༌། བདག་གི་བློ་གྲོས་ལ་ཕན་ཐོགས་མེད།
1CO 14:15 དེ་ལྟར་ཡིན༌ན། བདག་གིས་ཅི་བྱའམ། ངས་སེམས་ཉིད་ཀྱི་ངང་ནས་གསོལ་བ་འདེབས་དགོས་ལ། བློ་གྲོས་ཀྱི་ངང་ནས་ཀྱང་གསོལ་བ་འདེབས་དགོས། ཡང་སེམས་ཉིད་ཀྱི་ངང་ནས་གླུ་ལེན་དགོས་ལ། བློ་གྲོས་ཀྱི་ངང་ནས་ཀྱང་གླུ་ལེན་དགོས།
1CO 14:16 དེ་ལྟར་མ་ཡིན༌ན། ཁྱོད་ཅག་གིས་སེམས་ཉིད་ཀྱི་ངང་ནས་བསྟོད་བསྔགས་བརྗོད་པའི༌ཚེ། གནས་དེར་ཡོད་པའི་སྐད་གཞན་མི་གོ་བ་རྣམས་ཀྱིས་ཁྱོད་ཀྱི་སྐད་ཆ་མི་གོ༌བས། ཁྱོད་ཀྱིས་དྲིན་ལན་གྱི་ཞུ་ཚིག་འབུལ་དུས་སུ་ཞིག་གིས་ཨ་མེན་ཞེས་སྨྲ་བར་ནུས་སམ།
1CO 14:17 ཁྱོད་ཅག་གིས་དྲིན་ལན་གྱི་ཞུ་ཚིག་ཕུལ་བ་ནི་ལེགས༌ནའང༌། མི་གཞན་སྐྱེད་སྲིང་བྱེད་པར་ཕན་ཐོགས་ཅི་ཡང་མེད༌དོ།།
1CO 14:18 བདག་གིས་སྐད་གཞན་སྨྲ་བ་ནི་ཁྱོད་ཅག་ཐམས་ཅད་ལས་ཀྱང་མང་བས་ངས་དཀོན་མཆོག་ལ་ཐུགས་རྗེ༌ཆེ་ཞུའོ།།
1CO 14:19 འོན༌ཀྱང༌། ཆོས་ཚོགས་ཀྱི་ནང་དུ་བློ་གྲོས་ལ་བརྟེན་ནས་མི་གཞན་ལ་ཁྲིད་སྟོན་བྱེད་པའི་ཚིག་ལྔ་སྨྲ་འདོད་ཅིང་། དེ་ནི་སྐད་གཞན་ཆིག་ཁྲི་སྨྲས་པ་ལས་ཀྱང་མཆོག་ཏུ་གྱུར་པ་ཡིན༌ནོ།།
1CO 14:20 སྤུན་ཟླ༌རྣམས། བསམ་བློའི་ཆ་ནས་བྱིས་པ་བཞིན་དུ་མ་ཡིན༌པར། དོན་ངན་པའི་ཆ་ནས་བྱིས་པ་ལྟ་བུ་ཡིན་དགོས༌ཀྱང༌། བསམ་བློའི་ཆ་ནས་མི་དར་མ་བཞིན་དུ་ཡིན་པར༌གྱིས།
1CO 14:21 དེ་ལ་དཀོན་མཆོག་གི་བཀའ་ཁྲིམས་ཀྱི་མདོ༌ལས། གཙོ་བོས་འདི་སྐད༌དུ། བདག་གིས་ཕྱི་ཕྱོགས་མི་རྣམས༌ཀྱི།། སྐད་གཞན་དང་ནི་སྨྲ་སྒོ༌བཞིན།། སྨྲ་བར་བྱ་ཡང་མི་རྣམས་ཀྱིས།། བདག་གི་གཏམ་ལ་མི་མཉན༌ནོ།། ཞེས་གསུངས༌པ་བཀོད་ཡོད་དོ།།
1CO 14:22 དེས༌ན། སྐད་གཞན་སྨྲ་བ་ནི་དད་ལྡན་རྣམས་ལ་བདེན་དཔང་བྱེད་པའི་ཕྱིར་མ་ཡིན༌པར། དད་པ་མེད་པ་རྣམས་ལ་བདེན་དཔང་བྱེད་པའི་ཕྱིར་ཡིན༌ལ། ལུང་བསྟན་གནང་བ་ནི་དད་པ་མེད་པ་རྣམས་ལ་བདེན་དཔང་བྱེད་པའི་ཕྱིར་མ་ཡིན༌པར། དད་ལྡན་རྣམས་ལ་བདེན་དཔང་བྱེད་པའི་ཕྱིར་ཡིན་ནོ།།
1CO 14:23 དེའི༌ཕྱིར། ཆོས་ཚོགས་ཀྱི་མི་ཐམས་ཅད་གནས་གཅིག་ཏུ་འཛོམས་ཤིང་ཀུན་གྱིས་སྐད་གཞན་སྨྲ་བ༌ན། སྟབས་དབང་གིས་སྐད་གཞན་མི་གོ་བའམ་དད་པ་མེད་པའི་མི་འགའ་ཡོང༌ཚེ། ཁྱོད་རྣམས་སྨྱོས་འདུག་ཅེས་ཟེར་བ་མིན༌ནམ།
1CO 14:24 གལ༌ཏེ། མི་ཐམས་ཅད་ཀྱིས་ལུང་བསྟན་གནང་བའི་དུས་སུ། གློ་བུར་ཉིད་དུ་དད་པ་མེད་པའམ་སྐད་གཞན་མི་གོ་བའི་མི་ཞིག་ཡོང༌ཚེ། མི་ཚོགས་ཐམས་ཅད་ཀྱིས་དེ་ལ་ཁ་ཏ་བསླབ་བྱ་གཏོང་བ་དང་དྲི་བ་དྲིས་ཏེ།
1CO 14:25 རང་སེམས་ཀྱི་གསང་བ་ཕྱིར་མངོན་པར་འགྱུར༌བས། མི་དེས་ལུས་པོ་སར་བཏུད་ནས་དཀོན་མཆོག་ལ་ཕྱག་བཙལ་ཏེ། དཀོན་མཆོག་ནི་དངོས་གནས་ཁྱོད་ཅག་གི་ཁྲོད་དུ་བཞུགས་ཞེས་བསྔགས་བརྗོད་བྱ་ངེས༌སོ།།
1CO 14:26 སྤུན་ཟླ༌རྣམས། དེས་ན་འདི་ནི་ཅི་ལྟར་ཡིན༌ནམ། ཁྱོད་ཅག་མཉམ་དུ་འཛོམས་པའི་དུས༌སུ། མི་ལ་ལས་བསྟོད་དབྱངས་འབུལ་བ༌དང༌། ལ་ལས་ཆོས་འཆད་པ། ལ་ལས་གསང་བ་མངོན་པ། ལ་ལས་སྐད་གཞན་སྨྲ༌བ། ལ་ལས་སྐད་སྒྱུར་བྱེད་པ་བཅས་ཐམས་ཅད་ཀྱིས་མི་རྣམས་སྐྱེད་སྲིང་བྱེད་དགོས་སོ།།
1CO 14:27 གལ༌ཏེ། སྐད་གཞན་སྨྲ་མཁན་ཡོད༌ན། མི་གཉིས་སམ་མང་ན་མི་གསུམ་གྱིས་རེས་མོས་ངང་ནས་སྨྲ་ཞིང་མི་ཞིག་གིས་སྐད་སྒྱུར་བྱེད་དགོས།
1CO 14:28 གལ༌ཏེ། སྐད་སྒྱུར་བྱེད་མཁན་མེད༌ན། སྐད་གཞན་སྨྲ་མཁན་གྱིས་ཆོས་ཚོགས་ནང་དུ་ཅི་ཡང་མི་སྨྲ༌བར། རང་ཉིད་དང་དཀོན་མཆོག་ཁོ་ནར་སྨྲ་བར༌བྱའོ།།
1CO 14:29 ལུང་སྟོན་པ་མི་གཉིས་སམ་གསུམ་གྱིས་ལུང་བསྟན་གནང་བར་བྱ༌ཞིང༌། གཞན་དག་གིས་བསམ་གཞིགས་བཏང་ནས་རྟོག་དཔྱོད༌བྱའོ།།
1CO 14:30 གལ༌ཏེ། གནས་དེར་སྡོད་མཁན་གྱི་མི་གཞན་ཞིག་ལ་མངོན་པར་གྱུར་ན། སྔོན་དུ་ལུང་སྟོན་མཁན་དེ་ནི་ཁ་རོག་ཏུ་སྡོད་འོས༌པ་ཡིན།
1CO 14:31 ཅིའི་ཕྱིར་ཞེ་ན། ཁྱོད་ཐམས་ཅད་ཀྱིས་རེ་རེ་བཞིན་ལུང་བསྟན་གནང་བར་བྱ་སྟེ། མི་ཀུན་གྱིས་བསླབ་ཅིང་སྐུལ་མ་ཐེབས་པའི་ཕྱིར༌རོ།།
1CO 14:32 ལུང་སྟོན་པའི་སེམས་ཉིད་ནི་མ་གཞི་ལུང་སྟོན་པ་རྣམས་ལ་བསྟུན་པ་ཡིན་ཏེ།
1CO 14:33 དཀོན་མཆོག་ནི་མི་ལ་མགོ་རྙོག་པར་མཛད་པའི་དཀོན་མཆོག་མ་ཡིན༌པར། མི་ལ་ཞི་མཐུན་ཡོང་བར་མཛད་པའི་དཀོན་མཆོག་ཡིན་པས༌སོ།། དད་ལྡན་དམ་པ་རྣམས་ཀྱི་ཆོས་ཚོགས་ཐམས་ཅད་ཀྱི་ནང་དུ།
1CO 14:34 བུད་མེད་དག་གིས་གཏམ་མི་སྨྲ་བར་གྱིས། ཅིའི་ཕྱིར་ཞེ་ན། བཀའ་ཁྲིམས་ལས་གསུངས་པ༌བཞིན་དུ། ཁོ་མོ་རྣམས་ཀྱིས་གཏམ་མི་སྨྲ་ཞིང་རྣམ་པ་ཀུན་ཏུ་བསྟུན་དགོས་སོ།།
1CO 14:35 གལ༌ཏེ། ཁོ་མོ་རྣམས་ཀྱིས་གང་ཞིག་བསླབ་འདོད༌ན། རང་གི་ཁྱིམ་ནས་རང་ཉིད་ཀྱི་ཁྱོ་གར་དྲི་བར་བྱ༌སྟེ། བུད་མེད་རྣམས་ཀྱིས་ཆོས་ཚོགས་ནང་དུ་གཏམ་སྨྲ་བ་ནི་ངོ་གནོང་བ་ཞིག་ཡིན་པའི་ཕྱིར༌རོ།།
1CO 14:36 དཀོན་མཆོག་གི་བཀའ་ནི་ཁྱོད་ཅག་ལས་བྱུང་བ་ཞིག་ག་ནས༌ཡིན། ཁྱོད་ཅག་ཁོ་ན་ལ་ཐོབ་པ་ཞིག་ཀྱང་ག་ནས༌ཡིན།
1CO 14:37 གལ༌ཏེ། མི་ཞིག་གིས་རང་ཉིད་ནི་ལུང་སྟོན༌པའམ། ཡང་ན་ཐུགས་ཉིད་དང་ལྡན་པ་ཞིག་ཡིན་པར་འདོད༌ན། བདག་གིས་ཁྱོད་རྣམས་ལ་བྲིས་པ་དེ་དག་ནི་གཙོ་བོའི་བཀའ་ཡིན་པ་ཤེས་པར་གྱིས།
1CO 14:38 གལ༌ཏེ། སུ་ཞིག་གིས་དོན་འདི་ལ་དོ་སྣང་མི་བྱེད་ན། མི་དེ་ལའང་དོ་སྣང་བྱེད་མི་དགོས་སོ།།
1CO 14:39 དེའི༌ཕྱིར། བདག་གི་སྤུན་ཟླ༌རྣམས། ཁྱོད་རྣམས་ཀྱིས་ལུང་བསྟན་གནང་བར་བརྩོན་པ༌དང༌། སྐད་གཞན་སྨྲ་བའང་འགོག་པར་མི༌བྱ་བར།
1CO 14:40 དོན་ཐམས་ཅད་ཚུལ་དང་མཐུན་པའི་སྒོ་ནས་གོ་རིམ་བཞིན་དུ་བསྒྲུབ་དགོས༌སོ།།
1CO 15:1 སྤུན་ཟླ༌རྣམས། ད་ལྟ་བདག་གིས་སྔོན་ཆད་ཁྱོད་རྣམས་ལ་བསྒྲགས་མྱོང་བའི་འཕྲིན་བཟང་ཁྱོད་རྣམས་ཀྱིས་རྟོགས་དགོས་པ་དེ་སྨྲ་བར༌བྱ་སྟེ། འཕྲིན་བཟང་དེ་ནི་ཁྱོད་ཅག་གིས་དང་དུ་བླངས་ཤིང་དེ་ལ་བརྟེན་ནས་དད་པ་བརྟན་པོར་གནས༌པ་ཡིན་ནོ།།
1CO 15:2 བདག་གིས་བསྒྲགས་པའི་འཕྲིན་བཟང་དེ་ཉིད་ཁྱོད་རྣམས་ཀྱིས་རྒྱུན་འཁྱོངས་བྱས༌ན། འཕྲིན་བཟང་དེ་ལ་བརྟེན་ནས་ཁྱོད་ཅག་ལ་ཐར་པ་འཐོབ་ངེས༌ཤིང༌། དེ་ལྟར་མ་ཡིན༌ན། ཁྱོད་ཅག་གིས་དད་པ་བྱས་པར་སྙིང་པོ་མེད༌དོ།།
1CO 15:3 དེ་ཡང་སྔོན་ཆད་བདག་གིས་འཕྲིན་བཟང་གལ་ཆེན་དེ་ཉིད་དང་དུ་བླངས་ཤིང་ཁྱོད་རྣམས་ལའང་བསྒྲགས་མྱོང༌སྟེ། གསུང་རབ་ལས་གསུངས་པ༌བཞིན། སྐྱབས་མགོན་མཱ་ཤི་ཀ་ནི་བདག་ཅག་གི་སྡིག་པའི་ཕྱིར་སྐུ་གྲོངས༌ཤིང༌།
1CO 15:4 སྐུ་གདུང་དུར་དུ་བཅུག་པ་ཡིན། ཡང་གསུང་རབ་ལས་གསུངས་པ༌བཞིན། ཉིན་གསུམ་པར་ཁོང་ཉིད་སླར་གསོན་དུ་མཛད་པར་མ༌ཟད།
1CO 15:5 ཀེ་ཕཱ་ལ་མངོན་པར་མཛད་པ༌དང༌། དེ་ནས་སྐུ་ཚབ་པ་བཅུ་གཉིས་ལ་མངོན་པར་མཛད་དོ།།
1CO 15:6 དེའི༌རྗེས་སུ། དུས་གཅིག་ཏུ་སྤུན་ཟླ་ལྔ་བརྒྱ་ལྷག་ལ་མངོན་པར་མཛད༌ཅིང༌། རྗེས་འབྲང་པ་དེ་དག་ལས་འགའ་ཞིག་ཚེ་ལས་འདས༌ཀྱང༌། མང་ཤོས་ནི་ད་ལྟའི་བར་དུ་བཞུགས༌པ་ཡིན།
1CO 15:7 དེའི་རྗེས༌སུ། ཡ་ཀོབ་ལ་མངོན་པར་མཛད་པ༌དང༌། དེ་ནས་སྐུ་ཚབ་པ་ཐམས་ཅད་ལའང་མངོན་པར་མཛད་ཅིང་།
1CO 15:8 མཇུག་མཐར་བདག་ནི་སྐྱེ་རན་ལ་མ་ཐོན་པར་སྐྱེས་པའི་ཕྲུ་གུ་དང་མཚུངས་པར་བདག་ལའང་མངོན་པར་མཛད་དོ།།
1CO 15:9 བདག་གིས་སྔོན་ཆད་དཀོན་མཆོག་གི་ཆོས་ཚོགས་ལ་གཉའ་གནོན་བྱས་མྱོང༌བས། བདག་ནི་སྐུ་ཚབ་པ་ཐམས་ཅད་ལས་ཆེས་ཆུང་བ་ཡིན༌ལ། སྐུ་ཚབ་པ་ཞེས་པའི་མིང་ཡང་ཐོགས་མི་འོས་སོ།།
1CO 15:10 འོན༌ཀྱང༌། ད་ལྟ་བདག་མི་ཅི་ལྟ་བུ་ཞིག་ཏུ་གྱུར་པ་ནི་དཀོན་མཆོག་གི་ཐུགས་རྗེའི་དབང་གིས་ཡིན༌ལ། ཁོང་གིས་བདག་ལ་གནང་བའི་ཐུགས་རྗེ་ནི་སྙིང་པོ་མེད་པ་ཞིག་མིན༌ཏེ། བདག་གིས་སྐུ་ཚབ་པ་གཞན་དག་ལས་ཀྱང་ངལ་དུབ་མང་པོ་མྱངས། དོན་དམ་དུ་ང་རང་མིན༌ཏེ། དཀོན་མཆོག་གི་ཐུགས་རྗེ་བདག་དང་ལྷན་དུ་གནས་པ་ལགས།
1CO 15:11 བདག་དང་སྐུ་ཚབ་པ་གཞན་སུ་ཞིག་ཡིན༌ཡང༌། ངེད་ཅག་གིས་དེ་ལྟར་ཆོས་བསྒྲགས་ཤིང་ཁྱོད་རྣམས་ཀྱིས་ཀྱང་དེ་ལྟར་དད་པ་བྱས༌སོ།།
1CO 15:12 དེ་ཡང་སྐྱབས་མགོན་མཱ་ཤི་ཀ་ནི་སྐུ་གྲོངས་པ་ནས་སླར་གསོན་པ་ཡིན་ཞེས་སྒྲོག་བཞིན་ཡོད༌ན། ཁྱོད་ཅག་གི་ཁྲོད་དུ་མི་ཁ་ཤས་ཀྱིས་གཤིན་པོ་རྣམས་སླར་གསོན་པར་འགྱུར་བའི་དོན་དེ་མེད་ཟེར་བ༌ཅི།
1CO 15:13 གལ༌ཏེ། གཤིན་པོ་རྣམས་སླར་གསོན་པར་མི་འགྱུར༌ན། སྐྱབས་མགོན་མཱ་ཤི་ཀའང་སླར་གསོན་པ་མིན།
1CO 15:14 སྐྱབས་མགོན་མཱ་ཤི་ཀ་སླར་གསོན་པ་མིན༌ན། ངེད་ཅག་གིས་ཆོས་སྒྲོག་པར་སྙིང་པོ་མེད༌ཅིང༌། ཁྱོད་ཅག་གིས་དད་པ་བྱས་པ་ལའང་སྙིང་པོ་མེད་དོ།།
1CO 15:15 ད་དུང་གཤིན་པོ་རྣམས་སླར་གསོན་པར་མི་འགྱུར་ཞེས་པ་དེ་བདེན་པ་ཡིན་ན། དཀོན་མཆོག་གིས་ཀྱང་སྐྱབས་མགོན་མཱ་ཤི་ཀ་སླར་གསོན་པར་མཛད་པ་མིན༌ལ། དཀོན་མཆོག་གིས་སྐྱབས་མགོན་མཱ་ཤི་ཀ་སླར་གསོན་པར་མཛད་པ་ལ་ངེད་ཅག་གིས་བདེན་དཔང་བྱས༌པས། ངེད་ཅག་ནི་དཀོན་མཆོག་ལ་རྫུན་གྱི་དཔང་པོ་བྱེད་མཁན་ཡིན་པ་གསལ་པོར་མངོན།
1CO 15:16 རྒྱུ་མཚན་ནི་གཤིན་པོ་རྣམས་སླར་གསོན་པ་མིན༌ན། སྐྱབས་མགོན་མཱ་ཤི་ཀའང་སླར་གསོན་པ་མ་ཡིན་པའི་ཕྱིར༌རོ།།
1CO 15:17 གལ༌ཏེ། སྐྱབས་མགོན་མཱ་ཤི་ཀ་སླར་གསོན་པ་མིན༌ན། ཁྱོད་ཅག་གིས་དད་པ་བྱས་པར་སྙིང་པོ་མེད༌ཅིང༌། ཁྱོད་རྣམས་ནི་ད་དུང་སྡིག་པའི་ནང་དུ་ཡོད༌དེ།
1CO 15:18 སྐྱབས་མགོན་མཱ་ཤི་ཀའི་དད་ལྡན་འདས་པོ་རྣམས་འཇིག༌པ་ཡིན་ནོ།།
1CO 15:19 གལ༌ཏེ། བདག་ཅག་གིས་ཚེ་འདི་ཁོ་ནའི་ཆེད་དུ་སྐྱབས་མགོན་མཱ་ཤི་ཀར་སྐྱབས་སུ་བཅོལ་བ་ཡིན༌ན། མི་ཐམས་ཅད་ལས་ཀྱང་བདག་ཅག་སྙིང་རེ༌རྗེའོ།།
1CO 15:20 འོན༌ཀྱང༌། སྐྱབས་མགོན་མཱ་ཤི་ཀ་སྐུ་གྲོངས་པ་ནས་སླར་གསོན༌ཏེ། དད་ལྡན་འདས་པོ་རྣམས་ཀྱི་འབྲས་བུ་ཐོག་མར་གྱུར་པ་ཡིན་ནོ།།
1CO 15:21 དེ་ཡང་མི་གཅིག་གི་རྐྱེན་ལས་འཆི་བ་བྱུང་བ༌བཞིན། མི་གཅིག་གི་རྐྱེན་ལས་གཤིན་པོ་རྣམས་སླར་གསོན་པའི་དོན་དེའང་བྱུང་སྟེ།
1CO 15:22 ཨ་དམ་བརྒྱུད་ནས་མི་ཐམས་ཅད་ཤི་བ༌ལྟར། སྐྱབས་མགོན་མཱ་ཤི་ཀ་བརྒྱུད་ནས་མི་ཐམས་ཅད་སླར་གསོན་པར་འགྱུར་ངེས༌ཡིན།
1CO 15:23 འོན༌ཀྱང༌། མི་ཐམས་ཅད་ནི་རིམ་པ་ལྟར་སླར་གསོན་ངེས༌ཏེ། འབྲས་བུ་ཐོག་མར་གྱུར་པ་ནི་སྐྱབས་མགོན་མཱ་ཤི་ཀ་ལགས༌ཤིང༌། ཕྱིས་སུ་ཁོང་ཉིད་ཕེབས་ཡོང་བའི་དུས་སུ། ཁོང་ལ་གཏོགས་པ་རྣམས་སླར་གསོན་པར་འགྱུར་ངེས༌ཡིན།
1CO 15:24 དེའི་རྗེས༌སུ། སྐྱབས་མགོན་མཱ་ཤི་ཀས་སྲིད་འཛིན་མཁན༌དང༌། དབང་འཛིན༌མཁན། ནུས་མཐུ་ཅན་ཐམས་ཅད་ཕམ་པར་མཛད༌དེ། རྒྱལ་སྲིད་དེ་ཉིད་ཡབ་དཀོན་མཆོག་ལ་འབུལ་བའི་སྐབས་སུ་མཐའ་མའི་དུས་ལ་སླེབས་པ་ཡིན།
1CO 15:25 ཅིའི་ཕྱིར་ཞེ་ན། དཀོན་མཆོག་གིས་དགྲ་བོ་ཐམས་ཅད་སྐྱབས་མགོན་མཱ་ཤི་ཀའི་ཞབས་འོག་ཏུ་གནོན་པའི་བར༌དུ། ཁོང་ཉིད་རྒྱལ་པོར་བཞུགས་པའི་ཕྱིར༌རོ།།
1CO 15:26 ཆེས་མཐའ་མར་མེད་པར་མཛད་པའི་དགྲ་བོ་ནི་འཆི་བ་ཡིན།
1CO 15:27 དེ་ལ་གསུང་རབ་ཀྱི་མདོ་ལས་ཇི་སྐད༌དུ། དཀོན་མཆོག་གིས་འཇིག་རྟེན་གྱི་དངོས་པོ་ཐམས་ཅད་ཁོང་གི་ཞབས་འོག་ཏུ་གནོན་པར་མཛད་ཅེས་གསུངས་པས། དངོས་པོ་ཐམས་ཅད་ཁོང་གི་ཞབས་འོག་ཏུ་གནོན་པར་མཛད་མཁན་དཀོན་མཆོག་ནི་དེའི་ནང་དུ་མི་འདུས་སོ།།
1CO 15:28 འཇིག་རྟེན་གྱི་དངོས་པོ་ཐམས་ཅད་ནི་སྐྱབས་མགོན་མཱ་ཤི་ཀའི་དབང་དུ་གཏོགས༌ཤིང༌། དེའི་དུས༌སུ། དཀོན་མཆོག་གི་སྲས་རང་ཉིད་ཀྱང་དངོས་པོ་ཐམས་ཅད་དབང་དུ་སྡུད་མཁན་དཀོན་མཆོག་གི་དབང་དུ་གཏོགས་པར་འགྱུར༌ཏེ། དཀོན་མཆོག་ནི་དངོས་པོ་ཐམས་ཅད་ལས་བླ་ན་མཐོ་ཞིང༌། དངོས་པོ་ཐམས་ཅད་ཀྱི་བདག་པོར་འགྱུར་བའི་ཕྱིར༌རོ།།
1CO 15:29 དེ་ལྟར་མ་ཡིན༌ན། འདས་པོ་རྣམས་ལ་ཁྲུས་གསོལ་བྱེད་མཁན་དག་ གིས་མ་འོངས་པར་ཅི་བྱེད༌དམ། འདས་པོ་རྣམས་དངོས་གནས་སླར་མ་གསོན༌ན། ཅིའི་ཕྱིར་དེ་རྣམས་ལ་ཁྲུས་གསོལ་བྱེད༌དམ།
1CO 15:30 ཅིའི་ཕྱིར་ངེད་ཅག་གིས་རྒྱུན་དུ་ཉེན་ཁར་ཁ་གཏོད༌དམ།
1CO 15:31 སྤུན་ཟླ༌རྣམས། ངས་བདག་ཅག་གི་གཙོ་བོ་མཱ་ཤི་ཀ་ཡེ་ཤུར་བརྟེན༌ནས། ཁྱོད་ཅག་གི་སྐོར་ལ་བསྔགས་བརྗོད་བྱས་པས། བདག་ནི་ཉིན་རེ་བཞིན་འཆི་བའི་ཉེན་ཁར་ཕྲད་ཡོད་ཅེས་བདེན་དཔང་བྱེད་པའོ།།
1CO 15:32 བདག་ནི་མི་ཕལ་བ་བཞིན་དུ་ཨེ་ཕེ་སི་ནས་གཅན་གཟན་དང་འཐབ༌ན། བདག་ལ་ཕན་ཐོགས་ཅི་ཡོད༌དམ། འདས་པོ་རྣམས་སླར་གསོན་པ་མིན༌ན། དེ་ལ་ཇི་སྐད་དུ། སང་ཉིན་བདག་ཅག་འཆི་ངེས༌པས།། བཟའ་བཏུང་ལ་ནི་ཅི་དགར༌རོལ།། ཞེས་པ་བཞིན་དུ་བྱ་འོས༌སོ།།
1CO 15:33 ཁྱོད་ཅག་གིས་རང་ཉིད་བསླུ་བར་མི༌བྱའོ།། གྲོགས་ངན་པར་འགྲོགས་ན་སྤྱོད་བཟང་བརླག་པར་འགྱུར།
1CO 15:34 ཁྱོད་རྣམས་ལས་མི་ཁ་ཤས་ཀྱིས་དཀོན་མཆོག་ངོ་མི་ཤེས་པས་གོ་རྟོགས་སད་ཅིང་སྡིག་པ་མི་བྱེད་པར་ལས་བཟང་པོ་བྱ་འོས་པ་ཡིན། ཁྱོད་ཅག་ངོ་གནོང་བའི་ཕྱིར་བདག་གིས་དེ་ལྟར་སྨྲས༌པའོ།།
1CO 15:35 འདས་པོ་རྣམས་ཅི་ལྟར་སླར་གསོན་པར་འགྱུར༌རམ། དེ་དག་གིས་ལུས་པོ་ཅི་ལྟ་བུ་ཞིག་ཁྱེར་ཡོང་ངམ་ཞེས་འདྲི་མཁན་ཡོད་སྲིད་ཅིང་།
1CO 15:36 ཀྱེ། བླུན་པོ༌ཁྱོད། ཁྱོད་ཀྱིས་བཏབ་པའི་ས་བོན་ནི་འཆི་བར་མ་གྱུར་ན་སྐྱེ་བར་མི་འགྱུར་རོ།།
1CO 15:37 ཁྱོད་ཀྱིས་བཏབ་པ་ནི་མ་འོངས་པར་སྐྱེ་བར་འགྱུར་བའི་གཟུགས་དེ་མིན༌ལ། གྲོའམ་འབྲུ་རིགས་གཞན་ལ་སོགས་པའི་འབྲུ་རྡོག་ཙམ་ཡིན།
1CO 15:38 འོན༌ཀྱང༌། དཀོན་མཆོག་གིས་རང་ཉིད་ཀྱི་ཐུགས་དགོངས་བཞིན་ས་བོན་དེ་ལ་གཟུགས་དབྱིབས་གནང་བ༌དང༌། འབྲུ་རྡོག་རེ་རེར་རང་རང་གི་གཟུགས་དབྱིབས་ཡོད་པར་མཛད་དོ།།
1CO 15:39 ལུས་ཕུང་ཐམས་ཅད་མི་འདྲ༌སྟེ། མི༌དང༌། ཕྱུགས་ཟོག འདབ༌ཆགས། ཉ་བཅས་ནི་རྣམ་པ་མི་འདྲ་བ་རེ་རེ་ཡིན།
1CO 15:40 ནམ་མཁའི་གཟུགས་དབྱིབས་ཡོད་པ༌དང༌། ས་གཞིའི་གཟུགས་དབྱིབས་ཀྱང་ཡོད། འོན༌ཀྱང༌། ནམ་མཁའི་གཟུགས་དབྱིབས་ཀྱི་གཟི་འོད་ནི་སྣ་གཅིག་ཡིན་ལ། ས་གཞིའི་གཟུགས་དབྱིབས་ཀྱི་གཟི་འོད་ཀྱང་སྣ་གཅིག་ཡིན།
1CO 15:41 ཉི་མ་ལ་ཉི་མའི་གཟི་འོད་ཡོད་པ༌དང༌། ཟླ་བ་ལ་ཟླ་བའི་གཟི་འོད་ཡོད༌ལ། སྐར་མ་ལ་སྐར་མའི་གཟི་འོད་ཡོད༌དེ། སྐར་མ་སོ་སོའི་གཟི་འོད་ལའང་ཁྱད་པར་ཡོད༌དོ།།
1CO 15:42 གཤིན་པོ་རྣམས་སླར་གསོན་པར་འགྱུར་བའང་དེ་བཞིན༌ཏེ། ས་འོག་ཏུ་བཅུག་པ་ནི་ངེས་པར་འཇིག་སྲིད༌ཅིང༌། སླར་གསོན་པའི་ལུས་པོ་ལ་འཇིག་པ་མེད་དོ།།
1CO 15:43 ས་འོག་ཏུ་བཅུག་པ་ནི་ངོ་གནོང་བ་ཡིན༌ཞིང༌། སླར་གསོན་པའི་ལུས་པོར་གཟི་བརྗིད་ལྡན་ལ། ས་འོག་ཏུ་བཅུག་པ་ཉམ་ཐག༌ཅིང༌། སླར་གསོན་པའི་ལུས་པོར་སྟོབས་དང་ལྡན་ནོ།།
1CO 15:44 ས་འོག་ཏུ་བཅུག་པ་ནི་ཤ་ཁྲག་གི་ཕུང་བོ་ཡིན༌ཞིང༌། སླར་གསོན་པའི་ལུས་པོ་ནི་སེམས་ཉིད་ཀྱི་ལུས་པོ་ཡིན། ཤ་ཁྲག་གི་ལུས་པོ་ཡོད་ན། སེམས་ཉིད་ཀྱི་ལུས་པོའང་ཡོད་ངེས་པ་ཡིན་ནོ།།
1CO 15:45 དེའི༌ཕྱིར། གསུང་རབ་ཀྱི་མདོ་ལས་ཇི་སྐད༌དུ། མིའི་ཐོག་མ་ཨ་དམ་ནི་སྲོག་དང་ལྡན་པའི་མི་ཞིག་ཏུ་གྱུར་པ་ཡིན་ཞེས་བཀོད་ཡོད། ཨ་དམ་ཕྱི་མ་སྟེ་སྐྱབས་མགོན་ཡེ་ཤུ་ནི་མི་རྣམས་གསོན་པར་མཛད་པའི་ཐུགས་ཉིད་ཅིག་ཏུ་གྱུར༌པ་ཡིན།
1CO 15:46 འོན༌ཀྱང༌། སེམས་ཉིད་ཡིན་པ་དེ་ནི་སྔ་མ་མིན༌ཏེ། ཤ་ཁྲག་ཡིན་པ་དེ་ནི་སྔ་མ་ཡིན༌ཞིང༌། ཕྱིས་སུ་སེམས་ཉིད་ཡིན་པ་དེ་ཉིད་བྱུང༌བ་ཡིན།
1CO 15:47 མིའི་ཐོག་མ་དེ་ནི་ས་ལས་བཟོས་ཤིང་ས་ལ་གཏོགས༌པ་དང་། མི་ཕྱི་མ་དེ་ནི་ནམ་མཁའི་ཞིང་ཁམས་ནས་བྱོན༌པ་ཡིན།
1CO 15:48 ས་ལ་གཏོགས་པ་དེ་ནི་ཅི་འདྲ་ཡིན༌ན། ས་ལ་གཏོགས་པའི་མི་ཐམས་ཅད་ཀྱང་དེ་ལྟར་ཡིན༌ལ། ནམ་མཁའི་ཞིང་ཁམས་ལ་གཏོགས་པ་ནི་ཅི་འདྲ་ཡིན༌ན། ནམ་མཁའི་ཞིང་ཁམས་ལ་གཏོགས་པའི་མི་ཐམས་ཅད་ཀྱང་དེ་ལྟར་ཡིན།
1CO 15:49 བདག་ཅག་ས་ལ་གཏོགས་པའི་གཟུགས་དབྱིབས་དང་ལྡན༌པས། མ་འོངས་པར་ནམ་མཁའི་ཞིང་ཁམས་ལ་གཏོགས་པའི་གཟུགས་དབྱིབས་ཀྱང་ངེས་པར་ཡོད་སྲིད༌དོ།།
1CO 15:50 སྤུན་ཟླ༌རྣམས། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཤ་ཁྲག་གི་ཕུང་བོར་དཀོན་མཆོག་གི་རྒྱལ་སྲིད་འཐོབ་མི་སྲིད༌ལ། ངེས་པར་འཇིག་སྲིད་པ་ལ་འཇིག་པ་མེད་པ་དེའང་འཐོབ་མི་སྲིད།
1CO 15:51 ལྟོས༌དང༌། ད་ལྟ་བདག་གིས་ཁྱོད་རྣམས་ལ་གསང་བའི་དོན་ཞིག་སྨྲ་བར༌བྱ། བདག་ཅག་ཐམས་ཅད་འཆི་བར་འགྱུར་བ་མིན༌ཏེ།
1CO 15:52 མཇུག་མཐའི་དུང་སྒྲ་གྲགས་པའི་དུས༌སུ། སྐད་ཅིག་མའམ་མིག་རྡེབ་དབང་ཙམ་ལ་བདག་ཅག་ཐམས་ཅད་ཀྱི་ལུས་པོ་འགྱུར་ངེས༌སོ།། དུང་སྒྲ་དེ་གྲགས་པ་དང་། འདས་པོ་རྣམས་སླར་གསོན་པར་མཛད་ཅིང་ནམ་ཡང་འཇིག་པར་མི་འགྱུར༌ཏེ། བདག་ཅག་གི་ལུས་པོའང་འགྱུར་ངེས་ཡིན།
1CO 15:53 འཇིག་པར་འགྱུར་བའི་ལུས་པོ་འདི་ཡིས་ནམ་ཡང་འཇིག་པ་མེད་པ་གྱོན་དགོས་ཤིང༌། འཆི་བར་འགྱུར་བའི་ལུས་པོ་འདི་ཡིས་ནམ་ཡང་འཆི་བ་མེད་པ་གྱོན་དགོས་སོ།།
1CO 15:54 ཡང་འཇིག་པར་འགྱུར་བའི་ལུས་པོ་འདི་ཡིས་ནམ་ཡང་འཇིག་པ་མེད་པ་གྱོན་པ་དང་། འཆི་བར་འགྱུར་བའི་ལུས་པོ་འདི་ཡིས་ནམ་ཡང་འཆི་བ་མེད་པ་གྱོན་པའི་ཚེ། གསུང་རབ་ཀྱི་མདོ་ལས་ཇི་སྐད༌དུ། རྒྱལ་ཁས་འཆི་བ་ལ་ནི་ཁྱུར་མིད༌བཏང༌།། ཞེས་གསུངས་པ་ལྟར་འགྲུབ་པར་འགྱུར༌རོ།།
1CO 15:55 ཡང་ཇི་སྐད༌དུ། ཀྱེ་མ་འཆི་བ་ཁྱོད་ལ་རྒྱལ་ཁ་ཡོད་སྲིད་དམ།། ཀྱི་ཧུད་འཆི་བ་ཁྱོད་ལ་དུག་མདུང་ཡོད་སྲིད་དམ།། ཞེས་གསུངས་སོ།།
1CO 15:56 འཆི་བའི་དུག་མདུང་ནི་སྡིག་པ་ཡིན༌ལ། སྡིག་པའི་དབང་ཤུགས་ནི་བཀའ་ཁྲིམས་ཡིན།
1CO 15:57 འོན༌ཀྱང༌། དཀོན་མཆོག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད༌ནས། བདག་ཅག་རྒྱལ་བར་མཛད་པས་ཁོང་ལ་ཐུགས་རྗེ་ཆེ༌ཞུའོ།།
1CO 15:58 དེའི༌ཕྱིར། བདག་གི་སྙིང་ཉེ་བའི་སྤུན་ཟླ༌རྣམས། ཁྱོད་རྣམས་ངེས་པར་འགྱུར་མེད་བརྟན་པོར་སྡོད་པར༌གྱིས། གཙོ་བོའི་ནང་དུ་སྒྲུབ་པའི་ངལ་བའི་ལས་ནི་དོན་མེད་དུ་མི་འགྱུར་བ་ཤེས་པ་བཞིན། ཁྱོད་ཅག་གིས་གཙོ་བོའི་ལས་དོན་འབད་པས་སྒྲུབས་ཤིག །
1CO 16:1 སྔོན་ཆད་བདག་གིས་དད་ལྡན་དམ་པ་རྣམས་ལ་ཅི་ལྟར་ཞལ་འདེབས་འབུལ་དགོས་པའི་སྐོར་ག་ལད་ཡཱ་ཡུལ་གྱི་ཆོས་ཚོགས་སོ་སོར་ཁ་བསྒོ་བཏང་བ༌བཞིན། ཁྱོད་རྣམས་ཀྱིས་ཀྱང་དེ་ལྟར་བྱ་འོས༌ཏེ།
1CO 16:2 གཟའ་འཁོར་རེ་རེའི་ཉིན་དང་པོ་ལ། ང་རང་ཡོང་བའི་ཉིན་དེར་ཞལ་འདེབས་མི་བསྡུ་བའི༌ཕྱིར། མི་སོ་སོས་རང་རང་གི་ཡོང་འབབ་བཞིན་ཟུར་དུ་བླངས་ཏེ་བསྐྱུར་བར༌གྱིས།
1CO 16:3 ང་རང་ཡོང༌ཚེ། ཁྱོད་ཅག་གིས་ཡི་གེ་བྲིས་ཏེ་མི་འགའ་ཞིག་གདམ༌པར་བྱེད་ན། ངས་མི་དེ་རྣམས་ཡེ་རུ་སཱ་ལེམ་ལ་ཁྱོད་རྣམས་ཀྱི་ཞལ་འདེབས་སྐྱེལ་མཁན་དུ་མངག་པར༌བྱའོ།།
1CO 16:4 གལ༌ཏེ། ང་རང་འགྲོ་དགོས་བྱུང༌ན། མི་དེ་དག་བདག་དང་མཉམ་དུ་འགྲོ་བར༌བྱའོ།།
1CO 16:5 ང་རང་མ་ཀེ་དོན་ཡཱ་ཡུལ་བརྒྱུད་ནས་འགྲོ་རྒྱུ་ཡིན་ཞིང་། དེའི་རྗེས་སུ་ཁྱོད་ཅག་གི་གམ་དུ་ཡོང་ངོ་།།
1CO 16:6 ཁྱོད་ཅག་དང་མཉམ་དུ་རེ་ཞིག་སྡོད༌པའམ། ཡང་ན་དགུན་སྐྱེལ་ཡང་སྲིད༌ལ། ང་རང་གང་དུ་འགྲོ་ནའང་ཁྱོད་ཅག་གིས་སྐྱེལ་མ་བྱེད་རུང་བ་ཡིན།
1CO 16:7 ད་ལྟ་བདག་ནི་ལམ་བར་ནས་ཁྱོད་ཅག་དང་འཕྲད་མི་འདོད༌དེ། གཙོ་བོས་བདག་ལ་དགོངས་པ་གནང་བ་ཡིན༌ན། བདག་ནི་ཡུན་རིང་ཞིག་ལ་ཁྱོད་ཅག་དང་མཉམ་དུ་སྡོད་འདོད༌པ་ཡིན།
1CO 16:8 འོན༌ཀྱང༌། ལྔ་བཅུའི་དུས་ཆེན་གྱི་བར་དུ་ང་རང་ཨེ་ཕེ་སི་ནས་སྡོད་ངེས་ཡིན།
1CO 16:9 དེ་ནི་བདག་ལ་ཁོད་རྒྱ་ཆེ་ཞིང་ཕན་ནུས་ལྡན་པའི་སྒོ་ཞིག་ཕྱེས་ཡོད༌ལ། ངོ་རྒོལ་བྱེད་མཁན་ཡང་མང་པོ་ཞིག་ཡོད་པའི་ཕྱིར༌རོ།།
1CO 16:10 གལ༌ཏེ། ཐི་མོ་ཐེ་ཡོང་ན། ཁོས་ཀྱང་བདག་དང་འདྲ་བར་གཙོ་བོའི་ཆོས་དོན་སྒྲུབ་བཞིན་ཡོད༌པས། ཁོ་རང་ནི་ཁྱོད་ཅག་གི་གམ་དུ་མི་འཇིགས་པར་སྡོད་པའི༌ཕྱིར། ཁྱོད་རྣམས་ཀྱིས་མཉམ་འཇོག་བྱ་འོས་སོ།།
1CO 16:11 དེའི༌ཕྱིར། མི་སུས་ཀྱང་ཁོ་རང་ལ་མཐོང་ཆུང་མི་བྱེད་ཅིང་བདག་གི་གམ་དུ་བདེ་བར་ཡོང་བར༌གྱིས། ཅིའི་ཕྱིར་ཞེ་ན། ངས་ཁོ་རང་དང་སྤུན་ཟླ་རྣམས་མཉམ་དུ་ཡོང་བར་རེ་སྒུག་བྱེད་བཞིན་ཡོད་པའི་ཕྱིར༌རོ།།
1CO 16:12 བདག་གིས་སྤུན་ཟླ་ཨ་པོལ་ལོ་ནི་དད་ལྡན་གཞན་དག་དང་མཉམ༌དུ། ཁྱོད་ཅག་གི་གམ་དུ་འགྲོ་བར་ཡང་ཡང་བསྐུལ༌མོད། འོན་ཀྱང་ད་ལྟ་ཁོ་རང་འགྲོ་འདོད་མེད༌ནའང༌། ནམ་ཞིག་ལ་གོ་སྐབས་ལྡན་ཚེ་ཁོ་རང་འགྲོ་ངེས༌སོ།།
1CO 16:13 དད་པའི་ནང་དུ་བརྟན་པོར་སྡོད༌ཅིང༌། སྐྱེས་བུ་དམ་པའི་ངང་ཚུལ་གྱིས་དཔའ་ངར་བསྐྱེད་པའི༌ཕྱིར། ཁྱོད་ཅག་གིས་ངེས་པར་དོགས་ཟོན་བྱེད་པར༌གྱིས།
1CO 16:14 ཁྱོད་ཅག་གིས་ལས་གང་ཞིག་བྱེད་ནའང་ཐམས་ཅད་བྱམས་པ་ལ་བརྟེན་ནས་བསྒྲུབ་པར༌བྱའོ།།
1CO 16:15 སྤུན་ཟླ༌རྣམས། སི་ཕ་ནཱའི་ཁྱིམ་མི་དག་ནི་ཨ་ཀ་ཡཱ་ཡུལ་གྱི་འབྲས་བུ་ཐོག་མར་གྱུར་པ་ཡིན༌ལ། ཁོ་རྣམས་ཀྱིས་ཆེད་དུ་དད་ལྡན་དམ་པ་རྣམས་ལ་ཞབས་ཕྱི་བྱེད་པ་ཁྱོད་ཅག་གིས་ཤེས་པས།
1CO 16:16 བདག་གིས་ཁྱོད་རྣམས་མི་དེ་ལྟ་བུ་དང་ཆོས་གྲོགས་ཐམས་ཅད་ལ་བསྟུན་པར་བསྐུལ་བར་བྱའོ།།
1CO 16:17 སི་ཕ་ནཱ༌དང༌། ཕཱོར་ཏི༌ན། ཨ་ཁཱ་ཡ་ཀུ་གསུམ་པོ་འདིར་སླེབས་བྱུང་བས་ང་རང་ཤིན་ཏུ་དགའ༌སྟེ། ཁྱོད་ཅག་ལ་མི་ཚང་བ་དག་ཁོ་རྣམས་ཀྱིས་ཁ་བསྐངས་པའི་ཕྱིར༌རོ།།
1CO 16:18 ཁོ་རྣམས་ཀྱིས་བདག་དང་ཁྱོད་རྣམས་ཡིད་སེམས་སྤྲོ་བར་བྱས༌པས། ཁྱོད་ཅག་གིས་ངེས་པར་མི་དེ་ལྟ་བུ་རྣམས་ལ་བརྩི་བཀུར་བྱ་དགོས༌སོ།།
1CO 16:19 ཨེ་ཞི་ཡཱ་ཡུལ་གྱི་ཆོས་ཚོགས་དག་གིས་ཁྱོད་རྣམས་ལ་འཚམས་འདྲི༌ཞུའོ།། ཨ་ཀུ་ལཱ་དང་ཕུར་སི་ལཱ་གཉིས༌དང༌། ཁོ་གཉིས་ཀྱི་ཁྱིམ་དུ་ཡོད་པའི་ཆོས་ཚོགས་ཀྱི་མི་དག་གིས་ཀྱང་གཙོ་བོའི་ནང་དུ་ཁྱོད་ཅག་ལ་འཚམས་འདྲི་ཡང་ཡང༌ཞུའོ།།
1CO 16:20 འདིར་སྡོད་པའི་སྤུན་ཟླ་རྣམས་ཀྱིས་ཀྱང་ཁྱོད་ཅག་ལ་འཚམས་འདྲི༌ཞུའོ།། ཁྱོད་ཅག་གིས་ཀྱང་ཕན་ཚུན་ལ་དམ་པའི་འོ་བྱས་ནས་འཚམས་འདྲི་བྱ་འོས༌སོ།།
1CO 16:21 ཕོལ་ལོལ་བདག་གིས་འཚམས་འདྲི་ཞུ་བ་འདི་ནི་དངོས་སུ་བྲིས་པ་ཡིན།
1CO 16:22 གཙོ་བོ་གཅེས་སུ་མི་འཛིན་པ་ཡོད༌ན། དེ་ལ་དམོད་མོ་ཐེབས་པར་གྱུར༌ཅིག གཙོ་བོ་ལགས། ཁྱེད་ཉིད་ཕེབས་པར་ཤོག།
1CO 16:23 གཙོ་བོ་ཡེ་ཤུའི་ཐུགས་རྗེ་ནི་ནམ་ཡང་ཁྱོད་ཅག་དང་མཉམ་དུ་གནས་པར༌སྨོན།
1CO 16:24 བདག་གི་བརྩེ་བ་ནི་མཱ་ཤི་ཀ་ཡེ་ཤུའི་ནང་དུ་ཁྱོད་ཅག་ཐམས་ཅད་དང་མཉམ་དུ་གནས་པར༌སྨོན། ཨ༌མེན།། །།
2CO 1:1 དེ་ཡང་ཕོལ་ལོལ་ང་རང་ནི་དཀོན་མཆོག་གི་ཐུགས་དགོངས་བཞིན་མཱ་ཤི་ཀ་ཡེ་ཤུའི་སྐུ་ཚབ་པ་ཞིག་ཡིན༌ལ། སྤུན་ཟླ་ཐི་མོ་ཐེ་ངེད་གཉིས༌ཀྱིས། ཀོ་རིན་ཐུ་རུ་ཡོད་པའི་དཀོན་མཆོག་གི་ཆོས་ཚོགས༌དང༌། ཨ་ཀ་ཡཱ་ཡུལ་ཀུན་ཏུ་ཡོད་པའི་དད་ལྡན་དམ་པ་རྣམས་ལ་འཕྲིན་ཡིག་འདི་ཉིད་སྤྲིངས་པ༌སྟེ།
2CO 1:2 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
2CO 1:3 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག༌སྟེ། ཐུགས་རྗེའི་ཡབ་དང་སེམས་གསོ་ཇི་སྙེད་གནང་མཁན་དཀོན་མཆོག་ལ་བསྔགས་བརྗོད་བྱའོ།།
2CO 1:4 བདག་ཅག་དཀའ་སྡུག་སྣ་ཚོགས་ཀྱི་ནང་དུ་ཡོད་དུས། ཁོང་གིས་བདག་ཅག་ལ་སེམས་གསོ་གནང༌ཞིང༌། དེ་ནི་བདག་ཅག་གིས་ཀྱང་དཀོན་མཆོག་ནས་ཐོབ་པའི་སེམས་གསོ་ལ་བརྟེན༌ནས། དཀའ་སྡུག་སྣ་ཚོགས་མྱོང་མཁན་གཞན་དག་ལའང་སེམས་གསོ་བྱེད་ནུས་པའི་ཕྱིར་རོ།།
2CO 1:5 བདག་ཅག་གིས་སྐྱབས་མགོན་མཱ་ཤི་ཀའི་སྡུག་བསྔལ་དེ་མང་པོ་མྱངས༌ན། སྐྱབས་མགོན་མཱ་ཤི་ཀར་བརྟེན་ནས་སེམས་གསོའང་དེ་འདྲ་མང་པོ་འཐོབ་པའོ།།
2CO 1:6 ངེད་ཅག་གིས་དཀའ་སྡུག་མྱོང་བ་ཡིན་ན། དེ་ནི་ཁྱོད་རྣམས་ལ་སེམས་གསོ་དང་ཐར་པ་འཐོབ་པའི་ཕྱིར་ཡིན༌ལ། ངེད་ཅག་ལ་སེམས་གསོ་ཐོབ་པ་ཡིན་ན། དེ་ནི་ཁྱོད་རྣམས་ལའང་སེམས་གསོ་འཐོབ་པའི་ཕྱིར་ཡིན། སེམས་གསོ་དེ་ཡིས་ངེད་ཅག་གིས་མྱངས་པའི་སྡུག་བསྔལ་དང་འདྲ་བར་ཁྱོད་ཅག་གིས་ཀྱང་བཟོད་བསྲན་ངང་ནས་མྱང་ཐུབ་པར་བྱེད།
2CO 1:7 ངེད་ཅག་གིས་ཁྱོད་རྣམས་ལ་རེ་བ་བརྟན་པོ་བཅངས་ཡོད་དེ། ཁྱོད་ཅག་གིས་ངེད་ཅག་དང་མཉམ་དུ་སྡུག་བསྔལ་མྱངས༌ཤིང༌། ངེད་ཅག་དང་མཉམ་དུ་སེམས་གསོ་འཐོབ་ངེས་པའང་ངེད་ཅག་གིས་ཤེས་པའི་ཕྱིར༌རོ།།
2CO 1:8 སྤུན་ཟླ༌རྣམས། དེ་སྔར་ངེད་ཅག་གིས་ཨེ་ཞི་ཡཱ་ཡུལ་ནས་མྱངས་པའི་དཀའ་སྡུག་དེ་ཁྱོད་རྣམས་ཀྱིས་ཀྱང་ཤེས་དགོས༌ཏེ། དུས་དེར་ངེད་ཅག་གིས་གནོན་ཤུགས་བཟོད་ཐབས་མེད་པ་མྱངས་ཤིང་ལུས་སྟོབས་ཟད་པ༌དང༌། ཐ་ན་གསོན་པའི་རེ་བའང་ཡོངས་སུ་ཆད་པ༌དང༌།
2CO 1:9 རང་སེམས་ནས་ཀྱང་འཆི་ངེས་ཡིན་སྙམ་མོ།། དེ་ནི་ངེད་ཅག་གིས་རང་ལ་མི་བརྟེན༌པར། འདས་པོ་རྣམས་སླར་གསོན་པར་མཛད་མཁན་དཀོན་མཆོག་ཁོ་ནར་བརྟེན་དགོས་པའི་ཕྱིར་ཡིན།
2CO 1:10 དཀོན་མཆོག་གིས་དེ་སྔོན་ངེད་རྣམས་འཆི་བའི་ཉེན་ཁ་ལས་བསྐྱབས༌ཤིང༌། ད་ལྟའང་སྐྱོབ་པར་མཛད་པ༌དང༌། མ་འོངས་པའི་དུས་སུའང་སྐྱོབ་པའི་ཕྱིར་ངེད་ཅག་གིས་ཁོང་ལ་རེ་བ་བྱེད་དོ།།
2CO 1:11 མི་མང་པོས་དཀོན་མཆོག་ལ་བཀའ་དྲིན་ཞུ་བ་དང་། སྨོན་ལམ་མང་པོར་བརྟེན་ནས་ངེད་ཅག་ལ་བྱིན་རླབས་འཐོབ༌པའི་ཕྱིར། ཁྱོད་རྣམས་ཀྱིས་ཀྱང་གསོལ་བ་འདེབས་པའི་སྒོ་ནས་ངེད་ཅག་ལ་རོགས་རམ་བྱེད་དགོས༌སོ།།
2CO 1:12 ངེད་ཅག་གི་བསྔགས་བརྗོད་ནི་འདི་ལྟ་སྟེ། ངེད་ཅག་གིས་འཇིག་རྟེན་འདི་ནས་དཀོན་མཆོག་གི་རྣམ་དག་དང་ཐུགས་རྒྱུད་དྲང་མོར་བརྟེན་པ་ལས། མིའི་བློ་གྲོས་ལ་མི་བརྟེན་པར་དཀོན་མཆོག་གི་ཐུགས་རྗེ་ལ་བརྟེན་ནས་ལེགས་པར་སྤྱད་པ་དང༌། ཁྱོད་རྣམས་ལ་དེ་ལས་ལྷག་ཏུ་ལེགས་པར་སྤྱད་པ་ལ་རང་གི་བསམ་པས་བདེན་དཔང་བྱས་པ་ཡིན།
2CO 1:13 ངེད་ཅག་གིས་ད་ལྟ་ཁྱོད་རྣམས་ལ་ཡི་གེ་བྲིས་པ་ནི་ཁྱོད་རྣམས་ཀྱིས་ཀློག་པ་དང་ཤེས་ཐུབ་པའི་ཕྱིར་ཡིན༌ལ། ཁྱོད་རྣམས་ཀྱིས་རྩ་བ་ནས་ཤེས་པར་བདག་གིས་རེ་བ་བྱེད་དོ༎
2CO 1:14 ཁྱོད་ཅག་གིས་ངེད་རྣམས་ཏོག་ཙམ་ཤེས་པ་དང་། གཙོ་བོ་ཡེ་ཤུའི་ཉིན་མོར་ངེད་རྣམས་ཁྱོད་ཅག་གི་གཟི་བརྗིད་དུ་འགྱུར་བ་ལྟར་ཁྱོད་རྣམས་ཀྱང་ངེད་ཅག་གི་གཟི་བརྗིད་དུ་འགྱུར་རོ།།
2CO 1:15 བདག་ལ་དེ་ལྟ་བུའི་ཡིད་ཆེས་བརྟན་པོ་ཡོད༌པས། ཁྱོད་རྣམས་ལ་སླར་ཡང་ཕན་ཐོགས་པའི༌ཕྱིར། བདག་ནི་སྔ་མོ་ནས་ཁྱོད་རྣམས་ཀྱི་གམ་དུ་འགྲོ་འདོད༌ཅིང༌།
2CO 1:16 ཁྱོད་ཚོའི་ཡུལ་བརྒྱུད་ནས་མ་ཀེ་དོན་ཡཱ་ཡུལ་དུ་འགྲོ་བ༌དང༌། མ་ཀེ་དོན་ཡཱ་ཡུལ་ནས་སླར་ཡང་ཁྱོད་ཅག་གི་གམ་དུ་ལོག༌སྟེ། ཁྱོད་རྣམས་ཀྱིས་ང་རང་ཡ་ཧུ་དཱའི་ཡུལ་དུ་སྐྱེལ་མ་བྱེད་པར་རེ་བ་བྱས་པ་ཡིན།
2CO 1:17 དེའི་ཕྱིར། བདག་གིས་དེ་ལྟར་བྱེད་འདོད་པ་ལ་ཐེ་ཚོམ་སྐྱེས་སམ། ཡང་ན་བདག་གི་དམིགས་པ་ནི་རང་གི་འདོད་བློ་ལས་བྱུང༌སྟེ། ཡིན་མིན་གྱི་ཤན་འབྱེད་མི་ཐུབ་བམ་ཞེ་ན་མ་ཡིན་ནོ།།
2CO 1:18 དཀོན་མཆོག་ནི་ཡིད་རྟོན་རུང་བ་ཡིན་ཞིང་། ངེད་ཅག་གིས་ཁྱོད་རྣམས་ལ་བསྒྲགས་པའི་བཀའ་ནི་ཡིན་མིན་གཉིས་ལྡན་ཞིག་མ་ཡིན་ནོ།།
2CO 1:19 ཅིའི་ཕྱིར་ཞེ་ན། བདག་དང༌། སིལ་ཝ་ནཱ། ཐི་མོ་ཐེ་བཅས་ཀྱིས་ཁྱོད་ཅག་གི་ཁྲོད་དུ་བསྒྲགས་པའི་དཀོན་མཆོག་གི་སྲས་ཡེ་ཤུ་མཱ་ཤི་ཀ་ནི་ཅིས་ཀྱང་ཡིན་མིན་གཉིས་ལྡན་ཞིག་མ་ཡིན༌པར། ཁོང་ལ་བརྟེན་ནས་ཡིན་པ་ཁོ་ན་ལགས་པའི་ཕྱིར༌རོ།།
2CO 1:20 དཀོན་མཆོག་གི་ཞལ་བཞེས་ཅི་ཙམ་ཡོད་ནའང་། སྐྱབས་མགོན་མཱ་ཤི་ཀ་ལ་བརྟེན་ནས་ཐམས་ཅད་ཡིན་པ་ལགས༌པས། བདག་ཅག་བརྒྱུད་ནས་དཀོན་མཆོག་ལ་བསྟོད་བསྔགས་འབུལ་བའི་ཕྱིར། ངེད་ཅག་གིས་སྐྱབས་མགོན་མཱ་ཤི་ཀར་བརྟེན་ནས་ཨ་མེན་ཞེས༌སྨྲ་བ་ཡིན།
2CO 1:21 དཀོན་མཆོག་ནི་སྐྱབས་མགོན་མཱ་ཤི་ཀའི་ནང་དུ་ངེད་ཅག་དང་ཁྱོད་རྣམས་བརྟན་པོར་མཛད་མཁན་དང༌། བདག་ཅག་ལ་འབྱུག་མཁན་ཡང་ཡིན།
2CO 1:22 ཡང་ཁོང་གིས་བདག་ཅག་ལ་ཐེལ་བརྒྱབ་པ་དང་དམ་པའི་ཐུགས་ཉིད་བདག་ཅག་གི་སེམས་སུ་གཏའ་མར་གནང༌ངོ༌།།
2CO 1:23 ཁྱོད་རྣམས་ལ་བཟོད་པ་སྒོམ་པའི་ཕྱིར་ང་རང་ཀོ་རིན་ཐུ་རུ་མ་ཡོང༌སྟེ། ངས་རང་གི་ཚེ་སྲོག་དཔང་དུ་བཙུགས་ནས་དཀོན་མཆོག་གི་བདེན་དཔང་ཞུས་པ་ཡིན།
2CO 1:24 ངེད་ཅག་གིས་ཁྱོད་རྣམས་ཀྱི་དད་སེམས་ལ་ཚོད་འཛིན་བྱེད་འདོད་པ་མིན༌པར། ངེད་ཅག་ནི་ཁྱོད་རྣམས་དགའ་ཞིང་སྤྲོ་བར་བྱེད་པའི་ལས་གྲོགས་ཡིན་ལ། དེ་ནི་ཁྱོད་རྣམས་དད་པར་བརྟེན་ནས་བརྟན་པོར་གནས་ཐུབ་པའི་ཕྱིར་རོ།།
2CO 2:1 བདག་གིས་སེམས་ཐག་བཅད་རྗེས། ཕྱིས་སུ་སླར་ཡང་སྐྱོ་སྡུག་ངང་ཁྱོད་ཅག་གི་གམ་དུ་མི་ཡོང་ངོ་།།
2CO 2:2 གལ༌ཏེ། བདག་གིས་ཁྱོད་ཅག་ལ་སེམས་སྐྱོ་བར་བྱེད༌ན། བདག་གིས་གང་ཞིག་ལ་སེམས་སྐྱོ་བར་བྱེད་པ་དེ་ལས་གཞན། སུ་ཞིག་གིས་བདག་ལ་དགའ་ཞིང་སྤྲོ་བར་བྱེད་ནུས༌སམ།
2CO 2:3 ང་རང་སླེབ་པའི་དུས༌སུ། ང་རང་དགའ་བར་བྱེད་འོས་པ་རྣམས་ཀྱིས་བདག་གི་སེམས་སྐྱོ་བར་མི་བྱེད་པའི༌ཕྱིར། བདག་གིས་སྔོན་ཆད་དོན་འདི་ཁྱོད་རྣམས་ལ་འཕྲིན་ཡིག་ཏུ་བྲིས༌པ་ཡིན། ང་རང་དགའ་ཞིང་སྤྲོ་བ་ལ་བརྟེན་ནས་ཁྱོད་རྣམས་ཀྱང་དགའ་ཞིང་སྤྲོ་བར་འགྱུར་བ་བདག་ལ་ཡིད་ཆེས་བརྟན་པོ་ཡོད།
2CO 2:4 དེ་སྔར་བདག་གིས་སེམས་སྡུག་ཆེན་པོ་དང་སྐྱོ་བའི་ངང་ནས་མཆི་མ་མང་པོ་བཞུར་གྱིན་ཁྱོད་རྣམས་ལ་འཕྲིན་ཡིག་བྲིས༌ཤིང༌། དེ་ནི་ཁྱོད་ཅག་གི་སེམས་སྐྱོ་རུ་འཇུག་པའི་ཕྱིར་མ་ཡིན༌པར། བདག་གིས་ཁྱོད་ཅག་ལ་ཤིན་ཏུ་གཅེས་པ་ནི་ཁྱོད་ཅག་ལ་ཤེས་སུ་འཇུག་པའི་ཕྱིར༌ཡིན་ནོ།།
2CO 2:5 སུ་ཞིག་གིས་མི་སེམས་སྐྱོ་བར་བྱེད༌ན། མི་དེ་ཡིས་བདག་སེམས་སྐྱོ་བར་བྱས་པར་མ་ཟད། ཁྱོད་ཅག་ཐམས་ཅད་ལའང་སེམས་ཅུང་ཙམ་སྐྱོ་རུ་འཇུག༌པ་ཡིན། བདག་གིས་དེ་ལྟར་སྨྲས་པ་ཕལ་ཆེར་འུད་ཆེ་ཡང་སྲིད༌མོད།
2CO 2:6 འོན་ཀྱང་མི་དེ་ལྟ་བུར་མི་མང་ཤས་ཀྱི་ཆད་པ་འཕོག་པས་ཆོག་ལ།
2CO 2:7 ཁོ་རང་སྐྱོ་སྡུག་ཆེན་པོས་མནར་ནས་ཡོངས་སུ་མི་ཕམ་པའི༌ཕྱིར། དེ་ལས་ལྡོག་པར་ཁོ་ལ་གུ་ཡངས་གཏོང་བ་དང་སེམས་གསོ་བྱ་འོས་སོ།།
2CO 2:8 དེའི༌ཕྱིར། ཁྱོད་རྣམས་ཀྱིས་ཁོ་ལ་ཡང་བསྐྱར་བྱམས་པ་གནང་བར་བྱའོ་ཞེས་བདག་གིས་བསྐུལ༌བ་ཡིན།
2CO 2:9 བདག་གིས་དེ་སྔར་ཁྱོད་རྣམས་ལ་འཕྲིན་ཡིག་འབྲི་དོན་ནི་ཁྱོད་རྣམས་ཀྱིས་དོན་ཀུན་ནས་བདག་དང་བསྟུན་མིན་ལ་བརྟགས༌པ་ཡིན།
2CO 2:10 ཁྱོད་རྣམས་ཀྱིས་མི་སུ་ཞིག་ལ་གུ་ཡངས་བཏང་ན། བདག་གིས་ཀྱང་དེ་ལྟར་གུ་ཡངས་གཏོང༌བ་དང་། བདག་གིས་དོན་གང་ཞིག་ལ་གུ་ཡངས་བཏང་བ་ཡིན༌ན། དེ་ནི་སྐྱབས་མགོན་མཱ་ཤི་ཀའི་སྤྱན་དྲུང་ནས་ཁྱོད་རྣམས་ཀྱི་ཆེད་དུ་གུ་ཡངས་བཏང་བ་ཡིན༌ཏེ།
2CO 2:11 བདུད་སཱ་ཏན་གྱིས་གླགས་བཙལ་ནས་བདག་ཅག་ལས་མི་རྒྱལ་བའི་ཕྱིར་དེ་ལྟར་བྱ་དགོས་སོ།། རྒྱུ་མཚན་ནི་བདག་ཅག་གིས་བདུད་ཀྱི་གཡོ་ཐབས་མི་ཤེས་པ་མ་ཡིན་པའི་ཕྱིར༌རོ།།
2CO 2:12 སྔོན་ཆད་བདག་ནི་སྐྱབས་མགོན་མཱ་ཤི་ཀའི་འཕྲིན་བཟང་སྒྲོག་པའི་དོན་དུ་ཏྲོ་ཡཱ་རུ་སོང་བ་ན། གཙོ་བོས་ཀྱང་བདག་ལ་སྒོ༌ཕྱེས་བྱུང་།
2CO 2:13 དུས༌དེར། བདག་གི་སྤུན་ཟླ་ཐེ་ཏུ་དང་མ་ཕྲད་པས། ངའི་སེམས་མ་བདེ་བར་ཡུལ་དེའི་མི་རྣམས་དང་ཁ་བྲལ་ནས་མ་ཀེ་དོན་ཡཱ་ཡུལ་དུ་སོང༌ངོ༌།།
2CO 2:14 དཀོན་མཆོག་གིས་རྟག་ཏུ་སྐྱབས་མགོན་མཱ་ཤི་ཀའི་ནང་དུ་བདག་ཅག་ཁྲིད་དེ་རྣམ་པར་རྒྱལ་བར་མཛད་པ༌དང༌། བདག་ཅག་བརྒྱུད་ནས་ཡུལ་ཀུན་ཏུ་སྐྱབས་མགོན་མཱ་ཤི་ཀ་ངོ་ཤེས་པའི་དྲི་ཞིམ་ཁྱབ་པར་མཛད་པས་ཁོང་ལ་ཐུགས་རྗེ་ཆེ༌ཞུའོ།།
2CO 2:15 བདག་ཅག་ནི་དཀོན་མཆོག་གི་སྤྱན་དྲུང༌དུ། ཐར་པ་འཐོབ་བཞིན་པ་དང་འཇིག་བཞིན་པའི་མི་རྣམས་ལ་སྐྱབས་མགོན་མཱ་ཤི་ཀའི་དྲི་ཞིམ་ཡིན་ལ།
2CO 2:16 མི་གཅིག་ལ་འཆི་རུ་འཇུག་པའི་དྲི་མ༌དང༌། མི་གཞན་ལ་གསོན་དུ་འཇུག་པའི་དྲི་མའང་ཡིན། སུ་ཞིག་གིས་དོན་དེ་ལྟ་བུ་བསྒྲུབ་ནུས༌སམ་ཞེ་ན་མི་ནུས་སོ།།
2CO 2:17 ངེད་ཅག་ནི་ཁེ་ཕན་གྱི་དོན་དུ་དཀོན་མཆོག་གི་བཀའ་ལ་ལྷད་འཇུག་མཁན་གྱི་མི་མང་པོ་དང་མི་འདྲ༌སྟེ། ངེད་ཅག་ནི་གཤིས་རྒྱུད་དྲང་ཞིང་དཀོན་མཆོག་ནས་ཡོང་བ༌དང༌། དཀོན་མཆོག་གི་སྤྱན་དྲུང་དུ་སྐྱབས་མགོན་མཱ་ཤི་ཀར་བརྟེན་ནས་བཀའ་སྒྲོག་མཁན་ཡིན༌ནོ།།
2CO 3:1 ངེད་ཅག་གིས་སླར་ཡང་རང་ལ་བསྟོད་པ་བྱེད༌དམ། མི་གཞན་དག་ལྟར་ངེད་ཅག་གི་མཚམས་སྦྱོར་ཡི་གེ་ཁྱོད་རྣམས་ལ་སྤྲོད༌པའམ། ཡང་ན་ཁྱོད་ཅག་གི་མཚམས་སྦྱོར་ཡི་གེ་མི་གཞན་ལ་སྤྲོད་དགོས་སམ་ཞེ་ན་མི་དགོས་སོ།།
2CO 3:2 ཁྱོད་རྣམས་ནི་ངེད་ཅག་གི་སེམས་སུ་བྲིས་པའི་ངོ་སྤྲོད་ཡི་གེ་ཡིན༌ཏེ། མི་ཀུན་གྱིས་ཤེས་ཤིང་ཀློག༌པ་ཡིན།
2CO 3:3 ཁྱོད་ཅག་ནི་སྐྱབས་མགོན་མཱ་ཤི་ཀའི་འཕྲིན་ཡིག་ཡིན་པར་མངོན་ཞིང་། ངེད་ཅག་ལ་བརྟེན་ནས་བྱུང་བ་ཡིན་ལ། དེ་ནི་སྣག་ཚས་བྲིས་པ་མ་ཡིན་པར་གཏན་དུ་གསོན་པོར་བཞུགས་པའི་དཀོན་མཆོག་གི་ཐུགས་ཉིད་ཀྱིས་ཕྱག་བྲིས་གནང༌ཞིང༌། རྡོ་ལེབ་སྟེང་དུ་བྲིས་པ་མ་ཡིན་པར་མིའི་སེམས་ནང་དུ་བྲིས་པ་ཡིན༌ནོ།།
2CO 3:4 སྐྱབས་མགོན་མཱ་ཤི་ཀ་བརྒྱུད་ནས་ངེད་ཅག་ལ་དཀོན་མཆོག་གི་སྤྱན་དྲུང་དུ་ཡིད་ཆེས་དེ་འདྲ་ཡོད་པ་ཡིན།
2CO 3:5 ངེད་ཅག་གིས་རང་ལ་བརྟེན་ནས་གང་ཞིག་བསྒྲུབ་ནུས་པར་བསམ་པ་མིན༌ཏེ། གང་ཞིག་བསྒྲུབ་ནུས་པ་ནི་དཀོན་མཆོག་ལ་བརྟེན་ནས་བྱུང༌བ་ཡིན།
2CO 3:6 ཁོང་གིས་ཀྱང་ངེད་ཅག་ནི་ཞལ་ཆད་གསར་པའི་ཞབས་ཕྱི་པ་བྱེད་ནུས་པར་མཛད༌ཅིང༌། དེ་ནི་བཀའ་ཁྲིམས་ལས་བྱུང་བ་མ་ཡིན་པར་དམ་པའི་ཐུགས་ཉིད་ལས་བྱུང་བ་ཡིན༌ཏེ། བཀའ་ཁྲིམས་ཀྱིས་འཆི་རུ་འཇུག་པ༌དང༌། དམ་པའི་ཐུགས་ཉིད་ཀྱིས་གསོན་དུ་འཇུག་པའི་ཕྱིར༌རོ།།
2CO 3:7 སྔོན་ཆད་རྡོའི་སྟེང་དུ་ཡི་གེ་བརྐོས་ཤིང་འཆི་བར་གཏོགས་པའི་ཞབས་ཏོག་དེ་ལ་གཟི་འོད་ཡོད་པ༌དང༌། མོ་ཤེའི་གདོང་གི་གཟི་འོད་ཉམས་བཞིན་ཡོད་ཀྱང་ད་དུང་གཟི་འོད་ཡོད༌པས། ཡེས་ར་ཨེལ་གྱི་བུ་རྒྱུད་ཀྱིས་ཁོང་གི་གདོང་ལ་མིག་གིས་ཐད་ཀར་ལྟ་མ་ནུས༌ན།
2CO 3:8 དམ་པའི་ཐུགས་ཉིད་ཀྱི་ཞབས་ཏོག་ལ་ལྷག་ཏུ་གཟི་འོད་ལྡན་པ་མ་ཡིན༌ནམ།
2CO 3:9 གལ༌ཏེ། ཉེས་ཆད་གཅོད་པའི་ཞབས་ཏོག་ལ་གཟི་འོད་ཡོད༌ན། རྣམ་པར་དག་པ་ལ་གཏོགས་པའི་ཞབས་ཏོག་ལ་དེ་བས་ཀྱང་གཟི་འོད༌ཆེའོ།།
2CO 3:10 སྔོན་ཆད་གཟི་འོད་ཡོད་པ་དེ་ནི་ད་ལྟའི་གཟི་འོད་ཆེན་པོ་འདིའི་དབང་གིས་གཟི་འོད་ལྡན་པར་གྱུར་པ་མིན།
2CO 3:11 དེ་སྔར་ཉམས་པར་གྱུར་པ་དེ་ལ་གཟི་འོད་ཡོད་ན། གཏན་དུ་བཞུགས་པ་དེ་ལ་ལྷག་ཏུ་གཟི་འོད་ལྡན་པ་ཡིན༌ནོ།།
2CO 3:12 དེའི་ཕྱིར། ངེད་ཅག་ལ་རེ་བ་དེ་ལྟ་བུ་ཡོད་པས་སྤོབས་པ་ཆེན་པོས༌སྨྲ་བ་ཡིན་ནོ།།
2CO 3:13 དེ་ནི་མོ་ཤེ་ཡིས་རང་གི་གདོང་ལ་སེང་རས་བཀབ་སྟེ་ཡེས་ར་ཨེལ་གྱི་བུ་རྒྱུད་ལ་ཉམས་པར་འགྱུར་བའི་གཟི་འོད་ཐད་ཀར་མི་མཐོང་བར་བྱས་པ་དང་མི་མཚུངས་སོ།།
2CO 3:14 འོན༌ཀྱང༌། དེ་དག་གི་སེམས་རྒྱུད་གྱོང་པོ་ཡིན༌ཏེ། ད་ལྟའི་བར་དུ་ཞལ་ཆད་རྙིང་པའི་གཞུང་དོན་བཀླགས་ནའང་སེང་རས་དེ་བླངས་མེད་དོ།། རྒྱུ་མཚན་ནི་སྐྱབས་མགོན་མཱ་ཤི་ཀའི་ནང་ནས་སེང་རས་དེ་ལེན་ནུས༌པའི་ཕྱིར་རོ།།
2CO 3:15 དེང་གི་བར་དུ་མོ་ཤེའི་མདོ་ཀློག་ཐེངས་རེ༌རེར། སེང་རས་དེས་ཡེས་ར་ཨེལ་མི་རྣམས་ཀྱི་སེམས་གཡོགས་འདུག
2CO 3:16 འོན༌ཀྱང༌། སུ་ཞིག་དུས་ནམ་ཞིག་ལ་གཙོ་བོའི་ཕྱོགས་སུ་འཁོར༌ན། དེའི་དུས་སུ་སེང་རས་དེ་ཡང་ལེན་ངེས༌ཡིན།
2CO 3:17 གཙོ་བོ་ནི་ཐུགས་ཉིད༌ཡིན། གཙོ་བོའི་ཐུགས་ཉིད་དེ་གང་དུ་བཞུགས་ན་དེ་རུ་རང་དབང་ཡོད་དོ།།
2CO 3:18 བདག་ཅག་ཐམས་ཅད་ཀྱིས་གདོང་མ་གཡོགས་པར་གཙོ་བོའི་གཟི་འོད་མཐོང་བ་ནི་མེ་ལོང་ལས་ཕྱིར་སྣང་བ་དང་མཚུངས༌ཤིང༌། བདག་ཅག་ཐམས་ཅད་ནི་གཙོ་བོའི་སྣང་བརྙན་དང་མཚུངས་པར་འགྱུར་བཞིན་པ༌དང༌། དེ་ནི་རིམ་བཞིན་གཟི་བརྗིད་ཀྱི་སྟེང་དུ་གཟི་བརྗིད་བསྣན་པར་འགྱུར་ཞིང་ཐུགས་ཉིད་ཡིན་པའི་གཙོ་བོ་ནས་བྱུང་ངོ་།།
2CO 4:1 དེ་ལྟར་ཡིན་པས། ངེད་ཅག་ལ་ཐུགས་རྗེའི་སྒོ་ནས་ཞབས་ཏོག་བྱེད་པའི་ལས་འགན་འདི་ཐོབ་པས་དཔའ་མི་ཞུམ༌པར།
2CO 4:2 ལྐོག་གྱུར་དང་ངོ་ཚའི་དོན་རྣམས་སྤངས་ཤིང་གཡོ་སྒྱུ་མི་བྱེད་པ་དང་དཀོན་མཆོག་གི་བཀའ་ལའང་ལྷད་ཞུགས་སུ་མི་འཇུག༌པར། དཀོན་མཆོག་གི་བདེན་པ་ཉིད་ཁོ་ན་གསལ་པོར་བསྟན༌ཏེ། དཀོན་མཆོག་གི་སྤྱན་སྔར་རང་ཉིད་ནི་མི་ཚང་མའི་བསམ་པ་ལ་གཏོད་པར་བརྩོན་པ་ཡིན་ནོ།།
2CO 4:3 གལ༌ཏེ། ངེད་ཅག་གི་འཕྲིན་བཟང་བསྒྲིབས་པར་གྱུར༌ན། འཇིག་པར་འགྱུར་བའི་མི་རྣམས་ཀྱི་ཁྲོད་དུ་བསྒྲིབས༌པ་ཡིན།
2CO 4:4 འཇིག་རྟེན་འདིའི་ལྷ་ཡིས་དད་པ་མེད་པའི་མི་རྣམས་ཀྱི་སེམས་རྨོངས་པར་བྱས༌ཏེ། སྐྱབས་མགོན་མཱ་ཤི་ཀའི་གཟི་བརྗིད་དང་ལྡན་པའི་འཕྲིན་བཟང་གི་འོད་སྣང་ཁོ་རྣམས་ལ་འཕྲོ་རུ་མི་འཇུག༌པའི་ཕྱིར་རོ།། སྐྱབས་མགོན་མཱ་ཤི་ཀ་ནི་དཀོན་མཆོག་གི་སྣང་བརྙན་ཡིན།
2CO 4:5 ངེད་ཅག་གིས་རང་ཉིད་སྒྲོག་པ་མ་ཡིན༌པར། ཡེ་ཤུ་མཱ་ཤི་ཀ་ནི་གཙོ་བོ་ཡིན༌པ་དང་། སྐྱབས་མགོན་ཡེ་ཤུའི་དོན་དུ་ངེད་ཅག་ནི་ཁྱོད་རྣམས་ཀྱི་གཡོག་པོ་ཡིན་པ་སྒྲོག༌པ་ཡིན།
2CO 4:6 ཡེ་ཤུ་མཱ་ཤི་ཀའི་ཞལ་རས་ནས་མངོན་པའི་དཀོན་མཆོག་གི་གཟི་འོད་དེ་བདག་ཅག་ལ་ཤེས་སུ་འཇུག་པའི་ཕྱིར། མུན་པའི་ཁྲོད་ནས་འོད་སྤྲོ་བར་བཀའ་གནང་མཁན་དཀོན་མཆོག་ནི་བདག་ཅག་གི་སེམས་ནང་དུ་འཕྲོས༌སོ༎
2CO 4:7 འོན་ཀྱང་། དཔག་ཏུ་མེད་པའི་ནུས་མཐུ་ནི་དཀོན་མཆོག་ནས་བྱུང་བ་ལས་བདག་ཅག་ལས་བྱུང་བ་མ་ཡིན༌པའི་དོན་དེ་མངོན་པའི་ཕྱིར། བདག་ཅག་གི་ནོར་བུ་འདི་ནི་རྫ་ཆས་ནང་དུ་བཞག་ཡོད༌པ་ཡིན༌ནོ།།
2CO 4:8 ངེད་ཅག་ལ་ཕྱོགས་བཞི་ནས་དཀའ་སྡུག་གིས་མནན་ཡང་བཙིར་མི་ནུས་ལ། སེམས་ནི་ཅི་བྱ་གཏོལ་མེད་དུ་གྱུར་ནའང་བློ་མི༌ཕམ་མོ།།
2CO 4:9 གཉའ་གནོན་མྱངས་ཀྱང་འདོར་བ་མིན། ས་རུ་བསྒྱེལ་ཡང་འཆི་བར་གྱུར་མེད་དོ།།
2CO 4:10 སྐྱབས་མགོན་ཡེ་ཤུའི་ཚེ་སྲོག་ཀྱང་ངེད་ཅག་གི་སྟེང་དུ་གསལ་པོར་མངོན་པར་བྱེད༌པའི་ཕྱིར། ངེད་ཅག་གིས་རྟག་ཏུ་སྐྱབས་མགོན་ཡེ་ཤུ་སྐུ་གྲོངས་པའི་དོན་དེ་ལུས་ལ་འཁུར༌བ་ཡིན།
2CO 4:11 ཡང་ཁོང་ཉིད་ཀྱི་ཚེ་སྲོག་དེ་ངེད་ཅག་གི་འཆི་བར་འགྱུར་བའི་ལུས་སྟེང་ནས་གསལ་པོར་མངོན་པའི་ཕྱིར། ངེད་ཅག་གསོན་པོར་གནས༌ཀྱང༌། རྟག་ཏུ་སྐྱབས་མགོན་ཡེ་ཤུའི་དོན་དུ་འཆི་ལམ་ལ་བརྫངས༌པ་ཡིན་ནོ།།
2CO 4:12 དེའི༌ཕྱིར། འཆི་བས་ངེད་ཅག་གི་ནང་དུ་ལས་བྱེད་ཀྱང༌། ཚེ་སྲོག་གིས་ཁྱོད་ཅག་གི་ནང་དུ་ལས་བྱེད་དོ།།
2CO 4:13 འོན༌ཀྱང༌། ངེད་ཅག་ལ་དད་སེམས་ཡོད༌དེ། གསུང་རབ་ཀྱི་མདོ་ལས་ཇི་སྐད༌དུ། བདག་གིས་དད་པ་བྱེད་པས་གཏམ་འདི་ལྟར་སྨྲས་པ་ཡིན་ཞེས་གསུངས་པ༌བཞིན། ངེད་ཅག་ལའང་དད་པའི་སེམས་དང་ལྡན་པས་གཏམ༌སྨྲ་བ་ཡིན་ནོ།།
2CO 4:14 སྐྱབས་མགོན་ཡེ་ཤུ་སླར་གསོན་པར་མཛད་མཁན་གྱིས་བདག་ཅག་ཀྱང་སྐྱབས་མགོན་ཡེ་ཤུ་དང་མཉམ་དུ་སླར་གསོན་པར་མཛད་ངེས་པར་མ༌ཟད། ངེད་ཅག་དང་ཁྱོད་རྣམས་ལྷན་དུ་ཁོང་གི་སྤྱན་སྔར་མཉམ་དུ་སྡོད་པར་མཛད་ངེས་པའང་བདག་ཅག་གིས་ཤེས་སོ།།
2CO 4:15 ཐུགས་རྗེས་མི་གྲངས་ཇེ་མང་དུ་སོང་བ་དང་བསྟུན༌ནས། ལྷག་ཏུ་བཀའ་དྲིན་ཞུ་མཁན་མང་དུ་མངོན་ཞིང་དཀོན་མཆོག་ལ་བསྟོད་བསྔགས་འབུལ་བར་འགྱུར་བའི་ཕྱིར། དོན་ཐམས་ཅད་ཁྱོད་ཅག་གི་ཆེད་དུ་ཡིན༌ནོ།།
2CO 4:16 དེའི༌ཕྱིར། བདག་ཅག་དཔའ་མི་ཞུམ་ལ། ཕྱིའི་ལུས་པོ་རླག་དང་བརླག་པར་འགྱུར་ནའང་ནང་སེམས་ནི་ཉིན་རེ་བཞིན་གསར་དུ་སྒྱུར་བ་ཡིན་ནོ།།
2CO 4:17 བདག་ཅག་གི་ཡུད་ཙམ་གྱི་སྡུག་བསྔལ་ཆུང་ངུ་འདིས་བདག་ཅག་ལ་བླ་ན་མེད་པ་དང་མཐའ་ཡས་པའི་གཟི་བརྗིད་འཐོབ་པར་བྱེད།
2CO 4:18 མིག་གིས་མཐོང་བ་དག་ནི་གནས་སྐབས་ཙམ་དང་མི་མཐོང་བ་དག་ནི་གཏན་དུ་གནས༌པས། བདག་ཅག་གིས་མིག་གིས་མཐོང་བ་དག་ལ་མི་བལྟ་བར་མིག་གིས་མི་མཐོང་བ་དག་ལ་བལྟ༌བར་བྱའོ།།
2CO 5:1 དེ་ལྟར་ཡིན་པས། བདག་ཅག་གི་ས་སྟེང་གི་ཁང་པ་ཡིན་པའི་གུར་འདི་བཤིག་པར་འགྱུར༌ཚེ། དཀོན་མཆོག་གིས་བསྐྲུན་པའི་སྡོད་གནས་ཤིག་བདག་ཅག་ལ་ཡོད་པ་དང་། དེ་ནི་མིའི་ལག་པས་བསྐྲུན་པ་མ་ཡིན༌ཞིང༌། ནམ་མཁའི་ཞིང་ཁམས་སུ་གཏན་དུ་གནས་པའི་ཁང་པ་ཞིག་འཐོབ་ངེས་པ་བདག་ཅག་གིས་ཤེས་སོ།།
2CO 5:2 བདག་ཅག་གིས་གུར་འདིའི་ནང་དུ་ཤུགས་རིང་འབྱིན་ཞིང་། ནམ་མཁའི་ཞིང་ཁམས་ནས་འཐོབ་པའི་སྡོད་གནས་དེ་ནི་གོས་བཞིན་དུ་གྱོན་འདོད༌པ་དང་།
2CO 5:3 གོས་དེ་གྱོན་པ་ཡིན་ན་གཅེར་བུར་མི་ལུས་སོ།།
2CO 5:4 བདག་ཅག་གིས་གུར་འདིའི་ནང་དུ་དཀའ་སྡུག་མྱོང་བཞིན་ཤུགས་རིང་འབྱིན༌མོད། འོན་ཀྱང་མི་རྟག་པ་ནི་མཐའ་མེད་པའི་ཚེ་སྲོག་གིས་ཁྱུར་མིད་བྱེད་པའི༌ཕྱིར། གོས་འདི་ཕུད་འདོད་པ་མ་ཡིན་པར་གོས་དེ་གྱོན་འདོད༌པ་ཡིན།
2CO 5:5 དོན་འདི་བདག་ཅག་གི་ཕྱིར་དུ་སྟ་གོན་མཛད་མཁན་ནི་དཀོན་མཆོག་ཡིན༌ལ། ཁོང་གིས་དམ་པའི་ཐུགས་ཉིད་བདག་ཅག་ལ་གཏའ་མར་གནང༌ངོ༌།།
2CO 5:6 དེའི༌ཕྱིར། བདག་ཅག་རྒྱུན་དུ་སྙིང་སྟོབས་ཆེ་བར་མ༌ཟད། ལུས་པོའི་ནང་སྡོད༌པ་ན་གཙོ་བོ་དང་ཁ་གྱེས་པའང་ཤེས་སོ།།
2CO 5:7 ཅིའི་ཕྱིར་ཞེ་ན། བདག་ཅག་གིས་དད་པར་བརྟེན་ནས་སྤྱོད་པ༌ལས། མིག་གིས་མཐོང་བ་ལ་བརྟེན་ནས་སྤྱོད་པ་མ་ཡིན་པའི་ཕྱིར༌རོ།།
2CO 5:8 བདག་ཅག་དཔའ་ངར་ཞུམ་མེད་དུ་གནས༌ཤིང༌། དེ་ལས་ཀྱང་ལུས་པོ་དང་ཁ་བྲལ་ནས་གཙོ་བོ་དང་ལྷན་དུ་སྡོད་འདོད༌པས།
2CO 5:9 ལུས་པོའི་ཕྱི་ནང་གང་དུ་བསྡད་ཀྱང་བདག་ཅག་གིས་ཕུགས་འདུན་བཅངས་ཏེ། སྐྱབས་མགོན་མཱ་ཤི་ཀའི་ཐུགས་དགྱེས་པ་དེ་ཉིད་འཐོབ་པར་བརྩོན༌པ་ཡིན།
2CO 5:10 རྒྱུ་མཚན་ནི་བདག་ཅག་ཐམས་ཅད་སྐྱབས་མགོན་མཱ་ཤི་ཀའི་ལེགས་ཉེས་ཀྱི་ཁྲིམས་ཐག་གཅོད་པའི་བཞུགས་ཁྲིའི་མདུན་དུ་ལང་དགོས་ཤིང་། ལུས་པོའི་ནང་གསོན་པའི་དུས་སུ་རང་རང་གིས་ཅི་བྱས་བཞིན་མི་རེ་རེར་བཟང་ངན་གང་རུང་གི་འབྲས་བུ་འཐོབ་པར་འགྱུར་བའི་ཕྱིར༌རོ།།
2CO 5:11 དེ་བས་ན། ངེད་ཅག་གིས་གཙོ་བོ་ལ་འཇིགས་པ་ཤེས་པས་མི་རྣམས་ལ་བསྐུལ་བར༌བྱའོ།། འོན་ཀྱང་ངེད་རྣམས་དཀོན་མཆོག་གི་སྤྱན་སྔར་མངོན་པར་གསལ་བ་བཞིན༌དུ། ཁྱོད་ཅག་གི་བསམ་པ་ལའང་མངོན་པར་གསལ་བའི་རེ་བ་བྱའོ།།
2CO 5:12 ངེད་ཅག་གིས་ཁྱོད་རྣམས་ལ་རང་གིས་རང་ལ་འུད་བསྟོད་བྱེད་པ་མིན༌ཏེ། སེམས་ལ་མི་བརྟེན་པར་ཕྱིའི་རྣམ་པར་བརྟེན་ནས་འུད་བསྟོད་བྱེད་མཁན་དག་ལ་ལན་ཡོད་པར་འགྱུར་བའི༌ཕྱིར་དུ། ཁྱོད་ཅག་གིས་ངེད་ཅག་ལ་བསྟོད་པ་བྱ་བའི་གོ་སྐབས་ཤིག་སྟེར་རོ།།
2CO 5:13 གལ༌ཏེ། ངེད་ཅག་སྨྱོས་པ་ཡིན་ན་དཀོན་མཆོག་གི་ཆེད་དུ་ཡིན༌ལ། དྭངས་གསལ་ཡིན་ན་ཁྱོད་ཅག་གི་དོན་དུ་ཡིན།
2CO 5:14 ངེད་ཅག་གི་སེམས་སུ་མི་ཐམས་ཅད་ཀྱི་ཚབ་ཏུ་མི་གཅིག་སྐུ་གྲོངས་པ་ཡིན་ན་མི་ཐམས་ཅད་ཀྱང་ཤི་བ་ཐག་གིས་ཆོད་པས། སྐྱབས་མགོན་མཱ་ཤི་ཀའི་བྱམས་པས་ངེད་ཅག་ལ་ངར་ཤུགས་སློང་བ་ཡིན།
2CO 5:15 སྐྱབས་མགོན་ཡེ་ཤུ་ནི་མི་ཐམས་ཅད་ཀྱི་ཆེད་དུ་སྐུ་གྲོངས་པ་ཡིན༌ཏེ། གསོན་པོར་གནས་པ་རྣམས་ནི་དེང་ཕྱིན་རང་ཉིད་ཀྱི་དོན་དུ་མི་གསོན༌པར། ཁོ་རྣམས་ཀྱི་ཆེད་དུ་སྐུ་གྲོངས་ཤིང་སླར་གསོན་པ་ཁོང་ཉིད་ཀྱི་དོན་དུ་གསོན་དགོས་པའི་ཕྱིར༌རོ།།
2CO 5:16 དེའི༌ཕྱིར། བདག་ཅག་གིས་ད་ནས་བཟུང་མིའི་ཕྱི་ཡི་རྣམ་པར་མི༌བལྟའོ།། དེ་སྔོན་ཕྱིའི་རྣམ་པར་བལྟས་ནས་སྐྱབས་མགོན་མཱ་ཤི་ཀ་ངོས་བཟུང་མྱོང་ཡང་ད་ལྟ་དེ་ལྟར་ངོས་མི་འཛིན་པས།
2CO 5:17 སུ་ཞིག་སྐྱབས་མགོན་མཱ་ཤི་ཀའི་ནང་དུ་ཡོད༌ན། མི་དེ་ནི་གསར་དུ་བསྐྲུན་པའི་མི་ཡིན༌ལ། འདས་དོན་ཚང་མ་མེད་པར་གྱུར་ཅིང་། ལྟོས་དང་། གསར་པ་དེ་བྱུང་འདུག་གོ།
2CO 5:18 དོན་ཐམས་ཅད་ནི་དཀོན་མཆོག་ནས་བྱུང་བ༌སྟེ། ཁོང་གིས་སྐྱབས་མགོན་མཱ་ཤི་ཀ་བརྒྱུད་ནས་བདག་ཅག་ཁོང་དང་འདུམ་པར་མཛད་པ༌དང༌། མི་རྣམས་ཁོང་དང་འདུམ་པར་མཛད་པའི་ལས་འགན་ཡང་བདག་ཅག་ལ་གནང༌བ་ཡིན།
2CO 5:19 དེ་ནི་དཀོན་མཆོག་གིས་སྐྱབས་མགོན་མཱ་ཤི་ཀའི་ནང་དུ་འཇིག་རྟེན་གྱི་མི་རྣམས་ཁོང་ཉིད་དང་འདུམ་པར་མཛད༌ཅིང༌། ཁོ་རྣམས་ཀྱི་ཉེས་སྐྱོན་ཁོ་རྣམས་ལ་མི་འགེལ༌བར། འདུམ་པར་མཛད་པའི་བཀའ་ཡང་བདག་ཅག་ལ་བཅོལ་བ་ཡིན།
2CO 5:20 དེ་བས་ངེད་ཅག་ནི་སྐྱབས་མགོན་མཱ་ཤི་ཀའི་སྐུ་ཚབ་པ་ཡིན༌ལ། དཀོན་མཆོག་གིས་ངེད་ཅག་བརྒྱུད་ནས་ཁྱོད་རྣམས་ལ་བསྐུལ་བ༌བཞིན། ངེད་ཅག་གིས་སྐྱབས་མགོན་མཱ་ཤི་ཀའི་ཚབ་བྱས་ནས་ཁྱོད་རྣམས་དཀོན་མཆོག་དང་འདུམ་པར༌ཞུའོ།།
2CO 5:21 བདག་ཅག་སྐྱབས་མགོན་མཱ་ཤི་ཀའི་ནང་ནས་དཀོན་མཆོག་གི་མི་རྣམ་དག་ཏུ་འགྱུར་བའི༌ཕྱིར། དཀོན་མཆོག་གིས་སྡིག་པ་མེད་པ་དེ་ཉིད་བདག་ཅག་གི་ཚབ་ཏུ་སྡིག་པར་མཛད༌དོ།།
2CO 6:1 དཀོན་མཆོག་གི་ལས་གྲོགས་ཡིན་པ་ངེད་ཅག་གིས་ཁྱོད་རྣམས་ལ་ཁོང་གི་ཐུགས་རྗེ་དོན་མེད་དུ་དང་ལེན་མི་བྱེད་པར་བསྐུལ༌བ་ཡིན་ནོ།།
2CO 6:2 ཅིའི་ཕྱིར་ཞེ་ན། དཀོན་མཆོག་གིས་འདི་སྐད༌དུ། ཐུགས་དགྱེས་དུས་སུ་བདག་གིས་ཁྱོད་ཀྱི་སྨོན་ལམ༌བསྐངས།། སྐྱོབ་པའི་ཉིན་མོར་བདག་གིས་ཁྱོད་ལ་རོགས་རམ༌མཛད།། ཅེས་གསུངས་པའི་ཕྱིར༌རོ།། ལྟོས༌དང༌། ད་ནི་འོས་ཤིང་འཚམ་པའི་དུས་ལ་བབས། ལྟོས་དང་། ད་ལྟ་ནི་སྐྱོབ་པའི་ཉིན་མོ་ཡིན༌ནོ།།
2CO 6:3 ངེད་ཅག་གི་ཞབས་ཏོག་བྱེད་པའི་ལས་འགན་འདི་ལ་མི་གཞན་གྱིས་སྐྱོན་བརྗོད་མི་བྱེད་པའི༌ཕྱིར། ངེད་ཅག་གིས་ལས་གང་གི་ཆ་ནས་ཀྱང་བར་ཆད་མི༌བཟོ་ལ།
2CO 6:4 དོན་ཐམས་ཅད་ཀྱི་ཐད་ནས་ཀྱང་རང་ཉིད་ནི་དཀོན་མཆོག་གི་ཞབས་ཕྱི་པ་ཡིན་པ་གསལ་པོར་སྟོན་པ༌སྟེ། དཔེར༌ན། བཟོད་བསྲན༌དང༌། དཀའ༌སྡུག ཉམ་ཐག ཆག་སྒོ།
2CO 6:5 གཅར༌རྡུང༌། བཙོན༌འཇུག ཟིང༌སློང༌། ལས་ལ་བརྩོན་པ། གཉིད་མི་ཁུག༌པ། ཟས་མི་སྤྱོད༌པ།
2CO 6:6 སྤྱོད་གཙང༌། ཡོན༌ཏན། བཟོད༌པ། སྙིང༌རྗེ། དམ་པའི་ཐུགས་ཉིད། བཅོས་མ་མིན་པའི་བྱམས༌པ།
2CO 6:7 གཏམ་བདེན༌པ། དཀོན་མཆོག་གི་ནུས་མཐུ་ཆེན༌པོ། ལག་པ་གཡས་གཡོན་དུ་ཡོད་པའི་དྲང་བདེན་གྱི་མཚོན༌ཆ།
2CO 6:8 གཟི༌བརྗིད། ངོ༌ཚ། མིང༌ངན། མཚན༌སྙན། བལྟས་ན་བསླུ་བྲིད་ཡིན་ཡང་དོན་ལ་དྲང་པོ་ཡིན༌པ།
2CO 6:9 བལྟས་ན་ཅང་གིས་ངོ་མི་ཤེས་ཀྱང་དོན་ལ་ཀུན་གྱིས་ངོ་ཤེས་པ། བལྟས་ན་འཆི་ལ་ཉེ་ཡང་དོན་ལ་གསོན་པོ་ཡིན༌ལ། བལྟས་ན་ཉེས་ཆད་ཕོག་ཀྱང་དོན་ལ་སྲོག་མི་འཆོར་བ།
2CO 6:10 བལྟས་ན་སེམས་སྐྱོ་ཡང་དོན་ལ་ནམ་རྒྱུན་དགའ་སྤྲོས་ཁེངས༌པ། བལྟས་ན་དབུལ་ཕོངས་ཡིན་ཡང་དོན་ལ་མི་མང་པོ་ཕྱུག་པར་བྱེད༌པ། བལྟས་ན་ཅི་ཡང་མེད་ཀྱང་དོན་ལ་ཐམས་ཅད་འཛོམས་པ་ལྟ༌བུའོ།།
2CO 6:11 ཀོ་རིན་ཐུ་པ་རྣམས། ངེད་ཅག་གིས་ཁྱོད་རྣམས་ལ་གཏམ་དྲང་པོར་སྨྲ་ཞིང་སེམས་རྒྱ་ནི༌ཆེའོ།།
2CO 6:12 ཁྱོད་རྣམས་གུ་དོག་པ་ནི་ངེད་ཅག་གི་རྐྱེན་གྱིས་མིན༌ཏེ། ཁྱོད་ཅག་གི་སེམས་རྒྱ་ཆུང་བ་ལ་རག་ལས༌པ་ཡིན།
2CO 6:13 ཁྱོད་ཅག་གིས་ཀྱང་སེམས་རྒྱ་ཆེ་བའི་ངང་ནས་ངེད་རྣམས་ལ་དྲིན་ལན་གཞལ་དགོས༌ཏེ། བདག་གི་གཏམ་འདི་ནི་བུ་ཕྲུག་ལ་སྨྲ་བ་དང་མཚུངས༌སོ།།
2CO 6:14 ཁྱོད་ཅག་གིས་དད་མེད་རྣམས་དང་མཉམ་དུ་གཉའ་ཤིང་མ་ཁུར༌ཅིག དྲང་བདེན་དང་ཁྲིམས་མེད་ལུགས་མེད་གཉིས་ལ་འབྲེལ་བ་ཅི་ཡོད་དམ། འོད་དང་མུན་པ་གཉིས་ལ་འབྲེལ་བ་ཡོད་ནུས་སམ།
2CO 6:15 སྐྱབས་མགོན་མཱ་ཤི་ཀ་དང་པེལ་ལེ་ཨར་གཉིས་ལ་གཞི་མཐུན་ས་ཅི་ཡོད༌དམ། དད་པ་བྱེད་མཁན་དང་དད་པ་མི་བྱེད་མཁན་གཉིས་ལ་འབྲེལ་བ་ཅི་ཡོད༌དམ།
2CO 6:16 དཀོན་མཆོག་གི་མཆོད་ཁང་དང་སྐུ་འདྲ་གཉིས་ལ་མཐུན་ས་ཡོད་དམ་ཞེ་ན་མེད་དོ།། ཅིའི་ཕྱིར་ཞེ་ན། བདག་ཅག་ནི་གཏན་དུ་གསོན་པོར་བཞུགས་པའི་དཀོན་མཆོག་གི་མཆོད་ཁང་ཡིན༌ཏེ། སྔར་དཀོན་མཆོག་གིས་འདི་སྐད༌དུ། བདག་ནི་དེ་རྣམས་ནང་དུ་སྡོད་པ༌དང༌།། དེ་དག་ཁྲོད་ནས་འགྲོ་འོང་བྱེད་པ༌དང༌།། བདག་ནི་དེ་ཚོའི་དཀོན་མཆོག་བྱེད་པ༌དང༌།། དེ་རྣམས་བདག་གི་འབངས་མི་ཡིན་པར༌འགྱུར།། ཞེས༌དང༌།
2CO 6:17 ཡང་གཙོ་བོ་ལགས་ཀྱིས་འདི་སྐད༌དུ། དེའི༌ཕྱིར་ཁྱོད་རྣམས་དེ་དག་ལས་ཐོན་ཤོག ། དེ་དག་ལ་ནི་དབྱེ་བ་འབྱེད་པར༌ཤོག ། མི་གཙང་བ་ལ་རེག་པར་མ་བྱེད༌ཅིག ། བདག་གིས་ཁྱོད་རྣམས་དྲུང་དུ་ལེན་པར༌བྱེད།།
2CO 6:18 བདག་ནི་ཁྱོད་ཚོའི་ཕ་རུ་བྱེད་པ༌དང༌།། ཁྱོད་རྣམས་བདག་གི་བུ་དང་བུ་མོར༌འགྱུར།། ཞེས་ཀུན་དབང་གཙོ་བོས་བཀའ་བསྩལ༌པའོ།།
2CO 7:1 དེ་བས་ན། སྙིང་ཉེ་བའི་སྤུན་ཟླ༌རྣམས། བདག་ཅག་ལ་དེ་ལྟ་བུའི་ཞལ་བཞེས་ཡོད་པས་རང་ཉིད་གཙང་མར་བྱས༌ཏེ། ལུས་སེམས་ཀྱི་མི་གཙང་བ་ཐམས་ཅད་དོར་ནས་དཀོན་མཆོག་ལ་གུས་ཤིང་འཇིགས་པའི་ངང་ནས་དམ་པ་རུ་འགྱུར་བར་བྱེད་དགོས་སོ།།
2CO 7:2 ཁྱོད་རྣམས་ཀྱིས་སེམས་རྒྱ་བསྐྱེད་ནས་ངེད་ཅག་དང་ལེན་བྱེད་པར༌གྱིས། ངེད་ཅག་གིས་མི་སུ་ལའང་གྱོང་གུད་མ༌བཟོས། སུ་ཡང་ཉམས་དམས་སུ་མ་བཏང་། སུ་ལས་ཀྱང་ཁེ་བཟང་མ་བླངས་སོ།།
2CO 7:3 བདག་གིས་འདི་ལྟར་སྨྲས་པ་ནི་ཁྱོད་རྣམས་ལ་སྐྱོན་སྨྲ་བའི་ཕྱིར་མིན༌ཏེ། ཁྱོད་རྣམས་རྟག་ཏུ་ངེད་ཅག་གི་སེམས་སུ་གནས༌ཤིང༌། བདག་ཅག་གསོན་ན་མཉམ་གསོན་དང་ཤི་ན་མཉམ་ཤི་བྱེད་པར་དགའ་ཞེས་དེ་སྔར་བདག་གིས་སྨྲས་མྱོང༌།
2CO 7:4 བདག་གིས་སྤོབས་པ་ཆེན་པོས་ཁྱོད་རྣམས་ལ་གཏམ་སྨྲས༌ཤིང༌། ཁྱོད་ཅག་གི་རྐྱེན་གྱིས་བསྟོད་པ་མང་པོ་བརྗོད་ཅིང་སེམས་གསོ་ཆེན་པོ་ཐོབ༌པ་དང་། ངེད་ཅག་ལ་དཀའ་སྡུག་ཐམས་ཅད་ཀྱི་ཁྲོད་ནས་དགའ་སྤྲོ་དཔག་མེད་བྱུང༌ངོ༌།།
2CO 7:5 དེ་ཡང་སྔོན་ཆད་ངེད་ཅག་མ་ཀེ་དོན་ཡཱ་ཡུལ་དུ་སླེབས་པའི་དུས༌སུ། རང་གི་ལུས་པོར་ངལ་གསོ་གང་ཡང་མ་བྱུང་བར། ཕྱོགས་བཞི་ནས་དཀའ་སྡུག་སྣ་ཚོགས་ལ༌ཕྲད་ཅིང་། ཕྱི་རུ་འཁྲུག་རྩོད་དང་ནང་དུ་འཇིགས་པ༌ཡོད་དོ།།
2CO 7:6 འོན༌ཀྱང༌། ཡིད་སྐྱོ་བ་རྣམས་ལ་སེམས་གསོ་གནང་མཁན་དཀོན་མཆོག་གིས་ཐེ་ཏུ་སླེབས་པ་བརྒྱུད་ནས་ངེད་ཅག་ལ་སེམས་གསོ་མཛད་པར་མ༌ཟད།
2CO 7:7 ཐེ་ཏུ་ཡིས་ཁྱོད་ཅག་ནས་ཐོབ་པའི་སེམས་གསོར་བརྟེན་ནས་ངེད་ཅག་ལ་སེམས་གསོ་བྱས་པ་ཡིན། ཁོས་ཁྱོད་ཅག་གི་དུང་སེམས༌དང༌། སེམས་སྡུག བདག་ལ་བཅངས་པའི་སྤྲོ་སེམས་ཐམས་ཅད་བདག་ལ་སྨྲས༌པས། ང་རང་སྔར་ལས་ལྷག་ཏུ་དགའ་བར་གྱུར་ཏོ།།
2CO 7:8 དེ་སྔར་བདག་གིས་འཕྲིན་ཡིག་བྲིས་ཏེ་ཁྱོད་རྣམས་ལ་སེམས་སྐྱོ་རུ་བཅུག་པས་ང་རང་རེ་ཞིག་འགྱོད་བྱུང་ལ། འཕྲིན་ཡིག་དེས་ཁྱོད་རྣམས་ལ་སེམས་སྐྱོ་རུ་བཅུག་པ་ནི་གནས་སྐབས་ཙམ་ཡིན་པ་བདག་གིས་ཤེས༌པས། ད་ནི་བདག་ལ་འགྱོད་པ་མེད་དོ།།
2CO 7:9 ད་ལྟ་ང་རང་དགའ་བ་ནི་ཁྱོད་ཅག་གི་སེམས་སྐྱོ་བའི་ཕྱིར་མིན༌ཏེ། ཁྱོད་ཅག་གིས་སྐྱོ་སེམས་ཀྱི་ཁྲོད་ནས་འགྱོད་བཤགས་བྱས་པའི་ཕྱིར༌ཡིན། རྒྱུ་མཚན་ནི་དཀོན་མཆོག་གི་ཐུགས་དགོངས་བཞིན་ཁྱོད་ཅག་གི་སེམས་སྐྱོ༌ཞིང༌། ལས་གང་ལའང་ངེད་ཅག་གི་རྐྱེན་གྱིས་གྱོང་གུད་ཐེབས་མི་སྲིད་པའི་ཕྱིར༌ཡིན།
2CO 7:10 དཀོན་མཆོག་གི་ཐུགས་དགོངས་བཞིན་སེམས་སྐྱོ་བ་ཡིས་ཐར་ལམ་ལ་འཁྲིད་པའི་འགྱོད་བཤགས་འབྱུང་དུ་འཇུག་ཅིང་། དོན་དེར་འགྱོད་པ་གཅིག་ཀྱང་མེད་དོ།། འོན་ཀྱང་། འཇིག་རྟེན་གྱི་སྐྱོ་གདུང་གིས་མི་རྣམས་འཆི་བར་བྱེད་པ་ཡིན།
2CO 7:11 ལྟོས༌དང༌། དཀོན་མཆོག་གི་ཐུགས་དགོངས་བཞིན་ཁྱོད་ཅག་གི་སེམས་སྐྱོ་བར་གྱུར་པ་ནས༌བཟུང༌། ཁྱོད་རྣམས་ལ་བརྩོན་འགྲུས༌དང༌། ཉེས་སྐྱོན་མེད་པ། ཁྲོ་གཏུམ། འཇིགས༌སྣང༌། དུང༌སེམས། སྤྲོ༌སེམས། རང་ལ་ཆད་པ་གཅོད་པ་བཅས་བྱུང་བ༌དང༌། དོན་དེ་ཐམས་ཅད་ལས་ཁྱོད་ཅག་གཙང་མ་ཡིན་པ་གསལ་པོར་མངོན་ནོ།།
2CO 7:12 བདག་གིས་སྔོན་ཆད་ཁྱོད་རྣམས་ལ་འཕྲིན་ཡིག་བྲིས༌ཤིང༌། དེ་ནི་ཉེས་སྐྱོན་བཟོ་མཁན་དེའི་ཆེད་དུ་མིན༌ལ། ཉེས་སྐྱོན་ཐེབས་མཁན་གྱི་དོན་དུའང་མ་ཡིན༌པར། དཀོན་མཆོག་གི་སྤྱན་སྔར་ཁྱོད་རྣམས་ཀྱིས་ངེད་ཅག་ལ་སེམས་ཁུར་བྱས་པའི་སྤྲོ་སེམས་དེ་ཉིད་ཁྱོད་ཅག་ལ་གསལ་པོར་མངོན་པའི་ཕྱིར་ཡིན༌པས།
2CO 7:13 ངེད་ཅག་ལ་སེམས་གསོ་ཐོབ་པར་མ༌ཟད། ཁྱོད་རྣམས་ཀྱིས་ཐེ་ཏུའི་ཡིད་སེམས་སྤྲོ་བར་བྱས་ཤིང་ཁོ་རང་དགའ་བར་གྱུར་པས་ངེད་ཅག་ལྷག་ཏུ་དགའ་ཞིང་སྤྲོ་བར་གྱུར་ཏོ།།
2CO 7:14 བདག་གིས་ཐེ་ཏུའི་མདུན་ནས་ཁྱོད་རྣམས་ལ་བསྔགས་བརྗོད་གང་ཞིག་བྱས་པ་ཡིན༌ན། བདག་ལ་ངོ་གནོང་བའི་དོན་མེད༌དེ། བདག་གིས་ཁྱོད་རྣམས་ལ་སྨྲས་པ་ཐམས་ཅད་བདེན་པ་ཡིན་པ༌ལྟར། ཐེ་ཏུའི་མདུན་ནས་ཁྱོད་རྣམས་ལ་བསྔགས་བརྗོད་བྱས་པའང་བདེན་པ་ཡིན།
2CO 7:15 ཐེ་ཏུས་ཁྱོད་རྣམས་ཐམས་ཅད་ཀྱིས་ཁོའི་ངག་ལ་མཉན་པ་དང་སྐྲག་ཅིང་འདར་བའི་ངང་ནས་ཁོ་ལ་སྣེ་ལེན་བྱས་པ་དྲན༌པས། ཁོ་རང་ཁྱོད་རྣམས་ལ་ལྷག་ཏུ༌དགའ་བར་གྱུར་པ་ཡིན།
2CO 7:16 དོན་ཀུན་ནས་ང་རང་ཁྱོད་རྣམས་ལ་ཡིད་ཆེས་པས་དགའོ།།
2CO 8:1 ཀྱེ། སྤུན་ཟླ༌རྣམས། དཀོན་མཆོག་གིས་མ་ཀེ་དོན་ཡཱ་ཡུལ་གྱི་ཆོས་ཚོགས་དག་ལ་གནང་བའི་ཐུགས་རྗེ་དེ་ངེད་ཅག་གིས་ཁྱོད་རྣམས་ལ་འཆད་པར༌བྱའོ།།
2CO 8:2 ཆོས་ཚོགས་དེ་དག་ལ་དཀའ་སྡུག་གི་ཁྲོད་དུ་ཚོད་བགམ་ཆེན་པོ་ཐེབས་པའི་དུས་སུའང་དགའ་སྤྲོ་དཔག་མེད་ཡོད་པ༌དང༌། ཁོ་རྣམས་ཤིན་ཏུ་དབུལ་བའི་དུས་སུའང་ཞལ་འདེབས་འབུལ་བར་དགའ་བས་ཁོ་རྣམས་ཀྱི་བཀའ་དྲིན་ལྷག་ཏུ་ཆེའོ།།
2CO 8:3 ཁོ་རྣམས་ཀྱིས་རང་གི་ནུས་པ་བཞིན་བསྒྲུབས་པར་མ༌ཟད། ནུས་པ་ལས་བརྒལ་ནའང་ཞལ་འདེབས་འབུལ་བར་སེམས་དགའ་བ༌དང༌།
2CO 8:4 དད་ལྡན་དམ་པ་གཞན་དག་ལ་འབུལ་བ་ཕུལ་བའི་ཐུགས་རྗེའི་ནང་དུ་ཞུགས་པའི་རེ་བ་ཡང་ཡང་ཞུས་མྱོང་བར་བདག་གིས་བདེན་དཔང་བྱ་ནུས༌པ་ཡིན།
2CO 8:5 གཞན༌ཡང༌། ཁོ་རྣམས་ཀྱིས་ངེད་ཅག་གི་རེ་བ་ལས་ལྷག་པ་བསྒྲུབས་པར་མ༌ཟད། དཀོན་མཆོག་གི་ཐུགས་དགོངས་བཞིན་ཐོག་མར་རང་ཉིད་གཙོ་བོ་ལ་ཕུལ་བ༌དང༌། ངེད་ཅག་ལའང་གཏོགས་པར་བྱས་སོ།།
2CO 8:6 དེའི༌ཕྱིར། ངེད་རྣམས་ཀྱིས་ཐེ་ཏུ་ལ། ཁོས་སྔར་ནས་འགོ་བརྩམས་པ་ལྟར་ཁྱོད་ཅག་གི་ཁྲོད་དུ་བྱམས་སྙིང་རྗེའི་དོན་དེ་ཉིད་ཀྱང་སྒྲུབས་ཤིག་ཅེས་སྐུལ་མ་གནང༌བ་ཡིན་ལ།
2CO 8:7 ཁྱོད་ཅག་གིས་དད་སེམས༌དང༌། སྨྲ༌བརྗོད། ཤེས༌བྱ། བརྩོན༌སེམས། ངེད་ཅག་ལ་བཅངས་པའི་བྱམས་པ་བཅས་ལས་ཕུན་སུམ་ཚོགས་པ་མངོན༌པ་བཞིན། བྱམས་སྙིང་རྗེའི་དོན་འདིའི་སྟེང་དུའང་ཕུན་སུམ་ཚོགས་པར་གྱུར་ཅིག།
2CO 8:8 བདག་གིས་དེ་ལྟར་སྨྲས་པ་ནི་ཁྱོད་རྣམས་ལ་བཀའ་ཕབ་པ་མིན༌ཏེ། མི་གཞན་གྱི་བརྩོན་སེམས་ལ་བརྟེན་ནས་ཁྱོད་ཅག་གི་བྱམས་པ་དངོས་མ་ཡིན་མིན་ལ་ཚོད་བགམ་བྱེད༌པ་ཡིན་ནོ།།
2CO 8:9 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནི་ཁྱོད་རྣམས་ཀྱིས་ཀྱང་ཤེས༌ཏེ། ཁོང་ནི་ཕྱུག་པོ་ཡིན༌ཡང༌། ཁྱོད་ཅག་གི་ཆེད་དུ་དབུལ་ཞིང་ཕོངས་པར་གྱུར་པ༌དང༌། དེ་ནི་ཁོང་ཉིད་དབུལ་བར་བརྟེན་ནས་ཁྱོད་རྣམས་འབྱོར་བ་དང་ལྡན་པར་འགྱུར་བའི་ཕྱིར་རོ།།
2CO 8:10 བདག་གིས་དོན་འདིའི་སྟེང་ནས་རང་གི་དྲན་འཆར་ཁྱོད་ཅག་ལ་སྨྲ་ཞིང་དེ་ནི་ཁྱོད་རྣམས་ལ་ཕན་ཐོགས་ཡོད་དེ། ཁྱོད་ཅག་གིས་དོན་དེ་འགོ་བརྩམས་ཤིང་དེ་བསྒྲུབ་འདོད་ཀྱི་སེམས་ཀྱང་བྱུང་ནས་ལོ་གཅིག་ཙམ་འགོར༌བས།
2CO 8:11 སྔོན་ལ་ཇི་ལྟར་བསྒྲུབ་འདོད་པའི་སེམས་ཡོད༌ན། ད་ལྟ་དོན་དེ་བསྒྲུབ་འོས༌ཏེ། ཁྱོད་ཅག་གིས་ནུས་པ་བཞིན་དུ་བསྒྲུབ་འོས་སོ།།
2CO 8:12 མི་ལ་བསྒྲུབ་འདོད་ཀྱི་སེམས་ཡོད༌ན། དེ་ནི་རང་ལ་ཅི་ཡོད་པ་བཞིན་འབུལ་བས་ཆོག་སྟེ། རང་ལ་གང་ཞིག་མེད་པ་ལྟར་འབུལ་བ་མིན།
2CO 8:13 བདག་གིས་སྨྲས་པའི་དོན་ནི་མི་གཞན་དག་གི་ཁུར་པོ་ཇེ་ཡང་དུ་གཏོང་བ་དང་། ཁྱོད་ཅག་ལ་དཀའ་སྡུག་མྱང་དུ་འཇུག་པའི་ཕྱིར་མ་ཡིན་པར་ཆ་སྙོམས་ཡོང་བའི་ཕྱིར་ཡིན།
2CO 8:14 མ་འོངས་པར་ཁྱོད་རྣམས་ཀྱི་མི་འདང་ས་དེ་ཁོ་རྣམས་ཀྱི་འབྱོར་བ་ལས་ཁ་བསྐང་བར་འགྱུར་བའི་ཕྱིར། ད་ལྟ་ཁྱོད་ཅག་གི་འབྱོར་བས་ཁོ་རྣམས་ཀྱི་དགོས་མཁོ་སྐོང་འོས༌ཤིང༌། དེ་ལྟར་བྱས་ན་ཆ་སྙོམས་སུ་འགྱུར་རོ།།
2CO 8:15 དེ་ལ་གསུང་རབ་ཀྱི་མདོ་ལས་ཇི་སྐད༌དུ། མང་པོ་བསྡུས་ཀྱང་ཁོ་ལ་ལྷག་མ་མེད༎ ཉུང་ངུ་བསྡུས་ཀྱང་ཁོ་ལ་མི་འདང་མེད།། ཅེས་བཀོད་པ་བཞིན༌ནོ།།
2CO 8:16 དཀོན་མཆོག་གིས་ཐེ་ཏུ་ལ་སེམས་འགུལ་ཐེབས་པར་མཛད་དེ་བདག་དང་མཚུངས་པར་ཁྱོད་ཅག་ལ་སྤྲོ་སེམས་བཅངས༌ཡོད་པས། དཀོན་མཆོག་ལ་ཐུགས་རྗེ་ཆེ༌ཞུའོ།།
2CO 8:17 ཐེ་ཏུས་བདག་གི་ངག་ལ་མཉན་པ་དང་དེ་ལས་ཀྱང་སྤྲོ་སེམས་ཆེ་ཞིང་ཁྱོད་རྣམས་ཀྱི་གམ་དུ་ཕྱིན་པ་ཡིན།
2CO 8:18 ངེད་ཅག་གིས་སྤུན་ཟླ་གཞན་ཞིག་ཀྱང་ཁོ་དང་མཉམ་དུ་མངགས་ཤིང༌། སྤུན་ཟླ་དེ་ནི་འཕྲིན་བཟང་གི་ཕྱོགས་ནས་ཆོས་ཚོགས་ཀུན་གྱི་བསྔགས་བརྗོད་ཐོབ་མྱོང་བ་ཞིག་ཡིན༌པར་མ་ཟད།
2CO 8:19 ཁོ་རང་ཡང་ཆོས་ཚོགས་དག་གིས་བདམས་ནས་ངེད་རྣམས་དང་མཉམ་དུ་འགྲོ་བར་མཛད་པ༌དང༌། ངེད་རྣམས་ལ་བཅོལ་བའི་ཞལ་འདེབས་ཁྱེར་ནས་སླེབ་དགོས་པ་སྟེ། གཙོ་བོ་ལ་གཟི་བརྗིད་མང་དུ་འབུལ་བ་དང་ངེད་ཅག་གི་བསྒྲུབ་པར་དགའ་བའི་སེམས་པའང་གསལ་པོར་མངོན༌པའི་ཕྱིར་རོ།།
2CO 8:20 དེ་ནི་ངེད་ཅག་གིས་ཞལ་འདེབས་དངུལ་སྒོར་མང་པོ་བསྡུས་པས་སུས་ཀྱང་ངེད་ཅག་ལ་སྐྱོན་མི་འཛུགས་པའི་ཆེད་དུ་ཡིན༌ལ།
2CO 8:21 ངེད་ཅག་གིས་ནན་ཏན་གྱི་ངང་ནས་དོན་ལེགས་པོར་བསྒྲུབ༌པར་དམིགས་ཤིང༌། གཙོ་བོའི་སྤྱན་སྔར་དེ་ལྟར་སྒྲུབ་པ་དང་མི་རྣམས་ཀྱི་མིག་མདུན་དུའང་དེ་ལྟར་སྒྲུབ་བཞིན་ཡོད་དོ།།
2CO 8:22 ཡང་ངེད་ཅག་གིས་སྤུན་ཟླ་གཞན་ཞིག་ཀྱང་ཁོ་གཉིས་དང་མཉམ་དུ་མངགས་སོ།། ངེད་ཅག་གིས་དོན་དག་མང་པོ་ཞིག་ནས་ཁོ་ལ་ཚོད་བགམས་མྱོང༌ལ། ཁོ་ནི་བརྩོན་སེམས་ཆེ་བ་ཞིག་ཡིན། ད་ལྟ་ཁོས་ཁྱོད་རྣམས་ལ་ཡིད་ཆེས་ཆེན་པོ་བྱེད་པས་ཁོའི་བརྩོན་སེམས་ནི་སྔར་ལས་ཀྱང༌ཆེའོ།།
2CO 8:23 ཐེ་ཏུ་གླེང་ན། ཁོ་ནི་བདག་གི་ལས་གྲོགས་ཡིན༌ལ། བདག་དང་མཉམ་དུ་ཁྱོད་ཅག་ལ་ཞབས་ཕྱི་སྒྲུབ་མཁན་ཞིག་ཀྱང་ཡིན། སྤུན་ཟླ་གཞན་གཉིས་ཀ་གླེང་ན། ཁོ་གཉིས་ནི་ཆོས་ཚོགས་དག་གི་བང་ཆེན་དང་སྐྱབས་མགོན་མཱ་ཤི་ཀའི་གཟི་བརྗིད་ཀྱང་ཡིན།
2CO 8:24 དེའི༌ཕྱིར། ཁྱོད་ཅག་གིས་ངེས་པར་ཆོས་ཚོགས་དག་གི་དྲུང་དུ་མངོན་པའི་བྱམས་པ་ལ་བདེན་དཔང་བྱེད་པ༌དང༌། ངེད་རྣམས་ཀྱིས་ཁྱོད་ཅག་ལ་བསྔགས་བརྗོད་བྱས་པའི་རྒྱུ་མཚན་ཡང་སྟོན་དགོས༌སོ།།
2CO 9:1 དད་ལྡན་དམ་པ་རྣམས་ལ་འབུལ་བའི་ཞབས་ཏོག་སྒྲུབ་པའི་སྐོར་ནས་བདག་གིས་ཁྱོད་ཅག་ལ་འཕྲིན་ཡིག་འབྲི་དགོས་དོན་མེད་དོ།།
2CO 9:2 ཅིའི་ཕྱིར་ཞེ་ན། ཁྱོད་རྣམས་ཀྱི་བསྒྲུབ་པར་དགའ་བའི་སེམས་ནི་བདག་གིས་ཤེས་ཏེ། ཨ་ཀ་ཡཱ་ཡུལ་གྱི་མི་རྣམས་ཀྱིས་གྲ་སྒྲིག་བྱས་ནས་ལོ་གཅིག་འགོར་ཟིན་ཞེས་སྨྲས་ནས། རྒྱུན་དུ་མ་ཀེ་དོན་ཡཱ་ཡུལ་གྱི་མི་རྣམས་ཀྱི་མདུན་ནས་ཁྱོད་ཅག་ལ་བསྔགས་བརྗོད་བྱེད༌ཅིང༌། ཁྱོད་ཅག་གི་བརྩོན་སེམས་ཀྱིས་མི་མང་པོར་སེམས་འགུལ་ཐེབས་སུ་བཅུག་པའི་ཕྱིར༌རོ།།
2CO 9:3 འོན༌ཀྱང༌། ངེད་ཅག་གིས་དོན་འདིའི་ཆ་ནས་ཁྱོད་རྣམས་ལ་བསྔགས་བརྗོད་བྱས་པའི་གཏམ་དེ་སྟོང་བར་མི་འགྱུར༌བར། བདག་གིས་སྨྲས་པ་བཞིན་ཁྱོད་རྣམས་ཀྱིས་གྲ་སྒྲིག་ལེགས་པོ་བྱེད་པའི༌ཕྱིར། བདག་གིས་སྤུན་ཟླ་འདི་དག་མངགས༌པ་ཡིན།
2CO 9:4 གལ༌ཏེ། མ་ཀེ་དོན་ཡཱ་ཡུལ་གྱི་མི་འགའ་ཤས་བདག་དང་མཉམ་དུ་ཡོང༌སྟེ། ཁྱོད་ཅག་གིས་གྲ་སྒྲིག་བྱས་མེད་པ་མཐོང༌ན། ངེད་ཅག་གིས་ཡིད་ཆེས་བརྟན་པོ་བྱས་པ་དེ་ནི་ངོ་གནོང་བར་འགྱུར་བ༌དང༌། ཁྱོད་རྣམས་ངོ་གནོང་བ་ནི་དེ་བས་ཀྱང་སྨོས་མ་དགོས་སོ།།
2CO 9:5 དེའི༌ཕྱིར། བདག་གིས་སྤུན་ཟླ་དེ་རྣམས་ཐོག་མར་ཁྱོད་ཅག་གི་གམ་དུ་སོང༌སྟེ། སྔོན་ཆད་ཁས་བླངས་པའི་ཞལ་འདེབས་གྲ་སྒྲིག་ལེགས་པོ་བྱེད་པར་ཞུ་བ་མི་བྱེད་ཐབས་མེད་རེད་བསམས༌ཤིང༌། དེ་ནས་ཁྱོད་ཅག་གིས་ཕུལ་བའི་ཞལ་འདེབས་ནི་དགའ་མོས་ཡིན་པ་ལས་འུ་ཐུག་གིས་མིན་པ་མཚོན་ནུས༌སོ།།
2CO 9:6 དོན་ནི་འདི་ཡིན་ཏེ། ས་བོན་ཉུང་ངུ་བཏབ་ན་ལོ་ཏོག་ཉུང་ངུ་བསྡུ༌ཞིང༌། ས་བོན་མང་པོ་བཏབ་ན་ལོ་ཏོག་མང་པོ་བསྡུ་ཞེས་པའོ།།
2CO 9:7 ཡིད་སེམས་དགའ་མོས་ངང་ནས་ཞལ་འདེབས་ཕུལ་བ་ལ་དཀོན་མཆོག་ཐུགས་དགྱེས་པ་ཡིན༌པས། མི་སོ་སོས་རང་སེམས་ནས་ཐག་གིས་བཅད་པ་ལྟར་འབུལ་དགོས་པ༌ལས། སེམས་སྡུག་གམ་ཨུ་ཚུགས་ཀྱི་ངང་ནས་འབུལ་མི་འོས་པ་ཡིན།
2CO 9:8 དཀོན་མཆོག་གིས་ཐུགས་རྗེ་སྣ་ཚོགས་ཁྱོད་རྣམས་ལ་མང་དུ་གནང༌ནུས་ཏེ། རྟག་ཏུ་དོན་གང་ཅིའི་ཐད་ནས་ཁྱོད་རྣམས་ལ་མི་འདང་ས་མེད་ཅིང་དོན་བཟང་མང་དུ་བསྒྲུབ་ཐུབ་པའི་ཕྱིར་རོ།།
2CO 9:9 དེ་ལ་གསུང་རབ་ཀྱི་མདོ་ལས་ཇི་སྐད༌དུ། རྒྱུ་ནོར་བཏང་ནས་དབུལ་པོ་སྐྱོབ་བྱེད༌པས།། ཁོང་གི་དྲང་བདེན་ཇི་སྲིད་བར་དུ༌གནས།། ཞེས་བཀོད་པ་བཞིན༌ནོ།།
2CO 9:10 ཞིང་འདེབས་མཁན་ལ་ས་བོན་དང་མི་ལ་བག་ལེབ་གནང་མཁན་གྱིས་ཁྱོད་རྣམས་ལ་གདབ་བྱའི་ས་བོན་སྦྱོར་ཞིང་སྤེལ་ཏེ། ཁྱོད་རྣམས་ཀྱི་དྲང་བདེན་གྱི་འབྲས་བུའང་འཕེལ་བར་མཛད་ངེས༌སོ།།
2CO 9:11 ཁྱོད་ཅག་གིས་ཀྱང་སྦྱིན་པ་མང་པོ་གཏོང་བའི་ཕྱིར། ཁྱོད་རྣམས་དོན་གང་ཅིའི་ཐད་ནས་ཕུན་སུམ་ཚོགས་པར་མཛད༌པར་འགྱུར་ཞིང༌། དེ་ནས་ངེད་ཅག་བརྒྱུད་ནས་དཀོན་མཆོག་ལ་བཀའ་དྲིན་ཞུ་བའི་སེམས་འབྱུང་ངོ་།།
2CO 9:12 ཅིའི་ཕྱིར་ཞེ་ན། འབུལ་བའི་ཞབས་ཏོག་འདི་བསྒྲུབས༌ན། དད་ལྡན་དམ་པ་རྣམས་ཀྱི་དགོས་མཁོ་བསྐངས་པར་མ༌ཟད། མི་མང་པོས་ལྷག་ཏུ་དཀོན་མཆོག་ལ་བཀའ་དྲིན་ཞུ་བའི་ཕྱིར༌རོ།།
2CO 9:13 ཁོ་རྣམས་ལ་འབུལ་བའི་ཞབས་ཏོག་གི་ཆ་ནས་བདེན་དཔང་ཐོབ༌ཅིང༌། ཁྱོད་ཅག་གིས་སྐྱབས་མགོན་མཱ་ཤི་ཀའི་འཕྲིན་བཟང་ཁས་ལེན་པ༌དང༌། དེ་ལ་བསྟུན༌པ། ཁོ་རྣམས་དང་མི་གཞན་དག་ལ་ཞལ་འདེབས་མང་པོ་ཕུལ་བའང་ཁོ་རྣམས་ཀྱིས་ཤེས་པར་འགྱུར༌བས། དཀོན་མཆོག་ལ་བསྟོད་བསྔགས་བརྗོད་པར༌འགྱུར་ལ།
2CO 9:14 དཀོན་མཆོག་གི་བླ་ན་མེད་པའི་ཐུགས་རྗེ་དེ་ཁྱོད་ཅག་གི་སེམས་ནང་དུ་མངོན་པར་གྱུར༌པས། ཁོ་རྣམས་ཀྱིས་ཁྱོད་ཅག་ཤིན་ཏུ་དྲན༌ཏེ། ཁྱོད་ཅག་གི་ཆེད་དུ་གསོལ་བ་འདེབས་པར་ངེས།
2CO 9:15 དཀོན་མཆོག་ལ་བརྗོད་ཀྱིས་མི་ལང་བའི་གནང་སྦྱིན་ཡོད་པས་ཁོང་ལ་ཐུགས་རྗེ༌ཆེ་ཞུའོ།།
2CO 10:1 དེ་ཡང་ཕོལ་ལོལ་བདག་ནི་ཁྱོད་རྣམས་དང་ངོ་ཕྲད་པའི་དུས་སུ་ཁེངས་ཆུང་ཡིན༌ལ། ཁྱོད་ཅག་གི་གམ་དུ་མེད་པའི་དུས་སུ་ཁྱོད་ཅག་ལ་སྤོབས་པ་ཆེ་བ༌དང༌། ད་ལྟ་རང་གིས་དངོས་སུ་སྐྱབས་མགོན་མཱ་ཤི་ཀའི་ཞི་ཞིང་དུལ་བའི་རང་བཞིན་ལ་བརྟེན་ནས་ཁྱོད་ཅག་ལ་སྐུལ་མ་གཏོང་ངོ་།།
2CO 10:2 མི་ལ་ལས་ངེད་ཅག་གིས་ངར་ཤུགས་ལ་བརྟེན་ནས་སྤྱད་པ་སྤྱོད་པར་སྙམ་ལ། ངས་མི་དེའི་རིགས་ལ་ངེས་པར་སྤོབས་པར་བརྟེན་ནས་སྐུལ་ལྕག་གཏོང་དགོས་པར༌བསམས་མོད། འོན་ཀྱང་ང་རང་ཁྱོད་ཅག་དང་མཉམ་དུ་ཡོད་དུས། དེ་ལྟར་སྤོབས་པ་ལྡན་མི་དགོས་པའི་ཚུལ་ཁྱོད་ཅག་ལ་ཞུའོ།།
2CO 10:3 ངེད་ཅག་གིས་ངར་ཤུགས་ལ་བརྟེན་ནས་སྤྱད་པ་སྤྱོད༌ནའང༌། ངར་ཤུགས་ལ་བརྟེན་ནས་འཐབ་པར་མི་བྱེད།
2CO 10:4 ངེད་ཅག་གིས་འཐབ་པར་བྱེད་པའི་གོ་མཚོན་ནི་ངར་ཤུགས་ཀྱི་གོ་མཚོན་མ་ཡིན༌པར། དཀོན་མཆོག་གི་མཐུ་སྟོབས་དང་ལྡན་པས་བཙན་རྫོང་རྣམས་ཀྱང་གཏོར་ནུས༌ཤིང༌།
2CO 10:5 དཀོན་མཆོག་ཤེས་པར་བཀག་འགོག་བྱེད་པའི་ཇུས་ངན་སྣ་ཚོགས་དང་ང་རྒྱལ་ཅན་གྱི་དོན་ཐམས་ཅད་ཀྱང་ངེད་ཅག་གིས་འཇོམས་པ་དང་། བསམ་པ་ཐམས་ཅད་ཕྱིར་བཀུག་ནས་སྐྱབས་མགོན་མཱ་ཤི་ཀ་ལ་བསྟུན་དུ་འཇུག་པ་ཡིན།
2CO 10:6 ཡང་ཁྱོད་ཅག་གིས་བཀའ་ཡོངས་སུ་བརྩི་བའི་དུས༌སུ། ངེད་ཅག་གིས་བཀའ་མི་བརྩི་བ་ཐམས་ཅད་ལ་ཉེས་ཆད་གཅོད་པར་སྟ་གོན་བྱས་ཟིན༌ཏོ།།
2CO 10:7 ཁྱོད་ཅག་གིས་ཕྱིའི་རྣམ་པ་ཁོ་ནར༌ལྟའམ། གལ༌ཏེ། མི་ཞིག་ལ་རང་ཉིད་ནི་སྐྱབས་མགོན་མཱ་ཤི་ཀར་གཏོགས་པར་ཡིད་ཆེས་བརྟན་པོ་ཡོད༌ན། ད་དུང་བསམ་བློ་གཏོང་དགོས༌ཏེ། ཁོ་ནི་སྐྱབས་མགོན་མཱ་ཤི་ཀར་ཇི་ལྟར་གཏོགས་པ༌བཞིན། ངེད་ཅག་ཀྱང་དེ་ལྟར་སྐྱབས་མགོན་མཱ་ཤི་ཀར་གཏོགས༌པ་ཡིན་ནོ།།
2CO 10:8 གཙོ་བོས་ངེད་ཅག་ལ་དབང་ཆ་གནང༌བ་ནི་ཁྱོད་རྣམས་སྐྱེད་སྲིང་བྱེད་པ་ལས་ཉམས་དམས་སུ་གཏོང་ཕྱིར་མ་ཡིན། ངས་དབང་ཆ་འདི་ལ་བསྔགས་བརྗོད་ཅུང་ཙམ་བྱས་ཀྱང་ང་རང་ངོ་གནོང་བར་མི་འགྱུར།
2CO 10:9 ངས་དེ་ལྟར་སྨྲས་དོན༌ནི། བདག་གིས་འཕྲིན་ཡིག་བྲིས་ནས་ཁྱོད་ཅག་ལ་འཇིགས་སྣང་བསྐུལ་བའི་ཕྱིར་མ་ཡིན།
2CO 10:10 ཅིའི་ཕྱིར་ཞེ་ན། མི་འགའ་ཤས་ན༌རེ། ཁོའི་འཕྲིན་ཡིག་གི་ནང་དོན་ལྕི་ཞིང་དྲག་རྩུབ་ཆེ༌ཡང༌། ཁོ་དང་ངོ་ཕྲད་ན། ཁོ་རང་ནི་སྐྱེས་གཟུགས་ཞན་ཞིང་ཚིག་ཐ་མལ་སྨྲ་མཁན་ཡིན་ཞེས་ཟེར་བའི་ཕྱིར༌རོ།།
2CO 10:11 མི་འདི་ལྟ་བུ་རྣམས་ཀྱིས་ངེད་ཅག་གནས་དེར་མེད་པའི་དུས་སུ་འཕྲིན་ཡིག་གི་རྗོད་བྱེད་ཀྱི་ཚིག་ཇི་ལྟར་ཡིན༌ན། ངོ་འཕྲད་པའི་དུས་སུའང་དོན་དེ་བཞིན་དུ་བསྒྲུབ་ངེས་པར་བསམ་བློ་གཏོང་དགོས༌སོ།།
2CO 10:12 ཅིའི་ཕྱིར་ཞེ་ན། ངེད་ཅག་གིས་རང་ཉིད་ནི་རང་བསྟོད་བྱེད་པའི་མི་རྣམས་ལ་བརྩི་བའམ་བསྡུར་མི་ཕོད༌དེ། མི་དེ་རྣམས་ཀྱིས་རང་གིས་རང་ལ་ཚད་འཇལ་ཞིང་རང་གིས་རང་ལ་བསྡུར་བར་བྱེད་པ་ནི་བློ་དམན༌པ་ཡིན་ནོ།།
2CO 10:13 ངེད་ཅག་གིས་ཚད་ལས་འདས་པར་བསྔགས་བརྗོད་བྱ་མི་འདོད༌དེ། དཀོན་མཆོག་གིས་ངེད་ཅག་ལ་བསྩལ་པའི་དབྱེ་མཚམས་ལྟར་བསྔགས་བརྗོད་བྱ་ཞིང་ཁྱོད་ཅག་ཀྱང་དེའི་ནང་དུ་གནས་སོ།།
2CO 10:14 ངེད་ཅག་ཐོག་མ་ནས་ཁྱོད་ཅག་གི་གམ་དུ་སླེབས་ཏེ་སྐྱབས་མགོན་མཱ་ཤི་ཀའི་འཕྲིན་བཟང་བསྒྲགས་པ་ཡིན་པས། ངེད་རྣམས་ཀྱི་དབྱེ་མཚམས་ནི་ཁྱོད་རྣམས་ཀྱི་བར་དུ་མ་སླེབས་པ་ལྟར། ངེད་ཅག་ནི་རང་གི་དབྱེ་མཚམས་ལས་བརྒལ་བ་མ་ཡིན།
2CO 10:15 ངེད་ཅག་གིས་མི་གཞན་གྱི་དཀའ་ཚེགས་ལ་བརྟེན་ནས་བསྔགས་བརྗོད་ཚད་བརྒལ་མི་བྱེད༌ནའང༌། ཁྱོད་ཅག་གི་དད་པ་ཇེ་བརྟན་དུ་འགྲོ་བའི་དུས༌སུ། ངེད་ཅག་གི་དབྱེ་མཚམས་ནི་ཁྱོད་ཅག་གི་རྐྱེན་གྱིས་རྒྱ་ཆེ་རུ་འགྲོ་བ་དང༌།
2CO 10:16 ཁྱོད་ཅག་གི་ཡུལ་ལས་གཞན་པའི་ཡུལ་རྣམས་ལ་འཕྲིན་བཟང་སྒྲོག་ནུས་པར་རེ་བ་བྱེད། དེ་ནི་མི་གཞན་གྱི་དབྱེ་མཚམས་ནང་དུ་བསྒྲུབས་ཟིན་པའི་དོན་ལ་བརྟེན་ནས་བསྔགས་བརྗོད་བྱེད་པའང་མིན་ནོ།།
2CO 10:17 འོན༌ཀྱང༌། བསྔགས་བརྗོད་བྱེད་མཁན་སུས་ཀྱང་གཙོ་བོ་ལ་བསྔགས་འོས༌སོ།།
2CO 10:18 ཅིའི་ཕྱིར་ཞེ་ན། དཀོན་མཆོག་གི་ཐུགས་ལ་ལྡན་པ་ནི་རང་བསྟོད་བྱེད་མཁན་གྱིས་བསྟོད་པ་མ་ཡིན༌པར། གཙོ་བོས་བསྟོད་ཅིང་བསྔགས་པ་དེ་ཡིན་པའི་ཕྱིར༌རོ།།
2CO 11:1 དེ་ཡང་བདག་གི་གླེན་རྟགས་ཕྲན་བུ་འདིར་ཁྱོད་རྣམས་ཀྱིས་བཟོད་སྒོམ་གནང་བར༌སྨོན། དོན་དངོས་སུ་ཁྱོད་ཅག་གིས་བདག་ལ་བཟོད་སྒོམ་གནང༌བ་ཡིན་ནོ།།
2CO 11:2 བདག་གིས་དཀོན་མཆོག་གི་ཕྲག་དོག་སྤྱད་ནས་ཁྱོད་རྣམས་ལ་གཅེས་པ་ཡིན། ཅིའི་ཕྱིར་ཞེ་ན། སྔོན་ཆད་བདག་གིས་ཁྱོད་རྣམས་མག་གསར་གཅིག་ལ་གཉེན་རྟགས་བརྒྱབ་པ༌དང༌། ཁྱོད་ཅག་ན་ཆུང་བུ་མོ་གཙང་མ་ཞིག་ཡིན་པ་བཞིན་དུ་སྐྱབས་མགོན་མཱ་ཤི་ཀར་འབུལ་ཐུབ་པའི་ཕྱིར༌རོ།།
2CO 11:3 འོན༌ཀྱང༌། སྦྲུལ་གྱིས་གཡོ་སྒྱུར་བརྟེན་ནས་ཧ་ཝཱ་བསླུས་པ༌ལྟར། ཁྱོད་ཅག་གི་བསམ་པའང་སྐྱབས་མགོན་མཱ་ཤི་ཀར་བཅངས་པའི་དད་སེམས་དྲང་པོ་དང་གཙང་མ་དེ་ནས་ངན་ཕྱོགས་སུ་འཁོར་བར་ང་རང་འཇིགས༌པ་ཡིན།
2CO 11:4 རྒྱུ་མཚན་ནི་མི་ཞིག་ཡོང་ནས་ཁྱོད་རྣམས་ལ་ངེད་ཅག་གིས་བསྒྲགས་པ་མ་ཡིན་པའི་ཡེ་ཤུ་གཞན་ཞིག་བསྒྲགས༌པའམ། ཡང་ན་ཁྱོད་ཅག་ལ་སྔར་ཐོབ་མ་མྱོང་བའི་ཐུགས་ཉིད་གཞན་ཞིག་ཐོབ༌པ། ཡང་ན་ཁྱོད་རྣམས་ལ་སྔར་ཐོབ་མ་མྱོང་བའི་འཕྲིན་བཟང་གཞན་ཞིག་ཐོབ༌ན། ཁྱོད་རྣམས་དགའ་ཞིང་དེའི་དབང་དུ་འགྲོ་བའོ།།
2CO 11:5 འོན༌ཀྱང༌། ངས་རང་ཉིད་ནི་མཆོག་ཏུ་གྱུར་པའི་སྐུ་ཚབ་པ་ཞེས་པ་དག་ལས་ཅུང་ཙམ་ཡང་མི་དམན་སྙམ།
2CO 11:6 བདག་གི་སྨྲ་བརྗོད་ནི་ཕལ་བ་ཡིན༌ཡང༌། བདག་གི་ཡོན་ཏན་ནི་ཕལ་བ་མ་ཡིན། འདི་ནི་ངེད་ཅག་གིས་ལས་ཀུན་ནས་ཁྱོད་རྣམས་ལ་གསལ་པོར་བསྟན་པ་ཡིན༌ནོ།།
2CO 11:7 བདག་གིས་དཀོན་མཆོག་གི་འཕྲིན་བཟང་ནི་རིན་མེད་པར་ཁྱོད་རྣམས་ལ་བསྒྲགས༌ཤིང༌། ཁྱོད་ཅག་མཐོ་སར་འཕར་བའི༌ཕྱིར་ང་རང་དམའ་སར་བསྡད་པ་ནི་བདག་གིས་སྡིག་པ་བྱས་པ་ཡིན་ནམ།
2CO 11:8 བདག་གིས་ཆོས་ཚོགས་གཞན་ལ་གྱོང་གུད་བཟོས་ཤིང༌། ཁོ་རྣམས་ལས་གླ་ཕོགས་བླངས་ཏེ་ཁྱོད་ཅག་ལ་ཞབས་ཕྱི་སྒྲུབ༌པ་ཡིན།
2CO 11:9 ང་རང་ལ་ཁྱོད་ཅག་གི་གམ་དུ་དགོས་མཁོ་བྱུང་བའི་དུས༌སུ། མ་ཀེ་དོན་ཡཱ་ཡུལ་ནས་ཡོང་བའི་སྤུན་ཟླ་རྣམས་ཀྱིས་བདག་གི་དགོས་མཁོ་བསྐངས༌པས། ངས་ཁྱོད་རྣམས་སུ་ལའང་དཀའ་ལས་མ་གཏད། བདག་གིས་དེ་སྔར་ལས་ཀུན་ནས་གཟབ་གཟབ་བྱས་ཤིང་ཕྱིས་སུའང་དེ་ལྟར་བྱས་ཏེ་ཁྱོད་རྣམས་ལ་ཅིས་ཀྱང་དཀའ་ལས་མི་གཏོད།
2CO 11:10 སྐྱབས་མགོན་མཱ་ཤི་ཀའི་ཐུགས་རྒྱུད་དྲང་པོ་དེ་ཉིད་བདག་གི་སེམས་ཁོང་དུ་བཞུགས༌པས། མི་སུས་ཀྱང་ཨ་ཀ་ཡཱ་ཡུལ་ནས་བདག་གི་རང་བསྟོད་དེ་ནི་འགོག་མི་ནུས་སོ།།
2CO 11:11 ཅིའི་ཕྱིར་ཞེ་ན། ངས་ཁྱོད་རྣམས་ལ་མི་གཅེས་པའི་རྐྱེན་གྱིས་མིན༌ཏེ། དོན་དེ་ནི་དཀོན་མཆོག་གིས་མཁྱེན་ནོ།།
2CO 11:12 འོན་ཀྱང་། མི་གཞན་རྣམས་ཀྱིས་རང་བསྟོད་བྱེད་པའི་ཐད་ནས་ངེད་ཅག་དང་འདྲ་བར་འདོད༌ཀྱང༌། གོ་སྐབས་འཚོལ་བ་དེ་དག་གི་གོ་སྐབས་མེད་པར་བཟོ་བའི༌ཕྱིར། བདག་གིས་ད་ལྟ་ཅི་ལྟར་བྱེད་པ༌བཞིན། ཕྱིས་སུའང་དེ་ལྟར་བྱེད་པར་བྱའོ༎
2CO 11:13 མི་དེ་ལྟ་བུ་རྣམས་ནི་སྐུ་ཚབ་པ་རྫུས་མ་ཡིན༌ཏེ། ལས་ཀུན་སྒྲུབ་པར་གཡོ་སྒྱུ་ཆེ་ཞིང་སྐྱབས་མགོན་མཱ་ཤི་ཀའི་སྐུ་ཚབ་པ་ཡིན་ཁུལ་བྱེད་པ་ཡིན།
2CO 11:14 དེ་ལ་ངོ་མཚར་བ་མེད༌དེ། བདུད་སཱ་ཏན་གྱིས་ཀྱང་འོད་སྣང་གི་ཕོ་ཉ་ཡིན་ཁུལ་བྱེད་པའི་ཕྱིར༌ཡིན།
2CO 11:15 དེ་བས་བདུད་ཀྱི་གཡོག་པོ་དག་གིས་ཀྱང་དྲང་བདེན་གྱི་ཞབས་ཕྱི་པ་ཡིན་ཁུལ་བྱེད༌པས། དེ་ལའང་ངོ་མཚར་བ་མེད། དེ་དག་གི་མཐའ་འབྲས་ནི་དེ་དག་གི་སྤྱོད་ལམ་བཞིན་དུ་འབྱུང་ངེས༌སོ།།
2CO 11:16 བདག་གིས་ཡང་བསྐྱར་སྨྲ་བར་བྱ༌སྟེ། མི་སུས་ཀྱང་བདག་ནི་བླུན་པོར་བརྩི་བར་མི༌བྱའོ། །གལ༌ཏེ། བླུན་པོར་བརྩིས་པའི་དབང་དུ་བཏང༌ནའང༌། བདག་གིས་ཀྱང་རང་བསྟོད་ཅུང་ཙམ་བྱེད་ཐུབ་པའི༌ཕྱིར། ང་རང་བླུན་པོར་བརྩིས་ཀྱང་སྣེ་ལེན་བྱེད་པར་རིགས་སོ།།
