MAT 1:1 མེས་པོ་ཨབ་ར་ཧམ་གྱི་སྲས་རྒྱལ་པོ་དཱ་བིད་ཀྱི་སྲས་ཡེ་ཤུ་མཱ་ཤི་ཀའི་གདུང་རྒྱུད་ནི།
MAT 1:2 ཨབ་ར་ཧམ་ནི་ཨི་སཱག་ཅེས་བྱ་བའི་ཕ་དང༌། ཨི་སཱག་ནི་ཡ་ཀོབ་ཅེས་བྱ་བའི་ཕ། ཡ་ཀོབ་ནི་ཡུ་དཱ་དང་ཁོའི་ཕུ་ནུའི་ཕ་ཡིན།
MAT 1:3 ཡུ་དཱ་དང་ཁོའི་ཟླ་བོ་ཐཱ་མཱར་ནི་པེ་རེ་ཟི་དང་ཟཱ་རཱ་ཞེས་བྱ་བའི་ཕ་མ་དང༌། པེ་རེ་ཟི་ནི་ཧེ་ཟི་རོན་ཞེས་བྱ་བའི་ཕ། ཧེ་ཟི་རོན་ནི་རམ་ཞེས་བྱ་བའི་ཕ་ཡིན།
MAT 1:4 རམ་ནི་ཨ་མི་ན་དབ་ཅེས་བྱ་བའི་ཕ་དང༌། ཨ་མི་ན་དབ་ནི་ནཱ་སོན་ཞེས་བྱ་བའི་ཕ། ནཱ་སོན་ནི་སལ་མོན་ཞེས་བྱ་བའི་ཕ་ཡིན།
MAT 1:5 སལ་མོན་དང་ཁོའི་ཟླ་བོ་ར་ཧབ་ནི་པོ་ཨ་ཟི་ཞེས་བྱ་བའི་ཕ་མ་ཡིན། པོ་ཨ་ཟི་དང་ཁོའི་ཟླ་བོ་རུད་ནི་ཨོ་པེད་ཀྱི་ཕ་མ་ཡིན་ཞིང༌། ཨོ་པེད་ནི་ཡེ་སེ་ཞེས་བྱ་བའི་ཕ་དང༌།
MAT 1:6 ཡེ་སེ་ནི་རྒྱལ་པོ་དཱ་བིད་ཀྱི་ཕ་ཡིན། དཱ་བིད་དང་ཨུ་རི་ཡཱ་ཡི་ཟླ་བོ་ནི་རྒྱལ་པོ་སོ་ལོ་མོན་གྱི་ཕ་མ་ཡིན་ཞིང༌།
MAT 1:7 སོ་ལོ་མོན་ནི་རེ་ཧབ་ཨམ་ཞེས་བྱ་བའི་ཕ་ཡིན་པ་དང༌། རེ་ཧབ་ཨམ་ནི་ཨ་བི་ཡཱ་ཞེས་བྱ་བའི་ཕ་ཡིན། ཨ་བི་ཡཱ་ནི་ཨ་སཱ་ཞེས་བྱ་བའི་ཕ་དང༌།
MAT 1:8 ཨ་སཱ་ནི་ཡེ་ཧོ་ཤ་ཕད་ཅེས་བྱ་བའི་ཕ། ཡེ་ཧོ་ཤ་ཕད་ནི་ཡོ་རཱམ་ཞེས་བྱ་བའི་ཕ་ཡིན་ཞིང༌། ཡོ་རཱམ་ནི་ཨུ་ཟི་ཡཱ་ཞེས་བྱ་བའི་ཕ་ཡིན།
MAT 1:9 ཨུ་ཟི་ཡཱ་ནི་ཡོ་ཐམ་ཞེས་བྱ་བའི་ཕ་ཡིན་པ་དང༌། ཡོ་ཐམ་ནི་ཨ་ཧ་ཟི་ཞེས་བྱ་བའི་ཕ་ཡིན། ཨ་ཧ་ཟི་ནི་ཧེ་ཟེ་ཀི་ཡཱ་ཞེས་བྱ་བའི་ཕ་ཡིན་པ་དང༌།
MAT 1:10 ཧེ་ཟེ་ཀི་ཡཱ་ནི་མཱ་ན་ཟེ་ཞེས་བྱ་བའི་ཕ་ཡིན། མཱ་ན་ཟེ་ནི་ཨ་མོ་ཟི་ཞེས་བྱ་བའི་ཕ་ཡིན་པ་དང༌། ཨ་མོ་ཟི་ནི་ཡོ་ཟི་ཡཱ་ཞེས་བྱ་བའི་ཕ་ཡིན།
MAT 1:11 ཡ་ཧུ་དཱ་པའི་མི་རིགས་སྦ་བི་ལོན་ཞེས་པའི་ཡུལ་ལ་རྒྱང་འབུད་གཏོང་བའི་སྐབས་སུ་ཡོ་ཟི་ཡཱ་ནི་ཡེ་ཀོ་ནི་ཡཱ་དང་ཁོའི་གཅེན་གཅུང་གི་ཕ་ཡིན།
MAT 1:12 དེའི་རྗེས་སུ་ཡེ་ཀོ་ནི་ཡཱ་ནི་ཤེ་ཨལ་ཐི་ཨེལ་ཞེས་བྱ་བའི་ཕ་ཡིན་ཞིང༌། ཤེ་ཨལ་ཐི་ཨེལ་ནི་བཟེ་རུ་པ་པེལ་ཞེས་བྱ་བའི་ཕ་ཡིན་པ་དང༌།
MAT 1:13 བཟེ་རུ་པ་པེལ་ནི་ཨ་སྦི་ཧུད་ཅེས་བྱ་བའི་ཕ། ཨ་སྦི་ཧུད་ནི་ཨེལ་ཡ་ཀིམ་ཞེས་བྱ་བའི་ཕ་ཡིན། ཨེལ་ཡ་ཀིམ་ནི་ཨ་ཟོར་ཞེས་བྱ་བའི་ཕ་ཡིན་པ་དང༌།
MAT 1:14 ཨ་ཟོར་ནི་ཟཱ་དོག་ཅེས་བྱ་བའི་ཕ་ཡིན། ཟཱ་དོག་ནི་ཨ་ཀིམ་ཞེས་བྱ་བའི་ཕ་ཡིན་པ་དང༌། ཨ་ཀིམ་ནི་ཨེ་ལི་ཧུད་ཅེས་བྱ་བའི་ཕ་ཡིན།
MAT 1:15 ཨེ་ལི་ཧུད་ནི་ཨེ་ལི་ཨ་ཟར་ཞེས་བྱ་བའི་ཕ་ཡིན་ཞིང༌། ཨེ་ལི་ཨ་ཟར་ནི་མཱ་ཐན་ཞེས་བྱ་བའི་ཕ་ཡིན་པ་དང༌། མཱ་ཐན་ནི་ཡ་ཀོབ་ཅེས་བྱ་བའི་ཕ་ཡིན།
MAT 1:16 ཡ་ཀོབ་ནི་མིར་ཡམ་གྱི་ཟླ་བོ་ཡོ་སེབ་ཀྱི་ཕ་ཡིན་ཞིང༌། མིར་ཡམ་ནི་མཱ་ཤི་ཀ་ཞེས་ཟེར་བའི་ཡེ་ཤུའི་ཡུམ་ཡིན་ནོ།
MAT 1:17 དེ་བས་ན་མེས་པོ་ཨབ་ར་ཧམ་ནས་རྒྱལ་པོ་དཱ་བིད་བར་དུ་མི་རབས་བཅུ་བཞི་ཡིན་ཞིང༌། རྒྱལ་པོ་དཱ་བིད་ནས་ཡ་ཧུ་དཱ་པའི་མི་རིགས་སྦ་བི་ལོན་ཡུལ་ལ་རྒྱང་འབུད་བཏང་བའི་བར་དུ་མི་རབས་བཅུ་བཞི་ཡིན། དུས་དེ་ནས་མཱ་ཤི་ཀ་འཁྲུང་བའི་བར་དུ་མི་རབས་བཅུ་བཞི་ཡིན་ནོ། །
MAT 1:18 ཡེ་ཤུ་མཱ་ཤི་ཀ་འཁྲུངས་པའི་ལོ་རྒྱུས་འདི་ལྟར་ཡིན་ཏེ། ཁོང་གི་ཡུམ་མིར་ཡམ་དང་ཡོ་སེབ་གཉེན་སྒྲིག་བྱེད་རྒྱུའི་ཐག་བཅད་ཟིན་ཡང༌། ཁོ་གཉིས་མཉམ་དུ་མ་འདུས་པའི་གོང་དུ་མིར་ཡམ་གྱིས་རང་ཉིད་ལ་དམ་པའི་ཐུགས་ཉིད་ཀྱི་ནུས་མཐུ་ཡིས་མངལ་དང་ལྡན་པར་གྱུར་བར་ཤེས།
MAT 1:19 རང་གི་ཁྱོ་བོ་ཡོ་སེབ་ནི་མི་དྲང་ལྡན་ཞིག་ཡིན་པས། ཁོང་གིས་མིར་ཡམ་ལ་མིང་གྲགས་ངན་པ་བཟོ་མ་འདོད་པར་ཁ་ཁུ་སིམ་མེས་ལྐོག་ཏུ་ཁ་འབྲལ་བར་ཐག་གཅོད་བྱས།
MAT 1:20 དེ་ལྟར་བསམ་བཞིན་པའི་སྐབས། གཙོ་བོའི་ཕོ་ཉ་ཞིག་གིས་ཁོང་གི་རྨི་ལམ་ནང་མངོན་པར་གྱུར་ཏེ་“ཀྱེ་དཱ་བིད་ཀྱི་བུ་ཡོ་སེབ། མིར་ཡམ་རང་གི་ཟླ་བོར་ལེན་རྒྱུར་མ་འཇིགས་ཤིག ཁོ་མོའི་ལྷུམས་སུ་བཞུགས་པ་ནི་དམ་པའི་ཐུགས་ཉིད་ལས་ཆགས་པ་ཡིན།
MAT 1:21 ཁོ་མོ་ལ་སྲས་ཤིག་འཁྲུང་ཡོང༌། ཁྱེད་ཀྱིས་དེ་ལ་ཡེ་ཤུ་ཞེས་པའི་མཚན་གསོལ་དགོས། གང་ཡིན་ཟེར་ན། ཁོང་གིས་རང་གི་མི་རྣམས་ཁོ་ཚོའི་སྡིག་ཉེས་ལས་ཐར་བར་མཛད་པར་འགྱུར་”ཞེས་གསུངས།
MAT 1:22 དེ་ཐམས་ཅད་ནི་གཙོ་བོས་ལུང་སྟོན་པ་བརྒྱུད་ནས་གསུངས་པ་དེ་སྒྲུབ་པའི་ཕྱིར་ཡིན།
MAT 1:23 འདི་ལྟར་ཏེ། ལྟོས་དང་ན་ཆུང་མངལ་བཅས་སྲས་ཤིག་འོང༌། ། མཚན་ཡང་ཨིམ་མ་ནུ་ཨེལ་ཞེས་སུ་གསོལ། ། ཞེས་འཁོད་ཡོད། ཨིམ་མ་ནུ་ཨེལ་ནི་དཀོན་མཆོག་དང་ང་ཚོ་མཉམ་དུ་གནས་ཞེས་པའི་དོན་ཡིན།
MAT 1:24 ཡོ་སེབ་གཉིད་ལས་སད་རྗེས་གཙོ་བོའི་ཕོ་ཉས་གནང་བའི་བཀའ་བཞིན་དུ་མིར་ཡམ་རང་གི་ཟླ་བོར་བླངས་ཀྱང༌།
MAT 1:25 སྲས་མ་འཁྲུངས་པའི་བར་དུ་མིར་ཡམ་དང་མཉམ་དུ་མ་འདུས། སྲས་དེའི་མཚན་ལ་ཡེ་ཤུ་ཞེས་བཏགས་སོ། །
MAT 2:1 རྒྱལ་པོ་ཧེ་རོ་དཱེའི་དུས་སྐབས་སུ་ཡ་ཧུ་དཱ་ཡུལ་གྱི་གྲོང་ཁྱེར་བེད་ལེ་ཧེམ་དུ་ཡེ་ཤུ་འཁྲུངས་པའི་རྗེས། ཤར་ཕྱོགས་ནས་ཡིན་པའི་སྐར་རྩིས་མཁས་ཅན་འགའ་ཤས་རྒྱལ་ས་ཡེ་རུ་ཤ་ལེམ་དུ་ཡོང་སྟེ་
MAT 2:2 “ཡ་ཧུ་དཱ་པའི་མི་རིགས་ཀྱི་རྒྱལ་པོ་འཁྲུངས་པ་དེ་གང་དུ་བཞུགས། ཁོང་གི་སྐར་མ་ཤར་དུས་ང་ཚོས་མཐོང་སྟེ་ཁོང་ལ་བཀུར་སྟི་ཞུ་བར་འོངས་པ་ཡིན་”ཞེས་སྨྲས།
MAT 2:3 རྒྱལ་པོ་ཧེ་རོ་དཱེ་ཡིས་དེ་ཐོས་ནས་སེམས་འཁྲུགས་པར་གྱུར་བ་དང་ཡེ་རུ་ཤ་ལེམ་གྱི་མི་ཐམས་ཅད་ཀྱང་སེམས་འཁྲུགས་པར་གྱུར།
MAT 2:4 ཁོང་གིས་ཡ་ཧུ་དཱ་པའི་བླ་ཆེན་དང་ཆོས་ཁྲིམས་ལ་མཁས་པའི་མི་ཐམས་ཅད་བསྐོངས་ནས། མཱ་ཤི་ཀ་ནི་གང་དུ་འཁྲུང་བར་འགྱུར་ཞེས་དྲིས་པ་དང༌།
MAT 2:5 ཁོ་ཚོས་“ཡ་ཧུ་དཱ་ཡུལ་གྱི་བེད་ལེ་ཧེམ་དུ་འཁྲུངས་ཡོང༌། རྒྱུ་མཚན་ནི་ལུང་སྟོན་པས་བཀོད་པ་ལྟར།
MAT 2:6 ཡ་ཧུ་དཱ་ཡི་བེད་ལེ་ཧེམ་མི་རྣམས། ། ཁྱེད་ཚོ་དཔོན་ལས་ཆུང་བ་མ་ཡིན་ཏེ། ། ཁྱེད་ཚོའི་ནང་ནས་དབང་སྒྱུར་མཁན་ཞིག་འོང༌། ། དབང་སྒྱུར་མཁན་དེས་ང་ཡི་མི་རིགས་ཏེ། ། ཡི་སི་ར་ཨེལ་པ་ཡི་རྫི་བོར་འགྱུར། ། ཞེས་འཁོད་ཡོད་”ཅེས་གསུངས།
MAT 2:7 དེ་ནས་རྒྱལ་པོ་ཧེ་རོ་དཱེ་ཡིས་སྐར་རྩིས་མཁས་ཅན་དེ་རྣམས་ལྐོག་ཏུ་བོས་ནས། སྐར་མ་དེ་ཤར་བའི་ནམ་དུས་ཞིབ་ཏུ་དྲིས།
MAT 2:8 ཁོ་ཚོ་བེད་ལེ་ཧེམ་དུ་བཏང་སྟེ་རྒྱལ་པོས་“ད་ཁྱེད་ཚོ་སོང་ལ་ཕྲུ་གུ་ཆུང་ངུ་དེའི་སྐོར་ཞིབ་ཕྲ་རྩད་གཅོད་གྱིས་ཤིག ང་ཡང་ཁོ་ལ་བཀུར་བསྟི་ཞུ་བར་ཡོང་བའི་ཕྱིར་ཁོ་བརྙེད་ན་ང་ལ་འཕྲིན་གཏོང་”ཞེས་བརྗོད།
MAT 2:9 རྒྱལ་པོའི་བཀའ་ཐོས་ནས་ཁོ་རྣམས་སོང་ཞིང༌། ཤར་སྐབས་སུ་མཐོང་བའི་སྐར་མ་དེ་ཁོ་ཚོའི་སྔོན་དུ་རྒྱུ་སྟེ་ཕྲུ་གུ་ཆུང་ངུ་དེ་བཞུགས་སའི་མཚམས་སུ་བསྡད།
MAT 2:10 ཁོ་ཚོས་སྐར་མ་དེ་མཐོང་བས་དགའ་སྤྲོ་རབ་ཏུ་འཕེལ།
MAT 2:11 ཁང་པའི་ནང་དུ་འཛུལ་ནས་ཕྲུ་གུ་ཆུང་ངུ་དེ་དང་དེའི་ཡུམ་མིར་ཡམ་མཇལ་ཏེ་པུས་མོ་སར་བཙུགས་ནས་ཡེ་ཤུར་བསྙེན་བཀུར་ཞུས་ཤིང༌། རྟེན་སྒམ་ཁ་ཕྱེ་སྟེ་གསེར་དང༌། སྤོས་དཀར། དྲི་ཞིམ་བྱུགས་རྫས་རྣམས་ཀྱི་ལེགས་སྐྱེས་ཁོང་ལ་ཕུལ་ལོ།
MAT 2:12 དེ་རྣམས་རྨི་ལམ་ནང་ནས་རྒྱལ་པོ་ཧེ་རོ་དཱེའི་དྲུང་དུ་མ་ལོག་པའི་ཉེན་བརྡ་བྱུང་བ་བཞིན་དུ་ལམ་གཞན་ཞིག་བརྒྱུད་ནས་རང་ཡུལ་དུ་ལོག
MAT 2:13 ཁོ་རྣམས་སོང་བའི་རྗེས་སུ་གཙོ་བོའི་ཕོ་ཉ་ཞིག་ཡོ་སེབ་ཀྱི་རྨི་ལམ་ནང་ལ་མངོན་པར་གྱུར་ནས་ཁོང་ལ་“རྒྱལ་པོ་ཧེ་རོ་དཱེས་ཕྲུ་གུ་དེ་གསོད་པའི་ཕྱིར་འཚོལ་གྲབས་འདུག་པས། ལོངས་ལ་ཕྲུ་གུ་དེ་དང་ཁོང་གི་མ་འཁྲིད་དེ་ཨེ་ཇེབ་ཡུལ་ལ་འབྲོས་ཏེ། ངས་ཁྱོད་ལ་བཀའ་མ་བཏང་བའི་བར་དུ་ཡུལ་དེར་སྡོད་ཅིག་”ཅེས་གསུངས།
MAT 2:14 དེའི་ཕྱིར་ཡོ་སེབ་ལངས་ནས་མཚན་མོར་ཕྲུ་གུ་དང་ཁོང་གི་ཡུམ་འཁྲིད་དེ་ཨེ་ཇེབ་ཡུལ་དུ་སོང༌།
MAT 2:15 གཙོ་བོས་ལུང་སྟོན་པ་བརྒྱུད་ནས་ཨེ་ཇེབ་ཡུལ་ནས་ངའི་སྲས་བོས་པ་ཡིན་ཞེས་གསུངས་པ་དེ་སྒྲུབ་པའི་ཕྱིར། རྒྱལ་པོ་ཧེ་རོ་དཱེ་མ་ཤི་བའི་བར་དུ་ཁོང་རྣམས་ཡུལ་དེར་གནས།
MAT 2:16 དེ་ནས་སྐར་རྩིས་མཁས་ཅན་རྣམས་ཀྱིས་ཁོ་ལ་མགོ་སྐོར་བཏང་བ་ཧེ་རོ་དཱེ་ཡིས་ཤེས་ནས་ཤིན་ཏུ་ཁྲོས། སྐར་རྩིས་པས་ཁོ་ལ་སྨྲས་པའི་ཚེས་གྲངས་ལ་བརྟེན་ནས་དམག་མི་བཏང་ཞིང༌། བེད་ལེ་ཧེམ་དང་མཐའ་སྐོར་གྱི་ས་ཆར་ཡོད་པའི་ལོ་གཉིས་དང་དེ་ལས་ཆུང་བའི་བུ་ཐམས་ཅད་བསད།
MAT 2:17 དེ་ནས་ལུང་སྟོན་པ་ཡེ་རེམ་ཡཱ་ཡིས།
MAT 2:18 ར་མཱའི་གྲོང་དུ་མི་རྣམས་ལ། ། སྒྲ་ཞིག་ཐོས་པ་གང་དེ་ནི། ། བུ་ཕྲུག་ཆེད་དུ་རཱ་ཧེལ་གྱིས། ། སྨྲེ་སྔགས་འདོན་པའི་སྒྲ་ཡིན་ནོ། ། གཞན་གྱི་སེམས་གསོ་དགོས་འདོད་མེད། ། ཁོང་གི་ཕྲུ་གུ་འདས་པས་སོ། ། ཞེས་གསུངས་པ་དེ་བསྒྲུབས།
MAT 2:19 ཧེ་རོ་དཱེ་ཤི་བའི་རྗེས་སུ་ཨེ་ཇེབ་ཡུལ་ལ་ཡོ་སེབ་ཀྱི་རྨི་ལམ་ནང་གཙོ་བོའི་ཕོ་ཉ་ཞིག་མངོན་པར་གྱུར་ནས།
MAT 2:20 “ཕྲུ་གུ་དེ་གསོད་འདོད་མཁན་རྣམས་ཤི་བས། ལོངས་ལ་ཁོང་དང་ཁོང་གི་མ་འཁྲིད་དེ་ཡི་སི་ར་ཨེལ་ཡུལ་ལ་སོང་”ཞེས་གསུངས།
MAT 2:21 དེའི་ཕྱིར་ཡོ་སེབ་ལངས་ནས་ཕྲུ་གུ་དང་ཁོང་གི་ཡུམ་འཁྲིད་དེ་ཡི་སི་ར་ཨེལ་ཡུལ་དུ་སོང༌།
MAT 2:22 འོན་ཀྱང་རྒྱལ་པོ་ཧེ་རོ་དཱེའི་ཤུལ་དུ་ཁོའི་བུ་ཨར་ཀེ་ལཱ་ཡིས་ཡ་ཧུ་དཱ་ཡུལ་དུ་དབང་སྒྱུར་བྱེད་པར་ཐོས་པས། ཡོ་སེབ་དེར་འགྲོ་བར་འཇིགས་ཤིང༌། ཡང་བསྐྱར་རྨི་ལམ་དུ་ཉེན་བརྡ་བྱུང་ནས་ག་ལིལ་ཡུལ་དུ་སོང༌།
MAT 2:23 གྲོང་ཁྱེར་ན་ཙ་རེལ་ཞེས་བྱ་བ་ཞིག་ཏུ་སླེབས་ཏེ་དེར་བཞུགས། དེ་ནི་ལུང་སྟོན་པ་རྣམས་བརྒྱུད་ནས་ཁོང་ལ་ན་ཙ་རེལ་པ་ཞིག་ཞུ་བར་འགྱུར་ཞེས་གསུངས་པ་དེ་སྒྲུབ་པའི་ཕྱིར་རོ། །
MAT 3:1 དེའི་དུས་སུ་ཁྲུས་གསོལ་མཁན་ཡོ་ཧ་ནན་ཡ་ཧུ་དཱ་ཡུལ་གྱི་དབེན་སྟོང་ལ་ཕེབས་ཏེ་
MAT 3:2 “དཀོན་མཆོག་གི་རྒྱལ་སྲིད་ཉེ་བར་འོངས་པས་སྤྱོད་པ་ངན་པ་རྣམས་སྤངས་ནས་སེམས་སྒྱུར་ཞིག་”ཅེས་བསྒྲགས།
MAT 3:3 ལུང་སྟོན་པ་ཡེ་ཤ་ཡཱ་ཡིས། དབེན་སྟོང་ཡུལ་ནང་གྲགས་པའི་འབོད་སྒྲ་ཡིས། ། གཙོ་བོའི་ཆེད་དུ་ཕེབས་ལམ་གྲ་སྒྲིག་བྱོས། ། ལམ་བུ་དེ་ནི་བདེ་བར་བཟོས་ཤིག་ཨང༌། ། ཞེས་གསུངས་པ་འདི་ནི་ཁྲུས་གསོལ་མཁན་ཡོ་ཧ་ནན་གྱི་སྐོར་ཡིན།
MAT 3:4 ཡོ་ཧ་ནན་གྱིས་རྔ་མོང་གི་སྤུ་ཡི་གོས་གྱོན་པ་དང་རྐེད་པ་ལ་ཀོ་བའི་སྐེ་རགས་བཅིངས་ཤིང༌། ཟས་ལ་འབུ་ཆ་ག་པ་དང་ཤིང་ནགས་ཀྱི་སྦྲང་རྩི་བཟས།
MAT 3:5 ཡེ་རུ་ཤ་ལེམ་གྲོང་ཁྱེར་དང༌། ཡ་ཧུ་དཱ་ཡུལ། ཡོར་དན་གཙང་པོའི་མཐའ་སྐོར་གྱི་ཡུལ་ལ་བཞུགས་མཁན་ཤིན་ཏུ་མང་པོ་ཁོང་གི་དྲུང་དུ་འགྲོ་བཞིན་ཡོད་པས།
MAT 3:6 ཁོ་ཚོས་རང་གི་སྡིག་ཉེས་ཁས་བླངས་ཏེ་ཁོང་གིས་ཁོ་ཚོར་ཡོར་དན་གཙང་པོར་ཁྲུས་གསོལ་གནང༌།
MAT 3:7 ཕཱ་རུ་ཤི་དང་སཱ་ཅུ་སེ་ཞེས་ཟེར་བའི་ཕྱོགས་རིས་ལ་གཏོགས་པའི་མི་མང་པོ་ཁྲུས་གསོལ་ལེན་པའི་ཕྱིར་ཁོང་གི་དྲུང་དུ་འོང་བར་མཐོང་ནས་ཁོང་གིས་ཁོ་ཚོར་“དུག་སྦྲུལ་གྱི་རིགས་ཁྱོད་ཚོ། སྡིག་པའི་ཉེས་ཆད་ཡིན་ཏེ་མ་འོངས་པའི་ཐུགས་ཁྲོ་ལས་འབྲོས་པ་ཁྱོད་ཚོར་སུས་བསྟན།
MAT 3:8 སྤྱོད་པ་ངན་པ་རྣམས་སྤངས་ནས་སེམས་བསྒྱུར་བའི་འབྲས་བུ་ལེགས་པ་སྐྱེད་ཅིག
MAT 3:9 ཡང་ཨབ་ར་ཧམ་ང་ཚོའི་མེས་པོ་ཡིན་ཞེས་མ་སོམས། ངས་ཁྱོད་ཚོར་ཟེར་རྒྱུར། དཀོན་མཆོག་གིས་རྡོ་འདི་ཚོ་ལས་ཀྱང་ཨབ་ར་ཧམ་ལ་བུ་རྒྱུད་འབྱུང་བར་མཛད་ཐུབ་པའི་ཕྱིར་རོ།
MAT 3:10 ད་ལྟ་སྟ་རེ་ཞིག་ཤིང་སྡོང་གི་རྩ་ལ་བཞག་ཡོད་པས་འབྲས་བུ་བཟང་པོ་མི་སྐྱེས་པའི་ཤིང་སྡོང་རེ་རེ་བཞིན་བཅད་ནས་མེ་ལ་གཡུག་པར་འགྱུར།
MAT 3:11 ཁྱོད་ཀྱིས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བའི་ཕྱིར་ངས་ནི་ཆུ་ཡིས་ཁྲུས་གསོལ་བྱེད། འོན་ཀྱང་ངའི་རྗེས་ལ་ང་ལས་དབང་ཆེ་བ་ཞིག་ཕེབས་ཡོང་བར་ངེས་ཏེ། ངས་ཁོང་གི་ཞབས་ལྷམ་ཡང་འཁྱེར་བར་མི་འོས། ཁོང་གིས་ཁྱོད་ཚོར་དཀོན་མཆོག་གི་དམ་པའི་ཐུགས་ཉིད་དང་མེ་ཡི་ཐོག་ནས་ཁྲུས་གསོལ་གནང་བར་འགྱུར།
MAT 3:12 ཁོང་གི་གཡུལ་ཁ་ལེགས་པོར་གཙང་མ་བཟོ་བའི་ཆེད་དང༌། མཛོད་ཁང་ལ་གྲོ་སྡུད་པའི་ཕྱིར་སྦར་མོ་ཕྱག་ལ་ཡོད། འོན་ཀྱང་རྩྭ་རྣམས་ཁོང་གིས་གསོད་མི་སྲིད་པའི་མེ་ཡིས་སྲེག་པར་བྱ་”ཞེས་གསུངས།
MAT 3:13 དེ་ནས་ཡེ་ཤུ་ཁྲུས་གསོལ་འཐོབ་བའི་ཕྱིར་ག་ལིལ་ཡུལ་ནས་ཡོར་དན་གཙང་པོའི་འགྲམ་ལ་ཡོ་ཧ་ནན་གྱི་དྲུང་དུ་ཕེབས།
MAT 3:14 ཡོ་ཧ་ནན་གྱིས་ཁོང་འགོག་པར་འདོད་དེ་“ང་ལ་ཁྱེད་ཀྱིས་ཁྲུས་གསོལ་གནང་བའི་དགོས་པ་ཡོད་ཀྱི། ཁྱེད་ངའི་རྩར་ཕེབས་སམ་”ཞེས་གསུངས་པས།
MAT 3:15 ཡེ་ཤུས་ཁོང་ལ་“འདི་ལྟར་ངེད་རྣམས་ཀྱིས་དཀོན་མཆོག་གི་བཀའ་ཐམས་ཅད་སྒྲུབ་དགོས་པས་ད་ལྟ་འདི་ལྟར་བྱེད་དུ་ཆུག་”ཅེས་གསུངས་པ་ན། ཡོ་ཧ་ནན་གྱིས་དེ་ལྟར་བྱས།
MAT 3:16 ཡེ་ཤུས་ཁྲུས་གསོལ་བཞེས་ཏེ་ཆུ་ནས་ཡར་བཞེངས་མ་ཐག ནམ་མཁའ་ཕྱེ་སྟེ་དཀོན་མཆོག་གི་དམ་པའི་ཐུགས་ཉིད་ཕུག་རོན་ལྟར་རང་གི་སྟེང་ལ་བབས་པ་གཟིགས།
MAT 3:17 ཡང་དཀོན་མཆོག་གི་ཞིང་ཁམས་ནས་“འདི་ནི་ངའི་གཅེས་པའི་སྲས་ཡིན་ཞིང་ང་རང་ཁོང་ལ་ཤིན་ཏུ་དགའོ་”ཞེས་པའི་གསུང་སྐད་ཅིག་བྱུང་ངོ༌། །
MAT 4:1 དེ་ནས་བདུད་སཱ་ཏན་གྱིས་ཁོང་ལ་ཉམས་ཚོད་ལེན་པའི་ཕྱིར་དམ་པའི་ཐུགས་ཉིད་ཀྱིས་ཡེ་ཤུ་དབེན་སྟོང་ལ་ཁྲིད།
MAT 4:2 ཉིན་མཚན་བཞི་བཅུའི་རིང་ཁོང་གིས་ཞལ་ཟས་ཅི་ཡང་མ་བཞེས་པས་བཀྲེས་པར་གྱུར།
MAT 4:3 ཉམས་ཚོད་ལེན་མཁན་ཁོང་གི་དྲུང་དུ་ཡོང་ནས་ཁོང་ལ་“ཁྱེད་རང་དཀོན་མཆོག་གི་སྲས་ཡིན་ན་རྡོ་འདི་བག་ལེབ་ཏུ་འགྱུར་བའི་བཀའ་གཏོང་ཞིག་”ཅེས་སྨྲས་པ་ན།
MAT 4:4 ལན་དུ་ཁོང་གིས་“གསུང་རབ་ནང་མི་ནི་བག་ལེབ་ཁོ་ནས་མ་ཡིན་ཏེ་དཀོན་མཆོག་གི་ཞལ་ནས་འབྱུང་བའི་བཀའ་རེ་རེར་བརྟེན་ནས་འཚོ་བར་འགྱུར་ཞེས་བྲིས་འདུག་”ཅེས་གསུངས།
MAT 4:5 དེ་ནས་བདུད་ཀྱིས་གནས་མཆོག་ཡེ་རུ་ཤ་ལེམ་དུ་ཁྲིད་དེ་མཆོད་ཁང་ཆེན་མོའི་རྩེ་མོར་ལང་དུ་བཅུག་ནས་ཁོང་ལ་
MAT 4:6 “གལ་ཏེ་ཁྱེད་རང་དཀོན་མཆོག་གི་སྲས་ཡིན་ན་མར་མཆོངས་ཤིག གང་ལགས་ཟེར་ན། གསུང་རབ་ཀྱི་མདོ་ལས། ཁོང་གིས་ཁྱེད་ཕྱིར་ཕོ་ཉ་རྣམས་ལ་ནི། ། ཁྱེད་ཉིད་སྐྱོབ་པའི་བཀའ་ཡང་གནང་བར་འགྱུར། ། རྡོ་ལ་ཁྱེད་ཀྱི་ཞབས་ནི་མི་ཕོག་ཕྱིར། ། དེ་ཚོའི་ལག་པས་ཁྱེད་ནི་འདེགས་པར་འགྱུར། ། ཅེས་བྲིས་འདུག་”ཅེས་ཟེར་བས།
MAT 4:7 ལན་དུ་ཡེ་ཤུས་“གཙོ་བོ་ཁྱེད་ཀྱི་དཀོན་མཆོག་ལ་ཉམས་ཚོད་མ་བྱོས་ཤིག་ཅེས་བྲིས་འདུག་”ཅེས་གསུངས།
MAT 4:8 དེ་ནས་བདུད་ཀྱིས་ཁོང་རི་ཤིན་ཏུ་མཐོ་པོ་ཞིག་ལ་ཡར་ཁྲིད་ནས་འཇིག་རྟེན་གྱི་རྒྱལ་ཁམས་ཚང་མ་དང་དེའི་དཔལ་བསྟན་ནས་ཁོང་ལ་
MAT 4:9 “ང་ལ་ཕྱག་འཚལ་ན་འདི་ཚོ་ཐམས་ཅད་ཁྱེད་ལ་འབུལ་བར་བྱའོ་”ཞེས་ཟེར།
MAT 4:10 ཡེ་ཤུས་ཁོ་ལ་“སཱ་ཏན། ཕར་རྒྱུགས་ཤིག གསུང་རབ་ནང་ཁྱེད་ཀྱིས་རང་གི་གཙོ་བོ་དཀོན་མཆོག་ལ་བསྙེན་བཀུར་ཞུ་བ་དང་ཁོང་ཁོ་ནར་ཞབས་ཕྱི་བྱེད་དགོས་ཞེས་བྲིས་འདུག་”ཅེས་གསུངས།
MAT 4:11 དེ་ནས་བདུད་དེ་ཁོང་དང་བྲལ་ནས་དཀོན་མཆོག་གི་ཕོ་ཉ་རྣམས་ཡོང་ཞིང་ཁོང་ལ་ཞབས་ཕྱི་ཞུས།
MAT 4:12 ཡེ་ཤུས་ཁྲུས་གསོལ་མཁན་ཡོ་ཧ་ནན་འཛིན་བཟུང་བྱས་པའི་གཏམ་གསན་ནས་ག་ལིལ་ཡུལ་དུ་ཕེབས་པ་དང༌།
MAT 4:13 ན་ཙ་རེལ་གྲོང་སྡེ་དང་བྲལ་ནས་ཟ་བུ་ལུན་དང་ནབ་ཐ་ལིའི་ཡུལ་གྱི་མཚོ་འགྲམ་དུ་ཡོད་པའི་ཀ་ཕར་ན་ཧུམ་གྲོང་ཁྱེར་དུ་གཞིས་ཆགས།
MAT 4:14 དེ་ལྟར་ལུང་སྟོན་པ་ཡེ་ཤ་ཡཱ་ཡིས།
MAT 4:15 ཟ་བུ་ལུན་དང་ནབ་ཐ་ལི་ཡུལ་གཉིས། ། མཚོ་འགྲམ་དང་ནི་ཡོར་དན་ཕ་རོལ་ན། ། ཕྱི་པ་གནས་པའི་ག་ལིལ་ཡུལ་དེ་ལ། །
MAT 4:16 མུན་པའི་ཁྲོད་དུ་གོམ་བགྲོད་བྱེད་བཞིན་པའི། ། མི་རྣམས་ཀྱིས་ནི་འོད་ཆེན་ཞིག་མཐོང་ཞིང༌། ། སྨག་རུམ་མུན་པའི་ཁྲོད་དུ་གནས་པ་ཡི། ། མི་རྣམས་ལ་ནི་འོད་ཟེར་འཕྲོས་པར་གྱུར། ། ཞེས་གསུངས་པ་སྒྲུབ་པའི་ཕྱིར་རོ།
MAT 4:17 དེ་ནས་བཟུང་ཡེ་ཤུས་ཆོས་བསྟན་འགོ་ཚུགས་གནང་སྟེ་“དཀོན་མཆོག་གི་རྒྱལ་སྲིད་འཐོན་ལ་ཉེ་བར་སླེབས་པས། ཁྱེད་ཚོས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་དགོས་”ཞེས་གསུངས།
MAT 4:18 དེ་ནས་ཡེ་ཤུ་ག་ལིལ་ཡུལ་གྱི་མཚོ་འགྲམ་བརྒྱུད་ནས་ཕེབས་དུས། སི་མོན་ཞེས་ཟེར་བའི་པེ་ཏྲོ་དང་ཁོང་གི་གཅུང་པོ་ཨན་དྲི་ཡཱ་ཞེས་བྱ་བའི་ཉ་པ་གཉིས་ཀྱིས་མཚོ་ནང་དུ་དྲ་རྒྱ་འཕེན་བཞིན་པ་གཟིགས་ཤིང༌།
MAT 4:19 ཁོང་གིས་ཁོ་ཚོ་ལ་“ངའི་རྗེས་སུ་ཤོག ཁྱེད་ཀྱིས་ད་ལྟ་ཉ་འཚོལ་བ་ལྟར་རྗེས་མ་ངས་ཁྱེད་ཚོ་མི་རྣམས་འཚོལ་དུ་འཇུག་”ཅེས་གསུངས་མ་ཐག
MAT 4:20 ཁོ་གཉིས་ཀྱིས་རང་གི་དྲ་རྒྱ་སྤངས་ནས་ཁོང་གི་རྗེས་སུ་འབྲངས།
MAT 4:21 ཡེ་ཤུ་ཕར་ཙམ་ཕེབས་སྐབས། ཡ་ཀོབ་དང་ཡོ་ཧ་ནན་ཞེས་ཟེར་བའི་སྤུན་གཞན་གཉིས་ཁོ་ཚོའི་ཕ་ཟེ་བད་ཡཱ་དང་མཉམ་དུ་གྲུའི་ནང་ལ་དྲ་རྒྱ་བཟོ་བཅོས་རྒྱག་བཞིན་པ་གཟིགས་ནས། དེ་གཉིས་བོས་པ་དང༌།
MAT 4:22 དེ་མ་ཐག་ཏུ་ཁོ་གཉིས་གྲུ་དང་ཕ་བཞག་ནས་ཁོང་གི་རྗེས་སུ་འབྲངས།
MAT 4:23 ག་ལིལ་ཡུལ་ཡོངས་བརྒྱུད་ནས་ཕེབས་ཏེ་ཡེ་ཤུས་ཡ་ཧུ་དཱ་པའི་འདུ་ཁང་ནང་དུ་ཆོས་གསུངས་ཏེ། དཀོན་མཆོག་གི་རྒྱལ་སྲིད་ཀྱི་འཕྲིན་བཟང་བསྒྲགས་པ་དང༌། མི་རྣམས་ཀྱི་ནད་རིགས་ཀུན་སེལ་བར་མཛད།
MAT 4:24 ཁོང་གི་སྙན་གྲགས་སི་རི་ཡཱ་ཡུལ་ཀུན་ཏུ་ཁྱབ། མི་རྣམས་ཀྱིས་ནད་དང་ན་ཟུག་སྣ་ཚོགས་ཀྱིས་བཏབ་པ་ཐམས་ཅད་དང༌། གདོན་འདྲེས་བཟུང་བའི་མི་དང༌། གཟའ་ཕོག་པ། གོམ་པ་སྤོ་མི་ཐུབ་པ་ལ་སོགས་པའི་མི་རྣམས་ཁོང་གི་མདུན་དུ་ཁྲིད་པ་དང་ཁོང་གིས་དེ་ཚོ་སེལ་བར་མཛད།
MAT 4:25 ག་ལིལ་ཡུལ་དང༌། དེ་ཁ་པོ་ལེ་ཞེས་བྱ་བའི་ཡུལ། རྒྱལ་ས་ཡེ་རུ་ཤ་ལེམ་དང༌། ཡ་ཧུ་དཱ་ཡུལ། ཡོར་དན་གཙང་པོའི་ཕ་རོལ་ནས་འོངས་པའི་མི་ཚོགས་མང་པོ་ཞིག་ཁོང་གི་རྗེས་སུ་འབྲངས་སོ། །
MAT 5:1 མི་ཚོགས་གཟིགས་ནས་ཡེ་ཤུ་རི་ཞིག་གི་སྟེང་ལ་ཡར་ཕེབས་ཏེ། དེར་བཞུགས་པ་དང་ཁོང་གི་ཉེ་གནས་རྣམས་སྐུ་མདུན་དུ་ཡོང༌།
MAT 5:2 ཡང་ཁོང་གིས་ཁོ་རྣམས་ལ་ཆོས་བསྟན་ཏེ་གསུངས་པ།
MAT 5:3 “སེམས་རྒྱུད་དབུལ་རྣམས་བདེ་བ་དང་ལྡན་ཏེ། ། དཀོན་མཆོག་རྒྱལ་སྲིད་ཁོང་ཚོའི་ཡིན་པས་སོ། །
MAT 5:4 མྱ་ངན་ཅན་རྣམས་བདེ་བ་དང་ལྡན་ཏེ། ། ཁོ་ཚོར་སེམས་གསོ་འཐོབ་ངེས་ཡིན་པས་སོ། །
MAT 5:5 སྙེམས་ཆུང་བ་རྣམས་བདེ་བ་དང་ལྡན་ཏེ། ། ཁོ་ཚོ་ས་གཞིའི་བདག་པོར་འགྱུར་བས་སོ། །
MAT 5:6 བཀྲེས་སྐོམ་ཅན་གྱི་དྲང་བདེན་མི་དེ་རྣམས། ། བདེ་བ་ཡིན་ཏེ་བློ་ཡིད་ཚིམ་པས་སོ། །
MAT 5:7 སྙིང་རྗེ་ཅན་གྱི་མི་རྣམས་བདེ་བ་སྟེ། ། ཁོ་ཚོར་སྙིང་རྗེ་ངེས་པར་འཐོབ་པས་སོ། །
MAT 5:8 ལྷད་མེད་སེམས་བཟང་ཅན་དག་བདེ་བ་སྟེ། ། ཁོ་ཚོས་དཀོན་མཆོག་མཇལ་བར་འགྱུར་བས་སོ། །
MAT 5:9 འདུམ་སྒྲིག་མཁན་རྣམས་བདེ་བ་དང་ལྡན་ཏེ། ། ཁོ་ཚོར་དཀོན་མཆོག་སྲས་ཞེས་འབོད་པས་སོ། །
MAT 5:10 དྲང་བདེན་ཉིད་ཕྱིར་འཚེ་བ་ཕོག་པ་རྣམས། ། དཀོན་མཆོག་རྒྱལ་སྲིད་ཁོ་ཚོའི་ཡིན་པས་བདེའོ། །
MAT 5:11 ངའི་དོན་དུ་མི་རྣམས་ཀྱིས་ཁྱེད་ཚོར་དམའ་བེབས་གཏོང་ཞིང༌། གནོད་སྐྱེལ་བ་དང༌། རྫུན་ཤོད་དེ་ཚིག་ངན་སྣ་ཚོགས་སྨྲ་བའི་སྐབས་སུ་ཁྱེད་རྣམས་བདེ་བ་ཡིན།
MAT 5:12 དཀོན་མཆོག་གི་ཞིང་ཁམས་སུ་ཁྱེད་ལ་བྱ་དགའ་ཆེན་པོ་ཡོད་པས་དགའ་བ་སྐྱེད་པར་གྱུར་ཅིག གང་ཡིན་ཟེར་ན། ཁྱེད་ཚོའི་སྔོན་ལ་ཡོད་པའི་ལུང་སྟོན་པ་ལའང་དེ་ལྟར་གནོད་བསྐྱལ་བ་ཡིན།”
MAT 5:13 “ཁྱེད་རྣམས་འཇིག་རྟེན་གྱི་ཚྭ་ཡིན། འོན་ཀྱང་ཚྭའི་བྲོ་བ་ཡལ་ན། དེའི་བྲོ་བ་སླར་གང་གིས་གསོ་བར་བྱེད་དམ། དེ་ཕན་མེད་དུ་གྱུར་བས་ཕྱི་ལ་གཡུགས་ནས་མིའི་རྐང་པས་རྫི་བར་འགྱུར།
MAT 5:14 ཁྱེད་ཚོ་ནི་འཇིག་རྟེན་གྱི་འོད་ཡིན། རི་སྟེང་དུ་ཆགས་པའི་གྲོང་ཁྱེར་བཀབ་མི་སྲིད།
MAT 5:15 མི་སུས་ཀྱང་སྒྲོན་མེ་ཞིག་སྤར་ནས་བྲེའི་འོག་ཏུ་མི་འཇོག སྟེགས་བུའི་སྟེང་དུ་བཞག་ནས་ཁང་པའི་ནང་གི་མི་ཐམས་ཅད་ལ་འོད་སྤྲོ།
MAT 5:16 དེ་ལྟར་ཁྱེད་ཚོའི་འོད་ཀྱང་མི་རྣམས་ཀྱི་མདུན་དུ་འོད་སྤྲོ་བར་འཇུག་དགོས། དེ་ནས་ཁྱེད་ཚོས་བྱེད་པའི་བྱ་བ་བཟང་པོ་ཁོ་ཚོས་མཐོང་ནས་ཞིང་ཁམས་སུ་བཞུགས་པའི་ཁྱེད་ཀྱི་ཡབ་ལ་བསྟོད་བསྔགས་བྱེད་པར་འགྱུར།”
MAT 5:17 “ང་ཡོང་བ་ནི་ཆོས་ཁྲིམས་སམ་ལུང་སྟོན་པའི་བསྟན་པ་མེད་པར་བྱེད་པར་མ་སོམས་ཤིག ང་མེད་པར་བྱེད་དུ་མིན་ཏེ་དེ་ཚོ་སྒྲུབ་པའི་ཆེད་དུ་ཡོང་བ་ཡིན།
MAT 5:18 ངས་ཁྱེད་ཚོ་ལ་བདེན་པར་ཟེར་རྒྱུར། གནམ་ས་གཉིས་མ་འདའ་བའི་བར་དུ་ཆོས་ཁྲིམས་ཀྱི་ཚེག་གམ་ཡིག་འབྲུ་གཅིག་ཀྱང་མེད་པར་མི་འགྱུར་གྱི། ཐམས་ཅད་འགྲུབ་པར་འགྱུར་ངེས་ཡིན།
MAT 5:19 དེའི་ཕྱིར་མི་སུ་འདྲ་ཞིག་གིས་བཀའ་ཁྲིམས་འདི་རྣམས་ལས་ཆུང་ཤོས་ཤིག་དང༌། ཡང་འགལ་ནས་མི་གཞན་རྣམས་ལའང་དེ་ལྟར་བྱེད་པར་སློབ་མཁན་ནི་དཀོན་མཆོག་གི་རྒྱལ་སྲིད་ནང་དུ་ཆུང་ཤོས་ཟེར་བར་འགྱུར། འོན་ཀྱང་བཀའ་ཁྲིམས་དེ་ཚོ་སྲུང་ཞིང་སློབ་མཁན་ནི་དཀོན་མཆོག་གི་རྒྱལ་སྲིད་ནང་དུ་ཆེན་པོ་ཟེར་བར་འགྱུར།
MAT 5:20 ངས་ཁྱེད་ཚོ་ལ་ཟེར་རྒྱུར། གལ་ཏེ་ཁྱེད་ཚོས་ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་རྣམས་ལས་དཀོན་མཆོག་གི་བཀའ་ཁྲིམས་ལེགས་པར་མ་ཉན་ན། ཁྱེད་ཚོ་དཀོན་མཆོག་གི་རྒྱལ་སྲིད་དུ་འཛུལ་བར་མི་སྲིད།
MAT 5:21 གནའ་བོའི་དུས་ཀྱི་མི་རྣམས་ལ་མིའི་སྲོག་མ་གཅོད་ཅིག་ཅེས་དང༌། མིའི་སྲོག་གཅོད་མཁན་ལ་ཁྲིམས་གཅོད་འཕོག་ཉེན་ཡོད་ཅེས་གསུངས་པ་ཁྱེད་རྣམས་ཀྱིས་ཐོས་ཡོད།
MAT 5:22 འོན་ཀྱང་ངས་ཁྱེད་ཚོ་ལ་ཟེར་རྒྱུར། མི་སུས་ཀྱང་རང་གི་སྤུན་ཟླ་ལ་ཁྲོ་མཁན་དེ་རྣམས་ལ་ཡང་ཁྲིམས་གཅོད་འཕོག་ཉེན་ཡོད་ཅིང༌། རང་གི་སྤུན་ཟླ་ལ་ཁ་ངན་ཤོད་མཁན་ལ་རྒྱལ་ཚོགས་ཀྱི་མདུན་དུ་ཁྲིམས་གཅོད་འཕོག་ཉེན་ཡོད། གཞན་ལ་བླུན་པོ་ཁྱོད་ཅེས་ཟེར་མཁན་རྣམས་ལ་མེ་དང་ལྡན་པའི་དམྱལ་ཁམས་ལ་འགྲོ་ཉེན་ཡོད།
MAT 5:23 དེའི་ཕྱིར་མཆོད་ཁྲིའི་མདུན་དུ་མཆོད་པ་ཞིག་ཕུལ་བའི་སྐབས་སུ་དེར་ཁྱེད་ཀྱི་སྤུན་ཟླ་ཁྱེད་དང་མ་མཐུན་པ་ཞིག་ཡོད་པར་དྲན་ན།
MAT 5:24 ཁྱེད་ཀྱི་མཆོད་པ་དེ་མཆོད་ཁྲིའི་མདུན་དུ་བཞག་ནས་སོང་ལ། སྔོན་དུ་ཁྱེད་ཀྱི་སྤུན་ཟླ་དང་སྡུམ་པར་གྱུར་ཅིག དེ་ནས་ཤོག་ལ་ཁྱེད་ཀྱི་མཆོད་པ་ཕུལ།
MAT 5:25 ཁྱེད་དང་ཁྱེད་ཀྱི་ཁ་གཏད་གཉིས་ཁྲིམས་རར་འགྲོ་དུས་ལམ་བར་དུ་ཁོ་དང་མགྱོགས་པོར་མཐུན་འགྲིག་བྱོས་ཤིག དེ་མིན་ན་ཁ་གཏད་དེས་ཁྱོད་ཁྲིམས་དཔོན་ལ་གཏོད་པ་དང༌། ཁྲིམས་དཔོན་གྱིས་བཙོན་སྲུང་པར་གཏད་ནས་ཁྱེད་བཙོན་ཁང་དུ་འཇུག་ཉེན་ཡོད།
MAT 5:26 དེ་ལྟར་ན་ངས་ཁྱེད་ཚོ་ལ་བདེན་པར་ཟེར་རྒྱུར། མཐའ་མའི་སྒོར་མོ་གཅིག་དེ་ཡང་འཇལ་མ་ཚར་བའི་བར་དུ་ཁྱོད་དེ་ལས་ཐར་མི་སྲིད།”
MAT 5:27 “ལོག་གཡེམ་མ་བྱོས་ཤིག་ཅེས་གསུངས་པ་ཁྱེད་རྣམས་ཀྱིས་ཐོས་ཡོད།
MAT 5:28 འོན་ཀྱང་ངས་ཁྱེད་ཚོ་ལ་ཟེར་རྒྱུར། སུས་ཀྱང་འདོད་ཆགས་ཀྱི་སེམས་ཀྱིས་བུད་མེད་ཅིག་ལ་བལྟས་ན་ཡང་རང་གི་སེམས་ལ་ཁོ་མོ་མཉམ་དུ་ལོག་གཡེམ་བྱས་ཟིན་ནོ།
MAT 5:29 གལ་ཏེ་ཁྱེད་ཀྱི་མིག་གཡས་པས་ཁྱེད་སླུ་བར་བྱས་ན། མིག་དེ་བཏོན་ནས་དབྱུག་ཅིག ལུས་ཧྲིལ་པོ་དམྱལ་ཁམས་སུ་གཡུག་པ་ལས་ཁྱེད་ཀྱི་ལུས་ཀྱི་ཡན་ལག་གཅིག་བརླག་པ་དེ་ལེགས།
MAT 5:30 ཡང་གལ་ཏེ་ཁྱེད་ཀྱི་ལག་གཡས་པ་ཡིས་ཁྱེད་སླུ་བར་བྱས་ན། ལག་པ་དེ་བཅད་ནས་དབྱུག་ཅིག ལུས་ཧྲིལ་པོ་དམྱལ་ཁམས་སུ་འགྲོ་བ་ལས་ཁྱེད་ཀྱི་ལུས་ཀྱི་ཡན་ལག་གཅིག་བརླག་པ་དེ་ལེགས།
MAT 5:31 རང་གི་བཟའ་ཟླ་བཞག་པ་དེས་ཁོ་མོ་ལ་བཟའ་ཚང་ཁ་བྲལ་བའི་ཡི་གེ་སྤྲོད་དགོས་ཞེས་གསུངས་ཡོད།
MAT 5:32 འོན་ཀྱང་ངས་ཁྱེད་ཚོ་ལ་ཟེར་རྒྱུར། ལོག་གཡེམ་གྱི་རྒྱུ་ཡིས་མ་གཏོགས་པར། རང་གི་བཟའ་ཟླ་བཞག་པ་དེས་ཁོ་མོ་ལ་ལོག་གཡེམ་བྱེད་དུ་འཇུག བཟའ་ཚང་ཁ་བྲལ་མྱོང་བའི་བུད་མེད་གཅིག་བཟའ་ཟླར་ལེན་མཁན་དེས་ལོག་གཡེམ་བྱེད།”
MAT 5:33 “ཡང་གནའ་བོའི་དུས་ཀྱི་མི་རྣམས་ལ་རྫུན་གྱི་དམ་བཅའ་མ་འཇོག་ཅིག གཙོ་བོ་དཀོན་མཆོག་ལ་དམ་བཅའ་སྒྲུབ་པར་བྱོས་ཤིག་ཅེས་གསུངས་པ་ཁྱེད་རྣམས་ཀྱིས་ཐོས་ཡོད།
MAT 5:34 འོན་ཀྱང་ངས་ཁྱེད་ཚོ་ལ་ཟེར་རྒྱུར། མནའ་ནམ་ཡང་མ་སྐྱེལ་ཞིག ཞིང་ཁམས་ནི་དཀོན་མཆོག་གི་བཞུགས་ཁྲི་ཡིན་པས། དཀོན་མཆོག་གི་ཞིང་ཁམས་དཔང་དུ་འཛུགས་ཏེ་མནའ་མ་སྐྱེལ།
MAT 5:35 ས་གཞི་ནི་ཁོང་གི་ཞབས་སྟེགས་ཡིན་པས། ས་གཞི་དཔང་དུ་འཛུགས་ཏེ་མནའ་མ་སྐྱེལ། ཡེ་རུ་ཤ་ལེམ་ནི་རྒྱལ་པོ་ཆེན་པོའི་གྲོང་ཁྱེར་ཡིན་པས་དེ་དཔང་དུ་འཛུགས་ཏེ་མནའ་མ་སྐྱེལ།
MAT 5:36 ཡང་ཁྱེད་ཀྱིས་རང་གི་མགོའི་སྐྲ་གཅིག་ཀྱང་དཀར་པོའམ་ནག་པོར་བྱེད་མི་ཐུབ་པས་རང་གི་མགོ་དཔང་དུ་འཛུགས་ཏེ་མནའ་མ་སྐྱེལ་བར།
MAT 5:37 ཡིན་ན་ཡིན་དང་མིན་ན་མིན་གྱི་གཏམ་དྲང་པོ་ཤོད་ཅིག དེ་ལས་ལྷག་པ་ཇི་ཡོད་ངན་པ་ལས་འབྱུང༌།”
MAT 5:38 “མིག་གི་ལན་ལ་མིག་དང་སོ་ཡི་ལན་ལ་སོ་ཞེས་གསུངས་པ་ཁྱེད་རྣམས་ཀྱིས་ཐོས་ཡོད།
MAT 5:39 འོན་ཀྱང་ངས་ཁྱེད་ཚོ་ལ་ཟེར་རྒྱུར། མི་ངན་པ་ལ་མ་རྒོལ་ཞིག སུས་ཀྱང་ཁྱེད་ལ་འགྲམ་པ་གཡས་པ་ལ་འགྲམ་ལྕག་བཞུས་ན། དེ་ལ་འགྲམ་པ་གཞན་ཡང་སྟོན།
MAT 5:40 སུ་ཞིག་གིས་ཁྱེད་ཁྲིམས་རར་འཁྲིད་ནས་ནང་གོས་འཁྱེར་འདོད་ན། ཁོ་ལ་ཕྱི་གོས་ཀྱང་འཁྱེར་དུ་ཆུག་ཅིག
MAT 5:41 ཡང་སུ་ཞིག་གིས་ཁྱེད་ལ་སྤྱི་ལེ་གཅིག་དབང་གིས་འགྲོ་རུ་བཅུག་ན། ཁོ་དང་སྤྱི་ལེ་གཉིས་སོང༌།
MAT 5:42 ཁྱེད་ལ་གང་ཞིག་ཞུས་མཁན་ལ་སྦྱིན། གཡར་འདོད་མཁན་ལ་རྒྱབ་སྟོན་མ་བྱེད་ཅིག”
MAT 5:43 “ཁྱིམ་མཚེས་ལ་བྱམས་ཤིང་དགྲ་བོ་ལ་སྡང་ཞེས་གསུངས་པ་ཁྱེད་རྣམས་ཀྱིས་ཐོས་ཡོད།
MAT 5:44 འོན་ཀྱང་ངས་ཁྱེད་ཚོ་ལ་ཟེར་རྒྱུར། ཁྱེད་ཀྱི་དགྲ་བོ་རྣམས་ལ་བྱམས་པ་གྱིས་ཤིག ཁྱེད་ལ་གནོད་འཚེ་བྱེད་མཁན་རྣམས་ཀྱི་དོན་དུ་གསོལ་སྨོན་འདེབས་ཤིག
MAT 5:45 དེ་ལྟར་བྱས་ན་ཁྱེད་ཚོ་ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱི་སྲས་སུ་འགྱུར། གང་ཡིན་ཟེར་ན། ཁོང་གིས་མི་ངན་པ་དང་བཟང་པོ་གཉིས་ཀར་རང་གི་ཉི་མ་ཤར་དུ་འཇུག་ཅིང༌། རང་གཤིས་དྲང་པོ་དང་དྲང་པོ་མིན་པ་གཉིས་ཀར་ཆར་པ་འབེབས་པར་མཛད་པས་སོ།
MAT 5:46 ཡང་ཁྱེད་ལ་བྱམས་པ་བྱེད་མཁན་ལ་བྱམས་ན་ཁྱེད་ལ་བྱ་དགའ་གང་འཐོབ་ཡོང༌། ཁྲལ་སྡུད་མཁན་གྱིས་ཀྱང་དེ་ལྟར་མི་བྱེད་དམ།
MAT 5:47 ཁྱེད་ཀྱི་སྤུན་ཟླ་ཁོ་ནར་འཚམས་འདྲི་ཞུས་ན། མི་གཞན་ལས་ལྷག་པར་གང་བྱེད། ཡ་ཧུ་དཱ་པ་མིན་པ་རྣམས་ཀྱིས་ཀྱང་དེ་ལྟར་མི་བྱེད་དམ།
MAT 5:48 དེའི་ཕྱིར་ཞིང་ཁམས་སུ་བཞུགས་ཏེ་ཁྱེད་ཀྱི་ཡབ་མ་ཚང་བ་མེད་པ་ཡིན་པ་ལྟར། ཁྱེད་ཀྱང་མ་ཚང་བ་མེད་པ་ཡིན་པར་དགོས་སོ། །”
MAT 6:1 “ཁྱེད་ཚོས་མི་གཞན་གྱིས་མཐོང་བའི་ཕྱིར་ཁོ་ཚོའི་མདུན་དུ་ལས་བཟང་པོ་བྱེད་པར་དོགས་ཟོན་གྱིས་ཤིག དེ་ལྟར་བྱས་ན་ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱིས་ཁྱེད་ལ་བྱ་དགའ་མི་གནང༌།
MAT 6:2 དེའི་ཕྱིར་ཁྱེད་ཚོས་དབུལ་པོ་རྣམས་ལ་སྦྱིན་པ་གཏོང་བའི་སྐབས་སུ་དུང་ཆེན་གཏོང་དུ་མ་འཇུག་ཅིག ཁ་བཤད་དོན་ལ་མི་གནས་པ་རྣམས་ཀྱིས་མི་རྣམས་ཀྱི་བསྟོད་པ་འཐོབ་པའི་ཆེད་དུ་གཞུང་ལམ་དང་འདུ་ཁང་ལ་དེ་ལྟར་བྱེད། ངས་ཁྱེད་ཚོ་ལ་བདེན་པར་ཟེར་རྒྱུར་ཁོ་ཚོར་བྱ་དགའ་ཐོབ་ཚར་རོ།
MAT 6:3 འོན་ཀྱང་ཁྱེད་ཀྱིས་དབུལ་པོ་རྣམས་ལ་སྦྱིན་པ་གཏོང་བའི་སྐབས་སུ་ཁྱེད་ཀྱི་ལག་པ་གཡས་པས་གང་བྱེད་པ་དེ་ལག་པ་གཡོན་པས་ཀྱང་ཤེས་པར་མ་འཇུག་ཅིག
MAT 6:4 དེ་ལྟར་བྱས་ན་ཁྱེད་ཀྱིས་སྦྱིན་པ་ནི་གསང་བའི་ཐོག་ནས་ཡིན་པ་དང༌། ཁྱེད་ཀྱི་ཡབ་གསང་བ་གཟིགས་མཁན་གྱིས་ཁྱེད་ལ་བྱ་དགའ་གནང་ངེས་ཡིན།”
MAT 6:5 “ཡང་ཁྱེད་ཚོས་སྨོན་ལམ་འདེབས་པའི་སྐབས་སུ་ཁ་བཤད་དོན་ལ་མི་གནས་པ་རྣམས་ཀྱི་དཔེ་ལྟར་མ་བྱེད་ཅིག མི་རྣམས་ཀྱིས་མཐོང་བའི་ཆེད་དུ་ཁོ་ཚོས་འདུ་ཁང་དང་མདོ་ཁར་སྨོན་ལམ་འདེབས་པར་དགའ། ངས་ཁྱེད་ཚོ་ལ་བདེན་པར་ཟེར་རྒྱུར་ཁོ་ཚོར་རང་གི་བྱ་དགའ་ཐོབ་ཚར་རོ།
MAT 6:6 དེ་ལས་ལྡོག་སྟེ་སྨོན་ལམ་འདེབས་པའི་སྐབས་སུ་ཁང་པའི་ཕུག་ནང་དུ་སོང་ལ་སྒོ་བརྒྱབ་ནས་གསང་བར་བཞུགས་པའི་ཁྱེད་ཀྱི་ཡབ་ལ་སྨོན་ལམ་འདེབས། དེ་ནས་ཁྱེད་ཀྱི་ཡབ་གསང་བ་གཟིགས་མཁན་གྱིས་ཁྱེད་ལ་བྱ་དགའ་གནང་ངེས་ཡིན།
MAT 6:7 ཡང་སྨོན་ལམ་འདེབས་པའི་སྐབས་སུ་ཡ་ཧུ་དཱ་པ་མིན་པ་རྣམས་ཀྱིས་བྱེད་པ་ལྟར་དོན་མེད་པའི་གཏམ་མ་ཤོད་ཅིག ཁོ་ཚོས་ཚིག་མང་བས་སྨོན་ལམ་གསན་པར་འགྱུར་སྙམ།
MAT 6:8 དེའི་ཕྱིར་ཁོ་ཚོར་མིག་དཔེ་མ་བྱེད་ཅིག གང་ཡིན་ཞེ་ན། ཁྱེད་ཚོས་མ་ཞུས་པའི་སྔོན་ལ་ཁྱེད་ཀྱི་ཡབ་ཀྱིས་ཁྱེད་ལ་གང་དགོས་པ་མཁྱེན་པས་སོ།
MAT 6:9 དེ་བས་ན་ཁྱེད་ཀྱིས་འདི་ལྟར་སྨོན་ལམ་ཞུས་ཤིག ནམ་མཁར་བཞུགས་པའི་ངེད་ཀྱི་ཡབ། ། ཁྱེད་མཚན་དམ་པར་སྲུང་བར་ཤོག །
MAT 6:10 ཁྱེད་ཀྱི་རྒྱལ་སྲིད་འོང་བར་ཤོག ། ཁྱེད་ཀྱི་དགོངས་པ་ནམ་མཁའ་ལ། ། སྒྲུབ་ལྟར་ས་ལའང་སྒྲུབ་པར་ཤོག །
MAT 6:11 ངེད་ཀྱི་ཉིན་ཞག་རེའི་ཁ་ཟས། ། དེ་རིང་ཡང་ནི་གནང་བར་མཛོད། །
MAT 6:12 ངེད་ཚོས་གཞན་གྱི་ཉེས་པ་དག ། གུ་ཡངས་གཏོང་བ་ཇི་བཞིན་དུ། ། ངེད་ཀྱི་སྡིག་བུན་སེལ་བར་མཛོད། །
MAT 6:13 ཉམས་ཚོད་ནང་དུ་མ་འཁྲིད་པར། ། ངན་པ་ལས་ངེད་ཐར་བར་མཛོད། །
MAT 6:14 གལ་ཏེ་ཁྱེད་ཚོས་མི་གཞན་ལ་གུ་ཡངས་བཏང་ན། ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱིས་ཀྱང་ཁྱེད་ཀྱི་སྡིག་ཉེས་སེལ་བར་འགྱུར་ངེས་ཡིན།
MAT 6:15 འོན་ཀྱང་གཞན་ལ་གུ་ཡངས་མ་བཏང་ན། ཁྱེད་ཀྱི་ཡབ་ཀྱིས་ཀྱང་ཁྱེད་ཀྱི་སྡིག་ཉེས་སེལ་བར་མི་འགྱུར།”
MAT 6:16 “ཁྱེད་ཚོས་སྨྱུང་གནས་སྲུང་བའི་ཚེ་ཁ་བཤད་དོན་ལ་མི་གནས་པ་རྣམས་ཀྱིས་བྱེད་པ་ལྟར་རྣམ་འགྱུར་མ་སྟོན་ཅིག མི་གཞན་ལ་སྨྱུང་གནས་སྲུང་བཞིན་པར་སྟོན་པའི་ཕྱིར་ཁོ་ཚོས་རང་གི་ངོ་གདོང་ནག་པོ་བཟོ། ངས་ཁྱེད་ཚོ་ལ་བདེན་པར་ཟེར་རྒྱུར་ཁོ་ཚོར་རང་གི་བྱ་དགའ་ཐོབ་ཚར་རོ།
MAT 6:17 འོན་ཀྱང་སྨྱུང་གནས་སྲུང་བའི་ཚེ་རང་གི་མགོ་ལ་སྣུམ་འབྱུག་ཅིང་ངོ་གདོང་ཁྲུས།
MAT 6:18 དེ་ནས་མི་རྣམས་ཀྱིས་ཁྱེད་སྨྱུང་གནས་སྲུང་བཞིན་པར་མི་མཐོང་ཡང༌། གསང་བར་བཞུགས་པའི་ཡབ་ཀྱིས་གཟིགས་ཤིང༌། གསང་བ་གཟིགས་མཁན་ཡབ་ཀྱིས་ཁྱེད་ལ་བྱ་དགའ་གནང་ངེས་ཡིན།”
MAT 6:19 “མུག་པ་དང་བཙའ་ཡིས་ཟ་ཞིང༌། ཁང་པར་འཛུལ་ནས་རྐུན་མས་རྐུ་ས་འཇིག་རྟེན་འདི་ལ་ནོར་མ་གསོག་པར།
MAT 6:20 མུག་པ་དང་བཙའ་ཡིས་མི་ཟ་ཞིང༌། ཁང་པར་འཛུལ་ནས་རྐུན་མས་མི་རྐུ་ས་དཀོན་མཆོག་གི་ཞིང་ཁམས་སུ་ནོར་གསོག
MAT 6:21 གང་ལགས་ཟེར་ན། གང་ཁྱེད་ཀྱི་རྒྱུ་ནོར་ཡོད་ས་དེར་ཁྱེད་ཀྱི་སེམས་ཀྱང་ཡོད།
MAT 6:22 མིག་ནི་ལུས་ཀྱི་སྒྲོན་མེ་ལྟར་ཡིན། མིག་བཟང་པོ་ཡོད་ན་ལུས་ཧྲིལ་པོ་འོད་ཀྱིས་གང༌།
MAT 6:23 འོན་ཀྱང་མིག་བཟང་པོ་མེད་ན་ལུས་ཧྲིལ་པོ་མུན་ནག་གིས་གང༌། གལ་ཏེ་ཁྱེད་ཀྱི་སེམས་ནང་ལ་འོད་དེ་མུན་པ་ཡིན་ན་མུན་པ་དེ་ཅི་ལྟར་ཆེ།
MAT 6:24 སུ་ཞིག་གིས་བདག་པོ་གཉིས་ལ་གཡོག་བྱེད་མི་སྲིད། གང་ལགས་ཤེ་ན། ཁོས་གཅིག་ལ་སྡང་ཞིང་གཅིག་ལ་གཅེས་པའམ། གཅིག་ལ་མོས་ཤིང་གཅིག་ལ་སྨད་པར་བྱེད། ཁྱེད་ཚོས་དཀོན་མཆོག་དང་རྒྱུ་ནོར་གཉིས་ཀའི་གཡོག་བྱེད་མི་སྲིད།”
MAT 6:25 “དེའི་ཕྱིར་ངས་ཁྱེད་རྣམས་ལ་ཟེར་རྒྱུར། ཚེ་སྲོག་གི་ཕྱིར་ཟས་གང་ཞིག་ཟ་རྒྱུ་དང་འཐུང་རྒྱུ། ལུས་ཀྱི་ཕྱིར་གོས་གང་ཞིག་གྱོན་པ་སེམས་ཁྲལ་མ་བྱོས་ཤིག གང་ལགས་ཤེ་ན། ཚེ་སྲོག་དང་ལུས་པོ་གཉིས་ཟས་དང་གྱོན་ཆས་ལས་ལྷག་པ་མེད་དམ།
MAT 6:26 ནམ་མཁའི་བྱ་བྱིའུ་ལ་ལྟོས་ཤིག དེ་ཚོས་ས་བོན་མི་འདེབས་ལ། ལོ་ཏོག་མི་རྔ༌། མཛོད་ཁང་ལ་མི་གསོག་ཀྱང༌། ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱིས་དེ་ཚོར་ཟས་གནང༌། ཁྱེད་ཚོ་དེ་རྣམས་ལས་གལ་ཆེ་བ་མ་ཡིན་ནམ།
MAT 6:27 ཁྱེད་ཚོའི་ནང་ནས་སུ་ཞིག་གིས་སེམས་ཁྲལ་བྱེད་པའི་ངང་ནས་མི་ཚེ་འདི་ཆུ་ཚོད་གཅིག་ཙམ་གྱི་རིང་དུ་གཏོང་ཐུབ་བམ།
MAT 6:28 ཡང་གྱོན་ཆས་ཀྱི་ཕྱིར་ཅི་ལ་སེམས་ཁྲལ་བྱེད། རྩྭ་ཐང་སྟེང་གི་སྟག་གཟིག་མེ་ཏོག་ཇི་ལྟར་སྐྱེ་བར་ལྟོས་ཤིག དེ་ཚོས་ལས་ཀ་མི་བྱེད་ལ་བལ་ཡང་མི་འཁལ།
MAT 6:29 ངས་ཁྱེད་ཚོ་ལ་ཟེར་རྒྱུར། རྒྱལ་པོ་སོ་ལོ་མོན་གཟི་བརྗིད་ཆེན་པོ་དང་ལྡན་པ་ཞིག་ཡིན་ཡང༌། ཁོང་གི་རྒྱན་གོས་དེ་ཚོའི་ནང་གི་གཅིག་ལའང་འགྲན་མི་ཐུབ།
MAT 6:30 གལ་ཏེ་དཀོན་མཆོག་གིས་ཞིང་སྟེང་གི་རྩྭ་དེ་རིང་སྐྱེ་སྟེ་སང་ཉིན་ཐབ་ལ་འཕེན་རྒྱུ་ཡིན་པར་དེ་ལྟར་གཡོག་པར་མཛད་ན། ཁོང་གིས་དེ་བས་ཀྱང་ཁྱོད་དད་ཆུང་བ་རྣམས་ལ་གཡོག་པ་གནང་བར་མི་བྱའམ།
MAT 6:31 དེའི་ཕྱིར་ང་ཚོས་ཅི་ཟ། ཅི་འཐུང༌། ཅི་གྱོན་ཞེས་ཟེར་ཏེ་སེམས་ཁྲལ་མ་བྱེད་ཅིག
MAT 6:32 ཡ་ཧུ་དཱ་པ་མིན་པ་རྣམས་ཀྱིས་དེ་ཚོ་ཚང་མ་འཚོལ། ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱིས་ཁྱོད་ཚོ་ལ་དེ་ཐམས་ཅད་དགོས་པ་མཁྱེན།
MAT 6:33 ཐོག་མར་དཀོན་མཆོག་གི་རྒྱལ་སྲིད་དང་ཁོང་གི་དྲང་བདེན་ལ་འབད་བརྩོན་བྱོས། དེ་ནས་དེ་ཚོ་ཐམས་ཅད་ཁྱེད་ཚོ་ལ་གནང་བར་འགྱུར།
MAT 6:34 དེའི་ཕྱིར་སང་ཉིན་གྱི་དོན་ལ་སེམས་ཁྲལ་མ་བྱེད། གང་ཡིན་ཞེ་ན། སང་ཉིན་ལ་སང་ཉིན་གྱི་སེམས་ཁྲལ་ཡོད། ཉིན་རེར་རྙོག་དྲ་རེས་ཆོག་གོ །”
MAT 7:1 “སྐྱོན་འདོགས་མ་བྱོས་དང༌། ཁྲིམས་གཅོད་འབྱུང་བར་མི་འགྱུར།
MAT 7:2 གང་ཡིན་ཟེར་ན། ཇི་ལྟར་ཁྱེད་ཀྱིས་མི་གཞན་ལ་སྐྱོན་འདོགས་བྱས་པ། དེ་ལྟར་ཁྱེད་ལ་ཡང་ཁྲིམས་གཅོད་འབྱུང་བར་འགྱུར། སྣོད་གང་གིས་འཇལ་བ་དེ་རང་གིས་ཁྱེད་ལ་ཡང་འཇལ་བར་འགྱུར།
MAT 7:3 གཞན་གྱི་མིག་ལ་ཡོད་པའི་ཤིང་རྡུལ་མཐོང་ཡང༌། རང་གི་མིག་ལ་ཡོད་པའི་གདུང་མ་མི་མཐོང་བ་དེ་ཅི་ཡིན།
MAT 7:4 ཡང་ན་ཁྱེད་ཀྱིས་རང་གི་མིག་ལ་ཡོད་པའི་གདུང་མ་མི་མཐོང་བར། མི་གཞན་ལ་ཁྱེད་ཀྱི་མིག་ལ་ཡོད་པའི་ཤིང་རྡུལ་འདོན་པར་བྱ་ཞེས་ཅི་ལྟར་ཟེར།
MAT 7:5 ཁ་བཤད་དོན་ལ་མི་གནས་པ་ཁྱོད། སྔོན་ལ་རང་གི་མིག་ལ་ཡོད་པའི་གདུང་མ་ཐོན་ཅིག དེ་ནས་གཞན་གྱི་མིག་ནས་ཤིང་རྡུལ་འདོན་པའི་ཆེད་དུ་གསལ་པོར་མཐོང༌།
MAT 7:6 གང་ཞིག་དམ་པ་ཡིན་པ་དེ་ཁྱི་ལ་མ་སྟེར། དེས་ཁ་ཚུར་སློག་ནས་ཁྱེད་ལ་རྒོལ། ཁྱེད་ཀྱི་མུ་ཏིག་རྣམས་ཕག་པའི་མདུན་དུ་མ་དབྱུག་ཅིག དེ་མིན་ཕག་པའི་རྐང་པས་བརྫིས་པར་འགྱུར།”
MAT 7:7 “ཞུས་ན་གནང་བར་འགྱུར། བཙལ་ན་རྙེད་པར་འགྱུར། སྒོ་བརྡུངས་ན་འབྱེད་པར་འགྱུར།
MAT 7:8 གང་ལགས་ཟེར་ན། ཞུ་མཁན་ཐམས་ཅད་ལ་འཐོབ་པ་དང༌། འཚོལ་མཁན་ཐམས་ཅད་ལ་རྙེད། སྒོ་རྡུང་མཁན་ཐམས་ཅད་ལ་སྒོ་འབྱེད་པར་འགྱུར་བས་སོ།
MAT 7:9 དཔེར་ན་ཁྱེད་ཚོ་ལས་སུ་ཞིག་གིས་བུ་ལ་བག་ལེབ་དགོས་ཞེས་ཞུས་ན་ཁོ་ལ་རྡོ་སྟེར་བར་བྱའམ།
MAT 7:10 ཡང་ན་ཉ་ཤ་དགོས་ཞེས་ཞུས་ན་ཁོ་ལ་སྦྲུལ་སྟེར་བར་བྱའམ།
MAT 7:11 ཁྱོད་ཚོ་ངན་པ་ཡིན་ཡང་ཁྱོད་ཀྱི་ཕྲུ་གུ་རྣམས་ལ་ལག་རྟགས་བཟང་པོ་སྤྲོད་པར་ཤེས་ན། ཞིང་ཁམས་སུ་བཞུགས་པ་ཁྱེད་ཀྱི་ཡབ་ཀྱིས་ཁོང་ལ་གསོལ་འདེབས་བྱེད་མཁན་རྣམས་ལ་གང་བཟང་པོ་ཡིན་པ་དེ་བས་ཀྱང་གནང་བར་འགྱུར།
MAT 7:12 མི་གཞན་གྱིས་ཇི་ལྟར་ཁྱེད་ཚོར་བྱས་ན་དགའ་བ་བཞིན། དེ་ལྟར་གཞན་ལ་བྱོས་ཤིག དེ་ནི་ཆོས་ཁྲིམས་དང་ལུང་སྟོན་པའི་བསྟན་པའི་དོན་མདོར་བསྡུས་ཡིན་ནོ།
MAT 7:13 སྒོ་དོག་མོ་བརྒྱུད་ནས་འཇུག གང་ཡིན་ཞེ་ན། འཇིག་པར་འཁྲིད་པའི་སྒོ་ནི་ཞེང་ཅན་དང་ལམ་ཡངས་པོ་ཡོད་པས་མི་མང་པོ་དེར་འགྲོ
MAT 7:14 དཔག་ཏུ་མེད་པའི་ཚེ་ལ་འཁྲིད་པའི་སྒོ་ནི་ཞེང་ག་ཆུང་ཞིང་ལམ་ཡང་དོག་མོ་ཡོད་པས་མི་ཉུང་ངུ་ཙམ་ལ་ལམ་དེ་རྙེད།”
MAT 7:15 “ལུང་སྟོན་པ་རྫུན་མ་རྣམས་ལ་དོགས་ཟོན་གྱིས་ཤིག ལུག་གི་པགས་པ་གྱོན་ཏེ་ཁྱེད་ཚོའི་རྩར་ཡོང་ཡང༌། དངོས་གནས་ཁོ་རྣམས་སྤྱང་ཀི་དྲག་པོ་ཡིན།
MAT 7:16 དེ་ཚོའི་འབྲས་བུ་ནས་ངོ་ཤེས། ཚེར་ཤིང་ནས་རྒུན་འབྲུམ་དང༌། ཡང་ན་སེ་བའི་མེ་ཏོག་ནས་བསེ་ཡབ་འཐོག་སྲིད་དམ།
MAT 7:17 དེ་བཞིན་དུ་ཤིང་སྡོང་བཟང་པོ་རེ་རེ་ལས་འབྲས་བུ་བཟང་པོ་སྐྱེ་ཞིང༌། ཤིང་སྡོང་ངན་པ་ལས་འབྲས་བུ་ངན་པ་སྐྱེ།
MAT 7:18 ཤིང་སྡོང་བཟང་པོ་ལས་འབྲས་བུ་ངན་པ་དང༌། ཤིང་སྡོང་ངན་པ་ལས་འབྲས་བུ་བཟང་པོ་སྐྱེ་མི་སྲིད།
MAT 7:19 འབྲས་བུ་བཟང་པོ་མ་སྐྱེ་པའི་ཤིང་སྡོང་རེ་རེ་བཞིན་བཅད་ནས་མེ་ལ་གཡུག་པར་འགྱུར།
MAT 7:20 དེའི་ཕྱིར་ཁོ་ཚོའི་འབྲས་བུ་ལ་བལྟས་ནས་ཁྱེད་ཚོས་ཤེས་འོང༌།
MAT 7:21 ང་ལ། གཙོ་བོ་ལགས། གཙོ་བོ་ལགས་ཞེས་ཟེར་མཁན་ཐམས་ཅད་དཀོན་མཆོག་གི་རྒྱལ་སྲིད་དུ་འཇུག་མི་ཡོང༌། ཞིང་ཁམས་སུ་བཞུགས་པའི་ངའི་ཡབ་ཀྱི་ཐུགས་དགོངས་སྒྲུབ་མཁན་ནི་དེའི་ནང་དུ་འཇུག་པར་འགྱུར།
MAT 7:22 ཉིན་མོ་དེར་མི་མང་པོས། གཙོ་བོ་ལགས། གཙོ་བོ་ལགས། ང་ཚོས་ཁྱེད་ཀྱི་མཚན་གྱི་སྒོ་ནས་ལུང་བསྟན་མེད་པ་དང༌། ཁྱེད་ཀྱི་མཚན་གྱི་སྒོ་ནས་གདོན་འདྲེ་མ་བསྐྲད་པ། ཁྱེད་ཀྱི་མཚན་གྱི་སྒོ་ནས་ངོ་མཚར་བའི་ལས་མང་པོ་མ་བྱས་སམ་ཞེས་ང་ལ་ཟེར་བར་འགྱུར།
MAT 7:23 དེ་ནས་ངས་ཁོ་ཚོར། ངས་ཁྱོད་རྣམས་ནམ་ཡང་ངོ་མ་ཤེས་པས། ངན་པ་བྱེད་མཁན་ཁྱོད་ཚོ་ངའི་རྩ་ནས་ཕར་རྒྱུགས་ཞེས་སྨྲ་བར་འགྱུར།”
MAT 7:24 “དེའི་ཕྱིར་ངས་སྨྲས་པའི་ཚིག་ཐོས་ཏེ་ཉམས་ལེན་བྱེད་མཁན་ཐམས་ཅད་ནི་རང་གི་ཁང་པ་བྲག་ལ་བརྩིགས་པའི་ཤེས་རབ་ཅན་དང་འདྲ་བ་ཡིན།
MAT 7:25 ཁང་པ་དེ་བྲག་གི་སྟེང་དུ་རྩིགས་པས། ཆར་པ་བབས་ནས་ཆུ་ལོག་བྱུང་ཞིང༌། ལྷགས་པ་དྲག་པོ་བརྒྱབ་ནས་ཁང་པ་དེར་ཕོག་ཀྱང་མ་རྡིབ།
MAT 7:26 ངས་སྨྲས་པའི་ཚིག་ཐོས་ཏེ་ཉམས་ལེན་མ་བྱེད་མཁན་ཐམས་ཅད་ནི་རང་གི་ཁང་པ་བྱེ་མའི་སྟེང་དུ་བརྩིགས་པའི་བླུན་པོ་དང་འདྲ་བ་ཡིན།
MAT 7:27 ཆར་པ་བབས་ནས་ཆུ་ལོག་བྱུང་ཞིང༌། ལྷགས་པ་དྲག་པོ་བརྒྱབ་ནས་ཁང་པ་དེར་ཕོག་སྟེ་རྡིབ་ཅིང་ཡོངས་སུ་བཤིག་པར་གྱུར་”ཞེས་གསུངས།
MAT 7:28 ཡེ་ཤུས་བཀའ་དེ་གསུངས་ཚར་རྗེས། ཁོང་གིས་གསུངས་པ་དེ་ལ་མི་ཚོགས་རྣམས་ཡ་མཚན་ཆེན་པོ་སྐྱེས།
MAT 7:29 རྒྱུ་མཚན་ནི་ཡ་ཧུ་དཱ་པའི་ཆོས་ཁྲིམས་ལ་མཁས་པའི་མི་རྣམས་དང་མི་འདྲ་སྟེ། དབང་ལྡན་ཞིག་གིས་གསུངས་པ་དང་འདྲ་བར་ཁོ་ཚོར་ཆོས་བསྟན་གནང་བའི་ཕྱིར་རོ། །
MAT 8:1 ཡེ་ཤུ་རི་བོ་ལས་མར་འབབ་པའི་དུས་སུ་མི་ཚོགས་མང་པོ་ཞིག་ཁོང་གི་རྗེས་སུ་འབྲངས།
MAT 8:2 དེའི་ཚེ་མཛེ་ནད་ཅན་ཞིག་ཁོང་གི་དྲུང་དུ་ཡོང་ནས་པུས་མོ་སར་བཙུགས་ཏེ་“གཙོ་བོ་ལགས། གལ་ཏེ་ཁྱེད་ཐུགས་མཉེས་པ་ཡིན་ན་ཁྱེད་ཀྱིས་ང་རང་གི་མཛེ་ནད་དག་པར་མཛད་ཐུབ་”ཅེས་སྨྲས།
MAT 8:3 ཡེ་ཤུས་ཕྱག་བརྐྱངས་ནས་ཁོ་ལ་རེག་སྟེ་“ང་དེ་བཞིན་དུ་བྱེད་འདོད་ཡོད། དག་པར་གྱུར་ཅིག་”ཅེས་གསུངས་མ་ཐག་ཁོའི་མཛེ་ནད་དག་པར་གྱུར།
MAT 8:4 ཡེ་ཤུས་མི་དེར་“མི་གཞན་ལ་ཅི་ཡང་སྨྲ་བར་མ་བྱོས། སོང་ལ་རང་གི་ལུས་ཡ་ཧུ་དཱ་པའི་བླ་མར་སྟོན་དང༌། ཁོ་རྣམས་ལ་བདེན་དཔང་བྱེད་པའི་ཕྱིར་ལུང་སྟོན་པ་མོ་ཤེ་ཡིས་བཀའ་གནང་བ་ལྟར་ཁྱེད་དག་པར་གྱུར་བ་ཡིན་པའི་ཕྱིར་མཆོད་པ་ཞིག་ཕུལ་”ཞེས་གསུངས།
MAT 8:5 ཁོང་ཀ་ཕར་ན་ཧུམ་ལ་ཕེབས་སྐབས་དམག་མི་བརྒྱ་དཔོན་ཅིག་ཡོང་ནས་ཁོང་ལ་
MAT 8:6 “གཙོ་བོ་ལགས། ངའི་གཡོག་པོ་ཞ་རིལ་གྱི་ནད་ཕོག་པས་སྡུག་བསྔལ་ཆེན་པོ་མྱོང་སྟེ་ནང་ལ་ཉལ་ཡོད་”ཅེས་ནན་གྱིས་ཞུས།
MAT 8:7 ཡེ་ཤུས་ཁོ་ལ་“ང་ཡོང་ནས་ཁོའི་ནད་སེལ་བར་བྱ་”ཞེས་གསུངས་ཀྱང༌།
MAT 8:8 ལན་དུ་བརྒྱ་དཔོན་དེས་“གཙོ་བོ་ལགས། ཁྱེད་ངའི་ཁྱིམ་ནང་དུ་ཕེབས་པར་མི་འོས་པས་བཀའ་ཁོ་ན་གསུངས་དང༌། ངའི་གཡོག་པོ་ནད་ལས་ཐར་བར་འགྱུར།
MAT 8:9 གང་ལགས་ཤེ་ན། ང་ཡང་གཞན་གྱི་དབང་འོག་ཏུ་ཡོད་པ་དང༌། ངའི་འོག་ཏུ་ཡང་དམག་མི་ཡོད། ངས་དམག་མི་ཞིག་ལ་སོང་ཞེས་ཟེར་ན་འགྲོ གཞན་ལ་ཚུར་ཤོག་ཅེས་བཤད་ན་ཡོང༌། ངའི་གཡོག་པོར་ལས་ཀ་དེ་བྱོས་ཤིག་ཅེས་བཤད་ན་ཁོས་དེ་ལྟར་བྱེད་”ཅེས་ཟེར།
MAT 8:10 ཡེ་ཤུས་དེ་གསན་ནས་ཡ་མཚན་སྐྱེས་ཏེ་ཁོང་གི་རྗེས་སུ་འབྲང་བའི་མི་རྣམས་ལ་“ངས་ཁྱེད་རྣམས་ལ་བདེན་པར་ཟེར་རྒྱུར། ཡི་སི་ར་ཨེལ་ཡུལ་ལའང་ངས་འདི་འདྲ་བའི་དད་སེམས་ཡོད་པའི་མི་མཐོང་མ་མྱོང༌།
MAT 8:11 ངས་ཁྱེད་ཚོར་ཟེར་རྒྱུར། མེས་པོ་ཨབ་ར་ཧམ་དང༌། ཨི་སཱག་དང༌། ཡ་ཀོབ་དང་མཉམ་དུ་དཀོན་མཆོག་གི་རྒྱལ་སྲིད་ལ་ཞལ་ཟས་བཞེས་པའི་ཕྱིར་ཤར་ནུབ་ནས་མི་མང་པོ་ཞིག་ཡོང་ངེས་ཡིན།
MAT 8:12 འོན་ཀྱང་རྒྱལ་སྲིད་ཀྱི་འབངས་མི་ནི་ཕྱི་རོལ་གྱི་མུན་པའི་ནང་དུ་དབྱུག ས་ཆ་དེར་ངུ་ཞིང་སོ་ཁྲིག་ཁྲིག་བྱེད་པར་འགྱུར་”ཞེས་གསུངས།
MAT 8:13 ཡང་ཡེ་ཤུས་བརྒྱ་དཔོན་དེ་ལ་“སོང་ལ་ཁྱེད་ཀྱིས་དད་པ་བཞིན་དུ་སྒྲུབ་པར་འགྱུར་”ཞེས་གསུངས་ནས། དུས་དེ་རང་ལ་གཡོག་པོ་དེ་ནད་ལས་ཐར་བར་གྱུར།
MAT 8:14 ཡེ་ཤུ་ཉེ་གནས་པེ་ཏྲོའི་ཁྱིམ་ནང་དུ་ཕེབས་སྐབས། པེ་ཏྲོའི་བཟའ་ཟླའི་ཨ་མ་ཚ་བ་རྒྱས་ནས་ཉལ་ཁྲིར་ཉལ་བ་ཁོང་གིས་གཟིགས་པས།
MAT 8:15 ཁོ་མོའི་ལག་པ་ལ་རེག་པས་ཚ་བ་འཇགས་ཏེ་ཁོ་མོས་ཡར་ལངས་ནས། ཁོང་ལ་ཞབས་ཕྱི་ཞུས་སོ།
MAT 8:16 དགོང་མོ་དེར་ཁོ་ཚོས་གདོན་འདྲེས་བཟུང་བའི་མི་མང་པོ་ཁོང་གི་དྲུང་དུ་ཁྲིད་པ་དང༌། ཁོང་གི་བཀའ་ཡིས་གདོན་འདྲེ་དེ་རྣམས་བསྐྲད་པར་མཛད་ཅིང༌། ནད་པ་ཐམས་ཅད་གསོ་བར་མཛད།
MAT 8:17 འདི་ནི་ལུང་སྟོན་པ་ཡེ་ཤ་ཡཱའི་ལུང་བསྟན་སྒྲུབ་པའི་ཆེད་དུ་ཡིན་ཏེ། ཁོང་ཉིད། ཁོང་གིས་ང་ཚོའི་ནད་ཀུན་དང༌། ། སྡུག་བསྔལ་ཡོངས་སུ་སེལ་བར་མཛད། ། ཅེས་གསུངས།
MAT 8:18 ཡེ་ཤུས་རང་གི་མཐའ་སྐོར་ལ་མི་ཚོགས་གཟིགས་སྐབས། མཚོའི་ཕ་རོལ་ལ་འགྲོ་བའི་བཀའ་གནང༌།
MAT 8:19 ཡ་ཧུ་དཱ་པའི་ཆོས་ཁྲིམས་ལ་མཁས་པའི་མི་ཞིག་ཁོང་གི་དྲུང་དུ་ཡོང་ནས་ཁོང་ལ་“སྟོན་པ་ལགས། ཁྱེད་གང་དུ་ཕེབས་ན་ཡང་ང་ཁྱེད་ཀྱི་རྗེས་སུ་འབྲང་བར་བྱ་”ཞེས་ཟེར་བས།
MAT 8:20 ཡེ་ཤུས་ཁོ་ལ་“ཝ་ལ་ཝ་ཚང་དང༌། བྱ་ལ་བྱ་ཚང་ཡོད་ཀྱང༌། མིའི་རིགས་ཀྱི་བུ་ཟེར་མཁན་ལ་མགོ་བཞག་ས་ཙམ་ཡང་མེད་”ཅེས་གསུངས།
MAT 8:21 ཉེ་གནས་རྣམས་ལས་གཅིག་གིས་ཁོང་ལ་“གཙོ་བོ་ལགས། སྔོན་ལ་ང་སོང་ནས་ངའི་ཕའི་སྐུ་ཕུང་དུར་སར་འཇུག་པའི་ལུགས་སྲོལ་སྲུང་བའི་དགོངས་པ་གནང་རོགས་”ཞེས་སྨྲས།
MAT 8:22 འོན་ཀྱང་ཁོང་གིས་ཁོ་ལ་“ངའི་རྗེས་སུ་ཤོག གཤིན་པོ་དང་འདྲ་བ་རྣམས་ཀྱིས་རང་གི་གཤིན་པོ་རྣམས་དུར་དུ་འཇུག་ཆོག་”ཅེས་གསུངས།
MAT 8:23 ཡེ་ཤུ་གྲུའི་ནང་འཛུལ་ནས་ཁོང་གི་ཉེ་གནས་ཁོང་གི་རྗེས་སུ་འབྲངས།
MAT 8:24 གློ་བུར་དུ་མཚོའི་སྒང་ལ་རླུང་འཚུབ་ཆེན་པོ་ལངས་ཏེ་རྦ་རླབས་གྲུའི་ནང་ཡོང་ནས་གྲུ་ཆུས་ཁེངས་གྲབས་བྱེད། འོན་ཀྱང་ཡེ་ཤུ་གཟིམས་ཡོད།
MAT 8:25 ཁོ་ཚོ་ཉེ་བར་ཡོང་ནས་ཁོང་མནལ་སད་དེ་“གཙོ་བོ་ལགས། ང་ཚོ་འཆི་བ་ལ་ཐུག་པས་སྐྱོབ་པར་མཛོད་ཅིག་”ཅེས་ཟེར།
MAT 8:26 ཁོང་གིས་ཁོ་ཚོར་“ཁྱོད་ཚོ་དད་ཆུང་བ་རྣམས། ཞེད་དགོས་དོན་གང་ཡིན་”ཞེས་གསུངས་ཏེ་ཡར་བཞེངས་ནས་རླུང་དང་མཚོ་ལ་བཀའ་བཀྱོན་མཛད་ཅིང༌། དེ་ཚོ་ཡོངས་སུ་ཞི་བར་གྱུར།
MAT 8:27 ཡ་མཚན་ཆེན་པོ་སྐྱེས་ཏེ་ཁོ་ཚོས་གཅིག་གིས་གཅིག་ལ་“སྐྱེས་བུ་འདི་ཅི་ལྟར་ཡིན། རླུང་དང་མཚོ་ཡིས་ཀྱང་ཁོང་གི་བཀའ་ལ་ཉན་པར་བྱེད་”ཅེས་ཟེར།
MAT 8:28 མཚོའི་ཕ་རོལ་གད་དེ་རེའི་ཡུལ་དུ་ཕེབས་པ་དང༌། གདོན་འདྲེས་བཟུང་བའི་མི་གཉིས་དུར་ཁང་གི་ཁྲོད་ནས་ཐོན་ཏེ་ཁོང་དང་མཇལ། ཁོ་ཚོ་ཧ་ཅང་དྲག་པོ་ཡིན་པས་སུའང་ལམ་དེར་འགྲོ་མ་ཐུབ།
MAT 8:29 གློ་བུར་དུ་ཁོ་ཚོས་སྐད་ཆེན་པོས་“ཀྱེ་དཀོན་མཆོག་གི་སྲས། ངེད་རྣམས་ཁྱེད་དང་འབྲེལ་བ་ཅི་ཡོད། དུས་ལ་བབ་པའི་སྔོན་ལ་ང་ཚོར་མནར་གཅོད་གཏོང་བའི་ཕྱིར་ཕེབས་པ་ཡིན་ནམ་”ཞེས་ཟེར།
MAT 8:30 ཐག་རིང་ཙམ་ལ་ཕག་ཁྱུ་ཆེན་པོ་ཞིག་འཚོ་བཞིན་ཡོད་པ་དང༌།
MAT 8:31 གདོན་འདྲེ་དེ་ཚོས་ཁོང་ལ་“ཁྱེད་ཀྱིས་ང་ཚོ་ཕར་བསྐྲད་ན། ཕག་ཁྱུའི་ཁྲོད་ལ་གཏོང་བར་མཛོད་”ཅེས་ཞུ་བ་ཆེན་པོ་ཕུལ།
MAT 8:32 ཁོང་གིས་ཁོ་ཚོར་“སོང་ཞིག་”ཅེས་གསུངས་པས་གདོན་འདྲེ་དེ་ཚོ་ཕྱིར་ཐོན་ཏེ་ཕག་པའི་ནང་དུ་ཞུགས་ཤིང༌། ཕག་ཁྱུ་ཧྲིལ་པོ་གཡང་གཟར་ནས་མཆོངས་ཤིང་མཚོའི་ནང་དུ་ནུབ་སྟེ་ཤི
MAT 8:33 ཕག་རྫི་རྣམས་གྲོང་ཁྱེར་ལ་བྲོས་ནས་གདོན་འདྲེས་བཟུང་བའི་མི་རྣམས་ལ་གང་བྱུང་བ་ཐམས་ཅད་བཤད།
MAT 8:34 གྲོང་ཁྱེར་གྱི་མི་ཐམས་ཅད་ཡེ་ཤུ་མཇལ་བར་ཡོང་སྟེ། ཁོང་མཐོང་ནས་ས་ཆ་གཞན་ལ་ཕེབས་རྒྱུར་ཞུ་བ་ཡང་ཡང་ཕུལ་ལོ། །
MAT 9:1 ཡེ་ཤུ་གྲུའི་ནང་བཞུགས་ནས་མཚོའི་ཕ་རོལ་ཏུ་རང་གི་གྲོང་ཁྱེར་ལ་ཕེབས།
MAT 9:2 དེ་ནས་མི་ཁ་ཤས་ཀྱིས་གོམ་པ་སྤོ་མི་ཐུབ་པའི་ནད་པ་གཅིག་ཉལ་ཁྲི་སྟེང་ལ་ཁུར་ནས་ཁོང་གི་དྲུང་དུ་འོངས། ཁོ་ཚོའི་དད་སེམས་མཁྱེན་ནས་ཁོང་གིས་ནད་པ་དེར་“བུ། བློ་བདེ་བར་བྱོས་ཤིག ཁྱེད་ཀྱི་སྡིག་ཉེས་བསལ་ཟིན་པ་ཡིན་”ཞེས་གསུངས་པས།
MAT 9:3 དེར་ཡོད་པའི་ཆོས་ཁྲིམས་ལ་མཁས་པའི་མི་ཁ་ཤས་ཀྱི་བསམ་པ་ལ་མི་འདིས་དཀོན་མཆོག་ལ་སྐུར་བ་འདེབས་སྙམ།
MAT 9:4 ཁོ་ཚོའི་བསམ་པ་མཁྱེན་ནས་ཡེ་ཤུས་ཁོ་ཚོར་“ཁྱོད་ཚོས་བསམ་བློ་ངན་པ་འདི་ལྟར་བཏང་དགོས་པའི་རྒྱུ་མཚན་གང་ཡིན།
MAT 9:5 ཁྱེད་ཀྱི་སྡིག་ཉེས་བསལ་ཟིན་ཟེར་བ་ལས་སླ་པོ་ཡིན་ནམ། ཡང་ན། ལོངས་ལ་སོང་ཞིག་ཟེར་བ་ལས་སླ་པོ་ཡིན།
MAT 9:6 འོན་ཀྱང་མིའི་རིགས་ཀྱི་བུ་ཟེར་མཁན་དེ་ལ་འཇིག་རྟེན་འདིར་སྡིག་ཉེས་སེལ་བའི་དབང་ཡོད་པ་ཁྱོད་ཚོས་ཤེས་པའི་ཕྱིར༌༌༌༌”ཞེས་གསུངས་ནས་ཁོང་གིས་ནད་པ་དེ་ལ་“ལོངས་ལ་ཉལ་ཁྲི་ཁྱེར་ནས་ནང་ལ་ལོག་ཅིག་”ཅེས་གསུངས་པས།
MAT 9:7 མི་དེ་ཡར་ལངས་ནས་ཁྱིམ་དུ་ཕྱིར་ལོག
MAT 9:8 མི་ཚོགས་ཀྱིས་དེ་མཐོང་ནས་ཡ་མཚན་གྱིས་ཁེངས་ཤིང༌། དེ་ལྟར་ཆེ་བའི་དབང་མི་རྣམས་ལ་གནང་མཁན་གྱི་དཀོན་མཆོག་ལ་བསྟོད་པ་ཕུལ།
MAT 9:9 ཡེ་ཤུ་ཕར་ཕེབས་པའི་དུས་སུ་མད་ཐཱ་ཞེས་ཟེར་བའི་མི་ཞིག་ཁྲལ་སྡུད་སར་བསྡད་ཡོད་པ་ཁོང་གིས་གཟིགས་ནས་ཁོ་ལ་“ཁྱེད་རང་ངའི་རྗེས་སུ་ཤོག་”ཅེས་གསུངས་པས། ཁོ་ཡར་ལངས་ཏེ་ཁོང་གི་རྗེས་སུ་འབྲངས།
MAT 9:10 ཡེ་ཤུས་ཁྱིམ་ནང་དུ་ཞལ་ལག་བཞེས་པའི་སྐབས་སུ། ཁྲལ་སྡུད་མཁན་དང་སྡིག་ཉེས་ཅན་མང་པོ་ཞིག་ཡོང་ནས་ཡེ་ཤུ་དང་ཁོང་གི་ཉེ་གནས་མཉམ་དུ་ཟས་ཟ་བཞིན་ཡོད།
MAT 9:11 དེ་ཕཱ་རུ་ཤི་པ་རྣམས་ཀྱིས་མཐོང་ནས་ཁོང་གི་ཉེ་གནས་རྣམས་ལ་“ཁྱོད་ཚོའི་སྟོན་པས་ཁྲལ་སྡུད་མཁན་དང་སྡིག་ཉེས་ཅན་རྣམས་དང་མཉམ་དུ་ཞལ་ལག་བཞེས་བཞིན་པ་འདི་ཅི་ཡིན་”ཞེས་ཟེར།
MAT 9:12 ཡེ་ཤུས་གཏམ་དེ་གསན་ནས་“ཁམས་བཟང་པོའི་མི་རྣམས་ལ་སྨན་པ་མི་དགོས་ཀྱི། ནད་པ་ཚོ་ལ་དགོས་སོ།
MAT 9:13 སོང་ལ། ང་ནི་མཆོད་པ་ལ་མི་དགའ་བར་སྙིང་རྗེའི་སེམས་ལ་དགའོ་ཞེས་གསུངས་པའི་དོན་གང་ཡིན་ཤེས་པར་གྱིས་ཤིག ང་རང་ནི་མི་དྲང་ལྡན་རྣམས་འབོད་དུ་ཡོང་བ་མ་ཡིན་གྱི། མི་སྡིག་ཅན་རྣམས་འབོད་དུ་ཡོང་བ་ཡིན་”ཞེས་གསུངས།
MAT 9:14 དེ་ནས་ཁྲུས་གསོལ་མཁན་ཡོ་ཧ་ནན་གྱི་སློབ་མ་འགའ་ཞིག་ཡོང་ནས་ཡེ་ཤུ་ལ་“ང་ཚོ་དང་ཕཱ་རུ་ཤི་པ་རྣམས་ཀྱིས་སྨྱུང་གནས་སྲུང་ཡང༌། ཁྱེད་ཀྱི་སློབ་མ་རྣམས་ཀྱིས་སྨྱུང་གནས་མི་སྲུང་བ་དེ་ཅི་ཡིན་”ཞེས་དྲིས།
MAT 9:15 ཡེ་ཤུས་ཁོ་ཚོར་“ཆང་སའི་སྐབས། མག་པའི་རོགས་པ་རྣམས་ཀྱིས་མག་པ་དང་མཉམ་དུ་ཡོད་དུས་མྱ་ངན་བྱེད་སྲིད་དམ། འོན་ཀྱང་མག་པ་ཁོ་ཚོ་དང་ཁ་འབྲལ་བའི་དུས་ལ་འབབ་ཡོང༌། དུས་དེར་ཁོ་ཚོས་སྨྱུང་གནས་སྲུང་ངེས་སོ།
MAT 9:16 མི་སུས་ཀྱང་རས་མཐུག་པོས་གོས་སྲབ་པོར་ལྷན་པ་མི་རྒྱག ལྷན་པ་བརྒྱབ་ན་རས་མཐུག་པོ་དེས་གོས་སྲབ་པོའི་སྲུབས་ཁ་ཇེ་ཆེར་འགྲོའོ།
MAT 9:17 ཡང་མི་སུ་ཞིག་ཡིན་ཡང་རྒུན་འབྲུམ་ཆང་གསར་པ་པགས་པའི་ཁུག་མ་རྙིང་པའི་ནང་བསྙལ་བར་མི་བྱ་སྟེ། གལ་ཏེ་བསྙལ་ཚེ་ཆང་འཕེལ་ནས་ཁུག་མ་རྙིང་པ་གས་ཏེ་ཆང་དང་ཁུག་མ་གཉིས་ཀ་འཕྲོ་བརླག་འགྲོ་བར་འགྱུར། རྒུན་འབྲུམ་ཆང་གསར་པ་དེ་ཁུག་མ་གསར་པའི་ནང་དུ་བླུགས་ནས་གཉིས་ཀ་འཕྲོ་བརླག་མ་འགྲོ་བར་གནས་”ཞེས་གསུངས།
MAT 9:18 ཁོང་གིས་ཁོ་ཚོར་དེ་ལྟར་གསུང་སྐབས་དེར་ཡ་ཧུ་དཱ་པའི་འདུ་ཁང་གི་དཔོན་པོ་ཞིག་འོངས་ནས་ཁོང་གི་ཞབས་ལ་གཏུག་སྟེ་“ངའི་བུ་མོ་ད་ལྟ་རང་ཤི་སོང༌། འོན་ཏེ་ཁྱེད་ཕེབས་ནས་ཁོ་མོའི་ལུས་སྟེང་ལ་ཕྱག་འཇོག་པར་མཛད་ན་དེ་ནས་ཁོ་མོ་གསོན་པར་འགྱུར་”ཞེས་ཞུས་ནས།
MAT 9:19 ཡེ་ཤུ་བཞེངས་ནས་ཉེ་གནས་དང་མཉམ་དུ་མི་དེའི་རྗེས་སུ་ཕེབས།
MAT 9:20 གློ་བུར་དུ་བུད་མེད་ལོ་བཅུ་གཉིས་ཀྱི་བར་དུ་ལུས་ནས་ཁྲག་འཛིར་བའི་ནད་ཕོག་པ་གཅིག་ཁོང་གི་རྒྱབ་ཏུ་ཡོང་ཞིང༌། ཁོང་གི་སྟོད་གོས་ཀྱི་མཐའ་འཛར་ལ་རེག
MAT 9:21 གང་ཡིན་ཞེ་ན། གལ་སྲིད་ངས་ཁོང་གི་ན་བཟའ་གཅིག་པུ་ལ་རེག་ན་ང་ནད་ལས་ཐར་འོང་བསམས།
MAT 9:22 ཡེ་ཤུས་སྐུ་ཕྱིར་འཁོར་ཏེ་ཁོ་མོར་གཟིགས་པ་དང་“བུ་མོ། བློ་བདེ་བར་གྱུར་ཅིག ཁྱོད་ཀྱི་དད་པས་ཁྱོད་རང་ནད་ལས་ཐར་བ་ཡིན་”ཞེས་གསུངས་མ་ཐག་ཁོ་མོ་ནད་ལས་ཐར་བར་གྱུར།
MAT 9:23 ཡེ་ཤུ་དཔོན་པོའི་ཁྱིམ་ལ་ཕེབས་དུས་ཁོང་གིས་གླིང་བུ་གཏོང་མཁན་དང༌། མི་ཚོགས་ཀྱིས་ཅ་ཅོ་འདོན་པ་གཟིགས་ནས།
MAT 9:24 ཁོང་གིས་ཁོ་རྣམས་ལ་“བུ་མོ་དེ་ཤི་མེད་པར་གཉིད་ཁུག་འདུག་པས་འདི་ནས་ཕར་སོང་ཞིག་”ཅེས་གསུངས་པས། ཁོ་ཚོས་ཁོང་ལ་ཁྲེལ་དགོད་བྱས།
MAT 9:25 འོན་ཀྱང་མི་ཚོགས་ཕྱི་རོལ་ཏུ་བཏོན་ནས་ཁོང་ཁྱིམ་ནང་དུ་ཕེབས་ཏེ་བུ་མོའི་ལག་པ་ནས་འཇུས་པས་བུ་མོ་ཡར་ལངས།
MAT 9:26 གནས་ཚུལ་འདི་ས་ཕྱོགས་དེའི་གང་སར་ཁྱབ།
MAT 9:27 ཡེ་ཤུ་དེ་ནས་ཕར་ཕེབས་པའི་ཚེ། མི་ལོང་བ་གཉིས་ཁོང་གི་རྗེས་སུ་འབྲངས་ཏེ་སྐད་ཆེན་པོས་“ཀྱེ་རྒྱལ་པོ་དཱ་བིད་ཀྱི་སྲས། ང་ཚོ་ལ་ཐུགས་རྗེས་གཟིགས་”ཞེས་ཞུས།
MAT 9:28 ཁོང་ཁྱིམ་ལ་ཞུགས་དུས་མི་ལོང་བ་དེ་གཉིས་ཁོང་གི་མདུན་དུ་ཡོང༌། ཁོང་གིས་ཁོ་ཚོར་“ངས་དོན་འདི་སྒྲུབ་པར་ཡིད་ཆེས་སམ་”ཞེས་གསུངས་པས་ཁོ་ཚོས་ཁོང་ལ་“གཙོ་བོ་ལགས། ཡིད་ཆེས་སོ་”ཞེས་སྨྲས།
MAT 9:29 དེ་ནས་ཁོང་གིས་ཁོ་ཚོའི་མིག་ཟུང་ལ་རེག་སྟེ་ཁོ་གཉིས་ལ་“ཁྱེད་ཚོའི་ཡིད་ཆེས་བཞིན་དུ་སྒྲུབ་པར་འགྱུར་”ཞེས་གསུངས་པས།
MAT 9:30 ཁོ་ཚོའི་མིག་ཕྱེ། ཡེ་ཤུས་ཁོ་ཚོར་“དོན་འདི་མི་གཞན་ལ་མ་ཤོད་ཅིག་”ཅེས་ནན་གྱིས་བསྐུལ་ཡང༌།
MAT 9:31 མི་དེ་གཉིས་ཕྱི་རོལ་ཏུ་ཐོན་པ་དང༌། གཏམ་མང་པོ་བཤད་པས་ཁོང་གི་སྙན་གྲགས་ཡུལ་དེའི་གང་སར་ཁྱབ།
MAT 9:32 ལོང་བ་དེ་གཉིས་ཕར་ཕྱིན་རྗེས་མི་གཞན་པས་གདོན་འདྲེས་བཟུང་ནས་སྐད་ཆ་ཤོད་མི་ཐུབ་པའི་མི་ཞིག་ཁོང་གི་མདུན་དུ་ཁྲིད།
MAT 9:33 ཡེ་ཤུས་གདོན་འདྲེ་དེ་ཕྱིར་བསྐྲད་རྗེས་ལྐུགས་པ་དེས་སྐད་ཆ་བཤད་པས་མི་ཚོགས་ཡ་མཚན་ཆེན་པོ་སྐྱེས་ནས་“ཡི་སི་ར་ཨེལ་ཡུལ་ལ་དེ་བཞིན་དུ་ནམ་ཡང་མ་མཐོང་”ཞེས་སྨྲས།
MAT 9:34 འོན་ཀྱང་ཕཱ་རུ་ཤི་པ་རྣམས་ཀྱིས་“བདུད་ཀྱི་རྒྱལ་པོ་ལ་བརྟེན་ནས་ཁོས་གདོན་འདྲེ་སྐྲོད་”ཅེས་སྨྲས།
MAT 9:35 དེ་ནས་ཡེ་ཤུ་གྲོང་ཁྱེར་དང་གྲོང་གསེབ་ཐམས་ཅད་བརྒྱུད་ནས་ཕེབས་ཏེ། ཁོ་ཚོའི་འདུ་ཁང་རྣམས་ལ་ཆོས་བསྟན་པ་དང༌། དཀོན་མཆོག་གི་རྒྱལ་སྲིད་ཀྱི་འཕྲིན་བཟང་བསྒྲགས་པ། ནད་རིགས་ཀུན་སེལ་བར་མཛད།
MAT 9:36 མི་ཚོགས་མང་པོ་ནི་རྫི་བོ་མེད་པའི་ལུག་དང་འདྲ་བར་རོགས་མེད་པ་དང་སྡུག་ཕོག་ཡོད་པར་གཟིགས་པས། ཁོང་གི་ཐུགས་ལ་སྙིང་རྗེ་འཁྲུངས།
MAT 9:37 ཉེ་གནས་རྣམས་ལ་“སྟོན་ཐོག་རྔ་རྒྱུ་མང་པོ་ཡོད་ཀྱང་ལས་ཀ་བྱེད་མཁན་མང་པོ་མེད་པས།
MAT 9:38 ལོ་ཏོག་གི་བདག་པོར་སྟོན་ཐོག་སྡུད་མཁན་རྣམས་རང་གི་ས་ཞིང་ལ་གཏོང་བར་ཞུས་ཤིག་”ཅེས་གསུངས་སོ། །
MAT 10:1 ཡེ་ཤུས་ཉེ་གནས་བཅུ་གཉིས་པོ་བོས་ནས་ཁོ་ཚོར་གདོན་འདྲེ་མི་གཙང་བ་སྐྲོད་པ་དང༌། ནད་རིགས་ཀུན་སེལ་བའི་དབང་ཆ་གནང༌།
MAT 10:2 སྐུ་ཚབ་བཅུ་གཉིས་པོའི་མིང་ནི། དང་པོ་སི་མོན་མིང་གཞན་པེ་ཏྲོ་ཡང་ཟེར་བ་དང༌། ཁོའི་གཅུང་པོ་ཨན་དྲི་ཡཱ། ཟེ་བད་ཡཱ་ཞེས་ཟེར་བའི་བུ་ཡ་ཀོབ་དང༌། ཁོའི་གཅུང་པོ་ཡོ་ཧ་ནན།
MAT 10:3 ཕི་ལིབ་དང༌། པར་ཐོ་ལོ་མཱ་དང༌། ཐོ་མཱ། ཁྲལ་སྡུད་མཁན་མད་ཐཱ། ཨལ་ཕཱ་ཞེས་པ་དེའི་བུ་ཡ་ཀོབ་དང༌། ཐཱ་ཨད་དེ་ཨ་སི།
MAT 10:4 རྒྱལ་གཅེས་པའི་ཕྱོགས་ཁག་གི་ཁོངས་མི་སི་མོན་དང༌། ཡེ་ཤུ་ལ་རྒྱབ་གཏོད་བྱེད་མཁན་ཡུ་དཱ་དབྱི་སི་ཀར་རེ་བཅས་ཡིན་ནོ། །
MAT 10:5 ཡེ་ཤུས་བཀའ་འདི་ལྟར་གནང་བའི་རྗེས་སུ་བཅུ་གཉིས་པོ་དེ་ཕྱི་རུ་མངགས་ཏེ་“ཡ་ཧུ་དཱ་པ་མིན་པའི་དཀྱིལ་ལའམ། ས་མར་ཡཱ་ཡུལ་གྱི་གྲོང་ཁྱེར་གང་ཞིག་ལ་མི་འགྲོ་བར།
MAT 10:6 ཡི་སི་ར་ཨེལ་གྱི་ཁྱིམ་གྱི་ལུག་བརླག་པ་རྣམས་ཀྱི་རྩ་ལ་སོང༌།
MAT 10:7 ལམ་བར་དུ་དཀོན་མཆོག་གི་རྒྱལ་སྲིད་འཐོན་ལ་ཉེ་བར་སླེབས་སོ་ཞེས་འཆད་དེ་འཕྲིན་བཟང་ཁྱབ་བསྒྲགས་བྱེད།
MAT 10:8 ནད་པ་གསོ་བར་བྱེད། གཤིན་པོ་རྣམས་སླར་གསོན་པར་བྱེད། མཛེ་ནད་ཅན་དག་པར་བྱེད། གདོན་འདྲེ་རྣམས་སྐྲོད། ཁྱེད་ཚོར་རིན་མེད་པར་ཐོབ་པས། རིན་མེད་པར་སྟེར།
MAT 10:9 ཁྱེད་ཀྱི་སྐེ་རགས་ལ་གསེར་རམ། དངུལ། ཟངས་མ་འཁྱེར་ཞིག
MAT 10:10 ཡང་ལམ་གྱི་ཕྱིར་ཁུག་མའམ། ཕྱི་གོས་འཐོལ་པ། ལྷམ། དབྱུག་པ་མ་འཁུར། གང་ཡིན་ཞེ་ན། ལས་བྱེད་མཁན་ལ་ཟས་འཐོབ་པར་འོས་སོ།
MAT 10:11 ཁྱེད་ཚོ་གྲོང་ཁྱེར་རམ། གྲོང་གསེབ་གང་དུ་ཞུགས་ནའང༌། དེའི་ནང་ཁྱིམ་ཚང་འོས་པ་ཞིག་བཙལ་ནས། གྲོང་ཚོ་དེ་ནས་ཁ་མ་བྲལ་བར་དུ་དེར་སྡོད།
MAT 10:12 ཁྱིམ་ཚང་དེར་འཛུལ་སྐབས་དེའི་ནང་མི་རྣམས་ལ་འཚམས་འདྲི་ཞུས།
MAT 10:13 ཁོ་ཚོ་འོས་པ་ཡིན་ན་ཁྱེད་ཀྱི་ཞི་བདེ་ཁོ་རྣམས་ལ་འབབ་པར་བྱེད། འོས་པ་མིན་ན་ཞི་བདེ་དེ་ཁྱེད་ལ་ཕྱིར་ལོག་ཡོང་དུ་འཇུག
MAT 10:14 སུ་ཞིག་གིས་ཁྱེད་ཚོར་གནས་ཚང་མི་གཏོང་ཞིང་ཁྱོད་ཚོས་ཆོས་བསྒྲགས་པ་ལའང་མི་ཉན་ན། ཁྱེད་ཚོ་ཁྱིམ་ཚང་ངམ་གྲོང་ཁྱེར་དེ་ནས་འཐོན་པའི་སྐབས་སུ། ཁོ་རྣམས་ལ་དོན་དེར་འགན་ཁུར་དགོས་པར་བདེན་དཔང་བྱེད་པའི་ཆེད་དུ་རྐང་པའི་ཐོག་གི་ས་རྡུལ་སྤྲུགས་ཤིག
MAT 10:15 ངས་ཁྱེད་ཚོར་བདེན་པར་ཟེར་རྒྱུར། ཁྲིམས་གཅོད་པའི་ཉིན་མོར་གྲོང་ཁྱེར་དེའི་ཉེས་ཆད་སཱ་དོམ་དང་གྷོ་མོ་ར་གྲོང་ཁྱེར་ལས་ལྗིད་བ་འཕོག་པར་འགྱུར།
MAT 10:16 ཉོན་ཞིག ངས་སྤྱང་ཀིའི་ཁྲོད་དུ་ལུ་གུ་ལྟར་ཁྱེད་ཚོ་མངག་པས། ཁྱེད་ཚོ་སྦྲུལ་ལྟར་མགོ་གྲུང་པོ་དང༌། ཕུག་རོན་ལྟར་གནོད་མེད་པར་འགྱུར་དགོས།
MAT 10:17 མི་རྣམས་ལ་དོགས་ཟོན་གྱིས་ཤིག ཁོ་ཚོས་ཁྱེད་ཚོ་ཁྲིམས་ར་ལ་གཏོད་ཅིང༌། ཡ་ཧུ་དཱ་པའི་འདུ་ཁང་ལ་བརྡུང་ངེས་ཡིན།
MAT 10:18 ཁོ་ཚོ་དང་ཡ་ཧུ་དཱ་པ་མིན་པ་རྣམས་ལ་དཔང་པོ་བྱེད་པའི་ཕྱིར། ངའི་དོན་དུ་ཁྱེད་ཚོ་ས་གནས་དཔོན་པོ་དང་རྒྱལ་པོ་རྣམས་ཀྱི་དྲུང་དུ་འཁྲིད་པར་འགྱུར།
MAT 10:19 ཁོ་ཚོས་ཁྱེད་རྣམས་གཏོད་པའི་སྐབས་སུ། ཁྱེད་ཚོས་གང་ཟེར་རམ་ཇི་ལྟར་ཟེར་དགོས་པ་དེར་སེམས་ཁྲལ་མ་བྱེད། གང་ལགས་ཤེ་ན། དེའི་དུས་སུ་ཁྱེད་ཚོས་གང་ཟེར་དགོས་པ་ནི་ཁྱེད་རྣམས་ལ་གནང་བར་འགྱུར།
MAT 10:20 རྒྱུ་མཚན་ནི་གསུང་མཁན་ཁྱེད་ཚོ་མ་ཡིན་ཏེ། ཁྱེད་ཀྱི་ཡབ་ཀྱི་དམ་པའི་ཐུགས་ཉིད་ཁྱེད་ཚོའི་ནང་དུ་བཞུགས་པ་དེ་ཡིན་ནོ།
MAT 10:21 གཅེན་གཅུང་གིས་གཅེན་གཅུང་དང༌། ཨ་ཕས་རང་གི་བུ་ཡང་གསོད་པའི་ཕྱིར་གཏད་པར་འགྱུར། ཕྲུ་གུ་རྣམས་ཀྱིས་ཀྱང་ཕ་མ་དགྲ་རུ་བཟུང་སྟེ་གསོད་དུ་འཇུག་པར་འགྱུར།
MAT 10:22 ཡང་ངའི་མིང་གི་དོན་དུ་མི་ཐམས་ཅད་ཀྱིས་ཁྱེད་ཚོ་ལ་སྡང་བར་བྱ། འོན་ཀྱང་ཚེའི་མཐའ་མཇུག་བར་དུ་བཟོད་པ་སྒོམ་མི་དེ་ལ་ཐར་པ་འཐོབ་ངེས་ཡིན་ནོ།
MAT 10:23 ཁོ་ཚོས་ཁྱེད་ཚོར་གྲོང་ཁྱེར་ཞིག་ལ་གནོད་པ་བྱེད་པའི་ཚེ་གྲོང་ཁྱེར་གཞན་ཞིག་ལ་བྲོས། ངས་ཁྱེད་ཚོར་བདེན་པར་ཟེར་རྒྱུར། ཁྱེད་ཡི་སི་ར་ཨེལ་གྱི་གྲོང་ཁྱེར་ཐམས་ཅད་འཁོར་མ་ཚར་བའི་སྔོན་ལ་མིའི་རིགས་ཀྱི་བུ་འབྱོན་པར་འགྱུར།
MAT 10:24 ཉེ་གནས་རང་གི་སློབ་དཔོན་ལས་ཆེ་བ་མ་ཡིན་ཞིང༌། གཡོག་པོ་རང་གི་དཔོན་པོ་ལས་གལ་ཆེ་བ་མ་ཡིན།
MAT 10:25 ཉེ་གནས་རང་གི་སློབ་དཔོན་དང༌། གཡོག་པོ་རང་གི་དཔོན་པོ་དང་འདྲ་བ་ཡིན་ན་ཆོག ཁྱིམ་བདག་ལ་པེ་ཨིལ་བཟི་པད་ཅེས་ཟེར་ན། ནང་མི་རྣམས་ལ་དེ་ལས་ལྷག་པར་སྨད་ར་གཏོང་བར་བྱེད།
MAT 10:26 དེའི་ཕྱིར་ཁོ་ཚོར་མ་འཇིགས་ཤིག གང་ཡིན་ཟེར་ན། སྦས་པ་ཡིན་པ་ཐམས་ཅད་མངོན་པར་འགྱུར་བ་དང༌། གསང་བ་ཡིན་པ་ཐམས་ཅད་ཀྱང་ཤེས་པར་འགྱུར།
MAT 10:27 ངས་ཁྱེད་རྣམས་ལ་མུན་པར་གང་བཤད་པ་དེ་ཁྱེད་ཚོས་འོད་ཀྱི་ནང་དུ་འཆད་ཅིང༌། གང་ཤུབ་ཤུབ་ཏུ་ཐོས་པ་དེ་ཁྱེད་ཚོས་ཁང་པའི་ཐོག་ཁ་ནས་སྒྲོག་ཅིག
MAT 10:28 ལུས་གསོད་ཀྱང་སེམས་གསོད་མི་ཐུབ་པ་རྣམས་ལ་མ་འཇིགས་ཤིག ལུས་སེམས་གཉིས་པོ་དམྱལ་ཁམས་སུ་མེད་པར་མཛད་ཐུབ་མཁན་ཁོང་ལ་འཇིགས་ཤིག
MAT 10:29 ཁང་བྱིའུ་གཉིས་ཟངས་ཀྱི་སྒོར་མོ་གཅིག་ལ་མི་འཚོང་ངམ། འོན་ཀྱང་ཁྱེད་ཚོའི་ཡབ་དཀོན་མཆོག་གི་དགོངས་པ་ལྟར་མིན་ན་དེ་རྣམས་ལས་གཅིག་ཀྱང་ས་ལ་མི་ལྷུང༌།
MAT 10:30 ཁྱེད་ཀྱི་མགོའི་སྐྲ་ཐམས་ཅད་ཀྱང་གྲངས་ཀ་བཀྱོན་ཡོད་པས།
MAT 10:31 མ་འཇིགས་ཤིག ཁང་བྱིའུ་མང་པོ་ལས་ཁྱེད་ཚོ་རིན་ཐང་ཆེའོ། །
MAT 10:32 དེའི་ཕྱིར་སུས་ཀྱང་མི་གཞན་གྱི་མདུན་དུ་ང་ཁས་ལེན་ན། ཞིང་ཁམས་སུ་བཞུགས་པའི་ངའི་ཡབ་ཀྱི་མདུན་དུ་ངས་ཀྱང་མི་དེ་ཁས་ལེན་བྱེད་པར་བྱ།
MAT 10:33 འོན་ཀྱང་སུས་མི་གཞན་གྱི་མདུན་དུ་ང་ཁས་མི་ལེན་ན། ཞིང་ཁམས་སུ་བཞུགས་པའི་ངའི་ཡབ་ཀྱི་མདུན་དུ་ངས་ཀྱང་མི་དེ་ཁས་ལེན་བྱེད་པར་མི་བྱ།
MAT 10:34 ང་ནི་ས་ལ་ཞི་བདེ་སྐྱེལ་བར་ཡོང་བ་ཡིན་མ་སོམས་ཤིག ཞི་བདེ་སྐྱེལ་བར་མ་ཡོང་གིས། རལ་གྲི་སྐྱེལ་བར་ཡོང༌།
MAT 10:35 བུ་དང་ཕ་གཉིས་མ་དང་བུ་མོ་གཉིས། ། མནའ་མ་སྒྱུག་མོ་བཅས་ནི་ཕན་ཚུན་བར། ། ཁ་གཏད་འགྱུར་ཕྱིར་ང་ནི་འདི་གར་འོངས། །
MAT 10:36 མི་ཞིག་སོ་སོའི་དགྲ་བོ་གང་ཡིན་པ། ། དེ་ནི་སོ་སོའི་ནང་མིའི་ཁྲོད་དུ་ཡོང༌། །
MAT 10:37 ང་ལས་ཕའམ་མ་གཅེས་པར་བཟུང་ན་ང་ལ་མི་འོས་ཤིང༌། ང་ལས་བུའམ་བུ་མོ་གཅེས་པར་བཟུང་ན་ང་ལ་མི་འོས་སོ།
MAT 10:38 ཡང་སུ་ཞིག་གིས་རང་གི་རྒྱང་ཤིང་མ་འཁུར་བར་ང་ཡི་རྗེས་སུ་འབྲངས་ན། དེ་ང་ལ་མི་འོས་སོ།
MAT 10:39 སུ་ཡང་རང་གི་སྲོག་ལ་ཆགས་པ་དེ་བརླག་པར་འགྱུར། སུ་ཡང་ངའི་དོན་དུ་རང་གི་སྲོག་བཏང་ན་དེ་སྐྱོབ་པར་འགྱུར་རོ། །”
MAT 10:40 “སུས་ཀྱང་ཁྱེད་ཚོ་བསུས་ན་མི་དེས་ངའང་བསུ་ཞིང༌། ང་རང་བསུ་བའི་མི་དེས་ང་མངག་མཁན་ཡང་བསུ།
MAT 10:41 སུས་ཀྱང་ལུང་སྟོན་པ་ཡིན་པས་ལུང་སྟོན་པ་ཞིག་བསུས་ན་མི་དེར་ལུང་སྟོན་པའི་བྱ་དགའ་འཐོབ་ངེས་ཡིན་ཞིང༌། སུས་ཀྱང་དྲང་ལྡན་གྱི་མི་ཞིག་ཡིན་པས་དྲང་ལྡན་གྱི་མི་བསུས་ན་མི་དེར་དྲང་ལྡན་གྱི་མིའི་བྱ་དགའ་འཐོབ་ངེས་ཡིན།
MAT 10:42 ངས་ཁྱེད་ཚོར་བདེན་པར་ཟེར་རྒྱུར། སུས་ཀྱང་ཉེ་གནས་ཡིན་པའི་ཆ་ནས་ཆུང་ངུ་འདིའི་ཁྲོད་ནས་མི་ཞིག་ལ་ཆུ་གྲང་མོ་ཕོར་པ་གང་སྟེར་མཁན་དེ་ལ་ཡང་བྱ་དགའ་བརླག་པར་མི་འགྱུར་རོ་”ཞེས་གསུངས་སོ། །
MAT 11:1 ཡེ་ཤུས་ཁོང་གི་ཉེ་གནས་བཅུ་གཉིས་པོ་ལ་སློབ་སྟོན་མཛད་ཟིན་རྗེས། ཁོ་ཚོའི་གྲོང་ཁྱེར་རྣམས་ལ་ཆོས་སྟོན་དང་འཕྲིན་སྒྲོག་པའི་ཕྱིར་ས་ཆ་དེ་ནས་ཕར་ཕེབས།
MAT 11:2 ཁྲུས་གསོལ་མཁན་ཡོ་ཧ་ནན་བཙོན་ཁང་ལ་ཡོད་དུས་མཱ་ཤི་ཀ་ཡིས་མཛད་པའི་བྱ་བའི་སྐོར་ཐོས་པས་ཁོའི་སློབ་མ་རྣམས་བཏང་སྟེ།
MAT 11:3 ཁོང་ལ་“ཁྱེད་འབྱོན་པར་འགྱུར་ཞེས་བྱ་བ་དེ་ཡིན་ནམ། ཡང་ན་ང་ཚོ་གཞན་ཞིག་སྒུག་པར་བྱ་”ཞེས་དྲིས།
MAT 11:4 ལན་དུ་ཡེ་ཤུས་“སོང་ལ། ཁྱེད་ཀྱིས་གང་ཐོས་པ་དང་མཐོང་བ་སྟེ།
MAT 11:5 ལོང་བས་མཐོང་བ། ཞ་བོ་འགྲོ་བ། མཛེ་ནད་ཅན་དག་པར་འགྱུར་བ། འོན་པས་ཐོས་པ། གཤིན་པོ་རྣམས་གསོན་པོར་ལངས་པར་འགྱུར་བ། དབུལ་ཕོངས་རྣམས་ལ་འཕྲིན་བཟང་སྒྲོག་པ་སོགས་ཡོ་ཧ་ནན་ལ་ཤོད་ཅིག
MAT 11:6 ངའི་རྐྱེན་གྱིས་དད་པ་མི་ཉམས་པ་ནི་བདེའོ་”ཞེས་གསུངས།
MAT 11:7 ཁོ་ཚོ་ཕར་སོང་དུས་ཡེ་ཤུས་མི་ཚོགས་ལ་ཡོ་ཧ་ནན་གྱི་སྐོར་འདི་ལྟར་གསུངས་“ཁྱེད་ཚོས་ཅི་ཞིག་ལྟ་རུ་དབེན་སྟོང་ལ་སོང༌། རླུང་གིས་གཡོ་བའི་འདམ་རྩྭ་ཞིག་ལྟ་རུ་སོང་ངམ།
MAT 11:8 འོ་ན་ཁྱེད་ཚོས་ཅི་ཞིག་ལྟ་རུ་སོང༌། མི་གོས་སྤུས་ལེགས་གྱོན་པ་ཞིག་ལ་ལྟ་རུ་སོང་ངམ། གོས་སྤུས་ལེགས་གྱོན་པ་རྣམས་ནི་རྒྱལ་པོའི་ཕོ་བྲང་ལ་སྡོད་མཁན་ཡིན།
MAT 11:9 ཁྱེད་ཚོས་ཅི་ཞིག་ལ་ལྟ་རུ་སོང༌། ལུང་སྟོན་པ་ཞིག་ལ་ལྟ་རུ་སོང་ངམ། དེ་ལགས་ཡིན། ངས་ཁྱེད་ཚོ་ལ་ཟེར་རྒྱུར། ལུང་སྟོན་པ་ལས་ལྷག་པ་ཞིག་ལ་ལྟ་རུ་སོང༌།
MAT 11:10 ཁོང་གི་སྐོར་ལ་དཀོན་མཆོག་གི་དམ་པའི་གསུང་རབ་ནང་དུ་འདི་ལྟར་གསུངས། ལྟོས་ཤིག ང་ཡི་ཕོ་ཉ་ཁྱེད་ཀྱི་མདུན་དུ་གཏོང༌། ། དེ་ཡིས་ཁྱེད་ཀྱི་ལམ་ནི་བསལ་བར་བྱ། ། ཞེས་གསུངས།
MAT 11:11 ངས་ཁྱེད་ཚོ་ལ་བདེན་པར་ཟེར་རྒྱུར། བུད་མེད་རྣམས་ལས་སྐྱེས་པའི་མི་ཐམས་ཅད་ཀྱི་ནང་ནས་ཁྲུས་གསོལ་མཁན་ཡོ་ཧ་ནན་ལས་ཆེ་བ་གཅིག་ཀྱང་མེད། འོན་ཀྱང་དཀོན་མཆོག་གི་རྒྱལ་སྲིད་ནང་ལ་མི་ཆུང་ཤོས་ཁོང་ལས་ཆེའོ།
MAT 11:12 ཁྲུས་གསོལ་མཁན་ཡོ་ཧ་ནན་གྱི་དུས་ནས་ད་ལྟ་བར་དཀོན་མཆོག་གི་རྒྱལ་སྲིད་ལ་རྒོལ་བའི་སྡུག་བསྔལ་མྱོང་བ་དང༌། རྒོལ་མཁན་རྣམས་ཀྱིས་བཙན་ཤེད་ཀྱིས་འཛིན།
MAT 11:13 རྒྱུ་མཚན་ནི་ལུང་སྟོན་པ་ཐམས་ཅད་དང༌། ཆོས་ཁྲིམས་ཀྱིས་ཡོ་ཧ་ནན་གྱི་དུས་བར་དུ་དཀོན་མཆོག་གི་རྒྱལ་སྲིད་ཀྱི་སྐོར་ལུང་བསྟན་ཞིང༌།
MAT 11:14 ཁྱེད་ཚོས་དང་ལེན་བྱེད་པར་འདོད་ན། ཡོ་ཧ་ནན་ནི་འབྱུང་རྒྱུ་ཡིན་པའི་ཨེ་ལི་ཡཱ་དེ་ཡིན་ནོ།
MAT 11:15 རྣ་བ་ཡོད་པ་རྣམས་ཀྱིས་ཉོན་ཅིག
MAT 11:16 ངས་གང་ཞིག་གིས་དུས་རབས་འདིའི་མི་རྣམས་ལ་སྡུར་བར་བྱ། དེ་ཚོ་ཁྲོམ་རར་སྡོད་པའི་ཕྲུ་གུ་རྣམས་ཀྱིས་རང་གི་གྲོགས་པོ་རྣམས་ལ་འབོད་དེ།
MAT 11:17 ཁྱོད་ཕྱིར་གླིང་བུ་བཏང་ན་ཡང༌། ། ཁྱོད་ཀྱིས་ཞབས་བྲོ་མ་བརྒྱབ་ལ། ། ཁྱོད་ཆེད་མྱ་ངན་གླུ་བླངས་ཀྱང༌། ། ཁྱོད་ཚོས་ངུ་བར་མ་བྱས་སོ། ། ཞེས་པ་དང་འདྲ་བ་ཡིན།
MAT 11:18 གང་ལགས་ཟེར་ན། ཡོ་ཧ་ནན་ཕེབས་དུས་ཟ་འཐུང་མི་བྱེད་པར་དེ་ཚོས་འདྲེ་ཞུགས་པ་ཞིག་ཡིན་ཞེས་སྨྲས།
MAT 11:19 མིའི་རིགས་ཀྱི་བུ་ཕེབས་དུས་ཟ་འཐུང་བྱེད་པར་དེ་ཚོས་ལྟོས་ཤིག ཁོ་ནི་ལྟོགས་རྔམ་ཅན་དང༌། ར་བཟི་ཅན། ཁྲལ་སྡུད་མཁན་དང་སྡིག་ཉེས་ཅན་གྱི་གྲོགས་པོ་ཞིག་ཡིན། འོན་ཀྱང་ཤེས་རབ་ནི་དེའི་བྱ་བ་ཡིས་ཡང་དག་པ་ཡིན་པར་ཁུངས་སྐྱེལ་ལོ་”ཞེས་གསུངས།
MAT 11:20 དེ་ནས་གྲོང་ཁྱེར་དེ་ཚོར་ཁོང་གིས་ངོ་མཚར་གྱི་མཛད་པ་མང་ཆེ་བ་མཛད་ཀྱང་སྤྱོད་པ་ངན་པ་སྤངས་ནས་སེམས་མི་སྒྱུར་བས། གྲོང་ཁྱེར་དེ་ཚོའི་མི་རྣམས་ལ་བཀའ་བཀྱོན་གནང་སྟེ་གསུངས་པ་
MAT 11:21 “གལ་ཏེ་གྲོང་ཁྱེར་ཐཱ་ཨེར་དང་ཚི་དོན་ལ་བྱུང་བའི་ངོ་མཚར་ཅན་གྱི་རྟགས་ཁྱོད་ཚོར་བྱུང་ཡོད་ན། དེ་ཚོ་སྔོན་ནས་སེམས་བསྒྱུར་བའི་རྟགས་སུ་ལུས་ལ་རྩྭ་རས་གྱོན་པ་དང་གོ་ཐལ་ཁྲོད་དུ་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བ་ཡིན་པས། ཀྱེ་ཀོ་ར་ཟིན་དང་པེ་སད་དཱ་པ་རྣམས། ཁྱོད་ཚོར་ཆད་པ་ཕོག་པར་འགྱུར་ངེས་ཡིན།
MAT 11:22 ངས་ཁྱོད་ཚོར་ཟེར་རྒྱུར། ཁྲིམས་གཅོད་བྱེད་པའི་ཉིན་མོར་ཁྱོད་རྣམས་ལས་ཐཱ་ཨེར་དང་ཚི་དོན་གཉིས་ལ་བཟོད་པར་སླ་བར་འགྱུར་རོ།
MAT 11:23 ཀྱེ་ཀ་ཕར་ན་ཧུམ་པ་རྣམས། ཁྱོད་ཞིང་ཁམས་སུ་འཕག་པར་འགྱུར་བ་ཡིན་ནམ། མ་ཡིན། ཁྱོད་དམྱལ་བའི་གཏིང་སར་འབེབས་པར་འགྱུར། རྒྱུ་མཚན་ནི་ཁྱོད་ཚོའི་མདུན་དུ་མཛད་པའི་ངོ་མཚར་བའི་དོན་སཱ་དོམ་གྲོང་ཁྱེར་དུ་བྱུང་ན། དེ་ད་ལྟའི་བར་དུ་གནས་པར་འགྱུར་ངེས་ཡིན།
MAT 11:24 ངས་ཁྱོད་ཚོར་ཟེར་རྒྱུར། ཁྲིམས་གཅོད་བྱེད་པའི་ཉིན་མོར་ཁྱོད་རྣམས་ལས་སཱ་དོམ་ས་ཁུལ་ལ་བཟོད་པར་སླ་བར་འགྱུར་རོ་”ཞེས་གསུངས།
MAT 11:25 དེའི་དུས་སུ་ཡེ་ཤུས་“ཀྱེ་ཡབ་འཇིག་རྟེན་ཁམས་ཀྱི་བདག་པོ་ལགས། ཁྱེད་ཀྱིས་དོན་འདི་རྣམས་ཤེས་ཡོན་དང་ལྡན་པ་ཡིན་སྙམ་པའི་མི་རྣམས་ལ་སྦས་པ་གནང་ནས་ཕྲུ་གུ་ལྟ་བུའི་རྣམས་ལ་མངོན་པར་མཛད་པས་ཁྱེད་ལ་བསྟོད་པ་འབུལ་ལོ།
MAT 11:26 ཡབ་ལགས། དེ་ནི་ཁྱེད་ཀྱི་ཐུགས་རྗེ་དང་ལྡན་པའི་དགོངས་པ་ཡིན་པས་སོ།
MAT 11:27 ངའི་ཡབ་ཀྱིས་ང་ལ་ཡོད་དོ་ཅོག་གཏད་བྱུང༌། ཡབ་མ་གཏོགས་པར་སྲས་སུ་ཡིན་པ་སུས་ཀྱང་མི་ཤེས། སྲས་དང༌། སྲས་ཀྱིས་སྟོན་པར་འདོད་པའི་མི་མ་གཏོགས་པར། ཡབ་སུ་ཡིན་པ་སུས་ཀྱང་མི་ཤེས།
MAT 11:28 ཁྱེད་ཡིད་ཐང་ཆད་པ་དང་ཁུར་ཆེན་གྱིས་གནོན་པ་ཐམས་ཅད་ངའི་རྩར་ཤོག ངས་ཁྱེད་ལ་ངལ་གསོ་སྟེར་བར་བྱ།
MAT 11:29 ངའི་གཉའ་ཤིང་འཁུར་ཞིང༌། ང་ལས་ཤེས་པར་གྱིས། ང་ནི་སེམས་དུལ་ཞིང་སྙེམས་ཆུང་ཡིན་པས་ཁྱེད་ཚོའི་སེམས་ལ་ངལ་གསོ་འཐོབ་པར་འགྱུར།
MAT 11:30 རྒྱུ་མཚན་ནི་ངའི་གཉའ་ཤིང་འཇམ་ཞིང་ངའི་ཁུར་ཡང་ཡང་མོ་ཡིན་པས་སོ་”ཞེས་གསུངས་སོ། །
MAT 12:1 དེའི་དུས་སུ་ངལ་གསོ་བའི་ཉིན་མོ་ཞིག་ལ་ཡེ་ཤུ་ཞིང་ཁ་ཞིག་བརྒྱུད་ནས་ཕེབས་སྐབས། ཁོང་གི་ཉེ་གནས་རྣམས་ལྟོགས་པས་འབྲུ་ཡི་སྙེ་མ་བཏོགས་ཏེ་ཟ་བཞིན་ཡོད།
MAT 12:2 ཕཱ་རུ་ཤི་པས་དེ་མཐོང་ནས་ཁོང་ལ་“ལྟོས་ཤིག ཁྱེད་ཀྱི་ཉེ་གནས་རྣམས་ཀྱིས་ངལ་གསོ་བའི་ཉིན་མོར་བྱེད་མི་ཆོག་པའི་ལས་བྱེད་བཞིན་ཡོད་”ཅེས་ཟེར།
MAT 12:3 ཁོང་གིས་ཁོ་ཚོར་“རྒྱལ་པོ་དཱ་བིད་དང་ཁོང་གི་འཁོར་གཡོག་རྣམས་ཀྱིས་ལྟོགས་པའི་ཚེ་ཅི་ཞིག་བྱས་པ་དེ་ཡང་ཁྱེད་ཚོས་བཀླགས་མ་མྱོང་ངམ།
MAT 12:4 ཁོང་དཀོན་མཆོག་གི་མཆོད་ཁང་ལ་ཕེབས་ཏེ་དཀོན་མཆོག་གི་སྐུ་མདུན་གྱི་བག་ལེབ་བླངས་ནས་འཁོར་གཡོག་དང་མཉམ་དུ་བཟས། བཀའ་ཁྲིམས་ལྟར་ན་བག་ལེབ་དེ་ཡ་ཧུ་དཱ་པའི་བླ་མ་རྣམས་ལས་གཞན་སུས་ཀྱང་ཟ་མི་ཆོག
MAT 12:5 ཡང་ན་ངལ་གསོ་བའི་ཉིན་མོར་མཆོད་ཁང་གི་བླ་མ་རྣམས་ཀྱིས་ངལ་གསོ་བའི་ཁྲིམས་དང་འགལ་ཡང་སྐྱོན་མེད་པ་ཡིན་པར་ཁྱེད་ཚོས་ཆོས་ཁྲིམས་ཀྱི་མདོ་ལ་བཀླགས་མ་མྱོང་ངམ།
MAT 12:6 ངས་ཁྱེད་ཚོར་ཟེར་རྒྱུར། མཆོད་ཁང་ལས་ཆེ་བ་ཞིག་འདིར་ཡོད།
MAT 12:7 ང་ནི་མཆོད་པ་ལ་མི་དགའ་བར་སྙིང་རྗེའི་སེམས་ལ་དགའོ་ཞེས་གསུངས་པའི་དོན་རྟོགས་པ་ཡིན་ན། ཁྱེད་ཚོས་སྐྱོན་མེད་པ་རྣམས་ལ་སྐྱོན་འདོགས་བྱས་མེད་དོ།
MAT 12:8 གང་ཡིན་ཞེ་ན། མིའི་རིགས་ཀྱི་བུ་ནི་ངལ་གསོ་བའི་ཉིན་གྱི་གཙོ་བོ་ཡིན་པས་སོ་”ཞེས་གསུངས།
MAT 12:9 ཡེ་ཤུ་ས་ཆ་དེ་ནས་ཐོན་ཏེ་ཡ་ཧུ་དཱ་པའི་འདུ་ཁང་ནང་དུ་ཕེབས།
MAT 12:10 ལག་པ་འཁུམས་པ་ཞིག་དེ་རུ་ཡོད་པས་ཁོ་ཚོས་ཡེ་ཤུ་ལ་སྐྱོན་འདོགས་བྱེད་པའི་ཕྱིར་ཁོང་ལ་“ངལ་གསོ་བའི་ཉིན་མོར་ནད་བཅོས་ཆོག་གམ་”ཞེས་དྲིས་པ་དང༌།
MAT 12:11 ཁོང་གིས་ཁོ་ཚོར་“ཁྱོད་ཚོའི་ནང་སུ་ཞིག་ལ་ལུག་གཅིག་ཡོད་པ་དེ་ངལ་གསོ་བའི་ཉིན་མོར་ས་དོང་ལ་ལྷུངས་ན་དེ་བཟུང་ནས་མི་འདོན་ནམ།
MAT 12:12 ལུག་གཅིག་ལས་མི་ནི་རིན་ཆེ་བས། ངལ་གསོ་བའི་ཉིན་མོར་ལས་བཟང་པོ་བྱེད་ཆོག་གོ་”ཞེས་གསུངས།
MAT 12:13 དེ་ནས་ཁོང་གིས་མི་དེར་“ལག་པ་རྐྱོངས་ཤིག་”ཅེས་གསུངས་ཏེ། ཁོས་ལག་པ་བརྐྱངས་ཤིང་ནད་གསོས་པར་གྱུར་བས་ལག་པ་ཡ་གཅིག་དང་འདྲ་བར་གྱུར།
MAT 12:14 དེ་ནས་ཕཱ་རུ་ཤི་པ་རྣམས་ཕྱི་ལ་སོང་ནས་ཡེ་ཤུ་དགྲོང་རྒྱུའི་ངན་ཇུས་བྱས་ཀྱང༌།
MAT 12:15 ཁོང་གིས་དེའི་སྐོར་མཁྱེན་ནས་ས་ཆ་དེ་དང་ཁ་བྲལ། མི་མང་པོ་ཞིག་ཁོང་གི་རྗེས་སུ་འབྲངས། ཁོང་གིས་ནད་པ་ཐམས་ཅད་གསོས་པར་མཛད་ཅིང༌།
MAT 12:16 མི་དེ་ཚོ་ལ་ཁོང་མངོན་པར་མི་བྱེད་པའི་བཀའ་གནང༌།
MAT 12:17 འདི་ནི་ལུང་སྟོན་པ་ཡེ་ཤ་ཡཱ་ཡི་ལུང་བསྟན་སྒྲུབ་པའི་ཆེད་དུ་ཡིན། ཁོང་གིས།
MAT 12:18 ལྟོས་དང་ང་ཡིས་བདམས་པའི་ཞབས་ཕྱི་ནི། ། ང་ཡི་གཅེས་པར་འོས་ལ་སེམས་ནས་དགའ། ། ང་ཡིས་ཐུགས་ཉིད་ཁོང་ལ་སྤྲོད་པར་བྱ། ། ཁོང་གིས་ཕྱི་པ་རྣམས་ལ་ཞལ་ལྕེ་བསྒྲག །
MAT 12:19 རྩོད་པར་མི་བྱེད་ཟང་ཟིང་སྒྲ་ཡང་མེད། ། སྲང་ལམ་ནང་ན་ཁོང་གི་གསུང་མི་ཐོས། །
MAT 12:20 ཆག་ལ་ཁད་ཀྱི་འདམ་སྨྱུག་གཅོག་མི་མཛད། ། ནུབ་ལ་ཁད་ཀྱི་སྒྲོན་མེ་མི་གསོད་དེ། ། དྲང་བདེན་ཁྲིམས་དེ་མཐའ་མཇུག་རྒྱལ་བའི་བར། །
MAT 12:21 ཁོང་གི་མཚན་ལ་ཕྱི་པས་རེ་བ་བྱེད། ། ཅེས་གསུངས།
MAT 12:22 དེའི་ཚེ་གདོན་འདྲེས་བཟུང་བས་སྐད་ཆ་ཤོད་མི་ཐུབ་པའི་ལོང་བ་ཞིག་ཡེ་ཤུའི་མདུན་དུ་འཁྲིད་པ་དང༌། ཁོང་གིས་ནད་བསལ་བར་མཛད་པས་མི་དེ་སྐད་ཆ་བཤད་ཐུབ་པ་དང་མཐོང་ཐུབ་པར་གྱུར།
MAT 12:23 མི་ཚོགས་ཡ་མཚན་ཆེན་པོ་སྐྱེས་ནས་“མི་འདི་རྒྱལ་པོ་དཱ་བིད་ཀྱི་སྲས་ཡིན་སྲིད་དམ་”ཞེས་སྨྲས།
MAT 12:24 ཕཱ་རུ་ཤི་པ་རྣམས་ཀྱིས་དེ་ཐོས་ནས་“བདུད་ཀྱི་རྒྱལ་པོ་པེ་ཨིལ་བཟི་པད་ལ་བརྟེན་ནས་ཁོས་གདོན་འདྲེ་སྐྲོད་”ཅེས་སྨྲས།
MAT 12:25 ཁོ་ཚོའི་བསམ་པ་མཁྱེན་ནས་ཡེ་ཤུས་ཁོ་ཚོར་“རྒྱལ་ཁམས་ཤིག་གི་ནང་ལ་ནང་འཁྲུག་བྱུང་ན་འཇིག་པར་འགྱུར་ལ། གྲོང་ཁྱེར་རམ་ཁྱིམ་ཚང་ནང་ལའང་ནང་འཁྲུག་བྱུང་ན་མི་གནས།
MAT 12:26 གལ་ཏེ་བདུད་སཱ་ཏན་གྱིས་སཱ་ཏན་བསྐྲད་ན། རང་ལ་ནང་འཁྲུག་བསླངས་པས་ཁོའི་རྒྱལ་ཁམས་ཅི་ལྟར་གནས།
MAT 12:27 གལ་ཏེ་ངས་པེ་ཨིལ་བཟི་པད་ལ་བརྟེན་ནས་གདོན་འདྲེ་བསྐྲད་ན། ཁྱོད་རྣམས་ཀྱི་བུ་ཡིས་སུ་ལ་བརྟེན་ནས་གདོན་འདྲེ་སྐྲོད་དམ། དེའི་ཕྱིར་ཁོ་ཚོས་ཁྱོད་ཚོར་ཁྲིམས་གཏོང་བར་འགྱུར་ངེས་ཡིན།
MAT 12:28 འོན་ཀྱང་ངས་དཀོན་མཆོག་གི་ཐུགས་ཉིད་ལ་བརྟེན་ནས་གདོན་འདྲེ་བསྐྲད་ན། དཀོན་མཆོག་གི་རྒྱལ་སྲིད་ཁྱོད་ཚོའི་རྩར་སླེབས་ཡོད།
MAT 12:29 ཡང་ན་མི་སྟོབས་ཤུགས་ཆེན་པོ་ཞིག་སྔོན་ལ་མ་བཅིངས་པར་དེའི་ཁང་པར་འཛུལ་ནས་ཅ་ལག་ཇི་ལྟར་འཕྲོག་ཐུབ། ཁོ་བཅིངས་ནས་ཁོའི་ཁང་པའི་ཅ་ལག་འཕྲོག་ཡོང༌།
MAT 12:30 སུས་ཀྱང་ང་ཡི་ཕྱོགས་མི་བྱེད་པ་དེས་ང་ལ་རྒོལ་ཞིང༌། སུས་ཀྱང་ང་དང་མཉམ་དུ་མི་སྡུད་པ་ནི་གཏོར་མཁན་ཡིན།
MAT 12:31 དེའི་ཕྱིར་ངས་ཁྱེད་ཚོར་ཟེར་རྒྱུར། སྡིག་པ་དང་དཀོན་མཆོག་ལ་སྐུར་བ་འདེབས་པ་ཐམས་ཅད་སེལ་བར་འགྱུར། འོན་ཀྱང་དཀོན་མཆོག་གི་དམ་པའི་ཐུགས་ཉིད་ལ་སྐུར་བ་འདེབས་མཁན་དེའི་སྡིག་ཉེས་སེལ་བར་མི་འགྱུར།
MAT 12:32 མིའི་རིགས་ཀྱི་བུ་ལ་ངན་སྨྲས་བྱེད་མཁན་དེའི་སྡིག་ཉེས་སེལ་བར་འགྱུར། འོན་ཀྱང་དཀོན་མཆོག་གི་དམ་པའི་ཐུགས་ཉིད་ལ་ངན་སྨྲས་བྱེད་མཁན་དེའི་སྡིག་ཉེས་ནི་ད་ལྟ་དང་མ་འོངས་པའི་དུས་སུ་སེལ་བར་མི་འགྱུར།
MAT 12:33 འབྲས་བུ་ལས་ཤིང་སྡོང་གང་ཡིན་ཤེས་པས། ཤིང་སྡོང་དང་འབྲས་བུ་གཉིས་ཀ་བཟང་པོ་རྩིས། ཡང་ན་ཤིང་སྡོང་དང་འབྲས་བུ་གཉིས་ཀ་ངན་པ་རྩིས།
MAT 12:34 དུག་སྦྲུལ་གྱི་རིགས་ཁྱོད་ཚོ། སེམས་ནང་གང་ཁེངས་ཡོད་པ་དེ་ཁ་ཡིས་བརྗོད་པས། ཁྱོད་ཚོ་ངན་པ་ཡིན་ཏེ་བཟང་པོ་ཅི་ལྟར་སྨྲ།
MAT 12:35 མི་བཟང་པོ་ཞིག་གིས་སེམས་ཀྱི་མཛོད་བཟང་པོ་ནས་བཟང་པོ་འདོན་པ་དང༌། མི་ངན་པ་ཞིག་གིས་སེམས་ཀྱི་མཛོད་ངན་པ་ནས་ངན་པ་འདོན།
MAT 12:36 ངས་ཁྱེད་ཚོར་ཟེར་རྒྱུར། ཁྲིམས་གཅོད་ཀྱི་ཉིན་མོར་མི་ཚོས་ཕན་མེད་པའི་ཚིག་རེ་རེའི་དོན་ལ་དཀོན་མཆོག་ལ་རྩིས་འབུལ་ཞུ་དགོས།
MAT 12:37 གང་ལགས་ཟེར་ན། ཁྱོད་ཀྱིས་སྨྲས་པའི་ཚིག་གིས་ཁྱོད་ཡང་དག་པར་རྩིས་ཤིང༌། ཁྱོད་ཀྱིས་སྨྲས་པའི་ཚིག་གིས་ཁྱོད་ཁྲིམས་གཅོད་གཏོང་བར་འགྱུར་”ཞེས་གསུངས།
MAT 12:38 དེ་ནས་ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་ཁ་ཤས་ཀྱིས་ཡེ་ཤུ་ལ་“སྟོན་པ་ལགས། ཁྱེད་ལས་ངོ་མཚར་བའི་རྟགས་ཤིག་མཐོང་བར་འདོད་”ཅེས་ཟེར།
MAT 12:39 ལན་དུ་ཁོང་གིས་“མི་རབས་འདི་ནི་ངན་པ་དང་ལོག་གཡེམ་ཅན་ཞིག་ཡིན་པས་ངོ་མཚར་བའི་རྟགས་ཤིག་མཐོང་བར་འདོད་ཀྱང༌། ལུང་སྟོན་པ་ཡོ་ནཱ་ཡི་རྟགས་མ་གཏོགས་པར་གཞན་ཅི་ཡང་སྟེར་བར་མི་འགྱུར།
MAT 12:40 ལུང་སྟོན་པ་ཡོ་ནཱ་ནི་ཉིན་གསུམ་དང་མཚན་གསུམ་ཉ་ཆེན་པོའི་གྲོད་ཁོག་ནང་ལ་བསྡད་པ་ལྟར། མིའི་རིགས་ཀྱི་བུ་ཡང་ཉིན་གསུམ་དང་མཚན་གསུམ་སའི་གཏིང་ལ་སྡོད་པར་འགྱུར།
MAT 12:41 ཁྲིམས་གཅོད་པའི་ཉིན་མོར་གྲོང་ཁྱེར་ནུ་ནེ་ཝཱ་ཡི་མི་རྣམས་ལངས་ནས་མི་རབས་འདིའི་མི་རྣམས་ལ་ཉེས་སྐྱོན་འདོན་པར་བྱ། གང་ལགས་ཤེ་ན། ལུང་སྟོན་པ་ཡོ་ནཱའི་གསུང་ཐོས་ནས་ཁོ་ཚོས་སྤྱོད་པ་ངན་པ་རྣམས་སྤངས་ནས་སེམས་བསྒྱུར། ལྟོས་ཤིག ད་ལྟ་ཡོ་ནཱ་ལས་ཆེ་བ་ཞིག་འདིར་ཡོད།
MAT 12:42 ཁྲིམས་གཅོད་པའི་ཉིན་མོར་ལྷོ་ཡུལ་གྱི་རྒྱལ་མོའང་ལངས་ནས་མི་རབས་འདིའི་མི་རྣམས་ལ་ཉེས་སྐྱོན་འདོན་པར་བྱ། གང་ཡིན་ཞེ་ན། རྒྱལ་པོ་སོ་ལོ་མོན་གྱི་ཤེས་རབ་ཐོས་པའི་ཕྱིར་ཁོ་མོ་ས་གཞིའི་མཐའ་ནས་ཡོང༌། ལྟོས་ཤིག ད་ལྟ་སོ་ལོ་མོན་ལས་ཆེ་བ་ཞིག་འདིར་ཡོད།
MAT 12:43 མི་ཞིག་ནས་གདོན་འདྲེ་མི་གཙང་བ་འཐོན་སྐབས། ཆུ་མེད་པའི་ས་བརྒྱུད་དེ་ཕྱིན་ནས་ངལ་གསོ་འཚོལ་ཡང་མ་རྙེད།
MAT 12:44 དེ་ནས་དེས་ང་ཐོན་པའི་ཁང་པ་དེ་ལ་ཕྱིར་ལོག་ཅེས་ཟེར། དེར་སླེབས་དུས་སྟོང་ཞིང་གད་བརྒྱབ་ནས་གཙང་བ་དང་ལེགས་པར་བསྒྲིགས་ཡོད་པ་མཐོང༌།
MAT 12:45 སོང་ནས་དེ་ལས་ཀྱང་ངན་པ་གདོན་འདྲེ་བདུན་རང་དང་མཉམ་དུ་ཁྲིད་དེ་ཁང་པ་དེར་འཛུལ་ནས་བསྡད། མི་དེའི་གནས་ཚུལ་སྔ་མ་ལས་ཕྱི་མ་སྡུག་གོ དེ་བཞིན་དུ་མི་རབས་ངན་པ་འདི་ལ་ཡང་འབྱུང་བར་འགྱུར་རོ་”ཞེས་གསུངས།
MAT 12:46 ཁོང་གིས་མི་ཚོགས་ལ་གསུང་བཞིན་པའི་ཚེ། ཁོང་གི་ཡུམ་དང་གཅུང་པོ་རྣམས་ཁོང་ལ་གླེང་བར་འདོད་དེ་ཕྱི་ལོགས་ལ་ལངས་ནས་བཞུགས།
MAT 12:47 མི་ཞིག་གིས་ཁོང་ལ་“གཟིགས་དང༌། ཁྱེད་ཀྱི་ཡུམ་དང་སྐུ་མཆེད་ཕྱི་ལོགས་ལ་ལངས་ནས་ཁྱེད་རང་ལ་གླེང་བར་འདོད་དེ་བཞུགས་འདུག་”ཅེས་སྨྲས།
MAT 12:48 ཁོང་གིས་དེ་སྨྲས་པའི་མི་ལ་ལན་དུ་“ངའི་མ་དང་ངའི་སྤུན་ནི་སུ་ཡིན་”ཞེས་གསུངས་ནས།
MAT 12:49 ཁོང་གི་ཉེ་གནས་རྣམས་ཀྱི་ཕྱོགས་སུ་ཕྱག་བརྐྱངས་ཏེ་“ལྟོས་དང༌། ངའི་མ་དང་ངའི་སྤུན་ཟླ་ནི་མི་འདི་ཚོ་ཡིན།
MAT 12:50 གང་ལགས་ཟེར་ན། དཀོན་མཆོག་གི་ཞིང་ཁམས་སུ་བཞུགས་པའི་ངའི་ཡབ་ཀྱི་དགོངས་པ་བཞིན་དུ་བྱེད་མཁན་ནི་ངའི་སྤུན་དང་སྲིང་མོ། མ་ཡིན་ནོ་”ཞེས་གསུངས་སོ། །
MAT 13:1 ཉིན་དེར་ཡེ་ཤུ་ཁང་པ་ནས་ཕེབས་ཏེ་མཚོའི་འགྲམ་དུ་བཞུགས།
MAT 13:2 མི་ཚོགས་ཆེན་པོ་ཞིག་ཁོང་གི་དྲུང་དུ་འཛོམས་པས་ཁོང་གྲུ་ཞིག་གི་ནང་དུ་བཞུགས་པ་དང༌། མི་ཚོགས་ཆ་ཚང་མཚོ་འགྲམ་ལ་བསྡད།
MAT 13:3 ཁོང་གིས་དཔེའི་སྒོ་ནས་ཆོས་མང་པོ་གསུངས་ཏེ་ཁོ་ཚོར་“ཉོན་དང༌། ས་བོན་འདེབས་མཁན་ཞིག་ས་བོན་འདེབས་པར་ཕྱིན།
MAT 13:4 ས་བོན་གཏོར་བའི་སྐབས་སུ། ས་བོན་ཁ་ཤས་ལམ་ཁར་འཐོར་བ་དེ་རྣམས་བྱ་འོངས་ནས་བཟས་པ་དང༌།
MAT 13:5 ཁ་ཤས་ནི་ས་མང་པོ་མེད་པའི་བྲག་གི་སྟེང་ལ་འཐོར་ཞིང་སའི་གཏིང་རིང་པོ་མེད་པས་ཡར་སྐྱེས་པ་མགྱོགས་ཀྱང༌།
MAT 13:6 ཉི་མ་ཤར་ནས་ཚིག་སྟེ་རྩ་བ་གཏིང་རིང་པོ་མེད་པས་བསྐམས།
MAT 13:7 ས་བོན་ཁ་ཤས་ཚེར་མའི་ནང་དུ་འཐོར་ཞིང་ཚེར་མ་སྐྱེས་ནས་སྒྲིབ་པས་ས་བོན་ཡར་མ་སྐྱེས།
MAT 13:8 ཡང་ས་བོན་ཁ་ཤས་ས་རྒྱུ་བཟང་པོའི་ནང་དུ་ཟགས་ནས་ཆེར་སྐྱེས་ཤིང་འབྲས་བུ་སྨིན་ཏེ། འབྲས་བུ་ཁ་ཤས་ལྡབ་བརྒྱ་དང༌། ཁ་ཤས་ལྡབ་དྲུག་ཅུ། ཁ་ཤས་ལྡབ་སུམ་ཅུ་བཅས་སྨིན།
MAT 13:9 རྣ་བ་ཡོད་པ་རྣམས་ཀྱིས་ཉོན་ཅིག་”ཅེས་གསུངས།
MAT 13:10 ཉེ་གནས་རྣམས་ཁོང་གི་དྲུང་དུ་འོངས་ནས་ཁོང་ལ་“ཁྱེད་ཀྱིས་ཁོ་ཚོར་དཔེའི་སྒོ་ནས་ཅིའི་ཕྱིར་གསུངས་”ཞེས་བཤད།
MAT 13:11 ལན་དུ་ཁོང་གིས་“དཀོན་མཆོག་གི་རྒྱལ་སྲིད་ཀྱི་གསང་བ་ཤེས་པ་དེ་ཁྱེད་ཚོ་ལ་གནང་བ་ཡིན། འོན་ཀྱང་ཁོ་ཚོ་ལ་གནང་བ་མ་ཡིན།
MAT 13:12 མི་སུ་ཞིག་ཐོས་པ་དང་རྟོགས་པ་འདོད་པ་དེ་ལ་སྟེར་བར་འགྱུར་ཞིང༌། ལྷག་པ་ཡོད་པར་འགྱུར། འོན་ཀྱང་རྟོགས་པ་མི་འདོད་པ་དེ་ལས་རྟོགས་པ་གང་ཡོད་པ་དེ་ཡང་ལེན་པར་འགྱུར་རོ།
MAT 13:13 དེའི་ཕྱིར་ངས་ཁོ་ཚོར་དཔེའི་སྒོ་ནས་སྨྲ། དེ་ནི་ཁོ་ཚོས་མཐོང་ཡང་མི་མཐོང་ཞིང༌། ཐོས་ཡང་མི་ཐོས་ཏེ་ཧ་མི་གོ་བའི་ཆེད་དུ་ཡིན།
MAT 13:14 ལུང་སྟོན་པ་ཡེ་ཤ་ཡཱ་ཡི་ལུང་བསྟན་ཁོ་རྣམས་ལ་སྒྲུབ་སྟེ། ཁྱོད་ཚོས་གོ་ཡང་གསལ་བར་མི་ཤེས་ལ། ། མཐོང་ཡང་དེ་དོན་རྟོགས་པར་མི་འགྱུར་རོ། །
MAT 13:15 མི་རིགས་འདིའི་སེམས་གྱོང་པོར་གྱུར་བས་སོ། ། རྣ་བ་ལྗིད་ཅིང་མིག་ཡང་བཙུམས་པས་ན། ། མིག་གིས་མ་མཐོང་རྣ་བས་མི་ཐོས་ཤིང༌། ། བློ་ཡིས་མི་རྟོགས་དེ་མིན་སེམས་བསྒྱུར་ནས། ། ང་ཡིས་དེ་ཚོ་གསོ་ཞིང་སྐྱོབ་པར་བྱེད། ། ཅེས་གསུངས།
MAT 13:16 འོན་ཀྱང་ཁྱེད་ཚོའི་མིག་གིས་མཐོང་བས་བདེ་ཞིང༌། ཁྱེད་ཚོའི་རྣ་བས་ཐོས་པས་བདེའོ།
MAT 13:17 ངས་ཁྱེད་རྣམས་ལ་བདེན་པར་ཟེར་རྒྱུར། ཁྱེད་ཀྱིས་གང་མཐོང་བ་དང་ཐོས་པ་ནི་ལུང་སྟོན་པ་དང་དྲང་ལྡན་པ་མང་པོས་དེ་མཐོང་བ་དང་ཐོས་པ་འདོད་ཀྱང་མ་མྱོང༌།”
MAT 13:18 “འོ་ན་ས་བོན་འདེབས་མཁན་གྱི་དཔེ་ལ་ཉོན་དང༌།
MAT 13:19 མི་ཞིག་གིས་དཀོན་མཆོག་གི་རྒྱལ་སྲིད་ཀྱི་བསྟན་པ་ཐོས་ནས་ཧ་མི་གོ་ན། བདུད་ཡོང་ནས་ཁོའི་སེམས་ལ་བཏབ་པའི་ས་བོན་ཕྲོགས་ནས་ཕར་འཁྱེར། འདི་ནི་ལམ་ཁར་འཐོར་བ་དེ་ཡིན།
MAT 13:20 ས་བོན་བྲག་ཡོད་པའི་ས་ལ་འཐོར་བ་ནི་དཀོན་མཆོག་གི་བཀའ་དེ་ཐོས་མ་ཐག་སེམས་དགའ་བའི་ངང་ནས་དང་ལེན་བྱེད་མཁན་ཡིན།
MAT 13:21 འོན་ཀྱང་རང་གི་སེམས་ནང་ལ་རྩ་བ་གཏིང་རིང་པོ་ཚུགས་མེད་པས་དུས་ཐུང་ངུ་ལ་གནས་ཀྱང་བཀའ་དེའི་དོན་དུ་སྡུག་བསྔལ་དང་གནོད་འཚེ་འབྱུང་མ་ཐག་ཏུ་ཁོའི་དད་པ་ལོག་པར་འགྱུར།
MAT 13:22 ཡང་ས་བོན་ཚེར་མའི་ནང་དུ་འཐོར་བ་ནི་དཀོན་མཆོག་གི་བཀའ་ཐོས་ཀྱང༌། འཚོ་བའི་སྐོར་གྱི་སེམས་ཁྲལ་དང་རྒྱུ་ནོར་གྱི་བསླུ་བྲིད་ཀྱིས་བཀའ་མནན་ནས་འབྲས་བུ་སྐྱེ་མི་ཐུབ་པ་དེ་ཡིན།
MAT 13:23 ས་བོན་ས་རྒྱུ་བཟང་པོ་ལ་འཐོར་བ་ནི་དཀོན་མཆོག་གི་བཀའ་ཐོས་ནས་རྟོགས་པའི་མི་དེ་ཡིན། འབྲས་བུ་སྨིན་ཏེ། འབྲས་བུ་ཁ་ཤས་ལྡབ་བརྒྱ་དང༌། ཁ་ཤས་ལྡབ་དྲུག་ཅུ། ཁ་ཤས་ལྡབ་སུམ་ཅུ་བཅས་སྨིན་”ཞེས་གསུངས།
MAT 13:24 དཔེ་གཞན་ཞིག་ཁོ་ཚོར་བསྟན་ཏེ་“དཀོན་མཆོག་གི་རྒྱལ་སྲིད་ནི་རང་གི་ཞིང་ཁར་ས་བོན་བཟང་པོ་འདེབས་མཁན་དང་འདྲ་བ་ཡིན།
MAT 13:25 འོན་ཀྱང་མི་རྣམས་གཉིད་ཁུག་དུས་ཁོའི་དགྲ་བོ་ཡོང་ནས་གྲོའི་ཁྲོད་དུ་རྩྭ་ངན་བཏབ་ནས་ཕར་སོང༌།
MAT 13:26 གྲོའི་མྱུ་གུ་ཐོན་ནས་འབྲས་བུ་སྨིན་སྐབས། རྩྭ་ངན་དེ་ཡང་མངོན།
MAT 13:27 ཞིང་བདག་གི་གཡོག་པོ་རྣམས་ཡོང་ནས་ཁོང་ལ། སྐུ་ཞབས་ལགས། ཁྱེད་ཀྱི་ཞིང་ཁར་ས་བོན་བཟང་པོ་མ་བཏབ་བམ། རྩྭ་ངན་འདི་ཚོ་གང་ནས་བྱུང་ཞེས་སྨྲས།
MAT 13:28 ལན་དུ་ཁོང་གིས་ཁོ་ཚོར་དགྲ་བོ་ཞིག་གིས་བྱས་པ་ཡིན་ཞེས་ཟེར། གཡོག་པོ་རྣམས་ཀྱིས་ཁོང་ལ། ང་ཚོ་ཕྱིན་ནས་རྩྭ་ངན་དགོག་པར་འདོད་དམ་ཞེས་སྨྲས།
MAT 13:29 བདག་པོས་དེ་ལྟར་མ་བྱེད་ཅིག གང་ཡིན་ཞེ་ན། གྲོ་དང་རྩྭ་ངན་གཉིས་ཀ་དགོག་ཉེན་ཡོད།
MAT 13:30 ལོ་ཏོག་མ་སྨིན་པའི་བར་དུ་དེ་གཉིས་མཉམ་དུ་སྐྱེ་རུ་ཆུག ཞིང་ཁ་རྔ་རན་པའི་དུས་སུ་ངས་རྔ་མཁན་རྣམས་ལ། སྔོན་ལ་རྩྭ་ངན་བསྒྲུགས་ནས་མེས་སྲེག་གཏོང་བའི་ཕྱིར་རྡོག་ཁྲེས་སུ་ཆིངས་ཤིག དེ་ནས་གྲོ་ངའི་བང་མཛོད་དུ་སྡུས་ཤིག་ཅེས་སྨྲ་བར་བྱ་”ཞེས་གསུངས།
MAT 13:31 ཡེ་ཤུས་དཔེ་གཞན་ཞིག་ཁོ་ཚོར་བསྟན་ཏེ་“དཀོན་མཆོག་གི་རྒྱལ་སྲིད་ནི་ཞིང་ཁར་བཏབ་པའི་ཡུངས་འབྲུ་རྡོག་པོ་གཅིག་དང་འདྲ་སྟེ།
MAT 13:32 ས་བོན་ཐམས་ཅད་ལས་ཆུང་ཡང༌། ཆེར་སྐྱེས་དུས་སྡུམ་རའི་སྔོ་ཚོད་གཞན་རྣམས་ལས་ཆེ་བར་ཆགས་ཏེ་རྩི་ཤིང་དུ་གྱུར་ཞིང༌། བྱིའུ་རྣམས་ཡོང་ནས་དེའི་ཡལ་གར་ཚང་བཟོ་”ཞེས་གསུངས།
MAT 13:33 ཁོང་གིས་དཔེ་གཞན་ཞིག་ཁོ་ཚོར་བསྟན་ཏེ་“དཀོན་མཆོག་གི་རྒྱལ་སྲིད་ནི་སྐྱུར་རྩི་དང་འདྲ་སྟེ། བུད་མེད་ཅིག་གིས་དེ་གྲོ་ཕྱེ་བྲེ་གསུམ་གྱི་ནང་ལ་བསྲེས་པ་དང༌། རྗེས་མ་ཕྱེ་ཐམས་ཅད་ལ་སྐྱུར་ལངས་”ཞེས་གསུངས།
MAT 13:34 ཡེ་ཤུས་དོན་དེ་ཐམས་ཅད་དཔེའི་སྒོ་ནས་མི་ཚོགས་ལ་གསུངས་ཏེ། དཔེ་མ་བསྟན་པར་ཁོ་ཚོར་ཅིའང་མ་གསུངས།
MAT 13:35 འདི་ནི་ལུང་སྟོན་པ་བརྒྱུད་ནས་གསུངས་པ་དེ་སྒྲུབ་པའི་ཆེད་དུ་ཡིན། ང་ཡི་ཁ་ནས་དཔེ་སྤྱད་དེ། ། འཇིག་རྟེན་བཀོད་ནས་ད་བར་གྱི། ། སྦས་པའི་དོན་རྣམས་བསྟན་པར་བྱ། ། ཞེས་གསུངས།
MAT 13:36 དེ་ནས་མི་ཚོགས་དང་ཁ་བྲལ་ཏེ་ཁོང་ཁང་པའི་ནང་ལ་ཕེབས། ཁོང་གི་ཉེ་གནས་རྣམས་ཁོང་གི་མདུན་དུ་འོངས་ནས་“ཞིང་ཁའི་རྩྭ་ངན་གྱི་དཔེ་ང་ཚོར་གསལ་བཤད་མཛད་རོགས་གནང་”ཞེས་ཞུས།
MAT 13:37 ཁོང་གིས་“ས་བོན་འདེབས་མཁན་ནི་མིའི་རིགས་ཀྱི་བུ་ཡིན།
MAT 13:38 ཞིང་ཁ་ནི་འཇིག་རྟེན་ཡིན། ས་བོན་བཟང་པོ་ནི་རྒྱལ་སྲིད་ཀྱི་བུ་རྣམས་ཡིན། རྩྭ་ངན་ནི་བདུད་ཀྱི་བུ་རྣམས་ཡིན།
MAT 13:39 རྩྭ་ངན་འདེབས་མཁན་ནི་བདུད་ཡིན་ཞིང༌། ལོ་ཏོག་གི་རྔ་བ་ནི་དུས་ཀྱི་མཐའ་མ་ཡིན། རྔ་མཁན་རྣམས་ནི་དཀོན་མཆོག་གི་ཕོ་ཉ་ཡིན།
MAT 13:40 རྩྭ་ངན་བསྒྲུགས་ནས་མེས་སྲེག་གཏོང་བ་བཞིན། དུས་ཀྱི་མཐའ་མ་ལ་ཡང་དེ་ལྟར་འབྱུང་བར་འགྱུར་ངེས་ཡིན།
MAT 13:41 མིའི་རིགས་ཀྱི་བུ་ཡིས་རང་གི་ཕོ་ཉ་མངགས་ཏེ་རང་གི་རྒྱལ་སྲིད་ཀྱི་ནང་ནས་ཁོ་ཚོས་སྡིག་པའི་རྒྱུ་དང་ངན་པ་བྱེད་མཁན་ཐམས་ཅད་བསྒྲུགས་ནས།
MAT 13:42 མེ་ལྕེ་དང་ལྡན་པའི་ཐབ་ལ་འཕེན་པར་འགྱུར། ས་ཆ་དེར་ངུ་ཞིང་སོ་ཁྲིག་ཁྲིག་བྱེད་པ་འབྱུང་བར་འགྱུར།
MAT 13:43 དེ་ནས་ཁོ་ཚོའི་ཡབ་ཀྱི་རྒྱལ་སྲིད་ལ་དྲང་ལྡན་པ་རྣམས་ནི་ཉི་མ་ལྟར་འཕྲོ་བར་འགྱུར། རྣ་བ་ཡོད་པ་རྣམས་ཀྱིས་ཉོན་ཅིག”
MAT 13:44 “དཀོན་མཆོག་གི་རྒྱལ་སྲིད་ནི་ཞིང་ཁར་སྦས་ཡོད་པའི་གཏེར་ཞིག་དང་འདྲ་བ་ཡིན། མི་ཞིག་གིས་གཏེར་དེ་རྙེད་ནས་ཡང་བསྐྱར་སྦས་པ་དང༌། དགའ་བའི་ངང་ནས་སོང་ཞིང༌། རང་ལ་ཡོད་པ་ཐམས་ཅད་བཙོངས་ནས་ཞིང་ཁ་དེ་ཉོས།
MAT 13:45 ཡང་དཀོན་མཆོག་གི་རྒྱལ་སྲིད་ནི་མུ་ཏིག་སྤུས་ལེགས་འཚོལ་བའི་ཚོང་དཔོན་ཞིག་དང་འདྲ་བ་ཡིན།
MAT 13:46 མུ་ཏིག་རིན་ཆེན་ཞིག་མཐོང་ནས་ཕར་ཕྱིན་ཞིང་རང་ལ་ཡོད་པ་ཐམས་ཅད་བཙོངས་ཏེ་ཉོས།”
MAT 13:47 “ཡང་དཀོན་མཆོག་གི་རྒྱལ་སྲིད་ནི་མཚོ་ནང་དུ་འཕེན་པའི་དྲ་རྒྱ་ཞིག་དང་འདྲ་བ་ཡིན། དེས་ཉ་རིགས་སྣ་ཚོགས་བསྡུས་ནས་
MAT 13:48 གང་སྟེ་མི་རྣམས་ཀྱིས་དྲ་རྒྱ་དེ་སྐམ་ས་ལ་དྲུད་ཅིང༌། ཉ་ལེགས་པོ་རྣམས་སྣོད་ལ་བཞག་ཅིང་ཉ་ཕན་མེད་རྣམས་དབྱུགས།
MAT 13:49 དུས་ཀྱི་མཐའ་མར་དེ་ལྟར་འབྱུང་བར་འགྱུར་ངེས་ཡིན། དཀོན་མཆོག་གི་ཕོ་ཉ་རྣམས་ཀྱིས་ངན་པ་རྣམས་དྲང་ལྡན་རྣམས་ཀྱི་ནང་ནས་དབྱེ་བ་འབྱེད་དེ།
MAT 13:50 མེ་ལྕེ་དང་ལྡན་པའི་ཐབ་ལ་འཕེན་པར་འགྱུར། ས་ཆ་དེར་ངུ་ཞིང་སོ་ཁྲིག་ཁྲིག་བྱེད་པ་འབྱུང་བར་འགྱུར།”
MAT 13:51 “ད་ཁྱེད་ཚོས་དོན་དེ་ཐམས་ཅད་ཧ་གོ་སོང་ངམ་”ཞེས་གསུངས་པས་ཁོ་ཚོས་ཁོང་ལ་“ཧ་གོ་སོང་”ཞེས་སྨྲས།
MAT 13:52 ཁོང་གིས་ཁོ་རྣམས་ལ་“ཆོས་ཁྲིམས་ལ་མཁས་པའི་མི་དཀོན་མཆོག་གི་རྒྱལ་སྲིད་ཀྱི་ཉེ་གནས་སུ་འགྱུར་མཁན་རེ་རེ་ནི་རང་གི་གཏེར་མཛོད་ནས་དངོས་པོ་གསར་པ་དང་རྙིང་པ་གཉིས་འདོན་པའི་ཁྱིམ་བདག་གཅིག་དང་འདྲ་བ་ཡིན་ནོ་”ཞེས་གསུངས།
MAT 13:53 དཔེ་དེ་རྣམས་བསྟན་ཚར་ནས་ཡེ་ཤུ་ས་ཆ་དེ་ནས་ཕར་ཕེབས།
MAT 13:54 རང་གི་ཕ་ཡུལ་དུ་བྱོན་ནས་ཁོང་གིས་ཡ་ཧུ་དཱ་པའི་འདུ་ཁང་ནང་ལ་ཆོས་གསུངས། ཁོང་ལ་ཉན་མཁན་རྣམས་ཧ་ལས་ཏེ་“མི་འདི་ལ་འདི་ལྟ་བུའི་ཤེས་རབ་དང་ནུས་མཐུ་གང་ནས་བྱུང་བ་ཡིན།
MAT 13:55 ཁོ་ནི་ཤིང་བཟོ་བའི་བུ་མ་ཡིན་ནམ། ཁོའི་མ་མིར་ཡམ་ཟེར་མཁན་མ་ཡིན་ནམ། ཡང་ཁོའི་གཅུང་པོ་ཡ་ཀོབ་དང༌། ཡོ་སེབ། སི་མོན། ཡུ་དཱ་བཅས་མ་ཡིན་ནམ།
MAT 13:56 ཁོའི་སྲིང་མོ་རྣམས་ཀྱང་ཡུལ་འདིར་ང་ཚོ་དང་མཉམ་དུ་བསྡད་ཡོད་པ་མ་ཡིན་ནམ། འོ་ན་མི་འདི་ལ་དེ་ཐམས་ཅད་གང་ནས་བྱུང་བ་ཡིན་”ཞེས་ཟེར་བས།
MAT 13:57 ཁོ་ཚོས་ཁོང་རྩིས་མེད་བཏང་ངོ༌། འོན་ཀྱང་ཡེ་ཤུས་ཁོ་རྣམས་ལ་“ལུང་སྟོན་པ་ལ་རང་ཡུལ་གྱི་མི་དང་གཉེན་ཉེ་ལ་མ་གཏོགས་པར་རྩིས་མེད་མི་འབྱུང་”ཞེས་གསུངས།
MAT 13:58 ཁོ་ཚོས་དད་པ་མ་བྱས་པས་ཁོང་གིས་ས་ཆ་དེར་ངོ་མཚར་གྱི་མཛད་པ་མང་པོ་མ་མཛད་དོ། །
MAT 14:1 དེའི་ཚེ་ས་གནས་དཔོན་པོ་ཧེ་རོ་དཱེ་ཡིས་ཡེ་ཤུའི་སྐོར་གྱི་གཏམ་ཐོས་ནས།
MAT 14:2 ཁོའི་གཡོག་པོ་རྣམས་ལ་“མི་དེ་ནི་ཁྲུས་གསོལ་མཁན་ཡོ་ཧ་ནན་གཤིན་པོ་ནས་གསོན་པོར་ལངས་སུ་གྱུར་བ་དེ་ཡིན་པས། ཁོང་ལ་ནུས་མཐུ་འདི་ལྟར་ལྡན་”ཞེས་སྨྲས།
MAT 14:3 དེ་སྔོན་ཧེ་རོ་དཱེ་ཡིས་རང་གི་གཅུང་པོ་ཕི་ལིབ་ཀྱི་བཟའ་ཟླ་ཧེ་རོད་ཡཱ་ཟེར་བ་དེ་རང་གི་བཟའ་ཟླར་བླངས་པའི་རྐྱེན་གྱིས། ཡོ་ཧ་ནན་གྱིས་ཧེ་རོ་དཱེ་ལ་“དཀོན་མཆོག་གི་བཀའ་ཁྲིམས་ལྟར་ན་ཁྱེད་ཀྱིས་རང་གི་གཅུང་པོའི་བཟའ་ཟླ་ལེན་མི་ཆོག་”ཅེས་གསུངས་པས། ཧེ་རོ་དཱེ་ཡིས་ཡོ་ཧ་ནན་བཟུང་སྟེ་བསྡམས་ནས་བཙོན་ཁང་ལ་བཅུག
MAT 14:5 ཧེ་རོ་དཱེ་ཡིས་ཡོ་ཧ་ནན་གསོད་པར་འདོད་ཀྱང༌། ཡུལ་མི་རྣམས་ཀྱིས་ཡོ་ཧ་ནན་ལུང་སྟོན་པར་རྩིས་པས་ཧེ་རོ་དཱེ་ཡིས་དེ་རྣམས་ལ་འཇིགས།
MAT 14:6 དེ་ནས་ཧེ་རོ་དཱེ་ཡི་སྐྱེ་སྐར་གྱི་ཉིན་མོར་ཧེ་རོད་ཡཱའི་བུ་མོས་ཧེ་རོ་དཱེ་དང་ཁོའི་མགྲོན་པོའི་མདུན་དུ་ཞབས་བྲོ་འཁྲབ་པས་ཧེ་རོ་དཱེ་དགའ་བར་གྱུར་བ་དང༌།
MAT 14:7 ཁོ་མོས་གང་ཞུས་པའང་སྟེར་བའི་མནའ་བསྐྱལ།
MAT 14:8 རང་གི་མ་ཡིས་བསྐུལ་བས་ཁོ་མོས་“ཁྲུས་གསོལ་མཁན་ཡོ་ཧ་ནན་གྱི་མགོ་བོ་སྡེར་མའི་ནང་དུ་བཞག་ནས་ང་ལ་གནང་བར་མཛོད་”ཅེས་ཟེར།
MAT 14:9 ཧེ་རོ་དཱེའི་སེམས་སྐྱོ་ནའང་མགྲོན་པོ་རྣམས་ཀྱི་མདུན་ལ་མནའ་བསྐྱལ་ཡོད་པའི་ཕྱིར་བཀའ་གཏང་སྟེ།
MAT 14:10 སྲུང་དམག་ཞིག་བཏང་ནས་བཙོན་ཁང་དུ་ཡོ་ཧ་ནན་གྱི་དབུ་བཅད།
MAT 14:11 དབུ་དེ་སྡེར་མའི་ནང་དུ་བཞག་ནས་ཁྱེར་ཡོང་སྟེ་བུ་མོ་ལ་བྱིན་པ་དང༌། ཁོ་མོས་རང་གི་ཨ་མ་ལ་སྤྲད།
MAT 14:12 ཡོ་ཧ་ནན་གྱི་སློབ་མ་རྣམས་ཡོང་སྟེ་ཁོང་གི་སྐུ་ཕུང་ཁུར་ནས་དུར་ཁང་དུ་བཞག་པ་དང༌། ཡེ་ཤུ་ལ་གཏམ་དེ་ཞུ་བའི་ཕྱིར་སོང༌།
MAT 14:13 ཡེ་ཤུས་གཏམ་དེ་གསན་པས་གྲུ་ལ་བཞུགས་ནས་མི་གཞན་མེད་པའི་དབེན་གནས་ཤིག་ལ་ཕེབས། ཡུལ་མི་རྣམས་ཀྱིས་དེའི་སྐོར་ཐོས་པས་གྲོང་ཁྱེར་རྣམས་ནས་གོམ་པ་སྤོས་ཏེ་ཁོང་གི་རྗེས་སུ་འབྲངས།
MAT 14:14 ཁོང་གྲུ་ལས་བབས་དུས་མི་ཚོགས་མང་པོ་གཟིགས་པས། ཐུགས་བརྩེ་བའི་ངང་ནས་ཁོ་ཚོའི་ཁྲོད་ཀྱི་ནད་པའི་ནད་རྣམས་སེལ་བར་མཛད།
MAT 14:15 དགོང་མོ་ཆགས་དུས་ཉེ་གནས་རྣམས་ཁོང་གི་དྲུང་དུ་འོངས་ནས་ཁོང་ལ་“ས་ཆ་འདི་དབེན་སྟོང་ཡིན་ཞིང་ཉི་མ་ཡང་ནུབ་ལ་ཉེ་བས། མི་ཚོགས་ཡུལ་སྡེ་རྣམས་ལ་རང་རང་གི་ཟས་ཉོ་རུ་དགོངས་པ་གནང་རོགས་”ཞེས་སྨྲས།
MAT 14:16 འོན་ཀྱང་དེའི་ལན་དུ་ཡེ་ཤུས་“ཕར་འགྲོ་མི་དགོས། ཁྱེད་ཚོས་ཁོ་ཚོར་ཟས་སྟེར་ཞིག་”ཅེས་གསུངས།
MAT 14:17 ཁོ་ཚོས་ཁོང་ལ་“ང་ཚོར་འདིར་བག་ལེབ་ལྔ་དང་ཉ་ཤ་གཉིས་ལས་མེད་”ཅེས་ཟེར།
MAT 14:18 ཁོང་གིས་“དེ་ཚོ་ངའི་རྩར་འཁུར་ཤོག་”ཅེས་གསུངས་ནས།
MAT 14:19 ཁོང་གིས་མི་ཚོགས་ལ་རྩྭའི་སྟེང་ལ་སྡོད་དགོས་པའི་བཀའ་གནང་ཞིང༌། བག་ལེབ་ལྔ་དང་ཉ་ཤ་གཉིས་པོ་དེ་ཕྱག་ཏུ་བསྣམས་ཏེ་དཀོན་མཆོག་གི་ཞིང་ཁམས་ལ་ཡར་གཟིགས་ཤིང་དཀོན་མཆོག་ལ་བཀའ་དྲིན་ཆེ་ཞུས་རྗེས། བག་ལེབ་དུམ་བུར་བཟོས་ནས་ཉེ་གནས་རྣམས་ལ་གནང་སྟེ་ཁོ་ཚོས་མི་ཚོགས་ལ་སྟེར།
MAT 14:20 མི་ཚང་མས་བཟས་ནས་འགྲངས་ཏེ། ཟས་ལྷག་བསྡུས་པའི་རྗེས་སུ་བག་ལེབ་ཆག་དུམ་གྱིས་སླེ་པོ་བཅུ་གཉིས་ཁེངས།
MAT 14:21 ཟས་ཟ་མཁན་བུད་མེད་དང་ཕྲུ་གུ་མ་བརྩིས་པར་སྐྱེས་པ་ལྔ་སྟོང་ཙམ་ཡོད་པ་ཡིན།
MAT 14:22 དེ་མ་ཐག་ཡེ་ཤུས་ཉེ་གནས་རྣམས་གྲུ་ལ་སྡོད་དུ་བཅུག་སྟེ། ཁོང་གི་སྔོན་དུ་མཚོའི་ཕ་རོལ་གྱི་ཕྱོགས་སུ་སོང་ཞིག་ཅེས་གསུངས་ནས་མི་ཚོགས་ཕར་བཏང་གནང་ངོ༌།
MAT 14:23 དེ་ལྟར་མཛད་པའི་རྗེས་སུ་སྨོན་ལམ་འདེབས་པའི་ཕྱིར་ཁོང་གཅིག་པུར་རི་ལ་ཡར་ཕེབས། ཉི་མ་ནུབ་པའི་དུས་སུ་དེར་ཁོང་གཅིག་པུ་ཡིན།
MAT 14:24 དེའི་སྐབས་གྲུ་ནི་སྐམ་ས་ནས་ཐག་རིང་ལ་སླེབས་ཡོད། ལྷགས་པ་གྲུའི་མདུན་ཕྱོགས་ནས་བརྒྱབ་པས་རྦ་རླབས་ཀྱིས་དཀྲུགས།
MAT 14:25 མཚན་མོ་ཐུན་བཞི་པ་ཙམ་ལ་ཁོང་མཚོའི་སྟེང་ལ་ཞབས་ཀྱིས་འཆག་སྟེ་ཁོ་ཚོའི་རྩར་ཕེབས།
MAT 14:26 དེ་མཐོང་བས་ཉེ་གནས་རྣམས་འཇིགས་ཤིང་སྐྲག་པར་གྱུར་ནས་“གདོན་འདྲེ་ཞིག་འདུག་”ཅེས་འཇིགས་པས་སྐད་ཤོར་མ་ཐག
MAT 14:27 ཡེ་ཤུས་ཁོ་ཚོར་“ཁྱེད་ཚོའི་སེམས་བདེ་བར་བྱོས། ང་རང་ཡིན་པས་འཇིགས་མི་དགོས་”ཞེས་གསུངས།
MAT 14:28 པེ་ཏྲོས་ཁོང་ལ་“གཙོ་བོ་ལགས། ཁྱེད་རང་ཡིན་ན། ང་ལ་ཆུའི་སྟེང་དུ་ཁྱེད་ཀྱི་རྩར་ཡོང་དགོས་པའི་བཀའ་གནང་དང་”ཞེས་ཟེར་བས།
MAT 14:29 ཁོང་གིས་“ཚུར་ཤོག་”ཅེས་གསུངས་པས་པེ་ཏྲོ་གྲུ་ནས་བབས་ཤིང༌། ཆུའི་སྟེང་ལ་གོམ་པ་བརྒྱབ་སྟེ་ཁོང་གི་རྩར་ཕྱིན།
MAT 14:30 འོན་ཀྱང་ལྷགས་པ་དྲག་པོ་རྒྱག་པ་མཐོང་བས་འཇིགས་ཏེ་ཆུའི་ནང་ལ་ནུབ་འགྲོ་བའི་ཚེ། ཁོས་སྐད་ཆེན་པོས་“གཙོ་བོ་ལགས། ང་སྐྱོབ་རོགས་གནང་”ཞེས་ཞུས་མ་ཐག
MAT 14:31 ཡེ་ཤུས་རང་གི་ཕྱག་བརྐྱངས་ཏེ་ཁོ་བཟུང་ཞིང་ཁོ་ལ་“དད་ཆུང་བ་ཁྱོད། ཅིའི་ཕྱིར་ཐེ་ཚོམ་བྱས་”ཞེས་གསུངས།
MAT 14:32 ཁོང་རྣམས་གྲུའི་ནང་ལ་ཞུགས་པའི་སྐབས་སུ་རླུང་འཇགས།
MAT 14:33 གྲུའི་ནང་ལ་ཡོད་པ་རྣམས་ཀྱིས་ཁོང་ལ་བསྙེན་བཀུར་ཞུས་ཏེ་“ཁྱེད་རང་ནི་བདེན་པར་དཀོན་མཆོག་གི་སྲས་ཡིན་ནོ་”ཞེས་བཤད།
MAT 14:34 ཁོང་རྣམས་མཚོ་བརྒལ་ནས་གན་ནེ་སཱ་རེལ་ཞེས་པའི་ས་ཆར་སླེབས།
MAT 14:35 དེར་ཡོད་པའི་མི་རྣམས་ཀྱིས་ཁོང་ངོ་ཤེས་རྗེས། མཐའ་སྐོར་གྱི་ཡུལ་ཐམས་ཅད་ལ་མི་བཏང་སྟེ་ནད་པ་ཚང་མ་ཁོང་གི་མདུན་དུ་ཁྲིད་ཅིང༌།
MAT 14:36 ཡེ་ཤུ་ལ་ཁོང་གི་ན་བཟའི་ཟུར་ཙམ་ལ་རེག་པར་གནང་དུ་གསོལ་ཞེས་ཞུ་བ་ཆེན་པོ་ཕུལ་བས། ཁོང་གི་ན་བཟའ་ལ་རེག་པའི་ནད་པ་ཐམས་ཅད་ནད་ལས་ཐར་བར་གྱུར་རོ། །
MAT 15:1 དེའི་ཚེ་ཕཱ་རུ་ཤི་པ་དང་ཡ་ཧུ་དཱ་པའི་ཆོས་ལ་མཁས་པའི་མི་ཁ་ཤས་རྒྱལ་ས་ཡེ་རུ་ཤ་ལེམ་ནས་འོངས་ཤིང་ཁོང་ལ་
MAT 15:2 “ཁྱེད་ཀྱི་ཉེ་གནས་རྣམས་ཀྱིས་ཁ་ལག་མ་ཟ་གོང་ལ་ལག་པ་མི་འཁྲུད་པར་རྒན་པོའི་ལུགས་སྲོལ་ལས་ཅིའི་ཕྱིར་རྒལ་”ཞེས་ཟེར།
MAT 15:3 ལན་དུ་ཁོང་གིས་“ཁྱོད་ཚོས་རང་གི་ལུགས་སྲོལ་སྲུང་བའི་ཆེད་ཅིའི་ཕྱིར་དཀོན་མཆོག་གི་བཀའ་དང་འགལ་ལམ།
MAT 15:4 དཔེར་ན་དཀོན་མཆོག་གིས་རང་གི་ཕ་མ་གཉིས་ལ་བརྩི་བཀུར་གྱིས་ཞེས་དང༌། ཕ་མ་ལ་ཚིག་ངན་སྨྲ་མཁན་དེ་སྲོག་གཅོད་པར་འགྱུར་དགོས་ཞེས་གསུངས།
MAT 15:5 འོན་ཀྱང་ཁྱོད་ཚོས་སུ་ཞིག་གིས་རང་གི་ཕ་མ་ལ་ངས་ཁྱེད་ལ་ཕན་ཐོགས་ཆེད་སྤྲོད་པ་འདི་ནི་དཀོན་མཆོག་ལ་ཕུལ་ཟིན་ནོ་ཞེས་བཤད་ནས།
MAT 15:6 རང་གི་ཕ་ལ་བརྩི་བཀུར་བྱེད་མི་དགོས་པར་བཤད། དེའི་སྒོ་ནས་ཁྱོད་ཚོས་རང་གི་ལུགས་སྲོལ་སྲུང་བའི་ཕྱིར་དཀོན་མཆོག་གི་བཀའ་སྟོང་བར་བྱེད།
MAT 15:7 ཁ་བཤད་དོན་ལ་མི་གནས་པ་ཁྱོད་ཚོའི་སྐོར་ལ་ལུང་སྟོན་པ་ཡེ་ཤ་ཡཱ་ཡིས་ལེགས་པར་ལུང་བསྟན་ཏེ།
MAT 15:8 མི་རྒྱུད་འདི་ཡིས་ངག་ནས་ང་བཀུར་ཡང༌། ། ཁོ་ཚོའི་སེམས་ནི་ང་དང་ཡོངས་སུ་བྲལ། །
MAT 15:9 མི་ཡིས་བརྩམས་པའི་བསླབ་བྱ་རང་ལ་སྟོན། ། དེ་འདྲའི་བསྙེན་བཀུར་ང་ལ་བྱེད་དོན་མེད། །” ཅེས་གསུངས།
MAT 15:10 དེ་ནས་ཡེ་ཤུས་མི་ཚོགས་རང་གི་མདུན་དུ་བོས་ནས་ཁོ་ཚོར་“ཉོན་ཞིང་ཤེས་པར་གྱིས་ཤིག
MAT 15:11 ཕྱི་ནས་ཁའི་ནང་དུ་འགྲོ་བ་དེས་མི་མི་གཙང་བར་མི་བྱེད་དེ། མིའི་ཁ་ནས་ཕྱིར་གང་འཐོན་པ་དེས་མི་མི་གཙང་བར་བྱེད་”ཅེས་གསུངས།
MAT 15:12 ཉེ་གནས་རྣམས་ཁོང་གི་མདུན་དུ་ཡོང་ནས་“ཁྱེད་ཀྱི་གསུང་དེ་ཐོས་ནས་ཕཱ་རུ་ཤི་པ་རྣམས་ལ་ཕོག་ཐུག་བྱུང་བ་མཁྱེན་ནམ་”ཞེས་སྨྲས།
MAT 15:13 ལན་དུ་ཁོང་གིས་“ཞིང་ཁམས་སུ་བཞུགས་པའི་ངའི་ཡབ་ཀྱིས་མ་བཙུགས་པའི་རྩི་ཤིང་རེ་རེ་བཞིན་རྩ་བཀོག་གཏོང་བར་འགྱུར་ངེས་ཡིན།
MAT 15:14 ཁོ་རྣམས་ལ་དོ་སྣང་མ་བྱེད། ཁོ་ཚོ་ནི་ལོང་བས་ལོང་བ་རྣམས་འཁྲིད་མཁན་ཡིན། ལོང་བས་ལོང་བ་ཁྲིད་ན་གཉིས་ཀ་ས་དོང་ལ་ལྷུང་ཡོང་”ཞེས་གསུངས།
MAT 15:15 པེ་ཏྲོས་ཁོང་ལ་“དཔེ་དེ་ང་ཚོར་གསལ་བཤད་མཛད་རོགས་གནང་”ཞེས་ཞུས།
MAT 15:16 ལན་དུ་ཡེ་ཤུས་“ཁྱོད་ཚོས་ཀྱང་ད་དུང་མི་ཤེས་སམ།
MAT 15:17 ཕྱི་ནས་ཁའི་ནང་དུ་འགྲོ་བ་ཐམས་ཅད་ཕོ་བར་སོང་སྟེ་ལུས་ནས་ཕྱིར་འཐོན་པ་མི་ཤེས་སམ།
MAT 15:18 འོན་ཀྱང་མིའི་ཁ་ནས་གང་འཐོན་པ་སེམས་ནས་བྱུང་བས། མི་མི་གཙང་བར་བྱེད།
MAT 15:19 གང་ཡིན་ཟེར་ན། མི་རྣམས་ཀྱི་སེམས་ནང་ནས་བསམ་པ་ངན་པ་དང༌། མི་སྲོག་གཅོད་པ། ལོག་གཡེམ། འདོད་ལོག རྐུ་བ། རྫུན་དཔང༌། དམའ་འབེབས་གཏོང་བ་བཅས་འབྱུང་བའི་ཕྱིར་རོ།
MAT 15:20 དེ་ཚོས་མི་མི་གཙང་བར་བྱེད། ལག་པ་མ་ཁྲུས་པར་ཟས་ཟ་བ་དེས་མི་མི་གཙང་བར་མི་བྱེད་”ཅེས་གསུངས།
MAT 15:21 ཡེ་ཤུ་ས་ཆ་དེ་ནས་ཁ་བྲལ་ཏེ་ཐཱ་ཨེར་དང་ཚི་དོན་གྲོང་ཁྱེར་གྱི་ས་ཁུལ་དུ་ཕེབས།
MAT 15:22 ས་ཁུལ་དེའི་བུད་མེད་ཀ་ནཱན་མ་ཞིག་ཡོང་ནས་སྐད་ཆེན་པོས་“ཀྱེ་གཙོ་བོ་ལགས། རྒྱལ་པོ་དཱ་བིད་ཀྱི་སྲས། ང་ལ་ཐུགས་རྗེས་གཟིགས། ངའི་བུ་མོ་གདོན་འདྲེས་ཟིན་ནས་མནར་གཅོད་གཏོང་བཞིན་འདུག་”ཅེས་སྨྲས་ཀྱང༌།
MAT 15:23 ཁོང་གིས་ཅིའང་མ་གསུངས། ཁོང་གི་ཉེ་གནས་རྣམས་ཡོང་ནས་ཡེ་ཤུ་ལ་“ཁོ་མོས་ང་ཚོ་སྐད་ཆེན་པོས་ཡང་ནས་ཡང་དུ་འབོད་པས་ཁོ་མོ་ཕར་གཏོང་ཞིག་”ཅེས་བསྐུལ།
MAT 15:24 ལན་དུ་ཁོང་གིས་“ང་ནི་ཡི་སི་ར་ཨེལ་གྱི་ཁྱིམ་གྱི་ལུག་བརླགས་སོང་བ་རྣམས་འབའ་ཞིག་གི་རྩར་མངགས་པ་ཞིག་ཡིན་”ཞེས་གསུངས།
MAT 15:25 འོན་ཀྱང་ཁོ་མོ་ཡོང་ནས་ཁོང་གི་མདུན་དུ་པུས་མོ་སར་བཙུགས་ཏེ་“གཙོ་བོ་ལགས། ང་ལ་ཕྱག་རོགས་གནང་”ཞེས་ཞུ་བ་ཕུལ་བས།
MAT 15:26 ལན་དུ་ཡེ་ཤུས་“ཕྲུ་གུའི་བག་ལེབ་བླངས་ནས་ཁྱི་ལ་དབྱུགས་ན་མི་ལེགས་”ཞེས་གསུངས་ཀྱང༌།
MAT 15:27 ཁོ་མོས་“ལགས་སོ། གཙོ་བོ་ལགས། འོན་ཀྱང་ཁྱི་རྣམས་ཀྱིས་ཀྱང་ཁྱིམ་བདག་གི་ལྕོག་ཙེ་ནས་ཟགས་པ་རྣམས་ལས་ཟའོ་”ཞེས་སྨྲས་པས།
MAT 15:28 ཁོང་གིས་ཁོ་མོར་“ཀྱེ་བུད་མེད། ཁྱེད་ཀྱི་དད་པ་ཆེ་བས། ཁྱེད་ཀྱི་འདོད་པ་ལྟར་འབྱུང་བར་འགྱུར་”ཞེས་གསུངས་མ་ཐག ཁོ་མོའི་བུ་མོ་བདེ་བར་གྱུར།
MAT 15:29 ས་ཆ་དེ་ནས་ཁ་བྲལ་ཏེ་ཡེ་ཤུ་ག་ལིལ་མཚོ་འགྲམ་ལ་ཕེབས་ཤིང༌། རི་ལ་ཡར་ཕེབས་ནས་བཞུགས།
MAT 15:30 ཞ་བོ་དང༌། རྐང་ཀྱོག ལོང་བ། ལྐུགས་པ་ལ་སོགས་འཁྲིད་དེ་མི་ཚོགས་མང་པོ་ཁོང་གི་མདུན་དུ་ཡོང་ཞིང༌། ཁོ་རྣམས་ཁོང་གི་ཞབས་ཀྱི་རྩར་བཞག་ནས་ཁོང་གིས་གསོས་པར་མཛད།
MAT 15:31 མི་ཚོགས་ཀྱིས་ལྐུགས་པ་རྣམས་ཀྱིས་གཏམ་བྱེད་པ་དང༌། རྐང་ཀྱོག་རྣམས་གསོས་པ་དང༌། ཞ་བོ་རྣམས་གོམ་པ་སྤོ་བ། ལོང་བས་མཐོང་ནས་ལྟ་བས་ཡ་མཚན་དུ་གྱུར་ཞིང༌། ཡི་སི་ར་ཨེལ་གྱི་དཀོན་མཆོག་ལ་བསྟོད་པར་བྱས།
MAT 15:32 དེ་ནས་ཡེ་ཤུས་ཉེ་གནས་རང་གི་མདུན་དུ་བོས་ཏེ་ཁོ་ཚོར་“མི་ཚོགས་འདི་ང་དང་མཉམ་དུ་བསྡད་ནས་ཉིན་ཞག་གསུམ་སོང་ཞིང༌། ད་ཆ་ཟས་ཅི་ཡང་མེད་པས་ཁོ་ཚོ་སྙིང་རྗེ་བར་འདུག ལམ་བར་དུ་བཀྲེས་ཤིང་ལྟོགས་ཏེ་དྲན་མེད་དུ་བརྒྱལ་བའི་ཉེན་ཡོད་པས་ཁ་སྟོང་པར་ལོག་གཏོང་མི་འདོད་”ཅེས་གསུངས།
MAT 15:33 ཉེ་གནས་རྣམས་ཀྱིས་ཁོང་ལ་“མི་ཚོགས་མང་པོ་འདི་འགྲང་བར་བྱེད་པའི་བག་ལེབ་མང་པོ་འདི་འདྲ་དབེན་སྟོང་འདི་རུ་ག་ནས་རྙེད་ཐུབ་བམ་”ཞེས་བཤད་པས།
MAT 15:34 ཡེ་ཤུས་ཁོ་རྣམས་ལ་“ཁྱེད་ཚོར་བག་ལེབ་ཇི་ཙམ་ཡོད་”ཅེས་བཀའ་འདྲི་གནང་བས། ཁོ་ཚོས་“བདུན་དང་ཉ་ཤ་ཆུང་ཆུང་ཁ་ཤས་ཡོད་”ཅེས་སྨྲས།
MAT 15:35 ཁོང་གིས་མི་ཚོགས་རྣམས་ས་རུ་སྡོད་པའི་བཀའ་གནང་ནས།
MAT 15:36 བག་ལེབ་བདུན་པོ་དང་ཉ་ཤ་ཕྱག་ཏུ་བསྣམས་ཏེ་དཀོན་མཆོག་ལ་བཀའ་དྲིན་ཆེ་ཞུས་རྗེས། དེ་ཚོ་དུམ་བུར་བཟོས་ནས་ཉེ་གནས་རྣམས་ལ་གནང་ཞིང༌། ཁོ་ཚོས་མི་ཚོགས་ལ་བྱིན།
MAT 15:37 མི་ཚང་མས་བཟས་ནས་འགྲངས་ཤིང་ཁོ་ཚོས་ཟས་ལྷག་གི་དུམ་བུ་བསྡུ་གསོག་བྱས་པས་སླེ་པོ་གང་བ་བདུན་བྱུང༌།
MAT 15:38 བུད་མེད་དང་ཕྲུ་གུ་མ་བརྩིས་པར་ཟས་ཟ་མཁན་མི་སྟོང་ཕྲག་བཞི་ཙམ་ཡོད་པ་ཡིན།
MAT 15:39 མི་ཚོགས་ཕར་བཏང་ནས་ཡེ་ཤུ་གྲུ་ལ་བཞུགས་པ་དང༌། མ་ག་དན་ཞེས་བྱ་བའི་ཡུལ་ཕྱོགས་སུ་ཕེབས་སོ། །
MAT 16:1 ཕཱ་རུ་ཤི་པ་དང་སཱ་ཅུ་སེ་པ་རྣམས་ཡོང་ནས་ཡེ་ཤུ་ལ་ཉམས་ཚོད་ལེན་པའི་ཕྱིར་དཀོན་མཆོག་གི་ཞིང་ཁམས་ནས་ངོ་མཚར་བའི་རྟགས་ཁོ་ཚོར་སྟོན་པར་ཞུས།
MAT 16:2 ལན་དུ་ཁོང་གིས་“ཁྱོད་ཚོས་དགོང་མོ་ཆགས་པའི་དུས་སུ་ནམ་མཁའི་སྤྲིན་པ་དམར་པོ་ཡིན་ཚེ་ནམ་དྭངས་ཡོང་ཞེས་ཟེར།
MAT 16:3 ཡང་ཞོགས་པར་ནམ་མཁའ་འཐིབས་ཤིང་དམར་པོ་ཡིན་ཚེ་ཁྱོད་ཚོས་དེ་རིང་རླུང་འཚུབ་འབྱུང་བར་འགྱུར་ཞེས་ཟེར། ནམ་མཁའི་གནས་ཚུལ་དཔྱོད་སྟངས་ཤེས་ཀྱང༌། དུས་འདིའི་གནས་ཚུལ་དཔྱོད་མི་ཐུབ།
MAT 16:4 མི་རབས་འདི་ནི་ངན་པ་དང་ལོག་གཡེམ་ཅན་ཞིག་ཡིན་པས་ངོ་མཚར་བའི་རྟགས་ཤིག་མཐོང་བར་འདོད་ཀྱང༌། ལུང་སྟོན་པ་ཡོ་ནཱ་ཡི་རྟགས་མ་གཏོགས་པར་གཞན་ཅི་ཡང་སྟེར་བར་མི་འགྱུར་”ཞེས་གསུངས་ཏེ་ཁོ་ཚོ་དང་ཁ་བྲལ་ནས་ཕར་ཕེབས།
MAT 16:5 ཉེ་གནས་རྣམས་མཚོའི་ཕ་རོལ་ཏུ་སླེབས་པ་དང༌། བག་ལེབ་འཁྱེར་རྒྱུ་བརྗེད་པ་ཤེས།
MAT 16:6 ཡེ་ཤུས་ཁོ་ཚོར་“ཁྱེད་ཚོས་བློ་རིག་བསྒྲིམས་ནས་ཕཱ་རུ་ཤི་པ་དང་སཱ་ཅུ་སེ་པའི་སྐྱུར་རྩི་ལ་དོགས་ཟོན་གྱིས་ཤིག་”ཅེས་གསུངས།
MAT 16:7 ཉེ་གནས་རྣམས་ཀྱིས་ཕན་ཚུན་ལ་“འདི་ནི་ང་ཚོས་བག་ལེབ་མ་འཁྱེར་བས་ཡིན་”ཞེས་སྨྲས་པ་དང༌།
MAT 16:8 ཡེ་ཤུས་དེ་མཁྱེན་ནས་“ཁྱོད་ཚོ་དད་ཆུང་བ་རྣམས། ཁྱོད་ཚོས་གཅིག་གིས་གཅིག་ལ་ཅིའི་ཕྱིར་བག་ལེབ་མ་འཁྱེར་བའི་གཏམ་གླེང་བ་ཡིན་ནམ།
MAT 16:9 ཁྱོད་ཚོས་ད་དུང་ཡང་མི་རྟོགས་སམ། མི་ལྔ་སྟོང་ལ་སྟེར་བའི་བག་ལེབ་ལྔ་པོ་དང༌། ཁྱོད་ཚོས་ཟས་ལྷག་མ་སླེ་པོ་ཇི་ཙམ་བསྡུས་པ་མི་དྲན་ནམ།
MAT 16:10 ཡང་ན་མི་བཞི་སྟོང་ལ་སྟེར་བའི་བག་ལེབ་བདུན་པོ་དང༌། ཁྱོད་ཚོས་ཟས་ལྷག་མ་སླེ་པོ་ཇི་ཙམ་བསྡུས་པ་མི་དྲན་ནམ།
MAT 16:11 ངས་ཁྱོད་ཚོར་ཕཱ་རུ་ཤི་པ་དང་སཱ་ཅུ་སེ་པའི་སྐྱུར་རྩི་ལ་དོགས་ཟོན་གྱིས་ཤིག་ཅེས་པ་ལས་བག་ལེབ་ཀྱི་གཏམ་མི་གླེང་བ་ཅིའི་ཕྱིར་མ་རྟོགས། ཕཱ་རུ་ཤི་པ་དང་སཱ་ཅུ་སེ་པའི་སྐྱུར་རྩི་ལ་དོགས་ཟོན་གྱིས་ཤིག་”ཅེས་གསུངས་པས།
MAT 16:12 དེའི་ཚེ་ཁོང་གིས་བག་ལེབ་ཀྱི་སྐྱུར་རྩི་ལ་དོགས་ཟོན་བྱེད་པར་མ་གསུངས་ཏེ། ཕཱ་རུ་ཤི་པ་དང་སཱ་ཅུ་སེ་པའི་བསྟན་པའི་སྐོར་གསུངས་པར་ཁོ་ཚོས་རྟོགས།
MAT 16:13 ཡེ་ཤུ་གྲོང་ཁྱེར་སེ་སར་རེ་ཡཱ་ཕི་ལིབ་པཱི་ཡུལ་དུ་ཕེབས་ནས་ཁོང་གིས་ཉེ་གནས་རྣམས་ལ་“མི་རྣམས་ཀྱིས་མིའི་རིགས་ཀྱི་བུ་སུ་ཡིན་ཟེར་”ཞེས་བཀའ་འདྲི་གནང་བས།
MAT 16:14 ཁོ་ཚོས་“མི་ལ་ལས་ཁྲུས་གསོལ་མཁན་ཡོ་ཧ་ནན། ལ་ལས་ལུང་སྟོན་པ་ཨེ་ལི་ཡཱ། ལ་ལས་ལུང་སྟོན་པ་ཡེ་རེམ་ཡཱ་དང༌། ཡང་ན་གནའ་རབས་ཀྱི་ལུང་སྟོན་པ་ཞིག་ཡིན་ཟེར་”ཞེས་སྨྲས།
MAT 16:15 ཁོང་གིས་ཁོ་རྣམས་ལ་“འོ་ན་ཁྱེད་ཚོས་བྱས་ན་ང་རང་སུ་ཡིན་ཟེར་”ཞེས་གསུངས་པས།
MAT 16:16 སི་མོན་པེ་ཏྲོས་“ཁྱེད་ནི་མཱ་ཤི་ཀ་ཡིན་ཏེ་གཏན་དུ་གནས་པའི་དཀོན་མཆོག་གི་སྲས་ཡིན་ནོ་”ཞེས་ཞུས།
MAT 16:17 ཡེ་ཤུས་ཁོང་ལ་“ཡོ་ནཱ་ཡི་བུ་སི་མོན་ཁྱེད་བདེ་བ་ཡིན་ནོ། གང་ཡིན་ཞེ་ན། མི་རྣམས་མིན་ཏེ་ཞིང་ཁམས་སུ་བཞུགས་པའི་ངའི་ཡབ་ཀྱིས་དེ་ལྟར་ཁྱེད་ལ་མངོན་པར་མཛད།
MAT 16:18 ཡང་ངས་ཁྱེད་ལ་ཟེར་རྒྱུར། ཁྱེད་པེ་ཏྲོ་ནི་བྲག་ཡིན་ཏེ། བྲག་དེའི་སྟེང་ལ་ངའི་ཆོས་ཚོགས་རྩིག་པར་བྱ། གཤིན་པོའི་ཁམས་ཀྱི་རྒྱལ་སྒོ་རྣམས་ཀྱང་དེ་ལས་མི་རྒྱལ་ལོ།
MAT 16:19 ངས་དཀོན་མཆོག་ཞིང་ཁམས་ཀྱི་རྒྱལ་སྲིད་ཀྱི་ལྡེ་མིག་ཁྱེད་ལ་སྟེར་བས། ཁྱེད་ཀྱིས་ས་ལ་གང་འཆིང་བ་དེ་དཀོན་མཆོག་གི་ཞིང་ཁམས་ལའང་འཆིང་བར་འགྱུར། ཁྱེད་ཀྱིས་ས་ལ་གང་འགྲོལ་བ་དེ་དཀོན་མཆོག་གི་ཞིང་ཁམས་ལའང་འགྲོལ་བར་འགྱུར་”ཞེས་གསུངས།
MAT 16:20 དེ་ནས་ཁོང་གིས་ཉེ་གནས་རྣམས་ལ་ཁོང་ནི་མཱ་ཤི་ཀ་ཡིན་པ་དེ་མི་གཞན་ལ་ཟེར་མི་ཆོག་ནན་གྱིས་བསྐུལ་བར་མཛད།
MAT 16:21 དུས་དེ་ནས་བཟུང་ཡེ་ཤུས་རང་གི་ཉེ་གནས་རྣམས་ལ་ཁོང་ཡེ་རུ་ཤ་ལེམ་དུ་ཕེབས་ནས། ཡ་ཧུ་དཱ་པའི་མི་རིགས་ཀྱི་རྒན་པོ་དང་བླ་ཆེན་རྣམས། ཆོས་ཁྲིམས་ལ་མཁས་པའི་མི་བཅས་ཀྱིས་ཁོང་ལ་སྡུག་པོ་མང་པོ་གཏོང་ཞིང༌། ཁོང་གསོད་པར་འགྱུར་ལ། ཉི་མ་གསུམ་པར་འཆི་བ་ནས་ཡར་ལང་བར་འགྱུར་དགོས་པར་གསལ་བཤད་མཛད།
MAT 16:22 པེ་ཏྲོས་ཁོང་ཟུར་དུ་ཁྲིད་ཅིང་ནན་པོས་ཁོང་ལ་“གཙོ་བོ་ལགས། དེ་འདྲ་རྩ་བ་ནས་མི་སྲིད། ཁྱེད་ལ་ནམ་ཡང་དེ་འདྲ་འབྱུང་མི་སྲིད་”ཅེས་ཟེར།
MAT 16:23 འོན་ཀྱང་ཡེ་ཤུས་ཞལ་ཕྱིར་སྐོར་ཏེ་པེ་ཏྲོ་ལ་“བདུད་སཱ་ཏན་ཁྱོད། ངའི་རྒྱབ་ཏུ་སོང་ཞིག ཁྱོད་ཀྱི་བསམ་པ་དཀོན་མཆོག་བཞིན་མ་ཡིན་པར་མི་བཞིན་ཡིན་པས་ངའི་བཀག་རྡོ་ཡིན་”ཞེས་གསུངས།
MAT 16:24 དེ་ནས་ཡེ་ཤུས་རང་གི་ཉེ་གནས་རྣམས་ལ་“གལ་ཏེ་མི་སུ་ཞིག་གིས་ང་ཡི་རྗེས་སུ་འབྲང་འདོད་ན། རང་ཉིད་བློས་བཏང་ནས་རང་གི་རྒྱང་ཤིང་འཁུར་ཏེ་ང་ཡི་རྗེས་སུ་འབྲང་དགོས།
MAT 16:25 གང་ལགས་ཟེར་ན། མི་སུས་ཀྱང་རང་གི་སྲོག་ཐར་བར་བྱེད་འདོད་པ་དེས་བརླག་པར་འགྱུར། མི་སུས་ཀྱང་ང་རང་གི་དོན་དུ་རང་གི་སྲོག་གཏོང་པ་དེས་རྙེད་པར་འགྱུར་ངེས་ཡིན།
MAT 16:26 མི་སུ་ལ་འཇིག་རྟེན་ཧྲིལ་པོ་ཐོབ་ཀྱང་རང་སྲོག་བརླགས་ན་ཅི་ཕན། ཡང་ན་མིས་རང་གི་སྲོག་ཅི་དང་བརྗེའམ།
MAT 16:27 མིའི་རིགས་ཀྱི་བུ་ནི་རང་གི་ཡབ་ཀྱི་གཟི་བརྗིད་ཀྱི་སྒོ་ནས་རང་གི་ཕོ་ཉ་དང་མཉམ་དུ་འབྱོན་ཞིང༌། དེའི་དུས་སུ་ཁོང་གིས་མི་རེ་རེ་ལ་དེ་ཚོའི་བྱ་བ་དང་མཐུན་པར་ལན་གནང་བར་འགྱུར་ངེས་ཡིན།
MAT 16:28 ངས་ཁྱེད་རྣམས་ལ་བདེན་པར་ཟེར་རྒྱུར། འདི་རུ་ཡོད་པའི་མི་རྣམས་ཀྱི་ནང་ནས་འགའ་ཞིག་གིས་མིའི་རིགས་ཀྱི་བུ་རང་གི་རྒྱལ་སྲིད་དབང་སྒྱུར་བའི་ཕྱིར་འབྱོན་པ་མ་མཐོང་བའི་བར་དུ་ཅི་ནས་ཀྱང་འཆི་བ་མྱོང་བར་མི་འགྱུར་”ཞེས་གསུངས་སོ། །
MAT 17:1 ཉི་མ་དྲུག་གི་རྗེས་ལ་ཡེ་ཤུས་པེ་ཏྲོ་དང༌། ཡ་ཀོབ་དང༌། ཁོའི་གཅུང་པོ་ཡོ་ཧ་ནན་གསུམ་འཁྲིད་ནས་དབེན་པའི་གནས་རི་མཐོ་པོ་ཞིག་ལ་ཕེབས།
MAT 17:2 ཁོ་ཚོའི་མདུན་དུ་ཁོང་གི་སྐུའི་རྣམ་པ་གྱུར་ཏེ། ཁོང་གི་ཞལ་རས་ཉི་མ་དང་འདྲ་བར་འོད་འཕྲོས་པ་དང༌། ཁོང་གི་ན་བཟའ་འོད་ལྟར་དཀར་པོ་གྱུར།
MAT 17:3 དེའི་སྐབས་ལ་ཁོང་ཚོའི་མདུན་དུ་ལུང་སྟོན་པ་མོ་ཤེ་དང་ཨེ་ལི་ཡཱ་གཉིས་མངོན་སུམ་དུ་བྱོན་ནས་ཁོང་དང་བཀའ་མོལ་གནང༌།
MAT 17:4 པེ་ཏྲོས་ཡེ་ཤུ་ལ་“གཙོ་བོ་ལགས། ང་ཚོ་འདིར་བསྡད་ན་ལེགས། ཁྱེད་ཐུགས་དགྱེས་ན། ངས་བཞུགས་ས་གསུམ་བཟོ་བར་བྱ། ཁྱེད་ལ་གཅིག་དང་མོ་ཤེ་ལ་གཅིག ཨེ་ལི་ཡཱ་ལ་གཅིག་བཅས་ཡིན་”ཞེས་ཞུས་པའི་དུས་སུ།
MAT 17:5 འོད་དང་ལྡན་པའི་སྤྲིན་པ་ཞིག་ཡོང་ནས་ཁོང་ཚོ་བསྒྲིབས། སྤྲིན་པ་དེ་ནས་གསུང་ཞིག་བྱུང་སྟེ་“འདི་ནི་ངའི་གཅེས་པའི་སྲས་ཡིན་ཞིང༌། དེ་ལ་ང་ཤིན་ཏུ་དགའོ། ཁོང་ལ་ཉོན་ཅིག་”ཅེས་གསུངས།
MAT 17:6 ཉེ་གནས་རྣམས་དེ་ཐོས་རྗེས་འཇིགས་ཤིང་སྐྲག་ནས་ཕྱག་འཚལ།
MAT 17:7 ཡེ་ཤུ་ཕེབས་ཏེ་ཁོ་ཚོར་ཕྱག་རེག་ནས་“ད་ལོངས་ལ། མ་འཇིགས་ཤིག་”ཅེས་གསུངས།
MAT 17:8 ཁོ་ཚོས་ཡར་ལྟ་དུས་ཡེ་ཤུ་གཅིག་པུ་མ་གཏོགས་གཞན་སུ་ཡང་མ་མཐོང༌།
MAT 17:9 ཁོང་རྣམས་རི་བོ་ལས་མར་འབབ་པའི་དུས་སུ། ཡེ་ཤུས་“མིའི་རིགས་ཀྱི་བུ་ནི་འཆི་བ་ནས་གསོན་པོར་མ་ལངས་པའི་བར་དུ་ཁྱེད་ཚོས་གང་མཐོང་བ་དེ་མི་གཞན་སུ་ལའང་མ་ཤོད་ཅིག་”ཅེས་བཀའ་བསྒོས།
MAT 17:10 ཁོང་གི་ཉེ་གནས་རྣམས་ཀྱིས་ཁོང་ལ་“འོ་ན་ཆོས་ཁྲིམས་ལ་མཁས་པའི་མི་རྣམས་ཀྱིས་ཅིའི་ཕྱིར་ལུང་སྟོན་པ་ཨེ་ལི་ཡཱ་སྐྱབས་མགོན་མཱ་ཤི་ཀའི་སྔོན་ལ་འབྱོན་དགོས་ཟེར་བའི་དོན་ཅི་ཡིན་”ཞེས་ཞུས་པ་ལ།
MAT 17:11 ལན་དུ་ཁོང་གིས་“ལུང་སྟོན་པ་ཨེ་ལི་ཡཱ་དངོས་སུ་སྔོན་ལ་བྱོན་ཏེ་ཐམས་ཅད་སླར་གསོ་བྱེད།
MAT 17:12 འོན་ཀྱང་ངས་ཁྱེད་རྣམས་ལ་ཟེར་རྒྱུར། ལུང་སྟོན་པ་ཨེ་ལི་ཡཱ་ཕེབས་ཟིན་ནོ། ཁོ་རྣམས་ཀྱིས་ཁོང་ངོ་མ་ཤེས་པས་ཁོ་ཚོས་ཁོང་ལ་རང་འདོད་ལྟར་མནར་གཅོད་བཏང༌། དེ་ལྟར་མིའི་རིགས་ཀྱི་བུའང་ཁོ་ཚོའི་ལག་འོག་ནས་སྡུག་བསྔལ་མྱོང་བར་འགྱུར་ངེས་ཡིན་”ཞེས་གསུངས།
MAT 17:13 དེ་རྗེས་ཁོང་གིས་ཁྲུས་གསོལ་མཁན་ཡོ་ཧ་ནན་གྱི་སྐོར་གསུངས་པ་ཉེ་གནས་རྣམས་ཀྱིས་གཞི་ནས་ཤེས།
MAT 17:14 མི་ཚོགས་ཀྱི་རྩར་ཕེབས་པའི་ཚེ་མི་གཅིག་ཡེ་ཤུའི་མདུན་དུ་ཡོང་ནས་པུས་མོ་སར་བཙུགས་ཏེ་ཁོང་ལ་
MAT 17:15 “གཙོ་བོ་ལགས། ངའི་བུ་ལ་ཐུགས་རྗེས་གཟིགས། ཁོ་ནི་གཟའ་ཕོག་པ་ཡིན་ཏེ། མེ་དང་ཆུའི་ནང་ལ་ཐེངས་མང་ལྷུངས་པས་སྡུག་བསྔལ་མང་པོ་མྱོང༌།
MAT 17:16 ངས་ཁོ་ཁྱེད་ཀྱི་ཉེ་གནས་རྣམས་ཀྱི་རྩར་འཁྲིད་ཀྱང་ཁོ་ཚོས་བཅོས་མ་ཐུབ་”ཅེས་སྨྲས།
MAT 17:17 ལན་དུ་ཡེ་ཤུས་“དད་པ་མི་བྱེད་པ་དང་ངན་སེམས་ཅན་གྱི་མི་རབས་ཁྱོད་ཚོ། ང་དུས་ག་ཚོད་བར་དུ་ཁྱོད་ཚོ་མཉམ་དུ་སྡོད་དགོས་སམ། ང་རང་ཁྱོད་ཚོ་དུས་ནམ་ཞིག་གི་བར་བཟོད་པར་བྱེད་དགོས་སམ། བུ་དེ་ངའི་མདུན་དུ་ཁྲིད་ཤོག་”ཅེས་གསུངས།
MAT 17:18 ཁོང་གིས་གདོན་འདྲེ་དེ་ལ་བཀའ་བཀྱོན་གནང་བས། བུ་དེའི་ནང་ནས་ཐོན་མ་ཐག་གསོས་པར་གྱུར།
MAT 17:19 དེ་ནས་ཉེ་གནས་རྣམས་ཟུར་དུ་ཡེ་ཤུའི་མདུན་དུ་ཡོང་ནས་ཁོང་ལ་“ང་ཚོས་ཅིའི་ཕྱིར་གདོན་འདྲེ་དེ་བསྐྲད་མ་ཐུབ་བམ་”ཞེས་ཞུས་པ་ལ།
MAT 17:20 ཁོང་གིས་ཁོ་ཚོར་“ཁྱོད་ཚོའི་དད་པ་ཆུང་བས་སོ། ངས་ཁྱོད་རྣམས་ལ་བདེན་པར་ཟེར་རྒྱུར། གལ་སྲིད་ཁྱོད་ཚོ་ལ་དད་སེམས་ཡུངས་འབྲུ་རྡོག་པོ་ཆུང་ངུ་གཅིག་ཙམ་ཞིག་ཡོད་ན། ཁྱོད་ཚོས་རི་འདི་ལ། འདི་ནས་སྤོས་ལ་དེར་སོང་ཞིག་ཅེས་ཟེར་བས། དེ་ལྟར་སྤོ་བར་འགྱུར་ལ། ཁྱོད་རྣམས་ལ་ཡང་མི་སྲིད་པ་ཅིའང་མེད་”ཅེས་གསུངས།
MAT 17:22 ཁོང་རྣམས་ག་ལིལ་ཡུལ་དུ་འཛོམས་པའི་ཚེ་ཡེ་ཤུས་ཁོ་ཚོར་“མིའི་རིགས་ཀྱི་བུ་ནི་མི་རྣམས་ཀྱི་ལག་ཏུ་གཏོད་པར་འགྱུར།
MAT 17:23 དེ་རྣམས་ཀྱིས་ཁོ་རང་གསོད་པར་འགྱུར། ཉིན་ཞག་གསུམ་པར་ཁོ་རང་སླར་གསོན་པར་འགྱུར་ངེས་སོ་”ཞེས་གསུངས་པས། ཁོ་རྣམས་ཤིན་ཏུ་སེམས་འཁྲུགས།
MAT 17:24 ཁོང་རྣམས་ཀ་ཕར་ན་ཧུམ་དུ་སླེབས་དུས་མཆོད་ཁང་གི་ཁྲལ་སྡུད་མཁན་རྣམས་པེ་ཏྲོའི་རྩར་ཡོང་ནས་ཁོང་ལ་“ཁྱེད་ཚོའི་སློབ་དཔོན་གྱིས་མཆོད་ཁང་གི་ཁྲལ་མི་འཇལ་ལམ་”ཞེས་དྲིས་པ་ལ།
MAT 17:25 པེ་ཏྲོས་“འཇལ་ལོ་”ཞེས་ཟེར་བ་དང༌། ཁང་པའི་ནང་ལ་ཡོང་བའི་ཚེ་ཡེ་ཤུས་ཁོ་ལ་སྔོན་དུ་གསུངས་ཏེ་“སི་མོན། ཅི་ལྟར་སེམས། འཇིག་རྟེན་གྱི་རྒྱལ་པོ་རྣམས་ཀྱིས་སུ་ནས་ཁྲལ་སྡུད་དམ། རང་གི་བུའམ། གཞན་རྣམས་ནས་སྡུད་དམ་”ཞེས་གསུངས།
MAT 17:26 པེ་ཏྲོས་“གཞན་རྣམས་ནས་སྡུད་”ཅེས་ཞུས། ཡེ་ཤུས་ཁོ་ལ་“འོ་ན་བུ་རྣམས་ཀྱིས་འཇལ་མི་དགོས།
MAT 17:27 ང་ཚོས་ཁོ་ཚོར་ཕོག་ཐུག་མ་གཏོང་བའི་ཕྱིར་མཚོ་ལ་སོང་ནས་ལྕགས་ཀྱུ་ཆུའི་ནང་དུ་འཕེན་པ་དང༌། སྔོན་ལ་ཐོན་པའི་ཉ་དེ་བཟུང་ནས་དེའི་ཁ་ཕྱེ་ཏེ་ཊམ་ཀ་གཅིག་རྙེད་ཡོང༌། དེ་འཁྱེར་ནས་ངེད་གཉིས་ཀྱི་ཕྱིར་ཁོ་ཚོར་སྤྲོད་ཅིག་”ཅེས་གསུངས་སོ། །
MAT 18:1 དེའི་དུས་སུ་ཉེ་གནས་རྣམས་ཡེ་ཤུའི་དྲུང་དུ་ཡོང་ནས་ཁོང་ལ་“དཀོན་མཆོག་གི་རྒྱལ་སྲིད་ནང་ཆེ་ཤོས་དེ་སུ་ཡིན་”ཞེས་དྲིས།
MAT 18:2 ཡེ་ཤུས་ཕྲུ་གུ་ཞིག་བོས་ཏེ་ཁོ་ཚོའི་དཀྱིལ་ལ་བཞག་པ་དང༌།
MAT 18:3 “ངས་ཁྱེད་ཚོར་བདེན་པར་ཟེར་རྒྱུར། སེམས་བསྒྱུར་ནས་ཕྲུ་གུ་དང་འདྲ་བར་མ་གྱུར་ན། ཁྱེད་ཚོ་དཀོན་མཆོག་གི་རྒྱལ་སྲིད་དུ་ཅི་ནས་ཀྱང་འཛུལ་མི་ཐུབ།
MAT 18:4 སུ་ཞིག་ཕྲུ་གུ་འདི་ལྟར་སྙེམས་ཆུང་དུ་འགྱུར་བ་ཁོ་ནི་དཀོན་མཆོག་གི་རྒྱལ་སྲིད་ནང་ཆེ་ཤོས་ཡིན།
MAT 18:5 སུས་ཀྱང་ཕྲུ་གུ་ཆུང་ངུ་འདི་འདྲ་བ་ཞིག་ངའི་མིང་གི་ཐོག་ནས་བསུ་བ་དེས་ང་རང་བསུ།
MAT 18:6 འོན་ཀྱང་མི་སུ་ཞིག་གིས་ང་ལ་དད་པ་བྱེད་པའི་བུ་ཕྲུག་འདི་ཚོ་ལས་གཅིག་ལ་ཡང་སླུ་བར་བྱས་ན། མི་དེའི་སྐེ་ལ་རང་འཐག་གི་རྡོ་ཆེན་པོ་ཞིག་བཏགས་ནས་རྒྱ་མཚོའི་གཏིང་དུ་ནུབ་ན་ལེགས་སོ།
MAT 18:7 བསླུ་བྲིད་ཀྱི་རྐྱེན་གྱིས་འཇིག་རྟེན་ལ་ཡ་རེ་ང༌། གང་ལགས་ཟེར་ན། བསླུ་བྲིད་འབྱུང་དགོས་ཀྱང༌། བསླུ་བྲིད་བྱེད་མཁན་དེ་ལ་ཡ་རེ་ང༌།
MAT 18:8 གལ་ཏེ་ཁྱེད་ཀྱི་ལག་པའམ་རྐང་པས་ཁྱེད་ལ་སྡིག་ཉེས་བྱེད་དུ་བཅུག་ན། དེ་བཅད་ནས་དབྱུགས་ཤིག ལག་པ་གཉིས་སམ། རྐང་པ་གཉིས་དང་ལྡན་པར་གསོད་པར་མི་འགྱུར་བའི་མེ་ལ་དབྱུག་པ་ལས། ཞ་བོར་གྱུར་ཡང་ཚེ་དཔག་ཏུ་མེད་པ་ཐོབ་པ་དེ་ལེགས་སོ།
MAT 18:9 གལ་ཏེ་ཁྱེད་ཀྱི་མིག་གིས་ཁྱེད་ལ་སྡིག་ཉེས་བྱེད་དུ་བཅུག་ན། མིག་དེ་བཏོན་ནས་དོར། ཁྱེད་རང་མིག་ཟུང་དང་ལྡན་པར་དམྱལ་ཁམས་ཀྱི་མེ་ལ་དབྱུག་པ་ལས། མིག་ཡ་གཅིག་མེད་ནའང་ཚེ་དཔག་ཏུ་མེད་པ་ཐོབ་པ་དེ་ལེགས་སོ། །”
MAT 18:10 “ཕྲུག་གུ་ཆུང་ངུ་འདི་རྣམས་ལས་གཅིག་ལ་ཡང་མཐོང་ཆུང་མ་བྱེད་ཅིག ངས་ཁྱེད་ཚོར་ཟེར་རྒྱུ། ཁོ་ཚོའི་ཕོ་ཉ་རྣམས་ཀྱིས་ཞིང་ཁམས་སུ་བཞུགས་པའི་ངའི་ཡབ་ཀྱི་ཞལ་རས་རྒྱུན་དུ་མཐོང༌།
MAT 18:12 ཁྱེད་ཚོས་ཅི་སེམས། ལུག་བརྒྱ་ཡོད་པ་གཅིག་ལས་བོར་བརླག་སོང་ན། དགུ་བཅུ་གོ་དགུ་དེ་རི་ལ་བཞག་ནས་བརླག་པ་དེ་མི་འཚོལ་ལམ།
MAT 18:13 ངས་ཁྱེད་ཚོར་བདེན་པར་ཟེར་རྒྱུར། ལུག་དེ་རྙེད་ན་མ་བརླག་པའི་དགུ་བཅུ་གོ་དགུ་ལས་རྙེད་པའི་ལུག་གཅིག་པོ་དེའི་ཕྱིར་དེ་བས་དགའ་བར་འགྱུར།
MAT 18:14 དེ་བཞིན་དུ་ཕྲུ་གུ་ཆུང་ངུ་འདི་རྣམས་ལས་གཅིག་མེད་པར་འགྱུར་བ་ནི་ཞིང་ཁམས་སུ་བཞུགས་པའི་ཁྱེད་ཀྱི་ཡབ་ཀྱི་དགོངས་པ་མ་ཡིན།”
MAT 18:15 “ཁྱེད་ཀྱི་སྤུན་ཟླ་ཡིས་སྡིག་ཉེས་བྱས་ན། ཁོ་ཟུར་དུ་འཁྲིད་ནས་ཁོའི་སྐྱོན་བརྗོད་པར་བྱེད། ཁོས་ཁྱེད་ཀྱི་ཁ་ལ་ཉན་ན་ཁྱེད་རང་གི་སྤུན་ཟླ་ཡང་བསྐྱར་རྙེད།
MAT 18:16 གལ་སྲིད་ཁྱེད་ཀྱི་ཁ་ལ་མ་ཉན་ན། དཔང་པོ་གཉིས་གསུམ་གྱི་ཁ་ཡིས་གཏམ་ཚང་མ་ནན་ཏན་བྱེད་པའི་ཕྱིར། རང་དང་མཉམ་དུ་མི་གཅིག་གམ་གཉིས་འཁྲིད་དེ་ཁོའི་རྩར་སོང༌།
MAT 18:17 ཁོས་ཁོ་ཚོའི་ཁ་ལ་མ་ཉན་ན། ཆོས་ཚོགས་ལ་ཤོད། ཆོས་ཚོགས་ལའང་མ་ཉན་ན། ཁོ་དད་ལྡན་མིན་པ་དང་ཁྲལ་སྡུད་མཁན་ལྟར་རྩིས་ཤིག
MAT 18:18 ངས་ཁྱེད་ཚོར་བདེན་པར་ཟེར་རྒྱུར། ཁྱེད་ཚོས་ས་ལ་གང་འཆིང་བ་དེ་དཀོན་མཆོག་གི་ཞིང་ཁམས་ལའང་འཆིང་བར་འགྱུར། ཁྱེད་ཚོས་ས་ལ་གང་འགྲོལ་བ་དེ་དཀོན་མཆོག་གི་ཞིང་ཁམས་ལའང་འགྲོལ་བར་འགྱུར།
MAT 18:19 དེ་མ་ཟད། ཁྱེད་ཚོ་གཉིས་ཀྱིས་གང་ཡང་ཞུ་བའི་སྐོར་ས་སྟེང་ལ་བློ་མཐུན་པར་བྱས་ན། ཞིང་ཁམས་སུ་བཞུགས་པའི་ངའི་ཡབ་ཀྱིས་དེ་ལྟར་གནང་བར་འགྱུར།
MAT 18:20 གང་ལགས་ཤེ་ན། གང་དུ་ངའི་མིང་ཐོག་ནས་མི་གཉིས་སམ་གསུམ་འཛོམས་ན། དེར་ངའང་ཁོ་ཚོའི་ཁྲོད་དུ་ཡོད་”ཅེས་གསུངས།
MAT 18:21 དེ་ནས་པེ་ཏྲོ་ཡོང་ནས་ཁོང་ལ་“གཙོ་བོ་ལགས། ངའི་སྤུན་ཟླ་ཡིས་ང་ལ་སྡིག་ཉེས་བྱས་ན་ངས་ལན་ཇི་ཙམ་གྱི་བར་དུ་གུ་ཡངས་གཏོང་དགོས། ལན་བདུན་གྱིས་ཆོག་གམ་”ཞེས་དྲིས་པ་ལ།
MAT 18:22 ཡེ་ཤུས་ཁོ་ལ་“ལན་བདུན་མི་ཟེར་གྱི། བདུན་ཅུ་ཐེངས་བདུན་ཟེར།
MAT 18:23 དེའི་ཕྱིར་དཀོན་མཆོག་གི་རྒྱལ་སྲིད་ནི་རང་གི་བྲན་གཡོག་རྣམས་དང་རྩིས་དག་ཞུ་འདོད་པའི་རྒྱལ་པོ་ཞིག་དང་འདྲ་བ་ཡིན།
MAT 18:24 དེ་རྩིས་པའི་ཚེ་ཁོ་ལ་གསེར་གྱི་སྒོར་མོ་ས་ཡ་གཅིག་གི་བུ་ལོན་ཡོད་པ་ཞིག་རྒྱལ་པོའི་རྩར་ཁྲིད་དེ།
MAT 18:25 ཁོ་ལ་བུ་ལོན་འཇལ་རྒྱུ་མེད་པས། རྒྱལ་པོས་ཁོ་དང༌། བཟའ་ཟླ། ཕྲུ་གུ ཁོ་ལ་ཡོད་པ་ཐམས་ཅད་བུ་ལོན་དེ་འཇལ་བའི་ཕྱིར་འཚོང་དགོས་པའི་བཀའ་མངགས།
MAT 18:26 དེ་བས་ན་བྲན་གཡོག་དེ་རྒྱལ་པོའི་དྲུང་དུ་ཕྱག་འཚལ་དེ་ཁོང་ལ། ང་ལ་བཟོད་པར་མཛོད་ཅིག ངས་ཁྱེད་ལ་བུ་ལོན་ཐམས་ཅད་འཇལ་ཡོང་ཞེས་སྨྲས།
MAT 18:27 དེ་ནས་རྒྱལ་པོ་སྙིང་རྗེ་སྐྱེས་ནས་བྲན་གཡོག་དེ་གློད་གྲོལ་བཏང་སྟེ་བུ་ལོན་དེ་བསལ།
MAT 18:28 འོན་ཀྱང་བྲན་གཡོག་དེ་ཕྱིར་སོང་ནས་རང་དང་མཉམ་པའི་བྲན་གཡོག་རྣམས་ཀྱི་ནང་ནས་ཁོ་ལ་དངུལ་སྒོར་བརྒྱ་ཡི་བུ་ལོན་ཡོད་པ་ཞིག་དང་ཐུག་པས། སྐེ་བཙིར་ཏེ་ཁོ་ལ། བུ་ལོན་འཇོལ་ཞིག་ཅེས་སྨྲས།
MAT 18:29 བྲན་གཡོག་དེས་པུས་མོ་སར་བཙུགས་ནས་ཁོ་ལ། ང་ལ་བཟོད་པ་སྒོམ་རོགས། ངས་ཁྱེད་ལ་བུ་ལོན་འཇལ་ཡོང་ཞེས་བཤད།
MAT 18:30 འོན་ཀྱང་ཁོས་མ་ཉན་པར་སོང་ནས་བུ་ལོན་འཇལ་མ་ཚར་བའི་བར་དུ་བྲན་གཡོག་དེ་བཙོན་དུ་བཅུག
MAT 18:31 བྲན་གཡོག་གཞན་རྣམས་ཀྱིས་དེ་མཐོང་ནས་སེམས་ཤིན་ཏུ་འཁྲུགས་པར་གྱུར་ཏེ། རྒྱལ་པོའི་དྲུང་དུ་སོང་ནས་གནས་ཚུལ་དེ་ཐམས་ཅད་བཤད།
MAT 18:32 རྒྱལ་པོས་བྲན་གཡོག་དེ་བོས་ནས་ཁོ་ལ། གཡོག་པོ་ངན་པ་ཁྱོད། ཁྱོད་ཀྱིས་ང་ལ་ཞུ་བ་ཆེན་པོ་ཕུལ་བས་ངས་ཁྱོད་ཀྱི་བུ་ལོན་ཐམས་ཅད་བསལ།
MAT 18:33 ངས་ཁྱོད་ལ་སྙིང་རྗེ་བྱས་པ་ལྟར། ཁྱོད་ཀྱིས་ཀྱང་རང་དང་མཉམ་པའི་བྲན་གཡོག་ལ་སྙིང་རྗེ་བྱེད་དགོས་པ་མ་ཡིན་ནམ་ཞེས་སྨྲས།
MAT 18:34 རྒྱལ་པོ་ཁྲོས་ནས་བུ་ལོན་ཐམས་ཅད་འཇལ་མ་ཚར་བའི་བར་མནར་གཅོད་གཏོང་མཁན་རྣམས་ལ་གཏད།
MAT 18:35 གལ་ཏེ་ཁྱོད་ཚོ་མི་རེ་རེས་སེམས་གཏིང་ནས་རང་གི་སྤུན་ཟླར་གུ་ཡངས་མ་བཏང་ན། ཞིང་ཁམས་སུ་བཞུགས་པའི་ངའི་ཡབ་ཀྱིས་ཀྱང་ཁྱོད་ཚོར་དེ་ལྟར་མཛད་ངེས་ཡིན་”ཞེས་གསུངས་སོ། །
MAT 19:1 ཡེ་ཤུས་བཀའ་དེ་ཚོ་གསུངས་ཚར་ནས། ག་ལིལ་ཡུལ་དང་ཁ་བྲལ་ཏེ་ཡོར་དན་གཙང་པོའི་ཕར་ཕྱོགས་ཀྱི་ཡ་ཧུ་དཱ་ཡུལ་དུ་ཕེབས།
MAT 19:2 མི་ཚོགས་མང་པོ་ཁོང་གི་རྗེས་སུ་འབྲངས་ཤིང་ཁོང་གིས་ས་ཆ་དེར་ཁོ་ཚོའི་ནད་གསོས་པར་མཛད།
MAT 19:3 ཕཱ་རུ་ཤི་པ་འགའ་ཤས་ཡེ་ཤུའི་མདུན་དུ་ཡོང་ནས་ཁོང་ལ་ཉམས་ཚོད་ལེན་ཕྱིར་“དཀོན་མཆོག་གི་བཀའ་ཁྲིམས་ལྟར་ན་སྐྱེས་པས་རྒྱུ་མཚན་གང་གིས་ཀྱང་རང་གི་བཟའ་ཟླ་བཞག་ཆོག་གམ་”ཞེས་ཞུས་པ་ལ།
MAT 19:4 ལན་དུ་ཁོང་གིས་“ཁོ་ཚོ་ཐོག་མར་མཛད་མཁན་གྱིས་མི་ཕོ་མོ་གཉིས་མཛད་པ་ཡིན་ཞིང༌།
MAT 19:5 རྒྱུ་མཚན་དེའི་རྐྱེན་གྱིས་སྐྱེས་པས་རང་གི་ཕ་མ་བཞག་ནས་རང་གི་བཟའ་ཟླ་དང་མཉམ་དུ་འདུས་ཤིང༌། ཁོ་གཉིས་ཤ་རུས་གཅིག་ཏུ་འགྱུར་ཞེས་ཁྱེད་ཚོས་བཀླགས་མ་མྱོང་ངམ།
MAT 19:6 དེ་ལྟར་ན་སོ་སོ་བ་མིན་ཏེ་གཅིག་རང་ཡིན་པས། དཀོན་མཆོག་གིས་གང་སྦྲེལ་བར་མཛད་པ་དེ་མི་སུས་ཀྱང་འཕྲལ་བར་མི་རུང་ངོ་”ཞེས་གསུངས།
MAT 19:7 ཁོ་ཚོས་ཁོང་ལ་“འོ་ན་ལུང་སྟོན་པ་མོ་ཤེ་ཡིས་ཅིའི་ཕྱིར་བཟའ་ཚང་ཁ་བྲལ་བའི་ཡི་གེ་བྲིས་ནས་ཁོ་མོ་ཕར་བཏང་ན་འགྲིག་ཅེས་པའི་བཀའ་གནང་”ཞེས་དྲིས་པ་ལ།
MAT 19:8 ཁོང་གིས་ཁོ་ཚོར་“ཁྱོད་ཚོ་སེམས་མཁྲེགས་པོ་ཡིན་པས་མོ་ཤེ་ཡིས་བཟའ་ཚང་ཁ་བྲལ་བའི་ཁྲིམས་གནང༌། འོན་ཀྱང་ཐོག་མ་ནས་དེ་ལྟར་མེད།
MAT 19:9 ངས་ཁྱོད་ཚོར་ཟེར་རྒྱུར། ལོག་གཡེམ་གྱི་རྒྱུ་མཚན་མ་གཏོགས་པར། སུས་ཀྱང་རང་གི་བཟའ་ཟླ་བཞག་ནས་བུད་མེད་གཞན་ཞིག་བཟའ་ཟླར་བླངས་ན་ལོག་གཡེམ་བྱེད་”ཅེས་གསུངས།
MAT 19:10 ཉེ་གནས་རྣམས་ཀྱིས་ཁོང་ལ་“སྐྱེས་པ་དང་བཟའ་ཟླའི་གནས་ཚུལ་དེ་ལྟར་ཡིན་ན་ཆང་ས་མ་བརྒྱབ་ན་ལེགས་”ཞེས་བཤད།
MAT 19:11 འོན་ཀྱང་ཁོང་གིས་ཁོ་ཚོར་“སུ་ལ་གནང་བ་དེས་མ་གཏོགས་པར། མི་ཐམས་ཅད་ཀྱིས་གཏམ་དེ་དང་ལེན་བྱེད་མི་ཐུབ།
MAT 19:12 གང་ཡིན་ཟེར་ན། ཉུག་རུམ་ཁ་ཅིག་ནི་ཨ་མའི་མངལ་ནས་དེ་ལྟར་སྐྱེས་པ་ཡིན་ཞིང༌། ཁ་ཅིག་ནི་མི་རྣམས་ཀྱིས་ཉུག་རུམ་བཟོས། ཁ་ཅིག་དཀོན་མཆོག་གི་རྒྱལ་སྲིད་ཀྱི་དོན་ལ་རང་གིས་རང་ཉུག་རུམ་དུ་བྱས། གཏམ་དེ་དང་ལེན་བྱེད་ཐུབ་མཁན་གྱིས་དང་ལེན་བྱེད་དགོས་”ཞེས་གསུངས།
MAT 19:13 དེའི་ཚེ་ཁོང་གིས་ཁོ་རྣམས་ལ་ཕྱག་འཇོག་པར་མཛད་ནས་གསོལ་སྨོན་འདེབས་པའི་ཕྱིར་མི་རྣམས་ཀྱིས་ཕྲུ་གུ་འགའ་ཞིག་ཁོང་གི་མདུན་དུ་འཁྲིད། ཉེ་གནས་རྣམས་ཀྱིས་འཁྲིད་མཁན་ལ་གཤེ་གཤེ་བཏང་ཡང༌།
MAT 19:14 ཡེ་ཤུས་“ཕྲུ་གུ་ཆུང་ངུ་མ་འགོག་པར་ངའི་རྩར་ཡོང་བར་ཆོག གང་ཡིན་ཞེ་ན། ཁོ་ཚོ་དང་འདྲ་བ་རྣམས་ལ་དཀོན་མཆོག་གི་རྒྱལ་སྲིད་ཡོད་པའི་ཕྱིར་རོ་”ཞེས་གསུངས།
MAT 19:15 ཁོ་རྣམས་ལ་ཕྱག་བཞག་རྗེས་ས་ཆ་དེ་ནས་ཁ་བྲལ།
MAT 19:16 དེ་ནས་མི་ཞིག་ཁོང་གི་མདུན་དུ་ཡོང་ནས་ཁོང་ལ་“སློབ་དཔོན་ལགས། དཔག་ཏུ་མེད་པའི་ཚེ་འཐོབ་པའི་ཕྱིར་ངས་ལས་བཟང་པོ་གང་ཞིག་བྱེད་དགོས་”ཞེས་དྲིས་པ་ལ།
MAT 19:17 ཁོང་གིས་“བཟང་པོ་གང་ཡིན་པའི་སྐོར་ང་ལ་ཅིའི་ཕྱིར་འདྲིས། བཟང་པོ་ཡིན་པ་གཅིག་རང་ཡིན། དཔག་ཏུ་མེད་པའི་ཚེ་འཐོབ་འདོད་ན་བཀའ་ཁྲིམས་རྣམས་སྲུང་”ཞེས་གསུངས།
MAT 19:18 མི་དེས་ཁོང་ལ་“གང་སྲུང་དགོས་”ཞེས་ཟེར་བས་ཡེ་ཤུས་“མི་སྲོག་མ་གཅོད། ལོག་གཡེམ་མ་བྱེད། མ་རྐུ། རྫུན་གྱི་དཔང་པོ་མ་བྱེད།
MAT 19:19 རང་གི་ཕ་མ་གཉིས་ལ་བརྩི་བཀུར་བྱེད། ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་”ཞེས་གསུངས།
MAT 19:20 གཞོན་ནུ་དེས་ཁོང་ལ་“ངས་དེ་ཚོ་ཐམས་ཅད་བསྲུངས། ད་དུང་ཅི་མ་ཚང་”ཞེས་དྲིས་པས།
MAT 19:21 ཡེ་ཤུས་ཁོ་ལ་“མ་ཚང་བ་མེད་པར་འགྱུར་འདོད་ན། སོང་ལ། ནོར་ཐམས་ཅད་བཙོངས་ཏེ་དབུལ་པོ་རྣམས་ལ་བྱིན་ཞིག ཁྱེད་ལ་དཀོན་མཆོག་གི་ཞིང་ཁམས་སུ་བྱ་དགའ་འཐོབ་པར་འགྱུར། དེ་ནས་ཚུར་ཤོག་ལ་ངའི་རྗེས་སུ་འབྲང་”ཞེས་གསུངས།
MAT 19:22 གསུང་དེ་ཐོས་ནས་གཞོན་ནུ་དེའི་སེམས་སྐྱོ་བར་གྱུར་ནས་ཕར་སོང༌། གང་ཡིན་ཞེ་ན། ཁོ་ལ་ནོར་རྫས་མང་པོ་ཡོད།
MAT 19:23 ཡེ་ཤུས་རང་གི་ཉེ་གནས་རྣམས་ལ་“ངས་ཁྱེད་ཚོར་བདེན་པར་ཟེར་རྒྱུར། མི་ཕྱུག་པོ་ཞིག་དཀོན་མཆོག་གི་རྒྱལ་སྲིད་ནང་དུ་འགྲོ་བ་དེ་ཤིན་ཏུ་དཀའོ།
MAT 19:24 ངས་ཡང་བསྐྱར་ཟེར་རྒྱུར། མི་ཕྱུག་པོ་ཞིག་དཀོན་མཆོག་གི་རྒྱལ་སྲིད་ནང་ལ་འགྲོ་བ་ལས་རྔ་མོང་ཞིག་ཁབ་མིག་བརྒྱུད་ནས་འགྲོ་བ་སླའོ་”ཞེས་གསུངས།
MAT 19:25 དེ་ཐོས་ནས་ཉེ་གནས་རྣམས་ཧ་ལས་ཏེ་“འོ་ན་སུ་ལ་ཐར་པ་འཐོབ་སྲིད་”ཅེས་ཞུས།
MAT 19:26 ཡེ་ཤུས་ཁོ་རྣམས་ལ་གཟིགས་ཏེ་“དེ་ནི་མི་རྣམས་ལ་མི་སྲིད་ཀྱང་དཀོན་མཆོག་ལ་ཐམས་ཅད་འགྲུབ་པར་སྲིད་དོ་”ཞེས་གསུངས།
MAT 19:27 དེ་ནས་པེ་ཏྲོས་ཁོང་ལ་“གཟིགས་དང༌། ང་ཚོས་ཐམས་ཅད་དོར་ནས་ཁྱེད་ཀྱི་རྗེས་སུ་འབྲངས་པ་ཡིན་པས། ང་ཚོར་གང་ཞིག་འཐོབ་ཡོང་”ཞེས་ཞུས་པ་ལ།
MAT 19:28 ཡེ་ཤུས་ཁོ་རྣམས་ལ་“ངས་ཁྱེད་ཚོར་བདེན་པར་ཟེར་རྒྱུར། ཐམས་ཅད་གསར་དུ་མཛད་པའི་ཚེ། མིའི་རིགས་ཀྱི་བུ་རང་གི་གཟི་བརྗིད་ལྡན་པའི་ཁྲི་ལ་བཞུགས་པའི་སྐབས་སུ། ཁྱེད་ཚོ་ངའི་རྗེས་སུ་འབྲང་བ་རྣམས་ཀྱིས་ཀྱང་ཁྲི་བཅུ་གཉིས་ལ་བསྡད་ནས་ཡི་སི་ར་ཨེལ་གྱི་ཚོ་ཁག་བཅུ་གཉིས་ལ་ཁྲིམས་གཅོད་བྱེད་འོང༌།
MAT 19:29 མི་སུ་ཞིག་གིས་ངའི་མིང་གི་དོན་དུ་རང་གི་ཁང་པའམ། སྤུན་ནམ། སྲིང་མོ་འམ། ཕ་མའམ། བུ་ཕྲུག་གམ། ས་ཞིང་བཅས་བཞག་ན། ཁོ་ལ་ལྡབ་བརྒྱ་འཐོབ་པ་མ་ཟད། དཔག་ཏུ་མེད་པའི་ཚེ་ཡང་འཐོབ་པར་འགྱུར་ངེས་ཡིན།
MAT 19:30 འོན་ཀྱང་དང་པོ་ཡིན་པའི་མི་མང་པོ་མཐའ་མར་འགྱུར་ཞིང༌། མཐའ་མ་ཡིན་པ་མང་པོའང་དང་པོར་འགྱུར་འོང་”ཞེས་གསུངས་སོ། །
MAT 20:1 ཡེ་ཤུས་“དཀོན་མཆོག་གི་རྒྱལ་སྲིད་ནི་སྐྱ་རེངས་ཤར་དུས་རྒུན་འབྲུམ་གྱི་ལྡུམ་རའི་གླ་པ་འཚོལ་བར་སོང་བའི་ཁྱིམ་བདག་དང་འདྲ་བ་ཡིན།
MAT 20:2 ཁོང་གིས་གླ་པ་རྣམས་ལ་ཉི་མ་རེར་དངུལ་སྒོར་གཅིག་གི་གླ་ཆ་སྤྲོད་རྒྱུའི་ཁས་ལེན་བྱས་ནས། ཁོའི་རྒུན་འབྲུམ་གྱི་ལྡུམ་རར་བཏང༌།
MAT 20:3 ཞོགས་པའི་ཆུ་ཚོད་དགུ་པའི་ཙམ་ལ་ཡང་བསྐྱར་ཕྱིར་འགྲོ་དུས། ཁྲོམ་ལ་ལས་ཀ་མེད་པའི་གླ་པ་གཞན་རྣམས་ཡོད་པ་མཐོང༌།
MAT 20:4 ཁོ་ཚོར། རྒུན་འབྲུམ་གྱི་ལྡུམ་རར་སོང་ཞིང༌། གླ་གང་འོས་པ་ཁྱེད་ཚོར་སྤྲོད་རྒྱུ་ཡིན་ཞེས་སྨྲས་པས་ཁོ་རྣམས་སོང༌།
MAT 20:5 ཁོ་ཉིན་གུང་དང་ཆུ་ཚོད་གསུམ་པའི་ཙམ་ལ་ཡང་སོང་ནས་དེ་ལྟར་བྱས།
MAT 20:6 ཡང་ཆུ་ཚོད་ལྔ་པའི་ཙམ་ལ་ཕྱིར་ཐོན་ནས་ལས་ཀ་མེད་པ་གཞན་རྣམས་མཐོང་ནས་ཁོ་ཚོར། ཁྱེད་ཚོ་ཅིའི་ཕྱིར་ལས་ཀ་མེད་པར་ཉིན་གང་འདིར་སྡོད་ཅེས་དྲིས་པ་ལ།
MAT 20:7 ཁོ་ཚོས། མི་སུས་ཀྱང་ང་ཚོ་མ་གླས་ཞེས་ཟེར་བས། བདག་པོས། ཁྱེད་ཚོ་ཡང་རྒུན་འབྲུམ་གྱི་ལྡུམ་རར་སོང་ཞེས་བཤད།
MAT 20:8 དགོང་དྲོར་སླེབས་དུས་བདག་པོས་དོ་དམ་པར། གླ་པ་རྣམས་བོས་ལ། མཐའ་མ་ནས་དང་པོའི་བར་དུ་གླ་ཆ་སྤྲོད་ཅེས་སྨྲས།
MAT 20:9 ཆུ་ཚོད་ལྔ་པར་གླས་པའི་མི་རྣམས་ཡོང་ནས་རེ་རེ་ལ་དངུལ་སྒོར་གཅིག་ཐོབ།
MAT 20:10 དང་པོར་གླས་པའི་མི་རྣམས་ཡོང་ནས་དེ་ལས་ལྷག་པར་འཐོབ་རྒྱུ་ཡིན་པ་སྙམ་ཡང༌། ཁོ་ཚོ་རེ་རེ་ལ་ཡང་དངུལ་སྒོར་གཅིག་ཐོབ།
MAT 20:11 དེ་ཐོབ་དུས་བདག་པོ་ལ་མ་རངས་པའི་གཏམ་བྱས་ཏེ།
MAT 20:12 ཁྱེད་ཀྱིས་མཐའ་མར་གླས་པའི་མིས་ཆུ་ཚོད་གཅིག་ལས་ཀ་བྱས་པ་དང༌། ང་ཚོ་ཉིན་གང་ཉི་མ་ཚ་པོའི་འོག་ལ་དཀའ་ལས་རྒྱག་པ་རྣམས་འདྲ་མཉམ་བཟོས་སོ་ཞེས་བཤད།
MAT 20:13 ལན་དུ་བདག་པོས་ཁོ་ཚོ་ལས་གཅིག་ལ། གྲོགས་པོ། ངས་ཁྱེད་ལ་དྲང་པོ་མིན་པ་མི་བྱེད། ཁྱེད་ཀྱིས་ཉི་མ་གཅིག་ལ་དངུལ་སྒོར་གཅིག་གི་གླ་ཆ་འཐོབ་རྒྱུའི་ཁས་ལེན་མ་བྱས་སམ།
MAT 20:14 རང་ལ་ཐོབ་པ་དེ་འཁྱེར་ནས་སོང༌། ཁྱེད་དང་འདྲ་བ་མཐའ་མའི་མི་འདི་ལའང་གླ་ཆ་སྤྲོད་པར་འདོད།
MAT 20:15 ང་རང་ལ་ཡོད་པ་དེས་ང་རང་གི་འདོད་པ་ལྟར་བྱས་ན་མི་ཆོག་གམ། ཡང་ན་ང་གཏོང་ཕོད་ཆེ་བ་ཡིན་པས་ཁྱེད་རང་ཕྲག་དོག་སྐྱེས་སམ་ཞེས་བཤད།
MAT 20:16 དེ་ལྟར་མཐའ་མ་ཡིན་པ་རྣམས་དང་པོར་འགྱུར་ཞིང༌། དང་པོ་ཡིན་པ་རྣམས་མཐའ་མར་འགྱུར་”ཞེས་གསུངས།
MAT 20:17 ཡེ་ཤུ་རྒྱལ་ས་ཡེ་རུ་ཤ་ལེམ་ལ་ཕེབས་པའི་དུས་སུ་ཉེ་གནས་བཅུ་གཉིས་པོ་ཟུར་དུ་འཁྲིད་དེ་ཁོ་རྣམས་ལ།
MAT 20:18 “ཉོན་ཞིག ད་ལྟ་ང་ཚོ་ཡེ་རུ་ཤ་ལེམ་དུ་འགྲོ་བཞིན་ཡོད། མིའི་རིགས་ཀྱི་བུ་ནི་ཡ་ཧུ་དཱ་པའི་བླ་ཆེན་དང་ཆོས་ཁྲིམས་ལ་མཁས་པའི་མི་རྣམས་ཀྱི་དབང་འོག་ཏུ་བཏང་ནས། ཁོ་ཚོས་ཁོ་རང་གསོད་དགོས་པའི་ཁྲིམས་ཐག་བཅད་ནས།
MAT 20:19 ཁོང་ཡ་ཧུ་དཱ་པ་མིན་པ་རྣམས་ལ་གཏད་དེ། ཁོ་ཚོས་ཁོ་རང་ལ་འཕྱ་དམོད་བྱེད་པ་དང༌། རྟ་ལྕག་གིས་བརྡུངས་ནས་རྒྱང་ཤིང་སྒང་ལ་བརྒྱངས་པའི་སྒོ་ནས་གསོད་པའི་ཕྱིར། དེ་ནས་ཉིན་གསུམ་པར་ཁོང་སླར་གསོན་པར་འགྱུར་ངེས་ཡིན་”ཞེས་གསུངས།
MAT 20:20 དེ་ནས་ཟེ་བད་ཡཱ་ཞེས་པའི་བུ་གཉིས་ཀྱི་ཨ་མས་རང་གི་བུ་ཁྲིད་དེ་ཡེ་ཤུའི་མདུན་དུ་ཡོང་ནས་པུས་མོ་སར་བཙུགས་ཏེ་ཞུ་བ་གཅིག་ཕུལ།
MAT 20:21 ཁོང་གིས་ཁོ་མོར་“ཁྱེད་ཅི་འདོད་”ཅེས་གསུངས་པས་ཁོ་མོས་“ངའི་བུ་འདི་གཉིས་ཁྱེད་ཀྱི་རྒྱལ་སྲིད་ནང་ལ་གཅིག་ཁྱེད་ཀྱི་གཡས་ཕྱོགས་དང་གཅིག་གཡོན་ཕྱོགས་སུ་སྡོད་དུ་འཇུག་པར་བཀའ་གནང་བར་མཛོད་”ཅེས་སྨྲས།
MAT 20:22 ལན་དུ་ཡེ་ཤུས་ཁོ་རྣམས་ལ་“ཁྱེད་ཚོས་གང་ཞུ་བའི་དོན་མི་ཤེས་ཏེ། ངས་འཐུང་དགོས་པའི་ཕོར་པ་དེ་ཁྱེད་ཚོས་འཐུང་ཐུབ་བམ་”ཞེས་གསུངས་པ་ལ། ཁོ་ཚོས་ཁོང་ལ་“ཐུབ་བོ་”ཞེས་ཞུས།
MAT 20:23 ཁོང་གིས་ཁོ་ཚོར་“ཁྱེད་ཚོས་ངའི་ཕོར་པ་དེ་འཐུང་བར་འགྱུར་ཡང༌། ངའི་གཡས་གཡོན་ལ་སྡོད་དུ་འཇུག་པའི་དབང་ཆ་དེ་ང་ལ་མེད། ངའི་ཡབ་ཀྱིས་མི་སུ་ལ་བཤམས་པ་ཡིན་པ་དེ་ལ་འཐོབ་བོ་”ཞེས་གསུངས་སོ།
MAT 20:24 ཉེ་གནས་བཅུ་པོས་གཏམ་དེ་ཐོས་དུས་སྤུན་དེ་གཉིས་ལ་ཁོང་ཁྲོ་སྐྱེས།
MAT 20:25 ཡེ་ཤུས་ཁོ་ཚོ་རང་གི་དྲུང་དུ་བོས་ཏེ་“ཁྱེད་ཚོས་ཤེས་པ་ལྟར། ཡ་ཧུ་དཱ་པ་མིན་པ་རྣམས་ཀྱི་དཔོན་རིགས་ཀྱིས་ཁོ་ཚོར་དབང་བྱེད་ཅིང༌། ཁོ་ཚོའི་ནང་ནས་མི་ཆེན་པོ་རྣམས་ཀྱིས་ཁོ་ཚོར་དབང་བསྒྱུར།
MAT 20:26 འོན་ཀྱང་ཁྱེད་ཚོའི་ནང་དུ་དེ་ལྟར་མ་ཡིན། ཁྱེད་ཚོ་ལས་སུ་ཞིག་ཆེན་པོར་འགྱུར་འདོད་པ་དེ་ཁྱེད་ཚོའི་གཡོག་པོར་འགྱུར་དགོས་ཤིང༌།
MAT 20:27 ཁྱེད་ཚོ་ལས་སུ་ཞིག་དང་པོར་འགྱུར་འདོད་པ་དེ་མི་ཀུན་གྱི་བྲན་གཡོག་ཏུ་འགྱུར་དགོས།
MAT 20:28 དེ་བཞིན་དུ་མིའི་རིགས་ཀྱི་བུ་ཡང་གཞན་གྱིས་རང་ལ་གཡོག་བྱེད་པའི་ཕྱིར་ཡོང་བ་མ་ཡིན་པར། གཞན་ལ་གཡོག་བྱེད་པ་དང་རང་སྲོག་ཕུལ་ནས་མི་མང་པོ་བླུ་རིན་དུ་འགྱུར་ཕྱིར་ཡོང་བ་ཡིན་”ཞེས་གསུངས་སོ། །
MAT 20:29 ཁོང་རྣམས་ཡེ་རུ་ཀོ་ཞེས་བྱ་བའི་གྲོང་ཁྱེར་ནས་ཐོན་པའི་སྐབས་སུ་མི་ཚོགས་མང་པོ་ཞིག་ཁོང་གི་རྗེས་སུ་འབྲངས།
MAT 20:30 ལམ་ཁར་བསྡད་ཡོད་པའི་ལོང་བ་གཉིས་ཀྱིས་ཡེ་ཤུ་ཉེ་བར་ཕེབས་པར་ཐོས་ནས་སྐད་ཆེན་པོས་“གཙོ་བོ་ལགས། རྒྱལ་པོ་དཱ་བིད་ཀྱི་སྲས། ང་ཚོ་ལ་ཐུགས་རྗེས་གཟིགས་རོགས་”ཞེས་བཤད།
MAT 20:31 མི་ཚོགས་ཀྱིས་དེ་གཉིས་ལ་ཁ་ཁུ་སིམ་པོར་སྡོད་དགོས་པར་ནན་གྱིས་བཤད་ཀྱང༌། ཁོ་ཚོས་སྔོན་ལས་ལྷག་པར་སྐད་ཆེན་པོས་“གཙོ་བོ་ལགས། རྒྱལ་པོ་དཱ་བིད་ཀྱི་སྲས། ང་ཚོ་ལ་ཐུགས་རྗེས་གཟིགས་རོགས་”ཞེས་བཤད།
MAT 20:32 ཡེ་ཤུས་ཕེབས་མཚམས་བཞག་སྟེ་ཁོ་ཚོ་བོས་ནས་“ངས་ཁྱེད་ཚོར་གང་བྱེད་དགོས་སམ་”ཞེས་གསུངས་པ་ལ།
MAT 20:33 ཁོ་ཚོས་ཁོང་ལ་“གཙོ་བོ་ལགས། ང་ཚོའི་མིག་གིས་མཐོང་བར་འདོད་”ཅེས་ཞུས།
MAT 20:34 ཡེ་ཤུ་ཐུགས་རྗེ་སྐྱེས་ཏེ་ཁོ་ཚོའི་མིག་ཟུང་ལ་ཕྱག་རེག་མ་ཐག མིག་གིས་མཐོང་བར་གྱུར་ནས་ཁོང་གི་རྗེས་སུ་འབྲངས་སོ། །
MAT 21:1 ཁོང་རྣམས་ཡེ་རུ་ཤ་ལེམ་གྲོང་ཁྱེར་གྱི་ཉེ་འགྲམ་དུ་ཕེབས་སྐབས། སྐྱུར་རུ་ཤིང་གི་རིའི་ངོས་སུ་ཡོད་པའི་གྲོང་སྡེ་པེ་ཕ་གེ་ཞེས་བྱ་བའི་ས་ཆ་དེར་ཡེ་ཤུས་ཉེ་གནས་གཉིས་མངགས་ཏེ།
MAT 21:2 ཁོ་ཚོར་“ཁྱེད་ཚོ་མདུན་ལ་ཡོད་པའི་གྲོང་སྡེ་དེ་ལ་སོང་དང༌། དེར་སླེབས་མ་ཐག་ཏུ་བོང་བུ་དང་བོང་ཕྲུག་བཏགས་ཡོད་པ་མཐོང་བར་འགྱུར། དེ་ཚོ་བཀྲོལ་ནས་ངའི་རྩར་འཁྲིད་ཤོག
MAT 21:3 གལ་སྲིད་སུ་ཞིག་གིས་ཁྱེད་ཚོ་ལ་ཇི་ཞིག་ཟེར་ན། གཙོ་བོ་ལ་དགོས་ཞེས་སྨྲོས་དང༌། དེས་མྱུར་དུ་གཏོང་བར་འགྱུར་”ཞེས་གསུངས།
MAT 21:4 འདི་ནི་ལུང་སྟོན་པ་བརྒྱུད་ནས་གསུངས་པ་དེ་སྒྲུབ་པའི་ཆེད་དུ་ཡིན་ཏེ།
MAT 21:5 ཙི་ཡོན་ཡུལ་གྱི་བུ་མོར་སྨྲོས། ། ལྟོས་དང་ཁྱེད་ཚོའི་རྒྱལ་པོ་དེ། ། བོང་བུར་བཅིབས་ནས་སྙེམས་ཆུང་ངང༌། ། ཁྱེད་ཚོའི་ས་ལ་ཕེབས་བཞིན་འདུག ། ཅེས་པ་དེ་ཡིན།
MAT 21:6 ཉེ་གནས་དེ་རྣམས་སོང་ནས་ཡེ་ཤུས་བཀའ་གནང་བ་ལྟར་བྱས་ཏེ།
MAT 21:7 བོང་བུ་དང་བོང་ཕྲུག་འཁྲིད་ཡོང་ནས། རང་གི་ཕྱི་གོས་དེའི་སྟེང་ལ་བཞག་སྟེ་ཁོང་གིས་དེ་ལ་བཞུགས།
MAT 21:8 མི་ཚོགས་མང་པོས་རང་གི་གྱོན་པ་ལམ་ལ་བཏིང་ཞིང༌། གཞན་རྣམས་ཀྱིས་ཤིང་གི་ཡལ་ག་བཅད་དེ་ལམ་དུ་བཀྲམ།
MAT 21:9 ཁོང་གི་སྔོན་ནས་འགྲོ་བ་དང་རྗེས་སུ་འབྲངས་བའི་མི་རྣམས་ཀྱིས་སྐད་ཆེན་པོས། དཱ་བིད་སྲས་ལ་ཧོ་ཟན་ནཱ། ། གཙོ་བོའི་མཚན་གྱི་ཐོག་ནས་ནི། ། ཤིན་ཏུ་མཐོ་ཤིང་བླ་ན་མེད། ། དཀོན་མཆོག་ལ་ནི་ཧོ་ཟན་ནཱ། ། ཞེས་གསུངས།
MAT 21:10 ཁོང་ཡེ་རུ་ཤ་ལེམ་དུ་བྱོན་དུས་མི་ཚང་མ་ཕར་ཚུར་བརྒྱུགས་ནས་“འདི་སུ་ཡིན་”ཞེས་བཤད།
MAT 21:11 མི་ཚོགས་ཀྱིས་“འདི་ནི་ག་ལིལ་ཡུལ་གྱི་ན་ཙ་རེལ་གྲོང་སྡེ་ནས་ཡིན་པའི་ལུང་སྟོན་པ་ཡེ་ཤུ་ཡིན་”ཞེས་ཟེར།
MAT 21:12 ཡེ་ཤུ་ཡ་ཧུ་དཱ་པའི་མཆོད་ཁང་ཆེན་མོའི་ཁྱམས་རར་ཕེབས་ནས། དེར་ཡོད་པའི་ཉོ་ཚོང་མཁན་རྣམས་ཕྱི་ལ་བཏོན་པར་མཛད། དངུལ་རྗེ་མཁན་གྱི་ཅོག་ཙེ་དང་ཕུག་རོན་ཚོང་མཁན་གྱི་འདུག་སྟེགས་ཀྱང་སར་བསྒྱེལ།
MAT 21:13 ཁོང་གིས་མི་དེ་ཚོར་“དཀོན་མཆོག་གི་གསུང་རབ་ལས། ངའི་ཁང་པ་ལ་སྨོན་ལམ་འདེབས་སའི་ཁང་པ་ཟེར་བར་འགྱུར་ཞེས་འཁོད། འོན་ཀྱང་ཁྱོད་ཚོས་ཇག་ཚང་ལྟ་བུ་ཞིག་ཏུ་སྒྱུར་འདུག་”ཅེས་གསུངས།
MAT 21:14 ལོང་བ་དང་ཞ་བོ་རྣམས་མཆོད་ཁང་ཆེན་མོའི་ཁྱམས་རར་ཁོང་གི་མདུན་དུ་ཡོང་ནས་ཁོང་གིས་མི་དེ་ཚོའི་ནད་གསོས་པར་མཛད།
MAT 21:15 ཡ་ཧུ་དཱ་པའི་བླ་ཆེན་དང༌། ཆོས་ཁྲིམས་ལ་མཁས་པའི་མི་རྣམས་ཀྱིས་ཁོང་གིས་བསྒྲུབས་པའི་ངོ་མཚར་ཆེ་བའི་མཛད་པ་མཐོང་བ་དང༌། ཡང་མཆོད་ཁང་གི་ཁྱམས་རའི་ཕྲུ་གུ་རྣམས་ཀྱིས་སྐད་ཆེན་པོས་“རྒྱལ་པོ་དཱ་བིད་ཀྱི་སྲས་ལ་ཧོ་ཟན་ནཱ་”ཞེས་སྨྲས་པ་ཐོས་ནས་ཁྲོས་ཏེ།
MAT 21:16 ཁོང་ལ་“ཕྲུ་གུ་དེ་རྣམས་ཀྱིས་གང་བཤད་པ་ཐོས་སམ་”ཞེས་སྨྲས་པས་ཡེ་ཤུས་ཁོ་ཚོར་“ཐོས་སོ། ཕྲུ་གུ་དང་འོ་འཐུང་བའི་བྱིས་པ་རྣམས་ཀྱིས་ཁྱེད་ལ་བསྟོད་བསྔགས་བྱེད་དུ་བཅུག་ཅེས་མདོ་ལས་བཀླགས་མ་མྱོང་ངམ་”ཞེས་གསུངས།
MAT 21:17 དེ་ནས་ཡེ་ཤུས་ཁོ་རྣམས་བཞག་སྟེ་གྲོང་ཁྱེར་ཁ་བྲལ་ནས་པེ་ཐན་ཡཱ་གྲོང་སྡེ་ལ་ཕེབས་པ་དང༌། མཚན་མོ་དེར་བཞུགས།
MAT 21:18 དེའི་སང་ཞོགས་རྒྱལ་སར་ཕྱིར་ཕེབས་པའི་དུས་སུ་ཡེ་ཤུ་བཀྲེས་པར་གྱུར།
MAT 21:19 ལམ་གྱི་ཟུར་ལ་བསེ་ཡབ་ཤིང་སྡོང་ཞིག་གཟིགས་ཏེ། དེའི་རྩར་ཕེབས་དུས་ལོ་མ་ལས་གཞན་ཅི་ཡང་མེད་པ་གཟིགས་པས་དེ་ལ་“ད་ནས་བཟུང་འབྲས་བུ་ནམ་ཡང་མ་སྐྱེད་ཅིག་”ཅེས་གསུངས་མ་ཐག བསེ་ཡབ་ཤིང་དེ་བསྐམས།
MAT 21:20 དེ་མཐོང་ནས་ཉེ་གནས་རྣམས་ཡ་མཚན་དུ་གྱུར་ནས་“བསེ་ཡབ་ཤིང་དེ་ལྟར་མགྱོགས་པོ་ཅི་ལྟར་བསྐམས་”ཞེས་དྲིས།
MAT 21:21 ལན་དུ་ཡེ་ཤུས་“ངས་ཁྱེད་རྣམས་ལ་བདེན་པར་ཟེར་རྒྱུར། ཐེ་ཚོམ་མེད་པར་དད་པ་བྱས་ན། བསེ་ཡབ་ཤིང་ལ་གང་བྱས་པ་དེ་ཁྱེད་ཚོས་ཀྱང་དེ་ལྟར་བྱེད་པར་འགྱུར་བ་མ་ཟད། རི་འདི་ལ། འདི་ནས་བཀོག་པར་འགྱུར་ཞིང་རྒྱ་མཚོའི་ནང་ལ་དབྱུགས་པར་འགྱུར་ཞིག་ཅེས་ཟེར་ན། དེ་ལྟར་འགྲུབ་པར་འགྱུར་རོ།
MAT 21:22 དད་པའི་སྒོ་ནས་གང་སྨོན་ལམ་ཞུ་བ་ཐམས་ཅད་འཐོབ་ངེས་ཡིན་”ཞེས་གསུངས།
MAT 21:23 ཡེ་ཤུ་ཡ་ཧུ་དཱ་པའི་མཆོད་ཁང་ཆེན་མོའི་ཁྱམས་རར་ཕེབས་པ་དང༌། ཁོང་གིས་ཆོས་བསྟན་གནང་བའི་དུས་སུ་ཡ་ཧུ་དཱ་པའི་བླ་ཆེན་དང་ཡུལ་མི་རྣམས་ཀྱི་རྒན་པོ་ཚོ་ཁོང་གི་མདུན་དུ་ཡོང་ནས་“ཁྱེད་ཀྱིས་དབང་ཆ་གང་གི་སྒོ་ནས་དོན་འདི་ཚོ་མཛད། ཡང་སུ་ཞིག་གིས་ཁྱེད་ལ་དོན་འདི་རྣམས་མཛད་པའི་དབང་ཆ་སྤྲད་པ་ཡིན་ནམ་”ཞེས་བཤད་པ་ལ།
MAT 21:24 ཡེ་ཤུས་ཁོ་ཚོར་“ངས་ཀྱང་ཁྱེད་རྣམས་ལ་དྲི་བ་གཅིག་འདྲི་རྒྱུ་ཡིན། ཁྱེད་ཚོས་དེའི་ལན་བཏབ་ན། ངས་དོན་འདི་རྣམས་དབང་ཅི་ལྟ་བུས་མཛད་པའང་ཁྱེད་རྣམས་ལ་ཤོད་རྒྱུ་ཡིན།
MAT 21:25 ཡོ་ཧ་ནན་གྱིས་ཁྲུས་གསོལ་མཛད་པ་དེ་གང་ནས་བྱུང༌། དཀོན་མཆོག་ནས་བྱུང་ངམ། མི་ནས་བྱུང་”ཞེས་གསུངས་པས། ཁོ་ཚོས་ཕན་ཚུན་གཏམ་གླེང་བྱས་ཤིང་“གལ་ཏེ་དཀོན་མཆོག་ནས་བྱུང་ཞེས་བཤད་ན། ཁོང་གིས་ང་ཚོར་འོ་ན་ཁྱེད་རྣམས་ཀྱིས་ཅིའི་ཕྱིར་ཁོང་ལ་དད་པ་མ་བྱས་སམ་ཞེས་གསུང་ངེས་ལ།
MAT 21:26 མི་ལས་བྱུང་ཞེས་བཤད་ན། མི་ཐམས་ཅད་ཀྱིས་ཡོ་ཧ་ནན་ལུང་སྟོན་པར་རྩི་བའི་རྐྱེན་གྱིས་ང་ཚོ་མི་ཚོགས་ལ་འཇིགས་”ཞེས་བཤད།
MAT 21:27 དེར་བརྟེན་ཡེ་ཤུ་ལ་“ང་ཚོས་མི་ཤེས་”ཞེས་ལན་བཏབ་པས་ཁོང་གིས་ཁོ་ཚོར་“དེས་ན་ངས་ཀྱང་དོན་འདི་རྣམས་དབང་ཆ་གང་གིས་བྱེད་པ་མི་ཤོད།”
MAT 21:28 “ད་ཁྱེད་ཚོས་ཅི་ལྟར་སེམས། མི་ཞིག་ལ་བུ་གཉིས་ཡོད་དེ། ཁོས་བུ་ཆེ་བའི་རྩར་སོང་ནས་ཁོ་ལ་བུ། དེ་རིང་རྒུན་འབྲུམ་གྱི་ལྡུམ་རར་ཕྱིན་ནས་ལས་ཀ་བྱོས་ཤིག་ཅེས་ཟེར་བ་ལ།
MAT 21:29 ཁོས་ང་མི་འགྲོ་ཞེས་ཟེར་བའི་རྗེས་སུ་སེམས་བསྒྱུར་ནས་སོང༌།
MAT 21:30 མི་དེ་བུ་ཆུང་བའི་རྩར་ཕྱིན་ནས་སྔོན་ལྟར་སྨྲས་པ་དང༌། བུ་དེས་ཡབ་ལགས། ང་འགྲོ་ཞེས་ཟེར་ནས་མ་སོང༌།
MAT 21:31 བུ་དེ་གཉིས་ནས་སུས་ཕའི་འདོད་པ་བཞིན་དུ་བྱས་”ཞེས་གསུངས་པ་ལ། ཁོ་ཚོས་“ཆེ་བ་དེས་བྱས་”ཞེས་ཟེར་བས་ཡེ་ཤུས་ཁོ་རྣམས་ལ་“ངས་ཁྱོད་རྣམས་ལ་བདེན་པར་ཟེར་རྒྱུར། ཁྲལ་སྡུད་མཁན་དང་སྨད་འཚོང་མ་རྣམས་ཁྱོད་རྣམས་ཀྱི་སྔོན་ལ་དཀོན་མཆོག་གི་རྒྱལ་སྲིད་ལ་ཞུགས།
MAT 21:32 གང་ཡིན་ཟེར་ན། ཁྲུས་གསོལ་མཁན་ཡོ་ཧ་ནན་ཁྱོད་ཚོའི་དྲུང་དུ་དྲང་དང་ལྡན་པའི་ལམ་བསྟན་ཏེ་ཡོང་ནའང༌། ཁྱོད་ཚོས་ཁོང་ལ་ཡིད་མ་ཆེས། ཁྲལ་སྡུད་མཁན་དང་སྨད་འཚོང་མ་རྣམས་ཀྱིས་ཡིད་ཆེས། ཁྱོད་ཚོས་དེ་མཐོང་ནའང་ཁྱོད་ཚོའི་སེམས་མ་སྒྱུར་ཞིང༌། ཁོང་ལ་ཡིད་མ་ཆེས།”
MAT 21:33 “དཔེ་གཞན་ཞིག་ཉོན་ཞིག ཁྱིམ་བདག་ཅིག་གིས་རྒུན་འབྲུམ་གྱི་ལྡུམ་ར་ཞིག་བཟོས་ཤིང༌། ཕྱོགས་བཞིར་ར་བས་བསྐོར། རྒུན་ཆང་འཚིར་བྱེད་ཀྱི་ཆང་གཞོང་ཞིག་བཟོས་པ་དང་ཐོག་ཁང་ཞིག་ཀྱང་བཟོས་རྗེས། ལྡུམ་རའི་ལས་མཁན་རྣམས་ལ་བོགས་མར་བཏང་ནས་ཡུལ་གཞན་དུ་སོང༌།
MAT 21:34 འབྲས་བུའི་སྡུད་པའི་དུས་ལ་བབས་པའི་ཚེ། ཁོས་ལྡུམ་རའི་ལས་མཁན་རྣམས་ནས་ཁོང་གི་རྒུན་འབྲུམ་གྱི་སྐལ་བ་ལེན་པའི་ཕྱིར་ཁོའི་གཡོག་པོ་རྣམས་བཏང་བས།
MAT 21:35 ལྡུམ་རའི་ལས་མཁན་རྣམས་ཀྱིས་གཡོག་པོ་བཟུང་སྟེ། གཅིག་བརྡུངས། གཅིག་བསད། གཅིག་ལ་རྡོ་རུབ་བཏང༌།
MAT 21:36 དེ་ནས་ཁོས་སྔོན་ལས་མང་བའི་གཡོག་ཚོགས་བཏང་ཡང༌། ལྡུམ་རའི་ལས་མཁན་རྣམས་ཀྱིས་དེ་ཚོ་ལའང་དེ་ལྟར་བྱས།
MAT 21:37 ཁོ་ཚོས་ངའི་བུ་ལ་བརྩི་བཀུར་བྱེད་ཡོང་ཞེས་ཟེར་ནས་མཐའ་མར་རང་གི་བུ་ཁོ་ཚོའི་རྩར་བཏང༌།
MAT 21:38 འོན་ཀྱང་ལྡུམ་རའི་ལས་མཁན་རྣམས་ཀྱིས་བུ་དེ་མཐོང་ནས་གཅིག་གིས་གཅིག་ལ། མི་འདི་ནི་ཕ་ཤུལ་འཛིན་མཁན་ཡིན་པས། ཤོག་ལ། ཁོ་བསད་ནས་ནོར་སྐལ་འཕྲོག་པར་བྱ་ཞེས་སྨྲས་ཏེ།
MAT 21:39 བུ་དེ་བཟུང་ནས་ལྡུམ་རའི་ཕྱི་ལ་བསྐྲད་དེ་བསད།
MAT 21:40 ད་རྒུན་འབྲུམ་གྱི་ལྡུམ་རའི་བདག་པོ་ཡོང་ནས་ལྡུམ་རའི་ལས་མཁན་རྣམས་ལ་གང་འདྲ་བྱེད་ཡོང་”ཞེས་གསུངས་པས།
MAT 21:41 བླ་ཆེན་དང་རྒན་པོ་ཚོས་ཁོང་ལ་“མི་ངན་པ་དེ་རྣམས་སྡུག་པོ་བཏང་ནས་མེད་པར་བྱེད་ཅིང༌། ལྡུམ་ར་འདི་འབྲས་བུའི་སྡུད་པའི་དུས་ལ་བབས་པའི་ཚེ་ཁོང་ལ་རྒུན་འབྲུམ་གྱི་སྐལ་བ་སྤྲོད་པའི་གླ་མཁན་གཞན་རྣམས་ལ་གཏོད་པར་བྱེད་”ཅེས་སྨྲས།
MAT 21:42 ཡེ་ཤུས་ཁོ་ཚོར། “བཟོ་བ་རྣམས་ཀྱིས་སྤངས་པའི་རྡོ། ། ཁང་པའི་རྨང་རྡོར་གྱུར་བ་འདི། ། གཙོ་བོ་ཉིད་ཀྱིས་མཛད་པ་ཡིན། ། ང་ཚོའི་མིག་ལ་ངོ་མཚར་ཆེ། ། ཞེས་ཁྱེད་ཚོས་མདོ་ལས་བཀླགས་མ་མྱོང་ངམ།
MAT 21:43 དེའི་ཕྱིར་ངས་ཁྱེད་ཚོར་ཟེར་རྒྱུར། དཀོན་མཆོག་གི་རྒྱལ་སྲིད་ཁྱོད་རྣམས་ནས་འཕྲོག་སྟེ། དེའི་འབྲས་བུ་སྐྱེད་པའི་མི་རྒྱུད་ལ་གནང་བར་འགྱུར་ངེས་ཡིན།
MAT 21:44 རྡོ་དེའི་སྟེང་དུ་འགྱེལ་བའི་མི་དེ་དུམ་བུར་ཆག་པར་འགྱུར། རྡོ་དེ་མི་སུ་ཞིག་གི་སྟེང་ལ་ལྷུངས་ན་དེས་ཁོ་མནན་པར་བྱ་”ཞེས་གསུངས།
MAT 21:45 ཡ་ཧུ་དཱ་པའི་བླ་ཆེན་དང་ཕཱ་རུ་ཤི་པ་ཚོས་ཁོང་གི་དཔེ་རྣམས་ཐོས་ནས་ཁོང་གིས་ཁོ་ཚོའི་སྐོར་ལ་གསུངས་པར་ཤེས་པས།
MAT 21:46 ཡེ་ཤུ་འཛིན་བཟུང་བྱེད་པར་བསམས་ཀྱང༌། ཁོང་ལུང་སྟོན་པར་བརྩིས་པའི་མི་ཚོགས་ལ་འཇིགས་སོ། །
MAT 22:1 ཡེ་ཤུས་ཡང་བསྐྱར་དཔེ་བསྟན་པའི་སྒོ་ནས་ཁོ་ཚོར་
MAT 22:2 “དཀོན་མཆོག་གི་རྒྱལ་སྲིད་ནི་རང་གི་བུ་ལ་བག་སྟོན་བྱས་པའི་རྒྱལ་པོ་ཞིག་དང་འདྲ་བ་ཡིན།
MAT 22:3 བག་སྟོན་དེ་ལ་མགྲོན་ལ་བོས་པ་རྣམས་འདྲེན་པའི་ཕྱིར་གཡོག་པོ་རྣམས་བཏང་ན་ཡང༌། མགྲོན་པོ་རྣམས་ཡོང་བར་མི་འདོད།
MAT 22:4 རྒྱལ་པོས་གཡོག་པོ་གཞན་རྣམས་བཏང་སྟེ་ཁོ་ཚོར། མགྲོན་པོ་རྣམས་ལ། ཉོན་དང༌། ངའི་བག་སྟོན་གྲ་སྒྲིག་ཟིན་པ་ཡིན་ལ། ངའི་བ་གླང་དང་ཕྱུགས་རྒྱགས་པ་བཤས། ཐམས་ཅད་བཤམས་ཚར་བས། བག་སྟོན་ལ་ཤོག་ཅིག་ཅེས་ཟེར་ཞིག
MAT 22:5 འོན་ཀྱང་མགྲོན་པོ་རྣམས་ཀྱིས་དེ་ལ་དོ་སྣང་མ་བྱས་པར་ཕར་སོང་སྟེ། གཅིག་རང་གི་ཞིང་ཁར་སོང༌། གཞན་གཅིག་རང་གི་ཚོང་ཁང་ལ་སོང༌།
MAT 22:6 གཞན་རྣམས་ཀྱིས་རྒྱལ་པོའི་གཡོག་པོ་རྣམས་བཟུང་ནས་སྡུག་པོ་བཏང་སྟེ་བསད།
MAT 22:7 རྒྱལ་པོ་ཤིན་ཏུ་ཁྲོས་ནས་དམག་དཔུང་བཏང་སྟེ་མི་སྲོག་གཅོད་མཁན་དེ་རྣམས་མེད་པར་བྱས་ནས་ཁོ་ཚོའི་གྲོང་ཁྱེར་མེས་བསྲེགས།
MAT 22:8 དེ་ནས་རང་གི་གཡོག་པོ་རྣམས་ལ། བག་སྟོན་གྲ་སྒྲིག་ཟིན་ཡོད་ཀྱང༌། མགྲོན་པོ་རྣམས་ལ་འོས་པ་མིན་པས།
MAT 22:9 གཞུང་ལམ་ལ་སོང་ནས་དེར་ཡོད་པ་ཐམས་ཅད་བག་སྟོན་ལ་བོས་ཤིག་ཅེས་སྨྲས།
MAT 22:10 གཡོག་པོ་རྣམས་ལམ་ལ་སོང་ནས། མི་བཟང་ངན་སུ་ཐུག་ཀྱང་ཐམས་ཅད་ཁྲིད་ཡོང་བས་བག་སྟོན་ཁང་མགྲོན་པོས་ཁེངས་པར་གྱུར།
MAT 22:11 རྒྱལ་པོ་དེ་མགྲོན་པོ་རྣམས་ལ་ལྟ་བར་ནང་དུ་ཡོང་བའི་ཚེ། བག་སྟོན་གྱི་གོས་མ་གྱོན་པ་ཞིག་མཐོང་བས།
MAT 22:12 ཁོ་ལ། གྲོགས་པོ། བག་སྟོན་གྱི་གོས་མེད་པར་ཁྱོད་ཅི་ལྟར་འདིར་ཡོང་ཞེས་བཤད་པས། མགྲོན་པོ་དེས་ཇི་ལྟར་ཞུ་དགོས་མིན་མ་ཤེས།
MAT 22:13 དེ་ནས་རྒྱལ་པོས་གཡོག་པོ་རྣམས་ལ། ཁོ་རྐང་ལག་བསྡམས་ནས། ངུ་ཞིང་སོ་ཁྲིག་ཁྲིག་འབྱུང་ས་ཕྱི་རོལ་གྱི་མུན་པའི་ནང་དུ་དབྱུགས་ཤིག་ཅེས་བཤད།
MAT 22:14 བོས་པ་མང་ཡང་འདམ་པ་ཉུང་”ཞེས་གསུངས།
MAT 22:15 དེ་ནས་ཡེ་ཤུ་ལ་ཁྲིམས་དང་འགལ་བའི་གཏམ་ཤོད་གནང་དུ་འཇུག་པའི་ཕྱིར་ཕཱ་རུ་ཤི་པ་རྣམས་སོང་ནས་ངན་ཇུས་བྱས།
MAT 22:16 ཁོ་ཚོའི་ཉེ་གནས་དང༌། ཧེ་རོ་དཱེའི་ཕྱོགས་ཁག་གི་མི་འགའ་ཞིག་ཁོང་གི་མདུན་དུ་བཏང་ནས་ཁོང་ལ་“སློབ་དཔོན་ལགས། ཁྱེད་ནི་རང་གཤིས་དྲང་པོ་ཡིན་ཞིང༌། དཀོན་མཆོག་གི་ལམ་ཡང་དག་པར་བདེན་པར་སྟོན་དེ། མི་གཞན་གྱི་བསམ་པའི་དབང་དུ་མི་འགྲོ་བ་དང་ཕྱོགས་རིས་མེད་པ་ཞིག་ཡིན་པ་ངེད་ཀྱིས་ཤེས།
MAT 22:17 ཁྱེད་ཀྱིས་ཅི་ལྟར་དགོངས་པ་ང་ཚོར་གསུངས་རོགས། དཀོན་མཆོག་གི་བཀའ་ཁྲིམས་ལྟར་ན་ང་ཚོས་རྒྱལ་པོར་ཁྲལ་འཇལ་རུང་ངམ་མི་རུང་”ཞེས་སྨྲས།
MAT 22:18 ཡེ་ཤུས་ཁོ་ཚོའི་ངན་སེམས་མཁྱེན་ཏེ་ཁོ་ཚོར་“ཁ་བཤད་དོན་ལ་མི་གནས་པ་ཁྱོད་ཚོ། ང་ལ་ཉམས་ཚོད་ལེན་པའི་རྒྱུ་མཚན་ཅི།
MAT 22:19 ཁྲལ་གྱི་དངུལ་སྒོར་ཞིག་ང་ལ་སྟོན་དང་”ཞེས་གསུངས་པས་ཁོ་ཚོས་དངུལ་སྒོར་གཅིག་ཁྱེར་ཡོང༌།
MAT 22:20 ཁོང་གིས་མི་དེ་ཚོར་“རི་མོ་དང་ཡི་གེ་འདི་སུའི་ཡིན་ནམ་”ཞེས་དྲིས་པ་ན།
MAT 22:21 ཁོ་ཚོས་ཁོང་ལ་“རྒྱལ་པོའི་ཡིན་ནོ་”ཞེས་སྨྲས་པས་ཁོང་གིས་ཁོ་རྣམས་ལ་“འོ་ན། གང་ཞིག་རྒྱལ་པོའི་ཡིན་པ་དེ་རྒྱལ་པོར་ཕུལ་ཞིག གང་ཞིག་དཀོན་མཆོག་གི་ཡིན་པ་དེ་དཀོན་མཆོག་ལ་ཕུལ་ཞིག་”ཅེས་གསུངས།
MAT 22:22 དེ་ཐོས་ནས་དེ་རྣམས་ངོ་མཚར་ཆེ་བར་གྱུར་དེ། ཁོང་དང་ཁ་བྲལ་ནས་ཕར་སོང༌།
MAT 22:23 ཉིན་དེ་རང་ལ་གཤིན་པོ་རྣམས་ལ་སླར་གསོན་པ་མེད་ཅེས་ཟེར་མཁན་སཱ་ཅུ་སེ་པ་ནང་ནས་འགའ་ཤས་ཡེ་ཤུའི་མདུན་དུ་ཡོང་སྟེ་ཁོང་ལ་
MAT 22:24 “སློབ་དཔོན་ལགས། ལུང་སྟོན་པ་མོ་ཤེ་ཡིས། གལ་སྲིད་སྐྱེས་པ་ཞིག་བུ་ཕྲུག་མེད་པར་ཤི་ན། ཁོའི་སྤུན་གྱིས་སྐྱེས་པ་དེའི་ཡུགས་མོ་བཟའ་ཟླ་བླངས་ནས་རང་གི་སྤུན་གྱི་དོན་ལ་རིགས་རྒྱུད་སྤེལ་དགོས་ཞེས་གསུངས།
MAT 22:25 ང་ཚོའི་དཀྱིལ་ལ་སྤུན་བདུན་ཡོད་དེ། དང་པོ་དེ་བཟའ་ཟླར་བླངས་ནས་བུ་ཕྲུག་མེད་པར་ཤི ཁོའི་སྤུན་གྱིས་སྐྱེས་པ་དེའི་ཡུགས་མོ་བཟའ་ཟླར་བླངས།
MAT 22:26 སྤུན་གཉིས་པ་དང༌། གསུམ་པ་ལ་སོགས་པ་བདུན་པའི་བར་དུ་དེ་ལྟར་བྱུང༌།
MAT 22:27 མཐར་བུད་མེད་དེའང་ཤི
MAT 22:28 འོ་ན་ཁོ་ཚོ་ཚང་མས་ཁོ་མོ་བཟའ་ཟླར་བླངས་པས། གཤིན་པོ་རྣམས་འཆི་བ་ནས་སླར་གསོན་པའི་དུས་སུ་ཁོ་མོ་ནི་སུའི་བཟའ་ཟླར་འགྱུར་”ཞེས་དྲིས།
MAT 22:29 ལན་དུ་ཡེ་ཤུས་ཁོ་རྣམས་ལ་“ཁྱེད་ཚོས་གསུང་རབ་ཀྱང་མི་རྟོགས། དཀོན་མཆོག་གི་ནུས་མཐུ་ཡང་མི་རྟོགས་པས་ནོར།
MAT 22:30 གཤིན་པོ་རྣམས་སླར་གསོན་པའི་དུས་སུ་དེ་ཚོས་བག་མ་ཡང་མི་ལེན། བག་མར་ཡང་མི་གཏོང༌། དེ་ཚོ་དཀོན་མཆོག་གི་ཞིང་ཁམས་ཀྱི་ཕོ་ཉ་དང་འདྲ་བ་ཡིན།
MAT 22:31 འོན་ཀྱང་གཤིན་པོ་གསོན་པོར་ལང་དུ་གྱུར་ངེས་པའི་སྐོར་ལ། དཀོན་མཆོག་གིས་ཁྱེད་ཚོར་གསུངས་པ་སྟེ།
MAT 22:32 ང་ནི་ཁྱེད་ཀྱི་མེས་པོ་ཨབ་ར་ཧམ་གྱི་དཀོན་མཆོག་དང༌། ཨི་སཱག་གི་དཀོན་མཆོག ཡ་ཀོབ་ཀྱི་དཀོན་མཆོག་ཡིན་ཞེས་མ་བཀླགས་སམ། ཁོང་ནི་གཤིན་པོ་རྣམས་ཀྱི་དཀོན་མཆོག་མ་ཡིན་ཏེ། གསོན་པོ་རྣམས་ཀྱི་དཀོན་མཆོག་ཡིན་ནོ་”ཞེས་གསུངས།
MAT 22:33 མི་ཚོགས་ཀྱིས་དེ་ཐོས་ནས་ཁོང་གི་ཆོས་གསུངས་པ་ལ་ཡ་མཚན་ཆེན་པོ་སྐྱེས།
MAT 22:34 ཡེ་ཤུས་སཱ་ཅུ་སེ་པ་རྣམས་ལ་སྨྲ་རྒྱུ་མེད་པར་མཛད་པ་ཐོས་ནས་ཕཱ་རུ་ཤི་པ་རྣམས་འདུས་ཏེ།
MAT 22:35 ཁོ་ཚོའི་ནང་ནས་ཆོས་ཁྲིམས་ལ་མཁས་པའི་མི་ཞིག་གིས་ཁོང་ལ་ཉམས་ཚོད་ལེན་པའི་ཕྱིར་ཁོང་ལ་
MAT 22:36 “སློབ་དཔོན་ལགས། ཆོས་ཁྲིམས་ཀྱི་བཀའི་ནང་ནས་གལ་ཆེ་ཤོས་གང་ཡིན་”ཞེས་བཀའ་འདྲི་ཞུས།
MAT 22:37 ཁོང་གིས་མི་དེར་“རང་གིས་གཙོ་བོ་དཀོན་མཆོག་ལ་བློ་གཅིག་སེམས་གཅིག་དང་ཡིད་གཅིག་གིས་བརྩེ་བར་ཟུངས་ཤིག
MAT 22:38 འདི་ནི་བཀའ་རྒྱ་གལ་ཆེ་ཤོས་དང་དང་པོ་དེ་ཡིན།
MAT 22:39 གཉིས་པ་དེ་དང་འདྲ་བ་ཡིན། དེ་ནི་ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས།
MAT 22:40 བཀའ་དེ་གཉིས་ལ་ཆོས་ཁྲིམས་ཆ་ཚང་དང༌། ལུང་སྟོན་པའི་བསྟན་པ་རྟེན་ནོ་”ཞེས་གསུངས།
MAT 22:41 ཕཱ་རུ་ཤི་པ་རྣམས་འདུས་པའི་ཚེ་ཡེ་ཤུས་ཁོ་རྣམས་ལ་བཀའ་དྲི་གནང་སྟེ་
MAT 22:42 “ཁྱེད་ཚོས་སྐྱབས་མགོན་མཱ་ཤི་ཀའི་སྐོར་ཅི་ལྟར་སེམས། ཁོང་ནི་སུའི་སྲས་ཡིན་”ཞེས་གསུངས་པས་ཁོ་ཚོས་ཁོང་ལ་“རྒྱལ་པོ་དཱ་བིད་ཀྱི་སྲས་ཡིན་”ཞེས་ཟེར།
MAT 22:43 ཁོང་གིས་ཁོ་ཚོར་“འོ་ན་དཀོན་མཆོག་གི་དམ་པའི་ཐུགས་ཉིད་ཀྱིས་བསྐུལ་ཏེ་དཱ་བིད་ཀྱིས་ཁོང་ལ་གཙོ་བོ་ཞེས་ཟེར་བ་དེ་ཅི་ཡིན། ཁོང་གིས།
MAT 22:44 དཀོན་མཆོག་གིས་ནི་ང་ཡི་གཙོ་བོ་ལ། ། ཁྱེད་ཀྱི་དགྲ་རྣམས་ཁྱེད་ཀྱི་ཞབས་འོག་ཏུ། ། ང་ཡིས་མ་བཅུག་བར་དུ་ཁྱེད་རང་ཉིད། ། ང་ཡི་གཡས་སུ་དེ་བར་བཞུགས་སུ་གསོལ། །
MAT 22:45 རྒྱལ་པོ་དཱ་བིད་ཀྱིས་མཱ་ཤི་ཀ་ལ་གཙོ་བོ་ཞེས་ཟེར་ན། མཱ་ཤི་ཀ་ཁོང་གི་སྲས་ཅི་ལྟར་ཡིན་”ཞེས་གསུངས།
MAT 22:46 མི་སུས་ཀྱང་ཁོང་ལ་ལན་ཞུ་མ་ཐུབ་པས། དེའི་རྗེས་སུ་སུས་ཀྱང་ཁོང་ལ་དྲི་བ་ཅི་ཡང་ཞུ་མ་ཕོད་དོ། །
MAT 23:1 དེ་ནས་ཡེ་ཤུས་མི་ཚོགས་དང་རང་གི་ཉེ་གནས་རྣམས་ལ་
MAT 23:2 “ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་རྣམས་ལུང་སྟོན་པ་མོ་ཤེའི་བཞུགས་ཁྲི་ལ་སྡོད་པས།
MAT 23:3 ཁོ་ཚོས་ཁྱེད་རྣམས་ལ་སློབ་པ་གང་ཐམས་ཅད་སྲུང་ཞིག འོན་ཀྱང་ཁོ་ཚོའི་སྤྱོད་པ་བཞིན་དུ་མ་བྱེད་ཅིག གང་ཡིན་ཞེ་ན། ཁོ་ཚོས་སྨྲ་བ་ལྟར་མི་བྱེད།
MAT 23:4 དེ་ཚོས་འཁུར་དཀའ་བའི་རྡོག་ཁྲེས་ལྗིད་པོ་བསྡམས་ནས་མི་གཞན་གྱི་རྒྱབ་ལ་འགེལ་ཡང༌། རང་གི་མཛུབ་མོ་གཅིག་ཙམ་གྱིས་ཀྱང་དེ་ལ་རེག་པར་མི་འདོད།
MAT 23:5 ཁོ་ཚོས་རང་གི་ལས་བྱས་པ་ཐམས་ཅད་མི་གཞན་གྱིས་མཐོང་བའི་ཆེད་དུ་ཡིན་ཏེ། རང་གི་སྲུང་བ་ཞེང་ཆེ་བ་དང༌། གོས་ཀྱི་མཐའ་འཛར་རིང་པོ་བྱེད།
MAT 23:6 མི་དེ་ཚོས་གསོལ་སྟོན་ལ་གྲལ་མགོའི་གལ་ཆེ་ས་དང༌། འདུ་ཁང་ནང་ཁྲི་མཐོ་སར་སྡོད་པ།
MAT 23:7 ཁྲོམ་ལ་མི་རྣམས་ཀྱིས་ཁོ་ཚོར་ཕྱག་བྱེད་པ་དང༌། མི་རྣམས་ཀྱིས་ཁོ་ལ་རབ་བི་ཞེས་ཟེར་བར་དགའ།
MAT 23:8 འོན་ཀྱང་ཁྱེད་ཚོ་ཚང་མ་ཕན་ཚུན་སྤུན་ཟླ་ཡིན་ཞིང་སློབ་དཔོན་གཅིག་རང་ལས་མེད་པས་ཁྱེད་ཚོར་རབ་བི་ཟེར་བར་མ་འཇུག་ཅིག
MAT 23:9 ཡང་དཀོན་མཆོག་གི་ཞིང་ཁམས་སུ་བཞུགས་པ་ཁོང་གཅིག་པོ་ནི་ཁྱེད་ཀྱི་ཡབ་ཡིན་པས་འཇིག་རྟེན་སྟེང་གི་མི་སུ་ལ་ཡང་ཡབ་མ་ཟེར་ཞིག
MAT 23:10 སྐྱབས་མགོན་མཱ་ཤི་ཀ་གཅིག་པོ་ནི་ཁྱེད་ཚོའི་སློབ་དཔོན་ཡིན་པས་ཁྱེད་ཚོར་སློབ་དཔོན་ཟེར་བར་མ་འཇུག་ཅིག
MAT 23:11 ཁྱེད་ཚོའི་ནང་ནས་སུ་ཆེ་ཤོས་ཡིན་པ་དེ་ཁྱེད་ཚོའི་གཡོག་པོར་འགྱུར་དགོས།
MAT 23:12 རང་གིས་རང་ལ་བཀུར་སྟི་བྱེད་མཁན་དམའ་བར་འགྱུར་ཞིང༌། རང་གིས་རང་དམའ་ས་ཟིན་མཁན་ལ་བཀུར་སྟི་འཐོབ་པར་འགྱུར།
MAT 23:13 ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་སྟེ་ཁ་བཤད་དོན་ལ་མི་གནས་པ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཅིའི་ཕྱིར་ཞེ་ན། ཁྱོད་ཚོས་དཀོན་མཆོག་གི་རྒྱལ་སྲིད་ཀྱི་སྒོ་བརྒྱབ་ནས། ཁྱོད་ཚོ་རང་ནང་དུ་མ་ཞུགས་པ་དང༌། ནང་ལ་འགྲོ་བཞིན་པ་རྣམས་ཀྱང་བཀག
MAT 23:15 ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་སྟེ་ཁ་བཤད་དོན་ལ་མི་གནས་པ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཅིའི་ཕྱིར་ཞེ་ན། མི་གཅིག་ཡ་ཧུ་དཱ་པའི་ཆོས་སུ་འཇུག་པའི་ཕྱིར་ཁྱོད་ཚོས་སྐམ་ས་དང་རྒྱ་མཚོ་གཉིས་སྐོར་ཞིང༌། མི་དེ་ཡ་ཧུ་དཱ་པར་གྱུར་ནས་ཁྱོད་ཚོ་ལས་ལྡབ་གཉིས་ཀྱིས་ལྷག་པའི་དམྱལ་ཁམས་ཀྱི་བུར་བྱེད།
MAT 23:16 ལམ་སྟོན་པ་ལོང་བ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཁྱོད་ཚོས། གལ་ཏེ་མི་ཞིག་གིས་མཆོད་ཁང་ཆེན་མོ་དཔང་དུ་བཙུགས་ཏེ་མནའ་བསྐྱལ་ན་ཅིའང་མེད། འོན་ཀྱང་མཆོད་ཁང་ཆེན་མོའི་གསེར་དཔང་དུ་བཙུགས་ཏེ་མནའ་བསྐྱལ་ན་དེ་ཡིན་གཅིག་སྲུང་དགོས་ཞེས་ཟེར།
MAT 23:17 བླུན་པོ་ལོང་བ་ཁྱོད་རྣམས། གསེར་གལ་ཆེ་བ་ཡིན་ནམ། ཡང་ན་གསེར་དེ་རྩ་ཆེན་དུ་སྒྱུར་བའི་མཆོད་ཁང་ཆེན་མོ་གལ་ཆེ་བ་ཡིན།
MAT 23:18 ཡང་ཁྱོད་ཚོས། གལ་ཏེ་མི་ཞིག་གིས་མཆོད་ཁྲི་དཔང་དུ་བཙུགས་ཏེ་མནའ་བསྐྱལ་ན་ཅིའང་མེད། འོན་ཀྱང་མཆོད་ཁྲིའི་སྟེང་གི་མཆོད་པ་དཔང་དུ་བཙུགས་ཏེ་མནའ་བསྐྱལ་ན་དེ་ཡིན་གཅིག་སྲུང་དགོས་ཞེས་ཟེར།
MAT 23:19 ལོང་བ་ཁྱོད་ཚོ། མཆོད་པ་ཆེ་བ་ཡིན་ནམ། ཡང་ན་མཆོད་པ་རྩ་ཆེན་དུ་སྒྱུར་བའི་མཆོད་ཁྲི་གལ་ཆེ་བ་ཡིན།
MAT 23:20 དེ་བས་ན། མི་སུ་ཞིག་གིས་མཆོད་ཁྲི་དཔང་དུ་བཙུགས་ཏེ་མནའ་བསྐྱལ་ན། མཆོད་ཁྲི་དང་དེའི་སྟེང་གི་ཐམས་ཅད་དཔང་དུ་བཙུགས་ཏེ་མནའ་སྐྱེལ།
MAT 23:21 ཡང་སུ་ཞིག་གིས་མཆོད་ཁང་དཔང་དུ་བཙུགས་ཏེ་མནའ་བསྐྱལ་ན། མཆོད་ཁང་དང་དེའི་ནང་ལ་བཞུགས་མཁན་ཁོང་དཔང་དུ་བཙུགས་ཏེ་མནའ་སྐྱེལ།
MAT 23:22 ཡང་སུ་ཞིག་གིས་དཀོན་མཆོག་གི་ཞིང་ཁམས་དཔང་དུ་བཙུགས་ཏེ་མནའ་བསྐྱལ་ན། དཀོན་མཆོག་གི་བཞུགས་ཁྲི་དང་དེའི་སྟེང་ལ་བཞུགས་མཁན་ཡང་དཔང་དུ་བཙུགས་ཏེ་མནའ་སྐྱེལ།
MAT 23:23 ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་སྟེ་ཁ་བཤད་དོན་ལ་མི་གནས་པ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཅིའི་ཕྱིར་ཞེ་ན། ལྡུམ་རའི་རྩྭ་དྲི་ཞིམ་དང་གོ་སྙོད་ལ་སོགས་སྔོ་ཚོད་ཆུང་ཆུང་སྣ་ཚོགས་ཀྱི་བཅུ་ཆ་གཅིག་དཀོན་མཆོག་ལ་ཕུལ་ན་ཡང༌། ཁྱོད་ཚོས་ཁྲིམས་གཅོད་བདེན་པར་བྱེད་པ་དང༌། སྙིང་རྗེ་དང༌། དད་པ་ལ་སོགས་པའི་ཆོས་ཁྲིམས་ཀྱི་གལ་ཆེ་བའི་དོན་རྣམས་སྣང་མེད་དུ་བརྩིས། འདི་ཚོ་སྲུང་སྟེ་གཞན་རྣམས་དོར་བར་མི་རུང༌།
MAT 23:24 ལམ་སྟོན་པ་ལོང་བ་ཁྱོད་ཚོ། ཁྱོད་ཚོས་འབུ་ཆུང་ཆུང་བཙགས་ནས་རྔ་མོང་མིད།
MAT 23:25 ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་སྟེ་ཁ་བཤད་དོན་ལ་མི་གནས་པ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཅིའི་ཕྱིར་ཞེ་ན། ཁྱོད་ཚོས་ཕོར་པ་དང་སྡེར་མའི་ཕྱི་ཕྱོགས་གཙང་བར་བྱེད་ནའང༌། ནང་ཕྱོགས་སུ་དེ་ཚོ་སེར་སྣ་དང་རང་འདོད་ཚ་བའི་བཙོག་པ་ཡིས་ཁེངས།
MAT 23:26 ཕཱ་རུ་ཤི་པ་ལོང་བ་ཁྱོད། སྔོན་ལ་ཕོར་པ་དང་སྡེར་མའི་ནང་ཕྱོགས་གཙང་བར་བྱོས་ཤིག དེ་ནས་ཕྱི་ཕྱོགས་ཀྱང་གཙང་བར་འགྱུར།
MAT 23:27 ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་སྟེ་ཁ་བཤད་དོན་ལ་མི་གནས་པ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཅིའི་ཕྱིར་ཞེ་ན། ཁྱོད་ཚོ་ནི་དཀར་པོར་བཟོས་པའི་དུར་ཁང་དང་འདྲ་བ་ཡིན་ཏེ་ཕྱི་ཕྱོགས་ལ་བལྟས་ན་མཛེས་ཀྱང༌། ནང་ཕྱོགས་སུ་གཤིན་པོའི་རུས་དང༌། མི་གཙང་བ་རིགས་ཀུན་གྱིས་ཁེངས།
MAT 23:28 དེ་ལྟར་ཁྱོད་ཚོའང་ཕྱི་ཕྱོགས་སུ་མི་རྣམས་ཀྱིས་བལྟས་ན་ཆོས་དྲང་པོ་ཡིན་པར་མཐོང་ཡང༌། ནང་ཕྱོགས་སུ་ཁ་བཤད་དོན་ལ་མི་གནས་པ་དང་ཁྲིམས་མེད་པ་ཡིས་ཁེངས་སོ། །
MAT 23:29 ཆོས་ཁྲིམས་ལ་མཁས་པའི་མི་དང༌། ཕཱ་རུ་ཤི་པ་སྟེ་ཁ་བཤད་དོན་ལ་མི་གནས་པ་ཁྱོད་ཚོ་ལ་སྡུག་བསྔལ་ཆེན་པོ་འབྱུང༌། ཅིའི་ཕྱིར་ཞེ་ན། ཁྱོད་ཚོས་ལུང་སྟོན་པའི་དུར་ཁང་རྩིག་པ་དང༌། དྲང་ལྡན་པ་རྣམས་ཀྱི་དུར་ཁང་ལ་བརྒྱན་ཏེ།
MAT 23:30 ང་ཚོ་མེས་པོའི་དུས་སུ་ཡོད་པ་ཡིན་ན། ཁོ་ཚོ་དང་མཉམ་དུ་ལུང་སྟོན་པ་རྣམས་མི་གསོད་ཅེས་ཟེར།
MAT 23:31 དེ་ལྟར་སྨྲས་ནས་ཁྱོད་ཚོས་སོ་སོ་ལུང་སྟོན་པ་གསོད་མཁན་གྱི་རྒྱུད་པ་ཡིན་པར་དཔང་པོ་བྱེད།
MAT 23:32 བྱས་ན། ཁྱོད་ཚོའི་ཕ་མེས་ཀྱིས་འགོ་བཙུགས་པ་དེ་ཁྱོད་ཚོས་ཚར་བར་གྱིས་ཤིག
MAT 23:33 ཁྱོད་ཚོ་སྦྲུལ་གྱི་རིགས། དུག་སྦྲུལ་གྱི་རྒྱུད་རྣམས། དམྱལ་ཁམས་ཀྱི་ཆད་པ་ལས་ཅི་ལྟར་ཐར་བར་འགྱུར།
MAT 23:34 དེའི་ཕྱིར་ཉོན་ཞིག ངས་ལུང་སྟོན་པ་དང༌། ཤེས་རབ་ཅན་དང༌། ཆོས་ཁྲིམས་ལ་མཁས་པའི་མི་ཁྱོད་ཚོའི་རྩར་གཏོང༌། དེ་ཚོའི་ནང་ནས་ཁྱོད་ཚོས་ཁ་ཤས་གསོད། ཁ་ཤས་རྒྱང་ཤིང་ལ་རྒྱོང༌། ཁ་ཤས་འདུ་ཁང་ནང་ལ་རྟ་ལྕག་གིས་རྡུང༌། ཁ་ཤས་ལ་གྲོང་ཁྱེར་གཅིག་ནས་གཞན་ལ་རྗེས་སུ་སྙེག་སྟེ་གནོད་འཚེ་བྱེད་པས།
MAT 23:35 དྲང་ལྡན་གྱི་མེས་པོ་ཧ་བེལ་ནས་མཆོད་ཁང་དང་མཆོད་ཁྲི་གཉིས་བར་དུ་ཁྱོད་ཚོས་བསད་པའི་པེ་རེ་ཀི་ཡཱ་ཡི་བུ་ཟེ་ཀ་རི་ཡཱ་བར་གྱི་ས་ལ་གཟགས་པའི་ཁྲག་དེ་ཐམས་ཅད་ལ་ཁྱོད་ཚོས་འགན་ལེན་བྱེད་དགོས།
MAT 23:36 ངས་ཁྱོད་ཚོར་བདེན་པར་ཟེར་རྒྱུར། དེ་ཐམས་ཅད་ཀྱི་ཆད་པ་མི་རབས་འདི་ཡི་མགོ་སྟེང་དུ་འབབ་ངེས་ཡིན།”
MAT 23:37 “ཀྱེ་ཡེ་རུ་ཤ་ལེམ། ཡེ་རུ་ཤ་ལེམ། ཁྱོད་ཀྱིས་ལུང་སྟོན་པ་རྣམས་གསོད་ཅིང་ཁྱོད་རྩར་མངག་པ་རྣམས་རྡོ་རུབ་གཏོང༌། བྱ་མོས་རང་གི་བྱ་ཕྲུག་གཤོག་པའི་འོག་ཏུ་སྡུད་པ་ལྟར་ངས་ཐེངས་མང་པོར་ཁྱོད་ཀྱི་ཕྲུ་གུ་སྡུད་པར་འདོད་ཀྱང༌། ཁྱོད་རྣམས་མ་མོས།
MAT 23:38 ལྟོས་ཤིག ཁྱོད་ཀྱི་གནས་ཁང་ཁྱོད་ཕྱིར་སྟོང་བར་ལུས་པར་འགྱུར།
MAT 23:39 ངས་ཁྱོད་རྣམས་ལ་ཟེར་རྒྱུར། ད་ནས་བཟུང་ཁྱོད་ཚོས་གཙོ་བོའི་མཚན་ཐོག་ནས་ཕེབས་མཁན་ལ་བྱིན་རླབས་གནང་བར་ཤོག་ཅེས་ཟེར་བའི་བར་དུ་ཁྱོད་ཀྱིས་ང་མཐོང་བར་མི་འགྱུར་”ཞེས་གསུངས་སོ། །
MAT 24:1 ཡེ་ཤུ་མཆོད་ཁང་ཆེན་མོའི་ཁྱམས་ར་ནས་ཕྱིར་ཕེབས་སྐབས། དེའི་ཁང་པ་རྣམས་ཁོང་ལ་སྟོན་པའི་ཕྱིར་ཉེ་གནས་རྣམས་ཡོང་བ་དང༌།
MAT 24:2 ཁོང་གིས་ཁོ་རྣམས་ལ་“ཁང་པ་ཆེན་པོ་འདི་རྣམས་མཐོང་བ་ཡིན་ནམ། ངས་ཁྱེད་ཚོར་བདེན་པར་ཟེར་རྒྱུར། མ་འོངས་པའི་དུས་སུ་འདི་རུ་རྡོ་ཕ་བོང་གཅིག་སྟེང་གཅིག་ཀྱང་མི་ལུས་པར་ཐམས་ཅད་གཞིག་པར་འགྱུར་རོ་”ཞེས་གསུངས།
MAT 24:3 ཡེ་ཤུ་སྐྱུར་རུ་ཤིང་གི་རི་སྟེང་དུ་བཞུགས་པའི་ཚེ། ཉེ་གནས་རྣམས་ཟུར་དུ་ཁོང་གི་མདུན་ལ་ཡོང་ནས་ཁོང་ལ་“དོན་འདི་རྣམས་དུས་ནམ་ཞིག་ལ་འབྱུང་ཞིང༌། ཁྱེད་ཀྱིས་འབྱོན་པ་དང་དུས་ཀྱི་མཐའ་མའི་རྟགས་གང་ཡིན་པ་ང་ཚོར་གསུང་རོགས་”ཞེས་ཞུས།
MAT 24:4 ལན་དུ་ཡེ་ཤུས་དེ་རྣམས་ལ་“མི་སུས་ཀྱང་ཁྱེད་ཚོ་མི་སླུ་བའི་ཕྱིར་དོགས་ཟོན་གྱིས་ཤིག
MAT 24:5 མི་མང་པོས་ངའི་མིང་ཐོག་ནས་ཡོང་སྟེ་ང་རང་མཱ་ཤི་ཀ་ཡིན་ཞེས་ཟེར་ནས་མི་མང་པོར་མགོ་སྐོར་གཏོང་ངེས་ཡིན།
MAT 24:6 ཁྱེད་ཚོས་དམག་འཁྲུག་དང་དམག་འཁྲུག་སྐོར་གྱི་གཏམ་ཐོས་པའི་སྐབས་སུ་མ་འཇིགས་ཤིག དོན་འདི་ཚོ་འབྱུང་ངེས་ཀྱང་དེ་ནི་དུས་རབས་ཀྱི་མཐའ་མ་ད་དུང་མ་ཡིན།
MAT 24:7 རྒྱུ་མཚན་ནི་མི་རིགས་དང་མི་རིགས་འཁྲུག་ཅིང་རྒྱལ་ཁམས་དང་རྒྱལ་ཁམས་འཁྲུག་པ། ས་ཆ་ཁ་ཤས་ལ་མུ་གེ་དང་ས་ཡོམ་ཡང་འབྱུང་བར་འགྱུར།
MAT 24:8 འདི་ཚོ་ཐམས་ཅད་ནི་སྐྱེ་ཟུག་ཐོག་མ་དང་འདྲ་བ་ཡིན།
MAT 24:9 དེ་ནས་ཁོ་ཚོས་ཁྱེད་རྣམས་ལ་གནོད་འཚེ་བྱེད་པར་གཏད་ནས་གསོད་པར་འགྱུར། ངའི་མིང་གི་རྐྱེན་གྱིས་མི་རིགས་ཚང་མས་ཁྱེད་རྣམས་ལ་སྡང་བར་འགྱུར།
MAT 24:10 དེའི་ཚེ་མི་མང་པོ་དད་པ་ལོག་པར་གྱུར་ནས་གཅིག་གིས་གཅིག་ལ་རྒྱབ་གཏོད་བྱེད་ཅིང་སྡང་ཡོང༌།
MAT 24:11 ལུང་སྟོན་པ་རྫུན་མ་མང་པོ་ཞིག་འབྱུང་ཞིང་མི་མང་པོར་བསླུ་བྲིད་བྱེད་པར་འགྱུར།
MAT 24:12 བཀའ་ཁྲིམས་དང་འགལ་བ་འཕེལ་བས་མི་མང་ཆེ་བའི་བརྩེ་སེམས་ཉམས་པར་འགྱུར།
MAT 24:13 འོན་ཀྱང་ཚེའི་མཐའ་མཇུག་བར་དུ་བཟོད་པ་སྒོམ་པའི་མི་དེ་ལ་ཐར་པ་འཐོབ་ངེས་ཡིན།
MAT 24:14 ཡང་མི་རིགས་ཐམས་ཅད་ལ་དཔང་པོ་བྱེད་པའི་ཕྱིར་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་འདི་འཇིག་རྟེན་ཧྲིལ་པོར་སྒྲོག་པར་འགྱུར་ཞིང༌། དེ་ནས་དུས་ཀྱི་མཐའ་མ་འབྱུང༌།
MAT 24:15 ལུང་སྟོན་པ་དཱ་ནི་ཨེལ་གྱིས་གསུངས་པའི་སྟོང་བར་བྱེད་མཁན་གདུག་པ་ཅན་གནས་མཆོག་ལ་ལངས་བསྡད་པར་མཐོང་བའི་ཚེ། (འདི་ཀློག་མཁན་གྱིས་ཧ་གོ་བར་གྱིས་ཤིག)
MAT 24:16 ཡ་ཧུ་དཱ་ཡུལ་དུ་ཡོད་པའི་མི་རྣམས་རི་ལ་བྲོས་དགོས་ངེས་ཡིན།
MAT 24:17 ཁང་པའི་ཐོག་ལ་ཡོད་པ་མར་འབབ་ནས་རང་གི་ཁང་པའི་ནང་ནས་ཅ་ལག་མ་ལེན་ཅིག
MAT 24:18 ཞིང་ཁར་ཡོད་པའི་མི་རང་གི་ཕྱི་གོས་ལེན་དུའང་ངེས་པར་དུ་ཕྱིར་མི་ལོག་ཅིག
MAT 24:19 ཉིན་དེ་ཚོའི་རིང་ལ་བུད་མེད་ཕྲུ་གུ་འཁོར་བ་དང་བུ་ཕྲུག་ལ་འོ་མ་སྟེར་མཁན་རྣམས་ལ་སྙིང་རེ་རྗེ།
MAT 24:20 ཁྱེད་ཚོ་འབྲོས་པ་དེ་དགུན་ཁར་དང༌། ཡང་ན་ངལ་གསོ་བའི་ཉིན་མོར་མི་འབྱུང་བའི་ཕྱིར་ཁྱེད་ཚོས་སྨོན་ལམ་ཐོབས་ཤིག
MAT 24:21 དེའི་དུས་སུ་སྡུག་བསྔལ་ཤིན་ཏུ་ཆེན་པོ་འབྱུང་ཡོང༌། དེ་ལྟ་བུའི་སྡུག་བསྔལ་ཆེན་པོ་དེ་ཐོག་མར་འཇིག་རྟེན་བཀོད་པ་ནས་ད་ལྟའི་བར་དུ་བྱུང་མ་མྱོང་ལ་རྗེས་སུའང་རྩ་བ་ནས་འབྱུང་མི་སྲིད།
MAT 24:22 ཡང་སྡུག་བསྔལ་གྱི་ཉིན་དེ་རྣམས་ཉུང་བར་མ་མཛད་ན། མི་སུ་ཡང་ཐར་མི་ཐུབ། འོན་ཀྱང་ཁོང་གིས་བདམས་པའི་མི་རྣམས་ཀྱི་དོན་དུ་ཉིན་དེ་རྣམས་ཇེ་ཉུང་དུ་མཛད་པར་འགྱུར།
MAT 24:23 དེའི་དུས་སུ་མི་སུ་ཞིག་གིས་ཁྱེད་རྣམས་ལ་ལྟོས་ཤིག སྐྱབས་མགོན་མཱ་ཤི་ཀ་འདི་རུ་ཡོད། ཡང་ན་ལྟོས་ཤིག མཱ་ཤི་ཀ་དེ་རུ་ཡོད་ཟེར་ན། དེར་ཡིད་མ་ཆེས་ཤིག
MAT 24:24 གང་ལགས་ཟེར་ན། མཱ་ཤི་ཀ་རྫུན་མ་དང་ལུང་སྟོན་པ་རྫུན་མ་མང་པོ་འབྱུང་སྟེ། ངོ་མཚར་ཆེ་བའི་ལས་དང་རྟགས་མཚན་བསྟན་ནས་མགོ་སྐོར་བཏང་སྲིད་ན། བདམས་པའི་མི་རྣམས་ཀྱང་མགོ་འཁོར་བར་འགྱུར།
MAT 24:25 ཉོན་ཞིག ངས་ཁྱེད་ཚོར་སྔོན་ལ་བཤད་པ་ཡིན།
MAT 24:26 དེའི་ཕྱིར་ཁོ་ཚོས་ཁྱེད་རྣམས་ལ། ལྟོས་ཤིག ཁོང་དབེན་གནས་སུ་འདུག་ཅེས་ཟེར་ན་མ་འཐོན་ཞིག ཡང་ན། ལྟོས་ཤིག ཁོང་ཁང་པའི་ཕུག་ནང་འདུག་ཅེས་ཟེར་ན་ཡིད་མ་ཆེས་ཤིག
MAT 24:27 རྒྱུ་མཚན་ནི་གློག་ཤར་ཕྱོགས་ནས་ནུབ་ཕྱོགས་སུ་འཁྱུག་པ་ལྟར། མིའི་རིགས་ཀྱི་བུའི་འབྱོན་པ་འབྱུང་བར་འགྱུར།
MAT 24:28 ཕུང་པོ་ཡོད་སར་བྱ་རྒོད་འཛོམ་པར་འགྱུར་རོ། །”
MAT 24:29 “དུས་དེར་སྡུག་བསྔལ་ཆེན་པོ་དེའི་རྗེས་སུ། ཉི་མ་སྒྲིབ་ཅིང་ཟླ་བའི་འོད་མི་སྤྲོ། ། རྒྱུ་སྐར་ཚོགས་རྣམས་ས་སྟེང་དུ་ལྷུང་ཞིང༌། ། བར་སྣང་ཁམས་ཀྱི་དབང་ལྡན་གཡོ་བར་འགྱུར། །
MAT 24:30 དེ་ནས་མིའི་རིགས་ཀྱི་བུའི་རྟགས་ནམ་མཁར་འབྱུང་ཞིང༌། དེའི་ཚེ་འཇིག་རྟེན་གྱི་མི་སྡེ་ཚང་མས་མྱ་ངན་བྱེད། ཁོ་ཚོས་མིའི་རིགས་ཀྱི་བུ་ནི་དབང་ཆེན་པོ་དང་གཟི་བརྗིད་ངང་ནས་ནམ་མཁའི་སྤྲིན་གྱི་ནང་ནས་འབྱོན་པར་མཐོང་ཡོང༌།
MAT 24:31 ཡང་དམག་དུང་གི་སྒྲ་ཆེན་པོ་དང་བཅས་པར་ཁོང་གིས་རང་གི་ཕོ་ཉ་རྣམས་མངགས་ཏེ། དེ་ཚོས་ས་གཞི་ཆེན་པོའི་མཐའ་ནས་ནམ་མཁའི་མཐའ་བར་བདམས་པའི་མི་ཐམས་ཅད་ཕྱོགས་བཞི་མཚམས་བརྒྱད་ནས་སྡུད་ཡོང༌།”
MAT 24:32 “ཁྱེད་ཚོས་བསེ་ཡབ་ཤིང་ནས་དཔེ་ཞིག་ལོངས་དང༌། དེའི་ཡལ་གར་ལོ་མ་འབུས་ནས་མཉེན་པའི་དུས་སུ། དབྱར་ཁའི་དུས་ཉེ་བར་ཡོད་པ་ཁྱེད་ཚོས་ཤེས།
MAT 24:33 དེ་བཞིན་དུ་ཁྱེད་ཚོས་རྟགས་མཚན་དེ་ཐམས་ཅད་འབྱུང་བ་མཐོང་ཚེ། མིའི་རིགས་ཀྱི་བུ་ཁོང་ཡང་སྒོ་འགྲམ་དུ་ཉེ་བར་སླེབས་ཡོད་པའང་རྟོགས་པར་གྱིས་ཤིག
MAT 24:34 ངས་ཁྱེད་ཚོར་བདེན་པར་ཟེར་རྒྱུར། མི་རབས་འདི་འདའ་བར་འགྱུར་བའི་སྔོན་ལ་དོན་འདི་ཐམས་ཅད་འབྱུང་བར་འགྱུར།
MAT 24:35 གནམ་ས་གཉིས་ནི་འདའ་བར་འགྱུར་ཡང་ངའི་བཀའ་འདའ་བར་མི་འགྱུར་རོ།
MAT 24:36 ཉིན་མོ་དེ་དང་དུས་ཚོད་དེའི་སྐོར་ཡབ་དཀོན་མཆོག་གིས་མ་གཏོགས། སུས་ཀྱང་མི་ཤེས། དཀོན་མཆོག་གི་བཞུགས་གནས་ཀྱི་ཕོ་ཉ་རྣམས་ཀྱིས་ཀྱང་མི་ཤེས་ལ་སྲས་ཀྱིས་ཀྱང་མི་ཤེས།
MAT 24:37 མིའི་རིགས་ཀྱི་བུའི་འབྱོན་པ་ནི་ནོ་ཨའི་དུས་ལྟར་ཡིན་པར་འགྱུར།
MAT 24:38 གང་ལགས་ཤེ་ན། དུས་དེར་ཆུ་ལོག་མ་འབྱུང་བའི་སྔོན་ལ། ནོ་ཨ་ཁོང་གྲུ་ཆེན་གྱི་ནང་དུ་མ་ཞུགས་པའི་བར་དུ་དེ་ཚོས་བཟའ་འཐུང་བྱེད་ཅིང༌། བག་མ་གཏོང་ལེན་བྱེད་བཞིན་ཡོད།
MAT 24:39 ཆུ་ལོག་གིས་དེ་ཚོ་ཐམས་ཅད་ཕར་འཁྱེར་བའི་བར་དེ་ཚོས་མ་རྟོགས། མིའི་རིགས་ཀྱི་བུའི་འབྱོན་པ་དེ་ཡང་དེ་ལྟར་ཡིན་པར་འགྱུར།
MAT 24:40 དེའི་དུས་སུ་ཞིང་ཁར་མི་གཉིས་ཡོད་པ་ལས་གཅིག་ལེན་ཅིང་གཅིག་འབོར་བར་འགྱུར།
MAT 24:41 བུད་མེད་འབྲུ་འཐག་མཁན་གཉིས་ཡོད་པ་ལས། གཅིག་ལེན་ཅིང་གཅིག་འབོར་བར་འགྱུར།
MAT 24:42 དེ་བས་ན་ཁྱེད་ཀྱི་གཙོ་བོ་འབྱོན་པའི་ཉིན་མོ་མི་ཤེས་པས་བྱ་ར་བྱོས་ཤིག
MAT 24:43 ཁྱིམ་བདག་གིས་རྐུན་མ་སླེབས་པའི་དུས་དེ་ཤེས་པ་ཡིན་ན། གཉིད་མ་ལོག་པར་སྒུག་ནས་ཁང་པར་འཛུལ་དུ་མི་འཇུག་པ་དེ་རྟོགས་པར་གྱིས།
MAT 24:44 དེའི་ཕྱིར་ཁྱེད་ཚོའང་གྲ་སྒྲིག་བྱས་ནས་སྡོད་དགོས། གང་ལགས་ཟེར་ན། མིའི་རིགས་ཀྱི་བུ་ཁྱེད་ཀྱིས་མི་སེམས་པའི་དུས་ལ་ཕེབས་ངེས་ཡིན་ནོ། །”
MAT 24:45 “བློ་གཏད་ཆོག་པ་དང་ཤེས་རབ་དང་ལྡན་པའི་གཡོག་པོ་དེ་སུ་ཡིན། ཁྱིམ་བདག་གིས་མི་དེ་ལ་དབང་ཆ་སྤྲད་ནས་ཁོས་དུས་ལ་འབབ་སྐབས་གཡོག་པོ་གཞན་རྣམས་ལ་ཟས་སྐལ་སྟེར་བར་བྱེད་མཁན་དེ་ཡིན།
MAT 24:46 ཁྱིམ་བདག་ཡོང་ནས་ལྟ་སྐབས་དེ་ལྟར་བྱེད་བཞིན་པའི་གཡོག་པོ་ནི་བདེའོ།
MAT 24:47 ངས་ཁྱོད་ཚོ་ལ་བདེན་པར་ཟེར་རྒྱུར། ཁྱིམ་བདག་དེས་ཁོ་ལ་གང་ཡོད་པ་ཐམས་ཅད་གཡོག་པོ་དེའི་དབང་འོག་ཏུ་འཇུག་ངེས་ཡིན།
MAT 24:48 འོན་ཀྱང་གཡོག་པོ་ངན་པ་དེས་ཁྱིམ་བདག་འགྱང་བར་ཡོང་བསམས་ཤིང༌།
MAT 24:49 གཡོག་པོ་གཞན་རྣམས་བརྡུངས་ཏེ་ར་བཟི་མཁན་དང་མཉམ་དུ་ཟ་འཐུང་བྱས་ན།
MAT 24:50 གཡོག་པོས་མི་སེམས་པའི་ཉིན་དང༌། མི་ཤེས་པའི་དུས་ཚོད་ལ་ཁྱིམ་བདག་ཡོང་སྟེ།
MAT 24:51 ཁོ་དུམ་བུར་བཅད་ནས་ཁ་བཤད་དོན་ལ་མི་གནས་པ་རྣམས་དང་ལྷན་དུ་ངུ་ཞིང་སོ་ཁྲིག་ཁྲིག་བྱེད་པའི་གནས་སུ་འཇུག་ངེས་ཡིན་ནོ། །”
MAT 25:1 “དེའི་དུས་སུ་དཀོན་མཆོག་གི་རྒྱལ་སྲིད་ནི་སྣུམ་བཞུ་འཁུར་ཏེ་མག་པ་ཐུག་པར་སོང་བའི་བག་གཡོག་གཞོན་ནུ་མ་བཅུ་དང་འདྲ་བ་ཡིན།
MAT 25:2 དེ་ཚོའི་ནང་ནས་གཞོན་ནུ་མ་ལྔ་ནི་བླུན་པོ་དང༌། ལྔ་ནི་ཤེས་རབ་ཅན་ཡིན།
MAT 25:3 བླུན་པོ་རྣམས་ཀྱིས་སྣུམ་བཞུ་འཁྱེར་ཡང་བཞུ་སྣུམ་མ་འཁྱེར།
MAT 25:4 ཤེས་རབ་ལྡན་པ་རྣམས་ཀྱིས་ཁོ་ཚོའི་སྣུམ་བཞུ་དང་བཅས་པར་བཞུ་སྣུམ་ཡང་སྣོད་ནང་འཁྱེར།
MAT 25:5 མག་པ་འགྱང་བར་གྱུར་བས་དེ་ཚོ་ཐམས་ཅད་གཉིད་བྲོ་སྟེ་གཉིད་ལོག
MAT 25:6 ནམ་ཕྱེད་ལ་མི་རྣམས་ཀྱིས་སྐད་ཆེན་པོས། ལྟོས་ཤིག མག་པ་སླེབས་བྱུང༌། ཁོང་མཇལ་བར་ཤོག་ཅེས་ཟེར་བས།
MAT 25:7 གཞོན་ནུ་མ་ཐམས་ཅད་བླངས་ནས་སྣུམ་བཞུ་གྲ་སྒྲིག་བྱས།
MAT 25:8 བླུན་པོ་རྣམས་ཀྱིས་ཤེས་རབ་ལྡན་པ་རྣམས་ལ་ང་ཚོའི་སྣུམ་བཞུ་ཤི་གྲབས་འདུག་པས་ཁྱེད་ཚོའི་སྣུམ་ལས་ང་ཚོ་ལ་གནང་རོགས་ཞེས་སྨྲས།
MAT 25:9 ལན་དུ་ཤེས་རབ་ལྡན་པས། དེ་ལྟར་བྱས་ན་ང་ཚོ་ཚང་མ་མི་འདང་བར་འགྱུར་བས་སྣུམ་འཚོང་སར་སོང་ལ་རང་གི་དོན་དུ་སྣུམ་ཉོས་ཞེས་ཟེར།
MAT 25:10 བླུན་པོ་རྣམས་སྣུམ་ཉོ་བར་འགྲོ་དུས་མག་པ་སླེབས། གྲ་སྒྲིག་ཡོད་པ་རྣམས་ཁོ་དང་མཉམ་དུ་བག་སྟོན་ཁང་ལ་སོང་ནས་སྒོ་བརྒྱབ།
MAT 25:11 དེའི་རྗེས་སུ་གཞོན་ནུ་མ་གཞན་རྣམས་ཀྱང་སླེབས་ནས། གཙོ་བོ་ལགས། གཙོ་བོ་ལགས། སྒོ་འབྱེད་དང་ཞེས་ཞུས་ནའང༌།
MAT 25:12 མག་པས། ངས་ཁྱོད་རྣམས་ལ་བདེན་པར་ཟེར་རྒྱུར། ངས་ཁྱོད་རྣམས་ངོ་མི་ཤེས་ཞེས་བཤད།
MAT 25:13 དེའི་ཕྱིར་ཁྱེད་ཚོས་ཉིན་མོའམ་ཆུ་ཚོད་མི་ཤེས་པས་བྱ་ར་བྱོས་ཤིག”
MAT 25:14 “དེ་ནི་མི་ཞིག་ཡུལ་གཞན་ལ་འགྲོ་བའི་སྔོན་ལ་རང་གི་གཡོག་པོ་རྣམས་བོས་ཏེ་ཁོ་ཚོར་ཁོའི་ནོར་རྫས་གཏད་པ་ཞིག་དང་འདྲ་བ་ཡིན།
MAT 25:15 རེ་རེའི་ནུས་ཚད་ལྟར་ཁོས་གཅིག་ལ་གསེར་ཊམ་ཀ་ལྔ་སྟོང་དང༌། གཅིག་ལ་ཉིས་སྟོང་དང༌། གཞན་ཞིག་ལ་ཆིག་སྟོང་སྟེར་ནས་སོང༌།
MAT 25:16 འཕྲལ་དུ་གསེར་ཊམ་ཀ་ལྔ་སྟོང་འཐོབ་མཁན་སོང་ནས་ཉོ་ཚོང་བྱེད་པའི་སྒོ་ནས་གསེར་ཊམ་ཀ་ལྔ་སྟོང་ཁེ་བཟང་ཐོབ།
MAT 25:17 དེ་ལྟར་གསེར་ཊམ་ཀ་ཉིས་སྟོང་འཐོབ་མཁན་ལའང་གསེར་ཊམ་ཀ་ཉིས་སྟོང་ཁེ་བཟང་ཐོབ།
MAT 25:18 འོན་ཀྱང་གསེར་ཊམ་ཀ་ཆིག་སྟོང་འཐོབ་མཁན་ཕར་སོང་ནས་ས་ལ་ཁུང་ཞིག་དྲུས་པ་དང༌། རང་གི་བདག་པོའི་གསེར་ཊམ་ཀ་སྦས་ཏེ་བཞག
MAT 25:19 དུས་ཡུན་རིང་པོའི་རྗེས་སུ་གཡོག་པོ་དེ་རྣམས་ཀྱི་བདག་པོ་དེ་ལོག་ཡོང་ནས་རྩིས་དག་ཞུས།
MAT 25:20 གསེར་ཊམ་ཀ་ལྔ་སྟོང་འཐོབ་མཁན་ཡོང་ནས་གཞན་གསེར་ཊམ་ཀ་ལྔ་སྟོང་འཁྱེར་ཏེ། དཔོན་པོ་ལགས། གཟིགས་དང༌། ང་ལ་གསེར་ཊམ་ཀ་ལྔ་སྟོང་ཁེ་བཟང་བྱུང་ཞེས་སྨྲས་ནས།
MAT 25:21 དཔོན་པོས་ཁོ་ལ། གཡོག་པོ་བཟང་ཞིང་བློ་གཏད་ཆོག་པ་ཁྱོད། དངོས་པོ་ཉུང་ངུའི་ནང་ལ་དྲང་པོ་བྱས་པས་ངས་ཁྱོད་ལ་དངོས་པོ་མང་པོའི་དོ་དམ་པར་སྐོ་བར་བྱ། ད་ང་དང་མཉམ་དུ་དགའ་སྤྲོ་བྱེད་པར་ཤོག་ཅེས་ཟེར།
MAT 25:22 ཡང་གསེར་ཊམ་ཀ་ཉིས་སྟོང་འཐོབ་མཁན་ཡོང་ནས་ཁོ་ལ། དཔོན་པོ་ལགས། ཁྱེད་ཀྱིས་ང་ལ་གསེར་ཊམ་ཀ་ཉིས་སྟོང་གཏད་བྱུང༌། གཟིགས་དང༌། ང་ལ་གསེར་ཊམ་ཀ་ཉིས་སྟོང་ཁེ་བཟང་བྱུང་ཞེས་སྨྲས།
MAT 25:23 དཔོན་པོས་ཁོ་ལ། གཡོག་པོ་བཟང་ཞིང་བློ་གཏད་ཆོག་པ་ཁྱོད། དངོས་པོ་ཉུང་ངུའི་ནང་ལ་དྲང་པོ་བྱས་པས་ངས་ཁྱོད་ལ་དངོས་པོ་མང་པོའི་དོ་དམ་པར་སྐོ་བར་བྱ། ད་ང་དང་མཉམ་དུ་དགའ་སྤྲོ་བྱེད་པར་ཤོག་ཅེས་ཟེར།
MAT 25:24 དེ་ནས་གསེར་ཊམ་ཀ་ཆིག་སྟོང་འཐོབ་མཁན་ཡོང་ནས། དཔོན་པོ་ལགས། ཁྱེད་ནི་མ་བཏབ་ས་ནས་རྔ་བ་དང༌། སོན་མ་གཏོར་ས་ནས་སྡུད་མཁན་དྲག་པོ་ཞིག་ཡིན་པ་ངས་ཤེས་པས།
MAT 25:25 ང་འཇིགས་ཏེ་ཕར་སོང་ཞིང་གསེར་ཊམ་ཀ་དེ་ས་ལ་སྦས་ཏེ་བཞག གཟིགས་དང༌། ཁྱེད་རང་གི་ཡིན་པ་འདིར་འདུག་ཅེས་བཤད།
MAT 25:26 འོན་ཀྱང་དཔོན་པོས་ཁོ་ལ། གཡོག་པོ་ངན་པ་ལེ་ལོ་ཅན་ཁྱོད། ང་ནི་མ་བཏབ་ས་ནས་རྔ་བ་དང༌། སོན་མ་གཏོར་ས་ནས་སྡུད་མཁན་ཞིག་ཡིན་པ་ཤེས་སམ།
MAT 25:27 འོ་ན་ཁྱོད་ཀྱིས་ངའི་དངུལ་ནི་དངུལ་ཁང་ལ་བཞག་དགོས་པ་ཡིན། དེ་ནས་ངའི་དངུལ་དེ་སྐྱེད་ཀ་དང་བཅས་པར་འཐོབ་ཅེས་བཤད།
MAT 25:28 དེ་བས་ན། གཡོག་པོ་འདི་ནས་གསེར་ཊམ་ཀ་ཆིག་སྟོང་བླངས་ནས་གསེར་ཊམ་ཀ་ཁྲི་གཅིག་ཡོད་མཁན་ལ་སྟེར་ཞིག
MAT 25:29 གང་ཡིན་ཟེར་ན། སུ་ལ་ཡོད་པ་དེ་ལ་སྟེར་བར་འགྱུར་ཏེ་ལྷག་པ་ཡོད་པར་འགྱུར། འོན་ཀྱང་སུ་ལ་མེད་པ་དེ་ནས་གང་ཡོད་པའང་ལེན་པར་འགྱུར།
MAT 25:30 ཕན་མེད་ཀྱི་གཡོག་པོ་འདི་ངུ་ཞིང་སོ་ཁྲིག་ཁྲིག་བྱེད་ས་དེ་ཕྱི་རོལ་གྱི་མུན་པའི་ནང་དུ་དབྱུགས་ཤིག”
MAT 25:31 “མིའི་རིགས་ཀྱི་བུ་ནི་ཕོ་ཉ་དང་བཅས་གཟི་བརྗིད་དང་ལྡན་པར་འབྱོན་པའི་སྐབས་སུ། རང་གི་གཟི་བརྗིད་ལྡན་པའི་བཞུགས་ཁྲི་ལ་བཞུགས་པར་འགྱུར་ཞིང༌།
MAT 25:32 མི་རིགས་ཐམས་ཅད་ཁོང་གི་མདུན་དུ་བསྡུད་ནས། ལུག་རྫི་ཡིས་ར་རྣམས་ལས་ལུག་སོ་སོར་འབྱེད་པ་ལྟར། ཁོང་གིས་དེ་ཚོའང་འབྱེད་པར་གྱུར་ནས།
MAT 25:33 ལུག་རྣམས་ཁོང་གི་གཡས་ཕྱོགས་དང༌། ར་རྣམས་ཁོང་གི་གཡོན་ཕྱོགས་སུ་འཇུག
MAT 25:34 དེ་ནས་རྒྱལ་པོས་གཡས་ཕྱོགས་སུ་ཡོད་པ་རྣམས་ལ། ངའི་ཡབ་ཀྱིས་བྱིན་གྱིས་རླབས་པ་ཁྱོད་རྣམས། ཤོག་ལ། འཇིག་རྟེན་བཀོད་པ་ནས་ཁྱོད་ཚོའི་ཕྱིར་བཤམས་པའི་རྒྱལ་སྲིད་འཛིན་ཞིག
MAT 25:35 རྒྱུ་མཚན་ནི་ཁྱོད་ཀྱིས་ང་ལྟོགས་པ་ལ་ཟས་སྟེར། སྐོམ་པ་ལ་བཏུང་བ་སྟེར། ངོ་མི་ཤེས་པ་ཡིན་པ་ལ་གནས་ཚང་བཏང༌།
MAT 25:36 གོས་མེད་པ་ལ་གོས་སྟེར། ན་བ་ལ་བདག་སྐྱོང་བྱས། བཙོན་ཁང་ལ་ཡོད་པ་ལ་ང་མཇལ་བར་ཡོང་ཞེས་གསུང་བར་འགྱུར།
MAT 25:37 དེ་ནས་དྲང་ལྡན་རྣམས་ཀྱིས། གཙོ་བོ་ལགས། ངེད་རྣམས་ཀྱིས་ཁྱེད་བཀྲེས་པའམ། སྐྱེམས་པ།
MAT 25:38 ཞལ་མི་ཤེས་པའམ། གོས་མེད་པར་མཐོང་སྟེ། ཞལ་ཟས་སམ། སྐྱེམས། གནས་ཚང་ངམ། ན་བཟའ་ག་དུས་ཕུལ།
MAT 25:39 ཡང་སྙུང་བའམ། བཙོན་ཁང་ལ་མཐོང་སྟེ་ག་དུས་མཇལ་བར་ཡོང་ཞེས་ལན་འདེབས་པར་འགྱུར།
MAT 25:40 རྒྱལ་པོས་ཁོ་རྣམས་ལ། ངས་ཁྱོད་ཚོར་བདེན་པར་ཟེར་རྒྱུར། ཁྱོད་ཚོས་ངའི་སྤུན་ཟླ་ཆུང་ཤོས་འདི་རྣམས་ཀྱི་ནང་ནས་གཅིག་ལ་ཡང་དེ་ལྟར་བྱས་པ་ཙམ་གྱིས། ང་ལའང་བྱས་ཞེས་གསུང་བར་འགྱུར།
MAT 25:41 དེ་ནས་ཁོང་གིས་གཡོན་ཕྱོགས་སུ་ཡོད་པ་རྣམས་ལ། དམོད་པ་ཕོག་པ་ཁྱོད་ཚོ། ངའི་མདུན་ནས་བདུད་རྒྱལ་དང་ཁོའི་ཕོ་ཉ་རྣམས་ཀྱི་ཆེད་དུ་བཤམས་ཏེ་གསོད་པར་མི་ཐུབ་པའི་མེ་ལ་ཕར་རྒྱུགས་ཤིག
MAT 25:42 རྒྱུ་མཚན་ནི་ཁྱོད་ཀྱིས་ང་ལྟོགས་པ་ལ་ཟས་མ་སྟེར། སྐོམ་པ་ལ་བཏུང་བ་མ་སྟེར།
MAT 25:43 ངོ་མི་ཤེས་པ་ལ་གནས་ཚང་མ་བཏང༌། གོས་མེད་པ་ལ་གོས་མ་སྟེར། ན་བ་ལ་བདག་སྐྱོང་མ་བྱས། བཙོན་ཁང་དུ་ཡོད་པ་ལ་ང་མཇལ་བར་མ་འོངས་ཞེས་གསུང་བར་འགྱུར།
MAT 25:44 དེ་ནས་ཁོ་ཚོས་ཀྱང༌། གཙོ་བོ་ལགས། ངེད་ཀྱིས་ཁྱེད་བཀྲེས་པའམ། སྐོམ་པ། ངོ་མི་ཤེས་པའམ། གོས་མེད་པ། ན་བའམ། བཙོན་ལ་ཡོད་པར་མཐོང་ནས་ག་དུས་བདག་སྐྱོང་མ་བྱས་ཞེས་ཟེར་བར་འགྱུར།
MAT 25:45 ལན་དུ་ཁོང་གིས། ངས་ཁྱོད་ཚོར་བདེན་པར་ཟེར་རྒྱུར། ཁྱོད་ཚོས་ཆུང་ཤོས་འདི་རྣམས་ཀྱི་ནང་ནས་གཅིག་ལ་ཡང་དེ་ལྟར་མ་བྱས་པ་ཙམ་གྱིས། ང་ལའང་མ་བྱས་ཞེས་གསུང་བར་འགྱུར།
MAT 25:46 དེ་ནས་འདི་རྣམས་མཐའ་མེད་པའི་ཆད་པར་འགྲོ་བར་འགྱུར་ལ། དྲང་ལྡན་རྣམས་དཔག་ཏུ་མེད་པའི་ཚེ་ལ་འགྲོའོ་”ཞེས་གསུངས་སོ། །
MAT 26:1 ཡེ་ཤུས་བཀའ་དེ་གསུངས་ཚར་ནས་ཁོང་གི་ཉེ་གནས་རྣམས་ལ་
MAT 26:2 “ཉིན་གཉིས་ཀྱི་རྗེས་སུ་པེ་སག་དུས་ཆེན་འབབ་པར་འགྱུར་ཁྱེད་རྣམས་ཀྱིས་ཤེས། མིའི་རིགས་ཀྱི་བུ་ནི་རྒྱང་ཤིང་སྒང་ལ་བརྒྱངས་པའི་སྒོ་ནས་གསོད་པར་གཏད་རྒྱུ་ཡིན་”ཞེས་གསུངས།
MAT 26:3 དེ་ནས་བླ་ཆེན་དང་ཡུལ་མིའི་རྒན་པོ་རྣམས་ཀ་ཡ་ཕཱ་ཞེས་ཟེར་བའི་བླ་ཆེན་གཙོ་བོའི་ཕོ་བྲང་ནང་འཛོམས་ནས།
MAT 26:4 ཁོ་ཚོས་ཡེ་ཤུ་ལྐོག་ཏུ་བཟུང་ནས་ཁོང་གསོད་པའི་ཇུས་ངན་བྱས་ཏེ་
MAT 26:5 “ཡུལ་མི་རྣམས་ཟིང་ཆ་ལངས་ཉེན་ཡོད་པས་དུས་ཆེན་ལ་མི་གཟུང་”ཞེས་སྨྲས།
MAT 26:6 ཡེ་ཤུ་པེ་ཐན་ཡཱ་ཞེས་བྱ་བའི་གྲོང་སྡེའི་ནང་མཛེ་ནད་ཅན་གྱི་སྐྱེས་པ་སི་མོན་གྱི་ཁང་པ་ལ་བཞུགས་པའི་ཚེ།
MAT 26:7 ཁོང་གསོལ་བ་བཞེས་པའི་དུས་སུ་བུད་མེད་ཅིག་གིས་རིན་གོང་ཆེ་བའི་སྤོས་ཆུ་ཡིས་གང་བའི་རྡོ་ཀ་མ་རུའི་བུམ་པ་ཞིག་ཁྱེར་ཡོང་སྟེ། སྤོས་ཆུ་དེ་ཁོང་གི་དབུའི་སྟེང་ལ་བླུགས།
MAT 26:8 དེ་མཐོང་བས་ཉེ་གནས་རྣམས་ཁྲོས་ནས་“སྤོས་ཆུ་འདི་གང་གི་དོན་ལ་འདི་ལྟར་འཕྲོ་བརླག་བཏང་བ་ཡིན།
MAT 26:9 དེ་རིན་ཆེན་པོར་བཙོངས་ཏེ་དབུལ་པོ་རྣམས་ལ་བྱིན་ན་ལེགས་”ཞེས་སྨྲས།
MAT 26:10 ཡེ་ཤུས་དེ་མཁྱེན་ནས་ཁོ་རྣམས་ལ་“ཅིའི་ཕྱིར་ཁོ་མོ་ལ་སྡུག་པོ་གཏོང༌། ཁོ་མོས་ང་ལ་ལས་བཟང་པོ་ཞིག་བྱས་པ་ཡིན།
MAT 26:11 དབུལ་པོ་རྣམས་དུས་རྟག་ཏུ་ཁྱེད་ཚོ་དང་མཉམ་དུ་ཡོད་ཀྱང༌། ང་རང་ནི་དུས་རྟག་ཏུ་ཁྱེད་ཚོ་དང་མཉམ་དུ་མི་གནས།
MAT 26:12 ངའི་ལུས་ལ་སྤོས་ཆུ་དེ་བླུག་པའི་སྒོ་ནས་ཁོ་མོས་ང་དུར་ཁང་དུ་འཇུག་པར་གྲ་སྒྲིག་བྱས།
MAT 26:13 ངས་ཁྱེད་ཚོ་ལ་བདེན་པར་ཟེར་རྒྱུར། འཇིག་རྟེན་ཡོངས་སུ་ངའི་འཕྲིན་བཟང་འདི་གང་དུ་བསྒྲགས་ནའང་བུད་མེད་འདིས་གང་བྱས་པ་དེ་དྲན་པའི་ཕྱིར་གཏམ་དེ་ཡང་བརྗོད་པར་འགྱུར་”ཞེས་གསུངས།
MAT 26:14 དེ་ནས་ཉེ་གནས་བཅུ་གཉིས་པོའི་ནང་ནས་ཡུ་དཱ་དབྱི་སི་ཀར་རེ་ཟེར་བའི་མི་ཞིག་ཡ་ཧུ་དཱ་པའི་བླ་ཆེན་རྣམས་ཀྱི་རྩར་སོང་ནས།
MAT 26:15 ཁོ་ཚོར་“གལ་ཏེ་ངས་ཁོང་ཁྱེད་ཀྱི་དབང་དུ་གཏད་ན་ཁྱེད་ཀྱིས་ང་ལ་ག་རེ་སྟེར་རམ་”ཞེས་བཤད་པས། ཁོ་ཚོས་ཁོ་ལ་དངུལ་སྒོར་སུམ་ཅུ་སྟེར།
MAT 26:16 དེ་ནས་བཟུང་ཁོས་ཡེ་ཤུ་ཁོ་ཚོའི་ལག་ཏུ་སྤྲོད་རྒྱུའི་གོ་སྐབས་བཙལ།
MAT 26:17 སྐྱུར་རྩི་མེད་པའི་བག་ལེབ་དུས་ཆེན་གྱི་ཉིན་དང་པོར་ཉེ་གནས་རྣམས་ཡེ་ཤུའི་མདུན་དུ་ཡོང་ནས་ཁོང་ལ་“ཁྱེད་ཀྱིས་པེ་སག་གི་ཞལ་ཟས་བཞེས་པའི་ཕྱིར་ང་ཚོས་གང་དུ་གྲ་སྒྲིག་བྱེད་”ཅེས་སྨྲས་པས།
MAT 26:18 ཁོང་གིས་“གྲོང་ཁྱེར་དུ་མི་ཞིག་གི་རྩར་སོང་ནས་ཁོ་ལ། སློབ་དཔོན་གྱིས་ངའི་དུས་ལ་འབབ་འདུག ངའི་ཉེ་གནས་དང་བཅས་པར་ཁྱེད་ཀྱི་ཁང་པར་པེ་སག་གི་དུས་ཆེན་སྲུང་རྒྱུ་ཡིན་ཞེས་ཟེར་ཤིག་”ཅེས་གསུངས།
MAT 26:19 ཉེ་གནས་རྣམས་ཀྱིས་ཡེ་ཤུའི་བཀའ་བཞིན་དུ་བྱས་ཏེ་པེ་སག་གི་གསོལ་སྟོན་བཤམས།
MAT 26:20 མཚན་མོའི་དུས་སུ་ཁོང་དང་ཉེ་གནས་བཅུ་གཉིས་པོ་འཁོར་དང་བཅས་པ་གསོལ་སྟོན་དུ་བཞུགས།
MAT 26:21 ཁོང་རྣམས་ཀྱིས་ཞལ་ཟས་བཞེས་པའི་དུས་སུ་ཁོང་གིས་“ངས་ཁྱེད་ཚོ་ལ་བདེན་པར་ཟེར་རྒྱུར། ཁྱེད་རྣམས་ལས་མི་གཅིག་གིས་ང་ལ་རྒྱབ་གཏོད་བྱེད་ངེས་”ཞེས་གསུངས།
MAT 26:22 ཁོ་ཚོའི་སེམས་ཤིན་ཏུ་སྐྱོ་བར་གྱུར་ཏེ། རེ་རེ་བཞིན་གྱིས་ཁོང་ལ་“གཙོ་བོ། ང་རང་ཡིན་མི་སྲིད་”ཅེས་ཞུས་པ་དང༌།
MAT 26:23 ལན་དུ་ཁོང་གིས་“ང་དང་མཉམ་དུ་ཕོར་པ་གཅིག་གི་ནང་ནས་ཟས་ཟ་མཁན་དེ་ནི་ང་ལ་རྒྱབ་གཏོད་བྱེད་མཁན་ཡིན།
MAT 26:24 དཀོན་མཆོག་གི་གསུང་རབ་ལས་མིའི་རིགས་ཀྱི་བུ་རང་ཉིད་ཀྱི་སྐོར་ལ་ཇི་ལྟར་ལུང་བསྟན་ཡོད་པ་བཞིན་འཆི་དགོས་ཀྱང༌། མིའི་རིགས་ཀྱི་བུ་དགྲའི་ལག་ཏུ་སྤྲོད་མཁན་དེར་ཆད་པ་ཕོག་ངེས་ཡིན་ནོ། མི་དེ་འཇིག་རྟེན་འདི་རུ་སྐྱེས་པ་ལས་མ་སྐྱེས་ན་ལེགས་”ཞེས་གསུངས།
MAT 26:25 ཁོང་ལ་རྒྱབ་གཏོད་བྱེད་མཁན་ཡུ་དཱ་ཡིས་“རབ་བི། ང་རང་ཡིན་ནམ་”ཞེས་བཤད་པས་ཡེ་ཤུས་ཁོ་ལ་“ཁྱོད་ཀྱིས་སྨྲས་པ་བཞིན་ནོ་”ཞེས་གསུངས།
MAT 26:26 ཁོང་རྣམས་ཀྱིས་ཞལ་ཟས་བཞེས་པའི་དུས་སུ་ཡེ་ཤུས་བག་ལེབ་ཕྱག་ཏུ་བསྣམས་ཤིང༌། དཀོན་མཆོག་ལ་བསྟོད་པ་ཕུལ་རྗེས་དུམ་བུར་བགོས་ནས་ཉེ་གནས་རྣམས་ལ་གནང་སྟེ་“འདི་ནི་ངའི་ལུས་ཡིན་པས་ཁྱེད་ཚོས་ལོངས་ནས་ཟོ་ཞིག་”ཅེས་གསུངས།
MAT 26:27 དེ་ནས་ཁོང་གིས་ཕོར་པ་ཞིག་ཕྱག་ཏུ་བསྣམས་ཤིང་བཀའ་དྲིན་ཆེ་ཞུས་ནས་ཁོ་ཚོར་གནང་སྟེ་“འདི་ལས་ཁྱེད་ཐམས་ཅད་འཐུང་ཞིག
MAT 26:28 འདི་ནི་ངའི་ཁྲག་ཡིན་ཏེ། ཞལ་ཆད་ཀྱི་ཁྲག་འདི་མི་མང་པོའི་སྡིག་ཉེས་སེལ་བའི་ཆེད་དུ་འཐོན་ནོ།
MAT 26:29 ངས་ཁྱེད་ཚོ་ལ་ཟེར་རྒྱུར། ངའི་ཡབ་ཀྱི་རྒྱལ་སྲིད་ནང་རྒུན་ཆང་གསར་པ་ཁྱེད་ཚོ་དང་མཉམ་དུ་མ་འཐུང་བའི་ཉིན་མོའི་བར་དུ། ངས་རྒུན་ཆང་འདི་རྩ་བ་ནས་མི་འཐུང་”ཞེས་གསུངས།
MAT 26:30 ཁོང་རྣམས་ཀྱིས་གསུང་མགུར་བླངས་ནས་སྐྱུར་རུ་ཤིང་གི་རི་བོར་ཕེབས་སོ། །
MAT 26:31 དེ་ནས་ཡེ་ཤུས་ཁོ་ཚོར་“དཀོན་མཆོག་གི་གསུང་རབ་ཀྱི་མདོ་ལ་བཀོད་པ་ལྟར། ང་ཡིས་ལུག་རྫི་རྡུང་ནས་བསད། ། དེ་རྗེས་ལུག་ཁྱུ་འཐོར་བར་འགྱུར། ། ངའི་རྐྱེན་གྱིས་མཚན་འདིར་ཁྱོད་ཚོ་ཐམས་ཅད་ང་དང་བྲལ་ནས་འབྲོས་པར་འགྱུར།
MAT 26:32 འོན་ཀྱང་ང་འཆི་བ་ནས་སླར་གསོན་པར་འཇུག་རྗེས་ཁྱེད་ཚོའི་སྔོན་ལ་ག་ལིལ་ཡུལ་དུ་འགྲོ་ངེས་ཡིན་”ཞེས་གསུངས།
MAT 26:33 པེ་ཏྲོས་ཁོང་ལ་“ཁྱེད་རང་ལ་གང་འབྱུང་རྒྱུའི་རྐྱེན་གྱིས་ཐམས་ཅད་ཁྱེད་དང་བྲལ་ནའང་ང་ནི་མི་འབྲལ་ལོ་”ཞེས་ཞུས་པ་ལ།
MAT 26:34 ཡེ་ཤུས་ཁོ་ལ་“ངས་ཁྱེད་ལ་བདེན་པར་ཟེར་རྒྱུར། དེ་རིང་གི་མཚན་མོ་འདི་རང་ལ་བྱ་ཕོས་སྐད་མ་གྲགས་པའི་སྔོན་ལ་ཁྱེད་ཀྱིས་ང་རང་སུ་ཡིན་མི་ཤེས་ཞེས་ཐེངས་གསུམ་ཟེར་བར་ངེས་སོ་”ཞེས་གསུངས།
MAT 26:35 པེ་ཏྲོས་ཁོང་ལ་“ང་ནི་ཁྱེད་དང་མཉམ་དུ་ཤི་དགོས་ཀྱང་ཁྱེད་སུ་ཡིན་མི་ཤེས་ཞེས་ཟེར་མི་སྲིད་”ཅེས་ནན་གྱིས་ཞུས། ཉེ་གནས་ཐམས་ཅད་ཀྱིས་ཀྱང་དེ་ལྟར་སྨྲས།
MAT 26:36 དེ་ནས་ཡེ་ཤུ་དང་ཁོང་གི་ཉེ་གནས་རྣམས་གེད་སེམ་མཱ་ནེ་ཞེས་བྱ་བའི་གནས་སུ་ཕེབས་པ་དང༌། ཁོང་གིས་ཁོ་རྣམས་ལ་“ང་དེར་སོང་སྟེ་གསོལ་བ་འདེབས་དུས་ཁྱེད་ཚོ་གནས་འདིར་སྡོད་ཅིག་”ཅེས་གསུངས།
MAT 26:37 པེ་ཏྲོ་དང་ཟེ་བད་ཡཱ་ཟེར་མཁན་གྱི་བུ་གཉིས་འཁྲིད་པ་དང༌། ཁོང་ཐུགས་ཤིན་ཏུ་སྐྱོ་ཞིང་འཁྲུགས་པར་གྱུར་ཏེ།
MAT 26:38 ཁོ་ཚོར་“ངའི་ཡིད་ཤིན་ཏུ་སྐྱོ་ཞིང་འཆི་ལ་ཉེ་བས། ང་དང་མཉམ་དུ་འདི་རུ་གཉིད་མ་ལོག་པར་བྱ་ར་བྱོས་ཤིག་”ཅེས་གསུངས།
MAT 26:39 དེ་ནས་ཁོང་ཅུང་ཟད་ཕར་ཕེབས་ནས་ཕྱག་འཚལ་ཏེ་“ངའི་ཡབ་ལགས། སྲིད་ན་སྡུག་བསྔལ་གྱི་ཕོར་པ་འདི་ང་ལས་ཕར་ལེན་མཛོད། འོན་ཀྱང་ངའི་བསམ་པ་བཞིན་དུ་མིན་པར་ཁྱེད་ཀྱི་དགོངས་པ་བཞིན་དུ་གྱུར་ཅིག་”ཅེས་གསོལ་བ་བཏབ།
MAT 26:40 ཁོང་ཚུར་ཕེབས་སྐབས་དེ་རྣམས་གཉིད་ལོག་གི་ཡོད་པར་གཟིགས་ནས་པེ་ཏྲོ་ལ་“འོ་ན། ཁྱོད་ཚོས་ཆུ་ཚོད་གཅིག་ཙམ་ལའང་ང་དང་མཉམ་དུ་བྱ་ར་བྱེད་མ་ཐུབ་བམ།
MAT 26:41 ཁྱེད་སླུ་བར་མི་འགྱུར་བའི་ཕྱིར་བྱ་ར་བྱོས་ལ་སྨོན་ལམ་ཐོབས་ཤིག ཁྱེད་ཀྱི་སེམས་ནས་དེ་ལྟར་བྱེད་བསམ་ཡང་ལུས་པོའི་ནུས་ཤུགས་ཞན་པ་ཡིན་”ཞེས་གསུངས།
MAT 26:42 ཡང་ཐེངས་གཉིས་པར་ཕར་ཕེབས་ཏེ་ཁོང་གིས་“ངའི་ཡབ་ལགས། སྡུག་བསྔལ་གྱི་ཕོར་པ་འདི་ངས་མ་འཐུང་བར་ང་ལས་ཕར་ལེན་མི་སྲིད་ན། ཁྱེད་ཀྱི་དགོངས་པ་བཞིན་དུ་གྱུར་ཅིག་”ཅེས་གསོལ་བ་བཏབ།
MAT 26:43 ཁོང་ཚུར་ཕེབས་ནས་ཁོ་རྣམས་མིག་ལྗིད་པོ་ཆགས་པས་གཉིད་ཁུག་ཡོད་པར་གཟིགས།
MAT 26:44 ཁོ་ཚོ་དང་ཁ་བྲལ་ནས་ཕར་ཕེབས་ཏེ། སྔོན་གྱི་ཚིག་དེ་རང་གསུངས་ཏེ་ཁོང་གིས་ཐེངས་གསུམ་པར་གསོལ་སྨོན་བཏབ།
MAT 26:45 དེ་ནས་ཁོང་ཉེ་གནས་ཀྱི་རྩར་ཕེབས་ཏེ་ཁོ་ཚོར་“ཁྱེད་ཚོ་ད་དུང་གཉིད་ལོག་ནས་ངལ་གསོའམ། ལྟོས་ཤིག མིའི་རིགས་ཀྱི་བུ་སྡིག་ཅན་རྣམས་ཀྱི་དབང་དུ་སྤྲོད་པར་བྱེད་པའི་དུས་ལ་འབབ་འདུག
MAT 26:46 ལོངས་ལ་འགྲོ ལྟོས་ཤིག ང་ལ་རྒྱབ་གཏོད་བྱེད་མཁན་དེ་ཉེ་བར་སླེབས་”ཞེས་གསུངས།
MAT 26:47 ཁོང་གིས་དེ་ལྟར་གསུངས་དུས་ཉེ་གནས་བཅུ་གཉིས་པོ་ལས་ཡུ་དཱ་དང་མཉམ་དུ། ཡ་ཧུ་དཱ་པའི་བླ་ཆེན་དང་ཡུལ་མི་རྣམས་ཀྱི་རྒན་པོས་བཏང་བའི་མི་ཚོགས་མང་པོ་ཞིག་ལག་ཏུ་རལ་གྲི་དང་དབྱུག་པ་འཁྱེར་ཏེ་ས་ཆ་དེར་སླེབས།
MAT 26:48 ཁོང་ལ་རྒྱབ་གཏོད་བྱེད་མཁན་དེས་སྔོན་ནས་ཁོ་ཚོར་གསང་བརྡ་གྲ་སྒྲིག་བྱས་ཏེ་“ངས་སུ་ལ་འོ་བྱས་པ་དེ་ཁོང་རང་ཡིན་པས་ཟུངས་ཤིག་”ཅེས་བཤད།
MAT 26:49 འཕྲལ་དུ་ཡེ་ཤུའི་མདུན་དུ་ཡོང་ནས་ཡུ་དཱ་ཡིས་“རབ་བི། ཁྱེད་ལ་ཞི་བདེ་ལྡན་པར་གྱུར་ཅིག་”ཅེས་ཟེར་ནས་འགྲམ་པར་འོ་ཡིས་འཚམས་འདྲི་ཞུས་པ་ལ།
MAT 26:50 ཡེ་ཤུས་ཁོ་ལ་“གྲོགས་པོ། ཁྱོད་ཀྱིས་གང་བྱེད་པར་ཡོང་བ་དེ་བྱོས་”ཞེས་གསུངས། དེ་རྗེས་ཁོ་ཚོ་ཡོང་ནས་ཁོང་འཛིན་བཟུང་བྱས་པས།
MAT 26:51 ཡེ་ཤུ་དང་མཉམ་དུ་ཡོད་པ་ཞིག་གིས་རལ་གྲི་བཟུང་ནས་བཏོན་ཏེ་ཡ་ཧུ་དཱ་པའི་བླ་ཆེན་གཙོ་བོའི་གཡོག་པོའི་རྣ་བ་ཡ་གཅིག་བཅད།
MAT 26:52 དེ་ནས་ཡེ་ཤུས་ཁོ་ལ་“རལ་གྲི་དེ་ཤུབས་སུ་ཆུག་ཅིག གང་ཡིན་ཞེ་ན། རལ་གྲི་འདོན་ཚད་རལ་གྲི་ཡིས་གསོད་པར་འགྱུར།
MAT 26:53 ངའི་ཡབ་ཀྱིས་ཞིང་ཁམས་ཀྱི་ཕོ་ཉའི་དམག་དཔུང་བཅུ་གཉིས་ལས་མང་བ་ང་ལ་འཕྲལ་དུ་མངགས་པའི་ཕྱིར་ངས་ཁོང་ལ་ཞུ་མི་ཐུབ་པ་དེ་སེམས་སམ།
MAT 26:54 འོན་ཀྱང་དེ་ལྟར་བྱས་ན། འདི་ལྟར་འབྱུང་དགོས་པའི་མདོ་དེ་ཅི་ལྟར་འགྲུབ་”ཅེས་གསུངས།
MAT 26:55 དེའི་ཚེ་ཡེ་ཤུས་མི་ཚོགས་ལ་“རལ་གྲི་དང་དབྱུག་པ་ཁྱེར་ནས་ང་ཇག་པ་ལྟར་འཛིན་དུ་ཡོང་ངམ། ང་ནི་ཉིན་རེ་བཞིན་མཆོད་ཁང་ཆེན་མོར་བསྡད་དེ་ཆོས་བསྟན་ཡང་ཁྱེད་ཚོས་ང་མ་བཟུང༌།
MAT 26:56 འོན་ཀྱང་ལུང་སྟོན་པའི་མདོ་འགྲུབ་པའི་ཕྱིར་བྱ་བ་འདི་ཐམས་ཅད་བྱུང་ངོ་”ཞེས་གསུངས་རྗེས་ཉེ་གནས་ཐམས་ཅད་ཁོང་བཞག་སྟེ་བྲོས།
MAT 26:57 ཁོང་འཛིན་མཁན་རྣམས་ཀྱིས་བླ་ཆེན་གཙོ་བོ་ཀ་ཡ་ཕཱ་ཡི་མདུན་དུ་ཁྲིད། དེར་ཆོས་ཁྲིམས་ལ་མཁས་པའི་མི་དང་རྒན་པོ་རྣམས་འཛོམས།
MAT 26:58 པེ་ཏྲོ་རྒྱང་རིང་ནས་ཁོང་གི་རྗེས་སུ་འབྲངས་ཏེ། བླ་ཆེན་གཙོ་བོའི་སྒོ་རའི་བར་སོང་ནས་ནང་དུ་ཞུགས་པ་དང༌། དེའི་རྗེས་སུ་གང་འབྱུང་བ་ལྟ་བའི་ཕྱིར་སྲུང་དམག་རྣམས་དང་མཉམ་དུ་བསྡད།
MAT 26:59 ཡ་ཧུ་དཱ་པའི་བླ་ཆེན་རྣམས་དང་ཡ་ཧུ་དཱ་པའི་རྒྱལ་ཚོགས་ཀྱི་མི་ཐམས་ཅད་ཀྱིས་ཁོང་སྲོག་གཅོད་གཏོང་བའི་ཕྱིར་སྙད་འདོགས་བཙལ་ནས།
MAT 26:60 རྫུན་གྱི་དཔང་པོ་བྱེད་མཁན་མང་པོ་ཡོང་ནའང་སྐྱོན་མ་རྙེད། མཇུག་ཏུ་མི་གཉིས་ཡོང་ནས།
MAT 26:61 ཁོ་ཚོས་“མི་འདི་ཡིས་ངས་དཀོན་མཆོག་གི་མཆོད་ཁང་ཆེན་མོ་བཤིག་ནས་ཉིན་གསུམ་ལ་རྩིག་ཐུབ་ཅེས་ཟེར་བ་ང་ཚོས་ཐོས་”ཞེས་ཟེར།
MAT 26:62 བླ་ཆེན་གཙོ་བོ་ཡར་ལངས་ཏེ་ཡེ་ཤུ་ལ་“མི་འདི་རྣམས་ཀྱིས་ཁྱོད་ལ་དཔང་པོ་བྱེད་པ་དེ་ཅི་ཡིན། ཁྱོད་ཀྱིས་ལན་ཅི་ཡང་མི་འདེབས་སམ་”ཞེས་དྲིས་པ་ལ།
MAT 26:63 ཁོང་གིས་ཅི་ཡང་མ་གསུངས་པས་བླ་ཆེན་གཙོ་བོས་ཁོང་ལ་“ངས་ཁྱོད་ལ་གཏན་དུ་གནས་པའི་དཀོན་མཆོག་གི་སྒོ་ནས་ཁྱོད་ཀྱིས་མནའ་སྐྱེལ་ཏེ། ཁྱོད་ནི་དཀོན་མཆོག་གི་སྲས་སྐྱབས་མགོན་མཱ་ཤི་ཀ་ཡིན་ནམ་མ་ཡིན་ང་ཚོ་ལ་ཤོད་ཅིག་”ཅེས་སྨྲས།
MAT 26:64 ཡེ་ཤུས་ཁོ་ལ་“ཁྱེད་ཀྱིས་གསུངས་པ་དེ་ལྟར་ཡིན། ཡང་ངས་ཁྱེད་ཚོར་ཟེར་རྒྱུར། རྗེས་མ་ཁྱེད་ཚོས་མིའི་རིགས་ཀྱི་བུ་ཁོང་ཉིད་དབང་ཀུན་དང་ལྡན་པའི་དཀོན་མཆོག་གི་ཕྱག་གཡས་སུ་བཞུགས་ཏེ་ནམ་མཁའི་སྤྲིན་དང་བཅས་འབྱོན་པ་མཐོང་བར་འགྱུར་”ཞེས་གསུངས།
MAT 26:65 དེ་ཐོས་ནས་བླ་ཆེན་གཙོ་བོས་རང་གི་ཕྱི་གོས་དབྲལ་ཏེ་“ཁོས་དཀོན་མཆོག་ལ་སྐུར་བ་བཏབ། ད་དུང་ང་ཚོར་དཔང་པོ་ཅི་ལ་དགོས། ཉོན་ཞིག ཁོས་དཀོན་མཆོག་ལ་སྐུར་བ་བཏབ་པར་ཁྱེད་ཚོས་ད་ལྟ་ཐོས།
MAT 26:66 ཁྱེད་ཚོར་བསམ་འཆར་ཅི་ཡོད་”ཅེས་སྨྲས་པ་ན། ཁོ་ཚོས་“ཁོ་སྲོག་གཅོད་གཏོང་འོས་”ཞེས་བཤད།
MAT 26:67 དེ་ནས་ཁོ་ཚོས་ཁོང་གི་ཞལ་ལ་མཆིལ་མ་གཏོར་ཞིང་བརྡུངས་ཏེ་གཞན་རྣམས་ཀྱིས་འགྲམ་ལྕག་བཞུས་ནས།
MAT 26:68 ཁོང་ལ་“མཱ་ཤི་ཀ་ཁྱོད། ང་ཚོ་ལ་མངོན་ཤེས་ཤོད་ཅིག ཁྱོད་ལ་གཞུ་མཁན་སུ་ཡིན་”ཞེས་སྨྲས།
MAT 26:69 པེ་ཏྲོ་ཕྱི་རོལ་ཏུ་སྒོ་རར་བསྡད་དུས་གཡོག་མོ་ཞིག་དེའི་རྩར་ཡོང་ནས་“ཁྱེད་ཀྱང་ག་ལིལ་ཡུལ་གྱི་མི་ཡེ་ཤུ་དང་མཉམ་དུ་ཡོད་པ་གཅིག་ཡིན་”ཅེས་སྨྲས་པས།
MAT 26:70 པེ་ཏྲོས་ཁོ་ཚོ་ཚང་མའི་མདུན་དུ་ཁས་མ་བླངས་པར་“ཁྱོད་ཀྱིས་གང་ལབ་པ་ངས་མི་ཤེས་”ཞེས་ཟེར།
MAT 26:71 དེ་ནས་རྒྱལ་སྒོའི་རྩར་ཕྱིར་སོང་ནས་གཡོག་མོ་གཞན་ཞིག་གིས་ཁོ་མཐོང་སྟེ་དེར་ཡོད་པ་རྣམས་ལ་“མི་འདི་ན་ཙ་རེལ་པ་ཡེ་ཤུ་དང་མཉམ་དུ་ཡོད་”ཅེས་སྨྲས།
MAT 26:72 པེ་ཏྲོས་ཡང་བསྐྱར་མནའ་སྐྱེལ་ཏེ་“ངས་མི་དེ་ངོ་མི་ཤེས་”ཞེས་ཟེར།
MAT 26:73 ཡུན་རིང་པོ་མ་ལོན་པར་དེར་ཡོད་པའི་མི་རྣམས་ཡོང་ནས་པེ་ཏྲོ་ལ་“ཁྱོད་ཀྱང་ཁོ་ཚོའི་ནང་ནས་ངེས་པར་དུ་གཅིག་ཡིན། ཁྱོད་ཀྱི་སྐད་ལུགས་ནས་ཤེས་”ཞེས་སྨྲས་པ་ལ།
MAT 26:74 པེ་ཏྲོས་སྡིགས་དམོད་བྱེད་བཞིན་མནའ་སྐྱེལ་ཏེ་“ངས་མི་དེ་ངོ་མི་ཤེས་”ཞེས་བཤད་མ་ཐག་ཏུ་བྱ་ཕོས་སྐད་གྲགས།
MAT 26:75 པེ་ཏྲོས་དེ་སྔ་ཡེ་ཤུས་ཁོ་རང་ལ་“བྱ་ཕོས་སྐད་མ་གྲགས་པའི་སྔོན་དུ་ཁྱེད་ཀྱིས་ང་རང་སུ་ཡིན་མི་ཤེས་ཞེས་ཐེངས་གསུམ་སྨྲ་བར་ངེས་”ཞེས་གསུངས་པ་དེ་དྲན་ཏེ་ཕྱིར་སོང་ནས་མང་པོ་ངུས་སོ། །
MAT 27:1 ཞོགས་པར་ཡ་ཧུ་དཱ་པའི་བླ་ཆེན་གཙོ་བོ་དང་ཡུལ་མི་རྣམས་ཀྱི་རྒན་པོ་ཚང་མས་ཡེ་ཤུ་གསོད་པའི་ཕྱིར་མཉམ་དུ་གྲོས་བསྡུར་བྱས།
MAT 27:2 ཁོ་ཚོས་ཡེ་ཤུ་བཀྱིགས་ནས་འཁྲིད་དེ་སྤྱི་ཁྱབ་པི་ལ་ཏུ་ལ་བཏད།
MAT 27:3 ཡེ་ཤུ་ལ་རྒྱབ་གཏོད་བྱེད་མཁན་ཡུ་དཱ་ཡིས་ཁོང་གསོད་དགོས་པའི་ཁྲིམས་ཐག་བཅད་པ་མཐོང་བས་འགྱོད་པ་སྐྱེས་ནས་དངུལ་སྒོར་སུམ་ཅུ་འཁྱེར་ཏེ་བླ་ཆེན་གཙོ་བོ་དང་རྒན་མི་རྣམས་ཀྱི་རྩར་ལོག་སྟེ།
MAT 27:4 ཁོ་ཚོར་“ངས་སྐྱོན་མེད་པའི་མི་ཞིག་ལ་རྒྱབ་གཏོད་བྱས་ནས་སྡིག་ཉེས་བྱས་”ཞེས་ཟེར་བས། དེ་ཚོས་“ང་ཚོ་ལ་འབྲེལ་བ་ཅི་ཡོད། ཁྱོད་ཀྱིས་འགན་ཁུར་དགོས་”ཞེས་སྨྲས།
MAT 27:5 དངུལ་སྒོར་དེ་རྣམས་མཆོད་ཁང་ཆེན་མོའི་ནང་ལ་དབྱུགས་ཤིང་ཕར་སོང་སྟེ་རང་གི་སྐེ་ཐག་པས་བསྡམས་ནས་ཤི
MAT 27:6 བླ་ཆེན་གཙོ་བོ་རྣམས་ཀྱིས་དངུལ་སྒོར་སུམ་ཅུ་བསྡུས་ནས་“དངུལ་འདི་ནི་མི་གཅིག་གསོད་པའི་རིན་གོང་སྟེ་ཁྲག་རིན་ཡིན་པས། དཀོན་མཆོག་གི་བཀའ་ཁྲིམས་ལྟར་ན་མཆོད་ཁང་ཆེན་མོའི་མཛོད་ཁང་ལ་འཇོག་པར་མི་ཆོག་”ཅེས་ཟེར།
MAT 27:7 ཁོ་རྣམས་གྲོས་བསྡུར་བྱས་ནས། ཕྱི་མི་རྣམས་དུར་དུ་འཇུག་པའི་ཕྱིར་དངུལ་དེ་ཡིས་རྫ་མཁན་གྱི་ཞིང་ཞེས་པ་དེ་ཉོས།
MAT 27:8 དེའི་ཕྱིར་དེ་རིང་གི་བར་དུ་ཞིང་དེར་ཁྲག་རིན་གྱི་ཞིང་ཞེས་ཟེར།
MAT 27:9 དེ་ནས་ལུང་སྟོན་པ་ཡེ་རེམ་ཡཱ་ཡིས། ཡི་སི་ར་ཨེལ་གྱི་བུ་རྒྱུད་འགའ་ཤས་ཀྱིས་ཐག་གཅོད་བྱས་པའི་རིན་པ་སྟེ་དངུལ་སྒོར་སུམ་ཅུ་བླངས་ནས་
MAT 27:10 ཁོ་ཚོས་རྫ་མཁན་གྱི་ཞིང་ཞེས་ཟེར་བ་དེ་ཉོས། གཙོ་བོས་ང་ལ་དེ་ལྟར་བྱེད་པའི་བཀའ་གནང་བྱུང་ཞེས་པའི་གསུངས་དེ་བསྒྲུབས།
MAT 27:11 ཡེ་ཤུ་སྤྱི་ཁྱབ་ཀྱི་དྲུང་དུ་བཞེངས་པའི་ཚེ་སྤྱི་ཁྱབ་ཀྱིས་ཁོང་ལ་“ཁྱོད་ནི་ཡ་ཧུ་དཱ་པའི་རྒྱལ་པོ་ཡིན་ནམ་”ཞེས་དྲིས་པ་ན། ཡེ་ཤུས་ཁོ་ལ་“ཁྱེད་ཀྱིས་གསུངས་པ་ལྟར་ཡིན་”ཞེས་གསུངས།
MAT 27:12 བླ་ཆེན་གཙོ་བོ་དང་རྒན་པོ་རྣམས་ཀྱིས་ཁོང་ལ་ནག་ཉེས་བཙུགས་པའི་དུས་སུ་ཁོང་གིས་ལན་ཅིའང་མ་གསུངས།
MAT 27:13 དེ་ནས་སྤྱི་ཁྱབ་པི་ལ་ཏུ་ཡིས་ཡེ་ཤུ་ལ་“ཁོ་ཚོས་ཁྱོད་ལ་ནག་ཉེས་ཅི་ཙམ་མང་བ་བཙུགས་པ་དེ་མི་ཐོས་སམ་”ཞེས་སྨྲས་ཀྱང༌།
MAT 27:14 ཁོང་གིས་ཁོ་ལ་ནག་ཉེས་གཅིག་ཙམ་ལའང་ལན་མ་གསུངས་པས་སྤྱི་ཁྱབ་ཡ་མཚན་ཆེན་པོར་གྱུར།
MAT 27:15 དུས་ཆེན་དེར་སྤྱི་ཁྱབ་ཀྱིས་མི་ཚོགས་ཀྱི་འདོད་པ་ལྟར་བཙོན་པ་རེ་གློད་གྲོལ་གཏོང་བའི་ལུགས་སྲོལ་ཡོད།
MAT 27:16 དེའི་དུས་སུ་མིང་ངན་ཀུན་ཏུ་གྲགས་པའི་བཙོན་པ་ཞིག་པར་ཨབ་པཱ་ཞེས་ཟེར་མཁན་ཡོད་པས།
MAT 27:17 ཁོ་ཚོ་འཛོམས་ནས་སྤྱི་ཁྱབ་པི་ལ་ཏུ་ཡིས་ཁོ་རྣམས་ལ་“ཁྱོད་ཚོའི་ཕྱིར་ངས་སུ་གློད་ན་དགའ། པར་ཨབ་པཱ་དང༌། ཡང་ན་མཱ་ཤི་ཀ་ཞེས་ཟེར་བའི་ཡེ་ཤུ་”ཞེས་དྲིས།
MAT 27:18 རྒྱུ་མཚན་ནི་ཡེ་ཤུ་རྩིས་སྤྲོད་མཁན་ཚོས་ཕྲག་དོག་གིས་ཁོང་བཏད་པ་ཡིན་པར་ཁོས་ཤེས།
MAT 27:19 པི་ལ་ཏུ་ཁྲིམས་དཔོན་གྱི་ཁྲི་ལ་བསྡད་པའི་དུས་སུ་ཁོའི་བཟའ་ཟླ་ཡིས་ཁོ་ལ་“མདང་ནུབ་རྨི་ལམ་ལ་ཁོའི་དོན་དུ་སེམས་འཁྲུགས་ཆེན་པོ་མྱོང་བས། སྐྱོན་མེད་པའི་མི་དེ་ལ་འབྲེལ་བ་མ་བྱེད་”ཅེས་པའི་འཕྲིན་ཞིག་བཏང༌།
MAT 27:20 འོན་ཀྱང་བླ་ཆེན་གཙོ་བོ་དང་རྒན་མི་རྣམས་ཀྱིས་མི་ཚོགས་ལ་པར་ཨབ་པཱ་གློད་པ་དང་ཡེ་ཤུ་གསོད་རྒྱུར་བསྐུལ།
MAT 27:21 སྤྱི་ཁྱབ་པི་ལ་ཏུ་ཡིས་ཁོ་ཚོར་“མི་འདི་གཉིས་ལས་ཁྱོད་ཚོའི་ཕྱིར་ངས་སུ་གློད་པ་དགའ་”ཞེས་དྲིས་པས་ཁོ་རྣམས་ཀྱིས་“པར་ཨབ་པཱ་”ཞེས་སྨྲས།
MAT 27:22 པི་ལ་ཏུ་ཡིས་ཁོ་ཚོར་“བྱས་ན། མཱ་ཤི་ཀ་ཞེས་ཟེར་མཁན་ཡེ་ཤུ་དེ་ལ་ངས་གང་འདྲ་བྱེད་དགོས་”ཞེས་དྲིས་པས། ཁོ་ཚོ་ཚང་མས་“རྒྱང་ཤིང་སྒང་ལ་སོད་ཅིག་”ཅེས་བཤད།
MAT 27:23 པི་ལ་ཏུས་“རྒྱུ་མཚན་གང་ཡིན། ཁོས་ལས་ངན་ག་རེ་བྱས་ཡོད་”ཅེས་དྲིས། འོན་ཀྱང་མི་ཚོགས་ཀྱིས་སྐད་ཤུགས་དེ་བས་ཆེན་པོས་“རྒྱང་ཤིང་སྒང་ལ་སོད་ཅིག་”ཅེས་བཤད།
MAT 27:24 པི་ལ་ཏུས་གང་ཡང་མི་སྒྲུབ་པ་མ་ཟད་དེར་ཟིང་ཆ་ལང་གྲབས་ཡོད་པ་མཐོང་བས། མི་ཚོགས་ཀྱི་དྲུང་དུ་ཆུ་ཡིས་ལག་པ་བཀྲུས་ཏེ་ཁོ་ཚོར་“ང་ལ་མི་འདི་གསོད་པའི་འགན་མེད་པ་ཡིན་པས་ཁྱོད་ཚོས་དེའི་འགན་འཁུར་དགོས་”ཞེས་བཤད།
MAT 27:25 མི་ཐམས་ཅད་ཀྱིས་“ངེད་རྣམས་དང༌། ང་ཚོའི་བུ་རྒྱུད་ཀྱིས་དེའི་འགན་འཁུར་ཡོང་”ཞེས་བཤད་པས།
MAT 27:26 པི་ལ་ཏུས་ཁོ་ཚོའི་ཆེད་དུ་པར་ཨབ་པཱ་གློད་དེ། ཡེ་ཤུ་རྟ་ལྕག་གིས་རྡུང་དུ་བཅུག་ནས་རྒྱང་ཤིང་སྒང་ལ་གསོད་པའི་ཕྱིར་དམག་མི་ཚོར་རྩིས་སྤྲད་དོ། །
MAT 27:27 དེ་ནས་སྤྱི་ཁྱབ་ཀྱི་དམག་མི་ཚོས་ཡེ་ཤུ་སྤྱི་ཁྱབ་ཀྱི་ཕོ་བྲང་གི་ནང་ལ་ཁྲིད་དེ་དམག་ཁག་ཐམས་ཅད་ཁོང་གི་མདུན་དུ་བསྡུས་ནས།
MAT 27:28 ཁོང་གི་ན་བཟའ་ཕུད་དེ་ཕྱི་གོས་དམར་པོ་ཞིག་བསྐོན་པ་དང༌།
MAT 27:29 ཚེར་མས་སླས་པའི་ཅོད་པན་ཞིག་ཁོང་གི་དབུ་ལ་བསྐོན་པ་དང༌། ཕྱག་གཡས་པ་ལ་དབྱུག་པ་ཞིག་བཞག་ནས་ཁོང་གི་མདུན་དུ་པུས་མོ་སར་བཙུགས་ནས་“ཡ་ཧུ་དཱ་པའི་རྒྱལ་པོ་ལ་ཕྱག་འཚལ་ལོ་”ཞེས་སྨྲས་ཏེ་ཁོང་ལ་བརྙས་བཅོས་བྱས།
MAT 27:30 ཁོ་ཚོས་ཁོང་ལ་མཆིལ་མ་གཏོར་ཞིང༌། དབུ་དབྱུག་པས་ཡང་ཡང་བརྡུངས།
MAT 27:31 ཁོང་ལ་བརྙས་བཅོས་བྱས་ཚར་བའི་རྗེས་སུ་ཕྱི་གོས་དམར་པོ་དེ་ཕུད་ཅིང༌། ཁོང་ལ་རང་གི་ན་བཟའ་གྱོན་དུ་བཅུག དེ་ནས་རྒྱང་ཤིང་སྟེང་ལ་གཟེར་བརྒྱབ་སྟེ་གསོད་པའི་ཕྱིར་ཕར་ཁྲིད།
MAT 27:32 ཁོང་རྣམས་ཕྱི་ལ་ཕེབས་སྐབས། སི་མོན་ཞེས་བྱ་བ་ནི་སེ་རེ་ནཱ་ཞེས་པའི་གྲོང་ཁྱེར་གྱི་མི་ཞིག་དང་ཕྲད་ནས། ཁོང་གི་རྒྱང་ཤིང་འཁུར་དུ་འཇུག་ཕྱིར་བཙན་གྱིས་ཁྲིད།
MAT 27:33 ཡང་གོལ་གོ་ཐ་ཞེས་པ་སྟེ་མགོ་རུས་ཀྱི་ས་ཆ་ཟེར་བའི་ས་དེར་སླེབས་པའི་ཚེ།
MAT 27:34 དམག་མི་ཚོས་ཁོང་ལ་སྨན་རྩྭ་ཁ་ཏིག་འདྲེས་པའི་རྒུན་ཆང་དྲངས། དེ་མྱངས་ནས་བཞེས་པར་མ་དགྱེས།
MAT 27:35 རྒྱང་ཤིང་སྟེང་དུ་ཁོང་གི་ཕྱག་ཞབས་གཉིས་ལ་གཟེར་བརྒྱབ་རྗེས། དམག་མིས་རྒྱན་བརྒྱབ་ནས་ཁོང་གི་ན་བཟའ་བགོ་བཤའ་བྱས།
MAT 27:36 དེ་ནས་ས་ཆ་དེར་བསྡད་ནས་ཁོང་བསྲུངས།
MAT 27:37 ཁོང་གི་ཉེས་ཚིག་ལ་འདི་ནི་ཡེ་ཤུ་སྟེ་ཡ་ཧུ་དཱ་པའི་རྒྱལ་པོ་ཡིན་ཞེས་བྲིས་ནས་ཁོང་གི་དབུའི་སྟེང་ལ་སྦྱར།
MAT 27:38 ཁོང་དང་མཉམ་དུ་ཇག་པ་གཉིས་ནས་གཅིག་ཁོང་གི་གཡས་ཕྱོགས་སུ་ཡོད་པའི་རྒྱང་ཤིང་དང༌། གཅིག་ཁོང་གི་གཡོན་ཕྱོགས་སུ་ཡོད་པའི་རྒྱང་ཤིང་སྟེང་ལ་གཟེར་བརྒྱབ་ནས་བཀལ།
MAT 27:39 གནས་དེ་བརྒྱུད་ནས་འགྲོ་བའི་མི་རྣམས་ཀྱིས་ཁོང་ལ་དམའ་འབེབས་བྱས་ནས་མགོ་གཡུག་བཞིན་དུ་
MAT 27:40 “ཀྱེ། མཆོད་ཁང་ཆེན་མོ་བཤིག་ནས་ཉིན་གསུམ་གྱི་ནང་སླར་རྩིག་མཁན་ཁྱོད། རང་ཉིད་སྐྱོབས་ཤིག དཀོན་མཆོག་གི་སྲས་ཡིན་ན་རྒྱང་ཤིང་སྟེང་ནས་མར་བོབས་ཤིག་”ཅེས་བཤད།
MAT 27:41 དེ་ལྟར་བླ་ཆེན་གཙོ་བོ་དང༌། ཆོས་ཁྲིམས་ལ་མཁས་པའི་མི་དང༌། རྒན་པོ་རྣམས་ཀྱིས་ཀྱང་ཁོང་ལ་འཕྱ་དམོད་བྱེད་དེ་
MAT 27:42 “ཁོས་གཞན་རྣམས་བསྐྱབས་ཀྱང༌། རང་ཉིད་སྐྱོབ་མི་ཐུབ། ཁོ་ནི་ཡི་སི་ར་ཨེལ་ཡུལ་གྱི་རྒྱལ་པོ་ཡིན། ད་ལྟ་ཁོ་རྒྱང་ཤིང་སྟེང་ནས་མར་འབབ་ན། ང་ཚོས་ཁོ་ལ་དད་པ་བྱེད་ཡོང༌།
MAT 27:43 ཁོས་དཀོན་མཆོག་ལ་བློ་གཏོད་བྱེད་དེ། ང་ནི་དཀོན་མཆོག་གི་སྲས་ཡིན་ཞེས་ཟེར་བས། དཀོན་མཆོག་གིས་ཁོ་ལ་ཐུགས་མཉེས་ན། ད་ལྟ་ཁོ་ཐར་བར་མཛོད་”ཅེས་སྨྲས།
MAT 27:44 ཁོང་དང་མཉམ་དུ་རྒྱང་ཤིང་ལ་གཟེར་བརྒྱབ་པའི་ཇག་པ་རྣམས་ཀྱིས་ཀྱང་ཁོང་ལ་དེ་བཞིན་དུ་སྨད་ར་བཏང༌།
MAT 27:45 ཉི་མ་བསྒྲིབས་ཏེ་ཉིན་གུང་ནས་ཆུ་ཚོད་གསུམ་པའི་བར་དུ་ལུང་པ་དེ་ཡོངས་སུ་མུན་པས་ཁེངས།
MAT 27:46 ཆུ་ཚོད་གསུམ་པ་ཙམ་ལ་ཡེ་ཤུས་གསུང་ཆེན་པོས་“ཨེ་ལི། ཨེ་ལི། ལ་མ་ཤ་བག་ཐ་ནི་”ཞེས་གསུངས་པའི་དོན་ནི་ངའི་དཀོན་མཆོག ངའི་དཀོན་མཆོག ཁྱེད་ཀྱིས་ང་དོར་དགོས་དོན་ཅི་ཡིན་ཞེས་པའོ།
MAT 27:47 ཉེ་འགྲམ་ལ་ཡོད་པའི་མི་ཁ་ཤས་ཀྱིས་དེ་ཐོས་ནས་“མི་འདིས་ལུང་སྟོན་པ་ཨེ་ལི་ཡཱ་འབོད་ཀྱི་འདུག་”ཅེས་བཤད།
MAT 27:48 འཕྲལ་དུ་ཁོ་ཚོའི་ནང་ནས་མི་ཞིག་གིས་ཕར་བརྒྱུགས་ཏེ་རྒུན་ཆང་སྐྱུར་མོའི་ནང་སྲིང་བལ་སྦངས་ནས་དབྱུག་པའི་རྩེར་བཀོན་ཏེ་ཡེ་ཤུས་བཞེས་ཕྱིར་དྲངས།
MAT 27:49 གཞན་རྣམས་ཀྱིས་“སྒུག་ཅིག ལུང་སྟོན་པ་ཨེ་ལི་ཡཱ་ཁོ་སྐྱོབ་པའི་ཕྱིར་ཕེབས་མ་ཕེབས་བལྟའོ་”ཞེས་བཤད།
MAT 27:50 ཡེ་ཤུས་ཡང་བསྐྱར་གསུངས་ཆེན་པོ་ཞིག་བཀྱོན་ནས་སྐུ་སྲོག་བློས་བཏང་གནང་ངོ༌།
MAT 27:51 དེའི་སྐབས་མཆོད་ཁང་ཆེན་མོའི་ནང་གི་ཡོལ་བ་དེ་སྟེང་ནས་འོག་བར་དུམ་བུ་གཉིས་སུ་རལ། ས་གཡོས་པ་དང་བྲག་གས།
MAT 27:52 དུར་ཁང་གི་སྒོ་ཕྱེ་ནས་དཀོན་མཆོག་གི་མི་འཆི་བ་རྣམས་ལས་མང་པོ་གསོན་པོར་ལང་བར་གྱུར་ཏེ།
MAT 27:53 ཡེ་ཤུ་སྐུ་གསོན་པོར་བཞེངས་པའི་རྗེས་སུ་ཁོ་ཚོ་དུར་ཁང་ནས་ཐོན་ཞིང༌། གནས་མཆོག་ཡེ་རུ་ཤ་ལེམ་ལ་ཕྱིན་ནས་མི་མང་པོས་མཐོང་བར་གྱུར།
MAT 27:54 དམག་མིའི་བརྒྱ་དཔོན་དང༌། ཁོ་དང་མཉམ་དུ་ཡེ་ཤུ་སྲུང་མཁན་རྣམས་ཀྱིས་ས་ཡོམ་དང་གང་བྱུང་བ་ཐམས་ཅད་མཐོང་ནས་ཤིན་ཏུ་འཇིགས་ཏེ་“མི་འདི་དངོས་གནས་དཀོན་མཆོག་གི་སྲས་ཡིན་ནོ་”ཞེས་སྨྲས།
MAT 27:55 ཡེ་ཤུ་ལ་ཞབས་ཕྱི་ཞུས་ཤིང་ག་ལིལ་ཡུལ་ནས་ཁོང་གི་རྗེས་སུ་འབྲངས་པའི་བུད་མེད་མང་པོ་ཞིག་དེར་ཡོད་དེ། རྒྱང་རིང་ནས་བལྟས།
MAT 27:56 ཁོ་ཚོའི་ནང་ནས་མག་དལ་གྲོང་གསེབ་ནས་ཡིན་པའི་མིར་ཡམ་དང༌། ཡ་ཀོབ་དང་ཡོ་སེབ་ཀྱི་ཨ་མ་མིར་ཡམ་དང༌། ཟེ་བད་ཡཱ་ཞེས་པའི་བུའི་ཨ་མ་ཡང་ཡོད།
MAT 27:57 དེ་ནས་དགོང་མོ་ཟིན་པའི་ཚེ་ཡེ་ཤུའི་སློབ་མར་གྱུར་བ་གྲོང་ཁྱེར་ཨ་རི་མ་ཐཱའི་ཕྱུག་པོ་ཡོ་སེབ་ཟེར་མཁན་ཞིག་དེར་སླེབས།
MAT 27:58 མི་འདི་པི་ལ་ཏུའི་སར་ཕྱིན་ཏེ་ཡེ་ཤུའི་སྐུ་ཕུང་གནང་རོགས་ཞུས་པ་དང༌། པི་ལ་ཏུ་ཡིས་ཡོ་སེབ་ལ་སྤྲོད་རྒྱུའི་བཀའ་བཏང༌།
MAT 27:59 ཡོ་སེབ་ཀྱིས་ཡེ་ཤུའི་སྐུ་ཕུང་ལེན་པ་དང༌། རས་སྤུས་ལེགས་གཙང་མ་ཤིག་གིས་སྒྲིལ་ནས།
MAT 27:60 བྲག་ལ་བཟོས་པའི་རང་གི་དུར་ཁང་གསར་པར་བཞག་ནས། རྡོ་ཆེན་པོ་ཞིག་བསྒྲིལ་ཏེ་དུར་ཁང་གི་ཁ་བཀག་ནས་སོང༌།
MAT 27:61 ཡང་མིར་ཡམ་མག་དལ་མ་དང༌། མིར་ཡམ་གཞན་ཞིག་དུར་ཁང་ལ་ཁ་གཏད་ནས་དེར་བསྡད།
MAT 27:62 དེའི་སང་ཉིན་གྲ་སྒྲིག་གི་ཉིན་མོའི་རྗེས་ཀྱི་ཉིན་མོར། བླ་ཆེན་གཙོ་བོ་དང་ཕཱ་རུ་ཤི་པ་རྣམས་པི་ལ་ཏུའི་དྲུང་དུ་འདུས་ནས།
MAT 27:63 ཁོ་ལ་“སྐུ་ཞབས་ལགས། ཁོ་གསོན་པའི་དུས་སུ་མགོ་སྐོར་གཏོང་མཁན་དེས་ཉི་མ་གསུམ་གྱི་རྗེས་སུ་ང་ནི་འཆི་བ་ནས་གསོན་པོར་ལང་བར་འགྱུར་ཞེས་ཟེར་བ་དེ་ང་ཚོས་དྲན་པས།
MAT 27:64 ཉིན་གསུམ་པའི་བར་དུ་དུར་ཁང་སྲུང་དགོས་པའི་བཀའ་གཏོང་རོགས། དེ་མིན་ཁོའི་ཉེ་གནས་རྣམས་ཡོང་ནས་ཁོའི་རོ་ཕར་འཁྱེར་ནས་མི་རྣམས་ལ། ཁོང་འཆི་བ་ནས་སླར་གསོན་པོར་གྱུར་ཞེས་ཟེར་ཡོང་ཞེས་སྨྲས་པས། གཡོ་རྒྱུ་སྔོན་མ་ལས་མཐའ་མ་ངན་པར་འགྱུར་”ཞེས་བཤད།
MAT 27:65 པི་ལ་ཏུ་ཡིས་ཁོ་ཚོར་“སྲུང་དམག་རྣམས་ཁྱོད་རྣམས་ལ་ཡོད། སོང་ལ་གང་ཐུབ་པ་དམ་པོར་སྲུང་ཞིག་”ཅེས་སྨྲས།
MAT 27:66 སྲུང་དམག་འཁྲིད་དེ་ཁོ་ཚོས་དུར་ཁང་གི་ཁ་རྡོ་རྒྱ་ཡིས་བཏབ་ནས་སྲུང་དམག་རྣམས་སྲུང་དུ་བཅུག་གོ །
MAT 28:1 ངལ་གསོ་བའི་ཉིན་གྱི་རྗེས་སུ་བདུན་ཕྲག་གི་ཉིན་དང་པོའི་ཉི་མ་ཤར་ཙམ་ལ། མིར་ཡམ་མག་དལ་མ་དང༌། མིར་ཡམ་གཞན་དེ་དུར་ཁང་ལ་ལྟ་བར་ཕྱིན།
MAT 28:2 གློ་བུར་དུ་ས་ཡོམ་ཆེན་པོ་བྱུང་སྟེ། དཀོན་མཆོག་གི་ཕོ་ཉ་ཞིག་ཞིང་ཁམས་ནས་བབས་པ་དང༌། དུར་ཁང་གི་ཁ་རྡོ་ཕར་བསྒྲིལ་ནས་དེའི་སྟེང་ལ་བཞུགས།
MAT 28:3 ཁོང་གི་གཟུགས་ནི་གློག་འོད་ལྟར་འཕྲོས་ཤིང༌། ན་བཟའ་གངས་ལྟར་དཀར།
MAT 28:4 སྲུང་དམག་རྣམས་ཁོང་ལ་འཇིགས་ནས་འདར་ཏེ་ཤི་བ་ལྟར་གྱུར།
MAT 28:5 ཕོ་ཉ་དེས་བུད་མེད་རྣམས་ལ་“མ་འཇིགས་ཤིག ཁྱོད་ཚོས་རྒྱང་ཤིང་སྟེང་བཀྲོངས་པའི་ཡེ་ཤུ་འཚོལ་བཞིན་པ་ངས་ཤེས།
MAT 28:6 ཁོང་གིས་སྔར་གསུངས་པ་ལྟར། ཁོང་སྐུ་གསོན་པོར་བཞེངས་སུ་གྱུར་བས་འདིར་མེད། ཁོང་བཞག་སར་ལྟ་རུ་ཤོག
MAT 28:7 མགྱོགས་པོ་སོང་ལ་ཁོང་གི་ཉེ་གནས་རྣམས་ལ། ཁོང་འཆི་བ་ནས་གསོན་པོར་བཞེངས་སུ་གྱུར་ཞིང༌། ཁྱེད་ཚོའི་སྔོན་ལ་ག་ལིལ་ཡུལ་དུ་ཕེབས་ཏེ་དེར་ཁོང་མཇལ་ཡོང་ཞེས་སྨྲོས་ཤིག ད་ངས་ཁྱོད་ཚོར་བཤད་པ་ཡིན་”ཞེས་གསུངས།
MAT 28:8 བུད་མེད་དེ་རྣམས་འཇིགས་ཀྱང་དགའ་སྤྲོ་ཆེན་པོའི་ངང་ནས་མགྱོགས་པོར་དུར་ཁང་ནས་ཁོང་གི་ཉེ་གནས་རྣམས་ལ་འཕྲིན་སྐྱེལ་བར་བརྒྱུགས།
MAT 28:9 འཕྲལ་དུ་ཡེ་ཤུས་ཁོ་རྣམས་ཐུག་སྟེ་“བདེ་བར་གྱུར་ཅིག་”ཅེས་གསུངས། ཁོ་རྣམས་ཁོང་གི་མདུན་དུ་ཡོང་ནས་ཞབས་ལ་བཟུང་སྟེ་ཕྱག་བཙལ།
MAT 28:10 དེ་ནས་ཡེ་ཤུས་ཁོ་རྣམས་ལ་“མ་འཇིགས་ཤིག ད་སོང་ལ། ངའི་སྤུན་ཟླ་རྣམས་ལ། ག་ལིལ་ཡུལ་དུ་སོང་ཞིང༌། དེར་ང་མཐོང་བར་འགྱུར་ཞེས་འཕྲིན་སྐྱེལ་ཞིག་”ཅེས་གསུངས།
MAT 28:11 བུད་མེད་རྣམས་ཕར་འགྲོ་དུས་སྲུང་དམག་རྣམས་ནང་ནས་ཁ་ཤས་གྲོང་ཁྱེར་དུ་ཡོང་སྟེ་གང་བྱུང་བ་ཐམས་ཅད་བླ་ཆེན་གཙོ་བོ་རྣམས་ལ་བཤད།
MAT 28:12 རྒན་པོ་རྣམས་དང་འཛོམས་ནས་གྲོས་བསྡུར་བྱས་ཏེ། དམག་མི་རྣམས་ལ་ལྐོག་རྔན་ཆེན་པོ་ཞིག་སྟེར་ནས་ཁོ་ཚོར་
MAT 28:13 “ཁྱོད་ཚོས་མི་ཚོར། ཁོའི་ཉེ་གནས་མཚན་མོར་ཡོང་ཞིང་ང་ཚོ་གཉིད་ཁུག་པའི་ཚེ་ཁོའི་རོ་བརྐུས་ཞེས་ཟེར་དགོས།
MAT 28:14 སྤྱི་ཁྱབ་ཀྱིས་གཏམ་དེ་ཐོས་ན། ང་ཚོས་ཁོ་ལ་སྐད་ཆ་བཤད་ནས་ཁྱེད་ཚོའི་རྙོག་དྲ་སེལ་ཡོང་”ཞེས་ཟེར་བས།
MAT 28:15 དམག་མི་རྣམས་ཀྱིས་དངུལ་དེ་བླངས་ནས་གང་བཤད་པ་ལྟར་བྱས། གཏམ་འདི་ཡ་ཧུ་དཱ་པ་རྣམས་ཀྱི་ཁྲོད་དུ་དེ་རིང་གི་བར་དུ་དར་ནས་ཡོད།
MAT 28:16 ཉེ་གནས་བཅུ་གཅིག་པོ་ཡེ་ཤུས་གསུངས་པའི་ག་ལིལ་ཡུལ་གྱི་རི་ལ་སོང༌།
MAT 28:17 ཁོ་ཚོས་ཁོང་མཐོང་བའི་ཚེ་ཁོང་ལ་བསྙེན་བཀུར་བྱས། འོན་ཀྱང་ཁ་ཤས་ཐེ་ཚོམ་སྐྱེས།
MAT 28:18 ཡེ་ཤུ་ཁོ་ཚོའི་རྩར་ཕེབས་ནས་“དཀོན་མཆོག་གི་ཞིང་ཁམས་དང་འཇིག་རྟེན་གྱི་དབང་ཆ་ཀུན་ང་ལ་གཏད་པ་ཡིན།
MAT 28:19 དེའི་ཕྱིར། སོང་ལ། མི་རིགས་ཐམས་ཅད་སློབ་མར་འཇུག ཡབ་དང་སྲས། དམ་པའི་ཐུགས་ཉིད་ཀྱི་མཚན་གྱི་ཐོག་ནས་ཁོ་ཚོར་ཁྲུས་གསོལ་བྱོས་ལ།
MAT 28:20 ངས་ཁྱེད་ཚོར་བཀའ་བསྒོས་པ་ཐམས་ཅད་སྲུང་དགོས་པར་སློབས་ཤིག ཉོན་དང༌། ང་ནི་ནམ་ཡང་ཁྱེད་ཚོ་དང་མཉམ་དུ་གནས། དུས་ཀྱི་མཐའ་མའི་བར་དུའང་ཡོད་དོ་”ཞེས་གསུངས་སོ། །
MAR 1:1 དཀོན་མཆོག་གི་སྲས་ཡེ་ཤུ་མཱ་ཤི་ཀའི་འཕྲིན་བཟང་གི་ཐོག་མ་ནི།
MAR 1:2 ལུང་སྟོན་པ་ཡེ་ཤ་ཡཱ་ཡིས་བྲིས་པའི་མདོའི་ནང་དཀོན་མཆོག་གིས་འདི་ལྟར་གསུངས། ལྟོས་ཤིག ང་ཡི་ཕོ་ཉ་ཁྱེད་ཀྱི་མདུན་དུ་གཏོང༌། ། དེ་ཡིས་ཁྱེད་ཀྱི་ལམ་ནི་བསལ་བར་བྱ། །
MAR 1:3 དབེན་སྟོང་ཡུལ་ནང་གྲགས་པའི་འབོད་སྒྲ་ཡིས། ། གཙོ་བོའི་ཆེད་དུ་ཕེབས་ལམ་གྲ་སྒྲིག་བྱོས། ། ལམ་བུ་དེ་ནི་བདེ་བར་བཟོས་ཤིག་ཨང༌། ། ཅེས་གསུངས།
MAR 1:4 དེའི་ཕྱིར་ཁྲུས་གསོལ་མཁན་ཡོ་ཧ་ནན་དབེན་སྟོང་ལ་བཞུགས་ཏེ། མི་རྣམས་ལ་ཁྲུས་གསོལ་གནང་ནས། སྡིག་ཉེས་སེལ་བའི་ཆེད་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བའི་རྟགས་སུ་ཁྲུས་གསོལ་ལེན་དགོས་པར་བསྒྲགས།
MAR 1:5 ཡ་ཧུ་དཱ་ཡུལ་དང་ཡེ་རུ་ཤ་ལེམ་གྲོང་ཁྱེར་གྱི་མི་ཤིན་ཏུ་མང་པོ་ཡོ་ཧ་ནན་གྱི་དྲུང་དུ་འགྲོ་བཞིན་ཡོད་པས། ཁོ་ཚོས་རང་གི་ལས་ངན་ཁས་བླངས་པ་དང་ཡོར་དན་གཙང་པོ་ལ་ཁོང་གིས་ཁོ་ཚོར་ཁྲུས་གསོལ་གནང༌།
MAR 1:6 ཡོ་ཧ་ནན་གྱིས་རྔ་མོང་གི་སྤུ་ཡི་གོས་གྱོན་པ་དང་རྐེད་པ་ལ་ཀོ་བའི་སྐེ་རགས་བཅིངས། ཟས་ལ་འབུ་ཆ་ག་པ་དང་ཤིང་ནགས་ཀྱི་སྦྲང་རྩི་བཟས།
MAR 1:7 ཡོ་ཧ་ནན་གྱིས་“ངའི་རྗེས་ལ་ང་ལས་དབང་ཆེ་བ་ཞིག་ཕེབས་ཡོང་བར་ངེས་ཏེ། ང་བསྒུར་ནས་ཁོང་གི་ལྷམ་སྒྲོག་ཀྱང་འགྲོལ་བར་མི་འོས།
MAR 1:8 ངས་ཁྱེད་ཚོར་ཆུ་ཡིས་ཁྲུས་གསོལ་བྱས་པ་ཡིན། འོན་ཀྱང་ཁོང་གིས་ཁྱེད་ཚོར་དཀོན་མཆོག་གི་དམ་པའི་ཐུགས་ཉིད་ཀྱིས་ཁྲུས་གསོལ་གནང་བར་འགྱུར་རོ་”ཞེས་ཆོས་བསྒྲགས།
MAR 1:9 དེའི་དུས་སུ་ཡེ་ཤུ་ག་ལིལ་ཡུལ་གྱི་ན་ཙ་རེལ་གྲོང་ཚོ་ནས་ཕེབས་ཤིང༌། ཁྲུས་གསོལ་མཁན་ཡོ་ཧ་ནན་གྱིས་ཡེ་ཤུ་ཡོར་དན་གཙང་པོའི་ནང་ཁྲུས་གསོལ་གནང་མ་ཐག
MAR 1:10 ཡེ་ཤུ་ཆུ་ནས་ཡར་ཕེབས་སྐབས་ནམ་མཁའ་རལ་ཏེ་དཀོན་མཆོག་གི་དམ་པའི་ཐུགས་ཉིད་ཕུག་རོན་ལྟར་རང་གི་སྟེང་ལ་བབས་པ་གཟིགས།
MAR 1:11 ཡང་དཀོན་མཆོག་གི་ཞིང་ཁམས་ནས་“ཁྱེད་ནི་ངའི་གཅེས་པའི་བུ་ཡིན། ང་རང་ཁྱེད་ལ་ཤིན་ཏུ་དགའོ་” ཞེས་པའི་གསུང་སྐད་གཅིག་བྱུང༌།
MAR 1:12 དེ་ལྟར་གསུངས་མ་ཐག་ཏུ་དཀོན་མཆོག་གི་དམ་པའི་ཐུགས་ཉིད་ཀྱིས་བསྐུལ་ཏེ་ཡེ་ཤུ་དབེན་སྟོང་ལ་མངགས།
MAR 1:13 ཉིན་ཞག་བཞི་བཅུའི་རིང་བདུད་སཱ་ཏན་གྱིས་དབེན་སྟོང་དུ་ཁོང་ལ་ཉམས་ཚོད་བླངས། ཁོང་གཅན་གཟན་ཁྲོད་དུ་བཞུགས་ཤིང༌། དཀོན་མཆོག་གི་ཕོ་ཉས་ཁོང་ལ་ཞབས་ཕྱི་ཞུས་སོ། །
MAR 1:14 ཁྲུས་གསོལ་མཁན་ཡོ་ཧ་ནན་བཙོན་དུ་བཅུག་པའི་རྗེས་སུ་ཡེ་ཤུ་ག་ལིལ་ཡུལ་དུ་ཕེབས་ནས། དཀོན་མཆོག་གི་འཕྲིན་བཟང་ཁྱབ་བསྒྲགས་མཛད།
MAR 1:15 ཁོང་གིས་“ད་དུས་ལ་བབས་འདུག དཀོན་མཆོག་གི་རྒྱལ་སྲིད་འཐོན་ལ་ཉེ་བར་སླེབས་པས། ཁྱེད་ཚོས་སྤྱོད་པ་ངན་པ་སྤངས་ནས་སེམས་བསྒྱུར་ཏེ་འཕྲིན་བཟང་ལ་དད་པ་གྱིས་ཤིག་”ཅེས་གསུངས།
MAR 1:16 དེ་ནས་ཡེ་ཤུ་ག་ལིལ་ཡུལ་གྱི་མཚོ་འགྲམ་བརྒྱུད་ནས་ཕེབས་དུས། སི་མོན་དང་ཁོང་གི་གཅུང་པོ་ཨན་དྲི་ཡཱ་ཞེས་བྱ་བའི་ཉ་པ་གཉིས་ཀྱིས་མཚོ་ནང་དུ་དྲ་རྒྱ་འཕེན་བཞིན་པ་གཟིགས་ཤིང༌།
MAR 1:17 ཡེ་ཤུས་ཁོ་ཚོ་ལ་“ངའི་རྗེས་སུ་ཤོག ཁྱེད་ཀྱིས་ད་ལྟ་ཉ་འཚོལ་བ་ལྟར་རྗེས་མ་ངས་ཁྱེད་ཚོ་མི་རྣམས་འཚོལ་དུ་འཇུག་”ཅེས་གསུངས་མ་ཐག
MAR 1:18 ཁོང་གཉིས་ཀྱིས་རང་གི་དྲ་རྒྱ་བཞག་ནས་ཁོང་གི་རྗེས་སུ་འབྲངས།
MAR 1:19 ཡེ་ཤུ་ཕར་ཙམ་ཕེབས་སྐབས་ཁོང་གིས་ཟེ་བད་ཡཱ་ཟེར་མཁན་དེའི་བུ་ཡ་ཀོབ་དང་ཡོ་ཧ་ནན་གཉིས་ཀྱིས་གྲུའི་ནང་ལ་དྲ་རྒྱ་བཟོ་བཅོས་རྒྱག་བཞིན་པ་གཟིགས་ནས།
MAR 1:20 ཡེ་ཤུས་ལམ་སེང་ཁོ་ཚོར་“ཚུར་ཤོག་”ཅེས་གསུངས་པས། ཁོ་གཉིས་ཀྱིས་རང་གི་ཕ་ཟེ་བད་ཡཱ་དང་གླ་པ་རྣམས་གྲུ་ལ་བཞག་ནས་ཁོང་གི་རྗེས་སུ་འབྲངས་པ་རེད།
MAR 1:21 དེ་ནས་ཁོང་ཚོ་གྲོང་ཁྱེར་ཀ་ཕར་ན་ཧུམ་དུ་བྱོན་ནས་ངལ་གསོའི་ཉིན་མོ་སླེབས་མ་ཐག་ཡེ་ཤུ་ཡ་ཧུ་དཱ་པའི་འདུ་ཁང་དུ་ཕེབས་ཏེ། ཆོས་བསྟན་གནང་བ་རེད།
MAR 1:22 ཁོང་གིས་ཁོ་ཚོར་ཆོས་སྟོན་སྟངས་ནི་ཡ་ཧུ་དཱ་པའི་ཆོས་ཁྲིམས་ལ་མཁས་པའི་མི་རྣམས་དང་མི་འདྲ་སྟེ། དབང་ལྡན་ཞིག་གིས་གསུངས་པ་དང་འདྲ་བར་འདུག་པས། དེ་ཐོས་པ་ཐམས་ཅད་ཡ་མཚན་ཆེན་པོར་གྱུར།
MAR 1:23 དེའི་སྐབས་གདོན་འདྲེ་མི་གཙང་བ་ཡིས་ཟིན་པའི་མི་ཞིག་འདུ་ཁང་ནང་ལ་ཡོད་པ་དང༌།
MAR 1:24 དེས་སྐད་ཆེན་པོས་“ཀྱེ། ན་ཙ་རེལ་པ་ཡེ་ཤུ། ང་ཚོ་ཁྱེད་དང་འབྲེལ་བ་གང་ཡོད། ཁྱེད་ཀྱིས་ང་ཚོ་མེད་པ་བཟོ་བར་ཕེབས་སམ། ཁྱེད་སུ་ཡིན་པ་ངས་ཤེས་ཀྱི་ཡོད། ཁྱེད་ནི་དཀོན་མཆོག་གི་སྐྱེས་བུ་དམ་པ་དེ་ཡིན་”ཞེས་བཤད།
MAR 1:25 འོན་ཀྱང་ཡེ་ཤུས་གདོན་འདྲེ་དེར་བཀའ་གནང་ནས་“ཁ་རོག་སྡོད། མི་དེའི་ལུས་ནས་ཐོན་ཅིག་”ཅེས་གསུངས་པ་དང༌།
MAR 1:26 མི་དེ་གཟའ་ཕོག་པ་ལྟར་ས་ལ་འགྱེལ་ནས་ཁོས་སྐད་ངན་ཆེན་པོ་བཏོན་ཞིང་གདོན་འདྲེ་མི་གཙང་བ་དེ་མི་དེའི་ལུས་ནས་ཕྱིར་ཐོན།
MAR 1:27 མི་ཐམས་ཅད་ཧ་ལས་ཏེ་ཕན་ཚུན་གཅིག་གིས་གཅིག་ལ་སྐད་ཆ་དྲིས་པར་“འདི་ཅི་ཡིན། འདི་བསྟན་པ་གསར་པ་ཡིན་ནམ། ཁོང་གིས་དབང་ཆ་ཆེན་པོས་གདོན་འདྲེ་མི་གཙང་བ་ལ་ཡང་བཀའ་གནང་སྟེ། གདོན་འདྲེས་ཀྱང་ཁོང་གི་བཀའ་ལ་ཉན་པར་བྱེད་”ཅེས་བཤད།
MAR 1:28 དེ་མ་ཐག་ཏུ་ཁོང་གི་སྙན་གྲགས་ག་ལིལ་གྱི་ས་ཕྱོགས་གང་སར་ཁྱབ་པ་རེད།
MAR 1:29 ཁོང་ཚོ་ཡ་ཧུ་དཱ་པའི་འདུ་ཁང་ནས་ཐོན་མ་ཐག་ཡ་ཀོབ་དང་ཡོ་ཧ་ནན་གཉིས་མཉམ་དུ་སི་མོན་དང་ཨན་དྲི་ཡཱ་ཡི་ཁྱིམ་དུ་ཕེབས།
MAR 1:30 དེའི་དུས་སུ་སི་མོན་གྱི་བཟའ་ཟླའི་ཨ་མ་ཚ་བ་རྒྱས་ཏེ་ཉལ་ཁྲིའི་སྟེང་དུ་ཉལ་ཡོད། ཡེ་ཤུ་ཕེབས་སྐབས་ཁྱིམ་མི་རྣམས་ཀྱིས་ཁོ་མོའི་གནས་ཚུལ་ཁོང་ལ་ཞུས།
MAR 1:31 ཡེ་ཤུ་ཁོ་མོའི་མདུན་དུ་ཕེབས་ཏེ་ལག་པ་ནས་འཇུས་ཤིང་ཡར་བསྐྱོར་ཏེ་ལངས་སུ་བཅུག་པ་དང༌། ཚ་བ་འཇགས་ཏེ་ཁོ་མོས་ཁོང་རྣམས་ལ་ཞབས་ཕྱི་ཞུས་སོ། །
MAR 1:32 དེ་ནས་ཉི་མ་བཞུད་དེ་ས་མ་རུབ་ཙམ་ལ། མི་ཚོས་ནད་པ་དང་གདོན་འདྲེས་ཟིན་པའི་མི་རྣམས་ཡེ་ཤུའི་དྲུང་དུ་ཁྲིད་ཡོང༌།
MAR 1:33 གྲོང་ཁྱེར་གྱི་མི་ཐམས་ཅད་སྒོའི་འགྲམ་དུ་འཛོམས་པ་དང༌།
MAR 1:34 ཡེ་ཤུས་དཀོན་མཆོག་གི་དབང་གི་སྒོ་ནས་ནད་རིགས་མི་འདྲ་བ་མང་པོ་སེལ་གནང་བ་མ་ཟད། གདོན་འདྲེ་མང་པོ་བསྐྲད་དེ། གདོན་དེ་ཚོ་སྐད་ཆ་ལབ་ཏུ་མ་བཅུག གང་ཡིན་ཟེར་ན། གདོན་འདྲེས་ཁོང་ངོ་ཤེས་ཀྱི་ཡོད་པས་རེད།
MAR 1:35 དེའི་སང་ཉིན་ནམ་མ་ལངས་པའི་སྔོན་དུ་ཡེ་ཤུ་ཡར་བཞེངས་ཏེ་དབེན་གནས་ཤིག་ཏུ་ཕེབས་ནས་དེར་སྨོན་ལམ་བསྐྱོན།
MAR 1:36 སི་མོན་དང་ཁོང་གི་རོགས་པ་རྣམས་ཀྱིས་ཡེ་ཤུ་བཙལ་ནས།
MAR 1:37 ཁོང་དང་མཇལ་རྗེས་“མི་ཚང་མས་ཁྱེད་རང་འཚོལ་བཞིན་འདུག་”ཅེས་ཞུས་པ་དང༌།
MAR 1:38 ཁོང་གིས་“ང་ཚོ་ཉེ་འཁོར་གྱི་གྲོང་སྡེ་ལ་འགྲོ་དགོས། ངས་དེ་ཚོ་ལ་ཡང་ཆོས་བཤད་པར་བྱ། ང་དོན་འདིའི་ཆེད་དུ་ཡོང་བ་ཡིན་”ཞེས་གསུངས།
MAR 1:39 དེའི་ཕྱིར་ཁོང་ག་ལིལ་ཡུལ་ཡོངས་ཀྱི་ཡ་ཧུ་དཱ་པའི་འདུ་ཁང་དུ་ཕེབས་ནས་ཆོས་གསུངས་ཤིང༌། གདོན་འདྲེ་རྣམས་ཕར་བསྐྲད་དོ། །
MAR 1:40 དེའི་ཚེ་མཛེ་ནད་ཅན་ཅིག་ཁོང་གི་དྲུང་དུ་ཡོང་ནས་པུས་མོ་སར་བཙུགས་ཏེ་“གལ་ཏེ་ཁྱེད་ཐུགས་མཉེས་པ་ཡིན་ན་ཁྱེད་ཀྱིས་ང་རང་གི་མཛེ་ནད་དག་པར་མཛད་ཐུབ་བོ་”ཞེས་ཞུ་བ་ཆེན་པོ་ཕུལ་བས།
MAR 1:41 ཡེ་ཤུ་སྙིང་རྗེ་སྐྱེས་ཏེ་ཕྱག་བརྐྱངས་ཤིང་མི་དེར་རེག་ནས་“ང་དེ་བཞིན་དུ་བྱེད་འདོད་ཡོད། དག་པར་གྱུར་ཅིག་”ཅེས་གསུངས་མ་ཐག་མི་དེའི་མཛེ་ནད་དག་པར་གྱུར།
MAR 1:43 ཁོང་གིས་ནན་ཏན་གྱིས་མི་དེར་“ལྟོས་དང༌། ཁྱོད་ཀྱིས་མི་གཞན་ལ་ཅི་ཡང་ལབ་པར་མ་བྱོས་ཤིག སོང་ལ་རང་གི་ལུས་ཡ་ཧུ་དཱ་པའི་བླ་མར་སྟོན་དང༌། ཁོ་རྣམས་ལ་བདེན་དཔང་བྱེད་པའི་ཕྱིར་ལུང་སྟོན་པ་མོ་ཤེ་ཡིས་བཀའ་གནང་ཡོད་པ་བཞིན་མཆོད་པ་ཕུལ་ཅིག་”ཅེས་བཀའ་གནང་སྟེ་མི་དེ་ལམ་སེང་ཕྱིར་བཏོན།
MAR 1:45 འོན་ཀྱང་མི་དེ་ཕྱི་ལ་སོང་ནས་གཏམ་མང་པོ་བཤད་ཅིང་གནས་ཚུལ་འདི་ཁྱབ་བསྒྲགས་བྱས་པས། དེའི་རྗེས་སུ་ཡེ་ཤུ་གྲོང་ཁྱེར་གང་ལ་ཡང་མངོན་སུམ་དུ་ཕེབས་མ་ཐུབ་པར་ཕྱི་རོལ་གྱི་དབེན་གནས་རྣམས་སུ་བཞུགས། ཡིན་ན་ཡང་མི་རྣམས་ཕྱོགས་བཞི་མཚམས་བརྒྱད་ནས་ཡོང་སྟེ་ཁོང་གི་དྲུང་དུ་འདུས་སོ། །
MAR 2:1 དེ་ནས་ཉི་མ་འགའ་ཤས་ཕྱིན་པའི་རྗེས་ལ་ཡེ་ཤུ་ཡང་བསྐྱར་གྲོང་ཁྱེར་ཀ་ཕར་ན་ཧུམ་ལ་ཕེབས་ནས་ཁོང་ཁང་པའི་ནང་དུ་བཞུགས་ཡོད་པའི་གཏམ་གྲགས་པ་ཙམ་གྱིས།
MAR 2:2 མི་མང་པོ་སྒོའི་འགྲམ་དུ་འཛོམས་ཏེ་ས་ཆ་སྟོང་པའང་མེད། ཁོང་གིས་དཀོན་མཆོག་གི་བཀའ་བསྒྲགས་གནང་སྐབས་མི་འགའ་ཤས་ཡོང་ཞིང༌། དེའི་ནང་ནས་མི་བཞི་ཡིས་གོམ་པ་སྤོ་མི་ཐུབ་པའི་ནད་པ་གཅིག་ཁུར་ནས་ཁོང་གི་དྲུང་དུ་འོངས།
MAR 2:4 འོན་ཀྱང་མི་ཚོགས་མང་བས་ཁོ་ཚོ་ཁོང་གི་དྲུང་དུ་མ་ཐར་སྟབས། ཁང་པའི་ཐོག་ཁ་བཤུས་ཏེ་ཡེ་ཤུ་བཞུགས་སའི་སྒང་ལ་ཨི་ཁུང་ཆེན་པོ་ཞིག་ཕུག་ནས་ནད་པ་དང་ཉལ་ཁྲི་མཉམ་དུ་མར་ཕབ་པ་རེད།
MAR 2:5 ཡེ་ཤུས་ཁོ་ཚོའི་དད་སེམས་མཁྱེན་ནས་ནད་པ་དེ་ལ་“བུ། ཁྱོད་ཀྱི་སྡིག་ཉེས་བསལ་ཟིན་པ་ཡིན་”ཞེས་གསུངས།
MAR 2:6 དེར་ཡོད་པའི་ཆོས་ཁྲིམས་ལ་མཁས་པའི་མི་འགའ་ཞིག་གི་བསམ་པ་ལ།
MAR 2:7 མི་འདིས་འདི་ལྟར་བཤད་པ་གང་ཡིན་ནམ། དེས་དཀོན་མཆོག་ལ་སྐུར་བ་འདེབས་པ་རང་རེད། དཀོན་མཆོག་གཅིག་པོས་མ་གཏོགས་གཞན་སུས་སྡིག་ཉེས་སེལ་ཐུབ་བསམས།
MAR 2:8 དེ་མ་ཐག་ཏུ་ཡེ་ཤུའི་ཐུགས་ལ་ཁོ་ཚོའི་བསམ་པ་མཁྱེན་ནས་འདི་ལྟར་གསུངས་“ཁྱོད་ཚོས་བསམ་བློ་འདི་ལྟར་གཏོང་དགོས་པའི་རྒྱུ་མཚན་གང་ཡིན།
MAR 2:9 ནད་པ་དེར་ཁྱོད་ཀྱི་སྡིག་ཉེས་བསལ་ཟིན་ཟེར་བ་ལས་སླ་པོ་ཡིན་ནམ། ཡང་ན་ལོངས་ལ་ཉལ་ཁྲི་ཁྱེར་ནས་སོང་ཞིག་ཟེར་བ་ལས་སླ་པོ་ཡིན།
MAR 2:10 འོན་ཀྱང་མིའི་རིགས་ཀྱི་བུ་ལ་འཇིག་རྟེན་འདིའི་སྟེང་སྡིག་ཉེས་སེལ་བའི་དབང་ཡོད་པ་ཁྱོད་ཚོས་ཤེས་པའི་ཕྱིར༌༌༌༌” ཡེ་ཤུས་ནད་པ་དེ་ལ་
MAR 2:11 “ངས་ཁྱོད་ལ་ཟེར་རྒྱུར། ལོངས་ལ་ཉལ་ཁྲི་ཁྱེར་ནས་ནང་ལ་ལོག་ཅིག་”ཅེས་གསུངས།
MAR 2:12 མི་དེས་ལམ་སེང་ཡར་ལངས་ནས་ཉལ་ཁྲི་ཁྱེར་ཏེ་མི་ཚང་མའི་མདུན་ནས་ལོག་ཕྱིན་པས། ཐམས་ཅད་ཡ་མཚན་ཆེན་པོ་སྐྱེས་ནས་དཀོན་མཆོག་ལ་བསྟོད་པ་ཕུལ་ཏེ་“འདི་ལྟ་བུའི་མཛད་པ་ང་ཚོས་གཏན་ནས་མཐོང་མ་མྱོང་”ཞེས་བཤད།
MAR 2:13 དེ་ནས་ཡང་ཡེ་ཤུ་ག་ལིལ་ཡུལ་གྱི་མཚོའི་འགྲམ་དུ་ཕེབས་པ་དང༌། མི་ཚང་མ་ཁོང་གི་དྲུང་དུ་འཛོམས་ནས་ཁོང་གིས་དེ་ཚོ་ལ་ཆོས་བསྟན།
MAR 2:14 ཡེ་ཤུ་ཕེབས་བཞིན་པའི་སྐབས་སུ་ཁོང་གིས་ཨལ་ཕཱ་ཡི་བུ་ལེ་ཝི་ཟེར་བ་དེ་ཁྲལ་ལེན་སར་བསྡད་ཡོད་པ་གཟིགས་ནས། དེ་ལ་“ཁྱེད་རང་ངའི་རྗེས་སུ་ཤོག་”ཅེས་གསུངས་པས་ཁོ་ཡར་ལངས་ཏེ་ཁོང་གི་རྗེས་སུ་འབྲངས།
MAR 2:15 ཡེ་ཤུས་ལེ་ཝིའི་ཁྱིམ་ལ་ཞལ་ལག་བཞེས་པའི་སྐབས་སུ། ཁྲལ་ལེན་མཁན་དང་སྡིག་ཉེས་ཅན་མང་པོ་ཞིག་ཀྱང་ཡེ་ཤུ་དང་ཁོང་གི་ཉེ་གནས་མཉམ་དུ་ཟས་ཟ་བཞིན་ཡོད། དེ་ནི་མི་མང་པོ་ཡེ་ཤུའི་རྗེས་སུ་འབྲངས་པས་སོ།
MAR 2:16 ཕཱ་རུ་ཤི་ཟེར་བའི་ཕྱོགས་ཁག་གི་ཆོས་ཁྲིམས་ལ་མཁས་པའི་མི་ཚོས་ཡེ་ཤུས་ཁྲལ་ལེན་མཁན་དང་སྡིག་ཉེས་ཅན་ཚོ་མཉམ་དུ་ཞལ་ལག་བཞེས་བཞིན་པ་མཐོང་སྟེ། ཁོ་ཚོས་ཁོང་གི་ཉེ་གནས་ཚོར་“ཁོང་གིས་ཁྲལ་ལེན་མཁན་དང་སྡིག་ཉེས་ཅན་རྣམས་དང་མཉམ་དུ་བཟའ་བཏུང་བྱེད་པ་འདི་ཅི་ཡིན་”ཞེས་ཟེར་བས།
MAR 2:17 ཡེ་ཤུས་གཏམ་དེ་གསན་ནས་“ཁམས་བཟང་པོའི་མི་ལ་སྨན་པ་མི་དགོས་ཀྱི། ནད་པ་ཚོ་ལ་དགོས་སོ། ང་རང་ནི་ཆོས་དྲང་པོའི་མི་རྣམས་འབོད་དུ་ཡོང་བ་མ་ཡིན་གྱི། མི་སྡིག་ཉེས་ཅན་རྣམས་འབོད་དུ་ཡོང་བ་ཡིན་”ཞེས་གསུངས།
MAR 2:18 དེ་ཡང་ཁྲུས་གསོལ་མཁན་ཡོ་ཧ་ནན་གྱི་སློབ་མ་དང་ཕཱ་རུ་ཤི་པ་རྣམས་ཀྱིས་སྨྱུང་གནས་སྲུང་བཞིན་ཡོད་དེ། མི་འགའ་ཞིག་ཡོང་ནས་ཡེ་ཤུ་ལ་“ཡོ་ཧ་ནན་གྱི་སློབ་མ་དང་ཕཱ་རུ་ཤི་པའི་སློབ་མ་རྣམས་ཀྱིས་སྨྱུང་གནས་སྲུང་བཞིན་ཡོད་ནའང༌། ཁྱེད་ཀྱི་སློབ་མ་རྣམས་ཀྱིས་སྨྱུང་གནས་མི་སྲུང་བ་ཅི་ཡིན་”ཞེས་དྲིས།
MAR 2:19 ཡེ་ཤུས་“ཆང་སའི་སྐབས། མག་པའི་རོགས་རྣམས་མག་པ་དང་མཉམ་དུ་ཡོད་དུས་སྨྱུང་གནས་སྲུང་སྲིད་དམ། མག་པ་ཁོ་ཚོ་དང་མཉམ་དུ་ཡོད་དུས་ཁོ་ཚོས་སྨྱུང་གནས་སྲུང་མི་སྲིད།
MAR 2:20 འོན་ཀྱང་མག་པ་ཁོ་ཚོ་དང་ཁ་འབྲལ་བའི་དུས་ལ་འབབ་ཡོང༌། དུས་དེར་ཁོ་ཚོས་སྨྱུང་གནས་སྲུང་ངེས།
MAR 2:21 དཔེར་ན། མི་སུས་ཀྱང་རས་མཐུག་པོས་གོས་སྲབ་པོར་ལྷན་པ་མི་རྒྱག དེ་ལྟར་བྱས་ན་རས་མཐུག་པོ་དེས་གོས་སྲབ་པོའི་སྲུབས་ཁ་ཇེ་ཆེར་གཏོང༌།
MAR 2:22 ཡང་དེ་ལྟར་མི་སུ་ཞིག་ཡིན་ཡང་རྒུན་འབྲུམ་ཆང་གསར་པ་པགས་པའི་ཁུག་མ་རྙིང་པའི་ནང་བསྙལ་བར་མི་བྱ། གལ་ཏེ་བསྙལ་ཚེ་ཆང་འཕེལ་ནས་ཁུག་མ་རྙིང་པ་གས་ཏེ་ཆང་དང་ཁུག་མ་གཉིས་ཀ་འཕྲོ་བརླག་འགྲོ་བར་འགྱུར་ངེས་པས། རྒུན་འབྲུམ་ཆང་གསར་པ་དེ་ཁུག་མ་གསར་པའི་ནང་དུ་བླུག་གོ་”ཞེས་གསུངས།
MAR 2:23 དེ་ནས་ངལ་གསོ་བའི་ཉིན་མོར་ཡེ་ཤུ་དང་ཁོང་གི་ཉེ་གནས་རྣམས་ཞིང་ཁ་ཞིག་བརྒྱུད་ནས་ཕེབས་སྐབས། ཉེ་གནས་རྣམས་ཀྱིས་འབྲུ་ཡི་སྙེ་མ་འཐོག་བཞིན་ཡོད་པས།
MAR 2:24 ཕཱ་རུ་ཤི་པ་ཡིས་“གཟིགས་དང༌། ཁྱེད་ཀྱི་ཉེ་གནས་རྣམས་ཀྱིས་ཅིའི་ཕྱིར་ངལ་གསོ་བའི་ཉིན་མོར་དཀོན་མཆོག་གི་བཀའ་ཁྲིམས་ལྟར་བྱེད་མི་ཆོག་པའི་ལས་བྱེད་བཞིན་ཡོད་དམ་”ཞེས་བཤད།
MAR 2:25 ཡེ་ཤུས་“རྒྱལ་པོ་དཱ་བིད་དང་ཁོང་གི་འཁོར་གཡོག་རྣམས་ལྟོགས་ནས་ཟས་མེད་ཐབས་མེད་པར་གྱུར་ཏེ། ཅི་ཞིག་བྱས་པ་ཁྱོད་ཚོས་དཀོན་མཆོག་གི་གསུང་རབ་ལས་བཀླགས་མ་མྱོང་ངམ།
MAR 2:26 བླ་ཆེན་གཙོ་བོ་ཨབ་ཡཱ་ཐར་ཟེར་བའི་དུས་སུ། དཱ་བིད་ཉིད་དཀོན་མཆོག་གི་གུར་མཆོག་ཏུ་སོང་ནས་དཀོན་མཆོག་གི་སྐུ་མདུན་གྱི་བག་ལེབ་བཟས་ཤིང་འཁོར་གཡོག་རྣམས་ལའང་བྱིན། བག་ལེབ་དེ་བཀའ་ཁྲིམས་ལྟར་ན་ཡ་ཧུ་དཱ་པའི་བླ་མ་རྣམས་ལས་གཞན་སུས་ཀྱང་ཟ་མི་ཆོག་”ཅེས་གསུངས་པ་དང༌།
MAR 2:27 དེ་ནས་ཁོང་གིས་“མི་ནི་ངལ་གསོའི་ཉིན་གྱི་དོན་དུ་མཛད་པ་མ་ཡིན་གྱི། ངལ་གསོའི་ཉིན་མོ་ནི་མིའི་དོན་དུ་མཛད་པ་ཡིན།
MAR 2:28 དེ་བས་མིའི་རིགས་ཀྱི་བུ་ནི་ངལ་གསོ་བའི་ཉིན་གྱི་གཙོ་བོ་ཡིན་ནོ་”ཞེས་གསུངས་སོ། །
MAR 3:1 དེ་ནས་ཡང་ཡེ་ཤུ་ཡ་ཧུ་དཱ་པའི་འདུ་ཁང་དུ་ཕེབས། དེར་ལག་པ་འཁུམས་པའི་མི་ཞིག་ཡོད།
MAR 3:2 ཡེ་ཤུ་ལ་ནག་ཉེས་བཙུགས་པར་འདོད་པའི་མི་རྣམས་ཀྱིས་ངལ་གསོ་བའི་ཉིན་ལ་ཁོང་གིས་མི་དེའི་ནད་སེལ་དང་མི་སེལ་བའི་ཆེད་ནན་ཏན་གྱིས་བལྟས་ཏེ་བསྡད།
MAR 3:3 ཡེ་ཤུས་ལག་པ་གཅིག་འཁུམས་པའི་མི་དེ་ལ་“ཡར་ལངས་ནས་ཚུར་ཤོག་”ཅེས་གསུངས་ཤིང༌།
MAR 3:4 ཡང་མི་དེ་རྣམས་ལ་“དཀོན་མཆོག་གི་བཀའ་ཁྲིམས་ལྟར་ན་མི་རྣམས་ལ་ངལ་གསོ་བའི་ཉིན་མོར་ལས་བཟང་པོ་བྱེད་ཆོག་གམ་ཡང་ན་ལས་ངན་པ་བྱེད་ཆོག སྲོག་སྐྱོབ་ཆོག་གམ་ཡང་ན་སྲོག་གཅོད་ཆོག་”ཅེས་དྲིས། འོན་ཀྱང་དེ་ཚོས་ཁ་རོག་བསྡད།
MAR 3:5 ཡེ་ཤུ་ཐུགས་ཁྲོས་ནས་མི་དེ་རྣམས་ལ་རིམ་གྱིས་གཟིགས་ཤིང་དེ་ཚོའི་སེམས་མཁྲེགས་པོ་ཡིན་པར་ཐུགས་སྐྱོ་སྟེ། མི་དེར་“ལག་པ་རྐྱོངས་ཤིག་”ཅེས་གསུངས་པས་ཁོས་ལག་པ་བརྐྱངས་ཤིང་ནད་སེལ་བར་གྱུར།
MAR 3:6 དེ་ནས་ཕཱ་རུ་ཤི་པ་རྣམས་ཕྱི་ལ་སོང་མ་ཐག་ཏུ་རྒྱལ་པོ་ཧེ་རོ་དཱེ་ཞེས་བྱ་བའི་ཕྱོགས་ཁག་གི་མི་དང་མཉམ་དུ་ཡེ་ཤུ་དགྲོང་རྒྱུའི་ངན་ཇུས་བྱས།
MAR 3:7 དེ་ནས་ཡེ་ཤུ་དང་ཁོང་གི་ཉེ་གནས་རྣམས་ཕྱིར་མཚོ་འགྲམ་དུ་ཕེབས་པ་ལ། མི་ཚོགས་མང་པོ་ཞིག་ག་ལིལ་ཡུལ་ནས་ཁོང་གི་རྗེས་སུ་འབྲངས་པ་མ་ཟད།
MAR 3:8 ཁོང་གིས་མཛད་པའི་དོན་རྣམས་ཐོས་པས་གཞན་མི་མང་པོས་ཀྱང་ཡ་ཧུ་དཱ་ཡུལ་དང་ཡེ་རུ་ཤ་ལེམ་གྲོང་ཁྱེར། ཨི་དུམ་ཡཱ་ཡུལ། ཡོར་དན་གཙང་པོའི་ཕ་རོལ་གྱི་ས་ཆ་དང༌། གྲོང་ཁྱེར་ཐཱ་ཨེར་དང་ཚི་དོན་སོགས་ས་ཆ་སོ་སོ་ནས་ཁོང་གི་དྲུང་དུ་ཡོང༌།
MAR 3:9 དེར་ཡོད་པའི་མི་ཚོགས་མང་པོས་ཁོང་མ་བཙིར་བའི་ཕྱིར། ཁོང་གིས་ཉེ་གནས་ཚོར་གྲུ་ཆུང་ཞིག་གྲ་སྒྲིག་བྱེད་དུ་བཅུག
MAR 3:10 ཁོང་གིས་མི་མང་པོའི་ནད་སེལ་བར་མཛད་པས། ནད་ཡོད་པ་ཐམས་ཅད་ཀྱིས་ཁོང་ལ་རེག་པའི་ཆེད་དུ་འཚང་ཁ་བརྒྱབ།
MAR 3:11 གདོན་འདྲེ་མི་གཙང་བ་དེ་ཚོས་ག་དུས་ཡིན་ཡང་ཁོང་མཐོང་བ་ཙམ་གྱིས་ཁོང་གི་དྲུང་དུ་ཕྱག་འཚལ་ཏེ་སྐད་ཆེན་པོས་“ཁྱེད་ནི་དཀོན་མཆོག་གི་སྲས་ཡིན་ནོ་”ཞེས་བཤད།
MAR 3:12 ཡེ་ཤུས་དེ་ཚོ་ལ་ཁོང་མངོན་པར་མི་བྱེད་ཕྱིར་ནན་ཏན་གྱིས་བཀའ་གནང༌།
MAR 3:13 དེ་ནས་ཡེ་ཤུ་རིའི་སྟེང་ལ་ཕེབས་ཏེ་རང་གི་དགོངས་པ་ལྟར་ཚུར་ཤོག་ཅེས་བཀའ་གནང་ནས་ཁོ་རྣམས་ཁོང་གི་དྲུང་དུ་ཡོང༌།
MAR 3:14 ཁོ་ཚོ་ཁོང་དང་ཉེ་བར་གནས་པ་དང༌། ཁོང་གིས་ཁོ་ཚོ་ལ་ཆོས་ཤོད་པར་གཏོང་བ་དང་གདོན་འདྲེ་སྐྲོད་པའི་ཕྱིར་དབང་བསྐུར་ནས་དེ་རྣམས་ཉེ་གནས་བཅུ་གཉིས་ལ་བསྐོས་ཏེ་མིང་གཞན་སྐུ་ཚབ་ཅེས་ཀྱང་བཏགས།
MAR 3:16 ཁོང་གིས་བསྐོས་པའི་ཉེ་གནས་བཅུ་གཉིས་པོ་ནི་སི་མོན། ཁོང་གིས་མི་དེར་མིང་པེ་ཏྲོ་ཞེས་བཏགས་པ་དང༌།
MAR 3:17 ཟེ་བད་ཡཱ་ཞེས་པའི་བུ་ཡ་ཀོབ་དང༌། ཡ་ཀོབ་ཀྱི་གཅུང་པོ་ཡོ་ཧ་ནན། དེ་གཉིས་ཀྱི་མིང་ལ་བོ་ཨ་ནེར་གེ་ཞེས་བཏགས་ཏེ་འབྲུག་གི་བུ་ཞེས་པའི་དོན་ཡིན།
MAR 3:18 གཞན་ཡང་ཨན་དྲི་ཡཱ་དང༌། ཕི་ལིབ། པར་ཐོ་ལོ་མཱ། མད་ཐཱ། ཐོ་མཱ་དང༌། ཨལ་ཕཱ་ཞེས་པ་དེའི་བུ་ཡ་ཀོབ། ཐཱ་ཨད་དེ་ཨ་སི། རྒྱལ་གཅེས་པའི་ཕྱོགས་ཁག་གི་ཁོངས་མི་སི་མོན་དང༌།
MAR 3:19 རྗེས་སུ་ཡེ་ཤུ་ལ་རྒྱབ་གཏོད་བྱེད་མཁན་ཡུ་དཱ་དབྱི་སི་ཀར་རེ་བཅས་ཡིན་ནོ། །
MAR 3:20 དེ་ནས་ཡེ་ཤུ་དང་ཉེ་གནས་རྣམས་ཁང་པ་ཞིག་གི་ནང་དུ་ཕེབས་པ་ན། མི་ཚོགས་ཡང་བསྐྱར་འཛོམས་པས། ཁོང་རྣམས་ལ་ཐ་ན་ཞལ་ཟས་བཞེས་ལོང་ཡང་མ་བྱུང༌།
MAR 3:21 ཁོང་གི་གཉེན་ཉེ་རྣམས་ཀྱིས་གཏམ་དེ་ཐོས་ནས་ཁོང་སྨྱོས་སོ་ཞེས་བཤད་དེ་ཁོང་བཀག་པར་ཕྱིན།
MAR 3:22 ཡེ་རུ་ཤ་ལེམ་ནས་མར་ཡོང་བའི་ཆོས་ཁྲིམས་ལ་མཁས་པའི་མི་ཚོས་“ཁོང་ལ་པེ་ཨིལ་བཟི་པད་བདུད་ཞུགས་ཤིང་ཁོང་གིས་བདུད་ཀྱི་རྒྱལ་པོ་དེར་བརྟེན་ནས་གདོན་འདྲེ་སྐྲོད་”ཅེས་བཤད།
MAR 3:23 ཡེ་ཤུས་ཆོས་ཁྲིམས་ལ་མཁས་པའི་མི་དེ་ཚོ་རང་གི་དྲུང་དུ་བོས་ཏེ་དཔེའི་སྒོ་ནས་དེ་རྣམས་ལ་“བདུད་སཱ་ཏན་གྱིས་བདུད་རང་ཉིད་ཇི་ལྟར་སྐྲོད་སྲིད་དམ།
MAR 3:24 གལ་ཏེ་རྒྱལ་ཁབ་གཅིག་ལ་ནང་འཁྲུག་བྱུང་ན་རྒྱལ་ཁབ་དེ་བརྟན་པོར་གནས་མི་ཐུབ་པ་དང༌།
MAR 3:25 ཁྱིམ་ཚང་གཅིག་ལ་ནང་འཁྲུག་བྱུང་ན་ཁྱིམ་ཚང་དེའང་བརྟན་པོར་གནས་མི་ཐུབ་པ་ལྟར།
MAR 3:26 དེ་བཞིན་བདུད་སཱ་ཏན་གྱིས་རང་གིས་རང་ལ་རྒོལ་ན་བདུད་དེ་བརྟན་པོར་གནས་མི་ཐུབ་ཅིང་ཁོའི་དབང་མེད་པར་འགྱུར།
MAR 3:27 ཡང་སུས་ཀྱང་མི་སྟོབས་ཤུགས་ཆེན་པོ་ཞིག་གི་ཁང་པ་ལ་འཛུལ་ནས་དེའི་ཅ་ལག་འཕྲོག་མི་ཐུབ་སྟེ། སྔོན་ལ་མི་དེ་བཅིངས་ནས་ཁོ་ལ་ཅི་ཡོད་པ་དེ་འཕྲོག་ཐུབ།
MAR 3:28 ངས་ཁྱོད་ཚོ་ལ་བདེན་པར་ཟེར་རྒྱུར། དཀོན་མཆོག་གིས་མིའི་སྡིག་ཉེས་ཐམས་ཅད་དང་སྐུར་བ་འདེབས་པའི་སྡིག་པ་སེལ་ཐུབ་ནའང༌།
MAR 3:29 དཀོན་མཆོག་གི་དམ་པའི་ཐུགས་ཉིད་ལ་སྐུར་བ་འདེབས་མཁན་དེར་དུས་ནམ་ཡང་སྡིག་སེལ་མི་ཐོབ་པར་གཏན་དུ་སྡིག་པའི་ཆད་པ་འཁུར་དགོས་སོ་”ཞེས་གསུངས།
MAR 3:30 ཁོང་གིས་འདི་ལྟར་གསུངས་དོན་ནི་མི་དེ་རྣམས་ཀྱིས་ཁོང་ཉིད་གདོན་འདྲེ་མི་གཙང་བ་ཡིས་བཟུང་འདུག་ཅེས་བཤད་པའི་རྐྱེན་གྱིས་སོ། །
MAR 3:31 དེ་ནས་ཡེ་ཤུའི་མ་ཡུམ་དང་གཅུང་པོ་ཚོ་ཕེབས་ཏེ། ཕྱི་ལོགས་ལ་བཞེངས་ནས་མི་ཞིག་ཁོང་ཉིད་འབོད་དུ་བཏང༌།
MAR 3:32 མི་ཚོགས་མང་པོ་ཁོང་གི་མཐའ་བསྐོར་ལ་བསྡད་ཡོད་ཅིང༌། དེ་ཚོས་“གཟིགས་དང༌། ཁྱེད་ཀྱི་མ་ཡུམ་དང་སྐུ་མཆེད་ཚོས་ཕྱི་རོལ་ནས་ཁྱེད་རང་འཚོལ་བཞིན་འདུག་”ཅེས་ཞུས་པ་ལ།
MAR 3:33 ཁོང་གིས་མི་དེ་ཚོར་“ངའི་མ་དང་ངའི་སྤུན་ནི་སུ་ཡིན་ནམ་”ཞེས་གསུངས་ནས།
MAR 3:34 རང་གི་མཐའ་སྐོར་ལ་བསྡད་ཡོད་པའི་མིར་རིམ་གྱིས་གཟིགས་ནས་“ལྟོས་དང༌། ངའི་མ་དང་ངའི་སྤུན་ནི་མི་འདི་ཚོ་ཡིན།
MAR 3:35 གང་ལགས་ཟེར་ན། དཀོན་མཆོག་གི་དགོངས་པ་བཞིན་དུ་བྱེད་མཁན་ཐམས་ཅད་ནི་ངའི་སྤུན་དང་སྲིང་མོ། མ་ཡུམ་ཡིན་ནོ་”ཞེས་གསུངས་སོ། །
MAR 4:1 དེ་ནས་ཡང་ཡེ་ཤུས་ག་ལིལ་མཚོའི་འགྲམ་དུ་མི་དེ་ཚོ་ལ་ཆོས་བསྟན་ཏེ། མི་མང་པོ་གནས་དེར་འཛོམས་པས་ཁོང་གྲུ་ཞིག་གི་ནང་དུ་བཞུགས་པ་དང༌། མི་ཚོགས་ཚང་མ་མཚོ་འགྲམ་ལ་བསྡད།
MAR 4:2 ཁོང་གིས་དཔེའི་སྒོ་ནས་ཆོས་མང་པོ་གསུངས་པ་སྟེ་
MAR 4:3 “ད་ཉོན་ཅིག སྔོན་ས་བོན་འདེབས་མཁན་ཞིག་ས་བོན་འདེབས་པར་ཕྱིན།
MAR 4:4 ས་བོན་གཏོར་བའི་སྐབས་སུ། ས་བོན་ཁ་ཤས་ལམ་ཁར་འཐོར་བ་བྱ་ཚོ་འོངས་ནས་བཟས་པ་དང༌།
MAR 4:5 ཁ་ཤས་ནི་ས་མང་པོ་མེད་པའི་བྲག་གི་སྟེང་ལ་འཐོར་ཞིང་སའི་གཏིང་རིང་པོ་མེད་པས་ཡར་སྐྱེས་པ་མགྱོགས་ཀྱང༌།
MAR 4:6 ཉི་མ་ཤར་ནས་ཚིག་སྟེ་རྩ་བ་གཏིང་རིང་པོ་མེད་པས་བསྐམས།
MAR 4:7 ས་བོན་ཁ་ཤས་ཚེར་མའི་ནང་དུ་འཐོར་ཞིང་ཚེར་མ་སྐྱེས་ཏེ་སྒྲིབ་ནས་འབྲས་བུ་མ་སྨིན།
MAR 4:8 ཡང་ས་བོན་ཁ་ཤས་ས་རྒྱུ་བཟང་པོའི་ནང་དུ་ཟགས་ནས་ཆེར་སྐྱེས་ཤིང་འབྲས་བུ་སྨིན་ཏེ། འབྲས་བུ་ཁ་ཤས་ལྡབ་སུམ་ཅུ་དང་ཁ་ཤས་ལྡབ་དྲུག་ཅུ། ཁ་ཤས་ལྡབ་བརྒྱ་བཅས་སྨིན་ནོ་”ཞེས་དང༌།
MAR 4:9 མཇུག་ཏུ་ཁོང་གིས་“རྣ་བ་ཡོད་པ་རྣམས་ཀྱིས་ཉོན་ཅིག་”ཅེས་གསུངས།
MAR 4:10 ཡེ་ཤུ་གཅིག་པུར་བཞུགས་དུས་ཁོང་གི་ཉེ་གནས་བཅུ་གཉིས་པོ་དང་རྗེས་འབྲང་བ་རྣམས་ཀྱིས་ཁོང་ལ་དཔེའི་ནང་དོན་ཅི་ཡིན་པ་དྲིས་པའི་སྐབས།
MAR 4:11 ཁོང་གིས་“དཀོན་མཆོག་གི་རྒྱལ་སྲིད་ཀྱི་གསང་བ་དེ་ཁྱེད་ཚོ་ལ་བསྟན་པ་ཡིན། འོན་ཀྱང་ཕྱི་ཕྱོགས་ཀྱི་མི་རྣམས་ལ་ཐམས་ཅད་དཔེའི་སྒོ་ནས་བསྟན།
MAR 4:12 མདོ་ལས། དེ་ཚོས་སེམས་མི་འགྱུར་ཞིང༌། ། སྡིག་ཉེས་མི་སེལ་བའི་ཕྱིར། ། ལྟ་བར་བྱེད་ཀྱང་མི་མཐོང༌། ། ཐོས་པར་བྱེད་ཀྱང་མི་རྟོགས། །” ཞེས་གསུངས།
MAR 4:13 ཡང་ཁོང་གིས་“ཁྱེད་ཚོས་དཔེ་འདིའི་དོན་ཧ་མི་གོའམ། འོ་ན་དཔེ་ཐམས་ཅད་ཀྱི་དོན་ཇི་ལྟར་ཤེས་ཐུབ།
MAR 4:14 དེ་ནི་ཞིང་འདེབས་མཁན་གྱིས་ས་བོན་བཏབ་པ་ནི་དཀོན་མཆོག་གི་བཀའ་དང་འདྲ་བ་ཡིན་ཏེ།
MAR 4:15 ལམ་ཁར་འཐོར་བ་ནི་མི་ལ་ལས་དཀོན་མཆོག་གི་བཀའ་དེ་ཐོས་མ་ཐག་བདུད་སཱ་ཏན་ཡོང་ནས་དེའི་སེམས་ནང་གི་བཀའ་ཕྲོགས་ནས་ཁྱེར་སོང་བ་དང་འདྲ་བ་ཡིན།
MAR 4:16 དེ་བཞིན་དུ་བྲག་ཡོད་པའི་ས་ལ་འཐོར་བ་ནི་ཡང་མི་ལ་ལས་དཀོན་མཆོག་གི་བཀའ་དེ་ཐོས་མ་ཐག་སེམས་དགའ་བའི་ངང་ནས་བླངས་ན་ཡང༌།
MAR 4:17 རང་གི་སེམས་ནང་ལ་རྩ་བ་གཏིང་རིང་པོ་ཚུགས་མེད་པས། དུས་ཐུང་ངུ་ལ་གནས་ཀྱང་བཀའ་དེའི་དོན་དུ་སྡུག་བསྔལ་དང་གནོད་འཚེ་འབྱུང་སྐབས་དད་པ་ཉམས་པར་གྱུར་བ་དང་འདྲ།
MAR 4:18 ཡང་ཚེར་མའི་ནང་དུ་འཐོར་བ་ནི་མི་ལ་ལས་དཀོན་མཆོག་གི་བཀའ་དེ་ཐོས་རྗེས།
MAR 4:19 འཚོ་བའི་སེམས་ཁྲལ་དང་རྒྱུ་ནོར་གྱི་བསླུ་བྲིད། འདོད་པ་སྣ་ཚོགས་ཀྱིས་བཀའ་མནན་ནས་འབྲས་བུ་སྨིན་མ་ཐུབ་པ་དང་འདྲ་བ་ཡིན།
MAR 4:20 ས་རྒྱུ་བཟང་པོ་ལ་འཐོར་བ་ནི་ཡང་མི་ལ་ལས་དཀོན་མཆོག་གི་བཀའ་དེ་ཐོས་ནས་དད་པའི་ངང་ཉམས་སུ་བླངས་ཏེ་འབྲས་བུ་སྨིན་ཐུབ་པ་རྣམས་ཡིན་ཏེ། འབྲས་བུ་ཁ་ཤས་ལྡབ་སུམ་ཅུ་དང༌། ཁ་ཤས་ལྡབ་དྲུག་ཅུ། ཁ་ཤས་ལྡབ་བརྒྱ་བཅས་སྨིན་པ་ལྟར་ཡིན་ནོ་”ཞེས་གསུངས།
MAR 4:21 ཡང་ཡེ་ཤུས་“མིས་མར་མེ་ཞིག་བྲེ་ཡང་ན་ཉལ་ཁྲིའི་འོག་ཏུ་འཇོག་པ་ཡིན་ནམ། དེ་ནི་སྟེགས་བུའི་སྟེང་དུ་འཇོག་པའི་ཕྱིར་མ་ཡིན་ནམ།
MAR 4:22 གང་ལགས་ཟེར་ན། སྦས་པའི་དོན་རྣམས་མི་མངོན་པ་ཅི་ཡང་མེད་ལ། གསང་བའི་དོན་ཐམས་ཅད་ཀྱང་མི་མངོན་པ་ཅི་ཡང་མེད་དོ།
MAR 4:23 རྣ་བ་ཡོད་པ་རྣམས་ཀྱིས་ཉོན་ཅིག་”ཅེས་གསུངས།
MAR 4:24 ཡང་ཁོང་གིས་“ཁྱེད་ཚོས་གང་ཐོས་པ་དེ་ལ་གཟབ་ནན་གྱིས་ཤིག ཁྱེད་ཚོས་སྣོད་ཚད་ཅི་ལྟ་བུ་ལས་མི་གཞན་ལ་བཅལ་ན། ཁྱེད་ཚོར་ཡང་དེ་འདྲ་ཞིག་སྟེར་བར་མ་ཟད་དེ་ལས་ལྷག་པ་ཞིག་ཀྱང་སྟེར་བར་འགྱུར།
MAR 4:25 མི་སུ་ཞིག་ལ་ཡོད་པ་དེ་ལ་དེ་བས་མང་བ་སྟེར་བར་འགྱུར། མེད་པ་དེ་ལ་གང་ཡོད་པ་དེ་ཡང་ལེན་པར་འགྱུར་རོ་”ཞེས་གསུངས།
MAR 4:26 ཡང་ཁོང་གིས་“དཀོན་མཆོག་གི་རྒྱལ་སྲིད་འདི་ནི། མི་ཞིག་གིས་ཞིང་ལ་ས་བོན་གཏོར་བ་དང་འདྲ་སྟེ།
MAR 4:27 མི་འདི་མཚན་མོར་གཉིད་ཉལ་ཞིང་ཉིན་མོར་ཡར་ལངས། ཁོས་གང་ཡིན་མི་ཤེས་པར་ས་བོན་རིམ་བཞིན་སྐྱེས་ནས་མྱུ་གུ་འབུས།
MAR 4:28 ས་གཞི་ཡིས་རང་བཞིན་གྱིས་འབྲས་བུ་སྐྱེད་དེ། ཐོག་མར་མྱུ་གུ་འབུས་པ་དང་དེ་ནས་སྙེ་མ་ཐོགས་པ། མཇུག་མཐར་སྙེ་མ་ལས་འབྲུ་རྡོག་སྨིན།
MAR 4:29 འབྲུ་རིགས་སྨིན་ནས་ཞིང་བརྔ་རན་པས་ས་བོན་འདེབས་མཁན་གྱིས་ཟོར་བས་འབྲེག་པའོ་”ཞེས་གསུངས།
MAR 4:30 ཡང་ཁོང་གིས་“དཀོན་མཆོག་གི་རྒྱལ་སྲིད་ལ་གང་ཞིག་གིས་བསྡུར་ཐུབ་བམ། དཔེ་གང་ཞིག་གིས་མཚོན་ཐུབ་བམ་ཞེ་ན།
MAR 4:31 དེ་ནི་ཡུངས་འབྲུ་རྡོག་པོ་གཅིག་དང་འདྲ་སྟེ། ས་ལ་འདེབས་པའི་ས་བོན་གཞན་ཐམས་ཅད་ལས་ཆུང་ཡང༌།
MAR 4:32 བཏབ་པའི་རྗེས་སུ་ཆེར་སྐྱེས་ནས་སྔོ་ཚོད་གཞན་རྣམས་ལས་ཆེ་བར་འགྱུར་ཞིང་དེར་ཡལ་ག་ཆེན་པོ་ཆགས་ཏེ་བྱའང་དེའི་གྲིབ་མའི་འོག་ཏུ་གནས་ཐུབ་”ཅེས་གསུངས།
MAR 4:33 ཡེ་ཤུས་འདི་ལྟ་བུའི་དཔེ་མང་པོ་བཀོད་དེ། མི་རྣམས་ཀྱིས་དོན་དེ་ཇི་ཙམ་ཧ་གོ་ཐུབ་པ་དེ་བཞིན་དུ་དཀོན་མཆོག་གི་བཀའ་གསུངས།
MAR 4:34 ཁོང་གིས་དཔེ་མ་བཀོད་པར་དེ་རྣམས་ལ་ཅི་ཡང་མ་གསུངས་ཤིང༌། མི་གཞན་མེད་པའི་དུས་སུ་དཔེ་ཐམས་ཅད་ཀྱི་གོ་དོན་ཉེ་གནས་ཚོར་གསལ་བཤད་གནང་ངོ༌། །
MAR 4:35 དེ་ནས་ཉིན་དེའི་དགོང་མོར་ཡེ་ཤུས་ཉེ་གནས་ཚོར་“ང་ཚོ་མཚོའི་ཕ་རོལ་ལ་འགྲོའོ་”ཞེས་གསུངས།
MAR 4:36 ཉེ་གནས་ཚོ་མི་ཚོགས་དང་ཁ་བྲལ་ཏེ་ཡེ་ཤུ་བཞུགས་སའི་གྲུའི་ནང་འཛུལ་ནས་ཁོང་དང་མཉམ་དུ་ཕྱིན་པ་རེད། ཁོང་ཚོ་དང་མཉམ་དུ་གྲུ་གཞན་ཡང་ཡོད།
MAR 4:37 དེའི་སྐབས་རླུང་འཚུབ་ཆེན་པོ་ལངས་ཏེ་རྦ་རླབས་གྲུའི་ནང་འཛུལ་ནས་གྲུ་ཆུས་ཁེངས་གྲབས་བྱས།
MAR 4:38 དེ་དུས་ཡེ་ཤུ་གྲུའི་མཇུག་ཏུ་སྔས་འབོལ་གྱི་སྟེང་ལ་གཟིམས་ཡོད་པས་ཉེ་གནས་ཚོས་ཁོང་མནལ་སད་དེ་“སྟོན་པ་ལགས། ང་ཚོ་འཆི་བ་ལ་ཐུག་པར་ཁྱེད་ཀྱིས་ཐུགས་སྣང་མི་མཛད་དམ་”ཞེས་ཞུས།
MAR 4:39 ཁོང་མནལ་སད་དེ་ཡར་བཞེངས་ནས། རླུང་ལ་བཀའ་བཀྱོན་མཛད་ཅིང་རྦ་རླབས་ལ་“ཞི་བར་གྱུར་ལ་ཁ་རོག་སྡོད་ཅིག་”ཅེས་བཀའ་གནང་བས། རླུང་འཇགས་ནས་མཚོ་ཡོངས་སུ་ཞི་བར་གྱུར།
MAR 4:40 དེ་ནས་ཁོང་གིས་ཉེ་གནས་ཚོར་“ཁྱོད་ཚོ་ཞེད་དགོས་དོན་གང་ཡིན། ཁྱོད་རང་ཚོ་ད་དུང་ཡིད་ཆེས་མེད་དམ་”ཞེས་གསུངས།
MAR 4:41 ཁོ་ཚོ་ཤིན་ཏུ་འཇིགས་ནས་གཅིག་གིས་གཅིག་ལ་“འདི་སུ་ཡིན་ནམ། རླུང་དང་རྦ་རླབས་ཀྱིས་ཀྱང་ཁོང་གི་བཀའ་ལ་ཉན་པར་བྱེད་”ཅེས་ཟེར་རོ། །
MAR 5:1 དེ་ནས་ཁོང་རྣམས་ག་ལིལ་མཚོའི་ཕ་རོལ་གྱི་གེ་ར་སཱ་བྱ་བའི་ཡུལ་དུ་ཕེབས་ནས།
MAR 5:2 ཡེ་ཤུ་གྲུ་ལས་བབས་མ་ཐག་དུར་ཁང་གི་ཁྲོད་ནས་གདོན་འདྲེ་མི་གཙང་བ་ཡིས་བཟུང་བའི་མི་ཞིག་ཁོང་དང་མཇལ་བ་དང༌།
MAR 5:3 མི་དེ་རྒྱུན་དུ་དུར་ཁང་གི་ཁྲོད་དུ་སྡོད་ཅིང་མི་སུས་ཀྱང་ཁོ་བཟུང་ནས་ལྕགས་ཐག་གིས་ཀྱང་འཆིང་བར་མ་ཐུབ།
MAR 5:4 མི་རྣམས་ཀྱིས་ཐེངས་མང་པོར་ལྕགས་ཐག་དང་རྐང་སྒྲོག་གིས་ཁོ་རང་བཅིངས་མྱོང་ནའང༌། ཁོས་ལྕགས་ཐག་དང་རྐང་སྒྲོག་དེ་ཚོ་དུམ་བུར་བཅད་པས་མི་སུས་ཀྱང་ཁོ་འདུལ་བར་མ་ཐུབ།
MAR 5:5 ཁོས་ཉིན་མཚན་མེད་པར་དུར་ཁང་རྣམས་དང་རིའི་ཁྲོད་ལ་སྐད་ངན་བརྒྱབ་ཅིང་རྡོ་ཡིས་རང་ལུས་རྨས་པར་བྱེད།
MAR 5:6 ཁོས་རྒྱང་རིང་ནས་ཡེ་ཤུ་མཐོང་སྟེ་རྒྱུགས་འོངས་ནས་ཁོང་ལ་ཕྱག་འཚལ་བ་དང༌།
MAR 5:7 ཡེ་ཤུས་ཁོ་ལ་“གདོན་འདྲེ་མི་གཙང་བ་ཁྱོད་མི་འདི་ལས་ཕྱིར་བུད་ཅིག་”ཅེས་བཀའ་གནང་བས། ཁོས་སྐད་ཆེན་པོས་“ཀྱེ། བླ་ན་མེད་པའི་དཀོན་མཆོག་གི་སྲས་ཡེ་ཤུ་ལགས། ང་ཁྱེད་དང་འབྲེལ་བ་ཅི་ཡོད། ངས་དཀོན་མཆོག་གི་མདུན་དུ་ཁྱེད་ལ་ཞུ། ང་ལ་མནར་གཅོད་གཏོང་བ་མ་གནང་”ཞེས་ཞུས།
MAR 5:9 ཁོང་གིས་མི་དེར་“ཁྱོད་ཀྱི་མིང་ལ་ཅི་ཟེར་”ཞེས་དྲིས་ཤིང༌། མི་དེས་“ང་ཚོ་གྲངས་ཀ་མང་བའི་རྐྱེན་གྱིས་མིང་ལ་དཔུང་ཚོགས་ཟེར་”ཞེས་ཞུས་ཤིང༌།
MAR 5:10 “ང་ཚོ་གནས་འདི་ནས་ཡུལ་གཞན་ལ་མ་སྐྲོད་རོགས་”ཞེས་ཁོང་ལ་ཞུ་བ་ཡང་ཡང་ཕུལ།
MAR 5:11 དེའི་ཚེ་རིའི་ལོགས་སུ་ཕག་ཁྱུ་ཆེན་པོ་ཞིག་འཚོ་བཞིན་ཡོད་པ་དང༌།
MAR 5:12 གདོན་འདྲེ་མི་གཙང་བ་དེ་ཚོས་ཡེ་ཤུ་ལ་“ང་ཚོ་ཕག་པ་ལ་འཛུལ་བའི་ཕྱིར་ཕག་ཁྱུའི་ཁྲོད་ལ་གཏོང་བར་མཛོད་”ཅེས་ཞུ་བ་ཕུལ་བ་ལ།
MAR 5:13 ཁོང་གིས་དེ་ཚོ་ལ་དགོངས་པ་གནང་སྟེ། གདོན་འདྲེ་མི་གཙང་བ་དེ་ཚོ་མི་དེ་ནས་ཕྱིར་ཐོན་ཏེ་ཕག་པའི་ནང་དུ་ཞུགས་ཤིང༌། ཕག་པ་ཉིས་སྟོང་ཙམ་ཡོད་པ་ཚོ་གཡང་གཟར་དུ་མཆོངས་ཤིང་མཚོའི་ནང་དུ་ནུབ་ནས་ཤིའོ།
MAR 5:14 དེ་ནས་ཕག་རྫི་བྲོས་ཏེ་གྲོང་ཁྱེར་དང་སྡེ་པའི་མི་རྣམས་ལ་གནས་ཚུལ་དེ་བཤད་པས། མི་རྣམས་ཅི་བྱུང་བར་ལྟ་རུ་ཡོང༌།
MAR 5:15 ཁོ་ཚོ་ཡེ་ཤུའི་དྲུང་དུ་སླེབས་དུས། དེ་སྔོན་དཔུང་ཚོགས་ཞེས་པའི་གདོན་འདྲེས་བཟུང་བའི་མི་དེ་དྲན་པ་གསོས་ཤིང་གོས་གྱོན་ནས་བསྡད་ཡོད་པ་མཐོང་སྟེ་འཇིགས་སྣང་སྐྱེས།
MAR 5:16 ཡང་གནས་ཚུལ་འདི་མཐོང་བའི་མི་རྣམས་ཀྱིས་གདོན་འདྲེས་བཟུང་བའི་མི་དང་ཕག་ཁྱུ་ལ་བྱུང་བའི་ལོ་རྒྱུས་དེ་མི་ཚོགས་གཞན་ལ་བཤད་པ་དང༌།
MAR 5:17 མི་དེ་ཚོས་ཡེ་ཤུར་ས་ཆ་གཞན་ལ་ཕེབས་པར་ཞུ་ཞེས་ཞུ་བ་ཡང་ཡང་ཕུལ།
MAR 5:18 དེ་ནས་ཡེ་ཤུ་གྲུའི་ནང་དུ་བཞུགས་པའི་དུས་སུ། དེ་སྔོན་གདོན་འདྲེས་བཟུང་བའི་མི་དེས་ཁོང་ལ་“ང་ཡང་ཁྱེད་དང་མཉམ་དུ་ཡོང་གི་ཡིན་”ཞེས་ཞུ་བ་ཞུས་ཀྱང༌།
MAR 5:19 ཁོང་གིས་ཁས་མ་བླངས་པར་མི་དེ་ལ་“ཁྱེད་རང་གི་ནང་ལ་སོང་དང༌། ཁྱེད་ཀྱི་དོན་དུ་དཀོན་མཆོག་གིས་ཅི་ལྟར་ལས་ཆེན་པོ་ཞིག་བསྒྲུབས་པ་དང་ཇི་ལྟར་སྙིང་རྗེ་གནང་བ་དེ་ཚོ་གཉེན་ཉེ་རྣམས་ལ་ཤོད་ཅིག་”ཅེས་བཀའ་གནང༌།
MAR 5:20 དེ་ནས་མི་དེ་དེ་ཁ་པོ་ལེ་ཞེས་བྱ་བའི་ཡུལ་ལ་སོང་ནས་ཡེ་ཤུས་ཁོ་རང་གི་དོན་དུ་ཅི་མཛད་པ་རྣམས་མི་ཀུན་ལ་བསྒྲགས་ཤིང༌། མི་ཐམས་ཅད་ངོ་མཚར་བར་གྱུར།
MAR 5:21 དེ་ནས་ཡེ་ཤུ་གྲུའི་ནང་ལ་བཞུགས་ཏེ་ཡང་བསྐྱར་མཚོའི་ཕར་ཕྱོགས་སུ་ཕེབས་པ་དང་མི་ཚོགས་མང་པོ་ཁོང་གི་དྲུང་དུ་འདུས། ཁོང་མཚོའི་འགྲམ་དུ་བཞུགས་པ་རེད།
MAR 5:22 སྐབས་དེར་ས་ཆ་དེ་ལ་ཡ་ཧུ་དཱ་པའི་འདུ་ཁང་ཞིག་ཡོད་པ་དེའི་དཔོན་པོའི་མིང་ལ་ཡ་ཨིར་ཟེར་བ་ཞིག་འོངས་ནས། ཡེ་ཤུ་མཇལ་བ་དང་ཁོང་གི་ཞབས་ལ་གཏུག་སྟེ། ཞུ་བ་ཆེན་པོ་ཕུལ་ནས་
MAR 5:23 “ངའི་བུ་མོ་ཆུང་ཆུང་དེ་ཤི་གྲབས་འདུག ཁྱེད་རང་ངའི་ནང་ལ་ཕེབས་ནས་ཁོ་མོ་ནད་ལས་ཐར་ཏེ་གསོན་པའི་ཕྱིར། ཁྱེད་ཀྱིས་ཁོ་མོའི་ལུས་སྟེང་ལ་ཕྱག་འཇོག་པར་མཛོད་དང་”ཞེས་ཞུས་པས།
MAR 5:24 ཡེ་ཤུ་ཁོང་དང་མཉམ་དུ་ཕེབས་པ་དང༌། མི་མང་པོ་ཁོང་གི་རྗེས་སུ་འབྲངས་ནས་འཚང་ཁ་བརྒྱབ།
MAR 5:25 དེའི་ཚེ་བུད་མེད་གཅིག་ལོ་བཅུ་གཉིས་ཀྱི་བར་དུ་ལུས་ནས་ཁྲག་འཛིར་བའི་ནད་ཕོག་པ་ཞིག་ཡོད་དེ།
MAR 5:26 སྨན་པ་མང་པོས་སྨན་བཅོས་བྱས་ནས་སྡུག་བསྔལ་མང་པོ་མྱོང་ཡོད། ཁོ་མོ་ལ་ཡོད་པའི་རྒྱུ་ནོར་ཐམས་ཅད་ཟད་ཀྱང་ཕན་འབྲས་ཅི་ཡང་མེད་པ་མ་ཟད་ནད་དེ་སྡུག་རུ་སོང་བས།
MAR 5:27 ཁོ་མོས་ཡེ་ཤུའི་སྐོར་ཐོས་ཏེ། གལ་སྲིད་ངས་ཁོང་གི་ན་བཟའ་གཅིག་པུ་ལ་རེག་ན་ང་ནད་ལས་ཐར་འོང་བསམས་ནས་མི་ཚོགས་ཀྱི་དཀྱིལ་ནས་ཁོང་གི་རྒྱབ་ཏུ་ཡོང་ཞིང་ཁོང་གི་ན་བཟའ་ལ་རེག་པས།
MAR 5:29 དེ་མ་ཐག་ཏུ་ཁོ་མོའི་ཁྲག་འཛིར་བ་ཆད་དེ་རང་གི་ལུས་ནད་དེ་ལས་ཐར་བར་གྱུར་བ་ཤེས་སོ།
MAR 5:30 ཡེ་ཤུས་དེ་མ་ཐག་རང་གི་སྐུ་གཟུགས་ནས་ནུས་མཐུ་ཞིག་ཕྱིར་ཐོན་པ་ཐུགས་ལ་མཁྱེན་ཏེ། མི་ཚོགས་ཀྱི་དཀྱིལ་ནས་སྐུ་ཕྱིར་འཁོར་ཏེ་“སུས་ངའི་གོས་ལ་རེག་པ་ཡིན་ནམ་”ཞེས་གསུངས་ཤིང༌།
MAR 5:31 ཁོང་གི་ཉེ་གནས་ཚོས་ཁོང་ལ་“མི་ཚོགས་ཀྱིས་ཁྱེད་བཙིར་ཞིང་མཐའ་བསྐོར་བ་གཟིགས་བཞིན་དུ། ད་དུང་ང་ལ་སུས་རེག་པ་ཡིན་ཞེས་གསུངས་སམ་”ཞེས་བཤད།
MAR 5:32 འོན་ཀྱང་ཁོང་གིས་སུས་དེ་ལྟར་བྱས་པ་གཟིགས་པའི་ཕྱིར་ཕྱོགས་ཀུན་ཏུ་གཟིགས།
MAR 5:33 དེ་ནས་བུད་མེད་དེས་རང་གི་ལུས་ལ་ཅི་ལྟར་བྱུང་བ་ཤེས་པས། འཇིགས་ནས་འདར་ཞིང་ཁོང་གི་སྐུ་དྲུང་དུ་པུས་མོ་སར་བཙུགས་ནས་གནས་ཚུལ་ཐམས་ཅད་དྲང་པོར་ཁོང་ལ་ཞུས།
MAR 5:34 ཡེ་ཤུས་ཁོ་མོ་ལ་“བུ་མོ། ཁྱོད་ཀྱི་དད་པས་ཁྱོད་རང་ནད་ལས་ཐར་བ་ཡིན་པས། བདེ་བའི་ངང་ནས་སོང་དང་ཁྱོད་རང་ནད་འདི་དང་བྲལ་ཏེ་གནས་པར་གྱུར་ཅིག་”ཅེས་གསུངས།
MAR 5:35 ཁོང་གིས་དེ་ལྟར་གསུང་བཞིན་པའི་སྐབས་སུ། ཡ་ཧུ་དཱ་པའི་འདུ་ཁང་གི་དཔོན་པོའི་ཁྱིམ་ནས་མི་འགའ་ཤས་ཡོང་སྟེ། དེར་“ཁྱེད་རང་གི་བུ་མོ་ཤི་ཚར་སོང་བས་སྟོན་པ་ལ་འོ་བརྒྱལ་ཞུས་བྱས་ག་རེ་བྱེད་”ཅེས་ཟེར།
MAR 5:36 ཡེ་ཤུས་ཁོ་ཚོའི་སྐད་ཆར་ཁ་ཡ་མ་གནང་བར་དཔོན་པོ་ལ་“ཞེད་སྣང་མ་བྱེད། དད་པ་རང་གྱིས་ཤིག་”ཅེས་གསུངས།
MAR 5:37 དེ་ནས་ཁོང་གིས་པེ་ཏྲོ་དང་ཡ་ཀོབ། ཡ་ཀོབ་ཀྱི་སྤུན་ཡོ་ཧ་ནན་མ་གཏོགས་གཞན་སུ་ཡང་ཁོང་དང་མཉམ་དུ་ཡོང་མ་བཅུག
MAR 5:38 ཁོང་ཚོ་དཔོན་པོའི་ནང་ལ་ཕེབས་སྐབས། མི་མང་པོ་ཅ་ཅོ་དང་ངུ་ཞིང་སྨྲེ་སྔགས་འདོན་པ་གཟིགས་ནས།
MAR 5:39 ཡེ་ཤུ་ནང་དུ་འཛུལ་ཏེ་ཁོ་ཚོར་གསུངས་པར་“ཁྱོད་ཚོ་ཅ་ཅོ་དང་ངུ་བའི་དོན་གང་ཡིན། བུ་མོ་འདི་ཤི་མེད་པར་གཉིད་ཁུག་འདུག་”ཅེས་གསུངས་པས།
MAR 5:40 མི་དེ་ཚོས་ཁོང་ལ་ཁྲེལ་དགོད་བྱས། ཡེ་ཤུས་ཁོ་ཚོ་ཕྱིར་བཏོན་ནས་བུ་མོའི་ཕ་མ་གཉིས་དང་ཉེ་གནས་རྣམས་མཉམ་དུ་བུ་མོའི་སར་ཕེབས་ནས།
MAR 5:41 བུ་མོའི་ལག་པ་ནས་འཇུས་ཏེ་“ཏ་ལི་ཐཱ་ཀུ་མི་”ཞེས་པའི་དོན་ནི་བུ་མོ་ཆུང་ཆུང་ལོངས་ཤིག་ཅེས་བཀའ་གནང་བས།
MAR 5:42 བུ་མོ་དེ་ལམ་སེང་ཡར་ལངས་ནས་གོམ་པ་བརྒྱབ། (བུ་མོ་དེ་ལོ་བཅུ་གཉིས་ཡིན་) འདིས་མི་ཚང་མ་ཡ་མཚན་ཆེན་པོ་སྐྱེས་པ་རེད།
MAR 5:43 ཡེ་ཤུས་མི་རྣམས་ལ་བཀའ་ནན་པོས་འདི་མི་གཞན་སུ་ལ་ཡང་མ་ཤོད་ཅེས་བསྐུལ་བ་དང་བུ་མོ་ལ་ཟས་སྟེར་དགོས་ཞེས་བཀའ་གནང་ངོ༌། །
MAR 6:1 ཡེ་ཤུ་ས་ཆ་དེ་ནས་ཐོན་ཏེ་ཕ་ཡུལ་དུ་ཕེབས་པ་དང་ཉེ་གནས་རྣམས་ཀྱང་ཁོང་གི་རྗེས་སུ་འབྲངས།
MAR 6:2 ངལ་གསོ་བའི་ཉིན་ལ་ཡེ་ཤུས་ཡ་ཧུ་དཱ་པའི་འདུ་ཁང་ནང་ལ་ཆོས་གསུངས་ཤིང༌། ཉན་མཁན་རྣམས་ཀྱིས་གཏམ་དེ་ཐོས་ནས་ཧ་ལས་ཏེ་“མི་འདི་ལ་འདི་ལྟ་བུའི་དོན་རྣམས་གང་ནས་བྱུང་བ་ཡིན། ཁོ་ལ་གནང་བའི་ཤེས་རབ་དང་ཁོས་ཅི་བྱེད་པ་དེ་ནི་ངོ་མཚར་ཅན་འདི་འདྲ་གང་ཞིག་ཡིན་ནམ།
MAR 6:3 མི་འདི་ནི་ཤིང་བཟོ་བ་དེ་མ་རེད་དམ། ཁོ་རང་ནི་མིར་ཡམ་གྱི་བུ་ཡིན་ཏེ། ཡ་ཀོབ་དང༌། ཡོ་སེ། ཡུ་དཱ། སི་མོན་བཅས་ཀྱི་གཅེན་པོ་མ་ཡིན་ནམ། ཁོའི་སྲིང་མོ་རྣམས་ཀྱང་ཡུལ་འདིར་ང་ཚོ་དང་མཉམ་དུ་བསྡད་ཡོད་པ་མ་ཡིན་ནམ་”ཞེས་ཟེར་ཞིང་མི་དེ་རྣམས་ཕོག་ཐུག་བྱུང༌།
MAR 6:4 ཡེ་ཤུས་མི་དེ་རྣམས་ལ་“ལུང་སྟོན་པ་ལ་རང་ཡུལ་གྱི་མི་དང་གཉེན་ཉེ། རང་ཁྱིམ་ལ་མ་གཏོགས་མི་གཞན་གྱིས་གུས་པར་བྱེད་དོ་”ཞེས་གསུངས།
MAR 6:5 ཁོང་གིས་ས་ཆ་དེར་ནད་པ་ཁ་ཤས་ལ་ཕྱག་བཞག་ནས་ནད་སེལ་བར་མཛད་པ་མ་གཏོགས། ངོ་མཚར་གྱི་མཛད་པ་གཞན་མཛད་མ་ཐུབ།
MAR 6:6 མི་དེ་རྣམས་ལ་དད་པ་མེད་པས་ཁོང་ཡང་ཡ་མཚན་སྐྱེས་ཤིང་མཐའ་འཁོར་གྱི་ཡུལ་སྡེ་ལ་ཆོས་གསུང་བར་ཕེབས་སོ། །
MAR 6:7 ཡེ་ཤུས་ཉེ་གནས་བཅུ་གཉིས་པོ་རང་གི་དྲུང་དུ་བོས་ཏེ། ཁོ་ཚོར་གདོན་འདྲེ་མི་གཙང་བ་འདུལ་བའི་དབང་གནང་བ་དང་མི་གཉིས་གཉིས་ཕྱི་རུ་མངགས་ནས་
MAR 6:8 “ཁྱེད་ཚོ་ལམ་ལ་དབྱུག་པ་གཅིག་པུ་མ་གཏོགས་པར་གཞན་ཅི་ཡང་མ་ཁྱེར། ལམ་རྒྱགས་དང༌། ཁུག་མ། ད་དུང་སྐེ་རགས་ནང་ལའང་དངུལ་ཅི་ཡང་མ་ཁྱེར་ཞིག
MAR 6:9 རྐང་པ་ལ་ལྷམ་གྱོན། གོས་གཉིས་བརྩེགས་མ་གྱོན་”ཅེས་བཀའ་གནང་བ་དང༌།
MAR 6:10 ཡང་ཁོང་གིས་ཁོ་ཚོར་“ཁྱེད་ཚོ་གྲོང་ཚོ་གང་དུ་སླེབས་ནའང་མི་ཁྱིམ་ཞིག་ལ་བསྡད་ནས་ས་ཆ་དེ་ནས་ཁ་མ་བྲལ་བར་དུ་དེ་རུ་སྡོད་དང༌།
MAR 6:11 ཡུལ་གང་གི་མིས་ཁྱེད་ཚོར་གནས་ཚང་མི་གཏོང་ཞིང་ཁྱོད་ཚོས་ཆོས་བསྒྲགས་པ་ལའང་མི་ཉན་ན། ཁྱེད་ཚོ་ས་ཆ་དེ་ནས་ཐོན་པའི་སྐབས་སུ། ཁོ་རྣམས་ལ་དོན་དེར་འགན་ཁུར་དགོས་པར་བདེན་དཔང་བྱེད་པའི་ཆེད་དུ་རྐང་པའི་ཐོག་གི་ས་རྡུལ་སྤྲུགས་ཤིག་”ཅེས་གསུངས།
MAR 6:12 ཉེ་གནས་ཚོས་ཕྱི་རོལ་ཏུ་སོང་ནས་མི་ཚོར་སྤྱོད་པ་ངན་པ་སྤངས་ཏེ་སེམས་བསྒྱུར་བའི་ཆོས་བསྒྲགས་ཤིང༌།
MAR 6:13 གདོན་འདྲེ་མང་པོའང་ཕྱིར་བསྐྲད་པ་དང་ནད་པ་མང་པོར་སྣུམ་བྱུགས་ཏེ་ནད་ལས་ཐར་དུ་བཅུག
MAR 6:14 དེའི་ཚེ་ཡེ་ཤུའི་མཚན་སྙན་ཡུལ་ཐམས་ཅད་ལ་ཁྱབ་པས། རྒྱལ་པོ་ཧེ་རོ་དཱེས་ཀྱང་གཏམ་དེ་ཐོས། མི་གཞན་གྱིས་“ཁོང་ནི་ཁྲུས་གསོལ་མཁན་ཡོ་ཧ་ནན་གཤིན་པོ་ནས་གསོན་པོར་ལངས་སུ་གྱུར་བས། ཁོང་ལ་ནུས་མཐུ་འདི་ལྟར་ལྡན་”ཞེས་བཤད།
MAR 6:15 འོན་ཀྱང་མི་ལ་ལས་“དེ་ནི་ལུང་སྟོན་པ་ཨེ་ལི་ཡཱ་རེད་”ཅེས་ཟེར་བ་དང༌། ཡང་མི་ཁ་ཤས་ཀྱིས་“ཁོང་གནའ་རབས་ཀྱི་ལུང་སྟོན་པ་རྣམས་ཀྱི་ནང་ནས་གཅིག་དང་འདྲ་བའི་ལུང་སྟོན་པ་ཡིན་”ཞེས་ཟེར།