2CO 11:17 གཏམ་འདི་ནི་བདག་གིས་གཙོ་བོའི་བཀའ་ལྟར་སྨྲས་པ་མ་ཡིན༌ལ། མི་གླེན་པ་ཞིག་དང་མཚུངས་པར་ཅི་མི་སྙམ་པར་རང་བསྟོད་བྱས༌པ་ཡིན།
2CO 11:18 མི་མང་པོས་རང་གི་ངར་ཤུགས་ལ་བརྟེན་ནས་རང་བསྟོད་བྱེད༌པས། ངས་ཀྱང་རང་བསྟོད་བྱའོ།།
2CO 11:19 ཁྱོད་ཅག་ནི་མཁས་མཛངས་ཅན་ཡིན་པས་བླུན་པོ་རྣམས་ལའང་བཟོད་པ་སྒོམ་པར་དགའ་བ་མ་ཡིན༌ནམ།
2CO 11:20 གལ༌ཏེ། མི་ཞིག་གིས་ཁྱོད་རྣམས་བཙན་གྱིས་བྲན་དུ་བཀོལ༌བའམ། ཡང་ན་ཁྱོད་ཅག་ཧམ་བཟུང་བྱེད༌པ། ཡང་ན་ཁྱོད་རྣམས་འཕྲོག་བཅོམ་བྱེད་པ། ཡང་ན་ཁྱོད་ཅག་ལ་བརྙས་བཅོས་བྱེད༌པ། ཡང་ན་ཁྱོད་རྣམས་ལ་འགྲམ་ལྕག་གིས་གཞུ་བ་བཅས་བྱེད༌ཀྱང༌། ཁྱོད་ཅག་གིས་ཁོ་རྣམས་ལ་བཟོད་བསྲན་བྱེད་པ་ཡིན།
2CO 11:21 གཏམ་འདི་ནི་རང་གིས་རང་ལ་ངོ་གནོང་བའི་ཕྱིར་སྨྲས་པ་ཡིན༌ལ། སྔོན་ཆད་ངེད་ཅག་ནི་གཉོམ་ཆུང་ཡིན་པ༌འདྲ་མོད། འོན༌ཀྱང༌། མི་སུ་ཞིག་དོན་གང་གི་ཆ་ནས་སྤོབས་པ་ཅན་ཡིན༌ན། ངས་ཀྱང་བླུན་གཏམ་ཞིག་སྨྲ་བར་བྱ༌སྟེ། ང་རང་ཡང་སྤོབས་པ་ཅན་ཡིན་ནོ།།
2CO 11:22 དེ་རྣམས་ནི་ཨིབ་རི་པ་མ་ཡིན༌ནམ། ང་རང་ཡང་ཨིབ་རི་པ་ཡིན། དེ་རྣམས་ནི་ཡེས་ར་ཨེལ་པ་མ་ཡིན༌ནམ། ང་ཪང་ཡང་ཡེས་ར་ཨེལ་པ་ཡིན། དེ་རྣམས་ནི་ཨབ་ར་ཧམ་གྱི་རིགས་རྒྱུད་མ་ཡིན༌ནམ། ང་རང་ཡང་ཨབ་ར་ཧམ་གྱི་རིགས་རྒྱུད་ཡིན།
2CO 11:23 དེ་རྣམས་ནི་སྐྱབས་མགོན་མཱ་ཤི་ཀའི་ཞབས་ཕྱི་པ་མ་ཡིན༌ནམ། ཡང་ངས་སྨྱོ་གཏམ་ལྟ་བུ་ཞིག་སྨྲ་བར་བྱ༌སྟེ། ང་རང་ཡང་ལྷག་ཏུ་ཞབས་ཕྱི་པ་ཡིན། བདག་གིས་ཁོ་རྣམས་ལས་ཀྱང་དཀའ་ངལ་མང་དུ་མྱངས༌ཤིང༌། བཙོན་ཁང་དུ་ཐེངས་མང་པོར་བཅུག་པ༌དང༌། གཅར་རྡུང་ཚབས་ཆེན༌མྱངས། ཐེངས་དུ་མར་འཆི་བའི་ཉེན་ཁར་ཐུག
2CO 11:24 ཡ་ཧུ་དཱ་པས་བདག་ལ་གཅར་རྡུང་ཐེངས་ལྔ་བྱས༌པ་དང་། ཐེངས་རེར་རྟ་ལྕག་བཞི་བཅུ་གཞུས་ཤིང་དེའི་ནང་ནས་རྟ་ལྕག་གཅིག་བླངས།
2CO 11:25 ཡང་དབྱུག་པས་ཐེངས་གསུམ་ལ་བརྒྱབ། རྡོ་རུབ་ཐེངས་གཅིག་ལ་བཏང་། གྲུ་གཟིངས་ཐེངས་གསུམ་ལ་ཆག་གྲུམ་བྱུང༌སྟེ། ཉིན་ཞག་གཅིག་ལ་རྒྱ་མཚོའི་འཇིངས་སུ་ལུས།
2CO 11:26 ཡང་ཐེངས་དུ་མར་ལམ་ཐག་རིང་པོར་འགྲོ༌དུས། ཆུ་བོའི་ཉེན་ཁ༌དང༌། ཇག་པའི་ཉེན༌ཁ། ཡུལ་མི་རྣམས་ཀྱི་ཉེན༌ཁ། ཕྱི་ཕྱོགས་པ་རྣམས་ཀྱི་ཉེན༌ཁ། གྲོང་ཁྱེར་གྱི་ཉེན༌ཁ། དབེན་སྟོང་གི་ཉེན༌ཁ། རྒྱ་མཚོའི་ནང་གི་ཉེན༌ཁ། སྤུན་ཟླ་རྫུས་མའི་ཉེན་ཁ་བཅས་དང་ཕྲད།
2CO 11:27 ཡང་དཀའ་ཚེགས་དང་ངལ་བ་མྱངས་ཤིང་ཐེངས་མང་པོར་གཉིད་མ་ཁུག་པ༌དང༌། ཟས་མེད་པར་བཀྲེས་སྐོམ༌མྱངས། གྲངས་ངར་མྱངས་ཤིང་གཅེར་བུར་ལུས།
2CO 11:28 དོན་དེ་དག་ལས༌གཞན། བདག་གིས་ཆོས་ཚོགས་ཐམས་ཅད་ཀྱི་དོན་ལ་སེམས་ཁྲལ་བྱས་པས། ཉིན་རེར་སེམས་ཀྱི་ཁུར་བོའང་ཤིན་ཏུ༌ལྕི་མོ་ཡིན།
2CO 11:29 སུ་ཞིག་སྟོབས་ཞན་པར་གྱུར༌ན། ང་རང་ཞན་པར་མི་འགྱུར༌རམ། སུ་ཞིག་སར་འགྱེལ་ན། ང་རང་སེམས་འཚབ་པར་མི་འགྱུར༌རམ།
2CO 11:30 གལ༌ཏེ། བདག་གིས་ངེས་པར་རང་བསྟོད་བྱེད་དགོས༌ན། ང་རང་གཉོམ་ཆུང་ཡིན་པའི་ཐད་ལ་བསྟོད་པར་བྱ༌སྟེ།
2CO 11:31 ངས་རྫུན་མི་སྨྲ་བ་ནི་དུས་རྟག་ཏུ་བསྔགས་པར་འོས་པའི་གཙོ་བོ་ཡེ་ཤུའི་ཡབ་དཀོན་མཆོག་གིས་མཁྱེན༌ཏོ།།
2CO 11:32 དཱ་མེ་སེག་གི་རྒྱལ་པོ་ཨ་རེ་ཏའི་བློན་ཆེན་གྱིས་དཱ་མེ་སེག་མཁར་གྲོང་བསྲུངས་ནས་ང་རང་འཛིན་འདོད་པ༌ལ།
2CO 11:33 བདག་ནི་སླེ་བོའི་ནང་དུ་བསྡད་ཅིང་མཁར་གྱི་སྒེའུ་ཁུང་ལས་མར་དཔྱངས་ཏེ་བློན་ཆེན་གྱི་ལག་ནས་ཐར་བར་གྱུར༌ཏོ།།
2CO 12:1 དེ་ཡང་རང་བསྟོད་བྱས་ན་ཕན་ཐོགས་མེད་ཀྱང་བདག་གིས་དེ་ལྟར་མི་བྱེད་ཀ་མེད་བྱུང༌ངོ་༎ ད་ལྟ་བདག་གིས་གཙོ་བོའི་ཞལ་གཟིགས་དང་ཁོང་གི་མངོན་པར་གསལ་བའི་དོན་རྣམས་སྨྲ་བར༌བྱ་སྟེ།
2CO 12:2 བདག་གིས་སྐྱབས་མགོན་མཱ་ཤི་ཀའི་ནང་དུ་གནས་པའི་མི་ཞིག་ངོ་ཤེས༌ཏེ། ཁོ་རང་ནི་ལོ་བཅུ་བཞིའི་སྔོན་ལ་ནམ་མཁའི་ཞིང་ཁམས་ཀྱི་རིམ་པ་གསུམ་པར་དྲངས། ཁོ་རང་ནི་ལུས་ཕྱི་ནང་གང་དུ་ཡོད་པ་བདག་གིས་མི་ཤེས་ཀྱང་དཀོན་མཆོག་གིས་མཁྱེན༌ཏོ།།
2CO 12:3 ངས་མི་དེ་ངོ་ཤེས་པ་དང་ཁོ་རང་ལུས་ཕྱི་ནང་གང་དུ་ཡོད་པ་མི་ཤེས༌ཀྱང༌། དཀོན་མཆོག་གིས་མཁྱེན་ཏེ།
2CO 12:4 ཁོ་རང་ནི་ནམ་མཁའི་ཞིང་ཁམས་ཀྱི་དགའ་བདེའི་ལྡུམ་རར་དྲངས༌ཤིང༌། གསང་བའི་སྐད་ཆ་ཐོས་པ༌དང༌། དེ་ནི་མིས་སྨྲ་མི་རུང་བ་ཞིག་ཡིན།
2CO 12:5 བདག་གིས་མི་དེའི་དོན་དུ་བསྔགས་པར༌བྱའོ།། འོན་ཀྱང་བདག་གི་དོན་དུ་རང་ཉིད་གཉོམ་ཆུང་ཡིན་པ་དེ་ལས༌གཞན། བདག་ལ་བསྔགས་པར་བྱ་བ་ཅི་ཡང་མེད།
2CO 12:6 བདག་གིས་བདེན་གཏམ་སྨྲ་ངེས༌པས། རང་བསྟོད་བྱེད་འདོད་ནའང་དེ་ནི་བླུན་རྟགས་མ་ཡིན། མི་གཞན་གྱིས་བདག་ལས་བྱུང་བའི་མཐོང་ཐོས་བརྒལ་ནས་ང་རང་ཆེན་པོར་མི་བརྩི་བའི༌ཕྱིར། བདག་གིས་རང་བསྟོད་མི༌བྱའོ།།
2CO 12:7 ཡང་བདག་ལ་མངོན་པར་གསལ་བའི་དོན་རྣམས་རླབས་ཤིན་ཏུ་ཆེ་བས། ང་རྒྱལ་མི་སྐྱེ་བའི༌ཕྱིར། ངའི་ལུས་སྟེང་དུ་ཚེར་མ་ཞིག་གནང་བ་ཡིན་ལ། དེ་ནི་བདུད་སཱ་ཏན་གྱི་ཕོ་ཉས་བདག་ལ་རྡུང་རྡེག་བཏང༌བ་ཡིན་ཏེ་བདག་ང་རྒྱལ་མི་སྐྱེ་བའི་ཕྱིར་རོ།།
2CO 12:8 དོན་འདིའི་ཆེད་དུ་བདག་གིས་གཙོ་བོར་ཐེངས་གསུམ་ལ་ཚེར་མ་དེ་བདག་ལས་ལེན་པར་ཞུ་བ་བྱས༌པ་དང་།
2CO 12:9 ཁོང་གིས་བདག་ལ་འདི་སྐད༌དུ། ཁྱོད་ལ་བདག་གི་ཐུགས་རྗེ་ཡོད་པས་འདང༌སྟེ། བདག་གི་ནུས་མཐུ་ནི་མི་གཉོམ་ཆུང་རྣམས་ལ་ཡོངས་སུ་རྫོགས་པར་མངོན་པ་ཡིན་ཞེས་གསུངས༌པས། སྐྱབས་མགོན་མཱ་ཤི་ཀའི་ནུས་མཐུ་བདག་གི་སྟེང་དུ་བཞུགས་པའི༌ཕྱིར། བདག་ནི་རང་ཉིད་ཀྱི་གཉོམ་ཆུང་ལ་བསྔགས་པར་ལྷག་ཏུ༌དགའོ།།
2CO 12:10 དེའི་ཕྱིར་བདག་གིས་སྐྱབས་མགོན་མཱ་ཤི་ཀའི་ཆེད་དུ། གཉོམ་ཆུང༌དང༌། བརྙས༌བཅོས། དཀའ༌སྡུག གཉའ་གནོན། དཀའ་ཚེགས་བཅས་ནི་དགའ་འོས་པར་བརྩིས། རྒྱུ་མཚན་ནི་ང་རང་དུས་ནམ་ཞིག་ལ་གཉོམ་ཆུང་ཡིན༌ན། དུས་དེ་ལ་བདག་ནི་སྟོབས་ཅན་ཡིན་པའི་ཕྱིར༌རོ།།
2CO 12:11 སྤྱིར་ཁྱོད་ཅག་གིས་བདག་ལ་བཟང་སྨྲས་ན་འགྲིག༌མོད། འོན་ཀྱང་ད་ལྟ་ང་རང་བླུན་པོར་གྱུར་པ་ནི་ཁྱོད་ཅག་གིས་བཙན་སྐུལ་བྱས༌པ་ཡིན། བདག་ནི་ཅི་ཡང་མིན་ནའང་མཆོག་ཏུ་གྱུར་པའི་སྐུ་ཚབ་པ་ཞེས་པ་དག་ལས་དོན་གང་གི་ཐད་ནས་ཀྱང་མི་དམན་ནོ།།
2CO 12:12 བདག་གིས་ཁྱོད་ཅག་གི་ཁྲོད་དུ་བཟོད་བསྲན་ཚད་མེད་བྱས༌ནས། གྲུབ་རྟགས༌དང༌། དོན་ངོ་མཚར༌ཅན། ངོ་མཚར་བའི་ནུས་མཐུ་བཅས་ལ་བརྟེན་ནས་སྐུ་ཚབ་པ་དངོས་མའི་རྟགས་བསྟན༌པ་ཡིན།
2CO 12:13 བདག་གིས་ཁྱོད་ཅག་ལ་དཀའ་ལས་མ་གཏད་པ་འདི་ལས༌གཞན། ཁྱོད་རྣམས་དོན་གང་གི་ཆ་ནས་ཆོས་ཚོགས་གཞན་ལ་མི་དོའམ། འདྲ་མཉམ་མིན་པའི་ཆ་དེ་ལ་ཁྱོད་ཅག་གིས་གུ་ཡངས་གཏོང་བར༌ཞུའོ།།
2CO 12:14 ད་ལྟ་བདག་ནི་ཐེངས་གསུམ་པར་ཁྱོད་ཅག་གི་གམ་དུ་འགྲོ་རྩིས་ཡོད༌ཀྱང༌། ཁྱོད་རྣམས་ལ་དཀའ་ལས་གཏོད་མི་སྲིད་དོ།། ཅིའི་ཕྱིར་ཞེ་ན། བདག་གི་རེ་བ་ནི་ཁྱོད་ཅག་ཡིན་པ་ལས་ཁྱོད་ཅག་གི་རྒྱུ་ནོར་མ་ཡིན། ཕ་མས་བུ་ཕྲུག་གི་དོན་དུ་རྒྱུ་ནོར་གསོག་དགོས་པ༌ལས། བུ་ཕྲུག་གིས་ཕ་མའི་དོན་དུ་རྒྱུ་ནོར་གསོག་དགོས་པ་མ་ཡིན།
2CO 12:15 ཁྱོད་རྣམས་ཀྱི་ཚེ་སྲོག་གི་ཆེད༌དུ། བདག་ནི་རྒྱུ་ནོར་དང་ནུས་ཤུགས་གཉིས་ཀ་ཕུད་པར་ཤིན་ཏུ༌དགའོ།། ངས་ཁྱོད་རྣམས་ལ་ལྷག་ཏུ་བྱམས་ཤིང་གཅེས་པ་ཡིན༌ན། བདག་ལ་ཁྱོད་ཅག་གི་བྱམས་བརྩེ་དེ་བས་ཉུང་བ་ཞིག་འཐོབ༌བམ།
2CO 12:16 བདག་གིས་ཁྱོད་རྣམས་དཀའ་ལས་ལ་མ་སྦྱར༌ཡང༌། མི་ལ་ལས་བདག་ནི་གཡོ་སྒྱུ་ཅན་ཡིན་པས། གཡོ་ཐབས་ཀྱིས་ཁྱོད་རྣམས་དྲ་བར་ཚུད་དུ་བཅུག་ཟེར།
2CO 12:17 ངས་ཁྱོད་རྣམས་ཀྱི་གམ་དུ་མངགས་པའི་མི་སུ་ཞིག་ལ་བརྟེན་ནས་ཁྱོད་ཅག་ལས་ཁེ་བཟང་བླངས༌མྱོང་ངམ།
2CO 12:18 བདག་གིས་ཐེ་ཏུ་ཁྱོད་ཅག་གི་གམ་དུ་འགྲོ་བར་བསྐུལ༌ཞིང༌། སྤུན་ཟླ་གཞན་ཡང་ཁོ་དང་མཉམ་དུ་འགྲོ་བར་མངགས་མྱོང༌། ཐེ་ཏུས་ཁྱོད་རྣམས་ལས་ཁེ་བཟང་བླངས་མྱོང༌ངམ། ངེད་ཅག་གིས་སེམས་གཅིག་དང་སྤྱོད་ལམ་གཅིག་གི་སྒོ་ནས་དོན་བསྒྲུབས་པ་མ་ཡིན༌ནམ།
2CO 12:19 ཁྱོད་རྣམས་ཀྱིས་ད་ལྟའི་བར་དུ་ངེད་ཅག་གིས་ཁྱོད་རྣམས་ཀྱི་མདུན་དུ་རང་ཉིད་ལ་དག་འབུད་བྱེད་པ་རེད་སྙམ༌མམ། ངེད་ཅག་གིས་སྐྱབས་མགོན་མཱ་ཤི་ཀར་བརྟེན་ནས་དཀོན་མཆོག་གི་སྤྱན་སྔ་ནས་གཏམ་སྨྲས༌པ་ཡིན། སྙིང་ཉེ་བའི་སྤུན་ཟླ༌རྣམས། དོན་འདི་ཐམས་ཅད་ནི་ཁྱོད་ཅག་སྐྱེད་སྲིང་བྱེད་པའི་ཆེད་དུ་ཡིན་ནོ།།
2CO 12:20 ང་རང་ཡོང་བའི་དུས༌སུ། ངས་ཁྱོད་རྣམས་མཐོང་ན་ཁྱོད་ཅག་ནི་བདག་གི་རེ་བ་དང་མི་མཐུན༌ཞིང༌། ཁྱོད་རྣམས་ཀྱིས་ང་རང་མཐོང་ན་བདག་ནི་ཁྱོད་ཅག་གི་རེ་བ་དང་མི་མཐུན་པར་སྙམ་པ་ལ་བདག་ནི་འཇིགས༌ཏེ། ཁྱོད་ཅག་ནང་ཁུལ་དུའང་རྩོད་པ༌དང༌། ཕྲག༌དོག ཁོང༌ཁྲོ། སྒེར་སེམས། འཕྱ༌སྨོད། ཕྲ༌མ། ང༌རྒྱལ། རྙོག་འཛིང་ཆེ་བ་བཅས་ཀྱི་དོན་དག་འབྱུང་བར་ཡང་འཇིགས་སོ།།
2CO 12:21 ང་རང་ཡོང་བའི་དུས༌སུ། བདག་གི་དཀོན་མཆོག་གིས་ང་ནི་ཁྱོད་རྣམས་ཀྱི་མདུན་ནས་ངོ་གནོང་དུ་འཇུག་པ་ལའང་ང་རང་འཇིགས་པ༌དང༌། ཡང་མི་མང་པོས་སྔོན་ཆད་མི་གཙང་བ༌དང༌། ལོག༌གཡེམ། འདོད་ཆགས་བཅས་སྡིག་པའི་ལས་བྱས་ཀྱང་འགྱོད་བཤགས་མི་བྱེད༌པས། ང་རང་ཡིད་སྐྱོ་བར་ཡང་འཇིགས་སོ།།
2CO 13:1 ད་ནི་ང་རང་ཐེངས་གསུམ་པར་ཁྱོད་ཅག་གི་གམ་དུ་ཡོང་བ་ཡིན་ལ། མི་གཉིས་གསུམ་ཞིག་གི་ངག་ལས་བདེན་དཔང་བྱེད་པར་བརྟེན༌ནས། ཚིག་རེ་རེ་བཞིན་གཏན་ལ་དབབ་དགོས་ཞེས་པ༌ལྟར།
2CO 13:2 བདག་གིས་སྔོན་ཆད་སྨྲས་མྱོང་ཞིང་ད་ལྟ་ང་རང་ཁྱོད་ཅག་གི་གམ་དུ་མེད༌ནའང༌། བདག་གིས་ཐེངས་གཉིས་པར་ཁྱོད་རྣམས་མཐོང་བའི་དུས་སུ་སྨྲས་པ༌བཞིན། སྡིག་པའི་ལས་བྱེད་མཁན་དང་མི་གཞན་ཐམས་ཅད་ལ་འདི་ལྟར༌སྨྲ་བར་བྱ༌སྟེ། ང་རང་ཡང་བསྐྱར་ཡོང་བ༌ན། བཟོད་པ་སྒོམ་པར་མི་བྱེད་ཅེས༌པའོ།།
2CO 13:3 རྒྱུ་མཚན་ནི་ཁྱོད་ཅག་གིས་སྐྱབས་མགོན་མཱ་ཤི་ཀས་བདག་གི་སེམས་ནང་ནས་གསུངས་པའི་དཔང་རྟགས་འཚོལ་བའི་ཕྱིར་རོ།། སྐྱབས་མགོན་མཱ་ཤི་ཀ་ནི་ཁྱོད་ཅག་གི་ཆ་ནས་གཉོམ་ཆུང་མ་ཡིན་པར་ནུས་མཐུ་ཆེན་པོ་མངའ་བ་ཡིན།
2CO 13:4 ཁོང་ནི་གཉོམ་ཆུང་གི་ངང་ནས་ཤིང་རྒྱ་གྲམ་གྱི་སྟེང་དུ་བརྡབས༌ནའང༌། དཀོན་མཆོག་གི་ནུས་མཐུ་ཆེན་པོར་བརྟེན་ནས་ད་དུང་སྐུ་གསོན༌པོར་བཞུགས། ངེད་ཅག་ཀྱང་ཁོང་གི་ནང་ནས་གཉོམ་ཆུང་ཡིན༌མོད། འོན་ཀྱང་དཀོན་མཆོག་གིས་ཁྱོད་ཅག་ལ་བསྟན་པའི་ནུས་མཐུ་ཆེན་པོའི་དབང་གིས། ངེད་རྣམས་ནི་སྐྱབས་མགོན་མཱ་ཤི་ཀ་དང་ལྷན་དུ་གསོན༌པར་འགྱུར་རོ།།
2CO 13:5 ཁྱོད་རྣམས་ཀྱིས་རྟག་པར་རང་ཉིད་དད་པའི་ནང་དུ་ཡོད་མེད་ལ་བརྟག༌དགོས་ཤིང༌། རང་གིས་རང་ལ་ཚོད་ལྟའང་བྱ་འོས་སོ།། ཁྱོད་ཅག་ནི་ཚོད་བགམ་ཐེག་མི་ཐུབ་པ་ཡིན༌པ་མ་གཏོགས། ཁྱོད་ཅག་གི་སེམས་སུ་ཡེ་ཤུ་མཱ་ཤི་ཀ་བཞུགས་ཡོད་པ་མི་ཤེས༌སམ།
2CO 13:6 ཁྱོད་རྣམས་ཀྱིས་ངེད་ཅག་ནི་ཚོད་བགམ་མི་ཐེག་པའི་མི་མ་ཡིན་པ་ཤེས་པའི་ཕྱིར་བདག་གིས་རེ་བ་བྱེད།
2CO 13:7 ཁྱོད་ཅག་གིས་ལས་ངན་པ་ཅི་ཡང་མི་བྱེད་པའི༌ཕྱིར། ངེད་ཅག་གིས་དཀོན་མཆོག་ལ་གསོལ་བ་འདེབས། འདི་ནི་ངེད་ཅག་ཚོད་བགམ་ཐེག་ཐུབ་པའི་མི་ཡིན་པ་མངོན་པའི་ཆེད་དུ་མ་ཡིན༌པར། ཁྱོད་ཅག་གི་སྤྱོད་ལམ་དྲང་པོ་བྱེད་པའི་ཆེད་དུ་ཡིན༌པས། མི་གཞན་དག་གིས་ངེད་ཅག་ཚོད་བགམ་མི་ཐེག་པར་འདོད་ནའང་རུང༌།
2CO 13:8 ངེད་ཅག་གིས་རྟག་ཏུ་བདེན་པ་སྐྱོང་བ་ལས་བདེན་པ་ལ་ངོ་རྒོལ་བྱེད༌མི་ནུས།
2CO 13:9 ངེད་ཅག་གཉོམ་ཆུང་ཡིན༌ནའང་ཁྱོད་ཅག་སྟོབས་ཅན་ཡིན་ན་ངེད་ཅག་དགའ། ངེད་ཅག་གི་རེ་སྨོན་ནི་ཁྱོད་རྣམས་མི་ཡོངས་སུ་རྫོགས་པ་ཞིག་ཏུ་འགྱུར་བ་དེ་ཡིན་ནོ།།
2CO 13:10 དེའི༌ཕྱིར། ང་རང་ཁྱོད་ཅག་གི་གམ་དུ་མེད་པའི་དུས་སུ་ཁྱོད་རྣམས་ལ་དོན་འདི་དག་བྲིས་པ༌ནི། ང་རང་ཁྱོད་ཅག་དང་འཕྲད་པའི་དུས༌སུ། གཙོ་བོས་བདག་ལ་གནང་བའི་དབང༌ལྟར། བདག་གིས་ཁྱོད་རྣམས་ལ་བཙན་སྐུལ་བྱེད་མི་དགོས་པའི་ཕྱིར་ཡིན༌ལ། དབང་དེ་ནི་མི་རྣམས་ཉམས་དམས་སུ་གཏོང་བའི་ཕྱིར་མ་ཡིན༌པར། མི་རྣམས་སྐྱེད་སྲིང་བྱེད་པའི་ཆེད་དུ་གནང་བ་ལགས༌སོ།།
2CO 13:11 སྤུན་ཟླ་རྣམས། མཐར་ཁྱོད་རྣམས་དགའ་ཞིང་སྤྲོ་བར༌གྱིས། ཁྱོད་ཅག་ནི་མི་ཡོངས་སུ་རྫོགས་པ་ཞིག་བྱེད་པ༌དང༌། སེམས་གསོ་ཐོབ་པ། བློ་སེམས་མཐུན༌པ། ཕན་ཚུན་འགྲིག་མཐུན་ཡོང་བ་བཅས་བྱེད་པར༌གྱིས། དེ་ནས་བྱམས་པ་དང་ཞི་བདེ་མངའ་བའི་དཀོན་མཆོག་ནི་ཁྱོད་རྣམས་དང་ལྷན་དུ་བཞུགས་ངེས༌སོ།།
2CO 13:12 ཁྱོད་ཅག་གིས་ཕན་ཚུན་བར་དུ་དམ་པའི་འོ་བྱས་ནས་འཚམས་འདྲི་ཞུ་བར༌གྱིས།
2CO 13:13 དད་ལྡན་དམ་པ་མཐའ་དག་གིས་ཀྱང་ཁྱོད་ཅག་ལ་འཚམས་འདྲི༌ཞུའོ།།
2CO 13:14 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ༌དང༌། དཀོན་མཆོག་གི་བྱམས༌པ། དམ་པའི་ཐུགས་ཉིད་ཀྱི་འབྲེལ་འདྲིས་བཅས་ནི་ཁྱོད་ཅག་ཐམས་ཅད་དང་མཉམ་དུ་བཞུགས་པར༌སྨོན།། །།
GAL 1:1 དེ་ཡང་སྐུ་ཚབ་པ་ཕོལ་ལོལ་ང་རང་ནི་མི་དང་མིའི་རྐྱེན་ལ་བརྟེན་ནས་སྐུ་ཚབ་པར་གྱུར་པ་ཞིག་མིན༌པར། ཡེ་ཤུ་མཱ་ཤི་ཀ་དང་ཁོང་ཉིད་གྲོངས་པ་ནས་སླར་གསོན་པར་མཛད་པའི་ཡབ་དཀོན་མཆོག་གིས་སྐུ་ཚབ་པར་བསྐོས་པ་ཞིག་ཡིན།
GAL 1:2 བདག་དང་མཉམ་དུ་ཡོད་པའི་སྤུན་ཟླ་རྣམས་ཀྱིས་ག་ལད་ཡཱ་ཡུལ་གྱི་ཆོས་ཚོགས་སོ་སོར་སྤྲིངས་པའི་འཕྲིན་ཡིག་འདི་ལྟ༌སྟེ།
GAL 1:3 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
GAL 1:4 སྐྱབས་མགོན་མཱ་ཤི་ཀས་བདག་ཅག་གི་ཡབ་དཀོན་མཆོག་གི་ཐུགས་དགོངས༌བཞིན། བདག་ཅག་གི་སྡིག་པའི་ཕྱིར་རང་སྲོག་བློས་བཏང༌སྟེ། བདག་ཅག་བསྐལ་པ་ངན་པ་འདི་ལས་སྐྱོབ་པར་མཛད༌པས།
GAL 1:5 དཀོན་མཆོག་ལ་ཇི་སྲིད་བར་དུ་བསྟོད་བསྔགས་བརྗོད་པར༌བྱའོ།། ཨ༌མེན།
GAL 1:6 སྐྱབས་མགོན་མཱ་ཤི་ཀའི་ཐུགས་རྗེ་བརྒྱུད་ནས་དཀོན་མཆོག་གིས་ཁྱོད་རྣམས་ལ་ཞལ་འབོད་གནང༌ཡང༌། ཁྱོད་རྣམས་ཀྱིས་འདི་ལྟར་མགྱོགས་མྱུར་ངང་ཁོང་ཉིད་རིང་དུ་དོར་ཏེ་འཕྲིན་བཟང་གཞན་ལ་བློ་ཕྱོགས་པར་ང་རང་ཧ་ལས༌བྱུང་།
GAL 1:7 དོན་དམ་དུ་དེ་ནི་འཕྲིན་བཟང་མ་ཡིན༌ཏེ། མི་ལ་ལས་ཁྱོད་རྣམས་ལ་གནོད་འཚེ་བཏང་ནས་སྐྱབས་མགོན་མཱ་ཤི་ཀའི་འཕྲིན་བཟང་ལ་བཟོ་བཅོས་བྱ་འདོད༌པ་ཡིན་ནོ།།
GAL 1:8 འོན༌ཀྱང༌། ངེད་ཅག་གམ་ནམ་མཁའི་ཞིང་ཁམས་ནས་ཕེབས་པའི་ཕོ་ཉ་གང་ཞིག་ཡིན༌ཡང༌། སྔོན་ཆད་ངེད་ཅག་གིས་བསྒྲགས་པའི་འཕྲིན་བཟང་དང་མི་འདྲ་བའི་འཕྲིན་བཟང་གཞན་ཞིག་ཁྱོད་རྣམས་ལ་སྒྲོག་པ་ཡིན༌ན། དེ་ལ་དམོད་མོ་ཐེབས་པར་གྱུར༌ཅིག
GAL 1:9 ངེད་ཅག་གིས་དེ་སྔར་སྨྲས་པ་བཞིན་ད་ལྟ་ཡང་སྨྲ་བར་བྱ༌སྟེ། སུ་ཞིག་གིས་ཁྱོད་རྣམས་ལ་འཕྲིན་བཟང་བསྒྲགས༌ཀྱང༌། དེ་ནི་ཁྱོད་ཅག་ལ་ཐོབ་པའི་འཕྲིན་བཟང་དང་མི་མཐུན༌ན། མི་དེ་ལའང་དམོད་མོ་ཐེབས་པར་གྱུར༌ཅིག
GAL 1:10 ད་ལྟ་བདག་གིས་མི་རྣམས་ཀྱི་སེམས་དགའ་བར་བྱེད༌དམ། ཡང་ན་དཀོན་མཆོག་གི་ཐུགས་དགྱེས་པར་བྱ། བདག་གིས་ད་དུང་མི་རྣམས་དགའ་བར་བྱེད་འདོད་པ་ཡིན༌ནམ། གལ་ཏེ་བདག་གིས་ད་དུང་མི་རྣམས་དགའ་བར་བྱེད་འདོད་པ་ཡིན་ན། ང་རང་ནི་སྐྱབས་མགོན་མཱ་ཤི་ཀའི་ཞབས་ཕྱི་པ་མ་ཡིན༌ནོ།།
GAL 1:11 སྤུན་ཟླ༌རྣམས། ངས་ཁྱོད་རྣམས་ལ་ཤེས་སུ་འཇུག་པར་འདོད་དེ། བདག་གིས་སྔར་ཁྱོད་རྣམས་ལ་བསྒྲགས་པའི་འཕྲིན་བཟང་དེ་ནི་མིའི་བློ་ལས་བྱུང་བ་མ་ཡིན་ནོ།།
GAL 1:12 ཅིའི་ཕྱིར་ཞེ་ན། འཕྲིན་བཟང་དེ་ནི་མི་ལས་ཐོབ་པ་མིན༌ལ། མིས་བདག་ལ་ཁྲིད་སྟོན་བྱས་པའང་མ་ཡིན༌པར། བདག་ལ་ཡེ་ཤུ་མཱ་ཤི་ཀ་མངོན་པའི་སྒོ་ནས་ཐོབ་པའི་ཕྱིར༌ཡིན།
GAL 1:13 བདག་གིས་སྔོན་ཆད་ཡ་ཧུ་དཱའི་མི་རིགས་ཀྱི་ཆོས་ལུགས་ལ་དད་པ་བྱེད༌དུས། སྤྱོད་ལམ་ཅི་འདྲ་ཡིན་པ་དང་ཐབས་གང་ཡོད་ཀྱིས་དཀོན་མཆོག་གི་ཆོས་ཚོགས་ལ་ཇི་ལྟར་གཉའ་གནོན་ཚད་མེད་བྱས་པ༌དང༌། དེ་འཇོམས་པར་འབད་མྱོང་བ་ནི་ཁྱོད་ཅག་གིས་ཀྱང་ཐོས་པ་ཡིན།
GAL 1:14 བདག་ནི་ཡ་ཧུ་དཱ་པའི་ཆོས་ལུགས་ཀྱི་ཁྲོད༌དུ། རང་རིགས་ཀྱི་ན་ཟླ་མང་པོ་ལས་ཡ་ཧུ་དཱ་པའི་ཆོས་གཞུང་གི་ཡོན་ཚད་མཐོ༌ཞིང༌། རང་གི་ཕ་མེས་ཡང་མེས་ཀྱི་ལུགས་སྲོལ་ལའང་ལྷག་ཏུ་བརྩོན་པ་བྱས་མྱོང༌ངོ་།།
GAL 1:15 འོན༌ཀྱང༌། དཀོན་མཆོག་གིས་ང་རང་མའི་མངལ་དུ་ཡོད་པ་ནས༌བཟུང༌ལོགས་སུ་བཀར་ཞིང་། ཁོང་གི་ཐུགས་རྗེས་ང་རང་ལ་ཞལ་འབོད་གནང་བ༌དང༌།
GAL 1:16 ངས་སྐྱབས་མགོན་ཡེ་ཤུ་ཕྱི་ཕྱོགས་པ་རྣམས་ལ་སྒྲོག་པའི༌ཕྱིར། དཀོན་མཆོག་གིས་ཐུགས་དགྱེས་པའི་ངང་ནས་རང་ཉིད་ཀྱི་སྲས་བདག་གི་སེམས་སུ་མངོན་པར་མཛད་པ༌ན། ངས་དོན་འདི་ཤ་ཁྲག་ལྡན་པའི་མི་རྣམས་ལ་གྲོས་མ་བྱས༌ཤིང༌།
GAL 1:17 ཡར་ཡེ་རུ་སཱ་ལེམ་དུ་བདག་གི་སྔོན་ལ་སྐུ་ཚབ་པར་གྱུར་པ་དེ་རྣམས་ཀྱི་དྲུང་དུའང་མ་སོང༌བར། ཨ་རབ་ཡུལ་ཁོ་ནར་སོང་བ་དང་དེ་ནས་སླར་ཡང་དཱ་མེ་སེག་ཏུ་ལོག་པ་ཡིན༌ནོ།།
GAL 1:18 དེ་ནས་ལོ་གསུམ་འགོར༌རྗེས། ང་རང་ད་གཟོད་ཡར་ཡེ་རུ་སཱ་ལེམ་དུ་སྐུ་ཚབ་པ་ཀེ་ཕཱ་ལ་ངོ་འཕྲད་དུ་སོང་ནས་ཁོ་དང་མཉམ་དུ་ཉིན་བཅོ་ལྔར་བསྡད༌དོ།།
GAL 1:19 དེ་རུ་སྐྱབས་མགོན་ཡེ་ཤུའི་ནུ་བོ་ཡ་ཀོབ་ལས་སྐུ་ཚབ་པ་གཞན་སུ་ཡང་མ་མཐོང༌།
GAL 1:20 བདག་གིས་ཁྱོད་རྣམས་ལ་བྲིས་པ་འདི་ནི་རྫུན་གཏམ་མིན༌ཏེ། ངས་དཀོན་མཆོག་གི་སྤྱན་སྔར་སྨྲས༌པ་དང་།
GAL 1:21 དེའི་རྗེས༌སུ། ང་རང་སིར་ཡཱ་དང་ཀི་ལིག་ཡཱ་ཡུལ་དུ་སོང༌བ་ཡིན།
GAL 1:22 དུས༌དེར། ཡ་ཧུ་དཱའི་ཡུལ་དུ་སྐྱབས་མགོན་མཱ་ཤི་ཀའི་ནང་དུ་ཡོད་པའི་ཆོས་ཚོགས་སོ་སོས་ང་རང་མཐོང་མ་མྱོང༌ཡང༌།
GAL 1:23 སྔོན་ཆད་བདག་ཅག་ལ་གནོད་འཚེ་བྱེད་མཁན༌དེས། ད་ལྟ་ཁོས་དེ་སྔར་འཇོམས་པར་འབད་པའི་ཆོས་དེ་སྒྲོག་གིན་འདུག་ཅེས་སྨྲས་པ་ཐོས་ཤིང་།
GAL 1:24 དེ་རྣམས་ཀྱིས་ཀྱང་བདག་གི་རྐྱེན་གྱིས་དཀོན་མཆོག་ལ་བསྟོད་བསྔགས་བརྗོད༌དོ།།
GAL 2:1 དེ་ནས་ལོ་བཅུ་བཞི་འགོར༌རྗེས། བདག་དང་པཱར་ན་པཱ་གཉིས་ཀྱིས་ཐེ་ཏུ་ཁྲིད་ནས་སླར་ཡང་ཡར་ཡེ་རུ་སཱ་ལེམ་དུ་སོང༌ངོ་༎
GAL 2:2 ང་རང་ནི་མངོན་པར་མཛད་པ་བཞིན་སོང༌སྟེ། ཕྱི་ཕྱོགས་པ་རྣམས་ལ་སྒྲོག་བཞིན་པའི་འཕྲིན་བཟང་དེ་སྤུན་ཟླ་རྣམས་ལ་སྨྲས་པ༌དང༌། རང་གིས་འདས་པ་དང་ད་ལྟར་ཅི་བྱས་པ་ཐམས་ཅད་དོན་མེད་དུ་མི་འགྱུར་བའི༌ཕྱིར། ཆོས་དཔོན་གྲགས་ཆེན་རྣམས་ལའང་ཟུར་དུ་སྨྲས༌པའོ།།
GAL 2:3 འོན༌ཀྱང༌། བདག་དང་མཉམ་དུ་འགྲོ་བའི་ཐེ་ཏུ་ནི་གྷི་རིག་པ་ཡིན༌ཡང༌། ཁོ་རང་ལ་བཙན་གྱིས་མཚན་སྐྱི་གཅོད་དུ་མ་བཅུག
GAL 2:4 དེ་ནི་སྤུན་ཟླ་རྫུས་མ་འགའ་ཞིག་ལྐོག་འཛུལ་གྱིས་ཡོང་ནས་བདག་ཅག་བྲན་གཡོག་ཏུ་བསྒྱུར་བའི༌ཆེད་དུ། མཱ་ཤི་ཀ་ཡེ་ཤུའི་ནང་གི་ང་ཚོའི་རང་དབང་ལ་ལྐོག་ལྟ་བྱས༌པའི་ཕྱིར་ཡིན།
GAL 2:5 འཕྲིན་བཟང་གི་བདེན་པ་ཉིད་དེ་ཁྱོད་རྣམས་ཀྱི་ཁྲོད་དུ་སྔར་བཞིན་གནས་པའི༌ཕྱིར། ངེད་ཅག་གིས་ཡུད་ཙམ་ལའང་དེ་དག་གི་གཏམ་ལ་མ་བསྟུན་མོད།
GAL 2:6 འོན་ཀྱང་མི་གྲགས་ཆེན་དེ་དག་ནི་མི་ཅི་ལྟ་བུ་ཞིག་ཡིན་ཡང་བདག་ལ་འབྲེལ་བ་མེད༌དེ། དཀོན་མཆོག་ལ་ཕྱོགས་རིས་མེད་ཅིང་། མི་གྲགས་ཆེན་དེ་རྣམས་ཀྱིས་ཀྱང་ང་ལ་ཁ་སྣོན་ཅི་ཡང་མ་བརྒྱབ༌པར།
GAL 2:7 དཀོན་མཆོག་གིས་སྐུ་ཚབ་པ་པེ་ཏྲོ་ཁོང་ཉིད་མཚན་སྐྱི་བཅད་པ་རྣམས་ལ་འཕྲིན་བཟང་སྒྲོག་པར་མངགས་བཅོལ་གནང་བ༌ལྟར། ང་རང་ཡང་ཕྱི་ཕྱོགས་པ་རྣམས་ལ་འཕྲིན་བཟང་སྒྲོག་པར་མངགས་བཅོལ་གནང་ཡོད་པ་ཁོ་རྣམས་ཀྱིས་ཤེས་སོ།།
GAL 2:8 ཅིའི་ཕྱིར་ཞེ་ན། མཚན་སྐྱི་བཅད་པ་རྣམས་ལ་སྐུ་ཚབ་པའི་ལས་བསྒྲུབ་པར་པེ་ཏྲོ་ཁོང་ཉིད་ལ་སྐུལ་སློང་གནང་མཁན་དེ་ཉིད་ཀྱིས། ཕྱི་ཕྱོགས་པ་རྣམས་ལ་སྐུ་ཚབ་པའི་ལས་བསྒྲུབ་པར་ང་རང་ལའང་སྐུལ་སློང་གནང་བའི་ཕྱིར་རོ༎
GAL 2:9 ང་རང་ལ་གནང་བའི་ཐུགས་རྗེ་དེ་ནི་ཆོས་དཔོན་རྣམས་ཀྱིས་ཤེས༌ཤིང་། ཆོས་ཚོགས་ཀྱི་ཀ་བ་ཡིན་ཟེར་བའི་ཡ་ཀོབ༌དང༌། ཀེ་ཕཱ། ཡོ་ཧ་ནན་བཅས་ཀྱིས་ང་དང་པཱར་ན་པཱ་གཉིས་མཉམ་གྲོགས་ཡིན་པའི་རྟགས་སུ་ངེད་གཉིས་ལ་གཡས་ལག་གིས་ལག་འཇུ་བྱས༌ཏེ། ངེད་གཉིས་ཕྱི་ཕྱོགས་པ་རྣམས་ལ་ཆོས་སྤེལ་བ་དང་ཁོ་རྣམས་མཚན་སྐྱི་བཅད་པ་རྣམས་ལ་ཆོས་སྤེལ་དུ་འགྲོ་བར་ཐག་བཅད།
GAL 2:10 ཁོ་རྣམས་ཀྱིས་ངེད་གཉིས་ལ་དབུལ་པོ་རྣམས་སེམས་ལ་འཛིན་དགོས་པར་བསྐུལ༌ཞིང༌། དེ་ནི་བདག་གིས་བརྩོན་སེམས་ཆེན་པོས་བསྒྲུབ་འདོད་པའང་ཡིན༌ནོ།།
GAL 2:11 དོན་དེའི་རྗེས༌སུ། ཀེ་ཕཱ་ནི་ཨན་ཏི་ཡོག་ཡཱ་རུ་སླེབས་པ༌དང༌། ཁོ་རང་ལ་ནོར་འཁྲུལ་གྱི་ཆ་ཡོད་པས་བདག་གིས་ཁ་རི་ཁ་ཐུག་གིས་ཁོ་ལ་འགོག་རྒོལ་བྱས་པ་ཡིན་ནོ།།
GAL 2:12 རྒྱུ་མཚན་ནི་ཡ་ཀོབ་ཀྱི་ཕྱོགས་ནས་ཡོང་བའི་མི་རྣམས་མ་སླེབས་པའི་སྔོན༌ལ། ཁོས་ཕྱི་ཕྱོགས་པ་རྣམས་དང་མཉམ་དུ་ཁ་ཟས་སྤྱད་ཅིང༌། ཡང་མི་དེ་རྣམས་སླེབས་པ༌དང༌། ཁོ་རང་མཚན་སྐྱི་བཅད་པ་རྣམས་ལ་འཇིགས་ཏེ་ཕྱི་ཕྱོགས་པ་རྣམས་དང་ཁ་བྲལ་ནས་སོང་བའི་ཕྱིར༌རོ།།
GAL 2:13 དེ་ནས་ཡ་ཧུ་དཱ་པ་གཞན་རྣམས་ཀྱིས་ཀྱང་ཁོ་དང་མཉམ་དུ་ཚུལ་འཆོས་བྱས་ཤིང༌། པཱར་ན་པཱ་ཡིས་ཀྱང་དེ་དག་དང་ལྷན་དུ་ཚུལ་འཆོས་བྱས་པ་ཡིན།
GAL 2:14 འོན༌ཀྱང༌། བདག་གིས་ཁོ་རྣམས་ཀྱི་སྤྱོད་ལམ་མི་དྲང་བ་དེ་ནི་འཕྲིན་བཟང་གི་བདེན་ལུགས་དང་མི་མཐུན་པ་མཐོང༌བས། མི་ཚོགས་ཀྱི་མདུན་ནས་ཀེ་ཕཱ་ལ་འདི་ལྟར༌དུ། ཁྱོད་ནི་ཡ་ཧུ་དཱ་པ་ཞིག་ཡིན་ཡང་ཡ་ཧུ་དཱ་པའི་ཆོས་ཀྱི་ལུགས་སྲོལ་དོར་ནས་ཕྱི་ཕྱོགས་པ་ལྟར་སྤྱད་པ་སྤྱོད་ན། ད་དུང་བཙན་གྱིས་ཕྱི་ཕྱོགས་པ་རྣམས་ལ་ཡ་ཧུ་དཱ་པ་ལྟར་སྤྱད་པ་སྤྱོད་པར་བསྐུལ་བ་དེ་ཅི་ཡིན་ནམ་ཞེས་སྨྲས༌ཤིང༌།
GAL 2:15 བདག་ཅག་ནི་སྐྱེས་མ་ཐག་ནས་ཡ་ཧུ་དཱ་པ་ཡིན་པ༌ལས། ཕྱི་ཕྱོགས་པ་སྡིག་ཅན་ལྟ་བུ་ཞིག་མིན༌ཡང༌།
GAL 2:16 མི་རྣམ་དག་ཏུ་བརྩི་བ་ནི་བཀའ་ཁྲིམས༌ལྟར་བསྒྲུབས་པའི་རྐྱེན་གྱིས་མ་ཡིན༌ཏེ། ཡེ་ཤུ་མཱ་ཤི་ཀ་ལ་དད་པ་བྱས་པའི་རྐྱེན་ཡིན་པ་ངེད་ཅག་གིས་ཤེས་པས། བདག་ཅག་ཀྱང་བཀའ་ཁྲིམས་ལྟར་བསྒྲུབས་པའི་རྐྱེན་གྱིས་མ་ཡིན་པར། སྐྱབས་མགོན་མཱ་ཤི་ཀ་ལ་དད་པའི་སྒོ་ནས་མི་རྣམ་དག་ཏུ་བརྩི་བའི༌ཕྱིར། མཱ་ཤི་ཀ་ཡེ་ཤུ་ལ་དད་པ་བྱས་སོ༎ རྒྱུ་མཚན་ནི་ཤ་ཁྲག་ལྡན་པའི་མི་སུ་ཡིན་ཡང་བཀའ་ཁྲིམས་ལྟར་བསྒྲུབས་ནས་མི་རྣམ་དག་ཏུ་གྱུར་པ་ནི་གཅིག་ཀྱང་མེད་པའི་ཕྱིར༌རོ།།
GAL 2:17 བདག་ཅག་ནི་སྐྱབས་མགོན་མཱ་ཤི་ཀར་དད་པ་བྱས་ནས་མི་རྣམ་དག་ཏུ་བརྩི་འདོད༌ཀྱང༌། ད་དུང་བདག་ཅག་མི་སྡིག་ཅན་ཡིན་པར་བརྩིས་ན། སྐྱབས་མགོན་མཱ་ཤི་ཀས་མི་ལ་སྡིག་པ་བྱེད་དུ་འཇུག་པ་ཡིན་ནམ་ཞེ༌ན། དེ་འདྲ་གཏན་ནས་མ་ཡིན༌ཏེ།
GAL 2:18 བདག་གིས་སྔར་ནས་བཤིགས་པ་དེ་ཡང་བསྐྱར་བརྩིགས་པ་ཡིན༌ན། དེ་ནི་ང་རང་ཉེས་པ་བྱེད་མཁན་ཡིན་པར་བདེན་དཔང་བྱས་པ་ཡིན།
GAL 2:19 ཅིའི་ཕྱིར་ཞེ་ན། བཀའ་ཁྲིམས་བརྒྱུད་ནས་དེའི་ཕྱོགས་སུ་རང་ཉིད་ཤི་བ་སྟེ། བདག་ ནི་དཀོན་མཆོག་གི་ཕྱོགས་སུ་གསོན་པོར་གནས་ཐུབ་པའི་ཕྱིར༌རོ།།
GAL 2:20 བདག་ནི་སྐྱབས་མགོན་མཱ་ཤི་ཀ་དང་མཉམ་དུ་ཤིང་རྒྱ་གྲམ་གྱི་སྟེང་དུ་བརྡབས་ཟིན། ད་ལྟ་གསོན་པོར་གནས་པ་ནི་ང་རང་མིན༌ཏེ། སྐྱབས་མགོན་མཱ་ཤི་ཀ་བདག་གི་སེམས་སུ་གསོན་པོར་བཞུགས་པ་ཡིན། ད་ལྟ་བདག་གི་ལུས་ཕུང་གསོན་ཞིང་འཚོ་བཞིན་ཡོད་པ་ནི་དཀོན་མཆོག་གི་སྲས་ལ་དད་པ་བྱས་པར་བརྟེན་ནས་འཚོ་ཞིང་གཞེས་པ་ཡིན༌ལ། ཁོང་གིས་ང་རང་ལ་བྱམས་ཤིང་གཅེས་པས་བདག་གི་དོན་དུ་རང་སྲོག་ཀྱང་བློས་བཏང༌ངོ་།།
GAL 2:21 དེའི༌ཕྱིར། བདག་གིས་དཀོན་མཆོག་གི་ཐུགས་རྗེ་མི་འདོར། གལ༌ཏེ། མི་རྣམ་དག་ཏུ་བརྩི་བ་ནི་བཀའ་ཁྲིམས་ཀྱི་སྒོ་ནས་བྱུང་བ་ཡིན༌ན། སྐྱབས་མགོན་མཱ་ཤི་ཀ་ནི་དོན་མེད་དུ་སྐུ་གྲོངས་པ་མ་ཡིན་ནམ་ཞེས་སྨྲས༌པའོ།།
GAL 3:1 ཀྱེ། ག་ལད་ཡཱ་པ༌བླུན་པོ་རྣམས། ཡེ་ཤུ་མཱ་ཤི་ཀ་ཇི་ལྟར་ཤིང་རྒྱ་གྲམ་གྱི་སྟེང་དུ་བརྡབས་པའི་དོན་དེ་ཁྱོད་ཅག་གི་མིག་མདུན་དུ་གསལ་པོར་བཤམས༌ནའང༌། སུ་ཞིག་གིས་ཁྱོད་རྣམས་བསླུས་པ་ཡིན༌ནམ།
GAL 3:2 ངས་ཁྱོད་རྣམས་ལ་དོན་གཅིག་ཁོ་ན་དྲི་བར་བྱ༌སྟེ། ཁྱོད་རྣམས་ལ་དམ་པའི་ཐུགས་ཉིད་ཐོབ་པ་ནི་བཀའ་ཁྲིམས་ལྟར་བསྒྲུབས་པའི་རྐྱེན་གྱིས་ཡིན༌ནམ། ཡང་ན་འཕྲིན་བཟང་ལ་མཉན་ནས་དད་པ་བྱས་པའི་རྐྱེན་གྱིས་ཡིན།
GAL 3:3 ཁྱོད་ཅག་གིས་དམ་པའི་ཐུགས་ཉིད་ལ་བརྟེན་ནས་འགོ་བརྩམས༌མོད། འོན་ཀྱང་ད་ལྟ་ཁྱོད་ཅག་གིས་ཤ་ཁྲག་གི་ཕུང་བོར་བརྟེན་ནས་ལས་དེ་བསྒྲུབ་ཐུབ་བམ་ཞེ་ན་མི་ཐུབ། ཁྱོད་ཅག་ནི་ཇི་འདྲའི་བླུན་པ་ལ༌ཨང༌།
GAL 3:4 ཁྱོད་ཅག་གིས་སྡུག་བསྔལ་དེ་འདྲ་མང་པོ་མྱངས་པར་སྙིང་པོ་མེད་དམ་ཞེ༌ན། སྙིང་པོ་མེད་པ་ཞིག་གཏན་ནས་མ་ཡིན།
GAL 3:5 དཀོན་མཆོག་གིས་ཁྱོད་ཅག་ལ་དམ་པའི་ཐུགས་ཉིད་གནང་ཞིང་། ཁྱོད་རྣམས་ཀྱི་ཁྲོད་དུ་ངོ་མཚར་བའི་འཕྲིན་ལས་མཛད་པ་ནི་ཁྱོད་ཅག་གིས་བཀའ་ཁྲིམས་ལྟར་བསྒྲུབས་པའི་ཕྱིར་མིན༌ཏེ། འཕྲིན་བཟང་ལ་མཉན་ནས་དད་པ་བྱས་པའི་ཕྱིར་ཡིན༌ནོ།།
GAL 3:6 དེ་ལྟར་ཨབ་ར་ཧམ་གྱི་སྐོར་ལ་ཇི་སྐད་དུ། ཁོང་གིས་དཀོན་མཆོག་ལ་དད་པ་བྱས་པ་དང༌། དཀོན་མཆོག་གིས་ཀྱང་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་གསུངས་ཡོད༌པས།
GAL 3:7 ཁྱོད་ཅག་གིས་ཤེས་དགོས་པ་ནི་དད་པ་བྱེད་མཁན་གྱི་མི་རྣམས་ཨབ་ར་ཧམ་གྱི་བུ་རབས་ཚ་རྒྱུད་ཡིན་པ་དང་།
GAL 3:8 གསུང་རབ་ལས་ཀྱང་སྔོན་ལ་བསྟན་ཡོད་དེ། དཀོན་མཆོག་གིས་ཕྱི་ཕྱོགས་པ་རྣམས་དད་པའི་སྒོ་ནས་མི་རྣམ་དག་ཏུ་བརྩི་ངེས་པའི་སྐོར༌ལ། སྔར་ནས་ཨབ་ར་ཧམ་ལ་ཇི་སྐད༌དུ། ཁྱོད་རང་བརྒྱུད་ནས་ས་སྟེང་གི་མི་རིགས་ཐམས་ཅད་ལ་བྱིན་རླབས་འཐོབ་པར་འགྱུར་ཞེས་འཕྲིན་བཟང་བསྒྲགས༌པས།
GAL 3:9 དད་པ་བྱེད་མཁན་རྣམས་ལ་དད་པ་ཅན་ཨབ་ར་ཧམ་དང་མཉམ་དུ་བྱིན་རླབས་ཐོབ་པའང་ཤེས་ནུས༌སོ།།
GAL 3:10 དེ་ཡང་བཀའ་ཁྲིམས་ཀྱི་ལས་ལ་བརྟེན་མཁན་ཐམས་ཅད་ལ་དམོད་མོ་ཐེབས་འོས་སོ།། ཅིའི་ཕྱིར་ཞེ་ན། གསུང་རབ་ཀྱི་མདོ་ལས་ཇི་སྐད༌དུ། རྟག་ཏུ་བཀའ་ཁྲིམས་ཀྱི་མདོ་ལས་གསུངས་ཡོད་པ་མཐའ་དག་བཞིན་མི་སྒྲུབ་མཁན་ཐམས་ཅད་ལ་དམོད་མོ་ཐེབས་འོས་ཞེས་བཀོད་པའི་ཕྱིར༌ཡིན།
GAL 3:11 ཡང་གསུང་རབ་ཀྱི་མདོ་ལས་ཇི་སྐད༌དུ། མི་རྣམ་དག་ནི་དད་པའི་སྒོ་ནས་འཚོ་བར་འགྱུར་ཞེས་གསུངས༌པས། བཀའ་ཁྲིམས་ལ་བརྟེན་ནས་དཀོན་མཆོག་གི་དྲུང་དུ་མི་རྣམ་དག་ཏུ་གྱུར་པ་ནི་གཅིག་ཀྱང་མེད་པ་གསལ་ལོ།།
GAL 3:12 བཀའ་ཁྲིམས་ནི་དད་པ་ལ་བརྟེན་ནས་བྱུང་བ་མ་ཡིན༌ཏེ། ཇི་སྐད༌དུ། བཀའ་ཁྲིམས་བཞིན་དུ་སྒྲུབ་མཁན་གྱིས་བཀའ་ཁྲིམས་ལ་བརྟེན་ནས་འཚོ་བ་རོལ་དགོས་པ་ཡིན་ཞེས་གསུངས་པའི་ཕྱིར༌རོ།།
GAL 3:13 ཡང་གསུང་རབ་ཀྱི་མདོ་ལས་ཇི་སྐད༌དུ། སྡོང་པོའི་སྟེང་དུ་དཔྱངས་པ་ཐམས་ཅད་ནི་དམོད་མོ་ཐེབས་པ་ཡིན་ཞེས་བཀོད་ཡོད༌པས། སྐྱབས་མགོན་མཱ་ཤི་ཀ་ནི་བདག་ཅག་གི་ཆེད་དུ་དམོད་མོ་རུ་གྱུར༌ཏེ། བདག་ཅག་བཀའ་ཁྲིམས་ཀྱི་དམོད་མོ་ལས་བླུས་པ་ཡིན།
GAL 3:14 དེ་ནི་ཨབ་ར་ཧམ་ལ་གནང་བའི་བྱིན་རླབས་དེ་མཱ་ཤི་ཀ་ཡེ་ཤུ་བརྒྱུད་ནས་ཕྱི་ཕྱོགས་པ་རྣམས་ལ་འཐོབ་པར་འགྱུར༌ཞིང༌། བདག་ཅག་ལའང་དད་པའི་སྒོ་ནས་ཞལ་བཞེས་གནང་བའི་དམ་པའི་ཐུགས་ཉིད་འཐོབ་པར་འགྱུར་བའི་ཕྱིར༌རོ།།
GAL 3:15 སྤུན་ཟླ༌རྣམས། ངས་མི་ཡི་བཤད་སྲོལ་ལྟར་སྨྲ་བར་བྱ༌སྟེ། མི་དང་མིའི་བར་གྱི་གྲོས་འཆམ་ཡི་གེ་ཞིག་ལ་མཚོན༌ན། གཏན་ལ་ཕབ་རྗེས་འདོར་བའམ་ཁ་སྣོན་བྱས་མི་ཆོག
GAL 3:16 ཞལ་བཞེས་གནང་བ་རྣམས་ནི་ཨབ་ར་ཧམ་དང་ཁོའི་བུ་རྒྱུད་ལ་གསུངས་པ་ཡིན༌མོད། འོན་ཀྱང་བུ་རྒྱུད་རྣམས་ཞེས་གསུངས་མེད༌ཅིང༌། དེ་ནི་མི་མང་པོ་བསྟན་པ་མ་ཡིན༌པར། ཁྱོད་ཀྱི་བུ་རྒྱུད་ཅེས་གསུངས༌ཏེ། མི་གཅིག་ཁོ་ན་བསྟན་པ་ཡིན་ཞིང་དེ་ནི་སྐྱབས་མགོན་མཱ་ཤི་ཀ་ལགས་སོ།།
GAL 3:17 བདག་གི་སྨྲ་བའི་དོན་ནི་འདི་ལྟ་སྟེ། དཀོན་མཆོག་གིས་སྔ་མོ་ནས་གཏན་ལ་ཕབ་པའི་ཞལ་ཆད་དེ་ནི། ལོ་ངོ་བཞི་བརྒྱ་སུམ་ཅུའི་རྗེས་སུ་བྱུང་བའི་བཀའ་ཁྲིམས་ཀྱིས་མེད་པར་བཟོ་མི་ནུས༌ལ། ཞལ་བཞེས་ཀྱང་སྟོང་བར་བྱ་མི་ནུས་ཏེ།
GAL 3:18 བགོ་སྐལ་ནི་བཀའ་ཁྲིམས་ལས་ཐོབ་པ་ཡིན༌ན། ཞལ་བཞེས་གནང་བ་ལས་ཐོབ་པ་མིན་པའི་ཕྱིར༌ཡིན། འོན༌ཀྱང༌། དཀོན་མཆོག་གིས་ཞལ་བཞེས་གནང་བ་ལྟར་བགོ་སྐལ་དེ་ཨབ་ར་ཧམ་ལ་གནང་བ་ཡིན༌ནོ།།
GAL 3:19 དེས་ན་ཅིའི་ཕྱིར་བཀའ་ཁྲིམས་བྱུང་བ་ཡིན་ཞེ༌ན། ཞལ་བཞེས་གནང་བའི་ས་བོན་དེ་ཉིད་ཕེབས་ཡོང་བའི་བར༌དུ། མི་རྣམས་ཀྱིས་ཉེས་སྐྱོན་བྱས་པའི་དབང་གིས་ཆེད་དུ་གནང་བ་ཡིན༌ཞིང༌། ཕོ་ཉ་རྣམས་ཀྱིས་བར་མི་དེ་ཉིད་བརྒྱུད་ནས་གཏན་ལ་ཕབ་ཅིང་བསྒྲགས༌པ་ཡིན།
GAL 3:20 སྤྱིར་བར་མི་ནི་ཕྱོགས་གཅིག་ལ་བྱེད་པ་མ་ཡིན༌མོད། འོན་ཀྱང་དཀོན་མཆོག་ནི་གཅིག་རང་ཡིན་ནོ།།
GAL 3:21 དེས་ན་བཀའ་ཁྲིམས་ནི་དཀོན་མཆོག་གི་ཞལ་བཞེས་དང་འགལ་བ་ཡིན་ནམ་ཞེ༌ན། གཏན་ནས་མི་འགལ་ལོ།། མི་ཞིག་ལ་ཚེ་སྲོག་གནང་བར་བྱེད་ནུས་པའི་བཀའ་ཁྲིམས་ཤིག་གནང་ཡོད་པ་ཡིན༌ན། མི་རྣམ་དག་ཏུ་བརྩི་བ་ནི་བཀའ་ཁྲིམས་ཀྱི་སྒོ་ནས་བྱུང་བ་མ་ཡིན༌ནམ།
GAL 3:22 ཞལ་བཞེས་དེ་ནི་ཡེ་ཤུ་མཱ་ཤི་ཀར་དད་པའི་སྒོ་ནས་དད་ལྡན་རྣམས་ལ་གནང་བར་འགྱུར་བའི་ཕྱིར། གསུང་རབ་ཀྱིས་འཇིག་རྟེན་གྱི་མི་ཐམས་ཅད་སྡིག་པའི་ཁོངས་སུ་བསྡུས་པ་ཡིན་ནོ།།
GAL 3:23 འོན༌ཀྱང༌། དད་པ་བྱེད་པའི་དུས་དེ་མ་སླེབས་པའི་སྔོན༌ལ། བཀའ་ཁྲིམས་ཀྱིས་བདག་ཅག་ཐམས་ཅད་དབང་དུ་བསྡུས༌ཤིང༌། མ་འོངས་པར་དད་པ་དེ་གསལ་པོར་མངོན་པའི་བར་དུ་བསྲུངས་སོ།།
GAL 3:24 དེ་བས་བདག་ཅག་དད་པའི་སྒོ་ནས་མི་རྣམ་དག་ཏུ་བརྩི་བར་མཛད་པའི་ཕྱིར། བཀའ་ཁྲིམས་ནི་བདག་ཅག་ལ་སློབ་སྟོན་གནང་བའི་སློབ་དཔོན་ཡིན༌ཏེ། བདག་ཅག་སྐྱབས་མགོན་མཱ་ཤི་ཀའི་དྲུང་དུ་འདྲེན་པ་ཡིན།
GAL 3:25 འོན༌ཀྱང༌། དད་པ་བྱེད་པའི་དུས་དེ་སླེབས་པ་དང་བདག་ཅག་ནི་སློབ་དཔོན་གྱི་དབང་འོག་ཏུ་ཡོད་པ་མ་ཡིན༌ནོ།།
GAL 3:26 དེའི༌ཕྱིར། ཁྱོད་རྣམས་ཀྱིས་མཱ་ཤི་ཀ་ཡེ་ཤུར་དད་པ་བྱས་པའི་དབང༌གིས། ཐམས་ཅད་དཀོན་མཆོག་གི་བུ་དང་བུ་མོ་ཡིན་ནོ།།
GAL 3:27 སྐྱབས་མགོན་མཱ་ཤི་ཀའི་ནང་ནས་ཁྲུས་གསོལ་ལ་ཞུགས་མཁན་ཐམས་ཅད་ཀྱིས་སྐྱབས་མགོན་མཱ་ཤི་ཀ་ནི་གོས་བཞིན་དུ་རང་གི་ལུས་ལ་གྱོན་པ་ཡིན།
GAL 3:28 ཁྱོད་རྣམས་ནི་ཡ་ཧུ་དཱ་པ༌དང༌། གྷི་རིག་པ། བདག་པོའམ་བྲན༌གཡོག ཕོ་མོའི་དབྱེ་བ་བཅས་མི་མཛད་པར། དད་ལྡན་ཐམས་ཅད་མཱ་ཤི་ཀ་ཡེ་ཤུའི་ནང་གཅིག་ཏུ་བསྒྲིལ་ལོ།།
GAL 3:29 ཁྱོད་ཅག་ནི་སྐྱབས་མགོན་མཱ་ཤི་ཀར་གཏོགས༌པ་ཡིན་ན། ཁྱོད་ཅག་ཨབ་ར་ཧམ་གྱི་བུ་རབས་ཚ་རྒྱུད་ཡིན་ཞིང་། ཞལ་བཞེས་གནང་བ་ལྟར་ཕ་ཤུལ་འཛིན་མཁན་དུ་གྱུར་པའང་ཡིན༌ནོ།།
GAL 4:1 དེ་ཡང་བདག་གིས་ཕ་ཤུལ་འཛིན་མཁན་ཞེས་བརྗོད་པ་ནི་རྒྱུ་ནོར་ཐམས་ཅད་ཀྱི་བདག་པོ་ལ་གོ་བ་ཡིན༌ཡང༌། བྱིས་པའི་དུས་སུ་གཡོག་པོ་ཞིག་དང་ཁྱད་པར་གང་ཡང་མེད་དེ།
GAL 4:2 རང་གི་ཕ་ཡིས་གཏན་ཁེལ་བྱས་པའི་དུས་དེ་སླེབས་པའི་བར༌དུ། དགེ་རྒན་དང་གཉེར་པའི་དབང་འོག་ཏུ་སྡོད་པ་ཡིན་ནོ།།
GAL 4:3 དེ་བཞིན་དུ་བདག་ཅག་ཀྱང་བྱིས་པ་ལྟ་བུའི་དུས་སུ་འཇིག་རྟེན་གྱི་ཤེས་ཡོན་ཕྲན་བུ་དག་གི་དབང་འོག་ཏུ་སྡོད༌པ་ཡིན།
GAL 4:4 འོན༌ཀྱང༌། དུས་ལོངས༌པའི་ཚེ། དཀོན་མཆོག་གིས་རང་ཉིད་ཀྱི་སྲས་འཇིག་རྟེན་དུ་མངགས༌ཤིང༌། བུ་མོ་ཞིག་གི་མངལ་ལས་འཁྲུངས་པ་དང་། བཀའ་ཁྲིམས་ཀྱི་ལུགས་སྲོལ་འོག་ཏུ་འཁྲུངས་པའང་ཡིན་ཏེ།
GAL 4:5 བཀའ་ཁྲིམས་ཀྱི་དབང་འོག་ཏུ་ཡོད་པ་རྣམས་བླུས་ནས། བདག་ཅག་ཁོང་གི་བུ་དང་བུ་མོར་མཛད་པའི༌ཕྱིར་རོ།།
GAL 4:6 ཁྱོད་ཅག་ནི་དཀོན་མཆོག་གི་བུ་དང་བུ་མོ་ཡིན༌པས། དཀོན་མཆོག་གིས་རང་གི་སྲས་ཀྱི་ཐུགས་ཉིད་དེ་ཁྱོད་རྣམས་ཀྱི་སེམས་སུ་མངགས༌ཤིང༌། ཨབ་བཱ་ལགས། ཡབ་ལགས་ཞེས་འབོད་པར་བསྐུལ་ལོ།།
GAL 4:7 དེའི༌ཕྱིར། དུས་དེ་ནས༌བཟུང༌། ཁྱོད་ཅག་ནི་གཡོག་པོ་མ་ཡིན་པར་དཀོན་མཆོག་གི་བུ་དང་བུ་མོ་ཡིན། དེ་ལྟར་ལགས༌ན། ཁྱོད་ཅག་ནི་དཀོན་མཆོག་གི་རྐྱེན་གྱིས་ཕ་ཤུལ་འཛིན་མཁན་ཡང་ཡིན༌ནོ།།
GAL 4:8 སྔོན་ཆད་ཁྱོད་ཅག་གིས་དཀོན་མཆོག་ངོ་མི་ཤེས་པའི་དུས༌སུ། ངོ་བོ་ལྟར་དཀོན་མཆོག་མ་ཡིན་པ་དག་གི་གཡོག་པོ་བྱས༌པ་ཡིན་ནོ།།
GAL 4:9 ད་ལྟ་ཁྱོད་ཅག་གིས་དཀོན་མཆོག་ངོ་ཤེས༌ཤིང༌། དོན་དམ་དུ་དཀོན་མཆོག་གིས་ཀྱང་ཁྱོད་རྣམས་མཁྱེན༌པ་ཡིན་པས། ཁྱོད་རྣམས་སླར་ཡང་ནུས་པ་མེད་པའི་ཤེས་ཡོན་ཕྲན་བུའི་དབང་འོག་ཏུ་འཇུག་དོན༌ཅི། ཁྱོད་ཅག་གིས་སླར་ཡང་དེར་གཡོག་བྱེད་པར་འདོད་དམ།
GAL 4:10 ཁྱོད་རྣམས་ཀྱིས་ཚེས༌དང༌། ཟླ༌བ། དུས༌ཚིགས། ལོ་འཁོར་བཅས་གཟབ་གཟབ་ངང་ནས་བསྲུངས་པས།
GAL 4:11 སྔར་བདག་གིས་ཁྱོད་རྣམས་ཀྱི་ཕྱིར་བརྩོན་པའི་ལས་དེ་རྣམས་དོན་མེད་དུ་གྱུར་པ་ལ་སེམས་ཁྲལ་བྱེད་དོ།།
GAL 4:12 སྤུན་ཟླ༌རྣམས། དེ་སྔར་ང་རང་ཁྱོད་རྣམས་དང་འདྲ་བར་གྱུར་མྱོང་བས། ཁྱོད་ཅག་ང་དང་འདྲ་བར་གྱུར་ཅིག་ཅེས་ཞུའོ།། ཁྱོད་ཅག་གིས་བདག་ལ་འགལ་བའི་ལས་ཅི་ཡང་བྱས་མ་མྱོང༌།
GAL 4:13 བདག་གིས་ཐེངས་དང་པོར་ཁྱོད་རྣམས་ལ་འཕྲིན་བཟང་བསྒྲགས་པའི་དོན་དེ་ཁྱོད་ཅག་གིས་ཀྱང་ཤེས༌ཏེ། སྐབས་དེར་བདག་ལ་ན་ཚ་བྱུང་ཡོད་པས།
GAL 4:14 བདག་གི་ལུས་པོའི་རྐྱེན་གྱིས་ཁྱོད་ཅག་ལ་དཀའ་སྡུག་བྱུང་ནའང་ཁྱོད་རྣམས་ཀྱིས་བདག་ལ་མཐོང་ཆུང་མ་བྱས་ཤིང་ང་རང་མ་དོར༌བར། དཀོན་མཆོག་གི་ཕོ་ཉ་དང་མཱ་ཤི་ཀ་ཡེ་ཤུ་བཞིན་དུ་སྣེ་ལེན་བཟང་པོ་བྱས་སོ།།
GAL 4:15 དེས་ན་སྔོན་ཆད་ཁྱོད་ཅག་གི་སྤྲོ་སྣང་དེ་གང་དུ་ཡོད༌དམ། དེའི་དུས༌སུ། བསྒྲུབ་ནུས་པ་ཡིན་ན་ཁྱོད་རྣམས་ཀྱིས་རང་གི་མིག་བཏོན་ནས་བདག་ལ་སྟེར་བར་ངེས་ཤིང་། དོན་འདིར་བདག་གིས་བདེན་དཔང་བྱེད་པ་ཡིན།
GAL 4:16 ད་ལྟ་བདག་གིས་ཁྱོད་ཅག་ལ་བདེན་ལུགས་སྨྲས་པའི་རྐྱེན་གྱིས་བདག་ནི་ཁྱོད་རྣམས་ཀྱི་དགྲ་བོར་གྱུར་པ་ཡིན༌ནམ།
GAL 4:17 ད་ལྟ་ཁྱོད་ཅག་ལ་འབྲེལ་བ་འཛུགས་པར་བརྩོན་མཁན་རྣམས་ཀྱི་དམིགས་ཡུལ་མི་བཟང༌སྟེ། དེ་དག་གིས་བདག་ཅག་ཕྲལ་ནས་ཁོ་རྣམས་ལ་འབྲེལ་བ་འཛུགས་འདོད༌ཅིང་།
GAL 4:18 སྤྱིར་རྟག་ཏུ་དོན་བཟང་པོར་བརྩོན་པ་བྱས་ན་ལེགས། འོན༌ཀྱང༌། བདག་ཁྱོད་རྣམས་དང་ལྷན་དུ་ཡོད༌དུས་ཁོ་ནར་དེ་ལྟར་བྱ་མི་འོས་སོ།།
GAL 4:19 བདག་གི་བུ་ཕྲུག༌རྣམས། ཁྱོད་ཅག་གི་སེམས་ནང་དུ་སྐྱབས་མགོན་མཱ་ཤི་ཀའི་གཤིས་རྒྱུད་འཆག་པའི་བར༌དུ། ངས་ཁྱོད་ཅག་གི་ཆེད་དུ་ཕྲུ་གུ་བཙའ་བའི་ཟུག་གཟེར་ཡང་བསྐྱར་མྱོང་བ་ཡིན།
GAL 4:20 བདག་གི་སེམས་ནི་ཁྱོད་རྣམས་ཀྱི་ཕྱིར་ཅི་བྱ་གཏོལ་མེད་དུ་གྱུར་པས། བདག་ནི་ད་ལྟ་ཁྱོད་རྣམས་དང་མཉམ་དུ་འགྲོགས་ནས་རང་གི་སྨྲ་ཚུལ་བསྒྱུར་འདོད་དོ།།
GAL 4:21 དེ་ཡང་བཀའ་ཁྲིམས་ཀྱི་དབང་འོག་ཏུ་སྡོད་འདོད་པ་ཁྱོད་རྣམས་ཀྱིས་བདག་ལ་ཤོད༌དང༌། ཁྱོད་ཅག་གིས་བཀའ་ཁྲིམས་ཐོས་པ་མ་ཡིན་ནམ།
GAL 4:22 གསུང་རབ་ལས་འདི་ལྟར་བཀོད་ཡོད༌དེ། ཨབ་ར་ཧམ་ལ་བུ་གཉིས་ཡོད༌ཅིང༌། བུ་གཅིག་ནི་གཡོག་མོ་ལས་སྐྱེས་པ་ཡིན་ལ། ཅིག་ཤོས་ནི་རང་དབང་ལྡན་པའི་བུད་མེད་ལས་སྐྱེས་པ་ཡིན་ནོ།།
GAL 4:23 འོན༌ཀྱང༌། གཡོག་མོ་ལས་སྐྱེས་པ་ནི་ཤ་ཁྲག་གི་ཕུང་བོར་བརྟེན་ནས་སྐྱེས་པ༌དང༌། རང་དབང་ལྡན་པའི་བུད་མེད་ལས་སྐྱེས་པ་ནི་ཞལ་བཞེས་གནང་བ་ལྟར་སྐྱེས་པ་ཡིན།
GAL 4:24 དེ་ནི་འདྲ་དཔེའི་སྒོ་ནས་གསུངས་པ༌ཞིག་སྟེ། བུད་མེད་དེ་གཉིས་ནི་ཞལ་ཆད་གཉིས་ཡིན༌ལ། རི་བོ་སི་ནཱ་ལས་བྱུང་བའི་ཞལ་ཆད་ནི་གཡོག་མོ་ཧ་གར་ཡིན༌ལ། ཁོ་མོ་ལས་སྐྱེས་པའི་བུ་ཕྲུག་དག་ནི་གཡོག་པོ་ཡིན།
GAL 4:25 ཧ་གར་ཞེས་པའི་ཡིག་འབྲུ་འདིས་ཨ་རབ་ཡུལ་གྱི་རི་བོ་སི་ནཱ་བསྟན་ཅིང་དེང་གི་ཡེ་རུ་སཱ་ལེམ་མཚོན་པ་ཡིན་ཏེ། ད་ལྟའི་ཡེ་རུ་སཱ་ལེམ་དང་གནས་དེར་ཡོད་པའི་བུ་ཕྲུག་ཐམས་ཅད་ནི་གཡོག་པོ་ཡིན་པས་སོ།།
GAL 4:26 འོན༌ཀྱང༌། སྟེང་གི་ཡེ་རུ་སཱ་ལེམ་ནི་རང་དབང་ལྡན་པ༌ཞིག་ཡིན་པ་དང༌། བདག་ཅག་ཐམས་ཅད་ཀྱི་ཡུམ་ཡིན།
GAL 4:27 རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ། མངལ་ཡང་མ་སྦྲུམ་བུ་ཡང་མ་སྐྱེས༌ན།། བུད་མེད་ཁྱོད་ནི་དགའ་ཞིང་རངས་པར་གྱིས།། ཕྲུ་གུ་བཙའ་བའི་ཟུག་གཟེར་མ་མྱངས་ན།། དགའ་སྤྲོའི་འབོད་སྒྲ་ཁྱོད་ཀྱིས་མཐོན་པོར༌སྒྲོགས།། རྒྱུ་མཚན་ཁྱོ་ག་མེད་པའི་བུད་མེད༌ལ།། ཁྱོ་ག་ཅན་ལས་བུ་ཕྲུག་མང་དུ༌འབྱུང༌།། ཞེས་བཀོད་པའི་ཕྱིར༌རོ།།
GAL 4:28 སྤུན་ཟླ༌རྣམས། བདག་ཅག་ནི་ཨི་སཱག་བཞིན་དུ་དཀོན་མཆོག་གི་ཞལ་བཞེས་ལ་བརྟེན་ནས་ཁོང་གི་བུ་ཕྲུག་ཏུ་གྱུར་པ་ཡིན།
GAL 4:29 སྐབས་དེར། ཤ་ཁྲག་གི་ཕུང་བོ་ལས་སྐྱེས་པའི་བུ་ཡིས། དམ་པའི་ཐུགས་ཉིད་བརྒྱུད་ནས་འཁྲུངས་པའི་བུ་ལ་གནོད་འཚེ་བྱས་པ་བཞིན་ད་ལྟའང་དེ་ལྟར་བྱེད་དོ།།
GAL 4:30 དེས་ན་གསུང་རབ་ལས་ཇི་ལྟར་གསུངས་འདུག་ཅེ༌ན། འདི་ལྟ༌སྟེ། གཡོག་མོའི་བུ་ཡིས་རང་དབང་ལྡན་པའི་བུད་མེད་ཀྱི་བུ་དང་མཉམ་དུ་ཁྱིམ་རྒྱུད་འཛིན་མི་རུང༌བས། གཡོག་མོ་མ་བུ་གཉིས་ཀ་ཕྱིར་ཕུད་ཅིག་ཅེས་པ་ཡིན།
GAL 4:31 སྤུན་ཟླ༌རྣམས། དེའི༌ཕྱིར། བདག་ཅག་ནི་གཡོག་མོའི་བུ་ཕྲུག་མ་ཡིན༌པར། རང་དབང་ལྡན་པའི་བུད་མེད་ཀྱི་བུ་ཕྲུག་ཡིན༌ནོ།།
GAL 5:1 དེ་ཡང་སྐྱབས་མགོན་མཱ་ཤི་ཀས་བདག་ཅག་རང་དབང་ནང་དུ་གནས་པའི༌ཕྱིར་གྲོལ་བར་མཛད༌པས། ཁྱོད་རྣམས་བརྟན་པོར་ལངས་ནས་སྡོད་པ་ལས་སླར་ཡང་བྲན་གཡོག་གི་གཉའ་ཤིང་འོག་ཏུ་འཛུལ་མི་འོས་སོ།།
GAL 5:2 ལྟོས་དང་། ཕོལ་ལོལ་ངས་ཁྱོད་རྣམས་ལ་འདི་ལྟར་སྨྲ་བར་བྱ༌སྟེ། ཁྱོད་རྣམས་ཀྱིས་མཚན་སྐྱི་གཅོད་པའི་ལུགས་སྲོལ་བཞིན་དུ་བྱས༌ན། སྐྱབས་མགོན་མཱ་ཤི་ཀ་ནི་ཁྱོད་ཅག་ལ་ཕན་ཐོགས་ཅི་ཡང་མེད།
GAL 5:3 ཡང་ངས་མཚན་སྐྱི་གཅོད་པའི་ལས་ལ་ཞུགས་མཁན་ཐམས་ཅད་ལ་བདེན་པར་སྨྲ༌སྟེ། ཁྱོད་རྣམས་ཀྱིས་བཀའ་ཁྲིམས་ཐམས་ཅད་སྲུང་བའི་འགན་འཁུར་དགོས།
GAL 5:4 བཀའ་ཁྲིམས་ལ་བརྟེན་ནས་མི་རྣམ་དག་ཏུ་བརྩི་བར་འདོད་པ་མཐའ་དག་ནི་སྐྱབས་མགོན་མཱ་ཤི་ཀ་དང་ཁ་གྱེས༌ཤིང༌། ཐུགས་རྗེ་ལའང་རིང་དུ་བྲལ་ཏོ།།
GAL 5:5 འོན་ཀྱང་། བདག་ཅག་གིས་དམ་པའི་ཐུགས་ཉིད་བརྒྱུད་ཅིང་དད་པ་ལ་བརྟེན་ནས་མི་རྣམ་དག་ཏུ་འགྱུར་བར་རེ་སྒུག་བྱེད༌པ་ཡིན།
GAL 5:6 རྒྱུ་མཚན་ནི་མཱ་ཤི་ཀ་ཡེ་ཤུའི་ནང་དུ། མཚན་སྐྱི་གཅོད་མིན་ལ་སྙིང་པོ་ཅི་ཡང་མེད༌དེ། བྱམས་བརྩེའི་སྒོ་ནས་མཚོན་དགོས་པའི་དད་པ་ཁོ་ནར་དོན་སྙིང་ཆེན་པོ་ལྡན་པའི་ཕྱིར༌རོ།།
GAL 5:7 སྤྱིར་ཁྱོད་རྣམས་རྒྱུགས་པ་མགྱོགས་ནའང་སུ་ཞིག་གིས་ཁྱོད་རྣམས་བདེན་པ་ཉིད་ལ་བསྟུན་པར་བཀག་རྒྱ་བཟོས༌སམ།
GAL 5:8 སྐུལ་སློང་དེ་ནི་ཁྱོད་རྣམས་ལ་ཞལ་འབོད་གནང་མཁན་དེ་ཉིད་ནས་བྱུང་བ་མིན༌ནོ།།
GAL 5:9 སྐྱུར་རྩི་ཉུང་ཙམ་གྱིས་བག་ཕྱེ་ཚང་མ་སྐྱུར་ལང་དུ་འཇུག་པ་ཡིན།
GAL 5:10 བདག་གིས་གཙོ་བོ་ལ་བརྟེན་ནས་ཁྱོད་རྣམས་ལ་ཡིད་རྟོན་བྱེད༌དེ། ཁྱོད་རྣམས་ཀྱིས་བསམ་ཚུལ་གཞན་མི་བཅང་མོད། འོན་ཀྱང་ཁྱོད་རྣམས་ལ་གནོད་འཚེ་བྱེད་མཁན་སུ་ཞིག་ཡིན་ཡང་དེ་ལ་ཉེས་ཆད་གཅོད་ངེས་ཡིན།
GAL 5:11 སྤུན་ཟླ༌རྣམས། ངས་ད་ལྟའང་མཚན་སྐྱི་གཅོད་འོས་པའི་བཀའ་བསྒྲགས༌ན། ཅིའི་ཕྱིར་ད་དུང་བདག་ལ་མནར་གཅོད་བྱེད༌དམ། གལ༌སྲིད་དེ་ལྟར་ཡིན༌ན། ཤིང་རྒྱ་གྲམ་གྱིས་མི་སར་འགྱེལ་དུ་འཇུག་པའི་དོན་ནི་མེད་དོ།།
GAL 5:12 དེའི༌ཕྱིར། ཁྱོད་རྣམས་ལ་གནོད་འཚེ་བྱེད་མཁན་དེ་དག་ནི་རང་གིས་རང་ཉིད་ཉུག་རུམ་པར་བཟོས་ན་ཅི་མ་རུང༌།
GAL 5:13 སྤུན་ཟླ༌རྣམས། ད་ལྟ་ཁྱོད་རྣམས་རང་དབང་ལྡན་པར་ཞལ་འབོད་གནང༌བ་ཡིན། འོན༌ཀྱང༌། རང་དབང་དེ་ནི་ཤ་གཟུགས་ཀྱི་འདོད་ཆགས་ལ་གཡེང་བའི་གོ་སྐབས་ཤིག་ཏུ་མི་འཛིན༌པར། དུས་རྒྱུན་བྱམས་བརྩེ་ལ་བརྟེན་ནས་ཕན་ཚུན་ལ་ཞབས་ཕྱི་བྱ་འོས་སོ།།
GAL 5:14 རྒྱུ་མཚན་ནི་བཀའ་ཁྲིམས་ཐམས་ཅད་ཀྱི་ནང་དོན་གཅིག་ཏུ་བསྡུས་ན་འདི་ལྟ༌སྟེ། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་གསུངས་པ་འདི་ཡིན་པའི་ཕྱིར༌རོ།།
GAL 5:15 འོན༌ཀྱང༌། ཁྱོད་ཅག་གིས་མཉམ་འཇོག་དགོས་པ་ཞིག༌ནི། ཁྱོད་རྣམས་ཀྱིས་ཕན་ཚུན་ལ་སོ་བཏབ་ནས་གསོད་རེས་བྱས༌ན། མཐའ་མར་ཐམས་ཅད་བརླག་པར་འགྱུར་བ༌དེའོ།།
GAL 5:16 ཡང་བདག་གིས་འདི་ལྟར་སྨྲ་བར་བྱ༌སྟེ། ཁྱོད་རྣམས་ཀྱིས་དམ་པའི་ཐུགས་ཉིད་ལ་བསྟུན་ནས་སྤྱད་པ་སྤྱོད༌ན། ཤ་གཟུགས་ཀྱི་འདོད་ཆགས་ཀྱི་དབང་དུ་མི་འགྲོའོ།།
GAL 5:17 ཅིའི་ཕྱིར་ཞེ་ན། ཤ་གཟུགས་ཀྱི་འདོད་ཆགས་ཀྱིས་དམ་པའི་ཐུགས་ཉིད་ལ་འགྲན་རྩོད་བྱེད་པ༌དང༌། དམ་པའི་ཐུགས་ཉིད་ཀྱིས་ཀྱང་དེ་ལ་འགྲན་རྩོད་བྱེད༌པ་ཡིན། དེ་གཉིས་ནི་འགལ་བ་ལྟག་སྤྲོད་ཡིན་པས་ཁྱོད་ཅག་གིས་རང་གི་འདོད་བློ་ལྟར་བསྒྲུབ་མི་ནུས་པའི་ཕྱིར༌རོ།།
GAL 5:18 འོན༌ཀྱང༌། དམ་པའི་ཐུགས་ཉིད་ཀྱིས་ཁྱོད་རྣམས་འཁྲིད་པར་མཛད༌ན། ཁྱོད་ཅག་ནི་བཀའ་ཁྲིམས་ཀྱི་དབང་འོག་ཏུ་མེད་དོ།།
GAL 5:19 ཤ་གཟུགས་ཀྱི་འདོད་ཆགས་ཀྱི་ལས་རྣམས་ནི་མངོན་གསལ་ཡིན༌ཏེ། ལོག་གཡེམ༌དང༌། མི་ཚངས༌སྤྱོད། འཆལ་སྤྱོད།
GAL 5:20 ལྷ་སྐུར་བརྟེན༌པ། རྫུ༌འཕྲུལ། ཞེ༌འཁོན། འགྲན༌རྩོད། ཕྲག༌དོག ཞེ༌སྡང༌། སྒེར་སེམས། དབྱེན་འབྱེད། ལོག༌ལྟ།
GAL 5:21 འགྲན་སེམས། ར་རོར་གྱུར༌པ། གསོལ་སྟོན་ལ་བག་མེད་དུ་ཞུགས་པ་སོགས༌ཡིན། བདག་གིས་སྔོན་ཆད་ཁྱོད་རྣམས་ལ་སྨྲས་མྱོང་ཞིང་ད་ལྟའང་སྨྲ་བར་བྱ༌སྟེ། ལས་ངན་པ་འདི་ལྟ་བུ་བྱེད་པ་རྣམས་ལ་དཀོན་མཆོག་གི་རྒྱལ་སྲིད་ནམ་ཡང་མི་འཐོབ་བོ།།
GAL 5:22 འོན༌ཀྱང༌། དམ་པའི་ཐུགས་ཉིད་ལས་སྨིན་པའི་འབྲས་བུ་ནི་འདི་ལྟ༌སྟེ། བྱམས་པ༌དང༌། དགའ༌སྤྲོ། ཞི༌བདེ། བཟོད༌བསྲན། སྙིང༌རྗེ། གཤིས་བཟང་། ཡིད་རྟོན་རུང་བ།
GAL 5:23 ཞི༌འཇམ། རང་ཚོད་ཟིན་པ་བཅས་ཡིན། དོན་འདིའི་ཐད་ལ་བཀའ་ཁྲིམས་ཅི་ཡང་མེད།
GAL 5:24 མཱ་ཤི་ཀ་ཡེ་ཤུར་གཏོགས་པ་རྣམས་ཀྱིས་ཤ་གཟུགས་ཀྱི་ཕུང་བོ་དང་དེར་འབྲེལ་བའི་འདོད་ཆགས་དེའང་ཤིང་རྒྱ་གྲམ་གྱི་སྟེང་མཉམ་དུ་བརྡབས༌པ་ཡིན།
GAL 5:25 བདག་ཅག་དམ་པའི་ཐུགས་ཉིད་ལ་བརྟེན་ནས་འཚོ་ཞིང་གཞེས་པ་ཡིན༌ན། ངེས་པར་དམ་པའི་ཐུགས་ཉིད་བཞིན་སྤྱད་པ་སྤྱོད་དགོས་པ༌ལས།
GAL 5:26 རང་གི་མཚན་སྙན་གྲགས་ཙམ་ལ་བརྩོན་པ༌དང༌། ཕན་ཚུན་ལ་ཁོང་ཁྲོ་སློང༌བ། ཕན་ཚུན་ལ་ཕྲག་དོག་བྱེད་པ་བཅས་ནི་མི་རུང༌ངོ༌།།
GAL 6:1 སྤུན་ཟླ༌རྣམས། ཁྱོད་རྣམས་ལས་མི་ཞིག་གློ་བུར་སྡིག་པའི་དབང་དུ་ལྷུང༌བ་ཡིན་ན། དམ་པའི་ཐུགས་ཉིད་དང་ལྡན་པ་ཁྱོད་རྣམས་ཀྱིས་ཞི་འཇམ་གྱི་སེམས་དང་བཅས་མི་དེ་བསྐྱབ་འོས་སོ།། འོན༌ཀྱང༌། ཁྱོད་རྣམས་བསླུ་བྲིད་ཀྱི་དབང་དུ་མི་ལྷུང་བའི་ཕྱིར་རང་གིས་ཀྱང་སེམས་ཆུང་བྱ་འོས།
GAL 6:2 ཁྱོད་རྣམས་ཀྱིས་ཕན་ཚུན་ལ་སྡུག་གི་ཁུར་པོ་མཉམ་ཁུར་བྱེད་དགོས༌ཏེ། འདི་ལྟར་བྱས་ན། ད་གཟོད་སྐྱབས་མགོན་མཱ་ཤི་ཀའི་བཀའ་དེ་བསྒྲུབས་པ་ཡིན།
GAL 6:3 གལ༌ཏེ། མི་ཞིག་ཅི་ཡང་མིན་ནའང་རང་ཉིད་ཆེན་པོར་རློམ་ན། དེ་ནི་རང་མགོ་རང་གིས་གཡོག༌པ་ཡིན།
GAL 6:4 ཡང་མི་སུ་ཞིག་ཡིན་རུང་རང་གི་བྱ་སྤྱོད་ལ་ཞིབ་བཤེར་བྱ་དགོས༌ཏེ། ལས་བཟང་པོ་བསྒྲུབས་ན་རང་གི་ཡིད་ཚིམ་པར་འགྱུར༌ཡང༌། དེ་ནི་མི་གཞན་གྱི་བྱ་སྤྱོད་ལ་བསྡུར་མི་དགོས་སོ།།
GAL 6:5 ཅིའི་ཕྱིར་ཞེ་ན། མི་ཀུན་གྱིས་རང་གི་ཁུར་པོ་རང་གིས་འཁུར་དགོས་པའི་ཕྱིར༌རོ།།
GAL 6:6 ཆོས་སློབ་མཁན་གྱིས་ཆོས་འཆད་མཁན་གྱི་སློབ་དཔོན་ལ་གང་མཁོ་བའི་རྒྱུ་ནོམ་པ་ཐམས་ཅད་འབུལ་དགོས་སོ།།
GAL 6:7 རང་མགོ་རང་གིས་གཡོག་མི༌རུང༌། དཀོན་མཆོག་ལ་འཕྱ་དམོད་བྱ་མི༌རུང༌། རྒྱུ་མཚན་ནི་མིས་ས་བོན་གང་ཞིག་བཏབ་ན་འབྲས་བུའང་དེ་འབྱུང་བའི་ཕྱིར༌རོ།།
GAL 6:8 སུ་ཞིག་གིས་ཤ་གཟུགས་ཀྱི་ཕུང་བོ་ལ་བསྟུན་ནས་ས་བོན་བཏབ་ན། ཤ་གཟུགས་ཀྱི་ཕུང་བོ་ལས་འཇིག་པའི་འབྲས་བུ་འབྱུང༌ལ། སུ་ཞིག་གིས་དམ་པའི་ཐུགས་ཉིད་ལ་བསྟུན་ནས་ས་བོན་བཏབ་ན། དམ་པའི་ཐུགས་ཉིད་ལས་མཐའ་མེད་པའི་ཚེ་སྲོག་འཐོབ་ངེས༌སོ༎
GAL 6:9 བདག་ཅག་གིས་དོན་བཟང་པོ་གང་ཞིག་བྱེད་ནའང་ཡིད་ཕམ་མི་རུང༌སྟེ། ཡིད་མ་ཕམ་ན་དུས་གང་ཞིག་སླེབས་པ་དང་འབྲས་བུ་དེའང་ལེན་ཐུབ།
GAL 6:10 དེའི༌ཕྱིར། ད་ལྟ་བདག་ཅག་ལ་གོ་སྐབས་བྱུང༌ན་མི་ཐམས་ཅད་ལ་ལས་བཟང་པོ་བྱེད་དགོས༌པ་དང༌། ནང་སྒོས་སུ་དད་ལྡན་ཁྱིམ་མི་རྣམས་ལ་ལྷག་པར་ལས་བཟང་པོ་བྱེད་དགོས༌སོ།།
GAL 6:11 བདག་གིས་དངོས་སུ་བྲིས་པའི་ཡི་གེ་ཆེན་པོ་འདིར་ཁྱོད་རྣམས་ཀྱིས་ལྟོས༌ཤིག
GAL 6:12 ཡང་སྐྱབས་མགོན་མཱ་ཤི་ཀའི་ཤིང་རྒྱ་གྲམ་གྱི་དོན་དེ་ལས་རང་རང་ལ་གནོད་འཚེ་ཐེབས་པར་འཇིགས་པའི་ཕྱིར། མིའི་ཕྱི་ཚུགས་འདྲ་ཆགས་པོར་བཅོས་པ་དག་གིས་ཁྱོད་རྣམས་ལ་མཚན་སྐྱི་གཅོད་དགོས་པར་ནན་གྱིས་བསྐུལ་ལོ༎
GAL 6:13 མཚན་སྐྱི་བཅད་ཟིན་པའི་མི་དེ་དག་རང་གིས་བཀའ་ཁྲིམས་མི་སྲུང༌ནའང༌། ཁྱོད་ཅག་གི་ཤ་ཁྲག་གི་ཕུང་བོར་བརྟེན་ནས་ཁ་ཕོ་བཤད་པའི༌ཕྱིར། ཁྱོད་རྣམས་ལ་མཚན་སྐྱི་གཅོད་པར་རེ་བ་བྱེད་དོ།།
GAL 6:14 འོན༌ཀྱང༌། བདག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཤིང་རྒྱ་གྲམ་སྐོར་ལ་བསྟོད་བསྔགས་བརྗོད་པ་ལས་གཞན་འཆད་པར་མི་འགྱུར་བར་སྨོན། ཤིང་རྒྱ་གྲམ་གྱི་དབང་གིས། བདག་ལ་མཚོན་ན་འཇིག་རྟེན་འདི་ནི་སྔར་ནས་ཤིང་རྒྱ་གྲམ་གྱི་སྟེང་དུ་བརྡབས་ཟིན། འཇིག་རྟེན་ལ་མཚོན་ན་ང་རང་ཡང་སྔར་ནས་ཤིང་རྒྱ་གྲམ་གྱི་སྟེང་དུ་བརྡབས་ཟིན།
GAL 6:15 མཚན་སྐྱི་གཅོད་མིན་ལ་སྙིང་པོ་ཅི་ཡང་མེད༌དེ། གལ་ཆེ་བ་ནི་གསར་དུ་བསྐྲུན་པའི་མི་ཞིག་ཡིན་པ་དེའོ།།
GAL 6:16 གནས་ལུགས་དེ་བཞིན་དུ་སྒྲུབ་མཁན་རྣམས་དང་དཀོན་མཆོག་གི་ཡེས་ར་ཨེལ་པ་རྣམས་ལ་ཞི་བདེ་དང་ཐུགས་རྗེ་འཐོབ་པར༌སྨོན།
GAL 6:17 བདག་གི་ལུས་སྟེང་དུ་སྐྱབས་མགོན་ཡེ་ཤུའི་རྟགས་མཚན་ཡོད་པས། དུས་ད་ནས༌བཟུང༌། ཁྱོད་རྣམས་ཀྱིས་མི་སུ་ལའང་བདག་ལ་བར་ཆད་བཟོ་རུ་མ་འཇུག་ཅིག།
GAL 6:18 སྤུན་ཟླ༌རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་གི་སེམས་སུ་གནས་པར༌སྨོན། །ཨ༌མེན།། །།
EPH 1:1 དེ་ཡང་ཕོལ་ལོལ་བདག་ནི་དཀོན་མཆོག་གི་ཐུགས་དགོངས་བཞིན་མཱ་ཤི་ཀ་ཡེ་ཤུའི་སྐུ་ཚབ་པ་ཞིག་ཡིན་ནོ།། བདག་གིས་ཨེ་ཕེ་སི་རུ་ཡོད་པའི་མཱ་ཤི་ཀ་ཡེ་ཤུའི་ནང་དུ་བློ་སེམས་དཀར་བའི་དད་ལྡན་དམ་པ་རྣམས་ལ་འཕྲིན་ཡིག་སྤྲིངས་པ་ནི་འདི་ལྟ༌སྟེ།
EPH 1:2 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
EPH 1:3 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་བསྔགས་བརྗོད་པར༌ཤོག དཀོན་མཆོག་གིས་སྐྱབས་མགོན་མཱ་ཤི་ཀའི་ནང་དུ་ནམ་མཁའི་ཞིང་ཁམས་སུ་ཡོད་པའི་ཐུགས་ཉིད་ཀྱི་བྱིན་རླབས་ཐམས་ཅད་བདག་ཅག་ལ་གནང༌ཞིང༌།
EPH 1:4 ཁོང་གི་སྤྱན་སྔར་བདག་ཅག་ནི་དམ་པ་དང་སྐྱོན་གྱི་དྲི་མས་མ་གོས་པ་ཞིག་ཏུ་འགྱུར་བའི་ཕྱིར། ཁོང་གིས་འཇིག་རྟེན་ཁམས་མ་བཀོད་པའི་སྔོན་ལ། སྐྱབས་མགོན་མཱ་ཤི་ཀའི་ནང་དུ་བདག་ཅག་བདམས་པ་ཡིན་ནོ།།
EPH 1:5 ཡང་ཁོང་གིས་སྔ་མོ་ནས་རང་ཉིད་ཐུགས་དགྱེས་པ་བཞིན། བདག་ཅག་ཡེ་ཤུ་མཱ་ཤི་ཀ་བརྒྱུད་ནས་ཁོང་གི་བུ་སྐལ་དུ་འགྱུར་བར་བྱམས་པའི་ངང་ནས་ཐག་གིས་བཅད༌ཟིན་ལ།
EPH 1:6 དེ་ནི་ཁོང་གི་གཟི་བརྗིད་དང་ལྡན་པའི་ཐུགས་རྗེ་ལ་བསྟོད་བསྔགས་བརྗོད་པར་འགྱུར་བའི་ཕྱིར༌ཡིན་ལ། ཐུགས་རྗེ་དེ་ནི་ཁོང་གིས་རང་གི་གཅེས་པའི་སྲས་བརྒྱུད་ནས་བདག་ཅག་ལ་ཕངས་མེད་དུ་གནང་ངོ་།།
EPH 1:7 ཡང་བདག་ཅག་ནི་ཁོང་གི་ནང་དུ་ཉིད་ཀྱི་སྐུ་ཁྲག་ལ་བརྟེན་ནས་བླུས་ཤིང་སྡིག་པ་བསལ་བ་ཡིན། དེ་ནི་དཀོན་མཆོག་གི་ཐུགས་རྗེ་ཕུན་སུམ་ཚོགས་པ༌བཞིན་ཏེ།
EPH 1:8 ཁོང་གིས་ཤེས་རབ་དང་བློ་རིག་སྣ་ཚོགས་ཀྱི་སྒོ་ནས་བདག་ཅག་ལ་ཕངས་མེད་དུ་གནང༌ངོ་༎
EPH 1:9 ཡང་དཀོན་མཆོག་གིས་སྐྱབས་མགོན་མཱ་ཤི་ཀའི་ནང་དུ་སྔར་ནས་དམིགས་པའི་རང་ཉིད་ཀྱི་ཐུགས་དགོངས་ལེགས་པོ༌བཞིན། བདག་ཅག་ལ་ཁོང་གི་ཐུགས་དགོངས་ཀྱི་གསང་བ་དེ་མངོན་པར་མཛད་ཅིང་།
EPH 1:10 དེ་ནི་དཀོན་མཆོག་གི་ཐུགས་བཀོད་ལྟར་ཁོང་གི་དུས་དེ་ལོངས༌པའི་ཚེ། ཁོང་གིས་གནམ་ས་གཉིས་ཀྱི་དངོས་པོ་ཐམས་ཅད་སྐྱབས་མགོན་མཱ་ཤི་ཀའི་དབང་འོག་ཏུ་གཅིག་གྱུར་མཛད་པ་ཡིན་ནོ།།
EPH 1:11 ཡང་སྐྱབས་མགོན་མཱ་ཤི་ཀའི་ནང་དུ་བདག་ཅག་ལའང་བགོ་སྐལ་ཐོབ་པ་ཡིན། དོན་དེ་ནི་སྔ་མོ་ནས་ཁོང་གི་ཐུགས་དགོངས་ལྟར་ཐག་གིས་བཅད༌ཅིང༌། ཁོང་གིས་ཐུགས་དགོངས་བཞིན་དུ་དོན་ཐམས་ཅད་མཛད༌པ་སྟེ།
EPH 1:12 ཐོག་མར་སྐྱབས་མགོན་མཱ་ཤི་ཀར་རེ་བ་ལྡན་པ་ངེད་རྣམས་ཀྱིས་དཀོན་མཆོག་གི་གཟི་བརྗིད་ལ་བསྟོད་བསྔགས་བརྗོད་པའི་ཕྱིར༌ཡིན།
EPH 1:13 ཡང་སྐྱབས་མགོན་མཱ་ཤི་ཀའི་ནང་དུ། ཁྱོད་ཅག་གིས་ཀྱང་བཀའ་བདེན་པ་སྟེ་ཁྱོད་རྣམས་སྐྱོབ་པར་བྱེད་པའི་འཕྲིན་བཟང་དེ་ཐོས་ཤིང༌ཁོང་ལ་དད་པར་གྱུར་པ་དང་། ཁྱོད་ཅག་ལ་ཞལ་བཞེས་གནང་བའི་དམ་པའི་ཐུགས་ཉིད་ཀྱི་ཕྱག་རྒྱས་བཏབ་པ་ཡིན།
EPH 1:14 དཀོན་མཆོག་གིས་ཁོང་ཉིད་ཀྱི་མི་སྡེ་ཐར་བར་མཛད་པའི་བར༌དུ། དམ་པའི་ཐུགས་ཉིད་ནི་བདག་ཅག་ལ་བགོ་སྐལ་གྱི་གཏའ་མའི་དཔང་རྟགས་སུ་གནང་བ་ཡིན་ཏེ། དཀོན་མཆོག་གི་གཟི་བརྗིད་ལ་བསྟོད་བསྔགས་བརྗོད་པའི་ཕྱིར་རོ།།
EPH 1:15 དེའི༌ཕྱིར། བདག་གིས་ཀྱང་ཁྱོད་རྣམས་གཙོ་བོ་ཡེ་ཤུར་དད་པ་ཡོད་པ༌དང༌། དད་ལྡན་དམ་པ་ཐམས་ཅད་ལའང་བྱམས་ཤིང་གཅེས་པའི་དོན་དེ་ཐོས༌པས།
EPH 1:16 བདག་གིས་གསོལ་བ་འདེབས་པའི་དུས༌སུ། ཁྱོད་རྣམས་གླེང་བ་དང་རྒྱུན་དུ་ཁྱོད་ཅག་གི་ཆེད་དུ་དཀོན་མཆོག་ལ་བཀའ་དྲིན་ཞུས་པ་སྟེ།
EPH 1:17 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་དཀོན་མཆོག་སྟེ་གཟི་བརྗིད་ཆེ་བའི་ཡབ་དེ་ཉིད༌ཀྱིས། ཁྱོད་རྣམས་ཀྱིས་དངོས་གནས་དཀོན་མཆོག་གི་ངོ་བོ་རྟོགས་པའི་ཕྱིར། ཤེས་རབ་དང་བློ་སྒོ་འབྱེད་པའི་སེམས་དེ་ཁྱོད་ཅག་ལ་སྩོལ་བར༌སྨོན།
EPH 1:18 གཞན༌ཡང༌། ཁྱོད་རྣམས་ཀྱི་སེམས་ཁོང་གི་མིག་ཟུང་གསལ་པོར་མཛད་པར༌ཞུའོ།། དེ་ནི་དཀོན་མཆོག་གིས་ཁྱོད་རྣམས་ལ་ཞལ་འབོད་གནང༌ཞིང༌། ཁྱོད་རྣམས་ཀྱིས་ཀྱང་དེ་ལ་རེ་བ་ག་འདྲ་ལྡན་པ་དང༌། དད་ལྡན་དམ་པ་རྣམས་ཀྱི་ཁྲོད་དུ་དཀོན་མཆོག་གི་གཟི་བརྗིད་ཆེན་པོའི་བགོ་སྐལ་ཅི་འདྲ་ཡོད་པ།
EPH 1:19 ཁོང་གིས་རང་རེ་དད་ལྡན་རྣམས་ལ་མཐུ་རྩལ་མངོན་པ་ནི་ཇི་འདྲའི་ཆེ་བ་བཅས་རྟོགས་པའི་ཕྱིར་གསོལ་བ་བཏབ༌པའོ།། དེ་ནི་ཁོང་གི་མཐུ་དང་ནུས་པ་བཞིན་ཡིན༌ཏེ།
EPH 1:20 ཁོང་གིས་སྐྱབས་མགོན་མཱ་ཤི་ཀའི་སྐུ་ལུས་སྟེང་དུ་མཐུ་རྩལ་ཆེན་པོ་མངོན་པར་མཛད་པ༌དང༌། སྐྱབས་མགོན་མཱ་ཤི་ཀ་འཆི་བ་ལས་སླར་གསོན་པར་མཛད༌ཅིང་། ནམ་མཁའི་ཞིང་ཁམས་ནས་ཁོང་གི་གཡས་ཕྱོགས་སུ་བཞུགས་པར་མཛད༌པས།
EPH 1:21 སྐྱབས་མགོན་མཱ་ཤི་ཀ་ནི་བསྐལ་པ་འདི་དང་བསྐལ་པ་འབྱུང་འགྱུར་དུའང༌། འཇིག་རྟེན་གྱི་སྲིད་འཛིན་མཁན༌དང༌། དབང་འཛིན༌མཁན། མཐུ་སྟོབས༌ཅན། དབང་སྒྱུར་མཁན། མཚན་དང་ལྡན་པ་ཐམས་ཅད་ལས་ཀྱང་ཆེས་ཁྱད་དུ་འཕགས་ཤིང་བླ་ན༌མཐོ་བའོ།།
EPH 1:22 ཡང་དཀོན་མཆོག་གིས་འཇིག་རྟེན་གྱི་དངོས་པོ་ཐམས་ཅད་སྐྱབས་མགོན་མཱ་ཤི་ཀའི་ཞབས་འོག་ཏུ་གནོན་པར་མཛད༌ཅིང༌། ཁོང་ནི་ཆོས་ཚོགས་ཀྱི་ཆེད་དུ་འཇིག་རྟེན་གྱི་དངོས་པོ་ཐམས་ཅད་ཀྱི་དབུ་རུ་བསྐོས༌པ་ཡིན།
EPH 1:23 ཆོས་ཚོགས་ནི་ཁོང་གི་སྐུ་ལུས་ཡིན༌ཞིང༌། འཇིག་རྟེན་སྣོད་བཅུད་མ་ལུས་པར་ཡོངས་སུ་ཁྱབ་པ་དེ་ཉིད་ཀྱིས་ཁྱབ་པའང་ཡིན་ནོ།།
EPH 2:1 དེ་སྔར་ཁྱོད་ཅག་ནི་སྡིག་པ་དང་ཉེས་པའི་ཁྲོད་དུ་ཤི་བ་ཡིན་ནོ།།
EPH 2:2 དུས་དེར་ཁྱོད་རྣམས་ཀྱིས་འཇིག་རྟེན་གྱི་ལུགས་སྲོལ་ངན་པ་ལྟར་བྱེད་པ༌དང༌། བར་སྣང་ཁམས་སུ་དབང་འཛིན་མཁན་ལ་བསྟུན་པ་ཡིན། དེ་ནི་ད་ལྟ་དཀོན་མཆོག་གི་བཀའ་ལ་མི་ཉན་པ་རྣམས་ཀྱི་སེམས་སུ་ལས་བྱེད་པའི་སེམས་ཉིད་ངན་པ་ཡིན།
EPH 2:3 བདག་ཅག་ཐམས་ཅད་ཀྱིས་ཀྱང་སྔར་མི་དེ་དག་གི་ཁྲོད་ནས་ཤ་གཟུགས་ཀྱི་ཆགས་ཞེན་དང༌། ལུས་སེམས་གཉིས་ལས་ཇི་ལྟར་འདོད་པ་བཞིན་བྱས་མྱོང༌ལ། རང་བཞིན་གྱིས་དཀོན་མཆོག་ཐུགས་ཁྲོ་བར་འགྱུར་བའི་བུ་ཡིན་ཞིང་། མི་གཞན་དང་ཁྱད་པར་མེད་དོ།།
EPH 2:4 འོན༌ཀྱང༌། དཀོན་མཆོག་ལ་ཐུགས་རྗེ་ཕུན་སུམ་ཚོགས་པ་ཡོད་པ་དང་བདག་ཅག་ལ་ཤིན་ཏུ་བྱམས་ཤིང་གཅེས༌པས།
EPH 2:5 སྔར་བདག་ཅག་ཉེས་པའི་ཁྲོད་དུ་ཤི་བའི་དུས་སུ། བདག་ཅག་སྐྱབས་མགོན་མཱ་ཤི་ཀ་དང་ལྷན་དུ་གསོན་པར་མཛད། དེ་ནི་ཐུགས་རྗེས་ཁྱོད་རྣམས་ལ་ཐར་པ་འཐོབ་པར་མཛད༌པ་ཡིན་ནོ།།
EPH 2:6 ཡང་དཀོན་མཆོག་གིས་བདག་ཅག་མཱ་ཤི་ཀ་ཡེ་ཤུའི་ནང་དུ་ཁོང་དང་མཉམ་དུ་སླར་གསོན་པ༌དང༌། ཁོང་དང་ལྷན་ཅིག་ནམ་མཁའི་ཞིང་ཁམས་སུ་སྡོད་པར་མཛད།
EPH 2:7 དེ་ནི་དཀོན་མཆོག་གིས་རང་གི་ཐུགས་རྗེ་ཕུན་སུམ་ཚོགས་པ༌སྟེ། མཱ་ཤི་ཀ་ཡེ་ཤུའི་ནང་དུ་བདག་ཅག་ལ་གནང་བའི་སྙིང་རྗེ་དེ་ནི་བསྐལ་པ་འབྱུང་འགྱུར་དུ་མངོན་པར་མཛད་པའི་ཕྱིར༌ཡིན།
EPH 2:8 མདོར་ན། དད་པའི་སྒོ་ནས་ཐུགས་རྗེས་ཁྱོད་རྣམས་ལ་ཐར་པ་འཐོབ་པར་མཛད་པ༌ལས། རང་ལ་བརྟེན་པ་མ་ཡིན་པར་དཀོན་མཆོག་གིས་གནང་བ་ཡིན་ནོ།།
EPH 2:9 དེ་ནི་རང་བྱས་ཀྱི་ལས་ལ་བརྟེན་པ་མ་ཡིན༌ལ། མི་སུ་ཡིན་ཡང་ཁ་ཕོ་མི་བཤད་པའི་ཕྱིར་ཡིན།
EPH 2:10 དོན་དམ་དུ་བདག་ཅག་ནི་དཀོན་མཆོག་གིས་ལེགས་པར་བཅོས་པ་ཡིན༌ཏེ། མཱ་ཤི་ཀ་ཡེ་ཤུའི་ནང་དུ་དོན་བཟང་པོ་བསྒྲུབ་པའི་ཕྱིར་བདག་ཅག་བཀོད་པ་ཡིན་ལ། དོན་བཟང་པོ་དེ་དག་ནི་བདག་ཅག་གིས་བསྒྲུབ་པའི་ཕྱིར་དཀོན་མཆོག་གིས་སྔ་མོ་ནས་སྟ་གོན་མཛད༌པའོ།།
EPH 2:11 དེའི༌ཕྱིར། ཁྱོད་རྣམས་ཀྱིས་སེམས་སུ་འཛིན་དགོས་པ༌ནི། སྔར་ཤ་ཁྲག་གི་ཕུང་བོའི་ཐད་ནས་ཁྱོད་རྣམས་ཕྱི་ཕྱོགས་པ་ཡིན༌ལ། རང་གིས་རང་ལ་མཚན་སྐྱི་གཅོད་པའི་མི་ཞེས་འབོད་པ་རྣམས་ཀྱིས་ཁྱོད་ཅག་ལ་མཚན་སྐྱི་མི་གཅོད་པའི་མི་ཞེས་འབོད༌པ་དང་། མཚན་སྐྱི་གཅོད་པ་ནི་མིའི་རང་གི་ལག་པས་རང་ལུས་ལ་གཤག་བཅོས་བྱེད་པ༌དེ་ཡིན།
EPH 2:12 དུས་དེར་ཁྱོད་རྣམས་ནི་སྐྱབས་མགོན་མཱ་ཤི་ཀ་དང་འབྲེལ་བ་མེད༌དེ། ཡེས་ར་ཨེལ་མི་རིགས་ཀྱི་འབངས་སུའང་མི་གཏོགས༌ཤིང༌། ཞལ་བཞེས་ཀྱི་ཞལ་ཆད་རྣམས་ལ་རྒྱུས་ལོན་ཡང་མེད༌ལ། ཁྱོད་རྣམས་ལ་རེ་བ་མེད་ཅིང་འཇིག་རྟེན་དུ་གསོན་པོར་སྡོད་ཀྱང་དཀོན་མཆོག་དང་འབྲེལ་བ་མེད་དོ།།
EPH 2:13 འོན༌ཀྱང༌། སྔར་ཁྱོད་རྣམས་ནི་རྒྱང་རིང་དུ་གནས་པའི་མི་ཡིན་ཞིང་ད་ལྟ་མཱ་ཤི་ཀ་ཡེ་ཤུའི་ནང་དུ། ཁོང་གི་སྐུ་ཁྲག་ལ་བརྟེན་ནས་ཉེ་སར་དྲངས༌པ་ཡིན།
EPH 2:14 ཅིའི་ཕྱིར་ཞེ་ན། སྐྱབས་མགོན་ཡེ་ཤུ་ནི་བདག་ཅག་སྡུམ་མཁན་ཡིན་ཞིང༌། འགལ་ཟླའི་བར་གྱང་བཤིགས་ནས་ཡ་ཧུ་དཱ་པ་དང་ཕྱི་ཕྱོགས་པ་གཉིས་ཀ་རྣམ་པ་གཅིག་ཏུ་མཛད་དེ།
EPH 2:15 ད་དུང་ཁོང་ཉིད་ཀྱི་སྐུ་ལུས་ཀྱིས་ཞེ་འཁོན་བསལ་ཞིང་། བཀའ་ཁྲིམས་དང་དེ་ལས་ཕབ་པའི་ཁྲིམས་སྲོལ་ཐམས་ཅད་ལ་ནུས་པ་མེད་པར་མཛད་དོ།། དེ་ནི་སྐྱབས་མགོན་ཡེ་ཤུ་རང་ཉིད་ཀྱི་སྐུ་ལུས་བརྒྱུད་ནས་དེ་གཉིས་ཀ་མི་གསར་པ་ཞིག་ཏུ་བསྐྲུན་ཏེ་བསྡུམས་པ༌དང༌།
EPH 2:16 ཡང་ཤིང་རྒྱ་གྲམ་བརྒྱུད་ནས་དེ་གཉིས་བར་གྱི་ཞེ་འཁོན་མེད་པར་མཛད་ཅིང་། དེ་གཉིས་ཀ་སྐུ་ལུས་གཅིག་ཏུ་བྱས་ཏེ་དཀོན་མཆོག་དང་བསྡུམས་པའི་ཕྱིར་ཡིན།
EPH 2:17 སྐྱབས་མགོན་ཡེ་ཤུ་ཡུལ་འདིར་ཕེབས་ནས་དཀོན་མཆོག་དང་རྒྱང་དུ་གནས་པ་ཁྱོད་རྣམས་དང༌། ཉེ་སར་ཡོད་པའི་མི་གཞན་དག་ལའང་ཞི་བདེའི་འཕྲིན་བཟང་བསྒྲགས་མྱོང༌།
EPH 2:18 རྒྱུ་མཚན་ནི་བདག་ཅག་མི་རིགས་གཉིས་ཀ་སྐྱབས་མགོན་ཡེ་ཤུ་བརྒྱུད༌དེ། དམ་པའི་ཐུགས་ཉིད་གཅིག་གི་སྒོ་ནས་ཡབ་ཀྱི་དྲུང་དུ་འབྱོན་པའི་ལམ་བུ་བྱུང༌བའི་ཕྱིར་རོ།།
EPH 2:19 དེའི༌ཕྱིར། ད་ལྟ་ཁྱོད་ཅག་ཐམས་ཅད་ནི་ཕྱི་མི་དང་མགྲོན་པོ་མ་ཡིན༌པར། དཀོན་མཆོག་གི་དད་ལྡན་དམ་པ་དང་ཡུལ་ཕྱོགས་མཚུངས༌ཤིང༌། དཀོན་མཆོག་གི་ཁྱིམ་གཞིས་ལ་གཏོགས་པའི་མི་ཡིན་པ༌དང༌།
EPH 2:20 སྐུ་ཚབ་པ་དང་ལུང་སྟོན་པ་རྣམས་ཀྱི་རྨང་གཞིའི་སྟེང་ནས་ཁྱོད་རྣམས་བསྐྲུན་པ་ཡིན། ཁང་པའི་ཟུར་གྱི་རྨང་རྡོ་ནི་མཱ་ཤི་ཀ་ཡེ་ཤུ་རང་ཉིད་ལགས་སོ།།
EPH 2:21 ཁང་པའི་བཟོ་བཀོད་དེ་ཐམས་ཅད་ནི་ཁོང་གི་ནང་དུ་ལེགས་པར་སྦྲེལ༌ཞིང༌། རིམ་བཞིན་གཙོ་བོའི་ནང་དུ་མཆོད་ཁང་དམ་པ་ཞིག་ཏུ་འགྱུར་གྱིན་ཡོད།
EPH 2:22 ཁྱོད་རྣམས་ཀྱང་དད་ལྡན་གཞན་དག་དང་ལྷན༌དུ། སྐྱབས་མགོན་ཡེ་ཤུའི་ནང་དུ་དཀོན་མཆོག་ལ་བཞུགས་གནས་ཤིག་སྐྲུན་བཞིན་ཡོད༌དེ། དཀོན་མཆོག་ནི་དམ་པའི་ཐུགས་ཉིད་བརྒྱུད་ནས་གནས་དེར་བཞུགས་པ་ཡིན་ནོ།།
EPH 3:1 དེའི༌ཕྱིར། ཕྱི་ཕྱོགས་པ་ཁྱོད་རྣམས་ཀྱི་དོན་དུ་ཕོལ་ལོལ་བདག་ནི་མཱ་ཤི་ཀ་ཡེ་ཤུའི་བཙོན་པར་གྱུར་པ་ཡིན་ནོ།།
EPH 3:2 ཡང་དཀོན་མཆོག་གིས་ཁྱོད་རྣམས་ཀྱི་ཆེད་དུ་ཁོང་ཉིད་ཀྱི་ཐུགས་རྗེའི་ལས་འགན་བདག་ལ་གནང་བ་ནི་ཁྱོད་ཅག་གིས་ཀྱང་ཐོས་ཡོད་པ༌དང༌།
EPH 3:3 དེ་སྔར་བདག་གིས་རགས་ཙམ་བྲིས་པ་བཞིན༌དུ། དཀོན་མཆོག་གིས་གསང་བ་དེ་བདག་ལ་མངོན་པར་མཛད༌ཅིང༌།
EPH 3:4 ཁྱོད་ཅག་གིས་ཡི་གེ་དེ་བཀླགས་པ་ཡིན༌ན། བདག་གིས་སྐྱབས་མགོན་མཱ་ཤི་ཀའི་གསང་བ་གསལ་པོར་རྟོགས་པའང་ཤེས་པར་ནུས།
EPH 3:5 གསང་བ་དེ་མི་རབས་སྔ་མའི་མི་རྣམས་ལ་མངོན་པར་མ་མཛད༌ཅིང༌། ད་ལྟ་དམ་པའི་ཐུགས་ཉིད་བརྒྱུད་ནས་ཁོང་གི་སྐུ་ཚབ་དམ་པ་དང་ལུང་སྟོན་པ་རྣམས་ལ་མངོན་པར་མཛད༌པ་ཡིན།
EPH 3:6 དེ་ནི་མཱ་ཤི་ཀ་ཡེ་ཤུའི་ནང་དུ་མཆིས་ཤིང་འཕྲིན་བཟང་བརྒྱུད༌ནས། ཕྱི་ཕྱོགས་པ་རྣམས་ནི་ཡ་ཧུ་དཱ་པ་རྣམས་དང་ལྷན༌དུ་རྒྱུན་འཛིན་མཁན༌དང༌། སྐུ་ལུས་གཅིག་ཏུ་ཞུགས་པ༌དང༌། ཞལ་བཞེས་ཐོབ་མཁན་ཡང་ཡིན༌ནོ།།
EPH 3:7 ང་རང་འཕྲིན་བཟང་ལ་ཞབས་ཕྱི་བྱེད་མཁན་དུ་གྱུར་པ་ནི་དཀོན་མཆོག་གི་ཐུགས་རྗེའི་གནང་སྦྱིན་བཞིན་དུ་ཐོབ་པ་ཡིན༌ཞིང༌། དེ་ནི་ཁོང་གི་མཐུ་སྟོབས་བཞིན་དུ་བདག་ལ་གནང་ངོ་།།
EPH 3:8 བདག་ནི་དད་ལྡན་དམ་པ་ཐམས་ཅད་ལས་ཆེས་ཆུང་བ་ལས་ཀྱང་ཕྲན་བུ་ཡིན༌ཡང༌། དཀོན་མཆོག་གིས་བདག་ལ་ཐུགས་རྗེ་དེ་གནང་བའི་རྒྱུ་མཚན་ནི་འདི་ལྟ༌སྟེ། བདག་གིས་སྐྱབས་མགོན་མཱ་ཤི་ཀའི་བསམ་གྱིས་མི་ཁྱབ་པའི་ཐུགས་རྗེ་ཆེན་པོ་དེ་ཕྱི་ཕྱོགས་པ་རྣམས་ལ་སྒྲོག་པ༌དང༌།
EPH 3:9 གསང་བ་དེ་མངོན་པར་བྱེད་པའི་ལས་འགན་ནི་ངས་མི་ཐམས་ཅད་ལ་ཤེས་སུ་འཇུག་པའི་ཕྱིར༌ཡིན། གསང་བ་དེ་ནི་བསྐལ་པའི་ཐོག་མ་ནས་བཟུང༌། འཇིག་རྟེན་མཐའ་དག་ཡོངས་སུ་འགོད་མཁན་དཀོན་མཆོག་གི་ཐུགས་དགོངས་ནང་དུ་སྦས་ཡོད་ལ།
EPH 3:10 དེ་ནི་ཁོང་ཉིད་ཀྱི་མཁྱེན་རབ་སྣ་ཚོགས་ད་ལྟ་ཆོས་ཚོགས་བརྒྱུད༌ནས། ནམ་མཁའི་སྲིད་འཛིན་མཁན་དང་དབང་འཛིན་མཁན་རྣམས་ལ་ཤེས་སུ་འཇུག་པའི་ཕྱིར༌རོ།།
EPH 3:11 ཡང་དེ་ནི་དཀོན་མཆོག་གིས་ཁོང་ཉིད་ཀྱི་མཐའ་མེད་པའི་ཐུགས་དགོངས་བཞིན། བདག་ཅག་གི་གཙོ་བོ་མཱ་ཤི་ཀ་ཡེ་ཤུའི་ནང་དུ་འགྲུབ་པར་མཛད་པ་ཞིག་ཀྱང་ཡིན།
EPH 3:12 སྐྱབས་མགོན་ཡེ་ཤུར་དད་པ་བྱེད་པ་དང་ཁོང་ཉིད་ཀྱི་ནང་དུ། བདག་ཅག་དཀོན་མཆོག་གི་དྲུང་དུ་འགྲོ་ཐུབ་པར་སྙིང་ལ་ཞུམ་པ་མེད་ཅིང་བློ་ལ་གདེང་ཚོད་ཡོད།
EPH 3:13 དེའི༌ཕྱིར། ངས་ད་ལྟ་ཁྱོད་རྣམས་ཀྱི་དོན་དུ་དཀའ་སྡུག་མྱོང་བ་ནི་ཁྱོད་ཅག་གི་གཟི་བརྗིད་ཡིན༌པས། བདག་གིས་ཁྱོད་རྣམས་ལ་ཡིད་མ་ཕམ་ཞེས་ཞུ་བ་བྱེད༌དོ།།
EPH 3:14 དེའི༌ཕྱིར། བདག་གིས་ཡབ་ཀྱི་དྲུང་དུ་པུས་མོ་ས་ལ་བཙུགས་ནས་གསོལ་བ་བཏབ་ཅིང་།
EPH 3:15 ཁོང་ལ་བརྟེན་ནས་གནམ་ས་གཉིས་སུ་ཡོད་པའི་ཁྱིམ་གཞིས་ཐམས་ཅད་ལ་མིང་བྱུང༌བ་ཡིན་ནོ།།
EPH 3:16 གསོལ་འདེབས་ནི་འདི་ལྟ༌སྟེ། དཀོན་མཆོག་གི་གཟི་བརྗིད་ཆེན་པོ་བཞིན་ཁོང་གིས་དམ་པའི་ཐུགས་ཉིད་བརྒྱུད་ནས། ཁྱོད་རྣམས་ཀྱི་སེམས་ལ་སྟོབས་ཤུགས་རྒྱས་པར་མཛད༌ཅིང༌།
EPH 3:17 ཁྱོད་ཅག་གི་དད་པའི་སྒོ་ནས་སྐྱབས་མགོན་མཱ་ཤི་ཀ་ཁྱོད་ཅག་གི་སེམས་སུ་བཞུགས་པ་དང་། ཡང་ཁྱོད་ཅག་གི་བྱམས་པ་ལ་རྩ་བ་རྒྱས་ཤིང་བརྟན་པོར་གྱུར་ནས།
EPH 3:18 ཁྱོད་ཅག་དང་དད་ལྡན་དམ་པ་ཐམས་ཅད་ཀྱིས་ལྷན་དུ་སྐྱབས་མགོན་མཱ་ཤི་ཀའི་བྱམས་པ་ནི་ཇི་འདྲའི་ཡུན་རིང་ཞིང་རྒྱ་ཆེ་བ། ཚད་མཐོ་ཞིང་གཏིང་ཟབ་པ་ཞིག་ཡིན་པ་རྟོགས་ནུས༌པ་དང༌།
EPH 3:19 ཁོང་གི་བྱམས་པ་དེ་ནི་བློ་ཡུལ་དུ་མི་ཤོང་བ་ཞིག་ཡིན་པ་ཤེས་པར་གྱུར༌ནས། དཀོན་མཆོག་གི་ཕུན་སུམ་ཚོགས་པ་དེ་ཉིད་ཁྱོད་ཅག་ལའང་ཁྱབ་པར་སྨོན།
EPH 3:20 དཀོན་མཆོག་གིས་བདག་ཅག་གི་སེམས་སུ་མཛད་པའི་མཐུ་སྟོབས་ཆེན་པོ་བཞིན། བདག་ཅག་གིས་ཁོང་ལ་ཞུ་བའམ་སེམས་སུ་དྲན་པ་ལས༌ཀྱང༌། ཁོང་གིས་རྒྱ་ཆེ་ཞིང་ཕུན་སུམ་ཚོགས་པའི་སྒོ་ནས་དོན་ཐམས་ཅད་འགྲུབ་པར་མཛད་ནུས༌པས།
EPH 3:21 དཀོན་མཆོག་ལ་ཆོས་ཚོགས་དང་མཱ་ཤི་ཀ་ཡེ་ཤུ་བརྒྱུད་ནས། མི་རབས་ནས་མི་རབས་དང་ཡུན་ནས་ཡུན་དུ་བསྟོད་བསྔགས་བརྗོད་པར་སྨོན། ཨ༌མེན།
EPH 4:1 དེ་བས་ན། གཙོ་བོའི་ཆེད་དུ་བཙོན་ལ་སྦྱར་པ་བདག་གིས་ཁྱོད་རྣམས་ལ་བསྐུལ་བར༌བྱ་སྟེ། དཀོན་མཆོག་གི་ཞལ་འབོད་ཐོབ་པ་བཞིན་ཁྱོད་ཅག་གི་སྤྱོད་ལམ་ཡང་དེ་དང་མཐུན་དགོས་ཤིང་།
EPH 4:2 ཕྱོགས་ཀུན་ནས་ཁེངས་སྐྱུང༌དང༌ཞི༌འཇམ། ངང་རིང་བཅས་ལ་བརྟེན་ནས། བྱམས་པའི་ངང་ཕན་ཚུན་ལ་བཟོད་སྒོམ་བྱེད་དགོས་པ་དང༌།
EPH 4:3 འགྲིག་པོ་མཐུན་པོ་ཡོང་བའི་སྒོ་ནས། དམ་པའི་ཐུགས་ཉིད་ཀྱིས་གནང་བའི་གཅིག་མཐུན་གྱི་སེམས་པ་དེ་དམ་པོར་བསྲུང་དགོས༌ཏེ།
EPH 4:4 ཁྱོད་རྣམས་རེ་བ་གཅིག་གི་ནང་དུ་ཞལ་འབོད་གནང་བ༌ལྟར། སྐུ་ལུས་གཅིག༌དང༌། དམ་པའི་ཐུགས་ཉིད༌གཅིག
EPH 4:5 གཙོ་བོ་གཅིག དད་པ༌གཅིག ཁྲུས་གསོལ་གཅིག་བཅས༌དང༌།
EPH 4:6 དཀོན་མཆོག་གཅིག་སྟེ་ཐམས་ཅད་ཀྱི་ཡབ་ནི་མཐའ་དག་ལས་ཁྱད་དུ་འཕགས༌ཤིང༌། ཐམས་ཅད་ཀྱི་ཁྲོད་དུ་བརྒྱུད༌པ། ཐམས་ཅད་ཀྱི་ནང་དུ་བཞུགས་པ་བཅས་ཡིན་པའི་ཕྱིར༌རོ།།
EPH 4:7 འོན༌ཀྱང༌། བདག་ཅག་རེ་རེ་ལ་ཐུགས་རྗེ་གནང་བ་ནི་སྐྱབས་མགོན་མཱ་ཤི་ཀའི་གནང་སྦྱིན་གྱི་ཚད་བཞིན་དུ་གནང་བ་ཡིན༌ཞིང་།
EPH 4:8 དེའི་ཕྱིར། གསུང་རབ་ཀྱི་མདོ་ལས་ཇི་སྐད༌དུ། འཇིག་རྟེན་སྐྱབས་མགོན་ནམ་མཁར་འཕགས་པའི༌དུས།། བཙོན་པའི་དཔུང་ཚོགས་དེད་ནས་ཁྲིད་པ་དང་།། གནང་སྦྱིན་སྣ་ཚོགས་འཇིག་རྟེན་མི་ལ༌གནང༌།། ཞེས་གསུངས་པའོ།།
EPH 4:9 ནམ་མཁར་འཕགས་ཞེ༌ན། སྔོན་ལ་ས་འོག་གི་གནས་སུའང་བྱོན་པའི་དོན་མ་ཡིན༌ནམ།
EPH 4:10 ས་འོག་གི་གནས་སུ་བྱོན་པ་ཁོང་ནི་ནམ་མཁའ་ལས་ཀྱང་ཡར་འཕགས༌ཏེ། འཇིག་རྟེན་ཁམས་ཀྱི་དངོས་པོ་ཐམས་ཅད་ལ་ཁྱབ་པར་མཛད་པའི་ཕྱིར༌རོ།།
EPH 4:11 ཡང་ཁོང་གི་གནང་སྦྱིན་ནི་ལ་ལ་སྐུ་ཚབ་པ༌དང༌། ལ་ལ་ལུང་སྟོན༌པ། འགའ་ཞིག་འཕྲིན་བཟང་སྒྲོག༌མཁན། འགའ་ཞིག་བདག་སྐྱོང་པ་དང་དགེ་རྒན་བཅས་ཡིན་ཏེ།
EPH 4:12 ཞབས་ཕྱི་ཡི་ལས་འགན་སྣ་ཚོགས་བསྒྲུབ་པའི་ཆེད༌དུ། དད་ལྡན་དམ་པ་རྣམས་སྟ་གོན་བྱེད་པ་དང༌། སྐྱབས་མགོན་མཱ་ཤི་ཀའི་སྐུ་ལུས་གོང་དུ་སྤེལ་བ།
EPH 4:13 བདག་ཅག་ཐམས་ཅད་དད་པ་གཅིག་ཏུ་མཐུན་པ་དང༌། དཀོན་མཆོག་གི་སྲས་ཀྱི་ངོ་བོ་རྟོགས་པ། ནར་སོན་པ། སྐྱབས་མགོན་མཱ་ཤི་ཀའི་ཕུན་སུམ་ཚོགས་པའི་རང་བཞིན་གྱི་ཚད་ལྟར་ཡང་དག་པར་འགྱུར་བའི་བར་དུ་སྟ་གོན་བྱེད་དགོས་པའི་ཕྱིར༌རོ།།
EPH 4:14 དེས་ན། ད་ནས་བཟུང༌བདག་ཅག་ནི་མིའི་གཡོ་སྒྱུ་དང་བསླུ་བྲིད་འོག་ཏུ་ཚུད༌པ་དང༌། ཆོས་ལོག་རླུང་གིས་སྐྱོད་དེ་ཕར་གཡོ་ཚུར་གཡོ་བྱེད་ཅིང་། ལྟ་ངན་སྣ་ཚོགས་ཀྱི་དབང་དུ་འགྲོ་བའི་བྱིས་པ་ལྟ་བུ་ཞིག་མ་ཡིན༌པར།
EPH 4:15 བྱམས་པ་བཅངས་ནས་བདེན་གཏམ་སྨྲ༌བ་དང་། རྣམ་པ་ཀུན་ནས་དབུ་འཛིན་པ་སྐྱབས་མགོན་མཱ་ཤི་ཀའི་ཕྱོགས་སུ་ཡར་སྐྱེད་ཅིང་ཁོང་དང་འབྲེལ་བར་བྱའོ།།
EPH 4:16 སྐུ་ལུས་ཡོངས་ཀྱིས་ཁོང་ལ་བརྟེན་ཅིང༌། ལུས་པོའི་རུས་ཚིགས་རེ་རེ་སྒྲིག་སྦྱོར་འོས་མཐུན་བྱེད་པ་དང༌། ཡན་ལག་སོ་སོའི་ནུས་མཐུ་བཞིན་ཕན་ཚུན་ལ་རོགས་རམ་བྱས་ནས། སྐུ་ལུས་ཀྱང་བྱམས་པའི་ནང་རིམ་བཞིན་ཇེ་བརྟན་དུ་གཏོང་བར་འགྱུར་རོ།།
EPH 4:17 དེའི༌ཕྱིར། ངས་གཙོ་བོ་ལ་བརྟེན་ནས་གཟབ་ནན་ངང་ཁྱོད་རྣམས་ལ་སྨྲ༌སྟེ། ཁྱོད་ཅག་གིས་དེང་ཕྱིན་ཕྱི་ཕྱོགས་པ་རྣམས་དང་འདྲ༌བར། སྙིང་པོ་མེད་པའི་བསམ་པ་བཞིན་སྤྱོད་པར་མི༌བྱའོ།།
EPH 4:18 མི་དེ་ལྟ་བུ་རྣམས་ཀྱི་བློ་གྲོས་ནི་མུན་པའི་ནང་དུ་ལྷུང་བ༌དང་། རང་བཞིན་རྨོངས་ཤིང་སེམས་རྒྱུད་གྱོང་པོ་ཡིན་པས་དཀོན་མཆོག་གིས་གནང་བའི་ཚེ་སྲོག་དང་ཁ་བྲལ༌ཅིང༌།
EPH 4:19 ཚོར་བ་ཉམས་པས་འདོད་ཆགས་བག་ཡངས་སུ་བཏང་ནས། མི་གཙང་བའི་ལས་སྣ་ཚོགས་ལ་བག་མེད་དུ་ཞུགས་པའོ།།
EPH 4:20 འོན་ཀྱང༌། ཁྱོད་ཅག་གིས་སྐྱབས་མགོན་མཱ་ཤི་ཀའི་སྐོར་བསླབས་པ་ནི་དེ་འདྲ་མ་ཡིན་ནོ།།
EPH 4:21 བདེན་པ་ཉིད་ནི་སྐྱབས་མགོན་ཡེ་ཤུའི་ནང་དུ་གནས་པ་བཞིན། ཁྱོད་རྣམས་ཀྱིས་ཁོང་གི་བཀའ་ལ་མཉན་ཞིང་ཁོང་གི་ཆོས་བསླབས་པ་ཡིན་ན།
EPH 4:22 སྔོན་ཆད་ཀྱི་སྤྱོད་ལམ་ཐད་ཀྱི་གཤིས་ཀ་རྙིང་པ་འདོར་བར་གྱིས། གཤིས་ཀ་རྙིང་པ་དེ་ནི་ཆགས་ཞེན་གྱི་བསླུ་བྲིད་དབང་གིས་རྨོངས་ཤིང་རུལ་བར་གྱུར་པ་ཞིག་ཡིན།
EPH 4:23 ཁྱོད་རྣམས་ཀྱི་སེམས་ནི་གསར་པ་ཞིག་ཏུ་འགྱུར་དགོས༌ཤིང༌།
EPH 4:24 ཁྱོད་ཅག་གིས་ཀྱང་གཤིས་ཀ་གསར་པ་དེ་གྱོན༌པར་བྱའོ།། གཤིས་ཀ་གསར་པ་དེ་ནི་དཀོན་མཆོག་གི་སྣང་བརྙན་བཞིན། བདེན་པ་ཉིད་ཀྱི་དྲང་བདེན་དང་དམ་པའི་ངང་ནས་བཀོད༌པ་ལགས་སོ།།
EPH 4:25 དེའི༌ཕྱིར། བདག་ཅག་ནི་ཕན་ཚུན་གྱི་ཡན་ལག་ཡིན༌པས། ཁྱོད་ཅག་གིས་རྫུན་གཏམ་སྤངས་ནས་མི་རེ་རེས་རང་གི་ཁྱིམ་མཚེས་ལ་བདེན་གཏམ་སྨྲ་བར་གྱིས།
EPH 4:26 སེམས་ནས་ཁྲོས་ཀྱང་སྡིག་པ་མི་བྱ་ཞིང་། ཁོང་ཁྲོ་ལངས་ནའང་ཉི་མ་ནུབ་པའི་བར་དུ་ཞི་བར་བྱའོ།།
EPH 4:27 བདུད་ལ་གླགས་སྟེར་མི་རུང་ངོ་།།
EPH 4:28 སྔོན་ཆད་རྐུ་བྱས་མྱོང་བ་རྣམས་ཀྱིས་ཕྱིན་ཆད་རྐུ་བར་མི་བྱའོ།། འོན་ཀྱང༌རང་ཉིད་ཀྱི་ལག་པའི་རྩོལ་བ་ལ་བརྟེན༌ནས། དབུལ་པོ་རྣམས་ལ་སྦྱིན་པ་གཏོང་རྒྱུའང་ཡོད་པའི་ཕྱིར་ལས་བཟང་པོ་བྱེད་དགོས་སོ།།
EPH 4:29 ཉན་མཁན་རྣམས་ལ་ཕན་ཐོགས་པའི༌ཕྱིར། ངག་ནས་ཚིག་ངན་གཅིག་ཀྱང་མི་སྨྲ༌བར། དུས་དང་འཚམ་པར་མི་གཞན་དག་སྐྱེད་སྲིང་བྱེད་པའི་ཚིག་སྙན་སྨྲ་བར་བྱའོ།།
EPH 4:30 དཀོན་མཆོག་གི་དམ་པའི་ཐུགས་ཉིད་ཀྱི་སེམས་སྐྱོ་བར་མི་བྱའོ།། དམ་པའི་ཐུགས་ཉིད་ནི་ཐར་པའི་ཉིན་མོ་སླེབས་པའི་བར་དུ་ཐར་པ་ཐོབ་པའི་རྟགས་སུ་ཁྱོད་ཅག་ལ་གནང་ཡོད།
EPH 4:31 འཁོན་སེམས༌དང༌། ཁོང༌ཁྲོ། ཞེ༌སྡང༌། རྩོད་པའི་འུར༌སྒྲ། འཕྱ༌སྨོད། གདུག་རྩུབ་ཐམས་ཅད་བཅས་ཁྱོད་ཅག་གི་ཁྲོད་ནས་རིང་དུ་འདོར་བར་གྱིས།
EPH 4:32 ཁྱོད་ཅག་གིས་ཕན་ཚུན་ལ་གཅེས་པར༌བྱའོ།། ཡང་དཀོན་མཆོག་གིས་སྐྱབས་མགོན་མཱ་ཤི་ཀ་བརྒྱུད་ནས་ཁྱོད་ཅག་གི་སྡིག་པ་བསལ་བ༌བཞིན། ཁྱོད་རྣམས་ཀྱིས་ཀྱང་སེམས་སུ་སྙིང་རྗེ་བཅངས་ནས་ཕན་ཚུན་ལ་གུ་ཡངས་གཏོང་དགོས་སོ།།
EPH 5:1 དེའི༌ཕྱིར། ཁྱོད་རྣམས་ཀྱིས་བྱམས་སྐྱོང་ཐོབ་པའི་བུ་ཕྲུག་བཞིན་དུ་དཀོན་མཆོག་ཁོང་ཉིད་དཔེ་རུ་ལེན་འོས་སོ།།
EPH 5:2 ཡང་སྐྱབས་མགོན་མཱ་ཤི་ཀས་ཇི་ལྟར་བདག་ཅག་ལ་བྱམས་ཤིང་གཅེས་ཏེ་རང་སྲོག་བློས་བཏང་བ་དང་། དཀོན་མཆོག་ལ་དྲི་ཞིམ་གྱི་འབུལ་བ་དང་མཆོད་པ་ཕུལ་བ་བཞིན། ཁྱོད་ཅག་གིས་ཀྱང་དེ་ལྟར་བྱམས་པ་ལ་བརྟེན་ནས་སྤྱད་པ་སྤྱོད་དགོས།
EPH 5:3 འོན༌ཀྱང༌། གཡེམ༌སྦྱོར་རམ་མི་གཙང་བ་ཐམས༌ཅད། ཡང་ན་བརྣབ་སེམས་ཏེ་དད་ལྡན་དམ་པ་རྣམས་ཀྱི་སྤྱོད་ཚུལ་དང་མི་མཐུན་པའི་ལས་ནི་ཁྱོད་ཅག་གི་ཁྲོད་དུ་གླེང་ཡང་མི་རུང༌བ་ཡིན།
EPH 5:4 འདོད་གཏམ༌དང༌། འཆལ༌གཏམ། ཀུ་རེ་གཏམ་ངན་ཡང་སྨྲ་མི་འོས༌པར། རྟག་ཏུ་བཀའ་དྲིན་ཞུ་དགོས་སོ།།
EPH 5:5 རྒྱུ་མཚན་ནི་ལོག་གཡེམ་བྱེད་མཁན༌དང༌། མི་གཙང༌བ། སྐུ་འདྲར་བརྟེན་པ་དང་གཅིག་མཚུངས་ཡིན་པའི་བརྣབ་སེམས་ཅན་བཅས་ལ་སྐྱབས་མགོན་མཱ་ཤི་ཀ་དང་དཀོན་མཆོག་གི་རྒྱལ་སྲིད་ཀྱི་བགོ་སྐལ་ནམ་ཡང་འཐོབ་མི་སྲིད་པ་ཁྱོད་རྣམས་ཀྱིས་ཀྱང་གསལ་པོར་ཤེས༌པའི་ཕྱིར་རོ།།
EPH 5:6 མི་གཞན་གྱི་སྙིང་པོ་མེད་པའི་གཏམ་གྱི་གཡོ་འོག་ཏུ་ཚུད༌པར་མི་བྱའོ།། ལས་ངན་པ་དེ་དག་གི་རྐྱེན་གྱིས་དཀོན་མཆོག་གི་བཀའ་ལ་མི་ཉན་པ་རྣམས་ལ་ཁོང་ཉིད་ཀྱི་ཐུགས་ཁྲོ་འཕོག་པར་འགྱུར་ངེས་ཡིན།
EPH 5:7 དེའི༌ཕྱིར། ཁྱོད་རྣམས་མི་དེ་དག་དང་འགྲོགས་པར་མི༌བྱའོ།།
EPH 5:8 དེ་སྔར་ཁྱོད་རྣམས་ནི་མུན་པ་ཡིན༌ཡང༌། ད་ལྟ་གཙོ་བོ་ལ་གཏོགས་ཤིང་འོད་ཟེར་དང་ལྡན་པ་ཡིན༌པས། འོད་ཟེར་གྱི་བུ་ཕྲུག་བཞིན་དུ་སྤྱོད་འོས་སོ།།
EPH 5:9 འོད་ཟེར་ལས་བྱུང་བའི་འབྲས་བུ་ནི་ལས་བཟང་པོ༌དང༌། དྲང༌བདེན། བདེན་པ་ཐམས་ཅད་ཡིན།
EPH 5:10 ཁྱོད་རྣམས་ཀྱིས་ཀྱང་གཙོ་བོ་ཐུགས་དགྱེས་པའི་དོན་གང་ཞིག་འཚོལ་འོས་སོ།།
EPH 5:11 ཁྱོད་རྣམས་ཕན་ཐོགས་མེད་པའི་མུན་ནག་གི་བྱ་བ་ལ་མི་ཞུགས༌པར། བྱ་བ་ངན་པ་དེ་དག་མི་གཞན་ལ་རྗེན་པར་སྟོན་ཅིག
EPH 5:12 ཅིའི་ཕྱིར་ཞེ༌ན། དེ་དག་གིས་ལྐོག་ཏུ་སྒྲུབ་པ་ནི་ངག་ལས་སྨྲ་བའང་ངོ་གནོང་བ་ཞིག༌ཡིན།
EPH 5:13 འོན་ཀྱང༌། འོད་ཟེར་གྱིས་དོན་ཐམས་ཅད་རྗེན་པར་སྟོན་ཞིང་མངོན་པར་བྱེད། རྒྱུ་མཚན་ནི་མིག་གིས་མཐོང་བར་གྱུར་པ་ཐམས་ཅད་འོད་ཟེར་གྱིས་མངོན་པར་བྱེད་པའི་ཕྱིར་རོ།།
EPH 5:14 དེའི༌ཕྱིར། ཇི་སྐད༌དུ། གཉིད་དུ་ཡུར་པ་གཉིད་ལས་སད་པར༌གྱིས།། འཆི་བའི་བེམ་པོ་མྱུར་དུ་ལོངས་ཤིག་དང་།། མཱ་ཤི་ཀ་ཡིས་ཁྱོད་ལ་འོད་ཟེར་སྤྲོ།། ཞེས༌པའོ།།
EPH 5:15 དེ་ལྟར་ཡིན་པས། ཁྱོད་རྣམས་ཀྱིས་ཇི་ལྟར་སྤྱོད་པར་གཟབ་གཟབ་གྱིས། བླུན་པོ་དང་མི་འདྲ་བར་མཁས་པ་བཞིན་དུ་སྤྱོད་ཅིག
EPH 5:16 ད་ལྟ་ནི་དུས་ངན་པ་ཡིན་པས་དུས་ལ་དམ་འཛིན༌བྱ་དགོས།
EPH 5:17 བླུན་པོ་བཞིན་དུ་མི་འགྱུར་བར་གཙོ་བོའི་ཐུགས་དགོངས་ཅི་ཡིན་པ་ཤེས་པར་གྱིས།
EPH 5:18 ཆང་གིས་བཟི་བར་གྱུར་ན་བག་མེད་རྣམ་གཡེང་ཡིན༌པས། ཆང་གིས་བཟི་རུ་མི་འཇུག༌པར་དམ་པའི་ཐུགས་ཉིད་ཀྱིས་ཁྱབ་པར་གྱུར༌ཅིག
EPH 5:19 གསུང་མགུར་དང༌། བསྟོད༌དབྱངས། མགུར་གླུ་བཅས་ཀྱིས་ཕན་ཚུན་ལ་གཏམ་སྨྲ༌ཞིང༌། རང་གི་སེམས་ནས་གཙོ་བོ་ལ་བསྟོད་གླུ་དང་རོལ་དབྱངས་འབུལ་བར་བྱའོ།།
EPH 5:20 གཞན༌ཡང༌། དོན་ཐམས་ཅད་ཀྱི་ཆེད༌དུ་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་མཚན་གྱི་སྒོ་ནས་དུས་རྟག་ཏུ་ཡབ་དཀོན་མཆོག་ལ་བཀའ་དྲིན་ཞུ་བ་དང༌།
EPH 5:21 སྐྱབས་མགོན་མཱ་ཤི་ཀར་གུས་ཤིང་འཇིགས་པའི་ངང་ཕན་ཚུན་ལ་བསྟུན་པར་བྱ་འོས༌སོ།།
EPH 5:22 ཁྱོད་ཅག་ཆུང་མ་རྣམས་ཀྱིས་གཙོ་བོ་ལ་བསྟུན་པ་བཞིན་རང་རང་གི་ཁྱོ་ག་དང་བསྟུན་པར༌བྱའོ།།
EPH 5:23 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་ནི་སྐུ་ལུས་ཡོངས་ཀྱི་སྐྱབས་མགོན་དང་ཆོས་ཚོགས་ཀྱི་དབུ་ཡིན་པ་ལྟར། ཁྱོ་ག་ནི་ཆུང་མའི་མགོ་ཡིན་པའི་ཕྱིར༌རོ།།
EPH 5:24 ཆོས་ཚོགས་ཀྱིས་ཇི་ལྟར་སྐྱབས་མགོན་མཱ་ཤི་ཀ་ལ་བསྟུན་པ༌བཞིན། ཆུང་མས་ཀྱང་དེ་ལྟར་བྱ་བ་ཐམས་ཅད་རང་གི་ཁྱོ་ག་དང་བསྟུན་པར་བྱ་འོས་སོ།།
EPH 5:25 སྐྱབས་མགོན་མཱ་ཤི་ཀས་ཆོས་ཚོགས་ལ་ཇི་ལྟར་བྱམས་ཤིང་ཆོས་ཚོགས་ཀྱི་དོན་དུ་རང་སྲོག་བློས་བཏང་བ༌བཞིན། ཁྱོད་ཅག་ཁྱོ་ག་རྣམས་ཀྱིས་ཀྱང་རང་རང་གི་ཆུང་མ་ལ་དེ་ལྟར་བྱམས་ཤིང་གཅེས་དགོས་སོ།།
EPH 5:26 ཅིའི་ཕྱིར་ཞེ༌ན། སྐྱབས་མགོན་མཱ་ཤི་ཀས་བཀའ་ལ་བརྟེན་ནས་ཆུ་ཡིས་ཆོས་ཚོགས་གཙང་མར་བཀྲུས་ཤིང་དམ་པར་མཛད༌དེ།
EPH 5:27 སྨེ་བ་དང་གཉེར་མ་ལ་སོགས་མེད་པ༌དང་། ཆོས་ཚོགས་ནི་དམ་པ་ཡིན་པ་དང་སྐྱོན་གྱི་དྲི་མས་མ་གོས་པར་གཟི་བརྗིད་ལྡན་པ་ཞིག་རང་ཉིད་ལ་འབུལ་བའི་ཕྱིར༌ཡིན།
EPH 5:28 དཔེ་དེ་བཞིན་དུ་ཁྱོ་ག་རྣམས་ཀྱིས་ཀྱང་རང་གི་ལུས་པོར་ཇི་ལྟར་གཅེས་པ་བཞིན་ཆུང་མ་ལའང་དེ་ལྟར་གཅེས་དགོས། ཆུང་མར་གཅེས་ན་དོན་གྱིས་རང་ལ་གཅེས་པ་ཡིན།
EPH 5:29 ཐོག་མ་ཉིད་ནས་རང་གི་ལུས་ལ་ཞེ་སྡང་ལངས་མཁན་སུ་ཡང་མེད༌པར་རྟག་ཏུ་གཅེས་སྐྱོང་བྱེད་པ་དང་། དེ་ནི་སྐྱབས་མགོན་མཱ་ཤི་ཀས་ཆོས་ཚོགས་ལ་བྱམས་སྐྱོང་མཛད་པ་ལྟར༌ཡིན།
EPH 5:30 ཅིའི་ཕྱིར་ཞེ་ན། བདག་ཅག་ཐམས་ཅད་ནི་ཁོང་གི་སྐུ་ལུས་ཀྱི་ཡན་ལག་ཡིན་པའི་ཕྱིར༌རོ།།
EPH 5:31 དེའི༌ཕྱིར། སྐྱེས་པ་ནི་རང་གི་ཕ་མ་དང་ཁ་བྲལ་ནས་རང་གི་ཆུང་མར་འབྲེལ་ཏེ་ཁོ་གཉིས་ལུས་པོ་གཅིག་ཏུ་འགྱུར་ཞིང་།
EPH 5:32 འདི་ནི་གསང་བ་ཆེན་པོ་ཞིག་ཡིན༌ཡང༌། བདག་གིས་སྐྱབས་མགོན་མཱ་ཤི་ཀ་དང་ཆོས་ཚོགས་ལ་དམིགས་ནས་སྨྲས་པ་ཡིན་ནོ།།
EPH 5:33 འོན་ཀྱང༌། ཁྱོད་ཅག་མི་རེ་རེས་རང་ཉིད་ལ་གཅེས་པ་བཞིན་རང་གི་ཆུང་མ་ལའང་གཅེས༌ཤིང༌། ཆུང་མས་ཀྱང་རང་གི་ཁྱོ་ག་ལ་བརྩི་བཀུར་བྱ་འོས༌སོ།།
EPH 6:1 དེ་ཡང་ཁྱོད་ཅག་བུ་ཕྲུག་རྣམས་ཀྱིས་གཙོ་བོའི་ནང་དུ་རང་གི་ཕ་མའི་ངག་ལ་མཉན་དགོས༌ཏེ། དེ་ནི་འོས་ཤིང་འཚམ་པའི་ཕྱིར༌རོ།།
EPH 6:2 ཁྱོད་རང་བདེ་ཞིང་ས་སྟེང་དུ་ཚེ་ཐག་རིང་བར་འགྱུར་བའི༌ཕྱིར། ཁྱོད་ཀྱིས་རང་གི་ཕ་མ་གཉིས་ལ་བཀུར་བསྟི་བྱེད་དགོས་ཞེས་པ་དེ་ནི་བཀའ་ཁྲིམས་ལས་ཁྱོད་ཅག་ལ་ཞལ་བཞེས་གནང་ཡོད་པའི་བཀའ་དང༌པོ་ཡིན་ནོ།།
EPH 6:4 ཁྱོད་ཅག་ཕ་ཡིན་པ་རྣམས་ཀྱིས་ཀྱང་རང་གི་བུ་ཕྲུག་ལ་ཁོང་ཁྲོ་མི་སློང༌བར། གཙོ་བོའི་བསླབ་བྱ་དང་ཞལ་གདམས་བཞིན་ཁོ་རྣམས་སྙོར་སྐྱོང་བྱའོ།།
EPH 6:5 ཁྱོད་ཅག་གཡོག་པོ་རྣམས་ཀྱིས་སྐྱབས་མགོན་མཱ་ཤི་ཀའི་བཀའ་ལ་ཉན་པ༌བཞིན། སྐྲག་སྐྲག་འདར་འདར་དང་སེམས་རྒྱུད་དྲང་པོའི་ངང་ནས་རང་གི་ལུས་ཕུང་གི་བདག་པོ་དེའི་ངག་ལ་མཉན་དགོས་ཤིང༌།
EPH 6:6 ངོ་སོ་བྱེད་པ་ལྟར་མིག་མདུན་ཁོ་ནར་ཞབས་ཕྱི་མི་སྒྲུབ༌པར། སྐྱབས་མགོན་མཱ་ཤི་ཀའི་གཡོག་པོ་དང་འདྲ་བར་སེམས་གཏིང་ནས་དཀོན་མཆོག་གི་ཐུགས་དགོངས་བཞིན་དུ་བསྒྲུབ་དགོས་སོ།།
EPH 6:7 སེམས་གཏིང་ནས་ཞབས་ཕྱི་སྒྲུབ་ཅིང་མི་ལ་ཞབས་ཕྱི་བྱེད་པ་ལྟར་མ་ཡིན༌པར། གཙོ་བོ་ལ་ཞབས་ཕྱི་སྒྲུབ་པ་བཞིན་ཡིན་དགོས།
EPH 6:8 རྒྱུ་མཚན་ནི་བྲན་གཡོག་དང་མི་རང་དབང་ཅན་སུ་ཡིན༌ཡང༌། ལས་བཟང་པོ་བྱས་པ་བཞིན་དུ་མི་རེ་རེ་ལ་གཙོ་བོས་བྱ་དགའ་གནང་ངེས་པ་ཁྱོད་ཅག་གིས་ཀྱང་ཤེས་པས༌སོ།།
EPH 6:9 ཁྱོད་ཅག་བདག་པོ་རྣམས་ཀྱིས་ཀྱང་གཡོག་པོ་རྣམས་ལ་འཇིགས་སྣང་མི་བསྐུལ་བར་གོང་གི་ཚིག་བཞིན་དུ་བྱེད་དགོས། ཅི་ལ་ཞེ་ན། ཁྱོད་ཅག་དང་ཁོ་རྣམས་ཀྱི་བདག་པོ༌སྟེ། ནམ་མཁའི་ཞིང་ཁམས་སུ་བཞུགས་པ་ཁོང་ཉིད་ཀྱིས་ཕྱོགས་རིས་མི་འཛིན་པ་ཁྱོད་རྣམས་ཀྱིས་ཀྱང་ཤེས་པའི་ཕྱིར༌རོ།།
EPH 6:10 མཐར་ཁྱོད་རྣམས་གཙོ་བོ་དང་ཁོང་གི་མཐུ་སྟོབས་ཆེན་པོར་བརྟེན་ནས་དཔའ་རྟུལ་ཅན་དུ་གྱུར༌ཅིག
EPH 6:11 བདུད་ཀྱི་གཡོ་ཐབས་བཟློག་པའི༌ཕྱིར། དཀོན་མཆོག་གི་གོ་མཚོན་ཆ་ཚང་ལུས་ལ་སྤྲ༌དགོས་སོ།།
EPH 6:12 ཅིའི་ཕྱིར་ཞེ་ན། བདག་ཅག་གི་འཐབ་འཁྲུག་ནི་ཤ་ཁྲག་ལྡན་པའི་མི་ལ་དམག་འཁྲུག་རྒྱག་པ་མ་ཡིན༌པར། སྲིད་དབང་འཛིན་མཁན༌དང༌། དབང་འཛིན༌མཁན། འཇིག་རྟེན་འདིའི་མུན་ནག་ལ་དབང་སྒྱུར་མཁན། མཁའ་དབྱིངས་སུ་རྒྱུ་བའི་གདོན་འདྲེའི་རིགས་སུ་གྱུར་པ་ཐམས་ཅད་ལ་གཡུལ་འགྱེད༌པའི་ཕྱིར་ཡིན།
EPH 6:13 དེ་བས་ན། མ་འོངས་པའི་དུས་ངན་པ༌ལ། དགྲ་བོ་ཕྱིར་བཟློག་སྟེ་དོན་ཐམས་ཅད་བསྒྲུབས་ནས་བརྟན་པོར་གནས་པའི༌ཕྱིར། དཀོན་མཆོག་གི་གོ་མཚོན་ཆ་ཚང་ལུས་ལ་སྤྲ༌དགོས་སོ།།
EPH 6:14 ཁྱོད་རྣམས་ཀྱིས་བདེན་པ་ཉིད་ནི་སྐ་རགས་སུ་བཅིངས་ནས་དྲང་བདེན་གྱི་བྲང་ཁྲབ་ལུས་ལ་གྱོན་ཏེ་བརྟན་པོར་གནས་པར༌གྱིས།
EPH 6:15 རྐང་པར་ལྷམ་གྱོན་པ་བཞིན་ཁྱོད་རྣམས་ཀྱིས་ཀྱང་ཞི་བདེའི་འཕྲིན་བཟང་སྒྲོག་པར་གྲ་སྒྲིག་བྱའོ།།
EPH 6:16 གཞན་ཡང༌། དད་པ་ནི་ཕུབ་ལྟར་ཟུངས་དང༌། བདུད་ངན་པའི་མེ་མདའ་ཐམས་ཅད་ཕྱིར་བཟློག་ནུས་སོ།།
EPH 6:17 ཐར་པའི་རྨོག་ཞྭ་མགོ་ལ་གྱོན༌པ་དང༌། དམ་པའི་ཐུགས་ཉིད་ཀྱི་རལ་གྲི་ལག་ལ༌འཛིན་པར་གྱིས། རལ་གྲི་དེ་ནི་དཀོན་མཆོག་གི་བཀའ་ལགས་སོ།།
EPH 6:18 ཡང་དམ་པའི་ཐུགས་ཉིད་ལ་བརྟེན་ནས་རྟག་ཏུ་གསོལ་བ་སྣ་ཚོགས་འདེབས་པ༌དང༌། དོན་དེ་སེམས་ལ་བཟུང་ནས་དད་ལྡན་དམ་པ་ཐམས་ཅད་ཀྱི་ཆེད༌དུ། གཟབ་གཟབ་ངང་ནས་གསོལ་བ་འདེབས་ཤིང་བརྩོན་དགོས་སོ།།
EPH 6:19 བདག་ལ་གཏམ་སྨྲ་བའི་ཁ་ལྕེ་ལྡན་པ་དང་། སྤོབས་པ་དང་བཅས་འཕྲིན་བཟང་གི་གསང་བ་གསལ་པོར་བརྗོད་ཐུབ་པའི་ཕྱིར། ཁྱོད་ཅག་གིས་གསོལ་བ་འདེབས་པར་གྱིས།
EPH 6:20 བདག་ནི་འཕྲིན་བཟང་དེའི་ཆེད་དུ་ལྕགས་སྒྲོག་གིས་བཅིངས་པའི་སྐུ་ཚབ་པ་ཞིག་ཏུ་གྱུར་པ་ཡིན་ལ། ངས་འཆད་འོས་པ་བཞིན་དུ་སྙིང་ལ་སྤོབས་པ་བསྐྱེད་ནས་ངག་ལས་འཕྲིན་བཟང་བསྒྲག་པའི་ཕྱིར། ཡང་གསོལ་བ་འདེབས་རོགས་ཞུའོ༎
EPH 6:21 མཛའ་ཞིང་བརྩེ་བའི་སྤུན་ཟླ་དང་གཙོ་བོ་ལ་ལྷག་བསམ་རྣམ་དག་གིས་ཞབས་ཕྱི་སྒྲུབ་མཁན་ཐི་ཀེ་ཀུ་ཞེས་བྱ༌བས། བདག་གི་དོན་རྣམས་དང་གནས་ཚུལ་ཐམས་ཅད་ཁྱོད་རྣམས་ལ་བརྗོད་ཅིང་ཤེས་སུ་འཇུག་པ་དང་།
EPH 6:22 ངས་ཁྱོད་རྣམས་ལ་ངེད་ཅག་གི་གནས་ཚུལ་ཤེས་སུ་འཇུག་པ་དང་ཁྱོད་རྣམས་ལ་སེམས་གསོ་འཐོབ་པའི༌ཕྱིར། ཁོ་རང་ཆེད་དུ་ཁྱོད་རྣམས་ཀྱི་གམ་དུ་མངགས༌པའོ།།
EPH 6:23 སྤུན་ཟླ་ཁྱོད་རྣམས་ལ་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཞི་བདེ་དང༌། དད་པ་དང་ལྡན་པའི་བྱམས་བརྩེ་འཐོབ་པར༌ཤོག
EPH 6:24 གཞན༌ཡང༌། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་རྟག་ཏུ་གཅེས་པར་འཛིན་མཁན་ཐམས་ཅད་ལའང་ཐུགས་རྗེ་འཐོབ་པར༌སྨོན།། །།
PHI 1:1 དེ་ཡང་མཱ་ཤི་ཀ་ཡེ་ཤུའི་ཞབས་ཕྱི་པ་ཕོལ་ལོལ་ང་རང་དང་ཐི་མོ་ཐེ་གཉིས་ཀྱིས། ཕི་ལིབ་པི་རུ་ཡོད་པ་དང་མཱ་ཤི་ཀ་ཡེ་ཤུའི་ནང་གི་དད་ལྡན་དམ་པ་རྣམས༌དང༌། ཆོས་ཚོགས་ཀྱི་དོ་དམ་པ་རྣམས། ལས་འཛིན་པ་རྣམས་བཅས་ལ་འཕྲིན་ཡིག་འདི་སྤྲིངས༌པ་ཡིན།
PHI 1:2 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
PHI 1:3 བདག་གིས་ཁྱོད་རྣམས་དྲན་ཐེངས་རེ་རེར་ང་ཡི་དཀོན་མཆོག་ལ་བཀའ་དྲིན་ཞུས་ཤིང་།
PHI 1:4 ཁྱོད་ཅག་ཐམས་ཅད་ཀྱི་དོན་དུ་གསོལ་བ་འདེབས་ཐེངས་རེ་རེར། རྒྱུན་དུ་དགའ་སྤྲོའི་ངང་ནས་གསོལ་བ་བཏབ་པའོ།།
PHI 1:5 རྒྱུ་མཚན་ནི་ཉིན་དང་པོ་ནས་ད་ལྟའི་བར༌དུ། ཁྱོད་རྣམས་ཀྱིས་བློ་སེམས་གཅིག་མཐུན་གྱིས་འཕྲིན་བཟང་བདག་དང་མཉམ་འབྲེལ་སྤེལ་བའི་ཕྱིར༌རོ།།
PHI 1:6 ཁྱོད་རྣམས་ཀྱི་སེམས་སུ་ལས་བཟང་པོ་སྒྲུབ་འགོ་རྩོམ་མཁན་དེ་ཉིད་ཀྱིས། མཱ་ཤི་ཀ་ཡེ་ཤུའི་ཉིན་མོ་སླེབས་པའི་བར༌དུ། ལས་དེ་འགྲུབ་པར་མཛད་ངེས་པར་བདག་ལ་ཡིད་ཆེས་བརྟན་པོ་ཡོད་དོ།།
PHI 1:7 ངས་ཁྱོད་རྣམས་ལ་འདི་ལྟ་བུའི་བསམ་པ་བཅང་འོས་པ་ཡིན༌ཏེ། ཁྱོད་རྣམས་རྟག་ཏུ་ངའི་སེམས་སུ་གནས༌ཤིང༌། ང་རང་བཙོན་དུ་ཡོད་པའམ་འཕྲིན་བཟང་ལ་ཁུངས་བཅོལ༌ཞིང༌བདེན་དཔང་བྱེད་པའི་དུས་ནམ་ཞིག་ལའང་ཁྱོད་རྣམས་ཐམས་ཅད་ནི་བདག་དང་མཉམ་དུ་ཐུགས་རྗེ་ཐོབ་མཁན་ཡིན།
PHI 1:8 ངས་མཱ་ཤི་ཀ་ཡེ་ཤུའི་བྱམས་བརྩེ་བཞིན་དུ་སེམས་གཏིང་ནས་ཁྱོད་རྣམས་ཤིན་ཏུ་དྲན་པ༌དང༌། དོན་འདིར་དཀོན་མཆོག་གིས་ཀྱང་བདག་ལ་བདེན་དཔང་མཛད་པ་ལགས་སོ།།
PHI 1:9 ངས་གསོལ་བ་འདེབས་དོན་ནི་ཁྱོད་ཅག་གི་བྱམས་པ་དེ་ཤེས་ཡོན་དང་མཐོང་རྒྱ་སྣ་ཚོགས་ཀྱི་ཆ་ནས་སྔར་ལས་ལྷག་ཏུ་འཕེལ༌ཏེ།
PHI 1:10 ཁྱོད་རྣམས་ཀྱིས་བདེན་རྫུན་གྱི་དབྱེ་བ་འབྱེད་ཐུབ་པ༌དང༌། སྐྱབས་མགོན་མཱ་ཤི་ཀའི་ཉིན་མོ་སླེབས་པའི་བར༌དུ། གཞུང་དྲང་སྐྱོན་མེད་ཀྱི་མི་ཞིག་ཏུ་འགྱུར་བ༌དང༌།
PHI 1:11 ཡེ་ཤུ་མཱ་ཤི་ཀར་བརྟེན་ནས་དྲང་བདེན་གྱི་འབྲས་བུ་མང་དུ་བསྐྱེད༌དེ། དཀོན་མཆོག་ལ་གཟི་བརྗིད་དང་བསྟོད་བསྔགས་འབུལ་བའི་ཕྱིར༌རོ།།
PHI 1:12 སྤུན་ཟླ༌རྣམས། ངས་ཁྱོད་རྣམས་ལ་ཤེས་སུ་འཇུག་འདོད་པ་ནི། བདག་ལ་བྱུང་བའི་དོན་དེས་འཕྲིན་བཟང་སྔར་ལས་འཕེལ་བར་བྱས༌ཤིང༌།
PHI 1:13 ཐ་ན་ང་རང་བཙོན་དུ་འཇུག་དོན་ཡང་ཕོ་བྲང་ནང་གི་དམག་མི་དང་མི་གཞན་ཐམས་ཅད་ཀྱི་ཁྲོད༌དུ། སྐྱབས་མགོན་མཱ་ཤི་ཀའི་ཆེད་དུ་ཡིན་པ་གསལ་པོར་མངོན་ནོ།།
PHI 1:14 གཞན༌ཡང༌། གཙོ་བོ་ནང་གི་སྤུན་ཟླ་མང་ཤོས་ཀྱང་ང་རང་བཙོན་དུ་སྦྱར་བའི་རྐྱེན་གྱིས་དད་མོས་ཆེ་ཞིང་ཐེ་ཚོམ་མེད་པ༌དང༌། སྔར་ལས་ཀྱང་སྙིང་སྟོབས་བསྐྱེད་ནས་དཀོན་མཆོག་གི་བཀའ་སྒྲོག་པ་ལ་འཇིགས་པ་ཅི་ཡང་མེད༌དོ།།
PHI 1:15 མི་ལ་ལས་སྐྱབས་མགོན་མཱ་ཤི་ཀའི་ཆོས་སྒྲོག་པ་ནི་ཕྲག་དོག་དང་འགྲན་སེམས་ཀྱི་རྐྱེན་ཡིན་པ༌དང༌། ལ་ལ་ནི་ཕན་འདོགས་པའི་སེམས་ཡིན༌ཏེ།
PHI 1:16 སྔ་མ་རྣམས་ཀྱིས་སེམས་དྲང་པོ་མ་བཅངས༌པར་སྒེར་སེམས་ངང་ནས་ཆོས་སྒྲོག༌ཅིང༌། བཙོན་དུ་བཅུག་པ་ང་རང་ལ་སྡུག་བསྔལ་ཇེ་ཆེར་གཏོང་འདོད༌པ་ཡིན། ཕྱི་མ་རྣམས་ཀྱིས་བྱམས་པའི་ངང་ནས་ཆོས་སྒྲོག་ཅིང་ང་རང་ནི་འཕྲིན་བཟང་ལ་བདེན་དཔང་བྱེད་པའི་ཆེད་དུ་བསྐོས་པ་ཤེས་སོ།།
PHI 1:18 དེར་སྐྱོན་ཅི་ཡོད་དམ། སྔ་ཕྱིའི་བདེན་རྫུན་གང་ཡིན་ཡང་མཐར་ཐུག་སྐྱབས་མགོན་མཱ་ཤི་ཀའི་ཆོས་བསྒྲགས་པ་ཡིན༌པས། ང་རང་ད་ལྟ་དགའ་ཞིང་ཕྱིས་སུའང་དགའ་བར་འགྱུར།
PHI 1:19 ཅིའི་ཕྱིར་ཞེ་ན། དོན་འདི་ནི་ཁྱོད་ཅག་གི་གསོལ་འདེབས་དང་ཡེ་ཤུ་མཱ་ཤི་ཀའི་ཐུགས་ཉིད་ཀྱིས་རོགས་རམ་མཛད་པ་བརྒྱུད༌ནས། མཇུག་མཐར་ང་རང་ཐར་བར་འགྱུར་བ་བདག་གིས་ཤེས་པས༌སོ།།
PHI 1:20 བདག་གིས་ཡིད་སྨོན་དང་རེ་འདུན་ཆེན་པོ་བཅངས་པ༌ལྟར། བདག་ལ་ངོ་གནོང་དགོས་པའི་དོན་གཅིག་ཀྱང་མེད༌དེ། བདག་ལ་ཤི་གསོན་གང་འདྲ་བྱུང་ནའང་སྤོབས་པ་ཆེན་པོ་བཅངས༌ཏེ། སྔར་བཞིན་ད་ལྟ་ཡང་ངའི་ལུས་སྟེང་ནས་སྐྱབས་མགོན་མཱ་ཤི་ཀའི་གཟི་བརྗིད་མངོན་པར༌འགྱུར་རོ།།
PHI 1:21 ཅིའི་ཕྱིར་ཞེ་ན། ང་རང་གསོན་པོར་འཚོ་བ་ནི་སྐྱབས་མགོན་མཱ་ཤི་ཀའི་ཆེད་དུ་ཡིན༌ལ། ང་རང་འཆི་བར་གྱུར་ནའང་བདག་ལ་ཕན་ཐོགས་ཡོད་པའི་ཕྱིར༌ཡིན།
PHI 1:22 འོན༌ཀྱང༌། ངའི་ལུས་པོ་གསོན་པོར་འཚོ༌ཞིང༌། བདག་གིས་འབད་པའི་ལས་ལ་འབྲས་བུ་བྱུང༌ནའང༌། ངས་གང་ཞིག་གདམ་རྒྱུ་མི་ཤེས།
PHI 1:23 ད་ནི་ང་རང་ཅི་བྱེད་འདི་བྱེད་མེད་པར་གྱུར༌ཅིང༌། འཇིག་རྟེན་དང་ཁ་བྲལ་ནས་སྐྱབས་མགོན་མཱ་ཤི་ཀ་དང་མཉམ་དུ་གནས་པ་ནི་དོན་ཀུན་གྱི་མཆོག་ཡིན་པས། ངས་དེ་ལྟར་བྱ་འདོད༌ནའང༌།
PHI 1:24 ཁྱོད་རྣམས་ཀྱི་ཆེད་དུ་བདག་གི་ལུས་པོ་གསོན་པོར་འཚོ་བ་ནི་དེ་བས་ཀྱང་གལ༌ཆེའོ།།
PHI 1:25 བདག་ལ་འདི་ལྟ་བུའི་ཡིད་ཆེས་ཟབ་མོ་ཡོད༌པས། ཁྱོད་ཅག་གི་དད་པ་ཇེ་བརྟན་དང་དགའ་སྤྲོའང་ཇེ་ཆེར་འགྱུར་བའི༌ཕྱིར། བདག་ནི་སྔར་བཞིན་འཇིག་རྟེན་དུ་གསོན་པོར་འཚོ་ཞིང་ཁྱོད་ཅག་དང་མཉམ་དུ་སྡོད་པར་འགྱུར་བའང་ཤེས།
PHI 1:26 ང་རང་སླར་ཡང་ཁྱོད་ཅག་གི་གམ་དུ་སླེབ་པར་འགྱུར་བའི་རྐྱེན༌གྱིས། ཁྱོད་ཅག་གིས་མཱ་ཤི་ཀ་ཡེ་ཤུའི་ནང་དུ་བསྔགས་པའི་དགའ་སྤྲོ་ནི་སྔར་ལས་ཀྱང་ཇེ་ཆེར་འགྱུར༌རོ།།
PHI 1:27 ཁྱོད་ཅག་གི་སྤྱོད་ལམ་ནི་སྐྱབས་མགོན་མཱ་ཤི་ཀའི་འཕྲིན་བཟང་དང་མཐུན་པར༌གྱིས། དེ་ནི་ང་རང་ཁྱོད་ཅག་གི་གམ་དུ་ཡོང༌བའམ། ཡང་ན་ཁྱོད་ཅག་གི་གམ་དུ་མེད་པ་གང་ཡིན་ཡང་ཁྱོད་ཅག་གི་གནས་ཚུལ་ཐོས༌ཤིང༌། ཁྱོད་ཅག་ལ་དམིགས་ཡུལ་གཅིག་མཚུངས་ཡོད་པ་དང་བརྟན་པོར་གནས་པར་བྱས༌ཏེ། བདག་ཅག་གིས་འཕྲིན་བཟང་གི་དད་པའི་ཆེད༌དུ། བློ་སེམས་རྩེ་གཅིག་གིས་ཧུར་བརྩོན་བྱེད་བཞིན་པའང་བདག་གིས་ཤེས་པར་འགྱུར་བའི་ཕྱིར༌ཡིན།
PHI 1:28 དོན་གང་ལ་ཕྲད་ནའང་དགྲ་བོའི་འཇིགས་སྐུལ་ལ་མི་སྐྲག་པར༌གྱིས། དེ་ནི་དགྲ་བོ་རྣམས་འཇིག་ཅིང་ཁྱོད་རྣམས་ལ་ཐར་པ་ཐོབ་པའི་རྟགས་ཡིན༌ལ། དེ་ནི་དཀོན་མཆོག་ནས་བྱུང་བ་ལགས་སོ།།
PHI 1:29 ཅིའི་ཕྱིར་ཞེ་ན། ཁྱོད་རྣམས་ཀྱིས་སྐྱབས་མགོན་མཱ་ཤི་ཀར་དད་པ་བྱེད་པ་ལས༌གཞན། ཁོང་གི་ཆེད་དུ་ཁྱོད་རྣམས་ལ་སྡུག་བསྔལ་མྱོང་བའི་ཐུགས་རྗེ་ཡང་གནང་བ༌དང༌།
PHI 1:30 ཁྱོད་ཅག་ལ་འབྱུང་བའི་འཁྲུག་རྩོད་ནི་ཁྱོད་ཅག་གིས་བདག་ལ་བྱུང་བའི་དོན་རྣམས་སྔོན་ཆད་མཐོང་ཞིང་ད་ལྟ་ཐོས་པ་དང་གཅིག་མཚུངས་ཡིན༌ནོ།།
PHI 2:1 དེའི་ཕྱིར། སྐྱབས་མགོན་མཱ་ཤི་ཀའི་ནང་དུ་སྐུལ་མ་གང་ཞིག༌དང༌། བྱམས་པའི་སེམས་གསོ་གང༌ཞིག དམ་པའི་ཐུགས་ཉིད་ཀྱི་འབྲེལ་འདྲིས་གང༌ཞིག བྱམས་དང་སྙིང་རྗེ་གང་ཞིག་ཡོད་པ་ཡིན་ན།
PHI 2:2 ཁྱོད་རྣམས་ཀྱིས་བསམ་པ་གཅིག༌དང༌། བརྩེ་སེམས༌གཅིག དྲན་ཚུལ༌གཅིག བསམ་འདུན་གཅིག་ཡོད་པ་བཅས་བྱས་ནས་ངའི་དགའ་སྤྲོ་རྫོགས་པར་བྱ་འོས་སོ།།
PHI 2:3 སྒེར་སེམས་དང་སྙིང་པོ་མེད་པའི་གཟི་བརྗིད་ལ་འདོད་རྔམ་མི་བཅང་བར། ཁེངས་སྐྱུང་གི་བསམ་པ་བཅངས་ནས་རང་ལས་མི་གཞན་མཆོག་ཏུ་འཛིན་པར༌གྱིས།
PHI 2:4 མི་སུ་ཞིག་ཡིན་ཡང་རང་དོན་ཁོ་ན་མི་སེམས་པར་གཞན་དོན་ཡང་བསམ་དགོས་པ་ཡིན།
PHI 2:5 ཁྱོད་ཅག་གི་བསམ་པ་ནི་མཱ་ཤི་ཀ་ཡེ་ཤུའི་ཐུགས་དགོངས་བཞིན་ཡིན་དགོས་པ་འདི༌ལྟ་སྟེ།
PHI 2:6 དེ་ཡང་ཁོང་ཉིད་དཀོན་མཆོག་ཇི་བཞིན༌དུ།། ཐོག་མ་ཉིད་ནས་རང་བཞིན་མཚུངས་ན༌ཡང༌།། དཀོན་མཆོག་ཉིད་དང་མཉམ་པའི་གོ་འཕང༌དེར།། འཕྲོག་ཅིང་རྩོད་པའི་འགྲན་སེམས་ཡེ་ནས༌མེད།།
PHI 2:7 རང་གི་གཟི་བརྗིད་དོར་ནས་ཁེངས་སྐྱུང༌གིས།། རང་ཉིད་ཞབས་ཕྱི་པ་ཡི་རྣམ་པ༌བཞིན།། འཇིག་རྟེན་ཕལ་བའི་མི་ཡི་གཟུགས་པོར༌གྱུར།།
PHI 2:8 ཕལ་བའི་རྣམ་འགྱུར་བཟུང་ཞིང་དམན་ཚུལ༌གྱིས།། དཀོན་མཆོག་ཉིད་ཀྱི་བཀའ་ལུང་ཇི་བཞིན༌དུ།། རྒྱ་གྲམ་ཤིང་གི་རྩེ་ནས་གྲོངས་པར༌མཛད།།
PHI 2:9 དེའི་ཕྱིར་དཀོན་མཆོག་ཉིད་ཀྱིས་ཁོང་ཉིད༌ནི།། ཀུན་ལས་མཐོ་བའི་གནས་སུ་དྲངས་པ༌དང༌།། ཀུན་ལས་འཕགས་པའི་མཚན་ཡང་གནང་བར༌གྱུར།།
PHI 2:10 དེ་ནི་ས་སྟེང་ས་འོག་ས་བླ་ཀུན༎ སྐྱབས་མགོན་ཡེ་ཤུའི་མཚན་ལ་བཀུར་བའི༌ཕྱིར།། པུས་མོ་ས་ལ་བཙུགས་ནས་ཕྱག་འཚལ༌ཞིང་།།
PHI 2:11 ཡབ་ཆེན་དཀོན་མཆོག་ཉིད་ལ་བསྟོད་པའི༌ཕྱིར།། ཀུན་གྱི་ངག་ལས་ཡེ་ཤུ་མཱ་ཤི༌ཀར།། གཙོ་བོ་ལགས་ཞེས་སྨྲ་ཞིང་ཁས་ལེན༌བརྗོད།། ཅེས་པ་བཞིན༌ནོ།།
PHI 2:12 དེ་བས་ན། བདག་གི་སྙིང་ཉེ་བའི་སྤུན་ཟླ༌རྣམས། ཁྱོད་ཅག་གིས་རྒྱུན་དུ་བདག་གི་གཏམ་ལ་མཉན་པ་ཡིན༌ན། ང་རང་ཁྱོད་ཅག་གི་གམ་དུ་ཡོད༌པའམ། ཡང་ན་ད་ལྟ་ཁྱོད་ཅག་གི་གམ་དུ་མེད་པའི་དུས་སུའང་ལྷག་ཏུ་བདག་གི་གཏམ་ལ་ཉན་པ༌བཞིན། ཁྱོད་ཅག་གིས་སྐྲག་སྐྲག་འདར་འདར་ངང་ནས་རང་ལ་ཐར་པ་ཐོབ་ཟིན་པའི་དོན་དེ་དང་མཐུན་པར་བསྒྲུབ་དགོས་སོ།།
PHI 2:13 རྒྱུ་མཚན་ནི་ཁྱོད་ཅག་གིས་ལས་གང་ཞིག་དྲན་ཞིང་སྒྲུབ་པར་བྱེད་པ་ནི་དཀོན་མཆོག་གི་ཐུགས་དགོངས་བཞིན་དུ་ཡིན་པའི་ཕྱིར། དཀོན་མཆོག་གིས་ཁྱོད་རྣམས་ཀྱི་སེམས་ནང་དུ་འཕྲིན་ལས་མཛད༌པས་སོ༎
PHI 2:14 ཁྱོད་ཅག་གིས་འཁང་རའི་གཏམ་དང་རྩོད་གླེང་ཅི་ཡང་མེད་པར་ལས་ཐམས་ཅད་བསྒྲུབ་པར༌གྱིས།
PHI 2:15 ཅིའི་ཕྱིར་ཞེ་ན། ཁྱོད་རྣམས་ལ་སྐྱོན་བརྗོད་རྒྱུ་ཅི་ཡང་མེད་པ་དང་གཞུང་དྲང་ཟོལ་མེད་ཡིན༌པ། དཀར་ནག་གོ་ལྡོག་གི་དུས་རབས༌འདི་ལ། ཁྱོད་ཅག་ནི་སྐྱོན་གྱི་དྲི་མས་མ་གོས་པའི་དཀོན་མཆོག་གི་བུ་ཕྲུག་ཡིན་པའི་ཕྱིར༌རོ།། ཁྱོད་རྣམས་དུས་འདིར་མངོན་པ་ནི་འཇིག་རྟེན་ཀུན་ལ་འོད་ཟེར་འཕྲོས་པ་དང་མཚུངས་ཏེ།
PHI 2:16 ཁྱོད་ཅག་གིས་ཚེ་སྲོག་གི་བཀའ་དམ་པོར་ཟུངས་ཤིག་དང་། དེ་ནི་སྐྱབས་མགོན་མཱ་ཤི་ཀའི་ཉིན༌ལ། བདག་གི་ངལ་བ་འབྲས་མེད་དུ་མ་གྱུར་བར་བསྔགས་བརྗོད་བྱེད་པའི་ཕྱིར་ཡིན།
PHI 2:17 ང་རང་ནི་ཁྱོད་ཅག་གི་དད་པའི་བསྙེན་བཀུར་དང་མཆོད་རྫས་སྟེང་དུ་སྐྱེམས་མཆོད་གཏོར་བ་བཞིན་དུ་གྱུར༌ནའང༌། བདག་ནི་དགའ་ཞིང་ཁྱོད་རྣམས་དང་མཉམ་དུ༌སྤྲོ་བ་ཡིན་ནོ།།
PHI 2:18 ཁྱོད་རྣམས་ཀྱང་དེ་བཞིན་དུ་དགའ་ཞིང་བདག་དང་མཉམ་དུ་སྤྲོ་བར་གྱུར༌ཅིག།
PHI 2:19 དེ་ཡང་བདག་གིས་ཁྱོད་རྣམས་ཀྱི་གནས་ཚུལ་ཤེས་ནས་རང་ལ་སེམས་གསོ་འཐོབ་ཐུབ་པའི་ཕྱིར། བདག་གིས་གཙོ་བོ་ཡེ་ཤུར་བརྟེན་ནས་ཐི་མོ་ཐེ་མྱུར་བ་མྱུར་བར་ཁྱོད་རྣམས་ཀྱི་གམ་དུ་མངག་པའི་རེ་བ་བཅངས༌སོ།།
PHI 2:20 རྒྱུ་མཚན་ནི་ཁྱོད་རྣམས་ཀྱི་དོན་དུ་དངོས་གནས་སེམས་ཁྲལ་བྱེད་མཁན་ནི་བདག་དང་བློ་སེམས་མཐུན་པ་གཞན་མེད་པས༌སོ།།
PHI 2:21 མི་གཞན་རྣམས་ཀྱིས་རང་དོན་ཁོ་ན་ལས་མཱ་ཤི་ཀ་ཡེ་ཤུའི་དོན་དེ་མི་བསམས་མོད།
PHI 2:22 འོན༌ཀྱང༌། ཐི་མོ་ཐེ་ནི་བུས་ཕ་ལ་བསྙེན་བཀུར་བྱེད་པ༌བཞིན། ཁོས་ཀྱང་བདག་དང་མཉམ་དུ་འཕྲིན་བཟང་དར་སྤེལ་བྱས་མྱོང༌བས། ཁོས་ཚོད་བགམ་ཐེག་ཐུབ་པ་ཁྱོད་རྣམས་ཀྱིས་ཀྱང་ཤེས་པ་ཡིན།
PHI 2:23 དེའི༌ཕྱིར། བདག་གིས་རང་ལ་བྱུང་བའི་དོན་དེ་ཅི་ལྟ་བུ་ཞིག་ཏུ་འགྱུར་ངེས་པ་ཤེས་མ་ཐག ཁོ་རང་མྱུར་དུ་མངག་པར་རེ་བ་བྱེད༌ཅིང༌།
PHI 2:24 ང་རང་ཡང་གཙོ་བོ་ལ་བརྟེན་ནས་མྱུར་བ་མྱུར་བར་ཡོང་ཐུབ་པར་ཡིད་ཆེས་སོ།།
PHI 2:25 འོན༌ཀྱང༌། ད་ལྟ་བདག་གིས་ངེས་པར་ཁྱོད་རྣམས་ཀྱི་གམ་དུ་ཨེ་པབ་རོ་དི་མངག་དགོས་པར་འདོད༌དེ། ཁོ་ནི་བདག་གི་སྤུན་ཟླ་དང་ཆོས༌གྲོགས། དཔུང་གྲོགས་བཅས་ཡིན༌ལ། ཁྱོད་རྣམས་ཀྱིས་བདག་ལ་མངགས་པའི་མི༌དང༌། བདག་གི་དགོས་མཁོ་སྐོང་མཁན་ཡང་ཡིན།
PHI 2:26 ཁོས་ཁྱོད་རྣམས་ཤིན་ཏུ་དྲན་ཞིང་ཁྱོད་རྣམས་ཀྱིས་ཁོ་རང་ལ་ན་ཚ་བྱུང་བའི་གནས་ཚུལ་ཐོས་པས་ཁོའི་སེམས་ཤིན་ཏུ༌སྐྱོ་བ་རེད།
PHI 2:27 ཁོ་རང་ལ་དངོས་གནས་ན་ཚ་བྱུང་སྟེ་འཆི་ལ་ཉེ་བ་ཙམ་བྱུང་ནའང་དཀོན་མཆོག་གིས་ཁོ་རང་ལ་ཐུགས་རྗེ་གནང༌ཞིང༌། བདག་ལ་སྡུག་བསྔལ་གྱི་སྟེང་དུ་སྡུག་བསྔལ་མི་འབྱུང་བའི་ཕྱིར་ང་ལའང་ཐུགས་རྗེ་གནང༌ངོ་།།
PHI 2:28 དེའི༌ཕྱིར། བདག་གིས་དེ་ལས་མགྱོགས་མྱུར་ངང་ཁོ་རང་ཁྱོད་རྣམས་ཀྱི་གམ་དུ་མངགས་པ་སྟེ། ཁྱོད་རྣམས་ཀྱིས་ཁོ་རང་སླར་ཡང་མཐོང་ན་དགའ་ཞིང་སྤྲོ་བ་དང༌། བདག་གི་སེམས་ཁུར་ཡང་ཇེ་ཆུང་དུ་འགྲོ་ངེས་པའི་ཕྱིར༌ཡིན།
PHI 2:29 ཡང་ཁྱོད་རྣམས་ཀྱིས་གཙོ་བོའི་ནང་དུ་དགའ་དགའ་སྤྲོ་སྤྲོའི་ངང་ནས་ཁོ་རང་ལ་སྣེ་ལེན་བྱེད་དགོས༌ཤིང༌། མི་འདི་ལྟ་བུ་ལ་བརྩི་བཀུར་ཡང་བྱ་འོས་སོ།།
PHI 2:30 ཅིའི་ཕྱིར་ཞེ་ན། ཁོས་སྐྱབས་མགོན་མཱ་ཤི་ཀའི་ཆོས་དོན་སྒྲུབ་པའི་ཆེད་དུ་འཆི་ལ་ཉེ་བ་ཙམ་བྱུང༌ནའང༌། ཁྱོད་རྣམས་ཀྱིས་བདག་ལ་རོགས་རམ་བྱེད་མ་ནུས་པ་ཐམས་ཅད་ཁོས་རང་སྲོག་ལ་མ་འཛེམས་པར་བདག་ལ་རོགས་རམ་བྱས༌སོ།།
PHI 3:1 བདག་གི་སྤུན་ཟླ༌རྣམས། མཐར་ཁྱོད་ཅག་གཙོ་བོ་ལ་བརྟེན་ནས་དགའ་ཞིང་སྤྲོ་བར༌གྱིས། བདག་གིས་ཡང་བསྐྱར་གཏམ་འདི་རྣམས་ཁྱོད་ཅག་ལ་འབྲི་བར་དཀའ་ངལ་མེད༌ལ། ཁྱོད་ཅག་ལ་མཚོན་ན་འོས་ཤིང་འཚམ་པ་ཡིན་ནོ།།
PHI 3:2 ཁྱོད་རྣམས་ཀྱིས་ཁྱི་སྤྱང་ངན་པ་ལྟ་བུ་དང་ལས་ངན་པ་བྱེད་མཁན། རང་སྣང་ཆེན་པོས་མཚན་སྐྱི་གཅོད་མཁན་དག་ལ་དོགས་ཟོན་བྱོས༌ཤིག
PHI 3:3 ཅིའི་ཕྱིར་ཞེ་ན། བདག་ཅག་ནི་དངོས་གནས་མཚན་སྐྱི་གཅོད་པ་དག་ཡིན༌ལ། དཀོན་མཆོག་གི་ཐུགས་ཉིད་ལ་བརྟེན་ནས་བསྙེན་བཀུར་བྱེད༌ཅིང༌། མཱ་ཤི་ཀ་ཡེ་ཤུར་བསྔགས་མཁན་ཡང་ཡིན་པ༌ལས། ཤ་ཁྲག་གི་ཕུང་བོར་བརྟེན་མཁན་མ་ཡིན་པའི་ཕྱིར༌རོ།།
PHI 3:4 དོན་དམ་དུ། ངས་ཀྱང་ཤ་ཁྲག་གི་ཕུང་བོར་བརྟེན་རུང་སྟེ། མི་གཞན་ཞིག་གིས་ཤ་ཁྲག་གི་ཕུང་བོར་བརྟེན་རུང་བར་འདོད༌ན། བདག་ནི་ལྷག་ཏུ་བརྟེན་རུང་ངོ་།།
PHI 3:5 སྐྱེས་ནས་ཉིན་བརྒྱད་པ་ལ་ངའི་མཚན་སྐྱི་བཅད་ཅིང་། ང་ནི་ཡེས་ར་ཨེལ་གྱི་མི་རིགས་དང༌པེན་ཡཱ་མེན་གྱི་ཚོ་པ་ལའང་གཏོགས༌པ་དང་། ཨིབ་རིའི་མི་རིགས་ནས་མཆེད་པའི་རིགས་རྒྱུད་དངོས་མ་ཡང་ཡིན། བཀའ་ཁྲིམས་ཀྱི་ཕྱོགས་ནས་བཤད༌ན། ང་ནི་ཕ་རུ་ཤི་པའི་གྲུབ་མཐའ་ལ་གཏོགས་པ་ཡིན།
PHI 3:6 རང་གི་སྤྲོ་སེམས་ཐད་ནས་བཤད༌ན། ང་རང་ནི་ཆོས་ཚོགས་ལ་གནོད་འཚེ་ཆེན་པོ་བྱེད་མཁན་ཡིན་ལ། བཀའ་ཁྲིམས་ཀྱི་བདེན་ལུགས་ལྟར་བཤད༌ན། བདག་ནི་སྐྱོན་གྱི་དྲི་མས་མ་གོས་པ་ཡིན་ནོ།།
PHI 3:7 འོན༌ཀྱང༌། སྔོན་ཆད་བདག་གིས་ཁེ་ཕན་དུ་བསམས་པ་ཐམས་ཅད་ད་ལྟ་སྐྱབས་མགོན་མཱ་ཤི་ཀའི་རྐྱེན་གྱིས་གྱོང་གུད་དུ་མཐོང༌ངོ་།།
PHI 3:8 དེར་མ་ཟད་ངས་རང་གི་གཙོ་བོ་མཱ་ཤི་ཀ་ཡེ་ཤུ་ཁོང་ཉིད་ངོ་ཤེས༌པ་ནི་མཆོག་ཏུ་གྱུར་བར་བསམས་པས་དོན་གཞན་ཐམས་ཅད་གྱོང་གུད་དུ་བརྩིས་པ་ཡིན་ལ། བདག་ལ་སྐྱབས་མགོན་མཱ་ཤི་ཀ་འཐོབ་པའི་ཕྱིར། ངས་ཁོང་གི་ཆེད་དུ་དོན་གཞན་ཐམས་ཅད་སྤངས་ཤིང་སྙིགས་མར་བརྩིས་པ་དང་།
PHI 3:9 ང་རང་ཁོང་གི་ནང་དུ་གནས་པ་དང་། རང་ཉིད་ལའང་སྐྱབས་མགོན་མཱ་ཤི་ཀར་དད་པ་ནས་ཡོང་བའི་དྲང་བདེན་དེ་འཐོབ་པར་འགྱུར་ཞིང་། དྲང་བདེན་དེ་ནི་བཀའ་ཁྲིམས་ནས་བྱུང་བ་མ་ཡིན༌པར། དཀོན་མཆོག་ལས་བྱུང་ཞིང་དད་པའི་སྒོ་ནས་འཐོབ་པ་ཡིན་ལ།
PHI 3:10 དེ་ནི་ངས་སྐྱབས་མགོན་མཱ་ཤི་ཀ་ཁོང་ཉིད་ངོ་ཤེས་པ་དང་། ཁོང་ཉིད་སླར་གསོན་པའི་ནུས་མཐུ་ཆེན་པོའང་རྟོགས་ཤིང༌། ཁོང་གི་སྡུག་བསྔལ་ཡང་མཉམ་དུ་འཁུར་ཐུབ་པ་དང༌། ཁོང་ཉིད་སྐུ་གྲོངས་པ་མིག་དཔེར་བཟུང༌སྟེ།
PHI 3:11 ང་རང་ཡང་འཆི་བ་ལས་སླར་གསོན་པར་འགྱུར་བའི་ཕྱིར་རོ།།
PHI 3:12 བདག་ལ་དོན་དེ་དག་ཐོབ་ཟིན་པ་དང་ཕུལ་ཏུ་བྱུང་བ་ཡིན་ཞེས་པ་མིན༌ཏེ། མཱ་ཤི་ཀ་ཡེ་ཤུས་བདག་ལ་བསྩལ་པའི་དགོངས་དོན་དེར་སྙེག༌ཅིང༌། དོན་དེ་བསྒྲུབ་པའི་ཕྱིར་ངས་ཀྱང་བརྩོན་པ་བྱེད་དོ།།
PHI 3:13 སྤུན་ཟླ༌རྣམས། ངས་རང་ལ་དོན་དེ་ཐོབ་ཟིན་ཞེས་པ་མིན༌ཏེ། བདག་གིས་དོན་གཅིག་ཁོ་ན་སྒྲུབ་པ་ནི་འདས་པ་བསྐྱུར་ཞིང་མདུན་ལ་བརྩོན༌པ་ཡིན།
PHI 3:14 དེ་ནི་དཀོན་མཆོག་གིས་མཱ་ཤི་ཀ་ཡེ་ཤུའི་ནང༌ནས། ཁོང་གིས་ང་རང་ནམ་མཁའི་བྱ་དགའ་ལེན་པར་ཞལ་སྐུལ་གནང་བ་བཞིན་བདག་ཀྱང་དམིགས་འབེན་དེའི་ཕྱོགས་སུ་རྒྱུག་པ་ཡིན་ནོ།།
PHI 3:15 དེའི༌ཕྱིར། བདག་ཅག་གི་ཁྲོད་ནས་བསམ་ཤེས་རྣམས་ཀྱིས་དེ་ལྟ་བུའི་བསམ་པ་རྟག་ཏུ་བཅང་དགོས༌ཤིང༌། དོན་འདི་དང་བསམ་ཚུལ་མི་མཚུངས་པ་ཡོད༌ནའང༌། དཀོན་མཆོག་གིས་ཁྱོད་རྣམས་ལ་གསལ་པོར་སྟོན་པར་འགྱུར།
PHI 3:16 འོན༌ཀྱང༌། བདག་ཅག་ཚད་ག་འདྲ་ཞིག་ལ་སླེབས་ན་ཚད་དེ་བཞིན་དུ་བསྒྲུབ་དགོས༌སོ།།
PHI 3:17 སྤུན་ཟླ༌རྣམས། ཁྱོད་རྣམས་ཀྱིས་མཉམ་དུ་ང་རང་མིག་དཔེར་བཟུང༌ཞིང༌། ངེད་རྣམས་མིག་དཔེར་འཛིན་མཁན་དེ་རྣམས་ལའང་མཉམ་འཇོག་བྱ་འོས།
PHI 3:18 ཅིའི་ཕྱིར་ཞེ་ན། མི་མང་པོའི་སྤྱོད་སྟངས་ནི་སྐྱབས་མགོན་མཱ་ཤི་ཀའི་ཤིང་རྒྱ་གྲམ་གྱི་དགྲ་བོ་ཡིན་པའི་ཕྱིར༌རོ།། བདག་གིས་དོན་འདི་ཁྱོད་རྣམས་ལ་ཐེངས་མང་པོར་སྨྲས་མྱོང༌ལ། ད་ལྟ་ཡང་མིག་ལས་མཆི་མ་དང་བཅས་ཏེ་སྨྲས༌པ་ཡིན།
PHI 3:19 མི་དེ་རྣམས་ཀྱི་མཇུག་འབྲས་ནི་རང་ཉིད་འཇིག་པར་འགྱུར་བ༌དང༌། དེ་རྣམས་ཀྱི་དཀོན་མཆོག་ནི་རང་གི་ལྟོ་བ་ཁོ་ན་ཡིན། དེ་རྣམས་ཀྱིས་རང་གི་ངོ་ཚ་ནི་གཟི་བརྗིད་དུ་བརྩི་ཞིང་འཇིག་རྟེན་གྱི་ལས་ཁོ་ན་བསམས་མོད།
PHI 3:20 འོན༌ཀྱང༌། བདག་ཅག་ནི་ནམ་མཁའི་ཞིང་ཁམས་ཀྱི་འབངས་མི་ཡིན༌ལ། ཡང་སྐྱབས་མགོན་ཏེ་གཙོ་བོ་ཡེ་ཤུ་མཱ་ཤི་ཀ་ཕེབས་ཡོང་བར་རེ་བ་ཆེན་པོས་སྒུག༌པ་ཡིན།
PHI 3:21 ཁོང་གིས་འཇིག་རྟེན་གྱི་དངོས་པོ་ཐམས་ཅད་རང་ཉིད་ཀྱི་དབང་འོག་ཏུ་བསྡུ་ནུས་པའི་མཐུ་རྩལ་ཆེན་པོར་བརྟེན༌ནས། བདག་ཅག་གི་ལུས་པོ་ཐ་མལ་བ་འདིའི་རྣམ་པ་བསྒྱུར༌ཏེ། ཁོང་རང་ཉིད་ཀྱི་གཟི་བརྗིད་ལྡན་པའི་སྐུ་ལུས་དང་མཚུངས་པར་མཛད་ངེས༌སོ།།
PHI 4:1 དེ་ལྟར་ཡིན་པས། བདག་གི་སྙིང་ནས་བརྩེ་ཞིང་རྟག་ཏུ་དྲན་པའི་སྤུན་ཟླ༌རྣམས། ཁྱོད་ཅག་ནི་བདག་གི་དགའ་སྤྲོ་དང་གཙུག་རྒྱན་ཡིན། བདག་གི་སྙིང་ནས་བརྩེ་བ༌ལགས། ཁྱོད་རྣམས་ནི་གཙོ་བོ་ལ་བརྟེན་ནས་བརྟན་པོར་གནས་འོས་སོ།།
PHI 4:2 བདག་གིས་ཨོ་དི་ཡཱ་དང་སིན་ཏི་ཀེ་གཉིས༌ལ། གཙོ་བོའི་ནང་དུ་བློ་སེམས་མཐུན་དགོས་པར་སྐུལ་མ་གནང༌བ་ཡིན།
PHI 4:3 ངས་བློ་སེམས་དཀར་བའི་ཆོས་གྲོགས་ཁྱོད་ཀྱིས་ཀྱང་སྐྱེས་མ་འདི་གཉིས་ལ་རོགས་རམ་བྱེད་པར་བསྐུལ། རྒྱུ་མཚན་ནི་བདག་གིས་འཕྲིན་བཟང་སྤེལ་བའི་དུས༌སུ། དེ་གཉིས་ཀྱིས་བདག་དང་མཉམ་དུ་དཀའ་སྡུག་མྱངས་པ་དང་། ཡང་ཀཱ་ལེ་མེན་དང་ཆོས་གྲོགས་གཞན་རྣམས་མཉམ་དུའང་དཀའ་སྡུག་མྱངས་པས། ཚེ་སྲོག་གི་གླེགས་བམ་ནང་དུ་མི་དེ་རྣམས་ཀྱི་མིང་ཡང་བཀོད་ཡོད༌དོ།།
PHI 4:4 ཁྱོད་རྣམས་གཙོ་བོ་ལ་བརྟེན་ནས་རྟག་ཏུ་དགའ་ཞིང་སྤྲོ་བར༌གྱིས། ངས་ཡང་བསྐྱར་ཁྱོད་རྣམས་ལ་དགའ་ཞིང་སྤྲོ་བར་གྱིས་ཞེས་སྨྲས༌པའོ།།
PHI 4:5 ཁྱོད་རྣམས་ཀྱི་ཁེངས་སྐྱུང་གི་སེམས་དེ་མི་ཀུན་ལ་ཤེས་སུ་འཇུག་དགོས། གཙོ་བོ༌ཉེ་བར་བཞུགས་སོ།།
PHI 4:6 དོན་གང་ལའང་སེམས་ཁྲལ་མི་བྱ༌བར། དོན་ཐམས་ཅད་ཀྱི་ཆེད་དུ་གསོལ་བ་འདེབས་པ༌དང༌། སྨོན་ལམ་ཞུ༌བ། དྲིན་ལན་བརྗོད་པ་བརྒྱུད་ནས་ཁྱོད་ཅག་གི་དགོས་མཁོ་གང་ཞིག་དཀོན་མཆོག་ལ་ཞུས་དང༌།
PHI 4:7 མི་ཡི་བློ་ཡུལ་དུ་མི་ཤོང་བའི་དཀོན་མཆོག་གི་ཞི་བདེ་དེས། མཱ་ཤི་ཀ་ཡེ་ཤུའི་ནང་དུ་ཁྱོད་རྣམས་ཀྱི་སེམས་དང་བསམ་པ་བསྲུང་ངེས༌སོ།།
PHI 4:8 སྤུན་ཟླ༌རྣམས། མཐར་ཁྱོད་རྣམས་ཀྱིས་བདེན་པ༌དང༌། གུས་པར་འོས༌པ། དྲང༌བདེན། གཙང་མར་གྱུར༌པ། གཅེས་པར་འོས༌པ། སྙན་གྲགས་རྒྱས༌པ། གཤིས་སྤྱོད་ཕུལ་དུ་བྱུང༌བ། བསྟོད་པར་འོས་པ་བཅས་པའི་དོན་གང་ཡིན་ཡང་བསམ་བློ་གཏོང་དགོས་སོ།།
PHI 4:9 ཁྱོད་རྣམས་ཀྱིས་བདག་ལས་གང་ཞིག་བསླབས་པ་དང་ཐོབ༌པ། གང་ཞིག་མཐོང་བ་དང་ཐོས་པ་ཐམས་ཅད་ལག་ལེན་དུ་འདེབས་པར༌གྱིས་དང་། ཞི་བདེ་གནང་མཁན་དཀོན་མཆོག་ནི་ཁྱོད་རྣམས་དང་མཉམ་དུ་བཞུགས་ངེས༌སོ།།
PHI 4:10 ཁྱོད་རྣམས་ཀྱིས་ད་ལྟའང་བདག་གི་དོན་དུ་སེམས་ཁྲལ་བྱེད་བཞིན༌པས། ང་རང་གཙོ་བོ་ལ་བརྟེན་ནས་སེམས་སུ་དགའ་སྤྲོ་ཚད་མེད་སྐྱེས་སོ།། ཁྱོད་རྣམས་ཀྱིས་སྔར་ནས་བདག་ལ་སེམས་ཁྲལ་བྱས་ཀྱང་གོ་སྐབས་མ་བྱུང༌།
PHI 4:11 བདག་ལ་དགོས་མཁོ་གང་ཞིག་ཡོད་པའི་རྐྱེན་གྱིས་གཏམ་འདི་སྨྲས་པ་མིན༌ཏེ། བདག་ནི་གནས་ཚུལ་ཅི་འདྲའི་འོག་ཏུའང་རང་བློ་ཚིམ་པར་གོམས་ཡོད་ལ།
PHI 4:12 བདག་གིས་འབྱོར་བ་མེད་པའི་འཚོ་བ་དང་ལོངས་སྤྱོད་ཕུན་སུམ་ཚོགས་པའི་འཚོ་བ་ཅི་ལྟར་རོལ་དགོས་པ་ཤེས་ཏེ། རང་གི་ལྟོ་བ་འགྲངས་པའམ་ལྟོགས༌པ། རྒྱུ་ནོར་འཛོམས་པའམ་ཕོངས་པ་བཅས་དོན་གང་ཞིག་བྱུང༌ཡང༌། བདག་ནི་གོམས་པར་གྱུར་ཡོད།
PHI 4:13 ཅིའི་ཕྱིར་ཞེ་ན། བདག་གིས་རང་ལ་ནུས་མཐུ་གནང་མཁན་སྐྱབས་མགོན་ཡེ་ཤུར་བརྟེན་ནས་དོན་ཐམས་ཅད་བསྒྲུབ་ནུས་པའི་ཕྱིར༌རོ།།
PHI 4:14 འོན༌ཀྱང༌། ཁྱོད་རྣམས་ཀྱིས་བདག་དང་ལྷན་དུ་དཀའ་སྡུག་མྱོང་ཐུབ་པ་ནི་དོན་ལེགས་པོ་ཞིག་ཡིན་ནོ།།
PHI 4:15 ཕི་ལིབ་པི་པ༌རྣམས། བདག་གིས་ཐོག་མར་འཕྲིན་བཟང་བསྒྲགས་པའི་དུས༌དེར། མ་ཀེ་དོན་ཡཱ་ཡུལ་དང་ཁ་བྲལ་བའི་དུས་སུ། ཁྱོད་ཅག་གི་ཆོས་ཚོགས་ལས༌གཞན། ཆོས་ཚོགས་གང་གིས་ཀྱང་བདག་ལ་འབུལ་བ་མ་གནང་བ་ནི་ཁྱོད་རྣམས་ཀྱིས་ཤེས་སོ།།
PHI 4:16 ང་རང་ཐེ་སཱ་ལོ་ནེ་ཀེར་ཡོད་པའི་དུས༌སུའང༌། ཁྱོད་རྣམས་ཀྱིས་ཐེངས་འགར་མི་མངགས་ཏེ་ངའི་དགོས་མཁོ་བཞིན་དུ་འབུལ་བ་གནང་མྱོང༌།
PHI 4:17 ད༌ལྟ་བདག་གིས་འབུལ་བར་དམིགས་པ་མ་ཡིན་པར། ཁྱོད་རྣམས་ཀྱི་ལས་བཟང་པོའི་འབྲས་བུ་རིམ་བཞིན་ཇེ་མང་དུ་འགྱུར༌ཞིང༌། ཁྱོད་ཅག་གི་རྩིས་ཐོའི་སྟེང་དུ་འགོད་རྒྱུ་ཡོད་པར་དམིགས་པའི་ཕྱིར༌རོ།།
PHI 4:18 འོན༌ཀྱང༌། བདག་ལ་ཐམས་ཅད་འཛོམས་ཤིང་ལྷག་མའང་ཡོད་དེ་རང་བློའང་ཚིམས༌པ་ཡིན། བདག་གིས་ཨེ་པབ་རོ་དི་ཡིས་བསྐྱལ་ཡོང་བའི་ཁྱོད་ཅག་གི་འབུལ་བ་བླངས༌ཤིང༌། དེ་ནི་དཀོན་མཆོག་ལ་དྲི་ཞིམ་གྱི་འབུལ་བ་དང་ཐུགས་དགྱེས་པའི་མཆོད་པ་ཕུལ་བ་དང་མཚུངས་སོ།།
PHI 4:19 བདག་གི་དཀོན་མཆོག་གིས་ཁོང་ཉིད་ཀྱི་ཕུན་སུམ་ཚོགས་པའི་གཟི་བརྗིད་ཇི་བཞིན༌དུ། མཱ་ཤི་ཀ་ཡེ་ཤུའི་ནང་དུ་ཁྱོད་ཅག་གི་དགོས་མཁོ་ཐམས་ཅད་བསྐང་ངེས༌ཡིན།
PHI 4:20 བདག་ཅག་གི་ཡབ་དཀོན་མཆོག་ལ་ཇི་སྲིད་བར་དུ་བསྟོད་བསྔགས་བརྗོད་པར༌ཤོག ཨ༌མེན།
PHI 4:21 ཁྱོད་རྣམས་ཀྱིས་མཱ་ཤི་ཀ་ཡེ་ཤུའི་ནང་གི་དད་ལྡན་དམ་པ་ཐམས་ཅད་ལའང་འཚམས་འདྲི་ཞུ་བར་བྱའོ།། བདག་གི་གམ་དུ་ཡོད་པའི་སྤུན་ཟླ་རྣམས་ཀྱིས་ཀྱང་ཁྱོད་རྣམས་ལ་འཚམས་འདྲི༌ཞུའོ།།
PHI 4:22 འདིར་ཡོད་པའི་དད་ལྡན་དམ་པ་ཐམས་ཅད་ཀྱིས་ཀྱང་ཁྱོད་རྣམས་ལ་འཚམས་འདྲི༌ཞུའོ།། ལྷག་པར་སེ་བཟིར་གྱི་ཕོ་བྲང་ནང་དུ་ཡོད་པ་རྣམས་ཀྱིས་ཀྱང་ཆེད་དུ་ཁྱོད་ཅག་ལ་འཚམས་འདྲི༌ཞུའོ།།
PHI 4:23 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་གི་སེམས་སུ་གནས་པར༌སྨོན།། །།
COL 1:1 དེ་ཡང་ཕོལ་ལོལ་བདག་ནི་དཀོན་མཆོག་གི་ཐུགས་དགོངས་བཞིན་མཱ་ཤི་ཀ་ཡེ་ཤུའི་སྐུ་ཚབ་པ་ཞིག་ཡིན་ནོ།། བདག་དང་བདག་ཅག་གི་སྤུན་ཟླ་ཐི་མོ་ཐེ་གཉིས༌ཀྱིས།
COL 1:2 ཀོ་ལོ་སཱ་རུ་གནས་པ་དང་སྐྱབས་མགོན་མཱ་ཤི་ཀའི་ནང་གི་བློ་སེམས་དཀར་བའི་སྤུན་ཟླ་དམ་པ་རྣམས་ལ་འཕྲིན་ཡིག་སྤྲིངས་པ༌འདི་ལྟ་སྟེ། བདག་ཅག་གི་ཡབ་དཀོན་མཆོག་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
COL 1:3 ངེད་ཅག་གིས་ཁྱོད་རྣམས་ཀྱི་ཆེད་དུ་གསོལ་བ་འདེབས་པའི་དུས་སུ། རྟག་ཏུ་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བཀའ་དྲིན་ཞུས༌པའོ།།
COL 1:4 རྒྱུ་མཚན་ནི་ཁྱོད་རྣམས་མཱ་ཤི་ཀ་ཡེ་ཤུར་དད་པ་ཡོད་པ༌དང༌། དད་ལྡན་དམ་པ་ཐམས་ཅད་ལ་བརྩེ་སེམས་ཡོད་པའང་ངེད་ཅག་གིས་ཐོས་པའི་ཕྱིར༌རོ།།
COL 1:5 འདི་ནི་ནམ་མཁའི་ཞིང་ཁམས་སུ་ཁྱོད་ཅག་གི་ཆེད་དུ་བཞག་ཡོད་པའི་རེ་འདུན་དེའི་ཕྱིར་ཡིན༌ལ། རེ་འདུན་དེ་ནི་སྔར་ཁྱོད་རྣམས་ཀྱིས་འཕྲིན་བཟང་སྟེ་བདེན་པའི་བཀའ་ལས་ཐོས་པ་དེ་ཡིན།
COL 1:6 འཕྲིན་བཟང་དེ་ནི་ཁྱོད་ཅག་གི་གནས་སུ་ཁྱབ་ཅིང་ཁྱོད་རྣམས་ཀྱིས་ཀྱང་ཐོས༌ཏེ། དངོས་གནས་དཀོན་མཆོག་གི་ཐུགས་རྗེ་དེ་ཉིད་རྟོགས་པའི་ཉིན་མོ་ནས༌བཟུང༌། ཁྱོད་རྣམས་ཀྱི་ཁྲོད་དུ་འཕྲིན་བཟང་གི་འབྲས་བུ་མང་དུ་སྨིན་པ༌ལྟར། འཕྲིན་བཟང་དེ་ཉིད་འཇིག་རྟེན་ཀུན་ལ་བསྒྲགས་ཤིང་དེའི་འབྲས་བུའང་སྨིན་བཞིན་འདུག
COL 1:7 ཁྱོད་རྣམས་ཀྱིས་འཕྲིན་བཟང་དེ་ནི་ངེད་ཅག་གི་སྙིང་ནས་བརྩེ་བའི་ཞབས་ཏོག་པ་ཨེ་པབ་རཱའི་ངག་ལས་བསླབས༌ཤིང༌། ཁོ་རང་ནི་ངེད་ཅག་གི་ཕྱིར་དུ་སྐྱབས་མགོན་མཱ་ཤི་ཀར་བློ་སེམས་དཀར་བའི་ཞབས་ཕྱི་པ་ཞིག་ཡིན༌ལ།
COL 1:8 ཁོས་དམ་པའི་ཐུགས་ཉིད་ལས་བྱུང་བའི་ཁྱོད་ཅག་གི་བྱམས་པ་དེ་ངེད་ཅག་ལ་སྨྲས༌སོ།།
COL 1:9 དེའི༌ཕྱིར། ངེད་རྣམས་ཀྱིས་གོང་གི་དོན་དེ་ཐོས་པའི་ཉིན་མོ་ནས༌བཟུང༌། རྟག་ཏུ་ཁྱོད་རྣམས་ཀྱི་དོན་དུ་འདི་ལྟར་གསོལ་བ་བཏབ་པ༌སྟེ། ཁྱོད་རྣམས་ཀྱིས་ཐུགས་ཉིད་ཀྱི་ཤེས་རབ་དང་ཤེས་རྟོགས་ཐམས་ཅད་ལ་བརྟེན༌ནས། དཀོན་མཆོག་གི་ཐུགས་དགོངས་གསལ་པོར་རྟོགས་པར༌སྨོན།
COL 1:10 དེ་ནི་ཁྱོད་རྣམས་ཀྱི་སྤྱོད་ལམ་ནི་གཙོ་བོ་དང་མཐུན་འོས་ཤིང༌། དོན་ཀུན་ནས་ཁོང་གི་ཐུགས་དགྱེས་པར་བྱེད་པ༌དང༌། ལས་བཟང་པོ་ཐམས་ཅད་ནས་འབྲས་བུ་བསྐྱེད་ཅིང་རིམ་བཞིན་དཀོན་མཆོག་གི་ངོ་བོ་ལྷག་ཏུ་རྟོགས་པའི་ཕྱིར༌རོ།།
COL 1:11 ཡང་དཀོན་མཆོག་གི་གཟི་བརྗིད་ལྡན་པའི་ནུས་མཐུར་བརྟེན༌ནས། ཁྱོད་རྣམས་དགའ་ཞིང་སྤྲོ་བའི་ངང་དོན་ཀུན་ལ་བཟོད་བསྲན་ཡོད་པའི༌ཕྱིར། ཁྱོད་ཅག་གི་སེམས་སུ་ནུས་མཐུ་སྣ་ཚོགས་སྔར་ལས་རྒྱས་པར༌སྨོན།
COL 1:12 ཡང་ཡབ་ཀྱིས་བདག་ཅག་ལ་འོད་ཟེར་གྱི་ཁྲོད་ནས་དད་ལྡན་དམ་པ་རྣམས་དང་ལྷན་དུ་བགོ་སྐལ་འཐོབ་ཐུབ་པར་མཛད༌པས། དཀོན་མཆོག་ལ་བཀའ་དྲིན་ཞུ་བ་ཡིན་ནོ།།
COL 1:13 དཀོན་མཆོག་གིས་བདག་ཅག་མུན་པའི་དབང་ལས་ཐར་བར་མཛད༌དེ། ཁོང་གི་གཅེས་པའི་སྲས་ཀྱི་རྒྱལ་སྲིད་དུ་བསྐྱལ་བར་མཛད༌ཅིང༌།
COL 1:14 ཁོང་ཉིད་ཀྱི་གཅེས་པའི་སྲས་དེའི་ནང་དུ་བདག་ཅག་བླུས་ཤིང་སྡིག་པ་བསལ་བའོ།།
COL 1:15 གཅེས་པའི་སྲས་ནི་མིག་གིས་མཐོང་མི་ནུས་པའི་དཀོན་མཆོག་གི་སྣང་བརྙན་ཡིན༌ལ། འཇིག་རྟེན་དུ་བཀོད་པའི་དངོས་པོ་ཐམས་ཅད་ཀྱི་སྔོན་ལ་འཁྲུངས་ཡོད་པའོ།།
COL 1:16 རྒྱུ་མཚན་ནི་འཇིག་རྟེན་གྱི་དངོས་པོ་ཐམས་ཅད་ཁོང་ལ་བརྟེན་ནས་བཀོད་པ་ཡིན༌ཏེ། གནམ་ས་གང་ཁྱབ༌དང༌། མིག་གིས་མཐོང་ཐུབ༌མིན། རྒྱལ་ཁྲི་ཐོབ་མཁན། དབང་སྒྱུར༌མཁན། སྲིད་འཛིན༌མཁན། དབང་འཛིན་མཁན་བཅས་ཐམས་ཅད་ཁོང་ཉིད་བརྒྱུད་ནས་བཟོས་ཤིང་ཁོང་གི་ཆེད་དུ་བཀོད་པ་ལགས་སོ།།
COL 1:17 ཁོང་ཉིད་ནི་དངོས་པོ་ཐམས་ཅད་མ་བཀོད་པའི་སྔོན་ལ་བཞུགས༌ཤིང༌། དངོས་པོ་ཐམས་ཅད་ཀྱང་ཁོང་ལ་བརྟེན་ནས་གནས༌པ་ཡིན།
COL 1:18 ཡང་ཁོང་ནི་རང་ཉིད་ཀྱི་སྐུ་ལུས་ཡིན་པའི་ཆོས་ཚོགས་ཀྱི་དབུ་དང་། ཡང་ཁོང་ནི་ཐོག་མ་ཉིད་དང་། གཤིན་པོའི་ཁྲོད་ནས་སྔོན་དུ་འཁྲུངས་པ་ཡིན་ནོ༎ དེ་ནི་ཁོང་ཉིད་རྣམ་པ་ཀུན་ཏུ་མཆོག་གྱུར་ལགས་པའི་ཕྱིར་རོ།།
COL 1:19 ཅིའི་ཕྱིར་ཞེ་ན། ཡབ་ཐུགས་དགྱེས་པ་ནི་འདི་ལྟ༌སྟེ། ཁོང་གིས་ཕུན་སུམ་ཚོགས་པ་ཐམས་ཅད་སྐྱབས་མགོན་ཡེ་ཤུའི་ཐུགས་རྒྱུད་དུ་གནས་པར་མཛད་པ༌དང༌།
COL 1:20 སྐྱབས་མགོན་ཡེ་ཤུའི་སྐུ་ཁྲག་ཤིང་རྒྱ་གྲམ་གྱི་སྟེང་དུ་བཞུར་བ་ལ་བརྟེན་ནས་ཞི་བདེ་བསྐྲུན༌ཏེ། སྐྱབས་མགོན་ཡེ་ཤུ་བརྒྱུད་ནས་གནམ་ས་གང་ཁྱབ་ཏུ་ཡོད་པ་མཐའ་དག་ཁོང་དང་འདུམ་པར་མཛད་པའི་ཕྱིར༌རོ།།
COL 1:21 དེ་སྔར་ཁྱོད་ཅག་ནི་དཀོན་མཆོག་དང་གཏན་དུ་བྲལ་ཞིང༌། ལས་ངན་པ་བྱས་ཏེ་སེམས་གཏིང་ནས་ཁོང་ཉིད་དགྲ་རུ་བཟུང༌མོད།
COL 1:22 འོན་ཀྱང༌། ད་ལྟ་སྐྱབས་མགོན་ཡེ་ཤུའི་ཤ་ཁྲག་གི་སྐུ་ལུས་དང་ཁོང་ཉིད་སྐུ་གྲོངས་པ་བརྒྱུད་ནས། དཀོན་མཆོག་གིས་ཁྱོད་རྣམས་ཁོང་དང་བསྡུམས༌པའོ།། དེ་ནི་ཁྱོད་རྣམས་དམ་པ༌དང༌། སྐྱོན་གྱི་དྲི་མས་མ་གོས༌པ། སྐྱོན་བརྗོད་རྒྱུ་ཅི་ཡང་མེད་པར་ཁོང་གི་དྲུང་དུ་འདྲེན་པར་འགྱུར་བའི་ཕྱིར༌ཡིན།
COL 1:23 གལ་ཏེ། ཁྱོད་རྣམས་ཀྱིས་དད་པ་ལ་སྙིང་རུས་བསྐྱེད་པ་དང་རྩ་བ་སྲ་ཞིང་བརྟན་པ༌དང༌། ཐེ་ཚོམ་མེད་པར་བརྟན་ཅིང་བརླིང་བ༌སྟེ། སྔར་ཐོས་མྱོང་བའི་འཕྲིན་བཟང་ལ་བཅངས་པའི་རེ་བ་དང་ཁ་འབྲལ་བར་མ་གྱུར༌ན། ཁྱོད་རྣམས་ཁོང་གི་དྲུང་དུ་འདྲེན་པར་འགྱུར་རོ།། འཕྲིན་བཟང་འདི་ནི་གནམ་འོག་གི་མི་ཐམས་ཅད་ལའང་བསྒྲགས་པར་མ༌ཟད། ཕོལ་ལོལ་ང་རང་ཡང་འཕྲིན་བཟང་འདིའི་ཞབས་ཕྱི་པར་བསྐོས་པ་ཡིན༌ནོ།།
COL 1:24 ད་ལྟ་བདག་གིས་ཁྱོད་རྣམས་ཀྱི་ཆེད་དུ་དཀའ་སྡུག་མྱངས་ནའང་དགའ་སྣང་སྐྱེ་ཞིང༌། སྐྱབས་མགོན་མཱ་ཤི་ཀའི་སྐུ་ལུས་ཡིན་པའི་ཆོས་ཚོགས་ཀྱི་ཆེད༌དུ། ཁོང་གི་དཀའ་སྡུག་མི་འདང་བ་དེ་བདག་གི་ཤ་ཁྲག་གི་ཕུང་བོའི་སྟེང་ནས་རྫོགས་པར་བྱེད་དོ།།
COL 1:25 དཀོན་མཆོག་གི་བཀའ་ཡོངས་སུ་བསྒྲག་པའི༌ཕྱིར། དཀོན་མཆོག་གིས་ཁྱོད་རྣམས་ཀྱི་ཆེད་དུ་བདག་ལ་གནང་བའི་ལས་འགན་བཞིན་ང་རང་ནི་ཆོས་ཚོགས་ཀྱི་ཞབས་ཕྱི་པར་བསྐོས༌པ་ཡིན།
COL 1:26 བཀའ་དེ་ནི་བསྐལ་པ་ནས་བསྐལ་པ་དང༌། མི་རབས་ནས་མི་རབས་བར་དུ་སྦས་པའི་གསང་བ་ཡིན༌ཡང༌། ད་ལྟ་ཁོང་གི་དད་ལྡན་དམ་པ་རྣམས་ལ་མངོན་པར་མཛད།
COL 1:27 དཀོན་མཆོག་གིས་གསང་བ་དེ་ནི་ཕྱི་ཕྱོགས་པ་རྣམས་ཀྱི་ཁྲོད་དུ་ཅི་འདྲའི་ཕུན་སུམ་ཚོགས་པའི་གཟི་བརྗིད་ཅིག་ཡིན་པ་དད་ལྡན་དམ་པ་རྣམས་ལ་ཤེས་སུ་འཇུག་པར་དགོངས་པ༌དང༌། གསང་བ་དེ་ནི་སྐྱབས་མགོན་མཱ་ཤི་ཀ་ཁོང་ཉིད་ཁྱོད་རྣམས་ཀྱི་ནང་དུ་བཞུགས༌ཤིང༌། གཟི་བརྗིད་དང་ལྡན་པར་འགྱུར་བའི་རེ་བའང་ཡིན་ནོ།།
COL 1:28 སྐྱབས་མགོན་མཱ་ཤི་ཀའི་ནང་དུ་མི་རེ་རེ་ཕུལ་དུ་བྱུང་བ་ཡིན་པ་དཀོན་མཆོག་གི་དྲུང་དུ་འདྲེན་པའི༌ཕྱིར། ངེད་རྣམས་ཀྱིས་ཤེས་རབ་སྣ་ཚོགས་སྤྱད་ནས་མི་རེ་རེ་ལ་སྐུལ་སློང་དང་སློབ་སྟོན་གནང་སྟེ་སྐྱབས་མགོན་མཱ་ཤི་ཀ་སྒྲོག༌པ་དང་།
COL 1:29 དོན་འདིའི་ཆེད་དུ་བདག་གིས་ཀྱང་ངལ་དུབ་མྱོང་ཞིང་རང་གི་སེམས་སུ་བཞུགས་པའི་སྐྱབས་མགོན་ཡེ་ཤུའི་ནུས་མཐུ་ཆེན་པོར་བརྟེན་ཏེ། སྟོབས་ཤུགས་ཡོད་རྒུ་བཏོན་ནས་བརྩོན་པའོ།།
COL 2:1 བདག་གིས་ཁྱོད་རྣམས་ལ་ཤེས་སུ་འཇུག་འདོད་པ་ནི། ཁྱོད་ཅག་དང་ལའོ་དི་ཀེ་ཡཱ་རུ་གནས་པའི་མི་རྣམས༌དང༌། བདག་དང་དངོས་སུ་ངོ་ཕྲད་མ་མྱོང་བ་རྣམས་ཀྱི་དོན༌དུ། བདག་གིས་ཅི་ལྟར་སྟོབས་ཤུགས་འདོན་པ༌དེ་ཡིན།
COL 2:2 ཅིའི་ཕྱིར་ཞེ་ན། མི་དེ་རྣམས་ལ་སེམས་གསོ་ཐོབ༌ཅིང༌། བྱམས་པའི་དབང་གིས་ཕན་ཚུན་འབྲེལ་འདྲིས་བྱས༌ཏེ། ཤེས་རྟོགས་ཕུན་སུམ་ཚོགས་པའི་ཁྲོད་ནས་དད་སེམས་བརྟན་པོས་དཀོན་མཆོག་གི་གསང་བ་ནི་སྐྱབས་མགོན་མཱ་ཤི་ཀ་ཡིན་པ་ཤེས་ཐུབ་པར་འགྱུར་བའི་ཕྱིར༌རོ།།
COL 2:3 ཤེས་རབ་དང་ཤེས་བྱའི་གཏེར་ཁ་ཐམས་ཅད་ནི་སྐྱབས་མགོན་མཱ་ཤི་ཀའི་ནང་དུ་སྦས་ཡོད།
COL 2:4 བདག་གིས་འདི་ལྟར་སྨྲ་བ་ནི་མི་གཞན་གྱིས་ཁ་ཡག་ཚིག་གིས་ཁྱོད་རྣམས་འཁྲུལ་དུ་མི་འཇུག་པའི་ཕྱིར༌ཡིན།
COL 2:5 བདག་གི་ལུས་པོ་ནི་ཁྱོད་ཅག་དང་ཁ་བྲལ༌ནའང༌། སེམས་ནི་ཁྱོད་ཅག་དང་མཉམ་དུ་གནས། ཁྱོད་རྣམས་ནི་བག་ཡོད་ཚུལ་དང་ལྡན༌ཞིང༌། སྐྱབས་མགོན་མཱ་ཤི་ཀ་ལ་དད་པའི་སེམས་ཀྱང་བརྟན་པོ་ཡིན་པ་ཤེས་པས་བདག་ནི་དགའ་ཞིང་སྤྲོ་བར་གྱུར༌ཏོ།།
COL 2:6 དེའི༌ཕྱིར། ཁྱོད་རྣམས་ཀྱིས་གཙོ་བོ་མཱ་ཤི་ཀ་ཡེ་ཤུ་དང་དུ་བླངས༌པས། ཁོང་ལ་བསྟུན་ནས་སྤྱད་པ་སྤྱོད་དགོས༌ཤིང༌།
COL 2:7 ཁྱོད་ཅག་ལ་ཐོབ་པའི་བསླབ་བྱ་ལྟར། ཁྱོད་ཅག་ནི་ཁོང་གི་ནང་དུ་རྩ་བ་ཟབ་ཅིང་ཇེ་བརྟན་དུ་ཡོང་བ་དང༌། དད་སེམས་བརྟན་ཅིང་བརླིང༌བ། དྲིན་ཚོར་བའི་སེམས་ཀྱང་ལྷག་པར་འཕེལ་དགོས་སོ།།
COL 2:8 སུ་ཞིག་གིས་མཚན་ཉིད་རིག་པ་དང་རྫུན་གཏམ་སྟོང་བར་བརྟེན་ནས་སྐྱབས་མགོན་མཱ་ཤི་ཀ་དང་མི་མཐུན༌པར། མིའི་རིགས་ཀྱི་སྲོལ་རྒྱུན་དང་འཇིག་རྟེན་གྱི་ཤེས་ཡོན་ཕྲན་བུ་དག་ལ་བརྟེན༌ན། ཁྱོད་རྣམས་བསླུ་ཉེན་ཆེ་བས་གཟབ་པར༌གྱིས།
COL 2:9 ཅིའི་ཕྱིར་ཞེ་ན། དཀོན་མཆོག་གི་རང་བཞིན་ཕུན་སུམ་ཚོགས་པ་ཐམས་ཅད་ནི་གཟུགས་དང་ལྡན་པར་སྐྱབས་མགོན་མཱ་ཤི་ཀའི་ནང་དུ་བཞུགས་ཡོད་པ་དང་།
COL 2:10 སྐྱབས་མགོན་མཱ་ཤི་ཀའི་ནང་དུ་ཁྱོད་རྣམས་ཀྱང་ཕུན་སུམ་ཚོགས་པར་མཛད་ཡོད་ཅིང༌། ཁོང་ནི་འཇིག་རྟེན་གྱི་སྲིད་འཛིན་མཁན་དང་དབང་འཛིན་མཁན་ཐམས་ཅད་ཀྱི་དབུ་ལགས་སོ།།
COL 2:11 ཡང་ཁྱོད་ཅག་ནི་སྐྱབས་མགོན་མཱ་ཤི་ཀའི་ནང་དུ་མཚན་སྐྱི་གཅོད་པར་ཞུགས༌ཤིང༌། དེ་ནི་མི་ཡིས་ལག་པས་བྱས་པ་མ་ཡིན་པར། སྐྱབས་མགོན་མཱ་ཤི་ཀས་མཚན་སྐྱི་བཅད་པ་ཡིན་ཏེ། ཁྱོད་རྣམས་ལ་ཤ་གཟུགས་ཀྱི་འདོད་ཆགས་འདོར་དུ་བཅུག་པའོ།།
COL 2:12 དེ་སྔར་ཁྱོད་རྣམས་ཁྲུས་གསོལ་ལ་ཞུགས་ནས་ཁོང་དང་མཉམ་དུ་དུར་ལ་སྦས་ཤིང་ཁོང་ཉིད་གྲོངས་པ་ནས་སླར་གསོན་པར་མཛད་མཁན་དཀོན་མཆོག་གི་མཐུ་སྟོབས་ལ་ཡིད་ཆེས༌བྱས་པས། ཁྱོད་རྣམས་ཀྱང་སྐྱབས་མགོན་མཱ་ཤི་ཀ་དང་ལྷན་དུ་སླར་གསོན་པ་ཡིན་ནོ།།
COL 2:13 དེ་སྔར་ཁྱོད་རྣམས་ནི་སྡིག་པ་དང་མཚན་སྐྱི་མ་བཅད་པའི་ཤ་གཟུགས་ཀྱི་ཕུང་བོའི་ཁྲོད་དུ་ཤི་བའི་དུས་སུ། དཀོན་མཆོག་གིས་ཁྱོད་ཅག་གི་སྡིག་པ་ཐམས་ཅད་བསལ་ནས། ཁྱོད་ཅག་ནི་སྐྱབས་མགོན་མཱ་ཤི་ཀ་དང་ལྷན་དུ་སླར་གསོན༌པར་མཛད་པ་ཡིན་ནོ།།
COL 2:14 ཡང་ཁྲིམས་ཡིག་ནང་དུ་བྲིས་པའི་བདག་ཅག་ལ་སྐྱོན་བརྗོད་པ་དང་བདག་ཅག་ལ་གནོད་པའི་དཔང་ཡིག་རྣམས་བླངས༌ཏེ། ཤིང་རྒྱ་གྲམ་གྱི་སྟེང་དུ་བརྡབས་ནས་མེད་པར་མཛད།
COL 2:15 ཁོང་གིས་འཇིག་རྟེན་གྱི་སྲིད་འཛིན་མཁན་དང་དབང་འཛིན་མཁན་རྣམས་ལ་དབང་བསྒྱུར་བའི་དུས༌སུ། ཤིང་རྒྱ་གྲམ་གྱི་ནུས་མཐུ་ལ་བརྟེན༌ནས་དེ་དག་ལས་རྣམ་པར་རྒྱལ་བའི་དོན་ནི་མི་ཀུན་ལ་མངོན་པར་མཛད༌དོ།།
COL 2:16 དེའི༌ཕྱིར། བཟའ་བཏུང༌དང༌། དུས༌ཆེན། ཚེས་གཅིག ངལ་གསོ་བའི་ཉིན་མོ་བཅས་གང་ཐད༌ནས། མི་གཞན་སུས་ཀྱང་ཁྱོད་ཅག་ལ་ཁ་ཚོན་གཅོད་མི་རུང་ངོ༌།།
COL 2:17 དེ་དག་ནི་མ་འོངས་འབྱུང་འགྱུར་གྱི་དོན་རྣམས་ཀྱི་གྲིབ་གཟུགས་ཡིན༌ཡང༌། དོན་དམ་དུ་གཟུགས་པོ་ནི་སྐྱབས་མགོན་མཱ་ཤི་ཀ་ཡིན།
COL 2:18 མི་སུ་ཞིག་ལའང་བསམ་བཞིན་ཁེངས་སྐྱུང་གི་ཟོལ་ལ་བརྟེན་པ་དང་ཕོ་ཉར་བསྙེན་བཀུར་བྱེད་པ་བརྒྱུད༌ནས། ཁྱོད་ཅག་གི་བྱ་དགའ་འཕྲོག་ཏུ་འཇུག་མི་རུང༌། མི་དེ་རྣམས་ཀྱིས་མཐོང་སྣང་ཙམ་ལ་བརྟེན་ནས། རང་མོས་གང་འདོད་ཀྱིས་དོན་མེད་ཀྱི་ང་རྒྱལ་ཆེ་རུ་འཛིན༌པ་ལས།
COL 2:19 དབུ་དེ་ཉིད་ལ་མི་བརྟེན༌པ་རེད། དོན་དམ་དུ་སྐུ་ལུས་ཡོངས་ཀྱིས་ཁོང་ལ་བརྟེན༌ནས། རྒྱུས་པ་དང་རུས་ཚིགས་དག་གིས་འབྲེལ་མཐུད་སྒྲིག་སྦྱོར་བྱེད༌ཅིང༌། དཀོན་མཆོག་ལ་བརྟེན་ནས་རིམ་བཞིན་ཇེ་ཆེར་འགྱུར་བའོ།།
COL 2:20 ཁྱོད་ཅག་ནི་སྐྱབས་མགོན་མཱ་ཤི་ཀ་དང་ལྷན་དུ་གྲོངས་ཟིན་ཅིང༌། འཇིག་རྟེན་གྱི་ཤེས་ཡོན་ཕྲན་བུ་དག་ལའང་ཁ་བྲལ་བས་ན། ད་དུང་འཇིག་རྟེན་དུ་འཚོ་བ་དང་མཚུངས༌པར།
COL 2:21 འཁྱེར་མི་རུང་བ༌དང༌། བཟའ་མི་རུང༌བ། རེག་མི་རུང་བ་སོགས་ཀྱི་སྲུང་བྱ་དང་བསྟུན་པའི་རྒྱུ་མཚན་ཅི།
COL 2:22 སྲུང་བྱ་དེ་དག་ནི་མི་ཡིས་བཀའ་བསྒོས་པ་དང་སློབ་སྟོན་བྱས་པ་ལྟར་ཡིན༌ལ། དངོས་པོ་དེ་དག་ཀྱང་བཀོལ་སྤྱོད་བྱེད་བཞིན་པའི་སྐབས་སུ་ཐམས་ཅད་འཇིག་པར་འགྱུར་རོ།།
COL 2:23 སྲུང་བྱ་དེ་དག་གིས་མི་རྣམས་ལ་ཤེས་རབ་ལྡན་པའི་མིང་ཙམ༌དང༌། རང་འདོད་ཀྱིས་བསྙེན་བཀུར་བྱེད༌པ། ཁེངས་སྐྱུང་གི་ཟོལ་མངོན་པ། ལུས་ལ་དཀའ་ཐུབ་སྤྱོད་པ་བཅས་བྱེད་དུ་འཇུག༌པ་ཡིན། དོན་དམ་དུ་ཤ་གཟུགས་ཀྱི་འདོད་ཆགས་སྣ་ཚོགས་འགོག་པའི་ཐད་ལ་སྲུང་བྱ་དེ་དག་གིས་ཕན་ཅི་ཡང་མི་ཐོགས༌སོ།།
COL 3:1 དེའི་ཕྱིར་ཁྱོད་རྣམས་དངོས་གནས་སྐྱབས་མགོན་མཱ་ཤི་ཀ་དང་ལྷན་དུ་སླར་གསོན་པ་ཡིན༌ན། ནམ་མཁའི་ཞིང་ཁམས་ཀྱི་དོན་རྣམས་ལ་མུ་མཐུད་དུ་བརྩོན་པར༌གྱིས། སྐྱབས་མགོན་མཱ་ཤི་ཀ་ནི་གནས་དེ་རུ་དཀོན་མཆོག་གི་གཡས་ཕྱོགས་སུ་བཞུགས༌སོ།།
COL 3:2 ཁྱོད་ཅག་གིས་འཇིག་རྟེན་གྱི་དོན་རྣམས་ལ་བསམ་བློ་མི་གཏོང༌བར། ནམ་མཁའི་ཞིང་ཁམས་ཀྱི་དོན་རྣམས་ལ་བསམ་བློ་གཏོང་དགོས།
COL 3:3 རྒྱུ་མཚན་ནི་ཁྱོད་རྣམས་ཤི་ཟིན་པ་དང་རང་གི་ཚེ་སྲོག་སྐྱབས་མགོན་མཱ་ཤི་ཀ་དང་ལྷན་དུ་དཀོན་མཆོག་གི་ནང་དུ་སྦས་ཡོད་པས༌སོ།།
COL 3:4 སྐྱབས་མགོན་མཱ་ཤི་ཀ་ནི་བདག་ཅག་གི་ཚེ་སྲོག་ཡིན༌ལ། ཁོང་ཉིད་ཕྱིར་མངོན་པའི་དུས༌སུ། ཁྱོད་རྣམས་ཀྱང་ཁོང་དང་ལྷན་ཅིག་གཟི་བརྗིད་ནང་དུ་མངོན་པར་འགྱུར༌རོ།།
COL 3:5 དེའི༌ཕྱིར། ཁྱོད་རྣམས་ཀྱི་འཇིག་རྟེན་ཏུ་གཏོགས་པའི་ཡན་ལག་སྟེ། ལོག་གཡེམ༌དང༌། མི་ཚངས༌སྤྱོད། འདོད༌ཆགས། འདོད་ངན། བརྣབ་སེམས་སོགས་རྩ་བ་ནས་དོར༌ཅིག བརྣབ་སེམས་ནི་སྐུ་འདྲར་བརྟེན་པ་དང་མཚུངས་པའོ།།
COL 3:6 དོན་དེ་དག་གི་དབང༌གིས། དཀོན་མཆོག་གི་བཀའ་ལ་མི་ཉན་པ་རྣམས་ལ་ཁོང་ཉིད་ཀྱི་ཐུགས་ཁྲོ་འཕོག་པར་འགྱུར༌ངེས་ཡིན།
COL 3:7 དེ་སྔར་ཁྱོད་རྣམས་ཀྱང་དོན་དེ་དག་གི་ནང་དུ་འཚོ་བའི་སྐབས་སུ་དེ་ལྟར་བྱས་མྱོང༌མོད།
COL 3:8 འོན་ཀྱང་ད་ལྟ་ཁྱོད་རྣམས་ཀྱིས་དོན་དེ་ཐམས་ཅད༌དང༌། གཞན་ཡང༌། ཞེ་སྡང༌དང༌། ཁོང༌ཁྲོ། གདུག༌རྩུབ། འཕྱ༌སྨོད། ངག་ནས་ཚིག་ངན་སྨྲ་བ་བཅས་རིང་དུ་དོར༌ཅིག
COL 3:9 ཕན་ཚུན་ལ་རྫུན་སྨྲ་བར་མི༌བྱའོ།། རྒྱུ་མཚན་ནི་ཁྱོད་རྣམས་ཀྱིས་སྔར་གྱི་གཤིས་ཀ་རྙིང་པ་དང་དེའི་སྤྱོད་ངན་དོར་ཟིན་པས།
COL 3:10 གཤིས་ཀ་གསར་པ་ནི་གྱོན་དགོས་ཤིང་། དེ་ནི་རང་ཉིད་སྐྲུན་མཁན་གྱི་སྣང་བརྙན་ལྟར། ཤེས་བྱའི་ཐད་ནས་རིམ་བཞིན་བསྐྱར་གསོ་མཛད་པ་ཡིན།
COL 3:11 དོན་དེའི་ཐད་ནས་གྷི་རིག་པ་དང་ཡ་ཧུ་དཱ༌པ། མཚན་སྐྱི་བཅད་པའམ་མ་བཅད༌པ། མཐའ་འཁོབ་པ། སི་ཁེའུ་ཐེ་ཟི་པ། གཡོག་པོ། རང་དབང་ཅན་བཅས་ལ་ཁྱད་པར་ཅི་ཡང་མེད༌ཅིང༌། སྐྱབས་མགོན་མཱ་ཤི་ཀ་ནི་ཐམས་ཅད་ཀྱི་སྙིང་པོ་ཡིན་པ་དང་ཐམས་ཅད་ཀྱི་ནང་དུ་བཞུགས་སོ།།
COL 3:12 དེའི༌ཕྱིར། ཁྱོད་རྣམས་ནི་དཀོན་མཆོག་གིས་བདམས་པའི་མི༌སྟེ། དམ་པ་དང་གཅེས་པར་འཛིན་པ་རྣམས་ཡིན་པས། སྙིང་རྗེ༌དང༌། བྱམས༌བརྩེ། ཁེངས༌སྐྱུང༌། ཞི༌དུལ། བཟོད་པ་བཅས་ཀྱི་སེམས་པ་གྱོན་དགོས༌ཤིང༌།
COL 3:13 ཁྱོད་རྣམས་ལས་སུ་དང་སུ་ཞིག་གི་བར་དུ་འགལ་བ་ཡོད༌ན། གང་ལྟར་ཡང་ཕན་ཚུན་ལ་བཟོད་པ་དང་གུ་ཡངས་བྱེད་དགོས༌ཏེ། གཙོ་བོས་ཇི་ལྟར་ཁྱོད་རྣམས་ལ་དགོངས་དག་གནང་བ༌བཞིན། ཁྱོད་རྣམས་ཀྱིས་ཀྱང་དེ་ལྟར་མི་གཞན་ལ་གུ་ཡངས་གཏོང་དགོས།
COL 3:14 དོན་དེ་ཐམས་ཅད་ལས༌གཞན། ཁྱོད་རྣམས་ཀྱིས་བྱམས་པ་གྱོན་དགོས༌ཏེ། བྱམས་པ་ནི་ཕན་ཚུན་མཐུན་པོ་ཡོང་བར་ཕུལ་དུ་བྱུང་བའི་སྦྲེལ་ཐག་ཡིན་ནོ།།
COL 3:15 ཡང་ཁྱོད་རྣམས་ཀྱིས་སྐྱབས་མགོན་མཱ་ཤི་ཀའི་ཞི་བདེ་ནི་ཁྱོད་ཅག་གི་སེམས་ནང་དུ་དབང་སྒྱུར་མཁན་དུ་བྱ་དགོས། ཁྱོད་རྣམས་ཀྱང་དོན་དེའི་ཆེད་དུ་སྐུ་ལུས་གཅིག་གི་ནང་དུ་ཞལ་འབོད་གནང༌བ་ཡིན་ལ། ཁྱོད་ཅག་ལ་དྲིན་གཟོ་བའི་སེམས་དགོས་སོ།།
COL 3:16 ཡང་ཁྱོད་རྣམས་ཀྱིས་སྐྱབས་མགོན་མཱ་ཤི་ཀའི་བཀའ་ནི་ཁྱོད་ཅག་གི་སེམས་ནང་དུ་གཏམས་པར་བཅུག༌སྟེ། ཤེས་རབ་སྣ་ཚོགས་ལ་བརྟེན་ནས་གསུང་མགུར༌དང༌། བསྟོད༌དབྱངས། མགུར་གླུ་བཅས་ཀྱི་ཚིག་དོན་བཀོལ་ནས་ཕན་ཚུན་ལ་སློབ་སྟོན་དང་སྐུལ་མ་གནང་བ་དང༌། བཀའ་དྲིན་དྲན་བཞིན་སེམས་གཏིང་ནས་དཀོན་མཆོག་ལ་བསྟོད་བསྔགས་བརྗོད་འོས་པ་ཡིན།
COL 3:17 གཞན༌ཡང༌། གཏམ་སྨྲ་བའམ་དོན་གང་ཞིག་སྒྲུབ་ཀྱང་གཙོ་བོ་ཡེ་ཤུའི་མཚན་ལ་བརྟེན་ནས་བསྒྲུབ་དགོས་པ༌དང༌། ཁོང་ཉིད་བརྒྱུད་ནས་ཡབ་དཀོན་མཆོག་ལ་བཀའ་དྲིན་ཞུ་དགོས༌སོ།།
COL 3:18 ཁྱོད་ཅག་ཆུང་མ་རྣམས་ཀྱིས་རང་རང་གི་ཁྱོ་ག་དང་བསྟུན་པར༌གྱིས། འདི་ནི་གཙོ་བོ་ལ་གཏོགས་པའི་མི་རྣམས་ལ་མཚོན་ན་འོས་ཤིང་འཚམ་པ་ཡིན།
COL 3:19 ཁྱོད་ཅག་ཁྱོ་ག་རྣམས་ཀྱིས་རང་རང་གི་ཆུང་མར་བྱམས་ཤིང་གཅེས་དགོས་པ༌ལས། ཁོ་མོ་རྣམས་སྡུག་ལ་སྦྱར་མི་རུང༌ངོ་།།
COL 3:20 ཁྱོད་ཅག་བུ་ཕྲུག་རྣམས་ཀྱིས་སྒོ་ཀུན་ནས་ཕ་མའི་ངག་ལ་མཉན་དགོས༌ཏེ། འདི་ལྟར་བྱས་ན་གཙོ་བོ་ཐུགས་མཉེས་པའི་ཕྱིར༌ཡིན།
COL 3:21 ཁྱོད་ཅག་ཕ་ཡིན་པ་རྣམས་ཀྱིས་རང་གི་བུ་ཕྲུག་ལ་ཁོང་ཁྲོ་སློང་བར་མི་བྱ༌སྟེ། དེ་ལྟར་བྱས་ན་བུ་ཕྲུག་དག་གི་སེམས་ཕམ་པར་འགྱུར༌རོ།།
COL 3:22 ཁྱོད་ཅག་གཡོག་པོ་རྣམས་ཀྱིས་སྒོ་ཀུན་ནས་རང་གི་ལུས་ཕུང་གི་བདག་པོ་དེའི་ངག་ལ་མཉན་དགོས་པ༌དང༌། བདག་པོ་ལ་ངོ་སོ་བྱེད་པ་ལྟར་མིག་མདུན་ཁོ་ནར་ཁ་ལེན་ཚིག་བརྩི་མི་བྱེད༌པར། གཙོ་བོ་ལ་གུས་ཤིང་འཇིགས་པ་བཞིན༌དུ་ལྷག་བསམ་རྣམ་དག་གིས་བརྩི་བཀུར་བྱ་དགོས།
COL 3:23 ཁྱོད་རྣམས་ཀྱིས་དོན་གང་ཞིག་སྒྲུབ་ཀྱང་ལྷག་བསམ་རྣམ་དག་གིས་བསྒྲུབ་དགོས༌ཤིང༌། དེ་ནི་མི་གཞན་གྱི་ཆེད་དུ་མ་ཡིན་པར་གཙོ་བོའི་ཆེད་དུ་སྒྲུབ་པ་བཞིན་ཡིན་དགོས།
COL 3:24 ཅིའི་ཕྱིར་ཞེ་ན། གཙོ་བོ་ནས་བགོ་སྐལ་གྱི་བྱ་དགའ་ཁྱོད་ཅག་ལ་འཐོབ་ངེས་པ་ཁྱོད་རྣམས་ཀྱིས་ཀྱང་ཤེས་པའི་ཕྱིར༌ཡིན། ཁྱོད་རྣམས་ཀྱིས་བསྙེན་བཀུར་བྱེད་པ་ནི་གཙོ་བོ་མཱ་ཤི་ཀ་ལགས་སོ།།
COL 3:25 ངན་པ་བྱེད་མཁན་ལ་ངན་པ་བྱས་པའི་འབྲས་བུ་འཐོབ་པར་འགྱུར༌ཞིང༌། དཀོན་མཆོག་ལ་ཕྱོགས་རིས་ཅི་ཡང་མེད་དོ།།
COL 4:1 ཁྱོད་ཅག་བདག་པོ་རྣམས་ཀྱིས་རང་རང་གི་གཡོག་པོ་རྣམས་དྲང་གཞག་དང་འདྲ་མཉམ་གྱི་ངང་ནས་སྐྱོང་དགོས། ཅིའི་ཕྱིར་ཞེ་ན། ཁྱོད་ཅག་གིས་རང་རང་ལའང་ནམ་མཁའི་ཞིང་ཁམས་སུ་བདག་པོ་ཞིག་ཡོད་པ་ཤེས་པའི་ཕྱིར༌རོ།།
COL 4:2 ཁྱོད་རྣམས་ཀྱིས་གཟབ་གཟབ་ངང་བཀའ་དྲིན་དྲན་བཞིན་དཀོན་མཆོག་ལ་གསོལ་བ་འདེབས་པར་བརྩོན་པར་གྱིས།
COL 4:3 ངེད་རྣམས་ཀྱི་ཆེད་དུའང་གསོལ་བ་འདེབས་དགོས༌ཤིང༌། སྐྱབས་མགོན་མཱ་ཤི་ཀའི་གསང་བ་དེ་ཉིད་འཆད་པའི༌ཕྱིར། དཀོན་མཆོག་གིས་ངེད་ཅག་ལ་བཀའ་སྒྲོག་པའི་སྒོ་ཕྱེ་བར་གསོལ་བ་འདེབས་པར་གྱིས། དོན་དེའི་ཕྱིར་ང་རང་བཙོན་དུ་སྦྱར༌བའོ།།
COL 4:4 ཡང་བདག་གིས་བརྗོད་དགོས་པ་བཞིན་གསང་བ་འདི་གསལ་པོར་འཆད་ཐུབ་པའི་ཞུ་བ་ཕུལ༌ཞིག
COL 4:5 ཡང་ཁྱོད་རྣམས་ཀྱིས་ཆུ་ཚོད་དམ་འཛིན་དང་བློ་གྲོས་ལྡན་པའི་སྒོ་ནས་ཕྱི་ཕྱོགས་པ་རྣམས་ལ་འབྲེལ་འདྲིས་བྱེད་དགོས།
COL 4:6 ཁྱོད་ཅག་གི་ངག་གི་སྦྱོར་བ་ནི་སྙན་ཞིང་ལན་ཚྭ་བཏབ་པ་ལྟ་བུ་ཡིན་དགོས། དེ་ནས་མི་རེ་རེར་ཇི་ལྟར་ལན་འདེབས་དགོས་པ་ཤེས་པར་འགྱུར༌རོ།།
COL 4:7 སྙིང་ནས་བརྩེ་བའི་སྤུན་ཟླ་ཐི་ཀེ་ཀུ་ཡིས་བདག་གི་གནས་ཚུལ་ཐམས་ཅད་ཁྱོད་རྣམས་ལ་སྨྲ་བར་འགྱུར་རོ།། ཁོ་རང་ནི་བློ་སེམས་དཀར་བའི་ཞབས་ཕྱི་པ་ཞིག༌དང༌། བདག་དང་མཉམ་དུ་གཙོ་བོའི་ཞབས་ཏོག་པ་ཞིག་ཀྱང་ཡིན།
COL 4:8 ཁྱོད་རྣམས་ལ་ངེད་ཅག་གི་གནས་ཚུལ་ཤེས་སུ་འཇུག་པ་དང༌། ཁོས་ཁྱོད་ཅག་ལ་སེམས་གསོ་བྱེད་པའི༌ཕྱིར། བདག་གིས་ཁོ་རང་ཁྱོད་རྣམས་ཀྱི་གམ་དུ་ཆེད་མངགས་བྱས་པ་ཡིན།
COL 4:9 ཡང་སྙིང་ནས་བརྩེ་ཞིང་བློ་སེམས་དཀར་བའི་སྤུན་ཟླ་ཨོ་ནེ་སི་མུ་ཡང་ཐི་ཀེ་ཀུ་དང་མཉམ་དུ་མངགས༌ཤིང༌། ཁོ་རང་ཡང་ཁྱོད་ཅག་གི་ཡུལ་དེ་གའི་མི་ཡིན༌ཞིང༌། ཁོ་གཉིས་ཀྱིས་ཡུལ་འདི་གའི་གནས་ཚུལ་ཐམས་ཅད་ཁྱོད་རྣམས་ལ་སྨྲ་བར་འགྱུར༌རོ།།
COL 4:10 བདག་དང་མཉམ་དུ་ཡོད་པའི་བཙོན་གྲོགས་ཨ་རི་སྟར་ཀུ་དང༌། པཱར་ན་པཱའི་ཚ་བོ་མཱར་ཀུ་གཉིས་ཀྱིས་ཀྱང་ཁྱོད་རྣམས་ལ་འཚམས་འདྲི༌ཞུའོ།། མཱར་ཀུ་ཞེས་བྱ་བ་གླེང༌ན། འདིའི་སྐོར་གྱི་བཀའ་ནི་སྔར་ནས་ཁྱོད་ཅག་ལ་ཐོབ༌ཅིང༌། མཱར་ཀུ་ཁོ་རང་ཁྱོད་ཅག་གི་ཡུལ་དེར་སླེབས༌ན། ཁྱོད་ཅག་གིས་ཁོ་རང་ལ་བསུ་བ་བྱེད་དགོས།
COL 4:11 མིང་གཞན་ལ་ཡུས་ཐོ་ཟེར་བའི་ཡེ་ཤུ་ཡིས་ཀྱང་ཁྱོད་ཅག་ལ་འཚམས་འདྲི༌ཞུའོ།། མཚན་སྐྱི་བཅད་པའི་དད་ལྡན་རྣམས་ཀྱི་ཁྲོད་ན་མི་འདི་གསུམ་པོ་ནི་དཀོན་མཆོག་གི་རྒྱལ་སྲིད་ཀྱི་དོན་དུ། བདག་དང་མཉམ་དུ་ཆོས་སྤེལ་མཁན་ཁོ་ན་ཡིན་ལ། བདག་ལ་སེམས་གསོ་བྱེད་མཁན་ཡང་ཡིན།
COL 4:12 ཁྱོད་ཅག་གི་ཡུལ་མི་སྟེ་མཱ་ཤི་ཀ་ཡེ་ཤུའི་ཞབས་ཕྱི་པ་ཨེ་པབ་རཱ་བྱ་བས་ཀྱང་ཁྱོད་རྣམས་ལ་འཚམས་འདྲི༌ཞུའོ།། ཁོས་རྟག་ཏུ་ཁྱོད་རྣམས་ཀྱི་ཕྱིར་ནན་ཏན་གྱིས་འདི་ལྟར་གསོལ་བ་བཏབ་པ་སྟེ། དཀོན་མཆོག་གི་ཐུགས་དགོངས་ཡོངས་སུ་ཁྱོད་རྣམས་ཆ་ཚང་བ་དང༌། བློ་གདེང་དང་བཅས་ཚུགས་ཐུབ་པ་དེའོ།།
COL 4:13 ཨེ་པབ་རཱ་ཡིས་ཁྱོད་ཅག༌དང༌། ཡང་ལའོ་དི་ཀེ་ཡཱ་དང་ཧི་རཱ་པོ་ལི་རུ་གནས་པའི་སྤུན་ཟླ་རྣམས་ཀྱི་དོན་དུ་འབད་པ་ཆེན་པོ་བྱེད་ཅིང་། བདག་གིས་ཀྱང་དོན་འདིར་བདེན་དཔང་བྱེད་ནུས༌པ་ཡིན།
COL 4:14 སྙིང་ནས་བརྩེ་བའི་སྨན་པ་ལོ་ཀུ་དང་ཏི་མཱ་གཉིས་ཀྱིས་ཀྱང་ཁྱོད་ཅག་ལ་འཚམས་འདྲི༌ཞུའོ།།
COL 4:15 ལའོ་དི་ཀེ་ཡཱ་རུ་ཡོད་པའི་སྤུན་ཟླ་རྣམས༌དང༌། ནིམ་ཕཱ་དང་ཁོ་མོའི་ཁྱིམ་དུ་འདུས་པའི་ཆོས་ཚོགས་བཅས་ལའང་འཚམས་འདྲི་ཞུ་བར༌བྱའོ།།
COL 4:16 ཁྱོད་ཅག་གི་ཁྲོད་ནས་འཕྲིན་ཡིག་འདི་བཀླགས་ཚར༌རྗེས། ལའོ་དི་ཀེ་ཡཱ་རུ་ཡོད་པའི་ཆོས་ཚོགས་ལ་སྤྲད་ནས་ཁོ་རྣམས་ལའང་ཀློག་ཏུ་འཇུག་དགོས༌ཤིང༌། ཁྱོད་རྣམས་ཀྱིས་ཀྱང་ལའོ་དི་ཀེ་ཡཱ་ནས་བསྐུར་ཡོང་བའི་འཕྲིན་ཡིག་བཀླག་དགོས།
COL 4:17 ཁྱོད་རྣམས་ཀྱིས་ཨར་ཀི་པུ་ལ། གཙོ་བོས་ཁྱོད་ལ་གནང་བའི་ལས་འགན་དེ་ནན་ཏན་གྱིས་བསྒྲུབ་དགོས་ཞེས་སྨྲ་བར༌མཛོད།
COL 4:18 ཕོལ་ལོལ་བདག་གིས་ཁྱོད་རྣམས་ལ་འཚམས་འདྲི་ཞུ་བ་འདི་ནི་དངོས་སུ་བྲིས་པ་ཡིན། ཁྱོད་རྣམས་ཀྱིས་ང་རང་བཙོན་དུ་ཡོད་པ་དྲན་པར༌གྱིས། མཇུག་མཐར་ཐུགས་རྗེ་ནི་རྟག་ཏུ་ཁྱོད་ཅག་དང་མཉམ་དུ་གནས་པར༌སྨོན།། །།
1TH 1:1 དེ་ཡང་ཕོལ་ལོལ་བདག་དང་སིལ་ཝ་ནཱ། ཐི་མོ་ཐེ་བཅས་ནས་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ནང་དུ་ཡོད་པའི་ཐེ་སཱ་ལོ་ནེ་ཀེ་པ་རྣམས་ཀྱི་ཆོས་ཚོགས་ལ་འཕྲིན་ཡིག་སྤྲིངས་པ་འདི་ལྟ༌སྟེ། ཐུགས་རྗེ་དང་ཞི་བདེ་ཁྱོད་རྣམས་ལ་གནང་བར༌སྨོན།
1TH 1:2 ངེད་ཅག་གིས་ཁྱོད་རྣམས་ཐམས་ཅད་ཀྱི་ཆེད༌དུ། རྟག་ཏུ་དཀོན་མཆོག་ལ་བཀའ་དྲིན་ཞུས༌ཤིང༌། གསོལ་བ་འདེབས་པའི་དུས་སུའང་ཁྱོད་རྣམས་གླེང་བ༌དང༌།
1TH 1:3 བདག་ཅག་གི་ཡབ་དཀོན་མཆོག་གི་དྲུང་དུ་ཁྱོད་རྣམས་ཀྱིས་དད་སེམས་ལ་བརྟེན་ནས་བྱས་པའི་ལས༌དང༌། བྱམས་པ་ལ་བརྟེན་ནས་མྱངས་པའི་ངལ་དུབ། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཁོང་ཉིད་ལ་རེ་སྨོན་བྱེད་པར་བརྟེན་ནས་བཅངས་པའི་བཟོད་བསྲན་བཅས་རྒྱུན་ཆད་མེད་པར་དྲན༌ཏོ།།
1TH 1:4 དཀོན་མཆོག་གིས་གཅེས་སུ་འཛིན་པའི་སྤུན་ཟླ༌རྣམས། ངེད་ཅག་གིས་ཁྱོད་རྣམས་ནི་ཁོང་གིས་བདམས་པ་ཡིན་པ་ཤེས་སོ།།
1TH 1:5 རྒྱུ་མཚན་ནི་དེ་སྔར་ངེད་རྣམས་ཀྱིས་ཁྱོད་ཅག་ལ་འཕྲིན་བཟང་བསྒྲགས་པ་ནི་གཏམ་ཁོ་ནར་རག་ལས་པ་མ་ཡིན༌པར། དབང་དང་དམ་པའི་ཐུགས༌ཉིད། དད་སེམས་ཆེན་པོ་བཅས་ལའང་རག་ལས་པའི་ཕྱིར༌རོ།། དེ་ནི་ངེད་རྣམས་ཀྱིས་ཁྱོད་ཅག་གི་དོན་དུ་ཅི་ལྟར་བྱས་པ་ཁྱོད་རྣམས་ཀྱིས་ཀྱང་ཤེས་གསལ་ལྟར་ཡིན་ནོ།།
1TH 1:6 གཞན༌ཡང༌། དཀའ་སྡུག་ཆེན་པོའི་ཁྲོད་དུ་ཁྱོད་རྣམས་ལ་དམ་པའི་ཐུགས་ཉིད་ཀྱིས་གནང་བའི་དགའ་སྤྲོ་ཐོབ་པ༌དང༌། འཕྲིན་བཟང་དང་དུ་བླངས་ནས་ངེད་ཅག་དང་གཙོ་བོ་ལ་ལད་མོ་བྱས༌ཤིང༌།
1TH 1:7 ཐ་ན་ཁྱོད་རྣམས་མ་ཀེ་དོན་ཡཱ་དང་ཨ་ཀ་ཡཱ་ཡུལ་གྱི་དད་ལྡན་ཐམས་ཅད་ཀྱི་མིག་དཔེ་རུ་གྱུར་པའོ།།
1TH 1:8 ཅིའི་ཕྱིར་ཞེ་ན། གཙོ་བོའི་བཀའ་ནི་ཁྱོད་ཅག་གི་ཁྲོད་ནས་མ་ཀེ་དོན་ཡཱ་དང་ཨ་ཀ་ཡཱ་ཡུལ་དུ་བསྒྲགས་པར་མ༌ཟད། ཁྱོད་རྣམས་ཀྱིས་དཀོན་མཆོག་ལ་དད་པ་བྱས་པའི་གཏམ་དེའང་ཡུལ་ཐམས་ཅད་ལ་ཁྱབ་འདུག་པས་ངེད་རྣམས་ཀྱིས་ཅི་ཡང་སྨྲ་མི་དགོས་པའི་ཕྱིར༌ཏེ།
1TH 1:9 ཁོ་རྣམས་ཀྱིས་ཀྱང་ཁྱོད་ཅག་གིས་ངེད་རྣམས་ལ་ཇི་ལྟར་བསུ་བ་བྱས་པ༌དང༌། ཁྱོད་ཅག་གིས་བདེན་ཞིང་གསོན་པོར་བཞུགས་པའི་དཀོན་མཆོག་ལ་ཞབས་ཕྱི་བསྒྲུབ་པའི་ཆེད༌དུ། ཇི་ལྟར་ལྷ་སྐུ་སྤངས་ནས་དཀོན་མཆོག་གི་ཕྱོགས་སུ་འཁོར་བ༌དང༌།
1TH 1:10 ཁྱོད་ཅག་གིས་ཀྱང་ཁོང་གི་སྲས་དེ་ཉིད་ནམ་མཁའི་ཞིང་ཁམས་ནས་འབྱོན་པར་སྒུག་པ་ཡིན་སྨྲས་པའི་ཕྱིར༌རོ།། དེ་ནི་དཀོན་མཆོག་གིས་རང་ཉིད་ཀྱི་སྲས་གྲོངས་པ་ནས་སླར་གསོན་པར་མཛད༌ཅིང༌། བདག་ཅག་མ་འོངས་པའི་ཐུགས་ཁྲོ་ལས་སྐྱོབ་པར་འགྱུར་བའི་སྐྱབས་མགོན་ཡེ་ཤུ་ཁོང་ཉིད་ཡིན༌ནོ།།
1TH 2:1 སྤུན་ཟླ༌རྣམས། ངེད་རྣམས་དེ་སྔར་ཁྱོད་ཅག་གི་གམ་དུ་ཕྱིན་པ་ནི་སྙིང་པོ་མེད་པ་ཞིག་མིན་པ་ཁྱོད་རྣམས་ཀྱིས་ཤེས་སོ།།
1TH 2:2 སྔོན་ཆད་ཕི་ལིབ་པི་རུ་ངེད་ཅག་ལ་གནོད་འཚེ་དང་བརྙས་བཅོས་ཐེབས་པའང་ཁྱོད་ཅག་གིས་ཤེས༌པ་ཡིན། འོན༌ཀྱང༌། ངེད་རྣམས་ཀྱིས་བདག་ཅག་གི་དཀོན་མཆོག་ལ་བརྟེན་ནས་སྙིང་སྟོབས་བསྐྱེད༌ཅིང༌། འཁྲུག་རྩོད་ཆེན་པོའི་ཁྲོད་ནས་དཀོན་མཆོག་གི་འཕྲིན་བཟང་ཁྱོད་རྣམས་ལ་བསྒྲགས་མྱོང༌བས།
1TH 2:3 ངེད་ཅག་གི་སྐུལ་སློང་ནི་ནོར་འཁྲུལ་ཅན༌དང༌། མི་གཙང༌བ། གཡོ་སྒྱུ་བཅས་ལས་བྱུང་བ་མ་ཡིན༌པར།
1TH 2:4 དཀོན་མཆོག་གིས་ངེད་རྣམས་ལ་བརྟགས་ཤིང་གཟིགས་ཏེ་འཕྲིན་བཟང་བཅོལ་བ༌བཞིན། ངེད་རྣམས་ཀྱིས་ཀྱང་དེ་ལྟར་སྒྲོག༌ཅིང་། དེ་ནི་མི་རྣམས་དགའ་བར་བྱེད་པའི་ཕྱིར་མ་ཡིན༌པར། ངེད་ཅག་གི་སེམས་ལ་བརྟག་མཁན་དཀོན་མཆོག་ཁོང་ཉིད་ཐུགས་དགྱེས་པའི་ཕྱིར༌ཡིན་ནོ།།
1TH 2:5 རྒྱུ་མཚན་ནི་ངེད་ཅག་གིས་ནམ་ཡང་ངོ་དགའི་གཏམ་སྨྲས་མ་མྱོང་བ་ནི་ཁྱོད་རྣམས་ཀྱིས་ཤེས་པ༌དང༌། ཧམ་པའི་ཐབས་ཀྱང་མ་སྤྱད་པར་དཀོན་མཆོག་གིས་བདེན་དཔང་མཛད་དོ།།
1TH 2:6 ངེད་ཅག་ནི་སྐྱབས་མགོན་མཱ་ཤི་ཀའི་སྐུ་ཚབ་པ་ཡིན་པས་ཁྱོད་རྣམས་ལས་བརྩི་བཀུར་འཐོབ་འོས་ནའང༌། ཁྱོད་ཅག་གམ་མི་གཞན་སུ་ལས་ཀྱང་བཀུར་སྟི་བཙལ་མ་མྱོང༌ལ།
1TH 2:7 མ་ཡིས་རང་གི་བུ་ཕྲུག་སྐྱོང་བ་ལྟར་ཁྱོད་རྣམས་ཀྱི་ཁྲོད་དུ་ངེད་ཅག་ཞི་ཞིང་དུལ་བར་གནས་ཏེ།
1TH 2:8 ངེད་ཅག་གིས་ཁྱོད་རྣམས་ལ་དེ་ལྟར་གཅེས༌ཤིང༌། དཀོན་མཆོག་གི་འཕྲིན་བཟང་ཡང་ཁྱོད་ཅག་ལ་གནང་བ༌དང༌། ཁྱོད་རྣམས་ལ་ཤིན་ཏུ་བརྩེ་བའི༌ཕྱིར། ཐ་ན་རང་ཉིད་ཀྱི་ཚེ་སྲོག་ཀྱང་ཁྱོད་རྣམས་ལ་སྦྱིན་བསམས༌སོ།།
1TH 2:9 སྤུན་ཟླ༌རྣམས། ཁྱོད་ཅག་སུ་ལའང་འོ་བརྒྱལ་མི་བཟོ་བའི༌ཕྱིར། ཁྱོད་ཅག་ལ་དཀོན་མཆོག་གི་འཕྲིན་བཟང་བསྒྲགས་པའི་དུས༌སུ། ངེད་རྣམས་ཀྱིས་འབད་བརྩོན་བྱས་ཤིང་དཀའ་སྡུག་མྱངས༌པ་དང་། ཉིན་མཚན་མེད་པར་ལས་ཀ་བསྒྲུབས་པ་བཅས་ནི་ཁྱོད་རྣམས་ཀྱི་སེམས་སུ་བཟུང་ཡོད༌དོ།།
1TH 2:10 ཁྱོད་ཅག་དད་ལྡན་རྣམས་ཀྱི་དྲུང་དུ་ངེད་ཅག་གི་སྤྱོད་ལམ་ནི་ཅི་འདྲའི་རྣམ་པར་དག༌པ་དང༌། གཞུང་དྲང༌། སྐྱོན་བརྗོད་རྒྱུ་མེད་པ་ཞིག་ཡིན་པར་ཁྱོད་ཅག་གིས་བདེན་དཔང་བྱས་ཆོག་ལ། དཀོན་མཆོག་གིས་ཀྱང་བདེན་དཔང་མཛད་ཆོག་གོ།
1TH 2:11 ཡང་ཕ་ཡིས་རང་གི་བུ་ཕྲུག་ལ་ཅི་ལྟར་བྱེད་པ༌བཞིན། ངེད་ཅག་གིས་ཇི་ལྟར་ཁྱོད་རྣམས་ལ་སྐུལ་སློང་དང་སེམས་གསོ་བྱས༌པ། ཁྱོད་ཅག་མི་རེ་རེར་ཇི་ལྟར་གདམས་པའང་ཁྱོད་རྣམས་ཀྱིས་ཤེས་སོ།།
1TH 2:12 དེ་ནི་ཁྱོད་ཅག་གི་སྤྱོད་ལམ་ནི་དཀོན་མཆོག་དང་མཐུན་འོས་པའི་ཕྱིར༌ཡིན། དཀོན་མཆོག་ནི་ཁྱོད་རྣམས་ཁོང་གི་རྒྱལ་སྲིད་དུ་ཞུགས་པ་དང་ཁོང་གི་གཟི་བརྗིད་འཐོབ་པར་ཞལ་འབོད་གནང་མཁན་ལགས༌སོ།།
1TH 2:13 དེའི༌ཕྱིར། ངེད་རྣམས་ཀྱིས་བསྒྲགས་པའི་དཀོན་མཆོག་གི་བཀའ་ནི་ཁྱོད་ཅག་གིས་ཐོས་ཤིང་དང་དུ་བླངས༌པས། ངེད་ཅག་གིས་ཀྱང་རྒྱུན་ཆད་མེད་པར་དཀོན་མཆོག་ལ་བཀའ་དྲིན་ཞུ་བ་དང་། ཁྱོད་རྣམས་ཀྱིས་བཀའ་དེ་ནི་མི་ཡི་ངག་ལྟར་དང་དུ་མ་བླངས༌པར། ཁྱོད་ཅག་དད་ལྡན་རྣམས་ཀྱི་སེམས་སུ་འཕྲིན་ལས་མཛད་པ་དང་དཀོན་མཆོག་གི་བཀའ་དངོས་ཡིན་པ་བཞིན་དང་དུ་བླངས་སོ།།
1TH 2:14 ཅིའི་ཕྱིར་ཞེ་ན། ཡ་ཧུ་དཱའི་ཡུལ་དུ་གནས་ཤིང་མཱ་ཤི་ཀ་ཡེ་ཤུའི་ནང་དུ་ཡོད་པའི་དཀོན་མཆོག་གི་ཆོས་ཚོགས་སོ་སོར་ཡ་ཧུ་དཱ་པས་གནོད་འཚེ་བྱས་མྱོང་བ༌བཞིན། སྤུན་ཟླ་ཁྱོད་རྣམས་ལའང་རང་གི་ཡུལ་མི་རྣམས་ཀྱི་གནོད་འཚེ་ཐེབས་མྱོང༌བས། ཆོས་ཚོགས་དེ་དག་གི་དཔེ་རྣམས་ཁྱོད་ཅག་ལ་སྦྱར་བ་ཡིན།
1TH 2:15 ཡ་ཧུ་དཱ་པ་དེ་དག་གིས་གཙོ་བོ་ཡེ་ཤུ་དང་ལུང་སྟོན་པ་རྣམས་བཀྲོངས་ཤིང་ངེད་ཅག་ཀྱང་ཕྱི་རུ་བསྐྲད་པ༌དང༌། དཀོན་མཆོག་གི་ཐུགས་མཉེས་པར་མི་བྱེད་ཅིང་མི་ཐམས་ཅད་ལ་ངོ་རྒོལ་བྱེད་པ་རེད།
1TH 2:16 ཕྱི་ཕྱོགས་པ་རྣམས་ལ་ཐར་པ་འཐོབ་པའི་ཆེད༌དུ། ངེད་ཅག་གིས་དེ་རྣམས་ལ་ཆོས་བཤད་ཀྱང་ཡ་ཧུ་དཱ་པ་རྣམས་ཀྱིས་བཀག་འགོག་བྱེད༌པས། དེ་དག་གིས་རྒྱུན་དུ་སྡིག་པ་བསགས་ཤིང་སྡིག་པས་གང༌ངོ་།། འོན་ཀྱང་དཀོན་མཆོག་གི་ཐུགས་ཁྲོ་ཁོ་རྣམས་ཀྱི་སྟེང་དུ་ཡོངས་སུ་འཕོག་པར་གྱུར་ཏོ།།
1TH 2:17 སྤུན་ཟླ༌རྣམས། ངེད་རྣམས་རེ་ཞིག་ཁྱོད་ཅག་དང་ཁ་འབྲལ་དུ་བཅུག་པ་ནི་ལུས་སོ་སོར་བྲལ་བ་ལས་སེམས་སོ་སོར་བྲལ་བ་མིན༌ལ། ངེད་ཅག་གིས་གང་ནུས་ཅི་ཐུབ་སྒོས་ཐབས་བཙལ་ནས་ཁྱོད་ཅག་དང་འཕྲད་འདོད་ཤིན་ཏུ་ཆེ༌བས།
1TH 2:18 ངེད་རྣམས་ཁྱོད་ཅག་གི་གམ་དུ་ཡོང་འདོད༌དེ། ཕོལ་ལོལ་ང་རང་ཡང་ཡང་འགྲོ་རྩིས་བྱས༌མོད། འོན་ཀྱང་བདུད་སཱ་ཏན་གྱིས་ངེད་རྣམས་བཀག༌བྱུང༌།
1TH 2:19 བདག་ཅག་གི་གཙོ་བོ་ཡེ་ཤུ་ཕེབས་ཡོང་བའི་དུས༌སུ། ཁོང་གི་སྤྱན་སྔར་ངེད་ཅག་གི་འདུན་པ༌དང༌། དགའ༌སྤྲོ། གཙུག་རྒྱན་བཅས་ནི་ཅི་ཡིན་ཞེ༌ན། དེ་ནི་ཁྱོད་རྣམས་ཡིན་པ་ཤ་སྟག་གོ།
1TH 2:20 ཅིའི་ཕྱིར་ཞེ་ན། ཁྱོད་རྣམས་ནི་ངེད་ཅག་གི་གཟི་བརྗིད་དང་དགའ་སྤྲོ་ཡིན་པའི་ཕྱིར༌རོ།།
1TH 3:1 དེ་ལྟར་ཡིན་པས། ངེད་རྣམས་ཀྱིས་སེམས་ནས་མ་བཟོད༌དེ། ཡ་ཏེན་དུ་ངེད་རྣམས་གཅིག་པུར་སྡོད་པར་སེམས༌ཤིང༌།
1TH 3:2 ཁྱོད་རྣམས་དད་པའི་ཕྱོགས་ནས་བརྟན་པོར་གཏོང་བ་དང་དེ་ལ་བསྐུལ་སློང་བྱེད་པའི་ཕྱིར། ངེད་ཅག་གི་སྤུན་ཟླ་ཐི་མོ་ཐེ་ཁྱོད་ཅག་གི་གམ་དུ་མངགས༌ཤིང་། ཁོ་རང་ནི་སྐྱབས་མགོན་མཱ་ཤི་ཀའི་འཕྲིན་བཟང་གི་ཐད་དཀོན་མཆོག་གི་ཞབས་ཕྱི་པ་ཡིན་ནོ།།
1TH 3:3 དེ་ནི་སུ་ཞིག་གིས་དཀའ་སྡུག་མྱངས་ནའང་སེམས་མི་འཁྲུག་པའི་ཕྱིར༌ཏེ། བདག་ཅག་གིས་དཀའ་སྡུག་མྱོང་བ་ནི་དཀོན་མཆོག་གི་ཐུགས་དགོངས་བཞིན་ཡིན་པ་ཁྱོད་རྣམས་ཀྱིས་ཤེས་པའི་ཕྱིར༌རོ།།
1TH 3:4 དེ་སྔར་ངེད་རྣམས་ཁྱོད་ཅག་གི་གམ་དུ་ཡོད༌དུས། བདག་ཅག་གིས་དཀའ་སྡུག་མྱང་བར་ངེས་ཞེས་སྔ་མོ་ནས་ཁྱོད་ཅག་ལ་སྨྲས་མྱོང་བ༌དང༌། རྗེས་སུ་དངོས་གནས་དེ་བཞིན་དུ་བྱུང་བ་ཁྱོད་རྣམས་ཀྱིས་ཤེས་སོ།།
1TH 3:5 དེའི༌ཕྱིར། བདག་གིས་བཟོད་བསྲན་བྱེད་མ་ཐུབ་པ་དང་ཁྱོད་རྣམས་ཀྱི་དད་སེམས་ཅི་འདྲ་ཡིན་པ་ཤེས་པའི་ཕྱིར་ཁོ་རང་མངགས༌པ་དང་། དེ་ནི་བསླུ་བྲིད་བྱེད་མཁན་གྱིས་ཁྱོད་རྣམས་རྦད་དེ་བསླུས༌ནས། ངེད་ཅག་གིས་འབད་པའི་རྩོལ་བ་དེ་དོན་མེད་དུ་འགྲོ་བར་དོགས་པས༌སོ།།
1TH 3:6 འོན༌ཀྱང༌། ད་ལྟ་ཐི་མོ་ཐེ་ཁྱོད་རྣམས་ཀྱི་གམ་ནས་ཕྱིར་ངེད་ཅག་གི་མདུན་དུ་ལོག༌སྟེ། ཁྱོད་ཅག་གི་དད་པ་དང་བྱམས་པའི་སྐོར་གྱི་གཏམ་བཟང་སྨྲས༌ཤིང༌། ཡང་ཁྱོད་ཅག་གིས་རྟག་ཏུ་ངེད་རྣམས་སྙིང་ནས་དྲན་ཞིང་ངེད་ཅག་ནི་ཁྱོད་རྣམས་ལ་འཕྲད་འདོད་པ༌ལྟར། ཁྱོད་རྣམས་ཀྱང་ངེད་ཅག་དང་འཕྲད་འདོད་པའི་གཏམ་སྨྲས༌པས།
1TH 3:7 སྤུན་ཟླ༌རྣམས། ངེད་ཅག་ལ་རང་གི་སྡུག་བསྔལ་དང་དཀའ་སྡུག་སྣ་ཚོགས་ཁྲོད་ནས་ཁྱོད་ཅག་གི་དད་སེམས་ཀྱི་དབང་གིས་སེམས་གསོ་ཐོབ༌བྱུང་།
1TH 3:8 གལ༌ཏེ། ཁྱོད་རྣམས་གཙོ་བོ་ལ་བརྟེན་ནས་དད་པ་བརྟན་པོར་འདུག༌ན། ངེད་རྣམས་ཀྱང་དངོས་གནས་གསོན་པོ་ཡིན་ནོ།།
1TH 3:9 དཀོན་མཆོག་གི་སྤྱན་སྔར་ཁྱོད་ཅག་གི་རྐྱེན་གྱིས་ངེད་རྣམས་ཤིན་ཏུ་དགའ་སྤྲོ་སྐྱེས༌བྱུང་། དགའ་སྤྲོ་འདི་དག་གི༌ཕྱིར། ངེད་ཅག་གིས་ཁྱོད་རྣམས་ཀྱི་ཆེད་དུ་དཀོན་མཆོག་ལ་བཀའ་དྲིན་ཅི་ལྟ་བུ་ཞིག༌ཞུའམ།
1TH 3:10 ཁྱོད་ཅག་དང་ཕྲད་ནས་ཁྱོད་རྣམས་ཀྱི་དད་སེམས་ནང་མི་ཚང་བ་དེ་བསྐང་བའི་ཕྱིར། ངེད་རྣམས་ཀྱིས་ཉིན་མཚན་ཀུན་ཏུ་ནན་ཏན་སྒོས་གསོལ་བ་བཏབ་པ་ཡིན༌ནོ།།
1TH 3:11 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུས་ངེད་རྣམས་ཁྱོད་ཅག་གི་གམ་དུ་འགྲོ་བར་ལམ་བུ་ཞིག་ཕྱེ་བར༌མཛོད།
1TH 3:12 ཡང་ངེད་ཅག་གིས་ཁྱོད་རྣམས་ལ་གཅེས་པ༌བཞིན། ཁྱོད་རྣམས་ཀྱི་ཁྲོད་དུ་ཕན་ཚུན་ལ་གཅེས་ཤིང་མི་ཐམས་ཅད་ཀྱང་གཅེས་པར་འཛིན་པའི་དོན་དེ་གཙོ་བོས་འཕེལ་ཞིང་རྒྱས་པར་མཛད་པར༌ཤོག
1TH 3:13 དེ་ནི་བདག་ཅག་གི་གཙོ་བོ་ཡེ་ཤུ་དང་ཁོང་གི་དད་ལྡན་དམ་པ་རྣམས་ཕེབས་ཡོང་བའི་དུས༌སུ། བདག་ཅག་གི་ཡབ་དཀོན་མཆོག་གི་སྤྱན་སྔར་ཁོང་གིས་ཁྱོད་རྣམས་ཀྱི་དད་སེམས་བརྟན་པོར་མཛད༌དེ། ཁྱོད་ཅག་ནི་དམ་པའི་ངང་ནས་སྐྱོན་མི་མངའ་བའི་མི་རུ་འགྱུར་བའི་ཕྱིར༌རོ།།
1TH 4:1 སྤུན་ཟླ༌རྣམས། མཐར་ངེད་ཅག་གིས་གཙོ་བོ་ཡེ་ཤུར་བརྟེན་ནས་ཁྱོད་རྣམས་ལ་ཞུ་བ་བྱེད་ཅིང་གདམས་པར༌བྱའོ།། དེ་སྔར་ཁྱོད་ཅག་གིས་ཇི་ལྟར་དཀོན་མཆོག་ཐུགས་དགྱེས་པར་བྱེད་དགོས་པ་ངེད་རྣམས་ལས་བསླབ་བྱ་བླངས་པ༌བཞིན། ད་ལྟ་ཁྱོད་ཅག་གིས་སྤྱོད་ལམ་དེ་ལྟར་བྱེད་ཅིང་དེ་ལས་ཀྱང་བརྩོན་པར༌གྱིས།
1TH 4:2 ཅིའི་ཕྱིར་ཞེ་ན། གཙོ་བོ་ཡེ་ཤུའི་དབང་ལ་བརྟེན་ནས་ངེད་རྣམས་ཀྱིས་ཁྱོད་ཅག་ལ་བཀའ་གང་ཞིག་བསྒྲགས་པ་ནི་ཁྱོད་རྣམས་ཀྱིས་ཀྱང་ཤེས་པའི་ཕྱིར༌ཡིན།
1TH 4:3 དཀོན་མཆོག་གི་ཐུགས་དགོངས་ནི་ཁྱོད་རྣམས་དམ་པར་འགྱུར་བ་སྟེ། ལོག་གཡེམ་རིང་དུ་སྤང་བ་དེ་ཡིན༌ལ།
1TH 4:4 ཁྱོད་ཅག་གིས་དམ་པ་དང་བཀུར་འོས་པའི་སྒོ་ནས་ཇི་ལྟར་རང་གི་ལུས་པོ་བསྲུང་དགོས་པ་རྟོགས༌ཤིང༌།
1TH 4:5 དཀོན་མཆོག་ངོ་མི་ཤེས་པའི་ཕྱི་ཕྱོགས་པ་རྣམས་བཞིན༌དུ། རང༌གི་འདོད་ངན་བག་ཡངས་སུ་མི་གཏོང་བ་དང༌།
1TH 4:6 མི་སུས་ཀྱང་དོན་དེའི་ཆ་ནས་རང་གི་སྤུན་ཟླར་འགལ་ནས་བསླུ་མི་རུང༌སྟེ། དོན་དེའི་རིགས་ཐམས་ཅད་ལ་གཙོ་བོས་ལན་མཛད་ངེས་པའི་ཕྱིར༌ཡིན་ཞིང་། དེ་ནི་ངེད་རྣམས་ཀྱིས་སྔར་ནས་ཁྱོད་ཅག་ལ་སྨྲས་ཤིང་ནན་ཏན་གྱིས་གདམས་པ་བཞིན༌ནོ།།
1TH 4:7 ཅིའི་ཕྱིར་ཞེ་ན། དཀོན་མཆོག་གིས་བདག་ཅག་ལ་ཞལ་འབོད་གནང་བ༌ནི། བདག་ཅག་མི་གཙང་བར་འགྱུར་བའི་ཆེད་དུ་མ་ཡིན༌གྱི། དམ་པར་འགྱུར་བའི་ཕྱིར་ཡིན༌པས།
1TH 4:8 བསླབ་བྱ་འདི་འདོར་མཁན་རྣམས་ཀྱིས་མིའི་རིགས་དོར་བ་མ་ཡིན༌པར། ཁྱོད་རྣམས་ལ་དམ་པའི་ཐུགས་ཉིད་གནང་མཁན་དཀོན་མཆོག་ཁོང་ཉིད་དོར༌བའོ།།
1TH 4:9 དེ་ཡང་དཀོན་མཆོག་གིས་ཁྱོད་རྣམས་ཕན་ཚུན་ལ་བྱམས་ཤིང་གཅེས་དགོས་པའི་བསླབ་བྱ་གནང་ཡོད༌པས། སྤུན་ཟླའི་བརྩེ་སེམས་སྐོར་ནས་ཁྱོད་ཅག་ལ་བྲི་མི་དགོས་སོ།།
1TH 4:10 ཁྱོད་ཅག་གིས་མ་ཀེ་དོན་ཡཱ་ཡུལ་ཐམས་ཅད་ཀྱི་སྤུན་ཟླ་རྣམས་ལ་དེ་བཞིན་དུ་བྱམས་ཤིང་གཅེས་པར་བྱེད༌ནའང༌། ངེད་རྣམས་ཀྱིས་སྤུན་ཟླ་ཁྱོད་རྣམས་ལ་དེ་ལས་ལྷག་པ་ཞིག་བྱེད་པར་བསྐུལ༌བ་ཡིན།
1TH 4:11 ཡང་ངེད་ཅག་གིས་དེ་སྔར་ཁྱོད་རྣམས་ལ་ཁ་བསྒོ་བཏང་བ༌བཞིན། ཁྱོད་ཅག་ནི་ཞི་ཞིང་དུལ་བའི་མི་ཞིག་བྱེད་པ༌དང༌། རང་དོན་བསྒྲུབ་ཅིང་རང་གི་ལག་པར་བརྟེན་ནས་ལས་བྱེད་པར་བརྩོན་དགོས།
1TH 4:12 དེ་ནི་ཁྱོད་ཅག་གིས་ཕྱི་མི་རྣམས་ལ་སྤྱོད་ལམ་བཟང་པོ་སྟོན་པ༌དང༌། རང་ཉིད་ལ་མི་འདང་ས་ཅི་ཡང་ཡོད་པར་མི་འགྱུར་བའི་ཕྱིར༌རོ།།
1TH 4:13 སྤུན་ཟླ༌རྣམས། ཁྱོད་ཅག་གིས་རེ་ཐག་ཆད་པའི་མི་རྣམས་དང་འདྲ་བར་སེམས་སྡུག་མི་བྱེད་པའི་ཆེད༌དུ། ངེད་ཅག་གིས་འདས་པོ་རྣམས་ ཀྱི་སྐོར་ཁྱོད་ཅག་ལ་ཤེས་སུ་འཇུག་པར་འདོད་དོ།།
1TH 4:14 རྒྱུ་མཚན་ནི་སྐྱབས་མགོན་ཡེ་ཤུ་སྐུ་གྲོངས་ནས་སླར་གསོན་པར་བདག་ཅག་གིས་ཡིད་ཆེས་བྱེད་པ༌ཡིན་ན། སྐྱབས་མགོན་ཡེ་ཤུའི་དད་ལྡན་འདས་པོ་རྣམས་ཀྱང་དཀོན་མཆོག་གིས་སྐྱབས་མགོན་ཡེ་ཤུ་དང་ལྷན་དུ་འཁྲིད་ཡོང་བར༌ངེས།
1TH 4:15 ད་ལྟ་ངེད་ཅག་གིས་གཙོ་བོའི་བཀའ་ལྟར་ཁྱོད་རྣམས་ལ་དོན་འདི་སྨྲ་བར༌བྱ་སྟེ། གཙོ་བོ་ཕེབས་ཡོང་བའི་བར༌དུ། བདག་ཅག་གསོན་པོར་གནས་པ་རྣམས༌ནི་སྔར་ནས་ཚེ་ལས་འདས་པའི་དད་ལྡན་རྣམས་ཀྱི་སྔོན་དུ་འགྲོ་མི་ནུས༌ཏེ།
1TH 4:16 གཙོ་བོ་ནི་འུར་སྒྲ་དང་ཕོ་ཉའི་མཆོག་གི་སྐད༌སྒྲ། དཀོན་མཆོག་གི་དུང་སྒྲ་དང་བཅས་ནམ་མཁའི་ཞིང་ཁམས་ནས་ཕྱིར་འབྱོན་པའི་དུས༌སུ། སྐྱབས་མགོན་མཱ་ཤི་ཀའི་དད་ལྡན་འདས་པོ་རྣམས་སྔོན་དུ་སླར་གསོན་པར་འགྱུར་བའི་ཕྱིར༌རོ།།
1TH 4:17 དེ་ནས་བདག་ཅག་གསོན་པོར་གནས་པ་རྣམས་གློ་བུར་དེ་རྣམས་དང་མཉམ་དུ་སྤྲིན་ཕུང་ནང་དུ་དྲངས༌ཏེ། བར་སྣང་ནས་གཙོ་བོ་ལ་མཇལ་ཞིང་གཏན་དུ་ཁོང་དང་ལྷན་ཅིག་གནས་པར་འགྱུར་བས།
1TH 4:18 ཁྱོད་རྣམས་ཀྱིས་གཏམ་འདི་དག་གིས་ཕན་ཚུན་ལ་སེམས་གསོ་བྱེད་པར༌གྱིས།
1TH 5:1 དེ་ཡང་དུས་དང་ཟླ་ཚེས་ཀྱི་སྐོར་སྤུན་ཟླ་ཁྱོད་རྣམས་ལ་ཅི་ཡང་བྲི་མི་དགོས༌ཏེ།
1TH 5:2 མཚན་མོའི་དུས་སུ་རྐུན་པོ་ཇི་ལྟར་གློ་བུར་སླེབས་པ༌བཞིན། གཙོ་བོའི་ཉིན་མོའང་དེ་ལྟར་སླེབ་ངེས་པ་ཁྱོད་ཅག་གིས་གསལ་པོར་ཤེས་པའི་ཕྱིར༌ཡིན།
1TH 5:3 མི་རྣམས་ཀྱིས་བདེ་འཇགས་ཡིན་ཞེས་སྨྲ་བའི་དུས༌སུ། བུད་མེད་མངལ་དང་ལྡན་པ་ལ་ན་ཟུག་འབྱུང་བ་བཞིན་དེ་རྣམས་ལ་འཕྲལ་དུ་ཆག་སྒོ་འབྱུང་ཞིང་དེ་ལས་གཏན་ནས་ཐར་མི་ནུས་སོ།།
1TH 5:4 འོན༌ཀྱང༌། སྤུན་ཟླ་ཁྱོད་རྣམས་ནི་མུན་པའི་ནང་དུ་མི་གནས༌པས། ཉིན་མོ་དེ་ནི་རྐུན་པོ་གློ་བུར་སླེབས་པ༌ལྟར་ཁྱོད་རྣམས་ཀྱི་སྟེང་དུ་སླེབ་པར་མི་འགྱུར།
1TH 5:5 ཅིའི་ཕྱིར་ཞེ་ན། ཁྱོད་ཅག་ཐམས་ཅད་ནི་འོད་ཟེར་དང་ཉིན་མོ་ལ་གཏོགས་པའི་མི་ཡིན་པ༌ལས། མཚན་མོ་དང་མུན་པར་གཏོགས་པའི་མི་མ་ཡིན་པའི་ཕྱིར༌རོ།།
1TH 5:6 དེ་བས་བདག་ཅག་མི་གཞན་དག་དང་འདྲ་བར་གཉིད་ལ་མི་ཤོར༌བར། རྟག་ཏུ་དོགས་ཟོན་དང་གཟབ་གཟབ་བྱ་འོས་པ་ཡིན།
1TH 5:7 རྒྱུ་མཚན་ནི་གཉིད་དུ་ལོག་པ་རྣམས་མཚན་མོར་གཉིད་ལ་ཡུར་བ༌དང༌། ཆང་གིས་བཟི་བ་རྣམས་ནི་མཚན་མོར་བཟི་བའི་ཕྱིར༌ཡིན།