MAR 6:16 འོན་ཀྱང་ཧེ་རོ་དཱེས་གཏམ་དེ་ཐོས་ནས་ཁོས་“དེ་ནི་ངས་བཀའ་བསྒོས་ཏེ་མགོ་བོ་བཅད་ནས་བསད་ཟིན་པའི་ཡོ་ཧ་ནན་སླར་གསོན་པ་རེད་”ཅེས་སྨྲས།
MAR 6:17 དེ་སྔོན་ཧེ་རོ་དཱེ་ཡིས་རང་གི་གཅུང་པོ་ཕི་ལིབ་ཀྱི་བཟའ་ཟླ་ཧེ་རོད་ཡཱ་ཟེར་བ་དེ་རང་གི་བཟའ་ཟླར་བླངས་པའི་རྐྱེན་གྱིས། ཡོ་ཧ་ནན་གྱིས་ཧེ་རོ་དཱེ་ལ་“དཀོན་མཆོག་གི་བཀའ་ཁྲིམས་ལྟར་ན་ཁྱེད་ཀྱིས་རང་གི་གཅུང་པོའི་བཟའ་ཟླ་ལེན་མི་ཆོག་”ཅེས་གསུངས་པ་དང༌། ཧེ་རོ་དཱེ་ཡིས་ཧེ་རོད་ཡཱའི་དོན་ལ་མི་བཏང་ནས་ཡོ་ཧ་ནན་བཟུང་སྟེ་བཙོན་ཁང་ལ་བཅུག
MAR 6:19 ཧེ་རོད་ཡཱ་ཡིས་འཁོན་འཛིན་བཅངས་ཏེ་ཡོ་ཧ་ནན་གསོད་པར་འདོད་ཀྱང་མ་ཐུབ།
MAR 6:20 གང་ལགས་ཟེར་ན། ཧེ་རོ་དཱེས་ཡོ་ཧ་ནན་ནི་སྐྱེས་བུ་དྲང་ལྡན་དང་དམ་པ་ཞིག་ཡིན་པར་ཤེས་པས་ཁོང་ལ་བརྩི་བཀུར་བྱས་པ་དང་ཁོང་གནོད་པ་ལས་བསྲུངས། ཁོས་ཡོ་ཧ་ནན་གྱི་བསླབ་བྱ་ཉན་དུས་དོན་གསལ་པོར་མི་ཤེས་ཀྱང་ཉན་པར་དགའ།
MAR 6:21 མཐའ་མར་ཧེ་རོད་ཡཱ་ལ་གོ་སྐབས་རྙེད་དེ། ཧེ་རོ་དཱེའི་སྐྱེས་སྐར་གྱི་ཉིན་མོར་རང་གི་བློན་པོ་དང་དམག་དཔོན། ག་ལིལ་ཡུལ་གྱི་མི་ཆེན་ཚོར་གསོལ་སྟོན་བཤམས་པ་དང༌།
MAR 6:22 ཧེ་རོད་ཡཱའི་བུ་མོའང་ནང་དུ་འོངས་ཏེ་ཞབས་བྲོ་འཁྲབ་ནས་ཧེ་རོ་དཱེ་དང་མགྲོན་པོ་རྣམས་དགའ་བར་བྱས་པས། རྒྱལ་པོས་བུ་མོ་དེ་ལ་“ཁྱོད་ལ་ཅི་འདོད་ཀྱང་ངར་ཤོད་ཅིག ངས་ཁྱོད་ལ་སྟེར་རྒྱུ་ཡིན་”ཞེས་སྨྲས་པ་དང༌།
MAR 6:23 ཡང་ཁོ་མོར་མནའ་བསྐྱལ་ཏེ་“ཁྱོད་ཀྱིས་ང་རང་ལ་ཇི་དང་ཇི་སློང་བ་རྒྱལ་ཁམས་ཀྱི་ཕྱེད་ཀ་ཡིན་ཡང་ཁྱོད་ལ་སྟེར་ངེས་ཡིན་”ཞེས་སྨྲས།
MAR 6:24 དེ་ནས་བུ་མོ་དེ་ཕྱི་ལ་སོང་ནས་རང་གི་ཨ་མ་ལ་“ངས་ཅི་ཞིག་སློང་དགོས་སམ་”ཞེས་དྲིས་པ་ལ། ཁོ་མོའི་ཨ་མས་“ཁྲུས་གསོལ་མཁན་ཡོ་ཧ་ནན་གྱི་མགོ་སློངས་ཤིག་”ཅེས་བཤད།
MAR 6:25 དེ་མ་ཐག་བུ་མོ་དེ་ལམ་སེང་རྒྱལ་པོའི་དྲུང་དུ་ཡོང་ནས་“ངའི་རེ་བ་ལ་ད་ལྟ་མྱུར་དུ་ཁྲུས་གསོལ་མཁན་ཡོ་ཧ་ནན་གྱི་མགོ་སྡེར་མའི་ནང་དུ་བཞག་ནས་ང་ལ་གནང་བར་མཛོད་”ཅེས་ཞུས།
MAR 6:26 དེའི་ཚེ་རྒྱལ་པོ་ཧེ་རོ་དཱེའི་སེམས་ཤིན་ཏུ་སྐྱོ་ནའང་མགྲོན་པོ་རྣམས་ཀྱི་མདུན་ལ་མནའ་བསྐྱལ་ཡོད་པས་མི་སྟེར་ཞེས་ཟེར་མ་ཕོད།
MAR 6:27 དེ་མ་ཐག་ཏུ་རྒྱལ་པོས་སྲུང་དམག་ཞིག་བཏང་ནས་“ཡོ་ཧ་ནན་གྱི་མགོ་ཁྱེར་ཤོག་”ཅེས་བཀའ་བསྒོས་ཤིང༌། སྲུང་དམག་བཙོན་ཁང་དུ་ཕྱིན་ནས་ཡོ་ཧ་ནན་གྱི་མགོ་བཅད་དེ།
MAR 6:28 མགོ་སྡེར་མའི་ནང་དུ་བཞག་ནས་ཁྱེར་ཡོང་སྟེ་ཁོ་མོ་ལ་སྤྲད་པ་དང༌། བུ་མོ་དེས་ཀྱང་རང་གི་ཨ་མར་སྤྲད།
MAR 6:29 ཡོ་ཧ་ནན་གྱི་སློབ་མ་རྣམས་ཀྱིས་གཏམ་དེ་ཐོས་པས་ཚུར་ཡོང་སྟེ་ཁོང་གི་སྐུ་ཕུང་ཁུར་ནས་དུར་ཁང་དུ་བཞག
MAR 6:30 དེ་ནས་སྐུ་ཚབ་ཚོ་ཡེ་ཤུའི་དྲུང་དུ་འཛོམས་ཏེ། ཇི་བྱས་པ་དང་ཆོས་ཇི་བསྟན་པའི་ལོ་རྒྱུས་ཐམས་ཅད་ཁོང་ལ་ཞུས་པ་ལ།
MAR 6:31 དེ་རུ་ཕར་འགྲོ་ཚུར་འོང་གི་མི་མང་པོ་ཡོད་དེ། ཁོང་རྣམས་ལ་ཞལ་ཟས་བཞེས་ལོང་ཡང་མ་བྱུང༌། ཡེ་ཤུས་ཁོ་ཚོར་“ད་ཁྱེད་ཚོ་ཚུར་ཤོག་ལ་ངེད་དང་ལྷན་དུ་དབེན་གནས་ཤིག་ཏུ་སོང་ནས་ངལ་ཅུང་ཙམ་གསོ་བར་བྱའོ་”ཞེས་གསུངས་ནས།
MAR 6:32 ཁོང་རྣམས་མི་གཞན་མེད་པར་གྲུ་ལ་བཞུགས་ནས་དབེན་གནས་ཀྱི་ཕྱོགས་སུ་ཕེབས།
MAR 6:33 མི་མང་པོས་ཁོང་རྣམས་ཕེབས་བཞིན་པ་མཐོང་སྟེ། ཁོང་རྣམས་སུ་ཡིན་ཤེས་པས་གྲོང་སྡེ་ཐམས་ཅད་ནས་རྒྱུགས་ཡོང་སྟེ་ཁོང་ཚོའི་སྔོན་ལ་སླེབས།
MAR 6:34 ཡེ་ཤུ་གྲུ་ལས་བབས་དུས་མི་ཚོགས་མང་པོ་ནི་རྫི་བོ་མེད་པའི་ལུག་དང་འདྲ་བར་འདུག་པ་གཟིགས་པས། ཐུགས་བརྩེ་བའི་ངང་ནས་དེ་ཚོར་ཆོས་མང་པོ་གསུངས།
MAR 6:35 ཉི་མ་ནུབ་ལ་ཉེ་བའི་དུས་སུ། ཉེ་གནས་ཚོ་ཁོང་གི་དྲུང་དུ་ཡོང་སྟེ་“ས་ཆ་འདི་དབེན་སྟོང་ཡིན་ཞིང་ཉི་མ་ཡང་ནུབ་ལ་ཉེ་བས།
MAR 6:36 ཁོ་ཚོ་མཐའ་འཁོར་གྱི་ཡུལ་སྡེ་རྣམས་ལ་རང་རང་གི་ཟས་ཉོ་རུ་གཏོང་བར་མཛོད་”ཅེས་ཁོང་ལ་ཞུས་པ་ན།
MAR 6:37 ཡེ་ཤུས་ཁོ་རྣམས་ལ་“ཁྱེད་ཚོས་ཁོ་ཚོར་ཟས་སྟེར་ཅིག་”ཅེས་གསུངས། ཁོ་ཚོས་“ང་ཚོ་སོང་ནས་དེ་ཎ་རིའི་དངུལ་སྒོར་ཉིས་བརྒྱ་བཏང་སྟེ་བག་ལེབ་ཉོས་ནས་ཁོ་རྣམས་ལ་སྟེར་བར་བྱའམ་”ཞེས་ཞུས་པ་ལ།
MAR 6:38 ཁོང་གིས་“ཁྱེད་རྣམས་སོང་ནས་བག་ལེབ་ཇི་ཙམ་ཡོད་པ་ལྟོས་དང་”ཞེས་གསུངས་པ་དང༌། ཉེ་གནས་ཚོས་ཤེས་རྗེས་ཁོང་ལ་“བག་ལེབ་ལྔ་དང་ཉ་ཤ་གཉིས་འདུག་”ཅེས་སྨྲས།
MAR 6:39 དེ་ནས་ཡེ་ཤུས་ཉེ་གནས་ཚོ་ལ་མི་ཚོ་ཚོགས་པ་ཚོགས་པ་བྱས་ཏེ་སྤང་གི་སྟེང་ལ་སྡོད་འཇུག་པའི་བཀའ་གནང་ནས།
MAR 6:40 མི་ཚོགས་བརྒྱ་རེའམ་ལྔ་བཅུ་རེ་བྱས་ནས་བསྡད།
MAR 6:41 ཡེ་ཤུས་བག་ལེབ་ལྔ་དང་ཉ་ཤ་གཉིས་པོ་ཕྱག་ཏུ་བསྣམས་ཏེ་དཀོན་མཆོག་གི་ཞིང་ཁམས་ལ་ཡར་གཟིགས་ཤིང་དཀོན་མཆོག་ལ་བཀའ་དྲིན་ཆེ་ཞུས་རྗེས། བག་ལེབ་དུམ་བུར་མཛད་ནས་ཉེ་གནས་ཚོ་ལ་གནང་སྟེ་མི་ཚོགས་ལ་བགོ་རུ་བཅུག ཉ་ཤ་གཉིས་པོའང་ཁོང་གིས་བག་ལེབ་བགོས་པ་བཞིན་དུ་མཛད་ནས་ཉེ་གནས་ཚོས་ཀྱང་མི་ཚོགས་ཐམས་ཅད་ལ་བྱིན་པས།
MAR 6:42 མི་ཚང་མས་བཟས་ནས་ཚིམས་པར་གྱུར།
MAR 6:43 དེ་ནས་ཉེ་གནས་ཚོས་བག་ལེབ་དང་ཉ་ཤའི་ཟས་ལྷག་བསྡུས་ནས་སླེ་པོ་བཅུ་གཉིས་བཀང་ཞིང༌།
MAR 6:44 བག་ལེབ་ཟ་མཁན་ནང་ལ་སྐྱེས་པ་ཁོ་ན་ལྔ་སྟོང་ཙམ་ཡོད་པ་ཡིན་ནོ། །
MAR 6:45 དེ་མ་ཐག་ཡེ་ཤུས་ཉེ་གནས་རྣམས་གྲུ་ལ་སྡོད་དུ་བཅུག་སྟེ། ཁོང་གི་སྔོན་དུ་ཆུའི་ཕ་རོལ་གྱི་གྲོང་སྡེ་པེ་སད་དཱ་ཞེས་བྱ་བར་སོང་ཞིག་ཅེས་གསུངས་ནས་མི་ཚོགས་ཕར་བཏང་གནང་ངོ༌།
MAR 6:46 དེ་ནས་ཡེ་ཤུ་ཁོ་ཚོ་དང་ཁ་བྲལ་རྗེས་ཁོང་གསོལ་བ་སྨོན་ལམ་འདེབས་པའི་ཕྱིར་རི་ལ་ཕེབས།
MAR 6:47 དགོང་མོ་ཟིན་དུས། གྲུ་དེ་མཚོའི་དཀྱིལ་དུ་སླེབས་ཤིང༌། ཡེ་ཤུ་གཅིག་པུ་སྐམ་སར་བཞུགས།
MAR 6:48 གྲུའི་མདུན་ཕྱོགས་ནས་ལྷགས་པ་བརྒྱབ་པས་ཉེ་གནས་ཚོས་གྲུའི་སྐྱ་བ་རྒྱག་པ་ལ་དཀའ་ལས་བྱུང་བ་ཁོང་གིས་གཟིགས་ནས། མཚན་མོ་ཐུན་བཞི་པ་ཙམ་ལ་མཚོའི་སྟེང་ལ་ཁོ་ཚོའི་རྩར་ཞབས་འཆག་ཅིང་ཁོ་ཚོའི་འཁྲིས་ནས་འགྲོ་བར་དགོངས་བཞིན་པའི་སྐབས་སུ།
MAR 6:49 ཉེ་གནས་ཀྱིས་ཚུལ་དེ་མཐོང་ནས་གདོན་འདྲེ་ཡིན་པར་བསམས་ཏེ་སྐད་ངན་ཤོར།
MAR 6:50 གང་ཡིན་ཟེར་ན། ཉེ་གནས་ཚང་མས་ཁོང་མཐོང་བ་ཙམ་གྱིས་འཇིགས་ཤིང་སྐྲག་པར་གྱུར། ཡེ་ཤུས་ལམ་སེང་ཁོ་རྣམས་ལ་“ཁྱེད་ཚོའི་སེམས་བདེ་བར་བྱོས། ང་རང་ཡིན་པས་འཇིགས་མི་དགོས་”ཞེས་གསུངས།
MAR 6:51 ཁོང་གྲུའི་ནང་དུ་ཕེབས་པ་དང་ལྷགས་པ་འཇགས་པས། ཉེ་གནས་རྣམས་ཀྱི་སེམས་སུ་ངོ་མཚར་ཆེན་པོ་སྐྱེས།
MAR 6:52 ཅི་ལགས་ཟེར་ན། ཁོ་ཚོས་བག་ལེབ་ཀྱི་དོན་ཧ་མ་གོ་སྟེ། ཁོ་ཚོའི་སེམས་མཁྲེགས་པོ་ཡིན་པས་སོ། །
MAR 6:53 ཁོང་རྣམས་མཚོ་ག་ལིལ་བརྒལ་ནས་གན་ནེ་སཱ་རེལ་ཞེས་པའི་ས་ཆར་སླེབས་ཏེ་གྲུ་མཚོའི་འགྲམ་དུ་ཐག་པས་བཏགས་ནས་བཞག
MAR 6:54 གྲུ་ནས་བབས་མ་ཐག་མི་རྣམས་ཀྱིས་ཡེ་ཤུ་ངོ་ཤེས་ནས།
MAR 6:55 ཁོང་གང་དུ་བཞུགས་པ་ཐོས་རྗེས། མཐའ་སྐོར་གྱི་ཡུལ་ཐམས་ཅད་བརྒྱུད་ནས་རྒྱུགས་ཏེ་ནད་པ་རྣམས་ཉལ་ཁྲིའི་སྟེང་ལ་ཁུར་ཡོང༌།
MAR 6:56 གྲོང་སྡེའམ་ཡང་ན་གྲོང་ཁྱེར། གྲོང་གསེབ་བཅས་ས་ཆ་གང་དུ་ཕེབས་ནའང༌། མི་ཚོས་ནད་པ་རྣམས་ཁྲོམ་ལ་བཞག་སྟེ། ཡེ་ཤུ་ལ་ཁོང་གི་ན་བཟའི་ཟུར་ཁོ་ནར་རེག་ཏུ་གནང་ཞེས་ཞུ་བ་ཕུལ་བས། ཁོང་གི་ན་བཟའ་ལ་རེག་པའི་ནད་པ་ཐམས་ཅད་ནད་ལས་ཐར་བར་གྱུར་རོ། །
MAR 7:1 དེའི་ཚེ་ཕཱ་རུ་ཤི་པ་རྣམས་དང་ཡེ་རུ་ཤ་ལེམ་གྲོང་ཁྱེར་ནས་འོངས་པའི་ཆོས་ཁྲིམས་ལ་མཁས་པའི་མི་ཁག་ཅིག་ཡེ་ཤུའི་དྲུང་དུ་འདུས་ཤིང༌།
MAR 7:2 ཁོ་ཚོས་ཉེ་གནས་ཚོའི་ནང་ནས་འགའ་ཞིག་གིས་ཆོས་ཀྱི་ལུགས་སྲོལ་དང་མི་མཐུན་པར་ལག་པ་མི་གཙང་བའམ་མ་བཀྲུས་པར་ཟས་ཟ་བཞིན་པ་མཐོང༌།
MAR 7:3 (ཕཱ་རུ་ཤི་པ་དང་བཅས་པའི་ཡ་ཧུ་དཱ་པའི་མི་རིགས་ཐམས་ཅད་ཀྱིས་གནའ་མིའི་ལུགས་སྲོལ་སྲུང་ཞིང་རང་གི་ལག་པ་མ་ཁྲུས་པར་ཟས་མི་ཟ།
MAR 7:4 ཁྲོམ་ནས་ཕྱིར་ལོག་རྗེས་ཁྲུས་མ་བྱས་པར་ཅི་ཡང་མི་ཟ། ད་དུང་ལུགས་སྲོལ་གཞན་ཡང་མང་པོ་ཡོད་དེ། ཁོ་ཚོས་མི་རབས་ནས་མི་རབས་བར་དུ། ཕོར་པ་དང་བུམ་པ། ཟངས་སྣོད་འཁྲུད་པ་ལ་སོགས་པའི་ལུགས་སྲོལ་མང་པོ་སྲུང་དགོས་པ་ཡིན་)
MAR 7:5 དེ་ནས་ཕཱ་རུ་ཤི་པ་དང་ཆོས་ཁྲིམས་ལ་མཁས་པའི་མི་རྣམས་ཀྱིས་ཡེ་ཤུ་ལ་“ཁྱེད་ཀྱི་ཉེ་གནས་ཀྱིས་ཅིའི་ཕྱིར་གནའ་མིའི་ལུགས་སྲོལ་མི་སྲུང་བར་ལག་པ་མི་གཙང་ནའང་ཟའམ་”ཞེས་དྲིས་པས།
MAR 7:6 ཡེ་ཤུས་དེ་རྣམས་ལ་“ཁ་བཤད་དོན་ལ་མི་གནས་པ་ཁྱོད་ཚོའི་སྐོར་ལ་ལུང་སྟོན་པ་ཡེ་ཤ་ཡཱ་ཡིས་ལེགས་པར་གསུངས་ཏེ། མི་རྒྱུད་འདི་ཡིས་ངག་ནས་ང་བཀུར་ཡང༌། ། ཁོ་ཡི་སེམས་ནི་ང་དང་ཡོངས་སུ་བྲལ། །
MAR 7:7 མི་ཡིས་བརྩམས་པའི་བསླབ་བྱ་རང་ལ་སྟོན། ། དེ་འདྲའི་བསྙེན་བཀུར་ང་ལ་བྱེད་དོན་མེད། ། ཅེས་ལུང་བསྟན་པ་ལྟར།
MAR 7:8 ཁྱོད་ཚོས་དཀོན་མཆོག་གི་བཀའ་སྤངས་ནས་མིའི་ལུགས་སྲོལ་སྲུང་བཞིན་འདུག་”ཅེས་གསུངས་པ་དང༌།
MAR 7:9 “ཁྱོད་ཚོས་རང་གི་གཏམ་རྒྱུད་སྲུང་བའི་ཕྱིར་དཀོན་མཆོག་གི་བཀའ་རྣམས་སྤང་བ་ལ་མཁས།
MAR 7:10 དེ་ཡང་ལུང་སྟོན་པ་མོ་ཤེ་ཡིས་གསུངས་པ་ལྟར་རང་གི་ཕ་མ་གཉིས་ལ་བརྩི་བཀུར་གྱིས་ཞེས་དང༌། ཡང་ཕ་མ་ལ་ཚིག་ངན་སྨྲ་མཁན་དེ་སྲོག་གཅོད་པར་འགྱུར་དགོས་ཞེས།
MAR 7:11 ཡིན་ནའང་ཁྱོད་ཚོས་གལ་ཏེ་མི་ཞིག་གིས་རང་གི་ཕ་མ་ལ། ངས་ཁྱེད་ལ་ཕན་ཐོགས་འབྱུང་རྒྱུ་ཡིན་པ་འདི་ནི་ཁཱོར་པན་ཡིན་བཤད་ན། (ཁཱོར་པན་ཟེར་ན་དཀོན་མཆོག་ལ་མཆོད་པ་ཕུལ་ཆེད་དུ་ཡིན་)
MAR 7:12 ཁྱོད་ཚོས་མི་དེ་རང་གི་ཕ་མ་ལ་དེ་ཕྱིན་ཆད་གཉེར་སྐྱོང་བྱེད་དུ་མི་འཇུག
MAR 7:13 ཁྱོད་ཚོས་གཏད་པའི་གཏམ་རྒྱུད་ཀྱི་ཐོག་ནས་དཀོན་མཆོག་གི་བཀའ་རྩིས་མེད་བཏང༌། དེ་དང་འདྲ་བའི་བྱ་བ་གཞན་ཡང་མང་པོ་བྱེད་”ཅེས་གསུངས།
MAR 7:14 དེ་ནས་ཡང་ཡེ་ཤུས་མི་ཚོགས་རང་གི་དྲུང་དུ་བོས་ནས་“ཁྱེད་ཚོ་ཚང་མ་ང་ལ་ཉན་ནས་ཧ་གོ་བར་གྱིས་ཤིག
MAR 7:15 ཕྱི་ནས་ཁོག་པའི་ནང་ཞུགས་པ་དེས་མི་མི་གཙང་བར་བྱེད་མི་ཐུབ། ཡིན་ན་ཡང་མིའི་ཡིད་ནང་ནས་ཕྱིར་གང་འཐོན་པ་དེས་མི་མི་གཙང་བར་བྱེད་”ཅེས་གསུངས།
MAR 7:17 དེ་ནས་ཁོང་མི་ཚོགས་དང་ཁ་བྲལ་ནས་ཁང་པའི་ནང་དུ་འཛུལ། དེ་དུས་ཉེ་གནས་རྣམས་ཀྱིས་དཔེ་དེའི་དོན་བཀའ་འདྲི་ཞུས་པས།
MAR 7:18 ཁོང་གིས་“ཁྱོད་ཚོས་དེའི་སྐོར་ཡང་ཤེས་ཀྱི་མེད་དམ། ཕྱི་རོལ་ནས་ནང་དུ་འཛུལ་བའི་ཟས་དེས་མི་མི་གཙང་བར་བྱེད་མི་ཐུབ་པ་དེ་ཁྱོད་ཚོས་ཧ་མི་གོའམ།
MAR 7:19 གང་ཡིན་ཟེར་ན། དེ་ནི་མིའི་སེམས་ཀྱི་ནང་དུ་མི་འགྲོ་བར་གྲོད་པའི་ནང་དུ་འགྲོ དེ་ནས་ཕྱིར་འཐོན་”ཞེས་གསུངས། (ཡེ་ཤུས་གསུངས་པའི་དོན་དེ་ནི་ཟས་ཐམས་ཅད་གཙང་མ་ཡིན་པར་བསྟན་)
MAR 7:20 ཁོང་གིས་ད་དུང་གསུངས་པར་“མིའི་ཡིད་ནང་ནས་ག་རེ་འཐོན་པ་དེས་མི་མི་གཙང་བར་བྱེད།
MAR 7:21 རྒྱུ་མཚན་ནི། མིའི་ཡིད་ནང་ནས་བསམ་པ་ངན་པ་དང༌། འདོད་ལོག་སྤྱོད་པ། རྐུ་བ། མི་སྲོག་གཅོད་པ།
MAR 7:22 ལོག་གཡེམ། སེར་སྣ། གནོད་སེམས། མགོ་སྐོར། འདོད་ཆགས། ཕྲག་དོག དམའ་འབེབས་གཏོང་བ། ང་རྒྱལ། དཀོན་མཆོག་གི་བཀའ་དོར་བ་སོགས།
MAR 7:23 ངན་པ་དེ་ཚོ་ཐམས་ཅད་མིའི་ནང་ནས་ཕྱིར་འཐོན་ཏེ་མི་མི་གཙང་བར་བྱེད་”ཅེས་གསུངས།
MAR 7:24 དེ་ནས་ཡེ་ཤུ་ཡར་བཞེངས་ནས་ཡུལ་ཐཱ་ཨེར་དང་ཚི་དོན་ཞེས་པའི་གྲོང་ཁྱེར་ལ་ཕེབས་ཤིང༌། ཁོང་ཁྱིམ་ཚང་ཞིག་གི་ནང་ལ་ཕེབས་ནས་མི་གཞན་སུ་ལའང་ཤེས་སུ་མི་འཇུག་དགོངས་ཀྱང་གསང་མ་ཐུབ།
MAR 7:25 དེའི་དུས་སུ་བུད་མེད་ཅིག་ཡོད་པ་དེའི་བུ་མོ་ཆུང་ངུ་གདོན་འདྲེ་མི་གཙང་བ་ཡིས་བཟུང་ཡོད་པས། བུད་མེད་དེས་ཡེ་ཤུའི་གནས་ཚུལ་ཐོས་ནས་ཁོང་གི་མདུན་དུ་ཡོང་སྟེ་པུས་མོ་ས་ལ་བཙུགས་ནས་ཕྱག་འཚལ།
MAR 7:26 ཁོ་མོ་ནི་སི་རུ་ཕེ་ནི་ཀེ་ཡུལ་ནས་ཡིན་པའི་གྷི་རིག་མི་རིགས་ཀྱི་བུད་མེད་ཅིག་ཡིན་ཞིང༌། ཁོ་མོས་ཡེ་ཤུ་ལ་གདོན་འདྲེ་དེ་བུ་མོ་ལས་ཕར་སྐྲོད་པར་མཛོད་ཅེས་ཞུ་བ་ཡང་ཡང་ཞུས་པ་ན།
MAR 7:27 ཡེ་ཤུས་“སྔོན་ལ་ཕྲུ་གུ་རྣམས་ཀྱི་གྲོད་ཁོག་འགྲང་དུ་ཆུག ཕྲུ་གུའི་ཟས་སྐལ་ཁྱི་ལ་སྟེར་བར་མི་རུང་”ཞེས་གསུངས།
MAR 7:28 ཡང་ཁོ་མོས་“ལགས་སོ། སྟོན་པ་ལགས། ཡིན་ནའང་ཅོག་ཙེའི་འོག་ལ་ཡོད་པའི་ཁྱིས་ཀྱང་ཕྲུ་གུའི་ཟས་སར་ཟགས་པ་རྣམས་ཟའོ་”ཞེས་ཞུས་པས།
MAR 7:29 ཡང་ཡེ་ཤུས་“ཁྱོད་ཀྱིས་སྐད་ཆ་འདི་སྐད་སྨྲས་པའི་རྐྱེན་གྱིས་ཁྱོད་ཕྱིར་སོང་དང༌། གདོན་འདྲེ་དེ་ཁྱོད་ཀྱི་བུ་མོའི་གཟུགས་ནས་ཐོན་ཚར་རོ་”ཞེས་གསུངས།
MAR 7:30 བུད་མེད་དེ་རང་གི་ཁང་པ་ལ་ལོག་སོང་བ་དང༌། གདོན་ཐོན་ཚར་ནས་བུ་མོ་དེ་ཉལ་ཁྲིའི་སྟེང་ལ་ཉལ་འདུག་པ་མཐོང་ངོ༌། །
MAR 7:31 དེ་ནས་ཡེ་ཤུ་ཐཱ་ཨེར་གྱི་ཡུལ་ནས་ཚི་དོན་ཡུལ་སྡེ་བརྒྱུད་ནས། མཚོ་ག་ལིལ་གྱི་ཕྱོགས་སུ་དེ་ཁ་པོ་ལེ་ཡུལ་ལ་ཕེབས།
MAR 7:32 མི་འགའ་ཞིག་གིས་རྣ་བ་འོན་ཞིང་སྐད་ཆ་ཡག་པོ་ཤོད་མི་ཐུབ་པའི་མི་ཞིག་ཡེ་ཤུའི་དྲུང་དུ་ཁྲིད་ཡོང་སྟེ། ཁོང་ལ་མི་དེའི་ལུས་སྟེང་ལ་ཕྱག་འཇོག་པར་ཞུ་བ་ཕུལ།
MAR 7:33 ཡེ་ཤུས་མི་དེ་མི་ཚོགས་ཀྱི་ཁྲོད་ནས་ཟུར་དུ་ཁྲིད་དེ། ཁོང་གིས་ཕྱག་མཛུབ་ཁོའི་རྣ་བ་གཉིས་ལ་བཅུག་ཅིང་ལྗགས་ཆུ་གཏོར་ནས་ཁོའི་ལྕེ་ལ་རེག་པ་དང༌།
MAR 7:34 ཡང་དཀོན་མཆོག་གི་ཞིང་ཁམས་ལ་ཡར་གཟིགས་ཤིང་དབུགས་རིང་ཕྱུང་སྟེ་མི་དེ་ལ་“ཨེ་ཕ་ཐ་”ཞེས་གསུངས། དེའི་དོན་ནི་ཕྱེ་བར་གྱུར་ཞིག་ཅེས་པའོ།
MAR 7:35 དེ་མ་ཐག་མི་དེའི་རྣ་བ་ཕྱེ་ཞིང་ལྕེའི་འཆིང་བ་ཡང་གྲོལ་ཏེ་སྐད་ཆ་གསལ་པོར་སྨྲས།
MAR 7:36 དེ་ནས་ཡེ་ཤུས་ཁོ་ཚོར་དོན་འདི་མི་གཞན་སུ་ལའང་མ་ཤོད་ཅིག་ཅེས་བཀའ་གནང༌། འོན་ཀྱང་ཁོང་གིས་ཇི་ལྟར་བཀའ་གནང་ཡང་མི་དེ་ཚོས་དེ་བས་ཀྱང་མི་ཀུན་ལ་བསྒྲགས།
MAR 7:37 མི་ཚོགས་རྣམས་ཤིན་ཏུ་ངོ་མཚར་བར་གྱུར་ནས་“ཁོང་གིས་ཐམས་ཅད་ལེགས་པར་མཛད་དེ། ཐ་ན་འོན་པ་རྣམས་ལ་ཐོས་པར་མཛད་ཅིང་སྐད་ཆ་ཤོད་མི་ཐུབ་པ་རྣམས་ཀྱང་བཤད་ཐུབ་པར་མཛད་”ཅེས་སྨྲས་སོ། །
MAR 8:1 དེའི་དུས་སུ། ཡང་བསྐྱར་མི་མང་པོ་ཞིག་དེར་འདུས་ཏེ། ཁོ་ཚོར་ཟ་རྒྱུ་ཅི་ཡང་མེད་པས་ཡེ་ཤུས་ཁོང་གི་ཉེ་གནས་ཚོ་བོས་ཏེ་
MAR 8:2 “མི་ཚོགས་འདི་ང་དང་མཉམ་དུ་བསྡད་ནས་ཉིན་ཞག་གསུམ་སོང་ཞིང༌། ད་ཆ་ཟས་ཅི་ཡང་མེད་པས་ཁོ་ཚོ་སྙིང་རྗེ་བར་འདུག
MAR 8:3 ཁོ་ཚོའི་ནང་ནས་མི་ཁ་ཤས་རྒྱང་རིང་ནས་ཡོང་བས། གལ་ཏེ་ངས་ཁོ་ཚོ་གྲོད་པ་སྟོང་བར་ལོག་ཏུ་བཅུག་ན། ལམ་བར་དུ་བཀྲེས་ཤིང་ལྟོགས་ཏེ་དྲན་མེད་དུ་བརྒྱལ་བར་ངེས་”ཞེས་གསུངས།
MAR 8:4 ཉེ་གནས་ཚོས་ཁོང་ལ་“མི་འདི་རྣམས་འགྲང་བར་བྱེད་པའི་བག་ལེབ་ནི་དབེན་སྟོང་འདི་རུ་ག་ནས་རྙེད་ཐུབ་བམ་”ཞེས་ཞུས།
MAR 8:5 ཡེ་ཤུས་“ཁྱེད་ཚོར་བག་ལེབ་ཅི་ཙམ་ཡོད་”ཅེས་བཀའ་འདྲི་གནང་བས། ཁོ་ཚོས་“བདུན་ཡོད་”ཅེས་ཞུས།
MAR 8:6 དེ་ནས་ཁོང་གིས་མི་ཚོགས་ལ་བཀའ་གནང་ནས་ས་ལ་སྡོད་དུ་བཅུག བག་ལེབ་བདུན་པོ་ཕྱག་ཏུ་བསྣམས་ཏེ་དཀོན་མཆོག་ལ་བཀའ་དྲིན་ཆེ་ཞུས་རྗེས། བག་ལེབ་དུམ་བུར་བྱས་ནས་ཉེ་གནས་རྣམས་ལ་སྤྲད་ཅིང་ཁོ་ཚོས་མི་ཚོགས་ལ་བྱིན།
MAR 8:7 ཡང་ཉ་ཤ་ཆུང་ངུ་ཁ་ཤས་ཡོད་པ་ཡེ་ཤུས་དཀོན་མཆོག་ལ་བཀའ་དྲིན་ཆེ་ཞུས་པའི་རྗེས་ལ་དེ་ཡང་བག་ལེབ་བགོས་པ་བཞིན་དུ་མཛད་ནས་མི་ཚོགས་ལ་སྟེར་བའི་བཀའ་གནང༌།
MAR 8:8 དེ་ནས་མི་ཚོགས་ཚང་མས་བཟས་ནས་འགྲངས་ཤིང་ཁོ་ཚོས་ཟས་ལྷག་བསྡུ་གསོག་བྱས་པ་སླེ་པོ་བཀང་བ་བདུན་བྱུང༌།
MAR 8:9 དེར་མི་སྟོང་ཕྲག་བཞི་ཙམ་ཡོད་པ་ཡིན། ཡང་ཁོང་གིས་མི་དེ་ཚོ་འགྲོ་རུ་བཅུག
MAR 8:10 དེ་མ་ཐག་ཁོང་ཉེ་གནས་རྣམས་དང་མཉམ་དུ་གྲུ་ལ་བཞུགས་ནས་དཱལ་མ་ནུ་ཐ་ཞེས་བྱ་བའི་ཡུལ་ཕྱོགས་སུ་ཕེབས།
MAR 8:11 དེའི་ཚེ་ཕཱ་རུ་ཤི་པ་རྣམས་འོངས་ནས་ཡེ་ཤུ་ལ་རྩོད་གླེང་བྱས་ཤིང༌། ཁོང་ལ་དཀོན་མཆོག་ནས་མངགས་པ་ཡིན་པའི་རྟགས་ཤིག་བསྟན་དུ་གསོལ་ཞུས་ནས་ཉམས་ཚོད་བྱས།
MAR 8:12 ཡེ་ཤུས་རང་གི་ཐུགས་ནས་དབུགས་རིང་ཕྱུང་སྟེ་“མི་རབས་འདིས་ངོ་མཚར་བའི་རྟགས་ཤིག་ཅིའི་ཕྱིར་འཚོལ། ངས་ཁྱེད་ཚོ་ལ་བདེན་པར་ཟེར་རྒྱུར། མི་རབས་འདི་ལ་རྟགས་སྟོན་པར་མི་འགྱུར་རོ་”ཞེས་གསུངས་པ་དང༌།
MAR 8:13 ཡེ་ཤུ་ཁོ་ཚོ་བཞག་ནས་ཡང་བསྐྱར་གྲུ་ལ་བཞུགས་ཏེ་མཚོ་ག་ལིལ་གྱི་ཕ་རོལ་ཏུ་ཕེབས་སོ། །
MAR 8:14 ཉེ་གནས་རྣམས་ཀྱིས་ལམ་རྒྱགས་འཁྱེར་རྒྱུ་བརྗེད་སོང་བས། གྲུའི་ནང་དུ་བག་ལེབ་གཅིག་ལས་གཞན་ཟས་ཅི་ཡང་མེད།
MAR 8:15 དེ་ནས་ཡེ་ཤུས་“ཁྱེད་ཚོས་བློ་རིག་བསྒྲིམས་ནས་ཕཱ་རུ་ཤི་པ་དང་ཧེ་རོ་དཱེ་ཡི་སྐྱུར་རྩི་ལ་དོགས་ཟོན་གྱིས་ཤིག་”ཅེས་བཀའ་གནང་ཞིང༌།
MAR 8:16 ཉེ་གནས་རྣམས་ཀྱིས་ཕན་ཚུན་ལ་“འདི་ནི་ང་ཚོར་བག་ལེབ་མེད་པའི་ཕྱིར་”ཞེས་སྨྲས་པ་དང༌།
MAR 8:17 ཡེ་ཤུས་དེ་མཁྱེན་ནས་ཁོ་ཚོར་“ཁྱོད་ཚོས་ཅིའི་ཕྱིར་བག་ལེབ་མེད་པའི་གཏམ་གླེང་བ་ཡིན་ནམ། ཁྱོད་ཚོས་ད་དུང་ཡང་མི་ཤེས་ལ་ཧ་མི་གོའམ། ཁྱོད་ཚོའི་སེམས་མཁྲེགས་པོར་གྱུར་བ་ཡིན་ནམ།
MAR 8:18 ཁྱོད་ཚོར་མིག་ཡོད་ཀྱང་མི་མཐོང་ངམ། རྣ་བ་ཡོད་ཀྱང་མི་ཐོས་སམ། ཁྱོད་ཚོས་ཅི་ཡང་མི་དྲན་ནམ།
MAR 8:19 ངས་བག་ལེབ་ལྔ་མི་ལྔ་སྟོང་ལ་བགོས་པའི་སྐབས་ཁྱོད་ཚོས་ཟས་ལྷག་སླེ་པོ་ཅི་ཙམ་བསྡུ་གསོག་བྱས་སམ་”ཞེས་དྲིས་པ་ལ། ཁོ་ཚོས་“བཅུ་གཉིས་སོ་”ཞེས་ཞུས།
MAR 8:20 “ཡང་བག་ལེབ་བདུན་མི་བཞི་སྟོང་ལ་བགོས་པའི་དུས་ཁྱོད་ཚོས་ཟས་ལྷག་སླེ་པོ་ཅི་ཙམ་བསྡུ་གསོག་བྱས་སམ་”ཞེས་དྲིས་ཤིང༌། ཁོ་ཚོས་“བདུན་ནོ་”ཞེས་ཞུས་པ་དང༌།
MAR 8:21 ཡེ་ཤུས་“ཁྱོད་ཚོས་ད་དུང་མི་ཤེས་སམ་”ཞེས་གསུངས།
MAR 8:22 དེ་ནས་ཁོང་རྣམས་པེ་སད་དཱ་ཞེས་བྱ་བའི་གྲོང་སྡེ་ལ་ཕེབས་པ་དང༌། མི་འགའ་ཞིག་གིས་ལོང་བ་ཞིག་ཡེ་ཤུའི་དྲུང་དུ་ཁྲིད་ཡོང་སྟེ། ཁོང་ལ་ཕྱག་གིས་རེག་པའི་ཞུ་བ་ཞུས།
MAR 8:23 ཁོང་གིས་ལོང་བ་དེའི་ལག་པ་ནས་འཇུས་ཏེ་གྲོང་ཚོའི་ཕྱི་རོལ་ཏུ་ཁྲིད་ཅིང༌། དེའི་མིག་གཉིས་ལ་ལྗགས་ཆུ་གཏོར་བ་དང༌། ཁོང་གིས་ཕྱག་ཟུང་མི་དེ་ལ་བཞག་སྟེ་“ཁྱེད་ཀྱི་མིག་གིས་མཐོང་གི་འདུག་གམ་”ཞེས་གསུངས་པ་དང༌།
MAR 8:24 མི་ལོང་བ་དེས་ཡར་བལྟས་ཏེ་“ངས་མི་རྣམས་མཐོང༌། འོན་ཀྱང་ཁོ་ཚོ་ཤིང་འགྲོ་བཞིན་པ་ལྟར་མཐོང་གི་འདུག་”ཅེས་ཞུས།
MAR 8:25 དེ་ནས་ཡེ་ཤུས་ཡང་བསྐྱར་མི་དེའི་མིག་ལ་བཞག་པ་དང༌། ཁོས་མིག་ནན་གྱིས་བལྟས་ནས་མིག་ཟུང་གསོས་ཏེ་དངོས་པོ་ཐམས་ཅད་གསལ་པོར་མཐོང་བར་གྱུར།
MAR 8:26 ཡང་ཡེ་ཤུས་མི་དེ་རང་ཁྱིམ་དུ་འགྲོ་རུ་བཅུག་སྟེ་“གྲོང་སྡེ་འདིའི་ནང་དུ་ཡང་བསྐྱར་མ་འགྲོ་”ཞེས་གསུངས།
MAR 8:27 ཡང་ཡེ་ཤུ་རང་གི་ཉེ་གནས་རྣམས་དང་མཉམ་དུ་སེ་སར་རེ་ཡཱ་ཕི་ལིབ་པཱི་ཞེས་པའི་ཡུལ་གྱི་གྲོང་སྡེ་རྣམས་ལ་ཕེབས་ཏེ་ལམ་བར་དུ་ཉེ་གནས་ཚོར་“མི་རྣམས་ཀྱིས་ང་རང་སུ་རེད་ཅེས་བཤད་བཞིན་ཡོད་དམ་”ཞེས་གསུངས་ནས།
MAR 8:28 ཁོ་རྣམས་ཀྱིས་“མི་ལ་ལས་ཁྲུས་གསོལ་མཁན་ཡོ་ཧ་ནན་དང༌། ལ་ལས་ལུང་སྟོན་པ་ཨེ་ལི་ཡཱ། ཡང་མི་ལ་ལས་ལུང་སྟོན་པའི་ནང་གི་གཅིག་རེད་ཅེས་ཟེར་”ཞེས་ཞུས་
MAR 8:29 “འོ་ན་ཁྱེད་ཚོས་བྱས་ན་ང་རང་སུ་ཡིན་ཟེར་”ཞེས་གསུངས་པས་ལན་དུ། པེ་ཏྲོས་“ཁྱེད་ནི་སྐྱབས་མགོན་མཱ་ཤི་ཀ་ཡིན་ནོ་”ཞེས་ཞུས།
MAR 8:30 ཡེ་ཤུས་ཁོ་རྣམས་ལ་“དོན་འདི་མི་གཞན་ལ་མ་ཤོད་”ཅེས་ནན་གྱིས་བསྐུལ།
MAR 8:31 དེ་ནས་ཁོང་གིས་ཉེ་གནས་ཚོར་མིའི་རིགས་ཀྱི་བུ་ནི་ངེས་པར་དུ་སྡུག་བསྔལ་མང་པོ་མྱོང་ཞིང༌། ཡ་ཧུ་དཱ་པའི་མི་རིགས་ཀྱི་རྒན་པོ་དང་བླ་ཆེན་རྣམས། ཆོས་ཁྲིམས་ལ་མཁས་པའི་མིས་ཁོ་རང་དོར་ནས་གསོད་པར་འགྱུར་ལ། ཡང་ཉིན་གསུམ་གྱི་རྗེས་འཆི་བ་ནས་སླར་གསོན་པར་ལང་ངོ་ཞེས་གསུངས།
MAR 8:32 ཁོང་གིས་བཀའ་དེ་གསལ་པོར་གསུངས་ཤིང༌། པེ་ཏྲོས་ཁོང་ཟུར་དུ་ཁྲིད་ནས་གཤེ་གཤེ་བཏང༌།
MAR 8:33 འོན་ཀྱང་ཡེ་ཤུས་ཞལ་ཕྱིར་སྐོར་ཏེ་ཉེ་གནས་ཚོར་གཟིགས་ནས་པེ་ཏྲོ་ལ་བཀའ་བཀྱོན་གནང་སྟེ་“བདུད་སཱ་ཏན་ཁྱོད། ངའི་རྒྱབ་ཏུ་སོང་ཞིག ཁྱོད་ཀྱི་བསམ་པ་དཀོན་མཆོག་བཞིན་མ་ཡིན་པར་མི་བཞིན་ཡིན་ནོ་”ཞེས་གསུངས།
MAR 8:34 ཁོང་གིས་མི་ཚོགས་དང་ཉེ་གནས་རྣམས་རང་གི་དྲུང་དུ་བོས་ནས་“གལ་ཏེ་མི་སུ་ཞིག་ང་ཡི་རྗེས་སུ་འབྲང་འདོད་ན། རང་ཉིད་དོར་ནས་རང་གི་རྒྱང་ཤིང་འཁུར་ཏེ་ང་ཡི་རྗེས་སུ་འབྲང་དགོས།
MAR 8:35 མི་སུས་ཀྱང་རང་གི་སྲོག་ཐར་བར་བྱེད་འདོད་པ་དེས་བརླག་པར་འགྱུར། མི་སུས་ཀྱང་ང་རང་དང་འཕྲིན་བཟང་གི་དོན་དུ་རང་གི་སྲོག་གཏོང་པ་དེས་ཐར་བར་འགྱུར་ངེས་ཡིན།
MAR 8:36 མི་སུ་ལ་འཇིག་རྟེན་ཧྲིལ་པོ་ཐོབ་ཀྱང་རང་སྲོག་བརླགས་ན་ཅི་ཕན།
MAR 8:37 ཡང་ན་མིས་རང་གི་སྲོག་ཅི་དང་བརྗེའམ།
MAR 8:38 ལོག་གཡེམ་ཅན་དང་སྡིག་སྤྱོད་ཀྱི་མི་རབས་འདི་ལས་མི་སུ་ཞིག་གིས་ང་དང་ངའི་བཀའ་ངོ་ཚ་བའི་རྒྱུར་བརྩིས་ན། མིའི་རིགས་ཀྱི་བུ་ཡང་ཡབ་དཀོན་མཆོག་གི་གཟི་བརྗིད་ལས་དམ་པའི་ཕོ་ཉ་འཁོར་དང་བཅས་པ་འཇིག་རྟེན་དུ་ཕེབས་དུས། མི་དེ་ཡང་ངོ་ཚ་བའི་རྒྱུར་བརྩི་བར་བྱ་”ཞེས་གསུངས།
MAR 9:1 ཡང་ཡེ་ཤུས་ཁོ་རྣམས་ལ་“ངས་ཁྱེད་རྣམས་ལ་བདེན་པར་ཟེར་རྒྱུར། འདི་རུ་ལངས་ནས་སྡོད་པའི་མི་རྣམས་ཀྱི་ནང་ནས་འགའ་ཞིག་གིས་དཀོན་མཆོག་གི་རྒྱལ་སྲིད་དབང་ཆ་ཆེན་པོའི་སྒོ་ནས་འོང་ཚར་བ་མ་མཐོང་བའི་བར་དུ་ཅི་ནས་ཀྱང་འཆི་བ་མྱོང་བར་མི་འགྱུར་རོ་”ཞེས་གསུངས།
MAR 9:2 ཉི་མ་དྲུག་གི་རྗེས་ལ་ཡེ་ཤུས་པེ་ཏྲོ་དང་ཡ་ཀོབ། ཡོ་ཧ་ནན་གསུམ་ཁྲིད་ནས་དབེན་པའི་ཡུལ་གྱི་རི་མཐོ་པོ་ཞིག་ལ་ཕེབས། དེ་ནས་ཁོང་ཚོའི་མདུན་དུ་ཁོང་གི་སྐུའི་རྣམ་པ་གྱུར་ཅིང༌།
MAR 9:3 ཁོང་གི་ན་བཟའ་འོད་འཕྲོ་བའི་ཚོན་མདོག་ཧ་ཅང་དཀར་བ། འཇིག་རྟེན་འདིའི་སྟེང་སུས་ཀྱང་དེ་ལྟར་བཟོ་མི་ཐུབ་པའི་དཀར་པོ་ཞིག་ཏུ་གྱུར།
MAR 9:4 དེའི་སྐབས་ལ་ཁོང་ཚོའི་མདུན་དུ་ལུང་སྟོན་པ་ཨེ་ལི་ཡཱ་དང་མོ་ཤེ་གཉིས་མངོན་སུམ་དུ་བྱོན་ནས་ཡེ་ཤུ་དང་བཀའ་མོལ་གནང༌།
MAR 9:5 པེ་ཏྲོས་ཡེ་ཤུ་ལ་“རབ་བི། ང་ཚོ་འདིར་བསྡད་ན་ལེགས། ང་ཚོས་བཞུགས་ས་གསུམ་བཟོ་བར་བྱ། ཁྱེད་ལ་གཅིག་དང་མོ་ཤེ་ལ་གཅིག ཨེ་ལི་ཡཱ་ལ་གཅིག་བཅས་ཡིན་”ཞེས་ཞུས།
MAR 9:6 པེ་ཏྲོས་ཇི་ལྟར་ཞུ་དགོས་མིན་མ་ཤེས། གང་ཡིན་ཟེར་ན། ཁོ་ཚོ་ཧ་ཅང་སྐྲག་པས་སོ།
MAR 9:7 དེ་ནས་སྤྲིན་པ་ཞིག་ཡོང་ནས་ཁོང་ཚོ་བསྒྲིབས་པ་དང༌། སྤྲིན་པ་ནས་གསུང་ཞིག་བྱུང་སྟེ་“འདི་ནི་ངའི་གཅེས་པའི་སྲས་ཡིན། ཁོང་ལ་ཉོན་ཅིག་”ཅེས་གསུངས།
MAR 9:8 ཁོ་ཚོས་དུས་དེ་ཉིད་དུ་ཕར་ཚུར་བལྟས་པས་ཡེ་ཤུ་གཅིག་པུ་མ་གཏོགས་གཞན་སུ་ཡང་མ་མཐོང༌།
MAR 9:9 དེ་ནས་ཁོང་རྣམས་རི་བོ་ལས་མར་འབབ་པའི་དུས་སུ། ཡེ་ཤུས་“མིའི་རིགས་ཀྱི་བུ་གཤིན་པོའི་ཁྲོད་ནས་མ་ལང་བའི་བར་དུ་ཁྱེད་ཚོས་གང་མཐོང་བ་དེ་མི་གཞན་སུ་ལའང་མ་ཤོད་ཅིག་”ཅེས་བཀའ་བསྒོས།
MAR 9:10 ཉེ་གནས་རྣམས་ཀྱིས་ཁོང་གི་བཀའ་སེམས་ལ་བཞག་ནས། ཁོང་གཤིན་པོའི་ཁྲོད་ནས་ལང་བ་ཞེས་པའི་དོན་ཅི་ཡིན་པ་གཅིག་གིས་གཅིག་ལ་དྲིས།
MAR 9:11 ཁོ་ཚོས་“ཆོས་ཁྲིམས་ལ་མཁས་པའི་མི་རྣམས་ཀྱིས་ལུང་སྟོན་པ་ཨེ་ལི་ཡཱ་སྐྱབས་མགོན་མཱ་ཤི་ཀའི་སྔོན་ལ་འབྱོན་ངེས་ཡིན་ཟེར་དོན་ཅི་”ཞེས་ཞུས་པ་ལ།
MAR 9:12 ཁོང་གིས་“ལུང་སྟོན་པ་ཨེ་ལི་ཡཱ་དངོས་སུ་སྔོན་ལ་བྱོན་ཏེ་ཐམས་ཅད་སྒྲིག་པར་བྱེད། འོ་ན་དཀོན་མཆོག་གི་གསུང་རབ་ལས་མིའི་རིགས་ཀྱི་བུ་ནི་སྡུག་བསྔལ་མང་པོ་མྱོང་བར་འགྱུར་ཞིང་མི་རྣམས་ཀྱིས་མཐོང་ཆུང་བྱེད་རྒྱུ་ཡིན་ཞེས་བྲིས་པ་ཅི་ཡིན།
MAR 9:13 ངས་ཁྱེད་རྣམས་ལ་ཟེར་རྒྱུར། གསུང་རབ་ལས་ལུང་སྟོན་པ་ཨེ་ལི་ཡཱ་ཡི་སྐོར་བསྟན་ཡོད་པ་ལྟར་ཁོང་ཕེབས་ཡོད་པས། ཁོ་ཚོས་ཁོང་ལ་རང་འདོད་པ་ལྟར་བྱས་སོ་”ཞེས་གསུངས།
MAR 9:14 དེ་ནས་ཁོང་རྣམས་ཉེ་གནས་གཞན་གྱི་སར་ཕེབས་པ་དང༌། མི་མང་པོས་དེ་རྣམས་ཀྱི་མཐའ་ནས་བསྐོར་ཞིང་ཡང་ཆོས་ཁྲིམས་ལ་མཁས་པའི་མི་འགའ་ཞིག་གིས་ཁོ་ཚོ་དང་རྩོད་གླེང་བྱེད་བཞིན་པ་གཟིགས།
MAR 9:15 དེ་ནས་མི་ཚོགས་ཐམས་ཅད་ཀྱིས་ཡེ་ཤུ་མཐོང་མ་ཐག་ཚང་མ་ངོ་མཚར་སྐྱེས་ནས་ཁོང་གི་དྲུང་དུ་རྒྱུགས་ཏེ་ཁོང་མཇལ།
MAR 9:16 ཡེ་ཤུས་མི་དེ་རྣམས་ལ་“ཁྱེད་ཚོས་གང་གི་སྐོར་ལ་རྩོད་བཞིན་ཡོད་དམ་”ཞེས་དྲིས་པ་ལ།
MAR 9:17 མི་ཚོགས་ཀྱི་ཁྲོད་ནས་མི་ཞིག་གིས་“སྟོན་པ་ལགས། ངས་ཁྱེད་ཀྱི་དྲུང་དུ་ངའི་བུ་ཁྲིད་ཡོང་བ་ཡིན། བུ་གདོན་འདྲེ་ཞིག་གིས་བཟུང་སྟེ་སྐད་ཆ་ལབ་མི་ཐུབ་པར་གྱུར།
MAR 9:18 གདོན་འདྲེས་ག་དུས་ཁོ་འཛིན་ནའང༌། ཁོ་ས་ལ་འགྱེལ་ཞིང་ཁ་ནས་ལྦུ་བ་འཐོན་ཏེ་སོ་ཁྲིག་ཁྲིག་བྱེད་ཅིང༌། ལུས་པོའང་རེངས་པོར་འགྱུར་བས། ངས་ཁྱེད་ཀྱི་ཉེ་གནས་རྣམས་ལ་གདོན་འདྲེ་དེ་ཕྱིར་སྐྲོད་པར་ཞུས་ཀྱང་ཁོང་ཚོས་བསྐྲད་མ་ཐུབ་བོ་”ཞེས་ཞུས།
MAR 9:19 དེ་ནས་ཡེ་ཤུས་“དད་པ་མི་བྱེད་པའི་མི་རབས་ཁྱོད་ཚོ། ང་རང་ཁྱོད་ཚོ་དང་མཉམ་དུ་དུས་ནམ་ཞིག་གི་བར་དུ་སྡོད་དགོས་སམ། ངས་ཁྱོད་ཚོར་དུས་ནམ་ཞིག་གི་བར་དུ་བཟོད་པར་བྱེད་དགོས་སམ། བུ་དེ་ངའི་མདུན་དུ་ཁྲིད་ཤོག་”ཅེས་གསུངས་ནས།
MAR 9:20 མི་རྣམས་ཀྱིས་བུ་དེ་ཁོང་གི་དྲུང་དུ་ཁྲིད་ཡོང༌། གདོན་འདྲེ་དེས་ཡེ་ཤུ་མཐོང་མ་ཐག་བུ་དྲག་པོར་སྤྲུགས་པས་བུ་ས་ལ་འགྱེལ་ནས་འགྲེ་ལྡོག་བརྒྱབ་སྟེ་ཁ་ནས་ལྦུ་བ་ཐོན།
MAR 9:21 དེ་ནས་ཡེ་ཤུས་བུ་དེའི་ཕ་ལ་“དུས་ནམ་ཞིག་ལ་འདི་ལྟར་གྱུར་བ་ཡིན་ནམ་”ཞེས་དྲིས་པ་ལ་“ཁོ་ཆུང་དུས་ནས་བཟུང་འདི་ལྟར་ཡིན།
MAR 9:22 གདོན་འདྲེ་དེས་ངའི་བུ་གསོད་པའི་ཕྱིར་ཐེངས་མང་པོར་མེ་དང་ཆུའི་ནང་དུ་དབྱུགས་མྱོང༌། ཁྱེད་ཀྱིས་ང་ཚོར་རོགས་པ་ཅི་མཛད་ཐུབ་ན་དེ་གནང་བར་མཛོད། ཐུགས་རྗེ་གཟིགས་”ཞེས་ཞུས།
MAR 9:23 ཡེ་ཤུས་“མཛད་ཐུབ་ན་ཞེས་ཅི་ཟེར། དད་པ་བྱེད་མཁན་དེས་དོན་ཐམས་ཅད་སྒྲུབ་པར་སྲིད་”ཅེས་གསུངས།
MAR 9:24 བུའི་ཕ་ཡིས་དེ་མ་ཐག་སྐད་ཆེན་པོས་“ངས་དད་པ་བྱེད། འོན་ཀྱང་ངའི་དད་པ་མི་འདང་བས་སྐྱབས་པར་མཛོད་”ཅེས་ཞུས་པ་ལ།
MAR 9:25 ཡེ་ཤུས་མི་ཚོགས་རྒྱུགས་འོངས་བ་གཟིགས་པ་དང༌། གདོན་འདྲེ་མི་གཙང་བ་དེ་ལ་“འོན་ཞིང་ལྐུགས་པའི་གདོན་འདྲེ་ཁྱོད། ཁོའི་ལུས་ནས་ཐོན་ཅིག ད་ཕྱིན་ཆད་དེའི་ལུས་ལ་ཕྱིར་ལོག་མི་ཆོག་”ཅེས་བཀའ་བཀྱོན་གནང་ནས།
MAR 9:26 གདོན་འདྲེ་དེ་སྐད་ངན་ཤོར་ནས་བུ་དེ་དྲག་ཏུ་སྤྲུགས་ཏེ་ཕྱིར་ཐོན་པ་དང༌། བུ་དེ་རོ་ལྟར་གྱུར་བས་མི་མང་ཆེ་བས་“ཁོ་ཤི་སོང་”ཞེས་ཟེར།
MAR 9:27 འོན་ཀྱང་ཡེ་ཤུས་བུ་དེའི་ལག་པ་ནས་འཇུས་ཏེ་བསྐྱོར་བ་དང་ཁོ་ཡར་ལངས།
MAR 9:28 དེ་ནས་ཡེ་ཤུ་ཁང་པའི་ནང་དུ་འཛུལ་ཞིང་མི་གཞན་སུའང་མེད་པའི་དུས་ལ་ཉེ་གནས་རྣམས་ཀྱིས་“ང་ཚོས་ཅིའི་ཕྱིར་གདོན་འདྲེ་བསྐྲད་མ་ཐུབ་བམ་”ཞེས་ཞུས་ནས།
MAR 9:29 ཁོང་གིས་“གདོན་འདྲེ་འདིའི་རིགས་དཀོན་མཆོག་ལ་སྨོན་ལམ་མ་གཏོགས་པར་གཞན་ཐབས་གང་གིས་ཀྱང་འཐོན་པར་མི་སྲིད་”ཅེས་གསུངས།
MAR 9:30 དེ་ནས་ཁོང་རྣམས་ཕྱིར་ཐོན་ཏེ། ག་ལིལ་ཡུལ་བརྒྱུད་ནས་ཕེབས་ཤིང༌། ཡེ་ཤུས་ཉེ་གནས་ཚོར་ཆོས་བསྟན་པས་ཁོང་ཚོ་གང་དུ་ཡོད་པ་མི་གཞན་གྱིས་མི་ཤེས་པར་དགོངས།
MAR 9:31 ཉེ་གནས་རྣམས་ལ་“མིའི་རིགས་ཀྱི་བུ་ནི་མི་རྣམས་ཀྱི་ལག་ཏུ་གཏད་ནས་དེ་རྣམས་ཀྱིས་ཁོ་རང་གསོད་པར་འགྱུར། བསད་ནས་ཉིན་ཞག་གསུམ་པ་ལ་ཁོ་རང་ལང་བར་འགྱུར་ངེས་སོ་”ཞེས་གསུངས།
MAR 9:32 ཉེ་གནས་རྣམས་ཀྱིས་གསུང་དེའི་དོན་ཧ་མ་གོ་ཡང་ཁོང་ལ་བཀའ་དྲི་ཞུ་མ་ཕོད།
MAR 9:33 དེ་ནས་ཁོང་རྣམས་གྲོང་ཁྱེར་ཀ་ཕར་ན་ཧུམ་དུ་སླེབས་ནས། ཡེ་ཤུས་ཁང་པའི་ནང་དུ་བཞུགས་པའི་ཚེ་ཉེ་གནས་ཚོར་“ཁྱེད་ཚོས་ལམ་ཁར་ཅི་ཞིག་གླེང་བ་ཡིན་”ཞེས་དྲིས་པས།
MAR 9:34 ཁོ་ཚོས་ལམ་ལ་ཕན་ཚུན་གཅིག་གིས་གཅིག་ལ་ཁོ་ཚོ་ནང་ནས་སུ་མཆོག་ཏུ་ཡིན་པའི་གཏམ་གླེང་བས་ཁོ་ཚོ་ཁ་རོག་བསྡད།
MAR 9:35 ཁོང་བཞུགས་ནས་ཉེ་གནས་བཅུ་གཉིས་པོ་བོས་ཏེ་“མི་སུ་ཡང་མཆོག་ཏུ་འགྱུར་འདོད་ན། ཐམས་ཅད་ཀྱི་ནང་ནས་རྟིང་མར་གྱུར་ལ་ཀུན་གྱི་གཡོག་པོ་བྱེད་དགོས་སོ་”ཞེས་གསུངས།
MAR 9:36 དེ་ནས་ཡེ་ཤུས་ཕྲུ་གུ་ཆུང་ངུ་ཞིག་ཁྲིད་ཡོང་སྟེ་ཁོང་ཚོའི་དཀྱིལ་དུ་བཞག་པ་དང༌། ཡང་ཕྲུ་གུ་དེ་ཁོང་གི་སྐུ་པང་དུ་བསྣམས་ནས་
MAR 9:37 “སུས་ཀྱང་ཕྲུ་གུ་ཆུང་ངུ་འདི་འདྲ་བ་རྣམས་ཀྱི་ནང་ནས་གཅིག་ངའི་མིང་གི་ཐོག་ནས་གདན་འདྲེན་པ་དེས་ང་རང་འདྲེན། སུས་ཀྱང་ང་འདྲེན་པ་དེས་ང་རང་གདན་མི་འདྲེན་གྱིས། ང་གཏོང་མཁན་དེ་སྤྱན་འདྲེན་ནོ་”ཞེས་གསུངས།
MAR 9:38 དེ་ནས་ཉེ་གནས་ཡོ་ཧ་ནན་གྱིས་ཁོང་ལ་“སྟོན་པ་ལགས། ང་ཚོས་མི་གཞན་ཞིག་གིས་ཁྱེད་ཀྱི་མཚན་བརྗོད་ཅིང་གདོན་འདྲེ་བསྐྲད་པ་མཐོང་བྱུང༌། མི་དེ་ང་ཚོའི་ཁོངས་གཏོགས་མིན་པས་དོན་དེ་ལྟར་སྒྲུབ་པ་བཀག་པ་ཡིན་”ཞེས་ཞུས་པ་ལ།
MAR 9:39 ཡེ་ཤུས་“མི་གཞན་གྱིས་ངའི་མིང་བརྗོད་ཅིང་ངོ་མཚར་ཅན་གྱི་དོན་བྱས་རྗེས་མྱུར་དུ་ང་ལ་ཚིག་ངན་སྨྲ་བར་མི་ཐུབ་པས་འགོག་པར་མ་བྱེད།
MAR 9:40 སུས་ཀྱང་ང་ཚོ་ལ་དགྲ་མི་བྱེད་པ་དེས་ངེད་ཀྱི་ཕྱོགས་བྱེད།
MAR 9:41 ངས་ཁྱེད་རྣམས་ལ་བདེན་པར་ཟེར་རྒྱུར། མི་སུ་ཞིག་གིས་ཁྱེད་ཚོ་སྐྱབས་མགོན་མཱ་ཤི་ཀའི་ཡིན་པའི་ཕྱིར་ཁྱེད་ཚོ་ལ་ཆུ་ཕོར་པ་གང་སྟེར་ན། མི་དེའི་བྱ་དགའ་ཅི་ནས་ཀྱང་བརླག་པར་མི་འགྱུར་”ཞེས་གསུངས་སོ། །
MAR 9:42 དེ་ནས་ཡེ་ཤུས་“མི་སུ་ཞིག་གིས་ང་ལ་དད་པ་བྱེད་པའི་བུ་ཕྲུག་འདི་ཚོ་ལས་གཅིག་སླུ་བར་བྱས་ན། མི་དེའི་སྐེ་ལ་རང་འཐག་གི་རྡོ་ཆེན་པོ་ཞིག་བཏགས་ནས་རྒྱ་མཚོའི་ནང་དུ་དབྱུགས་ན་ལེགས་སོ།
MAR 9:43 དཔེར་ན། གལ་ཏེ་ཁྱེད་ཀྱི་ལག་པས་ཁྱེད་སླུ་བར་བྱས་ན། ལག་པ་དེ་ཆོད་ཅིག ཁྱེད་རང་ལག་པ་གཉིས་དང་ལྡན་ཏེ་དམྱལ་བར་ཞི་བ་མེད་པའི་མེ་རུ་འཇུག་པ་ལས། ལག་རྡུམ་དུ་གྱུར་ཡང་ཚེ་དཔག་ཏུ་མེད་པར་འཇུག་པ་དེ་ལེགས།
MAR 9:45 གལ་ཏེ་ཁྱེད་ཀྱི་རྐང་པས་ཁྱེད་ལ་སྡིག་ཉེས་བྱེད་དུ་བཅུག་ན། རྐང་པ་དེ་ཆོད་ཅིག རྐང་པ་གཉིས་དང་ལྡན་པར་དམྱལ་བའི་གནས་སུ་འཇུག་པ་ལས། ཞ་བོར་གྱུར་ཡང་ཚེ་དཔག་ཏུ་མེད་པ་ཐོབ་པ་དེ་ལེགས།
MAR 9:47 གལ་ཏེ་ཁྱེད་ཀྱི་མིག་གིས་ཁྱེད་སླུ་བར་བྱས་ན། མིག་དེ་བཏོན་ནས་དོར་ཅིག ཁྱེད་རང་མིག་ཟུང་དང་ལྡན་པར་དམྱལ་བའི་གནས་སུ་འཇུག་པ་ལས། མིག་ཡ་གཅིག་མེད་ནའང་དཀོན་མཆོག་གི་རྒྱལ་སྲིད་དུ་འགྲོ་བ་དེ་ལེགས།
MAR 9:48 དམྱལ་བའི་གནས་སུ་འབུ་ཡང་མི་འཆི་ལ་མེ་ཡང་མི་ཤིའོ།
MAR 9:49 གང་ལགས་ཟེར་ན། མི་སུ་ཡིན་ཡང་མེ་ཡིས་ཚྭ་རྒྱག་པར་འགྱུར།
MAR 9:50 ཚྭ་ནི་ཡག་པོ་ཡིན་ཡང་ཚྭའི་བྲོ་བ་ཡལ་ན། དེའི་བྲོ་བ་གང་གིས་གསོ་བར་བྱེད་དམ། ཁྱེད་ཚོར་ཚྭའི་ཁྱད་ཆོས་ལྡན་ཏེ་ཕན་ཚུན་མཐུན་ནས་སྡོད་ཅིག་”ཅེས་གསུངས་སོ། །
MAR 10:1 དེ་ནས་ཡེ་ཤུ་ཡར་བཞེངས་ཏེ་ཡོར་དན་གཙང་པོའི་ཕར་ཕྱོགས་ཀྱི་ཡ་ཧུ་དཱ་ཡུལ་དུ་ཕེབས་པ་དང༌། མི་ཚོགས་མང་པོ་ཡང་བསྐྱར་ཁོང་གི་དྲུང་དུ་འཛོམས་ཤིང༌། ཁོང་རང་གི་ལུགས་སྲོལ་ལྟར་དེ་རྣམས་ལ་ཆོས་གསུངས།
MAR 10:2 ཕཱ་རུ་ཤི་པ་རྣམས་ཀྱིས་ཁོང་ལ་ཉམས་ཚོད་བྱེད་ཕྱིར་ཁོང་གི་དྲུང་དུ་ཡོང་སྟེ་“དཀོན་མཆོག་གི་བཀའ་ཁྲིམས་ལྟར་ན་སྐྱེས་པས་རང་གི་བཟའ་ཟླ་བཞག་ཆོག་གམ་”ཞེས་ཞུས།
MAR 10:3 ཁོང་གིས་“ལུང་སྟོན་པ་མོ་ཤེ་ཡིས་ཁྱེད་རྣམས་ལ་བཀའ་གང་གནང་ཡོད་”ཅེས་གསུངས་པས།
MAR 10:4 ཁོ་ཚོས་“མོ་ཤེ་ཡིས་བཟའ་ཚང་ཁ་བྲལ་བའི་ཡི་གེ་བྲིས་ནས་བཞག་ཆོག་ཅེས་བཀའ་གནང་ངོ་”ཞེས་ཞུས་པ་ལ།
MAR 10:5 ཡེ་ཤུས་“ཁྱོད་ཚོའི་སེམས་མཁྲེགས་པོ་ཡིན་པས་མོ་ཤེ་ཡིས་བཀའ་འདི་ལྟར་གནང་བ་ཡིན་ཏེ།
MAR 10:6 འོན་ཀྱང་ཐོག་མ་འཇིག་རྟེན་འདི་བཀོད་དུས་ནས་དཀོན་མཆོག་གིས་མི་ཕོ་མོ་གཉིས་མཛད་པ་ཡིན།
MAR 10:7 དེའི་རྐྱེན་གྱིས་སྐྱེས་པས་རང་གི་ཕ་མ་བཞག་ནས་རང་གི་བཟའ་ཟླ་དང་མཉམ་དུ་འདུས་ཤིང༌།
MAR 10:8 ཁོ་གཉིས་ཤ་རུས་གཅིག་ཏུ་གྱུར་ནས་སོ་སོ་བ་མིན་ཏེ་གཅིག་རང་ཡིན།
MAR 10:9 དེའི་ཕྱིར་དཀོན་མཆོག་གིས་གང་སྦྲེལ་བར་མཛད་པ་དེ་མི་སུས་ཀྱང་ཕྲལ་བར་མི་རུང་”ཞེས་གསུངས།
MAR 10:10 ཁང་པའི་ནང་དུ་ཉེ་གནས་རྣམས་ཀྱིས་ཁོང་ལ་སླར་ཡང་གསུང་དེའི་དོན་དྲིས་ནས།
MAR 10:11 ཁོང་གིས་“སྐྱེས་པ་སུ་ཞིག་གིས་རང་གི་བཟའ་ཟླ་བཞག་ནས་བཟའ་ཟླ་གཞན་ཞིག་བླངས་ན་དེ་ནི་ལོག་གཡེམ་བྱས་པ་ཡིན་ལ་བཟའ་ཟླ་དང་པོར་ཉེས་པ་བསགས་པ་ཡང་ཡིན།
MAR 10:12 ཡང་བུད་མེད་ཅིག་གིས་རང་གི་སྐྱེས་པ་བཞག་ནས་སྐྱེས་པ་གཞན་དང་འགྲོགས་ན་དེའང་ལོག་གཡེམ་བྱས་པ་ཡིན་”ཞེས་གསུངས།
MAR 10:13 དེ་ནས་མི་འགའ་ཞིག་གིས་བྱིས་པ་རྣམས་ཁོང་གི་དྲུང་དུ་ཕྱག་གིས་རེག་པའི་ཕྱིར་ཁྲིད་ཡོང་སྟེ། ཉེ་གནས་རྣམས་ཀྱིས་ཁོ་ཚོ་ལ་བཀའ་བཀྱོན་བཏང༌།
MAR 10:14 ཡེ་ཤུས་དེ་གཟིགས་ཏེ་ཐུགས་མ་མཉེས་པར་“དཀོན་མཆོག་གི་རྒྱལ་སྲིད་ནི་འདི་ལྟ་བུ་རྣམས་ལ་གཏོགས་པ་ཡིན་པས། བྱིས་པ་རྣམས་མ་འགོག་པར་ངའི་དྲུང་དུ་འོང་དུ་ཆུག་ཅིག
MAR 10:15 ངས་ཁྱེད་རྣམས་ལ་བདེན་པར་ཟེར་རྒྱུར། སུ་ཞིག་གིས་དཀོན་མཆོག་གི་རྒྱལ་སྲིད་བྱིས་པའི་ཚུལ་དུ་མི་བླངས་ན། དེའི་ནང་དུ་ཅི་ནས་ཀྱང་འགྲོ་མི་ཐུབ་བོ་”ཞེས་གསུངས་ནས།
MAR 10:16 ཁོང་གིས་བྱིས་པ་དེ་རྣམས་སྐུ་པང་དུ་བསྣམས་ཤིང་ཕྱག་བཞག་སྟེ་བྱིན་གྱིས་བརླབས།
MAR 10:17 དེ་ནས་ཡེ་ཤུ་ལམ་དུ་ཕེབས་པའི་སྐབས་སུ། མི་ཞིག་རྒྱུགས་ཡོང་ནས་ཁོང་གི་དྲུང་དུ་པུས་མོ་སར་བཙུགས་ཏེ་“སྟོན་པ་བཟང་པོ་ལགས། དཔག་ཏུ་མེད་པའི་ཚེ་ཐོབ་ཕྱིར་ངས་གང་ཞིག་བྱ་དགོས་སམ་”ཞེས་ཞུས།
MAR 10:18 འོན་ཀྱང་ཁོང་གིས་“ཁྱེད་ཀྱིས་ང་ལ་ཅིའི་ཕྱིར་བཟང་པོ་ཟེར། དཀོན་མཆོག་གཅིག་པུ་ལས་གཞན་བཟང་པོ་གཅིག་ཀྱང་མེད།
MAR 10:19 མིའི་སྲོག་མ་གཅོད། ལོག་གཡེམ་མ་བྱེད། རྐུ་མ་མ་རྐུས། རྫུན་གྱི་དཔང་པོ་མ་བྱེད། མགོ་སྐོར་མ་གཏོང༌། རང་གི་ཕ་མར་བརྩི་བཀུར་བྱོས་ཤིག་ཅེས་གསུངས་པའི་བཀའ་ཁྲིམས་འདི་ཚོ་ཁྱེད་ཀྱིས་ཤེས་”ཞེས་གསུངས།
MAR 10:20 ཡང་མི་དེས་“སྟོན་པ་ལགས། ངས་ཆུང་དུས་ནས་བཀའ་འདི་ཐམས་ཅད་བསྲུངས་པ་ཡིན་”ཞེས་ཞུས།
MAR 10:21 ཡེ་ཤུས་ཁོ་ལ་གཟིགས་ནས་བྱམས་པར་མཛད་ཅིང་“ཁྱོད་ལ་ད་དུང་དོན་གཅིག་མི་ཚང་བས། ཁྱོད་སོང་ནས་རང་ལ་ཡོད་པ་ཐམས་ཅད་བཙོང་སྟེ་དབུལ་པོ་རྣམས་ལ་བྱིན་ཅིག དེ་ནས་ཁྱོད་ལ་དཀོན་མཆོག་གི་ཞིང་ཁམས་ནས་ནོར་ཐོབ་པར་འགྱུར་བ་དང༌། ཤོག ངའི་རྗེས་སུ་འབྲོངས་”ཞེས་གསུངས་པ་ལ།
MAR 10:22 མི་དེར་རྒྱུ་ནོར་མང་པོ་ཡོད་པས་གསུང་དེ་ཐོས་ནས་ངོ་མདོག་འགྱུར་ཞིང་སེམས་པ་སྐྱོ་པོར་གྱུར་ཏེ་ཕྱིར་སོང༌།
MAR 10:23 དེ་ནས་ཡེ་ཤུས་འཁོར་ལ་གཟིགས་ཤིང་ཉེ་གནས་རྣམས་ལ་“ཕྱུག་པོ་རྣམས་དཀོན་མཆོག་གི་རྒྱལ་སྲིད་ནང་དུ་འགྲོ་བ་ཤིན་ཏུ་དཀའོ་”ཞེས་གསུངས་པས།
MAR 10:24 ཁོང་གི་གསུང་དེར་ཉེ་གནས་ཧ་ལས་སོ། འོན་ཀྱང་ཡེ་ཤུས་སླར་ཡང་དེ་རྣམས་ལ་“བུ་ཚོ། དཀོན་མཆོག་གི་རྒྱལ་སྲིད་དུ་འགྲོ་བ་ནི་ཤིན་ཏུ་དཀའོ།
MAR 10:25 མི་ཕྱུག་པོ་ཞིག་དཀོན་མཆོག་གི་རྒྱལ་སྲིད་ནང་ལ་འགྲོ་བ་ལས་རྔ་མོང་ཞིག་ཁབ་མིག་བརྒྱུད་ནས་འགྲོ་བ་སླའོ་”ཞེས་གསུངས་པ་དང༌།
MAR 10:26 ཉེ་གནས་རྣམས་དེ་བས་ཧང་སང་ཞིང་ཁོང་ལ་“འོ་ན་སུ་ཞིག་ལ་ཐར་བ་ཐོབ་ཐུབ་བམ་”ཞེས་ཞུས།
MAR 10:27 ཡེ་ཤུས་ཁོ་རྣམས་ལ་གཟིགས་ཏེ་“དེ་ནི་མི་ལ་མི་སྲིད་ཀྱང་དཀོན་མཆོག་ལ་སྲིད་དོ། དཀོན་མཆོག་ལ་ཐམས་ཅད་འགྲུབ་པར་སྲིད་དོ་”ཞེས་གསུངས།
MAR 10:28 དེ་ནས་པེ་ཏྲོས་“གཟིགས་དང༌། ང་ཚོས་ཐམས་ཅད་དོར་ནས་ཁྱེད་ཀྱི་རྗེས་སུ་འབྲངས་པ་ཡིན་”ཞེས་ཞུས་པ་ལ།
MAR 10:29 ཡེ་ཤུས་“ངས་ཁྱེད་ཚོར་བདེན་པར་ཟེར་རྒྱུར། མི་སུ་ཞིག་གིས་ང་དང་འཕྲིན་བཟང་གི་དོན་དུ་རང་གི་ཁྱིམ་ཚང་ངམ། སྤུན་ནམ། སྲིང་མོ་འམ། ཕ་མའམ། བུ་ཕྲུག་གམ། ས་ཞིང་བཅས་བཞག་ན།
MAR 10:30 མི་དེ་ལ་ཚེ་འདིར་ཁྱིམ་ཚང་དང༌། སྤུན། སྲིང་མོ། མ། བུ་ཕྲུག ས་ཞིང་སོགས་ལྡབ་བརྒྱ་འགྱུར་ཐོབ་པར་མ་ཟད་འཚེ་བ་ཡང་ཡོང་ཞིང༌། མ་འོངས་པར་དཔག་ཏུ་མེད་པའི་ཚེ་འཐོབ་པར་ངེས།
MAR 10:31 འོན་ཀྱང་དང་པོ་ཡིན་པའི་མི་མང་པོ་མཐའ་མར་འགྱུར་ཞིང་མཐའ་མ་ཡིན་པ་མང་པོའང་དང་པོར་འགྱུར་འོང་”ཞེས་གསུངས་སོ། །
MAR 10:32 དེ་ནས་ཁོང་རྣམས་ཡེ་རུ་ཤ་ལེམ་ལ་ཕེབས་པའི་ལམ་དུ། ཡེ་ཤུ་ཁོ་རྣམས་ཀྱི་སྔོན་ལ་ཕེབས་ཤིང་ཉེ་གནས་རྣམས་ཡ་མཚན་སྐྱེས་པ་དང་རྗེས་སུ་འབྲང་མཁན་རྣམས་འཇིགས། ཁོང་གིས་ཡང་བསྐྱར་ཉེ་གནས་བཅུ་གཉིས་པོ་ཟུར་ལ་ཁྲིད་དེ། རང་ལ་གང་འབྱུང་རྒྱུ་ཡིན་པའི་གནས་ཚུལ་རྣམས་གསུངས་པ་འདི་ལྟར་ཏེ་
MAR 10:33 “ལྟོས་དང༌། ང་ཚོ་ད་ལྟ་ཡེ་རུ་ཤ་ལེམ་གྲོང་ཁྱེར་དུ་འགྲོ་བཞིན་ཡོད། མིའི་རིགས་ཀྱི་བུ་ནི་ཡ་ཧུ་དཱ་པའི་བླ་ཆེན་དང་ཆོས་ཁྲིམས་ལ་མཁས་པའི་མི་རྣམས་ཀྱི་དབང་དུ་བཏང་ནས། ཁོ་ཚོས་ཁོ་རང་གསོད་དགོས་པའི་ཁྲིམས་ཐག་བཅད་ནས་ཡ་ཧུ་དཱ་པ་མིན་པ་རྣམས་ལ་གཏད་ཡོང༌།
MAR 10:34 ཁོ་ཚོས་ཁོ་རང་ལ་འཕྱ་དམོད་བྱེད་པ་དང༌། མཆིལ་མ་གཏོར་བ་དང་རྟ་ལྕག་གིས་བརྡུངས་ནས་གསོད་པར་འགྱུར། དེ་ནས་ཉིན་ཞག་གསུམ་སོང་ནས་སླར་ཡང་གསོན་པོར་ལང་ངེས་ཡིན་”ཞེས་གསུངས།
MAR 10:35 དེ་ནས་ཟེ་བད་ཡཱ་ཞེས་པ་དེའི་བུ་ཡ་ཀོབ་དང་ཡོ་ཧ་ནན་གཉིས་ཡེ་ཤུའི་དྲུང་དུ་ཡོང་སྟེ་“སྟོན་པ་ལགས། ངེད་གཉིས་ཀྱིས་ཁྱེད་ལ་གང་ཞུས་པ་དེ་གནང་བར་ཞུ་”ཞེས་ཞུས་པ་ལ།
MAR 10:36 ཁོང་གིས་“ངས་ཁྱོད་ཚོའི་དོན་དུ་ཅི་བྱེད་དགོས་སམ་”ཞེས་གསུངས།
MAR 10:37 ཡང་དེ་གཉིས་ཀྱིས་“ཁྱེད་ཀྱི་གཟི་བརྗིད་ཀྱི་ཁྲོད་དུ་ངེད་གཉིས་ལས་གཅིག་ཁྱེད་ཀྱི་གཡས་ཕྱོགས་དང་གཅིག་གཡོན་ཕྱོགས་སུ་སྡོད་དུ་འཇུག་པར་མཛོད་”ཅེས་ཞུས།
MAR 10:38 ཡེ་ཤུས་“ཁྱེད་གཉིས་ཀྱིས་གང་ཞུ་བའི་དོན་མི་ཤེས་ཏེ། ངས་འཐུང་དགོས་པའི་སྡུག་བསྔལ་གྱི་ཕོར་པ་དེ་ལས་འཐུང་ཐུབ་བམ། ངས་ལེན་དགོས་པའི་ཁྲུས་གསོལ་ལེན་ཐུབ་བམ་”ཞེས་གསུངས་པ་ན།
MAR 10:39 དེ་གཉིས་ཀྱིས་ཁོང་ལ་“ཐུབ་བོ་”ཞེས་ཞུས། ཡེ་ཤུས་“ངས་འཐུང་བའི་ཕོར་པ་དེ་ཁྱེད་གཉིས་ཀྱིས་འཐུང་ཡོང༌། ངས་ལེན་པའི་ཁྲུས་གསོལ་ཡང་ལེན་ཡོང༌།
MAR 10:40 འོན་ཀྱང་ངའི་གཡས་གཡོན་ལ་སྡོད་དུ་འཇུག་པའི་དབང་ཆ་དེ་ང་ལ་མེད། མི་སུ་ལ་བཤམས་པ་ཡིན་པ་དེ་ལ་འཐོབ་བོ་”ཞེས་གསུངས།
MAR 10:41 ཉེ་གནས་བཅུ་པོས་གཏམ་དེ་ཐོས་དུས་ཡ་ཀོབ་དང་ཡོ་ཧ་ནན་གཉིས་ལ་ཁོང་ཁྲོ་སྐྱེས།
MAR 10:42 ཡེ་ཤུས་ཁོ་ཚོ་རང་གི་དྲུང་དུ་བོས་ཏེ་“ཁྱེད་ཚོས་ཤེས་པ་ལྟར། ཡ་ཧུ་དཱ་པ་མིན་པ་རྣམས་ཀྱི་ནང་ནས་དཔོན་པོའི་རིགས་སུ་གྱུར་བ་རྣམས་ཀྱིས་ཁོ་ཚོར་དབང་བྱེད་ཅིང༌། མི་ཆེན་པོ་རྣམས་ཀྱིས་ཁོ་ཚོར་དབང་བསྒྱུར།
MAR 10:43 འོན་ཀྱང་ཁྱེད་ཚོའི་ནང་དུ་དེ་ལྟར་མ་ཡིན། ཁྱེད་ཚོ་ལས་སུ་ཞིག་ཆེན་པོར་འགྱུར་འདོད་པ་དེ་ཁྱེད་ཚོའི་གཡོག་པོར་འགྱུར་དགོས་ཤིང༌།
MAR 10:44 ཁྱེད་ཚོ་ལས་སུ་ཞིག་དང་པོར་འགྱུར་འདོད་པ་དེ་མི་ཀུན་གྱི་བྲན་གཡོག་ཏུ་འགྱུར་དགོས།
MAR 10:45 གང་ལགས་ཟེར་ན། མིའི་རིགས་ཀྱི་བུ་ཡང་གཞན་གྱིས་རང་ལ་གཡོག་བྱེད་པའི་ཕྱིར་ཡོང་བ་མ་ཡིན་པར། གཞན་ལ་གཡོག་བྱེད་པ་དང་རང་སྲོག་ཕུལ་ནས་མི་མང་པོ་ལ་ཐར་པ་ཐོབ་པའི་ཕྱིར་ཡོང་བ་ཡིན་”ཞེས་གསུངས།
MAR 10:46 དེ་ནས་ཡེ་རུ་ཀོ་གྲོང་ཁྱེར་དུ་ཕེབས་ཤིང༌། ཁོང་ཉེ་གནས་དང་མི་ཚོགས་མང་པོ་མཉམ་དུ་ཡེ་རུ་ཀོ་ནས་ཐོན་པའི་སྐབས་སུ། ཐི་མེ་ཟིའི་བུ་མིང་ལ་པར་ཐི་མེ་ཟི་ཞེས་པའི་སྤྲང་པོ་ལོང་བ་ཞིག་ལམ་ཁར་བསྡད་ཡོད།
MAR 10:47 སྤྲང་པོ་དེས་ན་ཙ་རེལ་པ་ཡེ་ཤུ་ཕེབས་པའི་གཏམ་ཐོས་ནས་སྐད་ཆེན་པོས་“ཀྱེ། ཡེ་ཤུ་དཱ་བིད་ཀྱི་སྲས། ང་ལ་ཐུགས་རྗེས་གཟིགས་དང་”ཞེས་ཞུས།
MAR 10:48 མི་མང་པོས་ཁོ་ལ་ཁ་རོག་སྡོད་ཅེས་ནན་གྱིས་བསྐུལ་ནའང༌། ཁོས་དེ་བས་སྐད་ཆེན་པོས་“ཀྱེ། དཱ་བིད་ཀྱི་སྲས་ཁྱེད་ཀྱིས་ང་ལ་ཐུགས་རྗེས་གཟིགས་རོགས་”ཞེས་ཞུས།
MAR 10:49 དེ་ནས་ཡེ་ཤུས་ཕེབས་མཚམས་བཞག་སྟེ་“ལོང་བ་དེ་ཚུར་ལ་བོས་ཤིག་”ཅེས་གསུངས་པ་དང༌། ཁོ་ཚོས་ལོང་བ་དེ་སྐད་བཏང་ཞིང་དེ་ལ་“བློ་བདེ་བར་གྱིས། ཁོང་གིས་ཁྱོད་ལ་ཚུར་ཤོག་ཅེས་གསུངས། ཡར་ལོངས་”ཞེས་བཤད།
MAR 10:50 ཁོས་རང་གི་སྟོད་གོས་བསྐྱུར་ནས་མགྱོགས་པོར་ཡར་ལངས་ཏེ་ཁོང་གི་སྐུ་མདུན་དུ་ཡོང༌།
MAR 10:51 ཡེ་ཤུས་“ངས་ཁྱེད་ལ་གང་བྱེད་དགོས་སམ་”ཞེས་གསུངས་པ་དང༌། མི་ལོང་བ་དེས་“སློབ་དཔོན་ལགས། ངའི་མིག་གིས་མཐོང་ནུས་པར་མཛོད་”ཅེས་ཞུས་པ་ན།
MAR 10:52 ཡེ་ཤུས་“ད་ལྟ་ཁྱེད་རང་སོང་དང༌། ཁྱེད་ཀྱི་དད་པས་གསོས་ཟིན་ནོ་”ཞེས་གསུངས་མ་ཐག་ཁོའི་མིག་གིས་མཐོང་བར་གྱུར་བས། ཁོ་རང་ལམ་བར་ནས་ཡེ་ཤུའི་རྗེས་སུ་འབྲངས་སོ། །
MAR 11:1 ཁོང་རྣམས་ཡེ་རུ་ཤ་ལེམ་གྲོང་ཁྱེར་གྱི་ཉེ་འགྲམ་དུ་ཕེབས་སྐབས། སྐྱུར་རུ་ཤིང་གི་རིའི་ངོས་སུ་ཡོད་པའི་གྲོང་སྡེ་པེ་ཕ་གེ་དང་པེ་ཐན་ཡཱ་ས་ཆ་དེར་ཡེ་ཤུས་ཉེ་གནས་གཉིས་མངགས་ཏེ།
MAR 11:2 ཁོ་ཚོར་“ཁྱེད་ཚོ་མདུན་ལ་ཡོད་པའི་གྲོང་སྡེ་དེ་ལ་སོང་དང༌། དེར་སླེབས་མ་ཐག་ཏུ་མི་སུས་ཀྱང་བཞོན་མ་མྱོང་བའི་བོང་གསར་ཞིག་བཏགས་ཡོད་པ་མཐོང་བར་འགྱུར། དེ་བཀྲོལ་ནས་འདིར་ཁྲིད་ཤོག
MAR 11:3 གལ་སྲིད་མི་གཞན་གྱིས་ཁྱེད་གཉིས་ལ་ཅིའི་ཕྱིར་དེ་ལྟར་བྱེད་པ་ཡིན་ནམ་ཞེས་དྲིས་ན། ཁྱེད་ཀྱིས་འདི་ང་ཚོའི་གཙོ་བོ་ལ་མཁོ་བ་ཡིན་ཞེས་སྨྲོས་དང༌། ཁོང་གིས་འཁྱུག་ཙམ་ནས་ལོག་གཏོང་ངོ་”ཞེས་གསུངས།
MAR 11:4 ཁོ་ཚོ་སོང་ནས་སྒོའི་ཕྱི་རོལ་གྱི་སྲང་ལམ་དུ་བོང་གསར་ཞིག་བཏགས་འདུག་པ་མཐོང་སྟེ་བཀྲོལ་བ་དང༌།
MAR 11:5 དེར་ཡོད་པའི་མི་རྣམས་ལས་འགའ་ཞིག་གིས་ཁོ་ཚོ་ལ་“ཅིའི་ཕྱིར་བོང་གསར་དེ་བཀྲོལ་བ་ཡིན་ནམ་”ཞེས་དྲིས་པ་ན།
MAR 11:6 ཁོ་ཚོས་ཡེ་ཤུའི་བཀའ་ལྟར་ལན་བཏབ་པས། མི་དེ་རྣམས་ཀྱིས་ཁོ་གཉིས་བཏང༌།
MAR 11:7 བོང་གསར་ཁྲིད་ནས་ཡེ་ཤུའི་དྲུང་དུ་སླེབས་རྗེས་ཁོ་གཉིས་ཀྱིས་རང་གི་གོས་བོང་གསར་གྱི་རྒྱབ་ཏུ་བཏིང་བ་དང་ཁོང་དེ་ལ་བཅིབས།
MAR 11:8 མི་མང་པོས་རང་གི་གྱོན་པ་ལམ་ལ་བཏིང་ཞིང༌། གཞན་རྣམས་ཀྱིས་ཞིང་ནང་དུ་ཡོད་པའི་སྡོང་པོའི་སྟེང་ནས་ལོ་མ་མང་བའི་ཡལ་ག་བཅད་དེ་ལམ་དུ་བཀྲམ།
MAR 11:9 ཁོང་གི་སྔོན་ནས་འགྲོ་བ་དང་རྗེས་སུ་འབྲངས་པའི་མི་རྣམས་ཀྱིས་སྐད་ཆེན་པོས་“ཧོ་ཟན་ནཱ། གཙོ་བོའི་མཚན་གྱི་ཐོག་ནས་བྱོན་པ་འདི་ལ་བྱིན་རླབས་ཡོང་བར་ཤོག
MAR 11:10 ང་ཚོའི་མེས་པོ་དཱ་བིད་ཀྱི་རྒྱལ་སྲིད་བྱོན་པ་འདི་ལ་བྱིན་རླབས་ཡོང་བར་ཤོག ཤིན་ཏུ་མཐོ་ཞིང་བླ་ན་མེད་པའི་གནས་སུ་བཞུགས་པའི་དཀོན་མཆོག་ལ་ཧོ་ཟན་ནཱ་”ཞེས་འབོད་སྒྲ་བསྒྲགས།
MAR 11:11 དེ་ནས་ཁོང་ཡེ་རུ་ཤ་ལེམ་ནང་ཕེབས་ཏེ། ཡ་ཧུ་དཱ་པའི་མཆོད་ཁང་ཆེན་མོར་བྱོན་ནས་རིམ་གྱིས་མཐའ་འཁོར་ལ་གཟིགས་ཤིང༌། མཚན་མོའི་དུས་སུ་སླེབས་པས་ཉེ་གནས་བཅུ་གཉིས་པོ་དང་མཉམ་དུ་པེ་ཐན་ཡཱ་ཞེས་པའི་གྲོང་སྡེར་ཕེབས།
MAR 11:12 དེའི་ཕྱི་ཉིན་ཁོང་རྣམས་པེ་ཐན་ཡཱ་གྲོང་སྡེ་ནས་ཕར་ཕེབས་ཏེ་ཡེ་ཤུ་བཀྲེས་པར་གྱུར་ཞིང༌།
MAR 11:13 རྒྱང་རིང་ནས་ལོ་མ་དང་ལྡན་པའི་བསེ་ཡབ་ཤིང་སྡོང་ཞིག་ཡོད་པ་གཟིགས་ཏེ། ཤིང་འབྲས་ཡོད་སྲིད་དགོངས་ནས་དེའི་རྩ་ལ་ཕེབས་པ་དང༌། བསེ་ཡབ་ཤིང་ལ་འབྲས་བུ་སྨིན་མ་རན་པས་ལོ་མ་ལས་གཞན་ཅི་ཡང་མེད་པ་གཟིགས།
MAR 11:14 ཡེ་ཤུས་ཤིང་ལ་གཟིགས་ཏེ་“དུས་ད་ལྟ་ནས་བཟུང་ཁྱོད་ཀྱི་འབྲས་བུ་མི་སུས་ཀྱང་ཟ་རྒྱུ་མེད་པར་གྱུར་ཅིག་”ཅེས་གསུངས་པ་ཉེ་གནས་རྣམས་ཀྱིས་ཐོས།
MAR 11:15 དེ་ནས་ཁོང་རྣམས་ཡེ་རུ་ཤ་ལེམ་གྲོང་ཁྱེར་དུ་ཕེབས་པ་དང་ཁོང་ཉིད་ཡ་ཧུ་དཱ་པའི་མཆོད་ཁང་ཆེན་མོའི་ཁྱམས་རར་བྱོན་ཏེ། དེར་ཡོད་པའི་ཉོ་ཚོང་མཁན་ཐམས་ཅད་ཕྱི་ལ་བཏོན་པ་དང༌། དངུལ་རྗེ་མཁན་གྱི་ཅོག་ཙེ་དང་ཕུག་རོན་ཚོང་མཁན་གྱི་འདུག་སྟེགས་ཀྱང་སར་བསྒྱེལ།
MAR 11:16 མི་སུ་ལའང་མཆོད་ཁང་ཆེན་མོའི་ཁྱམས་ར་བརྒྱུད་ནས་ཚོང་ཟོག་ཅིག་ཀྱང་འཁྱེར་དུ་མ་བཅུག
MAR 11:17 སྐབས་དེར་ཁོང་གིས་མི་རྣམས་ལ་“དཀོན་མཆོག་གི་གསུང་རབ་ལས། ངའི་གནས་ཁང་ལ་མི་རིགས་ཐམས་ཅད་ཀྱི་ཆེད་དུ་སྨོན་ལམ་འདེབས་པའི་གནས་ཁང་ཟེར་བར་འགྱུར་ཞེས་གསུངས་ཡོད་པ་མིན་ནམ། འོན་ཀྱང་ཁྱོད་ཚོས་ཇག་ཚང་ལྟ་བུ་ཞིག་ཏུ་བསྒྱུར་འདུག་”ཅེས་གསུངས་པ་ན།
MAR 11:18 དེར་ཡོད་པའི་ཡ་ཧུ་དཱ་པའི་བླ་ཆེན་རྣམས་དང་ཆོས་ལ་མཁས་པའི་མི་རྣམས་ཀྱིས་གཏམ་དེ་ཐོས་ནས་ཡེ་ཤུ་ཁོང་ཇི་ལྟར་བྱས་ནས་གསོད་པའི་ཐབས་བཙལ། གང་ལགས་ཟེར་ན། ཁོང་ལ་འཇིགས་ཏེ། མི་ཚོགས་ཐམས་ཅད་ཁོང་གི་ཆོས་གསུངས་པ་ལ་ངོ་མཚར་སྐྱེས་པས་སོ།
MAR 11:19 དེ་ནས་མཚན་མོ་ཟིན་དུས་ཡེ་ཤུ་ཉེ་གནས་དང་མཉམ་དུ་གྲོང་ཁྱེར་གྱི་ཕྱི་རོལ་ཏུ་ཕེབས།
MAR 11:20 དེ་ཡང་ཞོགས་པའི་དུས་སུ་ཁོང་རྣམས་ཕར་བྱོན་སྐབས་བསེ་ཡབ་ཤིང་དེ་རྩ་བ་ནས་བསྐམས་ཟིན་པ་མཐོང་ཞིང༌།
MAR 11:21 པེ་ཏྲོ་ཡིས་ཡེ་ཤུའི་གསུང་དེ་དྲན་ནས་“རབ་བི་གཟིགས་དང༌། ཁྱེད་ཀྱིས་དམོད་པ་གནང་བའི་བསེ་ཡབ་ཤིང་བསྐམས་འདུག་”ཅེས་ཞུས་པ་ལ།
MAR 11:22 ཡེ་ཤུས་ཁོ་ཚོ་ལ་“དཀོན་མཆོག་ལ་དད་པ་བྱོས་ཤིག
MAR 11:23 ངས་ཁྱོད་རྣམས་ལ་བདེན་པར་ཟེར་རྒྱུར། མི་སུ་ཞིག་གིས་རི་འདི་ལ་ད་ཁྱོད་ཕར་སོང་ལ་རྒྱ་མཚོར་ལྷུང་བར་གྱུར་ཅིག་ཞེས་སྨྲས་ན། སྨྲས་པ་བཞིན་དུ་འགྲུབ་པར་འགྱུར་ཞེས་སེམས་སུ་ཐེ་ཚོམ་མེད་པར་དད་པ་བྱས་ན། མི་དེའི་དོན་འགྲུབ་པར་འགྱུར་རོ།
MAR 11:24 དེ་བས་ངས་ཁྱེད་རྣམས་ལ་ཟེར་རྒྱུར། ཁྱེད་ཚོས་སྨོན་ལམ་གང་ཡང་འདེབས་པ་དེ་འཐོབ་ཟིན་པར་དད་པ་བྱོས་དང་འཐོབ་པར་འགྱུར་རོ།
MAR 11:25 ཞིང་ཁམས་སུ་བཞུགས་པའི་ཁྱེད་ཀྱི་ཡབ་དཀོན་མཆོག་གིས་ཁྱེད་ཀྱི་སྡིག་ཉེས་རྣམས་སེལ་བར་འགྱུར་བའི་ཕྱིར། ཁྱེད་ཚོ་ལངས་ནས་སྨོན་ལམ་འདེབས་སྐབས། མི་གཞན་དང་འཁོན་འཛིན་ཡོད་ན་འཁོན་དུ་བཟུང་བར་མི་བྱའོ་”ཞེས་གསུངས།
MAR 11:27 དེ་ནས་ཡང་བསྐྱར་ཁོང་རྣམས་ཡེ་རུ་ཤ་ལེམ་གྲོང་ཁྱེར་དུ་སླེབས་ནས་ཡེ་ཤུ་མཆོད་ཁང་ཆེན་མོའི་ཁྱམས་རར་ཕེབས་པ་ན། ཡ་ཧུ་དཱ་པའི་བླ་ཆེན་དང༌། ཆོས་ཁྲིམས་ལ་མཁས་པའི་མི། རྒན་པོ་རྣམས་ཁོང་གི་དྲུང་དུ་ཡོང་སྟེ་
MAR 11:28 “ཁྱེད་ཀྱིས་དབང་ཆ་གང་གི་སྒོ་ནས་དོན་འདི་ཚོ་མཛད། ཡང་ན་སུ་ཞིག་གིས་ཁྱེད་ལ་དོན་འདི་རྣམས་མཛད་པའི་དབང་ཆ་སྤྲད་པ་ཡིན་ནམ་”ཞེས་ཞུས་པ་ལ།
MAR 11:29 ཡེ་ཤུས་“ངས་ཀྱང་ཁྱེད་རྣམས་ལ་དྲི་བ་གཅིག་འདྲི་རྒྱུ་ཡིན། དེའི་ལན་ཐོབ་ཅིག དེ་ནས་ངས་དོན་འདི་རྣམས་དབང་ཅི་ལྟ་བུས་མཛད་པའང་ཁྱེད་རྣམས་ལ་ཤོད་རྒྱུ་ཡིན།
MAR 11:30 ཡོ་ཧ་ནན་གྱིས་ཁྲུས་གསོལ་མཛད་པ་དེ་དཀོན་མཆོག་ནས་བྱུང་ངམ། མི་ནས་བྱུང༌། ང་ལ་ལན་ཐོབ་ཅིག་”ཅེས་གསུངས་པས།
MAR 11:31 མི་དེ་ཚོས་ཕན་ཚུན་གཏམ་གླེང་བྱས་ཤིང་“གལ་ཏེ་དཀོན་མཆོག་ནས་བྱུང་ཞེས་བཤད་ན། ཁོང་གིས་འོ་ན་ཁྱེད་རྣམས་ཀྱིས་ཅིའི་ཕྱིར་ཁོང་ལ་དད་པ་མ་བྱས་སམ་ཞེས་གསུང་ངེས་ལ།
MAR 11:32 ཡང་མི་ལས་བྱུང་ཞེས་བཤད་ན༌༌༌༌” མི་ཐམས་ཅད་ཀྱིས་ཡོ་ཧ་ནན་ལུང་སྟོན་མཁན་བདེན་པར་བརྩིས་པའི་རྐྱེན་གྱིས་མི་རྣམས་ལ་འཇིགས་པས།
MAR 11:33 ཁོ་རྣམས་ཀྱིས་“ང་ཚོས་མི་ཤེས་”ཞེས་ལན་བཏབ་པས། ཡེ་ཤུས་“དེས་ན་ངས་ཀྱང་དོན་འདི་རྣམས་དབང་ཆ་གང་གིས་འདི་རྣམས་བྱེད་པ་མི་ཤོད་དོ་”ཞེས་གསུངས་སོ། །
MAR 12:1 དེ་ནས་ཡེ་ཤུས་དཔེའི་སྒོ་ནས་ཁོ་ཚོར་ཆོས་བསྟན་ཏེ་“མི་ཞིག་གིས་རྒུན་འབྲུམ་གྱི་ལྡུམ་ར་ཞིག་བཟོས་ཤིང༌། ཕྱོགས་བཞིར་ར་བས་བསྐོར་བ་དང༌། རྒུན་ཆང་འཚིར་བྱེད་ཀྱི་ཆང་གཞོང་ཞིག་བརྐོས་ནས་ཐོག་ཁང་ཞིག་ཀྱང་བཟོས་རྗེས། ལྡུམ་རའི་ལས་མཁན་རྣམས་ལ་བོགས་མར་བཏང་ནས་ཡུལ་གཞན་དུ་སོང༌།
MAR 12:2 དེ་ནས་དུས་རན་པས་ཁོང་གིས་ལྡུམ་རའི་ལས་མཁན་རྣམས་ནས་ལྡུམ་རའི་འབྲས་བུ་ནས་ཁོང་གི་རྒུན་འབྲུམ་གྱི་སྐལ་བ་ལེན་པའི་ཕྱིར་གཡོག་པོ་ཞིག་བཏང་བས།
MAR 12:3 དེ་རྣམས་ཀྱིས་གཡོག་པོ་དེ་བཟུང་ནས་བརྡུངས་རྗེས་ལག་ཟུང་སྟོང་བར་ཕྱིར་བཏང༌།
MAR 12:4 ཡང་ཁོང་གིས་གཡོག་པོ་གཞན་ཞིག་བཏང་བས། དེ་ཚོས་གཡོག་པོ་དེའི་མགོར་རྨ་བཟོས་ནས་དམའ་འབེབས་བཏང༌།
MAR 12:5 ཡང་ཁོང་གིས་གཡོག་པོ་གཞན་ཞིག་མངགས་པའང་དེ་རྣམས་ཀྱིས་བསད། དེ་ནས་ཁོང་གིས་གཡོག་པོ་གཞན་མང་པོ་ཞིག་བཏང་བ་ན། དེ་རྣམས་ཀྱིས་གཡོག་པོ་ལ་ལ་བརྡུངས་ཤིང་ལ་ལ་བསད།
MAR 12:6 ཁོང་ལ་ད་དུང་གཅེས་པའི་བུ་ཞིག་ཡོད་དེ། མཇུག་མཐར་ཁོང་གིས་བུ་ཡང་དེ་རྣམས་ཀྱི་རྩ་ལ་བཏང་ཞིང༌། ཁོ་ཚོས་ངའི་བུ་ལ་བརྩི་བཀུར་བྱེད་པར་འགྱུར་ཞེས་གསུངས།
MAR 12:7 འོན་ཀྱང་ལྡུམ་རའི་ལས་མཁན་དེ་ཚོས་ཕན་ཚུན་ལ་མི་འདི་ནི་ཕ་ཤུལ་འཛིན་མཁན་ཡིན་པས། ད་ཁོ་རང་བསད་ན་རྒྱུ་ནོར་དེ་ང་ཚོ་ལ་ཐོབ་ཡོང་ཞེས་སྨྲས་ཏེ།
MAR 12:8 ཁོ་རང་བཟུང་ཞིང་བསད་ནས་རྒུན་འབྲུམ་གྱི་ལྡུམ་རའི་ཕྱི་རོལ་ཏུ་འཕངས།
MAR 12:9 ད་རྒུན་འབྲུམ་གྱི་ལྡུམ་རའི་བདག་པོས་གང་བྱེད་ཡོང༌། ཁོང་ཕེབས་ནས་ལྡུམ་རའི་ལས་མཁན་རྣམས་མེད་པར་བཟོས་ཏེ་རྒུན་འབྲུམ་གྱི་ལྡུམ་ར་མི་གཞན་ལ་སྤྲོད་པར་བྱེད།
MAR 12:10 དེ་ཡང་དཀོན་མཆོག་གི་གསུང་རབ་ལས། བཟོ་བོ་རྣམས་ཀྱིས་དོར་བའི་རྡོ། ། ཁང་པའི་རྨང་རྡོར་གྱུར་བ་འདི། །
MAR 12:11 གཙོ་བོ་ཉིད་ཀྱིས་མཛད་པ་ཡིན། ། ངེད་ཅག་མིག་ལ་ངོ་མཚར་ཆེ། ། ཞེས་གསུངས་ཡོད་པ་ཁྱེད་རྣམས་ཀྱིས་བཀླགས་མ་མྱོང་ངམ་”ཞེས་གསུངས་པ་དང༌།
MAR 12:12 ཁོ་ཚོས་དཔེ་དེ་ཁོ་ཚོའི་སྐོར་ལ་གསུངས་པ་ཤེས་ཏེ་ཡེ་ཤུ་འཛིན་པར་བསམས་ཀྱང༌། མི་ཚོགས་ལ་འཇིགས་ཏེ་ཁོང་དང་ཁ་བྲལ་ནས་སོང་ངོ༌། །
MAR 12:13 ཡང་མི་དེ་ཚོས་ཡེ་ཤུ་ལ་ཁྲིམས་དང་འགལ་བའི་གཏམ་བཤད་གནང་དུ་འཇུག་ཆེད་ཕཱ་རུ་ཤི་པ་དང༌། ཧེ་རོ་དཱེའི་ཕྱོགས་ཁག་གི་མི་འགའ་ཞིག་ཁོང་གི་དྲུང་དུ་བཏང༌།
MAR 12:14 ཁོ་ཚོ་ཡོང་ནས་ཁོང་ལ་“སྟོན་པ་ལགས། ཁྱེད་ནི་རང་གཤིས་དྲང་ཞིང་ཁྱེད་ཀྱིས་མིའི་ཕྱིའི་རྣམ་པར་མི་གཟིགས་ཤིང་མི་ཀུན་ལ་ཕྱོགས་རིས་མེད་པར་དཀོན་མཆོག་གི་ལམ་ཡང་དག་པར་བདེན་པར་སྟོན་པ་ངེད་ཀྱིས་ཤེས། དཀོན་མཆོག་གི་བཀའ་ཁྲིམས་ལྟར་ན་ད་ལྟ་ང་ཚོས་རྒྱལ་པོར་ཁྲལ་འཇལ་རུང་ངམ་མི་རུང༌།
MAR 12:15 འཇལ་ལམ་མི་འཇལ་”ཞེས་དྲིས། ཁོང་གིས་དེ་རྣམས་ཀྱི་གཡོ་སྒྱུ་མཁྱེན་ཏེ་“ཁྱོད་ཚོས་ང་ལ་ཉམས་ཚོད་ལེན་པའི་རྒྱུ་མཚན་ཅིའམ། དེ་ཎ་རིའི་དངུལ་ཊམ་ཀ་གཅིག་འདི་རུ་ཁྱེར་ཤོག་དང་བལྟའོ་”ཞེས་གསུངས་པ་དང༌།
MAR 12:16 ཁོ་ཚོས་གཅིག་ཁྱེར་ཡོང་ཞིང༌། ཁོང་གིས་དེ་རྣམས་ལ་“རི་མོ་དང་ཡི་གེ་འདི་སུའི་ཡིན་ནམ་”ཞེས་དྲིས་པ་ན། ཁོ་ཚོས་“སེ་སར་རྒྱལ་པོའི་ཡིན་”ཞེས་སྨྲས།
MAR 12:17 ཡང་ཡེ་ཤུས་“གང་ཞིག་སེ་སར་རྒྱལ་པོའི་ཡིན་པ་དེ་རྒྱལ་པོ་ལ་འཇལ་ཞིང༌། གང་ཞིག་དཀོན་མཆོག་གི་ཡིན་པ་དེ་དཀོན་མཆོག་ལ་ཕུལ་”ཞེས་གསུངས་པས་ཁོ་ཚོ་ཁོང་ལ་ངོ་མཚར་ཆེ་བར་གྱུར།
MAR 12:18 དེ་ནས་ཡང་གཤིན་པོ་རྣམས་ལ་སླར་གསོན་པ་མེད་ཅེས་ཟེར་མཁན་སཱ་ཅུ་སེ་པ་རྣམས་ཁོང་གི་དྲུང་དུ་ཡོང་སྟེ་
MAR 12:19 “སྟོན་པ་ལགས། ལུང་སྟོན་པ་མོ་ཤེའི་མདོ་ལས། གལ་སྲིད་སྐྱེས་པ་ཞིག་གི་གཅེན་པོ་ཤི་ནས་བུ་ཕྲུག་མེད་པར་བཟའ་ཟླ་གཅིག་པུ་ལུས་ན། སྐྱེས་པ་དེས་ཁོའི་བཟའ་ཟླ་བླངས་ནས་སྤུན་གྱི་དོན་དུ་རིགས་རྒྱུད་སྤེལ་དགོས་པ་ཡིན་ནོ་ཞེས་བྲིས།
MAR 12:20 ད་སྤུན་བདུན་ཡོད་དེ། སྤུན་ཆེ་བས་བཟའ་ཟླ་ཞིག་བླངས་ནས་བུ་ཕྲུག་མེད་པར་ཤི་པ་རེད།
MAR 12:21 ཡང་སྤུན་འབྲིང་བས་བུད་མེད་དེ་བླངས་ནས་བུ་ཕྲུག་མེད་པར་ཤི སྤུན་ཆུང་བས་ཀྱང་དེ་ལྟར་བྱས་ནས་བུ་མ་བྱུང་བར་ཤི་ལ།
MAR 12:22 དེ་བཞིན་སྤུན་བདུན་པོར་བུ་ཕྲུག་མ་བྱུང་ལ་ཐམས་ཅད་ཀྱི་གཞུག་ལ་བུད་མེད་དེའང་ཤིའོ།
MAR 12:23 གཤིན་པོ་རྣམས་སླར་གསོན་པར་འགྱུར་བའི་དུས་སུ། སྤུན་བདུན་པོས་བུད་མེད་དེར་གཉེན་སྒྲིག་བྱས་མྱོང་བས་ཁོ་མོ་ནི་སྤུན་བདུན་ཡོད་པ་ལས་སུའི་བཟའ་ཟླ་ཡིན་ནམ་”ཞེས་དྲིས་པ་ན།
MAR 12:24 ཡེ་ཤུས་དེ་རྣམས་ལ་“ཁྱོད་ཚོས་དཀོན་མཆོག་གི་གསུང་རབ་མི་རྟོགས་ཤིང་ཁོང་ཉིད་ཀྱི་མཐུ་སྟོབས་ཀྱང་མི་ཤེས་པས་ནོར་བ་མ་ཡིན་ནམ།
MAR 12:25 གང་ལགས་ཟེར་ན། གཤིན་པོ་སླར་གསོན་པའི་སྐབས་སུ། མི་རྣམས་ཀྱིས་ཚུར་མནའ་མ་མི་ལེན་ཞིང་ཕར་བག་མ་ཡང་མི་བསྐྱལ་བས་དཀོན་མཆོག་གི་ཕོ་ཉ་རྣམས་དང་འདྲའོ།
MAR 12:26 འོན་ཀྱང་གཤིན་པོ་གསོན་པོར་ལང་དུ་གྱུར་ངེས་པའི་སྐོར་ལ། ཁྱོད་ཚོས་གསུང་རབ་ཀྱི་ལུང་སྟོན་པ་མོ་ཤེའི་མདོ་ལས་ཚེར་མའི་སྐོར་བྲིས་ཡོད་པ་དེ་ལས་དཀོན་མཆོག་གིས་མོ་ཤེ་ལ་འདི་ལྟར་གསུངས། ང་ནི་ཁྱེད་ཀྱི་མེས་པོ་ཨབ་ར་ཧམ་གྱི་དཀོན་མཆོག་དང༌། ཨི་སཱག་གི་དཀོན་མཆོག ཡ་ཀོབ་ཀྱི་དཀོན་མཆོག་ཡིན་ཞེས་གསུངས་ཡོད་པ་དེ་མ་བཀླགས་སམ།
MAR 12:27 ཁོང་ནི་གཤིན་པོ་རྣམས་ཀྱི་དཀོན་མཆོག་མ་ཡིན་ཏེ། གསོན་པོ་རྣམས་ཀྱི་དཀོན་མཆོག་ཡིན་པས་ཁྱོད་ཚོས་ཤིན་ཏུ་ནོར་རོ་”ཞེས་གསུངས།
MAR 12:28 ཆོས་ཁྲིམས་ལ་མཁས་པའི་མི་ཞིག་འོངས་ནས་ཁོང་ཚོའི་རྩོད་པ་ཐོས་ཏེ། ཡེ་ཤུས་ལན་ཡག་པོ་མཛད་པ་མཐོང་བས། ཁོང་ལ་“བཀའ་ཁྲིམས་ཀྱི་ནང་ནས་གལ་ཆེ་ཤོས་གང་ཡིན་”ཞེས་བཀའ་འདྲི་ཞུས།
MAR 12:29 དེའི་ལན་དུ་ཡེ་ཤུས་“གལ་ཆེ་ཤོས་དང་པོ་ནི། ཀྱེ། ངའི་མི་རིགས་ཡི་སི་ར་ཨེལ་ཉོན་ཅིག གཙོ་བོ་དཀོན་མཆོག་ནི་ང་ཚོའི་གཙོ་བོ་གཅིག་རང་ཡིན།
MAR 12:30 རང་གིས་གཙོ་བོ་དཀོན་མཆོག་ལ་བློ་གཅིག་སེམས་གཅིག་དང་ནུས་པ་ཅི་ཡོད་ཀྱིས་བརྩེ་བར་ཟུངས་ཤིག
MAR 12:31 གཉིས་པ་ནི། ཁྱེད་རང་གིས་ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག འདི་གཉིས་ལས་གལ་ཆེ་བའི་བཀའ་ཁྲིམས་གཞན་མེད་”ཅེས་གསུངས།
MAR 12:32 ཡང་ཆོས་ཁྲིམས་ལ་མཁས་པའི་མི་དེས་“སྟོན་པ་ལགས། ཁྱེད་ཀྱིས་བདེན་ཅིང་ལེགས་པར་གསུངས། དཀོན་མཆོག་ནི་གཅིག་ཡིན། ཁོང་ལས་གཞན་པའི་དཀོན་མཆོག་ཡོད་པ་མ་ཡིན།
MAR 12:33 ཁོང་ལ་བློ་གཅིག་སེམས་གཅིག་དང་ནུས་པ་ཅི་ཡོད་ཀྱིས་བརྩེ་བ་དང༌། རང་གི་ཁྱིམ་མཚེས་ལ་རང་དང་འདྲ་བར་བརྩེ་བར་བྱེད་པ་དེ་ནི་སྦྱིན་སྲེག་དང་མཆོད་པ་ཐམས་ཅད་ལས་གཙོ་ཆེའོ་”ཞེས་བརྗོད།
MAR 12:34 ཡེ་ཤུས་མི་དེས་བློ་གྲོས་ཀྱི་སྒོ་ནས་ལན་བཏབ་པ་གཟིགས་ནས་མི་དེ་ལ་“ཁྱེད་རང་དཀོན་མཆོག་གི་རྒྱལ་སྲིད་དང་ཐག་རིང་པོ་མེད་”ཅེས་གསུངས་པ་དང༌། དེའི་རྗེས་སུ་མི་སུས་ཀྱང་ཁོང་ལ་དྲི་བ་ཅི་ཡང་འདོན་མ་ཕོད།
MAR 12:35 ཡེ་ཤུས་མཆོད་ཁང་ཆེན་མོར་ཆོས་གསུང་བའི་སྐབས་སུ་“ཆོས་ཁྲིམས་ལ་མཁས་པའི་མི་རྣམས་ཀྱིས་སྐྱབས་མགོན་མཱ་ཤི་ཀ་ནི་ཇི་ལྟར་གནའ་རབས་ཀྱི་རྒྱལ་པོ་དཱ་བིད་ཀྱི་སྲས་ཡིན་ཟེར་བ་ཅི་ཟེར་ཞེ་ན།
MAR 12:36 རྒྱལ་པོ་དཱ་བིད་རང་གིས་དམ་པའི་ཐུགས་ཉིད་ཀྱི་སྒོ་ནས་གསུངས་ཏེ། དཀོན་མཆོག་གིས་ནི་ང་ཡི་གཙོ་བོ་ལ། ། ཁྱེད་ཀྱི་དགྲ་རྣམས་ཁྱེད་ཀྱི་ཞབས་འོག་ཏུ། ། ང་ཡིས་མ་བཅུག་བར་དུ་ཁྱེད་རང་ཉིད། ། ང་ཡི་གཡས་སུ་དེ་བར་བཞུགས་སུ་གསོལ། ། ཅེས་གསུངས།
MAR 12:37 དཱ་བིད་རང་ཉིད་ཀྱིས་ཁོང་ལ་གཙོ་བོ་ཞེས་ཞུས་པས་མཱ་ཤི་ཀ་ནི་དཱ་བིད་ཀྱི་སྲས་སུ་ཇི་ལྟར་འགྱུར་བ་ཡིན་ནམ་”ཞེས་གསུངས། མི་ཚོགས་མང་པོས་ཀྱང་སེམས་དགའ་བའི་ངང་ནས་ཁོང་གི་གསུང་ལ་ཉན་ནོ། །
MAR 12:38 ཡེ་ཤུས་ཆོས་གསུང་བཞིན་“ཆོས་ཁྲིམས་ལ་མཁས་པའི་མི་རྣམས་ལ་དོགས་ཟོན་གྱིས་ཤིག ཁོ་རྣམས་ཀྱིས་གོས་རིང་པོ་གྱོན་ཏེ་ཕར་འགྲོ་ཚུར་འོང་བྱེད་པ་དང༌། ཁྲོམ་ལ་མི་རྣམས་ཀྱིས་ཕྱག་བྱེད་པར་མོས།
MAR 12:39 མི་དེ་ཚོས་ཡ་ཧུ་དཱ་པའི་འདུ་ཁང་ནང་ཁྲི་མཐོ་ས་དང་མགྲོན་ལ་གྲལ་མགོ་ལ་སྡོད་པར་དགའ་བ་དང༌།
MAR 12:40 མི་དེ་རྣམས་ཀྱིས་ཡུགས་མོ་རྣམས་ཀྱི་རྒྱུ་ནོར་ཧམ་འཕྲོག་བྱེད་ཅིང་ཕྱི་ཚུལ་བཅོས་མའི་ཚུལ་གྱིས་སྨོན་ལམ་རྒྱུན་རིང་འདེབས་ཁུལ་བྱེད་པས། མི་དེ་ཚོར་ལྷག་པར་དུ་ཆད་པ་ལྗིད་པོ་ཕོག་པར་འགྱུར་རོ་”ཞེས་གསུངས།
MAR 12:41 དེ་ནས་ཡེ་ཤུས་མཆོད་ཁང་ཆེན་མོའི་དངུལ་འབུལ་སྒམ་ལ་ཁ་གཏད་ནས་བཞུགས་ཤིང་མང་ཚོགས་ཀྱིས་དངུལ་འབུལ་བར་གཟིགས་པ་ན། མི་ཕྱུག་པོ་རྣམས་ཀྱིས་དངུལ་མང་པོ་ཕུལ་ཞིང༌།
MAR 12:42 དབུལ་པོ་ཡུགས་མོ་ཞིག་ཡོང་ནས་ཟངས་ཀྱི་སྒོར་མོ་ཆུང་ཆུང་གཉིས་ཕུལ་བ་གཟིགས། དེ་ནི་སྒོར་མོ་གཅིག་གི་རིན་ཐང་ཡིན།
MAR 12:43 ཁོང་གིས་ཉེ་གནས་རྣམས་རང་གི་དྲུང་དུ་བོས་ཏེ་“ངས་ཁྱེད་ཚོ་ལ་བདེན་པར་ཟེར་རྒྱུར། དངུལ་འབུལ་མཁན་ཐམས་ཅད་ལས་དབུལ་པོ་ཡུགས་མོ་འདིས་ཕུལ་བ་མང་ཤོས་ཡིན།
MAR 12:44 གང་ལགས་ཟེར་ན། དེ་ཚོ་ཐམས་ཅད་ཀྱིས་ལོངས་སྤྱོད་ལྷག་མ་མང་པོ་ནས་ཕུལ་བ་ཡིན། འོན་ཀྱང་ཁོ་མོ་ནི་རང་ལ་མེད་ཀྱང་ཅི་ཡོད་པ་ཐམས་ཅད་ཕུལ་བ་ཡིན་”ཞེས་གསུངས་སོ། །
MAR 13:1 ཡེ་ཤུ་མཆོད་ཁང་ཆེན་མོ་ནས་ཕྱིར་ཕེབས་སྐབས། ཉེ་གནས་ལས་གཅིག་གིས་ཁོང་ལ་“སྟོན་པ་ལགས་གཟིགས་དང༌། འདི་ནི་ཅི་ལྟ་བུའི་རྡོ་ཆེན་པོ་དང་ཅི་ལྟ་བུའི་ཁང་པའི་བཟོ་བཀོད་ངོ་མཚར་ཆེ་བ་ཞིག་རེད་ཨང་”ཞེས་སྨྲས་པ་ལ།
MAR 13:2 ཡེ་ཤུས་“ཁྱེད་ཀྱིས་ཁང་པ་ཆེན་པོ་འདི་རྣམས་མཐོང་བ་ཡིན་ནམ། མ་འོངས་པའི་དུས་སུ་འདི་རུ་རྡོ་ཕ་བོང་གཅིག་ཀྱང་མི་ལུས་པར་ཐམས་ཅད་གཞིག་པར་འགྱུར་རོ་”ཞེས་གསུངས།
MAR 13:3 དེ་ནས་ཡེ་ཤུ་སྐྱུར་རུ་ཤིང་གི་རི་སྟེང་དུ་ཕེབས་ཏེ་མཆོད་ཁང་ཆེན་མོ་ལ་ཁ་གཏད་ནས་བཞུགས་པའི་སྐབས་སུ། ཁོང་གི་ཉེ་གནས་པེ་ཏྲོ་དང་ཡ་ཀོབ། ཡོ་ཧ་ནན། ཨན་དྲི་ཡཱ་བཅས་ཀྱིས་མི་གཞན་མེད་པའི་དུས་སུ་ཁོང་ལ་འདི་ལྟར་དྲིས་
MAR 13:4 “དོན་འདི་རྣམས་དུས་ནམ་ཞིག་ལ་འབྱུང་ཞིང༌། དོན་འདི་ཐམས་ཅད་འགྲུབ་པའི་ཚེ་རྟགས་གང་འབྱུང་ཡོང་གསུང་རོགས་”ཞེས་ཞུས་པ་ན།
MAR 13:5 ཡེ་ཤུས་ཁོ་ཚོར་“མི་སུས་ཀྱང་ཁྱེད་ཚོ་མི་སླུ་བའི་ཕྱིར་དོགས་ཟོན་བྱོས་ཤིག
MAR 13:6 མི་མང་པོས་ངའི་མིང་ཐོག་ནས་ཡོང་སྟེ་ང་རང་ཡིན་ཟེར་ཞིང་མི་མང་པོར་མགོ་སྐོར་གཏོང་ངེས་ཡིན།
MAR 13:7 ཁྱེད་ཚོས་དམག་འཁྲུག་དང་དམག་འཁྲུག་སྐོར་གྱི་གཏམ་ཐོས་པའི་སྐབས་སུ་མ་འཇིགས་ཤིག དོན་འདི་ཚོ་འབྱུང་ངེས་ཀྱང་དེ་ནི་དུས་རབས་ཀྱི་མཐའ་མ་ད་དུང་མ་ཡིན།
MAR 13:8 རྒྱུ་མཚན་ནི་མི་རིགས་དང་མི་རིགས་འཁྲུག་ཅིང་རྒྱལ་ཁམས་དང་རྒྱལ་ཁམས་འཁྲུག་པ། ས་ཆ་ཁ་ཤས་ལ་ས་ཡོམ་དང་མུ་གེ་ཡང་འབྱུང་བར་འགྱུར། འདི་ཚོ་ནི་སྐྱེ་ཟུག་ཐོག་མ་དང་འདྲ་བ་ཡིན།
MAR 13:9 འོན་ཀྱང་ཁྱེད་ཚོས་དོགས་ཟོན་བྱོས་ཤིག ངའི་དོན་དུ་ཁྱེད་ཚོ་ཁྲིམས་ར་ལ་སྤྲོད་ཅིང༌། ཡ་ཧུ་དཱ་པའི་འདུ་ཁང་དུ་བརྡུང་ངེས་ཡིན་ལ། ས་གནས་དཔོན་པོ་དང་རྒྱལ་པོ་རྣམས་ལ་དཔང་པོ་བྱེད་པའི་ཕྱིར་ཁྱེད་རྣམས་ཀྱང་དེ་ཚོའི་དྲུང་དུ་འཁྲིད་པར་འགྱུར།
MAR 13:10 དེ་བས་སྔོན་ལ་མི་རིགས་ཀུན་ལ་ངེས་པར་དུ་འཕྲིན་བཟང་སྒྲོག་དགོས།
MAR 13:11 དེ་ཚོས་ཁྱེད་རྣམས་ཁྲིམས་གཅོད་པར་གཏོད་པའི་སྐབས་སུ། ཁྱེད་ཚོས་སྔོན་ལ་གང་ཟེར་དགོས་པ་སེམས་ཁྲལ་མ་བྱེད་ཅིག དེའི་དུས་སུ་ཁྱེད་ཚོ་ལ་གང་གནང་བ་དེ་ཤོད་ཅིག རྒྱུ་མཚན་ནི་གཏམ་ཤོད་མཁན་དེ་ནི་ཁྱེད་རང་ཉིད་མ་ཡིན་པར་དཀོན་མཆོག་གི་དམ་པའི་ཐུགས་ཉིད་ཡིན་པས་སོ།
MAR 13:12 དེའི་དུས་སུ་གཅེན་གཅུང་གིས་གཅེན་གཅུང་དང༌། ཨ་ཕས་རང་གི་བུ་ཡང་གསོད་པའི་ཕྱིར་གཏད་པར་འགྱུར། ཕྲུ་གུ་རྣམས་ཀྱིས་ཀྱང་ཕ་མ་དགྲ་རུ་བཟུང་སྟེ་གསོད་པར་འགྱུར།
MAR 13:13 ཡང་ངའི་མིང་གི་དོན་དུ་མི་ཐམས་ཅད་ཀྱིས་ཁྱེད་ཚོ་ལ་སྡང་བར་བྱ། འོན་ཀྱང་ཚེའི་མཐའ་མཇུག་བར་དུ་བཟོད་པ་སྒོམ་མཁན་དེ་ལ་ཐར་པ་འཐོབ་ངེས་ཡིན།”
MAR 13:14 “འདི་ཀློག་མཁན་གྱིས་ཧ་གོ་བར་གྱིས་ཤིག སྟོང་བར་བྱེད་མཁན་གདུག་པ་ཅན་ཁོ་མི་འོས་པའི་གནས་ལ་ལངས་བསྡད་པར་མཐོང་བའི་ཚེ། ཡ་ཧུ་དཱ་ཡུལ་དུ་ཡོད་པའི་མི་རྣམས་རི་ལ་བྲོས་ཤིག
MAR 13:15 ཁང་པའི་ཐོག་ལ་ཡོད་པ་མར་མ་འབབ། རང་གི་ཁང་པའི་ནང་ནས་ཅ་ལག་ལེན་དུ་མི་འགྲོ
MAR 13:16 ཞིང་ཁར་ཡོད་པའི་མི་རང་གི་གོས་ལེན་དུའང་ཕྱིར་མ་ལོག་ཅིག
MAR 13:17 ཉིན་དེ་ཚོའི་རིང་ལ་བུད་མེད་ཕྲུ་གུ་འཁོར་བ་དང་བུ་ཕྲུག་ལ་འོ་མ་སྟེར་བ་རྣམས་ལ་སྙིང་རེ་རྗེ།
MAR 13:18 དོན་དེ་དགུན་ཁར་མི་འབྱུང་བའི་ཕྱིར་ཁྱེད་ཚོས་སྨོན་ལམ་ཐོབས་ཤིག
MAR 13:19 དེའི་དུས་སུ་སྡུག་བསྔལ་ཤིན་ཏུ་ཆེན་པོ་འབྱུང་ཡོང༌། དེ་ལྟ་བུའི་སྡུག་བསྔལ་ཆེན་པོ་དེ་དཀོན་མཆོག་གིས་ཐོག་མར་འཇིག་རྟེན་བཀོད་པ་ནས་ད་ལྟའི་བར་དུ་བྱུང་མ་མྱོང་ལ་རྗེས་སུའང་རྩ་བ་ནས་འབྱུང་མི་སྲིད།
MAR 13:20 ཡང་གཙོ་བོ་དཀོན་མཆོག་ཁོང་གིས་ཉིན་དེ་རྣམས་ཉུང་བར་མ་མཛད་ན། མི་སུ་ཡང་ཐར་མི་ཐུབ། འོན་ཀྱང་ཁོང་གིས་བདམས་པའི་མི་རྣམས་ཀྱི་དོན་དུ་ཉིན་དེ་རྣམས་ཇེ་ཉུང་དུ་མཛད་པ་ཡིན།
MAR 13:21 དེའི་དུས་སུ་མི་སུ་ཞིག་གིས་ཁྱེད་རྣམས་ལ་ལྟོས་དང༌། སྐྱབས་མགོན་མཱ་ཤི་ཀ་འདི་རུ་ཡོད། ཡང་ན་ལྟོས་དང༌། མཱ་ཤི་ཀ་དེ་རུ་ཡོད་ཟེར་ན། དེར་ཡིད་མ་ཆེས་ཤིག
MAR 13:22 གང་ལགས་ཟེར་ན། མཱ་ཤི་ཀ་དང་ལུང་སྟོན་པ་རྫུན་མ་མང་པོ་འབྱུང་སྟེ། ངོ་མཚར་ཆེ་བའི་ལས་དང་ལྟས་བསྟན་ནས་མགོ་སྐོར་བཏང་སྲིད་ན། བདམས་པའི་མི་རྣམས་ཀྱང་མགོ་འཁོར་བར་འགྱུར།
MAR 13:23 འོན་ཀྱང་ཁྱེད་རྣམས་དོགས་ཟོན་བྱོས་ཤིག ངས་གཏམ་དེ་ཐམས་ཅད་ཁྱེད་རྣམས་ལ་སྔོན་ལ་བཤད་པ་ཡིན།”
MAR 13:24 “དུས་དེར་སྡུག་བསྔལ་ཆེན་པོ་དེའི་རྗེས་སུ། ཉི་མ་སྒྲིབ་པ་དང་ཟླ་བས་འོད་མི་སྤྲོ།
MAR 13:25 སྐར་མ་ནམ་མཁའ་ནས་སར་ལྷུང་ཞིང་བར་སྣང་ཁམས་ཀྱི་དབང་ལྡན་རྣམས་གཡོ་བར་འགྱུར།
MAR 13:26 དེའི་དུས་སུ་མི་རྣམས་ཀྱིས་མིའི་རིགས་ཀྱི་བུ་ཁོང་དབང་ཆེན་པོ་དང་གཟི་བརྗིད་ངང་ནས་སྤྲིན་གྱི་ནང་ནས་འབྱོན་པར་མཐོང་ཡོང༌།
MAR 13:27 དེ་ནས་ཁོང་གིས་ཕོ་ཉ་རྣམས་བཏང་སྟེ་ས་གཞི་ཆེན་པོའི་མཐའ་ནས་ནམ་མཁའི་མཐའ་བར་གྱི་བདམས་པའི་མི་ཐམས་ཅད་ཕྱོགས་བཞི་མཚམས་བརྒྱད་ནས་བསྡུ་བར་འགྱུར།”
MAR 13:28 “ཁྱེད་ཚོས་བསེ་ཡབ་ཤིང་ནས་དཔེ་ཞིག་ལོངས་དང༌། དེའི་ཡལ་གར་ལོ་མ་འབུས་ནས་མཉེན་པའི་དུས་སུ། དབྱར་ཁའི་དུས་ཉེ་བར་སླེབས་པ་ཁྱེད་ཚོས་ཤེས།
MAR 13:29 དེ་བཞིན་དུ་ཁྱེད་ཚོས་དོན་དེ་རྣམས་བྱུང་བ་མཐོང་ཚེ། ཁོང་ཡང་སྒོ་འགྲམ་དུ་ཉེ་བར་སླེབས་ཡོད་པའང་རྟོགས་པར་གྱིས་ཤིག
MAR 13:30 ངས་ཁྱེད་ཚོར་བདེན་པར་ཟེར་རྒྱུར། མི་རབས་འདི་མེད་པར་མ་གྱུར་བའི་སྔོན་ལ་དོན་འདི་ཐམས་ཅད་འབྱུང་བར་འགྱུར།
MAR 13:31 གནམ་ས་གཉིས་ནི་འདའ་བར་འགྱུར་ཡང་ངའི་བཀའ་འདའ་བར་མི་འགྱུར་རོ། །”
MAR 13:32 “ཉིན་མོ་དེ་དང་དུས་ཚོད་དེའི་སྐོར་ཡབ་དཀོན་མཆོག་གིས་མ་གཏོགས། སུས་ཀྱང་མི་ཤེས། དཀོན་མཆོག་གི་བཞུགས་གནས་ཀྱི་ཕོ་ཉ་རྣམས་ཀྱིས་ཀྱང་མི་ཤེས་ལ་སྲས་ཀྱིས་ཀྱང་མི་ཤེས།
MAR 13:33 ནམ་དུས་ལ་བབ་པ་ཁྱེད་ཚོས་མི་ཤེས་པས་དོགས་ཟོན་བྱོས་ཤིག གཉིད་མ་ལོག་ཅིག
MAR 13:34 འདི་ནི་མི་ཞིག་གིས་རང་ཁྱིམ་བཞག་ནས་ཡུལ་གཞན་དུ་འགྲོ་བའི་སྐབས་སུ། རང་གི་གཡོག་པོ་རྣམས་ལ་དབང་ཆ་སྤྲད་པ་དང་སོ་སོར་ལས་ཀ་བགོས་པ། སྒོ་སྲུང་མཁན་ལའང་བྱ་ར་བྱེད་པའི་བཀའ་གནང་བ་དང་འདྲའོ།
MAR 13:35 དེ་བས་ཁྱིམ་བདག་དེ་ནི་མཚན་མོའམ་ནམ་ཕྱེད་དམ། བྱ་ཕོས་སྐད་རྒྱག་དུས་སམ། སྐྱ་རེངས་ཤར་དུས་ནམ་ཞིག་ལ་ཡོང་བ་ཁྱེད་ཚོས་མི་ཤེས་པས་བྱ་ར་བྱོས་ཤིག
MAR 13:36 དེ་ལྟར་མ་བྱས་ན་ཁོང་གློ་བུར་དུ་ལོག་ཡོང་ནས་ཁྱེད་ཚོ་གཉིད་ལོག་པ་མཐོང་ཉེན་ཡོད།
MAR 13:37 ངས་ཁྱེད་ཚོ་ལ་གང་སྨྲས་པ་འདི་ངས་མི་ཐམས་ཅད་ལ་ཟེར། བྱ་ར་གྱིས་ཤིག་”ཅེས་གསུངས་སོ། །
MAR 14:1 པེ་སག་དུས་ཆེན་དང་སྐྱུར་རྩི་མེད་པའི་བག་ལེབ་དུས་ཆེན་ཉིན་གཉིས་ཀྱི་སྔོན་ལ། ཡ་ཧུ་དཱ་པའི་བླ་ཆེན་དང་ཆོས་ཁྲིམས་ལ་མཁས་པའི་མིས་གཡོ་ཐབས་ཀྱིས་ཡེ་ཤུ་འཛིན་བཟུང་དང་གསོད་པའི་གོ་སྐབས་བཙལ།
MAR 14:2 གང་ལགས་ཟེར་ན། མི་དེ་ཚོས་“ཡུལ་མི་རྣམས་ཟིང་ཆ་ལངས་ཉེན་ཡོད་པས། དུས་ཆེན་ལ་མི་གཟུང་”ཞེས་སྨྲས།
MAR 14:3 དེ་ནས་ཡེ་ཤུ་པེ་ཐན་ཡཱ་གྲོང་སྡེའི་ནང་མཛེ་ནད་ཅན་གྱི་སྐྱེས་པ་སི་མོན་གྱི་ཁང་པ་ལ་བཞུགས་ཏེ། གསོལ་བ་བཞེས་པའི་དུས་སུ་བུད་མེད་ཅིག་གིས་རིན་གོང་ཆེ་བའི་སྤོས་ཆུ་ལྷད་མེད་པ་ནཱར་དཱི་ཡིས་གང་བའི་རྡོ་ཀ་མ་རུའི་བུམ་པ་ཞིག་ཁྱེར་ཡོང་སྟེ། བུམ་པ་དེའི་ཁ་བཅག་ནས་སྤོས་ཆུ་ཁོང་གི་དབུ་སྟེང་ལ་བླུགས་པས།
MAR 14:4 དེ་རུ་ཡོད་པའི་མི་འགའ་ཞིག་ཁྲོས་ནས་ཕན་ཚུན་“སྤོས་ཆུ་འདི་གང་གི་དོན་ལ་འདི་ལྟར་ཆུད་ཟོས་ལ་བཏང་བ་ཡིན་ནམ།
MAR 14:5 སྤོས་ཆུ་འདི་དེ་ཎ་རིའི་དངུལ་སྒོར་སུམ་བརྒྱ་ལས་ལྷག་པའི་རིན་དུ་བཙོངས་ཏེ་དབུལ་པོ་རྣམས་ལ་བྱིན་ན་མི་ལེགས་སམ་”ཞེས་སྨྲས་ཤིང་བུད་མེད་དེར་གཤེ་གཤེ་བཏང༌།
MAR 14:6 འོན་ཀྱང་ཡེ་ཤུས་“ཁོ་མོ་ལ་སྡུག་པོ་མ་གཏོང༌། ཁོ་མོའི་སེམས་ཅི་ལ་དཀྲུག ཁོ་མོས་ང་ལ་ལས་བཟང་པོ་ཞིག་བྱས་པ་ཡིན།
MAR 14:7 དབུལ་པོ་རྣམས་ནི་དུས་རྟག་ཏུ་ཁྱེད་ཚོ་དང་མཉམ་དུ་ཡོད་པས། ག་དུས་ཡིན་རུང་ཁོ་ཚོར་རོགས་པ་བྱ་འདོད་ན་བྱེད་ཐུབ། འོན་ཀྱང་ང་རང་ནི་དུས་རྟག་ཏུ་ཁྱེད་ཚོ་དང་མཉམ་དུ་མི་གནས།
MAR 14:8 ཁོ་མོས་གང་ཐུབ་པ་དེ་བྱས་པ་ཡིན། ཁོ་མོས་ང་རང་དུར་ཁང་དུ་འཇུག་པར་སྔ་མོ་ནས་ངའི་ལུས་སྟེང་ལ་སྤོས་ཆུ་བླུགས་པ་ཡིན།
MAR 14:9 ངས་ཁྱེད་ཚོ་ལ་བདེན་པར་ཟེར་རྒྱུར། འཇིག་རྟེན་ཡོངས་སུ་ངའི་འཕྲིན་བཟང་འདི་གང་དུ་བསྒྲགས་ན་བུད་མེད་འདིས་གང་བྱས་པ་དེ་དྲན་པའི་ཕྱིར་གཏམ་དེ་ཡང་བརྗོད་པར་འགྱུར་”ཞེས་གསུངས།
MAR 14:10 ཡེ་ཤུའི་ཉེ་གནས་བཅུ་གཉིས་ཀྱི་ནང་ནས་ཡུ་དཱ་དབྱི་སི་ཀར་རེ་ཞེས་པ་དེས། ཡ་ཧུ་དཱ་པའི་བླ་ཆེན་རྣམས་ཀྱི་རྩར་སོང་ནས་ཡེ་ཤུ་ཁོ་ཚོའི་ལག་ཏུ་སྤྲོད་རྒྱུ་བྱས་པ་རེད།
MAR 14:11 ཁོ་ཚོས་ཡུ་དཱ་དབྱི་སི་ཀར་རེའི་སྐད་ཆ་འདི་ཐོས་ནས་ཧ་ཅང་དགའ་པོ་བྱུང་སྟེ་ཁོ་ལ་དངུལ་སྤྲོད་རྒྱུའི་ཁས་ལེན་བྱས། དེ་ནས་བཟུང་ཡུ་དཱས་ཡེ་ཤུ་ཁོ་ཚོའི་ལག་ཏུ་སྤྲོད་རྒྱུའི་གོ་སྐབས་བཙལ།
MAR 14:12 སྐྱུར་རྩི་མེད་པའི་བག་ལེབ་དུས་ཆེན་གྱི་ཉིན་དང་པོར། པེ་སག་དུས་ཆེན་གྱི་ལུགས་སྲོལ་ལྟར་སྦྱིན་སྲེག་གི་ལུ་གུ་མཆོད་པ་ཕུལ་བའི་ཚེ། ཉེ་གནས་རྣམས་ཀྱིས་ཡེ་ཤུ་ལ་“ཁྱེད་ཀྱིས་པེ་སག་གི་ཞལ་ཟས་བཞེས་པའི་ཕྱིར་ང་ཚོ་གང་དུ་གྲ་སྒྲིག་བྱེད་པར་འགྲོ་”ཞེས་ཞུས་པ་ལ།
MAR 14:13 ཁོང་གིས་ཉེ་གནས་གཉིས་བཏང་སྟེ་གསུངས་པ་“གྲོང་ཁྱེར་དུ་སོང་དང༌། དེར་ཆུ་བུམ་འཁྱེར་མཁན་སྐྱེས་པ་ཞིག་ཁྱེད་གཉིས་དང་འཕྲད་ཅིང༌། དེའི་རྗེས་སུ་འབྲང་ནས་སོང་ཞིག
MAR 14:14 ཁོ་རང་ཁྱིམ་གང་དུ་སོང་ན་ཁྱེད་ཚོས་ཁྱིམ་དེའི་བདག་པོ་ལ་སྟོན་པས། ང་རང་དང་ཉེ་གནས་རྣམས་ཀྱིས་མཉམ་དུ་པེ་སག་གི་ཟས་ཟ་བའི་ཁང་མིག་གང་དུ་ཡོད་ཅེས་ཤོད་ཅིག
MAR 14:15 མི་དེས་ཁྱེད་ཚོ་ལ་ནང་ཆས་སོགས་གྲ་སྒྲིག་བྱས་ཡོད་པའི་ཐོག་ཁང་ཆེན་པོ་ཞིག་བསྟན་ཡོང༌། གནས་དེ་རུ་གྲ་སྒྲིག་གྱིས་ཤིག་”ཅེས་གསུངས།
MAR 14:16 ཉེ་གནས་དེ་གཉིས་གྲོང་ཁྱེར་དུ་སོང་སྟེ་ཁོང་གིས་གསུངས་པ་ལྟར་མཐོང་ནས་པེ་སག་གི་གསོལ་སྟོན་བཤམས།
MAR 14:17 མཚན་མོ་དེའི་དུས་སུ། ཁོང་དང་ཉེ་གནས་བཅུ་གཉིས་པོ་འཁོར་དང་བཅས་པ་མཉམ་དུ་ཕེབས།
MAR 14:18 ཁོང་རྣམས་བཞུགས་ནས་ཞལ་ཟས་བཞེས་པའི་དུས་སུ་ཡེ་ཤུས་“ངས་ཁྱེད་ཚོ་ལ་བདེན་པར་ཟེར་རྒྱུར། ང་དང་མཉམ་དུ་ཟས་ཟ་མཁན་ཁྱེད་རྣམས་ལས་མི་གཅིག་གིས་ང་ལ་རྒྱབ་གཏོད་བྱེད་ངེས་སོ་”ཞེས་གསུངས་པས།
MAR 14:19 ཁོ་ཚོའི་སེམས་སྐྱོ་བར་གྱུར་ཏེ། རེ་རེ་བཞིན་གྱིས་ཁོང་ལ་“ང་རང་ཡིན་མི་སྲིད་”ཅེས་ཞུས།
MAR 14:20 ཡང་ཁོང་གིས་“དེ་ནི་ཁྱེད་ཉེ་གནས་བཅུ་གཉིས་པོ་ལས་ང་དང་མཉམ་དུ་ཕོར་པའི་ནང་དུ་བག་ལེབ་སྦངས་ནས་ཟ་མཁན་དེ་ཡིན།
MAR 14:21 རྒྱུ་མཚན་ནི་དཀོན་མཆོག་གི་གསུང་རབ་ལས་མིའི་རིགས་ཀྱི་བུ་རང་ཉིད་ཀྱི་སྐོར་ལ་ཇི་ལྟར་ལུང་བསྟན་ཡོད་པ་བཞིན་འཆི་དགོས་ཀྱང༌། མིའི་རིགས་ཀྱི་བུ་དགྲའི་ལག་ཏུ་སྤྲོད་མཁན་དེར་ཆད་པ་ཕོག་ངེས་ཡིན་ནོ། མི་དེ་འཇིག་རྟེན་འདི་རུ་སྐྱེས་པ་ལས་མ་སྐྱེས་ན་ལེགས་སོ་”ཞེས་གསུངས།
MAR 14:22 ཁོང་རྣམས་ཀྱིས་ཞལ་ཟས་བཞེས་པའི་སྐབས་སུ། ཡེ་ཤུས་བག་ལེབ་ཕྱག་ཏུ་བསྣམས་ཤིང་དཀོན་མཆོག་ལ་བསྟོད་པ་ཕུལ་རྗེས་དུམ་བུར་བགོས་ནས་ཁོང་རྣམས་ལ་གནང་སྟེ་གསུངས་པ་“འདི་ནི་ངའི་ལུས་ཡིན། ཁྱེད་ཚོས་ལེན་ཅིག་”ཅེས་གསུངས་ནས།
MAR 14:23 ཁོང་གིས་ཕོར་པ་ཞིག་ཕྱག་ཏུ་བསྣམས་ཤིང་བཀའ་དྲིན་ཆེ་ཞུས་ནས་ཁོང་རྣམས་ལ་གནང་བ་དང་ཚང་མས་བཏུངས།
MAR 14:24 ཁོང་གིས་“འདི་ནི་ངའི་ཁྲག་ཡིན་ཏེ། ཞལ་ཆད་ཀྱི་ཁྲག་འདི་མི་མང་པོའི་ཆེད་དུ་ཐོན།
MAR 14:25 ངས་ཁྱེད་ཚོ་ལ་བདེན་པར་ཟེར་རྒྱུར། ངས་དཀོན་མཆོག་གི་རྒྱལ་སྲིད་ཀྱི་ནང་རྒུན་ཆང་གསར་པ་མ་འཐུང་བའི་ཉིན་མོའི་བར་དུ། རྒུན་ཆང་འདི་རྩ་བ་ནས་མི་འཐུང་”ཞེས་གསུངས།
MAR 14:26 དེ་ནས་ཁོང་རྣམས་ཀྱིས་གསུང་མགུར་བླངས་ནས་སྐྱུར་རུ་ཤིང་གི་རི་བོར་ཕེབས་སོ། །
MAR 14:27 དེ་ནས་ཡེ་ཤུས་ཁོ་ཚོར་“དཀོན་མཆོག་གི་གསུང་རབ་ལས། ང་ཡིས་ལུག་རྫི་རྡུང་ནས་བསད། ། དེ་རྗེས་ལུག་རྣམས་འཐོར་བར་འགྱུར། ། ཞེས་བྲིས་པ་བཞིན། ཁྱོད་ཚོ་ཐམས་ཅད་ང་དང་བྲལ་ནས་འབྲོས་པར་འགྱུར།
MAR 14:28 འོན་ཀྱང་ང་འཆི་བ་ནས་གསོན་པོར་ལང་དུ་འགྱུར་རྗེས་ཁྱེད་ཚོའི་སྔོན་ལ་ག་ལིལ་ཡུལ་དུ་འགྲོ་ངེས་ཡིན་”ཞེས་གསུངས།
MAR 14:29 པེ་ཏྲོས་ཁོང་ལ་“ཐམས་ཅད་ཁྱེད་དང་བྲལ་ནའང་ང་ནི་མི་འབྲལ་”ཞེས་ཞུས་ནས།
MAR 14:30 ཡེ་ཤུས་ཁོ་ལ་“ངས་ཁྱེད་ལ་བདེན་པར་ཟེར་རྒྱུར། དེ་རིང་གི་མཚན་མོ་འདི་རང་ལ་བྱ་ཕོས་སྐད་ཐེངས་གཉིས་མ་གྲགས་པའི་སྔོན་ལ་ཁྱེད་ཀྱིས་ང་རང་སུ་ཡིན་མི་ཤེས་ཞེས་ཐེངས་གསུམ་ཟེར་བར་ངེས་”ཞེས་གསུངས།
MAR 14:31 འོན་ཀྱང་པེ་ཏྲོས་ཁོང་ལ་“ང་ནི་ཁྱེད་དང་མཉམ་དུ་ཤི་དགོས་ཀྱང་ཁྱེད་སུ་ཡིན་མི་ཤེས་ཞེས་ཟེར་མི་སྲིད་”ཅེས་ནན་གྱིས་ཞུས་ཤིང་ཉེ་གནས་གཞན་རྣམས་ཀྱིས་ཀྱང་དེ་ལྟར་ཞུས།
MAR 14:32 དེ་ནས་ཁོང་རྣམས་གེད་སེམ་མཱ་ནེ་ཞེས་བྱ་བའི་གནས་སུ་ཕེབས་པ་དང༌། ཁོང་གིས་རང་གི་ཉེ་གནས་རྣམས་ལ་“ངས་གསོལ་བ་འདེབས་དུས་ཁྱེད་ཚོ་གནས་འདིར་སྡོད་ཅིག་”ཅེས་གསུངས་ཤིང༌།
MAR 14:33 ཉེ་གནས་རྣམས་ལས་པེ་ཏྲོ་དང༌། ཡ་ཀོབ། ཡོ་ཧ་ནན་གསུམ་ཁྲིད་པ་དང༌། དེའི་ཚེ་ཁོང་ཉིད་ཀྱི་ཐུགས་ཤིན་ཏུ་འཁྲུགས་པར་གྱུར་ཏེ་
MAR 14:34 “ངའི་ཡིད་ཤིན་ཏུ་སྐྱོ་ཞིང་འཆི་ལ་ཉེ་བས། ཁྱེད་ཚོ་འདི་རུ་གཉིད་མ་ལོག་པར་དོགས་ཟོན་བྱོས་ཤིག་”ཅེས་གསུངས་པ་དང༌།
MAR 14:35 དེ་ནས་ཁོང་ཅུང་ཟད་ཕར་ཕེབས་ནས་ཕྱག་འཚལ་ཏེ་“གལ་སྲིད་སྒྲུབ་འོས་པ་ཡིན་ན་ང་ནི་དུས་འདི་ལས་ཐར་བར་མཛོད་ཅིག ངའི་ཡབ་ལགས། ཁྱེད་ཀྱིས་དོན་ཐམས་ཅད་སྒྲུབ་སྲིད་པས་སྡུག་བསྔལ་གྱི་ཕོར་པ་འདི་ང་ལས་ཕར་ལེན་མཛོད། འོན་ཀྱང་ངའི་བསམ་པ་བཞིན་དུ་མི་འགྱུར་བར་ཁྱེད་ཀྱི་དགོངས་པ་བཞིན་དུ་གྱུར་ཅིག་”ཅེས་གསོལ་བ་བཏབ།
MAR 14:37 ཁོང་ཚུར་ཕེབས་སྐབས་ཁོ་རྣམས་གཉིད་ལོག་གི་ཡོད་པར་གཟིགས་ནས་པེ་ཏྲོ་ལ་“སི་མོན། ཁྱེད་གཉིད་ལོག་གི་ཡོད་དམ། ཆུ་ཚོད་གཅིག་ཙམ་ལའང་དོགས་ཟོན་བྱ་མི་ནུས་སམ།
MAR 14:38 ཁྱེད་བསླུ་བར་མི་འགྱུར་བའི་ཕྱིར་དོགས་ཟོན་བྱོས་ལ་སྨོན་ལམ་ཐོབས་ཤིག སེམས་ནས་དེ་ལྟར་བྱེད་བསམས་ཀྱང་ལུས་པོའི་ནུས་ཤུགས་ཞན་པ་ཡིན་”ཞེས་གསུངས།
MAR 14:39 དེ་ནས་ཡང་ཁོང་ཕར་ཕེབས་ནས་སྔ་མ་བཞིན་དུ་གསོལ་བ་བཏབ་པ་དང༌།
MAR 14:40 ཁོང་ཚུར་ཕེབས་ནས་ཁོ་རྣམས་སླར་ཡང་གཉིད་ལོག་གི་ཡོད་པར་གཟིགས། ཁོ་ཚོའི་གཉིད་ཤིན་ཏུ་ལྕི་བས་ཁོང་ལ་ལན་ཅི་ཞུས་པའང་མ་ཤེས།
MAR 14:41 ཁོང་ཐེངས་གསུམ་པར་ཚུར་ཕེབས་ནས་“ཁྱེད་ཚོ་ད་དུང་ཉལ་ནས་ངལ་གསོའམ། ད་འགྲིག་སོང༌། ད་ལྟ་དུས་ལ་བབས་སོ། ལྟོས་དང༌། མིའི་རིགས་ཀྱི་བུ་ནི་ད་ལྟ་སྡིག་ཉེས་ཅན་གྱི་དབང་དུ་སྤྲོད་པར་བྱེད།
MAR 14:42 ལྟོས་ཤིག ང་ལ་རྒྱབ་གཏོད་བྱེད་མཁན་དེ་ཉེ་བར་སླེབས་པས། ཡར་ལོངས་དང་ཁོ་རང་འཕྲད་དུ་འགྲོའོ་”ཞེས་གསུངས།
MAR 14:43 དེ་ནས་ཁོང་གིས་དེ་ལྟར་གསུངས་མ་ཐག་ཉེ་གནས་བཅུ་གཉིས་པོ་ལས་ཡུ་དཱ་ཞེས་བྱ་བ་དེ་ཡ་ཧུ་དཱ་པའི་བླ་ཆེན་དང་ཆོས་ཁྲིམས་ལ་མཁས་པའི་མི། རྒན་པོ་རྣམས་ཀྱི་ས་ནས་ལག་ཏུ་རལ་གྲི་དང་དབྱུག་པ་འཁྱེར་བའི་མི་ཚོགས་དང་བཅས་པ་དེར་སླེབས།
MAR 14:44 ཡེ་ཤུ་ལ་རྒྱབ་གཏོད་བྱེད་མཁན་དེས་སྔོན་ནས་ཁོ་ཚོར་གསང་བརྡ་གྲ་སྒྲིག་བྱས་ཏེ་“ངས་སུ་ལ་འོ་བྱས་པ་དེ་ཁོང་རང་རེད། ཁྱོད་ཚོས་ཁོང་དམ་པོར་ཟིན་ནས་ཁྲིད་ཅིག་”ཅེས་བཤད་ཡོད།
MAR 14:45 ཡུ་དཱ་སླེབས་མ་ཐག་ཏུ་ཡེ་ཤུའི་དྲུང་དུ་ཡོང་ནས་“རབ་བི་”ཞེས་འགྲམ་པར་འོ་བྱས།
MAR 14:46 དེ་ནས་ཁོ་ཚོས་ཡེ་ཤུ་འཛིན་བཟུང་བྱས་པ་རེད།
MAR 14:47 ཉེ་འགྲམ་དུ་ལངས་ནས་བསྡད་ཡོད་པ་རྣམས་ལས་མི་ཞིག་གིས་རལ་གྲི་བཏོན་ཏེ་ཡ་ཧུ་དཱ་པའི་བླ་ཆེན་གཙོ་བོའི་གཡོག་པོར་བརྒྱབ་ནས་རྣ་བ་ཡ་གཅིག་བཅད།
MAR 14:48 དེ་ནས་ཡེ་ཤུས་ཁོ་ཚོར་“ཁྱེད་ཚོས་རལ་གྲི་དང་དབྱུག་པ་ཁྱེར་ནས་ཇག་པ་འཛིན་པ་ལྟར་ང་རང་འཛིན་དུ་ཡོང་ངམ།
MAR 14:49 ང་ནི་ཉིན་རེ་བཞིན་མཆོད་ཁང་ཆེན་མོར་ཆོས་བསྟན་ཏེ། ཁྱེད་ཚོ་དང་མཉམ་དུ་སྡོད་སྐབས་ཁྱེད་ཚོས་ང་བཟུང་མེད། འོན་ཀྱང་དོན་འདི་སྒྲུབ་པ་ནི་དཀོན་མཆོག་གི་གསུང་རབ་ཀྱི་ལུང་བསྟན་འགྲུབ་པའི་ཕྱིར་ཡིན་”ཞེས་གསུངས་པ་དང༌།
MAR 14:50 ཉེ་གནས་ཐམས་ཅད་ཀྱིས་ཀྱང་ཡེ་ཤུ་དོར་ནས་བྲོས།
MAR 14:51 སྐབས་དེར་ལུས་ལ་རས་རྐྱང་གྱོན་པའི་གཞོན་ནུ་ཞིག་ཁོང་གི་རྗེས་སུ་འབྲངས་པ་ལ་མི་དེ་ཚོས་ཁོ་ཡང་འཛིན་གྲབས་བྱས་པས།
MAR 14:52 ཁོས་རས་རྐྱང་གཡུགས་ཏེ་ལུས་གཅེར་བུར་བྲོས།
MAR 14:53 དེ་ནས་ཡེ་ཤུ་ཡ་ཧུ་དཱ་པའི་བླ་ཆེན་གཙོ་བོའི་དྲུང་དུ་ཁྲིད་ཅིང༌། ཡ་ཧུ་དཱ་པའི་བླ་ཆེན་དང་རྒན་པོ། ཆོས་ཁྲིམས་ལ་མཁས་པའི་མི་རྣམས་ཀྱང་དེར་འཛོམས་བཞིན་ཡོད་པ་དང༌།
MAR 14:54 པེ་ཏྲོའང་རྒྱང་རིང་ནས་ཁོང་གི་རྗེས་སུ་འབྲངས་ཏེ་བླ་ཆེན་གཙོ་བོའི་སྒོ་རར་ཐད་ཀར་སོང་ནས་འཁོར་གཡོག་དང་མཉམ་དུ་མེར་བསྲོ་བཞིན་བསྡད།
MAR 14:55 དེ་ནས་ཡ་ཧུ་དཱ་པའི་བླ་ཆེན་རྣམས་དང་ཡ་ཧུ་དཱ་པའི་རྒྱལ་ཚོགས་ཀྱི་མི་ཐམས་ཅད་ཀྱིས་ཁོང་སྲོག་གཅོད་པའི་ཕྱིར་དཔང་པོ་བྱེད་མཁན་བཙལ་ཡང་མ་རྙེད།
MAR 14:56 མི་མང་པོས་རྫུན་གྱི་དཔང་པོ་བྱས་ཀྱང་དཔང་པོ་བྱས་པ་ནང་མཐུན་མ་བྱུང༌།
MAR 14:57 ཡང་མི་འགའ་ཞིག་ལངས་ནས་ཁོང་ལ་རྫུན་གྱི་དཔང་པོ་བྱས་ཏེ་སྨྲས་པ་
MAR 14:58 “ཁོས་ངས་མི་ཡི་ལག་པས་བཟོས་པའི་དཀོན་མཆོག་གི་ཕོ་བྲང་འདི་བཤིག་ནས། ཉིན་གསུམ་ལ་མི་ཡི་ལག་པས་མ་བརྩིགས་པའི་ཕོ་བྲང་གཞན་ཞིག་རྩིག་པར་བྱའོ་ཞེས་ཟེར་བ་ང་ཚོས་ཐོས་”ཞེས་སྨྲས།
MAR 14:59 འོན་ཀྱང་དཔང་པོ་བྱས་པ་དེ་ཡང་མ་མཐུན།
MAR 14:60 དེ་ནས་ཡ་ཧུ་དཱ་པའི་བླ་ཆེན་གཙོ་བོ་དེ་དཀྱིལ་ནས་ཡར་ལངས་ཏེ་ཡེ་ཤུ་ལ་“མི་འདི་རྣམས་ཀྱིས་ཁྱོད་ལ་དཔང་པོ་བྱེད་པ་འདི་ཅི་ཡིན་ནམ། ཁྱོད་ཀྱིས་ལན་ཅི་ཡང་མི་འདེབས་སམ་”ཞེས་དྲིས་ནས།
MAR 14:61 ཁོང་གིས་ཅི་ཡང་མ་གསུངས་ཤིང་བཀའ་ལན་མ་གནང༌། ཡང་བླ་ཆེན་གཙོ་བོས་“ཁྱོད་ནི་བསྟོད་པར་འོས་པའི་དཀོན་མཆོག་གི་སྲས་སྐྱབས་མགོན་མཱ་ཤི་ཀ་ཡིན་ནམ་”ཞེས་དྲིས་པས།
MAR 14:62 ཡེ་ཤུས་“ང་རང་ལགས་སོ། ཡང་ཁྱེད་ཚོས་མིའི་རིགས་ཀྱི་བུ་ཁོང་ཉིད་དབང་ཀུན་དང་ལྡན་པའི་དཀོན་མཆོག་གི་ཕྱག་གཡས་སུ་བཞུགས་ཏེ་ནམ་མཁའི་སྤྲིན་དང་བཅས་འབྱོན་པ་མཐོང་ངེས་ཡིན་”ཞེས་གསུངས།
MAR 14:63 བླ་ཆེན་གཙོ་བོས་རང་གི་གོས་དབྲལ་ནས་“ད་ལྟ་ང་ཚོར་དཔང་པོ་གཞན་ཅི་ལ་དགོས།
MAR 14:64 ཁོས་དཀོན་མཆོག་ལ་སྐུར་བ་བཏབ་པ་ཁྱེད་ཚོས་ཀྱང་ཐོས་པས་ཁྱེད་ཚོར་བསམ་འཆར་ཅི་ཡོད་”ཅེས་སྨྲས། དེ་ཚོ་ཚང་མས་ཁོང་གསོད་དགོས་པའི་ཁྲིམས་ཐག་བཅད།
MAR 14:65 དེ་ནས་མི་འགའ་ཞིག་གིས་ཁོང་ལ་མཆིལ་མ་གཏོར་ཞིང་སྤྱན་ཟུང་རས་ཀྱིས་བཏུམས་ཏེ་འགྲམ་ལྕག་བཞུས་ཤིང་རྫོག་བརྒྱབ་ནས་ཁོང་ལ་“ད་མངོན་ཤེས་ཤོད་ཅིག་”ཅེས་བརྗོད་པ་དང་དམག་མི་ཚོས་ཀྱང་ཁོང་ཚུར་དྲུད་ནས་བཞུས།
MAR 14:66 དེ་ནས་ཉེ་གནས་པེ་ཏྲོ་ཞོལ་གྱི་སྒོ་ར་ལ་བསྡད་ཡོད་པའི་སྐབས་སུ་བླ་ཆེན་གཙོ་བོའི་གཡོག་མོ་ཞིག་ཡོང་སྟེ།
MAR 14:67 ཁོ་མོས་པེ་ཏྲོ་མེར་བསྲོ་བཞིན་པ་མཐོང་ཞིང་ཁོ་ལ་ཞིབ་པར་བལྟས་ནས་“ཁྱོད་ཀྱང་ན་ཙ་རེལ་གྱི་མི་ཡེ་ཤུ་དང་མཉམ་དུ་ཡོད་པ་གཅིག་རེད་”ཅེས་སྨྲས་པས།
MAR 14:68 པེ་ཏྲོས་ཁས་མ་བླངས་པར་“ཁྱོད་ཀྱིས་གང་བཤད་པ་ངས་མི་ཤེས་ལ་ཧ་ཡང་མི་གོ་”ཞེས་བཤད་དེ་སྒོའི་ཕྱི་རོལ་ཏུ་སོང་བ་དང་བྱ་ཕོས་སྐད་གྲགས་སོ།
MAR 14:69 ཡང་གཡོག་མོ་དེས་པེ་ཏྲོ་མཐོང་ནས་སླར་ཡང་དེ་རུ་ཡོད་པའི་མི་རྣམས་ལ་“མི་འདི་དེ་ཚོའི་ནང་ནས་གཅིག་རེད་”ཅེས་བཤད།
MAR 14:70 འོན་ཀྱང་ཁོང་གིས་ཡང་བསྐྱར་ཁས་མ་བླངས། དེ་ནས་ཅུང་མ་འགོར་བར་དེར་ཡོད་པའི་མི་རྣམས་ཀྱིས་ཀྱང་པེ་ཏྲོ་ལ་“ཁྱོད་ནི་ག་ལིལ་ཡུལ་གྱི་མི་ཞིག་ཡིན་པས་དངོས་གནས་དེ་ཚོའི་ནང་ནས་གཅིག་རེད་”ཅེས་སྨྲས།
MAR 14:71 པེ་ཏྲོས་སྡིགས་དམོད་བྱེད་བཞིན་མནའ་བསྐྱལ་ཏེ་“ཁྱོད་ཚོས་ཟེར་བའི་མི་དེ་ངས་ངོ་མི་ཤེས་”ཞེས་སྨྲས།
MAR 14:72 དེ་མ་ཐག་ཏུ་བྱ་ཕོས་སྐད་ཐེངས་གཉིས་པ་གྲགས་པས། པེ་ཏྲོས་དེ་སྔ་ཡེ་ཤུས་ཁོ་རང་ལ། བྱ་ཕོས་སྐད་ཐེངས་གཉིས་མ་གྲགས་པའི་སྔོན་དུ་ཁྱེད་ཀྱིས་ང་རང་སུ་ཡིན་མི་ཤེས་ཞེས་ཐེངས་གསུམ་སྨྲ་བར་ངེས་ཞེས་གསུངས་པ་དེ་དྲན་ནས་སེམས་ཤིན་ཏུ་སྐྱོ་སྟེ་ངུས་སོ། །
MAR 15:1 ནམ་ལངས་མ་ཐག་ཏུ་ཡ་ཧུ་དཱ་པའི་བླ་ཆེན་རྣམས་དང་རྒན་པོ། ཆོས་ཁྲིམས་ལ་མཁས་པའི་མི་རྣམས། རྒྱལ་ཚོགས་ཀྱི་མི་ཐམས་ཅད་མཉམ་དུ་གྲོས་བྱས་ཏེ། ཡེ་ཤུ་བཀྱིགས་ནས་ཁྲིད་དེ་སྤྱི་ཁྱབ་པི་ལ་ཏུ་ལ་བཏད།
MAR 15:2 པི་ལ་ཏུས་“ཁྱོད་ནི་ཡ་ཧུ་དཱ་པའི་མི་རིགས་ཀྱི་རྒྱལ་པོ་ཡིན་ནམ་”ཞེས་ཁོང་ལ་དྲིས་ནས། ཁོང་གིས་“ཁྱེད་ཀྱིས་སྨྲས་པ་བཞིན་ཡིན་ནོ་”ཞེས་གསུངས།
MAR 15:3 ཡང་ཡ་ཧུ་དཱ་པའི་བླ་ཆེན་རྣམས་ཀྱིས་ཁོང་ལ་ཉེས་སྐྱོན་མང་པོ་བཙུགས།
MAR 15:4 སླར་ཡང་པི་ལ་ཏུ་ཡིས་“མི་དེ་རྣམས་ཀྱིས་ཁྱོད་ལ་ཉེས་སྐྱོན་ཇི་འདྲ་མང་པོ་འདོགས་ཀྱི་འདུག་ཨང༌། ཁྱོད་ཀྱིས་ལན་ཅིའང་མི་འདེབས་སམ་”ཞེས་དྲིས།
MAR 15:5 ཡེ་ཤུས་བཀའ་ལན་ཅི་ཡང་མ་གསུངས་པས་པི་ལ་ཏུ་ཡང་ངོ་མཚར་བར་གྱུར།
MAR 15:6 དུས་ཆེན་དེར་སྤྱི་ཁྱབ་པི་ལ་ཏུས་མི་ཚོགས་ཀྱི་འདོད་པ་ལྟར་བཙོན་པ་རེ་གློད་གྲོལ་གཏོང་བའི་ལུགས་སྲོལ་ཡོད།
MAR 15:7 མིང་ལ་པར་ཨབ་པཱ་ཟེར་བའི་མི་ཞིག་ཡོད་པ་དེ་ཟིང་འཁྲུག་སྐབས་མི་བསད་མྱོང་བའི་བཙོན་པ་གཞན་དང་མཉམ་དུ་བཙོན་ཁང་ནང་ཡོད།
MAR 15:8 མི་ཚོགས་ཀྱིས་པི་ལ་ཏུའི་རྩར་འཛོམས་ནས་སྔོན་མའི་ལུགས་སྲོལ་ལྟར་གནང་རོགས་ཞེས་ཞུས།
MAR 15:9 པི་ལ་ཏུས་“ཁྱོད་ཚོ་ལ་ཡ་ཧུ་དཱ་པའི་རྒྱལ་པོ་གློད་དགོས་ཀྱི་ཡོད་དམ་”ཞེས་སྐད་ཆ་དྲིས།
MAR 15:10 དེ་ནི་པི་ལ་ཏུས་ཡ་ཧུ་དཱ་པའི་བླ་ཆེན་རྣམས་ཀྱིས་ཡེ་ཤུ་ལ་ཕྲག་དོག་བྱས་ནས་ཁོང་ལ་རྩིས་སྤྲད་པ་ཤེས་ཀྱི་ཡོད་པས་རེད།
MAR 15:11 འོན་ཀྱང་བླ་ཆེན་རྣམས་ཀྱིས་པར་ཨབ་པཱ་གློད་པའི་ཆེད་དུ་མི་ཚོགས་ལ་ངན་བསྐུལ་བྱས།
MAR 15:12 པི་ལ་ཏུས་ཡང་བསྐྱར་ཁོ་ཚོར་“བྱས་ན་ཁྱོད་ཚོས་ཡ་ཧུ་དཱ་པའི་རྒྱལ་པོ་ཟེར་བ་དེར་ངས་གང་འདྲ་བྱེད་དགོས་སམ་”ཞེས་དྲིས་པས།
MAR 15:13 ཁོ་ཚོས་སྐད་ཆེན་པོས་“རྒྱང་ཤིང་སྒང་ལ་སོད་ཅིག་”ཅེས་བཤད།
MAR 15:14 པི་ལ་ཏུས་“རྒྱུ་མཚན་གང་ཡིན། ཁོང་གིས་ལས་ངན་ག་རེ་བྱས་ཡོད་”ཅེས་དྲིས། འོན་ཀྱང་མི་ཚོགས་ཀྱིས་སྐད་ཤུགས་དེ་བས་ཆེན་པོས་“རྒྱང་ཤིང་སྒང་ལ་སོད་ཅིག་”ཅེས་བཤད།
MAR 15:15 པི་ལ་ཏུས་མི་ཚོགས་ཀྱི་འདོད་པ་བསྐོང་ཕྱིར་པར་ཨབ་པཱ་གློད་པ་དང༌། ཡེ་ཤུ་རྟ་ལྕག་གིས་བརྡུང་དུ་བཅུག་ནས་རྒྱང་ཤིང་སྒང་ལ་གསོད་པའི་ཕྱིར་དམག་མི་ཚོར་རྩིས་སྤྲད།
MAR 15:16 དེ་ནས་དམག་མི་ཚོས་ཁོང་ཉིད་སྤྱི་ཁྱབ་ཀྱི་ཕོ་བྲང་གི་སྒོ་ར་ལ་ཁྲིད་དེ་དམག་ཁག་ཐམས་ཅད་བསྡུས་ཤིང༌།
MAR 15:17 དེ་ཚོས་ཁོང་གི་ལུས་ལ་མདོག་རྒྱ་སྨུག་ཅན་གྱི་ན་བཟའ་བསྐོན་པ་དང་ཚེར་མས་སླས་པའི་ཅོད་པན་ཞིག་ཀྱང་ཁོང་གི་དབུ་ལ་བསྐོན།
MAR 15:18 ཡང་དེ་ཚོས་ཁོང་ལ་ཕྱག་ཕུལ་ཞུ་ཁུལ་བྱས་ནས་“ཡ་ཧུ་དཱ་པའི་རྒྱལ་པོ་ལ་ཕྱག་འཚལ་ལོ་”ཞེས་སྨྲས་པ་དང༌།
MAR 15:19 ཁོང་གི་དབུ་ལ་དབྱུག་པ་ཞིག་གིས་ཡང་ཡང་བརྡེག་ཅིང་གདོང་ལ་མཆིལ་མ་གཏོར། ཡང་པུས་མོ་སར་བཙུགས་ཏེ་ཁོང་ལ་ཕྱག་འཚལ་ཁུལ་བྱས།
MAR 15:20 དེ་ལྟར་ཁོང་ལ་བརྙས་བཅོས་བྱས་ཚར་རྗེས་མདོག་རྒྱ་སྨུག་ཅན་གྱི་ན་བཟའ་ཕུད་ཅིང༌། ཁོང་ལ་རང་གི་ན་བཟའ་གྱོན་དུ་བཅུག་སྟེ་རྒྱང་ཤིང་ཐོག་ལ་གཟེར་རྒྱག་པའི་ཕྱིར་ཕར་ཁྲིད།
MAR 15:21 ཁོང་ཚོ་ཕྱི་ལ་ཕེབས་སྐབས། ཨ་ལིག་ཟན་ཌེར་དང་རུ་ཕུ་སུ་ཞེས་པའི་སྤུན་གཉིས་ཀྱི་ཕ་སི་མོན་ནི་སེ་རེ་ནཱ་གྲོང་ཁྱེར་གྱི་མི་ཡིན་ལ། ཁོ་རང་གྲོང་གསེབ་ནས་འོངས། ས་ཆ་འདི་བརྒྱུད་ནས་འགྲོ་དུས། ཁོ་ཚོས་རྒྱང་ཤིང་འཁུར་དུ་འཇུག་ཕྱིར་མི་དེའང་བཙན་གྱིས་ཁྲིད།
MAR 15:22 ཡང་ཡེ་ཤུ་ཁྲིད་ནས་གོལ་གོ་ཐ་ཞེས་པ་ནི་མགོ་རུས་དང་འདྲ་བའི་ས་ཆ་ཟེར་བའི་ས་དེར་སླེབས་པ་དང༌།
MAR 15:23 ཁོ་ཚོས་ཁོང་ལ་གུ་གུལ་ཞེས་པའི་སྨན་འདྲེས་པའི་རྒུན་ཆང་དྲངས་ཀྱང་ཁོང་གིས་མ་བཞེས།
MAR 15:24 དེའི་ཚེ་དམག་མི་དེ་ཚོས་ཁོང་རྒྱང་ཤིང་སྟེང་དུ་གཟེར་བརྒྱབ་ནས་བཀལ། མི་རེ་རེར་གང་ཐོབ་རྒྱན་བརྒྱབ་ནས་ཁོང་གི་ན་བཟའ་བགོ་བཤའ་བྱས།
MAR 15:25 ཁོ་ཚོས་ཡེ་ཤུ་རྒྱང་ཤིང་སྒང་ལ་གཟེར་བརྒྱབ་ནས་བཀལ་བའི་དུས་ཚོད་ནི་ཞོགས་པའི་ཆུ་ཚོད་དགུ་པར་ཡིན།
MAR 15:26 ཁོང་གི་ཉེས་ཚིག་ལ་ཡ་ཧུ་དཱ་པའི་རྒྱལ་པོ་ཞེས་བྲིས་ཡོད།
MAR 15:27 ཁོང་མཉམ་དུ་ཇག་པ་གཉིས་ནས་གཅིག་ཁོང་གི་གཡས་ཕྱོགས་སུ་ཡོད་པའི་རྒྱང་ཤིང་དང་གཅིག་ཁོང་གི་གཡོན་ཕྱོགས་སུ་ཡོད་པའི་རྒྱང་ཤིང་ལ་གཟེར་བརྒྱབ།
MAR 15:29 གནས་དེར་བརྒྱུད་ནས་འགྲོ་བའི་མི་རྣམས་ཀྱིས་ཁོང་ལ་དམའ་འབེབས་བཏང་ནས་མགོ་གཡུག་བཞིན་“ཀྱེ། མཆོད་ཁང་ཆེན་མོ་བཤིག་ནས་ཉིན་གསུམ་གྱི་ནང་སླར་རྩིག་མཁན་ཁྱོད།
MAR 15:30 ད་ལྟ་རང་ཉིད་སྐྱོབས་དང༌། རྒྱང་ཤིང་སྟེང་ནས་མར་བོབས་ཤིག་”ཅེས་སྨྲས་པ་དང༌།
MAR 15:31 དེ་བཞིན་དུ་ཡ་ཧུ་དཱ་པའི་བླ་ཆེན་རྣམས་དང་ཆོས་ཁྲིམས་ལ་མཁས་པའི་མི་རྣམས་ཀྱིས་ཀྱང་མཉམ་དུ་ཁོང་ལ་འཕྱ་དམོད་བྱེད་དེ་“ཁོས་གཞན་རྣམས་སྐྱོབ་ཐུབ་པ་ལས་རང་ཉིད་སྐྱོབ་མི་ཐུབ་”ཅེས་ཕན་ཚུན་གླེང་བ་དང༌།
MAR 15:32 “ཀྱེ། ཡི་སི་ར་ཨེལ་གྱི་རྒྱལ་པོ་སྐྱབས་མགོན་མཱ་ཤི་ཀ ང་ཚོས་མཐོང་ནས་དད་པ་བྱེད་པའི་ཕྱིར་ད་ལྟ་ཁྱོད་རང་རྒྱང་ཤིང་སྟེང་ནས་མར་བོབ་”ཅེས་སྨྲས། ཁོང་དང་མཉམ་དུ་རྒྱང་ཤིང་གཞན་ལ་གཟེར་བརྒྱབ་པའི་ཇག་པ་གཉིས་ཀྱིས་ཀྱང་ཁོང་ལ་དེ་ལྟར་སྨྲས།
MAR 15:33 ཉིན་གུང་ལ་སླེབས་དུས་མུན་པས་ལུང་པ་དེ་ཡོངས་སུ་འཐིབས་ཏེ་ཆུ་ཚོད་གསུམ་པའི་བར་དུ་ལུས།
MAR 15:34 ཆུ་ཚོད་གསུམ་པར་ཡེ་ཤུས་གསུང་ཆེན་པོས་“ཨེ་ལོ་ཨི། ཨེ་ལོ་ཨི། ལ་མ་ཤ་བག་ཐ་ནི་”ཞེས་པའི་དོན་དག་ནི་“ངའི་དཀོན་མཆོག ངའི་དཀོན་མཆོག ཁྱེད་ཀྱིས་ང་དོར་དགོས་དོན་ཅི་ཡིན་”ཞེས་པའོ།
MAR 15:35 ཉེ་འགྲམ་ལ་ཡོད་པའི་མི་ཁ་ཤས་ཀྱིས་དེ་ཐོས་ནས་“ཉོན་ཅིག ཁོང་གིས་ལུང་སྟོན་པ་ཨེ་ལི་ཡཱ་འབོད་ཀྱི་འདུག་”ཅེས་བཤད།
MAR 15:36 མི་ཞིག་གིས་ཕར་ཕྱིན་ཏེ་རྒུན་ཆང་སྐྱུར་མོའི་ནང་སྲིང་བལ་སྦངས་ནས་དབྱུག་པའི་རྩེར་བཀོན་ཏེ་ཡེ་ཤུ་ལ་འཐུང་དུ་བཅུག་ནས་“སྒུག་ཅིག ཨེ་ལི་ཡཱས་ཁོང་མར་ཕབ་ཆེད་ཕེབས་མ་ཕེབས་བལྟའོ་”ཞེས་བཤད།
MAR 15:37 ཡེ་ཤུས་གསུངས་ཆེན་པོ་ཞིག་བསྐྱོན་ནས་སྐུ་ཚེ་ལས་འདས་སོ།
MAR 15:38 དེའི་སྐབས་མཆོད་ཁང་ཆེན་མོའི་ནང་གི་ཡོལ་བ་དེ་སྟེང་ནས་འོག་བར་དུམ་བུ་གཉིས་སུ་རལ།
MAR 15:39 རྒྱང་ཤིང་མདུན་དུ་ཡེ་ཤུ་དང་ཁ་ཐུག་ལངས་བསྡད་ཡོད་པའི་བརྒྱ་དཔོན་ཞིག་གིས་ཡེ་ཤུ་དེ་ལྟར་གྲོངས་པ་མཐོང་ནས་“ཁོང་དཀོན་མཆོག་གི་སྲས་ཡིན་པ་དེ་བདེན་པ་རང་རེད་”ཅེས་བཤད།
MAR 15:40 རྒྱང་རིང་ནས་བལྟ་བའི་བུད་མེད་རྣམས་ཀྱི་ནང་ནས་མག་དལ་གྲོང་གསེབ་ནས་ཡིན་པའི་མིར་ཡམ་དང༌། ཡ་ཀོབ་ཆུང་བ་དང་ཡོ་སེ་གཉིས་ཀྱི་ཨ་མ་མིར་ཡམ། བུད་མེད་ས་ལོ་མེ་ཡང་ཡོད།
MAR 15:41 དེ་རྣམས་ནི་ཡེ་ཤུ་ག་ལིལ་ཡུལ་དུ་བཞུགས་པའི་དུས་སུ་ཁོང་གི་རྗེས་སུ་འབྲངས་ནས་ཁོང་ལ་ཞབས་ཕྱི་ཞུས་མྱོང་ཞིང༌། ཁོང་དང་མཉམ་དུ་ཡེ་རུ་ཤ་ལེམ་གྲོང་ཁྱེར་ལ་སོང་བའི་བུད་མེད་གཞན་མང་པོ་ཡང་གནས་འདིར་ཡོད།
MAR 15:42 ས་མ་རུབ་ཙམ་ལ་གྲོང་ཁྱེར་ཨ་རི་མ་ཐཱའི་མི་མིང་ལ་ཡོ་སེབ་ཟེར་བ་ཞིག་སླེབས། ཁོང་ནི་མིས་གུས་བཀུར་བྱེད་པའི་ཡ་ཧུ་དཱ་པའི་རྒྱལ་ཚོགས་ཀྱི་ཁོངས་མི་ཞིག་རེད་ལ་དཀོན་མཆོག་གི་རྒྱལ་སྲིད་སྒུག་མཁན་ཞིག་ཀྱང་རེད། ཉིན་དེ་ནི་གྲ་སྒྲིག་གི་ཉིན་མོ་ཡིན་ཞིང་ངལ་གསོའི་ཉིན་མོའི་ཉིན་སྔོན་མ་དེ་སོང་བས། ཡོ་སེབ་ཀྱིས་བློ་ཁོག་ཆེན་པོའི་ངང་ནས་པི་ལ་ཏུའི་སར་ཕྱིན་ཏེ་ཡེ་ཤུའི་སྐུ་ཕུང་གནང་རོགས་ཞུས།
MAR 15:44 པི་ལ་ཏུས་ཡེ་ཤུ་གྲོངས་ཚར་བ་ཐོས་རྗེས་ཡ་མཚན་སྐྱེས་ནས་བརྒྱ་དཔོན་སྐད་བཏང་སྟེ་ཁོང་གྲོངས་ནས་དུས་ཚོད་རིང་པོ་ཕྱིན་ཡོད་མེད་སྐད་ཆ་དྲིས།
MAR 15:45 བརྒྱ་དཔོན་ནས་ཡེ་ཤུ་གྲོངས་པའི་གནས་ཚུལ་ངོ་མ་ཤེས་རྗེས་པི་ལ་ཏུས་ཡེ་ཤུའི་སྐུ་ཕུང་ཡོ་སེབ་ལ་སྤྲོད་རྒྱུའི་ཆོག་མཆན་གནང༌།
MAR 15:46 ཡོ་སེབ་ཀྱིས་རས་སྤུས་ལེགས་ཤིག་ཉོས་ཏེ་ཡེ་ཤུའི་སྐུ་ཕུང་མར་ཕབ་པ་དང་དེར་རས་ཀྱིས་བསྒྲིལ་ནས་བྲག་ལ་བརྐོས་པའི་དུར་ཁང་ཞིག་གི་ནང་ལ་བཞག དེ་ནས་རྡོ་ཆེན་པོ་ཞིག་བསྒྲིལ་ཏེ་དུར་ཁང་གི་ཁ་བཀག
MAR 15:47 མག་དལ་མ་མིར་ཡམ་དང་ཡོ་སེ་ཞེས་བྱ་བའི་ཨ་མ་མིར་ཡམ་གཉིས་ཀྱིས་སྐུ་གདུང་གང་དུ་བཞག་པའི་གནས་མཐོང་ངོ༌། །
MAR 16:1 ངལ་གསོའི་ཉིན་མོ་རྫོགས་རྗེས་གྲོང་ཁྱེར་མག་དལ་ནས་ཡིན་པའི་མིར་ཡམ་དང་ཡ་ཀོབ་ཀྱི་ཨ་མ་མིར་ཡམ། ས་ལོ་མེ་བཅས་ཀྱིས་ཡེ་ཤུའི་སྐུ་ཕུང་ལ་འབྱུག་ཆེད་ཀྱི་དྲི་ཞིམ་འབྱུག་རྫས་ཉོས་ནས།
MAR 16:2 བདུན་ཕྲག་གཅིག་གི་ཉིན་དང་པོའི་ཞོགས་པ་ཉི་མ་ཤར་ཙམ་ལ་ཁོང་ཚོ་དུར་ཁང་ལ་ཕྱིན།
MAR 16:3 ཁོང་ཚོས་ཕན་ཚུན་“སུས་ང་ཚོར་དུར་ཁང་གི་ཁའི་རྡོ་དེ་བསྒྲིལ་ནས་ཕར་ཕྱེ་ཡོང་”ཞེས་སྐད་ཆ་བཤད།
MAR 16:4 ཁོང་ཚོས་ཡར་ལྟ་དུས་རྡོ་ཧ་ཅང་ཆེན་པོ་དེ་བསྒྲིལ་ཚར་ཡོད་པ་མཐོང༌།
MAR 16:5 དུར་ཁང་གི་ནང་ལ་འཛུལ་སྐབས་གཞོན་ནུ་གོས་དཀར་པོ་གྱོན་པ་ཞིག་གཡས་ཕྱོགས་སུ་བསྡད་ཡོད་པ་མཐོང་བས་ཁོང་ཚོ་འཇིགས་པ་རེད།
MAR 16:6 གཞོན་ནུ་དེས་ཁོང་ཚོར་“ཞེད་མི་དགོས། ཁྱེད་ཚོས་འཚོལ་བའི་ན་ཙ་རེལ་པ་ཡེ་ཤུ་རྒྱང་ཤིང་སྟེང་བཀལ་བ་ཁོང་སྐུ་གསོན་པོར་བཞེངས་སུ་འགྱུར་ཏེ་འདིར་མེད། ལྟོས་དང༌། སྐུ་ཕུང་བཞག་ས་འདི་རེད།
MAR 16:7 ཁྱེད་ཚོ་ཕྱིན་ནས་ཁོང་གི་ཉེ་གནས་པེ་ཏྲོ་དང་བཅས་པ་ལ་འདི་ལྟར་ཤོད། ཡེ་ཤུས་ཁྱེད་ཚོའི་སྔོན་ལ་ག་ལིལ་ཡུལ་དུ་ཕེབས་ནས་སྔར་གསུངས་པ་བཞིན་དེར་ཁོང་མཇལ་ཡོང་”ཞེས་བཤད།
MAR 16:8 ཁོང་ཚོ་འདར་ཞིང་དངངས་འཚབ་ཆེན་པོ་སྐྱེས་ནས་དུར་ཁང་ནས་ཕྱིར་བྲོས་ཏེ་སུ་ལའང་མ་བཤད། གང་ལགས་ཟེར་ན། ཁོང་ཚོ་ཧ་ཅང་འཇིགས་པས་སོ། །
MAR 16:9 དེ་ཡང་བདུན་ཕྲག་གཅིག་གི་ཉིན་དང་པོའི་ཞོགས་པ་སྔ་པོར་ཡེ་ཤུ་སྐུ་གསོན་པོར་བཞེངས་ནས། ཐོག་མར་དེ་སྔ་ཁོང་གིས་གདོན་འདྲེ་བདུན་བསྐྲད་མྱོང་བའི་མག་དལ་མ་མིར་ཡམ་ལ་སྐུ་གཟུགས་མངོན་སུམ་དུ་བསྟན་པས།
MAR 16:10 དེས་ཕྱི་རུ་སོང་ནས་ཡེ་ཤུའི་རྗེས་སུ་འབྲང་མཁན་རྣམས་ཀྱི་དྲུང་དུ་ཕྱིན་ཏེ་དེ་རྣམས་ངུ་ཞིང་མྱ་ངན་བྱེད་བཞིན་ཡོད་པ་ལ་གཏམ་དེ་སྨྲས་ནའང༌།
MAR 16:11 ཁོང་ཚོས་ཡེ་ཤུ་འཆི་བ་ལས་སླར་གསོན་པ་དང་མིར་ཡམ་གྱིས་ཁོང་མཐོང་བ་ཡིན་ཞེས་པ་དེ་ལ་ཡིད་མ་ཆེས།
MAR 16:12 དེའི་རྗེས་སུ་འབྲང་བ་རྣམས་ལས་མི་གཉིས་གྲོང་སྡེ་གཞན་ཞིག་ཏུ་འགྲོ་བའི་ལམ་བར་དུ། ཁོང་གིས་རང་གི་སྐུ་གཟུགས་རྣམ་པ་གཞན་དུ་བསྒྱུར་ཏེ་ཁོ་ཚོ་ལ་མངོན་སུམ་དུ་བསྟན།
MAR 16:13 ཁོ་ཚོ་ལོག་ནས་རྗེས་སུ་འབྲང་བ་གཞན་རྣམས་ལ་གནས་ཚུལ་དེ་བཤད་ནའང་སུས་ཀྱང་ཁོ་ཚོ་ལ་ཡིད་མ་ཆེས།
MAR 16:14 དེའི་རྗེས་ཉེ་གནས་བཅུ་གཅིག་པོས་ཟས་བཞེས་བཞིན་པའི་སྐབས་སུ། ཁོང་གིས་དེ་རྣམས་ལ་རང་གི་སྐུ་གཟུགས་མངོན་སུམ་དུ་བསྟན་སྟེ། རང་ཉིད་འཆི་བ་ལས་སླར་གསོན་རྗེས་དེ་རྣམས་རང་ཉིད་མཐོང་མཁན་རྣམས་ཀྱིས་སྨྲས་པའི་གཏམ་ལ་ཡིད་མ་ཆེས་པས། ཁོང་གིས་དེ་རྣམས་ལ་དད་པ་མེད་པ་དང་སེམས་མཁྲེགས་པོ་ཡིན་པར་བཀའ་བཀྱོན་མཛད།
MAR 16:15 ཡེ་ཤུས་ཉེ་གནས་རྣམས་ལ་“ཁྱེད་ཚོས་འཇིག་རྟེན་ཀུན་ཏུ་ཕྱིན་ནས་མི་ཐམས་ཅད་ལ་འཕྲིན་བཟང་ཁྱབ་བསྒྲགས་གྱིས་ཤིག
MAR 16:16 སུ་ཡང་དད་པ་བྱས་ནས་ཁྲུས་གསོལ་ཐོབ་པ་དེ་ཐར་བར་འགྱུར། སུ་ཡང་དད་པ་མི་བྱེད་པ་དེ་ལ་ཆད་པ་གཅོད་པར་འགྱུར།
MAR 16:17 དད་པ་བྱེད་པ་རྣམས་ལ་ངོ་མཚར་ཆེ་བའི་ནུས་པ་འདི་ལྟར་ཡོད། ཁོང་ཚོས་ངའི་མིང་ཐོག་ནས་གདོན་འདྲེ་སྐྲོད་ཐུབ་ཅིང་སྐད་རིགས་གཞན་ཤོད་པ།
MAR 16:18 དུག་སྦྲུལ་རྣམས་ལག་པས་ལེན་པ། སྲོག་གཅོད་པའི་དུག་འཐུང་ཡང་གནོད་པ་མི་འབྱུང་བ། ལག་པས་ནད་པར་རེག་ན་ནད་འཇོམས་པར་འགྱུར་རོ་”ཞེས་གསུངས།
MAR 16:19 དེ་ལྟར་གཙོ་བོ་ཡེ་ཤུས་ཁོང་ཚོར་བཀའ་མོལ་གནང་ཚར་རྗེས། དཀོན་མཆོག་གི་ཞིང་ཁམས་སུ་བཞེངས་པར་གྱུར་ཏེ་དཀོན་མཆོག་གི་ཕྱག་གཡས་ངོས་སུ་བཞུགས།
MAR 16:20 ཉེ་གནས་རྣམས་གང་སར་ཕྱིན་ནས་དཀོན་མཆོག་གི་བཀའ་ཁྱབ་བསྒྲགས་བྱས། གཙོ་བོས་ཁོང་ཚོ་དང་མཉམ་དུ་འཕྲིན་ལས་མཛད་ཅིང་ངོ་མཚར་བའི་རྟགས་མཚན་བསྟན་པའི་སྒོ་ནས་འཕྲིན་བཟང་དེ་བདེན་པ་ཡིན་པར་ར་སྤྲོད་གནང་ངོ༌། །
LUK 1:1 མི་མང་པོ་ཞིག་གིས་ང་ཚོའི་ཁྲོད་དུ་གང་གྲུབ་པའི་སྐོར་གྱི་ལོ་རྒྱུས་བརྩམས་པས།
LUK 1:2 བཀའི་ཞབས་ཏོག་པ་ཐོག་མ་ནས་མིག་གིས་མཐོང་མཁན་རྣམས་ཀྱིས་ང་ཚོར་གང་གཏད་པ་བཞིན་དུ།
LUK 1:3 ངས་ཀྱང་ཐོག་མ་ནས་གང་ཞིག་བྱུང་བ་ཞིབ་ཕྲ་རྩད་གཅོད་བྱས་ནས་མི་རྗེ་ཐེ་ཨོ་ཕི་ལུ་ཁྱེད་ཀྱི་ཆེད་དུ་གོ་རིམ་ལྡན་པའི་ལོ་རྒྱུས་ཤིག་འབྲི་རྒྱུར་ཐག་གཅོད་བྱས།
LUK 1:4 དེ་ནི་ཁྱེད་ལ་བསྟན་པའི་གསུང་བདེན་པ་ཡིན་པར་མཁྱེན་པའི་ཕྱིར་རོ། །
LUK 1:5 ཡ་ཧུ་དཱ་ཡུལ་གྱི་རྒྱལ་པོ་ཧེ་རོ་དཱེ་ཡི་དུས་སུ་ཟེ་ཀ་རི་ཡཱ་ཞེས་བྱ་བའི་ཡ་ཧུ་དཱ་པའི་བླ་མ་ཞིག་ཡོད། ཁོ་ནི་ཨ་བི་ཡཱ་ཡི་བླ་མའི་སྡེ་ཚན་ཁོངས་ཀྱི་མི་ཞིག་ཡིན་པ་དང༌། ཁོ་ལ་ཡ་ཧུ་དཱ་པའི་མེས་པོ་ཨ་རོན་གྱི་རྒྱུད་པ་ཨེ་ལི་ས་བེད་ཅེས་ཟེར་བའི་བཟའ་ཟླ་ཞིག་ཡོད་པ་ཡིན།
LUK 1:6 དེ་གཉིས་ཀྱིས་སྐྱོན་མེད་པར་དཀོན་མཆོག་གི་བཀའ་དང་ཆོས་ཁྲིམས་ཐམས་ཅད་བསྲུངས་ཏེ་ཁོང་གི་སྤྱན་སྔར་སེམས་དྲང་པོ་ཡིན།
LUK 1:7 འོན་ཀྱང་ཨེ་ལི་ས་བེད་ཕྲུ་གུ་སྐྱེ་མི་ཐུབ་པས་ཁོང་ཚོ་གཉིས་བུ་ཕྲུག་མེད་པར་རྒས།
LUK 1:8 ཡང་ཟེ་ཀ་རི་ཡཱ་ཡི་སྡེ་ཚན་གྱི་རེ་མོས་བབས་ནས་ཁོང་གིས་དཀོན་མཆོག་གི་མདུན་དུ་མཆོད་གཡོག་བྱེད་སྐབས།
LUK 1:9 གཙོ་བོའི་མཆོད་ཁང་ཆེན་མོར་འཛུལ་ནས་སྤོས་འབུལ་བའི་ཆེད་དུ་བླ་མའི་ལུགས་སྲོལ་ལྟར་ཁོང་རྒྱན་བརྒྱབ་ནས་བདམས།
LUK 1:10 སྤོས་འབུལ་བའི་སྐབས་མི་ཚོགས་མང་པོས་ཕྱི་ལོགས་སུ་སྨོན་ལམ་འདེབས་བཞིན་ཡོད།
LUK 1:11 དེའི་དུས་སུ་གཙོ་བོའི་ཕོ་ཉ་ཞིག་སྤོས་འབུལ་བའི་མཆོད་ཁྲིའི་གཡས་ཕྱོགས་སུ་ཟེ་ཀ་རི་ཡཱ་ལ་མངོན་པར་གྱུར་བས།
LUK 1:12 ཁོང་ཕོ་ཉ་དེ་མཐོང་ནས་འདྲོགས་ཏེ་ཤིན་ཏུ་འཇིགས།
LUK 1:13 འོན་ཀྱང་ཕོ་ཉས་ཁོ་ལ་“ཟེ་ཀ་རི་ཡཱ། མ་འཇིགས་ཤིག གང་ལགས་ཤེ་ན། ཁྱོད་ཀྱི་ཞུ་བ་གསན་པས་ཁྱོད་ཀྱི་བཟའ་ཟླ་ཨེ་ལི་ས་བེད་ལ་བུ་ཞིག་བཙའ་བར་འགྱུར། ཁྱོད་ཀྱིས་བུ་དེའི་མིང་ལ་ཡོ་ཧ་ནན་ཞེས་ཐོགས་ཤིག
LUK 1:14 ཁྱོད་དགའ་ཞིང་སྤྲོ་བར་འགྱུར་ལ་བུ་དེ་སྐྱེ་བས་མི་མང་པོ་ཞིག་གིས་ཀྱང་དགའ་སྐྱིད་བར་འགྱུར།
LUK 1:15 གང་ལགས་ཤེ་ན། གཙོ་བོའི་སྤྱན་སྔར་ཁོ་མི་ཆེན་པོར་འགྱུར། ཁོ་རྒུན་ཆང་ལ་སོགས་འཐུང་མི་རུང་ལ། ཨ་མའི་མངལ་དུ་ཡོད་པའི་དུས་ནས་ཁོ་དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་འགྱུར།
LUK 1:16 ཡང་ཁོས་ཡི་སི་ར་ཨེལ་པ་མང་པོ་ཞིག་དེ་ཚོའི་གཙོ་བོ་དཀོན་མཆོག་གི་ཕྱོགས་སུ་འགུགས་པར་འགྱུར།
LUK 1:17 ཡང་ཕ་ཡི་སེམས་ཕྲུ་གུའི་ཕྱོགས་སུ་འགུགས་པའི་ཆེད་དང༌། བཀའ་ལ་མི་ཉན་པའི་སེམས་ནི་དྲང་པོའི་ཤེས་རབ་ཏུ་སྒྱུར་ཞིང༌། གཙོ་བོའི་ཞབས་ཕྱི་བྱེད་དུ་འོས་པའི་མི་རྣམས་གྲ་སྒྲིག་བྱེད་པའི་ཕྱིར། ཁོ་ལུང་སྟོན་པ་ཨེ་ལི་ཡཱ་ལྟར་དཀོན་མཆོག་གི་དབང་དང་དམ་པའི་ཐུགས་ཉིད་ཐོག་ནས་གཙོ་བོའི་སྔོན་དུ་འགྲོ་”ཞེས་གསུངས།
LUK 1:18 ཟེ་ཀ་རི་ཡཱ་ཡིས་ཕོ་ཉ་ལ་“ང་དང་ངའི་ཟླ་བོ་ཡང་རྒས་པས་དེ་བདེན་པ་ཡིན་པར་ངས་ཅི་ལྟར་ཤེས་”ཞེས་དྲིས།
LUK 1:19 ཕོ་ཉས་“ང་དཀོན་མཆོག་གི་མདུན་དུ་བཞུགས་པའི་ཕོ་ཉ་གེབ་རི་ཨེལ་ཡིན་ཏེ། ཁྱོད་ལ་སྨྲ་བ་དང༌། གཏམ་བཟང་པོ་འདི་འཆད་པའི་ཕྱིར་མངག་མཁན་ཡིན།
LUK 1:20 ལྟོས་ཤིག དོན་འདི་རྣམས་མ་འགྲུབ་པའི་བར་དུ་ཁྱོད་ཀྱིས་ཅི་ཡང་མི་སྨྲ་སྟེ་སྐད་ཆ་ཤོད་མི་ཐུབ་པ་གནས་པར་འགྱུར། གང་ལགས་ཤེ་ན། ཁྱོད་ཀྱིས་ངས་བཤད་པའི་བཀའ་ལ་ཡིད་མ་ཆེས་པས། དུས་ལ་འབབ་དུས་བཀའ་དེ་འགྲུབ་ངེས་ཡིན་”ཞེས་གསུངས།
LUK 1:21 དེའི་རིང་ལ་མི་རྣམས་ཟེ་ཀ་རི་ཡཱ་སྒུག་ནས་བསྡད་ལ་ཁོ་མཆོད་ཁང་ཆེན་མོར་ཡུན་རིང་འགོར་བས་ཡ་མཚན་སྐྱེས།
LUK 1:22 ཁོ་ཕྱིར་ཐོན་སྐབས་མི་དེ་ཚོར་སྐད་ཆ་ཤོད་མི་ཐུབ་པས་ཁོས་མཆོད་ཁང་ནང་ལ་ཞལ་གཟིགས་མཐོང་བར་མི་རྣམས་ཀྱིས་ཤེས། ཁོས་ཁོ་ཚོར་ལག་བརྡ་བྱེད་དེ་ཁ་གྲགས་མི་ཐུབ་པར་གནས།
LUK 1:23 ཞབས་ཏོག་གི་དུས་རིམ་ཚར་ནས་ཟེ་ཀ་རི་ཡཱ་ནང་ལ་ལོག
LUK 1:24 དེ་ནས་ཁོང་གི་བཟའ་ཟླ་ཨེ་ལི་ས་བེད་མངལ་དང་ལྡན་པར་གྱུར་བས་ཟླ་བ་ལྔའི་རིང་ཕྱི་རུ་མ་ཐོན་པར་ནང་ལ་བསྡད།
LUK 1:25 ཁོ་མོས་“གཙོ་བོས་ང་ལ་གཟིགས་སྐྱོང་མཛད་ནས་ངའི་མི་རིགས་ཀྱི་མདུན་དུ་ང་ཡི་ངོ་ཚ་བསལ་ཏེ་ང་ལ་འདི་ལྟར་མཛད་”ཅེས་སྨྲས།
LUK 1:26 ཨེ་ལི་ས་བེད་མངལ་དང་ལྡན་པའི་ཟླ་བ་དྲུག་པར་དཀོན་མཆོག་གིས་ཕོ་ཉ་གེབ་རི་ཨེལ་ག་ལིལ་ཡུལ་གྱི་ན་ཙ་རེལ་ཟེར་བའི་གྲོང་ཚོར་
LUK 1:27 མིར་ཡམ་ཞེས་ཟེར་བའི་གཞོན་ནུ་མའི་སར་མངགས། མིར་ཡམ་ནི་རྒྱལ་པོ་དཱ་བིད་ཀྱི་རྒྱུད་པ་ཡོ་སེབ་ཀྱི་བཟའ་ཟླར་འགྱུར་བ་ཐག་གཅོད་བྱས་པ་རེད།
LUK 1:28 ནང་ལ་ཕེབས་སྐབས་གེབ་རི་ཨེལ་གྱིས་ཁོ་མོར་“ཐུགས་རྗེ་ཐོབ་པ་ཁྱོད་ལ་བདེ་བ་དང་ལྡན་པར་གྱུར་ཅིག གཙོ་བོ་ཁྱོད་དང་མཉམ་དུ་བཞུགས་”ཞེས་གསུངས།
LUK 1:29 དེ་ཐོས་ནས་མིར་ཡམ་སེམས་ཤིན་ཏུ་འཁྲུགས་ཤིང་འཚམས་འདྲི་དེ་ཅི་ལྟར་ཡིན་བསམ་ཞིབ་བྱེད་བཞིན་ཡོད།
LUK 1:30 དཀོན་མཆོག་གི་ཕོ་ཉས་ཁོ་མོར་“མིར་ཡམ། མ་འཇིགས་ཤིག དཀོན་མཆོག་ནས་ཁྱོད་ལ་ཐུགས་རྗེ་ཐོབ།
LUK 1:31 ལྟོས་ཤིག ཁྱོད་མངལ་དང་ལྡན་པར་འགྱུར་ཏེ་སྲས་ཤིག་སྐྱེས་ནས་ཁྱོད་ཀྱིས་ཁོང་གི་མཚན་ལ་ཡེ་ཤུ་ཞེས་ཐོགས་ཤིག
LUK 1:32 ཁོང་སྐྱེས་བུ་ཆེན་པོར་འགྱུར་ལ་བླ་ན་མེད་པའི་དཀོན་མཆོག་གི་སྲས་ཞེས་ཀྱང་གསོལ་བར་འགྱུར། གཙོ་བོ་དཀོན་མཆོག་གིས་ཁོང་ལ་རང་གི་མེས་པོ་དཱ་བིད་ཀྱི་བཞུགས་ཁྲི་གནང་ཞིང༌།
LUK 1:33 ཁོང་གིས་ཡ་ཀོབ་ཀྱི་རྒྱུད་པར་དུས་རྒྱུན་དུ་དབང་སྒྱུར་ལ། ཁོང་གི་རྒྱལ་སྲིད་ནི་མཐའ་མེད་པའོ་”ཞེས་གསུངས།
LUK 1:34 མིར་ཡམ་གྱིས་ཕོ་ཉ་ལ་“ང་སྐྱེས་པ་དང་འདུས་མ་མྱོང་བས་འདི་ཅི་ལྟར་སྲིད་”ཅེས་ཞུས་པ་ན།
LUK 1:35 ཕོ་ཉས་“དམ་པའི་ཐུགས་ཉིད་ཁྱོད་ལ་འབབ་ཅིང་བླ་ན་མེད་པའི་དཀོན་མཆོག་གི་ནུས་མཐུ་ཁྱོད་ལ་ཁྱབ་པར་འགྱུར། དེའི་ཕྱིར་ཕྲུ་གུ་དམ་པ་དེ་ལ་དཀོན་མཆོག་གི་སྲས་ཞེས་གསོལ།
LUK 1:36 ལྟོས་ཤིག ཁྱོད་ཀྱི་སྤུན་མཆེད་རྒན་མོ་ཨེ་ལི་ས་བེད་རབས་ཆད་མ་ཞེས་བྱ་བ་ཡིན་ཀྱང༌། ད་ལྟ་མངལ་དུ་བུ་ཞིག་འཁོར་ནས་ཟླ་བ་དྲུག་ཡིན།
LUK 1:37 གང་ཡིན་ཟེར་ན། དཀོན་མཆོག་གིས་མཛད་མི་སྲིད་པ་གང་ཡང་མེད་དོ་”ཞེས་གསུངས།
LUK 1:38 དེ་ནས་མིར་ཡམ་གྱིས་“ང་གཙོ་བོའི་གཡོག་མོ་ཞིག་ཡིན་ཏེ་ཁྱེད་ཀྱི་བཀའ་ལྟར་ང་ལ་འབྱུང་བར་ཤོག་”ཅེས་སྨྲས་རྗེས་ཕོ་ཉ་ཕར་ཕེབས།
LUK 1:39 དེའི་དུས་སུ་མིར་ཡམ་གྲ་སྒྲིག་བྱས་ནས་ཡ་ཧུ་དཱ་ཡུལ་གྱི་རི་ཁུལ་གྲོང་གསེབ་ཅིག་ལ་མགྱོགས་པོར་ཕྱིན་པ་དང༌།
LUK 1:40 ཟེ་ཀ་རི་ཡཱ་ཡི་ཁང་པར་འཛུལ་ནས་ཨེ་ལི་ས་བེད་ལ་འཚམས་འདྲི་ཞུས།
LUK 1:41 ཨེ་ལི་ས་བེད་ཀྱིས་མིར་ཡམ་གྱི་འཚམས་འདྲི་ཐོས་སྐབས་མངལ་དུ་ཡོད་པའི་བུ་གློ་བུར་དུ་འགུལ། ཨེ་ལི་ས་བེད་དམ་པའི་ཐུགས་ཉིད་ཀྱིས་གང་སྟེ།
LUK 1:42 སྐད་ཆེན་པོས་“བུད་མེད་རྣམས་ལས་ཁྱེད་ནི་བྱིན་རླབས་ཆེ། ཁྱེད་ཀྱི་ལྷུམས་སུ་ཡོད་པའི་བུའང་བྱིན་གྱིས་བརླབས་སོ།
LUK 1:43 ངའི་གཙོ་བོའི་ཡུམ་ངའི་རྩར་ཕེབས་པའི་བཀའ་དྲིན་འདི་ཅི་ལགས།
LUK 1:44 གཟིགས་དང༌། ཁྱེད་ཀྱི་འཚམས་འདྲིའི་སྐད་ཐོས་མ་ཐག་ངའི་མངལ་དུ་ཡོད་པའི་བུ་དགའ་བས་འགུལ།
LUK 1:45 གཙོ་བོས་ཁོ་མོ་ལ་གང་གསུངས་པ་དེ་འགྲུབ་པར་འགྱུར་བར་ཡིད་ཆེས་པ་བྱིན་རླབས་ཆེ་”ཞེས་གསུངས།
LUK 1:46 ཡང་མིར་ཡམ་གྱིས། ང་ཡི་སེམས་ནས་གཙོ་བོར་བསྟོད། །
LUK 1:47 དཀོན་མཆོག་སྐྱབས་མགོན་ལ་ཡི་རང༌། །
LUK 1:48 ཁོང་གིས་དམའ་བའི་གཡོག་མོར་གཟིགས། ། ད་ནས་མི་རབས་ཀུན་གྱིས་ནི། ། ང་ལ་བདེ་ལེགས་བརྗོད་པར་འགྱུར། །
LUK 1:49 དབང་ཀུན་ལྡན་པས་ང་ལ་ནི། ། ངོ་མཚར་ལས་རྣམས་མཛད་པ་དང༌། ། ཁོང་གི་མཚན་ནི་དམ་པ་ཡིན། །
LUK 1:50 ཁོང་ལ་གུས་པའི་མི་རབས་ཀུན། ། ཁོང་གི་ཐུགས་རྗེས་ཁྱབ་པར་འགྱུར། །
LUK 1:51 ཁོང་གི་ཕྱག་གིས་མཛད་ཆེན་བསྒྲུབས། ། ང་རྒྱལ་ཅན་རྣམས་གཏོར་བར་མཛད། །
LUK 1:52 དབང་ཅན་ཁྲི་ལས་ཕབ་པར་མཛད། ། དམའ་བ་མཐོ་སར་བཏེགས་པར་མཛད། །
LUK 1:53 ལྟོགས་པར་བཟང་པོས་ཚིམས་པར་མཛད། ། ཕྱུག་པོ་སྟོང་བར་བཏོན་པར་མཛད། །
LUK 1:54 ཁོང་གིས་མེས་པོར་གསུངས་པ་ལྟར། ། ཡི་སི་ར་ཨེལ་གཡོག་པོ་ལ། ། ཁོང་གིས་རོགས་པ་གནང་བར་མཛད། ། ཨབ་ར་ཧམ་དང་དེའི་རྒྱུད་པ། ། དགོངས་ནས་ནམ་ཡང་ཐུགས་རྗེས་གཟིགས། ། ཞེས་གསུངས་སོ། །
LUK 1:56 དེ་ནས་མིར་ཡམ་ཟླ་བ་གསུམ་ཙམ་ཁོ་མོ་དང་མཉམ་དུ་བསྡད་ནས་རང་གི་ནང་ལ་ཕྱིར་ལོག
LUK 1:57 བུ་བཙའ་བའི་དུས་ལ་བབས་ཏེ་ཨེ་ལི་ས་བེད་ལ་བུ་ཞིག་སྐྱེས།
LUK 1:58 ཁྱིམ་མཚེས་དང་གཉེན་ཚན་རྣམས་ཀྱིས་གཙོ་བོས་ཁོ་མོར་ཐུགས་རྗེ་ཆེན་པོ་གཟིགས་པ་ཐོས་ནས་མི་དེ་ཚོ་ཁོ་མོ་དང་མཉམ་དུ་དགའ་བར་གྱུར།
LUK 1:59 ཉི་མ་བརྒྱད་པར་ཁོ་ཚོ་བུ་དེར་ཡ་ཧུ་དཱ་པའི་ཆོས་ཀྱི་རྟགས་རྒྱག་པའི་ཆེད་དུ་འཛོམས་ནས་ཕ་ལྟར་ཟེ་ཀ་རི་ཡཱ་ཞེས་བུའི་མིང་བཏགས་སྙམ།
LUK 1:60 འོན་ཀྱང་བུའི་ཨ་མས་“ལགས་མ་ཡིན། ཡོ་ཧ་ནན་ཞེས་མིང་འདོགས་པར་འགྱུར་”ཞེས་སྨྲས་པ་ན།
LUK 1:61 ཁོ་ཚོས་“ཁྱེད་ཀྱི་གཉེན་ཚན་གྱི་ཁྲོད་དུ་མིང་དེ་འདྲ་སུ་ལ་ཡང་མེད་”ཅེས་ཟེར་བས།
LUK 1:62 བུའི་མིང་གང་འདོགས་འདོད་པ་ཤེས་པའི་ཕྱིར་ཁོ་ཚོས་ཕ་ལ་ལག་བརྡ་བྱས།
LUK 1:63 ཁོང་གིས་ཡི་གེ་འབྲི་པང་ཞིག་བསླངས་ནས་ཁོའི་མིང་ཡོ་ཧ་ནན་ཡིན་ཞེས་བྲིས་པས་ཁོ་ཚོ་ཐམས་ཅད་ངོ་མཚར་སྐྱེས།
LUK 1:64 འཕྲལ་དུ་ཁོའི་ཁ་ཕྱེ་སྟེ་ལྕེ་གྲོལ་ནས་སྐད་ཆ་བཤད་དེ་དཀོན་མཆོག་ལ་བསྟོད་པ་ཕུལ།
LUK 1:65 ཉེ་འཁོར་གྱི་མི་ཐམས་ཅད་ཡ་མཚན་གྱིས་ཁེངས་ཏེ། ཡ་ཧུ་དཱ་ཡུལ་གྱི་རི་ཁུལ་ལ་སྡོད་མཁན་ཐམས་ཅད་ཀྱིས་དོན་དེའི་སྐོར་སྐད་ཆ་བཤད།
LUK 1:66 དོན་དེ་ཚོ་ཐོས་མཁན་ཐམས་ཅད་ཀྱིས་ཡིད་ལ་འཆང་སྟེ་“ཕྲུ་གུ་དེ་ཅི་ལྟ་བུ་ཞིག་འབྱུང་ཡོང་”ཞེས་སྨྲས། གང་ལགས་ཤེ་ན། གཙོ་བོའི་ནུས་མཐུ་ཁོང་དང་མཉམ་དུ་ཡོད་པས་སོ། །
LUK 1:67 ཁོའི་ཕ་ཟེ་ཀ་རི་ཡཱ་དམ་པའི་ཐུགས་ཉིད་ཀྱིས་གང་ནས་འདི་ལྟར་ལུང་བསྟན།
LUK 1:68 ཡི་སི་ར་ཨེལ་གཙོ་བོ་དཀོན་མཆོག་ཉིད། ། རང་གི་མི་རིགས་གཟིགས་ནས་བསྐྱབས་པར་མཛད། ། དེ་ཡི་ཕྱིར་དུ་ཁོང་ལ་བསྟོད་པར་ཤོག །
LUK 1:69 ཞབས་ཕྱི་དཱ་བིད་དེ་ཡི་བུ་རྒྱུད་ལས། ། ངེད་ཕྱིར་ཐར་པའི་རྭ་ཅོ་མཐོན་པོར་བཏེགས། །
LUK 1:70 གནའ་བོའི་དུས་ནས་དམ་པའི་ལུང་སྟོན་པའི། ། བཀའ་ཡི་སྒོ་ནས་ཁོང་གིས་གསུངས་པ་ལྟར། །
LUK 1:71 དགྲ་དང་སྡང་མཁན་ལག་ནས་ངེད་སྐྱོབ་སྟེ། །
LUK 1:72 ངེད་ཀྱི་མེས་པོར་སྙིང་རྗེ་མཛད་པ་དང༌། ། མེས་པོ་ཨབ་ར་ཧམ་ལ་མནའ་བཞེས་པའི། ། ཉིད་ཀྱི་དམ་པའི་ཞལ་ཆད་དྲན་པའི་ཕྱིར། །
LUK 1:74 ངེད་ཀྱི་དགྲ་ཡི་ལག་ལས་བསྐྱབས་མཛད་དེ། ། ངེད་ཀྱི་ཚེ་གང་དམ་པ་དྲང་པོའི་ངང༌། ། འཇིགས་པ་མེད་པར་ཁོང་ལ་བསྙེན་བཀུར་ཞུ། །
LUK 1:76 ང་ཡི་བུ་ཁྱོད་བླ་ན་མེད་པ་ཡི། ། དཀོན་མཆོག་གི་ནི་ལུང་སྟོན་པ་ཞེས་ཟེར། ། གཙོ་བོའི་ཕེབས་ལམ་སེལ་བར་བྱེད་པའི་ཕྱིར། ། ཁོང་གི་སྔོན་དུ་ལམ་ལ་འགྲོ་བར་བྱ། །
LUK 1:77 དེ་ཚོའི་སྡིག་ཉེས་སེལ་བའི་ཤེས་རབ་ཀྱིས། ། ཁོང་གི་མི་རྣམས་ཐར་ལམ་ངོ་སྤྲོད་ཕྱིར། །
LUK 1:78 དཀོན་མཆོག་ཉིད་ཀྱི་བཀའ་དྲིན་ཆེན་པོ་ཡིས། ། གནམ་ནས་ཐུགས་རྗེའི་ཉི་མ་འཆར་བའི་ཚེ། །
LUK 1:79 མུན་གྲིབ་འཆི་གྲིབ་སེལ་ཕྱིར་འོད་འཕྲོས་ཏེ། ། ཞི་བདེའི་ལམ་དུ་རྐང་པ་འདྲེན་པའི་ཕྱིར། ། ཞེས་ལུང་བསྟན་ནོ། །
LUK 1:80 བུ་དེ་འཚར་ལོངས་བྱུང་ནས་སེམས་སུ་སྟོབས་དང་ལྡན་པར་གྱུར། ཡི་སི་ར་ཨེལ་པ་རྣམས་ལ་མངོན་སུམ་དུ་མ་འགྱུར་བའི་བར་དུ་ཁོང་དབེན་སྟོང་ལ་བཞུགས་སོ། །
LUK 2:1 དེའི་དུས་སུ་རྒྱལ་པོ་སེ་སར་ཨུ་རྒ་ཟི་ཏུ་ཡིས་རོ་མཱ་གོང་མའི་རྒྱལ་ཁབ་ཀྱི་འབངས་མི་ཐམས་ཅད་ལ་མིང་ཐོ་འགོད་པའི་བཀའ་བཏང༌།
LUK 2:2 དེ་ནི་ཐོ་འགོད་བྱེད་པ་དང་པོ་ཡིན་ཏེ་སི་རི་ཡཱ་ཡུལ་གྱི་ས་གནས་དཔོན་པོ་ཀུ་རེ་ནུ་ཡི་དུས་སུ་བྱུང༌།
LUK 2:3 མི་ཐམས་ཅད་མིང་ཐོ་འགོད་པའི་ཕྱིར་སོ་སོའི་ཕ་ཡུལ་ལ་ཕྱིན་པ་རེད།
LUK 2:4 ཡོ་སེབ་ནི་དཱ་བིད་ཀྱི་བུ་རྒྱུད་ཡིན་པས་ཁོང་ཡང་ག་ལིལ་ཡུལ་གྱི་ན་ཙ་རེལ་གྲོང་ཚོ་ནས་ཡ་ཧུ་དཱ་ཡུལ་གྱི་བེད་ལེ་ཧེམ་ཞེས་བྱ་བའི་དཱ་བིད་ཀྱི་གྲོང་ཁྱེར་ལ་ཕྱིན།
LUK 2:5 ཁོང་གི་བཟའ་ཟླར་འགྱུར་བ་ཐག་གཅོད་བྱས་པ་དང༌། མངལ་དང་ལྡན་པའི་མིར་ཡམ་ཁོང་མཉམ་དུ་ཐོ་རྒྱག་པའི་ཆེད་དུ་ཕྱིན།
LUK 2:6 ཁོང་ཚོ་དེར་བཞུགས་དུས་མིར་ཡམ་གྱི་བུ་བཙའ་བའི་དུས་ལ་བབས་ཏེ།
LUK 2:7 སྲས་དང་པོ་འཁྲུངས། མགྲོན་ཁང་ལ་སྡོད་ས་མེད་པས་རས་ཀྱིས་བཏུམས་ནས་བྲེས་ཤིག་གི་ནང་ལ་བཞག
LUK 2:8 ཡུལ་དེར་རྩྭ་ཐང་སྟེང་ལ་བསྡད་པའི་ལུག་རྫི་ཡིས་མཚན་མོར་ལུག་ཁྱུ་བསྲུངས་ཏེ།
LUK 2:9 དཀོན་མཆོག་གི་ཕོ་ཉ་མྱུར་དུ་ཁོ་ཚོའི་མདུན་དུ་མངོན་པར་གྱུར་ནས་དཀོན་མཆོག་གི་གཟི་བརྗིད་ཁོ་ཚོའི་སྐོར་ལ་འཕྲོས་པས་འཇིགས་སྐྲག་སྐྱེས།
LUK 2:10 འོན་ཀྱང་ཕོ་ཉ་དེས་“མ་འཇིགས་ཤིག གཟིགས་དང༌། མི་ཚང་མའི་ཕྱིར་ངས་ཤིན་ཏུ་དགའ་བའི་འཕྲིན་བཟང་ཁྱབ་བསྒྲགས་བྱེད་དེ།
LUK 2:11 དེ་རིང་ཁྱེད་རྣམས་ལ་དཱ་བིད་ཀྱི་གྲོང་ཁྱེར་དུ་སྐྱབས་མགོན་ཞིག་འཁྲུངས་ཡོད། ཁོང་ནི་གཙོ་བོ་མཱ་ཤི་ཀ་ཡིན།
LUK 2:12 དེ་ནི་ཁྱེད་ལ་ཁོང་གི་རྟགས་འདི་ཡིན། བྲེས་ཤིག་ནང་ལ་རས་ཀྱིས་བཏུམས་པའི་མ་འབྱར་ཉལ་བ་ཞིག་མཇལ་བར་འགྱུར་”ཞེས་གསུངས།
LUK 2:13 གློ་བུར་དུ་དཀོན་མཆོག་གི་ཞིང་ཁམས་སུ་བཞུགས་མཁན་ཧ་ཅང་མང་པོ་ཞིག་ཕོ་ཉ་དང་མཉམ་དུ་མངོན་པར་གྱུར་ནས་དཀོན་མཆོག་ལ་བསྟོད་དེ།
LUK 2:14 བླ་ན་མེད་པའི་གནས་སུ་དཀོན་མཆོག་ལ་བསྟོད་པ་ཕུལ་ཞིང༌། ། ས་ལ་ཁོང་གི་ཐུགས་མཉེས་པའི་མིར་ཞི་བདེ་འབབ་པར་ཤོག །
LUK 2:15 དེ་ནས་ཕོ་ཉ་ཞིང་ཁམས་སུ་ཕྱིར་ལོག་ནས་ལུག་རྫི་རྣམས་ཀྱིས་གཅིག་གིས་གཅིག་ལ་“གཙོ་བོས་ང་ཚོར་གསུངས་པའི་དོན་དེ་ལྟ་བའི་ཕྱིར་ད་བེད་ལེ་ཧེམ་དུ་ཐད་ཀར་འགྲོ་”ཞེས་བཤད།
LUK 2:16 ཁོ་ཚོས་མགྱོགས་པོར་ཕྱིན་ནས་མིར་ཡམ་དང་ཡོ་སེབ་བཙལ་ཏེ་བྲེས་ཀྱི་ནང་ལ་ཉལ་བའི་མ་འབྱར་མཇལ།
LUK 2:17 དོན་དེ་མཐོང་ནས་ཕྲུ་གུ་དེའི་སྐོར་ཁོ་ཚོར་གང་གསུངས་པའི་གཏམ་གང་སར་བཤད།
LUK 2:18 ཡང་ལུག་རྫིའི་གཏམ་ཐོས་པ་ཐམས་ཅད་ཡ་མཚན་སྐྱེས།
LUK 2:19 འོན་ཀྱང་མིར་ཡམ་གྱིས་དོན་དེ་ཚོ་ཐམས་ཅད་སེམས་གཏིང་ལ་བཞག་ནས་བསམ་ཞིབ་བྱས།
LUK 2:20 ལུག་རྫི་རྣམས་ཀྱིས་གང་ཐོས་པ་དང་མཐོང་བའི་དོན་ཐམས་ཅད་ཕོ་ཉས་གསུངས་པ་ལྟར་གྲུབ་པས་དཀོན་མཆོག་ལ་བསྟོད་ཅིང་བསྔགས་ནས་ཕྱིར་ལོག
LUK 2:21 ཉིན་བརྒྱད་ཀྱི་རྗེས་སུ་ཡ་ཧུ་དཱ་པའི་རྟགས་རྒྱག་སྐབས་ཁོང་གི་མཚན་ལ་ཡེ་ཤུ་ཞེས་བཏགས། དེ་ནི་ཁོང་གི་ཡུམ་མངལ་དང་ལྡན་པར་གྱུར་བའི་སྔོན་ལ་དཀོན་མཆོག་གི་ཕོ་ཉས་གནང་བའི་མཚན་ཡིན་པས་སོ། །
LUK 2:22 ལུང་སྟོན་པ་མོ་ཤེའི་ཆོས་ཁྲིམས་ལྟར་ཁོང་ཚོའི་གཙང་སྦྲ་བྱེད་པའི་དུས་ཚར་ནས་གཙོ་བོ་དཀོན་མཆོག་ལ་ཡེ་ཤུ་འབུལ་བའི་ཆེད་དུ་ཁོང་རྣམས་ཡེ་རུ་ཤ་ལེམ་ལ་ཕེབས།
LUK 2:23 (གཙོ་བོའི་ཆོས་ཁྲིམས་ལ་བཀོད་པ་ལྟར་སྔོན་ལ་སྐྱེས་པའི་ཕོ་རེ་རེ་གཙོ་བོ་ལ་དམ་པར་བརྩི་བར་བྱ་ཞེས་གསུངས་)
LUK 2:24 ཡང་གཙོ་བོའི་ཆོས་ཁྲིམས་ལ་བཀོད་པ་ལྟར་ཐི་བ་ཟུང་གཅིག་གམ་ཕུག་རོན་ཆུང་ངུ་གཉིས་མཆོད་པར་འབུལ་དགོས་ཞེས་པའི་བཀའ་བཞིན་དུ་ཁོང་ཚོས་མཆོད་པ་ཞིག་ཕུལ།
LUK 2:25 ཡེ་རུ་ཤ་ལེམ་ལ་སི་མེ་ཡོན་ཞེས་བྱ་བའི་སེམས་དྲང་པོ་དང་ཆོས་སེམས་དང་ལྡན་པའི་མི་ཞིག་ཡོད། ཁོང་ནི་ཡི་སི་ར་ཨེལ་སྐྱོབ་པའི་དུས་སུ་སྒུག་མཁན་ཡིན་པ་དང༌། དཀོན་མཆོག་གི་དམ་པའི་ཐུགས་ཉིད་ཁོང་དང་མཉམ་དུ་ཡོད།
LUK 2:26 ཁོང་འཆི་བ་མ་མྱོང་བའི་སྔོན་ལ་གཙོ་བོའི་མཱ་ཤི་ཀ་ལ་མཇལ་རྒྱུ་ཡིན་པར་དམ་པའི་ཐུགས་ཉིད་ཀྱིས་ཁོང་ལ་མངོན་པར་མཛད་ཡོད།
LUK 2:27 དམ་པའི་ཐུགས་ཉིད་ཀྱིས་བསྐུལ་ཏེ་ཁོང་ཡ་ཧུ་དཱ་པའི་མཆོད་ཁང་ཆེན་མོའི་ཁྱམས་རའི་རྩར་ཕྱིན་པ་དང༌། ཆོས་ཁྲིམས་གང་དགོས་པ་བྱེད་པའི་ཕྱིར་ཕ་མས་ཕྲུ་གུ་ཡེ་ཤུ་ཁྱེར་ནས་སླེབས་སྐབས།
LUK 2:28 སི་མེ་ཡོན་གྱིས་ཕྲུ་གུ་པང་དུ་བླངས་ནས་དཀོན་མཆོག་ལ་བསྟོད་བསྔགས་ཏེ།
LUK 2:29 གཙོ་བོ་ད་ལྟ་ཁྱེད་ཀྱི་བཀའ་བཞིན་དུ། ། ཁྱེད་ཀྱི་ཞབས་ཕྱི་ཞི་བདེར་འགྲོ་རུ་འཇུག །
LUK 2:30 ང་ཡི་མིག་གིས་མི་རིགས་ཀུན་གྱི་ཆེད། ། ཁྱེད་ཀྱིས་བཀོད་པ་གནང་བའི་ཐར་པ་མཐོང༌། །
LUK 2:32 ཡི་སི་ར་ཨེལ་ཁྱེད་ཀྱི་མི་རིགས་ལ། ། གཟི་བརྗིད་དང་ནི་ཕྱི་པར་འཕྲོ་བའི་འོད། ། ཞེས་སོ།
LUK 2:33 ཕྲུ་གུའི་ཡབ་དང་ཡུམ་ཁོང་གི་སྐོར་ལ་བཤད་པའི་གཏམ་དེ་ལ་ཡ་མཚན་སྐྱེས།
LUK 2:34 སི་མེ་ཡོན་ཁོང་ཚོར་བྱིན་གྱིས་བརླབས་ནས་ཁོང་གི་ཡུམ་མིར་ཡམ་ལ་“གཟིགས་དང༌། ཕྲུ་གུ་འདི་ནི་ཡི་སི་ར་ཨེལ་པ་མང་པོ་འགྱེལ་བའི་རྒྱུ་རྐྱེན་དང༌། ལང་བའི་རྒྱུ་རྐྱེན་དང༌། རྒོལ་རྒྱུ་ཡིན་པའི་རྟགས་སུ་བསྐོས།
LUK 2:35 དེ་ནི་མི་མང་པོའི་གསང་བའི་བསམ་པ་མངོན་སུམ་དུ་འགྱུར་བའི་ཆེད་དུ་ཡིན། རལ་གྲི་ཞིག་གིས་ཁྱེད་ཀྱི་སེམས་ལ་ཡང་འཛུགས་པར་འགྱུར་”ཞེས་གསུངས།
LUK 2:36 ཡང་ཡི་སི་ར་ཨེལ་གྱི་ཚོ་ཁག་ཨ་ཤེར་ནས་ཕཱ་ནུ་ཨེལ་གྱི་བུ་མོ་ཨན་ནཱ་ནི་ལོ་ན་ཤིན་ཏུ་རྒས་པའི་ལུང་སྟོན་པ་དེར་ཡོད་དེ། ཁོ་མོ་གཉེན་སྒྲིག་བྱས་ནས་ལོ་བདུན་ཁྱོ་བོ་དང་མཉམ་དུ་བསྡད།
LUK 2:37 དེ་ནས་ཡུགས་མོའི་འཚོ་བ་བསྐྱལ་ནས་ལོ་བརྒྱད་ཅུ་གྱ་བཞི་བར་གསོན། ཁོ་མོས་མཆོད་ཁང་དང་མི་འབྲལ་བར་ཉིན་མཚན་མེད་པར་སྨྱུང་གནས་སྲུང་བ་དང་སྨོན་ལམ་བཏབ་སྟེ་དཀོན་མཆོག་ལ་བསྙེན་བཀུར་ཞུས།
LUK 2:38 དུས་དེ་རང་ལ་ཁོ་མོ་ཡོང་ནས་དཀོན་མཆོག་ལ་བཀའ་དྲིན་ཆེ་ཞུས་པ་དང༌། ཡེ་རུ་ཤ་ལེམ་གྱི་ཐར་བའི་ཉིན་མོ་སྒུག་མཁན་ཐམས་ཅད་ལ་ཕྲུ་གུ་དེའི་སྐོར་ལ་གཏམ་བྱས།
LUK 2:39 གཙོ་བོའི་ཆོས་ཁྲིམས་ལྟར་དོན་ཐམས་ཅད་བསྒྲུབས་ཚར་ནས་ཁོང་ཚོ་ག་ལིལ་ཡུལ་དུ་རང་གི་གྲོང་ཁྱེར་ན་ཙ་རེལ་ལ་ཕྱིར་ལོག
LUK 2:40 བུ་དེ་འཚར་ལོངས་བྱུང་སྟེ་སེམས་སུ་སྟོབས་དང་བློ་ལ་ཤེས་རབ་རྒྱས་པ་དང༌། དཀོན་མཆོག་གི་ཐུགས་རྗེ་ཁོང་གི་ཐོག་ལ་གནས།
LUK 2:41 ལོ་ལྟར་པེ་སག་ཟེར་བའི་དུས་ཆེན་གྱི་སྐབས་སུ་ཁོང་གི་ཡབ་ཡུམ་གཉིས་ཡེ་རུ་ཤ་ལེམ་ལ་ཕྱིན་པ་དང༌།
LUK 2:42 ཁོང་དགུང་ལོ་བཅུ་གཉིས་ལོན་སྐབས་ཁོང་ཚོ་ནམ་རྒྱུན་ལྟར་དུས་ཆེན་ལ་ཕེབས།
LUK 2:43 དུས་ཆེན་ཚར་ནས་ཁོང་ཚོ་ཕྱིར་ལོག་སྐབས་ཡབ་ཡུམ་གྱིས་མ་ཤེས་པར་ཕྲུ་གུ་ཡེ་ཤུ་ཡེ་རུ་ཤ་ལེམ་དུ་གནས།
LUK 2:44 ཁོང་ལམ་གྲོགས་ཀྱི་དཀྱིལ་ལ་ཡོད་བསམས་ནས་ཉིན་གཅིག་གི་ལམ་ལ་ཕྱིན་ཏེ། ཡབ་ཡུམ་གྱིས་གཉེན་ཚན་དང་ངོ་ཤེས་པའི་ནང་ཁོང་བཙལ།
LUK 2:45 མ་རྙེད་པར་ཁོང་འཚོལ་བའི་ཆེད་དུ་ཡེ་རུ་ཤ་ལེམ་ལ་ཕྱིར་ལོག
LUK 2:46 ཉིན་གསུམ་གྱི་རྗེས་སུ་ཁོང་མཆོད་ཁང་གི་ཁྱམས་རར་སློབ་དཔོན་ཁྲོད་དུ་བཞུགས་ཏེ་ཁོ་ཚོའི་ཆོས་གསན་པ་དང་ཁོ་ཚོར་བཀའ་འདྲི་གནང་སྟེ་ཕ་མ་རྙེད།
LUK 2:47 ཁོང་གི་མཁས་པའི་སེམས་དང་ལན་འདེབས་པ་ཐོས་མཁན་ཚང་མ་ཡ་མཚན་སྐྱེས།
LUK 2:48 ཡབ་ཡུམ་གྱིས་ཁོང་མཐོང་སྐབས་ཡ་མཚན་སྐྱེས་ཏེ་ཡུམ་གྱིས་“བུ། ཁྱོད་ཀྱིས་ཅི་ལ་ང་ཚོར་འདི་ལྟར་བྱས། ལྟོས་ཤིག ཁྱོད་ཀྱི་ཡབ་དང་ང་སེམས་ཤིན་ཏུ་འཚབས་ནས་ཁྱོད་བཙལ་”ཞེས་སྨྲས་པ་ན།
LUK 2:49 ཁོང་གིས་“ཅིའི་ཕྱིར་ང་བཙལ་བ་ཡིན། ངའི་ཡབ་ཀྱི་ཕོ་བྲང་ལ་སྡོད་དགོས་པར་ཁྱེད་ཀྱིས་མི་མཁྱེན་ནམ་”ཞེས་གསུངས།
LUK 2:50 འོན་ཀྱང་ཁོང་གིས་གང་གསུངས་པ་ཁོང་ཚོས་མ་མཁྱེན།
LUK 2:51 དེ་ནས་ཁོང་ཚོ་ན་ཙ་རེལ་ལ་མར་ཕེབས་པ་དང་ཁོང་གིས་ཡབ་ཡུམ་གྱི་བཀའ་ལ་ཉན་ནས་བཞུགས། ཁོང་གི་ཡུམ་གྱིས་དོན་དེ་ཚོ་ཚང་མ་སེམས་ལ་བཞག
LUK 2:52 ཡང་ཡེ་ཤུ་ཤེས་རབ་དང༌། སྐུ་གཟུགས། དཀོན་མཆོག་གི་ཐུགས་དགྱེས་པ། མི་རྣམས་ཀྱི་བརྩི་མཐོང་ལ་འཕེལ་ལོ། །
LUK 3:1 རྒྱལ་པོ་ཏི་པེར་ཡུ་སེ་སར་སྲིད་སྐྱོང་བྱེད་པའི་ལོ་བཅོ་ལྔའི་རིང་ལ་ཕོན་ཏི་ཡུ་པི་ལ་ཏུ་ཡ་ཧུ་དཱ་ཡུལ་གྱི་སྤྱི་ཁྱབ་ཡིན་པ་དང༌། ཧེ་རོ་དཱེ་ག་ལིལ་ཡུལ་གྱི་ས་གནས་དཔོན་པོ་ཡིན་ཏེ། ཁོའི་གཅེན་པོ་ཕི་ལིབ་ཨེ་ཏུ་རི་ཡཱ་དང་ཏྲ་ཀོ་ནི་ཏི་ཡུལ་གྱི་ས་གནས་དཔོན་པོ་དང༌། ལི་སན་ཡུ་ཨ་བི་ལེ་ནེ་ཡུལ་གྱི་ས་གནས་དཔོན་པོ་ཡིན་ལ།
LUK 3:2 ཨ་ན་སི་དང་ཀ་ཡ་ཕཱ་བླ་ཆེན་གཙོ་བོ་བྱེད་པའི་དུས་སུ་དབེན་སྟོང་ཡུལ་ལ་ཟེ་ཀ་རི་ཡཱ་ཡི་བུ་ཡོ་ཧ་ནན་ལ་དཀོན་མཆོག་གི་བཀའ་བབས།
LUK 3:3 ཡོར་དན་གཙང་པོའི་མཐའ་འཁོར་གྱི་ཡུལ་ཀུན་ཏུ་ཁོང་གིས་སྡིག་ཉེས་སེལ་བའི་ཆེད་དུ་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བའི་རྟགས་སུ་ཁྲུས་གསོལ་ལེན་དགོས་པར་བསྒྲགས་ཏེ་ཕེབས།
LUK 3:4 ཡེ་ཤ་ཡཱ་ཞེས་ཟེར་བའི་ལུང་སྟོན་པས་བྲིས་པའི་མདོ་ལ་བཀོད་པ་ལྟར། དབེན་སྟོང་ཡུལ་ནང་གྲགས་པའི་འབོད་སྒྲ་ཡིས། ། གཙོ་བོའི་ཆེད་དུ་ཕེབས་ལམ་གྲ་སྒྲིག་བྱོས། ། ལམ་བུ་དེ་ནི་བདེ་བར་བཟོས་ཤིག་ཨང༌། །
LUK 3:5 རོང་རྣམས་སྙོམས་ཤིང་རི་དག་དམའ་བར་འགྱུར། ། འཁྱོག་པ་དྲང་ལ་རྩུབ་པོ་བདེ་བར་འགྱུར། །
LUK 3:6 ཀུན་གྱིས་དཀོན་མཆོག་ཐར་པ་མཐོང་བར་འགྱུར། ། ཞེས་གསུངས།
LUK 3:7 ཡང་ཡོ་ཧ་ནན་ནས་ཁྲུས་གསོལ་ལེན་པའི་ཆེད་དུ་ཡོང་བའི་མི་ཚོགས་མང་པོར་ཁོང་གིས་“དུག་སྦྲུལ་གྱི་རིགས་ཁྱོད་ཚོ། སྡིག་པའི་ཉེས་ཆད་ཡིན་ཏེ་མ་འོངས་པའི་ཐུགས་ཁྲོ་ལས་འབྲོས་པ་ཁྱོད་ཚོར་སུས་བསྟན།
LUK 3:8 སྤྱོད་པ་ངན་པ་སྤངས་ནས་སེམས་བསྒྱུར་བའི་འབྲས་བུ་སྨིན་ཞིག ཡང་ཨབ་ར་ཧམ་ང་ཚོའི་མེས་པོ་ཡིན་ཞེས་མ་སོམས། ངས་ཁྱོད་ཚོར་ཟེར་རྒྱུར། དཀོན་མཆོག་གིས་རྡོ་འདི་ཚོ་ལས་ཨབ་ར་ཧམ་ལ་བུ་རྒྱུད་འབྱུང་བར་མཛད་ཐུབ་པའི་ཕྱིར་རོ།
LUK 3:9 ད་ལྟ་སྟ་རེ་ཞིག་ཤིང་སྡོང་གི་རྩ་ལ་བཞག་ཡོད་པས་འབྲས་བུ་བཟང་པོ་མ་སྨིན་པའི་ཤིང་སྡོང་རེ་རེ་བཞིན་བཅད་ནས་མེ་ལ་གཡུག་པར་འགྱུར་”ཞེས་གསུངས།
LUK 3:10 མི་ཚོགས་ཀྱིས་ཁོང་ལ་“བྱས་ན་ང་ཚོས་ཅི་བྱེད་དགོས་”ཞེས་དྲིས།
LUK 3:11 ལན་དུ་ཁོང་གིས་ཁོ་ཚོར་“གོས་གཉིས་ཡོད་པ་གོས་མེད་པ་ལ་བགོད་པ་དང༌། ཟས་ཡོད་མཁན་གྱིས་ཀྱང་དེ་ལྟར་བྱེད་དགོས་”ཞེས་གསུངས་པས།
LUK 3:12 ཁྲལ་སྡུད་མཁན་ཁྲུས་གསོལ་ལེན་ཕྱིར་ཡོང་ནས་ཁོང་ལ་“སློབ་དཔོན་ལགས། ང་ཚོས་ཅི་བྱེད་དགོས་”ཅེས་དྲིས་པ་དང༌།
LUK 3:13 ཁོང་གིས་ཁོ་ཚོར་“ཁ་མངག་པ་ལས་ལྷག་པར་མ་ལེན་”ཞེས་གསུངས།
LUK 3:14 དམག་མི་ཁ་ཤས་ཀྱིས་ཁོང་ལ་“ང་ཚོས་ཅི་བྱེད་དགོས་”ཅེས་དྲིས་པ་ན། ཁོང་གིས་“བཙན་ཐབས་ཀྱིས་དངུལ་མ་ལེན། མི་སུ་ཡང་ལ་སྙད་མ་འདོགས། ཁྱོད་ཀྱི་གླ་ཆ་ཡིས་ཚིམ་པར་འགྱུར་ཞིག་”ཅེས་གསུངས།
LUK 3:15 མི་རྣམས་རེ་སྒུག་བྱེད་བཞིན་པས་ཚང་མའི་སེམས་ལ་ཡོ་ཧ་ནན་ནི་མཱ་ཤི་ཀ་ཡིན་མིན་སྙམ་པ་དང༌།
LUK 3:16 ཡོ་ཧ་ནན་གྱིས་མི་དེ་ཚོ་ཚང་མར་“ངས་ནི་ཆུ་ཡིས་ཁྱོད་ཚོར་ཁྲུས་གསོལ་བྱེད། འོན་ཀྱང་ངའི་རྗེས་ལ་ང་ལས་དབང་ཆེ་བ་ཞིག་ཕེབས་ཡོང་བར་ངེས་ཏེ། ང་ཁོང་གི་ལྷམ་སྒྲོག་ཀྱང་འགྲོལ་བར་མི་འོས། ཁོང་གིས་ཁྱོད་ཚོར་དཀོན་མཆོག་གི་དམ་པའི་ཐུགས་ཉིད་དང་མེ་ཡིས་ཁྲུས་གསོལ་གནང་བར་འགྱུར་རོ།
LUK 3:17 ཁོང་གི་གཡུལ་ཁ་ལེགས་པོར་གཙང་མ་བཟོ་བའི་ཆེད་དང༌། མཛོད་ཁང་ལ་གྲོ་སྡུད་པའི་ཕྱིར་སྦར་མོ་ཕྱག་ལ་ཡོད། འོན་ཀྱང་རྩྭ་རྣམས་ཁོང་གིས་གསོད་མི་སྲིད་པའི་མེ་ཡིས་སྲེག་པར་བྱ་”ཞེས་གསུངས།
LUK 3:18 ད་དུང་སྐད་ཆ་གཞན་དག་མང་པོས་སྐུལ་མ་བཏང་སྟེ་ཁོང་གིས་མི་རྣམས་ལ་འཕྲིན་བཟང་བསྒྲགས།
LUK 3:19 འོན་ཀྱང་ཡོ་ཧ་ནན་གྱིས་ས་གནས་དཔོན་པོ་ཧེ་རོ་དཱེ་ལ་ཁོའི་གཅེན་པོའི་བཟའ་ཟླ་ཧེ་རོད་ཡཱ་ཡི་རྒྱུ་རྐྱེན་དང༌། ཁོས་བྱས་པའི་ལས་ངན་ཚང་མའི་རྐྱེན་གྱིས་བཀའ་བཀྱོན་བྱེད་སྐབས།
LUK 3:20 ཉེས་པ་གཞན་ཐམས་ཅད་བྱས་པའི་སྟེང་དུ་ཁོས་ཡོ་ཧ་ནན་བཙོན་ཁང་ལ་བཅུག
LUK 3:21 དེར་ཡོད་པའི་མི་རྣམས་ཁྲུས་གསོལ་ལེན་སྐབས་གཙོ་བོ་ཡེ་ཤུའང་ཁྲུས་གསོལ་བཞེས། ཁོང་གིས་གསོལ་སྨོན་འདེབས་དུས་ནམ་མཁའ་ཕྱེ་ནས།
LUK 3:22 དམ་པའི་ཐུགས་ཉིད་གཟུགས་དང་ལྡན་ཞིང་ཕུག་རོན་ལྟར་ཁོང་གི་སྟེང་ལ་བབས་ཏེ་དཀོན་མཆོག་གི་ཞིང་ཁམས་ནས་“ཁྱེད་ནི་ངའི་གཅེས་པའི་བུ་ཡིན། ང་རང་ཁྱེད་ལ་ཤིན་ཏུ་དགའོ་”ཞེས་པའི་གསུང་སྐད་ཅིག་བྱུང༌།
LUK 3:23 ཡེ་ཤུའི་ཕྱག་ལས་འགོ་འཛུགས་དུས་ཁོང་དགུང་ལོ་སུམ་ཅུ་ཙམ་ལོན་ཅིང༌། མི་རྣམས་ཀྱིས་ཁོང་ཡོ་སེབ་ཀྱི་བུ་ཡིན་པར་བསམས། ཡོ་སེབ་ནི་ཨེ་ལི་ཞེས་བྱ་བའི་བུ་དང༌།
LUK 3:24 ཨེ་ལི་ནི་མད་ཐད་ཅེས་བྱ་བའི་བུ། མད་ཐད་ནི་ལེ་ཝི་ཞེས་བྱ་བའི་བུ་དང༌། ལེ་ཝི་ནི་མེལ་ཀི་ཞེས་བྱ་བའི་བུ། མེལ་ཀི་ནི་ཡན་ནཱ་ཞེས་བྱ་བའི་བུ་དང༌། ཡན་ནཱ་ནི་ཡོ་སེབ་ཅེས་བྱ་བའི་བུ།
LUK 3:25 ཡོ་སེབ་ནི་མད་ཐི་ཐི་ཞེས་བྱ་བའི་བུ་དང༌། མད་ཐི་ཐི་ནི་ཨ་མོ་ཟི་ཞེས་བྱ་བའི་བུ། ཨ་མོ་ཟི་ནི་ནཱ་ཧུམ་ཞེས་བྱ་བའི་བུ་དང༌། ནཱ་ཧུམ་ནི་ཧེ་ཟི་ལེ་ཞེས་བྱ་བའི་བུ། ཧེ་ཟི་ལེ་ནི་ནཱ་གེ་ཞེས་བྱ་བའི་བུ་དང༌།
LUK 3:26 ནཱ་གེ་ནི་མ་ཧ་ཐུ་ཞེས་བྱ་བའི་བུ། མ་ཧ་ཐུ་ནི་མད་ཐི་ཐི་ཞེས་བྱ་བའི་བུ་དང༌། མད་ཐི་ཐི་ནི་སེ་མེ་ཞེས་བྱ་བའི་བུ། སེ་མེ་ནི་ཡོ་སེག་ཅེས་བྱ་བའི་བུ་དང༌། ཡོ་སེག་ནི་ཡོ་དཱ་ཞེས་བྱ་བའི་བུ།
LUK 3:27 ཡོ་དཱ་ནི་ཡོ་ཧན་ནཱ་ཞེས་བྱ་བའི་བུ་དང༌། ཡོ་ཧན་ནཱ་ནི་རེ་སཱ་ཞེས་བྱ་བའི་བུ། རེ་སཱ་ནི་བཟེ་རུ་པ་པེལ་ཞེས་བྱ་བའི་བུ་དང༌། བཟེ་རུ་པ་པེལ་ནི་ཤེ་ཨལ་ཐི་ཨེལ་ཞེས་བྱ་བའི་བུ། ཤེ་ཨལ་ཐི་ཨེལ་ནི་ནེ་རི་ཞེས་བྱ་བའི་བུ་དང༌།
LUK 3:28 ནེ་རི་ནི་མེལ་ཀི་ཞེས་བྱ་བའི་བུ། མེལ་ཀི་ནི་ཨ་དཱ་ཞེས་བྱ་བའི་བུ་དང༌། ཨ་དཱ་ནི་ཁོ་སམ་ཞེས་བྱ་བའི་བུ། ཁོ་སམ་ནི་ཨེལ་མོ་དཱམ་ཞེས་བྱ་བའི་བུ་དང༌། ཨེལ་མོ་དཱམ་ནི་ཨེར་ཞེས་བྱ་བའི་བུ།
LUK 3:29 ཨེར་ནི་ཡོ་ཤུ་ཨ་ཞེས་བྱ་བའི་བུ་དང༌། ཡོ་ཤུ་ཨ་ནི་ཨེ་ལི་ཨེ་ཟེ་ཞེས་བྱ་བའི་བུ། ཨེ་ལི་ཨེ་ཟེ་ནི་ཡོ་རིམ་ཞེས་བྱ་བའི་བུ་དང༌། ཡོ་རིམ་ནི་མད་ཐད་ཅེས་བྱ་བའི་བུ། མད་ཐད་ནི་ལེ་ཝི་ཞེས་བྱ་བའི་བུ་དང༌།
LUK 3:30 ལེ་ཝི་ནི་སི་མེ་ཡོན་ཞེས་བྱ་བའི་བུ། སི་མེ་ཡོན་ནི་ཡུ་དཱ་ཞེས་བྱ་བའི་བུ་དང༌། ཡུ་དཱ་ནི་ཡོ་སེབ་ཅེས་བྱ་བའི་བུ། ཡོ་སེབ་ནི་ཡོ་ནཱམ་ཞེས་བྱ་བའི་བུ་དང༌། ཡོ་ནཱམ་ནི་ཨེལ་ཡ་ཀིམ་ཞེས་བྱ་བའི་བུ།