1TH 5:8 འོན༌ཀྱང༌། བདག་ཅག་ནི་ཉིན་མོ་ལ་གཏོགས་པས་གཟབ་གཟབ་བྱེད་དགོས༌ཏེ། དད་པ་དང་བྱམས་པའི་བྲང་ཁྲབ་ལུས་ལ་གྱོན་པ༌དང༌། ཐར་པའི་རེ་སྨོན་གྱི་རྨོག་ཞྭ་མགོ་ལ་གྱོན་དགོས།
1TH 5:9 རྒྱུ་མཚན་ནི་དཀོན་མཆོག་གིས་བདག་ཅག་ཁོང་གི་ཐུགས་ཁྲོ་མྱོང་བར་བསྐོས་པ་མ་ཡིན༌པར། གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་ཐར་པ་འཐོབ་པར་བསྐོས་པའི་ཕྱིར་རོ།།
1TH 5:10 བདག་ཅག་གསོན་པོར་གནས་པའམ་ཚེ་ལས་འདས་ཀྱང་སྐྱབས་མགོན་ཡེ་ཤུ་དང་ལྷན་ཅིག་ཏུ་གནས་པར་འགྱུར་བའི་ཕྱིར། ཁོང་ནི་བདག་ཅག་གི་དོན་དུ་སྐུ་གྲོངས༌པའོ།།
1TH 5:11 དེའི༌ཕྱིར། ཁྱོད་རྣམས་ཀྱིས་དུས་རྒྱུན་ནང་བཞིན་ཕན་ཚུན་ལ་སེམས་གསོ་བྱེད་པ༌དང༌། ཕན་ཚུན་གྱི་དད་པ་ཇེ་བརྟན་དུ་གཏོང་བར་གྱིས༌ཤིག།
1TH 5:12 སྤུན་ཟླ༌རྣམས། ངེད་ཅག་གིས་ཁྱོད་རྣམས་ལ་གདམས་པར༌བྱ་སྟེ། ཁྱོད་རྣམས་ཁྲོད་ཀྱི་ངལ་རྩོལ་བྱེད་མཁན་རྣམས་ལ་ཁྱོད་ཅག་གིས་བརྩི་བཀུར་བྱེད་དགོས༌ཤིང༌། དེ་རྣམས་ཀྱིས་གཙོ་བོའི་ཕྱོགས་ནས་ཁྱོད་རྣམས་ལ་འགོ་ཁྲིད་མཛད་པ་དང་བསླབ་བྱ་གནང༌བ་ཡིན་ནོ།།
1TH 5:13 ཡང་དེ་དག་གིས་ལས་ཀ་བྱེད་པའི༌ཕྱིར། ཁྱོད་ཅག་གིས་ཁོང་རྣམས་ལ་བྱམས་པ་བཅངས་ནས་ལྷག་ཏུ་བརྩི་བཀུར་བྱོས༌དང༌། ཡང་ཁྱོད་རྣམས་ཕན་ཚུན་འགྲིག་མཐུན་ཡོང་བར༌གྱིས།
1TH 5:14 ཡང་ངེད་ཅག་གིས་སྤུན་ཟླ་ཁྱོད་རྣམས་ལ་བསྐུལ་བར་བྱ༌སྟེ། འགྲིག་ལམ་མི་བརྩི་བ་དག་ལ་གདམས་པ་དང་། རེ་ཐག་ཆད་པ་རྣམས་ལ་སེམས་གསོ་བྱེད༌པ། གཉོམ་ཆུང་རྣམས་ལ་རོགས་རམ་དང་མི་ཐམས་ཅད་ལ་བཟོད་པ་བསྒོམ་དགོས་སོ།།
1TH 5:15 ཡང་ཁྱོད་ཅག་གིས་གཟབ་ནན་གྱིས༌ཏེ། མི་སུས་ཀྱང་ངན་ལན་ངན་འཇལ་བྱེད་མི་རུང༌ཞིང༌། ཁྱོད་ཅག་ཕན་ཚུན་བར༌དུའམ། ཡང་ན་རྟག་ཏུ་མི་གཞན་ཐམས་ཅད་ལ་ལས་བཟང་པོ་སྒྲུབ་པར་བརྩོན་དགོས༌སོ།།
1TH 5:16 ཡང་རྟག་ཏུ་དགའ་ཞིང་སྤྲོ་བར༌གྱིས།
1TH 5:17 རྒྱུན་ཆད་མེད་པར་གསོལ་བ་ཐོབས།
1TH 5:18 དོན་གང་ལ་ཕྲད་ནའང་བཀའ་དྲིན་ཞུ་དགོས། ཅིའི་ཕྱིར་ཞེ་ན། དེ་ནི་དཀོན་མཆོག་གིས་མཱ་ཤི་ཀ་ཡེ་ཤུའི་ནང་དུ་ཁྱོད་རྣམས་ལ་མཛད་པའི་ཐུགས་དགོངས་ཡིན་པའི་ཕྱིར༌རོ།།
1TH 5:19 ཡང་དམ་པའི་ཐུགས་ཉིད་ཞི་བར་མི༌བྱའོ།།
1TH 5:20 ཡང་ལུང་སྟོན་པ་རྣམས་ཀྱི་གསུང་གླེང་ལ་མཐོང་ཆུང་མི་བྱའོ།།
1TH 5:21 འོན་ཀྱང༌། ཐམས་ཅད་ལ་ལེགས་པར་བརྟགས་ནས་བཟང་པོ་གང་ཡིན་པ་དེ་རྒྱུན་འཁྱོངས༌དང༌།
1TH 5:22 ལས་ངན་པ་ཐམས་ཅད་རྩ་བ་ནས་སྤང་བར༌གྱིས།
1TH 5:23 ཞི་བདེ་གནང་མཁན་དཀོན་མཆོག་གིས་སྐུ་དངོས་སུ་ཁྱོད་རྣམས་ཡོངས་སུ་དམ་པར་མཛད་པར༌སྨོན། ཡང་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཕེབས་ཡོང་བའི་དུས༌སུ། ཁྱོད་ཅག་གི་སེམས་ཉིད༌དང་རྣམ༌ཤེས། ལུས་པོ་བཅས་ལ་སྐྱོན་ཅི་ཡང་མེད་པར་བསྲུང་བར༌སྨོན།
1TH 5:24 ཁྱོད་རྣམས་ལ་ཞལ་འབོད་གནང་མཁན་ནི་ཡིད་རྟོན་རུང་བ་ཡིན༌པས། ཁོང་གིས་དེ་བཞིན་དུ་མཛད་ངེས༌སོ།།
1TH 5:25 སྤུན་ཟླ་ཁྱོད་རྣམས་ཀྱིས་ངེད་ཅག་གི་དོན་དུ་གསོལ་བ་ཐོབས༌ཤིག
1TH 5:26 སྤུན་ཟླ་ཐམས་ཅད་ལ་དམ་པའི་འོ་བྱས་ནས་འཚམས་འདྲི་བྱེད་པར༌གྱིས།
1TH 5:27 ངས་གཙོ་བོ་ལ་བརྟེན་ནས་ཁྱོད་རྣམས་ལ་འཕྲིན་ཡིག་འདི་སྤུན་ཟླ་གཞན་ཐམས་ཅད་ལ་བཀླག་པར་གྱིས་ཞེས་བསྐུལ༌བའོ།།
1TH 5:28 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་དང་མཉམ་དུ་གནས་པར༌སྨོན།། །།
2TH 1:1 དེ་ཡང་ཕོལ་ལོལ་བདག་དང་སིལ་ཝ་ནཱ། ཐི་མོ་ཐེ་བཅས་ནས་བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ནང་དུ་ཡོད་པའི་ཐེ་སཱ་ལོ་ནེ་ཀེ་པ་རྣམས་ཀྱི་ཆོས་ཚོགས་ལ་འཕྲིན་ཡིག་སྤྲིངས་པ་འདི་ལྟ༌སྟེ།
2TH 1:2 ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
2TH 1:3 སྤུན་ཟླ༌རྣམས། ཁྱོད་རྣམས་ཀྱི་དད་སེམས་ལྷག་ཏུ་ཆེ་རུ་ཕྱིན་པ་དང་ཁྱོད་ཅག་ཐམས་ཅད་ཀྱིས་ཕན་ཚུན་ལ་བྱམས་ཤིང་གཅེས་པའི་སེམས་དེའང་ཇེ་ཆེར་འགྲོ་བཞིན་ཡོད༌པས། ངེད་ཅག་གིས་རྟག་ཏུ་ཁྱོད་རྣམས་ཀྱི་ཆེད་དུ་དཀོན་མཆོག་ལ་བཀའ་དྲིན་ཞུ་འོས་སོ།།
2TH 1:4 དེའི༌ཕྱིར། ངེད་ཅག་གིས་དཀོན་མཆོག་གི་ཆོས་ཚོགས་སོ་སོ་ནས་ཁྱོད་རྣམས་ལ་བསྔགས་བརྗོད་བྱས་པ་ཡིན༌ཏེ། ཁྱོད་ཅག་གིས་གཉའ་གནོན་དང་དཀའ་སྡུག་མང་པོ་མྱོང་བའི་ཁྲོད་དུའང་སྔར་བཞིན་བཟོད་བསྲན་དང་དད་སེམས་བཅངས་པའི་ཕྱིར༌རོ།།
2TH 1:5 དོན་དེ་ནི་དཀོན་མཆོག་གིས་མ་འོངས་པར་དྲང་བདེན་གྱི་ཁྲིམས་ཐག་གཅོད་པར་འགྱུར་བའི་རྟགས་ཡིན༌ཏེ། ཁྱོད་རྣམས་དཀོན་མཆོག་གི་རྒྱལ་སྲིད་དུ་ཞུགས་འོས་པར་བརྩི་བའི་ཕྱིར༌རོ།། ཁྱོད་རྣམས་ཀྱིས་རྒྱལ་སྲིད་དེའི་དོན་དུ་སྡུག་བསྔལ་ཡང་མྱོང༌བ་ཡིན།
2TH 1:6 དཀོན་མཆོག་ནི་དྲང་གཞག་ཡིན་པས་ན། ནམ་མཁའི་ཞིང་ཁམས་ནས་གཙོ་བོ་ཡེ་ཤུ་དང་ཁོང་གི་ཕོ་ཉ་མཐུ་སྟོབས་ཅན་འཁོར་དང་བཅས་པ་མེ་ལྕེའི་ཁྲོད་དུ་མངོན་པར་འགྱུར་བའི༌ཚེ། ཁྱོད་རྣམས་སྡུག་ལ་སྦྱོར་མཁན་དེ་དག་ལ་དཀོན་མཆོག་གིས་ཀྱང་དེ་བཞིན་དུ་ལན་གནང་བར་འགྱུར་བ༌དང༌། ཁོང་གིས་དཀའ་སྡུག་མྱོང་མཁན་ཁྱོད་ཅག་དང་ངེད་རྣམས་ལྷན་དུ་དེ་ལས་ཐར་བར་མཛད་ངེས་ཤིང༌།
2TH 1:8 དཀོན་མཆོག་ངོ་མི་ཤེས་པ་དང་བདག་ཅག་གི་གཙོ་བོ་ཡེ་ཤུའི་འཕྲིན་བཟང་ལ་མི་ཉན་པ་རྣམས་ལ་ལན་དུ་ཉེས་ཆད་གཅོད་པར་འགྱུར་བ༌དང༌།
2TH 1:9 དེ་དག་ལ་གཏན་དུ་འཇིག་པའི་ཉེས་ཆད་ཕོག་སྟེ། གཙོ་བོའི་ཞལ་རས་དང་ཁོང་གི་དབང་ཤེད་ཀྱི་གཟི་འོད་དང་ཁ་འབྲལ་བར་འགྱུར།
2TH 1:10 ཁོང་ཉིད་ཕེབས་ཡོང་བའི་ཉིན་ལ། དོན་དེ་རྣམས་འབྱུང་ངེས༌ཏེ། ཁོང་གི་དད་ལྡན་དམ་པ་རྣམས་ཀྱི་སྟེང་ནས་རང་ཉིད་ལ་གཟི་བརྗིད་འཐོབ་པ༌དང༌། ཡང་དད་ལྡན་ཐམས་ཅད་ཀྱི་ཁྲོད་ནས་ཁོང་ལ་ངོ་མཚར་བར་འགྱུར། དེ་སྔར་ངེད་ཅག་གིས་བདེན་དཔང་བྱས་པ་ལ་ཁྱོད་རྣམས་ཀྱང་ཡིད་ཆེས༌སོ།།
2TH 1:11 དེའི༌ཕྱིར། ངེད་རྣམས་ཀྱིས་རྟག་ཏུ་ཁྱོད་རྣམས་ཀྱི་དོན་དུ་འདི་ལྟར་གསོལ་བ་འདེབས་བཞིན་ཡོད༌དེ། བདག་ཅག་གི་དཀོན་མཆོག་གིས་ཁྱོད་རྣམས་ལ་ཞལ་འབོད་གནང་བ་ནི་འོས་པར་གཟིགས་པ༌དང༌། ཡང་ནུས་མཐུའི་སྒོ་ནས་ཁྱོད་རྣམས་ཀྱི་འདུན་པ་བཟང་པོ་ཐམས་ཅད༌དང༌། དད་སེམས་ལ་བརྟེན་ནས་བྱས་པའི་ལས་ཐམས་ཅད་འགྲུབ་པར་མཛད་ཕྱིར་ཞུས༌པ་ཡིན།
2TH 1:12 དེ་ནི་བདག་ཅག་གི་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་བཞིན༌དུ། ཁྱོད་ཅག་གི་སྟེང་ནས་བདག་ཅག་གི་གཙོ་བོ་ཡེ་ཤུའི་མཚན་ལ་གཟི་བརྗིད་ལྡན་པར་འགྱུར་བ༌དང༌། ཁྱོད་རྣམས་ལའང་ཁོང་ནས་གཟི་བརྗིད་འཐོབ་པར་འགྱུར་བའི་ཕྱིར༌རོ།།
2TH 2:1 སྤུན་ཟླ༌རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཕེབས་ཡོང་བ་དང་བདག་ཅག་ཁོང་གི་དྲུང་དུ་འཛོམ་ངེས་པའི་སྐོར་ནི་ངེད་ཅག་གིས་ཁྱོད་རྣམས་ལ་འདི་ལྟར་བསྐུལ་བར་བྱ༌སྟེ།
2TH 2:2 ལུང་བསྟན་གནང་བ་དང༌། གཏམ་སྨྲ༌བ། ངེད་ཅག་གི་མིང་དུ་བརྫུས་ནས་བྲིས་པའི་འཕྲིན་ཡིག་བཅས་གང་དང་གང་གིས་གཙོ་བོའི་ཉིན་མོ་ད་ལྟ་སླེབས་ཟིན་ཞེས་ཟེར༌ན། ཁྱོད་རྣམས་བྱུང་རྒྱལ་དུ་སེམས་མི་འགུལ་ལ་འཇིགས་པར་ཡང་མི༌བྱའོ།།
2TH 2:3 མི་སུས་ཀྱང་ཐབས་གང་ཞིག་སྤྱད་ནའང་ཁྱོད་རྣམས་དེའི་གཡོ་འོག་ཏུ་མ་ཚུད༌ཅིག རྒྱུ་མཚན་ནི་ཉིན་མོ་དེ་མ་སླེབས་པའི་སྔོན༌དུ། དཀོན་མཆོག་ལ་ངོ་རྒོལ་བྱེད་པའི་དོན་དེ་འབྱུང་ངེས༌ཤིང༌། འཇིག་པའི་བུ་སྟེ་ཁྲིམས་མེད་ལུགས་མེད་བྱེད་མཁན་དེ་ཡང་ཕྱིར་མངོན་པར་འགྱུར་བ༌དང༌།
2TH 2:4 དེས་ལྷ་རུ་འབོད་པ་དང་དད་པའི་ཡུལ་ཐམས་ཅད་ལ་བཀག་འགོག་བྱེད་ཅིང་རང་ཉིད་དེ་རྣམས་ལས་མཆོག་གྱུར་ཏུ་བརྩི་བ་དང་། ཐ་ན་དཀོན་མཆོག་གི་མཆོད་ཁང་ནང་དུ་བསྡད་ནས་རང་ཉིད་དཀོན་མཆོག་ཡིན་ཞེས་ཀྱང་ཟེར་བར་འགྱུར་རོ།།
2TH 2:5 ང་རང་ཁྱོད་རྣམས་དང་མཉམ་དུ་ཡོད་དུས། ཁྱོད་རྣམས་ལ་དོན་འདི་རྣམས་སྨྲས་མྱོང་བ་ཁྱོད་ཅག་གིས་སེམས་སུ་མི་དྲན༌ནམ།
2TH 2:6 མི་དེ་ནི་དུས་འོས་འཚམ་ཞིག་ལ་ཕྱིར་མངོན་པར་འགྱུར་བའི༌ཕྱིར། ད་ལྟ་མི་དེ་འགོག་པའི་རྒྱུ་རྐྱེན་ཅི་ཡིན་པ་ཁྱོད་རྣམས་ཀྱིས་ཀྱང་ཤེས༌པ་ཡིན།
2TH 2:7 མ་གཞི་ཁྲིམས་མེད་ལུགས་མེད་ཀྱི་ལྐོག་ངན་བྱེད་འགོ་བརྩམས༌མོད། འོན་ཀྱང་ད་ལྟ་འགོག་མཁན་ཡོད་ཅིང་འགོག་མཁན་དེ་ཉིད་ཕྱིར་འདྲེན་པའི་བར་དུ་མུ་མཐུད་དུ་འགོག༌པའོ།།
2TH 2:8 དེ་ནས་ཁྲིམས་མེད་ལུགས་མེད་བྱེད་མཁན་ཕྱིར་མངོན་པར་འགྱུར་བ༌དང༌། གཙོ་བོས་རང་ཉིད་ཀྱི་ཞལ་ལས་ཐོན་པའི་དབུགས་ཀྱིས་ཁོ་རང་གཞོམ་པར་འགྱུར་བ༌དང༌། ཁོང་ཉིད་མངོན་སུམ་དུ་ཕེབས་ཡོང་བའི་བརྗིད་ཉམས་ཀྱིས་མི་དེ་འཇོམས་པར་མཛད་ངེས་སོ།།
2TH 2:9 ཁྲིམས་མེད་ལུགས་མེད་བྱེད་མཁན་དེ་ནི་བདུད་སཱ་ཏན་གྱིས་བསྐུལ་བ་བཞིན་ཡོང༌སྟེ། མཐུ་རྩལ་དང༌། གྲུབ༌རྟགས། རྫུ་འཕྲུལ་སྣ་ཚོགས་སྟོན་པ༌དང༌།
2TH 2:10 འཇིག་པར་འགྱུར་བའི་མི་རྣམས་ལ་མགོ་སྐོར་ངན་པ་སྣ་ཚོགས་གཏོང་བར་འགྱུར། རྒྱུ་མཚན་ནི་དེ་དག་གིས་བདེན་པ་ཉིད་ལ་དགའ་བའི་སེམས་དང་དུ་མ་བླངས་པས་དེ་རྣམས་ལ་ཐར་པ་ཐོབ་མེད་པའི་ཕྱིར༌རོ།།
2TH 2:11 དེ་བས་ན་དེ་རྣམས་རྫུན་ལ་ཡིད་ཆེས་པར་འགྱུར་བའི་ཕྱིར། དཀོན་མཆོག་གིས་དེ་རྣམས་ལ་འཁྲུལ་ཤེས་གནང་བར་ངེས།
2TH 2:12 དེ་ནི་བདེན་པ་ཉིད་ལ་དད་པ་མི་བྱེད་པར་སྤྱོད་ལམ་ངན་པར་དགའ་བ་ཐམས་ཅད་ལ་ཉེས་ཆད་གཅོད་པར་འགྱུར་བའི་ཕྱིར་ཡིན༌ནོ།།
2TH 2:13 གཙོ་བོས་གཅེས་པར་འཛིན་པའི་སྤུན་ཟླ༌རྣམས། ངེད་ཅག་གིས་ནམ་རྒྱུན་ཁྱོད་རྣམས་ཀྱི་ཆེད་དུ་དཀོན་མཆོག་ལ་བཀའ་དྲིན་ཞུ་འོས་སོ།། རྒྱུ་མཚན་ནི་དམ་པའི་ཐུགས་ཉིད་ཀྱིས་ཁྱོད་རྣམས་དམ་པར་མཛད་པ་དང༌། ཁྱོད་རྣམས་བདེན་པ་ཉིད་ལ་དད་པའི་སྒོ་ནས་ཐར་པ་འཐོབ་པའི་ཕྱིར། དཀོན་མཆོག་གིས་ཐོག་མ་ཉིད་ནས་ཁྱོད་རྣམས་བདམས༌པ་ཡིན།
2TH 2:14 ཡང་དོན་འདིའི་ཆེད་དུ་ངེད་ཅག་གིས་བསྒྲགས་པའི་འཕྲིན་བཟང་བརྒྱུད་ནས་དཀོན་མཆོག་གིས་ཁྱོད་རྣམས་ལ་ཞལ་འབོད་གནང་བ་ཡིན༌ཏེ། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་གཟི་བརྗིད་ཀྱང་ཁྱོད་རྣམས་ལ་ཐོབ་པར་འགྱུར་བའི་ཕྱིར༌རོ།།
2TH 2:15 དེ་བས་ན་སྤུན་ཟླ༌རྣམས། ཁྱོད་རྣམས་ཀྱིས་དད་པ་བརྟན་པོར་གྱིས༌དང༌། ངེད་ཅག་གིས་ངག་ནས་བསྒྲགས་པ་དང་འཕྲིན་ཡིག་ཏུ་བྲིས་པ་གང་ཡིན་ཡང་ཁྱོད་རྣམས་ལ་བསླབ་པའི་སྲོལ་རྒྱུན་ཐམས་ཅད་བརྟན་པོར་བསྲུང་བར༌བྱའོ།།
2TH 2:16 བདག་ཅག་གི་གཙོ་བོ་ཡེ་ཤུ་མཱ་ཤི་ཀ་དང༌། བདག་ཅག་ལ་གཅེས་ཤིང་ཐུགས་རྗེའི་སྒོ་ནས་མཐའ་མེད་པའི་སེམས་གསོ་དང་རེ་བ་བཟང་པོ་གནང་མཁན་དཀོན་མཆོག༌གིས།
2TH 2:17 ཁྱོད་རྣམས་ལ་སེམས་གསོ་མཛད་པ༌དང༌། ལས་བཟང་པོ་དང་སྨྲ་བརྗོད་ལེགས་པོ་ཐམས་ཅད་ཀྱི་ཐད་ནས་ཁྱོད་རྣམས་བརྟན་པོར་མཛད་པར༌སྨོན།
2TH 3:1 སྤུན་ཟླ༌རྣམས། མཐར་ཁྱོད་ཅག་གིས་ངེད་རྣམས་ཀྱི་དོན་དུ་གསོལ་བ་འདེབས་པར་ཞུའོ། །དེ་ཡང་ཁྱོད་ཅག་གི་ཁྲོད་ནས་ཇི་ལྟར་བྱུང་བ་བཞིན། གཙོ་བོའི་བཀའ་དེ་མྱུར་དུ་ཁྱབ་པ༌དང་གཟི་བརྗིད་ཀྱང་འཐོབ་ཅིང་།
2TH 3:2 ངེད་རྣམས་ལུགས་དང་མི་མཐུན་པའི་མི་ངན་དག་ལས་ཐར་བའི་ཕྱིར་གསོལ་བ་འདེབས་པར་གྱིས། མི་ཐམས་ཅད་ལ་དད་སེམས་ཡོད་པ་མིན་ནོ།།
2TH 3:3 གཙོ་བོ་ནི་ཡིད་རྟོན་རུང་བ་ཡིན༌པས། ཁོང་གིས་ཁྱོད་རྣམས་ཀྱི་དད་སེམས་བརྟན་པོར་མཛད་ཅིང་བདུད་ངན་དེ་ལས་བསྲུངས་ནས་སྐྱོབ་ངེས༌ཡིན།
2TH 3:4 ངེད་ཅག་གིས་གཙོ་བོ་ལ་བརྟེན་ནས་ཁྱོད་རྣམས་ཀྱིས་དུས་ད་ལྟ་མ་འོངས་གང་དུའང༌། ངེད་ཅག་གིས་ཁ་བསྒོ་བཏང་བ་བཞིན་ངེས་པར་བསྒྲུབ་པ་ལ་ཡིད་ཆེས་སོ།།
2TH 3:5 གཙོ་བོས་ཁྱོད་རྣམས་ཀྱི་སེམས་ནི་དཀོན་མཆོག་གི་བྱམས་པ་དང་སྐྱབས་མགོན་མཱ་ཤི་ཀའི་བཟོད་སྒོམ་ནང་དུ་འདྲེན་པར༌སྨོན།
2TH 3:6 སྤུན་ཟླ༌རྣམས། ངེད་ཅག་གིས་རང་རེའི་གཙོ་བོ་ཡེ་ཤུ་མཱ་ཤི་ཀའི་མཚན་གྱི་སྒོ་ནས་ཁྱོད་རྣམས་ལ་ཁ་བསྒོ་གཏོང་བར་བྱ༌སྟེ། སྤུན་ཟླ་སུ་ཞིག་ལེ་ལོ་ཡིན་པ་དང་ངེད་རྣམས་ལས་ཐོབ་པའི་སྲོལ་རྒྱུན་མི་བསྲུངས༌ན། མི་དེ་རྣམས་དང་རྒྱང་བཀྱེད་པར༌བྱའོ།།
2TH 3:7 ཅིའི་ཕྱིར་ཞེ་ན། ཁྱོད་ཅག་གིས་ཅི་ལྟར་ངེད་རྣམས་མིག་དཔེ་རུ་འཛིན་དགོས་པ་ཤེས༌ཏེ། སྔོན་ཆད་ངེད་རྣམས་ཁྱོད་ཅག་གི་ཁྲོད་དུ་ཡོད་པའི་དུས་སུ་ལེ་ལོ་ཅན་མིན་པ་དང༌།
2TH 3:8 རིན་མ་སྤྲད་པར་མི་གཞན་གྱི་ཟས་ཀྱང་མ་ཟོས༌ལ། ཁྱོད་རྣམས་སུ་ལའང་འོ་བརྒྱལ་མི་བཟོ་བའི༌ཕྱིར། འབད་བརྩོན་བྱས་ཤིང་དཀའ་སྡུག་མྱངས་ནས་ཉིན་མཚན་ཀུན་ཏུ་ལས་ཀ་བསྒྲུབས་པ་ཡིན།
2TH 3:9 འདི་ནི་ངེད་ཅག་ལ་དབང་ཤེད་མེད་པའི་རྐྱེན་མ་ཡིན༌གྱི། ངེད་ཅག་གིས་ཁྱོད་རྣམས་ལ་མིག་དཔེ་བསྟན་ཅིང་ཁྱོད་རྣམས་ཀྱིས་ཀྱང་ངེད་ཅག་ལ་ལད་མོ་བྱེད་པའི་ཕྱིར་ཡིན།
2TH 3:10 སྔོན་ཆད་ངེད་རྣམས་ཁྱོད་ཅག་གི་གམ་དུ་ཡོད་པའི་དུས༌སུ། སུ་ཞིག་གིས་ལས་ཀ་བྱེད་མི་འདོད༌ན། མི་དེ་ལ་ཁ་ཟས་སྟེར་མི་རུང་ཞེས་ཁྱོད་རྣམས་ལ་ཁ་བསྒོ་བཏང་མྱོང༌ངོ་།།
2TH 3:11 རྒྱུ་མཚན་ནི་ཁྱོད་རྣམས་ཀྱི་ཁྲོད་དུ་ལས་ཀ་ཅི་ཡང་མི་བྱེད༌པར། དོན་མེད་ཀྱི་ལས་ཁོ་ནར་བྲེལ་བའི་ལེ་ལོ་ཅན་ཡོད་པ་ངེད་རྣམས་ཀྱིས་ཐོས་པས༌སོ།།
2TH 3:12 ད་ལྟ་ངེད་ཅག་གིས་མི་དེ་ལྟ་བུ་རྣམས་ལ་གཙོ་བོ་ཡེ་ཤུ་མཱ་ཤི་ཀར་བརྟེན་ནས་ཁ་བསྒོ་དང་སྐུལ་མ་གཏོང་བར༌བྱའོ།། བློ་བདེ་བག་ཕེབས་ཀྱི་ངང་ནས་ལས་ཀ་བྱས་ཏེ་རང་ཁ་རང་གསོ་བྱེད་པར༌གྱིས།
2TH 3:13 སྤུན་ཟླ༌རྣམས། ཁྱོད་ཅག་ལས་བཟང་པོ་སྒྲུབ་པར་ཡིད་ཕམ་པར་མི་བྱའོ།།
2TH 3:14 མི་སུས་ཀྱང་ངེད་ཅག་གི་འཕྲིན་ཡིག་འདིའི་ནང་གི་བསླབ་བྱ་ལ་མི་ཉན༌ན། མི་དེ་ངོ་གནོང་བར་འགྱུར་བའི༌ཕྱིར། དོན་དེ་ཡིད་ལ་བཟུང་སྟེ་མི་དེ་དང་འབྲེལ་འདྲིས་མི་བྱེད་པར་གྱིས།
2TH 3:15 འོན༌ཀྱང༌། མི་དེ་ལ་དགྲ་བོ་ལྟ་བུའི་རྣམ་འགྱུར་མི་འཛིན་པར་སྤུན་ཟླ་བཞིན་དུ་སྐུལ་མ་གནང་བར༌མཛོད།
2TH 3:16 ཞི་བདེ་གནང་མཁན་གཙོ་བོ་ཁོང་ཉིད་ཀྱིས་དུས་དང་རྣམ་པ་ཀུན་ཏུ་ཁྱོད་རྣམས་ལ་ཞི་བདེ་གནང་བར༌ཤོག གཙོ་བོ་ཁོང་ཉིད་ནམ་ཡང་ཁྱོད་རྣམས་དང་ལྷན་དུ་གནས་པར༌སྨོན།
2TH 3:17 ཕོལ་ལོལ་བདག་གིས་ཁྱོད་རྣམས་ལ་འཚམས་འདྲི་ཞུ་བ་འདི་དངོས་སུ་བྲིས་པ་ཡིན། བདག་གི་འཕྲིན་ཡིག་ཐམས་ཅད་ལ་རྟགས་འདི་ ཡོད༌ཅིང༌། བདག་གི་འབྲི་སྟངས་འདི་ལྟར་ཡིན།
2TH 3:18 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་ཐམས་ཅད་དང་མཉམ་དུ་གནས་པར༌སྨོན།། །།
1TI 1:1 དེ་ཡང་ཕོལ་ལོལ་ང་རང་ནི་བདག་ཅག་གི་སྐྱབས་མགོན་དཀོན་མཆོག་དང་བདག་ཅག་གིས་རེ་སྨོན་བྱེད་པའི་མཱ་ཤི་ཀ་ཡེ་ཤུའི་བཀའ་བཞིན་དུ་ཁོང་གི་སྐུ་ཚབ་པ་ཞིག་ཡིན་ནོ།།
1TI 1:2 འཕྲིན་ཡིག་འདི་ནི་དད་པ་བརྒྱུད་ནས་རང་གི་བུ་དངོས་སུ་གྱུར་པ་ཐི་མོ་ཐེ་ལ་སྤྲིངས་པ་ཡིན༌ཏེ། ཡབ་དཀོན་མཆོག་དང་བདག་ཅག་གི་གཙོ་བོ་མཱ་ཤི་ཀ་ཡེ་ཤུས་ཁྱོད་ལ་བྱམས་དང་སྙིང༌རྗེ། ཞི་བདེ་བཅས་གནང་བར༌སྨོན།
1TI 1:3 སྔོན་ཆད་ང་རང་མ་ཀེ་དོན་ཡཱ་ཡུལ་དུ་འགྲོ་བའི་དུས༌སུ། ཁྱོད་རང་སྔར་བཞིན་ཨེ་ཕེ་སི་རུ་སྡོད༌པར་ནན་གྱིས་བསྐུལ་མྱོང་བ་ཡིན། དེ་ནི་ཁྱོད་ཀྱིས་ལོག་ལྟ་ཅན་དེ་དག་ལ་ལོག་ཁྲིད་མི་བྱེད་པ༌དང༌།
1TI 1:4 ཁུངས་ལུང་མེད་པའི་གཏམ་རྒྱུད་དང༌། རྫོགས་མཐའ་མེད་པའི་ཁྱིམ་རྒྱུད་ཀྱི་སྟོང་བཤད་ལའང་མགོ་བོ་འཁོར་མི་རུང་ཞེས་ཁ་བསྒོ་གཏོང་ཐུབ་པའི་ཕྱིར༌ཡིན་ལ། ལས་འདི་རིགས་ཀྱིས་དོན་སྙིང་མེད་པའི་རྩོད་པ་སློང་བ་ལས། དད་པར་བརྟེན་ནས་བསྒྲུབ་འོས་པའི་དཀོན་མཆོག་གི་དགོངས་དོན་ཐད་ལ་ཕན་ཐོགས་ཅི་ཡང་མེད་དོ།།
1TI 1:5 འོན་ཀྱང༌། བཀའ་འདིའི་དམིགས་དོན་ནི་བྱམས་པ་ཡིན༌ཏེ། རྣམ་པར་དག་པའི་སེམས་དང༌། བསམ་པ་རྣམ་དག གཡོ་ཟོལ་མེད་པའི་དད་སེམས་བཅས་ལས་བྱུང་བ་ཡིན་ནོ།།
1TI 1:6 ཡང་མི་འགའ་ཤས་ཀྱིས་དོན་འདི་དག་དང་ཁ་བྲལ་ནས་སྙིང་པོ་མེད་པའི་གཏམ་སྨྲ་བར་བྱེད༌ཅིང༌།
1TI 1:7 བཀའ་ཁྲིམས་ཀྱི་དགེ་རྒན་བྱེད་འདོད༌ཀྱང༌། རང་གིས་ཅི་ཞིག་གླེང་བཞིན་པ་དང་སྤོབས་པའི་ངང་ནས་ཅི་ཞིག་བསྒྲག་པའང་མི་ཤེས༌སོ།།
1TI 1:8 སུ་ཞིག་གིས་བཀའ་ཁྲིམས་འོས་ཤིང་འཚམ་པར་བཀོལ༌ན། བཀའ་ཁྲིམས་དེ་ནི་ལེགས་པོ་ཡིན་པ་བདག་ཅག་གིས་ཤེས༌སོ།།
1TI 1:9 བཀའ་ཁྲིམས་ནི་མི་གཞུང་དྲང་རྣམས་ཀྱི་ཆེད་དུ་བཙུགས་པ་མ་ཡིན༌པར། ཁྲིམས་མེད་ལུགས་མེད་དང་བསླབ་བྱར་མི་ཉན༌པ། དཀོན་མཆོག་ལ་དད་གུས་མེད༌པ། སྡིག་པ༌ཅན། དམ་པ་མ་ཡིན་པ་དང་ཐ་མལ་བ་ལ་ཞེན་ཆགས་པ། ཕ་མ་དང་མི་གསོད༌མཁན།
1TI 1:10 ལོག་གཡེམ་བྱེད་མཁན། ཕོ་ཡིས་ཕོ་ལ་འཁྲིག་པ་སྤྱོད་མཁན། མི་ཚོང་རྒྱག་མཁན། རྫུན་སྨྲ༌མཁན། དམ་བཅའ་རྫུན་མ་འཇོག་མཁན་བཅས༌དང༌། ཡང་དག་པའི་བསྟན་པ་དང་མི་མཐུན་པའི་དོན་གང་ཞིག་གི་ཆེད་དུ་བཙུགས་པ་ནི་བདག་ཅག་གིས་ཀྱང་ཤེས༌པ་ཡིན།
1TI 1:11 དོན་འདི་ནི་བསྔགས་པར་འོས་པའི་དཀོན་མཆོག་གིས་གཟི་བརྗིད་ལྡན་པའི་འཕྲིན་བཟང་དེ་ཉིད་བདག་ལ་བཅོལ་བ་བཞིན༌ནོ།།
1TI 1:12 བདག་ལ་མཐུ་སྟོབས་གནང་མཁན་ཏེ་བདག་ཅག་གི་གཙོ་བོ་མཱ་ཤི༌ཀ་ཡེ་ཤུས། བདག་ནི་བློ་སེམས་དཀར་པོ་ཡིན་པ་གཟིགས་ནས་ཁོང་གི་ཞབས་ཕྱི་པར་བསྐོས་པས་ངས་ཁོང་ལ་ཐུགས་རྗེ༌ཆེ་ཞུའོ།།
1TI 1:13 སྔོན་ཆད་ང་རང་ནི་དཀོན་མཆོག་ལ་སྐུར་བ་འདེབས་མཁན༌དང༌། དད་ལྡན་རྣམས་ལ་གཉའ་གནོན་བྱེད་མཁན༌དང༌མི་གདུག་རྩུབ་ཅན་ཞིག་ཡིན༌མོད། འོན་ཀྱང་དེ་ནི་བདག་ལ་དད་པ་མེད་པ་དང་ཅི་ཡང་མི་ཤེས་པའི་དུས་སུ་བྱས་པ་ཡིན༌པས། དཀོན་མཆོག་གིས་བདག་ལ་ཐུགས་རྗེ་དགོངས་པ༌དང༌།
1TI 1:14 བདག་ཅག་གི་གཙོ་བོའི་ཐུགས་རྗེ་ནི་ལྷག་ཏུ་ཕུན་སུམ་ཚོགས་པ་ཡིན༌པས། བདག་ལའང་མཱ་ཤི་ཀ་ཡེ་ཤུའི་ནང་དུ་དད་སེམས་དང་བྱམས་པ་ལྡན་པར་གྱུར༌ཏོ།།
1TI 1:15 མཱ་ཤི་ཀ་ཡེ་ཤུ་ནི་སྡིག་ཅན་རྣམས་སྐྱོབ་པའི༌ཕྱིར། འཇིག་རྟེན་དུ་ཕེབས་པ་ཡིན་ཞེས་པའི་གཏམ་འདི་ལ་ཡིད་རྟོན་རུང་བ་དང་ཧ་ཅང་ཁས་ལེན་འོས་པ་ཞིག་ཡིན་ཞིང་། བདག་ནི་མི་སྡིག་ཅན་རྣམས་ཀྱི་ཁྲོད་དུ་གཏེ་བོ་ཞིག་ཡིན་ནོ།།
1TI 1:16 འོན་ཀྱང༌། ཡེ་ཤུ་མཱ་ཤི་ཀས་སྡིག་ཅན་རྣམས་ལས་གཏེ་བོ་ང་རང་ལྟ་བུའི་སྟེང་དུའང་ཁོང་གི་བཟོད་པ་ཚད་མེད་གནང་བ༌དང༌། ཕྱིས་སུ་ཁོང་ལ་དད་པ་བྱེད་ཅིང་མཐའ་མེད་པའི་ཚེ་སྲོག་ཐོབ་མཁན་རྣམས་ལ་ང་རང་མིག་དཔེ་རུ་མཛད་པའི༌ཕྱིར། ཁོང་གིས་བདག་ལ་ཐུགས་རྗེ་གནང༌བ་ཡིན་ནོ།།
1TI 1:17 ཐོག་མཐའ་མེད་པའི་རྒྱལ་པོ༌དང༌། འཇིག་པ་མེད༌པ། མཐོང་རེག་བྲལ་བའི་དཀོན་མཆོག་ཁོ་ན་ཉིད་ལ་རྟག་ཏུ་བཀུར་བསྟི་དང་བསྟོད་པ་འབུལ་བར༌སྨོན། ཨ༌མེན།
1TI 1:18 བདག་གི་བུ་ཐི་མོ་ཐེ། སྔོན་ཆད་ཁྱོད་ཀྱི་སྐོར་ལ་ལུང་བསྟན་གནང་བ་བཞིན། བདག་གིས་གོང་གི་བཀའ་དེ་ཁྱོད་ལ་གདམས་པར་བྱ༌སྟེ། ཁྱོད་ཀྱིས་ལུང་བསྟན་དེ་དག་ལ་བརྟེན་ནས་འཐབ་འཛིང་བཟང་པོ་བྱེད་པ༌དང༌།
1TI 1:19 རྒྱུན་དུ་དད་སེམས་དང་བསམ་པ་རྣམ་དག་བཅང་ཐུབ་པའི་ཕྱིར༌རོ།། མི་ལ་ལས་དེ་སྤངས་པ་ནི་མཚོ་གྲུ་བྲག་རྡོ་ལ་ཐོགས་པ་བཞིན་དད་པ་ཉམས་པའོ།།
1TI 1:20 དེ་དག་གི་ཁྲོད་དུ་ཧི་མེ་ནཱ་ཡུ་དང་ཨ་ལིག་སན་དིར་གཉིས་ཡོད༌དེ། ཁོ་གཉིས་ཀྱིས་དཀོན་མཆོག་ལ་སྐུར་བ་འདེབས་མི་རུང་བ་ཤེས་པའི་ཆེད༌དུ། ངས་དེ་གཉིས་བདུད་སཱ་ཏན་གྱི་ལག་ཏུ་སྤྲད་ཟིན༌ཏོ།།
1TI 2:1 དེ་བས་ན། བདག་གིས་ཁྱོད་རྣམས་ལ་སྐུལ་བར༌བྱ་སྟེ། བདག་ཅག་གིས་དད་གུས་བྱེད་པ་དང་ཚུལ་མཐུན་ངང་བག་ཕབ་ལྷིང་འཇགས་ཀྱི་འཚོ་བ་རོལ་ཐུབ་པའི་ཕྱིར། ཐོག་མར་ཁྱོད་རྣམས་ཀྱིས་མི་ཐམས་ཅད༌དང༌། རྒྱལ༌པོ། དབང་ཤེད་ཅན་མཐའ་དག་གི་ཆེད༌དུ། དཀོན་མཆོག་ལ་ཞུ་བ་བྱེད་པ་དང༌། གསོལ་བ་འདེབས༌པ། ཚབ་ཞུ་བྱེད༌པ། བཀའ་དྲིན་ཞུ་བ་བཅས་བྱེད་པར༌གྱིས།
1TI 2:3 དོན་འདི་ནི་བདག་ཅག་གི་སྐྱབས་མགོན་དཀོན་མཆོག་གི་སྤྱན་སྔར་ལེགས༌ཤིང་ཁོང་ཐུགས་དགྱེས༌པ་ཡིན།
1TI 2:4 ཁོང་གིས་མི་ཐམས་ཅད་ལ་ཐར་པ་འཐོབ་པ་དང་ཀུན་གྱིས་བདེན་པ་ཉིད་རྟོགས་ཐུབ་པར་དགོངས་སོ།།
1TI 2:5 ཅིའི་ཕྱིར་ཞེ་ན། དཀོན་མཆོག་གཅིག་ཁོ་ན་ཉིད་ལས་གཞན་མེད༌ཅིང༌། ཡང་དཀོན་མཆོག་དང་མིའི་རིགས་ཀྱི་བར་དུ་བར་མི་གཅིག་ལས་གཞན་མེད༌དེ། འཇིག་རྟེན་དུ་མི་རུ་འཁྲུངས་པའི་མཱ་ཤི་ཀ་ཡེ་ཤུ་ཡིན་པའི་ཕྱིར༌རོ།།
1TI 2:6 ཁོང་གིས་རང་ཉིད་འཇིག་རྟེན་གྱི་མི་ཐམས་ཅད་ལ་བླུ་རིན་དུ་གནང༌ཞིང༌། དུས་ལ་བབས་པ་ན། དོན་འདིར་བདེན་དཔང་བྱས་པ་ཡིན།
1TI 2:7 བདག་ནི་དོན་དེའི་ཆེད་དུ་ཆོས་སྒྲོག་མཁན༌དང༌སྐུ་ཚབ༌པར་བསྐོས་ཏེ། དད་པ་དང་བདེན་པ་ཉིད་ཀྱི་ཆ་ནས་ཕྱི་ཕྱོགས་པ་རྣམས་ཀྱི་དགེ་རྒན་ཡིན། དེ་ནི་བདག་གིས་བདེན་པར་སྨྲས་པ་ཡིན་གྱི་རྫུན་སྨྲས་པ་མ་ཡིན༌ནོ།།
1TI 2:8 དེའི༌ཕྱིར། བདག་གིས་སྐྱེས་པ་རྣམས་ཀྱིས་ཞེ་སྡང་དང་རྩོད་གླེང་མེད་པར་རྣམ་པར་དག་པའི་ལག་ཟུང་ཡར་བཏེགས་ནས། གནས་གང་རུང་དུ་གསོལ་བ་འདེབས་པར་བསམས་སོ།།
1TI 2:9 ཡང་བདག་གིས་བུད་མེད་རྣམས་ནི་ཁྲེལ་ཡོད་བག་ཡོད་ངང་ཚུལ་མཐུན་གྱི་གོས་གྱོན་པ༌ལས། མགོའི་སྐྲ་སླས་པ་དང་གསེར་དང་མུ་ཏིག་དང་གོས་ཆེན་སོགས་ཀྱིས་མི་བརྒྱན་པར༌སྨོན།
1TI 2:10 དཀོན་མཆོག་ལ་དད་པ་ཡོད་ཟེར་བའི་སྐྱེས་མ་རྣམས་ཀྱིས་ལུས་ལ་དོན་བཟང་པོས་བརྒྱན་ན་འོས་སོ།།
1TI 2:11 ཡང་བུད་མེད་རྣམས་ལྷོད་འཇགས་ངང་ཆོས་བསླབ་ཅིང་རྒྱུན་དུ་ངག་ལ་ཉན་པ་ཞིག་ཡིན་དགོས༌ཏེ།
1TI 2:12 བུད་མེད་རྣམས་ལྷོད་འཇགས་སུ་སྡོད་པ་ལས་སྐྱེས་པ་རྣམས་ལ་ཆོས་བཤད་པའམ་མགོ་ཁྲིད་བྱེད་མི་རུང་ཞེས་བདག་གིས་སྨྲས༌པའོ།།
1TI 2:13 ཅིའི་ཕྱིར་ཞེ་ན། ཐོག་མར་ཨ་དམ་དང་ཕྱིས་སུ་ཧ་ཝཱ་མཛད་པའི་ཕྱིར༌དང༌།
1TI 2:14 ཡང་ཨ་དམ་བསླུས་པ་མ་ཡིན་པར་བུད་མེད་དེ་བསླུས་ནས་སྡིག་པའི་ནང་དུ་ལྷུང་བའི་ཕྱིར༌རོ།།
1TI 2:15 འོན༌ཀྱང༌། བུད་མེད་རྣམས་ཀྱིས་རྟག་ཏུ་དད་སེམས་དང་བྱམས་པ་བཅངས་པ༌དང༌། སྤྱོད་ལམ་དྲང་ཞིང་བག་ཡོད་པ་ཡིན༌ན། ཕྲུ་གུ་བཙའ་བའི་དུས་སུ་ཁོ་མོ་རྣམས་ཐར་བར་འགྱུར་རོ།།
1TI 3:1 སུ་ཞིག་གིས་དོ་དམ་པའི་འགན་འཁུར་འདོད༌ན། དེ་ནི་ལས་བཟང་པོར་ཡིད་སྨོན་ཤོར་བ་ཡིན་ཞེས་པ་ཡིད་རྟོན་རུང་བའི་གཏམ་ཡིན་ནོ།།
1TI 3:2 དོ་དམ་པ་ནི་ངེས་པར་སྐྱོན་བརྗོད་རྒྱུ་ཅི་ཡང་མེད༌ཅིང༌། ཆུང་མ་གཅིག་ཁོ་ནའི་ཁྱོ་ག་ཡིན་པ༌དང༌། རང་ཚོད་ཟིན༌པ། བག་ཡོད༌པ། ཚུལ་མཐུན་ཡ་རབས་ཡིན༌པ། མགྲོན་པོ་བསུ་བར་དགའ༌བ། ཁྲིད་སྟོན་བྱེད་ནུས༌པ།
1TI 3:3 ཆང་རག་འཐུང་བར་མི་རྔམ༌པ། མི་ལ་གཅར་རྡུང་མི་བྱེད༌པ། ཞི་ཞིང་དུལ༌བ། འཁྲུག་རྩོད་མི་བྱེད༌པ། རྒྱུ་ནོར་ལ་མི་རྔམ་པ་བཅས་ཡིན་དགོས༌ཤིང༌།
1TI 3:4 རང་གི་ཁྱིམ་ཚང་བདག་སྐྱོང་ལེགས་པོ་བྱས་ཏེ་བུ་ཕྲུག་རྣམས་ལ་ཡ་རབས་སྤྱོད་བཟང་ཁྲིད་པ་དང་གུས་ལུགས་ཡོད་པ་ཞིག་ཡིན་དགོས།
1TI 3:5 གལ༌ཏེ། སུ་ཞིག་གིས་རང་གི་ཁྱིམ་ཚང་ཙམ་ཡང་བདག་སྐྱོང་བྱེད་མི་ཤེས༌ན། དཀོན་མཆོག་གི་ཆོས་ཚོགས་ནི་ཇི་ལྟར་སྐྱོང་ནུས༌སམ།
1TI 3:6 དད་ལྡན་གསར་པ་རྣམས་ནི་དོ་དམ་པ་བྱེད་མི་རུང༌སྟེ། མི་དེ་ནི་རང་རློམ་ཆེ་བར་འགྱུར་བ་དང་བདུད་ཀྱི་ཉེས་ཆད་ནང་དུ་ལྷུང་ཉེན་ཆེ་བས༌སོ།།
1TI 3:7 ཡང་མི་གཞན་གྱིས་སྐུར་བ་མི་འདེབས་པ༌དང༌། བདུད་ཀྱི་རྙི་རྒྱ་རུ་མི་ཚུད་པའི༌ཕྱིར། དོ་དམ་པ་དེ་ནི་ཕྱི་ཕྱོགས་པ་རྣམས་ཀྱི་ཁྲོད་དུའང་ངེས་པར་མཚན་སྙན་ཅན་ཞིག་ཡིན་དགོས༌སོ།།
1TI 3:8 ལས་འཛིན་པ་རྣམས་ཀྱང་དེ་བཞིན་ཡིན་ཏེ། ངེས་པར་ཡ་རབས་ཚུལ་དང་མཐུན་ཞིང་ཁ་ཞེ་གཉིས་མེད་ཡིན༌པ། ཆང་རག་མང་པོ་མི་འཐུང༌བ། རྒྱུ་ནོར་མི་གཙང་བ་ལ་མི་རྔམ་པ་བཅས་ཡིན་དགོས་པ༌དང༌།
1TI 3:9 བསམ་པ་རྣམ་དག་གིས་དད་པའི་སྙིང་པོ་བརྟན་པོར་བསྲུང་དགོས་སོ།།
1TI 3:10 མི་དེ་རྣམས་ལ་ཐོག་མར་བརྟག་དགོས༌ཤིང༌། སྐྱོན་བརྗོད་རྒྱུ་ཅི་ཡང་མེད་ན་མི་དེ་རྣམས་ལས་འཛིན་པར་བསྐོ་རུང་བ་ཡིན།
1TI 3:11 བུད་མེད་རྣམས་ཀྱང་དེ་བཞིན་ཡིན་ཏེ། ངེས་པར་ཡ་རབས་ཚུལ་དང་མཐུན་ཞིང་ཕྲ་མ་མི་བྱེད༌པ། རང་ཚོད་ཟིན༌པ། དོན་ཀུན་ལ་བློ་སེམས་དཀར་བ་བཅས་ཡིན་དགོས་སོ།།
1TI 3:12 ལས་འཛིན་པ་ནི་ངེས་པར་ཆུང་མ་གཅིག་ཁོ་ནའི་ཁྱོ་ག་ཡིན་པ༌དང༌། བུ་ཕྲུག་དང་རང་གི་ཁྱིམ་ཚང་བདག་སྐྱོང་ལེགས་པོ་བྱེད་མཁན་ཞིག་ཡིན་དགོས།
1TI 3:13 ཅིའི་ཕྱིར་ཞེ་ན། ལས་འཛིན་པས་བྱ་བ་ལེགས་པར་བསྒྲུབས་ན་རང་ཉིད་ཡིད་དུ་འོང་བའི་གནས་སུ་སླེབས་པ༌དང༌། སྤོབས་པ་ཆེན་པོས་མཱ་ཤི་ཀ་ཡེ་ཤུ་ནང་གི་དད་པ་ལ་ཡིད་ཆེས་བརྟན་པོ་བྱེད་པའི་ཕྱིར༌རོ།།
1TI 3:14 ང་རང་ཁྱོད་ཀྱི་གམ་དུ་མྱུར་བ་མྱུར་བར་འགྲོ་འདོད་ཆེ་བས་སྔོན་ཚུད་ནས་དོན་འདི་རྣམས་ཁྱོད་ལ་ཡི་གེར་འབྲི་བཞིན་ཡོད༌དེ།
1TI 3:15 ང་རང་དུས་འགྱངས་ནས་མྱུར་དུ་མ་སླེབས་ན། ཁྱོད་ཀྱིས་ཀྱང་དཀོན་མཆོག་གི་ཁྱིམ་ཚང་ནང་དུ་ཇི་ལྟར་བྱེད་འོས་པ་ཤེས་པའི་ཕྱིར༌ཡིན་ཞིང་། ཁྱིམ་ཚང་དེ་ནི་གཏན་དུ་གསོན་པོར་བཞུགས་པའི་དཀོན་མཆོག་གི་ཆོས་ཚོགས༌དང༌། བདེན་པ་ཉིད་ཀྱི་ཀ་རྡོ་དང་རྨང་གཞི་ཡིན་ནོ།།
1TI 3:16 དད་གུས་ཀྱི་གསང་བ་ནི་རླབས་ཆེ་བ་ཞིག་ཡིན་པ་ཀུན་གྱིས་ཁས་ལེན་པར་གདོན་མི་ཟ༌སྟེ། མི་ཡི་ཤ་གཟུགས་བརྒྱུད་ནས་སྐྱབས་མགོན༌མངོན།། ཐུགས་ཉིད་ཀྱིས་ནི་རྣམ་དག་ཡིན་པ༌བསྟན།། ཕོ་ཉ་རྣམས་ནི་ཁོང་ལ་མཇལ་བ༌ཡིན།། མི་རིགས་དུ་མར་ཁོང་ཉིད་ཡོངས་སུ༌བསྒྲགས།། འཇིག་རྟེན་མི་རྣམས་ཁོང་ལ་དད་པར༌གྱུར།། གཟི་བརྗིད་ལྡན་པའི་ནམ་མཁའི་ཞིང་དུ༌དྲངས།། ཞེས༌པའོ།།
1TI 4:1 དེ་ཡང་དམ་པའི་ཐུགས་ཉིད་ཀྱིས་འདི་སྐད༌དུ། དུས་ཕྱི༌མར་ཁ་ཅིག་གིས་དད་པ་རིང་དུ་སྤངས༌ཏེ། མི་ལ་བསླུ་བྲིད་བྱེད་པའི་ལོག་སེམས་དང་གདོན་འདྲེའི་ལོག་ལྟ་ལ་བརྟེན་ངེས་ཞེས་གསལ་པོར་གསུངས་སོ།།
1TI 4:2 དེ་ནི་རྫུན་སྨྲ་མཁན་རྣམས་ཀྱི་ཚུལ་འཆོས་ལས་བྱུང༌ཞིང༌། མི་དེ་རྣམས་ཀྱི་བསམ་པ་ནི་ངར་ལྕགས་ཀྱིས་བསྲེགས་པ་དང་མཚུངས༌པས་སོ།།
1TI 4:3 མི་དེ་དག་གིས་མནའ་མ་ཚུར་ལེན་ཕར་བསྐྱལ་བྱེད་མི་རུང་བ༌དང༌། ཁ་ཟས་ལ་ལ་བཟའ་མི་རུང་བར་བྱེད། འོན་ཀྱང༌། དད་པ་ཅན་དང་བདེན་པ་ཉིད་རྟོགས་མཁན་རྣམས་ཀྱིས་དྲིན་ལན་ཞུ་བའི་ངང་ནས་ལོངས་སུ་སྤྱོད་པའི༌ཕྱིར། དཀོན་མཆོག་གིས་ཁ་ཟས་དེ་དག་མཛད༌པ་ཡིན་ནོ།།
1TI 4:4 དཀོན་མཆོག་གིས་བསྐྲུན་པ་ཐམས་ཅད་ནི་ལེགས་པོ་ཡིན༌པས། བཀའ་དྲིན་ཞུ་བའི་ངང་ནས་དང་དུ་བླངས་ན་འདོར་འོས་པ་གཅིག་ཀྱང་མེད༌དེ།
1TI 4:5 ཅིའི་ཕྱིར་ཞེ་ན། དེ་རྣམས་དཀོན་མཆོག་གི་བཀའ་དང་མི་ཡིས་གསོལ་བ་བཏབ་པའི་དབང་གིས་དམ་པར་གྱུར་པའི་ཕྱིར༌རོ།།
1TI 4:6 ཡང་ཁྱོད་ཀྱིས་དོན་འདི་དག་སྤུན་ཟླ་རྣམས་ལ་དྲན་སྐུལ་བྱེད༌ན། ཁྱོད་ནི་མཱ་ཤི་ཀ་ཡེ་ཤུའི་ཞབས་ཕྱི་པ་བཟང་པོ་ཞིག་ཡིན༌ཞིང༌། དད་པའི་བཀའ་དང་ཁྱོད་ཀྱིས་སྔར་ནས་དང་ལེན་བྱས་པའི་ཡང་དག་པའི་བསྟན་པ་ལས་ཁྱོད་ལ་སློབ་གསོ་འཐོབ༌པ་ཡིན་ནོ།།
1TI 4:7 ཡང་འཇིག་རྟེན་པའི་བཤད་རྒྱུན་དང་རྒན་མོ་རྣམས་ཀྱི་ཁུངས་ལུང་མེད་པའི་འཆལ་གཏམ་དག་རིང་དུ་སྤངས༌ཏེ། དད་གུས་ཐད་ལ་རང་ཉིད་སྦྱོང་བརྡར་བྱོས༌ཤིག
1TI 4:8 ལུས་ཀྱིས་རྩལ་སྦྱོང་བྱས་ན་ཕན་ཐོགས་ཅུང་ཙམ་ཡོད༌ཀྱང༌། དད་གུས་ནི་དོན་ཐམས་ཅད་ལ་ཕན་ཐོགས་ཡོད༌དེ། མི་ཚེ་འདི་དང་མ་འོངས་པའི་ཚེ་སྲོག་གཉིས་ལ་ཞལ་བཞེས་གནང་ཡོད་པས༌སོ།།
1TI 4:9 གཏམ་འདི་ནི་ཡིད་རྟོན་རུང་བ་དང་ཧ་ཅང་ཁས་ལེན་བྱེད་འོས་པ་ཞིག་ཡིན་ནོ།།
1TI 4:10 ད་ལྟ་བདག་ཅག་གིས་དོན་དེར་ངལ་བས་བརྩོན་པར༌བྱའོ།། ཅིའི་ཕྱིར་ཞེ་ན། བདག་ཅག་གིས་གཏན་དུ་གསོན་པོར་བཞུགས་པའི་དཀོན་མཆོག་ལ་རེ་སྨོན་བྱེད༌པ་དང༌། ཁོང་ནི་མི་ཐམས་ཅད་ཀྱི་སྐྱབས་མགོན་ཡིན་ཞིང་ལྷག་ཏུ་དད་ལྡན་རྣམས་ཀྱི་སྐྱབས་མགོན་ཡིན་པའི་ཕྱིར༌རོ།།
1TI 4:11 ཁྱོད་ཀྱིས་དོན་འདི་དག་མི་གཞན་ལ་ཁ་བསྒོ་དང་སློབ་སྟོན་བྱེད་དགོས༌ཤིང༌།
1TI 4:12 ཁྱོད་ཀྱིས་རང་ཉིད་ལོ་ན་གཞོན་པར་སུ་ལའང་མཐོང་ཆུང་བྱེད་དུ་མི་འཇུག༌པར། སྨྲ་བརྗོད༌དང༌། བྱ༌སྤྱོད། བྱམས༌སེམས། དད༌སེམས། རྣམ་དག་ཡིན་པ་བཅས་ནས་དད་ལྡན་རྣམས་ལ་མིག་དཔེ་སྟོན་པར༌གྱིས།
1TI 4:13 ང་རང་ཡོང་བའི་བར་དུ་ཁྱོད་ཀྱིས་གསུང་རབ་ཀློག་འདོན་དང༌། སྐུལ་སློང༌། སློབ་སྟོན་བཅས་བྱེད་པ་ལ་བརྩོན་པར་བྱའོ།།
1TI 4:14 ཁྱོད་ཀྱི་སེམས་ཁོང་དུ་ཡོད་པའི་དམ་པའི་ཐུགས་ཉིད་ཀྱི་གནང་སྦྱིན་ཏེ། དེ་སྔར་ཆོས་ཚོགས་ཀྱི་རྒན་པོ་རྣམས་ཀྱིས་ལུང་བསྟན་བརྒྱུད་ནས་ཁྱོད་ཀྱི་ལུས་ལ་ལག་པ་བཞག་པའི་དུས་སུ་ཐོབ་ཟིན་པ་དེར་མཐོང་ཆུང་མི་བྱའོ།།
1TI 4:15 མི་ཐམས་ཅད་ཀྱིས་ཁྱོད་རང་ཡར་རྒྱས་སུ་འགྲོ་བ་མཐོང་བར་འགྱུར་བའི་ཕྱིར། ཁྱོད་ཀྱིས་དོན་འདི་རྣམས་ཧུར་ཐག་གིས་བསྒྲུབ་ཅིང་བློ་སེམས་རྩེ་གཅིག་བྱེད་པར༌གྱིས།
1TI 4:16 ཁྱོད་ཀྱིས་རང་ཉིད་དང་རང་གི་སློབ་སྟོན་ལ་གཟབ་གཟབ་བྱས་ནས་དོན་དེའི་ཐད་ལ་སྙིང་རུས་སྐྱེད༌ཅིག ཅིའི་ཕྱིར་ཞེ་ན། དེ་ལྟར་བྱས་ན་ཁྱོད་དང་ཁྱོད་ཀྱི་གཏམ་ལ་ཉན་མཁན་རྣམས་ཀྱང་བསྐྱབ་ནུས་པའི་ཕྱིར༌རོ།།
1TI 5:1 དེ་ཡང་ཁྱོད་ཀྱིས་མི་རྒན་པ་ལ་སྐྱོན་བརྗོད་ནན་མོ་མི་བྱེད་པར་རང་གི་ཕ་བཞིན༌དང༌། ན་གཞོན་རྣམས་ལ་སྤུན་བཞིན༌དང༌།
1TI 5:2 བུད་མེད་རྒན་པ་རྣམས་ལ་མ་བཞིན༌དང༌། བུད་མེད་ན་གཞོན་རྣམས་ལ་ལྕམ་སྲིང་ལྟར་བསམ་པ་རྣམ་དག་གིས་ཁ་ཏ་བྱེད་པར༌གྱིས།
1TI 5:3 ཡུགས་མོ་དངོས་མ་རྣམས་ལ་བརྩི་བཀུར༌བྱའོ།།
1TI 5:4 འོན་ཀྱང༌། ཡུགས་མོ་ཞིག་ལ་བུ་ཕྲུག་དང་ཚ་བོའམ་ཚ་མོ་ཡོད༌ན། དེ་དག་གིས་ཐོག་མར་ཡུགས་མོ་ལ་རང་ཁྱིམ་ནས་སྲི་ཞུ་བྱེད་པ་དང༌། རང་གི་ཕ་མར་དྲིན་ལན་འཇལ་ཚུལ་ལ་གོམས་དགོས་པ་ཡིན། ཅིའི་ཕྱིར་ཞེ་ན། དེ་ནི་དཀོན་མཆོག་གི་སྤྱན་སྔར་དོན་བཟང་པོ་ཡིན་པའི་ཕྱིར་རོ།།
1TI 5:5 ཡུགས་མོ་དངོས་མ་ནི་ཁོ་མོ་གཅིག་པུར་ལུས་ཤིང་རྟེན་ས་གཞན་མེད་པ༌དང༌། དཀོན་མཆོག་ལ་རེ་སྨོན་བྱེད་ཅིང་ཉིན་མཚན་མེད་པར་ཞུ་བ་བྱེད་པ་དང་གསོལ་བ་བཏབ་ནས་སྡོད་པ་ཞིག་ཡིན།
1TI 5:6 འོན་ཀྱང༌། ལྟོ་གོས་གཏམ་ལ་ཆགས་པའི་ཡུགས་མོ་ནི་གསོན་པོའི་དུས་སུའང་ཤི་བ་དང༌འདྲའོ།།
1TI 5:7 དེ་རྣམས་ལ་སྐྱོན་བརྗོད་རྒྱུ་ཅི་ཡང་མེད་པར་བྱེད་པའི༌ཕྱིར། ཁྱོད་ཀྱིས་དོན་འདི་དག་གི་སྐོར་ནས་ཡུགས་མོ་རྣམས་ལ་ཁ་བསྒོ་གཏོང་བར༌གྱིས།
1TI 5:8 གལ༌ཏེ། སུ་ཞིག་གིས་རང་གི་གཉེན་ཉེ་ལ་ལྟ་སྐྱོང་མི་བྱེད་པ༌དང༌། ལྷག་པར་རང་གི་ཁྱིམ་མི་ལའང་ལྟ་སྐྱོང་མི་བྱེད༌ན། མི་དེ་ནི་དད་པ་དང་རིང་དུ་གྱེས༌ཤིང༌། དད་པ་མེད་པའི་མི་ལས་ཀྱང་ངན༌པའོ།།
1TI 5:9 ཡུགས་མོའི་མིང་ཐོ་ནང་དུ་མིང་འགོད༌ན། ཡུགས་མོ་ནི་ངེས་པར་ལོ་དྲུག་ཅུའི་ཡན་ལ་སླེབས་པ་ཞིག༌དང༌། སྐྱེས་པ་གཅིག་ཁོ་ནའི་ཆུང་མ་བྱས་མྱོང་བ་ཞིག༌དང༌།
1TI 5:10 དོན་བཟང་བསྒྲུབས་ནས་མཚན་སྙན་ཅན་ཞིག༌སྟེ། བུ་ཕྲུག་སྙོར་སྐྱོང་དང་མགྲོན་པོར་སྣེ་ལེན་བྱས་མྱོང་བ༌དང༌། དད་ལྡན་དམ་པ་རྣམས་ཀྱི་ཞབས་བཀྲུས་པ་དང་དཀའ་ངལ་ཅན་ལ་རོགས་རམ་བྱས་མྱོང༌བ། དོན་བཟང་པོའི་རིགས་ཐམས་ཅད་ཧུར་ཐག་གིས་བསྒྲུབས་མྱོང་བ་ཞིག་ཡིན་དགོས་སོ།།
1TI 5:11 འོན་ཀྱང༌། ལོ་ན་གཞོན་པའི་ཡུགས་མོ་རྣམས་མིང་ཐོ་ནང་དུ་འགོད་པར་མི༌བྱའོ།། ཅིའི་ཕྱིར་ཞེ་ན། ཡུགས་མོ་རྣམས་སྐྱབས་མགོན་མཱ་ཤི་ཀ་དང་འགལ་ནས་འདོད་ཆགས་རྒྱས་པའི་དུས༌སུ། གཉེན་སྒྲིག་བྱེད་འདོད་པའི་ཕྱིར་ཡིན༌ཏེ།
1TI 5:12 ཡུགས་མོ་རྣམས་སྔར་གྱི་དམ་བཅའ་དང་འགལ་བས་དེ་དག་ལ་སྐྱོན་འཛུགས་པར་འགྱུར།
1TI 5:13 ཁོ་མོ་རྣམས་ལེ་ལོའི་དབང་དུ་སོང་སྟེ་ཁྱིམ་ནས་ཁྱིམ་གཞན་རྣམས་སུ་ཉུལ༌ཞིང་། ལེ་ལོ་ཅན་ཡིན་པར་མ༌ཟད། ངག་ནས་མི་བཤད་དགུ་བཤད་དང་དོན་མེད་ཀྱི་བྱ་བར་ཇུས་གཏོགས་བྱེད་པར་དགའ་བ༌དང༌། སྨྲ་མི་འོས་པའི་གཏམ་ཡང༌སྨྲ་བ་ཡིན་ནོ།།
1TI 5:14 དེའི༌ཕྱིར། བདག་གིས་ལོ་ན་གཞོན་པའི་ཡུགས་མོ་རྣམས་ཀྱིས་ཡང་བསྐྱར་གཉེན་སྒྲིག་བྱས༌ཏེ། བུ་ཕྲུག་བཙའ་ཞིང་ཁྱིམ་སྐྱོང་བར་བསྐུལ་བ༌ཡིན། དེ་ནས་དགྲ་བོར་སྡིགས་དམོད་བྱེད་པའི་གླགས་མི་གཏོང་ངོ་།།
1TI 5:15 ཅིའི་ཕྱིར་ཞེ་ན། འགའ་ཤས་ཁ་ཕྱིར་འཁོར་ནས་བདུད་སཱ་ཏན་གྱི་རྗེས་སུ་འབྲངས་པའི་ཕྱིར༌རོ།།
1TI 5:16 ཆོས་ཚོགས་ཀྱིས་རྟེན་ས་མེད་པའི་ཡུགས་མོ་དངོས་མ་རྣམས་ལ་རོགས་རམ་བྱེད་པའི༌ཕྱིར། བུད་མེད་དད་ལྡན་གང་གི་ཁྱིམ་དུ་ཡུགས་མོ་ཡོད༌ན། ཁོ་མོར་རོགས་རམ་བྱེད་འོས་པ་ལས་ཆོས་ཚོགས་ལ་ཁག་འགེལ་མི་རུང༌ངོ་།།
1TI 5:17 དེ་ཡང་ཆོས་ཚོགས་ལ་བདག་སྐྱོང་ལེགས་པོ་བྱེད་པའི་རྒན་པོ་རྣམས་ལ་བཀུར་སྟི་ཆེན་པོ་བྱ་འོས༌ཤིང༌། དཀའ་སྡུག་ངང་ནས་དཀོན་མཆོག་གི་བཀའ་སྒྲོག་པ་དང་ཁྲིད་སྟོན་བྱེད་མཁན་ལ་དེ་བས་ཀྱང་བརྩི་བཀུར་བྱ་འོས་སོ།།
1TI 5:18 རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ། གཡུལ་ཁ་གཅོག་པའི་དུས༌སུ་བ་གླང་གི་མཆུ་ཏོ་མ༌སྡོམ་ཞེས་གསུངས་པ༌དང༌། ཡང་ཇི་སྐད༌དུ། ལས་ཀ་བྱེད་མཁན་རྣམས་ལ་གླ་ཆ་སྟེར་འོས་ཞེས་གསུངས་པའི་ཕྱིར༌ཡིན།
1TI 5:19 རྒན་པོ་ཞིག་ལ་སྐྱོན་ཡོད་པར་སྨྲ་བའི་དུས༌སུ། བདེན་དཔང་བྱེད་མཁན་གྱི་མི་གཉིས་སམ་གསུམ་མེད་ན་ཁས་ལེན་བྱ་མི་རུང༌ངོ་།།
1TI 5:20 མི་གཞན་རྣམས་ཀྱང་འཇིགས་པའི༌ཕྱིར། མུ་མཐུད་དུ་སྡིག་པ་བྱེད་མཁན་ལ་མི་ཐམས་ཅད་ཀྱི་མདུན་དུ་སྐྱོན་བརྗོད༌ཅིག
1TI 5:21 ངས་དཀོན་མཆོག་དང་མཱ་ཤི་ཀ་ཡེ་ཤུ་དང་ཁོང་གིས་བདམས་པའི་ཕོ་ཉ་རྣམས་ཀྱི་སྤྱན་སྔར་ཁྱོད་ལ་གདམས་པར་བྱ༌སྟེ། ཕྱོགས་ལྷུང་མེད་པར་བསླབ་བྱ་འདི་དག་བསྲུང་བར༌གྱིས། ལས་གང་ཞིག་བྱེད་ནའང་ཕྱོགས་རིས་མ་འཛིན༌ཅིག
1TI 5:22 མི་ཡི་ལུས་ལ་ལག་པ་འཇོག་པར་བྲེལ་འཚབ་མི་ལངས་པར༌གྱིས། མི་གཞན་རྣམས་ཀྱི་སྡིག་པའི་ལས་ལ་མི་ཞུགས་པར་རང་ཉིད་རྣམ་དག་ཏུ་བསྲུང་བར༌གྱིས།
1TI 5:23 ཁྱོད་ཀྱི་ཕོ་བ་མི་བདེ་ཞིང་བསྟུད་མར་ན་ཚ་བྱུང༌བས་ན། ཕྱིས་སུ་ཆུ་ཁོ་ན་མི་འཐུང་བར་རྒུན་ཆང་ཡང་ཉུང་ཙམ་འཐུང་བར༌གྱིས།
1TI 5:24 མི་ཁ་ཤས་ཀྱི་སྡིག་པ་ནི་མངོན་གསལ་ཡིན༌ཏེ། སྔོན་ལ་ཁྲིམས་ཐག་གཅོད་སར་སླེབས་པ་ལྟ༌བུ་ཡིན་ནོ།། ཡང་མི་ཁ་ཤས་ཀྱི་སྡིག་པ་ནི་སྡིག་ཅན་དག་གི་རྗེས་སུ་འབྲངས་ནས་སླེབ་ངེས་སོ།།
1TI 5:25 དེ་བཞིན་དུ་ལས་བཟང་པོ་རྣམས་ཀྱང་མངོན་གསལ་ཡིན༌ཞིང༌། མངོན་གསལ་མ་ཡིན་པ་རྣམས་ཀྱང་སྦ་མི་ནུས༌སོ།།
1TI 6:1 དེ་ཡང་དཀོན་མཆོག་གི་མཚན་དང་བསྟན་པ་ལ་སྐུར་བ་མི་འདེབས་པའི༌ཕྱིར། གཉའ་ཤིང་གི་འོག་ཏུ་ཡོད་པའི་གཡོག་པོ་ཐམས་ཅད་ཀྱིས་རང་རང་གི་བདག་པོ་རྣམས་ལ་ཕྱོགས་ཀུན་ནས་བརྩི་བཀུར་བྱེད་འོས་པར་རྩིས་ཤིག
1TI 6:2 གཡོག་པོ་སུ་ཞིག་ལ་དད་པ་དང་ལྡན་པའི་བདག་པོ་ཡོད༌ན། ཁོ་རང་སྤུན་ཟླ་ཡིན་པའི་དབང་གིས་བདག་པོར་མཐོང་ཆུང་མི་བྱེད༌པར། ཞབས་ཕྱི་ལས་ཕན་ཐོགས་པའི་བདག་པོ་རྣམས་ནི་དད་པ་ཅན་དང་གཅེས་སུ་འོས་པའི་མི་ཡིན༌པས། དེ་རྣམས་ལ་ལྷག་པར་ཞབས་ཕྱི་བསྒྲུབ་དགོས། ཁྱོད་ཀྱིས་དོན་དེ་རྣམས་མི་གཞན་དག་ལ་བསླབ་པ་དང་བསྐུལ་བར་བྱའོ།།
1TI 6:3 གལ༌ཏེ། སུ་ཞིག་གིས་ལྟ་བ་མི་མཐུན་པ་བསྒྲགས་ནས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡང་དག་པའི་གསུང་དང་དད་གུས་དང་མཐུན་པའི་ཆོས་དེ་ཁས་མི་ལེན༌ན།
1TI 6:4 མི་དེ་ནི་ང་རྒྱལ་ཆེ་བ་དང་ཅི་ཡང་མི་ཤེས་ཤིང་ནན་འདྲི་བྱེད་པ་དང་ཁ་རྩོད་ཚིག་རྩོད་བྱེད་པ་ཁོ་ནར་དགའ་བ་ཞིག་ཡིན། དེ་ལས་ཕྲག་དོག༌དང༌། རྩོད༌པ། དམོད༌ཚིག དོགས་པ་ངན་པ་བཅས་འབྱུང་བ༌དང༌།
1TI 6:5 བསམ་པ་ངན་པར་གྱུར་ཅིང་བདེན་པ་ཉིད་དང་བྲལ་བའི་རྩོད་པའང་རྒྱུན་ཆད་མེད་པར་འབྱུང༌། མི་དེ་དག་གིས་དད་གུས་བྱེད་པ་ནི་རྒྱུ་ནོར་འཐོབ་པའི་ཐབས་ལམ་ཡིན་པར་བསམས་སོ།།
1TI 6:6 འོན་ཀྱང༌། དད་གུས་བྱེད་པ་ལ་འདོད་ཆུང་ཆོག་ཤེས་ལྡན་ན་ཕན་ཐོགས་ཤིན་ཏུ་ཆེའོ།།
1TI 6:7 རྒྱུ་མཚན་ནི་བདག་ཅག་གིས་འཇིག་རྟེན་འདིར་ཅི་ཡང་ཁྱེར་མ་འོངས༌ལ། འཇིག་རྟེན་ནས་ཀྱང་ཅི་ཡང་འཁྱེར་མི་ནུས་པའི་ཕྱིར༌རོ།།
1TI 6:8 དེ་བས་ཁ་ལ་ཟས་དང་རྒྱབ་ལ་གོས་ཡོད་ན་ཡིད་ཚིམ་དགོས་སོ།།
1TI 6:9 འོན་ཀྱང༌། ཕྱུག་པོར་འགྱུར་འདོད་པ་རྣམས་ནི་ཉམས་ཚོད་དང་རྙི་རྒྱ་རུ་ཚུད༌པ་དང༌། བླུན་ཞིང་རྨོངས་པ་དང་གནོད་པ་ཆེ་བའི་འདོད་རྔམ་སྣ་ཚོགས་ཀྱི་ནང་དུ་ལྷུང་སྟེ་རང་ཉིད་བརླག་ཅིང་འཇིག་པར་འགྱུར་རོ།།
1TI 6:10 ཅིའི་ཕྱིར་ཞེ་ན། རྒྱུ་ནོར་ལ་རྔམ་པ་ནི་ལས་ངན་པ་སྣ་ཚོགས་ཀྱི་འབྱུང་རྩ་ཡིན༌ལ། མི་ཁ་ཤས་རྒྱུ་ནོར་ལ་ཞེན་ཆགས་ཏེ་དད་པ་དང་ཁ་བྲལ་ནས་རང་གིས་རང་ཉིད་སྡུག་བསྔལ་མང་པོས་བརྟོལ་བར་བྱེད་པའི་ཕྱིར་རོ།།
1TI 6:11 འོན་ཀྱང་། ཁྱོད་ནི་དཀོན་མཆོག་ལ་གཏོགས་པའི་མི་ཡིན་པས་གོང་གི་དོན་འདི་དག་དང་འབྲལ་བར༌གྱིས། དྲང་བདེན་དང་དད་གུས། དད་སེམས། བྱམས༌པ། བཟོད༌བསྲན། ཞི་དུལ་བཅས་བསྙེག་པར་བྱོས།
1TI 6:12 ཁྱོད་ཀྱིས་དད་པའི་ཆེད་དུ་འཐབ་འཛིང་བཟང་པོ་བྱེད་པ་དང་། མཐའ་མེད་པའི་ཚེ་སྲོག་ཀྱང་གཟུང་བར་གྱིས་ཤིག ཁྱོད་ནི་དེའི་ཆེད་དུ་ཞལ་འབོད་གནང་བ༌དང༌། ཁྱོད་ཀྱིས་ཀྱང་དཔང་པོ་བྱེད་མཁན་མང་པོའི་ཁྲོད་ནས་བདེན་དཔང་བཟང་པོ་བྱས་མྱོང༌བ་ཡིན།
1TI 6:13 བདག་གིས་སྲོག་ལྡན་ཐམས་ཅད་ལ་ཚེ་སྲོག་གནང་མཁན་དཀོན་མཆོག་གི་སྤྱན་དྲུང༌དང༌། ཕོན་ཏིའུ་པི་ལ་ཏུའི་མདུན༌དུ་བདེན་དཔང་བཟང་པོ་མཛད་མྱོང་མཁན་མཱ་ཤི་ཀ་ཡེ་ཤུའི་སྤྱན་སྔ་ནས་ཁྱོད་ལ་གདམས་པར་བྱ༌སྟེ།
1TI 6:14 ཁྱོད་ཀྱིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་མངོན་སུམ་དུ་ཕེབས་ཡོང་བའི་བར༌དུ། བཀའ་དེ་ལ་སྐྱོན་དང་དྲི་མས་མ་གོས་པར་བསྲུང་བར་བྱའོ།།
1TI 6:15 དུས་ལ་བབས༌པ་ན། དཀོན་མཆོག་གིས་ཐམས་ཅད་མངོན་པར་མཛད་ངེས༌ཡིན་ལ། དཀོན་མཆོག་ནི་བསྟོད་པར་འོས་པ༌དང༌། ཀུན་ལ་དབང་མཛད་མཁན་ཁོ་ན༌ཉིད། རྒྱལ་པོ་རྣམས་ཀྱི་རྒྱལ་པོ་དང་གཙོ་བོ་རྣམས་ཀྱི་གཙོ་བོ༌སྟེ།
1TI 6:16 ཁོང་ནི་ནམ་ཡང་འཆི་བ་མེད་པ་ཁོ་ན༌ཉིད། མི་རྣམས་ཉེ་སར་ཙམ་ཡང་འགྲོ་ཐབས་མེད་པའི་འོད་ཟེར་ནང་དུ་བཞུགས་པ༌དང༌། མི་སུས་ཀྱང་མཐོང་མ་མྱོང་ཞིང་མཐོང་ཡང་མི་ནུས་པ་དེ་ཉིད་ལགས་སོ།། ཁོང་ལ་བཀུར་བསྟི་དང་རྫོགས་མཐའ་མེད་པའི་མངའ་ཐང་ལྡན་པར༌ཤོག ཨ༌མེན།
1TI 6:17 ཁྱོད་ཀྱིས་འཇིག་རྟེན་འདིར་ཕྱུག་པོ་ཡིན་པ་རྣམས་ལ་ང་རྒྱལ་མི་བྱེད་པ་དང་མི་རྟག་པའི་རྒྱུ་ནོར་ལ་བློ་མི་གཏོད༌པར། བདག་ཅག་ལ་རྒྱུ་ནོར་ལོངས་སྤྱོད་ཚད་མེད་གནང་མཁན་ཏེ་དཀོན་མཆོག་ཁོ་ནར་བརྟེན་འོས་པའི་བཀའ་བསྒོ་བར་བྱའོ།།
1TI 6:18 ཡང་ཁོ་རྣམས་ལ་ལས་བཟང་པོ་བྱེད་པ༌དང༌། དོན་བཟང་མང་དུ་བསྒྲུབ༌པ། གཏོང་ཕོད་ཆེ༌བ། མི་གཞན་ལ་སྦྱིན་པ་གཏོང་བར་དགའ་དགོས་པ་དང་།
1TI 6:19 དེ་བཞིན་དུ་ཚེ་སྲོག་དངོས་མ་དེ་ཉིད་འཛིན་པའི་ཕྱིར། རང་གི་ཆེད་དུ་མ་འོངས་པར་རྨང་གཞི་བརྟན་པོའི་ནོར་བུ་གསོག་དགོས་པ་བཅས་ཀྱི་བཀའ་བསྒོ་བར་བྱའོ།།
1TI 6:20 ཀྱེ། ཐི་མོ༌ཐེ། ཁྱོད་ལ་བཅོལ་ཞིང་གདམས་པ་རྣམས་བསྲུང་བར་བྱའོ།། འཇིག་རྟེན་གྱི་སྙིང་པོ་མེད་པའི་འཆལ་གཏམ༌དང༌། བདེན་པ་ཉིད་དང་འགལ་ཞིང་ཡོན་ཏན་དུ་རློམ་པའི་འཁྲུལ་ཤེས་བཅས་ལ་ཁ་འབྲལ་བར༌གྱིས།
1TI 6:21 མི་འགའ་ཞིག་གིས་རང་ཉིད་ལ་ཡོན་ཏན་དེ་ལྟ་བུ་ལྡན་པར་སྨྲ་ཞིང་དད་པ་དང་ཁ་བྲལ་བའོ།། ཐུགས་རྗེ་ནི་རྟག་ཏུ་ཁྱོད་ཅག་དང་མཉམ་དུ་གནས་པར༌སྨོན།། །།
2TI 1:1 དེ་ཡང་ཕོལ་ལོལ་བདག་ནི་དཀོན་མཆོག་གི་ཐུགས་དགོངས་དང་མཱ་ཤི་ཀ་ཡེ་ཤུའི་ནང་དུ་ཡོད་པའི་ཚེ་སྲོག་གི་ཞལ་བཞེས་གནང་བ་བཞིན་མཱ་ཤི་ཀ་ཡེ་ཤུའི་སྐུ་ཚབ་པ་ཞིག་ཡིན་ནོ།།
2TI 1:2 འཕྲིན་ཡིག་འདི་ནི་བདག་གི་སྙིང་ནས་བརྩེ་བའི་བུ་ཐི་མོ་ཐེ་ལ་སྤྲིངས་པ་ཡིན༌ཏེ། ཡབ་དཀོན་མཆོག་དང་བདག་ཅག་གི་གཙོ་བོ་མཱ་ཤི་ཀ་ཡེ་ཤུ་ནས་ཁྱོད་ལ་བྱམས་དང་སྙིང༌རྗེ། ཞི་བདེ་བཅས་འཐོབ་པར༌སྨོན།
2TI 1:3 བདག་གིས་དཀོན་མཆོག་ལ་བཀའ་དྲིན༌ཞུའོ།། ངས་རང་གི་མེས་པོས་མཛད་པ་བཞིན་བསམ་པ་རྣམ་དག་གིས་དཀོན་མཆོག་ལ་བསྙེན་བཀུར་བྱེད་ཅིང༌། གསོལ་བ་འདེབས་པའི་ཚེ་ཁྱོད་རང་ཉིན་མཚན་མེད་པར་དྲན༌པ་དང༌།
2TI 1:4 དེ་སྔར་ཁྱོད་ཀྱི་མིག་ལས་མཆི་མ་བཞུར་མྱོང་བ་ཡིད་ལ་དྲན་ཞིང༌། བདག་གི་སེམས་ནི་དགའ་སྤྲོས་ཁེངས་པའི༌ཕྱིར། ཁྱོད་དང་ངོ་འཕྲད་འདོད་ཤིན་ཏུ་ཆེའོ།།
2TI 1:5 ཁྱོད་ཀྱི་བཅོས་མ་མིན་པའི་དད་པ༌ནི། ཐོག་མར་ཁྱོད་ཀྱི་རྨོ་མོ་ལོ་ཨེ་སི་དང་ཡུམ་ཨིའུ་ནེ་ཀེའི་སེམས་སུ་ཡོད་པ་དེ་ངས་ཡིད་ལ་ཤར༌ཞིང༌། ཁྱོད་ཀྱི་སེམས་སུའང་ཡོད་པར་བདག་ལ་ཡིད་ཆེས་བརྟན་པོ་ཡོད།
2TI 1:6 དེའི༌ཕྱིར། བདག་གིས་ཁྱོད་ལ་དྲན་སྐུལ༌བྱ་སྟེ། ངས་སྔོན་ཆད་རང་གི་ལག་པ་ཁྱོད་ཀྱི་ལུས་ལ་བཞག་པ་བརྒྱུད་ནས། ཁྱོད་ལ་ཐོབ་པའི་དཀོན་མཆོག་གི་གནང་སྦྱིན་དེ་ཁྱོད་ཀྱིས་སླར་ཡང་མེ་ལྟར་གསོ་བར༌གྱིས།
2TI 1:7 ཅིའི་ཕྱིར་ཞེ་ན། དཀོན་མཆོག་གིས་བདག་ཅག་ལ་སྡར་མའི་སེམས་གནང་བ་མ་ཡིན༌པར། ཞུམ་མེད་དང་བྱམས༌པ། རང་གཅུན་ཐུབ་པ་བཅས་ཀྱི་སེམས་གནང་བའི་ཕྱིར༌རོ།།
2TI 1:8 དེ་བས་ན། ཁྱོད་ཀྱིས་བདག་ཅག་གི་གཙོ་བོ་ལ་བདེན་དཔང་བྱེད་པ༌དང༌། ཡང་ན་ཁོང་གི་ཆེད་དུ་ང་རང་བཙོན་དུ་བཅུག་ཡོད་པ་ནི་ངོ་ཚ་ཞིག་ཏུ་མི་བརྩི༌བར། དཀོན་མཆོག་གི་ནུས་མཐུ་ལ་བརྟེན་ནས་འཕྲིན་བཟང་གི་ཆེད༌དུ། བདག་དང་ལྷན་ཅིག་སྡུག་བསྔལ་མྱོང་བར༌གྱིས།
2TI 1:9 དཀོན་མཆོག་གིས་བདག་ཅག་བསྐྱབས་ཤིང་དམ་པའི་ཞལ་འབོད་ཀྱིས་བོས་པ་ཡིན་ལ། དེ་ནི་བདག་ཅག་གིས་ཅི་བྱས་པ་བཞིན་ཐོབ་པ་མ་ཡིན༌པར། ཁོང་གི་ཐུགས་དགོངས་དང་ཐུགས་རྗེ་བཞིན་དུ་མཛད༌པ་ཡིན་ནོ།། ཐུགས་རྗེ་ནི་དུས་ཀྱི་ཐོག་མའི་སྔ་རོལ་ནས་མཱ་ཤི་ཀ་ཡེ་ཤུ་བརྒྱུད་ནས་བདག་ཅག་ལ་གནང་བ་ཡིན༌མོད།
2TI 1:10 འོན་ཀྱང་ད་ལྟ་བདག་ཅག་གི་སྐྱབས་མགོན་མཱ་ཤི་ཀ་ཡེ་ཤུ་དངོས་སུ་བྱོན་པ་བརྒྱུད་ནས་ཐུགས་རྗེ་དེ་ཕྱིར་མངོན་པ་ཡིན༌ལ། ཁོང་གིས་འཆི་བ་བཅོམ་ཞིང་འཕྲིན་བཟང་བརྒྱུད་ནས་འཇིག་པ་མེད་པའི་ཚེ་སྲོག་མངོན་གསལ་དུ་བསྟན་ཏོ།།
2TI 1:11 འཕྲིན་བཟང་འདིའི་ཆེད་དུ་ང་རང་ཆོས་སྒྲོག་མཁན༌དང༌། སྐུ་ཚབ༌པ། དགེ་རྒན་བཅས་སུ་བསྐོས་པ༌དང༌།
2TI 1:12 དོན་འདིའི་རྐྱེན་གྱིས་བདག་གིས་ཀྱང་སྡུག་བསྔལ་དེ་དག་མྱོང༌མོད། འོན་ཀྱང༌། ང་རང་དོན་འདིར་ངོ་མི་གནོང༌ངོ་།། ཅིའི་ཕྱིར་ཞེ་ན། བདག་གིས་སུ་ལ་དད་པ་བྱེད་པ་ཤེས་ཤིང་ཉིན་མོ་དེ་སླེབས་པའི་བར༌དུ། ཁོང་ལ་སྐྱབས་སུ་བཅོལ་བ་གང་ཞིག་ཁོང་གིས་བསྲུང་ནུས་པར་བདག་ལ་ཡིད་ཆེས་བརྟན་པོ་ཡོད་པའི་ཕྱིར༌རོ།།
2TI 1:13 ཡང་ཁྱོད་ཀྱིས་རྟག་ཏུ་མཱ་ཤི་ཀ་ཡེ་ཤུའི་ནང་དུ་ཡོད་པའི་དད་སེམས་དང་བྱམས་པ་ལ་བརྟེན་ནས། བདག་གི་ངག་ལས་ཐོས་པའི་ཡང་དག་པའི་བསྟན་པ་བསྲུང་བར་བྱའོ༎
2TI 1:14 དེ་སྔར་ཁྱོད་ལ་བཅོལ་བའི་དོན་བཟང་པོ༌དེ། ཁྱོད་ཀྱིས་བདག་ཅག་གི་སེམས་ཁོང་དུ་བཞུགས་པའི་དམ་པའི་ཐུགས་ཉིད་ལ་བརྟེན་ནས་བརྟན་པོར་བསྲུང་བར༌གྱིས།
2TI 1:15 ཨེ་ཞི་ཡཱ་ཡུལ་དུ་ཡོད་པའི་མི་ཐམས་ཅད་ཀྱིས་ང་རང་སྤངས་པ་ནི་ཁྱོད་ཀྱིས་ཤེས་པ༌དང༌། དེ་དག་གི་ཁྲོད་དུ་ཕི་གེལ་ལུ་དང་ཧེར་མོ་གེ་ནཱ་གཉིས་ཀྱང་ཡོད་དོ།།
2TI 1:16 ཨོ་ནེ་སི་ཕུ་རུའི་ཁྱིམ་མི་རྣམས་ལ་གཙོ་བོས་ཐུགས་རྗེ་གནང་བར༌སྨོན། ཅིའི་ཕྱིར་ཞེ་ན། ཁྱིམ་བདག་དེས་ཐེངས་མང་པོར་བདག་ལ་སེམས་གསོ་གནང་ཞིང༌། ང་རང་ལྕགས་སྒྲོག་གིས་བཅིངས་པའི་དོན་དེ་ངོ་ཚ་ཞིག་ཏུ་མ་བརྩིས༌པར།
2TI 1:17 དེ་ལས་ལྡོག་སྟེ་ཁོ་རང་རོ་མཱ་རུ་ཡོད་པའི་དུས༌སུ། འབད་པའི་ངང་ནས་ང་རང་བཙལ་ནས་རྙེད་པའི་ཕྱིར༌རོ།།
2TI 1:18 མ་འོངས་པའི་ཉིན་མོ༌དེར། གཙོ་བོས་རང་ཉིད་ཀྱི་ཐུགས་རྗེ་ཁོ་རང་ལ་གནང་བར༌སྨོན། ཁོས་ཨེ་ཕེ་སི་ནས་བདག་ལ་ཇི་ལྟར་ཞབས་ཕྱི་མང་དུ་བྱས་པ་ཁྱོད་ཀྱིས་ཤེས་པ་ཡིན་ནོ༎
2TI 2:1 དེ་ལྟར་ཡིན་པས། བདག་གི༌བུ། ཁྱོད་ནི་མཱ་ཤི་ཀ་ཡེ་ཤུའི་ནང་དུ་ཡོད་པའི་ཐུགས་རྗེ་ལ་བརྟེན་ནས་སྤོབས་པ་དང་ལྡན་པར་གྱུར༌ཅིག
2TI 2:2 ཁྱོད་ཀྱིས་དཔང་པོ་བྱེད་མཁན་མང་པོའི་མདུན༌དུ། བདག་གི་ངག་ལས་ཐོས་པའི་བསླབ་བྱ༌དག་ནི། མི་གཞན་ལ་སློབ་སྟོན་བྱེད་ནུས་པ་དང་ཡིད་རྟོན་རུང་བའི་མི་རྣམས་ལའང་བཅོལ་བར༌གྱིས།
2TI 2:3 ཁྱོད་ཀྱིས་མཱ་ཤི་ཀ་ཡེ་ཤུའི་དམག་མི་ཕུལ་བྱུང་ཅན་དང་མཚུངས་པར་བདག་དང་མཉམ་དུ་སྡུག་བསྔལ་མྱང༌དགོས་སོ།།
2TI 2:4 དམག་མི་སུས་ཀྱང་དམག་དཔོན་ཐུགས་དགྱེས་པར་བྱ༌ཆེད། རང་ཉིད་འཇིག་རྟེན་གྱི་བྱ་བའི་ནང་དུ་ལྷུང་བར་མི་བྱེད།
2TI 2:5 ཡང་སུ་ཞིག་གིས་ལུས་རྩལ་འགྲན་བསྡུར་བྱེད༌སྐབས། སྒྲིག་ལམ་བཞིན་དུ་འགྲན་བསྡུར་མ་བྱས་ན་དེ་ལ་རྒྱལ་ཁའི་ཅོད་པན་མི་འཐོབ་བོ།།
2TI 2:6 ཡང་ལུས་ཤུགས་ངལ་རྩོལ་བྱེད་པའི་ཞིང་པ་ལ་ཐོག་མར་འབྲུ་རིགས་ཀྱི་སྐལ་བ་འཐོབ་འོས།
2TI 2:7 གཙོ་བོས་ཁྱོད་ལ་དོན་ཀུན་རྟོགས་པའི་བློ་རིག་གནང་ངེས༌པས། བདག་གིས་སྨྲས་པ་རྣམས་ལ་ཁྱོད་ཀྱིས་ཀྱང་བསམ་མནོ་གཏོང་བར༌གྱིས།
2TI 2:8 ཁྱོད་ཀྱིས་ཡེ་ཤུ་མཱ་ཤི་ཀ་ཡིད་ལ་གཟུང་བར་བྱའོ།། བདག་གིས་སྒྲོག་པའི་འཕྲིན་བཟང་བཞིན། ཁོང་ནི་དཱ་བིད་ཀྱི་གདུང་རྒྱུད་ཡིན་ཞིང་སྐུ་གྲོངས་པ་ནས་སླར་གསོན་པ༌དེ་ཡིན།
2TI 2:9 འཕྲིན་བཟང་འདིའི་ཆེད་དུ་བདག་གིས་སྡུག་བསྔལ་མྱོང་བ་དང༌། ཐ་ན་ང་རང་ཉེས་ཅན་བཞིན་དུ་ལྕགས་སྒྲོག་གིས་ཀྱང་བཀྱིགས་མོད། འོན་ཀྱང་དཀོན་མཆོག་གི་བཀའ་ནི་འཁྱིག་མི་ཐུབ་བོ།།
2TI 2:10 དེའི༌ཕྱིར། བདམས་པའི་མི་རྣམས་ཀྱི་ཆེད༌དུ། བདག་གིས་དོན་ཀུན་ལ་བཟོད་བསྲན་བྱེད་བཞིན་ཡོད༌དེ། མི་དེ་རྣམས་ལའང་མཱ་ཤི་ཀ༌ཡེ་ཤུའི་ནང་དུ་ཡོད་པའི་ཐར་པ་དང་མཐའ་མེད་པའི་གཟི་བརྗིད་འཐོབ་པའི་ཕྱིར༌རོ།།
2TI 2:11 དེ་ལ་ཡིད་རྟོན་རུང་བའི་གཏམ་ཞིག་ཡོད་པ་འདི་ལྟ༌སྟེ། བདག་ཅག་ཁོང་དང་ལྷན་ཅིག་གྲོངས་པས༌ན།། ཁོང་དང་ལྷན་དུ་གསོན་པ་གདོན་མི༌ཟ།།
2TI 2:12 བདག་ཅག་གིས་ཀྱང་བཟོད་བསྲན་བྱེད་ནུས༌ན།། ཁོང་དང་ལྷན་ཅིག་རྒྱལ་སྲིད་བསྐྱང་བར༌འགྱུར།། བདག་ཅག་ཁོང་ལ་ངོ་ལོག་བྱས་གྱུར༌ན།། ཁོང་གིས་བདག་ཅག་ཁས་ལེན་མི་མཛད་དོ།།
2TI 2:13 བདག་ཅག་ཁ་བཤད་ཚིག་ལ་མི་གནས༌ཀྱང་།། ཁོང་ནི་རང་ཚིག་སྔ་ཕྱི་འགལ་མིན་པས༎ སྔར་བཞིན་རང་གི་གསུང་ལ་གནས་པར༌འགྱུར།། ཞེས༌པའོ།།
2TI 2:14 ཁྱོད་ཀྱིས་མི་གཞན་རྣམས་ལ་གོང་གི་དོན་དེ་དག་དྲན་སྐུལ་བྱོས། དཀོན་མཆོག་གི་སྤྱན་སྔར་ཁོ་རྣམས་ལ་ཚིག་རྩོད་མི་བྱེད་པའི་བཀའ་བསྒོ་བར་གྱིས། ཚིག་རྩོད་ཙམ་ལ་ཕན་པ་ཅི་ཡང་མེད་པ་དང་ཉན་མཁན་རྣམས་ཀྱི་སེམས་བརླག་པར་བྱེད་པའི་རྒྱུ་ཁོ༌ན་ཡིན་ནོ།།
2TI 2:15 ཁྱོད་ཀྱིས་དཀོན་མཆོག་གི་དྲུང་དུ་ཚོད་བགམ་ཐེག་པའི་མི་ཞིག་སྟེ། ངོ་གནོང་མི་དགོས་པའི་བཟོ་བ་ཞིག་བྱེད་པ་དང་། བདེན་པའི་བཀའ་ཡང་དག་པར་སྟོན་པ་ལ་བརྩོན་པར་བྱའོ།།
2TI 2:16 འཇིག་རྟེན་གྱི་སྙིང་པོ་མེད་པའི་འཆལ་གཏམ་གྱིས་སྔར་ལས་ཀྱང་དད་གུས་མེད་པའི་གནས་སུ་འདྲེན་པར་བྱེད༌པས། ཁྱོད་ནི་དེ་དག་དང་རིང་དུ་འབྲལ་བར༌གྱིས།
2TI 2:17 མི་དེ་དག་གི་གཏམ་ནི་འདྲུལ་ནད་དང་མཚུངས་པར་ཚབས་ཆེན་དུ་འགྲོ༌ཞིང༌། མི་དེ་དག་གི་ཁྲོད་དུ་ཧི་མེ་ནཱ་ཡུ་དང་ཕི་ལེ་ཏི་གཉིས་ཀྱང་ཡོད༌ལ།
2TI 2:18 ཁོ་གཉིས་བདེན་པ་ཉིད་དང་བྲལ་ཞིང་སླར་གསོན་པར་འགྱུར་བའི་དོན་ནི་འདས་ཟིན་པ་ཡིན་ཞེས་སྨྲས་ནས་མི་ཁ་ཤས་ཀྱི་དད་པར་གནོད་བསྐྱལ་ཏོ།།
2TI 2:19 འོན་ཀྱང༌། དཀོན་མཆོག་གི་རྨང་གཞི་བརྟན་པོ་དེ་ནི་བཙུགས་ཟིན༌ཅིང༌། དེའི་སྟེང་དུ་རྟགས་མཚན་ཡང་འདི་ལྟར་བཀོད་ཡོད༌དེ། གཙོ་བོས་སུ་ཞིག་རང་ཉིད་ཀྱི་མི་ཡིན་པ་མཁྱེན་ནོ་ཞེས༌དང༌། ཡང་གཙོ་བོའི་མཚན་བརྗོད་མཁན་ཐམས་ཅད་ནི་ལས་ངན་པ་དང་ཁ་འབྲལ་དགོས་ཞེས༌པའོ།།
2TI 2:20 ཕྱུག་པོའི་ཁང་ཆེན་དུ་གསེར་སྣོད་དང་དངུལ་སྣོད་ལས༌གཞན། ཤིང་སྣོད་དང་རྫ་སྣོད་ཀྱང་ཡོད༌དེ། ལ་ལ་ནི་མཆོག་ཏུ་བཀོལ་ཞིང་ལ་ལ་ནི་དམན་པར་བཀོལ༌བ་ཡིན་ནོ།།
2TI 2:21 དེ་བཞིན་དུ། སུ་ཞིག་གིས་རང་ཉིད་གཙང་མར་བཟུང་སྟེ་དམན་པའི་དོན་རྣམས་སྤངས༌ན། སྣོད་མཆོག་ཏུ་འགྱུར་ངེས་ཤིང༌། དམ་པར་མཛད༌པ་དང་། བདག་པོ་ལ་ཕན༌པ། ལས་བཟང་པོའི་རིགས་ཐམས་ཅད་བསྒྲུབ་པར་སྟ་གོན་བྱས་ཟིན་པའོ།།
2TI 2:22 ཡང་ཁྱོད་ཀྱིས་ན་གཞོན་གྱི་འདོད་ཆགས་སྤངས༌ཏེ། བསམ་པ་རྣམ་དག་གིས་གཙོ་བོ་ལ་གསོལ་བ་འདེབས་མཁན་རྣམས་དང་ལྷན་ཅིག་དྲང་བདེན་དང༌། དད༌པ། བྱམས༌པ། ཞི་བདེ་བཅས་ལ་བརྩོན་པར༌གྱིས།
2TI 2:23 བླུན་ཞིང་རྨོངས་པའི་ཁ་རྩོད་ཀྱིས་རྩོད་གཞི་སློང་བ་ཁྱོད་ཀྱིས་ཤེས་པས་དོན་དེའི་རིགས་རྩ་བ་ནས་སྤང་དགོས་སོ།།
2TI 2:24 གཙོ་བོའི་ཞབས་ཕྱི་པ་རྣམས་ཀྱིས་ཁ་རྩོད་ཚིག་རྩོད་མི་བྱེད༌པར། མི་ཐམས་ཅད་ལ་ཞི་བའི་རྣམ་འགྱུར་འཛིན་པ༌དང༌། སློབ་སྟོན་བྱེད་ནུས༌པ། བཟོད་བསྲན་ཡོད་པར་བྱ་དགོས་ཤིང༌།
2TI 2:25 ཞི་འཇམ་གྱི་ངང་ནས་ངོ་རྒོལ་བྱེད་མཁན་ལ་ཁ་ཏ་བྱེད་དགོས། དཀོན་མཆོག་གིས་ཁོ་རྣམས་ལ་འགྱོད་བཤགས་ཀྱི་སེམས་གནང་སྲིད༌ཅིང༌། དེ་དག་གིས་ཀྱང་བདེན་པ་ཉིད་རྟོགས་པར་འགྱུར་བ༌དང༌།
2TI 2:26 བདུད་ཀྱིས་རང་དགར་བཟུང་ཡོད་ནའང་ཁོ་རྣམས་གོ་རྟོགས་སད་ནས་བདུད་ཀྱི་རྙི་རྒྱ་ལས་ཐར་བར་འགྱུར༌རོ།།
2TI 3:1 དེ་ཡང་མཐའ་མའི་ཉིན་མོ་དག་ལ་དཀའ་སྡུག་ཆེ་བའི་དུས་ཤིག་སླེབ་ངེས་པ་ཤེས་པར༌གྱིས།
2TI 3:2 ཅིའི་ཕྱིར་ཞེ་ན། དེའི་དུས་སུ། མི་རྣམས་ཀྱིས་རང་དོན་ཁོ་ན་བསམ་ཞིང་རྒྱུ་ནོར་ལ་རྔམ་པ༌དང༌། རང་རློམ་ཆེ༌བ། ང་རྒྱལ་ཆེ༌བ། ཚིག་རྩུབ་སྨྲ༌བ། ཕ་མའི་ངག་ལ་མི་ཉན༌པ། བཀའ་དྲིན་མི་དྲན༌པ། དམ་པ་མ་ཡིན༌པ།
2TI 3:3 བརྩེ་སེམས་མེད༌པ། འགལ་བའི་མདུད་པ་མི་དགྲོལ༌བ། སྙོན་འཛུགས་པར་དགའ༌བ། རང་ཚོད་མི་ཟིན༌པ། གདུག་རྩུབ་ཆེ༌བ། དོན་བཟང་པོར་མི་དགའ༌བ།
2TI 3:4 ངོ་ལོག༌པ། མི་ལས་དགུ་ལས། རང་ཆེ་རང་མཐོ། འདོད་ཡོན་ལ་ཆགས་པ་ལས་དཀོན་མཆོག་ལ་མི་དགའ་བ་བཅས་འབྱུང་བ་ཡིན་ནོ།།
2TI 3:5 དེ་དག་ལ་དད་གུས་ཀྱི་ཕྱི་ཚུལ་ཙམ་ཡོད༌ནའང༌དད་གུས་ཀྱི་སྙིང་པོ་སྤངས་ཡོད་པས་ཁྱོད་ཀྱིས་དེའི་རིགས་དང་རྒྱང་བཀྱེད་པར༌བྱའོ།།
2TI 3:6 མི་དེ་དག་གི་ཁྲོད་དུ་འགའ་ཞིག་བུད་མེད་བླུན་མ་རྣམས་ཀྱི་ཁྱིམ་དུ་འཛུལ་ནས་ཁོ་མོ་དག་ལ་དབང་བསྒྱུར༌ཞིང་། བུད་མེད་དེ་དག་ནི་སྡིག་པའི་ཁུར་གྱིས་མནན་ཞིང་འདོད་ཆགས་སྣ་ཚོགས་ཀྱིས་བསླུས༌ཏེ།
2TI 3:7 བདེན་པ་ཉིད་རྟག་ཏུ་བསླབས་དང་སློབ་བཞིན་ཡོད་ནའང་དོན་ནི་གཏན་ནས་རྟོགས་མི་ནུས་སོ།།
2TI 3:8 སྔོན་ཆད་ཡཱན་ནེ་དང་ཡཱམ་བྲེ་གཉིས་ཀྱིས་མོ་ཤེ་ལ་ཇི་ལྟར་རྒོལ་བ་བཞིན། མི་འདི་དག་གིས་ཀྱང་བདེན་པ་ཉིད་ལ་རྒོལ་བ༌དང༌། དེ་དག་གི་བསམ་པ་ངན་པར་གྱུར་པས་དེ་རྣམས་ནི་དད་པའི་ཆ་ནས་འདོར་རུང༌བ་ཡིན་ནོ།།
2TI 3:9 འོན་ཀྱང༌། མི་དེ་དག་གི་བླུན་རྟགས་ནི་མི་དེ་གཉིས་དང་འདྲ་བར་ཐམས་ཅད་ཀྱི་མདུན་དུ་གསལ་རྗེན་དུ་མངོན་ངེས༌པས། སྤྱོད་ལམ་དེ་ལྟ་བུ་འཕེལ་བར་མི་འགྱུར༌རོ།།
2TI 3:10 འོན་ཀྱང་། ཁྱོད་ཀྱིས་བདག་གི་སློབ་སྟོན༌དང༌། སྤྱོད༌ལམ། ཕུགས་འདུན། དད༌པ། བཟོད༌སྒོམ། བྱམས༌པ། བཟོད་བསྲན་བཅས་ལ་བསྟུན་པར་མ༌ཟད།
2TI 3:11 སྔོན་ཆད་ངས་ཨན་ཏི་ཡོག་ཡཱ་དང༌། ཨི་ཀོན་ཡུ། ལིས་ཏྲ་བཅས་ནས་མྱངས་པའི་གཉའ་གནོན་དང་སྡུག་བསྔལ་ལའང་བསྟུན༌ཏེ། བདག་གིས་བཟོད་བསྲན་བྱས་པའི་གཉའ་གནོན་ནི་ཅི་འདྲའི་ཚབས་ཆེ་ཨང་། འོན་ཀྱང་གཙོ་བོས་ང་རང་དེ་ཐམས་ཅད་ལས་བསྐྱབས༌པའོ།།
2TI 3:12 སྤྱིར་མཱ་ཤི་ཀ་ཡེ་ཤུའི་ནང་དུ་དད་གུས་ངང་འཚོ་འདོད་པ་ཐམས་ཅད་ལ་གཉའ་གནོན་ཐེབས་ངེས༌ཡིན།
2TI 3:13 མི་ངན་པ་དང་བསླུ་བྲིད་བྱེད་མཁན་རྣམས་ནི་སྔར་ལས་ཀྱང་ཇེ་ངན་དུ་འགྱུར་བ༌དང༌། མི་ལ་མགོ་སྐོར་གཏོང་བ་དང་རང་ཉིད་ཀྱང་མི་གཞན་གྱི་གཡོ་འོག་ཏུ་ཚུད་པར་འགྱུར་རོ།།
2TI 3:14 འོན་ཀྱང༌། ཁྱོད་ཀྱིས་ཅི་ཞིག་བསླབས་པ་དང་གང་ཞིག་ལ་མཐའ་གཅིག་ཏུ་བློ་གཏོད་པ་དེ་ནི་མུ་མཐུད་དུ་སེམས་སུ་འཛིན་དགོས༌ལ། ཁྱོད་ཀྱིས་དོན་དེ་རྣམས་སུ་ཞིག་ནས་བསླབས་པ་ཤེས་པར་མ༌ཟད།
2TI 3:15 ཁྱོད་ཀྱིས་ཆུང་དུས་ནས་དམ་པའི་གསུང་རབ་ཀྱང་རྟོགས༌ཤིང་། དམ་པའི་གསུང་རབ་ཀྱིས་ཁྱོད་ལ་མཱ་ཤི་ཀ་ཡེ་ཤུར་དད་པའི་སྒོ་ནས་ཐར་པའི་ལམ་དུ་ཁྲིད་པའི་ཤེས་རབ་བསྩལ་ནུས་སོ།།
2TI 3:16 དམ་པའི་གསུང་རབ་ཡོངས་རྫོགས་ནི་དཀོན་མཆོག་གིས་ཞལ་ཕུ་གནང་བ་ལས་བྱུང་ཞིང་། སློབ་སྟོན་གནང་བ༌དང༌། སྐྱོན་སྟོན༌པ། ཡོ་བསྲང་བྱེད་པ། དྲང་བདེན་གྱི་ཕྱོགས་སུ་ཁྲིད་སྟོན་བྱེད་པའི་ཐད་ལ་ཕན་ཐོགས་མཆིས་སོ།།
2TI 3:17 དེ་ནི་དཀོན་མཆོག་ལ་གཏོགས་པའི་མི་རྣམས་ཆ་ཡོངས་སུ་ཚང་བ༌དང༌། ལས་བཟང་པོའི་རིགས་ཐམས་ཅད་བསྒྲུབ་པར་སྟ་གོན་མཛད་པའི་ཕྱིར༌རོ།།
2TI 4:1 དེ་ཡང་བདག་གིས་དཀོན་མཆོག་དང་མ་འོངས་པར་ཤི་གསོན་གཉིས་ལ་ལེགས་ཉེས་མཛད་མཁན་མཱ་ཤི་ཀ་ཡེ་ཤུའི་སྤྱན་དྲུང༌དུ། ཁོང་ཉིད་མངོན་སུམ་དུ་ཕེབས་ཡོང་བ་དང་ཁོང་གི་རྒྱལ་སྲིད་ལ་བརྟེན་ནས་ཁྱོད་ལ་གདམས་པར་བྱ༌སྟེ།
2TI 4:2 དུས་དང་དུས་མིན་ཐམས་ཅད་དུ་བསམ་པ་རྩེ་གཅིག་གིས་དཀོན་མཆོག་གི་བཀའ་སྒྲོག་པར་གྱིས། གཞན༌ཡང༌། བཟོད་བསྲན་ཆེན་པོ་དང་སློབ་སྟོན་སྣ་ཚོགས་ཀྱི་ངང་ནས་མི་རྣམས་ལ་བཀའ་བཀྱོན་གནང་བ་དང་། ཁ་ཏ་བྱེད་པ། སྐུལ་སློང་གནང་བ་བཅས་བྱེད་པར་གྱིས།
2TI 4:3 ཅིའི་ཕྱིར་ཞེ་ན། ཕྱིས་སུ་མི་རྣམས་ཀྱིས་ཡང་དག་པའི་བསྟན་པ་ལ་སུན་སྣང་སྐྱེས་ཤིང་། རྣ་བར་ཟ་འཕྲུག་ལངས་པ་ལྟར་རང་རང་གི་འདོད་པ་བཞིན་དགེ་རྒན་གཞན་དག་བསྡུས༌ཏེ།
2TI 4:4 རང་གི་རྣ་བ་བཀབ་ནས་བདེན་པ་ཉིད་ལ་མི་མཉན་པར་ཁུངས་ལུང་མེད་པའི་གཏམ་རྒྱུད་ཀྱི་ཕྱོགས་སུ་འཁོར་བར་འགྱུར་བ་ཡིན་ནོ།།
2TI 4:5 འོན་ཀྱང༌། ཁྱོད་ཀྱིས་དོན་ཀུན་ལ་གཟབ་པ་དང་། དཀའ་ངལ་ལ་བཟོད་པ། འཕྲིན་བཟང་སྒྲོག་མཁན་གྱི་བྱ་བ་སྒྲུབ་པ། རང་གི་ལས་འགན་སྒྲུབ་པ་བཅས་བྱོས༌ཤིག།
2TI 4:6 བདག་ནི་ཚེ་ལས་འདའ་བའི་དུས་ལ་སླེབས་ཤིང༌། རྒུན་ཆང་གཏོར་ནས་མཆོད་པ་འབུལ་བ་དང་མཚུངས༌པར། ད་ལྟ་ང་རང་ཡང་དེ་ལྟར་ཕུལ་ཟིན་ཏོ།།
2TI 4:7 བདག་གིས་འཐབ་འཛིང་བཟང་པོ་ནི་བརྒྱབ༌ཟིན། རྒྱུག་དགོས་པའི་ལམ་ཡང་བརྒྱུགས༌ཟིན། དད་པའང་རྟག་ཏུ་བསྲུངས༌པའོ།།
2TI 4:8 དུས་ད་ནས༌བཟུང༌། བདག་གི་ཆེད་དུ་དྲང་བདེན་གྱི་གཙུག་རྒྱན་བསྐྱུར་ཡོད༌དེ། ཉིན་མོ་དེ་ལ་དྲང་བདེན་ངང་ནས་ཁྲིམས་ཐག་གཅོད་མཁན་གཙོ་བོས་གཙུག་རྒྱན་དེ་ཉིད་བདག་ལ་གནང་བར་མ་ཟད། ཁོང་ཉིད་དངོས་སུ་མངོན་པར་རེ་སྨོན་ཆེན་པོ་བཅངས་པའི་མི་ཐམས་ཅད་ལའང་གནང་བར་འགྱུར༌རོ།།
2TI 4:9 ཁྱོད་རང་མྱུར་བ་མྱུར་བར་བདག་གི་གམ་དུ་ཡོང་བར༌གྱིས།
2TI 4:10 ཅིའི་ཕྱིར་ཞེ་ན། ཏི་མཱ་འཇིག་རྟེན་འདི་ལ་ཆགས་སྲེད་སྐྱེས་པའི་དབང༌གིས། ང་རང་བསྐྱུར་ནས་ཐེ་སཱ་ལོ་ནེ་ཀེ་རུ་སོང༌ཚར། ཀཱ་རེས་ཀེན་ནི་ག་ལད་ཡཱ་ཡུལ་དང༌། ཐེ་ཏུ་ནི་དཱལ་མད་ཡཱ་ཡུལ་ལ་ཕྱིན་ཏོ།།
2TI 4:11 ལོ་ཀུ་གཅིག་པུ་བདག་དང་མཉམ་དུ་ཡོད༌ལ། མཱར་ཀུ་ནི་ཞབས་ཕྱི་སྒྲུབ་པའི་ཕྱོགས་ནས་ང་རང་ལ་ཕན་ཐོགས་ཡོད༌པས། ཁྱོད་རང་འདིར་ཡོང་བའི་དུས་སུ་ཁོ་རང་ཡང་འཁྲིད་ཡོང་བར་གྱིས།
2TI 4:12 བདག་གིས་ཐི་ཀེ་ཀུ་ནི་ཨེ་ཕེ་སི་རུ་མངགས༌པ་ཡིན།
2TI 4:13 ཁྱོད་རང་འདིར་ཡོང་བའི་དུས༌སུ། བདག་གིས་ཏྲོ་ཡཱ་ནས་ཀར་པུ་ལ་བཅོལ་བའི་ཕྱི་གོས་དེ་འཁྱེར་ཡོང་བར༌ཤོག གཞན༌ཡང༌། དཔེ་ཆ་དང་ལྷག་པར་པགས་ཤོག་དེ་དག་ཀྱང་འཁྱེར་ཡོང་བར་གྱིས།
2TI 4:14 མགར་པ་ཨ་ལིག་སན་དིར་གྱིས་ང་རང་ལ་གནོད་འཚེ་གང་མང་བྱས་མྱོང༌བས། ཁོས་ཅི་བྱས་པ་བཞིན་དུ་གཙོ་བོས་ཁོ་རང་ལའང་ལན་གནང་བར༌ངེས།
2TI 4:15 ཁོས་གང་ནུས་ཅི་ཐུབ་ངང་བདག་ཅག་གིས་ཆོས་བཤད་པ་ལ་ངོ་རྒོལ་ཆེན་པོ་བྱས་པས། ཁྱོད་ཀྱིས་ཀྱང་ཁོ་རང་ལ་དོགས་ཟོན་བྱེད་པར༌གྱིས།
2TI 4:16 བདག་གིས་ཐེངས་དང་པོར་རང་ཉིད་ལ་དག་འབུད་བྱེད་པའི་དུས༌སུ། བདག་ལ་རོགས་རམ་བྱེད་མཁན་གཅིག་ཀྱང་མེད་པར་ཐམས་ཅད་ཀྱིས་ང་རང་སྤངས༌པ་ཡིན། དོན་དེ་ནི་མི་དེ་རྣམས་ལ་ཁག་མི་དཀྲི་བར༌སྨོན།
2TI 4:17 འོན་ཀྱང༌། གཙོ་བོས་ང་རང་བརྒྱུད་ནས་འཕྲིན་བཟང་སྒྲོག་པའི་དོན་ཡོངས་སུ་བསྒྲུབས་པ་དང་ཕྱི་ཕྱོགས་པ་ཐམས་ཅད་ཀྱིས་ཀྱང་ཐོས་པའི༌ཕྱིར། ཁོང་ཉིད་བདག་གི་འགྲམ་དུ་ཡར་བཞེངས་ཏེ་ང་རང་ལ་སྟོབས་ཤུགས་བསྩལ་པ་དང༌། ང་རང་ཡང་གཅན་གཟན་སེང་གེའི་ཁ་ནས་སྲོག་བསྐྱབས༌པའོ།།
2TI 4:18 གཙོ་བོས་དོན་ངན་པ་ཐམས་ཅད་ལས་ང་རང་ཐར་བར་མཛད་ངེས༌ཤིང༌། ནམ་མཁའི་རྒྱལ་སྲིད་དུའང་ང་རང་བདེ་བར་འདྲེན་ངེས༌ཡིན། ཁོང་ལ་ཇི་སྲིད་བར་དུ་བསྟོད་བསྔགས་བརྗོད་པར༌སྨོན། ཨ༌མེན།
2TI 4:19 ཁྱོད་ཀྱིས་ཕུར་སི་ལཱ་དང་ཨ་ཀུ་ལཱ་གཉིས༌དང༌། ཨོ་ནེ་སི་ཕུ་རུའི་ཁྱིམ་མི་རྣམས་ལའང་འཚམས་འདྲི་ཞུ་བར༌གྱིས།
2TI 4:20 ཨེ་རས་ཏི་ནི་ཀོ་རིན་ཐུ་རུ་བསྡད་པ༌དང༌། ཏྲོ་ཕེ་མུ་ལ་ན་ཚ་བྱུང་བས། ངས་ཁོ་རང་མུ་ལེ་ཐུ་རུ་བསྐྱུར་བ༌ཡིན།
2TI 4:21 ཁྱོད་རང་དགུན་དུས་མ་སླེབས་སྔོན་དུ་མྱུར་བ་མྱུར་བར་བདག་གི་གམ་དུ་ཡོང་བར༌གྱིས། འདིར་ཨིའུ་པུ་ལུ༌དང༌། པུ༌དེན། ལི༌ནུ། ཀ་ལུ་དི་ཡཱ་བཅས་དང༌། གཞན༌ཡང༌། སྤུན་ཟླ་ཐམས་ཅད་ཀྱིས་ཀྱང་ཁྱོད་ལ་འཚམས་འདྲི༌ཞུའོ།།
2TI 4:22 གཙོ་བོ་ནི་ཁྱོད་ཀྱི་སེམས་སུ་བཞུགས་པ་དང་། ཐུགས་རྗེ་ནི་རྟག་ཏུ་ཁྱོད་རྣམས་དང་མཉམ་དུ་གནས་པར༌སྨོན།། །།
TIT 1:1 དེ་ཡང་ཕོལ་ལོལ་བདག་ནི་དཀོན་མཆོག་གི་ཞབས་ཕྱི་པ་དང་ཡེ་ཤུ་མཱ་ཤི་ཀའི་སྐུ་ཚབ་པ་ཞིག་ཡིན༌ལ། དེ་ནི་དཀོན་མཆོག་གི་བདམས་པའི་མི་རྣམས་ཀྱི་དད་པ་དང༌། དད་གུས་བྱས་པ་བཞིན་དུ་བདེན་པ་ཉིད་རྟོགས་པ་ལ་བརྟེན༌ནས།
TIT 1:2 ཞལ་རྫུན་མི་གསུང་བའི་དཀོན་མཆོག་གིས་དུས་ཀྱི་སྔ་རོལ་ནས་ཞལ་བཞེས་གནང་བའི་མཐའ་མེད་པའི་ཚེ་སྲོག་དེ་ཉིད་འཐོབ་པར་རེ་བ་བཅངས་པ༌དང༌།
TIT 1:3 དུས་ལ་བབས་པ་ན། ཆོས་སྒྲོག་པ་བརྒྱུད་ནས་དཀོན་མཆོག་གི་བཀའ་དེ་མངོན་པར་མཛད༌ཅིང༌། ཆོས་བསྒྲག་པའི་ལས་འགན་ནི་བདག་ཅག་གི་སྐྱབས་མགོན་ཏེ་དཀོན་མཆོག་གི་བཀའ་བཞིན་དུ་བདག་ལ་བཅོལ་བ་ཡིན༌ནོ།།
TIT 1:4 ད་ལྟ་འཕྲིན་ཡིག་འདི་ནི་བདག་ཅག་ཐུན་མོང་གི་དད་པ་བཞིན། བདག་གི་བུ་དངོས་སུ་གྱུར་པ་ཐེ་ཏུ་ལ་སྤྲིངས༌ཤིང༌། ཡབ་དཀོན་མཆོག་དང་བདག་ཅག་གི་སྐྱབས་མགོན་མཱ་ཤི་ཀ་ཡེ་ཤུ་ནས་ཁྱོད་ལ་ཐུགས་རྗེ་དང་ཞི་བདེ་འཐོབ་པར༌སྨོན།
TIT 1:5 བདག་གིས་སྔོན་ཆད་ཁྱོད་རང་ཀཱ་རེ་ཏ་རུ་བསྐྱུར་དོན༌ནི། བསྒྲུབས་མ་ཚར་བའི་བྱ་བ་རྣམས་ལེགས་པར་བསྒྲུབ་པ༌དང༌། བདག་གིས་ཁྱོད་ལ་ཁ་བསྒོ་བཏང་བ་བཞིན་གྲོང་བརྡལ་རེ་རེ་ནས་ཆོས་ཚོགས་ཀྱི་རྒན་པོ་རྣམས་བསྐོ་བར་བྱེད་པའི་ཕྱིར༌ཡིན་ནོ།།
TIT 1:6 རྒན་པོ་ནི་སྐྱོན་བརྗོད་རྒྱུ་ཅི་ཡང་མེད་ལ་ཆུང་མ་གཅིག་ཁོ་ནའི་ཁྱོ་ག་ཡིན་པ༌དང༌། ཁོའི་བུ་ཕྲུག་རྣམས་ལ་དད་པ་ཡོད་པ༌ལས། བག་མེད་རྣམ་གཡེང་དང་ངག་ལ་མི་ཉན་མཁན་ཞིག་རེད་ཅེས་གཏུག་མཁན་མེད་པ་ཞིག་ཡིན་དགོས་སོ།།
TIT 1:7 ཅིའི་ཕྱིར་ཞེ་ན། དོ་དམ་པ་ནི་དཀོན་མཆོག་གི་གཉེར་པ་ཡིན་ལ། ངེས་པར་སྐྱོན་བརྗོད་རྒྱུ་ཅི་ཡང་མེད་པ༌དང༌། ཨུ་ཚུགས་མེད༌པ། ཁྲོ་སླ་བོ་མེད༌པ། ཆང་རག་འཐུང་བར་མི་རྔམ༌པ། མི་ལ་གཅར་རྡུང་མི་བྱེད༌པ། རྒྱུ་ནོར་མི་གཙང་བ་ལ་མི་རྔམ༌པ།
TIT 1:8 མགྲོན་པོ་བསུ་བར་དགའ༌བ། ལས་བཟང་པོར་དགའ༌བ། བག་ཡོད༌པ། གཞུང་དྲང༌བ། དམ་པ་ཡིན༌པ། རང་ཚོད་ཟིན༌པ།
TIT 1:9 ཡང་དག་པའི་བསྟན་པ་ལ་བརྟེན་ནས་མི་རྣམས་ལ་སྐུལ་སློང་བྱེད་པ༌དང༌། རྒོལ་ལན་སློག་མཁན་གྱི་སྨྲ་སྒོ་གཅོད་ཐུབ་པའི་ཕྱིར། ཆོས་གསུངས་པ་བཞིན་ཡིད་རྟོན་རུང་བའི་བཀའ་བརྟན་པོར་སྲུང་བ་བཅས་ཡིན་དགོས༌སོ།།
TIT 1:10 རྒྱུ་མཚན་ནི་ངོ་རྒོལ་བྱེད་ཅིང་འཆལ་གཏམ་སྨྲ་བ་དང་མི་ལ་མགོ་སྐོར་གཏོང་མཁན་ཡང་མང་དུ་ཡོད༌ལ། མཚན་སྐྱི་བཅད་པ་རྣམས་ནི་ལྷག་ཏུ་དེ་འདྲ་ཡིན་པའི་ཕྱིར༌རོ།།
TIT 1:11 དེ་རྣམས་ཀྱིས་ལྐོག་རྔན་གྱི་རྒྱུ་ནོར་འཐོབ་པའི་ཆེད༌དུ། སློབ་སྟོན་བྱེད་མི་རུང་བ་དེའང་མི་གཞན་ལ་སྨྲ་ཞིང༌། ཁྱིམ་ཚང་གང་བོར་གནོད་བསྐྱལ་བས་དེ་རྣམས་ཀྱི་སྨྲ་སྒོ་གཅོད་དགོས།
TIT 1:12 དེ་དག་གི་ཁྲོད་ནས་ལུང་སྟོན་པ་ཞིག་ན༌རེ། ཀཱ་རེ་ཏ་པ་རྣམས་ནི་རྟག་ཏུ་རྫུན་སྨྲ་མཁན་དང་གཅན་གཟན་གཏུམ་དྲག་ཅན་ལྟ་བུ་ཡིན༌ལ། ཟས་ལ་རྔམ་ཞིང་ལེ་ལོ་ཅན་ཡིན་ཞེས༌སྨྲས་སོ།།
TIT 1:13 བདེན་དཔང་དེ་ནི་དོན་དངོས་ཡིན་པས་ཁྱོད་ཀྱིས་དེ་རྣམས་ལ་གཤེ་གཤེ་དྲག་པོ་གཏོང་དགོས་སོ།། དེ་ནི་དེ་དག་ལ་དད་པའི་ཆ་ནས་སྐྱོན་གྱི་དྲི་མས་མ་གོས་པ༌དང༌།
TIT 1:14 ཡ་ཧུ་དཱ་པའི་ཁུངས་ལུང་མེད་པའི་གཏམ་རྒྱུད་དང་བདེན་པ་ཉིད་དང་ཁ་བྲལ་བ་རྣམས་ཀྱི་ངག་ལ་མི་མཉན་པའི་ཕྱིར༌རོ།།
TIT 1:15 སྤྱིར་གཙང་མ་ཅན་ལ་དངོས་པོ་ཐམས་ཅད་གཙང་མ་ཡིན༌མོད། འོན་ཀྱང་མི་གཙང་བ་དང་དད་པ་མེད་པའི་མི་ལ་གཙང་བ་གཅིག་ཀྱང་མེད། ཐ་ན་དེ་དག་གི་སེམས་དང་བསམ་པ་ཡང་མི་གཙང༌ངོ་།།
TIT 1:16 དེ་དག་གིས་དཀོན་མཆོག་ངོ་ཤེས་པ་ཡིན་ཞེས་སྨྲ་ཡང་སྤྱོད་ལམ་གྱི་ཆ་ནས་དཀོན་མཆོག་རིང་དུ་སྤངས་ཤིང་། དེ་དག་ནི་སྐྱུག་བྲོ་བ༌དང༌། བཀའ་ལ་མི་ཉན༌པ། ལས་བཟང་པོ་ཐམས་ཅད་ཀྱི་ཆ་ནས་འདོར་འོས་པ་ཡིན༌ནོ།།
TIT 2:1 དེ་ཡང་ཁྱོད་ཀྱིས་ཡང་དག་པའི་བསྟན་པ་དང་མཐུན་པའི་སྒོ་ནས་སློབ་སྟོན་བྱ་འོས༌ཏེ།
TIT 2:2 རྒན་པོ་རྣམས་ལ་རང་ཚོད་ཟིན་པ༌དང༌། བཀུར་འོས༌པ། བག་ཡོད་པར་མ༌ཟད། དད་པ༌དང༌། བྱམས༌སེམས། བཟོད་བསྲན་བཅས་ཀྱི་ཆ་ནས་སྐྱོན་ཅི་ཡང་མེད་པར་བསྐུལ་འོས༌སོ།།
TIT 2:3 ཡང་དེ་བཞིན་དུ་རྒན་མོ་རྣམས་ལའང་སྤྱོད་ལམ་ཚུལ་ལྡན་ཡིན་པ༌དང༌། ཕྲ་མའི་གཏམ་མི་སྨྲ༌བ། ཆང་རག་གི་དབང་དུ་མི་འགྲོ་བ། བསླབ་བྱ་བཟང་པོ་སྟོན་པར་བསྐུལ་འོས་སོ།།
TIT 2:4 དེ་ནས་ཁོ་མོ་རྣམས་ཀྱིས་ད་གཟོད་བུད་མེད་ན་གཞོན་དག་ལའང་རང་གི་ཁྱོ་ག་དང་བུ་ཕྲུག་ལ་གཅེས་པ༌དང༌།
TIT 2:5 བག་ཡོད་པ༌དང༌། སྤྱོད་ལམ་གཙང༌བ། ཁྱིམ་ལས་བྱེད༌པ། དྲིན་སྐྱོང་བ། རང་རང་གི་ཁྱོ་ག་དང་བསྟུན་པར་བསྐུལ་ནུས་པ་ཡིན། དེ་ལྟར་བྱས་ན་མི་གཞན་རྣམས་ཀྱིས་དཀོན་མཆོག་གི་བཀའ་ལ་དམའ་འབེབས་བྱེད་པར་མི་འགྱུར༌རོ།།
TIT 2:6 ཡང་དེ་བཞིན༌དུ་ན་གཞོན་རྣམས་ལ་བག་ཡོད་པར་བསྐུལ་བར༌གྱིས།
TIT 2:7 ཁྱོད་ཀྱིས་བྱ་བ་ཀུན་ལ་ལས་བཟང་པོའི་མིག་དཔེ་སྟོན་དགོས༌ཏེ། སློབ་སྟོན་གནང་སྐབས་གཞུང་དྲང་བ་དང་བཀུར་འོས༌པ།
TIT 2:8 གཏམ་བདེན་པར་སྨྲ་ཞིང་སྐྱོན་བརྗོད་རྒྱུ་མེད་པར་གྱིས། དེ་ནས་ངོ་རྒོལ་བྱེད་མཁན་རྣམས་ཀྱིས་བདག་ཅག་ལ་སྐྱོན་བརྗོད་རྒྱུ་མེད་པས་ཁོ་རྣམས་ངོ་གནོང་བར་འགྱུར༌རོ།།
TIT 2:9 གཡོག་པོ་རྣམས་ལ་རྣམ་པ་ཐམས་ཅད་ནས་རང་རང་གི་བདག་པོའི་བཀའ་བརྩི་བ༌དང༌། བདག་པོ་དགའ་བར་བྱེད༌པ། ཚིག་སློག་མི་རྒྱག་པ།
TIT 2:10 མ་བྱིན་པར་མི་ལེན་པ། དོན་ཐམས་ཅད་ལ་བློ་སེམས་དཀར་བ་བཅས་ཡིན་པར་བསྐུལ་ཏེ། ཕྱོགས་ཀུན་ནས་བདག་ཅག་གི་སྐྱབས་མགོན་དཀོན་མཆོག་གི་བསྟན་པ་ལ་གཟི་དཔལ་གྱིས་བརྒྱན་པའི་ཕྱིར་རོ།།
TIT 2:11 ཅིའི་ཕྱིར་ཞེ་ན། མི་ཐམས་ཅད་སྐྱོབ་པར་མཛད་པའི་དཀོན་མཆོག་གི་ཐུགས་རྗེ་ནི་མངོན་སུམ་དུ་བྱུང༌སྟེ།
TIT 2:12 བདག་ཅག་གིས་དཀོན་མཆོག་ལ་དད་གུས་མི་བྱེད་པའི་སེམས་དང་འཇིག་རྟེན་གྱི་འདོད་ཆགས་སྤོང་བར་བྱེད་པ༌དང༌། བསྐལ་པ་འདིར་བག་ཡོད་པ་དང་གཞུང་དྲང༌བ། དད་གུས་ངང་འཚོ་བ་རོལ་བ་དང་།
TIT 2:13 བླ་ན་མེད་པའི་དཀོན་མཆོག་སྟེ་བདག་ཅག་གི་སྐྱབས་མགོན་ཡེ་ཤུ་མཱ་ཤི་ཀ་གཟི་བརྗིད་ངང་ནས་མངོན་སུམ་དུ་ཕེབས་ཡོང་བའི་བདེ་སྐྱིད་ལྡན་པའི་རེ་བར་སྒུག༌པའི་ཕྱིར་ཡིན།
TIT 2:14 བདག་ཅག་ཉེས་པ་ཐམས་ཅད་ནས་བླུ་བ༌དང༌། ཁོང་ཉིད་ལ་དབང་བའི་མི་སྡེ་ལས་བཟང་པོར་བརྩོན་པ་ཞིག་གཙང་མར་མཛད་པའི་ཆེད་དུ། ཁོང་གིས་རང་ཉིད་ཀྱི་ཚེ་སྲོག་ཀྱང་བློས་བཏང་བའོ།།
TIT 2:15 ཁྱོད་ཀྱིས་རང་གི་དབང་ཐམས་ཅད་ལ་བརྟེན་ནས་དོན་འདི་རྣམས་ཀྱི་སྐོར་མི་རྣམས་ལ་གསལ་པོར་སྟོན་ཞིང་སྐུལ་སློང་བྱེད་པ་དང་ཚིག་ནན་མོ་བརྗོད་དེ། མི་སུ་ལའང་ཁྱོད་ལ་མཐོང་ཆུང་བྱེད་དུ་མི་འཇུག་པར་གྱིས།
TIT 3:1 དེ་ཡང་ཁྱོད་ཀྱིས་མི་དེ་རྣམས་ལ་དཔོན་པོ་དང་དབང་འཛིན་པ་རྣམས་ཀྱི་བཀའ་བརྩི་ཞིང་ཅི་གསུང་བཞིན་དུ་བསྒྲུབ་པ། ལས་བཟང་པོའི་རིགས་ཐམས་ཅད་བསྒྲུབ་པར་སྟ་གོན་བྱེད༌དགོས་པ་དང༌།
TIT 3:2 མི་སུ་ལའང་ཚིག་ངན་མི་སྨྲ༌བ་དང༌། འཁྲུག་རྩོད་མི་བྱེད༌པ། ཞི་ཞིང་དུལ་བ། མི་ཀུན་ལ་ཁེངས་སྐྱུང་ཡོད་པ་བཅས་བྱེད་པར་དྲན་སྐུལ་བྱའོ།།
TIT 3:3 ཅིའི་ཕྱིར་ཞེ་ན། དེ་སྔར་བདག་ཅག་ཀྱང་ཡིད་རྨོངས་ཤིང་བཀའ་ལ་མི་ཉན་པ་དང་བསླུ་བྲིད་ཐེབས༌པ། མ་རབས་ཐ་ཤལ་གྱི་ལས་དང་འདོད་ཡོན་སྣ་ཚོགས་ཀྱི་དབང་དུ་སོང༌སྟེ། རྟག་ཏུ་གདུག་རྩུབ་དང་ཕྲག་དོག་གིས་འཚོ༌ཞིང༌། གཞན་རྣམས་བདག་ཅག་ལ་སྡང་བ༌དང༌། ཕན་ཚུན་ལའང་སྡང་བའི་ཕྱིར་རོ།།
TIT 3:4 འོན༌ཀྱང༌། བདག་ཅག་གི་སྐྱབས་མགོན་དཀོན་མཆོག་གི་ཐུགས་རྗེ་དང་ཁོང་གིས་མི་རྣམས་ལ་བཅངས་པའི་བྱམས་པ་དེ་ཉིད་མངོན་སུམ་དུ་བྱུང༌ཚེ།
TIT 3:5 ཁོང་གིས་བདག་ཅག་བསྐྱབས་ཤིང་། དེ་ནི་བདག་ཅག་གིས་དྲང་བདེན་གྱི་ལས་བྱས་པའི་རྐྱེན་གྱིས་མ་ཡིན༌པར། ཁོང་གི་ཐུགས་རྗེའི་དབང་གིས་ཡིན༌པ་དང༌། ཡང་བསྐྱར་སྐྱེས་པའི་ཁྲུས་དང་དམ་པའི་ཐུགས་ཉིད་ཀྱིས་གསར་དུ་མཛད་པ་བརྒྱུད་ནས་བདག་ཅག་བསྐྱབས༌པའོ།།
TIT 3:6 དམ་པའི་ཐུགས་ཉིད་ནི་དཀོན་མཆོག་གིས་བདག་ཅག་གི་སྐྱབས་མགོན་ཡེ་ཤུ་མཱ་ཤི་ཀ་བརྒྱུད་ནས་བདག་ཅག་ལ་ཕངས་མེད་དུ་གནང་བ༌སྟེ།
TIT 3:7 ཁོང་གི་ཐུགས་རྗེ་ལ་བརྟེན་ནས་བདག་ཅག་མི་རྣམ་དག་ཏུ་མཛད༌ཅིང༌། མཐའ་མེད་པའི་ཚེ་སྲོག་གི་རེ་སྨོན་བཞིན་རྒྱུད་འཛིན་མཁན་དུ་འགྱུར་བའི་ཕྱིར༌ཡིན་ལ།
TIT 3:8 གཏམ་འདི་ནི་ཡིད་རྟོན་རུང་བ་ཡིན་ནོ།། ཡང་དཀོན་མཆོག་ལ་དད་པ་བྱེད་མཁན་རྣམས་ཀྱིས་ལས་བཟང་པོར་བརྩོན་པའི༌ཕྱིར། ཁྱོད་ཀྱིས་དོན་འདི་དག་ནན་ཏན་གྱིས་གསལ་པོར་སྟོན་རྒྱུ་ནི་བདག་གི་རེ་བ་ཡིན༌ལ། དོན་འདི་དག་ནི་ལེགས་ཤིང་མི་ཐམས་ཅད་ལ་ཕན་ཐོགས༌མཆིས་སོ༎
TIT 3:9 འོན༌ཀྱང༌། བླུན་ཞིང་རྨོངས་པའི་རྩོད་གླེང༌དང༌། ཁྱིམ༌རྒྱུད་ཀྱི་སྟོང་བཤད། འཁྲུག༌རྩོད། བཀའ་ཁྲིམས་སྐོར་གྱི་རྩོད་པ་བཅས་ལ་སྙིང་པོ་མེད་ཅིང་ཕན་ཐོགས་ཅི་ཡང་མེད་པས་དེ་དག་ལས་གཡོལ་བར༌གྱིས།
TIT 3:10 ཕྱོགས་ཁག་སྒྲིག་མཁན་ལ་ཉེན་བརྡ་རྒྱོབས་དང་། དེ་ནས་ཐེངས་གཉིས་ལ་ཉེན་བརྡ་བརྒྱབ་རྗེས་རིང་དུ་དོར༌ཅིག
TIT 3:11 རྒྱུ་མཚན་ནི་མི་དེ་ལྟ་བུ་ཕྱིན་ཅི་ལོག་ཅིང་སྡིག་པ་བྱེད་མཁན་ཡིན༌ལ། རང་གིས་རང་ལ་ཁྲིམས་ཐག་བཅད་པ་ཡིན་པ་ཁྱོད་ཀྱིས་ཤེས་པའི་ཕྱིར༌རོ།།
TIT 3:12 ད་ལོ་དགུན་དུས་བདག་ནི་ནུ་ཀོ་པོ་ལི་རུ་སྡོད་རྒྱུ་ཐག་གིས་བཅད༌པས། བདག་གིས་ཨར་ཏེ་མཱའམ་ཐི་ཀེ་ཀུ་གཉིས་ལས་མི་གཅིག་ཁྱོད་ཀྱི་གམ་དུ་མངག་པར་འགྱུར་བའི་དུས༌སུ། ཁྱོད་ནི་མྱུར་བ་མྱུར་དུ་གནས་དེར་ཡོང་བར་གྱིས།
TIT 3:13 ཁྱོད་ཀྱིས་ཁྲིམས་རྩོད་པ་ཟི་ནཱ་དང་ཨ་པོལ་ལོ་གཉིས་ལ་ཇི་དགོས་པ་སྦྱར་ཏེ་མྱུར་དུ་བསྐྱལ་བར༌གྱིས།
TIT 3:14 སྤྱིར་གང་ལ་གང་མཁོ་སྟ་གོན་བྱས་ཏེ་འབྲས་བུ་དང་ལྡན་པའི༌ཕྱིར། བདག་ཅག་གི་མི་རྣམས་ཀྱིས་ངེས་པར་ལས་བཟང་པོ་སྒྲུབ་ཚུལ་བསླབ་དགོས་སོ།།
TIT 3:15 བདག་དང་མཉམ་དུ་ཡོད་པ་ཀུན་གྱིས་ཁྱོད་ལ་འཚམས་འདྲི་ཞུ༌ཞིང༌། ཁྱོད་ཀྱིས་བདག་གི་འཐུས་ཚབ་ཏུ་ངེད་ཅག་ལ་བྱམས་ཤིང་གཅེས་པའི་དད་ལྡན་གཞན་རྣམས་ལའང་འཚམས་འདྲི་ཞུ་བར༌གྱིས། ཐུགས་རྗེ་ནི་ནམ་ཡང་ཁྱོད་རྣམས་ཐམས་ཅད་དང་མཉམ་དུ་གནས་པར༌སྨོན།། །།
PHM 1:1 སྐྱབས་མགོན་མཱ་ཤི་ཀ་ཡེ་ཤུའི་ཆེད་དུ་བཙོན་པར་གྱུར་པའི་ཕོལ་ལོལ་ང་རང་གིས། བདག་ཅག་གི་སྤུན་ཟླ་ཐི་མོ་ཐེ་དང་མཉམ༌དུ་སྙིང་ནས་བརྩེ་བའི་ཆོས་གྲོགས་ཕི་ལེ་མོན་དང་།
PHM 1:2 གཅུང་མོ་ཨ་ཕི་ཡཱ་དང་། ད་དུང་བདག་ཅག་གི་དཔུང་གྲོགས་ཨར་ཀི་པུ་དང་། ཁྱོད་ཀྱི་ཁྱིམ་དུ་ཡོད་པའི་ཆོས་ཚོགས་བཅས་ལ་འཕྲིན་ཡིག་འདི་སྤྲིངས་པ་ཡིན་ནོ།།
PHM 1:3 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།
PHM 1:4 ངས་རང་གི་དཀོན་མཆོག་ལ་གསོལ་བ་འདེབས་པའི་དུས༌སུ། རྒྱུན་དུ་ཁྱོད་རང་གླེང་ཞིང་ཁྱོད་ཀྱི་ཆེད་དུ་བཀའ་དྲིན་ཞུས་པ་ཡིན་ནོ།།
PHM 1:5 ཅིའི་ཕྱིར་ཞེ་ན། ཁྱོད་ཀྱིས་གཙོ་བོ་ཡེ་ཤུར་བཅངས་པའི་དད་སེམས་དང་། དད་ལྡན་དམ་པ་ཐམས་ཅད་ལ་བཅངས་པའི་བྱམས་པ་ག་འདྲ་ཡིན་པ་ཐོས་པའི་ཕྱིར༌རོ།།
PHM 1:6 ཁྱོད་དང་མི་ཐམས་ཅད་ལ་མཉམ་དུ་ཡོད་པའི་དད་སེམས་ལས་ཕན་ནུས་ཐོན་ཏེ། བདག་ཅག་གི་ནང་དུ་ཡོད་པའི་དོན་བཟང་པོ་ཐམས་ཅད་ནི་སྐྱབས་མགོན་མཱ་ཤི་ཀའི་ཆེད་དུ་ཡིན་པ་ཤེས་སུ་འཇུག་པར་སྨོན།
PHM 1:7 སྤུན་ཟླ༌ལགས། ཁྱོད་ལ་བརྟེན་ནས་དད་ལྡན་དམ་པ་རྣམས་ཀྱི་སེམས་ལ་སྐྱིད་སྣང་ཤར༌བས། ཁྱོད་ཀྱི་བྱམས་པ་ལ་བརྟེན་ནས་བདག་ལའང་དགའ་སྤྲོ་དང་སེམས་གསོ་ཆེན་པོ་ཐོབ༌བོ།།
PHM 1:8 དེ་ལྟར་ཡིན་པས། ངས་སྐྱབས་མགོན་མཱ་ཤི་ཀ་ལ་བརྟེན་ནས་སྤོབས་པ་ཆེན་པོས་ཁྱོད་ལ་ཅི་ཞིག་བསྒྲུབ་འོས་པ་དེ་བསྒྲུབ་པར་བསྒོ་ནུས་མོད།
PHM 1:9 འོན་ཀྱང་ཕོལ་ལོལ་ང་ནི་ལོ་ན་རྒས་པ་ཞིག༌ཡིན་པར་མ་ཟད། ད་ལྟ་སྐྱབས་མགོན་མཱ་ཤི་ཀ་ཡེ་ཤུའི་ཆེད་དུ་བཙོན་པར་གྱུར་པ་ཞིག་ཀྱང་ཡིན། ངས་བྱམས་པ་ལ་བརྟེན་ནས་ཁྱོད་ལ་ཞུ་བ་བྱ༌སྟེ།
PHM 1:10 ང་རང་བཙོན་དུ་སྦྱར་བའི་དུས༌སུ་བདག་ལས་སྐྱེས་པའི་བུ་ཨོ་ནེ་སི་མུའི་ཆེད་དུ་ཁྱོད་ལ་ཞུ་བ༌བྱའོ།།
PHM 1:11 ཁོ་ནི་དེ་སྔར་ཁྱོད་ལ་ཕན་ཐོགས་མེད༌ནའང༌། ད་ལྟ་ཁྱོད་དང་ང་གཉིས་ལ་ཕན་ཐོགས་མཆིས་སོ།།
PHM 1:12 ངས་ད་ལྟ་ཁོ་རང་ཁྱོད་ཀྱི་གམ་དུ་ཕྱིར་མངག་པར་བྱ་ཞིང་། ཁོ་ནི་བདག་གི་སྙིང་དང་འདྲ་བ་ཡིན།
PHM 1:13 འཕྲིན་བཟང་གི་ཆེད་དུ་ང་རང་བཙོན་དུ་སྦྱར་ཡོད་པ༌ལ། ཁོས་ཁྱོད་ཀྱི་ཚབ་ཏུ་བདག་ལ་ཞབས་ཕྱི་སྒྲུབ་པའི༌ཕྱིར། ངས་ཁོ་རང་བདག་གི་གམ་དུ་སྡོད་པར་བྱ་འདོད༌མོད།
PHM 1:14 འོན་ཀྱང་ཁྱོད་ཀྱི་བསམ་ཚུལ་མ་ཤེས༌པས། ངས་དེ་ལྟར་བྱ་མི་འདོད། ཅིའི་ཕྱིར་ཞེ་ན། ཁྱོད་ཀྱི་ལས་བཟང་པོ་ནི་བཙན་སྐུལ་མ་ཡིན་པར་རང་མོས་ལས་འབྱུང་བའི་ཕྱིར༌རོ།།