LUK 3:31 ཨེལ་ཡ་ཀིམ་ནི་མེ་ལེ་ཡཱ་ཞེས་བྱ་བའི་བུ་དང༌། མེ་ལེ་ཡཱ་ནི་མེན་ནཱ་ཞེས་བྱ་བའི་བུ། མེན་ནཱ་ནི་མད་ཐ་ཐི་ཞེས་བྱ་བའི་བུ་དང༌། མད་ཐ་ཐི་ནི་ནཱ་ཐན་ཞེས་བྱ་བའི་བུ། ནཱ་ཐན་ནི་དཱ་བིད་ཅེས་བྱ་བའི་བུ་དང༌།
LUK 3:32 དཱ་བིད་ནི་ཡེ་སེ་ཞེས་བྱ་བའི་བུ། ཡེ་སེ་ནི་ཨོ་པེད་ཅེས་བྱ་བའི་བུ་དང༌། ཨོ་པེད་ནི་པོ་ཨ་ཟི་ཞེས་བྱ་བའི་བུ། པོ་ཨ་ཟི་ནི་སལ་མོན་ཞེས་བྱ་བའི་བུ་དང༌། སལ་མོན་ནི་ནཱ་སོན་ཞེས་བྱ་བའི་བུ།
LUK 3:33 ནཱ་སོན་ནི་ཨ་མི་ན་དབ་ཅེས་བྱ་བའི་བུ་དང༌། ཨ་མི་ན་དབ་ནི་ཨད་མན་ཞེས་བྱ་བའི་བུ། ཨད་མན་ནི་རམ་ཞེས་བྱ་བའི་བུ་དང༌། རམ་ནི་ཧེ་ཟི་རོན་ཞེས་བྱ་བའི་བུ། ཧེ་ཟི་རོན་ནི་པེ་རེ་ཟི་ཞེས་བྱ་བའི་བུ་དང༌། པེ་རེ་ཟི་ནི་ཡུ་དཱ་ཞེས་བྱ་བའི་བུ།
LUK 3:34 ཡུ་དཱ་ནི་ཡ་ཀོབ་ཅེས་བྱ་བའི་བུ་དང༌། ཡ་ཀོབ་ནི་ཨི་སཱག་ཅེས་བྱ་བའི་བུ། ཨི་སཱག་ནི་ཨབ་ར་ཧམ་ཞེས་བྱ་བའི་བུ་དང༌། ཨབ་ར་ཧམ་ནི་ཐེ་རཱ་ཞེས་བྱ་བའི་བུ། ཐེ་རཱ་ནི་ནཱ་ཧོར་ཞེས་བྱ་བའི་བུ་དང༌།
LUK 3:35 ནཱ་ཧོར་ནི་སེ་རུག་ཅེས་བྱ་བའི་བུ། སེ་རུག་ནི་རེའུ་ཞེས་བྱ་བའི་བུ་དང༌། རེའུ་ནི་ཕེ་ལེག་ཅེས་བྱ་བའི་བུ། ཕེ་ལེག་ནི་ཨེ་པེར་ཞེས་བྱ་བའི་བུ་དང༌། ཨེ་པེར་ནི་ས་ལཱ་ཞེས་བྱ་བའི་བུ།
LUK 3:36 ས་ལཱ་ནི་ཁེ་ནཱན་ཞེས་བྱ་བའི་བུ་དང༌། ཁེ་ནཱན་ནི་ཨར་པག་སད་ཅེས་བྱ་བའི་བུ། ཨར་པག་སད་ནི་ཤེམ་ཞེས་བྱ་བའི་བུ་དང༌། ཤེམ་ནི་ནོ་ཨ་ཞེས་བྱ་བའི་བུ། ནོ་ཨ་ནི་ལ་མེག་ཅེས་བྱ་བའི་བུ་དང༌།
LUK 3:37 ལ་མེག་ནི་མེ་ཐུ་ཟི་ལཱ་ཞེས་བྱ་བའི་བུ། མེ་ཐུ་ཟི་ལཱ་ནི་ཧེ་ནོག་ཅེས་བྱ་བའི་བུ་དང༌། ཧེ་ནོག་ནི་ཡཱ་རིད་ཅེས་བྱ་བའི་བུ། ཡཱ་རིད་ནི་མཱ་ཧ་ལཱ་ཨེལ་ཞེས་བྱ་བའི་བུ་དང༌། མཱ་ཧ་ལཱ་ཨེལ་ནི་ཁེ་ནཱན་ཞེས་བྱ་བའི་བུ།
LUK 3:38 ཁེ་ནཱན་ནི་ཨེ་ནོ་ཟི་ཞེས་བྱ་བའི་བུ་དང༌། ཨེ་ནོ་ཟི་ནི་སེད་ཅེས་བྱ་བའི་བུ། སེད་ནི་ཨ་དམ་ཞེས་བྱ་བའི་བུ་ཡིན་པ་དང༌། ཨ་དམ་ནི་དཀོན་མཆོག་ནས་བྱུང་ངོ༌། །
LUK 4:1 དཀོན་མཆོག་གི་དམ་པའི་ཐུགས་ཉིད་ཀྱིས་ཁོང་ཡོངས་སུ་གང་སྟེ་ཡེ་ཤུ་ཡོར་དན་གཙང་པོ་ནས་ཕྱིར་ལོག་ཕེབས་པ་དང༌། དམ་པའི་ཐུགས་ཉིད་ཀྱིས་སྐུལ་ཏེ་ཁོང་དབེན་སྟོང་ལ་ཕེབས།
LUK 4:2 ཉིན་ཞག་བཞི་བཅུའི་རིང་བདུད་སཱ་ཏན་གྱིས་ཁོང་ལ་ཉམས་ཚོད་བླངས། དེའི་དུས་སུ་ཁོང་གིས་ཞལ་ཟས་ཅི་ཡང་མ་བཞེས་པས་དུས་སྐབས་དེའི་མཐའ་མར་བཀྲེས།
LUK 4:3 བདུད་ཀྱིས་ཁོང་ལ་“ཁྱེད་རང་དཀོན་མཆོག་གི་སྲས་ཡིན་ན་རྡོ་འདི་བག་ལེབ་ཏུ་འགྱུར་བའི་བཀའ་གཏོང་ཞིག་”ཅེས་སྨྲས་པ་ན།
LUK 4:4 ལན་དུ་ཡེ་ཤུས་“གསུང་རབ་ནང་མི་ནི་བག་ལེབ་ཁོ་ནར་བརྟེན་ནས་འཚོ་བ་མ་ཡིན་ཞེས་བྲིས་འདུག་”ཅེས་གསུངས་པས།
LUK 4:5 བདུད་ཀྱིས་ཁོང་ཡར་ཁྲིད་ནས་ཡུད་ཙམ་ཞིག་ལ་འཇིག་རྟེན་གྱི་རྒྱལ་ཁམས་ཚང་མ་བསྟན་པ་རེད།
LUK 4:6 ཁོང་ལ་“རྒྱལ་ཁམས་འདི་རྣམས་ཀྱི་སྲིད་དབང་དང་དཔལ་ང་ལ་གཏད་ཡོད་དེ་ངས་སུ་ལ་དགའ་བར་སྟེར་བས་ཁྱེད་ལ་འབུལ་བར་བྱ།
LUK 4:7 དེའི་ཕྱིར་ང་ལ་ཕྱག་འཚལ་ན་དེ་ཐམས་ཅད་ཁྱེད་ཀྱི་ཡིན་པར་འགྱུར་”ཞེས་ཟེར་བས།
LUK 4:8 ལན་དུ་ཡེ་ཤུས་“གསུང་རབ་ནང་ཁྱེད་ཀྱིས་རང་གི་གཙོ་བོ་དཀོན་མཆོག་ལ་བསྙེན་བཀུར་ཞུ་བ་དང་ཁོང་ཁོ་ནར་ཞབས་ཕྱི་བྱེད་དགོས་ཞེས་བྲིས་འདུག་”ཅེས་གསུངས།
LUK 4:9 བདུད་ཀྱིས་ཡེ་ཤུ་ཡེ་རུ་ཤ་ལེམ་ལ་ཁྲིད་ནས་མཆོད་ཁང་ཆེན་མོའི་རྩེ་རུ་ལང་དུ་བཅུག་ནས་ཁོང་ལ་“ཁྱེད་རང་དཀོན་མཆོག་གི་སྲས་ཡིན་ན་འདི་ནས་མར་མཆོངས་ཤིག
LUK 4:10 གང་ལགས་ཟེར་ན། གསུང་རབ་ཀྱི་མདོ་ལས། ཁོང་གི་སྲུང་དགོས་ཕོ་ཉ་རྣམས་སུ་ནི། ། ཁྱེད་སྐྱོབ་དགོས་པའི་བཀའ་ཡང་གནང་བར་འགྱུར། །
LUK 4:11 རྡོ་ལ་ཁྱེད་ཀྱི་ཞབས་ནི་མི་ཕོག་ཕྱིར། ། དེ་ཚོའི་ལག་པར་ཁྱེད་ནི་འདེགས་པར་འགྱུར། ། ཅེས་བྲིས་འདུག་”ཅེས་ཟེར་བས།
LUK 4:12 ལན་དུ་ཡེ་ཤུས་“གཙོ་བོ་ཁྱེད་ཀྱི་དཀོན་མཆོག་ལ་ཉམས་ཚོད་མ་བྱོས་ཤིག་ཅེས་བྲིས་འདུག་”ཅེས་གསུངས་པ་དང༌།
LUK 4:13 བདུད་ཀྱིས་ཉམས་ཚོད་ཀུན་བླངས་ཚར་བའི་རྗེས་སུ་གོ་སྐབས་མ་འཐོབ་པར་ཁོང་དང་བྲལ།
LUK 4:14 ཡེ་ཤུ་དམ་པའི་ཐུགས་ཉིད་ཀྱི་དབང་ཐོག་ནས་ག་ལིལ་ཡུལ་དུ་ཕྱིར་ལོག་ཕེབས་ནས་ཁོང་གི་སྙན་གྲགས་ག་ལིལ་གྱི་མཐའ་འཁོར་ཡུལ་ཀུན་ཏུ་ཁྱབ་པ་རེད།
LUK 4:15 དེར་ཡོད་པའི་ཡ་ཧུ་དཱ་པའི་འདུ་ཁང་རྣམས་ཀྱི་ནང་ལ་ཁོང་གིས་ཆོས་བསྟན་གནང་བ་དང་མི་ཚང་མས་ཁོང་ལ་བསྟོད།
LUK 4:16 ཡང་ཁོང་གི་འཚར་ལོངས་བྱུང་ས་ན་ཙ་རེལ་ལ་བྱོན་ཏེ་ནམ་རྒྱུན་ལྟར་ངལ་གསོ་བའི་ཉིན་མོར་ཁོང་འདུ་ཁང་ལ་ཕེབས། ཁོང་གསུང་རབ་ཀྱི་མདོ་ཀློག་པའི་ཆེད་དུ་བཞེངས་སྐབས།
LUK 4:17 ལུང་སྟོན་པ་ཡེ་ཤ་ཡཱ་ཡིས་བྲིས་པའི་མདོ་ཁོང་ལ་ཕུལ་ནས་ཁ་ཕྱེ་སྟེ་འདི་ལྟར་བྲིས་པའི་གནས་རྙེད།
LUK 4:18 དབུལ་ཕོངས་རྣམས་ལ་འཕྲིན་བཟང་སྒྲོག་པའི་ཆེད། ། གཙོ་བོའི་ཐུགས་ཉིད་ང་ཡི་སྟེང་དུ་གནས། ། བཙོན་པ་ཐར་ཞིང་ལོང་བ་གསོ་བ་དང༌། ། བཙན་གནོན་རྣམས་ལ་བཅིངས་འགྲོལ་བྱེད་པ་དང༌། ། ཁོང་གི་ལོ་བཟང་སླེབས་པ་སྒྲོག་པའི་ཆེད། ། གཙོ་བོ་དཀོན་མཆོག་ང་ལ་བསྐོས་ཤིང་མངགས། ། ཞེས་གསུངས།
LUK 4:20 ཁོང་གིས་ཤོག་སྒྲིལ་དེ་བསྒྲིལ་ཏེ་གཡོག་པོ་ལ་གནང་ནས་བཞུགས་པ་དང༌། འདུ་ཁང་ལ་ཡོད་པའི་མི་ཚང་མས་ཁོང་ལ་མིག་ནན་གྱིས་བལྟས།
LUK 4:21 ཡང་ཁོང་གིས་མི་དེ་ཚོར་“དེ་རིང་ཁྱེད་ཚོས་ཐོས་པའི་རིང་ལ་ལུང་བསྟན་འདི་གྲུབ་བོ་”ཞེས་གསུངས་པ་དང༌།
LUK 4:22 མི་ཚང་མས་ཁོང་ལ་བསྟོད་དེ་ཁོང་གི་ཐུགས་རྗེ་དང་ལྡན་པའི་གསུང་ལ་ཡ་མཚན་སྐྱེས་ཏེ། ཁོ་ཚོས་“འདི་ནི་ཡོ་སེབ་ཀྱི་བུ་མ་ཡིན་ནམ་”ཞེས་ཟེར།
LUK 4:23 ཁོང་གིས་ཁོ་ཚོར་“ཁྱེད་ཚོས་སྨན་པ་རང་གིས་རང་གསོ་བར་བྱོས་ཞེས་པའི་གཏམ་དཔེ་ང་ལ་ཟེར་ངེས་ཡིན་པ་དང༌། ང་ཚོས་ཐོས་པའི་ཀ་ཕར་ན་ཧུམ་ལ་གང་མཛད་པ་དེ་ཁྱེད་ཀྱི་ཕ་ཡུལ་འདི་རུའང་མཛོད་ཅེས་སྨྲ་བར་འགྱུར་”ཞེས་གསུངས།
LUK 4:24 ཡང་ཁོང་གིས་“ངས་ཁྱེད་ཚོ་ལ་བདེན་པར་ཟེར་རྒྱུར། རང་གི་ཕ་ཡུལ་ལ་ལུང་སྟོན་པ་སུ་ཞིག་ཀྱང་བསུ་བར་མི་འགྱུར།
LUK 4:25 དངོས་གནས་བྱས་ན་ལུང་སྟོན་པ་ཨེ་ལི་ཡཱ་ཡི་དུས་སུ་ལོ་གསུམ་དང་ཟླ་བ་དྲུག་རིང་ལ་ཆར་པ་ཆད་པས་ཡུལ་ཆ་ཚང་ལ་མུ་གེ་ཆེན་པོ་བྱུང་སྐབས། ཡི་སི་ར་ཨེལ་ལ་ཡུགས་མོ་མང་པོ་ཡོད་ནའང༌།
LUK 4:26 ཚི་དོན་ཡུལ་གྱི་ས་རེབ་ཏཱ་ཞེས་པའི་གྲོང་སྡེ་ཡི་ཡུགས་མོ་ཞིག་མ་གཏོགས་པར་ཨེ་ལི་ཡཱ་དེ་ཚོར་མ་མངགས།
LUK 4:27 ཡང་ལུང་སྟོན་པ་ཨེ་ལི་ཤཱ་ཡི་དུས་སུ་ཡི་སི་ར་ཨེལ་ལ་མཛེ་ནད་ཅན་མང་པོ་ཡོད་ནའང་སི་རི་ཡཱ་པ་ནེ་མན་མ་གཏོགས་པར་དེ་ཚོའི་ནང་ནས་སུ་ཡང་ནད་གསོས་ནས་གཙང་བར་མ་གྱུར་”ཞེས་གསུངས།
LUK 4:28 དོན་དེ་ཐོས་པའི་རྗེས་སུ་འདུ་ཁང་ལ་ཡོད་པ་ཐམས་ཅད་ཁོང་ཁྲོ་འབར་པས།
LUK 4:29 ལངས་ཏེ་ཁོང་གྲོང་སྡེ་ནས་ཕྱིར་བསྐྲད། ཁོ་ཚོའི་གྲོང་སྡེ་བྲག་རིའི་ལྡེབས་ལ་ཆགས་ཏེ་ཁོང་གཡང་ས་ནས་འཕེན་པའི་ཕྱིར་རིའི་ཟུར་ལ་ཁྲིད།
LUK 4:30 འོན་ཀྱང་ཁོང་མི་ཚོགས་ཀྱི་ཁྲོད་ནས་ཐོན་ཏེ་ཕར་ཕེབས་སོ། །
LUK 4:31 ག་ལིལ་ཡུལ་གྱི་གྲོང་སྡེ་ཀ་ཕར་ན་ཧུམ་ལ་མར་ཕེབས་ནས་ངལ་གསོ་བའི་ཉིན་མོར་ཁོང་གིས་ཁོ་ཚོར་ཆོས་བསྟན་གནང་བཞིན་ཡོད།
LUK 4:32 ཁོང་གི་གསུང་དབང་དང་ལྡན་པས་མི་དེ་ཚོ་ཡ་མཚན་ཆེན་པོ་སྐྱེས།
LUK 4:33 འདུ་ཁང་ལ་གདོན་འདྲེ་མི་གཙང་བས་ཟིན་པའི་མི་ཞིག་ཡོད་དེ་ཁོས་སྐད་ཆེན་པོས་
LUK 4:34 “ཧ། ན་ཙ་རེལ་པ་ཡེ་ཤུ། ང་ཚོ་དང་ཁྱེད་འབྲེལ་བ་གང་ཡོད། ཁྱེད་ཀྱིས་ང་ཚོ་མེད་པ་བཟོ་བར་ཕེབས་སམ། ཁྱེད་སུ་ཡིན་པ་ངས་ཤེས་ཀྱི་ཡོད། ཁྱེད་ནི་དཀོན་མཆོག་གི་སྐྱེས་བུ་དམ་པ་དེ་ཡིན་”ཞེས་བཤད།
LUK 4:35 འོན་ཀྱང་གཙོ་བོ་ཡེ་ཤུས་དེ་ལ་བཀའ་བཀྱོན་གནང་སྟེ་“ཁ་རོག་སྡོད། མི་དེའི་ལུས་ནས་ཐོན་ཅིག་”ཅེས་གསུངས་པ་ན། གདོན་འདྲེ་དེས་མི་རྣམས་ཀྱི་དཀྱིལ་དུ་ཁོ་ས་ལ་བསྒྱེལ་ནས་གནོད་འཚེ་མ་བྱུང་བར་ཁོའི་ལུས་ནས་ཕྱིར་ཐོན།
LUK 4:36 མི་ཐམས་ཅད་ཧ་ལས་ཏེ་ཕན་ཚུན་གཅིག་གིས་གཅིག་ལ་“བསྟན་པ་འདི་ཅི་ཡིན། དབང་ཆ་དང་ནུས་མཐུའི་སྒོ་ནས་ཁོང་གིས་གདོན་འདྲེ་མི་གཙང་བར་བཀའ་གནང་ནས་ཕྱིར་ཐོན་”ཞེས་བཤད་བཞིན་ཡོད།
LUK 4:37 ཁོང་གི་སྙན་གྲགས་མཐའ་འཁོར་གྱི་ཡུལ་ཀུན་ཏུ་ཁྱབ་པའོ། །
LUK 4:38 ཁོང་བཞེངས་ཏེ་འདུ་ཁང་ནས་ཐོན་ཏེ་སི་མོན་གྱི་ཁྱིམ་དུ་ཕེབས། སི་མོན་གྱི་བཟའ་ཟླའི་ཨ་མ་ཚ་བ་ཤིན་ཏུ་རྒྱས་པས་ཁོ་རྣམས་ཀྱིས་ཁོང་ལ་དེའི་སྐོར་ཞུས།
LUK 4:39 ཁོ་མོའི་མདུན་དུ་བཞེངས་ཏེ་ཁོང་གིས་ཚ་བ་ལ་བཀའ་བཀྱོན་གནང་བས་འཇགས་པ་དང༌། འཕྲལ་དུ་ཁོ་མོ་ལངས་ནས་ཁོང་རྣམས་ལ་ཞབས་ཕྱི་ཞུས།
LUK 4:40 ཉི་མ་བཞུད་པའི་དུས་སུ་ཁོ་ཚོས་ནད་སྣ་ཚོགས་ཕོག་པའི་མི་ཐམས་ཅད་ཡེ་ཤུའི་དྲུང་དུ་ཁྲིད་པ་དང༌། ཁོང་གིས་མི་དེ་ཚོ་རེ་རེར་ཕྱག་བཞག་སྟེ་གསོ་བར་མཛད།
LUK 4:41 མ་ཟད་གདོན་འདྲེ་མི་མང་པོའི་ནང་ནས་ཕྱིར་ཐོན་ཏེ་སྐད་ཆེན་པོས་“ཁྱེད་ནི་དཀོན་མཆོག་གི་སྲས་ཡིན་”ཞེས་སྨྲས། འོན་ཀྱང་དེ་ཚོར་བཀའ་བཀྱོན་གནང་ནས་ཁོང་གིས་གདོན་དེ་ཚོར་སྐད་ཆ་ལབ་ཏུ་མ་བཅུག གང་ཡིན་ཟེར་ན། གདོན་འདྲེས་ཁོང་མཱ་ཤི་ཀ་ཡིན་པར་ཤེས་ཀྱི་ཡོད་པས་རེད།
LUK 4:42 དེའི་སང་ཞོགས་སུ་ཡེ་ཤུ་དབེན་གནས་ཤིག་ཏུ་ཕེབས། མི་ཚོགས་ཀྱིས་བཙལ་ནས་ཁོང་གི་མདུན་དུ་ཡོང་བ་དང༌། ཕར་མི་ཕེབས་པའི་ཕྱིར་ཁོང་འགོག་པར་འདོད།
LUK 4:43 འོན་ཀྱང་ཁོང་གིས་ཁོ་ཚོར་“ངས་གྲོང་ཁྱེར་གཞན་རྣམས་ལ་ཡང་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་དགོས། ང་དོན་འདིའི་ཆེད་དུ་མངགས་པ་ཡིན་”ཞེས་གསུངས།
LUK 4:44 དེའི་ཕྱིར་ཁོང་གིས་ཡ་ཧུ་དཱ་ཡུལ་གྱི་འདུ་ཁང་ནང་ལ་ཆོས་ཡང་ཡང་གསུང་བཞིན་ཡོད་དོ། །
LUK 5:1 ཡེ་ཤུ་གན་ནེ་སཱ་རེལ་ཞེས་པའི་མཚོའི་འགྲམ་དུ་བཞུགས་པ་དང༌། དཀོན་མཆོག་གི་བཀའ་ལ་ཉན་པའི་ཆེད་དུ་མི་ཚོགས་འཚང་ཁ་བརྒྱབ་སྟེ་ཁོང་གི་མཐའ་ནས་བསྐོར་སྐབས།
LUK 5:2 ཁོང་གིས་མཚོའི་འགྲམ་ལ་གྲུ་གཉིས་ཡོད་པ་གཟིགས། ཉ་པ་རྣམས་གྲུ་བཞག་ནས་དྲ་རྒྱ་འཁྲུད་བཞིན་ཡོད།
LUK 5:3 ཁོང་སི་མོན་གྱི་གྲུ་ལ་ཞུགས་ནས་སི་མོན་ལ་སྐམ་ས་ནས་ཕྱིར་བསྐྱོད་ཏོག་ཙམ་བྱོས་ཞེས་གསུངས་པས། ཁོང་གྲུ་ལ་བཞུགས་ཏེ་མི་ཚོགས་ལ་ཆོས་བསྟན་གནང༌།
LUK 5:4 ཆོས་གསུངས་ཚར་ནས་ཁོང་གིས་སི་མོན་ལ་“ཉ་ཟིན་པའི་ཕྱིར་ཆུ་གཏིང་རིང་པོའི་སར་སོང་ལ་དྲ་རྒྱ་མར་ཐོང་”ཞེས་གསུངས་པ་ན།
LUK 5:5 ལན་དུ་སི་མོན་གྱིས་“རྒན་ལགས། ང་ཚོས་མཚན་གང་དཀའ་ལས་བརྒྱབ་ནས་ཉ་གཅིག་ཀྱང་ཟིན་མ་ཐུབ། འོན་ཀྱང་ཁྱེད་ཀྱིས་དེ་ལྟར་གསུངས་པས་ངས་དྲ་རྒྱ་མར་འབེབས་པར་བྱ་”ཞེས་ཟེར།
LUK 5:6 དེ་ལྟར་བྱས་ནས་ཉ་ཤིན་ཏུ་མང་པོ་བཟུང་བས་དྲ་རྒྱ་རལ་གྲབས་འདུག
LUK 5:7 རོགས་རམ་ཐོབ་པའི་ཕྱིར་ཁོ་ཚོས་གྲུ་གཞན་ལ་ཡོད་པའི་ལས་རོགས་རྣམས་ལ་ལག་བརྡ་བྱས་པ་དང༌། ཁོ་ཚོ་ཡོང་ནས་ཆུར་ནུབ་གྲབས་ཙམ་ལ་གྲུ་གཉིས་ཀ་ཉ་ཡིས་བཀང༌།
LUK 5:8 དེ་མཐོང་ནས་སི་མོན་པེ་ཏྲོ་ཡིས་གཙོ་བོ་ཡེ་ཤུའི་མདུན་དུ་པུས་མོ་སར་བཙུགས་ནས་ཁོང་ལ་“གཙོ་བོ། ང་མི་སྡིག་ཉེས་ཅན་ཡིན་པས་ངའི་རྩ་ནས་ཕར་ཕེབས་”ཞེས་ཟེར།
LUK 5:9 ཉ་དེ་ཙམ་མང་པོ་བཟུང་བའི་རྐྱེན་གྱིས་ཁོ་དང་ཁོའི་ལས་རོགས་ཚང་མ་ཡ་མཚན་ཆེན་པོ་སྐྱེས།
LUK 5:10 སི་མོན་གྱི་ལས་རོགས་ཡིན་པ་ཟེ་བད་ཡཱ་ཟེར་བའི་བུ་ཡ་ཀོབ་དང་ཡོ་ཧ་ནན་ཡང་དེ་ལྟར་ཧ་ལས་པ་དང༌། ཡེ་ཤུས་སི་མོན་ལ་“མ་འཇིགས་ཤིག ཁྱེད་ཚོས་ཉ་བཙལ་བ་ལྟར་ད་ནས་བཟུང་མི་རྣམས་འཚོལ་བར་འགྱུར་”ཞེས་གསུངས།
LUK 5:11 གྲུ་གཉིས་སྐམ་སར་སླེབས་ནས་ཐམས་ཅད་སྤངས་ཏེ་ཁོ་ཚོ་ཁོང་གི་རྗེས་སུ་འབྲངས་སོ། །
LUK 5:12 གྲོང་ཁྱེར་ཞིག་ལ་བཞུགས་སྐབས་མཛེ་ནད་ལྗིད་པོ་ཕོག་པ་ཞིག་གིས་ཡེ་ཤུ་མཐོང་ནས་ཕྱག་འཚལ་ཏེ་ཁོང་ལ་“གཙོ་བོ་ལགས། གལ་ཏེ་ཁྱེད་ཐུགས་མཉེས་པ་ཡིན་ན་ཁྱེད་ཀྱིས་ང་རང་གི་མཛེ་ནད་དག་པར་མཛད་ཐུབ་”ཅེས་ཞུ་བ་ཆེན་པོ་ཕུལ་བས།
LUK 5:13 ཡེ་ཤུས་ཕྱག་བརྐྱངས་ནས་ཁོ་ལ་རེག་སྟེ་“ང་དེ་བཞིན་དུ་བྱེད་འདོད་ཡོད། དག་པར་གྱུར་ཅིག་”ཅེས་གསུངས་པ་དང༌། འཕྲལ་དུ་ཁོ་མཛེ་ནད་དེ་དག་པར་གྱུར།
LUK 5:14 མི་དེར་གཞན་ལ་ཅི་ཡང་སྨྲ་བར་མི་བྱེད་པའི་བཀའ་གནང་སྟེ་“སོང་ལ་རང་གི་ལུས་ཡ་ཧུ་དཱ་པའི་བླ་མར་སྟོན་དང༌། ཁོང་རྣམས་ལ་བདེན་དཔང་བྱེད་པའི་ཕྱིར་ལུང་སྟོན་པ་མོ་ཤེ་ཡིས་བཀའ་གནང་བ་ལྟར་ཁྱེད་དག་པར་གྱུར་བའི་ཕྱིར་མཆོད་པ་ཞིག་ཕུལ་”ཞེས་གསུངས།
LUK 5:15 ཁོང་གི་སྙན་གྲགས་སྔོན་ལས་རྒྱ་ཆེ་བར་ཁྱབ་བཞིན་ཡོད་པས་ཁོང་གི་གསུང་ལ་ཉན་པ་དང༌། ཁོ་ཚོ་ནད་ལས་ཐར་བའི་ཆེད་དུ་མི་ཚོགས་མང་པོ་འཛོམས།
LUK 5:16 འོན་ཀྱང་ཡེ་ཤུ་སྨོན་ལམ་འདེབས་པའི་ཆེད་དུ་ནམ་རྒྱུན་ལྟར་དབེན་སྟོང་ལ་ཕེབས་སོ། །
LUK 5:17 ཉིན་ཞིག་ཁོང་གིས་ཆོས་བསྟན་གནང་བའི་སྐབས། ག་ལིལ་ཡུལ་གྱི་གྲོང་གསེབ་རེ་རེ་དང༌། ཡ་ཧུ་དཱ་ཡུལ། ཡེ་རུ་ཤ་ལེམ་ནས་ཡོང་བའི་ཕཱ་རུ་ཤི་པ་དང་ཆོས་ཁྲིམས་ལ་མཁས་པའི་མི་ཁ་ཤས་དེ་རུ་བསྡད་དེ། ནད་གསོ་བར་མཛད་པའི་ཆེད་དུ་དཀོན་མཆོག་གི་ནུས་མཐུ་ཁོང་དང་ལྷན་དུ་གནས།
LUK 5:18 མི་འགའ་ཤས་ཀྱིས་ཉལ་ཁྲི་སྟེང་ལ་གོམ་པ་སྤོ་མི་ཐུབ་པའི་ནད་པ་གཅིག་ཁུར་ཏེ་ནང་ལ་ཡོང་ནས་ཡེ་ཤུའི་མདུན་དུ་འཇོག་པའི་ཐབས་བཙལ་ཡང༌།
LUK 5:19 མི་ཚོགས་མང་བས་ཁོ་ཚོ་ཁོང་གི་དྲུང་དུ་མ་ཐར་སྟབས། ཁང་པའི་ཐོག་ཁར་འཛེགས་ནས་ཐོག་ས་བཀོག་སྟེ་ཁོ་ཚོས་ནད་པ་དང་ཉལ་ཁྲི་མཉམ་དུ་མི་ཚོགས་ཀྱི་དཀྱིལ་ལ་ཡེ་ཤུ་བཞུགས་སའི་མདུན་དུ་མར་ཕབ་པ་རེད།
LUK 5:20 ཁོ་ཚོའི་དད་སེམས་མཁྱེན་ནས་ཁོང་གིས་“བུ། ཁྱེད་ཀྱི་སྡིག་ཉེས་བསལ་ཟིན་པ་ཡིན་”ཞེས་གསུངས།
LUK 5:21 ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པའི་བསམ་པ་ལ་དཀོན་མཆོག་ལ་སྐུར་བ་འདེབས་མཁན་འདི་སུ་ཡིན། དཀོན་མཆོག་གཅིག་པོས་མ་གཏོགས་གཞན་སུས་སྡིག་ཉེས་སེལ་ཐུབ་སྙམ།
LUK 5:22 ཁོ་ཚོའི་བསམ་པ་མཁྱེན་ནས་ཡེ་ཤུས་ཁོ་ཚོར་“ཁྱོད་ཚོས་བསམ་བློ་འདི་ལྟར་བཏང་དགོས་པའི་རྒྱུ་མཚན་གང་ཡིན།
LUK 5:23 ནད་པ་དེར་ཁྱེད་ཀྱི་སྡིག་ཉེས་བསལ་ཟིན་ཟེར་བ་ལས་སླ་པོ་ཡིན་ནམ། ཡང་ན་ལོངས་ལ་སོང་ཞིག་ཟེར་བ་ལས་སླ་པོ་ཡིན།
LUK 5:24 འོན་ཀྱང་མིའི་རིགས་ཀྱི་བུ་ཟེར་མཁན་དེ་ལ་འཇིག་རྟེན་འདིར་སྡིག་ཉེས་སེལ་བའི་དབང་ཡོད་པ་ཁྱོད་ཚོས་ཤེས་པའི་ཕྱིར༌༌༌༌”ཞེས་གསུངས་ནས་ཁོང་གིས་ནད་པ་དེ་ལ་“ངས་ཁྱེད་ལ་ཟེར་རྒྱུར། ལོངས་ལ་ཉལ་ཁྲི་ཁྱེར་ནས་ནང་ལ་ལོག་ཅིག་”ཅེས་གསུངས་པས།
LUK 5:25 མི་དེས་ཁོ་ཚོའི་མདུན་དུ་ལམ་སེང་ཡར་ལངས་ནས་ཉལ་ཁྲི་ཁྱེར་བ་དང་དཀོན་མཆོག་ལ་བསྟོད་དེ་ཁྱིམ་དུ་ཕྱིར་ལོག
LUK 5:26 ཁོ་ཚོ་ཐམས་ཅད་ཡ་མཚན་ཆེན་པོ་སྐྱེས་ནས་དཀོན་མཆོག་ལ་བསྟོད་པ་ཕུལ། འཇིགས་སྐྲག་སྐྱེས་ཏེ་“དེ་རིང་ང་ཚོས་ངོ་མཚར་ཅན་གྱི་མཛད་པ་མཐོང་བྱུང་”ཞེས་བཤད་དོ། །
LUK 5:27 དེའི་རྗེས་སུ་ཁོང་ཕྱི་རུ་ཕེབས་ནས་ལེ་ཝི་ཞེས་བྱ་བའི་མི་ཞིག་ཁྲལ་ལེན་སར་བསྡད་ཡོད་པ་གཟིགས་ནས་དེ་ལ་“ཁྱེད་རང་ངའི་རྗེས་སུ་ཤོག་”ཅེས་གསུངས་པས།
LUK 5:28 ཐམས་ཅད་སྤངས་ནས་ཡར་ལངས་ཏེ་ཁོང་གི་རྗེས་སུ་འབྲངས།
LUK 5:29 ལེ་ཝི་ཡིས་རང་གི་ཁྱིམ་དུ་ཡེ་ཤུ་ལ་གསོལ་སྟོན་ཆེན་པོ་བཤམས་ཏེ། ཁྲལ་སྡུད་མཁན་ལ་སོགས་པའི་མི་ཚོགས་མང་པོ་ཞིག་ཁོང་ཚོ་དང་མཉམ་དུ་ཟ་བཞིན་ཡོད།
LUK 5:30 ཕཱ་རུ་ཤི་པ་དང་ཁོ་ཚོའི་ཕྱོགས་ཁག་ཏུ་གཏོགས་པའི་ཆོས་ཁྲིམས་ལ་མཁས་པའི་མི་ཚོས་ཁོང་གི་ཉེ་གནས་རྣམས་ལ་“ཁྱེད་ཚོས་ཁྲལ་སྡུད་མཁན་དང་སྡིག་ཉེས་ཅན་མཉམ་དུ་བཟའ་བཏུང་བྱེད་པ་འདི་ཅི་ཡིན་”ཞེས་མ་རངས་པའི་གཏམ་ཤོད་བཞིན་ཡོད་པ་དང༌།
LUK 5:31 ཡེ་ཤུས་“ཁམས་བཟང་པོའི་མི་ལ་སྨན་པ་མི་དགོས་ཀྱི། ནད་པ་ཚོ་ལ་དགོས།
LUK 5:32 ང་རང་ནི་ཆོས་དྲང་པོའི་མི་རྣམས་འབོད་དུ་ཡོང་བ་མ་ཡིན་གྱི། མི་སྡིག་ཅན་རྣམས་སྤྱོད་པ་ངན་པ་སྤངས་ནས་སེམས་བསྒྱུར་བར་འབོད་དུ་ཡོང་བ་ཡིན་”ཞེས་གསུངས།
LUK 5:33 ཁོ་ཚོས་ཁོང་ལ་“ཡོ་ཧ་ནན་གྱི་སློབ་མར་སྨྱུང་གནས་སྲུང་ཞིང་སྨོན་ལམ་འདེབས་པའི་ལུགས་སྲོལ་ཡོད། ཕཱ་རུ་ཤི་པའི་སློབ་མའང་དེ་ལྟར་བྱེད། འོན་ཀྱང་ཁྱེད་ཀྱི་སློབ་མས་བཟའ་བཏུང་བྱེད་”ཅེས་སྨྲས།
LUK 5:34 ཡེ་ཤུས་“ཆང་སའི་སྐབས། མག་པ་དང་ཁོའི་རོགས་པ་རྣམས་མཉམ་དུ་ཡོད་དུས་ཁྱེད་ཀྱིས་དེ་ཚོར་སྨྱུང་གནས་སྲུང་དུ་འཇུག་ཐུབ་བམ།
LUK 5:35 འོན་ཀྱང་མག་པ་ཁོ་ཚོ་དང་ཁ་འབྲལ་བའི་དུས་ལ་འབབ་ཡོང༌། དུས་དེར་ཁོ་ཚོས་སྨྱུང་གནས་སྲུང་ངེས་”ཞེས་གསུངས།
LUK 5:36 དཔེའི་སྒོ་ནས་ཁོང་གིས་ཁོ་ཚོར་“མི་སུ་ཡིན་ཡང་རས་མཐུག་པོས་གོས་སྲབ་པོར་ལྷན་པ་མི་རྒྱག ལྷན་པ་བརྒྱབ་ན་རས་མཐུག་པོ་དེས་གོས་སྲབ་པོའི་སྲུབས་ཁ་ཇེ་ཆེར་འགྲོ
LUK 5:37 ཡང་དེ་ལྟར་མི་སུ་ཞིག་ཡིན་ཡང་རྒུན་འབྲུམ་ཆང་གསར་པ་པགས་པའི་ཁུག་མ་རྙིང་པའི་ནང་བསྙལ་བར་མི་བྱ་སྟེ། གལ་ཏེ་བསྙལ་ཚེ་ཆང་འཕེལ་ནས་ཁུག་མ་རྙིང་པ་གས་ཏེ་ཆང་དང་ཁུག་མ་གཉིས་ཀ་འཕྲོ་བརླག་འགྲོ་བར་འགྱུར།
LUK 5:38 རྒུན་འབྲུམ་ཆང་གསར་པ་དེ་ཁུག་མ་གསར་པའི་ནང་དུ་བླུག་དགོས།
LUK 5:39 ཡང་རྒུན་འབྲུམ་ཆང་རྙིང་མ་བཏུངས་ནས་མི་སུས་ཀྱང་གསར་པ་འཐུང་མི་འདོད། གང་ལགས་ཤེ་ན། ཁོས་རྒུན་ཆང་རྙིང་པ་དེ་ལེགས་སོ་ཞེས་ཟེར་”ཞེས་གསུངས་སོ། །
LUK 6:1 ངལ་གསོ་བའི་ཉིན་མོ་ཞིག་ལ་ཡེ་ཤུ་ཞིང་ཁ་ཞིག་བརྒྱུད་ནས་ཕེབས་སྐབས། ཁོང་གི་ཉེ་གནས་རྣམས་ཀྱིས་འབྲུ་ཡི་སྙེ་མ་བཏོགས་ཏེ་ལག་པར་འཕུར་འཕུར་བྱས་ནས་བཟས་པ་ལ།
LUK 6:2 ཕཱ་རུ་ཤི་པ་ཁ་ཤས་ཀྱིས་“ཁྱེད་ཚོས་ཅིའི་ཕྱིར་ངལ་གསོ་བའི་ཉིན་མོར་བྱེད་མི་ཆོག་པའི་ལས་བྱེད་བཞིན་ཡོད་དམ་”ཞེས་དྲིས།
LUK 6:3 ཡེ་ཤུས་“རྒྱལ་པོ་དཱ་བིད་དང་ཁོང་གི་འཁོར་གཡོག་རྣམས་ཀྱིས་ལྟོགས་པའི་ཚེ་ཅི་ཞིག་བྱས་པ་དེ་ཡང་ཁྱོད་ཚོས་བཀླགས་མ་མྱོང་ངམ།
LUK 6:4 ཁོང་ཚོ་དཀོན་མཆོག་གི་མཆོད་ཁང་ལ་ཕེབས་ཏེ་དཀོན་མཆོག་གི་སྐུ་མདུན་གྱི་བག་ལེབ་བླངས་ནས་བཟས་ཤིང་འཁོར་གཡོག་རྣམས་ལའང་བྱིན་ནོ། བག་ལེབ་དེ་བཀའ་ཁྲིམས་ལྟར་ན་ཡ་ཧུ་དཱ་པའི་བླ་མ་རྣམས་ལས་གཞན་སུས་ཀྱང་ཟ་མི་ཆོག་”ཅེས་གསུངས།
LUK 6:5 དེ་ནས་ཁོང་གིས་“མིའི་རིགས་ཀྱི་བུ་ནི་ངལ་གསོ་བའི་ཉིན་གྱི་གཙོ་བོ་ཡིན་ནོ་”ཞེས་གསུངས།
LUK 6:6 ངལ་གསོ་བའི་ཉིན་མོ་གཞན་ཞིག་ལ་ཁོང་ཡ་ཧུ་དཱ་པའི་འདུ་ཁང་ནང་དུ་ཕེབས་ནས་ཆོས་བསྟན་གནང་སྟེ། ལག་གཡས་པ་འཁུམས་པ་ཞིག་དེ་རུ་ཡོད།
LUK 6:7 ཡེ་ཤུ་ལ་ནག་ཉེས་བཙུགས་པའི་ཕྱིར་ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་རྣམས་ཀྱིས་ངལ་གསོ་བའི་ཉིན་མོར་ཁོང་གིས་ནད་བཅོས་མི་བཅོས་ལ་ནན་ཏན་གྱིས་བལྟས་ཏེ་བསྡད།
LUK 6:8 འོན་ཀྱང་མི་དེ་ཚོའི་བསམ་པ་མཁྱེན་ཏེ་ཁོང་གིས་ལག་པ་འཁུམས་པའི་མི་དེར་“ཡར་ལངས་ནས་ཚུར་ཤོག་ཅིག་”ཅེས་གསུངས་པས་ཁོས་དེ་ལྟར་བྱས།
LUK 6:9 ཡེ་ཤུས་ཁོ་ཚོར་“དཀོན་མཆོག་གི་བཀའ་ཁྲིམས་ལྟར་ན་མི་རྣམས་ལ་ངལ་གསོ་བའི་ཉིན་མོར་ལས་བཟང་པོ་བྱེད་ཆོག་གམ་ཡང་ན་ལས་ངན་པ་བྱེད་ཆོག སྲོག་སྐྱོབ་ཆོག་གམ་ཡང་ན་སྲོག་གཅོད་ཆོག་”ཅེས་དྲིས་ནས།
LUK 6:10 དེ་ཐམས་ཅད་ལ་རིམ་གྱིས་གཟིགས་ནས་ཁོང་གིས་མི་དེར་“ལག་པ་རྐྱོངས་ཤིག་”ཅེས་གསུངས་པས་ཁོས་ལག་པ་བརྐྱངས་ཤིང་ནད་གསོས་པར་གྱུར།
LUK 6:11 འོན་ཀྱང་ཁོ་ཚོ་ཁོང་ཁྲོ་འབར་ནས་ཡེ་ཤུ་ལ་ཅི་ཞིག་བྱེད་པར་གྲོས་བསྡུར་བྱས་སོ། །
LUK 6:12 དེའི་དུས་སུ་སྨོན་ལམ་འདེབས་པའི་ཕྱིར་ཁོང་རི་ཞིག་ལ་ཕེབས་ནས་མཚན་གང་དཀོན་མཆོག་ལ་གསོལ་བ་བཏབ།
LUK 6:13 ནམ་ལངས་པའི་ཚེ་ཁོང་གི་ཉེ་གནས་རྣམས་བོས་ནས་བཅུ་གཉིས་པོ་བདམས་ཏེ་ཁོང་གིས་ཁོ་ཚོར་སྐུ་ཚབ་ཅེས་བཏགས།
LUK 6:14 ཁོ་ཚོ་ནི་ཁོང་གིས་པེ་ཏྲོ་ཞེས་བཏགས་པའི་སི་མོན་དང༌། ཁོའི་གཅུང་པོ་ཨན་དྲི་ཡཱ། ཡ་ཀོབ། ཡོ་ཧ་ནན། ཕི་ལིབ། པར་ཐོ་ལོ་མཱ།
LUK 6:15 མད་ཐཱ། ཐོ་མཱ། ཨལ་ཕཱ་ཞེས་པ་དེའི་བུ་ཡ་ཀོབ། རྒྱལ་གཅེས་པའི་ཕྱོགས་ཁག་གི་ཁོངས་མི་སི་མོན།
LUK 6:16 ཡ་ཀོབ་ཀྱི་བུ་ཡུ་དཱ། ཁོང་ལ་རྒྱབ་གཏོད་བྱེད་མཁན་དུ་འགྱུར་བ་ཡུ་དཱ་དབྱི་སི་ཀར་རེ་བཅས་ཡིན་ནོ། །
LUK 6:17 ཡེ་ཤུ་ཁོ་ཚོ་དང་མཉམ་དུ་རི་ནས་མར་ཕེབས་ནས་ཐང་ཞིག་ལ་བཞུགས། དེར་ཡ་ཧུ་དཱའི་ཡུལ་ཐམས་ཅད་དང༌། ཡེ་རུ་ཤ་ལེམ། ས་དབུས་རྒྱ་མཚོའི་འགྲམ་ལ་ཆགས་པའི་གྲོང་ཁྱེར་ཐཱ་ཨེར་དང་ཚི་དོན་ནི།
LUK 6:18 ཁོང་གི་གསུང་ལ་ཉན་པ་དང༌། ཁོ་ཚོ་ནད་ལས་ཐར་བའི་ཆེད་དུ་མི་ཚོགས་ཧ་ཅང་མང་པོ་འཛོམས་ཏེ། གདོན་འདྲེ་མི་གཙང་བས་བཟུང་བའི་མི་རྣམས་གསོས་པར་གྱུར།
LUK 6:19 ནུས་མཐུ་ཞིག་ཁོང་ནས་ཕྱིར་ཐོན་ཏེ་ཁོ་ཚོའི་ནད་ཀུན་གསོས་པར་མཛད་པས་ཚང་མས་ཁོང་ལ་རེག་ཐབས་བཙལ།
LUK 6:20 ཉེ་གནས་རྣམས་ལ་གཟིགས་ཏེ་ཁོང་གིས། “དཀོན་མཆོག་རྒྱལ་སྲིད་ཁྱེད་ལ་གནང་བས་ནི། ། དབུལ་ཕོངས་ཡིན་པ་ཁྱེད་རྣམས་བདེ་བ་ཡིན། །
LUK 6:21 ཁྱེད་ཚོ་ཚིམ་པར་འགྱུར་ངེས་ཡིན་པའི་ཕྱིར། ། ད་ལྟ་བཀྲེས་པ་རྣམས་ནི་བདེ་བ་ཡིན། ། རྗེས་མ་ཁྱེད་ཚོ་དགའ་བར་འགྱུར་བའི་ཆེད། ། ཁྱེད་རྣམས་ད་ལྟ་བཤུམ་མཁན་བདེ་བ་ཡིན། །
LUK 6:22 མི་ཡི་རིགས་ཀྱི་བུ་ཡི་དོན་དུ་ནི། ། ཁྱེད་ལ་སྡང་དང་ཟུར་ལ་ཕུད་བྱེད་དེ། ། དམའ་འབེབས་གཏོང་དང་མཐོང་ཆུང་བྱེད་པའི་སྐབས། ། ཁྱེད་རྣམས་ཤིན་ཏུ་བདེ་བ་ཡིན་པས་སོ། །
LUK 6:23 ལྟོས་དང༌། དཀོན་མཆོག་གི་ཞིང་ཁམས་སུ་ཁྱེད་ལ་བྱ་དགའ་ཆེན་པོ་ཡོད་པས་ཉིན་མོ་དེར་དགའ་བའི་ངང་ནས་མཆོངས་ཤིག གང་ལགས་ཟེར་ན། མི་དེ་ཚོའི་མེས་པོས་ཀྱང་ལུང་སྟོན་པ་རྣམས་ལ་དེ་ལྟར་བྱས་སོ། །
LUK 6:24 འོན་ཀྱང༌། ཕྱུག་པོ་ཡོངས་སུ་སེམས་གསོ་ཐོབ་ཟིན་པས། ། ཁྱོད་རྣམས་ཆད་པ་ཕོག་པར་འགྱུར་ངེས་ཡིན། །
LUK 6:25 ཁྱོད་རྣམས་བཟས་ནས་ཚིམ་པར་འགྱུར་བ་ལ། ། ལྟོགས་པར་འགྱུར་བའི་ཆད་པ་ཕོག་པར་འགྱུར། ། གད་མོ་དགོད་པར་ཆད་པ་ཕོག་འགྱུར་ཏེ། ། ཁྱོད་རྣམས་མྱ་ངན་བྱེད་ཅིང་ངུ་བར་འགྱུར། །
LUK 6:26 ལུང་སྟོན་རྫུན་མར་མེས་པོས་བྱས་པ་ལྟར། ། ཐམས་ཅད་ཁྱོད་ལ་བསྟོད་བསྔགས་བྱས་འགྱུར་ན། ། ཁྱོད་རྣམས་ཆད་པ་ཕོག་པར་འགྱུར་ངེས་ཡིན། །” ཞེས་གསུངས་སོ། །
LUK 6:27 ཡང་ཁོང་གིས་“ངས་ཁྱེད་ཉན་མཁན་རྣམས་ལ་ཟེར་རྒྱུར། དགྲ་བོ་རྣམས་ལ་བྱམས་པ་གྱིས་ཤིག ཁྱེད་ལ་སྡང་མཁན་རྣམས་ལ་ལས་བཟང་པོ་བྱོས།
LUK 6:28 ཁྱེད་ཚོར་དམོད་མོ་འདེབས་མཁན་ལ་བྱིན་གྱིས་རློབས་ཤིང༌། ཁྱེད་ཚོར་སྨད་ར་གཏོང་མཁན་གྱི་དོན་དུ་སྨོན་ལམ་འདེབས་ཤིག
LUK 6:29 སུས་ཁྱེད་ལ་འགྲམ་པ་ཡ་གཅིག་ལ་འགྲམ་ལྕག་བཞུས་ན། དེ་ལ་འགྲམ་པ་གཞན་ཡང་སྟོན། སུས་ཁྱེད་ཀྱི་ཕྱི་གོས་ཕྲོགས་ན། དེ་ལ་ནང་གོས་ཀྱང་འཁྱེར་དུ་ཆུག
LUK 6:30 སུས་ཁྱེད་ལ་གང་ཞིག་ཞུས་ན་དེ་ལ་སྦྱིན། སུས་ཁྱེད་ཀྱི་དངོས་པོ་ཕྲོགས་ན། དེ་ལ་ཚུར་ཁྱེར་ཤོག་ཅེས་མི་ཟེར།
LUK 6:31 མི་གཞན་གྱིས་ཇི་ལྟར་ཁྱེད་ཚོར་བྱས་ན་དགའ་བ་བཞིན། དེ་ལྟར་གཞན་ལ་བྱོས་ཤིག
LUK 6:32 ཁྱེད་ལ་བྱམས་པ་བྱེད་མཁན་ལ་བྱམས་ན་ཅི་ཕན། སྡིག་ཉེས་ཅན་ཡང་སོ་སོར་བྱམས་པ་བྱེད་མཁན་ལ་བྱམས།
LUK 6:33 ཁྱེད་ལ་བཟང་པོ་བྱེད་མཁན་ལ་བཟང་པོ་བྱས་ན་ཅི་ཕན། སྡིག་ཉེས་ཅན་གྱིས་ཀྱང་དེ་ལྟར་བྱེད།
LUK 6:34 སྐྱིན་པ་ལེན་པའི་ཆེད་དུ་མི་གཞན་ལ་གཡར་ན་ཅི་ཕན། སྐྱིན་པ་ལེན་པའི་ཕྱིར་ཐ་ན་སྡིག་ཅན་གྱིས་སྡིག་ཅན་ལ་གཡར།
LUK 6:35 གལ་ཏེ་ཁྱེད་ཀྱིས་དགྲ་བོ་རྣམས་ལ་བྱམས་ཤིང༌། བཟང་པོ་བྱེད། སྐྱིན་པ་ལེན་པའི་རེ་བ་མེད་པར་མི་གཞན་ལ་གཡར་ན། ཁྱེད་ཀྱི་བྱ་དགའ་ཆེན་པོ་ཡིན་པ་མ་ཟད། ཁྱེད་ཚོ་བླ་ན་མེད་པའི་དཀོན་མཆོག་གི་སྲས་ཡིན་པར་འགྱུར། གང་ལགས་ཟེར་ན། ཁོང་གིས་དྲིན་ལན་ལོག་འཇལ་བ་དང་ངན་པ་རྣམས་ལ་དྲིན་སྐྱོང་མཛད།
LUK 6:36 ཁྱེད་ཀྱི་ཡབ་ཐུགས་རྗེ་ཅན་ཡིན་པ་ལྟར་ཁྱེད་ཀྱང་སྙིང་རྗེ་ཅན་དུ་འགྱུར་དགོས་”ཞེས་གསུངས།
LUK 6:37 ཡང་ཁོང་གིས་“སྐྱོན་འདོགས་མ་བྱོས་དང་ཁྲིམས་གཅོད་འབྱུང་བར་མི་འགྱུར། ཁ་རྡུང་མ་གཏོང་དང་ཆད་པ་ཕོག་པར་མི་འགྱུར། གཞན་ལ་གུ་ཡངས་གཏོང་དང་རང་གི་སྡིག་ཉེས་སེལ་བར་འགྱུར།
LUK 6:38 མི་གཞན་ལ་སྦྱིན་དང་ཁྱེད་ལ་གནང་བར་འགྱུར་ཏེ། བྲེ་གང་ལས་མང༌། མནན་ནས་སྤྲུགས་པར་ཁྱེད་ཀྱི་ཐུ་བ་ལ་གཏོང་ཕོད་ཀྱིས་བླུག་པར་འགྱུར། སྣོད་གང་གིས་འཇལ་བ་དེ་རང་གིས་ཁྱེད་ལ་ཡང་འཇལ་བར་འགྱུར་”ཞེས་གསུངས།
LUK 6:39 དེ་ཡང་དཔེའི་སྒོ་ནས་ཁོང་གིས་ཁོ་རྣམས་ལ་“ལོང་བ་ཞིག་གིས་ལོང་བ་གཞན་ཞིག་ཁྲིད་ན་དེ་ཚོ་གཉིས་ས་སྡོང་ལ་འགྱེལ་བར་མི་འགྱུར་རམ།
LUK 6:40 ཉེ་གནས་སློབ་དཔོན་ལས་ཆེ་བ་མ་ཡིན། འོན་ཀྱང་ཡོན་ཏན་མཐར་ཕྱིན་པ་རྣམས་སློབ་དཔོན་དང་འདྲ་བར་འགྱུར།
LUK 6:41 གཞན་གྱི་མིག་ལ་ཡོད་པའི་ཤིང་རྡུལ་མཐོང་ཡང༌། རང་གི་མིག་ལ་ཡོད་པའི་གདུང་མ་མི་མཐོང་བ་དེ་ཅི་ཡིན།
LUK 6:42 རང་གི་མིག་ལ་ཡོད་པའི་གདུང་མ་མི་མཐོང་བར་གཞན་ལ་ཁྱེད་ཀྱི་མིག་ལ་ཡོད་པའི་ཤིང་རྡུལ་འདོན་པར་བྱ་ཞེས་ཅི་ལྟར་ཟེར། ཁ་བཤད་དོན་ལ་མི་གནས་པ་ཁྱོད། རང་གི་མིག་ལ་ཡོད་པའི་གདུང་མ་ཐོན་ཅིག དེ་ནས་གཞན་གྱི་མིག་ལ་ཤིང་རྡུལ་འདོན་པའི་ཆེད་དུ་གསལ་པོར་མཐོང་”ཞེས་གསུངས།
LUK 6:43 ཁོང་གིས་“ཤིང་སྡོང་བཟང་པོ་ལས་འབྲས་བུ་ངན་པ་མི་སྐྱེ་ལ། ཤིང་སྡོང་ངན་པ་ལས་འབྲས་བུ་ལེགས་པོ་མི་སྐྱེ།
LUK 6:44 དེའི་ཕྱིར་ཤིང་སྡོང་རེ་རེ་འབྲས་བུ་ནས་ངོ་ཤེས། སུས་ཀྱང་ཚེར་ཤིང་ནས་བསེ་ཡབ་ཀྱི་འབྲས་བུ་མི་ལེན་ལ། ཡང་ན་སེ་བའི་མེ་ཏོག་ནས་རྒུན་འབྲུམ་འཐོག་མི་སྲིད།
LUK 6:45 མི་བཟང་པོ་ཞིག་གིས་སེམས་ཀྱི་མཛོད་བཟང་པོ་ནས་བཟང་པོ་འདོན་པ་དང༌། མི་ངན་པ་ཞིག་གིས་སེམས་ཀྱི་མཛོད་ངན་པ་ནས་ངན་པ་འདོན། གང་ལགས་ཟེར་ན། སེམས་ཀྱི་མཛོད་ནས་ཁ་ཡིས་བརྗོད།
LUK 6:46 ང་ལ་གཙོ་བོ་ལགས། གཙོ་བོ་ལགས་ཞེས་ཟེར་ནས་ངའི་ཁ་ལ་མི་ཉན་པ་དེ་ཅི་ཡིན།
LUK 6:47 ངའི་རྩར་ཡོང་ནས་ངས་སྨྲ་བའི་ཚིག་ཐོས་ཏེ་ཉམས་ལེན་བྱེད་མཁན་འདི་ལྟར་ཡིན།
LUK 6:48 ཁོ་ནི་གཏིང་རིང་པོ་བརྐོས་ནས་བྲག་ལ་རྨང་གཞི་བརྟན་པོ་བཟོས་པའི་ཁང་པ་བཟོ་མཁན་ལྟར་ཡིན། ཁང་པ་དེ་ལེགས་པོར་བརྩིགས་པས་ཆུ་ལོག་བྱུང་སྐབས་དྲག་ཏུ་རྒྱུག་པའི་ཆུ་ཡིས་ཁང་པ་དེར་ཕོག་ནས་གཡོས་མ་ཐུབ།
LUK 6:49 འོན་ཀྱང་ངས་སྨྲ་བའི་ཚིག་ཐོས་ནས་ཉམས་ལེན་མི་བྱེད་མཁན་ནི་རྨང་གཞི་མེད་པའི་ཁང་པ་བཟོ་མཁན་ལྟར་ཡིན། ཆུ་ལོག་བྱུང་སྐབས་དྲག་ཏུ་རྒྱུག་པའི་ཆུ་ཡིས་ཁང་པ་དེར་ཕོག་ནས་འཕྲལ་དུ་རྡིབ་སྟེ། ཁང་པ་དེ་ཡོངས་སུ་འཇིག་”ཅེས་གསུངས་སོ། །
LUK 7:1 ཡེ་ཤུས་མི་ཚོགས་ཀྱི་ཐོས་སར་བཀའ་དེ་ཐམས་ཅད་གསུངས་ཚར་རྗེས་ཀ་ཕར་ན་ཧུམ་ལ་ཕེབས།
LUK 7:2 དེར་དམག་མི་བརྒྱ་དཔོན་ཅིག་གིས་གུས་པར་བྱེད་པའི་གཡོག་པོ་ཞིག་ན་ནས་ཤི་གྲབས་ཡོད།
LUK 7:3 བརྒྱ་དཔོན་དེས་ཡེ་ཤུའི་སྐོར་ཐོས་པ་དང༌། གཡོག་པོ་ནད་ལས་ཐར་བའི་ཕྱིར་ཁོས་ཡེ་ཤུ་གདན་འདྲེན་ཞུ་བར་ཡ་ཧུ་དཱ་པའི་འགན་འཁུར་བའི་རྒན་པོ་རྣམས་ཁོང་གི་རྩར་བཏང་བ་དང༌།
LUK 7:4 ཡེ་ཤུའི་མདུན་དུ་སླེབས་ནས་ཁོ་ཚོས་“ཁྱེད་ཀྱིས་དམག་མི་འདི་ལ་དེ་ལྟར་མཛད་འོས་པ་ཡིན།
LUK 7:5 གང་ལགས་ཤེ་ན། ང་ཚོའི་མི་རིགས་ལ་བྱམས་ཤིང༌། ཁོང་གིས་ང་ཚོའི་འདུ་ཁང་བརྩིགས་”ཞེས་ཞུ་བ་ནན་གྱིས་ཕུལ།
LUK 7:6 ཡེ་ཤུ་ཁོ་ཚོ་དང་མཉམ་དུ་ཕེབས་ནས་ཁང་པ་དང་ཉེ་བར་བྱོན་སྐབས། བརྒྱ་དཔོན་གྱིས་གྲོགས་པོ་ཁ་ཤས་བཏང་སྟེ་ཁོང་ལ་“གཙོ་བོ། ཁྱེད་འོ་བརྒྱལ་ཏེ་ངའི་ཁྱིམ་ནང་དུ་ཕེབས་པར་མི་འོས་པ་མ་ཟད།
LUK 7:7 ང་ཁྱེད་ཀྱི་སྐུ་མདུན་དུ་བཅར་བ་ཡང་མི་འོས་བསམས་པས། ཁྱེད་ཀྱིས་བཀའ་གནང་བར་མཛོད་དང༌། ངའི་གཡོག་པོ་ནད་ལས་ཐར་བར་འགྱུར།
LUK 7:8 གང་ལགས་ཤེ་ན། ང་ཡང་གཞན་གྱི་དབང་འོག་ཏུ་ཡོད་དང༌། ངའི་འོག་ཏུ་ཡང་དམག་མི་ཡོད། ངས་མི་ཞིག་ལ་སོང་ཞེས་ཟེར་ན་འགྲོ གཞན་ལ་ཚུར་ཤོག་ཅེས་བཤད་ན་ཡོང༌། ངའི་གཡོག་པོར་ལས་ཀ་དེ་བྱོས་ཤིག་ཅེས་བཤད་ན་ཁོས་དེ་ལྟར་བྱེད་”ཅེས་སྨྲས་པ་ལ།
LUK 7:9 ཡེ་ཤུས་དེ་གསན་ནས་ཡ་མཚན་སྐྱེས་པ་དང༌། ཞལ་ཕྱིར་བསྐོར་ཏེ་ཁོང་གི་རྗེས་སུ་འབྲང་བའི་མི་ཚོགས་ལ་“ངས་ཁྱེད་རྣམས་ལ་ཟེར་རྒྱུར། ཡི་སི་ར་ཨེལ་ལ་ཡང་ངས་འདི་འདྲ་བའི་དད་སེམས་ཡོད་པའི་མི་མ་མཐོང་”ཞེས་གསུངས།
LUK 7:10 ཡེ་ཤུའི་མདུན་དུ་བཏང་ཡོད་པའི་མི་རྣམས་བརྒྱ་དཔོན་གྱི་ཁང་པར་ཕྱིར་ལོག་སྐབས་གཡོག་པོ་ཁམས་བཟང་པོར་བསྡད་པ་མཐོང༌།
LUK 7:11 རིང་པོར་མ་ལོན་པར་ཁོང་ཉེ་གནས་དང་མི་ཚོགས་མང་པོ་ཞིག་དང་བཅས་པ་ནཱ་ཨིན་ཞེས་པའི་གྲོང་ཁྱེར་དུ་ཕེབས།
LUK 7:12 གྲོང་ཁྱེར་གྱི་རྒྱལ་སྒོ་དང་ཉེ་བར་བྱོན་སྐབས། ཁོང་གིས་མི་ཚོགས་མང་པོ་ཡོང་བཞིན་པ་གཟིགས། ཁོ་ཚོས་ཡུགས་མོ་ཞིག་གི་བུ་གཅིག་པོའི་ཕུང་པོ་ཕྱི་ལོགས་སུ་ཁུར་བ་དང༌།
LUK 7:13 གཙོ་བོས་ཁོ་མོ་ལ་གཟིགས་ནས་ཐུགས་རྗེ་སྐྱེས་ཏེ་ཁོ་མོར་“མ་ཤུམས་”ཞེས་གསུངས།
LUK 7:14 ཏོག་ཙམ་ཚུར་ཕེབས་པ་དང་ཕུང་པོ་ཡོད་པའི་འཁྱོགས་ཤིང་ལ་ཕྱག་གིས་རེག་ནས་ཁུར་མཁན་བསྡད། ཁོང་གིས་“གཞོན་ནུ། ངས་ཁྱེད་ལ་ཟེར་རྒྱུར། ཡར་ལོངས་ཤིག་”ཅེས་གསུངས་པས།
LUK 7:15 གཤིན་པོ་དེ་གསོན་པོར་ལངས་ནས་སྐད་ཆ་བཤད། ཡེ་ཤུས་བུ་དེ་རང་གི་ཨ་མ་ལ་གནང༌།
LUK 7:16 འཇིགས་པ་སྐྱེས་ནས་ཚང་མས་དཀོན་མཆོག་ལ་བསྟོད་པ་ཕུལ་ཏེ་“ང་ཚོའི་ཁྲོད་དུ་ལུང་སྟོན་པ་ཆེན་པོ་ཞིག་འདུག་”ཅེས་པ་དང་“དཀོན་མཆོག་གིས་ཁོང་གི་མི་རིགས་ལ་ཐུགས་རྗེས་གཟིགས་ཡོད་”ཅེས་བཤད།
LUK 7:17 གཏམ་འདི་ཡ་ཧུ་དཱ་ཡུལ་ཡོངས་དང༌། མཐའ་འཁོར་གྱི་ས་ཆ་ཀུན་ཏུ་ཁྱབ་པ་རེད།
LUK 7:18 ཁྲུས་གསོལ་མཁན་ཡོ་ཧ་ནན་གྱི་སློབ་མ་རྣམས་ཀྱིས་ཁོང་ལ་དོན་དེ་ཚོ་ཐམས་ཅད་བཤད་པས། ཡོ་ཧ་ནན་གྱིས་སློབ་མ་གཉིས་བོས་པ་དང༌།
LUK 7:19 གཙོ་བོའི་མདུན་དུ་བཏང་སྟེ་ཁོང་ལ་“ཁྱེད་འབྱོན་པར་འགྱུར་ཞེས་བྱ་བ་དེ་ཡིན་ནམ། ཡང་ན་ང་ཚོ་གཞན་ཞིག་སྒུག་པར་བྱ་”ཞེས་འདྲི་བའི་ཆེད་དུ་བཏང༌།
LUK 7:20 སློབ་མ་དེ་གཉིས་ཡེ་ཤུའི་དྲུང་དུ་སླེབས་ནས་ཁོང་ལ་“ཁྲུས་གསོལ་མཁན་ཡོ་ཧ་ནན་གྱིས་འདི་ཞུ་བར་ང་ཚོ་མངགས་ཏེ། ཁྱེད་འབྱོན་པར་འགྱུར་བ་དེ་ཡིན་ནམ། ཡང་ན་ང་ཚོ་གཞན་ཞིག་སྒུག་པར་བྱ་”ཞེས་སྨྲས།
LUK 7:21 དེའི་སྐབས་སུ་ཡེ་ཤུས་ནད་རིགས་སྣ་ཚོགས་གསོས་པར་མཛད་པ་དང༌། གདོན་འདྲེ་མང་པོ་ཕྱིར་བསྐྲད་པ་མ་ཟད། ལོང་བ་མང་པོ་མཐོང་བར་མཛད།
LUK 7:22 ལན་དུ་ཁོང་གིས་ཁོ་ཚོར་“སོང་ལ་ཁྱེད་ཀྱིས་གང་མཐོང་བ་དང་ཐོས་པ། ལོང་བས་མཐོང་བ། ཞ་བོ་འགྲོ་བ། མཛེ་ནད་ཅན་དག་པར་འགྱུར་བ། འོན་པས་ཐོས་པ། གཤིན་པོ་རྣམས་གསོན་པོར་ལངས་པར་འགྱུར་བ། དབུལ་ཕོངས་རྣམས་ལ་འཕྲིན་བཟང་སྒྲོག་པ་སོགས་ཡོ་ཧ་ནན་ལ་ཤོད།
LUK 7:23 ངའི་རྐྱེན་གྱིས་དད་པ་མི་ཉམས་པ་ནི་བདེའོ་”ཞེས་གསུངས།
LUK 7:24 ཡོ་ཧ་ནན་གྱི་བང་ཆེན་སོང་ནས་ཡེ་ཤུས་མི་ཚོགས་ལ་ཡོ་ཧ་ནན་གྱི་སྐོར་འདི་ལྟར་གསུངས་“ཁྱེད་ཚོས་ཅི་ཞིག་ལྟ་རུ་དབེན་སྟོང་ལ་སོང༌། རླུང་གིས་གཡོ་བའི་འདམ་རྩྭ་ཞིག་ལྟ་རུ་སོང་ངམ།
LUK 7:25 འོ་ན་ཁྱེད་ཚོས་ཅི་ཞིག་ལྟ་རུ་སོང༌། མི་གོས་སྤུས་ལེགས་གྱོན་པ་ཞིག་ལ་ལྟ་རུ་སོང་ངམ། གོས་སྤུས་ལེགས་གྱོན་པ་དང་རྒྱས་སྤྲོས་བྱེད་པ་རྣམས་ནི་རྒྱལ་པོའི་ཕོ་བྲང་ལ་སྡོད་མཁན་ཡིན།
LUK 7:26 ཁྱེད་ཚོས་ཅི་ཞིག་ལ་ལྟ་རུ་སོང༌། ལུང་སྟོན་པ་ཞིག་ལ་ལྟ་རུ་སོང་ངམ། ལགས་ཡིན། ངས་ཁྱེད་ཚོ་ལ་ཟེར་རྒྱུར། ལུང་སྟོན་པ་ལས་ལྷག་པ་ཞིག་ལྟ་རུ་སོང༌།
LUK 7:27 ཁོང་གི་སྐོར་ལ་དཀོན་མཆོག་གི་དམ་པའི་གསུང་རབ་ནང་དུ་འདི་ལྟར་གསུངས། ལྟོས་ཤིག ང་ཡི་ཕོ་ཉ་ཁྱེད་ཀྱི་མདུན་དུ་གཏོང༌། ། དེ་ཡིས་ཁྱེད་ཀྱི་ལམ་ནི་བསལ་བར་བྱ། ། ཞེས་གསུངས།
LUK 7:28 ངས་ཁྱེད་ཚོ་ལ་ཟེར་རྒྱུར། བུད་མེད་ལས་སྐྱེས་པ་ཐམས་ཅད་ཀྱི་ནང་ནས་ཡོ་ཧ་ནན་ལས་ཆེ་བ་གཅིག་ཀྱང་མེད། འོན་ཀྱང་དཀོན་མཆོག་གི་རྒྱལ་སྲིད་ནང་ལ་མི་ཆུང་ཤོས་ཁོང་ལས་ཆེའོ་”ཞེས་གསུངས།
LUK 7:29 ཁྲལ་སྡུད་མཁན་ཚུད་པའི་མི་ཐམས་ཅད་ཀྱིས་དེ་ཐོས་ནས་དཀོན་མཆོག་གི་དྲང་བ་ཉིད་ངོས་ལེན་བྱས། གང་ལགས་ཟེར་ན། ཁོ་ཚོས་ཡོ་ཧ་ནན་གྱི་ཁྲུས་གསོལ་བླངས་པའི་ཕྱིར་རོ།
LUK 7:30 འོན་ཀྱང་ཕཱ་རུ་ཤི་པ་དང་ཆོས་ཁྲིམས་ལ་མཁས་པའི་མི་རྣམས་ནི་ཡོ་ཧ་ནན་གྱི་ཁྲུས་གསོལ་མ་བླངས་པའི་སྒོ་ནས་དཀོན་མཆོག་གི་ཐུགས་དགོངས་རང་གི་དོན་དུ་དོར་བ་ཡིན།
LUK 7:31 དུས་རབས་འདིའི་མི་རྣམས་གང་ཞིག་ལ་སྡུར་བར་བྱ། ཁོ་ཚོ་སུ་དང་འདྲ་བ་ཡིན།
LUK 7:32 ཁོ་ཚོ་ཚོང་རར་སྡོད་པའི་ཕྲུ་གུ་གཅིག་གིས་གཅིག་ལ་འབོད་དེ། ཁྱོད་ཕྱིར་གླིང་བུ་བཏང་ན་ཡང༌། ། ཁྱོད་ཀྱིས་ཞབས་བྲོ་མ་བརྒྱབ་ལ། ། ཁྱོད་ཆེད་མྱ་ངན་གླུ་བླངས་ཀྱང༌། ། ཁྱོད་ཚོས་ངུ་བར་མ་བྱས་སོ། ། ཞེས་པ་དང་འདྲ་བ་ཡིན།
LUK 7:33 གང་ལགས་ཟེར་ན། ཁྲུས་གསོལ་མཁན་ཡོ་ཧ་ནན་བག་ལེབ་ཀྱང་མི་ཟ་ལ་རྒུན་ཆང་ཡང་མི་འཐུང་བར་ཕེབས་དུས་ཁྱོད་ཚོས་“འདྲེ་ཞུགས་པ་ཞིག་ཡིན་”ཞེས་སྨྲས།
LUK 7:34 མིའི་རིགས་ཀྱི་བུ་ཟ་འཐུང་བྱེད་པར་ཡོང་ནས་ཁྱོད་ཚོས་“ལྟོས་ཤིག ཁོ་ནི་ལྟོགས་རྔམ་ཅན་དང༌། ར་བཟི་ཅན། ཁྲལ་སྡུད་མཁན་དང་སྡིག་ཉེས་ཅན་གྱི་གྲོགས་པོ་ཞིག་ཡིན་”ཞེས་སྨྲ།
LUK 7:35 འོན་ཀྱང་ཤེས་རབ་དེའི་ཕྲུ་གུ་ཀུན་གྱིས་ཡང་དག་པ་ཡིན་པར་ཁུངས་སྐྱེལ་ལོ། །
LUK 7:36 དེ་ཡང་ཕཱ་རུ་ཤི་པ་ཞིག་གིས་ཡེ་ཤུ་དྲངས་ཏེ་ཁོང་དེའི་ཁྱིམ་ལ་ཕེབས་ནས་ཉལ་ཁྲིར་བསྙེས་ཏེ་གསོལ་བ་བཞེས་སུ་བཞུགས།
LUK 7:37 བུད་མེད་སྡིག་ཉེས་ཅན་ཞིག་གྲོང་ཁྱེར་དེར་ཡོད་དེ། ཁོ་མོས་ཡེ་ཤུ་ཕཱ་རུ་ཤི་པའི་ཁྱིམ་ལ་ཞལ་ལག་བཞེས་བཞིན་པར་ཤེས་ནས། སྤོས་ཆུ་གང་བའི་རྡོ་ཀ་མ་རུའི་བུམ་པ་ཞིག་ཁྱེར་ཡོང་བ་དང༌།
LUK 7:38 ཁོང་གི་རྒྱབ་ཏུ་ཡེ་ཤུའི་ཞབས་དང་ཉེ་བར་ལངས་ནས་ངུ་བཞིན་བསྡད་པ་དང༌། ཁོ་མོའི་མིག་ཆུས་ཁོང་གི་ཞབས་རློན་པར་འགྱུར་ཏེ་རང་གི་སྐྲ་ཡིས་འཕྱིས་པ་དང༌། ཞབས་ལ་འོ་བྱས་ནས་སྤོས་ཆུ་བླུགས།
LUK 7:39 ད་ཁོང་གདན་འདྲེན་ཞུ་བའི་ཕཱ་རུ་ཤི་པས་དེ་མཐོང་ནས་མི་འདི་ལུང་སྟོན་པ་ཡིན་ན་ཁོང་ལ་རེག་པའི་བུད་མེད་འདི་སུ་དང་གང་འདྲ་ཞིག་ཡིན་པ་དང༌། སྡིག་ཉེས་ཅན་ཡིན་པར་མཁྱེན་གྱི་རེད་བསམས།
LUK 7:40 ལན་དུ་ཡེ་ཤུས་“སི་མོན། ངས་ཁྱེད་ལ་སྐད་ཆ་ཤོད་རྒྱུ་ཡོད་”ཅེས་གསུངས་པས་ཁོས་“སློབ་དཔོན་ལགས། གསུང་རོགས་གནང་”ཞེས་བཤད།
LUK 7:41 ཡེ་ཤུས་“དངུལ་བུན་གཏོང་མཁན་ཅིག་ལ་བུ་ལོན་པ་གཉིས་ཡོད་དེ། གཅིག་ལ་དེ་ཎ་རིའི་དངུལ་སྒོར་ལྔ་བརྒྱ་དང༌། གཞན་ལ་དེ་ཎ་རིའི་དངུལ་སྒོར་ལྔ་བཅུའི་བུ་ལོན་ཡོད།
LUK 7:42 བུ་ལོན་འཇལ་མ་ཐུབ་པས་བུན་བདག་གིས་ཁོ་ཚོ་གཉིས་ཀའི་བུ་ལོན་བསལ། ད་ཁོང་ལ་ལྷག་པར་གཅེས་པའི་བུ་ལོན་པ་སུ་ཡིན་”ཞེས་གསུངས།
LUK 7:43 ལན་དུ་སི་མོན་གྱིས་“མང་པོ་བསལ་བ་དེས་ལྷག་པར་གཅེས་པར་བྱ་སྙམ་བྱུང་”ཞེས་སྨྲས་པ་དང༌། ཁོང་གིས་ཁོ་ལ་“ཁྱེད་ཀྱིས་ལེགས་པར་བཤད་”ཅེས་གསུངས།
LUK 7:44 བུད་མེད་དེར་ཞལ་ཕྱིར་བསྐོར་ཏེ་ཁོང་གིས་སི་མོན་ལ་“ཁྱོད་ཀྱིས་བུད་མེད་འདི་མཐོང་ངམ། ང་ཁྱོད་ཀྱི་ཁྱིམ་དུ་ཡོང་བ་དང༌། ཁྱོད་ཀྱིས་ང་ལ་རྐང་པ་འཁྲུད་པའི་ཆུ་མ་སྟེར། འོན་ཀྱང་ཁོ་མོས་རང་གི་མིག་ཆུ་ཡིས་ངའི་རྐང་པ་བཀྲུས་ནས་སྐྲ་ཡིས་འཕྱིས།
LUK 7:45 ཁྱོད་ཀྱིས་ང་ལ་འོ་མ་བྱས། ང་སླེབས་ནས་ཁོ་མོས་ངའི་རྐང་པར་མུ་མཐུད་ནས་འོ་བྱས།
LUK 7:46 ཁྱོད་ཀྱིས་ངའི་མགོར་སྣུམ་མ་བྱུགས། ཁོ་མོས་ངའི་རྐང་པར་སྤོས་ཆུ་བླུགས།
LUK 7:47 དེའི་ཕྱིར་ངས་ཁྱོད་ལ་ཟེར་རྒྱུར། ཁོ་མོའི་སྡིག་ཉེས་མང་པོ་བསལ་ཟིན་པའི་རྐྱེན་གྱིས་མང་དུ་གཅེས། སྡིག་ཉེས་ཉུང་ངུ་བསལ་བ་དེས་ཉུང་ངུ་གཅེས་སོ་”ཞེས་གསུངས།
LUK 7:48 དེ་ནས་ཁོང་གིས་ཁོ་མོར་“ཁྱེད་ཀྱི་སྡིག་ཉེས་བསལ་ཟིན་པ་ཡིན་”ཞེས་གསུངས་པ་དང༌།
LUK 7:49 ཁོང་དང་གསོལ་བ་བཞེས་པའི་མི་རྣམས་གཅིག་གིས་གཅིག་ལ་“སྡིག་ཉེས་ཀྱང་སེལ་མཁན་འདི་སུ་ཡིན་”ཞེས་སྨྲས།
LUK 7:50 ཡང་ཁོང་གིས་བུད་མེད་དེར་“ཁྱེད་ཀྱི་དད་པས་ཁྱེད་ཐར་ཟིན་པས་ཞི་བདེར་སོང་”ཞེས་གསུངས་སོ། །
LUK 8:1 རིང་པོར་མ་ལོན་པར་ཁོང་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་སྟེ་གྲོང་ཁྱེར་དང༌། གྲོང་གསེབ་བརྒྱུད་ནས་ཕེབས། ཉེ་གནས་བཅུ་གཉིས་པོ་ཁོང་དང་མཉམ་དུ་ཡོད་པ་མ་ཟད།
LUK 8:2 ནད་དང་གདོན་འདྲེ་ལས་ཐར་བའི་བུད་མེད་ནི། གདོན་འདྲེ་བདུན་ཕྱིར་ཐོན་པའི་མག་རྡལ་ནས་ཡིན་པའི་མིར་ཡམ་དང༌།
LUK 8:3 རྒྱལ་པོ་ཧེ་རོ་དཱེ་ཡི་ཁྱིམ་ཚང་གི་གཉེར་པ་ཀུ་སཱ་ཡི་བཟའ་ཟླ་ཡོ་ཨ་ནཱ། སུ་སན་ནཱ་སོགས་པའི་བུད་མེད་མང་པོ་ཡང་ཡོད། ཁོ་ཚོས་རང་གི་རྒྱུ་ནོར་གྱིས་ཁོང་ཚོར་རྒྱབ་སྐྱོར་བྱས།
LUK 8:4 གྲོང་ཁྱེར་སོ་སོ་ནས་ཡོང་བའི་མི་རྣམས་ཁོང་གི་མདུན་དུ་ཡོང་བ་དང་མི་ཚོགས་མང་པོ་ཞིག་འཛོམས་ཏེ་ཁོང་གིས་དཔེའི་སྒོ་ནས་དེ་རྣམས་ལ་
LUK 8:5 “ས་བོན་འདེབས་མཁན་ཞིག་ས་བོན་འདེབས་པར་ཕྱིན། ས་བོན་གཏོར་བའི་དུས་སུ། ས་བོན་ཁ་ཤས་ལམ་ཁར་འཐོར་ནས་རྐང་པས་བརྫིས་པ་དང་བྱ་རྣམས་ཡོང་ནས་བཟས།
LUK 8:6 ཁ་ཤས་ནི་ས་མང་པོ་མེད་པའི་བྲག་གི་སྟེང་ལ་འཐོར་བ་དང་ཡར་སྐྱེས་ནས་བཞའ་ཚན་མེད་པས་བསྐམས།
LUK 8:7 ས་བོན་ཁ་ཤས་ཚེར་མའི་ནང་དུ་འཐོར་ཞིང་ཚེར་མ་དང་མཉམ་དུ་ཡར་སྐྱེས་ཏེ་བསྒྲིབས་ནས་འབྲས་བུ་མ་སྨིན།
LUK 8:8 ཡང་ས་བོན་ཁ་ཤས་ས་རྒྱུ་བཟང་པོར་འཐོར་བས་ཡར་སྐྱེས་ཤིང་འབྲས་བུ་ལྡབ་བརྒྱ་སྨིན་”ཞེས་གསུངས་དུས་ཁོང་གིས་“རྣ་བ་ཡོད་པ་རྣམས་ཀྱིས་ཉོན་ཅིག་”ཅེས་གསུངས།
LUK 8:9 ཁོང་གི་ཉེ་གནས་རྣམས་ཀྱིས་ཁོང་ལ་དཔེའི་ནང་དོན་ཅི་ཡིན་པ་དྲིས་པའི་སྐབས།
LUK 8:10 ཁོང་གིས་“དཀོན་མཆོག་གི་རྒྱལ་སྲིད་ཀྱི་གསང་བའི་དོན་དེ་ཁྱེད་ཚོ་ལ་བསྟན་པ་ཡིན། འོན་ཀྱང་གཞན་དག་རྣམས་ལ་དཔེའི་སྒོ་ནས་བསྟན། དེ་ནི། ལྟ་བར་བྱེད་ཀྱང་མི་མཐོང༌། ། ཐོས་པར་བྱེད་ཀྱང་མི་རྟོགས། ། ཞེས་པའི་ཕྱིར་ཡིན།
LUK 8:11 དཔེ་དེ་འདི་ལྟར་ཡིན། ས་བོན་ནི་དཀོན་མཆོག་གི་བཀའ་དང་འདྲ་བ་ཡིན་ཏེ།
LUK 8:12 ལམ་ཁར་འཐོར་བ་ནི་བཀའ་ཐོས་པ་རྣམས་ཡིན། དད་པ་མི་སྐྱེ་པའི་ཆེད་དང༌། ཐར་བར་མི་འགྱུར་བའི་ཕྱིར་བདུད་སཱ་ཏན་ཡོང་ཞིང་དེ་རྣམས་ཀྱི་སེམས་ནང་གི་བཀའ་ཕྲོགས་ནས་ཕར་འཁྱེར།
LUK 8:13 བྲག་ཡོད་པའི་ས་ལ་འཐོར་བ་ནི་ཡང་མི་ལ་ལས་དཀོན་མཆོག་གི་བཀའ་དེ་ཐོས་ནས་སེམས་དགའ་བའི་ངང་ནས་བླངས་ཀྱང༌། རང་གི་སེམས་ནང་ལ་རྩ་བ་གཏིང་རིང་པོ་ཚུགས་མེད་པས་དུས་ཐུང་ངུ་ལ་གནས་ཀྱང༌། སླུ་བྲིད་འབྱུང་སྐབས་དད་ལོག་བྱེད་པ་དང་འདྲ་བ་ཡིན།
LUK 8:14 ཡང་ཚེར་མའི་ནང་དུ་འཐོར་བ་ནི་མི་ལ་ལས་དཀོན་མཆོག་གི་བཀའ་དེ་ཐོས་ནས་རྗེས་མ་འཚོ་བའི་སྐོར་གྱི་སེམས་ཁྲལ་དང༌། རྒྱུ་ནོར། འདོད་པ་སྣ་ཚོགས་ཀྱིས་བཀའ་མནན་ནས་འབྲས་བུ་སྨིན་མ་ཐུབ་པ་དང་འདྲ་བ་ཡིན།
LUK 8:15 ས་རྒྱུ་བཟང་པོ་ལ་འཐོར་བ་ནི་ཡང་མི་ལ་ལས་དཀོན་མཆོག་གི་བཀའ་དེ་ཐོས་ཏེ་སེམས་དྲང་ཞིང་བཟང་པོ་ཞིག་ལ་དམ་པོར་བཟུང་ནས་མཐར་སྐྱེལ་བཏང་བའི་ངང་ནས་འབྲས་བུ་སྨིན་ཐུབ་པ་རྣམས་དང་འདྲ་བ་ཡིན་”ཞེས་གསུངས།
LUK 8:16 ཡང་ཡེ་ཤུས་“མི་སུ་ཡིན་ཡང་མར་མེ་སྤར་ནས་བྲེ་ཡང་ན་ཉལ་ཁྲིའི་འོག་ཏུ་མི་འཇོག་སྟེ་ནང་ལ་ཡོང་མཁན་རྣམས་ཀྱིས་འོད་མཐོང་བའི་ཕྱིར་སྟེགས་བུའི་སྟེང་དུ་འཇོག
LUK 8:17 གང་ལགས་ཟེར་ན། སྦས་པའི་དོན་རྣམས་མི་མངོན་པ་ཅི་ཡང་མེད་ལ། གསང་བའི་དོན་ཐམས་ཅད་ཀྱང་མི་མངོན་པའམ་མི་ཤེས་པ་ཅི་ཡང་མེད་དོ།
LUK 8:18 ཁྱེད་ཚོས་གང་ཐོས་པ་དེ་ལ་གཟབ་ཉན་གྱིས་ཤིག གང་ལགས་ཟེར་ན། མི་སུ་ཞིག་ཐོས་པ་དང་རྟོགས་པ་འདོད་པ་དེ་ལ་སྟེར་བར་འགྱུར། རྟོགས་པ་མི་འདོད་པ་དེ་ལས་གང་ཡོད་པ་དེ་ཡང་ལེན་པར་འགྱུར་”ཞེས་གསུངས།
LUK 8:19 དེ་ནས་ཡེ་ཤུའི་ཡུམ་དང་གཅུང་པོ་ཚོ་ཕེབས་ཏེ། མི་ཚོགས་མང་བས་ཁོང་ཚོ་ཁོང་གི་དྲུང་དུ་མ་ཐར་སྟབས།
LUK 8:20 མི་ཞིག་གིས་ཁོང་ལ་“ཁྱེད་ཀྱི་ཡུམ་དང་སྐུ་མཆེད་ཚོས་ཕྱི་རོལ་ནས་ཁྱེད་རང་འཚོལ་བཞིན་འདུག་”ཅེས་སྨྲས་པ་དང༌།
LUK 8:21 ལན་དུ་ཁོང་གིས་ཁོ་ཚོར་“དཀོན་མཆོག་གི་བཀའ་ཐོས་ནས་སྒྲུབ་མཁན་ནི་ངའི་མ་དང་ངའི་སྤུན་རྣམས་ཡིན་”ཞེས་གསུངས།
LUK 8:22 ཉིན་ཞིག་ཡེ་ཤུ་དང་ཁོང་གི་ཉེ་གནས་རྣམས་གྲུའི་ནང་འཛུལ་ནས་ཁོང་གིས་ཁོ་ཚོར་“ང་ཚོ་མཚོའི་ཕ་རོལ་ལ་འགྲོ་”ཞེས་གསུངས་པས། ཁོང་ཚོ་མཉམ་དུ་ཕེབས་པ་རེད།
LUK 8:23 དེའི་རྗེས་སུ་ཡེ་ཤུ་མནལ་ལ་གཟིམས་ནས་མཚོའི་སྟེང་དུ་རླུང་འཚུབ་ཆེན་པོ་ལངས་ཏེ་རྦ་རླབས་གྲུའི་ནང་ཡོང༌། གྲུ་ཆུས་ཁེངས་གྲབས་བྱས་ཏེ་ནུབ་ཉེན་ཆེན་པོ་ཡོད་པས།
LUK 8:24 ཁོ་ཚོ་ཁོང་གི་མདུན་དུ་ཡོང་ནས་མནལ་སད་པ་དང་“སློབ་དཔོན་ལགས། སློབ་དཔོན་ལགས། ང་ཚོ་ཤི་གྲབས་བྱེད་ཀྱི་འདུག་”ཅེས་ཟེར། ཁོང་ཡར་བཞེངས་ཏེ་རླུང་དང་རྦ་རླབས་དྲག་པོ་ལ་བཀའ་བཀྱོན་མཛད་པ་དང་རླུང་འཇགས་ནས་མཚོ་ཡོངས་སུ་ཞི་བར་གྱུར།
LUK 8:25 དེ་ནས་ཁོང་གིས་ཉེ་གནས་ཚོར་“ཁྱོད་ཚོའི་དད་སེམས་གང་དུ་ཡོད་”ཅེས་གསུངས། ཡ་མཚན་སྐྱེས་ཏེ་ཤིན་ཏུ་འཇིགས་ནས་ཁོ་ཚོས་གཅིག་གིས་གཅིག་ལ་“འདི་སུ་ཡིན་ནམ། རླུང་དང་རྦ་རླབས་ཀྱིས་ཀྱང་ཁོང་གི་བཀའ་ལ་ཉན་པར་བྱེད་”ཅེས་ཟེར།
LUK 8:26 དེ་ནས་ཁོང་རྣམས་ག་ལིལ་ཡུལ་ནས་མཚོའི་ཕ་རོལ་གྱི་གེ་ར་སཱ་ཞེས་བྱ་བའི་ཡུལ་དུ་ཕེབས་པ་དང༌།
LUK 8:27 ཡེ་ཤུ་གྲུ་ལས་བབས་ཏེ་གྲོང་ཁྱེར་ནས་གདོན་འདྲེ་རྣམས་ཀྱིས་བཟུང་བའི་མི་ཞིག་ཁོང་དང་མཇལ། ཁོ་ནི་ཡུན་རིང་པོར་གྱོན་ཆས་མ་གྱོན་ཞིང་ཁང་པར་མི་སྡོད་པར་དུར་ཁང་གི་ཁྲོད་དུ་གནས།
LUK 8:28 ཁོས་ཡེ་ཤུ་མཐོང་སྟེ་ཁོང་ལ་ཕྱག་འཚལ་བ་དང་སྐད་ཆེན་པོས་“བླ་ན་མེད་པའི་དཀོན་མཆོག་གི་སྲས་ཡེ་ཤུ་ལགས། ང་ཁྱེད་དང་འབྲེལ་བ་ཅི་ཡོད། ང་ལ་མནར་གཅོད་གཏོང་བ་མ་གནང་”ཞེས་ཞུས།
LUK 8:29 གང་ལགས་ཤེ་ན། ཡེ་ཤུས་གདོན་འདྲེ་མི་གཙང་བ་མི་དེ་ནས་ཕྱིར་འཐོན་པའི་བཀའ་གནང༌། ཐེངས་མང་པོར་གདོན་འདྲེ་དེས་མི་དེ་བཟུང་སྐབས། མི་རྣམས་ཀྱིས་ཁོ་བསྲུངས་ཤིང་ལྕགས་ཐག་དང་རྐང་སྒྲོག་གིས་བཅིངས་ན་ཡང༌། ཁོས་དེ་ཚོ་བཅད་པ་དང་གདོན་འདྲེས་ཁོ་དབེན་སྟོང་ལ་བསྐྲད།
LUK 8:30 ཡང་ཡེ་ཤུས་ཁོ་ལ་“ཁྱོད་ཀྱི་མིང་ལ་ཅི་ཟེར་”ཞེས་དྲིས་ཤིང༌། མི་དེས་“དཔུང་ཚོགས་ཟེར་”ཞེས་སྨྲས། དེ་ནི་གདོན་འདྲེ་མང་པོ་ཁོའི་ནང་ལ་འཛུལ་ཡོད་པའི་ཕྱིར་རོ།
LUK 8:31 དེ་ཚོས་ཁོང་ལ་དམྱལ་བར་འགྲོ་དགོས་པའི་བཀའ་མ་གནང་བའི་ཞུ་བ་ནན་གྱིས་ཕུལ།
LUK 8:32 དེའི་ཚེ་རིའི་ལོགས་སུ་ཕག་ཁྱུ་ཆེན་པོ་ཞིག་འཚོ་བཞིན་ཡོད་པ་དང༌། གདོན་འདྲེ་དེ་ཚོས་ཡེ་ཤུ་ལ་ཕག་པ་ལ་འཛུལ་བའི་ཆོག་མཆན་ཞུས་ནས་ཁོང་གིས་དེ་ཚོ་ལ་དགོངས་པ་གནང༌།
LUK 8:33 གདོན་འདྲེ་དེ་ཚོ་མི་དེ་ནས་ཕྱིར་ཐོན་ཏེ་ཕག་པའི་ནང་དུ་འཛུལ་ཤིང༌། ཕག་པ་གཡང་གཟར་དུ་མཆོངས་ཤིང་མཚོའི་ནང་དུ་ནུབ་ནས་ཤིའོ།
LUK 8:34 ཕག་རྫི་རྣམས་ཀྱིས་དེ་མཐོང་ནས་བྲོས་ཏེ་གྲོང་ཁྱེར་དང་སྡེ་པའི་མི་རྣམས་ལ་གནས་ཚུལ་དེ་བཤད།
LUK 8:35 མི་རྣམས་ཅི་བྱུང་བར་ལྟ་རུ་ཡོང༌། ཁོ་ཚོ་ཡེ་ཤུའི་དྲུང་དུ་སླེབས་དུས། དེ་སྔོན་གདོན་འདྲེས་བཟུང་བའི་མི་དེ་དྲན་པ་གསོས་ཤིང་གོས་གྱོན་ནས་ཡེ་ཤུའི་ཞབས་ཀྱི་མདུན་ལ་བསྡད་ཡོད་པ་མཐོང་སྟེ་འཇིགས་སྣང་སྐྱེས།
LUK 8:36 ཡང་གནས་ཚུལ་འདི་མཐོང་བའི་མི་རྣམས་ཀྱིས་གདོན་འདྲེས་བཟུང་བའི་མི་ཅི་ལྟར་གསོས་པའི་ལོ་རྒྱུས་དེ་དེར་ཡོང་མཁན་རྣམས་ལ་བཤད།
LUK 8:37 འཇིགས་སྐྲག་སྐྱེས་པས་གེ་ར་སཱ་དང་དེའི་མཐའ་འཁོར་ལ་ཡོད་པའི་ཡུལ་མི་ཐམས་ཅད་ཀྱིས་ཡེ་ཤུར་ཕར་ཕེབས་པའི་ཞུ་བ་ཕུལ་བས། ཁོང་གྲུའི་ནང་དུ་བཞུགས་ནས་ཕྱིར་ལོག་ཕེབས།
LUK 8:38 དེ་སྔོན་གདོན་འདྲེས་བཟུང་བའི་མི་དེས་ཁོང་དང་མཉམ་དུ་འགྲོ་བའི་ཞུ་བ་ཕུལ་ཡང༌། ཁོང་གིས་མི་དེ་ཕར་ལ་བཏང་སྟེ་ཁོ་ལ་
LUK 8:39 “ཁྱེད་རང་གི་ནང་ལ་སོང་དང༌། ཁྱེད་ཀྱི་དོན་དུ་དཀོན་མཆོག་གིས་གང་མཛད་པ་དེ་ཤོད་ཅིག་”ཅེས་བཀའ་གནང་ནས་ཁོ་ཕར་སོང་བ་དང༌། དོན་དེ་རྣམས་གྲོང་ཁྱེར་ཡོངས་སུ་བསྒྲགས་སོ། །
LUK 8:40 མི་ཐམས་ཅད་ཀྱིས་ཁོང་བསྒུགས་ཡོད་པས་ཡེ་ཤུ་ལོག་ཕེབས་སྐབས་ཁོང་ལ་དགའ་བསུ་ཞུས།
LUK 8:41 སྐབས་དེར་ཡ་ཧུ་དཱ་པའི་འདུ་ཁང་གི་དཔོན་པོའི་མིང་ལ་ཡ་ཨིར་ཟེར་བ་ཞིག་ཡོང་ནས། ཡེ་ཤུའི་ཞབས་ལ་གཏུག་སྟེ་ཁོའི་ཁང་པར་ཕེབས་པའི་ཞུ་བ་ནན་གྱིས་ཕུལ།
LUK 8:42 གང་ཡིན་ཞེ་ན། ཁོང་ལ་ལོ་བཅུ་གཉིས་ཙམ་ལོན་པའི་བུ་མོ་གཅིག་པུ་དེ་ཤི་གྲབས་འདུག་པའི་ཕྱིར་ཡིན། ཁོང་ཕེབས་པའི་དུས་སུ་མི་ཚོགས་ཀྱིས་ཁོང་ལ་འཚང་ཁ་བརྒྱབ།
LUK 8:43 དེའི་ཚེ་བུད་མེད་གཅིག་ལོ་བཅུ་གཉིས་ཀྱི་བར་དུ་ལུས་ནས་ཁྲག་འཛིར་བའི་ནད་ཕོག་སྟེ། སུས་ཀྱང་ཁོ་མོ་ནད་ལས་ཐར་ཐུབ་མ་བྱས།
LUK 8:44 ཁོ་མོ་ཡེ་ཤུའི་རྒྱབ་ཏུ་ཡོང་ཞིང་ཁོང་གི་སྟོད་གོས་ཀྱི་མཐའ་འཛར་ལ་རེག་མ་ཐག་ཏུ་ཁྲག་འཛིར་བ་ཆད།
LUK 8:45 ཡེ་ཤུས་“སུས་ང་ལ་རེག་པ་ཡིན་ནམ་”ཞེས་གསུངས་པས་ཁོ་ཚོ་ཚང་མས་ཁས་མ་བླངས་པའི་ཚེ་པེ་ཏྲོས་ཁོང་ལ་“སློབ་དཔོན་ལགས། མི་ཚོགས་ཀྱིས་ཁྱེད་མཐའ་བསྐོར་ཞིང་འཚང་ཁ་རྒྱག་བཞིན་འདུག་”ཅེས་བཤད།
LUK 8:46 འོན་ཀྱང་ཡེ་ཤུས་“ང་ནས་ནུས་མཐུ་ཞིག་ཕྱིར་ཐོན་པས་མི་ཞིག་གིས་ང་ལ་རེག་པར་ཤེས་”ཞེས་གསུངས།
LUK 8:47 བུད་མེད་དེས་དོན་དེ་གསང་མི་ཐུབ་པ་ཤེས་པའི་ཚེ་འཇིགས་ནས་འདར་ཏེ་ཁོང་གི་སྐུ་དྲུང་དུ་པུས་མོ་སར་བཙུགས། ཁོ་མོས་ཁོང་གི་སྟོད་གོས་ལ་རེག་པའི་རྒྱུ་མཚན་དང་འཕྲལ་དུ་དྲག་པའི་ལོ་རྒྱུས་ཁོང་ཚོ་ཚང་མར་བཤད།
LUK 8:48 ཁོང་གིས་ཁོ་མོར་“བུ་མོ། ཁྱོད་ཀྱི་དད་པས་ཁྱོད་རང་ནད་ལས་ཐར་བ་ཡིན་པས། བདེ་བའི་ངང་ནས་སོང་དང་”ཞེས་གསུངས།
LUK 8:49 ཁོང་གིས་དེ་ལྟར་གསུང་བཞིན་པའི་སྐབས་སུ། ཡ་ཧུ་དཱ་པའི་འདུ་ཁང་གི་དཔོན་པོའི་ཁྱིམ་ནས་མི་འགའ་ཤས་ཡོང་སྟེ། ཁོ་ལ་“ཁྱེད་རང་གི་བུ་མོ་ཤི་ཚར་འདུག་པས་སྟོན་པ་ལ་འོ་བརྒྱལ་ཞུས་ནས་ག་རེ་བྱེད་”ཅེས་ཟེར།
LUK 8:50 ཁོ་ཚོའི་སྐད་ཆ་གསན་ནས་ཡེ་ཤུས་མི་དེར་“ཞེད་སྣང་མ་བྱེད། དད་པ་རང་གྱིས་ཤིག ཁོ་མོ་ཐར་བར་འགྱུར་”ཞེས་གསུངས།
LUK 8:51 ཁྱིམ་དུ་སླེབས་ནས་ཁོང་གིས་པེ་ཏྲོ་དང༌། ཡ་ཀོབ། ཡོ་ཧ་ནན། བུ་མོའི་ཕ་མ་གཉིས་མ་གཏོགས་གཞན་སུ་ཡང་ཁོང་དང་མཉམ་དུ་འཛུལ་མ་བཅུག
LUK 8:52 བུ་མོ་དེའི་དོན་ལ་མི་ཐམས་ཅད་ངུ་ཞིང་སྨྲེ་སྔགས་འདོན་པས་ཁོང་གིས་“བུ་མོ་འདི་ཤི་མེད་པར་གཉིད་ཁུག་འདུག་པས་མ་ངུ་ཞིག་”ཅེས་གསུངས།
LUK 8:53 བུ་མོ་ཤི་ཚར་བ་ཤེས་ཏེ་ཁོ་ཚོས་ཁོང་ལ་ཁྲེལ་དགོད་བྱས།
LUK 8:54 འོན་ཀྱང་ཁོང་གིས་བུ་མོའི་ལག་པ་ནས་འཇུས་ཏེ་“བུ་མོ་ལོངས་ཤིག་”ཅེས་གསུངས་པས།
LUK 8:55 དབུགས་ཕྱིར་ལོག་ཅིང་བུ་མོ་དེ་ལམ་སེང་ཡར་ལངས། དེ་ནས་ཁོང་གིས་བུ་མོ་ལ་ཟས་སྟེར་དགོས་ཞེས་བཀའ་གནང༌།
LUK 8:56 བུ་མོའི་ཕ་མ་གཉིས་ཡ་མཚན་སྐྱེས། ཡེ་ཤུས་ཁོ་ཚོར་གང་བྱུང་བ་དེ་མི་གཞན་སུ་ལ་ཡང་མི་ཤོད་པའི་བཀའ་གནང་ངོ༌། །
LUK 9:1 ཉེ་གནས་བཅུ་གཉིས་པོ་རང་གི་དྲུང་དུ་བོས་ནས་ཡེ་ཤུས་གདོན་འདྲེ་ཐམས་ཅད་འདུལ་བ་དང་ནད་ལས་ཐར་བའི་ནུས་མཐུ་དང་དབང་ཁོ་ཚོར་གནང་ནས།
LUK 9:2 དཀོན་མཆོག་གི་རྒྱལ་སྲིད་སྒྲོག་པའི་ཆེད་དང༌། ནད་ལས་ཐར་བའི་ཕྱིར་ཁོ་ཚོ་ཕྱི་རུ་མངགས།
LUK 9:3 ཁོང་གིས་ཁོ་ཚོར་“ཁྱེད་ཚོ་ལམ་ལ་ཅི་ཡང་མ་ཁྱེར་ཅིག དབྱུག་པ་དང༌། ཁུག་མ། བག་ལེབ། དངུལ། ད་དུང་སྟོད་གོས་ལྷག་མའང་མ་ཁྱེར།
LUK 9:4 ཁྱེད་ཚོ་མི་ཁྱིམ་ཞིག་ལ་བསྡད་ནའང་གྲོང་ཚོ་དེ་ནས་ཁ་མ་བྲལ་བར་དུ་དེ་རུ་སྡོད།
LUK 9:5 ཡུལ་གང་གི་མིས་ཁྱེད་ཚོར་གནས་ཚང་མི་བཏང་ན། དོན་དེར་འགན་ཁུར་ལེན་དགོས་པར་ཁོ་རྣམས་ལ་བདེན་དཔང་བྱེད་པའི་ཆེད་དུ། ཁྱེད་ཚོ་ས་ཆ་དེ་ནས་ཐོན་པའི་སྐབས་སུ་རྐང་པའི་ཐོག་གི་ས་རྡུལ་སྤྲུགས་ཤིག་”ཅེས་གསུངས།
LUK 9:6 ཁོ་ཚོ་སོང་ནས་ཡུལ་ཀུན་གྱི་གྲོང་གསེབ་བརྒྱུད་ནས་ཕྱིན་ཏེ་འཕྲིན་བཟང་བསྒྲགས་པ་དང་ནད་པ་རྣམས་ནད་ལས་ཐར་བར་བྱས།
LUK 9:7 དེའི་དུས་སུ་ས་གནས་དཔོན་པོ་ཧེ་རོ་དཱེ་ཡིས་གང་བྱུང་བ་ཐམས་ཅད་ཐོས་པ་དང༌། མི་ལ་ལས་ཁྲུས་གསོལ་མཁན་ཡོ་ཧ་ནན་གཤིན་པོ་ནས་གསོན་པོར་ལང་བ་དང༌། མི་ལ་ལས་ལུང་སྟོན་པ་ཨེ་ལི་ཡཱ་མངོན་སུམ་དུ་གྱུར་བ་དང༌། ཡང་མི་གཞན་གྱིས་གནའ་རབས་ཀྱི་ལུང་སྟོན་པའི་ནང་ནས་གཅིག་གསོན་པོར་ལང་བ་ཞེས་ཟེར་བའི་རྐྱེན་གྱིས་ག་བྱེད་འདི་བྱེད་མེད་པར་གྱུར།
LUK 9:9 ཧེ་རོ་དཱེས་“ངས་བཀའ་བསྒོས་ཏེ་ཡོ་ཧ་ནན་གྱི་མགོ་བོ་བཅད་ནས་བསད། འོན་ཀྱང་དོན་དེ་འདྲ་ཐོས་པའི་མི་དེ་སུ་ཡིན་”ཞེས་ཟེར་བས་ཁོང་དང་མཇལ་ཐབས་བཙལ།
LUK 9:10 ཡེ་ཤུའི་དྲུང་དུ་འཛོམས་ནས་སྐུ་ཚབ་རྣམས་ཀྱིས་ཇི་བྱས་པ་ཐམས་ཅད་ཁོང་ལ་ཞུས། ཁོ་ཚོ་ཁོ་ན་ཁྲིད་ནས་ཡེ་ཤུ་པེ་སད་དཱ་ཞེས་བྱ་བའི་གྲོང་སྡེ་ལ་ཕེབས།
LUK 9:11 གཏམ་དེ་ཐོས་ནས་མི་ཚོགས་ཁོང་གི་རྗེས་སུ་འབྲངས། ཡེ་ཤུས་ཁོ་ཚོར་དགའ་བསུ་མཛད་ནས་དཀོན་མཆོག་གི་རྒྱལ་སྲིད་ཀྱི་སྐོར་ལ་གསུངས་པ་དང༌། ནད་ལས་ཐར་དགོས་པ་རྣམས་ནད་ལས་ཐར་བར་མཛད།
LUK 9:12 ཉི་མ་ནུབ་ལ་ཉེ་བའི་དུས་སུ། ཉེ་གནས་བཅུ་གཉིས་པོ་ཁོང་གི་དྲུང་དུ་ཡོང་སྟེ་“ས་ཆ་འདི་དབེན་སྟོང་ཡིན་པས་ཁོ་ཚོ་མཐའ་འཁོར་གྱི་ཡུལ་སྡེ་རྣམས་ལ་རང་རང་གི་ཟས་ཉོ་བ་དང༌། བསྡད་ས་འཚོལ་བའི་ཆེད་དུ་གཏོང་བར་མཛོད་”ཅེས་ཁོང་ལ་ཞུས་པ་ན།
LUK 9:13 ཡེ་ཤུས་ཁོ་རྣམས་ལ་“ཁྱེད་ཚོས་ཁོ་ཚོར་ཟས་སྟེར་ཞིག་”ཅེས་གསུངས། ཁོ་ཚོས་“བག་ལེབ་ལྔ་དང་ཉ་ཤ་གཉིས་ལས་མེད་པས་མི་ཚོགས་མང་པོ་འདིར་ཟས་ཉོ་རུ་འགྲོ་བར་བྱའམ་”ཞེས་ཟེར།
LUK 9:14 དེ་རུ་སྐྱེས་པ་ལྔ་སྟོང་ཙམ་ཡོད། ཁོང་གིས་ཉེ་གནས་རྣམས་ལ་“མི་ཚོགས་ལྔ་བཅུ་ཙམ་རེ་བྱས་ནས་སྡོད་དུ་འཇུག་”ཅེས་གསུངས།
LUK 9:15 དེ་ལྟར་བྱས་ནས་ཐམས་ཅད་བསྡད།
LUK 9:16 དེ་ནས་ཡེ་ཤུས་བག་ལེབ་ལྔ་དང་ཉ་ཤ་གཉིས་པོ་ཕྱག་ཏུ་བསྣམས་ཏེ་དཀོན་མཆོག་གི་ཞིང་ཁམས་ལ་ཡར་གཟིགས་ཤིང་དཀོན་མཆོག་ལ་བཀའ་དྲིན་ཆེ་ཞུས་རྗེས། བག་ལེབ་དུམ་བུར་བཅག་ནས་མི་ཚོགས་ལ་བགོ་བའི་ཆེད་དུ་ཉེ་གནས་རྣམས་ལ་གནང༌།
LUK 9:17 མི་ཚང་མས་བཟས་ནས་འགྲངས་ཏེ་ཟས་ལྷག་བསྡུས་པའི་རྗེས་སུ་བག་ལེབ་ཆག་དུམ་གྱིས་སླེ་པོ་བཅུ་གཉིས་ཁེངས།
LUK 9:18 དེ་ནས་ཁོང་གཅིག་པོ་གསོལ་བ་འདེབས་པའི་སྐབས། ཉེ་གནས་ཀྱང་ཁོང་དང་ཉེ་བར་ཡོད་དེ་ཁོང་གིས་“མི་རྣམས་ཀྱིས་ང་རང་སུ་རེད་ཅེས་བཤད་བཞིན་ཡོད་དམ་”ཞེས་གསུངས་ཤིང༌།
LUK 9:19 ལན་དུ་ཁོ་རྣམས་ཀྱིས་“མི་ལ་ལས་ཁྲུས་གསོལ་མཁན་ཡོ་ཧ་ནན་རེད་ཅེས་དང༌། ལ་ལས་ལུང་སྟོན་པ་ཨེ་ལི་ཡཱ་རེད་ཅེས། ཡང་མི་ལ་ལས་གནའ་རབས་ཀྱི་ལུང་སྟོན་པའི་ནང་ནས་གཅིག་སླར་གསོན་པར་གྱུར་”ཞེས་ཟེར།
LUK 9:20 ཁོང་གིས་“འོ་ན་ཁྱེད་ཚོས་བྱས་ན་ང་རང་སུ་ཡིན་ཟེར་”ཞེས་གསུངས་པས་ལན་དུ་པེ་ཏྲོས་“ཁྱེད་ནི་དཀོན་མཆོག་གི་སྐྱབས་མགོན་མཱ་ཤི་ཀ་ཡིན་ནོ་”ཞེས་ཞུས།
LUK 9:21 ཡེ་ཤུས་ཁོ་རྣམས་ལ་“དོན་འདི་མི་གཞན་ལ་མ་ཤོད་”ཅེས་ནན་གྱིས་བསྐུལ།
LUK 9:22 ཁོང་གིས་ཉེ་གནས་ཚོར་“མིའི་རིགས་ཀྱི་བུ་ངེས་པར་དུ་སྡུག་བསྔལ་མང་པོ་མྱོང་ཞིང༌། ཡ་ཧུ་དཱ་པའི་མི་རིགས་ཀྱི་རྒན་པོ་དང་བླ་ཆེན་རྣམས། ཆོས་ཁྲིམས་ལ་མཁས་པའི་མིས་ཁོ་རང་དོར་ནས་གསོད་པར་འགྱུར་ལ། ཡང་ཉི་མ་གསུམ་པར་འཆི་བ་ནས་ཡར་ལང་བར་འགྱུར་དགོས་སོ་”ཞེས་གསུངས།
LUK 9:23 དེ་ནས་ཁོང་གིས་ཁོ་ཚོ་ཚང་མར་“གལ་ཏེ་མི་སུ་ཞིག་ང་ཡི་རྗེས་སུ་འབྲང་འདོད་ན། རང་ཉིད་དོར་ནས་རང་གི་རྒྱང་ཤིང་ཉིན་ལྟར་འཁུར་ཏེ་ང་ཡི་རྗེས་སུ་འབྲང་དགོས།
LUK 9:24 གང་ལགས་ཟེར་ན། མི་སུས་ཀྱང་རང་གི་སྲོག་ཐར་བར་བྱེད་འདོད་པ་དེས་བརླག་པར་འགྱུར། མི་སུས་ཀྱང་ང་རང་གི་དོན་དུ་རང་གི་སྲོག་གཏོང་པ་དེས་ཐར་བར་འགྱུར་ངེས་ཡིན།
LUK 9:25 སུ་ལ་འཇིག་རྟེན་ཧྲིལ་པོ་ཐོབ་ཀྱང་རང་སྲོག་ཤོར་བའམ་བརླགས་ན་ཅི་ཕན།
LUK 9:26 མི་སུ་ཞིག་གིས་ང་དང་ངའི་བཀའ་ངོ་ཚ་བའི་རྒྱུར་བརྩིས་ན། མིའི་རིགས་ཀྱི་བུས་ཀྱང་རང་ཉིད་དང༌། ཡབ་དཀོན་མཆོག་དང་དམ་པའི་ཕོ་ཉ་རྣམས་ཀྱི་གཟི་བརྗིད་དང་བཅས་འཇིག་རྟེན་དུ་ཕེབས་སྐབས། མི་དེ་ཡང་ངོ་ཚ་བའི་རྒྱུར་བརྩི་བར་བྱ།
LUK 9:27 ངས་ཁྱེད་རྣམས་ལ་བདེན་པར་ཟེར་རྒྱུར། འདི་རུ་ཡོད་པའི་མི་རྣམས་ཀྱི་ནང་ནས་འགའ་ཞིག་གིས་དཀོན་མཆོག་གི་རྒྱལ་སྲིད་མ་མཐོང་བའི་བར་དུ་ཅི་ནས་ཀྱང་འཆི་བ་མྱོང་བར་མི་འགྱུར་”ཞེས་གསུངས་སོ། །
LUK 9:28 གསུང་འདི་ཚོ་བརྗོད་ནས་ཉི་མ་བརྒྱད་ཙམ་གྱི་རྗེས་ལ་ཡེ་ཤུས་པེ་ཏྲོ་དང་ཡ་ཀོབ་ཡོ་ཧ་ནན་གསུམ་ཁྲིད་ནས་རི་ཞིག་ལ་གསོལ་བ་འདེབས་པའི་ཆེད་དུ་ཕེབས།
LUK 9:29 གསོལ་བ་འདེབས་དུས་ཁོང་གི་ཞལ་གྱི་རྣམ་པ་གྱུར་ཞིང༌། ཁོང་གི་ན་བཟའ་འོད་འཕྲོ་བའི་ཚོན་མདོག་ཧ་ཅང་དཀར་པོ་ཞིག་ཏུ་གྱུར།
LUK 9:30 གློ་བུར་དུ་ལུང་སྟོན་པ་མོ་ཤེ་དང་ཨེ་ལི་ཡཱ་གཉིས་མངོན་སུམ་དུ་གཟི་བརྗིད་དང་ལྡན་པར་གྱུར་ནས་ཡེ་ཤུ་དང་བཀའ་མོལ་གནང༌། ཁོང་ཚོས་ཡེ་ཤུ་སྐུ་ཚེ་ལས་འདའ་བའི་དོན་དེ་ནི་ཡེ་རུ་ཤ་ལེམ་ལ་བསྒྲུབ་རྒྱུ་ཡིན་པའི་སྐོར་གསུངས།
LUK 9:32 པེ་ཏྲོ་དང་ཁོའི་གྲོགས་པོ་གཉིས་གཉིད་ལྗིད་པོ་ཞིག་ཁུག་ནས་གཉིད་སད་སྐབས་ཁོང་གི་གཟི་བརྗིད་དང༌། ཁོང་དང་མཉམ་དུ་བཞེངས་པའི་མི་གཉིས་མཐོང༌།
LUK 9:33 ལུང་སྟོན་པ་ཨེ་ལི་ཡཱ་དང་མོ་ཤེ་གཉིས་ཁོང་དང་བྲལ་སྐབས། ཇི་ལྟར་ཞུ་དགོས་མིན་མ་ཤེས་ཏེ་པེ་ཏྲོས་ཡེ་ཤུ་ལ་“སློབ་དཔོན་ལགས། ང་ཚོ་འདིར་བསྡད་ན་ལེགས། ང་ཚོས་བཞུགས་ས་གསུམ་བཟོ་བར་བྱ། ཁྱེད་ལ་གཅིག་དང་མོ་ཤེ་ལ་གཅིག ཨེ་ལི་ཡཱ་ལ་གཅིག་བཅས་ཡིན་”ཞེས་ཞུས་པའི་དུས་སུ།
LUK 9:34 སྤྲིན་པ་ཞིག་ཡོང་ནས་ཁོང་ཚོ་བསྒྲིབས། དེའི་ནང་དུ་སོང་སྐབས་ཁོ་ཚོ་འཇིགས་ཤིང་སྐྲག་པར་གྱུར།
LUK 9:35 སྤྲིན་པ་ནས་གསུང་ཞིག་བྱུང་སྟེ་“འདི་ནི་ངའི་སྲས་དང་ངས་བདམས་པ་ཡིན་ནོ། ཁོང་ལ་ཉོན་ཅིག་”ཅེས་གསུངས་པའི་རྗེས་སུ།
LUK 9:36 ཡེ་ཤུ་གཅིག་པོར་གནས། ཡང་དེའི་དུས་སྐབས་སུ་ཉེ་གནས་རྣམས་ཀྱིས་གང་མཐོང་བའི་གཏམ་མི་གླེང་ལ་མི་གཞན་ལ་ཡང་ཅི་ཡང་མ་བཤད།
LUK 9:37 དེའི་སང་ཉིན་ཁོང་ཚོ་རི་ནས་བབས་པའི་རྗེས་སུ་མི་ཚོགས་མང་པོ་ཞིག་ཁོང་དང་མཇལ།
LUK 9:38 མི་ཚོགས་ལས་གཅིག་གིས་“སློབ་དཔོན་ལགས། ངའི་ཕྲུ་གུ་གཅིག་པོ་ཡིན་པའི་བུ་ལ་ཐུགས་རྗེས་གཟིགས་རོགས་གནང༌།
LUK 9:39 གདོན་འདྲེས་ག་དུས་འཛིན་ནའང༌། ཁོ་གློ་བུར་དུ་སྐད་ངན་ཆེན་པོ་ཤོར་ནས་ས་ལ་འགྱེལ་ཞིང་ཁ་ནས་ལྦུ་བ་འཐོན་ཅིང༌། སོ་ཁྲིག་ཁྲིག་བྱེད། ལུས་པོའང་རེངས་པོར་འགྱུར། གདོན་འདྲེ་འཐོན་པར་དཀའ་ཞིང་དེས་ཁོ་ལ་གནོད་འཚེ་ཆེན་པོ་གཏོང་བཞིན་འདུག
LUK 9:40 ངས་ཁྱེད་ཀྱི་ཉེ་གནས་རྣམས་ལ་གདོན་འདྲེ་དེ་ཕྱིར་སྐྲོད་པར་ཞུས་ཀྱང་ཁོང་ཚོས་བསྐྲད་མ་ཐུབ་”ཞེས་སྨྲས།
LUK 9:41 དེ་ནས་ཡེ་ཤུས་“ངན་སེམས་ཅན་དང་དད་པ་མི་བྱེད་པའི་མི་རབས་ཁྱོད་ཚོ། ང་རང་ཁྱོད་ཚོ་དང་མཉམ་དུ་དུས་ནམ་ཞིག་གི་བར་དུ་བསྡད་ནས་བཟོད་པར་བྱེད་དགོས་སམ། བུ་དེ་ངའི་མདུན་དུ་ཁྲིད་ཤོག་”ཅེས་གསུངས་པ་དང༌།
LUK 9:42 བུ་དེ་ཁོང་གི་མདུན་ལ་ཡོང་དུས་གདོན་འདྲེ་མི་གཙང་བ་དེས་ཁོ་ས་ལ་བརྡབས་ནས་དྲག་པོར་སྤྲུགས། འོན་ཀྱང་ཡེ་ཤུས་གདོན་འདྲེ་དེར་བཀའ་བཀྱོན་གནང་སྟེ་བུ་གསོས་པར་མཛད་ནས་ཁོའི་ཕ་ལ་གནང་བས།
LUK 9:43 མི་ཐམས་ཅད་དཀོན་མཆོག་གི་གཟི་བརྗིད་ལ་ཡ་མཚན་སྐྱེས། ཁོང་གིས་མཛད་པའི་དོན་ལ་མི་ཚང་མ་ངོ་མཚར་སྐྱེ་བའི་དུས་སུ་ཁོང་གིས་ཉེ་གནས་རྣམས་ལ་
LUK 9:44 “གཏམ་འདི་སེམས་ལ་ཟུངས་ཤིག མིའི་རིགས་ཀྱི་བུ་ནི་མི་རྣམས་ཀྱི་ལག་ཏུ་གཏོད་པར་འགྱུར་རོ་”ཞེས་གསུངས།
LUK 9:45 ཉེ་གནས་རྣམས་ཀྱིས་གསུང་དེའི་དོན་ཧ་མ་གོ ཁོ་ཚོ་མི་རྟོགས་པའི་ཕྱིར་དེའི་དོན་ཁོ་རྣམས་ལ་སྦས་པར་གྱུར་ཞིང་འཇིགས་ནས་ཁོང་ལ་དེའི་སྐོར་བཀའ་འདྲི་ཞུ་མ་ཕོད།
LUK 9:46 ཁོ་ཚོའི་ནང་ནས་སུ་མཆོག་ཏུ་ཡིན་པའི་རྩོད་གླེང་ཞིག་བྱུང༌།
LUK 9:47 ཁོ་ཚོའི་བསམ་པ་མཁྱེན་ནས་ཡེ་ཤུས་ཕྲུ་གུ་ཆུང་ངུ་ཞིག་ཁྲིད་ཡོང་སྟེ་རང་གི་རྩར་ལང་དུ་བཅུག་ནས་
LUK 9:48 ཁོ་ཚོར་“སུས་ཀྱང་ཕྲུ་གུ་འདི་ངའི་མིང་གི་ཐོག་ནས་དྲངས་ན་དེས་ང་རང་འདྲེན། སུས་ཀྱང་ང་འདྲེན་པ་དེས་ང་མངགས་མཁན་དེ་སྤྱན་འདྲེན། རྒྱུ་མཚན་ནི་ཁྱོད་ཚོའི་ནང་ནས་དམའ་ཤོས་ཡིན་པ་དེ་མཆོག་ཏུ་འགྱུར་བ་ཡིན་”ཞེས་གསུངས།
LUK 9:49 ལན་དུ་ཡོ་ཧ་ནན་གྱིས་ཁོང་ལ་“སྟོན་པ་ལགས། ང་ཚོས་མི་གཞན་ཞིག་གིས་ཁྱེད་ཀྱི་མཚན་ཐོག་ནས་གདོན་འདྲེ་སྐྲོད་པ་མཐོང་བྱུང༌། མི་དེ་ང་ཚོའི་ཁོངས་གཏོགས་མིན་པས་དོན་དེ་ལྟར་སྒྲུབ་པ་བཀག་ཐབས་བཙལ་བ་ཡིན་”ཞེས་ཞུས་པ་ལ།
LUK 9:50 ཡེ་ཤུས་“སུས་ཀྱང་ཁྱེད་ལ་དགྲ་མི་བྱེད་པ་དེས་ཁྱེད་ཀྱི་ཕྱོགས་བྱེད་པས་ཁོ་འགོག་པར་མ་བྱོས་ཤིག་”ཅེས་གསུངས།
LUK 9:51 དཀོན་མཆོག་གི་ཞིང་ཁམས་སུ་འཕག་པའི་དུས་ཉེ་བར་སླེབས་པས་ཁོང་ཡེ་རུ་ཤ་ལེམ་ལ་ཕེབས་རྒྱུའི་འདུན་པ་བརྟན་པོར་བཅངས་སོ།
LUK 9:52 ཁོང་གི་སྔོན་དུ་བང་ཆེན་མངགས་པ་དང༌། ཁོ་ཚོ་ཁོང་གི་དོན་ལ་གྲ་སྒྲིག་བྱེད་པའི་ཕྱིར་ས་མར་ཡཱ་ཡུལ་གྱི་གྲོང་གསེབ་ཅིག་ཏུ་སོང༌།
LUK 9:53 ཁོང་ཡེ་རུ་ཤ་ལེམ་ལ་ཕེབས་པར་ཤེས་ཏེ་ས་མར་ཡཱ་པས་ཁོང་ལ་བསུ་བ་མ་བྱས།
LUK 9:54 དོན་དེ་མཐོང་ནས་ཉེ་གནས་ཡོ་ཧ་ནན་དང་ཡ་ཀོབ་ཀྱིས་“གཙོ་བོ། མི་དེ་ཚོ་མེད་པར་བྱེད་པའི་ཕྱིར་ང་ཚོས་དཀོན་མཆོག་གི་ཞིང་ཁམས་ནས་མེ་འབབ་པའི་བཀོད་པ་གཏོང་བར་ཁྱེད་ཐུགས་མཉེས་སམ་”ཞེས་སྨྲས།
LUK 9:55 འོན་ཀྱང་ཁོང་ཞལ་ཕྱིར་བསྐོར་ཏེ་ཁོ་ཚོར་བཀའ་བཀྱོན་མཛད་པ་དང༌།
LUK 9:56 ཁོང་ཚོ་གྲོང་གསེབ་གཞན་ཞིག་ལ་ཕེབས།
LUK 9:57 ལམ་བར་དུ་མི་ཞིག་གིས་ཁོང་ལ་“ཁྱེད་གང་དུ་ཕེབས་ན་ཡང་ང་ཁྱེད་ཀྱི་རྗེས་སུ་འབྲང་བར་བྱ་”ཞེས་ཟེར་བས།
LUK 9:58 ཁོང་གིས་ཁོ་ལ་“ཝ་ལ་ཝ་ཚང་དང༌། བྱ་ལ་བྱ་ཚང་ཡོད་ཀྱང༌། མིའི་རིགས་ཀྱི་བུ་ལ་མགོ་བཞག་ས་ཙམ་ཡང་མེད་”ཅེས་གསུངས།
LUK 9:59 ཡང་ཁོང་གིས་མི་གཞན་ལ་“ངའི་རྗེས་སུ་འབྲོངས་ཤིག་”ཅེས་གསུངས་པས་ལན་དུ་ཁོས་“གཙོ་བོ། སྔོན་ལ་ང་སོང་ནས་ཕ་དུར་དུ་འཇུག་པའི་དགོངས་པ་གནང་རོགས་”ཞེས་སྨྲས།
LUK 9:60 འོན་ཀྱང་ཁོང་གིས་མི་དེར་“གཤིན་པོ་དང་འདྲ་བ་རྣམས་ཀྱིས་རང་གི་གཤིན་པོ་རྣམས་དུར་དུ་འཇུག་ཆོག ཁྱོད་སོང་ནས་དཀོན་མཆོག་གི་རྒྱལ་སྲིད་ཁྱབ་བསྒྲགས་གྱིས་ཤིག་”ཅེས་གསུངས།
LUK 9:61 ད་དུང་མི་གཞན་གྱིས་“གཙོ་བོ། ཁྱེད་ཀྱི་རྗེས་སུ་འབྲང་བར་བྱ། འོན་ཀྱང་དེའི་སྔོན་དུ་ནང་མི་རྣམས་ལ་གྱེས་མཚམས་ཞུ་བའི་དགོངས་པ་གནང་རོགས་”ཞེས་ཟེར་བ་ལ།
LUK 9:62 ཡེ་ཤུས་མི་དེར་“སུས་ཀྱང་ཐོང་གཤོལ་བཟུང་སྟེ་ཕྱི་བལྟས་སློག་ན་དཀོན་མཆོག་གི་རྒྱལ་སྲིད་ལ་མི་འོས་”ཞེས་གསུངས་སོ། །
LUK 10:1 དེ་ནས་གཙོ་བོས་མི་གཞན་བདུན་ཅུ་བསྐོས་ཏེ་ཁོང་ཕེབས་རྒྱུ་ཡིན་པའི་གྲོང་ཁྱེར་དང་ས་ཆ་རེ་རེར་མི་གཉིས་རེ་མངགས།
LUK 10:2 ཡང་ཁོང་གིས་ཁོ་ཚོར་“སྟོན་ཐོག་རྔ་རྒྱུ་མང་པོ་ཡོད་ཀྱང་ལས་ཀ་བྱེད་མཁན་ཉུང་ངུ་ཡོད། དེའི་ཕྱིར་ལོ་ཏོག་གི་བདག་པོར་སྟོན་ཐོག་སྡུད་མཁན་རྣམས་རང་གི་ས་ཞིང་ལ་མངག་པར་ཞུས་ཤིག
LUK 10:3 སོང་ལ། ངས་སྤྱང་ཀིའི་ཁྲོད་དུ་ལུ་གུ་ལྟར་ཁྱེད་ཚོ་མངག
LUK 10:4 ཁྱེད་ཚོ་ཁུག་མ་དང༌། ལྷམ་གྱོན། སྐེ་རགས་ནང་ལའང་དངུལ་ཅི་ཡང་མ་ཁྱེར་ཞིང༌། ལམ་བར་དུ་མི་སུ་ལ་ཡང་འཚམས་འདྲི་མ་ཞུས།
LUK 10:5 ཁྱིམ་ཚང་གང་ཞིག་ལ་འཛུལ་ནའང་ཐོག་མར་ཁྱིམ་ཚང་འདི་ལ་ཞི་བདེ་འབབ་པར་ཤོག་ཅེས་ཤོད།
LUK 10:6 གལ་སྲིད་ཞི་བདེ་དང་ལྡན་པའི་སྐྱེས་པ་ཞིག་ཁྱིམ་ཚང་དེར་བཞུགས་ན་ཁྱེད་ཀྱི་ཞི་བདེ་ཁོང་ལ་གནས་པར་འགྱུར། འོན་ཀྱང་མེད་ན་ཞི་བདེ་ཁྱེད་ལ་ཕྱིར་ལོག་ཡོང༌།
LUK 10:7 ཁོ་ཚོས་ཁྱེད་ལ་གང་སྟེར་བ་དེ་བཟའ་བཏུང་བྱེད་པར་ཁྱིམ་ཚང་དེ་རང་ལ་སྡོད། གང་ཡིན་ཞེ་ན། ལས་བྱེད་མཁན་ལ་གླ་ཆ་ཐོབ་པར་འོས་སོ། ཁང་པ་གཅིག་ནས་གཞན་པར་མ་སྤོས།
LUK 10:8 ཁྱེད་ཚོ་གྲོང་ཁྱེར་གང་ཞིག་ལ་ཞུགས་ནས་གནས་ཚང་བཏང་ན་ཁྱེད་ཚོར་གང་བཤམས་པ་དེ་ཟོ་ཞིག
LUK 10:9 དེར་ཡོད་པའི་ནད་པ་རྣམས་ནད་ལས་ཐར་བར་བྱེད་དེ་ཁོ་ཚོར་དཀོན་མཆོག་གི་རྒྱལ་སྲིད་ཁྱེད་དང་ཉེ་བར་སླེབས་ཞེས་ཤོད།
LUK 10:10 ཁྱེད་ཚོ་གྲོང་ཁྱེར་གང་ཞིག་ལ་ཞུགས་ནས་གནས་ཚང་མི་བཏང་ན་ལམ་ལ་སོང་ནས།
LUK 10:11 ཁྱོད་ཚོ་དོན་འདི་ལ་འགན་ཁུར་དགོས་པར་སྟོན་པའི་ཕྱིར་ངེད་ཀྱི་རྐང་པ་ལ་ཁྱོད་ཚོའི་གྲོང་ཁྱེར་གྱི་ས་རྡུལ་འབྱར་བ་ཡང་ང་ཚོས་འཕྱི། དཀོན་མཆོག་གི་རྒྱལ་སྲིད་ཁྱེད་དང་ཉེ་བར་སླེབ་པ་ཤེས་པར་གྱིས་ཤིག་ཅེས་སྨྲོས།
LUK 10:12 ངས་ཁྱེད་ཚོ་ལ་ཟེར་རྒྱུར། ཁྲིམས་གཅོད་པའི་ཉིན་མོ་དེར་གྲོང་ཁྱེར་འདིའི་ཉེས་ཆད་སཱ་དོམ་གྲོང་ཁྱེར་ལས་ལྗིད་བ་འཕོག་པར་འགྱུར།
LUK 10:13 གལ་ཏེ་གྲོང་ཁྱེར་ཐཱ་ཨེར་དང་ཚི་དོན་ལ་བྱུང་བའི་ངོ་མཚར་ཅན་གྱི་རྟགས་ཁྱོད་ཚོར་བྱུང་ཡོད་ན། མི་དེ་ཚོ་སེམས་བསྒྱུར་བའི་རྟགས་སུ་རྩྭ་རས་གྱོན་པ་དང་གོ་ཐལ་ཁྲོད་ལ་བསྡད་དེ་ཡུན་རིང་ནས་སྤྱོད་པ་ངན་པ་སྤངས་ནས་སེམས་བསྒྱུར་བ་ཡིན་པས། ཀྱེ་ཀོ་ར་ཟིན་དང་པེ་སད་དཱ་པ་རྣམས། ཁྱོད་ཚོར་ཆད་པ་ཕོག་པར་འགྱུར་ངེས་ཡིན།
LUK 10:14 འོན་ཀྱང་ཁྲིམས་གཅོད་བྱེད་པའི་ཉིན་མོར་ཁྱོད་རྣམས་ལས་ཐཱ་ཨེར་དང་ཚི་དོན་གཉིས་ལ་བཟོད་པར་སླ་བར་འགྱུར་རོ།
LUK 10:15 ཀྱེ་ཀ་ཕར་ན་ཧུམ་པ་རྣམས། ཁྱོད་ཞིང་ཁམས་སུ་འཕག་པར་འགྱུར་བ་ཡིན་ནམ། མ་ཡིན། ཁྱོད་དམྱལ་བའི་གཏིང་སར་འཕེན་པར་འགྱུར།
LUK 10:16 ཁྱོད་རྣམས་ལ་ཉན་པ་དེས་ང་ལའང་ཉན། ཁྱོད་རྣམས་འདོར་བ་དེས་ང་ཡང་འདོར། ང་འདོར་མཁན་གྱིས་ང་མངག་མཁན་ཡང་འདོར་”ཞེས་གསུངས།
LUK 10:17 བདུན་ཅུ་དེ་རྣམས་ཀྱིས་“གཙོ་བོ། ཁྱེད་ཀྱི་མཚན་ཐོག་ནས་གདོན་འདྲེས་ཀྱང་ང་ཚོའི་ཁ་ལ་ཉན་”ཞེས་སྨྲས་ཏེ་དགའ་བའི་ངང་ནས་ཕྱིར་ལོག་ཡོང༌།
LUK 10:18 ཁོང་གིས་ཁོ་ཚོར་“ངས་དཀོན་མཆོག་གི་ཞིང་ཁམས་ནས་བདུད་སཱ་ཏན་གློག་འཁྱུག་པ་ལྟར་བབས་པར་བལྟས།
LUK 10:19 ལྟོས་ཤིག ངས་ཁྱེད་ཚོར་སྦྲུལ་དང་སྡིག་པ་རྭ་ཉག་བརྫི་རྒྱུ་དང༌། དགྲའི་མཐུ་ཐམས་ཅད་འཇོམས་པའི་དབང་ཆ་སྟེར་བ་ཡིན་པས། ཁྱེད་རྣམས་ལ་གནོད་འཚེ་ཅིའང་བྱེད་མི་ཐུབ།
LUK 10:20 འོན་ཀྱང་གདོན་འདྲེས་ཁྱེད་ཚོའི་བཀའ་ལ་ཉན་པར་མ་དགའ། ཁྱེད་ཚོའི་མིང་དཀོན་མཆོག་གི་ཞིང་ཁམས་སུ་བཀོད་པ་ཡིན་པས་དགའ་བར་འགྱུར་”ཞེས་གསུངས།
LUK 10:21 དུས་དེར་དཀོན་མཆོག་གི་དམ་པའི་ཐུགས་ཉིད་ཐོག་ནས་ཤིན་ཏུ་དགྱེས་པས་ཁོང་གིས་“ཀྱེ། ཡབ་འཇིག་རྟེན་ཁམས་ཀྱི་བདག་པོ་ལགས། ཁྱེད་ཀྱིས་དོན་འདི་རྣམས་ཤེས་ཡོན་དང་ལྡན་པ་རྣམས་ལ་སྦས་པ་གནང་ནས་ཕྲུ་གུ་རྣམས་ལ་མངོན་པར་མཛད་པས་ཁྱེད་ལ་བསྟོད་པ་འབུལ་ལོ། ཡབ་ལགས། དེ་ནི་ཁྱེད་ཀྱི་ཐུགས་རྗེ་དང་ལྡན་པའི་དགོངས་པ་ཡིན་པས་སོ།
LUK 10:22 ངའི་ཡབ་ཀྱིས་ང་ལ་ཡོད་དོ་ཅོག་གཏད་བྱུང༌། ཡབ་མ་གཏོགས་པར་སྲས་སུ་ཡིན་པ་སུས་ཀྱང་མི་ཤེས། སྲས་དང༌། སྲས་ཀྱིས་སྟོན་པར་འདོད་པའི་མི་མ་གཏོགས་པར། ཡབ་སུ་ཡིན་པ་སུས་ཀྱང་མི་ཤེས་”ཞེས་གསུངས།
LUK 10:23 ཉེ་གནས་རྣམས་ལ་ཞལ་ཕྱིར་བསྐོར་ཏེ་ཟུར་དུ་ཁོང་གིས་“ཁྱེད་ཀྱིས་གང་མཐོང་བའི་དོན་དེ་མཐོང་མཁན་རྣམས་བདེའོ།
LUK 10:24 ངས་ཁྱེད་རྣམས་ལ་ཟེར་རྒྱུར། ཁྱེད་ཀྱིས་གང་མཐོང་བ་དང་ཐོས་པ་ནི་ལུང་སྟོན་པ་དང་རྒྱལ་པོ་མང་པོས་དེ་མཐོང་བ་དང་ཐོས་པ་འདོད་ཀྱང་མ་མྱོང་”ཞེས་གསུངས།
LUK 10:25 དེ་ནས་ཁོང་ལ་ཉམས་ཚོད་ལེན་པའི་ཕྱིར་ཆོས་ཁྲིམས་ལ་མཁས་པའི་མི་ཞིག་ཡར་ལངས་ཏེ་ཁོང་ལ་“སློབ་དཔོན་ལགས། དཔག་ཏུ་མེད་པའི་ཚེ་ཐོབ་ཕྱིར་ངས་གང་ཞིག་བྱ་དགོས་སམ་”ཞེས་ཞུས་པ་ན།
LUK 10:26 ཁོང་གིས་མི་དེ་ལ་“ཆོས་ཁྲིམས་ནང་ལ་ཅི་ཞིག་འཁོད་འདུག ཁྱེད་ཀྱིས་ཇི་ལྟར་ཀློག་”ཅེས་གསུངས།
LUK 10:27 ལན་དུ་ཁོས་“ཆོས་ཁྲིམས་ནང་ལ་རང་གིས་གཙོ་བོ་དཀོན་མཆོག་ལ་བློ་གཅིག་སེམས་གཅིག་དང་ནུས་པ་ཅི་ཡོད་ཀྱིས་བརྩེ་བར་ཟུངས་ཤིག ཁྱེད་རང་གིས་ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག་ཅེས་འཁོད་འདུག་”ཅེས་སྨྲས།
LUK 10:28 ཡེ་ཤུས་“ཁྱེད་ཀྱིས་བཤད་པ་དེ་བདེན། དེ་ལྟར་བྱས་ན་འཚོ་བར་འགྱུར་”ཞེས་གསུངས།
LUK 10:29 འོན་ཀྱང་རང་ལ་རྒྱུ་མཚན་ཡོད་པ་གསལ་པོར་སྟོན་ཕྱིར་མི་དེས་ཡེ་ཤུ་ལ་“འོ་ན་ངའི་ཁྱིམ་མཚེས་སུ་ཡིན་”ཞེས་དྲིས།
LUK 10:30 ལན་དུ་ཡེ་ཤུས་“མི་ཞིག་ཡེ་རུ་ཤ་ལེམ་ནས་ཡེ་རུ་ཀོ་གྲོང་ཁྱེར་དུ་མར་འགྲོ་དུས་ཇག་པས་བཟུང་ནས་གོས་ཕྲོགས་པ་དང༌། ཁོ་མ་ཤི་ཙམ་དུ་བརྡུངས་ནས་སོང༌།
LUK 10:31 དེ་དུས་ཡ་ཧུ་དཱ་པའི་བླ་མ་ཞིག་ལམ་དེ་བརྒྱུད་ནས་ཡོང་བ་དང་སྐབས་འཁེལ་བས་མི་དེ་མཐོང་སྟེ་ཕར་ཕྱོགས་ནས་སོང༌།
LUK 10:32 དེ་བཞིན་དུ་ལེ་ཝི་པ་ཟེར་བའི་མཆོད་གཡོག་ཅིག་ཡོང་ནས་མི་དེ་མཐོང་སྟེ་ཡང་ཕར་ཕྱོགས་ནས་སོང༌།
LUK 10:33 འོན་ཀྱང་ས་མར་ཡཱ་པའི་འགྲུལ་པ་ཞིག་ཡོང་ནས་མི་དེ་མཐོང་སྟེ་སྙིང་རྗེ་སྐྱེས།
LUK 10:34 ཁོའི་ཕྱོགས་སུ་སོང་ནས་རྨ་ལ་སྣུམ་དང་རྒུན་ཆང་བླུགས་ཏེ་རས་ཀྱིས་བཏུམས་པ་དང༌། རང་གི་ཁལ་མར་བསྐྱོན་ཏེ་མགྲོན་ཁང་ཞིག་ལ་བསྐྱལ་ནས་བྱམས་སྐྱོང་བྱས།
LUK 10:35 དེའི་སང་ཉིན་ཁོས་དེ་ཎ་རིའི་དངུལ་ཊམ་ཀ་གཉིས་མགྲོན་ཁང་གི་བདག་པོ་ལ་སྟེར་ནས་ཁོ་ལ་བདག་སྐྱོང་བྱེད་དང༌། དེ་ལས་ལྷག་པ་བཏང་ན་ལོག་སྐབས་སུ་ངས་ཁྱེད་ལ་སྐྱིན་པ་འཇལ་རྒྱུ་ཡིན་ཞེས་སྨྲས།
LUK 10:36 ཁྱེད་ཀྱི་བསམ་པར་འདི་ཚོ་གསུམ་གྱི་ནང་ནས་ཇག་པས་བཟུང་བའི་མི་ཁོའི་ཁྱིམ་མཚེས་སུ་ཡིན་”ཞེས་གསུངས་ནས།
LUK 10:37 ཆོས་ཁྲིམས་ལ་མཁས་པའི་མི་དེས་“ཁོ་ལ་སྙིང་རྗེ་བྱེད་མཁན་དེ་ཡིན་”ཞེས་ཟེར་བས། ཡེ་ཤུས་“སོང་ལ་དེ་ལྟར་བྱོས་ཤིག་”ཅེས་གསུངས།
LUK 10:38 ལམ་ལ་ཕེབས་དུས་ཡེ་ཤུ་དང་ཉེ་གནས་གྲོང་གསེབ་ཅིག་ལ་ཞུགས་ནས་མར་ཐཱ་ཞེས་བྱ་བའི་བུད་མེད་ཀྱིས་ཁོ་མོའི་ནང་ལ་ཁོང་ཚོར་སྣེ་ལེན་ཞུས།
LUK 10:39 ཁོ་མོའི་ནུ་མོ་མིར་ཡམ་ནི་གཙོ་བོའི་ཞབས་ཀྱི་མདུན་དུ་བསྡད་དེ་ཁོང་གི་གསུང་ལ་ཉན།
LUK 10:40 སྣེ་ལེན་གྱི་ལས་མང་བས་མར་ཐཱ་ཡིས་སེམས་འཚབ་སྟེ་ཁོང་གི་མདུན་དུ་ཡོང་བ་དང་“གཙོ་བོ། ངའི་ནུ་མོས་ང་གཅིག་པོ་སྣེ་ལེན་བྱེད་དུ་འཇུག་པ་ཁྱེད་ཀྱིས་ཐུགས་སྣང་མི་མཛད་དམ། ང་ལ་རོགས་རམ་བྱེད་དགོས་པའི་བཀའ་ཁོ་མོར་གནང་དང་”ཞེས་ཟེར།
LUK 10:41 འོན་ཀྱང་ལན་དུ་གཙོ་བོས་“མར་ཐཱ། མར་ཐཱ། ཁྱེད་ཀྱིས་དོན་མང་པོའི་ཆེད་དུ་སེམས་ཁྲལ་དང་སེམས་འཁྲུག་པར་བྱེད།
LUK 10:42 འོན་ཀྱང་དོན་གལ་ཆེ་བ་ནི་གཅིག་རང་ཡིན། མིར་ཡམ་གྱིས་སྐལ་བ་བཟང་པོ་བདམས་པས་ཁོ་མོའི་ས་ནས་ལེན་པར་མི་འགྱུར་”ཞེས་གསུངས་སོ། །
LUK 11:1 ཡེ་ཤུས་ས་ཆ་ཞིག་ལ་གསོལ་བ་བཏབ་པ་དང༌། དེ་ཚར་རྗེས་ཉེ་གནས་ཤིག་གིས་ཁོང་ལ་“གཙོ་བོ། ཡོ་ཧ་ནན་གྱིས་ཁོང་གི་ཉེ་གནས་རྣམས་ལ་སྨོན་ལམ་འདེབས་པར་བསླབས་པ་ལྟར། ང་ཚོ་ལའང་སྨོན་ལམ་འདེབས་པར་སློབས་དང་”ཞེས་སྨྲས་པ་ལ།
LUK 11:2 ཁོང་གིས་ཁོ་ཚོར་“ཁྱེད་ཚོས་སྨོན་ལམ་འདེབས་སྐབས་འདི་ལྟར་ཤོད། ཡབ་ལགས། ཁྱེད་མཚན་དམ་པར་སྲུང་བར་ཤོག ། ཁྱེད་ཀྱི་རྒྱལ་སྲིད་འོང་བར་ཤོག །
LUK 11:3 ངེད་ཀྱི་ཉིན་རེའི་ཁ་ཟས་དེ། ། ཁྱེད་ཀྱིས་ང་ཚོར་གནང་བར་མཛོད། །
LUK 11:4 ངེད་ཚོས་གཞན་གྱི་སྡིག་ཉེས་རྣམས། ། གུ་ཡངས་གཏོང་བ་ཇི་བཞིན་དུ། ། ངེད་ཀྱི་སྡིག་བུན་སེལ་བར་མཛོད། ། ཉམས་ཚོད་ནང་དུ་འཇུག་མ་མཛོད། །” ཞེས་གསུངས།
LUK 11:5 ཁོང་གིས་ཁོ་ཚོར་“དཔེར་ན་ཁྱེད་ཚོའི་ནང་ནས་གཅིག་ལ་གྲོགས་པོ་ཡོད་ན། ནམ་ཕྱེད་ལ་ཁོའི་རྩར་ཕྱིན་ནས་ཁོ་ལ་གྲོགས་པོ། བག་ལེབ་གསུམ་ང་ལ་གཡར་དང༌།
LUK 11:6 གང་ལགས་ཟེར་ན། ཐག་རིང་ནས་ངའི་གྲོགས་པོ་ཞིག་སླེབས་པ་དང༌། ཁོ་ལ་སྟེར་བའི་ཟས་གང་ཡང་མེད་ཅེས་སྨྲས།
LUK 11:7 ལན་དུ་ནང་ལ་ཡོད་པའི་མི་དེས་ང་ལ་སུན་པོ་མ་བཟོས། སྒོ་བརྒྱབ་ཚར་ཏེ་ངའི་ཕྲུ་གུ་ང་དང་མཉམ་དུ་ཉལ་ཡོད་པས་ཁྱོད་ལ་གང་ཞིག་སྟེར་བའི་ཕྱིར་ཡར་ལང་མི་ཐུབ་ཅེས་ཟེར་”ཞེས་གསུངས།
LUK 11:8 ཡེ་ཤུས་“ངས་ཁྱེད་ཚོ་ལ་ཟེར་རྒྱུར། ནང་ལ་ཡོད་པའི་མི་དེ་གྲོགས་པོ་ཡིན་པས་ལངས་ནས་མི་སྟེར་ན་ཡང༌། ཕྱི་ལོགས་ཀྱི་མིས་ཡང་ཡང་ཞུ་བའི་རྐྱེན་གྱིས་ཡར་ལངས་ནས་གང་ཙམ་དགོས་པ་ཁོ་ལ་སྟེར་ངེས་ཡིན།
LUK 11:9 དེའི་ཕྱིར་ངས་ཁྱེད་ཚོར་ཟེར་རྒྱུར་ཞུས་ན་གནང་བར་འགྱུར། བཙལ་ན་རྙེད་པར་འགྱུར། སྒོ་བརྡུངས་ན་འབྱེད་པར་འགྱུར།
LUK 11:10 གང་ལགས་ཟེར་ན། ཞུ་མཁན་ཐམས་ཅད་ལ་འཐོབ་པ་དང༌། འཚོལ་མཁན་ཐམས་ཅད་ལ་རྙེད། སྒོ་རྡུང་མཁན་ཐམས་ཅད་ལ་སྒོ་འབྱེད་པར་འགྱུར་བས་སོ།
LUK 11:11 དཔེར་ན་ཁྱེད་ཚོ་ལས་སུ་ཞིག་ཕ་ཡིན་པ་དེས་བུ་ཉ་ཤ་དགོས་ཞེས་ཞུས་ན་སྦྲུལ་སྟེར་བར་བྱའམ།
LUK 11:12 ཡང་ན་བུ་ཡིས་སྒོ་ང་དགོས་ཞེས་ཞུས་ན་སྡིག་པ་རྭ་ཉག་ཅིག་སྟེར་རམ།
LUK 11:13 ཁྱོད་ཚོ་ངན་པ་ཡིན་ཡང་ཁྱོད་ཀྱི་ཕྲུ་གུ་རྣམས་ལ་ལག་རྟགས་བཟང་པོ་སྤྲོད་པར་ཤེས་ན། ཁྱེད་ཀྱི་ཡབ་ཞིང་ཁམས་སུ་བཞུགས་པ་ཡིས་ཁོང་ལ་གསོལ་འདེབས་བྱེད་མཁན་རྣམས་ལ་དམ་པའི་ཐུགས་ཉིད་དེ་བས་ཀྱང་གནང་བར་འགྱུར་”ཞེས་གསུངས།
LUK 11:14 དེའི་རྗེས་སུ་ཁོང་གིས་གདོན་འདྲེ་ཁ་མི་གྲགས་པ་ཞིག་བསྐྲད། དེ་ཐོན་ཚར་ནས་ཁ་ལྐུགས་པས་སྐད་ཆ་བཤད་པ་དང༌། མི་ཚོགས་ཡ་མཚན་སྐྱེས།
LUK 11:15 འོན་ཀྱང་མི་དེ་ཚོའི་ནང་ནས་ལ་ལས་“བདུད་ཀྱི་རྒྱལ་པོ་པེ་ཨིལ་བཟི་པད་ལ་བརྟེན་ནས་ཁོས་གདོན་འདྲེ་སྐྲོད་”ཅེས་སྨྲས།
LUK 11:16 ཁོང་ལ་ཉམས་ཚོད་ལེན་པའི་ཕྱིར་གཞན་པ་རྣམས་ཀྱིས་དཀོན་མཆོག་གི་ཞིང་ཁམས་ནས་ངོ་མཚར་བའི་རྟགས་སྟོན་ཞུ་བ་ཡང་ཡང་ཞུས།
LUK 11:17 ཁོ་ཚོའི་བསམ་པ་མཁྱེན་ནས་ཁོང་གིས་ཁོ་ཚོར་“རྒྱལ་ཁམས་ཤིག་གི་ནང་ལ་ནང་འཁྲུག་བྱུང་ན་འཇིག་པར་འགྱུར་ལ། ཁྱིམ་ཚང་ནང་ལའང་ནང་འཁྲུག་བྱུང་ན་ཉམས་པར་འགྱུར།
LUK 11:18 དེ་བཞིན་དུ་བདུད་སཱ་ཏན་གྱིས་རང་ལ་ནང་འཁྲུག་བསླངས་ན། ཁོའི་རྒྱལ་ཁམས་ཅི་ལྟར་གནས། དེ་ནི་ཁྱོད་ཚོས་ངས་བདུད་ཀྱི་རྒྱལ་པོ་པེ་ཨིལ་བཟི་པད་ལ་བརྟེན་ནས་གདོན་འདྲེ་སྐྲོད་ཅེས་སྨྲ་བའི་ཕྱིར་ཡིན།
LUK 11:19 གལ་ཏེ་པེ་ཨིལ་བཟི་པད་ལ་བརྟེན་ནས་ངས་གདོན་འདྲེ་བསྐྲད་ན། ཁྱོད་རྣམས་ཀྱི་བུ་ཡིས་སུ་ལ་བརྟེན་ནས་གདོན་འདྲེ་སྐྲོད་དམ། དེའི་ཕྱིར་ཁོ་ཚོ་ནི་ཁྱོད་ཚོའི་ཁྲིམས་དཔོན་དུ་འགྱུར་ངེས་ཡིན།
LUK 11:20 འོན་ཀྱང་ངས་དཀོན་མཆོག་གི་ཕྱག་མཛུབ་ལ་བརྟེན་ནས་གདོན་འདྲེ་བསྐྲད་ན། དཀོན་མཆོག་གི་རྒྱལ་སྲིད་ཁྱོད་ཚོའི་རྩར་སླེབས་ཡོད།
LUK 11:21 མཚོན་ཆ་འཁྱེར་བའི་མི་སྟོབས་ཤུགས་ཆེན་པོ་ཞིག་གིས་རང་གི་ཁང་པ་བསྲུངས་ན། ཁོའི་ཅ་ལག་འཕྲོག་མི་ཐུབ།
LUK 11:22 འོན་ཀྱང་ཁོ་ལས་སྟོབས་ཤུགས་ཆེ་བ་ཞིག་ཡོང་ནས་མི་སྟོབས་ཤུགས་ཅན་བཅོམ་ན། ཁོས་བརྟེན་པར་བྱས་པའི་མཚོན་ཆ་ཕྲོགས་ནས་སྟོབས་ཤུགས་ཆེ་བ་དེས་འཕྲོག་ནོར་བགོ་བཤའ་རྒྱག
LUK 11:23 སུས་ཀྱང་ང་ཡི་ཕྱོགས་མི་བྱེད་པ་དེས་ང་ལ་རྒོལ་ཞིང༌། སུས་ཀྱང་ང་དང་མཉམ་དུ་མི་སྡུད་བ་དེས་གཏོར།”
LUK 11:24 “མི་ཞིག་ནས་གདོན་འདྲེ་མི་གཙང་བ་འཐོན་སྐབས། ངལ་གསོ་འཚོལ་བའི་ཕྱིར་ཆུ་མེད་པའི་ས་བརྒྱུད་དེ་ཕྱིན་ནས། མ་རྙེད་པས་ང་ཐོན་པའི་ཁང་པ་དེ་ལ་ཕྱིར་ལོག་ཅེས་ཟེར།
LUK 11:25 དེར་སླེབས་དུས་གད་བརྒྱབ་ནས་གཙང་བ་དང་ལེགས་པར་བསྒྲིགས་ཡོད་པ་མཐོང་སྟེ།
LUK 11:26 སོང་ནས་དེ་ལས་ཀྱང་ངན་པ་གདོན་འདྲེ་བདུན་ཁྲིད་དེ་ཁང་པ་དེར་འཛུལ་ནས་བསྡད། མི་དེའི་གནས་ཚུལ་སྔ་མ་ལས་ཕྱི་མ་སྡུག་གོ་”ཞེས་གསུངས།
LUK 11:27 ཡེ་ཤུས་དེ་ལྟར་གསུང་དུས་མི་ཚོགས་ནང་ནས་བུད་མེད་གཅིག་གིས་སྐད་ཆེན་པོས་ཁོང་ལ་“ཁྱེད་བཞུགས་པའི་ལྷུམས་དང་ཁྱེད་ལ་ཆབ་ཞོ་སྟེར་བའི་ནུ་མ་བདེའོ་”ཞེས་ཟེར་བ་ན།
LUK 11:28 ཁོང་གིས་“དེ་བས་དཀོན་མཆོག་གི་བཀའ་ཐོས་ནས་ཁ་ལ་ཉན་པ་རྣམས་ལས་བདེ་བ་མེད་”ཅེས་གསུངས།
LUK 11:29 མི་ཚོགས་མང་པོ་ཁོང་གི་དྲུང་དུ་འཛོམས་སྐབས་ཁོང་གིས་“མི་རབས་འདི་ནི་མི་རབས་ངན་པ་ཞིག་ཡིན། མི་རབས་འདིས་རྟགས་ཤིག་ཞུས་ན་ཡང༌། ལུང་སྟོན་པ་ཡོ་ནཱ་ཡི་རྟགས་མ་གཏོགས་པར་གཞན་ཅི་ཡང་སྟེར་བར་མི་འགྱུར།
LUK 11:30 རྒྱུ་མཚན་ནི་ལུང་སྟོན་པ་ཡོ་ནཱ་ནི་གནའ་བོའི་གྲོང་ཁྱེར་ནུ་ནེ་ཝཱ་ཡི་མི་རྣམས་ལ་རྟགས་ཤིག་ཏུ་གྱུར་བ་ལྟར། མིའི་རིགས་ཀྱི་བུ་ཡང་མི་རབས་འདི་ལ་རྟགས་སུ་འགྱུར་ཡོང༌།
LUK 11:31 ཁྲིམས་གཅོད་པའི་ཉིན་མོར་ལྷོ་ཡུལ་གྱི་རྒྱལ་མོ་ལངས་ནས་མི་རབས་འདིའི་མི་རྣམས་ལ་ཉེས་སྐྱོན་འདོན་པར་བྱ། གང་ཡིན་ཞེ་ན། རྒྱལ་པོ་སོ་ལོ་མོན་གྱི་ཤེས་རབ་ཐོས་པའི་ཕྱིར་ཁོ་མོ་ས་གཞིའི་མཐའ་ནས་ཡོང༌། ལྟོས་ཤིག ད་ལྟ་སོ་ལོ་མོན་ལས་ཆེ་བ་ཞིག་འདིར་ཡོད།
LUK 11:32 ཁྲིམས་གཅོད་པའི་ཉིན་མོར་གྲོང་ཁྱེར་ནུ་ནེ་ཝཱ་ཡི་མི་རྣམས་ལངས་ནས་མི་རབས་འདིའི་མི་རྣམས་ལ་ཉེས་སྐྱོན་འདོན་པར་བྱ། གང་ལགས་ཤེ་ན། ལུང་སྟོན་པ་ཡོ་ནཱའི་གསུང་ཐོས་ནས་དེ་ཚོས་སྤྱོད་པ་ངན་པ་རྣམས་སྤངས་ནས་སེམས་བསྒྱུར། ལྟོས་ཤིག ད་ལྟ་ཡོ་ནཱ་ལས་ཆེ་བ་ཞིག་འདིར་ཡོད།”
LUK 11:33 “མི་སུས་ཀྱང་མར་མེ་སྤར་ནས་ས་འོག་ཁང་མིག་ཡང་ན། བྲེ་འོག་ཏུ་མི་འཇོག་སྟེ་ནང་ལ་ཡོང་མཁན་རྣམས་ཀྱིས་འོད་མཐོང་བའི་ཕྱིར་སྟེགས་བུའི་སྟེང་དུ་འཇོག
LUK 11:34 མིག་ནི་ལུས་ཀྱི་སྒྲོན་མེ་ལྟར་ཡིན། མིག་བཟང་པོ་ཡིན་ན་ལུས་ཧྲིལ་པོ་འོད་ཀྱིས་གང༌། མིག་བཟང་པོ་མིན་ན་ལུས་ཧྲིལ་པོ་མུན་ནག་གིས་གང༌།
LUK 11:35 དེའི་ཕྱིར་ཁྱེད་ཀྱི་ནང་ན་ཡོད་པའི་འོད་ནི་མུན་ནག་ཡིན་མིན་བསམ་བློ་ཞིབ་ཕྲ་གཏོང༌།
LUK 11:36 ཁྱེད་ཀྱི་ལུས་ཧྲིལ་པོ་འོད་ཀྱིས་གང་ནས་མུན་ནག་ཅི་ཡང་མེད་ན། སྒྲོན་མེས་ཁྱེད་ལ་འོད་འཕྲོ་བ་ལྟར་ཁྱེད་ཡོངས་སུ་འོད་ཅན་དུ་འགྱུར་”ཞེས་གསུངས།
LUK 11:37 དེ་ལྟར་གསུངས་ནས་ཕཱ་རུ་ཤི་པ་ཞིག་གིས་དྲངས་ཏེ་ཁོང་དེའི་ཁྱིམ་ལ་ཕེབས་ནས་གསོལ་བ་བཞེས་སུ་བཞུགས།
LUK 11:38 ཕཱ་རུ་ཤི་པ་དེས་ཁོང་ཡ་ཧུ་དཱ་པའི་ཆོས་ཁྲིམས་དང་མི་མཐུན་པར་གསོལ་བ་མ་བཞེས་པའི་སྔོན་ལ་ཕྱག་མ་བཀྲུས་པ་མཐོང་ནས་ཡ་མཚན་སྐྱེས།
LUK 11:39 འོན་ཀྱང་གཙོ་བོས་“ཕཱ་རུ་ཤི་པ་ཁྱོད་རྣམས་ཕོར་པ་དང་སྡེར་མའི་ཕྱི་ཕྱོགས་གཙང་བར་བྱེད་ནའང༌། ནང་ཕྱོགས་སུ་ཁྱོད་ཚོ་སེར་སྣ་དང་ངན་སེམས་ཀྱིས་ཁེང་འདུག
LUK 11:40 བླུན་པོ་ཁྱོད། ཕྱི་ཕྱོགས་འགོད་པ་གནང་མཁན་གྱིས་ནང་ཕྱོགས་ཀྱང་མ་བཀོད་དམ།
LUK 11:41 འོན་ཀྱང་ནང་ན་ཡོད་པ་དེ་སྦྱིན་པ་བཏང་ན། ཁྱོད་རྣམས་ལ་ཐམས་ཅད་གཙང་བར་འགྱུར།
LUK 11:42 ཕཱ་རུ་ཤི་པ་ཁྱོད་ཚོ་ཆད་པ་ཕོག་པར་འགྱུར་ངེས་ཡིན། གང་ལགས་ཟེར་ན། ལྡུམ་རའི་རྩྭ་དྲི་ཞིམ་དང་སྔོ་ཚོད་ཆུང་ཆུང་སྣ་ཚོགས་ཀྱི་བཅུ་ཆ་གཅིག་དཀོན་མཆོག་ལ་ཕུལ་ན་ཡང༌། ཁྱོད་ཚོས་དྲང་བ་ཉིད་དང་དཀོན་མཆོག་གི་བྱམས་པ་སྣང་མེད་དུ་རྩི་པས་སོ། འདི་ནི་བསྲུངས་ཏེ་གཞན་རྣམས་དོར་བར་མི་རུང༌།
LUK 11:43 ཕཱ་རུ་ཤི་པ་ཁྱོད་ཚོ་ཆད་པ་ཕོག་པར་འགྱུར་ངེས་ཡིན། གང་ལགས་ཟེར་ན། འདུ་ཁང་ལ་གྲལ་མགོའི་གལ་ཆེ་སར་སྡོད་པ་དང༌། ཁྲོམ་ལ་མི་རྣམས་ཀྱིས་བརྩི་བཀུར་ལྡན་པའི་འཚམས་འདྲི་ལ་དགའ་བས་སོ།
LUK 11:44 ཁྱོད་ཚོ་ཆད་པ་ཕོག་པར་འགྱུར་ངེས་ཡིན། གང་ལགས་ཟེར་ན། ཁྱོད་ཚོ་རྟགས་མེད་པའི་དུར་ཁང་ལྟར་ཡིན། མི་རྣམས་ཀྱིས་མི་ཤེས་པར་དེའི་སྟེང་ལ་འགྲོ་བས་སོ་”ཞེས་གསུངས།
LUK 11:45 ལན་དུ་ཆོས་ཁྲིམས་ལ་མཁས་པའི་མི་ཞིག་གིས་“སློབ་དཔོན་ལགས། དེ་ལྟར་གསུངས་ནས་ཁྱེད་ཀྱིས་ང་ཚོ་ལའང་སྨོད་བཞིན་འདུག་”ཅེས་སྨྲས་པ་ན།
LUK 11:46 ཡེ་ཤུས་“ཆོས་ཁྲིམས་ལ་མཁས་པའི་མི་ཁྱོད་ཚོ་ལའང་སྡུག་བསྔལ་ཆེན་པོ་འབྱུང་ངེས་ཡིན། རྒྱུ་མཚན་ནི་ཁྱོད་ཚོས་མི་གཞན་ལ་ཁུར་ཆེན་པོ་འགེལ། འོན་ཀྱང་རང་གི་མཛུབ་མོ་གཅིག་ཙམ་གྱིས་དེ་ལ་མི་རེག
LUK 11:47 ཁྱོད་ཚོར་སྡུག་བསྔལ་ཆེན་པོ་འབྱུང་ངེས་ཡིན། ཁྱོད་རྣམས་ཀྱིས་ཁྱོད་ཀྱི་མེས་པོས་བསད་པའི་ལུང་སྟོན་པའི་དུར་ཁང་རྩིག
LUK 11:48 དེའི་ཕྱིར་ཁྱོད་ཀྱི་མེས་པོས་བྱས་པའི་ལས་ལ་མོས་མཐུན་བྱེད་ཅིང་དཔང་པོ་བྱེད། མེས་པོས་དེ་རྣམས་བསད་ཅིང་ཁྱོད་ཚོས་དུར་ཁང་རྩིག
LUK 11:49 དེའི་ཕྱིར་དཀོན་མཆོག་གི་ཤེས་རབ་ཀྱིས་ངས་ལུང་སྟོན་པ་དང་སྐུ་ཚབ་མངག་པར་བྱ། ཁོ་ཚོས་ཁ་ཤས་གསོད་དང་ཁ་ཤས་གནོད་སྐྱེལ་བར་འགྱུར་ཞེས་གསུངས།
LUK 11:50 དེ་བས་འཇིག་རྟེན་བཀོད་པ་ནས་བཟུང་བསད་པའི་ལུང་སྟོན་པ་ཐམས་ཅད་ཀྱི་ཁྲག་ནི་མི་རབས་འདིས་འགན་ཁུར་ལེན་དགོས།
LUK 11:51 ངས་ཁྱེད་ཚོར་ཟེར་རྒྱུར། ཧ་བེལ་ནས་མཆོད་ཁྲི་དང་དཀོན་མཆོག་གི་ཕོ་བྲང་གཉིས་བར་དུ་བསད་པའི་ཟེ་ཀ་རི་ཡཱ་ཙམ་གྱི་ཁྲག་དེ་ཐམས་ཅད་མི་རབས་འདིས་འགན་ཁུར་ལེན་དགོས།
LUK 11:52 ཆོས་ཁྲིམས་ལ་མཁས་པའི་མི་ཁྱོད་ཚོ་ལ་སྡུག་བསྔལ་ཆེན་པོ་འབྱུང་ངེས་ཡིན། ཁྱོད་ཚོས་ཤེས་རབ་ཕོ་བྲང་གི་ལྡེ་མིག་ཕར་ཁྱེར་ཏེ་ཁྱོད་ཚོ་རང་ནང་དུ་མ་ཞུགས་པ་དང༌། ནང་ལ་འགྲོ་བཞིན་པ་རྣམས་ཀྱང་བཀག་”ཅེས་གསུངས།
LUK 11:53 ས་ཆ་དེ་དང་ཁ་བྲལ་ནས་ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་རྣམས་ཀྱིས་ཁོང་དགྲར་འཛིན་ཏེ་རྩོད་པའི་དྲི་བ་སྣ་ཚོགས་དྲིས་པ་དང༌། ཡེ་ཤུ་ཁྲིམས་དང་འགལ་བའི་གཏམ་བཤད་ནང་དུ་འཇུག་ཆེད་ཇུས་ངན་བཏིང་ངོ༌། །
LUK 12:1 དེའི་དུས་སུ་མི་ཚོགས་སྟོང་ཕྲག་མང་པོ་འཛོམས་པས་གཅིག་གིས་གཅིག་བརྫིས། སྐབས་དེར་ཁོང་གིས་ཐོག་མར་ཉེ་གནས་རྣམས་ལ་“ཕཱ་རུ་ཤི་པའི་སྐྱུར་རྩི་ལ་དོགས་ཟོན་གྱིས་ཤིག སྐྱུར་རྩི་དེ་ནི་ཁ་བཤད་དོན་ལ་མི་གནས་པ་ཡིན།
LUK 12:2 སྦས་པ་ཡིན་པ་ཐམས་ཅད་མངོན་པར་འགྱུར་བ་དང༌། གསང་བ་ཡིན་པ་ཐམས་ཅད་ཀྱང་ཤེས་པར་འགྱུར།
LUK 12:3 དེའི་ཕྱིར་ཁྱེད་ཀྱིས་མུན་པར་གང་བཤད་པ་དེ་འོད་ནང་ཐོས་པར་འགྱུར། ཁང་པའི་ཕུག་ནང་གང་ཤུབ་ཤུབ་ཏུ་སྨྲས་པ་དེ་ཁང་པའི་ཐོག་ཁ་ནས་སྒྲོག་པར་འགྱུར།”
LUK 12:4 “གྲོགས་པོ་ཚོ། ངས་ཁྱེད་ཚོ་ལ་ཟེར་རྒྱུར། གཟུགས་པོ་གསོད་པ་ལས་ཅི་ཡང་བྱེད་མི་ཐུབ་པ་རྣམས་ལ་མ་འཇིགས་ཤིག
LUK 12:5 འོན་ཀྱང་ངས་ཁྱེད་ཚོར་སུ་ཞིག་ལ་འཇིགས་དགོས་པ་སྟོན་པར་བྱ། བསད་ནས་དམྱལ་ཁམས་སུ་འཕེན་པའི་དབང་ཆ་ཡོད་མཁན་དེ་ལ་འཇིགས་དགོས། སླར་ཡང་ངས་ཁྱེད་ཚོར་ཁོང་ལ་འཇིགས་ཤིག་ཅེས་སྐུལ།
LUK 12:6 ཁང་བྱིའུ་ལྔ་ཟངས་ཀྱི་སྒོར་མོ་གཉིས་ལ་མི་འཚོང་ངམ། འོན་ཀྱང་དཀོན་མཆོག་གི་སྤྱན་སྔར་དེ་རྣམས་ལས་གཅིག་ཀྱང་མི་བརྗེད།
LUK 12:7 དེ་བས་ཀྱང་ཁྱེད་ཀྱི་མགོའི་སྐྲ་ཐམས་ཅད་ཀྱང་གྲངས་ཀ་བརྒྱབ་ཡོད་པས་མ་འཇིགས་ཤིག ཁང་བྱིའུ་མང་པོ་ལས་ཁྱེད་ཚོ་རིན་ཐང་ཆེའོ། །”
LUK 12:8 “ཡང་ངས་ཁྱེད་རྣམས་ལ་ཟེར་རྒྱུར། སུས་ཀྱང་མི་གཞན་གྱི་མདུན་དུ་ང་ཁས་ལེན་ན། དཀོན་མཆོག་གི་ཕོ་ཉའི་མདུན་དུ་མིའི་རིགས་ཀྱི་བུས་མི་དེ་ཡང་ཁས་ལེན་བྱེད་པར་འགྱུར།
LUK 12:9 འོན་ཀྱང་སུས་མི་གཞན་གྱི་མདུན་དུ་ང་ཁས་མི་ལེན་ན། དཀོན་མཆོག་གི་ཕོ་ཉའི་མདུན་དུ་མི་དེ་ཡང་ཁས་ལེན་བྱེད་པར་མི་འགྱུར།
LUK 12:10 མིའི་རིགས་ཀྱི་བུ་ལ་ངན་སྨྲས་བྱེད་མཁན་དེའི་སྡིག་ཉེས་སེལ་བར་འགྱུར། འོན་ཀྱང་དཀོན་མཆོག་གི་དམ་པའི་ཐུགས་ཉིད་ལ་སྐུར་བ་འདེབས་མཁན་དེའི་སྡིག་ཉེས་སེལ་བར་མི་འགྱུར།
LUK 12:11 ཁོ་ཚོས་ཡ་ཧུ་དཱ་པའི་འདུ་ཁང་གི་ཚོགས་འདུ་དང༌། དཔོན་པོ། ཁྲིམས་དཔོན་ལ་སོགས་པའི་མདུན་དུ་ཁྱེད་ཚོ་ཁྲིམས་གཅོད་བྱེད་དུ་འཁྲིད་སྐབས། ལན་ཅི་ལྟར་བྱེད་པ་དང༌། ཡང་ན་ཅི་སྨྲ་བ་སེམས་ཁྲལ་མ་བྱེད།
LUK 12:12 གང་ལགས་ཟེར་ན། དུས་དེ་རང་ལ་དཀོན་མཆོག་གི་དམ་པའི་ཐུགས་ཉིད་ཀྱིས་ཁྱེད་ཚོར་ཅི་ཞིག་སྨྲ་དགོས་པ་གསུང་བར་འགྱུར་”ཞེས་གསུངས།
LUK 12:13 མི་ཚོགས་ནང་ནས་མི་ཞིག་གིས་“སློབ་དཔོན་ལགས། ངའི་གཅེན་པོ་ལ་ཕ་ཤུལ་ང་དང་བགོ་བཤའ་རྒྱག་དགོས་པའི་བཀའ་གནང་རོགས་”ཞེས་བཤད།
LUK 12:14 ཁོང་གིས་མི་དེར་“གྲོགས་པོ། སུས་ང་ཁྱོད་ཀྱི་ཁྲིམས་དཔོན་ནམ། བར་འདུམ་གཏོང་མཁན་ལ་བསྐོས་”ཞེས་གསུངས།
LUK 12:15 དེ་ནས་ཁོང་གིས་ཁོ་ཚོར་“སེར་སྣ་ཐམས་ཅད་ལ་དོགས་ཟོན་གྱིས་ཤིག རྒྱུ་མཚན་ནི་མི་ཞིག་གི་ཚེ་ནོར་མང་པོ་ཡོད་མེད་ལ་རག་མི་ལས་པའི་ཕྱིར་རོ་”ཞེས་གསུངས།
LUK 12:16 ཡང་དཔེའི་སྒོ་ནས་གསུངས་ཏེ་ཁོང་གིས་“ཕྱུག་པོ་ཞིག་གི་ས་ཞིང་ལས་ལོ་ཏོག་ལེགས་པོ་བྱུང་བས།
LUK 12:17 ང་ལ་ལོ་ཏོག་བཞག་ས་མེད་པས་ངས་ཅི་བྱ་ཞེས་སྙམ་ནས།
LUK 12:18 ཁོས་ངས་མཛོད་ཁང་རྣམས་བཤིག་ནས་དེ་ལས་ཆེ་བ་རྩིག་པར་བྱ། དེར་ངའི་འབྲུ་རིགས་དང་ཅ་ལག་ཐམས་ཅད་ཉར་ཚགས་བྱེད་ཅེས་ཟེར།
LUK 12:19 ཡང་ངས་ང་རང་གིས་རང་ལ། ལོ་མང་པོའི་ཆེད་དུ་རྒྱུ་ནོར་ཉར་ཚགས་བྱས་ཡོད་པས་ངལ་གསོ་དང༌། ལོངས་སྤྱོད། སྐྱིད་པོ་བྱས་ཏེ། བཟའ་བཏུང་བྱེད་པར་བྱ་ཞེས་ཟེར་རྒྱུ་ཡིན།
LUK 12:20 འོན་ཀྱང་དཀོན་མཆོག་གིས་དེ་ལ། བླུན་པོ་ཁྱོད། མཚན་མོ་འདི་རང་ལ་ཁྱོད་ཀྱི་ཚེ་སྲོག་ལེན་པར་འགྱུར། ཁྱོད་ཀྱིས་གྲ་སྒྲིག་བྱས་པའི་ཅ་ལག་དེ་ཚོ་སུ་ལ་འཐོབ་ཡོང་ཞེས་གསུངས།
LUK 12:21 དཀོན་མཆོག་གི་སྤྱན་སྔར་ཕྱུག་པོ་མ་ཡིན་པ་རྣམས་ནི་རང་ལ་རྒྱུ་ནོར་གསོག་པས་དེ་ལྟར་འབྱུང་”ཞེས་གསུངས།
LUK 12:22 ཡེ་ཤུས་ཁོང་གི་ཉེ་གནས་རྣམས་ལ་“དེའི་ཕྱིར་ངས་ཁྱེད་རྣམས་ལ་ཟེར་རྒྱུར། མི་ཚེའི་ཕྱིར་ཟས་གང་ཞིག་ཟ་རྒྱུ་དང༌། ལུས་ཀྱི་ཕྱིར་གོས་གང་ཞིག་གྱོན་པ་སེམས་ཁྲལ་མ་བྱོས་ཤིག
LUK 12:23 གང་ལགས་ཟེར་ན། མི་ཚེ་ནི་ཟས་དང༌། ལུས་པོ་གྱོན་ཆས་དེ་གཉིས་ལས་ལྷག་པ་ཡོད་དོ།
LUK 12:24 ཕོ་རོག་ལ་ལྟོས་ཤིག དེ་ཚོས་ས་བོན་མི་འདེབས་ལ། ལོ་ཏོག་ཡང་མི་རྔ༌། དེ་ཚོར་མཛོད་ཁང་ངམ་བང་མཛོད་མེད་ཀྱང༌། དཀོན་མཆོག་གིས་དེ་ཚོར་ཟས་གནང༌། ཁྱེད་ཚོ་བྱ་རྣམས་ལས་ཇི་ཙམ་གྱི་གལ་ཆེའོ།
LUK 12:25 ཁྱེད་ཚོ་ལས་སུ་ཞིག་གིས་སེམས་ཁྲལ་བྱེད་པའི་ངང་ནས་མི་ཚེ་འདི་ལ་ཆུ་ཚོད་གཅིག་ཙམ་གྱི་རིང་དུ་གཏོང་ཐུབ་བམ།
LUK 12:26 དེ་ལྟར་དོན་ཆུང་འདི་ཡང་བྱེད་མི་ཐུབ་ན། དོན་གཞན་ལ་ཅིའི་ཕྱིར་སེམས་ཁྲལ་བྱེད།
LUK 12:27 སྟག་གཟིག་མེ་ཏོག་ཇི་ལྟར་སྐྱེ་བར་ལྟོས་ཤིག དེ་ཚོས་ལས་ཀ་མི་བྱེད་ཅིང་བལ་ཡང་མི་འཁལ། ངས་ཁྱེད་ཚོ་ལ་ཟེར་རྒྱུར། རྒྱལ་པོ་སོ་ལོ་མོན་གཟི་བརྗིད་དང་ལྡན་པ་ཡིན་ཡང༌། ཁོང་གི་རྒྱན་གོས་དེ་ཚོ་ལས་གཅིག་ལའང་འགྲན་མི་ཐུབ།
LUK 12:28 གལ་ཏེ་དཀོན་མཆོག་གིས་ཞིང་གི་རྩྭ་ནི་དེ་རིང་སྐྱེ་སྟེ་སང་ཉིན་ཐབ་ལ་འཕེན་རྒྱུ་ཡིན་པ་དེ་ལྟར་གཡོག་པར་མཛད་ན། ཁོང་གིས་དེ་བས་ཀྱང་ཁྱོད་དད་ཆུང་བ་རྣམས་ལ་གཡོག་པ་གནང་བར་བྱའམ།
LUK 12:29 ཅི་ཟ་དང་ཅི་འཐུང་མ་འཚོལ་ཞིང་སེམས་ཁྲལ་མ་བྱོས།
LUK 12:30 རྒྱུ་མཚན་ནི་ཕྱི་པ་རྣམས་ཀྱིས་དེ་ཚོ་ཚང་མ་འཚོལ། ཁྱོད་ཀྱི་ཡབ་ཀྱིས་ཁྱོད་ཚོ་ལ་དེ་རྣམས་དགོས་པ་མཁྱེན།
LUK 12:31 ཁོང་གི་རྒྱལ་སྲིད་ལ་འབད་བརྩོན་བྱོས། དེ་ནས་དེ་རྣམས་ཁྱེད་ཚོ་ལ་གནང་བར་འགྱུར།
LUK 12:32 ཀྱེ། ཁྱུ་ཆུང་དང་འདྲ་བ་རྣམས། མ་འཇིགས་ཤིག གང་ཡིན་ཞེ་ན། རྒྱལ་སྲིད་ཁྱོད་རྣམས་ལ་གནང་བ་དེ་ཁྱོད་ཀྱི་ཡབ་ལ་ཐུགས་མཉེས་སོ།
LUK 12:33 སོ་སོའི་དངོས་པོ་བཙོངས་ནས་དབུལ་ཕོངས་ལ་སྦྱིན་པ་ཐོང༌། བསྐུལ་ཟད་མི་འཐེབས་པའི་དངུལ་ཁུག་དང༌། རྐུན་མ་མི་ཡོང་བ་དང་མུག་པས་མི་འཇིག་པའི་ཞིང་ཁམས་སུ་ཡོད་པའི་རྒྱུ་ནོར་རྒྱུན་དུ་གནས་པ་ཞིག་འཐོབ་པར་གྱིས་ཤིག
LUK 12:34 གང་ཡིན་ཞེ་ན། ཁྱེད་ཀྱི་རྒྱུ་ནོར་གང་དུ་ཡོད་པ་དེར་ཁྱེད་ཀྱི་སེམས་ཀྱང་ཡོད་དོ་”ཞེས་གསུངས།
LUK 12:35 ཡང་ཡེ་ཤུས་“བག་སྟོན་ནས་ཕྱིར་ལོག་པའི་ཁྱིམ་བདག་གིས་སྒོ་བརྡུངས་ནས་འཕྲལ་དུ་སྒོ་འབྱེད་པའི་ཕྱིར་སྒུག་མཁན་རྣམས་ལྟར་ཞབས་ཕྱི་བྱེད་པར་སྐེད་རགས་ཆིངས་ཤིང༌། སྒྲོན་མེ་འབར་ཏེ་གནས་པར་གྱིས་ཤིག
LUK 12:37 ཁྱིམ་བདག་སླེབས་སྐབས་ཁོང་གིས་བྱ་ར་བྱེད་བཞིན་པའི་གཡོག་པོ་རྣམས་མཐོང་ན་དེ་རྣམས་བདེའོ། ངས་ཁྱེད་ཚོར་བདེན་པར་ཟེར་རྒྱུར། ཁྱིམ་བདག་དེ་སྐེད་རགས་བཅིངས་ཏེ་ཁོ་ཚོ་ཟས་ཟ་བར་སྡོད་དུ་འཇུག་པ་དང༌། ཁོ་ཚོའི་རྩར་ཕེབས་ནས་གཡོག་བྱེད་ཡོང༌།
LUK 12:38 ཁོང་ནམ་ཕྱེད་དང༌། ཡང་ན་སྐྱ་རེངས་ཤར་དུས་ཕེབས་ཀྱང་དེ་ལྟར་མཐོང་ན། གཡོག་པོ་དེ་རྣམས་བདེའོ།
LUK 12:39 ཁྱིམ་བདག་གིས་རྐུན་མ་སླེབས་པའི་དུས་དེ་ཤེས་པ་ཡིན་ན། ཁང་པར་འཛུལ་དུ་མི་འཇུག་པ་དེ་རྟོགས་པར་གྱིས་ཤིག
LUK 12:40 དེའི་ཕྱིར་ཁྱེད་ཚོའང་གྲ་སྒྲིག་བྱས་ནས་སྡོད་དགོས། གང་ལགས་ཟེར་ན། མིའི་རིགས་ཀྱི་བུ་ཁྱེད་ཀྱིས་མི་སེམས་པའི་དུས་ལ་ཕེབས་ངེས་ཡིན་”ཞེས་གསུངས།
LUK 12:41 པེ་ཏྲོས་“གཙོ་བོ་ལགས། དཔེ་དེ་ང་ཚོ་ལ་གསུངས་པ་ཡིན་ནམ། ཡང་ན་མི་ཚང་མར་གསུངས་པ་ཡིན་”ཞེས་བཤད།
LUK 12:42 ཡང་གཙོ་བོས་“བློ་གཏད་ཆོག་པ་དང་ཤེས་རབ་དང་ལྡན་པའི་གཉེར་པ་སུ་ཡིན། ཁྱིམ་བདག་གིས་མི་དེ་ལ་དབང་ཆ་སྤྲད་ནས་ཁོས་དུས་ལ་འབབ་སྐབས་སུ་གཡོག་པོ་གཞན་པ་རྣམས་ལ་ཟས་སྐལ་སྟེར།
LUK 12:43 དེ་ལྟར་བྱེད་བཞིན་པའི་གཡོག་པོ་ནི་ཁྱིམ་བདག་ཡོང་ནས་བལྟས་ན་བདེའོ།
LUK 12:44 ངས་ཁྱོད་ཚོ་ལ་བདེན་པར་ཟེར་རྒྱུར། ཁྱིམ་བདག་དེས་ཁོ་ལ་གང་ཡོད་པ་ཐམས་ཅད་གཉེར་པ་དེའི་དབང་འོག་ཏུ་འཇུག་ངེས་ཡིན།
LUK 12:45 འོན་ཀྱང་གཡོག་པོ་དེས་ཁྱིམ་བདག་འགྱང་བར་བསམས་ཏེ་གཡོག་པོ་དང་གཡོག་མོ་བརྡུངས་ཏེ་ཟ་འཐུང་བྱས་ནས་ར་བཟི་བར་གྱུར་ན།
LUK 12:46 གཡོག་པོས་མི་བསམ་པའི་ཉིན་དང༌། མི་ཤེས་པའི་དུས་ཚོད་ལ་ཁྱིམ་བདག་ཡོང་སྟེ་ཁོ་དུམ་བུར་བཅད་ནས་དད་པ་མེད་པའི་མི་དང་ལྷན་དུ་གནས་སུ་འཇུག་ངེས་ཡིན།
LUK 12:47 གཡོག་པོས་ཁྱིམ་བདག་གི་དགོངས་པ་ཤེས་ན་ཡང༌། གྲ་སྒྲིག་མ་བྱས་པ་དང་ཁྱིམ་བདག་གི་དགོངས་པ་ལྟར་མ་བྱས་པ་དེ་ལ་ཉེས་རྡུང་དྲག་པོ་གཟེད་པར་འགྱུར།
LUK 12:48 གཡོག་པོས་ཁྱིམ་བདག་གི་དགོངས་པ་མི་ཤེས་པའི་སྒོ་ནས་ཉེས་རྡུང་འོས་པའི་ལས་བྱས་པ་དེར་ཉེས་རྡུང་ཏོག་ཙམ་གཟེད་པར་འགྱུར། སུ་ཞིག་ལ་མང་པོ་སྟེར་ཡོད་པ་དེས་མང་པོ་སྟེར་དགོས་དང༌། སུ་ཞིག་ལ་མང་པོ་གཏད་ཡོད་པ་དེས་ལྷག་པར་སྟེར་དགོས།”
LUK 12:49 “ང་འཇིག་རྟེན་ལ་མེ་འཕེན་པའི་ཕྱིར་ཡོང་བས་དེ་འབར་ཟིན་པ་ཅི་མ་རུང༌།
LUK 12:50 ང་ལ་མྱོང་དགོས་པའི་ཁྲུས་གསོལ་ཡོད། དེ་མ་ཚར་བའི་བར་དུ་ང་སེམས་ཤིན་ཏུ་འཁྲུགས།
LUK 12:51 ང་ཞི་བདེ་གཏོང་བར་འཇིག་རྟེན་ལ་ཡོང་བ་ཡིན་པར་སེམས་སམ། ངས་ཟེར་རྒྱུར་དེ་ལྟར་མ་ཡིན། མི་མཐུན་པ་སྦྱིན་པར་ཡོང༌།
LUK 12:52 ད་ནས་བཟུང་ཁྱིམ་ཚང་གཅིག་གི་མི་ལྔ་མི་མཐུན་པར་སྡོད་དེ། གསུམ་གྱིས་གཉིས་དང་གཉིས་ཀྱིས་གསུམ་ལ་རྒོལ་བར་འགྱུར།
LUK 12:53 དེ་ཚོ་མི་མཐུན་པར་སྡོད་དེ། ཕ་ཡིས་བུ་དང༌། བུ་ཡིས་ཕ། མ་ཡིས་བུ་མོ་དང༌། བུ་མོས་མ། སྒྱུག་མོས་མནའ་མ་དང༌། མནའ་མས་སྒྱུག་མོར་རྒོལ་བར་འགྱུར་”ཞེས་གསུངས།
LUK 12:54 ཡང་ཁོང་གིས་མི་ཚོགས་ལ་“ནུབ་ཕྱོགས་ནས་སྤྲིན་པ་བྱུང་སྐབས་འཕྲལ་དུ་ཁྱོད་ཚོས་ཆར་པ་འབབ་གྲབས་འདུག་ཅེས་སྨྲས་ནས་དེ་ལྟར་འབྱུང༌།
LUK 12:55 ཡང་ལྷོ་ཕྱོགས་ནས་རླུང་ཞིག་རྒྱུག་བཞིན་པ་མཐོང་སྐབས་ཁྱོད་ཚོས་གནམ་གཤིས་ཚ་པོར་འགྱུར་ཞེས་ཟེར་ནས་དེ་ལྟར་འབྱུང༌།
LUK 12:56 ཁ་ཆོས་པ་ཁྱོད་ཚོ། གནམ་ས་གཉིས་ཀྱི་གནས་ཚུལ་དཔྱོད་སྟངས་ཤེས་ན། དུས་འདིའི་གནས་ཚུལ་ཅིའི་ཕྱིར་མི་དཔྱོད།”
LUK 12:57 “ཡང་ཁྱོད་ཚོ་རང་གིས་གང་ཞིག་འོས་པ་ཡིན་པར་ཅིའི་ཕྱིར་ཐག་གཅོད་མི་བྱེད།
LUK 12:58 དཔེར་ན་ཁྱོད་དང་ཁྱོད་ཀྱི་ཁ་གཏད་གཉིས་དཔོན་པོའི་རྩར་འགྲོ་དུས་ལམ་བར་དུ་ཁོ་དང་མཐུན་འགྲིག་བྱེད་པར་བརྩོན་ལེན་བྱོས་ཤིག དེ་མིན་ན་ཁ་གཏད་དེས་ཁྱོད་ཁྲིམས་དཔོན་གྱི་མདུན་དུ་འཁྲིད་དུ་བཅུག་པ་དང༌། ཁྲིམས་དཔོན་གྱིས་ཁྱོད་བཙོན་སྲུང་པར་གཏད་ནས་བཙོན་ཁང་དུ་འཇུག
LUK 12:59 ངས་ཁྱོད་ཚོ་ལ་ཟེར་རྒྱུར། མཐའ་མའི་ཟངས་ཀྱི་སྒོར་མོ་ཆུང་ཆུང་གཅིག་མ་འཇལ་བའི་བར་དུ་ཁྱོད་དེ་ལས་ཐར་མི་སྲིད་”ཅེས་གསུངས་སོ། །
LUK 13:1 དེའི་དུས་སུ་དེར་ཡོད་པའི་མི་ཁ་ཤས་ཀྱིས་ཁོང་ལ་སྤྱི་ཁྱབ་པི་ལ་ཏུ་ཡིས་ག་ལིལ་པ་བསད་ནས་དེ་ཚོའི་ཁྲག་མཆོད་པར་ཕུལ་བའི་སེམས་ཅན་གྱི་ཁྲག་དང་བསྲེས་པའི་གཏམ་བཤད་པ་དང༌།
LUK 13:2 ཡེ་ཤུས་ཁོ་ཚོར་“སྡུག་བསྔལ་དེ་ལྟར་མྱངས་པས་ག་ལིལ་པ་ཐམས་ཅད་ལས་འདི་ཚོ་སྡིག་ཉེས་ཅན་ཡིན་པར་སེམས་སམ།
LUK 13:3 དེ་ལྟར་མ་ཡིན་ཞེས་ཟེར། ཁྱོད་ཚོས་སྤྱོད་པ་ངན་པ་རྣམས་སྤངས་ནས་སེམས་མ་བསྒྱུར་ན་ཁྱོད་ཚོ་ཐམས་ཅད་དེ་ལྟར་འཇིག་པར་འགྱུར།
LUK 13:4 ཡང་སི་ལོམ་གྱི་མཁར་རྡིབ་ནས་མི་བཅོ་བརྒྱད་ཤི་བ་རྣམས་ཡེ་རུ་ཤ་ལེམ་ལ་སྡོད་མཁན་ཐམས་ཅད་ལས་ཉེས་ཅན་ཡིན་པར་སེམས་སམ།
LUK 13:5 དེ་ལྟར་མ་ཡིན་ཞེས་ཟེར། ཁྱོད་ཚོས་སྤྱོད་པ་ངན་པ་སྤངས་ནས་སེམས་མ་བསྒྱུར་ན་ཁྱོད་ཚོ་ཐམས་ཅད་དེ་ལྟར་དུ་འཇིག་པར་འགྱུར་”ཞེས་གསུངས།
LUK 13:6 ཡང་དཔེའི་སྒོ་ནས་ཁོང་གིས་“མི་ཞིག་གི་རྒུན་འབྲུམ་གྱི་ལྡུམ་རར་བསེ་ཡབ་ཤིང་སྡོང་ཞིག་བཙུགས་ཡོད་པ་དང༌། ཁོས་འབྲས་བུ་བཙལ་བར་ཡོང་སྟེ་ཅི་ཡང་མ་རྙེད།
LUK 13:7 ཡང་ཁོས་ཚལ་སྲུང་མཁན་ལ། ལྟོས་ཤིག ལོ་གསུམ་རིང་ངས་བསེ་ཡབ་ཤིང་འདིར་འབྲས་བུ་བཙལ་ནས་ཅི་ཡང་མ་རྙེད། དེ་ཆོད་ཅིག དེས་ས་རྒྱུ་ཆུད་ཟོས་གཏོང་བའི་དོན་གང་ཡིན་ཞེས་སྨྲས་པ་ལ།
LUK 13:8 ལན་དུ་ཁོས། སྐུ་ཞབས་ལགས། ད་དུང་ལོ་གཅིག་རིང་ལ་དེ་མི་གཅོད་པར་ཞོག ངས་མཐའ་འཁོར་གྱི་ས་རྒྱུ་བརྐོས་ནས་ལུད་རྒྱག་གི་ཡིན།
LUK 13:9 ལོ་རྗེས་མར་འབྲས་བུ་སྐྱེས་ན་ལེགས་སོ། མ་སྐྱེས་ན་གཅད་ཆོག་”ཅེས་གསུངས།
LUK 13:10 དེ་ནས་ངལ་གསོ་བའི་ཉིན་མོར་ཁོང་གིས་ཡ་ཧུ་དཱ་པའི་འདུ་ཁང་ཞིག་ལ་ཆོས་གསུང་སྐབས།
LUK 13:11 གདོན་འདྲེས་བཟུང་ནས་ལོ་བཅོ་བརྒྱད་རིང་དགུར་པོར་འགྲོ་དགོས་པ་དང༌། འདྲོང་པོར་ལང་མི་ཐུབ་པའི་བུད་མེད་ནད་པ་ཞིག་དེར་ཡོད།
LUK 13:12 ཡེ་ཤུས་བུད་མེད་དེ་གཟིགས་ནས་ཁོ་མོ་ལ་ཚུར་ཤོག་ཅེས་པའི་བཀའ་གནང་སྟེ་“ཨ་ཅག་ལགས། ཁྱེད་ནད་ལས་ཐར་རོ་”ཞེས་གསུངས་ནས།
LUK 13:13 ཁོང་གིས་ཁོ་མོར་ཕྱག་བཞག་སྟེ་འཕྲལ་དུ་འདྲོང་པོར་ལངས་ནས་ཁོ་མོས་དཀོན་མཆོག་ལ་བསྟོད་པ་ཕུལ།
LUK 13:14 འོན་ཀྱང་ཡེ་ཤུས་ངལ་གསོ་བའི་ཉིན་མོར་ནད་གསོས་པར་མཛད་པའི་རྐྱེན་གྱིས་འདུ་ཁང་གི་དཔོན་པོས་ཁྲོས་ཏེ་མི་ཚོགས་ལ་“ལས་ཀ་བྱེད་ཆོག་པའི་ཉི་མ་དྲུག་ཡོད། ངལ་གསོ་བའི་ཉིན་མོ་མ་ཡིན་པ་དེ་ཚོ་ལ་ནད་གསོ་བའི་ཕྱིར་ཤོག་”ཅེས་བཤད།
LUK 13:15 ལན་དུ་གཙོ་བོས་“ཁ་ཆོས་པ་ཁྱོད་ཚོ། ཁྱོད་རྣམས་ཀྱི་ནང་ནས་རེ་རེས་ངལ་གསོ་བའི་ཉིན་མོར་གླང་གོག་དང༌། ཡང་ན་བོང་བུ་བྲེས་ནས་བཀྲོལ་ཏེ་ཆུ་འཐུང་བར་མི་འཁྲིད་དམ།
LUK 13:16 ཡང་ཨབ་ར་ཧམ་གྱི་བུ་མོ་ཡིན་པའི་བུད་མེད་འདི་ནི་བདུད་སཱ་ཏན་གྱིས་ལོ་བཅོ་བརྒྱད་རིང་བཅིངས་ནས་ངལ་གསོ་བའི་ཉིན་མོར་ནད་ལས་ཐར་བར་འགྱུར་མི་འོས་སམ་”ཞེས་གསུངས་པས།
LUK 13:17 ཁོང་གི་ཁ་གཏད་ཐམས་ཅད་ངོ་ཚ་བར་གྱུར། ཁོང་གིས་ངོ་མཚར་བའི་ལས་མང་པོ་མཛད་པས་མི་ཚོགས་ཚང་མ་དགའ་བར་གྱུར།
LUK 13:18 དེའི་ཕྱིར་ཁོང་གིས་“དཀོན་མཆོག་གི་རྒྱལ་སྲིད་ཅི་དང་འདྲ་བ་ཡིན་ལ། ངས་གང་ཞིག་དང་སྡུར་བར་བྱ།
LUK 13:19 དེ་ནི་ཡུངས་འབྲུ་ས་བོན་ཅིག་དང་འདྲ་སྟེ། མི་ཞིག་དེ་བླངས་ནས་རང་གི་ལྡུམ་རར་ས་ལ་བཏབ་ནས་ཆེར་སྐྱེས་ཏེ་རྩི་ཤིང་དུ་གྱུར་ཞིང༌། བྱིའུ་རྣམས་ཀྱིས་དེའི་ཡལ་གར་ཚང་བཟོས་”ཞེས་གསུངས།
LUK 13:20 ཡང་ཁོང་གིས་“ངས་དཀོན་མཆོག་གི་རྒྱལ་སྲིད་གང་ཞིག་དང་སྡུར་བར་བྱ།
LUK 13:21 དེ་ནི་སྐྱུར་རྩི་དང་འདྲ་སྟེ། བུད་མེད་ཞིག་གིས་དེ་གྲོ་ཕྱེ་བྲེ་གསུམ་གྱི་ནང་ལ་བསྲེས་པ་དང༌། རྗེས་མ་ཕྱེ་ཐམས་ཅད་ལ་སྐྱུར་ལངས་”ཞེས་གསུངས།
LUK 13:22 ཡེ་རུ་ཤ་ལེམ་ལ་ཕེབས་པའི་ལམ་བར་དུ་ཡེ་ཤུས་ཆོས་གསུངས་ཏེ་གྲོང་ཁྱེར་དང༌། གྲོང་གསེབ་མང་པོ་བརྒྱུད།
LUK 13:23 མི་ཞིག་གིས་ཁོང་ལ་“གཙོ་བོ་ལགས། ཐར་དུ་འགྱུར་བ་རྣམས་ཉུང་ངུ་ཡིན་ནམ་”ཞེས་དྲིས་པས་ཁོང་གིས་ཁོ་ཚོར་
LUK 13:24 “སྒོ་དོག་མོའི་བརྒྱུད་ནས་འཇུག་པར་འབད་བརྩོན་གྱིས་ཤིག ངས་ཁྱེད་རྣམས་ལ་ཟེར་རྒྱུར། མི་མང་པོ་འཇུག་པའི་ཐབས་བཙལ་ཡང་མི་ཐུབ་པའི་ཕྱིར་རོ།
LUK 13:25 ཁྱིམ་བདག་ཡར་ལངས་ནས་སྒོ་བརྒྱབ་པའི་རྗེས་སུ་ཁྱོད་ཚོས་ཕྱི་རུ་ལངས་ཤིང་སྒོ་བརྡུངས་ཏེ། གཙོ་བོ་ལགས། ང་ཚོ་ལ་སྒོ་འབྱེད་པར་མཛོད་ཅེས་ཟེར། ལན་དུ་ཁོང་གིས་ཁྱོད་ཚོ་གང་ནས་ཡོང་མིན་ངས་མི་ཤེས་ཞེས་གསུང་བར་འགྱུར།
LUK 13:26 དེ་ནས་ཁྱོད་ཚོས། ཁྱེད་ཀྱི་མདུན་དུ་ང་ཚོས་བཟས་ཤིང་བཏུངས། ང་ཚོའི་ལམ་ལ་ཁྱེད་ཀྱིས་ཆོས་གསུངས་ཞེས་ཟེར།
LUK 13:27 ཁོང་གིས། ངས་ཁྱོད་ཚོར་ཟེར་རྒྱུར། ཁྱོད་གང་ནས་ཡོང་མིན་ངས་མི་ཤེས། ཁྱོད་ལས་ངན་བྱེད་མཁན་ཐམས་ཅད། ངའི་རྩ་ནས་ཕར་སོང་ཞིག་ཅེས་གསུང་བར་འགྱུར།
LUK 13:28 ཨབ་ར་ཧམ་དང༌། ཨི་སཱག ཡ་ཀོབ། ལུང་སྟོན་པ་ཐམས་ཅད་དཀོན་མཆོག་གི་རྒྱལ་སྲིད་ལ་གནས་ཏེ་ཁྱོད་རང་ཕྱིར་འདོན་པར་མཐོང་ནས་ཁྱོད་ཚོས་ངུ་ཞིང་སོ་ཁྲིག་ཁྲིག་བྱེད་པར་འགྱུར།
LUK 13:29 ཡང་དེ་རྣམས་དཀོན་མཆོག་གི་རྒྱལ་སྲིད་ལ་ཞལ་ཟས་བཞེས་པའི་ཕྱིར་ཤར་ནུབ་དང༌། ལྷོ་བྱང་ཕྱོགས་ནས་ཡོང་ངེས་ཡིན།
LUK 13:30 ཡང་ལྟོས་ཤིག མཐའ་མ་ཡིན་པ་ཁ་ཤས་དང་པོར་འགྱུར་ལ། དང་པོ་ཡིན་པ་ཁ་ཤས་མཐའ་མར་འགྱུར་ངེས་ཡིན་”ཞེས་གསུངས།
LUK 13:31 དུས་དེ་རང་ལ་ཕཱ་རུ་ཤི་པ་ཁ་ཤས་ཡོང་ནས་ཁོང་ལ་“རྒྱལ་པོ་ཧེ་རོ་དཱེ་ཡིས་ཁྱེད་གསོད་པར་འདོད་པས་ཕར་ཕེབས་ཤིག་”ཅེས་སྨྲས་པ་ན།
LUK 13:32 ཁོང་གིས་ཁོ་ཚོར་“སོང་ལ་གཡོ་ཅན་ཝ་དང་འདྲ་བ་དེར། ཉོན་ཅིག ངས་དེ་རིང་དང་སང་ཉིན་གདོན་འདྲེ་སྐྲོད་པ་དང་ནད་སེལ་ཏེ། ཉིན་མོ་གསུམ་པར་ངའི་དམིགས་ཡུལ་སྒྲུབ་པར་བྱ།
LUK 13:33 འོན་ཀྱང་དེ་རིང་དང༌། སང་ཉིན། གནངས་ཉིན་བཅས་ང་ལམ་ལ་འགྲོ་དགོས། གང་ཡིན་ཞེ་ན། ལུང་སྟོན་པ་ཞིག་ཡེ་རུ་ཤ་ལེམ་གྱི་ཕྱི་རོལ་ཏུ་ཤི་མི་སྲིད་”ཅེས་གསུངས།
LUK 13:34 ཁོང་གིས་“ཀྱེ་ཡེ་རུ་ཤ་ལེམ། ཡེ་རུ་ཤ་ལེམ། ཁྱོད་ཀྱིས་ལུང་སྟོན་པ་རྣམས་གསོད་ཅིང་ཁྱོད་ལ་མངག་མཁན་རྣམས་རྡོ་རུབ་གཏོང༌། བྱ་མོས་རང་གི་བྱ་ཕྲུག་གཤོག་པའི་འོག་ཏུ་སྡུད་པ་ལྟར་ངས་ཐེངས་མང་པོར་ཁྱོད་ཀྱི་ཕྲུ་གུ་སྡུད་པར་འདོད་ཀྱང༌། ཁྱོད་རྣམས་མ་མོས།
LUK 13:35 ལྟོས་ཤིག ཁྱོད་ཀྱི་གནས་ཁང་སྟོང་པར་འགྱུར། ངས་ཁྱོད་རྣམས་ལ་ཟེར་རྒྱུར། གཙོ་བོའི་མཚན་ཐོག་ནས་ཕེབས་མཁན་ལ་བྱིན་རླབས་གནང་བར་ཤོག་ཅེས་ཟེར་བའི་བར་དུ་ཁྱོད་ཀྱིས་ང་མཐོང་བར་མི་འགྱུར་”ཞེས་གསུངས་སོ། །
LUK 14:1 ངལ་གསོ་བའི་ཉིན་མོར་ཁོང་ཞལ་ཟས་བཞེས་པའི་ཕྱིར་ཕཱ་རུ་ཤི་པའི་དཔོན་པོ་ཞིག་གི་ཁང་པར་ཕེབས་ནས་ཁོ་ཚོས་ཁོང་ལ་ནན་ཏན་གྱིས་བལྟས་བཞིན་ཡོད།
LUK 14:2 དེའི་དུས་སུ་ཁོང་གི་མདུན་དུ་གཟུགས་པོ་སྐྲང་ནད་ཕོག་པའི་མི་ཞིག་ཡོད་དེ།
LUK 14:3 ཡེ་ཤུས་ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་རྣམས་ལ་“ཆོས་ཁྲིམས་ལྟར་ངལ་གསོ་བའི་ཉིན་མོར་ནད་གསོ་བར་བྱེད་ཆོག་གམ། མི་ཆོག་”ཅེས་གསུངས།
LUK 14:4 འོན་ཀྱང་ཁོ་ཚོ་ཁ་རོག་བསྡད། ཡེ་ཤུས་མི་དེ་ལ་རེག་སྟེ་ནད་གསོ་བར་མཛད་ནས་འགྲོ་རུ་བཅུག
LUK 14:5 ཡང་ཁོང་གིས་ཁོ་ཚོར་“ཁྱོད་ཚོའི་ནང་སུ་ཞིག་གིས་བུ་ཕྲུག་གམ་བ་གླང་ངལ་གསོ་བའི་ཉིན་མོར་རྫིང་བུར་ལྷུངས་ན་འཕྲལ་དུ་མི་འདོན་ནམ་”ཞེས་གསུངས།
LUK 14:6 ཁོ་ཚོས་ལན་ཅི་ཡང་བརྗོད་མ་ཐུབ།
LUK 14:7 མགྲོན་པོ་རྣམས་གྲལ་མགོའི་གལ་ཆེ་སར་བདམས་པར་གཟིགས་ནས་ཁོང་གིས་ཁོ་ཚོར་དཔེའི་སྒོ་ནས་
LUK 14:8 “སུ་ཞིག་གིས་ཁྱོད་བག་སྟོན་དུ་མགྲོན་ལ་བོས་སྐབས་གྲལ་མགོའི་གལ་ཆེ་སར་མ་སྡོད། གང་ལགས་ཟེར་ན། སྦྱིན་བདག་གིས་ཁྱོད་ལས་གལ་ཆེ་བ་ཞིག་བོས་ཡོད་ན།
LUK 14:9 ཁྱོད་གཉིས་བག་སྟོན་ལ་འབོད་མཁན་ཡོང་ནས་ཁྱོད་ལ། ཁྱེད་ཀྱི་བཞུགས་ས་མི་འདི་ལ་གནང་རོགས་ཞེས་བཤད་དེ་ངོ་ཚ་བའི་ངང་ནས་ཁྱོད་གྲལ་མཇུག་ཏུ་འགྲོ་དགོས།
LUK 14:10 འོན་ཀྱང་སྟོན་ལ་བོས་སྐབས་སུ་གྲལ་མཇུག་ཏུ་སོང༌། དེ་ནས་ཁྱོད་བག་སྟོན་ལ་འབོད་མཁན་ཡོང་ནས། གྲོགས་པོ། གྲལ་མགོའི་གལ་ཆེ་སར་བཞུགས་རོགས་གནང་ཞེས་སྨྲས་ནས་ཚང་མའི་མདུན་དུ་ཁྱོད་བཀུར་སྟི་འཐོབ་པར་འགྱུར།
LUK 14:11 དེ་བས་རང་གིས་རང་ལ་བཀུར་སྟི་བྱེད་མཁན་ཐམས་ཅད་དམའ་བར་འགྱུར་ཞིང༌། རང་གིས་རང་ལ་དམའ་བར་གཏོང་མཁན་ཐམས་ཅད་བཀུར་སྟི་འཐོབ་པར་འགྱུར་”ཞེས་གསུངས།
LUK 14:12 དེ་ནས་ཁོང་སྟོན་དུ་འབོད་མཁན་ལ་ཁོང་གིས་“ཁྱེད་ཀྱིས་དགུང་ཟས་དང༌། ཡང་ན་དགོང་ཟས་གཏོང་སྐབས་གྲོགས་པོའམ། སྤུན་ནམ། ཁྱིམ་མཚེས་ཕྱུག་པོ་རྣམས་མགྲོན་ལ་མ་འབོད། དེ་ལྟར་བྱས་ན་དེ་ཚོས་ཀྱང་ཁྱེད་སྟོན་ལ་བོས་ནས་དྲིན་ལན་འཇལ་བར་འགྱུར།
LUK 14:13 གསོལ་སྟོན་གཏོང་སྐབས་སུ་དབུལ་པོ་དང༌། དབང་པོ་སྐྱོན་ཅན། ཞ་བོ། ལོང་བ་ལ་སོགས་པའི་མི་རྣམས་བོས་ནས།
LUK 14:14 ཁྱེད་བདེ་བར་འགྱུར། རྒྱུ་མཚན་ནི་ཁོ་ཚོར་དྲིན་ལན་བྱེད་རྒྱུ་མེད་པས་རྣམ་དག་པ་རྣམས་འཆི་བ་ནས་སླར་གསོན་པའི་དུས་སུ་ཁྱེད་ཀྱི་དྲིན་ལན་འཇལ་བར་འགྱུར་ངེས་ཡིན་”ཞེས་གསུངས།
LUK 14:15 ཁོང་དང་ཞལ་ཟས་བཞེས་པའི་མི་རྣམས་ཀྱི་ནང་ནས་མགྲོན་པོ་ཞིག་གིས་དེ་ཐོས་ནས་ཁོང་ལ་“དཀོན་མཆོག་གི་རྒྱལ་སྲིད་ལ་ཞལ་ཟས་བཞེས་མཁན་ཐམས་ཅད་བདེའོ་”ཞེས་བཤད།
LUK 14:16 ཁོང་གིས་མི་དེར་“མི་ཞིག་གིས་གསོལ་སྟོན་ཆེན་པོ་གཏོང་བའི་སྔོན་ལ་མི་མང་པོ་བོས།
LUK 14:17 དགོངས་ཟས་དུས་ལ་འབབ་ཚེ། མགྲོན་པོ་རྣམས་ལ་ད་ལྟ་ཐམས་ཅད་བཤམས་པས་ཕེབས་ཤོག་ཅེས་ཟེར་རྒྱུར་ཁོས་གཡོག་པོ་ཞིག་མངགས།
LUK 14:18 འོན་ཀྱང་དེ་ཚོ་ཚང་མས་ཁ་མཐུན་ནས་སྙད་བཏགས། དང་པོས་ཁོ་ལ། ངས་ས་ཞིང་ཉོས་ནས་དེ་ལྟ་རུ་འགྲོ་དགོས་པས་དགོངས་དག་ཞུ་ཞེས་སྨྲས།
LUK 14:19 གཞན་ཞིག་གིས་ངས་བ་གླང་དོར་ལྔ་ཉོས་ནས་དེ་ཚོ་ཚོད་ལྟ་བྱེད་པའི་ཆེད་དུ་འགྲོ་དགོས་པས་དགོངས་དག་ཞུ་ཞེས་སྨྲས།
LUK 14:20 ཡང་གཞན་ཞིག་གིས་ངས་ད་ལྟ་བག་མ་བླངས་པས་ཡོང་མི་ཐུབ་ཞེས་སྨྲས།
LUK 14:21 གཡོག་པོ་དེ་ཕྱིར་ལོག་པ་དང་ཁྱིམ་བདག་ལ་གཏམ་དེ་བཤད། ཁྱིམ་བདག་ཁྲོས་ཏེ་གཡོག་པོར། གྲོང་ཁྱེར་གྱི་སྲང་ལམ་ལ་མགྱོགས་པོར་སོང་ལ། དབུལ་པོ་དང༌། དབང་པོ་སྐྱོན་ཅན། ཞ་བོ། ལོང་བ་ལ་སོགས་པའི་མི་རྣམས་འདི་རུ་ཁྲིད་དེ་ཤོག་ཅིག་ཅེས་སྨྲས།
LUK 14:22 དེའི་རྗེས་སུ་གཡོག་པོས་སྐུ་ཞབས་ལགས། ཁྱེད་ཀྱིས་བཀའ་མངག་མཛད་པ་དེ་གྲུབ་ནས་ད་དུང་སྡོད་ས་སྟོང་པ་ཡོད་”ཅེས་བཤད།
LUK 14:23 ཁྱིམ་བདག་གིས་གཡོག་པོར་“ངའི་ཁང་པ་སྟོང་པ་མེད་པར་བྱེད་པའི་ཕྱིར་གཞུང་ལམ་དང་གྲོང་གསེབ་ལ་སོང་ནས་དེ་ཚོ་འདིར་ཡོང་དུ་འཇུག
LUK 14:24 ངས་ཁྱོད་ཚོར་ཟེར་རྒྱུར། སྔར་སྟོན་ལ་བོས་པ་རྣམས་ཀྱི་ནང་ནས་མི་སུ་ཞིག་ཀྱང་དགོངས་ཟས་བྲོ་བ་མྱོང་བར་མི་འགྱུར་ཞེས་སྨྲས་”ཞེས་གསུངས།
LUK 14:25 མི་ཚོགས་ཤིན་ཏུ་མང་པོ་ཞིག་ཁོང་དང་མཉམ་དུ་སོང་བ་དང༌། ཁོ་ཚོར་ཞལ་ཕྱིར་བསྐོར་ཏེ་ཁོང་གིས་
LUK 14:26 “སུ་ཡང་ངའི་རྩར་ཡོང་བ་དང༌། ང་ལས་ཕའམ། མ། བཟའ་ཟླ། ཕྲུ་གུ མིང་སྲིང་དང༌། ཐ་ན་རང་ཉིད་ཀྱི་སྲོག་ལས་ཀྱང་གཅེས་པར་བཟུང་ན། དེ་ངའི་ཉེ་གནས་ཡིན་པར་མི་སྲིད།
LUK 14:27 སུས་ཀྱང་རང་གི་རྒྱང་ཤིང་མ་འཁུར་བར་ང་ཡི་རྗེས་སུ་འབྲང་མཁན་དེ་ངའི་ཉེ་གནས་ཡིན་པར་མི་སྲིད།
LUK 14:28 དཔེར་ན། ཁྱེད་རྣམས་ལས་མི་སུ་ཞིག་གིས་ཐོག་བརྩེགས་ཁང་རྩིག་པར་འདོད་ན། སྔོན་ལ་བསྡད་ནས་དེ་སྒྲུབ་པའི་ཕྱིར་འགྲོ་གྲོན་མི་རྩི་བའམ།
LUK 14:29 དེ་མིན་ན་རྨང་གཞི་ཚར་ནས་སྒྲུབ་མི་ཐུབ་པས་དེ་མཐོང་མཁན་ཐམས་ཅད་ཀྱིས་ཁོ་ལ་འཕྱ་དམོད་བྱེད་དེ།
LUK 14:30 མི་དེས་ལས་ཀ་འགོ་འཛུགས་ནའང་སྒྲུབ་པར་མི་ཐུབ་ཅེས་ཟེར་བར་འགྱུར།
LUK 14:31 ཡང་ན་རྒྱལ་པོ་ཞིག་ལ་དམག་མི་ཁྲི་གཅིག་ཡོད་དེ་དམག་མི་ཁྲི་གཉིས་ཡོད་པའི་རྒྱལ་པོ་གཞན་པར་དམག་འདྲེན་ན། ཕར་རྒོལ་བྱེད་མཁན་ལས་རྒྱལ་བ་འཐོབ་མི་ཐུབ་པ་ཁོས་ཐོག་མར་བསྡད་ནས་རྩིའམ།
LUK 14:32 དེ་ལྟར་མིན་ན། ཕར་རྒོལ་བྱེད་མཁན་ད་དུང་ཐག་རིང་པོ་ཡོད་པའི་ཚེ་ཞི་མཐུན་ཞུ་བའི་ཕྱིར་ཁོས་ཕོ་ཉ་འགའ་གཏོང༌།
LUK 14:33 དེའི་ཕྱིར་ཁྱེད་ཚོའི་ནང་ནས་མི་སུ་ཞིག་གིས་ཅི་ཡོད་པ་ཐམས་ཅད་མི་སྤངས་ན་ངའི་ཉེ་གནས་ཡིན་པར་མི་སྲིད།
LUK 14:34 ཚྭ་ནི་ཡག་པོ་ཡིན་ཀྱང་ཚྭའི་བྲོ་བ་ཡལ་ན། དེའི་བྲོ་བ་གང་གིས་གསོ་བར་བྱེད་དམ།
LUK 14:35 ས་རྒྱུར་རམ་ལུད་ཕུང་ལ་ཡང་མི་ཕན་པས་དེ་ཚོས་ཕྱི་རུ་དབྱུག རྣ་བ་ཡོད་པ་རྣམས་ཀྱིས་ཉོན་ཅིག་”ཅེས་གསུངས་སོ། །
LUK 15:1 ཁོང་གི་གསུང་ལ་ཉན་པའི་ཕྱིར་ཁྲལ་སྡུད་མཁན་དང་སྡིག་ཅན་མང་པོ་ཞིག་ཁོང་གི་མདུན་དུ་ཡོང་བ་དང༌།
LUK 15:2 ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་རྣམས་ཀྱིས་ཡིད་མ་རངས་པའི་གཏམ་བྱེད་བཞིན་ཡོད་དེ་“མི་འདིས་སྡིག་ཅན་རྣམས་བསུས་ནས་ཁོ་ཚོ་དང་མཉམ་དུ་ཟ་”ཞེས་སྨྲས།
LUK 15:3 དེའི་ཕྱིར་དཔེའི་སྒོ་ནས་ཁོང་གིས་
LUK 15:4 “ཁྱེད་ཚོའི་ནང་ནས་སུ་ཞིག་ལ་ལུག་བརྒྱ་ཡོད་པ་ལས་ལུག་གཅིག་བརླགས་ན། དགུ་བཅུ་གོ་དགུ་པོ་རྩྭ་ཐང་ལ་བཞག་ནས་བརླག་པ་དེ་མ་རྙེད་པའི་བར་དུ་མི་འཚོལ་ལམ།
LUK 15:5 ལུག་བརླག་པ་དེ་རྙེད་རྗེས་དགའ་བའི་ངང་ནས་རང་གི་དཔུང་པར་འཁུར་བ་དང༌།
LUK 15:6 ནང་ལ་སླེབས་རྗེས་གྲོགས་པོ་དང་ཁྱིམ་མཚེས་བོས་ནས་ཁོ་ཚོར་ང་དང་མཉམ་དུ་དགའ་སྤྲོ་གྱིས་དང༌། གང་ལགས་ཟེར་ན། ངའི་ལུག་བརླག་པ་དེ་རྙེད་པའི་ཕྱིར་རོ་ཞེས་ཟེར།
LUK 15:7 ངས་ཁྱེད་རྣམས་ལ་ཟེར་རྒྱུར། དེ་ལྟར་སེམས་བསྒྱུར་བར་མི་དགོས་པའི་མི་སེམས་དྲང་པོ་དགུ་བཅུ་གོ་དགུ་པོ་ལས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བའི་སྡིག་ཅན་གཅིག་གི་དོན་དུ་དཀོན་མཆོག་གི་ཞིང་ཁམས་སུ་ལྷག་པར་དགའ་བར་འགྱུར།”
LUK 15:8 “ཡང་ན་བུད་མེད་སུ་ཞིག་ལ་དངུལ་ཊམ་ཀ་བཅུ་ཡོད་པ་ལས་གཅིག་བརླགས་ན། བརླག་པ་དེ་མ་རྙེད་པའི་བར་དུ་མར་མེ་སྤར་ནས་ཁང་པ་གད་བརྒྱབ་སྟེ་གཟབ་ནན་ཆེན་པོས་མི་འཚོལ་ལམ།
LUK 15:9 བརླག་པ་དེ་རྙེད་ནས་གྲོགས་མོ་དང་ཁྱིམ་མཚེས་བོས་ནས་ཁོ་ཚོར་ང་དང་མཉམ་དུ་དགའ་སྤྲོ་གྱིས་དང༌། གང་ལགས་ཟེར་ན། ངའི་དངུལ་ཊམ་ཀ་བརླག་པ་དེ་རྙེད་པའི་ཕྱིར་རོ་ཞེས་ཟེར།
LUK 15:10 ངས་ཁྱེད་ཚོར་ཟེར་རྒྱུར། དེ་ལྟར་སྡིག་ཅན་གཅིག་གིས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བས་དཀོན་མཆོག་གི་ཕོ་ཉ་རྣམས་ཀྱི་མདུན་དུ་དགའ་སྤྲོ་ཡོད་”ཅེས་གསུངས།
LUK 15:11 ཡང་ཁོང་གིས་“མི་ཞིག་ལ་བུ་གཉིས་ཡོད་པ་དང༌།
LUK 15:12 ཆུང་བ་ཡིས་ཁོའི་ཕ་ལ། ཡབ་ལགས། ང་ལ་འཐོབ་རྒྱུ་ཡིན་པའི་ནོར་སྐལ་གནང་རོགས་ཞེས་ཟེར་བས་ཕ་ཡིས་བུ་གཉིས་ལ་རང་གི་ནོར་བགོ་བཤའ་བརྒྱབ།
LUK 15:13 ཉིན་མང་པོ་མ་ལོན་པར་བུ་ཆུང་བ་ཡིས་ཅི་ཡོད་པ་ཐམས་ཅད་བསྡུས་ནས་ཡུལ་ཐག་རིང་པོ་ཞིག་ལ་སོང༌། དེར་ཁོས་བྱ་སྤྱོད་ངན་པ་སྣ་ཚོགས་ཀྱི་ཐོག་ནས་ནོར་སྐལ་འཕྲོག་བརླག་བཏང༌།
LUK 15:14 རྒྱུ་ནོར་ཚང་མ་རྫོགས་ནས་ཡུལ་དེར་མུ་གེ་ཚབས་ཆེན་བྱུང་བས། ཁོ་བཀྲེས་སྐོམ་གྱིས་མནར་ཏེ་དབུལ་པོར་གྱུར།
LUK 15:15 དེའི་ཕྱིར་ཁོ་ཕྱིན་ནས་ཡུལ་དེའི་ཁྱིམ་བདག་གཅིག་ལ་བརྟེན་པས། དེས་ཕག་པ་འཚོ་བའི་ཕྱིར་ཁོ་ཞིང་ཐང་དུ་བཏང༌།
LUK 15:16 སུས་ཀྱང་ཁོ་ལ་ཟ་རྒྱུ་ཅི་ཡང་མ་སྟེར་བས་ཁོ་ལྟོགས་ཏེ་ཕག་པས་ཟ་བའི་གང་བུ་ཡང་ཟ་འདོད་ཆེན་པོ་ལངས།
LUK 15:17 དེ་ནས་བློ་ཁུག་སྟེ་ཁོས་ངའི་ཕ་ཡི་གཡོག་པོ་རྣམས་ལ་བག་ལེབ་ཟ་རྒྱུ་ཡོད་པ་མ་ཟད་བསག་རྒྱུ་ཡང་ཡོད། འོན་ཀྱང་ཡུལ་འདིར་ང་ལྟོགས་ནས་ཤི་གྲབས་འདུག
LUK 15:18 ང་ཡར་ལངས་ཏེ་ཕའི་རྩར་ཕྱིན་ནས་ཁོང་ལ། ཕ་ལགས། ངས་དཀོན་མཆོག་གི་ཞིང་ཁམས་དང་ཁྱེད་ལ་སྡིག་ཉེས་བྱས་པས།
LUK 15:19 ང་ནི་ཁྱེད་ཀྱི་སྲས་ཞེས་ཟེར་བ་མི་འོས་ཏེ་ང་ཁྱེད་ཀྱི་གླ་པ་ཞིག་དང་འདྲ་བར་མཛོད་ཅེས་ཟེར་བར་བྱ་སྙམ།
LUK 15:20 ཁོ་ལངས་ནས་ཕའི་རྩར་སོང༌། འོན་ཀྱང་ཕ་ཡིས་རྒྱང་རིང་ནས་ཁོ་མཐོང་བ་དང༌། སྙིང་རྗེ་སྐྱེས་ནས་བུའི་མདུན་དུ་བརྒྱུགས་པ་དང༌། ཁོ་ལ་འཐམ་སྟེ་འོ་བྱས།
LUK 15:21 བུ་ཡིས་ཁོང་ལ། ཕ་ལགས། ངས་དཀོན་མཆོག་གི་ཞིང་ཁམས་དང་ཁྱེད་ལ་སྡིག་ཉེས་བྱས་པས་ང་ནི་ཁྱེད་ཀྱི་བུ་ཞེས་འབོད་པར་མི་འོས་ཞེས་སྨྲས།
LUK 15:22 འོན་ཀྱང་ཕ་ཡིས་ཁོའི་གཡོག་པོ་ཚོར། ཕྱུ་པ་ཡག་ཤོས་མགྱོགས་པོར་འཁྱེར་ནས་གཡོགས་ལ། ཁོའི་མཛུབ་མོར་སོར་གདུབ་དང༌། རྐང་པར་ལྷམ་གཡོགས་ཤིག
LUK 15:23 བེའུ་རྒྱགས་པ་དེ་འདིར་ཁྲིད་ནས་སོད། ང་ཚོས་ཟ་ཞིང་དགའ་སྟོན་བྱེད་པར་བྱ།
LUK 15:24 གང་ལགས་ཤེ་ན། ངའི་བུ་འདི་ཤི་ནས་སླར་གསོན་པོར་གྱུར་ཞིང༌། བརླགས་ནས་རྙེད་པར་གྱུར་བས་སོ་ཞེས་བཤད་རྗེས་ཁོ་ཚོས་སྐྱིད་པོ་བཏང༌།
LUK 15:25 དེའི་རིང་ལ་ཁོའི་བུ་རྒན་པ་ཞིང་ཁར་ཡོད་པ་དང༌། ཁོ་ཕྱིར་ལོག་སྟེ་ཁང་པར་སླེབས་པའི་ཚེ་རོལ་མོ་དང་ཞབས་བྲོའི་སྒྲ་ཐོས་པས།
LUK 15:26 གཡོག་པོ་ཞིག་བོས་ནས་དེ་ཅི་ཡིན་ཞེས་སྐད་ཆ་དྲིས།
LUK 15:27 གཡོག་པོ་དེས་ཁྱེད་ཀྱི་གཅུང་པོ་སྐུ་ཁམས་བཟང་པོར་སླེབས་པས་ཁྱེད་ཀྱི་ཡབ་ཀྱིས་བེའུ་རྒྱགས་པ་བསད་ཅེས་སྨྲས།
LUK 15:28 དེ་ཐོས་ནས་ཁྲོས་ཏེ་ཁོ་འཛུལ་བར་མ་དགའ། ཁོའི་ཕ་ཕྱི་རོལ་ཏུ་ཡོང་ནས་ཁོ་ནང་དུ་འཛུལ་བར་རེ་འབོད་བྱས།
LUK 15:29 ཁོས་ཁོའི་ཕ་ལ། གཟིགས་དང༌། ཁྱེད་ཀྱི་བཀའ་ལས་ནམ་ཡང་མ་འགལ་ཏེ་ལོ་འདི་འདྲ་མང་པོའི་རིང་ལ་ངས་གཡོག་པོ་ལྟར་ལས་ཀ་བྱས་ཀྱང༌། ངའི་གྲོགས་པོ་དང་མཉམ་དུ་དགའ་སྟོན་བྱེད་པའི་ཕྱིར་ཁྱེད་ཀྱིས་ར་ཕྲུག་ཙམ་ཡང་ང་ལ་གནང་མ་བྱུང༌།
LUK 15:30 འོན་ཀྱང་ཁྱེད་ཀྱི་བུ་ཟེར་བ་དེ་སྨད་འཚོང་མ་རྣམས་དང་མཉམ་དུ་ཁྱེད་ཀྱི་རྒྱུ་ནོར་ཆུད་ཟོས་གཏོང་མཁན་ཡོང་སྐབས་ཁྱེད་ཀྱིས་ཁོའི་དོན་ལ་བེའུ་རྒྱགས་པ་བསད་ཅེས་བཤད།
LUK 15:31 ཕ་ཡིས་ཁོ་ལ། ངའི་བུ། ཁྱོད་དུས་རྒྱུན་དུ་ང་དང་མཉམ་དུ་ཡོད་པས། ང་ལ་ཅི་ཡོད་པ་ཐམས་ཅད་ཁྱོད་ཀྱི་ཡིན།
LUK 15:32 འོན་ཀྱང་ང་ཚོས་སྤྲོ་སེམས་ཀྱིས་དགའ་སྟོན་བྱེད་དགོས། གང་ལགས་ཟེར་ན། ཁྱོད་ཀྱི་ནུ་བོ་འདི་ཤི་ནས་སླར་གསོན་པོར་གྱུར་ཞིང༌། བརླགས་ནས་རྙེད་པར་གྱུར་ཟེར་”ཞེས་གསུངས་སོ། །
LUK 16:1 དེ་ནས་ཡེ་ཤུས་ཉེ་གནས་རྣམས་ལ་“མི་ཕྱུག་པོ་ཞིག་ལ་གཉེར་པ་ཞིག་ཡོད་དེ། ཁོའི་རྒྱུ་ནོར་གཉེར་པས་འཕྲོ་བརླག་གཏོང་ཞེས་པའི་གཏམ་ཐོས་པ་ན།
LUK 16:2 གཉེར་པ་བོས་ནས་མི་ཕྱུག་པོས་ཁོ་ལ། ཁྱོད་ཀྱི་སྐོར་གཏམ་འདི་ཅི་ཡིན། ད་ནས་བཟུང་ཁྱོད་གཉེར་པའི་ལས་བྱེད་མི་ཆོག་པས་རྩིས་དག་ཞུ་ཞིག་ཅེས་སྨྲས།
LUK 16:3 གཉེར་པས། བདག་པོས་ང་ཕྱིར་འབུད་པས་ཅི་བྱེད་པར་བྱ། ས་རྐོ་བའི་སྟོབས་ཤུགས་ནི་མེད། སློང་བར་ནི་ངོ་ཚ།
LUK 16:4 ང་ཕྱིར་འབུད་པའི་རྗེས་སུ་མི་རྣམས་ཀྱིས་ཁོ་ཚོའི་ཁྱིམ་ཚང་ལ་ང་བསུ་བའི་ཆེད་དུ་ཅི་བྱེད་པར་ངས་ཤེས་སོ་སྙམ།
LUK 16:5 ཁོའི་བདག་པོའི་བུ་ལོན་ལེན་མཁན་རེ་རེ་བཞིན་བོས་ནས་ཁོས་བུ་ལོན་ལེན་མཁན་དང་པོ་ལ། ཁྱེད་ཀྱིས་ངའི་བདག་པོར་འཇལ་དགོས་པའི་བུ་ལོན་ཇི་ཙམ་ཡོད་ཅེས་བཤད།
LUK 16:6 ལན་དུ་ཁོས་སྣུམ་རྫ་སྣོད་བརྒྱ་ཐམ་པའི་བུ་ལོན་ཡོད་ཅེས་སྨྲས་པ་དང༌། གཉེར་པས་རྩིས་ཁྲ་ལོངས་ལ་མགྱོགས་པོ་མར་བསྡད་ནས་ལྔ་བཅུ་བྲིས་ཤིག་ཅེས་བཤད།
LUK 16:7 ཡང་མི་གཞན་པར་ཁྱེད་ལ་བུ་ལོན་ཇི་ཙམ་ཡོད་ཅེས་དྲིས་པ་དང་མི་དེས་གྲོ་བྲེ་བརྒྱ་ཡོད་ཅེས་བཤད། གཉེར་པས་རྩིས་ཁྲ་ལོངས་ལ་བརྒྱད་བཅུ་བྲིས་ཤིག་ཅེས་ཟེར།
LUK 16:8 བདག་པོས་དྲང་པོ་མེད་པའི་གཉེར་པས་མགོ་གྲུང་པོའི་ངང་ནས་ལས་བསྒྲུབས་པར་བསྟོད་ར་བྱས། གང་ལགས་ཤེ་ན། འོད་ཀྱི་བུ་རྣམས་ལས་རང་དང་འདྲ་བ་རྣམས་ཀྱི་ཁྲོད་དུ་འཇིག་རྟེན་འདིའི་བུ་ཚོས་སོ་སོའི་དོན་སྒྲུབ་པར་མཁས་པར་ཆེ།
LUK 16:9 ངས་ཁྱེད་རྣམས་ལ་ཟེར་རྒྱུར། འཇིག་རྟེན་འདིའི་ལོག་པའི་ནོར་གྱིས་གྲོགས་པོ་སྒྲིགས། དེ་རྫོགས་སྐབས་རྟག་པའི་གནས་སར་མི་དེ་ཚོས་ཁྱེད་བསུ་བར་འགྱུར།
LUK 16:10 སུ་ཡང་དོན་ཆུང་བ་ལ་བློ་གཏད་ཆོག་ཡིན་པ་དེ་དོན་ཆེན་པོ་ལའང་བློ་གཏད་ཆོག་པ་ཡིན། སུ་ཡང་དོན་ཆུང་བ་ལ་དྲང་པོ་མིན་པ་དེ་དོན་ཆེན་པོ་ལའང་དྲང་པོ་མིན།
LUK 16:11 དེའི་ཕྱིར་ཁྱེད་ནི་འཇིག་རྟེན་འདིའི་ལོག་པའི་ནོར་ལ་བློ་གཏད་ཆོག་པ་མ་ཡིན་ན། སུས་ཁྱེད་ལ་བདེན་པའི་རྒྱུ་ནོར་འཆོལ་བར་འགྱུར།
LUK 16:12 གང་ཞིག་གཞན་ལ་ཡོད་པར་ཁྱེད་བློ་གཏད་ཆོག་པ་མ་ཡིན་ན། རང་ལ་བདག་འོས་པའི་ནོར་དེ་སུས་སྟེར་བར་འགྱུར།
LUK 16:13 གཡོག་པོ་ཞིག་གིས་བདག་པོ་གཉིས་ལ་གཡོག་བྱེད་མི་སྲིད། གང་ལགས་ཤེ་ན། ཁོས་གཅིག་ལ་སྡང་ཞིང་གཅིག་ལ་གཅེས་པའམ། ཁོས་གཅིག་ལ་ཆགས་ཤིང་གཅིག་ལ་སྨད་པར་བྱེད། ཁྱེད་ཚོས་དཀོན་མཆོག་དང་རྒྱུ་ནོར་གཉིས་ཀའི་གཡོག་བྱེད་མི་སྲིད་”ཅེས་གསུངས།
LUK 16:14 རྒྱུ་ནོར་ལ་ཆགས་པའི་ཕཱ་རུ་ཤི་པ་རྣམས་ཀྱིས་དོན་དེ་ཚོ་ཐམས་ཅད་ཐོས་ནས་ཁོང་ལ་འཕྱ་དམོད་བྱེད་བཞིན་ཡོད།
LUK 16:15 ཁོང་གིས་ཁོ་ཚོར་“མི་རྣམས་ཀྱི་མདུན་དུ་ཁྱོད་ཚོ་དྲང་པོ་ཡིན་ཚུལ་སྟོན། འོན་ཀྱང་དཀོན་མཆོག་གིས་ཁྱོད་ཀྱི་སེམས་མཁྱེན། མི་རྣམས་ཀྱིས་གང་བརྩི་བཀུར་བྱེད་པ་དེ་དཀོན་མཆོག་གི་སྤྱན་སྔར་སྐྱུག་བྲོ་བ་ཡིན།
LUK 16:16 བཀའ་ཁྲིམས་དང་ལུང་སྟོན་པའི་བཀའ་གཉིས་ནི་ཁྲུས་གསོལ་མཁན་ཡོ་ཧ་ནན་གྱི་བར་དུ་བསྒྲགས་མྱོང༌། དུས་དེ་ནས་བཟུང་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་བཞིན་ཡོད་པ་དང༌། མི་ཐམས་ཅད་དེའི་ནང་དུ་འཛུལ་བར་ནན་གྱིས་བརྩོན།
LUK 16:17 འོན་ཀྱང་བཀའ་ཁྲིམས་ཀྱི་ཚེག་གཅིག་འཇིག་པ་ལས་ནམ་མཁའ་དང་ས་གཉིས་འཇིག་པ་སླའོ།
LUK 16:18 སུས་ཀྱང་རང་གི་བཟའ་ཟླ་བཞག་ནས་བུད་མེད་གཞན་ཞིག་བཟའ་ཟླར་བླངས་ན་ལོག་གཡེམ་བྱེད་པ་དང༌། བཟའ་ཚང་ཁ་བྲལ་མྱོང་བའི་བུད་མེད་གཅིག་བཟའ་ཟླར་ལེན་མཁན་དེ་ནི་ལོག་པར་གཡེམ་པའོ་”ཞེས་གསུངས་སོ། །
LUK 16:19 ཡང་ཡེ་ཤུས་“རས་སྤུས་ལེགས་མདོག་རྒྱ་སྨུག་ཅན་གྱི་གྱོན་ཆས་གྱོན་པའི་མི་ཕྱུག་པོ་ཞིག་ཡོད་པ་དང༌། ཁོས་ཉིན་ལྟར་རྒྱས་སྤྲོས་བྱས།
LUK 16:20 ཡང་ལཱ་ཟར་ཞེས་པ་ནི་ལུས་ཡོངས་སུ་པགས་ནད་ཀྱི་རྨ་ཡིས་ཁྱབ་པའི་དབུལ་པོ་ཞིག་ཡིན་ཏེ། ཁོ་མི་ཕྱུག་པོའི་གནས་ཁང་གི་རྒྱལ་སྒོར་བཞག་ཡོད།
LUK 16:21 མི་ཕྱུག་པོའི་ཅོག་ཙེ་ནས་ས་ལ་ལྷུང་བའི་ཟས་སྙིགས་ཆུང་ཆུང་ཟ་བར་འདོད་ཅིང༌། ཁྱིས་ཀྱང་ཡོང་ནས་ཁོའི་རྨ་བལྡགས།
LUK 16:22 དབུལ་པོ་དེ་ཤི་ནས་དཀོན་མཆོག་གི་ཕོ་ཉ་རྣམས་ཀྱིས་མེས་པོ་ཨབ་ར་ཧམ་གྱི་དྲུང་དུ་བསྐྱལ་བ་དང༌། མི་ཕྱུག་པོའང་ཤི་ནས་དུར་དུ་བཅུག
LUK 16:23 དམྱལ་ཁམས་སུ་སྡུག་བསྔལ་ཆེན་པོ་མྱོང་སྟེ་ཕྱུག་པོས་ཡར་བལྟས་ནས་ཨབ་ར་ཧམ་དང་ཁོང་གི་དྲུང་དུ་སྡོད་མཁན་ལཱ་ཟར་ཐག་རིང་ནས་མཐོང་སྟེ།
LUK 16:24 སྐད་ཆེན་པོས། ཡབ་ཨབ་ར་ཧམ་ལགས། ང་ལ་ཐུགས་རྗེས་གཟིགས། མེ་འདིའི་ནང་སྡུག་བསྔལ་ཆེན་པོ་མྱོང་བས་ངའི་ལྕེ་བསིལ་བར་བྱེད་པའི་ཕྱིར་ལཱ་ཟར་གྱི་མཛུབ་མོའི་རྩེ་ཆུར་བཅུག་ནས་མངག་པར་མཛོད་ཅེས་བཤད།
LUK 16:25 ཨབ་ར་ཧམ་གྱིས། ངའི་བུ། གསོན་པའི་དུས་སུ་ཁྱོད་ནི་བཟང་པོ་དང་ལཱ་ཟར་སྡུག་པོ་ཐོབ་པ་དེ་དྲན་པར་གྱིས་ཤིག ད་འདི་རུ་ཁོ་སེམས་གསོ་བར་འགྱུར་བ་དང༌། ཁྱོད་སྡུག་བསྔལ་མྱོང་བཞིན་ཡོད་པ་མ་ཟད།
LUK 16:26 འདི་ནས་ཁྱོད་ཀྱི་རྩར་འགྲོ་འདོད་པ་དང༌། དེ་ནས་ང་ཚོའི་མདུན་དུ་ཡོང་འདོད་ཀྱང་བརྒལ་མི་སྲིད་པའི་ཕྱིར་ང་ཚོ་དང་ཁྱོད་ཀྱི་བར་ལ་གཡང་ས་ཆེན་པོ་ཞིག་འདུག་ཅེས་སྨྲས།
LUK 16:27 ཕྱུག་པོས་ཞུ་བ་ཞུས་ཏེ། ཡབ་ལགས། ལཱ་ཟར་ངའི་ཕའི་ཁང་པར་མངག་པར་མཛོད་ཅིག
LUK 16:28 གང་ལགས་ཤེ་ན། ང་ལ་སྤུན་ལྔ་ཡོད། ལཱ་ཟར་གྱིས་ཁོ་ཚོར་ཐ་ཚིག་བསྒྲགས་ན་ཁོ་ཚོའང་སྡུག་བསྔལ་ཆེན་པོའི་གནས་འདིར་མི་ཡོང་ཞེས་བཤད།
LUK 16:29 འོན་ཀྱང་ཨབ་ར་ཧམ་གྱིས། ཁོ་ཚོར་མོ་ཤེ་དང་ལུང་སྟོན་པའི་བཀའ་ཡོད་པས་ཁོ་ཚོས་དེ་ལ་ཉན་དགོས་ཞེས་གསུངས།
LUK 16:30 ཕྱུག་པོས། ཡབ་ཨབ་ར་ཧམ་ལགས། གལ་ཏེ་གཤིན་པོ་རྣམས་ལས་སུ་ཞིག་ཁོ་ཚོའི་རྩར་སོང་ན་ཁོ་ཚོས་སྤྱོད་པ་ངན་པ་སྤངས་ནས་སེམས་བསྒྱུར་རོ་ཞེས་བཤད།
LUK 16:31 ཨབ་ར་ཧམ་གྱིས་ཁོ་ལ་མོ་ཤེ་དང་ལུང་སྟོན་པའི་བཀའ་ལ་མ་ཉན་ན་གཤིན་པོ་རྣམས་ལས་སུ་ཞིག་ལངས་ན་ཡང་ཡིད་མི་ཆེས་”ཞེས་གསུངས་སོ། །
LUK 17:1 ཡེ་ཤུས་ཉེ་གནས་རྣམས་ལ་“སླུ་བའི་རྒྱུ་མི་འབྱུང་བར་མི་སྲིད། འོན་ཀྱང་སླུ་བར་བྱེད་མཁན་ལ་ཆད་པ་ཕོག་པར་འགྱུར་ངེས་ཡིན།
LUK 17:2 ཆུང་ངུ་འདི་རྣམས་ལས་གཅིག་སླུ་བར་བྱེད་པ་ལས་མི་དེ་ཉིད་ཀྱི་སྐེ་ལ་རང་འཐག་གི་རྡོ་ཆེན་པོ་ཞིག་བཏགས་ནས་རྒྱ་མཚོའི་ནང་དུ་དབྱུགས་ན་ཁོ་ལ་ལེགས་སོ།
LUK 17:3 དོགས་ཟོན་གྱིས་ཤིག ཁྱེད་ཀྱི་སྤུན་གྱིས་ཉེས་པ་བྱས་ན་ཁོ་ལ་བཀའ་བཀྱོན་གཏོང་ཞིག གལ་ཏེ་ཁོས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་ན་གུ་ཡངས་གཏོང་ཞིག
LUK 17:4 ཡང་ཉིན་གཅིག་ལ་ཁོས་ཁྱེད་ལ་ཉེས་པ་ལན་བདུན་བྱས་ནས་ངས་སྤྱོད་པ་ངན་པ་སྤངས་ནས་སེམས་བསྒྱུར་ཞེས་ལན་བདུན་བཤད་དེ་ཁྱེད་རྩར་ཕྱིར་ལོག་ན་གུ་ཡངས་གཏོང་དགོས་”ཅེས་གསུངས།
LUK 17:5 སྐུ་ཚབ་རྣམས་ཀྱིས་གཙོ་བོ་ལ་“ང་ཚོའི་དད་སེམས་འཕེལ་བར་མཛོད་”ཅེས་སྨྲས།
LUK 17:6 གཙོ་བོས་“གལ་སྲིད་ཁྱེད་ཀྱི་དད་སེམས་ཡུངས་འབྲུ་རྡོག་པོ་ཆུང་ངུ་གཅིག་ཙམ་ཡོད་ན་ཁྱེད་ཀྱིས་ཤིང་སྡོང་ཆེན་པོ་འདི་ལ། རང་གིས་རང་རྩ་བཀོག་བཏང་ནས་རྒྱ་མཚོར་འཚུགས་པར་འགྱུར་ཞིག་ཅེས་སྨྲས་ན་དེས་ཁྱེད་ཀྱི་བཀའ་ལ་ཉན་པར་འགྱུར།
LUK 17:7 སུ་ཞིག་ལ་ཞིང་རྨོ་བའམ། ལུག་འཚོ་བཞིན་པའི་གཡོག་པོ་ཞིག་ཡོད་ན་དེ་ཁྱིམ་ཚང་ལ་སླེབས་པའི་རྗེས་སུ་ཁོ་ལ། ལམ་སེང་ཚུར་ཤོག་ལ་ཟས་ཟ་རུ་སྡོད་ཅིག་ཅེས་ཟེར་རམ།
LUK 17:8 ཡང་ན་ཁོ་ལ་ངའི་དགོང་ཟས་གྲ་སྒྲིག་གྱིས་ལ་སྐེད་རགས་ཆིངས་ནས་ངས་བཟའ་བཏུང་བྱེད་དུས་ང་ལ་གཡོག་བྱོས་ཤིག དེ་ནས་ཁྱོད་ཟ་འཐུང་བྱེད་ཆོག་ཅེས་མི་ཟེར་རམ།
LUK 17:9 གཡོག་པོས་བཀའ་ལྟར་བསྒྲུབ་པས་ཁྱིམ་བདག་གིས་ཁོ་ལ་ཐུགས་རྗེ་ཆེ་ཞེས་ཟེར་བར་འགྱུར་རམ།
LUK 17:10 དེ་བཞིན་དུ་བཀོད་པ་བཏང་བའི་ལས་ཚང་མ་ཁྱོད་ཀྱིས་ཀྱང་བསྒྲུབས་ཚེ། ང་ཚོ་ཕན་མེད་ཀྱི་གཡོག་པོ་ཡིན་ཏེ། ང་ཚོས་བྱེད་འོས་པའི་ལས་ཁོ་ན་བྱས་པ་ཡིན་ཞེས་ཟེར་དགོས་”ཞེས་གསུངས་སོ། །
LUK 17:11 ཡེ་རུ་ཤ་ལེམ་གྱི་ལམ་བར་དུ་ཁོང་ས་མར་ཡཱ་ཡུལ་དང་ག་ལིལ་ཡུལ་གྱི་ས་མཚམས་བརྒྱུད་ནས་ཕེབས་པ་དང༌།
LUK 17:12 གྲོང་གསེབ་གཅིག་དང་ཉེ་བར་ཕེབས་ཚེ་མཛེ་ནད་ཅན་གྱི་མི་བཅུ་ཐག་རིང་ན་ལངས་བསྡད་དེ་ཁོང་དང་མཇལ།
LUK 17:13 ཁོ་ཚོས་སྐད་ཆེན་པོས་“སྟོན་པ་ཡེ་ཤུ་ལགས། ང་ཚོ་ལ་ཐུགས་རྗེས་གཟིགས་རོགས་”ཞེས་ཟེར།
LUK 17:14 ཁོ་ཚོ་གཟིགས་ནས་ཁོང་གིས་ཁོ་ཚོར་“སོང་ལ་རང་གི་ལུས་ཡ་ཧུ་དཱ་པའི་བླ་མར་སྟོན་”ཞེས་གསུངས་ནས་ལམ་བར་དུ་གསོས་ཏེ་ཐམས་ཅད་དག་པར་གྱུར།
LUK 17:15 ནད་དག་པ་མཐོང་སྟེ་ཁོ་ཚོ་ལས་མི་གཅིག་ཕྱིར་ལོག་ནས་སྐད་ཆེན་པོས་དཀོན་མཆོག་ལ་བསྟོད་པ་ཕུལ།
LUK 17:16 ཡེ་ཤུའི་མདུན་དུ་ཕྱག་འཚལ་བ་དང༌། ཁོང་ལ་བཀའ་དྲིན་ཆེ་ཞེས་ཞུས། ཁོ་ནི་ས་མར་ཡཱ་པ་ཞིག་ཡིན།
LUK 17:17 དེ་ནས་ཡེ་ཤུས་“མི་བཅུ་པོ་མཛེ་ནད་ལས་དག་པར་མ་གྱུར་རམ། གཞན་དགུ་པོ་དེ་ཚོ་གང་དུ་ཡོད།
LUK 17:18 ཕྱི་པ་འདི་ལས་དཀོན་མཆོག་ལ་བསྟོད་པ་འབུལ་མཁན་གཞན་སུ་ཡང་མེད་དམ་”ཞེས་གསུངས།
LUK 17:19 ཡང་ཁོང་གིས་ཁོ་ལ་“ཡར་ལངས་ནས་སོང་དང༌། ཁྱོད་ཀྱི་དད་པས་ཁྱོད་རང་ཐར་བར་བྱས་སོ་”ཞེས་གསུངས།
LUK 17:20 ཕཱ་རུ་ཤི་པ་རྣམས་ཀྱིས་ཁོང་ལ་དཀོན་མཆོག་གི་རྒྱལ་སྲིད་འབྱུང་བའི་དུས་ཀྱི་སྐོར་ལ་སྐད་ཆ་དྲིས་པ་ན། ཁོང་གིས་མི་དེ་ཚོར་“དཀོན་མཆོག་གི་རྒྱལ་སྲིད་ནི་མིག་གིས་མཐོང་ཐུབ་པའི་ལུགས་སུ་མི་ཡོང༌།
LUK 17:21 མི་རྣམས་ཀྱིས། ལྟོས་ཤིག་འདི་རུ་ཡོད་པའམ། ཡང་ན་དེར་ཡོད་ཅེས་མི་ཟེར། གང་ཡིན་ཞེ་ན། དཀོན་མཆོག་གི་རྒྱལ་སྲིད་ཁྱེད་ཚོའི་ཁྲོད་དུ་ཡོད་དོ་”ཞེས་གསུངས།
LUK 17:22 དེ་ནས་ཁོང་གིས་ཉེ་གནས་རྣམས་ལ་“མིའི་རིགས་ཀྱི་བུ་ཡི་ཉིན་མོ་ལས་གཅིག་མཐོང་བར་འདོད་པའི་དུས་ལ་འབབ་ཡོང་ན་ཡང༌། ཁྱེད་ཚོས་དེ་མཐོང་བར་མི་འགྱུར།
LUK 17:23 མི་དེ་ཚོས། འདིར་ལྟོས་ཤིག་གམ། ཡང་ན་དེར་ལྟོས་ཤིག་ཅེས་ཟེར་རྒྱུ་ཡིན། དེར་མ་སོང་ལ་དེ་ཚོའི་རྗེས་སུ་མ་འབྲོངས་ཤིག
LUK 17:24 རྒྱུ་མཚན་ནི་གློག་འཁྱུག་ནམ་མཁའི་ཕྱོགས་གཅིག་ནས་གཞན་པར་འོད་འཕྲོ་བ་ལྟར། དེ་ལྟར་མིའི་རིགས་ཀྱི་བུའང་ཁོང་གི་ཉིན་མོར་འབྱུང་བར་འགྱུར།
LUK 17:25 འོན་ཀྱང་དེའི་སྔོན་ལ་ཁོང་སྡུག་བསྔལ་མང་པོ་མྱོང་དགོས་པ་དང༌། མི་རབས་འདིས་ཁོང་འདོར་བར་འགྱུར།
LUK 17:26 ཡང་མེས་པོ་ནོ་ཨ་ཡི་དུས་ལ་བྱུང་བ་ལྟར། མིའི་རིགས་ཀྱི་བུ་ཡི་དུས་ལ་ཡང་འབྱུང་བར་འགྱུར།
LUK 17:27 ནོ་ཨ་གྲུ་ཆེན་གྱི་ནང་དུ་མ་ཞུགས་པའི་བར་དུ་ཁོ་ཚོས་བཟའ་བ་དང་བཏུང་ཞིང༌། བག་མ་གཏོང་ལེན་བྱེད་བཞིན་ཡོད། དེ་ནས་ཆུ་ལོག་ཆེན་པོ་བྱུང་ནས་ཁོ་ཚོ་ཚང་མ་འཇིག་པར་གྱུར།
LUK 17:28 དེ་བཞིན་དུ་མེས་པོ་ལོཌ་ད་ཞེས་ཟེར་མཁན་གྱི་དུས་སུ་ཡང་བྱུང༌། མི་རྣམས་ཀྱིས་བཟའ་བ་དང་བཏུང་ཞིང༌། ཉོ་འཚོང༌། ས་བོན་འདེབས་ལས། ཁང་པ་རྩིག་པ་ལ་སོགས་པའི་ལས་ཀ་བྱེད་བཞིན་ཡོད།
LUK 17:29 འོན་ཀྱང་ལོཌ་ད་སཱ་དོམ་གྲོང་ཁྱེར་ནས་ཕྱིར་ཐོན་པའི་ཉིན་མོར་མེ་དང་མུ་ཟི་ནམ་མཁའ་ནས་བབས་པས་དེ་ཚོ་ཚང་མ་འཇིག་པར་གྱུར།
LUK 17:30 མིའི་རིགས་ཀྱི་བུ་མངོན་པར་འགྱུར་བའི་ཉིན་མོར་ཡང་དེ་ལྟར་འབྱུང་བར་འགྱུར།
LUK 17:31 ཉིན་མོ་དེར་ཁང་པའི་ཐོག་ཁར་ཡོད་མཁན་རང་གི་ཅ་ལག་ཕར་འཁྱེར་བའི་ཕྱིར་མར་མ་འགྲོ དེ་བཞིན་དུ་ཞིང་ཁར་ཡོད་པ་ཕྱིར་མ་ལོག
LUK 17:32 ལོཌ་ད་ཡི་བཟའ་ཟླ་དྲན་པར་གྱིས་ཤིག
LUK 17:33 སུ་ཡང་རང་གི་སྲོག་ལ་ཆགས་པ་དེ་བརླག་པར་འགྱུར། སུ་ཡང་རང་གི་སྲོག་བཏང་ན་དེ་སྐྱོབ་པར་འགྱུར།
LUK 17:34 ངས་ཁྱེད་རྣམས་ལ་ཟེར་རྒྱུར། ཉིན་དེའི་མཚན་མོར་ཉལ་ཁྲི་ཞིག་ལ་མི་གཉིས་ཡོད་པ་ལས། གཅིག་ལེན་གཅིག་འབོར་བར་འགྱུར།
LUK 17:35 ས་ཆ་གཅིག་ལ་བུད་མེད་འབྲུ་འཐག་མཁན་གཉིས་ཡོད་པ་ལས། གཅིག་ལེན་གཅིག་འབོར་བར་འགྱུར་”ཞེས་གསུངས།
LUK 17:37 ལན་དུ་ཁོ་ཚོས་“གཙོ་བོ། གང་དུ་འབྱུང་བར་འགྱུར་”ཞེས་ཞུས། ཁོང་གིས་ཁོ་ཚོར་“ཕུང་པོ་ཡོད་སར་བྱ་རྒོད་འཛོམ་པར་འགྱུར་”ཞེས་གསུངས་སོ། །
LUK 18:1 དེའི་རྗེས་སུ་དེ་རྣམས་ཡིད་མི་ཞུམ་པར་སྨོན་ལམ་ཡང་ཡང་འདེབས་དགོས་པ་སྟོན་པའི་ཕྱིར་དཔེའི་སྒོ་ནས་འདི་ལྟར་གསུངས།
LUK 18:2 “གྲོང་ཁྱེར་ཞིག་ལ་དཀོན་མཆོག་གམ། ཡང་ན་མི་རྣམས་ལ་མི་བཀུར་བའི་ཁྲིམས་དཔོན་ཡོད་པ་དང༌།
LUK 18:3 གྲོང་ཁྱེར་དེ་ལ་ཁོའི་མདུན་དུ་ཡང་ཡང་ཡོང་བའི་ཡུགས་མོ་ཞིག་ཡོད་དེ། ཁོ་མོས་དེ་ལ་ངའི་ཁ་གཏད་ལས་སྲུང་བར་མཛོད་ཅེས་ཞུས།
LUK 18:4 རེ་ཞིག་དེ་ལྟར་བྱེད་མ་འདོད་ཀྱང༌། རྗེས་སུ་ཁོས་ངས་དཀོན་མཆོག་གམ། ཡང་ན་མི་རྣམས་ལ་མི་བཀུར་ཡང༌།
LUK 18:5 ཡུགས་མོ་འདིས་ང་ལ་སུན་པོ་བྱེད་པས་ངས་མོའི་ཁ་གཏད་ལས་སྲུང་བར་བྱ། དེ་མིན་ན་ཁོ་མོ་ཡང་ཡང་ཡོང་བས་ང་ངལ་བས་དུབ་བོ་སྙམ་”ཞེས་གསུངས།
LUK 18:6 ཡང་གཙོ་བོས་“དྲང་པོ་མིན་པའི་ཁྲིམས་དཔོན་གྱིས་གང་བཤད་པ་དེ་ལ་ཉོན་ཞིག
LUK 18:7 དཀོན་མཆོག་གིས་ཁོང་ལ་ཉིན་མཚན་མེད་པར་སྨོན་ལམ་འདེབས་མཁན་ཉིད་ཀྱིས་བདམས་པ་ལ་སྲུང་བར་མི་མཛོད་དམ། མི་དེ་ཚོར་རོགས་པ་གནང་བར་ཡུན་རིང་པོར་འགོར་རམ།
LUK 18:8 ངས་ཁྱེད་རྣམས་ལ་ཟེར་རྒྱུར། ཁོང་གིས་མྱུར་དུ་ཁོ་ཚོ་སྲུང་བར་འགྱུར། འོན་ཀྱང་མིའི་རིགས་ཀྱི་བུ་ཕེབས་པའི་དུས་སུ་འཇིག་རྟེན་འདིར་དད་ལྡན་རྣམས་རྙེད་པར་འགྱུར་རམ་”ཞེས་གསུངས།
LUK 18:9 ཡང་རང་ཉིད་དྲང་པོ་ཡིན་པར་བསམ་ཞིང་མི་གཞན་ལ་མཐོང་ཆུང་བྱེད་པའི་མི་ཁ་ཤས་ལ་དཔེ་འགྲེ་བྱས་ནས་ཁོང་གིས་
LUK 18:10 “ཕཱ་རུ་ཤི་པ་ཞིག་དང་ཁྲལ་སྡུད་མཁན་ཞིག་སྨོན་ལམ་འདེབས་པའི་ཆེད་དུ་མཆོད་ཁང་ཆེན་མོར་སོང༌།
LUK 18:11 ཕཱ་རུ་ཤི་པ་གཅིག་པོར་ལངས་ཏེ། ཀྱེ་དཀོན་མཆོག ང་ཁ་བསླུས་རྒྱག་མཁན་ནམ། དྲང་པོ་མིན་པའམ། ལོག་གཡེམ་བྱེད་མཁན་མི་གཞན་པ་དང་མི་འདྲ་ཞིང༌། ཁྲལ་སྡུད་མཁན་འདི་དང་ཡང་མི་འདྲ་བས་ཁྱེད་ལ་ཐུགས་རྗེ་ཆེ་ཞུ།
LUK 18:12 ངས་གཟའ་འཁོར་ཞིག་ལ་སྨྱུང་གནས་ཐེངས་གཉིས་སྲུང་ཞིང༌། ཡོང་འབབ་ཐམས་ཅད་ལས་བཅུ་ཆ་གཅིག་དཀོན་མཆོག་ལ་འབུལ་ཞེས་སྨོན་ལམ་བཏབ།
LUK 18:13 འོན་ཀྱང་ཁྲལ་སྡུད་མཁན་དེ་ཐག་རིང་པོར་ལངས་ཏེ་དཀོན་མཆོག་གི་ཞིང་ཁམས་སུ་ཡར་ལྟ་བར་མི་ཕོད་ཅིང༌། བྲང་ཁོག་བརྡུངས་ཏེ། ཀྱེ་དཀོན་མཆོག ང་སྡིག་ཅན་ལ་ཐུགས་རྗེས་གཟིགས་ཞེས་བཤད།
LUK 18:14 ངས་ཁྱེད་རྣམས་ལ་ཟེར་རྒྱུར། གཞན་དེ་ལས་མི་འདི་ཡང་དག་པར་གྱུར་ནས་ཁྱིམ་དུ་སོང༌། གང་ལགས་ཤེ་ན། རང་གིས་རང་ལ་བཀུར་སྟི་བྱེད་མཁན་ཐམས་ཅད་དམའ་བར་འགྱུར་ཞིང༌། རང་གིས་རང་ལ་དམའ་བར་རྩི་མཁན་ཐམས་ཅད་བཀུར་སྟི་འཐོབ་པར་འགྱུར་”ཞེས་གསུངས།
LUK 18:15 མི་རྣམས་ཀྱིས་བྱིས་པ་ཡང་ཁོང་གི་དྲུང་དུ་ཕྱག་གིས་རེག་པའི་ཕྱིར་ཁུར་ཡོང་ཞིང༌། ཉེ་གནས་རྣམས་ཀྱིས་དེ་མཐོང་ནས་ཁོ་ཚོར་གཤེ་གཤེ་བཏང༌།
LUK 18:16 འོན་ཀྱང་ཡེ་ཤུས་ཕྲུ་གུ་རྣམས་ཁོང་གི་མདུན་དུ་ཡོང་བའི་བཀའ་གནང་སྟེ་“ཁོ་ཚོ་དང་འདྲ་བ་རྣམས་དཀོན་མཆོག་གི་རྒྱལ་སྲིད་ཀྱི་ཁོངས་གཏོགས་ཡིན་པས། ཕྲུ་གུ་ཆུང་ངུ་མ་འགོག་པར་ངའི་དྲུང་དུ་ཡོང་དུ་ཆུག་ཅིག
LUK 18:17 ངས་ཁྱེད་རྣམས་ལ་བདེན་པར་ཟེར་རྒྱུར། སུ་ཞིག་གིས་དཀོན་མཆོག་གི་རྒྱལ་སྲིད་ཕྲུ་གུ་ཆུང་ངུའི་ཚུལ་དུ་མི་བླངས་ན། དེའི་ནང་དུ་ཅི་ནས་ཀྱང་འགྲོ་མི་ཐུབ་བོ་”ཞེས་གསུངས།
LUK 18:18 དེ་ནས་དཔོན་པོ་ཞིག་གིས་ཁོང་ལ་“སྟོན་པ་བཟང་པོ་ལགས། དཔག་ཏུ་མེད་པའི་ཚེ་ཐོབ་ཕྱིར་ངས་གང་ཞིག་བྱ་དགོས་སམ་”ཞེས་ཞུས་པ་ལ།
LUK 18:19 ཡེ་ཤུས་མི་དེར་“ཁྱེད་ཀྱིས་ང་ལ་ཅིའི་ཕྱིར་བཟང་པོ་ཟེར། དཀོན་མཆོག་གཅིག་པུ་ལས་གཞན་བཟང་པོ་གཅིག་ཀྱང་མེད།
LUK 18:20 ལོག་གཡེམ་མ་བྱེད། མིའི་སྲོག་མ་གཅོད། རྐུ་མ་མ་རྐུས། རྫུན་གྱི་དཔང་པོ་མ་བྱེད། རང་གི་ཕ་མར་བརྩི་བཀུར་བྱོས་ཤིག་ཅེས་གསུངས་པའི་བཀའ་ཁྲིམས་འདི་ཚོ་ཁྱེད་ཀྱིས་ཤེས་”ཞེས་གསུངས།
LUK 18:21 ཡང་མི་དེས་“ངས་ཆུང་དུས་ནས་བཀའ་འདི་ཐམས་ཅད་བསྲུངས་པ་ཡིན་”ཞེས་ཞུས།
LUK 18:22 དེ་གསན་ནས་ཡེ་ཤུས་ཁོ་ལ་“ཁྱོད་ལ་ད་དུང་དོན་གཅིག་མི་ཚང་བས། རང་ལ་ཡོད་པ་ཐམས་ཅད་བཙོངས་ཏེ་དབུལ་པོ་རྣམས་ལ་སྦྱིན་ཅིག དེ་ནས་དཀོན་མཆོག་གི་ཞིང་ཁམས་སུ་ཁྱོད་ལ་རྒྱུ་ནོར་ཐོབ་པར་འགྱུར་བ་དང༌། ཤོག ངའི་རྗེས་སུ་འབྲོངས་ཤིག་”ཅེས་གསུངས་པ་ལ།
LUK 18:23 མི་དེ་ཤིན་ཏུ་ཕྱུག་པོ་ཡིན་པས་དེ་ཐོས་ནས་སེམས་སྐྱོ་པོར་འགྱུར།
LUK 18:24 མི་དེར་གཟིགས་ནས་ཡེ་ཤུས་“ཕྱུག་པོ་རྣམས་དཀོན་མཆོག་གི་རྒྱལ་སྲིད་ནང་དུ་འགྲོ་བ་ཤིན་ཏུ་དཀའོ།
LUK 18:25 མི་ཕྱུག་པོ་ཞིག་དཀོན་མཆོག་གི་རྒྱལ་སྲིད་ནང་ལ་འགྲོ་བ་ལས་རྔ་མོང་ཞིག་ཁབ་མིག་བརྒྱུད་ནས་འགྲོ་བ་སླའོ་”ཞེས་གསུངས་པ་དང༌།
LUK 18:26 དེ་ཐོས་པ་རྣམས་ཀྱིས་“འོ་ན་སུ་ཞིག་ལ་ཐར་བ་ཐོབ་ཐུབ་བམ་”ཞེས་ཞུས།
LUK 18:27 ཡེ་ཤུས་“དེ་ནི་མི་རྣམས་ལ་མི་སྲིད་ཀྱང་དཀོན་མཆོག་ལ་སྲིད་དོ་”ཞེས་གསུངས།
LUK 18:28 དེ་ནས་པེ་ཏྲོས་“ཁྱེད་ཀྱིས་གཟིགས་དང༌། ང་ཚོས་ཐམས་ཅད་དོར་ནས་ཁྱེད་ཀྱི་རྗེས་སུ་འབྲངས་པ་ཡིན་”ཞེས་ཞུས་པ་ལ།
LUK 18:29 ཡེ་ཤུས་ཁོ་ཚོར་“ངས་ཁྱེད་ཚོར་བདེན་པར་ཟེར་རྒྱུར། མི་སུ་ཞིག་གིས་དཀོན་མཆོག་གི་རྒྱལ་སྲིད་ཀྱི་དོན་དུ་རང་གི་ཁྱིམ་ཚང་ངམ། བཟའ་ཟླའམ། སྤུན་ནམ། ཕ་མའམ། བུ་ཕྲུག་བཅས་བཞག་ན།
LUK 18:30 མི་དེ་ལ་ཚེ་འདིར་ལྡབ་འགྱུར་གྱིས་མང་པོ་འཐོབ་པར་འགྱུར་ལ། མ་འོངས་པར་དཔག་ཏུ་མེད་པའི་ཚེ་འཐོབ་པར་ངེས་”ཞེས་གསུངས།
LUK 18:31 དེ་ནས་ཁོང་གིས་བཅུ་གཉིས་པོ་རྣམས་ཟུར་དུ་ཁྲིད་དེ་ཁོ་ཚོར་“ལྟོས་དང༌། ད་ང་ཚོ་ཡེ་རུ་ཤ་ལེམ་གྲོང་ཁྱེར་དུ་འགྲོ་ལ། ལུང་སྟོན་པས་མིའི་རིགས་ཀྱི་བུའི་སྐོར་བྲིས་ཡོད་པ་ཐམས་ཅད་འགྲུབ་པར་འགྱུར།
LUK 18:32 མིའི་རིགས་ཀྱི་བུ་ཕྱི་པ་རྣམས་ལ་གཏད་ནས་ཁོ་ཚོས་ཁོང་ལ་འཕྱ་དམོད་བྱེད་དེ་ཁ་ངན་བཤད་ནས་མཆིལ་མ་གཏོར་བར་འགྱུར་བ་དང༌།
LUK 18:33 རྟ་ལྕག་གིས་བརྡུངས་ནས་གསོད་པར་འགྱུར། དེ་ནས་ཉིན་གསུམ་པར་ཁོང་སླར་གསོན་པར་འགྱུར་རོ་”ཞེས་གསུངས།
LUK 18:34 ཉེ་གནས་རྣམས་ཀྱིས་གསུང་དེའི་དོན་ཧ་མ་གོ དོན་དེ་ཁོ་ཚོ་ལ་སྦས་ཡོད་པས་མ་རྟོགས།
LUK 18:35 དེ་ནས་ཡེ་ཤུ་ཡེ་རུ་ཀོ་ཞེས་བྱ་བའི་གྲོང་ཁྱེར་དང་ཉེ་བར་བྱོན་སྐབས། སྤྲང་པོ་ལོང་བ་ཞིག་ལམ་ཁར་བསྡད་ནས་སློང་བཞིན་ཡོད།
LUK 18:36 སྤྲང་པོ་དེས་མི་ཚོགས་ཕར་འགྲོ་བཞིན་པའི་སྒྲ་ཐོས་ནས་མི་གཞན་ལ་གང་འབྱུང་བའི་སྐོར་སྐད་ཆ་དྲིས་པ་ན།
LUK 18:37 མི་དེ་ཚོས་“ན་ཙ་རེལ་པ་ཡེ་ཤུ་ཕར་ཕེབས་བཞིན་འདུག་”ཅེས་བཤད།
LUK 18:38 སྤྲང་པོ་དེས་སྐད་ཆེན་པོས་“ཀྱེ། ཡེ་ཤུ་དཱ་བིད་ཀྱི་སྲས། ང་ལ་ཐུགས་རྗེས་གཟིགས་དང་”ཞེས་ཞུས།
LUK 18:39 སྔོན་ལ་འགྲོ་མཁན་རྣམས་ཀྱིས་ཁོ་ལ་ཁ་རོག་སྡོད་ཅེས་ནན་གྱིས་བསྐུལ་ནའང༌། ཁོས་དེ་བས་སྐད་ཆེན་པོས་“ཀྱེ། དཱ་བིད་ཀྱི་སྲས། ཁྱེད་ཀྱིས་ང་ལ་ཐུགས་རྗེས་གཟིགས་རོགས་”ཞེས་ཞུས།
LUK 18:40 དེ་ནས་ཡེ་ཤུས་ཕེབས་མཚམས་བཞག་སྟེ་“ལོང་བ་དེ་ཚུར་ཁྲིད་ཅིག་”ཅེས་བཀའ་གནང༌། མི་དེ་ཡེ་ཤུའི་མདུན་དུ་སླེབས་ནས་ཁོང་གིས་ཁོ་ལ་
LUK 18:41 “ངས་ཁྱེད་ལ་གང་བྱེད་དགོས་སམ་”ཞེས་གསུངས་པ་དང༌། མི་ལོང་བ་དེས་“སློབ་དཔོན་ལགས། ངའི་མིག་གིས་ཡང་བསྐྱར་མཐོང་ནུས་པར་མཛོད་”ཅེས་ཞུས།
LUK 18:42 ཡེ་ཤུས་ཁོ་ལ་“ཁྱེད་ཀྱི་མིག་གིས་མཐོང་བར་གྱུར་ཅིག ཁྱེད་ཀྱི་དད་པས་གསོས་ཟིན་ནོ་”ཞེས་གསུངས་མ་ཐག
LUK 18:43 ཁོའི་མིག་གིས་མཐོང་བར་གྱུར་བས་དཀོན་མཆོག་ལ་བསྟོད་པ་ཕུལ་ཏེ་ཁོང་གི་རྗེས་སུ་འབྲངས། མི་ཐམས་ཅད་ཀྱིས་དེ་མཐོང་ནས་ཁོ་ཚོའང་དཀོན་མཆོག་ལ་བསྟོད་པ་ཕུལ་ལོ། །
LUK 19:1 དེ་ནས་ཁོང་ཡེ་རུ་ཀོ་གྲོང་ཁྱེར་བརྒྱུད་ནས་ཕེབས་སྐབས།
LUK 19:2 མི་ཕྱུག་པོ་སཱ་ཀཱ་ཟེར་བའི་ཁྲལ་སྡུད་མཁན་དཔོན་པོ་དེར་ཡོད།
LUK 19:3 ཁོས་ཡེ་ཤུ་སུ་ཡིན་པ་མཐོང་བར་འདོད་ཀྱང་མ་ཐུབ། གང་ལགས་ཟེར་ན། མི་ཚོགས་མང་པོ་ཞིག་ཡོད་པ་དང༌། ཁོ་གཟུགས་པོ་ཆུང་ངུ་ཡིན་པས་སོ།
LUK 19:4 དེའི་ཕྱིར་ཁོ་ཡེ་ཤུའི་ཕེབས་ལམ་གྱི་མདུན་དུ་བརྒྱུགས་ནས་ཁོང་ལ་ལྟ་བར་སུ་ཀོ་མོར་ཞེས་ཟེར་བའི་ཤིང་སྡོང་ཆེན་པོ་ཞིག་འཛེགས།
LUK 19:5 ཡེ་ཤུ་ས་ཆ་དེར་ཕེབས་ནས་ཡར་གཟིགས་ཏེ་ཁོ་ལ་“སཱ་ཀཱ མགྱོགས་པོར་མར་འབབ་ཅིག དེ་རིང་ཁྱེད་ཀྱི་ཁྱིམ་ཚང་ལ་སྡོད་དགོས་”ཞེས་གསུངས་པ་ན།
LUK 19:6 ཁོ་མྱུར་དུ་མར་བབས་ནས་དགའ་བའི་ངང་ནས་ཁོང་ལ་སྣེ་ལེན་ཞུས།
LUK 19:7 དེ་མཐོང་བ་ཐམས་ཅད་ཀྱིས་ཡིད་མ་རངས་པའི་གཏམ་བཤད་དེ་“མི་སྡིག་ཉེས་ཅན་གྱི་ཁྱིམ་ལ་མགྲོན་དུ་སོང་”ཞེས་སྨྲས།
LUK 19:8 སཱ་ཀཱ་དེར་བསྡད་དེ་གཙོ་བོ་ཡེ་ཤུ་ལ་“གཙོ་བོ། གཟིགས་དང༌། ང་ལ་ཡོད་པའི་རྒྱུ་ནོར་ཕྱེད་ཀ་དབུལ་པོ་རྣམས་ལ་སྦྱིན་པ་དང༌། གལ་ཏེ་ངས་སུ་ཞིག་ལ་མགོ་སྐོར་བཏང་ནས་དངུལ་ཐོབ་ན་ངས་ཕྱིར་ལྡབ་བཞི་འཇལ་བར་བྱ་”ཞེས་སྨྲས།
LUK 19:9 ཡེ་ཤུས་ཁོ་ལ་“དེ་རིང་ཁྱིམ་ཚང་འདིར་ཐར་པ་བབས་ཡོད་དོ། གང་ཡིན་ཞེ་ན། མི་འདི་ཡང་ཨབ་ར་ཧམ་གྱི་བུ་ཞིག་ཡིན།
LUK 19:10 མིའི་རིགས་ཀྱི་བུ་ནི་བརླག་པ་རྣམས་འཚོལ་བ་དང་སྐྱོབ་པའི་ཆེད་དུ་ཡོང་ངོ་”ཞེས་གསུངས།
LUK 19:11 ཁོ་ཚོས་དོན་དེ་རྣམས་ཉན་པའི་རིང་ལ། ཡེ་ཤུ་ཡེ་རུ་ཤ་ལེམ་དང་ཉེ་བར་ཡོད་པས། མི་དེ་ཚོ་དཀོན་མཆོག་གི་རྒྱལ་སྲིད་འཕྲལ་དུ་མངོན་པར་འགྱུར་སྙམ་པས་ཁོང་གིས་ཁོ་ཚོར་དཔེའི་སྒོ་ནས་འདི་ལྟར་གསུངས་
LUK 19:12 “སྐུ་དྲག་གཅིག་རྒྱལ་བའི་དབང་ཐོབ་པའི་ཆེད་དུ་ཡུལ་ཐག་རིང་ལ་སོང་ནས་ཕྱིར་ལོག་པར་བསམས་ཏེ།
LUK 19:13 རང་གི་གཡོག་པོ་བཅུ་བོས་ནས་ཁོ་ཚོར་མི་ནཱ་ཞེས་པའི་གསེར་ཊམ་ཀ་བཅུ་སྤྲད་ཅིང༌། ང་མ་སླེབས་པའི་བར་དུ་དངུལ་འདི་ཡིས་ཉོ་ཚོང་བྱོས་ཤིག་ཅེས་སྨྲས།
LUK 19:14 འོན་ཀྱང་ཁོའི་འབངས་མི་རྣམས་ཀྱིས་ཁོ་ལ་སྡང་བས། མི་འདི་ང་ཚོའི་རྒྱལ་པོར་འགྱུར་བར་མི་འདོད་ཅེས་ཟེར་བའི་ཕྱིར་ཕོ་ཉ་འགའ་ཁོའི་རྗེས་སུ་བཏང༌།
LUK 19:15 རྒྱལ་སྲིད་ཐོབ་ནས་ཕྱིར་ལོག་སྐབས་སུ་དངུལ་སྤྲོད་པའི་གཡོག་པོས་ཚོང་ལས་བྱས་ནས་དངུལ་ཅི་ཙམ་ཐོབ་པ་ཤེས་པའི་ཆེད་དུ་ཁོས་དེ་རྣམས་མདུན་དུ་བོས་དགོས་པའི་བཀའ་བཏང༌།
LUK 19:16 གཡོག་པོ་དང་པོ་དེ་ཁོའི་མདུན་དུ་ཡོང་ནས། མི་དབང་ཆེན་པོ་ལགས། ཁྱེད་ཀྱི་མི་ནཱ་གཅིག་གིས་མི་ནཱ་བཅུའི་ཁེ་བཟང་ཐོབ་འབྱུང་ཞེས་བཤད།
LUK 19:17 རྒྱལ་པོས་ཁོ་ལ་ལེགས་སོ། གཡོག་པོ་བཟང་པོ་ཁྱོད་དོན་ཆུང་ངུ་ལ་བློ་གཏད་ཆོག་པ་ཡིན་པས་ངས་ཁྱོད་ལ་གྲོང་ཁྱེར་བཅུའི་དབང་སྟེར་བར་བྱ་ཞེས་སྨྲས།
LUK 19:18 གཉིས་པ་དེ་ཡོང་ནས་ཁོས། མི་དབང་ཆེན་པོ་ལགས། ཁྱེད་ཀྱི་མི་ནཱ་གཅིག་གིས་མི་ནཱ་ལྔ་ཡི་ཁེ་བཟང་ཐོབ་འབྱུང་ཞེས་བཤད།
LUK 19:19 རྒྱལ་པོས་མི་དེ་ལ། ངས་ཁྱོད་ལའང་གྲོང་ཁྱེར་ལྔ་ཡི་དབང་སྟེར་བར་བྱ་ཞེས་སྨྲས།
LUK 19:20 གཡོག་པོ་གཞན་ཞིག་ཡོང་ནས་ཁོས། མི་དབང་ཆེན་པོ་ལགས། ཁྱེད་ཀྱི་མི་ནཱ་འདི་རུ་ཡོད། ངས་དེ་རས་ཀྱིས་བཏུམས་ཏེ་ཉར་ཚགས་བྱས།
LUK 19:21 གང་ལགས་ཟེར་ན། ཁྱེད་ནི་དོ་ནན་པོ་ཞིག་ཡིན་པས་ང་ཁྱེད་ལ་འཇིགས། ཁྱེད་ཀྱིས་རྒྱུ་ནོར་མ་བསགས་པ་དེ་ལེན་པ་དང༌། ས་བོན་མ་བཏབ་པ་དེ་རྔ༌།
LUK 19:22 རྒྱལ་པོས་ཁོ་ལ། གཡོག་པོ་ངན་པ་ཁྱོད་ཀྱིས་སྨྲས་པའི་ཚིག་གིས་ངས་ཁྱོད་ལ་ཁྲིམས་གཅོད་གཏོང་རྒྱུ་ཡིན། ང་ནི་དོ་ནན་པོ་ཞིག་ཡིན་པས། ངས་རྒྱུ་ནོར་མ་བསགས་པ་དེ་ལེན་པ་དང༌། ས་བོན་མ་བཏབ་པ་དེ་རྔ་བ་ཁྱོད་ཀྱིས་ཤེས་སམ།
LUK 19:23 ངས་ཁྱོད་ལ་སྤྲད་པ་དེ་ཁྱོད་ཀྱིས་ཅིའི་ཕྱིར་དངུལ་བུན་གཏོང་མཁན་ལ་མ་བཅོལ། དེ་ལྟར་བྱས་ན་ང་འདིར་སླེབས་ནས་སྐྱེད་ཁ་དང་བཅས་པའི་དངུལ་ལེན་རྒྱུ་ཡོད་ཅེས་ཟེར།
LUK 19:24 དེ་ནས་རྒྱལ་པོས་ཉེ་འཁོར་དུ་ཡོད་པའི་མི་རྣམས་ལ་ཁོ་ནས་མི་ནཱ་དེ་ལེན་ཞིང༌། མི་ནཱ་བཅུ་ཡོད་པ་དེ་ལ་སྟེར་ཞིག་ཅེས་བཤད་ནས།
LUK 19:25 ཁོ་ཚོས་མི་དབང་ཆེན་པོ་ལགས། ཁོ་ལ་མི་ནཱ་བཅུ་ཡོད་ཅེས་སྨྲས།
LUK 19:26 ངས་ཁྱོད་ཚོ་ལ་ཟེར་རྒྱུར། སུ་ལ་ཡོད་པ་དེ་ལ་སྟེར་བར་འགྱུར། འོན་ཀྱང་སུ་ལ་མེད་པ་དེ་ལ་ཉུང་ངུ་ཙམ་ཡོད་པ་དེ་ཡང་ལེན་པར་འགྱུར།
LUK 19:27 འོན་ཀྱང་ང་རྒྱལ་པོར་འགྱུར་བར་མི་འདོད་མཁན་དགྲ་བོ་རྣམས་ནི་འདིར་ཁྲིད་ནས་ངའི་མདུན་དུ་སོད་ཅིག་”ཅེས་གསུངས།
LUK 19:28 ཡེ་ཤུས་དེ་ལྟར་གསུངས་པའི་རྗེས་སུ་ཡེ་རུ་ཤ་ལེམ་ལ་སྔོན་དུ་ཕེབས།
LUK 19:29 ཁོང་སྐྱུར་རུ་ཤིང་གི་རི་དང་ཉེ་བའི་གྲོང་སྡེ་པེ་ཕ་གེ་དང་པེ་ཐན་ཡཱ་ལ་བྱོན་པའི་ཚེ་ཡེ་ཤུས་ཉེ་གནས་གཉིས་མངགས་ཏེ།
LUK 19:30 ཁོ་ཚོར་“ཁྱེད་ཚོ་མདུན་དུ་ཡོད་པའི་གྲོང་སྡེ་དེ་ལ་སོང་དང༌། དེར་སླེབས་མ་ཐག་ཏུ་མི་སུས་ཀྱང་བཞོན་མ་མྱོང་བའི་བོང་བུ་ཞིག་བཏགས་ཡོད་པ་མཐོང་བར་འགྱུར། དེ་བཀྲོལ་ནས་འདིར་ཁྲིད་ཤོག
LUK 19:31 གལ་ཏེ་སུ་ཞིག་གིས་ཁྱེད་ཚོར་ཅིའི་ཕྱིར་དེ་ལྟར་བྱས་པ་ཡིན་ནམ་ཞེས་དྲིས་ན། ཁྱེད་གཉིས་ཀྱིས་འདི་གཙོ་བོ་ལ་མཁོ་བ་ཡིན་ཞེས་སྨྲོས་”ཞེས་གསུངས།
LUK 19:32 ཁོང་གིས་ཇི་ལྟར་གསུངས་པ་བཞིན་དུ་ཕར་བཏང་བ་རྣམས་ཀྱིས་དེ་ལྟར་མཐོང༌།
LUK 19:33 ཁོ་ཚོས་བོང་བུ་འགྲོལ་བཞིན་པའི་དུས་སུ་བོང་བུ་དེའི་བདག་པོ་རྣམས་ཀྱིས་དེ་གཉིས་ལ་“ཅིའི་ཕྱིར་བོང་བུ་དེ་བཀྲོལ་བ་ཡིན་ནམ་”ཞེས་དྲིས་པ་ན།
LUK 19:34 ཁོ་ཚོས་“འདི་གཙོ་བོ་ལ་མཁོ་བ་ཡིན་”ཞེས་སྨྲས།
LUK 19:35 བོང་བུ་དེ་ཡེ་ཤུའི་དྲུང་དུ་ཁྲིད་ནས་ཁོ་གཉིས་ཀྱིས་རང་གི་གྱོན་གོས་བོང་བུའི་རྒྱབ་ལ་བཏིང་བ་དང་ཁོང་དེ་ལ་བཅིབས།
LUK 19:36 ཁོང་ཕར་ཕེབས་སྐབས་མི་རྣམས་ཀྱིས་རང་གི་གྱོན་ཆས་ལམ་ལ་བཏིང༌།
LUK 19:37 ཁོང་སྐྱུར་རུ་ཤིང་གི་རི་ནས་ལམ་ལ་མར་བབས་པའི་གནས་དང་ཉེ་བར་ཕེབས་དུས་ཁོ་ཚོས་ངོ་མཚར་བའི་མཛད་པ་མང་པོ་མཐོང་མྱོང་བས། ཉེ་གནས་ཀྱི་ཚོགས་ཐམས་ཅད་དགའ་ཞིང་སྐད་ཆེན་པོས་དཀོན་མཆོག་ལ་བསྟོད་བསྔགས་ཕུལ་ཏེ་
LUK 19:38 “གཙོ་བོའི་མཚན་གྱི་ཐོག་ནས་བྱོན་པའི་རྒྱལ་པོར་བྱིན་རླབས་ཡོང་བར་ཤོག དཀོན་མཆོག་གི་ཞིང་ཁམས་སུ་ཞི་བདེ་ཡོད་པར་འགྱུར་ལ། བླ་ན་མེད་པའི་གནས་སུ་བཞུགས་པའི་དཀོན་མཆོག་ལ་བསྟོད་པར་བྱའོ་”ཞེས་བསྒྲགས།
LUK 19:39 མི་ཚོགས་ནང་ནས་ཕཱ་རུ་ཤི་པ་ཁ་ཤས་ཀྱིས་ཁོང་ལ་“རྒན་ལགས། ཁྱེད་ཀྱིས་ཉེ་གནས་རྣམས་ལ་བཀའ་བཀྱོན་མཛོད་ཅིག་”ཅེས་བཤད།
LUK 19:40 ལན་དུ་ཡེ་ཤུས་“ངས་ཁྱེད་རྣམས་ལ་ཟེར་རྒྱུར། གལ་སྲིད་འདི་ཚོ་ཁ་རོག་བསྡད་ན། རྡོ་རྣམས་ཀྱིས་ཀྱང་སྐད་སྒྲོག་པར་འགྱུར་”ཞེས་གསུངས།
LUK 19:41 ཡེ་རུ་ཤ་ལེམ་དང་ཉེ་བར་བྱོན་སྐབས་ཁོང་གིས་གྲོང་ཁྱེར་གཟིགས་ནས་བཤུམས་ཏེ་
LUK 19:42 “གལ་ཏེ་ཁྱོད་ཀྱིས་ཀྱང་ཉིན་མོ་འདིར་ཞི་བདེའི་ཐབས་རྟོགས་པ་ཡིན་ན༌༌༌༌། ད་དོན་དེ་རྣམས་སྦས་ཡོད་པས་ཁྱོད་ཀྱིས་མི་རྟོགས།
LUK 19:43 ཁྱོད་ཀྱི་དགྲ་བོ་རྣམས་ཀྱིས་ཁྱོད་ཀྱི་མཐའ་སྐོར་ལ་ལྕགས་རི་རྒྱག་པར་འགྱུར་ཞིང༌། ཕྱོགས་བཞི་ནས་སྐོར་ཞིང་ཕྱོགས་ཚང་མ་ལ་དགག་པའི་དུས་ལ་འབབ་ངེས་ཡིན།
LUK 19:44 ཁྱོད་ལ་ཐུགས་རྗེས་གཟིགས་པའི་དུས་དེ་མ་ཤེས་པས། ཁྱོད་ཀྱི་དགྲ་བོ་རྣམས་ཀྱིས་ཁྱོད་དང་ཁྱོད་ཀྱི་ར་བའི་ནང་གི་ཕྲུ་གུ་རྣམས་ས་ལ་བརྡབས་ནས། ཁྱོད་ཀྱི་ནང་ལ་རྡོ་གཅིག་གི་སྟེང་དུ་རྡོ་གཅིག་ཀྱང་ལུས་མི་ཡོང་”ཞེས་གསུངས།
LUK 19:45 དེ་ནས་ཡེ་ཤུ་ཡ་ཧུ་དཱ་པའི་མཆོད་ཁང་ཆེན་མོའི་ཁྱམས་རར་ཞུགས་ནས། དེར་ཡོད་པའི་ཉོ་ཚོང་མཁན་རྣམས་ཕྱི་ལ་བཏོན་པར་མཛད།
LUK 19:46 ཁོང་གིས་མི་དེ་ཚོར་“དཀོན་མཆོག་གི་གསུང་རབ་ལས། ངའི་ཁང་པ་ལ་སྨོན་ལམ་འདེབས་སའི་ཁང་པ་ཟེར་བར་འགྱུར་ཞེས་འཁོད། འོན་ཀྱང་ཁྱོད་ཚོས་ཇག་ཚང་ལྟ་བུ་ཞིག་ཏུ་བསྒྱུར་འདུག་”ཅེས་གསུངས།
LUK 19:47 ཡེ་ཤུས་ཉིན་ལྟར་མཆོད་ཁང་ཆེན་མོའི་ཁྱམས་རར་ཆོས་གསུངས། ཡ་ཧུ་དཱ་པའི་བླ་ཆེན་དང༌། ཆོས་ཁྲིམས་ལ་མཁས་པའི་མི། ཡུལ་མིའི་དཔོན་པོ་བཅས་ཀྱིས་ཁོང་གསོད་པའི་གོ་སྐབས་བཙལ་ན་ཡང༌།
LUK 19:48 ཐབས་གང་ཡང་མ་རྙེད། གང་ཡིན་ཟེར་ན། མི་ཐམས་ཅད་ཀྱིས་ཁོང་གི་གསུང་ལ་ཞིབ་ཏུ་ཉན་པས་སོ། །
LUK 20:1 དེ་ནས་ཉིན་གཅིག་ལ་ཡེ་ཤུས་མཆོད་ཁང་ཆེན་མོར་མི་རྣམས་ལ་ཆོས་གསུངས་པ་དང༌། མི་རྣམས་ལ་འཕྲིན་བཟང་སྒྲོག་པའི་དུས་སུ། ཡ་ཧུ་དཱ་པའི་བླ་ཆེན་དང༌། ཆོས་ཁྲིམས་ལ་མཁས་པའི་མི། རྒན་པོ་རྣམས་དང་མཉམ་དུ་ཁོང་གི་དྲུང་དུ་ཡོང་སྟེ།
LUK 20:2 མི་དེ་ཚོས་“ཁྱེད་ཀྱིས་དབང་ཆ་གང་གི་སྒོ་ནས་དོན་འདི་ཚོ་མཛད། ཡང་ན་སུ་ཞིག་གིས་ཁྱེད་ལ་དོན་འདི་རྣམས་མཛད་པའི་དབང་ཆ་སྤྲད་པ་ཡིན་ནམ། ང་ཚོར་ལན་ཐོབ་ཅིག་”ཅེས་སྨྲས་པ་ལ།
LUK 20:3 ཡེ་ཤུས་“ངས་ཀྱང་ཁྱེད་རྣམས་ལ་དྲི་བ་གཅིག་འདྲི་རྒྱུ་ཡིན། དེའི་ལན་ཐོབ་ཅིག
LUK 20:4 ཡོ་ཧ་ནན་གྱི་ཁྲུས་གསོལ་མཛད་པའི་དབང་དེ་དཀོན་མཆོག་ནས་བྱུང་ངམ། མི་ནས་བྱུང་”ཞེས་གསུངས།
LUK 20:5 ཁོ་ཚོས་ཕན་ཚུན་གཏམ་གླེང་བྱས་ཤིང་“གལ་ཏེ་དཀོན་མཆོག་ནས་བྱུང་ཞེས་བཤད་ན། ཁོང་གིས་འོ་ན་ཁྱེད་རྣམས་ཀྱིས་ཅིའི་ཕྱིར་ཁོང་ལ་དད་པ་མ་བྱས་སམ་ཞེས་གསུང་ངེས་ལ།
LUK 20:6 ཡང་མི་ལས་བྱུང་ཞེས་བཤད་ན། མི་ཐམས་ཅད་ཀྱིས་ཡོ་ཧ་ནན་ལུང་སྟོན་པར་བརྩིས་པའི་རྐྱེན་གྱིས་ང་ཚོ་རྡོ་རུབ་བཏང་སྟེ་གསད་རྒྱུ་རེད་”ཅེས་སྨྲས།
LUK 20:7 དེའི་ཕྱིར་ཁོ་ཚོས་“གང་ནས་བྱུང་ང་ཚོས་མི་ཤེས་”ཞེས་ལན་བཏབ།
LUK 20:8 ཡེ་ཤུས་“དེས་ན་ངས་ཀྱང་དབང་ཆ་གང་གིས་དོན་འདི་རྣམས་བྱེད་པ་མི་ཤོད་”ཅེས་གསུངས།
LUK 20:9 དེ་ནས་དཔེའི་སྒོ་ནས་ཡེ་ཤུས་མི་རྣམས་ལ་“མི་ཞིག་གིས་རྒུན་འབྲུམ་གྱི་ལྡུམ་ར་ཞིག་བཟོས་ཤིང༌། ལྡུམ་རའི་ལས་མཁན་རྣམས་ལ་བོགས་མར་བཏང་ནས་ཡུལ་གཞན་དུ་སོང་སྟེ་ཡུན་རིང་པོར་བསྡད།
LUK 20:10 དེ་ནས་དུས་རན་པས་ཁོང་གིས་ལྡུམ་རའི་ལས་མཁན་རྣམས་ནས་ལྡུམ་རའི་རྒུན་འབྲུམ་གྱི་འབྲས་བུའི་སྐལ་བ་ལེན་པའི་ཕྱིར་གཡོག་པོ་ཞིག་བཏང༌། འོན་ཀྱང་མི་དེ་ཚོས་གཡོག་པོ་དེ་བརྡུངས་རྗེས་ལག་ཟུང་སྟོང་པར་ཕྱིར་བཏང༌།
LUK 20:11 ཡང་ཁོང་གིས་གཡོག་པོ་གཞན་ཞིག་བཏང་བས། ལྡུམ་རའི་ལས་མཁན་རྣམས་ཀྱིས་གཡོག་པོ་དེའང་བརྡུངས་ཤིང༌། ཁ་ངན་བཤད་ནས་ལག་ཟུང་སྟོང་པར་ཕྱིར་བཏང༌།
LUK 20:12 ཡང་ཁོང་གིས་གཡོག་པོ་གསུམ་པ་དེ་མངགས་པའང་དེ་རྣམས་ཀྱིས་རྨས་སྐྱོན་བཏང་ནས་ཕྱིར་བཏོན།
LUK 20:13 དེ་ནས་ལྡུམ་རའི་བདག་པོས་ངས་ཅི་བྱེད་པར་བྱ། ངའི་གཅེས་པའི་བུ་གཏོང་རྒྱུ་ཡིན། ཁོ་ཚོས་ངའི་བུ་ལ་བརྩི་བཀུར་བྱེད་པར་འགྱུར་ཞེས་གསུངས།
LUK 20:14 འོན་ཀྱང་ལྡུམ་རའི་ལས་མཁན་རྣམས་ཀྱིས་བུ་མཐོང་ནས་ཕན་ཚུན་ལ། མི་འདི་ནི་ཕ་ཤུལ་འཛིན་མཁན་ཡིན་པས། ཤུལ་འཛིན་དེ་འཐོབ་པའི་ཆེད་དུ་ཁོ་རང་གསོད་པར་བྱ་ཞེས་སྨྲས་ཏེ།
LUK 20:15 ཁོ་རང་རྒུན་འབྲུམ་གྱི་ལྡུམ་རའི་ཕྱི་རོལ་ཏུ་བསྐྲད་ནས་བསད། དེས་ན་རྒུན་འབྲུམ་གྱི་ལྡུམ་རའི་བདག་པོས་ཁོ་ཚོར་གང་བྱེད་ཡོང༌།
LUK 20:16 ཁོང་ཕེབས་ནས་ལྡུམ་རའི་ལས་མཁན་རྣམས་མེད་པར་བཟོས་ཏེ་རྒུན་འབྲུམ་གྱི་ལྡུམ་ར་མི་གཞན་ལ་སྤྲོད་པར་བྱེད་དོ་”ཞེས་གསུངས། དེ་ཐོས་ནས་ཁོ་ཚོས་“དེ་ལྟར་མི་སྲིད་”ཅེས་བཤད།
LUK 20:17 འོན་ཀྱང་ཡེ་ཤུས་ཁོ་ཚོར་ནན་གྱིས་བལྟས་ནས་“དཀོན་མཆོག་གི་གསུང་རབ་ལས། བཟོ་བོ་རྣམས་ཀྱིས་དོར་བའི་རྡོ། ། ཁང་པའི་རྨང་རྡོར་གྱུར་བ་ཡིན། ། ཞེས་པའི་དོན་ཅི་ཡིན།
LUK 20:18 སུ་ཞིག་རྡོ་དེའི་སྟེང་དུ་འགྱེལ་ན་དུམ་བུར་ཆག་པར་འགྱུར། རྡོ་དེ་མི་སུ་ཞིག་ལ་ལྷུངས་ན་དེས་ཁོ་མནན་པར་བྱ་”ཞེས་གསུངས།
LUK 20:19 ཆོས་ཁྲིམས་ལ་མཁས་པའི་མི་དང་བླ་ཆེན་རྣམས་ཀྱིས་དཔེ་དེ་ཁོ་རང་ཚོའི་སྐོར་ལ་གསུངས་པ་ཤེས་ཏེ་དུས་དེ་རང་ལ་ཡེ་ཤུ་འཛིན་པའི་ཐབས་བཙལ་ཡང༌། མི་ཚོགས་ལ་འཇིགས།
LUK 20:20 དེར་བརྟེན་ཁོ་ཚོས་ཁོང་ལ་ལྐོག་ལྟ་བྱས་ཏེ། ཡེ་ཤུ་ལ་ཁྲིམས་དང་འགལ་བའི་གཏམ་བཤད་གནང་དུ་འཇུག་ཆེད་མི་དྲང་པོ་ཡིན་ཚུལ་སྟོན་པའི་ལྟ་མྱུལ་པ་ཁོང་གི་དྲུང་དུ་བཏང༌། དེ་ནི་ཁོང་སྤྱི་ཁྱབ་དབང་ཅན་གྱི་ལག་ཏུ་གཏོང་བའི་ཕྱིར་ཡིན།
LUK 20:21 ཁོ་ཚོས་ཁོང་ལ་“སྟོན་པ་ལགས། ཁྱེད་ཀྱིས་སྐྱོན་མེད་པར་ཆོས་བསྟན་གནང་བ་དང༌། ཕྱོགས་རིས་མེད་པར་དཀོན་མཆོག་གི་ལམ་ཡང་དག་པར་བདེན་པར་སྟོན་པ་དེ་ང་ཚོས་ཤེས།
LUK 20:22 དཀོན་མཆོག་གི་བཀའ་ཁྲིམས་ལྟར་ན་ང་ཚོས་རྒྱལ་པོ་ཆེན་པོ་སེ་སར་ལ་ཁྲལ་འཇལ་རུང་ངམ་མི་རུང་”ཞེས་དྲིས།
LUK 20:23 ཁོང་གིས་དེ་རྣམས་ཀྱི་གཡོ་སྒྱུ་མཁྱེན་ཏེ་ཁོ་ཚོར་
LUK 20:24 “དེ་ཎ་རིའི་དངུལ་ཊམ་ཀ་གཅིག་ང་ལ་སྟོན་ཅིག རི་མོ་དང་ཡི་གེ་འདི་སུའི་རེད་དམ་”ཞེས་བཀའ་འདྲི་གནང་ནས་ཁོ་ཚོས་“སེ་སར་རྒྱལ་པོའི་རེད་”ཅེས་སྨྲས།
LUK 20:25 ཁོང་གིས་ཁོ་ཚོར་“དེས་ན་གང་ཞིག་སེ་སར་རྒྱལ་པོའི་ཡིན་པ་དེ་སེ་སར་ལ་ཕུལ་ཞིག གང་ཞིག་དཀོན་མཆོག་གི་ཡིན་པ་དེ་དཀོན་མཆོག་ལ་ཕུལ་ཞིག་”ཅེས་གསུངས།
LUK 20:26 ཁོ་ཚོས་མི་ཚོགས་ཀྱི་མདུན་དུ་ཡེ་ཤུ་ལ་ཁྲིམས་དང་འགལ་བའི་གཏམ་བཤད་གནང་དུ་མ་བཅུག་སྟེ། ཁོང་གི་ལན་ལ་ངོ་མཚར་བར་གྱུར་བས་ཁ་རོག་བསྡད།
LUK 20:27 དེ་ནས་ཡང་འཆི་བ་ནས་སླར་གསོན་པ་མེད་ཅེས་ཟེར་མཁན་སཱ་ཅུ་སེ་པ་རྣམས་ཁོང་གི་དྲུང་དུ་ཡོང་སྟེ་
LUK 20:28 “སློབ་དཔོན་ལགས། ལུང་སྟོན་པ་མོ་ཤེའི་མདོ་ལས། གལ་སྲིད་སྐྱེས་པ་ཞིག་གི་སྤུན་ཤི་ནས་བུ་ཕྲུག་མེད་པར་བཟའ་ཟླ་གཅིག་པུ་ལུས་ན། སྐྱེས་པ་དེས་ཁོའི་བཟའ་ཟླ་བླངས་ནས་སྤུན་གྱི་དོན་དུ་རིགས་རྒྱུད་སྤེལ་དགོས་པ་ཡིན་ནོ་ཞེས་བྲིས་སོ།
LUK 20:29 ད་སྤུན་བདུན་ཡོད་དེ། སྤུན་ཆེ་བས་བཟའ་ཟླ་ཞིག་བླངས་ནས་བུ་ཕྲུག་མེད་པར་ཤི་པ་རེད།
LUK 20:30 ཡང་སྤུན་འབྲིང་བས་བུད་མེད་དེ་བླངས་ནས་བུ་ཕྲུག་མེད་པར་ཤི སྤུན་ཆུང་བས་ཀྱང་དེ་ལྟར་བྱས་ནས་བུ་ཕྲུག་མ་བྱུང་བར་ཤི དེ་བཞིན་སྤུན་བདུན་པོར་བུ་ཕྲུག་མ་བྱུང་བར་ཤི་ལ། ཐམས་ཅད་ཀྱི་གཞུག་ལ་བུད་མེད་དེའང་ཤིའོ།
LUK 20:33 འཆི་བ་ནས་སླར་གསོན་པོར་འགྱུར་བའི་དུས་སུ། སྤུན་བདུན་པོས་བུད་མེད་དེར་ཆང་ས་བརྒྱབ་མྱོང་བས་ཁོ་མོ་ནི་སྤུན་བདུན་ཡོད་པ་ལས་སུའི་བཟའ་ཟླ་ཡིན་ནམ་”ཞེས་དྲིས་པ་ན།
LUK 20:34 ཡེ་ཤུས་ཁོ་ཚོར་“དུས་འདི་དང་གཏོགས་པའི་མི་རྣམས་ཀྱིས་བག་མ་གཏོང་ལེན་བྱེད།
LUK 20:35 འོན་ཀྱང་མ་འོངས་པའི་དུས་ཀྱི་གཤིན་པོ་སླར་གསོན་པར་འོས་པ་རྣམས་ཀྱིས་ཚུར་མནའ་མ་མི་ལེན་ཞིང་ཕར་མག་པ་ཡང་མི་བསྐྱལ།
LUK 20:36 ཁོ་ཚོ་ནམ་ཡང་ཤི་མི་སྲིད། གང་ལགས་ཟེར་ན། ཁོ་ཚོ་འཆི་བ་ནས་སླར་གསོན་པ་རྣམས་ཡིན་ཏེ། དཀོན་མཆོག་གི་སྲས་ཡིན་པ་དང༌། དཀོན་མཆོག་གི་ཕོ་ཉ་རྣམས་དང་འདྲའོ།
LUK 20:37 ལུང་སྟོན་པ་མོ་ཤེའི་མདོ་ལས་ཚེར་མའི་སྒྲུང་ལྟར་དཀོན་མཆོག་གིས་མོ་ཤེ་ལ་འདི་ལྟར་གསུངས། ང་ནི་ཁྱེད་ཀྱི་མེས་པོ་ཨབ་ར་ཧམ་གྱི་དཀོན་མཆོག་དང༌། ཨི་སཱག་གི་དཀོན་མཆོག ཡ་ཀོབ་ཀྱི་དཀོན་མཆོག་ཡིན་ཞེས་གསུངས་པའི་སྒོ་ནས་མོ་ཤེ་རང་གིས་འཆི་བ་རྣམས་གསོན་པོར་ལང་དུ་གྱུར་ངེས་པར་བསྟན་པ་ཡིན།
LUK 20:38 ཁོང་ནི་གཤིན་པོ་རྣམས་ཀྱི་དཀོན་མཆོག་མ་ཡིན་ཏེ། གསོན་པོ་རྣམས་ཀྱི་དཀོན་མཆོག་ཡིན། གང་ཡིན་ཞེ་ན། ཁོང་གི་སྤྱན་སྔར་ཁོ་ཚོ་ཐམས་ཅད་གསོན་ནོ་”ཞེས་གསུངས།
LUK 20:39 ཆོས་ཁྲིམས་ལ་མཁས་པའི་མིའི་ནང་ནས་ཁ་ཤས་ཀྱིས་“སློབ་དཔོན་ལགས། ཁྱེད་ཀྱིས་ལེགས་པོ་གསུངས་”ཞེས་ཟེར།
LUK 20:40 དེའི་རྗེས་སུ་ཁོ་ཚོས་ཁོང་ལ་བཀའ་དྲི་གང་ཡང་ཞུ་མ་ནུས།
LUK 20:41 དེ་ནས་ཁོང་གིས་ཁོ་ཚོར་“སྐྱབས་མགོན་མཱ་ཤི་ཀ་ནི་ཇི་ལྟར་གནའ་རབས་ཀྱི་རྒྱལ་པོ་དཱ་བིད་ཀྱི་སྲས་ཡིན་ཟེར་བ་དེ་ཅི་ཡིན།
LUK 20:42 རྒྱལ་པོ་དཱ་བིད་རང་གིས་གསུང་རབ་ཀྱི་གསུང་མགུར་ཞེས་པའི་མདོ་ལས་འདི་ལྟར་གསུངས། དཀོན་མཆོག་གིས་ནི་ང་ཡི་གཙོ་བོ་ལ། ། ཁྱེད་ཀྱི་དགྲ་རྣམས་ཁྱེད་ཀྱི་ཞབས་འོག་ཏུ། ། ང་ཡིས་མ་བཅུག་བར་དུ་ཁྱེད་རང་ཉིད། ། ང་ཡི་གཡས་སུ་དེ་བར་བཞུགས་སུ་གསོལ། ། ཞེས་གསུངས།
LUK 20:44 དཱ་བིད་རང་ཉིད་ཀྱིས་ཁོང་ལ་གཙོ་བོ་ཞེས་ཞུས་པས་མཱ་ཤི་ཀ་ནི་དཱ་བིད་ཀྱི་སྲས་སུ་ཇི་ལྟར་འགྱུར་བ་ཡིན་ནམ་”ཞེས་གསུངས།
LUK 20:45 མི་ཐམས་ཅད་ཀྱིས་ཐོས་པའི་དུས་སུ་ཁོང་གིས་ཉེ་གནས་ཚོར་འདི་ལྟར་གསུངས་
LUK 20:46 “ཆོས་ཁྲིམས་ལ་མཁས་པའི་མི་རྣམས་ལ་དོགས་ཟོན་གྱིས་ཤིག ཁོ་རྣམས་ཀྱིས་གོས་རིང་པོ་གྱོན་ཏེ་ཕར་འགྲོ་ཚུར་འོང་བྱེད་པ་དང༌། ཁྲོམ་ལ་མི་རྣམས་ཀྱིས་ཕྱག་བྱེད་པར་མོས། ཁོ་ཚོས་འདུ་ཁང་ནང་ཁྲི་མཐོ་ས་དང་གསོལ་སྟོན་གྱི་གྲལ་མགོའི་གལ་ཆེ་སར་སྡོད་པར་དགའ།
LUK 20:47 མི་དེ་རྣམས་ཀྱིས་ཡུགས་མོ་རྣམས་ཀྱི་རྒྱུ་ནོར་ཧམ་འཕྲོག་བྱེད་ཅིང༌། ཕྱི་ཚུལ་བཅོས་མའི་ཚུལ་གྱིས་སྨོན་ལམ་རྒྱུན་རིང་འདེབས་ཁུལ་བྱེད་པས། མི་དེ་ཚོར་ལྷག་པར་དུ་ཆད་པ་ལྗིད་པོ་ཕོག་པར་འགྱུར་རོ་”ཞེས་གསུངས་སོ། །
LUK 21:1 དེ་ནས་ཡེ་ཤུས་དབུ་ཡར་བཏེགས་ནས་མི་ཕྱུག་པོ་རྣམས་ཀྱིས་དངུལ་འབུལ་སྒམ་ལ་འབུལ་བ་འཇོག་པར་གཟིགས་པ་དང༌།
LUK 21:2 དབུལ་པོ་ཡུགས་མོ་ཞིག་གིས་ཟངས་ཀྱི་སྒོར་མོ་ཆུང་ཆུང་གཉིས་དེའི་ནང་དུ་བླུགས་པར་གཟིགས་ནས།
LUK 21:3 ཁོང་གིས་“ངས་ཁྱེད་ཚོ་ལ་བདེན་པར་ཟེར་རྒྱུར། དངུལ་འབུལ་མཁན་ཐམས་ཅད་ལས་དབུལ་པོ་ཡུགས་མོ་འདིས་ཕུལ་བ་མང་ཤོས་ཡིན།
LUK 21:4 གང་ལགས་ཟེར་ན། ཁོ་ཚོ་ཐམས་ཅད་ཀྱིས་ལོངས་སྤྱོད་ལྷག་མ་མང་པོ་ནས་ཕུལ་བ་ཡིན། འོན་ཀྱང་ཁོ་མོ་ནི་རང་ལ་མེད་ཀྱང་ཅི་ཡོད་པ་ཐམས་ཅད་ཕུལ་བ་ཡིན་ནོ་”ཞེས་གསུངས།
LUK 21:5 དེ་ནས་མི་ལ་ལས་མཆོད་ཁང་ཆེན་མོ་ནི་ཅི་ལྟ་བུའི་རྡོ་མཛེས་པ་དང་དཀོན་མཆོག་ལ་ཕུལ་བའི་མཆོད་པ་རྣམས་ཀྱིས་རྒྱན་པའི་གཏམ་བཤད་དུས་ཁོང་གིས་
LUK 21:6 “ཁྱེད་ཚོས་མཐོང་བའི་ཁང་པ་ཆེན་པོ་འདི་ནི༌༌༌༌། མ་འོངས་པའི་དུས་སུ་རྡོ་ཕ་བོང་གཅིག་གི་སྟེང་དུ་རྡོ་གཅིག་ཀྱང་མི་ལུས་པར་ཐམས་ཅད་གཞིག་པར་འགྱུར་རོ་”ཞེས་གསུངས།
LUK 21:7 ཁོ་ཚོས་ཁོང་ལ་“སྟོན་པ་ལགས། དོན་འདི་རྣམས་དུས་ནམ་ཞིག་ལ་འབྱུང་ཞིང༌། དོན་འདི་ཚོ་འགྲུབ་པའི་ཚེ་རྟགས་གང་འཐོན་ཡོང་”ཞེས་ཞུས་པ་ན།
LUK 21:8 ཁོང་གིས་“མི་སུས་ཀྱང་ཁྱེད་ཚོ་མི་སླུ་བའི་ཕྱིར་དོགས་ཟོན་བྱོས་ཤིག གང་ཡིན་ཞེ་ན། མི་མང་པོས་ངའི་མིང་ཐོག་ནས་ཡོང་སྟེ། ང་རང་ཡིན་ཟེར་ཞིང༌། ད་དུས་ལ་བབས་འདུག་ཅེས་ཟེར། ཁོ་ཚོའི་རྗེས་སུ་མ་འབྲོངས།
LUK 21:9 ཁྱེད་ཚོས་དམག་འཁྲུག་དང༌། ཟིང་འཁྲུག་སྐོར་གྱི་གཏམ་ཐོས་པའི་སྐབས་སུ་མ་འཇིགས་ཤིག དོན་འདི་ཚོ་འབྱུང་ངེས་ཀྱང་དེ་ནི་དུས་རབས་ཀྱི་མཐའ་མ་ད་དུང་མ་ཡིན་”ཞེས་གསུངས།
LUK 21:10 དེ་ནས་ཁོང་གིས་ཁོ་ཚོར་“མི་རིགས་དང་མི་རིགས་འཁྲུག་ཅིང༌། རྒྱལ་ཁམས་དང་རྒྱལ་ཁམས་འཁྲུག་ཡོང༌།
LUK 21:11 ས་ཡོམ་ཆེན་པོ་དང༌། ས་ཆ་མི་གཅིག་པར་ནད་ཡམས་དང་མུ་གེ་ཡང་འབྱུང་བར་འགྱུར། ནམ་མཁའ་ནས་འཇིགས་སྐྲག་སློང་བའི་སྔ་ལྟས་འབྱུང་ཡོང༌།
LUK 21:12 དོན་དེ་ཚོ་ཐམས་ཅད་མ་འབྱུང་བའི་སྔོན་དུ་ཁོ་ཚོས་ཁྱེད་རྣམས་བཟུང་ནས་གནོད་འཚེ་བྱེད་པ་དང༌། ཡ་ཧུ་དཱ་པའི་འདུ་ཁང་དང་བཙོན་ཁང་ལ་གཏད་ཅིང༌། ངའི་མིང་གི་དོན་དུ་ས་གནས་དཔོན་པོ་དང་རྒྱལ་པོ་རྣམས་ཀྱི་མདུན་དུ་འཁྲིད་ཡོང༌།
LUK 21:13 དེས་ན་ཁྱེད་རྣམས་ལ་དཔང་པོ་བྱེད་པའི་གོ་སྐབས་འབྱུང་ཡོང༌།
LUK 21:14 དེའི་ཕྱིར་ཁྱེད་ཚོས་ལན་ཇི་ལྟར་འདེབས་པ་སྔོན་ལ་གྲ་སྒྲིག་མ་བྱེད་པར་ཐག་གཅོད་བྱོས་ཤིག
LUK 21:15 རྒྱུ་མཚན་ནི་ངས་ཁྱེད་རྣམས་ལ་ཤེས་རབ་དང་ལྡན་པའི་གཏམ་སྤྲོད་པར་བྱ། ཁྱེད་ཀྱི་ཁ་གཏད་རྣམས་ཀྱི་ནང་ནས་སུ་ཞིག་གིས་དེ་ལ་ཁས་མི་ལེན་པའམ་དགག་པ་རྒྱག་པར་མི་ཐུབ།
LUK 21:16 ཕ་མ་དང༌། སྤུན། གྲོགས་པོ་སོགས་ཀྱིས་ཀྱང་ཁྱེད་ཚོར་རྒྱབ་གཏོད་བྱེད་ལ། ཁ་གཏད་རྣམས་ཀྱིས་ཁྱེད་ཚོ་ལས་ཁ་ཤས་གསོད་པར་འགྱུར།
LUK 21:17 ཡང་ངའི་མིང་གི་དོན་དུ་མི་ཐམས་ཅད་ཀྱིས་ཁྱེད་ཚོ་ལ་སྡང་བར་བྱ།
LUK 21:18 འོན་ཀྱང་ཁྱེད་ཀྱི་མགོའི་སྐྲ་རྐང་གཅིག་ཀྱང་འཇིག་པར་མི་འགྱུར།
LUK 21:19 བཟོད་པ་སྒོམ་པའི་སྒོ་ནས་ཁྱེད་ཚོའི་སྲོག་སྐྱོབ་ངེས་ཡིན་ནོ། །
LUK 21:20 ཁྱེད་རྣམས་ཀྱིས་ཡེ་རུ་ཤ་ལེམ་གྱི་ཕྱོགས་བཞི་ལ་དམག་དཔུང་གིས་སྐོར་བ་མཐོང་སྐབས། གྲོང་ཁྱེར་དེ་གཏོར་བའི་དུས་ལ་སླེབས་ཉེ་བ་ཤེས་པར་གྱིས་ཤིག
LUK 21:21 དེའི་སྐབས་སུ་ཡ་ཧུ་དཱ་ཡུལ་དུ་ཡོད་པའི་མི་རྣམས་རི་ལ་འབྲོས་དགོས། གྲོང་ཁྱེར་ལ་ཡོད་པ་རྣམས་ཕྱིར་ཐོན་ཅིང༌། གྲོང་གསེབ་ཀྱི་མི་རྣམས་གྲོང་ཁྱེར་ནང་དུ་མ་འགྲོ་ཞིག
LUK 21:22 གང་ལགས་ཟེར་ན། གསུང་རབ་ལ་གང་བྲིས་པ་ཐམས་ཅད་འགྲུབ་སྟེ་དུས་དེ་ནི་ཆད་པ་གཅོད་པའི་ཉིན་མོ་ཡིན།
LUK 21:23 ཉིན་དེ་ཚོའི་རིང་ལ་བུད་མེད་ཕྲུ་གུ་འཁོར་བ་དང་བུ་ཕྲུག་ལ་འོ་མ་སྟེར་མཁན་རྣམས་ལ་སྙིང་རེ་རྗེ། ཡུལ་ལ་སྡུག་བསྔལ་ཆེན་པོ་འབྱུང་བ་དང༌། སྡིག་ཉེས་བྱས་པའི་རྐྱེན་གྱིས་མི་རིགས་འདི་ལ་དཀོན་མཆོག་གི་ཐུགས་ཁྲོ་འབབ་པར་འགྱུར།
LUK 21:24 ཁ་ཤས་རལ་གྲིའི་ཁ་ཡིས་གསད་པ་དང༌། ཁ་ཤས་བཙོན་པར་འགྱུར་ནས་མི་རིགས་ཐམས་ཅད་ཀྱི་ཁྲོད་དུ་འཁྲིད། ཡ་ཧུ་དཱ་པ་མིན་པའི་མི་རིགས་ཀྱི་དུས་མ་ཚར་བའི་བར་དུ་ཡེ་རུ་ཤ་ལེམ་མི་དེ་ཚོའི་རྐང་འོག་ཏུ་རྫི་བར་འགྱུར།
LUK 21:25 ཡང་ཉི་མ་དང༌། ཟླ་བ། སྐར་མའི་རྟགས་འབྱུང་བར་འགྱུར་ལ། རྒྱ་མཚོ་དང་རྦ་རླབས་ཀྱི་འུར་སྒྲ་ཐོས་ནས་ས་གཞིའི་སྟེང་གི་མི་རིགས་སེམས་འཁྲུགས་ཏེ་སྡུག་བསྔལ་ཆེན་པོ་འབྱུང་བར་འགྱུར།
LUK 21:26 བར་སྣང་ཁམས་ཀྱི་དབང་ལྡན་རྣམས་གཡོ་བར་འགྱུར་བས་ས་གཞི་ལ་གང་འབྱུང་བར་འགྱུར་བ་ལ་འཇིགས་ནས་མི་རྣམས་དྲན་པ་འཐོར་བར་འགྱུར།
LUK 21:27 དེའི་དུས་སུ་མི་རྣམས་ཀྱིས་མིའི་རིགས་ཀྱི་བུ་ཁོང་དབང་དང་གཟི་བརྗིད་ཆེན་པོ་དང་བཅས་སྤྲིན་པ་ཞིག་གི་ནང་དུ་འབྱོན་པར་མཐོང་ཡོང༌།
LUK 21:28 དོན་འདི་ཚོ་འབྱུང་སྐབས་ཁྱེད་ཚོ་ལངས་ནས་ཡར་ལྟོས་ཤིག གང་ཡིན་ཞེ་ན། ཁྱེད་ཀྱི་ཐར་བའི་དུས་ཐོན་ལ་ཉེ་བ་ཡིན་”ཞེས་གསུངས།
LUK 21:29 དེ་ནས་ཁོང་གིས་“བསེ་ཡབ་ལ་སོགས་པའི་ཤིང་ནས་དཔེ་ཞིག་ལོངས།
LUK 21:30 དེའི་ལོ་མ་འབུས་མ་ཐག་ཁྱེད་ཚོས་དེ་མཐོང་བ་དང༌། དབྱར་ཁའི་དུས་ཉེ་བར་ཡོད་པ་རང་ཤུགས་ཀྱིས་ཤེས།
LUK 21:31 དེ་བཞིན་དུ་ཁྱེད་ཚོས་དོན་དེ་རྣམས་བྱུང་བ་མཐོང་ཚེ། དཀོན་མཆོག་གི་རྒྱལ་སྲིད་ཉེ་བར་སླེབས་ཡོད་པ་རྟོགས་པར་འགྱུར།
LUK 21:32 ངས་ཁྱེད་ཚོར་བདེན་པར་ཟེར་རྒྱུར། མི་རབས་འདི་མེད་པར་མ་གྱུར་བའི་སྔོན་ལ་དོན་འདི་ཐམས་ཅད་འབྱུང་བར་འགྱུར།
LUK 21:33 གནམ་ས་གཉིས་ནི་འདའ་བར་འགྱུར་ཡང་ངའི་བཀའ་འདའ་བར་མི་འགྱུར་རོ། །
LUK 21:34 སྤྱོད་པ་ངན་པ་དང༌། ར་བཟི་བ། འཚོ་བའི་སྐོར་གྱི་སེམས་ཁྲལ་སོགས་ཀྱིས་ཁྱེད་མི་གནོན་པའི་ཕྱིར་དང༌། ཉིན་མོ་དེས་རྙི་ལྟར་ཁྱེད་ཚོ་འཛིན་པར་མི་འགྱུར་བའི་ཆེད་དུ་དོགས་ཟོན་གྱིས་ཤིག
LUK 21:35 གང་ལགས་ཟེར་ན། ཉིན་མོ་དེ་ནི་ས་གཞིའི་སྟེང་གི་མི་ཀུན་ལ་འབབ་པར་འགྱུར་ངེས་ཡིན།
LUK 21:36 འབྱུང་བར་འགྱུར་བའི་དོན་དེ་ཐམས་ཅད་ལས་ཐར་ཐུབ་པའི་སྟོབས་ཡིན་པ་དང༌། མིའི་རིགས་ཀྱི་བུའི་སྐུ་མདུན་དུ་ལངས་ནས་སྡོད་ཐུབ་པའི་སྨོན་ལམ་འདེབས་ཏེ། དུས་རྟག་ཏུ་དོགས་ཟོན་བྱོས་ཤིག་”ཅེས་གསུངས།
LUK 21:37 ཉིན་ལྟར་ཁོང་གིས་མཆོད་ཁང་ཆེན་མོའི་ཁྱམས་རར་ཆོས་བསྟན་གནང་བ་དང༌། མཚན་མོར་ཁོང་ཕྱི་རོལ་ཏུ་ཕེབས་ནས་སྐྱུར་རུ་ཟེར་བའི་ཤིང་གི་རི་ལ་བཞུགས།
LUK 21:38 ཡང་ཁོང་གི་གསུང་ལ་ཉན་པའི་ཕྱིར་མི་ཐམས་ཅད་སྔ་པོ་ལངས་ནས་མཆོད་ཁང་ཆེན་མོར་འགྲོ་མྱོང་ངོ༌། །
LUK 22:1 དེ་ཡང་སྐྱུར་རྩི་མེད་པའི་བག་ལེབ་དུས་ཆེན་ནམ་པེ་སག་ཅེས་བྱ་བའི་དུས་ཆེན་ཉེ་བར་སླེབས་པ་དང༌།
LUK 22:2 མི་ཚོགས་ལ་འཇིགས་པས་ཡ་ཧུ་དཱ་པའི་བླ་ཆེན་དང་ཆོས་ཁྲིམས་ལ་མཁས་པའི་མི་ཡིས་ཡེ་ཤུ་གཡོ་ཐབས་ཀྱི་ངང་ནས་གསོད་པའི་གོ་སྐབས་བཙལ།
LUK 22:3 ཡང་ཡེ་ཤུའི་ཉེ་གནས་བཅུ་གཉིས་པོ་ལས་ཡུ་དཱ་དབྱི་སི་ཀར་རེ་ཞེས་ཟེར་བའི་མི་ཞིག་གི་སེམས་ནང་དུ་བདུད་སཱ་ཏན་ཞུགས་ཏེ།
LUK 22:4 ཡ་ཧུ་དཱ་པའི་བླ་ཆེན་རྣམས་དང༌། མཆོད་ཁང་ཆེན་མོའི་སྲུང་དམག་གི་དཔོན་པོའི་རྩར་སོང་ནས་ཡེ་ཤུ་ཁོ་ཚོའི་ལག་ཏུ་སྤྲོད་རྒྱུའི་གྲོས་སྡུར་བྱས།
LUK 22:5 ཁོ་ཚོས་སྐད་ཆ་འདི་ཐོས་ནས་ཧ་ཅང་དགའ་པོ་བྱུང་སྟེ་ཁོ་ལ་དངུལ་སྤྲོད་རྒྱུའི་ཁས་ལེན་བྱས།
LUK 22:6 ཁོས་དེ་ལ་མོས་མཐུན་བྱས་པ་དང༌། མི་ཚོགས་མེད་པའི་སྐབས་དང་བསྟུན་ནས་ཡེ་ཤུ་ཁོ་ཚོའི་ལག་ཏུ་སྤྲོད་རྒྱུའི་གོ་སྐབས་བཙལ།
LUK 22:7 དེ་ནས་སྐྱུར་རྩི་མེད་པའི་བག་ལེབ་དུས་ཆེན་གྱི་ཉིན་དང་པོར་སླེབས་དུས། པེ་སག་གི་ལུ་གུ་གསོད་དགོས་པའི་ཉིན་མོ་ཡིན་ཏེ།
LUK 22:8 ཡེ་ཤུས་“སོང་ལ་ང་ཚོས་ཟ་བའི་ཕྱིར་པེ་སག་གི་གསོལ་སྟོན་གྲ་སྒྲིག་བྱོས་”ཞེས་གསུངས་ནས་ཁོང་གིས་ཉེ་གནས་པེ་ཏྲོ་དང་ཡོ་ཧ་ནན་མངགས།
LUK 22:9 ཁོ་ཚོས་ཁོང་ལ་“ང་ཚོ་གང་དུ་གྲ་སྒྲིག་བྱེད་པར་འགྲོ་”ཞེས་ཞུས་པ་ལ།
LUK 22:10 ཁོང་གིས་ཁོ་ཚོར་“གྲོང་ཁྱེར་དུ་སླེབས་ནས་དེར་ཆུ་བུམ་འཁྱེར་བའི་སྐྱེས་པ་ཞིག་ཁྱེད་གཉིས་དང་འཕྲད་ཅིང༌། དེའི་རྗེས་སུ་འབྲངས་ནས་ཁོ་འཛུལ་སའི་ཁང་པ་ལ་སོང༌།
LUK 22:11 ཁྱེད་གཉིས་ཀྱིས་ཁྱིམ་དེའི་བདག་པོ་ལ་སྟོན་པས་ང་དང་ངའི་ཉེ་གནས་རྣམས་ཀྱིས་མཉམ་དུ་པེ་སག་གི་ཟས་ཟ་བའི་ཁང་མིག་གང་དུ་ཡོད་ཅེས་ཤོད་ཅིག
LUK 22:12 མི་དེས་ཁྱེད་གཉིས་ལ་ནང་ཆས་སོགས་གྲ་སྒྲིག་བྱས་ཡོད་པའི་ཐོག་ཁང་ཆེན་པོ་ཞིག་བསྟན་ཡོང༌། ཁྱེད་ཀྱིས་གནས་དེ་རུ་གྲ་སྒྲིག་གྱིས་ཤིག་”ཅེས་གསུངས།
LUK 22:13 ཉེ་གནས་དེ་གཉིས་གྲོང་ཁྱེར་དུ་སོང་སྟེ་ཁོང་གིས་གསུངས་པ་ལྟར་མཐོང་ཞིང་གནས་དེར་པེ་སག་གི་གསོལ་སྟོན་བཤམས་སོ། །
LUK 22:14 དུས་ལ་འབབ་པའི་ཚེ་ཁོང་དང་སྐུ་ཚབ་རྣམས་འཁོར་དང་བཅས་པ་གསོལ་སྟོན་དུ་བཞུགས།
LUK 22:15 ཁོང་གིས་ཁོ་ཚོར་“ང་སྡུག་བསྔལ་མྱོང་བའི་སྔོན་དུ་པེ་སག་གི་གསོལ་སྟོན་འདི་ཁྱེད་ཚོ་དང་མཉམ་དུ་ཤིན་ཏུ་ཟ་བར་འདོད།
LUK 22:16 གང་ཡིན་ཞེ་ན། ངས་ཁྱེད་རྣམས་ལ་ཟེར་རྒྱུར། དཀོན་མཆོག་གི་རྒྱལ་སྲིད་ལ་དེའི་ནང་དོན་མ་འགྲུབ་པའི་བར་དུ་ངས་ཡང་བསྐྱར་མི་ཟའོ་”ཞེས་གསུངས།
LUK 22:17 ཡང་ཁོང་གིས་ཕོར་པ་ཞིག་ཕྱག་ཏུ་བསྣམས་ཤིང༌། དཀོན་མཆོག་ལ་བཀའ་དྲིན་ཆེ་ཞུས་ནས་ཁོང་གིས་“འདི་བླངས་ནས་ཁྱེད་ཀྱི་ནང་བགོ་བཤའ་བྱོས།
LUK 22:18 ངས་ཁྱེད་ཚོ་ལ་ཟེར་རྒྱུར། ད་ནས་བཟུང་དཀོན་མཆོག་གི་རྒྱལ་སྲིད་མ་སླེབས་པའི་བར་དུ་ངས་རྒུན་འབྲུམ་ཤིང་གི་འབྲས་བུ་ལས་མི་འཐུང་ངོ་”ཞེས་གསུངས།
LUK 22:19 ཡེ་ཤུས་བག་ལེབ་ཕྱག་ཏུ་བསྣམས་ཤིང༌། དཀོན་མཆོག་ལ་བཀའ་དྲིན་ཆེ་ཞུས་ནས་དུམ་བུར་བགོས་ནས་ཁོ་རྣམས་ལ་གནང་སྟེ་“འདི་ནི་ངའི་ལུས་ཡིན་ཏེ་ཁྱེད་རྣམས་ཀྱི་དོན་དུ་སྦྱིན་པ་ཡིན། ང་དྲན་པའི་ཕྱིར་འདི་ལྟར་བྱོས་ཤིག་”ཅེས་གསུངས།
LUK 22:20 ཡང་དེ་བཞིན་དུ་ཁོང་རྣམས་ཞལ་ཟས་བཞེས་པའི་རྗེས་སུ། ཁོང་གིས་ཕོར་པ་ཕྱག་ཏུ་བསྣམས་ཏེ་“ཕོར་པ་འདི་ནི་ངའི་ཁྲག་གིས་བཀོད་པའི་ཞལ་ཆད་གསར་པ་ཡིན་ཏེ་ཁྱེད་ཀྱི་དོན་དུ་འཐོན་ནོ།
LUK 22:21 ལྟོས་ཤིག ང་ལ་རྒྱབ་གཏོད་བྱེད་མཁན་གྱི་ལག་པ་དེའང་ང་དང་མཉམ་དུ་ཅོག་ཙེའི་སྒང་ལ་ཡོད།
LUK 22:22 དཀོན་མཆོག་གི་དགོངས་པ་བཞིན་དུ་མིའི་རིགས་ཀྱི་བུ་འཆི་དགོས་ཀྱང༌། དགྲའི་ལག་ཏུ་སྤྲོད་མཁན་དེར་ཆད་པ་ཕོག་ངེས་ཡིན་ནོ་”ཞེས་གསུངས།
LUK 22:23 དེ་ནས་ཁོ་ཚོས་ཕན་ཚུན་དེ་ལྟར་བྱེད་མཁན་སུ་ཡིན་པའི་སྐོར་གྲོས་བསྡུར་བྱས།
LUK 22:24 དེ་ནས་ཁོ་ཚོའི་ནང་སུ་མཆོག་ཏུ་རྩི་བའི་རྩོད་གླེང་བྱུང་སྐབས།
LUK 22:25 ཁོང་གིས་ཁོ་ཚོར་“ཕྱི་པ་རྣམས་ཀྱི་རྒྱལ་པོས་ཁོ་ཚོར་དབང་སྒྱུར་བྱེད་ཅིང༌། ཁོ་ཚོའི་དཔོན་རིགས་ལ་སྦྱིན་བདག་ཞེས་ཟེར་ཡང༌།
LUK 22:26 ཁྱེད་ཚོས་དེ་ལྟར་བྱེད་མི་རུང༌། ཁྱེད་ཚོ་ལས་སུ་ཞིག་མཆོག་ཏུ་གྱུར་བ་དེ་ཆུང་ཤོས་འདྲ་བ་དང༌། འགོ་ཁྲིད་པ་གཡོག་བྱེད་མཁན་འདྲ་བར་འགྱུར་དགོས།
LUK 22:27 ཅོག་ཙེར་གསོལ་བ་བཞེས་མཁན་དང་གཡོག་པོ་བྱེད་མཁན་གཉིས་ལས་སུ་ཞིག་ཆེ། གསོལ་བ་བཞེས་མཁན་མ་ཡིན་ནམ། འོན་ཀྱང་ང་ནི་ཁྱེད་ཚོའི་ཁྲོད་དུ་གཡོག་བྱེད་མཁན་དང་འདྲའོ།
LUK 22:28 ང་ཉམས་ཚོད་ལེན་དུས་ཁྱེད་རྣམས་ང་དང་མཉམ་དུ་གནས་པས།
LUK 22:29 ངའི་ཡབ་ཀྱིས་ཇི་ལྟར་ང་ལ་རྒྱལ་ཁམས་གནང་བ་བཞིན། དེ་ལྟར་ངས་ཀྱང་རྒྱལ་ཁམས་ཤིག་ཁྱེད་རྣམས་ལ་སྤྲོད། དེ་ནི་ངའི་རྒྱལ་ཁམས་སུ་ངའི་ཅོག་ཙེར་ཁྱེད་ཚོས་ཟ་ཞིང་འཐུང་བ་དང༌། ཁྲི་ལ་བཞུགས་ནས་ཡི་སི་ར་ཨེལ་གྱི་ཚོ་ཁག་བཅུ་གཉིས་ལ་ཁྲིམས་ཐག་གཅོད་བྱེད་པའི་ཕྱིར་ཡིན་”ཞེས་གསུངས།
LUK 22:31 ཡང་ཁོང་གིས་“སི་མོན། སི་མོན། ཉོན་ཅིག སཱ་ཏན་གྱིས་ཁྱོད་རྣམས་ལ་གྲོ་ཞིབ་ཁྲོལ་ཚག་རྒྱག་པ་དང་འདྲ་བའི་ཉམས་ཚོད་བྱེད་པའི་ཕྱིར་ཆོག་མཆན་ཞུས།
LUK 22:32 འོན་ཀྱང་ཁྱོད་རང་གི་དད་པ་མི་ཉམས་པའི་ཕྱིར་ངས་སྨོན་ལམ་བཏབ་པ་ཡིན། ཁྱོད་ཕྱིར་ལོག་བྱས་ནས་ཉེ་གནས་གཞན་རྣམས་ལ་བརྟན་པར་བྱོས་”ཞེས་གསུངས།
LUK 22:33 པེ་ཏྲོས་ཁོང་ལ་“གཙོ་བོ། ཁྱེད་དང་མཉམ་དུ་བཙོན་ཁང་ལ་འགྲོ་བ་དང༌། འཆི་བ་ལ་ཐུག་པའི་སེམས་ཡོད་”ཅེས་བཤད།
LUK 22:34 ཡེ་ཤུས་ཁོ་ལ་“པེ་ཏྲོ། ངས་ཁྱོད་ལ་ཟེར་རྒྱུར། དེ་རིང་གི་མཚན་མོ་འདི་རང་ལ་བྱ་ཕོས་སྐད་མ་གྲགས་པའི་སྔོན་ལ་ཁྱོད་ཀྱིས་ང་སུ་ཡིན་མི་ཤེས་ཞེས་ཐེངས་གསུམ་སྨྲ་བར་ངེས་སོ་”ཞེས་གསུངས།
LUK 22:35 ཡང་ཁོང་གིས་ཁོ་ཚོར་“ངས་ཁྱེད་རྣམས་དངུལ་ཁུག་གམ། ཁུག་མ། ལྷམ་བཅས་མེད་པར་གཏོང་སྐབས། ཁྱོད་རྣམས་ལ་ཅི་ཡང་མ་ཚང་ངམ་”ཞེས་གསུངས་པས་ཁོ་ཚོས་“ང་ཚོར་ཅི་ཡང་མ་ཚང་”ཞེས་སྨྲས།
LUK 22:36 ཡང་ཁོང་གིས་ཁོ་ཚོར་“ད་སུ་ལ་དངུལ་ཁུག་གམ། ཁུག་མ་ཡོད་ན་དེ་རྣམས་ཁུར་ཞིག སུ་ལ་རལ་གྲི་མེད་པ་དེས་ཕྱི་གོས་བཙོངས་ནས་རལ་གྲི་ཞིག་ཉོ་དགོས།
LUK 22:37 ངས་ཁྱེད་ཚོར་ཟེར་རྒྱུར། གསུང་རབ་ནང་གང་བྲིས་པ་བཞིན། ཁོང་ནི་ཉེས་ཅན་གྱི་གྲས་སུ་བརྩིས་ཞེས་འགྲུབ་པར་འགྱུར་དགོས། གང་ཡིན་ཞེ་ན། ངའི་སྐོར་ལ་གང་བྲིས་ཡོད་པ་དེ་ང་རང་བརྒྱུད་ནས་འགྲུབ་བཞིན་ཡོད་”ཅེས་གསུངས།
LUK 22:38 ཁོ་ཚོས་“གཙོ་བོ། གཟིགས་དང༌། རལ་གྲི་གཉིས་འདུག་”ཅེས་ཟེར་བས་ལན་དུ་ཁོང་གིས་“དོན་དེ་ཚར་རོ་”ཞེས་གསུངས།
LUK 22:39 གྲོང་ཁྱེར་ནས་ཕྱི་རོལ་ཏུ་བྱོན་ཏེ་ཁོང་རང་གི་ལུགས་སྲོལ་ལྟར་སྐྱུར་རུ་ཟེར་བའི་ཤིང་གི་རི་ལ་ཕེབས་པ་དང༌། ཉེ་གནས་རྣམས་ཁོང་གི་རྗེས་སུ་འབྲངས།
LUK 22:40 དེར་སླེབས་ནས་ཁོང་གིས་ཁོ་ཚོར་“ཁྱོད་རྣམས་ཉམས་ཚོད་ནང་དུ་མི་ལྷུང་བའི་ཕྱིར་གསོལ་བ་ཐོབ་ཅིག་”ཅེས་གསུངས་པ་དང༌།
LUK 22:41 ཁོ་ཚོ་དང་ཁ་བྲལ་ཏེ་ཡེ་ཤུ་རྡོ་རྒྱང་གཅིག་ཙམ་ཕར་ཕེབས། ཞབས་པུས་སར་བཙུགས་ནས་ཁོང་གིས་
LUK 22:42 “ཀྱེ་ཡབ་ལགས། ཁྱེད་ཐུགས་མཉེས་པ་ཡིན་ན་ཕོར་པ་འདི་ང་ལས་ཕར་ལེན་མཛོད། འོན་ཀྱང་ངའི་བསམ་པ་བཞིན་དུ་མི་འགྱུར་བར་ཁྱེད་ཀྱི་དགོངས་པ་བཞིན་དུ་གྱུར་ཅིག་”ཅེས་གསོལ་བ་བཏབ།
LUK 22:43 དེའི་དུས་སུ་དཀོན་མཆོག་གི་ཞིང་ཁམས་ནས་ཕོ་ཉ་ཞིག་མངོན་སུམ་དུ་བྱོན་ནས། ཁོང་གི་ཐུགས་བརྟན་པོར་མཛད།
LUK 22:44 སྡུག་བསྔལ་ཚད་མེད་མྱོང་སྟེ་ཁོང་གིས་དེ་བས་ཀྱང་གསོལ་སྨོན་ནན་གྱིས་ཞུས་པ་དང༌། ཁོང་གི་རྔུལ་ཆུ་ནི་ཁྲག་གི་ཐིགས་པ་ལྟར་ས་ལ་ལྷུངས།
LUK 22:45 ཁོང་གསོལ་སྨོན་བཏབ་ནས་བཞེངས་ཏེ་ཉེ་གནས་རྣམས་ཀྱི་རྩར་ཕེབས་པ་དང༌། ཁོ་རྣམས་སེམས་སྐྱོ་ནས་གཉིད་ཁུག་པར་གཟིགས།
LUK 22:46 ཁོ་ཚོར་“ཅིའི་ཕྱིར་གཉིད་ཉལ། ལོངས་ལ་ཁྱོད་ཚོ་ཉམས་ཚོད་ནང་དུ་མི་ལྷུང་བའི་ཕྱིར་གསོལ་བ་ཐོབ་ཅིག་”ཅེས་གསུངས།
LUK 22:47 ཁོང་གིས་དེ་ལྟར་གསུང་སྐབས་ཉེ་གནས་བཅུ་གཉིས་པོ་ལས་ཡུ་དཱ་ཞེས་བྱ་བ་དེས་མི་ཚོགས་ཁྲིད་དེ་ཡོང་བ་དང༌། ཁོས་ཡེ་ཤུ་ལ་འོ་བྱེད་པའི་ཕྱིར་ཁོང་གི་མདུན་དུ་ཡོང༌།
LUK 22:48 འོན་ཀྱང་ཡེ་ཤུས་ཁོ་ལ་“ཡུ་དཱ། ཁྱོད་ཀྱིས་འོ་ཡིས་མིའི་རིགས་ཀྱི་བུ་ལ་རྒྱབ་གཏོད་བྱེད་དམ་”ཞེས་གསུངས།
LUK 22:49 ཉེ་འགྲམ་དུ་ཡོད་པའི་མི་རྣམས་ཀྱིས་གང་ཞིག་འབྱུང་རྒྱུ་ཡིན་པ་མཐོང་ནས་ཁོ་ཚོས་“གཙོ་བོ། ང་ཚོས་རལ་གྲི་རྒྱག་གམ་”ཞེས་དྲིས།
LUK 22:50 ཁོ་ཚོའི་ནང་ནས་མི་ཞིག་གིས་ཡ་ཧུ་དཱ་པའི་བླ་ཆེན་གཙོ་བོའི་གཡོག་པོར་རལ་གྲི་བརྒྱབ་ནས་རྣ་བ་གཡས་པ་བཅད།
LUK 22:51 འོན་ཀྱང་ཡེ་ཤུས་“དེ་ལྟར་མ་བྱོས་ཤིག་”ཅེས་གསུངས་ནས་མི་དེའི་རྣ་བར་རེག་ནས་གསོས་པར་མཛད།
LUK 22:52 ཡང་ཡེ་ཤུས་ཁོང་འཛིན་བཟུང་བྱེད་དུ་ཡོང་བ་རྣམས་ཡ་ཧུ་དཱ་པའི་བླ་ཆེན་དང༌། མཆོད་ཁང་ཆེན་མོའི་སྲུང་དམག་གི་དཔོན་པོ་དང༌། རྒན་པོ་བཅས་ལ་“ཁྱེད་ཚོས་རལ་གྲི་དང་དབྱུག་པ་ཁྱེར་ནས་ཇག་པ་འཛིན་པ་ལྟར་ང་འཛིན་དུ་ཡོང་ངམ།
LUK 22:53 ང་ཉིན་རེ་བཞིན་མཆོད་ཁང་ཆེན་མོར་ཁྱེད་ཚོའི་མདུན་དུ་ཡོད་ནའང༌། ཁྱེད་ཚོས་ང་བཟུང་མེད། འོན་ཀྱང་འདི་ནི་ཁྱེད་རྣམས་ཀྱི་དུས་དང་མུན་ནག་གི་དབང་ཡིན་”ཞེས་གསུངས།
LUK 22:54 ཡེ་ཤུ་འཛིན་བཟུང་བྱས་ནས་ཁོ་ཚོས་ཡ་ཧུ་དཱ་པའི་བླ་ཆེན་གཙོ་བོའི་ཁང་ཆེན་ལ་ཁྲིད་པ་དང༌། པེ་ཏྲོའང་རྒྱང་རིང་ནས་ཁོང་གི་རྗེས་སུ་འབྲངས།
LUK 22:55 སྒོ་རའི་དཀྱིལ་ལ་མེ་ཞིག་བཏང་ནས་མི་དེ་ཚོ་ལྷན་དུ་བསྡད་པ་དང༌། པེ་ཏྲོ་ཡང་དེ་ཚོའི་ཁྲོད་ལ་བསྡད།
LUK 22:56 པེ་ཏྲོ་མེའི་འོད་ཀྱི་འོག་ཏུ་བསྡད་ནས་ཁོ་ལ་ནན་གྱིས་བལྟས་པས་གཡོག་མོ་ཞིག་གིས་“མི་འདི་ཡང་ཁོ་དང་མཉམ་དུ་ཡོད་པ་གཅིག་རེད་”ཅེས་སྨྲས་པ་ན།
LUK 22:57 པེ་ཏྲོས་ཁས་མ་བླངས་ཏེ་“བུ་མོ། ངས་ཁོ་ངོ་མི་ཤེས་”ཞེས་བཤད།
LUK 22:58 དེ་ནས་ཅུང་མ་འགོར་བར་མི་གཞན་ཞིག་གིས་ཁོ་མཐོང་ནས་“ཁྱེད་ཀྱང་ཁོ་ཚོའི་ནང་ནས་གཅིག་རེད་”ཅེས་བཤད། འོན་ཀྱང་པེ་ཏྲོས་“ང་གཏན་ནས་མ་ཡིན་”ཞེས་ཟེར།
LUK 22:59 ཆུ་ཚོད་གཅིག་ཙམ་འགོར་བའི་རྗེས་སུ་མི་གཞན་ཞིག་གིས་“སྐྱེས་པ་འདི་ག་ལིལ་ཡུལ་གྱི་མི་ཞིག་ཡིན་པས་དངོས་གནས་དེ་ཚོའི་ནང་ནས་གཅིག་ཡིན་པར་ངེས་”ཞེས་ཨུ་ཚུགས་བྱས་ཀྱང༌།
LUK 22:60 པེ་ཏྲོས་“ཁྱེད་ཀྱིས་གང་བཤད་པ་ངས་མི་ཤེས་”ཞེས་སྨྲས་མ་ཐག་ཏུ་བྱ་ཕོས་སྐད་གྲགས།
LUK 22:61 གཙོ་བོས་ཞལ་ཕྱིར་སྐོར་ཏེ་པེ་ཏྲོ་ལ་གཟིགས་པ་དང༌། པེ་ཏྲོ་ཡེ་ཤུས་ཁོ་རང་ལ། དེ་རིང་གི་མཚན་མོ་འདི་རང་ལ་བྱ་ཕོས་སྐད་མ་གྲགས་པའི་སྔོན་ལ་ཁྱེད་ཀྱིས་ང་སུ་ཡིན་མི་ཤེས་ཞེས་ཐེངས་གསུམ་ཟེར་བར་ངེས་ཞེས་གསུངས་པ་དེ་དྲན་པས།
LUK 22:62 ཁོ་ཕྱིར་སོང་ནས་སེམས་ཤིན་ཏུ་སྐྱོ་བས་ངུས།
LUK 22:63 སྲུང་མཁན་རྣམས་ཀྱིས་ཡེ་ཤུ་ལ་འཕྱ་སྨོད་བྱས་ནས་བརྡུངས་ཏེ།
LUK 22:64 སྤྱན་ཟུང་རས་ཀྱིས་བཏུམས་ཏེ་ཁོང་ལ་“ད་མངོན་ཤེས་ཤོད་ཅིག ཁྱོད་རྡུང་མཁན་དེ་སུ་ཡིན་”ཅེས་བརྗོད་པ་དང༌།
LUK 22:65 ཁ་ངན་བཤད་དེ་ཁོང་ལ་དམའ་འབེབས་མང་པོ་བཏང༌།
LUK 22:66 ནམ་ལངས་པའི་ཚེ་ཡུལ་མི་རྣམས་ཀྱི་རྒན་པོ་དང༌། ཡ་ཧུ་དཱ་པའི་བླ་ཆེན། ཆོས་ཁྲིམས་ལ་མཁས་པའི་མི་བཅས་འཛོམས་ནས་ཁོང་རྒྱལ་ཚོགས་ཀྱི་མདུན་དུ་འཁྲིད་དུ་བཅུག
LUK 22:67 མི་དེ་ཚོས་“ཁྱོད་ནི་སྐྱབས་མགོན་མཱ་ཤི་ཀ་ཡིན་ན་ང་ཚོ་ལ་ཤོད་ཅིག་”ཅེས་སྨྲས་པས་ཁོང་གིས་“གལ་ཏེ་ངས་ཁྱེད་ཚོར་བཤད་ན། ཁྱེད་ཚོས་ཡིད་མི་ཆེས་ཤིང༌།
LUK 22:68 གལ་ཏེ་ངས་ཁྱེད་ཚོར་དྲི་བ་ཞིག་དྲིས་ན་ལན་མི་རྒྱག
LUK 22:69 འོན་ཀྱང་ད་ནས་བཟུང་མིའི་རིགས་ཀྱི་བུ་དབང་ཀུན་དང་ལྡན་པའི་དཀོན་མཆོག་གི་ཕྱག་གཡས་སུ་བཞུགས་པར་འགྱུར་རོ་”ཞེས་གསུངས།
LUK 22:70 ཡང་ཁོ་ཚོ་ཚང་མས་“བྱས་ན་ཁྱོད་ནི་དཀོན་མཆོག་གི་སྲས་ཡིན་ནམ་”ཞེས་དྲིས་པས་ལན་དུ་ཁོང་གིས་ཁོ་ཚོར་“ཁྱེད་ཀྱིས་སྨྲས་པ་ལྟར་ང་དེ་ཡིན་ནོ་”ཞེས་གསུངས།
LUK 22:71 དེ་ནས་ཁོ་ཚོས་“ད་དུང་དཔང་པོ་ཅི་དགོས། ང་ཚོ་རང་གིས་ཁོའི་ཁ་ནས་ཐོས་”ཞེས་སྨྲས་སོ། །
LUK 23:1 དེ་ནས་རྒྱལ་ཚོགས་ཀྱི་མི་ཐམས་ཅད་ཡར་ལངས་ནས་ཡེ་ཤུ་སྤྱི་ཁྱབ་པི་ལ་ཏུའི་མདུན་དུ་ཁྲིད།
LUK 23:2 ཁོ་ཚོས་ཁོང་ལ་ཉེས་སྐྱོན་བཙུགས་ཏེ་“མི་འདིས་ང་ཚོའི་མི་རིགས་ལ་མགོ་སྐོར་བཏང་སྟེ། ང་ཚོས་རྒྱལ་པོ་སེ་སར་ལ་ཁྲལ་འཇལ་མི་ཆོག་པ་དང༌། ཁོ་རང་རྒྱལ་པོ་མཱ་ཤི་ཀ་ཡིན་ཞེས་བཤད་པ་ང་ཚོས་ཐོས་”ཞེས་སྨྲས།
LUK 23:3 དེའི་ཕྱིར་པི་ལ་ཏུས་ཁོང་ལ་“ཁྱོད་ནི་ཡ་ཧུ་དཱ་པའི་མི་རིགས་ཀྱི་རྒྱལ་པོ་ཡིན་ནམ་”ཞེས་ཁོང་ལ་དྲིས་པ་ན། ཁོང་གིས་“ཁྱེད་ཀྱིས་སྨྲས་པ་བཞིན་ཡིན་ནོ་”ཞེས་གསུངས།
LUK 23:4 དེ་ནས་པི་ལ་ཏུ་ཡིས་བླ་ཆེན་དང་མི་ཚོགས་ལ་“ངས་མི་འདི་ལ་ཉེས་སྐྱོན་ཅིའང་མ་རྙེད་”ཅེས་བཤད་ཀྱང༌།
LUK 23:5 ཁོ་ཚོས་“ག་ལིལ་ཡུལ་ནས་ས་ཆ་འདིའི་བར་དུ་ཡ་ཧུ་དཱ་ཡུལ་ཡོངས་སུ་ཆོས་བསྟན་པའི་སྒོ་ནས་ཁོས་མི་རྣམས་ལ་ངན་བསྐུལ་བྱེད་ཀྱི་འདུག་”ཅེས་ཨུ་ཚུགས་བྱས།
LUK 23:6 པི་ལ་ཏུ་ཡིས་གཏམ་དེ་ཐོས་ནས་ཁོང་ག་ལིལ་ཡུལ་གྱི་མི་ཡིན་ནམ་ཞེས་དྲིས།
LUK 23:7 ཡེ་ཤུ་ནི་རྒྱལ་པོ་ཧེ་རོ་དཱེ་ཡི་འབངས་མི་ཡིན་པ་ཐོས་རྗེས་དེའི་དུས་སུ་ཧེ་རོ་དཱེ་ཡེ་རུ་ཤ་ལེམ་ལ་ཡོད་པས་པི་ལ་ཏུས་ཁོང་ཧེ་རོ་དཱེ་ཡི་རྩར་བཏང༌།
LUK 23:8 ཧེ་རོ་དཱེ་དུས་ཡུན་རིང་པོའི་སྔོན་ནས་ཡེ་ཤུ་དང་མཇལ་བར་འདོད་པས་ཁོང་མཐོང་ནས་ཤིན་ཏུ་དགའ། ཡེ་ཤུའི་སྐོར་ཐོས་ནས་ཁོང་གིས་ངོ་མཚར་བའི་རྟགས་ཤིག་མཛད་པར་མཐོང་བའི་རེ་བ་བྱས།
LUK 23:9 ཧེ་རོ་དཱེ་ཡིས་ཁོང་ལ་དྲི་བ་མང་པོ་དྲིས་ཀྱང༌། ཁོང་གིས་ལན་ཅིའང་མ་གནང༌།
LUK 23:10 ཡང་ཡ་ཧུ་དཱ་པའི་བླ་ཆེན་དང༌། ཆོས་ཁྲིམས་ལ་མཁས་པའི་མི་རྣམས་ཀྱིས་དེར་ལངས་ཏེ་ཁོང་ལ་ཉེས་སྐྱོན་ནན་གྱིས་བཙུགས།
LUK 23:11 ཧེ་རོ་དཱེ་དང་ཁོའི་དམག་མི་རྣམས་ཀྱིས་ཁོང་ལ་མཐོང་ཆུང་དང་འཕྱ་སྨོད་བྱས་ཏེ་ན་བཟའ་མཛེས་པོ་ཁོང་ལ་གཡོགས་ནས་པི་ལ་ཏུའི་རྩར་ཕྱིར་བཏང༌།
LUK 23:12 དེའི་སྔོན་ལ་ཧེ་རོ་དཱེ་དང་པི་ལ་ཏུ་ཕན་ཚུན་དགྲ་ཁ་གཏད་ཡིན་ཡང༌། ཉིན་དེ་རང་ལ་གྲོགས་པོར་གྱུར།
LUK 23:13 པི་ལ་ཏུ་ཡིས་བླ་ཆེན་དང༌། དཔོན་རིགས། ཡུལ་མི་བཅས་ཁོའི་དྲུང་དུ་བོས་ནས།
LUK 23:14 ཁོ་ཚོར་“ཁྱོད་རྣམས་ཀྱིས་མི་འདི་ཟིང་ཆ་སློང་དུ་ངན་བསྐུལ་བྱེད་མཁན་ལྟར་ངའི་རྩར་ཁྲིད། ཁྱོད་ཚོའི་མདུན་དུ་ངས་ཁོ་ལ་འདྲི་གཅོད་བྱས་ཀྱང༌། ཁྱོད་ཀྱིས་སྨྲས་པའི་ཉེས་སྐྱོན་ཅིའང་མ་རྙེད།
LUK 23:15 ཧེ་རོ་དཱེ་ཡིས་ཁོང་ང་ཚོར་ཕྱིར་ལོག་མངགས་པས་ཁོང་ལ་ཡང་ཉེས་སྐྱོན་མ་རྙེད། མི་འདིས་སྲོག་ཁྲིམས་གཏོང་དགོས་པའི་ཉེས་པ་ཅི་ཡང་མ་བྱས།
LUK 23:16 དེའི་ཕྱིར་ངས་ཁོ་ལ་ཉེས་ཆད་བཅད་ནས་གློད་གྲོལ་གཏོང་རྒྱུ་ཡིན་”ཞེས་བཤད།
LUK 23:18 འོན་ཀྱང་མི་ཚོགས་ཐམས་ཅད་ཀྱིས་ལྷན་གཅིག་ཏུ་“ཁོ་ཕར་ཁྲིད། པར་ཨབ་པཱ་ཟེར་མཁན་དེ་གློད་གྲོལ་གཏོང་ཞིག་”ཅེས་འབོད་སྒྲ་བསྒྲགས།
LUK 23:19 (པར་ཨབ་པཱ་ཟེར་བ་དེ་གྲོང་ཁྱེར་ལ་ཟིང་འཁྲུག་བསླངས་པ་དང༌། མི་བསད་པའི་རྐྱེན་གྱིས་བཙོན་ཁང་ལ་བཅུག་)
LUK 23:20 ཡེ་ཤུ་གློད་གྲོལ་གཏོང་འདོད་པས་པི་ལ་ཏུས་ཡང་བསྐྱར་མི་ཚོགས་ལ་གཏམ་བཤད་ཀྱང༌།
LUK 23:21 ཁོ་ཚོས་སྐད་ཆེན་པོས་“རྒྱང་ཤིང་སྒང་ལ་སོད་ཅིག རྒྱང་ཤིང་སྒང་ལ་སོད་ཅིག་”ཅེས་ཡང་ཡང་བཤད།
LUK 23:22 ཐེངས་གསུམ་པར་ཡང་ཁོས་མི་དེ་ཚོར་“རྒྱུ་མཚན་གང་ཡིན། ཁོས་ལས་ངན་ག་རེ་བྱས་ཡོད། མི་འདིས་སྲོག་ཁྲིམས་གཏོང་དགོས་པའི་ཉེས་པ་ཅི་ཡང་མ་བྱས་པས་ངས་ཁོ་ལ་ཉེས་ཆད་བཅད་ནས་གློད་གྲོལ་གཏོང་རྒྱུ་ཡིན་”ཞེས་བཤད།
LUK 23:23 འོན་ཀྱང་ཁོ་ཚོས་འབོད་སྒྲ་སྒྲོག་སྟེ་ཁོང་རྒྱང་ཤིང་སྒང་ལ་གསོད་དགོས་པར་ཨུ་ཚུགས་བྱས་པས་མཐར་ཁོ་ཚོའི་འདོད་པ་བཞིན་དུ་གྱུར།
LUK 23:24 དེ་ནས་པི་ལ་ཏུས་ཁོ་ཚོའི་རེ་བ་བཞིན་དུ་བྱེད་དགོས་པའི་བཀའ་བསྩལ།
LUK 23:25 པི་ལ་ཏུས་ཟིང་འཁྲུག་བསླངས་པ་དང༌། མི་བསད་པའི་རྐྱེན་གྱིས་བཙོན་ཁང་ལ་བཅུག་པའི་མི་དེ་གློད་གྲོལ་བཏང་ནས་མི་ཚོགས་ཀྱི་འདོད་པ་ལྟར་ཡེ་ཤུ་རྩིས་སྤྲད།
LUK 23:26 ཁོང་ཕར་འཁྲིད་དུས་སེ་རེ་ནཱ་པ་སི་མོན་གྲོང་གསེབ་ནས་ཡོང་བ་དང༌། ཁོ་ཚོས་ཡེ་ཤུའི་རྗེས་སུ་འབྲངས་ཏེ་རྒྱང་ཤིང་འཁུར་དུ་འཇུག་ཕྱིར་ཁོ་བཟུང༌།
LUK 23:27 མི་ཚོགས་མང་པོ་ཞིག་ཡེ་ཤུའི་རྗེས་སུ་འབྲངས། ཁོ་ཚོའི་ནང་ཁོང་གི་ཕྱིར་ངུ་ཞིང་སྨྲེ་སྔགས་འདོན་པའི་བུད་མེད་རྣམས་ཀྱང་ཡོད།
LUK 23:28 འོན་ཀྱང་ཡེ་ཤུས་ཞལ་ཕྱིར་སྐོར་ཏེ་ཁོ་ཚོར་“ཡེ་རུ་ཤ་ལེམ་གྱི་བུ་མོ། ངའི་དོན་ལ་མ་ངུ༌། ཁྱེད་དང་ཁྱེད་ཀྱི་བུ་ཕྲུག་གི་དོན་དུ་ངུས་ཤིག
LUK 23:29 གང་ལགས་ཟེར་ན། རབས་ཆད་མ་རྣམས་དང༌། ཕྲུ་གུ་མ་བཙའ་བ། འོ་མ་མ་སྟེར་མཁན་རྣམས་བདེའོ་ཞེས་ཟེར་བའི་དུས་ལ་འབབ་ངེས་ཡིན།
LUK 23:30 དེའི་དུས་སུ་ཁོ་ཚོས་རི་ཆེན་ལ་ང་ཚོར་ས་རུད་རྒྱོབ་དང༌། རི་ཆུང་ལ་ང་ཚོར་སར་སྦོས་རྒྱོབ་ཅེས་ཟེར།
LUK 23:31 ཤིང་སྡོང་རློན་པའི་སྐབས་སུ་འདི་ལྟར་བྱས་ན། བསྐམས་ནས་ཅི་ལྟར་བྱ་”ཞེས་གསུངས།
LUK 23:32 ཁོང་དང་མཉམ་དུ་ཉེས་ཅན་གཉིས་སྲོག་གཅོད་གཏོང་ཕྱིར་ཁྲིད།
LUK 23:33 མགོ་རུས་ཞེས་ཟེར་བའི་ས་ཆར་སླེབས་ནས་ཁོང་མཉམ་དུ་ཉེས་ཅན་གཉིས་ནས་གཅིག་ཁོང་གི་གཡས་ཕྱོགས་སུ་ཡོད་པའི་རྒྱང་ཤིང་དང་གཅིག་ཁོང་གི་གཡོན་ཕྱོགས་སུ་ཡོད་པའི་རྒྱང་ཤིང་ལ་གཟེར་བརྒྱབ།
LUK 23:34 དེ་ནས་ཡེ་ཤུས་“ཀྱེ་ཡབ་ལགས། ཁོ་ཚོས་གང་བྱེད་པ་མི་རྟོགས་པས་ཁོ་ཚོའི་སྡིག་ཉེས་སེལ་བར་མཛོད་”ཅེས་གསུངས་པ་དང༌། དམག་མིས་རྒྱན་བརྒྱབ་ནས་ཁོང་གི་ན་བཟའ་བགོ་བཤའ་བྱས།
LUK 23:35 མི་ཚོགས་ཀྱིས་ས་ཆ་དེར་བལྟས་ནས་བསྡད། དཔོན་རིགས་ཀྱིས་ཀྱང་ཁོང་ལ་འཕྱ་དམོད་བྱེད་དེ་“ཁོས་གཞན་རྣམས་བསྐྱབས་ཏེ་ཁོ་ནི་དཀོན་མཆོག་གིས་བདམས་པའི་སྐྱབས་མགོན་མཱ་ཤི་ཀ་ཡིན་ན། རང་ཉིད་སྐྱོབ་པར་བྱོས་ཤིག་”ཅེས་བཤད།
LUK 23:36 དམག་མིས་ཀྱང་ཁོང་ལ་འཕྱ་སྨོད་བྱེད་དེ་ཁོང་གི་མདུན་དུ་ཡོང་ནས་ཁོང་ལ་རྒུན་ཆང་སྐྱུར་མོ་ཕུལ་ཏེ།
LUK 23:37 “ཁྱོད་ཡ་ཧུ་དཱ་པའི་རྒྱལ་པོ་ཡིན་ན་རང་ཉིད་སྐྱོབ་པར་བྱོས་ཤིག་”ཅེས་ཟེར།
LUK 23:38 ཁོང་གི་སྟེང་ལ་ཡོད་པའི་ཉེས་ཚིག་ལ་ཡ་ཧུ་དཱ་པའི་རྒྱལ་པོ་ཞེས་བྲིས་ཡོད།
LUK 23:39 དེར་རྒྱང་ཤིང་ལ་ཡོད་པའི་ཉེས་ཅན་གཉིས་ལས་གཅིག་གིས་ཁོང་ལ་ཁ་ངན་བཤད་དེ་“ཁྱོད་སྐྱབས་མགོན་མཱ་ཤི་ཀ་མ་ཡིན་ནམ། ཁྱོད་ཀྱིས་རང་ཉིད་དང་ང་ཚོ་སྐྱོབས་ཤིག་”ཅེས་ཟེར།
LUK 23:40 འོན་ཀྱང་མི་དེ་ལ་བཀའ་བཀྱོན་བྱས་ནས་ཉེས་ཅན་གཞན་གྱིས་“ཁྱོད་ལ་ཡང་ཁོང་གི་ཉེས་ཆད་དང་འདྲ་བ་ཕོག་པས་ཁྱོད་རང་དཀོན་མཆོག་ལའང་མི་འཇིགས་སམ།
LUK 23:41 ང་ཚོ་གཉིས་ཀྱིས་བྱས་པའི་ལས་ངན་དང་མཐུན་པའི་ཆད་པ་བྱུང་བས་ང་ཚོར་དྲང་པོའི་ཁྲིམས་གཅོད་ཕོག འོན་ཀྱང་མི་འདིས་ཉེས་སྐྱོན་ཅི་ཡང་མ་བྱས་”ཞེས་གསུངས་ནས།
LUK 23:42 ཁོས་“ཡེ་ཤུ་ལགས། ཁྱེད་ཀྱི་རྒྱལ་སྲིད་ཐོབ་དུས་ང་དྲན་དུ་གསོལ་”ཞེས་ཞུས་པས།
LUK 23:43 ཁོང་གིས་ཁོ་ལ་“ངས་ཁྱོད་ལ་བདེན་པར་ཟེར་རྒྱུར། ཉིན་མོ་འདི་རང་ལ་ཁྱོད་ང་དང་མཉམ་དུ་དཀོན་མཆོག་གི་ཞིང་ཁམས་སུ་ཡོད་པར་འགྱུར་རོ་”ཞེས་གསུངས།
LUK 23:44 ཉི་མ་བསྒྲིབས་ཏེ་ཉིན་གུང་ནས་ཆུ་ཚོད་གསུམ་པའི་བར་དུ་ལུང་པ་དེ་ཡོངས་སུ་མུན་པས་ཁེངས། དེའི་སྐབས་མཆོད་ཁང་ཆེན་མོའི་ནང་གི་ཡོལ་བ་དེ་དུམ་བུ་གཉིས་སུ་རལ།
LUK 23:46 དེ་ནས་ཡེ་ཤུས་གསུང་སྐད་ཆེན་པོས་“ཀྱེ་ཡབ་ལགས། ང་ཡི་སེམས་ཁྱེད་ཀྱི་ཕྱག་ལ་བཅོལ་ལོ་”ཞེས་གསུངས་ནས་ཁོང་སྐུ་ཚེ་ལས་འདས་སོ།
LUK 23:47 དེར་ལངས་བསྡད་ཡོད་པའི་དམག་མི་བརྒྱ་དཔོན་ཞིག་གིས་གང་བྱུང་བ་དེ་མཐོང་ནས་དཀོན་མཆོག་ལ་བསྟོད་པ་ཕུལ་ཏེ་“མི་འདི་ངེས་པར་སྐྱོན་མེད་པ་ཞིག་ཡིན་”ཞེས་སྨྲས།
LUK 23:48 བྱ་བ་འདི་རྣམས་ལ་ལྟ་བའི་ཆེད་དུ་དེར་འཛོམས་པའི་མི་ཚང་མས་གང་བྱུང་བ་མཐོང་ནས་བྲང་ཁོག་བརྡུངས་ཏེ་སོ་སོའི་ནང་ལ་སོང༌།
LUK 23:49 འོན་ཀྱང་ཁོང་གི་ངོ་མཁྱེན་པ་ཐམས་ཅད་དང༌། ག་ལིལ་ཡུལ་ནས་ཁོང་གི་རྗེས་སུ་འབྲངས་པའི་བུད་མེད་རྣམས་རྒྱང་རིང་དུ་བསྡད་དེ་བྱ་བ་འདི་ཚོར་བལྟས།
LUK 23:50 དེ་ནས་ཡོ་སེབ་ཟེར་མཁན་མི་སེམས་བཟང་ཞིང་དྲང་པོ་ཡིན་པ་དང༌། ཡ་ཧུ་དཱ་པའི་རྒྱལ་ཚོགས་ཀྱི་ཁོངས་མི་ཡིན་ཡང༌།
LUK 23:51 མི་དེ་ཚོའི་འཆར་གཞི་དང་བྱ་བ་དེ་དག་ལ་མི་མཐུན་ཏེ། ཁོང་ནི་ཡ་ཧུ་དཱ་པའི་གྲོང་ཁྱེར་ཨ་རི་མ་ཐཱ་ནས་ཡིན་ལ། དཀོན་མཆོག་གི་རྒྱལ་སྲིད་སྒུག་མཁན་ཞིག་ཀྱང་ཡིན།
LUK 23:52 མི་འདི་པི་ལ་ཏུའི་རྩར་ཕྱིན་ཏེ་ཡེ་ཤུའི་སྐུ་ཕུང་གནང་རོགས་ཞུས།
LUK 23:53 ཡོ་སེབ་ཀྱིས་ཡེ་ཤུའི་སྐུ་ཕུང་མར་ཕབ་པ་དང༌། རས་སྤུས་ལེགས་ཤིག་གིས་སྒྲིལ་ནས་བྲག་ལ་བརྐོས་པའི་དུར་ཁང་སྤུར་བཞག་མ་མྱོང་བ་ཞིག་གི་ནང་དུ་བཞག་གོ
LUK 23:54 ཉིན་དེ་ནི་གྲ་སྒྲིག་གི་ཉིན་མོ་ཡིན་ཞིང་ངལ་གསོའི་ཉིན་མོ་སླེབས་ལ་ཉེ།
LUK 23:55 ག་ལིལ་ཡུལ་ནས་ཡེ་ཤུ་དང་མཉམ་དུ་ཕེབས་པའི་བུད་མེད་རྣམས་ཡོ་སེབ་ཀྱི་རྗེས་སུ་འབྲངས་པ་དང༌། དེ་རྣམས་ཀྱིས་དུར་ཁང་དང༌། ཁོང་གི་སྐུ་ཕུང་ཅི་ལྟར་བཞག་པ་མཐོང༌།
LUK 23:56 དེ་ནས་ཁོ་ཚོ་ཕྱིར་ལོག་ནས་དྲི་ཞིམ་འབྱུག་རྫས་གྲ་སྒྲིག་བྱས། ཡང་ངལ་གསོའི་ཉིན་མོར་དཀོན་མཆོག་གི་བཀའ་ལྟར་ངལ་གསོ་བྱས་སོ། །
LUK 24:1 བདུན་ཕྲག་གཅིག་གི་ཉིན་དང་པོའི་ཞོགས་པ་ཉི་མ་ཤར་ཙམ་ལ་བུད་མེད་ཚོས་གྲ་སྒྲིག་བྱས་པའི་དྲི་ཞིམ་འབྱུག་རྫས་འཁུར་ཏེ་ཁོ་ཚོ་དུར་ཁང་ལ་ཕྱིན་པ་དང༌།
LUK 24:2 ཁ་རྡོ་དེ་བསྒྲིལ་ཚར་ཡོད་པ་མཐོང་ཡང༌།
LUK 24:3 དུར་ཁང་གི་ནང་ལ་འཛུལ་སྐབས་གཙོ་བོ་ཡེ་ཤུའི་སྐུ་ཕུང་མ་མཐོང༌།
LUK 24:4 དེ་བས་ཐེ་ཚོམ་བྱུང་སྐབས་མི་གཉིས་འོད་འཕྲོ་བའི་གོས་གྱོན་པ་གློ་བུར་དུ་ཁོ་ཚོའི་འགྲམ་ལ་མངོན་པར་གྱུར།
LUK 24:5 འཇིགས་སྐྲག་སྐྱེས་ཏེ་བུད་མེད་རྣམས་མགོ་བཏུད་པ་དང༌། མི་དེ་གཉིས་ཀྱིས་ཁོ་མོ་ཚོར་“གསོན་པོ་ནི་གཤིན་པོའི་ནང་ཅིའི་ཕྱིར་འཚོལ།
LUK 24:6 ཁོང་འདིར་མེད་དེ་སྐུ་གསོན་པོར་བཞེངས་སོ། ཁོང་ག་ལིལ་ཡུལ་ལ་བཞུགས་པའི་ཚེ་ཁྱོད་རྣམས་ལ།
LUK 24:7 མིའི་རིགས་ཀྱི་བུ་སྡིག་ཉེས་ཅན་གྱི་ལག་ཏུ་གཏད་པ་དང༌། རྒྱང་ཤིང་ལ་བཀྲོངས་ནས་ཉིན་ཞག་གསུམ་པ་ལ་ཁོ་རང་ལང་བར་འགྱུར་ངེས་ཞེས་པའི་གསུང་དེ་དྲན་ཅིག་”ཅེས་གསུངས་པས།
LUK 24:8 ཁོ་མོ་ཚོས་ཁོང་གི་གསུང་དྲན།
LUK 24:9 དུར་ཁང་ནས་ཕྱིར་ལོག་སྟེ། ཉེ་གནས་བཅུ་གཅིག་པོ་དང་གཞན་རྣམས་ལ་དོན་དེ་ཐམས་ཅད་བཤད།
LUK 24:10 དོན་འདི་ཚོ་སྐུ་ཚབ་ལ་རྗོད་མཁན་རྣམས་ནི་མག་རྡལ་ནས་ཡིན་པའི་མིར་ཡམ་དང༌། ཡོ་ཨ་ནཱ། ཡ་ཀོབ་ཀྱི་ཡུམ་མིར་ཡམ་ལ་སོགས་པའི་བུད་མེད་རྣམས་ཡིན།
LUK 24:11 འོན་ཀྱང་སྐུ་ཚབ་རྣམས་ཀྱི་བསམ་པར་གཏམ་འདི་དོན་མེད་པ་ཡིན་པས་བུད་མེད་རྣམས་ལ་ཡིད་མ་ཆེས།
LUK 24:12 འོན་ཀྱང་པེ་ཏྲོ་ལངས་ནས་དུར་ཁང་ལ་བརྒྱུགས་པ་དང༌། བསྒུར་ནས་ནང་ལ་བལྟས་ཏེ་རས་སྤུས་ལེགས་གཅིག་པུ་མཐོང་ནས། ངོ་མཚར་སྐྱེས་ཏེ་རང་གི་ནང་ལ་སོང༌།
LUK 24:13 ཉིན་དེ་རང་ལ་ཁོ་ཚོ་ནས་མི་གཉིས་ཡེ་རུ་ཤ་ལེམ་ནས་རྒྱང་ཐག་སྤྱི་ལེ་བཅུ་གཅིག་ཙམ་ཡོད་པའི་ཨེ་མ་ཨུ་ཞེས་པའི་གྲོང་གསེབ་ལ་འགྲོ་སྐབས།
LUK 24:14 ཁོ་ཚོས་གང་བྱུང་བ་ཐམས་ཅད་ཀྱི་སྐོར་ལ་གཏམ་གླེང་བྱེད་པ་དང༌།
LUK 24:15 དེའི་དུས་སུ་ཡེ་ཤུ་རང་ཉིད་ཉེ་བར་བྱོན་ཏེ་ཁོ་ཚོ་དང་མཉམ་དུ་ཕེབས།
LUK 24:16 ཁོ་ཚོ་མིག་བསྒྲིབས་པ་ལྟར་གྱུར་བས་ཁོང་མཐོང་ན་ཡང་སུ་ཡིན་པ་མ་ཤེས།
LUK 24:17 ཡང་ཁོང་གིས་ཁོ་ཚོར་“ཁྱེད་ཚོ་ལམ་ལ་འགྲོ་དུས་གཏམ་གླེང་ཅི་བྱེད་”ཅེས་གསུངས་པས་ཁོ་ཚོའི་གདོང་ལ་སྐྱོ་བའི་ཉམས་ཤིག་ཤར་ནས་བསྡད།
LUK 24:18 ལན་དུ་ཁོ་གཉིས་ལས་ཀཱ་ལི་ཨོ་ཕཱ་ཟེར་མཁན་གཅིག་གིས་ཁོང་ལ་“ཡེ་རུ་ཤ་ལེམ་གྱི་མཇལ་མཁན་རྣམས་ལས་ཁྱེད་གཅིག་པུས་དེང་སང་གང་བྱུང་བ་མི་ཤེས་པ་ཡིན་ནམ་”ཞེས་སྨྲས།
LUK 24:19 ཡང་ཡེ་ཤུས་“གང་བྱུང་”ཞེས་གསུངས་པས་ཁོ་ཚོས་ཁོང་ལ་“ན་ཙ་རེལ་པ་ཡེ་ཤུ་ལ་གང་བྱུང་བའི་སྐོར་ནི། ཁོང་དཀོན་མཆོག་དང་མི་ཐམས་ཅད་ཀྱི་མདུན་དུ་འཕྲིན་ལས་དང་བཀའ་ལ་ནུས་མཐུ་དང་ལྡན་པའི་ལུང་སྟོན་པ་ཞིག་ཡིན་ལ།
LUK 24:20 བླ་ཆེན་དང་ང་ཚོའི་དཔོན་རིགས་ཀྱིས་ཁོང་ལ་སྲོག་ཁྲིམས་གཏོང་བའི་ཕྱིར་པི་ལ་ཏུ་ལ་གཏད་ནས་རྒྱང་ཤིང་སྒང་ལ་བསད།
LUK 24:21 ཡི་སི་ར་ཨེལ་གྱི་སྐྱབས་མཛད་མཁན་ཁོང་ཡིན་པ་དེ་ང་ཚོས་རེ་བ་བྱས། མ་ཟད་བྱ་བ་དེ་ཐམས་ཅད་བྱུང་ནས་ཉི་མ་གསུམ་སོང་བ་ལ།
LUK 24:22 ཡང་ང་ཚོའི་ནང་ནས་བུད་མེད་ཁ་ཤས་ཀྱིས་ང་ཚོར་ཡ་མཚན་སྐྱེད་དུ་བཅུག གང་ལགས་ཟེར་ན། དེ་རིང་ཞོགས་པ་ཉི་མ་ཤར་ཙམ་ལ་ཁོ་ཚོ་དུར་ཁང་ལ་འགྲོ་སྐབས།
LUK 24:23 ཁོང་གི་སྐུ་ཕུང་མ་རྙེད། དེ་ནས་ཁོ་ཚོ་ཡོང་ནས་ང་ཚོ་ལ་དཀོན་མཆོག་གི་ཕོ་ཉ་ཡིས་ང་ཚོར་ཁོང་གསོན་པོ་ཡིན་ཞེས་གསུངས་པའི་ཞལ་གཟིགས་མཐོང་བྱུང་ཞེས་ཟེར།
LUK 24:24 ང་ཚོ་དང་མཉམ་དུ་ཡོད་པ་ཁ་ཅིག་གིས་དུར་ཁང་ལ་ཕྱིན་ནས་བུད་མེད་ཀྱིས་བཤད་པ་ལྟར་མཐོང༌། འོན་ཀྱང་ཁོང་མཐོང་མ་བྱུང་”ཞེས་བཤད།
LUK 24:25 ཡང་ཁོང་གིས་ཁོ་ཚོར་“ལུང་སྟོན་པ་རྣམས་ཀྱིས་གང་གསུངས་པ་ཐམས་ཅད་ལ་ཡིད་ཆེས་དཀའ་བ་བླུན་པོ་ཁྱོད་རྣམས།
LUK 24:26 སྐྱབས་མགོན་མཱ་ཤི་ཀ་སྡུག་བསྔལ་དེ་ལྟར་མྱོང་ནས་ཁོང་གི་གཟི་བརྗིད་ལ་ཞུགས་མི་དགོས་སམ་”ཞེས་གསུངས།
LUK 24:27 དེ་ནས་ལུང་སྟོན་པ་མོ་ཤེ་ཡི་མདོ་ནས་བཟུང་དང་ལུང་སྟོན་པ་གཞན་རྣམས་ཀྱི་མདོ་རེ་རེ་བཞིན་ཁོང་གི་སྐོར་ལ་གང་བྲིས་པ་ཁོ་ཚོར་གསལ་སྟོན་མཛད།
LUK 24:28 ཁོ་ཚོ་འགྲོ་སའི་གྲོང་གསེབ་དང་ཉེ་བར་སླེབས་སྐབས་ཁོང་ད་དུང་ཕར་ལ་ཕེབས་པའི་ཚུལ་མཛད།
LUK 24:29 འོན་ཀྱང་མི་དེ་ཚོས་“ཕྱི་དྲོ་ཡིན་ཏེ་ཉི་མ་ནུབ་ལ་ཉེ་བས་ང་ཚོ་དང་མཉམ་དུ་བཞུགས་རོགས་”ཞེས་ནན་གྱིས་ཞུས། ཁོང་ཁོ་ཚོ་དང་མཉམ་དུ་བཞུགས་པའི་ཕྱིར་གནས་ཁང་ནང་ལ་ཕེབས།
LUK 24:30 ཁོ་ཚོ་དང་མཉམ་དུ་ཅོག་ཙེར་བཞུགས་ཚེ་ཡེ་ཤུས་བག་ལེབ་ཕྱག་ཏུ་བསྣམས་ཤིང༌། དཀོན་མཆོག་ལ་བཀའ་དྲིན་ཆེ་ཞུས་རྗེས་དུམ་བུར་བགོས་ནས་ཁོ་རྣམས་ལ་གནང༌།
LUK 24:31 དེ་ནས་ཁོ་ཚོའི་མིག་ཕྱེ་ནས་ཁོང་སུ་ཡིན་པ་ཤེས་རྗེས་ཁོང་དེ་ཚོའི་མིག་ལམ་ནས་མི་སྣང་བར་གྱུར།
LUK 24:32 ཁོ་ཚོས་གཅིག་གིས་གཅིག་ལ་“ལམ་ལ་ཁོང་གིས་ང་ཚོར་གསུང་གླེང་དང་གསུང་རབ་གསལ་སྟོན་མཛད་སྐབས་ང་ཚོ་སེམས་འགུལ་མི་ཐེབས་སམ་”ཞེས་ཟེར།
LUK 24:33 ཆུ་ཚོད་དེ་རང་ལ་ཁོ་ཚོ་ལངས་ནས་ཡེ་རུ་ཤ་ལེམ་ལ་ཕྱིར་ལོག ཉེ་གནས་བཅུ་གཅིག་པོ་སོགས་འཛོམས་པ་དང་ཐུག་ནས།
LUK 24:34 ཁོ་རྣམས་ཀྱིས་“གཙོ་བོ་དངོས་སུ་སྐུ་གསོན་པོར་བཞེངས་པ་དང་སི་མོན་ལ་མངོན་སུམ་དུ་གྱུར་རོ་”ཞེས་སྨྲས།
LUK 24:35 ཁོ་གཉིས་ཀྱིས་ལམ་ལ་གང་བྱུང་བའི་གཏམ་དང༌། ཅི་ལྟར་བག་ལེབ་བགོས་པའི་སྒོ་ནས་ཁོ་ཚོས་ཁོང་སུ་ཡིན་ངོ་ཤེས་པར་སྨྲས།
LUK 24:36 དེ་ལྟར་བཤད་པའི་དུས་སུ་ཁོང་ཉིད་ཁོ་ཚོའི་དཀྱིལ་ལ་བཞེངས་ཏེ་ཁོ་ཚོར་“ཞི་བདེ་ཁྱེད་རྣམས་ལ་འབབ་པར་ཤོག་”ཅེས་གསུངས།
LUK 24:37 ཁོ་ཚོས་དེ་མཐོང་ནས་གདོན་འདྲེ་ཡིན་པར་བསམས་ཏེ་འཇིགས་སྐྲག་སྐྱེས།
LUK 24:38 ཁོང་གིས་ཁོ་ཚོར་“ཁྱོད་ཚོ་ཅི་ལ་ཞེད་སྣང་སྐྱེས་ཤིང༌། ཁྱོད་ཀྱི་སེམས་སུ་ཅིའི་ཕྱིར་ཐེ་ཚོམ་སྐྱེས།
LUK 24:39 ངའི་རྐང་པ་དང་ལག་པ་ལ་ལྟོས་དང༌། ངའི་ལུས་ལ་རེག་ནས་ང་རང་ཡིན་པ་རྟོགས་པར་གྱིས་ཤིག གང་ཡིན་ཞེ་ན། ང་ལྟར་གདོན་འདྲེ་ལ་ཤ་དང་རུས་པ་མེད་”ཅེས་གསུངས།
LUK 24:40 ཁོང་གིས་དེ་ལྟར་གསུངས་ནས་རང་གི་ཞབས་དང་ཕྱག་ཁོ་ཚོ་ལ་སྟོན་པར་མཛད།
LUK 24:41 སེམས་དགའ་བའི་རྐྱེན་གྱིས་ཁོ་ཚོས་ད་དུང་ཡིད་མ་ཆེས་ཏེ་ཡ་མཚན་ཆེན་པོར་གྱུར་བའི་དུས་སུ་ཁོང་གིས་ཁོ་ཚོར་“ཟས་ཅི་ཞིག་ཡོད་དམ་”ཞེས་གསུངས་ནས།
LUK 24:42 ཁོ་ཚོས་ཁོང་ལ་མེ་སྲེག་ཐེབས་པའི་ཉ་ཤ་དུམ་བུ་ཞིག་སྟེར་ནས།
LUK 24:43 དེ་ཕྱག་ཏུ་བསྣམས་ཏེ་ཁོ་ཚོའི་མདུན་དུ་བཞེས།
LUK 24:44 དེ་ནས་ཁོང་གིས་ཁོ་ཚོར་“ཁྱོད་ཚོ་དང་མཉམ་དུ་ཡོད་པའི་ཚེ་ངས་འདི་ལྟར་སྨྲས། མོ་ཤེ་ཡི་བཀའ་ཁྲིམས་དང༌། ལུང་སྟོན་པ་རྣམས་དང་གསུང་མགུར་ཞེས་པའི་མདོ་ལས་ངའི་སྐོར་བྲིས་པ་ཐམས་ཅད་འགྲུབ་པར་འགྱུར་ངེས་ཡིན་ནོ་”ཞེས་གསུངས།
LUK 24:45 དེ་ནས་མདོ་རྣམས་རྟོགས་པའི་ཕྱིར་ཁོང་གིས་ཁོ་ཚོའི་བློ་སྒོ་འབྱེད་པར་མཛད་པ་དང༌།
LUK 24:46 ཁོ་ཚོར་“སྐྱབས་མགོན་མཱ་ཤི་ཀ་སྡུག་བསྔལ་མྱོང་ནས་ཉི་མ་གསུམ་པར་འཆི་བ་ལས་གསོན་པོར་བཞེངས་པར་འགྱུར་ཞིང༌།
LUK 24:47 ཡེ་རུ་ཤ་ལེམ་ནས་བཟུང་སྟེ་མི་རིགས་ཀུན་ལ་ཁོང་གི་མཚན་གྱི་ཐོག་ནས་སྡིག་ཉེས་སེལ་བའི་ཆེད་སྤྱོད་པ་ངན་པ་སྤངས་ནས་སེམས་བསྒྱུར་བ་དེ་སྒྲོག་དགོས་པ་བྲིས་འདུག
LUK 24:48 དོན་འདི་ཚོ་ལ་དཔང་པོ་བྱེད་མཁན་ཁྱེད་རྣམས་ཡིན་ནོ།
LUK 24:49 ཡང་ལྟོས་ཤིག ངའི་ཡབ་ཀྱིས་ཞལ་གྱིས་བཞེས་པའི་དམ་པའི་ཐུགས་ཉིད་ངས་ཁྱེད་ཚོར་འབབ་ཏུ་འཇུག ཁྱེད་ཚོར་སྟེང་ནས་ནུས་མཐུ་ཡིས་ཡོངས་སུ་མ་ཁྱབ་པའི་བར་དུ་གྲོང་ཁྱེར་ལ་སྡོད་ཅིག་”ཅེས་གསུངས།
LUK 24:50 དེའི་རྗེས་སུ་ཁོང་གིས་ཁོ་ཚོ་ཕྱི་རོལ་ཏུ་པེ་ཐན་ཡཱ་ཞེས་བྱ་བའི་གྲོང་གསེབ་ཀྱི་བར་དུ་ཁྲིད་པ་དང༌། ཕྱག་ཟུང་ཡར་བཏེག་སྟེ་ཁོ་ཚོར་བྱིན་རླབས་གནང༌།
LUK 24:51 དེ་ལྟར་མཛད་པའི་རིང་ལ་ཁོ་རྣམས་དང་ཁ་བྲལ་ཏེ་ཁོང་དཀོན་མཆོག་གི་ཞིང་ཁམས་སུ་འཕགས་པར་གྱུར།
LUK 24:52 ཁོང་ལ་བསྙེན་བཀུར་ཞུས་པའི་རྗེས་སུ་དེ་རྣམས་དགའ་སྤྲོ་ཆེན་པོས་ཡེ་རུ་ཤ་ལེམ་ལ་ཕྱིར་ལོག་པ་དང༌།
LUK 24:53 ཁོ་ཚོ་མཆོད་ཁང་ཆེན་མོར་དུས་རྒྱུན་དུ་གནས་ཏེ་དཀོན་མཆོག་ལ་བསྟོད་པ་ཕུལ་ལོ། །
JOH 1:1 ཐོག་མར་བཀའ་ཡོད་ལགས་པ་དང༌། བཀའ་ནི་དཀོན་མཆོག་དང་མཉམ་དུ་བཞུགས། བཀའ་དེ་དཀོན་མཆོག་ལགས་པ་ཡིན།
JOH 1:2 ཁོང་ནི་ཐོག་མར་དཀོན་མཆོག་དང་མཉམ་དུ་བཞུགས་ཏེ།
JOH 1:3 ཁོང་བརྒྱུད་ནས་ཅི་ཡོད་པ་ཐམས་ཅད་བྱུང་བ་དང༌། ཁོང་མེད་པར་ཅི་ཡང་མ་བྱུང༌།
JOH 1:4 ཁོང་གི་ནང་ན་དཔག་ཏུ་མེད་པའི་ཚེ་ཡོད་པ་དང༌། ཚེ་དེ་ནི་མི་ཐམས་ཅད་ཀྱི་འོད་ཡིན་ནོ།
JOH 1:5 འོད་དེ་མུན་པའི་ནང་དུ་འཕྲོ། མུན་པས་དེ་མནན་པར་མ་ཐུབ།
JOH 1:6 དཀོན་མཆོག་གིས་མི་ཞིག་མངགས་ཏེ། ཁོང་གི་མིང་ལ་ཡོ་ཧ་ནན་ཞེས་ཟེར།
JOH 1:7 མི་ཐམས་ཅད་ཁོང་བརྒྱུད་ནས་དད་པ་བྱེད་པའི་ཕྱིར་ཁོང་ནི་འོད་དེ་ལ་དཔང་པོ་བྱེད་པའི་ཆེད་དུ་ཕེབས།
JOH 1:8 ཁོང་རང་ནི་འོད་དེ་མ་ཡིན་མོད། འོད་དེ་ལ་དཔང་པོ་བྱེད་པའི་ཕྱིར་འོངས།
JOH 1:9 བདེན་པའི་འོད་མི་ཐམས་ཅད་ལ་འོད་གནང་བའི་ཕྱིར་འཇིག་རྟེན་ལ་བྱོན།
JOH 1:10 ཁོང་ནི་འཇིག་རྟེན་འདིར་བཞུགས་ཏེ། ཁོང་ཉིད་བརྒྱུད་ནས་འཇིག་རྟེན་བཀོད་ན་ཡང༌། འཇིག་རྟེན་གྱི་མི་རྣམས་ཀྱིས་ཁོང་ངོ་མ་ཤེས།
JOH 1:11 ཁོང་ནི་རང་གི་ཡུལ་ལ་ཕེབས་ན་ཡང༌། རང་གི་ཡུལ་མི་རྣམས་ཀྱིས་ཁོང་མ་བསུས།
JOH 1:12 འོན་ཀྱང་ཁོང་བསུས་ནས་ཁོང་གི་མཚན་ལ་དད་པ་བྱེད་མཁན་ཐམས་ཅད་ལ་ཁོང་གིས་དཀོན་མཆོག་གི་སྲས་དང་སྲས་མོར་འགྱུར་བའི་དབང་ཆ་གནང་བ་དང༌།
JOH 1:13 དེ་རྣམས་ནི་མ་ཡི་མངལ་ལས་སྐྱེས་པ་མ་ཡིན་ལ། མི་ཡི་འདོད་པའི་དབང་གིས་མ་སྐྱེས་ཤིང་ཁྱོ་གའི་བསམ་འདུན་བཞིན་དུའང་སྐྱེས་པ་མིན། དཀོན་མཆོག་ལས་སྐྱེས་སོ། །
JOH 1:14 བཀའ་ཞེས་པ་དེ་མི་རུ་གྱུར་བ་དང༌། ཐུགས་རྗེ་དང་བདེན་པ་ཉིད་ཀྱིས་གང་བ་ཡིན་ཏེ་ང་ཚོའི་ཁྲོད་དུ་གནས། ཁོང་གི་གཟི་བརྗིད་ཡབ་ནས་བྱུང་བའི་སྲས་གཅིག་པོའི་གཟི་བརྗིད་དེ་ང་ཚོས་མཐོང༌།
JOH 1:15 ཡོ་ཧ་ནན་གྱིས་“ང་ཡི་རྗེས་སུ་ཕེབས་མཁན་ནི། ང་ལས་སྔོན་དུ་ཡོད་པས་ང་ལས་ཆེ་བ་ཡིན་ཞིང༌། ངས་སྔོན་སྨྲས་པའི་སྐྱེས་བུ་ནི་ཁོང་ཉིད་ཡིན་”ཞེས་ཁོང་གི་སྐོར་གསུངས་ནས་དཔང་པོ་བྱས་ཤིང་འབོད་སྒྲ་བསྒྲགས།
JOH 1:16 ཁོང་གི་ཕུན་སུམ་ཚོགས་པ་ལས་ང་ཚོ་ཚང་མར་ཐུགས་རྗེ་ཡང་ཡང་ཐོབ།
JOH 1:17 དཀོན་མཆོག་གིས་ལུང་སྟོན་པ་མོ་ཤེ་བརྒྱུད་ནས་ཡ་ཧུ་དཱ་པའི་ཆོས་ཁྲིམས་གནང་མོད། ཐུགས་རྗེ་དང་བདེན་པ་ཉིད་ནི་ཡེ་ཤུ་མཱ་ཤི་ཀ་བརྒྱུད་ནས་བྱུང༌།
JOH 1:18 མི་སུས་ཀྱང་དཀོན་མཆོག་གཏན་ནས་མ་མཐོང༌། ཡབ་དཀོན་མཆོག་གི་སྐུ་པང་ལ་བཞུགས་པའི་སྲས་གཅིག་པོས་འཇིག་རྟེན་ཀུན་ལ་ཁོང་གི་སྐོར་གསལ་སྟོན་མཛད།
JOH 1:19 ཡེ་རུ་ཤ་ལེམ་གྲོང་ཁྱེར་ལ་ཡོད་པའི་ཡ་ཧུ་དཱ་པའི་ཆོས་དཔོན་རིགས་ཀྱིས་ཡ་ཧུ་དཱ་པའི་བླ་མ་རྣམས་དང་ལེ་ཝི་པ་ཟེར་བའི་མཆོད་གཡོག་པོ་རྣམས་ཡོ་ཧ་ནན་གྱི་དྲུང་དུ་བཏང་ནས། ཁོང་ལ་ཁྱེད་སུ་ཡིན་ཞེས་འདྲི་བའི་ཕྱིར།
JOH 1:20 ཡོ་ཧ་ནན་གྱིས་སྦ་གསང་ཅི་ཡང་མེད་པར་དྲང་པོར་གསུངས་ཏེ་“ང་ནི་སྐྱབས་མགོན་མཱ་ཤི་ཀ་མིན་”ཞེས་དཔང་པོ་བྱས།
JOH 1:21 མི་དེ་ཚོས་“བྱས་ན་ཁྱེད་སུ་ཡིན། ཁྱེད་ལུང་སྟོན་པ་ཨེ་ལི་ཡཱ་ཡིན་ནམ་”ཞེས་ཟེར་བ་དང་ཁོང་གིས་“མ་ཡིན་”ཞེས་གསུངས། ཁོ་ཚོས་“ཁྱེད་ལུང་སྟོན་པ་ཞེས་པ་དེ་ཡིན་ནམ་”ཞེས་དྲིས་པ་དང་ཁོང་གིས་“མ་ཡིན་”ཞེས་གསུངས།
JOH 1:22 མི་དེ་རྣམས་ཀྱིས་“ང་ཚོ་གཏོང་མཁན་རྣམས་ལ་ལན་འདེབས་དགོས་པས། ཁྱེད་རང་གིས་ཁྱེད་སུ་ཡིན་པ་ཤོད་རོགས་”ཞེས་སྨྲས་པ་དང༌།
JOH 1:23 ཁོང་གིས་“ལུང་སྟོན་པ་ཡེ་ཤ་ཡཱ་ཡི་མདོ་ལས་གསུངས་པ་ལྟར། དབེན་སྟོང་ནང་ལ་གྲགས་པའི་འབོད་སྒྲ་ཡིས། ། གཙོ་བོའི་ཕེབས་ལམ་བདེ་མོ་བཟོ་བར་གྱིས། ། ཞེས་གསུང་བའི་སྒྲ་དེ་ནི་ང་ཡིན་”ཞེས་ལན་བཏབ།
JOH 1:24 ཕཱ་རུ་ཤི་ཟེར་བའི་ཕྱོགས་ཁག་གིས་བཏང་ཡོད་པའི་མི་འདི་རྣམས་ཀྱིས་ཡོ་ཧ་ནན་ལ་
JOH 1:25 “ད་ཁྱེད་སྐྱབས་མགོན་མཱ་ཤི་ཀ་མ་ཡིན་ན། ལུང་སྟོན་པ་ཨེ་ལི་ཡཱ་ཡང་མ་ཡིན་ན། ལུང་སྟོན་པ་ཟེར་མཁན་དེ་ཡང་མ་ཡིན་པས། ཅིའི་ཕྱིར་མི་ལ་ཁྲུས་གསོལ་གནང་ངམ་”ཞེས་དྲིས།
JOH 1:26 དེའི་ལན་དུ་ཡོ་ཧ་ནན་གྱིས་“ངས་མི་རྣམས་ལ་ཆུ་ཡིས་ཁྲུས་གསོལ་བྱེད་བཞིན་ཡོད། འོན་ཀྱང་ཁྱེད་རྣམས་ཀྱིས་ངོ་མི་ཤེས་པའི་སྐྱེས་བུ་དེ་ནི་ཁྱེད་ཚོའི་ཁྲོད་དུ་ཡོད།
JOH 1:27 ཁོང་ངའི་རྗེས་སུ་འབྱོན་ཀྱང་ང་ནི་ཁོང་གི་ལྷམ་སྒྲོག་འགྲོལ་བར་ཡང་མི་འོས་”ཞེས་བཤད།
JOH 1:28 དོན་འདི་རྣམས་ཡོ་ཧ་ནན་གྱིས་ཁྲུས་གསོལ་གནང་བའི་གནས་པེ་ཐན་ཡཱ་ཞེས་བྱ་བ་ཡོར་དན་གཙང་པོའི་ཕར་ཕྱོགས་སུ་བྱུང་ངོ༌། །
JOH 1:29 དེའི་ཕྱི་ཉིན་ཡོ་ཧ་ནན་གྱིས་ཡེ་ཤུ་རང་གི་མདུན་དུ་ཕེབས་པར་མཐོང་སྟེ་“ལྟོས་དང༌། འདི་ནི་དཀོན་མཆོག་གི་ལུ་གུ་ཡིན་ཏེ་འཇིག་རྟེན་གྱི་སྡིག་ཉེས་སེལ་མཁན་ནི་ཁོང་ཉིད་ཡིན་ནོ།
JOH 1:30 སྔར་ངས་ང་ཡི་རྗེས་སུ་ཕེབས་མཁན་ནི། ང་ལས་སྔོན་དུ་ཡོད་པས་ང་ལས་ཆེ་བ་ཡིན་ཞིང༌། ངས་སྔོན་སྨྲས་པའི་སྐྱེས་བུ་ནི་ཁོང་ཉིད་ཡིན།
JOH 1:31 ང་རང་གིས་ཁོང་ངོ་མ་ཤེས། འོན་ཀྱང་ཁོང་ཡི་སི་ར་ཨེལ་ལ་ངོ་སྤྲོད་བྱེད་པའི་ཕྱིར་ཆུ་ཡིས་ཁྲུས་གསོལ་བྱེད་དུ་ང་འོངས་”ཞེས་བཤད།
JOH 1:32 ཡང་ཡོ་ཧ་ནན་གྱིས་དཔང་པོ་བྱས་ཏེ་“དམ་པའི་ཐུགས་ཉིད་ཕུག་རོན་ལྟར་དཀོན་མཆོག་གི་ཞིང་ཁམས་ནས་བབ་སྟེ་ཁོང་གི་སྟེང་དུ་གནས་པར་ངས་མཐོང་མྱོང༌། ངས་ཁོང་ངོ་མ་ཤེས་ཡོད་ཀྱང་ང་ཆུ་ཡིས་ཁྲུས་གསོལ་དུ་མངགས་མཁན་གྱིས་ངར་འདི་སྐད་གསུངས། ཁྱོད་ཀྱིས་སུའི་ཐོག་ཏུ་དམ་པའི་ཐུགས་ཉིད་བབ་ནས་བཞུགས་པར་མཐོང་བ་དེ་ནི་དམ་པའི་ཐུགས་ཉིད་ཀྱིས་ཁྲུས་གསོལ་མཁན་དེ་ཡིན་ནོ་”ཞེས་གསུངས།
JOH 1:34 ཁོང་གིས་“ང་རང་གིས་དེ་བཞིན་དུ་མཐོང་མྱོང་བས། མི་འདི་ནི་དཀོན་མཆོག་གི་སྲས་ཡིན་པར་དཔང་པོ་བྱས་ཡོད་”ཅེས་གསུངས་སོ། །
JOH 1:35 དེའི་ཕྱི་ཉིན་ཡང་ཡོ་ཧ་ནན་ཁོང་གི་ཉེ་གནས་གཉིས་དང་མཉམ་དུ་དེར་ཡོད་དེ།
JOH 1:36 ཡེ་ཤུ་ཕེབས་པ་མཐོང་སྟེ་ཡོ་ཧ་ནན་གྱིས་“ལྟོས་དང༌། འདི་ནི་དཀོན་མཆོག་གི་ལུ་གུ་ཡིན་ནོ་”ཞེས་གསུངས།
JOH 1:37 ཉེ་གནས་དེ་གཉིས་ཀྱིས་ཁོང་གིས་གསུངས་པ་དེ་ཐོས་ནས་ཡེ་ཤུའི་རྗེས་སུ་འབྲངས།
JOH 1:38 ཡེ་ཤུས་ཞལ་ཕྱིར་བསྐོར་ཏེ་རྗེས་སུ་འབྲང་མཁན་དེ་གཉིས་གཟིགས་ཏེ་“ཁྱེད་ཚོས་ཅི་འཚོལ་བ་ཡིན་ནམ་”ཞེས་གསུངས་པས་དེ་གཉིས་ཀྱིས་“རབ་བི། (རབ་བི་ཟེར་ན་ཡ་ཧུ་དཱ་པའི་ཆོས་ཀྱི་སློབ་དཔོན་ཡིན་) ཁྱེད་རང་ག་པར་བཞུགས་ཀྱི་ཡོད་”ཅེས་བཤད།
JOH 1:39 ཁོང་གིས་“ཤོག་ལ་ལྟོས་དང་”ཞེས་གསུངས། ཁོ་གཉིས་འོངས་པ་དང་ཁོང་གི་བཞུགས་ས་མཐོང་ནས་ཕྱི་དྲོའི་ཆུ་ཚོད་བཞི་ཙམ་ཡོད་པས་ཉིན་མོ་དེ་ཁོང་དང་མཉམ་དུ་བསྡད།
JOH 1:40 ཡོ་ཧ་ནན་གྱིས་གསུངས་པ་དེ་ཐོས་ནས་ཡེ་ཤུའི་རྗེས་སུ་འབྲང་མཁན་དེ་གཉིས་ཀྱི་ནང་ནས་གཅིག་ནི་སི་མོན་པེ་ཏྲོ་ཡི་སྤུན་ཨན་དྲི་ཡཱ་ཡིན།
JOH 1:41 ཨན་དྲི་ཡཱས་ཐོག་མར་རང་གི་སྤུན་སི་མོན་ཐུག་ནས་དེ་ལ་“ང་ཚོས་སྐྱབས་མགོན་མཱ་ཤི་ཀ་མཇལ་བྱུང་”ཞེས་ཟེར། (མཱ་ཤི་ཀ་ཟེར་ན་བྱུགས་པའི་མི་ཡི་དོན་ཡིན་)
JOH 1:42 དེ་ནས་ཨན་དྲི་ཡཱ་ཡིས་སི་མོན་ཡེ་ཤུའི་སྐུ་དྲུང་དུ་ཁྲིད། ཡེ་ཤུས་ཁོ་ལ་གཟིགས་ནས་“ཁྱེད་ནི་ཡོ་ཧ་ནན་ཞེས་བྱ་བའི་བུ་སི་མོན་ཡིན་ཏེ། ཁྱེད་ཀྱི་མིང་ལ་ཀེ་ཕཱ་ཞེས་གདགས་རྒྱུ་ཡིན་”ཞེས་གསུངས། (ཀེ་ཕཱ་ཡི་དོན་ནི་པེ་ཏྲོ་ཡིན་)
JOH 1:43 དེའི་སང་ཉིན་ཡེ་ཤུ་ག་ལིལ་ཡུལ་དུ་ཕེབས་པར་དགོངས་ཏེ། ཕི་ལིབ་དང་ཐུག་ནས་ཁོ་ལ་“ངའི་རྗེས་སུ་འབྲོངས་”ཞེས་གསུངས།
JOH 1:44 ཕི་ལིབ་ནི་པེ་སད་དཱ་པ་ཡིན་པས། ཨན་དྲི་ཡཱ་དང་པེ་ཏྲོ་གཉིས་དང་ཕ་ཡུལ་གཅིག་པ་ཡིན།
JOH 1:45 ཕི་ལིབ་ན་ཐན་ཨེལ་དང་ཐུག་ནས་ཁོ་ལ་“ལུང་སྟོན་པ་མོ་ཤེས་བཀའ་ཁྲིམས་ཀྱི་མདོའི་ནང་བྲིས་ཡོད་པ་དང༌། ལུང་སྟོན་པ་རྣམས་ཀྱིས་ཀྱང་ལུང་བསྟན་ལས་སྐྱེས་བུ་དེའི་སྐོར་བྲིས་ཡོད་པའི་ན་ཙ་རེལ་གྲོང་སྡེ་ནས་ཡིན་པ་ཡོ་སེབ་ཀྱི་བུ་ཡེ་ཤུ་ང་ཚོས་མཇལ་བྱུང་”ཞེས་བཤད།
JOH 1:46 ན་ཐན་ཨེལ་གྱིས་“ན་ཙ་རེལ་ནས་དོན་ལེགས་པོ་ཞིག་འབྱུང་བར་སྲིད་དམ་”ཞེས་ཟེར་བས་ལན་དུ་ཕི་ལིབ་ཀྱིས་“ཤོག་ལ་ལྟོས་དང་”ཞེས་གསུངས།
JOH 1:47 ཡེ་ཤུས་ན་ཐན་ཨེལ་དྲུང་དུ་འོང་བར་གཟིགས་ནས་“ལྟོས་དང༌། འདི་ནི་བདེན་པའི་ཡི་སི་ར་ཨེལ་པ་ཡིན་ཏེ། སེམས་ལ་གཡོ་སྒྱུ་མེད་པ་ཞིག་ཡིན་”ཞེས་གསུངས།
JOH 1:48 ན་ཐན་ཨེལ་གྱིས་ཁོང་ལ་“ཁྱེད་ཀྱིས་ང་ཇི་ལྟར་མཁྱེན་”ཞེས་ཞུས་པས་ཡེ་ཤུས་“ཁྱེད་བསེ་ཡབ་ཤིང་གི་འོག་ལ་བསྡད་ཡོད་པའི་ཚེ། ཕི་ལིབ་ཀྱིས་ཁྱེད་མ་བོས་པའི་སྔོན་ལ་ངས་ཁྱེད་མཐོང་བྱུང་”ཞེས་གསུངས་པ་དང༌།
JOH 1:49 ན་ཐན་ཨེལ་གྱིས་“རབ་བི། ཁྱེད་རང་ནི་དཀོན་མཆོག་གི་སྲས་དང་ཡི་སི་ར་ཨེལ་གྱི་རྒྱལ་པོ་ཡིན་”ཞེས་བཤད།
JOH 1:50 དེའི་ལན་དུ་ཡེ་ཤུས་“ངས་ཁྱེད་བསེ་ཡབ་ཤིང་གི་འོག་ལ་མཐོང་བྱུང་ཞེས་ཁྱེད་ལ་བཤད་པས་ཁྱེད་ཀྱིས་དད་པ་བྱེད་དམ། ཁྱེད་ཀྱིས་དོན་དེ་ལས་ཆེ་བ་མཐོང་བར་འགྱུར་”ཞེས་གསུངས།
JOH 1:51 ཡང་ཁོང་གིས་“ངས་ཁྱེད་རྣམས་ལ་བདེན་པ་བདེན་པར་ཟེར་རྒྱུ་ཡིན་ཏེ། དཀོན་མཆོག་གི་ཞིང་ཁམས་བྱེ་ནས། དཀོན་མཆོག་གི་ཕོ་ཉ་རྣམས་མིའི་རིགས་ཀྱི་བུ་ཟེར་མཁན་གྱི་ཐོག་ཏུ་འབབ་པ་དང་འཛེག་པར་ཁྱེད་རྣམས་ཀྱིས་མཐོང་གི་རེད་”ཅེས་གསུངས་སོ། །
JOH 2:1 དེ་ནས་ཉི་མ་གསུམ་པ་ལ་ག་ལིལ་ཡུལ་གྱི་ཀ་ནཱ་ཟེར་བའི་གྲོང་ཁྱེར་ལ་བག་སྟོན་ཅིག་ཡོད་དེ། ཡེ་ཤུའི་ཡུམ་དེ་རུ་ཡོད་པ་ཡིན།
JOH 2:2 ཡེ་ཤུ་དང་ཁོང་གི་ཉེ་གནས་རྣམས་ཀྱང་བག་སྟོན་དུ་མགྲོན་ལ་བོས།
JOH 2:3 རྒུན་ཆང་རྫོགས་སྐབས། ཡེ་ཤུའི་ཡུམ་གྱིས་ཁོང་ལ་“ཁོ་ཚོར་རྒུན་ཆང་མེད་”ཅེས་གསུངས།
JOH 2:4 ཡེ་ཤུས་ཁོང་ལ་“ཨ་མ་ལགས། ཁྱེད་ཀྱིས་ཅིའི་ཕྱིར་ང་རང་དོན་དེ་དང་འབྲེལ་བ་ཡོད་པར་བྱ་འདོད་དམ། ངའི་དུས་ཚོད་ད་དུང་མ་སླེབས་”ཞེས་གསུངས།
JOH 2:5 ཁོང་གི་ཡུམ་གྱིས་དེར་ཡོད་པའི་གཡོག་པོ་རྣམས་ལ་“ཁོང་གིས་ཁྱེད་ཚོ་ལ་གང་གསུང་པ་བཞིན་དུ་བྱོས་ཤིག་”ཅེས་བཤད།
JOH 2:6 ད་ཡ་ཧུ་དཱ་པ་རྣམས་ཀྱི་གཙང་བར་བྱེད་པའི་ཆོས་ཁྲིམས་བཞིན་དུ་རྡོའི་ཆུ་བན་རེ་རེ་ལ་ཧ་ལམ་ཧྲེང་བརྒྱ་གཤོང་བ་དྲུག་དེར་བཞག་ཡོད་པ་ཡིན།
JOH 2:7 ཡེ་ཤུས་གཡོག་པོ་ཚོར་“བན་འདི་ཚོ་ཆུ་ཡིས་རྒྱོངས་”ཞེས་བཀའ་གནང་བས་ཁོ་ཚོས་བན་ཡོངས་སུ་ཁེངས་པར་ཆུས་བཀང༌།
JOH 2:8 ཁོང་གིས་“ད་བཅུས་ནས་གསོལ་དཔོན་ལ་སྐྱོལ་དང་”ཞེས་གསུངས་པ་དང་གཡོག་པོས་དེ་ལྟར་བྱས།
JOH 2:9 གསོལ་དཔོན་དེས་ཆུ་རྒུན་ཆང་དུ་གྱུར་བའི་བྲོ་བ་མྱངས་ནས། དེ་ག་ནས་བྱུང་མིན་མ་ཤེས་ཀྱང༌། གཡོག་པོ་ཆུ་འཆུ་མཁན་གྱིས་ཤེས། གསོལ་དཔོན་གྱིས་མག་པ་བོས་ཏེ་
JOH 2:10 “མི་གཞན་དག་ཚང་མས་སྔོན་ལ་རྒུན་ཆང་སྤུས་ལེགས་སྟེར་ནས་མགྲོན་པོ་རྣམས་ཀྱིས་མང་པོ་བཏུངས་པའི་རྗེས་སུ་རྒུན་ཆང་ཞན་པ་ཞིག་སྟེར། འོན་ཀྱང་ཁྱེད་ཀྱིས་རྒུན་ཆང་ལེགས་པོ་ད་ལྟ་བར་ཉར་ཚགས་བྱས་”ཞེས་བཤད།
JOH 2:11 དེ་ལྟར་ཡེ་ཤུས་ག་ལིལ་ཡུལ་གྱི་གྲོང་ཁྱེར་ཀ་ནཱ་ལ་ངོ་མཚར་བའི་རྟགས་དང་པོ་བསྟན་ཏེ། རང་གི་གཟི་བརྗིད་མངོན་པར་མཛད་པས་ཉེ་གནས་རྣམས་ཀྱིས་ཁོང་ལ་དད་པ་བྱས་སོ།
JOH 2:12 དེའི་རྗེས་སུ་ཡེ་ཤུ་རང་གི་ཡུམ་དང་སྐུ་མཆེད་དང༌། ཉེ་གནས་རྣམས་དང་མཉམ་དུ་ཀ་ཕར་ན་ཧུམ་ཞེས་པའི་གྲོང་ཁྱེར་ལ་མར་ཕེབས་ནས། དེར་ཉིན་ཤས་བཞུགས་སོ། །
JOH 2:13 ཡང་པེ་སག་ཟེར་བའི་ཡ་ཧུ་དཱ་པའི་དུས་ཆེན་ཉེ་བས། ཡེ་ཤུ་ཡེ་རུ་ཤ་ལེམ་ལ་ཡར་ཕེབས་པ་དང༌།
JOH 2:14 དེར་ཁོང་གིས་ཡ་ཧུ་དཱ་པའི་མཆོད་ཁང་ཆེན་མོའི་སྒོ་ར་ལ་བ་གླང་དང༌། ལུག ཕུག་རོན་བཅས་ཚོང་མཁན་དང༌། དངུལ་རྗེ་མཁན་རྣམས་བསྡད་ཡོད་པར་གཟིགས།
JOH 2:15 ཁོང་གིས་ཐག་པའི་རྟ་ལྕག་ཅིག་མཛད་ནས། སྒོ་རའི་ནང་ནས་ལུག་དང་བ་གླང་ཐམས་ཅད་ཕྱིར་བཏོན་པ་དང༌། དངུལ་རྗེ་མཁན་གྱི་ལྕོག་ཙེ་མགོ་རྟིང་བསློགས་ནས་དངུལ་སྒོར་གཏོར།
JOH 2:16 ཕུག་རོན་ཚོང་མཁན་རྣམས་ལ་“འདི་ཐམས་ཅད་འདི་ནས་ཕྱིར་ཁྱེར་ཞིག ངའི་ཡབ་ཀྱི་གནས་མཆོག་ནི་ཚོང་རར་མ་བྱོས་”ཞེས་བཀའ་གནང༌།
JOH 2:17 ཁྱེད་ཀྱི་ཕོ་བྲང་གི་ཆེད་དུ་བརྩོན་སེམས་ཀྱིས་ང་མེད་པ་བཟོ་བར་བྱ་ཞེས་མདོ་ལས་བྲིས་འདུག་པ་དེ་ཉེ་གནས་རྣམས་ཀྱིས་དྲན།
JOH 2:18 དེ་ནས་ཡ་ཧུ་དཱ་པའི་ཆོས་དཔོན་རྣམས་ཀྱིས་“ཁྱེད་ཀྱིས་ལས་འདི་འདྲ་མཛད་པའི་དབང་ཆ་ཡོད་པ་སྟོན་པའི་ཕྱིར་ང་ཚོ་ལ་ངོ་མཚར་བའི་དོན་གང་སྟོན་པར་མཛད་དམ་”ཞེས་དྲིས་པས།
JOH 2:19 ལན་དུ་ཡེ་ཤུས་“མཆོད་ཁང་འདི་བཤིག་ན་ངས་ཉིན་ཞག་གསུམ་ལ་སླར་ཡང་རྩིག་པར་བྱའོ་”ཞེས་གསུངས།
JOH 2:20 ཡ་ཧུ་དཱ་པའི་ཆོས་དཔོན་རྣམས་ཀྱིས་“མཆོད་ཁང་ཆེན་མོ་འདི་ནི་ལོ་བཞི་བཅུ་ཞེ་དྲུག་རིང་ལ་བརྩིགས་པ་ཡིན། ཁྱེད་ཀྱིས་ཞག་གསུམ་ལ་སླར་ཡང་བརྩིག་རྒྱུ་ཡིན་ནམ་”ཞེས་དྲིས།
JOH 2:21 འོན་ཀྱང་ཡེ་ཤུས་རང་གི་སྐུ་ལུས་ཡིན་པའི་མཆོད་ཁང་ལ་དཔེ་མཛད་དེ་གསུངས་པ་ཡིན།
JOH 2:22 དེས་ཁོང་འཆི་བ་ནས་སྐུ་གསོན་པོར་བཞེངས་སྐབས་ཉེ་གནས་རྣམས་ཀྱིས་གསུངས་དེ་དྲན་པ་དང༌། མདོ་དང་ཡེ་ཤུས་གསུངས་པའི་བཀའ་དེ་གཉིས་ལ་དད་པ་བྱས།
JOH 2:23 ཡང་ཡེ་ཤུ་པེ་སག་གི་དུས་ཆེན་ལ་ཡེ་རུ་ཤ་ལེམ་ལ་བཞུགས་པའི་ཚེ། མི་མང་པོས་ཁོང་གིས་མཛད་པའི་ངོ་མཚར་བའི་རྟགས་མཐོང་བས་ཁོང་གི་མཚན་ལ་དད་པ་བྱས།
JOH 2:24 འོན་ཀྱང་ཡེ་ཤུས་མི་ཐམས་ཅད་མཁྱེན་པས་སུས་ཀྱང་གཞན་གྱི་སྐོར་ཁོང་ལ་ཞུ་མ་དགོས་པར། མི་རྣམས་ཀྱི་སེམས་ནང་ཅི་ཡོད་པ་མཁྱེན་པས་དེ་ཚོར་བློ་གཏད་མ་མཛད་དོ། །
JOH 3:1 དེའི་ཚེ་ཕཱ་རུ་ཤི་ཟེར་བའི་ཕྱོགས་ཁག་ནང་ནས་མི་ནཱི་ཀོ་དེམ་བྱ་བ་ཡ་ཧུ་དཱ་པའི་དབུ་ཁྲིད་པ་ཞིག་ཡོད་དེ།
JOH 3:2 མཚན་མོར་ཡེ་ཤུ་མཇལ་དུ་འོངས་ནས་“རབ་བི། ཁྱེད་ནི་དཀོན་མཆོག་གི་མདུན་ནས་ཕེབས་པའི་སྟོན་པ་ཞིག་ཡིན་པ་ང་ཚོས་ཤེས། ཅི་ལགས་ཟེར་ན། ཁྱེད་ཀྱིས་སྟོན་པར་མཛད་པའི་རྟགས་འདི་ཚོ་དཀོན་མཆོག་དང་འབྲལ་ཏེ་སུས་ཀྱང་སྟོན་པར་མི་སྲིད་”ཅེས་གསུངས་པ་ན།
JOH 3:3 ལན་དུ་ཡེ་ཤུས་“ངས་ཁྱེད་ལ་བདེན་པ་བདེན་པར་ཟེར་རྒྱུར། གལ་ཏེ་མི་ཞིག་ཡང་བསྐྱར་མ་སྐྱེས་ན། དཀོན་མཆོག་གི་རྒྱལ་སྲིད་མཐོང་བར་མི་སྲིད་དོ་”ཞེས་གསུངས།
JOH 3:4 ནཱི་ཀོ་དེམ་གྱིས་ཁོང་ལ་“མི་ཞིག་རྒས་ནས་ཡང་བསྐྱར་ཇི་ལྟར་སྐྱེ་སྲིད། ཁོའི་ཨ་མའི་མངལ་དུ་འཛུལ་ནས་ཐེངས་གཉིས་པར་སྐྱེ་སྲིད་དམ་”ཞེས་དྲིས།
JOH 3:5 ལན་དུ་ཡེ་ཤུས་“ངས་ཁྱེད་ལ་བདེན་པ་བདེན་པར་ཟེར་རྒྱུར། གལ་ཏེ་མི་ཞིག་ཆུ་དང་དཀོན་མཆོག་གི་དམ་པའི་ཐུགས་ཉིད་བརྒྱུད་ནས་མ་སྐྱེས་ན། དཀོན་མཆོག་གི་རྒྱལ་སྲིད་དུ་འཛུལ་བར་མི་སྲིད་དོ།
JOH 3:6 ལུས་ནས་སྐྱེས་པ་ནི་ལུས་ཡིན་པ་ལྟར། དམ་པའི་ཐུགས་ཉིད་ལས་སྐྱེས་པ་དེ་ནི་སེམས་ཉིད་ཡིན་ནོ།
JOH 3:7 ངས་ཁྱེད་རང་ལ་ཁྱེད་ཚོ་ཡང་བསྐྱར་སྐྱེ་དགོས་ཞེས་བཤད་པས་ཡ་མཚན་མ་སྐྱེད།
JOH 3:8 ལྷགས་པ་ནི་རང་འདོད་པ་བཞིན་དུ་རྒྱག་པ་དང་དེའི་སྒྲ་ཁྱེད་ཀྱིས་ཐོས་ཀྱང༌། དེ་ག་ནས་བྱུང་དང་གང་དུ་འགྲོ་མི་ཤེས། དཀོན་མཆོག་གི་དམ་པའི་ཐུགས་ཉིད་ནས་སྐྱེས་པ་ཐམས་ཅད་ནི་དེ་བཞིན་ཡིན་”ཞེས་གསུངས།
JOH 3:9 ཡང་ནཱི་ཀོ་དེམ་གྱིས་“དེ་ཇི་ལྟར་སྲིད་”ཅེས་བཤད་པ་དང༌།
JOH 3:10 ལན་དུ་ཡེ་ཤུས་“ཁྱེད་ཡི་སི་ར་ཨེལ་གྱི་སློབ་དཔོན་ཡིན་ཞིང་དོན་དེ་ཡང་མི་རྟོགས་སམ།
JOH 3:11 ངས་ཁྱེད་ལ་བདེན་པ་བདེན་པར་ཟེར་རྒྱུར། ང་ཚོས་གང་ཤེས་པ་དེ་བཤད། གང་མཐོང་ཡོད་པ་དེའི་དཔང་པོ་བྱེད་ཀྱང༌། དཔང་པོ་དེ་ལ་ཁྱེད་རྣམས་ཀྱིས་དང་ལེན་མི་བྱེད།
JOH 3:12 ངས་ཁྱེད་རྣམས་ལ་ས་སྟེང་དུ་བྱུང་བའི་དོན་བཤད་ནས་ཁྱེད་རྣམས་ཡིད་མ་ཆེས་ན། དཀོན་མཆོག་གི་ཞིང་ཁམས་ལ་བྱུང་བའི་དོན་བཤད་ན་ཁྱེད་རྣམས་ཇི་ལྟར་ཡིད་ཆེས་པར་བྱ།
JOH 3:13 དཀོན་མཆོག་གི་ཞིང་ཁམས་ནས་བབ་པའི་མིའི་རིགས་ཀྱི་བུ་མ་གཏོགས་པར། སུའང་ཞིང་ཁམས་ལ་ཡར་ཕེབས་མ་མྱོང༌།
JOH 3:14 ལུང་སྟོན་པ་མོ་ཤེ་ཡིས་འབྲོག་སྟོང་དུ་སྦྲུལ་གྱི་གཟུགས་བརྙན་ཡར་བཀྱགས་པ་ལྟར། མིའི་རིགས་ཀྱི་བུ་ཡང་འཕགས་པར་འགྱུར་དགོས་ཏེ།
JOH 3:15 མིའི་རིགས་ཀྱི་བུ་ལ་དད་པ་བྱེད་མཁན་ཐམས་ཅད་ལ་དཔག་ཏུ་མེད་པའི་ཚེ་ཐོབ་པར་འགྱུར་བའི་ཕྱིར་རོ།
JOH 3:16 དཀོན་མཆོག་གིས་རང་གི་སྲས་གཅིག་པོ་གནང་བ་ཙམ་གྱིས་འཇིག་རྟེན་གྱི་མི་རྣམས་ལ་བྱམས་པར་མཛད་པས། སྲས་ལ་དད་པ་བྱེད་མཁན་ཚང་མར་འཇིག་པར་མི་འགྱུར་བར་དཔག་ཏུ་མེད་པའི་ཚེ་ཐོབ་ངེས་པའོ།
JOH 3:17 ཡང་དཀོན་མཆོག་གིས་རང་གི་སྲས་འཇིག་རྟེན་གྱི་མིར་ཁྲིམས་གཅོད་མཛད་རྒྱུར་མ་མངགས་ཀྱིས། འཇིག་རྟེན་གྱི་མི་ཁོང་བརྒྱུད་ནས་སྐྱབས་མཛད་རྒྱུར་མངགས།
JOH 3:18 སྲས་ལ་དད་པ་བྱེད་མཁན་ཚོ་ལ་ཁྲིམས་བཅད་མེད་དེ། སྲས་ལ་དད་པ་མི་བྱེད་མཁན་ཚོ་ལ་ཁྲིམས་བཅད་ཟིན། དེ་ནི་དཀོན་མཆོག་གི་སྲས་གཅིག་པོའི་མཚན་ལ་དད་པ་མ་བྱས་པས་སོ།
JOH 3:19 ཡང་ཁྲིམས་གཅོད་དེ་འདི་ལྟར་ཡིན། འོད་དེ་འཇིག་རྟེན་དུ་ཕེབས་ཡོད་ཀྱང༌། མི་རྣམས་ཀྱི་སྤྱོད་པ་ངན་པས་དེ་ཚོ་འོད་དེ་ལས་སྡིག་ཉེས་ཀྱི་མུན་ནག་ལ་དགའོ།
JOH 3:20 ཅི་ལགས་ཟེར་ན། ལས་ངན་བྱེད་པ་ཐམས་ཅད་རང་གི་སྤྱོད་ངན་རྣམས་མི་མངོན་པའི་ཕྱིར་འོད་དེ་ལ་སྡང་ཞིང་འོད་ཀྱི་རྩར་མི་འོང༌།
JOH 3:21 འོན་ཀྱང་བདེན་པའི་དོན་ལག་ལེན་བྱེད་མཁན་རྣམས་ཀྱི་བྱ་བ་དཀོན་མཆོག་ལས་བྱུང་བ་གསལ་བར་མཐོང་བའི་ཕྱིར་མི་དེ་རྣམས་འོད་ལ་འོང་”ཞེས་གསུངས་སོ། །
JOH 3:22 དེའི་རྗེས་སུ་ཡེ་ཤུ་དང་ཉེ་གནས་ཚོ་ཡ་ཧུ་དཱ་ཡུལ་དུ་ཕེབས་ནས། དེར་ཁོང་ཚོ་དང་མཉམ་དུ་བཞུགས་ཤིང་མི་ཚོར་ཁྲུས་གསོལ་གནང་བཞིན་ཡོད་པ་དང༌།
JOH 3:23 དེའི་ཚེ་ཁྲུས་གསོལ་མཁན་ཡོ་ཧ་ནན་ཡང་ས་ལིམ་དང་ཐག་ཉེ་བའི་གནས་ཨེ་ནོན་ཞེས་པ་ལ་ཆུ་མང་པོ་ཡོད་པས་ཁྲུས་གསོལ་གནང་བཞིན་ཡོད། མི་རྣམས་དེར་ཕྱིན་ཏེ་ཁྲུས་གསོལ་ཐོབ་བཞིན་པ་དང༌།
JOH 3:24 (དེའི་དུས་སུ་ཡོ་ཧ་ནན་ནི་ད་དུང་བཙོན་དུ་བཅུག་མེད་)
JOH 3:25 དེའི་ཚེ་ཡོ་ཧ་ནན་གྱི་ཉེ་གནས་རྣམས་ཆོས་ཀྱི་གཙང་ཁྲུས་བྱེད་པའི་སྐོར་ལ་ཡ་ཧུ་དཱ་པ་ཞིག་དང་རྩོད་གླེང་ཞིག་བྱུང༌།
JOH 3:26 མི་དེ་ཚོ་ཡོ་ཧ་ནན་གྱི་དྲུང་དུ་ཡོང་ནས་“རབ་བི་གཟིགས་དང༌། ཁྱེད་ཀྱིས་དཔང་པོ་མཛད་པའི་མི་ཡོར་དན་གཙང་པོའི་ཕ་རོལ་ལ་ཁྱེད་དང་མཉམ་དུ་ཡོད་པ་དེས་ཁྲུས་གསོལ་གནང་བཞིན་ཡོད་དེ། མི་མང་པོ་ཁོང་གི་དྲུང་དུ་འགྲོ་བཞིན་ཡོད་”ཅེས་ཞུས་པས།
JOH 3:27 ལན་དུ་ཡོ་ཧ་ནན་གྱིས་“དཀོན་མཆོག་གི་ཞིང་ཁམས་ནས་མ་གནང་ན་མི་ཞིག་ལ་ཅིའང་ཐོབ་མི་སྲིད།
JOH 3:28 ངས་ང་ནི་སྐྱབས་མགོན་མཱ་ཤི་ཀ་མ་ཡིན་ཏེ། ཁོང་གི་སྔོན་དུ་བཏང་བ་དེ་ཡིན་ཞེས་བཤད་པ་ཡིན་པ་ལ་ཁྱེད་ཚོ་རང་ངའི་དཔང་པོ་ཡིན།
JOH 3:29 སུ་ལ་བག་མ་ཡོད་པ་དེ་ནི་མག་པ་ཡིན། མག་པའི་གྲོགས་པོ་ལངས་ནས་བསྡད་ཅིང་མག་པའི་སྐད་ཐོས་པས་སེམས་ཤིན་ཏུ་དགའ། དེའི་ཕྱིར་ངའི་དགའ་བས་ཁེངས་སོ།
JOH 3:30 ཁོང་ནི་འཕེལ་བར་དགོས་ཤིང་ང་ནི་འགྲིབ་པར་དགོས་”ཞེས་གསུངས།
JOH 3:31 དཀོན་མཆོག་གི་ཞིང་ཁམས་ནས་བྱོན་པ་དེ་མི་ཐམས་ཅད་ལས་མཆོག་ཉིད། ས་གཞི་ལ་གཏོགས་པ་ནི་ས་ནས་ཡིན་ཞིང་སའི་དོན་གླེང་བ་བྱེད། དཀོན་མཆོག་གི་ཞིང་ཁམས་ནས་བྱོན་པ་དེ་བླ་ན་མེད་པ་ཡིན།
JOH 3:32 ཁོང་གིས་གང་མཐོང་བ་དང་ཐོས་པ་དེ་ལ་དཔང་པོ་མཛད་མོད། མི་སུས་ཀྱང་དཔང་པོ་དེ་ཁས་མི་ལེན།
JOH 3:33 ཁོང་གིས་དཔང་པོ་མཛད་པ་ལ་དང་ལེན་བྱེད་མཁན་གྱིས་དཀོན་མཆོག་བདེན་པ་ཡིན་པ་ར་སྤྲོད་བྱས།
JOH 3:34 དཀོན་མཆོག་གིས་དམ་པའི་ཐུགས་ཉིད་ཚད་མེད་དུ་གནང་བས། དཀོན་མཆོག་གིས་མངགས་པ་དེས་དཀོན་མཆོག་གི་བཀའ་གསུང༌།
JOH 3:35 ཡབ་ཀྱིས་སྲས་ལ་བྱམས་པར་མཛད་པ་དང༌། ཡོད་དོ་ཅོག་ཁོང་གི་ཕྱག་ཏུ་གནང་བ་ཡིན།
JOH 3:36 སྲས་ལ་དད་པ་བྱེད་མཁན་དེ་ལ་དཔག་ཏུ་མེད་པའི་ཚེ་ཡོད། སྲས་ལ་དད་པ་མི་བྱེད་པ་དེས་དཔག་ཏུ་མེད་པའི་ཚེ་མི་མྱོང་བར། དཀོན་མཆོག་གི་ཉེས་ཆད་དེ་ལ་གནས་པར་འགྱུར་རོ། །
JOH 4:1 དེའི་ཚེ་ཕཱ་རུ་ཤི་ཟེར་བའི་ཕྱོགས་ཁག་གིས་ཡེ་ཤུས་སློབ་མ་བསྡུས་ཤིང་ཁྲུས་གསོལ་ལེན་པ་རྣམས་ཡོ་ཧ་ནན་ལས་མང་བའི་གཏམ་ཐོས་པ་ཡེ་ཤུས་མཁྱེན་ནས།
JOH 4:2 (དོན་དམ་དུ་ཡེ་ཤུ་རང་ཉིད་ཀྱིས་ཁྲུས་གསོལ་མ་གནང༌། ཁོང་གི་ཉེ་གནས་ཁོ་ནས་ཁྲུས་གསོལ་གནང་བ་ཡིན་)
JOH 4:3 ཁོང་ཡ་ཧུ་དཱ་ཡུལ་དང་བྲལ་ནས་ག་ལིལ་ཡུལ་དུ་ཕྱིར་ཕེབས།
JOH 4:4 དེའི་དུས་སུ་ཁོང་ས་མར་ཡཱ་ཡུལ་བརྒྱུད་ནས་ཕེབས་དགོས་པས།
JOH 4:5 ཁོང་ས་མར་ཡཱ་ཡུལ་གྱི་གྲོང་ཚོ་སི་གར་ལ་ཕེབས། གྲོང་དེ་སྔར་ཡ་ཧུ་དཱ་པའི་མེས་པོ་ཡ་ཀོབ་ཀྱིས་ཁོང་གི་བུ་ཡོ་སེབ་ལ་གནང་བའི་ཞིང་དང་ཐག་ཉེ་པོ་ཡོད།
JOH 4:6 ཡ་ཀོབ་ཀྱི་ཁྲོན་པ་དེར་ཡོད་ཅིང༌། ཡེ་ཤུ་འགྲུལ་ནས་སྐུ་ཐང་ཆད་དེ་ཁྲོན་པའི་རྩར་བཞུགས་སྐབས་ཉིན་གུང་ཙམ་ཡིན།
JOH 4:7 ཉེ་གནས་རྣམས་གྲོང་ཚོ་ལ་ཟས་ཉོ་བར་སོང་བའི་རྗེས་སུ། ས་མར་ཡཱ་ཡུལ་གྱི་བུད་མེད་ཅིག་ཆུ་ལེན་དུ་ཡོང་བ་དང༌། ཡེ་ཤུས་ཁོ་མོར་“ང་ལ་འཐུང་ཆུ་ཏོག་ཙམ་སྟེར་དང་”ཞེས་གསུངས།
JOH 4:9 བུད་མེད་དེས་ཁོང་ལ་“ཁྱེད་ཡ་ཧུ་དཱ་པ་རེད། ང་ས་མར་ཡཱ་མ་ལྟ་བུ་ལས་འཐུང་ཆུ་སློང་བ་དེ་ཅི་ལ་སྲིད་”ཅེས་བཤད། (གང་ལགས་ཟེར་ན། ཡ་ཧུ་དཱ་པའི་མི་རིགས་ས་མར་ཡཱ་ཡི་མི་རིགས་དང་མི་འགྲོགས་)
JOH 4:10 ལན་དུ་ཡེ་ཤུས་ཁོ་མོར་“གལ་ཏེ་ཁྱོད་ཀྱིས་དཀོན་མཆོག་གི་གནང་སྦྱིན་དང༌། ཁྱོད་ལ་ཆུ་སྟེར་རོགས་ཟེར་མཁན་དེ་སུ་ཡིན་པ་ཤེས་ན། ཁྱོད་ཀྱིས་ཁོང་ལ་ཞུས་ནས་ཁོས་ཁྱོད་ལ་གསོན་པའི་ཆུ་སྟེར་བ་ཡིན་”ཞེས་གསུངས།
JOH 4:11 ལན་དུ་བུད་མེད་དེས་“སྐུ་ཞབས་ལགས། ཁྲོན་པ་འདི་གཏིང་རིང་པོ་ཡིན་ཞིང་ཁྱེད་ལ་ཆུ་འཆུ་བའི་སྣོད་ཀྱང་མི་འདུག་པས་གསོན་པའི་ཆུ་དེ་གང་ནས་ལེན།
JOH 4:12 ང་ཚོའི་མེས་པོ་ཡ་ཀོབ་ཀྱིས་ང་ཚོ་ལ་ཁྲོན་པ་འདི་གནང་སྟེ། ཁོང་རང་དང་ཁོང་གི་བུ་རྣམས་དང་ཕྱུགས་དེ་ཚོས་དེ་ནས་བཏུངས་པས། ཁྱེད་ཁོང་ལས་ཆེ་བ་ཡིན་ནམ་”ཞེས་བཤད།
JOH 4:13 ལན་དུ་ཡེ་ཤུས་“སུས་ཀྱང་ཆུ་འདི་ལས་བཏུངས་ན་ཡང་བསྐྱར་སྐོམ་པར་འགྱུར།
JOH 4:14 འོན་ཏེ་སུས་ཀྱང་ངས་སྟེར་བའི་ཆུ་དེ་ལས་བཏུངས་ན་ནམ་ཡང་མི་སྐོམ་སྟེ། ངས་སྟེར་བའི་ཆུ་དེ་ཁོའི་ནང་ན་དཔག་ཏུ་མེད་པའི་ཚེ་ལ་ཆུ་འཕྱུར་བའི་ཆུ་མིག་ཅིག་ལྟ་བུ་ཡིན་པར་འགྱུར་”ཞེས་གསུངས།
JOH 4:15 བུད་མེད་དེས་“སྐུ་ཞབས་ལགས། ཆུ་དེ་ང་ལ་གནང་རོགས། དེས་ང་སྐོམ་པར་མི་འགྱུར་ཏེ་ཆུ་ལེན་དུ་འདི་རུ་ཡང་ཡང་ཡོང་མི་དགོས་”ཞེས་ཟེར་བ་དང༌།
JOH 4:16 ཡེ་ཤུས་“སོང་ལ་ཁྱོད་ཀྱི་ཁྱོ་ག་བོས་ནས་འདིར་ཤོག་”ཅེས་གསུངས་པ་ན།
JOH 4:17 བུད་མེད་དེས་“ང་ལ་ཁྱོ་ག་མེད་”ཅེས་བཤད་པ་དང་ཡེ་ཤུས་“ཁྱོད་ཀྱིས་ང་ལ་ཁྱོ་ག་མེད་ཅེས་ཟེར་བ་དེ་བདེན་པ་ཡིན།
JOH 4:18 སྔོན་ཆད་ཁྱོད་ལ་ཁྱོ་ག་ལྔ་ཡོད་མྱོང༌། ད་ལྟ་ཡོད་པ་དེ་ནི་ཁྱོད་ཀྱི་ཁྱོ་ག་མ་ཡིན། ཁྱོད་ཀྱིས་གཏམ་བདེན་པར་བཤད་”ཅེས་གསུངས་པ་དང༌།
JOH 4:19 བུད་མེད་དེས་“སྐུ་ཞབས་ལགས། ངས་ཁྱེད་རང་ནི་ལུང་སྟོན་པ་ཞིག་ཡིན་པར་མཐོང༌།
JOH 4:20 ང་ཚོའི་མེས་པོས་རི་བོ་འདིའི་སྟེང་དུ་དཀོན་མཆོག་ལ་བསྙེན་བཀུར་བྱས་པ་ཡིན། འོན་ཀྱང་ཡ་ཧུ་དཱ་པ་ཁྱེད་ཚོས་དཀོན་མཆོག་ལ་བསྙེན་བཀུར་བྱེད་དགོས་པའི་གནས་ནི་ཡེ་རུ་ཤ་ལེམ་གྲོང་ཁྱེར་ཡིན་ཟེར་”ཞེས་བཤད།
JOH 4:21 ཡེ་ཤུས་“ཨ་ཅག་ལགས། ང་ལ་ཡིད་ཆེས་བྱོས་དང༌། རི་བོ་འདི་དང་ཡེ་རུ་ཤ་ལེམ་དུ་ཁྱེད་ཚོས་ཡབ་ལ་བསྙེན་བཀུར་མི་ཞུ་བའི་དུས་ཤིག་ཡོང་བར་འགྱུར།
JOH 4:22 ཁྱེད་ཚོས་གང་མི་ཤེས་པ་དེ་ལ་བསྙེན་བཀུར་བྱེད་ཅིང༌། ང་ཚོས་གང་ཤེས་པ་དེ་ལ་བསྙེན་བཀུར་བྱེད། ཅི་ལགས་ཤེ་ན། ཐར་པ་ནི་ཡ་ཧུ་དཱ་པ་རྣམས་ནས་འབྱུང་ངོ༌།
JOH 4:23 འོན་ཀྱང་བཅོས་མིན་གྱི་བསྙེན་བཀུར་བྱེད་པ་རྣམས་ཀྱིས་དཀོན་མཆོག་གི་དམ་པའི་ཐུགས་ཉིད་དང་བདེན་པ་ཉིད་ཀྱི་སྒོ་ནས་ཡབ་དཀོན་མཆོག་ལ་བསྙེན་བཀུར་ཞུ་བའི་དུས་ཤིག་འོང་བར་འགྱུར་ལ། འོང་བཞིན་པ་ཡང་ཡིན། ཡབ་དཀོན་མཆོག་ནི་དེ་ལྟ་བུའི་མི་རྣམས་ལ་དགྱེས་ཤིང་གཟིགས་སོ།
JOH 4:24 དཀོན་མཆོག་ནི་ཐུགས་ཉིད་ཡིན་པས། ཁོང་ལ་བསྙེན་བཀུར་བྱེད་མཁན་རྣམས་ཀྱིས་དམ་པའི་ཐུགས་ཉིད་དང་བདེན་པ་ཉིད་ཀྱི་སྒོ་ནས་བསྙེན་བཀུར་བྱེད་དགོས་”ཞེས་གསུངས།
JOH 4:25 བུད་མེད་དེས་ཁོང་ལ་“སྐྱབས་མགོན་མཱ་ཤི་ཀ་(ཁོང་ནི་ཁི་རིའི་སི་ཐོ་ཡང་ཟེར་) ཕེབས་ཡོད་པར་ངས་ཤེས། ཁོང་ཕེབས་སྐབས་ང་ཚོར་དོན་ཐམས་ཅད་སྒྲོག་པར་འགྱུར་”ཞེས་བཤད།
JOH 4:26 ཡེ་ཤུས་ཁོ་མོར་“ང་ནི་ཁྱེད་དང་གླེང་མོལ་བྱེད་མཁན་སྐྱབས་མགོན་མཱ་ཤི་ཀ་དེ་ཡིན་ནོ་”ཞེས་གསུངས།
JOH 4:27 དེའི་ཚེ་ཉེ་གནས་ཚོ་ལོག་ཡོང་ནས། ཡེ་ཤུས་བུད་མེད་ཅིག་དང་གཏམ་བྱེད་ཀྱི་ཡོད་པ་མཐོང་ནས་ཡ་མཚན་སྐྱེས་མོད། སུས་ཀྱང་ཁྱེད་རང་ཅི་དགོངས་སམ། བུད་མེད་འདི་དང་ཅི་ལ་གསུང་གླེང་མཛད་ཅེས་བཀའ་འདྲི་མ་ཞུས།
JOH 4:28 བུད་མེད་དེས་རང་གི་ཆུ་སྣོད་དེར་བཞག་སྟེ། གྲོང་ཁྱེར་དུ་སོང་ནས་མི་ཚོ་ལ་
JOH 4:29 “ཤོག་ལ་ལྟོས་དང༌། འདི་ལ་མི་ཞིག་ཡོད་དེ་ངས་བྱས་པའི་ལས་ཀ་ཐམས་ཅད་ང་ལ་གསུངས་བྱུང་བས། སྐྱབས་མགོན་མཱ་ཤི་ཀ་ཡིན་སྲིད་དམ་”ཞེས་སྨྲས་པ་དང༌།
JOH 4:30 མི་དེ་ཚོ་གྲོང་ཁྱེར་གྱི་ཕྱི་རོལ་ཏུ་སོང་ནས་ཡེ་ཤུའི་དྲུང་དུ་ཡོང༌།
JOH 4:31 དེའི་དུས་སུ་ཉེ་གནས་རྣམས་ཀྱིས་ཁོང་ལ་“རབ་བི། ཞལ་ཟས་བཞེས་”ཞེས་ཞུས་ཀྱང༌།
JOH 4:32 ཁོང་གིས་ཁོ་ཚོར་“ཁྱེད་ཚོ་ལ་རྒྱུས་མེད་པའི་ཟས་ཤིག་ང་ལ་ཡོད་”ཅེས་གསུངས།
JOH 4:33 དེའི་ཕྱིར་ཉེ་གནས་རྣམས་ཀྱིས་གཅིག་གིས་གཅིག་ལ་“མི་ཞིག་གིས་ཁོང་ལ་ཟས་ཤིག་བསྐྱལ་ལམ་”ཞེས་འདྲི་བཞིན་ཡོད།
JOH 4:34 ཡེ་ཤུས་ཁོ་ཚོར་“ང་མངགས་མཁན་དཀོན་མཆོག་གི་ཐུགས་དགོངས་བཞིན་དུ་བྱེད་པ་དང་ཁོང་གི་འཕྲིན་ལས་སྒྲུབ་པ་ནི་ངའི་ཟས་ཡིན།
JOH 4:35 ཁྱེད་ཚོའི་གཏམ་དཔེ་ལྟར་ད་དུང་ཟླ་བ་བཞི་ཡོད་དེ་དེ་ནས་ཞིང་རྔ་རན་ཡོང་བཤད་པ་མ་ཡིན་ནམ། འོན་ཀྱང་ངས་ཁྱེད་རྣམས་ལ་ཟེར་རྒྱུར། ཞིང་ལ་ལྟོས་དང༌། ད་ལྟ་ལོ་ཏོག་གསེར་གྱི་མདོག་ཏུ་གྱུར་བས་རྔ་རན་ནོ།
JOH 4:36 རྔ་མཁན་ལ་གླ་ཐོབ་ཅིང་དཔག་ཏུ་མེད་པའི་ཚེའི་ཕྱིར་འབྲས་བུ་སྡུད་བཞིན་ཡོད། དེར་བརྟེན་ས་བོན་འདེབས་མཁན་དང་ཞིང་རྔ་མཁན་གཉིས་ཀ་མཉམ་དུ་དགའ་བར་བྱེད།
JOH 4:37 གཅིག་གིས་འདེབས། གཅིག་གིས་རྔ་ཞེས་པའི་གཏམ་དཔེ་དེ་བཞིན་བདེན་པ་ཡིན།
JOH 4:38 ཁྱེད་ཚོས་ལས་མ་བྱས་པའི་ཞིང་ལ་ངས་ཁྱེད་རྣམས་རྔ་བའི་ཕྱིར་བཏང༌། གཞན་རྣམས་ཀྱིས་དེར་ལས་ཀ་བྱས་ནས། ཁྱེད་ཚོར་ནི་ལས་དེའི་ཁེ་བཟང་ཐོབ་”ཅེས་གསུངས།
JOH 4:39 བུད་མེད་དེས་ཁོང་གིས་ངས་བྱས་པའི་ལས་ཐམས་ཅད་ང་ལ་གསུངས་པ་ཡིན་ཞེས་དཔང་པོ་བྱས་པས་གྲོང་ཁྱེར་དེའི་ས་མར་ཡཱ་པ་མང་པོས་ཡེ་ཤུ་ལ་དད་པ་བྱས།
JOH 4:40 དེའི་ཕྱིར་ས་མར་ཡཱ་པ་རྣམས་ཁོང་གི་དྲུང་དུ་ཡོང་སྐབས་ཁོ་ཚོ་དང་མཉམ་དུ་བཞུགས་སུ་གསོལ་ཞེས་ཞུས་པས་ཁོང་ཉིན་གཉིས་དེར་བཞུགས།
JOH 4:41 ཁོང་གིས་བཀའ་གསུངས་པས་མི་སྔར་ལས་ཇེ་མང་བས་དད་པ་སྐྱེས་པ་དང༌།
JOH 4:42 མི་དེ་ཚོས་བུད་མེད་དེར་“ད་ང་ཚོས་ཁྱོད་ཀྱི་གཏམ་ཁོ་ན་ཐོས་པས་དད་པ་མི་བྱེད་དེ། ང་ཚོ་རང་གིས་ཐོས་པའི་རྐྱེན་གྱིས་ཁོང་ནི་དངོས་གནས་འཇིག་རྟེན་གྱི་སྐྱབས་མགོན་ཡིན་པར་ཤེས་སོ་”ཞེས་བཤད།
JOH 4:43 ཉིན་གཉིས་དེའི་རྗེས་སུ་ཁོང་ཡུལ་དེ་ནས་ག་ལིལ་ཡུལ་དུ་ཕེབས།
JOH 4:44 ཅི་ལགས་ཟེར་ན། ཡེ་ཤུ་ཉིད་ཀྱིས་ཕ་ཡུལ་ན་ལུང་སྟོན་པ་ལ་བཀུར་སྟི་མེད་དོ་ཞེས་གསུངས།
JOH 4:45 ག་ལིལ་པ་ཚོ་པེ་སག་གི་དུས་ཆེན་སྐབས་སུ་ཡེ་རུ་ཤ་ལེམ་ལ་སོང་ནས་ཁོང་གིས་མཛད་པའི་ངོ་མཚར་བའི་དོན་ཐམས་ཅད་མཐོང་བས། ཡེ་ཤུ་ག་ལིལ་ཡུལ་དུ་བྱོན་སྐབས་ཁོ་ཚོས་ཁོང་ལ་དགའ་བསུ་ཞུས།
JOH 4:46 ཡེ་ཤུ་ཡང་བསྐྱར་ག་ལིལ་ཡུལ་གྱི་ཀ་ནཱ་ཟེར་བའི་གྲོང་ཚོར་ཕེབས། སྔར་ཁོང་གིས་གནས་དེར་ཆུ་རྒུན་ཆང་དུ་འགྱུར་བར་མཛད། ག་ལིལ་ཡུལ་དུ་རྒྱལ་པོའི་དཔོན་རིགས་ཤིག་གི་བུ་ཀ་ཕར་ན་ཧུམ་གྲོང་ཁྱེར་དུ་ན་ཡོད།
JOH 4:47 དཔོན་རིགས་དེས་ཡེ་ཤུ་ནི་ཡ་ཧུ་དཱ་ཡུལ་ནས་ག་ལིལ་དུ་ཕེབས་པའི་གཏམ་ཐོས་པས་ཁོང་གི་དྲུང་དུ་ཕྱིན། ཁོའི་བུ་འཆི་བ་ལ་ཐུག་པས་ཡེ་ཤུ་ཀ་ཕར་ན་ཧུམ་དུ་མར་ཕེབས་ནས་བུའི་ནད་གསོ་བར་མཛད་པའི་ཕྱིར་ཞུ་བ་ཕུལ།
JOH 4:48 ཡེ་ཤུས་མི་དེར་“གལ་ཏེ་ཁྱེད་རྣམས་ཀྱིས་རྟགས་དང་ངོ་མཚར་བའི་དོན་རྣམས་མ་མཐོང་ན་དད་པ་མི་བྱེད་”ཅེས་གསུངས།
JOH 4:49 ལན་དུ་རྒྱལ་པོའི་དཔོན་རིགས་དེས་“སྐུ་ཞབས་ལགས། ངའི་བུ་མ་འཆི་གོང་ལ་ཕེབས་རོགས་གནང་”ཞེས་ཞུས།
JOH 4:50 ཡེ་ཤུས་“སོང་ལ་ཁྱེད་ཀྱི་བུ་གསོན་ནོ་”ཞེས་གསུངས། དཔོན་པོ་དེས་ཡེ་ཤུས་གསུངས་པའི་བཀའ་ལ་ཡིད་ཆེས་ཏེ་ཕྱིར་ལོག་སོང་བ་དང༌།
JOH 4:51 ཁོང་ཕྱིར་ལོག་དུས་དེའི་གཡོག་པོ་རྣམས་ཚུར་ཡོང་བ་དང་ཁོང་ཐུག་ནས་བུ་གསོན་པའི་གཏམ་བཤད།
JOH 4:52 དེ་ནས་ཁོང་གིས་ནད་གསོ་བའི་ཆུ་ཚོད་དྲིས་པ་ན་ཁོ་ཚོས་“ཁ་སང་ཕྱི་དྲོའི་ཆུ་ཚོད་དང་པོར་ཙམ་ལ་ཚ་བ་འཇགས་”ཞེས་བཤད།
JOH 4:53 དེ་ནས་ཡེ་ཤུས་ཁྱེད་ཀྱི་བུ་གསོན་ནོ་ཞེས་གསུངས་པའི་ཆུ་ཚོད་དེ་རང་ལ་བུ་གསོས་པར་གྱུར་བ་ཕ་ཡིས་ཤེས་ཏེ། ཕ་རང་ཉིད་དང་ཁྱིམ་མི་ཐམས་ཅད་ཀྱིས་ཡེ་ཤུ་ལ་དད་པ་བྱས།
JOH 4:54 འདི་ནི་ཡེ་ཤུ་ཡ་ཧུ་དཱ་ཡུལ་ནས་ག་ལིལ་དུ་ཕེབས་ནས་བསྟན་པའི་ངོ་མཚར་བའི་རྟགས་གཉིས་པ་ཡིན་ནོ། །
JOH 5:1 དེའི་རྗེས་སུ་ཡ་ཧུ་དཱ་པའི་དུས་ཆེན་ཞིག་ཡོད་པ་དང༌། ཡེ་ཤུ་ཡེ་རུ་ཤ་ལེམ་གྲོང་ཁྱེར་ལ་ཡར་ཕེབས།
JOH 5:2 ཡེ་རུ་ཤ་ལེམ་གྱི་ལུག་སྒོའི་རྩར་རྫིང་བུ་ཞིག་ཡོད་པ་ཡ་ཧུ་དཱ་པའི་སྐད་དུ་པེ་ཐེས་དཱ་ཞེས་བྱ་བ་གཡབ་ལྔ་ཡོད་པ་ཞིག་ཡོད།
JOH 5:3 དེ་ཚོའི་ནང་ལ་ནད་པ་དང༌། ལོང་བ་དང༌། ཞ་བོ་དང༌། ཡན་ལག་བསྐམས་པ་སོགས་མང་པོ་ཉལ་ཡོད་པ་ཡིན།
JOH 5:5 མི་ཞིག་ཞ་བོ་ཆགས་ནས་ལོ་སུམ་ཅུ་སོ་བརྒྱད་སོང་བ་ཞིག་དེར་ཡོད།
JOH 5:6 ཡེ་ཤུས་ཞ་བོ་དེ་ཉལ་ཡོད་པ་གཟིགས་ཏེ་ཡུན་རིང་པོ་དེ་ལྟར་གནས་པ་མཁྱེན་ནས་མི་དེར་“ཁྱེད་དྲག་པར་འགྱུར་འདོད་དམ་”ཞེས་གསུངས།
JOH 5:7 ཞ་བོ་དེས་ཁོང་ལ་“སྐུ་ཞབས་ལགས། ཆུ་སྐྱོམ་སྐབས་ང་རྫིང་བུར་འཇུག་པའི་མི་ང་ལ་མེད་པས། ང་ཡོང་དུས་ངའི་སྔོན་ལ་གཞན་ཞིག་ཆུའི་ནང་དུ་འཛུལ་ཟིན་”ཞེས་བཤད།
JOH 5:8 ཡེ་ཤུས་“ཡར་ལོངས་ལ་ཉལ་ཁྲི་ཁུར་ཏེ་གོམ་པར་རྒྱོབ་དང་”ཞེས་གསུངས་མ་ཐག
JOH 5:9 མི་དེ་དྲག་པར་གྱུར་ནས། རང་གི་ཉལ་ཁྲི་ཁུར་ཏེ་ཕྱིར་སོང༌། ཉིན་དེ་ནི་ངལ་གསོ་བའི་ཉིན་མོ་ཡིན་པས།
JOH 5:10 ཡ་ཧུ་དཱ་པའི་དཔོན་རིགས་ཚོས་ནད་གསོས་པར་གྱུར་བའི་མི་དེར་“དེ་རིང་ངལ་གསོ་བའི་ཉིན་མོ་ཡིན་པས་ཁྲིམས་ལྟར་ཁྱོད་ཀྱིས་ཉལ་ཁྲི་འཁུར་མི་ཆོག་”ཅེས་བཤད།
JOH 5:11 མི་དེས་“ངའི་ནད་སེལ་མཁན་དེས་ང་ལ་ཉལ་ཁྲི་ཁུར་ཏེ་སོང་དང་ཞེས་གསུངས་པ་ཡིན་”ཞེས་བཤད་པས།
JOH 5:12 ཁོ་ཚོས་“ཉལ་ཁྲི་ཁུར་ཏེ་སོང་དང་ཞེས་ཟེར་བའི་མི་སུ་ཡིན་”ཞེས་དྲིས་ཀྱང༌།
JOH 5:13 ནད་ལས་ཐར་བའི་མི་དེས་ཁོང་སུ་ཡིན་པ་ངོ་མ་ཤེས། གནས་དེར་མི་ཚོགས་མང་བས་ཡེ་ཤུ་ཕེབས་ཟིན་པའི་ཕྱིར་རོ།
JOH 5:14 དེའི་རྗེས་སུ་ཡེ་ཤུས་མཆོད་ཁང་ཆེན་མོའི་ནང་ལ་མི་དེ་གཟིགས་ནས་ཁོ་ལ་“ལྟོས་དང༌། ཁྱེད་རང་དྲག་པར་གྱུར་བས། ད་ནས་བཟུང་སྡིག་ཉེས་མ་བྱོས་ཤིག གལ་ཏེ་བྱས་ན་ཁྱེད་ལ་སྡུག་བསྔལ་དེ་ལས་ཆེ་བ་ཞིག་འཕོག་སྲིད་”ཅེས་གསུངས།
JOH 5:15 མི་དེ་ཕར་ཕྱིན་ནས་ཡ་ཧུ་དཱ་པའི་དཔོན་རིགས་ཚོར་རང་གི་ནད་སེལ་མཁན་དེ་ནི་ཡེ་ཤུ་རེད་ཅེས་བཤད།
JOH 5:16 ཡེ་ཤུས་ངལ་གསོ་བའི་ཉིན་མོར་དེ་ལྟར་མཛད་པས་ཡ་ཧུ་དཱ་པའི་དཔོན་རིགས་ཚོས་ཁོང་ལ་གནོད་སྐྱེལ་བར་འགོ་བཙུགས།
JOH 5:17 འོན་ཀྱང་ཡེ་ཤུས་ཁོ་ཚོར་“ངའི་ཡབ་ཀྱིས་ད་ལྟའི་བར་དུ་ཡང་འཕྲིན་ལས་མཛད་དེ། ངས་ཀྱང་འཕྲིན་ལས་སྒྲུབ་བཞིན་ཡོད་”ཅེས་གསུངས་པས།
JOH 5:18 ཡ་ཧུ་དཱ་པའི་དཔོན་རིགས་ཀྱིས་དེ་བས་ཀྱང་ཁོང་གསོད་ཐབས་བཙལ། ཅི་ལགས་ཟེར་ན། ཡེ་ཤུས་ངལ་གསོ་བའི་ཉིན་མོའི་ཁྲིམས་ལས་འགལ་བ་མ་ཟད། དཀོན་མཆོག་ང་རང་གི་ཡབ་ཡིན་ཞེས་ཟེར་བས་ཁོང་རང་དཀོན་མཆོག་དང་གཅིག་ནང་བཞིན་མཛད་པའི་ཕྱིར་རོ། །
JOH 5:19 ཡང་ཡེ་ཤུས་“ངས་ཁྱེད་རྣམས་ལ་བདེན་པ་བདེན་པར་ཟེར་རྒྱུར། སྲས་ཀྱིས་ཡབ་ལ་མ་བརྟེན་པར་ཅིའང་བྱེད་ཐུབ་མི་སྲིད། ཡབ་ཀྱིས་གང་མཛད་པ་བཞིན་དུ་སྲས་ཀྱིས་ཀྱང་མཛད། ཡབ་ཀྱིས་ཅི་མཛད་པ་དེ་མ་གཟིགས་པར་སྲས་ཀྱིས་ཅིའང་བྱེད་མི་སྲིད།
JOH 5:20 གང་ལགས་ཟེར་ན། ཡབ་ཀྱིས་སྲས་ལ་བྱམས་པས་ཁོང་རང་གིས་གང་མཛད་པ་ཐམས་ཅད་སྲས་ལ་སྟོན་པ་མ་ཟད། དེ་ལས་ཀྱང་ངོ་མཚར་ཆེ་བའི་འཕྲིན་ལས་ཁོང་ལ་སྟོན་པར་མཛད་དེ་ཁྱེད་ཚོ་ཡ་མཚན་སྐྱེད་པར་འགྱུར།
JOH 5:21 ཡབ་ཀྱིས་ཇི་ལྟར་གཤིན་པོ་རྣམས་སློང་ཞིང་དེ་ཚོར་དཔག་ཏུ་མེད་པའི་ཚེ་གནང་བ་བཞིན། དེ་ལྟར་སྲས་ཀྱིས་ཀྱང་སུ་ལ་དགྱེས་པ་དེར་དཔག་ཏུ་མེད་པའི་ཚེ་གནང་ངོ༌།
JOH 5:22 ཡབ་ཉིད་ཀྱིས་སུ་ལའང་ཁྲིམས་གཅོད་མི་མཛད། དེ་ཡོངས་སུ་སྲས་ལ་གནང་བ་ཡིན་པས།
JOH 5:23 མི་ཐམས་ཅད་ཡབ་ལ་བཀུར་སྟི་ཞུ་བ་ལྟར། སྲས་ལ་ཡང་ཐམས་ཅད་ཀྱིས་བཀུར་སྟི་ཞུ་བར་འགྱུར། སྲས་ལ་བཀུར་སྟི་མི་ཞུ་མཁན་དེས་སྲས་མངགས་མཁན་ཡབ་ལའང་བཀུར་སྟི་མི་ཞུས།
JOH 5:24 ངས་ཁྱེད་རྣམས་ལ་བདེན་པ་བདེན་པར་ཟེར་རྒྱུར། ངའི་བཀའ་ལ་ཉན་ཅིང་ང་མངགས་མཁན་ཡབ་དཀོན་མཆོག་ལ་དད་པ་བྱེད་མཁན་ལ་དཔག་ཏུ་མེད་པའི་ཚེ་ཡོད་པ་དང༌། མི་དེ་རྣམས་ཁྲིམས་གཅོད་མི་མྱོང་བར་འཆི་བ་ནས་གསོན་པོར་གྱུར་ཡོད་དོ་”ཞེས་གསུངས།
JOH 5:25 ཡང་ཡེ་ཤུས་“ངས་ཁྱེད་རྣམས་ལ་བདེན་པ་བདེན་པར་ཟེར་རྒྱུར། ཚེ་མེད་པ་ནང་བཞིན་གྱི་མི་རྣམས་ཀྱིས་དཀོན་མཆོག་གི་སྲས་ཀྱི་གསུང་སྐད་ཐོས་པའི་དུས་ལ་འབབ་པར་འགྱུར་བ་མ་ཟད། དུས་དེ་ད་ལྟ་ཡིན། ཡང་སྐད་དེ་ཐོས་པ་རྣམས་གསོན་པར་འགྱུར།
JOH 5:26 ཡབ་ཉིད་ཚེ་དཔག་ཏུ་མེད་པའི་འབྱུང་ཁུངས་ཡིན་པ་ལྟར། དེ་བཞིན་ཁོང་གིས་སྲས་ལའང་མི་རྣམས་ལ་དཔག་ཏུ་མེད་པའི་ཚེ་གནང་རྒྱུའི་དབང་ཆ་བྱིན་ནོ།
JOH 5:27 ཡང་ཁོང་མིའི་རིགས་ཀྱི་བུ་ཡིན་པས། ཡབ་ཀྱིས་སྲས་ལ་ལེགས་ཉེས་ཀྱི་ཁྲིམས་གཅོད་བྱེད་པའི་དབང་ཆ་གནང་ངོ༌།
JOH 5:28 དུར་ཁང་ལ་ཡོད་པ་ཐམས་ཅད་སྲས་ཀྱི་གསུང་སྐད་ཐོས་ནས་འཐོན་པའི་དུས་ལ་འབབ་ཡོང་བ་ལ་ཁྱེད་ཚོ་ཡ་མཚན་མ་སྐྱེད།
JOH 5:29 ལས་བཟང་པོ་བྱས་པ་ཚོར་དཔག་ཏུ་མེད་པའི་ཚེ་ཐོབ་པའི་ཕྱིར་སླར་གསོན་པར་འགྱུར་བ་དང༌། ལས་ངན་བྱས་པ་ཚོ་ཁྲིམས་གཅད་མྱོང་བའི་ཕྱིར་སླར་གསོན་པར་འགྱུར་རོ་”ཞེས་གསུངས།
JOH 5:30 ཡེ་ཤུས་“ཡབ་ལ་མ་བརྟེན་པར་ངས་ཅིའང་བྱེད་མི་སྲིད་དེ། ཡབ་ཀྱི་བཀའ་ཇི་ལྟར་ཐོས་པ་བཞིན་དུ་ཁྲིམས་གཅོད་བྱེད། དེའི་ཕྱིར་ངའི་ཁྲིམས་ཆད་དེ་དྲང་པོ་ཡིན། གང་ལགས་ཟེར་ན། ངས་རང་གི་བསམ་ཚུལ་བཞིན་དུ་མི་བྱེད་དེ། ང་མངགས་མཁན་གྱི་དགོངས་པ་བཞིན་དུ་བྱེད།
JOH 5:31 གལ་ཏེ་ངས་རང་གིས་རང་ལ་དཔང་པོ་བྱས་ན། ངའི་དཔང་པོ་དེ་བདེན་པ་མ་ཡིན།
JOH 5:32 འོན་ཀྱང་ང་ལ་དཔང་པོ་བྱེད་མཁན་གཞན་ཞིག་ཡོད། ཡང་ཁོང་གིས་ང་ལ་དཔང་པོ་མཛད་པ་ངས་དེ་བདེན་པ་ཡིན་པར་ཤེས།
JOH 5:33 ཁྱེད་རྣམས་ཀྱིས་ཁྲུས་གསོལ་མཁན་ཡོ་ཧ་ནན་གྱི་དྲུང་དུ་བང་ཆེན་བཏང་བ་དང༌། ཡོ་ཧ་ནན་གྱིས་བདེན་པ་ལ་དཔང་པོ་བྱས།
JOH 5:34 འོན་ཀྱང་ངས་ནི་མི་ཡིས་དཔང་པོ་བྱེད་པ་ལ་མི་རྟེན། ཁྱེད་ཚོར་ཐར་པ་ཐོབ་པའི་ཕྱིར་ངས་དོན་འདི་ཚོ་བཤད།
JOH 5:35 ཡོ་ཧ་ནན་ནི་མར་མེ་འབར་ཞིང་འོད་འཕྲོ་བ་ལྟ་བུ་ཞིག་ཡོད་པ་ཡིན་ཏེ། ཁྱེད་ཚོ་ནི་འོད་དེའི་ནང་རེ་ཞིག་དགའ་ཞིང་མོས།
JOH 5:36 འོན་ཀྱང་ང་ཡོ་ཧ་ནན་གྱི་དཔང་པོ་ལས་ཆེ་བར་རྟེན། ཡབ་ཀྱིས་ང་ལ་འཕྲིན་ལས་སྒྲུབ་ཏུ་གནང་བ་དང་ངས་བྱེད་བཞིན་པའི་འཕྲིན་ལས་དེ་ཉིད་ཀྱིས་ང་མངགས་མཁན་ཡབ་དཀོན་མཆོག་ཡིན་པར་དཔང་པོ་བྱེད།
JOH 5:37 ཡང་ང་མངགས་མཁན་ཡབ་དཀོན་མཆོག་ཉིད་ཀྱིས་ཀྱང་ང་ལ་དཔང་པོ་མཛད། ཁྱོད་ཚོས་ཁོང་གི་གསུང་སྐད་ཀྱང་གཏན་ནས་མ་ཐོས། ཁོང་གི་སྐུ་དབྱིབས་ཀྱང་གཏན་ནས་མ་མཐོང༌།
JOH 5:38 ཁྱོད་ཚོས་ཁོང་གིས་མངགས་པ་དེ་ལ་ཡིད་མ་ཆེས་པས། ཁོང་གི་བཀའ་ཁྱོད་ཀྱི་སེམས་སུ་མི་གནས་”ཞེས་གསུངས།
JOH 5:39 ཡེ་ཤུས་“ཁྱོད་ཚོས་གསུང་རབ་ནང་ལ་དཔག་ཏུ་མེད་པའི་ཚེའི་ལམ་ཡོད་བསམས་ནས་དེ་འཚོལ་ཞིབ་བྱེད། དེ་ཉིད་ཀྱིས་ང་ལ་དཔང་པོ་བྱེད་ཀྱང༌།
JOH 5:40 ཁྱོད་ཚོ་ལ་དཔག་ཏུ་མེད་པའི་ཚེ་ཐོབ་པའི་ཕྱིར་ངའི་སར་ཡོང་བ་མི་མོས།
JOH 5:41 ངས་མིའི་བཀུར་སྟི་མི་འཚོལ།
JOH 5:42 འོན་ཀྱང་ངས་ཁྱོད་ཚོ་རྟོགས་པ་དང༌། ཁྱོད་ཀྱིས་དཀོན་མཆོག་ལ་མི་བརྩེ་བ་དེ་ངས་ཤེས།
JOH 5:43 ང་ནི་ཡབ་ཀྱི་མཚན་ཐོག་ནས་ཡོང་བ་ཡིན་ཏེ་ཁྱོད་ཚོས་ང་རང་དང་ལེན་མི་བྱེད། གཞན་ཞིག་རང་གི་མིང་ཐོག་ནས་ཡོང་ན་ཁྱོད་ཀྱིས་མི་དེ་དང་ལེན་པར་བྱ།
JOH 5:44 ཁྱོད་ཚོ་གཅིག་གིས་གཅིག་ལ་བསྟོད་ར་བྱེད་པ་ལ་དགའ་སྟེ། དཀོན་མཆོག་གཅིག་པོ་དང་ཁོ་ན་ཡིན་པ་ལས་འབྱུང་བའི་བསྟོད་ར་མ་བཙལ་ན། ཁྱོད་ཚོས་ཡིད་ཆེས་ཇི་ལྟར་བྱེད།
JOH 5:45 ངས་ཡབ་ཀྱི་དྲུང་དུ་ཁྱོད་ཚོ་ལ་སྐྱོན་འཛུགས་བྱེད་པར་འགྱུར་རོ་ཞེས་མ་སོམས་ཤིག ཁྱོད་ཚོར་སྐྱོན་འཛུགས་བྱེད་མཁན་ནི་ཁྱོད་ཚོས་རེ་ལྟོས་བྱས་སའི་ལུང་སྟོན་པ་མོ་ཤེ་རང་ཡིན།
JOH 5:46 གལ་ཏེ་ཁྱོད་ཚོ་མོ་ཤེ་ལ་ཡིད་ཆེས་བྱས་པ་ཡིན་ན། ང་ལའང་ཡིད་ཆེས་བྱེད་པར་འགྱུར། ཅི་ལགས་ཟེར་ན། ཁོང་གིས་ངའི་སྐོར་བྲིས་སོ།
JOH 5:47 འོན་ཀྱང་ཁོང་གིས་གང་བྲིས་པར་ཡིད་ཆེས་མ་བྱས་ན། ངས་བཤད་པའི་གཏམ་ལ་ཡིད་ཆེས་བྱེད་པ་ཅི་ལ་སྲིད་”ཅེས་གསུངས་སོ། །
JOH 6:1 དེའི་རྗེས་སུ་ཡེ་ཤུ་ག་ལིལ་མཚོའི་ཕར་ཕྱོགས་སུ་ཕེབས། (ག་ལིལ་མཚོ་ནི་ཏི་པེར་ཡཱ་མཚོ་ཡང་ཟེར་)
JOH 6:2 མི་ཚོགས་མང་པོས་ཁོང་གིས་ནད་པ་ཚོ་ལ་མཛད་པའི་ངོ་མཚར་བའི་དོན་མཐོང་བས་ཁོང་གི་རྗེས་སུ་འབྲངས།
JOH 6:3 ཡེ་ཤུ་རི་ཞིག་ལ་ཕེབས་ནས་རང་གི་ཉེ་གནས་དང་མཉམ་དུ་དེར་བཞུགས།
JOH 6:4 དེའི་ཚེ་པེ་སག་ཟེར་བའི་ཡ་ཧུ་དཱ་པའི་དུས་ཆེན་སླེབས་པར་ཉེ་བ་ཡིན།
JOH 6:5 ཡེ་ཤུས་མི་ཚོགས་མང་པོ་ཁོང་གི་དྲུང་དུ་ཡོང་བཞིན་པ་གཟིགས་ནས་ཁོང་གིས་ཉེ་གནས་ཕི་ལིབ་ལ་“ང་ཚོས་མི་འདི་ཚོས་ཟ་རྒྱུའི་བག་ལེབ་ག་ནས་ཉོ་བར་སྲིད་”ཅེས་གསུངས།
JOH 6:6 ཁོང་གིས་ཅི་ལྟར་མཛད་རྒྱུ་ཡིན་པ་མཁྱེན་ནས། ཕི་ལིབ་ལ་ཉམས་ཚོད་ལེན་པའི་ཕྱིར་དེ་ལྟར་གསུངས།
JOH 6:7 ལན་དུ་ཕི་ལིབ་ཀྱིས་ཁོང་ལ་“དེ་ཎ་རིའི་དངུལ་སྒོར་ཉིས་བརྒྱའི་བག་ལེབ་མི་རེ་རེ་ལ་ཅུང་ཟད་ཅིག་ཐོབ་ཀྱང་མི་འདང་”ཞེས་ཞུས།
JOH 6:8 ཁོང་གི་ཉེ་གནས་རྣམས་ཀྱི་ནང་ནས་གཞན་གཅིག་སི་མོན་པེ་ཏྲོ་ཡི་སྤུན་ཨན་དྲི་ཡཱས་ཁོང་ལ་
JOH 6:9 “འདིར་ཡོད་པའི་བུ་ཞིག་ལ་ནས་ཕྱེའི་བག་ལེབ་ལྔ་དང་ཉ་ཤ་གཉིས་ཡོད་ཀྱང༌། མི་འདི་ཙམ་མང་པོ་ལ་ཅི་ཕན་”ཞེས་བཤད།
JOH 6:10 ཡེ་ཤུས་“མི་དེ་ཚོ་སྡོད་དུ་ཆུག་དང་”ཞེས་གསུངས། ས་ཆ་དེར་རྩྭ་མང་པོ་ཡོད་དེ་མི་ཚོ་དེར་བསྡད། མི་ཚོགས་དེར་སྐྱེས་པ་ལྔ་སྟོང་ཙམ་ཡོད།
JOH 6:11 དེ་ནས་ཡེ་ཤུས་བག་ལེབ་ཕྱག་ཏུ་བསྣམས་ནས་དཀོན་མཆོག་ལ་བཀའ་དྲིན་ཆེ་ཞུས་པའི་རྗེས་ལ་ས་ལ་བསྡད་ཡོད་པའི་མི་རྣམས་ལ་བག་ལེབ་དེ་བགོད་དུ་བཅུག ཉ་ཤ་དེ་ཚོ་ལས་ཀྱང་ཁོ་ཚོས་འདོད་པ་ཙམ་ལ་བགོད་དུ་བཅུག
JOH 6:12 མི་ཚང་མས་བཟས་ནས་འགྲངས་པར་གྱུར་ཏེ་ཡེ་ཤུས་ཁོང་གིས་ཉེ་གནས་རྣམས་ལ་“ད་ཅིའང་ཆུད་ཟོས་མི་འགྲོ་བའི་ཕྱིར་ཟས་ལྷག་སྡུས་དང་”ཞེས་གསུངས་པས།
JOH 6:13 ཁོ་ཚོས་བསྡུས་ཏེ་མི་ཚོས་བཟས་པའི་ནས་ཕྱེའི་བག་ལེབ་ལྔ་པོ་ལས་ལུས་པའི་ཆག་དུམ་གྱིས་སླེ་པོ་བཅུ་གཉིས་བཀང༌།
JOH 6:14 མི་ཚོགས་ཀྱིས་ཡེ་ཤུས་མཛད་པའི་ངོ་མཚར་བའི་རྟགས་དེ་མཐོང་བས་“འདི་ནི་དངོས་གནས་འཇིག་རྟེན་ལ་ཕེབས་རྒྱུ་ཡོད་པའི་ལུང་སྟོན་པ་དེ་ཡིན་”ཞེས་བཤད།
JOH 6:15 ཡེ་ཤུས་ཁོ་ཚོས་ཁོང་རང་བཟུང་ནས་བཙན་ཡོད་ཀྱིས་རྒྱལ་པོར་བསྐོ་རྩིས་ཡོད་པ་མཁྱེན་ནས་གཅིག་པུར་རི་ལ་སླར་ཕེབས།
JOH 6:16 དགོང་དྲོ་སླེབས་དུས་ཡེ་ཤུའི་ཉེ་གནས་རྣམས་མཚོའི་འགྲམ་ལ་མར་སོང་དུས།
JOH 6:17 གྲུ་ཞིག་ལ་ཞུགས་ནས་མཚོའི་ཕར་ཕྱོགས་སུ་ཀ་ཕར་ན་ཧུམ་དུ་འགྲོ་བར་བརྩམས། མུན་རུབ་ཀྱང་ཡེ་ཤུ་ཁོ་ཚོའི་རྩར་ད་དུང་མ་བྱོན།
JOH 6:18 རླུང་ཆེན་པོ་ཞིག་ལངས་བས་མཚོའི་རྦ་རླབས་དྲག་ཏུ་འཕྱུར་བ་དང༌།
JOH 6:19 ཉེ་གནས་ཚོས་སྐྱ་བ་བརྒྱབ་ནས་གྲུ་དེ་སྤྱི་ལེ་ལྔ་དྲུག་ཙམ་སླེབས་སྐབས་ཁོ་ཚོས་ཡེ་ཤུ་མཚོའི་སྟེང་ལ་ཞབས་བཅགས་ཏེ་གྲུ་དང་ཉེ་བར་ཕེབས་པ་མཐོང་བས་ཁོ་ཚོ་ཤིན་ཏུ་འཇིགས།
JOH 6:20 འོན་ཀྱང་ཡེ་ཤུས་“ང་རང་ཡིན་པས་མ་ཞེད་ཅིག་”ཅེས་གསུངས་པས།
JOH 6:21 ཁོ་ཚོ་འགྲུའི་ནང་དུ་ཁོང་བསུས་འདོད་དེ། དེ་མ་ཐག་ཏུ་གང་དུ་འགྲོ་བའི་གནས་སུ་གྲུ་སླེབས།
JOH 6:22 དེའི་ཕྱི་ཉིན་ག་ལིལ་མཚོའི་ཕ་རོལ་ཏུ་བསྡད་ཡོད་པའི་མི་ཚོགས་ཀྱིས་གྲུ་གཅིག་མ་གཏོགས་པར་གཞན་མེད་པ་དང༌། གྲུ་དེ་ལ་ཡེ་ཤུ་མ་ཕེབས་པར་ཉེ་གནས་ཚོ་གཅིག་པོར་སོང་ཟིན་པར་ཤེས།
JOH 6:23 ཏི་པེར་ཡཱ་ཞེས་པའི་གྲོང་ཁྱེར་ནས་གྲུ་གཞན་དག་རྣམས་ཡེ་ཤུས་བཀའ་དྲིན་ཆེ་ཞུས་ནས་ཁོ་ཚོས་བག་ལེབ་བཟས་སའི་གནས་དང་ཉེ་བར་སླེབས།
JOH 6:24 མི་ཚོགས་ཀྱིས་ཡེ་ཤུ་ཡང་མ་མཐོང༌། ཉེ་གནས་རྣམས་ཀྱང་མ་མཐོང་བས། གྲུ་དེ་ཚོར་ཞོན་པ་དང༌། ཡེ་ཤུ་འཚོལ་བའི་ཕྱིར་ཀ་ཕར་ན་ཧུམ་ལ་ཕྱིན།
JOH 6:25 མཚོའི་ཕར་ཕྱོགས་སུ་ཁོང་མཇལ་སྐབས་ཁོ་ཚོས་“རབ་བི། ཁྱེད་འདིར་ནམ་ཕེབས་པ་ཡིན་”ཞེས་བཤད།
JOH 6:26 ལན་དུ་ཡེ་ཤུས་“ངས་ཁྱོད་ཚོར་བདེན་པ་བདེན་པར་ཟེར་རྒྱུར། ཁྱོད་རྣམས་ང་འཚོལ་དོན་ནི་རྟགས་རྣམས་མཐོང་བས་མ་ཡིན་པར་བག་ལེབ་བཟས་ནས་འགྲངས་པའི་ཕྱིར་རོ།
JOH 6:27 ཟས་མི་རྟག་པ་དེ་ལ་འབད་རྩོལ་མ་བྱེད་ཀྱིས། དཔག་ཏུ་མེད་པའི་ཚེ་གནང་བའི་ཟས་དེ་ལ་འབད་རྩོལ་གྱིས་ཤིག ང་མིའི་རིགས་ཀྱི་བུ་ཡིས་ཁྱེད་ཚོ་ལ་ཟས་དེ་སྟེར་བར་བྱ། གང་ཡིན་ཟེར་ན། ཡབ་དཀོན་མཆོག་གིས་མིའི་རིགས་ཀྱི་བུ་ལ་ཁོང་གི་ཕྱག་ཐེལ་བསྐྱོན་ཡོད་པ་ཡིན་”ཞེས་གསུངས།
JOH 6:28 ཁོ་ཚོས་ཁོང་ལ་“དཀོན་མཆོག་གིས་ང་ཚོར་སྒྲུབ་དགོས་པའི་ལས་རྣམས་སྒྲུབ་པའི་ཕྱིར་ང་ཚོས་ཅི་བྱེད་དགོས་”ཞེས་ཞུས་པ་དང༌།
JOH 6:29 ཡེ་ཤུས་ཁོ་ཚོར་“དཀོན་མཆོག་གིས་བཏང་གནང་བ་དེ་ལ་དད་པ་བྱེད་པ་ནི་དཀོན་མཆོག་གི་སྒྲུབ་དགོས་པའི་ལས་དེ་ཡིན་ནོ་”ཞེས་གསུངས།
JOH 6:30 ཁོ་ཚོས་“འོ་ན་ང་ཚོས་དེ་མཐོང་ནས་ཁྱེད་ལ་ཡིད་ཆེས་པའི་ཕྱིར་ཁྱེད་ཀྱིས་ངོ་མཚར་བའི་རྟགས་གང་ཞིག་མཛད་པར་བྱ། ཁྱེད་ཀྱིས་ལས་ཅི་ཞིག་མཛད།
JOH 6:31 ང་ཚོའི་ཕ་མེས་ཀྱིས་འབྲོག་སྟོང་ལ་མན་ནཱ་ཟེར་བའི་ཁ་ཟས་བཟས། མདོ་ལས་བྲིས་ཡོད་པ་ལྟར་ཁོང་གིས་ཁོ་ཚོར་དཀོན་མཆོག་གི་ཞིང་ཁམས་ནས་བག་ལེབ་ཟས་སུ་གནང་”ཞེས་བཤད།
JOH 6:32 ཡེ་ཤུས་ཁོ་ཚོར་“ངས་ཁྱེད་རྣམས་ལ་བདེན་པ་བདེན་པར་ཟེར་རྒྱུར། ལུང་སྟོན་པ་མོ་ཤེ་ཡིས་ཁྱེད་རྣམས་ལ་དཀོན་མཆོག་གི་ཞིང་ཁམས་ནས་བག་ལེབ་གནང་མཁན་མ་ཡིན། ངའི་ཡབ་ཀྱིས་ཁྱེད་ཚོར་ཞིང་ཁམས་ནས་བདེན་པའི་བག་ལེབ་གནང་མཁན་དེ་ཡིན།
JOH 6:33 དཀོན་མཆོག་གི་བག་ལེབ་དེ་ནི་དཀོན་མཆོག་གི་ཞིང་ཁམས་ནས་བབ་སྟེ་འཇིག་རྟེན་ལ་ཚེ་གནང་མཁན་དེ་ཡིན་”ཞེས་གསུངས།
JOH 6:34 ཁོ་ཚོས་“སྐུ་ཞབས་ལགས། དུས་རྒྱུན་དུ་དེ་ལྟ་བུའི་བག་ལེབ་ང་ཚོ་ལ་གནང་རོགས་”ཞེས་ཞུས་པ་དང༌།
JOH 6:35 ཡེ་ཤུས་“ང་ནི་ཚེའི་བག་ལེབ་དེ་ཡིན་ནོ། ངའི་རྩར་ཡོང་མཁན་དེ་མི་ལྟོགས། ང་ལ་དད་པ་བྱེད་མཁན་དེ་ནམ་ཡང་མི་སྐོམ།
JOH 6:36 འོན་ཀྱང་ངས་སྔར་བཤད་པ་བཞིན་དུ་ཁྱོད་རྣམས་ཀྱིས་ང་མཐོང་ཡང་ང་ལ་ད་དུང་དད་པ་མི་བྱེད།
JOH 6:37 ཡབ་ཀྱིས་ང་ལ་གནང་བ་ཐམས་ཅད་ངའི་རྩར་ཡོང་ངེས་ཡིན། སུ་ངའི་རྩར་ཡོང་ན་ཡང་དེ་ངས་ནམ་ཡང་བསྐྲད་པར་མི་བྱ།
JOH 6:38 ང་དཀོན་མཆོག་གི་ཞིང་ཁམས་ནས་བབ་དོན་ནི་ང་རང་གི་བསམ་པ་སྒྲུབ་ཏུ་མ་ཡིན་ཏེ། ང་མངགས་མཁན་དཀོན་མཆོག་གི་དགོངས་པ་བཞིན་དུ་སྒྲུབ་པའི་ཕྱིར་ཡིན།
JOH 6:39 ང་མངགས་མཁན་དཀོན་མཆོག་གི་དགོངས་པ་ཅི་ཡིན་ཞེ་ན། ཁོང་གིས་ང་ལ་གནང་ཡོད་པ་ཐམས་ཅད་ལས་གཅིག་ཀྱང་མ་བརླག་པར། དེ་ཚོ་ཐམས་ཅད་དུས་ཀྱི་ཐ་མའི་ཉིན་མོར་སློང་དགོས་པ་དེ་ཡིན།
JOH 6:40 སུས་ཀྱང་སྲས་མཇལ་ནས་ཁོང་ལ་དད་པ་བྱས་ན་དཔག་ཏུ་མེད་པའི་ཚེ་ཐོབ་སྟེ་དུས་ཀྱི་ཐ་མའི་ཉིན་ལ་ངས་དེ་ཚོ་ཐམས་ཅད་གཤིན་པོའི་ཁྲོད་ནས་སློང་བར་བྱ། དེ་ནི་ངའི་ཡབ་ཀྱི་དགོངས་པ་ཡིན་”ཞེས་གསུངས་སོ། །
JOH 6:41 ཡེ་ཤུས་ང་ནི་དཀོན་མཆོག་གི་ཞིང་ཁམས་ནས་བབ་པའི་བག་ལེབ་ཡིན་ཞེས་གསུངས་པས་ཡ་ཧུ་དཱ་པས་མ་རངས་པའི་གཏམ་བྱེད་བཞིན་ཡོད་དེ།
JOH 6:42 “ཡེ་ཤུ་ཁོ་ཡོ་སེབ་ཀྱི་བུ་མ་ཡིན་ནམ། ཁོའི་ཕ་མ་ང་ཚོས་ངོ་མི་ཤེས་སམ། ད་ལྟ་ཁོས་ང་དཀོན་མཆོག་གི་ཞིང་ཁམས་ནས་བབ་པ་ཡིན་ཞེས་ཟེར་བ་ཇི་ལྟར་ཡིན་”ཞེས་བཤད།
JOH 6:43 དེའི་ལན་དུ་ཡེ་ཤུས་“ཁྱོད་ཚོའི་ཁྲོད་དུ་མ་རངས་པའི་གཏམ་མ་ཤོད།
JOH 6:44 ང་མངགས་མཁན་ཡབ་ཀྱིས་མི་འདྲེན་པར་སུ་ཡང་ངའི་རྩར་ཡོང་མི་སྲིད། ཡང་ངས་དུས་ཀྱི་ཐ་མའི་ཉིན་ལ་མི་དེ་གཤིན་པོའི་ཁྲོད་ནས་སློང་བར་བྱ།
JOH 6:45 ལུང་སྟོན་པའི་མདོ་ལས། དཀོན་མཆོག་གིས་ཁོ་ཚོ་ཐམས་ཅད་ལ་སློབ་པར་མཛད་པར་འགྱུར་ཞེས་བྲིས་ཡོད། ཡབ་ཀྱི་བཀའ་ལ་ཉན་ཅིང་ཁོང་ལས་སྤྱངས་པའི་མི་ཐམས་ཅད་ངའི་རྩར་ཡོང༌།
JOH 6:46 མི་སུས་ཀྱང་ཡབ་མཐོང་མྱོང་བ་ཡིན་ཞེས་བཤད་པ་མ་ཡིན་ཏེ། དཀོན་མཆོག་གི་དྲུང་ནས་ཡོང་བ་དེས་མ་གཏོགས་སུས་ཀྱང་ཡབ་མཐོང་མ་མྱོང༌།
JOH 6:47 ངས་ཁྱོད་རྣམས་ལ་བདེན་པ་བདེན་པར་ཟེར་རྒྱུར། ང་ལ་དད་པ་བྱེད་མཁན་དེ་ལ་དཔག་ཏུ་མེད་པའི་ཚེ་ཡོད་དོ།
JOH 6:48 ང་ནི་ཚེའི་བག་ལེབ་ཡིན་ནོ།
JOH 6:49 ཁྱོད་ཚོའི་མེས་པོས་འབྲོག་སྟོང་ལ་མན་ནཱ་ཟེར་བའི་ཁ་ཟས་བཟས་ཀྱང་ཤི
JOH 6:50 འོན་ཀྱང་དཀོན་མཆོག་གི་ཞིང་ཁམས་ནས་བབ་པའི་བག་ལེབ་དེ་འདི་ལྟ་བུ་ཡིན། མི་ཞིག་གིས་དེ་ལས་བཟས་ན་འཆི་མི་སྲིད།
JOH 6:51 ང་ནི་ཞིང་ཁམས་ནས་བབ་པའི་ཚེ་དཔག་ཏུ་མེད་པའི་བག་ལེབ་ཡིན། མི་སུས་ཀྱང་བག་ལེབ་འདི་ལས་བཟས་ན་དུས་གཏན་དུ་གསོན་པར་འགྱུར། ཡང་འཇིག་རྟེན་གསོན་པར་བྱ་བའི་ཕྱིར་ངས་སྦྱིན་པར་བྱ་བའི་བག་ལེབ་དེ་ནི་ངའི་ཤ་ཡིན་”ཞེས་གསུངས།
JOH 6:52 དེའི་ཕྱིར་ཡ་ཧུ་དཱ་པས་གཅིག་གིས་གཅིག་ལ་རྩོད་གླེང་བྱས་ཏེ་“མི་འདིས་ཁོའི་ཤ་ང་ཚོར་ཟས་སུ་སྟེར་བ་དེ་ཅི་ལ་སྲིད་”ཅེས་བཤད་པས།
JOH 6:53 ཡེ་ཤུས་“ངས་ཁྱོད་རྣམས་ལ་བདེན་པ་བདེན་པར་ཟེར་རྒྱུར། གལ་ཏེ་ཁྱོད་ཚོས་མིའི་རིགས་ཀྱི་བུའི་ཤ་དེ་མ་བཟས་ཤིང༌། ཁྲག་ཡང་མ་བཏུངས་ན། ཁྱོད་ཚོར་དཔག་ཏུ་མེད་པའི་ཚེ་མེད་དོ།
JOH 6:54 ངའི་ཤ་ཟ་ཞིང་ངའི་ཁྲག་འཐུང་མཁན་ལ་དཔག་ཏུ་མེད་པའི་ཚེ་ཡོད་དེ། དུས་ཀྱི་ཐ་མའི་ཉིན་ལ་ངས་ཁོ་ཚོ་གཤིན་པོའི་ཁྲོད་ནས་སློང་བར་བྱ།
JOH 6:55 ངའི་ཤ་ནི་བདེན་པའི་ཟས་ཡིན་ཞིང༌། ངའི་ཁྲག་བདེན་པའི་བཏུང་བ་ཡིན་ནོ།
JOH 6:56 ངའི་ཤ་ཟ་ཞིང་ངའི་ཁྲག་འཐུང་མཁན་རྣམས་ང་དང་འགྲོགས་ཏེ་གནས་ཡོད། ང་ཡང་ཁོ་རྣམས་དང་འགྲོགས་ཏེ་གནས་སོ།
JOH 6:57 གཏན་ནས་གསོན་པའི་ཡབ་ཀྱིས་ང་མངགས་པ་ཡིན་ཏེ། ང་ཡབ་ལ་བརྟེན་ཏེ་གསོན་པ་བཞིན། དེ་ལྟར་ང་ཟ་མཁན་ནི་ང་ལ་བརྟེན་ཏེ་གསོན་པར་འགྱུར།
JOH 6:58 འདི་ནི་དཀོན་མཆོག་གི་ཞིང་ཁམས་ནས་བབ་པའི་བག་ལེབ་ཡིན། བཟས་པ་དང་ཐ་མར་ཤི་བའི་ཁྱོད་ཀྱི་མེས་པོའི་བག་ལེབ་དང་མི་འདྲ། བག་ལེབ་འདི་ཟ་མཁན་གཏན་དུ་གསོན་པར་འགྱུར་རོ་”ཞེས་གསུངས།
JOH 6:59 ཁོང་གིས་དོན་འདི་ཚོ་ཀ་ཕར་ན་ཧུམ་ལ་ཡོད་པའི་ཡ་ཧུ་དཱ་པའི་འདུ་ཁང་ནང་དུ་ཆོས་སྟོན་དུས་གསུངས་སོ། །
JOH 6:60 ཁོང་གི་རྗེས་སུ་འབྲང་མཁན་གྱི་ནང་ནས་མང་པོས་དེ་ཐོས་ནས་“གསུང་འདི་ཁག་པོ་ཡིན་པས་སུས་ཁས་ལེན་ཐུབ་”ཅེས་བཤད།
JOH 6:61 འོན་ཀྱང་ཡེ་ཤུས་རྗེས་སུ་འབྲང་མཁན་རྣམས་མ་རངས་པའི་གཏམ་ཤོད་བཞིན་པ་མཁྱེན་ནས་ཁོ་ཚོར་“ངས་བཤད་པ་དེས་ཁྱོད་ཀྱི་དད་པ་ཉམས་སུ་འཇུག་གམ།
JOH 6:62 ཁྱོད་རྣམས་ཀྱིས་མིའི་རིགས་ཀྱི་བུ་སྔར་ཡོད་པའི་གནས་སུ་ལོག་འགྲོ་བར་མཐོང་ན་ཅི་བསམ་ཡོང༌།
JOH 6:63 མི་རྣམས་ལ་ཚེ་གནང་མཁན་ནི་དཀོན་མཆོག་གི་དམ་པའི་ཐུགས་ཉིད་ཡིན་ཏེ་མི་རྣམས་ཀྱི་འབད་རྩོལ་ཕན་མེད་དོ། ངས་ཁྱེད་ཚོར་བཤད་པའི་གཏམ་དེ་ནི་ཚེ་དང་ཐུགས་ཉིད་ཡིན།
JOH 6:64 འོན་ཀྱང་ཁྱོད་ཚོའི་ནང་ནས་ཁ་ཅིག་གིས་དད་པ་མི་བྱེད་”ཅེས་གསུངས། གང་ལགས་ཟེར་ན། ཡེ་ཤུས་ཐོག་མ་ནས་དད་པ་མི་བྱེད་པ་རྣམས་དང༌། ཁོང་རང་དགྲའི་དབང་དུ་གཏོང་མཁན་སུ་ཡིན་པ་མཁྱེན།
JOH 6:65 ཡང་ཁོང་གིས་“དེའི་ཕྱིར་ངས་ཁྱོད་རྣམས་ལ་ངའི་ཡབ་ཀྱིས་མི་གནང་བར་སུ་ཡང་ངའི་རྩར་ཡོང་མི་སྲིད་ཅེས་བཤད་པ་ཡིན་”ཞེས་གསུངས།
JOH 6:66 དེའི་ཕྱིར་ཁོང་གི་རྗེས་སུ་འབྲང་མཁན་རྣམས་ལས་མི་མང་པོ་ཕྱིར་ལོག་ནས་ཁོང་དང་མ་འགྲོགས།
JOH 6:67 དེའི་རྐྱེན་གྱིས་ཡེ་ཤུས་ཉེ་གནས་བཅུ་གཉིས་པོ་ལ་“ད་ཁྱེད་ཚོ་ཡང་ཕར་འགྲོ་འདོད་དམ་”ཞེས་བཀའ་འདྲི་གནང༌།
JOH 6:68 སི་མོན་པེ་ཏྲོས་“གཙོ་བོ་ལགས། ང་ཚོ་སུའི་དྲུང་དུ་འགྲོ་བར་བྱ། ཁྱེད་ལ་དཔག་ཏུ་མེད་པའི་ཚེའི་གསུང་ཡོད།
JOH 6:69 ང་ཚོས་དད་པ་བྱས་ཤིང་ཁྱེད་ཉིད་དཀོན་མཆོག་གི་དྲུང་ནས་ཕེབས་པའི་སྐྱེས་བུ་དམ་པ་དེ་ཡིན་པར་ཤེས་”ཞེས་ཟེར།
JOH 6:70 ཡེ་ཤུས་“ངས་ཁྱོད་བཅུ་གཉིས་པོ་བདམས་པ་མ་ཡིན་ནམ། འོན་ཀྱང་ཁྱོད་ཚོའི་ནང་ནས་གཅིག་ནི་བདུད་ཅིག་ཡིན་”ཞེས་གསུངས།
JOH 6:71 ཁོང་གིས་གསུངས་པའི་དོན་ནི་སི་མོན་དབྱི་སི་ཀར་རེའི་བུ་ཡུ་དཱ་ཡིན། མི་འདི་ནི་བཅུ་གཉིས་པོའི་ནང་ནས་གཅིག་ཡིན་ཀྱང་རྗེས་མ་ཡེ་ཤུ་དགྲའི་དབང་དུ་གཏོང་མཁན་དེ་ཡིན་ནོ། །
JOH 7:1 དེའི་རྗེས་ལ་ཡེ་ཤུ་ག་ལིལ་ཡུལ་གྱི་གནས་སོ་སོར་ཕེབས། ཁོང་ཡ་ཧུ་དཱ་ཡུལ་དུ་དེ་ལྟར་ཕེབས་མི་མཉེས། གང་ལགས་ཟེར་ན། ཡ་ཧུ་དཱ་པའི་དཔོན་རིགས་རྣམས་ཀྱིས་ཁོང་དགྲོང་བའི་གོ་སྐབས་བཙལ་གྱི་ཡོད་པའི་ཕྱིར་རོ།
JOH 7:2 དེའི་ཚེ་ཡ་ཧུ་དཱ་པའི་སྤྱིལ་བུའི་དུས་ཆེན་ཉེ་བར་སླེབས་པས།
JOH 7:3 ཁོང་གི་ནུ་བོ་རྣམས་ཀྱིས་ཁོང་ལ་“ད་ཁྱེད་ཀྱི་རྗེས་སུ་འབྲང་མཁན་རྣམས་ཀྱིས་ཁྱེད་ཀྱིས་བྱེད་པའི་ལས་རྣམས་མཐོང་བའི་ཕྱིར། ས་ཆ་འདི་དང་འབྲལ་ནས་ཡ་ཧུ་དཱ་ཡུལ་དུ་སོང་དང༌།
JOH 7:4 མི་སུས་ཀྱང་སྙན་གྲགས་ཅན་དུ་འགྱུར་འདོད་ན་དོན་གང་ཡང་ལྐོག་ཏུ་མི་བྱེད། གལ་ཏེ་ཁྱེད་ཀྱིས་ལས་འདི་རྣམས་མཛད་ན། འཇིག་རྟེན་ལ་མངོན་པར་མཛོད་”ཅེས་ཞུས།
JOH 7:5 ཁོང་གི་ནུ་བོ་རྣམས་ཀྱིས་ཀྱང་ཁོང་ལ་དད་པ་མ་བྱས་པས་སོ།
JOH 7:6 དེའི་ཕྱིར་ཡེ་ཤུས་ཁོ་ཚོར་“ཁྱོད་ལ་རྒྱུན་དུ་གོ་སྐབས་ཡོད་ཀྱང༌། ངའི་དུས་ལ་ད་དུང་མ་བབ།
JOH 7:7 འཇིག་རྟེན་གྱི་མི་ཚོས་ཁྱོད་ཚོར་སྡང་བའི་རྒྱུ་མཚན་ཅི་ཡང་མེད། འོན་ཀྱང་ངས་ཁོ་ཚོས་བྱེད་པའི་ལས་ངན་པ་ཡིན་པར་དཔང་པོ་བྱེད་པས་ང་ལ་སྡང༌།
JOH 7:8 ཁྱོད་ཚོ་དུས་ཆེན་ལ་སོང་ཞིག ངའི་དུས་ལ་ད་དུང་མ་བབ་པས། ང་ནི་དུས་ཆེན་འདི་ལ་ད་ལྟ་མི་འགྲོ་”ཞེས་གསུངས་ནས་
JOH 7:9 ག་ལིལ་ཡུལ་དུ་གནས།
JOH 7:10 འོན་ཀྱང་ཁོང་གི་ནུ་བོ་རྣམས་དུས་ཆེན་དེ་ལ་སོང་བའི་རྗེས་སུ་ཁོང་ཡང་མངོན་སུམ་དུ་མ་ཕེབས་པར་གསང་སྟབས་ཀྱིས་དེར་ཕེབས།
JOH 7:11 ཡ་ཧུ་དཱ་པའི་དཔོན་རིགས་ཚོས་དུས་ཆེན་གཏོང་སར་ཁོང་བཙལ་ཏེ་“ཁོ་གང་དུ་ཡོད་”ཅེས་བཤད།
JOH 7:12 མི་ཚོགས་ཀྱི་ནང་ཁོང་གི་སྐོར་ལ་ཤུབ་ཤུབ་ཏུ་སྨྲ་བའི་གཏམ་མང་པོ་བྱུང་སྟེ། ཁ་ཅིག་གིས་“ཁོང་མི་བཟང་པོ་ཡིན་”ཞེས་བཤད་པ་དང༌། ཁ་ཅིག་གིས་“དེ་ལྟར་མ་ཡིན། མི་མང་པོར་མགོ་སྐོར་གཏོང་མཁན་ཞིག་ཡིན་”ཞེས་བཤད།
JOH 7:13 འོན་ཀྱང་ཡ་ཧུ་དཱ་པའི་དཔོན་རིགས་ལ་འཇིགས་པས་སུས་ཀྱང་མངོན་སུམ་གྱི་སྒོ་ནས་ཁོང་གི་སྐོར་གཏམ་མ་བྱས།
JOH 7:14 དེ་ནས་དུས་ཆེན་གྱི་ཕྱེད་ཙམ་ལ་ཡེ་ཤུ་མཆོད་ཁང་ཆེན་མོའི་སྒོ་རར་ཕེབས་ནས་ཆོས་བསྟན་འགོ་བཙུགས།