PHM 1:15 ཁོ་རང་རེ་ཞིག་ཁྱོད་དང་ཁ་བྲལ་བ་ནི་གཏན་དུ་ཁྱོད་ལ་འཐོབ་པའི་ཕྱིར་ཡིན་ཡང་སྲིད་དེ།
PHM 1:16 ད་ལྟ་གཡོག་པོ་མ་ཡིན༌པར། གཡོག་པོ་ལས་གོ་ས་མཐོ་ཞིང་སྙིང་ནས་བརྩེ་བའི་སྤུན་ཟླ་ཡིན༌ཞིང་། བདག་ལ་དངོས་གནས་དེ་ལྟར་ཡིན༌པས་ཁྱོད་ལ་སྨོས་ཅི༌དགོས། ལུས་ཕུང་གི་ཆ་ཁོ་ན་མ་ཡིན་པར་གཙོ་བོའི་ནང་དུའང་དེ་བཞིན་ཡིན་ནོ།།
PHM 1:17 གལ་ཏེ། ཁྱོད་ཀྱིས་ང་རང་ཆོས་གྲོགས་སུ་བརྩིས༌ན། ཁྱོད་ཀྱིས་ང་ལ་གུས་ལེན་བྱེད་པ་བཞིན་ཁོ་ཡང་དང་ལེན་བྱེད་པར༌གྱིས།
PHM 1:18 གལ་ཏེ། ཁོས་ཁྱོད་ལ་འོས་མེད་བྱས་པའམ། ཡང་ན་ཁྱོད་ལ་བུ་ལོན་གང་ཞིག་ཆད་ན། དེ་དག་ཐམས་ཅད་བདག་གི་རྩིས་ཐོའི་ནང་དུ་ཁོད་དང་།
PHM 1:19 ངས་ཁྱོད་ལ་སྐྱིན་ཚབ་སྤྲོད་ངེས་ཤིང་། འདི་ནི་ཕོལ་ལོལ་བདག་གིས་དངོས་སུ་བྲིས་པ་ཡིན། ཐ་ན་ཁྱོད་ཀྱིས་རང་ཉིད་ཀྱང་ང་ལ་འབུལ་དགོས་པ་བདག་གིས་ཁྱོད་ལ་སྨྲ་མི་དགོས་སོ།།
PHM 1:20 སྤུན་ཟླ༌ལགས། ཁྱོད་ཀྱིས་གཙོ་བོའི་ནང་དུ་ང་རང་ལ་ཕན་འདོགས་པ་དང་། སྐྱབས་མགོན་མཱ་ཤི་ཀའི་ནང་དུ་ངའི་སེམས་དགའ་ཞིང་སྤྲོ་རུ་འཇུག་པར་སྨོན།
PHM 1:21 བདག་གིས་ཁྱོད་ལ་འཕྲིན་ཡིག་འདི་འབྲི་དོན༌ནི། ཁྱོད་ཀྱིས་ངའི་ངག་ལ་མཉན་པར་ཡིད་ཆེས་བརྟན་པོ་ཡོད་པར་མ༌ཟད། ངས་སྨྲས་པ་ལས་ཀྱང་ལྷག་པ་ཞིག་བསྒྲུབ་ངེས་པ་ཤེས་པའི་ཕྱིར༌རོ།།
PHM 1:22 གཞན༌ཡང༌། ཁྱོད་ཀྱིས་བདག་ལ་སྡོད་གནས་སྟ་གོན་བྱེད་པར་གྱིས། ཅིའི་ཕྱིར་ཞེ་ན། ངས་ཁྱོད་རྣམས་ཀྱི་སྨོན་ལམ་བརྒྱུད་ནས་ཐུགས་རྗེ་འཐོབ་པ་དང་། ཁྱོད་ཅག་གི་གམ་དུ་འགྲོ་བར་རེ་སྨོན་བཅངས་པའི་ཕྱིར༌རོ།།
PHM 1:23 སྐྱབས་མགོན་མཱ་ཤི་ཀ་ཡེ་ཤུའི་ཆེད་དུ་བདག་དང་མཉམ་དུ་བཙོན་ལ་སྦྱར་བའི་ཨེ་པབ་རཱ་ཡིས་ཁྱོད་ལ་འཚམས་འདྲི༌ཞུའོ།།
PHM 1:24 བདག་གི་ཆོས་གྲོགས་མཱར་ཀུ༌དང༌། ཨ་རི་སྟར༌ཀུ ཏི༌མཱ། ལོ་ཀུ་བཅས་ཀྱིས་ཀྱང་ཁྱོད་ལ་འཚམས་འདྲི༌ཞུའོ།།
PHM 1:25 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་གི་སེམས་སུ་གནས་པར༌སྨོན།། །།
HEB 1:1 དེ་ཡང་དཀོན་མཆོག་གིས་གནའ་བོའི་དུས་སུ་ལུང་སྟོན་པ་རྣམས་བརྒྱུད་ནས་ཐེངས་དུ་མ་དང་ཐབས་ཤེས་སྣ་ཚོགས་ཀྱི་སྒོ་ནས་མེས་པོ་རྣམས་ལ་བཀའ་གསུངས་པ༌དང༌།
HEB 1:2 མཐའ་མའི་ཉིན་མོ་འདི་དག་ལ་ཡང་ཁོང་གི་སྲས་བརྒྱུད་ནས་བདག་ཅག་ལ་བཀའ་གསུངས༌ཤིང༌། སྔ་མོ་ནས་ཁོང་ནི་དངོས་པོ་ཐམས་ཅད་ཀྱི་རྒྱུད་འཛིན་མཁན་དུ་བསྐོས་པ༌དང༌། ཁོང་ཉིད་བརྒྱུད་ནས་འཇིག་རྟེན་ཁམས་ཐམས་ཅད་ཀྱང་བཀོད་པ་ལགས་སོ།།
HEB 1:3 ཁོང་ནི་དཀོན་མཆོག་གི་གཟི་བརྗིད་ལས་འཕྲོས་པའི་འོད་ཟེར་ཡིན༌ལ། དཀོན་མཆོག་གི་ངོ་བོའི་སྣང་བརྙན་དངོས་མའང་ལགས་ཤིང་། ཁོང་གི་ནུས་མཐུ་ཆེ་བའི་བཀའ་ཡིས་རྟག་ཏུ་དངོས་པོ་ཐམས་ཅད་སྐྱོར་བའོ།། ཁོང་གིས་མིའི་རིགས་ཀྱི་སྡིག་པ་དག་པར་མཛད༌རྗེས། ནམ་མཁའི་ཞིང་ཁམས་ཀྱི་གཟི་བརྗིད་བླ་ན་མེད་པ་དེ་ཉིད་ཀྱི་གཡས་ཕྱོགས་སུ་བཞུགས༌ལགས་སོ།།
HEB 1:4 ཁོང་ལ་ཐོབ་པའི་མཚན་སྙན་ནི་ཕོ་ཉ་རྣམས་ལས་མཆོག་ཏུ་གྱུར་པ་ཡིན་པས་ཁོང་ཉིད་དེ་རྣམས་ལས་ཀྱང་ཁྱད་དུ་འཕགས༌པའོ།།
HEB 1:5 ཅིའི་ཕྱིར་ཞེ་ན། དཀོན་མཆོག་གིས་ཕོ་ཉ་རྣམས་ལས་སུ་ལའང་འདི་སྐད༌དུ། ཁྱོད་ནི་བདག་གི་སྲས་ཡིན༌ཞིང༌།། དེ་རིང་བདག་ལ་འཁྲུངས་པ་ཡིན།། ཞེས༌དང༌། ཡང་འདི་སྐད༌དུ། བདག་ནི་ཁོ་ཡི་ཕ་ཡིན༌ཞིང༌།། ཁོ་ནི་བདག་གི་བུ་རུ༌འགྱུར།། ཞེས་གསུངས་མ་མྱོང་བའི་ཕྱིར༌རོ།།
HEB 1:6 དཀོན་མཆོག་གིས་རང་གི་སྲས་ཐོག་མ་དེ་ཉིད་འཇིག་རྟེན་དུ་ཡང་བསྐྱར་བསྐྱལ་ཡོང་བའི་དུས་སུ་འདི་སྐད༌དུ། དཀོན་མཆོག་གི་ཕོ་ཉ་ཐམས་ཅད་ཀྱིས་ཁོང་ལ་ཕྱག་འཚལ་བར་བྱའོ་ཞེས་གསུངས་སོ།།
HEB 1:7 ཡང་དཀོན་མཆོག་གིས་ཕོ་ཉ་རྣམས་ཀྱི་སྐོར་ལ་འདི་སྐད༌དུ། ཁོང་གིས་རང་གི་ཕོ་ཉ་རླུང་བཞིན༌དང༌།། ཞབས་ཕྱི་པ་ནི་མེ་ལྕེ་བཞིན་དུ༌མཛད།། ཅེས་གསུངས༌སོ།།
HEB 1:8 འོན་ཀྱང་། དཀོན་མཆོག་གིས་སྲས་ཀྱི་སྐོར་ལ་འདི་སྐད༌དུ། དཀོན་མཆོག་ཁྱེད་ཀྱི་བཞུགས་ཁྲི་རྟག་ཏུ༌གནས།། འཁར་བ་དྲང་པོ་ཁྱེད་ཀྱི་སྲིད་འཁར་ཡིན།།
HEB 1:9 ཁྱེད་ནི་དྲང་པོར་དགྱེས་ཤིང་ཉེས་པར༌སྡང༌།། དེའི་ཕྱིར་དཀོན་མཆོག་ཁྱེད་ཀྱི་དཀོན་མཆོག༌གིས།། ཁྱེད་ཀྱི་གྲོགས་པོ་དག་ལས་ཁྱད་པར༌དུ།། དགའ་སྤྲོའི་སྣུམ་གྱིས་ཁྱེད་ལ་བྱུགས་པར༌མཛད།། ཅེས་གསུངས༌སོ།།
HEB 1:10 ཡང་ཁོང་གིས་འདི་སྐད༌དུ། གཙོ་བོས་ཐོག་མར་ས་གཞིའི་རྨང་བཏིངས་ཤིང་།། ནམ་མཁའ་འདི་ཡང་ཁྱེད་ཀྱི་ཕྱག་གིས༌མཛད།།
HEB 1:11 གནམ་ས་འཇིག་ཀྱང་ཁྱེད་ནི་རྟག་ཏུ༌བཞུགས།། གནམ་ས་གཉིས་ནི་གོས་ལྟར་རྙིང་བར༌འགྱུར།།
HEB 1:12 ཁྱེད་ཀྱིས་གནམ་ས་གཉིས་ནི་གོས་བཞིན༌བསྒྲིལ།། གོས་བཞིན་དེ་ནི་ཡོངས་སུ་བསྒྱུར་པ་ཡིན།། འོན་ཀྱང་ཁྱེད་རང་ནམ་ཡང་འགྱུར་བ༌མེད།། ཁྱེད་ཀྱི་ལོ་ཟླ་ནམ་ཡང་རྫོགས་མཐའ༌བྲལ།། ཞེས་གསུངས༌སོ།།
HEB 1:13 དཀོན་མཆོག་གིས་ཕོ་ཉ་སུ་ལའང་འདི་སྐད༌དུ། བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་སྟེགས་སུ་བསྒྱུར་བའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས་མ་མྱོང༌།
HEB 1:14 ཕོ་ཉ་ཐམས་ཅད་ནི་ཞབས་ཕྱི་སྒྲུབ་པའི་སེམས་ཉིད༌དང༌། ཐར་པ་འཐོབ་ངེས་པའི་མི་རྣམས་ལ་ཞབས་ཕྱི་སྒྲུབ་མཁན་དུ་མངགས་པ་མ་ཡིན་ནམ།
HEB 2:1 དེ་བས་ན་བདག་ཅག་འཁྱོག་འགྲོས་སུ་མི་འཁྱར་བའི༌ཕྱིར། གང་ཞིག་ཐོས་པ་ལ་ལྷག་ཏུ་གཟབ་ནན་གྱིས་མཉན་པར་བྱའོ།།
HEB 2:2 ཕོ་ཉ་བརྒྱུད་ནས་བསྒྲགས་པའི་བཀའ་དེ་ངེས་གཏན་ཡིན་ཏེ། བཀའ་དེ་དང་འགལ་ཞིང་དེར་མ་མཉན་པ་ཐམས་ཅད་ལ་འཐོབ་འོས་པའི་ལན་ཐོབ་ཟིན་ཅིང་།
HEB 2:3 བདག་ཅག་གིས་ཐར་པ་ཆེན་པོ་འདི་ལྟ་བུ་སྣང་མེད་དུ་བསྐྱུར༌ན། ལན་དེ་ལས་ཅི་ལྟར་ཐར་ཐུབ༌བམ། ཐར་པ་དེ་ནི་ཐོག་མར་གཙོ་བོས་དངོས་སུ་གསུངས་པ༌དང༌། ཕྱིས་སུ་ཐོས་མཁན་རྣམས་ཀྱིས་བདག་ཅག་ལ་བདེན་དཔང་བྱས༌པ་ཡིན།
HEB 2:4 དཀོན་མཆོག་གིས་ཀྱང་རང་གི་ཐུགས་དགོངས་བཞིན་དུ་གྲུབ་རྟགས༌དང༌། དོན་ངོ་མཚར༌ཅན། ནུས་མཐུ་སྣ༌ཚོགས། གཞན་ཡང་དམ་པའི་ཐུགས་ཉིད་ཀྱི་གནང་སྦྱིན་བཅས་ལ་བརྟེན་ནས་ཁོ་རྣམས་དང་མཉམ་དུ་བདེན་དཔང་མཛད་པ་ལགས༌སོ།།
HEB 2:5 ངེད་ཅག་གིས་གླེང་བཞིན་པའི་འབྱུང་འགྱུར་གྱི་འཇིག་རྟེན་དེ་ནི་དཀོན་མཆོག་གིས་ཕོ་ཉ་རྣམས་ལ་བདག་སྐྱོང་བྱེད་པར་སྤྲད་པ་མ་ཡིན༌མོད།
HEB 2:6 འོན་ཀྱང་མི་གཞན་གྱིས་མདོ་ཞིག་ལས་ལུང་དྲངས་ཤིང་བདེན་དཔང་བྱས་པ༌འདི་ལྟར། ཀྱེ་ཀྱེ་མགོ་ནག་མི་ནི་ཅི་འདྲ༌ཙམ།། ཁྱེད་ཀྱིས་མི་རྣམས་ཐུགས་སུ་འཛིན་དོན༌ཅི།། ཀྱེ་ཀྱེ་འཇིག་རྟེན་མིའི་བུ་ཅི་འདྲ༌ཙམ།། ཁྱེད་ཀྱིས་དེ་ལ་ཐུགས་ཁུར་མཛད་དོན༌ཅི།།
HEB 2:7 ཁྱེད་ཀྱིས་ཕོ་ཉ་ལ་ནི་བསྡུར་བ༌ན།། ཁོང་ནི་རེ་ཞིག་ཅུང་ཙམ་དམའ་བར་མཛད།། གཟི་བྱིན་བཀུར་སྟི་གནང་སྟེ་གཙུག་རྒྱན༌གྱུར།། ཁྱེད་ཀྱི་ཕྱག་གིས་མཛད་པའི་དངོས་པོ༌ཀུན།། ཁོང་ལ་དོ་དམ་བྱེད་པར༌མཛད་པ་ཡིན།།
HEB 2:8 དངོས་པོ་ཐམས་ཅད་ཁོང་གི་ཞབས་འོག་གནོན།། ཞེས༌པའོ།། དངོས་པོ་ཐམས་ཅད་ཁོང་གི་ཞབས་འོག་ཏུ་གནོན་པར་མཛད་པ་ཡིན༌པས། ཁོང་གི་དབང་འོག་ཏུ་མི་འགྲོ་བ་ཅི་ཡང་ལྷག་མེད། ད་ལྟ་བདག་ཅག་གིས་དངོས་པོ་ཐམས་ཅད་ཁོང་གི་དབང་འོག་ཏུ་ཡོད་པ་མི་མཐོང༌མོད།
HEB 2:9 འོན་ཀྱང་སྐྱབས་མགོན་ཡེ་ཤུ་ནི་རེ་ཞིག་ཕོ་ཉ་དག་ལས་ཅུང་ཙམ་དམའ་བར་མཛད་པ༌དང༌། ཁོང་གིས་འཆི་བའི་སྡུག་བསྔལ་མྱངས་པས་གཟི་བྱིན་དང་བཀུར་སྟིའི་གཙུག་རྒྱན་ཐོབ༌ཅིང༌། དེ་ནི་དཀོན་མཆོག་གི་ཐུགས་རྗེ་ལ་བརྟེན་ནས་མི་ཐམས་ཅད་ཀྱི་དོན་དུ་འཆི་བའི་སྡུག་བསྔལ་མྱངས༌པའི་ཕྱིར་རོ།།
HEB 2:10 མ་གཞི་དངོས་པོ་ཐམས་ཅད་ཀྱི་ཁོངས་གཏོགས་དང་གཞི་རྩ་ཡིན་པའི་དཀོན་མཆོག་གིས་བུ་མང་པོ་ཞིག་གཟི་བརྗིད་ཀྱི་ནང་དུ་འཁྲིད་པའི༌ཕྱིར། ཁོ་རྣམས་སྐྱོབ་པའི་འགོ་དཔོན་དེ་ཉིད་ཀྱིས་སྡུག་བསྔལ་མྱངས་པ་བརྒྱུད་ནས་ཆ་ཡོངས་སུ་རྫོགས་པར་མཛད་པ་ནི་འོས་ཤིང་འཚམ༌པ་ཡིན་ནོ།།
HEB 2:11 མི་དམ་པར་མཛད་མཁན་སྐྱབས་མགོན་ཡེ་ཤུ་དང་དམ་པར་གྱུར་ཟིན་པ་ཐམས་ཅད་འབྱུང་ཁུངས་གཅིག་ཡིན༌པས། ཁོང་གིས་དེ་རྣམས་ལ་སྤུན་ཟླ་ཞེས་ཞལ་འབོད་གནང་བ་ནི་ངོ་གནོང་དགོས་པ་ཞིག་མིན༌ཏེ།
HEB 2:12 ཁོང་གིས་འདི་སྐད༌དུ། བདག་གིས་ཁྱེད་མཚན་ང་ཡི་སྤུན་ལ༌སྒྲོག ། འདུ་ཚོགས་ནང་དུ་ཁྱེད་ལ་བསྟོད་དབྱངས༌འབུལ།། ཞེས༌དང༌།
HEB 2:13 ཡང་འདི་སྐད༌དུ། བདག་གིས་ཁོང་ཉིད་ལ་ནི་ཡིད་རྟོན༌བྱེད།། ཅེས༌དང༌། ཡང་འདི་སྐད༌དུ། བདག་དང་དཀོན་མཆོག་ཉིད་ཀྱིས་ང་རང་ལ།། གནང་བའི་བུ་ཕྲུག་རྣམས་ལ༌བལྟ་བར་གྱིས།། ཞེས་གསུངས༌པའི་ཕྱིར་རོ།།
HEB 2:14 དེའི༌ཕྱིར། བུ་ཕྲུག་རྣམས་ལ་ཤ་ཁྲག་གདོས་བཅས་ཀྱི་ཕུང་བོ་ཡོད་པ༌བཞིན། སྐྱབས་མགོན་ཡེ་ཤུའང་དངོས་སུ་མི་ཡི་གཟུགས་པོར་གྱུར༌ཅིང༌། དེ་ནི་འཆི་བ་བརྒྱུད་ནས་འཆི་བདག་བདུད་དེ་འཇོམས་པ༌དང༌།
HEB 2:15 འཆི་བར་འཇིགས་ནས་མི་ཚེ་ཧྲིལ་པོར་གཡོག་པོར་གྱུར་པ་རྣམས་དགྲོལ་བའི་ཆེད༌དུ་ཡིན།
HEB 2:16 ཁོང་གིས་ཕོ་ཉ་རྣམས་བསྐྱབས་པ་མ་ཡིན༌པར། ཨབ་ར་ཧམ་གྱི་རིགས་རྒྱུད་རྣམས་སྐྱོབ༌པ་ཤ་སྟག་གོ།
HEB 2:17 དེའི༌ཕྱིར། ཁོང་ནི་རྣམ་པ་ཀུན་ནས་རང་གི་སྤུན་ཟླ་རྣམས་དང་གཅིག་འདྲར་འགྱུར་དགོས༌ཏེ། དཀོན་མཆོག་གི་འཕྲིན་ལས་ཀྱི་ཐད་ནས་བྱམས་སྙིང་རྗེ་ཅན་དང་ཡིད་རྟོན་རུང་བའི་མཆོད་དཔོན་ཆེན་པོར་འགྱུར་བ༌དང༌། མི་རྣམས་ཀྱི་སྡིག་པའི་ཆེད་དུ་ཉེས་ཆད་བསལ་བའི་མཆོད་པ་འབུལ་བའི་ཕྱིར༌ཡིན།
HEB 2:18 ཁོང་ལ་ཉམས་ཚོད་ཐེབས་ནས་སྡུག་བསྔལ་མྱངས༌པས། ཁོང་གིས་ཉམས་ཚོད་མྱོང་བའི་མི་རྣམས་ཀྱང་སྐྱོབ་ནུས༌སོ།།
HEB 3:1 དེ་ལྟར་ཡིན་པས། ནམ་མཁའི་ཞིང་ཁམས་ནས་ཞལ་འབོད་གཅིག་མཚུངས་ཐོབ་མཁན་གྱི་སྤུན་ཟླ་དམ་པ༌རྣམས། བདག་ཅག་གིས་སྐུ་ཚབ་པ་དང་མཆོད་དཔོན་ཆེན་པོ་རུ་ཁས་ལེན་པའི་སྐྱབས་མགོན་ཡེ་ཤུ་ལ་ཁྱོད་ཅག་གིས་བསམ་མནོ་གཏོང་བར༌གྱིས།
HEB 3:2 ཁོང་ཉིད་ནི་རང་ཉིད་བསྐོ་མཁན་ལ་བློ་སེམས་དཀར༌བ་དང་། དེ་ནི་མོ་ཤེ་ཁོ་རང་དཀོན་མཆོག་གི་ཁྱིམ་མི་ཡོངས་ལ་བློ་སེམས་དཀར་བ་དང་མཚུངས་སོ།།
HEB 3:3 ཡང་ཁོང་ཉིད་ནི་མོ་ཤེ་ལས་ཀྱང་གཟི་བརྗིད་ཆེན་པོ་འཐོབ་འོས༌ཏེ། ཁང་པ་བཟོ་མཁན་ནི་ཁང་པ་ལས་ཀྱང་བརྗིད་ཉམས་ཆེ་བ་བཞིན༌ནོ།།
HEB 3:4 ཅིའི་ཕྱིར་ཞེ་ན། ཁང་པ་རེ་རེར་བཟོ་མཁན་ཡོད༌མོད། འོན་ཀྱང་དངོས་པོ་ཐམས་ཅད་སྐྲུན་མཁན་ནི་དཀོན་མཆོག་ཡིན་པའི་ཕྱིར་རོ།།
HEB 3:5 མོ་ཤེ་ནི་དཀོན་མཆོག་གི་ཁྱིམ་གཞིས་ལ་བློ་སེམས་དཀར་བའི་ཞབས་ཕྱི་པ་ཡིན༌ལ། མ་འོངས་པའི་དུས་སུ་སྒྲོག་ངེས་པའི་དོན་དེ་ལ་བདེན་དཔང་བྱེད་པར་འགྱུར།
HEB 3:6 འོན་ཀྱང་སྐྱབས་མགོན་མཱ་ཤི་ཀ་ནི་དཀོན་མཆོག་གི་སྲས་ཡིན་པ་བཞིན༌དུ། དཀོན་མཆོག་གི་ཁྱིམ་གཞིས་ལ་བློ་སེམས་དཀར་པོས་བདག་སྐྱོང་མཛད་མཁན་ཡིན། བདག་ཅག་གིས་བསྟོད་པར་འོས་པའི་རེ་བ་དང་བློ་སྟོབས་དེ་ཉིད་མཐའ་འཁྱོངས་པར་བྱས༌ན། བདག་ཅག་ནི་ཁོང་གི་ཁྱིམ་གཞིས་ཡིན་ནོ།།
HEB 3:7 དེའི་ཕྱིར། དམ་པའི་ཐུགས་ཉིད་ཀྱིས་འདི་སྐད་དུ་གསུངས་པ༌སྟེ། དེ་རིང་ཁྱོད་ཚོས་ཁོང་གི་བཀའ་ཐོས༌ན།།
HEB 3:8 དབེན་སྟོང་ཡུལ་ནས་རྒྱབ་གཏོད་བྱས་པ་དང༌།། ཚོད་བགམ་བགྱིས་པའི་དུས་དེ་ནང་བཞིན༌དུ།། རང་གི་སེམས་ནི་གྱོང་པོར་མ་བྱེད༌ཅིག །
HEB 3:9 ཁྱོད་ཅག་མེས་པོས་གནའ་བོའི་ཡུལ་དེ༌ནས།། བགྲང་བྱ་བཞི་བཅུར་བདག་གི་འཕྲིན་ལས་མཐོང་།། བདག་ལ་ཚོད་བགམ་བྱས་ནས་འགྲན་སློང་བགྱིས།།
HEB 3:10 དེའི་ཕྱིར་ང་རང་མི་རབས་དེ༌ལ་ནི།། སུན་སྣང་བྱུང་ནས་འདི་སྐད་སྨྲས་པ༌སྟེ།། དེ་དག་སེམས་ནི་རྟག་ཏུ་འཁྱོར་གྱུར་ནས།། བདག་གི་སྤྱོད་ལམ་ནམ་ཡང་མི་ཤེས༌སོ།།
HEB 3:11 བདག་ནི་ཁོང་ཁྲོ་ལངས་ཏེ་དམ་བཅས་པ།། ཁོ་རྣམས་བདག་གི་ངལ་གསོ་དེའི་ནང༌དུ།། གཏན་ནས་ཞུགས་པར་མི་བྱ་ཞེས་པ་འོ།།
HEB 3:12 སྤུན་ཟླ༌རྣམས། ཁྱོད་ཅག་གི་ཁྲོད་དུ་སུ་ཞིག་གིས་དད་པ་མི་བྱེད་པའི་སེམས་ངན་བཅངས༌ནས། རྟག་ཏུ་གསོན་པོར་བཞུགས་པའི་དཀོན་མཆོག་དང་ཁ་མི་འབྲལ་བའི་ཕྱིར་ཁྱོད་ཅག་གིས་དོགས་ཟོན་བྱོས༌ཤིག
HEB 3:13 ཁྱོད་རྣམས་ལས་སུ་ཞིག་ཀྱང་སྡིག་པའི་གཡོ་འོག་ཏུ་ཚུད་ནས་སེམས་གྱོང་པོར་མི་འགྱུར་བའི༌ཕྱིར། དེ་རིང་ཟེར་བའི་ཉིན་མོ་མ་རྫོགས་པའི་བར་དུ། ཉིན་རེ་བཞིན་ཕན་ཚུན་སྐུལ་སློང་བྱེད་པར༌གྱིས།
HEB 3:14 ཅིའི་ཕྱིར་ཞེ་ན། བདག་ཅག་གིས་ཐོག་མར་ཐག་ཆོད་པའི་དད་སེམས་དེ་མཐའ་འཁྱོངས་ན། སྐྱབས་མགོན་མཱ་ཤི་ཀའི་ཆ་ནས་སྐལ་བ་དང་ལྡན༌པར་གྱུར་པའི་ཕྱིར་རོ།།
HEB 3:15 དེ་ལ་གསུང་རབ་ཀྱི་མདོ་ལས་ཇི་སྐད༌དུ། དེ་རིང་ཁྱོད་ཚོས་ཁོང་གི་བཀའ་ཐོས༌ན།། ཁོང་ལ་རྒྱབ་གཏོད་བྱེད་པའི་དུས་བཞིན༌དུ།། རང་གི་སེམས་ནི་གྱོང་པོར་བྱ་མི༌རུང༌།། ཞེས་གསུངས༌པའོ།།
HEB 3:16 དུས་དེར་ཁོང་གི་བཀའ་ཐོས་ཤིང་ཁོང་ལ་རྒྱབ་གཏོད་མཁན་ནི་སུ་ཞིག་ཡིན་ནམ་ཞེ༌ན། མོ་ཤེའི་རྗེས་སུ་འབྲངས་ཤིང་ཨེ་ཅིབ་ཡུལ་ནས་ཕྱིར་ཐོན་པའི་མི་ཐམས་ཅད་མ་ཡིན༌ནམ།
HEB 3:17 ལོ་ངོ་བཞི་བཅུའི་རིང༌ལ། དཀོན་མཆོག་ནི་མི་སུ་ཞིག་ལ་ཐུགས་སུན་སྐྱེས་སམ་ཞེ༌ན། དེ་ནི་སྡིག་ཉེས་བསགས་ཏེ་བེམ་པོ་དབེན་སྟོང་དུ་ལུས་པའི་མི་རྣམས་མ་ཡིན༌ནམ།
HEB 3:18 ཡང་ཁོང་གིས་མི་སུ་ཞིག་རང་ཉིད་ཀྱི་ངལ་གསོའི་ནང་དུ་མི་ཞུགས་པར་དམ་བཅས་སམ་ཞེ༌ན། དེ་ནི་བཀའ་མི་སྲུང་བ་རྣམས་མ་ཡིན༌ནམ།
HEB 3:19 དེས་ན། ཁོ་རྣམས་ངལ་གསོའི་ནང་དུ་ཞུགས་མ་ནུས་པ་ནི་དད་པ་མེད་པའི་རྐྱེན་ཡིན་པ་ཤེས༌སོ།།
HEB 4:1 དེའི་ཕྱིར། ཁོང་གི་ངལ་གསོའི་ནང་དུ་ཞུགས་པའི་ཞལ་བཞེས་དེ་ད་དུང་བཞག་ཡོད་པས་ན། ཁྱོད་རྣམས་ལས་སུ་ཞིག་ཀྱང་རྗེས་སུ་ལུས་པར་སྙམ་པ་ཙམ་ལ་དོགས་ཟོན་བྱེད་དགོས་སོ།།
HEB 4:2 ཅིའི་ཕྱིར་ཞེ་ན། ཁོ་རྣམས་དང་འདྲ་བར་བདག་ཅག་ལའང་འཕྲིན་བཟང་དེ་བསྒྲགས་མྱོང་བའི་ཕྱིར༌ཡིན། འོན་ཀྱང་ཁོ་རྣམས་ལ་བཀའ་ཐོས་པ་དང་མཐུན་པའི་དད་པ་མེད༌པས། བཀའ་ཐོས་པ་དེ་ནི་ཁོ་རྣམས་ལ་ཕན་ཐོགས་མེད།
HEB 4:3 བདག་ཅག་དད་པ་བྱས་ཟིན་པ་དག་ནི་ངལ་གསོའི་ནང་དུ་ཞུགས་པ་ཡིན༌ཏེ། དཀོན་མཆོག་གིས་འདི་སྐད༌དུ། བདག་ནི་ཁོང་ཁྲོ་ལངས་ཏེ་དམ་བཅས་པ།། ཁོ་རྣམས་བདག་གི་ངལ་གསོ་དེའི་ནང༌དུ།། གཏན་ནས་ཞུགས་པར་མི་བྱ་ཞེས་པ་འོ།། ཞེས་གསུངས་པ་བཞིན༌ནོ།། དོན་དམ་དུ་ཁོང་གི་འཕྲིན་ལས་ནི་འཇིག་རྟེན་ཁམས་བཀོད་པའི་ཚུན་ལ་ཡོངས་སུ་གྲུབ༌པའོ།།
HEB 4:4 ཉིན་བདུན་པའི་སྐོར་ལ་གསུང་རབ་ཀྱི་མདོ་ཞིག་ལས་ཇི་སྐད༌དུ། ཉིན་བདུན་པར་དཀོན་མཆོག་གིས་འཕྲིན་ལས་ཐམས་ཅད་ནས་ངལ་གསོ་མཛད་ཅེས་གསུངས་སོ།།
HEB 4:5 ཡང་མདོ་དེ་ལས་ཇི་སྐད༌དུ། ཁོ་རྣམས་བདག་གི་ངལ་གསོ་དེའི་ནང༌དུ།། གཏན་ནས་ཞུགས་པར་མི་བྱ་ཞེས་པ་འོ།། ཞེས་གསུངས༌པའོ།།
HEB 4:6 ངལ་གསོའི་ནང་དུ་ཞུགས་ངེས་པའི་མི་འགའ་ཞིག་ཡོད༌ལ། སྔོན་ཆད་འཕྲིན་བཟང་ཐོས་མྱོང་བ་རྣམས་ཀྱིས་བཀའ་མ་བསྲུངས༌པས། དེའི་ནང་དུ་ཞུགས་མ་ནུས་སོ།།
HEB 4:7 དེའི༌ཕྱིར། ལོ་མང་པོ་འདས་པའི་རྗེས༌སུ། དཱ་བིད་ཀྱི་མདོ་ལས་ཡང་ཉིན་གཅིག་གཏན་ཁེལ་བྱས་པ༌སྟེ། དེ་ནི་གོང་ནས་ཇི་སྐད༌དུ། དེ་རིང་ཁྱོད་ཚོས་ཁོང་གི་བཀའ་ཐོས༌ན།། རང་གི་སེམས་ནི་གྱོང་པོར་བྱ་མི༌རུང༌།། ཞེས་གསུངས་པ་བཞིན༌ནོ།།
HEB 4:8 དེ་ཡང་སྔོན་ཆད་ཡོ་ཤུ་ཨ་ཡིས་ཁོ་རྣམས་ངལ་གསོའི་ནང་དུ་ཞུགས་པར་བྱས༌ན། ཕྱིས་སུ་དཀོན་མཆོག་གིས་ངལ་གསོ་བའི་ཉིན་གཞན་ཞིག་གསུང་བར་མ་མཛད་དོ།།
HEB 4:9 དེས་ན་དཀོན་མཆོག་གིས་རང་གི་མི་སྡེའི་ཆེད༌དུ། ངལ་གསོ་ཞིག་བསྐྱུར་ཡོད་པ་ཤེས་ནུས་ལ།
HEB 4:10 ཁོང་གི་ངལ་གསོའི་ནང་དུ་ཞུགས་མཁན་ཡིན༌ན། དཀོན་མཆོག་གིས་རང་གི་འཕྲིན་ལས་ཐམས་ཅད་ནས་ངལ་གསོ་མཛད་པ་བཞིན། རང་གི་དོན་རྣམས་སྒྲུབ་མཚམས་བཞག་སྟེ་ངལ་གསོ་བྱས་པ་ཡིན༌ནོ།།
HEB 4:11 དེའི༌ཕྱིར། མི་སུས་ཀྱང་དཀོན་མཆོག་གི་བཀའ་མི་སྲུང་བ་དེ་རྣམས་མིག་དཔེར་བཟུང་ནས་ས་རུ་མི་འགྱེལ་བའི༌ཕྱིར། བདག་ཅག་གིས་ངེས་པར་ངལ་གསོ་དེའི་ནང་དུ་ཞུགས་པར་བརྩོན་དགོས༌སོ།།
HEB 4:12 དཀོན་མཆོག་གི་བཀའ་ནི་སྐྱེ་སྟོབས་དང་ནུས་མཐུ་ལྡན་ཞིང་རལ་གྲི་ཁ་གཉིས་མ་ལས་ཀྱང་རྣོ་བ༌དང༌། ཐ་ན་ཡིད་དང༌སེམས། རུས་ཚིགས་དང་རུས་རྐང་བཅས་ཀྱང་དབུག་ཅིང་གཤག་ནུས༌ལ། ཡིད་ཀྱི་བསམ་ཚུལ་དང་འདོད་ཚུལ་ལའང་བརྡར་ཤ་གཅོད་ནུས་སོ།།
HEB 4:13 བཀོད་པ་ཐམས་ཅད་ལས་ཁོང་གི་དྲུང་དུ་མི་སྣང་བ་གཅིག་ཀྱང་མེད། མ་གཞི་དངོས་པོ་ཐམས་ཅད་བདག་ཅག་དང་འབྲེལ་བ་ཡོད་པའི་དཀོན་མཆོག་གི་སྤྱན་སྔར་དམར་རྗེན་དུ་མངོན་པ་ཡིན༌ནོ།།
HEB 4:14 དེ་བས་ན། བདག་ཅག་ལ་ནམ་མཁའི་ཞིང་ཁམས་སུ་འཕགས་ཤིང་བརྗིད་ཉམས་ཆེ་བའི་མཆོད་དཔོན་ཆེན་པོ་ཞིག་ཡོད༌དེ། ཁོང་ནི་དཀོན་མཆོག་གི་སྲས་སྐྱབས་མགོན་ཡེ་ཤུ་ཡིན༌པས། བདག་ཅག་གིས་ཁས་ལེན་བྱས་པའི་དད་པ་དེ་བརྟན་པོར་བསྲུང་དགོས་སོ།།
HEB 4:15 ཅིའི་ཕྱིར་ཞེ་ན། བདག་ཅག་གི་མཆོད་དཔོན་ཆེན་པོས་རང་རེའི་སྟོབས་ཤུགས་ཞན་པར་ཐུགས་རྗེ་དགོངས་མི་ནུས་པ་མིན༌ཏེ། ཁོང་ལའང་དོན་ཐམས་ཅད་ཀྱི་ཆ་ནས་བདག་ཅག་དང་འདྲ་བར་ཉམས་ཚོད་ཐེབས་མྱོང་མོད། འོན་ཀྱང་ཁོང་གིས་སྡིག་པ་ཅི་ཡང་མ་བསགས་སོ།།
HEB 4:16 དེའི༌ཕྱིར། རོགས་སྐྱོར་དགོས་པའི་དུས་སུ་སྐྱབས་དང་ཐུགས་རྗེ་འཐོབ་པའི༌ཕྱིར། བདག་ཅག་བག་ཕེབས་ཞུམ་མེད་ཀྱིས་ཐུགས་རྗེའི་བཞུགས་ཁྲི་མདུན་དུ་ཡོང་བར༌བྱའོ།།
HEB 5:1 སྤྱིར་མི་རྣམས་ལས་མཆོད་དཔོན་ཆེན་པོར་བདམས་པ༌ཐམས་ཅད་ནི། མངགས་བཅོལ་ལྟར་མིའི་འཐུས་ཚབ་ཏུ་དཀོན་མཆོག་གི་འཕྲིན་ལས་རྣམས་བསྒྲུབ་པ༌དང༌། སྡིག་པའི་ཆེད་དུ་ཕྱག་རྟེན་དང་མཆོད་པ་རྣམས་འབུལ་བའི་ཕྱིར་ཡིན་ནོ།།
HEB 5:2 མཆོད་དཔོན་ཆེན་པོས་མགོ་བོ་རྨོངས་ཤིང་ཁ་ཕྱོགས་བོར་བའི་མི་རྣམས་ལ་ཐུགས་རྒྱ་བསྐྱེད་ནུས༌ཏེ། ཁོ་རང་ཡང་སྟོབས་ཞན་པའི་གནས་སུ་ལྷུང་ཡོད་པས།
HEB 5:3 ཁོ་བོས་འབངས་མི་དང་རང་གི་ཆེད་དུ། སྡིག་པའི་ཕྱིར་མཆོད་པ་འབུལ་དགོས་སོ།།
HEB 5:4 ཡང་མཆོད་དཔོན་ཆེན་པོའི་བརྗིད་ཉམས་ནི་མི་སུ་ཞིག་གིས་ཚུར་ལེན་མི་ནུས༌ཏེ། ཨ་རོན་ཇི་བཞིན་ངེས་པར་དཀོན་མཆོག་གི་ཞལ་འབོད་འཐོབ་དགོས་ལ།
HEB 5:5 དེས་ན་སྐྱབས་མགོན་མཱ་ཤི་ཀས་གཟི་བརྗིད་དེ་རང་ལ་བླངས་ནས་མཆོད་དཔོན་ཆེན་པོར་བྱས་པ་ནི་མིན༌ཏེ། དཀོན་མཆོག་གིས་ཁོང་ལ་འདི་སྐད༌དུ། ཁྱོད་ནི་བདག་གི་སྲས་ཡིན༌ཞིང༌།། དེ་རིང་བདག་ལ་འཁྲུངས་པ་ཡིན།། ཞེས་གསུངས་པ་ཡིན༌ནོ།།
HEB 5:6 ཡང་མདོ་གཞན་ཞིག་ལས་འདི་སྐད༌དུ། མཆོད་དཔོན་མཱལ་ཀི་ཚེ་དེག་རིམ་པ་བཞིན།། ཁྱོད་ནི་ཇི་སྲིད་བར་དུ་མཆོད་དཔོན༌ཡིན།། ཞེས་གསུངས་པ་བཞིན༌ནོ།།
HEB 5:7 སྐྱབས་མགོན་མཱ་ཤི་ཀ་ཁོང་ཉིད་སྐུ་གཟུགས་ཀྱི་ཕུང་བོའི་ནང་དུ་བཞུགས་པའི་དུས༌སུ། ཁོང་གིས་གསུང་སྐད་ཆེན་པོས་ཞུམ་ཞིང་སྤྱན་ཆབ་བཞུར་བཞིན་གསོལ་བ་བཏབ་པ་དང་། རང་ཉིད་འཆི་བ་ལས་སྐྱོབ་པར་མཛད་ནུས་པ་དེ་ཉིད་ལ་ཞུ་བ་བྱས་མྱོང་ཞིང་། ཁོང་ལ་དད་གུས་མངའ་བའི་རྐྱེན་གྱིས་དཀོན་མཆོག་གིས་གསན་པར་མཛད་དོ།།
HEB 5:8 ཁོང་ནི་སྲས་ཡིན་ཡང་ཁོང་གིས་སྡུག་བསྔལ་མྱངས་པ་བརྒྱུད་ནས་དཀོན་མཆོག་གི་བཀའ་ཇི་ལྟར་བསྲུང་དགོས་པ་བསླབས་ནས།
HEB 5:9 ཁོང་ཉིད་ཆ་ཡོངས་སུ་རྫོགས་པས། ཁོང་གི་བཀའ་རྩི་མཁན་ཐམས་ཅད་ལ་མཐའ་མེད་པའི་ཐར་པ་འཐོབ་པའི་རྒྱུ་རུ་གྱུར་པར་མ༌ཟད།
HEB 5:10 དཀོན་མཆོག་གིས་མཱལ་ཀི་ཚེ་དེག་གི་རིམ་པ་བཞིན། ཁོང་ལ་མཆོད་དཔོན་ཆེན་པོ་ཞེས་གསོལ༌བའོ།།
HEB 5:11 དེ་ཡང་མཱལ་ཀི་ཚེ་དེག་གི་སྐོར་ངེད་ཅག་ལ་འཆད་རྒྱུ་མང་པོ་ཡོད༌ནའང་། ཁྱོད་རྣམས་ཀྱིས་རྣ་བ་མི་གཏོད་པས་དེ་ལ་གསལ་བཤད་བྱེད༌དཀའོ།།
HEB 5:12 དུས་ཚོད་ལྟར༌ན་ད་ལྟ་ཁྱོད་རྣམས་སློབ་དཔོན་དུ་བྱེད་འོས༌མོད། འོན་ཀྱང་མི་གཞན་ཞིག་གིས་དཀོན་མཆོག་གི་བཀའ་ཡི་རྨང་གཞི་དེ་ཡང་བསྐྱར་ཁྱོད་ཅག་ལ་ཁྲིད་སྟོན་བྱེད་དགོས་ཤིང་། ཁྱོད་ཅག་ནི་འོ་མ་ཁོ་ན་འཐུང་དགོས་པ་ལས་ཟས་བཟའ་མི་ནུས་པའི་མི་བཞིན་དུ་གྱུར༌པ་ཡིན།
HEB 5:13 འོ་མ་ཁོ་ན་འཐུང་མཁན་ནི་ཁྱེའུ་ཡིན༌པས། དྲང་བདེན་གྱི་བཀའ་ལ་བྱང་ཆ་མེད་དོ།།
HEB 5:14 འོན་ཀྱང་ལོ་ན་ཆེར་སོན་པ་རྣམས་ཀྱིས་ད་གཟོད་ཁ་ཟས་བཟའ་ནུས་པ་ཡིན༌ལ། དེ་རྣམས་ཀྱི་སེམས་ལ་སྦྱངས་པ་མཐར་ཕྱིན་པས་བཟང་ངན་གྱི་དབྱེ་བའང་འབྱེད་ནུས༌སོ།།
HEB 6:1 དེའི༌ཕྱིར། བདག་ཅག་གིས་སྐྱབས་མགོན་མཱ་ཤི་ཀའི་རྨང་གཞིའི་བསླབ་བྱ་ལས་བརྒལ་ནས། དད་པ་བརྟན་པོའི་ཕྱོགས་སུ་བརྩོན་དགོས་པ་ལས། ཡང་བསྐྱར་རྨང་གཞི་འདིང་མི་དགོས་ཏེ། དཔེར་ན། འཆི་རུ་འཇུག་པའི་སྤྱོད་ངན་ལས་འགྱོད་བཤགས་བྱེད་པ་དང་། དཀོན་མཆོག་ལ་དད༌པ་བྱེད་པ།
HEB 6:2 ཁྲུས་ཀྱི་མཛད་སྒོ་སྣ༌ཚོགས་བསྒྲུབ་པ། ལག་པ་གཞན་གྱི་ལུས་སྟེང་དུ་འཇོག༌པ། གཤིན་པོ་རྣམས་སླར་གསོན༌པ། རྫོགས་མཐའ་མེད་པའི་ལེགས་ཉེས་ཀྱི་ཁྲིམས་ཐག་གཅོད་པ་ལ་སོགས་པའི་བསླབ་བྱ་སྣ་ཚོགས་ལྟ་བུ་ཡིན་ནོ།།
HEB 6:3 དཀོན་མཆོག་ཐུགས་དགྱེས་ན། བདག་ཅག་གིས་དེ་ལྟར་བྱ་ངེས༌སོ།།
HEB 6:4 དེ་ཡང་སུ་ཞིག་ལན་གཅིག་བློ་གསལ་པོར་མཛད་ཅིང་ནམ་མཁའི་ཞིང་ཁམས་ཀྱི་གནང་སྦྱིན་གྱི་བྲོ་བ་མྱངས་པ༌དང༌། དམ་པའི་ཐུགས་ཉིད་ཀྱི་སྐལ་བ་ལྡན་པར་མ༌ཟད།
HEB 6:5 དཀོན་མཆོག་གི་བཀའ་ལེགས་པོ་དང་། བསྐལ་པ་འབྱུང་འགྱུར་གྱི་ནུས་མཐུའི་བྲོ་བ་མྱངས་ནའང་།
HEB 6:6 དེ་རྣམས་ཀྱིས་དད་པ་བསྐྱུར་ན། ཁོ་རྣམས་ཡང་བསྐྱར་འགྱོད་བཤགས་བྱེད་པར་བྱ་མི་ནུས་སོ།། ཅིའི་ཕྱིར་ཞེ་ན། དེ་རྣམས་ཀྱིས་དངོས་སུ་དཀོན་མཆོག་གི་སྲས་དེ་ཡང་བསྐྱར་ཤིང་རྒྱ་གྲམ་གྱི་སྟེང་དུ་བརྡབས་ཏེ། མངོན་སུམ་དུ་ཁོང་ལ་ངོ་གནོང་བར་བྱས་པའི་ཕྱིར་རོ།།
HEB 6:7 དེ་ནི་ས་ཞིང་ཞིག་བསྟུད་མར་བབས་པའི་ཆར་ཆུས་བརླན་པར་བྱས་ཤིང་། དེ་ལས་སྔོ་ཚོད་སྐྱེས་པ་དང་ཞིང་འདེབས་མཁན་རྣམས་ལ་མཁོ་བ་བཞིན་དུ་བཀོལ་སྤྱོད་བྱེད་པར་འོས༌ན། དེ་ནི་དཀོན་མཆོག་ནས་བྱིན་རླབས་ཐོབ་པ་ལྟ་བུ་ཡིན་མོད།
HEB 6:8 འོན་ཀྱང་། ས་ཞིང་དེ་ལས་ཚེར་མ་དང་སྤྱང་ཚེར་སྐྱེས་པ་ཡིན་ན། དེ་ཉིད་འདོར་ཞིང་དམོད་མོ་ཐེབས་ཉེན་ཆེ་བ་དང་། མཇུག་འབྲས་ནི་མེར་བསྲེག་པ་ལྟ་བུའོ།།
HEB 6:9 སྙིང་ནས་བརྩེ་བའི་སྤུན་ཟླ༌རྣམས། ངེད་ཅག་གིས་འདི་ལྟར་སྨྲས༌ནའང༌། ཁྱོད་རྣམས་ཀྱི་སྤྱོད་ལམ་དེ་དག་ལས་ལེགས་པ་དང་། ཁྱོད་རྣམས་ལ་ཐར་པ་དང་ལྡན་པའི་དོན་རྣམས་ཐོབ་ཡོད་པར་ཡིད་ཆེས་སོ།།
HEB 6:10 ཅིའི་ཕྱིར་ཞེ་ན། དཀོན་མཆོག་ནི་དྲང་བདེན་ཡིན་པས། ཁྱོད་ཅག་གིས་བྱས་པའི་ལས་བཟང་པོ་དང་ཁོང་གི་མཚན་ལ་བཅངས་པའི་བྱམས་པ་སྟེ། སྔོན་ཆད་དད་ལྡན་དམ་པ་རྣམས་ལ་ཞབས་ཕྱི་བསྒྲུབས་ཤིང་། ད་ལྟའང་སྒྲུབ་བཞིན་པའི་ལས་དེ་ཁོང་གིས་བརྗེད་མི་སྲིད༌པའི་ཕྱིར་ཡིན།
HEB 6:11 ཁྱོད་རྣམས་ལ་མཐའ་མཇུག་བར་དུ་རེ་བ་ཆེན་པོ་དང་ལྡན་པའི༌ཕྱིར། ཁྱོད་ཅག་མི་རེ་རེས་ལས་དེ་ལྟ་བུར་བརྩོན་རྒྱུ་ནི་ངེད་ཅག་གི་འདུན་པ་ཡིན༌ཏེ།
HEB 6:12 ཁྱོད་རྣམས་ལེ་ལོའི་དབང་དུ་མི་འགྲོ་བའི་ཕྱིར། དད་པ་དང་བཟོད་བསྲན་ལ་བརྟེན་ནས་ཞལ་བཞེས་ཐོབ་མཁན་རྣམས་མིག་དཔེར་འཛིན་དགོས་སོ།།
HEB 6:13 དེ་ཡང་དང་ཐོག་དཀོན་མཆོག་གིས་ཨབ་ར་ཧམ་ལ་ཞལ་བཞེས་གནང་བའི་དུས༌སུ། རང་ཉིད་ལས་ཆེན་པོ་ཞིག་རྟེན་ས་མེད་པས། ཁོང་གིས་རང་ཉིད་དཔང་དུ་བཙུགས་ནས་འདི་སྐད༌དུ།
HEB 6:14 བདག་གིས་ཁྱོད་ལ་བྱིན་རླབས་ཆེན་པོ་གནང་ངེས༌ཤིང༌། ཁྱོད་ཀྱི་རིགས་རྒྱུད་མང་དུ་སྤེལ་བར་བྱའོ་ཞེས་དམ་བཅས་སོ།།
HEB 6:15 དེ་ལྟར་ཨབ་ར་ཧམ་གྱིས་ཡུན་རིང་དུ་བཟོད་བསྲན་བྱས་རྗེས། ཞལ་བཞེས་གནང་བ་དེ་ཉིད་ཁོང་ལ་ཐོབ་པ་ཡིན༌ནོ།།
HEB 6:16 མི་སུ་ཡིན་ཡང་རང་ཉིད་ལས་ཆེན་པོ་ཞིག་དཔང་དུ་བཙུགས་ནས་དམ་བཅའ་བར་མ༌ཟད། དམ་བཅའི་ཚིག་གཞིར་བཟུང་ནས་རྩོད་གཞི་སྣ་ཚོགས་ཐག་གིས་གཅོད་པར་བྱེད་དོ།།
HEB 6:17 དེ་བཞིན་དུ་དཀོན་མཆོག་གིས་ཞལ་བཞེས་ཐོབ་མཁན་རྣམས་ལ་ཁོང་གི་ཐུགས་དགོངས་ནི་འགྱུར་བ་མེད་པ་དེ་ལས་ཀྱང་མངོན་གསལ་དུ་སྟོན་པར་དགོངས༌ཤིང་། དམ་བཅས་པར་བརྟེན་ནས་བདེན་དཔང་མཛད༌པ་ཡིན།
HEB 6:18 དེ་ནི་འགྱུར་བ་མེད་པའི་དོན་འདི་གཉིས་བརྒྱུད་ནས། དཀོན་མཆོག་གིས་ཞལ་རྫུན་གཏན་ནས་གསུང་མི་སྲིད་ཅིང་། བདག་ཅག་སྐྱབས་སུ་སོང་པ་རྣམས་ནི་བདག་ཅག་གི་མདུན་དུ་ལྷགས་པའི་རེ་བ་དེ་རང་སེམས་ལ་འཛིན་པར་སྙིང་སྟོབས་ཆེན་པོ་བསྐྱེད་ཐུབ་པའི་ཕྱིར་རོ།།
HEB 6:19 བདག་ཅག་གི་རེ་བ་ནི་སེམས་ཀྱི་གཏིང་རྡོ་ལྟ་བུ་ཡིན་ཏེ། སྲ་ཞིང་བརྟན་ལ་ཡོལ་བའི་རྒྱབ་ཀྱི་གནས་དེ་རུ་སླེབ་པ་ཡིན།
HEB 6:20 སྐྱབས་མགོན་ཡེ་ཤུ་ནི་བདག་ཅག་གི་ཆེད་དུ་སྔོན་འགྲོ་པ་ལྟར་གནས་དེ་རུ་ཕེབས་ཟིན་ཏེ། མཱལ་ཀི་ཚེ་དེག་གི་རིམ་པ་བཞིན་དུ་ཡུན་གཏན་གྱི་མཆོད་དཔོན་ཆེན་པོར་གྱུར༌པའོ།།
HEB 7:1 དེ་ཡང་མཱལ་ཀི་ཚེ་དེག་ནི་སཱ་ལེམ་གྱི་རྒྱལ་པོ་ཡིན་ལ། བླ་ན་མེད་པའི་དཀོན་མཆོག་གི་མཆོད་དཔོན་ཡང་ཡིན། ཨབ་ར་ཧམ་ནི་རྒྱལ་པོ་གཞན་དག་ལས་རྣམ་པར་རྒྱལ་ཏེ་ཕྱིར་ལོག༌སྐབས། ཁོང་གིས་ཨབ་ར་ཧམ་ལ་བསུ་བ་བྱས་ཤིང་བྱིན་གྱིས་བརླབས་སོ།།
HEB 7:2 ཨབ་ར་ཧམ་གྱིས་ཀྱང་རང་ཉིད་ལ་ཐོབ་པ་ཐམས་ཅད་ལས་བཅུ་ཆའི་གཅིག་བླངས་ནས་ཁོང་ལ་ཕུལ་ཏོ།། ཁོང་གི་མཚན་དང་པོའི་དོན་ནི་དྲང་བདེན་གྱི་རྒྱལ་པོ་ཞེས་པ་དང༌། ཡང་སཱ་ལེམ་གྱི་རྒྱལ་པོ་ཞེས་ཀྱང་ཟེར་ཏེ་ཞི་བདེའི་རྒྱལ་པོ་ཞེས་པའི་དོན་ཡིན།
HEB 7:3 ཁོང་ལ་ཕ་ནི་མེད་ལ་མ་ཡང་མེད་ཅིང་རིགས་རྒྱུད་མེད༌པ་དང་། སྐྱེས་པའི་དུས་དང་འཆི་བའི་དུས་ཀྱང་མེད༌དེ། དཀོན་མཆོག་གི་སྲས་དང་མཚུངས་པར་ཡུན་གཏན་གྱི་མཆོད་དཔོན་ཡིན༌ནོ།།
HEB 7:4 ཁྱོད་ཅག་གིས་སོམས༌དང༌། མེས་པོ་ཨབ་ར་ཧམ་གྱིས་འཕྲོག་བཅོམ་བྱས་པའི་ནོར་རྫས་མཆོག་ཏུ་གྱུར་པ་ལས་བཅུ་ཆའི་གཅིག་བླངས་ནས་ཁོང་ཉིད་ལ་ཕུལ༌བས། སྐྱེས་བུ་དེ་ཉིད་ཇི་འདྲའི་རླབས་ཆེ་བ་ལ།
HEB 7:5 ཡང་ལེ་ཝིའི་བུ་རྒྱུད་ལས་མཆོད་དཔོན་གྱི་ལས་འགན་ཐོབ་པ་རྣམས་ཀྱིས་བཀའ་ཁྲིམས་ལྟར་འབངས་མི་ལས་བཅུ་ཆའི་གཅིག་ལེན་ཞིང་། དེ་དག་ནི་རང་གི་སྤུན་ཟླ་ཡིན༌ལ། ཨབ་ར་ཧམ་གྱི་བུ་རྒྱུད་ཡིན་ཡང་། ད་དུང་ལུགས་སྲོལ་ལྟར་བཅུ་ཆའི་གཅིག་ལེན༌པའོ།།
HEB 7:6 འོན་ཀྱང་། མཱལ་ཀི་ཚེ་དེག་ནི་ཁོ་རྣམས་དང་རིགས་རྒྱུད་མི་གཅིག་ཀྱང༌། ཨབ་ར་ཧམ་གྱིས་བཅུ་ཆའི་གཅིག་གནང་བའང་བླངས་པ༌དང༌། ཞལ་བཞེས་ཐོབ་པའི་ཨབ་ར་ཧམ་ལ་བྱིན་གྱིས་བརླབས་ཤིང་།
HEB 7:7 ཆེན་པོས་ཆུང་ངུ་ལ་བྱིན་གྱིས་བརླབས་པ་ནི་གནས་ལུགས་མཐར་ཐུག་ཡིན།
HEB 7:8 དོན་འདིའི་སྟེང་དུ་ཕྱོགས་གཅིག་ནས་བཅུ་ཆའི་གཅིག་ལེན་མཁན་ཐམས་ཅད་ནི་འཆི་བར་འགྱུར་ངེས་པའི་མི་ཡིན༌མོད། འོན་ཀྱང་ཕྱོགས་གཞན་ཞིག་ནས་བཅུ་ཆའི་གཅིག་ལེན་མཁན་མཱལ་ཀི་ཚེ་དེག་ལ་ཁོང་ནི་གསོན་པོ་ཡིན་ཞེས་བདེན་དཔང་བྱས་ཡོད༌པར་མ་ཟད།
HEB 7:9 བཅུ་ཆའི་གཅིག་ལེན་མཁན་ལེ་ཝིས་ཀྱང་ཨབ་ར་ཧམ་བརྒྱུད་ནས་བཅུ་ཆའི་གཅིག་ཕུལ་བ་ཡིན་ཞེས་བརྗོད་རུང་ངོ་།།
HEB 7:10 ཅིའི་ཕྱིར་ཞེ་ན། མཱལ་ཀི་ཚེ་དེག་གིས་ཨབ་ར་ཧམ་ལ་བསུ་བ་བྱེད་པའི་དུས་སུ། ལེ་ཝི་ཡང་རང་གི་མེས་པོའི་རྒྱུད་ལས་ཡོད་ པའི་ཕྱིར་རོ།།
HEB 7:11 སྔོན་ཆད་ལེ་ཝིའི་རིགས་རྒྱུད་ཀྱི་མཆོད་དཔོན་གྱི་ལས་འགན་ལ་བརྟེན་ནས་མི་སྡེས་དཀོན་མཆོག་གི་བཀའ་ཁྲིམས་དང་དུ་བླངས་པ་དང༌། ལས་འགན་དེ་བརྒྱུད་ནས་ཕུལ་ཏུ་བྱུང་བར་འགྱུར་ཐུབ༌པ་ཡིན་ན། ཨ་རོན་གྱི་རིམ་པ་བཞིན་མ་ཡིན་པར་མཱལ་ཀི་ཚེ་དེག་གི་རིམ་པ་བཞིན་མཆོད་དཔོན་གཞན་ཞིག་འབྱུང་དགོས་དོན༌ཅི།
HEB 7:12 མཆོད་དཔོན་གྱི་ལས་འགན་བསྒྱུར་པ་ཡིན་པས་ན། བཀའ་ཁྲིམས་ཀྱང་ངེས་པར་བསྒྱུར་དགོས་སོ།།
HEB 7:13 རྒྱུ་མཚན་ནི་ཚིག་འདིས་བསྟན་པའི༌མི་དེ་ནི་ཚོ་པ་གཞན་ཞིག་ལ་གཏོགས༌ཤིང་། ཚོ་པ་དེ་ལས་མཆོད་ཁྲི་ལ་ཞབས་ཕྱི་བསྒྲུབས་མྱོང༌བ་གཅིག་ཀྱང་མེད་པའི་ཕྱིར་ཡིན།
HEB 7:14 བདག་ཅག་གི་གཙོ་བོ་ནི་ཡ་ཧུ་དཱའི་ཚོ་པ་ལས་བྱུང༌བ་མངོན་གསལ་ཡིན་མོད། འོན་ཀྱང་ཚོ་པ་དེར་མཆོད་དཔོན་ཡོད་པ་ནི་མོ་ཤེ་ཡིས་གསུངས་མ་མྱོང༌།
HEB 7:15 གལ་ཏེ། མཱལ་ཀི་ཚེ་དེག་དང་མཚུངས་པའི་མཆོད་དཔོན་གཞན་ཞིག་བྱུང་ཚེ། བདག་གི་གཏམ་འདི་ནི་དེ་ལས་ཀྱང་གསལ་པོ་ཡིན༌ཏེ།
HEB 7:16 ཁོང་ཉིད་མཆོད་དཔོན་དུ་གྱུར་པ་ནི་མིའི་ཤ་གཟུགས་ཀྱི་ཕུང་བོའི་སྲོལ་ཡིག་བཞིན་དུ་མ་ཡིན༌པར། འཇོམས་ཐབས་མེད་པའི་ཚེ་སྲོག་གི་ནུས་མཐུ་བཞིན་དུ་གྱུར་པའོ།།
HEB 7:17 ཅིའི་ཕྱིར་ཞེ་ན། ཁོང་ལ་བདེན་དཔང་མཛད་པ་ནི་གསུང་རབ་ཀྱི་མདོ་ལས་ཇི་སྐད༌དུ། མཱལ་ཀི་ཚེ་དེག་ཉིད་ཀྱི་རིམ་པ་བཞིན།། ཁྱེད་ནི་ཇི་སྲིད་བར་དུ་མཆོད་དཔོན་ཡིན།། ཞེས་གསུངས་པའི་ཕྱིར་རོ།།
HEB 7:18 ཕྱོགས་གཅིག་ནས་བཀའ་ཁྲིམས་ཀྱིས་ཅི་ཡང་ཕུལ་དུ་བྱུང་བར་མ་མཛད༌ཅིང༌། སྔོན་ཆད་ཀྱི་བཀའ་ནི་སྟོབས་དང་ཕན་ནུས་ཅི་ཡང་མེད་པས་དོར་བ་དང་། ཕྱོགས་གཞན་ཞིག་ནས་སྔར་ལས་ཁྱད་དུ་འཕགས་པའི་རེ་བ་ཞིག་དྲངས་ཡོད་ཅིང༌། རེ་བ་དེ་ལ་བརྟེན་ནས་བདག་ཅག་དཀོན་མཆོག་གི་དྲུང་དུ་སླེབ་ནུས་སོ།།
HEB 7:20 ཡང་གཅིག་སྨྲས༌ན། སྐྱབས་མགོན་ཡེ་ཤུ་མཆོད་དཔོན་དུ་བསྐོས་པ་ནི་དམ་བཅའ་མ་མཛད་པ་མ་ཡིན་ནོ།། མཆོད་དཔོན་གཞན་དག་ལ་མཚོན་ན། དམ་བཅས་ནས་བསྐོས་པ་མ༌ཡིན་ཏེ།
HEB 7:21 སྐྱབས་མགོན་ཡེ་ཤུ་ཁོ་ན་དམ་བཅས་ནས་བསྐོས་པ་ཡིན། ཅིའི་ཕྱིར་ཞེ་ན། ཁོང་ཉིད་བསྐོ་མཁན་གྱིས་ཁོང་ལ་འདི་སྐད༌དུ། གཙོ་བོས་དམ་བཅའ་བཞག་པས་ཐུགས་མི༌གཡོ།། ཁྱེད་ནི་ཇི་སྲིད་བར་དུ་མཆོད་དཔོན༌ཡིན།། ཞེས་གསུངས་པའི་ཕྱིར་རོ།།
HEB 7:22 དམ་བཅས་ནས་བསྐོས་པའི་རྐྱེན་གྱིས། སྐྱབས་མགོན་ཡེ་ཤུ་ནི་དེ་ལས་ཀྱང་ཁྱད་དུ་འཕགས་པའི་ཞལ་ཆད་ཀྱི་ཁག་ལེན་མཁན་དུ་གྱུར་པའོ།།
HEB 7:23 ཕྱོགས་གཅིག་ནས་མཆོད་དཔོན་དུ་གྱུར་པ་གཞན་དག་འཆི་བའི་བར་ཆད་ཀྱི་དབང་གིས། ཡུན་རིང་པོར་གནས་མི་ཐུབ་པས་ཁོ་རྣམས་ཀྱི་མི་གྲངས་མང༌བ་ཡིན་ནོ།།
HEB 7:24 ཕྱོགས་གཞན་ཞིག་ནས་སྐྱབས་མགོན་ཡེ་ཤུ་ནི་གཏན་དུ་བཞུགས་པ་ཡིན་པས། ཁོང་གི་མཆོད་དཔོན་གྱི་ལས་འགན་ལ་ནམ་ཡང་འགྱུར༌བ་མེད།
HEB 7:25 དེ་བས་ན། མི་དེ་རྣམས་ཀྱི་ཆེད་དུ་གསོལ་བ་འདེབས་པར་ཁོང་ཉིད་གཏན་དུ་གསོན་པོར་བཞུགས་པས། ཁོང་ལ་བརྟེན་ནས་དཀོན་མཆོག་གི་དྲུང་དུ་འགྲོ་མཁན་ཐམས་ཅད་ཁོང་གིས་མཐའ་གཅིག་ཏུ་སྐྱོབ་ནུས༌སོ།།
HEB 7:26 དམ་པ་དང་། སྐྱོན་མི་མངའ་བ། དྲི་མས་མ་གོས༌པ། སྡིག་ཅན་རྣམས་དང་ཁ་བྲལ༌བ། ནམ་མཁའ་ལས་ཀྱང་བླ་ན་འཕགས་པའི་མཆོད་དཔོན་ཆེན་པོ་ འདི་ལྟ་བུ་ནི་བདག་ཅག་ལ་ཡོད་ན་འོས་འཚམ་ཡིན་ནོ།།
HEB 7:27 ཁོང་ནི་མཆོད་དཔོན་ཆེན་པོ་གཞན་དག་དང་འདྲ་བར། ངེས་པར་ཉིན་རེ་བཞིན་ཐོག་མར་རང་ཉིད་ཀྱི་སྡིག་པ༌དང༌། ཕྱིས་སུ་འབངས་མི་ཡི་སྡིག་པའི་ཕྱིར་མཆོད་པ་འབུལ་བ་མ་ཡིན༌ཏེ། ཁོང་གིས་རང་ཉིད་ཐེངས་གཅིག་ཁོ་ནར་ཕུལ་བས་དོན་དེ་ཡོངས་སུ་འགྲུབ་པར་མཛད༌པའི་ཕྱིར་ཡིན།
HEB 7:28 མ་གཞི་བཀའ་ཁྲིམས་ཀྱིས་ནུས་སྟོབས་ཞན་པའི་མི་རྣམས་མཆོད་དཔོན་ཆེན་པོར་བསྐོ་བར་བྱེད་པ་ཡིན༌མོད། འོན་ཀྱང་བཀའ་ཁྲིམས་ཀྱི་རྗེས་སུ་དམ་བཅས་པའི་བཀའ་ཡིས་སྲས་དཀོན་མཆོག་དེ་ཉིད་མཆོད་དཔོན་ཆེན་པོར་བསྐོས་ཤིང་རྟག་ཏུ་ཕུལ་དུ་བྱུང་བའོ།།
HEB 8:1 ངེད་ཅག་གིས་བརྗོད་པའི་དོན་གྱི་སྙིང་པོ་ནི་བདག་ཅག་ལ་འདི་ལྟ་བུའི་མཆོད་དཔོན་ཆེན་པོ་ཞིག་ཡོད༌ཅིང༌། ཁོང་ནི་ནམ་མཁའི་ཞིང་ཁམས་ཀྱི་གཟི་བརྗིད་ཆེན་པོ་དེ་ཉིད་ ཀྱི་བཞུགས་ཁྲིའི་གཡས་ཕྱོགས་སུ་བཞུགས་པ་དེ་ཡིན་ལ།
HEB 8:2 ཁོང་གིས་གནས་མཆོག་སྟེ་གུར་མཆོག་དངོས་མའི་ནང་དུ་འཕྲིན་ལས་མཛད་ཅིང༌། གུར་མཆོག་དེ་ནི་གཙོ་བོས་བཞེངས་པ་ལས་མི་ཡིས་ཕུབ་པ་མ་ཡིན༌ནོ།།
HEB 8:3 མཆོད་དཔོན་ཆེན་པོ་ཐམས་ཅད་ནི་ཕྱག་རྟེན་དང་མཆོད་པ་འབུལ་བའི་ཆེད་དུ་བསྐོས་པ་ཡིན༌པས། མཆོད་དཔོན་ཆེན་པོ་དེ་ཉིད་ལའང་ངེས་པར་མཆོད་པ་གང་རུང་ཞིག་འབུལ་རྒྱུ་དགོས་སོ༎
HEB 8:4 གལ་ཏེ། མཆོད་དཔོན་ཆེན་པོ་དེ་ཉིད་འཇིག་རྟེན་དུ་བཞུགས་པ་ཡིན་ན། ཁོང་ནི་མཆོད་དཔོན་ཡང་ཡིན་མི་སྲིད། ཅིའི་ཕྱིར་ཞེ་ན། བཀའ་ཁྲིམས་ལྟར་འབུལ་བ་འབུལ་མཁན་རྣམས་ཡོད་པའི་ཕྱིར་རོ།།
HEB 8:5 དེ་དག་གིས་ཞབས་ཏོག་སྒྲུབ་པའི་དོན་དེ་ནི་ནམ་མཁའི་ཞིང་ཁམས་ཀྱི་སྣང་བརྙན་དང་གྲིབ་གཟུགས་ཇི་བཞིན་ཡིན། དེ་ནི་མོ་ཤེ་ཡིས་གུར་མཆོག་བཟོ་བར་རྩོམ་དུས། དཀོན་མཆོག་གིས་ཁོང་ལ་ཉེན་བརྡ་འདི་སྐད༌བཏང་བ་སྟེ། ཁྱོད་ཀྱིས་མཉམ་པར་འཇོག་འོས་པ་ནི། དངོས་པོ་སྣ་ཚོགས་བཟོ་དུས་རི་མགོ་ནས་ཁྱོད་ལ་བསྟན་པའི་དཔེ་བཞིན་བཟོ་དགོས་ཞེས་གསུངས་པ་བཞིན་ནོ།།
HEB 8:6 སྐྱབས་མགོན་ཡེ་ཤུ་ནི་དེ་ལས་ཀྱང་ཕུལ་དུ་བྱུང་བའི་ཞལ་ཆད་ཀྱི་བར་མི་རུ་མཛད་པ་བཞིན་དུ། ད་ལྟ་ཁོང་ལ་ཐོབ་པའི་ཞབས་ཏོག་གི་ལས་འགན་ནི་དེ་ལས་ཀྱང་ཁྱད་དུ་འཕགས༌པ་ཡིན། ཞལ་ཆད་འདི་ནི་དེ་ལས་ཁྱད་དུ་འཕགས་པའི་ཞལ་བཞེས་ལ་བརྟེན་ནས་བཙུགས་པའོ།།
HEB 8:7 ཞལ་ཆད་སྔ་མ་ལ་འཕན་ཟེལ་ཅི་ཡང་མེད་པ་ཡིན་ན། ཞལ་ཆད་ཕྱི་མ་འཚོལ་དགོས་དོན་མེད༌པས།
HEB 8:8 གཙོ་བོས་ཁོང་གི་འབངས་མི་ལ་འདི་སྐད་བཀའ་བཀྱོན་གནང་བ་སྟེ། ལྟོས་དང༌། བདག་གིས་ཡེས་ར་ཨེལ་དང་ཡ་ཧུ༌དཱ།། ཁྱིམ་རྒྱུད་གཉིས་ལ་ཞལ་ཆད་གསར་པ༌ཞིག ། གནང་བའི་དུས་ལ་སླེབ་ཅིང་སླེབས་ལ་ཉེ།།
HEB 8:9 དེ་ནི་བདག་གིས་ཁོ་ཚོའི་མེས་པོ༌ཡི།། ལག་པར་འཇུས་ཏེ་ཨེ་ཅིབ་ཡུལ་གང་ནས།། ཕྱི་རུ་ཁྲིད་ནས་ཡོང་དུས་བཞག་པ༌ཡི།། ཞལ་ཆད་དེ་དང་གཏན་ནས་མི་འདྲ་བའོ།། བདག་གིས་བཞག་པའི་ཞལ་ཆད་དེ་ཉིད་ནི།། ཁོ་ཚོས་བློ་སེམས་བརྟན་པོས་མ་བསྲུངས༌པས།། བདག་གིས་ཁོ་ཚོར་གཟིགས་སྐྱོང་མི་མཛད༌ཅེས།། གཙོ་བོས་དེ་ལྟར་གསུངས་པ་ཡིན་ལགས༌སོ།། ཞེས་གསུངས་པ་དང་། ཡང་འདི་སྐད་དུ།
HEB 8:10 ཉིན་མོ་དེ་དག་རྗེས་སུ་བདག་གིས༌ནི།། ཡེས་ར་ཨེལ་གྱི་ཁྱིམ་རྒྱུད་དེ་རྣམས་ལ།། ཞལ་ཆད་མཛད་པ་འདི་ཡིན་གཙོ་བོས༌གསུངས།། བདག་གིས་རང་གི་བཀའ་ཁྲིམས་དེ་རྣམས༌ནི།། ཁོ་ཚོའི་ཡིད་ལ་འཇོག་ཅིང་སེམས་ལ་བརྐོ།། བདག་ནི་ཁོ་ཚོའི་དཀོན་མཆོག་ཡིན་པ༌དང༌།། དེ་རྣམས་བདག་གི་འབངས་མི་ཡིན་པར༌འགྱུར།།
HEB 8:11 ཆེ་ཆུང་ཀུན་གྱིས་ང་རང་ངོ་ཤེས༌པས།། ཁོ་ཚོས་རང་གི་སྤུན་དང་ཡུལ་མི༌ལ།། ཁྱོད་ཀྱིས་གཙོ་བོ་ཁོང་ངོ་ཤེས་པར་གྱིས།། ཞེས་པའི་ཁ་བསྒོ་གནང་བའི་དགོས་པ་མེད།།
HEB 8:12 བདག་གིས་ཁོ་ཚོའི་ཉེས་པར་གུ་ཡངས༌གཏོང་།། ཁོ་ཚོའི་སྡིག་པ་ནམ་ཡང་དྲན་མི་འགྱུར།། ཞེས་གསུངས་སོ།།
HEB 8:13 མདོར་ན། ཁོང་གིས་ཞལ་ཆད་གསར་པ་ཞེས་བརྗོད་པ་དེ་ལས་ཞལ་ཆད་སྔ་མ་དེ་རྙིང་པར་བརྩིས༌པ་ཤེས་ཤིང་། རིམ་བཞིན་རྙིང་ཞིང་ཉམས་པར་གྱུར་པ་དེ་ནི་མི་འགྱང་བར་མེད་པར་འགྱུར༌ངེས་སོ།།
HEB 9:1 མ་གཞི་ཞལ་ཆད་སྔ་མར་བསྙེན་བཀུར་བྱེད་པའི་སྲོལ་ཡིག་དང་འཇིག་རྟེན་ལ་གཏོགས་པའི་གནས་མཆོག་མཆིས་སོ།།
HEB 9:2 ཅིའི་ཕྱིར་ཞེ་ན། དེ་རུ་སྟ་གོན་བྱས་པའི་གུར་མཆོག་ཡོད༌དེ། རིམ་པ་དང་པོ་ལ་གནས་དམ་པ་ཞེས་དང༌། དེའི་ནང་དུ་སྒྲོན་སྟེགས་དང་། སྒྲོག༌ཙེ། སྤྱན་བསྟར་བག་ལེབ་བཅས་ཡོད་ལ།
HEB 9:3 རིམ་པ་གཉིས་པའི་ཡོལ་བའི་རྒྱབ་ཏུ་ཡང་གུར་མཆོག་རིམ་པ་ཞིག་ཡོད་དེ། མིང་ལ་གནས་དམ་མཆོག་ཅེས་ཟེར་ཞིང༌།
HEB 9:4 དེ་རུ་གསེར་གྱི་སྤོས་ཁྲི་དང་གསེར་གྱིས་ཡོངས་སུ་བཏུམས་པའི་ཞལ་ཆད་ཀྱི་ཤུར་སྒམ་ཡོད༌ཅིང་། སྒམ་དེའི་ནང་དུ་མཱན་ནཱ་ཡོད་པའི་གསེར་གྱི་བུམ་པ་དང་། མྱུ་གུ་འབུས་མྱོང་བའི་ཨ་རོན་གྱི་ཕྱག་རྟེན། ཞལ་ཆད་ཀྱི་རྡོ་ལེབ་གཉིས་བཅས་ཡོད༌ལ།
HEB 9:5 ཤུར་སྒམ་གྱི་སྟེང་དུ་གཟི་བརྗིད་ལྡན་པའི་ཀེ་རུབ་ཀྱི་གཟུགས་བརྙན་གྱིས་གཡོགས་པའི་ཐུགས་རྗེའི་བཞུགས་ཁྲི་བཅས་ཡོད་མོད། འོན་ཀྱང་ད་ལྟ་ངེད་ཅག་གིས་དེ་དག་རེ་རེ་བཞིན་ཞིབ་པར་སྨྲ་མི་རུང་ངོ་།།
HEB 9:6 དངོས་པོ་འདི་དག་ཐམས་ཅད་སྟ་གོན་བྱས་ཚར་རྗེས། མཆོད་དཔོན་རྣམས་རྒྱུན་དུ་གུར་མཆོག་རིམ་པ་དང་པོའི་ནང་དུ་དཀོན་མཆོག་ལ་བསྙེན་བཀུར་ཞུ་བར་འགྲོའོ།།
HEB 9:7 འོན་ཀྱང་གུར་མཆོག་རིམ་པ་གཉིས་པའི་ནང་དུ་མཆོད་དཔོན་ཆེན་པོ་ལོ་རེར་ཐེངས་གཅིག་ལ་གཅིག་པུ་འགྲོ༌ཞིང༌། ཐེངས་རེར་ཁྲག་མ་འཁྱེར་བར་མི་འགྲོ་སྟེ། རང་ཉིད་ཀྱི་ཕྱིར་དང་མི་སྡེས་མ་ཤེས་པར་བསགས་པའི་སྡིག་པའི་ཆེད་དུ་ཁྲག་དེ་འབུལ་བར་འགྲོ་བ་ཡིན།
HEB 9:8 དམ་པའི་ཐུགས་ཉིད༌ཀྱིས་འདི་ལས་གུར་མཆོག་རིམ་པ་དང་པོ་སྔར་བཞིན་གནས་པའི་བར་དུ། གནས་དམ་མཆོག་ནང་དུ་འགྲོ་བའི་ལམ་ད་དུང་གསལ་པོར་མངོན་མེད་པ་བསྟན་ཏོ།།
HEB 9:9 གུར་མཆོག་རིམ་པ་དང་པོ་ནི་ད་ལྟའི་དུས་ཀྱི་དཔེ་མཚོན་ཡིན༌ལ། ཕྱག་རྟེན་དང་མཆོད་པ་ལ་བརྟེན་ནས་བསྙེན་བཀུར་བྱེད་མཁན་གྱི་བསམ་པ་ནི་ཡོངས་སུ་རྫོགས་པར་བྱ་མི་ནུས།
HEB 9:10 དོན་འདི་དག་ནི་བཟའ་བཏུང་དང་ཁྲུས་སྣ་ཚོགས་ལ་འབྲེལ་བའི་ལུགས་སྲོལ་ཙམ་ཡིན༌ལ། དེ་དག་ནི་ཤ་གཟུགས་ཀྱི་ཕུང་བོར་གཏོགས་པའི་སྒྲིག་སྲོལ་ཙམ་ཡིན་པས་གོ་རིམ་གསར་པའི་དུས་སླེབས་པའི་བར་དུ་བཀོལ་བའོ།།
HEB 9:11 འོན་ཀྱང་། ད་ལྟ་སྐྱབས་མགོན་མཱ་ཤི་ཀ་ནི་ཕེབས་ཟིན་པ༌དང༌། ཁོང་ནི་བྱུང་ཟིན་པའི་དོན་བཟང་པོ་དག་གི་མཆོད་དཔོན་ཆེན་པོར་མཛད་ཅིང༌། མིའི་ལག་པས་མ་བཟོས་ཤིང་འཇིག་རྟེན་འདི་ལའང་མི་གཏོགས་པར། སྔར་གྱི་གུར་མཆོག་ལས་ཀྱང་ཆེ་ཞིང་ཕུན་སུམ་ཚོགས་པའི་གུར་མཆོག་བརྒྱུད་ནས་ཕེབས་པར་མ་ཟད།
HEB 9:12 ར་མ་དང་བ་ཕྲུག་དག་གི་ཁྲག་ལ་མི་བརྟེན་པར། རང་ཉིད་ཀྱི་སྐུ་ཁྲག་ལ་བརྟེན་ནས་ཐེངས་གཅིག་ཁོ་ནར་གནས་དམ་མཆོག་ནང་དུ་ཕེབས་ཏེ། མཐའ་མེད་པའི་ཐར་པའི་དོན་དེ་འགྲུབ་པར་མཛད་དོ།།
HEB 9:13 གལ་ཏེ། ར་མ་དང་གླང་ཐུག་གི་ཁྲག་དང་། བ་གཞོན་གྱི་ཐལ་བ་དེ་མི་གཙང་བའི་མི་ཡི་ལུས་སྟེང་ལ་གཏོར་བས། ལུས་པོ་གཙང་མར་འགྱུར་བའི་ཆེད་དུ་མི་དེ་དམ་པར་བྱ་ནུས༌ན།
HEB 9:14 སྐྱབས་མགོན་མཱ་ཤི་ཀའི་སྐུ་ཁྲག་ནི་ལྟ་ཅི་སྨོས། ཁོང་གིས་མཐའ་མེད་པའི་ཐུགས་ཉིད་ལ་བརྟེན་ནས། རང་ཉིད་ཉེས་སྐྱོན་ཅི་ཡང་མི་མངའ་བར་དཀོན་མཆོག་ལ་ཕུལ༌བས། ཁོང་གི་སྐུ་ཁྲག་གིས་དེ་བས་ཀྱང་ཁྱོད་རྣམས་ཀྱི་བསམ་པ་ནི་དག་པར་མཛད༌ཅིང༌། འཆི་ལམ་དུ་འཇུག་པའི་སྤྱོད་པ་བསལ༌ཏེ། ཁྱོད་ཅག་གིས་གཏན་དུ་གསོན་པོར་བཞུགས་པའི་དཀོན་མཆོག་ལ་ཞབས་ཕྱི་སྒྲུབ་པར་མཛད༌པ་མ་ཡིན་ནམ།
HEB 9:15 དེར་རྟེན། ཁོང་ཉིད་ཞལ་ཆད་གསར་པའི་བར་མི་རུ་མཛད་ཅིང༌། རང་ཉིད་སྐུ་གྲོངས་པ་བརྒྱུད་ནས་ཞལ་ཆད་སྔ་མའི་དུས་སུ་མི་རྣམས་ཀྱིས་བསགས་པའི་ཉེས་པ་ཐམས་ཅད་བླུས་པ་ཡིན་པས། ཞལ་འབོད་ཐོབ་མཁན་རྣམས་ལ་ཞལ་བཞེས་གནང་བའི་རྟག་གཏན་གྱི་བགོ་སྐལ་འཐོབ་ངེས་སོ།།
HEB 9:16 སྤྱིར་ཁ་ཆེམས་ཡོད་ན་ངེས་པར་ཁ་ཆེམས་འཇོག་མཁན་ཚེ་ལས་འདས་ཟིན་པར་བདེན་དཔང་བྱེད་དགོས་སོ།།
HEB 9:17 ཅིའི་ཕྱིར་ཞེ་ན། མི་ཚེ་ལས་འདས་པ་ཡིན་ན་ད་གཟོད་ཁ་ཆེམས་ལ་བྱེད་ནུས་ཡོད་དེ། ཁ་ཆེམས་འཇོག་མཁན་གསོན་པོར་གནས་ན་ཁ་ཆེམས་ལའང་བྱེད་ནུས་མེད་པའི་ཕྱིར་ཡིན།
HEB 9:18 དེ་བས་ཞལ་ཆད་སྔ་མའང་ཁྲག་གིས་མ་བཞག་པ་མིན༌ནོ།།
HEB 9:19 ཅིའི་ཕྱིར་ཞེ་ན། དེའི་དུས་སུ་མོ་ཤེ་ཡིས་བཀའ་ཁྲིམས་བཞིན་དུ་བཀའ་རྒྱ་རེ་རེ་འབངས་མི་ཐམས་ཅད་ལ་བསྒྲགས་པ༌དང༌། ཁུ་ལུ་དམར་པོ་དང་ཨི་སོབ་རྩྭ་ཤིང་བླངས་ཏེ། བ་ཕྲུག་དང་ར་མ་དག་གི་ཁྲག ཆུ་དང་བཅས་གླེགས་བམ་སྟེང་དུ་གཏོར་བ་དང་འབངས་མིའི་ལུས་སྟེང་ལའང་གཏོར་བཞིན་འདི་སྐད༌དུ།
HEB 9:20 འདི་ནི་དཀོན་མཆོག་གིས་ཁྱོད་ཅག་ལ་བཞག་པའི་ཞལ་ཆད་ཀྱི་ཁྲག་ཡིན་ཞེས་གསུངས་སོ།།
HEB 9:21 ཡང་ཁོང་གིས་དེ་བཞིན་གུར་མཆོག་དང་བསྙེན་བཀུར་འབུལ་བྱེད་སྣོད་ཆས་མཐའ་དག་གི་སྟེང་དུ་ཁྲག་གཏོར༌བའོ།།
HEB 9:22 བཀའ་ཁྲིམས་ལྟར༌ན་དངོས་པོ་ཐམས་ཅད་ནི་ཕལ་ཆེར་ཁྲག་གིས་གཙང་མར་བྱེད་པ་ཡིན༌ལ། ཁྲག་མ་བཞུར་བར་སྡིག་པ་བསལ་བ་མེད་དོ།།
HEB 9:23 དེའི་ཕྱིར། ནམ་མཁའི་ཞིང་ཁམས་ཀྱི་གཟུགས་དབྱིབས་བཞིན་དུ་བཟོས་པའི་དངོས་པོ་ནི་ངེས་པར་མཛད་སྒོ་འདི་དག་གིས་གཙང་མར་བྱེད་དགོས༌པ་ཡིན་མོད། འོན་ཀྱང་ནམ་མཁའི་ཞིང་ཁམས་ཀྱི་དངོས་པོ་ནི་དེ་ལས་ཁྱད་དུ་འཕགས་པའི་མཆོད་པས་གཙང་མར་བྱེད་དགོས་སོ།།
HEB 9:24 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་ནི་གནས་དམ་པ་དངོས་ཀྱི་སྣང་བརྙན་ཙམ་ལས། མིའི་ལག་པས་བཟོས་པའི་གནས་དམ་པའི་ནང་དུ་ཕེབས་པ་མིན་ཏེ། ནམ་མཁའི་ཞིང་ཁམས་སུ་ཕེབས་ཤིང་ད་ལྟ་བདག་ཅག་གི་དོན་དུ་དཀོན་མཆོག་གི་དྲུང་དུ་སླེབས༌པ་དང་།
HEB 9:25 ཡང་མཆོད་དཔོན་ཆེན་པོས་རང་གི་ཁྲག་མ་ཡིན་པ་ཁྱེར་ནས་ལོ་རེ་བཞིན་གནས་དམ་མཆོག་ནང་དུ་འགྲོ་བ༌ལྟར། སྐྱབས་མགོན་མཱ་ཤི་ཀས་རང་ཉིད་ཐེངས་མང་པོར་ཕུལ་བ་མིན་པའི་ཕྱིར་རོ།།
HEB 9:26 གལ་སྲིད། དེ་ལྟར་ཡིན་ན། འཇིག་རྟེན་ཁམས་བཀོད་པའི་ཚུན་ལ། ཁོང་གིས་ཐེངས་མང་པོར་སྡུག་བསྔལ་མྱང་དགོས་པ་ཡིན༌མོད། འོན་ཀྱང་ད་ལྟ་བསྐལ་པའི་མཐའ་མའི་དུས་འདིར་ཁོང་ཉིད་ཐེངས་གཅིག་ཁོ་ནར་མངོན་ཞིང༌། མིའི་སྡིག་པ་བསལ་པའི་ཕྱིར་རང་ཉིད་མཆོད་པར་ཕུལ༌བ་ཡིན།
HEB 9:27 ཚེ་སྲོག་གི་གཏན་ཁེལ་ལྟར་ན། མི་རེ་རེ་ལན་གཅིག་ཚེ་ལས་འདའ་དགོས་ཤིང་། ཚེ་ལས་འདས་རྗེས་ལེགས་ཉེས་ཀྱི་ཁྲིམས་ཐག་གཅོད་པར་འགྱུར༌རོ།།
HEB 9:28 དེ་ལྟར་སྐྱབས་མགོན་མཱ་ཤི་ཀའང་ལན་གཅིག་ལ་མཆོད་པར་ཕུལ་ཏེ་མི་མང་པོའི་སྡིག་པ་ཁུར༌བ་དང༌། མ་འོངས་པར་ཁོང་ཉིད་ཐེངས་གཉིས་པར་མངོན་ཞིང༌། དེའི་དུས་སུ་སྡིག་པ་དང་འབྲེལ་བ་མེད་དེ། ཁོང་ལ་རེ་བ་ཆེན་པོས་སྒུག་མཁན་རྣམས་སྐྱོབ་པའི་ཕྱིར་ཡིན་ནོ།།
HEB 10:1 ཡང་བཀའ་ཁྲིམས་ནི་མ་འོངས་འབྱུང་འགྱུར་གྱི་དོན་བཟང་པོ་དག་གི་གྲིབ་གཟུགས་ཡིན་པ་ལས་དངོས་པོའི་གཟུགས་དབྱིབས་ངོ་མ་མིན་པས། ལོ་རེ་བཞིན་མཆོད་པ་གཅིག་མཚུངས་ཡང་དང་ཡང་དུ་འབུལ་བ་ལ་བརྟེན་ནས། ཉེ་བར་བཅར་བའི་མི་རྣམས་ཡང་དག་པར་མཛད་མི་ནུས༌སོ།།
HEB 10:2 གལ་སྲིད། དེ་ལྟར་མིན༌ན། མཆོད་པ་འབུལ་བའི་དོན་ནི་གནའ་སྔ་མོ་ནས་མཚམས་བཞག་ཟིན་པ་མ་ཡིན༌ནམ། ཅིའི་ཕྱིར་ཞེ་ན། བསྙེན་བཀུར་ཞུ་བའི་མི་རྣམས་ཀྱི་སེམས་ཐེངས་གཅིག་ལ་གཙང་མར་མཛད་པ་ཡིན་ན། སེམས་ལ་སྡིག་པའི་ནོངས་ཡོད་པར་མི་འགྱུར༌བའི་ཕྱིར་རོ།།
HEB 10:3 འོན་ཀྱང་། མཆོད་པ་འདི་དག་གིས་ལོ་རེ་བཞིན་མི་རྣམས་ལ་སྡིག་པ་དྲན་ཏུ་འཇུག་ཅིང་།
HEB 10:4 རྒྱུ་མཚན་ནི་གླང་ཐུག་གི་ཁྲག་དང་ར་ཁྲག་གིས་སྡིག་པ་གཏན་ནས་བསལ་མི་ནུས༌སོ།།
HEB 10:5 དེའི༌ཕྱིར། སྔོན་ཆད་སྐྱབས་མགོན་མཱ་ཤི་ཀ་འཇིག་རྟེན་དུ་ཕེབས་དུས་ཁོང་གིས་འདི་སྐད༌དུ། ཀྱེ་ཀྱེ་བླ་ན་མེད་པའི་དཀོན་མཆོག་ལགས།། མཆོད་པ་དང་ནི་འབུལ་བར་ཁྱེད་མི་མཉེས།། ཁྱེད་ཀྱིས་བདག་ལ་ལུས་གཟུགས་སྟ་གོན༌མཛད།།
HEB 10:6 སྦྱིན་སྲེག༌དང་ནི་སྡིག་བཤགས་མཆོད་པ་ལ།། དཀོན་མཆོག་ཁྱེད་ནི་དེ་ལ་ཐུགས་མི༌དགྱེས།། ཞེས་གསུངས་སོ།།
HEB 10:7 དེའི་དུས་སུ། བདག་གིས་འདི་ལྟར་སྨྲས་པ་སྟེ། ཀྱེ་ཀྱེ་དཀོན་མཆོག༌ཁྱེད་ཀྱིས་གཟིགས་པར་གྱིས།། ཁྱེད་ཀྱི་ཐུགས་དགོངས་བསྒྲུབ་ཕྱིར་བདག་ནི་སླེབས།། ང་ཡི་དོན་འདི་ཤོག་སྒྲིལ་མདོ་ལ་བཀོད།། ཅེས་པའོ།།
HEB 10:8 གོང་དུ་སྐྱབས་མགོན་མཱ་ཤི་ཀས་འདི་སྐད༌དུ། མཆོད་པ་དང་འབུལ་བ། སྦྱིན་སྲེག་དང་སྡིག་བཤགས་མཆོད་པ་བཅས་ལ་ཁྱེད་རང་ཐུགས་མི་མཉེས་ཤིང་། འདི་ནི་བཀའ་ཁྲིམས་བཞིན་དུ་ཕུལ་བ་ལའང་ཁྱེད་ཐུགས་མི་དགྱེས་ཞེས་གསུངས་པ༌དང༌།
HEB 10:9 ཕྱིས་སུ་ཡང་ཁོང་གིས་འདི་སྐད་དུ། བདག་ནི་ཁྱེད་ཀྱི་ཐུགས་དགོངས་བཞིན་དུ་བསྒྲུབ་པའི་ཕྱིར་ཡོང་བ་ཡིན་ཞེས་གསུངས་ཤིང་། ཁོང་གིས་ཕྱི་མ་འཛུགས་པའི་ཕྱིར་སྔ་མ་མེད་པར་མཛད་དོ།།
HEB 10:10 དཀོན་མཆོག་གི་ཐུགས་དགོངས་དེ་བཞིན་ཡེ་ཤུ་མཱ་ཤི་ཀས་རང་ཉིད་ཀྱི་སྐུ་ལུས་ཐེངས་གཅིག་ཁོ་ནར་ཕུལ་བར་བརྟེན་ནས། བདག་ཅག་དམ་པར་མཛད་པ་ཡིན༌ནོ།།
HEB 10:11 སྤྱིར་མཆོད་དཔོན་ཀུན་པོས་ཉིན་རེ་བཞིན་ལངས་ནས་བསྡད་དེ་དཀོན་མཆོག་ལ་ཞབས་ཕྱི་སྒྲུབ༌ཅིང༌། མཆོད་པ་གཅིག་མཚུངས་ཡང་དང་ཡང་དུ་འབུལ་ནའང་། མཆོད་པ་དེ་དག་གིས་སྡིག་པ་གཏན་ནས་བསལ་མི་ནུས༌སོ།།
HEB 10:12 འོན་ཀྱང༌། སྐྱབས་མགོན་ཡེ་ཤུས་རྟག་གཏན་གྱི་སྡིག་བཤགས་མཆོད་པ་ཐེངས་གཅིག་ལ་ཕུལ་བས། དཀོན་མཆོག་གི་གཡས་ཕྱོགས་སུ་བཞུགས་པར་གྱུར་ཏོ།།
HEB 10:13 དེ་ནས་བཟུང༌། བསྟན་དགྲ་ཐམས་ཅད་ཁོང་གི་ཞབས་སྟེགས་སུ་འཁོད་པའི་བར་དུ་ཁོང་གིས་སྒུག་ནས་བཞུགས་ཡོད།
HEB 10:14 ཅིའི་ཕྱིར་ཞེ་ན། ཁོང་གིས་ཐེངས་གཅིག་ཁོ་ནར་མཆོད་པ་ཕུལ་བ་བརྒྱུད་ནས། དམ་པར་གྱུར་པ་རྣམས་རྟག་ཏུ་ཡང་དག་པར་མཛད༌པའི་ཕྱིར་རོ།།
HEB 10:15 དམ་པའི་ཐུགས་ཉིད་ཀྱིས་བདག་ཅག་ལའང་བདེན་དཔང་མཛད་དོ།། ཅིའི་ཕྱིར་ཞེ་ན། ཁོང་གིས་འདི་སྐད༌དུ།
HEB 10:16 གཙོ་བོས་འདི་སྐད༌དུ། ཉིན་མོ་དེ་རྣམས་རྗེས་སུ་བདག་གིས༌ནི།། མི་རྣམས་དེ་ལ་ཞལ་ཆད་འདི་ལྟར༌བཞག ། ང་ཡིས་རང་གི་བཀའ་ཁྲིམས་དེ་རྣམས༌ཀྱི།། ཡིད་ལ་འཇོག་ཅིང་སེམས་ལ་བརྐོ་བར༌བྱ།། ཞེས་དང་།
HEB 10:17 ཕྱིས་སུ་ཡང་འདི་སྐད༌དུ། དེ་ཚོའི་སྡིག་པ་དང་ནི་ཉེས༌པ་དག ། བདག་གིས་ནམ་ཡང་དྲན་པར་མི་བྱེད་དོ།། ཞེས་གསུངས༌པའི་ཕྱིར་རོ།།
HEB 10:18 སྡིག་པ་འདི་དག་བསལ་ཟིན་པས། ད་ནི་སྡིག་པའི་ཆེད་དུ་མཆོད་པ་འབུལ་དགོས་དོན་མེད་དོ།།
HEB 10:19 སྤུན་ཟླ༌རྣམས། དེ་ལྟར་ཡིན་པས། སྐྱབས་མགོན་ཡེ་ཤུའི་སྐུ་ཁྲག་ལ་བརྟེན་ནས་བདག་ཅག་བག་ཕེབས་ངང་གནས་དམ་མཆོག་ནང་དུ་འགྲོ་ཐུབ་ཅིང༌།
HEB 10:20 དེ་ནི་ཁོང་གིས་བདག་ཅག་ལ་གསར་ཞིང་གསོན་པོའི་ལམ་ཞིག་ཕྱེས་ཤིང་ཡོལ་བ་དེ་བརྒྱུད་ནས་འགྲོ་བ་དང་། ཡོལ་བ་དེ་ནི་སྐྱབས་མགོན་ཡེ་ཤུའི་སྐུ་ལུས་ཡིན་ནོ།།
HEB 10:21 ཡང་དཀོན་མཆོག་གི་ཁྱིམ་གཞིས་ལ་བདག་སྐྱོང་མཛད་པའི་མཆོད་དཔོན་ཆེན་པོ་ཞིག་ཡོད་པས།
HEB 10:22 ནོངས་ཡོད་པའི་བསམ་པ་ལ་ཁྲག་གཏོར་ཞིང་ཆུ་གཙང་མས་ལུས་པོ་བཀྲུས་པར་མཛད་པ་དང་། བདག་ཅག་ལྷག་བསམ་རྣམ་དག་དང་དད་སེམས་ཆེན་པོ་བཅངས་ནས་དཀོན་མཆོག་གི་དྲུང་དུ་འགྲོ་བར་བྱ་འོས༌སོ།།
HEB 10:23 ཡང་ཞལ་བཞེས་གནང་མཁན་དཀོན་མཆོག་ནི་ཡིད་རྟོན་རུང་བ་ཡིན་པས། བདག་ཅག་གིས་ཁས་ལེན་པའི་རེ་བ་དེ་ཐེ་ཚོམ་མེད་པར་བརྟན་པོར་བསྲུང་དགོས།
HEB 10:24 ཡང་བདག་ཅག་གིས་ཕན་ཚུན་ལ་བྱམས་ཤིང་གཅེས་པ་དང་ལས་བཟང་པོའི་ཕྱོགས་སུ་ཅི་ལྟར་བསྐུལ་བར་བསམ་བློ་གཏོང་བར་བྱའོ།།
HEB 10:25 མི་ཁ་ཤས་ལྷན་དུ་མི་འཚོགས་པར་གོམས་པ་བཞིན། བདག་ཅག་གིས་འདུ་ཚོགས་ཀྱི་མཚམས་གཅོད་མི་རུང་སྟེ། ཁྱོད་ཅག་གིས་ཉིན་མོ་དེ་ཉེ་བར་སླེབས་པ་ཤེས་པ་བཞིན། ལྷག་ཏུ་ཕན་ཚུན་ལ་སྐུལ་སློང་བྱ་དགོས༌སོ།།
HEB 10:26 བདག་ཅག་གིས་བདེན་པ་ཉིད་རྟོགས་རྗེས། ད་དུང་ཤེས་བཞིན་སྡིག་པ་བྱེད༌ན། ད་ནི་སྡིག་བཤགས་ཀྱི་མཆོད་པ་མེད་དེ།
HEB 10:27 ཉེས་ཆད་གཅོད་པར་འགྱུར་བ་དང་དགྲ་བོ་ཐམས་ཅད་ཚར་གཅོད་པའི་མེ་དཔུང་དྲག་པོ་ལ་འཇིགས་སྣང་གིས་བསྒུགས་ནས་སྡོད་དགོས༌པའོ།།
HEB 10:28 སུ་ཞིག་གིས་མོ་ཤེའི་བཀའ་ཁྲིམས་དོར་ནའང་། མི་གཉིས་གསུམ་གྱི་དཔང་པོ་ཙམ་ལ་བརྟེན་ནས་མི་དེ་སྙིང་རྗེ་མེད་པར་གསོད་པ་ཡིན༌ན།
HEB 10:29 དཀོན་མཆོག་གི་སྲས་རྐང་འོག་ཏུ་བརྫིས་ཤིང་། ཁོ་རང་དམ་པར་མཛད་པའི་ཞལ་ཆད་ཀྱི་ཁྲག་དེ་མི་གཙང་བར་བརྩིས༌ཏེ། ཐུགས་རྗེ་གནང་མཁན་དམ་པའི་ཐུགས་ཉིད་ཀྱང་ཁྱད་དུ་གསོད་པར་བྱས་ན། མི་དེ་དག་ལ་དེ་ལས་ཀྱང་ཉེས་ཆད་ལྕི་མོ་འཕོག་འོས་པར་ཁྱོད་རྣམས་ཀྱིས་བསམ་པར་བྱའོ།།
HEB 10:30 ཅིའི་ཕྱིར་ཞེ་ན། གནོད་ལན་གནོད་འཇལ་ནི་བདག་ལ་རག་ལས་ཤིང་ངས་ལན་འཇལ་ངེས་ཡིན་ཞེས༌གསུངས་པ་དང༌། ཡང་གཙོ་བོས་རང་གི་མི་ལ་ལེགས་ཉེས་ཀྱི་ཁྲིམས་ཐག་གཅོད་པར་འགྱུར་ཞེས་གསུང་མཁན་ཁོང་ཉིད་བདག་ཅག་གིས་ཤེས་པའི་ཕྱིར་ཡིན།
HEB 10:31 གཏན་དུ་གསོན་པོར་བཞུགས་པའི་དཀོན་མཆོག་གི་ཕྱག་ཏུ་ལྷུང་བ་ནི་དངོས་གནས་འཇིགས་སུ་རུང་བའོ།།
HEB 10:32 ཁྱོད་རྣམས་ཀྱིས་འདས་ཟིན་པའི་ཉིན་མོ་དག་ལ་ཕྱིར་འདང་རྒྱོབས༌དང༌། ཁྱོད་ཅག་གི་བློ་གསལ་པོར་མཛད་པའི་རྗེས་སུ། འཐབ་འཁྲུག་ཆེན་པོའི་སྡུག་བསྔལ་སྣ་ཚོགས་ལ་ཇི་ལྟར་བཟོད་བསྲན་བྱས་པ་སྟེ།
HEB 10:33 གཅིག་ནས་འཕྱ་དམོད་དང་དཀའ་ཚེགས་ལ་ཕྲད་ཅིང་མི་རྣམས་ཀྱི་ལྟད་མོར་གྱུར་པ༌དང༌། གཅིག་ནས་དེ་ལྟ་བུའི་སྡུག་བསྔལ་མྱོང་མཁན་རྣམས་ཀྱི་གྲོགས་སུ་གྱུར༌པའོ།།
HEB 10:34 ཅིའི་ཕྱིར་ཞེ་ན། ཁྱོད་རྣམས་ཀྱིས་བཙོན་དུ་བཅུག་ཡོད་པ་རྣམས་ལ་སྙིང་རྗེ་བསྒོམས་པ་དང༌། རང་ལ་དེ་ལས་ཁྱད་དུ་འཕགས་ཤིང་གཏན་དུ་གནས་པའི་བགོ་སྐལ་ཡོད་པ་ཤེས༌པས། མི་གཞན་གྱིས་རང་གི་ཁྱིམ་གཞིས་ཕྲོགས་ནའང་དགའ་མགུའི་ངང་དང་དུ་བླངས་པའི་ཕྱིར་རོ།།
HEB 10:35 དེའི་ཕྱིར། ཁྱོད་རྣམས་ཀྱིས་སྤོབས་པ་ལྡན་པའི་སེམས་དེ་འདོར་མི་རུང་། སེམས་དེ་ལྟ་བུ་བཅངས་པ་ལ་བྱ་དགའ་ཆེན་པོ་འཐོབ་པ་ཡིན།
HEB 10:36 ཁྱོད་རྣམས་ཀྱིས་དཀོན་མཆོག་གི་ཐུགས་དགོངས་བཞིན་བསྒྲུབས་ནས། ཞལ་བཞེས་གནང་ཡོད་པ་དེ་ཉིད་འཐོབ་པའི་ཕྱིར། ངེས་པར་བཟོད་བསྲན་བྱ་དགོས།
HEB 10:37 ཇི་སྐད༌དུ། ད་དུང་ཆུ་ཚོད་ཅུང་ཙམ་ཡོད་པའི་དུས།། ཕེབས་པར་འགྱུར་བ་ཁོང་ཉིད་ཕེབས་ངེས་ཤིང་།། ཁོང་ནི་འགྱངས་པར་མི་བྱེད་ཕེབས་པར༌འགྱུར།།
HEB 10:38 རྣམ་དག་མི་ནི་དད་པའི་སྒོ་ནས༌འཚོ།། ཕྱི་བསྣུར་བྱས་ན་བདག་སེམས་དགའ་མི་སྲིད།། ཅེས༌གསུངས་པའི་ཕྱིར་རོ།།
HEB 10:39 འོན་ཀྱང་། བདག་ཅག་ནི་ཕྱི་བསྣུར་བྱེད་ཅིང་འཇིག་པར་འགྱུར་བའི་མི་དེ་འདྲ་མ་ཡིན༌པར། དད་པའི་ངང་ནས་ཐར་པ་འཐོབ་ངེས་པའི་མི་རྣམས་ཡིན༌ནོ།།
HEB 11:1 དད་པ་ནི་རེ་བ་བྱེད་པའི་དོན་རྣམས་ཀྱི་བློ་གདེང་དང་མིག་གིས་མི་མཐོང་བའི་དོན་རྣམས་ཀྱི་དཔང་རྟགས་ཡིན༌ལ།
HEB 11:2 གནའ་བོའི་དད་ལྡན་རྣམས་ལ་དད་པའི་ཆ་ནས་བདེན་དཔང་ལེགས་པོ་བྱུང༌ངོ༌།།
HEB 11:3 བདག་ཅག་གིས་དད་པར་བརྟེན་ནས་འཇིག་རྟེན་ཁམས་ཐམས་ཅད་ནི་དཀོན་མཆོག་གི་བཀའ་ཡིས་བཀོད་པ་ཤེས༌པས། མིག་གིས་མཐོང་བ་དག་ནི་མིག་གིས་མཐོང་ཐུབ་པའི་དངོས་པོ་དག་ལས་བཟོས་པ་མིན་ནོ།།
HEB 11:4 ཡང་ཧ་བེལ་གྱིས་དད་པར་བརྟེན་ནས་དཀོན་མཆོག་ལ་མཆོད་པ་ཕུལ༌ཞིང༌། དེ་ནི་ཀཱ་ཡན་གྱིས་ཕུལ་བ་ལས་ཀྱང་ཁྱད་དུ་འཕགས་པས། ཧ་བེལ་མི་རྣམ་དག་ཏུ་གྱུར་པའི་བདེན་དཔང༌བྱུང་ངོ་།། དེ་ནི་དཀོན་མཆོག་གིས་ཁོའི་ཕྱག་རྟེན་ལ་བདེན་དཔང་མཛད་པའོ།། ཁོ་རང་ཚེ་ལས་འདས་ནའང་དད་པའི་དབང་གིས་ཁོས་ད་དུང་གཏམ་སྨྲ༌བའོ།།
HEB 11:5 ཡང་ཧ་ནོག་གིས་དད་པར་བརྟེན་པའི་རྐྱེན་གྱིས་ཁོ་རང་ཡར་དྲངས་ཤིང་། དེ་ནི་དཀོན་མཆོག་གིས་ཁོ་རང་ཡར་དྲངས་པ་ཡིན་པས། ཁོས་འཆི་བ་ཉམས་སུ་མ་མྱངས་ལ་མི་ཡིས་ཀྱང་ཁོ་རང་བཙལ་ནས་མ་རྙེད་དོ།། ཧ་ནོག་ཡར་མ་དྲངས་པའི་སྔོན་ལ། ཁོ་ལ་དཀོན་མཆོག་ཐུགས་དགྱེས་པའི་བདེན་དཔང་བྱུང་ཟིན༌ཏོ།།
HEB 11:6 སྤྱིར་མི་ལ་དད་པ་མེད་ན་དཀོན་མཆོག་ཐུགས་དགྱེས་མི་སྲིད༌དོ།། ཅིའི་ཕྱིར་ཞེ་ན། དཀོན་མཆོག་གི་དྲུང་དུ་ཡོང་བའི་མི་རྣམས་ཀྱིས་ངེས་པར་དཀོན་མཆོག་བཞུགས་པར་ཡིད་ཆེས་བྱ་དགོས་ཤིང་། ཁོང་གིས་རང་ཉིད་འཚོལ་བའི་མི་རྣམས་ལ་བྱ་དགའ་གནང་ངེས་པ་ལའང་ཡིད་རྟོན་བྱ་དགོས༌སོ།།
HEB 11:7 ཡང་ནོ་ཨས་དད་པ་ལ་བརྟེན་ཅིང་དཀོན་མཆོག་གིས་ཁོ་རང་ལ་ད་དུང་མིག་གིས་མ་མཐོང་བའི་དོན་དག་སྐོར་ཉེན་བརྡ་མཛད༌སྐབས། ཁོ་ལ་གུས་ཤིང་འཇིགས་པའི་སེམས་འགུལ་ཐེབས་ནས། ཁོས་རང་གི་ཁྱིམ་མི་ཐམས་ཅད་སྐྱོབ་པའི་ཕྱིར་གྲུ་གཟིངས་བཟོས་པས། དོན་དེ་ལ་བརྟེན་ནས་འཇིག་རྟེན་གྱི་མི་རྣམས་ལ་ནག་ཉེས་བཙུགས་པ་དང་། ཁོ་རང་ནི་དད་པ་ལས་བྱུང་བའི་རྣམ་པར་དག་པའི་རྒྱུད་འཛིན་མཁན་དུ་གྱུར་ཏོ།།
HEB 11:8 ཡང་ཨབ་ར་ཧམ་གྱིས་དད་པར་བརྟེན་ནས་དཀོན་མཆོག་གི་ཞལ་འབོད་ཐོབ་པའི་དུས་སུ། བཀའ་ལྟར་མ་འོངས་པ་ན་བགོ་སྐལ་འཐོབ་པར་འགྱུར་བའི་ཡུལ་དེར་འགྲོ་བར་བརྩམས། ཁོ་རང་དངོས་སུ་འགྲོ་བའི་དུས་སུ་གང་དུ་འགྲོ་བའང་མ་ཤེས་སོ།།
HEB 11:9 ཁོས་དད་པར་བརྟེན་ནས་ཁོ་རང་ལ་ཞལ་བཞེས་གནང་བའི་ཡུལ་ལ་སོང་སྟེ་མགྲོན་པོ་ལྟར་གནས་ཤིང་། ཞལ་བཞེས་གཅིག་མཚུངས་ཐོབ་མཁན་ཨི་སཱག་དང་ཡ་ཀོབ་བཞིན་ཡུལ་གཞན་ནས་སྦྲ་གུར་ནང་དུ་བསྡད་པ་ཡིན།
HEB 11:10 ཅིའི་ཕྱིར་ཞེ་ན། ཁོས་རྨང་གཞི་ལྡན་པའི་གྲོང་ཁྱེར་དེ་ལ་རེ་སྒུག་བྱེད་ཅིང་། དེ་ནི་དཀོན་མཆོག་གིས་ཇུས་འགོད་གནང་ཞིང་བཟོ་སྐྲུན་མཛད་པའོ།།
HEB 11:11 ཡང་དད་པར་བརྟེན་ནས་སཱ་ར་ཁོ་མོའང་ཕྲུ་གུ་ཆགས་པའི་ལོ་ཚོད་ལས་བརྒལ༌ཡང༌། ཁོ་མོས་རང་ཉིད་ལ་ཞལ་བཞེས་གནང་མཁན་ནི་ཡིད་རྟོན་རུང་བར་སྙམ་པས། ཁོ་མོར་མངལ་ཆགས་ནུས་པའོ།།
HEB 11:12 དེའི་ཕྱིར། ཚེ་ལས་འདས་ཟིན་པ་ལྟ་བུའི་མི་ཞིག་ལས་བུ་རྒྱུད་མཆེད་པ༌ནི། ནམ་མཁའི་སྐར་ཚོགས་བཞིན་མང་ཞིང་། མཚོ་འགྲམ་གྱི་བྱེ་མ་བཞིན་དུ་བགྲང་ལས་འདས་སོ།།
HEB 11:13 མི་དེ་ཐམས་ཅད་དད་སེམས་བཅངས་ནས་ཚེ་ལས་འདས་ཤིང་ཞལ་བཞེས་རྣམས་ཀྱང་མ་ཐོབ་མོད། འོན་ཀྱང་རྒྱང་རིང་ནས་ཞལ་བཞེས་མཐོང་ཞིང་དགའ་སྤྲོའི་ངང་བསུ་བ་བྱས་པ༌དང༌། རང་ཉིད་ནི་འཇིག་རྟེན་གྱི་མགྲོན་པོ་ཡིན་པ་དང་འཇིག་རྟེན་དུ་བྱེས་སུ་ཡོང་བའང་ཁས་བླངས་པའོ།།
HEB 11:14 གཏམ་འདི་ལྟར་སྨྲ་མཁན་རྣམས་ཀྱིས་རང་ཉིད་ལ་ཡུལ་ཞིག་འཚོལ་བཞིན་ཡོད་པ་བསྟན༌པ་ཡིན།
HEB 11:15 ཁོ་རྣམས་ཀྱིས་ཁ་བྲལ་ཟིན་པའི་ཡུལ་དེ་དྲན་པ་ཡིན་ན། ཁོ་རྣམས་ལ་སྔ་མོ་ནས་ཕྱིར་ཡུལ་དུ་འགྲོ་བའི་གོ་སྐབས་ལྡན་ནོ།།
HEB 11:16 དོན་དམ་དུ་ཁོ་རྣམས་ཀྱིས་དེ་ལས་ཀྱང་ཁྱད་དུ་འཕགས་པའི་ཡུལ་ཏེ། ནམ་མཁའི་ཞིང་ཁམས་ཀྱི་ཡུལ་དེ་ལ་རེ་སྨོན་བཅངས་པ་ཡིན། དེའི་ཕྱིར། དཀོན་མཆོག་ནི་ཁོ་རྣམས་ཀྱི་དཀོན་མཆོག་ཏུ་འབོད་ཀྱང་། ཁོང་ཉིད་དེ་ལ་ངོ་མི་གནོང་ཞིང་། དཀོན་མཆོག་གིས་ཁོ་རྣམས་ལ་གྲོང་ཁྱེར་ཞིག་སྟ་གོན་མཛད་ཡོད་པས་སོ།།
HEB 11:17 ཡང་ཨབ་ར་ཧམ་གྱིས་དད་པར་བརྟེན་ཅིང་ཁོ་རང་ཉིད་ལ་བརྟག་པའི་དུས་སུ། ཨི་སཱག་མཆོད་པར་འབུལ་བར་རྩོམ་ཞིང་། རང་ཉིད་ཀྱི་བུ་གཅིག་པུའང་མཆོད་པར་འབུལ་བའི་མི་ཁོ་རང་ནི་ཞལ་བཞེས་ཐོབ་མཁན་དེ་ཡིན་ནོ།།
HEB 11:18 དཀོན་མཆོག་གིས་དེ་སྔར་ཁོ་ལ་འདི་སྐད༌དུ། ཨི་སཱག་བརྒྱུད་ནས་ཁྱོད་ཀྱི་རིགས་རྒྱུད་ཀྱི་མིང་ཐོན་པར་འགྱུར་ཞེས་གསུངས་པ་ཡིན།
HEB 11:19 ཁོས་ནི་དཀོན་མཆོག་གིས་མི་འཆི་བ་ལས་སླར་གསོན་པར་མཛད་ནུས་པར་སྙམ༌ཞིང༌། ཡང་དེ་ནི་ཁོ་ལ་རང་གི་བུ་འཆི་བ་ལས་ཕྱིར་ཐོབ་པའི་དཔེ་གཞི་ཡིན་ནོ༎
HEB 11:20 ཡང་ཨི་སཱག་གིས་དད་པར་བརྟེན་ནས་ཡ་ཀོབ་དང་ཨེ་སཱབ་གཉིས་ལ་མ་འོངས་པའི་དོན་རྣམས་བསྟན་ཏེ་བྱིན་རླབས་གནང༌ངོ༌།།
HEB 11:21 ཡང་ཡ་ཀོབ་ཀྱིས་དད་པར་བརྟེན་ནས་རང་ཉིད་ཚེ་ལས་འདའ་ཁར། ཡོ་སེབ་ཀྱི་བུ་རེ་རེ་ལ་བྱིན་རླབས་གནང༌ཞིང༌། འཁར་བ་ལ་བརྟེན་ནས་དཀོན་མཆོག་ལ་བསྟོད་བསྔགས་བརྗོད༌དོ།།
HEB 11:22 ཡང་ཡོ་སེབ་ཀྱིས་དད་པར་བརྟེན་ནས་རང་ཉིད་ཚེ་ལས་འདའ་ཁར། ཡེས་ར་ཨེལ་གྱི་བུ་རྒྱུད་ཕྱིས་སུ་ཨེ་ཅིབ་ཡུལ་ནས་ཕྱིར་ཐོན་ངེས་པའི་སྐོར་སྨྲས་ཤིང་། རང་གི་ཀེང་རུས་ཀྱི་ཕྱིར་ཁ་ཆེམས་བཞག་གོ།
HEB 11:23 ཡང་དད་པར་བརྟེན་ནས། མོ་ཤེ་སྐྱེས་པ་དང་ཁོའི་ཕ་མ་གཉིས་ཀྱིས་ཕྲུ་གུ་མཛེས་ཤིང་སྡུག་པ་ཞིག་ཡིན་པ་མཐོང༌སྟེ། རྒྱལ་པོའི་བཀའ་ལའང་མ་འཇིགས་པར་ཕྲུ་གུ་དེ་ཟླ་བ་གསུམ་གྱི་རིང་ལ་སྦས༌པའོ།།
HEB 11:24 ཡང་མོ་ཤེ་ཡིས་དད་པར་བརྟེན་ནས་ཁོ་རང་ནར་སོན་རྗེས། ཕཱར་ཨོལ་གྱི་སྲས་མོའི་བུ་ཞེས་འབོད་པ་ཁས་མ་བླངས་སོ།།
HEB 11:25 ཁོ་རང་ནི་དཀོན་མཆོག་གི་འབངས་མི་དང་ལྷན་དུ་གནོད་འཚེ་མྱང་བར༌དགའ་བ་ལས། གནས་སྐབས་ཙམ་ལའང་སྡིག་པའི་ནང་གི་བདེ་སྐྱིད་ལ་རོལ་མི་འདོད།
HEB 11:26 ཁོས་དཀོན་མཆོག་གི་བྱ་དགའ་ལ་རེ་སྒུག་བྱེད་པས། སྐྱབས་མགོན་མཱ་ཤི་ཀའི་དོན་དུ་ཐེབས་པའི་བརྙས་བཅོས་ནི་ཨེ་ཅིབ་ཡུལ་གྱི་རྒྱུ་ནོར་ལས་ཀྱང་རིན་པོ་ཆེ་རུ་བརྩིས་པ་ཡིན།
HEB 11:27 ཁོས་དད་པར་བརྟེན་ནས་རྒྱལ་པོའི་ཁྲོ་བ་ལ་མ་འཇིགས་པར་ཨེ་ཅིབ་ཡུལ་དང་ཁ་བྲལ་ཏོ།། དེ་ནི་མིག་གིས་མཐོང་མི་ནུས་པའི་དཀོན་མཆོག་མཐོང་བ་བཞིན་བློ་སེམས་བརྟན་པོས་བཟོད་བསྲན་བྱས་པའི་ཕྱིར་ཡིན།
HEB 11:28 ཡང་ཁོས་དད་པར་བརྟེན་ནས་པེ་སག་གི་དུས་ཆེན་དང་ཁྲག་གཏོར་བའི་དོན་དེ་བསྲུངས་པ་ཡིན། དེ་ནི་བུ་སྐྱེས་འགོ་རྣམས་གསོད་མཁན་གྱིས་ཡེས་ར་ཨེལ་མི་རིགས་ལ་གནོད་འཚེ་མི་བྱེད་པའི་ཕྱིར་ཡིན་ནོ།།
HEB 11:29 ཡང་ཡེས་ར་ཨེལ་གྱི་མི་རྣམས་ཀྱིས་དད་པར་བརྟེན་ནས་མཚོ་དམར་པོ་སྐམ་ས་བཞིན་དུ་བརྒལ་ནས་སོང་བ་ལ། ཨེ་ཅིབ་པ་རྣམས་ཀྱང་དེ་ལྟར་བརྒལ་བར་བརྩམས་པ་ན་ཆུར་ནུབ་བོ།།
HEB 11:30 ཡང་ཡེས་ར་ཨེལ་གྱི་མི་རྣམས་ཀྱིས་དད་པར་བརྟེན་ནས་ཉིན་བདུན་ལ་ཡེ་རུ་ཀོ་ལ་སྐོར་བ་བརྒྱབ་པ་དང་མཁར་གྱང་ལོག་པར་གྱུར་ཏོ།།
HEB 11:31 ཡང་སྨད་འཚོང་མ་རཱ་ཧབ་ཀྱིས་དད་པར་བརྟེན་ནས་ཞི་འཇམ་ངང་མྱུལ་མ་རྣམས་ནང་དུ་བསུས༌པས། ཁོ་མོ་ནི་དཀོན་མཆོག་གི་བཀའ་ལ་མི་ཉན་པ་རྣམས་དང་མཉམ་དུ་འཆི་བར་མ་གྱུར༌ཏོ།།
HEB 11:32 བདག་གིས་ད་དུང་བརྗོད་དགོས་དོན་ཅི་ཡོད༌དམ། གལ་ཏེ། བདག་གིས་རེ་རེ་བཞིན་ཞིབ་ཏུ་བཤད༌ན། གིད་ཡོན་དང་། པཱ༌རག སཱམ༌སོན། ཡེབ༌ཐཱ། དཱ༌བིད། སཱ་མུ༌ཨེལ་དང་བཅས་པའི་ལུང་སྟོན་པ་དག་གི་དོན་རྣམས་བརྗོད་ཁོམ་མེད་དོ།།
HEB 11:33 ཁོ་རྣམས་ཀྱིས་དད་པར་བརྟེན་ནས་རྒྱལ་ཁམས་གཞན་དག་བཏུལ་ཞིང་། དྲང་བདེན་གཉེར་བ༌དང༌། ཞལ་བཞེས་ཐོབ༌པ། སེངྒེ་དག་གི་མཆུ་ཏོ་བསྡམས༌པ།
HEB 11:34 མེ་དཔུང་གི་ངར་ཤུགས་བཅོམས་པ། རལ་གྲིའི་ཁ་ལས་ཐར༌བ། ཉམ་ཆུང་ལས་སྟོབས་ཅན་དུ་བསྒྱུར༌བ། གཡུལ་ངོར་དཔའ་རྩལ་ངོམ་པ། ཕས་རྒོལ་གྱི་དམག་དཔུང་ཕྱིར་བཟློག༌པའོ།།
HEB 11:35 བུད་མེད་དག་གི་འདས་པོ་རྣམས་སླར་གསོན་ནས་ཁོ་མོ་དག་ལ་ཕྱིར་ཐོབ༌པ། ལ་ལས་མནར་གཅོད་དྲག་པོ་མྱངས་ནའང་། ཁྱད་དུ་འཕགས་པའི་སླར་གསོན་དེ་ཉིད་འཐོབ་པའི༌ཕྱིར། གནས་སྐབས་ཙམ་གྱི་ཐར་པ་དང་དུ་མ་བླངས་སོ།།
HEB 11:36 ཡང་དད་ལྡན་ལ་ལས་འཕྱ་དམོད་དང་རྡུང༌རྡེག ལྕགས༌སྒྲོག་དང་བཙོན་འཇུག་བཅས་ཀྱི་སྡུག་བསྔལ་སྣ་ཚོགས་ཀྱང་མྱངས༌ཤིང་།
HEB 11:37 ལ་ལ་རྡོ་རུབ་བཏང་བ་དང་། ལ་ལ་སོག་ལེ་ཡིས་དུམ་བུར་བཅད། ལ་ལ་ཉམས་ཚོད་དང༌ཕྲད། ལ་ལ་རལ་གྲིས༌བསད། ལ་ལས་ལུག་ལྤགས་དང་ར་ལྤགས་གྱོན་ནས་ས་མཐར་འཁྱམས། ལ་ལ་དབུལ་ཕོངས་དང་། དཀའ༌ཚེགས། མནར་གཅོད་བཅས་ཀྱི་གནས་སུ༌ལྷུང༌།
HEB 11:38 ལ་ལ་དབེན་སྟོང་དང་། རི༌ལུང་། བྲག༌ཁུང་། ས་དོང་བཅས་གནས་ངེས་མེད་དུ་རྒྱུའོ།། འཇིག་རྟེན་འདི་ནི་ཁོ་རྣམས་ཡོད་པར་མི་འོས་སོ།།
HEB 11:39 མི་དེ་དག་ཐམས་ཅད་ལ་དད་པ་བརྒྱུད་ནས་བདེན་དཔང་ལེགས་པོ་ཐོབ་ནའང༌ཞལ་བཞེས་མ་ཐོབ་བོ།།
HEB 11:40 རྒྱུ་མཚན་ནི་དཀོན་མཆོག་གིས་བདག་ཅག་ལ་དེ་ལས་འཕགས་པ་ཞིག་སྟ་གོན་མཛད་ཡོད་དེ། ཁོ་རྣམས་ལ་བདག་ཅག་དང་མཉམ་དུ་ཐོབ་པར་མ་མཛད་ན། དེ་རྣམས་ཡོངས་སུ་རྫོགས་པར་མི་འགྱུར༌བའི་ཕྱིར་རོ།།
HEB 12:1 དེ་བས་ན་བདག་ཅག་ལ་སྤྲིན་ཕུང་གིས་མཐའ་ནས་བསྐོར་བ་ལྟ་བུའི་དཔང་པོ་འདི་འདྲ་མང་པོ་ཡོད་པས། ཁུར་པོ་ལྕི་མོ་སྣ་ཚོགས་བསྐྱུར་བ་དང་། འཁྲིལ་སླ་བའི་སྡིག་པ་རྣམས་སྤངས༌ཏེ། བཟོད་སེམས་བཅངས་ནས་མདུན་དུ་བཤམས་པའི་འགྲན་རྒྱུག་དེར་རྒྱུག་དགོས༌པ་དང་།
HEB 12:2 བདག་ཅག་གི་དད་པའི་འགོ་རྩོམ་མཁན་དང་དེ་ཉིད་ཡོངས་སུ་རྫོགས་པར་མཛད་མཁན་སྐྱབས་མགོན་ཡེ་ཤུ་ལ་མགོ་བོ་ཡར་བཏེགས་ནས་བལྟ་དགོས༌སོ།། ཁོང་གིས་རང་ཉིད་ཀྱི་མདུན་དུ་བཤམས་པའི་དགའ་སྤྲོའི་ཕྱིར། ངོ་ཚ་སྣང་མེད་དུ་བསྐྱུར་བ་དང་ཤིང་རྒྱ་གྲམ་གྱི་དཀའ་སྡུག་ལ་བཟོད་བསྲན་མཛད་དེ། ཁོང་ཉིད་དཀོན་མཆོག་གི་བཞུགས་ཁྲིའི་གཡས་ཕྱོགས་སུ་བཞུགས༌པ་ཡིན།
HEB 12:3 ཁྱོད་རྣམས་ལུས་ཐང་མི་ཆད་པ་དང་ཡིད་སེམས་མི་ཕམ་པའི་ཕྱིར། ཁོང་གིས་སྡིག་ཅན་རྣམས་ཀྱི་འགོག་རྒོལ་ལ་ཅི་ལྟར་བཟོད་བསྲན་བྱས་པར་ཁྱོད་ཅག་གིས་མནོ་བསམ་གཏོང་བར་བྱའོ།།
HEB 12:4 ཁྱོད་རྣམས་སྡིག་པ་དང་འཐབ་ནའང་། ཁྲག་བཞུར་བའི་བར་དུ་འགོག་དགོས་པའི་ཚད་ལ་ད་དུང་མ་སླེབས་སོ།།
HEB 12:5 དེ་ལ་ཇི་སྐད༌དུ། བདག་གི་བུ་ཁྱོད་གཙོ་བོས་གཅུན་པ་ལ།། ཁྱོད་ཀྱིས་མཐོང་ཆུང་སྣང་མེད་མ་བྱེད་ཅིག ། བཀའ་བཀྱོན་མཛད་དུས་ཡིད་སེམས་ཕམ་མི་བྱ།།
HEB 12:6 གཙོ་བོས་གཅེས་པ་རྣམས་ལ་གཅུན་པ་དང་།། བུ་རུ་བརྩིས་པ་རེ་རེར་རྡེག་ཕྱིར་རོ།། ཞེས་བུ་ལ་བསླབ་བྱ་གནང་བ་བཞིན། ཁྱོད་རྣམས་ལ་བསླབ་བྱ་གནང་བ་ཡང་ཁྱོད་ཅག་གིས་བརྗེད་ཟིན༌ཏོ།།
HEB 12:7 ཁྱོད་རྣམས་ཀྱིས་བཟོད་བསྲན་བྱེད་པ་ནི་གཅུན་པའི་ཕྱིར་ཡིན་ལ། དཀོན་མཆོག་གིས་ཁྱོད་རྣམས་རང་གི་བུ་བཞིན་དུ་གཅུན་པར་མཛད་པའོ།། ཕ་ཡིས་བུ་ལ་མི་གཅུན་པ་ཞིག་ག་ན་ཡོད་ཨང་།
HEB 12:8 མ་གཞི་བུ་ཕྲུག་ཐམས་ཅད་ལ་གཅུན་མཁན་ཡོད། གལ་ཏེ། ཁྱོད་རྣམས་ལ་གཅུན་མཁན་མེད༌ན། ཁྱོད་ཅག་ནི་བྱི་ཕྲུག་ཡིན་པ་ལས་བུ་ཕྲུག་དངོས་མིན་ནོ།།
HEB 12:9 གཞན་ཡང་། བདག་ཅག་ལ་གཅུན་མཁན་ལུས་སྦྱིན་གྱི་ཕ་ཡོད་ལ། བདག་ཅག་གིས་ཁོང་ལ་བརྩི་བཀུར་བྱེད༌པ་ཡིན་པས། སེམས་ཉིད་ཀྱི་ཡབ་ནི་ལྟ་ཅི་སྨོས། བདག་ཅག་གིས་ཁོང་གི་བཀའ་ལ་མཉན་ཏེ་འཚོ་བར་མི་འོས༌སམ།
HEB 12:10 ལུས་སྦྱིན་གྱི་ཕ་རྣམས་ཀྱིས་རང་རང་གི་འདོད་བློ་ལྟར་གནས་སྐབས་སུ་བདག་ཅག་ལ་གཅུན་པ་ཡིན༌མོད། འོན་ཀྱང་སེམས་ཉིད་ཐམས་ཅད་ཀྱི་ཡབ་ལགས་ཀྱིས་བདག་ཅག་ལ་ཕན་འདོགས་པ་དང་། ཁོང་གི་དམ་པའི་རང་བཞིན་ལས་བདག་ཅག་ལ་སྐལ་བ་ལྡན་པའི་ཕྱིར་གཅུན་པར་མཛད་པའོ།།
HEB 12:11 སྤྱིར་གཅུན་པའི་དོན་ཐམས་ཅད་ནི་སྐབས་དེར་སྡུག་བསྔལ་དུ་འདོད་པ་ལས་དགའ་སྤྲོའི་ཚོར་བ་མེད་མོད། འོན་ཀྱང་གཅུན་པའི་སྦྱོང་བ་ཐོབ་པ་རྣམས་ལ་ཕྱིས་སུ་ཞི་བདེའི་འབྲས་བུ་སྨིན་ཞིང་དེ་ནི་དྲང་བདེན་ཡིན་ནོ།།
HEB 12:12 དེའི༌ཕྱིར། ཁྱོད་རྣམས་ཀྱིས་ལག་པ་ལྷོད་ཅིང་པུས་མོའི་ཤེད་ཉམས་པ་དག་ནི་སྟོབས་དང་ལྡན་པར་གྱིས།
HEB 12:13 ཡང་རང་རང་གི་རྐང་པའི་དོན་དུ་ལམ་དྲང་པོར་བཟོས༌ཤིག དེ་ལྟར་བྱས་ན། རྐང་ལག་ཞ་བར་གྱུར་པ་གང་ཡིན་པ་ཚིགས་མི་བུད་པར་སོས་པར་འགྱུར༌རོ།།
HEB 12:14 ཁྱོད་རྣམས་ཀྱིས་མི་ཐམས་ཅད་ལ་མཐུན་པོ་ཡོང་བ་དང་རང་ཉིད་དམ་པར་འགྱུར་བར་བསྙེག་དགོས༌ཏེ། དམ་པ་མིན་ན་གཙོ་བོ་ལ་མཇལ་ཐུབ་མཁན་གཅིག་ཀྱང་མེད༌དོ།།
HEB 12:15 ཡང་དཀོན་མཆོག་གི་ཐུགས་རྗེ་དང་མི་འབྲལ་བ་དང་། འཁོན་སེམས་དུག་གི་རྩ་བ་རྒྱས་ཏེ་ཁྱོད་རྣམས་དཀྲུགས་པ་བརྒྱུད་ནས་མི་མང་པོ་བཙོག་པར་མི་བྱེད་པའི་ཕྱིར་གཟབ་གཟབ་གྱིས་ཤིག
HEB 12:16 ལོག་གཡེམ་བྱེད་མཁན་དང་དད་གུས་མེད་པ་ཨེ་སཱབ་ལྟ་བུ་འབྱུང་བར་གཟབ་གཟབ་བྱེད་དགོས༌ཏེ། ཨེ་སཱབ་ཀྱིས་ཟས་ཐུན་གཅིག་གི་ཆེད་དུ་རང་ཉིད་ཀྱི་བུ་ཆེ་བའི་ཐོབ་ཐང་ཡང་བཙོངས་པ་ཡིན།
HEB 12:17 ཕྱིས་སུ་ཁོ་ལ་ཕ་ཡི་བྱིན་རླབས་འཐོབ་འདོད་ཀྱང་ཁོ་ནི་འདོར་བར་གྱུར་པ་དང་། མིག་ལས་མཆི་མ་བཞུར་གྱིན་ཞུ་བ་ཞུས་ཀྱང་ཕ་ཡི་བློ་ཁ་བསྒྱུར་བའི་ཐབས་མ་རྙེད་པ་ཁྱོད་རྣམས་ཀྱིས་ཤེས༌སོ།།
HEB 12:18 ཁྱོད་ཅག་ནི་རེག་ཐུབ་པའི་རི་བོ་དེར་ཡོང་བ་མ་ཡིན༌ཏེ། རི་བོ་དེར་མེ་དཔུང་དང་། སྤྲིན་ནག མུན་ནག དྲག་རླུང་།
HEB 12:19 དུང་སྒྲ་དང་བཀའ་གསུང་བའི་སྒྲ་བཅས་ཡོད་པ་ཡིན་ལ། གསུང་སྐད་དེ་ཐོས་པ་རྣམས་ཀྱིས་ཁོ་རྣམས་ལ་གསུང་སྐད་ཅི་ཡང་མི་གནང་བར་ཞུ་བ་ཞུས་སོ།།
HEB 12:20 ཅིའི་ཕྱིར་ཞེ་ན། འདི་སྐད༌དུ། རི་བོ་དེའི་འདབས་ལ་རེག་མཁན་ནི་རི་དྭགས་ཡིན་ཡང་། རྡོ་རུབ་བཏང་ནས་གསོད་པར་བྱ་ཞེས་གསུངས་པའི་བཀའ་ནི་ཁོ་རྣམས་ཀྱིས་མ་བཟོད་པའི་ཕྱིར་རོ།།
HEB 12:21 མིག་གིས་མཐོང་བ་དེ་ནི་འཇིགས་སུ་རུང་བ་ཞིག་ཡིན་པས། དེ་ལ་མོ་ཤེ་ཡིས་འདི་སྐད་དུ། བདག་ནི་ཤིན་ཏུ་འཇིགས་ཤིང་སྐྲག་སྟེ་འདར་བར་གྱུར་ཞེས་གསུངས་སོ།།
HEB 12:22 འོན་ཀྱང་། ཁྱོད་ཅག་ནི་རི་བོ་ཛ་ཡན་དང་རྟག་ཏུ་གསོན་པོར་བཞུགས་པའི་དཀོན་མཆོག་གི་གྲོང་ཁྱེར་ཏེ། ནམ་མཁའི་ཞིང་ཁམས་ཀྱི་ཡེ་རུ་སཱ་ལེམ་དུ་ཡོང་ངོ་།། གནས་དེ་རུ་ཕོ་ཉ་ཁྲི་ཕྲག་དུ་མ་ཡོད་ལ།
HEB 12:23 ནམ་མཁའི་ཞིང་ཁམས་སུ་མིང་ཐོ་བཀོད་ཡོད་པའི་བུ་སྐྱེས་འགོ་རྣམས་འདུས་པའི་ཆོས་ཚོགས་དང་། མི་ཐམས་ཅད་ལ་ཁྲིམས་ཐག་མཛད་མཁན་དཀོན་མཆོག་དང་། ཡོངས་སུ་རྫོགས་པར་མཛད་པའི་རྣམ་པར་དག་པ་རྣམས་ཀྱི་རྣམ་ཤེས་ཡོད་པར་མ༌ཟད།
HEB 12:24 ཞལ་ཆད་གསར་པའི་བར་མི་སྟེ་སྐྱབས་མགོན་ཡེ་ཤུ་དང་ཁོང་གིས་གཏོར་བའི་སྐུ་ཁྲག་ཀྱང་ཡོད༌ལ། སྐུ་ཁྲག་དེས་ཧ་བེལ་གྱི་ཁྲག་ལས་ཀྱང་ཡིད་དུ་འོང་བའི་བཀའ་གསུངས་སོ།།
HEB 12:25 ཁྱོད་རྣམས་ཀྱིས་རྟག་ཏུ་གཟབ་གཟབ་བྱ་དགོས་ཏེ། ཁྱོད་རྣམས་ལ་བཀའ་གསུང་མཁན་དེ་ཉིད་འདོར་མི༌རུང་ངོ་།། འཇིག་རྟེན་དུ་མི་རྣམས་ལ་ཉེན་བརྡ་གཏོང་མཁན་དེ་ཉིད་དོར་བ་ཁོ་རྣམས་ཐར་མི་ནུས་ན། ནམ་མཁའི་ཞིང་ཁམས་ནས་བདག་ཅག་ལ་ཉེན་བརྡ་གཏོང་མཁན་དེ་ཉིད་དང་འགལ་བ་ཡིན་ན་སྨྲ་ཅི་དགོས།
HEB 12:26 དུས་དེར་ཁོང་གི་གསུང་སྐད་ཀྱིས་ས་གཞི་གཡོས་མོད། འོན་ཀྱང་ད་ལྟ་ཁོང་གིས་འདི་སྐད༌དུ་ཞལ་བཞེས་གནང་བ་སྟེ། ད་དུང་ཐེངས་གཅིག་ལ་བདག་གིས་ས་གཞི་གཡོ་ཞིང་ནམ་མཁའ་ཡང་གཡོ་བར་བྱའོ་ཞེས་གསུངས་པ་ཡིན།
HEB 12:27 ད་དུང་ཐེངས་གཅིག་ལ་ཞེས་པའི་གསུང་འདིས་གཡོ་མི་ནུས་པ་རྣམས་རྟག་ཏུ་གནས་པའི༌ཕྱིར། གཡོ་བར་འགྱུར་བའི་དངོས་པོ་བསྐྲུན་པ་དེ་དག་འདོར་བར་འགྱུར་བ་གསལ་པོར་བསྟན༌ཏོ།།
HEB 12:28 དེའི༌ཕྱིར། བདག་ཅག་ལ་གཡོ་མི་ནུས་པའི་རྒྱལ་སྲིད་ཐོབ་པ་ཡིན་པས། བདག་ཅག་ནི་དྲིན་གཟོ་བའི་སེམས་དང་ལྡན་འོས་ཤིང༌། དཀོན་མཆོག་ཐུགས་དགྱེས་པ་བཞིན་དུ། དད་གུས་དང་འཚེར་སྣང་བཅས་ཁོང་ལ་ཞབས་ཏོག་བསྒྲུབ་འོས་སོ།།
HEB 12:29 ཅིའི་ཕྱིར་ཞེ་ན། བདག་ཅག་གི་དཀོན་མཆོག་ནི་ཡོངས་རྫོགས་རྩ་མེད་གཏོང་བའི་མེ་ཡིན་པའི་ཕྱིར་རོ།།
HEB 13:1 ཁྱོད་ཅག་གིས་རྟག་ཏུ་སྤུན་ཟླ་རྣམས་གཅེས་སུ་འཛིན་པའི་སེམས་བཅང༌དགོས་ཤིང་།
HEB 13:2 མགྲོན་པོར་སྣེ་ལེན་བྱ་རྒྱུ་བརྗེད་མི་རུང༌སྟེ། སྔོན་ཆད་མགྲོན་པོར་སྣེ་ལེན་བྱེད་མཁན་གྱིས་དེ་ལྟར་བྱས་ནས་མ་བསམ་ས་ནས་ཕོ་ཉ་རྣམས་ལའང་སྣེ་ལེན་བྱས་མྱོང་བའི་ཕྱིར་རོ།།
HEB 13:3 ཁྱོད་ཅག་གིས་བཙོན་དུ་བཅུག་ཡོད་པ་རྣམས་སེམས་སུ་གཟུང་འོས༌ཏེ། རང་ཉིད་ཀྱང་ཁོ་རྣམས་དང་ལྷན་དུ་བཙོན་ལ་བཅུག་ཡོད་པ་བཞིན་བྱེད༌པ་དང་། རང་ཉིད་ཀྱང་ཤ་གཟུགས་ཀྱི་ཕུང་བོའི་ནང་དུ་ཡོད་པས། མནར་གཅོད་མྱངས་པ་རྣམས་སེམས་སུ་གཟུང་འོས༌སོ།།
HEB 13:4 མི་ཐམས་ཅད་ཀྱིས་གཉེན་སྒྲིག་ལ་བརྩི་མཐོང་བྱ་འོས་ཤིང་། བཟའ་ཟླའི་མལ་ཁྲི་ཡང་མི་གཙང་བར་བྱ་མི༌རུང་ངོ་།། རྒྱུ་མཚན་ནི་མི་ཚངས་སྤྱོད་པ་དང་ལོག་གཡེམ་བྱེད་མཁན་ལ་དཀོན་མཆོག་གིས་ཉེས་ཆད་གཅོད་པར་འགྱུར་བའི་ཕྱིར་ཡིན།
HEB 13:5 ཁྱོད་རྣམས་དངུལ་ལ་ཞེན་ཆགས་མི་རུང༌སྟེ། རང་ཉིད་ལ་གང་ཡོད་པ་དེར་ཡིད་ཚིམ་པར་བྱའོ། །ཅིའི་ཕྱིར་ཞེ་ན། དཀོན་མཆོག་གིས་འདི་སྐད༌དུ། བདག་གིས་རྒྱུན་དུ་ཁྱོད་རང་མི་འདོར་ཞིང༌།། ནམ་ཡང་ཁྱོད་རང་བསྐྱུར་བར་མི༌བྱེད་དོ།། ཞེས་གསུངས༌པའི་ཕྱིར་རོ།།
HEB 13:6 དེའི་ཕྱིར། བདག་ཅག་གིས་སྤོབས་པ་བསྐྱེད་ནས། གཙོ་བོ་ཁོང་ཉིད་བདག་གི་སྡོངས་གྲོགས་ཡིན།། བདག་ལ་འཇིགས་པའི་དོན༌ནི་ཡོད་མི་སྲིད།། འཇིག་རྟེན་མི་ཡིས་བདག་ལ་ཅི་ཞིག་བྱ།། ཞེས་སྨྲ་བར་ནུས༌སོ།།
HEB 13:7 ཁྱོད་ཅག་གིས་སྔོན་ཆད་ཁྱོད་རྣམས་ལ་ཁྲིད་སྟོན་གནང་བ་སྟེ་དཀོན་མཆོག་གི་བཀའ་གསུང་མཁན་རྣམས་སེམས་སུ་གཟུང་དགོས༌ཤིང༌། དེ་དག་གི་སྤྱོད་ལམ་གྱི་འབྲས་བུར་ནན་གྱིས་བལྟས་ནས། ཁོ་ཚོའི་དད་སེམས་མིག་དཔེར་གཟུང་བར་བྱའོ།།
HEB 13:8 ཡེ་ཤུ་མཱ་ཤི་ཀ་ནི་ཁ་སང་དེ༌རིང༌དང་ཡུན་ནས་ཡུན་དུ་འགྱུར་བ་མེད་དོ།།
HEB 13:9 ཁྱོད་རྣམས་ཚུལ་མིན་བསླབ་པ་སྣ་ཚོགས་ཀྱི་བསླུ་བྲིད་དབང་དུ་འགྲོ་བར་མི་བྱའོ། །ཅིའི་ཕྱིར་ཞེ་ན། མིའི་སེམས་ནི་ཐུགས་རྗེ་ལ་བརྟེན་ནས་བརྟན་པོར་གྱུར་ན་ལེགས་པ་ལས། བཟའ་བཏུང་ལ་བརྟེན་པ་མ་ཡིན་ཏེ། བཟའ་བཏུང་ཁོ་ནར་བློ་འཁོར་བ་རྣམས་ལ་ཕན་ཅི་ཡང་མ་ཐོགས་པའི་ཕྱིར་ཡིན།
HEB 13:10 བདག་ཅག་ལ་མཆོད་ཁྲི་ཞིག་ཡོད་ཅིང་གུར་མཆོག་གི་ཞབས་ཏོག་པ་རྣམས་ཀྱིས་དེ་ལས་བཟའ་མི་རུང་ངོ་།།
HEB 13:11 མ་གཞི་མཆོད་དཔོན་ཆེན་པོས་གནས་དམ་མཆོག་ནང་དུ་ཕྱུགས་ཟོག་གི་ཁྲག་ཁྱེར་ནས་སྡིག་པའི་ཆེད་དུ་འབུལ་བ༌དང༌། ཕྱུགས་ཟོག་གི་བེམ་པོ་ནི་སྒར་སའི་ཕྱི་རོལ་ཏུ་མེར་བསྲེགས་པའོ།།
HEB 13:12 དེའི་ཕྱིར། སྐྱབས་མགོན་ཡེ་ཤུས་རང་ཉིད་ཀྱི་སྐུ་ཁྲག་གིས་འབངས་མི་དམ་པར་མཛད་པའི་ཆེད་དུ། ཁོང་གིས་ཀྱང་མཁར་སྒོའི་ཕྱི་རོལ་ཏུ་སྡུག་བསྔལ་མྱངས་པའོ།།
HEB 13:13 དེ་ལྟར་བདག་ཅག་སྒར་སའི་ཕྱི་རོལ་ཏུ་ཁོང་གི་དྲུང་ལ་སོང་སྟེ། ཁོང་གིས་མྱངས་པའི་བརྙས་བཅོས་དེ་ལྟ་བུ་ལ་བཟོད་བསྲན་བྱ་འོས༌ཤིང་།
HEB 13:14 བདག་ཅག་ལ་གནས་འདི་རུ་རྟག་གཏན་གྱི་གྲོང་ཁྱེར་ཞིག་མེད་ནའང་། མ་འོངས་འབྱུང་འགྱུར་གྱི་གྲོང་ཁྱེར་དེ་ཉིད་འཚོལ་བའོ།།
HEB 13:15 དེའི་ཕྱིར། བདག་ཅག་གིས་སྐྱབས་མགོན་ཡེ་ཤུར་བརྟེན་ནས། དཀོན་མཆོག་ལ་རྟག་ཏུ་བསྟོད་བསྔགས་ཀྱི་མཆོད་པ་འབུལ་འོས༌ཤིང༌། དེ་ནི་ཁོང་གི་མཚན་ཁས་ལེན་མཁན་དག་གི་སྨྲ་སྒོའི་འབྲས་བུ་ཡིན༌ནོ།།
HEB 13:16 ལས་བཟང་པོ་བསྒྲུབ་པ་དང་ཕན་ཚུན་ལ་སྦྱིན་པ་གཏོང་བ་ནི་བརྗེད་པར་མི་བྱའོ།། ཅིའི་ཕྱིར་ཞེ་ན། དཀོན་མཆོག་མཆོད་པ་དེ་ལྟ་བུ་ལ་ཐུགས་དགྱེས་པའི་ཕྱིར་རོ།།
HEB 13:17 ཁྱོད་ཅག་གིས་ཁྲིད་སྟོན་གནང་མཁན་གྱི་ངག་ལ་མཉན་པ་དང་ཁོང་རྣམས་ཀྱི་བཀའ་ལྟར་བསྒྲུབ་དགོས༌སོ།། ཅིའི་ཕྱིར་ཞེ་ན། ཁོང་རྣམས་ཀྱིས་རྟག་ཏུ་ཁྱོད་ཅག་གི་ཚེ་སྲོག་སྲུང་བ་དང༌། དེ་རྣམས་ནི་མ་འོངས་པའི་དུས་སུ་དཀོན་མཆོག་ལ་རྩིས་སྤྲོད་མཁན་ཡིན་པས། ཁྱོད་ཅག་གིས་ཁོང་རྣམས་ལ་སེམས་ཁྲལ་མེད་པར་དགའ་སྤྲོའི་ངང་ནས་བསྲུང་དུ་བཅུག་ན་འོས་སོ།། གལ་ཏེ། ཁོང་རྣམས་ལ་སེམས་ཁྲལ་ཡོད་ན་ཁྱོད་ཅག་ལ་ཕན་ཐོགས་མེད་པའི་ཕྱིར་རོ།།