JOH 7:15 དེར་ཡ་ཧུ་དཱ་པའི་དཔོན་རིགས་ཡ་མཚན་སྐྱེས་ནས་“མི་འདིས་ཆོས་ནམ་ཡང་མ་བསླབས་ཀྱང༌། ཅི་ལྟར་ཆོས་ལ་མཁས་པར་གྱུར་བ་ཡིན་”ཞེས་བཤད།
JOH 7:16 ལན་དུ་ཡེ་ཤུས་“ངའི་བསྟན་པ་འདི་ནི་ང་རང་གི་བསྟན་པ་མ་ཡིན་ཏེ། ང་མངགས་མཁན་དཀོན་མཆོག་ནས་བྱུང་བ་ཡིན།
JOH 7:17 སུ་ཡང་དཀོན་མཆོག་གི་ཐུགས་དགོངས་བཞིན་དུ་སྒྲུབ་པར་ཆོད་སེམས་བཙུགས་ན། བསྟན་པ་འདི་ནི་དཀོན་མཆོག་ནས་བྱུང་ངམ། ཡང་ན་ངས་རང་ཐོག་ནས་བཤད་པ་ཡིན་ཤེས་པར་འགྱུར།
JOH 7:18 རང་ལ་བརྟེན་ནས་གཏམ་བཤད་པ་ནི་རང་གི་གྲགས་པ་གཉེར། འོན་ཀྱང་རང་གཏོང་མཁན་གྱི་གྲགས་པ་གཉེར་བ་དེ་ནི་བདེན་པ་ཡིན་ཏེ། དེའི་ནང་ལ་བཅོས་མ་ཅི་ཡང་མེད།
JOH 7:19 ལུང་སྟོན་པ་མོ་ཤེ་ཡིས་ཁྱོད་རྣམས་ལ་བཀའ་ཁྲིམས་གནང་བ་མ་ཡིན་ནམ། ཁྱོད་ཚོའི་ནང་ནས་མི་གཅིག་ཀྱང་བཀའ་ཁྲིམས་མི་སྲུང༌། ཁྱོད་རྣམས་ཀྱིས་ང་གསོད་པའི་གོ་སྐབས་འཚོལ་བ་ཅིའི་ཕྱིར་ཡིན་”ཞེས་གསུངས་པ་དང༌།
JOH 7:20 ལན་དུ་མི་ཚོགས་ཀྱིས་“ཁྱོད་ལ་འདྲེ་ཞིག་ཞུགས་འདུག སུས་ཁྱོད་གསོད་པར་འབད་བཞིན་ཡོད་”ཅེས་བཤད།
JOH 7:21 ཡེ་ཤུས་“ངས་ངོ་མཚར་བའི་ལས་ཤིག་བྱས་པས་ཁྱོད་ཚོ་ཐམས་ཅད་ཡ་མཚན་སྐྱེས།
JOH 7:22 ལུང་སྟོན་པ་མོ་ཤེ་ཡིས་ཁྱོད་ཚོར་དཀོན་མཆོག་གིས་གནང་བའི་ཞལ་ཆད་དེ་སྲུང་བའི་རྟགས་རྒྱག་པའི་བཀའ་ཁྲིམས་གནང་ཡོད་པས། ངལ་གསོ་བའི་ཉིན་ལའང་ཁྱོད་ཚོས་རང་གི་བུ་ལ་རྟགས་དེ་རྒྱག་པའི་ལུགས་སྲོལ་སྲུང༌། (འོན་ཀྱང་དོན་དམ་དུ་ལུགས་སྲོལ་དེ་ནི་མོ་ཤེ་རང་ནས་མ་བྱུང༌། མེས་པོའི་དུས་ནས་བྱུང་)
JOH 7:23 ད་མོ་ཤེའི་བཀའ་ཁྲིམས་དང་མི་འགལ་བའི་ཕྱིར་ངལ་གསོ་བའི་ཉིན་ལ་མི་ཞིག་ལ་དཀོན་མཆོག་གིས་གནང་བའི་ཞལ་ཆད་དེ་སྲུང་བའི་རྟགས་ལེན་ན། ངས་ངལ་གསོ་བའི་ཉིན་ལ་མི་ཞིག་གི་ལུས་ཡོངས་སུ་གསོ་བར་བྱས་པས་ཁྱོད་ཚོ་ང་ལ་ཁྲོས་སམ།
JOH 7:24 ངོ་ལ་བལྟས་ཏེ་ཁྲིམས་གཅོད་མ་བྱོས། ཡང་དག་པའི་སྒོ་ནས་ཁྲིམས་གཅོད་བྱོས་ཤིག་”ཅེས་གསུངས།
JOH 7:25 དེའི་ཕྱིར་ཡེ་རུ་ཤ་ལེམ་པ་ཁ་ཅིག་གིས་“དཔོན་རིགས་ཚོས་གསོད་ཐབས་བྱེད་པའི་མི་འདི་མ་ཡིན་ནམ།
JOH 7:26 ད་ལྟོས་དང༌། ཁོང་གིས་མངོན་སུམ་དུ་གཏམ་གསུངས་བཞིན་པ་ལ་ཁོ་ཚོས་ཅི་ཡང་མི་ཟེར། དཔོན་རིགས་ཚོས་མི་འདི་སྐྱབས་མགོན་མཱ་ཤི་ཀ་ཡིན་པ་དངོས་གནས་ཤེས་སམ།
JOH 7:27 ང་ཚོར་མི་འདི་གང་ནས་བྱུང་བ་རྒྱུས་ཡོད། འོན་ཀྱང་སྐྱབས་མགོན་མཱ་ཤི་ཀ་འབྱོན་པའི་ཚེ་ཁོང་གང་ནས་འབྱུང་སུས་ཀྱང་མི་ཤེས་”ཞེས་ཟེར།
JOH 7:28 མཆོད་ཁང་ཆེན་མོའི་སྒོ་རར་ཆོས་བསྟན་པའི་སྐབས་ཡེ་ཤུས་གསུང་སྐད་ཆེན་པོས་“ཁྱེད་ཚོས་ང་རང་སུ་ཡིན་པ་དང་གང་ནས་བྱུང་བའང་ཤེས། ངས་རང་ཉིད་ལ་བརྟེན་ནས་མ་ཡོང༌། ང་མངགས་མཁན་དཀོན་མཆོག་ཉིད་བདེན་པ་ཡིན་ཏེ། ཁྱེད་ཚོས་ཁོང་ངོ་མི་ཤེས་ཀྱང༌།
JOH 7:29 ངས་ཁོང་ངོ་ཤེས་སོ། གང་ལགས་ཟེར་ན། ང་ཁོང་ནས་བྱུང་སྟེ། ཁོང་གིས་ང་མངགས་པ་ཡིན་”ཞེས་གསུངས་པས།
JOH 7:30 ཁོ་ཚོས་ཡེ་ཤུ་འཛིན་བཟུང་བར་བཙལ་ཡང༌། ཁོང་གི་དུས་ལ་ད་དུང་མ་སླེབས་པས་མི་སུས་ཀྱང་ཁོང་ལ་ལག་པ་མ་རེག
JOH 7:31 འོན་ཀྱང་མི་ཚོགས་ཀྱི་ནང་ནས་མི་མང་པོས་ཡེ་ཤུ་ལ་དད་པ་བྱས་ནས་“སྐྱབས་མགོན་མཱ་ཤི་ཀ་འབྱོན་པའི་ཚེ་མི་འདིས་བསྟན་པའི་རྟགས་ལས་མང་པོ་སྟོན་པར་འགྱུར་རམ་”ཞེས་ཟེར།
JOH 7:32 ཕཱ་རུ་ཤི་པ་རྣམས་ཀྱིས་མི་ཚོགས་ཀྱིས་ཁོང་གི་སྐོར་ལ་ཤུབ་ཤུབ་ཏུ་སྨྲ་བ་ཐོས་ནས། ཡ་ཧུ་དཱ་པའི་བླ་ཆེན་དང་ཕཱ་རུ་ཤི་པ་ཚོས་ཁོང་འཛིན་པའི་ཆེད་དུ་མཆོད་ཁང་གི་སྲུང་དམག་བཏང༌།
JOH 7:33 ཡེ་ཤུས་“ང་ད་དུང་ཁྱོད་ཚོ་དང་མཉམ་དུ་དུས་ཐུང་ངུ་ཞིག་སྡོད་པར་འགྱུར། དེ་ནས་ང་མངགས་མཁན་གྱི་དྲུང་དུ་འགྲོ
JOH 7:34 དུས་དེར་ཁྱོད་ཚོས་ང་བཙལ་ཡང་མི་རྙེད། ང་གང་དུ་ཡོད་པའི་སར་ཁྱོད་ཚོ་ཡོང་མི་ཐུབ་”ཅེས་གསུངས།
JOH 7:35 ཡ་ཧུ་དཱ་པའི་དཔོན་རིགས་ཀྱིས་ཕན་ཚུན་བར་“མི་འདི་ང་ཚོས་མི་རྙེད་པའི་ས་ཆ་གང་དུ་འགྲོ་རྩི་ཡོད། ཁོ་རང་ཕྱི་རྒྱལ་ལ་ཕྱིན་ནས་ཕྱི་པ་ཚོར་ཆོས་སྟོན་ནམ།
JOH 7:36 ཁྱོད་ཚོས་ང་བཙལ་ཡང་མི་རྙེད་ཅིང༌། ང་གང་དུ་ཡོད་པའི་སར་ཁྱོད་ཚོ་ཡོང་མི་ཐུབ་ཅེས་བཤད་པའི་དོན་ཅི་ཡིན་”ཞེས་ཟེར།
JOH 7:37 དེ་ནས་དུས་ཆེན་གྱི་མཐའ་མ་ཡིན་ཏེ་གལ་ཆེ་ཤོས་ཡིན་པའི་ཉིན་ལ་ཡེ་ཤུ་བཞེངས་ནས་གསུང་སྐད་ཆེན་པོས་“མི་སུ་སྐོམ་ཡང་དེ་ངའི་མདུན་དུ་ཤོག་ལ་འཐུང་ཞིག
JOH 7:38 སུས་ང་ལ་དད་པ་བྱེད་ཀྱང༌། གསུང་རབ་ཀྱིས་མི་དེའི་སྐོར་གསུངས་པ་ལྟར། མི་དེ་ལས་ཚེ་སྲོག་གི་ཆུ་དང་ལྡན་པའི་གཙང་པོ་རྣམས་འབབ་ཡོང་”ཞེས་གསུངས་པའི་དོན་ནི།
JOH 7:39 ཡེ་ཤུ་ལ་དད་པ་བྱེད་མཁན་ཚོ་དཀོན་མཆོག་གི་དམ་པའི་ཐུགས་ཉིད་འཐོབ་རྒྱུ་ཡིན་པ་དེ་ཡིན། ཡེ་ཤུ་ད་དུང་གཟི་བརྗིད་མ་འཕག་པས་དམ་པའི་ཐུགས་ཉིད་ད་དུང་མ་གནང་བའི་ཕྱིར་རོ། །
JOH 7:40 ཁོང་གིས་གསུངས་པ་དེ་ཐོས་ནས་མི་ཚོགས་ཀྱི་ནང་ནས་ལ་ལས་“མི་འདི་ལུང་སྟོན་པ་ཞེས་པ་དེ་དངོས་གནས་ཡིན་”ཞེས་བཤད་པ་དང༌།
JOH 7:41 ལ་ལས་“ཁོང་སྐྱབས་མགོན་མཱ་ཤི་ཀ་ཡིན་”ཞེས་བཤད། འོན་ཀྱང་ཁ་ཅིག་གིས་“ག་ལིལ་ཡུལ་ནས་མཱ་ཤི་ཀ་འབྱུང་ངམ།
JOH 7:42 གསུང་རབ་ཀྱི་ནང་སྐྱབས་མགོན་མཱ་ཤི་ཀ་ནི་རྒྱལ་པོ་དཱ་བིད་ཀྱི་གདུང་རྒྱུད་དང༌། དཱ་བིད་ཀྱི་ཕ་ཡུལ་བེད་ལེ་ཧེམ་ནས་འབྱུང་བར་འགྱུར་ཞེས་གསུངས་ཡོད་པ་མ་ཡིན་ནམ་”ཞེས་བཤད།
JOH 7:43 དེ་ལྟར་མི་ཚོགས་ཀྱི་ནང་ན་ཁོང་གི་སྐོར་ལ་ལྟ་ཚུལ་མི་མཐུན་པ་བྱུང༌།
JOH 7:44 ཁོ་ཚོའི་ནང་ནས་ཁ་ཅིག་གིས་ཁོང་འཛིན་གཟུང་བྱེད་པར་འདོད་ནའང༌། སུས་ཀྱང་ཁོང་ལ་ལག་པ་མ་རེག
JOH 7:45 དེར་མཆོད་ཁང་གི་སྲུང་དམག་ཚོ་ཡ་ཧུ་དཱ་པའི་བླ་ཆེན་དང་ཕཱ་རུ་ཤི་པ་ཚོའི་དྲུང་དུ་ཕྱིར་ཡོང་བ་དང༌། ཁོ་ཚོས་“ཁྱོད་ཚོ་ཅིའི་ཕྱིར་མི་དེ་ཁྲིད་མ་ཡོང་ངམ་”ཞེས་དྲིས་པ་དང༌།
JOH 7:46 མཆོད་ཁང་གི་སྲུང་དམག་ཚོས་“མི་སུས་ཀྱང་དེ་ལྟར་ཆོས་གསུངས་མ་མྱོང་”ཞེས་ལན་བཏབ།
JOH 7:47 ཕཱ་རུ་ཤི་པ་ཚོས་“ཁོས་ཁྱོད་ཚོར་ཡང་མགོ་སྐོར་བཏང་ངམ།
JOH 7:48 དབུ་ཁྲིད་པ་ཚོའམ་ཕཱ་རུ་ཤི་པ་ལས་སུ་ཞིག་གིས་དེ་ལ་དད་པ་བྱས་སམ།
JOH 7:49 འོན་ཀྱང་ཆོས་ཁྲིམས་མི་ཤེས་པའི་མི་ཚོགས་འདི་དཀོན་མཆོག་དང་བྲལ་བའོ་”ཞེས་བཤད།
JOH 7:50 ཕཱ་རུ་ཤི་ཕྱོགས་ཁག་ནང་ནས་ནཱི་ཀོ་དེམ་བྱ་བའི་མི་ཞིག་སྔར་ཡེ་ཤུ་མཇལ་དུ་ཕྱིན་པ་དེས་ཁོ་ཚོར་
JOH 7:51 “ང་ཚོས་ཁྲིམས་གཞུང་ལྟར་མིས་ཅི་ཞིག་བྱས་པ་མ་གོ་བར་དང་མ་ཤེས་གོང་མི་ལ་ཁྲིམས་གཏོང་ཆོག་གམ་”ཞེས་དྲིས་པ་དང༌།
JOH 7:52 ཁོ་ཚོས་“ཁྱོད་ཀྱང་ག་ལིལ་པ་ཡིན་ནམ། གསུང་རབ་ལ་འཚོལ་ཞིབ་བྱོས་ཤིག ག་ལིལ་ཡུལ་ནས་ལུང་སྟོན་པ་སུ་ཡང་མི་འབྱུང་”ཞེས་ལན་བཏབ་བོ། །
JOH 7:53 མི་རེ་རེ་བཞིན་ཁྱིམ་དུ་ཕྱིན།
JOH 8:1 དེ་ནས་ཡེ་ཤུ་སྐྱུར་རུ་ཤིང་གི་རི་ལ་ཕེབས།
JOH 8:2 ཐོ་རེངས་སྐབས་སུ་ཁོང་ཡང་བསྐྱར་མཆོད་ཁང་ཆེན་མོའི་རྩར་ཕེབས་པ་དང༌། མི་ཐམས་ཅད་ཁོང་གི་དྲུང་དུ་འཛོམས་ནས་ཁོང་བཞུགས་ཏེ་ཁོ་ཚོར་ཆོས་གསུངས།
JOH 8:3 ཡ་ཧུ་དཱ་པའི་ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པས་ལོག་གཡེམ་བྱེད་བཞིན་པའི་བུད་མེད་ཅིག་བཟུང་སྟེ་ཡེ་ཤུའི་དྲུང་དུ་ཁྲིད་ཡོང་ནས། མི་ཚོགས་ཀྱི་མདུན་ལ་ཁོ་མོ་ལང་དུ་བཅུག་ནས་ཁོང་ལ་
JOH 8:4 “སྟོན་པ་ལགས། བུད་མེད་འདིས་ལོག་གཡེམ་བྱེད་བཞིན་པའི་སྐབས་བཟུང་བ་ཡིན།
JOH 8:5 ད་ཆོས་ཁྲིམས་ལྟར་མོ་ཤེ་ཡིས་བུད་མེད་འདི་འདྲ་བ་རྣམས་རྡོ་རུབ་གཏོང་བའི་སྒོ་ནས་གསོད་དགོས་པའི་བཀའ་གནང་བས། ཁྱེད་ཀྱིས་ཅི་ལྟར་གསུང་”ཞེས་ཞུས།
JOH 8:6 ཁོང་ལ་སྐྱོན་གདོགས་པ་དང་བསྙོན་འཛུགས་པའི་ཆེད་དུ་དེ་ལྟར་ཞུས། འོན་ཀྱང་ཡེ་ཤུས་སྐུ་གཟུགས་སྒུར་ནས་ཕྱག་མཛུབ་ཀྱིས་ས་ལ་བྲིས།
JOH 8:7 ཁོ་ཚོས་ཁོང་ལ་ཡང་ཡང་བཀའ་འདྲི་ཞུས་པ་དང༌། ཁོང་ཡར་བཞེངས་ཏེ་ཁོ་ཚོར་“ཁྱོད་ཚོའི་ནང་ནས་སྡིག་ཅན་མ་ཡིན་པ་ཞིག་གིས་ཁོ་མོ་ལ་རྡོ་དང་པོ་གཞུ་བར་ཆོག་”ཅེས་གསུངས།
JOH 8:8 དེ་ནས་ཡེ་ཤུས་ཡང་བསྐྱར་སྐུ་གཟུགས་སྒུར་ནས་ས་ལ་བྲིས།
JOH 8:9 ཁོང་གིས་གང་གསུངས་པ་ཐོས་ནས་ཁོ་ཚོ་རྒན་ཤོས་ནས་གཞོན་པའི་བར་དུ་རིམ་བཞིན་ཕྱི་རུ་སོང་ཞིང༌། ཡེ་ཤུའི་དྲུང་དུ་བུད་མེད་དེ་གཅིག་པོ་ལངས་ཏེ་ལུས།
JOH 8:10 ཡེ་ཤུས་ཡར་བཞེངས་ནས་ཁོ་མོར་“བུ་མོ། ཁོ་ཚོ་གང་དུ་ཡོད། སུས་ཀྱང་ཁྱོད་ལ་ཁྲིམས་མ་བཅད་དམ་”ཞེས་གསུངས།
JOH 8:11 ཁོ་མོས་“སྐུ་ཞབས་ལགས། སུས་ཀྱང་ང་ལ་ཁྲིམས་མ་བཅད་”ཅེས་བཤད་པ་དང་ཡེ་ཤུས་“འོ་ན་ངའང་ཁྱོད་ལ་ཁྲིམས་མི་གཅོད། སོང་ལ་ད་ཕྱིན་ཆད་སྡིག་ཉེས་མ་བྱོས་ཤིག་”ཅེས་གསུངས།
JOH 8:12 དེ་ནས་ཡེ་ཤུས་ཡང་བསྐྱར་ཁོ་ཚོར་“ང་ནི་འཇིག་རྟེན་གྱི་འོད་ཡིན། སུ་ངའི་རྗེས་སུ་འབྲངས་ཀྱང་དེ་མུན་པའི་ནང་ལ་མི་འགྲུལ་བར་ཚེ་ཡི་འོད་དང་ལྡན་པར་འགྱུར་རོ་”ཞེས་གསུངས།
JOH 8:13 ཕཱ་རུ་ཤི་པས་ཁོང་ལ་“ཁྱོད་ཀྱིས་རང་ལ་དཔང་པོ་བྱེད་པས། ཁྱོད་ཀྱི་དཔང་པོ་དེ་མི་བདེན་”ཞེས་ཟེར།
JOH 8:14 ཡེ་ཤུས་“ངས་རང་ལ་དཔང་པོ་བྱས་ཀྱང་ངའི་དཔང་པོ་བདེན་པ་ཡིན། གང་ལགས་ཟེར་ན། ང་རང་གང་ནས་བྱུང་བ་དང་གང་དུ་འགྲོ་བ་ཤེས་ཀྱི་ཡོད། འོན་ཀྱང་ཁྱོད་ཚོས་ང་གང་ནས་བྱུང་བ་དང་གང་དུ་འགྲོ་བ་མི་ཤེས།
JOH 8:15 ཁྱོད་རྣམས་ཀྱིས་ངོ་ལ་བལྟས་ཏེ་ཁྲིམས་གཅོད་བྱེད། ངས་སུ་ལ་ཡང་ཁྲིམས་གཅོད་མི་བྱེད།
JOH 8:16 གལ་སྲིད་ངས་ཁྲིམས་གཅོད་བྱས་པ་ཡིན་ན། དེ་ནི་བདེན་པ་ཡིན། གང་ཡིན་ཟེར་ན། ང་གཅིག་པོ་མ་ཡིན་ཏེ། ང་མངགས་མཁན་ཡབ་ང་དང་མཉམ་དུ་ཡོད་པས་སོ།
JOH 8:17 ཁྱོད་ཚོའི་བཀའ་ཁྲིམས་ལྟར་མི་གཉིས་ཀྱིས་དཔང་པོ་བྱེད་པ་ནི་བདེན་ནོ་ཞེས་བྲིས་འདུག
JOH 8:18 ངས་ང་རང་ལ་དཔང་པོ་བྱེད། ང་མངགས་མཁན་ཡབ་ཀྱིས་ཀྱང་ང་ལ་དཔང་པོ་མཛད་”ཅེས་གསུངས་པ་དང༌།
JOH 8:19 ཁོ་ཚོས་ཁོང་ལ་“ཁྱོད་ཀྱི་ཡབ་གང་དུ་ཡོད་”ཅེས་ཞུས། ཡེ་ཤུས་“ཁྱོད་རྣམས་ཀྱིས་ང་ཡང་ངོ་མི་ཤེས། ངའི་ཡབ་ཀྱང་ངོ་མི་ཤེས། ཁྱོད་རྣམས་ཀྱིས་ང་ངོ་ཤེས་ན། ངའི་ཡབ་ཀྱང་ངོ་ཤེས་”ཞེས་གསུངས།
JOH 8:20 གསུང་དེ་ནི་ཡེ་ཤུས་མཆོད་ཁང་ཆེན་མོའི་དངུལ་འབུལ་ས་དང་ཉེ་བར་ཆོས་སྟོན་དུས་གསུངས་པ་ཡིན་ཀྱང༌། ཁོང་གི་དུས་ལ་ད་དུང་མ་བབ་པས་མི་སུས་ཀྱང་ཁོང་འཛིན་བཟུང་མ་བྱས།
JOH 8:21 དེ་ནས་ཁོང་གིས་ཡང་ཁོ་ཚོར་“ང་ཕར་འགྲོ་སྟེ། ཁྱོད་ཚོས་ང་བཙལ་ཡང༌། ཁྱོད་ཚོ་རང་གི་སྡིག་ཉེས་ནང་དུ་འཆི་བར་འགྱུར་རོ། ང་གང་དུ་འགྲོ་བའི་གནས་སུ་ཁྱོད་ཚོ་ཡོང་མི་སྲིད་”ཅེས་གསུངས།
JOH 8:22 དེའི་ཕྱིར་ཡ་ཧུ་དཱ་པ་ཚོས་“ང་གང་དུ་འགྲོ་བའི་གནས་སུ་ཁྱོད་ཚོ་ཡོང་མི་ཐུབ་ཅེས་ཟེར་ནི་རང་གི་སྲོག་རང་གིས་གཅོད་དམ་ཞེས་པའི་དོན་ཡིན་ནམ་”ཞེས་དྲིས་པ་དང༌།
JOH 8:23 ཡེ་ཤུས་ཁོ་ཚོར་“ཁྱོད་རྣམས་འོག་ནས་ཡིན། ང་ནི་སྟེང་ནས་ཡིན། ཁྱོད་རྣམས་འཇིག་རྟེན་འདི་ལ་གཏོགས་ཏེ། ང་ནི་འཇིག་རྟེན་འདི་ལ་མི་གཏོགས།
JOH 8:24 དེའི་ཕྱིར་ངས་ཁྱོད་ཚོར་ཁྱོད་ཚོ་རང་གི་སྡིག་ཉེས་ནང་དུ་འཆི་བར་འགྱུར་ཞེས་བཤད། གལ་སྲིད་ཁྱོད་ཚོས་ང་ཁོང་ཡིན་པར་དད་པ་མ་བྱས་ན། ཁྱོད་ཚོ་རང་གི་སྡིག་ཉེས་ནང་དུ་འཆི་བར་འགྱུར་”ཞེས་གསུངས་པ་དང༌།
JOH 8:25 ཁོ་ཚོས་“ཁྱེད་སུ་ཡིན་”ཞེས་ཞུས་པས། ཡེ་ཤུས་“ངས་ཐོག་མ་ནས་ཁྱོད་ཚོར་གང་བཤད་དམ།
JOH 8:26 ངར་ཁྱོད་ཚོའི་སྐོར་གྱི་གཏམ་དང་ཁྲིམས་གཅོད་བྱ་རྒྱུ་མང་པོ་ཡོད། འོན་ཀྱང་ང་མངགས་མཁན་དེ་བདེན་པ་ཡིན་པས། ངས་ཁོང་ནས་གང་ཐོས་པ་ཁོ་ན་དེ་ཚོ་ནི་འཇིག་རྟེན་ལ་སྒྲོག་”ཅེས་གསུངས།
JOH 8:27 ཁོང་གིས་ཡབ་དཀོན་མཆོག་གི་སྐོར་གསུངས་པ་ཁོ་ཚོས་ཧ་མ་གོ་བས།
JOH 8:28 ཡེ་ཤུས་“ཁྱོད་རྣམས་ཀྱིས་མིའི་རིགས་ཀྱི་བུ་འཕགས་པའི་ཚེ། ང་ནི་ཁོང་ཡིན་པར་ཤེས་ཤིང༌། ངས་ཡབ་ལ་མ་བརྟེན་པར་ཅི་ཡང་མི་བྱེད་དེ། ཡབ་ཀྱིས་ང་ལ་གསུངས་གནང་བ་ཁོ་ནར་ངས་དེ་སྨྲའོ།
JOH 8:29 ཡང་ང་མངགས་མཁན་དེ་ང་དང་མཉམ་དུ་ཡོད། ངས་རྟག་ཏུ་ཡབ་ཀྱི་ཐུགས་མཉེས་པར་བྱེད་པས། ཁོང་གིས་ང་གཅིག་པུར་མ་ལུས་པར་མཛད་”ཅེས་གསུངས།
JOH 8:30 ཁོང་གིས་དེ་ལྟར་གསུངས་དུས་མི་མང་པོས་ཁོང་ལ་དད་པ་བྱས་སོ། །
JOH 8:31 དེ་ནས་ཡེ་ཤུས་ཁོང་ལ་དད་པ་ཡོད་པའི་ཡ་ཧུ་དཱ་པ་ཚོར་“གལ་སྲིད་ཁྱེད་རྣམས་ཀྱིས་ངའི་བཀའ་ལ་མུ་མཐུད་ནས་ཉན་ན། ཁྱེད་ཚོ་ངའི་སློབ་མ་དངོས་གནས་ཡིན་ཏེ།
JOH 8:32 བདེན་པ་ཉིད་ཅི་ཡིན་ཤེས་པའི་སྒོ་ནས་ཁྱེད་ཚོ་སྒྲོལ་བར་འགྱུར་”ཞེས་གསུངས།
JOH 8:33 ལན་དུ་ཁོ་ཚོས་“ང་ཚོ་མེས་པོ་ཨབ་ར་ཧམ་གྱི་བུ་རྒྱུད་ཡིན་ཞིང་མི་གཞན་གྱི་བྲན་གཡོག་གཏན་ནས་བྱེད་མ་མྱོང་བས། ཁྱེད་ཀྱིས་ཁྱེད་ཚོ་སྒྲོལ་བར་འགྱུར་ཞེས་གསུངས་པའི་དོན་ཅི་ཡིན་”ཞེས་ཞུས།
JOH 8:34 ཡེ་ཤུས་“ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། སུས་ཀྱང་སྡིག་ཉེས་བྱེད་པ་དེ་སྡིག་པའི་བྲན་གཡོག་ཡིན།
JOH 8:35 བྲན་གཡོག་དེ་བདག་པོའི་ཁྱིམ་ལ་རྟག་ཏུ་མི་གནས། འོན་ཀྱང་སྲས་ནི་རྟག་ཏུ་གནས།
JOH 8:36 དེའི་ཕྱིར་སྲས་ཀྱིས་ཁྱེད་ཚོ་བསྒྲལ་ན་ཁྱེད་ཚོ་དངོས་སུ་གྲོལ་བར་འགྱུར་རོ།
JOH 8:37 ངས་ཁྱོད་ཚོ་ཨབ་ར་ཧམ་གྱི་བུ་རྒྱུད་ཡིན་པར་ཤེས་ཀྱང༌། ངའི་བཀའ་ཁྱོད་ཚོའི་སེམས་ཀྱི་ནང་ལ་གནས་ས་མེད་པས་ཁྱོད་ཚོས་ང་གསོད་པའི་གོ་སྐབས་འཚོལ།
JOH 8:38 ངས་ང་རང་གི་ཡབ་ཀྱི་དྲུང་ནས་གང་མཐོང་ཡོད་པ་དེའི་སྐོར་ཤོད་པར་བྱེད། འོན་ཀྱང་ཁྱོད་ཚོས་རང་གི་ཕ་ནས་གང་ཐོས་པ་བཞིན་དུ་བྱེད་”ཅེས་གསུངས།
JOH 8:39 ཁོ་ཚོས་“ང་ཚོའི་ཕ་ནི་མེས་པོ་ཨབ་ར་ཧམ་ཡིན་”ཞེས་བཤད་པ་དང་ཡེ་ཤུས་“ཁྱོད་ཚོ་ཨབ་ར་ཧམ་གྱི་བུ་རྒྱུད་ཡིན་ན། ཁྱོད་ཚོས་ཁོང་གི་སྤྱོད་ལམ་བཞིན་དུ་བྱེད་པར་འགྱུར།
JOH 8:40 ད་ངས་དཀོན་མཆོག་ནས་ཐོས་པའི་བདེན་པ་དེ་ཁྱོད་ཚོ་ལ་བཤད་ཡོད་པས་ཁྱོད་ཚོས་ང་གསོད་རྒྱུ་འབད། ཨབ་ར་ཧམ་གྱིས་དེ་ལྟར་མ་བྱས།
JOH 8:41 ཁྱོད་ཚོས་རང་གི་ཕའི་ལས་བཞིན་དུ་བྱེད་”ཅེས་གསུངས། ཁོ་ཚོས་ཁོང་ལ་“ང་ཚོ་ནི་བྱི་ཕྲུག་མ་ཡིན། དཀོན་མཆོག་ཉིད་ང་ཚོའི་ཡབ་གཅིག་པོ་ཡིན་”ཞེས་བཤད་པ་དང༌།
JOH 8:42 ཡེ་ཤུས་ཁོ་ཚོར་“གལ་ཏེ་དཀོན་མཆོག་ཁྱོད་ཚོའི་ཡབ་ཡིན་ན། ཁྱོད་ཚོས་ང་ལ་གཅེས་པར་འགྱུར། གང་ལགས་ཟེར་ན། ང་དཀོན་མཆོག་ནས་ཡོང་སྟེ་ད་ལྟ་འདིར་ཡོད། ང་ནི་རང་ལ་བརྟེན་ནས་མ་ཡོང་སྟེ། དཀོན་མཆོག་གིས་ང་མངགས་པ་ཡིན་པའི་ཕྱིར་རོ།
JOH 8:43 ཁྱོད་ཚོས་ཅིའི་ཕྱིར་ངའི་གཏམ་ཧ་མི་གོ དེ་ནི་ངའི་བཀའ་དེ་ཁས་མི་ལེན་པའི་ཕྱིར་རོ།
JOH 8:44 ཁྱོད་ཚོའི་ཕ་བདུད་ཡིན་པས། ཁྱོད་རང་གི་ཕའི་འདོད་པ་བཞིན་དུ་བྱེད་པར་དགའ། བདུད་ནི་ཐོག་མ་ནས་སྲོག་གཅོད་མཁན་ཡིན་ཏེ། བདེན་པ་ཉིད་དང་འབྲལ་བས་ཁོའི་ནང་བདེན་པ་ཅི་ཡང་མེད། ཁོས་རྫུན་ཤོད་པའི་སྐབས་སུ་ཁོའི་རང་བཞིན་ལྟར་རྗོད། ཅི་ལགས་ཟེར་ན། ཁོ་རྫུན་གཏམ་ཤོད་མཁན་ཡིན་ཏེ། རྫུན་གྱི་ཕ་ཡང་ཡིན་ནོ།
JOH 8:45 འོན་ཀྱང་ངས་བདེན་གཏམ་ཤོད་ཀྱི་ཡོད་པས། ཁྱོད་ཚོ་ང་ལ་ཡིད་མི་ཆེས།
JOH 8:46 ཁྱོད་ཚོའི་ནང་ནས་སུས་ང་སྡིག་ཅན་ཡིན་པར་ར་སྤྲོད་བྱེད་ཐུབ། ངས་ཁྱོད་ཚོར་བདེན་པ་བཤད་ན་ཁྱོད་ཅིའི་ཕྱིར་ང་ལ་ཡིད་མི་ཆེས།
JOH 8:47 དཀོན་མཆོག་ལ་གཏོགས་པའི་མི་ཚོས་ཁོང་གི་བཀའ་ལ་ཉན། ཁྱོད་ཚོ་དཀོན་མཆོག་ལ་མི་གཏོགས་པས་ཁོང་གི་བཀའ་ལ་མི་ཉན་”ཞེས་གསུངས།
JOH 8:48 ལན་དུ་ཡ་ཧུ་དཱ་པས་ཁོང་ལ་“ང་ཚོས་ཁྱོད་ནི་ས་མར་ཡཱ་པ་ཡིན་ཏེ་འདྲེ་ཡིས་ཟིན་པ་ཡིན་བཤད་པ་དེ་མི་བདེན་ནམ་”ཞེས་བཤད།
JOH 8:49 ཡེ་ཤུས་“ང་ནི་འདྲེ་ཡིས་མ་ཟིན། ངས་ཡབ་ལ་བཀུར་སྟི་བྱེད། འོན་ཀྱང་ཁྱོད་ཚོས་ང་ལ་སྨོད་བཞིན་འདུག
JOH 8:50 ངས་རང་གི་བཀུར་སྟི་མི་འཚོལ། འོན་ཀྱང་དེ་འཚོལ་མཁན་ཞིག་ཡོད་ཅིང་ཁོང་ནི་ཁྲིམས་དཔོན་ཡིན།
JOH 8:51 ངས་ཁྱོད་ཚོ་ལ་བདེན་པ་བདེན་པར་ཟེར་རྒྱུར། མི་ཞིག་གིས་ངའི་བཀའ་སྲུང་མཁན་འཆི་བ་ནམ་ཡང་མི་མྱོང་”ཞེས་གསུངས།
JOH 8:52 ཡ་ཧུ་དཱ་པས་ཁོང་ལ་“ད་ཁྱོད་འདྲེ་ཡིས་ཟིན་ཡོད་པ་ང་ཚོས་ངེས་པར་དུ་ཤེས། མེས་པོ་ཨབ་ར་ཧམ་དང་ལུང་སྟོན་པ་ཚོ་འདས་ཟིན་མོད། འོན་ཀྱང་ཁྱོད་ཀྱིས་ངའི་བཀའ་སྲུང་མཁན་འཆི་བ་ནམ་ཡང་མི་མྱོང་ཞེས་བཤད།
JOH 8:53 ཁྱོད་ནི་ང་ཚོའི་མེས་པོ་ཨབ་ར་ཧམ་གྲོངས་པ་དེ་ལས་ཆེ་བ་ཡིན་ནམ། ལུང་སྟོན་པ་ཚོ་ཡང་གྲོངས། ཁྱོད་ཀྱིས་རང་སུ་ཡིན་པར་སེམས་”ཞེས་བཤད་པ་དང༌།
JOH 8:54 ཡེ་ཤུས་“ངས་ང་རང་ལ་བཀུར་སྟི་བྱས་ན་བཀུར་སྟི་དེ་ནི་དོན་མེད་དོ། ངའི་ཡབ་ཀྱིས་ང་ལ་བཀུར་སྟི་མཛད། ཁྱོད་ཚོས་དེ་ནི་ང་ཚོའི་དཀོན་མཆོག་ཡིན་ཞེས་ཟེར་ཡང༌།
JOH 8:55 ཁྱོད་ཚོས་ཁོང་ངོ་མི་ཤེས། ངས་ཁོང་ངོ་ཤེས་སོ། གལ་སྲིད་ངས་དཀོན་མཆོག་ངོ་མི་ཤེས་ཞེས་བཤད་ན་ཁྱོད་དང་འདྲ་བར་རྫུན་ཤོད་མཁན་ཡིན། འོན་ཀྱང་ངས་ཁོང་ངོ་ཤེས་ཏེ་ཁོང་གི་བཀའ་སྲུང༌།
JOH 8:56 ཁྱོད་ཚོའི་ཕ་མེས་ཨབ་ར་ཧམ་གྱིས་ངའི་འཇིག་རྟེན་དུ་ཡོང་བའི་དུས་སྐབས་མཐོང་བས་དགའ་མགུ་ཡི་རངས་ཏེ། དེ་མཐོང་ནས་དགའ་བར་གྱུར་”ཞེས་གསུངས།
JOH 8:57 ཡ་ཧུ་དཱ་པས་ཁོང་ལ་“ཁྱོད་ནི་ལོ་ལྔ་བཅུ་མ་ལོན་ཀྱང་ཨབ་ར་ཧམ་མཐོང་མྱོང་ངམ་”ཞེས་ཞུས།
JOH 8:58 ཡེ་ཤུས་“ངས་ཁྱོད་ཚོ་ལ་བདེན་པ་བདེན་པར་ཟེར་རྒྱུར། ཨབ་ར་ཧམ་མ་སྐྱེས་པའི་སྔོན་ལ་ངའོ་”ཞེས་གསུངས་པས།
JOH 8:59 ཁོ་ཚོས་ཁོང་ལ་རྡོ་རུབ་གཏོང་བའི་ཕྱིར་རྡོ་བསྒྲུགས། འོན་ཀྱང་ཡེ་ཤུ་གསང་བའི་ངང་མཆོད་ཁང་ཆེན་མོ་ནས་ཕར་ཕེབས་སོ། །
JOH 9:1 ཡེ་ཤུ་ལམ་ལ་ཕེབས་སྐབས་སྐྱེས་དུས་ནས་ལོང་བ་ཡིན་པའི་མི་ཞིག་གཟིགས་པ་དང༌།
JOH 9:2 ཁོང་གི་ཉེ་གནས་རྣམས་ཀྱིས་ཁོང་ལ་“རབ་བི། མི་དེ་ལོང་བར་སྐྱེས་པའི་རྒྱུ་རྐྱེན་ཅི་ཡིན། ཁོ་རང་ངམ་ཁོའི་ཕ་མ་སུས་སྡིག་ཉེས་བསགས་སམ་”ཞེས་ཞུས་པ་དང༌།
JOH 9:3 ཡེ་ཤུས་“མི་འདིས་སྡིག་ཉེས་བསགས་པས་མ་ཡིན་ལ། ཕ་མས་བསགས་པས་ཀྱང་མ་ཡིན། དཀོན་མཆོག་གི་མཛད་པ་ཁོའི་ཚེ་ལ་མངོན་པར་འགྱུར་བའི་ཕྱིར་ཁོ་ནི་ལོང་བར་སྐྱེས་སོ།
JOH 9:4 ང་ཚོས་ང་མངགས་མཁན་གྱི་མཛད་པ་དེ་ཉིན་མོའི་དུས་སུ་བྱེད་དགོས། མཚན་མོ་ཤར་བའི་དུས་སུ་མི་སུས་ཀྱང་ལས་ཀ་བྱེད་མི་ཐུབ།
JOH 9:5 ང་འཇིག་རྟེན་དུ་ཡོད་པའི་དུས་སུ་ང་ནི་འཇིག་རྟེན་གྱི་འོད་ཡིན་ནོ་”ཞེས་གསུངས་པའི་རྗེས་སུ།
JOH 9:6 ཡེ་ཤུས་ས་ལ་ལྗགས་ཆབ་དོར་ནས་འདམ་བག་ཅིག་མཛད་དེ་འདམ་བག་དེ་ལོང་བ་དེའི་མིག་ཟུང་ལ་བསྐུས་ནས་དེ་ལ་
JOH 9:7 “སི་ལོམ་རྫིང་བུ་ལ་སོང་ནས་ངོ་ཁྲུས་དང་”ཞེས་གསུངས། (སི་ལོམ་ཞེས་པ་མངགས་པའི་དོན་ཡིན་) དེའི་ཕྱིར་ཁོ་སོང་ནས་བཀྲུས་པས་མིག་གིས་མཐོང་བར་གྱུར་ཏེ་ཚུར་ཡོང༌།
JOH 9:8 དེར་ཁྱིམ་མཚེས་དང་སྔར་ཁོ་སློང་མཁན་ཡིན་པར་མཐོང་ཡོད་པ་ཚོས་“འདི་ནི་བསྡད་ནས་སློང་མཁན་དེ་མ་ཡིན་ནམ་”ཞེས་དྲིས།
JOH 9:9 ལ་ལས་“ཁོ་རང་ཡིན་”ཞེས་ཟེར་བ་དང༌། ལ་ལས་“ཁོ་མ་ཡིན། ཁོ་དང་འདྲ་བ་ཞིག་ཡིན་”ཞེས་བཤད། ཁོ་རང་ཉིད་ཀྱིས་“ང་དེ་ཡིན་”ཞེས་བཤད།
JOH 9:10 མི་དེ་ཚོས་“འོ་ན་ཁྱེད་ཀྱི་མིག་དབང་ཇི་ལྟར་གསོས་སམ་”ཞེས་དྲིས་པ་ལ།
JOH 9:11 མི་དེས་“མི་ཡེ་ཤུ་ཟེར་མཁན་གྱིས་འདམ་བག་མཛད་ནས་ངའི་མིག་ཟུང་ལ་བསྐུས་ཏེ། སི་ལོམ་རྫིང་བུར་སོང་ནས་ཁྲུས་དང་ཞེས་གསུངས་པ་དང༌། ང་སོང་ནས་བཀྲུས་པས་ངའི་མིག་གིས་མཐོང་བྱུང་”ཞེས་བཤད།
JOH 9:12 ཁོ་ཚོས་“མི་དེ་གང་དུ་ཡོད་”ཅེས་དྲིས་པས་ཁོས་“ངས་མི་ཤེས་”ཞེས་ལན་བཏབ།
JOH 9:13 ཁོ་ཚོས་སྔར་ལོང་བ་ཡིན་པ་དེ་ཕཱ་རུ་ཤི་པ་ཚོའི་མདུན་དུ་ཁྲིད།
JOH 9:14 ཡེ་ཤུས་འདམ་བག་མཛད་ཅིང་མི་དེའི་མིག་ཟུང་གསོས་པར་མཛད་པའི་ཉིན་ནི་ངལ་གསོ་བའི་ཉིན་མོ་ཡིན།
JOH 9:15 ཕཱ་རུ་ཤི་པ་ཚོས་ཀྱང་ཡེ་ཤུས་མིག་ཇི་ལྟར་གསོས་པར་མཛད་པའི་སྐོར་ཁོ་ལ་དྲིས་པ་དང་ལན་དུ་ཁོས་“ཁོང་གིས་ངའི་མིག་ཟུང་ལ་འདམ་བག་བསྐུས་ཏེ་ངས་བཀྲུས་ནས་མིག་གིས་མཐོང་ཐུབ་”ཅེས་ཟེར།
JOH 9:16 ཕཱ་རུ་ཤི་པ་ཚོའི་ནང་ནས་ཁ་ཅིག་གིས་“མི་དེས་ངལ་གསོ་བའི་ཉིན་མོའི་བཀའ་ཁྲིམས་མི་སྲུང་བས། དཀོན་མཆོག་ནས་བྱུང་བ་མི་སྲིད་”ཅེས་བཤད། འོན་ཀྱང་ཁ་ཅིག་གིས་“མི་སྡིག་ཅན་ཅིག་གིས་དེ་ལྟ་བུའི་རྟགས་སྟོན་པ་ཅི་ལ་སྲིད་”ཅེས་བཤད་པས་དེ་ཚོར་ལྟ་བ་མི་མཐུན་པ་བྱུང༌།
JOH 9:17 དེ་ནས་ཡང་ཕཱ་རུ་ཤི་པ་ཚོས་སྔོན་མ་ལོང་བ་ཡིན་པ་དེར་“མི་དེས་ཁྱོད་རང་གི་མིག་གསོས་པར་མཛད་པས་ཁྱོད་ཀྱིས་ཅི་ལྟར་སེམས་”ཞེས་དྲིས་པ་དང་མི་དེས་“ཁོང་ལུང་སྟོན་པ་ཞིག་ཡིན་”ཞེས་བཤད།
JOH 9:18 ཡ་ཧུ་དཱ་པ་ཚོས་མི་དེ་སྔར་ལོང་བ་ཡིན་ཏེ་ད་མཐོང་བ་ལ་ཡིད་མ་ཆེས་པས་དེའི་ཕ་མ་བོས་ནས།
JOH 9:19 དེ་གཉིས་ལ་“འདི་ནི་ཁྱོད་ཚོའི་ཟེར་བའི་སྐྱེས་དུས་ནས་བུ་ལོང་བ་དེ་ཡིན་ནམ། ད་ཅི་ལྟར་མཐོང་བར་གྱུར་རམ་”ཞེས་དྲིས་པ་ལ།
JOH 9:20 ཕ་མ་གཉིས་ཀྱིས་“འདི་ནི་ང་ཚོའི་བུ་ཡིན་ཞིང་སྐྱེས་པའི་དུས་ནས་ལོང་བ་ཡིན་པར་ང་ཚོས་ཤེས།
JOH 9:21 འོན་ཀྱང་ད་ལྟ་ཅི་ལྟར་མཐོང༌། ཡང་ན་མིག་སུས་གསོས་པར་མཛད་པ་མི་ཤེས། ཁོ་ན་ཚོད་ལོན་པས་ཁོ་རང་ལ་དྲིས་དང༌། ཁོ་རང་གིས་གཏམ་བཤད་ཡོང་”ཞེས་ཟེར།
JOH 9:22 ཁོའི་ཕ་མས་ཡ་ཧུ་དཱ་པའི་དཔོན་རིགས་ལ་འཇིགས་པའི་རྐྱེན་གྱིས་དེ་ལྟར་བཤད། ཅི་ལགས་ཟེར་ན། སུས་ཀྱང་ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་བཤད་པ་དེ་ཡ་ཧུ་དཱ་པའི་འདུ་ཁང་ནས་འབུད་རྒྱུ་ཡིན་པ་ཁོ་ཚོས་སྔོན་ནས་ཐག་བཅད་པ་ཡིན།
JOH 9:23 དེའི་ཕྱིར་ཁོའི་ཕ་མས་ཁོ་ན་ཚོད་ལོན་པས་ཁོ་རང་ལ་དྲིས་དང་ཞེས་བཤད།
JOH 9:24 དེའི་ཕྱིར་ཕཱ་རུ་ཤི་པ་ཚོས་མི་སྔར་ལོང་བ་ཡིན་པ་དེ་ཡང་བསྐྱར་བོས་ནས་ཁོ་ལ་“ཁྱོད་ཀྱིས་དཀོན་མཆོག་གི་མདུན་དུ་བདེན་པ་ཤོད་ཅིག ང་ཚོས་མི་དེ་ནི་སྡིག་ཅན་ཞིག་ཡིན་པར་ཤེས་”ཞེས་ཟེར།
JOH 9:25 ཁོས་“ཁོང་སྡིག་ཅན་ཡིན་མིན་ངས་མི་ཤེས། ང་ནི་སྔར་ལོང་བ་ཡིན་ཡང་ད་ལྟ་མིག་གིས་མཐོང་བ་འདི་ངས་ཤེས་”ཞེས་བཤད།
JOH 9:26 དེར་ཕཱ་རུ་ཤི་པ་ཚོས་ཡང་བསྐྱར་ཁོ་ལ་“ཁོས་ཁྱོད་ལ་གང་བྱས། ཁྱོད་ཀྱི་མིག་ཅི་ལྟར་གསོས་པར་བྱས་”ཞེས་དྲིས།
JOH 9:27 མི་དེས་“ངས་སྔར་བཤད་ཀྱང་ཁྱེད་ཚོས་མ་ཉན། ཅིའི་ཕྱིར་ཡང་བསྐྱར་ཐོས་པར་དགའ། ཁྱེད་རང་ཚོའང་ཁོང་གི་ཉེ་གནས་སུ་འགྱུར་བར་འདོད་དམ་”ཞེས་བཤད།
JOH 9:28 ཁོ་ཚོ་ཁྲོས་ནས་ཁ་ངན་བཤད་དེ་“ཁྱོད་ནི་མི་དེའི་ཉེ་གནས་ཡིན། འོན་ཀྱང་ང་ཚོ་ནི་ལུང་སྟོན་པ་མོ་ཤེའི་ཉེ་གནས་ཡིན།
JOH 9:29 དཀོན་མཆོག་གིས་མོ་ཤེ་ལ་གསུང་གནང་ཡོད་པ་དེ་ནི་ང་ཚོས་ཤེས། འོན་ཀྱང་མི་འདི་གང་ནས་བྱུང་བ་མི་ཤེས་”ཞེས་བཤད།
JOH 9:30 ཡང་མི་དེས་“ཁྱད་མཚར། ཁྱེད་ཚོས་ཁོང་གང་ནས་བྱུང་མི་ཤེས་ཀྱང༌། ཁོང་གིས་ངའི་མིག་གསོས་པར་མཛད།
JOH 9:31 དཀོན་མཆོག་གིས་མི་སྡིག་ཅན་ལ་མི་གསན། འོན་ཀྱང་དཀོན་མཆོག་ལ་བསྙེན་བཀུར་བྱེད་ཅིང་ཁོང་གི་དགོངས་པ་བཞིན་དུ་བྱེད་མཁན་དེའི་སྨོན་ལམ་ལ་གསན་པར་ང་ཚོས་ཤེས།
JOH 9:32 འཇིག་རྟེན་གྱི་ཐོག་མ་ནས་བཟུང་སུ་ཞིག་གིས་སྐྱེས་དུས་ནས་ལོང་བ་ཞིག་གསོས་པར་མཛད་པའི་ལོ་རྒྱུས་གཏན་ནས་ཐོས་མ་མྱོང༌།
JOH 9:33 མི་འདི་དཀོན་མཆོག་ནས་མ་བྱུང་ན། ཅི་ཡང་མཛད་པར་མི་སྲིད་”ཅེས་བཤད།
JOH 9:34 ལན་དུ་ཁོ་ཚོས་“ཁྱོད་སྐྱེས་དུས་ནས་སྡིག་ཅན་རང་ཡིན་ཡང༌། ང་ཚོར་བསླབ་བྱ་བྱེད་ཀྱི་ཡོད་དམ་”ཞེས་ཟེར་ནས་ཁོ་ཕྱི་རོལ་ཏུ་བསྐྲད།
JOH 9:35 ཡེ་ཤུས་མི་དེ་ཚོས་ཁོ་བསྐྲད་པའི་སྐོར་གསན་ནས། ཁོ་བཙལ་ནས་རྙེད་དེ་ཁོ་ལ་“ཁྱེད་མིའི་རིགས་ཀྱི་བུ་ལ་དད་པ་ཡོད་དམ་”ཞེས་གསུངས།
JOH 9:36 མི་དེས་“སྐུ་ཞབས་ལགས། ངས་ཁོང་ལ་དད་པ་བྱེད་པའི་ཕྱིར་ཁོང་སུ་ཡིན་པ་ང་ལ་གསུང་དང་”ཞེས་ཞུས།
JOH 9:37 ཡེ་ཤུས་མི་དེར་“ཁྱེད་ཀྱིས་ཁོང་མཐོང་མྱོང་ཞིང༌། ཁྱེད་ལ་གཏམ་བྱེད་མཁན་འདི་ཉིད་ཡིན་ནོ་”ཞེས་གསུངས་པ་དང༌།
JOH 9:38 མི་དེས་“གཙོ་བོ་ལགས། ང་དད་དོ་”ཞེས་ཞུས་ནས་ཁོང་ལ་བསྙེན་བཀུར་བྱས།
JOH 9:39 ཡེ་ཤུས་“ང་ནི་ཁྲིམས་གཅོད་བྱེད་པའི་ཆེད་དུ་འཇིག་རྟེན་འདི་རུ་ཡོང་སྟེ། ལོང་བ་ཚོས་མཐོང་བར་བྱེད་ཅིང༌། མཐོང་བ་ཚོ་ལོང་བར་འགྱུར་བའི་ཕྱིར་རོ་”ཞེས་གསུངས།
JOH 9:40 ཡེ་ཤུ་དང་མཉམ་དུ་ཡོད་པའི་ཕཱ་རུ་ཤི་པ་འགའ་ཞིག་གིས་གསུང་དེ་ཐོས་ནས་ཁོང་ལ་“ང་ཚོ་ཡང་ལོང་བ་ཡིན་ནམ་”ཞེས་ཞུས།
JOH 9:41 ལན་དུ་ཡེ་ཤུས་“གལ་ཏེ་ཁྱོད་ཚོ་ལོང་བ་ཡིན་ན་སྡིག་ཉེས་ཀྱང་མེད། འོན་ཀྱང་ཁྱོད་ཀྱིས་ང་ཚོས་མཐོང་ཞེས་ཟེར་བས། ཁྱོད་ཚོའི་སྡིག་ཉེས་ནི་ལུས་སོ་”ཞེས་གསུངས་སོ། །
JOH 10:1 ཡེ་ཤུས་“ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། སུ་ཡང་ལུག་རའི་སྒོ་ནས་ལུག་རའི་ནང་དུ་མ་འཛུལ་བར། ཕྱོགས་གཞན་ནས་འཛེག་པ་དེ་ནི་རྐུན་མ་དང་ཇག་པ་ཡིན།
JOH 10:2 འོན་ཀྱང་སྒོ་ནས་ལུག་རའི་ནང་དུ་འཛུལ་བ་དེ་ནི་ལུག་རྫི་ཡིན།
JOH 10:3 སྒོ་སྲུང་མཁན་གྱིས་ལུག་རྫི་ལ་སྒོ་ཕྱེ། ལུག་ཚོས་ལུག་རྫིའི་སྐད་ལ་ཉན། ལུག་རྫིས་རང་གི་ལུག་ཚོའི་མིང་ནས་འབོད་དེ་ཕྱི་རོལ་ཏུ་འཁྲིད།
JOH 10:4 དེ་ནས་རང་གི་ལུག་ཚང་མ་བཏོན་ཚར་རྗེས། དེ་ཚོའི་མདུན་དུ་འགྲོ་བ་དང༌། ལུག་ཚོས་ཁོའི་སྐད་ངོ་ཤེས་པས་ཁོའི་རྗེས་སུ་འབྲང༌།
JOH 10:5 འོན་ཀྱང་མི་རྒྱུས་མེད་ཀྱི་སྐད་ངོ་མི་ཤེས་པས། ལུག་ཚོས་ཁོའི་རྗེས་སུ་མི་འབྲང་སྟེ་འབྲོས་ཡོང་”ཞེས་གསུངས།
JOH 10:6 དཔེ་འདི་ཡེ་ཤུས་གསུངས་ཀྱང༌། ཕཱ་རུ་ཤི་པ་ཚོས་དེའི་དོན་ཧ་མ་གོ །
JOH 10:7 དེའི་ཕྱིར་ཡེ་ཤུས་ཁོ་ཚོར་ཡང་བསྐྱར་“ངས་ཁྱེད་ཚོར་བདེན་པ་བདེན་པར་ཟེར་རྒྱུར། ལུག་རའི་སྒོ་དེ་ནི་ང་ཡིན།
JOH 10:8 ངའི་སྔོན་དུ་ཡོང་བ་ཐམས་ཅད་རྐུན་མ་དང་ཇག་པ་ཡིན་ཏེ། ལུག་རྣམས་དེ་ཚོར་མ་ཉན།
JOH 10:9 ང་ནི་སྒོ་དེ་ཡིན། སུ་ཡང་ང་བརྒྱུད་ནས་འཛུལ་ན་ཐར་བར་འགྱུར། ཡང་ཕྱི་འགྲོ་ནང་འཛུལ་བྱེད་ཅིང་རྩྭ་ཁ་རྙེད་པར་འགྱུར།
JOH 10:10 རྐུན་མས་རྐུ་བ་དང་གསོད་པ་དང་མེད་པར་བྱེད་པ་ཁོ་ནའི་ཕྱིར་ཡོང༌། འོན་ཀྱང་ང་ནི་དེ་ཚོར་དཔག་ཏུ་མེད་པའི་ཚེ་ཕུན་སུམ་ཚོགས་པ་ཐོབ་པའི་ཕྱིར་ཡོང༌།
JOH 10:11 ང་ནི་ལུག་རྫི་བཟང་པོ་ཡིན། ལུག་རྫི་བཟང་པོས་ལུག་གི་དོན་དུ་རང་གི་སྲོག་གཏོང་ངོ༌།
JOH 10:12 གླ་པ་ནི་ལུག་རྫི་མ་ཡིན། ལུག་གི་བདག་པོ་ཡང་མ་ཡིན་པས། སྤྱང་ཀི་ཡོང་བ་མཐོང་སྐབས་ཁོས་ལུག་རྣམས་དོར་ནས་འབྲོས་པ་དང༌། སྤྱང་ཀིས་ལུག་འཁྱེར་ཞིང་ལུག་ཁྱུ་གཏོར།
JOH 10:13 ཁོ་ནི་གླ་པ་ཡིན་པས་ལུག་ཁྱུ་ལ་སེམས་ཁུར་མི་བྱེད་པར་འབྲོས།
JOH 10:14 ང་ནི་ལུག་རྫི་བཟང་པོ་ཡིན། ཇི་ལྟར་ངས་རང་གི་ལུག་རྣམས་ངོ་ཤེས་པ་དང༌། ངའི་ལུག་རྣམས་ཀྱིས་ཀྱང་ང་ངོ་ཤེས།
JOH 10:15 དེ་ལྟར་ཡབ་ཀྱིས་ང་ངོ་མཁྱེན་པ་དང༌། ངས་ཀྱང་ཡབ་ཀྱི་ཞལ་ངོ་ཤེས། ཡང་ངས་ལུག་གི་དོན་དུ་ང་རང་གི་སྲོག་བློས་གཏོང༌།
JOH 10:16 ལུག་ར་འདི་ལ་མི་གཏོགས་པའི་ལུག་གཞན་པ་ཡང་ཡོད། ངས་དེ་ཚོའང་འཁྲིད་དགོས། དེ་ཚོས་ཀྱང་ངའི་སྐད་ཉན་ཏེ་ལུག་ཁྱུ་གཅིག་ལ་རྫི་བོ་གཅིག་ཡོད་པར་འགྱུར།
JOH 10:17 ངས་རང་གི་སྲོག་བློས་གཏོང་བས་ཡབ་ཀྱིས་ང་ལ་བྱམས། ངས་རང་སྲོག་གཏོང་བའི་རྒྱུ་རྐྱེན་ནི་དེ་སླར་ལེན་པའི་ཕྱིར་རོ།
JOH 10:18 སུས་ཀྱང་ངའི་སྲོག་མི་འཕྲོག ང་ནི་རང་སྲོག་རང་གིས་གཏོང༌། ང་ལ་སྲོག་བློས་གཏོང་བའི་དབང་ཆ་ཡོད་ཅིང་སླར་གསོན་པའི་དབང་ཆ་ཡང་ཡོད། དེ་ལྟར་ངའི་ཡབ་ཀྱིས་ང་ལ་བཀའ་གནང་”ཞེས་གསུངས།
JOH 10:19 ཡེ་ཤུས་དེ་ལྟར་གསུངས་པས་ཡ་ཧུ་དཱ་པའི་ནང་ན་ཡང་བསྐྱར་ལྟ་བ་མི་མཐུན་པ་བྱུང༌།
JOH 10:20 དེ་ཚོའི་ནང་ནས་མི་མང་པོས་“མི་འདི་འདྲེ་ཞུགས་ཏེ་སྨྱོས་པས་ཁྱོད་ཚོས་ཅིའི་ཕྱིར་ཉན་”ཞེས་བཤད།
JOH 10:21 འོན་ཀྱང་གཞན་རྣམས་ཀྱིས་“གཏམ་འདི་ནི་འདྲེ་ཞུགས་པ་ཞིག་གི་གཏམ་མ་ཡིན། འདྲེ་ཡིས་མི་ལོང་བའི་མིག་གསོ་བར་བྱེད་པ་དེ་ཅི་ལ་སྲིད་”ཅེས་བཤད།
JOH 10:22 དེ་ནས་དགུན་དུས་སུ་ཡེ་རུ་ཤ་ལེམ་གྲོང་ཁྱེར་ལ་མཆོད་ཁང་ཆེན་མོའི་བསྔོ་བའི་དུས་ཆེན་གྱི་སྐབས་ལ།
JOH 10:23 ཡེ་ཤུ་མཆོད་ཁང་ཆེན་མོའི་རྩར་སོ་ལོ་མོན་གྱི་གཡབ་རིང་པོའི་ནང་ལ་ཞབས་བཅགས་བཞིན་པའི་དུས་སུ།
JOH 10:24 ཡ་ཧུ་དཱ་པ་ཡིས་ཁོང་བསྐོར་ཏེ་“ཁྱེད་ཀྱིས་ཇི་ཙམ་བར་དུ་ང་ཚོར་ཐེ་ཚོམ་སྐྱེ་རུ་འཇུག ཁྱེད་ནི་སྐྱབས་མགོན་མཱ་ཤི་ཀ་ཡིན་ན་གསལ་པོར་ཤོད་ཅིག་”ཅེས་ཞུས།
JOH 10:25 ཡེ་ཤུས་“ངས་ཁྱོད་ཚོར་བཤད་ཟིན་ཡང་ཁྱོད་ཚོས་ཡིད་མི་ཆེས། ངས་ངའི་ཡབ་ཀྱི་མཚན་ཐོག་ནས་བྱས་པའི་ལས་ཀྱིས་ང་ལ་དཔང་པོ་བྱེད།
JOH 10:26 འོན་ཀྱང་ཁྱོད་ཚོ་ནི་ངའི་ལུག་མ་ཡིན་པས་ང་ལ་ཡིད་མི་ཆེས།
JOH 10:27 ངའི་ལུག་ངའི་སྐད་ལ་ཉན། ངས་དེ་ཚོ་ངོ་ཤེས་ཤིང་དེ་ཚོ་ངའི་རྗེས་སུ་འབྲང༌།
JOH 10:28 ཡང་ངས་དེ་ཚོར་དཔག་ཏུ་མེད་པའི་ཚེ་སྦྱིན་ཞིང་དེ་ཚོ་ནམ་ཡང་འཇིག་པར་མི་འགྱུར། སུས་ཀྱང་ངའི་ལག་ནས་འཕྲོག་མི་སྲིད།
JOH 10:29 ངའི་ཡབ་ཀྱིས་དེ་ཚོ་ང་ལ་གནང་བ་དང༌། ཁོང་ནི་ཐམས་ཅད་ལས་མཆོག་ཡིན། སུས་ཀྱང་དེ་ཚོ་ངའི་ཡབ་ཀྱི་ཕྱག་ནས་འཕྲོག་མི་སྲིད།
JOH 10:30 ང་དང་ཡབ་གཅིག་ཡིན་ནོ་”ཞེས་གསུངས།
JOH 10:31 ཡ་ཧུ་དཱ་པ་ཚོས་ཡང་བསྐྱར་ཁོང་ལ་རྡོ་རུབ་གཏོང་བའི་ཆེད་དུ་རྡོ་བསྒྲུགས།
JOH 10:32 ཡེ་ཤུས་མི་དེ་ཚོར་“ངས་ཡབ་ནས་བྱུང་བའི་འཕྲིན་ལས་མང་པོ་ཁྱེད་ཚོར་བསྟན། ལས་དེ་ཚོའི་ནང་ནས་གང་གི་ཆེད་དུ་ཁྱེད་ཚོས་ང་ལ་རྡོ་རུབ་གཏོང་ངམ་”ཞེས་གསུངས་པ་དང༌།
JOH 10:33 མི་དེ་ཚོས་“ལས་བཟང་པོ་ཞིག་གི་ཕྱིར་ང་ཚོས་ཁྱོད་ལ་རྡོ་རུབ་གཏོང་རྒྱུ་མ་ཡིན། ཁྱོད་ནི་མི་མ་གཏོགས་ཡིན་ཏེ། དཀོན་མཆོག་ཡིན་ཟེར་ནས་དཀོན་མཆོག་ལ་སྐུར་བ་བཏབ་པའི་ཕྱིར་ཡིན་”ཞེས་བཤད།
JOH 10:34 ཡེ་ཤུས་“ཁྱེད་རྣམས་ཀྱི་ཆོས་ཁྲིམས་ལ་ང་ཡིས་ཁྱོད་ཚོ་ནི་ལྷ་ཡིན་ཟེར་བ་ཡིན་ཞེས་བྲིས་པ་མ་ཡིན་ནམ།
JOH 10:35 གསུང་རབ་ནི་དུས་གཏན་དུ་བདེན་པ་ཡིན་ཏེ། ཡང་དཀོན་མཆོག་གི་བཀའ་ཐོབ་པའི་མི་ལ་ལྷ་རྣམས་ཞེས་ཟེར་ཡོད་པ་ཡིན་ན།
JOH 10:36 ངས་ང་དཀོན་མཆོག་གི་སྲས་ཡིན་ཞེས་བཤད་པས་ཁྱོད་ཚོས་དེ་དཀོན་མཆོག་ལ་སྐུར་བ་འདེབས་པ་ཡིན་ཞེས་ཟེར་བའི་དོན་ཅི་ཡིན། དཀོན་མཆོག་གིས་དམ་པར་མཛད་ནས་འཇིག་རྟེན་དུ་མངགས་པ་དེ་ང་ཡིན།
JOH 10:37 ངས་ཡབ་ཀྱི་འཕྲིན་ལས་མ་བྱས་ན། ང་ལ་ཡིད་མ་ཆེས་ཤིག
JOH 10:38 འོན་ཀྱང་ངས་འཕྲིན་ལས་དེ་ཚོ་བྱས་ན། ཁྱོད་ཚོས་ང་ལ་ཡིད་མི་ཆེས་ཀྱང༌། འཕྲིན་ལས་དེ་ཚོར་ཡིད་ཆེས་ཤིག དེ་ནས་ཡབ་ངའི་ནང་ན་ཡོད་པ་དང༌། ང་ཡབ་ཀྱི་ནང་ན་ཡོད་པར་ཤེས་པར་འགྱུར་”ཞེས་གསུངས།
JOH 10:39 དེ་རྗེས་ཡ་ཧུ་དཱ་པས་ཡང་བསྐྱར་ཡེ་ཤུ་འཛིན་རྒྱུ་འབད་ཀྱང༌། ཁོང་ཁོ་ཚོའི་ལག་ནས་ཐར་ཏེ་ཕེབས།
JOH 10:40 ཁོང་ཡང་བསྐྱར་ཡོར་དན་གཙང་པོའི་ཕར་ཕྱོགས་སུ་སྔར་ཡོ་ཧ་ནན་གྱིས་ཁྲུས་གསོལ་གནང་བའི་གནས་སུ་ཕེབས་ནས་དེར་བཞུགས།
JOH 10:41 མི་མང་པོ་ཁོང་གི་དྲུང་དུ་འཛོམས་པ་དང༌། ཁོ་ཚོས་གཅིག་གིས་གཅིག་ལ་“ཁྲུས་གསོལ་མཁན་ཡོ་ཧ་ནན་གྱིས་རྟགས་གང་ཡང་བསྟན་མེད་ཀྱང༌། ཁོང་གིས་མི་འདིའི་སྐོར་གང་གསུངས་པ་ཐམས་ཅད་བདེན་པ་ཡིན་”ཞེས་བཤད།
JOH 10:42 ཡང་ས་ཆ་དེར་མི་མང་པོས་ཡེ་ཤུ་ལ་དད་པ་བྱས་སོ། །
JOH 11:1 དེ་ཡང་མི་ལཱ་ཟར་ཟེར་མཁན་པེ་ཐན་ཡཱ་གྲོང་གསེབ་ལ་ན་ནས་བསྡད་ཡོད། པེ་ཐན་ཡཱ་ནི་མར་ཐཱ་དང་ཁོ་མོའི་ནུ་མོ་མིར་ཡམ་གྱི་གྲོང་ཚོ་ཡིན།
JOH 11:2 མིར་ཡམ་ནི་གཙོ་བོའི་སྐུ་གཟུགས་ལ་སྤོས་ཆུ་བླུགས་ནས་ཁོང་གི་ཞབས་རང་གི་སྐྲ་ཡིས་འཕྱིས་མཁན་དེ་ཡིན། དེའི་ནུ་བོ་ལཱ་ཟར་ནད་ཀྱིས་བཏབ་པས།
JOH 11:3 མར་ཐཱ་དང་མིར་ཡམ་གཉིས་ཀྱིས་ཡེ་ཤུ་ལ་“གཙོ་བོ་ལགས། ཁྱེད་ཀྱིས་བྱམས་པའི་གྲོགས་པོ་ནི་ནད་ཀྱིས་བཏབ་”ཅེས་ལན་ཅིག་བསྐུར།
JOH 11:4 ཡེ་ཤུས་དེ་གསན་ནས་ཁོང་གིས་“ནད་དེ་ནི་འཆི་བའི་རྒྱུ་མ་ཡིན། དཀོན་མཆོག་གི་གཟི་བརྗིད་མངོན་པར་འགྱུར་བའི་ཕྱིར་ཡིན་ཏེ། དཀོན་མཆོག་གི་སྲས་ལ་མིས་བཀུར་སྟི་བྱ་བའི་ཆེད་དུ་བྱུང་”ཞེས་གསུངས།
JOH 11:5 ཡེ་ཤུས་མར་ཐཱ་དང༌། དེའི་ནུ་མོ་དང༌། ལཱ་ཟར་སྤུན་གསུམ་ལ་བྱམས་པར་མཛད་ན་ཡང༌།
JOH 11:6 ཁོང་གིས་ལཱ་ཟར་ནད་ཀྱིས་བཏབ་པའི་ལན་དེ་གསན་ནས་ཁོང་གང་དུ་བཞུགས་པའི་གནས་སུ་ད་དུང་ཉིན་གཉིས་བཞུགས།
JOH 11:7 དེ་ནས་ཁོང་གིས་ཉེ་གནས་ཚོར་“ད་ང་ཚོ་སླར་ཡ་ཧུ་དཱ་ཡུལ་དུ་ཕྱིར་འགྲོ་”ཞེས་གསུངས་པ་དང༌།
JOH 11:8 ཉེ་གནས་རྣམས་ཀྱིས་“རབ་བི། ཁ་སང་ཡ་ཧུ་དཱ་པས་ཁྱེད་ལ་རྡོ་རུབ་བཏང་སྟེ་གསོད་པར་འབད་ཀྱང༌། ད་ཡང་དེར་ཕེབས་རྒྱུ་ཡིན་ནམ་”ཞེས་ཞུས་པ་དང༌།
JOH 11:9 ཡེ་ཤུས་“ཉིན་མོ་གཅིག་ལ་ཆུ་ཚོད་བཅུ་གཉིས་མེད་དམ། སུ་ཡང་ཉིན་མོར་ལམ་དུ་ཕྱིན་ན། འཇིག་རྟེན་འདིའི་འོད་མཐོང་བས་རྐང་པ་ཐོགས་ནས་སར་མི་འགྱེལ།
JOH 11:10 འོན་ཀྱང་སུ་ཡང་མཚན་མོ་ལམ་ལ་ཕྱིན་ན། དེ་ཚོར་འོད་མེད་པས་སར་འགྱེལ་བར་འགྱུར་”ཞེས་གསུངས་ནས།
JOH 11:11 ཁོང་གིས་ཁོ་ཚོར་“ང་ཚོའི་གྲོགས་པོ་ལཱ་ཟར་གཉིད་ཁུག་སྟེ། ངས་ཁོང་གཉིད་གསོད་པར་ཆེད་དུ་འགྲོ་”ཞེས་གསུངས།
JOH 11:12 ཉེ་གནས་ཚོས་ཁོང་ལ་“གཙོ་བོ་ལགས། ཁོང་གཉིད་ཁུག་ན་དྲག་ཡོང་”ཞེས་ཞུས་པ་དང༌།
JOH 11:13 ཡེ་ཤུས་ལཱ་ཟར་ཤི་བའི་སྐོར་གསུངས་ཀྱང༌། ཁོ་ཚོས་ཁོང་གཉིད་ཁུག་པའི་སྐོར་གསུངས་པ་བསམས།
JOH 11:14 དེའི་ཕྱིར་ཡེ་ཤུས་ཁོ་ཚོར་“ལཱ་ཟར་ཤི་ཚར་བ་ཡིན།
JOH 11:15 ཁྱེད་ཚོས་དད་པ་བྱེད་པའི་ཕྱིར་ང་ཁོང་མཉམ་དུ་དེར་མེད་པ་ལ་དགའ། ད་ང་ཚོ་ཁོའི་རྩ་ལ་འགྲོ་”ཞེས་གསལ་པོར་གསུངས།
JOH 11:16 དེར་ཐོ་མཱ་མིང་གཞན་ལ་མཚེ་མར་ཡང་ཞེས་པ་དེས་ཉེ་གནས་གཞན་ཚོར་“ཁོང་དང་མཉམ་དུ་འཆི་བའི་ཕྱིར་ང་ཚོའང་འགྲོ་”ཞེས་བཤད།
JOH 11:17 དེ་ནས་ཡེ་ཤུ་དེར་བྱོན་ནས་ལཱ་ཟར་གྱི་ཕུང་པོ་དུར་ཁང་དུ་བཅུག་ནས་ཞག་བཞི་སོང་བ་གཟིགས།
JOH 11:18 པེ་ཐན་ཡཱ་དེ་ཡེ་རུ་ཤ་ལེམ་དང་ཐག་ཉེ་ཞིང་སྤྱི་ལེ་གསུམ་ཙམ་ཡོད་པས།
JOH 11:19 ཡ་ཧུ་དཱ་པ་མང་པོ་མར་ཐཱ་དང་མིར་ཡམ་གྱི་ནུ་བོ་ཤི་བར་སེམས་གསོ་བའི་ཕྱིར་ཡོང༌།
JOH 11:20 མར་ཐཱ་ཡིས་ཡེ་ཤུ་ཕེབས་ཀྱི་ཡོད་པ་ཐོས་ནས་ཁོང་བསུ་བར་ཕྱིན། འོན་ཀྱང་མིར་ཡམ་ཁང་པར་བསྡད།
JOH 11:21 དེ་ནས་མར་ཐཱ་ཡིས་ཡེ་ཤུ་ལ་“གཙོ་བོ་ལགས། ཁྱེད་རང་འདིར་བཞུགས་པ་ཡིན་ན་ངའི་ནུ་བོ་ཤི་མི་སྲིད།
JOH 11:22 འོན་ཀྱང་ད་ལྟའང་ཁྱེད་རང་གིས་དཀོན་མཆོག་ལ་གང་ཞུ་བ་དེ་གནང་བར་འགྱུར་བར་ངས་ཤེས་”ཞེས་ཟེར།
JOH 11:23 ཡེ་ཤུས་“ཁྱེད་ཀྱི་ནུ་བོ་གསོན་པོར་ལང་བར་འགྱུར་”ཞེས་གསུངས་པ་དང༌།
JOH 11:24 མར་ཐཱ་ཡིས་“དུས་ཀྱི་མཐའ་མའི་ཉིན་མོར་གཤིན་པོ་ཐམས་ཅད་གསོན་པོར་ལང་དུས་ཁོ་ཡང་སླར་གསོན་པར་འགྱུར་བ་ངས་ཤེས་”ཞེས་ཞུས།
JOH 11:25 ཡེ་ཤུས་“སླར་གསོན་པ་དང་དཔག་ཏུ་མེད་པའི་ཚེ་ནི་ངའོ། སུ་ཡང་ང་ལ་དད་པ་བྱེད་མཁན་དེ་ཤི་ཡང་གསོན་པར་འགྱུར་ལ།
JOH 11:26 སུ་ཡང་ང་ལ་བརྟེན་ནས་གསོན་ཞིང་ང་ལ་དད་པ་བྱེད་མཁན་དེ་འཆི་མི་སྲིད། དོན་དེ་ལ་ཁྱེད་ཀྱིས་ཡིད་ཆེས་སམ་”ཞེས་གསུངས།
JOH 11:27 མར་ཐཱས་ཁོང་ལ་“ལགས་སོ། གཙོ་བོ་ལགས། ཁྱེད་ནི་སྐྱབས་མགོན་མཱ་ཤི་ཀ་དཀོན་མཆོག་གི་སྲས་འཇིག་རྟེན་དུ་འབྱོན་པ་དེ་ཡིན་པར་ངས་དད་པ་བྱེད་”ཅེས་ཞུས།
JOH 11:28 མར་ཐཱ་སོང་ནས་མིར་ཡམ་ཟུར་དུ་བོས་ཏེ་“སྟོན་པ་འདིར་ཡོད་ཅིང་ཁྱོད་འབོད་ཀྱི་འདུག་”ཅེས་བཤད་པ་དང༌།
JOH 11:29 མིར་ཡམ་གྱིས་དེ་ཐོས་ནས་མགྱོགས་པོར་ལངས་ཏེ་ཁོང་གི་དྲུང་དུ་སོང༌།
JOH 11:30 ཡེ་ཤུ་ནི་ད་དུང་གྲོང་གསེབ་ལ་མ་ཕེབས་ཏེ་མར་ཐཱ་ཡིས་ཁོང་མཇལ་བའི་གནས་སུ་བཞུགས་ཡོད།
JOH 11:31 མིར་ཡམ་དང་མཉམ་དུ་ཁང་པར་བསྡད་ཅིང་སྐྱོ་རོགས་བྱེད་པའི་ཡ་ཧུ་དཱ་པ་དེ་ཚོས་ཁོ་མོ་མགྱོགས་པོར་ལངས་ནས་ཕྱི་རོལ་ཏུ་སོང་བར་མཐོང་ནས། དུར་ཁང་དུ་ངུ་བར་སོང་བསམས་ཏེ་དེའི་རྗེས་སུ་འབྲངས།
JOH 11:32 མིར་ཡམ་ཡེ་ཤུ་ཡོད་སར་སླེབས་པའི་ཚེ་ཁོང་མཇལ་ནས་པུས་མོ་སར་བཙུགས་ཏེ་“གཙོ་བོ་ལགས། ཁྱེད་རང་འདིར་བཞུགས་པ་ཡིན་ན་ངའི་ནུ་བོ་ཤི་མི་སྲིད་”ཅེས་ཞུས།
JOH 11:33 ཡེ་ཤུས་མིར་ཡམ་དང་ཡ་ཧུ་དཱ་པ་གཞན་ཚོའང་ངུ་བར་གཟིགས་ཏེ། ཐུགས་ཤིན་ཏུ་འཁྲུགས་ནས།
JOH 11:34 ཁོང་གིས་“ཁོའི་ཕུང་པོ་གང་དུ་བཞག་ཡོད་”ཅེས་གསུངས་པས་ལན་དུ་ཁོ་ཚོས་“གཙོ་བོ་ལགས། འདིར་ཕེབས་ནས་གཟིགས་དང་”ཞེས་ཞུས་པ་དང༌།
JOH 11:35 དེར་ཡེ་ཤུ་བཤུམས།
JOH 11:36 དེའི་ཕྱིར་ཡ་ཧུ་དཱ་པས་གཅིག་གིས་གཅིག་ལ་“ལྟོས་དང༌། ཁོང་གིས་ཁོ་ལ་ཤིན་ཏུ་བྱམས་པ་ཡིན་”ཞེས་བཤད།
JOH 11:37 འོན་ཀྱང་ཁོ་ཚོ་ལས་ཁ་ཅིག་གིས་“མི་འདིས་ལོང་བའི་མིག་གསོས་ཐུབ་པ་ཡིན་ན། ལཱ་ཟར་ཡང་འཆི་བ་ལས་སྐྱོབ་པར་མཛད་མི་ཐུབ་བམ་”ཞེས་ཟེར།
JOH 11:38 དེར་ཡང་ཡེ་ཤུ་རང་གི་ཐུགས་འཁྲུགས་ཏེ་དུར་ཁང་གི་རྩར་ཕེབས། དུར་ཁང་དེ་བྲག་ཕུག་ཅིག་ཡིན་ཞིང་དེའི་ཁ་ལ་རྡོ་ཆེན་པོ་ཞིག་བཞག་ཡོད་པ་ཡིན།
JOH 11:39 ཡེ་ཤུས་“ད་རྡོ་ཕར་འཐེན་ཅིག་”ཅེས་གསུངས་ནས། གཤིན་པོའི་ཨ་ཅག་མར་ཐཱས་“གཙོ་བོ་ལགས། ཁོ་ཤི་ནས་ཉིན་བཞི་སོང་བས་ད་དྲི་མ་ངན་པ་ཁ་ཡོང་”ཞེས་ཞུས།
JOH 11:40 ཡེ་ཤུས་“སྔར་ངས་ཁྱེད་ལ་གལ་ཏེ་དད་པ་བྱས་ན་དཀོན་མཆོག་གི་གཟི་བརྗིད་མཐོང་ངེས་ཡིན་ཞེས་བཤད་པ་མ་ཡིན་ནམ་”ཞེས་གསུངས་པས།
JOH 11:41 ཁོ་ཚོས་རྡོ་ཕར་འཐེན། དེར་ཡེ་ཤུས་ཡར་གཟིགས་ཏེ་“ངའི་ཡབ། ཁྱེད་ཀྱིས་ང་ལ་གསན་པས་ཐུགས་རྗེ་ཆེ།
JOH 11:42 ཁྱེད་ཀྱིས་རྟག་ཏུ་ངས་ཞུས་པ་ལ་གསན་པ་ཤེས་ཀྱང༌། འདིར་ཡོད་པའི་མི་ཚོས་ཁྱེད་ཀྱིས་ང་མངགས་པ་ཡིན་པར་དད་པ་བྱེད་པའི་ཕྱིར་ངས་དེ་ལྟར་ཞུས་”ཞེས་གསུངས་པའི་རྗེས་སུ།
JOH 11:43 ཁོང་གིས་གསུང་སྐད་ཆེན་པོས་“ལཱ་ཟར། ཕྱིར་ཐོན་ཤོག་”ཅེས་གསུངས་མ་ཐག
JOH 11:44 གཤིན་པོ་རྐང་ལག་རས་ཀྱིས་བསྡམས་པ་དང༌། གདོང་པ་ཡང་རས་ཀྱིས་བཏུམས་པ་དེ་ཕྱི་རོལ་ཏུ་ཐོན། ཡེ་ཤུས་ཁོ་ཚོར་“རས་བཀྲོལ་ལ་ཁོང་འགྲོ་རུ་ཆུག་ཅིག་”ཅེས་གསུངས།
JOH 11:45 དེའི་ཕྱིར་མིར་ཡམ་དང་མཉམ་དུ་ཡོང་བའི་ཡ་ཧུ་དཱ་པ་མང་པོས་ཡེ་ཤུས་མཛད་པའི་དོན་དེ་མཐོང་ནས་ཁོང་ལ་དད་པ་སྐྱེས་སོ།
JOH 11:46 འོན་ཀྱང་ཁོ་ཚོ་ལས་འགའ་ཞིག་ཕཱ་རུ་ཤི་པ་ཚོའི་རྩར་ཕྱིན་ནས་ཡེ་ཤུས་གང་མཛད་པའི་སྐོར་བཤད།
JOH 11:47 དེའི་ཕྱིར་ཡ་ཧུ་དཱ་པའི་བླ་ཆེན་དང་ཕཱ་རུ་ཤི་པ་ཚོས་གྲོས་ཚོགས་བསྐོངས་ནས་“མི་འདིས་རྟགས་མང་པོ་སྟོན་པས། ང་ཚོས་ཅི་ལྟར་བྱ།
JOH 11:48 གལ་སྲིད་ཁོ་ལ་དེ་ལྟར་བྱེད་བཅུག་ན་མི་ཐམས་ཅད་ཀྱིས་ཁོ་ལ་དད་པར་འགྱུར་ཞིང༌། རོ་མཱ་པ་ཚོ་ཡོང་ནས་ང་ཚོའི་གནས་མཆོག་དང་མི་རིགས་གཉིས་འཕྲོག་ཡོང་”ཞེས་ཟེར།
JOH 11:49 འོན་ཀྱང་ཁོ་ཚོའི་ནང་ནས་ཀ་ཡ་ཕཱ་ཞེས་པའི་མི་གཅིག་ལོ་དེར་ཡ་ཧུ་དཱ་པའི་དབུ་ཁྲིད་བླ་ཆེན་ཡིན་ཏེ། མི་དེ་ཚོར་“ཁྱོད་ཚོས་ཅིའང་མི་ཤེས།
JOH 11:50 མི་དམངས་ཧྲིལ་པོ་མེད་པར་འགྱུར་བ་ལས། མི་གཅིག་མི་དམངས་ཀྱི་དོན་དུ་འཆི་བ་དེ་ཁྱོད་ཚོ་ལ་ལེགས་པ་ཡིན་པ་དེ་མི་རྟོགས་”ཅེས་བཤད།
JOH 11:51 འོན་ཀྱང་ཁོང་གིས་གཏམ་དེ་རང་ཐོག་ནས་མ་བཤད་དེ། ལོ་དེར་དབུ་ཁྲིད་བླ་ཆེན་ཡིན་པས་ཡེ་ཤུ་ནི་ཡ་ཧུ་དཱ་པའི་མི་རིགས་ཀྱི་དོན་དུ་འགྲོངས་རྒྱུ་ཡིན་པ་མ་ཟད།
JOH 11:52 གང་སར་འཐོར་བའི་དཀོན་མཆོག་གི་སྲས་དང་སྲས་མོ་རྣམས་གཅིག་ཏུ་སྡུད་པའི་ཕྱིར་ཡང་འགྲོངས་རྒྱུ་ཡིན་པ་ལུང་བསྟན།
JOH 11:53 དེའི་ཕྱིར་ཉིན་དེ་ནས་བཟུང་ཡ་ཧུ་དཱ་པའི་དཔོན་རིགས་ཀྱིས་ཡེ་ཤུ་དགྲོང་བའི་ཇུས་ངན་བཏིང༌།
JOH 11:54 དེར་བརྟེན་ཡེ་ཤུ་ཡ་ཧུ་དཱ་པའི་ནང་མངོན་སུམ་དུ་མ་ཕེབས་པར། དབེན་གནས་ས་ཁུལ་དང་ཉེ་བའི་ཨེབ་ར་ཡིམ་ཟེར་བའི་གྲོང་ཁྱེར་ལ་ཉེ་གནས་དང་བཅས་ཕེབས་ནས་བཞུགས།
JOH 11:55 དེའི་ཚེ་ཡ་ཧུ་དཱ་པའི་པེ་སག་གི་དུས་ཆེན་ཉེ་བར་སླེབས་པས། དུས་ཆེན་གྱི་སྔོན་ལ་མི་མང་པོ་གྲོང་གསེབ་ནས་ཡེ་རུ་ཤ་ལེམ་དུ་གཙང་སྦྲའི་ཆོ་ག་བྱེད་དུ་ཕྱིན།
JOH 11:56 ཁོ་ཚོས་ཡེ་ཤུ་བཙལ་བ་དང༌། མཆོད་ཁང་ཆེན་མོའི་ཁྱམས་རའི་ནང་ལངས་བསྡད་ཡོད་དུས་ཕན་ཚུན་དུ་“ཁྱེད་ཅི་ལྟར་སེམས། ཁོང་དུས་ཆེན་འདི་ལ་ཕེབས་ཡོང་ངམ་”ཞེས་དྲིས།
JOH 11:57 ཡ་ཧུ་དཱ་པའི་བླ་ཆེན་དང་ཕཱ་རུ་ཤི་པ་རྣམས་ཀྱིས་ཡེ་ཤུ་འཛིན་བཟུང་བྱེད་པའི་ཆེད་དུ། སུས་ཡེ་ཤུ་གང་དུ་བཞུགས་པའི་རྒྱུས་ཡོད་ཀྱང་དེས་ཁོ་ཚོར་ཤོད་དགོས་པའི་བཀའ་བཏང་ངོ༌། །
JOH 12:1 པེ་སག་གི་དུས་ཆེན་སྔོན་གྱི་ཉི་མ་དྲུག་པ་ལ་ཡེ་ཤུ་པེ་ཐན་ཡཱ་གྲོང་གསེབ་ལ་བྱོན་པ་དང༌། དེ་ནི་ཁོང་གིས་སྔར་འཆི་བ་ལས་བསླངས་པའི་མི་ལཱ་ཟར་གྱི་ཕ་ཡུལ་ཡིན་ཞིང༌།
JOH 12:2 དེར་ཁོ་ཚོས་ཁོང་ལ་དགོང་ཟས་ཤིག་བཤམས་ནས། མར་ཐཱས་གསོལ་གཡོག་བྱས་ཏེ། ལཱ་ཟར་ཡང་ཁོང་ཚོ་དང་མཉམ་དུ་བཟས་པ་དང༌།
JOH 12:3 མིར་ཡམ་གྱིས་ནཱར་དཱི་ཟེར་བའི་རིན་གོང་ཆེ་བའི་སྤོས་ཆུ་ལྷད་མེད་པ་རྒྱ་མ་གང་ཙམ་བླངས་ནས། ཡེ་ཤུའི་ཞབས་ལ་བླུགས་ཏེ། རང་གི་སྐྲ་ཡིས་འཕྱིས། ཁང་པ་སྤོས་ཆུའི་དྲི་བཟང་གིས་གང་བར་གྱུར།
JOH 12:4 འོན་ཀྱང་རྗེས་མ་ཡེ་ཤུ་དགྲའི་དབང་དུ་གཏོང་མཁན་ཡུ་དཱ་དབྱི་སི་ཀར་རེ་ཁོང་གི་ཉེ་གནས་རྣམས་ལས་གཅིག་ཡིན་ཏེ་དེས་
JOH 12:5 “སྤོས་ཆུ་འདི་དེ་ཎ་རིའི་དངུལ་སྒོར་སུམ་བརྒྱར་བཙོངས་ནས་དབུལ་ཕོངས་ཚོ་ལ་སྦྱིན་པ་བཏང་ན་ལེགས་པ་མ་ཡིན་ནམ་”ཞེས་ཟེར།
JOH 12:6 ཁོས་དབུལ་ཕོངས་ཚོར་སྙིང་རྗེ་སྐྱེས་ནས་དེ་ལྟར་ཟེར་བ་མ་ཡིན་ཏེ། ཁོ་ནི་རྐུན་མ་ཡིན་ཞིང་ཁོས་ཐུན་མོང་གི་དངུལ་ཁུག་ཁྱེར་ཏེ་དེའི་ནང་བཅུག་ཡོད་པའི་དངུལ་ལྐོག་ལེན་བྱེད་པའི་གོམས་གཤིས་ཡོད།
JOH 12:7 དེ་ནས་ཡེ་ཤུས་“ཁོ་མོར་སྡུག་པོ་མ་གཏོང་ཞིག དེ་ནི་ང་དུར་དུ་འཇུག་པའི་ཉིན་མོའི་དོན་དུ་ཡིན།
JOH 12:8 དབུལ་ཕོངས་ཚོ་ནི་རྟག་ཏུ་ཁྱེད་ཚོ་དང་མཉམ་དུ་ཡོད་ཀྱང༌། ང་ནི་དུས་རྒྱུན་དུ་ཁྱེད་ཚོའི་རྩར་མེད་”ཅེས་གསུངས་སོ། །
JOH 12:9 དེའི་ཚེ་ཡ་ཧུ་དཱ་པའི་མི་ཚོགས་མང་པོས་ཡེ་ཤུ་དེར་བཞུགས་པ་ཐོས་ནས། ཡེ་ཤུ་མཇལ་བའི་ཆེད་དུ་མ་ཟད། ལཱ་ཟར་ཁོང་གིས་འཆི་བ་ལས་བསླངས་པ་དེར་ཡང་ལྟ་བར་ཡོང༌།
JOH 12:10 དེའི་ཕྱིར་ཡ་ཧུ་དཱ་པའི་བླ་ཆེན་ཚོས་ལཱ་ཟར་ཡང་གསོད་པའི་ཇུས་ངན་བྱས།
JOH 12:11 ཅི་ལགས་ཟེར་ན། ལཱ་ཟར་གྱི་རྐྱེན་གྱིས་ཡ་ཧུ་དཱ་པ་མང་པོ་ཆོས་དཔོན་དང་ཁ་བྲལ་ནས་ཡེ་ཤུ་ལ་དད་པ་བྱེད་པའི་ཕྱིར་རོ། །
JOH 12:12 དེའི་སང་ཉིན་པེ་སག་དུས་ཆེན་ལ་ཡོང་བའི་མི་ཚོགས་མང་པོས་ཡེ་ཤུ་ཡེ་རུ་ཤ་ལེམ་ལ་ཕེབས་བཞིན་ཡོད་པའི་གཏམ་ཐོས་ནས།
JOH 12:13 ཁོ་ཚོས་ཏ་ལའི་ཤིང་གི་ཡལ་ག་བླངས་ནས་ཁོང་བསུ་བར་ཕྱིན་པ་དང་སྐད་ཆེན་པོས་“ཧོ་ཟན་ནཱ། དཀོན་མཆོག་གི་མཚན་ཐོག་ནས་ཕེབས་མཁན་ཡིན་ཏེ་ཡི་སི་ར་ཨེལ་གྱི་རྒྱལ་པོར་བྱིན་རླབས་གནང་བར་ཤོག་”ཅེས་བསྒྲགས།
JOH 12:14 ཡེ་ཤུས་བོང་གསར་ཞིག་ཐོབ་ནས་དེ་ལ་བཅིབས། བྱ་བ་འདི་ཚོ་གསུང་རབ་ཀྱི་མདོ་ལྟར་བྱུང་སྟེ།
JOH 12:15 ཀྱེ། ཙི་ཡོན་སྲས་མོ་འཇིགས་པར་མ་འགྱུར་ཞིག ། ཁྱེད་ཀྱི་རྒྱལ་པོ་བོང་གསར་བཅིབས་ནས་ནི། ། ད་ལྟ་འབྱོན་བཞིན་འདུག་པར་ལྟོས་ཤིག་ཨང༌། ། ཞེས་མདོ་ལ་བྲིས་ཡོད།
JOH 12:16 དེའི་སྐབས་སུ་ཁོང་གི་ཉེ་གནས་ཚོས་དོན་འདི་ཚོ་མ་རྟོགས། འོན་ཀྱང་ཡེ་ཤུ་འཕགས་པའི་གཟི་བརྗིད་མངོན་པའི་རྗེས་སུ་དོན་དེ་རྣམས་ཁོང་གི་སྐོར་ལ་བྲིས་ཡོད་པ་དང་མི་གཞན་གྱིས་ཁོང་ལ་གང་བྱས་པ་དྲན།
JOH 12:17 ཡེ་ཤུས་ལཱ་ཟར་དུར་ཁང་ནས་བོས་ཤིང་འཆི་བ་ལས་བསླངས་པ་མཐོང་བའི་མི་ཚོགས་ཀྱིས་མི་གཞན་ལ་ཡེ་ཤུའི་སྐོར་དཔང་པོ་བྱེད་བཞིན་ཡོད་པས།
JOH 12:18 མི་མང་པོས་ཁོང་གིས་རྟགས་དེ་བསྟན་པ་ཡིན་པ་ཐོས་ཏེ་ཁོང་མཇལ་བར་སོང༌།
JOH 12:19 ཕཱ་རུ་ཤི་པ་ཚོས་ཕན་ཚུན་དུ་“ལྟོས་ཤིག འཇིག་རྟེན་ཀུན་ཁོའི་རྗེས་སུ་འབྲང་བས། ང་ཚོས་ང་ཚོའི་དོན་མི་སྒྲུབ་”ཅེས་ཟེར།
JOH 12:20 དེའི་ཚེ་དཀོན་མཆོག་ལ་བསྙེན་བཀུར་བྱེད་པའི་ཕྱིར་པེ་སག་གི་དུས་ཆེན་ལ་ཡོང་བའི་མི་ཚོའི་ནང་ནས་གྷི་རིག་མི་འགའ་ཞིག་ཡོད་པ་དང༌།
JOH 12:21 མི་དེ་ཚོ་ག་ལིལ་ཡུལ་གྱི་གྲོང་ཚོ་པེ་སད་དཱ་ནས་ཡིན་པ་ཕི་ལིབ་ཀྱི་མདུན་དུ་སོང་ནས་“སྐུ་ཞབས་ལགས། ང་ཚོ་ཡེ་ཤུ་མཇལ་བར་འདོད་”ཅེས་ཞུས།
JOH 12:22 ཕི་ལིབ་སོང་ནས་ཨན་དྲི་ཡཱ་ལ་དོན་དེ་བཤད་དེ། ཨན་དྲི་ཡཱ་དང་ཕི་ལིབ་གཉིས་སོང་ནས་ཡེ་ཤུ་ལ་ཞུས།
JOH 12:23 ལན་དུ་ཡེ་ཤུས་དེ་གཉིས་ལ་“ད་མིའི་རིགས་ཀྱི་བུ་ཡི་གཟི་བརྗིད་མངོན་པར་འགྱུར་བའི་དུས་ལ་འབབ།
JOH 12:24 ངས་ཁྱེད་ཚོར་བདེན་པ་བདེན་པར་ཟེར་རྒྱུར། གྲོའི་འབྲུ་རྡོག་སའི་ནང་ལྷུངས་ནས་མ་ཤི་ན་འབྲུ་རྡོག་ཁོ་ནར་ལུས། འོན་ཀྱང་ཤི་ན་འབྲུ་རྡོག་དེ་འབྲས་བུ་མང་པོ་སྐྱེ་བར་འགྱུར།
JOH 12:25 སུ་ཡང་རང་གི་སྲོག་ལ་ཆགས་པ་དེ་བརླག་པར་འགྱུར། སུས་འཇིག་རྟེན་འདིར་རང་གི་སྲོག་ལ་མ་ཆགས་པ་དེ་དཔག་ཏུ་མེད་པའི་ཚེའི་ཕྱིར་སྐྱོབ་པར་འགྱུར།
JOH 12:26 སུས་ང་ལ་གཡོག་བྱས་ཀྱང་དེ་ངའི་རྗེས་སུ་འབྲང་དགོས་ཤིང༌། ང་གང་དུ་ཡོད་པའི་གནས་དེར་ངའི་གཡོག་པོའང་ཡོད་པར་འགྱུར། སུས་ང་ལ་གཡོག་བྱས་ན། ཡབ་ཀྱིས་མི་དེར་བཀུར་སྟི་མཛད་དོ། །
JOH 12:27 ད་ངའི་སེམས་འཁྲུགས་ཏེ་ཅི་བཤད་པར་བྱ། ཀྱེ། ཡབ་ཁྱེད་ཀྱིས་ང་སྡུག་བསྔལ་གྱི་དུས་སྐབས་འདི་ལས་སྐྱོབ་པར་མཛོད་ཅིག་ཅེས་ཟེར་རམ། དེ་མི་སྲིད། གང་ཡིན་ཟེར་ན། ང་དོན་འདིའི་ཕྱིར་འཇིག་རྟེན་དུ་ཡོང་བ་ཡིན་པས་སོ།
JOH 12:28 ཡབ་ལགས། ཁྱེད་ཀྱི་མཚན་གཟི་བརྗིད་དང་ལྡན་པར་མཛོད་ཅིག་”ཅེས་གསུངས་པ་དང་དཀོན་མཆོག་གི་ཞིང་ཁམས་ནས་གསུང་ཞིག་བྱུང་བ་སྟེ་“ངས་གཟི་བརྗིད་དང་ལྡན་པར་བྱས་ལ་སླར་ཡང་དེ་ལྟར་བྱ་”ཞེས་གསུངས།
JOH 12:29 དེར་ལངས་པའི་མི་ཚོགས་ཀྱིས་དེ་ཐོས་པ་དང༌། ལ་ལས་འབྲུག་སྒྲ་ལྡིར་བ་ཡིན་ཞེས་ཟེར་བ་དང༌། ལ་ལས་“དཀོན་མཆོག་གི་ཕོ་ཉ་ཞིག་གིས་ཁོང་ལ་གསུངས་པ་ཡིན་”ཞེས་བཤད།
JOH 12:30 ཡེ་ཤུས་“གསུང་འདི་ངའི་ཕྱིར་མ་བྱུང་གི ཁྱེད་ཚོའི་ཆེད་དུ་བྱུང༌།
JOH 12:31 ད་འཇིག་རྟེན་འདིའི་ཁྲིམས་གཅོད་ཀྱི་དུས་ལ་འབབ་འདུག ད་འཇིག་རྟེན་འདིའི་དབང་སྒྱུར་མཁན་སྐྲོད་ཀྱི་དུས་ལ་ཡང་འབབ་འདུག
JOH 12:32 ཡང་ང་ས་ལས་འཕག་པའི་ཚེ་ངས་མི་ཐམས་ཅད་ང་རང་གི་དྲུང་དུ་འདྲེན་པར་བྱ་”ཞེས་གསུངས་པའི་དོན་ནི།
JOH 12:33 ཁོང་རང་གི་འགྲོངས་ལུགས་གང་འབྱུང་བར་འགྱུར་བ་དེ་ཡིན།
JOH 12:34 དེའི་ཕྱིར་མི་ཚོགས་ཀྱིས་ཁོང་ལ་“ང་ཚོས་དཀོན་མཆོག་གི་གསུང་རབ་ལས་སྐྱབས་མགོན་མཱ་ཤི་ཀ་ནི་རྒྱུན་དུ་གནས་སོ་ཞེས་བྲིས་ཡོད་པ་ཐོས་པས། ཁྱེད་ཀྱིས་མིའི་རིགས་ཀྱི་བུ་འཕག་དགོས་གསུང་བ་དེ་ཅི་ཡིན། མིའི་རིགས་ཀྱི་བུ་དེ་སུ་ཡིན་”ཞེས་ཟེར།
JOH 12:35 ཡེ་ཤུས་“ད་དུང་དུས་ཐུང་ངུ་ཞིག་གི་རིང་འོད་ནི་ཁྱོད་ཚོ་དང་མཉམ་དུ་ཡོད། འོད་ཡོད་པའི་བར་དུ་འགྲུལ་ཞིག ཁྱེད་ཚོར་མུན་ནག་མི་རུབ་པའི་ཕྱིར་རོ། སུ་ཡང་མུན་པ་ལ་འགྲུལ་བ་དེ་གང་དུ་འགྲོ་མི་ཤེས།
JOH 12:36 འོད་ཡོད་པའི་བར་དུ་འོད་ལ་དད་པ་གྱིས་ཤིག དེ་ནི་ཁྱེད་ཚོ་འོད་ཀྱི་སྲས་སུ་འགྱུར་བའི་ཕྱིར་རོ་”ཞེས་གསུངས་པ་དང་ཡེ་ཤུས་ཕར་ཕེབས་ཏེ། ཁོང་ཁོ་ཚོ་ལ་ཡིབས་ནས་བཞུགས།
JOH 12:37 ཁོང་གིས་ཁོ་ཚོའི་མདུན་དུ་དེ་ལྟར་རྟགས་མང་པོ་བསྟན་ཀྱང་ཁོ་ཚོས་ཁོང་ལ་དད་པ་མ་བྱས།
JOH 12:38 འདི་ནི་ལུང་སྟོན་པ་ཡེ་ཤ་ཡཱའི་ལུང་བསྟན་སྒྲུབ་པའི་ཆེད་དུ་ཡིན། ཁོང་གིས། གཙོ་བོ། ང་ཚོས་བསྒྲགས་པའི་འཕྲིན་ལ་སུས་ཡིད་ཆེས། ། གཙོ་བོའི་ནུས་མཐུ་སུ་ལ་མངོན་པར་གྱུར། ། ཞེས་གསུངས།
JOH 12:39 དེའི་ཕྱིར་ཁོ་ཚོས་དད་པ་བྱས་མ་ཐུབ། ཡང་ཡེ་ཤ་ཡཱས།
JOH 12:40 གཙོ་བོ་ཉིད་ཀྱིས་མི་རྣམས་དེ་ཡི་མིག ། ལོང་བར་མཛད་ཅིང་སེམས་ཀྱང་མཁྲེགས་པོར་མཛད། ། དེ་ལྟར་མིན་ན་མིག་གིས་མཐོང་བ་དང༌། ། བློ་ཡིས་རྟོགས་ཤིང་སེམས་ཀྱང་བསྒྱུར་ནས་ནི། ། ང་ཡིས་ཁོ་ཚོ་གསོ་ཞིང་དྲག་པར་འགྱུར། ། ཞེས་གསུངས།
JOH 12:41 ལུང་སྟོན་པ་ཡེ་ཤ་ཡཱས་ཡེ་ཤུའི་གཟི་བརྗིད་མཐོང་བས་ཁོང་གི་སྐོར་དེ་ལྟར་གསུངས།
JOH 12:42 དེ་ཡང་ཡ་ཧུ་དཱ་པའི་དཔོན་རིགས་ནང་ནས་མི་མང་པོས་ཡེ་ཤུ་ལ་དད་པ་བྱས་ཀྱང༌། ཕཱ་རུ་ཤི་པ་ཚོས་ཡ་ཧུ་དཱ་པའི་འདུ་ཁང་ནས་འབུད་པར་འཇིགས་ཏེ་མངོན་སུམ་དུ་དེའི་སྐོར་གཏམ་མ་བཤད།
JOH 12:43 རྒྱུ་མཚན་ནི་ཁོ་ཚོ་དཀོན་མཆོག་གིས་བཀུར་སྟི་ལས་མིས་བཀུར་སྟི་ལ་ལྷག་པར་ཆགས།
JOH 12:44 དེ་ནས་ཡེ་ཤུས་སྐད་ཆེན་པོས་“སུས་ང་ལ་དད་པ་བྱས་ཀྱང་དེས་ང་དང་ང་མངགས་མཁན་ཏེ་དཀོན་མཆོག་ལའང་དད་པ་བྱེད་པས།
JOH 12:45 སུས་ང་མཐོང་ཡང་དེས་ང་མངགས་མཁན་དེའང་མཐོང༌།
JOH 12:46 ང་ལ་དད་པ་བྱེད་མཁན་ཐམས་ཅད་མུན་པའི་ནང་དུ་མི་ལུས་པའི་ཕྱིར་ང་ནི་འོད་ལྟར་འཇིག་རྟེན་དུ་ཡོང༌།
JOH 12:47 མི་སུ་ཞིག་ངའི་བཤད་པའི་བཀའ་ཐོས་ནས་མ་ཉན་ན་ངས་མི་དེ་ལ་ཁྲིམས་གཅོད་མི་བྱེད། ང་ནི་འཇིག་རྟེན་ལ་ཁྲིམས་གཅོད་བྱེད་དུ་མ་ཡོང་བར། འཇིག་རྟེན་སྐྱོབ་པའི་ཆེད་དུ་ཡོང་བ་ཡིན་ནོ།
JOH 12:48 མི་སུ་ཞིག་གིས་ང་དོར་ནས་ངའི་བཀའ་ལ་མི་ཉན་མཁན་ལ་ཁྲིམས་གཅོད་པ་ཞིག་ཡོད། ངས་བཤད་པའི་བཀའ་དེ་ཉིད་ཀྱིས་དུས་ཀྱི་མཐའ་མའི་ཉིན་མོར་དེར་ཁྲིམས་གཅོད་པ་ཡིན།
JOH 12:49 རྒྱུ་མཚན་ནི་ངས་ང་རང་ཐོག་ནས་གཏམ་མ་བཤད་དེ། ང་མངགས་མཁན་ཡབ་དཀོན་མཆོག་ཉིད་ཀྱིས་ང་ལ་གང་ཞིག་ཟེར་དགོས་པ་གནད་འཁེལ་པོར་བཀའ་གནང་བྱུང༌།
JOH 12:50 ངས་ཁོང་གིས་གནང་བའི་བཀའ་དེ་དཔག་ཏུ་མེད་པའི་ཚེ་ཡིན་པ་ཤེས་པས། དེའི་ཕྱིར་ངས་གང་ཤོད་པ་དེ་ཡབ་དཀོན་མཆོག་གིས་ང་ལ་ཅི་གསུངས་པ་དེ་རང་ཡིན་ནོ་”ཞེས་གསུངས་སོ། །
JOH 13:1 པེ་སག་གི་དུས་ཆེན་གྱི་སྔོན་ལ་ཡེ་ཤུ་འཇིག་རྟེན་འདི་ནས་ཡབ་དཀོན་མཆོག་གི་དྲུང་དུ་ཕེབས་དགོས་པའི་དུས་ལ་བབ་པར་མཁྱེན་ཏེ། རང་གི་རྗེས་འབྲང་བ་འཇིག་རྟེན་འདིར་ཡོད་པ་ཚོར་སྔར་ཡང་བྱམས་ཤིང་མཐའ་མའི་བར་དུ་ཡང་བྱམས་པར་མཛད།
JOH 13:2 བདུད་ཀྱིས་ཡེ་ཤུ་དགྲའི་དབང་དུ་གཏོང་བའི་བསམ་པ་དེ་སི་མོན་གྱི་བུ་ཡུ་དཱ་དབྱི་སི་ཀར་རེའི་སེམས་སུ་བཞག་ཚར་ནས། དགོང་ཟས་བཞེས་པའི་ཚེ་
JOH 13:3 ཡེ་ཤུས་ཡབ་དཀོན་མཆོག་གིས་ཁོང་ལ་དོན་ཐམས་ཅད་ཁོང་གི་ལག་ཏུ་གནང་ཡོད་པ་མཁྱེན་པ་དང༌། རང་ཉིད་དཀོན་མཆོག་ནས་ཡོང་བ་ཡིན་ཏེ་དཀོན་མཆོག་གི་དྲུང་དུ་ལོག་རྒྱུ་ཡིན་པར་མཁྱེན་ཏེ།
JOH 13:4 དགོང་ཟས་ཀྱི་གྲལ་ནས་བཞེངས་ཏེ་ཕྱིའི་ན་བཟའ་ཕུད་དེ་ཕྱག་རས་རྐེད་པར་དཀྲིས་པའི་རྗེས་སུ།
JOH 13:5 གཞོང་པའི་ནང་ཆུ་བླུགས་ནས་ཉེ་གནས་རེ་རེ་བཞིན་གྱི་རྐང་པ་བཀྲུས་པ་དང༌། རང་གི་སྐུ་ལ་དཀྲིས་པའི་ཕྱག་རས་ཀྱིས་འཕྱིས།
JOH 13:6 ཁོང་སི་མོན་པེ་ཏྲོའི་རྩར་ཕེབས་པ་དང༌། ཁོས་ཁོང་ལ་“གཙོ་བོ་ལགས། ཁྱེད་ཀྱིས་ངའི་རྐང་པ་བཀྲུ་རྒྱུ་ཡིན་ནམ་”ཞེས་ཞུས།
JOH 13:7 ལན་དུ་ཡེ་ཤུས་“ངས་བྱེད་བཞིན་པའི་ལས་ཀྱི་དོན་ཁྱེད་ཀྱིས་ད་ལྟ་མི་རྟོགས་ཀྱང༌། རྗེས་མ་རྟོགས་པར་འགྱུར་”ཞེས་གསུངས།
JOH 13:8 པེ་ཏྲོས་ཁོང་ལ་“ཁྱེད་ཀྱིས་ངའི་རྐང་པ་ཅི་ནས་ཀྱང་མི་བཀྲུ་”ཞེས་ཞུས་པ་དང་ལན་དུ་ཡེ་ཤུས་“གལ་ཏེ་ངས་ཁྱོད་མ་བཀྲུས་ན། ཁྱོད་ང་དང་འབྲེལ་བ་མེད་”ཅེས་གསུངས་པ་དང༌།
JOH 13:9 སི་མོན་པེ་ཏྲོས་“གཙོ་བོ་ལགས། ངའི་རྐང་པ་ཙམ་མ་ཟད། ལག་པ་དང་མགོ་ཡང་ཁྲུས་རོགས་མཛོད་”ཅེས་ཞུས།
JOH 13:10 ཡེ་ཤུས་“ཁྲུས་བྱས་ཟིན་པ་ཞིག་ལུས་ཧྲིལ་པོ་གཙང་མར་གྱུར་བ་ཡིན་པས་རྐང་པ་མ་གཏོགས་འཁྲུད་དགོས་མེད། ཁྱེད་ཚོ་ནི་གཙང་མ་ཡིན། འོན་ཀྱང་ཐམས་ཅད་གཙང་མ་མིན་”ཞེས་གསུངས།
JOH 13:11 ཡེ་ཤུས་ཁོང་རང་དགྲའི་དབང་དུ་གཏོང་མཁན་དེ་སུ་ཡིན་པ་མཁྱེན་པས། ཁོང་གིས་“ཁྱེད་ཚོ་ཐམས་ཅད་གཙང་མ་མིན་”ཞེས་གསུངས།
JOH 13:12 དེ་ནས་ཡེ་ཤུས་ཉེ་གནས་རྣམས་ཀྱི་རྐང་པ་བཀྲུས་ཚར་ནས་ཕྱིའི་ན་བཟའ་བཞེས་ཏེ་སླར་བཞུགས་པ་དང་ཁོ་ཚོར་“ངས་ཁྱེད་ཚོ་ལ་བྱས་པ་དེའི་དོན་ནི་ཅི་ཡིན་རྟོགས་སམ་”ཞེས་བཀའ་འདྲི་གནང༌།
JOH 13:13 “ཁྱོད་ཚོས་ང་ལ་སྟོན་པ་དང་གཙོ་བོ་ཞེས་ཟེར་བ་བདེན་པ་ཡིན་ཏེ། ང་ནི་དེ་ཡིན་པས་སོ།
JOH 13:14 དེའི་ཕྱིར་ང་ཁྱེད་ཀྱི་གཙོ་བོ་དང་སྟོན་པ་ཡིན་ཏེ་ཁྱེད་ཚོའི་རྐང་པ་བཀྲུས་པ་ཡིན་ན། ཁྱེད་ཚོས་ཀྱང་གཅིག་གིས་གཅིག་ལ་རྐང་པ་འཁྲུད་དགོས།
JOH 13:15 ངས་ཁྱེད་ཚོ་ལ་མིག་དཔེ་ཞིག་བསྟན་ཅིང༌། ཁྱེད་ཚོས་ཀྱང་ངས་ཁྱེད་ཚོ་ལ་བྱས་པ་བཞིན་དུ་བྱེད་དགོས།
JOH 13:16 ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། གཡོག་པོ་ནི་དཔོན་པོ་ལས་གལ་ཆེ་བ་མ་ཡིན་ཞིང་བང་ཆེན་དེའང་མངགས་མཁན་ལས་ཆེ་བ་མ་ཡིན།
JOH 13:17 གལ་ཏེ་ཁྱེད་ཚོས་དོན་དེ་རྣམས་ཤེས་ཏེ་དེ་ལྟར་བྱས་ན་བདེ་བ་དང་ལྡན་པར་འགྱུར་རོ།
JOH 13:18 ངའི་གཏམ་འདི་ཁྱེད་ཚོ་ཚང་མའི་སྐོར་བཤད་པ་མིན། ངས་བདམས་པའི་མི་རྣམས་ངས་ཤེས། འོན་ཀྱང་འདི་ནི་དཀོན་མཆོག་གི་གསུང་རབ་ཀྱི་མདོ་ལས། ངའི་བག་ལེབ་ཟ་མཁན་དེས་རྐང་པའི་རྟིང་པས་ང་བརྫིས་པ་ཡིན། ཞེས་གསུངས་པ་བཞིན་དུ་སྒྲུབ་པའི་ཕྱིར་རོ།
JOH 13:19 ད་དེ་བཞིན་དུ་མ་འགྲུབ་པའི་སྔོན་ལ་ངས་ཁྱེད་ཚོར་སྨྲ། དེའི་ཕྱིར་དེ་བཞིན་དུ་འགྲུབ་པའི་ཚེ་ཁྱེད་ཚོས་ང་ཁོང་ཉིད་ཡིན་པར་དད་པའི་ཕྱིར་རོ།
JOH 13:20 ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། སུས་ཀྱང་ངས་མངགས་པའི་མི་ཞིག་བསུས་ན་མི་དེ་ངའང་བསུ། ང་རང་བསུ་བའི་མི་དེས་ང་མངག་མཁན་ཡང་བསུ་”ཞེས་གསུངས།
JOH 13:21 ཡེ་ཤུས་དེ་གསུངས་ཏེ་ཐུགས་འཁྲུགས་པར་གྱུར་ནས་“ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། ཁྱེད་ཚོའི་ནང་ནས་གཅིག་གིས་ང་རྒྱབ་གཏོད་བྱེད་ཡོང་”ཞེས་གསལ་བསྒྲགས་མཛད་པས།
JOH 13:22 ཉེ་གནས་རྣམས་ཀྱིས་ཁོང་གིས་གསུངས་པའི་མི་སུ་ཡིན་མི་ཤེས་པར་གཅིག་གིས་གཅིག་ལ་བལྟས།
JOH 13:23 དེར་ཡེ་ཤུས་བྱམས་པར་འཛིན་པའི་ཉེ་གནས་གཅིག་ཁོང་གི་སྐུ་འགྲམ་ལ་ཡོད་པས།
JOH 13:24 སི་མོན་པེ་ཏྲོས་མི་དེར་མགོ་བོ་གཡུག་བཞིན་བརྡ་བཏང་སྟེ་“ཁོང་གིས་སུའི་སྐོར་ལ་གསུངས་པ་བཀའ་དྲིས་ཞུས་ཤིག་”ཅེས་བཤད།
JOH 13:25 ཉེ་གནས་དེས་ཡེ་ཤུའི་རྩར་གཟུགས་པོ་ཡོ་ནས་ཁོང་ལ་“གཙོ་བོ་ལགས། མི་དེ་སུ་ཡིན་”ཞེས་ཞུས་པ་དང༌།
JOH 13:26 ཡེ་ཤུས་“ངས་བག་ལེབ་དུམ་བུ་འདི་ཁུ་བ་ལ་སྦངས་ནས་སྟེར་བའི་མི་དེ་རང་ཡིན་”ཞེས་གསུངས་ནས་ཁོང་གིས་བག་ལེབ་དུམ་བུ་དེ་ཁུ་བར་སྦངས་རྗེས། སི་མོན་དབྱི་སི་ཀར་རེའི་བུ་ཡུ་དཱ་ལ་གནང༌།
JOH 13:27 བག་ལེབ་དུམ་བུ་དེ་བླངས་ནས་བདུད་སཱ་ཏན་ཁོའི་སེམས་ནང་དུ་ཞུགས། ཡེ་ཤུས་ཡུ་དཱ་ལ་“ཁྱོད་ཀྱིས་བྱེད་རྒྱུ་ཡིན་པ་དེ་མགྱོགས་པོར་བྱོས་ཤིག་”ཅེས་གསུངས།
JOH 13:28 དེར་ཡོད་པ་རྣམས་ཀྱི་ནང་ནས་སུས་ཀྱང་ཅིའི་ཕྱིར་དེ་ལྟར་གསུངས་པའི་དོན་ཧ་མ་གོ
JOH 13:29 ཡུ་དཱ་ལ་སྤྱི་ཐོག་གི་དངུལ་ཁུག་ཡོད་པས་ཉེ་གནས་རྣམས་ཀྱི་ནང་ནས་ལ་ལས་ཡེ་ཤུས་ཁོ་ལ་དུས་ཆེན་ལ་གང་དགོས་པ་ཉོ་རྒྱུ་འམ་ཡང་ན་དབུལ་པོ་རྣམས་ལ་གང་ཞིག་སྦྱིན་པར་བཀའ་གནང་ངོ་ཞེས་བསམས།
JOH 13:30 ཡུ་དཱས་བག་ལེབ་དེ་བླངས་མ་ཐག་ཕྱི་རོལ་ཏུ་སོང༌། དུས་དེ་ནི་མཚན་མོ་ཡིན་ནོ། །
JOH 13:31 ཡུ་དཱ་སོང་བའི་རྗེས་སུ་ཡེ་ཤུས་“ད་མིའི་རིགས་ཀྱི་བུ་ཡི་གཟི་བརྗིད་མངོན་པར་འགྱུར་ཞིང་དཀོན་མཆོག་ཀྱང་ཁོང་བརྒྱུད་ནས་གཟི་བརྗིད་དང་ལྡན་པར་འགྱུར།
JOH 13:32 དཀོན་མཆོག་གི་གཟི་བརྗིད་ཁོང་བརྒྱུད་ནས་མངོན་པར་གྱུར་ན། དཀོན་མཆོག་གིས་རང་བརྒྱུད་ནས་མིའི་རིགས་ཀྱི་བུའི་གཟི་བརྗིད་མྱུར་དུ་མངོན་པར་མཛད།
JOH 13:33 ཕྲུ་གུ་རྣམས། ང་ད་དུང་ཁྱོད་ཚོ་དང་མཉམ་དུ་དུས་ཐུང་ངུ་ཞིག་ཡོད། ཁྱོད་ཚོས་ང་བཙལ་ཡང༌། སྔར་ངས་ཡ་ཧུ་དཱ་པ་རྣམས་ལ་བཤད་པ་བཞིན་དུ་ད་ཁྱོད་ཚོར་ཡང་ཟེར་རྒྱུར། ང་གང་དུ་འགྲོ་བའི་གནས་སུ་ཁྱོད་ཚོ་ཡོང་མི་སྲིད།
JOH 13:34 ངས་ཁྱོད་རྣམས་ལ་བཀའ་གསར་པ་ཞིག་སྦྱིན། དེ་ནི་ཁྱོད་ཚོས་ཕན་ཚུན་བྱམས་པོ་བྱོས་ཤིག ངས་ཁྱོད་རྣམས་ལ་བྱམས་པ་ལྟར་ཁྱོད་རྣམས་ཀྱང་གཅིག་གིས་གཅིག་ལ་བྱམས་པར་ཟུངས་ཤིག
JOH 13:35 ཁྱོད་རྣམས་གཅིག་གིས་གཅིག་ལ་བྱམས་པར་བཟུང་ན་མི་ཐམས་ཅད་ཀྱིས་ཁྱོད་ངའི་ཉེ་གནས་ཡིན་པ་ཤེས་པར་འགྱུར་”ཞེས་གསུངས།
JOH 13:36 སི་མོན་པེ་ཏྲོས་“གཙོ་བོ་ལགས། ཁྱེད་གང་དུ་ཕེབས་ཀྱི་ཡིན་”ཞེས་ཟེར་བ་དང་ལན་དུ་ཡེ་ཤུས་“ང་གང་དུ་འགྲོ་བའི་གནས་སུ་ཁྱོད་ད་ལྟ་ངའི་རྗེས་སུ་འབྲང་མི་ཐུབ་ཀྱང༌། རྗེས་མ་འབྲང་བར་འགྱུར་”ཞེས་གསུངས།
JOH 13:37 པེ་ཏྲོས་ཁོང་ལ་“གཙོ་བོ་ལགས། ཅིའི་ཕྱིར་ང་ད་ལྟ་ཁྱེད་ཀྱི་རྗེས་སུ་འབྲང་བར་མི་ཐུབ། ཁྱེད་ཀྱི་དོན་དུ་ངའི་རང་སྲོག་བློས་གཏོང་བའི་སེམས་ཡོད་”ཅེས་བཤད།
JOH 13:38 ཡེ་ཤུས་“ཁྱོད་ཀྱིས་ངའི་དོན་དུ་སྲོག་བློས་གཏོང་བའི་སེམས་དངོས་གནས་ཡོད་དམ། ངས་ཁྱོད་ལ་བདེན་པ་བདེན་པར་ཟེར་རྒྱུར། ཁྱོད་ཀྱིས་བྱ་ཕོས་སྐད་མ་རྒྱག་པའི་སྔོན་ལ་ང་རང་སུ་ཡིན་མི་ཤེས་ཞེས་ལན་གསུམ་བཤད་པར་འགྱུར་”ཞེས་གསུངས་སོ། །
JOH 14:1 ཡེ་ཤུས་ཉེ་གནས་རྣམས་ལ་“ཁྱེད་ཚོའི་སེམས་འཁྲུག་པར་མ་འགྱུར། དཀོན་མཆོག་ལ་དད་པ་བྱོས་ལ་ང་ལ་ཡང་དད་པ་བྱོས།
JOH 14:2 ངའི་ཡབ་ཀྱི་ཕོ་བྲང་ལ་གནས་ཁང་མང་པོ་ཡོད། དེ་ལྟར་མ་ཡིན་ན་ངས་ཁྱེད་རྣམས་ལ་སྔ་མ་ནས་བཤད་ཡོད། ང་ཁྱེད་ཚོའི་དོན་དུ་གནས་གྲ་སྒྲིག་བྱེད་དུ་འགྲོ
JOH 14:3 ང་སོང་ནས་ཁྱེད་ཚོའི་དོན་དུ་གནས་གྲ་སྒྲིག་བྱས་རྗེས། ང་ཕྱིར་ལོག་སྟེ་ཁྱེད་ཚོ་ངའི་རྩར་འདྲེན་པར་བྱ། དེ་ནས་ང་རང་གང་དུ་ཡོད་པ་དེར་ཁྱེད་ཚོའང་ཡོད་པར་འགྱུར།
JOH 14:4 ང་རང་འགྲོ་རྒྱུ་ཡིན་པའི་ལམ་དེ་ཁྱེད་ཚོས་ཤེས་”ཞེས་གསུངས་པ་དང༌།
JOH 14:5 ཐོ་མཱས་ཁོང་ལ་“གཙོ་བོ་ལགས། ཁྱེད་རང་གང་དུ་ཕེབས་པ་ང་ཚོས་མི་ཤེས་ཏེ་ལམ་དེ་ཇི་ལྟར་ཤེས་”ཞེས་ཞུས།
JOH 14:6 ལན་དུ་ཡེ་ཤུས་“ང་ནི་ལམ་དང༌། བདེན་པ་ཉིད། དཔག་ཏུ་མེད་པའི་ཚེའང་ཡིན། ང་མ་བརྒྱུད་པར་སུ་ཡང་ཡབ་ཀྱི་དྲུང་དུ་འགྲོ་བའི་ལམ་མེད་དོ།
JOH 14:7 ཁྱེད་ཚོས་ང་ངོ་ཤེས་ཡོད་ན། ངའི་ཡབ་ཀྱང་ངོ་ཤེས་ཡོད། ད་ནས་བཟུང་ཁྱེད་ཚོས་ཁོང་ངོ་ཤེས་པ་དང་མཐོང་མྱོང་ཡོད་དོ་”ཞེས་གསུངས་པ་དང༌།
JOH 14:8 ཕི་ལིབ་ཀྱིས་“གཙོ་བོ་ལགས། ཡབ་དེ་ང་ཚོ་ལ་སྟོན་པར་མཛོད་དང༌། ཚིམ་པར་འགྱུར་”ཞེས་བཤད།
JOH 14:9 ཡེ་ཤུས་“ཕི་ལིབ། ང་རང་ཁྱོད་ཚོ་དང་མཉམ་དུ་ཡུན་རིང་པོར་བསྡད་ཀྱང༌། ཁྱོད་ཀྱིས་ད་དུང་ང་སུ་ཡིན་པ་མི་ཤེས་སམ། ང་མཐོང་མཁན་དེས་ཡབ་མཐོང་བས། ཁྱོད་ཀྱིས་ཅིའི་ཕྱིར་ཡབ་དེ་ང་ཚོ་ལ་སྟོན་པར་མཛོད་ཅེས་ཟེར།
JOH 14:10 ཁྱོད་ཀྱིས་ང་ཡབ་ཀྱི་ནང་ན་ཡོད་པ་དང་ཡབ་ངའི་ནང་ན་ཡོད་པར་དད་པ་མི་བྱེད་དམ། ངས་ཁྱོད་ཚོར་བཤད་པའི་གཏམ་དེ་རྣམས་ང་རང་རང་ཐོག་ནས་མ་བཤད་དེ། ཡབ་ངའི་ནང་དུ་གནས་པ་དེས་རང་གི་ལས་རྣམས་མཛད།
JOH 14:11 ང་ཡབ་ཀྱི་ནང་ན་ཡོད་པ་དང་ཡབ་ངའི་ནང་ན་ཡོད་པར་ཡིད་ཆེས་ཤིག དེ་མ་བྱས་ནའང་ངས་བྱས་པའི་འཕྲིན་ལས་ཉིད་ཀྱི་ཕྱིར་ཡིད་ཆེས་བྱོས།
JOH 14:12 ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། ང་ལ་དད་པ་བྱེད་མཁན་དེས་ངས་གང་བྱས་པ་བཞིན་དུ་བྱེད་པ་མ་ཟད། དེ་ལས་ཆེ་བའི་འཕྲིན་ལས་ཀྱང་བྱེད་པར་འགྱུར། ཅི་ལགས་ཟེར་ན། ང་ཡབ་ཀྱི་དྲུང་དུ་འགྲོ་བའི་ཕྱིར་རོ།
JOH 14:13 ཡང་ཡབ་ཀྱི་གཟི་བརྗིད་ནི་སྲས་བརྒྱུད་ནས་མངོན་པར་འགྱུར་བའི་ཕྱིར། ཁྱེད་ཚོས་ངའི་མིང་ལ་བརྟེན་ནས་གང་ཞིག་ཞུས་ཀྱང་ངས་དེ་བཞིན་དུ་སྒྲུབ་པར་བྱ།
JOH 14:14 ཁྱེད་ཚོས་ངའི་མིང་ཐོག་ནས་དོན་གང་ཞིག་ཞུས་ནའང་ངས་དེ་ལྟར་བྱ།”
JOH 14:15 “གལ་ཏེ་ཁྱེད་ཚོས་ང་ལ་བྱམས་པར་བཟུང་ན་ངའི་བཀའ་རྣམས་སྲུང་བར་འགྱུར།
JOH 14:16 ངས་ཡབ་ལ་ཞུས་པ་དང་ཁོང་གིས་ཁྱེད་ཚོར་རོགས་པ་གནང་མཁན་གཞན་པ་ཞིག་གནང་བར་འགྱུར། ཁོང་ནི་དུས་རྒྱུན་དུ་ཁྱེད་ཚོ་དང་མཉམ་དུ་གནས་པར་འགྱུར་རོ།
JOH 14:17 ཁོང་ནི་དཀོན་མཆོག་གི་བདེན་པ་མངོན་པར་མཛད་མཁན་ཡིན་པའི་ཐུགས་ཉིད་ཡིན། དད་པ་མེད་པ་རྣམས་ཀྱི་སེམས་ནང་ཁོང་བསུ་བར་མི་སྲིད། ཅི་ལགས་ཟེར་ན། ཁོ་ཚོས་ཁོང་མི་མཐོང་ཞིང་ངོ་མི་ཤེས། འོན་ཀྱང་ཁོང་ནི་ཁྱེད་ཚོའི་སེམས་ནང་ཡོད་པ་དང་དེར་གནས་རྒྱུ་ཡིན་པས་ཁྱེད་ཚོས་ཁོང་ངོ་ཤེས།
JOH 14:18 ངས་ཁྱེད་ཚོ་དྭ་ཕྲུག་ལྟར་མི་འཇོག་པར་ཁྱེད་ཚོའི་རྩར་ཕྱིར་ལོག་ངེས་ཡིན།
JOH 14:19 ད་དུང་ཅུང་ཟད་ཅིག་སོང་ནས་འཇིག་རྟེན་གྱི་མི་ཚོས་ང་མི་མཐོང༌། འོན་ཀྱང་ཁྱོད་ཚོས་ང་མཐོང་བར་འགྱུར། གང་ལགས་ཟེར་ན། ང་ཤི་ནས་ཡང་བསྐྱར་འཚོ་བས་ཁྱེད་ཚོའང་འཚོ་བར་འགྱུར།
JOH 14:20 དེའི་ཉིན་མོར་ཁྱེད་ཚོས་ང་ཡབ་ཀྱི་ནང་ན་ཡོད་པ་དང༌། ཁྱེད་ཚོ་ངའི་ནང་ན་ཡོད་པ་དང༌། ང་ཁྱེད་རྣམས་ཀྱི་ནང་དུ་ཡོད་པར་ཤེས་པར་འགྱུར།
JOH 14:21 ངའི་བཀའ་རྣམས་ཤེས་ཏེ་སྲུང་བ་དེ་ནི་ང་ལ་བྱམས་པར་འཛིན་མཁན་ཡིན། ཡང་ང་ལ་བྱམས་པར་འཛིན་མཁན་དེ་ནི་ངའི་ཡབ་ཀྱིས་ཀྱང་བྱམས་པར་འཛིན་པར་འགྱུར། ངས་ཀྱང་མི་དེར་བྱམས་པར་འཛིན་ཏེ། ང་རང་ཁོ་ལ་མངོན་པར་བྱའོ་”ཞེས་གསུངས།
JOH 14:22 དེར་ཡུ་དཱ་དབྱི་སི་ཀར་རེ་མ་ཡིན་པའི་ཡུ་དཱ་ཡིས་ཁོང་ལ་“གཙོ་བོ་ལགས། ཁྱེད་ཀྱིས་ཁྱེད་རང་འཇིག་རྟེན་གྱི་མི་ཚོར་མངོན་དུ་མི་མཛད་པར་ང་ཚོར་མངོན་དུ་མཛད་པ་དེ་ཅི་ལ་སྲིད་”ཅེས་ཞུས།
JOH 14:23 ལན་དུ་ཡེ་ཤུས་“ང་ལ་བྱམས་པར་འཛིན་མཁན་གྱིས་ངའི་བཀའ་ལ་སྲུང་སྟེ། ངའི་ཡབ་ཀྱིས་མི་དེར་བྱམས་པར་མཛད་རྒྱུ་ཡིན་པས། ང་དང་ངའི་ཡབ་ཁོའི་རྩར་ཕེབས་ནས་ཁོ་དང་མཉམ་དུ་གནས་པར་འགྱུར།
JOH 14:24 ཡང་ང་ལ་བྱམས་པར་མི་འཛིན་མཁན་གྱིས་ངའི་བཀའ་ལ་མི་ཉན། ཁྱེད་ཚོས་ཐོས་པའི་བཀའ་དེ་ང་རང་ནས་མ་ཡིན་པར། ང་མངགས་མཁན་ཏེ་ཡབ་དཀོན་མཆོག་ནས་ཡིན།
JOH 14:25 ང་ཁྱེད་ཚོ་དང་མཉམ་དུ་ཡོད་དུས་གཏམ་དེ་བཤད་པ་ཡིན།
JOH 14:26 ངའི་ཡབ་ཀྱིས་ངའི་མིང་ཐོག་ནས་མངག་རྒྱུ་ཡིན་ཞིང་རོགས་པ་གནང་མཁན་དཀོན་མཆོག་གི་དམ་པའི་ཐུགས་ཉིད་ཀྱིས་ཁྱེད་ཚོར་དོན་ཐམས་ཅད་བསླབ་ཅིང་ངས་བཤད་པ་ཐམས་ཅད་དྲན་སྐུལ་གནང་ཡོང༌།
JOH 14:27 ངས་ཁྱེད་ཚོ་ཞི་བདེ་གནས་པར་བྱེད། ངའི་ཞི་བདེ་ཁྱེད་ཚོར་སྦྱིན། ངས་ཞི་བདེ་སྦྱིན་ཚུལ་ནི་འཇིག་རྟེན་གྱིས་ཞི་བདེ་སྟེར་ཚུལ་དང་མི་འདྲ་བས། ཁྱེད་ཚོའི་སེམས་མ་འཁྲུགས་ཤིང་མ་འཇིགས་ཤིག
JOH 14:28 ངས་ཁྱེད་ཚོར་ང་འགྲོ་ན་ཡང་ཁྱེད་ཚོའི་རྩར་ཕྱིར་ལོག་ངེས་ཡིན་ཞེས་བཤད་པ་ཁྱེད་ཀྱིས་ཐོས། ཁྱེད་ཚོས་ང་ལ་བརྩེ་དུང་ཡོད་ན། ང་ཡབ་ཀྱི་དྲུང་དུ་འགྲོ་བར་སེམས་དགའ་བར་འགྱུར་བ་ཡིན། ཅི་ལགས་ཟེར་ན། ང་ལས་ཡབ་རླབས་ཆེ་བ་ཡིན།
JOH 14:29 ད་དེ་བཞིན་དུ་མ་བྱུང་བའི་སྔོན་ལ་ཁྱེད་ཚོར་བཤད་པ་ཡིན། དེའི་ཕྱིར་དེ་བཞིན་དུ་འབྱུང་བའི་ཚེ་ཁྱེད་ཚོས་དད་པ་བྱེད་པར་བྱ།
JOH 14:30 ད་ཕྱིན་ཆད་ངས་ཁྱེད་ཚོ་ལ་གཏམ་མང་པོ་མི་བྱེད། འཇིག་རྟེན་འདིའི་དབང་སྒྱུར་མཁན་ཡོང་བཞིན་པ་དང་ངའི་ཐོག་ཁོ་ལ་དབང་ཅི་ཡང་མེད།
JOH 14:31 འོན་ཀྱང་འཇིག་རྟེན་གྱིས་ངས་ཡབ་ལ་བྱམས་པ་ཤེས་པའི་ཕྱིར། ངས་ཡབ་ཀྱིས་ང་ལ་བཀའ་གནང་བ་ཇི་བཞིན་སྒྲུབ། ད་ལོངས་ལ་ང་ཚོ་འདི་ནས་ཕར་འགྲོ་”ཞེས་གསུངས་སོ། །
JOH 15:1 དེ་ནས་ཡེ་ཤུས་ཉེ་གནས་ཚོར་“ང་ནི་བདེན་པའི་རྒུན་འབྲུམ་ཤིང་ཡིན་ཞིང༌། ངའི་ཡབ་ནི་རྒུན་ཤིང་ལྡུམ་ར་གསོ་སྐྱོང་གནང་མཁན་ཡིན།
JOH 15:2 ཁོང་གིས་ངའི་ནང་ན་འབྲས་བུ་མ་སྐྱེས་པའི་ཡལ་ག་རེ་བཅད་ནས་དབྱུག་ཅིང༌། ངའི་ནང་ན་འབྲས་བུ་སྐྱེས་པའི་ཡལ་ག་རེ་རེར་འབྲས་བུ་འཕེལ་བའི་ཕྱིར་དེ་ཤིང་བཅོས་མཛད།
JOH 15:3 ངས་ཁྱེད་ཚོར་བཤད་པའི་བཀའ་དེས་ཁྱེད་ཚོ་དག་པར་བྱས་ཟིན།
JOH 15:4 ང་ཁྱེད་རྣམས་ཀྱི་ནང་ན་གནས་པ་ལྟར་ཁྱེད་རྣམས་ངའི་ནང་ན་གནས་ཤིག ཡལ་ག་ནི་རྒུན་འབྲུམ་ཤིང་ལ་མི་གནས་ན་རང་བཞིན་གྱིས་འབྲས་བུ་མི་སྐྱེ་བ་ལྟར། ཁྱེད་ཚོའང་ངའི་ནང་དུ་མི་གནས་ན་འབྲས་བུ་ཆགས་པར་མི་སྲིད།
JOH 15:5 ང་ནི་རྒུན་འབྲུམ་ཤིང་ཡིན་ཏེ་ཁྱེད་ཚོ་ཡལ་ག་ཡིན། སུ་ཡང་ངའི་ནང་དུ་གནས་ཏེ་ང་ཡང་ཁོའི་ནང་དུ་གནས་ན། དེ་ལ་འབྲས་བུ་མང་པོ་སྐྱེ། ང་དང་བྲལ་ན་ཁྱེད་ཚོས་ཅི་ཡང་བྱེད་མི་ཐུབ་པའི་ཕྱིར་རོ།
JOH 15:6 ངའི་ནང་ན་མི་གནས་པ་དེ་ནི་ཕྱི་རུ་འཕངས་པའི་ཡལ་ག་ལྟར་སྐམ་པོར་འགྱུར། ཡལ་ག་དེ་ཚོ་བསྡུས་ནས་མེ་ལ་བཏབ་སྟེ་འཚིག
JOH 15:7 གལ་ཏེ་ཁྱེད་ཚོ་ངའི་ནང་ན་གནས་པ་དང༌། ངས་བཤད་པའི་བཀའ་ཡང་ཁྱེད་ཀྱི་ནང་དུ་གནས་ན། ཁྱེད་ཀྱིས་གང་འདོད་པ་དེ་ཞུས་ནས་འགྲུབ་པར་འགྱུར།
JOH 15:8 ཁྱེད་ཚོར་འབྲས་བུ་མང་པོ་སྐྱེས་ན་ཁྱེད་ནི་ངའི་ཉེ་གནས་དངོས་ཡིན་པ་དང༌། དེའི་སྒོ་ནས་ངའི་ཡབ་ཀྱི་གཟི་བརྗིད་མངོན་པར་འགྱུར།
JOH 15:9 ཡབ་ཀྱིས་ང་ལ་བྱམས་པར་མཛད་པ་ལྟར་ངས་ཀྱང་ཁྱེད་ཚོ་ལ་བྱམས་པར་བྱས། ཁྱེད་ཚོ་ངའི་བྱམས་པའི་ནང་གནས་པར་གྱིས་ཤིག
JOH 15:10 ངས་ཡབ་ཀྱི་བཀའ་རྣམས་བསྲུངས་ཡོད་པ་དང༌། ཁོང་གི་བྱམས་པའི་ནང་གནས་པ་ལྟར། ཁྱེད་ཀྱིས་ཀྱང་ངའི་བཀའ་རྣམས་བསྲུངས་ན་ངའི་བྱམས་པའི་ནང་གནས་པར་འགྱུར།”
JOH 15:11 “ངས་ཁྱེད་ཚོ་ལ་བཤད་པ་འདི་རྣམས་ནི་ངའི་དགའ་སྤྲོ་ཁྱེད་ཚོའི་སེམས་ལ་གནས་པ་དང་ཁྱེད་ཀྱི་དགའ་སྤྲོ་ཁེངས་པའི་ཕྱིར་རོ།
JOH 15:12 ངས་ཁྱེད་ཚོ་ལ་བྱམས་པ་བྱས་པ་ལྟར། ཁྱེད་ཚོས་ཀྱང་ཕན་ཚུན་བྱམས་པར་གྱིས་ཤིག་ཅེས་པ་དེ་ནི་ངའི་བཀའ་ཡིན་ནོ།
JOH 15:13 མི་ཞིག་གིས་རང་གི་གྲོགས་པོའི་དོན་དུ་རང་སྲོག་བཏང་ན་དེ་ནི་བྱམས་པ་རབ་ཡིན།
JOH 15:14 ཡང་ཁྱེད་ཚོས་ངའི་བཀའ་བཞིན་དུ་བསྒྲུབས་ན་ངའི་གྲོགས་པོ་ཡིན།
JOH 15:15 ད་ནས་བཟུང་ངས་ཁྱེད་ཚོ་ལ་གཡོག་པོ་ཞེས་མི་ཟེར། རྒྱུ་མཚན་ནི་དཔོན་པོས་ཅི་བྱེད་པ་གཡོག་པོས་མི་ཤེས། ངས་ཡབ་ལས་གང་ཐོས་པ་ཐམས་ཅད་ཁྱེད་ཚོ་ལ་བཤད་པས་ཁྱེད་ཚོ་ལ་གྲོགས་པོ་ཞེས་ཟེར།
JOH 15:16 ཁྱེད་ཚོས་ང་མ་བདམས། ངས་ཁྱེད་ཚོ་བདམས་ཏེ་བསྐོས་པ་ཡིན་པས། ཁྱེད་ཚོ་སོང་ནས་འབྲས་བུ་སྐྱེ་བ་སྟེ། འབྲས་བུ་དེ་རྟག་ཏུ་གནས་པའི་ཕྱིར་རོ། དེ་ནས་ངའི་མིང་ཐོག་ནས་ཡབ་ལ་གང་ཞུས་པ་དེ་ཁྱེད་ཚོ་ལ་གནང་བར་འགྱུར།
JOH 15:17 ཁྱེད་ཚོས་ཕན་ཚུན་བྱམས་པར་གྱིས་ཤིག འདི་ནི་ངའི་བཀའ་ཡིན་ནོ་”ཞེས་གསུངས།
JOH 15:18 ཡང་ཡེ་ཤུས་“གལ་ཏེ་འཇིག་རྟེན་གྱི་མི་ཚོས་ཁྱེད་ཚོ་ལ་སྡང་ན། ཁྱེད་ཚོའི་སྔོན་དུ་ང་ལ་སྡང་བ་ཡིན་པ་ཤེས་དགོས།
JOH 15:19 གལ་ཏེ་ཁྱེད་ཚོ་འཇིག་རྟེན་ལ་གཏོགས་ན། འཇིག་རྟེན་གྱིས་རང་གི་ཡིན་པ་དེ་ལ་གཅེས། འོན་ཀྱང་ངས་ཁྱེད་ཚོ་འཇིག་རྟེན་གྱི་ནང་ནས་བདམས་པས། ཁྱེད་ཚོ་འཇིག་རྟེན་འདིར་མ་གཏོགས། དེའི་ཕྱིར་འཇིག་རྟེན་གྱིས་ཁྱེད་ཚོ་ལ་སྡང༌།
JOH 15:20 སྔར་ངས་ཁྱེད་ཚོར་གཡོག་པོ་ནི་དཔོན་པོ་ལས་གལ་ཆེ་བ་མ་ཡིན་ཞེས་བཤད་པ་དེ་དྲན་པར་གྱིས་ཤིག གལ་སྲིད་ཁོ་ཚོས་ང་ལ་གནོད་འཚེ་བྱས་ན། ཁྱེད་ཚོ་ལ་ཡང་གནོད་འཚེ་བྱེད་པར་འགྱུར། ངས་བཤད་པའི་བཀའ་བསྲུངས་པ་ཡིན་ན། ཁྱེད་ཚོའི་གཏམ་ཡང་བསྲུང་བར་འགྱུར།
JOH 15:21 ཁོ་ཚོས་ང་མངགས་མཁན་དེ་ངོ་མི་ཤེས་པས། ཁྱེད་ཚོ་ང་ལ་གཏོགས་པའི་རྐྱེན་གྱིས་ཁྱེད་ཚོ་ལ་དེ་ཐམས་ཅད་བྱེད་པར་འགྱུར།
JOH 15:22 གལ་ཏེ་ང་ཡོང་ནས་ཁོ་ཚོ་ལ་མ་བཤད་པ་ཡིན་ན་ཁོ་ཚོར་སྡིག་ཉེས་མེད་པ་ཡིན། འོན་ཀྱང་ད་ལྟ་ཁོ་ཚོས་ང་ཚོས་སྡིག་ཉེས་མ་བྱས་ཞེས་ཟེར་བའི་རྒྱུ་མཚན་མེད།
JOH 15:23 སུས་ཀྱང་ང་ལ་སྡང་ན་དེས་ངའི་ཡབ་ལ་ཡང་སྡང༌།
JOH 15:24 གལ་ཏེ་ངས་གཞན་སུ་ཞིག་ཀྱང་གཏན་ནས་མ་བྱས་པའི་འཕྲིན་ལས་ཁོ་ཚོའི་མདུན་དུ་མ་བྱས་པ་ཡིན་ན། ཁོ་ཚོ་ལ་སྡིག་ཉེས་མེད། འོན་ཀྱང་ད་ལྟ་ཁོ་ཚོ་ངས་གང་བྱས་པ་དེ་མཐོང་མྱོང་ཡང་ཁོ་ཚོས་ང་དང་ངའི་ཡབ་གཉིས་ལ་སྡང༌།
JOH 15:25 འོན་ཀྱང་དེ་ནི་གསུང་རབ་ནང་ཁོ་ཚོས་དོན་མེད་དུ་ང་རང་ལ་སྡང་ཞེས་པའི་བཀའ་དེ་འགྲུབ་པའི་ཕྱིར་རོ།
JOH 15:26 ངས་ཁྱེད་ཚོ་ལ་ཡབ་ཀྱི་དྲུང་ནས་རོགས་པ་གནང་མཁན་ཟེར་བ་གཏོང་བར་བྱ། ཁོང་ནི་ཡབ་ནས་འབྱུང་བའི་དཀོན་མཆོག་གི་བདེན་པ་མངོན་པར་མཛད་མཁན་ཏེ་དམ་པའི་ཐུགས་ཉིད་ཡིན། ཁོང་གིས་ངའི་སྐོར་ལ་དཔང་པོ་མཛད་པར་འགྱུར་བ་དང༌།
JOH 15:27 ཁྱེད་ཚོའང་ཐོག་མ་ནས་ང་དང་མཉམ་དུ་ཡོད་པ་ཡིན་པས། ངའི་སྐོར་ལ་དཔང་པོ་བྱེད་པར་འགྱུར་རོ་”ཞེས་གསུངས་སོ། །
JOH 16:1 ཡང་ཡེ་ཤུས་“དོན་དེ་ཐམས་ཅད་ངས་ཁྱེད་ཚོའི་དད་པ་མི་ཉམས་པའི་ཕྱིར་བཤད།
JOH 16:2 ཁོ་ཚོས་ཁྱེད་རྣམས་འདུ་ཁང་ནས་འབུད་པ་མ་ཟད། སུས་ཁྱེད་ཚོ་གསོད་པ་དེ་ཚོས་དཀོན་མཆོག་ལ་བསྙེན་བཀུར་གྱི་ལས་བྱེད་པར་བསམ་པའི་དུས་ལ་འབབ་ཡོང༌།
JOH 16:3 ཁོ་ཚོས་ངའི་ཡབ་ཀྱང་ངོ་མ་ཤེས། ང་ཡང་ངོ་མ་ཤེས་པས། ཁྱེད་ཚོ་ལ་དོན་དེ་བཞིན་དུ་བྱེད་པར་འགྱུར།
JOH 16:4 དུས་ལ་འབབ་པའི་ཚེ་ཁྱེད་ཚོས་དོན་དེ་ཚོ་དྲན་པའི་ཕྱིར་ངས་ཁྱེད་ཚོ་ལ་བཤད་པ་ཡིན། ཐོག་མ་ནས་ངས་ཁྱེད་ཚོ་ལ་གཏམ་དེ་མ་བཤད་པ་དེ་ནི་ང་ཁྱེད་ཚོ་དང་མཉམ་དུ་ཡོད་པའི་ཕྱིར་རོ།
JOH 16:5 ད་ང་ནི་ང་མངགས་མཁན་གྱི་དྲུང་དུ་འགྲོ་ན་ཡང༌། ཁྱེད་ཚོ་སུས་ཀྱང་ང་ལ་གང་དུ་འགྲོ་ཞེས་མི་འདྲི།
JOH 16:6 ངས་དོན་འདི་ཚོ་བཤད་པས་ཁྱེད་ཚོའི་སེམས་མྱ་ངན་གྱིས་གདུངས།
JOH 16:7 འོན་ཀྱང་ངས་ཁྱེད་ཚོ་ལ་བདེན་པར་ཟེར་རྒྱུར། ང་ཕར་འགྲོ་བ་དེ་ཁྱེད་ཚོ་ལ་ཕན་པའི་ཕྱིར་ཡིན། གང་ཡིན་ཞེ་ན། གལ་ཏེ་ང་ཕར་མ་སོང་ན། རོགས་པ་གནང་མཁན་ཞེས་པ་དེ་ཁྱེད་ཚོའི་རྩར་མི་ཕེབས། འོན་ཀྱང་ང་སོང་ན་ཁོང་ངས་ཁྱེད་ཚོའི་རྩར་གཏོང་རྒྱུ་ཡིན།
JOH 16:8 ཡང་ཁོང་ཕེབས་སྐབས་སྡིག་པ་དང༌། དྲང་བདེན་དང༌། ཁྲིམས་གཅོད་པ་གསུམ་གྱི་སྐོར་ལ་འཇིག་རྟེན་གྱི་མི་ཚོའི་འཛིན་པའི་སྐྱོན་རྣམས་གསལ་སྟོན་གནང་བར་འགྱུར།
JOH 16:9 སྡིག་པ་ནི། མི་དེ་ཚོས་ང་ལ་དད་པ་མི་བྱེད་པའི་དོན་དང༌།
JOH 16:10 དྲང་བདེན་ནི། ང་ཡབ་ཀྱི་དྲུང་དུ་འགྲོ་བས་ད་ཕྱིན་ཆད་ཁྱེད་ཚོས་ང་མི་མཐོང་བའི་དོན་དང༌།
JOH 16:11 ཁྲིམས་གཅོད་པ་ནི། འཇིག་རྟེན་འདིའི་དབང་སྒྱུར་མཁན་ལ་ཁྲིམས་གཅོད་ཚར་བས་སོ།
JOH 16:12 ང་ལ་ད་དུང་གཏམ་བཤད་རྒྱུ་མང་པོ་ཡོད་ཀྱང༌། ད་ཁྱེད་ཚོ་བཟོད་མི་ཐུབ།
JOH 16:13 འོན་ཀྱང་དཀོན་མཆོག་གི་བདེན་པ་མངོན་པར་མཛད་མཁན་ཏེ་དམ་པའི་ཐུགས་ཉིད་འབྱོན་པའི་ཚེ། ཁོང་གིས་ཁྱེད་ཚོ་དཀོན་མཆོག་གི་བདེན་པ་ཚང་མའི་ནང་དུ་འཁྲིད་པར་འགྱུར། ཁོང་གིས་རང་ཐོག་ནས་མི་གསུང་སྟེ། ཁོང་གིས་གང་གསན་པ་དེ་གསུང་བར་འགྱུར། ཡང་མ་འོངས་པའི་དོན་རྣམས་ཁྱེད་ཚོ་ལ་གསུང་བར་འགྱུར་རོ།
JOH 16:14 ཁོང་གིས་ངའི་གཟི་བརྗིད་མངོན་པར་མཛད་པར་འགྱུར་ཏེ། ངའི་གང་ཡིན་པ་རྣམས་བླངས་ནས་ཁྱེད་ཚོར་སྟོན་པར་འགྱུར་རོ།
JOH 16:15 ཡབ་ལ་ཡོད་པ་ཐམས་ཅད་ང་རང་གི་ཡིན། དེའི་ཕྱིར་དམ་པའི་ཐུགས་ཉིད་ཀྱིས་ང་རང་གང་ཡིན་པ་ནས་བཞེས་ཏེ་ཁྱེད་ཚོ་ལ་སྟོན་པར་འགྱུར་ཞེས་ངས་བཤད་དོ།
JOH 16:16 ད་དུང་ཅུང་ཟད་ཅིག་ནས་ཁྱེད་ཚོས་ང་མི་མཐོང་བར་འགྱུར། དེ་ནས་ཡང་རིང་པོར་མ་ལོན་པར་ང་མཐོང་བར་འགྱུར་”ཞེས་གསུངས།
JOH 16:17 ཉེ་གནས་ཚོའི་ནང་ནས་ཁ་ཤས་གཅིག་གིས་གཅིག་ལ་“ཁོང་གིས་ད་དུང་ཅུང་ཟད་ཅིག་ནས་ཁྱེད་ཚོས་ང་མི་མཐོང་བར་འགྱུར། དེ་ནས་ཡང་རིང་པོར་མ་ལོན་པར་ང་མཐོང་བར་འགྱུར་ཞེས་དང༌། ང་ནི་ཡབ་ཀྱི་དྲུང་དུ་འགྲོ་བའི་ཕྱིར་རོ་ཞེས་གསུངས་པའི་དོན་དེ་ཅི་ཡིན་”ཞེས་དྲིས་པ་དང༌།
JOH 16:18 ཡང་ཁོ་ཚོས་“ཁོང་གིས་ད་དུང་ཅུང་ཟད་ཅིག་ཅེས་གསུང་བ་དེ་ཅི་ཡིན། ཁོང་གིས་གང་གསུངས་པ་དེའི་དོན་ཧ་མི་གོ་”ཞེས་བཤད།
JOH 16:19 ཡེ་ཤུས་ཉེ་གནས་ཚོས་ཁོང་རང་ལ་བཀའ་འདྲི་ཞུ་འདོད་པ་མཁྱེན་ཏེ་“ངས་ཁྱེད་ཚོ་ལ་ད་དུང་ཅུང་ཟད་ཅིག་ནས་ཁྱེད་ཚོས་ང་མི་མཐོང་བར་འགྱུར། དེ་ནས་ཡང་རིང་པོར་མ་ལོན་པར་ང་མཐོང་བར་འགྱུར་ཞེས་པའི་དོན་ཁྱེད་ཚོས་ཕན་ཚུན་ལ་གྲོས་སམ།
JOH 16:20 ངས་ཁྱེད་ཚོ་ལ་བདེན་པ་བདེན་པར་ཟེར་རྒྱུར། ཁྱེད་ཚོ་ངུ་ཞིང་མྱ་ངན་བྱེད་ཀྱང་འཇིག་རྟེན་གྱི་མི་ཚོ་དགའ་བར་འགྱུར། ཁྱེད་ཚོར་སྡུག་བསྔལ་འབྱུང་ཡང༌། ཁྱེད་ཀྱི་སྡུག་བསྔལ་དགའ་སྤྲོ་ལ་འགྱུར།
JOH 16:21 བུད་མེད་ཅིག་ནི་བུ་བཙའ་བའི་དུས་སུ་སྐྱེ་ཟུག་གིས་སྡུག་བསྔལ་འབྱུང༌། མོ་རང་གི་དུས་ཚོད་ལ་བབ་པའི་ཕྱིར་རོ། འོན་ཀྱང་དམར་འབྱར་ཞིག་སྐྱེས་ཚར་ནས། ཕྲུ་གུ་ཞིག་འཇིག་རྟེན་དུ་སྐྱེས་པ་ཡིན་པས་དགའ་སྟེ། སྡུག་བསྔལ་དེ་མི་དྲན།
JOH 16:22 དེ་བཞིན་དུ་ད་ལྟ་ཁྱེད་ཚོར་སྡུག་བསྔལ་ཡོད་ནའང༌། ང་ཁྱེད་ཚོ་དང་ཡང་བསྐྱར་ཐུག་པའི་ཚེ། ཁྱེད་ཀྱི་སེམས་དགའ་བར་འགྱུར་ཏེ། ཁྱེད་ཀྱི་དགའ་སྤྲོ་སུས་ཀྱང་འཕྲོག་པར་མི་སྲིད།
JOH 16:23 དེའི་ཉིན་མོར་ཁྱེད་ཚོས་ང་ལ་དོན་ཅི་ཡང་འདྲི་མི་ཡོང༌། ངས་ཁྱེད་ཚོར་བདེན་པ་བདེན་པར་ཟེར་རྒྱུར། ཁྱེད་ཚོས་ངའི་མིང་ཐོག་ནས་དཀོན་མཆོག་ལ་གང་ཞིག་ཞུས་ཀྱང་ཁོང་གིས་ཁྱེད་ཚོར་གནང་བར་འགྱུར།
JOH 16:24 ད་བར་ཁྱེད་ཚོས་ངའི་མིང་ཐོག་ནས་ཅི་ཡང་ཞུས་མ་མྱོང་ལ། ད་ཁྱེད་ཚོའི་དགའ་སྤྲོ་འགྲུབ་པའི་ཕྱིར་གསོལ་བ་ཐོབ་དང་འཐོབ་པར་འགྱུར་རོ།
JOH 16:25 ངས་དོན་དེ་རྣམས་ཁྱེད་ཚོ་ལ་དཔེའི་སྒོ་ནས་བཤད་ཀྱང༌། དཔེའི་སྒོ་ནས་མ་ཡིན་པར་ཡབ་ཀྱི་སྐོར་གསལ་པོར་ཤོད་པར་བྱ་བའི་དུས་ལ་འབབ་པར་འགྱུར།
JOH 16:26 དེའི་ཉིན་མོར་ཁྱེད་ཚོས་ངའི་མིང་ཐོག་ནས་ཁོང་ལ་གསོལ་བ་འདེབས་རྒྱུ་ཡིན། ངས་ཁྱེད་ཚོའི་དོན་དུ་ཡབ་ལ་གསོལ་བ་འདེབས་པར་བྱ་མི་ཟེར།
JOH 16:27 ཅི་ལགས་ཟེར་ན། ཁྱེད་ཚོས་ང་ལ་བརྩེ་བར་བཟུང་ཞིང༌། ང་དཀོན་མཆོག་ནས་བྱུང་བ་ལ་དད་པ་བྱས་མྱོང་བས་ཡབ་ཉིད་ཀྱིས་ཀྱང་ཁྱེད་ཚོ་ལ་བྱམས།
JOH 16:28 ང་ཡབ་ནས་བྱུང་སྟེ་འཇིག་རྟེན་ལ་ཡོང་བ་ལྟར། ད་འཇིག་རྟེན་དང་ཁ་བྲལ་ནས་ཡབ་ཀྱི་དྲུང་དུ་འགྲོ་”ཞེས་གསུངས།
JOH 16:29 ཁོང་གི་ཉེ་གནས་རྣམས་ཀྱིས་“ད་ནི་ཁྱེད་ཀྱིས་དཔེའི་སྒོ་ནས་མི་གསུང་བར་གསལ་པོར་གསུང༌།
JOH 16:30 ད་ང་ཚོས་ཁྱེད་ཀྱིས་དོན་ཚང་མ་མཁྱེན་པ་ཤེས་པས་སུས་ཀྱང་ཁྱེད་ལ་བཀའ་དྲི་ཞུ་མི་དགོས་པར་ང་ཚོས་ཤེས། དེའི་ཕྱིར་ང་ཚོས་ཁྱེད་ནི་དཀོན་མཆོག་ནས་བྱུང་བ་ཡིན་པར་ཡིད་ཆེས་བྱེད་”ཅེས་ཟེར་བ་དང༌།
JOH 16:31 ལན་དུ་ཡེ་ཤུས་“ད་ཁྱེད་ཚོས་ཡིད་ཆེས་བྱེད་དམ།
JOH 16:32 ཁྱེད་ཚོ་རང་རང་གི་གནས་སུ་སོ་སོར་འགྱེས་ཤིང་ང་གཅིག་པུར་འཇོག་པའི་དུས་ལ་འབབ་པར་འགྱུར་བ་དང༌། ད་ལྟའང་འབབ་བོ། འོན་ཀྱང་ཡབ་ནི་ང་དང་མཉམ་དུ་བཞུགས་པས་ང་ནི་གཅིག་པུར་མི་གནས།
JOH 16:33 ང་དང་འགྲོགས་པའི་སྒོ་ནས་ཁྱེད་ཚོ་ཞི་བདེར་གནས་པའི་ཕྱིར་ངས་ཁྱེད་ཚོ་ལ་དེ་ལྟར་བཤད། འཇིག་རྟེན་ནང་ལ་ཁྱེད་ཚོར་སྡུག་བསྔལ་ཡོད་ཀྱང༌། ང་འཇིག་རྟེན་ལས་རྒྱལ་བས་མ་འཇིགས་ཤིག་”ཅེས་གསུངས་སོ། །
JOH 17:1 ཡེ་ཤུས་དེ་ལྟར་གསུངས་ནས། དཀོན་མཆོག་གི་ཞིང་ཁམས་ཀྱི་ཕྱོགས་སུ་ཡར་གཟིགས་ཏེ་“ཀྱེ་ཡབ། ད་དུས་ལ་འབབ་སྟེ་སྲས་ཀྱིས་ཁྱེད་ཀྱི་གཟི་བརྗིད་མངོན་པར་བྱེད་པའི་ཕྱིར་ཁྱེད་ཀྱི་སྲས་ཀྱི་གཟི་བརྗིད་མངོན་པར་མཛོད།
JOH 17:2 རྒྱུ་མཚན་ནི་ཁྱེད་ཀྱིས་སྲས་ལ་གནང་ཡོད་པ་ཐམས་ཅད་ལ་དཔག་ཏུ་མེད་པའི་ཚེ་གནང་བའི་ཕྱིར་ཁྱེད་ཀྱིས་མི་ཐམས་ཅད་སྲས་ཀྱི་དབང་འོག་ཏུ་བཅུག
JOH 17:3 ཁྱེད་རང་བདེན་པའི་དཀོན་མཆོག་ཁོ་ན་དང༌། ཁྱེད་ཀྱི་མངགས་པ་ཡེ་ཤུ་མཱ་ཤི་ཀ་ཁོ་ཚོས་ངོ་ཤེས་པ་ནི་དཔག་ཏུ་མེད་པའི་ཚེ་ཡིན་ནོ།
JOH 17:4 ཁྱེད་ཀྱིས་ང་ལ་གནང་བའི་འཕྲིན་ལས་དེ་སྒྲུབ་པའི་སྒོ་ནས་ངས་སའི་སྟེང་ལ་ཁྱེད་ཀྱི་གཟི་བརྗིད་མངོན་པར་བྱས་པ་ཡིན།
JOH 17:5 ཀྱེ་ཡབ། འཇིག་རྟེན་མ་བཀོད་པའི་སྔོན་ལ་ང་རང་ཁྱེད་དང་མཉམ་དུ་བཞུགས་པའི་དུས་ཀྱི་གཟི་བརྗིད་དེ་ཉིད་ད་ལྟའང་ཁྱེད་ཀྱི་མདུན་དུ་ང་ལ་མངོན་པར་མཛོད།
JOH 17:6 ཁྱེད་ཀྱིས་འཇིག་རྟེན་གྱི་ནང་ནས་ང་ལ་གནང་བའི་མི་རྣམས་ལ་ངས་ཁྱེད་ཀྱི་མཚན་མངོན་པར་བྱས། དེ་ཚོ་སྔར་ནས་ཁྱེད་ཀྱི་ཡིན་ཏེ། ཁྱེད་ཀྱིས་དེ་ཚོ་ང་ལ་གནང་ནས། ཁོ་ཚོས་ཁྱེད་ཀྱི་བཀའ་བསྲུངས་ཡོད།
JOH 17:7 ད་ལྟ་ཁྱེད་ཀྱིས་ང་ལ་གང་གནང་ཡོད་པ་དེ་ཐམས་ཅད་ཁྱེད་རང་ནས་ཡིན་པ་ཁོ་ཚོས་ཤེས།
JOH 17:8 གང་ལགས་ཟེར་ན། ཁྱེད་ཀྱིས་ང་ལ་གནང་བའི་བཀའ་རྣམས་ངས་ཁོ་ཚོ་ལ་གཏད་ནས་དེ་ཚོས་དང་དུ་བླངས། ང་ནི་ཁྱེད་ནས་དངོས་སུ་བྱུང་བ་དེ་ཚོས་བདེན་པར་ཤེས་ཤིང༌། ང་ཁྱེད་ཀྱིས་མངགས་པར་ཡང་ཡིད་ཆེས་སོ།
JOH 17:9 ངས་འཇིག་རྟེན་གྱི་མིའི་དོན་དུ་གསོལ་བ་མི་འདེབས་པར་ཁྱེད་ཀྱིས་ང་ལ་གནང་བའི་མི་འདི་ཚོའི་དོན་ལ་གསོལ་བ་འདེབས། གང་ལགས་ཟེར་ན། ཁོ་ཚོ་ཁྱེད་ལ་གཏོགས་པའི་ཕྱིར་རོ།
JOH 17:10 ངའི་ཡིན་པ་ཐམས་ཅད་ཁྱེད་ཀྱི་ཡིན་པ་དང༌། ཁྱེད་ཀྱི་ཡིན་པ་ཐམས་ཅད་ངའི་ཡིན། དེ་ཚོའི་ངང་ནས་ངའི་གཟི་བརྗིད་མངོན་དུ་གྱུར་བ་ཡིན།
JOH 17:11 ད་ཕྱིན་ཆད་ང་ནི་འཇིག་རྟེན་གྱི་ནང་ལ་མེད། འོན་ཀྱང་ཁོ་ཚོ་འཇིག་རྟེན་ནང་ལ་ཡོད། ང་ནི་ཁྱེད་ཀྱི་དྲུང་དུ་ཡོང༌། ཀྱེ་ཡབ་དམ་པ་ལགས། ཁོ་ཚོ་ནི་ང་གཉིས་གཅིག་ཡིན་པ་ལྟར་ཁོ་ཚོའང་གཅིག་ཏུ་འགྱུར་བའི་ཕྱིར་ཁྱེད་ཀྱིས་ང་ལ་གནང་བའི་མཚན་གྱི་དབང་ཐོག་ནས་ཁོ་ཚོ་སྲུང་བར་མཛོད།
JOH 17:12 ང་ཁོ་ཚོ་དང་མཉམ་དུ་ཡོད་དུས་ཁྱེད་ཀྱིས་ང་ལ་གནང་བའི་མཚན་གྱི་དབང་ཐོག་ནས་ངས་ཁོ་ཚོ་བསྲུངས་ཤིང་བསྐྱངས་པ་ཡིན། གསུང་རབ་ལས་གསུངས་པ་ལྟར་འགྲུབ་པའི་ཕྱིར་སྟོར་རྒྱུ་ཡིན་པའི་མི་མ་གཏོགས་པར་དེ་ཚོའི་ནང་ནས་གཅིག་ཀྱང་མ་སྟོར།
JOH 17:13 འོན་ཀྱང་ད་ལྟ་ང་ཁྱེད་རང་གི་དྲུང་དུ་ཡོང་ཞིང་ངས་འཇིག་རྟེན་ལ་དེ་ལྟར་བཤད་པ་ནི། ཁོ་ཚོའི་སེམས་ནང་ལ་ངའི་དགའ་སྤྲོ་ཚང་བའི་ཕྱིར་རོ།
JOH 17:14 ངས་ཁོ་ཚོ་ལ་ཁྱེད་ཀྱི་བཀའ་གཏད་ཡོད། ཇི་ལྟར་ང་རང་འཇིག་རྟེན་ནས་མ་ཡིན་པ་དེ་ལྟར་ཁོ་ཚོའང་འཇིག་རྟེན་ནས་མ་ཡིན་པས། འཇིག་རྟེན་གྱིས་ཁོ་ཚོ་ལ་སྡང་བ་ཡིན།
JOH 17:15 ངས་ཁྱེད་ཀྱིས་ཁོ་ཚོ་འཇིག་རྟེན་གྱི་ནང་ནས་འཁྱེར་བར་གསོལ་བ་མི་འདེབས་པར། ཁྱེད་ཀྱིས་སྡིག་སྤྱོད་མཁན་ཞེས་བྱ་བ་ལས་སྲུང་བར་གསོལ་བ་འདེབས་སོ།
JOH 17:16 ང་རང་འཇིག་རྟེན་ནས་མ་ཡིན་པ་ལྟར་ཁོ་ཚོའང་འཇིག་རྟེན་ནས་མ་ཡིན་ནོ།
JOH 17:17 བདེན་པ་ཉིད་ཀྱི་ངང་ནས་ཁོ་ཚོ་དམ་པར་མཛོད། ཁྱེད་ཀྱི་བཀའ་ནི་བདེན་པ་ཉིད་ཡིན་ནོ།
JOH 17:18 ཇི་ལྟར་ཁྱེད་ཀྱིས་ང་རང་འཇིག་རྟེན་དུ་མངགས་པ་ལྟར་ངས་ཁོ་ཚོ་འཇིག་རྟེན་དུ་བཏང་ཡོད།
JOH 17:19 ཡང་ཁོ་ཚོ་བདེན་པའི་ངང་ནས་དམ་པར་འགྱུར་བའི་ཕྱིར་ངས་རང་ཉིད་དམ་པ་ཆགས་པར་བྱེད།
JOH 17:20 ངས་ཁོ་ཚོ་ཁོ་ནའི་དོན་དུ་མ་ཟད། ཁོ་ཚོས་ཆོས་བསྟན་པའི་སྒོ་ནས་ང་ལ་དད་པར་འགྱུར་བ་རྣམས་ཀྱི་དོན་དུ་ཡང་གསོལ་བ་འདེབས།
JOH 17:21 དེ་ནི་ཁོ་ཚོ་ཐམས་ཅད་གཅིག་ཏུ་འགྱུར་བའི་ཕྱིར་རོ། ཇི་ལྟར་ཡབ་ཁྱེད་ནི་ངའི་ནང་ན་བཞུགས་ཏེ། ང་ཡང་ཁྱེད་ཀྱི་ནང་ལ་ཡོད་པ་དེ་ལྟར་དེ་ཚོའང་ངེད་གཉིས་ཀྱི་ནང་ན་གཅིག་ཏུ་འགྱུར་བར་ཞུ། དེ་ནས་འཇིག་རྟེན་གྱི་མི་རྣམས་ཀྱིས་ང་ནི་ཁྱེད་ཀྱིས་མངགས་པ་ཡིན་པར་དད་པ་བྱེད་པར་འགྱུར།
JOH 17:22 ཡང་ཁྱེད་ཀྱིས་ང་ལ་གནང་བའི་གཟི་བརྗིད་དེ་ནི་ཁོ་ཚོ་ལ་ཡང་སྟེར་ཟིན། ངེད་གཉིས་གཅིག་ཡིན་པ་ལྟར་དེ་ཚོའང་གཅིག་ཏུ་འགྱུར་བའི་ཕྱིར་རོ།
JOH 17:23 དེའི་དོན་ནི་ང་ཁོ་ཚོའི་ནང་ན་ཡོད། ཁྱེད་ངའི་ནང་ན་ཡོད། དེ་ནི་ཁོ་ཚོ་ཡང་དག་པར་གཅིག་ཏུ་འགྱུར་བའི་ཕྱིར་རོ། དེ་ནས་འཇིག་རྟེན་གྱིས་ཁྱེད་ཀྱིས་ང་མངགས་པ་དང༌། ཁྱེད་ཀྱིས་ང་ལ་བྱམས་པ་མཛད་པ་བཞིན་དུ་ཁོ་ཚོ་ལ་ཡང་བྱམས་པར་མཛད་པ་ཤེས་པར་འགྱུར།
JOH 17:24 ཀྱེ་ཡབ། ཁྱེད་ཀྱིས་ང་ལ་གནང་བ་རྣམས་ང་གང་དུ་ཡོད་པ་དེར་ང་དང་མཉམ་དུ་ཡོད་པར་འདོད། དེ་ནི་ཁྱེད་ཀྱིས་ང་ལ་གནང་བའི་གཟི་བརྗིད་ཁོ་ཚོས་མཐོང་བར་འགྱུར་བའི་ཕྱིར་རོ། འཇིག་རྟེན་མ་བཀོད་པའི་སྔོན་ལ་ཁྱེད་ཀྱིས་ང་ལ་བྱམས་པར་མཛད་པ་ཡིན་པས་གཟི་བརྗིད་དེ་ང་ལ་གནང་བྱུང༌།
JOH 17:25 ཀྱེ། དྲང་བདེན་གྱི་ཡབ་ལགས། འཇིག་རྟེན་གྱི་མི་ཚོས་ཁྱེད་རང་ངོ་མི་ཤེས་མོད། ངས་ཁྱེད་རང་ངོ་ཤེས། མི་འདི་ཚོས་ཀྱང་ཁྱེད་ཀྱིས་ང་མངགས་པ་ཡིན་པར་ཤེས།
JOH 17:26 ཁྱེད་ཀྱིས་ང་ལ་བྱམས་པར་མཛད་པའི་བྱམས་པ་དེ་ཁོ་ཚོའི་སེམས་ལ་བཞུགས་པའི་ཆེད་དང༌། ང་རང་ཡང་ཁོ་ཚོའི་སེམས་ལ་བཞུགས་པའི་ཕྱིར། ངས་ཁྱེད་རང་གི་མཚན་ཁོ་ཚོ་ལ་མངོན་པར་བྱས་ལ། ད་དུང་ཡང་མངོན་པར་བྱ་”ཞེས་གསོལ་བ་བཏབ་བོ། །
JOH 18:1 ཡེ་ཤུས་དེ་ལྟར་གསུངས་པའི་རྗེས་སུ། ཉེ་གནས་དང་མཉམ་དུ་ཕྱི་རོལ་ལ་ཕེབས་པ་དང་ཀི་ཌ་རོན་ཟེར་བའི་གཤོང་ས་བརྒལ་ནས་གནས་དེར་ཡོད་པའི་སྐྱེད་ཚལ་ཞིག་ལ་ཕེབས།
JOH 18:2 ས་ཆ་དེར་ཡེ་ཤུ་ལན་མང་པོ་ཉེ་གནས་དང་མཉམ་དུ་འཛོམས་མྱོང་བས། ཁོང་དགྲའི་དབང་དུ་གཏོང་མཁན་ཡུ་དཱ་ལ་གནས་དེ་རྒྱུས་ཡོད་པ་ཡིན།
JOH 18:3 དེ་ནས་ཡུ་དཱ་ཡིས་དཔུང་ཚོགས་དང༌། ཕཱ་རུ་ཤི་པ་དང་ཡ་ཧུ་དཱ་པའི་བླ་ཆེན་རྣམས་ཀྱིས་བཏང་བའི་མཆོད་ཁང་གི་སྲུང་དམག་མཉམ་དུ་ཁྲིད་ནས་ལག་ཏུ་ལྒང་ཞུ་དང༌། དཔལ་འབར། མཚོན་ཆ་བཅས་ཁྱེར་ནས་དེར་སླེབས་པས།
JOH 18:4 ཡེ་ཤུས་རང་ལ་གང་འབྱུང་རྒྱུ་ཡིན་པ་ཐམས་ཅད་མཁྱེན་ཏེ། མདུན་ལ་ཕེབས་ནས་མི་དེ་ཚོར་“ཁྱེད་ཚོས་སུ་ཞིག་འཚོལ་བཞིན་ཡོད་”ཅེས་གསུངས་པ་དང༌།
JOH 18:5 ལན་དུ་མི་དེ་ཚོས་“ན་ཙ་རེལ་པ་ཡེ་ཤུ་འཚོལ་”ཞེས་ཟེར་བས་ཡེ་ཤུས་“དེ་ནི་ང་ཡིན་”ཞེས་གསུངས། ཁོང་དགྲའི་དབང་དུ་གཏོང་མཁན་ཡུ་དཱ་ཡང་ཁོ་ཚོ་དང་མཉམ་དུ་དེར་ལངས་བསྡད་ཡོད་པ་ཡིན།
JOH 18:6 ཡེ་ཤུས་ང་དེ་ཡིན་ཞེས་གསུངས་པ་ཙམ་གྱིས་ཁོ་ཚོ་ཕྱི་ནུད་བརྒྱབ་ནས་ས་ལ་འགྱེལ།
JOH 18:7 ཡེ་ཤུས་ཡང་བསྐྱར་ཁོ་ཚོར་“ཁྱེད་ཚོས་སུ་ཞིག་འཚོལ་”ཞེས་གསུངས་པས་ཁོ་ཚོས་“ན་ཙ་རེལ་པ་ཡེ་ཤུ་འཚོལ་”ཞེས་བཤད།
JOH 18:8 ཡེ་ཤུས་“ངས་དེ་ཡིན་ཞེས་བཤད་པ་ཡིན། ཁྱེད་ཚོས་ང་རང་བཙལ་ན་མི་འདི་ཚོ་འགྲོ་རུ་ཆུག་”ཅེས་གསུངས།
JOH 18:9 དེ་ནི་ཡེ་ཤུས་ཁྱེད་ཀྱིས་ང་ལ་གནང་བའི་མི་དེ་ཚོའི་ནང་ནས་གཅིག་ཀྱང་མ་བརླགས་ཤེས་སྔར་གསུངས་པ་དེ་སྒྲུབ་པའི་ཕྱིར་བྱུང་ངོ༌།
JOH 18:10 སི་མོན་པེ་ཏྲོ་ལ་རལ་གྲི་ཞིག་ཡོད་པ་དེ་བཏོན་ནས། བླ་ཆེན་གཙོ་བོའི་གཡོག་པོ་ལ་བརྒྱབ་ནས་རྣ་བ་གཡས་པ་བཅད། གཡོག་པོ་དེའི་མིང་ནི་མལ་ཀུ་ཡིན།
JOH 18:11 ཡེ་ཤུས་པེ་ཏྲོ་ལ་“རལ་གྲི་དེ་ཤུབས་སུ་ཆུག་ཅིག ཡབ་ཀྱིས་ང་ལ་གནང་བའི་ཕོར་པ་གང་པོ་དེ་ངས་མི་འཐུང་ངམ་”ཞེས་གསུངས།
JOH 18:12 དེ་ནས་དཔུང་ཚོགས་དང༌། དེ་ཚོའི་དམག་དཔོན་ཡ་ཧུ་དཱ་པའི་མཆོད་ཁང་གི་སྲུང་དམག་བཅས་ཀྱིས་ཡེ་ཤུ་འཛིན་བཟུང་བྱས་ནས་བཅིངས་ཏེ།
JOH 18:13 སྔོན་ལ་ཨ་ན་སི་ཟེར་མཁན་གྱི་དྲུང་དུ་ཁྲིད། ཁོ་ནི་ལོ་དེའི་ཡ་ཧུ་དཱ་པའི་བླ་ཆེན་གཙོ་བོ་ཀ་ཡ་ཕཱ་ཡི་ཟླ་བོའི་ཕ་ཡིན།
JOH 18:14 ཀ་ཡ་ཕཱ་ཞེས་པ་དེ་ནི་སྔར་ཡ་ཧུ་དཱ་པའི་དཔོན་རིགས་རྣམས་ལ་མི་གཅིག་མི་དམངས་ཀྱི་དོན་དུ་ཤི་ན་ལེགས་ཞེས་བསླབ་བྱ་བྱེད་མཁན་དེ་ཡིན།
JOH 18:15 དེ་ནས་སི་མོན་པེ་ཏྲོ་དང་ཉེ་གནས་གཞན་པ་ཞིག་ཡེ་ཤུའི་རྗེས་སུ་འབྲངས། ཉེ་གནས་གཞན་པ་དེ་ནི་བླ་ཆེན་གཙོ་བོའི་ངོ་ཤེས་པ་ཡིན་པས། ཡེ་ཤུ་དང་མཉམ་དུ་བླ་ཆེན་གཙོ་བོའི་སྒོ་རའི་ནང་དུ་ཕེབས།
JOH 18:16 འོན་ཀྱང་པེ་ཏྲོ་ནི་སྒོའི་འགྲམ་གྱི་ཕྱི་རོལ་ཏུ་ལངས་ཏེ་བསྡད། དེ་ནས་བླ་ཆེན་གཙོ་བོས་ངོ་ཤེས་པའི་ཉེ་གནས་གཞན་པ་དེ་ཕྱི་ལ་སོང་ནས་སྒོ་སྲུང་མཁན་གཡོག་མོ་ལ་གཏམ་བྱས་ནས་པེ་ཏྲོ་ཡང་ནང་དུ་ཁྲིད།
JOH 18:17 དེ་ནས་གཡོག་མོ་དེས་པེ་ཏྲོ་ལ་“ཁྱེད་ཀྱང་མི་དེའི་ཉེ་གནས་རྣམས་ཀྱི་ནང་ནས་གཅིག་མ་ཡིན་ནམ་”ཞེས་བཤད་པས་ལན་དུ་ཁོས་“ང་མ་ཡིན་”ཞེས་བཤད།
JOH 18:18 གནམ་གྲང་མོ་ཡིན་པས་གཡོག་པོ་རྣམས་དང་མཆོད་ཁང་གི་སྲུང་དམག་ཚོས་སོལ་བའི་མེ་བཏང་ནས་ལངས་ཏེ་མེ་ལ་བསྲོས། པེ་ཏྲོ་ཡང་དེ་ཚོ་དང་མཉམ་དུ་བསྡད་ནས་མེ་ལ་བསྲོས།
JOH 18:19 དེ་ནས་བླ་ཆེན་གཙོ་བོས་ཡེ་ཤུ་ལ་ཁོང་གི་ཉེ་གནས་དང་བསྟན་པའི་སྐོར་དྲིས་པས།
JOH 18:20 ཡེ་ཤུས་“ངས་མངོན་སུམ་དུ་འཇིག་རྟེན་ལ་བཤད་པ་ཡིན། ངས་རྟག་པར་འདུ་ཁང་དང༌། ཡ་ཧུ་དཱ་པ་ཐམས་ཅད་འཛོམས་པའི་མཆོད་ཁང་ཆེན་མོའི་སྒོ་ར་གཉིས་ལ་ཆོས་བསྟན་པ་ཡིན། ཅི་ཡང་གསང་བའི་ངང་ནས་མ་བཤད།
JOH 18:21 ང་ལ་ཅིའི་ཕྱིར་འདྲི། ངས་བཤད་པའི་གཏམ་ཐོས་པ་རྣམས་ལ་དྲིས་ཤིག ངས་གང་བཤད་པ་དེ་ཚོས་ཤེས་”ཞེས་གསུངས་པས།
JOH 18:22 དེ་རུ་ལངས་བསྡད་པའི་སྲུང་དམག་རྣམས་ཀྱི་ནང་ནས་གཅིག་གིས་ཡེ་ཤུའི་ཞལ་ལ་བཞུས་ཏེ་“ཁྱོད་ཀྱིས་བླ་ཆེན་གཙོ་བོ་ལ་ལན་འདི་ལྟར་འདེབས་སམ་”ཞེས་ཟེར།
JOH 18:23 ལན་དུ་ཡེ་ཤུས་“ངའི་བཤད་པའི་གཏམ་དེ་འོས་པ་མ་ཡིན་ན་དེ་ལ་དཔང་པོ་བྱོས་ཤིག འོས་པ་ཡིན་ན་ཁྱེད་ཀྱིས་ང་ཅིའི་ཕྱིར་བརྡུངས་”ཞེས་གསུངས།
JOH 18:24 ཡེ་ཤུ་སྔར་ནས་བཅིངས་ཡོད་དེ་ཨ་ན་སི་ཡིས་ཡེ་ཤུ་བླ་ཆེན་གཙོ་བོ་ཀ་ཡ་ཕཱའི་དྲུང་དུ་ཁྲིད་དུ་བཅུག
JOH 18:25 སི་མོན་པེ་ཏྲོ་ད་དུང་ལངས་ནས་བསྡད་དེ་མེ་ལ་སྲོ་བཞིན་ཡོད། དེའི་ཕྱིར་ཁོ་ཚོས་ཁོ་ལ་“ཁྱོད་ཀྱང་མི་དེའི་ཉེ་གནས་ལས་གཅིག་མ་ཡིན་ནམ་”ཞེས་དྲིས་པས་ཁོས་ཁས་མ་བླངས་ཏེ་“ང་རང་མིན་”ཞེས་བཤད།
JOH 18:26 བླ་ཆེན་གཙོ་བོའི་གཡོག་པོ་རྣམས་ཀྱི་ནང་ནས་གཅིག་པེ་ཏྲོས་རྣ་བ་བཅད་པ་དེའི་གཉེན་ཚན་ཡིན་པ་དེས་“ངས་ཁྱོད་སྐྱེད་ཚལ་གྱི་ནང་ལ་ཁོང་དང་མཉམ་དུ་མ་མཐོང་ངམ་”ཞེས་བཤད།
JOH 18:27 པེ་ཏྲོས་ཡང་བསྐྱར་ཁས་མ་བླངས་མ་ཐག་ཏུ་བྱ་ཕོས་སྐད་བརྒྱབ་བོ། །
JOH 18:28 དེ་ནས་ཞོགས་སྔ་པོར་ཁོ་ཚོས་ཡེ་ཤུ་ཀ་ཡ་ཕཱ་ཡི་རྩ་ནས་སྤྱི་ཁྱབ་ཀྱི་ཕོ་བྲང་དུ་ཁྲིད་དེ། མི་དེ་ཚོ་རང་ཉིད་མི་གཙང་བར་མི་འགྱུར་བའི་ཕྱིར་དང་པེ་སག་གི་ཞལ་ལག་ཟ་ཐུབ་པའི་ཆེད་དུ་ཆོས་ཀྱི་ལུགས་སྲོལ་བཞིན་ཕོ་བྲང་གི་ནང་དུ་མ་ཞུགས།
JOH 18:29 དེའི་ཕྱིར་སྤྱི་ཁྱབ་པི་ལ་ཏུ་ཕྱི་རོལ་ཏུ་སོང་ནས་“ཁྱོད་ཚོས་མི་འདི་ལ་ཉེས་སྐྱོན་ཅི་འཛུགས་”ཞེས་དྲིས་པ་དང༌།
JOH 18:30 ལན་དུ་ཁོ་ཚོས་“གལ་ཏེ་མི་འདི་ཉེས་ཅན་མ་ཡིན་ན་ངེད་ཀྱིས་ཁོ་ཁྱེད་རང་ལ་གཏད་པ་མེད་”ཅེས་བཤད།
JOH 18:31 པི་ལ་ཏུ་ཡིས་“ཁྱོད་ཚོ་རང་ཉིད་ཀྱིས་ཁོ་ཁྲིད་ནས་ཁྱོད་རང་གི་ཁྲིམས་བཞིན་དུ་ཁྲིམས་གཅོད་བྱོས་ཤིག་”ཅེས་བཤད་པ་དང༌། ཡ་ཧུ་དཱ་པའི་ཆོས་དཔོན་རྣམས་ཀྱིས་“ང་ཚོས་མི་སུ་ཡང་སྲོག་ཐོག་གཏོང་མི་ཆོག་”ཅེས་བཤད།
JOH 18:32 དེ་ནི་སྔར་ཡེ་ཤུས་འགྲོངས་ཚུལ་གང་འབྱུང་རྒྱུ་ཡོད་པའི་སྐོར་ལ་གསུངས་པའི་བཀའ་དེ་སྒྲུབ་པའི་ཕྱིར་རོ།
JOH 18:33 དེ་ནས་པི་ལ་ཏུ་ཡང་བསྐྱར་ཕོ་བྲང་གི་ནང་དུ་སོང་ནས་ཡེ་ཤུ་བོས་ནས་“ཁྱོད་ནི་ཡ་ཧུ་དཱ་པའི་རྒྱལ་པོ་ཡིན་ནམ་”ཞེས་དྲིས།
JOH 18:34 ཡེ་ཤུས་“འདི་ཁྱེད་རང་ངོ་ཐོག་ནས་འདྲི་འམ། ཡང་ན་ཁྱེད་ལ་མི་གཞན་གྱིས་ངའི་སྐོར་གཏམ་བྱས་སམ་”ཞེས་གསུངས།
JOH 18:35 ལན་དུ་པི་ལ་ཏུ་ཡིས་“ང་ཡ་ཧུ་དཱ་པ་ཡིན་ནམ། ཁྱོད་རང་གི་ཡུལ་མི་དང་བླ་ཆེན་རྣམས་ཀྱིས་ཁྱོད་ངའི་དབང་དུ་བཏང༌། ཁྱོད་ཀྱིས་ཅི་བྱས་”ཞེས་བརྗོད་པ་དང༌།
JOH 18:36 ཡེ་ཤུས་“ངའི་རྒྱལ་ཁམས་ནི་འཇིག་རྟེན་འདིའི་རྒྱལ་ཁམས་མ་ཡིན། གལ་ཏེ་ཡིན་ན། ངའི་གཡོག་པོ་རྣམས་ཀྱིས་ང་རང་ཡ་ཧུ་དཱ་པའི་ལག་ཏུ་མི་སྤྲོད་པའི་ཕྱིར་འཐབ་འཛིང་བྱེད་པ་ཡིན། འོན་ཀྱང་ད་ངའི་རྒྱལ་ཁམས་ནི་འཇིག་རྟེན་འདི་ནས་མ་ཡིན་ནོ་”ཞེས་གསུངས།
JOH 18:37 དེའི་ཕྱིར་པི་ལ་ཏུ་ཡིས་“འོ་ན་ཁྱོད་རྒྱལ་པོ་ཞིག་ཡིན་ནམ་”ཞེས་བརྗོད་པ་དང༌། ཡེ་ཤུས་“ཁྱེད་ཀྱིས་གསུངས་པ་ལྟར་ང་རྒྱལ་པོ་ཞིག་ཡིན། ང་ནི་བདེན་པ་ཉིད་ལ་དཔང་པོ་བྱེད་པའི་ཕྱིར་སྐྱེས། དེའི་དོན་དུ་ང་འཇིག་རྟེན་དུ་ཡོང༌། སུ་ཡང་བདེན་པ་ཉིད་ནས་ཡིན་པ་དེས་ངའི་བཀའ་ལ་ཉན་ནོ་”ཞེས་གསུངས།
JOH 18:38 པི་ལ་ཏུ་ཡིས་ཁོང་ལ་“བདེན་པ་ནི་ཅི་ཡིན་”ཞེས་བཤད་ནས་ཡང་ཕྱི་རོལ་ཏུ་ཡ་ཧུ་དཱ་པའི་རྩར་སོང་སྟེ་ཁོ་ཚོ་ལ་“ངས་མི་འདི་ལ་ཉེས་སྐྱོན་ཅིའང་མི་རྙེད།
JOH 18:39 འོན་ཀྱང་ཁྱོད་རྣམས་ལ་པེ་སག་གི་དུས་ཆེན་ལ་མི་གཅིག་གློད་བཀྲོལ་གཏོང་བའི་ལུགས་སྲོལ་ཞིག་ཡོད། ད་ངས་ཡ་ཧུ་དཱ་པའི་རྒྱལ་པོ་འདི་གཏོང་བ་ཁྱེད་ཚོ་འདོད་དམ་”ཞེས་དྲིས།
JOH 18:40 དེའི་ཕྱིར་ཁོ་ཚོས་སྐད་ཆེན་པོས་“མི་འདི་མ་གཏོང༌། པར་ཨབ་པཱ་གཏོང་”ཞེས་ཞུས། པར་ཨབ་པཱ་དེ་ནི་ཇག་པ་ཞིག་ཡིན་ནོ། །
JOH 19:1 དེ་ནས་པི་ལ་ཏུ་ཡིས་ཡེ་ཤུ་རྟ་ལྕག་གིས་རྡུང་དུ་བཅུག་པ་དང༌།
JOH 19:2 དམག་མི་རྣམས་ཀྱིས་ཚེར་མའི་ཅོད་པན་ཅིག་བསླས་ནས་ཁོང་གི་དབུ་ལ་བསྐོན་ཅིང༌། མདོག་རྒྱ་སྨུག་ཅན་གྱི་ན་བཟའ་ཞིག་ཁོང་ལ་བསྐོན།
JOH 19:3 ཁོ་ཚོ་ཁོང་གི་དྲུང་དུ་ཡོང་ནས་“ཡ་ཧུ་དཱ་པའི་རྒྱལ་པོ་ལ་ཕྱག་འཚལ་ལོ་”ཞེས་ཡང་ཡང་ཟེར་ཞིང་འགྲམ་ལྕག་བཞུས།
JOH 19:4 པི་ལ་ཏུ་ཡང་བསྐྱར་ཕྱི་རོལ་ཏུ་སོང་ནས་ཁོ་ཚོར་“ལྟོས་ཤིག ངས་ཁོ་ལ་ཉེས་སྐྱོན་ཅིའང་མ་རྙེད་པ་ཁྱོད་ཚོས་ཤེས་པའི་ཕྱིར་ངས་ཁོ་ཁྱོད་ཚོའི་མདུན་དུ་ཕྱི་ལ་འཁྲིད་”ཅེས་བཤད།
JOH 19:5 དེ་ནས་ཡེ་ཤུ་ཚེར་མའི་ཅོད་པན་དང་མདོག་རྒྱ་སྨུག་ཅན་གྱི་ན་བཟའ་བཞེས་ནས་ཕྱི་རོལ་ཏུ་ཕེབས་པ་དང༌། པི་ལ་ཏུ་ཡིས་ཁོ་ཚོར་“ལྟོས་ཤིག མི་དེ་འདིར་འདུག་”ཅེས་བཤད།
JOH 19:6 བླ་ཆེན་དང་མཆོད་ཁང་གི་སྲུང་དམག་ཚོས་ཁོང་མཐོང་སྐབས་སྐད་ཆེན་པོས་“རྒྱང་ཤིང་སྒང་ལ་སོད་ཅིག རྒྱང་ཤིང་སྒང་ལ་སོད་ཅིག་”ཅེས་ཟེར། པི་ལ་ཏུ་ཡིས་ཁོ་ཚོར་“ངས་ཁོ་ལ་ཉེས་སྐྱོན་ཅིའང་མ་རྙེད། ཁྱོད་ཚོས་ཁོང་བཟུང་ནས་རྒྱང་ཤིང་སྒང་ལ་སོད་”ཅེས་ཟེར།
JOH 19:7 ལན་དུ་ཡ་ཧུ་དཱ་པས་“ང་ཚོ་ལ་ཆོས་ཁྲིམས་ཤིག་ཡོད་པ་དེ་ནང་བཞིན་དུ་ཁོ་ལ་གསོད་པའི་ཉེས་ཆད་གཅོད་འོས་སོ། ཅི་ལགས་ཟེར་ན། ཁོས་ང་རང་དཀོན་མཆོག་གི་སྲས་ཡིན་ཞེས་བཤད་པའི་ཕྱིར་”ཞེས་བརྗོད།
JOH 19:8 པི་ལ་ཏུ་ཡིས་གཏམ་དེ་ཐོས་ནས་ལྷག་པར་ཡང་འཇིགས་པར་གྱུར་ཏེ།
JOH 19:9 ཡང་བསྐྱར་ཕོ་བྲང་ནང་དུ་སོང་ནས་ཡེ་ཤུ་ལ་“ཁྱོད་ག་ནས་ཡིན་”ཞེས་ཟེར། འོན་ཀྱང་ཡེ་ཤུས་ལན་ཅིའང་མ་གསུངས།
JOH 19:10 དེའི་ཕྱིར་པི་ལ་ཏུ་ཡིས་“ཁྱོད་ཀྱིས་ང་ལ་གཏམ་མི་བྱེད་དམ། ང་ལ་ཁྱོད་གློད་བཀྲོལ་གཏོང་བའི་དབང་ཆ་དང༌། ཁྱོད་རྒྱང་ཤིང་སྒང་ལ་གསོད་པའི་དབང་ཆ་ཡང་ཡོད་པ་མི་ཤེས་སམ་”ཞེས་དྲིས་པ་དང༌།
JOH 19:11 ཡེ་ཤུས་“ཁྱེད་ལ་སྟེང་ནས་ང་ལ་དབང་བྱེད་པར་གནང་བ་མ་ཡིན་ན་ཁྱེད་ལ་དབང་མེད། དེའི་ཕྱིར་ང་ཁྱེད་ལ་གཏད་མཁན་གྱི་སྡིག་ཉེས་ཁྱེད་ཀྱི་སྡིག་པ་ལས་ཆེ་”ཞེས་གསུངས།
JOH 19:12 དེ་ནས་པི་ལ་ཏུ་ཡིས་ཁོང་གློད་པའི་ཐབས་བཙལ་ཡང༌། ཡ་ཧུ་དཱ་པས་སྐད་ཆེན་པོས་“སུ་ཞིག་གིས་ང་རང་རྒྱལ་པོ་ཡིན་ཟེར་བ་དེས་རྒྱལ་པོ་ཆེན་པོ་སེ་སར་ལ་ངོ་རྒོལ་བྱེད་པས། ཁྱེད་ཀྱིས་མི་འདི་གློད་བཏང་ན་རྒྱལ་པོ་ཆེན་པོ་སེ་སར་གྱི་མཛའ་གྲོགས་མ་ཡིན་”ཞེས་ཟེར།
JOH 19:13 པི་ལ་ཏུ་ཡིས་གཏམ་དེ་ཐོས་ནས་ཡེ་ཤུ་ཕྱི་རོལ་ཏུ་ཁྲིད་ཡོང་ནས། རྡོ་གཅལ་ལ་ཡ་ཧུ་དཱ་པའི་སྐད་དུ་གབ་བ་ཐཱ་ཟེར་བའི་ས་ཆར་ཁྲིམས་དཔོན་གྱི་ཁྲི་ལ་བསྡད།
JOH 19:14 དེ་ནི་པེ་སག་དུས་ཆེན་གྱི་གྲ་སྒྲིག་གི་ཉིན་མོའི་ཉིན་གུང་ཙམ་ཡིན། པི་ལ་ཏུ་ཡིས་ཡ་ཧུ་དཱ་པ་ཚོར་“ད་ཁྱོད་ཚོའི་རྒྱལ་པོ་ལ་ལྟོས་ཤིག་”ཅེས་བཤད།
JOH 19:15 ཁོ་ཚོས་སྐད་ཆེན་པོས་“ཁོ་ཕར་ཁྲིད། ཕར་ཁྲིད། རྒྱང་ཤིང་སྒང་ལ་སོད་ཅིག་”ཅེས་ཟེར། པི་ལ་ཏུ་ཡིས་ཁོ་ཚོར་“ངས་ཁྱོད་ཚོའི་རྒྱལ་པོ་རྒྱང་ཤིང་སྒང་ལ་གསོད་པར་བྱ་འམ་”ཞེས་དྲིས་པའི་ལན་དུ་བླ་ཆེན་ཚོས་“རྒྱལ་པོ་ཆེན་པོ་སེ་སར་མ་གཏོགས་ང་ཚོར་རྒྱལ་པོ་མེད་”ཅེས་བཤད།
JOH 19:16 དེ་ནས་པི་ལ་ཏུ་ཡིས་ཁོང་རྒྱང་ཤིང་སྒང་ལ་གསོད་པའི་ཕྱིར་ཁོ་ཚོ་ལ་གཏད་ནས་ཁོ་ཚོས་ཁོང་ཕར་ཁྲིད་དོ། །
JOH 19:17 ཡེ་ཤུ་ཕྱི་རོལ་ཏུ་ཕེབས་ནས་རང་གི་རྒྱང་ཤིང་འཁུར་ཏེ་ཀ་ལི་ཞེས་པའི་གནས་ཡ་ཧུ་དཱ་པའི་སྐད་དུ་གོལ་གོ་ཐ་ཞེས་བྱ་བ་ལ་ཕེབས།
JOH 19:18 དེར་ཁོང་དང་གཞན་མི་གཉིས་གཡས་སུ་གཅིག་དང་གཡོན་དུ་གཅིག་ཡེ་ཤུ་དཀྱིལ་དུ་རྒྱང་ཤིང་སྒང་ལ་བརྒྱངས།
JOH 19:19 པི་ལ་ཏུ་ཡིས་ན་ཙ་རེལ་པ་ཡེ་ཤུ་ཡ་ཧུ་དཱ་པའི་རྒྱལ་པོ་ཞེས་པའི་བརྡ་ཁྱབ་བྲིས་ནས་རྒྱང་ཤིང་གི་ཁར་བཏགས་སུ་བཅུག
JOH 19:20 ཡི་གེ་དེ་ཡ་ཧུ་དཱ་དང་གྷི་རིག་དང་ལཱ་ཏིན་གྱི་སྐད་གསུམ་དུ་བྲིས་པ་དང༌། ཡེ་ཤུ་རྒྱང་ཤིང་ལ་བརྒྱངས་པའི་གནས་དེ་གྲོང་ཁྱེར་དང་ཐག་ཉེ་བས། ཡ་ཧུ་དཱ་པ་མང་པོས་ཡི་གེ་དེ་བཀླགས།
JOH 19:21 དེའི་ཕྱིར་ཡ་ཧུ་དཱ་པའི་བླ་ཆེན་རྣམས་ཀྱིས་པི་ལ་ཏུ་ལ་“ཡ་ཧུ་དཱ་པའི་རྒྱལ་པོ་ཞེས་མི་འབྲི་བར། མི་འདི་ཡིས་ང་ཡ་ཧུ་དཱ་པའི་རྒྱལ་པོ་ཡིན་ཞེས་ཟེར་བཞིན་འབྲི་བར་མཛོད་ཅིག་”ཅེས་ཞུས།
JOH 19:22 ལན་དུ་པི་ལ་ཏུ་ཡིས་“ངས་གང་བྲིས་ཡོད་པ་དེ་ཚར་རོ་”ཞེས་བཤད།
JOH 19:23 དམག་མི་རྣམས་ཀྱིས་ཡེ་ཤུ་རྒྱང་ཤིང་སྟེང་ལ་བརྒྱངས་ནས། ཁོང་གི་ན་བཟའ་སྐལ་བ་བཞི་རུ་བགོས་ནས་དམག་མི་རེ་རེར་ཐོབ་པ་དང༌། ཡང་ནང་གོས་ཤིག་འཚེམ་མེད་རས་ཡུག་ཅིག་ལས་གྲུབ་པ་ཡིན་པའི་ཕྱིར།
JOH 19:24 ཁོ་ཚོས་གཅིག་གིས་གཅིག་ལ་“འདི་མི་རལ་བར་སུ་ལ་ཐོབ་པའི་རྒྱན་འཛུགས་པར་བྱ་”ཞེས་ཟེར་བ་དེ་ནི་གསུང་རབ་ཀྱི་མདོ་ལས། ང་ཡི་གོས་རྣམས་བགོས་བྱས་ཤིང༌། ། ང་ཡི་གོས་ལ་རྒྱན་བརྒྱབ་བོ། ། ཞེས་གསུངས་པ་བཞིན་དུ་འགྲུབ་པའི་ཕྱིར་དེ་ལྟར་བྱུང་བ་དང་དམག་མི་རྣམས་ཀྱིས་དེ་ལྟར་བྱས།
JOH 19:25 སྐབས་དེར་ཡེ་ཤུའི་རྒྱང་ཤིང་གི་རྩར་ཡེ་ཤུའི་ཡུམ་དང༌། ཁོ་མོའི་སྤུན་མིར་ཡམ་ཀ་ལོ་ཕཱ་ཡི་ཟླ་བོ་དང་མག་རྡལ་ནས་ཡིན་པའི་མིར་ཡམ་བཅས་དེར་ལངས་ཏེ་བསྡད།
JOH 19:26 ཡེ་ཤུས་རང་གི་ཡུམ་དང་ཁོང་གིས་དམིགས་བསལ་གྱིས་བྱམས་པར་འཛིན་པའི་ཉེ་གནས་དེར་ལངས་ཏེ་བསྡད་པར་གཟིགས་ནས་ཡུམ་ལ་“ཨ་མ་ལགས། ལྟོས་དང༌། འདི་ནི་ཁྱེད་ཀྱི་བུ་ཡིན་”ཞེས་གསུངས།
JOH 19:27 ཁོང་གིས་ཉེ་གནས་ལ་“ལྟོས་དང༌། འདི་ནི་ཁྱོད་ཀྱི་ཨ་མ་ལགས་ཡིན་ནོ་”ཞེས་གསུངས་པ་དང༌། དུས་དེ་རང་ནས་ཉེ་གནས་དེས་ཡེ་ཤུའི་ཡུམ་རང་གི་ཁྱིམ་ཚང་དུ་བསུས།
JOH 19:28 དེའི་རྗེས་སུ་ཡེ་ཤུས་དོན་ཚང་མ་ཟིན་པར་མཁྱེན་ཏེ་གསུང་རབ་ཀྱི་མདོ་ལས་བྲིས་པ་བཞིན་དུ་འགྲུབ་པའི་ཕྱིར་“ང་སྐོམ་མོ་”ཞེས་གསུངས་པ་དང༌།
JOH 19:29 རྒུན་ཆང་སྐྱུར་མོས་གང་བའི་སྣོད་ཅིག་དེར་ཡོད་པས་ཁོ་ཚོས་དེའི་ནང་སྲིང་བལ་སྦངས་ནས་ཧི་སོབ་ཟེར་བའི་རྩི་ཤིང་གི་རྐང་ཡུའི་རྩེ་ལ་བསྐོན་ཏེ་ཁོང་གི་ཞལ་ལ་བཞག
JOH 19:30 ཡེ་ཤུས་རྒུན་ཆང་སྐྱུར་མོ་དེ་བཞེས་ནས་“ད་གྲུབ་བོ་”ཞེས་གསུངས་པ་དང༌། དབུ་བཏུད་དེ་སྐུ་སྲོག་བཏང་གནང་ངོ༌། །
JOH 19:31 དེའི་ཉིན་གྲ་སྒྲིག་གི་ཉིན་མོ་ཡིན་ཏེ། ངལ་གསོ་བའི་ཉིན་མོ་ཡང་ཡིན་པས་དེ་ནི་དུས་གལ་ཆེན་ཅིག་ཡིན་པའི་ཕྱིར། སྤུར་རྣམས་ངལ་གསོ་བའི་ཉིན་མོར་རྒྱང་ཤིང་ལ་མ་ལུས་པའི་ཆེད་དུ་ཡ་ཧུ་དཱ་པས་པི་ལ་ཏུ་ལ་དེ་ཚོའི་རྐང་པ་བཅག་ནས་སྤུར་དེ་རྣམས་འཁྱེར་བའི་ཕྱིར་ཞུས།
JOH 19:32 དེའི་ཕྱིར་དམག་མི་རྣམས་ཡོང་ནས་ཁོང་དང་མཉམ་དུ་རྒྱང་ཤིང་ལ་བརྒྱངས་པའི་མི་དང་པོའི་རྐང་པ་བཅག་ནས་མི་གཞན་པ་དེའི་རྐང་པའང་བཅག
JOH 19:33 འོན་ཀྱང་ཁོ་ཚོ་ཡེ་ཤུའི་དྲུང་དུ་སླེབས་ནས་ཁོང་གྲོངས་ཚར་བ་མཐོང་སྟེ་ཁོང་གི་ཞབས་མ་བཅག
JOH 19:34 དམག་མི་རྣམས་ལས་གཅིག་གིས་ཁོང་གི་གཞོགས་ལ་མདུང་བཙུགས་མ་ཐག་ཏུ་ཁྲག་དང་ཆུ་ཐོན་ནོ།
JOH 19:35 བྱ་བ་དེ་རྣམས་མཐོང་བའི་མིས་དེའི་དཔང་པོ་བྱས། ཡང་དཔང་པོ་དེ་ནི་བདེན་པ་ཡིན། མི་དེས་རང་གིས་བཤད་པ་དེ་བདེན་པ་ཡིན་པར་ཤེས་སྟེ། ཁྱེད་ཚོས་ཀྱང་དད་པ་བྱེད་པའི་ཕྱིར་རོ།
JOH 19:36 བྱ་བ་དེ་རྣམས་ནི་གསུང་རབ་ཀྱི་མདོ་ལས་ཁོང་གི་རུས་པ་ལས་གཅིག་ཀྱང་གཅོག་པར་མི་འགྱུར་ཞེས་དང༌།
JOH 19:37 ཡང་མདོ་གཞན་ཞིག་ལ་དེ་རྣམས་ཀྱིས་སུ་ལ་བཙུགས་པ་དེ་ལ་ལྟ་བར་འགྱུར་རོ་ཞེས་གསུངས་པ་དེ་འགྲུབ་པའི་ཕྱིར་བྱུང་བ་ཡིན།
JOH 19:38 དོན་དེ་རྣམས་ཀྱི་རྗེས་སུ། ཨ་རི་མ་ཐཱ་ཟེར་བའི་གྲོང་ཚོ་ནས་ཡིན་པ་ཡོ་སེབ་ནི་ཡ་ཧུ་དཱ་པ་ལ་འཇིགས་པས་ཡེ་ཤུའི་ཉེ་གནས་གསང་བ་ཞིག་ཡིན་པ་དེས་པི་ལ་ཏུ་ལ་ཡེ་ཤུའི་སྐུ་སྤུར་ཕར་འཁྱེར་དུ་གནང་བར་ཞུས་པ་དང༌། པི་ལ་ཏུ་ཡིས་དེ་བཞིན་དུ་ཆོག་མཆན་གནང་བས་ཡོ་སེབ་ཀྱིས་ཡེ་ཤུའི་སྐུ་སྤུར་ཕར་ཁྱེར།
JOH 19:39 ནཱི་ཀོ་དེམ་ཟེར་མཁན་ཡང་སྔར་མཚན་མོར་ཡེ་ཤུ་མཇལ་མཁན་དེས་དྲི་ཞིམ་བྱུགས་རྫས་བསྲེས་མ་སྤྱི་རྒྱ་སུམ་ཅུ་སོ་བཞི་ཙམ་ཁུར་ཡོང༌།
JOH 19:40 དེ་གཉིས་ཀྱིས་ཡེ་ཤུའི་སྐུ་སྤུར་བླངས་ཏེ། ཡ་ཧུ་དཱ་མི་རིགས་ཀྱི་རོ་དུར་དུ་འཇུག་པའི་ལུགས་སྲོལ་བཞིན་དུ་དེ་ལ་སྤོས་རྫས་དེ་བཏབ་ནས་རས་སྤུས་ལེགས་ཀྱིས་བཏུམས།
JOH 19:41 ཡེ་ཤུ་རྒྱང་ཤིང་ལ་བརྒྱངས་པའི་གནས་དེར་སྐྱེད་ཚལ་ཞིག་ཡོད་དེ། ཚལ་དེའི་ནང་ན་རོ་གཏན་ནས་བཞག་མ་མྱོང་བའི་དུར་ཁང་གསར་པ་ཞིག་ཡོད་པ་ཡིན།
JOH 19:42 ཉིན་དེ་ནི་ཡ་ཧུ་དཱ་པའི་གྲ་སྒྲིག་གི་ཉིན་མོ་ཡིན་པ་དང་དུར་ཁང་དེ་ཐག་ཉེ་བར་ཡོད་པས་ཁོ་ཚོས་ཡེ་ཤུའི་སྐུ་ཕུང་དེར་བཞག་གོ །
JOH 20:1 དེ་ནས་གཟའ་འཁོར་གྱི་ཉིན་དང་པོར་ནམ་ཤིན་ཏུ་སྔ་བ་ད་དུང་མུན་པ་ཡོད་དུས་མག་རྡལ་ནས་ཡིན་པའི་མིར་ཡམ་དུར་ཁང་གི་མདུན་དུ་ཡོང་སྟེ། ཁ་རྡོ་དེ་དུར་ཁང་ནས་ཕར་བསྒྲིལ་ཚར་ཡོད་པ་མཐོང་བས།
JOH 20:2 བརྒྱུགས་ཏེ་སི་མོན་པེ་ཏྲོ་དང༌། ཡེ་ཤུས་དམིགས་བསལ་གྱིས་བྱམས་པ་གནང་བའི་ཉེ་གནས་གཞན་དེའི་རྩར་སོང་ནས་“ཁོ་ཚོས་གཙོ་བོ་དུར་ཁང་ནས་ཁྱེར་བ་དང༌། ཁོང་གང་དུ་བཞག་ཡོད་པ་ང་ཚོས་མི་ཤེས་”ཞེས་ཟེར།
JOH 20:3 དེའི་ཕྱིར་པེ་ཏྲོ་དང་ཉེ་གནས་གཞན་པ་དེ་ཕྱི་རོལ་ཏུ་ཐོན་ནས་དུར་གྱི་ཕྱོགས་སུ་སོང༌།
JOH 20:4 ཡང་དེ་གཉིས་མཉམ་དུ་བརྒྱུགས་པ་དང༌། པེ་ཏྲོ་ལས་ཉེ་གནས་གཞན་དེ་མགྱོགས་པོར་བརྒྱུགས་པས་སྔོན་ལ་དུར་དུ་སླེབས་ཤིང༌།
JOH 20:5 བསྒུར་ནས་ནང་དུ་བལྟས་ཏེ་རས་སྤུས་ལེགས་དེར་ཡོད་པ་མཐོང་ཡང་ནང་དུ་མ་ཞུགས།
JOH 20:6 སི་མོན་པེ་ཏྲོ་ཡང་ཁོའི་རྗེས་སུ་དེར་སླེབས་པ་དང༌། དུར་ཁང་གི་ནང་དུ་ཞུགས་ནས་ཁོང་གིས་རས་སྤུས་ལེགས་དེར་ཡོད་པ་མཐོང་བ་མ་ཟད།
JOH 20:7 ཡེ་ཤུའི་དབུ་ལ་གཡོགས་པའི་ཞལ་ཕྱིས་རས་དེ་གཞན་པ་རྣམས་དང་མཉམ་དུ་མེད་པར་གཅིག་པུ་གནས་གཞན་ཞིག་ན་བསྒྲིལ་ཏེ་ཡོད་པ་ཡང་མཐོང༌།
JOH 20:8 དེ་ནས་ཉེ་གནས་གཞན་པ་དུར་དུ་སྔོན་ལ་སླེབས་པ་དེ་ཡང་ནང་དུ་ཞུགས་ནས་མཐོང་བས་ཡིད་ཆེས་བྱས།
JOH 20:9 འོན་ཀྱང་དེ་གཉིས་ཀྱིས་དཀོན་མཆོག་གི་གསུང་རབ་ཀྱི་མདོ་ལས་ཁོང་གཤིན་པོའི་ནང་ནས་གསོན་པོར་བཞེངས་དགོས་པ་དེ་ད་དུང་མ་རྟོགས།
JOH 20:10 དེ་ནས་ཉེ་གནས་དེ་གཉིས་རང་གི་ཁྱིམ་ལ་ཕྱིར་ལོག
JOH 20:11 མིར་ཡམ་ནི་དུར་ཁང་གི་ཕྱི་ལ་ལངས་ནས་བསྡད་དེ་ངུ་བཞིན། བསྒུར་ནས་དུར་ཁང་གི་ནང་དུ་བལྟས་པ་དང༌།
JOH 20:12 ཡེ་ཤུའི་སྐུ་སྤུར་བཞག་ཡོད་པའི་གནས་ལ་དཀོན་མཆོག་གི་ཕོ་ཉ་གོས་དཀར་པོ་གྱོན་པ་གཉིས་དབུའི་ཕྱོགས་སུ་གཅིག་དང་ཞབས་ཀྱི་ཕྱོགས་སུ་གཅིག་བཞུགས་པར་མཐོང༌།
JOH 20:13 ཁོང་ཚོས་མིར་ཡམ་ལ་“བུ་མོ། ཁྱོད་རང་ཅི་ལ་ངུ་”ཞེས་དྲིས་པས་ལན་དུ་ཁོ་མོས་“ཁོ་ཚོས་ངའི་གཙོ་བོ་ཕར་ཁྱེར་ནས་གང་དུ་བཞག་པ་མི་ཤེས་”ཞེས་བཤད།
JOH 20:14 མིར་ཡམ་ཁ་ཕྱིར་ལོག་སྟེ་ཡེ་ཤུ་དེར་བཞེངས་ནས་བཞུགས་ཡོད་པ་མཐོང་ཡང༌། ཡེ་ཤུ་ཡིན་པ་མ་ཤེས།
JOH 20:15 ཡེ་ཤུས་ཁོ་མོར་“བུ་མོ། ཁྱོད་ཅི་ལ་ངུ༌། ཁྱོད་སུ་འཚོལ་”ཞེས་གསུངས་པ་དང༌། མིར་ཡམ་གྱིས་ཁོང་ནི་ཚལ་སྲུང་མཁན་ཡིན་པར་བསམས་ཏེ་“སྐུ་ཞབས་ལགས། གལ་ཏེ་ཁྱེད་ཀྱིས་ཁོང་འདི་ནས་ཕར་ཁྱེར་བ་ཡིན་ན། གང་དུ་བཞག་པ་ཤོད་དང༌། ངས་ཕར་འཁྱེར་བར་བྱ་”ཞེས་བཤད།
JOH 20:16 ཡེ་ཤུས་ཁོ་མོར་“མིར་ཡམ་”ཞེས་གསུངས་པ་དང༌། ཁོ་མོས་ཁོང་གི་ཕྱོགས་སུ་བསྒྱུར་ཏེ་ཡ་ཧུ་དཱ་པའི་སྐད་དུ་“རབ་བུ་ནི་”ཞེས་བརྗོད། (དེ་ནི་སྟོན་པ་ལགས་ཞེས་པའི་དོན་ཡིན་)
JOH 20:17 ཡེ་ཤུས་“ང་ད་དུང་ཡབ་ཀྱི་དྲུང་དུ་ཡར་མ་ཕྱིན་པས། ཁྱོད་ཀྱིས་ང་ལ་མ་ཟུངས་ཤིག ངའི་སྤུན་རྣམས་ཀྱི་དྲུང་དུ་སོང་སྟེ་ཁོ་ཚོར་ང་ནི་ང་རང་གི་ཡབ་དང་ཁྱེད་ཚོའི་ཡབ། ངའི་དཀོན་མཆོག་དང་ཁྱེད་ཚོའི་དཀོན་མཆོག་གི་དྲུང་དུ་ཡར་འགྲོའོ་ཞེས་གཏམ་བྱོས་ཤིག་”ཅེས་གསུངས།
JOH 20:18 མག་རྡལ་ནས་ཡིན་པའི་མིར་ཡམ་ཡོང་སྟེ་ཉེ་གནས་རྣམས་ལ་“ངས་གཙོ་བོ་མཇལ་བྱུང་”ཞེས་ཟེར་ཞིང༌། ཁོང་གིས་ཁོ་མོར་གང་གསུངས་པ་རྣམས་ཀྱང་ཁོ་ཚོ་ལ་བཤད།
JOH 20:19 བདུན་ཕྲག་གི་ཞག་དང་པོའི་དགོང་མོ་ཉེ་གནས་རྣམས་ཡ་ཧུ་དཱ་པ་ལ་འཇིགས་པས་གནས་དེའི་སྒོ་རྣམས་ཨ་ཤིང་བརྒྱབ་ཡོད་དུས། ཡེ་ཤུ་དེར་བྱོན་ཏེ་ཁོ་ཚོའི་དཀྱིལ་དུ་བཞེངས་ནས་“ཁྱེད་ཚོ་ཞི་བདེ་དང་ལྡན་པར་གྱུར་ཅིག་”ཅེས་གསུངས།
JOH 20:20 ཁོང་གིས་དེ་ལྟར་གསུངས་ནས་རང་གི་ཕྱག་དང་གཞོགས་ཁོ་ཚོ་ལ་བསྟན་ཅིང༌། ཉེ་གནས་རྣམས་ཀྱིས་གཙོ་བོ་མཇལ་བས་སེམས་དགའ་བར་གྱུར་རོ།
JOH 20:21 དེ་ནས་ཡེ་ཤུས་ཡང་བསྐྱར་“ཁྱེད་ཚོ་ཞི་བདེ་དང་ལྡན་པར་གྱུར་ཅིག ཡབ་ཀྱིས་ང་མངགས་པ་ལྟར་ངས་ཀྱང་ཁྱེད་ཚོ་མངག་”ཅེས་གསུངས་རྗེས།
JOH 20:22 ཁོ་ཚོ་ལ་ཕུ་བསྐྱོན་ཏེ་“ཁྱེད་རྣམས་ལ་དཀོན་མཆོག་གི་དམ་པའི་ཐུགས་ཉིད་འཐོབ་པར་གྱུར་ཅིག
JOH 20:23 ཁྱེད་ཀྱིས་སུའི་སྡིག་ཉེས་བསལ་ན། དེ་ཚོའི་སྡིག་ཉེས་བསལ་ཟིན་ནོ། སུའི་སྡིག་ཉེས་མི་བསལ་ན། དེ་ལུས་པར་འགྱུར་རོ་”ཞེས་གསུངས།
JOH 20:24 འོན་ཀྱང་ཉེ་གནས་བཅུ་གཉིས་པོའི་ནང་ནས་མཚེ་མ་ཟེར་བའི་ཐོ་མཱ་ནི་ཡེ་ཤུ་ཕེབས་པའི་ཚེ་ཁོ་རྣམས་དང་མཉམ་དུ་མེད་པས།
JOH 20:25 ཉེ་གནས་གཞན་པ་རྣམས་ཀྱིས་ཁོ་ལ་“ང་ཚོས་གཙོ་བོ་མཇལ་བྱུང་”ཞེས་ཟེར། འོན་ཀྱང་ཁོས་ཁོ་ཚོར་“གལ་ཏེ་ངས་ཁོང་གི་ཕྱག་ལ་གཟེར་གྱི་ཤུལ་མཐོང་བ་དང༌། ངའི་མཛུག་གུ་གཟེར་གྱི་ཤུལ་ལ་འཇུག་པ། ལག་པ་ཡང་ཁོང་གི་གཞོགས་ཀྱི་མདུང་ཤུལ་ནང་དུ་བཅུག་ན་མ་གཏོགས། ངས་རྩ་བ་ནས་ཡིད་ཆེས་མི་བྱེད་”ཅེས་བཤད།
JOH 20:26 དེ་ནས་ཉིན་བརྒྱད་སོང་བ་དང༌། ཁོང་གི་ཉེ་གནས་རྣམས་ཡང་བསྐྱར་ནང་ལ་ཡོད་ཅིང༌། ཐོ་མཱ་ཡང་ཁོ་ཚོ་དང་མཉམ་དུ་ཡོད་པ་ཡིན། སྒོ་རྣམས་ལ་ཨ་ཤིང་བརྒྱབ་ཡོད་ཀྱང་ཡེ་ཤུ་དེར་བྱོན་ནས་ཁོ་ཚོའི་དཀྱིལ་དུ་བཞེངས་ཏེ་“ཁྱེད་ཚོ་ཞི་བདེ་དང་ལྡན་པར་གྱུར་ཅིག་”ཅེས་གསུངས།
JOH 20:27 དེ་ནས་ཁོང་གིས་ཐོ་མཱ་ལ་“ད་ཁྱོད་ཀྱི་མཛུག་གུ་འདིར་ཞོག་ཅིག ངའི་ལག་པ་ལ་ལྟོས། ཁྱོད་ཀྱིས་ལག་པ་བརྐྱངས་ཏེ་ངའི་གཞོགས་ཀྱི་ནང་དུ་ཆུག་ཅིག དད་མེད་ཀྱི་སེམས་སྤོངས་ལ་དད་པ་བྱོས་ཤིག་”ཅེས་གསུངས།
JOH 20:28 ལན་དུ་ཐོ་མཱས་“ངའི་གཙོ་བོ་དང་ངའི་དཀོན་མཆོག་ལགས་”ཞེས་བཤད།
JOH 20:29 ཡེ་ཤུས་ཁོང་ལ་“ཁྱོད་ཀྱིས་ང་མཐོང་བས་དད་པ་བྱེད་པ་ཡིན་ནམ། ང་མི་མཐོང་ཡང་དད་པ་རྣམས་བདེའོ་”ཞེས་གསུངས།
JOH 20:30 ཡང་མདོ་འདི་ལ་མ་བྲིས་པའི་རྟགས་གཞན་མང་པོ་ཡེ་ཤུས་ཉེ་གནས་རྣམས་ཀྱི་མདུན་དུ་མཛད།
JOH 20:31 འོན་ཀྱང་ཁྱེད་ཚོས་ཡེ་ཤུ་ནི་སྐྱབས་མགོན་མཱ་ཤི་ཀ་དང་དཀོན་མཆོག་གི་སྲས་དེ་ཡིན་པར་དད་པ་བྱེད་པའི་ཕྱིར་དོན་འདི་ཚོ་བྲིས་ཡོད་ཅིང༌། ཁོང་ལ་དད་པ་བྱེད་པའི་སྒོ་ནས་ཁྱེད་ཚོ་ཁོང་གི་མཚན་གྱི་ཐོག་ནས་དཔག་ཏུ་མེད་པའི་ཚེ་འཐོབ་པའི་ཕྱིར་རོ། །
JOH 21:1 དེའི་རྗེས་སུ་ཡེ་ཤུས་ཡང་བསྐྱར་ཏི་པེར་ཡཱ་མཚོའི་འགྲམ་དུ་ཉེ་གནས་རྣམས་ལ་ཁོང་རང་མངོན་པར་མཛད། མངོན་པར་མཛད་ཚུལ་འདི་ལྟར་བྱུང༌།
JOH 21:2 སི་མོན་པེ་ཏྲོ་དང༌། མཚེ་མ་ཟེར་བའི་ཐོ་མཱ། ག་ལིལ་ཡུལ་གྱི་ཀ་ནཱ་པ་ན་ཐན་ཨེལ། ཟེ་བད་ཡཱ་ཡི་བུ་གཉིས། ཁོང་གི་ཉེ་གནས་གཞན་གཉིས་བཅས་མཉམ་དུ་ཡོད།
JOH 21:3 སི་མོན་པེ་ཏྲོས་ཁོ་ཚོར་“ང་ཉ་འཛིན་དུ་འགྲོ་”ཞེས་ཟེར་བ་དང་ཁོ་ཚོས་“ང་ཚོ་ཡང་ཁྱོད་དང་མཉམ་དུ་འགྲོ་”ཞེས་བཤད། ཁོ་ཚོ་ཕྱི་རོལ་ཏུ་སོང་སྟེ་གྲུ་ལ་བསྡད་ཡང་མཚན་དེ་ལ་ཉ་ཅིའང་མ་བཟུང༌།
JOH 21:4 ནམ་ལངས་པའི་ཚེ་ཡེ་ཤུ་མཚོའི་འགྲམ་དུ་བཞེངས་ཡོད་པ་ཡིན། འོན་ཀྱང་ཉེ་གནས་ཚོས་ཁོང་ཡིན་པར་ངོ་མ་ཤེས།
JOH 21:5 ཡེ་ཤུས་ཁོ་ཚོར་“བུ་ཚོ། ཁྱོད་ཚོས་ཉ་ཟིན་མེད་དམ་”ཞེས་གསུངས་པ་དང་ཁོ་ཚོས་“ལགས་མེད་”ཅེས་བཤད།
JOH 21:6 ཁོང་གིས་ཁོ་ཚོར་“གྲུའི་གཡས་ཕྱོགས་སུ་དྲ་རྒྱ་ཕོངས་དང་རྙེད་པར་འགྱུར་”ཞེས་གསུངས་པ་ལ་ཁོ་ཚོས་དྲ་རྒྱ་འཕངས་ནས་ཉ་ཤིན་ཏུ་མང་པོ་བཟུང་བས་དྲ་རྒྱ་ཆུ་ནས་འཐེན་མ་ཐུབ།
JOH 21:7 དེ་ནས་ཡེ་ཤུས་དམིགས་བསལ་གྱིས་བྱམས་པ་གནང་བའི་ཉེ་གནས་དེས་པེ་ཏྲོ་ལ་“གཙོ་བོ་ཡིན་”ཞེས་བཤད། སི་མོན་པེ་ཏྲོས་གཙོ་བོ་ཡིན་ཞེས་པ་ཐོས་ཏེ་ནང་གོས་ལས་མེད་པས། ཕྱི་གོས་གྱོན་པ་དང་མཚོའི་ནང་དུ་མཆོངས།
JOH 21:8 ཉེ་གནས་གཞན་རྣམས་སྐམ་ས་ནས་སྨི་བརྒྱ་ཙམ་མ་གཏོགས་མེད་པས། ཉས་གང་བའི་དྲ་རྒྱ་དྲུད་དེ་ཡོང་བ་ཡིན།
JOH 21:9 ཡང་ཁོ་ཚོ་སྐམ་ས་ལ་སླེབས་ནས་སོལ་བའི་མེ་འབར་བའི་སྟེང་དུ་ཉ་ཤ་བཞག་ཡོད་པ་དང་བག་ལེབ་ཀྱང་མཐོང༌།
JOH 21:10 ཡེ་ཤུས་ཁོ་ཚོར་“ཁྱེད་ཚོས་ད་ལྟ་བཟུང་བའི་ཉ་ཁ་ཤས་འདིར་འཁྱེར་ཤོག་”ཅེས་གསུངས་པ་དང༌།
JOH 21:11 སི་མོན་པེ་ཏྲོ་གྲུའི་ནང་ལ་སོང་ནས་ཉ་ཆེན་པོ་བརྒྱ་དང་ལྔ་བཅུ་ང་གསུམ་གྱིས་གང་བའི་དྲ་རྒྱ་དེ་སྐམ་ས་ལ་དྲུད། ཡང་ཉ་དེ་ཙམ་མང་པོ་ཡོད་ཀྱང་དྲ་རྒྱ་མ་རལ།
JOH 21:12 ཡེ་ཤུས་ཁོ་ཚོར་“ཚུར་ཤོག་ལ་ཞོགས་ཟས་ཟོ་དང་”ཞེས་གསུངས། ཉེ་གནས་རྣམས་ཀྱིས་གཙོ་བོ་ཡིན་པར་ངོ་ཤེས་མོད་སུས་ཀྱང་ཁྱོད་སུ་ཡིན་ཞེས་བཀའ་འདྲི་ཞུ་བར་མ་ཕོད།
JOH 21:13 ཡེ་ཤུ་ཕེབས་ནས་བག་ལེབ་བསྣམས་ཏེ་ཁོ་ཚོ་ལ་གནང་ཞིང་དེ་བཞིན་དུ་ཉ་ཤ་ཡང་གནང༌།
JOH 21:14 ཡེ་ཤུ་གཤིན་པོ་ནས་སྐུ་གསོན་པོར་བཞེངས་སུ་གྱུར་བའི་རྗེས་སུ་ཉེ་གནས་རྣམས་ལ་ཁོང་མངོན་པར་མཛད་པའི་ལན་གསུམ་པ་དེ་ཡིན་ནོ། །
JOH 21:15 ཁོ་ཚོས་ཞོགས་ཟས་བཞེས་ཚར་རྗེས་ཡེ་ཤུས་སི་མོན་པེ་ཏྲོ་ལ་“སི་མོན་ཡོ་ཧ་ནན་གྱི་བུ། ཁྱོད་ཀྱིས་འདི་ཚོ་ལས་ང་ལ་ལྷག་པར་བརྩེ་འམ་”ཞེས་གསུངས་པས་ལན་དུ་ཁོས་“གཙོ་བོ་ལགས། ངས་ཁྱེད་ལ་བརྩེ་བ་ཁྱེད་ཀྱིས་མཁྱེན་ནོ་”ཞེས་ཟེར་བ་དང༌། ཁོང་གིས་ཁོ་ལ་“ངའི་ལུ་གུ་རྣམས་འཚོ་བར་བྱོས་ཤིག་”ཅེས་གསུངས།
JOH 21:16 ཡང་ལན་གཉིས་པར་ཡེ་ཤུས་“སི་མོན་ཡོ་ཧ་ནན་གྱི་བུ། ཁྱོད་ཀྱིས་ང་ལ་བརྩེ་འམ་”ཞེས་གསུངས་པས་ཁོས་“གཙོ་བོ་ལགས། ངས་ཁྱེད་ལ་བརྩེ་བ་ཁྱེད་ཀྱིས་མཁྱེན་ནོ་”ཞེས་བཤད་པས་ཁོང་གིས་“ངའི་ལུག་རྣམས་འཚོ་བར་བྱོས་ཤིག་”ཅེས་གསུངས།
JOH 21:17 ཡང་ལན་གསུམ་པར་ཡེ་ཤུས་“སི་མོན་ཡོ་ཧ་ནན་གྱི་བུ། ཁྱོད་ཀྱིས་ང་ལ་བརྩེ་འམ་”ཞེས་གསུངས་པ་དང༌། ཁྱོད་ཀྱིས་ང་ལ་བརྩེ་འམ་ཞེས་ལན་གསུམ་གསུངས་པས་པེ་ཏྲོ་སེམས་སྐྱོ་བར་གྱུར་ནས་ཁོང་ལ་“གཙོ་བོ་ལགས། ཁྱེད་ཀྱིས་དོན་ཚང་མ་མཁྱེན་ཏེ། ངས་ཁྱེད་ལ་བརྩེ་བ་མཁྱེན་ནོ་”ཞེས་བཤད་པ་དང་ཡེ་ཤུས་“ངའི་ལུག་རྣམས་འཚོ་བར་བྱོས་ཤིག
JOH 21:18 ངས་ཁྱོད་ལ་བདེན་པ་བདེན་པར་ཟེར་རྒྱུར། ཁྱོད་གཞོན་པའི་དུས་སུ་རང་གི་སྐེད་རགས་རང་གིས་བཅིངས་ཏེ་གང་དུ་དགའ་བར་སོང་ཡང༌། རྒས་དུས་སུ་ཁྱོད་རང་གི་ལག་པ་བརྐྱངས་ནས་མི་གཞན་གྱིས་ཁྱོད་ཀྱི་སྐེད་རགས་འཆིང་སྟེ་ཁྱོད་མི་དགའ་བའི་གནས་སུ་འཁྲིད་པར་འགྱུར་”ཞེས་གསུངས།
JOH 21:19 ཡེ་ཤུས་པེ་ཏྲོ་ཤི་ལུགས་ནི་གང་གིས་དཀོན་མཆོག་གི་གཟི་བརྗིད་སྟོན་པའི་ཕྱིར་དེ་ལྟར་གསུངས་པའི་རྗེས་སུ་ཁོང་གིས་པེ་ཏྲོ་ལ་“ངའི་རྗེས་སུ་འབྲོངས་ཤིག་”ཅེས་གསུངས་སོ། །
JOH 21:20 པེ་ཏྲོ་ཁ་ཕྱིར་སློག་པ་དང་ཡེ་ཤུས་དམིགས་བསལ་གྱིས་བྱམས་པ་གནང་བའི་ཉེ་གནས་དེས་སྔར་དགོང་ཟས་བཞེས་པའི་དུས་སུ་ཡེ་ཤུའི་རྩར་གཟུགས་པོ་ཡོ་ནས་གཙོ་བོ་ཁྱེད་དགྲའི་དབང་དུ་གཏོང་མཁན་སུ་ཡིན་ཞེས་དྲི་མཁན་དེ་ཡང་ཁོང་གི་རྗེས་སུ་འབྲངས་པར་མཐོང༌།
JOH 21:21 པེ་ཏྲོས་ཁོ་མཐོང་སྐབས་ཡེ་ཤུ་ལ་“གཙོ་བོ་ལགས། མི་འདི་ལ་ཅི་འབྱུང་ཡོང་”ཞེས་ཞུས།
JOH 21:22 ཡེ་ཤུས་“གལ་ཏེ་ང་མ་ཡོང་བའི་བར་དུ་ཁོ་ལུས་པར་དགའ་ན། ཁྱོད་ལ་དོན་ཅི་ཡོད། ཁྱོད་རང་ངའི་རྗེས་སུ་འབྲོངས་ཤིག་”ཅེས་གསུངས།
JOH 21:23 དེའི་ཕྱིར་ཉེ་གནས་དེ་འཆི་བར་མི་གྱུར་བའི་གཏམ་སྤུན་ཟླ་རྣམས་ཀྱི་ནང་ལ་ཁྱབ། འོན་ཀྱང་ཡེ་ཤུས་ཉེ་གནས་དེ་མི་ཤི་ཞེས་མ་གསུངས་ཀྱི། གལ་ཏེ་ང་མ་ཡོང་བའི་བར་དུ་ཁོ་གསོན་པོར་གནས་པར་དགའ་ན་ཁྱོད་ལ་དོན་ཅི་ཡོད་ཅེས་གསུངས་པ་ཡིན།
JOH 21:24 འདི་ནི་དོན་འདི་ཚོ་ལ་དཔང་པོ་བྱེད་པ་དང་ཡི་གེ་འབྲི་མཁན་གྱི་ཉེ་གནས་ཡིན། ཡང་ཁོས་དཔང་པོ་བྱས་པ་དེ་བདེན་པ་ཡིན་པར་ངེད་རྣམས་ཀྱིས་ཤེས།
JOH 21:25 ཡེ་ཤུས་མཛད་པའི་འཕྲིན་ལས་གཞན་རྣམས་མང་བས། ངའི་བསམ་ཚུལ་ལ་དེ་ཐམས་ཅད་རེ་རེ་ནས་བྲིས་པ་ཡིན་ན། བྲིས་པའི་མདོ་རྣམས་ཐ་ན་འཇིག་རྟེན་ཡོངས་སུ་མི་ཤོང་ངོ༌། །
ACT 1:1 ཀྱེ་མི་རྗེ་ཐེ་ཨོ་ཕི་ལུ། གཙོ་བོ་ཡེ་ཤུས་གང་མཛད་པ་དང་ཆོས་གང་གསུངས་པ་ཐམས་ཅད་འགོ་བརྩམས་པ་ནས་བཟུང༌། ཁོང་གིས་བདམས་པའི་སྐུ་ཚབ་རྣམས་ལ་དམ་པའི་ཐུགས་ཉིད་ཐོག་ནས་བཀའ་གནང་བའི་རྗེས་སུ་དཀོན་མཆོག་གི་ཞིང་ཁམས་ལ་མ་འཕགས་པའི་ཉིན་མོའི་བར་དུ། ངས་མདོ་དང་པོར་བཀོད།
ACT 1:3 སྡུག་བསྔལ་མྱོང་བའི་རྗེས་སུ་ཁོང་འཆི་བ་ནས་སླར་གསོན་དུ་གྱུར་བའི་ར་སྤྲོད་མང་པོ་སྐུ་ཚབ་རྣམས་ལ་གསལ་པོར་བསྟན་ཞིང༌། ཉིན་བཞི་བཅུའི་རིང་ཁོང་གིས་ཁོ་ཚོར་མངོན་པར་མཛད་དེ་དཀོན་མཆོག་གི་རྒྱལ་སྲིད་ཀྱི་སྐོར་གསུངས།
ACT 1:4 ཡང་ཁོ་ཚོ་དང་མཉམ་དུ་བཞུགས་པའི་དུས་ཤིག་ལ་ཁོང་གིས་“ངས་ཁྱེད་ཚོར་སྔར་བཤད་པ་ལྟར་ངའི་ཡབ་ཀྱིས་ཞལ་ཆད་གནང་བ་དེ་མ་འགྲུབ་པའི་བར་དུ་ཡེ་རུ་ཤ་ལེམ་གྲོང་ཁྱེར་ནས་མ་བྲལ་བར་སྒུག་སྟེ་སྡོད་ཅིག
ACT 1:5 ཡོ་ཧ་ནན་གྱིས་ཆུ་ཡིས་ཁྲུས་གསོལ་གནང་བ་རེད། འོན་ཀྱང་ཉིན་མང་པོ་མ་འགོར་བར་ཁྱེད་རྣམས་ལ་དམ་པའི་ཐུགས་ཉིད་ཀྱིས་ཁྲུས་གསོལ་གནང་བར་འགྱུར་”ཞེས་གསུངས།
ACT 1:6 ཡང་ལྷན་དུ་འཛོམས་ནས་ཁོ་ཚོས་ཡེ་ཤུ་ལ་“གཙོ་བོ། ད་ཁྱེད་ཀྱིས་ཡ་ཧུ་དཱ་པའི་རྒྱལ་སྲིད་སླར་གསོ་མཛད་དམ་”ཞེས་དྲིས་པས།
ACT 1:7 ལན་དུ་ཁོང་གིས་“ཡབ་ཀྱིས་རང་གི་དབང་ཆ་ལ་བརྟེན་ནས་བཀོད་པའི་དུས་དང་ནམ་དུས་ནི་ཁྱེད་ཀྱིས་ཤེས་པར་མི་རུང༌།
ACT 1:8 ཡང་དམ་པའི་ཐུགས་ཉིད་ཁྱེད་རྣམས་ལ་འབབ་པའི་ཚེ་ཁྱེད་ཚོར་ནུས་མཐུ་འཐོབ་པས། ཡེ་རུ་ཤ་ལེམ་དང༌། ཡ་ཧུ་དཱ་ཡུལ་ཡོངས། ས་མར་ཡཱ་ཡུལ། ས་གཞི་མཐའ་མའི་བར་དུ་ངའི་དཔང་པོ་ཡིན་པར་འགྱུར་”ཞེས་གསུངས་པའི་རྗེས་སུ།
ACT 1:9 ཁོ་ཚོའི་མཐོང་སར་ཁོང་ཡར་འཕགས་ནས་སྤྲིན་པ་ཞིག་གིས་ཁོང་བསུས་ཏེ་མི་མཐོང་བར་གྱུར།
ACT 1:10 ཁོ་ཚོས་ནམ་མཁའི་ཕྱོགས་སུ་ནན་གྱིས་བལྟས་ཏེ་ཁོང་ཡར་ཕེབས་དུས་གློ་བུར་དུ་གོས་དཀར་པོ་གྱོན་པའི་མི་གཉིས་དེ་ཚོའི་འགྲམ་དུ་ཐོན།
ACT 1:11 ཁོང་ཚོས་“ཀྱེ་ག་ལིལ་པ་རྣམས། ཅིའི་ཕྱིར་བསྡད་དེ་ནམ་མཁའི་ཕྱོགས་སུ་ལྟ། ཁྱེད་ཚོའི་མདུན་ནས་དཀོན་མཆོག་གི་ཞིང་ཁམས་སུ་ཡར་འཕགས་པ་གཙོ་བོ་ཡེ་ཤུ་ཉིད། ཇི་ལྟར་ཞིང་ཁམས་སུ་འཕགས་པ་མཐོང་བ་བཞིན། དེ་ལྟར་ཕྱིར་ལོག་ཕེབས་ངེས་ཡིན་”ཞེས་གསུངས།
ACT 1:12 དེ་ནས་སྐུ་ཚབ་རྣམས་ཡེ་རུ་ཤ་ལེམ་དང་ཐག་ཉེ་བ་སྟེ་སྤྱི་ལེ་གཅིག་ཙམ་གྱི་ས་ལ་ཆགས་པའི་སྐྱུར་རུ་ཤིང་ཟེར་བའི་རི་ནས་ཡེ་རུ་ཤ་ལེམ་དུ་ཕྱིར་ལོག
ACT 1:13 གྲོང་ཁྱེར་ལ་སླེབས་ནས་ཁོང་ཚོའི་བཞུགས་སའི་ཐོག་ཁང་ནང་དུ་འཛུལ། ཁོང་རྣམས་ནི་པེ་ཏྲོ་དང༌། ཡོ་ཧ་ནན། ཡ་ཀོབ། ཨན་དྲི་ཡཱ། ཕི་ལིབ། ཐོ་མཱ། པར་ཐོ་ལོ་མཱ། མད་ཐཱ། ཨལ་ཕཱ་ཞེས་པ་དེའི་བུ་ཡ་ཀོབ། རྒྱལ་གཅེས་པའི་ཕྱོགས་ཁག་གི་ཁོངས་མི་སི་མོན་ཞེས་པ། ཡ་ཀོབ་ཀྱི་བུ་ཡུ་དཱ་བཅས་ཡིན།
ACT 1:14 ཁོང་ཚོ་ཚང་མ་དང༌། གཙོ་བོ་ཡེ་ཤུའི་ཡུམ་མིར་ཡམ་ཚུད་པའི་བུད་མེད་དང༌། ཁོང་གི་གཅུང་པོ་རྣམས་དུས་རྒྱུན་དུ་འཛོམས་ནས་བློ་སེམས་གཅིག་མཐུན་གྱི་སྒོ་ནས་སྨོན་ལམ་འདེབས་བཞིན་ཡོད།
ACT 1:15 དེའི་དུས་སུ་དད་ལྡན་བརྒྱ་དང་ཉི་ཤུ་ཙམ་ཚོགས་པའི་ཁྲོད་དུ་ཡར་ལངས་ནས་པེ་ཏྲོས་
ACT 1:16 “སྤུན་ཟླ་རྣམས། རྒྱལ་པོ་དཱ་བིད་ཀྱི་ཐོག་ནས་དམ་པའི་ཐུགས་ཉིད་ཀྱིས་སྔར་མདོའི་ནང་ཡུ་དཱ་ཡི་སྐོར་གསུངས་པའི་བཀའ་འགྲུབ་དགོས། ཁོ་ནི་ང་ཚོའི་གྲལ་དུ་བརྩིས་ཏེ་ཞབས་ཏོག་འདིའི་སྐལ་བ་ཐོབ་མཁན་དང༌། གཙོ་བོ་ཡེ་ཤུ་འཛིན་མཁན་རྣམས་ཀྱི་ལམ་སྟོན་བྱེད་མཁན་དུ་གྱུར་”ཞེས་གསུངས།
ACT 1:18 (ཁོས་བྱས་པའི་ལས་ངན་གྱི་གླ་ཐོབ་ནས་ཞིང་ཁ་ཞིག་ཉོས་པ་དང༌། དེར་ཁ་སྦུབ་ཏུ་ལྷུངས་ནས་གྲོད་ཁོག་གས་ཏེ་ནང་ཁྲོལ་ཐམས་ཅད་ཕྱིར་ཐོན།
ACT 1:19 ཡེ་རུ་ཤ་ལེམ་ལ་སྡོད་མཁན་ཐམས་ཅད་ཀྱིས་དོན་དེའི་སྐོར་ཐོས་པས། ཞིང་དེའི་མིང་ནི་དེ་ཚོའི་སྐད་དུ་ཨ་ཀེལ་ད་མཱ་ཞེས་བཏགས། དེའི་དོན་ནི་ཁྲག་གི་ཞིང་ཁའོ་)
ACT 1:20 པེ་ཏྲོས་“གསུང་མགུར་གྱི་མདོ་ལས། ཁོ་ཡི་སྡོད་ས་སྟོང་བར་འགྱུར། ། སུ་ཡང་དེ་རུ་གནས་མ་ཆོག ། ཅེས་དང༌། ཡང༌། ཁོའི་ལས་འགན་གཞན་གྱིས་ལེན་པར་བྱོས་ཤིག ། ཅེས་གསུངས།
ACT 1:21 དེའི་ཕྱིར་ཡོ་ཧ་ནན་གྱིས་ཁྲུས་གསོལ་གནང་བ་ནས་བཟུང་སྟེ། ང་ཚོའི་མདུན་ནས་དཀོན་མཆོག་གི་ཞིང་ཁམས་སུ་ཡར་འཕགས་པའི་ཉིན་མོའི་བར་དུ། དུས་ཚང་མར་གཙོ་བོ་ཡེ་ཤུ་དང་མཉམ་དུ་འགྲོགས་པའི་ངེད་རྣམས་ཀྱི་ནང་ནས་མི་ཞིག་བདམས་ཏེ་ཁོང་སླར་གསོན་པའི་དཔང་པོར་འགྱུར་དགོས་”ཞེས་གསུངས་པས།
ACT 1:23 ཁོང་ཚོ་ཚང་མས་པར་ས་པཱ་ཟེར་བའི་ཡོ་སེབ་(ཡུ་སི་ཏཱུ་ཡང་ཟེར་) དང༌། མ་ཐི་ཡཱ་ཟེར་མཁན་གཉིས་འོས་ཁོངས་སུ་ངོ་སྤྲོད་བྱས།
ACT 1:24 དེ་ནས་ཁོང་ཚོས་“ཀྱེ་གཙོ་བོ་ལགས། ཁྱེད་ཀྱིས་མི་ཚང་མའི་སེམས་མཁྱེན་པས། ཡུ་དཱ་ནི་འོས་པའི་གནས་སུ་འགྲོ་བའི་ཆེད་དུ་ལས་ཚན་དོར་བས། སྐུ་ཚབ་ཀྱི་ལས་འགན་བྱེད་པའི་ཕྱིར་མི་འདི་ཚོ་གཉིས་ལས་ཁྱེད་ཀྱིས་བདམས་པར་མཛད་ཟིན་པ་དེ་ང་ཚོར་སྟོན་པར་མཛོད་”ཅེས་སྨོན་ལམ་བཏབ་ནས།
ACT 1:26 ཁོང་ཚོས་རྒྱན་བརྒྱབ་སྟེ་མ་ཐི་ཡཱ་ཡི་མིང་ཐོན་པས། ཁོང་སྐུ་ཚབ་བཅུ་གཅིག་པོའི་གྲལ་དུ་བརྩིས་སོ། །
ACT 2:1 ཉི་མ་ལྔ་བཅུ་པའི་དུས་ཆེན་ལ་སླེབས་སྐབས་ཁོ་ཚོ་ཚང་མ་ས་ཆ་གཅིག་ཏུ་འཛོམས་པ་དང༌།
ACT 2:2 གློ་བུར་དུ་དཀོན་མཆོག་གི་ཞིང་ཁམས་ནས་ཧུར་ཧུར་དུ་རྒྱག་པའི་རླུང་དང་འདྲ་བའི་སྒྲ་ཞིག་བྱུང་བ་དང༌། དེས་ནི་ཁོ་ཚོ་སྡོད་སའི་ཁང་པ་ཆ་ཚང་ཁྱབ།
ACT 2:3 མེ་ལྟར་གྱི་ལྕེ་རྣམས་ཁོ་ཚོའི་མདུན་དུ་མངོན་སུམ་དུ་གྱུར་ནས་བྲལ་ཏེ་སོ་སོའི་སྟེང་ལ་གནས།
ACT 2:4 དཀོན་མཆོག་གི་དམ་པའི་ཐུགས་ཉིད་ཀྱིས་ཁོ་ཚོ་ཚང་མ་གང་བར་གྱུར་ཞིང༌། དམ་པའི་ཐུགས་ཉིད་ཀྱིས་ནུས་མཐུ་གནང་བ་བཞིན་དུ་ཁོ་ཚོས་སྐད་རིགས་གཞན་རྣམས་སྤྱད་ནས་སྐད་ཆ་བཤད།
ACT 2:5 ཡང་ནམ་མཁའི་འོག་ཏུ་མི་རིགས་ཀུན་ནས་སེམས་དྲང་པོ་དང་ཆོས་སེམས་དང་ལྡན་པའི་ཡ་ཧུ་དཱ་པ་རྣམས་ཡེ་རུ་ཤ་ལེམ་ལ་གནས་པ་དང༌།
ACT 2:6 སྒྲ་དེ་བྱུང་བས་མི་ཚོགས་མང་པོ་ཞིག་འཛོམས་ཤིང༌། དེ་རྣམས་ཀྱིས་རང་རང་གི་སྐད་དད་ལྡན་པ་རྣམས་ཀྱིས་བཤད་པར་ཐོས་ནས་ཐེ་ཚོམ་སྐྱེས།
ACT 2:7 ཧ་ལས་ཏེ་ཡ་མཚན་ཆེན་པོར་གྱུར་བས་ཁོ་ཚོས་“གཏམ་ཤོད་མཁན་འདི་ཚོ་ཚང་མ་ག་ལིལ་པ་མ་ཡིན་ནམ།
ACT 2:8 ཡང་ཁོ་ཚོས་རང་རེའི་ཕ་སྐད་སྤྱད་ནས་གཏམ་བྱེད་པར་ང་ཚོས་ཐོས་པ་དེ་ཅི་ལ་སྲིད།
ACT 2:9 ང་ཚོ་པར་ཐ་དང༌། མེཌ་ཡཱ། ཨེ་ལཱམ། མེ་སུའོ་པི་ཏ་མེ་ཡཱ། ཡ་ཧུ་དཱ། ཀ་པ་དོག་ཡཱ། པོན་ཏུ། ཨེ་ཞེ་ཡཱ།
ACT 2:10 ཕ་རུག་ཡཱ། ཕམ་ཕིལ་ཡཱ། ཨེ་ཇེབ། སེ་རེ་ནཱ་གྲོང་ཁྱེར་དང་ཉེ་བའི་ལིབ་ཡཱ་ཡུལ་པ། རོ་མཱ་གྲོང་ཁྱེར་ནས་ཡོང་བའི་ཡ་ཧུ་དཱ་དང་ཡ་ཧུ་དཱ་པའི་ཆོས་ལུགས་ལ་ཞུགས་པའི་ཡ་ཧུ་དཱ་པ་མིན་པ་རྣམས།
ACT 2:11 ཀེ་རེ་ཊེ་དང༌། ཨ་རབ་པ་རྣམས་བཅས་མི་དེ་ཚོས་ང་ཚོ་རང་རང་གི་སྐད་ལ་དཀོན་མཆོག་གི་ངོ་མཚར་ཆེ་བའི་མཛད་པ་སྒྲོག་པར་ཐོས་”ཞེས་སྨྲས།
ACT 2:12 ཡང་ཁོ་ཚོ་ཚང་མ་ཧ་ལས་ཏེ་ཐེ་ཚོམ་སྐྱེས་པས་གཅིག་གིས་གཅིག་ལ་“འདིའི་དོན་ཅི་ཡིན་”ཞེས་བཤད།
ACT 2:13 འོན་ཀྱང་གཞན་པ་རྣམས་ཀྱིས་ཁྲེལ་དགོད་བྱས་ཏེ་“ཁོ་ཚོ་རྒུན་ཆང་མངར་མོས་བཟི་བ་ཡིན་”ཞེས་ཟེར།
ACT 2:14 དེ་ནས་པེ་ཏྲོས་སྐུ་ཚབ་བཅུ་གཅིག་པོ་དང་མཉམ་དུ་ལངས་ཏེ་སྐད་ཆེན་པོས་མི་ཚོགས་ལ་“ཡ་ཧུ་དཱ་ཡུལ་པ་དང་ཡེ་རུ་ཤ་ལེམ་ལ་གནས་པ་ཐམས་ཅད། ངས་དོན་འདི་གསལ་བཤད་བྱེད་རྒྱུ་ཡིན་པས་ང་ལ་ནན་གྱིས་ཉོན་དང༌།