HEB 13:18 ངེད་ཅག་གིས་བསམ་པ་རྣམ་དག་མངའ་བའི་གདེང་ཚོད་དང་བཅས་ལས་ཐམས་ཅད་ཡང་དག་པའི་སྒོ་ནས་བསྒྲུབ་པར་འདོད་པས། ཁྱོད་རྣམས་ཀྱིས་ངེད་ཅག་གི་དོན་དུ་སྨོན་ལམ་འདེབས་པར་ཞུའོ།།
HEB 13:19 ང་རང་མྱུར་བ་མྱུར་བར་ཁྱོད་ཅག་གི་གམ་དུ་ཕྱིར་ཡོང་ཐུབ་པའི་ཆེད་དུ། ཁྱོད་རྣམས་ཀྱིས་བདག་གི་ཆེད་དུའང་ལྷག་ཏུ་སྨོན་ལམ་འདེབས་པར་ཞུའོ།།
HEB 13:20 ཞི་བདེ་གནང་མཁན་དཀོན་མཆོག་སྟེ། རྟག་གཏན་ཞལ་ཆད་ཀྱི་ཁྲག་ལ་བརྟེན་ནས་ལུག་ཁྱུའི་རྫི་བོ་ཆེན༌པོ་སྟེ། བདག་ཅག་གི་གཙོ་བོ་ཡེ་ཤུ་གཤིན་པོ་རྣམས་ལས་ཕྱིར་འདྲེན་མཁན་དཀོན་མཆོག༌གིས།
HEB 13:21 ཁོང་གི་ཐུགས་དགོངས་བཞིན་དུ་བསྒྲུབ་པའི་ཕྱིར། ལས་བཟང་པོ་སྣ་ཚོགས་ཀྱི་ཆ་ནས་ཁྱོད་རྣམས་སྟ་གོན་མཛད་པ༌དང༌། ཡང་ཁོང་གི་སྤྱན་སྔར་ཐུགས་དགྱེས་རུང་བའི་དོན་རྣམས་ནི་ཡེ་ཤུ་མཱ་ཤི་ཀ་བརྒྱུད་ནས་ཁྱོད་ཅག་གི་སེམས་སུ་མཛད་པར༌སྨོན། ཁོང་ལ་ཇི་སྲིད་བར་དུ་བསྟོད་བསྔགས་བརྗོད་པར་སྨོན། ཨ༌མེན།
HEB 13:22 སྤུན་ཟླ༌རྣམས། བདག་གིས་ཁྱོད་རྣམས་ལ་འཕྲིན་ཐུང་འདི་བྲིས་པ༌དང༌། ཁྱོད་རྣམས་ཀྱིས་བདག་གི་གདམས་པ་ཐེག་པར་སྐུལ་ལོ།།
HEB 13:23 ཁྱོད་རྣམས་ཀྱིས་བདག་ཅག་གི་སྤུན་ཟླ་ཐི་མོ་ཐེ་བཏང་ཟིན་པ་ཤེས་སྲིད་ལ། ཁོ་རང་མྱུར་དུ་ཡོང་བ་ཡིན་ན། ང་རང་ཡང་ཁོ་དང་ལྷན་དུ་ཁྱོད་ཅག་ལ་བལྟ་རུ་ཡོང་ངེས༌ཡིན།
HEB 13:24 ཁྱོད་ཅག་གིས་ཁྲིད་སྟོན་གནང་མཁན་དང་དད་ལྡན་དམ་པ་ཐམས་ཅད་ལ་འཚམས་འདྲི་ཞུ་བར་བྱའོ།། ཨི་ཏ་ལི་ཡུལ་ནས་ཡོང་བ་རྣམས་ཀྱིས་ཀྱང་ཁྱོད་ཅག་ལ་འཚམས་འདྲི༌ཞུའོ།།
HEB 13:25 ཐུགས་རྗེ་ནི་རྟག་ཏུ་ཁྱོད་ཅག་ཐམས་ཅད་དང་མཉམ་དུ་གནས་པར༌སྨོན།། །།
JAM 1:1 དེ་ཡང་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཞབས་ཕྱི་པ་ཡ་ཀོབ་བདག་གིས་ཐར་ཐོར་དུ་གནས་པའི་ཚོ་པ་བཅུ་གཉིས་ལ་འཕྲིན་ཡིག་སྤྲིངས་ཤིང༌། ཁྱོད་རྣམས་ལ་འཚམས་འདྲི༌ཞུའོ།།
JAM 1:2 བདག་གི་སྤུན་ཟླ༌རྣམས། ཁྱོད་ཅག་དཀའ་སྡུག་སྣ་ཚོགས་ལ་འཕྲད༌དུས། དེ་ནི་དགའ་སྤྲོ་ཆེན་པོར་བརྩི་བར་བྱའོ།།
JAM 1:3 ཅིའི་ཕྱིར་ཞེ་ན། རང་གི་དད་པར་ཚོད་བརྟག་བྱས་པ་བརྒྱུད་ནས་བཟོད་སེམས་འབྱུང་བ་ནི་ཁྱོད་ཅག་གིས་ཀྱང་ཤེས་པས༌སོ།།
JAM 1:4 ཁྱོད་ཅག་ནི་མ་ཚང་བ་མེད༌པར་ཡང་དག་པ་དང་ཕུལ་དུ་བྱུང་བར་འགྱུར་བའི་ཕྱིར། བཟོད་པའང་ཡོངས་སུ་རྫོགས་དགོས།
JAM 1:5 ཁྱོད་རྣམས་ལས་སུ་ཞིག་ལ་ཤེས་རབ་མི་ཚང་ན། བཀའ་བཀྱོན་མི་མཛད་ཅིང་མི་ཐམས་ཅད་ལ་གཏོང་ཕོད་ཆེ་བའི་དཀོན་མཆོག་ཁོང་ལ་ཞུས༌དང༌། ཁོང་གིས་གནང་བར་འགྱུར།
JAM 1:6 འོན༌ཀྱང༌། ཞུ་བ་བྱེད་པའི་དུས༌སུ། ཐེ་ཚོམ་སྤུ་ཙམ་ཡང་མེད་པར་དད་པའི་སྒོ་ནས་ཞུ་དགོས། ཅིའི་ཕྱིར་ཞེ་ན། མི་ཐེ་ཚོམ་ཅན་ནི་རྒྱ་མཚོའི་རྦ་རླབས་རླུང་གིས་དེད་ནས་དགུང་དུ་འཕྱུར་བ་དང་མཚུངས་པའི་ཕྱིར༌རོ།།
JAM 1:7 མི་འདི་ལྟ་བུས་གཙོ་བོ་ནས་ཅི་ཡང་འཐོབ་པར་བསམ་མི་དགོས༌ཏེ།
JAM 1:8 མི་བློ་གཉིས་ཅན་ནི་རང་གིས་སྒྲུབ་པའི་ལས་ཀུན་ལའང་བརྟན་པོ་མ་ཡིན་ནོ།།
JAM 1:9 སྤུན་ཟླ་གཉོམ་ཆུང་དེ་གོ་ས་འཕར་བར་དགའ་འོས༌ཤིང༌།
JAM 1:10 ཕྱུག་པོ་དེ་དམན་སར་ལྷུང་བ་ལའང་དགའ་འོས༌སོ། །ཅིའི་ཕྱིར་ཞེ་ན། དེ་ནི་རྩྭ་མགོའི་མེ་ཏོག་དང་མཚུངས་པར་ཡལ་ངེས་ཏེ།
JAM 1:11 ཉི་མ་ཤར་བ་དང་ཚ་རླུང་གཡུགས་ནས་རྩྭ་སྔོན་སྐམས་ཤིང་མེ་ཏོག་སར་ལྷུང་བས་མཛེས་སྡུག་ཐམས་ཅད་ཡལ་བར་འགྱུར་བའི་ཕྱིར༌ཡིན། དཔེ་དེ་བཞིན་དུ་ཕྱུག་པོ་དེ་ཡང་རང་དོན་སྒྲུབ་བཞིན་པའི་སྐབས་སུ་ཉམས་པར་འགྱུར་རོ།།
JAM 1:12 ཚོད་བགམ་ལ་བཟོད་བསྲན་ཐུབ་པའི་མི་ནི་བྱིན་རླབས་ཅན་ཡིན། ཅིའི་ཕྱིར་ཞེ་ན། ཚོད་བགམ་བྱས་པའི་རྗེས་སུ། དཀོན་མཆོག་གིས་ཁོང་ཉིད་གཅེས་པར་འཛིན་པ་རྣམས་ལ་ཞལ་བཞེས་གནང་བའི་ཚེ་སྲོག་གི་ཅོད་པན་གནང་བར་འགྱུར་བའི་ཕྱིར༌རོ།།
JAM 1:13 ཉམས་ཚོད་ལ་འཕྲད་པའི་དུས༌སུ། དཀོན་མཆོག་གིས་བདག་ལ་ཉམས་ཚོད་ལེན་བཞིན་གདའ་ཞེས་སུ་ཞིག་གིས་ཀྱང་སྨྲ་མི་རུང༌། ཅིའི་ཕྱིར་ཞེ་ན། ངན་པས་དཀོན་མཆོག་ལ་ཉམས་ཚོད་བྱ་མི་ནུས༌ལ། དཀོན་མཆོག་གིས་ཀྱང་སུ་ཞིག་ལའང་ཉམས་ཚོད་མི་མཛད་པས༌སོ།།
JAM 1:14 འོན༌ཀྱང༌། མི་རེ་རེ་རང་གི་འདོད་ཆགས་ཀྱིས་དྲངས་ཏེ་བསླུས་ན་ཉམས་ཚོད་འབྱུང་།
JAM 1:15 འདོད་ཆགས་མངལ་དང་ལྡན་པར་གྱུར་ན་སྡིག་པ་སྐྱེས༌ཤིང༌། སྡིག་པ་བྱས་ན་འཆི་བ་འབྱུང་ངོ་།།
JAM 1:16 བདག་གི་སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་བསླུ་བྲིད་འོག་ཏུ་མི་ཚུད་པར་གྱུར༌ཅིག
JAM 1:17 གནང་སྦྱིན་ལེགས་ཤིང་ཕུལ་དུ་བྱུང་བ་ཐམས་ཅད་ནི་སྟེང་ནས་བྱུང་བ༌དང༌། དེ་ནི་འོད་ཟེར་ཀུན་གྱི་མངའ་བདག་སྟེ་ཡབ་ལས་བྱུང༌ཞིང༌། ཁོང་ལ་འགྱུར་ལྡོག་མེད་ཅིང་འགུལ་སྐྱོད་ཀྱི་གྲིབ་མ་ཙམ་ཡང་མེད་དོ།།
JAM 1:18 བདག་ཅག་ནི་ཁོང་གིས་བསྐྲུན་པ་ཐམས་ཅད་ལས་ཐོག་མར་སྨིན་པའི་འབྲས་བུ་ལྟ་བུར་འགྱུར་བའི༌ཕྱིར། ཁོང་གིས་རང་ཉིད་ཀྱི་ཐུགས་དགོངས་བཞིན་བདེན་པ་ཉིད་ཀྱི་བཀའ་བརྒྱུད་ནས་བདག་ཅག་སྐྱེ་བར་མཛད་པ་ལགས༌སོ།།
JAM 1:19 བདག་གི་སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་ཤེས་གསལ༌ལྟར། ཁྱོད་རྣམས་མི་རེ་རེ་ནི་རྣ་བས་ཉན་པ་ལ་མྱུར་དགོས༌ཤིང༌། ངག་ནས་སྨྲ་བ་དང་སེམས་ནས་ཁྲོ་བ་ལ་དལ་དགོས་སོ།།
JAM 1:20 ཅིའི་ཕྱིར་ཞེ་ན། མིའི་ཁོང་ཁྲོས་དཀོན་མཆོག་གི་རྣམ་པར་དག་པའི་ལས་བསྒྲུབ་མི་ནུས་པའི་ཕྱིར༌རོ།།
JAM 1:21 དེ་བས་ཁྱོད་ཅག་གིས་མི་གཙང་བ་དང་ངན་པས་གང་བ་ཐམས་ཅད་སྤངས༌ཏེ། ཞི་ཞིང་དུལ་བའི་སེམས་བཅངས་ནས་ཁྱོད་ཅག་གི་ནང་དུ་བཙུགས་ཡོད་པ་དང་ཁྱོད་ཅག་གི་བླ་སྲོག་སྐྱོབ་ནུས་པའི་བཀའ་དེ་ཁས་ལེན་དགོས།
JAM 1:22 ཁྱོད་རྣམས་ནི་རང་མགོ་རང་གིས་གཡོག་ཅིང་བཀའ་ལ་ཉན་མཁན་ཁོ་ནར་མི་འགྱུར་བར་བཀའ་བཞིན་དུ་སྒྲུབ་མཁན་དུ་གྱུར༌ཅིག
JAM 1:23 རྒྱུ་མཚན་ནི་སུ་ཞིག་གིས་བཀའ་ལ་ཉན་པ་ལས་བཀའ་ལྟར་མི་སྒྲུབ་པ་ནི་མི་ཞིག་གིས་མེ་ལོང་ལས་རང་གི་ངོ་གདོང་མཐོང་བ་དང་མཚུངས༌ལ།
JAM 1:24 མིག་གིས་མཐོང་ཞིང་ཕར་སོང་མ་ཐག་རང་ཉིད་ཀྱི་བཞིན་རས་ཇི་འདྲ་ཡིན་པ་བརྗེད་པ་ཡིན་ནོ།།
JAM 1:25 འོན༌ཀྱང༌། སུ་ཞིག་གིས་ཕུལ་དུ་བྱུང་བ་དང་རང་དབང་འཐོབ་པར་བྱེད་པའི་བཀའ་ཁྲིམས་ལ་རྒྱུན་དུ་ཞིབ་ལྟ་བྱས་ནས་བརྩི་སྲུང་བྱེད་ན། བཀའ་ལ་ཉན་མ་ཐག་བརྗེད་པ་མིན་པར་དངོས་སུ་དེ་ལྟར་བསྒྲུབས༌པས། ཁོས་སྒྲུབ་པའི་དོན་ཐམས་ཅད་ལ་བྱིན་རླབས་འཐོབ་པར་འགྱུར་ངེས༌སོ།།
JAM 1:26 གལ༌ཏེ། སུ་ཞིག་གིས་རང་ཉིད་ཆོས་སེམས་ཅན་ཡིན་པར་བསམས་ཀྱང༌། རང་གི་སྨྲ་ལྕེ་ལ་བདག་མི་བྱེད་པར། རང་མགོ་རང་གིས་གཡོག་པར་བྱེད༌ན། མི་དེའི་ཆོས་ལ་སྙིང་པོ་མེད་དོ།།
JAM 1:27 བདག་ཅག་གི་ཡབ་དཀོན་མཆོག་གི་སྤྱན༌སྔར། ཡང་དག་ཅིང་དྲི་མས་མ་གོས་པའི་ཆོས་ནི་དཀའ་སྡུག་གིས་ཁེངས་པའི་དྭ་ཕྲུག་དང་ཡུགས་མོ་ལ་བདག་སྐྱོང་བྱེད་པ་དང༌། འཇིག་རྟེན་གྱི་དྲི་མ་རང་ཉིད་ལ་མི་འགོས་པར་སྲུང་བ་དེའོ།།
JAM 2:1 བདག་གི་སྤུན་ཟླ༌རྣམས། ཁྱོད་རྣམས་ཀྱིས་བདག་ཅག་གི་གཟི་བརྗིད་ཆེ་བའི་གཙོ་བོ་ཡེ་ཤུ་མཱ་ཤི་ཀ་ལ་དད་པ་བྱེད་པས་མི་གཞན་ལ་ཕྱོགས་རིས་འཛིན་མི་རུང་ངོ༌།།
JAM 2:2 གལ༌ཏེ། གསེར་གྱི་མཛུབ་དཀྲིས་དང་གོས་ཆེན་གྱོན་པའི་མི་ཞིག་ཁྱོད་ཅག་གི་ཚོགས་རའི་ནང་དུ་ཡོང༌བ་དང༌། གོས་ཧྲུལ་གྱོན་པའི་དབུལ་པོ་ཞིག་ཀྱང་ཡོང་བ་ཡིན༌ན།
JAM 2:3 ཁྱོད་ཅག་གིས་གོས་ཆེན་གྱོན་མཁན་ལ་བརྩི་མཐོང་བྱས༌ཏེ། ཁྱེད་རང་གྲལ་མགོ་ནས་བཞུགས་རོགས་མཛོད་ཅེས་སྨྲ་བ༌དང༌། དབུལ་པོ་དེ་ལ་ཁྱོད་རང་གནས་དེར་ལངས་ནས་སྡོད་ཅིག་ཅེས་སྨྲ་བའམ། ཡང་ན་བདག་གི་ཞབས་སྟེགས་ཀྱི་གམ་དུ་སྡོད་ཅིག་ཅེས་སྨྲ་བར་འགྱུར།
JAM 2:4 དེ་ནི་ཁྱོད་ཅག་གིས་མི་ལ་ཕྱོགས་རིས་བཟུང་ཞིང༌། ངན་སེམས་བཅངས་ནས་མི་ལ་ཁ་ཚོན་གཅོད་མཁན་དུ་གྱུར་པ་མ་ཡིན༌ནམ།
JAM 2:5 བདག་གི་སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་ཉོན༌དང༌། དཀོན་མཆོག་གིས་འཇིག་རྟེན་གྱི་དབུལ་པོ་རྣམས་བདམས་ཏེ་དད་པའི་ཕྱོགས་ནས་ཕྱུག་པོར་མཛད་པར་མ༌ཟད། ཁོང་ཉིད་གཅེས་པར་འཛིན་མཁན་རྣམས་ཁོང་གིས་ཞལ་བཞེས་གནང་བའི་རྒྱལ་སྲིད་འཛིན་མཁན་དུ་བདམས་པ་མ་ཡིན༌ནམ།
JAM 2:6 འོན༌ཀྱང༌། ཁྱོད་ཅག་གིས་དབུལ་པོ་རྣམས་ལ་མཐོང་ཆུང་བྱས་ཤིང་། ཕྱུག་པོ་རྣམས་ཀྱིས་ཁྱོད་ཅག་ལ་གཉའ་གནོན་བྱས་ནས་ཁྲིམས་རར་འདྲུད་པ་མ་ཡིན༌ནམ།
JAM 2:7 ཕྱུག་པོ་རྣམས་ཀྱིས་ཁྱོད་ཅག་ལ་ཐོགས་པའི་དམ་པའི་མཚན་ལ་སྐུར་བ་བཏབ་པ་མ་ཡིན༌ནམ།
JAM 2:8 གསུང་རབ་ཀྱི་མདོ་ལས་ཇི་སྐད༌དུ། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་གསུངས་ཤིང་། གལ༌ཏེ། ཁྱོད་ཅག་གིས་དངོས་གནས་བླ་ན་མེད་པའི་བཀའ་ཁྲིམས་དེ་བཞིན་དུ་བྱེད༌ན། ཁྱོད་རྣམས་ཀྱིས་ལེགས་པོར་བྱས་པ་ཡིན་ནོ།།
JAM 2:9 འོན༌ཀྱང༌། ཁྱོད་ཅག་གིས་མི་ལ་ཕྱོགས་རིས་བཟུང་ན་དེ་ནི་སྡིག་པ་བྱས་པ་ཡིན༌ཏེ། བཀའ་ཁྲིམས་ལྟར་ཁྱོད་ཅག་ནི་བཀའ་ཁྲིམས་དང་འགལ་མཁན་དུ་བརྩིས༌སོ།།
JAM 2:10 ཅིའི་ཕྱིར་ཞེ་ན། སུ་ཞིག་གིས་བཀའ་ཁྲིམས་ཐམས་ཅད་བསྲུངས༌ནའང༌། དེ་ལས་གཅིག་དང་འགལ༌ན། དེ་ནི་བཀའ་ཁྲིམས་ཐམས་ཅད་ལ་འགལ་བའི་ཕྱིར༌རོ།།
JAM 2:11 མ་གཞི་ལོག་གཡེམ་མ་བྱེད་ཅེས་གསུང་མཁན་གྱིས་མི་མ་གསོད་ཅེས་ཀྱང་གསུངས་པ་ཡིན། ཁྱོད་ཀྱིས་ལོག་གཡེམ་མི་བྱེད་ནའང་མི་གསོད་པ་ཡིན༌ན། ཁྱོད་ནི་བཀའ་ཁྲིམས་དང་འགལ་བ་ཡིན༌ནོ།།
JAM 2:12 མི་ལ་རང་དབང་འཐོབ་པར་བྱེད་པའི་བཀའ་ཁྲིམས་ཀྱིས་ཁྱོད་ཅག་ལ་ལེགས་ཉེས་ཀྱི་ཁྲིམས་ཐག་གཅོད༌ངེས་པས། ཁྱོད་རྣམས་ཀྱིས་ཀྱང་རང་གི་སྨྲ་བརྗོད་དང་སྤྱོད་ལམ་ནི་བཀའ་ཁྲིམས་དེ་བཞིན་དུ་བྱ་འོས་སོ།།
JAM 2:13 རྒྱུ་མཚན་ནི་མི་གཞན་ལ་སྙིང་རྗེ་མི་བྱེད་མཁན་ལ་སྙིང་རྗེ་མེད་པའི་ཁྲིམས་ཆད་ཕོག་པར་འགྱུར་བའི་ཕྱིར༌ཡིན། ཐུགས་རྗེ་ནི་ཉེས་ཆད་ལས་རྣམ་པར་རྒྱལ་བ་ཡིན༌ནོ།།
JAM 2:14 བདག་གི་སྤུན་ཟླ༌རྣམས། མི་ཞིག་གིས་རང་ཉིད་ལ་དད་པ་ཡོད་ཅེས་སྨྲས༌ཀྱང༌། དེ་དང་མཐུན་པའི་སྤྱོད་བཟང་མེད༌ན། དེ་ལ་ཕན་ཐོགས་ཅི་ཡོད༌དམ། དད་པ་དེ་ལྟ་བུས་ཁོ་རང་སྐྱོབ་ནུས༌སམ།
JAM 2:15 གལ༌ཏེ། སྤུན་ཟླའམ་ལྕམ་སྲིང་ཞིག་ལ་གྱོན་གོས་མེད་ལ་ཉིན་རེ་བཞིན་ཁ་ཟས་ཀྱང་མེད༌ན།
JAM 2:16 ཁྱོད་རྣམས་ལས་གཅིག་གིས་དེ་ལ་འདི༌ལྟར། བདེ་བའི་ངང་ཕྱིར་སོང་དང༌། ཁྱོད་རང་གི་ལུས་རྒྱབ་དྲོ་ཞིང་ལྟོ་བ་འགྲང་བར་སྨོན་ཞེས་སྨྲས༌ནའང༌། མི་དེའི་ལུས་ལ་གང་ཞིག་མཁོ་བ་མ་སྦྱིན༌ཚེ། དེ་ལ་ཕན་ཐོགས་ཅི་ཡོད༌དམ།
JAM 2:17 དེ་བཞིན་དུ་སྤྱོད་བཟང་མེད་པའི་དད་པ་ནི་འཆི་བ་ཡིན་ནོ།།
JAM 2:18 མི་གཞན་ཞིག་ན༌རེ། ཁྱོད་ལ་དད་པ་ཡོད་ལ། བདག་ལ་སྤྱོད་བཟང་ཡོད། ཁྱོད་ཀྱིས་བདག་ལ་སྤྱོད་བཟང་མེད་པའི་དད་པ་སྟོན༌དང༌། བདག་གིས་རང་གི་སྤྱོད་བཟང་བརྒྱུད་ནས་རང་གི་དད་པ་ཁྱོད་ལ་སྟོན་པར༌བྱའོ་ཞེས་སྨྲ་ངེས་སོ།།
JAM 2:19 ཁྱོད་ཀྱིས་དཀོན་མཆོག་གཅིག་རང་ཡིན་པ་ལ་དད་པ་བྱེད་པས། ཁྱོད་ཀྱི་དད་པ་དེ་ནི་ལེགས༌པོ་མ་ཡིན་ནམ། གདོན་འདྲེ་དག་གིས་ཀྱང་དཀོན་མཆོག་ལ་ཡིད་ཆེས༌བྱེད་ཀྱང༌། ཁོང་ལ་འཇིགས་ཤིང་སྐྲག་སྟེ་འདར་བ་ཡིན་ནོ།།
JAM 2:20 བླུན་པོ་ཁྱོད་ཀྱིས་སྤྱོད་བཟང་མེད་པའི་དད་པ་ནི་འཆི་བ་ཡིན་པ་ཤེས་འདོད༌དམ།
JAM 2:21 བདག་ཅག་གི་མེས་པོ་ཨབ་ར་ཧམ་གྱིས་རང་གི་བུ་ཨི་སཱག་མཆོད་ཁྲིའི་སྟེང་དུ་མཆོད་པར་ཕུལ་ཞིང༌། སྤྱོད་བཟང་དེ་ལ་བརྟེན་ནས་ཁོང་ནི་མི་རྣམ་དག་ཏུ་བརྩིས་པ་མ་ཡིན༌ནམ།
JAM 2:22 དད་པ་དང་སྤྱོད་བཟང་གཉིས་མཉམ་དུ་གནས་པར་མ༌ཟད། ཁོང་གི་དད་པ་ནི་སྤྱོད་བཟང་ལ་བརྟེན་ནས་ཆ་ཡོངས་སུ་རྫོགས་ཡོད་པ་རྟོགས་ནུས་སོ།།
JAM 2:23 གསུང་རབ་ཀྱི་མདོ་ལས་ཇི་སྐད༌དུ། ཨབ་ར་ཧམ་གྱིས་དཀོན་མཆོག་ལ་དད་པ་བྱས་པ་དང་དཀོན་མཆོག་གིས་ཀྱང་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་གསུངས་པ་བཞིན་དུ་གྲུབ་པ༌དང༌། ཨབ་ར་ཧམ་ནི་དཀོན་མཆོག་གི་མཛའ་གྲོགས་སུ་འབོད་པར་གྱུར་ཏོ།།
JAM 2:24 དེའི༌ཕྱིར། མི་ཞིག་རྣམ་དག་ཏུ་བརྩི་བ་ནི་དད་པ་འབའ་ཞིག་ལ་བརྟེན་པ་མ་ཡིན་པར་སྤྱོད་བཟང་ལའང་རག་ལས་པ་རྟོགས་ནུས་སོ།།
JAM 2:25 དེ་བཞིན༌དུ། སྨད་འཚོང་མ་རཱ་ཧབ་ཀྱིས་བང་ཆེན་རྣམས་ལ་སྣེ་ལེན་བྱས༌ཤིང༌། ཡང་བང་ཆེན་རྣམས་ལམ་གཞན་བརྒྱུད་ནས་ཕྱིར་བཏང་བས། སྤྱོད་བཟང་ལ་བརྟེན་ནས་ཁོ་མོ་ནི་མི་རྣམ་དག་ཏུ་བརྩིས་པ་མ་ཡིན༌ནམ།
JAM 2:26 དེའི༌ཕྱིར། ལུས་པོ་ནི་རྣམ་ཤེས་དང་ཁ་བྲལ་ན་བེམ་པོ་ཡིན་པ༌བཞིན། དད་པའང་སྤྱོད་བཟང་དང་ཁ་བྲལ་ན་འཆི་བ་ཡིན༌ནོ།།
JAM 3:1 བདག་གི་སྤུན་ཟླ༌རྣམས། ངེད་ཅག་ལ་མི་གཞན་ལས་ལེགས་ཉེས་ཀྱི་ཁྲིམས་ཐག་ལྷག་པར་ནན་མོ་གཅོད་ངེས༌པས། ཁྱོད་རྣམས་ལས་མི་མང་པོ་ཞིག་སློབ་དཔོན་བྱེད་པར་མི༌བྱའོ།།
JAM 3:2 མ་གཞི་བདག་ཅག་ལ་ལས་སྣ་ཚོགས་ཀྱི་ཆ་ནས་ནོར་འཁྲུལ་ཡོད་པ་ཡིན། གལ༌ཏེ། སུ་ཞིག་ལ་སྨྲ་བརྗོད་ཀྱི་ཆ་ནས་ནོར་འཁྲུལ་མེད༌ན། མི་དེ་ནི་ཕུལ་དུ་བྱུང་ཞིང་རང་ལུས་ཧྲིལ་པོའང་གཅུན་ནུས་སོ།།
JAM 3:3 བདག་ཅག་གིས་རྟ་རྒོད་འདུལ་བའི་ཆེད་དུ་རྟའི་ཁ་ནང་དུ་ལྕགས་བཞག་པ་ན་དེའི་ལུས་ཧྲིལ་པོར་ཁ་ལོ་བསྒྱུར་ནུས༌པ་ཡིན།
JAM 3:4 ལྟོས༌དང༌། གྲུ་གཟིངས་ནི་ཤིན་ཏུ་ཆེ་ཞིང་རླུང་ཆེན་དྲག་པོས་དེད༌ཀྱང༌། དེད་དཔོན་གྱིས་གྲུ་སྐྱ་ཆུང་ངུར་བརྟེན་ནས་གང་དུ་སྐྱོད་འདོད་པ་བཞིན་གྲུ་གཟིངས་ལ་ཁ་ལོ་བསྒྱུར་ནུས་སོ།།
JAM 3:5 དེ་བཞིན༌དུ། ལྕེ་ནི་ལུས་ཀྱི་ཆ་ཤས་ཆུང་ངུ་ཞིག་ཡིན༌ཡང༌། ལྕེ་ཡིས་ཁ་ཕོ་ཆེན་པོ་སྨྲ་བར་བྱེད། ལྟོས༌དང༌། མེ་ལྕེ་ཆུང་ངུ་ཞིག་གིས་ནགས་ཚལ་ཆེན་པོ་བསྲེག་ནུས་པ་ཡིན།
JAM 3:6 ལྕེ་ནི་མེ་ཡིན༌ཏེ། སྡིག་པས་ཁེངས་པའི་འཇིག་རྟེན་ཞིག་ཀྱང་ཡིན༌ལ། བདག་ཅག་གི་ལུས་ཀྱི་ཆ་ཤས་གཞན་དག་ཁྲོད་ནས་མིའི་ལུས་ཧྲིལ་པོ་མི་གཙང་བར་བྱེད༌ཅིང༌། བདེ་སྐྱིད་ཀྱི་འཚོ་བ་ཡོངས་སུ་བསྲེགས་པར་མ༌ཟད། དམྱལ་བའི་གནས་ལས་ཀྱང་བསྲེག་པར་འགྱུར༌རོ།།
JAM 3:7 རི་དྭགས༌དང༌། འདབ༌ཆགས། ལྟོ་འགྲོའི༌རིགས། རྒྱ་མཚོའི་སྲོག་ལྡན་ཐམས་ཅད་མི་ཡིས་འདུལ་ནུས་ཤིང་བཏུལ་བའང་ཡིན༌མོད།
JAM 3:8 འོན་ཀྱང་སྨྲ་ལྕེ་འདུལ་ཐུབ་མཁན་གཅིག་ཀྱང་མེད༌ལ། དེ་ནི་རྒྱུན་ཆད་མེད་པར་འབྱུང་བའི་ནག་ཉེས༌དང༌། འཆི་ལམ་དུ་གཏོད་བྱེད་དུག་གི་རླངས་པས་ཁྱབ་པ་ཞིག༌ཡིན།
JAM 3:9 བདག་ཅག་གིས་ལྕེ་ལ་བརྟེན་ནས་གཙོ་བོ་དང་ཡབ་ལ་བསྟོད་བསྔགས་བརྗོད༌ཅིང༌། ཡང་ལྕེ་ལ་བརྟེན་ནས་དཀོན་མཆོག་གི་སྣང་བརྙན་བཞིན་དུ་བཟོས་པའི་མི་རྣམས་ལ་སྡིགས་དམོད་བྱེད།
JAM 3:10 ཁ་གཅིག་ལས་བསྔགས་བརྗོད་དང་སྡིགས་དམོད་གཉིས་ཀ་འོང་བ་ཡིན། བདག་གི་སྤུན་ཟླ༌རྣམས། དོན་འདི་ནི་མི་འོས་སོ།།
JAM 3:11 ཆུ་མིག་གཅིག་ལས་ཆུ་མངར་མོ་དང་ཁ་ཏིག་གཉིས་ཀ་འབྱུང་སྲིད༌དམ།
JAM 3:12 བདག་གི་སྤུན་ཟླ༌རྣམས། བསེ་ཡབ་ཤིང་ལས་སྐྱུ་རུ་རའི་ཤིང་ཏོག་འབྱུང་སྲིད༌དམ། རྒུན་འབྲུམ་ཤིང་ལས་བསེ་ཡབ་ཀྱི་ཤིང་ཏོག་འབྱུང་སྲིད༌དམ། ཚྭ་ཆུ་ལས་ཆུ་མངར་མོ་འབྱུང་སྲིད་དམ་ཞེ་ན་མི་སྲིད་དོ།།
JAM 3:13 ཁྱོད་ཅག་གི་ཁྲོད་དུ་སུ་ཞིག་མི་ཤེས་རབ་ཅན་དང་ཐོས་རྒྱ་ཅན་ཡིན༌ན། མི་དེས་སྤྱོད་ལམ་བཟང་པོའི་སྒོ་ནས་རང་གི་ལས་དེ་རྣམས་ཤེས་རབ་དང་ཞི་ཞིང་དུལ་བའི་ངང་སྟོན་པར་བྱ་དགོས་སོ།།
JAM 3:14 ཁྱོད་རྣམས་ཀྱི་སེམས་སུ་ཕྲག་དོག་ཁ་ཏིག་ཅན་དང་སྒེར་སེམས་ཡོད༌ན། རང་བསྟོད་མི་བྱེད༌ཅིང་། བདེན་པ་ཉིད་ལ་རྫུན་ཡང་སྨྲ་བར་མི༌བྱའོ།།
JAM 3:15 ཤེས་རབ་དེ་ལྟ་བུ་ནི་སྟེང་ནས་བྱུང་བ་མ་ཡིན༌པར། དེ་ནི་འཇིག་རྟེན༌དང༌། ཤ་ཁྲག གདོན་འདྲེ་བཅས་ཀྱི་རིགས་སུ་གཏོགས།
JAM 3:16 གནས་གང་དུ་ཕྲག་དོག་དང་སྒེར་སེམས་ཡོད༌ན། གནས་དེ་རུ་ཟིང་འཁྲུག་དང་ལས་ངན་པ་སྣ་ཚོགས་ཡོད་པ་ཡིན༌ནོ།།
JAM 3:17 འོན༌ཀྱང༌། སྟེང་ནས་བྱུང་བའི་ཤེས་རབ་ནི་ཐོག་མར་ཡང་དག་པ་དང་ཕྱི་མར་ཞི་ཞིང་དུལ་བ། དེ་ནས་གཤིས་རྒྱུད་འཇམ༌པ། གནས་ལུགས་བརྩི་བ། སྙིང་རྗེ་དང་འབྲས་བུ་བཟང་པོས་ཁེངས་ཡོད་པ། ཕྱོགས་རིས་མེད༌པ། ཚུལ་འཆོས་མེད་པ་བཅས་ཡིན་ནོ།།
JAM 3:18 གཞན་ཡང༌། དྲང་བདེན་གྱི་འབྲས་བུ་ནི་འདུམ་སྒྲིག་པ་རྣམས་ཀྱིས་ཞི་བདེའི་ངང་ནས་འདེབས༌པའོ།།
JAM 4:1 ཁྱོད་ཅག་ཁྲོད་ཀྱི་འཁོན་འཛིང་དང་འཁྲུག་རྩོད་ནི་གང་ནས་བྱུང༌ངམ། དེ་ནི་ཁྱོད་རྣམས་ཀྱི་རྒྱུད་དུ་ཡོད་པའི་འཁྲུག་རྩོད་ཀྱི་འདོད་ཆགས་ལས་བྱུང་བ་མ་ཡིན༌ནམ།
JAM 4:2 ཁྱོད་ཅག་འདོད་རྔམ་ཆེ་ཡང་ཅི་ཡང་མ་ཐོབ༌པས། ཁྱོད་རྣམས་ཀྱིས་མི་གསོད་པ་ཡིན། ཁྱོད་རྣམས་ཀྱིས་བརྣབ་སེམས་བྱེད་ཀྱང་ཅི་ཡང་མ་ཐོབ་པས། འཁྲུག་རྩོད་དང་འཁོན་འཛིང་བྱེད་པ་ཡིན། ཁྱོད་ཅག་གིས་དཀོན་མཆོག་ལ་ཞུ་བ་མི་བྱེད་པས་ཁྱོད་རྣམས་ལ་ཅི་ཡང་མ་ཐོབ།
JAM 4:3 ཁྱོད་ཅག་གིས་རང་རང་གི་འདོད་པ་ལྟར་ཆུད་ཟོས་སུ་གཏོང་བའི་ཕྱིར། ཀུན་སློང་ངན་པས་དཀོན་མཆོག་ལ་ཞུ་བ་ཞུས་ཀྱང་ཅི་ཡང་མ་ཐོབ༌བོ།།
JAM 4:4 ཀྱེ། ལོག་གཡེམ་པ༌རྣམས། འཇིག་རྟེན་གྲོགས་སུ་གྱུར་པ་ནི་དཀོན་མཆོག་གི་དགྲ་རུ་ལངས་པ་མི་ཤེས༌སམ། དེའི་ཕྱིར། སུ་ཞིག་འཇིག་རྟེན་གྱི་གྲོགས་སུ་འགྱུར་འདོད་ན་དེ་ནི་དཀོན་མཆོག་གི་དགྲ་རུ་ལངས་པ་ཡིན་ནོ།།
JAM 4:5 གསུང་རབ་ཀྱི་མདོ་ལས་ཇི་སྐད་དུ། དཀོན་མཆོག་ནི་བདག་ཅག་གི་རྒྱུད་དུ་བཞུགས་པར་མཛད༌པའི་ཐུགས་ཉིད་ལ་ཤིན་ཏུ་དུངས་ཞིང་ཕྲག་དོག་སྐྱེས་པའི་ཚད་དུ་སླེབས་པ་ཡིན་ཞེས་གསུངས་པ་དེ་ནི་ཁྱོད་རྣམས་ཀྱིས་དོན་མེད་པར་འདོད༌དམ།
JAM 4:6 འོན༌ཀྱང༌། དཀོན་མཆོག་གིས་བདག་ཅག་ལ་དེ་ལས་ལྷག་པའི་ཐུགས་རྗེ་ཆེན་པོ་གནང༌བས། ཇི་སྐད༌དུ། དཀོན་མཆོག་ཉིད་ཀྱིས་ང་རྒྱལ་ཅན་ལ༌རྒོལ།། ཁེངས་སྐྱུང་མི་ལ་ཁོང་གིས་ཐུགས་རྗེ༌གནང༌། །ཞེས་གསུངས༌པའོ།།
JAM 4:7 དེའི༌ཕྱིར། ཁྱོད་ཅག་གིས་དཀོན་མཆོག་ལ་བསྟུན་དགོས་སོ།། བདུད་ལ་རྒོལ་བར་གྱིས༌དང༌། བདུད་ནི་ཁྱོད་ཅག་དང་བྲལ་ནས་འབྲོ་བར༌ངེས།
JAM 4:8 ཁྱོད་རྣམས་དཀོན་མཆོག་དང་ཉེ་བར་གཅོར་ཅིག ཁོང་ཡང་ཁྱོད་རྣམས་དང་ཉེ་བར་གཅར་ངེས་ཡིན། སྡིག་ཅན་ཁྱོད་ཅག་གིས་རང་གི་ལག་པ་གཙང་མར་ཁྲུས༌དང༌། བློ་གཉིས་འགལ་ཅན་ཁྱོད་རྣམས་ཀྱིས་རང་གི་སེམས་གཙང་མར་ཁྲུས༌ཤིག
JAM 4:9 ཁྱོད་རྣམས་ཀྱིས་ཡིད་སྐྱོ་བ་དང་མྱ་ངན་བྱས་ནས་ངུ་བར༌གྱིས་ཤིག རང་གི་དགོད་སྒྲ་ནི་སྡུག་བསྔལ༌དང༌དགའ་སྤྲོ་ནི་སྐྱོ་གདུང་དུ་སྒྱུར༌ཅིག
JAM 4:10 ཁྱོད་ཅག་གིས་གཙོ་བོའི་སྤྱན་སྔར་དམན་སེམས་བཅང་དགོས་པ་དང་། ཁོང་གིས་ཀྱང་ཁྱོད་རྣམས་མཐོན་པོར་བསྒྲེང་ངེས་སོ།།
JAM 4:11 སྤུན་ཟླ༌རྣམས། ཁྱོད་ཅག་གིས་ཕན་ཚུན་ལ་ཚིག་ངན་སྨྲ་བར་མི༌བྱའོ།། སུ་ཞིག་གིས་སྤུན་ཟླ་ལ་ཚིག་ངན་སྨྲ་ཞིང་ཁ་ཚོན་གཅོད་ན། དེ་ནི་བཀའ་ཁྲིམས་ལ་ཚིག་ངན་སྨྲས་ཤིང་ཁ་ཚོན་བཅད་པ་ཡིན། སུ་ཞིག་གིས་བཀའ་ཁྲིམས་ལ་ཁ་ཚོན་བཅད༌ན། དེ་ནི་བཀའ་ཁྲིམས་སྲུང་མཁན་མ་ཡིན་པར། བཀའ་ཁྲིམས་ཀྱི་ཁྲིམས་དཔོན་ཡིན་ཏེ།
JAM 4:12 མ་གཞི་བཀའ་ཁྲིམས་གནང་མཁན་དང་ཁྲིམས་དཔོན་ཆེན་པོ་གཅིག་ཁོ་ན་སྟེ། ཁོང་ནི་འཇིག་རྟེན་གྱི་མི་རྣམས་སྐྱོབ་ནུས་ཤིང་འཇོམས་ཡང་ནུས་པ་དེ་ཉིད་ལགས་སོ།། འོན༌ཀྱང༌ཁྱོད་ཀྱིས་རང་གི་ཁྱིམ་མཚེས་ལ་ཁ་ཚོན་གཅོད་པས་ཁྱོད་ནི་སུ་ཞིག་ཡིན་འདོད༌དམ།
JAM 4:13 ཉོན༌དང༌། ཁྱོད་ཅག་ལས་མི་འགའ་ཞིག་ན༌རེ། དེ་རིང་ངམ་སང་ཉིན་ངེད་ཅག་གྲོང་ཁྱེར་ག་གེ་མོ་ཞིག་ལ་སོང་ནས་ལོ་གཅིག་རིང་བསྡད༌དེ། ཚོང་ལས་བྱས་ནས་ཁེ་སྤོགས་ལེན་པར་བྱའོ་ཞེས༌སྨྲ་བ་ཡིན།
JAM 4:14 དོན་དམ་དུ་སང་ཉིན་དོན་ཅི་ཞིག་འབྱུང་བ་ནི་ཁྱོད་ཅག་གིས་མི་ཤེས། ཁྱོད་ཅག་གི་ཚེ་སྲོག་ནི་ཅི་ཞིག་ཡིན༌ནམ། མ་གཞི་ཁྱོད་ཅག་ནི་སྨུག་པ་ལྟ་བུ་ཡིན་པས་ཡུད་ཙམ་གྱིས་ཡལ་བར་འགྱུར།
JAM 4:15 དེ་ལས་ལྡོག་སྟེ། ཁྱོད་ཅག་གིས་གཙོ་བོ་ཐུགས་མཉེས་ན། བདག་ཅག་གསོན་པོར་གནས༌ཤིང༌། བདག་ཅག་གིས་དོན་འདི་དང་འདི་ཟེར་བ་ཞིག་བསྒྲུབ་ནུས་པ་ཡིན་ཞེས་སྨྲས་ན་ལེགས་སོ།།
JAM 4:16 འོན༌ཀྱང༌། ད་ལྟ་ཁྱོད་རྣམས་ཀྱིས་ང་རྒྱལ་བཅངས་ནས་ཁ་ཕོ་བྱེད་པས། དེ་ལྟར་ཁ་ཕོ་བྱེད་པ་ཐམས་ཅད་ནི་ངན་པ་ཡིན།
JAM 4:17 དེ་བས་སུ་ཞིག་གིས་ལས་བཟང་པོ་བསྒྲུབ་དགོས་པ་ཤེས་བཞིན་དུ་དེ་ལྟར་མི་བྱེད༌ན། མི་དེས་སྡིག་པ་བྱས་པའོ།།
JAM 5:1 ཀྱེ། ཁྱོད་ཅག་ཕྱུག་པོ་རྣམས་ཀྱིས་ཉོན༌ཅིག ཁྱོད་ཅག་ལ་སྡུག་བསྔལ་འབྱུང་ངེས་པའི༌ཕྱིར། ཁྱོད་རྣམས་ངུས་ཤིང་ངུ་འབོད་བྱེད་པར༌གྱིས།
JAM 5:2 ཁྱོད་ཅག་གི་རྒྱུ་ནོར་ཟད་ཅིང་གྱོན་གོས་འབུ་ཡིས་ཟོས་སོ།།
JAM 5:3 ཁྱོད་ཅག་གི་གསེར་དངུལ་བཙའ་ཡིས་ཟོས༌ཤིང༌། བཙའ་ཡིས་ཁྱོད་ཅག་གི་ཉེས་སྐྱོན་ལ་དཔང་པོ་བྱེད་པ༌དང༌། མེ་ཡིས་བསྲེགས་པ་བཞིན་ཁྱོད་ཅག་གི་ལུས་པོ་ནི་བཟའ་བར་འགྱུར། ཁྱོད་ཅག་གིས་མཐའ་མའི་ཉིན་མོ་དག་ལ་ཡང་ནོར་རྫས་བསགས་པ་ཡིན་ནོ།།
JAM 5:4 ལྟོས༌དང༌། གླ་བ་རྣམས་ཀྱིས་ཁྱོད་ཅག་ལ་ཞིང་བྲེགས་ནའང་གླ་ཆ༌ཆད་པས། གླ་ཆ་ཡིས་འབོད་སྐད་སྒྲོག༌ཅིང༌། ཞིང་འབྲེག་མཁན་རྣམས་ཀྱི་ངུ་འབོད་ནི་སྔར་ནས་དཔུང་ཚོགས་ཀུན་གྱི་གཙོ་བོའི་སྙན་ལམ་དུ་སླེབས་པ་ཡིན།
JAM 5:5 ཁྱོད་རྣམས་ཀྱིས་འཇིག་རྟེན་དུ་འདོད་ཡོན་ལོངས་སུ་སྤྱད་དེ་བདེ་བའི་འཚོ་བ་རོལ་བའོ།། འོན༌ཀྱང༌། ཁྱོད་རྣམས་ཀྱིས་ཉེས་ཆད་གཅོད་པའི་ཉིན་མོའི་ཆེད༌དུ། རང་གིས་རང་ཉིད་ངན་ལང་དུ་གཏོང༌བ་ཡིན།
JAM 5:6 ཁྱོད་ཅག་གིས་མི་གཞུང་དྲང་ལ་ཉེས་པ་བཙུགས་ནས་བསད་ཀྱང་དེས་ཁྱོད་རྣམས་ལ་ངོ་རྒོལ་མ་བྱས་སོ།།
JAM 5:7 སྤུན་ཟླ༌རྣམས། དེ་ལྟར་ཡིན་པས། ཁྱོད་ཅག་གིས་གཙོ་བོ་ཕེབས་ཡོང་བའི་བར་དུ་བཟོད་བསྲན་བྱེད་པར་གྱིས། ཞིང་པས་ཇི་ལྟར་ས་ཞིང་ནས་རྨད་དུ་བྱུང་བའི་འབྲས་བུ་འཐོབ་པའི་ཆེད༌དུ། སྟོན་ཆར་དཔྱིད་ཆར་འབབ་པར་བཟོད་བསྲན་གྱིས་སྒུག་པར་ལྟོས༌དང༌།
JAM 5:8 གཙོ་བོ་ཕེབས་ཡོང་བའི་དུས་དེ་ཉེ་བར་སླེབས༌པས། ཁྱོད་རྣམས་ཀྱིས་ཀྱང་ངང་རྒྱུད་རིང་ཞིང་ཡིད་སེམས་བརྟན་པོས་སྒུག་པར་བྱའོ།།
JAM 5:9 སྤུན་ཟླ༌རྣམས། ཁྱོད་ཅག་ལ་ཉེས་ཆད་མི་འཕོག་པའི༌ཕྱིར། ཁྱོད་རྣམས་ཀྱིས་ཕན་ཚུན་ལ་འཁང་ར་མ་བྱེད༌ཅིག ལྟོས༌དང༌། ཁྲིམས་དཔོན་ཆེན་པོ་དེ་ཉིད་སྒོ་མདུན་དུ་བཞེངས་འདུག་པའོ།།
JAM 5:10 སྤུན་ཟླ༌རྣམས། སྔོན་ཆད་གཙོ་བོའི་མཚན་གྱི་སྒོ་ནས་བཀའ་གསུངས་པའི་ལུང་སྟོན་པ་རྣམས་ཀྱིས་སྡུག་བསྔལ་མྱོང་ཐུབ་པ་དང་བཟོད་བསྲན་བྱ་ནུས་པ་དེ་ཁྱོད་ཅག་གིས་མིག་དཔེ་རུ་འཛིན་པར་གྱིས།
JAM 5:11 བདག་ཅག་གིས་སྔོན་ཆད་བཟོད་བསྲན་བྱས་མྱོང་བ་དག་ནི་མི་བྱིན་རླབས་ཅན་དུ་བརྩིས༌པ་དང་། ཁྱོད་རྣམས་ཀྱིས་ཨེས་ཡོབ་ཀྱི་སྙིང་རུས་ནི་ཅི་ལྟ་བུ་ཞིག་ཡིན་པ་ཐོས་མྱོང༌ཞིང༌། གཙོ་བོས་ཁོ་རང་ལ་མཐའ་འབྲས་ཅི་གནང་བའང་ཤེས༌ཏེ། གཙོ་བོ་ནི་བྱམས་སྙིང་རྗེ་དང་ཐུགས་རྗེ་ཆེན་པོ་ཅན་ཡིན་པ་རྟོགས༌སོ།།
JAM 5:12 བདག་གི་སྤུན་ཟླ༌རྣམས། ཆེས་གལ་ཆེ་བ་ནི་མནའ་བསྐྱལ་མི་རུང་བ་དེ་ཡིན་ནོ།། ནམ་མཁའི་ཞིང་ཁམས་དཔང་དུ་བཙུགས་ནས་མནའ་བསྐྱལ་མི་རུང༌ལ། ས་གཞི་དཔང་དུ་བཙུགས་ནས་ཀྱང་མནའ་བསྐྱལ་མི་རུང་། ཅིས་ཀྱང་མནའ་བསྐྱལ་མི་རུང༌། ཁྱོད་ཅག་ཉེས་ཆད་འོག་ཏུ་མི་ལྷུང་བའི༌ཕྱིར། ཁྱོད་རྣམས་ཀྱིས་ཕན་ཚུན་ལ་གཏམ་སྨྲ་བའི་ཚེ། ཡིན་ན་ཡིན་དང༌། མིན་ན་མིན་ཞེས་སྨྲ་བར་བྱའོ།།
JAM 5:13 ཁྱོད་རྣམས་ལས་སུ་ཞིག་གིས་སྡུག་བསྔལ་མྱོང་བ་ཡིན༌ན་དཀོན་མཆོག་ལ་གསོལ་བ་འདེབས་འོས་སོ།། སུ་ཞིག་ལ་དགའ་སྤྲོ་ཡོད༌ན་དཀོན་མཆོག་ལ་བསྟོད་དབྱངས་འབུལ་དགོས་སོ།།
JAM 5:14 ཁྱོད་རྣམས་ལས་སུ་ཞིག་ལ་ན་ཚ་བྱུང༌ན། ཆོས་ཚོགས་ཀྱི་རྒན་པོ་རྣམས་བོས༌ཏེ། ཁོང་རྣམས་ཀྱིས་གཙོ་བོའི་མཚན་གྱི་སྒོ་ནས་ནད་པ་དེ་ལ་སྣུམ་གྱིས་བྱུགས་ནས་གསོལ་བ་འདེབས་དགོས་ལ།
JAM 5:15 རྒན་པོ་རྣམས་ཀྱིས་དད་པའི་སྒོ་ནས་གསོལ་བ་བཏབ་སྟེ་ནད་པ་གསོ་བར་བྱེད༌ཅིང༌། གཙོ་བོས་ནད་པ་དེ་ཡར་བསླང་བར་མ༌ཟད། ནད་པ་དེས་སྡིག་པ་བྱས་ཡོད་ན་སྡིག་པའང་བསལ་ངེས༌སོ།།
JAM 5:16 དེ་བས་ཁྱོད་ཅག་གིས་རང་རང་གི་སྡིག་ཉེས་ཕན་ཚུན་ལ་ཁས་ལེན་ཞིང༌། ཕན་ཚུན་གྱི་ཆེད་དུ་དཀོན་མཆོག་ལ་གསོལ་བ་བཏབ་ན་ཁྱོད་རྣམས་སོས་པར༌འགྱུར། མི་གཞུང་དྲང་གི་སྨོན་ལམ་ལ་ཕན་ནུས་ཆེན་པོ་ལྡན༌ནོ།།
JAM 5:17 ཨེ་ལི་ཡཱ་ནི་བདག་ཅག་དང་རང་གཤིས་གཅིག་མཚུངས་ཡིན༌ལ། ཁོང་གིས་ཆར་བ་མི་འབབ་པའི་ཕྱིར། བློ་སེམས་རྩེ་གཅིག་གིས་གསོལ་བ་བཏབ་པ༌ན། ལོ་གསུམ་དང་ཕྱེད་ཀའི་རིང་ས་ལ་ཆར་བ་མ་བབས་སོ།།
JAM 5:18 ཡང་ཁོང་གིས་གསོལ་བ་བཏབ་པ༌ན། གནམ་ནས་ཆར་བ་བབས་ཤིང་ས་ནས་ལོ་ཏོག་སྐྱེས༌སོ།།
JAM 5:19 བདག་གི་སྤུན་ཟླ༌རྣམས། ཁྱོད་རྣམས་ལས་མི་ཞིག་བདེན་པ་ཉིད་དང་ཁ་བྲལ་བ༌དང༌། གཞན་ཞིག་གིས་མི་དེ་ཕྱིར་ཁྲིད་ཡོང་བ་ཡིན༌ན།
JAM 5:20 ཕྱིར་ཁྲིད་མཁན་གྱི་མི་དེས་མི་སྡིག་ཅན་ཞིག་ལོག་ལམ་ནས་ཕྱིར་ཁྲིད་ཡོང་བ༌དང༌། མི་དེ་འཆི་བ་ལས་བསྐྱབས་པར་མ༌ཟད། མི་དེའི་སྡིག་པ་མང་པོའང་བསལ་བའི་རྒྱུ་རུ་འགྱུར་བར་ཤེས་འོས་སོ།། །།
1PE 1:1 དེ་ཡང་པེ་ཏྲོ་ང་རང་ནི་ཡེ་ཤུ་མཱ་ཤི་ཀའི་སྐུ་ཚབ་པ་ཞིག་ཡིན་ཞིང་། འཕྲིན་ཡིག་འདི་ནི་ཕོན་ཐུ་དང༌། ག་ལད༌ཡཱ། ཀ་པ་ཏོ་ཡཱ། ཨེ་ཞི༌ཡཱ། པི་ཐིན་ཡཱ་ཡུལ་བཅས་ལ་ཐར་ཐོར་དུ་བྱེས་སུ་སྡོད་པ་རྣམས་ལ་སྤྲིངས་པའོ།།
1PE 1:2 ཁྱོད་ཅག་ནི་ཡེ་ཤུ་མཱ་ཤི་ཀའི་བཀའ་བརྩི་བ་དང་ཁོང་གི་སྐུ་ཁྲག་གཏོར་ཡུལ་ཡིན་པའི༌ཕྱིར། ཡབ་དཀོན་མཆོག་གིས་སྔ་མོ་ནས་མཁྱེན་པ་བཞིན་དུ་བདམས་ཤིང་། དམ་པའི་ཐུགས་ཉིད་བརྒྱུད་ནས་དམ་པར་མཛད་པའི་མི་རྣམས་ཡིན། ཁྱོད་ཅག་ལ་ཐུགས་རྗེ་དང་ཞི་བདེ་མང་དུ་གནང་བར༌སྨོན།
1PE 1:3 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་བསྔགས་བརྗོད་པར༌བྱའོ།། ཁོང་གིས་རང་ཉིད་ཀྱི་ཐུགས་རྗེ་ཆེན་པོ་བཞིན། ཡེ་ཤུ་མཱ་ཤི་ཀ་སྐུ་གྲོངས་པ་ནས་སླར་གསོན་པར་མཛད་པ་བརྒྱུད་ནས། བདག་ཅག་ལ་རེ་བ་གསོན་པོ་ལྡན་པའི་ཆེད་དུ། བདག་ཅག་ཡང་བསྐྱར་སྐྱེས་པར་མཛད་དེ།
1PE 1:4 བདག་ཅག་ལ་འཇིག་པ་མེད་པ་དང་། ནག་ནོག་གི་དྲི་མས་མ་གོས༌པ། ཉམས་པར་མི་འགྱུར༌བ། ནམ་མཁའི་ཞིང་ཁམས་སུ་ཉར་ཚགས་བྱས་ཡོད་པ་བཅས་ཀྱི་བགོ་སྐལ་འཐོབ་པར་འགྱུར་བའི་ཕྱིར༌རོ།།
1PE 1:5 ཁྱོད་རྣམས་ལ་སྟ་གོན་མཛད་པ་དང་དུས་ཀྱི་མཐའ་མར་མངོན་པར་འགྱུར་བའི་ཐར་པ་དེ་འཐོབ་པའི་ཆེད་དུ། ད་ལྟ་ཁྱོད་ཅག་ནི་དད་པའི་སྒོ་ནས་དཀོན་མཆོག་གི་ནུས་མཐུས་སྲུང་བར་མཛད་དོ།།
1PE 1:6 དེའི༌ཕྱིར། ཁྱོད་ཅག་ལ་དགའ་སྤྲོ་ཆེན་པོ་ལྡན་ཡང་། ད་ལྟ་དཀའ་སྡུག་སྣ་ཚོགས་ཀྱི་ཁྲོད་དུ་གནས་སྐབས་སུ་ཡིད་གདུང་དགོས་པ་ཡིན།
1PE 1:7 ཁྱོད་རྣམས་ཀྱི་དད་པར་ཚོད་བརྟག་བྱེད་པ་དེ་ནི། མེས་བཙོ་སྦྱང་བྱས་ནའང་འཇིག་པར་འགྱུར་བའི་གསེར་ལས་ཀྱང་རིན་ཆེན་པོར་སྣང༌ཞིང༌། ཡེ་ཤུ་མཱ་ཤི་ཀ་མངོན་སུམ་དུ་ཕེབས་པའི་དུས་སུ། དད་པ་དེ་ལ་བསྔགས་བརྗོད་དང་། གཟི༌བརྗིད། བརྩི་མཐོང་བཅས་འཐོབ་པར་འགྱུར་བའི་ཕྱིར༌རོ།།
1PE 1:8 ཁྱོད་རྣམས་ཀྱིས་ཁོང་ཉིད་དངོས་སུ་མཐོང་མ་མྱོང་ཡང་གཅེས་སུ་འཛིན་པར་བྱེད། ད་ལྟ་ཁོང་ཉིད་མ་མཐོང་ཡང་ཁོང་ལ་དད་པ་བྱས་པའི་རྐྱེན་གྱིས། བརྗོད་ཀྱིས་མི་ལང་བ་དང་གཟི་བརྗིད་ལྡན་པའི་དགའ་སྤྲོ་ཆེན་པོ་ཡོད་པར་མ༌ཟད།
1PE 1:9 ཁྱོད་ཅག་གི་དད་པའི་འབྲས་བུ་སྟེ། རྣམ་ཤེས་ལ་ཐར་པ་འཐོབ་པར་འགྱུར་རོ།།
1PE 1:10 ཐར་པ་འདིའི་སྐོར་གླེང་བ་ཡིན་ན། སྔོན་ཆད་ཁྱོད་ཅག་ལ་ཐུགས་རྗེ་འཐོབ་པར་འགྱུར་ཞེས་གསུང་མཁན་ཏེ། ལུང་སྟོན་པ་རྣམས་ཀྱིས་སྔར་ནས་འཚོལ་རྟོག་དང་བརྟག་དཔྱད་ཞིབ་མོ་བྱས་མྱོང་ངོ་།།
1PE 1:11 དེ་ནི་ཁོ་རྣམས་ཀྱི་སེམས་ཁོང་དུ་ཡོད་པའི་སྐྱབས་མགོན་མཱ་ཤི་ཀའི་ཐུགས་ཉིད་ཀྱིས། སྐྱབས་མགོན་མཱ་ཤི་ཀས་སྡུག་བསྔལ་མྱང་བར་འགྱུར་བ་དང་ཕྱིས་སུ་གཟི་བརྗིད་འཐོབ་པར་འགྱུར་བར་སྔ་མོ་ནས་བདེན་དཔང་བྱས་ཏེ། དུས་ནམ་ཞིག་དང་དུས་ཅི་ལྟ་བུ་ཞིག་ཡིན་པ་ལ་བརྟག་དཔྱད་བྱས་པ་ཡིན།
1PE 1:12 ཡང་ཁོ་རྣམས་ལ་མངོན་པར་མཛད་པ༌བཞིན། ཁོ་རྣམས་ཀྱིས་རང་གི་དོན་དུ་མ་ཡིན་པར་ཁྱོད་རྣམས་ཀྱི་ཆེད་དུ་ཞབས་ཕྱི་བསྒྲུབས་ཤིང་། ནམ་མཁའི་ཞིང་ཁམས་ནས་མངགས་ཡོང་བའི་དམ་པའི་ཐུགས་ཉིད་ལ་བརྟེན༌ནས་ཁྱོད་རྣམས་ལ་འཕྲིན་བཟང་སྒྲོག་མཁན་རྣམས་ཀྱིས། ད་ལྟ་དོན་དེ་རྣམས་ཁྱོད་ཅག་ལ་བསྒྲགས་པ་དང༌། ཐ་ན་ཕོ་ཉ་རྣམས་ཀྱིས་ཀྱང་དོན་འདི་དག་ལ་ཞིབ་ཏུ་བརྟག་པར་དགོངས་སོ།།
1PE 1:13 དེའི༌ཕྱིར། ཁྱོད་ཅག་གིས་རང་གི་སེམས་གཅུན་ཞིང་རང་ཚོད་ཟིན་དགོས་པ༌དང༌། ཡེ་ཤུ་མཱ་ཤི་ཀ་མངོན་སུམ་དུ་ཕེབས་པའི་དུས༌སུ། ཁྱོད་རྣམས་ལ་གནང་ངེས་པའི་ཐུགས་རྗེ་ལ་བློ་སེམས་རྩེ་གཅིག་གིས་རེ་བ་གཟུང་དགོས་སོ།།
1PE 1:14 ཁྱོད་རྣམས་ནི་བཀའ་བརྩི་བའི་བུ་ཕྲུག་ཡིན་པ་བཞིན། སྔོན་ཆད་རྨོངས་པའི་དུས་ཀྱི་འདོད་ཆགས་བཞིན་དུ་མ་བྱེད༌ཅིག
1PE 1:15 དེ་ལས་ལྡོག་སྟེ་ཁྱོད་ཅག་ལ་ཞལ་འབོད་གནང་མཁན་ནི་དམ་པ་ཡིན་པ་བཞིན། ཁྱོད་རྣམས་ཀྱང་སྤྱོད་ལམ་ཀུན་ནས་དམ་པ་ཡིན་དགོས༌ཏེ།
1PE 1:16 གསུང་རབ་ཀྱི་མདོ་ལས་ཇི་སྐད༌དུ། བདག་ནི་དམ་པ་ཡིན་པའི༌ཕྱིར་ཁྱོད་རྣམས་ཀྱང་དམ་པ་ཡིན་དགོས༌སོ། །ཞེས་བཀོད་པའི་ཕྱིར༌རོ།།
1PE 1:17 དེ་ཡང་མི་ལ་ཕྱོགས་རིས་མི་འཛིན་པར་མི་རེ་རེའི་སྤྱོད་ལམ་བཞིན་དུ་ཁྲིམས་ཐག་གཅོད་མཁན་ལ་ཁྱོད་རྣམས་ཀྱིས་ཡབ་ལགས་ཞེས་འབོད་པས། ཁྱོད་རྣམས་བྱེས་སུ་སྡོད་དུས་གུས་ཤིང་འཇིགས་པའི་སེམས་བཅང་དགོས་སོ།།
1PE 1:18 ཁྱོད་རྣམས་རང་གི་ཕ་མེས་ཡང་མེས་ནས་བརྒྱུད་ཅིང་སྙིང་པོ་མེད་པའི་སྤྱོད་ལམ་དག་ལས་བླུས་ནས་ཐར་བར་མཛད་པ༌ནི། འཇིག་པར་འགྱུར་བའི་གསེར་དངུལ་ལ་སོགས་པའི་དངོས་པོར་བརྟེན་པ་མ་ཡིན༌པར།
1PE 1:19 སྐྱབས་མགོན་མཱ་ཤི་ཀའི་སྐུ་ཁྲག་རིན་ཆེན་ཏེ། ནག་ནོག་མ་འདྲེས་པ་དང་། དྲི་མས་མ་གོས་པའི་ལུ་གུའི་ཁྲག་དང་མཚུངས་པ་དེ་ལ་བརྟེན་པ་ནི་ཁྱོད་རྣམས་ཀྱིས་ཤེས༌སོ།།
1PE 1:20 དཀོན་མཆོག་གིས་འཇིག་རྟེན་ཁམས་མ་བཀོད་པའི་ཡར་སྔོན་ལ་སྐྱབས་མགོན་ཡེ་ཤུ་སྔ་མོ་ནས་མཁྱེན་པ་ཡིན༌ཡང༌། དུས་ཀྱི་མཐའ་མ་འདིར་ད་གཟོད་ཁྱོད་རྣམས་ཀྱི་དོན་དུ་མངོན༌པར་མཛད།
1PE 1:21 ཁྱོད་རྣམས་ཀྱིས་ཀྱང་ཁོང་ཉིད་བརྒྱུད་ནས་དཀོན་མཆོག་ལ་དད་པ་བྱས༌ཤིང༌། དཀོན་མཆོག་གིས་ཁོང་ཉིད་སྐུ་གྲོངས་པ་ནས་སླར་གསོན་པ་དང་གཟི་བརྗིད་དང་ལྡན་པར་མཛད་དོ།། དེ་ནི་ཁྱོད་རྣམས་ཀྱིས་དཀོན་མཆོག་ལ་དད་པ་དང་རེ་བ་བྱེད་པའི་ཕྱིར༌རོ།།
1PE 1:22 ཡང་ཁྱོད་ཅག་གིས་བདེན་པ་ཉིད་བརྩིས་ནས་རང་གི་སེམས་གཙང་མར་བྱས་པ་དང་སྤུན་ཟླ་རྣམས་ལ་ཟོལ་གྱིས་གཅེས་པ་མ་ཡིན་པས། སེམས་གཏིང་ནས་ཕན་ཚུན་ལ་གཅེས་དགོས་སོ།།
1PE 1:23 ཁྱོད་རྣམས་ཡང་བསྐྱར་སྐྱེས་པ་ནི་འཇིག་པར་འགྱུར་བའི་ས་བོན་ལས་བྱུང་བ་མ་ཡིན་པར། འཇིག་པ་མེད་པའི་ས་བོན༌ཏེ། དཀོན་མཆོག་གི་སྲོག་དང་ལྡན་ཞིང་གཏན་དུ་བཞུགས་པའི་བཀའ་ལ་བརྟེན་ནས་བྱུང་བའོ།།
1PE 1:24 ཅིའི་ཕྱིར་ཞེ་ན། ལུས་ཅན་ཐམས་ཅད་རྩྭ་དང༌འདྲ།། གཟི་བརྗིད་རྩྭ་ཡི་མེ་ཏོག༌འདྲ།། རྩྭ་ནི་བསྐམས་ནས་མེ་ཏོག༌ཡལ།།
1PE 1:25 གཙོ་བོའི་བཀའ་ནི་རྟག་ཏུ་གནས།། ཞེས་གསུངས་པའི་ཕྱིར༌ཡིན་ཞིང་། ཁྱོད་རྣམས་ལ་བསྒྲགས་པའི་འཕྲིན་བཟང་ཡང་བཀའ་འདི་ཡིན༌ནོ།།
1PE 2:1 དེ་ལྟར་ཡིན་པས། ཁྱོད་རྣམས་ཀྱིས་གདུག་རྩུབ་དང་། གཡོ༌སྒྱུ། ཚུལ་འཆོས། ཕྲག༌དོག སྐུར་འདེབས་ཀྱི་གཏམ་སྣ་ཚོགས་སྤངས༌ནས།
1PE 2:2 གསར་སྐྱེས་ཀྱི་ཕྲུ་གུས་བྱེད་པ་བཞིན། ཁྱོད་ཅག་གིས་བཀའ་ཡི་འོ་མ་ལྷད་མེད་དེ་ལ་ཡིད་སྨོན་བྱེད་དགོས༌ཏེ། ཁྱོད་རྣམས་དེ་ལ་བརྟེན་ནས་ཐར་པའི་ཕྱོགས་སུ་རིམ་བཞིན་དད་པ་ཇེ་བརྟན་དུ་འགྱུར་བའི་ཕྱིར༌ཡིན་ཞིང་།
1PE 2:3 ཁྱོད་རྣམས་ཀྱིས་གཙོ་བོའི་ཐུགས་རྗེ་ཉམས་སུ་མྱངས་པས་དེ་ལྟར་བྱེད་འོས་སོ།།
1PE 2:4 ཁོང་ནི་རྡོ་གསོན་པོ་ཞིག་ཡིན་ལ། དེ་ནི་མི་ཡིས་སྤངས་ནའང་དཀོན་མཆོག་གིས་བདམས་ཤིང་རིན་ཐང་ཆེན་པོར་བརྩིས་པ་ཡིན་ལ། ཁྱོད་རྣམས་ཁོང་གི་དྲུང་དུ་ཡོང་བའི་དུས་སུ།
1PE 2:5 ཁྱོད་ཅག་ཀྱང་རྡོ་གསོན་པོ་ཡིན་པ་བཞིན་དུ། དམ་པའི་ཐུགས་ཉིད་ཀྱི་བཞུགས་གནས་སུ་བཟོ་བ་སྟེ། ཁྱོད་ཅག་ནི་དམ་པའི་མཆོད་དཔོན་ཡིན་ཞིང་། ཡེ་ཤུ་མཱ་ཤི་ཀར་བརྟེན་ནས་དཀོན་མཆོག་དགྱེས་པའི་ཐུགས་ཉིད་ཀྱི་མཆོད་པ་འབུལ་བའི་ཕྱིར༌རོ།།
1PE 2:6 ཅིའི་ཕྱིར་ཞེ་ན། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ལྟོས་དང་། བདག་གིས་ཛ་ཡན་ཡུལ་དུ་རྡོ་ཞིག༌བཞག། བདམས་པའི་ཟུར་གྱི་རྨང་རྡོ་ནོར་བུ་ཡིན༎ ཁོང་ལ་བརྟེན་ཅིང་དད་པ་བྱེད་མཁན༌ཀུན།། ཁ་ནི་མི་སྐྱེངས་ངོ་ཡང་མི་གནོང༌ངོ༌།། ཞེས་གསུངས༌པའི་ཕྱིར་རོ།།
1PE 2:7 དེའི༌ཕྱིར། ཁྱོད་ཅག་དད་ལྡན་རྣམས་ལ་མཚོན་ན་ཁོང་ནི་ནོར་བུ་ཞིག་ཡིན༌ལ། དད་པ་མེད་པ་རྣམས་ལ་མཚོན་ན་ཇི་སྐད༌དུ་གསུངས་པ་སྟེ། བཟོ་བ་རྣམས་ཀྱིས་སྤངས་པའི༌རྡོ།། ཁང་པའི་ཟུར་གྱི་རྨང་རྡོར༌གྱུར།། ཞེས་པའོ།།
1PE 2:8 ཡང་ཇི་སྐད༌དུ། དེ་ནི་རྐང་པ་འདྲེད་པའི་རྡོ།། ས་རུ་སྒྱེལ་བའི་ཕ་བོང་ཡིན།། ཞེས་གསུངས། ཁོ་རྣམས་ཀྱིས་བཀའ་དེ་ལ་མི་ཉན་པས་ས་རུ་འགྱེལ། ཁོ་རྣམས་དེ་ལྟར་འགྱེལ་བ་ནི་དཀོན་མཆོག་གིས་སྔར་ནས་ཐག་གིས་བཅད་ཟིན༌ནོ།།
1PE 2:9 འོན་ཀྱང་། ཁྱོད་རྣམས་ནི་བདམས་ཟིན་པའི་རིགས་རྒྱུད་དང་། རྒྱལ་རྒྱུད་ཀྱི་མཆོད་དཔོན། མི་རིགས་དམ༌པ། དཀོན་མཆོག་ལ་གཏོགས་པའི་མི་བཅས་ཡིན་ཏེ། དེ་ནི་ཁྱོད་རྣམས་མུན་ནག་ལས་ཁོང་གི་ངོ་མཚར་ཆེ་བའི་འོད་ཟེར་ནང་དུ་ཞལ་འབོད་གནང་མཁན་ཁོང་གི་འཕྲིན་ལས་སྒྲོག་པའི་ཕྱིར་རོ།།
1PE 2:10 སྔོན་ཆད་ཁྱོད་རྣམས་ནི་འབངས་མི་མིན་མོད། འོན་ཀྱང་ད་ལྟ་ཁྱོད་ཅག་ནི་དཀོན་མཆོག་གི་འབངས་མི་ཡིན། སྔོན་ཆད་ཁྱོད་རྣམས་ལ་ཐུགས་རྗེ་མ་ཐོབ༌མོད། འོན་ཀྱང་ད་ལྟ་ཁྱོད་རྣམས་ལ་ཐུགས་རྗེ་ཐོབ་ཟིན༌ནོ།།
1PE 2:11 སྙིང་ཉེ་བའི་སྤུན་ཟླ༌རྣམས། ཁྱོད་རྣམས་ནི་མགྲོན་པོ་དང་ཕྱི་མི་ཡིན་པ༌བཞིན། བདག་གིས་ཁྱོད་རྣམས་ལ་ཤ་གཟུགས་ཀྱི་འདོད་ཆགས་སྤང་བར་བསྐུལ༌བར་བྱའོ།། འདོད་ཆགས་ཀྱིས་སེམས་ལ་རྒོལ་བ་ཡིན་ནོ།།
1PE 2:12 ཕྱི་ཕྱོགས་པ་རྣམས་ཀྱི་ཁྲོད་དུ་ཁྱོད་ཅག་གི་སྤྱོད་ལམ་དྲང་པོ་ཡིན་དགོས་སོ།། ཅིའི་ཕྱིར་ཞེ་ན། ཁྱོད་རྣམས་ནི་ལས་ངན་པ་བྱེད་མཁན་ཡིན་ཞེས་དམའ་འབེབས་བྱེད་མཁན་དག་གིས་ཁྱོད་ཅག་གི་ལས་བཟང་པོར་བལྟས་ནས། དཀོན་མཆོག་གི་གཟིགས་སྐྱོང་མཛད་པའི་དུས་སུ། ཁོང་ལ་བསྟོད་བསྔགས་བརྗོད་པའི་ཕྱིར༌རོ།།
1PE 2:13 གཙོ་བོའི་ཆེད་དུ་ཁྱོད་རྣམས་ཀྱིས་གོང་མ་རྒྱལ་པོའམ། ཡང་ན་རྒྱལ་པོས་ལས་ངན་པ་བྱེད་མཁན་ལ་ཁྲིམས་ཐག་གཅོད་པ་དང་ལས་བཟང་པོ་བྱེད་མཁན་ལ་གཟེངས་བསྟོད་བྱེད་པར་མངགས་པའི་སྤྱི་དཔོན་ནམ། མིའི་ལམ་ལུགས་ཐམས་ཅད་བརྩི་སྲུང་བྱེད་དགོས་སོ།།
1PE 2:15 ཅིའི་ཕྱིར་ཞེ་ན། དཀོན་མཆོག་གི་ཐུགས་དགོངས་ནི་ཁྱོད་རྣམས་ཀྱིས་ལས་བཟང་པོ་བྱས་ཏེ། ཤེས་པ་མེད་པའི་བླུན་པོ་རྣམས་ཀྱི་སྨྲ་སྒོ་གཅོད་པའི་ཕྱིར་ཡིན།
1PE 2:16 ཁྱོད་ཅག་ནི་མི་རང་དབང་ཅན་ཡིན་ནའང་། རང་དབང་ལ་བརྟེན་ནས་ལས་ངན་པ་འགེབས་མི་རུང༌སྟེ། རྟག་ཏུ་དཀོན་མཆོག་གི་ཞབས་ཕྱི་པ་ཡིན་དགོས་སོ།།
1PE 2:17 ཁྱོད་ཅག་གིས་མི་ཐམས་ཅད་ལ་བརྩི་བཀུར་དང་། དད་ལྡན་སྤུན་ཟླ་ལ་གཅེས་པ། དཀོན་མཆོག་ལ་གུས༌ཤིང་འཇིགས་པ། རྒྱལ་པོ་ལ་བརྩི་བཀུར་བཅས་བྱེད་པར༌གྱིས།
1PE 2:18 ཁྱོད་ཅག་གཡོག་པོ་རྣམས་ཀྱིས་དོན་ཐམས་ཅད་ཀྱི་ཆ་ནས་གུས་ཞུམ་ངང་བདག་པོའི་བཀའ་བརྩི་དགོས་པ་དང་། བདག་པོ་བཟང་པོ་ཞི་དུལ་ཅན་གྱི་བཀའ་བརྩི་དགོས་པར་མ་ཟད། བདག་པོ་སྤྱོད་རྩིང་ཅན་གྱི་བཀའ་ཡང་བརྩི་དགོས་སོ།།
1PE 2:19 མི་ཞིག་གིས་དཀོན་མཆོག་གི་སྤྱན་སྔར་བསམ་པའི་རྐྱེན་གྱིས། བསྙོན་བཙུགས་པའི་སྡུག་བསྔལ་ལ་བཟོད་བསྲན་བྱས་པ་ཡིན་ན། དེ་ནི་གཅེས་སུ་འཛིན་འོས་སོ།།
1PE 2:20 ཁྱོད་ཅག་གིས་ཉེས་པ་བྱས་པས་རྡུང་རྡེག་མྱངས་ཤིང་བཟོད་བསྲན་བྱས་པ་ཡིན་ན། དེ་ལ་བསྟོད་འོས་པ་ཅི་ཡོད༌དམ། འོན་ཀྱང་། ཁྱོད་རྣམས་ཀྱིས་ལས་བཟང་པོ་བྱས་པའི་རྐྱེན་གྱིས། སྡུག་བསྔལ་མྱངས་ཤིང་བཟོད་བསྲན་བྱས་པ་ཡིན༌ན། དེ་ནི་དཀོན་མཆོག་གི་སྤྱན་སྔར་གཅེས་སུ་འཛིན་འོས་སོ།།
1PE 2:21 ཁྱོད་རྣམས་ལ་ཞལ་འབོད་ཐོབ་པ་ནི་དེའི་ཕྱིར་ཡིན། རྒྱུ་མཚན་ནི་སྐྱབས་མགོན་མཱ་ཤི་ཀས་ཀྱང་ཁྱོད་ཅག་གི་དོན་དུ་སྡུག་བསྔལ་མྱངས་ཤིང་། ཁྱོད་རྣམས་ལ་མིག་དཔེ་མཛད་པ་ཡིན་ཏེ། ཁྱོད་རྣམས་ཁོང་གི་རྗེས་སུ་འབྲང་བའི་ཕྱིར་རོ།།
1PE 2:22 དེ་ལ་ཇི་སྐད༌དུ། ཁོང་གིས་ཉེས་པ་ཅི་ཡང་མ་བྱས༌ཤིང༌།། གཡོ་སྒྱུའི་ཚིག་ཀྱང༌ངག་ལས་བརྗོད་པ་མེད།། ཅེས༌གསུངས་པའོ།།
1PE 2:23 ཁོང་གིས་སྡིགས་དམོད་མྱོང་བའི་དུས་སུ་ཚིག་ལོག་མ་བརྒྱབ་ཅིང་། གནོད་འཚེ་མྱོང་བའི་དུས་སུ་འཇིགས་སྐུལ་གྱི་ཚིག་མ་གསུངས༌པར། དྲང་བདེན་གྱིས་མི་ལ་ཁྲིམས་ཐག་གཅོད་མཁན་དཀོན་མཆོག་ལ་རང་ཉིད་བཅོལ་བ་ཡིན།
1PE 2:24 ཁོང་ཉིད་སྡོང་པོའི་སྟེང་དུ་བཀལ་ཞིང་། ཁོང་གིས་སྐུ་དངོས་སུ་བདག་ཅག་གི་སྡིག་པ་འཁུར་ཏེ། བདག་ཅག་ནི་སྡིག་པའི་ཆ་ནས་འཆི་བ་དང་། དྲང་བདེན་གྱི་ཆ་ནས་སྲོག་འཚོ་བར་འགྱུར་བའི་ཕྱིར་ཡིན་ཞིང་། ཁོང་གི་རྨ་ཁས་ཁྱོད་རྣམས་སོས་པར་གྱུར་ཏོ།།
1PE 2:25 སྔོན་ཆད་ཁྱོད་རྣམས་ནི་མགོ་འཐོམ་པའི་ལུག་དང་མཚུངས༌མོད། འོན་ཀྱང་ད་ལྟ་ཁྱོད་ཅག་ནི་སེམས་ཀྱི་རྫི་བོ་དང་སྲུང་མཁན་གྱི་ཕྱོགས་སུ་འཁོར་བའོ།།
1PE 3:1 དེ་དང་དེ་བཞིན་དུ་ཁྱོད་ཅག་ཆུང་མ་རྣམས་ཀྱིས་རང་གི་ཁྱོ་གར་བསྟུན་དགོས་སོ།། དེ་ལྟར་ཡིན་ན། དཀོན་མཆོག་གི་བཀའ་མི་བརྩི་བའི་ཁྱོ་ག་ཡོད་ཅིང་། ཁོ་རྣམས་ཀྱིས་བཀའ་ལ་མི་ཉན༌ཡང༌། ཆུང་མས་ཅི་ཡང་མི་སྨྲ་བར་རང་གི་སྤྱོད་ལམ་གྱིས་ཁྱོ་ག་ཚུར་འགུག་ཀྱང་སྲིད།
1PE 3:2 དེ་ནི་ཁྱོད་རྣམས་ལ་སྤྱོད་ལམ་གཙང་མ་དང་གུས་པའི་སེམས་ཡོད་པ་མཐོང་བའི་ཕྱིར༌ཡིན།
1PE 3:3 ཁྱོད་རྣམས་ཀྱིས་མགོའི་སྐྲ་སླས་པ་དང་། གསེར་གྱི་རྒྱན་ཆ་འདོགས༌པ། གོས་ཡག་པོ་གྱོན་པ་བཅས་ཕྱི་ཚུལ་གྱི་གཟབ་མཆོར་མི་སྤྲ་བར།
1PE 3:4 ཁྱོད་ཅག་གི་སེམས་ནང་དུ་འགྱུར་བ་མེད་པའི་གཤིས་འཇམ་དང་། ཞི་དུལ་གྱི་སེམས་ཡོད་པ་ནི་རྒྱན་ཆར་བརྩི་དགོས༌ཤིང༌། དེ་ནི་དཀོན་མཆོག་གི་སྤྱན་སྔར་རིན་ཐང་ཆེན་པོ་ལྡན་ནོ།།
1PE 3:5 ཅིའི་ཕྱིར་ཞེ་ན། གནའ་དུས་སུ་དཀོན་མཆོག་ལ་རེ་བ་བཅོལ་བའི་བུད་མེད་དམ་པ་རྣམས་ཀྱིས་ཀྱང་དེ་ལྟར་རང་ལ་བརྒྱན༌ནས་རང་གི་ཁྱོ་གར་བསྟུན་པའི་ཕྱིར་ཡིན།
1PE 3:6 དཔེར་ན། སཱ་ར་ཡིས་ཨབ་ར་ཧམ་གྱི་བཀའ་ལ་མཉན་ནས་ཁོང་ལ་བདག་པོ་ཞེས༌འབོད་པ་ལྟ་བུ་ཡིན། གལ་ཏེ། ཁྱོད་རྣམས་འཇིགས་སྐུལ་ལ་མི་སྐྲག་པར་ལས་བཟང་པོ་བྱེད་པ་ཡིན་ན་སཱ་རའི་བུ་མོ་ཡིན༌ནོ།།
1PE 3:7 དེ་དང་དེ་བཞིན་དུ། ཁྱོད་ཅག་ཁྱོ་ག་རྣམས་ཀྱང་ཤེས་རྟོགས་ལྡན་པའི་སྒོ་ནས་ཆུང་མ་ལྷན་དུ་སྡོད་དགོས་ཤིང་། ཁོ་མོ་ནི་བུད་མེད་ཡིན་པས་ཁྱོད་ལས་གཉོམ་པ་དང་། ཁྱོད་དང་མཉམ་དུ་ཚེ་སྲོག་གི་ཐུགས་རྗེ་ཐོབ་མཁན་ཡིན༌པས། ཁྱོད་ཀྱིས་ཀྱང་ཁོ་མོ་ལ་བརྩི་བཀུར་བྱ་འོས་སོ།། དེ་ལྟར་ཡིན་ན། ཁྱོད་ཅག་གི་སྨོན་ལམ་ལ་བར་ཆད་ཅི་ཡང་མི་འབྱུང་ངོ་།།
1PE 3:8 མདོར་བསྡུས་ན། ཁྱོད་རྣམས་ཐམས་ཅད་ཀྱིས་བསམ་པ་མཐུན་ཞིང་ཕན་ཚུན་ལ་ཤ་ཚ་བ༌དང༌། སྤུན་ཟླ་ལྟར་བརྩེ་ཞིང་དུང་བ་དང་། སྙིང་རྗེ་དང་ཁེངས་སྐྱུང་གི་བསམ་པ་ལྡན་དགོས་སོ།།
1PE 3:9 ཁྱོད་རྣམས་ཀྱིས་གནོད་ལན་གནོད་འཇལ་མི་བྱེད་པ་དང་། དམའ་འབེབས་ཀྱི་ཚིག་ལ་དམའ་འབེབས་ཀྱི་ལན་མི་སློག་པར། དེ་ལས་ལྡོག་སྟེ་བྱིན་རླབས་ཞུ་འོས་སོ།། ཅིའི་ཕྱིར་ཞེ་ན། ཁྱོད་རྣམས་ལ་ཞལ་འབོད་གནང་བ་ནི་བྱིན་རླབས་འཐོབ་པའི་ཆེད་དུ་ཡིན།
1PE 3:10 དེ་ལ་གསུང་རབ་ཀྱི་མདོ་ལས་ཇི་སྐད༌དུ། སུ་ཞིག་སྲོག་ལ་གཅེས་པ་དང་།། སྐྱིད་པའི་འཚོ་བ་རོལ་འདོད་ན།། ཚིག་ངན་སྨྲ་ལྕེ་བསྡམ་དགོས་ཤིང་།། མཆུ་ཏོའི་གཡོ་སྒྱུ་བསྲུང་བར་གྱིས།།
1PE 3:11 ངན་པ་སྤངས་ནས་བཟང་པོ་སྒྲུབས།། ཞི་མཐུན་འཚོལ་ཞིང་དེའི་རྗེས་སྙེགས།།
1PE 3:12 དེ་ནི་གཙོ་བོ་ལགས་ཀྱི་སྤྱན་ཟུང་གིས།། དྲང་བདེན་མི་ལ༌གཟིགས་ཤིང་ཐོས་འཛིན་གྱིས།། དེ་ཡི་སྨོན་ལམ་དག་ལ་གསན་ཕྱིར་རོ།། འོན་ཀྱང་ངན་པའི་ལས་སུ་འཇུག་མཁན་ལ།། གཙོ་བོ་ལགས་ཀྱི་ཞལ་རས་འགྱུར་བ་འོ།། ཞེས་གསུངས་པའི་ཕྱིར༌རོ།།
1PE 3:13 ཁྱོད་ཅག་གིས་བརྩོན་སེམས་ངང་ནས་ལས་བཟང་པོ་བྱས་པ་ཡིན་ན། ཁྱོད་རྣམས་ལ་གནོད་འཚེ་གཏོང་མཁན་སུ་ཡོད།
1PE 3:14 ཁྱོད་ཅག་གིས་དྲང་བདེན་གྱི་ལས་སྒྲུབ་པའི་ཕྱིར་སྡུག་བསྔལ་མྱངས་ནའང་ཁྱོད་རྣམས༌བདེའོ།། དེ་དག་གི་འཇིགས་སྐུལ་ལ་མི་སྐྲག་ཅིང་སེམས་ཀྱང་མ་འཚབ༌ཅིག
1PE 3:15 འོན་ཀྱང་། ཁྱོད་ཅག་གི་སེམས་སུ་སྐྱབས་མགོན་མཱ་ཤི་ཀ་ནི་གཙོ་བོར་བཀུར་འོས་སོ།། སུ་ཞིག་གིས་ཁྱོད་རྣམས་ལ་སེམས་ཀྱི་རེ་སྨོན་ཅི་ཡིན་དྲི་བའི་ཕྱིར། ཁྱོད་ཅག་གིས་རྟག་ཏུ་སྟ་གོན་བྱེད་ཅིང་ཞི་འཇམ་དང་གུས་སེམས་བཅངས་ཏེ། མི་རེ་རེ་ལ་ལན་གདབ་པར༌བྱའོ།།
1PE 3:16 ཁྱོད་ཅག་གིས་བསམ་པ་རྣམ་དག་དང་བཅས། ཁྱོད་རྣམས་ལ་དོན་གང་ཞིག་གི་ཆ་ནས་དམའ་འབེབས་བྱས༌ན། དོན་དེའི་ཆ་ནས་སྐྱབས་མགོན་མཱ་ཤི་ཀའི་ནང་དུ་ཁྱོད་ཅག་གི་སྤྱོད་ལམ་བཟང་པོ་ལ་སྙོན་འཛུགས་མཁན་གྱི་མི་དེ་ངོ་ཚར་སྦྱོར་བ་ཡིན།
1PE 3:17 དཀོན་མཆོག་གི་ཐུགས་དགོངས་ཡིན་ན། ཁྱོད་རྣམས་ཀྱིས་ལས་བཟང་པོ་བྱས་པའི་ཕྱིར་སྡུག་བསྔལ་མྱོང་བ་ནི། ལས་ངན་པ་བྱས་པའི་ཕྱིར་སྡུག་བསྔལ་མྱོང་བ་ལས་ལེགས་སོ།།
1PE 3:18 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀས་ཀྱང་དེ་སྔར་ཐེངས་གཅིག་ལ་སྡིག་པའི་ཆེད་དུ་སྡུག་བསྔལ་མྱངས༌ཤིང་། དེ་ནི་རྣམ་པར་དག་པ་དེ་ཡིས་རྣམ་དག་མ་ཡིན་པའི་ཚབ་བྱས་ཏེ། བདག་ཅག་དཀོན་མཆོག་གི་དྲུང་དུ་འདྲེན་པའི་ཕྱིར༌ཡིན། ལུས་ཕུང་གི་ཆ་ནས་བརྗོད་ན། ཁོང་ཉིད་སྐུ་བཀྲོངས་ཤིང་། ཐུགས་ཉིད་ཀྱི་ཆ་ནས་བརྗོད་ན། ཁོང་ཉིད་སླར་གསོན་པ་ཡིན།
1PE 3:19 དེ་སྔར་ཁོང་གིས་ཐུགས་ཉིད་དེ་ལ་བརྟེན་ནས་བཙོན་དུ་ཡོད་པའི་སེམས་ཉིད་དག་ལ་བཀའ་བསྒྲགས་པར་ཕེབས་ཤིང༌།
1PE 3:20 དེ་དག་ནི་སྔོན་ཆད་ནོ་ཨས་གྲུ་གཟིངས་བཟོ་བའི་དུས༌དང༌། དཀོན་མཆོག་གིས་ངང་རྒྱུད་རིང་པོས་རེ་སྒུག་མཛད་པའི་དུས་སུ། དཀོན་མཆོག་གི་བཀའ་ལ་མི་ཉན་པའི་མི་རྣམས་ཡིན། དུས་དེར། གྲུ་གཟིངས་ནང་དུ་སོང་ཞིང་ཆུ་ལ་བརྟེན་ནས་ཐར་མཁན་མི་བརྒྱད་ལས་མང་པོ་མེད།
1PE 3:21 ཆུ་དེ་ཡིས་ཁྲུས་གསོལ་མཚོན་ཞིང༌། ད་ལྟ་ཡེ་ཤུ་མཱ་ཤི་ཀ་སླར་གསོན་པ་བརྒྱུད་ནས་ཁྱོད་རྣམས་ཀྱང་སྐྱོབ་པ་དང་། ཁྲུས་གསོལ་དེ་ནི་ལུས་ཀྱི་མི་གཙང་བ་མེད་པར་བཟོ་བ་མ་ཡིན་པར། དཀོན་མཆོག་གི་སྤྱན་སྔར་བསམ་པ་རྣམ་དག་ལྡན་པའི་ཕྱིར་ཡིན།
1PE 3:22 སྐྱབས་མགོན་ཡེ་ཤུ་ནམ་མཁའི་ཞིང་ཁམས་སུ་ཕེབས་ཏེ། དཀོན་མཆོག་གི་གཡས་ཕྱོགས་སུ་བཞུགས་ཤིང༌། ཕོ་ཉའི་ཚོགས་དང་། དབང་འཛིན༌མཁན། མཐུ་སྟོབས་ཅན་ཐམས་ཅད་ཁོང་གི་མངའ་འོག་ཏུ་མཛད་དོ།།
1PE 4:1 དེ་བས་ན་སྐྱབས་མགོན་མཱ་ཤི་ཀས་སྐུ་ལུས་ཀྱི་ཆ་ནས་སྡུག་བསྔལ་མྱངས༌པས། ཁྱོད་ཅག་གིས་ཀྱང་བློ་སྟོབས་དེ་ལྟ་བུའི་གོ་མཚོན་སྤྲ་བར་བྱ་འོས་སོ།། ཅིའི་ཕྱིར་ཞེ་ན། ལུས་སྟེང་ནས་སྡུག་བསྔལ་མྱངས་པ་རྣམས་ནི་སྡིག་པ་དང་ཁ་བྲལ་བའི་ཕྱིར༌ཡིན།
1PE 4:2 ཁྱོད་རྣམས་ལ་སེམས་དེ་ལྟ་བུ་ལྡན་ན། དེང་ཕྱིན་མིའི་འདོད་ཆགས་ཀྱི་རྗེས་སུ་མི་འབྲང་བར། དཀོན་མཆོག་གི་ཐུགས་དགོངས་བཞིན་འཇིག་རྟེན་འདིའི་ཚེ་སྨད་ཀྱི་དུས་འདའ་དགོས་སོ།།
1PE 4:3 ཅིའི་ཕྱིར་ཞེ་ན། སྔོན་ཆད་ཁྱོད་རྣམས་ཀྱིས་ཕྱི་ཕྱོགས་པའི་འདོད་བློ་བཞིན་དུ་ལོག་གཡེམ་དང་། འདོད༌ངན། ཆང་རག་གིས་བཟི་བ། ཟས་བག་མེད་དུ་ཟ་བ། བཟའ་བཏུང་བག་མེད་ལ་ཞུགས་པར་མ༌ཟད། སྐུ་འདྲར་བརྟེན་པའི་སྐྱུག་བྲོ་བའི་དོན་ལ་སོགས་པའི་དུས་ཡུན་ལོངས་པའི་ཕྱིར་ཡིན།
1PE 4:4 མི་དེ་དག་གིས་ཁྱོད་རྣམས་དོན་འདིའི་ཆ་ནས་ཁོ་རྣམས་དང་མཉམ་དུ་བག་མེད་ལང་ཤོར་གྱི་ལས་ལ་མི་ཞུགས་པ་མཐོང་སྟེ། ཧ་ལས་ཤིང་ཁྱོད་ཅག་ལ་འཕྱ་དམོད་བྱེད་མོད།
1PE 4:5 འོན་ཀྱང་། དེ་རྣམས་ཀྱིས་ངེས་པར་གསོན་པོ་དང་འདས་པོ་ཀུན་ལ་ལེགས་ཉེས་འབྱེད་མཁན་ཁོང་ཉིད་ལ་རྩིས་སྤྲོད་དགོས་སོ།།
1PE 4:6 དེའི་ཕྱིར། འདས་པོ་རྣམས་ལའང་འཕྲིན་བཟང་བསྒྲགས་ཤིང་། དེ་ནི་མིའི་ཚུལ་བཞིན་དུ་དེ་དག་གི་ལུས་གཟུགས་ལ་ཉེས་ཆད་འཕོག་པར་འགྱུར་ཡང་། དེ་རྣམས་ཀྱི་སེམས་ཉིད་ནི་དཀོན་མཆོག་ལ་བརྟེན་ནས་འཚོ་བའི་ཕྱིར་རོ།།
1PE 4:7 དངོས་པོ་ཐམས་ཅད་ཀྱི་མཐའ་མཇུག་སླེབས་ལ་ཉེ་བས། ཁྱོད་ཅག་གིས་གཟབ་ནན་ངང་རང་ཉིད་བསྲུང་བ་དང་། སྨོན་ལམ་འདེབས་པར་གཟབ་གཟབ་བྱ་དགོས་སོ།།
1PE 4:8 དེ་ལས་ཀྱང་གལ་ཆེ་བ་ནི་ཕན་ཚུན་ལ་དངོས་གནས་བྱམས་དགོས་པ་དེ་ཡིན། ཅིའི་ཕྱིར་ཞེ་ན། བྱམས་པས་སྡིག་པ་མང་པོ་འགེབས་ཐུབ་པའི་ཕྱིར༌རོ།།
1PE 4:9 ཁྱོད་རྣམས་ཀྱིས་ཕན་ཚུན་ལ་སྣེ་ལེན་བཟང་པོ་བྱེད་པ་ལས་སྡུག་ཡུས་འདོན༌པར་མི་བྱའོ།།
1PE 4:10 མི་རེ་རེར་གནང་སྦྱིན་གང་ཞིག་ཐོབ་པ་ལྟར་ཕན་ཚུན་ལ་ཞབས་ཕྱི་བསྒྲུབས༌ཏེ། དཀོན་མཆོག་གི་ཐུགས་རྗེ་སྣ་ཚོགས་ཀྱི་གཉེར་པ་ལེགས་པོ་ཞིག་བྱ་དགོས་སོ།།
1PE 4:11 སུ་ཞིག་ཆོས་གསུང་མཁན་ཡིན་ན། དཀོན་མཆོག་གི་བཀའ་བཞིན་དུ་གསུང་བ༌དང༌། སུ་ཞིག་ཞབས་ཕྱི་སྒྲུབ་མཁན་ཡིན་ན། དཀོན་མཆོག་གིས་གནང་བའི་མཐུ་སྟོབས་བཞིན་དུ་བསྒྲུབ༌དགོས་སོ།། དེ་ནི་དོན་ཐམས་ཅད་ལས་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་བསྟོད་བསྔགས་འཐོབ་པའི་ཕྱིར༌ཡིན། མ་གཞི་གཟི་བརྗིད་དང་མངའ་ཐང་ཐམས་ཅད་ནམ་ཡང་ཁོང་ལ་དབང་ངོ་། །ཨ༌མེན།
1PE 4:12 སྙིང་ནས་བརྩེ་བའི་སྤུན་ཟླ༌རྣམས། ཁྱོད་རྣམས་ལ་ཚོད་བགམ་པའི་ཕྱིར་མེ་ལྟ་བུའི་སྡུག་བསྔལ་དང་འཕྲད་པའི་དུས་སུ། དེ་ནི་རང་ཉིད་ལ་ཧ་ལས་པའི་དོན་ཞིག་བྱུང་བར་སྙམ་ཞིང་ཡ་མཚན་དུ་མ་འདོད་ཅིག
1PE 4:13 སྐྱབས་མགོན་མཱ་ཤི་ཀའི་གཟི་བརྗིད་མངོན་པའི་དུས་སུ། ཁྱོད་རྣམས་ཀྱང་ཤིན་ཏུ་དགའ་ཞིང་སྤྲོ་བའི་ཕྱིར། ད་ལྟ་ཁྱོད་ཅག་གིས་སྐྱབས་མགོན་མཱ་ཤི་ཀའི་སྡུག་བསྔལ་མཉམ་དུ་འཁུར་བས་དགའ་ཞིང་སྤྲོ་བར༌གྱིས།
1PE 4:14 ཁྱོད་རྣམས་ཀྱིས་སྐྱབས་མགོན་མཱ་ཤི་ཀའི་མཚན་གྱི་ཆེད་དུ་སྡིགས་དམོད་མྱངས་ན་བདེའོ། །ཅིའི་ཕྱིར་ཞེ་ན། དཀོན་མཆོག་གི་གཟི་བརྗིད་དང་ལྡན་པའི་ཐུགས་ཉིད་ནི་རྟག་ཏུ་ཁྱོད་རྣམས་ཀྱི་སྟེང་དུ་བཞུགས་པའི་ཕྱིར་རོ།།
1PE 4:15 ཁྱོད་ཅག་གི་ཁྲོད་དུ་མི་གསོད་པ་དང་། རྐུ་བྱེད་པ། ལས་ངན་པ་བྱེད་པ། གཞན་དོན་ལ་ཐེ་གཏོགས་བྱེད་པ་བཅས་ཀྱི་རྐྱེན་གྱིས་སྡུག་བསྔལ་མྱོང་མཁན་ཡོད་མི་འོས་སོ།།
1PE 4:16 འོན་ཀྱང་མཱ་ཤི་ཀ་པ་ཡིན་པའི་རྐྱེན་གྱིས་སྡུག་བསྔལ་མྱངས་ན་ངོ་གནོང༌བར་མི་བྱ་ཞིང་། མཚན་དེའི་རྐྱེན་གྱིས་དཀོན་མཆོག་ལ་བསྟོད་བསྔགས་འབུལ་དགོས་སོ།།
1PE 4:17 ཅིའི་ཕྱིར་ཞེ་ན། ད་ལྟ་དུས་དེ་སླེབས་ཟིན་ཅིང་། ལེགས་ཉེས་ཀྱི་ཁྲིམས་ཐག་གཅོད་པ་ནི་དཀོན་མཆོག་གི་ཁྱིམ་རྒྱུད་ནས་འགོ་རྩོམ༌པའི་ཕྱིར་ཡིན། གལ་ཏེ། བདག་ཅག་ནས་འགོ་རྩོམ་པ་ཡིན་ན། དཀོན་མཆོག་གི་འཕྲིན་བཟང་ལ་མི་ཉན་པ་རྣམས་ཀྱི་མཇུག་འབྲས་ནི་ཅི་ལྟ་བུ་ཞིག་ཡིན༌ནམ།
1PE 4:18 དེ་ལ་ཇི་སྐད༌དུ། གཞུང་དྲང་མི་རྣམས་ཐར་བ་ཙམ་ཡིན༌ན།། དད་པ་མེད་པའི་མི་དང་སྡིག་ཅན༌ལ།། ལངས་ནས་སྡོད་ས་ཙམ་ཡང་གང་དུ་ཡོད།། ཅེས༌གསུངས་པའོ།།
1PE 4:19 དེའི༌ཕྱིར། དཀོན་མཆོག་གི་ཐུགས་དགོངས་བཞིན་སྡུག་བསྔལ་མྱོང་བའི་མི་རྣམས་ཀྱིས་བློ་སེམས་རྩེ་གཅིག་གིས་ལས་བཟང་པོ་བྱེད་དགོས་ཤིང༌། རང་གི་རྣམ་ཤེས་ནི་ཡིད་རྟོན་རུང་བའི་མཛད་པོ་དཀོན་མཆོག་ལ་བཅོལ་དགོས༌སོ།།
1PE 5:1 དེ་བས་ན་ང་རང་ནི་ཆོས་ཚོགས་ཀྱི་རྒན་པོ༌དང༌། སྐྱབས་མགོན་མཱ་ཤི་ཀས་སྡུག་བསྔལ་མྱངས་པའི་དཔང་པོ། ཕྱིས་སུ་མངོན་པར་འགྱུར་བའི་གཟི་བརྗིད་ལ་ཞུགས་མཁན་བཅས་ཡིན༌ལ། བདག་གིས་ཁྱོད་ཅག་ཁྲོད་ཆོས་ཚོགས་ཀྱི་རྒན་པོ་དག་ལ་འདི་ལྟར་བསྐུལ་བར་བྱ་སྟེ།
1PE 5:2 ཁྱོད་རྣམས་ཀྱིས་ངེས་པར་ཁྱོད་ཅག་ཁྲོད་ཀྱི་དཀོན་མཆོག་གི་ལུག་ཁྱུ་འཚོ་སྐྱོང་བྱེད་པ་དང་། དཀོན་མཆོག་གི་ཐུགས་དགོངས་ལྟར་བདག་སྐྱོང་བྱེད་དགོས། དེ་ནི་རང་མོས་ཡིན་པ་ལས་བཙན་གྱིས་བྱེད་དུ་བཅུག་པ་ཞིག་མིན་ལ། རྒྱུ་ནོར་ལ་རྔམ་པའི་རྐྱེན་ཡང་མིན་ཏེ།
1PE 5:3 ལུག་ཁྱུའི་མིག་དཔེར་བྱེད་པ་ལས་ཁྱོད་ཅག་ལ་བཅོལ་བ་རྣམས་ལ་ཚོད་འཛིན་བྱེད་པའི་ཕྱིར་མ་ཡིན་ནོ།།
1PE 5:4 དེ་ནས་རྫི་བོ་ཆེན་པོ་མངོན་སུམ་དུ་ཕེབས་པའི་དུས་སུ། ནམ་ཡང་འཇིག་པ་མེད་པའི་གཟི་བརྗིད་ཀྱི་ཅོད་པན་ཁྱོད་ཅག་ལ་འཐོབ་པར་འགྱུར༌རོ།།
1PE 5:5 དེ་བཞིན་དུ། ཁྱོད་ཅག་ན་གཞོན་རྣམས་ཀྱིས་ཀྱང་ཆོས་ཚོགས་ཀྱི་རྒན་པོ་དག་གི་བཀའ་ལ་མཉན་དགོས༌ཤིང༌། ཁྱོད་ཅག་ཐམས་ཅད་ཀྱིས་ཀྱང་ཁེངས་སྐྱུང་གི་སེམས་པ་གོས་བཞིན་གྱོན་ནས་ཕན་ཚུན་ལ་བསྟུན་དགོས་སོ།། དེ་ལ་ཇི་སྐད༌དུ། དཀོན་མཆོག་ཉིད་ཀྱིས་ང་རྒྱལ་ཅན་ལ༌རྒོལ།། ཁེངས་སྐྱུང་མི་ལ་ཁོང་གིས་ཐུགས་རྗེ༌གནང༌།། ཞེས་གསུངས་པའི་ཕྱིར༌རོ།།
1PE 5:6 དེའི་ཕྱིར། ཁྱོད་ཅག་གིས་དམན་སེམས་བཅངས་ཏེ་དཀོན་མཆོག་གི་མཐུ་སྟོབས་ཆེ་བའི་ཕྱག་འོག་ཏུ་སྡོད་དགོས་ཤིང་། དུས་ལ་བབས་པ་ན། ཁོང་གིས་ཁྱོད་རྣམས་མཐོན་པོར་བསྒྲེང་ངེས༌སོ།།
1PE 5:7 ཁྱོད་ཅག་གིས་རང་གི་སེམས་ཁུར་མཐའ་དག་དཀོན་མཆོག་ལ་བཅོལ་དགོས་ཏེ། རྒྱུ་མཚན་ནི་ཁོང་གིས་ཁྱོད་རྣམས་ལ་གཟིགས་སྐྱོང་མཛད་པས༌སོ།།
1PE 5:8 ཁྱོད་རྣམས་ཀྱིས་གཟབ་ནན་ངང་ནས་རང་ཉིད་བསྲུངས་ཏེ་དོགས་ཟོན་བྱ་དགོས་སོ།། ཁྱོད་ཅག་གི་དགྲ་ཟླ་སྟེ་བདུད་ནི་ངར་སྐད་སྒྲོག་པའི་སེང་གེ་དང་མཚུངས༌པར། ཡུལ་ཕྱོགས་ཀུན་ཏུ་རྒྱུ་ཞིང་ཁྱུར་མིད་གཏོང་འདོད་པའི་མི་རྣམས་འཚོལ་བཞིན་ཡོད།
1PE 5:9 ཁྱོད་རྣམས་ཀྱིས་དད་སེམས་བརྟན་པོས་དེ་ལ་འགོག་རྒོལ་བྱ་དགོས་ཏེ། འཇིག་རྟེན་དུ་ཡོད་པའི་བདག་ཅག་གི་སྤུན་ཟླ་རྣམས་ཀྱིས་ཀྱང་སྡུག་བསྔལ་འདི་ལྟ་བུ་མྱོང་བཞིན་པ་ཁྱོད་ཅག་གིས་ཤེས་པས༌སོ།།
1PE 5:10 སྐྱབས་མགོན་མཱ་ཤི་ཀའི་ནང་དུ་ཁྱོད་ཅག་ལ་ཞལ་འབོད་གནང་མཁན་དང༌། ཁྱོད་ཅག་ལ་མཐའ་མེད་པའི་གཟི་བརྗིད་ཉམས་སུ་མྱོང་དུ་འཇུག་མཁན་དང་། ཐུགས་རྗེ་ཆེན་པོ་གནང་མཁན་དཀོན་མཆོག་གིས། གནས་སྐབས་སུ་ཁྱོད་རྣམས་ཀྱིས་སྡུག་བསྔལ་མྱངས༌རྗེས། ཁོང་ཉིད་ཀྱིས་དངོས་སུ་ཁྱོད་རྣམས་ཡོངས་སུ་རྫོགས་པར་མཛད༌ཅིང༌། བརྟན་པོར་མཛད་དེ་སྟོབས་ཤུགས་གནང་བ་དང་། གཡོ་བ་མེད་པར་མཛད་ངེས་སོ།།
1PE 5:11 མངའ་ཐང་ནམ་ཡང་ཁོང་ལ་དབང་བར་སྨོན། ཨ༌མེན།
1PE 5:12 བདག་གིས་འཕྲིན་ཡིག་མདོར་བསྡུས་འདི་བྲིས་ཏེ། ངས་ཡིད་རྟོན་རུང་བར་འདོད་པའི་སྤུན་ཟླ་སིལ་ཝ་ནཱ་བརྒྱུད་ནས་ཁྱོད་ཅག་ལ་སྤྲོད་པར་བྱས་ཤིང༌། ངས་ཁྱོད་རྣམས་ལ་སྐུལ་སློང་བྱེད་པར་མ་ཟད། ཐུགས་རྗེ་འདི་ནི་དཀོན་མཆོག་གི་ཐུགས་རྗེ་དངོས་ཡིན་པར་བདེན་དཔང་བྱས་པ་ཡིན། ཁྱོད་ཅག་ནི་ངེས་པར་ཐུགས་རྗེ་འདིའི་ནང་དུ་བརྟན་པོར་ལངས་ནས་སྡོད་དགོས༌སོ།།
1PE 5:13 དཀོན་མཆོག་གིས་པཱ་པེལ་ལོན་གྱི་ཆོས་ཚོགས་ནི་ཁྱོད་ཅག་དང་མཉམ་དུ་བདམས་པ་ཡིན་ལ། ད་ལྟ་ཁོ་རྣམས་ཀྱིས་ཀྱང་ཁྱོད་རྣམས་ལ་འཚམས་འདྲི་ཞུའོ།། བདག་གི་བུ་བཞིན་དུ་གྱུར་པ་མཱར་ཀུས་ཀྱང་ཁྱོད་ཅག་ལ་འཚམས་འདྲི༌ཞུའོ།།
1PE 5:14 ཁྱོད་རྣམས་ཀྱིས་ཕན་ཚུན་ལ་བྱམས་པའི་འོ་དང་བཅས་འཚམས་འདྲི་ཞུ་བར་བྱའོ།། སྐྱབས་མགོན་མཱ་ཤི་ཀའི་ནང་དུ་གནས་པ་ཁྱོད་ཅག་ཐམས་ཅད་ལ་ཞི་བདེ་འཐོབ་པར༌སྨོན།། །།
2PE 1:1 དེ་ཡང་སི་མོན་པེ་ཏྲོ་ང་རང་ནི་ཡེ་ཤུ་མཱ་ཤི་ཀའི་ཞབས་ཕྱི་པ་དང་སྐུ་ཚབ་པ་ཞིག་ཡིན༌ལ། འཕྲིན་ཡིག་འདི་ནི་བདག་ཅག་གི་དཀོན་མཆོག་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་དྲང་བདེན་ལ་བརྟེན་ནས། ངེད་ཅག་དང་ལྷན་ཅིག་དད་པ་རིན་ཐང་ཅན་འདྲ་མཚུངས་ཐོབ་པ་རྣམས་ལ་སྤྲིངས་པ་སྟེ།
2PE 1:2 ཁྱོད་ཅག་གིས་དཀོན་མཆོག་དང་བདག་ཅག་གི་གཙོ་བོ་ཡེ་ཤུ་ངོ་ཤེས་པ་བརྒྱུད་ནས། ཁྱོད་རྣམས་ལ་ཐུགས་རྗེ་དང་ཞི་བདེ་མང་དུ་འཐོབ་པར༌སྨོན།
2PE 1:3 དེ་ཡང་དཀོན་མཆོག་གི་ནུས་མཐུ་ཡིས་བདག་ཅག་ལ་ཚེ་སྲོག་དང་དད་གུས་སྐོར་གྱི་དོན་ཐམས་ཅད་གནང་ཟིན་ནོ།། དེ་ནི་བདག་ཅག་གིས་ཁོང་ཉིད་ངོ་ཤེས་པའི་རྐྱེན་གྱིས་ཡིན་ལ། ཁོང་ནི་རང་ཉིད་ཀྱི་གཟི་བརྗིད་དང་ཕུལ་བྱུང་ལ་བརྟེན་ནས་བདག་ཅག་ལ་ཞལ་འབོད་གནང་མཁན་ཡིན།
2PE 1:4 དོན་དེ་བརྒྱུད་ནས་ཁོང་གིས་རིན་ཐང་ལྡན་ཞིང་ཤིན་ཏུ་ཆེ་བའི་ཞལ་བཞེས་རྣམས་བདག་ཅག་ལ་གནང་ཞིང་། དེ་ནི་བདག་ཅག་འཇིག་རྟེན་གྱི་འདོད་ཆགས་ནས་བྱུང་བའི་ངན་རུལ་ལས་ཐར་ཏེ་དཀོན་མཆོག་གི་རང་བཞིན་དང་ལྡན་པར་འགྱུར་བའི་ཕྱིར་རོ།།
2PE 1:5 རྒྱུ་མཚན་འདིའི་དབང༌གིས། ཁྱོད་རྣམས་ཀྱིས་ལྷག་ཏུ་བརྩོན་པ་བྱེད་དགོས༌ཏེ། དད་སེམས་ལྡན་པའི་ཁར་ད་དུང་སྤྱོད་བཟང་ཡོད་དགོས༌ལ། སྤྱོད་བཟང་ལྡན་པའི་ཁར་ད་དུང་ཤེས་ཡོན་ཡོད༌དགོས།
2PE 1:6 ཤེས་ཡོན་ལྡན་པའི་ཁར་ད་དུང་རང་ཚོད་ཟིན་དགོས་ལ། རང་ཚོད་ཟིན་པའི་ཁར་ད་དུང་སྙིང་རུས་ཡོད༌དགོས། སྙིང་རུས་ལྡན་པའི་ཁར་ད་དུང་དད་གུས་ཡོད༌དགོས་ལ།
2PE 1:7 དད་གུས་ལྡན་པའི་ཁར་ད་དུང་སྤུན་ཟླར་གཅེས་སེམས་ཡོད་དགོས། སྤུན་ཟླར་གཅེས་སེམས་ཡོད་པའི་ཁར་ད་དུང་མི་ཐམས་ཅད་ལ་གཅེས་སེམས་ཡོད་དགོས༌པའོ།།
2PE 1:8 གལ་ཏེ། ཁྱོད་ཅག་ལ་དོན་དེ་རྣམས་ལྡན་ཞིང་དེ་དག་འཕེལ་བཞིན་ཡོད་ན། ཁྱོད་རྣམས་ནི་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ངོ་ཤེས་པའི་ཕྱོགས་སུ་ཕན་ཐོགས་མེད་པ་དང་འབྲས་བུ་མི་འབྱུང་བ་མིན་ནོ།།
2PE 1:9 གལ་ཏེ། མི་སུ་ཞིག་ལ་དོན་དེ་རྣམས་མི་ལྡན་ན། ཁོ་ནི་ལོང་བ་ཡིན་ལ། ཁོས་མིག་མདུན་ཁོ་ན་ལས་གཞན་ཅི་ཡང་མི་མཐོང༌ཞིང༌། རང་གི་སྔར་བྱས་ཀྱི་སྡིག་པ་རྣམས་དག་ཟིན་པའང་བརྗེད༌པའོ།།
2PE 1:10 དེའི་ཕྱིར། སྤུན་ཟླ༌རྣམས། ཁྱོད་ཅག་ལ་ཞལ་འབོད་ཐོབ་པ་དང་ཁྱོད་ཅག་བདམས་པར་གྱུར་པ་དེ་བརྟན་ཅིང་མི་འགྱུར་བའི་ཕྱིར། ཁྱོད་ཅག་གིས་དེ་བས་ཀྱང་བརྩོན་དགོས་སོ།། གལ་ཏེ། ཁྱོད་ཅག་གིས་དོན་དེ་རྣམས་བྱེད་པ་ཡིན་ན་ནམ་ཡང་ས་རུ་འགྱེལ་མི་སྲིད་དོ།།
2PE 1:11 དེ་ལྟར་ན། ཁྱོད་རྣམས་བདག་ཅག་གི་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་མཐའ་མེད་པའི་རྒྱལ་སྲིད་ནང་དུ་འགྲོ་བར་ཕུན་སུམ་ཚོགས་པའི་བདེ་ལམ་གནང་བར༌འགྱུར་རོ།།
2PE 1:12 དེ་བས་ན་ཁྱོད་ཅག་གིས་དོན་འདི་རྣམས་རྟོགས་ཤིང་ཁྱོད་ཅག་ལ་སྔར་ནས་ཡོད་པའི་བདེན་པ་ཉིད་ཀྱི་ཆ་ནས་བརྟན་པོ་ཡིན༌ཡང་། བདག་གིས་རྒྱུན་དུ་དོན་འདི་རྣམས་ཁྱོད་ཅག་ལ་དྲན་སྐུལ་བྱའོ།།
2PE 1:13 ངས་རང་ཉིད་ད་དུང་གུར་འདིའི་ནང་དུ་བསྡད་ཡོད་པའི་གོ་སྐབས་དང་བསྟུན་ནས། ཁྱོད་རྣམས་ལ་དྲན་སྐུལ་བརྒྱུད་ནས་སྐུལ་མ་གཏོང་འོས་པར༌སྙམ།
2PE 1:14 ཅིའི་ཕྱིར་ཞེ་ན། བདག་ཅག་གི་གཙོ་བོ་ཡེ་ཤུ་མཱ་ཤི་ཀས་བདག་ལ་མཛུབ་སྟོན་གནང་བ་བཞིན། ངས་ཀྱང་རང་ཉིད་གུར་འདི་དང་ཁ་འབྲལ་བའི་དུས་སླེབས་ལ་ཉེ་བ་ཤེས་པའི་ཕྱིར་ཡིན།
2PE 1:15 ང་རང་ཚེ་ལས་འདས་རྗེས། ཁྱོད་ཅག་གིས་རྒྱུན་དུ་དོན་འདི་དག་ལ་དྲན་གསོ་བྱེད་པའི་ཆེད་དུ། བདག་གིས་ད་དུང་བརྩོན་པ་ཆེན་པོ་བྱེད༌པའོ།།
2PE 1:16 སྔོན་ཆད་ངེད་ཅག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ནུས་མཐུ་ཆེན་པོ་དང་ཁོང་ཉིད་ཕེབས་པར་འགྱུར་བའི་དོན་རྣམས་ཁྱོད་ཅག་ལ་སྨྲས་པ༌ནི། མཁས་པས་སྒྲིགས་པའི་སྒྲུང་བཞིན་དུ་མ་ཡིན་པར། ངེད་རྣམས་ཀྱིས་ཁོང་གི་གཟི་དཔལ་མིག་གིས་དངོས་སུ་མཐོང་བ་ཡིན།
2PE 1:17 ཡབ་དཀོན་མཆོག་ནས་ཁོང་ལ་བཀུར་སྟི་དང་གཟི་བརྗིད་ཐོབ་པའི་དུས་སུ། གཟི་འོད་ཆེན་པོ་དེ་ཉིད་ཀྱིས་ཁོང་ལ་ཇི་སྐད་དུ། འདི་ནི་བདག་གི་གཅེས་པའི་བུ་ཡིན་ཞིང་། ང་རང་ཁོ་ལ་ཤིན་ཏུ་དགའ་ཞེས་གསུངས༌པའི་སྒྲ་གྲགས་ཤིང་།
2PE 1:18 ངེད་ཅག་ཁོང་དང་མཉམ་དུ་རི་བོ་དམ་པ་རུ་ཡོད་པའི་དུས༌སུ། ནམ་མཁའི་ཞིང་ཁམས་ནས་སྒྲ་དེ་གྲགས་ཡོང་བ་དངོས་སུ་ཐོས༌སོ།།
2PE 1:19 བདག་ཅག་ལ་ལུང་སྟོན་པའི་ལུང་བསྟན་དེ་ལས་ཀྱང་ཁུངས་བཙན་ཡོད༌དེ། སྐྱ་རེངས་ཤར་བ་དང་ཁྱོད་ཅག་གི་སེམས་སུ་ཐོ་རེངས་སྐར་ཆེན་ཤར་བའི་དུས་སུ། མུན་ནག་ནང་དུ་སྒྲོན་མེའི་འོད་ཟེར་འཕྲོ་བ་བཞིན། ཁྱོད་རྣམས་ཀྱིས་ལུང་བསྟན་འདིར་གཟབ་གཟབ་བྱས་ན་ལེགས་སོ།།
2PE 1:20 དེ་བས་ཀྱང་ཆེས་གལ་ཆེ་བ་ནི་གསུང་རབ་ཀྱི་ལུང་བསྟན་གང་ཞིག་ཡིན་ཡང་། རང་འདོད་ལྟར་འགྲེལ་བཤད་བྱས་ཆོག་པ་གཅིག་ཀྱང་མེད་པ་ཤེས་པར་གྱིས།
2PE 1:21 རྒྱུ་མཚན་ནི་ལུང་བསྟན་གང་ཞིག་ཡིན་ཡང་མིའི་འདོད་བློ་ལྟར་བྱུང་བ་གཏན་ནས་མ་ཡིན་པར། དམ་པའི་ཐུགས་ཉིད་ཀྱིས་མི་ལ་བསྐུལ་ཞིང་དཀོན་མཆོག་ནས་བྱུང་བའི་བཀའ་རྣམས་མི་ཡིས་བརྗོད་པའི་ཕྱིར་རོ།།
2PE 2:1 དེ་ཡང་སྔོན་ཆད་མི་རྣམས་ཀྱི་ཁྲོད་དུ་ལུང་སྟོན་པ་རྫུས་མ་བྱུང་བ་བཞིན། ཕྱིས་སུ་ཁྱོད་ཅག་གི་ཁྲོད་དུའང་སློབ་དཔོན་རྫུས་མ་འབྱུང་བར་འགྱུར༌ལ། དེ་རྣམས་ཀྱིས་ལྐོག་ནས་མི་ལ་གནོད་འཚེ་གཏོང་བའི་ལོག་ལྟ་རྣམས་ཁྲིད་འོང་བར་འགྱུར་ཞིང་། དེ་དག་གིས་ཁོ་རྣམས་བླུ་མཁན་གྱི་བདག་པོའང་ཁས་མི་ལེན༌པར། མྱུར་དུ་རང་གིས་རང་ཉིད་བརླག་པར་འགྱུར་རོ།།
2PE 2:2 མི་མང་པོ་ཞིག་གིས་ལོག་གཡེམ་པ་དེ་དག་གི་བྱ་སྤྱོད་བཞིན་བྱེད་པར་འགྱུར་ཞིང་། སློབ་དཔོན་རྫུས་མ་དེ་དག་གི་རྐྱེན་གྱིས། བདེན་པ་ཉིད་ཀྱི་ལམ་ལ་འཕྱ་དམོད་བྱེད་པར་འགྱུར།
2PE 2:3 དེ་དག་ལ་བརྣབ་སེམས་ཆེ་བས་རྫུན་གཏམ་ལ་བརྟེན་ནས་ཁྱོད་ཅག་ལས་འཕྲོག་པར་འགྱུར། དེ་དག་ལ་ཉེས་ཆད་གཅོད་པ་ནི་གནའ་སྔ་མོ་ནས་དུས་མི་འགྱངས་ལ། དེ་རྣམས་བརླག་པར་འགྱུར་བའི་དུས་ཀྱང་གཉིད་ལ་མི་ཡུར་རོ།།
2PE 2:4 སྔོན་ཆད་ཕོ་ཉ་རྣམས་ཀྱིས་སྡིག་པ་བྱས་པ་ན། དཀོན་མཆོག་གིས་དེ་རྣམས་ལའང་བཟོད་སྒོམ་མ་གནང་བར་དམྱལ་བའི་གནས་སུ་གཡུགས་ཤིང་། མུན་ནག་གི་དོང་ནང་དུ་ཁྲིམས་ཐག་གཅོད་པའི་བར་དུ་བསྐྱུར་བ་ཡིན་ནོ།།
2PE 2:5 ཡང་དཀོན་མཆོག་གིས་གནའ་བོའི་འཇིག་རྟེན་ལའང་བཟོད་སྒོམ་མ་གནང་བར། དད་གུས་མེད་པའི་མི་རྣམས་ཆུ་ལོག་གིས་བསྣུབས་པར་མཛད༌མོད། འོན་ཀྱང་ཡང་དག་པའི་ཆོས་སྒྲོག་མཁན་ནོ་ཨའི་ཁྱིམ་མི་བརྒྱད་པོ་བསྐྱབས་མྱོང་།
2PE 2:6 ཡང་ཁོང་གིས་སཱ་དོམ་དང་གཱ་མོ་ར་གཉིས་ལ་ཉེས་ཆད་བཅད་ནས་མེར་བསྲེགས་ཤིང༌རྡུལ་དུ་བཏང་བ་དང་། དུས་རབས་ཕྱི་མའི་དད་གུས་མེད་པའི་མི་རྣམས་ལ་བསླབ་བྱའི་དཔེ་རུ་གནང་བ་ཡིན།
2PE 2:7 དུས་དེར་ཁྲིམས་མེད་ལུགས་མེད་ཀྱི་མི་དག་གི་གཡེམ་སྦྱོར་གྱི་རྐྱེན་གྱིས། དུས་རྒྱུན་དུ་ཡིད་སེམས་སྐྱོ་བའི་མི་གཞུང་དྲང་ལོད་ཐུ་ཁོ་ན་ཁོང་གིས་བསྐྱབས་པ་ཡིན།
2PE 2:8 རྒྱུ་མཚན་ནི་མི་གཞུང་དྲང་དེ་ཁོ་རྣམས་ཀྱི་ཁྲོད་དུ་སྡོད༌ཅིང༌། མི་དེ་དག་གི་ཁྲིམས་མེད་ལུགས་མེད་ཀྱི་དོན་རྣམས་མཐོང་ཐོས་སུ་གྱུར་པས། ཁོའི་དྲང་སེམས་ནི་ཉིན་རེ་བཞིན་སྐྱོ་གདུང་གིས་མནར༌བར་གྱུར་པའོ༎
2PE 2:9 དེ་ལྟར་ཡིན་ན། གཙོ་བོས་དད་གུས་ལྡན་པའི་མི་ནི་ཉམས་ཚོད་ལས་སྐྱོབ་པ་དང་། དྲང་བདེན་མིན་པའི་མི་ནི་ལེགས་ཉེས་ཀྱི་ཁྲིམས་ཐག་གཅོད་པའི་ཉིན་མོའི་བར་ཉེས་ཆད་འོག་ཏུ་བསྐྱུར་བ་མཁྱེན༌ནོ།།
2PE 2:10 ཤ་གཟུགས་ཀྱི་ཕུང་བོར་བསྟུན་ནས་འདོད་ཆགས་ལ་འཇོལ་ཉོག་ཏུ་སྤྱོད་མཁན་དང་། དབང་ཆེན་ལ་མཐོང་ཆུང་བྱེད་མཁན་ནི་ཁོང་གིས་ལྷག་ཏུ་མཁྱེན་ལ། མི་དེ་དག་ནི་སྤོབས་པ་ཆེ་ཞིང་གཤིས་རྒྱུད་གྱོང་པོ་ཡིན་ལ། གཟི་བརྗིད་ཅན་རྣམས་ལ་དམའ་འབེབས་བྱེད་པ་ལའང་མི་འཇིགས་སོ།།
2PE 2:11 ཕོ་ཉ་རྣམས་ལ་མཚོན་ན་མི་དེ་དག་ལས་མཐུ་སྟོབས་དང་དབང་ཐང་ཆེ༌ཡང་། གཙོ་བོའི་དྲུང་དུ་དམའ་འབེབས་ཀྱི་ཚིག་གིས་དེ་རྣམས་གཏུག་པར་མི༌བྱ།
2PE 2:12 འོན་ཀྱང་། མི་དེ་དག་ནི་ཡིད་ཤེས་མེད་པ་དང་མཚུངས༌པར། སྐྱེས་མ་ཐག་ནས་དུད་འགྲོ་ཡིན་ཏེ། མི་ཡིས་བཟུང་ནས་བཤས་ཟོག་ལ་སྟ་གོན་བྱེད་པ་ཡིན། མི་དེ་རྣམས་ཀྱིས་རང་གིས་མི་ཤེས་པའི་དོན་རྣམས་ལ་དམའ་འབེབས་བྱེད་ཅིང༌། མི་གཞན་དག་བརླག་བཞིན་པའི་དུས་སུ། ཁོ་རང་ཉིད་བརླག་པར་འགྱུར་ངེས་སོ།།
2PE 2:13 དེ་རྣམས་ཀྱི་སྤྱོད་ལམ་དྲང་པོ་མ་ཡིན་པས་འབྲས་བུ་མི་བདེན་པ་ཐོབ། མི་དེ་དག་ནི་ཉིན་མོར་བག་མེད་ལོངས་སྤྱོད་ལ་ཞུགས་པར་དགའ་ཞིང་། བཙོག་པར་གྱུར་པ་དང་སྐྱོན་ཅན་ཡང་ཡིན་ལ། ཁྱོད་ཅག་དང་མཉམ་དུ་གསོལ་སྟོན་ལ་ཞུགས་དུས། རང་གི་གཡོ་སྒྱུ་ནི་དགའ་སྐྱིད་དུ་འདོད་པ་རེད།
2PE 2:14 མི་དེ་རྣམས་ཀྱི་མིག་ནང་དུ་ལོག་གཡེམ་གྱིས་ཁེངས་ཤིང་སྡིག་པའི་མཚམས་མི་འཇོག༌པར། བློ་མི་བརྟན་པ་རྣམས་ལ་སླུ་བྲིད་བྱེད་པ་དང༌། སེམས་ནང་དུ་འདོད་རྔམ་ལ་གོམས་ཡོད་པས། དངོས་གནས་སྡིགས་དམོད་ཐེབས་པའི་རིགས་རྒྱུད་ཡིན།
2PE 2:15 མི་དེ་རྣམས་ཀྱིས་དྲང་ལམ་སྤངས་ནས་ལོག་ལམ་དུ་ཞུགས་པ་དང་། པེ་ཨོར་གྱི་བུ་པེལ་ཨམ་གྱི་ལམ་དུ༌ཞུགས་པ་ཡིན། པེལ་ཨམ་ནི་གླ་ཆའི་ཡོང་ཁུངས་མི་གཙང་བ་ལ་འདོད་རྔམ་བཅང་མཁན་ཞིག་ཡིན༌མོད།
2PE 2:16 འོན་ཀྱང་ཁོ་བོར་རང་གི་ནག་ཉེས་དབང་གིས་བཀའ་བཀྱོན་ཐེབས་ཤིང་། སྨྲ་མི་ཤེས་པའི་བོང་བུས་མི་སྐད་སྨྲས་ཏེ་ལུང་སྟོན་པའི་སྨྱོ་སྤྱོད་བཀག༌པའོ།།
2PE 2:17 ཡང་མི་དེ་རྣམས་ནི་ཆུ་མིག་སྐམ་པོ་དང་རླུང་ནག་འཚུབ་མས་འདེད་པའི་སྨུག་པ་ཡིན༌ལ། མུན་པའི་སྨག་རུམ་ནི་མི་དེ་རྣམས་ཀྱི་ཆེད་དུ་སྟ་གོན་མཛད་ཡོད།
2PE 2:18 དེ་རྣམས་ཀྱིས་ང་རྒྱལ་གྱི་བླུན་གཏམ་སྨྲ༌ཞིང༌། ཤ་གཟུགས་ཀྱི་ཆགས་ཞེན་དང་ལོག་གཡེམ་གྱི་ལས་ལ་བརྟེན་ནས། ནོར་འཁྲུལ་ཅན་ལས་ཐར་མ་ཐག་པ་དེ་རྣམས་ལའང་སླུ་བྲིད་བྱེད།
2PE 2:19 དེ་རྣམས་ཀྱིས་མི་རྣམས་ལ་རང་དབང་འཐོབ་པར་ཁས་ལེན་ནའང་། རང་ཉིད་ནི་འཕུང་དཀྲོལ་གྱི་གཡོག་པོ་རུ་བྱེད༌པ་ཡིན། ཅིའི་ཕྱིར་ཞེ་ན། མི་སུ་ཡིན་ཡང་གང་ཞིག་གི་དབང་འོག་ཏུ་བཅུག་ན་དེའི་གཡོག་པོ་ཡིན་པའི་ཕྱིར་རོ།།
2PE 2:20 གལ་ཏེ། མི་དེ་རྣམས་ཀྱིས་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀ་ངོ་ཤེས་པ་བརྒྱུད་ནས། འཇིག་རྟེན་གྱི་མི་གཙང་བ་སྤངས་ཐུབ་པ་བྱུང༌ནའང༌། རྗེས་སུ་སླར་ཡང་དེའི་ནང་དུ་ཞུགས་ཤིང་དེའི་དབང་འོག་ཏུ་ཚུད་ན། མི་དེ་དག་གི་ཕྱིས་ཀྱི་གནས་ཚུལ་དེ་སྔ་ལས་ཀྱང་སྡུག་པ་ཡིན།
2PE 2:21 ཁོ་རྣམས་ཀྱིས་དྲང་བདེན་གྱི་ལམ་ཤེས་བཞིན་དུ། ཁོ་རྣམས་ལ་གནང་བའི་བཀའ་དམ་པ་རྒྱབ་ཏུ་བསྐྱུར་བས། ཁོ་རྣམས་ཀྱིས་དོན་དེ་ཤེས་པ་ལས་མ་ཤེས་ན་ལེགས་སོ།།
2PE 2:22 ཁ་དཔེ་ལ། ཁྱི་ནི་རང་གི་སྐྱུག་རོར་ལོག །ཕག་ནི་བཀྲུས་ཀྱང་འདམ་ལ་འགྲིལ། །ཞེས་པའི་ཚིག་འདི་ཅིས་མ་བདེན། དེ་ནི་ཁོ་རྣམས་ཀྱི་སྟེང་དུ་བྱུང་བའོ།།
2PE 3:1 སྙིང་ནས་བརྩེ་བའི་སྤུན་ཟླ༌རྣམས། ད་ལྟ་བདག་གིས་ཁྱོད་ཅག་ལ་འབྲི་བཞིན་པ་འདི་ནི་འཕྲིན་ཡིག་གཉིས་པ་ཡིན་ནོ༎ འཕྲིན་ཡིག་འདི་གཉིས་ནི་ཁྱོད་ཅག་གི་གཞུང་སེམས་དྲང་པོ་ལ་དྲན་སྐུལ་དང་སྐུལ་སློང་བྱེད་པའི་ཆེད་དུ་བྲིས་པ་ཡིན་ལ།
2PE 3:2 དེ་ནི་ལུང་སྟོན་པ་དམ་པ་རྣམས་ཀྱིས་སྔར་གསུངས་པའི་བཀའ་རྣམས་དང་། གཙོ་བོ་དང་སྐྱབས་མགོན་དེ་ཉིད་ཀྱི་བཀའ༌སྟེ་ཁྱོད་ཅག་གི་སྐུ་ཚབ་པ་རྣམས་ཀྱིས་གནང་བ་དེ་དག་ཁྱོད་རྣམས་ཀྱི་ཡིད་ལ་འཛིན་པའི་ཕྱིར་དུ་ཡིན།
2PE 3:3 ཆེས་གལ་ཆེ་བ་ནི། མཐའ་མའི་ཉིན་མོ་དག་ལ་འཕྱ་སྨོད་བྱེད་པར་དགའ་བའི་མི་འབྱུང་བར་འགྱུར་བ་ཤེས་དགོས༌ཏེ། ཁོ་རྣམས་རང་གི་འདོད་ཆགས་ཀྱི་རྗེས་སུ་འབྲངས་ཏེ་ན་རེ།
2PE 3:4 ཁོང་ཉིད་ཕེབས་ཡོང་རྒྱུ་ཡིན་ཟེར་བའི་ཞལ་བཞེས་དེ་གང་དུ་ཡོད༌དམ། ཅིའི་ཕྱིར་ཞེ་ན། མེས་པོ་རྣམས་ཚེ་ལས་འདས་པ་ནས་བཟུང་། དོན་ཐམས་ཅད་ཐོག་མར་བསྐྲུན་པའི་དུས་དང་གཅིག་མཚུངས་ཡིན་པའི་ཕྱིར་རོ་ཞེས་སྨྲ་བ་ཡིན།
2PE 3:5 གནའ་སྔ་མོ་ནས་དཀོན་མཆོག་གི་བཀའ་ལ་བརྟེན་ནས་ནམ་མཁའ་བྱུང་བ་དང་། ས་གཞི་ནི་ཆུ་ནས་བྱུང་ཞིང་ཆུ་ལས་གྲུབ་པ་ཡིན་ལ། སྐབས་དེའི་འཇིག་རྟེན་ཆུས་བསྣུབས་ཏེ་འཇིག་པར་གྱུར་པ་ནི་མི་དེ་རྣམས་ཀྱིས་བསམ་བཞིན་བརྗེད་པར་བྱས་སོ།།
2PE 3:7 འོན་ཀྱང་ད་ལྟའི་གནམ་ས་གཉིས་ནི་ད་དུང་ཡང་བཀའ་དེར་བརྟེན་ནས་གནས༌ཤིང་། དད་གུས་མེད་པའི་མི་རྣམས་ལ་ཉེས་ཆད་ཕོགས་ནས་བརླག་པར་མཛད་པའི་ཉིན་མོའི་བར་དུ་བསྐྱུར་བ་དང་། དེ་ནས་གནམ་ས་གཉིས་མེར་བསྲེག་པར་འགྱུར་རོ།།
2PE 3:8 སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་བརྗེད་མི་རུང༌བ་ཞིག་ནི། གཙོ་བོའི་སྤྱན་ལམ་དུ་ཉིན་གཅིག་ནི་ལོ་འཁོར་ཆིག་སྟོང་དང་ལོ་འཁོར་ཆིག་སྟོང་ནི་ཉིན་གཅིག་དང་མཚུངས་པ་དེ་ཡིན་ནོ།།
2PE 3:9 གཙོ་བོས་ཞལ་བཞེས་གནང་བ་བཞིན་ད་དུང་འགྲུབ༌མེད་པས། མི་འགའ་ཤས་ཀྱི་སེམས་སུ་ཁོང་གིས་དུས་འགྱངས་མཛད་དོ་སྙམ་མོད། འོན་ཀྱང་དོན་དམ་དུ་དུས་འགྱངས་མཛད་པ་མ་ཡིན་པར། ཁྱོད་རྣམས་ལ་བཟོད་སྒོམ་གནངས་ཏེ། མི་གཅིག་ཀྱང་འཇིག་པར་འགྱུར་བར་ཐུགས་མི་མཉེས་ཤིང་། མི་ཐམས་ཅད་ཀྱིས་འགྱོད་བཤགས་བྱེད་པར་དགོངས༌པའོ།།
2PE 3:10 འོན་ཀྱང་། རྐུན་པོ་གློ་བུར་སླེབས་པ་ལྟར་གཙོ་བོའི་ཉིན་མོའང་སླེབ༌པར་ངེས་སོ།། ཉིན་དེར། ནམ་མཁའ་འུར་སྒྲ་ཆེན་པོ་དང་བཅས་ཡལ་བར་འགྱུར༌བ་དང་། འབྱུང་བ་ཐམས་ཅད་མེ་དཔུང་དྲག་པོས་བསྲེགས་ཏེ་མེད་པར་འགྱུར་ཞིང་། ས་གཞི་དང་དེའི་སྟེང་གི་དངོས་པོ་ཐམས་ཅད་ཀྱང་མེས་བསྲེག་པར་འགྱུར༌རོ།།
2PE 3:11 དེ་ཐམས་ཅད་དེ་བཞིན་མེད་པར་འགྱུར་འགྲོ་བ་ཡིན་ན། ཁྱོད་ཅག་གིས་ཇི་ལྟར་དམ་པ་དང་དད་གུས་ཡོད་པ་ཞིག་བྱེད་ཅིང་།
2PE 3:12 དཀོན་མཆོག་གི་ཉིན་མོ་སླེབ་ཡོང་བར་རེ་སྒུག་བྱེད་ལོང་མེད་པ་མ་ཡིན་ནམ། ཉིན་དེར། ནམ་མཁའ་མེས་བསྲེགས་ནས་མེད་པར་འགྱུར་ཞིང་། འབྱུང་བ་ཐམས་ཅད་ཀྱང་མེ་དཔུང་དྲག་པོས་ཞུ་བར་འགྱུར་རོ།།
2PE 3:13 འོན་ཀྱང་། ཁོང་གིས་ཞལ་བཞེས་གནང་བ་བཞིན། བདག་ཅག་གིས་དྲང་བདེན་བཞུགས་སའི་གནམ་ས་གསར་པ་ལ་རེ་སྨོན་བཅང་བའོ།།
2PE 3:14 དེའི་ཕྱིར། སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་དོན་དེ་དག་ལ་རེ་སྨོན་བཅངས་པ་ཡིན་ན། རང་ཉིད་སྐྱོན་གྱི་དྲི་མས་མ་གོས་པ་དང་། སྐྱོན་བརྗོད་རྒྱུ་ཅི་ཡང་མེད་པ། གཙོ་བོའི་སྤྱན་སྔར་བློ་སེམས་བདེ་བའི་ངང་གནས་ཐུབ་པའི་ཕྱིར་བརྩོན་པ་བྱེད་དགོས་སོ།།
2PE 3:15 དེར་མ་ཟད། བདག་ཅག་གི་གཙོ་བོས་ཡུན་རིང་ལ་བཟོད་སྒོམ་གནང་བ་ནི་ཐར་པ་འཐོབ་པའི་རྒྱུ་རྐྱེན་དུ་བརྩི་དགོས་ལ། དེ་ནི་བདག་ཅག་གི་སྙིང་ནས་བརྩེ་བའི་སྤུན་ཟླ་ཕོལ་ལོལ་གྱིས་རང་ཉིད་ལ་གནང་ཡོད་པའི་ཤེས་རབ་བཞིན་ཁྱོད་ཅག་ལ་འཕྲིན་ཡིག་སྤྲིངས་པ་ལྟར་ཡིན།
2PE 3:16 ཁོང་གི་འཕྲིན་ཡིག་ཐམས་ཅད་ལས་དོན་དེ་རྣམས་བརྗོད་ཡོད། འཕྲིན་ཡིག་ལས་གོ་བ་ལོན་དཀའ་བ་དག༌ནི། བློ་གྲོས་མེད་པ་དང་བློ་མི་བརྟན་པ་རྣམས་ཀྱིས་ལོག་བཤད་བྱེད་ཅིང་། དེ་ནི་གསུང་རབ་ཀྱི་མདོ་གཞན་དག་ལ་ལོག་བཤད་བྱེད་པ་ལྟར། རང་གིས་རང་ཉིད་འཇིག་པར་བྱེད་དོ།།
2PE 3:17 སྙིང་ནས་བརྩེ་བའི་སྤུན་ཟླ༌རྣམས། དེ་ལྟར་ཡིན་པས། ཁྱོད་ཅག་གིས་སྔ་མོ་ནས་དོན་འདི་དག་ཤེས་པ་ཡིན༌ན། ཁྲིམས་མེད་ལུགས་མེད་ཀྱི་མི་དག་གི་ནོར་འཁྲུལ་གྱི་གཡོ་འོག་ཏུ་མི་ཚུད་པ་དང་། རང་ཉིད་བརྟན་པོ་ཡིན་པ་དེ་མི་ཉམས་པའི་ཕྱིར་དོགས་ཟོན་བྱེད་དགོས་སོ།།
2PE 3:18 འོན་ཀྱང་། ཁྱོད་རྣམས་དེ་ལས་ལྡོག་སྟེ་བདག་ཅག་གི་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་ཐུགས་རྗེ་དང་ཤེས་ཡོན་རྟོགས་པའི་ཆ་ནས་ཡར་ཐོན་ཡོང་དགོས། དུས་ད་ལྟ་དང་མཐའ་མེད་པའི་ཉིན་མོའི་བར་དུ་ཁོང་ལ་བསྟོད་བསྔགས་བརྗོད་པར་སྨོན། ཨ༌མེན།། །།
1JO 1:1 དེ་ཡང་ཐོག་མ་ཉིད་ནས་བཞུགས་པའི་ཚེ་སྲོག་གི་བཀའ་དེ་གླེང་བ་ཡིན་ན། ངེད་ཅག་གིས་བཀའ་ དེ་རྣ་བས་ཐོས་ཤིང་མིག་གིས་མཐོང་མྱོང་བ༌དང༌། དངོས་སུ་བལྟས་མྱོང་ལ། ལག་པས་ཀྱང་དངོས་སུ་རེག་མྱོང་ངོ་།།
1JO 1:2 ཚེ་སྲོག་དེ་མངོན་པར་གྱུར་ཡོད་ལ་ངེད་ཅག་གིས་མཐོང་མྱོང་བ་དང་། ད་ལྟ་དེ་ལ་བདེན་དཔང་བྱེད་བཞིན་ཡོད་དེ། མ་གཞི་ཚེ་སྲོག་དེ་ཉིད་ནི་ཡབ་དང་ལྷན་དུ་བཞུགས་ཤིང་། ངེད་ཅག་ལ་མངོན་པར་གྱུར་པའི་མཐའ་མེད་པའི་ཚེ་སྲོག་དེ་ཁྱོད་ཅག་ལ་སྒྲོག་པ་ཡིན།
1JO 1:3 ཁྱོད་རྣམས་ངེད་ཅག་དང་འདྲིས་པའི༌ཕྱིར། ངེད་ཅག་གིས་གང་ཞིག་མཐོང་ཞིང་ཐོས་པ་དག་ཁྱོད་རྣམས་ལ་སྒྲོག་པ་ཡིན། ངེད་ཅག་ནི་དངོས་གནས་ཡབ་དང་ཁོང་གི་སྲས་ཡེ་ཤུ་མཱ་ཤི་ཀར་འདྲིས་ཡོད་དོ།།
1JO 1:4 བདག་ཅག་ཡོངས་སུ་དགའ་ཞིང་སྤྲོ་བར་འགྱུར་བའི་ཕྱིར། ངེད་ཅག་གིས་དོན་འདི་དག་ཁྱོད་རྣམས་ལ་བྲིས་པའོ།།
1JO 1:5 དཀོན་མཆོག་ནི་འོད་ཟེར་ཡིན་པས་ཁོང་ལ་མུན་ནག་གཏན་ནས་མེད་དོ།། འདི་ནི་ངེད་ཅག་གིས་སྐྱབས་མགོན་ཡེ་ཤུ་ནས་ཐོས་ཤིང་ཁྱོད་ཅག་ལ་སྒྲོག་པའི་བརྡ་འཕྲིན་ཡིན་ནོ།།
1JO 1:6 གལ་ཏེ། བདག་ཅག་གིས་དཀོན་མཆོག་དང་འདྲིས་ཡོད་ཟེར་ཡང་། ད་དུང་མུན་ནག་ནང་དུ་སྤྱོད་པ་ཡིན་ན། དེ་ནི་བདག་ཅག་གིས་རྫུན་སྨྲས་པ་ཡིན་པས་བདེན་པ་ཉིད་བཞིན་དུ་སྤྱད་པ་སྤྱོད་པ་མ་ཡིན།
1JO 1:7 དཀོན་མཆོག་ནི་འོད་ཟེར་ནང་དུ་བཞུགས་པ་བཞིན་བདག་ཅག་འོད་ཟེར་ནང་དུ་སྤྱོད་པ་ཡིན་ན། བདག་ཅག་ཕན་ཚུན་ལ་འདྲིས་ཡོད་པ་ཡིན་ལ། ཁོང་གི་སྲས་སྐྱབས་མགོན་ཡེ་ཤུའི་སྐུ་ཁྲག་གིས་བདག་ཅག་གི་སྡིག་པ་ཐམས་ཅད་འདག་པར་མཛད༌དོ།།
1JO 1:8 བདག་ཅག་གིས་རང་ལ་སྡིག་པ་མེད་ཟེར་ན། དེ་ནི་རང་མགོ་རང་གིས་གཡོག་པ་ཡིན་པས། བདེན་པ་ཉིད་ནི་བདག་ཅག་གི་སེམས་སུ་གནས༌པ་མ་ཡིན་ནོ།།
1JO 1:9 དཀོན་མཆོག་ནི་ཡིད་རྟོན་རུང་བ་དང་དྲང་བདེན་ཡིན་པས། བདག་ཅག་གིས་རང་གི་སྡིག་པ་མཐོལ་བཤགས་བྱས༌ན། ཁོང་གིས་བདག་ཅག་གི་སྡིག་པ་བསལ་ཞིང་དྲང་བདེན་མ་ཡིན་པ་ཐམས་ཅད་གཙང་མར་མཛད་ངེས་ཡིན།
1JO 1:10 བདག་ཅག་གིས་སྡིག་པ་བྱས་མ་མྱོང་ཟེར་ན། བདག་ཅག་གིས་དཀོན་མཆོག་ནི་ཞལ་རྫུན་གསུང་མཁན་དུ་བརྩིས་པས། ཁོང་གི་བཀའ་ཡང་བདག་ཅག་གི་སེམས་སུ་གནས༌པ་མ་ཡིན་ནོ།།
1JO 2:1 བདག་གི་བུ་ཕྲུག༌རྣམས། ངས་ཁྱོད་ཅག་ལ་དོན་འདི་རྣམས་འབྲི་དོན་ནི་ཁྱོད་ཅག་གིས་སྡིག་པ་མི་བྱེད་པའི་ཕྱིར་ཡིན། གལ་ཏེ། སུ་ཞིག་གིས་སྡིག་པ་བྱས༌པ་ཡིན་ན། ཡབ་ཀྱི་དྲུང་དུ་བདག་ཅག་ལ་ཞུ་བ་འབུལ་མཁན་ཞིག་ཡོད་དེ། ཁོང་ནི་རྣམ་པར་དག་པ་ཡེ་ཤུ་མཱ་ཤི་ཀ་ལགས་སོ།།
1JO 2:2 ཁོང་ནི་བདག་ཅག་གི་སྡིག་པའི་ཕྱིར་ཉེས་ཆད་བསལ་བའི་མཆོད་རྫས་ཡིན་ཞིང༌། དེ་ནི་བདག་ཅག་ཁོ་ན་མ་ཡིན་པར་འཇིག་རྟེན་གྱི་མི་ཐམས་ཅད་ཀྱི་དོན་དུའང་ཡིན༌ནོ།།
1JO 2:3 གལ་ཏེ། བདག་ཅག་གིས་ཁོང་གི་བཀའ་རྣམས་བརྩི་སྲུང་བྱས་པ་ཡིན་ན། ཁོང་ཉིད་དངོས་གནས་ངོ་ཤེས་པ་གསལ་ལོ།།
1JO 2:4 གལ་ཏེ། མི་ཞིག་ན་རེ། ངས་ཁོང་ཉིད་ངོ་ཤེས་པ་ཡིན་ཞེས་སྨྲས་ཀྱང་ཁོང་གི་བཀའ་རྣམས་མི་བརྩི་ན། མི་དེ་ནི་རྫུན་སྨྲ་མཁན་ཡིན་ལ། བདེན་པ་ཉིད་ཀྱང་ཁོའི་སེམས་སུ་ཡོད་པ་མ་ཡིན།
1JO 2:5 སུ་ཞིག་གིས་ཁོང་གི་བཀའ་བསྲུངས་ན། དཀོན་མཆོག་གི་བྱམས་པ་ནི་ཁོའི་སེམས་ནང་དུ་དངོས་གནས་ཕུལ་དུ་བྱུང་བ༌ཡིན། དོན་འདི་ལས་བདག་ཅག་གིས་རང་ཉིད་དཀོན་མཆོག་གི་ནང་དུ་གནས་པ་ཤེས་སོ།།
1JO 2:6 མི་ཞིག་གིས་བདག་ནི་ཁོང་གི་ནང་དུ་གནས་པ་ཡིན་ཟེར༌ན། མི་དེས་སྐྱབས་མགོན་ཡེ་ཤུའི་སྤྱོད་ལམ་བཞིན་དུ་སྤྱོད་འོས༌སོ།།
1JO 2:7 སྙིང་ནས་བརྩེ་བའི་སྤུན་ཟླ༌རྣམས། ངས་ཁྱོད་ཅག་ལ་འབྲི་བཞིན་པ་ནི་བཀའ་གསར་པ་ཞིག་མིན༌ཏེ། ཐོག་མ་ནས་ཁྱོད་ཅག་ལ་ཐོབ་པའི་བཀའ་རྙིང་པ་དེ་ཡིན་ལ། བཀའ་རྙིང་པ་དེ་ནི་ཁྱོད་ཅག་གིས་ཐོས་མྱོང་བའི་བཀའ་ཡིན་ནོ།།
1JO 2:8 ཡང་གཅིག་བཤད༌ན། ངས་ཁྱོད་ཅག་ལ་འབྲི་བཞིན་པ་ནི་བཀའ་གསར་པ་ཞིག་ཡིན༌ལ། དེ་ནི་སྐྱབས་མགོན་ཡེ་ཤུ་དང་ཁྱོད་རྣམས་གང་གི་ཆ་ནས་ཀྱང་བདེན་པ་ཡིན་ནོ།། ཅིའི་ཕྱིར་ཞེ་ན། མུན་ནག་རིམ་བཞིན་ཡལ་ཞིང་འོད་ཟེར་བདེན་པ་དེ་སྔར་ནས་འཕྲོ་བཞིན་ཡོད་པའི་ཕྱིར་རོ།།
1JO 2:9 གལ་ཏེ། མི་ཞིག་གིས་རང་ཉིད་འོད་ཟེར་ནང་དུ་ཡོད་ཟེར་ནའང་། རང་གི་སྤུན་ཟླར་སྡང༌བ་ཡིན་ན། མི་དེ་ནི་སྔར་བཞིན་མུན་ནག་ནང་དུ་གནས་པ༌ཡིན་ནོ།།
1JO 2:10 རང་གི་སྤུན་ཟླར་གཅེས་མཁན་ནི་འོད་ཟེར་ནང་དུ་གནས་ཤིང་། ཁོ་ནི་ས་རུ་འགྱེལ་བའི་རྒྱུ་རྐྱེན་མེད།
1JO 2:11 འོན་ཀྱང་། རང་གི་སྤུན་ཟླར་སྡང་མཁན་ནི་མུན་ནག་ནང་དུ་གནས་ཤིང་མུན་ནག་ནང་དུ་སྤྱོད་པ་དང༌། རང་ཉིད་གང་དུ་འགྲོ་བའང་མི་ཤེས་སོ།། ཅིའི་ཕྱིར་ཞེ་ན། མུན་ནག་གིས་ཁོའི་མིག་ཟུང་ལོང་བར་བྱས༌པས་སོ།།
1JO 2:12 བུ་ཕྲུག༌རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱི་སྡིག་པ་ནི་སྐྱབས་མགོན་ཡེ་ཤུའི་མཚན་ལ་བརྟེན་ནས་བསལ་བའི་ཕྱིར་རོ།།
1JO 2:13 ཕ་ཡིན་པ་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱིས་ཐོག་མ་ཉིད་ནས་བཞུགས་པ་ཁོང་ཉིད་ངོ་ཤེས་པའི་ཕྱིར༌ཡིན། ན་གཞོན་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་བདུད་ངན་དེ་ལས་རྣམ་པར་རྒྱལ་བའི་ཕྱིར་ཡིན།
1JO 2:14 བུ་ཕྲུག༌རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱིས་ཡབ་ངོ་ཤེས་པའི་ཕྱིར༌ཡིན། ཕ་ཡིན་པ་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱིས་ཐོག་མ་ཉིད་ནས་བཞུགས་པ་ཁོང་ཉིད་ངོ་ཤེས་པའི་ཕྱིར་ཡིན། ན་གཞོན་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ལ་སྟོབས་དང་ལྡན་ཞིང་དཀོན་མཆོག་གི་བཀའ་རྟག་ཏུ་ཁྱོད་ཅག་གི་སེམས་སུ་བཞུགས༌པ་དང༌། ཁྱོད་ཅག་བདུད་ངན་དེ་ལས་རྣམ་པར་རྒྱལ་བའི་ཕྱིར༌རོ།།
1JO 2:15 འཇིག་རྟེན་འདི་དང་འཇིག་རྟེན་གྱི་དངོས་པོ་ཀུན་ལ་ཞེན་ཆགས༌པར་མི་བྱའོ། །གལ་ཏེ། མི་སུ་ཞིག་འཇིག་རྟེན་ལ་ཞེན་ཆགས་པར་གྱུར་ན། མི་དེའི་སེམས་སུ་ཡབ་ལ་གཅེས་པའི་སེམས་ནི་ཡོད་པ་མ་ཡིན་ནོ།།
1JO 2:16 ཅིའི་ཕྱིར་ཞེ་ན། འཇིག་རྟེན་གྱི་དོན་ཐམས་ཅད་དེ། ཤ་གཟུགས་ཀྱི་འདོད་ཆགས་དང་། མིག་གི་འདོད༌ཆགས། ཚེ་འདིའི་ང་རྒྱལ་བཅས་ནི་ཡབ་ནས་བྱུང་བ་མ་ཡིན་པར་འཇིག་རྟེན་ནས་བྱུང་བའི་ཕྱིར་རོ།།
1JO 2:17 འཇིག་རྟེན་འདི་དང་འཇིག་རྟེན་གྱི་འདོད་ཆགས་ཐམས་ཅད་འཇིག་པར་འགྱུར༌མོད། འོན་ཀྱང་དཀོན་མཆོག་གི་ཐུགས་དགོངས་བཞིན་སྒྲུབ་མཁན་ནི་གཏན་དུ་གནས་པར་འགྱུར་རོ།།
1JO 2:18 བུ་ཕྲུག༌རྣམས། ད་ནི་མཐའ་མའི་དུས་སྐབས་ཡིན༌ལ། སྐྱབས་མགོན་མཱ་ཤི་ཀའི་བསྟན་དགྲ་ཡོང་ངེས་པ་ཁྱོད་ཅག་གིས་ཐོས་མྱོང་བ༌ལྟར། ད་ལྟ་སྐྱབས་མགོན་མཱ་ཤི་ཀའི་བསྟན་དགྲ་མང་པོ་ཡོང་ཡོད་པས། བདག་ཅག་གིས་ད་ལྟ་ནི་མཐའ་མའི་དུས་སྐབས་ཡིན་པ་ཤེས།
1JO 2:19 དེ་དག་ནི་བདག་ཅག་གི་ཁྲོད་ནས་ཕྱི་རོལ་ཏུ་སོང་བ་ཡིན༌མོད། འོན་ཀྱང་བདག་ཅག་ལ་གཏོགས་པ་མ་ཡིན། དེ་རྣམས་བདག་ཅག་ལ་གཏོགས་པ་ཡིན་ན། སྔར་བཞིན་བདག་ཅག་དང་ལྷན་དུ་འགྲོག་ངེས༌མོད། འོན་ཀྱང་དེ་རྣམས་ཕྱི་རོལ་ཏུ་སོང་བས་བདག་ཅག་ལ་མི་གཏོགས་པ་གསལ་པོར་མངོན་ནོ།།
1JO 2:20 ཁྱོད་ཅག་ནི་དམ་པ་ཉིད་ཀྱིས་བྱུགས་པའི་མི་རྣམས་ཡིན་ལ། ཁྱོད་ཅག་ཐམས་ཅད་ཀྱིས་ཀྱང་དོན་འདི་ཤེས་སོ།།
1JO 2:21 བདག་གིས་ཁྱོད་རྣམས་ལ་འཕྲིན་ཡིག་འདི་འབྲི་དོན་ནི་ཁྱོད་ཅག་གིས་བདེན་པ་ཉིད་མི་ཤེས་པའི་རྐྱེན་གྱིས་མ་ཡིན༌པར། ཁྱོད་རྣམས་ཀྱིས་བདེན་པ་ཉིད་ཤེས་པར་མ་ཟད། བདེན་པ་ཉིད་ལས་རྫུན་མི་འབྱུང་བའང་ཤེས་པའི་ཕྱིར་ཡིན།
1JO 2:22 རྫུན་སྨྲ་མཁན་ནི་སུ་ཡིན་ཞེ་ན། ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་ཁས་མི་ལེན་པའི་མི་དེ་མ་ཡིན༌ནམ། དེའི་ཕྱིར། ཡབ་དང་སྲས་ཁོང་ཉིད་ཁས་མི་ལེན་པའི་མི་ནི་སྐྱབས་མགོན་མཱ་ཤི་ཀའི་བསྟན་དགྲ་ཡིན།
1JO 2:23 སྲས་ཁོང་ཉིད་ཁས་མི་ལེན་པའི་མི་དེ་ལ་ཡབ་ནི༌མེད། སྲས་ཁོང་ཉིད་ཁས་ལེན་པའི་མི་དེ་ལ་ཡབ་ནི་ཡོད་པའོ།།
1JO 2:24 ཁྱོད་ཅག་གི་སྐོར་གླེང་བ་ཡིན་ན། ཐོག་མ་ནས་ཐོས་པ་རྣམས་ཁྱོད་ཅག་གི་ནང་དུ་གནས་པར་གྱིས། གལ་ཏེ། ཐོག་མ་ནས་ཐོས་པ་དེ་རྣམས་ཁྱོད་ཅག་གི་ནང་དུ་གནས་པ་ཡིན་ན། ཁྱོད་ཅག་ནི་སྲས་ཁོང་ཉིད་ཀྱི་ནང་དུ་གནས་ཤིང་ཡབ་ཀྱི་ནང་དུའང་གནས༌པ་ཡིན།
1JO 2:25 སྐྱབས་མགོན་ཡེ་ཤུས་བདག་ཅག་ལ་ཞལ་བཞེས་གནང་བ་ནི་མཐའ་མེད་པའི་ཚེ་སྲོག་དེ་ཉིད་ཡིན་ནོ།།
1JO 2:26 བདག་གིས་ཁྱོད་ཅག་ལ་སྐད་ཆ་འདི་དག་འབྲི་དོན་ནི་ཁྱོད་ཅག་ལ་སླུ་བྲིད་གཏོང་མཁན་དེ་དག་ལ་དམིགས་ནས་སྨྲས་པའོ།།
1JO 2:27 སྐྱབས་མགོན་ཡེ་ཤུ་ནས་ཐོབ་པའི་བྱུགས་པར་མཛད་པ་དེ་ཉིད་ཁྱོད་ཅག་གི་སེམས་སུ་བཞུགས་ཡོད་པས། མི་སུས་ཀྱང་ཁྱོད་ཅག་ལ་བསླབ་བྱ་གཏོང་དགོས་པ་མ་ཡིན༌ཏེ། ཁོང་ལས་ཐོབ་པའི་བྱུགས་པར་མཛད་པ་དེ་ཉིད་ཀྱིས་དོན་ཐམས་ཅད་ཀྱི་སྐོར་ནས་ཁྱོད་ཅག་ལ་བསླབ་བྱ་གནང་ངེས་ཤིང་། བྱུགས་པར་མཛད་པ་དེ་ཉིད་ནི་བདེན་པ་ཡིན་པ་ལས་རྫུན་མིན༌ལ། བྱུགས་པར་མཛད་པ་དེ་ཉིད་ཀྱིས་བསླབ་བྱ་གནང་བ་བཞིན། ཁྱོད་ཅག་ནི་ཁོང་གི་ནང་དུ་གནས་པར་བྱའོ།།
1JO 2:28 བུ་ཕྲུག༌རྣམས། ཁྱོད་ཅག་ནི་སྐྱབས་མགོན་ཡེ་ཤུའི་ནང་དུ་གནས་པར་གྱིས། དེ་ལྟར་བྱས་ན། ཁོང་ཉིད་མངོན་པར་འགྱུར་བའི་དུས་སུ། བདག་ཅག་བག་ཕེབས་ཞུམ་མེད་ངང་སྡོད་ནུས་ལ། ཁོང་ཉིད་ཕེབས་ཡོང་བའི་དུས་སུ། ཁོང་གི་སྤྱན་དྲུང་དུ་བདག་ཅག་ངོ་གནོང་བར་མི་འགྱུར་རོ།།
1JO 2:29 གལ་ཏེ། ཁྱོད་ཅག་གིས་ཁོང་ནི་དྲང་བདེན་ཡིན་པ་ཤེས༌ན། དྲང་བདེན་གྱིས་སྒྲུབ་མཁན་ཐམས་ཅད་ནི་ཁོང་ལས་སྐྱེས་པའང་ཤེས་སོ།།
1JO 3:1 ལྟོས་དང་། ཡབ་ཀྱིས་བདག་ཅག་ལ་གནང་བའི་ཐུགས་བརྩེ་ནི་ཅི་འདྲ་ཆེ་ཨང༌། བདག་ཅག་ནི་དཀོན་མཆོག་གི་བུ་དང་བུ་མོར་འབོད༌ཅིང༌། བདག་ཅག་ནི་དངོས་གནས་ཁོང་གི་བུ་ཕྲུག་ཡིན་ནོ།། འཇིག་རྟེན་གྱི་མི་རྣམས་ཀྱིས་བདག་ཅག་ངོ་མི་ཤེས་པའི་རྒྱུ་མཚན་ནི། ཁོ་རྣམས་ཀྱིས་ཁོང་ཉིད་ངོ་མ་ཤེས་པའི་རྐྱེན་ཡིན།
1JO 3:2 སྙིང་ནས་བརྩེ་བའི་སྤུན་ཟླ་རྣམས། ད་ལྟ་བདག་ཅག་ནི་དཀོན་མཆོག་གི་བུ་ཕྲུག་ཡིན༌ལ། མ་འོངས་པར་ཅི་འདྲ་ཡིན་པ་ད་དུང་གསལ་པོར་མ་མངོན་མོད། འོན་ཀྱང་སྐྱབས་མགོན་ཡེ་ཤུ་མངོན་སུམ་དུ་ཕེབས་པའི་དུས༌སུ། བདག་ཅག་གིས་ཁོང་ཉིད་ཇི་ལྟར་ཡིན་པ་དེ་ལྟར་མཐོང་བར་འགྱུར་བས། བདག་ཅག་ནི་ཁོང་དང་མཚུངས་པར་འགྱུར་བ་བདག་ཅག་གིས་ཤེས་སོ།།
1JO 3:3 ཁོང་ལ་དེ་ལྟ་བུའི་རེ་སྨོན་བཅང་མཁན་ཐམས་ཅད་ཀྱིས་ཁོང་ཉིད་གཙང་མ་ཡིན་པ་བཞིན་རང་ཉིད་ཀྱང་གཙང་མར་བྱེད་པའོ།།
1JO 3:4 སྡིག་པ་བྱས་དང་བྱེད་བཞིན་ཡོད་ན། དེ་ནི་བཀའ་ཁྲིམས་དང་འགལ་བ་ཡིན༌ལ། བཀའ་ཁྲིམས་དང་འགལ་བ་ཡིན་ན། དེ་ནི་སྡིག་པ་ཡིན་ནོ།།
1JO 3:5 སྐྱབས་མགོན་ཡེ་ཤུ་མངོན་མྱོང་ཞིང་། དེ་ནི་མིའི་སྡིག་པ་བསལ་ཆེད་ཡིན་པ་ཁྱོད་ཅག་གིས་ཤེས་པ་ཡིན། སྐྱབས་མགོན་ཡེ་ཤུར་སྡིག་པ་ཅི་ཡང་མེད།
1JO 3:6 སུ་ཞིག་ཁོང་གི་ནང་དུ་གནས་པ་ཡིན་ན། དེ་ཡིས་རྟག་ཏུ་སྡིག་པ་མི་བྱེད༌ལ། སུ་ཞིག་གིས་རྟག་ཏུ་སྡིག་པ་བྱེད་པ་ཡིན་ན། དེ་ཡིས་ཁོང་ཉིད་མཐོང་མ་མྱོང་ཞིང་ངོ་ཡང་མི་ཤེས༌སོ།།
1JO 3:7 བུ་ཕྲུག༌རྣམས། མིའི་སླུ་བྲིད་ཀྱི་འོག་ཏུ་འཚུད༌པར་མི་བྱའོ།། དྲང་བདེན་གྱིས་ལས་བསྒྲུབས་ཤིང་སྒྲུབ་བཞིན་པ་ནི་དྲང་བདེན་ཅན་ཡིན་ཏེ། སྐྱབས་མགོན་ཡེ་ཤུ་དྲང་བདེན་ཡིན་པ་བཞིན་ནོ།།
1JO 3:8 སྡིག་པ་བྱས་ཤིང་བྱེད་བཞིན་པ་ནི་བདུད་ཀྱི་ཁོངས་སུ་གཏོགས། ཅིའི་ཕྱིར་ཞེ་ན། བདུད་ཀྱིས་ཐོག་མ་ནས་སྡིག་པ་བྱས་ཤིང་བྱེད་བཞིན་པས་སོ། །དཀོན་མཆོག་གི་སྲས་མངོན་པར་གྱུར་པ་ནི། བདུད་ཀྱི་ལས་རྣམས་འཇོམས་པའི་ཕྱིར་ཡིན།
1JO 3:9 སུ་ཞིག་དཀོན་མཆོག་ནས་སྐྱེས་པ་ཡིན་ན། དེ་ཡིས་རྟག་ཏུ་སྡིག་པ་མི་བྱེད། ཅིའི་ཕྱིར་ཞེ་ན། དཀོན་མཆོག་གི་ས་བོན་ནི་མི་དེའི་སེམས་སུ་བཞུགས་པས་སོ།། མི་དེ་ནི་དཀོན་མཆོག་ནས་སྐྱེས་པའི་རྐྱེན་གྱིས། དེ་ཡིས་རྟག་ཏུ་སྡིག་པ་བྱེད་མི་སྲིད།
1JO 3:10 དེ་ལས་སུ་ཞིག་ནི་དཀོན་མཆོག་གི་བུ་ཕྲུག་ཡིན་པ་དང་། གང་ཞིག་ནི་བདུད་ཀྱི་བུ་ཕྲུག་ཡིན་པ་གསལ་པོར་མངོན་ཏེ། དྲང་བདེན་གྱི་ལས་མི་བྱེད་པ་ནི་དཀོན་མཆོག་ལ་མི་གཏོགས་ཤིང་། རང་གི་སྤུན་ཟླར་མི་གཅེས་པའང་དེ་བཞིན་ཡིན་ནོ།།
1JO 3:11 བདག་ཅག་གིས་ཕན་ཚུན་ལ་བྱམས་ཤིང་གཅེས་དགོས་སོ།། དེ་ནི་ཁྱོད་ཅག་གིས་ཐོག་མ་ནས་ཐོས་པའི་འཕྲིན་ཡིན།
1JO 3:12 ཀཱ་ཡན་བཞིན་དུ་བྱ་མི་རུང་སྟེ། ཁོ་ནི་བདུད་ངན་དེ་ལ་གཏོགས་པས་རང་གི་གཅུང་པོ་བསད། གཅུང་པོ་བསད་པའི་རྒྱུ་མཚན་ཅི་ཞེ་ན། ཁོའི་སྤྱོད་ལམ་ངན་ཞིང་གཅུང་པོའི་སྤྱོད་ལམ་དྲང་བའི་ཕྱིར་ཡིན།
1JO 3:13 སྤུན་ཟླ༌རྣམས། འཇིག་རྟེན་གྱི་མི་རྣམས་ཁྱོད་ཅག་ལ་སྡང་བ་ཡིན་ན། དེ་ནི་ཡ་མཚན་དུ་འདོད་པར་མི་བྱའོ།།
1JO 3:14 བདག་ཅག་གིས་སྤུན་ཟླ་གཅེས་སུ་བཟུང་བའི་ཕྱིར། འཆི་བ་ནས་གསོན་པའི་ནང་དུ་ཞུགས་པ་ཤེས་ཤིང་། གཅེས་སེམས་མེད་ན་སྔར་བཞིན་འཆི་བའི་ནང་དུ་གནས་པ་ཡིན།
1JO 3:15 རང་གི་སྤུན་ཟླར་སྡང་མཁན་ཐམས་ཅད་ནི་ལག་དམར༌ཡིན། ལག་དམར་རྣམས་ཀྱི་སེམས་ནང་དུ་མཐའ་མེད་པའི་ཚེ་སྲོག་མེད་པ་ཁྱོད་ཅག་གིས་ཤེས༌པའོ།།
1JO 3:16 སྐྱབས་མགོན་ཡེ་ཤུས་བདག་ཅག་གི་ཆེད་དུ་རང་སྲོག་བློས་བཏང་བའི་དོན་དེ་ལས། བདག་ཅག་གིས་བྱམས་པ་ནི་ཅི་ཡིན་པ་ཤེས་པས། བདག་ཅག་གིས་ཀྱང་སྤུན་ཟླའི་ཆེད་དུ་རང་སྲོག་བློས་གཏོང་འོས་སོ།།
1JO 3:17 སུ་ཞིག་ལ་འཇིག་རྟེན་གྱི་རྒྱུ་ནོར་ཡོད་ཅིང་སྤུན་ཟླའི་དགོས་མཁོ་མཐོང་ཡང་སྙིང་རྗེ་མི་སྐྱེས༌ན། དཀོན་མཆོག་གི་བྱམས་པ་ནི་ཁོའི་སེམས་ནང་དུ་ཅི་ལྟར་གནས༌སམ།
1JO 3:18 བུ་ཕྲུག༌རྣམས། བདག་ཅག་གིས་ཕན་ཚུན་གཅེས་སུ་འཛིན་པ་ནི་ངག་ནས་སྨྲ་བ་ཙམ་མ་ཡིན་པར་བྱ་སྤྱོད་དང་གཞུང་དྲང་གི་ཐད་ནས་མཚོན༌དགོས་ལ།
1JO 3:19 དོན་དེ་ལས་བདག་ཅག་ནི་བདེན་པ་ཉིད་ལ་གཏོགས་པ་ཡིན་པ་ཤེས་པར་འགྱུར་ཞིང་། བདག་ཅག་གི་སེམས་ནི་དཀོན་མཆོག་གི་སྤྱན་དྲུང་དུ་བདེ་བར་གནས་ཐུབ་ངེས།
1JO 3:20 གལ་ཏེ། བདག་ཅག་གི་སེམས་ཀྱིས་བདག་ཅག་ལ་གཤེ་གཤེ་གཏོང་བ་ཡིན་ན། དཀོན་མཆོག་ནི་བདག་ཅག་གི་སེམས་ལས་ཀྱང་ཆེན་པོ་ཡིན་ལ། མི་མཁྱེན༌པའི་དོན་ཅི་ཡང་མེད་དོ།།
1JO 3:21 སྙིང་ནས་བརྩེ་བའི་སྤུན་ཟླ༌རྣམས། གལ་ཏེ། བདག་ཅག་གི་སེམས་ཀྱིས་བདག་ཅག་ལ་གཤེ་གཤེ་མི་གཏོང༌ན། བདག་ཅག་དཀོན་མཆོག་གི་དྲུང་དུ་བག་ཕེབས་ཞུམ་མེད་ངང་གནས་ཐུབ་པར་མ་ཟད།
1JO 3:22 བདག་ཅག་གིས་ཁོང་གི་བཀའ་རྣམས་སྲུང་ཞིང་ཁོང་གི་སྤྱན་སྔར་ཐུགས་དགྱེས་པའི་དོན་རྣམས་སྒྲུབ་པ་ཡིན་པས། བདག་ཅག་གིས་གང་ཞིག་ཞུས་པ་ཁོང་ནས་འཐོབ་པར༌འགྱུར་རོ།།
1JO 3:23 དཀོན་མཆོག་གི་བཀའ་ནི་བདག་ཅག་གིས་ཁོང་གི་སྲས་ཡེ་ཤུ་མཱ་ཤི་ཀའི་མཚན་ལ་དད་པ་བྱེད་པ༌དང༌། ཁོང་གིས་བདག་ཅག་ལ་གནང་བའི་བཀའ་བཞིན་དུ་ཕན་ཚུན་ལ་བྱམས་ཤིང་གཅེས་པར་བྱེད་པ་དེ་ཡིན།
1JO 3:24 དཀོན་མཆོག་གི་བཀའ་རྣམས་བརྩི་སྲུང་བྱེད་མཁན་ནི་དཀོན་མཆོག་གི་ནང་དུ་གནས་ཤིང༌། དཀོན་མཆོག་ཀྱང་མི་དེའི་ནང་དུ་བཞུགས་པ་ཡིན། བདག་ཅག་ལ་གནང་བའི་དམ་པའི་ཐུགས་ཉིད་ལ་བརྟེན་ནས། བདག་ཅག་གིས་དཀོན་མཆོག་ནི་བདག་ཅག་གི་ནང་དུ་བཞུགས་པ་ཤེས་སོ།།
1JO 4:1 སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་སེམས་ཉིད་ཐམས་ཅད་ལ་ཡིད་ཆེས་པར་མི་བྱའོ།། སེམས་ཉིད་དེ་དག་ནི་དཀོན་མཆོག་ནས་བྱུང་མིན་ལ་ཚོད་བརྟག་བྱ་དགོས། རྒྱུ་མཚན་ནི་འཇིག་རྟེན་དུ་ལུང་སྟོན་པ་རྫུས་མ་མང་པོ་བྱུང་ཡོད་པས༌སོ།།
1JO 4:2 སེམས་ཉིད་གང་ཞིག་གིས་ཡེ་ཤུ་མཱ་ཤི་ཀ་ནི་མི་ཡི་གཟུགས་པོར་གྱུར་ནས་བྱོན་པ་ཁས་ལེན་ན། སེམས་ཉིད་དེ་ནི་དཀོན་མཆོག་ལས་བྱུང་བ་ཡིན། དེ་ལས་ཁྱོད་ཅག་གིས་དཀོན་མཆོག་གི་ཐུགས་ཉིད་ངོ་ཤེས་ཐུབ་པར༌འགྱུར་རོ།།
1JO 4:3 སེམས་ཉིད་གང་ཞིག་གིས་སྐྱབས་མགོན་ཡེ་ཤུ་ཁས་མི་ལེན་ན། སེམས་ཉིད་དེ་ནི་དཀོན་མཆོག་ནས་བྱུང་བ་མ་ཡིན༌པར། སྐྱབས་མགོན་མཱ་ཤི་ཀ་དགྲ་རུ་འཛིན་པའི་བསྟན་དགྲའི་སེམས་ཉིད་ཡིན། ཁྱོད་ཅག་གིས་སྔར་ནས་བསྟན་དགྲ་དེ་ཡོང་ངེས་པ་ཐོས་ཤིང་། ད་ལྟ་འཇིག་རྟེན་དུ་ཡོང་ཟིན་ནོ།།
1JO 4:4 བུ་ཕྲུག༌རྣམས། ཁྱོད་ཅག་ནི་དཀོན་མཆོག་ལ་གཏོགས་ཤིང་བསྟན་དགྲ་དེ་དག་ལས་རྣམ་པར་རྒྱལ་ལོ།། ཅིའི་ཕྱིར་ཞེ་ན། ཁྱོད་ཅག་གི་ནང་དུ་བཞུགས་པ་དེ་ཉིད་ནི་འཇིག་རྟེན་དུ་ཡོད་པ་དེ་ལས་ཀྱང་ཆེན་པོ་ཡིན་ནོ།།
1JO 4:5 དེ་དག་ནི་འཇིག་རྟེན་ལ་གཏོགས་པས་འཇིག་རྟེན་གྱི་དོན་འཆད་པ་དང་། འཇིག་རྟེན་གྱི་མི་རྣམས་ཀྱིས་ཀྱང་དེ་དག་གི་ངག་ལ་ཉན་པ་ཡིན།
1JO 4:6 ངེད་ཅག་ནི་དཀོན་མཆོག་ལ་གཏོགས་པས་དཀོན་མཆོག་ངོ་ཤེས་པ་དག་གིས་ངེད་ཅག་གི་ངག་ལ་ཉན་པ༌དང༌། དཀོན་མཆོག་ལ་མི་གཏོགས་པ་རྣམས་ཀྱིས་ངེད་ཅག་གི་ངག་ལ་མི་ཉན་ནོ།། དེ་ལས་བདག་ཅག་གིས་གང་ཞིག་བདེན་པ་ཉིད་ཀྱི་སེམས་ཉིད་དང་གང་ཞིག་རྫུན་གྱི་སེམས་ཉིད་ཡིན་པ་ཤེས་ནུས་སོ།།
1JO 4:7 སྙིང་ནས་བརྩེ་བའི་སྤུན་ཟླ༌རྣམས། བདག་ཅག་གིས་ཕན་ཚུན་ལ་བྱམས་ཤིང་གཅེས་འོས་སོ།། ཅིའི་ཕྱིར་ཞེ་ན། བྱམས་པ་ནི་དཀོན་མཆོག་ནས་བྱུང་བས༌སོ། །གཅེས་སེམས་ཡོད་པ་ཐམས་ཅད་ནི་དཀོན་མཆོག་ནས་སྐྱེས་ཤིང་དཀོན་མཆོག་ངོ་ཤེས་པ་ཡིན།
1JO 4:8 གཅེས་སེམས་མེད་པ་དེས་དཀོན་མཆོག་ངོ་མི་ཤེས་སོ།། ཅིའི་ཕྱིར་ཞེ་ན། དཀོན་མཆོག་ནི་བྱམས་པ་ཡིན་པའི་ཕྱིར་རོ།།
1JO 4:9 དཀོན་མཆོག་གིས་རང་ཉིད་ཀྱི་སྲས་གཅིག་པུ་འཇིག་རྟེན་དུ་མངགས་ཤིང་། དེ་ནི་བདག་ཅག་ཁོང་ལ་བརྟེན་ནས་གསོན་པོར་གནས་པའི་ཕྱིར་ཡིན་ལ། དེ་ལས་དཀོན་མཆོག་གི་བྱམས་པ་བདག་ཅག་ལ་མངོན༌པ་ཡིན།
1JO 4:10 བདག་ཅག་གིས་དཀོན་མཆོག་ལ་གཅེས་པ་མ་ཡིན་པར་ཁོང་གིས་བདག་ཅག་ལ་བྱམས་པ་ཡིན༌ཏེ། ཁོང་གིས་རང་ཉིད་ཀྱི་སྲས་མངགས་ནས་བདག་ཅག་གི་སྡིག་པའི་ཉེས་ཆད་བསལ་བའི་མཆོད་རྫས་སུ་མཛད་ཅིང་། དེ་ནི་དཀོན་མཆོག་གི་བྱམས་པ་ཡིན།
1JO 4:11 སྙིང་ནས་བརྩེ་བའི་སྤུན་ཟླ༌རྣམས། དཀོན་མཆོག་གིས་བདག་ཅག་ལ་འདི་ལྟར་བྱམས་པས། བདག་ཅག་གིས་ཀྱང་ཕན་ཚུན་ལ་བྱམས་ཤིང་གཅེས་འོས་སོ།།
1JO 4:12 སུ་ཞིག་གིས་ཀྱང་དཀོན་མཆོག་མཐོང་མ་མྱོང༌མོད། འོན་ཀྱང་བདག་ཅག་གིས་ཕན་ཚུན་ལ་བྱམས་ཤིང་གཅེས༌པ་ཡིན་ན། དཀོན་མཆོག་བདག་ཅག་གི་ནང་དུ་བཞུགས་ཡོད་ལ། ཁོང་གི་བྱམས་པ་ནི་བདག་ཅག་གི་ནང་དུ་ཆ་ཡོངས་སུ་ཚང་བའོ།།
1JO 4:13 དཀོན་མཆོག་གིས་ཁོང་གི་ཐུགས་ཉིད་བདག་ཅག་ལ་གནང༌བས། བདག་ཅག་དཀོན་མཆོག་གི་ནང་དུ་གནས་པ་དང་། ཁོང་ཉིད་ཀྱང་བདག་ཅག་གི་ནང་དུ་བཞུགས་པ་བདག་ཅག་གིས་ཤེས༌སོ།།
1JO 4:14 ཡབ་ཀྱིས་ཁོང་གི་སྲས་འཇིག་རྟེན་གྱི་སྐྱབས་མགོན་དུ་མངགས༌པ་ནི། ངེད་ཅག་གིས་དངོས་སུ་མཐོང་ཞིང་བདེན་དཔང་ཡང་བྱེད་པ་ཡིན།
1JO 4:15 སུ་ཞིག་གིས་སྐྱབས་མགོན་ཡེ་ཤུ་ནི་དཀོན་མཆོག་གི་སྲས་ཡིན་པར་ཁས་ལེན༌ན། དཀོན་མཆོག་མི་དེའི་ནང་དུ་བཞུགས་ཤིང་། མི་དེ་ཡང་དཀོན་མཆོག་གི་ནང་དུ་གནས་སོ།།
1JO 4:16 དཀོན་མཆོག་གིས་བདག་ཅག་ལ་བྱམས་པ་ནི་བདག་ཅག་གིས་ཤེས་ཤིང་ཡིད་ཆེས་ཀྱང་བྱེད༌པ་དང་། དཀོན་མཆོག་ནི་བྱམས་པ་ཡིན། སུ་ཞིག་བྱམས་པའི་ནང་དུ་གནས་པ་ཡིན་ན། དཀོན་མཆོག་གི་ནང་དུའང་གནས་པ་ཡིན༌ལ། དཀོན་མཆོག་ཀྱང་མི་དེའི་ནང་དུ་བཞུགས༌པ་ཡིན།
1JO 4:17 དེ་ལྟར་བྱམས་པ་ནི་བདག་ཅག་གི་ནང་དུ་ཆ་ཡོངས་སུ་ཚང་བ་ཡིན་པས། མ་འོངས་པའི་ལེགས་ཉེས་ཀྱི་ཁྲིམས་ཐག་གཅོད་པའི་ཉིན་ལ་བདག་ཅག་བག་ཕེབས་ཞུམ་མེད་ངང་སྡོད་ནུས་སོ།། ཅིའི་ཕྱིར་ཞེ་ན། ཁོང་ནི་ཅི་ལྟར་ཡིན་པ་བཞིན་བདག་ཅག་ཀྱང་འཇིག་རྟེན་འདིར་དེ་ལྟར་ཡིན་པའི་ཕྱིར་རོ།།
1JO 4:18 བྱམས་པའི་ནང་དུ་འཇིགས་པ་མེད་ལ་བྱམས་པ་ནི་ཆ་ཡོངས་སུ་ཚང་བས། འཇིགས་པ་ཐམས་ཅད་བསལ་བ་ཡིན། འཇིགས་པ་ནི་ཉེས་ཆད་དང་འབྲེལ་བ་ཡོད་པས། འཇིགས་པ་ཡོད་པའི་མི་ནི་བྱམས་པའི་ནང་དུ་ཆ་ཡོངས་སུ་ཚང་བ་མ་ཡིན་ནོ།།
1JO 4:19 བདག་ཅག་གིས་བྱམས་ཤིང་གཅེས་པ་སྟེ། རྒྱུ་མཚན་ནི་ཐོག་མར་དཀོན་མཆོག་གིས་བདག་ཅག་ལ་བྱམས་པའི་ཕྱིར་རོ།།
1JO 4:20 གལ་ཏེ་མི་ཞིག་ན་རེ། བདག་གིས་དཀོན་མཆོག་ལ་གཅེས་ཞེས་སྨྲ་ཡང་རང་གི་སྤུན་ཟླར་སྡང་བ་ཡིན་ན། མི་དེ་ནི་རྫུན་སྨྲ་མཁན་ཡིན། རྒྱུ་མཚན་ནི་མིག་གིས་མཐོང་བའི་སྤུན་ཟླར་གཅེས༌པ་མིན་ན། མཐོང་མ་མྱོང་བའི་དཀོན་མཆོག་ལའང་གཅེས་མི་སྲིད།
1JO 4:21 དཀོན་མཆོག་ལ་གཅེས་པ་ཡིན་ན་སྤུན་ཟླ་ལའང་གཅེས་དགོས་སོ།། འདི་ནི་དཀོན་མཆོག་ནས་བདག་ཅག་ལ་ཐོབ་པའི་བཀའ་ཡིན༌ནོ།།
1JO 5:1 ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་དད་པ་བྱེད་མཁན་ཐམས་ཅད་དཀོན་མཆོག་ནས་སྐྱེས་པ་དང་། རང་ཉིད་སྐྱེས་ཡུལ་གྱི་དཀོན་མཆོག་ལ་གཅེས་མཁན་ཐམས་ཅད་ཀྱིས་དཀོན་མཆོག་ནས་སྐྱེས་པ་གཞན་ལའང་གཅེས་པའོ།།
1JO 5:2 བདག་ཅག་གིས་དཀོན་མཆོག་ལ་གཅེས་ཤིང་ཁོང་གི་བཀའ་རྣམས་ཀྱང་སྲུང༌བ་ཡིན་ན། དེ་ལས་བདག་ཅག་གིས་དཀོན་མཆོག་གི་བུ་ཕྲུག་ལ་བྱམས་ཤིང་གཅེས་པའང་ཤེས།
1JO 5:3 བདག་ཅག་གིས་དཀོན་མཆོག་གི་བཀའ་རྣམས་སྲུང་བ་ནི་ཁོང་ལ་གཅེས་པ་ཡིན༌ལ། ཁོང་གི་བཀའ་རྣམས་ནི་སྲུང་དཀའ་བ་ཞིག་མིན།
1JO 5:4 རྒྱུ་མཚན་ནི་དཀོན་མཆོག་ནས་སྐྱེས་པ་ཐམས་ཅད་འཇིག་རྟེན་ལས་རྣམ་པར་རྒྱལ༌བ་ཡིན་པས་སོ།། བདག་ཅག་འཇིག་རྟེན་ལས་རྒྱལ་བའི་རྒྱུ་ནི་བདག་ཅག་གི་དད་པ་དེ་ཡིན།
1JO 5:5 འཇིག་རྟེན་ལས་རྣམ་པར་རྒྱལ་མཁན་ནི་སུ་ཡིན་ཞེ་ན། སྐྱབས་མགོན་ཡེ་ཤུ་ནི་དཀོན་མཆོག་གི་སྲས་ཡིན་པར་དད་པ་བྱེད་མཁན་རྣམས་ཡིན་ནོ།།
1JO 5:6 ཆུ་དང་ཁྲག་ལ་བརྟེན་ནས་བྱོན་པ་དེ་ཉིད་ནི་ཡེ་ཤུ་མཱ་ཤི་ཀ་ཡིན། དེ་ནི་ཆུ་ཁོ་ནར་བརྟེན་པ་མ་ཡིན་པར། ཆུ་དང་ཁྲག་གཉིས་ལ་བརྟེན་པ༌དང༌། དམ་པའི་ཐུགས་ཉིད་ཀྱིས་དོན་དེར་བདེན་དཔང་མཛད་པའོ།། ཅིའི་ཕྱིར་ཞེ་ན། དམ་པའི་ཐུགས་ཉིད་ནི་བདེན་པ་ཉིད་ཡིན་པའི་ཕྱིར་རོ།།
1JO 5:7 ཡང་དོན་དེར་བདེན་དཔང་གསུམ་ཡོད༌དེ།
1JO 5:8 དམ་པའི་ཐུགས་ཉིད་དང༌། ཆུ། ཁྲག་བཅས་ཡིན༌ལ། དེ་གསུམ་ནི་ཕན་ཚུན་འགལ་བ་མིན་ནོ།།
1JO 5:9 བདག་ཅག་གིས་མིའི་བདེན་དཔང་དང་དུ་ལེན་པ་ཡིན་ན། དཀོན་མཆོག་གི་བདེན་དཔང་དེ་བས་ཀྱང་དང་དུ་ལེན་འོས་སོ།། རྒྱུ་མཚན་ནི་དཀོན་མཆོག་གི་བདེན་དཔང་ནི་རང་ཉིད་ཀྱི་སྲས་ལ་མཛད་པའི་ཕྱིར༌རོ།།
1JO 5:10 དཀོན་མཆོག་གི་སྲས་ལ་དད་པ་བྱེད་མཁན་གྱི་སེམས་སུ་བདེན་དཔང་འདི་ཉིད་ཡོད་ལ། དཀོན་མཆོག་ལ་དད་པ་མི་བྱེད་པའི་སེམས་སུ་དཀོན་མཆོག་ནི་ཞལ་རྫུན་གསུང་མཁན་དུ་བརྩིས་པའོ།། ཅིའི་ཕྱིར་ཞེ་ན། དཀོན་མཆོག་གིས་རང་ཉིད་ཀྱི་སྲས་ལ་མཛད་པའི་བདེན་དཔང་དེ་ཁས་མ་བླངས་པའི་ཕྱིར་རོ།།
1JO 5:11 བདེན་དཔང་ནི་འདི་ལྟ་སྟེ། དཀོན་མཆོག་གིས་བདག་ཅག་ལ་མཐའ་མེད་པའི་ཚེ་སྲོག་གནང་བ༌ཡིན་ལ། མཐའ་མེད་པའི་ཚེ་སྲོག་འདི་ཡང་ཁོང་གི་སྲས་ཀྱི་ནང་དུ་བཞུགས་པ་ཡིན།
1JO 5:12 མི་སུ་ལའང་དཀོན་མཆོག་གི་སྲས་ཡོད་ན་མཐའ་མེད་པའི་ཚེ་སྲོག་དེ་ཉིད་ཡོད་ལ། དཀོན་མཆོག་གི་སྲས་མེད་ན་མཐའ་མེད་པའི་ཚེ་སྲོག་དེ་ཡང་མེད་དོ།།
1JO 5:13 བདག་གིས་དཀོན་མཆོག་གི་སྲས་ཀྱི་མཚན་ལ་དད་པ་བྱེད་མཁན་ཁྱོད་རྣམས་ལ་དོན་འདི་དག་འབྲི་དོན༌ནི། ཁྱོད་རྣམས་ཀྱིས་རང་ཉིད་ལ་མཐའ་མེད་པའི་ཚེ་སྲོག་ཡོད་པ་ཤེས་པའི་ཆེད་དུ༌ཡིན་ནོ།།
1JO 5:14 བདག་ཅག་གིས་ཁོང་གི་ཐུགས་དགོངས་ལྟར་ཅི་ཞིག་ཞུས་པ་ཡིན་ན། ཁོང་གིས་བདག་ཅག་གི་ཞུ་བ་ལ་གསན་པ་ཡིན༌ཏེ། འདི་ནི་བདག་ཅག་གིས་ཁོང་ལ་བཅངས་པའི་བག་ཕེབས་ཞུམ་མེད་ཀྱི་སེམས་ཡིན།
1JO 5:15 བདག་ཅག་གིས་ཁོང་ལ་ཅི་ཞིག་ཞུས་པ་ཁོང་གིས་གསན་ངེས་པ་ཤེས༌ན། ཁོང་ལ་ཞུས་པ་རྣམས་མི་ཐོབ་པ་ཅི་ཡང་མེད་པའང་བདག་ཅག་གིས་ཤེས༌སོ།།
1JO 5:16 གལ་ཏེ། སུ་ཞིག་གིས་རང་གི་སྤུན་ཟླས་འཆི་ལམ་དུ་མི་འཇུག་པའི་སྡིག་པ་བྱས་པ་མཐོང༌ཚེ། ཁོའི་དོན་དུ་གསོལ་བ་འདེབས་དགོས༌ཤིང༌། དཀོན་མཆོག་གིས་དེ་ལ་ཚེ་སྲོག་གནང་ངེས༌སོ།། འཆི་ལམ་དུ་འཇུག་པའི་སྡིག་པ་ཡོད་པ་ལ། དེའི་དོན་དུ་གསོལ་བ་འདེབས་དགོས་ཞེས་བདག་གིས་སྨྲས་པ་མ་ཡིན།
1JO 5:17 དྲང་བདེན་མིན་པའི་ལས་ཐམས་ཅད་ནི་སྡིག་པ་ཡིན༌ལ། འཆི་ལམ་དུ་མི་འཇུག་པའི་སྡིག་པའང་ཡོད༌དོ།།
1JO 5:18 སུ་ཞིག་དཀོན་མཆོག་ནས་སྐྱེས་པ་ཡིན་ན། དེ་ཡིས་རྟག་ཏུ་སྡིག་པ་མི་བྱེད་པ་ནི་བདག་ཅག་གིས་ཤེས་ལ། དཀོན་མཆོག་ནས་འཁྲུངས་པ་ཁོང་གིས་མི་དེ་བསྲུང་ངེས་ཤིང༌། བདུད་ངན་ཀྱིས་མི་དེ་ལ་གནོད་འཚེ་བྱ་མི་ནུས་སོ།།
1JO 5:19 བདག་ཅག་ནི་དཀོན་མཆོག་ལ་གཏོགས་ཤིང༌། འཇིག་རྟེན་ཡོངས་རྫོགས་བདུད་ངན་གྱི་དབང་འོག་ཏུ་ཡོད་པ་བདག་ཅག་གིས་ཤེས༌པ་ཡིན།
1JO 5:20 དཀོན་མཆོག་གི་སྲས་ཕེབས་ཟིན་ཅིང་། བདེན་པའི་དཀོན་མཆོག་ཉིད་ཤེས་པའི་ཕྱིར། བདག་ཅག་ལ་ཤེས་རབ་གནང་བའང་བདག་ཅག་གིས་ཤེས༌པ་དང་། བདག་ཅག་ནི་བདེན་པའི་དཀོན་མཆོག་ཉིད་ཀྱི་ནང་དུ་གནས་ཤིང་། ཁོང་གི་སྲས་ཡེ་ཤུ་མཱ་ཤི་ཀའི་ནང་དུའང་གནས༌པ་ཡིན། ཁོང་ནི་དཀོན་མཆོག་བདེན་པ་དང་མཐའ་མེད་པའི་ཚེ་སྲོག་ཀྱང་ཡིན༌ནོ།།
1JO 5:21 བུ་ཕྲུག༌རྣམས། ཁྱོད་ཅག་གིས་རང་ཉིད་བསྲུངས་ནས་སྐུ་འདྲ་དང་རིང་དུ་གྱེས་པར་བྱའོ།། །།
2JO 1:1 དེ་ཡང་དཀོན་མཆོག་གིས་བདམས་པའི་བུད་མེད་དང་ཁོ་མོའི་བུ་ཕྲུག་རྣམས་ལ་ཆོས་ཚོགས་ཀྱི་རྒན་པོ་བདག་གིས་འཕྲིན་ཡིག་འདི་སྤྲིངས་པ་སྟེ། བདག་གིས་ཁྱོད་རྣམས་དངོས་གནས་གཅེས་སུ་འཛིན་པ་དང་། བདེན་པ་ཉིད་རྟོགས་མཁན་ཐམས་ཅད་ཀྱིས་ཀྱང་ཁྱོད་རྣམས་གཅེས་སུ་འཛིན་ནོ།།
2JO 1:2 ཁྱོད་རྣམས་གཅེས་སུ་འཛིན་པ་ནི་བདེན་པ་ཉིད་ཀྱི་ཕྱིར་ཡིན༌ལ། བདེན་པ་ཉིད་ནི་བདག་ཅག་གི་ནང་དུ་གནས་ཤིང་། རྟག་ཏུ་བདག་ཅག་དང་ལྷན་དུ་བཞུགས་སོ།།
2JO 1:3 ཡབ་དཀོན་མཆོག་དང་ཁོང་གི་སྲས་ཡེ་ཤུ་མཱ་ཤི་ཀ་ལས་བྱམས་དང་སྙིང༌རྗེ། ཞི་བདེ་བཅས་འབྱུང་ཞིང་། བདེན་པ་དང་གཅེས་སེམས་ཀྱི་ངང་ནས་བདག་ཅག་དང་ལྷན་དུ་གནས་པར༌ངེས་སོ།།
2JO 1:4 ཁྱོད་ཀྱི་བུ་ཕྲུག་འགའ་ཞིག་གིས་བདེན་པ་ཉིད་ཀྱི་ནང་དུ་སྤྱོད་བཞིན་ཡོད་པ་བདག་གིས་ཤེས་པར་གྱུར་པས་ང་ནི་ཤིན་ཏུ༌དགའ་བྱུང་ངོ་༎ དེ་ནི་ཡབ་ཀྱིས་བདག་ཅག་ལ་གནང་བའི་བཀའ་བཞིན་ཡིན།
2JO 1:5 བུད་མེད༌ཀྱེ། བདག་གིས་ད་ལྟ་ཁྱོད་ལ་བསྐུལ་བར་བྱ༌སྟེ། བདག་ཅག་གིས་ཕན་ཚུན་ལ་བྱམས་ཤིང་གཅེས་སུ་འཛིན་འོས་སོ།། འདི་ནི་བདག་གིས་ཁྱོད་ལ་བཀའ་གསར་པ་ཞིག་འབྲི་བ་མ་ཡིན་པར། ཐོག་མ་ནས་བདག་ཅག་ལ་ཐོབ་པའི་བཀའ་ཡིན།
2JO 1:6 དཀོན་མཆོག་གི་བཀའ་རྣམས་བཞིན་དུ་སྤྱོད་པ་ཡིན་ན་དེ་ནི་བྱམས་པ་ཡིན། ཁྱོད་རྣམས་ཀྱིས་ཐོག་མ་ནས་ཐོས་ཤིང་དེ་བཞིན་དུ་སྤྱོད་དགོས་པ་དེ་ནི་བཀའ་འདི་ཡིན༌ནོ།།
2JO 1:7 ཅིའི་ཕྱིར་ཞེ་ན། འཇིག་རྟེན་འདིར་མི་ལ་སླུ་བྲིད་བྱེད་མཁན་མང་པོ་བྱུང༌བ་དང་། དེ་དག་གིས་ཡེ་ཤུ་མཱ་ཤི་ཀ་ནི་མི་ཡི་གཟུགས་པོར་གྱུར་ནས་བྱོན་པ་ཁས་མི་ལེན་པའི་ཕྱིར་རོ།། དེ་དག་ནི་མི་ལ་སླུ་བྲིད་བྱེད་མཁན་དང་སྐྱབས་མགོན་མཱ་ཤི་ཀའི་བསྟན་དགྲ་ཡིན།
2JO 1:8 ངེད་ཅག་གིས་བསྒྲུབས་པའི་དོན་རྣམས་མེད་པར་མི་འགྱུར་བ་དང་ཁྱོད་ཅག་ལ་བྱ་དགའ་ཚང་མ་འཐོབ་པའི་ཕྱིར་ཁྱོད་རྣམས་ཀྱིས་གཟབ་པར་གྱིས།
2JO 1:9 སུ་ཞིག་སྐྱབས་མགོན་མཱ་ཤི་ཀའི་གསུངས་པའི་ཆོས་དང་རིང་དུ་གྱེས་ཤིང་། དེའི་ནང་དུ་མི་གནས་པ་ནི་དཀོན་མཆོག་དང་འབྲེལ་བ་མེད། ཁོང་གི་གསུངས་པའི་ཆོས་ཀྱི་ནང་དུ་གནས་པ་ནི་དཀོན་མཆོག་ཡབ་སྲས་གཉིས་ལ་འབྲེལ་བ་མཆིས།
2JO 1:10 གལ་ཏེ། མི་སུ་ཞིག་ཁྱོད་ཅག་གི་གམ་དུ་ཡོང་བ་དང་གསུངས་པའི་ཆོས་དེ་དག་མི་སྟོན་ན། མི་དེ་རང་གི་ཁྱིམ་དུ་མི་བསུ་ཞིང་འཚམས་འདྲིའང་ཞུ་བར་མི་བྱའོ།།
2JO 1:11 རྒྱུ་མཚན་ནི་མི་དེ་ལྟ་བུར་འཚམས་འདྲི་ཞུས་པ་ཡིན་ན། འཚམས་འདྲི་ཞུ་མཁན་ནི་མི་དེའི་ལས་ངན་པ་དང་འབྲེལ་བ་ཡོད་པའི་ཕྱིར་རོ།།
2JO 1:12 བདག་ལ་ད་དུང་ཁྱོད་ཅག་ལ་འབྲི་བྱའི་དོན་མང་ཡང་། ཤོག་སྣག་ལ་བརྟེན་ནས་འབྲི་མི་འདོད་དེ། བདག་ཅག་གི་སེམས་སུ་དགའ་སྤྲོས་ཁེངས་པའི་ཕྱིར། ཁྱོད་ཅག་གི་གམ་དུ་ཡོང་སྟེ་གདོང་ཐུག་ནས་གླེང་མོལ་བྱེད་པར་རེ་བ་བཅངས་སོ།།
2JO 1:13 དཀོན་མཆོག་གིས་བདམས་པའི་ཁྱོད་ཀྱི་གཅུང་མོའི་བུ་ཕྲུག་རྣམས་ཀྱིས་ཁྱོད་ལ་འཚམས་འདྲི༌ཞུའོ།། །།
3JO 1:1 དེ་ཡང་ཆོས་ཚོགས་ཀྱི་རྒན་པོ་བདག་གིས་སྙིང་ནས་བརྩེ་ཞིང་གཅེས་པར་བྱེད་པའི་ཀེ་ཡུ་ལ་འཕྲིན་ཡིག་འདི་སྤྲིངས་པའོ།།
3JO 1:2 སྙིང་ནས་བརྩེ་བའི་སྤུན་ཟླ༌ལགས། ཁྱོད་ཀྱི་སེམས་ཁམས་བདེ་བ་བཞིན་དུ། ཁྱོད་ཀྱི་ལས་དོན་འགྲུབ་ཅིང་ལུས་ཁམས་ཀྱང་བདེ་བར༌སྨོན།
3JO 1:3 དེ་སྔར་སྤུན་ཟླ་འགའ་ཞིག་ཡོང་ནས་ཁྱོད་ཀྱི་སེམས་སུ་བདེན་པ་ཉིད་ཡོད་པར་བདེན་དཔང་བྱས་ཤིང་། དེ་ནི་ཁྱོད་ཀྱིས་བདེན་པ་ཉིད་ལ་སྤྱོད་བཞིན་ཡོད་པས། ང་རང་ཤིན་ཏུ་དགའ་བར་གྱུར་ཏོ།།
3JO 1:4 ངའི་བུ་ཕྲུག་རྣམས་ཀྱིས་བདེན་པ་ཉིད་ཀྱི་ནང་དུ་སྤྱོད་པ་བདག་གིས་ཐོས་ཤིང་། བདག་ལ་འདི་ལས་ལྷག་པའི་དགའ་སྤྲོ་ནི་མེད་དོ།།
3JO 1:5 སྙིང་ནས་བརྩེ་བའི་སྤུན་ཟླ༌ལགས། སྤུན་ཟླ་མགྲོན་པོ་རྣམས་ནི་རྒྱུས་མེད་ཡིན་ཡང་ཁྱོད་ཀྱིས་དེ་རྣམས་ལ་ལས་གང་ཞིག་བྱས་པ་ནི་བློ་སེམས་དཀར་བ་ཡིན་ནོ།།
3JO 1:6 དེ་རྣམས་ཀྱིས་ཆོས་ཚོགས་ཀྱི་མདུན་དུ་ཁྱོད་ཀྱི་བྱམས་པ་ལ་བདེན་དཔང་བྱས༌ཤིང༌། ད་ལྟ་ཁྱོད་ཀྱིས་དཀོན་མཆོག་གི་སྤྱན་སྔར་ཅི་ཞིག་བྱ་འོས་པ་བཞིན་དུ། ཁོ་རྣམས་ལ་རོགས་རམ་བྱས་ནས་མདུན་དུ་བསྐྱོད་ན་ལེགས་སོ།།
3JO 1:7 ཅིའི་ཕྱིར་ཞེ་ན། ཁོ་རྣམས་ནི་ཁོང་གི་མཚན་གྱི་ཆེད་དུ་ཕྱིར་སོང་བ་ཡིན་ལ། ཕྱི་ཕྱོགས་པ་རྣམས་ལས་ཅི་ཡང་མ་བླངས་པའི་ཕྱིར་ཡིན།
3JO 1:8 དེའི་ཕྱིར། བདག་ཅག་ཀྱང་བདེན་པ་ཉིད་ཀྱི་ལས་གྲོགས་སུ་འགྱུར་བའི་ཕྱིར། མི་འདི་ལྟ་བུ་རྣམས་ལ་བསུ་བ་བྱེད་དགོས༌སོ།།
3JO 1:9 སྔོན་ཆད་བདག་གིས་ཆོས་ཚོགས་ལ་འཕྲིན་ཡིག་གཞན་ཞིག་སྤྲིངས་མྱོང༌མོད། འོན་ཀྱང་ཆོས་ཚོགས་ནང་དུ་འགོ་འཛིན་བྱེད་པར་དགའ་མཁན་ཏི་ཏྲེ་ཕེ་ཡིས་ངེད་ཅག་ཁས་མ་བླངས་སོ།།
3JO 1:10 དེའི༌ཕྱིར། ང་རང་གནས་དེར་ཡོང་བ་ཡིན་ན། ཁོས་ཅི་ཞིག་བྱེད་བཞིན་པ་ཀུན་ལ་ཁྱབ་སྒྲོག་བྱེད་ངེས་ཡིན་ཏེ། ཁོས་ངེད་ཅག་ལ་གཏམ་ངན་སྨྲས་ནས་སྙོན་འཛུགས༌པར་ཡིད་མི་ཚིམ་པར་མ་ཟད། ཁོས་སྤུན་ཟླར་སྣེ་ལེན་བྱེད་པ་ལྟ་ཅི། སྣེ་ལེན་བྱེད་འདོད་མཁན་གཞན་ལ་བཀག་འགོག་བྱས་ཏེ། སྣེ་ལེན་བྱེད་མཁན་དེའང་ཆོས་ཚོགས་ལས་ཕྱིར་སྐྲོད༌པར་བྱེད་དོ།།
3JO 1:11 སྙིང་ནས་བརྩེ་བའི་སྤུན་ཟླ༌ལགས། ལས་ངན་པ་དཔེ་རུ་མི་གཟུང་ལ། ལས་བཟང་པོ་དཔེ་རུ་ལེན་པར་བྱའོ།། ལས་བཟང་པོ་བྱེད་མཁན་ནི་དཀོན་མཆོག་ལ་གཏོགས་ཤིང་། ལས་ངན་པ་བྱེད་མཁན་ནི་དཀོན་མཆོག་མཇལ་མྱོང་བ་མེད།
3JO 1:12 སྔོན་ཆད་ཏི་མེ་ཏྲེ་ལ་མི་ཐམས་ཅད་ཀྱིས་བདེན་དཔང་བྱས་ཤིང་། བདེན་པ་ཉིད་ཀྱིས་ཀྱང་བདེན་དཔང་བྱས་པ༌དང༌། ངེད་ཅག་གིས་ཀྱང་བདེན་དཔང་བྱེད་དེ། ཁྱོད་ཀྱིས་ཀྱང་ངེད་ཅག་གི་བདེན་དཔང་ནི་བདེན་པ་ཡིན་པར་ཤེས་སོ།།
3JO 1:13 བདག་ལ་ད་དུང་ཁྱོད་ལ་འབྲི་བྱ་མང་པོ་ཡོད༌ནའང་། སྨྱུག་གུ་དང་སྣག་ཚ་ལ་བརྟེན་ནས་ཡིག་ཐོག་ཏུ་འགོད་མི་འདོད༌དེ།
3JO 1:14 མི་འགྱངས་པར་ཁྱོད་དང་འཕྲད་ཅིང་གདོང་ཐུག་ནས་གླེང་མོལ་བྱ་ཐུབ་པར་རེ་བ་བྱེད་དོ།།
3JO 1:15 མཇུག་མཐར་ཁྱོད་ལ་ཞི་བདེ་འཐོབ་པར་ཤོག གྲོགས་པོ་རྣམས་ཀྱིས་ཀྱང་ཁྱོད་ལ་འཚམས་འདྲི༌ཞུའོ།། ཁྱོད་ཀྱིས་བདག་གི་ཚབ་ཏུ་གྲོགས་པོ་རེ་རེའི་མིང་བཞིན་དུ་འཚམས་འདྲི་ཞུ་བར་བྱའོ།། །།
JUD 1:1 དེ་ཡང་ཡ་ཧུ་དཱ་བདག་ནི་ཡེ་ཤུ་མཱ་ཤི་ཀའི་ཞབས་ཕྱི་པ་དང་ཡ་ཀོབ་ཀྱི་སྤུན་ཡིན་ལ། ཞལ་འབོད་ཐོབ་པ་དང་། ཡབ་དཀོན་མཆོག་ནང་དུ་གཅེས་སུ་འཛིན་ཞིང་ཡེ་ཤུ་མཱ་ཤི་ཀའི་ཆེད་དུ་སྲུང་བར་མཛད་པ་རྣམས་ལ་འཕྲིན་ཡིག་འདི་སྤྲིངས་པའོ༎
JUD 1:2 ཐུགས་རྗེ་དང་། ཞི་བདེ། བྱམས་པ་བཅས་ཁྱོད་ཅག་ལ་མང་དུ་འཐོབ་པར་ཤོག།
JUD 1:3 སྙིང་ནས་བརྩེ་བའི་སྤུན་ཟླ་རྣམས། ངས་རང་རེའི་ཐུན་མོང་གི་ཐར་པ་སྐོར་གྱི་གཏམ་ཁྱོད་ཅག་ལ་འབྲི་བར་ནན་གྱིས་བརྩོན་ཅིང་། སྔར་ལན་གཅིག་དད་ལྡན་དམ་པ་རྣམས་ལ་གཏད་པའི་དད་པའི་ཕྱིར་བརྩོན་པ་ལྷོད་མེད་བྱེད་ཆེད། ད་ལྟ་ཅི་ནས་ཀྱང་ཁྱོད་ཅག་ལ་འཕྲིན་ཡིག་བྲིས་ནས་སྐུལ་མ་གཏོང་དགོས་བྱུང་ངོ་།།
JUD 1:4 རྒྱུ་མཚན་ནི་སྔར་ནས་ཉེས་ཆད་ཕོགས་པར་ཐག་གིས་བཅད་པའི་དད་གུས་མེད་པ་རྣམས་ལྐོག་ནས་ཁྱོད་ཅག་གི་ཁྲོད་དུ་ཞུགས་ཡོད་ཅིང་། ཁོ་རྣམས་ཀྱིས་རང་རེའི་དཀོན་མཆོག་གི་ཐུགས་རྗེ་དེ་འདོད་གཡེམ་བག་ཡངས་སུ་གཏོང་བའི་གོ་སྐབས་སུ་བསྒྱུར་བར་མ་ཟད། རང་རེའི་བདག་པོ་དང་གཙོ་བོ་གཅིག་པུ་སྟེ་ཡེ་ཤུ་མཱ་ཤི་ཀའང་སྤང་བར་བྱེད་པའོ།།
JUD 1:5 དེ་སྔར་གཙོ་བོས་རང་གི་འབངས་མི་ཨེ་ཅིབ་ཡུལ་ནས་བསྐྱབས་ཤིང་། ཕྱིས་སུ་དད་པ་མེད་པའི་མི་དེ་རྣམས་མེད་པར་མཛད་དོ།། དོན་དེ་ཐམས་ཅད་ཁྱོད་ཅག་གིས་ཤེས་ནའང་། ངས་ད་དུང་ཁྱོད་རྣམས་ལ་དྲན་སྐུལ་བྱ་འདོད།
JUD 1:6 ཡང་རང་གི་འགན་གནས་མ་བསྲུངས་པར་རང་གནས་བསྐྱུར་བའི་ཕོ་ཉ་རྣམས་ནི། ལེགས་ཉེས་ཀྱི་ཁྲིམས་ཐག་གཅོད་པའི་ཉིན་ཆེན་པོ་དེའི་བར་དུ། དཀོན་མཆོག་གིས་ལྕགས་སྒྲོག་བརྒྱབ་སྟེ་ཇི་སྲིད་བར་དུ་མུན་ནག་ལ་བཅུག་གོ།
JUD 1:7 ཡང་སཱ་དོམ༌དང༌གཱ་མོ༌ར་དང་མཐའ་འཁོར་གྲོང་ཁྱེར་གྱི་མི་རྣམས་ཀྱིས་ཀྱང་དེ་དག་དང་འདྲ་བར་ལོག་གཡེམ་རྐྱང་རྐྱང་བྱེད་ཅིང་འདོད་ཆགས་ཕྱིན་ཅི་ལོག་པ་ལ་བསྟུན་པས། ནམ་ཡང་ཞི་བ་མེད་པའི་མེའི་ཆད་པ་ཕོག་སྟེ་མི་རྣམས་ལ་ཉེན་བརྡ་བཏང་འདུག་གོ།
JUD 1:8 རྨི་ལམ་ལ་མགོ་འཐོམ་པའི་མི་འདི་དག་གིས་ཀྱང་དེ་རྣམས་དང་འདྲ་བར་ལུས་པོ་བཙོག་པར་བྱེད་ཅིང་། དབང་འཛིན་མཁན་རྒྱབ་ཏུ་འདོར་བ་དང་། གཟི་བརྗིད་ཅན་ལ་འཕྱ་སྨོད་བྱེད་པའོ།།
JUD 1:9 ཕོ་ཉའི་མཆོག་མེའ་ཀཱ་ཨེལ་གྱིས་མོ་ཤེའི་སྐུ་གདུང་གི་སྐོར་ནས་བདུད་ལ་རྩོད་པའི་དུས་སུ། སྨོད་ཚིག་གསུང་མ་ཕོད་པར། གཙོ་བོས་ཁྱོད་ལ་བཀའ་བཀྱོན་མཛད་པར་གྱུར་ཅིག་ཅེས་སྨྲས་པ་ཡིན།
JUD 1:10 འོན་ཀྱང་མི་འདི་རྣམས་ཀྱིས་རང་གིས་མི་ཤེས་པ་ལ་འཕྱ་སྨོད་བྱེད་པ་དང་། དེ་རྣམས་ནི་ཤེས་རྒྱ་མེད་པའི་དུད་འགྲོ་དང་མཚུངས་ལ། རང་རྒྱུད་ནས་ཤེས་པའི་དོན་ཁོ་ན་བསྒྲུབས་ནས་རང་ཉིད་འཕུང་བའོ།།
JUD 1:11 དེ་དག་ལ་ཆག་སྒོ་འབྱུང་ངོ་།། ཅིའི་ཕྱིར་ཞེ་ན། དེ་རྣམས་ཀཱ་ཡན་གྱི་ལམ་ལ་ཞུགས་ཤིང་། ཡང་རྒྱུ་ནོམ་པའི་ཆེད་དུ་པེལ་ཨམ་གྱི་ནོར་འཁྲུལ་ནང་དུ་བརྒྱུགས་ཏེ། ཀོ་རཱ་ཡི་རྒྱབ་འགལ་ཁྲོད་དུ་མེད་པར་གྱུར་པའི་ཕྱིར་ཡིན།
JUD 1:12 མི་དེ་རྣམས་ནི་ཁྱོད་ཅག་གི་མཛའ་བརྩེའི་གསོལ་སྟོན་སྟེང་དུ་ནག་ཐིག་ཡིན། དེ་རྣམས་ནི་ཁྱོད་ཅག་དང་མཉམ་དུ་ཟས་ལ་རོལ་བའི་དུས་སུ་འཇིགས་སྣང་མེད་ཅིང་། རྫི་བོས་རང་གི་ལྟོ་བ་ཁོ་ན་འགྲང་བར་བྱེད་པ་དང་མཚུངས། དེ་རྣམས་ནི་ཆར་ཆུ་མེད་པའི་སྤྲིན་ལྟར་རླུང་གིས་འཁྱེར་བ་དང་འདྲ་ལ། སྟོན་ཁའི་ཤིང་འབྲས་མེད་པའི་ལྗོན་ཤིང་དང་མཚུངས་པར་ལན་གཉིས་ཤི་ནས་རྩ་བ་བལ་པ་དང་འདྲ།
JUD 1:13 ཡང་རྒྱ་མཚོའི་རྦ་རླབས་དྲག་པོ་དང་མཚུངས་པར་རང་ཉིད་ཀྱི་ངོ་གནོང་བའི་ལྦུ་བ་འཕྱུར་བ་དང་འདྲ། དེ་རྣམས་རྒྱུ་སྐར་དང་མཚུངས་ཤིང་མུན་པའི་སྨག་རུམ་ནི་རྒྱུན་ནས་རྒྱུན་དུ་ཁོ་ཚོའི་དོན་དུ་བསྐྱུར་ཡོད་པའོ། །
JUD 1:14 ཨ་དམ་གྱི་མི་རབས་བདུན་པ་ཧ་ནོག་གིས་ཀྱང་དེ་དག་ལ་ལུང་བསྟན་གནང་སྟེ། ལྟོས་དང་། གཙོ་བོ་རང་ཉིད་ཀྱི་འཁོར་དམ་པ་ཁྲི་སྟོང་ཁྲིད་ནས་ཕེབས་ཏེ།
JUD 1:15 མི་ཐམས་ཅད་ཀྱི་སྟེང་དུ་ཁྲིམས་ཐག་གཅོད་ཅིང་། དད་གུས་མེད་པའི་མི་རྣམས་ཀྱིས་བྱས་པའི་དད་གུས་མེད་པའི་ལས་རྣམས་ལ་ར་སྤྲོད་མཛད་པ་དང་། དད་གུས་མེད་པའི་མི་སྡིག་ཅན་རྣམས་ཀྱིས་ཁོང་ལ་ཚིག་རྩུབ་སློག་པ་ཐམས་ཅད་ལ་ར་སྤྲོད་མཛད་ཅེས་གསུངས་སོ།།
JUD 1:16 མི་དེ་དག་གིས་སྡུག་སྐད་འདོན་པ་དང་། གཞན་ལ་སྐྱོན་འཛུགས་པ། རང་འདོད་བཞིན་སྤྱོད་པ། ངག་ནས་ཚིག་སྦོམ་སྨྲ་བ། རང་ལ་ཕན་ཐོགས་པའི་ཕྱིར་མི་ལ་ངོ་སོ་བྱེད་པའོ།།
JUD 1:17 སྙིང་ནས་བརྩེ་བའི་སྤུན་ཟླ་རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་སྐུ་ཚབ་པ་རྣམས་ཀྱིས་སྔོན་ཆད་ཅི་གསུངས་པ་ཁྱོད་ཅག་གིས་དྲན་པར་གྱིས།
JUD 1:18 དེ་རྣམས་ཀྱིས་སྔོན་ཆད་ཁྱོད་ཅག་ལ་འདི་སྐད་དུ། མཐའ་མའི་དུས་སུ་འཕྱ་སྨོད་བྱེད་མཁན་འབྱུང་བར་ངེས་ལ། དེ་དག་གིས་རང་གི་དད་གུས་མེད་པའི་རང་འདོད་བཞིན་སྤྱོད་པར་འགྱུར་ཞེས་གསུངས་མྱོང་ངོ་།།
JUD 1:19 མི་དེ་དག་ནི་ཕྱོགས་ཁག་སྒྲིག་པར་མོས་པ་དང་། འཇིག་རྟེན་པའི་སེམས་དང་ལྡན་པ། དམ་པའི་ཐུགས་ཉིད་དང་མི་ལྡན་པ་བཅས་ཡིན།
JUD 1:20 སྙིང་ནས་བརྩེ་བའི་སྤུན་ཟླ་རྣམས། ཁྱོད་ཅག་གིས་མཆོག་ཏུ་དམ་པའི་དད་པ་ཡི་ནང་རང་ཉིད་བརྟན་པོ་བྱེད་དགོས་ཤིང་། དམ་པའི་ཐུགས་ཉིད་ཀྱི་ངང་ནས་གསོལ་འདེབས་ཞུ་བ་དང་།
JUD 1:21 གཞན་ཡང་མཐའ་མེད་པའི་ཚེ་སྲོག་ཏུ་དྲངས་པའི་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ལ་རེ་སྒུག་བྱེད་པའི་ཚེ། རང་ཉིད་ནི་དཀོན་མཆོག་གི་བྱམས་བརྩེའི་ནང་དུ་གནས་པར་གྱིས་ཤིག
JUD 1:22 མི་ལ་ལའི་སེམས་སུ་ཐེ་ཚོམ་སྐྱེས་ན། ཁྱོད་ཅག་གིས་དེ་དག་ལ་སྙིང་རྗེ་བསྐྱེད་པར་གྱིས།
JUD 1:23 ཡང་ལ་ལ་ནི་ཁྱོད་ཅག་གིས་མེ་ལས་བླངས་ཏེ་བསྐྱབ་པར་བྱའོ།། ཡང་ཁ་ཤས་ལ་ཁྱོད་ཅག་གིས་མཚེར་སྣང་གི་སེམས་དང་བཅས་སྙིང་རྗེ་བསྐྱེད་པ་དང་། ཐ་ན་འདོད་ཆགས་ཀྱི་དབང་གིས་མི་གཙང་བར་བྱས་པའི་གྱོན་གོས་དེ་ལའང་ཞེན་པ་ལོག་དགོས་སོ།།
JUD 1:24 ཁྱོད་རྣམས་ས་ལ་མི་འགྱེལ་བ་དང་སྐྱོན་གྱི་དྲི་མས་མི་གོས་པར་བསྲུངས་ནས། ཁོང་གི་གཟི་བརྗིད་ཀྱི་དྲུང་དུ་དགའ་མགུ་ཡི་རང་ངང་ཚུགས་སུ་འཇུག་པར་མཛད་ནུས་པ་སྟེ།
JUD 1:25 བདག་ཅག་གི་སྐྱབས་མགོན་དཀོན་མཆོག་གཅིག་པུ་དེ་ཉིད་ལ། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས། བསྐལ་པ་ཐམས་ཅད་ཀྱི་ཡར་སྔོན་དང་དུས་ད་ལྟ་དང་། ཇི་སྲིད་བར་དུ་གཟི་བརྗིད་དང་། སྙན་གྲགས། ནུས་མཐུ། དབང་ཐང་བཅས་འབུལ་བར་བྱའོ། །ཨ་མེན།། །།
REV 1:1 དེ་ཡང་ཡེ་ཤུ་མཱ་ཤི་ཀའི་མངོན་པ་ནི་དཀོན་མཆོག་གིས་ཁོང་ལ་གནང་ཞིང་། དེ་ནི་མྱུར་དུ་འགྲུབ་ངེས་པའི་དོན་རྣམས་ཁོང་གི་ཞབས་ཕྱི་པ་རྣམས་ལ་སྟོན་པར་མཛད་པའི་ཕྱིར་ཡིན་ལ། ཁོང་གིས་ཕོ་ཉ་མངགས་པ་བརྒྱུད་ནས་རང་ཉིད་ཀྱི་ཞབས་ཕྱི་པ་ཡོ་ཧ་ནན་ལ་གསལ་པོར་སྟོན་པར་མཛད་དོ།།
REV 1:2 ཡོ་ཧ་ནན་གྱིས་དཀོན་མཆོག་གི་བཀའ་དང་ཡེ་ཤུ་མཱ་ཤི་ཀའི་བདེན་དཔང་ལ་རང་གིས་ཅི་མཐོང་བ་ཐམས་ཅད་བཞིན་ར་སྤྲོད་བྱས་པ་ཡིན།
REV 1:3 ལུང་བསྟན་འདིའི་ཚིག་རྣམས་ཀློག་མཁན་དང་། དེའི་ནང་དུ་ཅི་བཀོད་ཡོད་པ་ཐོས་ཤིང་ཇི་བཞིན་སྲུང་མཁན་རྣམས་ནི་བྱིན་རླབས་ཅན་ཡིན་ཏེ། རྒྱུ་མཚན་ནི་དུས་དེ་སླེབས་ལ་ཉེ་བའི་ཕྱིར་རོ།།
REV 1:4 ཡོ་ཧ་ནན་གྱིས་ཨེ་ཞི་ཡཱ་ཡུལ་དུ་ཡོད་པའི་ཆོས་ཚོགས་བདུན་ལ་འདི་ལྟར་སྨྲས་པ་སྟེ། ད་ལྟ་བཞུགས་པ་དང་། སྔར་མཆིས་པ། ཕེབས་པར་ངེས་པའི་དཀོན་མཆོག་དང་། ཁོང་གི་བཞུགས་ཁྲིའི་དྲུང་དུ་ཐུགས་ཉིད་བདུན་པོ་དང་།
REV 1:5 གཞུང་དྲང་གིས་བདེན་དཔང་མཛད་ཅིང་གཤིན་པོ་རྣམས་ལས་ཐོག་མར་སླར་གསོན་པ། འཇིག་རྟེན་གྱི་རྒྱལ་པོ་རྣམས་ཀྱི་མངའ་བདག་སྟེ་ཡེ་ཤུ་མཱ་ཤི་ཀ་བཅས་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར་སྨོན། ཁོང་གིས་བདག་ཅག་ལ་བྱམས་ཤིང་ཉིད་ཀྱི་སྐུ་ཁྲག་གིས་བདག་ཅག་སྡིག་པ་ལས་ཐར་བར་མཛད་པ་དང་།
REV 1:6 ཡང་བདག་ཅག་ནི་རྒྱལ་སྲིད་ཅིག་དང་ཁོང་གི་ཡབ་དཀོན་མཆོག་ལ་མཆོད་དཔོན་དུ་མཛད་དོ།། ཁོང་ལ་ནམ་ཡང་གཟི་བརྗིད་དང་མངའ་ཐང་ལྡན་པར་སྨོན། ཨ་མེན།།
REV 1:7 ལྟོས་དང་། ཁོང་ཉིད་སྤྲིན་དང་བཅས་ཕེབས་ཡོང་བ་དང་། མིག་ལྡན་ཐམས་ཅད་ཀྱིས་མཐོང་བར་འགྱུར་ཞིང་། ཐ་ན་ཁོང་ལ་མདུང་གིས་སྣུན་མཁན་རྣམས་ཀྱིས་ཀྱང་མཐོང་བར་འགྱུར་ལ། ས་སྟེང་གི་མི་རིགས་ཐམས་ཅད་ཀྱིས་ཁོང་གི་ཕྱིར་དུ་ངུ་འབོད་བྱེད་པར་འགྱུར་རོ།། དེ་བདེན་ནོ། །ཨ་མེན།
REV 1:8 གཙོ་བོ་དཀོན་མཆོག་གིས་འདི་སྐད་དུ། བདག་ནི་ཨལ་ཕཱ་དང་ཨོ་མེ་ཀ་ཡིན་ལ། ད་ལྟ་བཞུགས་པ་དང་། སྔར་མཆིས་པ། ཕེབས་པར་ངེས་པའི་ཀུན་དབང་དེ་ཉིད་ཡིན་ཞེས་གསུངས་སོ།།
REV 1:9 ཡོ་ཧ་ནན་ང་རང་ནི་ཁྱོད་ཅག་གི་སྤུན་ཟླ་ཡིན་ཞིང་། སྐྱབས་མགོན་ཡེ་ཤུའི་ནང་དུ་ཡོད་པའི་དཀའ་སྡུག་དང་། རྒྱལ་སྲིད། བཟོད་བསྲན་བཅས་སུ་མཉམ་འགྲོགས་ཡིན་ལ། དཀོན་མཆོག་གི་བཀའ་དང་སྐྱབས་མགོན་ཡེ་ཤུའི་དོན་དུ་བདེན་དཔང་བྱས་པའི་རྐྱེན་གྱིས། སྔར་པེད་མོ་ཟེར་བའི་གླིང་ཕྲན་དུ་བསྡད་མྱོང་ངོ་༎
REV 1:10 གཙོ་བོའི་ཉིན་མོ་ལ། ང་རང་དམ་པའི་ཐུགས་ཉིད་ཀྱི་ནང་དུ་དྲངས་ཏེ། ངའི་རྒྱབ་ཕྱོགས་སུ་དུང་སྐད་ལྟ་བུའི་སྒྲ་ཆེན་པོ་ཞིག་གྲགས་པ་ཐོས་ཤིང་འདི་སྐད་དུ།
REV 1:11 ཁྱོད་ཀྱིས་ཅི་མཐོང་བ་ཐམས་ཅད་ཤོག་དྲིལ་སྟེང་དུ་བྲིས་ཏེ། ཨེ་ཕེ་སི་དང་། སི་མིར་ནཱ། ཕེར་ག་མུ། ཐི་ཨ་ཏེ་རཱ། སཱར་དི། ཕི་ལཱ་དེལ་ཕི་ཨ། ལའོ་དི་ཀེ་ཡཱ་བཅས་ཆོས་ཚོགས་བདུན་ལ་སྐུར་ཅིག་ཅེས་གསུངས་སོ།།
REV 1:12 དེ་ནས་ངས་ཁ་ཕྱིར་འཁོར་ནས་བདག་ལ་སྐད་སྒྲ་སྒྲོག་པ་དང་གསུང་གནང་མཁན་སུ་ཡིན་པར་བལྟ་འདོད་དེ། ཁ་ཕྱིར་འཁོར་ནས་བལྟས་པ་ལ། གསེར་གྱི་སྒྲོན་སྟེགས་བདུན་མཐོང་ངོ་།།
REV 1:13 སྒྲོན་སྟེགས་དེ་དག་གི་དཀྱིལ་དུ་མིའི་བུ་དང་མཚུངས་པ་ཞིག་བཞུགས་ཡོད་པ་མཐོང་སྟེ། ན་བཟའ་རིང་པོ་ཞབས་ངོས་སུ་ཐུག་པ་ཞིག་མནབས་ཤིང་། བྲང་ཁ་རུ་གསེར་གྱི་སྐེད་ཆིངས་བཅིངས་ཡོད།
REV 1:14 ཁོང་གི་དབུ་དང་སྐྲ་ནི་ལུག་བལ་དཀར་པོ་དང་ཁ་བ་དཀར་པོ་དང་འདྲ། སྤྱན་ཟུང་ནི་མེ་ལྕེ་དང་མཚུངས།
REV 1:15 ཞབས་ནི་བཞུ་ཐབ་ནང་དུ་བཙོ་སྦྱང་བྱས་ཤིང་འོད་ཟེར་འཕྲོ་བའི་ལི་དང་འདྲ། གསུང་སྐད་ནི་ཆུ་མང་པོའི་སྒྲ་དང་མཚུངས།
REV 1:16 ཁོང་གི་ཕྱག་གཡས་པས་སྐར་མ་བདུན་བཟུང་ཡོད་ཅིང་། ཞལ་ནས་རལ་གྲི་རྣོན་པོ་ཁ་གཉིས་ཅན་ཞིག་ཐོན། ཞལ་རས་ནི་ཉི་ཟེར་དྲག་པོ་འཕྲོ་བ་དང་མཚུངས་སོ།།
REV 1:17 ངས་ཁོང་ཉིད་མཐོང་བ་དང་ཁོང་གི་ཞབས་དྲུང་དུ་སར་འགྱེལ་ཏེ་བེམ་པོ་བཞིན་དུ་གྱུར་ཏོ།། དེ་ནས་ཁོང་གིས་ཕྱག་གཡས་པ་བདག་གི་ལུས་སྟེང་དུ་བཞག་སྟེ་འདི་སྐད་དུ། འཇིགས་པར་མི་བྱའོ།། བདག་ནི་ཐོག་མ་ཡིན་ལ་མཐའ་མའང་ཡིན།
REV 1:18 གསོན་པོར་བཞུགས་པ་དེ་ཉིད་ཀྱང་ཡིན། བདག་ནི་དེ་སྔར་ཚེ་ལས་འདས་ནའང་། ལྟོས་དང་། ད་ལྟ་ང་རང་སླར་གསོན་ཏེ། ཇི་སྲིད་བར་དུ་གསོན་པོར་གནས་པར་མ་ཟད། འཆི་བ་དང་གཤིན་པོའི་གནས་ཀྱི་ལྡེ་མིག་རྣམས་བདག་གིས་བཟུང་ཡོད།
REV 1:19 དེའི་ཕྱིར། ཁྱོད་ཀྱིས་མཐོང་བྱུང་བ་རྣམས་དང་། ད་ལྟའི་དོན་རྣམས་དང་། དོན་དེ་དག་གི་རྗེས་སུ་འབྱུང་བར་འགྱུར་བའི་དོན་རྣམས་ཡིག་ཐོག་ཏུ་འགོད་པར་བྱའོ།།
REV 1:20 ཁྱོད་ཀྱི་མཐོང་ལམ་དུ་གྱུར་པའི་བདག་གི་ཕྱག་གཡས་ཀྱི་སྐར་མ་བདུན་དང་། གསེར་གྱི་སྒྲོན་སྟེགས་བདུན་གྱི་གསང་བ་བརྗོད་ན་འདི་ལྟ་སྟེ། སྐར་མ་བདུན་པོ་ནི་ཆོས་ཚོགས་བདུན་གྱི་ཕོ་ཉ་ཡིན་ལ། སྒྲོན་སྟེགས་བདུན་པོ་ནི་ཆོས་ཚོགས་བདུན་ཡིན་ཞེས་གསུངས་སོ།།
REV 2:1 ཡང་ཁོང་གིས་འདི་སྐད་དུ། ཁྱོད་ཀྱིས་ཨེ་ཕེ་སིའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། ཕྱག་གཡས་པར་སྐར་མ་བདུན་ཐོགས་ཤིང་། གསེར་གྱི་སྒྲོན་སྟེགས་བདུན་གྱི་ཁྲོད་དུ་བགྲོད་མཁན་གྱིས་འདི་སྐད་དུ།
REV 2:2 ཁྱོད་ཀྱིས་བྱས་པའི་ལས་དང་། དཀའ་ངལ། བཟོད་བསྲན་བཅས་ངས་ཤེས་པར་མ་ཟད། ཁྱོད་ཀྱིས་མི་ངན་ལ་བཟོད་པ་སྒོམ་མི་ཐུབ་པ་ཡང་ཤེས། ཁྱོད་ཀྱིས་དེ་སྔར་རང་ཉིད་སྐུ་ཚབ་པ་ཡིན་ཟེར་ཡང་སྐུ་ཚབ་པ་དངོས་མིན་པ་རྣམས་ལ་ཚོད་བགམས་ཏེ། ཁོ་རྣམས་རྫུས་མ་ཡིན་པ་རྟོགས་པའང་ཤེས།
REV 2:3 དེ་སྔར་ཁྱོད་ཀྱིས་བཟོད་བསྲན་བྱས་ནས། བདག་གི་མིང་གི་ཆེད་དུ་དཀའ་སྡུག་མྱངས་ཀྱང་ཐང་མ་ཆད་པའང་བདག་གིས་ཤེས་སོ།།
REV 2:4 འོན་ཀྱང་། ཁྱོད་ཀྱིས་ཐོག་མར་ཡོད་པའི་བྱམས་པ་སྤངས་པས། བདག་གིས་ཁྱོད་ལ་སྐྱོན་འགེལ་བར་བྱའོ།།
REV 2:5 དེའི་ཕྱིར། ཁྱོད་ནི་ཇི་ལྟར་ཉམས་པར་གྱུར་པ་ལ་ཕྱིར་དྲན་བྱ་འོས་པར་མ་ཟད། འགྱོད་བཤགས་བྱས་ཏེ་ཐོག་མར་ཅི་ལྟར་བྱས་པ་བཞིན་བྱེད་དགོས། གལ་ཏེ་ཁྱོད་ཀྱིས་འགྱོད་བཤགས་མི་བྱེད་ན། ང་རང་ཁྱོད་ཀྱི་གམ་དུ་ཡོང་ནས་སྒྲོན་སྟེགས་དེ་རང་གནས་ལས་ལེན་པར་བྱའོ།།
REV 2:6 འོན་ཀྱང་། ཁྱོད་ལ་བཟང་ཆ་གཅིག་རང་ཡོད་པ་ནི། ཁྱོད་རང་ནེ་ཀོ་ལཱ་པ་རྣམས་ཀྱི་སྤྱོད་ལམ་ལ་སྡང་སེམས་ཆེ། ང་རང་ཡང་དེ་ལ་སྡང་བའོ།།
REV 2:7 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ།། བདག་གིས་རྒྱལ་ཁ་ལེན་མཁན་རྣམས་ལ་དཀོན་མཆོག་གི་དགའ་བདེའི་ལྡུམ་རར་ཡོད་པའི་ཚེ་སྲོག་གི་ལྗོན་ཤིང་ལས་བཟའ་བྱར་གནང་བར་ངེས་ཞེས་གསུངས་སོ།།
REV 2:8 ཡང་ཁོང་གིས་འདི་སྐད་དུ། ཁྱོད་ཀྱིས་སི་མིར་ནཱའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། ཐོག་མ་དང་མཐའ་མ་ཡིན་ལ། སྔར་གྲོངས་ནའང་སླར་གསོན་པ་དེ་ཉིད་ཀྱིས་འདི་སྐད་དུ།
REV 2:9 ངས་ཁྱོད་ཀྱི་དཀའ་སྡུག་དང་དབུལ་ཕོངས་ཤེས་ལ། དོན་དམ་དུ་ཁྱོད་ནི་ཕྱུག་པོ་ཡིན། ཡང་རང་ཉིད་ཡ་ཧུ་དཱ་པ་ཡིན་ཟེར་བ་དག་གིས་སྐུར་འདེབས་ཀྱི་གཏམ་སྨྲས་པའང་བདག་གིས་ཤེས། དོན་དངོས་སུ་དེ་དག་ནི་ཡ་ཧུ་དཱ་པ་མ་ཡིན་པར། བདུད་སཱ་ཏན་གྱི་ཚོགས་ཁག་ལ་གཏོགས་པ་ཡིན།
REV 2:10 ཁྱོད་ནི་སྡུག་བསྔལ་མྱང་བར་འགྱུར་བ་ལ་འཇིགས་པར་མི་བྱའོ།། ལྟོས་དང་། བདུད་ཀྱིས་ཁྱོད་ཅག་ལས་འགའ་ཞིག་བཙོན་དུ་བཅུག་ནས་ཁྱོད་རྣམས་ལ་ཚོད་བརྟག་བྱེད་ཅིང་། ཁྱོད་ཅག་གིས་ཉིན་བཅུའི་རིང་ལ་དཀའ་སྡུག་མྱང་ངེས་ཡིན། འོན་ཀྱང་འཆི་བའི་བར་དུ་བློ་སེམས་བརྟན་པར་གྱིས་དང་། བདག་གིས་ཁྱོད་ལ་ཚེ་སྲོག་གི་ཅོད་པན་གནང་བར་བྱའོ།།
REV 2:11 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ།། རྒྱལ་ཁ་ལེན་མཁན་རྣམས་ལ་འཆི་བ་ཐེངས་གཉིས་པའི་གནོད་འཚེ་ཐེབས་སུ་མི་འཇུག་པ་ཁག་ཐེག་ཡིན་ཞེས་གསུངས་སོ།།
REV 2:12 ཁྱོད་ཀྱིས་ཕེར་ག་མུའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། རལ་གྲི་རྣོན་པོ་ཁ་གཉིས་ཅན་ཐོགས་མཁན་གྱིས་འདི་སྐད་དུ།
REV 2:13 ཁྱོད་ཀྱི་སྡོད་གནས་ནི་བདུད་སཱ་ཏན་གྱི་ཁྲི་ཡོད་ས་ཡིན་ཞིང་། བདག་གི་བློ་སེམས་དཀར་པོའི་དཔང་པོ་ཨན་ཏི་པཱ་ནི་ཁྱོད་ཅག་ཁྲོད་དུ་བདུད་སཱ་ཏན་སྡོད་སར་བཀྲོངས་པའི་ཉིན་མོ་དག་ལ། ཁྱོད་ཀྱིས་ད་དུང་བདག་གི་མིང་བརྟན་པོར་བསྲུངས་ཤིང་། བདག་ལ་དད་ལོག་མ་བྱས་པ་བདག་གིས་ཤེས་སོ།།
REV 2:14 འོན་ཀྱང་། དོན་འགའ་ཤས་ཀྱི་ཆ་ནས། བདག་གིས་ཁྱོད་ལ་སྐྱོན་འགེལ་བར་བྱའོ།། རྒྱུ་མཚན་ནི་ཁྱོད་ཅག་གི་ཁྲོད་དུ་པེལ་ཨམ་གྱི་བསླབ་བྱར་བསྟུན་མཁན་ཡོད། པེལ་ཨམ་གྱིས་སྔོན་ཆད་པཱ་ལག་ལ་ཡེས་ར་ཨེལ་གྱི་བུ་རྒྱུད་ཀྱི་མདུན་དུ་བཀག་རྡོ་བཞག་ནས། ཁོ་རྣམས་ལ་སྐུ་འདྲར་ཕུལ་བའི་མཆོད་རྫས་ཟ་བ་དང་ལོག་གཡེམ་བྱེད་པའི་བསླབ་བྱ་གནང་ཞིང་།
REV 2:15 ཡང་དེ་བཞིན་དུ་ཁྱོད་ཅག་གི་ཁྲོད་དུ་མི་ཁ་ཤས་ཀྱིས་ནེ་ཀོ་ལཱ་པ་རྣམས་ཀྱི་བསླབ་བྱར་བསྟུན་པ་རེད།
REV 2:16 དེའི་ཕྱིར། ཁྱོད་ཀྱིས་འགྱོད་བཤགས་བྱོས་ཤིག གལ་ཏེ་འགྱོད་བཤགས་མི་བྱེད་ན། བདག་ནི་མྱུར་བ་མྱུར་བར་ཁྱོད་ཀྱི་གམ་དུ་ཡོང་སྟེ། བདག་གི་ཁ་ནས་ཐོན་པའི་རལ་གྲིས་ཁོ་རྣམས་ལ་རྒོལ་བར་བྱའོ།།
REV 2:17 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ།། རྒྱལ་ཁ་ལེན་མཁན་རྣམས་ལ་སྦས་ཤིང་གབ་པའི་མཱན་ནཱ་དེ་ལས་གནང་ངེས་པར་མ་ཟད། རྡོ་དཀར་པོ་ཞིག་ཀྱང་གནང་བར་འགྱུར་ལ། རྡོའི་ཐོག་ཏུ་མིང་གསར་པ་བརྐོས་ཤིང་། ཐོབ་མཁན་ལས་གཞན་སུས་ཀྱང་རྟོགས་པར་མི་འགྱུར་ཞེས་གསུངས་སོ།།
REV 2:18 ཁྱོད་ཀྱིས་ཐི་ཨ་ཏེ་རཱ་ཡི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། སྤྱན་ཟུང་ནི་མེ་ལྕེ་དང་མཚུངས་ཤིང་ཞབས་ནི་འོད་འཕྲོ་བའི་ལི་དང་འདྲ་བའི་དཀོན་མཆོག་གི་སྲས་ཀྱིས་འདི་སྐད་དུ།
REV 2:19 ཁྱོད་ཀྱིས་བྱས་པའི་ལས་དང་། བྱམས་པ། དད་སེམས། ལས་བརྩོན། བཟོད་བསྲན་བཅས་བདག་གིས་ཤེས་པར་མ་ཟད། ཁྱོད་ཀྱིས་ཕྱིས་སུ་བྱས་པའི་ལས་རྣམས་སྔར་ལས་ཀྱང་ལྷག་ཏུ་མང་བའང་ཤེས་སོ།།
REV 2:20 འོན་ཀྱང་། དོན་འདིའི་ཆ་ནས་བདག་གིས་ཁྱོད་ལ་སྐྱོན་འགེལ་ཏེ། རང་ཉིད་ལུང་སྟོན་པ་ཡིན་ཟེར་བའི་བུད་མེད་ཡེ་ཟི་བེལ་གྱིས་བདག་གི་ཞབས་ཕྱི་པ་རྣམས་ལ་ཁྲིད་སྟོན་དང་བསླུ་བྲིད་བྱས་ཤིང་། དེ་དག་གིས་ལོག་གཡེམ་བྱེད་པ་དང་སྐུ་འདྲར་ཕུལ་བའི་མཆོད་རྫས་ཟོས་ཀྱང་ཁྱོད་ཀྱིས་ཁོ་མོ་ལ་བཟོད་པ་སྒོམ་པའི་ཕྱིར་རོ།།
REV 2:21 བདག་གིས་ཁོ་མོར་འགྱོད་བཤགས་བྱེད་པའི་གོ་སྐབས་སྤྲད་ནའང་། ཁོ་མོས་ལོག་གཡེམ་ལས་འགྱོད་བཤགས་བྱེད་པར་མི་འདོད།
REV 2:22 ལྟོས་དང་། བདག་གིས་ཁོ་མོ་མལ་སར་ལྷུང་བར་བྱེད་པ་དང་། ཁོ་མོ་དང་མཉམ་དུ་ལོག་གཡེམ་བྱེད་མཁན་རྣམས་ཀྱིས་ཁོ་མོའི་སྤྱོད་ལམ་ལས་འགྱོད་བཤགས་མི་བྱེད་ན། བདག་གིས་དེ་རྣམས་ལའང་དཀའ་སྡུག་ཆེན་པོ་མྱང་དུ་འཇུག་པ་ཡིན།
REV 2:23 ཡང་བདག་གིས་ཁོ་མོའི་བུ་ཕྲུག་རྣམས་འཆི་ལམ་དུ་བརྫང་བར་བྱེད་ཅིང་། བདག་ནི་མིའི་སེམས་དང་བསམ་པར་རྟོག་དཔྱོད་བྱེད་མཁན་ཡིན་པར་མ་ཟད། ཁྱོད་རྣམས་ཀྱིས་ལས་ཅི་བྱས་པ་རེ་རེ་ལ་ལན་སློག་མཁན་ཡིན་པའང་ཆོས་ཚོགས་ཡོངས་ཀྱིས་ཤེས་པར་འགྱུར་རོ།།
REV 2:24 ཡང་ཁྱོད་ཅག་ཐི་ཨ་ཏེ་རཱ་ཡི་མི་གཞན་དག་སྟེ། དེ་དག་གི་བསླབ་བྱ་ལ་མི་ཉན་པ་དང་། གཞན་རྣམས་གྱིས་རྒྱུན་དུ་གླེང་བའི་བདུད་སཱ་ཏན་གྱི་གསང་བ་ཟེར་བ་མི་རྟོགས་པ་ཐམས་ཅད་ལ། བདག་གིས་ཁུར་བོ་གཞན་ཞིག་ཁྱོད་ཅག་གི་ཕྲག་ལ་མི་འགེལ་ཞེས་སྨྲ་བ་ཡིན།
REV 2:25 འོན་ཀྱང་། ཁྱོད་ཅག་ལ་ཅི་ཞིག་ཡོད་པ་དེ་ང་རང་ཡོང་བའི་བར་དུ་བརྟན་པོར་བསྲུང་བར་བྱའོ།།
REV 2:26 རྒྱལ་ཁ་ལེན་ཞིང་བདག་གི་འཕྲིན་ལས་རྣམས་མཐར་ཐུག་བར་དུ་སྲུང་མཁན་ལ། བདག་གིས་རྒྱལ་ཁབ་ཁག་ལ་དབང་བསྒྱུར་བའི་མངའ་ཐང་གནང་བར་བྱ་སྟེ།
REV 2:27 བདག་ལ་རང་གི་ཡབ་ལས་དབང་ཐང་ཐོབ་པ་བཞིན། ཁོས་ལྕགས་དབྱུག་བཟུང་ནས་དེ་རྣམས་ལ་དབང་བསྒྱུར་ཅིང་དེ་དག་རྫ་ཆས་རྡུལ་དུ་བརླག་པ་བཞིན་དུ་འགྱུར་ཞིང་།
REV 2:28 ཡང་བདག་གིས་ཐོ་རེངས་སྐར་ཆེན་ཁོ་ལ་གནང་བར་བྱའོ།།
REV 2:29 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ་ཞེས་གསུངས་སོ།།
REV 3:1 ཡང་ཁོང་གིས་འདི་སྐད་དུ། ཁྱོད་ཀྱིས་སཱར་དིའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། དཀོན་མཆོག་གི་ཐུགས་ཉིད་བདུན་དང་སྐར་མ་བདུན་ཡོད་པ་དེ་ཉིད་ཀྱིས་འདི་སྐད་དུ། ངས་ཁྱོད་ཀྱི་སྤྱོད་ལམ་ཤེས་ཏེ། མིང་གི་ཆ་ནས་ཁྱོད་ནི་གསོན་པོ་ཡིན་ཡང་དོན་གྱིས་ཁྱོད་ནི་ཤི་ཟིན་ཏོ།།
REV 3:2 ཁྱོད་ཀྱིས་དོགས་ཟོན་གྱིས་ཏེ། ཉམས་པར་འགྱུར་ལ་ཉེ་བའི་དོན་དག་ལྷག་ལུས་རྣམས་བརྟན་པར་བྱའོ།། ཅིའི་ཕྱིར་ཞེ་ན། ངའི་དཀོན་མཆོག་གི་སྤྱན་སྔར་ཁྱོད་ཀྱི་སྤྱོད་ལམ་ལས་ཡོངས་སུ་རྫོགས་པ་བདག་གིས་མ་མཐོང་བས་སོ།།
REV 3:3 དེའི་ཕྱིར། ཁྱོད་ཀྱིས་ཇི་ལྟར་དང་དུ་བླངས་ཤིང་ཇི་ལྟར་ཐོས་པ་བཅས་ནི་ཕྱིར་དྲན་བྱས་ནས་བསྲུང་དགོས་པར་མ་ཟད། འགྱོད་བཤགས་བྱེད་པར་བྱའོ།། གལ་ཏེ་ཁྱོད་ཀྱིས་དོགས་ཟོན་མ་བྱས་ན། བདག་ནི་རྐུན་པོ་གློ་བུར་སླེབས་པ་ལྟར་ཁྱོད་ཀྱི་གམ་དུ་ཡོང་ངེས་ཤིང་། བདག་ནི་དུས་ནམ་ཞིག་ལ་ཡོང་བ་ཁྱོད་ཀྱིས་གཏན་ནས་ཤེས་མི་སྲིད་དོ།།
REV 3:4 འོན་ཀྱང་། ཁྱོད་ལ་སཱར་དི་རུ་ད་དུང་རང་གི་གྱོན་གོས་བཙོག་པར་མ་བཟོས་པའི་མི་འགའ་ཡོད་ལ། ཁོ་རྣམས་ཀྱིས་གོས་དཀར་པོ་གྱོན་ནས་བདག་དང་མཉམ་དུ་བསྐྱོད་པར་ངེས། རྒྱུ་མཚན་ནི་དེ་དག་འོས་ཤིང་འཚམ་པའོ།།
REV 3:5 རྒྱལ་ཁ་ལེན་མཁན་རྣམས་ཀྱིས་དེ་ལྟར་གོས་དཀར་པོ་གྱོན་པར་འགྱུར་ཞིང་། བདག་གིས་ཀྱང་ཚེ་སྲོག་གི་གླེགས་བམ་ལས་དེ་རྣམས་ཀྱི་མིང་གསུབ་པར་མི་བྱེད་ལ། བདག་གི་ཡབ་དང་ཁོང་གི་ཕོ་ཉའི་ཚོགས་ཀྱི་སྤྱན་དྲུང་དུ། མི་དེའི་མིང་ཡང་ཁས་ལེན་པར་འགྱུར་རོ།།
REV 3:6 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ་ཞེས་གསུངས་སོ།།
REV 3:7 ཡང་ཁོང་གིས་འདི་སྐད་དུ། ཁྱོད་ཀྱིས་ཕི་ལཱ་དེལ་ཕི་ཨའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། དམ་པ་དང་། བདེན་པ། དཱ་བིད་ཀྱི་ལྡེ་མིག་ཕྱག་ཏུ་ཐོགས་པ། ཕྱེ་བར་མཛད་ན་རྒྱག་ཐུབ་མཁན་མེད་པ། བརྒྱབ་པར་མཛད་ན་འབྱེད་ཐུབ་མཁན་མེད་པ་དེ་ཉིད་ཀྱིས་འདི་སྐད་དུ།
REV 3:8 ཁྱོད་ཀྱིས་བྱས་པའི་ལས་བདག་གིས་ཤེས་སོ།། ལྟོས་དང་། ཁྱོད་ལ་སྟོབས་ཤུགས་ཉུང་ཙམ་ལས་མེད་ནའང་། ཁྱོད་ཀྱིས་བདག་གི་བཀའ་བརྩིས་པ་དང་། བདག་གི་མིང་ཡང་ཁས་བླངས་པས། བདག་གིས་ཁྱོད་ཀྱི་མདུན་དུ་སྒོ་ཕྱེས་པ་ཞིག་གནང་སྟེ། སྒོ་དེ་ནི་སུས་ཀྱང་རྒྱག་མི་ནུས་སོ།།
REV 3:9 ལྟོས་དང་། བདུད་སཱ་ཏན་གྱི་ཚོགས་ཁག་ལ་གཏོགས་པ་རྣམས་ཀྱིས་རང་ཉིད་ནི་ཡ་ཧུ་དཱ་པ་ཡིན་ཟེར་ཡང་། དོན་དམ་དུ་ཡ་ཧུ་དཱ་པ་མ་ཡིན་པར་རྫུན་སྨྲ་མཁན་ཡིན། ངས་ཁོ་རྣམས་ཁྱོད་ཀྱི་ཞབས་དྲུང་དུ་ཡོང་ནས་ཕྱག་འཚལ་བ་དང་། བདག་གིས་ཁྱོད་ལ་གཅེས་པ་ནི་ཁོ་རྣམས་ལ་ཤེས་སུ་འཇུག་པར་ངེས།
REV 3:10 ཁྱོད་ཀྱིས་བདག་གི་བཟོད་བསྲན་དགོས་པའི་བཀའ་བསྲུངས་པས། འཇིག་རྟེན་ཡོངས་སུ་ཚོད་བརྟག་དང་འཕྲད་པའི་དུས་ཏེ། ས་སྟེང་དུ་གནས་པའི་མི་རྣམས་ལ་ཚོད་བརྟག་ཐེབས་པའི་དོན་དེ་ལས་བདག་གིས་ཁྱོད་རང་བསྲུང་བར་འགྱུར་རོ།།
REV 3:11 བདག་ནི་མྱུར་བ་མྱུར་དུ་ཡོང་ངེས་ལ། ཁྱོད་ཀྱི་ཅོད་པན་མི་གཞན་གྱིས་མི་འཕྲོག་པའི་ཕྱིར། ཁྱོད་ཀྱིས་རང་ལ་ཅི་ཡོད་པ་ཐམས་ཅད་བརྟན་པོར་བསྲུང་དགོས་སོ།།
REV 3:12 བདག་གིས་རྒྱལ་ཁ་ལེན་མཁན་གང་ཞིག་ནི་ངའི་དཀོན་མཆོག་གི་མཆོད་ཁང་དུ་ཀ་བར་བསྐོ་བ་དང་། ཁོ་རང་ནམ་ཡང་དེ་ནས་ཕྱིར་འགྲོ་བར་མི་བྱའོ།། ཡང་ངས་རང་ཉིད་ཀྱི་དཀོན་མཆོག་གི་མཚན་དང་། ངའི་དཀོན་མཆོག་གི་གྲོང་ཁྱེར་གྱི་མིང་སྟེ། ནམ་མཁའི་ཞིང་ཁམས་དང་ངའི་དཀོན་མཆོག་ལས་མར་འབབ་པའི་ཡེ་རུ་སཱ་ལེམ་གསར་པ། བདག་གི་མིང་གསར་པ་བཅས་ནི་མི་དེའི་ལུས་སྟེང་དུ་འབྲི་བར་འགྱུར་རོ།།
REV 3:13 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ་ཞེས་གསུངས་སོ།།
REV 3:14 ཡང་ཁོང་གིས་འདི་སྐད་དུ། ཁྱོད་ཀྱིས་ལའོ་དི་ཀེ་ཡཱའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། ཨ་མེན་ཞེས་འབོད་ཅིང་། ཡིད་རྟོན་རུང་ཞིང་དྲང་བདེན་གྱི་དཔང་པོ། དཀོན་མཆོག་གིས་བསྐྲུན་པའི་དངོས་པོ་ཐམས་ཅད་ཀྱི་འབྱུང་ཁུངས་ཡིན་པ་དེ་ཉིད་ཀྱིས་འདི་སྐད་དུ།
REV 3:15 ཁྱོད་ཀྱིས་བྱས་པའི་ལས་བདག་གིས་ཤེས་ཏེ། ཁྱོད་ནི་གྲང་བ་མིན་ལ་ཚ་བའང་མིན། ངས་ཁྱོད་ནི་གྲང་བའམ་ཡང་ན་ཚ་བ་ཡིན་ན་ཅི་མ་རུང་སྙམ།
REV 3:16 ཁྱོད་ནི་ཆུ་དྲོད་འཇམ་ཞིག་དང་འདྲ་སྟེ། གྲང་བ་མ་ཡིན་ལ་ཚ་བའང་མིན་པས། བདག་གིས་རང་གི་ཁ་ནས་ཁྱོད་རང་བསྐྱུག་ངེས་ཡིན།
REV 3:17 ཁྱོད་ན་རེ། ང་ནི་ཕྱུག་ཅིང་རྒྱུ་ནོར་འཛོམས་པས་ཅི་ཡང་མི་མཁོ་ཞེས་ཟེར་ཡང་། དོན་དམ་དུ་ཁྱོད་ནི་ཐ་ཤལ་བ་དང་། ཉམ་ང་བ། དབུལ་ཕོངས། ལོང་བ། གཅེར་བུ་བཅས་ཡིན་པ་ཁྱོད་ཀྱིས་མི་ཤེས་སོ།།
REV 3:18 བདག་གིས་ཁྱོད་ལ་བློ་འདོན་པར་བྱ་སྟེ། ཁྱོད་ནི་ཕྱུག་པོར་འགྱུར་བའི་ཕྱིར། བདག་ལས་མེས་བཙོ་སྦྱང་བྱས་པའི་གསེར་ཉོ་བར་གྱིས། ཡང་ཁྱོད་ཀྱི་ལུས་པོ་གཅེར་བུ་ཡིན་པའི་ངོ་ཚ་དེ་མི་མངོན་པའི་ཕྱིར། གོས་དཀར་པོ་ཉོས་ནས་གྱོན་ཞིག ཡང་ཁྱོད་ཀྱི་མིག་གིས་མཐོང་བའི་ཕྱིར། མིག་སྨན་ཉོས་ནས་མིག་ལ་བྱུག་པར་བྱའོ།།
REV 3:19 བདག་གིས་གཅེས་སུ་འཛིན་པ་རྣམས་ལ་གཤེ་གཤེ་གཏོང་ཞིང་བསླབ་བྱ་གནང་བ་ཡིན་པས། ཁྱོད་ཀྱིས་ངར་ཤུགས་བསྐྱེད་པ་དང་འགྱོད་བཤགས་ཀྱང་བྱེད་དགོས་སོ།།
REV 3:20 ལྟོས་དང་། བདག་ནི་སྒོ་ཁར་འགྲེང་ཞིང་སྒོ་རྡུང་བཞིན་ཡོད། གལ་ཏེ། སུ་ཞིག་གིས་ངའི་སྐད་ཐོས་པ་དང་སྒོ་ཕྱེས་པ་ཡིན་ན། ང་རང་དེའི་ནང་དུ་ཞུགས་ཏེ་ཁོ་དང་མཉམ་དུ་ཁ་ཟས་ལ་རོལ་བར་བྱའོ།།
REV 3:21 ངས་རྒྱལ་ཁ་ལེན་མཁན་རྣམས་རང་གི་བཞུགས་ཁྲིའི་སྟེང་ང་དང་མཉམ་དུ་སྡོད་པར་བྱའོ།། དེ་ནི་བདག་ལ་རྒྱལ་ཁ་ཐོབ་སྟེ་རང་གི་ཡབ་ཀྱི་བཞུགས་ཁྲིའི་སྟེང་ཁོང་དང་མཉམ་དུ་བསྡད་པ་བཞིན་ཡིན་ནོ།།
REV 3:22 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ་ཞེས་གསུངས་སོ།།
REV 4:1 དོན་དེ་དག་བྱུང་བའི་རྗེས་སུ་བདག་གིས་ཕར་བལྟས་པ་ན། ལྟོས་དང་། ནམ་མཁའི་ཞིང་ཁམས་སུ་སྒོ་ཞིག་ཕྱེས་འདུག་པ་མཐོང་ངོ་།། བདག་གིས་ཐེངས་དང་པོར་དུང་སྐད་ལྟ་བུའི་སྒྲ་ཞིག་ཐོས་ཤིང་བདག་ལ་འདི་སྐད་དུ། ཁྱོད་རང་ཡར་ཤོག་དང་། བདག་གིས་དོན་དེ་དག་གི་རྗེས་སུ་འབྱུང་བར་འགྱུར་བའི་དོན་རྣམས་ཁྱོད་ལ་སྟོན་པར་བྱའོ་ཞེས་གསུངས།
REV 4:2 དེ་མ་ཐག་ཏུ། ང་རང་དམ་པའི་ཐུགས་ཉིད་ཀྱི་ནང་དུ་དྲངས་ཤིང་། ལྟོས་དང་། ནམ་མཁའི་ཞིང་ཁམས་སུ་བཞུགས་ཁྲི་ཞིག་འདུག་ལ། བཞུགས་ཁྲི་དེའི་སྟེང་དུ་གང་ཞིག་བཞུགས་ཡོད་པ་མཐོང་ངོ་༎
REV 4:3 བཞུགས་འདུག་པ་དེ་ཉིད་ཕར་བལྟས་ན་གཡང་ཊི་སྔོན་པོ་དང་པད་མ་རཱ་ག་དམར་པོ་དང་མཚུངས་ཤིང་། བཞུགས་ཁྲིའི་མཐའ་འཁོར་དུ་འཇའ་ཚོན་ཡང་ཤར་ཡོད་ལ། དེ་ནི་མ་རྒད་ལྗང་ཁུའི་མདངས་དང་མཚུངས།
REV 4:4 བཞུགས་ཁྲིའི་མཐའ་འཁོར་དུ་ཁྲི་གཞན་ཉེར་བཞི་ཡོད་ལ། ཁྲི་དེ་དག་གི་སྟེང་དུ་རྒན་པོ་ཉེར་བཞི་བཞུགས་ཡོད་པ་མཐོང་ཞིང་། གོས་དཀར་པོ་མནབས་པ་དང་དབུ་ལ་གསེར་གྱི་ཅོད་པན་གསོལ་ཡོད།
REV 4:5 བཞུགས་ཁྲི་དེ་ལས་གློག་དམར་འཁྱུག་ཅིང་ལྡིར་སྒྲ་སྒྲོག་པ་དང་འབྲུག་སྒྲ་གྲགས། ཡང་བཞུགས་ཁྲིའི་མདུན་དུ་དཔལ་འབར་བདུན་སྦར་ཡོད་ལ། དེ་དག་ནི་དཀོན་མཆོག་གི་ཐུགས་ཉིད་བདུན་ཡིན་ནོ།།
REV 4:6 བཞུགས་ཁྲིའི་མདུན་དུ་ཤེལ་གྱི་རྒྱ་མཚོ་ལྟ་བུ་ཞིག་ཡོད་ལ། དེ་ནི་ཆུ་ཤེལ་དང་མཚུངས། བཞུགས་ཁྲིའི་དཀྱིལ་དབུས་དང་བཞུགས་ཁྲིའི་མཐའ་འཁོར་དུ་སེམས་ཅན་བཞི་ཡོད་ལ། དེ་དག་ནི་ལུས་པོའི་མདུན་རྒྱབ་ཡོངས་ལ་མིག་གིས་གང་འདུག་གོ།
REV 4:7 སེམས་ཅན་དང་པོ་ནི་སེང་གེ་དང་མཚུངས། སེམས་ཅན་གཉིས་པ་ནི་བ་ཕྲུག་དང་མཚུངས། སེམས་ཅན་གསུམ་པའི་ཞལ་རས་ནི་མིའི་ངོ་གདོང་དང་མཚུངས། སེམས་ཅན་བཞི་པ་ནི་ནམ་འཕང་སྐྱོད་པའི་གླག་དང་མཚུངས།
REV 4:8 སེམས་ཅན་བཞི་པོ་རེ་རེ་ལ་གཤོག་པ་དྲུག་རེ་ཡོད་པ་དང་། ལུས་པོའི་ཕྱི་ནང་ཀུན་ལ་མིག་གིས་གང་ཞིང་། དེ་དག་གིས་ཉིན་མཚན་མེད་པར་འདི་སྐད་དུ། དམ་པ་དམ་པ་དམ་པ་སྟེ།། གཙོ་བོ་ཀུན་དབང་དཀོན་མཆོག་ནི།། ད་ལྟ་བཞུགས་ཤིང་སྔར་མཆིས་པ།། ཕེབས་པར་ངེས་པ་ཉིད་ལགས་སོ།། ཞེས་གསུངས་སོ།།
REV 4:9 དེ་ནས་ཡང་སེམས་ཅན་བཞི་པོས་བཞུགས་ཁྲི་སྟེང་དུ་བཞུགས་ཤིང་ཇི་སྲིད་བར་དུ་གསོན་པོར་བཞུགས་པ་དེ་ཉིད་ལ་བསྟོད་བསྔགས་དང་། བསྙེན་བཀུར། བཀའ་དྲིན་བཅས་འབུལ་བའི་སྐབས་སུ།
REV 4:10 རྒན་པོ་ཉེར་བཞིས་བཞུགས་ཁྲིའི་སྟེང་དུ་བཞུགས་པ་དེ་ཉིད་ཀྱི་དྲུང་དུ་ཕྱག་འཚལ་ཞིང་། ཇི་སྲིད་བར་དུ་གསོན་པོར་བཞུགས་པ་དེ་ཉིད་ལ་བསྟོད་བསྔགས་བརྗོད་པ་དང་། ཡང་ཁོང་རྣམས་ཀྱིས་རང་གི་ཅོད་པན་བཞུགས་ཁྲིའི་མདུན་དུ་བཞག་སྟེ་འདི་སྐད་དུ།
REV 4:11 ཀྱེ་ཀྱེ་ང་ཚོའི་གཙོ་བོ་དང་༎ ང་ཚོའི་དཀོན་མཆོག་ཁྱེད་རང་ལགས།། བསྟོད་བསྔགས་དང་ནི་བསྙེན་བཀུར་དང་།། དབང་ཐང་ཁྱེད་ལ་འོས་ཤིང་འབྱོར།། ཅིའི་ཕྱིར་ཞེ་ན་འདི་ལྟ་སྟེ།། ཁྱེད་ཀྱིས་ཐམས་ཅད་བསྐྲུན་པ་ནི།། ཐུགས་དགོངས་བཞིན་དུ་གྲུབ་ཅིང་གནས།། ཞེས་གསུངས་སོ།།
REV 5:1 དེ་ནས་བདག་གིས་བཞུགས་ཁྲིའི་སྟེང་དུ་བཞུགས་པ་དེ་ཉིད་ཀྱི་ཕྱག་གཡས་པར་ཤོག་དྲིལ་ཐོགས་ཤིང་། ཤོག་དྲིལ་གྱི་ཕྱི་ནང་གཉིས་ཀར་ཡི་གེ་བྲིས་ཏེ་ཐམ་ག་བདུན་བཀོད་ནས་སྦྱར་ཡོད་པ་མཐོང་ངོ་༎
REV 5:2 ཡང་ཕོ་ཉ་ནུས་མཐུ་ཅན་ཞིག་གིས་སྐད་ཆེན་པོས་འདི་སྐད་དུ། ཤོག་དྲིལ་འདིའི་ཁ་འབྱེད་པ་དང་ཐམ་ག་བདུན་པོ་འགོག་པར་འོས་པ་སུ་ཡོད་ཅེས་སྒྲོག་པ་བདག་གིས་མཐོང་།
REV 5:3 ཡང་ནམ་མཁའི་ཞིང་ཁམས་དང་། ས་སྟེང་། ས་འོག་བཅས་ནས་ཤོག་དྲིལ་གྱི་ཁ་འབྱེད་པ་དང་དེར་བལྟ་ནུས་མཁན་གཅིག་ཀྱང་མ་བྱུང་ངོ་༎
REV 5:4 དེ་ནས་ཤོག་དྲིལ་གྱི་ཁ་འབྱེད་འོས་མཁན་དང་བལྟ་འོས་མཁན་མ་རྙེད་པས་བདག་ནི་རབ་ཏུ་ངུས་ཤིང་།
REV 5:5 རྒན་པོ་རྣམས་ལས་གཅིག་གིས་བདག་ལ་འདི་སྐད་དུ། ངུ་བར་མི་བྱའོ།། ལྟོས་དང་། ཡ་ཧུ་དཱའི་ཚོ་ཁག་གི་སེངྒེ་དང་དཱ་བིད་རིགས་རྒྱུད་ཀྱི་རྩ་བས་རྒྱལ་ཁ་བླངས་ཟིན་པས། ཁོང་གིས་ཤོག་དྲིལ་གྱི་ཁ་འབྱེད་པ་དང་དེའི་ཐམ་ག་བདུན་པོ་འགོག་ནུས་པ་ཡིན་ཞེས་གསུངས་སོ།།
REV 5:6 དེ་ནས་ཡང་བདག་གིས་བཞུགས་ཁྲི་དང་སེམས་ཅན་བཞི་པོ། རྒན་པོ་བཅས་ཀྱི་ཁྲོད་དུ་ལུ་གུ་ཞིག་ཡར་ལངས་འདུག་པ་མཐོང་ཞིང་། ལུ་གུ་དེ་ནི་བསད་མྱོང་བ་ཞིག་དང་མཚུངས་སོ།། དེ་ལ་རྭ་ཅོ་བདུན་དང་མིག་བདུན་ཡོད་ལ། མིག་བདུན་པོ་ནི་འཇིག་རྟེན་ཡོངས་ལ་མངགས་པའི་དཀོན་མཆོག་གི་ཐུགས་ཉིད་བདུན་ཡིན་ནོ༎
REV 5:7 དེ་ནས་ལུ་གུ་ཕར་སོང་ནས་བཞུགས་ཁྲིའི་སྟེང་དུ་བཞུགས་པ་དེ་ཉིད་ཀྱི་ཕྱག་གཡས་པ་ནས་ཤོག་དྲིལ་ཚུར་བླངས་པ་དང་།
REV 5:8 ཁོང་གིས་ཤོག་དྲིལ་ཕྱག་ཏུ་བཟུང་བ་ན། སེམས་ཅན་བཞི་པོ་དང་རྒན་པོ་ཉེར་བཞིས་ལུ་གུའི་མདུན་དུ་ཕྱག་བཙལ་ཞིང་། དེ་དག་སོ་སོས་ཕྱག་ཏུ་རྒྱུད་མངས་ཐོགས་པ་དང་སྤོས་ཀྱིས་གང་བའི་གསེར་གྱི་ཕོར་བ་བཟུང་བ་དང་། སྤོས་ནི་དད་ལྡན་དམ་པ་རྣམས་ཀྱི་སྨོན་ལམ་ཡིན་ལ།
REV 5:9 ཁོང་རྣམས་ཀྱིས་བསྟོད་དབྱངས་གསར་པ་ལེན་བཞིན་འདི་སྐད་དུ། ཁྱེད་ནི་ཤོག་དྲིལ་ལེན་ལ་འོས་ཤིང་འབྱོར།། ཁྱེད་ནི་དེ་ཡི་ཐམ་ག་འགོག་ལ་འཚམ།། ཁྱེད་ནི་དེ་སྔར་སྐུ་བཀྲོངས་མྱོང་བ་དང་།། ཁྱེད་ཀྱིས་རང་གི་སྐུ་ཁྲག་བཞུར་བ་ལས།། ཚོ་པ་སྐད་རིགས་མི་སྡེ་སོ་སོ་དང་།། མི་རིགས་སོ་སོ་ནས་ཀྱང་མི་རྣམས་ནི༎ དཀོན་མཆོག་ཁོང་ཉིད་དོན་དུ་བླུས་པས་སོ།།
REV 5:10 གཞན་ཡང་དེ་རྣམས་རང་རེའི་དཀོན་མཆོག་གི། རྒྱལ་སྲིད་དང་ནི་མཆོད་དཔོན་དུ་མཛད་ཅིང་།། ས་གཞིའི་སྲིད་འཛིན་མཁན་དུ་འགྱུར་བ་འོ།། ཞེས་པའོ།།
REV 5:11 ཡང་བདག་གིས་ཕར་བལྟས་པ་ན། བཞུགས་ཁྲི་དང་སེམས་ཅན། རྒན་པོ་བཅས་མཐོང་ཞིང་། དེ་དག་གི་མཐའ་འཁོར་དུ་ཕོ་ཉ་མང་པོའི་གསུང་སྐད་ཐོས་པ་དང་། ཕོ་ཉའི་གྲངས་ཀ་ནི་ཁྲི་ཁྲི་འབུམ་འབུམ་མཆིས་སོ།།
REV 5:12 དེ་རྣམས་ཀྱིས་སྐད་ཆེན་པོས་འདི་སྐད་དུ། དེ་སྔར་སྐུ་སྲོག་བཀྲོངས་པའི་ལུ་གུ་ནི།། དབང་ཐང་ཁྱད་ནོར་མཁྱེན་རབ་ནུས་མཐུ་དང་།། བསྙེན་བཀུར་གཟི་བརྗིད་བསྟོད་བསྔགས་འབུལ་བ་བཅས།། ཁྱེད་ལ་འོས་ཤིང་འབྱོར་བ་ཡིན་ལགས་སོ།། ཞེས་གསུངས་སོ།།
REV 5:13 ཡང་ནམ་མཁའི་ཞིང་ཁམས་དང་། ས་སྟེང་། ས་འོག རྒྱ་མཚོ་བཅས་དང་། དེ་རྣམས་ཀྱི་ནང་དུ་ཡོད་པའི་བསྐྲུན་པའི་དངོས་པོ་ཐམས་ཅད་ན་རེ། བསྔགས་བརྗོད་བསྙེན་བཀུར་གཟི་བརྗིད་མངའ་ཐང་བཅས།། བཞུགས་ཁྲིར་བཞུགས་མཁན་ཁོང་དང་ལུ་གུ་ལ།། ཇི་སྲིད་བར་དུ་ཕུལ་ཞིང་འབུལ་བར་སྨོན།། ཞེས་སྨྲས་པ་བདག་གིས་ཐོས་སོ།།
REV 5:14 དེ་ནས་སེམས་ཅན་བཞི་པོས་འདི་སྐད་དུ། ཨ་མེན་ཞེས་གསུངས་ཤིང་། རྒན་པོ་རྣམས་ཀྱིས་ཀྱང་ཕྱག་བཙལ་ནས་བསྟོད་བསྔགས་བརྗོད་དོ༎
REV 6:1 དེ་ནས་ལུ་གུས་ཐམ་ག་བདུན་པོ་ལས་གཅིག་གི་ཁ་འབྱེད་བཞིན་པ་བདག་གིས་མཐོང་བ་དང་། སེམས་ཅན་བཞི་པོ་ལས་སེམས་ཅན་གཅིག་གིས་འདི་སྐད་དུ། ཤོག་དང་ཞེས་གསུངས་པ་ཐོས་ཤིང་། ཁོང་གི་སྐད་ནི་འབྲུག་སྒྲ་དང་མཚུངས་སོ།།
REV 6:2 དེ་ནས་བདག་གིས་ཕར་བལྟས་པ་ན། ལྟོས་དང་། རྟ་དཀར་པོ་ཞིག་མཐོང་ཞིང་། རྟ་ལ་ཞོན་མཁན་གྱིས་ལག་ཏུ་གཞུ་བཟུང་ཡོད་ལ། དེ་ལ་ཅོད་པན་ཡང་བསྩལ་ཡོད། དེ་ནི་རྒྱལ་ཞིང་རྣམ་པར་རྒྱལ་བའི་ཕྱིར་ཕྱི་རོལ་ཏུ་ཐོན་ནོ།།
REV 6:3 དེ་ནས་ལུ་གུས་ཐམ་ག་གཉིས་པ་ཁ་འབྱེད་པའི་དུས་སུ། སེམས་ཅན་གཉིས་པས་འདི་སྐད་དུ། ཤོག་དང་ཞེས་གསུངས་པ་བདག་གིས་ཐོས་སོ༎
REV 6:4 དེ་ནས་རྟ་གཞན་ཞིག་ཕྱི་རོལ་ཏུ་ཐོན་པ་དང་། དེ་ནི་རྟ་རྐྱང་རྐྱང་ཞིག་ཡིན། རྟ་ལ་ཞོན་མཁན་དེར་ས་སྟེང་གི་ཞི་བདེ་ལེན་པར་བྱེད་པ་དང་། མི་རྣམས་ཕན་ཚུན་གསོད་རེས་བྱེད་དུ་འཇུག་པའི་དབང་ཤུགས་བསྩལ་ཡོད་ལ། རལ་གྲི་ཆེན་པོ་ཞིག་ཀྱང་གནང་ངོ་།།
REV 6:5 དེ་ནས་ལུ་གུས་ཐམ་ག་གསུམ་པ་ཁ་འབྱེད་པའི་དུས་སུ། སེམས་ཅན་གསུམ་པས་འདི་སྐད་དུ། ཤོག་དང་ཞེས་གསུངས་པ་བདག་གིས་ཐོས་སོ༎ དེ་ནས་བདག་གིས་ཕར་བལྟས་པ་ན། ལྟོས་དང་། རྟ་ནག་པོ་ཞིག་མཐོང་ཞིང་། རྟ་ལ་ཞོན་མཁན་གྱིས་ལག་ཏུ་རྒྱ་སྲང་ཞིག་བཟུང་ཡོད།
REV 6:6 སེམས་ཅན་བཞི་པོའི་ཁྲོད་ནས་སྐད་སྒྲ་ལྟ་བུ་ཞིག་གྲགས་ཏེ་འདི་སྐད་དུ། གྲོ་བྲེ་གང་གི་རིན་གོང་ནི་དངུལ་སྒོར་གཅིག་དང་། ནས་བྲེ་གསུམ་གྱི་རིན་གོང་ནི་དངུལ་སྒོར་གཅིག་ཡིན། སྣུམ་དང་རྒུན་ཆང་ནི་འཕྲོ་བརླག་ཏུ་གཏོང་མི་རུང་ཞེས་གསུངས་པ་བདག་གིས་ཐོས་སོ།།
REV 6:7 དེ་ནས་ལུ་གུས་ཐམ་ག་བཞི་པ་ཁ་འབྱེད་པའི་དུས་སུ། སེམས་ཅན་བཞི་པས་འདི་སྐད་དུ། ཤོག་དང་ཞེས་གསུངས་པ་བདག་གིས་ཐོས་སོ༎
REV 6:8 དེ་ནས་བདག་གིས་ཕར་བལྟས་པ་ན། ལྟོས་དང་། རྟ་སྐྱ་བོ་ཞིག་མཐོང་ཞིང་། རྟ་ལ་ཞོན་མཁན་གྱི་མིང་ལ་འཆི་བ་ཟེར། གཤིན་པོའི་གནས་ཀྱང་དེའི་རྗེས་སུ་འབྲང་ཡོད། དེ་རྣམས་ལ་རལ་གྲི་དང་། མུ་གེ ནད་ཡམས། གཅན་གཟན་བཅས་བཀོལ་ནས། ས་སྟེང་གི་མི་རྣམས་ལས་བཞི་ཆའི་གཅིག་གསོད་པའི་དབང་ཤུགས་བསྩལ་ཡོད་དོ།།
REV 6:9 དེ་ནས་ལུ་གུས་ཐམ་ག་ལྔ་པ་ཁ་འབྱེད་པའི་དུས་སུ། མཆོད་ཁྲིའི་འོག་ཏུ་དཀོན་མཆོག་གི་བཀའ་ཡི་ཆེད་དང་ཁོང་ལ་བདེན་དཔང་བྱེད་པའི་ཕྱིར་བཀྲོངས་པ་རྣམས་ཀྱི་རྣམ་ཤེས་བདག་གིས་མཐོང་ངོ་།།
REV 6:10 དེ་དག་གིས་སྐད་ཆེན་པོས་འདི་ལྟར་སྨྲས་པ། ཀྱེ། དམ་པ་དང་བདེན་པ་ཡི་བདག་པོ་ལགས། ཁྱེད་ཀྱིས་ས་སྟེང་གི་མི་རྣམས་ལ་ཉེས་ཆད་མི་གཅོད་ཅིང་། ངེད་ཅག་གི་ཁྲག་བཞུར་བ་ལ་སྲོག་ལན་ཡང་མི་འཇལ་ལམ། ངེད་ཅག་གིས་དུས་ནམ་ཞིག་གི་བར་དུ་སྒུག་དགོས་སམ་ཞེས་ཞུས་སོ།།
REV 6:11 དེ་ནས་དེ་དག་རེ་རེ་ལ་ལྭ་རིང་དཀར་པོ་རེ་གནང་ཞིང་། མཉམ་དུ་ཞབས་ཕྱི་པར་གྱུར་པ་དག་དང་ཁོ་རྣམས་ཀྱི་སྤུན་ཟླ་རྣམས་ཀྱང་ཁོ་རྣམས་བཞིན། སྐུ་བཀྲོངས་ཏེ་གྲངས་ཀ་ལོང་བའི་བར་དུ། ད་དུང་རེ་ཞིག་ལ་སྒུག་དགོས་པའི་བཀའ་གནང་ངོ་།།
REV 6:12 དེ་ནས་ལུ་གུས་ཐམ་ག་དྲུག་པ་ཁ་འབྱེད་པའི་དུས་སུ། བདག་གིས་ཕར་བལྟས་པ་ན། ས་འགུལ་ཆེན་པོ་བྱུང་བ་དང༌། ཉི་མ་ནི་རྩིད་རས་བཞིན་ནག་པོར་གྱུར་པ། ཟླ་བ་ཡོངས་སུ་ཁྲག་ལྟར་དམར་པོར་གྱུར་པ།
REV 6:13 ནམ་མཁའི་སྐར་ཚོགས་ས་ལ་ལྷུང་ཞིང་། དེ་ནི་དྲག་རླུང་གིས་བསེ་ཡབ་ཤིང་བསྒུལ་ནས་འབྲས་བུ་མ་སྨིན་པ་རྣམས་ས་ལ་ཐོར་བ་ལྟ་བུའོ།།
REV 6:14 ནམ་མཁའ་ནི་ཤོག་དྲིལ་སྒྲིལ་བ་བཞིན་ཡལ་བ་དང་། རི་དང་གླིང་ཕྲན་ཐམས་ཅད་ཀྱང་གཡོ་བར་གྱུར་ཏེ་རང་ས་ནས་སྤར་བ་མཐོང་ངོ་།།
REV 6:15 དེ་ནས་ས་སྟེང་གི་རྒྱལ་པོ་དང་། བློན་ཆེན་དང་། དམག་དཔོན་དང་། ཕྱུག་པོ་དང་། སྟོབས་ཅན་རྣམས་དང་། གཡོག་པོ་དང་རང་དབང་ཅན་ཐམས་ཅད་རི་ཕུག་དང་རིའི་བྲག་སྐྱིབས་སུ་སོང་ནས་སྦས་ཏེ།
REV 6:16 རི་དང་བྲག་ལ་འདི་ལྟར་སྨྲས་པ། བཞུགས་ཁྲིའི་སྟེང་དུ་བཞུགས་མཁན་གྱི་ཞལ་རས་དང་ལུ་གུའི་ཐུགས་ཁྲོ་ལ་གཡོལ་བའི་ཕྱིར། ངེད་ཅག་གི་སྟེང་དུ་བསྙིལ་ནས་ངེད་རྣམས་སྦ་བར་མཛོད།
REV 6:17 ཁོང་རྣམ་གཉིས་ཐུགས་ཁྲོ་བའི་ཉིན་དྲག་པོ་དེ་ནི་སླེབས་ཟིན་པས། སུ་ཞིག་ལངས་ནས་སྡོད་ཐུབ་བམ་ཞེས་པའོ།།
REV 7:1 དོན་དེའི་རྗེས་སུ། ཕོ་ཉ་བཞི་ནི་ས་གཞིའི་ཟུར་བཞི་རུ་བཞེངས་ཡོད་དེ། ས་གཞི་དང་། རྒྱ་མཚོ། ཤིང་སྡོང་བཅས་ཀྱི་སྟེང་དུ་རླུང་མི་གཡུག་པའི་ཕྱིར། ས་སྟེང་གི་ཕྱོགས་བཞིའི་རླུང་དབང་དུ་བསྒྱུར་འདུག་པ་བདག་གིས་མཐོང་ངོ་༎
REV 7:2 ཡང་ཕོ་ཉ་གཞན་ཞིག་ཤར་ཕྱོགས་ནས་ཡར་འོངས་ཤིང་གཏན་དུ་གསོན་པོར་བཞུགས་པའི་དཀོན་མཆོག་གི་ཐམ་ག་ཕྱག་ཏུ་ཐོགས་པ་བདག་གིས་མཐོང་། ཕོ་ཉ་དེས་ས་གཞི་དང་རྒྱ་མཚོ་ལ་གནོད་པ་བྱེད་པའི་དབང་ཐོབ་མཁན་གྱི་ཕོ་ཉ་བཞི་པོ་ལ་སྐད་ཆེན་པོས་འདི་སྐད་དུ།
REV 7:3 ངེད་ཅག་གིས་རང་རེའི་དཀོན་མཆོག་གི་ཞབས་ཕྱི་པ་རྣམས་ཀྱི་དཔྲལ་བར་ཐམ་ག་བཀོད་རེག་བར་དུ། ཁྱོད་ཅག་གིས་ས་གཞི་དང༌། རྒྱ་མཚོ། ཤིང་སྡོང་དག་ལ་གནོད་འཚེ་མ་བྱེད་ཅེས་གསུངས་སོ།།
REV 7:4 དེ་ནས་བདག་གིས་ཡེས་ར་ཨེལ་བུ་རྒྱུད་ཀྱི་ཚོ་པ་ཐམས་ཅད་ལས་ཐམ་ག་བཀོད་པའི་མི་གྲངས་ཆིག་འབུམ་བཞི་ཁྲི་བཞི་སྟོང་ཡོད་པ་ཐོས་ཤིང་།
REV 7:5 དེ་དག་ནི་འདི་ལྟ་སྟེ། ཡ་ཧུ་དཱ་ཚོ་པ་ལས་ཐམ་ག་བཀོད་པའི་མི་ཆིག་ཁྲི་ཉིས་སྟོང་དང་། རུ་བེན་ཚོ་པ་ལས་མི་ཆིག་ཁྲི་ཉིས་སྟོང་དང་། གཱ་རྡུ་ཚོ་པ་ལས་མི་ཆིག་ཁྲི་ཉིས་སྟོང་དང་།
REV 7:6 ཨ་ཤེར་ཚོ་པ་ལས་མི་ཆིག་ཁྲི་ཉིས་སྟོང་དང་། ནཱབ་ཐ་ལི་ཚོ་པ་ལས་མི་ཆིག་ཁྲི་ཉིས་སྟོང་དང་། མཱ་ན་ཤེ་ཚོ་པ་ལས་མི་ཆིག་ཁྲི་ཉིས་སྟོང་དང་།
REV 7:7 སི་མུ་ཨོན་ཚོ་པ་ལས་མི་ཆིག་ཁྲི་ཉིས་སྟོང་དང་། ལེ་ཝི་ཚོ་པ་ལས་མི་ཆིག་ཁྲི་ཉིས་སྟོང་དང་། ཡེས་སི་ཀཱར་ཚོ་པ་ལས་མི་ཆིག་ཁྲི་ཉིས་སྟོང་དང༌།
REV 7:8 ཟེ་བུ་ལུན་ཚོ་པ་ལས་མི་ཆིག་ཁྲི་ཉིས་སྟོང་དང་། ཡོ་སེབ་ཚོ་པ་ལས་མི་ཆིག་ཁྲི་ཉིས་སྟོང་དང་། པེན་ཡཱ་མེན་ཚོ་པ་ལས་མི་ཆིག་ཁྲི་ཉིས་སྟོང་ཡོད་པ་བཅས་སོ།།
REV 7:9 དོན་དེའི་རྗེས་སུ། ཡང་བདག་གིས་ཕར་བལྟས་པ་ན། ལྟོས་དང་། མི་ཤིན་ཏུ་མང་པོ་བགྲང་གིས་མི་ལང་བ་ཞིག་མཐོང་ཞིང་། དེ་རྣམས་ནི་མི་རིགས་སོ་སོ་དང་། ཚོ་པ་སོ་སོ། མི་སྡེ་སོ་སོ། སྐད་རིགས་སོ་སོ་བཅས་ནས་ཐོན་པ་དང་། བཞུགས་ཁྲི་དང་ལུ་གུའི་མདུན་དུ་ཡར་འགྲེང་ཞིང་། ལུས་ལ་ལྭ་རིང་དཀར་པོ་གྱོན་པ་དང་ལག་ཏུ་ཏ་ལའི་ཤིང་གི་ཡལ་ག་བཟུང་སྟེ།
REV 7:10 སྐད་ཆེན་པོས་འདི་ལྟར་དུ་སྨྲས་པ། བཞུགས་ཁྲིའི་སྟེང་དུ་བཞུགས་པའི་རང་རེའི་དཀོན་མཆོག་དང་།། ལུ་གུ་ལ་ནི་ཐར་པའི་དབང་དེ་གཏོགས་པ་ལགས།། ཞེས་པའོ།།
REV 7:11 དེ་ནས་ཕོ་ཉ་ཐམས་ཅད་བཞུགས་ཁྲི་དང་། རྒན་པོ་རྣམས། སེམས་ཅན་བཞི་པོ་བཅས་ཀྱི་མཐའ་འཁོར་དུ་ཡར་འགྲེངས་ནས་སྡོད་པ་དང་། ཡང་བཞུགས་ཁྲིའི་མདུན་དུ་ཕྱག་བཙལ་ནས་དཀོན་མཆོག་ལ་འདི་ལྟར་བསྟོད་བསྔགས་བརྗོད་པ་སྟེ།
REV 7:12 ཨ་མེན་བསྟོད་བསྔགས་གཟི་བརྗིད་མཁྱེན་རབ་དང་།། ཐུགས་རྗེ་བསྙེན་བཀུར་དབང་ཐང་ནུས་མཐུ་བཅས།། ཐམས་ཅད་ཇི་སྲིད་བར་དུ་བདག་ཅག་གི ། དཀོན་མཆོག་ཁོང་ལ་ཡོད་པར་གྱུར་ཅིག་ཨང་༎ ཨ་མེན་ཞེས་སོ།།
REV 7:13 དེ་ནས་རྒན་པོ་རྣམས་ལས་གཅིག་ན་རེ། ལྭ་རིང་དཀར་པོ་གྱོན་མཁན་འདི་རྣམས་སུ་ཡིན་ནམ། གང་ནས་ཡོང་བ་ཡིན་ནམ་ཞེས་བདག་ལ་དྲིས་པ་ན།
REV 7:14 ངས་ཁོང་ལ་འདི་ལྟར་སྨྲས་པ་སྟེ། བདག་པོ་ལགས། ཁྱེད་ཀྱིས་མཁྱེན་ནོ་ཞེས་པ་ལ། ཡང་ཁོང་གིས་འདི་སྐད་དུ། མི་འདི་རྣམས་ནི་དཀའ་སྡུག་ཆེན་པོའི་ཁྲོད་ནས་ཡོང་བ་ཡིན་ཞིང་། ལུ་གུའི་སྐུ་ཁྲག་གིས་ལྭ་རིང་པོ་གཙང་མར་བཀྲུས་ནས་དཀར་པོར་གྱུར་པ་ཡིན།