ACT 2:15 ད་ལྟ་ཞོགས་པའི་ཆུ་ཚོད་དགུ་པ་ལས་མ་ཡིན་པས་ཁྱེད་ཚོའི་སེམས་ལ་མི་འདི་ཚོ་ཆང་གིས་ར་བཟི་བར་སྙམ་ན་ཡང་དེ་ལྟར་མིན།
ACT 2:16 དེ་ལས་ལྡོག་སྟེ་ཁྱེད་ཀྱིས་གང་ཐོས་པ་དེ་ལུང་སྟོན་པ་ཡོ་ཨེལ་གྱིས་ལུང་བསྟན་དང་མཐུན་ཏེ།
ACT 2:17 དཀོན་མཆོག་གིས་ནམ་དུས་མཐའ་མའི་སྐབས་སུ། ། ཁོང་གི་བཀའ་བསྩལ་ང་ཡི་ཐུགས་ཉིད་དེ། ། མི་ཡི་རིགས་ཅན་ཀུན་ལ་གནང་འགྱུར་ཏེ། ། ཁྱེད་ཀྱི་བུ་དང་བུ་མོས་ལུང་བསྟན་ཞིང༌། ། སྐྱེས་པ་གཞོན་ནུ་རྣམས་ལ་ཞལ་གཟིགས་འོང༌། ། ཁྱེད་ཀྱི་རྒན་རྒོན་རྣམས་ལ་རྨི་ལམ་འབྱུང༌། །
ACT 2:18 དུས་དེར་ང་ཡི་གཡོག་པོ་གཡོག་མོ་ལའང༌། ། ང་ཡི་ཐུགས་ཉིད་བསྩལ་གནང་འགྱུར་ནས་ནི། ། དེ་དག་གིས་ཀྱང་ལུང་བསྟན་འཆད་ངེས་ཡིན། །
ACT 2:19 ང་ཡིས་ནམ་མཁར་ངོ་མཚར་བྱ་བ་དང༌། ། ས་སྟེང་འདི་རུ་གྲུབ་རྟགས་སྟོན་པར་འགྱུར། ། ཁྲག་དང་མེ་དང་དུད་རླངས་འབྱུང་བར་འགྱུར། །
ACT 2:20 གཙོ་བོའི་ཁྱད་འཕགས་ཉིན་མོ་མ་ཟིན་བར། ། ཉི་མ་མུན་དང་ཟླ་བ་ཁྲག་ཏུ་འགྱུར། །
ACT 2:21 དེ་དུས་གཙོ་བོའི་མཚན་ནས་བརྗོད་མཁན་རྣམས། ། སྐྱབས་ནས་ཐར་པ་ཐོབ་པར་ཐེ་ཚོམ་མེད། ། ཅེས་གསུངས་སོ། །
ACT 2:22 ཀྱེ་ཡི་སི་ར་ཨེལ་པ་རྣམས། ངའི་གཏམ་ལ་ཉོན་ཅིག ཁྱེད་ཀྱིས་ཤེས་གསལ་ལྟར་ཁྱེད་ཚོའི་དཀྱིལ་ལ་ན་ཙ་རེལ་པ་ཡེ་ཤུས་ནུས་མཐུ་ལྡན་པའི་མཛད་པ་དང༌། ངོ་མཚར་ཅན་གྱི་དོན། གྲུབ་རྟགས་བཅས་མཛད། དཀོན་མཆོག་གིས་དེའི་སྒོ་ནས་གཙོ་བོ་ཡེ་ཤུ་ནི་ཁོང་གིས་མངགས་པ་ཡིན་པ་གསལ་པོར་བསྟན།
ACT 2:23 དེ་ཡང་ཁོང་ནི་དཀོན་མཆོག་གི་དགོངས་པ་དང་སྔོན་དུ་མཁྱེན་པ་ལྟར་ཁྱོད་རྣམས་ལ་གཏད་དེ། ཁྱོད་ཀྱིས་ཆོས་ཁྲིམས་མེད་པ་རྣམས་ཀྱི་ལག་པའི་སྒོ་ནས་རྒྱང་ཤིང་སྒང་ལ་གཟེར་བརྒྱབ་སྟེ་བཀྲོངས་སུ་བཅུག་ཀྱང༌།
ACT 2:24 འཆི་བའི་སྡུག་བསྔལ་ལས་སྒྲོལ་བར་མཛད་ནས་དཀོན་མཆོག་གིས་ཁོང་བསླངས། གང་ལགས་ཤེ་ན། འཆི་བའི་དབང་གིས་ཁོང་འཛིན་མི་སྲིད།
ACT 2:25 དེའི་ཕྱིར་རྒྱལ་པོ་དཱ་བིད་ཀྱིས་ཁོང་གི་སྐོར་ལ། རྟག་ཏུ་གཙོ་བོ་ང་ཡི་མདུན་དུ་མཐོང༌། ། ཁོང་ནི་ང་ཡི་གཡས་སུ་བཞུགས་འགྱུར་བས། ། ང་ནི་གཡོ་མེད་བརྟན་པོར་གནས་པར་འགྱུར། །
ACT 2:26 དེར་བརྟེན་ངའི་སེམས་དགའ་ཞིང་ངག་ནས་བསྟོད། ། ང་ཡི་ལུས་ཀྱང་རེ་བའི་ནང་དུ་གནས། །
ACT 2:27 ཁྱེད་ཀྱི་སྐྱེས་བུ་དམ་པ་མི་འཇིག་ལ། ། ངའི་སེམས་གཤིན་པོའི་གནས་སུ་དོར་མི་འགྱུར། །
ACT 2:28 ཁྱེད་ཀྱིས་ཚེ་ཡི་ལམ་ཁ་ང་ལ་བསྟན། ། མཉམ་དུ་འགྲོགས་པས་དགའ་སྤྲོ་ཁྱབ་པར་འགྱུར། ། ཞེས་གསུངས།
ACT 2:29 ཀྱེ་སྤུན་ཟླ་རྣམས། ང་ཚོའི་མེས་པོ་དཱ་བིད་གྲོངས་ནས་ཁོང་གི་སྐུ་སྤུར་ད་ལྟའི་བར་དུ་གནས་པའི་དུར་ཁང་ནང་དུ་བཅུག་པར་ངས་ཁྱེད་ཚོར་ཡིད་རྟོན་བྱས་ནས་སྨྲས།
ACT 2:30 དཱ་བིད་ནི་ལུང་སྟོན་པ་ཞིག་ཡིན་པས་དཀོན་མཆོག་གིས་ཁོང་ལ་རང་གི་བུ་རྒྱུད་ལས་གཅིག་བཞུགས་ཁྲིར་སྐོ་བའི་མནའ་བཞེས་པར་ཤེས།
ACT 2:31 མཱ་ཤི་ཀ་སླར་གསོན་དུ་འགྱུར་བའི་སྐོར་སྔོན་དུ་མཁྱེན་པས་རྒྱལ་པོ་དཱ་བིད་ཀྱིས་ཁོང་ནི་གཤིན་པོའི་ཁམས་ལ་མ་བོར་ཞིང༌། ཁོང་གི་ཤ་ལུས་ཀྱང་རུལ་བར་མ་གནང་ཞེས་གསུངས།
ACT 2:32 དཀོན་མཆོག་གིས་གཙོ་བོ་ཡེ་ཤུ་དེ་ཉིད་གསོན་པོར་བསླངས་པ་ལ་ང་ཚོ་ཚང་མས་དཔང་པོ་བྱེད།
ACT 2:33 དཀོན་མཆོག་གི་ཕྱག་གཡས་སུ་འཕགས་ཏེ་ཡབ་ནས་དམ་པའི་ཐུགས་ཉིད་གནང་རྒྱུ་ཡིན་པའི་ཞལ་ཆད་ཐོབ་ནས་ཁྱེད་ཀྱིས་མཐོང་བ་དང་ཐོས་པ་འདི་ཁོང་གིས་འབྱུང་བར་མཛད།
ACT 2:34 རྒྱུ་མཚན་ནི་རྒྱལ་པོ་དཱ་བིད་དཀོན་མཆོག་གི་ཞིང་ཁམས་སུ་འཕགས་མ་མྱོང་ཡང༌། ཁོང་ཉིད་ཀྱིས། དཀོན་མཆོག་གིས་ནི་ང་ཡི་གཙོ་བོ་ལ། ། ང་ཡིས་ཁྱེད་ཀྱི་དགྲ་ཚོགས་བཅོམ་ནས་ནི། ། ཁྱེད་ཀྱི་ཞབས་སྟེགས་འོག་ཏུ་མ་བཅུག་བར། ། ཁྱེད་ངའི་གཡས་སུ་བཞུགས་པར་འགྱུར་ཞིག་ཨང༌། ། ཞེས་གསུངས།
ACT 2:36 དེའི་ཕྱིར་ཁྱེད་རྣམས་ཀྱིས་རྒྱང་ཤིང་སྒང་ལ་བརྒྱངས་པའི་ཡེ་ཤུ་འདི་ནི་དཀོན་མཆོག་གིས་གཙོ་བོ་དང་སྐྱབས་མགོན་མཱ་ཤི་ཀར་བསྐོས་པ་ཡིན་པར་ཡི་སི་ར་ཨེལ་ཡོངས་ཀྱིས་ནན་ཏན་གྱིས་ཤེས་པར་གྱིས་ཤིག་”ཅེས་གསུངས།
ACT 2:37 དེ་ཐོས་ནས་ཁོ་ཚོ་སེམས་ཤིན་ཏུ་འཁྲུགས་པས་པེ་ཏྲོ་དང་སྐུ་ཚབ་གཞན་རྣམས་ལ་“སྤུན་ཟླ་རྣམས། ང་ཚོས་ཅི་བྱ་”ཞེས་སྨྲས་ནས།
ACT 2:38 པེ་ཏྲོས་ཁོ་ཚོར་“སྤྱོད་པ་ངན་པ་རྣམས་སྤངས་ནས་སེམས་སྒྱུར་ལ་ཁྱེད་ཀྱི་སྡིག་ཉེས་སེལ་བའི་ཕྱིར་རེ་རེས་གཙོ་བོ་ཡེ་ཤུ་མཱ་ཤི་ཀའི་མཚན་གྱི་ཐོག་ནས་ཁྲུས་གསོལ་ལོངས་ཤིག་དང༌། ཁྱེད་རྣམས་ལ་དཀོན་མཆོག་གི་གནང་སྦྱིན་ཏེ་དམ་པའི་ཐུགས་ཉིད་འཐོབ་པར་འགྱུར།
ACT 2:39 གང་ཡིན་ཞེ་ན། ཞལ་ཆད་འདི་ནི་ཁྱེད་དང༌། ཁྱེད་ཀྱི་བུ་རྒྱུད། ཐག་རིང་དུ་སྡོད་པའི་མི་ཐམས་ཅད་དེ། ང་ཚོའི་གཙོ་བོ་དཀོན་མཆོག་གིས་རང་ལ་འབོད་གནང་བའི་མི་སུ་ལ་ཡང་གནང་བ་ཡིན་”ཞེས་གསུངས།
ACT 2:40 ཡང་ཁོང་གིས་གཏམ་གཞན་མང་པོས་དཔང་པོ་བྱས་ཏེ་ཁོ་ཚོར་“མི་རབས་ངན་པ་འདི་ལས་ཐར་བར་འགྱུར་ཞིག་”ཅེས་ཡང་ཡང་བསྐུལ།
ACT 2:41 དེ་ནས་ཁོང་གིས་གསུངས་པའི་བཀའ་དང་ལེན་བྱེད་མཁན་རྣམས་ཀྱིས་ཁྲུས་གསོལ་བླངས་ཤིང༌། ཉིན་མོ་དེར་མི་གསུམ་སྟོང་ཙམ་ཁོ་ཚོའི་གྲལ་དུ་ཞུགས།
ACT 2:42 ཡང་ཁོ་རྣམས་ལ་སྐུ་ཚབ་ཀྱི་ཆོས་བསྟན་པ་དང༌། དད་ལྡན་དང་འགྲོགས་པ། བག་ལེབ་བགོས་པ། སྨོན་ལམ་འདེབས་པར་བརྩོན་སེམས་ཡོད།
ACT 2:43 དཀོན་མཆོག་གིས་སྐུ་ཚབ་རྣམས་བརྒྱུད་ནས་རྟགས་དང་ངོ་མཚར་བའི་དོན་མང་པོ་བསྟན་པས། མི་ཐམས་ཅད་འཇིགས་ཏེ་དཀོན་མཆོག་ལ་བཀུར་སྟི་བྱས།
ACT 2:44 ཡང་དད་ལྡན་ཐམས་ཅད་འགྲོགས་ཏེ་ནོར་རྫས་ཡོད་ཚད་ཐུན་མོང་དུ་བྱས།
ACT 2:45 ནོར་རྫས་དང་ས་ཞིང་བཙོངས་ནས་མི་ཐམས་ཅད་ཀྱི་ནང་ལ་དགོས་པ་བཞིན་དུ་བགོ་བཤའ་བརྒྱབ།
ACT 2:46 ཉིན་རེར་ཁོ་རྣམས་མཆོད་ཁང་གི་ཁྱམས་རར་འཛོམས། ཁྱིམ་ཚང་ནང་བག་ལེབ་བགོས་པ་དང༌། སེམས་དགའ་ཞིང་དྲིན་གཟོའི་སེམས་ཀྱིས་མཉམ་དུ་ཟ་སྟེ། དཀོན་མཆོག་ལ་བསྟོད་པ་ཕུལ་ཞིང༌། མི་ཐམས་ཅད་ཀྱིས་ཁོ་རྣམས་ལ་མོས་མཐུན་བྱས། གཙོ་བོས་ཉིན་རེ་བཞིན་ཐར་བར་གྱུར་བ་རྣམས་ཁོ་ཚོའི་གྲལ་དུ་ཞུགས་པར་མཛད་དོ། །
ACT 3:1 ཉིན་ཞིག་སྐུ་ཚབ་པེ་ཏྲོ་དང་ཡོ་ཧ་ནན་གཉིས་ཕྱི་དྲོའི་ཆུ་ཚོད་གསུམ་པའི་སྨོན་ལམ་འདེབས་པའི་དུས་སུ་མཆོད་ཁང་ལ་ཡར་ཕེབས་པའི་ཚེ།
ACT 3:2 མི་རྣམས་ཀྱིས་སྐྱེས་དུས་ནས་ཞ་བོ་ཡིན་པ་ཞིག་ཁུར་ཏེ་ཡོང༌། ཞ་བོ་དེས་མཆོད་ཁང་ལ་འགྲོ་མཁན་རྣམས་ལ་སློང་བའི་ཆེད་དུ་ཁོ་ཚོས་མཛེས་པ་ཞེས་ཟེར་བའི་རྒྱལ་སྒོར་ཉིན་ལྟར་བཞག
ACT 3:3 ཞ་བོ་དེས་པེ་ཏྲོ་དང་ཡོ་ཧ་ནན་མཆོད་ཁང་གི་ཁྱམས་རའི་ནང་དུ་ཕེབས་གྲབས་ཡོད་པ་མཐོང་ནས་སྦྱིན་པ་སློང༌།
ACT 3:4 འོན་ཀྱང་པེ་ཏྲོ་དང་ཡོ་ཧ་ནན་གཉིས་ཀྱིས་ཁོ་ལ་ནན་གྱིས་བལྟས་ཏེ་པེ་ཏྲོས་“ང་ཚོར་ལྟོས་དང་”ཞེས་གསུངས་ནས།
ACT 3:5 སྦྱིན་པ་འཐོབ་པར་རེ་བ་བྱས་ཏེ། མི་དེས་ཁོང་ཚོར་དོ་སྣང་བྱས།
ACT 3:6 པེ་ཏྲོས་“དངུལ་ཡང་ན་གསེར་ང་ལ་མེད་ཀྱང༌། ང་ལ་ཡོད་པ་དེ་ཁྱེད་ལ་སྟེར་རྒྱུ་ཡིན། ན་ཙ་རེལ་པ་ཡེ་ཤུ་མཱ་ཤི་ཀའི་མཚན་གྱི་ཐོག་ནས་ཡར་ལོངས་ལ་སོང་ཞིག་”ཅེས་གསུངས་ནས།
ACT 3:7 ཁོང་གིས་ཁོའི་ལག་པ་གཡས་པ་ནས་བཟུང་སྟེ་ཡར་བསྐྱོར་བ་དང་ལངས་སུ་བཅུག འཕྲལ་དུ་ཁོའི་རྐང་པ་བརྟན་པོར་གྱུར།
ACT 3:8 ཡར་མཆོངས་ཤིང་ལངས་ནས་འགྲོ་ཐུབ་པར་གྱུར། དེ་ནས་གོམ་པ་སྤོས་པ་དང་མཆོངས་ནས་དཀོན་མཆོག་ལ་བསྟོད་དེ་མཆོད་ཁང་གི་ཁྱམས་རའི་ནང་དུ་ཁོང་ཚོ་དང་མཉམ་དུ་ཕྱིན།
ACT 3:9 མི་ཐམས་ཅད་ཀྱིས་མི་དེ་འགྲོ་བ་དང་དཀོན་མཆོག་ལ་བསྟོད་པར་མཐོང་ཞིང༌།
ACT 3:10 སྔར་མི་རྣམས་ལ་སློང་བའི་ཆེད་དུ་མཛེས་པའི་རྒྱལ་སྒོར་སྡོད་མཁན་སྤྲང་པོ་ཡིན་པར་ངོ་ཤེས་པས། ཁོ་ལ་ཅི་བྱུང་བར་ཧ་ལས་ཤིང་ཡ་མཚན་ཆེན་པོ་སྐྱེས།
ACT 3:11 མི་དེས་པེ་ཏྲོ་དང་ཡོ་ཧ་ནན་བཟུང་བཞིན་ཡོད་དུས་མི་ཐམས་ཅད་ཡོངས་སུ་ཧ་ལས་ཤིང༌། ཁོང་ཚོའི་རྩར་སོ་ལོ་མོན་གྱི་གཡབ་རིང་ཞེས་བྱ་བར་རྒྱུག་ནས་འཛོམས།
ACT 3:12 པེ་ཏྲོས་དེ་མཐོང་ནས་མི་རྣམས་ལ་“ཀྱེ་ཡི་སི་ར་ཨེལ་པ་རྣམས། དོན་འདི་ལ་ཅིའི་ཕྱིར་ཡ་མཚན་སྐྱེས་ལ་ང་ཚོར་ནན་གྱིས་ལྟ། ངེད་གཉིས་ཀྱི་ནུས་མཐུའམ་ཆོས་སེམས་ཀྱི་སྒོ་ནས་མི་འདི་འགྲོ་ཐུབ་པར་གྱུར་སྙམ་མམ།
ACT 3:13 ང་ཚོའི་མེས་པོ་ཨབ་ར་ཧམ་དང༌། ཨི་སཱག་དང༌། ཡ་ཀོབ་བཅས་ཀྱི་དཀོན་མཆོག་གིས་ཁོང་གི་ཞབས་ཕྱི་ཡེ་ཤུ་འཕགས་པར་མཛད་པ་ཡིན། སྔར་པི་ལ་ཏུ་ཡིས་ཡེ་ཤུ་གློད་པར་ཐག་གཅོད་བྱས་ཟིན་ཡང༌། པི་ལ་ཏུའི་མདུན་དུ་ཁྱོད་རྣམས་ཀྱིས་ཁོང་དགྲ་བོར་གཏད་ནས་དོར།
ACT 3:14 ཁྱོད་རྣམས་ཀྱིས་སྐྱེས་བུ་དམ་པ་དང་རྣམ་པར་དག་པ་དེ་དོར་ནས་མི་གསོད་མཁན་ཅིག་གློད་པར་ཞུས་པས།
ACT 3:15 ཚེ་སྲོག་གི་འགོད་པ་པོ་དེ་བསད། དཀོན་མཆོག་གིས་ཁོང་འཆི་བ་ནས་སླར་གསོན་པོར་མཛད་པ་ལ་ང་ཚོས་དཔང་པོ་བྱེད།
ACT 3:16 ཁྱེད་ཀྱིས་མཐོང་བ་དང༌། ངོ་ཤེས་པའི་མི་འདི་གཙོ་བོ་ཡེ་ཤུའི་མཚན་ལ་དད་པའི་སྒོ་ནས་གསོས་པར་འགྱུར། ཁོང་གི་མཚན་དང༌། ཁོང་བརྒྱུད་ནས་བྱུང་བའི་དད་པ་ཡིས་ཁྱེད་ཚོའི་མདུན་དུ་མི་འདི་ཁམས་བཟང་པོར་མཛད་པ་ཡིན།
ACT 3:17 ད་སྤུན་ཟླ་རྣམས། ཁྱེད་དང་ཁྱེད་ཀྱི་དཔོན་པོ་རྣམས་ཀྱིས་དོན་ལ་རྨོངས་པའི་སྒོ་ནས་དེ་བཞིན་དུ་བྱས་པར་ངས་ཤེས།
ACT 3:18 དཀོན་མཆོག་གིས་སྔར་ལུང་སྟོན་པ་ཐམས་ཅད་ཀྱི་བཀའ་བརྒྱུད་ནས་རང་གིས་མངགས་པའི་མཱ་ཤི་ཀ་སྡུག་བསྔལ་མྱོང་དགོས་ཞེས་གསུངས་པ་ནི། དེ་བཞིན་དུ་དཀོན་མཆོག་གིས་བསྒྲུབས་པར་མཛད།
ACT 3:19 དེ་བས་ན་ཁྱེད་ཚོས་སྤྱོད་པ་ངན་པ་རྣམས་སྤངས་ནས་སེམས་སྒྱུར་ཞིང་དཀོན་མཆོག་ལ་བློ་སེམས་གཏོད་དང༌། དེ་ནི་ཁྱེད་ཀྱི་སྡིག་ཉེས་སེལ་བར་འགྱུར་བ་དང༌།
ACT 3:20 དཀོན་མཆོག་གི་མདུན་ནས་ལྷོད་པའི་དུས་ལ་འབབ་ཞིང༌། ཁོང་གིས་ཁྱེད་རྣམས་ཀྱི་དོན་དུ་བསྐོས་པའི་མཱ་ཤི་ཀ་སྟེ་ཡེ་ཤུ་མངག་རྒྱུ་ཡིན་པའི་ཕྱིར་རོ།
ACT 3:21 ཁོང་ནི་དམ་པའི་ལུང་སྟོན་པའི་བཀའ་ཡི་སྒོ་ནས་དཀོན་མཆོག་གིས་གནའ་བོ་ནས་གསུངས་པའི་དོན་ཐམས་ཅད་སླར་གསོ་བའི་དུས་མ་འབབ་པའི་བར་དུ། དཀོན་མཆོག་གི་ཞིང་ཁམས་སུ་བཞུགས་དགོས།
ACT 3:22 ལུང་སྟོན་པ་མོ་ཤེ་ཡིས་གཙོ་བོ་ཁྱེད་ཀྱི་དཀོན་མཆོག་གིས་ཁྱེད་ཚོའི་དོན་ལ་ང་བཞིན་དུ་ལུང་སྟོན་པ་ཞིག་ཁྱེད་ཚོའི་ནང་ནས་བསྐོ་བར་འགྱུར་ཞིང༌། ཁོང་གིས་གསུང་བའི་བཀའ་ཐམས་ཅད་ལ་ཁྱོད་ཀྱིས་ཉན་དགོས།
ACT 3:23 ལུང་སྟོན་པ་དེའི་བཀའ་ལ་མི་ཉན་མཁན་ནི་དཀོན་མཆོག་གི་མི་རྣམས་དང་བྲལ་ནས་ཡོངས་སུ་འཇིག་པར་འགྱུར་ངེས་ཡིན་ཞེས་གསུངས།
ACT 3:24 ཡང་ཤ་མུ་ཨེལ་དང་ཁོང་གི་རྒྱུན་འཛིན་པ་རྣམས་ཀྱི་དུས་ནས་བཟུང་ལུང་སྟོན་པ་ཡོད་ཚད་ཀྱིས་དུས་འདིའི་སྐོར་ལུང་བསྟན།
ACT 3:25 དཀོན་མཆོག་གིས་མེས་པོ་ཨབ་ར་ཧམ་ལ་ཁྱེད་ཀྱི་བུ་རྒྱུད་ནས་ས་སྟེང་གི་མི་རིགས་ཐམས་ཅད་ལ་བྱིན་རླབས་འབྱུང་བར་འགྱུར་ཞེས་གསུངས་པས། ཁྱེད་ཚོ་ནི་ལུང་སྟོན་པ་རྣམས་ཀྱི་བུ་རྒྱུད་དང༌། དཀོན་མཆོག་གིས་ཁྱེད་ཀྱི་མེས་པོ་ལ་གནང་བའི་ཞལ་ཆད་ཀྱི་འཐོབ་མཁན་ཡིན།
ACT 3:26 དཀོན་མཆོག་གིས་ཁོང་གི་ཞབས་ཕྱི་ཡེ་ཤུ་མངག་སྐབས་སུ་ཁྱེད་ཚོར་ཐོག་མར་བཏང་བར་མཛད། དེ་ནི་མི་རེ་རེ་ངན་སེམས་ལས་སྒྱུར་དུ་བཅུག་ནས་ཁྱེད་རྣམས་ལ་བྱིན་གྱིས་རླབས་པའི་ཆེད་དུ་ཡིན་”ཞེས་གསུངས་སོ། །
ACT 4:1 པེ་ཏྲོ་དང་ཡོ་ཧ་ནན་གྱིས་མི་ཚོགས་ལ་གཏམ་བྱེད་པའི་དུས་སུ་ཡ་ཧུ་དཱ་པའི་བླ་མ་རྣམས་དང༌། སཱ་ཅུ་སེ་པའི་ཕྱོགས་ཁག་ནང་ནས་ཁ་ཅིག་དང༌། མཆོད་ཁང་གི་སྲུང་དམག་གི་དཔོན་པོ་ཁོ་ཚོའི་འཁྲིས་སུ་སླེབས།
ACT 4:2 ཁོང་གཉིས་ཀྱིས་གཙོ་བོ་ཡེ་ཤུའི་ཐོག་ནས་འཆི་བ་ལས་སླར་གསོན་པ་ཡོད་པར་བསྒྲགས་ཏེ་མི་རྣམས་ལ་ཆོས་བསྟན་གནང་བས་ཁོ་ཚོ་སེམས་ཤིན་ཏུ་འཁྲུགས་པས།
ACT 4:3 ཁོང་ཚོ་འཛིན་བཟུང་བྱས་པ་དང༌། དགོང་དྲོ་ཟིན་ཚར་བས་དེའི་སང་ཉིན་གྱི་བར་བཙོན་ཁང་དུ་བཅུག
ACT 4:4 འོན་ཀྱང་བཀའ་དེ་ཐོས་མཁན་གྱི་ནང་ནས་མི་མང་པོ་ཞིག་གིས་དད་པ་བྱས་ཏེ། དད་ལྡན་རྣམས་ཀྱི་གྲལ་དུ་སྐྱེས་པ་རྣམས་ཀྱི་གྲངས་ལྔ་སྟོང་ཙམ་དུ་གྱུར།
ACT 4:5 དེའི་ཕྱི་ཉིན་ཁོ་ཚོའི་དཔོན་པོ་དང༌། རྒན་པོ། ཆོས་ཁྲིམས་ལ་མཁས་པའི་མི་རྣམས།
ACT 4:6 ཡ་ཧུ་དཱ་པའི་བླ་ཆེན་གཙོ་བོ་ཨ་ན་སི། ཀ་ཡ་ཕཱ། ཡོ་ཧ་ནན། ཨ་ལིག་ཟན་ཌེར། བླ་ཆེན་གཙོ་བོའི་ནང་མི་ཐམས་ཅད་ཡེ་རུ་ཤ་ལེམ་དུ་འཛོམས།
ACT 4:7 བཙོན་པ་དེ་གཉིས་ཁོ་ཚོའི་དཀྱིལ་ལ་བཞག་ནས་ཁོ་ཚོས་“ནུས་མཐུ་གང་ངམ། སུའི་མིང་ལ་བརྟེན་ནས་ཁྱོད་ཚོས་དོན་འདི་བསྒྲུབས་པ་ཡིན་ནམ་”ཞེས་དྲིས་པས།
ACT 4:8 སྐུ་ཚབ་པེ་ཏྲོ་དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་གྱུར་ནས་ཁོ་ཚོར་“ཀྱེ་དཔོན་རིགས་དང་རྒན་པོ་རྣམས།
ACT 4:9 གལ་ཏེ་ནད་པ་ཞིག་ལ་འཕྲིན་ལས་བྱས་པ་དང༌། ཅི་ལྟར་བྱས་ཏེ་ཁོ་གསོས་པར་གྱུར་བའི་སྐོར་ལ་ཁྱེད་རྣམས་ཀྱིས་ང་ཚོར་དེ་རིང་འདྲི་གཅོད་བྱས་ན།
ACT 4:10 ཁྱོད་རྣམས་ཀྱིས་རྒྱང་ཤིང་སྒང་ལ་བསད་ནས་དཀོན་མཆོག་གིས་འཆི་བ་ནས་གསོན་པོར་ལང་དུ་མཛད་པ་ན་ཙ་རེལ་པ་ཡེ་ཤུ་མཱ་ཤི་ཀའི་མཚན་གྱི་ཐོག་ནས་མི་འདི་ཁྱེད་ཀྱི་མདུན་དུ་ཁམས་བཟང་པོར་བཞུགས་པ་ཁྱེད་ཚོ་དང༌། ཡི་སི་ར་ཨེལ་གྱི་མི་ཚང་མས་ཤེས་པར་གྱིས་ཤིག
ACT 4:11 ཡེ་ཤུ་ནི་གསུང་རབ་ལྟར་ཁྱོད་ཚོ་བཟོ་པ་རྣམས་ཀྱིས་དོར་བའི་རྡོ་སྟེ་རྨང་རྡོར་གྱུར་བ་དེ་ཡིན་ནོ།
ACT 4:12 ཐར་པ་ནི་གཞན་སུ་ཡང་ལས་འབྱུང་མི་སྲིད། གང་ཡིན་ཞེ་ན། ང་ཚོ་ཐར་བར་འགྱུར་བའི་ཆེད་དུ་མི་རྣམས་ཀྱི་ནང་ནས་མཚན་འདི་མ་གཏོགས་པར་གཞན་ཞིག་གནམ་འོག་ཏུ་གནང་བ་མ་ཡིན་ནོ་”ཞེས་གསུངས།
ACT 4:13 ཁོ་རྣམས་ཀྱིས་པེ་ཏྲོ་དང་ཡོ་ཧ་ནན་གྱིས་བློ་སྟོབས་ཆེན་པོས་གསུངས་པར་མཐོང་བ་དང༌། ཁོང་ཚོ་སློབ་གསོ་མྱོང་མེད་པའི་མི་སེར་ཡིན་པར་རྟོགས་ཏེ། ཡ་མཚན་ཆེན་པོ་སྐྱེས་ནས་དེ་གཉིས་གཙོ་བོ་ཡེ་ཤུ་དང་འགྲོགས་མྱོང་བ་ཡིན་པར་ཤེས།
ACT 4:14 ཡང་ཞ་བོ་ནད་ལས་གསོས་པར་གྱུར་བ་དེ་ཁོ་ཚོའི་དཀྱིལ་ལ་ལངས་ཏེ་སྡོད་པ་མཐོང་བས་ཁོ་ཚོས་ལན་ཅི་ཡང་བརྗོད་མ་ཐུབ་རྐྱེན།
ACT 4:15 ཁོང་ཚོས་ཁོ་གཉིས་གྲོས་ཚོགས་ཁང་ནས་ཕྱི་རུ་འདོན་པའི་བཀའ་བཏང་ནས། གཅིག་གིས་གཅིག་ལ་གཏམ་གླེང་བྱས་ཏེ་
ACT 4:16 “ངེད་རྣམས་ཀྱིས་མི་འདི་གཉིས་ལ་ཅི་བྱེད་པར་བྱ། ཡེ་རུ་ཤ་ལེམ་ལ་སྡོད་མཁན་ཀུན་གྱིས་ངོ་མཚར་བའི་རྟགས་བསྒྲུབས་པ་ཡིན་པར་ཤེས་པས་ང་ཚོས་དེ་མ་བྱུང་ཞེས་ཟེར་མི་སྲིད།
ACT 4:17 འོན་ཀྱང་དོན་འདི་མི་རྣམས་ཀྱི་ཁྲོད་དུ་སྔར་ལས་ལྷག་པ་མི་ཁྱབ་པའི་ཆེད་དུ་ང་ཚོས་ཁོ་རྣམས་ལ་ད་ནས་བཟུང་མཚན་འདིའི་ཐོག་ནས་སུ་ལ་ཡང་མི་འཆད་པའི་ཐ་ཚིག་བྱེད་རྒྱུ་ཡིན་”ཞེས་བཤད་པས།
ACT 4:18 ཁོ་ཚོ་གཉིས་བོས་པ་དང༌། གཙོ་བོ་ཡེ་ཤུའི་མཚན་ཐོག་ནས་ནམ་ཡང་གཏམ་བརྗོད་པ་དང་ཆོས་སྟོན་མི་ཆོག་པར་བཀའ་བཏང་ཡང༌།
ACT 4:19 པེ་ཏྲོ་དང་ཡོ་ཧ་ནན་གྱིས་ཁོ་ཚོར་“ཁྱེད་ཀྱི་གསུང་ངམ། དཀོན་མཆོག་གི་བཀའ་ལ་ཉན་པ་ནི་དཀོན་མཆོག་གི་སྤྱན་སྔར་ཇི་ཞིག་འོས་པ་ཡིན་པར་ཁྱེད་ཀྱིས་ཐག་གཅོད་བྱེད་དགོས་ཏེ།
ACT 4:20 ང་ཚོས་གང་མཐོང་བ་དང་ཐོས་པའི་སྐོར་ལ་འཆད་རྒྱུ་ལས་ཐབས་གཞན་མེད་”ཅེས་གསུངས།
ACT 4:21 ངོ་མཚར་བའི་རྟགས་ཀྱིས་གསོས་པར་འགྱུར་བའི་མི་དེ་ལོ་བཞི་བཅུ་ལྷག་ཙམ་ལོན་པ་ཞིག་ཡིན་ཏེ། རྟགས་དེ་བྱུང་བས་མི་ཐམས་ཅད་ཀྱིས་དཀོན་མཆོག་ལ་བསྟོད་པ་ཕུལ་བའི་རྐྱེན་གྱིས་ཁོང་གཉིས་ལ་ཉེས་ཆད་གཏོང་མ་ནུས། དེའི་ཕྱིར་གྲོས་ཚོགས་ཀྱིས་སྔོན་ལས་ལྷག་པའི་རྫིག་རྫིག་བཏང་ནས་ཁོང་རྣམས་གློད།
ACT 4:23 དེའི་རྗེས་སུ་སྐུ་ཚབ་པེ་ཏྲོ་དང་ཡོ་ཧ་ནན་རང་གི་འགྲོགས་མིའི་རྩར་ཕྱིར་ལོག་ནས་བླ་ཆེན་དང་རྒན་པོ་རྣམས་ཀྱིས་གང་བཤད་པ་ཐམས་ཅད་ཁོ་ཚོར་གསུངས།
ACT 4:24 ཁོ་ཚོས་གཏམ་དེ་ཐོས་ནས་བློ་སེམས་གཅིག་མཐུན་གྱིས་དཀོན་མཆོག་ལ་སྨོན་ལམ་བཏབ་སྟེ་“ཀྱེ་གཙོ་བོ་དཀོན་མཆོག ཁྱེད་ཀྱིས་གནམ་ས་གཉིས་དང༌། རྒྱ་མཚོ། དེར་ཡོད་པ་ཐམས་ཅད་བཀོད་པ་གནང་ངོ༌།
ACT 4:25 ཁྱེད་ཀྱིས་དམ་པའི་ཐུགས་ཉིད་ཀྱི་ཐོག་ནས་ཁྱེད་ཀྱི་ཞབས་ཕྱི་ང་ཚོའི་མེས་པོ་དཱ་བིད་བརྒྱུད་ནས། ཕྱི་པ་རབ་ཏུ་ཁྲོས་པ་ཅི་ཡི་ཕྱིར། ། མི་རྒྱུད་རྣམས་ཀྱིས་དོན་མེད་བྱེད་པ་ཅི། །
ACT 4:26 དེ་ཡང་གཙོ་བོ་དཀོན་མཆོག་ཁོང་ཉིད་ཀྱིས། ། མངགས་པའི་སྐྱབས་མགོན་དེ་ལ་རྒོལ་ཆེད་དུ། ། ས་སྟེང་རྒྱལ་དཔོན་ཐམས་ཅད་མཉམ་དུ་འདུས། ། ཞེས་གསུངས་པའི་ལུང་བསྟན་ནི།
ACT 4:27 དོན་དངོས་སུ་གྲོང་ཁྱེར་འདིར་བསྒྲུབས་སོ། གང་ལགས་ཟེར་ན། རྒྱལ་པོ་ཧེ་རོ་དཱེ་དང་སྤྱི་ཁྱབ་ཕོན་ཏི་ཡུ་པི་ལ་ཏུ་གཉིས་ནི་ཕྱི་པ་རྣམས་དང་ཡི་སི་ར་ཨེལ་གྱི་མི་སྡེ་དང་བཅས་པ་ཁྱེད་ཀྱིས་སྣུམ་གྱིས་བྱུགས་སུ་བཅུག་པའི་ཞབས་ཕྱི་དམ་པ་ཡེ་ཤུ་ལ་ངོ་རྒོལ་བྱེད་པར་འཛོམས།
ACT 4:28 དེ་ནི་སྔར་ནས་ཁྱེད་ཀྱི་དབང་དང་ཐུགས་དགོངས་ཀྱིས་གང་ཐག་བཅད་ཟིན་པ་དེ་སྒྲུབ་པའི་ཆེད་དུ་ཡིན།
ACT 4:29 ཀྱེ་གཙོ་བོ་དཀོན་མཆོག ད་ཁོ་ཚོའི་འཇིགས་སྐུལ་གཟིགས་ཤིང༌། ཁྱེད་ཀྱི་གཡོག་པོ་རྣམས་ཀྱིས་བློ་སྟོབས་ཆེན་པོས་ཁྱེད་ཀྱི་བཀའ་སྒྲོག་གནང་བར་ཤོག
ACT 4:30 ཡང་ནད་གསོ་བར་མཛད་པའི་ཆེད་དུ་ཁྱེད་ཀྱི་ཕྱག་རྐྱོངས་ཤིང༌། ཁྱེད་ཀྱི་ཞབས་ཕྱི་དམ་པ་ཡེ་ཤུའི་མཚན་གྱི་ཐོག་ནས་རྟགས་དང་ངོ་མཚར་བའི་དོན་སྒྲུབ་པར་ཤོག་”ཅེས་གསུངས།
ACT 4:31 ཁོང་ཚོས་སྨོན་ལམ་བཏབ་པའི་རྗེས་སུ་འཛོམས་ས་གཡོ་བར་གྱུར་བ་དང༌། ཁོང་ཚོ་ཚང་མ་དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་གྱུར་བས་འཇིགས་སྣང་ཅི་ཡང་མེད་པར་དཀོན་མཆོག་གི་བཀའ་བསྒྲགས།
ACT 4:32 ཡང་དད་ལྡན་གྱི་མི་ཚོགས་བློ་སེམས་གཅིག་མཐུན་པར་བཞུགས་ཏེ། ཁོ་ཚོའི་ནང་ནས་རང་ནོར་རང་གི་ཡིན་ཟེར་མཁན་གཅིག་ཀྱང་མེད་པས། ནོར་རྫས་ཐམས་ཅད་ཐུན་མོང་དུ་བྱས།
ACT 4:33 ནུས་མཐུ་ཆེན་པོས་སྐུ་ཚབ་རྣམས་ཀྱིས་གཙོ་བོ་ཡེ་ཤུ་འཆི་བ་ནས་སླར་གསོན་པར་དཔང་པོ་མཛད། དཀོན་མཆོག་གི་ཐུགས་རྗེ་ཆེན་པོ་ཁོང་ཚོ་ཚང་མར་བབས་སོ།
ACT 4:34 དད་ལྡན་རྣམས་ཀྱི་ནང་ནས་དབུལ་པོ་གཅིག་ཀྱང་མེད། རྒྱུ་མཚན་ནི་ས་ཞིང་ངམ་ཁང་པ་ཡོད་པའི་མི་ཐམས་ཅད་ཀྱིས་དེ་ཚོ་བཙོངས་ནས་དངུལ་ཐོབ་པ་དང༌། དད་ལྡན་གཞན་ལ་ཕན་པའི་ཕྱིར་སྐུ་ཚབ་རྣམས་ཀྱི་ཞབས་ཀྱི་དྲུང་དུ་བཞག དེ་ནས་ཁོང་ཚོས་མི་རེ་རེ་ལ་དགོས་པ་བཞིན་དུ་བགོ་བཤའ་བརྒྱབ།
ACT 4:36 ཡང་ཀིབ་རུ་གླིང་ཕྲན་ནས་ཡིན་པའི་སྐྱེས་པ་ཡོ་སེབ་ཟེར་མཁན་ཞིག་ཡོད་དེ། ཁོང་ནི་ལེ་ཝི་པ་ཞིག་ཡིན། སྐུ་ཚབ་རྣམས་ཀྱིས་ཁོང་ལ་མིང་པར་ན་པཱ་ཞེས་བཏགས་པ་སྟེ། བློ་སྟོབས་སྤེལ་མཁན་ཞེས་པའི་དོན་ཡིན།
ACT 4:37 ཁོང་ལ་ཡོད་པའི་ཞིང་ཁ་ཞིག་བཙོངས་ནས་དེའི་རིན་གོང་འཁྱེར་ཡོང་བ་དང༌། སྐུ་ཚབ་རྣམས་ཀྱི་ཞབས་ཀྱི་དྲུང་དུ་བཞག་གོ །
ACT 5:1 འོན་ཀྱང་ཨ་ནན་ཡཱ་ཟེར་བའི་སྐྱེས་པ་ཞིག་དང་ཁོའི་བཟའ་ཟླ་སབ་ཕི་རཱ་གཉིས་ཀྱིས་ཞིང་ཁ་ཞིག་བཙོངས་ནས།
ACT 5:2 ཨ་ནན་ཡཱ་ཡིས་སའི་རིན་གོང་ཆ་ཤས་ཤིག་རང་གི་དོན་ལ་བཞག་ནས་ས་རིན་ལྷག་མ་སྐུ་ཚབ་རྣམས་ཀྱི་ཞབས་ལ་བཞག་པ་དེ་སབ་ཕི་རཱ་ཡིས་ཀྱང་ཤེས་ཀྱི་ཡོད།
ACT 5:3 ཡང་སྐུ་ཚབ་པེ་ཏྲོས་“ཨ་ནན་ཡཱ། བདུད་སཱ་ཏན་གྱིས་ཁྱོད་ཀྱི་སེམས་ལ་ཁྱབ་ནས་དཀོན་མཆོག་གི་དམ་པའི་ཐུགས་ཉིད་ལ་རྫུན་བཤད་དེ། སའི་རིན་གོང་ཆ་ཤས་རང་ལ་བཞག་པ་དེ་ཅི་ཡིན།
ACT 5:4 ཞིང་ཁ་དེ་མ་བཙོངས་པའི་སྔོན་དུ་ཁྱོད་རང་གི་མ་ཡིན་ནམ། ཡང་བཙོངས་པའི་རྗེས་སུ་སའི་རིན་གོང་ཁྱོད་ལ་དབང་བ་མ་ཡིན་ནམ། བསམ་པ་འདི་ཁྱོད་ཀྱི་སེམས་ལ་སྐྱེས་པ་དེ་ཅི་ལྟར་སྲིད། ཁྱོད་ཀྱིས་མི་རྣམས་ལ་མ་བཤད་ཀྱི། དཀོན་མཆོག་ལ་རྫུན་བཤད་”ཅེས་གསུངས།
ACT 5:5 གཏམ་དེ་གོ་མ་ཐག་ཨ་ནན་ཡཱ་ས་ལ་འགྱེལ་ནས་ཤིའོ། དེའི་སྐོར་ཐོས་པ་ཐམས་ཅད་ཤིན་ཏུ་འཇིགས།
ACT 5:6 གཞོན་ནུ་རྣམས་ཀྱིས་ཁོའི་ཕུང་པོ་རས་ཀྱིས་བཏུམས་ནས་ཕྱི་རོལ་ཏུ་འཁུར་ཏེ་དུར་དུ་བཅུག
ACT 5:7 དེ་ནས་ཆུ་ཚོད་གསུམ་ཙམ་གྱི་རྗེས་སུ་ཁོ་ལ་ཅི་བྱུང་བ་མི་ཤེས་པར་ཁོའི་བཟའ་ཟླ་ཡོང་ཞིང༌།
ACT 5:8 སྐུ་ཚབ་པེ་ཏྲོས་ཁོ་མོར་“ང་ལ་ཤོད་དང༌། ཁྱོད་གཉིས་ཀྱིས་ས་ཞིང་བཙོངས་ནས་རིན་གོང་འདི་ཙམ་ཐོབ་བམ་”ཞེས་གསུངས་པས་ཁོ་མོས་“ལགས་ཡིན། རིན་གོང་དེ་ཙམ་ཡིན་”ཞེས་སྨྲས་པ་དང༌།
ACT 5:9 སྐུ་ཚབ་པེ་ཏྲོས་ཁོ་མོར་“དཀོན་མཆོག་གི་དམ་པའི་ཐུགས་ཉིད་ལ་ཉམས་ཚོད་བྱེད་པའི་ཕྱིར་ཁྱོད་གཉིས་ཀྱིས་མོས་མཐུན་བྱས་པ་དེ་ཅི་ཡིན། ལྟོས་ཤིག ཁྱོད་ཀྱི་ཁྱོ་བོའི་ཕུང་པོ་དུར་དུ་འཇུག་མཁན་སྒོ་ལ་འདུག ཁོ་ཚོས་ཁྱོད་ཀྱི་ཕུང་པོ་ཕྱི་རོལ་ཏུ་འཁུར་ངེས་ཡིན་”ཞེས་གསུངས་མ་ཐག
ACT 5:10 ཁོང་གི་ཞབས་ཀྱི་དྲུང་དུ་འགྱེལ་ནས་ཁོ་མོ་ཤིའོ། གཞོན་ནུ་རྣམས་ནང་ལ་ཡོང་ནས་ཁོ་མོ་ཤི་བར་མཐོང་བས། ཁོ་མོའི་ཕུང་པོ་ཕྱིར་འཁུར་བ་དང༌། ཁྱོ་བོའི་དུར་སའི་ཉེ་འགྲམ་ལ་དུར་དུ་བཅུག
ACT 5:11 ཡང་དོན་དེའི་སྐོར་ཐོས་མཁན་དང༌། ཆོས་ཚོགས་ཀྱི་མི་ཚང་མ་འཇིགས་སྐྲག་སྐྱེས་སོ། །
ACT 5:12 ཡང་མི་རྣམས་ཀྱི་ཁྲོད་དུ་སྐུ་ཚབ་རྣམས་ཀྱི་ཐོག་ནས་རྟགས་དང་ངོ་མཚར་བའི་དོན་མང་པོ་བྱུང༌། དད་ལྡན་ཐམས་ཅད་མཆོད་ཁང་དུ་སོ་ལོ་མོན་གྱི་གཡབ་རིང་ལ་འཛོམས།
ACT 5:13 གཞན་རྣམས་ཀྱིས་ཁོང་ཚོ་དང་འགྲོགས་མི་ནུས་ཀྱང༌། ཡུལ་མི་རྣམས་ཀྱིས་ཁོང་ཚོར་བརྩི་བཀུར་བྱས།
ACT 5:14 ཡང་སྔོན་ལས་ལྷག་པར་སྐྱེས་པ་དང་བུད་མེད་དད་ལྡན་ཤིན་ཏུ་མང་པོ་ཁོང་ཚོའི་གྲལ་དུ་ཞུགས་པར་གྱུར།
ACT 5:15 སྐུ་ཚབ་རྣམས་ཀྱིས་གང་མཛད་པའི་རྐྱེན་གྱིས་མི་རྣམས་ཀྱིས་ནད་པ་ཚོ་ལམ་ལ་འཁུར་ནས་ཉལ་ཁྲི་དང་མལ་སྟན་སྒང་ལ་བཞག དེ་ནི་སྐུ་ཚབ་པེ་ཏྲོ་ཕེབས་པའི་དུས་སུ་ཁོང་གི་གྲིབ་མ་ཙམ་ཡང་ཁོ་ཚོ་ཁ་ཤས་ཀྱི་ལུས་ལ་ཕོག་པའི་ཆེད་དུ་ཡིན་པས་སོ།
ACT 5:16 ཡེ་རུ་ཤ་ལེམ་དང་ཉེ་འཁོར་གྱི་གྲོང་སྡེའི་མི་མང་པོ་ནད་པ་དང༌། གདོན་འདྲེ་མི་གཙང་བ་ཕོག་པ་རྣམས་འཁྲིད་དེ་འཛོམས་ཤིང༌། ཁོ་ཚོ་ཐམས་ཅད་གསོས་པར་གྱུར།
ACT 5:17 དེ་ནས་བླ་ཆེན་གཙོ་བོ་དང༌། ཁོ་དང་འགྲོགས་པའི་སཱ་ཅུ་སེ་པའི་ཕྱོགས་ཁག་གི་ཁོངས་གཏོགས་པ་ཐམས་ཅད་ཕྲག་དོག་སྐྱེས་ཏེ།
ACT 5:18 སྐུ་ཚབ་རྣམས་འཛིན་བཟུང་བྱས་ནས་སྤྱི་པའི་བཙོན་ཁང་དུ་བཅུག
ACT 5:19 འོན་ཀྱང་མཚན་མོའི་དུས་སུ་གཙོ་བོའི་ཕོ་ཉ་ཞིག་གིས་བཙོན་ཁང་གི་སྒོ་ཕྱེ་ནས་ཁོང་རྣམས་ཕྱི་རོལ་ཏུ་འཁྲིད་དེ།
ACT 5:20 ཁོང་ཚོར་“སོང་ལ་མཆོད་ཁང་ཆེན་མོའི་ཁྱམས་རར་མི་རྣམས་ལ་ཚེ་གསར་པ་འདིའི་འཕྲིན་ཡོངས་སུ་སྒྲོགས་ཤིག་”ཅེས་གསུངས།
ACT 5:21 དེ་ཐོས་ནས་ནམ་ལངས་པའི་ཚེ་ཁོང་རྣམས་མཆོད་ཁང་ཆེན་མོའི་ཁྱམས་རར་སོང་ནས་ཆོས་བསྟན། བླ་ཆེན་འཁོར་དང་བཅས་པ་ཡོང་སྐབས། ཁོ་ཚོས་ཡི་སི་ར་ཨེལ་གྱི་རྒན་པོ་ཐམས་ཅད་ཀྱི་གྲོས་ཚོགས་བསྐོངས་ནས་བཙོན་པ་དེ་གཉིས་ཁོ་ཚོའི་རྩར་འཁྲིད་ཡོང་དགོས་པས་བཙོན་ཁང་ལ་བཀའ་མངགས་བཏང༌།
ACT 5:22 མཆོད་ཁང་གི་སྲུང་དམག་དེར་སོང་ནས་སྐུ་ཚབ་རྣམས་བཙོན་ཁང་དུ་མ་རྙེད་པས། གྲོས་ཚོགས་ལ་ཕྱིར་ལོག་པ་དང་ཁོ་རྣམས་ལ་
ACT 5:23 “བཙོན་ཁང་གི་སྒོ་དམ་པོར་བརྒྱབ་སྟེ་སྲུང་མཁན་རྣམས་སྒོ་འགྲམ་ལ་ལངས་ཏེ་བསྡད་པ་ང་ཚོས་མཐོང་ཡང༌། སྒོ་ཕྱེ་ནས་ནང་ལ་མི་སུ་ཡང་མ་མཐོང་”ཞེས་བཤད།
ACT 5:24 དེ་ཐོས་ནས་མཆོད་ཁང་གི་སྲུང་དམག་གི་དཔོན་པོ་དང༌། བླ་ཆེན་རྣམས་ག་བྱེད་འདི་བྱེད་མེད་པར་གྱུར་ཏེ། བྱ་བ་འདི་ནས་ཅི་འབྱུང་བར་འགྱུར་སྙམ།
ACT 5:25 མི་ཞིག་དེར་སླེབས་ནས་ཁོ་ཚོར་“ཉོན་དང༌། ཁྱེད་ཚོས་བཙོན་ཁང་དུ་བཅུག་པའི་མི་དེ་རྣམས་མཆོད་ཁང་གི་ཁྱམས་རར་མི་ཚོགས་ལ་ཆོས་སྟོན་གྱི་འདུག་”ཅེས་སྨྲས།
ACT 5:26 དེ་ནས་དཔོན་པོ་དེ་སྲུང་དམག་དང་མཉམ་དུ་མཆོད་ཁང་ལ་ཕྱིན་ནས། མི་རྣམས་ཀྱིས་ཁོ་ཚོར་རྡོ་རུབ་གཏོང་བའི་འཇིགས་པ་སྐྱེས་པས་བཙན་ཤེད་མི་བྱེད་པར་ཁོང་རྣམས་གྲོས་ཚོགས་ལ་འཁྲིད་ཡོང་སྟེ།
ACT 5:27 གྲོས་ཚོགས་ཀྱི་མདུན་དུ་བཞག་ནས། བླ་ཆེན་གྱིས་ཁོང་ཚོར་
ACT 5:28 “ངེད་རྣམས་ཀྱིས་ཁྱོད་ཚོར་མིང་འདིའི་ཐོག་ནས་མི་བསྟན་པ་ནན་གྱིས་བསྐུལ་ཡང༌། ཁྱོད་ཀྱིས་ཡེ་རུ་ཤ་ལེམ་ལ་ཆོས་འདི་གང་སར་ཁྱབ་བསྒྲགས་བྱས་ཏེ། མི་དེའི་ཁྲག་ལན་ང་ཚོ་ལ་འགེལ་བར་འདོད་”ཅེས་ཟེར།
ACT 5:29 འོན་ཀྱང་པེ་ཏྲོ་དང་སྐུ་ཚབ་གཞན་རྣམས་ཀྱིས་“མིའི་ངག་ལ་མི་ཉན་གྱི། དཀོན་མཆོག་གི་བཀའ་ལ་ཉན་དགོས།
ACT 5:30 ཁྱེད་ཀྱིས་རྒྱང་ཤིང་སྒང་ལ་བརྒྱངས་ནས་བསད་པའི་གཙོ་བོ་ཡེ་ཤུ་ནི་ངེད་རྣམས་ཀྱི་མེས་པོའི་དཀོན་མཆོག་གིས་འཆི་བ་ནས་སླར་གསོན་པར་མཛད།
ACT 5:31 ཡི་སི་ར་ཨེལ་གྱི་མི་རིགས་ལ་སེམས་བསྒྱུར་བ་དང༌། སྡིག་ཉེས་སེལ་རྒྱུའི་གོ་སྐབས་གནང་བའི་ཕྱིར་དཀོན་མཆོག་གིས་གཙོ་བོ་དང་སྐྱབས་མགོན་ལྟར་ཉིད་ཀྱི་ཕྱག་གཡས་སུ་ཁོང་འཕགས་པར་མཛད།
ACT 5:32 ང་ཚོས་དོན་དེ་རྣམས་ལ་དཔང་པོ་བྱེད་ཅིང༌། ཁོང་གི་བཀའ་ལ་ཉན་མཁན་ལ་གནང་བ་དཀོན་མཆོག་གི་དམ་པའི་ཐུགས་ཉིད་ཀྱིས་ཀྱང་དོན་དེ་རྣམས་ལ་དཔང་པོ་མཛད་”ཅེས་གསུངས།
ACT 5:33 དེ་ཐོས་ནས་གྲོས་ཚོགས་ཀྱི་མི་རྣམས་ཁོང་ཁྲོ་ལངས་ཏེ་ཁོང་རྣམས་གསོད་པར་འདོད།
ACT 5:34 འོན་ཀྱང་ཕཱ་རུ་ཤི་ཟེར་བའི་ཕྱོགས་ཁག་ལ་གཏོགས་པའི་མི་སྟེ་ཆོས་ཁྲིམས་ལ་མཁས་ཤིང༌། མི་ཚང་མས་བཀུར་བ་གཱ་མ་ལི་ཨེལ་ཟེར་མཁན་ནི་གྲོས་ཚོགས་སུ་ལངས་ནས་སྐུ་ཚབ་རྣམས་དུས་ཐུང་ངུ་ཕྱི་རོལ་ཏུ་འཁྲིད་དགོས་པའི་བཀའ་གནང༌།
ACT 5:35 ཁོང་གིས་གྲོས་ཚོགས་ལ་“ཡི་སི་ར་ཨེལ་གྱི་སྐྱེས་པ་རྣམས། ཁྱེད་ཀྱིས་མི་འདི་རྣམས་ལ་ཅི་བྱེད་ཞིབ་པར་དགོངས་ཤིག
ACT 5:36 སྔོན་ཆད་ཐེའུ་དཱ་ཟེར་མཁན་གྱིས་རང་བསྟོད་བྱས་ཏེ་སྲིད་གཞུང་ལ་ངོ་རྒོལ་བྱས་པ་དང༌། མི་བཞི་བརྒྱ་ཙམ་ཁོའི་རྗེས་སུ་འབྲངས། གཞན་གྱིས་ཁོ་བསད་ནས་ཁོའི་རྗེས་འབྲངས་པ་རྣམས་འཐོར་ཏེ་དོན་དེ་མེད་པར་གྱུར།
ACT 5:37 དེའི་རྗེས་སུ་ཡ་ཧུ་དཱ་ཡུལ་གྱི་འབངས་མི་མིང་ཐོ་འགོད་པའི་དུས་སུ་ག་ལིལ་ཡུལ་ནས་ཡིན་པ་ཡུ་དཱ་ཡིས་རྗེས་འབྲངས་པ་རྣམས་མཉམ་དུ་བསྡུས་ནས་སྲིད་གཞུང་ལ་ངོ་རྒོལ་བྱས་པ་དང༌། ཁོ་ཡང་བསད་ནས། རྗེས་འབྲངས་པ་ཐམས་ཅད་འཐོར་བར་གྱུར།
ACT 5:38 དེའི་ཕྱིར་གནས་ཚུལ་འདིའི་སྐོར་ངས་ཁྱེད་རྣམས་ལ་ཟེར་རྒྱུར། མི་འདི་ཚོར་ཅི་ཡང་མི་བྱེད་ཅིང་གློད་བཀྲོལ་གཏོང་ཞིག གང་ལགས་ཤེ་ན། གལ་ཏེ་འཆར་གཞིའམ་བྱ་བ་འདི་ནི་མི་རྣམས་ལས་བྱུང་བ་ཡིན་ན་འཇིག་པར་འགྱུར།
ACT 5:39 འོན་ཀྱང་དཀོན་མཆོག་ལས་བྱུང་ན་ཁྱེད་ཀྱིས་ཁོ་ཚོ་འགོག་མི་ཐུབ་པ་མ་ཟད། དཀོན་མཆོག་ལ་ངོ་རྒོལ་བྱེད་མཁན་དུ་འགྱུར་བའི་ཉེན་ཁ་ཡོད་”ཅེས་གསུངས།
ACT 5:40 ཁོང་གི་བཀའ་ལ་ཉན་ཏེ་གྲོས་ཚོགས་ཀྱིས་སྐུ་ཚབ་རྣམས་བོས་ནས་ཁོང་ཚོ་རྟ་ལྕག་གིས་རྡུང་དུ་བཅུག དེ་ནས་ཁོ་ཚོས་སྐུ་ཚབ་རྣམས་ལ་གཙོ་བོ་ཡེ་ཤུའི་མཚན་གྱི་ཐོག་ནས་མི་འཆད་པར་བཀའ་བཏང་ནས་གློད།
ACT 5:41 གྲོས་ཚོགས་ནས་འཐོན་དུས་ཡེ་ཤུའི་མཚན་གྱི་དོན་ལ་སྡུག་བསྔལ་དེ་ལྟར་མྱོང་འོས་པར་བརྩིས་པས་ཁོང་རྣམས་ཧ་ཅང་དགའ་བར་གྱུར།
ACT 5:42 ཡང་ཉིན་ལྟར་མཆོད་ཁང་གི་ཁྱམས་ར་དང་ཁྱིམ་ཚང་གང་དུའང་ཁོང་ཚོས་གཙོ་བོ་ཡེ་ཤུ་ནི་མཱ་ཤི་ཀ་ཡིན་ཞེས་རྒྱུན་མི་ཆད་པར་བསྟན་ཏེ་བསྒྲགས་སོ། །
ACT 6:1 ཡེ་ཤུ་ལ་དད་ལྡན་རྣམས་ཀྱི་གྲངས་མང་དུ་འཕེལ་བའི་དུས་སུ། ཉིན་རེའི་ཟས་ཀྱི་བགོ་སྐལ་གནང་སྐབས་ཡ་ཧུ་དཱ་པའི་སྐད་ཆ་ཤོད་པའི་ཡ་ཧུ་དཱ་པ་རྣམས་ཀྱིས་གྷི་རིག་སྐད་སྨྲ་བའི་ཡུགས་མོ་རྣམས་ལ་སྣང་མེད་དུ་བཏང་བས་ཁོ་ཚོའི་བར་མི་མཐུན་པ་ཞིག་བྱུང་བས།
ACT 6:2 བཅུ་གཉིས་པོས་དད་ལྡན་ཐམས་ཅད་ཀྱི་ཚོགས་བོས་ནས་ཁོ་ཚོར་“ཉིན་རེའི་བགོ་སྐལ་གནང་བའི་ཆེད་དུ་དཀོན་མཆོག་གི་བཀའ་སྣང་མེད་དུ་འཇོག་མི་རུང་བས།
ACT 6:3 སྤུན་ཟླ་རྣམས། ཁྱེད་ཚོ་ལས་ཡོན་ཏན་ཅན་ཡིན་ཏེ། དམ་པའི་ཐུགས་ཉིད་དང་ཤེས་རབ་ཀྱིས་གང་བའི་སྐྱེས་པ་བདུན་འདོམས་ཤིག ང་ཚོས་ཁོང་རྣམས་ལ་ལས་ཀ་འདི་བསྐོས་ནས།
ACT 6:4 སྨོན་ལམ་འདེབས་པ་དང་དཀོན་མཆོག་གི་བཀའ་སྒྲོག་པའི་ལས་ལ་བརྩོན་པར་བྱ་”ཞེས་གསུངས།
ACT 6:5 དེ་ཐོས་ནས་ཆོས་ཚོགས་ཀྱི་དད་ལྡན་ཐམས་ཅད་བློ་སེམས་བདེ་བར་གྱུར། ཁོ་ཚོས་དད་པ་དང་དམ་པའི་ཐུགས་ཉིད་ཀྱིས་གང་བ་སེ་ཏེ་ཕཱན་དང༌། ཕི་ལིབ། པོ་རོ་ཀོ་རུ། ནི་ཀ་ནོར། ཏི་མོན། པར་མེ་ནཱ། སྔར་ཡ་ཧུ་དཱ་པའི་ཆོས་ལུགས་ལ་ཞུགས་ཏེ་ཨན་ཏི་ཡོག་ཡཱ་གྲོང་ཁྱེར་ནས་ཡིན་པ་ནི་ཀོ་ལཱ་བཅས་བདམས།
ACT 6:6 ཁོ་ཚོས་མི་འདི་ཚོ་སྐུ་ཚབ་རྣམས་ཀྱི་མདུན་དུ་འཁྲིད་ནས་ཁོང་རྣམས་ཀྱིས་སྨོན་ལམ་བཏབ་སྟེ་མི་དེ་ཚོར་ཕྱག་འཇོག་པར་མཛད།
ACT 6:7 དཀོན་མཆོག་གི་བཀའ་ཕྱོགས་ཀུན་ཏུ་ཁྱབ། ཡེ་རུ་ཤ་ལེམ་ལ་དད་ལྡན་རྣམས་ཀྱི་གྲངས་ཤིན་ཏུ་མང་པོར་འཕེལ། ཡ་ཧུ་དཱ་པའི་བླ་མའི་ནང་ནས་མང་པོ་ཞིག་གིས་འཕྲིན་བཟང་ལ་དད་པ་རེད།
ACT 6:8 ཡང་ཐུགས་རྗེ་དང་ནུས་མཐུ་ཡིས་གང་སྟེ་སེ་ཏེ་ཕཱན་གྱིས་ཡུལ་མིའི་ནང་ནས་རྟགས་དང་ངོ་མཚར་ཆེ་བའི་དོན་བསྟན།
ACT 6:9 འོན་ཀྱང་རང་དབང་ཅན་ཞེས་བྱ་བའི་ཡ་ཧུ་དཱ་པའི་འདུ་ཁང་ནས་སེ་རེ་ནཱ་དང་ཨ་ལིག་ཟན་དྲི་ཡཱ་གྲོང་ཁྱེར་ནས་ཡིན་པ་དང༌། གཞན་ཡང་ཀི་ལིག་ཡཱ་དང་ཨེ་ཞེ་ཡཱ་ཡུལ་པ་ཁ་ཤས་ཀྱིས་སེ་ཏེ་ཕཱན་དང་རྩོད་གླེང་བྱས།
ACT 6:10 འོན་ཀྱང་སེ་ཏེ་ཕཱན་གྱིས་ཤེས་རབ་དང་དམ་པའི་ཐུགས་ཉིད་ཀྱིས་གསུངས་པ་དེར་ཁོ་ཚོས་རྒོལ་མ་ཐུབ།
ACT 6:11 དེ་ནས་ཁོ་ཚོས་མི་ཁ་ཤས་ལ་ལྐོག་ཏུ་བློ་འགུགས་བྱས་པས་མི་དེ་ཚོས་“ཁོས་དཀོན་མཆོག་དང༌། ལུང་སྟོན་པ་མོ་ཤེ་ལ་སྐུར་བ་འདེབས་པ་ང་ཚོས་ཐོས་”ཞེས་ཟེར།
ACT 6:12 ཁོ་ཚོས་ཡུལ་མི་དང༌། རྒན་པོ། ཆོས་ཁྲིམས་ལ་མཁས་པའི་མི་རྣམས་ལ་ངན་བསྐུལ་བྱས་ནས་ཡོང་སྟེ་སེ་ཏེ་ཕཱན་བཟུང་ཞིང༌། གྲོས་ཚོགས་ཀྱི་མདུན་དུ་འཁྲིད།
ACT 6:13 དེ་ནས་ཁོ་ཚོས་རྫུན་གྱི་དཔང་པོ་གྲ་སྒྲིག་བྱས་ཤིང༌། ཁོ་ཚོས་“མི་འདིས་གནས་མཆོག་དང་ཆོས་ཁྲིམས་ལ་རྒྱུན་ཆད་མེད་པར་སྐུར་བ་འདེབས།
ACT 6:14 གང་ལགས་ཤེ་ན། ཁོས་ཡེ་ཤུ་ཟེར་བའི་ན་ཙ་རེལ་པ་དེས་གནས་མཆོག་བཤིག་ནས་མོ་ཤེ་ཡིས་ང་ཚོར་གནང་བའི་ཁྲིམས་སྲོལ་སྒྱུར་བར་བྱ་ཞེས་ཟེར་བ་ཐོས་”ཞེས་བཤད།
ACT 6:15 གྲོས་ཚོགས་ལ་སྡོད་མཁན་ཐམས་ཅད་ཀྱིས་སེ་ཏེ་ཕཱན་ལ་ནན་གྱིས་བལྟས་ཏེ། ཁོང་གི་ངོ་གདོང་ནི་དཀོན་མཆོག་གི་ཕོ་ཉ་ཞིག་གི་ཞལ་དང་འདྲ་བར་ཡོད་པ་མཐོང་ངོ༌། །
ACT 7:1 བླ་ཆེན་གྱིས་“དོན་འདི་ཚོ་བདེན་ནམ་”ཞེས་དྲིས་པས།
ACT 7:2 སེ་ཏེ་ཕཱན་གྱིས་“ཀྱེ་སྤུན་ཟླ་དང་ཕ་རྒན་རྣམས་ང་ལ་ཉོན་དང༌། ཧ་རན་གྲོང་ཁྱེར་ལ་བཞུགས་པའི་སྔོན་ལ་མེ་སུའོ་པི་ཏ་མེ་ཡཱ་ཡུལ་ལ་གནས་པའི་དུས་སུ་གཟི་བརྗིད་དང་ལྡན་པའི་དཀོན་མཆོག་གིས་ངེད་རྣམས་ཀྱི་མེས་པོ་ཨབ་ར་ཧམ་ལ་མངོན་པར་མཛད་ཏེ།
ACT 7:3 ཁོང་ལ་ཁྱོད་རང་གི་ཕ་ཡུལ་དང་གཉེན་ཚན་དང་ཁ་བྲལ་ཏེ་ངས་ཁྱོད་ལ་བསྟན་པའི་ཡུལ་དུ་སོང་ཞིག་ཅེས་གསུངས་པས།
ACT 7:4 ཁོང་ཀལ་དཱ་པ་རྣམས་ཀྱི་ཡུལ་བཞག་ནས་ཧ་རན་གྲོང་ཁྱེར་ལ་གཞིས་ཆགས་བྱས། ཁོང་གི་ཕ་སྐུ་ཚེ་ལས་འདས་པའི་རྗེས་སུ་དཀོན་མཆོག་གིས་ཧ་རན་ནས་ཁྱེད་རྣམས་ད་ལྟ་བཞུགས་པའི་ཡུལ་འདིར་ཁོང་མངགས།
ACT 7:5 འོན་ཀྱང་དཀོན་མཆོག་གིས་ཨབ་ར་ཧམ་ལ་ཡུལ་ཡི་རྐང་མཐིལ་ལས་ཆེ་ཙམ་ཞིག་ཀྱང་སྐལ་བ་མ་གནང༌། ཨབ་ར་ཧམ་ལ་ད་དུང་བུ་ཕྲུག་མེད་ཀྱང༌། དཀོན་མཆོག་གིས་ཁོང་དང་ཁོང་གི་བུ་རྒྱུད་རྣམས་ལ་ཡུལ་འདི་བདག་འཛིན་བྱེད་རྒྱུའི་ཞལ་ཆད་གནང༌།
ACT 7:6 འོན་ཀྱང་རྗེས་མ་དཀོན་མཆོག་གི་གསུངས་པ་ལྟར། ཁྱོད་ཀྱི་བུ་རྒྱུད་ནི་མི་རིགས་གཞན་གྱི་ཡུལ་ལ་ཕྱི་པ་ལྟར་ལོ་བཞི་བརྒྱའི་རིང་ལ་བྲན་གཡོག་བྱེད་དེ་སྡུག་བསྔལ་མྱོང་བར་འགྱུར།
ACT 7:7 ཁོ་ཚོ་བྲན་གཡོག་ཏུ་འཇུག་མཁན་གྱི་མི་རིགས་ལ་ངས་ཁྲིམས་གཅོད་གཏོང་བར་བྱ། དེའི་རྗེས་སུ་ཁོ་རྣམས་ཐོན་ཏེ་གནས་འདིར་ང་ལ་བསྙེན་བཀུར་བྱེད་པར་འགྱུར་ཞེས་གསུངས།
ACT 7:8 ཡང་དཀོན་མཆོག་གིས་ཨབ་ར་ཧམ་ལ་ཞལ་ཆད་སྲུང་བའི་རྟགས་ཤིག་གནང་བས། ཨབ་ར་ཧམ་ནི་ཨི་སཱག་གི་ཕ་རུ་གྱུར་ཏེ་སྐྱེས་པ་ནས་ཉིན་བརྒྱད་པར་ཁོང་གིས་ཨི་སཱག་ལ་ཡ་ཧུ་དཱ་པའི་ཆོས་ཀྱི་རྟགས་དེ་བརྒྱབ། ཨི་སཱག་ནི་ཡ་ཀོབ་ཀྱི་ཕ་རུ་གྱུར་ཞིང༌། ཡ་ཀོབ་དེ་མེས་པོ་བཅུ་གཉིས་པོའི་ཕ་རུ་གྱུར།
ACT 7:9 མེས་པོ་གཞན་རྣམས་ཀྱིས་མེས་པོ་ཡོ་སེབ་ལ་ཕྲག་དོག་སྐྱེས་ཏེ་བྲན་གཡོག་ལྟར་ཨེ་ཇེབ་ཡུལ་ལ་བཙོངས་ཀྱང༌། དཀོན་མཆོག་ཁོང་དང་མཉམ་དུ་བཞུགས་པས།
ACT 7:10 ཁོང་གི་སྡུག་བསྔལ་ཐམས་ཅད་ལས་ཐར་བར་མཛད་ནས་དཀོན་མཆོག་གིས་ཁོང་ཨེ་ཇེབ་ཡུལ་གྱི་རྒྱལ་པོ་ཕར་ཨོ་ཞེས་བྱ་བའི་སྤྱན་སྔར་དྲིན་ཐོབ་པ་དང་ཤེས་རབ་ལྡན་པར་བསྒྱུར་བས། རྒྱལ་པོ་དེས་ཉིད་ཀྱི་ཕོ་བྲང་གི་གཉེར་པ་དང༌། ཨེ་ཇེབ་ཡུལ་གྱི་སྤྱི་ཁྱབ་ལ་བསྐོས།
ACT 7:11 དེ་ནས་ཨེ་ཇེབ་དང་ཀ་ནཱན་ཟེར་བའི་ཡུལ་ཡོངས་སུ་མུ་གེ་བྱུང་བས་མི་རྣམས་སྡུག་བསྔལ་ཆེན་པོ་མྱོང་སྟེ། ངེད་རྣམས་ཀྱི་མེས་པོ་ལ་ཟ་རྒྱུ་མ་ཐོབ།
ACT 7:12 འོན་ཀྱང་ཡ་ཀོབ་ཀྱིས་ཨེ་ཇེབ་ཡུལ་ལ་འབྲུ་རིགས་ཡོད་པ་ཐོས་ནས་དེར་ཁོང་གིས་ང་ཚོའི་མེས་པོ་ཐེངས་དང་པོར་མངགས།
ACT 7:13 འགྲུལ་སྐྱོད་ཐེངས་གཉིས་པར་ཡོ་སེབ་ཀྱིས་རང་གི་གཅེན་པོ་རྣམས་ལ་ཁོང་སུ་ཡིན་པར་བཤད་ཅིང༌། ཁོང་གི་ཁྱིམ་མི་རྣམས་རྒྱལ་པོ་ཕར་ཨོ་ལ་ངོ་སྤྲོད་བྱས།
ACT 7:14 དེ་ནས་ཡོ་སེབ་ཀྱིས་ཉིད་ཀྱི་ཕ་རྒན་ཡ་ཀོབ་དང་གཉེན་ཉེ་མི་གྲངས་བདུན་ཅུ་དོན་ལྔ་གདན་འདྲེན་ཞུས་པས།
ACT 7:15 ཡ་ཀོབ་ཨེ་ཇེབ་ཡུལ་ལ་ཕེབས་རྗེས་དེར་ཁོང་དང་ང་ཚོའི་མེས་པོ་གཞན་རྣམས་སྐུ་ཚེ་ལས་འདས།
ACT 7:16 ཁོ་ཚོའི་ཕུང་པོ་ས་ཆ་དེ་ནས་ཤེ་ཀེམ་ལ་སྤོས་པ་དང༌། ཨབ་ར་ཧམ་གྱིས་ཤེ་ཀེམ་ལ་ཧེ་མོར་གྱི་བུ་རྣམས་ནས་སྔར་དངུལ་སྲང་གིས་ཉོས་པའི་དུར་ཁང་ལ་བཅུག
ACT 7:17 ཡང་དཀོན་མཆོག་གིས་ཨབ་ར་ཧམ་ལ་མཛད་པའི་ཞལ་ཆད་སྒྲུབ་ལ་ཉེ་བའི་དུས་སུ་ཨེ་ཇེབ་ཡུལ་ལ་ང་ཚོའི་མི་རིགས་ཤིན་ཏུ་མང་པོར་འཕེལ།
ACT 7:18 དེ་ནས་ཡོ་སེབ་ཀྱི་སྐོར་མི་ཤེས་པའི་རྒྱལ་པོ་ཞིག་ཨེ་ཇེབ་ཡུལ་དབང་བསྒྱུར།
ACT 7:19 ཁོས་ང་ཚོའི་མི་རྒྱུད་ལ་མགོ་སྐོར་བཏང་སྟེ་དྲག་གནོན་བྱས་པ་དང༌། ང་ཚོའི་མེས་པོའི་དམར་འབྱར་གསོད་པའི་ཆེད་ཕྱི་རོལ་ཏུ་དོར་བར་བཅུག
ACT 7:20 དེའི་དུས་སུ་ལུང་སྟོན་པ་མོ་ཤེ་སྐྱེས་ཏེ་ཁོང་ནི་དཀོན་མཆོག་གི་སྤྱན་སྔར་མཛེས་པོ་ཡིན། ཕའི་ཁང་པར་ཟླ་བ་གསུམ་གྱི་བར་དུ་གསོ་སྐྱོང་བྱས་ནས།
ACT 7:21 ཁོང་ཕྱི་རོལ་ཏུ་བཞག་ནས་རྒྱལ་པོ་ཕར་ཨོ་ཡི་སྲས་མོས་ཚུར་བླངས་ཏེ་ཁོ་མོའི་བུ་ལྟར་གསོས།
ACT 7:22 ཨེ་ཇེབ་པའི་ཤེས་བྱ་ཐམས་ཅད་བསླབས་ནས་མོ་ཤེ་གསུང་དང་མཛད་པ་གཉིས་ལ་དབང་དང་ལྡན་པར་གྱུར།
ACT 7:23 ཁོང་ལོ་བཞི་བཅུ་ཙམ་ལོན་པའི་སྐབས་སུ་རང་གི་སྤུན་ཟླ་ཡི་སི་ར་ཨེལ་པ་རྣམས་ལ་གཟིགས་པ་ཕེབས་པར་བསམས།
ACT 7:24 ཨེ་ཇེབ་པ་ཞིག་གིས་ཡི་སི་ར་ཨེལ་པ་ཞིག་ལ་སྡུག་པོ་གཏོང་བར་གཟིགས་པའི་སྐབས་སུ། མི་དེར་སྲུང་སྐྱོབ་བྱས་ཏེ་མོ་ཤེ་ཡིས་དགྲ་ཤ་ལེན་པའི་ཆེད་དུ་ཨེ་ཇེབ་པ་དེ་བརྡུངས་ནས་བསད།
ACT 7:25 མོ་ཤེ་ཡིས་རང་ཉིད་བརྒྱུད་ནས་དཀོན་མཆོག་གིས་ཁོའི་མི་རིགས་ལ་ཐར་བར་མཛད་པ་ཁོང་གི་སྤུན་ཟླ་རྣམས་ཀྱིས་ཤེས་པར་སྙམ་ཡང་མི་དེ་ཚོས་ཧ་མ་གོ
ACT 7:26 དེའི་ཕྱི་ཉིན་མོ་ཤེས་ཁོ་ཚོའི་ནང་ནས་གཉིས་ཀྱིས་འཁྲུག་རྩོད་བྱེད་བཞིན་ཡོད་པ་མཐོང་ནས་བར་འདུམ་གཏོང་ཐབས་བྱས་ཏེ་ཁོ་ཚོར་ཁྱོད་གཉིས་སྤུན་ཡིན་ཏེ་ཅིའི་ཕྱིར་གཅིག་གིས་གཅིག་ལ་གནོད་པ་བྱེད་ཅེས་བཤད་ཀྱང༌།
ACT 7:27 གཞན་ལ་སྡུག་པོ་གཏོང་མཁན་དེས་མོ་ཤེ་ཕར་བུད་ནས་ཁོང་ལ་ཁྱོད་ང་ཚོའི་དབང་སྒྱུར་བའམ་ཁྲིམས་དཔོན་ལྟར་སུས་བསྐོས།
ACT 7:28 ཁ་སང་ཁྱོད་ཀྱིས་ཨེ་ཇེབ་པ་དེ་བསད་པ་ལྟར་ངའང་གསོད་པར་འདོད་དམ་ཞེས་སྨྲས་པ་དང༌།
ACT 7:29 དེ་ཐོས་ནས་མོ་ཤེ་བྲོས་ཏེ་ཕྱི་པ་ལྟར་མཱ་རྡེ་ཡན་ཡུལ་ལ་བཞུགས། དེར་ཁོང་ལ་བུ་གཉིས་སྐྱེས།
ACT 7:30 ལོ་བཞི་བཅུའི་རྗེས་སུ་སི་ནཱ་རིའི་འབྲོག་སྟོང་ལ་ཚེར་མ་མེ་ལྕེ་འབར་བ་ཞིག་གི་ནང་ལ་དཀོན་མཆོག་གི་ཕོ་ཉ་ཞིག་ཁོང་ལ་མངོན་སུམ་དུ་གྱུར།
ACT 7:31 དེ་མཐོང་ནས་ཡ་མཚན་དུ་གྱུར་ཞིང༌། དེ་ལ་ནན་གྱིས་ལྟ་བའི་ཆེད་དུ་ཉེ་བར་ཕེབས་སྐབས་གཙོ་བོ་དཀོན་མཆོག་གི་གསུང་སྐད་བྱུང་སྟེ།
ACT 7:32 ང་ནི་ཁྱོད་ཀྱི་མེས་པོ་རྣམས་ཀྱི་དཀོན་མཆོག་སྟེ། ཨབ་ར་ཧམ་དང༌། ཨི་སཱག ཡ་ཀོབ་བཅས་ཀྱི་དཀོན་མཆོག་ཡིན་ནོ་ཞེས་གསུངས་པས་མོ་ཤེ་འཇིགས་ནས་འདར་ཏེ་ལྟ་བར་མ་ཕོད།
ACT 7:33 དེ་ནས་དཀོན་མཆོག་གིས་ཁོང་ལ་ཁྱོད་ལངས་ནས་སྡོད་ས་ནི་གནས་མཆོག་ཡིན་པས་ལྷམ་ཕུད་ཅིག
ACT 7:34 ངས་ངའི་མི་རིགས་ཀྱི་སྡུག་བསྔལ་ངེས་པར་དུ་མཐོང་སྟེ་ཁོ་ཚོའི་སྨྲེ་སྔགས་ཐོས་པ་དང༌། ཁོ་ཚོ་སྐྱོབ་པའི་ཆེད་དུ་མར་བབས་པ་ཡིན། ད་ཤོག་ལ་ངས་ཁྱོད་ཨེ་ཇེབ་ཡུལ་དུ་གཏོང་བར་བྱ་ཞེས་གསུངས།
ACT 7:35 ཁོ་ཚོས་ཁྱོད་ང་ཚོའི་དབང་སྒྱུར་བའམ་ཁྲིམས་དཔོན་ལྟར་སུས་བསྐོས་ཞེས་ཟེར་ཏེ་མོ་ཤེ་འདི་རང་སྤངས་ཏེ། ཚེར་མའི་ནང་ཁོང་ལ་མངོན་སུམ་དུ་གྱུར་བའི་ཕོ་ཉ་བརྒྱུད་ནས་དཀོན་མཆོག་ཉིད་ཀྱིས་ཁོ་ཚོའི་དབང་སྒྱུར་བ་དང་སྐྱོབ་མཁན་དུ་འགྱུར་བར་མངགས།
ACT 7:36 ཨེ་ཇེབ་ཡུལ་དང༌། རྒྱ་མཚོ་དམར་པོ་དང༌། ལོ་བཞི་བཅུའི་རིང་འབྲོག་སྟོང་ལ་རྟགས་དང་ངོ་མཚར་བའི་དོན་བསྒྲུབས་ཏེ་ཁོང་གིས་ཁོ་ཚོ་ཕྱི་རོལ་ཏུ་འཁྲིད།
ACT 7:37 མོ་ཤེ་འདི་ཉིད་ཀྱིས་ཡི་སི་ར་ཨེལ་གྱི་མི་རིགས་ལ་དཀོན་མཆོག་གིས་ཁྱེད་ཚོའི་དོན་ལ་ང་བཞིན་དུ་ལུང་སྟོན་པ་ཞིག་ཁྱེད་ཚོའི་སྤུན་གྱི་ནང་ནས་སྐོ་བར་འགྱུར་ངེས་ཡིན་ཞེས་གསུངས།
ACT 7:38 ལུང་སྟོན་པ་མོ་ཤེ་ནི་འབྲོག་སྟོང་ལ་ཡི་སི་ར་ཨེལ་གྱི་མི་ཚོགས་དང་ང་ཚོའི་མེས་པོ་བཅས་ཏེ། སི་ནཱ་ཞེས་ཟེར་བའི་རི་བོར་ཁོང་ལ་གསུངས་པའི་ཕོ་ཉ་དང་མཉམ་དུ་ཡོད། ང་ཚོར་སྒྲོག་པའི་ཕྱིར་འཚོ་བའི་སྤྱོད་ལམ་སྟོན་པའི་བཀའ་མོ་ཤེས་དང་ལེན་མཛད།
ACT 7:39 འོན་ཀྱང་ང་ཚོའི་མེས་པོས་ཁོང་གི་བཀའ་ལ་ཉན་པར་མི་འདོད་པས་ཁོང་དོར་ཞིང༌། ཁོ་ཚོའི་སེམས་ལ་ཨེ་ཇེབ་ཡུལ་ལ་ཕྱིར་ལོག་པའི་འདོད་པ་སྐྱེས།
ACT 7:40 དེའི་ཕྱིར་ཁོ་ཚོས་ཨ་རོན་ལ་ངེད་རྣམས་ཀྱི་ཆེད་དུ་ལམ་འཁྲིད་མཁན་འདྲ་སྐུ་བཟོས་ཤིག གང་ཡིན་ཞེ་ན། ང་ཚོ་ཨེ་ཇེབ་ཡུལ་ནས་འཁྲིད་པ་མོ་ཤེ་ཟེར་མཁན་དེ་ལ་ཅི་བྱུང་བ་མི་ཤེས་ཞེས་སྨྲས་པའི་སྐབས་སུ།
ACT 7:41 བེའུ་ཡི་འདྲ་སྐུ་ཞིག་བཟོས་ནས་དེ་ལ་མཆོད་པ་ཞིག་སྟེར་ཞིང༌། རང་གི་ལག་པས་ཇི་བཟོས་པའི་རྐྱེན་གྱིས་དགའ་སྟོན་རྟེན་འབྲེལ་བྱས།
ACT 7:42 འོན་ཀྱང་དཀོན་མཆོག་གིས་དེ་རྣམས་འདོར་བར་མཛད་དེ་སྟེང་གི་ཉི་ཟླ་སྐར་གསུམ་ལ་བསྙེན་བཀུར་བྱེད་པར་སྤངས་སོ། ལུང་སྟོན་པ་རྣམས་ཀྱི་མདོ་ལས་འདི་ལྟར་གསུངས་པར། ཡི་སི་ར་ཨེལ་ཁྱིམ་གཞིས་མི་རྒྱུད་ཚོ། ། འབྲོག་སྟོང་ལ་གནས་མི་ལོ་བཞི་བཅུའི་རིང༌། ། ཤ་ཁྲག་དམར་མཆོད་ང་ལ་འཕུལ་ཡོད་དམ། །
ACT 7:43 ལྷ་སྐུ་མའོ་ལོག་གུར་ཁང་དེ་དང་ནི། ། གཟའ་སྐར་རེམ་ཕན་ཞེས་པའི་སྐུ་རྟེན་སོགས། ། རང་བཟོས་འདྲ་སྐུར་བསྙེན་བཀུར་བྱེད་འགྱུར་བས། ། ཁྱེད་རྣམས་སྦ་བི་ལོན་གྱི་མཐའ་ལ་འབུད། ། ཅེས་གསུངས།
ACT 7:44 དཔང་པོའི་གུར་མཆོག་དཀོན་མཆོག་གིས་ལུང་སྟོན་པ་མོ་ཤེ་ལ་བསྟན་པའི་དཔེ་བཞིན་དུ་བཟོས་པ་དེ་འབྲོག་སྟོང་ནང་ང་ཚོའི་མེས་པོར་ཡོད།
ACT 7:45 ཁོ་ཚོའི་རྒྱུད་པ་རྣམས་ལ་ཡང་གུར་མཆོག་དེ་ཐོབ་པ་དང༌། དཀོན་མཆོག་གིས་ང་ཚོའི་མེས་པོའི་སྔོན་དུ་ཀ་ནཱན་ཡུལ་གྱི་མི་རིགས་རྣམས་བསྐྲད་སྐབས་ལུང་སྟོན་པ་ཡོ་ཤུ་ཨ་ཡིས་གཙོ་འཁྲིད་བྱས་ཏེ་ཕ་རྣམས་ཀྱིས་གུར་མཆོག་འདིར་འཁུར་ཡོང་ཞིང༌། རྒྱལ་པོ་དཱ་བིད་ཀྱི་དུས་ཀྱི་བར་དུ་གནས།
ACT 7:46 དཀོན་མཆོག་གི་སྤྱན་སྔར་དཱ་བིད་ལ་ཐུགས་རྗེ་ཐོབ་ནས་ང་ཚོའི་མེས་པོ་ཡ་ཀོབ་ཀྱི་དཀོན་མཆོག་ལ་བཞུགས་གནས་ཤིག་བཞེངས་པའི་ཞུ་བ་ཕུལ་ན་ཡང༌།
ACT 7:47 དཱ་བིད་ཀྱི་སྲས་སོ་ལོ་མོན་གྱིས་དཀོན་མཆོག་ལ་བཞུགས་གནས་དེ་བཞེངས།
ACT 7:48 འོན་ཀྱང་བླ་ན་མེད་པའི་དཀོན་མཆོག་ནི་མི་ཡི་ལག་པས་བརྩིགས་པའི་ཁང་པ་ལ་མི་བཞུགས་ཏེ། ལུང་སྟོན་པས་གསུངས་པ་ལྟར།
ACT 7:49 ནམ་མཁའི་དབྱིངས་ནི་ང་ཡི་བཞུགས་ཁྲི་དང༌། ། ས་གཞི་འདི་ནི་ང་ཡི་རྐང་སྟེགས་ཡིན། ། ཁང་པ་ཅི་ཞིག་ང་ལ་བརྩིག་འགྱུར་ལ། ། ཡང་ན་ངལ་གསོའི་གནས་མཆོག་གང་དུ་ཡོད། ། གཙོ་བོ་དཀོན་མཆོག་ཉིད་ཀྱིས་དེ་ལྟར་གསུངས། །
ACT 7:50 ཐམས་ཅད་ང་ཡིས་བཀོད་པ་མ་ཡིན་ནམ། ། ཞེས་གསུངས།
ACT 7:51 དཀོན་མཆོག་གི་བཀའ་ལ་མི་ཉན་ཞིང་སེམས་མཁྲེགས་པོ་ཁྱོད་ཚོ། ཁྱོད་ཀྱི་མེས་པོ་ལྟར་ཁྱོད་ཚོས་ཀྱང་དཀོན་མཆོག་གི་དམ་པའི་ཐུགས་ཉིད་ལ་རྟག་པར་རྒོལ།
ACT 7:52 ཁྱོད་ཀྱི་མེས་པོས་ལུང་སྟོན་པ་ལས་སུ་ཞིག་ལའང་གནོད་འཚེ་མ་བྱས། སྔར་སྐྱེས་བུ་རྣམ་དག་གི་འབྱོན་པ་སྒྲོག་མཁན་རྣམས་ཁོ་ཚོས་བསད། ད་ཁྱོད་ཚོ་ཁོང་གི་རྒྱབ་གཏོད་བྱེད་མཁན་དང་གསོད་པ་པོར་གྱུར་བ་ཡིན།
ACT 7:53 ཁྱོད་ཚོར་དཀོན་མཆོག་གི་ཕོ་ཉ་རྣམས་བརྒྱུད་ནས་གནང་བའི་ཆོས་ཁྲིམས་ཐོབ་ཀྱང་མ་བསྲུངས་”ཞེས་གསུངས།
ACT 7:54 གཏམ་དེ་ཐོས་པས་ཁོ་ཚོ་ཁོང་ཁྲོ་ལངས་ཏེ་སེ་ཏེ་ཕཱན་ལ་སོ་ཁྲིག་ཁྲིག་བྱས།
ACT 7:55 འོན་ཀྱང་དཀོན་མཆོག་གི་དམ་པའི་ཐུགས་ཉིད་ཀྱིས་གང་སྟེ་སེ་ཏེ་ཕཱན་གྱིས་དཀོན་མཆོག་གི་ཞིང་ཁམས་སུ་ནན་གྱིས་བལྟས་ནས་དཀོན་མཆོག་གི་གཟི་བརྗིད་དང༌། དཀོན་མཆོག་གི་ཕྱག་གཡས་སུ་གཙོ་བོ་ཡེ་ཤུ་བཞེངས་པར་མཐོང་བས།
ACT 7:56 ཁོང་གིས་“ལྟོས་ཤིག ངས་དཀོན་མཆོག་གི་ཞིང་ཁམས་སྒོ་ཕྱེ་སྟེ་དཀོན་མཆོག་གི་ཕྱག་གཡས་སུ་མིའི་རིགས་ཀྱི་བུ་བཞེངས་པར་མཐོང་ངོ་”ཞེས་གསུངས་ཀྱང༌།
ACT 7:57 ཁོ་ཚོས་སྐད་ཆེན་པོ་བརྒྱབ་ནས་རྣ་བ་ལག་པས་བཀག་པ་དང༌། ཁོང་གི་རྩར་ལྷན་གཅིག་ཏུ་རྒྱུག་ནས་ཕྱིན།
ACT 7:58 གྲོང་ཁྱེར་ཕྱི་རོལ་ཏུ་བསྐྲད་ནས་ཁོང་ལ་རྡོ་རུབ་གཏོང་སྐབས། དཔང་པོ་རྣམས་ཀྱིས་ཁོ་ཚོའི་ཕྱི་གོས་ཤ་ཨུལ་ཞེས་ཟེར་བའི་གཞོན་ནུ་ཞིག་གི་མདུན་དུ་བཞག
ACT 7:59 ཡང་རྡོ་རུབ་གཏོང་དུས་སེ་ཏེ་ཕཱན་གྱིས་“ཀྱེ་གཙོ་བོ་ཡེ་ཤུ། ངའི་སེམས་ཉིད་བཞེས་པར་མཛོད་”ཅེས་སྨོན་ལམ་ཞུས་པ་དང༌།
ACT 7:60 པུས་མོ་སར་བཙུགས་ཏེ་སྐད་ཆེན་པོས་“གཙོ་བོ་ལགས། ཁོ་ཚོའི་སྡིག་ཉེས་འདི་སེལ་བར་མཛོད་”ཅེས་གསུངས་ནས་ཁོང་སྐུ་ཚེ་ལས་འདས།
ACT 8:1 སེ་ཏེ་ཕཱན་གསོད་པའི་ལས་ལ་ཤ་ཨུལ་ཡིས་མོས་མཐུན་བྱས་སོ། ། ཉིན་དེར་ཡེ་རུ་ཤ་ལེམ་ལ་སྡོད་པའི་དད་ལྡན་རྣམས་ལ་གནོད་འཚེ་དྲག་པོ་ཞིག་བྱུང་བས། སྐུ་ཚབ་རྣམས་མ་གཏོགས་པར་ཁོ་ཚོ་ཚང་མ་ཡ་ཧུ་དཱ་དང་ས་མར་ཡཱ་ཡུལ་ལ་ཁ་འཐོར།
ACT 8:2 ཆོས་སེམས་དང་ལྡན་པའི་མི་འགའ་ཤས་ཀྱིས་སེ་ཏེ་ཕཱན་གྱི་ཕུང་པོ་དུར་དུ་བཅུག་ནས་སྐད་ཆེན་པོས་སྨྲེ་སྔག་བཏོན།
ACT 8:3 འོན་ཀྱང་ཤ་ཨུལ་ཡིས་ཁང་པ་རེ་རེའི་ནང་དུ་ཕྱིན་པ་དང༌། ཕོ་མོ་གཉིས་ཀ་བཙན་གྱིས་འཁྲིད་ནས་བཙོན་དུ་བཅུག་སྟེ་ཆོས་ཚོགས་ལ་གནོད་འཚེ་ཆེན་པོ་བཏང་བས།
ACT 8:4 ཁ་འཐོར་བ་རྣམས་འཕྲིན་བཟང་སྒྲོག་སྟེ་ཡུལ་སོ་སོར་ཕྱིན་པ་རེད།
ACT 8:5 ཕི་ལིབ་ས་མར་ཡཱ་ཡུལ་གྱི་གྲོང་ཁྱེར་ཞིག་ལ་ཕྱིན་ནས་དེར་ཡོད་པའི་མི་རྣམས་ལ་ཡེ་ཤུ་མཱ་ཤི་ཀའི་འཕྲིན་བཟང་བསྒྲགས།
ACT 8:6 མི་ཚོགས་ཀྱིས་ཕི་ལིབ་ཀྱིས་གསུངས་པའི་བསྟན་པ་ཐོས་ཤིང༌། ཁོང་གིས་སྒྲུབ་པའི་རྟགས་མཐོང་ནས་ཡིད་མཐུན་ཏེ་ཁོང་གི་གསུང་ལ་ཉན།
ACT 8:7 གང་ཡིན་ཞེ་ན། གདོན་འདྲེ་མི་གཙང་བ་རྣམས་སྐད་ངན་ཆེན་པོ་ཤོར་ཏེ་མི་མང་པོའི་ལུས་ནས་ཕྱིར་ཐོན་ཞིང༌། ཞ་བོ་དང་ཡན་ལག་བསྐམས་པ་མང་པོ་ནད་ལས་ཐར་བར་གྱུར།
ACT 8:8 དེའི་ཕྱིར་གྲོང་ཁྱེར་དེའི་མི་རྣམས་ཧ་ཅང་དགའ་བར་འགྱུར།
ACT 8:9 ཡང་སི་མོན་ཟེར་མཁན་ཞིག་གིས་སྔར་ནས་ད་བར་གྲོང་ཁྱེར་དེར་མཐུ་བརྒྱབ་ནས་ས་མར་ཡཱ་ཡུལ་གྱི་མི་རྣམས་ཡ་མཚན་སྐྱེས་སུ་བཅུག ཁོས་རང་བསྟོད་བྱས་ཏེ།
ACT 8:10 མི་མཐོ་དམན་ཚང་མས་ཁོ་ལ་ཉན་ཞིང་“མི་འདི་ནི་དཀོན་མཆོག་གི་ནུས་མཐུ་ཆེན་པོ་ཟེར་བ་དེ་ཡིན་”ཞེས་སྨྲས།
ACT 8:11 ཁོས་ཡུན་རིང་པོ་ཞིག་ནས་མཐུ་ཡིས་ཁོ་ཚོར་ཡ་མཚན་སྐྱེས་སུ་བཅུག་པས་ཡུལ་མི་རྣམས་ཀྱིས་ཁོའི་གཏམ་ལ་ནན་གྱིས་ཉན།
ACT 8:12 འོན་ཀྱང་ཕི་ལིབ་ནི་དཀོན་མཆོག་གི་རྒྱལ་སྲིད་དང་གཙོ་བོ་ཡེ་ཤུ་མཱ་ཤི་ཀའི་མཚན་གྱི་སྐོར་འཕྲིན་བཟང་སྒྲོག་མཁན་ཡིན་པ་ལ་མི་རྣམས་ཀྱིས་ཡིད་ཆེས་བྱས་ནས། སྐྱེས་པ་དང་བུད་མེད་གཉིས་ཀས་ཁྲུས་གསོལ་བླངས།
ACT 8:13 ཐ་ན་སི་མོན་གྱིས་ཀྱང་ཡིད་ཆེས་བྱས་ཏེ་ཁྲུས་གསོལ་བླངས་ནས་ཕི་ལིབ་དང་འགྲོགས། སི་མོན་གྱིས་ཕི་ལིབ་ཀྱི་གྲུབ་རྟགས་དང་ངོ་མཚར་ཅན་གྱི་དོན་མཐོང་བས་ཧ་ལས་སོ། །
ACT 8:14 ཡེ་རུ་ཤ་ལེམ་ལ་ཡོད་པའི་སྐུ་ཚབ་རྣམས་ཀྱིས་ས་མར་ཡཱ་པས་དཀོན་མཆོག་གི་བཀའ་ལ་དད་པ་བྱེད་པ་ཐོས་སྐབས། ཁོང་ཚོས་སྐུ་ཚབ་པེ་ཏྲོ་དང་ཡོ་ཧ་ནན་ཕི་ལིབ་དང་བཅས་པའི་རྩར་མངགས།
ACT 8:15 ཁོང་ཚོ་གཉིས་མར་ཕེབས་ནས་ས་མར་ཡཱ་པ་རྣམས་ལ་དཀོན་མཆོག་གི་དམ་པའི་ཐུགས་ཉིད་འཐོབ་པའི་ཆེད་དུ་སྨོན་ལམ་ཞུས།
ACT 8:16 གང་ཡིན་ཞེ་ན། ཁོ་རྣམས་ཀྱིས་གཙོ་བོ་ཡེ་ཤུའི་མཚན་གྱི་ཐོག་ནས་ཁྲུས་གསོལ་བླངས་ཀྱང༌། དམ་པའི་ཐུགས་ཉིད་ཁོ་ཚོར་ད་དུང་མར་མ་བབས་པས་སོ།
ACT 8:17 དེ་ནས་པེ་ཏྲོ་དང་ཡོ་ཧ་ནན་གཉིས་ཀྱིས་ས་མར་ཡཱ་པ་རྣམས་ཀྱི་ལུས་ལ་ཕྱག་འཇོག་པར་མཛད་པས་ཁོ་ཚོར་དམ་པའི་ཐུགས་ཉིད་ཐོབ།
ACT 8:18 སྐུ་ཚབ་རྣམས་ཀྱི་ཕྱག་འཇོག་པར་མཛད་པའི་སྒོ་ནས་དམ་པའི་ཐུགས་ཉིད་གནང་བར་མཐོང་ནས་སི་མོན་གྱིས་ཁོང་རྣམས་ལ་དངུལ་སྟེར་གྲབས་བྱས་ཏེ་
ACT 8:19 “ངས་མི་སུ་ཞིག་ལ་ལག་པ་བཞག་པ་དེས་དམ་པའི་ཐུགས་ཉིད་འཐོབ་ཕྱིར་དབང་དེ་ང་ལའང་གནང་བར་མཛོད་”ཅེས་སྨྲས།
ACT 8:20 འོན་ཀྱང་པེ་ཏྲོས་ཁོ་ལ་“དཀོན་མཆོག་གི་གནང་སྦྱིན་ནི་དངུལ་གྱིས་འཐོབ་པར་བསམས་པས་ཁྱོད་དང་ཁྱོད་ཀྱི་དངུལ་གཉིས་མེད་པར་འགྱུར་བར་ཤོག
ACT 8:21 དཀོན་མཆོག་གི་སྤྱན་སྔར་ཁྱོད་ཀྱི་སེམས་དྲང་པོ་མེད་པས་ཁྱོད་ལ་དོན་འདིའི་སྐལ་བའམ་འབྲེལ་བ་ཅིའང་མེད།
ACT 8:22 དེའི་ཕྱིར་ངན་སེམས་འདི་སྤངས་ནས་སེམས་བསྒྱུར་བ་དང༌། གཙོ་བོ་དཀོན་མཆོག་ལ་གསོལ་བ་ཐོབ་ཅིག ཁོང་གི་ཐུགས་དགོངས་དང་མཐུན་ན་ཁྱོད་ཀྱི་ངན་སེམས་ཀྱི་སྡིག་ཉེས་སེལ་བར་འགྱུར།
ACT 8:23 གང་ལགས་ཤེ་ན། ཁྱོད་ནི་ཆེས་ཕྲག་དོག་བྱེད་མཁན་དང༌། སྡིག་ཉེས་ཀྱིས་བཅིངས་པ་ཡིན་པ་ངས་མཐོང་”ཞེས་གསུངས།
ACT 8:24 ལན་དུ་སི་མོན་གྱིས་“ཁྱེད་ཀྱིས་གསུངས་པའི་དོན་ང་ལ་ཅིའང་མི་འབབ་པའི་ཆེད་དུ་ཁྱེད་རྣམས་ཀྱིས་ངའི་དོན་དུ་གཙོ་བོ་ལ་སྨོན་ལམ་འདེབས་པར་མཛོད་ཅིག་”ཅེས་སྨྲས།
ACT 8:25 དེ་ནས་ཁོང་ཚོས་གཙོ་བོ་དཀོན་མཆོག་གི་བཀའ་བསྒྲགས་པ་དང་དཔང་པོ་བྱས་པའི་རྗེས་སུ་ས་མར་ཡཱ་ཡུལ་གྱི་གྲོང་གསེབ་མང་པོར་འཕྲིན་བཟང་སྒྲོག་སྟེ་ཡེ་རུ་ཤ་ལེམ་ལ་ཕྱིར་ལོག་ཕེབས་སོ། །
ACT 8:26 ཡང་དཀོན་མཆོག་གི་ཕོ་ཉ་ཞིག་གིས་ཕི་ལིབ་ལ་“ཡར་ལོངས་ལ་ལྷོ་ཕྱོགས་ལ་ཕྱིན་ཏེ་ཡེ་རུ་ཤ་ལེམ་ནས་ག་ཟཱ་གྲོང་ཁྱེར་དུ་འབབ་པའི་ལམ་ལ་སོང་ཞིག་”ཅེས་གསུངས། (ལམ་དེ་ནི་འབྲོག་སྟོང་གི་ལམ་ཞིག་ཡིན་)
ACT 8:27 ཕི་ལིབ་ལངས་ནས་སོང་ཞིང༌། ལམ་བར་དུ་ཨེ་ཐི་ཨོ་ཕི་ཡཱ་ཡུལ་གྱི་དབང་ཆ་ཆེ་བའི་ཉུག་རུམ་ཞིག་ཡོད་པ་དེ་ནི་ཡུལ་དེའི་རྒྱལ་མོ་ཀན་ད་སཱེ་ཟེར་བའི་བང་མཛོད་ཡོངས་ཀྱི་གཉེར་དཔོན་ཡིན། ཁོང་དཀོན་མཆོག་ལ་བསྙེན་བཀུར་ཞུ་བའི་ཆེད་དུ་ཡེ་རུ་ཤ་ལེམ་ལ་ཕེབས་ཡོད་པ་དང༌།
ACT 8:28 ཤིང་རྟར་བཞུགས་ནས་རང་ཡུལ་ལ་ཕྱིར་ལོག་དུས། ལུང་སྟོན་པ་ཡེ་ཤ་ཡཱ་ཡིས་བྲིས་པའི་མདོ་ཀློག་བཞིན་ཡོད།
ACT 8:29 དམ་པའི་ཐུགས་ཉིད་ཀྱིས་ཕི་ལིབ་ལ་“ཤིང་རྟ་དེའི་རྩར་ཕྱིན་ནས་མཉམ་དུ་སོང་ཞིག་”ཅེས་གསུངས་པས།
ACT 8:30 ཕི་ལིབ་དེའི་རྩར་བརྒྱུགས་ཤིང༌། གཉེར་དཔོན་དེས་ལུང་སྟོན་པ་ཡེ་ཤ་ཡཱ་ཡི་མདོ་ཀློག་གི་ཡོད་པ་ཐོས་ནས་ཁོང་ལ་“ཁྱེད་ཀྱིས་ཀློག་པ་དེའི་དོན་རྟོགས་སམ་”ཞེས་དྲིས།
ACT 8:31 གཉེར་དཔོན་གྱིས་“སུ་ཞིག་གིས་ང་ལ་གསལ་བཤད་མ་བྱས་ན་ངས་ཇི་ལྟར་ཤེས་”ཅེས་སྨྲས་ནས་ཁོང་གིས་ཕི་ལིབ་ལ་ཤིང་རྟའི་ནང་མཉམ་དུ་སྡོད་པར་གདན་དྲངས།
ACT 8:32 ཁོང་གིས་ཀློག་བཞིན་པའི་མདོ་ནི། ཁོང་ནི་ལུག་ལྟར་བཤས་རར་ཁྲིད་པ་ཡིན། ། བལ་འབྲེག་མཁན་སར་གནས་པའི་ལུ་གུ་བཞིན། ། སྐད་སྒྲ་མེད་པ་ལྟར་དུ་ཞལ་མི་འབྱེད། །
ACT 8:33 དམའ་བའི་སྐབས་སུ་གཞུང་དྲང་ཁྲིམས་མ་བཅད། ། ཁོང་གི་གདུང་རྒྱུད་སུ་ཡིས་འཆད་པར་ནུས། ། ཁོང་གི་ཚེ་སྲོག་ས་ནས་འཕྲོག་པས་སོ། །
ACT 8:34 གཉེར་དཔོན་གྱིས་ཕི་ལིབ་ལ་“ལུང་བསྟན་དེ་ནི་ལུང་སྟོན་པས་ཁོ་རང་ངམ་ཡང་ན་མི་གཞན་སུ་ཡི་སྐོར་གསུངས་པ་དེ་ང་ལ་གསུངས་དང་”ཞེས་སྨྲས་པ་ན།
ACT 8:35 ཕི་ལིབ་ཀྱིས་ལུང་བསྟན་དེ་ནས་འགོ་བཙུགས་ཏེ་ཁོང་ལ་གཙོ་བོ་ཡེ་ཤུའི་འཕྲིན་བཟང་གསུངས།
ACT 8:36 ཁོ་ཚོ་ལམ་ལ་འགྲོ་དུས་ཆུ་ཡོད་སར་སླེབས་པས་གཉེར་དཔོན་གྱིས་“ལྟོས་དང༌། འདིར་ཆུ་འདུག ངས་ཁྲུས་གསོལ་ལེན་ན་ཅི་མ་རུང་”ཞེས་བཤད།
ACT 8:38 ཤིང་རྟ་འགོག་དགོས་པའི་བཀའ་བཏང་ནས་ཕི་ལིབ་དང་གཉེར་དཔོན་གཉིས་ཆུར་ཞུགས་པ་དང༌། ཕི་ལིབ་ཀྱིས་གཉེར་དཔོན་ལ་ཁྲུས་གསོལ་གནང༌།
ACT 8:39 ཁོང་གཉིས་ཆུ་ནས་ཕྱིར་འཐོན་སྐབས་དཀོན་མཆོག་གི་དམ་པའི་ཐུགས་ཉིད་ཀྱིས་ཕི་ལིབ་མྱུར་དུ་ཁྲིད་པས་གཉེར་དཔོན་གྱིས་ཁོང་མ་མཐོང་ཡང་སེམས་དགའ་བའི་ངང་ནས་ལམ་ལ་ཕེབས་པ་རེད།
ACT 8:40 ཡང་ཕི་ལིབ་ཨ་ཟོ་ཊོ་གྲོང་ཁྱེར་དུ་མངོན་པར་འགྱུར་ཏེ། སེ་སར་རེ་ཡཱ་གྲོང་ཁྱེར་ལ་མ་སླེབས་པའི་བར་དུ་ཁོང་གིས་ཡུལ་དེ་བརྒྱུད་ནས་འགྲོ་དུས་གྲོང་ཁྱེར་ཚང་མར་འཕྲིན་བཟང་བསྒྲགས་སོ། །
ACT 9:1 དེའི་དུས་སུ་ཤ་ཨུལ་གྱིས་དམར་གསོད་གཏོང་བའི་གཏམ་བཤད་དེ་གཙོ་བོའི་ཉེ་གནས་རྣམས་ལ་མུ་མཐུད་ནས་འཇིགས་སྐུལ་བྱས་ཤིང༌། བླ་ཆེན་གཙོ་བོའི་དྲུང་དུ་སོང་ནས།
ACT 9:2 ཁོས་གཙོ་བོ་ཡེ་ཤུའི་ཐར་ལམ་ལ་འཛིན་མཁན་ཏེ་སྐྱེས་པའམ་བུད་མེད་རྙེད་ན་ཡེ་རུ་ཤ་ལེམ་ལ་བཅིངས་ནས་འཁྲིད་པའི་ཕྱིར། དཱ་མེ་སེག་གྲོང་ཁྱེར་དུ་ཡོད་པའི་འདུ་ཁང་གི་འགོ་ཁྲིད་རྣམས་ལ་ངོ་སྤྲོད་ཡི་གེ་གནང་རོགས་ཞུས།
ACT 9:3 ལམ་བར་དུ་ཤ་ཨུལ་དཱ་མེ་སེག་གི་ཉེ་འགྲམ་དུ་སླེབས་པའི་སྐབས་སུ། དཀོན་མཆོག་གི་ཞིང་ཁམས་ནས་འོད་ཅིག་ཁོའི་ཕྱོགས་བཞིར་གློ་བུར་དུ་འཁྱུགས་པ་དང༌།
ACT 9:4 ཤ་ཨུལ་ས་ལ་འགྱེལ། ཁོས་“ཤ་ཨུལ། ཤ་ཨུལ། ཁྱོད་ཀྱིས་ང་ལ་ཅིའི་ཕྱིར་གནོད་སྐྱེལ་”ཞེས་གསུངས་པའི་སྒྲ་ཞིག་ཐོས་ནས།
ACT 9:5 ཁོས་“གཙོ་བོ་ལགས། ཁྱེད་སུ་ཡིན་”ཞེས་བཤད་པས་ཁོང་གིས་“ང་ནི་ཁྱོད་ཀྱིས་གནོད་སྐྱེལ་བཞིན་པའི་ཡེ་ཤུ་ཡིན་ནོ།
ACT 9:6 ད་ཡར་ལོངས་ལ་གྲོང་ཁྱེར་དུ་སོང་ཞིག ཁྱོད་ཀྱིས་གང་བྱེད་དགོས་པ་དེ་ཁྱོད་ལ་སྨྲ་བར་འགྱུར་”ཞེས་གསུངས།
ACT 9:7 སྒྲ་དེ་ཐོས་ཀྱང་སུ་ཞིག་ཡིན་པ་མ་མཐོང་བས་ཤ་ཨུལ་གྱི་ལམ་གྲོགས་རྣམས་ཁ་རོག་བསྡད།
ACT 9:8 ཤ་ཨུལ་ས་ནས་ལངས་ཏེ་མིག་གདངས་ཀྱང་ཅི་ཡང་མཐོང་མ་ཐུབ། ལམ་གྲོགས་ཀྱིས་ཁོའི་ལག་པ་ནས་འཇུས་ཏེ་དཱ་མེ་སེག་ལ་འཁྲིད།
ACT 9:9 ཡང་ཉིན་གསུམ་གྱི་རིང་ལ་མིག་གིས་མི་མཐོང་བ་དང་ཁོས་ཟ་འཐུང་ཅི་ཡང་མ་བྱས།
ACT 9:10 དེའི་དུས་སུ་དཱ་མེ་སེག་ལ་ཨ་ནན་ཡཱ་ཞེས་ཟེར་བའི་ཉེ་གནས་ཤིག་ཡོད་ཅིང༌། གཙོ་བོས་ཁོ་ལ་ཞལ་གཟིགས་གནང་ནས་“ཨ་ནན་ཡཱ་”ཞེས་གསུངས་པས་ཁོས་“གཙོ་བོ་ལགས། ང་འདིར་ཡོད་”ཅེས་བཤད།
ACT 9:11 གཙོ་བོས་ཁོ་ལ་“ལོངས་ལ་དྲང་པོ་ཟེར་བའི་སྲང་ལམ་ལ་སོང་ནས་ཡུ་དཱ་ཞེས་བྱ་བའི་ཁང་པར་ཊར་སཱུ་གྲོང་ཁྱེར་ནས་ཡིན་པའི་ཤ་ཨུལ་ཚོལ་ཞིག ད་ལྟ་ཁོས་སྨོན་ལམ་འདེབས་བཞིན་ཡོད་ཅིང༌།
ACT 9:12 ཁོས་ཨ་ནན་ཡཱ་ཟེར་མཁན་ཞིག་ནང་ལ་ཡོང་ནས་མིག་གིས་སླར་ཡང་མཐོང་ཐུབ་པའི་ཆེད་དུ་ཁོ་ལ་ཕྱག་འཇོག་པ་ཞལ་གཟིགས་ཀྱི་ནང་ནས་མཐོང་”ཞེས་གསུངས།
ACT 9:13 འོན་ཀྱང་ཨ་ནན་ཡཱས་“གཙོ་བོ་ལགས། ཡེ་རུ་ཤ་ལེམ་ལ་མི་འདིས་ཁྱེད་ཀྱི་དད་ལྡན་རྣམས་ལ་གནོད་པ་ཅི་ལྟར་ཆེ་བ་བཏང་བ་མི་མང་པོས་ང་ལ་བཤད་བྱུང༌།
ACT 9:14 ཡང་འདིར་ཁོ་ལ་བླ་ཆེན་རྣམས་ནས་ཁྱེད་ཀྱི་མཚན་ནས་བརྗོད་མཁན་ཐམས་ཅད་འཛིན་བཟུང་བྱེད་པའི་དབང་ཡོད་”ཅེས་སྨྲས་ཀྱང༌།
ACT 9:15 གཙོ་བོས་ཁོ་ལ་“ད་སོང་ཞིག མི་འདི་ནི་ཡ་ཧུ་དཱ་པ་མིན་པ་རྣམས་དང༌། རྒྱལ་པོ། ཡི་སི་ར་ཨེལ་གྱི་མི་རྣམས་ལ་ངའི་མིང་སྒྲོག་ཕྱིར་ངས་བདམས་པའི་སྣོད་ཡིན།
ACT 9:16 ངའི་མིང་གི་དོན་དུ་སྡུག་བསྔལ་ཅི་ལྟར་ཆེ་བ་མྱོང་དགོས་པ་ང་རང་གིས་ཁོ་ལ་སྟོན་པར་བྱ་”ཞེས་གསུངས་པས།
ACT 9:17 ཨ་ནན་ཡཱ་སོང་ནས་ཁང་པ་དེའི་ནང་ལ་འཛུལ་བ་དང་ཤ་ཨུལ་ལ་ཕྱག་བཞག་ནས་ཁོ་ལ་“སྤུན་ཟླ་ཤ་ཨུལ། ལམ་བར་དུ་ཁྱེད་ལ་མངོན་པར་མཛད་མཁན་གཙོ་བོ་ཡེ་ཤུ་ཡིས་ཁྱེད་ཀྱི་མིག་གིས་སླར་ཡང་མཐོང་ཐུབ་པའི་ཆེད་དང༌། ཁྱེད་ནི་དམ་པའི་ཐུགས་ཉིད་ཀྱིས་གང་བར་འགྱུར་བའི་ཕྱིར་ང་འདིར་མངགས་”ཞེས་བཤད།
ACT 9:18 དེ་ལྟར་གསུངས་མ་ཐག་ཉ་ཁྲབ་འདྲ་བ་རེ་ཁོའི་མིག་ནས་ཟགས་ཏེ་མིག་གིས་སླར་ཡང་མཐོང་བར་གྱུར། ཡར་ལངས་ནས་ཁྲུས་གསོལ་ལེན་ཞིང༌།
ACT 9:19 ཟས་བཟས་པས་ལུས་སྟོབས་གསོས་པར་གྱུར། ཉིན་ཤས་རིང་ཁོ་དཱ་མེ་སེག་ལ་ཡོད་པའི་ཉེ་གནས་དང་མཉམ་དུ་བསྡད་དེ།
ACT 9:20 ཁོང་གིས་འཕྲལ་དུ་འདུ་ཁང་རྣམས་ལ་ཡེ་ཤུའི་འཕྲིན་བཟང་བསྒྲགས་ཏེ་“ཁོང་ནི་དཀོན་མཆོག་གི་སྲས་ཡིན་ནོ་”ཞེས་གསུངས།
ACT 9:21 ཁོང་གི་གཏམ་ཐོས་པ་ཐམས་ཅད་ཡ་མཚན་སྐྱེས་ནས་“ཡེ་རུ་ཤ་ལེམ་ལ་གཙོ་བོའི་མཚན་ནས་བརྗོད་མཁན་རྣམས་མེད་པར་བཟོ་མཁན་ཁོ་རང་མ་ཡིན་ནམ། ཡང་དད་ལྡན་རྣམས་བཙོན་པ་ལྟར་བླ་ཆེན་རྣམས་ཀྱི་རྩར་འཁྲིད་པའི་ཕྱིར་ཁོ་འདིར་མ་ཡོང་ངམ་”ཞེས་བཤད།
ACT 9:22 ཤ་ཨུལ་གྱི་ཆོས་སྟོན་པའི་ནུས་པ་ཇེ་ཆེར་གྱུར་ཞིང༌། ཡེ་ཤུ་ནི་མཱ་ཤི་ཀ་ཡིན་པ་ར་སྤྲོད་བྱས་པས་དཱ་མེ་སེག་ལ་སྡོད་པའི་ཡ་ཧུ་དཱ་པ་ཚོས་ཁོང་གིས་ཆོས་བསྟན་པར་ལན་འདེབས་མ་ཐུབ།
ACT 9:23 ཉིན་མང་སོང་རྗེས། ཡ་ཧུ་དཱ་པ་རྣམས་ཀྱིས་ཤ་ཨུལ་གསོད་རྒྱུའི་ངན་ཇུས་བྱས་ཀྱང༌།
ACT 9:24 ཤ་ཨུལ་གྱིས་ཁོ་ཚོའི་ཇུས་ངན་ཤེས་པར་གྱུར། ཁོང་གསོད་པའི་ཆེད་དུ་ཁོ་ཚོས་ཉིན་མཚན་མེད་པར་གྲོང་ཁྱེར་གྱི་སྒོ་རྣམས་བསྲུངས།
ACT 9:25 འོན་ཀྱང་ཁོང་གི་ཉེ་གནས་རྣམས་ཀྱིས་མཚན་མོར་ཤ་ཨུལ་སླེ་པོ་ཆེན་པོ་ཞིག་གི་ནང་དུ་བླུགས་ནས་ལྕགས་རིའི་ཨི་ཁུང་བརྒྱུད་ནས་མར་ཕབ་པ་རེད།
ACT 9:26 ཡེ་རུ་ཤ་ལེམ་ལ་སླེབས་ནས་ཁོང་ཉེ་གནས་རྣམས་དང་འགྲོགས་འདོད་ཀྱང༌། ཁོང་ཉེ་གནས་དངོས་ཡིན་པར་ཡིད་མ་ཆེས་པས་ཁོ་ཚོ་ཚང་མས་ཁོང་ལ་འཇིགས།
ACT 9:27 འོན་ཀྱང་པར་ན་པཱས་ཁོང་ལ་རོགས་པ་བྱས་ཏེ་སྐུ་ཚབ་རྣམས་ཀྱི་མདུན་དུ་འཁྲིད་ཅིང༌། ལམ་བར་དུ་གཙོ་བོ་ཡེ་ཤུ་ཇི་ལྟར་མཐོང་ནས་གཙོ་བོས་ཁོང་ལ་ཅི་གསུངས་པ་དང༌། དཱ་མེ་སེག་ལ་ཡང་ཡེ་ཤུའི་མཚན་གྱི་ཐོག་ནས་ཤ་ཨུལ་གྱིས་འཇིགས་པ་མེད་པར་འཕྲིན་བཟང་བསྒྲགས་པའི་སྐོར་སྐུ་ཚབ་རྣམས་ལ་གསུངས།
ACT 9:28 ཡེ་རུ་ཤ་ལེམ་ལ་ཁོང་མངོན་སུམ་དུ་ཁོ་ཚོ་དང་འགྲོགས་ཏེ་གཙོ་བོའི་མཚན་གྱི་ཐོག་ནས་འཇིགས་པ་མེད་པར་ཆོས་བསྟན།
ACT 9:29 ཁོང་གིས་གྷི་རིག་སྐད་སྨྲ་བའི་ཡ་ཧུ་དཱ་པ་རྣམས་དང་གཏམ་བཤད་ཅིང་རྩོད་གླེང་བྱས། འོན་ཀྱང་མི་དེ་ཚོས་ཁོང་གསོད་ཐབས་བཙལ་བཞིན་ཡོད།
ACT 9:30 དོན་དེའི་སྐོར་ཤེས་ནས་སྤུན་ཟླ་རྣམས་ཀྱིས་ཤ་ཨུལ་སེ་སར་རེ་ཡཱ་གྲོང་ཁྱེར་ལ་མར་འཁྲིད་པ་དང༌། ཁོང་ཊར་སཱུ་གྲོང་ཁྱེར་དུ་བཏང༌།
ACT 9:31 དེའི་དུས་སུ་ཡ་ཧུ་དཱ་དང༌། ག་ལིལ། ས་མར་ཡཱ་ཡུལ་ཀུན་ལ་ཆོས་ཚོགས་ཞི་བདེའི་ངང་ནས་བློ་སྒོ་ཕྱེ་བར་གྱུར་ཞིང༌། གཙོ་བོ་ལ་བཀུར་སྟི་བྱེད་པ་དང་དམ་པའི་ཐུགས་ཉིད་ཀྱི་སེམས་གསོ་བའི་ངང་ནས་གནས་ཏེ་འཕེལ་ལོ། །
ACT 9:32 པེ་ཏྲོ་ཡུལ་དེ་ཚོ་བརྒྱུད་ནས་ཕེབས་པའི་དུས་སུ་ཁོང་ལུ་དཱ་གྲོང་ཁྱེར་ལ་སྡོད་པའི་དད་ལྡན་རྣམས་ཀྱི་རྩར་སླེབས།
ACT 9:33 དེར་ལོ་བརྒྱད་ཀྱི་བར་དུ་གོམ་པ་སྤོ་མི་ཐུབ་པར་ཉལ་ཁྲིའི་སྟེང་སྡོད་དགོས་པའི་ཨ་ནི་ཡཱ་ཟེར་མཁན་ཞིག་དང་ཕྲད།
ACT 9:34 པེ་ཏྲོས་ཁོ་ལ་“ཨ་ནི་ཡཱ། ཡེ་ཤུ་མཱ་ཤི་ཀ་ཡིས་ཁྱོད་གསོ་བར་མཛད། ལོངས་ལ་ཉལ་ཁྲི་སྡུས་ཤིག་”ཅེས་གསུངས་པས་ནད་པ་དེ་འཕྲལ་དུ་ཡར་ལངས།
ACT 9:35 ཡང་ལུ་དཱ་གྲོང་ཁྱེར་དང་ཞ་རོན་ཞེས་པའི་ཡུལ་ལ་སྡོད་མཁན་ཚང་མས་ཁོ་མཐོང་བས་སེམས་བསྒྱུར་ནས་གཙོ་བོར་དད་པ་བྱས།
ACT 9:36 ཡོ་ཕཱ་གྲོང་ཁྱེར་དུ་ཐཱ་པི་ཐཱ་ཞེས་བྱ་བའི་ཉེ་གནས་ཤིག་ཡོད། (གྷི་རིག་སྐད་དུ་ཐཱ་པི་ཐཱ་ཞེས་པའི་དོན་ནི་དོར་ཀེ་ཡིན་) ཁོ་མོས་སྦྱིན་པ་མང་པོ་བཏང་ཞིང་ལས་བཟང་མུ་མཐུད་ནས་བྱེད་བཞིན་ཡོད།
ACT 9:37 དེའི་དུས་སུ་ཁོ་མོ་ནད་ཀྱིས་བཏབ་ནས་ཤི་བས། ཁོ་རྣམས་ཀྱིས་སྤུར་བཀྲུས་ནས་ཐོག་ཁང་གཅིག་ལ་བཞག
ACT 9:38 ཡོ་ཕཱ་གྲོང་ཁྱེར་ནི་ལུ་དཱ་གྲོང་དང་ཉེ་བར་ཆགས་པས། པེ་ཏྲོ་དེར་ཡོད་པའི་གཏམ་ཐོས་པའི་ཚེ་ཉེ་གནས་རྣམས་ཀྱིས་མི་གཉིས་ཁོང་གི་དྲུང་དུ་བཏང་སྟེ་ང་ཚོའི་རྩར་མགྱོགས་པོར་ཕེབས་རོགས་ཞེས་ནན་གྱིས་བསྐུལ་བའི་རྐྱེན་གྱིས།
ACT 9:39 པེ་ཏྲོ་ལངས་ནས་ཁོ་ཚོ་དང་མཉམ་དུ་ཕེབས་པ་དང༌། དེར་སླེབས་ནས་ཁོ་ཚོས་ཐོག་ཁང་ནང་ལ་འཁྲིད། ཡུགས་མོ་ཚང་མས་ཁོང་གི་འཁྲིས་ལ་ལངས་ཏེ་ངུས་ཤིང༌། དོར་ཀེ་ཡིས་ཁོ་ཚོ་དང་མཉམ་དུ་ཡོད་དུས་བཟོས་པའི་ཕྱི་གོས་དང་གྱོན་ཆས་ཁོང་ལ་བསྟན།
ACT 9:40 པེ་ཏྲོས་ཁོ་ཚོ་ཚང་མ་ཕྱིར་བཏོན་པ་དང༌། པུས་མོ་སར་བཙུགས་ནས་སྨོན་ལམ་བཏབ། སྤུར་གྱི་ཕྱོགས་སུ་ཁ་ཚུར་གཅུས་ཏེ་ཁོང་གིས་“ཐཱ་པི་ཐཱ། ཡར་ལོངས་ཤིག་”ཅེས་སྨྲས་པས་ཁོ་མོས་མིག་གདངས་ཏེ་པེ་ཏྲོ་མཐོང་ནས་ཡར་བླངས།
ACT 9:41 པེ་ཏྲོས་བུད་མེད་དེའི་ལག་པ་ནས་འཇུས་ཤིང་ཡར་བསྐྱོར་ཏེ་ལངས་སུ་བཅུག་པ་དང༌། ཡུགས་མོ་ཚུད་པའི་དད་ལྡན་རྣམས་འབོད་དེ་ཁོ་མོ་གསོན་པོར་བསྟན།
ACT 9:42 དོན་དེ་ཡོ་ཕཱ་གྲོང་ཁྱེར་གྱི་ས་ཕྱོགས་གང་སར་ཁྱབ་པས་མི་མང་པོས་གཙོ་བོ་ལ་དད་པ་བྱས།
ACT 9:43 དེའི་དུས་སུ་པེ་ཏྲོ་ཡོ་ཕཱ་ལ་ཀོ་བ་མཉེད་མཁན་སི་མོན་ཞེས་བྱ་བའི་ཁྱིམ་དུ་ཉིན་མང་པོ་བཞུགས་སོ། །
ACT 10:1 སེ་སར་རེ་ཡཱ་གྲོང་ཁྱེར་ལ་ཀོར་ནེ་ལི་ཡཱུ་ཞེས་ཟེར་བའི་མི་ཞིག་ཡོད་དེ། ཁོ་ནི་དབྱི་ཏ་ལི་པ་ཞེས་པའི་དམག་དཔུང་གི་བརྒྱ་དཔོན་ཡིན་ལ།
ACT 10:2 ཆོས་སེམས་དང་ལྡན་པའི་མི་ཞིག་ཀྱང་ཡིན་ཏེ་ཁོ་རང་དང་ནང་མི་ཚང་མས་དཀོན་མཆོག་ལ་བསྙེན་བཀུར་བྱེད། དབུལ་པོ་རྣམས་ལ་སྦྱིན་པ་མང་པོ་བཏང་ཞིང་དཀོན་མཆོག་ལ་རྒྱུན་དུ་སྨོན་ལམ་འདེབས།
ACT 10:3 ཕྱི་དྲོའི་ཆུ་ཚོད་གསུམ་པ་ཙམ་ལ་ཞལ་གཟིགས་གནང་ནས་དཀོན་མཆོག་གི་ཕོ་ཉ་ཞིག་རང་གི་སར་ཕེབས་པ་གསལ་པོར་མཐོང་ནས་ཁོ་ལ་“ཀོར་ནེ་ལི་ཡཱུ་”ཞེས་གསུངས་པས།
ACT 10:4 ཁོ་འཇིགས་སྐྲག་སྐྱེས་ནས་ཁོང་ལ་མིག་ནན་གྱིས་བལྟས་ཏེ་ཁོས་“སྐུ་ཞབས། ཅི་ལགས་”ཞེས་ཟེར་བས་ཕོ་ཉས་ཁོ་ལ་“ཁྱོད་ཀྱི་སྨོན་ལམ་དང་སྦྱིན་པ་རྣམས་དྲན་རྟེན་ལྟར་དཀོན་མཆོག་གི་མདུན་དུ་བྱུང་ངོ༌།
ACT 10:5 ད་སི་མོན་ཏེ་པེ་ཏྲོ་ཡང་ཟེར་བ་དེ་ཚུར་འཁྲིད་པའི་ཕྱིར་ཡོ་ཕཱ་ལ་མི་འགའ་ཤས་གཏོང་ཞིག
ACT 10:6 ཁོ་ནི་རྒྱ་མཚོའི་འགྲམ་ལ་གནས་པའི་ཀོ་བ་མཉེད་མཁན་སི་མོན་གྱི་ཁང་པར་བཞུགས་”ཞེས་གསུངས།
ACT 10:7 བརྒྱ་དཔོན་ལ་གསུང་མཁན་ཕོ་ཉ་དེ་ཕེབས་པ་དང༌། ཁོས་རང་གི་གཡོག་པོ་གཉིས་དང་ཁོ་ལ་གཡོག་བྱེད་མཁན་དམག་མིའི་ནང་ནས་ཆོས་སེམས་དང་ལྡན་པ་ཞིག་བོས་ནས།
ACT 10:8 དོན་དེ་ཐམས་ཅད་ཁོ་ཚོར་གསལ་བཤད་བྱས་ཏེ་ཁོས་ཁོ་རྣམས་ཡོ་ཕཱ་གྲོང་ཁྱེར་དུ་བཏང༌།
ACT 10:9 དེའི་སང་ཉིན་ཁོ་ཚོ་ལམ་ལ་འགྲོ་དུས་གྲོང་ཁྱེར་དང་ཉེ་བར་སླེབས་པ་དང༌། ཉིན་གུང་ཙམ་ལ་སྨོན་ལམ་འདེབས་པའི་ཆེད་དུ་པེ་ཏྲོ་ཁང་པའི་ཐོག་ཁར་ཕེབས།
ACT 10:10 ཁོང་ལྟོགས་ཏེ་ཟས་ཟ་བར་འདོད་ཅིང་ཁ་ལག་གྲ་སྒྲིག་བྱེད་བཞིན་པའི་དུས་སུ་ཁོང་གིས་ཞལ་གཟིགས་མཐོང་ཞིང༌།
ACT 10:11 དཀོན་མཆོག་གི་ཞིང་ཁམས་བྱེ་ནས་རས་ཆེན་པོ་དང་འདྲ་བ་ཞིག་གྲུ་བཞི་ནས་བཟུང་སྟེ་ས་ལ་མར་འབེབས་བཞིན་པ་ཁོང་གིས་མཐོང༌།
ACT 10:12 དེའི་ནང་ལ་རྐང་པ་བཞི་ལྡན་གྱི་སེམས་ཅན་དང༌། ས་ལ་འགྲོ་བའི་འབུ་སྲིན། ནམ་མཁའི་བྱ་བྱིའུ་སྣ་ཚོགས་ཡོད།
ACT 10:13 དེ་ནས་“པེ་ཏྲོ། ལོངས་ལ་འདི་རྣམས་ལས་གང་རུང་ཞིག་བསད་ནས་ཟོ་ཞིག་”ཅེས་གསུངས་པའི་སྐད་ཅིག་བྱུང་ན་ཡང༌།
ACT 10:14 པེ་ཏྲོས་“གཙོ་བོ་ལགས། ངས་མི་བྱ། གང་ཡིན་ཞེ་ན། ཆོས་ཁྲིམས་ལྟར་ཟས་མི་རུང་བའམ། མི་གཙང་བ་ངས་གཏན་ནས་ཟ་མ་མྱོང་”ཞེས་སྨྲས།
ACT 10:15 ཡང་ཐེངས་གཉིས་པར་སྐད་དེས་“དཀོན་མཆོག་གིས་གང་གཙང་མར་མཛད་པ་དེ་ཁྱོད་ཀྱིས་མི་གཙང་བར་རྩི་མི་རུང་”ཞེས་གསུངས།
ACT 10:16 དོན་དེ་ཐེངས་གསུམ་བྱུང་བའི་རྗེས་སུ་འཕྲལ་དུ་རས་ཆེན་དེ་ཞིང་ཁམས་སུ་ཡར་འཐེན་པར་གྱུར།
ACT 10:17 པེ་ཏྲོས་ཞལ་གཟིགས་དེའི་དོན་མ་རྟོགས་པས་ག་བྱེད་འདི་བྱེད་མེད་པར་གྱུར་བའི་དུས་དེར། གློ་བུར་དུ་བརྒྱ་དཔོན་ཀོར་ནེ་ལི་ཡཱུ་ཡིས་བཏང་བའི་མི་རྣམས་ཀྱིས་སི་མོན་གྱི་ཁང་པར་འགྲོ་བའི་ལམ་གང་ཡིན་དྲིས་ནས་སྒོའི་འགྲམ་ལ་སླེབས་པ་དང༌།
ACT 10:18 སི་མོན་ནམ་པེ་ཏྲོ་ཡང་བྱ་བ་ཞིག་དེར་བཞུགས་ཀྱི་ཡོད་མེད་དྲིས་ཏེ་བོས།
ACT 10:19 པེ་ཏྲོས་ཞལ་གཟིགས་ཀྱི་དོན་དེའི་སྐོར་བསམ་བློ་ཞིབ་ཕྲ་གཏོང་དུས་དཀོན་མཆོག་གི་དམ་པའི་ཐུགས་ཉིད་ཀྱིས་ཁོ་ལ་“ལྟོས་ཤིག མི་གསུམ་གྱིས་ཁྱོད་འཚོལ་བཞིན་འདུག
ACT 10:20 ད་ལོངས་ལ་མར་འབབ། ང་རང་གིས་དེ་རྣམས་བཏང་བས་ཁྱོད་ཐེ་ཚོམ་མེད་པར་ཁོ་ཚོ་དང་མཉམ་དུ་སོང་ཞིག་”ཅེས་གསུངས་པས།
ACT 10:21 པེ་ཏྲོ་ཁོ་ཚོའི་རྩར་མར་བབས་ནས་“ཁྱེད་རྣམས་ཀྱིས་འཚོལ་བཞིན་པ་དེ་ང་ཡིན། ཁྱེད་རྣམས་ཅིའི་ཕྱིར་ཕེབས་པ་ཡིན་”ཞེས་བཤད།
ACT 10:22 ལན་དུ་ཁོ་ཚོས་“ང་ཚོ་བརྒྱ་དཔོན་ཀོར་ནེ་ལི་ཡཱུའི་ས་ནས་ཡོང་བ་ཡིན། ཁོང་ནི་རང་གཤིས་དྲང་བ་དང་དཀོན་མཆོག་ལ་བསྙེན་བཀུར་བྱེད་མཁན་ཅིག་ཡིན་ཏེ་ཡ་ཧུ་དཱ་པའི་མི་རིགས་ཡོངས་ཀྱིས་ཁོང་ལ་བཀུར་སྟི་བྱེད། དཀོན་མཆོག་གི་ཕོ་ཉ་དམ་པ་ཞིག་གིས་ཁོང་ལ་ཁྱེད་ཀྱི་གསུང་ཉན་པའི་ཆེད་དུ་ཁྱེད་གདན་འདྲེན་ཞུས་དགོས་པའི་བཀའ་གནང་”ཞེས་སྨྲས།
ACT 10:23 དེ་ནས་པེ་ཏྲོས་ཁོ་རྣམས་བསུས་ནས་ཁང་པ་དེར་བཞུགས། དེའི་སང་ཉིན་པེ་ཏྲོ་ལངས་ཤིང༌། ཡོ་ཕཱ་གྲོང་ཁྱེར་ནས་དད་ལྡན་པ་ཁ་ཤས་དང་འགྲོགས་ཏེ་ཁོ་ཚོ་དང་མཉམ་དུ་ཕེབས།
ACT 10:24 དེའི་ཕྱི་ཉིན་ཁོ་རྣམས་སེ་སར་རེ་ཡཱ་གྲོང་ཁྱེར་དུ་སླེབས། ཀོར་ནེ་ལི་ཡཱུ་ཡིས་རང་གི་གཉེན་ཉེ་དང་སྙིང་གྲོགས་བོས་ནས་བསྒུགས།
ACT 10:25 པེ་ཏྲོ་ནང་ལ་ཞུགས་པས་ཀོར་ནེ་ལི་ཡཱུ་ཡིས་ཁོང་གདན་འདྲེན་ཞུས་པ་དང༌། ཁོང་གི་ཞབས་ཀྱི་དྲུང་དུ་ཕྱག་འཚལ།
ACT 10:26 འོན་ཀྱང་པེ་ཏྲོས་ཁོ་ཡར་སྐྱོར་ཏེ་“ལོངས་དང༌། ངའང་མི་ཡིན་ནོ་”ཞེས་གསུངས།
ACT 10:27 ཁོ་དང་གཏམ་གླེང་བྱེད་བཞིན་ནང་ལ་ཕྱིན་པ་དང༌། ཁོང་གིས་མི་ཚོགས་འཛོམས་ཡོད་པ་མཐོང༌།
ACT 10:28 ཡང་ཁོང་གིས་ཁོ་ཚོར་“ཡ་ཧུ་དཱ་ཡིན་པའི་མི་ཞིག་གིས་ཡ་ཧུ་དཱ་པ་མིན་པའི་མི་དང་འགྲོགས་སམ། ཐུག་འཕྲད་བྱེད་པ་དེ་ཆོས་ཁྲིམས་དང་འགལ་བ་ཡིན་པར་ཁྱེད་རང་གིས་ཤེས། འོན་ཀྱང་དཀོན་མཆོག་གིས་ངས་སུ་ལའང་ལྷད་ཡོད་པ་དང་ཡང་ན། མི་གཙང་བར་རྩི་མི་རུང་བ་དེ་ང་ལ་བསྟན་བྱུང༌།
ACT 10:29 དེའི་ཕྱིར་ང་འདིར་འབོད་སྐབས་ངས་ངོ་རྒོལ་མ་བྱས་པར་ཡོང༌། ཁྱེད་ཀྱིས་ང་འདིར་འདྲེན་པའི་དོན་ཅི་ཡིན་”ཞེས་དྲིས།
ACT 10:30 ཀོར་ནེ་ལི་ཡཱུ་ཡིས་“ཉིན་བཞིའི་སྔོན་གྱི་དུས་འདི་རང་སྟེ་ཕྱི་དྲོའི་ཆུ་ཚོད་གསུམ་པར་ངའི་ཁང་པའི་ནང་ལ་སྨོན་ལམ་བཏབ་པའི་ཚེ། གློ་བུར་དུ་འོད་འཕྲོ་བའི་ན་བཟའ་གྱོན་པ་ཞིག་ངའི་མདུན་ལ་བཞེངས་ནས་བཞུགས་ཡོད་པ་དང༌།
ACT 10:31 ཁོང་གིས་ང་ལ་ཀོར་ནེ་ལི་ཡཱུ། དཀོན་མཆོག་གིས་ཁྱོད་ཀྱི་སྨོན་ལམ་གསན་ཞིང་སྦྱིན་པ་བཏང་བའང་གཟིགས།
ACT 10:32 དེའི་ཕྱིར་མི་རྣམས་ཡོ་ཕཱ་ལ་བཏང་ནས་སི་མོན་ནམ་པེ་ཏྲོ་ཡང་བྱ་བ་འདིར་འདྲེན་ཞིག ཁོ་ནི་རྒྱ་མཚོའི་འགྲམ་ལ་གནས་པའི་ཀོ་བ་མཉེད་མཁན་སི་མོན་གྱི་ཁང་པར་བཞུགས་ཞེས་གསུངས།
ACT 10:33 དེའི་ཕྱིར་ངས་ལམ་སེང་ཁྱེད་གདན་འདྲེན་ཞུས་ཏེ། ཁྱེད་རང་འདིར་ཕེབས་ན་ལེགས། ད་གཙོ་བོས་ཁྱེད་ལ་གནང་བའི་བཀའ་ཐམས་ཅད་ལ་ཉན་པའི་ཆེད་དུ་ང་ཚོ་ཚང་མ་དཀོན་མཆོག་གི་སྤྱན་སྔར་འདིར་འཛོམས་ཡོད་”ཅེས་སྨྲས།
ACT 10:34 དེ་ནས་པེ་ཏྲོས་“དཀོན་མཆོག་གིས་ཕྱོགས་རིས་མི་མཛད་པ་དེ་ངས་ད་ལྟ་ཐེ་ཚོམ་མེད་པར་ཤེས།
ACT 10:35 མི་རིགས་ཐམས་ཅད་ཀྱི་ཁྲོད་དུ་སུ་ཡང་དཀོན་མཆོག་ལ་བསྙེན་བཀུར་ཞུ་བ་དང་དྲང་བའི་ལས་སྒྲུབ་མཁན་དེ་ལ་ཁོང་ཐུགས་མཉེས།
ACT 10:36 དཀོན་མཆོག་གིས་ཡི་སི་ར་ཨེལ་མི་རིགས་ལ་གནང་བའི་འཕྲིན་བཟང་ཁྱེད་ཀྱིས་ཤེས། དེ་ནི་ཐམས་ཅད་ཀྱི་གཙོ་བོ་ཡིན་ཏེ་ཡེ་ཤུ་མཱ་ཤི་ཀ་ལ་དད་པའི་སྒོ་ནས་ཞི་བདེ་འཐོབ་པའི་འཕྲིན་ཡིན།
ACT 10:37 ཡོ་ཧ་ནན་གྱིས་ཁྲུས་གསོལ་ལེན་དགོས་པའི་འཕྲིན་སྒྲོག་པའི་རྗེས་སུ་ག་ལིལ་ཡུལ་ནས་ཡ་ཧུ་དཱ་ཡུལ་ཡོངས་སུ་ཅི་བྱུང་བ་དང༌།
ACT 10:38 ཅི་ལྟར་དཀོན་མཆོག་གིས་ན་ཙ་རེལ་པ་ཡེ་ཤུ་ལ་དམ་པའི་ཐུགས་ཉིད་དང་ནུས་མཐུ་གནང་ཞིང༌། དཀོན་མཆོག་ཁོང་དང་མཉམ་དུ་བཞུགས་པས་ཁོང་གིས་ལས་བཟང་པོ་སྒྲུབ་ཅིང༌། བདུད་ཀྱིས་མནན་པ་ཐམས་ཅད་གསོ་བར་མཛད་པ་དེ་ཁྱེད་ཀྱིས་ཤེས།
ACT 10:39 ཁོང་གིས་ཡ་ཧུ་དཱ་ཡུལ་དང་ཡེ་རུ་ཤ་ལེམ་གྲོང་ཁྱེར་དུ་གང་མཛད་པ་ཐམས་ཅད་ཀྱི་དཔང་པོ་ང་ཚོ་ཡིན། རྒྱང་ཤིང་སྒང་ལ་བརྒྱངས་པའི་སྒོ་ནས་ཁོ་ཚོས་ཁོང་བསད་ཀྱང༌།
ACT 10:40 ཉི་མ་གསུམ་པར་དཀོན་མཆོག་གིས་ཁོང་འཆི་བ་ནས་སླར་གསོན་པོར་མཛད་ནས་ཁོང་མངོན་དུ་བཅུག་གོ
ACT 10:41 མི་ཐམས་ཅད་ལ་ཁོང་མངོན་སུམ་དུ་མ་བསྟན་པར། འཆི་བ་ནས་སྐུ་གསོན་པོར་བཞེངས་ནས་ཁོང་དང་མཉམ་དུ་ཟ་ཞིང་འཐུང་མཁན་ཏེ་དཀོན་མཆོག་གིས་སྔར་འདེམས་པར་མཛད་པའི་དཔང་པོ་ཡིན་པ་ང་ཚོས་མཐོང༌།
ACT 10:42 ཡང་ཁོང་གིས་ང་ཚོར་མི་རྣམས་ལ་ཆོས་སྟོན་པ་དང༌། ཁོང་ཉིད་དཀོན་མཆོག་གིས་བསྐོས་པར་མཛད་དེ་ཤི་གསོན་གཉིས་ཀྱི་ཁྲིམས་དཔོན་ཡིན་པ་བདེན་དཔང་བྱེད་དགོས་པའི་བཀའ་གནང༌།
ACT 10:43 ཡང་ཁོང་གི་སྐོར་ལུང་སྟོན་པ་ཚང་མས། ཁོང་ལ་དད་པ་བྱེད་མཁན་ཐམས་ཅད་ཁོང་གི་མཚན་གྱི་ཐོག་ནས་སྡིག་སེལ་འཐོབ་པར་འགྱུར་ཞེས་པའི་དཔང་པོ་མཛད་”ཅེས་གསུངས།
ACT 10:44 པེ་ཏྲོས་མུ་མཐུད་གསུངས་པའི་སྐབས་སུ་དམ་པའི་ཐུགས་ཉིད་བཀའ་ཐོས་མཁན་ཐམས་ཅད་ལ་བབས།
ACT 10:45 ཡ་ཧུ་དཱ་པ་མིན་པ་རྣམས་ལའང་དཀོན་མཆོག་གི་གནང་སྦྱིན་ཏེ་དམ་པའི་ཐུགས་ཉིད་ཐོབ་པའི་རྐྱེན་གྱིས། ཡ་ཧུ་དཱ་པའི་དད་ལྡན་པ་ཆོས་ཀྱི་རྟགས་དང་ལྡན་པ་རྣམས་པེ་ཏྲོ་དང་མཉམ་དུ་ཡོང་མཁན་ཚང་མ་ཡ་མཚན་ཆེན་པོ་སྐྱེས།
ACT 10:46 དེ་ནི་དམ་པའི་ཐུགས་ཉིད་འཐོབ་པ་རྣམས་ཀྱིས་སྐད་རིགས་གཞན་རྣམས་སྤྱད་ནས་སྐད་ཆ་བཤད་པ་དང༌། དཀོན་མཆོག་ལ་བསྟོད་བསྔགས་བྱེད་པ་ཐོས་པས་སོ། དེ་ནས་པེ་ཏྲོས་
ACT 10:47 “མི་འདི་རྣམས་ཆུ་ཡིས་ཁྲུས་གསོལ་བྱེད་པར་སུས་སྔོན་འགོག་བྱེད་དམ། ང་ཚོ་ལྟར་ཁོ་ཚོ་ལའང་དམ་པའི་ཐུགས་ཉིད་ཐོབ་བོ་”ཞེས་གསུངས་པས།
ACT 10:48 ཡེ་ཤུ་མཱ་ཤི་ཀའི་མཚན་ཐོག་ནས་ཁོ་རྣམས་ལ་ཁྲུས་གསོལ་བྱེད་པའི་བཀའ་གནང་ནས། ཁོ་ཚོས་ཁོང་ཉིན་ཤས་བཞུགས་པར་གདན་འདྲེན་ཞུས་སོ། །
ACT 11:1 དེ་ཡང་ཡ་ཧུ་དཱ་ཡུལ་གང་སར་ཡོད་པའི་སྐུ་ཚབ་དང་དད་ལྡན་པའི་སྤུན་ཟླ་རྣམས་ཀྱིས་ཡ་ཧུ་དཱ་པ་མིན་པ་རྣམས་ཀྱིས་ཀྱང་དཀོན་མཆོག་གི་བཀའ་དང་ལེན་བྱས་པའི་གཏམ་ཐོས།
ACT 11:2 པེ་ཏྲོ་ཡེ་རུ་ཤ་ལེམ་ལ་སླེབས་ནས་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པའི་དད་ལྡན་པ་ཁ་ཅིག་གིས་ཁོང་ལ་སྐྱོན་བརྗོད་བྱས་ཏེ་
ACT 11:3 “ཆོས་ཀྱི་རྟགས་མེད་པ་རྣམས་ཀྱི་ཁང་པར་ཞུགས་ནས་ཁྱོད་ཀྱིས་མི་དེ་ཚོ་དང་མཉམ་དུ་ཁ་ལག་ཀྱང་བཟས་”ཞེས་སྨྲས།
ACT 11:4 དེ་ནས་པེ་ཏྲོས་ཁོ་རྣམས་ལ་རིམ་གྱིས་གསལ་བཤད་བྱས་ཏེ་
ACT 11:5 “ཡོ་ཕཱ་གྲོང་ཁྱེར་དུ་སྨོན་ལམ་འདེབས་པའི་སྐབས་ཞལ་གཟིགས་ཀྱི་ནང་ནས་རས་ཆེན་པོ་དང་འདྲ་བ་ཞིག་གྲུ་བཞི་ནས་བཟུང་སྟེ་དཀོན་མཆོག་གི་ཞིང་ཁམས་ནས་ངའི་མདུན་དུ་ཕབ་པ་ངས་མཐོང༌།
ACT 11:6 དེ་ལ་ནན་གྱིས་བལྟས་པས་ངས་རྐང་པ་བཞི་ལྡན་གྱི་སེམས་ཅན་དང༌། གཅན་གཟན། ས་ལ་འགྲོ་བའི་འབུ་སྲིན། ནམ་མཁའི་བྱ་བྱིའུ་བཅས་མཐོང་ནས།
ACT 11:7 ང་ལ་པེ་ཏྲོ། ལོངས་ལ་འདི་རྣམས་ལས་གང་རུང་ཞིག་བསད་ནས་ཟོ་ཞིག་ཅེས་གསུངས་པའི་སྐད་ཅིག་ངས་ཐོས།
ACT 11:8 འོན་ཀྱང་ངས་གཙོ་བོ་ལགས། ངས་མི་བྱ། གང་ཡིན་ཞེ་ན། ཆོས་ཁྲིམས་ལྟར་ན་ཟས་མི་རུང་བའམ། མི་གཙང་བ་ངས་གཏན་ནས་ཟ་མ་མྱོང་ཞེས་སྨྲས།
ACT 11:9 ཡང་ཐེངས་གཉིས་པར་དཀོན་མཆོག་གི་ཞིང་ཁམས་ནས་སྐད་དེས་དཀོན་མཆོག་གིས་གང་གཙང་མར་མཛད་པ་དེ་ཁྱོད་ཀྱིས་མི་གཙང་བ་རྩི་མི་རུང་ཞེས་གསུངས།
ACT 11:10 དེ་ལྟར་ཐེངས་གསུམ་བྱུང་བའི་རྗེས་སུ་ཐམས་ཅད་ཞིང་ཁམས་ལ་དྲངས་པར་གྱུར།
ACT 11:11 དུས་དེ་རང་ལ་སེ་སར་རེ་ཡཱ་གྲོང་ཁྱེར་ནས་ངའི་རྩར་བཏང་བའི་མི་གསུམ་ང་ཚོ་སྡོད་སའི་ཁང་པར་སླེབས།
ACT 11:12 དམ་པའི་ཐུགས་ཉིད་ཀྱིས་ང་ལ་ཁོ་ཚོ་དང་ང་ཚོའི་བར་དུ་དབྱེ་བ་མ་འབྱེད་པར་འགྲོ་དགོས་པའི་བཀའ་གནང༌། ཡང་སྤུན་ཟླ་དྲུག་པོ་འདི་ཡང་ང་དང་མཉམ་དུ་ཕེབས་ཏེ། ངེད་རྣམས་མི་དེའི་ཁྱིམ་ཚང་ལ་ཞུགས།
ACT 11:13 ཡང་ཁོས་དཀོན་མཆོག་གི་ཕོ་ཉ་ཁོའི་ཁང་པའི་ནང་ལ་བཞུགས་ཡོད་པ་མཐོང་སྟེ་ཕོ་ཉས་སི་མོན་ནམ་པེ་ཏྲོ་ཡང་ཟེར་བ་ཚུར་འཁྲིད་པའི་ཕྱིར་ཡོ་ཕཱ་ལ་མི་རྣམས་གཏོང་ཞིག
ACT 11:14 ཁོང་གིས་སྒྲོག་པའི་འཕྲིན་གྱི་སྒོ་ནས་ཁྱོད་དང་ཁྱོད་ཀྱི་ནང་མི་ཐམས་ཅད་ཐར་བར་འགྱུར་ཞེས་གསུངས་པའི་གཏམ་ངེད་རྣམས་ལ་བཤད།
ACT 11:15 ངས་ཁོ་རྣམས་ལ་བཤད་པར་བརྩམས་པའི་ཚེ་དམ་པའི་ཐུགས་ཉིད་ནི་ཐོག་མར་ང་ཚོར་བབས་པ་ལྟར་ཁོ་ཚོ་ལའང་བབས།
ACT 11:16 ཡང་གཙོ་བོས་གསུངས་པའི་བཀའ་སྟེ་ཡོ་ཧ་ནན་གྱིས་ཆུ་ཡིས་ཁྲུས་གསོལ་གནང་ན་ཡང་ཁྱེད་རྣམས་ལ་དམ་པའི་ཐུགས་ཉིད་ཀྱིས་ཁྲུས་གསོལ་གནང་བར་འགྱུར་ཞེས་གསུངས་པ་དེ་ངས་དྲན།
ACT 11:17 དེ་བས་ན་ངེད་རྣམས་ཀྱིས་གཙོ་བོ་ཡེ་ཤུ་མཱ་ཤི་ཀ་ལ་དད་པ་བྱས་པའི་རྗེས་སུ་ང་ཚོར་གནང་བའི་སྦྱིན་པ་དེ་རང་ནི་དཀོན་མཆོག་གིས་ཁོ་ཚོ་ལའང་གནང་བ་ཡིན་ན། ང་དཀོན་མཆོག་ལ་ངོ་རྒོལ་བྱེད་མཁན་དུ་འགྱུར་བ་དེ་ཅི་ལྟར་སྲིད་”ཅེས་གསུངས།
ACT 11:18 དེ་ཐོས་པས་རྩོད་པ་སྤངས་ནས་དཀོན་མཆོག་ལ་བསྟོད་ར་བྱས་ཏེ་“བྱས་ན། དཀོན་མཆོག་གིས་ཡ་ཧུ་དཱ་པ་མིན་པ་རྣམས་ལའང་སེམས་བསྒྱུར་ནས་དཔག་ཏུ་མེད་པའི་ཚེ་འཐོབ་པར་གནང་བ་ཡིན་ནོ་”ཞེས་སྨྲས།
ACT 11:19 དེ་ནས་སེ་ཏེ་ཕཱན་གྲོངས་པའི་རྗེས་སུ་གནོད་པ་བྱུང་བས་ཁ་འཐོར་ཡོད་པ་རྣམས་ཀྱིས་ཡ་ཧུ་དཱ་པ་ཁོ་ན་ལས་གཞན་སུ་ལའང་བཀའ་མི་སྒྲོགས་པར་ཕེ་ནི་ཀེ་ཡུལ་དང༌། ཀིབ་རུ་གླིང་ཕྲན། སི་རི་ཡཱ་ཡུལ་གྱི་ཨན་ཏི་ཡོག་ཡཱ་གྲོང་ཁྱེར་ལ་ཕྱིན།
ACT 11:20 འོན་ཀྱང་དེ་ཚོའི་ཁྲོད་དུ་ཀིབ་རུ་དང༌། སེ་རེ་ནཱ་ཞེས་པའི་གྲོང་ཁྱེར་ནས་ཡིན་པའི་མི་ཁ་ཅིག་གིས་ཨན་ཏི་ཡོག་ཡཱ་ལ་སླེབས་ནས་གྷི་རིག་སྐད་སྨྲ་བའི་ཡ་ཧུ་དཱ་པ་རྣམས་ལའང་གཙོ་བོ་ཡེ་ཤུའི་འཕྲིན་བཟང་བསྒྲགས།
ACT 11:21 དཀོན་མཆོག་གི་ནུས་མཐུ་ཁོ་ཚོ་དང་མཉམ་དུ་བཞུགས་པའི་རྐྱེན་གྱིས། མི་ཧ་ཅང་མང་པོས་སེམས་བསྒྱུར་ནས་གཙོ་བོ་ལ་དད་པ་བྱས་སོ།
ACT 11:22 དོན་དེའི་སྐོར་ཡེ་རུ་ཤ་ལེམ་གྱི་ཆོས་ཚོགས་ཀྱི་མིའི་རྣ་ལམ་དུ་ཐོས་པས་པར་ན་པཱ་ཟེར་བ་དེ་ཨན་ཏི་ཡོག་ཡཱ་ལ་མངགས།
ACT 11:23 ཁོང་དེར་སླེབས་ནས་དཀོན་མཆོག་གི་ཐུགས་རྗེ་མཐོང་བས་ཁོང་སེམས་དགའ་བར་གྱུར། ཁོང་གིས་ཁོ་རྣམས་ལ་བློ་སེམས་གཅིག་གིས་གཙོ་བོ་ལ་རྟེན་དགོས་པར་བསྐུལ།
ACT 11:24 གང་ལགས་ཟེར་ན། ཁོང་ནི་མི་བཟང་པོ་ཞིག་ཡིན་ཏེ། དད་པ་དང་དཀོན་མཆོག་གི་དམ་པའི་ཐུགས་ཉིད་ཀྱིས་གང་བ་ཞིག་ཡིན། ཡང་མི་ཤིན་ཏུ་མང་པོས་གཙོ་བོ་ལ་དད་པ་བྱས།
ACT 11:25 དེ་ནས་པར་ན་པཱ་ཤ་ཨུལ་འཚོལ་བའི་ཆེད་དུ་ཊར་སཱུ་གྲོང་ཁྱེར་ལ་ཕེབས་ཏེ།
ACT 11:26 ཁོང་རྙེད་ནས་ཨན་ཏི་ཡོག་ཡཱ་ལ་འཁྲིད། ལོ་གཅིག་གི་བར་དུ་ཁོང་རྣམས་ཆོས་ཚོགས་དང་འགྲོགས་ཏེ་མི་མང་པོར་ཆོས་བསྟན། ཨན་ཏི་ཡོག་ཡཱར་ཉེ་གནས་རྣམས་ཀྱི་སྤྱི་མིང་ལ་མཱ་ཤི་ཀ་པ་ཞེས་ཐོག་མར་བཏགས།
ACT 11:27 དེའི་དུས་སུ་ལུང་སྟོན་པ་ཁ་ཤས་ཡེ་རུ་ཤ་ལེམ་ནས་ཨན་ཏི་ཡོག་ཡཱར་སླེབས།
ACT 11:28 ཁོ་ཚོའི་ནང་ནས་ཨ་ག་བཱུ་ཟེར་མཁན་ཞིག་གིས་ཚོགས་པའི་ཁྲོད་དུ་ཡར་ལངས་ཏེ་དམ་པའི་ཐུགས་ཉིད་ལ་བརྟེན་ནས་རོ་མཱ་གོང་མའི་རྒྱལ་ཁབ་ཡོངས་སུ་མུ་གེ་ཆེན་པོ་ཞིག་འབྱུང་བར་འགྱུར་ངེས་ཡིན་ཞེས་པའི་ལུང་བསྟན། དེ་ནི་གོང་མའི་རྒྱལ་པོ་ཀ་ལོ་དཱི་ཡིས་རྒྱལ་པོ་བྱེད་པའི་དུས་སུ་བྱུང༌།
ACT 11:29 ཁོ་ཚོས་སོ་སོའི་ནུས་པ་བཞིན་དུ་ཡ་ཧུ་དཱ་ཡུལ་གྱི་སྤུན་ཟླ་རྣམས་ལ་སྦྱིན་པ་ཕུལ་རྒྱུའི་ཐག་གཅོད་བྱས་ནས།
ACT 11:30 དེ་རྣམས་བསྡུས་ཏེ་པར་ན་པཱ་དང་ཤ་ཨུལ་གཉིས་ཡེ་རུ་ཤ་ལེམ་ཆོས་ཚོགས་ཀྱི་འགན་འཁུར་བ་རྣམས་ལ་སྤྲོད་པར་བཏང་ངོ༌། །
ACT 12:1 དེའི་དུས་སུ་རྒྱལ་པོ་ཧེ་རོ་དཱེ་ཡིས་ཆོས་ཚོགས་ཀྱི་མིའི་ནང་ནས་ཁ་ཤས་ལ་གནོད་སྐྱེལ་བའི་ཕྱིར་ཁོ་རྣམས་འཛིན་བཟུང་བྱེད་དུ་བཅུག
ACT 12:2 ཁོས་ཡོ་ཧ་ནན་གྱི་གཅེན་པོ་སྐུ་ཚབ་ཡ་ཀོབ་རལ་གྲིའི་ཁ་ཡིས་བསད་དུ་བཅུག་པས།
ACT 12:3 ཡ་ཧུ་དཱ་པ་རྣམས་དགའ་བར་གྱུར་བ་མཐོང་ནས་ཁོས་པེ་ཏྲོ་ཡང་འཛིན་བཟུང་བྱས། (དེ་ནི་སྐྱུར་རྩི་མེད་པའི་བག་ལེབ་དུས་ཆེན་གྱི་དུས་སུ་བྱུང་)
ACT 12:4 ཧེ་རོ་དཱེ་ཡིས་པེ་ཏྲོ་བཟུང་ནས་བཙོན་ཁང་དུ་བཅུག་ཅིང༌། ཁོ་སྲུང་བའི་ཕྱིར་དམག་མི་བཞི་རེ་ཅན་གྱི་དམག་ཁག་བཞི་ལ་གཏད། པེ་སག་དུས་ཆེན་དེའི་རྗེས་སུ་ཁོས་པེ་ཏྲོ་ཡུལ་མི་རྣམས་ཀྱི་མདུན་དུ་འཁྲིད་ནས་ཁྲིམས་གཅོད་པར་འདོད།
ACT 12:5 པེ་ཏྲོ་བཙོན་ཁང་ལ་བཅུག་དུས་ཆོས་ཚོགས་ཀྱིས་ཁོང་གི་ཆེད་དུ་དཀོན་མཆོག་ལ་སྙིང་ཐག་པ་ནས་གསོལ་འདེབས་བྱས།
ACT 12:6 ཧེ་རོ་དཱེ་ཡིས་པེ་ཏྲོ་ཡུལ་མི་རྣམས་ཀྱི་མདུན་དུ་ཁྲིད་ནས་ཁྲིམས་གཅོད་བྱེད་པའི་སྔོན་གྱི་མཚན་མོར་པེ་ཏྲོ་ལྕགས་ཐག་གཉིས་ཀྱིས་བཅིངས་ཏེ་དམག་མི་གཉིས་ཀྱི་བར་དུ་གཉིད་ཁུག་ནས་བསྡད། སྒོའི་ཕྱི་རོལ་ཏུ་སྲུང་དམག་རྣམས་ཀྱིས་བཙོན་ཁང་བསྲུངས།
ACT 12:7 གློ་བུར་དུ་དཀོན་མཆོག་གི་ཕོ་ཉ་ཞིག་མངོན་སུམ་དུ་བྱུང་ཞིང་ཁང་མིག་ལ་འོད་ཅིག་འཕྲོས། ཕོ་ཉས་གཉིད་གསོད་པའི་ཕྱིར་པེ་ཏྲོའི་གཞོགས་ལ་འཆང་སྟེ་ཁོང་ལ་“མགྱོགས་པོ་ལོངས་ཤིག་”ཅེས་གསུངས་པས་ལྕགས་ཐག་གཉིས་ཁོང་གི་ལག་པ་ནས་སར་ལྷུངས།
ACT 12:8 ཡང་ཕོ་ཉས་ཁོང་ལ་“སྐེ་རགས་བཅིངས་ནས་ལྷམ་གྱོན་ཞིག་”ཅེས་གསུངས་པས་པེ་ཏྲོས་དེ་ལྟར་བྱས་པ་དང༌། ཕོ་ཉས་“ཕྱི་གོས་གྱོན་ནས་ངའི་རྗེས་སུ་ཤོག་”ཅེས་གསུངས།
ACT 12:9 པེ་ཏྲོ་ཕྱིར་ཐོན་ནས་ཕོ་ཉའི་རྗེས་སུ་འབྲངས། ཕོ་ཉས་གང་མཛད་པ་དེ་དངོས་གནས་ཡིན་པ་པེ་ཏྲོས་མི་ཤེས་ཏེ། ཞལ་གཟིགས་ཤིག་མཐོང་བར་སྙམ།
ACT 12:10 དེ་རྗེས་སྲུང་དམག་དང་པོ་དང་གཉིས་པ་བརྒལ་ནས་གྲོང་ཁྱེར་ལ་འགྲོ་བའི་ལྕགས་སྒོར་སླེབས་པ་དང༌། དེ་རང་ཤུགས་ཀྱིས་ཕྱེ་ནས་ཁོང་ཚོ་ཕྱིར་ཐོན་ཏེ་སྲང་ལམ་ཞིག་བརྒྱུད་ནས་ཕེབས་དུས་གློ་བུར་དུ་ཕོ་ཉ་ཁོང་དང་ཁ་བྲལ།
ACT 12:11 པེ་ཏྲོས་གང་བྱུང་བ་དེ་དངོས་གནས་ཡིན་པ་ཤེས་ནས་“ད་གཙོ་བོས་རང་གི་ཕོ་ཉ་མངགས་ཏེ་རྒྱལ་པོ་ཧེ་རོ་དཱེ་ཡི་དབང་ཤེད་དང༌། ཡ་ཧུ་དཱ་པ་རྣམས་ཀྱིས་རེ་སྒུག་བྱེད་པའི་དོན་ཐམས་ཅད་ལས་ང་སྐྱོབ་པར་མཛད་པ་ངས་ཐེ་ཚོམ་མེད་པར་ཤེས་”ཞེས་གསུངས།
ACT 12:12 དེ་ལྟར་བསམས་མ་ཐག་ཁོང་ཡོ་ཧ་ནན་ཏེ་མར་ཀུ་ཡང་བྱ་བའི་ཨ་མ་མིར་ཡམ་གྱི་ཁང་པར་ཕེབས། དེར་མི་མང་པོ་འཛོམས་ནས་སྨོན་ལམ་འདེབས་བཞིན་ཡོད།
ACT 12:13 པེ་ཏྲོས་ཕྱི་སྒོ་བརྡུངས་པས་རོལ་དཱ་ཞེས་ཟེར་བའི་གཡོག་མོ་ཞིག་སྒོ་ཕྱེ་བར་ཡོང༌།
ACT 12:14 པེ་ཏྲོའི་སྐད་ཡིན་པར་ཤེས་ཏེ་ཧ་ཅང་དགའ་བའི་ངང་ནས་སྒོ་མ་ཕྱེ་བར་ནང་ལ་བརྒྱུགས་ཤིང་“པེ་ཏྲོ་ལགས་སྒོའི་ཕྱི་ལ་འདུག་”ཅེས་བཤད།
ACT 12:15 ཁོ་ཚོས་ཁོ་མོ་ལ་“ཁྱོད་སྨྱོའོ་”ཞེས་ཟེར་ན་ཡང༌། ཁོ་མོས་བདེན་པ་ཡིན་པར་ཨུ་ཚུགས་བྱས་པས། ཁོ་ཚོས་“ཁོང་གི་ཕོ་ཉ་ཡིན་པར་ངེས་”ཞེས་སྨྲས།
ACT 12:16 དེའི་རིང་ལ་པེ་ཏྲོས་མུ་མཐུད་སྒོ་བརྡུངས། སྒོ་ཕྱེ་ནས་ཁོང་མཐོང་བས་ཁོ་རྣམས་ངོ་མཚར་བར་གྱུར།
ACT 12:17 པེ་ཏྲོས་ཁ་ཁུ་སིམ་པོར་སྡོད་དགོས་པའི་ལག་བརྡ་བྱས་ཏེ། གཙོ་བོས་ཁོང་ཇི་ལྟར་བཙོན་ཁང་ནས་འཁྲིད་པའི་གཏམ་ཁོ་ཚོར་བཤད། ཁོང་གིས་“དོན་དེ་ཡ་ཀོབ་དང་སྤུན་ཟླ་གཞན་རྣམས་ལ་ཤོད་ཅིག་”ཅེས་གསུངས་ནས་ཁོ་ཚོ་དང་ཁ་བྲལ་ཏེ་ས་ཆ་གཞན་ཞིག་ལ་ཕར་ཕེབས།
ACT 12:18 དེའི་སང་ཞོགས་པེ་ཏྲོ་གང་དུ་སོང་མིན་མ་ཤེས་པས་དམག་མི་རྣམས་ཤིན་ཏུ་འཁྲུགས་པར་གྱུར།
ACT 12:19 ཧེ་རོ་དཱེ་ཡིས་ཁོང་བཙལ་ནས་མ་རྙེད་པས་ཁོས་སྲུང་དམག་རྣམས་ལ་འདྲི་གཅོད་བྱས་པ་དང༌། ཁོ་ཚོ་ལ་སྲོག་ཁྲིམས་གཏོང་དགོས་པའི་བཀའ་བསྒོས། དེའི་རྗེས་སུ་ཁོ་ཡ་ཧུ་དཱ་ཡུལ་ནས་སེ་སར་རེ་ཡཱ་གྲོང་ཁྱེར་ལ་ཕྱིན་ནས་དེར་གནས་སོ། །
ACT 12:20 ཧེ་རོ་དཱེ་ཐཱ་ཨེར་དང་ཚི་དོན་གྲོང་ཁྱེར་གྱི་འབངས་མི་རྣམས་ལ་ཤིན་ཏུ་ཁྲོས་པར་འགྱུར། ཁོ་ཚོའི་ཡུལ་དེ་ནི་རྒྱལ་པོའི་ཧེ་རོ་དཱེ་ཡི་ཡུལ་ལ་བརྟེན་ནས་འཚོ་ཆས་འཐོབ་པར་བྱེད་དགོས་པས། ཡུལ་མི་རྣམས་ཀྱིས་སྐུ་ཚབ་ཚོགས་པ་ཞིག་བཏང་སྟེ་རྒྱལ་པོའི་གཟིམ་དཔོན་པཱ་ལ་སི་ཐོ་བློ་འགུགས་ནས་བར་འདུམ་གཏོང་བའི་རེ་བ་ཞུས།
ACT 12:21 གཏན་འཁེལ་བའི་ཉིན་མོ་ཞིག་ལ་ཧེ་རོ་དཱེ་ཡིས་རྒྱལ་པོའི་གོས་གྱོན་ནས་ཁྲིམས་དཔོན་གྱི་ཁྲིར་བསྡད་པ་དང༌། མི་རྣམས་ལ་གཏམ་སྨྲ་བར་བརྩམས།
ACT 12:22 མི་རྣམས་ཀྱིས་“འདི་ནི་མི་ཞིག་གི་སྐད་མ་ཡིན་ཏེ། ལྷ་ཡི་གསུང་སྐད་ཡིན་”ཞེས་སྐད་ཆེན་པོས་ཡང་ཡང་བཤད།
ACT 12:23 ཧེ་རོ་དཱེ་ཡིས་བསྟོད་པ་འདི་དཀོན་མཆོག་ལ་མ་ཕུལ་བས། འཕྲལ་དུ་གཙོ་བོའི་ཕོ་ཉ་ཞིག་གིས་ཁོ་ལ་ནད་ཀྱིས་བཏབ་ནས་རྒྱུ་སྲིན་གྱིས་བཟས་ནས་ཤིའོ། །
ACT 12:24 ཡང་གཙོ་བོ་དཀོན་མཆོག་གི་བཀའ་ཁྱབ་པས། དད་ལྡན་རྣམས་ཀྱི་གྲངས་མང་དུ་འཕེལ།
ACT 12:25 དེ་ནས་པར་ན་པཱ་དང་ཤ་ཨུལ་གཉིས་ཀྱིས་ཡེ་རུ་ཤ་ལེམ་ལ་ལས་ཀ་སྒྲུབས་ཚར་བས། ཡོ་ཧ་ནན་ཏེ་མར་ཀུ་ཡང་བྱ་བ་འཁྲིད་དེ་ཕྱིར་ལོག་ཕེབས་སོ། །
ACT 13:1 ཨན་ཏི་ཡོག་ཡཱ་གྲོང་ཁྱེར་གྱི་ཆོས་ཚོགས་ལ་པར་ན་པཱ་དང༌། ནེ་གེར་ཞེས་བྱ་བའི་སི་མེ་ཡོན་དང༌། ད་དུང་སེ་རེ་ནཱ་གྲོང་ཁྱེར་ནས་ཡིན་པའི་ལུ་ཀི་ཡཱུ་དང༌། ས་གནས་དཔོན་པོ་ཧེ་རོ་དཱེ་ཡི་ཕོ་བྲང་ལ་འཚར་ལོངས་བྱུང་བའི་མཱ་ནཱ་ཧེན་དང༌། ཤ་ཨུལ་ཞེས་པའི་ལུང་སྟོན་པ་དང་ཆོས་སྟོན་མཁན་ཡོད།
ACT 13:2 ཁོང་ཚོས་གཙོ་བོ་ལ་བསྙེན་བཀུར་བྱེད་ཅིང་སྨྱུང་གནས་སྲུང་བའི་དུས་སུ་དམ་པའི་ཐུགས་ཉིད་ཀྱིས་ཁོ་ཚོར་“ངའི་ཆེད་དུ་ཁྱོད་རྣམས་ཀྱིས་པར་ན་པཱ་དང་ཤ་ཨུལ་གཉིས་ང་ཡིས་འདེམས་པའི་ལས་སྒྲུབ་པའི་ཕྱིར་སྐོས་ཤིག་”ཅེས་གསུངས།
ACT 13:3 དེ་ནས་ཁོ་ཚོས་སྨྱུང་གནས་བསྲུངས་ཏེ་སྨོན་ལམ་བཏབ་པ་དང༌། ཁོང་ཚོ་གཉིས་ཀྱི་ལུས་ལ་ལག་པ་བཞག་ནས་བཏང་ངོ༌། །
ACT 13:4 ཁོང་གཉིས་དམ་པའི་ཐུགས་ཉིད་ཀྱིས་མངགས་ཏེ་གྲུ་ཁའི་གྲོང་ཁྱེར་སེ་ལུ་ཀི་ཡཱ་ལ་ཕེབས་པ་དང༌། གྲུ་གཟིངས་ལ་བསྡད་ནས་ཀིབ་རུ་གླིང་ཕྲན་དུ་སླེབས།
ACT 13:5 སཱ་ལ་མཱི་གྲོང་ཁྱེར་ལ་སླེབས་ནས་ཡ་ཧུ་དཱ་པའི་འདུ་ཁང་རྣམས་ལ་དཀོན་མཆོག་གི་བཀའ་བསྒྲགས། ཡང་ཡོ་ཧ་ནན་གྱིས་ཁོང་ཚོ་ལ་ལས་གྲོགས་བྱེད་བཞིན་ཡོད།
ACT 13:6 གླིང་ཕྲན་ཡོངས་སུ་བརྒྱུད་ནས་པཱ་ཕོ་གྲོང་ཁྱེར་ཙམ་ལ་ཕེབས་སྐབས། ཁོང་རྣམས་ལ་པཱར་ཡེ་ཤུ་ཞེས་ཟེར་བའི་སྔགས་པ་སྟེ་ཡ་ཧུ་དཱ་པའི་ལུང་སྟོན་པ་རྫུན་མ་ཞིག་དང་ཕྲད།
ACT 13:7 མི་འདི་ནི་སྤྱི་ཁྱབ་སྟེ་བློ་གྲོས་ཅན་སེར་གིའུ་པའུ་ལུ་དང་མཉམ་དུ་འགྲོགས་པ་ཞིག་ཡིན། དཀོན་མཆོག་གི་བཀའ་ཐོས་པར་སྤྱི་ཁྱབ་དེས་པར་ན་པཱ་དང་ཤ་ཨུལ་གཉིས་བོས་ན་ཡང༌།
ACT 13:8 སྔགས་པ་དེས་(གྷི་རིག་སྐད་དུ་ཨེ་ལི་མཱ་ཡང་ཟེར་) ཁོང་ཚོར་ངོ་རྒོལ་བྱས་པ་དང༌། སྤྱི་ཁྱབ་དད་པ་ལས་ཟློག་པའི་ཐབས་བཙལ།
ACT 13:9 འོན་ཀྱང་ཤ་ཨུལ་(པའུ་ལུ་ཡང་ཟེར་) དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་གྱུར་ཏེ་ཁོ་ལ་ནན་གྱིས་བལྟས་ཏེ།
ACT 13:10 ཁོ་ལ་“ཁྱོད་ནི་བདུད་ཀྱི་བུ་ཡིན་ཏེ་དྲང་བ་ཐམས་ཅད་ཀྱི་དགྲ་བོ་ཡིན། གཡོ་སྒྱུ་དང་ངན་སེམས་ཀུན་གྱིས་གང་སྟེ་ཁྱོད་ཀྱིས་གཙོ་བོ་ཡེ་ཤུའི་ལམ་དྲང་པོ་འཁྱོག་པར་བྱེད་པ་མི་སྤོང་ངམ།
ACT 13:11 ད་ལྟོས་ཤིག དཀོན་མཆོག་གི་ནུས་མཐུ་ཁྱོད་ལ་བཏབ་ནས་ལོང་བར་འགྱུར་བས་རེ་ཞིག་ཁྱོད་ཀྱིས་ཉི་མའི་འོད་མཐོང་མི་ཐུབ་”ཅེས་གསུངས་པ་དང༌། འཕྲལ་དུ་ཁོའི་མིག་ལ་སྨུག་པ་དང་མུན་པ་ཡིས་འཐིབས་པས་ཁོས་ལག་པ་ནས་འཇུས་ཏེ་འཁྲིད་མཁན་བཙལ།
ACT 13:12 སྤྱི་ཁྱབ་ཀྱིས་གང་བྱུང་བ་མཐོང་ནས་དད་པ་སྐྱེས། གཙོ་བོ་ཡེ་ཤུའི་བསྟན་པ་ཐོས་ནས་ངོ་མཚར་བར་གྱུར་རོ། །
ACT 13:13 དེ་ནས་པའུ་ལུ་དང་ཁོང་གི་རོགས་པ་རྣམས་གྲུ་གཟིངས་ལ་བསྡད་དེ་པཱ་ཕོ་ནས་ཕམ་ཕིལ་ཡཱ་ཡུལ་གྱི་གྲོང་ཁྱེར་པེར་གཱ་ལ་ཕེབས་པ་དང༌། དེར་སླེབས་ནས་ཡོ་ཧ་ནན་ཁོང་རྣམས་དང་ཁ་བྲལ་ཏེ་ཡེ་རུ་ཤ་ལེམ་ལ་ཕྱིར་ལོག
ACT 13:14 ཁོང་ཚོ་པེར་གཱ་ནས་ཕར་སོང་སྟེ་པི་སི་དི་ཡཱ་ཡུལ་གྱི་གྲོང་ཁྱེར་ཨན་ཏི་ཡོག་ཡཱ་ལ་ཕེབས་པ་དང༌། དེར་ངལ་གསོའི་ཉིན་མོར་ཁོང་རྣམས་འདུ་ཁང་ལ་ཕེབས་ནས་བཞུགས།
ACT 13:15 བཀའ་ཁྲིམས་དང་ལུང་སྟོན་པའི་མདོ་ལས་བཀླགས་རྗེས་འདུ་ཁང་གི་དཔོན་པོས་“སྤུན་ཟླ་རྣམས། གལ་ཏེ་མི་རྣམས་ཀྱི་ཆེད་དུ་ཁྱེད་ལ་སྐུལ་བའི་གཏམ་ཞིག་ཡོད་ན་གསུངས་ཤིག་”ཅེས་པའི་ལན་ཁོང་རྣམས་ལ་བསྐུར།
ACT 13:16 པའུ་ལུ་ཡར་ལངས་ཏེ་ལག་བརྡ་བྱས་ནས་འདི་ལྟར་གསུངས་“ཡི་སི་ར་ཨེལ་པ་དང་དཀོན་མཆོག་ལ་བསྙེན་བཀུར་བྱེད་མཁན་རྣམས། ང་ལ་ཉོན་དང༌།
ACT 13:17 ཡི་སི་ར་ཨེལ་མི་རིགས་འདིའི་དཀོན་མཆོག་གིས་ང་ཚོའི་མེས་པོ་བདམས་ཤིང༌། ཨེ་ཇེབ་ཡུལ་ལ་སྡོད་པའི་དུས་སུ་ཁོ་རྣམས་ཤིན་ཏུ་མང་པོར་འཕེལ་བར་མཛད། ནུས་མཐུ་དང་ལྡན་པའི་ཕྱག་གིས་ཁོ་ཚོ་ཡུལ་དེ་ནས་ཕྱི་རོལ་ཏུ་འཁྲིད།
ACT 13:18 ལོ་བཞི་བཅུ་ཙམ་གྱི་བར་དུ་འབྲོག་སྟོང་ལ་ཁོང་གིས་ཁོ་ཚོའི་སྤྱོད་པ་བཟོད་པར་མཛད།
ACT 13:19 ཀ་ནཱན་ཡུལ་གྱི་མི་རིགས་བདུན་མེད་པར་མཛད་ནས་དཀོན་མཆོག་གིས་མེས་པོ་རྣམས་ལ་ཁོ་ཚོའི་ཡུལ་བགོས་སྐལ་དུ་གནང༌།
ACT 13:20 དོན་དེ་རྣམས་ལོ་བཞི་བརྒྱ་ལྔ་བཅུ་ཙམ་འགོར་བ་ཡིན། དེའི་རྗེས་སུ་ལུང་སྟོན་པ་ཤ་མུ་ཨེལ་གྱི་བར་དུ་ཁོང་གིས་ཁོ་ཚོར་ཁྲིམས་དཔོན་གྱི་ལམ་ལུགས་བཙུགས།
ACT 13:21 དེ་ནས་ཁོ་ཚོས་རྒྱལ་པོ་སྐོ་བའི་ཞུ་བ་ཞུས་པས་དཀོན་མཆོག་གིས་ཡི་སི་ར་ཨེལ་གྱི་ཚོ་ཁག་པེན་ཡ་མཱིན་གྱི་ཚོ་ཁག་ནས་ཀི་སི་ཡི་བུ་ཤ་ཨུལ་རྒྱལ་པོར་བསྐོས་པར་མཛད། ཁོས་ལོ་བཞི་བཅུའི་རིང་རྒྱལ་པོ་བྱས།
ACT 13:22 དེ་ནས་དཀོན་མཆོག་གིས་ཁོ་གོ་གནས་ལས་འབེབས་པར་མཛད་པ་དང༌། དཱ་བིད་ཁོ་ཚོའི་རྒྱལ་པོར་བསྐོས། དཀོན་མཆོག་གིས་དཱ་བིད་ཀྱི་སྐོར་དཔང་པོ་མཛད་དེ་ཡེ་སེ་ཞེས་བྱ་བའི་བུ་དཱ་བིད་ནི་ངའི་སེམས་དང་མཐུན་པ་ཞིག་ཡིན་ཞིང༌། ཁོས་ངའི་བསམ་པ་ཐམས་ཅད་སྒྲུབ་པར་འགྱུར་རོ་ཞེས་གསུངས།
ACT 13:23 དཀོན་མཆོག་གིས་ཞལ་ཆད་གནང་བ་ལྟར། དཱ་བིད་ཀྱི་རྒྱུད་པ་རྣམས་ལས་ཁོང་གིས་ཡི་སི་ར་ཨེལ་ལ་སྐྱབས་མགོན་ཡེ་ཤུ་གནང་བ་ཡིན།
ACT 13:24 ཁོང་མ་འབྱོན་པའི་སྔོན་ལ་ཁྲུས་གསོལ་མཁན་ཡོ་ཧ་ནན་གྱིས་ཡི་སི་ར་ཨེལ་གྱི་མི་ཐམས་ཅད་ལ་སྤྱོད་པ་ངན་པ་སྤངས་ནས་སེམས་བསྒྱུར་བའི་རྟགས་སུ་ཁྲུས་གསོལ་ལེན་དགོས་པའི་འཕྲིན་བསྒྲགས་ཤིང༌།
ACT 13:25 ཡོ་ཧ་ནན་གྱིས་ལས་ཚར་བའི་སྐབས་ལ་ཁོང་གིས་ཁྱེད་ཀྱིས་ང་རང་སུ་རེད་སྙམ། ང་ཁོང་མ་ཡིན། ལྟོས་ཤིག ངའི་རྗེས་ལ་ཕེབས་མཁན་ནི་ཁོང་གི་ལྷམ་སྒྲོག་ཀྱང་འགྲོལ་བར་མི་འོས་ཞེས་གསུངས།
ACT 13:26 ཨབ་ར་ཧམ་གྱི་རྒྱུད་པ་སྟེ་ངའི་སྤུན་ཡིན་ཞིང༌། ཁྱེད་ཚོའི་ནང་ནས་དཀོན་མཆོག་ལ་བསྙེན་བཀུར་བྱེད་མཁན་རྣམས། ཐར་པ་འདིའི་འཕྲིན་ངེད་རྣམས་ལ་མངགས་ཡོད།
ACT 13:27 ཡེ་རུ་ཤ་ལེམ་པ་དང་ཁོ་ཚོའི་དཔོན་པོ་རྣམས་ཀྱིས་གཙོ་བོ་ཡེ་ཤུ་སྐྱབས་མགོན་ཡིན་པ་ངོ་མི་ཤེས་པ་དང༌། ངལ་གསོ་བའི་ཉིན་རེ་རེར་ལུང་སྟོན་པའི་བཀའ་གང་ཀློག་པའང་མི་ཤེས་པས། ཁོང་ལ་ཁྲིམས་གཅོད་གཏོང་བའི་སྒོ་ནས་བཀའ་དེ་རྣམས་བསྒྲུབས།
ACT 13:28 སྲོག་ཁྲིམས་གཏོང་དགོས་པའི་རྒྱུ་རྐྱེན་ཅི་ཡང་མ་རྙེད་ཀྱང༌། ཁོ་ཚོས་པི་ལ་ཏུ་ལ་ཁོང་སྲོག་གཅོད་གཏོང་བའི་ཞུ་བ་ཞུས།
ACT 13:29 ཁོ་ཚོས་ཁོང་གི་སྐོར་གང་བྲིས་ཡོད་པ་ཐམས་ཅད་བསྒྲུབས་ནས། མི་རྣམས་ཀྱིས་ཁོང་གི་སྐུ་ཕུང་རྒྱང་ཤིང་སྟེང་ནས་མར་ཕབ་སྟེ་དུར་ཁང་ལ་བཅུག
ACT 13:30 འོན་ཀྱང་དཀོན་མཆོག་གིས་ཁོང་འཆི་བ་ནས་སླར་གསོན་པར་མཛད།
ACT 13:31 སྔར་ཁོང་དང་མཉམ་དུ་ག་ལིལ་ཡུལ་ནས་ཡེ་རུ་ཤ་ལེམ་ལ་ཡོང་བ་རྣམས་ཀྱིས་ཉིན་མང་པོའི་རིང་ཁོང་མཐོང་ཞིང༌། ད་ལྟ་ཁོ་རྣམས་ནི་མི་རྣམས་ལ་ཁོང་གི་དཔང་པོ་བྱེད་མཁན་ཡིན།
ACT 13:32 ང་ཚོས་ཁྱེད་རྣམས་ལ་འཕྲིན་བཟང་སྒྲོག་སྟེ། དཀོན་མཆོག་གིས་ང་ཚོའི་མེས་པོ་རྣམས་ལ་གང་ཞལ་གྱིས་བཞེས་པ་དེ།
ACT 13:33 གཙོ་བོ་ཡེ་ཤུ་ཡར་སློང་བར་མཛད་པའི་སྒོ་ནས་ཁོ་ཚོའི་རྒྱུད་པ་སྟེ་ངེད་རྣམས་ཀྱི་ཕྱིར་སྒྲུབ་པར་མཛད། གསུང་མགུར་གཉིས་པ་ལ་འཁོད་པ་བཞིན། ཁྱེད་ནི་ང་ཡི་བུ་ཉིད་ཡིན་པས་ན། ། དེ་རིང་ང་ནི་ཁྱེད་ཀྱི་ཕ་རུ་གྱུར། །
ACT 13:34 ཡང་དཀོན་མཆོག་གིས་ཁོང་འཆི་བ་ནས་སླར་གསོན་པར་མཛད་དེ་ཡང་བསྐྱར་འགྲོངས་མི་སྲིད་པའི་སྐོར་འདི་ལྟར་གསུངས། ང་ཡིས་དཱ་བིད་ཉིད་ལ་སྤྲད་པ་བཞིན། ། ཡང་དག་བདེན་པའི་བྱིན་རླབས་ཁྱེད་ལ་སྦྱིན། །
ACT 13:35 དེའི་ཕྱིར་ཁོང་གིས་གསུང་མགུར་གྱི་མདོ་གཞན་པ་ལས། ཁྱེད་ཀྱིས་རང་གི་སྐྱེས་བུ་དམ་པ་ཉིད། ། དུར་དུ་རུལ་བར་འཇུག་པ་ག་ལ་སྲིད། ། ཅེས་གསུངས།
ACT 13:36 རྒྱལ་པོ་དཱ་བིད་ནི་རང་གི་མི་རབས་ཀྱི་དུས་སུ་དཀོན་མཆོག་གི་དགོངས་པ་བསྒྲུབས་པའི་རྗེས་སུ་སྐུ་ཚེ་ལས་འདས་ཤིང༌། ཁོའི་མེས་པོའི་དུར་ཁང་གི་ཁྲོད་དུ་བཞག་ནས་སྐུ་སྤུར་རུལ་བར་གྱུར།
ACT 13:37 འོན་ཀྱང་དཀོན་མཆོག་གིས་བསླངས་པ་ནི་རུལ་བར་མ་གྱུར།
ACT 13:38 ངའི་སྤུན་ཟླ་རྣམས། དེའི་ཕྱིར་ཁོང་གི་ཐོག་ནས་སྡིག་ཉེས་སེལ་བ་ཁྱེད་རྣམས་ལ་སྒྲོག་པ་དེ་ཤེས་པར་གྱིས་ཤིག
ACT 13:39 ཁོང་ལ་དད་པ་བྱེད་མཁན་ཐམས་ཅད་ནི་མོ་ཤེའི་བཀའ་ཁྲིམས་ཀྱི་སྒོ་ནས་སེལ་མི་སྲིད་པའི་སྡིག་ཉེས་ཐམས་ཅད་ལས་ཐར་བར་འགྱུར་རོ།
ACT 13:40 ལུང་སྟོན་པས་གང་གསུངས་པ་ཁྱེད་རྣམས་ལ་མི་ཕོག་པའི་ཕྱིར་དོགས་ཟོན་གྱིས་ཤིག
ACT 13:41 ང་ཡིས་ཁྱོད་ཀྱི་དུས་སུ་ལས་ཤིག་བྱེད། ། གཞན་གྱིས་དེ་དག་ཁྱོད་ལ་འཆད་གྱུར་ཀྱང༌། ། ཁྱོད་ཀྱིས་དེ་ལ་ནམ་ཡང་ཡིད་མི་ཆེས། ། ཁྱོད་ཚོ་འཕྱ་བར་བྱེད་མཁན་ལྟོས་ཤིག་ཨང༌། ། ངོ་མཚར་འགྱུར་ཞིང་འཇིག་པར་ཡང་འགྱུར་འོང༌། །” ཞེས་གསུངས།
ACT 13:42 པའུ་ལུ་དང་པར་ན་པཱ་འདུ་ཁང་ནས་ཕྱིར་ཐོན་སྐབས། མི་རྣམས་ཀྱིས་ཁོང་གཉིས་ལ་ངལ་གསོ་བའི་ཉིན་རྗེས་མར་དོན་དེའི་སྐོར་ཡང་བསྐྱར་གསུང་དགོས་པར་བསྐུལ།
ACT 13:43 འདུ་ཁང་གི་ཚོགས་འདུ་གྲོལ་བའི་རྗེས་སུ་ཡ་ཧུ་དཱ་པ་དང༌། ཡ་ཧུ་དཱ་པའི་ཆོས་ལུགས་ལ་ཞུགས་པའི་ཡ་ཧུ་དཱ་པ་མིན་པ་སྟེ་དཀོན་མཆོག་ལ་བསྙེན་བཀུར་བྱེད་མཁན་རྣམས་ལས་མང་པོ་ཞིག་གིས་པའུ་ལུ་དང་པར་ན་པཱ་ཡི་རྗེས་སུ་འབྲངས། ཁོང་གཉིས་ཀྱིས་ཁོ་ཚོར་དཀོན་མཆོག་གི་ཐུགས་རྗེ་ལ་གནས་པར་བསྐུལ།
ACT 13:44 ངལ་གསོ་བའི་ཉིན་རྗེས་མར་གྲོང་ཁྱེར་གྱི་མི་མང་ཆེ་བ་གཙོ་བོ་དཀོན་མཆོག་གི་བཀའ་ཉན་པར་འདུས།
ACT 13:45 འོན་ཀྱང་ཡ་ཧུ་དཱ་པ་རྣམས་ཀྱིས་མི་ཚོགས་མཐོང་བས་ཕྲག་དོག་སྐྱེས་ཤིང༌། འཕྱ་དམོད་བྱས་ཏེ་པའུ་ལུས་གསུངས་པ་ལ་རྒོལ་བར་བྱས།
ACT 13:46 པའུ་ལུ་དང་པར་ན་པཱ་གཉིས་ཀྱིས་བློ་སྟོབས་ཆེན་པོས་“ང་ཚོས་དཀོན་མཆོག་གི་བཀའ་ཁྱེད་རྣམས་ལ་དང་པོར་བཤད་འོས་པ་ཡིན། འོན་ཀྱང་ཁྱེད་ཀྱིས་དཔག་ཏུ་མེད་པའི་ཚེ་འཐོབ་པ་མི་འོས་པ་ཡིན་པར་བསམས་ཏེ་དང་ལེན་མི་བྱེད་པས། ལྟོས་ཤིག ང་ཚོས་ད་ལྟ་ཡ་ཧུ་དཱ་པ་མིན་པ་རྣམས་ལ་ཆོས་བཤད་རྒྱུ་ཡིན།
ACT 13:47 གང་ཡིན་ཞེ་ན། གཙོ་བོས་ང་ཚོར་འདི་ལྟར་བཀའ་གནང་སྟེ། ང་ཡིས་ཁྱོད་ཉིད་ཕྱི་པ་རྣམས་ཀྱི་ཆེད། ། འཕྲོ་བར་བྱེད་པའི་འོད་དུ་བསྐོས་པ་ཡིན། ། དེ་ནི་ཁྱོད་ཀྱིས་ས་མཐའི་བར་དུ་ནི། ། ཆོས་དག་བསྒྲགས་ཅིང་ཐར་པ་འཐོབ་པའི་ཕྱིར། །” ཞེས་གསུངས།
ACT 13:48 དེ་ཐོས་ནས་ཡ་ཧུ་དཱ་པ་མིན་པ་རྣམས་དགའ་བར་གྱུར་ཞིང་དཀོན་མཆོག་གི་བཀའ་ལ་བསྟོད་པ་ཕུལ། དཀོན་མཆོག་གིས་སྔར་ནས་དཔག་ཏུ་མེད་པའི་ཚེ་འཐོབ་པར་བསྐོས་པའི་མི་ཐམས་ཅད་དད་པར་གྱུར།
ACT 13:49 དེ་ལྟར་དཀོན་མཆོག་གི་བཀའ་ཡུལ་དེའི་ས་ཕྱོགས་གང་སར་ཁྱབ།
ACT 13:50 འོན་ཀྱང་ཡ་ཧུ་དཱ་པ་རྣམས་ཀྱིས་ཆོས་ལ་དགའ་བའི་རིགས་མཐོ་བའི་བུད་མེད་དང་གྲོང་ཁྱེར་གྱི་འགོ་ཁྲིད་བྱེད་པའི་སྐྱེས་པ་རྣམས་ལ་ངན་བསྐུལ་བྱས་ནས། པའུ་ལུ་དང་པར་ན་པཱ་གཉིས་ལ་གནོད་བསྐྱལ་ཏེ་ཁོ་ཚོའི་ཡུལ་ནས་ཕར་བསྐྲད།
ACT 13:51 ཁོ་རྣམས་ལ་དོན་དེར་འགན་ཁུར་དགོས་པར་སྟོན་པའི་ཕྱིར་ཁོང་རྣམས་ཀྱིས་རྐང་པའི་སྟེང་གི་ས་རྡུལ་ཁོ་ཚོའི་ཕྱོགས་སུ་སྤྲུགས་ནས་ཨི་ཀོན་ཡཱུ་ཞེས་པའི་གྲོང་ཁྱེར་ལ་ཕེབས།
ACT 13:52 ཡང་ཉེ་གནས་རྣམས་ནི་དགའ་སྤྲོ་དང༌། དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་འགྱུར་རོ། །
ACT 14:1 ཨི་ཀོན་ཡཱུ་གྲོང་ཁྱེར་ལ་པའུ་ལུ་དང་པར་ན་པཱ་གཉིས་ཡ་ཧུ་དཱ་པའི་འདུ་ཁང་ལ་ཕེབས་པ་དང༌། ཁོང་ཚོའི་ཆོས་སྟོན་སྟངས་ཀྱི་རྐྱེན་གྱིས་ཡ་ཧུ་དཱ་དང་གྷི་རིག་མི་མང་པོ་དད་ལྡན་པར་གྱུར།
ACT 14:2 འོན་ཀྱང་དད་པ་མི་བྱེད་པའི་ཡ་ཧུ་དཱ་པ་རྣམས་ཀྱིས་ཡ་ཧུ་དཱ་པ་མིན་པ་རྣམས་ཀྱི་སེམས་དཀྲུགས་པས་ཁོ་རྣམས་ནི་སྤུན་ཟླ་རྣམས་ལ་ཁོང་ཁྲོ་སྐྱེས།
ACT 14:3 དེའི་ཕྱིར་པའུ་ལུ་དང་པར་ན་པཱ་གྲོང་ཁྱེར་དེ་ལ་ཡུན་རིང་པོར་བཞུགས་ཏེ་གཙོ་བོ་ལ་བརྟེན་ནས་བློ་སྟོབས་ཆེན་པོས་ཆོས་བསྟན། ཁོང་ཚོའི་ཕྱག་གིས་རྟགས་དང་ངོ་མཚར་བའི་དོན་སྒྲུབ་པར་གནང་བའི་སྒོ་ནས་གཙོ་བོས་ཁོང་གི་ཐུགས་རྗེ་དང་ལྡན་པའི་བཀའ་ལ་བདེན་དཔང་མཛད།
ACT 14:4 གྲོང་ཁྱེར་གྱི་འབངས་མིའི་ནང་ལྟ་བ་མི་མཐུན་པ་བྱུང༌། ལ་ལས་ཡ་ཧུ་དཱ་པའི་ཕྱོགས་བྱས་ཤིང༌། ལ་ལས་སྐུ་ཚབ་རྣམས་ཀྱི་ཕྱོགས་བྱས།
ACT 14:5 ཡ་ཧུ་དཱ་པ་དང་ཡ་ཧུ་དཱ་པ་མིན་པ་རྣམས་ཀྱིས་དཔོན་རིགས་དང་མཉམ་དུ་ཁོང་ཚོར་དམའ་འབེབས་བྱེད་ཅིང་རྡོ་རུབ་གཏོང་བའི་གོ་སྐབས་བཙལ།
ACT 14:6 སྐུ་ཚབ་རྣམས་ཀྱིས་དེའི་སྐོར་ཤེས་ཏེ་ལི་ཀ་ཨོན་ཡཱ་ཡུལ་གྱི་ལིས་ཏྲཱ་དང་ཌེར་པེ་གྲོང་ཁྱེར་དེ་བཞིན་དེའི་ཉེ་འཁོར་གྱི་ཡུལ་ལ་བྲོས་ནས།
ACT 14:7 དེར་ཁོང་ཚོས་མུ་མཐུད་འཕྲིན་བཟང་བསྒྲགས་སོ། །
ACT 14:8 ལིས་ཏྲཱ་གྲོང་ཁྱེར་ལ་སྐྱེས་དུས་ནས་ཞ་བོ་ཡིན་ཞིང་རྐང་པ་འཁུམས་པའི་མི་གོམ་པ་སྤོ་མ་མྱོང་བ་ཞིག་བསྡད་ཡོད།
ACT 14:9 མི་དེས་པའུ་ལུའི་གསུང་ལ་ཉན། པའུ་ལུ་ཡིས་ཁོ་ལ་ནན་གྱིས་བལྟས་ཏེ་ནད་ལས་ཐར་བའི་ཆེད་དུ་དད་པ་ཡོད་པར་མཐོང་བས།
ACT 14:10 སྐད་ཆེན་པོས་ཁོ་ལ་“རྐང་པ་སར་བཙུགས་ཏེ་ཡར་ལོངས་”ཞེས་གསུངས་པས་མི་དེ་ཡར་མཆོངས་ཏེ་འགྲོ་ཐུབ་པར་གྱུར།
ACT 14:11 པའུ་ལུས་གང་བྱས་པ་མཐོང་ནས་མི་ཚོགས་ཀྱིས་ལི་ཀ་ཨོན་ཡཱ་སྐད་སྤྱད་ནས་སྐད་ཆེན་པོས་“ལྷ་རྣམས་མི་རུ་སྤྲུལ་ནས་ང་ཚོའི་ཁྲོད་དུ་བབས་”ཞེས་སྨྲས།
ACT 14:12 མི་དེ་ཚོས་པར་ན་པཱ་ཡི་མིང་ལ་ཟུ་སཱི་དང༌། པའུ་ལུ་གསུང་མཁན་གཙོ་བོ་ཡིན་པས་ཁོང་གི་མིང་ལ་ཧེར་མཱེ་ཞེས་བཏགས།
ACT 14:13 ཟུ་སཱི་ཡི་ལྷ་ཁང་གྲོང་ཁྱེར་གྱི་ཕྱི་རོལ་ཏུ་ཡོད་ཅིང༌། དེའི་མཆོད་དཔོན་གྱིས་གླང་འཁྲིད་དེ་མེ་ཏོག་གི་ཕྲེང་བ་ཁྱེར་ནས་སྒོ་ཁར་སླེབས་པ་དང༌། མི་ཚོགས་དང་བཅས་ཀྱིས་དམར་མཆོད་བྱེད་པར་འདོད།
ACT 14:14 སྐུ་ཚབ་པར་ན་པཱ་དང་པའུ་ལུས་དེའི་སྐོར་ཤེས་ནས་ཕྱི་གོས་དབྲལ་བ་དང༌། མི་ཚོགས་ཀྱི་ནང་དུ་བརྒྱུགས་ཏེ་སྐད་ཆེན་པོས་
ACT 14:15 “མི་རྣམས། ཁྱེད་ཚོས་ཅིའི་ཕྱིར་འདི་ལྟར་བྱེད། ང་ཚོ་གཉིས་ལ་ཁྱེད་ཚོ་དང་འདྲ་བར་མིའི་རང་བཞིན་ཡོད། ཁྱེད་ཚོས་དོན་མེད་པའི་བྱ་བ་འདི་རྣམས་སྤངས་ནས། ནམ་མཁའ་དང༌། ས་གཞི། རྒྱ་མཚོ། དེར་ཡོད་པ་ཐམས་ཅད་བཀོད་པ་དང་གཏན་དུ་གནས་པའི་དཀོན་མཆོག་ལ་དད་པ་བྱེད་པའི་ཆེད་དུ་ང་ཚོས་ཁྱེད་རྣམས་ལ་འཕྲིན་བཟང་སྒྲོག
ACT 14:16 འདས་པའི་དུས་སུ་ཁོང་གིས་མི་རིགས་ཐམས་ཅད་རང་གི་འདོད་པ་ལྟར་བྱེད་དུ་བཅུག་ཀྱང༌།
ACT 14:17 ཁྱེད་རྣམས་ལ་ཕྱག་ལས་བཟང་པོ་མཛད་པའི་སྒོ་ནས་ཁོང་ནི་བཟང་པོ་ཡིན་པར་བདེན་དཔང་མཛད། དཔེར་ན་རྒྱུན་དུ་སྦྱིན་པ་གནང་སྟེ་ཁོང་གིས་ནམ་མཁའ་ལས་ཆར་པ་དང༌། ས་ལས་ལོ་ཏོག་དེ་བཞིན་ཁྱེད་རྣམས་ལ་ཟས་དང་སེམས་སུ་དགའ་སྤྲོ་ཁེངས་པར་གནང་ངོ་”ཞེས་གསུངས།
ACT 14:18 དེ་ལྟར་གསུངས་ཀྱང༌། མི་ཚོགས་ཀྱིས་ཁོང་ཚོར་དམར་མཆོད་བྱེད་པ་འགོག་རྒྱུར་དཀའ་ལས་ཁག་པོ་བྱུང༌།
ACT 14:19 ཨན་ཏི་ཡོག་ཡཱ་དང་ཨི་ཀོན་ཡཱུ་གྲོང་ཁྱེར་ནས་ཡོང་བའི་ཡ་ཧུ་དཱ་པ་ཁ་ཅིག་གིས་མི་ཚོགས་ཁོ་ཚོའི་ཕྱོགས་ལ་བློ་འགུགས་བྱས་པས། ཁོ་ཚོས་པའུ་ལུ་ལ་རྡོ་རུབ་བཏང་ནས་ཁོང་ཤི་ཟིན་པར་བསམས་ཏེ་གྲོང་ཁྱེར་ནས་ཕྱི་རོལ་ཏུ་དྲུད།
ACT 14:20 ཉེ་གནས་རྣམས་ཁོང་གི་མཐའ་བསྐོར་དུ་འཛོམས་དུས་ཁོང་ཡར་ལངས་ནས་གྲོང་ཁྱེར་ལ་ཕྱིར་ལོག དེའི་སང་ཉིན་པར་ན་པཱ་དང་མཉམ་དུ་ཌེར་པེ་ལ་ཕེབས་སོ། །
ACT 14:21 དེར་ཁོང་རྣམས་ཀྱིས་འཕྲིན་བཟང་བསྒྲགས་པས་མི་མང་པོ་ཞིག་གཙོ་བོ་ཡེ་ཤུའི་ཉེ་གནས་སུ་གྱུར། དེ་ནས་ཁོང་གཉིས་ལིས་ཏྲཱ་དང༌། ཨི་ཀོན་ཡཱུ། ཨན་ཏི་ཡོག་ཡཱ་བཅས་སུ་ཕྱིར་ལོག
ACT 14:22 དེར་ཁོང་གཉིས་ཀྱིས་ཉེ་གནས་ཀྱི་སེམས་བརྟན་པོ་བྱས་ཏེ་དད་པ་མུ་མཐུད་ནས་བྱེད་པར་བསྐུལ་ནས་“ངེད་རྣམས་སྡུག་བསྔལ་མང་པོ་མྱོང་བའི་སྒོ་ནས་དཀོན་མཆོག་གི་རྒྱལ་སྲིད་དུ་འཇུག་པར་དགོས་”ཞེས་གསུངས།
ACT 14:23 ཁོང་གཉིས་ཀྱིས་ཆོས་ཚོགས་རེ་རེར་འགན་འཁུར་བ་རེ་རེ་བསྐོས་ཤིང༌། སྨྱུང་གནས་བསྲུངས་པ་དང་སྨོན་ལམ་བཏབ་ནས་ཁོ་ཚོས་དད་པ་བྱས་པའི་གཙོ་བོར་བཅོལ།
ACT 14:24 ཁོང་གཉིས་པི་སི་དི་ཡཱ་ཡུལ་བརྒྱུད་ནས་ཕམ་ཕིལ་ཡཱ་ཡུལ་ལ་སླེབས།
ACT 14:25 དཀོན་མཆོག་གི་བཀའ་པེར་གཱ་གྲོང་ཁྱེར་དུ་བསྒྲགས་ནས་ཨ་ཐལ་ཡཱ་ཞེས་པའི་གྲུ་ཁར་ཕེབས་ཤིང༌།
ACT 14:26 གྲུ་གཟིངས་ལ་བསྡད་ནས་སི་རི་ཡཱ་ཡུལ་གྱི་ཨན་ཏི་ཡོག་ཡཱ་གྲོང་ཁྱེར་ལ་ཕྱིར་ལོག་ཕེབས། ས་ཆ་འདི་ནི་སྔར་ཆོས་ཚོགས་ཀྱིས་ཁོང་གཉིས་དཀོན་མཆོག་གི་ཐུགས་རྗེ་ལ་བཅོལ་བའི་གནས་དེ་ཡིན་ཞིང༌། དེ་ནི་ད་ལྟ་བསྒྲུབས་ཟིན་པའི་ལས་འདིའི་ཆེད་དུའོ།
ACT 14:27 དེར་སླེབས་ནས་ཁོང་ཚོས་ཆོས་ཚོགས་བསྡུས་ཤིང༌། དཀོན་མཆོག་གིས་ཁོང་ཚོ་བརྒྱུད་ནས་གང་མཛད་པ་དང༌། ཡ་ཧུ་དཱ་པ་མིན་པའི་དོན་ལ་དད་པའི་སྒོ་ཇི་ལྟར་ཕྱེ་བར་མཛད་པའི་ཚུལ་གསུངས།
ACT 14:28 ཡང་ཁོང་གཉིས་ཉེ་གནས་རྣམས་དང་མཉམ་དུ་ཡུན་རིང་པོ་ཞིག་དེར་གནས་སོ། །
ACT 15:1 ཡ་ཧུ་དཱ་ཡུལ་ནས་ཡོང་བའི་མི་ཁ་ཅིག་གིས་སྤུན་ཟླ་རྣམས་ལ་“གལ་ཏེ་ལུང་སྟོན་པ་མོ་ཤེ་ཡི་ཆོས་ཁྲིམས་ལྟར་ཡ་ཧུ་དཱ་པའི་ཆོས་ཀྱི་རྟགས་མ་ལེན་ན། ཐར་བར་འགྱུར་མི་སྲིད་”ཅེས་བསྟན།
ACT 15:2 པའུ་ལུ་དང་པར་ན་པཱ་ཁོ་ཚོ་དང་མི་མཐུན་ཏེ་རྩོད་གླེང་དྲག་པོ་བྱུང་བས། སྤུན་ཟླ་རྣམས་ཀྱིས་ཁོང་གཉིས་དང་དད་ལྡན་པ་ལས་གཞན་ཁ་ཅིག་དོན་དེའི་སྐོར་ལ་སྐུ་ཚབ་དང་འགན་འཁུར་བ་རྣམས་མཇལ་བར་ཡེ་རུ་ཤ་ལེམ་ལ་འགྲོ་དགོས་པའི་ཐག་གཅོད་བྱས།
ACT 15:3 དེའི་ཕྱིར་ཆོས་ཚོགས་ཀྱིས་ཁོང་ཚོ་མངགས་ཏེ་ཕེ་ནི་ཀེ་དང་ས་མར་ཡཱ་ཡུལ་གཉིས་བརྒྱུད་ནས་ཕེབས་པ་དང༌། ཁོང་ཚོས་ཡ་ཧུ་དཱ་པ་མིན་པ་རྣམས་ཇི་ལྟར་དད་ལྡན་པར་གྱུར་བར་གསུངས་པས་སྤུན་ཟླ་ཐམས་ཅད་ཧ་ཅང་དགའ་བར་གྱུར།
ACT 15:4 པའུ་ལུ་དང་པར་ན་པཱ་ཡེ་རུ་ཤ་ལེམ་ལ་སླེབས་ནས་ཆོས་ཚོགས་དང༌། སྐུ་ཚབ། འགན་འཁུར་བ་བཅས་ཀྱིས་ཁོང་ཚོ་བསུས། དཀོན་མཆོག་གིས་ཁོང་གཉིས་བརྒྱུད་ནས་ཇི་མཛད་པ་ཐམས་ཅད་ཁོང་ཚོར་གསུངས།
ACT 15:5 དེ་ནས་ཕཱ་རུ་ཤི་ཟེར་བའི་ཕྱོགས་ཁག་ལས་དད་ལྡན་དུ་གྱུར་བའི་མི་ཁ་ཅིག་ཡར་ལངས་ནས་“ཡ་ཧུ་དཱ་པ་མིན་པ་རྣམས་ཀྱིས་ཡ་ཧུ་དཱ་པའི་ཆོས་ཀྱི་རྟགས་ལེན་དགོས་པ་དང་མོ་ཤེ་ཡི་ཆོས་ཁྲིམས་སྲུང་དགོས་པ་དེ་ངེས་པར་དུ་སྐུལ་”ཞེས་སྨྲས།
ACT 15:6 དོན་དེ་ཞིབ་དཔྱད་བྱེད་པའི་ཕྱིར་སྐུ་ཚབ་དང་འགན་འཁུར་བ་རྣམས་འཛོམས།
ACT 15:7 གཏམ་གླེང་མང་པོ་བྱས་ནས་སྐུ་ཚབ་པེ་ཏྲོ་ལངས་ཏེ་ཁོ་ཚོར་“སྤུན་ཟླ་རྣམས། སྔོན་དཀོན་མཆོག་གིས་ཁྱེད་ཚོའི་ཁྲོད་ནས་འདམ་ཀ་མཛད་དེ། ཡ་ཧུ་དཱ་པ་མིན་པ་རྣམས་ཀྱིས་ངའི་ཁ་ནས་འཕྲིན་བཟང་ཐོས་ཤིང་དད་པ་དང་ལྡན་པར་འགྱུར་བ་ཁྱེད་རྣམས་ཀྱིས་མཁྱེན།
ACT 15:8 མི་རྣམས་ཀྱི་སེམས་མཁྱེན་པའི་དཀོན་མཆོག་གིས་ང་ཚོ་ལ་དམ་པའི་ཐུགས་ཉིད་གནང་བ་ལྟར། ཡ་ཧུ་དཱ་པ་མིན་པ་རྣམས་ལའང་དམ་པའི་ཐུགས་ཉིད་གནང་སྟེ་ཁོ་ཚོར་དཔང་པོ་མཛད།
ACT 15:9 ཡང་ང་ཚོ་དང་ཁོ་ཚོའི་བར་དུ་ཁྱད་པར་མི་མཛད་དེ་ཁོང་གིས་དད་པའི་སྒོ་ནས་ཁོ་ཚོའི་སེམས་དག་པར་མཛད།
ACT 15:10 ད་ལྟ་ཁྱེད་ཚོས་ཅིའི་ཕྱིར་ང་ཚོའམ་མེས་པོས་ཀྱང་འཁུར་མ་ཐུབ་པའི་གཉའ་ཤིང་དེ་ཉེ་གནས་རྣམས་ཀྱི་གཉའ་ལ་འགེལ་བའི་སྒོ་ནས་དཀོན་མཆོག་ལ་ཉམས་ཚོད་བྱེད།
ACT 15:11 དེ་ལས་ལྡོག་སྟེ་ཁོ་ཚོ་དང་འདྲ་བར་ང་ཚོའང་གཙོ་བོ་ཡེ་ཤུའི་ཐུགས་རྗེའི་སྒོ་ནས་ཐར་བར་འགྱུར་བར་ཡིད་ཆེས་སོ་”ཞེས་གསུངས།
ACT 15:12 དེ་ནས་དེར་ཚོགས་པའི་མི་ཀུན་ཁ་ཁུ་སིམ་པོར་བསྡད་དེ་པར་ན་པཱ་དང་པའུ་ལུའི་གཏམ་ལ་ཉན། དཀོན་མཆོག་གིས་ཁོང་གཉིས་བརྒྱུད་ནས་ཡ་ཧུ་དཱ་པ་མིན་པ་རྣམས་ཀྱི་ཁྲོད་དུ་རྟགས་དང་ངོ་མཚར་བའི་དོན་ཅི་ལྟར་མཛད་པའི་སྐོར་གསུངས།
ACT 15:13 ཁོང་ཚོས་གསུངས་པའི་རྗེས་སུ་ཡ་ཀོབ་ཀྱིས་ལན་དུ་“སྤུན་ཟླ་རྣམས། ང་ལ་ཉོན་དང༌།
ACT 15:14 ད་ལྟ་སི་མེ་ཡོན་གྱིས་གསུངས་པ་ལྟར་ཐོག་མར་དཀོན་མཆོག་གིས་ཡ་ཧུ་དཱ་པ་མིན་པ་རྣམས་ལ་ཐུགས་རྗེས་གཟིགས་ཏེ་ཁོ་རྣམས་ལས་རང་གི་དོན་དུ་འབངས་མི་བཞེས།
ACT 15:15 དེ་ནི་ལུང་སྟོན་པས་གང་གསུངས་པའི་བཀའ་དང་མཐུན་ཏེ་ཁོང་ཚོས་བྲིས་པའི་མདོ་ལ་བཀོད་པ་ལྟར།
ACT 15:16 དེ་ཡི་རྗེས་སུ་ང་ནི་ཕྱིར་ལོག་ནས། ། དཱ་བིད་གནས་ས་བཞིག་རལ་སོང་བ་དག ། གཞི་གསོ་བྱེད་ཅིང་གནས་ས་རྡིབས་པ་དག ། ང་ཡིས་སླར་ཡང་འཛུགས་ཤིང་བསྐྲུན་པར་བྱ། །
ACT 15:17 དེ་ནི་མི་རིགས་གཞན་གང་ཐམས་ཅད་དང༌། ། ང་ཡི་མིང་ཐོགས་ཕྱི་པ་རྣམས་ཀྱིས་ནི། ། ཡང་དག་གཙོ་བོ་དཀོན་མཆོག་འཚོལ་ཕྱིར་རོ། །
ACT 15:18 གདོད་ནས་མངོན་པར་མཛད་དེ་གཙོ་བོས་གསུངས། །
ACT 15:19 དེའི་ཕྱིར་ངའི་བསམ་ཚུལ་ལ་དཀོན་མཆོག་གི་ཕྱོགས་སུ་སེམས་བསྒྱུར་བའི་ཡ་ཧུ་དཱ་པ་མིན་པ་རྣམས་ལ་དཀའ་ངལ་མི་བཟོ་བར།
ACT 15:20 ལྷ་སྐུ་དང་འབྲེལ་བའི་མི་གཙང་བ་དང༌། ལོག་གཡེམ། སྐེ་བཙིར་ནས་གསོད་པའི་དུད་འགྲོའི་ཤ ཁྲག་བཅས་ལ་འཛེམ་དགོས་ཞེས་པའི་ཡི་གེ་ཞིག་བྲིས་ན་ལེགས།
ACT 15:21 གང་ལགས་ཤེ་ན། གནའ་བོ་ནས་བཟུང་ངལ་གསོ་བའི་ཉིན་རེར་ལུང་སྟོན་པ་མོ་ཤེའི་ཆོས་ཁྲིམས་ནི་གྲོང་ཁྱེར་རེའི་འདུ་ཁང་ལ་བཀླགས་ཡོད་”ཅེས་གསུངས།
ACT 15:22 དེ་ནས་སྐུ་ཚབ་དང་འགན་འཁུར་བ་རྣམས་དང༌། ཆོས་ཚོགས་ཡོངས་ཀྱིས་རང་གི་མི་རྣམས་ལས་ཁ་ཤས་བདམས་ནས་པའུ་ལུ་དང་པར་ན་པཱ་གཉིས་དང་མཉམ་དུ་སི་རི་ཡཱ་ཡུལ་གྱི་ཨན་ཏི་ཡོག་ཡཱ་གྲོང་ཁྱེར་ལ་མངག་པར་ཐག་གཅོད་བྱས་པས། སྤུན་ཟླ་རྣམས་ཀྱི་ནང་ནས་འགོ་ཁྲིད་ཡིན་པའི་ཡུ་དཱའམ་པར་ས་པཱ་ཡང་ཟེར་བ་ཞིག་དང༌། སི་ལཱ་བདམས།
ACT 15:23 དེ་རྗེས་ཁོང་གཉིས་བརྒྱུད་ཁོ་ཚོ་ལ་གཤམ་གྱི་ཡི་གེ་དེ་བསྐུར། ཁྱེད་རྣམས་ཀྱི་སྤུན་ཟླ་ཡིན་པའི་སྐུ་ཚབ་དང་འགན་འཁུར་བ་རྣམས་ཀྱིས། ཨན་ཏི་ཡོག་ཡཱ་གྲོང་ཁྱེར་དང༌། སི་རི་ཡཱ་ཡུལ། ཀི་ལིག་ཡཱ་ཡུལ་བཅས་སུ་གནས་པའི་ཡ་ཧུ་དཱ་པ་མིན་པའི་མི་རིགས་ལས་བྱུང་བའི་དད་ལྡན་རྣམས་ལ་འཚམས་འདྲི་ཞུ།
ACT 15:24 ང་ཚོས་མ་མངགས་པར་ང་ཚོའི་ཁྲོད་ནས་ཁ་ཅིག་ཐོན་ཏེ་ཁྱེད་རྣམས་ལ་སྡུག་པོ་བཏང་ཞིང༌། ཁོ་ཚོའི་གཏམ་གྱིས་ཁྱེད་ཚོའི་སེམས་དཀྲུགས་པར་བྱས་པའི་གཏམ་ཐོས་པས།
ACT 15:25 ང་ཚོ་གཅིག་མཐུན་གྱིས་མི་གཉིས་བདམས་ཏེ་ངེད་ཀྱི་གཅེས་པའི་པར་ན་པཱ་དང་པའུ་ལུ་མཉམ་དུ་ཁྱེད་རྣམས་ཀྱི་མདུན་དུ་གཏོང་བར་ཐག་གཅོད་བྱས།
ACT 15:26 ཁོང་གཉིས་ནི་ང་ཚོའི་གཙོ་བོ་ཡེ་ཤུ་མཱ་ཤི་ཀའི་དོན་ལ་རང་གི་སྲོག་ཉེན་ལའང་འཛེམ་མེད།
ACT 15:27 དེའི་ཕྱིར་ང་ཚོས་ཡུ་དཱ་དང་སི་ལཱ་གཉིས་ཁྱེད་རྣམས་ཀྱི་དྲུང་དུ་མངགས་ཏེ། དོན་འདི་ཚོ་ཁོང་ཚོས་རང་གི་ཞལ་ནས་ཁྱེད་རྣམས་ལ་བཤད་པར་འགྱུར།
ACT 15:28 གང་ཡིན་ཟེར་ན། དཀོན་མཆོག་གི་དམ་པའི་ཐུགས་ཉིད་ཀྱི་དགོངས་པ་དང་མཚུངས་པར་དོན་གལ་ཆེ་བ་འདི་ཚོ་ལས་ལྷག་པའི་ཁུར་པོ་ཁྱེད་རྣམས་ཀྱི་ཕྲག་པར་འགེལ་བར་མི་རུང༌།
ACT 15:29 ཁྱེད་ཚོས་ལྷ་སྐུའི་མདུན་དུ་ཕུལ་བའི་མཆོད་རྫས་མི་གཙང་བ་དང༌། ཁྲག སྐེ་བཙིར་ནས་གསོད་པའི་དུད་འགྲོའི་ཤ ལོག་གཡེམ་བཅས་ལ་འཛེམ་དགོས། དེ་ཚོ་དང་འབྲེལ་བ་ཅི་ཡང་མེད་ན་ལེགས། ཁྱེད་རྣམས་བདེ་བར་ཤོག ཅེས་པའོ། །
ACT 15:30 ཁོང་རྣམས་ཕར་མངགས་ཏེ་ཨན་ཏི་ཡོག་ཡཱ་གྲོང་ཁྱེར་དུ་སླེབས་པ་དང༌། དད་ལྡན་རྣམས་བསྡུས་ནས་འཕྲིན་ཡིག་དེ་ཁོ་ཚོར་སྤྲད།
ACT 15:31 དེ་བཀླགས་པས་སེམས་གསོ་བའི་གཏམ་གྱིས་ཁོ་ཚོ་དགའ་བར་གྱུར།
ACT 15:32 ལུང་སྟོན་པ་ཡང་ཡིན་པའི་ཡུ་དཱ་དང་སི་ལཱ་གཉིས་ཀྱིས་གཏམ་མང་པོ་བཤད་དེ་སྤུན་ཟླ་རྣམས་ལ་སེམས་གསོ་བཏང་ཞིང༌། ཁོ་ཚོའི་དད་པ་བརྟན་པོར་བྱས།
ACT 15:33 དེར་བཞུགས་པའི་རྗེས་སུ་སྤུན་ཟླ་རྣམས་ཀྱིས་ཁོ་ཚོ་མངག་མཁན་གྱི་དྲུང་དུ་ཞི་བདེའི་ངང་ནས་ཕྱིར་ལོག་བཏང༌།
ACT 15:35 ཡང་པའུ་ལུ་དང་པར་ན་པཱ་ཨན་ཏི་ཡོག་ཡཱ་གྲོང་ཁྱེར་ལ་གནས་ཤིང༌། མི་གཞན་མང་པོ་དང་བཅས་པར་ཁོང་རྣམས་ཀྱིས་ཆོས་བསྟན་པ་དང༌། གཙོ་བོ་དཀོན་མཆོག་གི་འཕྲིན་བཟང་བསྒྲགས།
ACT 15:36 དེའི་རྗེས་སུ་པའུ་ལུ་ཡིས་པར་ན་པཱ་ལ་“སྤུན་ཟླ་རྣམས་ཀྱི་དད་པ་ཇི་ལྟར་ཡིན་མིན་ཤེས་པའི་ཕྱིར་ང་ཚོས་སྔར་དཀོན་མཆོག་གི་བཀའ་བསྒྲགས་པའི་གྲོང་ཁྱེར་རེ་རེར་ཕྱིར་ལོག་བྱེད་”ཅེས་གསུངས།
ACT 15:37 པར་ན་པཱ་ཡིས་ཡོ་ཧ་ནན་ཏེ་མར་ཀུ་ཡང་ཟེར་བ་མཉམ་དུ་འཁྲིད་པར་འདོད་ཀྱང༌།
ACT 15:38 མར་ཀུ་སྔར་ཕམ་ཕིལ་ཡཱ་ཡུལ་ལ་ཁོང་དང་ཁ་བྲལ་ནས་ཕྱིན་ཞིང༌། ལས་མ་སྒྲུབ་པའི་བར་དུ་མ་འགྲོགས་པས་པའུ་ལུས་ཁོ་མཉམ་དུ་འཁྲིད་ན་མི་འོས་པར་ནན་གྱིས་བསྐུལ།
ACT 15:39 བསམ་འཆར་མི་མཐུན་པ་དྲག་པོ་བྱུང་བས་ཁོང་གཉིས་སོ་སོར་གྱེས་པ་དང༌། པར་ན་པཱས་མར་ཀུ་འཁྲིད་དེ་གྲུ་གཟིངས་ལ་བསྡད་ནས་ཀིབ་རུ་གླིང་ཕྲན་ལ་ཕེབས།
ACT 15:40 འོན་ཀྱང་པའུ་ལུས་སི་ལཱ་བདམས་ནས་ཕར་ཕེབས་ཏེ། དད་ལྡན་རྣམས་ཀྱིས་ཁོང་གཉིས་གཙོ་བོའི་ཐུགས་རྗེ་ལ་བཅོལ།
ACT 15:41 པའུ་ལུས་སི་རི་ཡཱ་ཡུལ་དང་ཀི་ལིག་ཡཱ་ཡུལ་བརྒྱུད་ནས་ཕེབས་ཏེ་ཆོས་ཚོགས་རྣམས་ལ་བརྟན་པོར་བྱས་སོ། །
ACT 16:1 ཡང་དེ་ནས་པའུ་ལུ་ཌེར་པེ་དང་ལིས་ཏྲཱ་གྲོང་ཁྱེར་དུ་སླེབས། དེར་ཐི་མོ་ཐེ་ཞེས་བྱ་བའི་ཉེ་གནས་ཤིག་ཡོད་དེ། ཁོའི་ཨ་མ་ནི་དད་ལྡན་པའི་ཡ་ཧུ་དཱ་པ་ཞིག་ཡིན་ཡང༌། ཕ་གྷི་རིག་པ་ཡིན།
ACT 16:2 ལིས་ཏྲཱ་དང་ཨི་ཀོན་ཡཱུ་གྲོང་ཁྱེར་ལ་སྡོད་པའི་སྤུན་ཟླ་རྣམས་ཀྱིས་ཁོ་ལ་བསྟོད་པར་བྱས།
ACT 16:3 པའུ་ལུས་ཐི་མོ་ཐེ་ཁོང་དང་མཉམ་དུ་འགྲོ་བར་འདོད་པས་ཁོང་གིས་ཁོ་ལ་ཡ་ཧུ་དཱ་པའི་ཆོས་ཀྱི་རྟགས་རྒྱག་ཏུ་བཅུག གང་ལགས་ཤེ་ན། ཡུལ་དེར་ཡ་ཧུ་དཱ་པ་མང་པོ་ཡོད་ཅིང༌། ཁོ་ཚོ་ཚང་མས་ཐི་མོ་ཐེའི་ཕ་ནི་གྷི་རིག་པ་ཡིན་པར་ཤེས་པའི་ཕྱིར་རོ།
ACT 16:4 གྲོང་ཁྱེར་རྣམས་བརྒྱུད་ནས་འགྲོ་དུས་ཡེ་རུ་ཤ་ལེམ་གྱི་སྐུ་ཚབ་དང་འགན་འཁུར་བ་རྣམས་ཀྱིས་ཐག་བཅད་པའི་བཀའ་སྲུང་བའི་ཕྱིར་དད་ལྡན་རྣམས་ལ་བསྒྲགས་པས།
ACT 16:5 ཆོས་ཚོགས་རྣམས་ཀྱི་དད་སེམས་བརྟན་པོར་གྱུར་ཞིང༌། དད་ལྡན་རྣམས་ཀྱི་གྲངས་ཉིན་རེ་བཞིན་མང་དུ་འཕེལ།
ACT 16:6 དཀོན་མཆོག་གི་དམ་པའི་ཐུགས་ཉིད་ཀྱིས་ཁོང་ཚོ་ཨེ་ཞེ་ཡཱ་ཞིང་ཆེན་ལ་བཀའ་སྒྲོག་ཏུ་མ་བཅུག་པས། ཁོང་རྣམས་ཕ་རུག་ཡཱ་དང་ག་ལད་ཡཱ་ཡུལ་བརྒྱུད་ནས་ཕེབས་ཤིང༌།
ACT 16:7 མོ་སི་ཡཱ་ཡུལ་དུ་སླེབས་དུས་པི་ཐིན་ཡཱ་ཞིང་ཆེན་ལ་ཞུགས་པར་བསམས་ཀྱང༌། ཡེ་ཤུའི་ཐུགས་ཉིད་ཀྱིས་འགྲོ་མ་བཅུག་པའི་རྐྱེན་གྱིས།
ACT 16:8 མོ་སི་ཡཱ་ཡུལ་བརྒྱུད་ནས་ཏྲོ་ཡཱ་གྲུ་ཁར་ཕེབས།
ACT 16:9 མཚན་མོར་པའུ་ལུ་ལ་ཞལ་གཟིགས་གནང་སྟེ་མ་ཀེ་དོན་ཡཱ་ཞིང་ཆེན་གྱི་མི་ཞིག་ཁོང་གི་དྲུང་དུ་ལངས་ནས་ཁོང་ལ་“མ་ཀེ་དོན་ཡཱ་ལ་ཕེབས་ནས་ང་ཚོར་རོགས་པ་གནང་རོགས་”ཞེས་ནན་གྱིས་བསྐུལ།
ACT 16:10 ཞལ་གཟིགས་དེ་མཐོང་བའི་རྗེས་དཀོན་མཆོག་གིས་ང་ཚོ་དངོས་སུ་མ་ཀེ་དོན་ཡཱ་པ་རྣམས་ལ་འཕྲིན་བཟང་སྒྲོག་ཏུ་བོས་པར་ཤེས་ནས། ང་ཚོས་འཕྲལ་དུ་ཁོ་ཚོའི་རྩར་འགྲོ་བའི་གྲ་སྒྲིག་བྱས།
ACT 16:11 དེ་ནས་ཏྲོ་ཡཱ་ནས་གྲུ་གཟིངས་ལ་བསྡད་དེ་སཱ་མོ་ཏྲེ་ཀེ་ཞེས་པའི་གླིང་ཕྲན་ལ་ཐད་ཀར་ཕྱིན་ཞིང༌། དེའི་ཕྱི་ཉིན་ནེ་ཨ་པོ་ལི་ཞེས་པའི་གྲུ་ཁར་སླེབས།
ACT 16:12 དེ་ནས་མ་ཀེ་དོན་ཡཱ་ཡུལ་གྱི་གལ་ཆེན་གྲོང་ཁྱེར་ཕི་ལིབ་པཱི་ལ་སླེབས། གྲོང་ཁྱེར་དེ་ནི་རོ་མཱའི་རྒྱལ་ཁབ་ཀྱི་ཁོངས་གཏོགས་ཡིན་ཞིང་དེར་ང་ཚོ་ཉིན་ཤས་བསྡད།
ACT 16:13 ངལ་གསོ་བའི་ཉིན་མོར་ང་ཚོ་གྲོང་ཁྱེར་གྱི་སྒོའི་ཕྱི་ཕྱོགས་གཙང་པོའི་འགྲམ་དུ་སྨོན་ལམ་འདེབས་ས་ཡིན་པར་བསམས་ནས། དེ་ལ་ཕྱིན་ཏེ་བསྡད་པ་དང༌། དེར་འཛོམས་ཡོད་པའི་བུད་མེད་རྣམས་ལ་ཆོས་བཤད།
ACT 16:14 དེའི་ནང་ནས་གྲོང་ཁྱེར་ཐི་ཡ་ཏི་རཱ་ནས་ཡིན་པའི་མདོག་རྒྱ་སྨུག་ཅན་གྱི་རས་འཚོང་མཁན་ལི་དི་ཡཱ་ཞེས་བྱ་བའི་བུད་མེད་ཅིག་གིས་ང་ཚོའི་གཏམ་ལ་ཉན། ཁོ་མོ་ནི་དཀོན་མཆོག་ལ་བསྙེན་བཀུར་བྱེད་མཁན་ཡིན་ལ། པའུ་ལུས་གསུངས་པའི་བཀའ་ལ་ཉན་པའི་ཕྱིར་གཙོ་བོས་ཁོ་མོའི་བློ་སྒོ་ཕྱེ།
ACT 16:15 ཁོ་མོས་རང་གི་ནང་མི་དང་བཅས་པར་ཁྲུས་གསོལ་ལེན་པའི་རྗེས་སུ་“གལ་ཏེ་ཁྱེད་ཀྱིས་ང་གཙོ་བོ་ལ་དད་པ་བྱེད་མཁན་ཞིག་ཡིན་པར་བརྩིས་ན། ངའི་ཁང་པར་ཕེབས་ནས་བཞུགས་དང་”ཞེས་ནན་གྱིས་བསྐུལ་ནས་ང་ཚོ་དེར་འཁྲིད།
ACT 16:16 དེ་ནས་ཉིན་ཞིག་ལ་སྨོན་ལམ་འདེབས་སར་འགྲོ་དུས་སྔོན་ཤེས་དང་ལྡན་པའི་གདོན་འདྲེ་ཡིས་ཟིན་པའི་བྲན་མོ་ཞིག་ང་ཚོ་དང་ཕྲད། ཁོ་མོས་སྔོན་ཤེས་བཤད་པའི་སྒོ་ནས་རང་གི་བདག་པོ་རྣམས་ལ་དངུལ་མང་པོ་ཐོབ།
ACT 16:17 ཁོ་མོ་པའུ་ལུ་དང་ང་ཚོའི་རྗེས་སུ་འབྲང་དུས་སྐད་ཆེན་པོས་“མི་འདི་རྣམས་བླ་ན་མེད་པའི་དཀོན་མཆོག་གི་ཞབས་ཕྱི་དང༌། ཁྱེད་རྣམས་ལ་ཐར་བའི་ལམ་སྟོན་མཁན་ཡིན་”ཞེས་ཡང་ཡང་བརྗོད།
ACT 16:18 ཉིན་མང་པོའི་རིང་ལ་དེ་ལྟར་བྱས་པས་པའུ་ལུ་སུན་སྣང་ཆེན་པོ་སྐྱེས་ནས་ཁ་ཚུར་གཅུས་ཏེ་གདོན་འདྲེ་དེ་ལ་“ངས་གཙོ་བོ་ཡེ་ཤུ་མཱ་ཤི་ཀའི་མཚན་ཐོག་ནས་ཁྱོད་ལ་མོ་ནས་ཕྱིར་ཐོན་པའི་བཀའ་གཏོང་”ཞེས་གསུངས་མ་ཐག་གདོན་འདྲེ་དེ་ཕྱིར་ཐོན།
ACT 16:19 བྲན་མོ་དེའི་བདག་པོ་རྣམས་ཀྱིས་དངུལ་འཐོབ་པའི་རེ་བ་མེད་པར་གྱུར་བ་ཤེས་ནས། ཁོ་ཚོས་པའུ་ལུ་དང་སི་ལཱ་གཉིས་བཟུང་ནས་ཁྲོམ་ལ་ཡོད་པའི་དཔོན་པོ་རྣམས་ཀྱི་དྲུང་དུ་དྲུད།
ACT 16:20 ཡང་ཁྲིམས་དཔོན་རྣམས་ཀྱི་དྲུང་དུ་འཁྲིད་ནས་ཁོ་ཚོས་“མི་འདི་གཉིས་ཡ་ཧུ་དཱ་པ་ཡིན་ཞིང་ང་ཚོའི་གྲོང་ཁྱེར་དཀྲུག་པ་དང༌།
ACT 16:21 ངེད་རོ་མཱ་པ་རྣམས་ལ་ཁྲིམས་ལྟར་དང་ལེན་མི་བྱེད་པ་དང༌། སྲུང་མི་ཆོག་པའི་ལུགས་སྲོལ་སྒྲོག་བཞིན་འདུག་”ཅེས་སྨྲས།
ACT 16:22 མི་ཚོགས་ཀྱིས་ཀྱང་ཁོང་གཉིས་ལ་ངོ་རྒོལ་བྱས་པས་ཁྲིམས་དཔོན་རྣམས་ཀྱིས་པའུ་ལུ་དང་སི་ལཱ་ཡི་ཕྱི་གོས་འབུད་དུ་བཅུག་ནས་དབྱུག་པ་ཡིས་རྡུང་བའི་བཀའ་བསྒོས།
ACT 16:23 ཁོང་ཚོ་དྲག་པོ་བརྡུངས་ནས་བཙོན་ཁང་དུ་བཅུག་པ་དང༌། བཙོན་སྲུང་དཔོན་ལ་དམ་པོར་སྲུང་དགོས་པའི་བཀའ་བཏང༌།
ACT 16:24 བཀའ་དེ་བཞིན་དུ་བཙོན་སྲུང་དཔོན་གྱིས་ཁོང་ཚོ་བཙོན་ཁང་གི་ཕུགས་ལ་བཅུག་ནས་ཁོ་ཚོའི་རྐང་པར་ཤིང་སྒྲོག་བརྒྱབ་ནས་བཞག
ACT 16:25 ནམ་ཕྱེད་ཙམ་ལ་པའུ་ལུ་དང་སི་ལཱ་གཉིས་ཀྱིས་སྨོན་ལམ་འདེབས་ཤིང་དཀོན་མཆོག་ལ་མགུར་གླུ་ལེན་སྐབས་བཙོན་པ་གཞན་རྣམས་ཀྱིས་ཉན།
ACT 16:26 གློ་བུར་དུ་ས་ཡོམ་ཆེན་པོ་བྱུང་བས་བཙོན་ཁང་གི་རྩིག་རྨང་གཡོ་བར་གྱུར། འཕྲལ་དུ་བཙོན་ཁང་གི་སྒོ་ཐམས་ཅད་བྱེ་ནས་བཙོན་པ་རྣམས་ཀྱི་ལྕགས་ཐག་གྲོལ་བར་གྱུར།
ACT 16:27 གཉིད་ལས་སད་སྐབས་བཙོན་སྲུང་དཔོན་གྱིས་བཙོན་ཁང་གི་སྒོ་བྱེ་ཡོད་པ་མཐོང་བས། བཙོན་པ་བྲོས་པར་སྙམ་སྟེ་རལ་གྲི་ཞིག་བཏོན་ནས་རང་སྲོག་གཅོད་པར་བསམས་ཀྱང༌།
ACT 16:28 པའུ་ལུས་སྐད་ཆེན་པོས་“ཁྱེད་ཀྱིས་རང་ལ་གནོད་པ་མ་བྱོས་ཤིག ང་ཚོ་ཐམས་ཅད་འདིར་ཡོད་”ཅེས་གསུངས།
ACT 16:29 བཙོན་སྲུང་དཔོན་གྱིས་བཞུ་མར་འཁྱེར་དགོས་པའི་བཀའ་བཏང་ནས་བཙོན་ཁང་ནང་དུ་བརྒྱུགས། འཇིགས་ནས་འདར་བཞིན་པའུ་ལུ་དང་སི་ལཱ་ཡི་དྲུང་དུ་ཕྱག་འཚལ།
ACT 16:30 ཁོང་རྣམས་ཕྱི་རོལ་ཏུ་འཁྲིད་ནས་བཙོན་སྲུང་དཔོན་གྱིས་“སྐུ་ཞབས། ཐར་བར་འགྱུར་བའི་ཕྱིར་ངས་གང་ཞིག་བྱེད་དགོས་”ཞེས་ཟེར།
ACT 16:31 ཁོང་ཚོས་“གཙོ་བོ་ཡེ་ཤུ་ལ་དད་པ་བྱོས་ཤིང༌། ཁྱེད་རང་དང་ཁྱེད་ཀྱི་ནང་མི་ཚང་མ་ཐར་བར་འགྱུར་”ཞེས་གསུངས།
ACT 16:32 ཁོང་ཚོས་ཁོ་དང་ཁོའི་ནང་མི་ཚང་མར་གཙོ་བོ་དཀོན་མཆོག་གི་བཀའ་གསུངས།
ACT 16:33 མཚན་མོའི་ཆུ་ཚོད་དེ་རང་ལ་བཙོན་སྲུང་དཔོན་གྱིས་ཁོང་ཚོ་འཁྲིད་དེ་རྨ་བཀྲུས་པ་དང༌། ཁོ་དང་ཁོའི་ནང་མི་ཚང་མས་མྱུར་དུ་ཁྲུས་གསོལ་ལེན།
ACT 16:34 བཙོན་སྲུང་དཔོན་གྱིས་ཁོང་རྣམས་རང་གི་ཁྱིམ་དུ་འཁྲིད་ནས་ཟས་སྟེར་ཞིང༌། དཀོན་མཆོག་ལ་དད་པ་དང་ལྡན་པར་གྱུར་བས་ཁོ་རང་དང་ནང་མི་ཐམས་ཅད་ཧ་ཅང་དགའ་བར་གྱུར།
ACT 16:35 དེའི་སང་ཞོགས་ཁྲིམས་དཔོན་རྣམས་ཀྱིས་སྲུང་དམག་བཏང་སྟེ་“མི་དེ་གཉིས་གློད་གྲོལ་གཏོང་ཞིག་”ཅེས་པའི་བཀའ་བསྩལ།
ACT 16:36 བཙོན་སྲུང་དཔོན་གྱིས་པའུ་ལུ་ལ་གཏམ་དེ་བཤད་དེ་“ཁྲིམས་དཔོན་རྣམས་ཀྱིས་ཁྱེད་ཚོ་གློད་གྲོལ་གཏོང་བའི་བཀའ་བཙལ་བས། ཕྱི་རོལ་ཏུ་ཕེབས་ཤིང༌། ཞི་བདེའི་ངང་ནས་སོང་དང་”ཞེས་སྨྲས་ཀྱང༌།
ACT 16:37 པའུ་ལུས་སྲུང་དམག་རྣམས་ལ་“ང་ཚོ་རོ་མཱ་གོང་མའི་རྒྱལ་ཁབ་ཀྱི་མངའ་འབངས་ཡིན་ཡང༌། ཁྲིམས་རར་འདྲི་གཅོད་མི་བྱས་པར་དམངས་ཀྱི་མདུན་དུ་བརྡུངས་ནས་ང་ཚོ་བཙོན་ཁང་དུ་བཅུག ད་ལྟ་ཁོ་ཚོས་གསང་བའི་ངང་ནས་ང་ཚོ་འདོན་ནམ། དེ་ལྟར་མི་བྱ། འདིར་ཡོང་ནས་ཁོ་ཚོ་རང་གིས་ང་ཚོ་ཕྱི་རོལ་ཏུ་འཁྲིད་དགོས་”ཞེས་གསུངས་པའི་གཏམ་དེ།
ACT 16:38 སྲུང་དམག་ཚོས་ཁྲིམས་དཔོན་རྣམས་ལ་བཤད། ཁོང་ཚོ་གཉིས་རོ་མཱ་གོང་མའི་རྒྱལ་ཁབ་ཀྱི་མངའ་འབངས་ཡིན་པ་ཐོས་ནས་ཁྲིམས་དཔོན་རྣམས་འཇིགས་པར་གྱུར་བ་དང༌།
ACT 16:39 དེར་ཡོང་ནས་ཁོང་ཚོར་དགོངས་དག་ཞུས་པ་དང༌། ཕྱི་རོལ་ཏུ་འཁྲིད་དེ་གྲོང་ཁྱེར་ནས་ཕར་ཕེབས་པར་ཡང་ཡང་བསྐུལ།
ACT 16:40 ཁོང་གཉིས་བཙོན་ཁང་ནས་ཐོན་པ་དང༌། ལི་དི་ཡཱ་ཡི་ཁང་པར་ཕེབས། སྤུན་ཟླ་རྣམས་དང་ལྷན་དུ་འདུས་ཏེ་ཁོ་ཚོར་བློ་སྟོབས་སྤེལ་ནས་ཕར་ཕེབས་སོ། །
ACT 17:1 པའུ་ལུ་དང་སི་ལཱ་ཨམ་ཕི་པོ་ལཱི་དང་ཨ་པོ་ལོན་ཡཱ་གྲོང་ཁྱེར་བརྒྱུད་ནས་ཕེབས་རྗེས་ཐེ་ས་ལོ་ནི་ཀེ་གྲོང་ཁྱེར་དུ་སླེབས། དེར་ཡ་ཧུ་དཱ་པའི་འདུ་ཁང་ཞིག་ཡོད།
ACT 17:2 པའུ་ལུ་ཡིས་གོམས་གཤིས་ལྟར་དེར་ཕེབས་པ་དང༌། ངལ་གསོ་བའི་ཉིན་མོ་གསུམ་གྱི་བར་དུ་གསུང་རབ་ལ་བརྟེན་ནས་ཁོ་ཚོར་རྩོད་གླེང་བྱས་ཏེ།
ACT 17:3 མཱ་ཤི་ཀ་སྡུག་བསྔལ་མྱོང་ནས་སླར་གསོན་པོར་འགྱུར་དགོས་པར་གསལ་བཤད་དང་ར་སྤྲོད་བྱས། པའུ་ལུས་“ངས་ཁྱེད་རྣམས་ལ་སྒྲོག་བཞིན་པའི་ཡེ་ཤུ་ནི་མཱ་ཤི་ཀ་ཡིན་ནོ་”ཞེས་གསུངས།
ACT 17:4 དེ་རྣམས་ཀྱི་ནང་ནས་ཁ་ཤས་དང༌། ཆོས་སེམས་དང་ལྡན་པའི་གྷི་རིག་པ་མང་པོ། རིགས་མཐོ་བའི་བུད་མེད་བཅས་དད་པ་སྐྱེས་ནས་པའུ་ལུ་དང་སི་ལཱ་གཉིས་དང་འགྲོགས།
ACT 17:5 འོན་ཀྱང་ཡ་ཧུ་དཱ་པ་རྣམས་ཕྲག་དོག་སྐྱེས་ཏེ་ཁྲོམ་ནས་མི་ངན་ཁ་ཤས་འཁྲིད་དེ་འཛོམས་བྱས་པ་དང༌། གྲོང་ཁྱེར་གྱི་མི་རྣམས་ལ་ངན་བསྐུལ་བྱས། པའུ་ལུ་དང་སི་ལཱ་གཉིས་མི་ཚོགས་ཀྱི་རྩར་བཙན་འཁྲིད་བྱེད་པའི་ཕྱིར་ཡཱ་སོན་གྱི་ཁང་པར་བཙན་གྱིས་འཛུལ་ཡང༌།
ACT 17:6 ཁོང་གཉིས་མ་རྙེད་པས་ཁོ་ཚོས་ཡཱ་སོན་ལ་སོགས་པའི་སྤུན་ཟླ་ཁ་ཅིག་གྲོང་ཁྱེར་དཔོན་རིགས་ཀྱི་རྩར་བཙན་གྱིས་འཁྲིད་ནས་སྐད་ཆེན་པོས་“ས་གཞི་ཐམས་ཅད་དཀྲུག་མཁན་འདི་གཉིས་ས་ཆ་འདིར་ཡང་སླེབས་པ་དང༌།
ACT 17:7 ཡཱ་སོན་གྱིས་ཁོ་ཚོ་བསུས། ཁོ་ཚོ་ཚང་མས་གོང་མའི་རྒྱལ་པོ་སེ་སར་གྱི་བཀའ་ལས་འགལ་ཏེ་ཡེ་ཤུ་ཞེས་ཟེར་བའི་རྒྱལ་པོ་གཞན་ཞིག་ཡོད་པར་སྨྲས་”ཞེས་ཟེར།
ACT 17:8 དེ་ཐོས་ནས་མི་ཚོགས་དང་གྲོང་ཁྱེར་གྱི་དཔོན་པོ་རྣམས་སེམས་འཁྲུགས།
ACT 17:9 ཡཱ་སོན་དང་སྤུན་ཟླ་གཞན་རྣམས་ནས་གཏའ་མ་བླངས་ནས་དཔོན་རིགས་རྣམས་ཀྱིས་ཁོ་ཚོ་གློད་གྲོལ་བཏང༌།
ACT 17:10 མཚན་མོ་དེ་རང་ལ་སྤུན་ཟླ་རྣམས་ཀྱིས་པའུ་ལུ་དང་སི་ལཱ་གཉིས་པུ་རེ་ཡཱ་གྲོང་ཁྱེར་དུ་བཏང་ཞིང༌། དེར་སླེབས་ནས་ཁོང་རྣམས་ཡ་ཧུ་དཱ་པའི་འདུ་ཁང་ལ་ཕེབས།
ACT 17:11 གནས་འདིའི་མི་རྣམས་ཐེ་ས་ལོ་ནི་ཀེ་གྲོང་ཁྱེར་གྱི་ཡ་ཧུ་དཱ་པ་རྣམས་ལས་བློ་རྒྱ་ཆེ་ལ། འཕྲིན་བཟང་ཉན་རྒྱུར་དགའ་བ་མ་ཟད། བཀའ་ཐོས་ནས་དོན་དེ་རྣམས་བདེན་པ་ཡིན་མིན་ཤེས་པའི་ཕྱིར་ཁོ་ཚོས་ཉིན་ལྟར་གསུང་རབ་འཚོལ་ཞིབ་བྱས།
ACT 17:12 དེའི་ཕྱིར་དེ་རྣམས་ལས་མི་མང་པོ་ཞིག་དང༌། གྷི་རིག་གི་རིགས་མཐོ་བའི་ཕོ་མོ་མང་པོའང་དད་པར་གྱུར།
ACT 17:13 འོན་ཀྱང་ཐེ་ས་ལོ་ནི་ཀེ་གྲོང་ཁྱེར་གྱི་ཡ་ཧུ་དཱ་པ་རྣམས་ཀྱིས་པའུ་ལུས་པུ་རེ་ཡཱ་གྲོང་ཁྱེར་ལའང་དཀོན་མཆོག་གི་བཀའ་སྒྲོག་པའི་གཏམ་ཐོས་པས། དེར་སོང་ནས་མི་ཚོགས་དཀྲུགས་ཤིང་ངན་བསྐུལ་བྱས།
ACT 17:14 དེ་ནས་སྤུན་ཟླ་རྣམས་ཀྱིས་འཕྲལ་དུ་པའུ་ལུ་རྒྱ་མཚོའི་འགྲམ་དུ་བསྐྱལ་ཞིང༌། སི་ལཱ་དང་ཐི་མོ་ཐེ་པུ་རེ་ཡཱ་གྲོང་ཁྱེར་དུ་གནས།
ACT 17:15 པའུ་ལུ་སྐྱེལ་མཁན་རྣམས་ཀྱིས་ཁོང་ཨ་ཐེ་ནེ་གྲོང་ཁྱེར་ལ་འཁྲིད་ཅིང༌། པའུ་ལུས་སི་ལཱ་དང་ཐི་མོ་ཐེ་གཉིས་གང་མགྱོགས་ཡོང་དགོས་པའི་བཀའ་གནང་ནས་སྐྱེལ་མ་རྣམས་ཕྱིར་ལོག
ACT 17:16 པའུ་ལུ་ཁོ་ཚོ་གཉིས་ཨ་ཐེ་ནེ་གྲོང་ཁྱེར་དུ་སྒུག་ནས་བསྡད་དུས། ས་ཆ་དེར་སྐུ་འདྲས་གང་ཡོད་པ་གཟིགས་ཏེ་སེམས་ཧ་ཅང་འཁྲུགས་པར་གྱུར་བས།
ACT 17:17 པའུ་ལུས་འདུ་ཁང་ལ་ཡ་ཧུ་དཱ་པ་དང༌། དཀོན་མཆོག་ལ་བསྙེན་བཀུར་བྱེད་པའི་ཡ་ཧུ་དཱ་པ་མིན་པ་རྣམས་དེ་བཞིན་ཚོང་རར་ཡོང་བ་རྣམས་ལ་ཉིན་རེ་བཞིན་རྩོད་གླེང་བྱས།
ACT 17:18 ཡང་ཨེ་པི་ཀུར་ཞེས་པ་དང་སི་ཏོ་ཀེ་ཞེས་པའི་མཚན་ཉིད་རིག་པའི་ལྟ་བ་འཛིན་མཁན་ཁ་ཅིག་གིས་ཁོང་དང་རྩོད་གླེང་བྱས། ལ་ལས་“གང་བྱུང་མང་བྱུང་ཤོད་མཁན་འདིས་གང་སྨྲ་བར་འདོད་”ཅེས་ཟེར་ཞིང༌། ལ་ལས་“ཕྱི་པའི་ལྷ་སྒྲོག་མཁན་དང་འདྲ་བ་ཡིན་”ཞེས་སྨྲས། དེ་ནི་ཡེ་ཤུ་དང་ཁོང་འཆི་བ་ནས་སླར་གསོན་པོར་འགྱུར་བའི་སྐོར་གསུངས་པས་སོ།
ACT 17:19 དེ་ནས་ཁོ་ཚོས་པའུ་ལུ་ཨ་རེ་ཨོ་པ་གུ་ཞེས་པའི་རྒྱལ་ཚོགས་ལ་འཁྲིད་དེ་ཁོང་ལ་“ཁྱེད་ཀྱིས་སྒྲོག་པའི་བསྟན་པ་གསར་པ་འདི་གང་ཡིན་ངེད་རྣམས་ལ་གསུང་དང༌།
ACT 17:20 གང་ལགས་ཤེ་ན། བསྟན་པ་འགའ་ཤས་ཁྱད་མཚར་བས་ངེད་རྣམས་དོན་འདི་ཚོ་རྟོགས་པར་འདོད་”ཅེས་སྨྲས།
ACT 17:21 (ཨ་ཐེ་ནེ་གྲོང་ཁྱེར་གྱི་མི་དང༌། ས་ཆ་དེར་ཡུལ་གཞན་ནས་ཡོང་བའི་མི་རྣམས་ཀྱིས་དོན་གསར་པའི་སྐོར་གཏམ་གླེང་བྱེད་པ་ལས་གཞན་གང་ཡང་མ་བྱས་)
ACT 17:22 དེ་ནས་པའུ་ལུས་ཨ་རེ་ཨོ་པ་གུ་ཚོགས་པའི་དཀྱིལ་ལ་བཞེངས་ཏེ་“ཨ་ཐེ་ནེ་པ་རྣམས། ཁྱེད་ཚོ་རྣམ་པ་ཀུན་ནས་ཆོས་ལ་ཤིན་ཏུ་དགའ་བའི་མི་ཡིན་པར་ངས་མཐོང༌།
ACT 17:23 གང་ཡིན་ཟེར་ན། ངས་གྲོང་ཁྱེར་བརྒྱུད་ནས་འགྲོ་དུས་ཁྱེད་རྣམས་ཀྱིས་བསྙེན་བཀུར་བྱེད་པའི་རྟེན་རྣམས་ལ་ཞིབ་ལྟ་བྱས་པ་དང༌། རྒྱུས་མེད་པའི་ལྷ་ཡི་ཕྱིར་ཞེས་བྲིས་པའི་མཆོད་ཁྲི་ཞིག་མཐོང་བས། ཁྱེད་རྣམས་ཀྱིས་མི་ཤེས་པར་བསྙེན་བཀུར་བྱེད་པ་དེ་ངས་ཁྱེད་ཚོར་སྒྲོག་པར་བྱ།
ACT 17:24 འཇིག་རྟེན་ཁམས་དང་དེར་ཡོད་པ་ཐམས་ཅད་འགོད་པ་གནང་མཁན་དཀོན་མཆོག་སྟེ་གནམ་ས་གཉིས་ཀྱི་བདག་པོ་ཡིན་པས་མི་ཡིས་བཟོས་པའི་ལྷ་ཁང་ལ་མི་བཞུགས་ལ།
ACT 17:25 ཁོང་ལ་ཅི་ཡང་མི་དགོས་པའི་རྐྱེན་གྱིས་མིའི་ལག་པས་ཁོང་ལ་གཡོག་ཀྱང་བྱེད་མི་དགོས། གང་ལགས་ཟེར་ན། ཁོང་རང་གིས་མི་ཚང་མར་སྲོག་དང༌། དབུགས། ཅི་དགོས་པ་ཐམས་ཅད་གནང་བས་སོ།
ACT 17:26 དཀོན་མཆོག་གིས་མི་གཅིག་ནས་མི་རིགས་ཐམས་ཅད་བཀོད་པ་དང༌། ས་གཞི་ཡོངས་སུ་གནས་ཏུ་བཅུག དེ་ཚོ་སོ་སོའི་དུས་དང་གནས་པའི་ས་མཚམས་སྔོན་ནས་བསྐོས་པ་གནང༌།
ACT 17:27 དེ་ནི་དཀོན་མཆོག་བཙལ་ནས་རྙེད་པའི་རེ་བ་དང་ལྡན་པར་འགྱུར་བའི་ཕྱིར་ཡིན་ཏེ། དོན་དངོས་སུ་ཁོང་ང་ཚོ་རེ་རེ་དང་ཐག་རིང་པོ་མེད།
ACT 17:28 མི་ཞིག་གིས་བྲིས་པ་ལྟར། ངེད་རྣམས་གསོན་ཞིང་བགྲོད་པ་དང་ཁོང་ལ་བརྟེན་ནས་བྱུང་ཞེས་བྲིས་པ་དང༌། ཁྱེད་ཚོའི་སྙན་ངག་མཁན་འགའ་ཤས་ཀྱིས་ཀྱང༌། ང་ཚོའང་ཁོང་གི་བུ་རྒྱུད་ཡིན་ནོ་ཞེས་གསུངས།
ACT 17:29 ངེད་རྣམས་དཀོན་མཆོག་གི་བུ་རྒྱུད་ཡིན་པས་ཁོང་གི་ངོ་བོ་ནི་མི་རྣམས་ཀྱི་ལག་རྩལ་དང་བློ་གྲོས་ཀྱིས་བཟོས་པའི་གསེར་རམ། དངུལ་ལམ། རྡོའི་ལྷ་རྟེན་དང་འདྲ་བ་ཞིག་ཡིན་པར་བསམ་མི་རུང༌།
ACT 17:30 སྔོན་མི་རྣམས་ཀྱིས་དོན་དེ་ཚོ་མ་ཤེས་པར་དཀོན་མཆོག་གིས་མ་བརྩིས་ཡང༌། ད་ལྟ་ཁོང་གིས་གནས་ཀུན་གྱི་མི་ཐམས་ཅད་ལ་སྤྱོད་པ་ངན་པ་རྣམས་སྤངས་ནས་སེམས་བསྒྱུར་དགོས་པའི་བཀའ་གནང༌།
ACT 17:31 གང་ཡིན་ཞེ་ན། ཁོང་གིས་ཁྲིམས་གཅོད་པའི་ཉིན་མོ་ཞིག་བསྐོས་པར་མཛད་ཅིང༌། ཉིན་དེར་ཁོང་གིས་བསྐོས་པའི་མི་ཞིག་གིས་འཇིག་རྟེན་གྱི་མི་རྣམས་ལ་དྲང་བདེན་གྱི་སྒོ་ནས་ཁྲིམས་གཅོད་མཛད་པར་འགྱུར། མི་དེ་འཆི་བ་ནས་སླར་གསོན་པར་མཛད་པའི་ངང་ནས་ཁོང་གིས་དེ་ལྟར་འབྱུང་བར་འགྱུར་བའི་ར་སྤྲོད་མི་ཐམས་ཅད་ལ་གསལ་པོར་བྱས་སོ་”ཞེས་གསུངས།
ACT 17:32 འཆི་བ་ནས་སླར་གསོན་པར་འགྱུར་བའི་སྐོར་ཐོས་ནས་མི་ལ་ལས་ཁོང་ལ་ཁྲེལ་དགོད་བྱས་ཀྱང༌། ལ་ལས་“དོན་དེའི་སྐོར་རྗེས་སུ་ཉན་པར་བྱ་”ཞེས་ཟེར།
ACT 17:33 པའུ་ལུ་མི་དེ་ཚོའི་དཀྱིལ་ནས་ཕྱིར་ཕེབས།
ACT 17:34 འོན་ཀྱང་དཱ་ཨོ་ནེ་སི་ཡཱུ་ཟེར་མཁན་ནི་ཨ་རེ་ཨོ་པ་གུ་ཚོགས་པའི་ཁོངས་མི་ཞིག་དང༌། དཱ་མ་རཱི་ཞེས་ཟེར་བའི་བུད་མེད་ཅིག་ལ་སོགས་པའི་མི་དད་པ་དང་ལྡན་པར་གྱུར་ནས་པའུ་ལུ་དང་འགྲོགས་སོ། །
ACT 18:1 དེའི་རྗེས་སུ་པའུ་ལུ་ཨ་ཐེ་ནེ་གྲོང་ཁྱེར་ནས་ཀོ་རིན་ཐུ་གྲོང་ཁྱེར་དུ་ཕེབས།
ACT 18:2 དེར་ཁོང་དང་པོན་ཏུ་ཡུལ་དུ་སྐྱེས་པའི་ཡ་ཧུ་དཱ་པ་ཨ་ཀུ་ལཱ་དང་ཕྲད། གོང་མའི་རྒྱལ་པོ་ཀ་ལོ་དཱི་ཡིས་ཡ་ཧུ་དཱ་པ་ཐམས་ཅད་རོ་མཱ་གྲོང་ཁྱེར་ནས་འཐོན་དགོས་པའི་བཀའ་ཞིག་བསྒོས་པས། ཨ་ཀུ་ལཱ་དང་ཁོའི་བཟའ་ཟླ་ཕུར་སི་ལཱ་དབྱི་ཏ་ལི་ཡུལ་ནས་ས་ཆ་འདིར་སླེབས་མ་ཐག་ཡིན། པའུ་ལུ་ཁོ་ཚོའི་རྩར་ཕེབས་ནས།
ACT 18:3 ཁོ་རྣམས་དང་འགྲོགས་ཏེ་ལས་ཀ་བྱས། གང་ཡིན་ཟེར་ན། ཁོང་ཡང་ཁོ་ཚོ་དང་མཚུངས་པར་གུར་བཟོ་མཁན་ཡིན་པས་སོ།
ACT 18:4 ངལ་གསོ་བའི་ཉིན་རེ་རེ་བཞིན་ཡ་ཧུ་དཱ་པའི་འདུ་ཁང་དུ་ཁོང་གིས་ཡ་ཧུ་དཱ་པ་དང་གྷི་རིག་པ་རྣམས་དང་རྩོད་གླེང་བྱས་ཏེ་ཁོ་ཚོའི་བློ་འགུགས་པར་བརྩོན།
ACT 18:5 སི་ལཱ་དང་ཐི་མོ་ཐེ་གཉིས་མ་ཀེ་དོན་ཡཱ་ཡུལ་ནས་དེར་སླེབས་སྐབས། པའུ་ལུས་ཡེ་ཤུ་ནི་མཱ་ཤི་ཀ་ཡིན་པ་ཡ་ཧུ་དཱ་པ་རྣམས་ལ་བདེན་དཔང་མཐའ་གཅིག་ཏུ་བྱེད་བཞིན་ཡོད།
ACT 18:6 ཡ་ཧུ་དཱ་པ་རྣམས་ཀྱིས་པའུ་ལུ་ལ་ངོ་རྒོལ་དང་དམའ་འབེབས་བྱེད་སྐབས། ཁོང་གིས་ཕྱི་གོས་ཐོག་གི་ས་རྡུལ་ཁོ་ཚོའི་ཕྱོགས་སུ་སྤྲུགས་ཏེ་“ཁྱོད་ཚོའི་སྡིག་ཉེས་ཀྱི་ཆད་པ་ཁྱོད་ཚོའི་མགོ་ལ་ཕོག་པར་འགྱུར། ང་ལ་འགན་ཅི་ཡང་མེད། ད་ནས་བཟུང་ང་ཡ་ཧུ་དཱ་པ་མིན་པ་རྣམས་ལ་འཕྲིན་བཟང་སྒྲོག་ཏུ་འགྲོ་”ཞེས་གསུངས།
ACT 18:7 དེ་ནས་ཐོན་ཞིང་འདུ་ཁང་གི་འགྲམ་དུ་ཡོད་པའི་དཀོན་མཆོག་ལ་བསྙེན་བཀུར་བྱེད་མཁན་ཐི་ཏི་ཡཱུ་ཡུ་སི་ཏཱུ་ཟེར་མཁན་ཞིག་གི་ཁྱིམ་ལ་བཞུགས་པར་ཕེབས།
ACT 18:8 ཡང་འདུ་ཁང་གི་འགོ་ཁྲིད་ཀ་རི་སི་པཱུ་དང་ཁོང་གི་ནང་མི་ཐམས་ཅད་གཙོ་བོ་ལ་དད་པར་གྱུར། དེའི་སྐོར་ཐོས་ནས་ཀོ་རིན་ཐུ་པ་མང་པོ་ཞིག་གིས་དད་པ་བྱས་ཏེ་ཁྲུས་གསོལ་ལེན།
ACT 18:9 མཚན་མོ་ཞིག་ལ་གཙོ་བོས་ཞལ་གཟིགས་གནང་ནས་པའུ་ལུ་ལ་“འཇིགས་པ་མེད་པར་ཆོས་སྟོན་ལ་མ་ལབ་པར་མ་སྡོད་ཅིག
ACT 18:10 གང་ཡིན་ཟེར་ན། ང་ཁྱོད་དང་མཉམ་དུ་གནས་ཤིང༌། གྲོང་ཁྱེར་འདི་ལ་ང་དང་འགྲོགས་པའི་མི་མང་པོ་ཡོད་པས་གནོད་འཚེ་བྱེད་མཁན་སུས་ཀྱང་ཁྱོད་ལ་རྒོལ་བར་མི་འགྱུར་”ཞེས་གསུངས།
ACT 18:11 པའུ་ལུ་ལོ་གཅིག་དང་ཟླ་བ་དྲུག་དེར་བཞུགས་ཏེ་ཁོ་ཚོའི་ཁྲོད་དུ་དཀོན་མཆོག་གི་བཀའ་བསྟན།
ACT 18:12 ཡང་ག་ལི་ཡཱོ་ཞེས་བྱ་བ་ཨ་ཀ་ཡཱ་ཡུལ་གྱི་སྤྱི་ཁྱབ་ཡིན་པའི་དུས་སུ་ཡ་ཧུ་དཱ་པ་རྣམས་ཀྱིས་གཅིག་མཐུན་གྱིས་པའུ་ལུ་ལ་ངོ་རྒོལ་བྱས་ནས་ཁྲིམས་རར་འཁྲིད་དེ་
ACT 18:13 “མི་འདིས་མི་རྣམས་ལ་དཀོན་མཆོག་ལ་ཁྲིམས་དང་འགལ་བའི་བསྙེན་བཀུར་གྱི་བྱ་ཐབས་སྐྱོང་དགོས་པའི་ངན་བསྐུལ་བྱེད་”ཅེས་སྨྲས།
ACT 18:14 པའུ་ལུས་གསུང་གྲབས་ཡོད་དུས་ག་ལི་ཡཱོ་ཡིས་ཡ་ཧུ་དཱ་པ་རྣམས་ལ་“ཡ་ཧུ་དཱ་པ་ཁྱོད་རྣམས། གལ་ཏེ་དོན་དེ་ཉེས་པའམ་ནག་ཉེས་ཆེན་པོ་ཤིག་ཡིན་ན་ངས་ཁྱོད་ཚོར་བཟོད་པ་དེ་རིགས་སོ།
ACT 18:15 འོན་ཀྱང་ཁྱོད་ཚོའི་རྩོད་གཞི་ཆོས་ཁྲིམས་ཀྱི་སྐོར་དང་མིང༌། ཚིག་བཅས་ཡིན་པས་ཁྱོད་རང་ཚོས་ཐག་གཅོད་བྱོས་ཤིག ང་ནི་དོན་དེའི་ཁྲིམས་དཔོན་དུ་འགྱུར་མི་འདོད་”ཅེས་ཟེར་ནས།
ACT 18:16 ཁོས་ཁོ་ཚོ་ཁྲིམས་ར་ནས་ཕར་བསྐྲད།
ACT 18:17 དེ་ནས་ཁོ་ཚོ་ཚང་མས་འདུ་ཁང་གི་འགོ་ཁྲིད་སོ་ཐེ་ནཱེ་བཙན་བཟུང་བྱས་ནས་ཁྲིམས་རའི་མདུན་དུ་བརྡུངས་ན་ཡང༌། ག་ལི་ཡཱོ་ཡིས་བྱ་བ་དེ་ལ་ཁ་ཡ་མ་བྱས།
ACT 18:18 ས་ཆ་དེར་པའུ་ལུ་ཉིན་མང་པོ་གནས་པའི་རྗེས་སུ་སྤུན་ཟླ་རྣམས་དང་ཁ་བྲལ་ཏེ་ཕུར་སི་ལཱ་དང་ཨ་ཀུ་ལཱ་མཉམ་དུ་གྲུ་གཟིངས་ལ་བཞུགས་ནས་སི་རི་ཡཱ་ཡུལ་དུ་ཕེབས། པའུ་ལུ་ཀེན་གྲེ་གྲུ་ཁར་ཕེབས་ནས་དེར་སྔར་བཞག་པའི་དམ་བཅའ་བཞིན་ཁོང་གི་དབུ་སྐྲ་བྲེགས།
ACT 18:19 ཨེ་ཕེ་སུ་གྲོང་ཁྱེར་དུ་སླེབས་ནས་པའུ་ལུ་ཁོ་གཉིས་དེར་བཞག ཁོང་ཉིད་ཡ་ཧུ་དཱ་པའི་འདུ་ཁང་ལ་འཛུལ་ཏེ་ཡ་ཧུ་དཱ་པ་རྣམས་དང་རྩོད་གླེང་བྱས་པ་དང༌།
ACT 18:20 ཁོ་ཚོས་ཡུན་རིང་པོ་ཞིག་དེར་སྡོད་པར་ཞུས་ཀྱང་ཁོང་གིས་ཞལ་མ་བཞེས་ཏེ།
ACT 18:21 ཁོ་ཚོ་དང་ཁ་བྲལ་ནས་ཁོང་གིས་“དཀོན་མཆོག་གི་དགོངས་པ་ཡིན་ན་ང་ཕྱིར་ལོག་པར་བྱ་”ཞེས་གསུངས་པའི་རྗེས་སུ་གྲུ་གཟིངས་ལ་བཞུགས་ནས་ཨེ་ཕེ་སུ་གྲོང་ཁྱེར་ནས་ཕར་ཕེབས།
ACT 18:22 སེ་སར་རེ་ཡཱ་གྲོང་ཁྱེར་དུ་སླེབས་པའི་རྗེས་སུ་ཡེ་རུ་ཤ་ལེམ་གྱི་ཆོས་ཚོགས་ལ་འཚམས་འདྲི་ཞུ་བར་ཡར་སོང༌། དེ་ནས་ཁོང་ཨན་ཏི་ཡོག་ཡཱ་གྲོང་ཁྱེར་དུ་མར་ཕེབས།
ACT 18:23 དེར་རེ་ཞིག་བཞུགས་པའི་རྗེས་སུ་ཁོང་ས་ཆ་དེ་དང་ཁ་བྲལ་བ་དང༌། རིམ་བཞིན་ག་ལད་ཡཱ་དང་ཕ་རུག་ཡཱ་ཡུལ་གཉིས་བརྒྱུད་ནས་ཕེབས་ཏེ་ཉེ་གནས་ཐམས་ཅད་ཀྱི་དད་པ་བརྟན་པར་མཛད།
ACT 18:24 དེའི་དུས་སུ་ཨ་ལིག་ཟན་དྲི་ཡཱ་གྲོང་ཁྱེར་དུ་སྐྱེས་པའི་ཡ་ཧུ་དཱ་པ་ཨ་པོ་ལོ་སི་ཞེས་བྱ་བ་སྨྲ་མཁས་ཅན་དང་གསུང་རབ་ལ་མཁས་པ་ཞིག་ཨེ་ཕེ་སུ་གྲོང་ཁྱེར་དུ་སླེབས།
ACT 18:25 ཁོས་གཙོ་བོ་ཡེ་ཤུའི་ལམ་ལ་བསླབས་ཤིང༌། བརྩོན་སེམས་ཀྱིས་ཡེ་ཤུའི་སྐོར་ཡང་དག་པར་གསུངས་ཏེ་ཆོས་བསྟན་ཡང༌། ཡོ་ཧ་ནན་གྱི་ཁྲུས་གསོལ་འབའ་ཞིག་ཤེས།
ACT 18:26 ཡ་ཧུ་དཱ་པའི་འདུ་ཁང་ལ་ཁོས་བློ་སྟོབས་ཆེན་པོས་ཆོས་བསྟན་པར་བརྩམས། འོན་ཀྱང་ཕུར་སི་ལཱ་དང་ཨ་ཀུ་ལཱ་གཉིས་ཀྱིས་ཁོའི་བསྟན་པ་ཐོས་སྐབས་ཟུར་དུ་འཁྲིད་ནས་ཁོ་ལ་དཀོན་མཆོག་གི་ལམ་ནི་དེ་ལས་ཡང་དག་པར་བསྟན།
ACT 18:27 ཨ་པོ་ལོ་སི་ཨ་ཀ་ཡཱ་ཡུལ་ལ་འགྲོ་བར་འདོད་སྐབས་སྤུན་ཟླ་རྣམས་ཀྱིས་ཁོ་བསྐུལ་ནས་ཡུལ་དེའི་ཉེ་གནས་རྣམས་ལ་ཁོ་བསུ་དགོས་ཞེས་པའི་འཕྲིན་ཡིག་བྲིས། དེར་སླེབས་ནས་ཐུགས་རྗེའི་སྒོ་ནས་དད་པར་གྱུར་བ་རྣམས་ལ་ཁོས་རོགས་རམ་མང་པོ་བྱས།
ACT 18:28 གང་ཡིན་ཞེ་ན། ཁོས་མི་དམངས་ཀྱི་མདུན་དུ་ཡ་ཧུ་དཱ་པ་རྣམས་ལ་ནན་གྱིས་རྩོད་པར་བྱས་ཏེ་དེ་རྣམས་བཀག་ནས། གསུང་རབ་ལས་ཡེ་ཤུ་ནི་མཱ་ཤི་ཀ་ཡིན་པར་གསལ་པོར་བསྟན་ནོ། །
ACT 19:1 ཡང་ཨ་པོ་ལོ་སི་ཀོ་རིན་ཐུ་གྲོང་ཁྱེར་ལ་ཡོད་དུས་པའུ་ལུ་ག་ལད་ཡཱ་དང་ཕ་རུག་ཡཱ་ཡུལ་གཉིས་བརྒྱུད་ནས་ཕེབས་པ་དང༌། ཨེ་ཕེ་སུ་གྲོང་ཁྱེར་དུ་སླེབས་ནས་ཉེ་གནས་ཁ་ཅིག་དང་ཕྲད།
ACT 19:2 ཁོང་གིས་ཁོ་ཚོར་“དད་པར་འགྱུར་སྐབས་ཁྱེད་ཚོས་དཀོན་མཆོག་གི་དམ་པའི་ཐུགས་ཉིད་དང་ལེན་བྱས་སམ་”ཞེས་གསུངས་པས་ལན་དུ་ཁོ་ཚོས་“བྱེད་མ་མྱོང༌། དམ་པའི་ཐུགས་ཉིད་ཡོད་པའང་ཐོས་མ་མྱོང་”ཞེས་སྨྲས།
ACT 19:3 ཡང་པའུ་ལུས་“བྱས་ན། ཁྲུས་གསོལ་ཅི་ལེན་”ཞེས་གསུངས་པས་ཁོ་ཚོས་“ཡོ་ཧ་ནན་གྱི་ཁྲུས་གསོལ་”ཞེས་ཟེར།
ACT 19:4 པའུ་ལུས་“ཡོ་ཧ་ནན་གྱིས་མི་རྣམས་ལ་ཁོང་གི་རྗེས་སུ་ཕེབས་མཁན་ཏེ། ཡེ་ཤུ་ལ་དད་པ་བྱེད་དགོས་པར་གསུངས་ནས་སྡིག་ཉེས་སེལ་བའི་ཆེད་སྤྱོད་པ་ངན་པ་སྤངས་ནས་སེམས་བསྒྱུར་བའི་རྟགས་སུ་ཁྲུས་གསོལ་གནང་”ཞེས་གསུངས།
ACT 19:5 དེ་ཐོས་ནས་ཁོ་ཚོས་གཙོ་བོ་ཡེ་ཤུའི་མཚན་གྱི་ཐོག་ནས་ཁྲུས་གསོལ་ལེན།
ACT 19:6 པའུ་ལུས་ཁོ་རྣམས་ཀྱི་ལུས་སྟེང་དུ་ཕྱག་བཞག་ནས་དཀོན་མཆོག་གི་དམ་པའི་ཐུགས་ཉིད་ཁོ་ཚོར་བབས་ཤིང༌། སྐད་རིགས་གཞན་རྣམས་སྤྱད་ནས་སྐད་ཆ་བཤད་དེ་ལུང་ཡང་བསྟན།
ACT 19:7 དེ་དུས་བསྡོམས་པས་ཁོ་ཚོ་མི་བཅུ་གཉིས་ཙམ་ཡོད།
ACT 19:8 ཟླ་བ་གསུམ་གྱི་རིང་ལ་པའུ་ལུ་འདུ་ཁང་ལ་ཡང་ཡང་ཕེབས་ནས་འཇིགས་པ་མེད་པར་རྩོད་གླེང་མཛད་ཅིང་དཀོན་མཆོག་གི་རྒྱལ་སྲིད་ཀྱི་སྐོར་ཆོས་བསྟན་ཞིང་བསྐུལ།
ACT 19:9 ཁ་ཅིག་སེམས་མཁྲེགས་ཤིང་ཁ་ལ་མི་ཉན་པར་གྱུར་ནས་ཚོགས་པའི་མདུན་དུ་ཡེ་ཤུའི་ཐར་ལམ་ལ་ངན་སྨྲས་བྱས་པས། ཁོ་ཚོ་དང་ཁ་བྲལ་ནས་པའུ་ལུས་ཉེ་གནས་རྣམས་ཕར་འཁྲིད་དེ་ཉིན་ལྟར་ཏི་རན་ནུ་ཞེས་བྱ་བའི་སློབ་ཁང་དུ་ཆོས་བསྟན།
ACT 19:10 ཁོང་གིས་ལོ་གཉིས་རིང་དེ་ལྟར་གནང་བས་ཨེ་ཞེ་ཡཱ་ཞིང་ཆེན་ལ་སྡོད་མཁན་ཏེ་ཡ་ཧུ་དཱ་པ་དང་གྷི་རིག་མི་རིགས་ཚང་མས་གཙོ་བོ་དཀོན་མཆོག་གི་བཀའ་ཐོས་སོ། །
ACT 19:11 དཀོན་མཆོག་གིས་པའུ་ལུའི་ཕྱག་བརྒྱུད་ནས་ཤིན་ཏུ་ངོ་མཚར་ཆེ་བའི་དོན་མཛད་པ་སྟེ།
ACT 19:12 དཔེར་ན་ཁོང་གིས་གཏུགས་པའི་ལག་ཕྱིས་སམ་པང་ཁེབས་ནད་པ་རྣམས་ཀྱི་རྩར་འཁྱེར་ནས་ནད་སེལ་བར་གྱུར་ཞིང༌། གདོན་འདྲེ་རྣམས་ཕྱིར་ཐོན།
ACT 19:13 ཡ་ཧུ་དཱ་པའི་འགྲུལ་པ་གདོན་འདྲེ་སྐྲོད་མཁན་ཁ་ཅིག་གིས་གཙོ་བོ་ཡེ་ཤུའི་མཚན་བརྗོད་ནས་གདོན་འདྲེས་ཟིན་པའི་མི་རྣམས་ལ་“པའུ་ལུས་སྒྲོག་པའི་ཡེ་ཤུའི་ཐོག་ནས་ངས་ཁྱོད་ལ་བཀོད་པ་གཏོང་”ཞེས་ཟེར།
ACT 19:14 དེ་ལྟར་བྱེད་མཁན་གྱི་ནང་དུ་སི་རྐེ་བཱ་ཞེས་བྱ་བ་ཡ་ཧུ་དཱ་པའི་བླ་ཆེན་ཅིག་གི་བུ་བདུན་པོ་ཡོད།
ACT 19:15 གདོན་འདྲེ་དེས་“ངས་ཡེ་ཤུ་ངོ་ཤེས་ཤིང༌། པའུ་ལུའི་སྐོར་ཡང་ཤེས། འོན་ཀྱང་ཁྱོད་རྣམས་སུ་ཡིན་”ཞེས་ཟེར་བས།
ACT 19:16 གདོན་འདྲེས་ཟིན་པའི་མི་དེས་ཁོ་ཚོའི་སྟེང་ལ་མཆོངས་ནས་བཅོམས་པས་ཁོ་ཚོ་རྒྱལ་ཞིང་ཁོ་ཚོ་རྨས་ནས་གཅེར་བུར་ཁང་པ་ནས་བྲོས།
ACT 19:17 ཨེ་ཕེ་སུ་གྲོང་ཁྱེར་ལ་སྡོད་མཁན་ཡ་ཧུ་དཱ་པ་དང་གྷི་རིག་པ་ཐམས་ཅད་ཀྱིས་དེའི་སྐོར་ཤེས་ནས་འཇིགས་པས་གཙོ་བོ་ཡེ་ཤུའི་མཚན་ལ་བསྟོད་པ་རེད།
ACT 19:18 ཡང་དད་པར་གྱུར་བ་རྣམས་ལས་མང་པོ་དེར་ཡོང་སྟེ་རང་གི་ལས་ངན་བཤད་ནས་ཁས་བླངས་པ་དང༌།
ACT 19:19 སྔགས་རྒྱག་མཁན་རྣམས་ལས་མང་པོ་ཞིག་གིས་རང་གི་དཔེ་ཆ་རྣམས་གཅིག་ཏུ་བསྡུས་ནས་མི་ཚང་མའི་མདུན་དུ་བསྲེགས། དཔེ་ཆ་དེ་རྣམས་ཀྱི་རིན་ཐང་རྩི་དུས་དངུལ་གྱི་ཊམ་ཀ་ཁྲི་ལྔ་ཡིན།
ACT 19:20 དེ་ལྟར་གཙོ་བོ་དཀོན་མཆོག་གི་བཀའ་དར་ཞིང་རྒྱས་པར་གྱུར་རོ། །
ACT 19:21 དོན་དེ་རྣམས་བྱུང་བའི་རྗེས་སུ་པའུ་ལུས་མ་ཀེ་དོན་ཡཱ་དང་ཨ་ཀ་ཡཱ་ཡུལ་བརྒྱུད་དེ་ཡེ་རུ་ཤ་ལེམ་ལ་འགྲོ་བར་དགོངས། ཁོང་གིས་“དེར་ཕྱིན་ནས་ང་རོ་མཱ་གྲོང་ཁྱེར་དུ་ལྟ་བར་འགྲོ་དགོས་”ཞེས་གསུངས།
ACT 19:22 རོགས་པ་བྱེད་མཁན་ལས་ཐི་མོ་ཐེ་དང་ཨེ་ར་སི་ཏུ་གཉིས་མ་ཀེ་དོན་ཡཱ་ཡུལ་ལ་མངགས་ནས་ཁོང་ཉིད་དུས་རེ་ཞིག་གི་བར་དུ་ཨེ་ཞེ་ཡཱ་ཞིང་ཆེན་དུ་བཞུགས།
ACT 19:23 དུས་དེ་ཙམ་ལ་ཡེ་ཤུའི་ཐར་ལམ་གྱི་སྐོར་ལ་འཁྲུག་རྩོད་ཆེན་པོ་ཞིག་བྱུང༌།
ACT 19:24 དེ་མེ་ཏྲི་ཡུ་ཞེས་ཟེར་བའི་དངུལ་བཟོ་བ་ཞིག་གིས་ལྷ་མོ་ཨར་ཏེ་མཱི་ཡི་ལྷ་ཁང་དཔེར་བྱས་ནས་དངུལ་སྒམ་བཟོས་པས་བཟོ་པ་རྣམས་ལ་ཁེ་ཕན་ཆེན་པོ་ཐོབ།
ACT 19:25 ཁོ་ཚོ་དང་ལག་རྩལ་བཟོ་པ་གཞན་རྣམས་བསྡུས་ནས་ཁོས་“ལས་གྲོགས་རྣམས། ཉོ་ཚོང་འདིས་ངེད་རྣམས་ལ་ནོར་ཐོབ་པ་ཁྱེད་ཚོས་ཤེས།
ACT 19:26 ཨེ་ཕེ་སུ་གྲོང་ཁྱེར་ཙམ་མ་ཟད་ཨེ་ཞེ་ཡཱ་ཞིང་ཆེན་ཕལ་ཆེར་དུ་པའུ་ལུ་ཟེར་མཁན་འདིས་མིའི་ལག་པས་བཟོས་པ་དེ་ལྷ་མ་ཡིན་ཟེར་ནས། མི་མང་པོ་སེམས་བསྒྱུར་ཞིང་བསླུ་བྲིད་བྱས་པ་ཁྱེད་ཚོས་མཐོང་ཞིང་ཐོས།
ACT 19:27 ང་ཚོའི་ཉོ་ཚོང་གི་སྙན་གྲགས་ཉམས་ཉེས་སུ་འགྲོ་བའི་ཉེན་ཁ་ཡོད་པ་མ་ཟད། ལྷ་མོ་ཆེན་མོ་ཨར་ཏེ་མཱི་ཡི་ལྷ་ཁང་བརྩི་མེད་དུ་འགྱུར་ཞིང༌། ཨེ་ཞེ་ཡཱ་ཞིང་ཆེན་དང་འཇིག་རྟེན་གྱི་མི་ཐམས་ཅད་ཀྱིས་བསྙེན་བཀུར་བྱེད་པའི་ལྷ་མོ་ཉིད་ཀྱི་གཟི་བརྗིད་ཉམས་པར་འགྱུར་བའི་ཉེན་ཁའང་ཡོད་”ཅེས་སྨྲས།
ACT 19:28 མི་རྣམས་ཀྱིས་དེ་ཐོས་ཏེ་ཁོང་ཁྲོ་འབར་ནས་སྐད་ཆེན་པོས་“ཨེ་ཕེ་སུ་པའི་ལྷ་མོ་ཨར་ཏེ་མཱི་ཆེའོ་”ཞེས་ཟེར།
ACT 19:29 གྲོང་ཁྱེར་ཡོངས་སུ་ཟིང་ཆ་ལངས་ཤིང༌། མི་ཚོགས་ཀྱིས་པའུ་ལུའི་ལམ་གྲོགས་ཡིན་པའི་མ་ཀེ་དོན་ཡཱ་ཡུལ་གྱི་ག་ཡུ་དང་ཨ་རིས་ཐར་ཀུ་གཉིས་བཙན་ཁྲིད་བྱས་ཏེ་ཁོ་ཚོ་ལྷན་ཅིག་ཏུ་འཁྲབ་སར་བརྒྱུགས།
ACT 19:30 པའུ་ལུ་མི་ཚོགས་ཀྱི་མདུན་དུ་ཕེབས་པར་འདོད་ཀྱང༌། ཉེ་གནས་རྣམས་ཀྱིས་ཁོང་ཕེབས་སུ་མ་བཅུག
ACT 19:31 ཡང་པའུ་ལུའི་གྲོགས་པོ་ཡིན་པའི་ཨེ་ཞེ་ཡཱ་ཞིང་ཆེན་གྱི་དཔོན་རིགས་ཁ་ཅིག་གིས་ཁོང་ལ་འཁྲབ་སར་མ་ཕེབས་ཞེས་པའི་ལན་བཏང༌།
ACT 19:32 དེའི་དུས་སུ་ཚོགས་པ་ཟང་ཟིང་དུ་གྱུར་བས། ལ་ལས་སྐད་ཆེན་པོས་གཅིག་སྨྲས། ལ་ལས་གཞན་སྨྲས། མི་མང་ཆེ་བས་དེར་འདུས་པའི་རྒྱུ་མཚན་ཡང་མ་ཤེས།
ACT 19:33 ཡ་ཧུ་དཱ་པ་རྣམས་ཀྱིས་ཨ་ལིག་ཟན་ཌེར་མི་ཚོགས་ཀྱི་མདུན་དུ་བཞག་ནས། མི་ཚོགས་ལས་ཁ་ཅིག་གིས་ཁོ་ལ་གཏམ་བཤད་པས། ཁོས་ལག་བརྡ་བྱས་ནས་མི་ཚོགས་ལ་དོན་དེའི་སྐོར་གསལ་བཤད་བྱེད་པར་བསམས་ཀྱང༌།
ACT 19:34 ཁོ་ཡ་ཧུ་དཱ་པ་ཡིན་པར་ཤེས་ནས་ཁོ་ཚོས་ཆུ་ཚོད་གཉིས་ཙམ་ལྷན་ཅིག་ཏུ་སྐད་ཆེན་པོས་“ཨེ་ཕེ་སུ་པའི་ཨར་ཏེ་མཱི་ཆེའོ་”ཞེས་ཟེར།
ACT 19:35 གྲོང་ཁྱེར་གྱི་དྲུང་ཡིག་གིས་མི་ཚོགས་ཁ་ཁུ་སིམ་པོར་སྡོད་དུ་བཅུག་ནས་“ཁྱེད་ཨེ་ཕེ་སུ་པ་རྣམས། ཨེ་ཕེ་སུ་གྲོང་ཁྱེར་གྱི་མི་རྣམས་ནི་ལྷ་མོ་ཆེན་མོ་ཨར་ཏེ་མཱི་ཡི་ལྷ་ཁང་དང༌། ནམ་མཁའ་ནས་བབས་པའི་དེ་ཡི་སྐུ་རྟེན་སྲུང་མཁན་ཡིན་པར་སུས་མི་ཤེས།
ACT 19:36 དོན་དེར་རྩོད་རྒྱུ་མེད་པས་ཁྱེད་ཚོ་ཞི་བར་སྡོད་ཅིང༌། རྗེས་འབྲས་ལ་མི་ལྟ་བའི་ལས་མ་བྱོས།
ACT 19:37 གང་ཡིན་ཞེ་ན། ཁྱེད་རྣམས་ཀྱིས་འདིར་བཙན་འཁྲིད་བྱས་པའི་མི་རྣམས་ཀྱིས་ལྷ་ཁང་ནས་ཅི་ཡང་མ་ཕྲོགས། ང་ཚོའི་ལྷ་མོ་ལ་དམའ་འབེབས་ཡང་མ་བྱས།
ACT 19:38 གལ་ཏེ་དེ་མེ་ཏྲི་ཡུ་ལ་སོགས་པའི་ལག་རྩལ་བཟོ་པ་རྣམས་ཀྱིས་མི་སུ་ཞིག་ལ་ནག་ཉེས་འཛུགས་པར་འདོད་ན། ཁྲིམས་ཁང་སྒོ་ཕྱེ་ཡོད་དེ་སྤྱི་ཁྱབ་ཀྱང་ཡོད་པས། དེར་གཅིག་གིས་གཅིག་ལ་གཏུག་རེས་བྱས་ན་འགྲིག
ACT 19:39 དེ་ལས་ལྷག་པར་འདོད་ན་ཁྲིམས་བཞིན་དུ་འདུས་པའི་ཚོགས་པར་ཐག་གཅོད་པར་འགྱུར།
ACT 19:40 གང་ལགས་ཤེ་ན། དེ་རིང་འཁྲུག་པའི་རྒྱུ་མཚན་གང་ཡིན་པ་གསལ་བཤད་བྱེད་མི་ཐུབ་པས། ང་ཚོར་ཟིང་ཆ་སློང་བའི་ནག་ཉེས་འཛུགས་ཉེན་ཡོད་”ཅེས་སྨྲས་ནས།
ACT 19:41 ཁོས་མི་ཚོགས་ཕར་བཏང་ངོ༌། །
ACT 20:1 འཁྲུག་པ་དེ་ཞི་བར་གྱུར་བའི་རྗེས་སུ་པའུ་ལུས་ཉེ་གནས་རྣམས་བོས་ཏེ་བསྐུལ་བར་མཛད་ཅིང༌། གྱེས་མཚམས་ཞུས་ནས་མ་ཀེ་དོན་ཡཱ་ཡུལ་དུ་ཕེབས།
ACT 20:2 དད་ལྡན་རྣམས་ལ་སྐུལ་མ་མང་པོ་གནང་སྟེ་ཡུལ་དེ་རྣམས་བརྒྱུད་ནས་ཕེབས་ཤིང༌། དེའི་རྗེས་སུ་ཁོང་གྷི་རིག་ཡུལ་དུ་སླེབས་ནས།
ACT 20:3 ཟླ་བ་གསུམ་དེར་བཞུགས། ཁོང་གྲུ་གཟིངས་ལ་བསྡད་ནས་སི་རི་ཡཱ་ཡུལ་ལ་ཕེབས་གྲབས་ཡོད་པའི་སྐབས་སུ། ཡ་ཧུ་དཱ་པ་རྣམས་ཀྱིས་ཁོང་གསོད་པའི་ཇུས་ངན་བརྩམས་པས་ཁོང་གིས་མ་ཀེ་དོན་ཡཱ་ཡུལ་བརྒྱུད་ནས་ཕྱིར་ཕེབས་རྒྱུར་ཐག་བཅད་དོ།
ACT 20:4 ཁོང་དང་མཉམ་དུ་འགྲོ་མཁན་ནི་པིར་རུ་ཡི་བུ་པུ་རེ་ཡཱ་ནས་ཡིན་པའི་སཱོ་པ་ཏེར་དང༌། ཐེ་ས་ལོ་ནི་ཀེ་ནས་ཡིན་པའི་ཨ་རིས་ཐར་ཀུ་དང་སེ་ཀུན་ཊུ་གཉིས། ཌེར་པེ་ནས་ཡིན་པའི་ག་ཡུ། ཐི་མོ་ཐེ། ཨེ་ཞེ་ཡཱ་ཞིང་ཆེན་ནས་ཡིན་པ་ཏི་ཀི་ཀུ་དང་ཏྲོ་ཕེ་མུ་བཅས་ཡིན།
ACT 20:5 ཁོ་ཚོ་ཚང་མ་སྔོན་དུ་ཕྱིན་ནས་ང་ཚོ་མ་སླེབས་པའི་བར་དུ་ཏྲོ་ཡཱ་གྲོང་ཁྱེར་དུ་བསྒུགས།
ACT 20:6 སྐྱུར་རྩི་མེད་པའི་བག་ལེབ་དུས་ཆེན་གྱི་རྗེས་སུ་ང་ཚོ་ཕི་ལིབ་པཱི་གྲོང་ཁྱེར་ནས་གྲུ་གཟིངས་ལ་ཉི་མ་ལྔ་བསྡད་རྗེས་ཏྲོ་ཡཱ་ལ་ཁོ་ཚོ་དང་ཐུག་ཅིང༌། ཉི་མ་བདུན་དེར་བསྡད།
ACT 20:7 བདུན་ཕྲག་གི་ཉིན་དང་པོར་ང་ཚོ་བག་ལེབ་བགོ་བཤའ་རྒྱག་པར་འཛོམས་པའི་ཚེ། པའུ་ལུས་དེའི་སང་ཉིན་ཕར་ཕེབས་པར་དགོངས་པས་ནམ་ཕྱེད་བར་དུ་ཆོས་བསྟན་ཏེ་བཞུགས།
ACT 20:8 ང་ཚོ་ལྷན་དུ་འཛོམས་པའི་ཐོག་ཁང་ལ་མར་མེ་མང་པོ་ཡོད།
ACT 20:9 ཡང་སྒེའུ་ཁུང་གི་འཁྲིས་སུ་བསྡད་པའི་ཡུ་ཏི་ཀུ་ཞེས་ཟེར་བའི་གཞོན་ནུ་ཞིག་ཡོད་དེ། པའུ་ལུས་ཡུན་རིང་པོར་ཆོས་བསྟན་དུས་ཁོ་གཉིད་ལྗིད་པོ་ཁུགས་པས་ཐོག་ས་གསུམ་པ་ནས་སར་ལྷུངས་པ་དང༌། མི་གཞན་གྱིས་འཁྱེར་དུས་ཤི་ཟིན་ཡོད་དོ།
ACT 20:10 པའུ་ལུ་མར་ཕེབས་ནས་རོའི་སྟེང་ལ་བཀབ་ནས་འཐམས། ཁོང་གིས་“གསོན་པོར་འདུག་པས་དངངས་སྐྲག་མ་བྱེད་ཅིག་”ཅེས་གསུངས།
ACT 20:11 ཐོག་ཁང་དུ་ཕྱིར་ཕེབས་ནས་ཁོང་གིས་གཙོ་བོའི་དྲན་རྟེན་གྱི་ཞལ་ཟས་སྤྱོད་པ་དང་ཁ་ལག་བཟས་ཤིང༌། ནམ་ལངས་པའི་བར་དུ་ཁོ་ཚོ་དང་གསུང་གླེང་མང་པོ་མཛད་ནས་ཕར་ཕེབས།
ACT 20:12 གསོན་པོའི་གཞོན་ནུ་དེ་ནང་ལ་འཁྲིད་པས་ཁོ་ཚོ་སེམས་ཤིན་ཏུ་གསོ་བར་གྱུར།
ACT 20:13 པའུ་ལུའི་བཀོད་སྒྲིག་ལྟར་ང་ཚོ་སྔོན་དུ་ཕྱིན་ནས་ཨ་སཱོ་ཞེས་པའི་གྲོང་ཁྱེར་བར་དུ་གྲུ་གཟིངས་ལ་བསྡད་དེ་དེར་པའུ་ལུ་དང་ཕྲད་ནས་ང་ཚོ་ཚང་མ་གྲུ་གཟིངས་ལ་བཞུགས་ནས་ཕར་འགྲོ་བར་བསམས། པའུ་ལུ་ཉིད་ཞབས་ཐང་ལ་ཕེབས་རྩིས་གནང༌།
ACT 20:14 ཨ་སཱོ་ལ་ཁོང་ང་ཚོ་དང་མཇལ་ནས་གྲུ་གཟིངས་ལ་བསུས་ཏེ་མཉམ་དུ་མི་ཏི་ལེ་ནེ་གྲོང་ཁྱེར་དུ་སླེབས་ཤིང༌།
ACT 20:15 ས་ཆ་དེ་ནས་ཡང་བསྐྱར་གྲུ་གཟིངས་ལ་བསྡད་དེ་ཕྱི་ཉིན་ལ་ཀི་ཨོ་སི་ཞེས་པའི་གླིང་ཕྲན་གྱི་ཕྱོགས་སུ་སླེབས། དེའི་སང་ཉིན་སཱ་མོ་སི་ཞེས་པའི་གླིང་ཕྲན་དུ་ཡོང་བ་དང༌། དེའི་ཕྱི་ཉིན་མི་ལེ་ཏུ་ཞེས་ཟེར་བའི་གྲུ་ཁར་སླེབས།
ACT 20:16 གང་ཡིན་ཞེ་ན། པའུ་ལུས་ཨེ་ཞེ་ཡཱ་ཞིང་ཆེན་ལ་དུས་འགྱངས་མ་བྱེད་པའི་ཆེད་དུ་ཨེ་ཕེ་སུ་གྲོང་ཁྱེར་ལ་མི་འགྲོ་བར་ཐག་གཅོད་བྱས། དེ་ནི་མྱུར་བར་བསྐྱོད་ནས་ཉི་མ་ལྔ་བཅུ་པའི་དུས་ཆེན་གྱི་ཉིན་མོར་ཡེ་རུ་ཤ་ལེམ་ལ་སླེབས་ན་སྙམ་པས་སོ། །
ACT 20:17 མི་ལེ་ཏུ་ནས་པའུ་ལུས་ཨེ་ཕེ་སུའི་ཆོས་ཚོགས་ཀྱི་འགན་འཁུར་བ་རྣམས་རང་གི་མདུན་དུ་བོས་པ་དང༌།
ACT 20:18 ཁོང་གི་མདུན་དུ་སླེབས་ནས་ཁོང་གིས་ཁོ་རྣམས་ལ་“ང་ཨེ་ཞེ་ཡཱ་ཞིང་ཆེན་དུ་སླེབས་པའི་ཉིན་དང་པོ་ནས་བཟུང་ཁྱེད་ཚོའི་ཁྲོད་དུ་ངའི་སྤྱོད་ལམ་ཇི་ལྟར་ཡིན་པ་ཁྱེད་རྣམས་ཀྱིས་ཤེས།
ACT 20:19 ཆེས་ཉམ་ཆུང་དང་མིག་ནས་མཆི་མ་ལྷུངས་ཤིང་ངས་གཙོ་བོ་ལ་ཞབས་ཏོག་བསྒྲུབས། ཡ་ཧུ་དཱ་པའི་ཇུས་ངན་ལས་བྱུང་བའི་ཉམས་ཚོད་མྱོང༌།
ACT 20:20 ཁྱེད་རྣམས་ལ་ཕན་པའི་དོན་གང་ཡོད་སྒྲོག་པར་མ་འཛེམ་པར་ངས་མི་ཚོགས་ཀྱི་མདུན་དང་ཁང་པ་རེ་རེར་ཆོས་བསྟན།
ACT 20:21 ངས་ཡ་ཧུ་དཱ་པ་དང་གྷི་རིག་པ་གཉིས་ལ་སྤྱོད་པ་ངན་པ་སྤངས་ནས་དཀོན་མཆོག་གི་ཕྱོགས་སུ་སེམས་བསྒྱུར་ཏེ་ང་ཚོའི་གཙོ་བོ་ཡེ་ཤུ་ལ་དད་པ་བྱེད་དགོས་པར་ནན་གྱིས་བསྐུལ།
ACT 20:22 ད་ལྟ་དམ་པའི་ཐུགས་ཉིད་ཀྱིས་བསྐུལ་ནས་ཡེ་རུ་ཤ་ལེམ་ལ་འགྲོ་བཞིན་ཡོད། དེར་ང་ལ་གང་འབྱུང་བ་མི་ཤེས་ཀྱང༌།
ACT 20:23 གྲོང་ཁྱེར་རེར་དམ་པའི་ཐུགས་ཉིད་ཀྱིས་ང་ལ་བཙོན་དང་སྡུག་བསྔལ་མྱོང་བར་འགྱུར་ཞེས་བདེན་དཔང་མཛད་པ་དེ་འབའ་ཞིག་ཤེས།
ACT 20:24 འོན་ཀྱང་ངས་རང་གི་བགྲོད་ལམ་མཇུག་རྫོགས་དགོས་ཏེ་གཙོ་བོ་ཡེ་ཤུ་ལས་ཐོབ་པའི་དཀོན་མཆོག་གི་ཐུགས་རྗེའི་འཕྲིན་བཟང་ལ་བདེན་དཔང་བྱེད་པའི་ཞབས་ཏོག་དང་ལས་དོན་བསྒྲུབས་ན། ངས་རང་སྲོག་གཅེས་པར་མི་རྩི།
ACT 20:25 ཁྱེད་ཚོའི་ཁྲོད་དུ་ཕར་འགྲོ་ཚུར་འོངས་ཀྱིས་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་སྟེ། ད་ནས་བཟུང་ཁྱེད་ཚོ་ཚང་མས་ངའི་གདོང་མཐོང་བར་མི་འགྱུར་བ་ངས་ཤེས།
ACT 20:26 དེའི་ཕྱིར་ཁྱེད་ཚོའི་ནང་ནས་སུ་ཞིག་གཙོ་བོ་ཡེ་ཤུ་ལ་དད་པ་མི་བྱེད་པར་ཤི་ན། ང་ལ་འགན་མེད་པ་ཡིན་པར་དེ་རིང་ཁྱེད་ཚོར་དཔང་པོ་བྱེད།
ACT 20:27 གང་ལགས་ཤེ་ན། ངས་ཁྱེད་རྣམས་ལ་དཀོན་མཆོག་གི་དགོངས་པ་ཆ་ཚང་སྒྲོག་པར་མ་འཛེམས་པས་སོ།
ACT 20:28 དམ་པའི་ཐུགས་ཉིད་ཀྱིས་ཁྱེད་ཚོ་ཆོས་ཚོགས་ཀྱི་དོ་དམ་པར་བསྒྱུར་བས་ཁྱེད་ཚོ་རང་ཉིད་དང་ཆོས་ཚོགས་ཀྱི་མི་ཐམས་ཅད་སྲུངས། དེ་ནི་དཀོན་མཆོག་གིས་སྲས་ཀྱི་སྐུ་ཁྲག་བླུ་རིན་གྱིས་ཐོབ་པའི་ཆོས་ཚོགས་ལ་ཁྱེད་ཚོས་ལུག་རྫི་ལྟར་བདག་སྐྱོང་བྱེད་པའི་ཆེད་དུ་ཡིན།
ACT 20:29 ང་ཕར་ཕྱིན་པའི་རྗེས་སུ་སྤྱང་ཀི་གདུག་པ་དང་འདྲ་བའི་མི་རྣམས་ལུག་ཁྱུ་དང་འདྲ་བའི་ཁྱེད་ཚོའི་དཀྱིལ་ལ་ཡོང་ནས་དད་ལྡན་རྣམས་ལ་གནོད་པ་བྱེད་པ་ངས་ཤེས།
ACT 20:30 ཁྱེད་ཚོའི་ཚོགས་པའི་ནང་ནས་ཀྱང་ཁ་ཅིག་གིས་དད་ལྡན་རྣམས་རང་གི་ཉེ་གནས་སུ་འཇུག་པའི་ཕྱིར་ལོག་ལྟ་སྟོན་པར་ངེས།
ACT 20:31 དེར་བརྟེན་དོགས་ཟོན་གྱིས་ཤིག ལོ་གསུམ་རིང་ངས་ཉིན་མཚན་མེད་པར་མིག་ཆུ་དང་བཅས་པར་མི་རེ་རེར་ཁ་ཏ་བྱས་པ་དེ་ཡིད་ལ་འཇོག་ཅིག
ACT 20:32 ད་ངས་དཀོན་མཆོག་དང་ཁོང་གི་ཐུགས་རྗེའི་བཀའ་ལ་ཁྱེད་རྣམས་འཆོལ། བཀའ་དེས་ཁྱེད་ཚོར་བློ་སྒོ་འབྱེད་ཅིང་དམ་པ་རུ་འགྱུར་བ་ཐམས་ཅད་དང་མཉམ་དུ་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་བགོ་སྐལ་གནང་ཐུབ་བོ།
ACT 20:33 ངས་མི་སུ་གང་གི་དངུལ་ལམ། གསེར་རམ། གྱོན་གོས་བཅས་ལ་ཧམ་སེམས་བཅངས་མེད།
ACT 20:34 ངས་རང་གི་ལག་པ་གཉིས་ལ་བརྟེན་ནས་ང་དང་ངའི་ལས་རོགས་ཀྱི་དགོས་མཁོ་བསྒྲུབས་པ་ཁྱེད་ཉིད་ཀྱིས་ཤེས།
ACT 20:35 གཙོ་བོ་ཡེ་ཤུ་ཉིད་ཀྱིས་ཐོབ་པ་ལས་སྦྱིན་པ་བདེ་བ་ཆེའོ་ཞེས་གསུངས་པར་དྲན་ཏེ། དེ་བཞིན་དུ་ངལ་རྩོལ་བྱེད་པའི་སྒོ་ནས་ངས་ཐབས་ཀུན་གྱིས་ཁྱེད་ཚོར་སྐྱོ་པོ་རྣམས་ལ་རོགས་པ་བྱེད་དགོས་པའི་མིག་དཔེ་ཞིག་བསྟན་ཡོད་”ཅེས་གསུངས་པའི་རྗེས་སུ།
ACT 20:36 པུས་མོ་སར་བཙུགས་ཏེ་ཁོང་གིས་ཁོ་ཚོ་ཐམས་ཅད་དང་མཉམ་དུ་སྨོན་ལམ་བཏབ།
ACT 20:37 ཤུགས་ཆེན་པོར་ངུས་ཏེ་ཁོ་ཚོ་ཐམས་ཅད་ཀྱིས་པའུ་ལུ་ལ་འཐམས་ནས་འགྲམ་པར་འོ་བྱས།
ACT 20:38 ཁོང་གིས་ད་ནས་བཟུང་ངའི་གདོང་རྩ་བ་ནས་མཐོང་བར་མི་འགྱུར་ཞེས་གསུངས་པས་ཁོ་ཚོའི་སེམས་ཧ་ཅང་སྐྱོ་བར་གྱུར། དེ་ནས་ཁོ་ཚོས་པའུ་ལུ་གྲུ་གཟིངས་ལ་བསྐྱལ་ལོ། །
ACT 21:1 ཁོ་རྣམས་དང་ཁ་བྲལ་ཏེ་གྲུ་གཟིངས་ལ་བསྡད་ནས་ང་ཚོ་ཀོ་ཟི་ཞེས་པའི་གླིང་ཕྲན་དུ་ཐད་ཀར་ཕྱིན་ཞིང༌། དེའི་སང་ཉིན་རོའོ་ཏི་ཞེས་ཟེར་བའི་གླིང་ཕྲན་དང༌། ས་ཆ་དེ་ནས་པ་ཏ་རཱ་གྲུ་ཁར་སླེབས།
ACT 21:2 དེར་ཕེ་ནི་ཀེ་ཡུལ་ལ་འགྲོ་བའི་གྲུ་གཟིངས་ཤིག་དང་ཕྲད་ནས་དེ་ལ་འཛུལ་ནས་ང་ཚོ་ཕྱིན།
ACT 21:3 ཀིབ་རུ་གླིང་ཕྲན་མཐོང་ནས་དེ་གཡོན་ཕྱོགས་སུ་བཞག་སྟེ་སི་རི་ཡཱ་ཡུལ་ལ་གྲུ་གཟིངས་ཀྱི་དོས་པོ་འདོན་སའི་གྲུ་ཁ་ཐཱ་ཨེར་དུ་སླེབས།
ACT 21:4 དད་ལྡན་རྣམས་བཙལ་ནས་རྙེད་ཅིང་ང་ཚོ་དེར་ཉི་མ་བདུན་གྱི་བར་དུ་བསྡད། ཁོ་རྣམས་ཀྱིས་དམ་པའི་ཐུགས་ཉིད་ཀྱི་ངང་ནས་པའུ་ལུ་ལ་ཡེ་རུ་ཤ་ལེམ་ལ་མ་ཕེབས་ཞེས་ཞུས།
ACT 21:5 དེར་ང་ཚོ་བསྡད་ཐུབ་པའི་དུས་ཚོད་རྫོགས་ནས་ང་ཚོ་ལམ་ལ་ཆས་པ་ལ། དད་ལྡན་ཐམས་ཅད་ཀྱིས་བཟའ་ཟླ་དང་ཕྲུ་གུ་དང་བཅས་པར་ང་ཚོ་གྲོང་ཁྱེར་གྱི་ཕྱི་ཕྱོགས་སུ་བསྐྱལ། ངེད་རྣམས་ཀྱིས་རྒྱ་མཚོའི་འགྲམ་ལ་པུས་མོ་སར་བཙུགས་ཏེ་སྨོན་ལམ་བཏབ།
ACT 21:6 ཕན་ཚུན་གྱེས་མཚམས་ཞུས་ནས་ངེད་རྣམས་གྲུ་གཟིངས་ལ་བསྡད་པ་དང༌། ཁོ་རྣམས་སོ་སོའི་ཁྱིམ་དུ་ཕྱིར་ལོག
ACT 21:7 ཐཱ་ཨེར་ནས་མཚོ་ལམ་བརྒྱུད་དེ་ཕེ་ཏོ་ལེ་མཱ་ཞེས་པའི་གྲུ་ཁར་སླེབས། སྤུན་ཟླ་རྣམས་ལ་འཚམས་འདྲི་ཞུས་ནས་ཉི་མ་གཅིག་ཁོ་ཚོ་དང་མཉམ་དུ་བསྡད།
ACT 21:8 དེའི་ཕྱི་ཉིན་ལ་ཕར་ཕྱིན་ཏེ་སེ་སར་རེ་ཡཱ་གྲོང་ཁྱེར་དུ་སླེབས་པ་དང༌། འཕྲིན་བཟང་སྒྲོག་མཁན་ཕི་ལིབ་ཀྱི་ཁྱིམ་དུ་སོང་ནས་ཁོ་དང་མཉམ་དུ་བསྡད། ཕི་ལིབ་ནི་བདུན་པོའི་ནང་ནས་གཅིག་ཡིན།
ACT 21:9 ཁོ་ལ་ཆང་ས་རྒྱག་མ་མྱོང་བའི་བུ་མོ་བཞི་ཡོད་པ་ཚང་མ་ལུང་སྟོན་མཁན་ཡིན།
ACT 21:10 དེར་ཉིན་ཁ་ཤས་སྡོད་དུས་ཨ་ག་བཱུ་ཞེས་ཟེར་བའི་ལུང་སྟོན་པ་ཞིག་ཡ་ཧུ་དཱ་ཡུལ་ནས་སླེབས་པ་དང༌།
ACT 21:11 ངེད་རྣམས་ཀྱི་རྩར་ཡོང་སྟེ། པའུ་ལུའི་སྐེ་རགས་བླངས་ནས་རང་གི་རྐང་ལག་བཅིངས་ཏེ་ཁོང་གིས་“དམ་པའི་ཐུགས་ཉིད་ཀྱིས་འདི་སྐད་དུ། ཡེ་རུ་ཤ་ལེམ་གྱི་ཡ་ཧུ་དཱ་པ་རྣམས་ཀྱིས་སྐེ་རགས་འདིའི་བདག་པོ་འདི་ལྟར་བཅིངས་ནས་ཡ་ཧུ་དཱ་པ་མིན་པའི་ལག་ཏུ་གཏད་”ཅེས་གསུངས།
ACT 21:12 དེ་ཐོས་ནས་ང་ཚོ་དང་ཡུལ་དེའི་མི་རྣམས་ཀྱིས་པའུ་ལུ་ལ་ཡེ་རུ་ཤ་ལེམ་ལ་མ་ཕེབས་པར་ནན་གྱིས་བསྐུལ།
ACT 21:13 ལན་དུ་པའུ་ལུས་“ཁྱོད་རྣམས་ངུ་ནས་ངའི་སྙིང་གས་པར་བྱེད་པ་འདི་ཅི་ཡིན། ང་ནི་གཙོ་བོ་ཡེ་ཤུའི་མཚན་གྱི་ཕྱིར་འཆིང་བར་འགྱུར་བ་མ་ཟད། ཡེ་རུ་ཤ་ལེམ་ལ་ཤི་རྒྱུར་ཡང་གྲ་སྒྲིག་ཡོད་”ཅེས་གསུངས།
ACT 21:14 ཁོང་གི་ཐུགས་བསྒྱུར་མི་ཐུབ་པས་ང་ཚོས་“གཙོ་བོ་དཀོན་མཆོག་གི་དགོངས་པ་འགྲུབ་པར་ཤོག་”ཅེས་སྨྲས་པ་དང་ཁ་རོག་བསྡད།
ACT 21:15 དེའི་རྗེས་སུ་ལམ་ཆས་གྲ་སྒྲིག་བྱས་ནས་ང་ཚོ་ཡེ་རུ་ཤ་ལེམ་དུ་སོང༌།
ACT 21:16 སེ་སར་རེ་ཡཱ་གྲོང་ཁྱེར་གྱི་ཉེ་གནས་ལས་ཁ་ཅིག་ངེད་རྣམས་དང་མཉམ་དུ་ཕྱིན་ཏེ། ཁོ་ཚོས་ཀིབ་རུ་གླིང་ཕྲན་གྱི་མི་སྔ་མོ་ནས་ཉེ་གནས་ཡིན་པ་ནཱ་ཟོན་གྱི་ཁྱིམ་དུ་སྡོད་པའི་ཕྱིར་ངེད་རྣམས་འཁྲིད།
ACT 21:17 ཡེ་རུ་ཤ་ལེམ་ལ་སླེབས་ནས་དེར་ཡོད་པའི་སྤུན་ཟླ་རྣམས་ཀྱིས་ང་ཚོ་དགའ་བའི་ངང་ནས་བསུས།
ACT 21:18 དེའི་སང་ཉིན་ཡ་ཀོབ་མཇལ་བར་པའུ་ལུ་ང་ཚོ་དང་མཉམ་དུ་ཕེབས་ཤིང༌། འགན་འཁུར་བ་ཐམས་ཅད་ཀྱང་དེར་ཡོད།
ACT 21:19 པའུ་ལུས་ཁོ་ཚོར་འཚམས་འདྲི་ཞུས་ནས། དཀོན་མཆོག་གིས་ཁོང་གི་ལས་ཀ་བརྒྱུད་དེ་ཡ་ཧུ་དཱ་པ་མིན་པ་རྣམས་ཀྱི་ནང་ལ་གང་མཛད་པ་རེ་རེ་བཞིན་གསུངས།
ACT 21:20 དེ་ཐོས་ནས་ཁོ་ཚོས་དཀོན་མཆོག་ལ་བསྟོད་པ་ཕུལ་བ་དང༌། པའུ་ལུ་ལ་“སྤུན་ཟླ་ལགས། ཡ་ཧུ་དཱ་པ་རྣམས་ཀྱི་ཁྲོད་དུ་མི་སྟོང་ཕྲག་མང་པོ་དད་ལྡན་པར་གྱུར་བ་ཁྱེད་ཀྱིས་གཟིགས། ཁོ་ཚོ་ཐམས་ཅད་ཀྱིས་བརྩོན་སེམས་ཆེན་པོས་ཆོས་ཁྲིམས་སྲུང་གི་ཡོད།
ACT 21:21 ཡང་ཡ་ཧུ་དཱ་པ་མིན་པའི་ཁྲོད་དུ་སྡོད་པའི་ཡ་ཧུ་དཱ་པ་ཐམས་ཅད་ལ་ཁྱེད་ཀྱིས་མོ་ཤེའི་ཆོས་ཁྲིམས་སྤོང་བར་བསྐུལ་ཏེ་ཁོ་ཚོའི་བུ་རྣམས་ལ་ཡ་ཧུ་དཱ་པའི་ཆོས་ཀྱི་རྟགས་མི་རྒྱག་ཅིང༌། ཆོས་ཀྱི་ལུགས་སྲོལ་མི་སྲུང་བར་སྟོན་ཞེས་པའི་གཏམ་འཆལ་ཁོ་ཚོས་ཐོས།
ACT 21:22 བྱས་ན། ཁྱེད་འདིར་ཕེབས་པ་ཁོ་ཚོས་ཐོས་པར་འགྱུར་ངེས་ཡིན། ང་ཚོས་ཅི་བྱ།
ACT 21:23 ང་ཚོས་སྨྲ་བ་ལྟར་མཛོད་ཅིག ང་ཚོའི་ནང་ན་དམ་བཅའ་པ་བཞི་ཡོད།
ACT 21:24 ཁོ་ཚོ་དང་མཉམ་དུ་ཆོས་ཀྱི་གཙང་སྦྲ་བྱེད་པའི་ཆོ་ག་བྱོས་དང༌། ཁོ་ཚོའི་སྐྲ་འབྲེག་པའི་ཕྱིར་ཁོ་ཚོར་འགྲོ་སོང་ཕུལ་ཅིག དེ་ནས་མི་རྣམས་ཀྱིས་ཁྱེད་ཀྱི་སྐོར་ལ་ཐོས་པའི་གཏམ་མི་བདེན་པ་ཡིན་ཞིང༌། ཁྱེད་ཉིད་ཀྱིས་ཆོས་ཁྲིམས་སྲུང་བ་མི་ཐམས་ཅད་ཀྱིས་ཤེས་པར་འགྱུར།
ACT 21:25 ཡང་དད་པར་གྱུར་བའི་ཡ་ཧུ་དཱ་པ་མིན་པ་རྣམས་ཀྱི་སྐོར་ང་ཚོས་ཐག་གཅོད་བྱས་ཏེ། ཁོ་ཚོས་ལྷ་སྐུ་ལ་ཕུལ་བའི་ཤ ཁྲག སྐེ་བཙིར་ནས་གསོད་པའི་དུད་འགྲོའི་ཤ ལོག་གཡེམ་བཅས་ལ་འཛེམ་དགོས་ཞེས་པའི་ཡི་གེ་ཞིག་བཏང་”ཞེས་བཤད།
ACT 21:26 དེའི་སང་ཉིན་མི་དེ་ཚོ་བཞི་འཁྲིད་དེ་པའུ་ལུས་ཁོ་ཚོ་དང་བཅས་པར་གཙང་སྦྲ་བྱེད་པའི་ཆོ་ག་མཛད། དེ་ནས་ཁོང་ཚོ་རེ་རེའི་ཆེད་དུ་མཆོད་པ་ཕུལ་བའི་ཉི་མ་དང༌། གཙང་སྦྲ་འགྲུབ་པའི་དུས་ཡ་ཧུ་དཱ་པའི་བླ་མར་སྨྲ་བའི་ཕྱིར་མཆོད་ཁང་ཆེན་མོར་ཕེབས།
ACT 21:27 གཙང་སྦྲ་བྱེད་པའི་ཉིན་བདུན་པོ་རྫོགས་ལ་ཉེ་བའི་སྐབས་ཨེ་ཞེ་ཡཱ་ཞིང་ཆེན་ནས་ཡིན་པའི་ཡ་ཧུ་དཱ་པ་ཁ་ཅིག་གིས་མཆོད་ཁང་ལ་པའུ་ལུ་མཐོང་ནས། མི་ཚོགས་ཀུན་ལ་ངན་བསྐུལ་བྱས་ཏེ་ཁོང་འཛིན་བཟུང་བྱས།
ACT 21:28 ཁོ་ཚོས་སྐད་ཆེན་པོས་“ཡི་སི་ར་ཨེལ་པ་རྣམས་ང་ཚོར་རོགས་རམ་བྱོས་ཤིག མི་འདི་ནི་ཡུལ་ཀུན་ཏུ་མི་ཐམས་ཅད་ལ་ངེད་རྣམས་ཀྱི་མི་རིགས་དང༌། ཆོས་ཁྲིམས། གནས་འདི་བཅས་ལ་ངོ་རྒོལ་བྱེད་མཁན་ཡིན། དེས་མ་ཚད་གྷི་རིག་པ་རྣམས་ཀྱང་མཆོད་ཁང་གི་ནང་དུ་འཁྲིད་པས་ཁོས་གནས་མཆོག་འདི་མི་གཙང་བར་བྱས་”ཞེས་བཤད།
ACT 21:29 (གང་ཡིན་ཞེ་ན། སྔར་ཁོ་ཚོས་གྲོང་ཁྱེར་ལ་ཡུལ་ཨེ་ཕེ་སུ་ནས་ཡིན་པའི་ཏྲོ་ཕེ་མུ་ཁོང་དང་འགྲོགས་པར་མཐོང་ཡོད་པས། པའུ་ལུས་ཁོ་མཆོད་ཁང་ཆེན་མོའི་ནང་དུ་འཁྲིད་པ་ཡིན་པར་སྙམ་)
ACT 21:30 གྲོང་ཁྱེར་གྱི་མི་ཚང་མ་འཁྲུགས་པར་གྱུར་ནས། ཁོ་རྣམས་དེར་ལྷན་ཅིག་ཏུ་བརྒྱུགས་ཏེ་པའུ་ལུ་བཟུང༌། ཁོང་མཆོད་ཁང་གི་ར་བ་ནས་ཕྱི་རོལ་ཏུ་བཙན་ཁྲིད་བྱས་མ་ཐག་ལམ་སེང་རྒྱལ་སྒོ་བརྒྱབ།
ACT 21:31 ཁོང་གསོད་ཐབས་བྱེད་དུས་རོ་མཱ་དམག་མིའི་སྟོང་དཔོན་གྱིས་ཡེ་རུ་ཤ་ལེམ་ཡོངས་སུ་ཟིང་ཆ་ལངས་ཞེས་ཟེར་བའི་གཏམ་ཐོས་ནས།
ACT 21:32 མྱུར་དུ་བརྒྱ་དཔོན་དང་དམག་མི་འཁྲིད་དེ་ཁོ་ཚོའི་རྩར་བརྒྱུགས། མི་ཚོགས་ཀྱིས་སྟོང་དཔོན་དང་དམག་མི་རྣམས་མཐོང་ནས་པའུ་ལུ་ལ་རྡུང་བ་མཚམས་བཞག
ACT 21:33 སྟོང་དཔོན་ཡོང་སྟེ་པའུ་ལུ་འཛིན་བཟུང་བྱས་པ་དང༌། ལྕགས་ཐག་གཉིས་ཀྱིས་འཆིང་བའི་བཀའ་བསྒོས་ནས་ཁོང་སུ་ཡིན་དང་ཅི་ཞིག་བྱས་པའི་སྐད་ཆ་དྲིས།
ACT 21:34 མི་ཚོགས་ཀྱི་ཁྲོད་དུ་ལ་ལས་སྐད་ཆེན་པོས་གཅིག་སྨྲས། ལ་ལས་གཞན་སྨྲས་པས། སྐད་ཅོར་གྱི་རྐྱེན་པས་གནས་ཚུལ་ངེས་པར་ཤེས་མ་ཐུབ་པས་ཁོས་པའུ་ལུ་མཁར་རྫོང་ལ་འཁྲིད་དགོས་པའི་བཀའ་བཏང༌།
ACT 21:35 མཁར་རྫོང་གི་རྡོ་སྐས་ཀྱི་བར་དུ་སླེབས་ནས་མི་ངན་འཛོམས་ཏེ་དྲག་སྤྱོད་ཆེན་པོར་གྱུར་བས་དམག་མི་རྣམས་ཀྱིས་ཁོང་ཡར་བཏེགས་ནས་འཁུར་དགོས་བྱུང༌།
ACT 21:36 གང་ཡིན་ཟེར་ན། མི་ཚོགས་མང་པོ་ཞིག་ཁོང་ཚོའི་རྗེས་སུ་འབྲངས་ཏེ་སྐད་ཆེན་པོས་“ཁོ་སོད་ཅིག་”ཅེས་སྨྲས།
ACT 21:37 མཁར་རྫོང་གི་ནང་དུ་འཁྲིད་པའི་སྐབས་སུ་པའུ་ལུས་སྟོང་དཔོན་ལ་“ཁྱེད་ལ་གཅིག་ཞུས་ན་ཆོག་གམ་”ཞེས་གསུངས་པས་སྟོང་དཔོན་གྱིས་“ཁྱོད་ཀྱིས་གྷི་རིག་སྐད་ཤེས་སམ།
ACT 21:38 དེས་ན་ཁྱོད་ནི་ཉེ་ཆར་ཟིང་འཁྲུག་བསླངས་ནས་ལྐོག་གསོད་གཏོང་མཁན་ཟེར་བའི་ངོ་ལོག་པ་བཞི་སྟོང་དབེན་གནས་ལ་འཁྲིད་མཁན་ཨེ་ཇེབ་པ་མ་ཡིན་ནམ་”ཞེས་དྲིས་པས།
ACT 21:39 ལན་དུ་པའུ་ལུས་“ང་ནི་ཡ་ཧུ་དཱ་པ་དང༌། ཀི་ལིག་ཡཱ་ཡུལ་གྱི་གྲོང་ཁྱེར་གལ་ཆེན་ཊར་སཱུ་ཡི་མངའ་འབངས་ཤིག་ཡིན། མི་ཚོགས་ལ་གཏམ་བརྗོད་པའི་ཆོག་མཆན་གནང་རོགས་གནང་”ཞེས་གསུངས།
ACT 21:40 སྟོང་དཔོན་གྱིས་དེ་ལྟར་ཁས་ལེན་པ་ལ། པའུ་ལུས་རྡོ་སྐས་སུ་ལངས་ནས་མི་ཚོགས་ལ་ལག་བརྡ་བྱས་ཤིང༌། ཁོ་ཚོ་ཁ་ཁུ་སིམ་པོར་གྱུར་ནས་ཡ་ཧུ་དཱ་པའི་སྐད་དུ་གསུངས་སོ། །
ACT 22:1 པའུ་ལུས་“རྒན་པོ་དང་སྤུན་ཟླ་རྣམས། ད་ལྟ་ངས་ཁྱེད་ཚོ་ལ་འདིར་གང་བྱུང་བའི་སྐོར་གསལ་བཤད་ཞུ་རྒྱུ་ཡིན་པས་གསན་རོགས་གནང་”ཞེས་གསུངས།
ACT 22:2 ཁོང་གིས་ཁོ་ཚོར་ཡ་ཧུ་དཱ་པའི་སྐད་ནས་གསུངས་པ་ཐོས་ནས་མི་ཚོགས་དེ་བས་ཁ་ཁུ་སིམ་པོར་གྱུར། ཁོང་གིས་
ACT 22:3 “ང་ནི་ཀི་ལིག་ཡཱ་ཡུལ་གྱི་ཊར་སཱུ་གྲོང་ཁྱེར་ལ་སྐྱེས་པའི་ཡ་ཧུ་དཱ་པ་ཞིག་ཡིན་ཞིང༌། གྲོང་ཁྱེར་འདིར་འཚར་ལོངས་བྱུང༌། ངེད་རྣམས་ཀྱི་མེས་པོའི་ཆོས་ཁྲིམས་ལྟར་སློབ་དཔོན་གཱ་མ་ལི་ཨེལ་དྲུང་དུ་ནན་ཏན་གྱིས་སྦྱངས་པ་བྱས་ཏེ། ཁྱེད་ཚོ་ཐམས་ཅད་ཀྱིས་དེ་རིང་བརྩོན་སེམས་ཆེན་པོས་དཀོན་མཆོག་ལ་བཀུར་སྟི་ཞུ་བ་ལྟར། ངས་ཀྱང་དཀོན་མཆོག་ལ་བཀུར་སྟི་ཞུས།
ACT 22:4 ངས་ལམ་འདིར་ཞུགས་པའི་མི་རྣམས་ལ་སྲོག་གཅོད་ཀྱི་གནོད་པ་སྐྱེལ་བ་ཙམ་མ་ཟད། སྐྱེས་ཕོ་མོ་གཉིས་ཀ་བཅིངས་ནས་བཙོན་ཁང་དུའང་བཅུག
ACT 22:5 དོན་འདིར་བླ་ཆེན་གཙོ་བོ་དང་རྒན་པོའི་གྲོས་ཚོགས་ཡོངས་ཀྱིས་དཔང་པོ་མཛད་ཐུབ། ཁོང་ཚོས་དཱ་མེ་སེག་གྲོང་ཁྱེར་གྱི་སྤུན་ཟླ་རྣམས་ལ་བྲིས་པའི་ཡི་གེ་ང་ལ་ཐོབ་ནས། ལམ་འདིར་འཛིན་མཁན་རྣམས་བཅིངས་ནས་ཆད་པ་གཏོང་བར་ཡེ་རུ་ཤ་ལེམ་ལ་འཁྲིད་པའི་ཕྱིར་ང་དཱ་མེ་སེག་གྲོང་ཁྱེར་ལ་འགྲོ་དུས།
ACT 22:6 དཱ་མེ་སེག་དང་ཉེ་བར་སླེབས་པའི་སྐབས་ཀྱི་ཉིན་གུང་ཙམ་ལ་ནམ་མཁའ་ནས་འོད་ཆེན་པོ་ཞིག་ངའི་ཕྱོགས་བཞིར་གློ་བུར་དུ་འཁྱུགས་པ་དང༌།
ACT 22:7 ང་ས་ལ་འགྱེལ་བ་དང༌། ཤ་ཨུལ། ཤ་ཨུལ། ཁྱོད་ཀྱིས་ང་ལ་ཅིའི་ཕྱིར་གནོད་སྐྱེལ་ཞེས་གསུངས་པའི་སྐད་ཅིག་ཐོས།
ACT 22:8 ངས་ལན་དུ། གཙོ་བོ་ལགས། ཁྱེད་སུ་ཡིན་ཞེས་དྲིས་པས་ཁོང་གིས་ང་ནི་ཁྱོད་ཀྱིས་གནོད་སྐྱེལ་བཞིན་པའི་ན་ཙ་རེལ་པ་ཡེ་ཤུ་ཡིན་ནོ་ཞེས་གསུངས།
ACT 22:9 ངའི་ལམ་གྲོགས་རྣམས་ཀྱིས་འོད་དེ་མཐོང་ཡང༌། ང་ལ་གསུངས་པའི་སྒྲ་དེའི་དོན་མ་རྟོགས།
ACT 22:10 ཡང་ངས། གཙོ་བོ་ལགས། ངས་ཅི་བྱ་ཞེས་བཤད་ནས་གཙོ་བོས་ང་ལ། ཡར་ལོངས་ལ་དཱ་མེ་སེག་གྲོང་ཁྱེར་དུ་སོང་ཞིག དེར་ངའི་དགོངས་པ་ལྟར་ཁྱོད་ཀྱིས་གང་བྱེད་དགོས་པ་ཐམས་ཅད་ཁྱོད་ལ་སྨྲ་བར་འགྱུར་ཞེས་གསུངས།
ACT 22:11 འོད་ཆེན་པོ་དེའི་རྐྱེན་གྱིས་ངའི་མིག་མི་མཐོང་བར་གྱུར་བས་ལམ་གྲོགས་རྣམས་ཀྱིས་ངའི་ལག་པ་ནས་འཇུས་ཏེ་དཱ་མེ་སེག་ཏུ་འཁྲིད།
ACT 22:12 དེར་མིང་ལ་ཨ་ནན་ཡཱ་ཟེར་བའི་མི་ཞིག་ཡོད་པ་དེ་ལ་དེར་གནས་པའི་ཡ་ཧུ་དཱ་པ་ཐམས་ཅད་ཀྱིས་གུས་བཀུར་བྱེད་པ་དང༌། ཆོས་ཁྲིམས་བཞིན་དུ་ཆོས་སེམས་དང་ལྡན་པ་ཞིག་ཡིན།
ACT 22:13 ཁོང་ཕེབས་ཏེ་ངའི་འཁྲིས་སུ་བཞེངས་ནས། སྤུན་ཟླ་ཤ་ཨུལ། ཁྱེད་ཀྱི་མིག་གིས་མཐོང་བར་འགྱུར་ཞིག་ཅེས་གསུངས་མ་ཐག ངའི་མིག་གིས་མཐོང་བར་གྱུར་བ་དང༌། ངས་ཁོང་མཐོང་བྱུང༌།
ACT 22:14 དེ་ནས་ཁོང་གིས་ང་ལ། ངེད་ཀྱི་མེས་པོའི་དཀོན་མཆོག་གིས་ཁྱེད་བདམས་པར་མཛད་དེ། ཁོང་གི་དགོངས་པ་ཤེས་སུ་བཅུག་པ་མ་ཟད། སྐྱེས་བུ་རྣམ་པར་དག་པ་དེ་མཐོང་ནས་དེ་ཡི་གསུང་སྐད་ཐོས་པར་འགྱུར།
ACT 22:15 གང་ལགས་ཟེར་ན། ཁྱེད་ཀྱིས་གང་མཐོང་བ་དང་ཐོས་པ་དེ་མི་ཐམས་ཅད་ལ་བདེན་དཔང་བྱེད་མཁན་དུ་འགྱུར་ངེས་ཡིན།
ACT 22:16 ད་ཅིའི་ཕྱིར་འགྱངས་པར་བྱེད། ལོངས་ལ་ཁྲུས་གསོལ་ལེན་ཞིང༌། ཡེ་ཤུའི་མཚན་ལ་བརྟེན་ནས་ཁྱེད་ཀྱི་སྡིག་ཉེས་དག་པར་བྱོས་ཤིག་ཅེས་སྨྲས།
ACT 22:17 ཡེ་རུ་ཤ་ལེམ་ལ་ཕྱིར་ལོག་པའི་རྗེས་སུ་མཆོད་ཁང་ཆེན་མོར་སྨོན་ལམ་འདེབས་དུས་ང་ལ་ཞལ་གཟིགས་གནང་སྟེ།
ACT 22:18 གཙོ་བོས། ཁྱོད་ཀྱིས་ང་ལ་དཔང་པོ་བྱེད་པ་དེ་ཁོ་ཚོས་ཁས་མི་ལེན་པས་ཡེ་རུ་ཤ་ལེམ་ནས་མགྱོགས་པོར་ཐོན་ཏེ་སོང་ཞིག་ཅེས་གསུངས།
ACT 22:19 ངས། གཙོ་བོ་ལགས། སྔར་ངས་འདུ་ཁང་རེ་རེར་ཁྱེད་ལ་དད་པ་བྱེད་མཁན་རྣམས་བརྡུངས་ནས་བཙོན་དུ་བཅུག་པ་ཁོ་ཚོ་ཉིད་ཀྱིས་ཤེས།
ACT 22:20 ཡང་མི་རྣམས་ཀྱིས་ཁྱེད་ཀྱི་དཔང་པོ་སེ་ཏེ་ཕཱན་ལ་རྡོ་རུབ་བཏང་ནས་གསོད་པའི་སྐབས། ངས་ཀྱང་མོས་མཐུན་བྱས་ཏེ་དེར་བསྡད་ནས་ཁོ་ཚོའི་ཕྱི་གོས་སྲུང་ཉར་བྱས་ཞེས་ཟེར་བས།
ACT 22:21 ཁོང་གིས་ང་ལ། སོང་ཞིག ངས་ཁྱོད་ས་ཆ་འདི་ནས་ཐག་རིང་དུ་ཡ་ཧུ་དཱ་པ་མིན་པའི་རྩར་གཏོང་བར་བྱ་ཞེས་གསུངས་སོ་”ཞེས་པའོ། །
ACT 22:22 པའུ་ལུས་དེ་ལྟར་གསུངས་པའི་བར་དུ་མི་ཚོགས་ཀྱིས་ཉན་ནས་ཁོ་ཚོས་སྐད་ཆེན་པོས་“ཁོ་གསོད་ཅིག མི་འདི་འདྲ་ཞིག་ས་གཞི་འདིར་གསོན་པར་མི་འོས་”ཞེས་སྨྲས།
ACT 22:23 ཁོ་ཚོས་སྐད་ཅོར་རྒྱག་བཞིན་ཕྱི་གོས་ཕུད་ནས་ས་རྡུལ་ཡང་ནམ་མཁའ་ལ་གཏོར་བའི་དུས་སུ།
ACT 22:24 མི་ཚོགས་ཀྱིས་དེ་ལྟར་སྐད་ཅོར་རྒྱག་པའི་རྒྱུ་མཚན་གང་ཡིན་ཤེས་པའི་ཕྱིར། སྟོང་དཔོན་གྱིས་དམག་མི་རྣམས་ལ་པའུ་ལུ་མཁར་རྫོང་ནང་དུ་འཁྲིད་དགོས་པ་དང༌། རྟ་ལྕག་གིས་བརྡུངས་ནས་ཁོང་ལ་འདྲི་གཅོད་བྱེད་དགོས་པའི་བཀའ་བཏང༌།
ACT 22:25 རྟ་ལྕག་གིས་རྡུང་བའི་ཆེད་དུ་ཐག་པས་བཅིངས་སྐབས་ཁོང་གིས་དེར་ཡོད་པའི་དམག་མི་བརྒྱ་དཔོན་ལ་“ཁྲིམས་ཐག་བཅད་མེད་པའི་རོ་མཱ་པའི་མངའ་འབངས་ཤིག་ལ་རྟ་ལྕག་གཞུ་བ་དེ་ཁྲིམས་བཞིན་དུ་ཆོག་གམ་”ཞེས་གསུངས།
ACT 22:26 དེ་ཐོས་པས་བརྒྱ་དཔོན་དེ་སྟོང་དཔོན་གྱི་དྲུང་དུ་སོང་ནས་ཁོ་ལ་“ཁྱེད་ཀྱིས་མཛད་པ་དེ་ཅི་ཡིན། མི་འདི་རོ་མཱ་པའི་མངའ་འབངས་ཤིག་ཡིན་ནོ་”ཞེས་བཤད།
ACT 22:27 སྟོང་དཔོན་ཡོང་ནས་པའུ་ལུ་ལ་“ང་ལ་ཤོད་ཅིག ཁྱོད་རོ་མཱ་པའི་མངའ་འབངས་ཤིག་ཡིན་ནམ་”ཞེས་ཟེར་བས་ཁོང་གིས་“ལགས་ཡིན་”ཞེས་གསུངས།
ACT 22:28 ལན་དུ་སྟོང་དཔོན་གྱིས་“ངས་དངུལ་མང་པོ་ཞིག་བཏང་ནས་རོ་མཱ་པའི་མངའ་འབངས་དེ་ཐོབ་”ཅེས་སྨྲས་པ་དང༌། པའུ་ལུས་“ང་སྐྱེས་དུས་ནས་རོ་མཱ་པའི་མངའ་འབངས་ཤིག་ཡིན་”ཞེས་གསུངས།
ACT 22:29 དེ་མ་ཐག་ཁོང་ལ་འདྲི་གཅོད་བྱེད་མཁན་རྣམས་ཕྱིར་བཤོལ་བརྒྱབ། སྟོང་དཔོན་གྱིས་ཀྱང་པའུ་ལུ་ནི་རོ་མཱ་པའི་མངའ་འབངས་ཤིག་ཡིན་པར་ཤེས་པ་དང༌། ཁོང་ལྕགས་ཐག་གིས་བཅིངས་པས་ཁོ་རང་འཇིགས་པར་གྱུར།
ACT 22:30 ཡ་ཧུ་དཱ་པ་རྣམས་ཀྱིས་པའུ་ལུ་ལ་ནག་ཉེས་བཙུགས་པའི་རྒྱུ་རྐྱེན་ཅི་ཡིན་པ་ངེས་པར་དུ་ཤེས་པར་འདོད་པས་སྟོང་དཔོན་གྱིས་དེའི་སང་ཉིན་པའུ་ལུ་གློད་བཀྲོལ་བཏང་ཞིང༌། བླ་ཆེན་དང་གྲོས་ཚོགས་ཡོངས་སྐོང་དགོས་པའི་བཀའ་བཏང་ནས་ཁོས་པའུ་ལུ་ཁོ་ཚོའི་དྲུང་དུ་འཁྲིད་དུ་བཅུག་གོ །
ACT 23:1 པའུ་ལུས་གྲོས་ཚོགས་ལ་ནན་གྱིས་བལྟས་ནས་“སྤུན་ཟླ་རྣམས། དེ་རིང་གི་བར་དུ་ངས་དཀོན་མཆོག་གི་སྤྱན་སྔར་རྒྱུ་དག་ཡོད་པའི་སྒོ་ནས་སྤྱོད་པ་བཟང་པོ་བྱས་པ་ཡིན་”ཞེས་གསུངས།
ACT 23:2 བླ་ཆེན་གཙོ་བོ་ཨ་ནན་ཡཱ་ཡིས་པའུ་ལུའི་ཉེ་འཁོར་དུ་ལངས་ནས་བསྡད་ཡོད་པའི་མི་རྣམས་ལ་ཁོང་གི་ཞལ་ལ་གཞུ་དགོས་པའི་བཀའ་བཏང༌།
ACT 23:3 ཡང་པའུ་ལུས་ཁོ་ལ་“ཁ་བཤད་དོན་ལ་མི་གནས་པ་ཁྱོད། དཀོན་མཆོག་གིས་ཁྱོད་རྡུང་བར་མཛད་ངེས་ཡིན། ཁྱོད་ཀྱིས་ཁྲིམས་བཞིན་དུ་ང་ཁྲིམས་གཅོད་བྱེད་པའི་ཆེད་དུ་དེར་བསྡད་ཡོད་ཀྱང༌། ཁྲིམས་དང་འགལ་ཏེ་ང་རྡུང་བའི་བཀའ་གཏོང་ངམ་”ཞེས་གསུངས།
ACT 23:4 པའུ་ལུ་ཡི་གཡས་གཡོན་དུ་ཡོད་པའི་མི་རྣམས་ཀྱིས་“ཁྱོད་ཀྱིས་དཀོན་མཆོག་གི་བླ་ཆེན་གཙོ་བོ་ལ་དམའ་འབེབས་གཏོང་བར་ཕོད་དམ་”ཞེས་སྨྲས་པས།
ACT 23:5 པའུ་ལུས་“སྤུན་ཟླ་རྣམས། ངས་ཁོང་བླ་ཆེན་གཙོ་བོ་ཡིན་པ་མ་ཤེས། གསུང་རབ་ཀྱི་ནང་ལ་ཁྱོད་ཀྱི་མི་རིགས་ཀྱི་དཔོན་པོ་ལ་དམའ་འབེབས་མ་གཏོང་ཞིག་ཅེས་འཁོད་ཡོད་”ཅེས་གསུངས།
ACT 23:6 མི་དེ་ཚོའི་ནང་ནས་ཕྱོགས་ཁག་ཅིག་སཱ་ཅུ་སེ་པ་དང༌། ཕྱོགས་ཁག་གཞན་ཕཱ་རུ་ཤི་པ་ཡིན་པ་མཁྱེན་པས་པའུ་ལུས་གྲོས་ཚོགས་ལ་སྐད་ཆེན་པོས་“སྤུན་ཟླ་རྣམས། ང་ནི་ཕཱ་རུ་ཤི་པ་ཡིན་ལ། ཕཱ་རུ་ཤི་པའི་བུ་རྒྱུད་ཀྱང་ཡིན་ནོ། ངས་གཤིན་པོ་རྣམས་འཆི་བ་ནས་སླར་གསོན་པར་འགྱུར་བ་ལ་ཡིད་རྟོན་པར་དད་པ་བྱེད་པས་ད་ལྟ་ཁྲིམས་གཅོད་མྱོང་”ཞེས་གསུངས།
ACT 23:7 དེ་ལྟར་གསུངས་པས་ཕཱ་རུ་ཤི་པ་དང་སཱ་ཅུ་སེ་པ་གཉིས་ཀྱི་བར་དུ་རྩོད་གླེང་ཞིག་བྱུང་བས་གྲོས་ཚོགས་མི་མཐུན་པར་གྱུར།
ACT 23:8 (གང་ཡིན་ཞེ་ན། སཱ་ཅུ་སེ་པ་རྣམས་ཀྱིས་འཆི་བ་ནས་སླར་གསོན་པར་འགྱུར་བ་དང༌། དཀོན་མཆོག་གི་ཕོ་ཉ། སེམས་ཉིད་ཀྱང་མེད་ཅེས་ཟེར། ཕཱ་རུ་ཤི་པ་རྣམས་ཀྱིས་དེ་ཚོ་གསུམ་ཡོད་པར་ཟེར་)
ACT 23:9 འུར་སྒྲ་ཆེན་པོ་བྱུང་བ་དང༌། ཕཱ་རུ་ཤི་པའི་ཕྱོགས་ཁག་གི་ཆོས་ཁྲིམས་ལ་མཁས་པའི་མི་ཁ་ཤས་ལངས་ནས་རྩོད་གླེང་བྱེད་དེ་“ང་ཚོས་མི་འདིར་ཉེས་སྐྱོན་ཅིའང་མི་རྙེད། གལ་ཏེ་སེམས་ཉིད་ཡང་ན་དཀོན་མཆོག་གི་ཕོ་ཉ་ཞིག་གིས་ཁོ་ལ་གཏམ་གསུངས་ན་ཅི་འདྲ་ལགས་”ཞེས་བཤད།
ACT 23:10 རྩོད་པ་དེ་ཤུགས་ཆེར་སོང་བས། ཁོ་ཚོས་པའུ་ལུ་དུམ་བུར་བཅད་པའི་ཉེན་ཁ་ཡོད་པར་འཇིགས་ནས། སྟོང་དཔོན་གྱིས་དམག་མི་རྣམས་ལ་པའུ་ལུ་ཁོ་ཚོའི་དཀྱིལ་ནས་མཁར་རྫོང་ལ་དབང་ཤུགས་ཀྱིས་འཁྲིད་དགོས་པའི་བཀའ་བཏང༌།
ACT 23:11 མཚན་མོ་དེར་གཙོ་བོ་ཡེ་ཤུ་པའུ་ལུའི་འགྲམ་དུ་བཞེངས་ཏེ་“མ་འཇིགས་ཤིག ཡེ་རུ་ཤ་ལེམ་ལ་ཁྱོད་ཀྱིས་ང་ལ་བདེན་དཔང་བྱས་པ་ལྟར། རོ་མཱ་གྲོང་ཁྱེར་ལའང་དེ་ལྟར་བདེན་དཔང་བྱེད་དགོས་”ཞེས་གསུངས།
ACT 23:12 དེའི་སང་ཞོགས་ཡ་ཧུ་དཱ་པ་ཁ་ཅིག་གིས་ཇུས་ངན་བཏིང་བས་པའུ་ལུ་མ་བསད་པའི་བར་དུ་བཟའ་བཏུང་ཅི་ཡང་མི་སྤྱོད་པའི་དམ་བཅའ་བཞག
ACT 23:13 ཇུས་ངན་འདི་འདིང་མཁན་ནི་མི་བཞི་བཅུ་ལས་མང་བ་ཡོད།
ACT 23:14 ཁོ་ཚོས་བླ་ཆེན་དང་རྒན་པོ་རྣམས་ཀྱི་དྲུང་དུ་ཕྱིན་ནས་“ང་ཚོས་པའུ་ལུ་མ་བསད་པའི་བར་དུ་བཟས་ཅི་ཡང་མི་སྤྱོད་པའི་དམ་བཅའ་ནན་གྱིས་བཞག་པས།
ACT 23:15 ད་གྲོས་ཚོགས་ཀྱི་མི་དང་བཅས་པས་སྔོན་ལས་ཞིབ་པར་འདྲི་གཅོད་བྱེད་ཁུལ་ཏེ། སྟོང་དཔོན་ལ་པའུ་ལུ་ཁྱེད་ཚོའི་མདུན་དུ་འཁྲིད་དགོས་པའི་ཞུ་བ་མངག་ཅིག ང་ཚོས་གྲ་སྒྲིག་བྱས་ཟིན་པས་པའུ་ལུ་ཉེ་བར་མ་སླེབས་པའི་སྔོན་ལ་ཁོ་གསོད་པར་བྱ་”ཞེས་བཤད།
ACT 23:16 ཡང་པའུ་ལུའི་སྲིང་མོའི་བུས་དེའི་སྐོར་ཐོས་ནས་མཁར་རྫོང་ལ་ཕྱིན་ཏེ་པའུ་ལུ་ལ་བཤད།
ACT 23:17 བརྒྱ་དཔོན་ཁྲོད་ནས་གཅིག་བོས་ཏེ་པའུ་ལུས་ཁོ་ལ་“གཞོན་ནུ་འདི་སྟོང་དཔོན་གྱི་རྩར་འཁྲིད་དང༌། ཁོང་ལ་གཏམ་ཞུ་རྒྱུ་ཞིག་ཡོད་པས་སོ་”ཞེས་གསུངས་པས།
ACT 23:18 བརྒྱ་དཔོན་གྱིས་གཞོན་ནུ་དེ་སྟོང་དཔོན་གྱི་རྩར་འཁྲིད་ནས་ཁོ་ལ་“བཙོན་པ་པའུ་ལུས་ང་བོས་ནས་གཞོན་ནུ་འདི་ཁྱེད་ཀྱི་རྩར་འཁྲིད་པར་ཞུས། གང་ཡིན་ཞེ་ན། ཁྱེད་ལ་གཏམ་ཞིག་ཞུ་རྒྱུ་ཡོད་”ཅེས་བཤད།
ACT 23:19 སྟོང་དཔོན་གྱིས་བུ་དེའི་ལག་པ་ནས་འཇུས་ཏེ་ཟུར་དུ་འཁྲིད་ནས་ཁོ་ལ་“ང་ལ་གཏམ་ཅི་ཞིག་ཤོད་རྒྱུ་ཡོད་”ཅེས་བཤད་པ་ལ།
ACT 23:20 གཞོན་ནུ་དེས་“ཡ་ཧུ་དཱ་པ་རྣམས་ཀྱིས་པའུ་ལུ་ལ་སྔོན་ལས་ཞིབ་པར་འདྲི་གཅོད་བྱེད་ཁུལ་ཏེ། ཁྱེད་ཀྱིས་སང་ཉིན་ཁོང་གྲོས་ཚོགས་ཀྱི་དྲུང་དུ་འཁྲིད་པའི་ཞུ་བར་གཏན་འཁེལ།
ACT 23:21 འོན་ཏེ་ཁོ་ཚོས་བཤད་པ་ལྟར་མ་གནང་ཞིག གང་ཡིན་ཞེ་ན། ཁོ་ཚོ་མི་བཞི་བཅུ་ལྷག་ཙམ་གྱིས་ཁོང་གསོད་པར་ལྐོག་ཏུ་སྒུག་ནས་སྡོད་དེ། ཁོང་མ་བསད་པའི་བར་དུ་བཟའ་བཏུང་ཅི་ཡང་མི་སྤྱོད་པའི་དམ་བཅའ་བཞག ད་ལྟ་གྲ་སྒྲིག་ཟིན་ཏེ་ཁྱེད་ཀྱིས་ཆོག་མཆན་གནང་རྒྱུ་ཁོ་ན་སྒུག་བསྡད་ཡོད་”ཅེས་སྨྲས།
ACT 23:22 སྟོང་དཔོན་གྱིས་“ཁྱོད་ཀྱིས་ང་ལ་སྨྲས་པའི་དོན་འདི་མི་གཞན་སུ་ལའང་མ་ཤོད་ཅིག་”ཅེས་པའི་བཀའ་བཏང་ནས་གཞོན་ནུ་དེ་ཕར་བཏང༌།
ACT 23:23 སྟོང་དཔོན་གྱིས་བརྒྱ་དཔོན་གཉིས་བོས་ཏེ་ཁོ་རྣམས་ལ་“རྐང་དམག་མི་ཉིས་བརྒྱ་དང༌། རྟ་དམག་བདུན་ཅུ། མདུང་དམག་ཉིས་བརྒྱ་བཅས་མཚན་མོའི་ཆུ་ཚོད་དགུ་པར་སེ་སར་རེ་ཡཱ་གྲོང་ཁྱེར་ལ་འགྲོ་བའི་གྲ་སྒྲིག་གྱིས་ཤིག
ACT 23:24 པའུ་ལུའི་ཕྱིར་བཞོན་པ་གྲ་སྒྲིག་བྱས་ནས་སྤྱི་ཁྱབ་ཕེ་ལིག་གི་རྩར་ཉེན་ཁ་མེད་པར་སྐྱོལ་ཞིག་”ཅེས་བཤད།
ACT 23:25 ཡང་ཁོས་གཤམ་དུ་ཡོད་པའི་ཡི་གེ་འདི་བྲིས།
ACT 23:26 ཀ་ལོ་དཱི་ལི་སི་ཡཱ་ཡིས་གུས་པར་འོས་པའི་སྤྱི་ཁྱབ་ཕེ་ལིག་ཁྱེད་ལ་འཚམས་འདྲི་ཞུའོ།
ACT 23:27 ཡ་ཧུ་དཱ་པ་རྣམས་ཀྱིས་མི་འདི་འཛིན་བཟུང་བྱས་ནས་གསོད་གྲབས་བྱེད་དུས། ངས་ཁོ་རོ་མཱ་པའི་མངའ་འབངས་ཤིག་ཡིན་པ་ཤེས་ཏེ་དམག་མི་དང་བཅས་པར་ས་ཆ་དེར་སོང་ཞིང་ཁོ་ཚོའི་ལག་པ་ནས་བསྐྱབས།
ACT 23:28 ཉེས་སྐྱོན་བཙུགས་པའི་དོན་གང་ཡིན་ཤེས་པར་འདོད་པས་ངས་མི་དེ་ཁོ་ཚོའི་གྲོས་ཚོགས་ཀྱི་དྲུང་དུ་འཁྲིད་པ་དང༌།
ACT 23:29 སྐྱོན་འཛུགས་བྱས་པ་དེ་ཡང་ཁོ་ཚོའི་ཆོས་ཁྲིམས་ཀྱི་དོན་ཡིན་པ་ལས་སྲོག་ཁྲིམས་གཏོང་བའམ་བཙོན་དུ་བཅུག་དགོས་པའི་ཉེས་པ་ཅིའང་མེད་པ་དེ་ངས་རྟོགས།
ACT 23:30 དེ་རྗེས་ཁོ་གསོད་པའི་ཇུས་ངན་གྱི་གཏམ་ཐོས་སྐབས། མི་དེ་ཁྱེད་ལ་འཕྲལ་དུ་བསྐྱལ་བ་ཡིན། ཡང་ཉེས་སྐྱོན་འཛུགས་མཁན་རྣམས་ལའང་ཉེས་སྐྱོན་གང་ཡོད་པ་འཆད་པའི་ཕྱིར་ཁྱེད་ཀྱི་མདུན་དུ་འགྲོ་དགོས་པའི་བཀའ་བཏང༌། ཞེས་པའོ། །
ACT 23:31 བཀའ་དེ་དང་བསྟུན་ཏེ་མཚན་མོའི་དུས་སུ་དམག་མི་རྣམས་ཀྱིས་པའུ་ལུ་ཨན་ཏི་པ་ཏྲི་གྲོང་ཁྱེར་དུ་བསྐྱལ།
ACT 23:32 དེའི་སང་ཉིན་རྐང་དམག་རྣམས་མཁར་རྫོང་ལ་ཕྱིར་ལོག་པ་དང༌། རྟ་དམག་རྣམས་པའུ་ལུ་འཁྲིད་དེ་ཕར་ཕྱིན།
ACT 23:33 ཁོང་རྣམས་སེ་སར་རེ་ཡཱ་གྲོང་ཁྱེར་དུ་སླེབས་སྐབས། ཡི་གེ་དེ་སྤྱི་ཁྱབ་ལ་སྤྲད་ཅིང་པའུ་ལུ་ཡང་ཁོའི་ལག་ཏུ་བརྩིས་སྤྲད།
ACT 23:34 སྤྱི་ཁྱབ་ཀྱིས་ཡི་གེ་དེ་བཀླགས་ནས་པའུ་ལུ་ཡུལ་གང་ནས་ཡིན་དྲིས་པ་ལ། ཁོང་ཀི་ལིག་ཡཱ་ཞིང་ཆེན་ནས་ཡིན་པར་ཤེས་ནས།
ACT 23:35 ཁོས་“ཁྱོད་ལ་ཉེས་འཛུགས་མཁན་འདིར་སླེབས་པའི་ཚེ་ཁྱོད་ཀྱི་དོན་ཉན་པར་བྱ་”ཞེས་བཤད་ནས། རྒྱལ་པོ་ཧེ་རོ་དཱེ་ཡིས་བརྩིགས་པའི་ཕོ་བྲང་གི་བཙོན་ཁང་དུ་པའུ་ལུ་སྲུང་དགོས་པའི་བཀའ་བཏང་ངོ༌། །
ACT 24:1 ཉི་མ་ལྔ་ཡི་རྗེས་སུ་བླ་ཆེན་གཙོ་བོ་ཨ་ནན་ཡཱ་དང༌། རྒན་པོ་ཁ་ཅིག ཏེར་ཏུལ་ལུ་ཞེས་པའི་ཁྲིམས་རྩོད་པ་དང་བཅས་ཏེ་དེར་སླེབས་པ་དང་སྤྱི་ཁྱབ་ཀྱི་མདུན་དུ་པའུ་ལུ་ལ་ནག་ཉེས་བཙུགས།
ACT 24:2 པའུ་ལུ་བོས་པ་དང་ཏེར་ཏུལ་ལུ་ཡིས་ཁོང་ལ་ཉེས་སྐྱོན་འཛུགས་ཏེ་སྤྱི་ཁྱབ་ལ་“སྤྱི་ཁྱབ་ཕེ་ལིག་དཔོན་ཆེན་ལགས། ཁྱེད་ཀྱི་བཀའ་དྲིན་གྱིས་ང་ཚོ་ཡུན་རིང་ཞི་བདེ་ལ་ལོངས་སྤྱོད་ཅིང༌། ཁྱེད་ཀྱིས་སྔོན་གཟིགས་ལྟར་མི་རིགས་འདི་ལ་ཕན་པའི་བཅོས་བསྒྱུར་བྱུང༌།
ACT 24:3 ང་ཚོས་ཁྱེད་ཀྱི་བཀའ་དྲིན་འདིར་དུས་དང་རྣམ་པ་ཀུན་ཏུ་ཐུགས་རྗེ་ཆེ་ཞུའོ།
ACT 24:4 འོན་ཀྱང་ཁྱེད་ལ་དེ་བས་སྙན་སུན་མི་ཞུ་བའི་ཕྱིར་ཐུགས་རྗེས་ཆེན་པོས་ང་ཚོས་ཚིག་འགའ་ཞུས་པར་གསན་རོགས་གནང༌།
ACT 24:5 མི་འདི་ནི་ཡུལ་ཀུན་ཏུ་ཡ་ཧུ་དཱ་པ་ཐམས་ཅད་ཀྱི་ནང་ནས་རྙོག་དྲ་དང༌། ཟིང་ཆ་སློང་མཁན་གཙོ་བོ་ཞིག་དང༌། ན་ཙ་རེལ་པ་ཞེས་པའི་ཆོས་ལུགས་ཀྱི་འགོ་ཁྲིད་པ་བཅས་ཡིན་པ་ངེད་རྣམས་ཀྱིས་ཤེས།
ACT 24:6 མ་ཟད་ཁོས་མཆོད་ཁང་ཆེན་མོ་ལའང་མི་གཙང་བ་བྱེད་པར་བསམས་པས་ང་ཚོས་ཁོ་འཛིན་བཟུང་བྱས།
ACT 24:8 ཁྱེད་ཀྱིས་དོན་དེ་ཐམས་ཅད་ཀྱི་སྐོར་ཁོ་ལ་འདྲི་གཅོད་གནང་ན་ང་ཚོས་ཁོ་ལ་ཉེས་སྐྱོན་བཙུགས་པའི་རྒྱུ་མཚན་མཁྱེན་པར་འགྱུར་”ཞེས་སྨྲས།
ACT 24:9 ཡ་ཧུ་དཱ་པ་རྣམས་ཀྱིས་ཀྱང་ནག་ཉེས་བཙུགས་པའི་དོན་དེ་རྣམས་བདེན་པ་ཡིན་པར་ཁས་ལེན་བྱས།
ACT 24:10 དེ་ནས་སྤྱི་ཁྱབ་ཀྱིས་པའུ་ལུ་ལ་སྐད་ཆ་ཤོད་དགོས་པའི་བརྡ་བྱས་པས་པའུ་ལུས་“ཁྱེད་ནི་ལོ་མང་པོའི་རིང་མི་རིགས་འདིའི་ཁྲིམས་དཔོན་ཡིན་པར་ངས་ཤེས། དེར་བརྟེན་ངས་དགའ་བའི་ངང་ནས་ང་ཉེས་མེད་པ་ཡིན་པའི་རྒྱུ་མཚན་ཁྱེད་ལ་གསལ་བཤད་བྱེད།
ACT 24:11 ང་བསྙེན་བཀུར་བྱེད་པའི་ཆེད་དུ་ཡེ་རུ་ཤ་ལེམ་ལ་སླེབས་ནས་ཉི་མ་བཅུ་གཉིས་ལས་མ་འགོར་བར་དེ་ཁྱེད་ཀྱིས་ལས་སླ་པོར་མཁྱེན་ཐུབ།
ACT 24:12 ངས་མཆོད་ཁང་ཆེན་མོ་དང༌། ཡང་ན་ཡ་ཧུ་དཱ་པའི་འདུ་ཁང༌། དེ་བཞིན་གྲོང་ཁྱེར་ནང་དུ་མི་སུ་དང་ཡང་རྩོད་གླེང་བྱེད་པའམ། ཟིང་ཆ་སློང་བ་ཁོ་ཚོས་མ་མཐོང༌།
ACT 24:13 ཁོ་ཚོས་ད་ལྟ་ང་ལ་ནག་ཉེས་འཛུགས་པ་དེར་ཁོ་ཚོས་ཀྱང་ར་སྤྲོད་བྱེད་མི་ཐུབ།
ACT 24:14 འོན་ཀྱང་ངས་ཁྱེད་ལ་དོན་གཅིག་ཁས་ལེན་བྱེད་དེ། ཁོ་ཚོས་ལོག་པའི་ཆོས་ཞེས་ཟེར་བའི་ལམ་བཞིན་དུ་ངས་མེས་པོའི་དཀོན་མཆོག་ལ་བསྙེན་བཀུར་བྱེད་ཅིང༌། ཆོས་ཁྲིམས་དང་མཐུན་ཞིང་ལུང་སྟོན་པའི་མདོ་ན་གང་བྲིས་པ་ཐམས་ཅད་ལའང་དད་པ་བྱེད།
ACT 24:15 ཁོ་ཚོ་དང་འདྲ་བར་ངས་ཀྱང་དཀོན་མཆོག་ལ་ཡིད་རྟོན་བྱེད་དེ། དྲང་པོ་དང་ངན་པ་རིགས་གཉིས་ཀ་འཆི་བ་ནས་སླར་གསོན་པོར་འགྱུར།
ACT 24:16 དེའི་ཕྱིར་ངས་དཀོན་མཆོག་དང་མི་རྣམས་ཀྱི་མདུན་དུ་རྒྱུ་དག་ཡོད་པར་རྟག་ཏུ་བརྩོན།
ACT 24:17 ལོ་ཁ་ཤས་འགོར་བའི་རྗེས་སུ་ངའི་མི་རིགས་ལ་སྦྱིན་པ་གཏོང་ཞིང༌། མཆོད་པ་འབུལ་བའི་ཆེད་དུ་ས་དེར་ཡོང༌།
ACT 24:18 དེ་ལྟར་བྱེད་པའི་སྐབས་སུ་ངས་གཙང་སྦྲ་བྱེད་པའི་ཆོ་ག་སྒྲུབ་ཚར་ནས་ང་མཆོད་ཁང་ཆེན་མོར་ཡོད་པ་མི་ཚོགས་སམ། འཁྲུག་པ་ཅི་ཡང་མེད་པར་ཁོ་ཚོས་མཐོང༌།
ACT 24:19 འོན་ཀྱང་ཨེ་ཞེ་ཡཱ་ཞིང་ཆེན་ནས་ཡིན་པའི་ཡ་ཧུ་དཱ་པ་ཁ་ཅིག་གིས་ང་ལ་སྐྱོན་བརྗོད་བྱེད་རྒྱུ་ཡོད་ན། འདིར་ཁྱེད་ཀྱི་མདུན་དུ་ཡོང་ནས་བརྗོད་འོས་སོ།
ACT 24:20 ཡང་ན། ང་གྲོས་ཚོགས་ཀྱི་མདུན་དུ་ཡོད་སྐབས་ངས་ཉེས་པ་གང་ཞིག་བྱས་པ་དེ་མི་འདི་ཚོས་འཆད་དགོས་སོ།
ACT 24:21 གྲོས་ཚོགས་ཀྱི་དཀྱིལ་ལ་ལངས་དུས་ངས་སྐད་ཆེན་པོས་གཤིན་པོ་རྣམས་འཆི་བ་ནས་སླར་གསོན་པར་འགྱུར་བའི་སྐོར་ལ་དེ་རིང་ཁྱེད་རྣམས་ཀྱི་མདུན་དུ་ཁྲིམས་གཅོད་མྱོང་ཞེས་སྨྲས་པ་ལས་སྐྱོན་གཞན་ཡོད་ན་ཁོ་ཚོས་ཁྱེད་ལ་སྨྲ་དགོས་”ཞེས་གསུངས།
ACT 24:22 ཡེ་ཤུའི་ཐར་ལམ་ཞིབ་པར་ཤེས་པའི་སྤྱི་ཁྱབ་ཕེ་ལིག་གིས་ཚོགས་འདུ་འཚོག་མཚམས་འཇོག་སྟེ་“སྟོང་དཔོན་ལི་སི་ཡཱ་འདིར་སླེབས་ནས་ངས་ཁྱོད་ཀྱི་ཁྲིམས་ཐག་གཅོད་པར་བྱ་”ཞེས་བཤད།
ACT 24:23 དེ་ནས་ཁོས་བརྒྱ་དཔོན་ལ་པའུ་ལུ་ནན་པོར་སྲུང་མི་དགོས་ཏེ་ལྟ་སྐྱོང་བྱེད་མཁན་གྲོགས་པོ་རྣམས་ཀྱང་མི་འགོག་པའི་བཀའ་བཏང༌།
ACT 24:24 ཉིན་ཤས་ཀྱི་རྗེས་སུ་ཕེ་ལིག་དང་ཁོང་གི་སྐུ་ཟླ་ཡ་ཧུ་དཱ་པ་ཡིན་པའི་དྲུ་སིལ་ལཱ་བཅས་པ་ཡོང་ནས་པའུ་ལུ་བོས་པ་དང༌། པའུ་ལུས་མཱ་ཤི་ཀ་ཡེ་ཤུ་ལ་དད་པའི་སྐོར་གྱི་ཆོས་གསུངས་པ་ལ་ཉན།
ACT 24:25 པའུ་ལུས་དྲང་བདེན་ཉིད་དང༌། རང་ཚོད་ཟིན་པ། མ་འོངས་པའི་ཁྲིམས་གཅོད་བཅས་གསུངས་པས་ཕེ་ལིག་འཇིགས་ནས་“ད་ཕར་སོང་ལ་དུས་ཚོད་བྱུང་ན་ངས་ཁྱོད་འབོད་པར་བྱ་”ཞེས་སྨྲས་ཀྱང༌།
ACT 24:26 ཕེ་ལིག་གིས་པའུ་ལུས་རང་ཉིད་ལ་དངུལ་སྤྲོད་པའི་རེ་བས་ཁོས་ཐེངས་མང་པོར་བོས་ནས་ཁོང་དང་གཏམ་བྱས།
ACT 24:27 ལོ་གཉིས་འགོར་བའི་རྗེས་སུ་པོར་ཀི་ཡུ་ཕེ་སི་ཏུ་ཞེས་བྱ་བ་ཕེ་ལིག་གི་ཚབ་ལ་སྤྱི་ཁྱབ་ཏུ་བསྐོས། སྤྱི་ཁྱབ་ཕེ་ལིག་གིས་ཡ་ཧུ་དཱ་པ་རྣམས་ལ་དགའ་བའི་ཕྱིར་པའུ་ལུ་མུ་མཐུད་བཙོན་ཁང་ལ་བཞག་གོ །
ACT 25:1 ཞིང་ཆེན་དེར་སླེབས་ནས་ཉི་མ་གསུམ་གྱི་རྗེས་སུ་སྤྱི་ཁྱབ་ཕེ་སི་ཏུ་སེ་སར་རེ་ཡཱ་གྲོང་ཁྱེར་ནས་ཡེ་རུ་ཤ་ལེམ་ལ་ཕྱིན།
ACT 25:2 དེར་བླ་ཆེན་དང་ཡ་ཧུ་དཱ་པའི་འགོ་ཁྲིད་པ་རྣམས་ཀྱིས་ཁོང་གི་མདུན་དུ་པའུ་ལུ་ལ་ནག་ཉེས་བཙུགས།
ACT 25:3 ཁོ་ཚོས་པའུ་ལུ་ཡེ་རུ་ཤ་ལེམ་ལ་གཏོང་བའི་ཁོ་རང་ཚོའི་རེ་བ་བསྐོང་ཕྱིར་ཕེ་སི་ཏུ་ལ་ཞུ་བ་ཕུལ། དེ་ནི་ཁོ་ཚོས་ལམ་བར་དུ་ཁོང་གསོད་པའི་ཇུས་ངན་བཤམས་པས་སོ།
ACT 25:4 ལན་དུ་ཕེ་སི་ཏུ་ཡིས་“པའུ་ལུ་སེ་སར་རེ་ཡཱ་གྲོང་ཁྱེར་ལ་ལྟ་སྲུང་བྱེད་བཞིན་པས་ང་རང་ཡང་ཅུང་མ་འགོར་བར་དེར་འགྲོ་རྒྱུ་ཡིན།
ACT 25:5 ཁྱོད་ཚོའི་ནང་ནས་དབང་ཡོད་པ་རྣམས་ང་དང་མཉམ་དུ་དེར་འགྲོ་དགོས། གལ་ཏེ་མི་དེ་ལ་ཉེས་སྐྱོན་ཡོད་ན་ཁོ་ལ་ཁྲིམས་གཅོད་བྱེད་ཆོག་”ཅེས་སྨྲས།
ACT 25:6 ཕེ་སི་ཏུ་ཁོ་ཚོའི་ཁྲོད་དུ་ཉི་མ་བརྒྱད་ནས་བཅུ་ཙམ་བར་ལས་ལྷག་པ་མ་བསྡད་པར་སེ་སར་རེ་ཡཱ་གྲོང་ཁྱེར་ལ་ཕྱིན་པ་དང༌། དེའི་སང་ཉིན་ཁྲིམས་དཔོན་གྱི་ཁྲི་ལ་བསྡད་ནས་པའུ་ལུ་ཁོའི་མདུན་དུ་འཁྲིད་དགོས་པའི་བཀའ་བཏང༌།
ACT 25:7 ཁོང་དེར་སླེབས་རྗེས་ཡེ་རུ་ཤ་ལེམ་ནས་ཡོང་བའི་ཡ་ཧུ་དཱ་པ་རྣམས་ཀྱིས་ཁོང་གི་མཐའ་སྐོར་དུ་ལངས་ནས་བསྡད་དེ་ར་སྤྲོད་བྱེད་མ་ཐུབ་པའི་ནག་ཉེས་ཚབས་ཆེན་མང་པོ་བཙུགས།
ACT 25:8 པའུ་ལུས་“ངས་ཡ་ཧུ་དཱ་པའི་ཆོས་ཁྲིམས་སམ། མཆོད་ཁང་ཆེན་མོའམ། ཡང་ན་གོང་མའི་རྒྱལ་པོ་སེ་སར་ལ་བལྟས་ནས་ཉེས་པ་ཅིའང་མ་བྱས་”ཞེས་སྐྱོན་མེད་པ་ཡིན་པར་གསལ་བཤད་མཛད།
ACT 25:9 འོན་ཀྱང་སྤྱི་ཁྱབ་ཕེ་སི་ཏུ་ཡིས་ཡ་ཧུ་དཱ་པ་རྣམས་ལ་དགའ་པོ་ཡོང་བའི་ཕྱིར་པའུ་ལུ་ལ་“ཡེ་རུ་ཤ་ལེམ་ལ་ཕྱིན་ནས་ངའི་མདུན་དུ་དོན་འདི་ཁྲིམས་གཅོད་མྱོང་བར་འདོད་དམ་”ཞེས་དྲིས་པས།
ACT 25:10 པའུ་ལུས་“ད་ལྟ་ང་རྒྱལ་པོ་སེ་སར་གྱི་ཁྲིམས་རར་ཡོད། འདི་ནི་ང་ལ་ཁྲིམས་གཅོད་བྱེད་འོས་པའི་ས་ཆ་ཡིན། ཁྱེད་རང་གིས་མཁྱེན་གསལ་ལྟར་ངས་ཡ་ཧུ་དཱ་པ་རྣམས་ལ་ཉེས་པ་གང་ཡང་མ་བྱས།
ACT 25:11 གལ་ཏེ་ང་ཉེས་ཅན་པ་ཡིན་ཞིང༌། སྲོག་ཁྲིམས་གཏོང་དགོས་པའི་ཉེས་པའི་ལས་གང་ཞིག་བྱས་ཡོད་པ་ཡིན་ན་འཆི་བ་ལས་ཐར་བར་འགྱུར་བའི་ཐབས་མི་འཚོལ། གལ་ཏེ་དེ་ཚོས་བཙུགས་པའི་ཉེས་སྐྱོན་རྣམས་བདེན་པ་གང་ཡང་མིན་ན། སུས་ཀྱང་ང་ཁོ་ཚོའི་ལག་ཏུ་གཏོད་པར་མི་རུང༌། ངས་རྒྱལ་པོ་སེ་སར་ལ་སྙན་སེང་ཞུ་”ཞེས་གསུངས།
ACT 25:12 སྤྱི་ཁྱབ་ཕེ་སི་ཏུས་རང་གི་གྲོས་ཚོགས་ཀྱི་མི་དང་གྲོས་བསྡུར་བྱས་ནས་“རྒྱལ་པོ་སེ་སར་གྱིས་ཁྱོད་ལ་ཁྲིམས་གཅོད་བྱེད་པར་ཞུས་པས། ཁྱོད་རང་སེ་སར་གྱི་ཁྲིམས་རར་འགྲོ་དགོས་”ཞེས་སྨྲས།
ACT 25:13 ཉི་མ་ཁ་ཤས་འགོར་བའི་རྗེས་སུ་རྒྱལ་པོ་ཨག་རི་པཱ་དང་བཙུན་མོ་པུར་ནི་ཀཱེ་གཉིས་སེ་སར་རེ་ཡཱ་གྲོང་ཁྱེར་དུ་ཕེ་སི་ཏུ་ལ་འཚམས་འདྲི་བྱེད་པར་སླེབས།
ACT 25:14 ཁོ་ཚོ་དེར་ཉིན་མང་པོ་བསྡད་པས་ཕེ་སི་ཏུ་ཡིས་པའུ་ལུའི་གནས་ཚུལ་རྒྱལ་པོ་དང་གཏམ་གླེང་བྱས་པ་སྟེ་“ཕེ་ལིག་གིས་བཙོན་དུ་བཅུག་པའི་མི་ཞིག་ཡོད།
ACT 25:15 ང་ཡེ་རུ་ཤ་ལེམ་ལ་ཡོད་དུས་ཡ་ཧུ་དཱ་པའི་བླ་ཆེན་དང་རྒན་པོ་རྣམས་ཀྱིས་ཁོ་ལ་ནག་ཉེས་བཙུགས་ཏེ་ཁྲིམས་གཅོད་གཏོང་དགོས་པར་བསྐུལ།
ACT 25:16 ངས་ཁོ་ཚོར་ཉེས་སྐྱོན་འཛུགས་མཁན་གྱི་མདུན་དུ་རང་སྐྱོབ་ཀྱི་གཏམ་མ་བཤད་པའི་བར་དུ་མི་སུ་ཞིག་ཁ་གཏད་པ་རྣམས་ལ་གཏོད་པ་ནི་རོ་མཱ་པའི་ཁྲིམས་ལུགས་མིན་པར་སྨྲས།
ACT 25:17 དེའི་ཕྱིར་ཁོ་ཚོ་འདིར་འདུས་པས་ངས་དུས་ཚོད་མ་འགྱངས་པར་དེའི་སང་ཉིན་ཁྲིམས་དཔོན་གྱི་ཁྲི་ལ་བསྡད་ནས་མི་དེ་འཁྲིད་ཡོང་དགོས་པའི་བཀའ་བཏང༌།
ACT 25:18 ནག་ཉེས་འཛུགས་མཁན་རྣམས་ཡར་ལངས་ནས་ངའི་བསམ་པ་བཞིན་དུ་ཁོ་ལ་ཉེས་པ་ཅིའང་མ་བཙུགས་ཏེ།
ACT 25:19 རང་ཆོས་ཀྱི་རྣམ་པ་དང༌། ཡེ་ཤུ་ཞེས་བྱ་བ་ཞིག་ཤི་ནས་པའུ་ལུས་དེ་ནི་གསོན་པོར་འདུག་ཅེས་སྨྲས་པའི་སྐོར་ལ་རྩོད་པ་བྱས།
ACT 25:20 དོན་དེ་འདྲི་གཅོད་བྱེད་སྟངས་མ་ཤེས་པས་ངས་ཁོ་ལ། ཡེ་རུ་ཤ་ལེམ་ལ་སོང་ནས་ངའི་མདུན་དུ་དོན་འདི་ཁྲིམས་གཅོད་མྱོང་བར་འདོད་དམ་ཞེས་དྲིས།
ACT 25:21 འོན་ཀྱང་པའུ་ལུས་གོང་མའི་རྒྱལ་པོས་ཁྲིམས་ཐག་མ་བཅད་པའི་བར་དུ་འདིར་བཞག་པའི་ཞུ་བ་ཞུས་པའི་ཚེ། ངས་ཁོ་གོང་མའི་རྒྱལ་པོ་སེ་སར་ལ་མ་བཏང་བའི་བར་དུ་བཙོན་དུ་སྲུང་དགོས་པའི་བཀའ་བཏང་”ཞེས་བཤད།
ACT 25:22 དེ་ནས་རྒྱལ་པོ་ཨག་རི་པཱ་ཡིས་སྤྱི་ཁྱབ་ཕེ་སི་ཏུ་ལ་“ང་ཡང་མི་དེའི་གཏམ་ལ་ཉན་པར་དགའ་”ཞེས་ཟེར་བས་ཕེ་སི་ཏུ་ཡིས་“སང་ཉིན་གསན་པར་འགྱུར་”ཞེས་སྨྲས།
ACT 25:23 དེའི་སང་ཉིན་རྔམ་བརྗིད་དང་ལྡན་པའི་སྒོ་ནས་རྒྱལ་པོ་ཨག་རི་པཱ་དང་བཙུན་མོ་པུར་ནི་ཀཱེ་དམག་མིའི་སྟོང་དཔོན་དང༌། གྲོང་ཁྱེར་གྱི་དཔོན་རིགས་དང་བཅས་པར་ཚོགས་ཁང་ལ་འཛུལ། སྤྱི་ཁྱབ་ཕེ་སི་ཏུ་ཡིས་བཀའ་བཏང་བས་པའུ་ལུ་ཁོ་ཚོའི་མདུན་དུ་འཁྲིད།
ACT 25:24 སྤྱི་ཁྱབ་ཕེ་སི་ཏུ་ཡིས་“རྒྱལ་པོ་ཨག་རི་པཱ་དང་འདིར་ངེད་རྣམས་དང་མཉམ་དུ་བཞུགས་པའི་སྐུ་ཞབས་ཐམས་ཅད། ཁྱེད་རྣམས་ཀྱིས་གཟིགས་པའི་མི་འདིའི་ཕྱིར་ཡ་ཧུ་དཱ་པའི་མི་ཚོགས་ཀུན་གྱིས་ཡེ་རུ་ཤ་ལེམ་དང་གནས་འདིར་ང་ལ་ཁྲིམས་ཞུ་བ་ཞུས་ཏེ། སྐད་ཆེན་པོས་ཁོ་གསོན་པོར་གནས་པར་མི་རུང་ཞེས་བཤད།
ACT 25:25 འོན་ཀྱང་ངས་མི་འདིར་སྲོག་ཁྲིམས་གཏོང་དགོས་པའི་ཉེས་པ་ཅིའང་མ་རྙེད། ཁོ་ཉིད་ཀྱིས་གོང་མའི་རྒྱལ་པོར་ཁྲིམས་ཞུས་པས་ངས་ཁོ་དེར་གཏོང་བར་ཐག་གཅོད་བྱས་ཀྱང༌།
ACT 25:26 མི་འདིའི་སྐོར་གྱི་དོན་ངེས་གཏན་ཞིག་གོང་མའི་རྒྱལ་པོ་ལ་འབྲི་རྒྱུ་མེད། དེའི་ཕྱིར་ཁྱེད་རྣམས་དང༌། ལྷག་པར་དུ་རྒྱལ་པོ་ཨག་རི་པཱ་ཁྱེད་རང་གི་མདུན་དུ་ཁོ་འཁྲིད་ཡོད། དེ་ནི་འདྲི་གཅོད་འདི་ཚར་བའི་རྗེས་སུ་གོང་མའི་རྒྱལ་པོར་དོན་ཞིག་འབྲི་རྒྱུ་ཡོད་པའི་ཆེད་དུ་ཡིན།
ACT 25:27 གང་ལགས་ཟེར་ན། ཉེས་སྐྱོན་གང་ཡིན་མ་བྲིས་པར་བཙོན་པ་ཞིག་གཏོང་བ་དེ་ངའི་བསམ་པར་མི་རིགས་པས་སོ་”ཞེས་བཤད་དོ། །
ACT 26:1 རྒྱལ་པོ་ཨག་རི་པཱ་ཡིས་པའུ་ལུ་ལ་“གཏམ་བྱེད་ཆོག་”ཅེས་སྨྲས་ནས་པའུ་ལུས་ཕྱག་བརྐྱངས་ཏེ་ཉེས་སྐྱོན་མེད་པའི་སྐོར་ཁོ་རྣམས་ལ་གསལ་བཤད་བྱེད་དེ་
ACT 26:2 “ཀྱེ་རྒྱལ་པོ་ཨག་རི་པཱ་ལགས། ཡ་ཧུ་དཱ་པ་རྣམས་ཀྱིས་ང་ལ་ཉེས་འགེལ་བྱས་པའི་དོན་ཐམས་ཅད་ལ་བལྟས་ནས་དེ་རིང་ཁྱེད་ཀྱི་མདུན་དུ་ངས་ང་ལ་སྐྱོན་མེད་པའི་སྐོར་ཤོད་པར་ཤིན་ཏུ་དགའོ།
ACT 26:3 གང་ཡིན་ཟེར་ན། སྐུ་ཉིད་ཀྱིས་ཡ་ཧུ་དཱ་པའི་ལུགས་སྲོལ་དང་རྩོད་གླེང་ཐམས་ཅད་ལེགས་པར་མཁྱེན་པས་སོ། ཁྱེད་ཀྱིས་ཐུགས་རྒྱུད་རིང་པོས་ང་ལ་གསན་རོགས་གནང༌།
ACT 26:4 ང་ཆུང་དུས་ནས་ངའི་མི་རིགས་ཀྱི་ཁྲོད་དང༌། ཡེ་རུ་ཤ་ལེམ་དུ་བསྡད་པ་ནས་བཟུང་ངའི་སྤྱོད་ལམ་ཅི་ལྟར་ཡིན་པ་དེ་ཡ་ཧུ་དཱ་པ་ཐམས་ཅད་ཀྱིས་ཤེས།
ACT 26:5 ང་ངོ་ཤེས་ནས་ཡུན་རིང་ཕྱིན་པས། ངེད་རྣམས་ཀྱི་ཆོས་ལུགས་ཀུན་ལས་ཀྱང་ནན་པའི་རུ་ཚོགས་ཤིག་སྟེ་ཕཱ་རུ་ཤི་པ་ལྟར་ངས་མི་ཚེ་བསྐྱལ་བར་གལ་སྲིད་ཁོ་ཚོས་བདེན་དཔང་བྱེད་འདོད་ན་བྱེད་ཐུབ།
ACT 26:6 དཀོན་མཆོག་གིས་ངེད་རྣམས་ཀྱི་མེས་པོ་རྣམས་ལ་ཞལ་གྱིས་བཞེས་པའི་མནའ་ལ་ངས་ཡིད་རྟོན་བྱས་པའི་རྐྱེན་གྱིས་ད་ལྟ་ཁྲིམས་གཅོད་མྱོང༌།
ACT 26:7 ངེད་རྣམས་ཀྱི་ཚོ་ཁག་བཅུ་གཉིས་ཀྱིས་ཉིན་མཚན་མེད་པར་དཀོན་མཆོག་ལ་བརྩོན་སེམས་ཀྱིས་བསྙེན་བཀུར་ཞུ་བཞིན་ཞལ་ཆད་དེ་འགྲུབ་པའི་རེ་བ་བྱེད། མི་རྗེ་ཨག་རི་པཱ་ལགས། དོན་དེའི་ཕྱིར་ཡ་ཧུ་དཱ་པ་རྣམས་ཀྱིས་ང་ལ་ནག་ཉེས་འཛུགས།
ACT 26:8 ཁྱེད་ཚོའི་ནང་ནས་སུ་ཞིག་གིས་དཀོན་མཆོག་གིས་གཤིན་པོ་རྣམས་སླར་གསོན་པར་མཛད་པར་ཡིད་ཆེས་བྱེད་མི་སྲིད་སྙམ་པ་དེ་ཅིའི་ཕྱིར།
ACT 26:9 ངས་ཀྱང་ན་ཙ་རེལ་པ་ཡེ་ཤུའི་མཚན་ལ་རྒོལ་ཅི་ཐུབ་བྱེད་དགོས་པར་བསམས་པས།
ACT 26:10 ཡེ་རུ་ཤ་ལེམ་ལ་དེ་ལྟར་བྱས། བླ་ཆེན་གྱི་དབང་ཐོབ་ནས་ངས་དད་ལྡན་མང་པོ་བཙོན་དུ་བཅུག་པ་མ་ཟད། ཁོ་ཚོ་སྲོག་ཁྲིམས་གཏོང་བར་ངས་ཀྱང་མོས་པ་བྱས།
ACT 26:11 ཡ་ཧུ་དཱ་པའི་འདུ་ཁང་རེ་རེའི་ནང་ངས་ཁོ་ཚོར་ཉེས་ཆད་ཐེངས་མང་བཅད་དེ་ཁོ་ཚོས་སྐུར་བ་འདེབས་སུ་བཅུག་པའི་ཐབས་བཙལ། ཁོང་ཁྲོ་ཚད་མེད་ལངས་ནས་ངས་ཕྱི་པའི་གྲོང་ཁྱེར་ལའང་གནོད་འཚེ་བྱེད་ཆེད་ཁོ་ཚོ་རྗེས་སུ་བསྙེགས་ཏེ།
ACT 26:12 དེ་ལྟར་བྱེད་པའི་དུས་སུ། ང་ལ་བླ་ཆེན་གྱི་དབང་དང་ཆོག་མཆན་ཐོབ་སྟེ་དཱ་མེ་སེག་གྲོང་ཁྱེར་དུ་འགྲོ་བཞིན་ཡོད།
ACT 26:13 རྒྱལ་པོ་ཨག་རི་པཱ་ལགས། ལམ་བར་དུ་ཉིན་གུང་ཞིག་ལ་ངས་ནམ་མཁའ་ནས་ཉི་མའི་འོད་ལས་ཆེ་བ་ཞིག་ང་དང་ངའི་ལམ་གྲོགས་ཀྱི་ཕྱོགས་བཞིར་འཕྲོས་པར་མཐོང༌།
ACT 26:14 ང་ཚོ་ཚང་མ་ས་ལ་འགྱེལ་དུས། ཡ་ཧུ་དཱ་པའི་སྐད་ནས་ང་ལ། ཤ་ཨུལ། ཤ་ཨུལ། ཁྱོད་ཀྱིས་ང་ལ་ཅིའི་ཕྱིར་གནོད་སྐྱེལ། ཕྱུགས་རྫིའི་ལྕག་ཚན་ལ་རྡོག་རྒྱག་བཞུས་ན་ཁྱོད་ལ་གནོད་པ་ཡོང་ཞེས་གསུངས་པའི་སྒྲ་ཞིག་ཐོས་བྱུང༌།
ACT 26:15 ངས་གཙོ་བོ་ལགས། ཁྱེད་སུ་ཡིན་ཞེས་བཤད་པས་ཁོང་གིས་ང་ནི་ཁྱོད་ཀྱིས་གནོད་སྐྱེལ་བཞིན་པ་ཡེ་ཤུ་ཡིན་ནོ།
ACT 26:16 ད་ཡར་ལོངས་ཤིག ཁྱོད་ཀྱིས་གང་མཐོང་བ་འདི་དང༌། ངས་ཁྱོད་ལ་སྟོན་པར་འགྱུར་བའི་དོན་ལ་དཔང་པོ་བྱེད་ཅིང༌། ཁྱོད་ནི་ངའི་གཡོག་པོར་སྐོ་བའི་ཆེད་དུ་མངོན་པར་གྱུར།
ACT 26:17 ངས་ཁྱོད་ཁྱོད་ཀྱི་མི་རིགས་དང༌། ཡ་ཧུ་དཱ་པ་མིན་པ་རྣམས་ཀྱི་དབང་ལས་སྒྲོལ་བར་བྱ། ཁོ་ཚོའི་མིག་འབྱེད་པ་དང༌། མུན་པ་ལས་འོད་སྣང་ཕྱོགས་སུ་སྤོ་ཞིང༌། བདུད་སཱ་ཏན་གྱི་དབང་ལས་དཀོན་མཆོག་གི་ཕྱོགས་སུ་སེམས་བསྒྱུར་བའི་ཆེད་དུ་ངས་ཁྱོད་ཁོ་ཚོའི་རྩར་མངགས་པར་བྱ། དེ་ནི་ཁོ་ཚོའི་སྡིག་པ་སེལ་བ་དང༌། ང་ལ་དད་པ་བྱེད་པའི་སྒོ་ནས་དམ་པ་རུ་འགྱུར་བ་རྣམས་ཀྱི་ཁྲོད་ལ་གནས་ཤིག་ཐོབ་པའི་ཕྱིར་ཡིན།
ACT 26:19 ཀྱེ་རྒྱལ་པོ་ཨག་རི་པཱ་ལགས། དེ་ནས་ངས་དཀོན་མཆོག་གི་ཞིང་ཁམས་ནས་བྱུང་བའི་ཞལ་གཟིགས་བཞིན་དུ་སྒྲུབས་ཏེ།
ACT 26:20 ཐོག་མར་དཱ་མེ་སེག་གྲོང་ཁྱེར་དང༌། གཉིས་པར་ཡེ་རུ་ཤ་ལེམ། ཡ་ཧུ་དཱ་ཡུལ་ཀུན། མཐའ་མར་ཡ་ཧུ་དཱ་པ་མིན་པ་རྣམས་ལའང་དེ་ཚོས་སྤྱོད་པ་ངན་པ་སྤངས་ཏེ་སེམས་དཀོན་མཆོག་གི་ཕྱོགས་སུ་བསྒྱུར་ནས། དེ་དང་མཐུན་པའི་བྱ་བ་བྱེད་དགོས་པར་བསྒྲགས།
ACT 26:21 དེའི་ཕྱིར་ཡ་ཧུ་དཱ་པ་ཁ་ཅིག་གིས་མཆོད་ཁང་གི་ཁྱམས་རར་ང་འཛིན་བཟུང་བྱས་ནས་གསོད་པའི་ཐབས་བཙལ།
ACT 26:22 དེ་རིང་གི་བར་དུ་དཀོན་མཆོག་གིས་བསྲུངས་པར་མཛད་པས་ངས་མི་མཐོ་དམན་གཉིས་ཀ་ལ་བདེན་དཔང་བྱེད་བཞིན་འདིར་ལངས་ནས་སྡོད། མོ་ཤེ་ཚུད་པའི་ལུང་སྟོན་པ་རྣམས་ཀྱིས་གསུངས་པ་ལྟར་གང་འབྱུང་བར་འགྱུར་བའི་དོན་ཁོ་ནར་སྨྲ་སྟེ།
ACT 26:23 མཱ་ཤི་ཀ་ཁོང་ནི་སྡུག་བསྔལ་མྱོང་དགོས་པ་དང༌། འཆི་བ་ནས་སླར་གསོན་པོར་འགྱུར་བའི་ཐོག་མ་དེ་ཡིན་པའི་སྒོ་ནས་ཡ་ཧུ་དཱ་པ་དང་ཡ་ཧུ་དཱ་པ་མིན་པ་རྣམས་ལའང་འོད་སྣང་ལྡན་པའི་འཕྲིན་བཟང་སྒྲོག་མཁན་དུ་འགྱུར་བ་དེ་ཡིན་ནོ་”ཞེས་གསུངས།
ACT 26:24 པའུ་ལུས་དེ་ལྟར་གསུངས་པའི་དུས་སྤྱི་ཁྱབ་ཕེ་སི་ཏུ་ཡིས་སྐད་ཆེན་པོས་“པའུ་ལུ། ཁྱོད་སྦྱངས་པ་བྱེད་རྒྱུ་མང་དྲགས་པས་སྨྱོས་སོ་”ཞེས་བཤད་ནས།
ACT 26:25 པའུ་ལུས་“མི་རྗེ་ཕེ་སི་ཏུ་ལགས། ང་སྨྱོ་བ་མིན་ཏེ་བདེན་པ་དང་ཁ་གསལ་བའི་གཏམ་སྨྲ།
ACT 26:26 གང་ལགས་ཤེ་ན། དོན་དེ་རྣམས་ལྐོག་ཏུ་མ་བསྒྲུབས་པས་རྒྱལ་པོས་དེ་ལ་ངེས་པར་དོ་སྣང་བྱས་ཏེ་མཁྱེན་པས་ངས་འཇིགས་པ་མེད་པའི་སྒོ་ནས་ཁོང་ལ་བཤད།
ACT 26:27 རྒྱལ་པོ་ཨག་རི་པཱ་ལགས། ཁྱེད་ཀྱིས་ལུང་སྟོན་པ་རྣམས་ལ་ཐུགས་ཆེས་སམ། ཁྱེད་ཀྱིས་ཐུགས་ཆེས་པ་ངས་ཤེས་”ཞེས་གསུངས་པས།
ACT 26:28 ལན་དུ་ཨག་རི་པཱ་ཡིས་པའུ་ལུ་ལ་“ཁྱོད་ཀྱིས་ང་ལ་དུས་ཅུང་ཟད་བསྐུལ་བ་ཙམ་གྱིས་ང་མཱ་ཤི་ཀ་པ་ཞིག་ཏུ་འགྱུར་བར་འདོད་དམ་”ཞེས་སྨྲས།
ACT 26:29 པའུ་ལུས་“དུས་ཅུང་ཟད་དམ་རིང་པོ་ཅི་ཡིན་རུང༌། ཁྱེད་རང་མ་ཟད་ངའི་གཏམ་ལ་དེ་རིང་གསན་མཁན་ཐམས་ཅད་ལྕགས་ཐག་འདི་མ་གཏོགས་པར་ང་དང་འདྲ་བར་འགྱུར་བ་དེ་ངས་དཀོན་མཆོག་ལ་སྨོན་ལམ་འདེབས་”ཞེས་གསུངས།
ACT 26:30 རྒྱལ་པོ་དང༌། སྤྱི་ཁྱབ། པུར་ནི་ཀཱེ་ལ་སོགས་པའི་དེར་སྡོད་ཡོད་པ་རྣམས་ཡར་ལངས་ཏེ།
ACT 26:31 ཕྱིར་ཐོན་དུས་ཁོ་ཚོས་གཅིག་གིས་གཅིག་ལ་“མི་འདིས་སྲོག་ཁྲིམས་གཏོང་བའམ་བཙོན་དུ་བཅུག་དགོས་པའི་བྱ་བ་ཅིའང་བྱས་མེད་”ཅེས་བཤད།
ACT 26:32 རྒྱལ་པོ་ཨག་རི་པཱ་ཡིས་སྤྱི་ཁྱབ་ཕེ་སི་ཏུ་ལ་“མི་འདིས་གོང་མའི་རྒྱལ་པོ་སེ་སར་ལ་སྙན་ཞུ་ཕུལ་མེད་ན། གྲོལ་བར་འགྱུར་རོ་”ཞེས་སྨྲས་སོ། །
ACT 27:1 ངེད་རྣམས་གྲུ་གཟིངས་ལ་བསྡད་ནས་དབྱི་ཏ་ལི་ཡུལ་ལ་འགྲོ་བར་ཐག་གཅོད་བྱས་པའི་ཚེ། ཁོ་ཚོས་པའུ་ལུ་བཙོན་པ་གཞན་ཁ་ཅིག་དང་བཅས་པར་ཨུ་རྒ་ཟི་ཏུ་ཞེས་པའི་དམག་ཁག་གི་བརྒྱ་དཔོན་ཡུ་ལི་ཡུ་ཟེར་བ་ཞིག་གི་དབང་དུ་གཏད།
ACT 27:2 མ་ཀེ་དོན་ཡཱ་ཡུལ་གྱི་ཐེ་ས་ལོ་ནི་ཀེ་གྲོང་ཁྱེར་ནས་ཡིན་པའི་ཨ་རིས་ཐར་ཀུ་ང་ཚོ་དང་བཅས་པར། ཨེ་ཞེ་ཡཱ་ཞིང་ཆེན་གྱི་མཚོ་འགྲམ་བརྒྱུད་དེ་འགྲོ་བའི་ཨད་ར་མི་ཏི་གྲུ་ཁའི་གྲུ་གཟིངས་ལ་བསྡད་ནས་ཐོན།
ACT 27:3 དེའི་ཕྱི་ཉིན་ཚི་དོན་གྲུ་ཁར་སླེབས་ནས་བརྒྱ་དཔོན་ཡུ་ལི་ཡུ་ཡིས་པའུ་ལུ་ལ་གཟིགས་སྐྱོང་གནང་སྟེ་གྲོགས་པོ་རྣམས་ཀྱིས་ཁོང་ལ་སྣེ་ལེན་བྱེད་པའི་ཆེད་དུ་ཁོ་ཚོའི་རྩར་ཕེབས་སུ་བཅུག
ACT 27:4 དེ་ནས་ངེད་རྣམས་གྲུ་གཟིངས་ལ་བསྡད་པ་དང༌། གྲུ་གཟིངས་ཀྱི་མདུན་ཕྱོགས་ནས་ལྷགས་པ་བརྒྱབ་པས་ཀིབ་རུ་གླིང་ཕྲན་གྱི་ལྷགས་པ་མེད་པའི་ཕྱོགས་སུ་ཕྱིན།
ACT 27:5 ཀི་ལིག་ཡཱ་དང་ཕམ་ཕིལ་ཡཱ་ཡུལ་གཉིས་ཀྱི་མཚོ་བརྒལ་ནས་ངེད་རྣམས་ལིག་ཡཱ་ཞིང་ཆེན་གྱི་གྲུ་ཁར་མུ་རཱ་ལ་སླེབས།
ACT 27:6 དེར་བརྒྱ་དཔོན་ལ་དབྱི་ཏ་ལི་ཡུལ་ལ་འགྲོ་བའི་ཨ་ལིག་ཟན་དྲི་ཡཱ་གྲོང་ཁྱེར་ནས་ཡོང་བའི་གྲུ་གཟིངས་ཤིག་རྙེད་པ་དང༌། ངེད་རྣམས་དེའི་ནང་བཅུག
ACT 27:7 ངེད་རྣམས་གྲུ་གཟིངས་ལ་ཉི་མ་མང་པོ་འགོར་ཞིང་དཀའ་ངལ་ཆེན་པོ་བྱུང་སྟེ་གཞི་ནས་ནི་དུ་ཞེས་པའི་གྲོང་ཁྱེར་གྱི་ཉེ་འཁོར་དུ་སླེབས། རླུང་གིས་བཀག་རྒྱ་ཐེབས་ཏེ་མདུན་དུ་འགྲོ་མ་ཐུབ་པས། ཀེ་རེ་ཊེ་གླིང་ཕྲན་གྱི་སྣེ་མོ་སལ་མོ་ནཱེ་བར་དུ་ལྷགས་པ་མེད་པའི་ཕྱོགས་སུ་ཕྱིན།
ACT 27:8 ང་ཚོ་དཀའ་ཚེགས་ཆེན་པོའི་སྒོ་ནས་མཚོ་འགྲམ་བརྒྱུད་དེ་ལ་སེ་ཡཱ་གྲོང་ཁྱེར་དང་ཉེ་བའི་གྲུ་ཁ་བདེ་ཅན་ཞེས་བྱ་བའི་ས་ཆར་སླེབས།
ACT 27:9 ལམ་བར་དུ་དུས་ཚོད་མང་པོ་འགོར་བ་དང༌། གྲུ་གཟིངས་ལ་བསྡད་དེ་བསྐྱོད་པའི་ཉེན་ཁ་ཆེ་བ། དེ་བཞིན་སྨྱུང་གནས་སྲུང་བའི་དུས་ཆེན་ཚར་ཟིན་པས་པའུ་ལུས་ཁོ་ཚོར་བསྐུལ་ཏེ་
ACT 27:10 “སྐུ་ཞབས་རྣམས། ཆུ་ཐོག་གི་འགྲུལ་བཞུད་འདི་ནི་གྲུ་གཟིངས་དང་དོས་པོ་ལ་གཏོར་བཤིག་ཐེབས་པ་དང༌། ངེད་རྣམས་ཀྱི་སྲོག་ལའང་ཉེན་ཁ་ཆེན་པོ་ཡོད་པར་ངས་ཤེས་”ཞེས་གསུངས།
ACT 27:11 འོན་ཀྱང་བརྒྱ་དཔོན་དེས་པའུ་ལུས་གང་གསུངས་པ་ལས་གྲུ་དཔོན་དང་གྲུ་གཟིངས་ཀྱི་བདག་པོ་གཉིས་ཀྱིས་གང་བཤད་པ་ལ་དོ་སྣང་བྱས།
ACT 27:12 དགུན་ཁར་གྲུ་ཁ་དེ་སྡོད་པར་མི་བདེ་བས་མི་མང་ཆེ་བས་ཕར་འགྲོ་བར་ཐག་གཅོད་བྱས། ཁོ་ཚོས་ཕེ་ནི་ཀཱེ་ལ་སླེབས་ནས་དེ་ལ་དགུན་ཁ་སྡོད་པར་རེ་བ་བྱས། ས་ཆ་དེ་ནི་ཀེ་རེ་ཊེ་གླིང་ཕྲན་གྱི་མཚོ་ཁ་ཞིག་ཡིན་ཏེ་ལྷོ་ནུབ་དང་ནུབ་བྱང་ལ་ཁ་ཕྱོགས་ཡོད།
ACT 27:13 ལྷོ་ཕྱོགས་ནས་རླུང་འཇམ་པོ་ཞིག་བྱུང་བའི་ཚེ་ཁོ་ཚོའི་དོན་སྒྲུབ་པར་སྙམ་པས། གྲུ་གཟིངས་ཀྱི་གཏིང་རྡོ་ཡར་དྲངས་ནས་ཀེ་རེ་ཊེ་གླིང་ཕྲན་གྱི་མཚོ་འགྲམ་དང་ཉེ་བར་སོང༌།
ACT 27:14 དེ་ནས་ཅུང་མ་འགོར་བར་བྱང་ཤར་བ་ཞེས་བྱ་བའི་ལྷགས་པ་དྲག་པོ་ཞིག་ཀེ་རེ་ཊེ་གླིང་ཕྲན་ནས་རྒྱག་པར་བརྩམས།
ACT 27:15 རླུང་དེས་གྲུ་གཟིངས་བཟུང་ནས་དེའི་ཕྱོགས་སུ་ཁ་ལོ་སྒྱུར་མ་ཐུབ་པས་རླུང་གིས་གང་སར་འདེད།
ACT 27:16 ཀའུ་དཱ་ཞེས་པའི་གླིང་ཕྲན་ཆུང་བ་ཞིག་གི་ལྷགས་པ་མེད་པའི་ཕྱོགས་སུ་ཕྱིན་ཏེ་གྲུ་གཟིངས་ཀྱི་གྲུ་ཆུང་བ་དེ་དམ་པོར་བཟུང་ནས།
ACT 27:17 དཀའ་ལས་ཆེན་པོ་དང་བཅས་ཏེ་ཡར་དྲངས་ནས་གྲུ་གཟིངས་ལ་བཞག དེ་ནས་གྲུ་གཟིངས་མི་འཇིག་པའི་ཕྱིར་དེར་ཐག་པ་ཡིས་བསྡམས། སིར་ཏི་ཞེས་བྱ་བའི་ཆུ་གཏིང་ཐུང་སར་གྲུ་གཟིངས་ཆག་པའི་འཇིགས་པ་སྐྱེས་ཏེ་ཁོ་ཚོས་གྲུ་གཟིངས་ཀྱི་དར་པོ་ཆེ་རྣམས་ཕབ་ནས་གྲུ་གཟིངས་རླུང་གིས་འཁྱེར་བར་གྱུར།
ACT 27:18 དེའི་སང་ཉིན་ལྷགས་པ་དྲག་པོས་གྲུ་གཟིངས་ཤིན་ཏུ་གཡོ་བས་ཁོ་ཚོས་དོས་པོ་མཚོ་ནང་དུ་གཡུག་པར་བརྩམས།
ACT 27:19 ཉི་མ་གསུམ་པར་ཁོ་ཚོ་རང་གིས་གྲུ་གཟིངས་སྟེང་གི་ཡོ་ཆས་མཚོ་ནང་དུ་གཡུགས།
ACT 27:20 ཉིན་མང་པོའི་རིང་ཉི་མ་དང་སྐར་མ་མི་མཐོང་ཞིང་རླུང་འཚུབ་དྲག་པོ་མུ་མཐུད་བརྒྱབ་པས། མཇུག་ཏུ་ང་ཚོ་ལས་སྲོག་ཐར་བའི་རེ་བ་ཟད་པར་གྱུར།
ACT 27:21 ཡང་ཁོ་ཚོས་དུས་ཚོད་རིང་པོ་ཁ་ལག་མ་བཟས་པས་པའུ་ལུ་དེ་རྣམས་ཀྱི་དཀྱིལ་ལ་བཞེངས་ནས་“སྐུ་ཞབས་རྣམས། ངས་སྔར་སྨྲས་པའི་གཏམ་ལ་ཉན་ཏེ། ཀེ་རེ་ཊེ་ནས་མ་ཐོན་ན་གནོད་འཚེ་དང་གཏོར་བཤིག་འདི་འདྲ་མྱོང་མེད།
ACT 27:22 ད་ངས་ཁྱེད་ཚོར་སེམས་མ་འཇིགས་པར་སྐུལ། གང་ཡིན་ཞེ་ན། གྲུ་གཟིངས་བཤིག་པར་འགྱུར་ན་ཡང༌། ཁྱེད་ཚོ་ཚང་མ་ཐར་བར་འགྱུར་ངེས་ཡིན།
ACT 27:23 རྒྱུ་མཚན་ནི་མདང་དགོང་ངས་བསྙེན་བཀུར་ཞུས་པའི་བདག་པོ་དཀོན་མཆོག་གི་ཕོ་ཉ་ཞིག་གིས་ངའི་མདུན་དུ་བཞེངས་ཏེ་འདི་ལྟར་གསུངས།
ACT 27:24 པའུ་ལུ། མ་འཇིགས་ཤིག ཁྱོད་ནི་རྒྱལ་པོ་སེ་སར་གྱི་དྲུང་དུ་འགྲོ་དགོས་ཏེ། ལྟོས་ཤིག གྲུ་གཟིངས་ནང་ཁྱོད་དང་མཉམ་དུ་འགྲོ་བ་ཐམས་ཅད་ལ་དཀོན་མཆོག་གིས་བདེ་འཇགས་གནང་བ་ཡིན་ནོ་ཞེས་གསུངས།
ACT 27:25 དཀོན་མཆོག་གིས་གང་གསུངས་པ་བཞིན་དུ་མཛད་པར་ངས་ཡིད་ཆེས་བྱེད་པས། མ་འཇིགས་ཤིག
ACT 27:26 འོན་ཀྱང་རླུང་གིས་གྲུ་གཟིངས་གླིང་ཕྲན་ཞིག་གི་མཚོ་འགྲམ་ལ་འདེད་པར་འགྱུར་”ཞེས་གསུངས།
ACT 27:27 ཨ་དྲི་ཡཱ་ཞེས་པའི་རྒྱ་མཚོར་རླུང་གིས་གྲུ་གཟིངས་འདེད་དེ་མཚན་མོ་བཅུ་བཞི་པའི་ནམ་ཕྱེད་ཙམ་ལ་གྲུ་པས་སྐམ་ས་དང་ཉེ་བ་ཞིག་ལ་སླེབས་པར་སྙམ།
ACT 27:28 གཏིང་ཚད་འཇལ་བས་སྨི་གསུམ་ཅུ་སོ་བདུན་ཙམ་ཡོད། ཏོག་ཙམ་སོང་ནས་ཡང་སྐྱར་འཇལ་བས་གཏིང་ཚད་སྨི་ཉི་ཤུ་རྩ་བདུན་ཡོད།
ACT 27:29 གྲུ་གཟིངས་བྲག་ལ་ཐོགས་པའི་འཇིགས་པ་སྐྱེས་ཏེ་ཁོ་ཚོས་གྲུ་གཟིངས་ཀྱི་མཇུག་ནས་གཏིང་རྡོ་བཞི་ཕབ་སྟེ་ནམ་ལངས་པར་རེ་སྒུག་བྱེད།
ACT 27:30 གྲུ་མགོ་ནས་གཏིང་རྡོ་འབེབས་པའི་ཁུལ་བྱས་ཏེ་གྲུ་གཟིངས་ལས་ཐར་བའི་ཕྱིར་གྲུ་པས་གྲུ་ཆུང་རྒྱ་མཚོར་ཕབ།
ACT 27:31 པའུ་ལུས་བརྒྱ་དཔོན་དང་དམག་མི་རྣམས་ལ་“མི་དེ་ཚོ་གྲུ་གཟིངས་ནང་ལ་མ་བསྡད་ན། ཁྱེད་ཚོ་སྲོག་ཐར་བར་འགྱུར་མི་སྲིད་”ཅེས་གསུངས།
ACT 27:32 དམག་མིས་གྲུ་ཆུང་གི་ཐག་པ་བཅད་ནས་རྒྱ་མཚོར་བཏང༌།
ACT 27:33 ནམ་ལངས་པའི་ཙམ་ལ་པའུ་ལུས་མི་ཚང་མར་ཟས་ཟ་བར་བསྐུལ་ཏེ་“ཁྱེད་ཚོས་སེམས་ཁྲལ་བྱས་ཏེ་དེ་རིང་ཟས་མ་བཟས་པའི་ཉིན་བཅུ་བཞི་པ་ཡིན་པས།
ACT 27:34 ངས་ཁྱེད་རྣམས་ལ་ཁ་ལག་ཟ་བར་སྐུལ། དེ་ནི་ཁྱེད་རྣམས་གསོན་པོར་གནས་པའི་ཆེད་དུ་ཡིན། གང་ཡིན་ཟེར་ན། ཁྱེད་ཚོའི་སྐྲའི་ཉག་མ་གཅིག་ཀྱང་འཇིག་པར་མི་འགྱུར་”ཞེས་གསུངས་ནས།
ACT 27:35 བག་ལེབ་བླངས་ནས་ཁོ་ཚོ་ཚང་མའི་མདུན་དུ་དཀོན་མཆོག་ལ་བཀའ་དྲིན་ཆེ་ཞུས་པ་དང༌། དུམ་བུར་བཟོས་ནས་བཞེས་པར་བརྩམས།
ACT 27:36 ཁོང་ཚོ་ཚང་མ་སེམས་བདེ་བར་གྱུར་ཏེ་ཁ་ལག་བཟས།
ACT 27:37 (གྲུ་གཟིངས་ནང་ལ་ང་ཚོ་ཁྱོན་བསྡོམས་མི་གྲངས་ཉིས་བརྒྱ་བདུན་ཅུ་དོན་དྲུག་ཡོད་)
ACT 27:38 ཁོ་ཚོས་བཟས་ནས་ལྟོ་བ་ཁེངས་རྗེས། གྲུ་གཟིངས་ཡང་པོ་ཡོང་བའི་ཕྱིར་གྲོ་རྣམས་རྒྱ་མཚོར་འཕངས།
ACT 27:39 ནམ་ལངས་པའི་ཚེ་ས་ཆ་དེ་གང་ཡིན་མ་ཤེས་ཀྱང༌། ཁོ་ཚོས་བྱེ་མ་ཡོད་པའི་མཚོ་ཁུག་མཐོང་བས། དེར་བཏང་ཐུབ་ན་གྲུ་གཟིངས་གཏོང་བར་བསམས།
ACT 27:40 གཏིང་རྡོ་རྣམས་ཀྱི་ཐག་པ་བཅད་དེ་རྒྱ་མཚོར་བཞག་པ་དང་ཆབས་ཅིག་ཁོ་ཚོས་མཇུག་གི་སྐྱ་བོའི་ཐག་པ་བཀྲོལ། མདུན་གྱི་གྲུ་གཟིངས་ཀྱི་དར་པོ་ཆེ་རླུང་དང་བསྟུན་ནས་ཡར་བཀྱགས་པ་དང་སྐམ་སའི་ཕྱོགས་སུ་གྲུ་གཟིངས་བཏང༌།
ACT 27:41 ཆུ་གཏིང་ཐུང་སར་བྲག་ལ་ཐོགས་ནས་གྲུ་གཟིངས་འགུལ་རྒྱུ་མེད་པར་གྱུར་ཞིང༌། གྲུ་མགོ་བརྟན་པོར་ལུས་ཏེ་རྦ་རླབས་ཤུགས་ཀྱིས་གྲུ་མཇུག་ལ་གཏོར་བཞིན་ཡོད།
ACT 27:42 བཙོན་པ་སུ་ཞིག་ཀྱང་རྐྱལ་བརྒྱབ་ནས་མི་འབྲོས་པའི་ཆེད་དུ་དམག་མི་ཚོས་ཁོ་རྣམས་གསོད་པར་བསམས་ཀྱང༌།
ACT 27:43 བརྒྱ་དཔོན་གྱིས་པའུ་ལུ་ཐར་བར་བྱེད་འདོད་པས་འཆར་གཞི་དེ་བཀག་པ་དང༌། ཐོག་མར་རྐྱལ་རྒྱག་ཐུབ་མཁན་ཚང་མ་རྒྱ་མཚོར་མཆོངས་ནས་སྐམ་སར་རྐྱལ་རྒྱག་དགོས་ཤིང༌།
ACT 27:44 གཞན་རྣམས་པང་ལེབ་དང་གྲུ་གཟིངས་ཀྱི་ཆག་དུམ་བཟུང་ནས་ཁོ་ཚོའི་རྗེས་སུ་འབྲངས་དགོས་པའི་བཀའ་བཏང༌། དེ་ལྟར་མི་ཚང་མ་ཉེན་ཁ་ལས་ཐར་ཏེ་སྐམ་སར་སླེབས་སོ། །
ACT 28:1 ང་ཚོ་ཐར་བར་གྱུར་ནས་ངེད་རྣམས་ཀྱིས་གླིང་ཕྲན་དེའི་མིང་ལ་མེ་ལི་ཊེ་ཞེས་ཟེར་གྱི་ཡོད་པ་ཤེས།
ACT 28:2 གླིང་ཕྲན་སྟེང་གནས་པའི་མི་རྣམས་ཀྱིས་ངེད་རྣམས་ལ་དྲིན་ཆེན་པོ་བྱས། ཆར་པ་བབས་ནས་གནམ་གཤིས་གྲང་མོ་ཆགས་པས་ཁོ་ཚོས་མེ་ཞིག་བཏང་ནས་ང་ཚོ་ཚང་མར་སྣེ་ལེན་བྱས།
ACT 28:3 པའུ་ལུས་མེ་ཤིང་ཧྲུག་པོ་བསྒྲུགས་ཏེ་མེར་བུད་པ་དང༌། མེ་ཡིས་བསྐྲད་པའི་དུག་སྦྲུལ་ཞིག་པའུ་ལུའི་ཕྱག་ལ་འབྱར།
ACT 28:4 ཡུལ་དེའི་མི་རྣམས་ཀྱིས་སྦྲུལ་དེ་ཁོང་གི་ཕྱག་ནས་འཕྱངས་པར་མཐོང་ནས་གཅིག་གིས་གཅིག་ལ་“མི་འདི་ནི་ལག་དམར་བ་ཞིག་ཡིན་པར་ཐེ་ཚོམ་མེད། རྒྱ་མཚོ་ལས་ཐར་ཡང༌། གཞུང་དྲང་ཟེར་བའི་ལྷ་མོས་ཁོ་གསོན་པོར་མི་འཇོག་”ཅེས་བཤད།
ACT 28:5 ཁོང་གིས་སྦྲུལ་དེ་མེའི་ནང་དུ་སྤྲུགས་ནས་ཁོང་ལ་གནོད་པ་ཅི་ཡང་མ་བྱུང༌།
ACT 28:6 མི་དེ་ཚོས་ཁོང་གི་སྐུ་གཟུགས་སྐྲང་བའམ་གློ་བུར་དུ་ས་ལ་འགྱེལ་ནས་ཤི་བར་འགྱུར་སྙམ་ཡང༌། ཡུན་རིང་བསྒུགས་ནས་གནོད་པ་ཅིའང་མ་བྱུང་བ་མཐོང་བས་སེམས་བསྒྱུར་ཏེ་ཁོ་ཚོས་ཁོང་ལྷ་ཞིག་ཡིན་པར་བཤད།
ACT 28:7 གླིང་ཕྲན་དེའི་ས་གནས་དཔོན་པོ་པུབ་ལི་ཡུ་ཞེས་ཟེར་མཁན་ཞིག་གི་གཞིས་ཀ་ཉེ་འཁོར་དུ་ཡོད་དེ། ཁོས་ངེད་རྣམས་བསུས་ནས་ཉིན་གསུམ་རིང་སྣེ་ལེན་བྱས།
ACT 28:8 སྐབས་དེ་དུས་པུབ་ལི་ཡུ་ཡི་ཕ་ནི་ཚ་བ་རྒྱས་པ་དང་བཤལ་ནད་ཕོག་སྟེ་ཉལ་ཁྲིའི་སྒང་ལ་ལུས་ཡོད། པའུ་ལུ་ཁོའི་རྩར་ཕེབས་ཏེ། སྨོན་ལམ་བཏབ་ནས་ཕྱག་ཁོའི་སྟེང་ལ་བཞག་སྟེ་ནད་ལས་ཐར་བར་མཛད།
ACT 28:9 དེ་ལྟར་བྱུང་བའི་རྗེས་སུ་གླིང་ཕྲན་སྟེང་གི་ནད་པ་གཞན་རྣམས་ཀྱང་ཁོང་གི་མདུན་དུ་ཡོང་ནས་ནད་ལས་ཐར་བར་གྱུར།
ACT 28:10 ཁོ་རྣམས་ཀྱིས་ང་ཚོར་བཀུར་སྟི་མང་པོ་བྱས་པ་དང༌། གྲུ་གཟིངས་ལ་འགྲོ་བའི་སྐབས་ངེད་རྣམས་ལ་མཁོ་བ་ཚང་མ་གྲུ་གཟིངས་ནང་བཞག
ACT 28:11 ཟླ་བ་གསུམ་འགོར་རྗེས། ང་ཚོ་ཨ་ལིག་ཟན་དྲི་ཡཱ་གྲོང་ཁྱེར་ནས་ཡོང་བའི་གྲུ་གཟིངས་ཤིག་ལ་བསྡད་ནས་ཕྱིན། གྲུ་གཟིངས་དེ་དགུན་ཁ་གླིང་ཕྲན་དེར་བསྡད་ཅིང་དེའི་གྲུ་མགོར་མཚེ་མ་ཞེས་ཟེར་བའི་ལྷ་ཡི་རྟགས་ཤིག་ཡོད།
ACT 28:12 སི་ར་ཀུ་སེ་ཞེས་པའི་གྲོང་ཁྱེར་ལ་སླེབས་ནས་དེར་ཉི་མ་གསུམ་བསྡད།
ACT 28:13 དེ་ནས་གྲུ་གཟིངས་ལ་བསྡད་དེ་རེ་གི་ཡོན་གྲོང་ཁྱེར་དུ་སླེབས། དེའི་སང་ཉིན་ལྷོ་རླུང་ལྡངས་ཤིང༌། ཉི་མ་གཉིས་པར་ངེད་རྣམས་པུ་ཏེའོ་ལི་ཞེས་པའི་གྲུ་ཁར་སླེབས།
ACT 28:14 དེར་ཡོད་པའི་སྤུན་ཟླ་རྣམས་དང་ཕྲད་དེ་ཁོ་ཚོས་གདན་འདྲེན་ཞུས་ནས་ངེད་རྣམས་ཉི་མ་བདུན་དེར་བསྡད། དེ་འདྲའི་ངང་ནས་ངེད་རྣམས་རོ་མཱ་རྒྱལ་སར་སླེབས།
ACT 28:15 དེར་ཡོད་པའི་སྤུན་ཟླ་རྣམས་ཀྱིས་ངེད་རྣམས་ཀྱི་སྐོར་ཐོས་པས་ཨ་པི་ཡུ་ཞེས་པའི་ཚོང་ར་དང༌། མགྲོན་ཁང་གསུམ་ཞེས་པའི་གནས་ཀྱི་བར་དུ་ང་ཚོ་བསུ་བར་ཡོང༌། པའུ་ལུས་ཁོ་རྣམས་གཟིགས་པས་དཀོན་མཆོག་ལ་བཀའ་དྲིན་ཆེ་ཞུས་པ་དང༌། སྙིང་སྟོབས་དང་ལྡན་པར་གྱུར།
ACT 28:16 རྒྱལ་ས་རོ་མཱ་ལ་སླེབས་ནས་པའུ་ལུ་དང་དམག་མི་སྲུང་མཁན་གཅིག་མཉམ་དུ་སྒེར་གྱི་ཁང་པ་ཞིག་ལ་བཞུགས་པར་བཅུག
ACT 28:17 ཉི་མ་གསུམ་གྱི་རྗེས་སུ་པའུ་ལུས་ཡ་ཧུ་དཱ་པའི་འགོ་ཁྲིད་པ་རྣམས་བོས་པ་དང༌། འཛོམས་ནས་ཁོང་གིས་ཁོ་ཚོར་“སྤུན་ཟླ་རྣམས། ངས་ངེད་རྣམས་ཀྱི་མི་རིགས་སམ། མེས་པོའི་ལུགས་སྲོལ་དང་འགལ་བའི་ལས་ཅིའང་མ་བྱས་ཀྱང༌། ང་ཡེ་རུ་ཤ་ལེམ་ལ་འཛིན་བཟུང་བྱས་ཏེ་རོ་མཱ་པའི་ལག་ཏུ་གཏད།
ACT 28:18 ཁོ་ཚོས་འདྲི་གཅོད་བྱས་པའི་རྗེས་སུ་ང་གློད་གྲོལ་གཏོང་བར་འདོད། གང་ཡིན་ཞེ་ན། སྲོག་ཁྲིམས་གཏོང་དགོས་པའི་རྒྱུ་རྐྱེན་ཅིའང་མ་རྙེད།
ACT 28:19 འོན་ཀྱང་ཡ་ཧུ་དཱ་པ་རྣམས་ཀྱིས་ང་གློད་གྲོལ་གཏོང་བར་ངོ་རྒོལ་བྱས་པས། གོང་མའི་རྒྱལ་པོ་སེ་སར་ལ་སྙན་སེང་མི་ཞུ་ཐབས་མེད་བྱུང༌། འོན་ཏེ་ངའི་མི་རིགས་ལ་ཉེས་འཛུགས་བྱེད་རྒྱུ་ཅིའང་མེད།
ACT 28:20 དེའི་ཕྱིར་ངས་ཁྱེད་རྣམས་དང་གཏམ་གླེང་བྱེད་པར་བོས། ཡི་སི་ར་ཨེལ་གྱི་མིའི་རེ་བའི་ཆེད་ང་ལྕགས་ཐག་འདི་ཡིས་བཅིངས་”ཞེས་གསུངས།
ACT 28:21 ལན་དུ་ཁོ་ཚོས་“ཡ་ཧུ་དཱ་ཡུལ་ནས་ཁྱེད་ཀྱི་སྐོར་ལ་ཡི་གེ་ཡང་མ་འབྱོར། ཡ་ཧུ་དཱ་པའི་སྤུན་ཟླ་སུ་ཞིག་གིས་འདིར་ཡོང་ནས་ཁྱེད་ཀྱི་ངན་གཏམ་ཡང་མ་བཤད།
ACT 28:22 འོན་ཀྱང་ང་ཚོས་ཁྱེད་ཀྱི་བསམ་འཆར་གང་ཡིན་པ་ཉན་པར་འདོད། གང་ཡིན་ཟེར་ན། ཡུལ་ཀུན་ཏུ་མི་རྣམས་ཀྱིས་ཆོས་ལུགས་འདིའི་སྐོར་ལ་ངན་གཏམ་བཤད་པ་ངེད་རྣམས་ཀྱིས་ཤེས་”ཞེས་སྨྲས།
ACT 28:23 ཁོ་ཚོས་པའུ་ལུ་དང་མཇལ་བའི་ཉིན་ཞིག་གཏན་འཁེལ་བཟོས་ནས་མི་མང་པོ་ཞིག་ཁོང་གི་བཞུགས་སར་ཡོང༌། ཞོགས་པ་ནས་མཚན་མོའི་བར་དུ་ཁོང་གིས་ཁོ་ཚོར་དཀོན་མཆོག་གི་རྒྱལ་སྲིད་ལ་བདེན་དཔང་མཛད་ཅིང༌། མོ་ཤེའི་བཀའ་ཁྲིམས་དང་ལུང་སྟོན་པའི་མདོ་གཉིས་ལ་བརྟེན་ནས་ཡེ་ཤུའི་སྐོར་སྐུལ་བར་མཛད།
ACT 28:24 ཁོང་གིས་གསུངས་པའི་བཀའ་ལ་ཁ་ཅིག་གིས་དད་པ་བྱས་ཀྱང༌། ཁ་ཅིག་གིས་དད་པ་མ་བྱས་པས།
ACT 28:25 མི་མཐུན་པ་བྱུང་ཞིང༌། ཁོ་རྣམས་ཕྱིར་ཐོན་པའི་ཚེ་པའུ་ལུས་“དམ་པའི་ཐུགས་ཉིད་ཀྱིས་ལུང་སྟོན་པ་ཡེ་ཤ་ཡཱ་བརྒྱུད་ནས་ཁྱེད་ཀྱི་མེས་པོ་རྣམས་ལ་ལེགས་པར་གསུངས་ཏེ།
ACT 28:26 ཁྱེད་ཀྱིས་མི་རྣམས་ཕྱོགས་ལ་འདི་ལྟར་ཤོད། ། གང་ཞིག་རྣ་བས་ཐོས་པར་འགྱུར་ན་ཡང༌། ། དེ་དོན་གང་ཡིན་གསལ་བར་ཤེས་མི་འགྱུར། ། མཐོང་ཡང་གང་ཡིན་རྟོགས་པར་མི་འགྱུར་བ། །
ACT 28:27 མི་རྣམས་སེམས་ནི་གྱོང་པོར་གྱུར་བ་དང༌། ། རྣ་བ་ལྗིད་ཅིང་མིག་ཡང་བཙུམ་པས་ན། ། མིག་གིས་མ་མཐོང་རྣ་བས་མི་ཐོས་ཤིང༌། ། བློ་ཡིས་མི་རྟོགས་དེ་ཕྱིར་སེམས་བསྒྱུར་ན། ། ང་ཡིས་དེ་དག་གསོ་ཞིང་སྐྱོབ་པར་བྱེད། །
ACT 28:28 ཞེས་འཁོད་པས་དཀོན་མཆོག་གི་ཐར་ལམ་འདི་ཡ་ཧུ་དཱ་པ་མིན་པ་རྣམས་ལ་གནང་བ་ཡིན་དེ་ཤེས་པར་གྱིས་ཤིག ཁོ་ཚོས་ཉན་པར་འགྱུར་ངེས་ཡིན་”ཞེས་གསུངས།
ACT 28:30 པའུ་ལུས་ཁང་པ་ཞིག་ནང་ཁང་གླ་སྤྲད་དེ་ལོ་གཉིས་རིང་བཞུགས་ནས་ཁོང་དང་མཇལ་བར་ཡོང་བའི་མི་ཐམས་ཅད་ལ་བསུ་བར་མཛད།
ACT 28:31 པའུ་ལུས་འཇིགས་པ་མེད་པར་དཀོན་མཆོག་གི་རྒྱལ་སྲིད་ཀྱི་གསུང་བསྒྲགས་ཤིང༌། སུས་ཀྱང་མ་བཀག་པར་གཙོ་བོ་ཡེ་ཤུ་མཱ་ཤི་ཀའི་སྐོར་ཆོས་བསྟན་པར་མཛད་དོ། །
ROM 1:1 འཕྲིན་ཡིག་འདི་འབྲི་མཁན་མཱ་ཤི་ཀ་ཡེ་ཤུའི་ཞབས་ཕྱི་པའུ་ལུ་ང་ནི། དཀོན་མཆོག་གིས་སྐུ་ཚབ་ཏུ་བོས་པ་དང༌། དཀོན་མཆོག་གི་འཕྲིན་བཟང་སྒྲོག་པར་བསྐོས་པ་ཞིག་ཡིན།
ROM 1:2 སྔོན་ནས་དཀོན་མཆོག་གིས་ཉིད་ཀྱི་ལུང་སྟོན་པ་རྣམས་བརྒྱུད་ནས་དམ་པའི་མདོའི་ནང་ཁོང་གི་སྲས་ཀྱི་སྐོར་གྱི་འཕྲིན་བཟང་ཞལ་གྱིས་བཞེས། མིའི་རིགས་ཀྱི་ཆ་ནས་སྲས་དེ་ནི་རྒྱལ་པོ་དཱ་བིད་ཀྱི་བུ་རྒྱུད་ཡིན་ཞིང༌།
ROM 1:4 དཀོན་མཆོག་གི་དམ་པའི་ཐུགས་ཉིད་བརྒྱུད་དེ་འཆི་བ་ནས་སླར་གསོན་དུ་གྱུར་བས་དཀོན་མཆོག་གི་སྲས་དབང་དང་ལྡན་པ་ཡིན་པར་བསྟན། ཁོང་ནི་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀ་ཡིན་ནོ།
ROM 1:5 ཁོང་བརྒྱུད་ནས་དཀོན་མཆོག་གི་ཐུགས་རྗེ་དང་སྐུ་ཚབ་ཀྱི་ལས་འགན་ང་ཚོར་ཐོབ། དེ་ནི་ཁོང་གི་མཚན་གྱི་དོན་དུ་མི་རིགས་ཐམས་ཅད་ཀྱི་ཁྲོད་དུ་མི་རྣམས་ཀྱིས་དད་པ་བྱེད་དེ་ཁོང་གི་བཀའ་ལ་ཉན་པའི་ཆེད་དུ་ཡིན།
ROM 1:6 ཁྱེད་རྣམས་ཀྱང་ཡེ་ཤུ་མཱ་ཤི་ཀའི་ཁོངས་སུ་གཏོགས་པར་བོས་པའི་མི་རྣམས་ཤིག་ཡིན།
ROM 1:7 རོ་མཱ་གྲོང་ཁྱེར་དུ་བཞུགས་ཏེ་དཀོན་མཆོག་གིས་བྱམས་ཤིང༌། དམ་པར་འགྱུར་བར་བདམས་པ་ཐམས་ཅད་ལ་འཕྲིན་ཡིག་འདི་ཕུལ་ལོ། ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་རྣམས་ལ་འཐོབ་པར་གྱུར་ཅིག
ROM 1:8 དང་པོ་ནི། ཁྱེད་ཀྱིས་དད་པ་བྱེད་པའི་ལོ་རྒྱུས་ཕྱོགས་ཀུན་ཏུ་གྲགས་པས། ངས་ཁྱེད་ཐམས་ཅད་ཀྱི་དོན་དུ་ཡེ་ཤུ་མཱ་ཤི་ཀའི་སྒོ་ནས་ངའི་དཀོན་མཆོག་ལ་བཀའ་དྲིན་ཆེ་ཞུ།
ROM 1:9 དཀོན་མཆོག་གི་སྲས་ཡེ་ཤུའི་འཕྲིན་བཟང་སྒྲོག་པའི་སྒོ་ནས་ངས་སེམས་གཅིག་གིས་བསྙེན་བཀུར་ཞུ་བའི་དཀོན་མཆོག་ནི་ངས་ཁྱེད་ཀྱི་དོན་དུ་རྒྱུན་ཆད་མེད་པར་སྨོན་ལམ་འདེབས་པར་དཔང་པོ་མཛད་མཁན་དེ་ཡིན།
ROM 1:10 ངས་དཀོན་མཆོག་གི་དགོངས་པ་བརྒྱུད་མཐར་ཁྱེད་ཚོའི་སར་ཡོང་བའི་ལམ་ཞིག་འབྱུང་བའི་གསོལ་བ་ཞུ་བཞིན་ཡོད།
ROM 1:11 ང་ཁྱེད་ཚོ་དང་མཇལ་བར་འདོད། གང་ལགས་ཟེར་ན། ཁྱེད་ཚོའི་དད་པ་བརྟན་པོར་བྱེད་པའི་ཆེད་དུ་དམ་པའི་ཐུགས་ཉིད་ནས་ང་ལ་ཐོབ་པའི་ཆོས་ཀྱི་གནང་སྦྱིན་དེ་ཁྱེད་ཚོར་འབུལ་བའི་ཕྱིར་རོ།
ROM 1:12 དེ་ནི་ང་དང་ཁྱེད་རྣམས་མཉམ་དུ་ཡོད་དུས་ཕན་ཚུན་དད་སེམས་འཕེལ་བའི་ཆེད་དུ་ཡིན།
ROM 1:13 སྤུན་ཟླ་རྣམས། ང་ལ་ཡ་ཧུ་དཱ་པ་མིན་པ་རྣམས་ཀྱི་ཁྲོད་ནས་འབྲས་བུ་ཐོབ་པ་ལྟར། ཁྱེད་རྣམས་ལས་ཀྱང་འཐོབ་པའི་ཆེད་དུ་ངས་ཐེངས་མང་པོར་ཁྱེད་ཚོའི་རྩར་འགྲོ་བར་བསམས་ཀྱང༌། ད་ལྟའི་བར་དུ་འགོག་པར་གྱུར་བ་དེ་ངེས་པར་དུ་ཤེས་དགོས།
ROM 1:14 ངར་རིག་གནས་ཡོད་མེད་གཉིས་ཀ་དང༌། མཁས་བླུན་གཉིས་ཀར་འཕྲིན་བཟང་སྒྲོག་པའི་ལས་འགན་ཡོད།
ROM 1:15 དེའི་ཕྱིར་ངས་རོ་མཱ་གྲོང་ཁྱེར་ལ་བཞུགས་མཁན་ཁྱེད་ཚོ་ལའང་འཕྲིན་བཟང་སྒྲོག་པའི་བརྩོན་སེམས་ཡོད།
ROM 1:16 ང་འཕྲིན་བཟང་གི་དོན་དུ་ངོ་མི་གནོང༌། གང་ལགས་ཟེར་ན། འཕྲིན་བཟང་དེ་ནི་དད་པ་བྱེད་མཁན་ཐམས་ཅད་དེ། དང་པོར་ཡ་ཧུ་དཱ་པ། དེ་ནས་ཡ་ཧུ་དཱ་པ་མིན་པ་རྣམས་དཀོན་མཆོག་གིས་ཐར་བར་བྱེད་པའི་ནུས་མཐུ་དང་ལྡན་པ་ཡིན།
ROM 1:17 འཕྲིན་བཟང་དེ་བཞིན་དུ་དཀོན་མཆོག་གིས་ང་ཚོ་ཁོང་དང་འབྲེལ་བ་ཡང་དག་པ་ཡིན་པར་མཛད། དེ་ནི་ཐོག་མ་ནས་མཐའ་མར་དད་པའི་སྒོ་ནས་སྒྲུབ། མདོ་ལས་བཀོད་པ་ལྟར་ན། དྲང་པོ་དང་ལྡན་པ་ནི་དད་པའི་སྒོ་ནས་གསོན་པོར་གནས་པར་འགྱུར་ཞེས་འཁོད།
ROM 1:18 དེའི་ཕྱིར་དཀོན་མཆོག་གི་ཐུགས་ཁྲོ་ནི་ངན་པའི་སྒོ་ནས་བདེན་པར་གནོན་མཁན་ཏེ། སྡིག་པ་དང་ངན་པ་ཐམས་ཅད་ལ་དཀོན་མཆོག་གི་ཞིང་ཁམས་ནས་མངོན་པར་འགྱུར།
ROM 1:19 དཀོན་མཆོག་གི་སྐོར་གང་ཤེས་ཐུབ་པ་དེ་ཁོ་ཚོས་ལེགས་པར་ཤེས། གང་ཡིན་ཞེ་ན། དཀོན་མཆོག་གིས་ཁོ་ཚོར་གསལ་པོར་སྟོན་པར་མཛད་པས་སོ།
ROM 1:20 ཁོང་ནི་མི་སྣང་བའི་རང་བཞིན་ཏེ། དཔག་ཏུ་མེད་པའི་ནུས་མཐུ་དང༌། བླ་ན་མེད་པའི་ངོ་བོ་འཇིག་རྟེན་ཁམས་བཀོད་པ་ནས་བཟུང་གསལ་པོར་མཐོང༌། དེ་ཚོ་ནི་ཁོང་གིས་གང་བཀོད་པའི་སྒོ་ནས་རྟོགས་པས་མི་རྣམས་ཀྱིས་དཀོན་མཆོག་ངོ་མ་ཤེས་ཞེས་ཟེར་བའི་རྒྱུ་མཚན་མེད།
ROM 1:21 ཁོ་ཚོས་དཀོན་མཆོག་ཤེས་ཀྱང་དཀོན་མཆོག་ཡིན་པ་ལ་འབུལ་འོས་པའི་བཀུར་སྟི་དང་བཀའ་དྲིན་མ་ཞུས། ཁོ་ཚོའི་བསམ་བློ་དོན་མེད་པ་དང༌། བླུན་ཞིང་རྨོངས་པའི་སེམས་མུན་པར་གྱུར།
ROM 1:22 ང་ཚོ་མཁས་པ་ཡིན་ཞེས་ཟེར་ཡང་ཁོ་ཚོ་བླུན་པོར་གྱུར་ཏེ།
ROM 1:23 འཆི་བ་མེད་པའི་དཀོན་མཆོག་གི་གཟི་བརྗིད་དོར་ནས་ཁོ་ཚོས་འཆི་བ་མྱོང་བའི་མིའམ། བྱ་བྱིའུ། དུད་འགྲོ ལྟོ་བགྲོད་བཅས་ཀྱི་འདྲ་སྐུ་རྣམས་ལ་བསྙེན་བཀུར་བྱས།
ROM 1:24 དེའི་ཕྱིར་དཀོན་མཆོག་གིས་ཁོ་ཚོའི་སེམས་ཀྱི་འདོད་ཆགས་ལྟར་གཏད་པར་མཛད་པས། ཁོ་ཚོས་རང་གི་ལུས་ཀྱིས་ཕན་ཚུན་མི་གཙང་བའི་སྤྱོད་པ་བྱས་ཏེ།
ROM 1:25 དཀོན་མཆོག་གི་བདེན་པ་དོར་ནས་ཁོ་ཚོས་རྫུན་ཞིག་དང་ལེན་བྱས་པ་སྟེ། འགོད་པ་གནང་མཁན་ལས་གང་བཀོད་པ་ལ་གཡོག་བྱེད་ཅིང་བསྙེན་བཀུར་བྱས། འགོད་པ་གནང་མཁན་དཀོན་མཆོག་རྟག་ཏུ་བསྟོད་དོ། ཨ་མེན།
ROM 1:26 དེའི་ཕྱིར་དཀོན་མཆོག་གིས་ཁོ་རྣམས་ངོ་ཚ་བའི་འདོད་ཆགས་ལྟར་གཏད་ནས་ཁོ་ཚོའི་བུད་མེད་རྣམས་ཀྱིས་ཀྱང་རང་བཞིན་གྱི་སྤྱོད་པ་སྤངས་ནས་བུད་མེད་དང་ལོག་གཡེམ་བྱས་ཤིང༌།
ROM 1:27 དེ་བཞིན་དུ་སྐྱེས་པའང་བུད་མེད་དོར་ཏེ་འདོད་ཆགས་ཀྱིས་གཅིག་གིས་གཅིག་ལ་ལོག་གཡེམ་བྱས། སྐྱེས་པ་གཞན་དང་ངོ་ཚ་བའི་སྤྱོད་པ་བྱས་པས་རང་གི་ལུས་ལ་ལོག་པའི་སྤྱོད་པ་དང་མཐུན་པའི་ཉེས་ཆད་མྱོང༌།
ROM 1:28 ཁོ་ཚོས་དཀོན་མཆོག་རྩིས་མེད་དུ་བཏང་བས་དཀོན་མཆོག་གིས་ཁོ་རྣམས་ལ་ལོག་ལྟ་འཛིན་པའི་སེམས་དང༌། མི་རུང་བའི་སྤྱོད་པ་བྱེད་དུ་འཇུག་པར་མཛད།
ROM 1:29 ཁོ་ཚོ་ནི་ངན་པ་ཀུན་དང༌། ངན་སེམས། སེར་སྣ། ངན་སྤྱོད། ཕྲག་དོག མི་སྲོག་གཅོད་པ། འཁྲུག་རྩོད། མགོ་སྐོར། གནོད་སེམས་སོགས་ཀྱིས་གང༌། ཁོ་ཚོ་ནི་རྒྱབ་བཤད་རྒྱག་མཁན་དང༌།
ROM 1:30 སྨད་ར་གཏོང་མཁན། དཀོན་མཆོག་ལ་སྡང་མཁན། རང་མཐོང་ཅན། ང་རྒྱལ་ཅན། རང་བསྟོད་བྱེད་མཁན། ངན་ཐབས་འཚོལ་མཁན། ཕ་མའི་བཀའ་ལ་མི་ཉན་མཁན།
ROM 1:31 བླུན་པོ། ཁ་དན་ཚིག་ལ་མི་གནས་པ། བྱམས་སེམས་མེད་པ། སྙིང་རྗེ་མེད་པ་བཅས་ཡིན་ནོ།
ROM 1:32 དེ་ལྟར་བྱེད་མཁན་ལ་སྲོག་ཁྲིམས་ཀྱི་ཉེས་ཆད་འོས་པའི་དཀོན་མཆོག་གི་བཀའ་ཤེས་ཀྱང༌། ཁོ་ཚོས་དེ་བཞིན་དུ་བྱེད་པ་མ་ཟད། དེ་ལྟར་བྱེད་མཁན་གཞན་རྣམས་ལའང་མོས་མཐུན་བྱེད་དོ། །
ROM 2:1 དེ་བས་ན་གཞན་ལ་སྐྱོན་འདོགས་བྱེད་མཁན་ཐམས་ཅད་ལ་ཁ་གཡར་ས་མེད། གང་ཡིན་ཟེར་ན། གཞན་ལ་སྐྱོན་འདོགས་གང་རུང་བྱེད་དུས་དེས་རང་ཉིད་ལ་ཁྲིམས་གཅོད་གཏོང༌། དེ་ནི་སྐྱོན་འདོགས་བྱེད་མཁན་གྱིས་སྤྱོད་པ་དེ་རང་བྱེད་པའི་ཕྱིར་རོ།
ROM 2:2 དེ་ལྟར་སྤྱོད་མཁན་རྣམས་ལ་དཀོན་མཆོག་གི་ཁྲིམས་གཅོད་ཕོག་པ་ནི་བདེན་པ་དང་མཐུན་པ་ཡིན་པ་ངེད་རྣམས་ཀྱིས་ཤེས།
ROM 2:3 ཀྱེ། མི་ཁྱོད་ཀྱིས་སྤྱོད་པ་དེ་ལྟར་བྱེད་མཁན་གཞན་ལ་སྐྱོན་འདོགས་བྱེད་ཀྱང་རང་ཉིད་ཀྱི་སྤྱོད་པའང་དེ་དང་མཚུངས་པས། དཀོན་མཆོག་གི་ཁྲིམས་གཅོད་ལས་ཐར་ཐུབ་སྙམ་མམ།
ROM 2:4 ཡང་ན། ཁྱོད་ཀྱིས་དཀོན་མཆོག་གི་བླ་ན་མེད་པའི་བཀའ་དྲིན་དང༌། ཐུགས་བསྲན། ཐུགས་བཟོད་བཅས་ལ་རྩིས་མེད་གཏོང་ངམ། དཀོན་མཆོག་གི་བཀའ་དྲིན་ནི་ཁྱོད་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བའི་ཕྱོགས་སུ་འཁྲིད་པའི་ཆེད་དུ་ཡིན་པ་མི་ཤེས་སམ།
ROM 2:5 ཁྱོད་ནི་སེམས་མཁྲེགས་ཤིང་ངན་སྤྱོད་ཀྱི་བསམ་པ་མི་བསྒྱུར་བས་རང་གི་ཆེད་དུ་ཆད་པ་དྲག་པོ་གསོག གང་ལགས་ཟེར་ན། དཀོན་མཆོག་གི་ཐུགས་ཁྲོའི་ཉིན་མོ་ཡོང་བས་ཁོང་གི་དྲང་བདེན་གྱི་ཁྲིམས་གཅོད་མངོན་པར་འགྱུར་ངེས་ཡིན།
ROM 2:6 ཁོང་གིས་མི་རེ་རེའི་བྱ་བ་བཞིན་དེ་དང་མཐུན་པར་གནང་བར་འགྱུར་ཏེ།
ROM 2:7 བྱ་བ་བཟང་པོ་སྒྲུབ་པར་བཟོད་པའི་སྒོ་ནས་གཟི་བརྗིད་དང༌། བཀུར་སྟི། འཆི་མེད་བཅས་འཚོལ་མཁན་རྣམས་ལ་དཔག་ཏུ་མེད་པའི་ཚེ་གནང་བ་དང༌།
ROM 2:8 ངན་པ་ལ་དགའ་ཞིང་བདེན་པ་ལ་མི་གནས་པར་རང་འདོད་ཚ་བ་རྣམས་ལ་དཀོན་མཆོག་གིས་ཐུགས་ཁྲོ་དྲག་པོ་གནང་ངེས་ཡིན།
ROM 2:9 ངན་པ་བྱེད་མཁན་སུ་ཡིན་ཡང་སྡུག་བསྔལ་དྲག་པོ་འབབ་པར་འགྱུར་ཏེ། དང་པོར་ཡ་ཧུ་དཱ་པ། དེ་ནས་ཡ་ཧུ་དཱ་པ་མིན་པ་ཡིན།
ROM 2:10 འོན་ཀྱང་བཟང་པོ་བྱེད་མཁན་སུ་ཡིན་ཡང་གཟི་བརྗིད་དང༌། བཀུར་སྟི། ཞི་བདེ་བཅས་ཐོབ་པར་འགྱུར་ཏེ། དང་པོར་ཡ་ཧུ་དཱ་པ། དེ་ནས་ཡ་ཧུ་དཱ་པ་མིན་པའོ།
ROM 2:11 གང་ཡིན་ཞེ་ན། དཀོན་མཆོག་ལ་ཕྱོགས་རིས་ཅི་ཡང་མེད།
ROM 2:12 ཆོས་ཁྲིམས་མི་ལྡན་པར་སྡིག་ཉེས་བྱས་པ་ཐམས་ཅད་ཆོས་ཁྲིམས་མི་ལྡན་པར་འཇིག་པར་འགྱུར། ཆོས་ཁྲིམས་ལྡན་བཞིན་དུ་སྡིག་ཉེས་བྱས་པ་ཐམས་ཅད་ནི་ཆོས་ཁྲིམས་དེ་ཉིད་ཀྱིས་གཅོད་པར་འགྱུར།
ROM 2:13 དཀོན་མཆོག་གི་སྤྱན་སྔར་ཆོས་ཁྲིམས་ཐོས་མཁན་རྣམས་ཡང་དག་པ་མིན་པར། ཆོས་ཁྲིམས་སྒྲུབ་མཁན་རྣམས་ཡང་དག་པར་བརྩིའོ།
ROM 2:14 དོན་དམ་དུ་ཆོས་ཁྲིམས་མེད་པའི་ཡ་ཧུ་དཱ་པ་མིན་པ་རྣམས་ཀྱིས་རང་བཞིན་གྱིས་ཆོས་ཁྲིམས་ཀྱི་ལས་སྒྲུབ་པའི་ཚེ། ཆོས་ཁྲིམས་མེད་ཀྱང་རང་བཞིན་གྱི་ཁྲིམས་ཁོ་ཚོའི་སེམས་ལ་ཡོད་པར་སྟོན།
ROM 2:15 ཁོ་ཚོས་རང་གིས་རང་ལ་སྐྱོན་འདོགས་སམ་དྲང་པོའི་སེམས་ཀྱི་སྒོ་ནས་ཀྱང་དཔང་པོ་བྱེད་དེ། ཆོས་ཁྲིམས་ཀྱི་བཀའ་ཁོ་ཚོའི་སེམས་ལ་བྲིས་ཡོད་པར་སྟོན།
ROM 2:16 ངས་སྒྲོག་པའི་འཕྲིན་བཟང་ལྟར་དེ་ནི་དཀོན་མཆོག་གིས་མཱ་ཤི་ཀ་ཡེ་ཤུ་བརྒྱུད་ནས་མི་ཐམས་ཅད་ཀྱི་གསང་བ་ལ་ཁྲིམས་གཅོད་མཛད་པའི་ཉིན་མོར་འབྱུང་བར་འགྱུར་ངེས་ཡིན།
ROM 2:17 འོན་ཀྱང་ཁྱོད་ནི་ཡ་ཧུ་དཱ་པ་ཡིན་ཞེས་བཤད་པ་དང༌། ཆོས་ཁྲིམས་ལ་བརྟེན་པ་དང༌། དཀོན་མཆོག་དང་འབྲེལ་བ་ཡོད་པའི་སྐོར་འུད་ཤོབ་བྱེད་པ་དང༌།
ROM 2:18 ཁོང་གི་དགོངས་པ་ཤེས་པ་དང༌། ཆོས་ཁྲིམས་ཀྱི་བསླབ་བྱ་ཐོབ་པས་གང་མཆོག་ཡིན་པའི་བླང་དོར་ཤེས་པ་དང༌།
ROM 2:19 ཁྱོད་ཉིད་ལོང་བའི་ལམ་སྟོན་པ་དང༌། མུན་པར་སྡོད་པ་རྣམས་ཀྱི་སྒྲོན་མེ་དང༌།
ROM 2:20 བླུན་པོ་རྣམས་ཀྱི་སློབ་དཔོན་དང༌། ཕྲུ་གུ་རྣམས་ཀྱི་དགེ་རྒན། ཆོས་ཁྲིམས་ལ་ཤེས་རབ་དང་བདེན་པ་བཅས་ཡོད་མཁན་ཡིན་པར་བསམས་ན།
ROM 2:21 གཞན་ལ་སློབ་སྟོན་བྱེད་མཁན་ཁྱོད་ཀྱིས་རང་ཉིད་ལ་མི་སློབ་བམ། གཞན་ལ་མ་རྐུ་ཞེས་ཆོས་བསྟན་པ་ཁྱོད་ཉིད་ཀྱིས་རྐུའམ།
ROM 2:22 ལོག་གཡེམ་མ་བྱོས་ཞེས་ཟེར་མཁན་ཁྱོད་ཉིད་ཀྱིས་ལོག་གཡེམ་བྱེད་དམ། འདྲ་སྐུ་ལ་སྡང་མཁན་ཁྱོད་ཉིད་ཀྱིས་ལྷ་ཁང་གི་རྒྱུ་ནོར་ཧམ་འཕྲོག་བྱེད་དམ།
ROM 2:23 ཆོས་ཁྲིམས་ཀྱི་སྐོར་འུད་ཤོབ་བྱེད་མཁན་ཁྱོད་ཉིད་ཀྱིས་ཆོས་ཁྲིམས་དང་འགལ་བའི་སྒོ་ནས་དཀོན་མཆོག་ལ་སྨོད་དམ།
ROM 2:24 མདོ་ལས་བཀོད་པ་ལྟར། ཁྱོད་ཀྱི་རྐྱེན་གྱིས་ཡ་ཧུ་དཱ་པ་མིན་པ་རྣམས་ཀྱིས་དཀོན་མཆོག་གི་མཚན་ལ་སྐུར་བ་འདེབས་ཞེས་བྲིས།
ROM 2:25 གལ་སྲིད་ཁྱོད་ཀྱིས་ཆོས་ཁྲིམས་ཀྱི་བཀའ་ལ་ཉན་ན་ཡ་ཧུ་དཱ་པའི་ཆོས་ཀྱི་རྟགས་དེ་ཕན་པ་དང་ལྡན། འོན་ཀྱང་ཆོས་ཁྲིམས་དང་འགལ་ན་ཆོས་ཀྱི་རྟགས་མེད་པ་རྣམས་དང་མཚུངས།
ROM 2:26 དེའི་ཕྱིར་ཡ་ཧུ་དཱ་པའི་ཆོས་ཀྱི་རྟགས་མེད་པ་ཞིག་གིས་ཆོས་ཁྲིམས་ཀྱི་བཀའ་རྣམས་བསྲུངས་ན། ཁོ་ལ་རྟགས་དེ་མེད་ཀྱང་རྟགས་ཡོད་པ་དང་འདྲ་བར་མི་རྩིའམ།
ROM 2:27 ཡ་ཧུ་དཱ་པའི་ཆོས་ཀྱི་རྟགས་མེད་པ་དེས་ཆོས་ཁྲིམས་བསྲུངས་ན། ཁྱོད་ཆོས་ཁྲིམས་དང་རྟགས་ཡོད་ཀྱང་ཁྲིམས་དང་འགལ་མཁན་ཡིན་པ་རྣམས་ལ་ཁྲིམས་གཅོད་མི་གཏོང་ངམ།
ROM 2:28 གང་ལགས་ཤེ་ན། ཕྱི་ཚུལ་ཙམ་དང་ཆོས་ཀྱི་རྟགས་ཁོ་ན་ཡོད་མཁན་ནི་ཡ་ཧུ་དཱ་པ་མིན། ཆོས་ཀྱི་རྟགས་དེ་མིའི་ལུས་དང་ཕྱི་ལ་བྱེད་པ་ཙམ་གྱིས་ཀྱང་མིན།
ROM 2:29 ཡ་ཧུ་དཱ་པ་དངོས་ཡིན་པ་ནི་ཕྱི་ཚུལ་གྱི་དོན་མིན་ཏེ་ནང་སེམས་ཀྱི་དོན་ཡིན་ཞིང༌། ཆོས་ཀྱི་རྟགས་དངོས་ནི་ཆོས་ཁྲིམས་ཀྱི་ལས་སྒྲུབ་པའི་དོན་མིན་ཏེ། དམ་པའི་ཐུགས་ཉིད་ཀྱིས་མི་རྣམས་ཀྱི་སེམས་ལ་གང་མཛད་པའི་དོན་ཡིན། མི་དེའི་བསྟོད་པ་གཞན་ནས་མི་འབྱུང་སྟེ་དཀོན་མཆོག་ནས་འབྱུང་ངོ༌། །
ROM 3:1 འོ་ན། ཡ་ཧུ་དཱ་པ་ཡིན་པའམ། ཡ་ཧུ་དཱ་པའི་ཆོས་ཀྱི་རྟགས་ལེན་པ་དེས་ཅི་ཕན།
ROM 3:2 ཕན་ཐོགས་ཆེ་སྟེ། དང་པོ་ནི་དཀོན་མཆོག་གི་བཀའ་ཡ་ཧུ་དཱ་པ་རྣམས་ལ་བཅོལ་བ་ཡིན།
ROM 3:3 གལ་ཏེ་ཁ་ཅིག་གིས་བཀའ་དེར་མ་ཉན་ན། དེས་དཀོན་མཆོག་གི་ཞལ་བཞེས་པ་དེ་མེད་པར་བྱེད་དམ།
ROM 3:4 དེ་མི་སྲིད། མི་ཐམས་ཅད་ཀྱིས་རྫུན་བཤད་ཀྱང་དཀོན་མཆོག་བདེན་པ་ཡིན་ནོ། མདོ་ལས་བཀོད་པ་ལྟར་ན། ཁྱེད་ཀྱི་བཀའ་ཡིས་ཁྱེད་ཉིད་བདེན་པར་གསལ། ། ཞལ་ལྕེའི་ཚེ་ན་ཁྱེད་ཉིད་རྒྱལ་བར་འགྱུར། ། ཞེས་སོ། །
ROM 3:5 འོ་ན་གལ་ཏེ་ང་ཚོའི་དྲང་བདེན་མ་ཡིན་པའི་བྱ་བ་བརྒྱུད་དཀོན་མཆོག་གི་དྲང་བདེན་ཉིད་གསལ་པོར་བསྟན་ན། ང་ཚོས་ཅི་ཟེར། དཀོན་མཆོག་གིས་ང་ཚོར་ཁྲིམས་གཅོད་པ་དེ་དྲང་བདེན་མ་ཡིན་ཞེས་ཟེར་རམ། (ངས་མིའི་རིགས་ཀྱི་ཆ་ནས་གཏམ་བྱེད་)
ROM 3:6 དེ་མི་སྲིད། དེ་ལྟར་ཡིན་ན་དཀོན་མཆོག་གིས་འཇིག་རྟེན་གྱི་མི་རྣམས་ལ་ཁྲིམས་གཅོད་མཛད་པ་ཅི་ལ་སྲིད།
ROM 3:7 འོན་ཀྱང་མི་ཞིག་གིས་ངའི་རྫུན་གྱིས་དཀོན་མཆོག་གི་བདེན་པ་སྟོན་ཏེ་ཁོང་གི་གཟི་བརྗིད་འཕེལ་བར་བྱས་ན། ང་ལ་ཅིའི་ཕྱིར་སྡིག་ཅན་ལྟར་ད་དུང་ཁྲིམས་གཅོད་གཏོང་ཞེས་ཟེར།
ROM 3:8 ཡང་བཟང་པོ་འབྱུང་བའི་ཕྱིར་ལས་ངན་བྱེད་དགོས་ཞེས་སྨྲས་པ་དེ་ཅིའི་ཕྱིར་ཟེར་མི་རུང༌། ང་ཚོར་སྨད་ར་གཏོང་མཁན་ཁ་ཅིག་གིས་ང་ཚོས་དེ་ལྟར་སྨྲས་ཟེར་བའི་སྐྱོན་འདོགས་བྱེད། ཁོ་ཚོ་ཆད་པ་ཕོག་འོས་པ་ཡིན།
ROM 3:9 འོ་ན་ང་ཚོས་ཅི་ལྟར་སྨྲ། ང་ཚོ་ཡ་ཧུ་དཱ་པ་རྣམས་གཞན་རྣམས་ལས་ཡག་པ་ཡོད་དམ། དེ་ལྟར་ཁྱོན་ནས་མེད། མི་ཐམས་ཅད་དེ་ཡ་ཧུ་དཱ་པ་མིན་པ་དང་ཡ་ཧུ་དཱ་པ་གཉིས་ཀ་སྡིག་ཉེས་ཀྱི་དབང་འོག་ཏུ་ཡོད་པར་ང་ཚོས་བསྟན།
ROM 3:10 མདོ་ལས་བཀོད་པ་ལྟར། དྲང་བའི་མི་ཞེས་གཅིག་ཀྱང་ནི། ། རྩ་བ་ཉིད་ནས་ཡོད་མ་ཡིན། །
ROM 3:11 རྟོགས་པ་གཅིག་ཀྱང་ཡོད་མིན་ཏེ། ། དཀོན་མཆོག་འཚོལ་བའང་ཡོད་མ་ཡིན། །
ROM 3:12 ཐམས་ཅད་ཁོང་ལ་རྒྱབ་ཀྱིས་ཕྱོགས། ། ཐམས་ཅད་ལྷན་ཅིག་དོན་མེད་གྱུར། ། ལས་བཟང་བྱེད་མཁན་གཅིག་མེད་དེ། ། རྩ་བ་ཉིད་ནས་ཡོད་མ་ཡིན། །
ROM 3:13 མིད་པ་གདངས་པའི་དུར་ཁུང་སྟེ། ། ལྕེ་ནི་གཡོ་སྒྱུའི་བཤད་པ་སྐྱོང༌། ། མཆུ་ལ་སྦྲུལ་གྱི་དུག་ལྡན་ཏེ། །
ROM 3:14 ཁ་ནི་དམོད་འཁོན་ཚིག་གིས་ཁེངས། །
ROM 3:15 མི་སྲོག་གཅོད་ལ་རྐང་པ་མགྱོགས། །
ROM 3:16 འགྲོ་ལམ་གཏོར་བཤིག་སྐྱོ་བས་གདུང༌། །
ROM 3:17 ཞི་བདེའི་ལམ་ཡང་མི་ཤེས་སོ། །
ROM 3:18 དཀོན་མཆོག་ཅི་ཡང་མི་བཀུར་རོ། །
ROM 3:19 ཡང་གསུང་རབ་ཀྱི་བཀའ་ཐམས་ཅད་ཆོས་ཁྲིམས་ཀྱི་དབང་འོག་ཏུ་ཡོད་པ་རྣམས་ལ་གསུངས་པར་ངེད་ཀྱིས་ཤེས། དེ་ནི་ཁོང་ཚོ་དང་དེ་མིན་འཇིག་རྟེན་གྱི་མི་ཐམས་ཅད་ཁ་མི་གཡར་ཞིང༌། དཀོན་མཆོག་གི་མདུན་དུ་མཇུག་རྩི་རྒྱག་པའི་ཆེད་དུ་ཡིན།
ROM 3:20 དེའི་ཕྱིར་ཆོས་ཁྲིམས་ཀྱི་བྱ་བ་བཟང་པོའི་སྒོ་ནས་སུའང་དཀོན་མཆོག་གི་སྤྱན་སྔར་ཡང་དག་པ་ཡིན་པར་མི་རྩི། གང་ཡིན་ཟེར་ན། ཆོས་ཁྲིམས་ཀྱིས་ང་ཚོ་སྡིག་ཉེས་ཀྱི་དབང་འོག་ཏུ་ཡོད་པ་ཤེས་པའི་ཆེད་དུ་ཡིན།
ROM 3:21 འོན་ཀྱང་ད་ལྟ་ཆོས་ཁྲིམས་དང་བྲལ་ཏེ་དཀོན་མཆོག་དང་འབྲེལ་བ་ཡང་དག་པ་འཐོབ་པའི་ལམ་མངོན་སུམ་དུ་བསྟན་ཡོད། བཀའ་ཁྲིམས་དང་ལུང་སྟོན་པ་རྣམས་ཀྱིས་དེ་ལ་བདེན་དཔང་བྱེད།
ROM 3:22 དཀོན་མཆོག་ནས་བྱུང་བའི་ལམ་དེ་ནི་ཡེ་ཤུ་མཱ་ཤི་ཀ་ལ་དད་པ་བྱེད་པའི་ངང་ནས་དད་ལྡན་ཐམས་ཅད་ཀྱི་ཕྱིར་རོ། དབྱེ་བ་ཅིའང་མེད།
ROM 3:23 གང་ཡིན་ཞེ་ན། མི་ཐམས་ཅད་ཀྱིས་སྡིག་ཉེས་ཀྱི་ལས་བྱས་པས་དཀོན་མཆོག་གི་གཟི་བརྗིད་དང་རྒྱང་རིང་དུ་གནས།
ROM 3:24 དེ་ཡང་ད་ལྟ་མཱ་ཤི་ཀ་ཡེ་ཤུ་ཡིས་མི་རྣམས་ཀྱིས་ཆོས་ཁྲིམས་དང་འགལ་བའི་ཆད་པ་མྱོང་བའི་བླུ་རིན་གྱིས་ཁོ་རྣམས་ཐར་དུ་འཇུག་པས། དཀོན་མཆོག་གི་ཐུགས་རྗེའི་གནང་སྦྱིན་གྱི་སྒོ་ནས་དཀོན་མཆོག་གིས་མི་རྣམས་ཡང་དག་པ་ཡིན་པར་རྩི་གནང་ངོ༌།
ROM 3:25 ཐུགས་ཁྲོ་སེལ་བའི་ཕྱིར་དཀོན་མཆོག་གིས་ཡེ་ཤུའི་སྐུ་ཁྲག་བླུ་རིན་དུ་མཛད་པ་དང༌། དད་པ་བྱེད་པའི་སྒོ་ནས་དེ་དང་ལེན་བྱེད། དེ་ནི་དཀོན་མཆོག་གི་དྲང་བདེན་ཉིད་མངོན་པར་མཛད་པའི་ཆེད་དུ་ཡིན། གང་ལགས་ཤེ་ན། དཀོན་མཆོག་གི་བཟོད་པའི་ཐུགས་ཀྱིས་མི་རྣམས་ཀྱི་སྔོན་བྱས་པའི་སྡིག་ལས་ལ་ཆད་པ་མ་མཛད་པས་སོ།
ROM 3:26 དེ་ནི་དཀོན་མཆོག་ཉིད་དྲང་བདེན་ཡིན་པ་དང༌། ཁོང་ཉིད་ཡེ་ཤུ་ལ་དད་མཁན་རྣམས་ཡང་དག་པར་མཛད་མཁན་ཡིན་པ་དུས་འདིར་སྟོན་པའི་ཆེད་དུ་ཡིན།
ROM 3:27 འོ་ན། རང་བསྟོད་བྱེད་རྒྱུ་ག་རེ་ཡོད། མེད་དོ། རྐྱེན་གང་གིས་མེད་དམ། དགེ་བའི་ལས་ཀྱི་རྐྱེན་གྱིས། དེ་མིན། དད་པའི་རྐྱེན་གྱིས་མེད་དོ།
ROM 3:28 གང་ལགས་ཤེ་ན། ང་ཚོས་ཡེ་ཤུ་མཱ་ཤི་ཀ་ལ་དད་པའི་སྒོ་ནས་མི་ཞིག་ཡང་དག་པར་འགྱུར་བ་འཛིན་གྱི། ཆོས་ཁྲིམས་ཀྱི་དགེ་བའི་ལས་ཀྱིས་མ་ཡིན་ནོ།
ROM 3:29 དཀོན་མཆོག་ནི་ཡ་ཧུ་དཱ་པ་གཅིག་པོའི་དཀོན་མཆོག་ཡིན་ནམ། ཡང་ན་ཡ་ཧུ་དཱ་པ་མིན་པའི་དཀོན་མཆོག་ཀྱང་མ་ཡིན་ནམ། ལགས་ཡིན། ཡ་ཧུ་དཱ་པ་མིན་པ་རྣམས་ཀྱི་དཀོན་མཆོག་ཀྱང་ཡིན།
ROM 3:30 གང་ཡིན་ཟེར་ན། དཀོན་མཆོག་གཅིག་རང་ཡིན། ཁོང་གིས་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་དང༌། ཡ་ཧུ་དཱ་པའི་ཆོས་ཀྱི་རྟགས་མེད་པ་གཉིས་ཀ་དད་པའི་སྒོ་ནས་ཡང་དག་པར་མཛད།
ROM 3:31 འོ་ན་དད་པ་འདིས་ཆོས་ཁྲིམས་དོན་མེད་པར་བྱེད་དམ། དེ་མི་སྲིད། དེ་ལས་ལྡོག་སྟེ་དད་པའི་སྒོ་ནས་ང་ཚོས་ཆོས་ཁྲིམས་སྒྲུབ་པར་བྱེད་དོ། །
ROM 4:1 བྱས་ན། མིའི་རིགས་ཀྱི་ཆ་ནས་ང་ཚོའི་མེས་པོ་ཨབ་ར་ཧམ་གྱི་སྐོར་ལ་ཅི་སྨྲ། ཁོང་གིས་དོན་འདིའི་སྐོར་ལ་ཅི་མཁྱེན།
ROM 4:2 གལ་སྲིད་ཨབ་ར་ཧམ་དགེ་བའི་ལས་ལ་བརྟེན་ནས་དཀོན་མཆོག་གི་སྤྱན་སྔར་རྣམ་པར་དག་པར་གྱུར་ན། ཁོང་ལ་རང་བསྟོད་བྱེད་རྒྱུ་ཡོད་ཀྱང༌། དེ་དཀོན་མཆོག་གི་དྲུང་དུ་མེད།
ROM 4:3 གསུང་རབ་ལས་ཅི་གསུང༌། ཨབ་ར་ཧམ་གྱིས་དཀོན་མཆོག་ལ་དད་པ་བྱས་པས། དཀོན་མཆོག་གིས་ཁོང་རྣམ་པར་དག་པའི་མི་ཞིག་ལ་བརྩིས་གནང་ངོ་ཞེས་གསུངས།
ROM 4:4 འོ་ན། ལས་ཀ་བྱེད་མཁན་གྱི་གླ་ཆ་ནི་སྦྱིན་པ་མིན་ཏེ་ཐོབ་འོས་པར་རྩི།
ROM 4:5 འོན་ཀྱང་མི་ཞིག་གིས་དགེ་བའི་ལས་ལ་མ་བརྟེན་པར་ངན་པ་བྱེད་པ་རྣམས་ལ་རྣམ་པར་དག་པར་མཛད་མཁན་ལ་དད་པ་བྱས་ན། ཁོའི་དད་པ་ནི་རྣམ་པར་དག་པར་རྩིའོ།
ROM 4:6 དེ་ལྟར་དགེ་བའི་ལས་དང་བྲལ་བར་དཀོན་མཆོག་གིས་རྣམ་པར་དག་པ་དང་ལྡན་པ་ལྟར་རྩི་གནང་བའི་མི་ཡི་བདེ་བའི་སྐོར་རྒྱལ་པོ་དཱ་བིད་ཀྱིས་ཀྱང་གསུངས་ཏེ།
ROM 4:7 སུ་ཡི་སྡིག་ཉེས་བསལ་བར་གྱུར། ། སྡིག་ཉེས་སེལ་བའི་མི་རྣམས་བདེ། །
ROM 4:8 སུ་ཡི་སྡིག་ཉེས་གཙོ་བོ་ཡིས། ། བརྩི་བར་མི་འགྱུར་མི་དེ་བདེ། །
ROM 4:9 བདེ་བ་དེ་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་ཁོ་ནའམ། ཡང་ན་མེད་པ་རྣམས་ཀྱི་ཆེད་དུ་ཡིན། ང་ཚོས་ཨབ་ར་ཧམ་གྱིས་དད་པ་བྱས་པས་དཀོན་མཆོག་གིས་ཁོང་རྣམ་པར་དག་པའི་མི་ཞིག་ལ་བརྩིས་གནང་ངོ་ཞེས་སྨྲས།
ROM 4:10 དེ་ནི་ཇི་ལྟར་བྱུང༌། ཁོང་གིས་ཡ་ཧུ་དཱ་པའི་ཆོས་ཀྱི་རྟགས་ལེན་པའི་སྔོན་དུ་རྣམ་པར་དག་པའི་མི་ལ་བརྩིས་སམ། ཡང་ན་རྗེས་སུ་བརྩིས། རྗེས་སུ་མིན་ཏེ་སྔོན་དུ་བྱུང་ངོ༌།
ROM 4:11 ཡ་ཧུ་དཱ་པའི་ཆོས་ཀྱི་རྟགས་ནི་ཨབ་ར་ཧམ་ལ་དད་པ་ཡོད་ཅིང༌། དཀོན་མཆོག་གིས་ཁོང་དང་ལེན་མཛད་དེ་རྣམ་པར་དག་པ་དང་ལྡན་པར་བརྩིས་གནང་བའི་རྟགས་ཤིག་ཡིན། དེ་ནི་ཁོང་གིས་ཡ་ཧུ་དཱ་པའི་ཆོས་ཀྱི་རྟགས་མ་ལེན་པའི་སྔོན་དུ་ཡིན། དེའི་ཕྱིར་ཨབ་ར་ཧམ་ནི་ཡ་ཧུ་དཱ་པའི་ཆོས་ཀྱི་རྟགས་མི་ལྡན་པ་རྣམས་ལ་དད་པ་བྱེད་མཁན་གྱི་མེས་པོ་ཡིན། དད་པ་བྱས་པའི་རྐྱེན་གྱིས་ཁོ་ཚོ་རྣམ་པར་དག་པའི་མི་ལ་རྩི་བར་འགྱུར།
ROM 4:12 དེ་བཞིན་དུ་ཁོ་ཚོར་ཁོང་གིས་ཡ་ཧུ་དཱ་པའི་ཆོས་ཀྱི་རྟགས་མ་ལེན་པའི་སྔོན་གྱི་དད་པ་ཡོད་ན་ཨབ་ར་ཧམ་ནི་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་རྣམས་ཀྱི་མེས་པོ་ཡང་ཡིན།
ROM 4:13 དཀོན་མཆོག་གིས་ཨབ་ར་ཧམ་དང་ཁོང་གི་བུ་རྒྱུད་རྣམས་ལ་ཨབ་ར་ཧམ་འཇིག་རྟེན་གྱི་འཛིན་མཁན་དུ་འགྱུར་བའི་ཞལ་ཆད་གནང་བ་དེ་ཆོས་ཁྲིམས་སྲུང་བའི་སྒོ་ནས་མིན་ཏེ། དད་པ་ལས་འབྱུང་བའི་རྣམ་པར་དག་པ་ནས་བྱུང་ངོ༌།
ROM 4:14 གང་ཡིན་ཞེ་ན། ཆོས་ཁྲིམས་སྲུང་མཁན་རྣམས་འཇིག་རྟེན་གྱི་འཛིན་མཁན་ཡིན་ན། དད་པ་ནི་སྟོང་པ་དང༌། ཞལ་ཆད་ནི་དོན་མེད་པའོ།
ROM 4:15 རྒྱུ་མཚན་ནི་ཆོས་ཁྲིམས་དང་འགལ་བ་ལས་དཀོན་མཆོག་གི་ཐུགས་ཁྲོ་འབྱུང༌། འོན་ཀྱང་ཁྲིམས་མེད་ན་ཁྲིམས་དང་འགལ་བའང་མེད།
ROM 4:16 དེའི་ཕྱིར་དཀོན་མཆོག་གི་ཞལ་ཆད་ནི་དད་པའི་སྒོ་ནས་དང་ལེན་བྱེད་དེ། དཀོན་མཆོག་གི་ཐུགས་རྗེ་ལས་འབྱུང་བའི་གནང་སྦྱིན་ཡིན། གལ་ཏེ་ང་ཚོས་ཨབ་ར་ཧམ་དང་འདྲ་བར་དད་པ་བྱས་ན། ཆོས་ཁྲིམས་སྲུང་མཁན་ཡིན་མིན་ལ་མ་བརྟེན་པར་ངེད་རྣམས་ཀྱིས་ཞལ་ཆད་དེ་འཐོབ་ངེས་ཡིན། གང་ལགས་ཤེ་ན། ཨབ་ར་ཧམ་ནི་དད་པ་བྱེད་མཁན་ངེད་རྣམས་ཀུན་གྱི་མེས་པོ་ཡིན་པས་སོ།
ROM 4:17 མདོ་ལས་བཀོད་པ་ལྟར་ན། ངས་ཁྱོད་ནི་མི་རིགས་མང་པོའི་མེས་པོར་བསྒྱུར་ཞེས་གསུངས། དཀོན་མཆོག་གི་སྤྱན་སྔར་ཁོང་ནི་ངེད་རྣམས་ཀྱི་མེས་པོ་ཡིན། ཨབ་ར་ཧམ་གྱིས་འཆི་བ་རྣམས་སླར་གསོན་དུ་མཛད་ཅིང་མེད་པ་ལས་གསར་དུ་འགོད་པ་གནང་མཁན་དཀོན་མཆོག་ལ་དད་པ་བྱས་པས་དེ་ལྟར་བྱུང་ངོ༌།
ROM 4:18 རེ་བ་བྱེད་པའི་རྒྱུ་རྐྱེན་མེད་པའི་སྐབས་སུ། ཨབ་ར་ཧམ་གྱིས་མི་རིགས་མང་པོའི་མེས་པོར་འགྱུར་བ་རེ་བ་བྱས། གང་ལགས་ཟེར་ན། དཀོན་མཆོག་གིས་ཁོང་ལ་ཁྱེད་ཀྱི་བུ་རྒྱུད་དེ་ལྟར་མང་པོར་འགྱུར་ངེས་ཡིན་ཞེས་གསུངས།
ROM 4:19 ཡང་དགུང་ལོ་བརྒྱ་ཙམ་ལོན་པས་རང་གི་གཟུགས་པོ་དང་ཁོང་གི་བཟའ་ཟླ་ས་རཱ་ཡི་མངལ་གཉིས་ནི་ཤི་བར་ལྟར་བསམས་ཀྱང་ཁོང་གི་དད་པ་མ་ཉམས།
ROM 4:20 ཨབ་ར་ཧམ་གྱིས་ཐེ་ཚོམ་མེད་པར་དཀོན་མཆོག་གི་ཞལ་ཆད་ལ་ཡིད་ཆེས་པས། ཁོང་གི་དད་པ་འཕེལ་ཞིང་དཀོན་མཆོག་ལ་བཀུར་སྟི་བྱས་ཏེ།
ROM 4:21 དཀོན་མཆོག་གིས་གང་ཞལ་གྱིས་བཞེས་པ་དེ་མཛད་ཐུབ་པའི་ཡིད་ཆེས་ཀྱི་ངེས་པ་རྙེད།
ROM 4:22 དེའི་ཕྱིར་ཁོང་གི་དད་པ་ནི་རྣམ་པར་དག་པར་བརྩིས་པར་གྱུར།
ROM 4:23 བརྩིས་པར་གྱུར་ཞེས་པའི་ཚིག་འདི་ཁོང་ཁོ་ནའི་དོན་ལ་བྲིས་པ་མ་ཡིན་ཏེ།
ROM 4:24 ངེད་རྣམས་ཀྱི་དོན་དུ་ཡང་བྲིས་སོ། ངེད་རྣམས་ཀྱི་གཙོ་བོ་ཡེ་ཤུ་འཆི་བ་ལས་སླར་གསོན་པར་མཛད་མཁན་དཀོན་མཆོག་ལ་དད་པ་བྱེད་མཁན་རྣམས་ཀྱང་རྣམ་པར་དག་པའི་མི་ལ་རྩི་ངེས་ཡིན།
ROM 4:25 ངེད་རྣམས་ཀྱི་སྡིག་ཉེས་ཀྱི་རྐྱེན་གྱིས་ཡེ་ཤུ་འཆི་བ་ལ་སྦྱོར་བའི་ཕྱིར་ཡ་ཧུ་དཱ་པར་གཏད་པར་གྱུར་ཞིང༌། ངེད་རྣམས་རྣམ་པར་དག་པར་འགྱུར་བའི་ཕྱིར་ཁོང་འཆི་བ་ནས་སྐུ་གསོན་པོར་བཞེངས་པར་གྱུར་རོ། །
ROM 5:1 དེའི་ཕྱིར་དཀོན་མཆོག་གི་སྤྱན་སྔར་དད་པའི་སྒོ་ནས་རྣམ་པར་དག་པར་བརྩིས་པར་གྱུར་བས། ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་དང་བསྡུམས་པ་ཡིན།
ROM 5:2 དད་པའི་སྒོ་ནས་ཁོང་གིས་ངེད་རྣམས་ཐུགས་རྗེའི་ནང་ཚུད་ཅིང་གནས་པར་མཛད་པས། ང་ཚོས་དགའ་མགུའི་སེམས་ཀྱིས་དཀོན་མཆོག་གི་གཟི་བརྗིད་ཀྱི་གནང་སྦྱིན་འཐོབ་པའི་རེ་སྒུག་བྱེད།
ROM 5:3 དེ་མ་ཟད་སྡུག་བསྔལ་མྱོང་དུས་ང་ཚོས་དགའ་བར་བྱེད། གང་ལགས་ཟེར་ན། སྡུག་བསྔལ་ལས་བཟོད་པའི་སེམས་དང༌།
ROM 5:4 བཟོད་པའི་སེམས་ལས་རང་གཤིས་བཟང་པོ། རང་གཤིས་བཟང་པོ་ལས་རེ་བ་སྐྱེ་བ་ང་ཚོས་ཤེས།
ROM 5:5 རེ་བ་དེས་བློ་མི་འཕམ་མོ། གང་ཡིན་ཟེར་ན། ངེད་རྣམས་ལ་གནང་བའི་དམ་པའི་ཐུགས་ཉིད་ཀྱི་སྒོ་ནས་དཀོན་མཆོག་གི་བྱམས་པ་ང་ཚོའི་སེམས་ལ་ལྷག་པར་གནང་བ་ཡིན་པའི་ཕྱིར་རོ།
ROM 5:6 གང་ལགས་ཤེ་ན། ངེད་རྣམས་ལ་ཐར་ཐབས་མེད་པའི་ཚེ། དུས་ལ་འབབ་སྐབས་མཱ་ཤི་ཀ་སྡིག་ཅན་རྣམས་ཀྱི་ཆེད་དུ་གྲོངས།
ROM 5:7 རང་གཤིས་བཟང་པོ་ཞིག་གི་དོན་ལ་སྲོག་གཏོང་བ་དེ་དཀོན་པོ་ཡིན་ཡང༌། མི་ཧ་ཅང་བཟང་པོ་ཞིག་གི་དོན་ལ་སྲོག་གཏོང་བར་ནུས་སྲིད།
ROM 5:8 འོན་ཀྱང་ངེད་རྣམས་ད་དུང་སྡིག་ཉེས་ཅན་ཡིན་པའི་དུས་སུ། མཱ་ཤི་ཀ་ང་ཚོའི་དོན་དུ་སྐུ་སྲོག་བཏང་གནང་བའི་སྒོ་ནས་དཀོན་མཆོག་ཉིད་ཀྱི་བྱམས་པ་ཇི་ཙམ་ཡོད་པ་ངེད་རྣམས་ལ་བསྟན་པར་མཛད།
ROM 5:9 ད་ཁོང་གི་སྐུ་ཁྲག་གི་སྒོ་ནས་ངེད་རྣམས་རྣམ་པར་དག་པར་བརྩིས་པར་གྱུར་བས། ཁོང་བརྒྱུད་ནས་ང་ཚོ་དེ་བས་ཀྱང་དཀོན་མཆོག་གི་ཐུགས་ཁྲོ་ལས་ཐར་བར་འགྱུར།
ROM 5:10 གང་ཡིན་ཞེ་ན། ང་ཚོ་དཀོན་མཆོག་གི་དགྲ་བོ་ཡིན་པའི་དུས་སུ། ཁོང་གིས་ཉིད་ཀྱི་སྲས་སྐུ་སྲོག་བཏང་གནང་བའི་སྒོ་ནས་ང་ཚོ་དང་བསྡུམས་པར་མཛད་ན། ད་བསྡུམས་ཚར་བས་དེ་བས་ཀྱང་ཁོང་གི་སྐུ་ཚེ་ཡིས་ངེད་རྣམས་ཐར་བར་མཛད་པར་འགྱུར།
ROM 5:11 དེས་མ་ཟད་ང་ཚོའི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་ངེད་རྣམས་དཀོན་མཆོག་དང་བསྡུམས་པས་ང་ཚོས་དཀོན་མཆོག་ལ་ཡི་རང་ངོ༌། །
ROM 5:12 མི་གཅིག་གི་རྐྱེན་གྱིས་སྡིག་ཉེས་འཛམ་གླིང་དུ་བྱུང་ཞིང༌། སྡིག་ཉེས་ལས་འཆི་བ་བྱུང་བས། ཐམས་ཅད་ཀྱིས་སྡིག་པའི་ལས་བྱས་པའི་རྐྱེན་གྱིས་འཆི་བ་ནི་མིའི་རིགས་ཀུན་ལ་བྱུང༌།
ROM 5:13 ཆོས་ཁྲིམས་མ་གནང་བའི་སྔོན་ལ་སྡིག་ཉེས་འཛམ་གླིང་དུ་ཡོད་ཀྱང༌། ཁྲིམས་མེད་པས་སྡིག་ཉེས་དེ་སྡིག་ཉེས་སུ་མ་བརྩིས།
ROM 5:14 འོན་ཀྱང་ཨ་དམ་ནས་ལུང་སྟོན་པ་མོ་ཤེའི་དུས་ཀྱི་བར་དུ་མི་ཚང་མ་འཆི་བའི་དབང་འོག་ཏུ་ཡོད། ཐ་ན་སྡིག་པའི་ལས་བྱེད་མཁན་རྣམས་ཨ་དམ་གྱིས་དཀོན་མཆོག་གི་བཀའ་དང་འགལ་བ་ལྟར་བྱས་པ་མ་ཡིན་ཀྱང་ཁོ་ཚོ་ཡང་འཆི་བའི་དབང་འོག་ཏུ་ཡོད། ཨ་དམ་ནི་འབྱོན་པར་འགྱུར་བའི་མཱ་ཤི་ཀ་ཡི་དཔེ་ཞིག་ཡིན།
ROM 5:15 འོན་ཀྱང་དཀོན་མཆོག་གི་རིན་ཐང་བྲལ་བའི་ཐུགས་རྗེའི་གནང་སྦྱིན་ནི་ཁྲིམས་འགལ་དང་མི་འདྲ་བ་ཡིན། གང་ཡིན་ཞེ་ན། མི་གཅིག་གིས་བཀའ་ཁྲིམས་དང་འགལ་བའི་རྐྱེན་གྱིས་མི་མང་པོ་ཤི་ན་ཡང༌། ཡེ་ཤུ་མཱ་ཤི་ཀ་མི་གཅིག་གི་ཐུགས་རྗེ་བརྒྱུད་ནས་བྱུང་བའི་དཀོན་མཆོག་གི་ཐུགས་རྗེའི་གནང་སྦྱིན་དེ་བས་ཀྱང་མི་མང་པོར་འཕེལ་བར་གྱུར།
ROM 5:16 ཡང་དཀོན་མཆོག་གི་རིན་ཐང་བྲལ་བའི་ཐུགས་རྗེའི་གནང་སྦྱིན་ནི་མི་གཅིག་གིས་བྱས་པའི་སྡིག་ཉེས་ཀྱི་འབྲས་བུ་དང་མི་འདྲ་བ་ཡིན། གང་ཡིན་ཟེར་ན། ཨ་དམ་གྱིས་བཀའ་ཁྲིམས་དང་འགལ་བ་ལས་ཁྲིམས་གཅོད་བྱུང༌། འོན་ཀྱང་དཀོན་མཆོག་གི་ཐུགས་རྗེའི་གནང་སྦྱིན་དེ་བཀའ་ཁྲིམས་དང་འགལ་བ་མང་པོའི་རྗེས་སུ་བྱུང་བ་དང༌། དེའི་འབྲས་བུ་མི་མང་པོ་རྣམ་པར་དག་པར་གྱུར་བ་དེ་ཡིན།
ROM 5:17 གལ་ཏེ་མི་གཅིག་གིས་བཀའ་ཁྲིམས་དང་འགལ་བའི་རྐྱེན་གྱིས་མི་མང་པོ་འཆི་བའི་དབང་འོག་ཏུ་གྱུར་ན། དེ་བས་ཀྱང་དཀོན་མཆོག་གི་ཡོངས་སུ་རྫོགས་པའི་ཐུགས་རྗེ་དང་རྣམ་པར་དག་པ་དེ་དཀོན་མཆོག་གི་གནང་སྦྱིན་འཐོབ་མཁན་རྣམས། མི་གཅིག་སྟེ་ཡེ་ཤུ་མཱ་ཤི་ཀ་བརྒྱུད་ནས་གསོན་པར་འགྱུར་ཏེ་རྒྱལ་སྲིད་སྐྱོང་ངོ༌། །
ROM 5:18 དེ་བས་ན་མི་གཅིག་གིས་བཀའ་ཁྲིམས་དང་འགལ་བས་ཐམས་ཅད་ཁྲིམས་གཅོད་མྱོང་དགོས་པ་བཞིན། དེ་ལྟར་མི་གཅིག་གིས་དྲང་བདེན་ཉིད་ཀྱི་བྱ་བ་མཛད་པས་ཐམས་ཅད་རྣམ་པར་དག་པར་འགྱུར་ཞིང༌། དཔག་ཏུ་མེད་པའི་ཚེ་འཐོབ།
ROM 5:19 གང་ལགས་ཟེར་ན། མི་གཅིག་གིས་བཀའ་ལ་མ་ཉན་པས་མི་མང་པོ་སྡིག་ཉེས་ཅན་དུ་གྱུར་བ་ལྟར། དེ་བཞིན་མི་གཅིག་གིས་བཀའ་ལ་ཉན་པས་མི་མང་པོ་རྣམ་པར་དག་པར་འགྱུར།
ROM 5:20 ཁྲིམས་དང་འགལ་བ་གང་ཡིན་པ་ཤེས་པའི་ཕྱིར་ཆོས་ཁྲིམས་བྱུང༌། འོན་ཀྱང་སྡིག་ཉེས་འཕེལ་བས་ཐུགས་རྗེ་དེ་བས་ཀྱང་འཕེལ།
ROM 5:21 དེ་བས་ན་སྔོན་མ་སྡིག་ཉེས་ཀྱིས་འཆི་བའི་སྒོ་ནས་དབང་དུ་བསྒྱུར་མོད། ད་ལྟ་དཀོན་མཆོག་གི་ཐུགས་རྗེ་ཡིས་དབང་དུ་སྒྱུར། དེའི་འབྲས་བུ་ནི་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་ང་ཚོར་དཀོན་མཆོག་དང་ཡང་དག་པའི་འབྲེལ་བ་ཡོད་ཅིང༌། དཔག་ཏུ་མེད་པའི་ཚེའང་འཐོབ་བོ། །
ROM 6:1 འོ་ན། ང་ཚོས་ཅི་ཟེར་བར་བྱ། ཐུགས་རྗེ་འཕེལ་བའི་ཆེད་དུ་ངེད་རྣམས་སྡིག་ཉེས་ལ་གནས་པར་བྱའམ།
ROM 6:2 དེ་མི་སྲིད། ངེད་རྣམས་སྡིག་ཉེས་ལས་འདས་ཟིན་པས་ད་དུང་དེའི་ནང་འཚོ་བར་ཅི་ལྟར་སྲིད།
ROM 6:3 མཱ་ཤི་ཀ་ཡེ་ཤུའི་ཐོག་ནས་ཁྲུས་གསོལ་ལེན་མཁན་ངེད་ཐམས་ཅད་ཀྱིས་ཁོང་གྲོངས་པའི་ཐོག་ནས་ཁྲུས་གསོལ་བླངས་པ་དེ་མི་ཤེས་སམ།
ROM 6:4 དེའི་ཕྱིར་ཁྲུས་གསོལ་ལེན་པའི་སྒོ་ནས་ངེད་རྣམས་ཁོང་དང་མཉམ་དུ་ཤི་ནས་དུར་དུ་བཅུག་པ་ལྟར་ཡིན་པས། དེ་ནི་ཡབ་ཀྱི་གཟི་བརྗིད་དང་ལྡན་པའི་ནུས་མཐུ་ཡིས་མཱ་ཤི་ཀ་སླར་གསོན་དུ་མཛད་པ་བཞིན། ང་ཚོའང་ཚེ་གསར་ཞིག་གི་ནང་འཚོ་བའི་ཕྱིར་རོ།
ROM 6:5 གང་ཡིན་ཞེ་ན། གལ་སྲིད་དེ་ལྟར་ཁོང་གྲོངས་པའི་ཐོག་ནས་ངེད་རྣམས་ཁོང་དང་གཅིག་ཏུ་གྱུར་ན། ཁོང་དང་གཅིག་ཏུ་སླར་གསོན་པོར་ཡང་འགྱུར་ངེས་ཡིན།
ROM 6:6 ད་ཕྱིན་ཆད་ངེད་རྣམས་སྡིག་ཉེས་ཀྱི་བྲན་གཡོག་མ་ཡིན་པའི་ཆེད་དུ་དང༌། སྡིག་ཉེས་ཀྱི་དབང་འོག་ཏུ་མི་གནས་པའི་ཕྱིར། ང་ཚོ་སྡིག་ཉེས་ཅན་གྱི་གང་ཟག་རྙིང་པ་དེ་མེད་པར་འགྱུར་བའི་ཕྱིར་མཱ་ཤི་ཀ་དང་མཉམ་དུ་རྒྱང་ཤིང་སྒང་ལ་བརྒྱངས་པ་ཡིན་པ་ངེད་རྣམས་ཀྱིས་ཤེས།
ROM 6:7 གང་ལགས་ཟེར་ན། ཤི་ཟིན་པ་དེ་སྡིག་ཉེས་ཀྱི་དབང་ལས་ཐར་བར་གྱུར་བ་ཡིན་པས་སོ།
ROM 6:8 ངེད་རྣམས་མཱ་ཤི་ཀ་དང་མཉམ་དུ་ཤི་བ་ཡིན་ན། ཁོང་དང་མཉམ་དུ་འཚོ་བར་ཡང་ཡིད་ཆེས།
ROM 6:9 མཱ་ཤི་ཀ་འཆི་བ་ནས་སླར་གསོན་པོར་གྱུར་བ་ཡིན་ཏེ་ཡང་བསྐྱར་འགྲོངས་མི་སྲིད་པས། ད་ཕྱིན་ཆད་ཁོང་འཆི་བའི་དབང་འོག་ཏུ་མིན་པ་ངེད་ཀྱིས་ཤེས།
ROM 6:10 ཁོང་གྲོངས་པ་དེ་སྡིག་ཉེས་ཀྱི་དབང་ལས་རྒྱལ་བའི་ཕྱིར་ཐེངས་གཅིག་གྲོངས། ཁོང་འཚོ་བ་དེ་དཀོན་མཆོག་ཐུགས་མཉེས་ཕྱིར་འཚོ།
ROM 6:11 དེ་བས་ན་ཁྱེད་ཚོའང་སྡིག་ཉེས་ཀྱི་དབང་འོག་ཏུ་མི་གནས་པ་དང༌། མཱ་ཤི་ཀ་ཡེ་ཤུ་བརྒྱུད་ནས་དཀོན་མཆོག་ཐུགས་མཉེས་ཕྱིར་གསོན་པ་ཡིན་པར་རྩིས་ཤིག
ROM 6:12 དེའི་ཕྱིར་འདོད་ཆགས་ཀྱི་དབང་དུ་མི་འགྲོ་བའི་ཆེད་དུ་སྡིག་ཉེས་ཀྱིས་ཁྱེད་ཚོའི་མི་རྟག་པའི་ལུས་ལ་དབང་བསྒྱུར་དུ་མ་འཇུག
ROM 6:13 ལུས་ཀྱི་ཡན་ལག་དེ་ངན་པ་ལ་གཡོག་བྱེད་པའི་ལག་ཆ་ལྟར་སྡིག་ཉེས་ལ་མ་གཏོད། དེ་ལས་ལྡོག་སྟེ་ཤི་ནས་གསོན་པོར་གྱུར་བ་ལྟར་ཁྱོད་ཚོས་རང་ཉིད་དཀོན་མཆོག་ལ་ཕུལ་ཞིང༌། ལུས་ཀྱི་ཡན་ལག་ཀྱང་ཡང་དག་པ་ཉིད་ཀྱི་ལག་ཆ་ལྟར་ཁོང་ལ་མཆོད་པ་ཕུལ་ཞིག
ROM 6:14 སྡིག་ཉེས་ཀྱིས་ཁྱེད་ཚོར་དབང་མི་བསྒྱུར། གང་ཡིན་ཞེ་ན། ཁྱེད་ཚོ་ཆོས་ཁྲིམས་ཀྱི་དབང་འོག་ཏུ་མ་ཡིན་པར་ཐུགས་རྗེའི་དབང་འོག་ཏུ་ཡོད་པས་སོ། །
ROM 6:15 བྱས་ན། ཆོས་ཁྲིམས་ཀྱི་དབང་འོག་ཏུ་མིན་ཏེ་ཐུགས་རྗེའི་དབང་འོག་ཏུ་ཡོད་པས་སྡིག་ཉེས་བྱེད་དམ། དེ་རྩ་བ་ནས་མི་རུང༌།
ROM 6:16 གང་གི་བཀའ་ལ་ཉན་པ་དེའི་བྲན་གཡོག་ཏུ་འགྱུར་བ་ཁྱེད་ཚོས་མི་ཤེས་སམ། སྡིག་ཉེས་ཀྱི་བྲན་གཡོག་ཏུ་གྱུར་བའི་འབྲས་བུ་ནི་འཆི་བ་དང༌། བཀའ་ལ་ཉན་པའི་བྲན་གཡོག་ཏུ་གྱུར་བའི་འབྲས་བུ་ནི་དཀོན་མཆོག་ཐུགས་མཉེས་པའི་སྤྱོད་ལམ་བཟང་པོ་ཡིན།
ROM 6:17 སྔོན་མ་སྡིག་ཉེས་ཀྱི་བྲན་གཡོག་བྱས་ཀྱང༌། ད་ཁྱེད་ཚོར་གཏད་པར་གྱུར་བའི་བསྟན་པ་ལ་སྙིང་ཐག་པ་ནས་ཉན་པས་དཀོན་མཆོག་ལ་བཀའ་དྲིན་ཆེ་ཞུའོ།
ROM 6:18 སྡིག་ཉེས་ལས་བསྒྲལ་ཏེ་ཁྱེད་ཚོ་དྲང་བདེན་གྱི་སྤྱོད་པའི་བྲན་གཡོག་ཏུ་གྱུར།
ROM 6:19 ཁྱེད་ཚོའི་རྟོགས་པའི་ནུས་པ་ཞན་པས་ངས་མིའི་ལུགས་སྲོལ་ལྟར་བརྗོད་དེ། སྔར་ཁྱེད་རྣམས་ཀྱིས་ལུས་ཀྱི་ཡན་ལག་མི་གཙང་བ་དང་ངན་པའི་གཡོག་བྱེད་དུ་གཏད་དེ་དེ་བས་ངན་པ་མང་དུ་འཕེལ་བཞིན། ད་ལྟ་དམ་པར་འཕེལ་བའི་ཕྱིར་ཁྱེད་ཀྱི་ཡན་ལག་སྤྱོད་པ་བཟང་པོ་ལ་གཡོག་བྱེད་པར་གཏོད་ཅིག
ROM 6:20 སྡིག་ཉེས་ཀྱི་གཡོག་བྱེད་དུས་ཁྱེད་ཚོ་དྲང་བདེན་ཉིད་ཀྱི་དབང་བསྒྱུར་ལས་བྲལ་ལོ།
ROM 6:21 དེ་བས་ན། ད་ལྟ་ངོ་ཚ་བར་རྩི་བའི་དོན་དེ་རྣམས་ལས་ཕན་ཐོགས་ཅི་ཐོབ། དེ་ཚོའི་འབྲས་བུ་ནི་འཆི་བ་ཡིན།
ROM 6:22 ད་ལྟ་ཁྱེད་རྣམས་སྡིག་ཉེས་ལས་ཐར་བར་གྱུར་ནས་དཀོན་མཆོག་གི་བྲན་གཡོག་བྱེད་པས། དམ་པར་འགྱུར་བའི་ཕན་ཐོགས་འཐོབ། དེའི་འབྲས་བུ་ནི་དཔག་ཏུ་མེད་པའི་ཚེ་ཡིན།
ROM 6:23 དེས་ན་སྡིག་ཉེས་ཀྱི་གླ་ཆ་ནི་འཆི་བ་ཡིན། འོན་ཀྱང་དཀོན་མཆོག་གི་རིན་ཐང་བྲལ་བའི་ཐུགས་རྗེའི་གནང་སྦྱིན་ནི་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་བརྒྱུད་ནས་ཐོབ་པའི་དཔག་ཏུ་མེད་པའི་ཚེ་དེ་ཡིན་ནོ། །
ROM 7:1 སྤུན་ཟླ་རྣམས། ངས་ཆོས་ཁྲིམས་རྒྱུས་ཡོད་པ་རྣམས་ལ་སྨྲ་སྟེ། མི་ཞིག་གསོན་པའི་དུས་ཁོ་ནར་ཆོས་ཁྲིམས་ཀྱིས་ཁོ་ལ་ཁྲིམས་འཛིན་གྱི་དབང་ཆ་ཡོད་པར་ཁྱེད་ཚོས་མི་ཤེས་སམ།
ROM 7:2 དཔེར་ན། ཁྱོ་བོ་གསོན་པའི་རིང་ལ་ཁོའི་བཟའ་ཟླ་གཉེན་སྒྲིག་གི་བཀའ་ཁྲིམས་ཀྱི་དབང་འོག་ཏུ་ཡོད་ཀྱང༌། ཁྱོ་བོ་ཤི་ན་བུད་མེད་དེ་གཉེན་སྒྲིག་གི་བཀའ་ཁྲིམས་དང་བྲལ་བར་འགྱུར།
ROM 7:3 དེའི་ཕྱིར་ཁྱོ་བོ་གསོན་པའི་རིང་ལ་བུད་མེད་དེས་སྐྱེས་པ་གཞན་དང་འགྲོགས་ན་ལོག་གཡེམ་བྱེད་མཁན་ཞེས་ཟེར་བར་འགྱུར། འོན་ཀྱང་བུད་མེད་དེའི་ཁྱོ་བོ་ཤི་ན། གཉེན་སྒྲིག་གི་བཀའ་ཁྲིམས་དང་བྲལ་བར་འགྱུར་བས་སྐྱེས་པ་གཞན་དང་གཉེན་སྒྲིག་བྱས་ནའང་ལོག་གཡེམ་པ་མ་ཡིན།
ROM 7:4 ངའི་སྤུན་ཟླ་རྣམས། དེ་བཞིན་དུ་ཁྱེད་ཚོའང་མཱ་ཤི་ཀ་དང་མཉམ་དུ་རྒྱང་ཤིང་ཐོག་ཆོས་ཁྲིམས་ཀྱི་ངོས་ནས་འཆི་བའོ། དེ་ནི་མི་གཞན་ཏེ་འཆི་བ་ནས་སླར་གསོན་དུ་མཛད་པ་ཁོང་དང་འགྲོགས་པའི་ཆེད་ཅིང༌། ངེད་རྣམས་དཀོན་མཆོག་གི་དོན་ལ་འབྲས་བུ་དང་ལྡན་པར་འགྱུར་བའི་ཕྱིར་རོ།
ROM 7:5 སྡིག་པའི་རང་གཤིས་ཀྱི་དབང་འོག་ཏུ་ཡོད་པའི་དུས་སུ། ཆོས་ཁྲིམས་ཀྱི་རྐྱེན་གྱིས་འདོད་ཆགས་སྐྱེས་ཏེ་ང་ཚོའི་ལུས་ཀྱི་ཡན་ལག་རྣམས་ངན་པར་བསྐུལ། དེའི་རྐྱེན་གྱིས་ང་ཚོར་འཆི་བའི་འབྲས་བུ་བསྐྱེད།
ROM 7:6 འོན་ཀྱང་ད་ལྟ་ཆོས་ཁྲིམས་ལས་ཐར་ཏེ་བཅིངས་པར་བྱེད་པའི་ཆོས་ཁྲིམས་ཀྱི་ཆ་ནས་ངེད་རྣམས་ཤི་བས། ང་ཚོས་ཆོས་ཁྲིམས་ཀྱི་ཚིག་འབྲུའི་ལུགས་རྙིང་པ་ལྟར་མིན་ཏེ་དམ་པའི་ཐུགས་ཉིད་ཀྱི་ལུགས་གསར་པ་བཞིན་དུ་ཞབས་ཞུ་སྒྲུབ།
ROM 7:7 དེ་བས་ན་ང་ཚོས་ཅི་ཟེར། ཆོས་ཁྲིམས་ནི་སྡིག་པ་ཡིན་ནམ། དེ་མི་སྲིད། དེ་ལས་ལྡོག་སྟེ་ཆོས་ཁྲིམས་མེད་པ་ཡིན་ན་ངས་སྡིག་ཉེས་གང་ཡིན་པ་མི་ཤེས། དཔེར་ན། ཆོས་ཁྲིམས་ཀྱིས་ཧམ་འདོད་མ་བྱོས་ཤིག་ཅེས་མ་གསུངས་ན་ངས་ཧམ་འདོད་བྱེད་ཅེས་པ་དེ་གང་ཡིན་པར་མི་ཤེས།
ROM 7:8 སྡིག་ཉེས་ཀྱིས་བཀའ་ཁྲིམས་ཀྱི་སྒོ་ནས་ངའི་སེམས་ལ་ཧམ་འདོད་ཀྱི་རིགས་ཀུན་སྐྱེད་དུ་བཅུག གང་ཡིན་ཞེ་ན། ཆོས་ཁྲིམས་མེད་ན་སྡིག་ཉེས་ལ་དབང་མེད་དོ།
ROM 7:9 སྔོན་གྱི་དུས་ན་ང་ཆོས་ཁྲིམས་དང་བྲལ་ནས་འཚོ་ཡང༌། བཀའ་ཁྲིམས་བྱུང་བའི་རྗེས་སུ་སྡིག་ཉེས་གསོན་པོར་གྱུར་ཞིང་ང་ཤི་སྟེ།
ROM 7:10 ཚེ་ཡོང་བའི་ཆེད་དུ་གནང་བའི་བཀའ་ཁྲིམས་འདི་ཉིད་ང་ཤི་བའི་རྒྱུ་རྐྱེན་དུ་གྱུར་བར་ངས་ཤེས།
ROM 7:11 གང་ཡིན་