REV 7:15 དེའི་ཕྱིར་ཁོ་རྣམས་ཀྱིས་དཀོན་མཆོག་གི་བཞུགས་ཁྲིའི་མདུན་དང་། ཁོང་གི་མཆོད་ཁང་ནང་དུ་ཉིན་མཚན་མེད་པར་ཁོང་ལ་བསྙེན་བཀུར་ཞུ་བ་དང་། བཞུགས་ཁྲིའི་སྟེང་དུ་བཞུགས་མཁན་གྱིས་མི་དེ་རྣམས་ཀྱི་སྟེང་དུ་རང་ཉིད་ཀྱི་གུར་འགེབས་པར་འགྱུར་ཞིང་།
REV 7:16 མི་དེ་རྣམས་ཀྱིས་དུས་ནམ་ཡང་བཀྲེས་སྐོམ་མི་མྱོང་ཞིང་། དེ་རྣམས་ལ་ཉི་ཟེར་དང་ཚ་ཟེར་གང་གིས་ཀྱང་གནོད་འཚེ་བྱེད་པར་མི་འགྱུར་རོ།།
REV 7:17 ཅིའི་ཕྱིར་ཞེ་ན། བཞུགས་ཁྲིའི་དཀྱིལ་དུ་བཞུགས་པའི་ལུ་གུས་མི་དེ་རྣམས་འཚོ་སྐྱོང་མཛད་ནས། ཁོ་རྣམས་ཚེ་སྲོག་གི་ཆུ་མིག་རྣམས་ཀྱི་དྲུང་དུ་འཁྲིད་པར་མཛད་པ་དང་། དཀོན་མཆོག་གིས་ཀྱང་ཁོ་རྣམས་ཀྱི་མིག་ཆུ་ཐམས་ཅད་ཕྱི་བར་འགྱུར་ཞེས་སྨྲས་སོ།།
REV 8:1 ལུ་གུས་ཐམ་ག་བདུན་པ་ཁ་འབྱེད་པའི་དུས་སུ། ནམ་མཁའི་ཞིང་ཁམས་ནི་ཆུ་ཚོད་ཕྱེད་ཀའི་རིང་ལ་ལྷིང་འཇགས་སུ་གྱུར་ཏོ།།
REV 8:2 དེ་ནས་དཀོན་མཆོག་གི་མདུན་དུ་ཡར་འགྲེངས་ནས་བསྡད་ཡོད་པའི་ཕོ་ཉ་བདུན་པོ་བདག་གིས་མཐོང་ཞིང་། དེ་དག་ལ་དུང་བདུན་གནང་ཡོད་དོ།།
REV 8:3 དེ་ནས་ལག་ཏུ་གསེར་གྱི་སྤོས་ཕོར་ཐོགས་པའི་ཕོ་ཉ་གཞན་ཞིག་མཆོད་ཁྲིའི་གམ་དུ་ཕེབས་ཏེ་ཡར་འགྲེངས་ནས་སྡོད་ཅིང་། དེ་ལ་སྤོས་མང་པོ་གནང་ཡོད་དོ།། དེ་ནི་དད་ལྡན་དམ་པ་ཐམས་ཅད་ཀྱི་སྨོན་ལམ་དང་ལྷན་དུ། བཞུགས་ཁྲིའི་མདུན་དུ་ཡོད་པའི་གསེར་གྱི་མཆོད་ཁྲིའི་སྟེང་དུ་འབུལ་བའི་ཕྱིར་ཡིན།
REV 8:4 དེ་ནས་སྤོས་ཀྱི་དུ་བ་དང་དད་ལྡན་དམ་པ་རྣམས་ཀྱི་སྨོན་ལམ་ནི་མཉམ་དུ་ཕོ་ཉའི་ཕྱག་ནས་ཡར་དཀོན་མཆོག་གི་དྲུང་དུ་སླེབས་སོ།།
REV 8:5 ཕོ་ཉས་ཕྱག་ཏུ་སྤོས་ཕོར་ཐོགས་ཤིང་། སྤོས་ཕོར་ནང་དུ་མཆོད་ཁྲིའི་སྟེང་གི་མེས་གང་བར་བྱས་ཤིང་ས་གཞིར་གཏོར་བ་ན། འབྲུག་སྒྲ་གྲགས་པ་དང་། ལྡིར་སྒྲ་སྒྲོག་པ། གློག་དམར་འཁྱུག་པ། ས་འགུལ་ཡོང་བ་བཅས་བྱུང་བར་གྱུར་ཏོ།།
REV 8:6 དེ་ནས་དུང་བདུན་ཕྱག་ཏུ་ཐོགས་པའི་ཕོ་ཉ་བདུན་པོས་དུང་འབུད་པར་སྟ་གོན་བྱས་སོ།།
REV 8:7 ཕོ་ཉ་དང་པོས་དུང་བུས་པ་ན། ཁྲག་འདྲེས་པའི་སེར་བ་དང་མེ་ཕུང་དག་ས་སྟེང་དུ་འཕངས་ཏེ། ས་གཞིའི་གསུམ་ཆའི་གཅིག་དང་ཤིང་སྡོང་གི་གསུམ་ཆའི་གཅིག་མེར་བསྲེགས་པ་དང་། རྩྭ་སྔོན་ཐམས་ཅད་ཀྱང་མེར་བསྲེགས་སོ།།
REV 8:8 ཕོ་ཉ་གཉིས་པས་དུང་བུས་པ་ན། མེ་འབར་བ་ལྟ་བུའི་རི་ཆེན་པོ་རྒྱ་མཚོའི་ནང་དུ་འཕངས་ཏེ། རྒྱ་མཚོའི་གསུམ་ཆའི་གཅིག་ཁྲག་ཏུ་གྱུར་པ་དང་།
REV 8:9 རྒྱ་མཚོའི་སེམས་ཅན་ལས་གསུམ་ཆའི་གཅིག་ཤི་བ་དང་། གྲུ་གཟིངས་ལས་གསུམ་ཆའི་གཅིག་ཀྱང་བརླག་པར་གྱུར་ཏོ།།
REV 8:10 ཕོ་ཉ་གསུམ་པས་དུང་བུས་པ་ན། སྐར་ཆེན་ནི་དཔལ་འབར་བཞིན་ནམ་མཁའ་ནས་སར་ལྷུང་ཞིང་། གཙང་པོའི་གསུམ་ཆའི་གཅིག་དང་ཆུ་མིག་གི་སྟེང་དུ་ལྷུང་ངོ་།།
REV 8:11 སྐར་མ་དེའི་མིང་ལ་མཁན་པ་ཟེར་ཞིང་། ཆུའི་གསུམ་ཆའི་གཅིག་ཁ་མོར་གྱུར་པ་དང་། ཆུ་ཁ་མོར་གྱུར་པའི་རྐྱེན་གྱིས་མི་མང་པོ་ཤིའོ༎
REV 8:12 ཕོ་ཉ་བཞི་པས་དུང་བུས་པ་ན། ཉི་མའི་གསུམ་ཆའི་གཅིག་དང་། ཟླ་བའི་གསུམ་ཆའི་གཅིག སྐར་མའི་གསུམ་ཆའི་གཅིག་བཅས་ལ་ཕོགས་པས། ཉི་ཟླ་སྐར་གསུམ་གྱི་གསུམ་ཆའི་གཅིག་མུན་ནག་ཏུ་གྱུར་ཅིང་། ཉིན་མོའི་གསུམ་ཆའི་གཅིག་ལ་འོད་མ་འཕྲོས་པ་དང་། མཚན་མོའང་དེ་བཞིན་ནོ།།
REV 8:13 དེ་ནས་ཡང་བདག་གིས་ཕར་བལྟས་པ་ན། གླག་ཅིག་མཁའ་དབྱིངས་སུ་འཕུར་བཞིན་ཡོད་ཅིང་། དེས་སྐད་ཆེན་པོས་འདི་སྐད་དུ། ཕོ་ཉ་གཞན་གསུམ་པོས་དུང་འཕྲོ་མ་རྣམས་འབུད་རྒྱུ་ཡིན་པས། ས་སྟེང་དུ་སྡོད་པའི་མི་རྣམས་ལ་ཆག་སྒོ་འབྱུང་ངོ་།། ཆག་སྒོ་འབྱུང་ངོ་།། ཆག་སྒོ་འབྱུང་ངོ་ཞེས་བརྗོད་པའང་བདག་གིས་ཐོས་སོ།།
REV 9:1 ཕོ་ཉ་ལྔ་པས་དུང་བུས་པ་ལ། སྐར་མ་ཞིག་ནམ་མཁའི་ཞིང་ཁམས་ནས་ས་སྟེང་དུ་ལྷུང་ཡོད་པ་བདག་གིས་མཐོང་ངོ་༎ ཞབས་མེད་པའི་དོང་གི་ལྡེ་མིག་ནི་སྐར་མ་དེ་ལ་གནང་བ་དང་།
REV 9:2 ཁོས་ཞབས་མེད་པའི་དོང་གི་ཁ་ཕྱེས་པ་ལ། དོང་ལས་དུ་བ་འཕྱུར་ཅིང་དེ་ནི་མེ་ཐབ་ཆེན་པོའི་དུ་བ་དང་འདྲ། ཉི་མ་དང་མཁའ་དབྱིངས་ཐམས་ཅད་དུ་བའི་རྐྱེན་གྱིས་མུན་ནག་ཏུ་གྱུར་ཏོ།།
REV 9:3 དེ་ནས་དུ་བ་ལས་འབུ་ཆ་ག་པ་ཕྱིར་ཐོན་ཏེ་ས་སྟེང་དུ་འཕུར་ཡོང་བ་དང་། ས་ཐོག་གི་སྡིག་པ་རྭ་ཙ་ལ་ཡོད་པའི་ནུས་མཐུ་ལྟ་བུ་ནི་དེ་རྣམས་ལ་གནང་ཡོད་པར་མ་ཟད།
REV 9:4 ས་སྟེང་གི་རྩྭ་དང་། རྩི་ཤིང་སྣ་ཚོགས། ཤིང་སྡོང་གང་ལའང་གནོད་འཚེ་མི་བྱེད་པར། དཔྲལ་བར་དཀོན་མཆོག་གི་ཐམ་ག་བཀོད་མེད་པའི་མི་ཁོ་ནར་གནོད་འཚེ་བྱེད་པའི་བཀའ་གནང་ཡོད།
REV 9:5 འོན་ཀྱང་སྡིག་པ་རྭ་ཙས་དུག་གིས་བསྣུན་པ་ལྟ་བུའི་མནར་གཅོད་ནི་ཟླ་བ་ལྔའི་རིང་ལ་མི་དེ་རྣམས་ལ་མྱོང་བར་བྱེད་པ་ལས། འབུ་ཆ་ག་པར་མི་དེ་རྣམས་གསོད་པའི་དབང་ནི་གནང་མེད།
REV 9:6 ཉིན་དེ་དག་གི་རིང་ལ། མི་རྣམས་ཀྱིས་ཤི་བར་རེ་བ་བཅངས་ནའང་གཏན་ནས་ཤི་བར་མི་འགྱུར་ལ། འཆི་བར་འདོད་ཀྱང་འཆི་བ་ནི་དེ་རྣམས་དང་རིང་དུ་གྱེས་སོ།།
REV 9:7 འབུ་ཆ་ག་པའི་ཚུགས་ཀ་ནི་གཡུལ་འཐབ་ལ་ཞུགས་པར་སྟ་གོན་བྱས་པའི་དམག་རྟ་དང་མཚུངས་ཏེ། མགོ་ལ་གསེར་གྱི་ཅོད་པན་ལྟ་བུ་བསྐོན་ཡོད་ལ། གདོང་ནི་སྐྱེས་པའི་གདོང་དང་འདྲ།
REV 9:8 སྐྲ་ནི་བུད་མེད་ཀྱི་སྐྲ་དང་མཚུངས། སོ་ནི་སེང་གེའི་མཆེ་བ་དང་འདྲ།
REV 9:9 དེ་དག་གི་བྲང་ཁར་ཁྲབ་ཡོད་ཅིང་དེ་ནི་ལྕགས་ཀྱི་གོ་ཁྲབ་དང་མཚུངས། གཤོག་པའི་འུར་སྒྲ་ནི་ཤིང་རྟ་དང་རྟ་མང་པོ་གཡུལ་སར་ཞུགས་པའི་སྒྲ་དང་མཚུངས།
REV 9:10 དེ་དག་གི་རྔ་མ་ནི་སྡིག་པ་རྭ་ཙའི་རྔ་མ་དང་འདྲ་ཞིང་དུག་མདུང་ཐོགས་ཡོད་ལ། རྔ་མའི་ནང་དུ་ཟླ་བ་ལྔའི་རིང་མི་ལ་གནོད་འཚེ་བྱེད་པའི་ནུས་པ་ཡོད།
REV 9:11 ཞབས་མེད་པའི་དོང་གི་ཕོ་ཉ་ནི་འབུ་ཆ་ག་པ་དེ་དག་གི་རྒྱལ་པོ་ཡིན་ཞིང་། ཨིབ་རིའི་མི་རིགས་ཀྱི་སྐད་དུ་ཨ་བད་ཏོན་དང་། གྷི་རིག་སྐད་དུ་ཨ་པོལ་ལི་ཨོན་ཞེས་ཟེར་རོ།།
REV 9:12 ཆག་སྒོ་དང་པོ་མཇུག་རྫོགས་ཤིང་། ལྟོས་དང་། དོན་དེ་དག་གི་རྗེས་སུ་ད་དུང་ཆག་སྒོ་གཉིས་འབྱུང་བར་འགྱུར་རོ།།
REV 9:13 དེ་ནས་ཕོ་ཉ་དྲུག་པས་དུང་བུས་པ་ན། དཀོན་མཆོག་གི་མདུན་དུ་ཡོད་པའི་གསེར་གྱི་མཆོད་ཁྲིའི་ཟུར་བཞི་ཡི་རུ་ཐུར་ནས་སྒྲ་གྲགས་ཏེ།
REV 9:14 དུང་ཐོགས་པའི་ཕོ་ཉ་དྲུག་པ་ལ་འདི་སྐད་དུ། གཙང་པོ་ཆེན་པོ་ཕི་རཱད་དུ་བཅིངས་ཡོད་པའི་ཕོ་ཉ་བཞི་པོ་ཁྲོལ་ཅིག་ཅེས་བཀའ་བསྒྲགས་པ་བདག་གིས་ཐོས་སོ༎
REV 9:15 དེ་ནས་ཕོ་ཉ་བཞི་པོ་བཀྲོལ་བར་གྱུར་ཏོ།། མ་གཞི་ཕོ་ཉ་བཞི་པོ་ནི་ལོ་ཟླ་དང་། ཉིན་དང་ཆུ་ཚོད་ངེས་ཅན་ཞིག་ལ་མིའི་རིགས་ཀྱི་གསུམ་ཆའི་གཅིག་གསོད་པའི་ཕྱིར་སྟ་གོན་བྱས་ཡོད།
REV 9:16 རྟ་དམག་དུང་ཕྱུར་གཉིས་ཡོད་ལ། དེའི་གྲངས་ཀ་ནི་བདག་གིས་ཐོས་སོ།།
REV 9:17 བདག་གིས་ཞལ་གཟིགས་ནང་དུ་མཐོང་བའི་རྟ་དང་རྟ་ལ་ཞོན་མཁན་རྣམས་འདི་ལྟ་སྟེ། རྟ་ལ་ཞོན་མཁན་རྣམས་ཀྱི་བྲང་ཁར་མེ་དམར་པོ་དང་། རྟ་ཀླད་དམར་སྨུག མུ་ཟི་སེར་པོ་བཅས་དང་མཚུངས་པའི་གོ་ཁྲབ་ཡོད་ལ། རྟའི་མགོ་ནི་སེང་གེའི་མགོ་དང་མཚུངས་ཤིང་། རྟའི་ཁ་ནས་མེ་དང་། དུ་བ། མུ་ཟི་བཅས་ཕྱིར་ཐོན་ནོ།།
REV 9:18 རྟའི་ཁ་ནས་ཐོན་པའི་མེ་དང་། དུ་བ། མུ་ཟི་བཅས་པའི་ཆག་སྒོ་རིགས་གསུམ་གྱིས་མིའི་གསུམ་ཆའི་གཅིག་བསད་པ་རེད།
REV 9:19 རྟ་དེ་དག་གི་ནུས་པ་ཁ་ནང་དང་རྔ་མའི་སྟེང་དུ་ཡོད་ལ། རྔ་མ་ནི་སྦྲུལ་དང་མཚུངས་ཤིང་མགོ་ཡོད་པ་དང་གཞན་ལ་གནོད་འཚེ་བྱེད་པའོ།།
REV 9:20 ཆག་སྒོ་དེ་ལས་མ་བསད་པའི་མིའི་རིགས་ཀྱིས་རང་གི་ལག་པས་ཅི་བཟོས་པ་དག་ལས་འགྱོད་བཤགས་མི་བྱེད་པར། སྔར་བཞིན་དུ་གདོན་འདྲེ་ལ་དད་གུས་བྱེད་པ་དང་། མིག་གིས་མི་མཐོང་བ་དང་། རྣ་བས་མི་ཐོས་པ། འགྲོ་མི་ནུས་པ། གསེར། དངུལ། ཟངས། ཤིང་། རྡོ་བཅས་ཀྱིས་བཟོས་པའི་སྐུ་འདྲ་དག་ལ་ཕྱག་འཚལ་བ་དང་།
REV 9:21 ཡང་དེ་རྣམས་ཀྱིས་མི་གསོད་པ་དང་། ངན་སྔགས་པ། ལོག་གཡེམ་བྱེད་པ། རྐུ་བྱེད་པ་བཅས་ལས་འགྱོད་བཤགས་མ་བྱས་སོ།།
REV 10:1 ཡང་བདག་གིས་ནུས་མཐུ་ཆེན་པོ་ལྡན་པའི་ཕོ་ཉ་གཞན་ཞིག་ནམ་མཁའི་ཞིང་ཁམས་ནས་མར་ཕེབས་པ་མཐོང་ངོ་།། ཁོང་ནི་སྤྲིན་ཕུང་གིས་གཡོགས་ཤིང་། དབུ་ལ་འཇའ་ཚོན་ཤར་བ་དང་། ཞལ་རས་ནི་ཉི་མ་དང་མཚུངས། ཞབས་ཟུང་ནི་མེའི་ཀ་བ་དང་འདྲ།
REV 10:2 ཕྱག་ཏུ་ཁ་ཕྱེས་ཡོད་པའི་ཤོག་དྲིལ་ཆུང་བ་ཞིག་ཐོགས་ཤིང་། ཁོང་གིས་ཞབས་གཡས་པ་རྒྱ་མཚོ་དང་ཞབས་གཡོན་པ་ས་སྟེང་དུ་བཅགས་ཏེ།
REV 10:3 གསུང་སྐད་ཆེན་པོ་བསྒྲགས་པ་ནི་སེང་གེས་ངར་སྐད་སྒྲོག་པ་ལྟ་བུ་ཡིན། གསུང་སྐད་བསྒྲགས་ཚར་བ་དང་འབྲུག་སྐད་བདུན་གྲགས།
REV 10:4 འབྲུག་སྐད་བདུན་གྲགས་རྗེས་བདག་གིས་ཡི་གེར་འགོད་པར་རྩོམ་པ་ལ། ནམ་མཁའི་ཞིང་ཁམས་ནས་སྐད་སྒྲ་ཞིག་གིས་འདི་སྐད་དུ། འབྲུག་སྐད་བདུན་གྱིས་གསུངས་པ་ནི་ཁྱོད་ཀྱིས་གསང་དགོས་པ་ལས་ཡི་གེར་འགོད་མི་རུང་ཞེས་གསུངས་སོ།།
REV 10:5 དེ་ནས་བདག་གིས་མཐོང་བའི་རྒྱ་མཚོ་དང་ས་སྟེང་ལ་ཞབས་ཀྱིས་བཅགས་པའི་ཕོ་ཉ་དེ་ཉིད་ཀྱིས་ནམ་མཁའི་ཞིང་ཁམས་ཀྱི་ཕྱོགས་སུ་ཕྱག་གཡས་པ་ཡར་བཀྱགས་ཏེ།
REV 10:6 ནམ་མཁའ་དང་ནམ་མཁར་ཡོད་པའི་དངོས་པོ་དང་། ས་གཞི་དང་ས་གཞིར་ཡོད་པའི་དངོས་པོ། རྒྱ་མཚོ་དང་རྒྱ་མཚོར་ཡོད་པའི་དངོས་པོ་ཐམས་ཅད་སྐྲུན་མཁན་དང་། ཇི་སྲིད་བར་དུ་གསོན་པོར་བཞུགས་པ་ཁོང་ཉིད་ལ་བརྟེན་ནས་འདི་སྐད་དུ། ད་ནི་དུས་འགྱང་མི་རུང་ངོ་།།
REV 10:7 འོན་ཀྱང་ཕོ་ཉ་བདུན་པས་དུང་སྐད་བསྒྲག་པའི་ཉིན་མོ་དག་ལ། དཀོན་མཆོག་གིས་རང་ཉིད་ཀྱི་ཞབས་ཕྱི་ལུང་སྟོན་པ་རྣམས་ལ་འཕྲིན་བཟང་བསྒྲགས་པ་བཞིན། ཁོང་གི་གསང་བ་འགྲུབ་པར་འགྱུར་ཞེས་དམ་བཅས་སོ།།
REV 10:8 དེ་ནས་བདག་གིས་དེ་སྔར་ཐོས་པའི་ནམ་མཁའི་ཞིང་ཁམས་ནས་གྲགས་པའི་སྐད་སྒྲ་དེས་ཡང་བསྐྱར་བདག་ལ་འདི་སྐད་དུ། ཁྱོད་ཕར་སོང་ནས་རྒྱ་མཚོ་དང་ས་སྟེང་དུ་ཞབས་ཀྱིས་བཅགས་པའི་ཕོ་ཉའི་ཕྱག་ལས་ཁ་ཕྱེས་ཡོད་པའི་ཤོག་དྲིལ་ཆུང་བ་དེ་ཚུར་ལོངས་ཤིག་ཅེས་བཀའ་གནང་བས།
REV 10:9 ང་རང་ཕོ་ཉའི་དྲུང་དུ་སོང་སྟེ། ཤོག་དྲིལ་ཆུང་བ་དེ་བདག་ལ་གནང་བར་མཛོད་ཅེས་ཞུས་པ་ན། ཁོང་གིས་འདི་སྐད་དུ། ཁྱོད་ཀྱིས་འདི་བླངས་ནས་བཟའ་བར་གྱིས། ཁྱོད་ཀྱི་ཕོ་བ་ནི་ཁ་མོར་འགྱུར་ཡང་། ཁྱོད་ཀྱི་ཁ་རུ་སྦྲང་རྩི་ལྟར་མངར་མོ་ཡིན་ཞེས་གསུངས་སོ།།
REV 10:10 བདག་གིས་ཕོ་ཉའི་ཕྱག་ལས་ཤོག་དྲིལ་ཆུང་བ་ཚུར་བླངས་ཏེ་ཟོས་པ་དང་། བདག་གི་ཁ་ནང་དུ་དངོས་གནས་སྦྲང་རྩི་ལྟར་མངར་མོ་ཡིན་མོད། འོན་ཀྱང་ཟོས་པའི་རྗེས་སུ་ཕོ་བ་ནི་ཁ་མོར་གྱུར་ཏོ།།
REV 10:11 ཡང་བདག་ལ་འདི་སྐད་དུ། ཁྱོད་ཀྱིས་ངེས་པར་མི་རིགས་དང་། རྒྱལ་ཁབ། སྐད་རིགས། རྒྱལ་པོ་བཅས་མང་པོ་ལ་ཡང་བསྐྱར་མ་འོངས་ལུང་བསྟན་གནང་དགོས་ཞེས་གསུངས་སོ།།
REV 11:1 དེ་ནས་བདག་ལ་རིང་ཐུང་འཇལ་བྱེད་ཀྱི་དབྱུག་པ་ལྟ་བུའི་འདམ་རྩྭ་ཞིག་གནང་སྟེ་འདི་སྐད་དུ། ཡར་ལོངས་དང་། དཀོན་མཆོག་གི་མཆོད་ཁང་དང་། མཆོད་ཁྲི། མཆོད་ཁང་ནང་གི་བསྙེན་བཀུར་བྱེད་མཁན་ཐམས་ཅད་ལ་ཚད་ཐིག་ལོངས་དང་།
REV 11:2 མཆོད་ཁང་ཕྱིའི་ར་སྐོར་ལ་ཚད་ཐིག་མི་ལེན་པར་བསྐྱུར་བར་བྱའོ།། འདི་ནི་ཕྱི་ཕྱོགས་པ་རྣམས་ལ་གནང་བ་ཡིན་པས། དེ་དག་གིས་ཟླ་བ་ཞེ་གཉིས་རིང་ལ་གྲོང་ཁྱེར་དམ་པ་ལ་རྡོག་བརྫིས་གཏོང་བར་འགྱུར།
REV 11:3 ངས་རང་ཉིད་ཀྱི་དཔང་པོ་གཉིས་ལ་དབང་གནང་ཞིང་དེ་གཉིས་ཀྱིས་རྩིད་རས་གྱོན་ནས་ཉིན་ཆིག་སྟོང་ཉིས་བརྒྱ་དྲུག་ཅུའི་རིང་ལ་ལུང་སྟོན་པར་ངེས་ཞེས་གསུངས་སོ།།
REV 11:4 ཁོང་གཉིས་ནི་སྐྱུ་རུ་རའི་ཤིང་གཉིས་དང་སྒྲོན་སྟེགས་གཉིས་ཡིན་ལ། ས་གཞིའི་བདག་པོའི་དྲུང་དུ་འགྲེངས་ནས་བཞུགས་ཡོད།
REV 11:5 གལ་ཏེ། སུ་ཞིག་གིས་ཁོང་གཉིས་ལ་གནོད་འཚེ་བྱ་འདོད་ན། དེ་གཉིས་ཀྱི་ཞལ་ནས་མེ་ཐོན་ཏེ་དགྲ་བོ་རྣམས་བསྲེགས་ནས་མེད་པར་བཟོ་བ་དང་། དེ་གཉིས་ལ་གནོད་འཚེ་བྱ་འདོད་མཁན་སུ་ཡིན་ཡང་དེ་བཞིན་དུ་གསོད་དགོས་སོ།།
REV 11:6 མི་དེ་གཉིས་ལ་ལུང་བསྟན་བརྗོད་པའི་ཉིན་དེ་དག་གི་རིང་ལ། ནམ་མཁར་བཀའ་གནང་སྟེ་ཆར་བ་འགོག་པའི་དབང་ཡོད་པ་དང་། ཆུ་ནི་ཁྲག་ཏུ་བསྒྱུར་བའི་དབང་དང་། རང་ཉིད་ཀྱི་འདོད་མོས་བཞིན་རྟག་ཏུ་ཆག་སྒོ་སྣ་ཚོགས་ཀྱིས་འཇིག་རྟེན་ལ་རྒོལ་བའི་དབང་ཡང་ཡོད་དོ།།
REV 11:7 ཁོང་གཉིས་ཀྱིས་བདེན་དཔང་བྱས་ཚར་བའི་རྗེས་སུ། ཞབས་མེད་པའི་དོང་ནས་ཡར་འོངས་པའི་གཅན་གཟན་གྱིས་ཁོང་གཉིས་ལ་འཐབ་ཅིང་། གཅན་གཟན་གྱིས་རྒྱལ་ཁ་བླངས་ཏེ་ཁོང་གཉིས་གསོད་པར་འགྱུར་རོ།།
REV 11:8 དེ་གཉིས་ཀྱི་བེམ་པོ་ནི་གྲོང་ཁྱེར་ཆེན་པོའི་སྲང་ལམ་དུ་བསྐྱུར་བ་དང་། གྲོང་ཁྱེར་དེ་ལ་དོན་གྱི་སྙིང་པོ་ལྟར་ན་སཱ་དོམ་མམ། ཡང་ན་ཨེ་ཅིབ་ཅེས་འབོད་ཅིང་། དེ་ནི་ཁོང་གཉིས་ཀྱི་གཙོ་བོ་དེ་ཉིད་ཤིང་རྒྱ་གྲམ་གྱི་སྟེང་དུ་བརྡབས་སའི་གནས་ཡིན་ནོ།།
REV 11:9 དེ་ནས་མི་སྡེ་སོ་སོ་དང་། ཚོ་པ་སོ་སོ། སྐད་རིགས་སོ་སོ། མི་རིགས་སོ་སོ་བཅས་ལས། མི་སྐོར་ཞིག་གིས་ཉིན་གསུམ་དང་ཕྱེད་ཀའི་རིང་ལ། ཁོང་གཉིས་ཀྱི་བེམ་པོ་ལ་བལྟས་ནས་བེམ་པོ་དུར་ལ་སྦ་རུ་མི་འཇུག
REV 11:10 ཁོང་གཉིས་ཀྱི་ཕྱིར་ས་སྟེང་གི་མི་རྣམས་དགའ་ཞིང་སྤྲོ་བར་འགྱུར་བ་དང་ཕན་ཚུན་ལ་ལེགས་སྐྱེས་འབུལ་བར་འགྱུར་རོ།། རྒྱུ་མཚན་ནི་སྔར་ལུང་སྟོན་པ་དེ་གཉིས་ཀྱིས་ས་སྟེང་གི་མི་རྣམས་ལ་མནར་གཅོད་བཏང་བའི་ཕྱིར་རོ།།
REV 11:11 དེ་ནས་ཉིན་གསུམ་དང་ཕྱེད་ཀ་འགོར་རྗེས། དཀོན་མཆོག་ལས་བྱུང་བའི་ཚེ་སྲོག་གི་དབུགས་ནི་ཁོང་གཉིས་ཀྱི་བེམ་པོའི་ནང་དུ་ཞུགས་པ་དང་ཁོང་གཉིས་ཡར་འགྲེངས་པ་ལ། མཐོང་མཁན་རྣམས་འཇིགས་སྐྲག་ཆེན་པོ་སྐྱེས་སོ།།
REV 11:12 ནམ་མཁའི་ཞིང་ཁམས་ནས་སྐད་ཆེན་པོ་ཞིག་གྲགས་པ་ཁོང་གཉིས་ཀྱིས་ཐོས་ཤིང་། སྐད་དེས་ཁོང་གཉིས་ལ་འདི་སྐད་དུ། འདིར་ཡར་ཤོག་ཅིག་ཅེས་གསུངས་པ་ལ། ཁོང་གཉིས་སྤྲིན་གྱི་ནང་ནམ་མཁའི་ཞིང་ཁམས་སུ་ཕེབས་པ་དང་། ཁོང་གཉིས་ཀྱི་དགྲ་བོ་དག་གིས་ཀྱང་དོན་དེ་མཐོང་ངོ་།།
REV 11:13 དུས་དེ་ཉིད་ལ། ས་འགུལ་ཆེན་པོ་བྱུང་སྟེ་གྲོང་ཁྱེར་གྱི་བཅུ་ཆའི་གཅིག་བརྡིབས་པར་གྱུར་པ་དང་མི་བདུན་སྟོང་ཤི་བས། མི་གཞན་ཐམས་ཅད་འཇིགས་ཏེ་ནམ་མཁའི་ཞིང་ཁམས་ཀྱི་དཀོན་མཆོག་ལ་བསྔགས་བརྗོད་བྱས་སོ།།
REV 11:14 ཆག་སྒོ་གཉིས་པ་མཇུག་རྫོགས་པ་ཡིན། ལྟོས་དང་། ཆག་སྒོ་གསུམ་པ་མྱུར་དུ་འབྱུང་བར་འགྱུར་རོ།།
REV 11:15 དེ་ནས་ཕོ་ཉ་བདུན་པས་དུང་བུས་པ་ལ། ནམ་མཁའི་ཞིང་ཁམས་སུ་སྐད་ཆེན་པོ་དག་གྲགས་ཏེ་འདི་སྐད་དུ། འཇིག་རྟེན་གྱི་རྒྱལ་སྲིད་ནི་བདག་ཅག་གི་གཙོ་བོ་དང་ཁོང་གི་མཱ་ཤི་ཀའི་རྒྱལ་སྲིད་དུ་གྱུར་ཅིང་། ཁོང་ནི་ཇི་སྲིད་བར་དུ་རྒྱལ་པོར་བཞུགས་པར་འགྱུར་ཞེས་གསུངས་སོ།།
REV 11:16 དེ་ནས་དཀོན་མཆོག་གི་དྲུང་དུ་རང་རང་གི་ཁྲིར་བཞུགས་པའི་རྒན་པོ་ཉེར་བཞིས་ཁོང་ལ་ཕྱག་བཙལ་ནས་འདི་ལྟར་བསྟོད་བསྔགས་བརྗོད་པ་སྟེ།
REV 11:17 ད་ལྟ་བཞུགས་ཤིང་སྔར་མཆིས་པའི་ཀུན་དབང་གཙོ་བོ་དཀོན་མཆོག་ལགས། ཁྱེད་ཀྱིས་ཉིད་ཀྱི་དབང་ཐང་ཆེན་པོ་བཞེས་ནས་རྒྱལ་པོར་བཞུགས་པས། ངེད་ཅག་གིས་ཁྱེད་ལ་བཀའ་དྲིན་ཞུའོ།།
REV 11:18 ཕྱི་ཕྱོགས་པ་རྣམས་ཁོང་ཁྲོ་ལངས་པ་དང་། ཁྱེད་ཀྱི་ཐུགས་ཁྲོ་འཕོག་པའི་དུས་ཀྱང་སླེབས། གཤིན་པོ་རྣམས་ལ་ལེགས་ཉེས་ཀྱི་ཁྲིམས་ཐག་གཅོད་པའི་དུས་ཀྱང་སླེབས། ཁྱེད་ཀྱི་ཞབས་ཕྱི་ལུང་སྟོན་པ་དང་། དད་ལྡན་དམ་པ། ཁྱེད་ཀྱི་མཚན་ལ་གུས་ཤིང་འཇིགས་མཁན་བཅས་མཆོག་དམན་ཀུན་ལ་བྱ་དགའ་གནང་བའི་དུས་ཀྱང་སླེབས། ཁྱེད་ཀྱིས་འཇིག་རྟེན་ལ་གཏོར་བརླག་བྱེད་མཁན་ཐམས་ཅད་མེད་པར་བཟོ་བའི་དུས་ཀྱང་སླེབས་ཞེས་པའོ།།
REV 11:19 སྐབས་དེར། དཀོན་མཆོག་གི་ནམ་མཁའི་ཞིང་ཁམས་ཀྱི་མཆོད་ཁང་གི་སྒོ་ཕྱེས་ཤིང་། ཁོང་གི་མཆོད་ཁང་ནང་དུ་ཁོང་ཉིད་ཀྱི་ཞལ་ཆད་ཀྱི་ཤུར་སྒམ་མངོན་ནོ།། དེ་ནས་གློག་དམར་འཁྱུག་པ་དང་། ལྡིར་སྒྲ་སྒྲོག་པ། འབྲུག་སྒྲ་གྲགས་པ། ས་འགུལ་བྱུང་བ། སེར་བ་དྲག་པོ་འབབ་པ་བཅས་བྱུང་ངོ་།།
REV 12:1 ནམ་མཁའ་རུ་ངོ་མཚར་བའི་ལྟས་ཆེན་པོ་བྱུང་སྟེ། བུད་མེད་ཅིག་ཡོད་པ་དེས་ལུས་ལ་ཉི་མ་གྱོན་ཞིང་ཟླ་བ་རྐང་འོག་ཏུ་མནན་པ་དང་། མགོ་ལ་སྐར་མ་བཅུ་གཉིས་ཀྱི་ཅོད་པན་གྱོན་ལ།
REV 12:2 ཁོ་མོར་མངལ་སྦྲུམ་པ་དང་ཕྲུ་གུ་བཙའ་བའི་དཀའ་སྡུག་ཁྲོད་ཟུག་གཟེར་གྱི་འཁུན་སྒྲ་འབྱིན་ནོ།།
REV 12:3 ཡང་ནམ་མཁའ་ནས་ངོ་མཚར་བའི་ལྟས་གཞན་ཞིག་བྱུང་སྟེ། ལྟོས་དང་། འབྲུག་ཆེན་དམར་པོ་ཞིག་ཡོད་པ་ལ་མགོ་བདུན་དང་རྭ་ཅོ་བཅུ་ཐོགས་པ་དང་། མགོ་བོ་བདུན་པོར་ཅོད་པན་རེ་གྱོན་ཡོད།
REV 12:4 འབྲུག་གི་རྔ་མས་ནམ་མཁའི་སྐར་མ་རྣམས་ཀྱི་གསུམ་ཆའི་གཅིག་དྲུད་ནས་ས་གཞིར་གཡུགས་ཤིང་། བུད་མེད་ཀྱིས་ཕྲུ་གུ་བཙས་རྗེས་ཁོ་མོའི་ཕྲུ་གུ་ཁྱུར་མིད་གཏོང་ཕྱིར། འབྲུག་དེ་ནི་ཕྲུ་གུ་བཙའ་རན་པའི་བུད་མེད་དེའི་མདུན་དུ་འགྲེངས་ནས་བསྡད་དོ།།
REV 12:5 དེ་ནས་བུད་མེད་ཀྱིས་བུ་ཞིག་བཙས་ཤིང་བུ་དེ་ནི་མ་འོངས་པར་ལྕགས་ཀྱི་དབྱུག་པས་རྒྱལ་ཁབ་ཐམས་ཅད་སྐྱོང་མཁན་ཡིན་ལ། ཁོ་མོའི་བྱིས་པ་ནི་དཀོན་མཆོག་དང་ཁོང་ཉིད་ཀྱི་བཞུགས་ཁྲིའི་གནས་སུ་ཡར་དྲངས་པ་རེད།
REV 12:6 བུད་མེད་དབེན་སྟོང་དུ་བྲོས་ཤིང་། གནས་དེ་རུ་དཀོན་མཆོག་གིས་ཁོ་མོར་ས་ཆ་ཞིག་སྟ་གོན་མཛད་ཡོད་དེ། ཉིན་ཆིག་སྟོང་ཉིས་བརྒྱ་དྲུག་ཅུ་ལ་ཁོ་མོ་སྐྱོང་བར་མཛད་པའི་ཕྱིར་རོ།།
REV 12:7 དེ་ནས་ནམ་མཁའི་ཞིང་ཁམས་སུ་འཐབ་འཁྲུག་བྱུང་བ་སྟེ། ཕོ་ཉ་མེའ་ཀཱ་ཨེལ་དང་ཁོང་གི་འཁོར་རྣམས་འབྲུག་ལ་འཐབ་ཅིང་། འབྲུག་གིས་ཀྱང་ཁོའི་འཁོར་རྣམས་ལ་ལྷན་དུ་རྒོལ་བ་དང་།
REV 12:8 རྒྱལ་ཁ་མ་ལོན་ཞིང་དུས་དེ་ནས་བཟུང་ནམ་མཁའི་ཞིང་ཁམས་སུ་དེ་རྣམས་ལ་སྡོད་ས་མེད་དོ།།
REV 12:9 འབྲུག་ཆེན་ནི་གནའ་བོའི་སྦྲུལ་དེ་ཡིན་པ་དང་མིང་ལ་བདུད་དང་། ཡང་ན་སཱ་ཏན་ཞེས་ཀྱང་ཟེར་ཏེ། འཇིག་རྟེན་ཡོངས་ལ་སླུ་བྲིད་གཏོང་མཁན་ཡིན། འབྲུག་ཆེན་དེ་ས་གཞིར་གཡུགས་ཤིང་ཁོའི་འཁོར་རྣམས་ཀྱང་ལྷན་དུ་སར་གཡུགས་པའོ།།
REV 12:10 དེ་ནས་ནམ་མཁའི་ཞིང་ཁམས་ནས་སྐད་ཆེན་པོ་ཞིག་གིས་འདི་སྐད་དུ་གསུངས་པ་བདག་གིས་ཐོས་ཏེ། བདག་ཅག་དཀོན་མཆོག་ཉིད་ཀྱི་ཐར་པ་དང་།། ནུས་མཐུ་དང་ནི་རྒྱལ་སྲིད་བཅས་པ་དང་།། ད་དུང་ཁོང་གི་མཱ་ཤི་ཀ་ཉིད་ཀྱི།། དབང་ཐང་ཐམས་ཅད་ད་ལྟ་སླེབས་ཟིན་ཏོ།། དེ་ནི་བདག་ཅག་དཀོན་མཆོག་ཞབས་དྲུང་དུ།། ཉིན་མཚན་མེད་པར་བདག་ཅག་སྤུན་ཟླ་ལ།། སྐྱོན་འཛུགས་མཁན་དེ་ས་ལ་གཡུགས་པས་སོ།།
REV 12:11 སྤུན་ཟླ་རྣམས་ནི་དེ་ལས་རྒྱལ་བ་ཡང་།། ལུ་གུའི་ཟུངས་ཁྲག་དང་ནི་རང་ཉིད་ཀྱི།། བདེན་དཔང་ཚིག་ལ་བརྟེན་ནས་རྒྱལ་བ་འོ།། ཁོ་རྣམས་འཆི་བའི་ལམ་དུ་འགྲོ་དགོས་ཀྱང་།། རང་སྲོག་ལ་ནི་ཡེ་ནས་མ་འཛེམས་སོ།།
REV 12:12 དེའི་ཕྱིར་ནམ་མཁའ་དང་ནི་གནས་དེ་རུ།། བདེ་བར་སྡོད་པ་ཐམས་ཅད་སྤྲོ་བར་གྱིས།། འོན་ཀྱང་ས་གཞི་དང་ནི་རྒྱ་མཚོ་ལ།། ཆག་སྒོ་འབྱུང་བ་རྒྱུ་མཚན་ཅི་ཞེ་ན།། བདུད་ཀྱིས་རང་ལ་དུས་ཡུན་མང་པོ་ཞིག ། མེད་པར་ཤེས་ནས་ཁོང་ཁྲོ་ཆེན་པོ་བཅས།། ཁྱོད་ཅག་གམ་དུ་མར་ལ་ཡོང་བ་ཡིན།། ཞེས་པའོ།།
REV 12:13 འབྲུག་གིས་རང་ཉིད་སར་གཡུགས་པ་མཐོང་སྟེ། བུ་བཙའ་མཁན་བུད་མེད་དེ་ལ་མནར་གཅོད་བཏང་ངོ་།།
REV 12:14 དེ་ནས་བུད་མེད་ལ་གླག་ཆེན་པོའི་གཤོག་ཟུང་གནང་སྟེ། ཁོ་མོ་དབེན་སྟོང་དུ་འཕུར་ཞིང་རང་གི་ས་ཆར་སོང་ནས་སྦྲུལ་དེ་ལ་གཞའ་ཐུབ་པའི་ཕྱིར་ཡིན། གནས་དེ་རུ་ཁོ་མོ་ལོ་གཅིག་དང་ལོ་གཉིས། ལོ་ཕྱེད་ཀ་བཅས་ལ་སྐྱོང་བར་མཛད་དོ།།
REV 12:15 སྦྲུལ་གྱིས་བུད་མེད་ཀྱི་རྒྱབ་ཏུ་ཁ་ནས་ཆུ་བསྐྱུགས་ཤིང་། དེ་ནི་གཙང་པོ་དང་འདྲ་ཞིང་ཆུས་བུད་མེད་འཁུར་བའི་ཕྱིར་ཡིན་མོད།
REV 12:16 འོན་ཀྱང་ས་གཞི་ཡིས་བུད་མེད་ལ་རོགས་བྱས་ཤིང་། ས་གཞིས་ཁ་གདངས་ཏེ་འབྲུག་གི་ཁ་ནས་བསྐྱུགས་པའི་གཙང་པོ་མིད་དོ།།
REV 12:17 དེ་ནས་འབྲུག་བུད་མེད་ལ་རབ་ཏུ་ཁྲོས་ཏེ་ཁོ་མོའི་བུ་ཕྲུག་གཞན་རྣམས་ལ་འཐབ་ཏུ་སོང་ཞིང་། བུ་ཕྲུག་དེ་དག་ནི་དཀོན་མཆོག་གི་བཀའ་ཁྲིམས་བསྲུངས་ཤིང་སྐྱབས་མགོན་ཡེ་ཤུར་བདེན་དཔང་བྱེད་མཁན་རྣམས་ཡིན་ལ།
REV 12:18 དེའི་དུས་སུ་འབྲུག་ནི་རྒྱ་མཚོའི་འགྲམ་གྱི་བྱེ་ཐང་དུ་འགྲེངས་ནས་བསྡད་ཡོད་དོ།།
REV 13:1 ཡང་བདག་གིས་གཅན་གཟན་ཞིག་རྒྱ་མཚོ་ལས་ཡར་འཐོན་པ་མཐོང་ཞིང་། དེ་ལ་རྭ་ཅོ་བཅུ་དང་མགོ་བོ་བདུན་ཡོད་ལ། རྭ་ཅོ་བཅུའི་སྟེང་དུ་ཅོད་པན་བཅུ་གྱོན་པ་དང་། མགོ་རེ་རེའི་སྟེང་དུ་སྐུར་འདེབས་ཀྱི་མིང་ཡོད་དོ།།
REV 13:2 བདག་གིས་མཐོང་བའི་གཅན་གཟན་དེ་ནི་གཟིག་དང་མཚུངས་ཞིང་། རྐང་པ་ནི་དོམ་གྱི་རྐང་པ་དང་འདྲ། ཁ་ནི་སེང་གེའི་ཁ་དང་འདྲ། འབྲུག་དེས་རང་གི་ནུས་མཐུ་དང་། ཁྲི། དབང་ཐང་ཆེན་པོ་བཅས་དེ་ལ་སྤྲད་པ་ཡིན།
REV 13:3 ཡང་བདག་གིས་གཅན་གཟན་དེའི་མགོ་བདུན་པོ་ལས་གཅིག་ལ་འཆི་བར་ཐུག་པའི་རྨས་སྐྱོན་བྱུང་བ་འདྲ་མཐོང་མོད། འོན་ཀྱང་རྨས་སྐྱོན་དེ་སོས་པ་ན། འཇིག་རྟེན་གྱི་མི་ཐམས་ཅད་ཧ་ལས་ཤིང་གཅན་གཟན་དེའི་རྗེས་སུ་འབྲངས་པ་དང་།
REV 13:4 འབྲུག་གིས་རང་གི་དབང་ཐང་གཅན་གཟན་དེ་ལ་སྤྲད་པས། མི་དེ་རྣམས་ཀྱིས་འབྲུག་དེ་ལ་བསྟོད་བསྔགས་བརྗོད་ཅིང་། ཡང་གཅན་གཟན་དེ་ལའང་བསྟོད་བསྔགས་འདི་ལྟར་བརྗོད་པ་སྟེ། གཅན་གཟན་འདི་ལ་འགྲན་ཟླ་སུ་ཡོད་དམ།། གཅན་གཟན་འདི་ལ་འཐབ་ཡ་སུ་ཡང་མེད།། ཅེས་པའོ།།
REV 13:5 ཡང་གཅན་གཟན་དེ་ལ་ཁ་ཕོ་དང་སྐུར་འདེབས་ཀྱི་སྨྲ་སྒོ་སྤྲད་ཅིང་། ཟླ་བ་བཞི་བཅུ་ཞེ་གཉིས་ཀྱི་རིང་ཁོ་ལ་སྲིད་བྱེད་པའི་དབང་སྤྲད་དོ།།
REV 13:6 གཅན་གཟན་གྱིས་ཁ་གདངས་ནས་དཀོན་མཆོག་ལ་སྐུར་འདེབས་ཀྱི་ཚིག་སྨྲས་ཤིང་། དཀོན་མཆོག་གི་མཚན་དང་ཁོང་གི་གུར་མཆོག་སྟེ། ནམ་མཁའི་ཞིང་ཁམས་སུ་བཞུགས་མཁན་རྣམས་ལ་སྐུར་བ་བཏབ་བོ།།
REV 13:7 ཡང་དེ་ལ་དད་ལྡན་དམ་པ་རྣམས་དང་འཐབ་ནས་རྒྱལ་ཁ་ལེན་པ་དང་། ཚོ་པ་སོ་སོ་དང་མི་སྡེ་སོ་སོ། སྐད་རིགས་སོ་སོ། མི་རིགས་སོ་སོ་བཅས་འདུལ་བའི་དབང་ཡང་སྤྲད།
REV 13:8 འཇིག་རྟེན་བཀོད་པའི་ཚུན་ལ། བཀྲོངས་ཟིན་པའི་ལུ་གུའི་ཚེ་སྲོག་གི་གླེགས་བམ་ནང་དུ་མིང་ཐོ་བཀོད་མེད་པའི་མི་རྣམས་ཏེ། ས་སྟེང་དུ་སྡོད་པ་ཐམས་ཅད་ཀྱིས་གཅན་གཟན་དེ་ལ་ཕྱག་འཚལ་བར་འགྱུར་རོ།།
REV 13:9 རྣ་བ་ཡོད་པ་ཐམས་ཅད་ཀྱིས་ཉོན་ཅིག
REV 13:10 བཙོན་དུ་འཇུག་དགོས་པ་རྣམས་ནི་བཙོན་དུ་འཇུག་པར་འགྱུར་ལ། རལ་གྲིས་གསོད་དགོས་པ་རྣམས་ནི་རལ་གྲིའི་ཁ་ནས་གསོད་པར་འགྱུར་རོ།། འདི་ནི་དད་ལྡན་དམ་པ་རྣམས་ཀྱི་བཟོད་བསྲན་དང་དད་སེམས་ཡིན་ནོ།།
REV 13:11 ཡང་བདག་གིས་གཅན་གཟན་གཞན་ཞིག་ས་གཞི་ནས་ཡར་འཐོན་པ་མཐོང་སྟེ། ལུ་གུ་དང་འདྲ་བར་རྭ་ཅོ་གཉིས་ཡོད་ཅིང་། འབྲུག་ལྟར་གཏམ་སྨྲས་སོ།།
REV 13:12 དེ་ཡིས་གཅན་གཟན་སྔ་མའི་མདུན་ནས་དེའི་དབང་ཐམས་ཅད་སྤྱོད་པར་མ་ཟད། ས་གཞི་དང་ས་གཞིའི་སྟེང་དུ་སྡོད་པ་ཐམས་ཅད་ལ་འཆི་བར་ཐུག་པའི་རྨས་སྐྱོན་བྱུང་ཞིང་སོས་པར་གྱུར་པའི་གཅན་གཟན་སྔ་མ་དེར་ཕྱག་འཚལ་དུ་བཅུག་པ་དང་།
REV 13:13 ཡང་གྲུབ་རྟགས་ཆེན་པོ་རྣམས་སྟོན་ཞིང་། ཐ་ན་མིའི་མདུན་དུ་ནམ་མཁའ་ནས་ས་གཞིར་མེ་འབབ་ཏུ་བཅུག་པའོ༎
REV 13:14 དེ་ལ་གཅན་གཟན་སྔ་མའི་མདུན་དུ་གྲུབ་རྟགས་རྣམས་སྟོན་པའི་དབང་སྤྲད་ཡོད་པས། ས་སྟེང་དུ་སྡོད་པ་རྣམས་ལ་འདི་ལྟར་སླུ་བྲིད་བྱས་པ་སྟེ། རལ་གྲིའི་རྨས་སྐྱོན་ཐེབས་ཀྱང་གསོན་པོར་གནས་པའི་གཅན་གཟན་དེ་ལ་གཟུགས་བརྙན་བཟོ་བར་བྱའོ་ཞེས་སྨྲས་ཤིང་།
REV 13:15 གཅན་གཟན་སྔ་མའི་གཟུགས་བརྙན་ལ་སྲོག་དང་ལྡན་པར་བྱེད་པའི་དབང་ཡང་དེ་ལ་གནང་ངོ་༎ དེ་ནི་གཅན་གཟན་སྔ་མའི་གཟུགས་བརྙན་ལ་གཏམ་སྨྲ་རུ་འཇུག་པ་དང་། དེ་ལ་ཕྱག་མི་འཚལ་བ་ཐམས་ཅད་གསོད་པའི་ཕྱིར་རོ།།
REV 13:16 ཡང་གཅན་གཟན་ཕྱི་མ་དེས་མི་ཆེ་ཆུང་དང་། དབུལ་ཕྱུག བདག་པོ། གཡོག་པོ་བཅས་གང་ཡིན་ཐམས་ཅད་ཀྱི་གཡས་ལག་གམ། ཡང་ན་དཔྲལ་བའི་སྟེང་དུ་རྟགས་རྒྱག་ཏུ་བཅུག་ནས།
REV 13:17 དེ་ནི་རྟགས་ཐོབ་པ་སྟེ་གཅན་གཟན་གྱི་མིང་ཡོད་པའམ། ཡང་ན་གཅན་གཟན་གྱི་མིང་གྲངས་ཡོད་པ་ལས་གཞན་སུ་ཞིག་གིས་ཀྱང་ཉོ་འཚོང་བྱེད་མི་ནུས་པའི་ཕྱིར་རོ།།
REV 13:18 འདི་རུ་ཤེས་རབ་ཡོད་དེ། བློ་གྲོས་ལྡན་པ་སུས་ཀྱང་གཅན་གཟན་གྱི་གྲངས་ཀ་བརྩི་རུང་། ཅིའི་ཕྱིར་ཞེ་ན། དེ་ནི་མིའི་གྲངས་ཀ་ཡིན་ཏེ། དེའི་གྲངས་ཀ་ནི་དྲུག་བརྒྱ་དྲུག་ཅུ་རེ་དྲུག་ཡིན་པའི་ཕྱིར་རོ།།
REV 14:1 ཡང་བདག་གིས་ཕར་བལྟས་པ་ལ། ལྟོས་དང་། ལུ་གུ་རི་བོ་ཛ་ཡན་སྟེང་དུ་འགྲེང་འདུག་པ་མཐོང་ཞིང་། ཁོང་དང་ལྷན་དུ་མི་གྲངས་ཆིག་འབུམ་བཞི་ཁྲི་བཞི་སྟོང་ཡོད་ལ། དེ་ཐམས་ཅད་ཀྱི་དཔྲལ་བའི་སྟེང་དུ་ཁོང་གི་མཚན་དང་ཁོང་གི་ཡབ་ཀྱི་མཚན་བཀོད་ཡོད་དོ།།
REV 14:2 ཡང་ནམ་མཁའི་ཞིང་ཁམས་ནས་ཆུ་མང་པོའི་སྒྲ་དང་འབྲུག་སྒྲ་ལྡིར་བ་ལྟ་བུའི་སྒྲ་གྲགས་པ་བདག་གིས་ཐོས་ཤིང་། སྒྲ་དེ་ནི་རོལ་མོ་པ་རྣམས་ཀྱིས་དཀྲོལ་བའི་རྒྱུད་མངས་ཀྱི་དབྱངས་དང་མཚུངས་སོ།།
REV 14:3 དེ་རྣམས་ཀྱིས་བཞུགས་ཁྲི་དང་། སེམས་ཅན་བཞི་པོ། རྒན་པོ་བཅས་ཀྱི་དྲུང་དུ་བསྟོད་དབྱངས་གསར་པ་ཕུལ་ཞིང་། ས་སྟེང་ནས་བླུས་པའི་མི་གྲངས་ཆིག་འབུམ་བཞི་ཁྲི་བཞི་སྟོང་ལས་གཞན། བསྟོད་དབྱངས་གསར་པ་འདི་སློབ་ཐུབ་མཁན་མེད།
REV 14:4 མི་དེ་རྣམས་ནི་བུད་མེད་དང་འགྲོགས་མ་མྱོང་བའི་སྐྱེས་པ་གཙང་མ་ཡིན་ལ། ལུ་གུ་གང་དུ་ཕེབས་ན་དེ་རྣམས་ཀྱང་ཁོང་གི་རྗེས་སུ་འབྲངས་པའོ།། ཁོ་ཚོ་ནི་མི་རྣམས་ལས་བླུས་ཤིང་འབྲས་བུ་ཐོག་མ་སྨིན་པ་ལྟར་དཀོན་མཆོག་དང་ལུ་གུ་ལ་ཕུལ་བ་དང་།
REV 14:5 དེ་རྣམས་ཀྱི་ངག་ལས་རྫུན་མི་རྙེད་ཅིང་། དེ་རྣམས་ལ་སྐྱོན་གྱི་དྲི་མས་མ་གོས་པའོ།།
REV 14:6 ཡང་བདག་གིས་ཕོ་ཉ་གཞན་ཞིག་བར་སྣང་དུ་འཕུར་བ་མཐོང་ཞིང་། མི་རིགས་སོ་སོ་དང་ཚོ་པ་སོ་སོ། སྐད་རིགས་སོ་སོ། མི་སྡེ་སོ་སོ་བཅས་ས་སྟེང་དུ་སྡོད་པའི་མི་རྣམས་ལ་སྒྲོག་ཕྱིར་མཐའ་མེད་པའི་འཕྲིན་བཟང་ཡོད་དེ།
REV 14:7 ཁོང་གིས་སྐད་ཆེན་པོས་འདི་སྐད་དུ། དཀོན་མཆོག་གིས་ལེགས་ཉེས་ཀྱི་ཁྲིམས་ཐག་གཅོད་པའི་དུས་ནི་སླེབས་ཟིན་པས། ཁོང་ཉིད་ལ་འཇིགས་ཤིང་བསྟོད་པར་བྱའོ།། ནམ་མཁའ་དང་ས་གཞི། རྒྱ་མཚོ་དང་ཆུ་མིག་བཅས་འགོད་མཁན་ཁོང་ཉིད་ལ་བསྟོད་བསྔགས་བརྗོད་པར་གྱིས་ཞེས་གསུངས་སོ།།
REV 14:8 ཡང་ཕོ་ཉ་གཉིས་པས་མུ་མཐུད་ནས་འདི་སྐད་དུ། རྒྱལ་ཁབ་ཐམས་ཅད་ལ་ལོག་གཡེམ་དང་འདོད་ཆགས་ཀྱི་རྒུན་ཆང་འཐུང་དུ་བཅུག་པའི་པཱ་པེལ་ལོན་ཆེན་པོ་དེ་ནི་འཇིག་སོང་ངོ་།། འཇིག་སོང་ངོ་ཞེས་གསུངས་སོ།།
REV 14:9 ཡང་ཕོ་ཉ་གསུམ་པས་དེ་གཉིས་ཀྱི་མུ་མཐུད་ནས་སྐད་ཆེན་པོས་འདི་སྐད་དུ། གལ་ཏེ་སུ་ཞིག་གིས་གཅན་གཟན་དང་གཅན་གཟན་གྱི་གཟུགས་བརྙན་ལ་ཕྱག་འཚལ་བ་དང་། དཔྲལ་བའམ་ལག་པའི་སྟེང་དུ་རྟགས་བརྒྱབ་ཡོད་ན།
REV 14:10 མི་དེས་ཀྱང་དཀོན་མཆོག་གི་ཐུགས་ཁྲོའི་རྒུན་ཆང་འཐུང་བར་འགྱུར་ཏེ། རྒུན་ཆང་དེ་ནི་དཀོན་མཆོག་གི་ཐུགས་ཁྲོའི་ཕོར་བ་ནང་དུ་བླུགས་ཡོད་པའི་ལྷད་མེད་རྒུན་ཆང་ཡིན། ཕོ་ཉ་དམ་པ་རྣམས་དང་ལུ་གུའི་དྲུང་དུ། མི་དེས་མེ་དང་མུ་ཟིའི་ཁྲོད་ནས་མནར་གཅོད་མྱོང་བར་འགྱུར་རོ།།
REV 14:11 མི་དེ་རྣམས་ཀྱིས་མནར་གཅོད་མྱོང་བའི་དུ་བ་ནི་ཇི་སྲིད་བར་དུ་དགུང་ལ་འཕྱུར་ཞིང༌། གཅན་གཟན་དང་གཅན་གཟན་གྱི་གཟུགས་བརྙན་ལ་ཕྱག་འཚལ་བ་དང་། གཅན་གཟན་གྱི་མིང་གི་རྟགས་བརྒྱབ་ཡོད་པ་རྣམས་ལ་ཉིན་མཚན་ཀུན་ཏུ་བདེ་བ་མེད་ཅེས་གསུངས་སོ།།
REV 14:12 འདི་ནི་དད་ལྡན་དམ་པ་རྣམས་ཀྱི་བཟོད་བསྲན་ཡིན་ཏེ། ཁོ་རྣམས་ནི་དཀོན་མཆོག་གི་བཀའ་རྣམས་དང་སྐྱབས་མགོན་ཡེ་ཤུ་ལ་བཅངས་པའི་དད་པ་སྲུང་མཁན་ཡིན་ནོ།།
REV 14:13 ནམ་མཁའི་ཞིང་ཁམས་ནས་སྐད་སྒྲ་ཞིག་གིས་འདི་སྐད་དུ། དུས་ད་ནས་བཟུང་། གཙོ་བོའི་ནང་དུ་ཚེ་ལས་འདས་པ་རྣམས་བདེའོ་ཞེས་ཁྱོད་ཀྱིས་ཡི་གེར་འགོད་པར་གྱིས་ཤིག་ཅེས་གསུངས་པ་བདག་གིས་ཐོས་སོ༎ དམ་པའི་ཐུགས་ཉིད་ཀྱིས་འདི་སྐད་དུ། ལགས་སོ༎ ཁོ་རྣམས་རང་གི་ངལ་དུབ་ལས་ངལ་གསོ་བར་ངེས་ཤིང་། རྩོལ་བའི་འབྲས་བུ་ཡང་ཁོ་རྣམས་དང་ལྷན་དུ་ཡོད་ཅེས་གསུངས་སོ།།
REV 14:14 ཡང་བདག་གིས་ཕར་བལྟས་པ་ན། ལྟོས་དང་། སྤྲིན་དཀར་ཞིག་དང་སྤྲིན་གྱི་བང་རིམ་དུ་མིའི་བུ་དང་མཚུངས་པ་ཞིག་བཞུགས་པ་མཐོང་ཞིང་། ཁོང་གི་དབུ་ལ་གསེར་གྱི་ཅོད་པན་མནབས་ཤིང་ཕྱག་ཏུ་ཟོར་བ་རྣོན་པོ་ཐོགས་ཡོད།
REV 14:15 ཡང་ཕོ་ཉ་གཞན་ཞིག་མཆོད་ཁང་ནས་ཐོན་ཏེ་སྤྲིན་གྱི་བང་རིམ་དུ་བཞུགས་མཁན་དེ་ཉིད་ལ་སྐད་ཆེན་པོས་འདི་སྐད་དུ། སྟོན་བསྡུ་བའི་དུས་ལ་སླེབས་ཤིང་ས་སྟེང་གི་ལོ་ཏོག་སྨིན་ཟིན་པས། ཁྱེད་ཀྱིས་ཟོར་བ་བསྲིངས་ནས་སྟོན་བསྡུ་བར་མཛོད་ཅེས་ཞུས་པ་ལ།
REV 14:16 སྤྲིན་གྱི་བང་རིམ་དུ་བཞུགས་མཁན་དེ་ཉིད་ཀྱིས་ཟོར་བ་ས་སྟེང་དུ་གཡུགས་ཏེ་ས་སྟེང་གི་སྟོན་བསྡུ་བར་མཛད་དོ།།
REV 14:17 ཡང་ཕོ་ཉ་གཞན་ཞིག་ནམ་མཁའི་ཞིང་ཁམས་ཀྱི་མཆོད་ཁང་ནས་ཐོན་ཞིང་། ཕྱག་ཏུ་ཡང་ཟོར་བ་རྣོན་པོ་ཐོགས་ཡོད་དོ།།
REV 14:18 ཡང་ཕོ་ཉ་གཞན་ཞིག་མཆོད་ཁྲི་ལས་ཐོན་ཞིང་། དེ་ནི་མེ་ལ་དབང་སྒྱུར་མཁན་ཡིན་ལ། དེས་ཟོར་བ་རྣོན་པོ་འཛིན་མཁན་དེ་ལ་སྐད་ཆེན་པོས་འདི་སྐད་དུ། ས་སྟེང་གི་རྒུན་འབྲུམ་སྨིན་ཟིན་པས་ཟོར་བ་རྣོན་པོ་སྲོངས་ལ་རྒུན་འབྲུམ་ཤིང་གི་འབྲས་བུ་སྡུས་ཤིག་ཅེས་སྨྲས་པ་ན།
REV 14:19 ཕོ་ཉས་ཟོར་བ་ས་སྟེང་དུ་གཡུགས་ཏེ་ས་སྟེང་གི་རྒུན་འབྲུམ་བསྡུས་ཤིང་། དཀོན་མཆོག་གི་ཐུགས་ཁྲོའི་རྒུན་འབྲུམ་འཚིར་གཞོང་ཆེན་པོ་ནང་དུ་གཡུགས་སོ།།
REV 14:20 གྲོང་ཁྱེར་ཕྱི་རོལ་ཏུ་ཡོད་པའི་རྒུན་འབྲུམ་འཚིར་གཞོང་གི་ནང་དུ་རྒུན་འབྲུམ་རྡོག་བརྫིས་བཏང་བས། གཞོང་བ་ལས་ཁྲག་བཞུར་ཏེ་མཐོ་ཚད་རྟའི་སྲབ་ལ་ཐུག་པ་དང་། རིང་ཚད་རྒྱང་གྲགས་ཆིག་སྟོང་དྲུག་བརྒྱ་ཙམ་དུ་སླེབས་སོ།།
REV 15:1 ཡང་བདག་གིས་ནམ་མཁའ་ནས་ལྟས་ངོ་མཚར་ཅན་གཞན་ཞིག་ཡོད་པ་མཐོང་བ་དང་། དེ་ནི་ཆེ་ཞིང་ཆེ་ལ་ཤིན་ཏུ་ངོ་མཚར་རོ།། ཕོ་ཉ་བདུན་པོས་མཐའ་མའི་ཆག་སྒོ་བདུན་ལ་དབང་བསྒྱུར་ཏོ།། ཅིའི་ཕྱིར་ཞེ་ན། དཀོན་མཆོག་གི་ཐུགས་ཁྲོ་ནི་ཆག་སྒོ་བདུན་ལས་རྫོགས་པར་འགྱུར་བའི་ཕྱིར་རོ།།
REV 15:2 བདག་གིས་ཤེལ་གྱི་རྒྱ་མཚོ་མེ་དང་འདྲེས་མ་ལྟ་བུ་ཞིག་མཐོང་ཞིང་། ཡང་གཅན་གཟན་དང་གཅན་གཟན་གྱི་གཟུགས་བརྙན། དེའི་མིང་གི་གྲངས་ཀ་བཅས་ལས་རྣམ་པར་རྒྱལ་བའི་མི་ཐམས་ཅད་ཤེལ་གྱི་རྒྱ་མཚོའི་སྟེང་དུ་འགྲེང་ཞིང་། ལག་ཏུ་དཀོན་མཆོག་གི་རྒྱུད་མངས་ཐོགས་པ་དང་།
REV 15:3 དཀོན་མཆོག་གི་ཞབས་ཕྱི་པ་མོ་ཤེའི་མགུར་དང་ལུ་གུའི་མགུར་འདི་ལྟར་བླངས་པ། ཀྱེ་ཀྱེ་གཙོ་བོ་ཀུན་དབང་དཀོན་མཆོག་ལགས།། ཁྱེད་ཀྱི་འཕྲིན་ལས་ཆེ་ཞིང་ངོ་མཚར་ལྡན།། རྒྱལ་ཁབ་ཀུན་གྱི་རྒྱལ་པོ་ཆེན་པོ་ལགས།། ཁྱེད་ཀྱི་ལམ་ནི་དྲང་ཞིང་བདེན་པ་ཡིན།།
REV 15:4 གཙོ་བོ་ཁྱེད་རང་གཅིག་པུ་དམ་པ་ལགས།། ཁྱེད་ལ་གུས་ཞུམ་མི་བྱེད་ཁྱེད་མཚན་ལ།། བསྟོད་བསྔགས་མི་འབུལ་བ་ནི་སུ་ཞིག་ཡོད།། ཁྱེད་ཀྱི་དྲང་བདེན་མཛད་འཕྲིན་མངོན་གྱུར་པས།། མི་རིགས་ཐམས་ཅད་ཁྱེད་ཀྱི་སྤྱན་དྲུང་དུ།། ཡོང་ནས་ཁྱེད་ལ་བསྟོད་བསྔགས་བརྗོད་པར་འགྱུར།། ཞེས་པའོ།།
REV 15:5 དོན་དེ་དག་གི་རྗེས་སུ། བདག་གིས་ཕར་བལྟས་པ་ན། ནམ་མཁའི་ཞིང་ཁམས་སུ་ཡོད་པའི་དཔང་པོའི་གུར་མཆོག་གི་མཆོད་ཁང་གི་སྒོ་ཕྱེས་པ་མཐོང་ངོ་།།
REV 15:6 ཆག་སྒོ་བདུན་ལ་དབང་བསྒྱུར་བའི་ཕོ་ཉ་བདུན་པོ་མཆོད་ཁང་ནས་ཐོན་ཅིང་། ལུས་ལ་དྭངས་ཤིང་གཙང་ལ་འོད་སྣང་འཕྲོ་བའི་སོ་རས་གྱོན་པ་དང་། བྲང་ཁར་གསེར་གྱི་སྐ་རགས་བཅིངས་ཡོད་དོ།།
REV 15:7 དེ་ནས་སེམས་ཅན་བཞི་པོ་དེ་ལས་གཅིག་གིས། ཇི་སྲིད་བར་དུ་གསོན་པོར་བཞུགས་པའི་དཀོན་མཆོག་གི་ཐུགས་ཁྲོས་གང་བའི་གསེར་གྱི་ཕོར་བ་བདུན་པོ་དེ་ཕོ་ཉ་བདུན་ལ་གནང་ཞིང་།
REV 15:8 མཆོད་ཁང་ནང་དུ་དཀོན་མཆོག་གི་གཟི་བརྗིད་དང་ནུས་མཐུའི་དབང་གིས་བྱུང་བའི་དུ་བས་ཁེངས་ཏེ། ཕོ་ཉ་བདུན་པོས་ཆག་སྒོ་བདུན་བཏང་ཚར་བའི་བར་དུ་གནས་དམ་མཆོག་ཏུ་འགྲོ་ཐུབ་མཁན་གཅིག་ཀྱང་མེད་དོ།།
REV 16:1 དེ་ནས་བདག་གིས་མཆོད་ཁང་ནས་སྐད་ཆེན་པོ་ཞིག་གྲགས་ཡོང་བ་ཐོས་ཤིང་། སྐད་དེས་ཕོ་ཉ་བདུན་པོ་ལ་འདི་སྐད་དུ། ཁྱོད་རྣམས་ཕར་སོང་སྟེ་དཀོན་མཆོག་གི་ཐུགས་ཁྲོའི་ཕོར་བ་བདུན་པོ་ས་སྟེང་དུ་བླུགས་ཤིག་ཅེས་གསུངས་སོ།།
REV 16:2 ཕོ་ཉ་དང་པོ་ཕར་སོང་ནས་རང་གི་ཕོར་བ་ས་སྟེང་དུ་བླུགས་ཏེ། གཅན་གཟན་གྱི་རྟགས་བརྒྱབ་ཡོད་པ་དང་གཅན་གཟན་གྱི་གཟུགས་བརྙན་ལ་ཕྱག་འཚལ་མཁན་རྣམས་ཀྱི་ལུས་སྟེང་དུ་སྐྱུག་བྲོ་ཞིང་དུག་གིས་ཁེངས་པའི་རྨ་ནད་བྱུང་ངོ་།།
REV 16:3 ཕོ་ཉ་གཉིས་པས་རང་གི་ཕོར་བ་རྒྱ་མཚོ་ནང་དུ་བླུགས་ཏེ། རྒྱ་མཚོ་ནི་ཁྲག་ཏུ་གྱུར་པ་དང་། ཤི་བོའི་ཁྲག་ལྟར་གྱུར་ཏེ། རྒྱ་མཚོ་ནང་གི་སྲོག་ལྡན་ཐམས་ཅད་ཤི་བའོ།།
REV 16:4 ཕོ་ཉ་གསུམ་པས་རང་གི་ཕོར་བ་གཙང་པོ་དང་ཆུ་མིག་གི་ནང་དུ་བླུགས་པ་དང་། ཆུ་ནི་ཁྲག་ཏུ་གྱུར་ཏོ།།
REV 16:5 ཆུ་ལ་དབང་སྒྱུར་མཁན་གྱི་ཕོ་ཉས་འདི་སྐད་གསུངས་པ་བདག་གིས་ཐོས་ཏེ། འདས་དང་ད་ལྟར་བཞུགས་པའི་དམ་པ་ཁྱེད།། དེ་ལྟར་ཉེས་ཆད་བཅད་པས་དྲང་བདེན་ལགས།།
REV 16:6 དེ་རྣམས་ཀྱིས་ནི་དད་ལྡན་དམ་པ་དང་།། ལུང་སྟོན་པ་ཚོའི་སྐུ་ཁྲག་བཞུར་བྱས་པས།། ད་ལྟ་ཁྱེད་ཀྱིས་སྐྱེ་བོ་དེ་རྣམས་ལ།། ཁྲག་ལན་འཐུང་བར་མཛད་པ་འཐོབ་འོས་སོ།། ཞེས་པའོ།།
REV 16:7 ཡང་མཆོད་ཁྲི་ནས་སྒྲ་ཞིག་གྲགས་ཤིང་འདི་སྐད་གསུངས་པ་བདག་གིས་ཐོས་ཏེ། ལགས་སོ་གཙོ་བོ་ཀུན་དབང་དཀོན་མཆོག་ལགས།། ཁྱེད་ཀྱིས་ཉེས་ཆད་བཅད་པ་དྲང་བདེན་ལགས།། ཞེས་པའོ།།
REV 16:8 ཕོ་ཉ་བཞི་པས་རང་གི་ཕོར་བ་ཉི་མའི་སྟེང་དུ་བླུགས་ཏེ། ཉི་མར་མི་རྣམས་མེས་བསྲེག་པའི་དབང་གནང་ངོ་།།
REV 16:9 མི་རྣམས་ཚ་བ་དྲག་པོས་བསྲེགས་པ་ན། དེ་རྣམས་ཀྱིས་ཆག་སྒོ་འདི་དག་ལ་དབང་སྒྱུར་མཁན་དཀོན་མཆོག་གི་མཚན་ལ་སྨད་པ་ལས། འགྱོད་བཤགས་བྱས་ནས་ཁོང་ལ་བསྟོད་བསྔགས་མ་བརྗོད་དོ།།
REV 16:10 ཕོ་ཉ་ལྔ་པས་རང་གི་ཕོར་བ་གཅན་གཟན་གྱི་ཁྲིའི་སྟེང་དུ་བླུགས་ཏེ། གཅན་གཟན་གྱི་རྒྱལ་སྲིད་མུན་ནག་ཏུ་གྱུར་ཏོ།། མི་རྣམས་ཀྱིས་ཟུག་གཟེར་མ་བཟོད་པས་རང་གི་ལྕེ་བལྡད་པ་དང་།
REV 16:11 ཡང་ཟུག་གཟེར་དང་རྨ་ནད་མ་བཟོད་པའི་རྐྱེན་གྱིས། ནམ་མཁའི་ཞིང་ཁམས་ཀྱི་དཀོན་མཆོག་ལ་སྐུར་བ་བཏབ་ཅིང་། རང་གིས་ཅི་བྱས་ལ་འགྱོད་བཤགས་མ་བྱས་སོ།།
REV 16:12 ཕོ་ཉ་དྲུག་པས་རང་གི་ཕོར་བ་གཙང་པོ་ཆེན་པོ་ཕི་རཱད་ནང་དུ་བླུགས་ཏེ། ཤར་ཕྱོགས་ནས་ཡོང་བའི་རྒྱལ་པོ་རྣམས་ལ་བགྲོད་ལམ་སྟ་གོན་བྱེད་པའི་ཕྱིར་ཆུ་སྐམ་པར་གྱུར་ཏོ།།
REV 16:13 ཡང་བདག་གིས་གདོན་མི་གཙང་བ་གསུམ་མཐོང་ཞིང་། དེ་ནི་སྦལ་བ་དང་འདྲ་ལ། འབྲུག་དང་གཅན་གཟན། ལུང་སྟོན་པ་རྫུས་མ་བཅས་ཀྱི་ཁ་ནས་ཐོན་ནོ།།
REV 16:14 དེ་དག་ནི་མ་གཞི་གདོན་འདྲེ་དག་གི་སེམས་ཉིད་ཡིན་ཞིང་གྲུབ་རྟགས་སྟོན་པ་དང་། གནམ་འོག་གི་རྒྱལ་པོ་རྣམས་ཀྱི་གམ་དུ་འགྲོ་ཞིང་། དེ་རྣམས་ཀུན་དབང་དཀོན་མཆོག་གི་ཉིན་མོ་ཆེན་པོར་མཉམ་དུ་འདུས་ནས་འཐབ་འཁྲུག་ལ་ཞུགས་པར་བསྐུལ་བའི་ཕྱིར་རོ།།
REV 16:15 ལྟོས་དང་། རྐུན་པོ་གློ་བུར་སླེབས་པ་ལྟར་ང་རང་ཡོང་བར་ངེས། དོགས་ཟོན་བྱེད་པ་དང་ལུས་ལ་གོས་གྱོན་པའི་མི་ནི་བདེའོ།། དེ་ལྟར་མ་བྱས་ན་ལུས་གཅེར་བུར་འགྲོ་ཞིང་། མི་རྣམས་ཀྱིས་ཁོའི་ངོ་ཚ་མཐོང་བར་འགྱུར་རོ།།
REV 16:16 གདོན་འདྲེ་དེ་གསུམ་པོས་རྒྱལ་པོ་རྣམས་ཨིབ་རིའི་མི་རིགས་ཀྱི་སྐད་དུ་ཧཱར་མ་གེ་དོན་ཟེར་བའི་ས་ཆར་བསྡུས་སོ།།
REV 16:17 ཕོ་ཉ་བདུན་པས་རང་གི་ཕོར་བ་བར་སྣང་དུ་བླུགས་ཏེ། སྐད་སྒྲ་ཆེན་པོ་ཞིག་མཆོད་ཁང་གི་ཁྲིའི་སྟེང་ནས་ཐོན་ཅིང་རྫོགས་པར་གྱུར་ཟིན་ཞེས་གསུངས་སོ།།
REV 16:18 དེ་ནས་གློག་དམར་འཁྱུག་པ་དང་། ལྡིར་སྒྲ་སྒྲོག་པ། འབྲུག་སྒྲ་གྲགས་པ། ས་འགུལ་ཆེན་པོ་བཅས་བྱུང་ཞིང་། ས་སྟེང་དུ་མི་ཡོད་པ་ནས་བཟུང་། འདི་ལྟ་བུའི་ས་འགུལ་ཆེན་པོ་དང་ས་འགུལ་དྲག་པོ་བྱུང་མ་མྱོང་ངོ་།།
REV 16:19 གྲོང་ཁྱེར་ཆེན་པོ་དེ་དུམ་བུ་གསུམ་དུ་གས་པ་དང་། རྒྱལ་ཁབ་སོ་སོའི་གྲོང་ཁྱེར་ཐམས་ཅད་ཀྱང་བརྡིབས། དཀོན་མཆོག་གིས་ཀྱང་རང་ཉིད་ཀྱི་ཐུགས་ཁྲོ་ཆེན་པོ་ཡོད་པའི་རྒུན་ཆང་གི་ཕོར་བ་དེ་པཱ་པེལ་ལོན་ཆེན་པོར་སྤྲོད་རྒྱུ་ཐུགས་ལ་དྲན།
REV 16:20 གླིང་ཕྲན་ཐམས་ཅད་བྲོས་ཤིང་རི་བོ་དག་ཀྱང་ཡལ་བར་གྱུར།
REV 16:21 ཡང་ནམ་མཁའ་ནས་སེར་བ་ཆེན་པོ་མིའི་སྟེང་དུ་བབས་པ་དང་། སེར་རྡོག་རེ་རེའི་ལྗིད་ཚད་ལ་སྤྱི་རྒྱ་ཞེ་ལྔ་ཙམ་ཡོད། སེར་བའི་ཆག་སྒོ་ཡི་རྐྱེན་གྱིས་མི་རྣམས་ཀྱིས་དཀོན་མཆོག་ལ་སྐུར་བ་བཏབ་པའོ༎ རྒྱུ་མཚན་ནི་ཆག་སྒོ་དེ་ཆེས་དྲགས་པས་སོ།།
REV 17:1 ཕོར་བ་བདུན་བཟུང་བའི་ཕོ་ཉ་རྣམས་ལས་གཅིག་ཡོང་སྟེ་བདག་ལ་འདི་སྐད་དུ། ཤོག་དང་། ཆུ་མང་པོའི་སྟེང་དུ་སྡོད་པའི་སྨད་འཚོང་མ་ཆེན་མོར་འཕོག་ངེས་པའི་ཉེས་ཆད་དེ་བདག་གིས་ཁྱོད་ལ་སྟོན་པར་བྱའོ།།
REV 17:2 ས་སྟེང་གི་རྒྱལ་པོ་རྣམས་ཀྱིས་ཁོ་མོར་ལོག་གཡེམ་བྱས་ཤིང་། ས་སྟེང་དུ་སྡོད་པའི་མི་རྣམས་ཀྱིས་ཁོ་མོའི་ལོག་གཡེམ་གྱི་རྒུན་ཆང་འཐུང་ནས་ར་བཟི་བ་ཡིན་ཞེས་གསུངས་སོ།།
REV 17:3 དེ་ནས་ཕོ་ཉས་ང་རང་དམ་པའི་ཐུགས་ཉིད་ཀྱི་ངང་ནས་དབེན་སྟོང་ཞིག་ཏུ་ཁྲིད་པ་དང་། ངས་བུད་མེད་ཅིག་གཅན་གཟན་དམར་པོ་ཞིག་ལ་བཞོན་ཡོད་པ་མཐོང་ཞིང་། གཅན་གཟན་དེ་ལ་མགོ་བོ་བདུན་དང་རྭ་ཅོ་བཅུ་ཡོད་པ་དང་། ལུས་ཧྲིལ་པོར་སྐུར་འདེབས་ཀྱི་མིང་རྟགས་ཀྱིས་ཁྱབ་འདུག
REV 17:4 བུད་མེད་དེས་ལུས་ལ་ཁ་དོག་རྒྱ་སྨུག་དང་དམར་པོ་ཅན་གྱི་གོས་གྱོན་ཞིང་། གསེར་དང་། རིན་པོ་ཆེ། མུ་ཏིག་གི་རྒྱན་ཆ་བཏགས་པ་དང་། ལག་ཏུ་གསེར་གྱི་ཕོར་བ་བཟུང་ཡོད་ལ། ཕོར་བའི་ནང་དུ་སྐྱུག་བྲོ་བའི་དོན་དག་དང་ཁོ་མོས་ལོག་གཡེམ་བྱས་པའི་མི་གཙང་བས་གང་ངོ་།།
REV 17:5 ཁོ་མོའི་དཔྲལ་བར་མིང་ལྐོག་གྱུར་པ་ཞིག་བཀོད་ཡོད་དེ། པཱ་པེལ་ལོན་ཆེན་པོ་དང་། འཇིག་རྟེན་གྱི་སྨད་འཚོང་མ། སྐྱུག་བྲོ་བའི་དོན་ཐམས་ཅད་ཀྱི་མ་ཞེས་པའོ།།
REV 17:6 ཡང་བུད་མེད་དེས་དད་ལྡན་དམ་པ་རྣམས་ཀྱི་ཁྲག་དང་སྐྱབས་མགོན་ཡེ་ཤུར་བདེན་དཔང་བྱེད་མཁན་རྣམས་ཀྱི་ཁྲག་འཐུང་ནས་ར་བཟི་བ་བདག་གིས་མཐོང་ངོ་།། ངས་ཁོ་མོ་མཐོང་བ་དང་ཡ་མཚན་ཆེན་པོ་སྐྱེས་སོ།།
REV 17:7 ཕོ་ཉས་བདག་ལ་འདི་སྐད་དུ། ཁྱོད་ནི་ཅིའི་ཕྱིར་ཡ་མཚན་སྐྱེས་སམ། ངས་བུད་མེད་དེ་དང་ཁོ་མོ་བཞོན་པའི་མགོ་བོ་བདུན་དང་རྭ་ཅོ་བཅུ་ཅན་གྱི་གཅན་གཟན་གྱི་གསང་བ་ཁྱོད་ལ་འཆད་པར་བྱའོ།།
REV 17:8 སྔར་ཁྱོད་ཀྱིས་མཐོང་བའི་གཅན་གཟན་དེ་ནི་སྔོན་ཆད་ཡོད་ལ་ད་ལྟ་མེད་དེ། ཕྱིས་སུ་ཞབས་མེད་པའི་དོང་ནས་འཐོན་ངེས་ཤིང་འཇིག་པར་འགྱུར། ཡང་ས་སྟེང་དུ་སྡོད་ཅིང་འཇིག་རྟེན་བཀོད་པའི་ཚུན་ལ་ཚེ་སྲོག་གི་གླེགས་བམ་ནང་དུ་མིང་ཐོ་མ་བཀོད་པ་རྣམས་ཀྱིས། གཅན་གཟན་དེ་མཐོང་བའི་ཚེ་ངོ་མཚར་བར་འགྱུར་ཏེ། ཁོ་རང་སྔོན་ཆད་ཡོད་ལ་ད་ལྟ་མེད་ཀྱང་ཕྱིས་སུ་ཡོང་བར་འགྱུར་བའི་ཕྱིར་རོ༎
REV 17:9 འདི་རུ་ཤེས་རབ་ལྡན་པའི་བློ་ཡོད་དེ། མགོ་བོ་བདུན་པོ་ནི་བུད་མེད་སྡོད་སའི་རི་བོ་བདུན་ཡིན་ལ།
REV 17:10 དེ་ནི་རྒྱལ་པོ་བདུན་ཡང་ཡིན་ཏེ། རྒྱལ་པོ་ལྔ་ནི་འགྱེལ་ཟིན་པ་དང་། གཅིག་ནི་ད་ལྟ་ཡོད། གཅིག་ནི་ད་དུང་མ་ཡོང་ལ། དེ་ཉིད་ཡོང་ཚེ་རེ་ཞིག་ལ་སྡོད་དགོས།
REV 17:11 སྔོན་ཆད་ཡོད་ཅིང་ད་ལྟ་མེད་པའི་གཅན་གཟན་དེ་ནི་ཨང་བརྒྱད་པ་ཡིན་ལ། བདུན་པོ་དེའི་ཡ་གྱལ་དུ་གཏོགས་ཤིང་དེ་ཡང་འཇིག་པར་འགྱུར་རོ།།
REV 17:12 ཁྱོད་ཀྱིས་དེ་སྔར་མཐོང་བའི་རྭ་ཅོ་བཅུ་པོ་ནི་རྒྱལ་པོ་བཅུ་ཡིན་ལ། དེ་རྣམས་ལ་རྒྱལ་སྲིད་ད་དུང་ཐོབ་མེད་མོད། འོན་ཀྱང་དེ་རྣམས་ལ་དུས་ཚོད་གཅིག་གི་རིང་ལ་གཅན་གཟན་དེ་དང་མཉམ་དུ་རྒྱལ་པོའི་དབང་འཐོབ་པར་འགྱུར་རོ།།
REV 17:13 དེ་རྣམས་ཀྱིས་བློ་སེམས་གཅིག་མཐུན་ངང་ནས་རང་གི་ནུས་མཐུ་དང་དབང་ཐང་ཐམས་ཅད་གཅན་གཟན་དེ་ལ་སྤྲོད་པ་ཡིན།
REV 17:14 དེ་རྣམས་ལུ་གུ་དང་འཐབ་ཅིང་། ཁོང་ནི་གཙོ་བོ་རྣམས་ཀྱི་གཙོ་བོ་དང་རྒྱལ་པོ་རྣམས་ཀྱི་རྒྱལ་པོ་ཡིན་པས། དེ་དག་ལས་རྣམ་པར་རྒྱལ་བར་འགྱུར། ལུ་གུ་དང་མཉམ་དུ་ཡོད་པ་ནི་ཞལ་འབོད་ཐོབ་པ་དང་བདམས་པར་མཛད་པ། བློ་སེམས་དཀར་བ་བཅས་རྣམས་ཡིན་ཞེས་སྨྲས་སོ།།
REV 17:15 ཡང་ཕོ་ཉས་བདག་ལ་འདི་སྐད་དུ། ཁྱོད་ཀྱིས་མཐོང་བའི་སྨད་འཚོང་མ་སྡོད་པའི་ཆུ་རྣམས་ནི་མི་སྡེ་དང་། མི་ཚོགས། མི་རིགས། སྐད་རིགས་བཅས་ཡིན་ནོ།།
REV 17:16 ཁྱོད་ཀྱིས་མཐོང་བའི་རྭ་ཅོ་བཅུ་པོ་དང་གཅན་གཟན་ནི་སྨད་འཚོང་མ་ལ་ངེས་པར་སྡང་སྟེ། ཁོ་མོ་སྟོངས་པར་བྱེད་ཅིང་གཅེར་བུར་བསྐྱུར་བ་དང་། ཡང་ཁོ་མོའི་ཤ་ཟ་བ་དང་ཁོ་མོ་མེར་བསྲེགས་ནས་ཚར་བར་འགྱུར།
REV 17:17 རྒྱུ་མཚན་ནི་དཀོན་མཆོག་གིས་རྒྱལ་པོ་རྣམས་ལ་བློ་སེམས་གཅིག་མཐུན་ངང་ཁོང་གི་དགོངས་པ་བཞིན་དུ་སྒྲུབ་པར་མཛད་དེ། ཁོང་གི་བཀའ་རྣམས་འགྲུབ་པའི་བར་དུ། རྒྱལ་པོ་དེ་རྣམས་ཀྱིས་རང་གི་རྒྱལ་སྲིད་གཅན་གཟན་དེ་ལ་སྤྲོད་པར་འགྱུར་བའི་ཕྱིར་རོ།།
REV 17:18 ཁྱོད་ཀྱིས་མཐོང་བའི་བུད་མེད་དེ་ནི་ས་སྟེང་གི་རྒྱལ་པོ་རྣམས་ལ་དབང་བསྒྱུར་བའི་གྲོང་ཁྱེར་ཆེན་པོ་ཡིན་ཞེས་སྨྲས་སོ།།
REV 18:1 དེའི་རྗེས་སུ། བདག་གིས་དབང་ཐང་ཆེན་པོའི་ཕོ་ཉ་གཞན་ཞིག་ནམ་མཁའི་ཞིང་ཁམས་ནས་མར་ཕེབས་པ་མཐོང་ཞིང་། ཁོང་གི་གཟི་བརྗིད་ཆེན་པོའི་གཟི་འོད་ས་གཞི་ཡོངས་ལ་ཁྱབ་བོ།།
REV 18:2 ཁོང་གིས་གསུང་སྐད་དྲག་པོས་འདི་སྐད་དུ། འཇིག་པར་གྱུར་ཏོ་པཱ་པེལ་ལོན།། ཆེན་པོ་དེ་ནི་འཇིག་པར་གྱུར།། དེ་ནི་གདོན་གྱི་སྡོད་གནས་དང་།། མི་གཙང་གདོན་དང་བྱེའུ་ཚང་དང་།། མི་གཙང་སྐྱུག་བྲོ་སྣ་ཚོགས་ཀྱི།། གཅན་གཟན་འགྲོ་སའི་གནས་སུ་གྱུར།།
REV 18:3 རྒྱལ་ཁབ་སོ་སོས་ཁོ་མོ་ཡི།། གཡེམ་གྱི་འདོད་ཆགས་ཆེན་པོའི་ཆང་།། འཐུང་ཞིང་ས་སྟེང་རྒྱལ་པོ་རྣམས།། ཁོ་མོ་ལ་ནི་ལོག་གཡེམ་བྱས།། ས་སྟེང་ཚོང་པ་དག་གིས་ཀྱང་།། ཁོ་མོར་ལོག་གཡེམ་བྱས་པའི་ཕྱིར།། ས་སྟེང་ཚོང་པ་ཐམས་ཅད་ནི།། ཁོ་མོའི་འདོད་ཡོན་ལོངས་སྤྱོད་ལ།། བརྟེན་པའི་དབང་གིས་འབྱོར་བ་རྒྱས།། ཞེས་གསུངས་སོ།།
REV 18:4 ཡང་བདག་གིས་ནམ་མཁའི་ཞིང་ཁམས་ནས་སྐད་གཞན་ཞིག་གིས་འདི་སྐད་གསུངས་པ་ཐོས་ཏེ། ཀྱེ་ཀྱེ་ང་ཡི་མི་སྡེ་རྣམས།། ཁོ་མོ་མཉམ་དུ་སྡིག་པ་དང་།། ཁོ་མོས་མྱོང་བའི་ཆག་སྒོ་དེ།། ཁྱོད་ལ་འབྱུང་བར་མི་བྱ་ཕྱིར།། གྲོང་ཁྱེར་དེ་ནས་ཕྱིར་ཐོན་ཤོག །
REV 18:5 ཁོ་མོའི་སྡིག་ཕུང་ནམ་མཁར་གཏུགས༎ དཀོན་མཆོག་ཉིད་ཀྱིས་ཁོ་མོ་ཡི།། སྡིག་པ་དག་ནི་ཐུགས་ལ་དྲན།།
REV 18:6 ཁོ་མོས་མི་ལ་ཅི་བྱས་ན།། ཁོ་མོ་ལ་ཡང་དེ་ལྟར་བྱ།། ཁོ་མོས་ཅི་ལྟར་བྱས་པ་ལ།། ཁོ་མོར་ཡ་ལན་ལྡབ་གཉིས་སྩོལ།། ཁོ་མོས་བསྡེབས་པའི་ཕོར་བ་ལ།། ཁོ་མོར་ལྡབ་གཉིས་བསྡེབ་པར་གྱིས།།
REV 18:7 ཁོ་མོས་ཇི་ལྟར་རང་བསྟོད་དང་།། འདོད་ཡོན་ལོངས་སྤྱོད་རྫོགས་པ་བཞིན།། དེ་ལྟར་ཁོ་མོར་མནར་གཅོད་དང་།། མྱ་ངན་ཆེན་པོ་མྱང་བར་གྱིས།། ཁོ་མོའི་སེམས་སུ་འདི་བཞིན་དུ།། ང་ནི་བཙུན་མོའི་ཁྲི་ལ་བསྡད།། ཡུགས་མོ་ལ་ནི་མ་ཡིན་ཏེ།། མྱ་ངན་གནས་སུ་མི་ལྷུང་སྙམ།།
REV 18:8 དེའི་ཕྱིར་ཉིན་གཅིག་དུས་ཡུན་ལ།། འཆི་བ་མྱ་ངན་མུ་གེ་བཅས།། ཁོ་མོའི་ཆག་སྒོ་མཉམ་དུ་འབྱུང་།། མེ་ཡིས་ཁོ་མོ་བསྲེག་འགྱུར་ཞིང་།། ཁོ་མོར་ཉེས་ཆད་གཅོད་མཁན་ཏེ།། གཙོ་བོ་དཀོན་མཆོག་ཁོང་ཉིད་ལ།། ནུས་མཐུ་ཆེན་པོ་ལྡན་པས་སོ།། ཞེས་པའོ།།
REV 18:9 ཡང་འདི་སྐད་དུ། ཁོ་མོར་ལོག་གཡེམ་བྱེད་ཅིང་མཉམ་དུ་འདོད་ཡོན་ལོངས་སྤྱོད་ལ་རོལ་བའི་ས་སྟེང་གི་རྒྱལ་པོ་རྣམས་ཀྱིས། ཁོ་མོ་མེར་བསྲེག་པའི་དུ་བ་མཐོང་སྟེ་ཁོ་མོའི་ཆེད་དུ་ངུ་ཞིང་མྱ་ངན་བྱེད་པར་འགྱུར་བ་དང་།
REV 18:10 ཁོ་མོའི་མནར་གཅོད་ལ་འཇིགས་པས་རྒྱང་རིང་དུ་ལངས་བསྡད་དེ་ན་རེ། ཆག་སྒོ་བྱུང་ངོ་ཆག་སྒོ་བྱུང་།། སྲ་མཁྲེགས་ལྡན་པའི་པཱ་པེལ་ལོན།། གྲོང་ཁྱེར་ཆེན་པོ་ཁྱོད་ཉིད་ལ།། ཆུ་ཚོད་གཅིག་གི་དུས་ཡུན་དུ།། ཁྱོད་ཀྱི་ཉེས་ཆད་སླེབས་ཟིན་ཏོ།། ཞེས་སྨྲས་པའོ།།
REV 18:11 ཡང་འདི་སྐད་དུ། ཁོ་རྣམས་ཀྱི་ཚོང་ཟོག་ཉོ་མཁན་མེད་པས། ས་སྟེང་གི་ཚོང་པ་ཡང་ཁོ་མོའི་ཕྱིར་ངུ་ཞིང་མྱ་ངན་བྱེད་པའོ།།
REV 18:12 ཚོང་ཟོག་ནི་གསེར་དང་། དངུལ། རིན་པོ་ཆེ། མུ་ཏིག སོ་རས་སྲབ་བུ། རས་རྒྱ་སྨུག དར་སིལ། རས་དམར་པོ། ཤིང་དྲི་ཞིམ་ཅན་སྣ་ཚོགས། བ་སོའི་སྣོད་ཅ་ལག་སྣ་ཚོགས། རིན་ཐང་ཤིན་ཏུ་ཆེ་བའི་ཤིང་དང་ལི། ལྕགས། རྡོ་ཀ་མ་རུའི་སྣོད་ཅ་ལག་སྣ་ཚོགས།
REV 18:13 ཤིང་ཚ། བསུང་རྫས། བདུག་སྤོས། གུ་གུལ། སྤོས་དཀར། རྒུན་ཆང་། སྐྱུ་རུ་རའི་འཚིར་སྣུམ། ཕྱེ་ཡག་པོ། གྲོ། བ་གླང་། ལུག རྟ། ཤིང་རྟ། གཡོག་པོ། མིའི་སྲོག་དང་བཅས་སོ།།
REV 18:14 ཀྱེ་པཱ་པེལ་ལོན། ཁྱོད་རང་ཞེན་ཆགས་པའི་འབྲས་བུ་ཁྱོད་དང་བྲལ་ཞིང་། ཁྱོད་ཀྱི་རོ་བརྒྱའི་ཟས་མཆོག་དང་ཡིད་དུ་འོང་བའི་དངོས་པོ་དག་ཀྱང་ཁྱོད་ལས་རྩ་མེད་བཏང་བས་ནམ་ཡང་སླར་མཐོང་བར་མི་འགྱུར་རོ།།
REV 18:15 ཚོང་རྫས་འདི་རྣམས་འཚོང་མཁན་ཏེ། ཁོ་མོར་བརྟེན་ནས་ཕྱུག་པོར་གྱུར་པའི་ཚོང་པ་རྣམས་ཁོ་མོའི་མནར་གཅོད་ལ་འཇིགས་པའི་རྐྱེན་གྱིས། རྒྱང་རིང་དུ་ལངས་ནས་བསྡད་དེ་ངུ་ཞིང་མྱ་ངན་བྱས་ཏེ་ན་རེ།
REV 18:16 ཆག་སྒོ་བྱུང་ངོ་ཆག་སྒོ་བྱུང་།། གྲོང་ཁྱེར་ཆེན་པོ་འདི་ལ་བྱུང་།། སོ་རས་སྲབ་བུ་གྱོན་པ་དང་།། ཁ་དོག་རྒྱ་སྨུག་དམར་པོ་ཡི།། གོས་ནི་གྱོན་ཞིང་གསེར་རྒྱན་དང་།། རིན་པོ་ཆེ་དང་མུ་ཏིག་གི ། རྒྱན་ཆས་ལེགས་པར་བརྒྱན་པ་འོ།།
REV 18:17 ཆུ་ཚོད་གཅིག་གི་དུས་ཡུན་ལ།། དེ་འདྲའི་འབྱོར་ཕྱུག་ཆེན་པོ་ཞིག ། ཅི་ཡང་མེད་པར་གྱུར་པ་འོ།། ཞེས་སྨྲས་པའོ།། ཡང་འདི་སྐད་དུ། གྲུ་དཔོན་དང་གྲུ་གཟིངས་ལ་བསྡད་ནས་ཕྱོགས་བཞིར་འགྲིམ་མཁན་དང་། གྲུ་པ་དང་། རྒྱ་མཚོར་བརྟེན་ནས་འཚོ་བ་རོལ་མཁན་ཐམས་ཅད་རྒྱང་རིང་དུ་ལངས་ནས་བསྡད་དེ།
REV 18:18 ཁོ་མོ་མེ་ལ་བསྲེག་པའི་དུ་བ་མཐོང་ནས་སྐད་ཆེན་པོས་འདི་ལྟར་སྨྲས་པ། གྲོང་ཁྱེར་གང་ཞིག་གྲོང་ཁྱེར་ཆེན་པོ་འདི་དང་བསྡུར་ནུས་སམ་ཞེས་པའོ།།
REV 18:19 ཡང་དེ་རྣམས་ཀྱིས་རང་གི་མགོ་ལ་ས་རྡུལ་གཏོར་བ་དང་། ངུ་ཞིང་མྱ་ངན་བྱེད་ཀྱིན་སྐད་ཆེན་པོས། ཆག་སྒོ་བྱུང་ངོ་ཆག་སྒོ་བྱུང་།། གྲོང་ཁྱེར་ཆེན་པོ་འདི་ལ་བྱུང་།། རྒྱ་མཚོར་གྲུ་གཟིངས་ཡོད་པ་དང་།། ཁོ་མོའི་རིན་པོ་ཆེ་རྣམས་ལ།། བརྟེན་མཁན་ཐམས་ཅད་ཕྱུག་པོར་གྱུར།། ཆུ་ཚོད་གཅིག་གི་དུས་ཡུན་ལ།། ཁོ་མོ་གཞི་ནས་མེད་པར་གྱུར།། ཞེས་སྨྲས་སོ།།
REV 18:20 ཡང་འདི་སྐད་དུ། ཀྱེ་ནམ་མཁའི་ཞིང་ཁམས་དང་། དད་ལྡན་དམ་པ། སྐུ་ཚབ་པ། ལུང་སྟོན་པ་རྣམས། ཁོ་མོའི་དབང་གིས་དགའ་བར་གྱིས། ཅིའི་ཕྱིར་ཞེ་ན། དཀོན་མཆོག་གིས་ཁྱོད་རྣམས་ཀྱི་ཆེད་དུ་ཁོ་མོར་ཉེས་ཆད་བཅད་པས་སོ་ཞེས་གསུངས་སོ།།
REV 18:21 ཡང་ཕོ་ཉ་སྟོབས་ཆེན་ཞིག་གིས་རྡོ་ཕ་བོང་རང་འཐག་གི་རྡོ་ཆེན་པོ་དང་འདྲ་བ་ཞིག་ཡར་བཀྱགས་ནས་རྒྱ་མཚོར་འཕངས་ཏེ་འདི་སྐད་དུ། གྲོང་ཁྱེར་ཆེན་པོ་པཱ་པེལ་ལོན།། འདི་བཞིན་ཤུགས་ཀྱིས་གཡུག་པར་ངེས།། སླར་ཡང་མཐོང་བར་མི་འགྱུར་རོ།།
REV 18:22 རོལ་དབྱངས་ཀྱང་ནི་དཀྲོལ་བ་དང་།། གླུ་གཞས་ཀྱང་ནི་གཏོང་བ་དང་།། གླིང་བུ་ཡང་ནི་འབུད་པ་དང་།། དུང་དཀར་ཡང་ནི་འབུད་པ་བཅས།། ཁྱོད་ཀྱི་ཁྲོད་ནས་ཐོས་མི་འགྱུར།། ལས་རིགས་སོ་སོའི་ལག་རྩལ་ཡང་།། ཁྱོད་ཀྱི་ཁྲོད་ནས་མཐོང་མི་འགྱུར།། རང་འཐག་སྒྲ་ནི་ཁྱོད་ཀྱི་ཁྲོད།། ནམ་ཡང་ཐོས་པར་མི་འགྱུར་རོ།།
REV 18:23 སྒྲོན་མེའི་འོད་ནི་ཁྱོད་ཀྱི་ཁྲོད།། ནམ་ཡང་འཕྲོ་བར་མི་འགྱུར་རོ།། མག་པ་བག་མའི་སྐད་སྒྲ་ཡང་།། ཁྱོད་ཀྱི་ཁྲོད་དུ་ཐོས་མི་འགྱུར།། དེ་ནི་ཁྱོད་ཀྱི་ཚོང་པ་རྣམས།། ས་སྟེང་འདི་ཡི་མི་ཆེན་ཡིན།། འཇིག་རྟེན་རྒྱལ་ཁབ་སོ་སོ་ཡང་།། ཁྱོད་ཀྱི་སྒྱུ་མས་བསླུས་ཕྱིར་རོ།།
REV 18:24 ལུང་སྟོན་པ་དང་དད་ལྡན་དམ་པ་དང་།། ས་སྟེང་འདི་ནས་བསད་པའི་མི་ཚང་མའི།། ཁྲག་དམར་གྲོང་ཁྱེར་འདི་རུ་རྙེད་པ་ཡིན།། ཞེས་གསུངས་སོ།།
REV 19:1 དེའི་རྗེས་སུ། བདག་གིས་ནམ་མཁའི་ཞིང་ཁམས་ནས་འདུ་ཚོགས་ཆེན་པོའི་སྐད་སྒྲ་ལྟ་བུ་ཞིག་ཐོས་ཏེ་འདི་སྐད་དུ། ཧ་ལེ་ལོའུ་ཡཱ་ཐར་པ་དང་།། གཟི་བརྗིད་དབང་ཐང་ཐམས་ཅད་པོ།། བདག་ཅག་དཀོན་མཆོག་ཉིད་ལ་གཏོགས།།
REV 19:2 ཁོང་གིས་བཅད་པའི་ཉེས་ཆད་ནི།། བདེན་ཅིང་དྲང་པོ་ཡིན་ལགས་པས།། ཁོང་གིས་སྨད་འཚོང་ཆེན་མོ་ལ།། ཉེས་ཆད་བཅད་པ་ཡིན་ལགས་སོ།། ཁོ་མོས་ལོག་གཡེམ་ལ་བརྟེན་ནས།། འཇིག་རྟེན་འདི་ནི་རྫོབ་པར་བྱས།། དཀོན་མཆོག་གིས་ནི་ཁོང་ཉིད་ཀྱི།། ཞབས་ཕྱི་རྣམས་ཀྱི་བཞུར་བའི་ཁྲག ། སྨད་འཚོང་མ་ལས་ཁྲག་ལན་བླངས།། ཞེས་གསུངས་སོ།།
REV 19:3 ཡང་འདི་སྐད་དུ། ཀྱེ་ཀྱེ་ཧ་ལེ་ལོའུ་ཡཱ་ཀྱེ།། ཁོ་མོ་བསྲེག་པའི་དུ་བ་ནི།། ནམ་ཞར་དགུང་ལ་རྟག་ཏུ་འཕྱུར།། ཞེས་གསུངས་སོ།།
REV 19:4 རྒན་པོ་ཉེར་བཞི་དང་སེམས་ཅན་བཞི་པོས་ཕྱག་བཙལ་ནས་ཁྲི་ལ་བཞུགས་པའི་དཀོན་མཆོག་ལ་བསྟོད་བསྔགས་ཕུལ་ཏེ་ན་རེ། ཨ་མེན། ཧ་ལེ་ལོའུ་ཡཱ་ཞེས་བརྗོད་དོ།།
REV 19:5 དེ་ནས་བཞུགས་ཁྲི་ནས་གསུང་སྐད་ཅིག་ཐོན་ཏེ་འདི་སྐད་དུ། ཀྱེ་ཀྱེ་དཀོན་མཆོག་ཉིད་ཀྱི་ཞབས་ཕྱི་ཀུན།། ཁོང་ལ་གུས་ཤིང་འཇིགས་པར་བྱེད་མཁན་དང་།། མི་སྣ་ཆེ་ཆུང་དབྱེ་བ་མེད་པ་ཡི།། ཀུན་གྱིས་བདག་ཅག་དཀོན་མཆོག་བསྟོད་པར་ཤོག ། ཅེས་གསུངས་སོ།།
REV 19:6 ཡང་བདག་གིས་འདུ་ཚོགས་ཆེན་པོའི་སྐད་སྒྲ་ལྟ་བུ་ཞིག་ཐོས་ཤིང་། དེ་ནི་ཆུ་མང་པོའི་སྒྲ་དང་འབྲུག་སྒྲ་ལྡིར་བ་དང་མཚུངས་པར་འདི་སྐད་དུ། རང་རེའི་གཙོ་བོ་དཀོན་མཆོག་ཀུན་དབང་ཉིད༎ རྒྱལ་པོར་བཞུགས་པས་ཧ་ལེ་ལོའུ་ཡཱ་ཀྱེ།།
REV 19:7 ལུ་གུའི་བག་སྟོན་དུས་ལ་བབས་པ་དང་།། ཁོང་གི་བག་མས་སྟ་གོན་བྱས་ཚར་ཕྱིར།། བདག་ཅག་དགའ་མགུ་རང་ཞིང་སྤྲོ་བ་དང་།། ཁོང་ལ་བསྟོད་བསྔགས་བརྗོད་པར་འོས་སོ་ལོ།།
REV 19:8 དྭངས་ཤིང་གཙང་ལ་འོད་སྣང་འཕྲོ་བ་ཡི།། སོ་རས་སྲབ་བུའི་གྱོན་གོས་ཁོ་མོར་གནང་།། ཞེས་བརྗོད་པ་དང་། སོ་རས་སྲབ་བུའི་གྱོན་གོས་དེ་ནི་དད་ལྡན་དམ་པ་དག་གིས་བྱས་པའི་དྲང་བདེན་གྱི་ལས་རྣམས་ཡིན་ནོ།།
REV 19:9 དེ་ནས་ཕོ་ཉ་དེས་བདག་ལ་འདི་སྐད་དུ། ལུ་གུའི་གཉེན་སྟོན་ལ་གདན་ཞུ་གནང་བ་ཐམས་ཅད་བདེའོ་ཞེས་ཁྱོད་ཀྱིས་ཡི་གེར་འགོད་པར་བྱའོ་ཞེས་གསུངས་པ་དང་། ཡང་ཁོང་གིས་བདག་ལ་འདི་སྐད་དུ། འདི་རྣམས་ནི་དཀོན་མཆོག་གི་བདེན་པའི་བཀའ་ཡིན་ཞེས་གསུངས་སོ།།
REV 19:10 བདག་གིས་ཁོང་གི་ཞབས་དྲུང་དུ་ཕྱག་བཙལ་ནས་བསྟོད་བསྔགས་བརྗོད་པར་བརྩམས་པ་ན། ཁོང་གིས་དེ་ལྟར་ཡེ་ནས་བྱ་མི་རུང་སྟེ། ང་རང་ཡང་སྐྱབས་མགོན་ཡེ་ཤུར་བདེན་དཔང་བྱེད་མཁན་ཁྱོད་དང་ཁྱོད་ཀྱི་སྤུན་ཟླ་བཞིན་དུ་ཞབས་ཕྱི་པ་ཡིན། ཁྱོད་ཀྱིས་དཀོན་མཆོག་ལ་བསྟོད་པ་འབུལ་འོས་ཏེ། རྒྱུ་མཚན་སྐྱབས་མགོན་ཡེ་ཤུར་བདེན་དཔང་བྱེད་པ་ནི་ལུང་བསྟན་འཆད་པའི་སེམས་ཉིད་ཡིན་ཞེས་གསུངས་སོ།།
REV 19:11 དེ་ནས་བདག་གིས་ནམ་མཁའི་ཞིང་ཁམས་ཕྱེས་ཡོད་པ་མཐོང་བ་དང་། ལྟོས་དང་། དེ་རུ་རྟ་དཀར་པོ་ཞིག་ཡོད་ཅིང་། རྟ་དེར་བཅིབ་མཁན་ལ་བློ་གཏད་རུང་བ་དང་བདེན་པ་ལགས་སོ་ཞེས་གསོལ་བ་དང་། ཁོང་གིས་དྲང་བདེན་གྱི་ངང་ནས་ཉེས་ཆད་གཅོད་པ་དང་དམག་འདྲེན་ནོ།།
REV 19:12 ཁོང་གི་སྤྱན་ཟུང་ནི་མེ་ལྕེ་དང་མཚུངས་ལ། ཁོང་གི་དབུ་ལ་ཅོད་པན་མང་པོ་མནབས་པ་དང༌། ཁོང་གི་སྐུ་ལུས་ཀྱི་སྟེང་དུ་རང་ལས་གཞན་སུས་ཀྱང་མི་ཤེས་པའི་མཚན་ཞིག་བཀོད་ཡོད།
REV 19:13 ཁྲག་ལ་སྦངས་པའི་ན་བཟའ་ཁོང་གིས་མནབས་ཤིང་། ཁོང་གི་མཚན་ལ་དཀོན་མཆོག་གི་བཀའ་ཞེས་གསོལ།
REV 19:14 ནམ་མཁའི་ཞིང་ཁམས་སུ་ཡོད་པའི་དམག་དཔུང་རྟ་དཀར་པོར་བཞོན་པ་དང་། ལུས་ལ་དཀར་ཞིང་གཙང་བའི་སོ་རས་སྲབ་བུ་གྱོན་ནས་ཁོང་གི་རྗེས་སུ་འབྲང་ངོ་།།
REV 19:15 རྒྱལ་ཁབ་རྣམས་ལ་རྡེག་པའི་ཕྱིར་ཁོང་གི་ཞལ་ལས་རལ་གྲི་རྣོན་པོ་ཐོན་ཞིང་། ཁོང་གིས་ལྕགས་ཀྱི་དབྱུག་པས་ཁོ་རྣམས་འཚོ་སྐྱོང་བྱེད་པར་འགྱུར་ཞིང་། ཀུན་དབང་དཀོན་མཆོག་གི་ཐུགས་ཁྲོ་དྲག་པོའི་རྒུན་འབྲུམ་འཚིར་གཞོང་ལ་རྡོག་བརྫིས་གཏོང་བར་མཛད།
REV 19:16 ཁོང་གི་ལྭ་རིང་དང་བརླའི་སྟེང་དུ། རྒྱལ་པོ་རྣམས་ཀྱི་རྒྱལ་པོ་དང་། གཙོ་བོ་རྣམས་ཀྱི་གཙོ་བོ་ཞེས་པའི་མིང་རྟགས་བཀོད་འདུག་གོ།
REV 19:17 དེ་ནས་བདག་གིས་ཕོ་ཉ་ཞིག་ཉི་མའི་ནང་དུ་འགྲེངས་ནས་བསྡད་ཡོད་པ་མཐོང་ཞིང་། ཁོང་གིས་བར་སྣང་དུ་འཕུར་བའི་འདབ་ཆགས་རྣམས་ལ་སྐད་ཆེན་པོས་འདི་སྐད་དུ། ཁྱོད་རྣམས་ལྷན་དུ་འདུས་ནས་དཀོན་མཆོག་གི་སྟོན་ཆེན་ལ་ཞུགས་པར་གྱིས།
REV 19:18 རྒྱལ་པོ་དང་། དམག་དཔོན། སྟོབས་ཅན་བཅས་ཀྱི་ཤ་དང་། རྟ་དང་རྟ་དམག་གི་ཤ གཞན་ཡང་རང་དབང་ཅན་དང་གཡོག་པོ། མི་མཆོག་དམན་ཐམས་ཅད་ཀྱི་ཤ་བཅས་བཟའ་རུང་ཞེས་གསུངས་སོ།།
REV 19:19 ཡང་བདག་གིས་གཅན་གཟན་དེ་དང་ས་སྟེང་གི་རྒྱལ་པོ། དེ་དག་གི་དམག་དཔུང་ཐམས་ཅད་འདུས་པ་མཐོང་ངོ་།། དེ་ནི་རྟ་ལ་བཅིབ་མཁན་དང་ཁོང་གི་དམག་དཔུང་ལ་འཐབ་པའི་ཕྱིར་ཡིན།
REV 19:20 འོན་ཀྱང་གཅན་གཟན་དེ་ནི་བཟུང་ཞིང་། དེའི་མིག་སྔར་གྲུབ་རྟགས་རྣམས་བསྟན་ཏེ། གཅན་གཟན་གྱི་རྟགས་བརྒྱབ་ཡོད་པ་དང་གཅན་གཟན་གྱི་གཟུགས་བརྙན་ལ་ཕྱག་འཚལ་བའི་མི་རྣམས་བསླུ་མཁན་གྱི་ལུང་སྟོན་པ་རྫུས་མ་ཡང་གཅན་གཟན་དང་མཉམ་དུ་བཟུང་ཞིང་། དེ་གཉིས་ཀ་མུ་ཟི་འབར་བའི་མེ་མཚོའི་ནང་དུ་གསོན་པོར་གཡུགས་སོ།།
REV 19:21 འཕྲོ་མ་རྣམས་རྟ་དཀར་པོར་བཅིབ་མཁན་གྱི་ཞལ་ནས་ཐོན་པའི་རལ་གྲིས་བསད་པ་དང་། བྱ་ཐམས་ཅད་ཀྱིས་དེ་དག་གི་ཤ་ཟོས་ནས་ལྟོ་བ་འགྲངས་པར་གྱུར་ཏོ།།
REV 20:1 ཡང་བདག་གིས་ཕོ་ཉ་ཞིག་ནམ་མཁའི་ཞིང་ཁམས་ནས་མར་ཕེབས་པ་མཐོང་ཞིང་། ཁོང་གི་ཕྱག་ཏུ་ཞབས་མེད་པའི་དོང་གི་ལྡེ་མིག་དང་ལྕགས་ཐག་ཆེན་པོ་ཞིག་བཟུང་ཡོད་དོ།།
REV 20:2 ཁོང་གིས་འབྲུག་སྟེ་གནའ་བོའི་སྦྲུལ་དང་མིང་གཞན་ལ་བདུད་དང་སཱ་ཏན་ཞེས་ཟེར་བ་དེ་བཟུང་ནས་ལོ་ངོ་ཆིག་སྟོང་ལ་བཀྱིགས་ཤིང་།
REV 20:3 རྒྱལ་ཁབ་རྣམས་སླར་ཡང་མི་བསླུ་བའི་ཕྱིར། ཞབས་མེད་པའི་དོང་ནང་དུ་གཡུགས་ཏེ། ལོ་ངོ་ཆིག་སྟོང་ལོང་བའི་བར་དུ་དོང་ཁ་བཅད་ཅིང་རྟགས་ཐམ་བརྒྱབས་སོ།། དེའི་རྗེས་སུ། བདུད་དེ་གནས་སྐབས་སུ་གློད་བཀྲོལ་གཏོང་དགོས་པ་ཡིན་ནོ།།
REV 20:4 ཡང་བདག་གིས་བཞུགས་ཁྲི་འགའ་ཡོད་པ་མཐོང་ཞིང་། ཁྲིའི་སྟེང་དུ་བཞུགས་མཁན་རྣམས་ལ་ལེགས་ཉེས་ཀྱི་ཁྲིམས་ཐག་གཅོད་པའི་དབང་ཐང་གནང་ཡོད་དོ།། ཡང་བདག་གིས་སྐྱབས་མགོན་ཡེ་ཤུར་བདེན་དཔང་བྱས་པའི་རྐྱེན་དང་། དཀོན་མཆོག་གི་བཀའ་ཡི་ཆེད་དུ་མགོ་བོ་བཅད་པ་རྣམས་ཀྱི་རྣམ་ཤེས་དང་། གཅན་གཟན་དང་གཅན་གཟན་གྱི་གཟུགས་བརྙན་ལ་ཕྱག་འཚལ་མ་མྱོང་བ་དང༌། དཔྲལ་བ་དང་ལག་པའི་སྟེང་དུ་རྟགས་བརྒྱབ་མེད་པ་རྣམས་ཀྱི་རྣམ་ཤེས་ནི་མཐོང་ངོ་༎ དེ་དག་ཐམས་ཅད་སླར་གསོན་ཞིང་སྐྱབས་མགོན་མཱ་ཤི་ཀ་དང་ལྷན་དུ་ལོ་ངོ་ཆིག་སྟོང་གི་རིང་ལ་རྒྱལ་སྲིད་བསྐྱངས་པ་ཡིན།
REV 20:5 འདི་ནི་སླར་གསོན་ཐེངས་དང་པོ་ཡིན་ལ། ལོ་ངོ་ཆིག་སྟོང་ལོང་བའི་བར་དུ། གཞན་རྣམས་ད་དུང་སླར་གསོན་པར་མ་གྱུར་ཏོ།།
REV 20:6 སླར་གསོན་ཐེངས་དང་པོའི་ནང་སྐལ་བ་ལྡན་པ་རྣམས་ནི་བདེ་ཞིང་དམ་པ་ཡིན། དེ་རྣམས་ཀྱི་སྟེང་དུ་འཆི་བ་ཐེངས་གཉིས་པར་དབང་ཐང་མེད་ལ། འོན་ཀྱང་དེ་རྣམས་ནི་དཀོན་མཆོག་དང་སྐྱབས་མགོན་མཱ་ཤི་ཀའི་མཆོད་དཔོན་བྱེད་པར་མ་ཟད། སྐྱབས་མགོན་མཱ་ཤི་ཀ་དང་ལྷན་དུ་ལོ་ངོ་ཆིག་སྟོང་རིང་ལ་རྒྱལ་སྲིད་བསྐྱང་བར་འགྱུར་རོ།།
REV 20:7 ལོ་ངོ་ཆིག་སྟོང་ལོངས་པའི་དུས་སུ། བདུད་སཱ་ཏན་བཙོན་ལས་གཏོང་ངེས་ཞིང་།
REV 20:8 ཁོ་རང་ཕྱིར་ཐོན་ནས་ས་གཞིའི་ཕྱོགས་བཞིར་གནས་པའི་རྒྱལ་ཁབ་རྣམས་ཏེ། གཱོག་དང་མ་གཱོག་ཟེར་བ་བསླུས་ནས་འཐབ་འཁྲུག་རྒྱག་ཕྱིར་དེ་རྣམས་བསྡུ་བར་འགྱུར་ཞིང་། དེ་དག་གི་མི་གྲངས་ནི་མཚོ་འགྲམ་གྱི་བྱེ་མ་ལྟར་མང་ངོ་།།
REV 20:9 དེ་རྣམས་ཡར་ཐོན་ཞིང་ས་གཞི་ཡོངས་ལ་ཁྱབ་སྟེ། དད་ལྡན་དམ་པ་རྣམས་ཀྱི་སྒར་དང་གཅེས་སུ་འཛིན་པའི་གྲོང་ཁྱེར་དེ་བསྐོར་བ་ལ། ནམ་མཁའ་ནས་མེ་ཆར་བབས་ཏེ། དེ་རྣམས་རྩ་བ་ནས་བསྲེག་པར་གྱུར་ཏོ།།
REV 20:10 དེ་རྣམས་བསླུ་མཁན་བདུད་ནི་གཅན་གཟན་དང་ལུང་སྟོན་པ་རྫུས་མ་ཡོད་སའི་གནས་ཏེ། མུ་ཟི་འབར་བའི་མེ་མཚོའི་ནང་དུ་གཡུགས་ཤིང་། དེ་དག་གིས་ཉིན་མཚན་མེད་པར་ནམ་ཡང་མནར་གཅོད་མྱང་བར་འགྱུར་རོ།།
REV 20:11 ཡང་བདག་གིས་མདོག་དཀར་པོ་ཅན་གྱི་བཞུགས་ཁྲི་ཆེན་པོ་ཞིག་དང་ཁྲིའི་སྟེང་དུ་བཞུགས་མཁན་ཡང་མཐོང་ཞིང་། གནམ་ས་གཉིས་ཁོང་གི་མདུན་ནས་བྲོས་ཤིང་རང་གི་གནས་མ་རྙེད་དོ།།
REV 20:12 ཡང་བདག་གིས་གཤིན་པོ་རྣམས་མཐོང་ཞིང་། མཆོག་དམན་སུ་ཡིན་ཡང་ཐམས་ཅད་བཞུགས་ཁྲིའི་མདུན་དུ་ཡར་ལངས་ནས་བསྡད་ཡོད་ལ། གླེགས་བམ་དག་གི་ཁ་ཕྱེས་པར་མ་ཟད། ཡང་གླེགས་བམ་གཞན་ཞིག་གི་ཁ་ཕྱེས་ཤིང་། དེ་ནི་ཚེ་སྲོག་གི་གླེགས་བམ་ཡིན། གཤིན་པོ་ཐམས་ཅད་ལ་གླེགས་བམ་དེ་དག་གི་ནང་དུ་ཅི་ཞིག་བཀོད་ཡོད་པ་གཞིར་བཟུང་སྟེ། དེ་རྣམས་ཀྱིས་ཅི་བྱས་བཞིན་ལེགས་ཉེས་ཀྱི་ཁྲིམས་ཐག་བཅད་པའོ།།
REV 20:13 དེའི་ཕྱིར། རྒྱ་མཚོས་མཚོ་ནང་གི་གཤིན་པོ་རྣམས་ཕྱིར་སྤྲད་པ་དང་། འཆི་བ་དང་གཤིན་པོའི་གནས་ཀྱིས་ཀྱང་དེའི་གཤིན་པོ་རྣམས་ཕྱིར་སྤྲད་ཅིང་། དེ་དག་ལ་རང་རང་གིས་ཅི་བྱས་བཞིན་ལེགས་ཉེས་ཀྱི་ཁྲིམས་ཐག་བཅད་པ་ཡིན།
REV 20:14 དེ་ནས་འཆི་བ་དང་གཤིན་པོའི་གནས་དེ་ཡང་མེ་མཚོའི་ནང་དུ་གཡུགས་ཏེ། མེ་མཚོ་དེ་ནི་འཆི་བ་ཐེངས་གཉིས་པ་ཡིན།
REV 20:15 སུ་དག་གི་མིང་དེ་ཚེ་སྲོག་གི་གླེགས་བམ་ནང་དུ་བཀོད་མེད་པ་ཡིན་ན། མི་དེ་དག་མེ་མཚོའི་ནང་དུ་གཡུགས་པའོ།།
REV 21:1 ཡང་བདག་གིས་གནམ་ས་གསར་པ་ཞིག་མཐོང་ངོ་།། རྒྱུ་མཚན་གནམ་ས་སྔ་མ་ནི་འདས་ཤིང་རྒྱ་མཚོ་ཡང་མེད་པར་གྱུར་པའི་ཕྱིར་རོ།།
REV 21:2 ཡང་གྲོང་ཁྱེར་དམ་པ་སྟེ་ཡེ་རུ་སཱ་ལེམ་གསར་པ་ནི་དཀོན་མཆོག་ནས་བྱུང་ཞིང་ནམ་མཁའི་ཞིང་ཁམས་ལས་བབས་པ་བདག་གིས་མཐོང་ངོ་།། དེ་ནི་སྟ་གོན་བྱས་ཚར་བའི་བག་གསར་གྱིས་གཟབ་མཆོར་སྤྲས་ནས་མག་པར་སྒུག་པ་དང་མཚུངས།
REV 21:3 དེ་ནས་བདག་གིས་བཞུགས་ཁྲི་ནས་སྐད་ཆེན་པོ་ཞིག་གྲགས་ཡོང་བ་ཐོས་ཤིང་འདི་སྐད་དུ། ལྟོས་དང༌། དཀོན་མཆོག་གི་གུར་མཆོག་ནི་མི་རྣམས་ཀྱི་དབུས་སུ་མཆིས་ཤིང་། ཁོང་མི་རྣམས་དང་མཉམ་དུ་བཞུགས་ཏེ། མི་རྣམས་ཁོང་གི་འབངས་མི་རུ་འགྱུར་བ་དང་། དཀོན་མཆོག་ནི་སྐུ་དངོས་སུ་ཁོ་རྣམས་དང་མཉམ་དུ་བཞུགས་ཤིང་ཁོ་རྣམས་ཀྱི་དཀོན་མཆོག་ཡིན་པར་འགྱུར།
REV 21:4 དཀོན་མཆོག་གིས་ཁོ་རྣམས་ཀྱི་མིག་ཆུ་ཐམས་ཅད་དབྱི་བར་འགྱུར་ཞིང་། སྔོན་གྱི་དོན་རྣམས་འདས་ཟིན་པས། ད་ནི་འཆི་བ་ཡོད་མི་སྲིད་ལ། མྱ་ངན་དང་། ངུ་འབོད། ཟུག་གཟེར་བཅས་ཀྱང་ཡོད་མི་སྲིད་དོ།།
REV 21:5 བཞུགས་ཁྲིའི་སྟེང་དུ་བཞུགས་མཁན་གྱིས་འདི་སྐད་དུ། ལྟོས་དང་། བདག་གིས་ཐམས་ཅད་གསར་དུ་སྐྲུན་པ་ཡིན་ཞེས་དང་། ཡང་འདི་སྐད་དུ། བཀའ་འདི་རྣམས་ནི་ཡིད་རྟོན་རུང་བ་དང་བདེན་པ་ཡིན་པས། ཁྱོད་ཀྱིས་ཡི་གེར་འགོད་པར་བྱའོ་ཞེས་གསུངས་སོ།།
REV 21:6 ཡང་ཁོང་གིས་བདག་ལ་འདི་སྐད་དུ། ལེགས་པར་གྲུབ་འདུག ང་ནི་ཨལ་ཕཱ་དང་ཨོ་མེ་ཀ་སྟེ། ཐོག་མ་དང་མཐའ་མ་ཡིན་ནོ།། ངས་ཚེ་སྲོག་གི་ཆུ་མིག་ལས་ཁ་སྐོམ་པ་རྣམས་ལ་རིན་མི་དགོས་པར་གནང་བར་ངེས།
REV 21:7 རྣམ་པར་རྒྱལ་པ་རྣམས་ལ་དོན་འདི་དག་འཐོབ་པར་འགྱུར་བ་དང་། བདག་ནི་ཁོ་རྣམས་ཀྱི་དཀོན་མཆོག་ཡིན་ཞིང་། དེ་རྣམས་ནི་བདག་གི་བུ་ཡིན་པར་འགྱུར་རོ།།
REV 21:8 འོན་ཀྱང་། སྡར་མ་དང་། དད་པ་མེད་པ། ཞེན་ལོག་པ། ལག་དམར། ལོག་གཡེམ་པ། སྒྱུ་འཕྲུལ་པ། སྐུ་འདྲར་བརྟེན་མཁན། རྫུན་སྨྲ་མཁན་ཐམས་ཅད་ལ་འཐོབ་པའི་སྐལ་ནི་མུ་ཟི་འབར་བའི་མེ་མཚོ་ནང་དུ་ཡོད་ཅིང་། དེ་ནི་འཆི་བ་ཐེངས་གཉིས་པ་ཡིན་ཞེས་གསུངས་སོ།།
REV 21:9 དེ་ནས་མཐའ་མའི་ཆག་སྒོ་བདུན་གྱིས་གང་བའི་ཕོར་བ་བདུན་བཟུང་ཡོད་པའི་ཕོ་ཉ་བདུན་ལས་གཅིག་ཡོང་སྟེ་བདག་ལ་འདི་སྐད་དུ། ཁྱོད་འདིར་ཤོག་དང་། བདག་གིས་ཁྱོད་ལ་བག་གསར་སྟོན་པར་བྱའོ།། དེ་ནི་ལུ་གུའི་ཆུང་མ་ཡིན་ཞེས་གསུངས་སོ།།
REV 21:10 དེ་ནས་ཕོ་ཉ་དེས་ང་རང་དམ་པའི་ཐུགས་ཉིད་ཀྱི་ངང་ནས་མཐོ་ཞིང་ཆེ་བའི་རི་ཞིག་ཏུ་ཁྲིད་དེ། དཀོན་མཆོག་ནས་བྱུང་ཞིང་ནམ་མཁའི་ཞིང་ཁམས་ལས་བབས་པའི་གྲོང་ཁྱེར་དམ་པ་ཡེ་རུ་སཱ་ལེམ་བདག་ལ་བསྟན།
REV 21:11 གྲོང་ཁྱེར་དེ་ལ་དཀོན་མཆོག་གི་གཟི་བརྗིད་ལྡན་པ་དང་། གྲོང་ཁྱེར་གྱི་གཟི་འོད་ནི་རིན་ཐང་ཆེ་བའི་རྡོ་དང་མཚུངས་ཤིང་གཡང་ཊི་སྔོན་པོ་དང་འདྲ་བ། ཆུ་ཤེལ་ལྟར་དྭངས་པ་ཡིན།
REV 21:12 དེ་ལ་མཐོ་ཞིང་ཆེ་བའི་མཁར་གྱང་དང་། མཁར་སྒོ་བཅུ་གཉིས། མཁར་སྒོ་རུ་ཕོ་ཉ་བཅུ་གཉིས་བཅས་མཆིས། མཁར་སྒོའི་སྟེང་དུ་ཡེས་ར་ཨེལ་བུ་རྒྱུད་ཀྱི་ཚོ་པ་བཅུ་གཉིས་པོའི་མིང་བཀོད་ཡོད་དོ།།
REV 21:13 ཤར་ཕྱོགས་སུ་མཁར་སྒོ་གསུམ་དང་། བྱང་ཕྱོགས་སུ་མཁར་སྒོ་གསུམ། ལྷོ་ཕྱོགས་སུ་མཁར་སྒོ་གསུམ། ནུབ་ཕྱོགས་སུ་མཁར་སྒོ་གསུམ་བཅས་མཆིས།
REV 21:14 གྲོང་ཁྱེར་གྱི་མཁར་གྱང་ལ་རྟིང་རྡོ་བཅུ་གཉིས་ཡོད་ལ། རྟིང་རྡོ་བཅུ་གཉིས་ཀྱི་སྟེང་དུ་ལུ་གུའི་སྐུ་ཚབ་པ་བཅུ་གཉིས་ཀྱི་མིང་བཀོད་ཡོད་དོ།།
REV 21:15 བདག་ལ་གཏམ་སྨྲ་མཁན་གྱིས་ཕྱག་ཏུ་གསེར་གྱི་ཐིག་ཤིང་བཟུང་སྟེ་གྲོང་ཁྱེར་དང་། མཁར་སྒོ། མཁར་གྱང་བཅས་ཀྱི་ཚད་ཐིག་འཇལ་བའི་ཕྱིར་རོ།།
REV 21:16 གྲོང་ཁྱེར་དེ་ནི་གྲུ་བཞི་མ་སྟེ་སྲིད་ཞེང་གཉིས་འདྲའོ།། ཕོ་ཉས་ཕྱག་ཏུ་ཐིག་ཤིང་བཟུང་ནས་གྲོང་ཁྱེར་གྱི་ཚད་ཐིག་འཇལ་བ་ལ་རྒྱང་གྲགས་ཆིག་ཁྲི་ཉིས་སྟོང་ལྷག་ཡིན། སྲིད་ཞེང་མཐོ་གསུམ་འདྲའོ།།
REV 21:17 ཡང་ཁོང་གིས་གྲོང་ཁྱེར་གྱི་མཁར་གྱང་གི་ཚད་ཐིག་འཇལ་བ་ལ། མིའི་ཚད་གཞི་བཞིན་ཏེ་ཕོ་ཉའི་ཚད་གཞི་ལྟར་ན་ཁྲུ་བརྒྱ་དང་ཞེ་བཞི་མཆིས།
REV 21:18 མཁར་གྱང་ནི་གཡང་ཊི་སྔོན་པོས་བཟོས་ཤིང་། གྲོང་ཁྱེར་ནི་གསེར་སྦྱངས་བཙོ་མས་བཟོས་པ་དང་ཆུ་ཤེལ་ལྟར་དྭངས་ཤིང་གསལ།
REV 21:19 མཁར་གྱང་གི་རྟིང་གཞི་ནི་རིན་པོ་ཆེ་སྣ་ཚོགས་ཀྱིས་བརྒྱན་ཞིང་། རྟིང་གཞི་དང་པོ་ནི་གཡང་ཊི་སྔོན་པོ་དང་། གཉིས་པ་ནི་ཨིནྡྲ་ནཱི་ལ། གསུམ་པ་ནི་པད་མ་རཱ་ག བཞི་པ་ནི་མ་རྒད།
REV 21:20 ལྔ་པ་ནི་མཆོང་། དྲུག་པ་ནི་པདྨ་རཱ་ག བདུན་པ་ནི་བཻཌཱུརྱ་སུ་ག་ཏ། བརྒྱད་པ་ནི་བཻཌཱུརྱ་ལྗང་སེར། དགུ་པ་ནི་སྤྲིན་རྡོ། བཅུ་པ་ནི་བཻཌཱུརྱ་ལྗང་དཀར། བཅུ་གཅིག་པ་ནི་རྟ་ཀླད་སྨུག་པོ། བཅུ་གཉིས་པ་ནི་མུ་མེན་བཅས་ཡིན།
REV 21:21 མཁར་སྒོ་བཅུ་གཉིས་ནི་མུ་ཏིག་བཅུ་གཉིས་ཡིན་ཞིང་། མཁར་སྒོ་རེ་རེ་མུ་ཏིག་རེ་རེས་བཟོས་པ་དང་། གྲོང་ཁྱེར་ནང་གི་སྲང་ལམ་ནི་གསེར་སྦྱངས་བཙོ་མས་བཟོས་པ་དང་ཆུ་ཤེལ་ལྟར་དྭངས་ཤིང་གསལ་ལོ།།
REV 21:22 བདག་གིས་གྲོང་ཁྱེར་ནང་དུ་མཆོད་ཁང་ཡོད་པ་མ་མཐོང་ངོ་།། རྒྱུ་མཚན་ནི་གཙོ་བོ་དཀོན་མཆོག་སྟེ་ཀུན་དབང་དེ་ཉིད་དང་ལུ་གུ་ནི་གྲོང་ཁྱེར་གྱི་མཆོད་ཁང་ཡིན་པའི་ཕྱིར་རོ།།
REV 21:23 དཀོན་མཆོག་གི་གཟི་བརྗིད་ཀྱིས་འོད་ཟེར་འཕྲོ་བ་དང་ལུ་གུ་ནི་གྲོང་ཁྱེར་གྱི་སྒྲོན་མེ་ཡིན་པས། གྲོང་ཁྱེར་ནང་དུ་ཉི་ཟླའི་འོད་ཟེར་མཁོ་བ་མེད།
REV 21:24 རྒྱལ་ཁབ་ཐམས་ཅད་ནི་གྲོང་ཁྱེར་གྱི་འོད་ཟེར་ལ་བརྟེན་ནས་སྐྱོད་ཅིང་། ས་སྟེང་གི་རྒྱལ་པོ་ཐམས་ཅད་ཀྱིས་རང་གི་གཟི་བརྗིད་གྲོང་ཁྱེར་དེ་ལ་འབུལ་ངེས་ཡིན།
REV 21:25 གྲོང་ཁྱེར་གྱི་མཁར་སྒོ་ནི་ཉིན་མོར་ཅིས་ཀྱང་མི་གཏན་ཏེ། གནས་དེར་མཚན་མོ་མེད་པའི་ཕྱིར་རོ།།
REV 21:26 མི་རྣམས་ཀྱིས་རྒྱལ་ཁབ་ཐམས་ཅད་ཀྱི་གཟི་བརྗིད་དང་གུས་བཀུར་བཅས་གྲོང་ཁྱེར་དེ་ལ་འབུལ་ངེས་ཡིན།
REV 21:27 མི་གཙང་བའམ། ཡང་ན་ཞེན་ལོག་པ་དང་རྫུན་གྱི་ལས་བྱེད་མཁན་སུ་ཡིན་ཡང་གྲོང་ཁྱེར་དེའི་ནང་དུ་འགྲོ་མི་ནུས་ཏེ། ལུ་གུའི་ཚེ་སྲོག་གི་གླེགས་བམ་ནང་དུ་མིང་ཐོ་བཀོད་ཡོད་པ་ཁོ་ན་དེའི་ནང་དུ་འགྲོ་ནུས་སོ།།
REV 22:1 དེ་ནས་ཕོ་ཉས་ཚེ་སྲོག་དང་ལྡན་པའི་ཆུ་ཡི་གཙང་པོ་ཞིག་བདག་ལ་བསྟན་ཅིང་། དེ་ནི་ཆུ་ཤེལ་ལྟར་དྭངས་ཤིང་གསལ་བ་དང་། དཀོན་མཆོག་དང་ལུ་གུའི་བཞུགས་ཁྲི་ནས་བཞུར་ཡོང་བ་དང་།
REV 22:2 གྲོང་ཁྱེར་ནང་གི་སྲང་ལམ་གྱི་དཀྱིལ་དུ་བཞུར་ཅིང་། གཙང་པོའི་འགྲམ་གཉིས་སུ་ཚེ་སྲོག་གི་ལྗོན་ཤིང་ཡོད་ལ། འབྲས་བུ་སྣ་ཁ་བཅུ་གཉིས་ཐོགས་པ་དང་། ཟླ་བ་རེ་རེར་འབྲས་བུ་སྨིན་པ་དང་། སྡོང་ལོ་ནི་མི་རིགས་ཐམས་ཅད་གསོ་བའི་ཕྱིར་ཡིན་ནོ།།
REV 22:3 ཡང་དུས་དེ་ནས་བཟུང་དམོད་པ་མེད་པར་གྱུར་པ་ཡིན། གྲོང་ཁྱེར་ནང་དུ་དཀོན་མཆོག་དང་ལུ་གུའི་བཞུགས་ཁྲི་ཡོད་པ་དང་། ཁོང་གི་ཞབས་ཕྱི་པ་རྣམས་ཀྱིས་ཁོང་ལ་བསྙེན་བཀུར་འབུལ་ཞིང་།
REV 22:4 ཁོང་གི་ཞལ་རས་ཀྱང་མཐོང་བར་འགྱུར་བ་དང་། དེ་རྣམས་ཀྱི་དཔྲལ་བར་ཁོང་གི་མཚན་འགོད་པ་ཡིན་ནོ།།
REV 22:5 མཚན་མོ་ཡོད་པར་མི་འགྱུར་ཏེ། གཙོ་བོ་དཀོན་མཆོག་གིས་ཁོ་རྣམས་ལ་འོད་ཟེར་སྤྲོ་བར་འགྱུར་བས། ཁོ་རྣམས་ལ་སྒྲོན་མེའི་འོད་ཟེར་དང་ཉི་འོད་མི་མཁོའོ།། ཁོ་རྣམས་ཀྱིས་ནམ་ཡང་སྲིད་དབང་བསྐྱང་བར་འགྱུར་རོ།།
REV 22:6 ཡང་ཕོ་ཉས་བདག་ལ་འདི་སྐད་དུ། བཀའ་འདི་རྣམས་ནི་ཡིད་རྟོན་རུང་བ་དང་བདེན་པ་ཡིན་ནོ།། གཙོ་བོ་སྟེ་ལུང་སྟོན་པ་དག་གི་སེམས་ཉིད་ཀྱི་དཀོན་མཆོག་གིས་ཁོང་གི་ཕོ་ཉ་མངགས་ཏེ། མྱུར་དུ་འབྱུང་དགོས་པའི་དོན་རྣམས་ཁོང་ཉིད་ཀྱི་ཞབས་ཕྱི་པ་རྣམས་ལ་སྟོན་པའི་ཕྱིར་ཡིན་ཞེས་གསུངས་སོ།།
REV 22:7 ལྟོས་དང་། བདག་ནི་མྱུར་དུ་ཡོང་ངེས་སོ།། མདོ་འདིའི་ལུང་བསྟན་སྲུང་མཁན་རྣམས་བྱིན་རླབས་ཅན་ཡིན་ཞེས་གསུངས་སོ།།
REV 22:8 དོན་འདི་དག་ནི་ཡོ་ཧ་ནན་ངས་ཐོས་ཤིང་མཐོང་བ་རྣམས་ཡིན་ནོ།། བདག་གིས་མཐོང་ཐོས་སུ་གྱུར་ཏེ་རང་ལ་སྟོན་མཁན་ཕོ་ཉའི་ཞབས་དྲུང་དུ་ཕྱག་བཙལ་ནས་ཁོང་ལ་བསྟོད་བསྔགས་བརྗོད་པར་རྩོམ་པ་ན།
REV 22:9 ཁོང་གིས་བདག་ལ་འདི་སྐད་དུ། དེ་ལྟར་བྱེད་ག་ལ་རུང་། ང་ནི་ཁྱོད་དང་ཁྱོད་ཀྱི་སྤུན་ལུང་སྟོན་པ་རྣམས་དང་། མདོ་འདིའི་བཀའ་སྲུང་མཁན་ཐམས་ཅད་ལྷན་ཅིག་ཞབས་ཕྱི་པ་ཡིན་པས། ཁྱོད་ཀྱིས་དཀོན་མཆོག་ལ་བསྟོད་བསྔགས་བརྗོད་པར་བྱའོ་ཞེས་གསུངས་སོ།།
REV 22:10 ཡང་ཁོང་གིས་བདག་ལ་འདི་སྐད་དུ། དུས་དེ་སླེབས་ལ་ཉེ་བས། མདོ་འདིའི་ལུང་བསྟན་རྣམས་ལ་ཐམ་ག་རྒྱག་པར་མི་བྱའོ།།
REV 22:11 དྲང་བདེན་མ་ཡིན་པར་ད་དུང་ཁོ་ལ་དྲང་བདེན་མིན་པ་བྱེད་དུ་ཆུག མི་གཙང་བ་ནི་ད་དུང་ཁོ་རང་མི་གཙང་བར་ལུས་སུ་ཆུག དྲང་བདེན་བྱེད་མཁན་ལ་ད་དུང་ཁོ་ལ་དྲང་བདེན་བྱེད་དུ་ཆུག དམ་པ་ནི་ད་དུང་ཁོ་རང་དམ་པར་ལུས་སུ་ཆུག་ཅེས་གསུངས་སོ།།
REV 22:12 ལྟོས་དང་། བདག་ནི་མྱུར་དུ་ཡོང་ངེས་ཡིན། མི་རེ་རེའི་ཅི་བྱས་བཞིན་ལན་འཇལ་བའི་ཕྱིར་ངས་རྔན་པ་འཁྱེར་འོང་ངོ་།།
REV 22:13 ང་ནི་ཨལ་ཕཱ་དང་ཨོ་མེ་ཀ་སྟེ། སྔ་མ་དང་ཕྱི་མ་ཡིན་ལ། ཐོག་མ་དང་མཐའ་མའོ༎
REV 22:14 རང་གི་ལྭ་རིང་པོ་གཙང་མར་བཀྲུ་མཁན་རྣམས་བདེའོ།། དེ་རྣམས་ལ་ཚེ་སྲོག་གི་ལྗོན་ཤིང་དྲུང་དུ་འགྲོ་བའི་དབང་འཐོབ་ཅིང་། མཁར་སྒོ་བརྒྱུད་ནས་གྲོང་ཁྱེར་ནང་དུ་འགྲོ་ཡང་ནུས་སོ།།
REV 22:15 གྲོང་ཁྱེར་གྱི་ཕྱི་རོལ་ཏུ་ཁྱི་སྤྱང་ངན་པ་དང་། སྒྱུ་འཕྲུལ་པ། ལོག་གཡེམ་པ། ལག་དམར། སྐུ་འདྲར་བརྟེན་མཁན། རྫུན་ལ་དགའ་ཞིང་རྫུན་སྨྲ་མཁན་ཐམས་ཅད་ཡོད་དོ།།
REV 22:16 ཡེ་ཤུ་བདག་གིས་ཆོས་ཚོགས་དག་གི་ཆེད་དུ་ཁྱོད་རྣམས་ལ་དོན་འདི་དག་བདེན་དཔང་བྱེད་པའི་ཕྱིར་རང་གི་ཕོ་ཉ་མངགས་པ་ཡིན་ལ། བདག་ནི་དཱ་བིད་ཀྱི་རྩ་བ་ཡིན་ལ་ཁོང་གི་རིགས་རྒྱུད་ཀྱང་ཡིན། བདག་ནི་ཐོ་རངས་ཀྱི་སྐར་ཆེན་ཡིན་ཞེས་གསུངས་སོ།།
REV 22:17 དམ་པའི་ཐུགས་ཉིད་དང་བག་གསར་གྱིས་ཕེབས་ཤོག་དང་ཞེས་ཞུས་པ་དང་། ཐོས་མཁན་རྣམས་ཀྱིས་ཀྱང་ཕེབས་ཤོག་དང་ཞེས་ཞུ་འོས་སོ།། ཁ་སྐོམ་པ་རྣམས་ཡོང་འོས་པ་དང་འཐུང་འདོད་པ་རྣམས་ཀྱིས་ཀྱང་རིན་མི་དགོས་པར་ཚེ་སྲོག་དང་ལྡན་པའི་ཆུ་འཐུང་རུང་ངོ་།།
REV 22:18 བདག་གིས་མདོ་འདིའི་ལུང་བསྟན་ཐོས་མཁན་ཐམས་ཅད་ལ་བདེན་དཔང་བྱེད་པར་བྱ་སྟེ། སུ་ཞིག་གིས་ལུང་བསྟན་འདི་ལ་གང་ཞིག་སྣོན་པ་ཡིན་ན། དཀོན་མཆོག་གིས་མདོ་འདིའི་ནང་དུ་བཀོད་པའི་ཆག་སྒོ་ཐམས་ཅད་ཁོའི་སྟེང་དུ་འགེལ་བར་འགྱུར་རོ།།
REV 22:19 ཡང་སུ་ཞིག་གིས་མདོ་འདིའི་ནང་གི་ལུང་བསྟན་ལས་གང་ཞིག་འཕྲི་བ་ཡིན་ན། དཀོན་མཆོག་གིས་ཀྱང་མདོ་འདིའི་ནང་དུ་བཀོད་པའི་ཚེ་སྲོག་གི་ལྗོན་ཤིང་དང་དམ་པའི་གྲོང་ཁྱེར་གྱི་སྐལ་ནི་མི་དེ་ལས་ཕྱིར་ལེན་པར་འགྱུར་རོ།།
REV 22:20 དོན་འདི་རྣམས་ལ་བདེན་དཔང་མཛད་མཁན་གྱིས་འདི་སྐད་དུ། ལགས་སོ༎ ང་ནི་མྱུར་དུ་ཡོང་ངེས་ཡིན་ཞེས་གསུངས་སོ།། ཨ་མེན། གཙོ་བོ་ཡེ་ཤུ་ལགས། ཁྱེད་ཉིད་ཕེབས་པར་ཞུའོ།།
REV 22:21 གཙོ་བོ་ཡེ་ཤུའི་ཐུགས་རྗེ་ནི་དད་ལྡན་དམ་པ་རྣམས་དང་མཉམ་དུ་གནས་པར་སྨོན། ཨ་མེན།། །།
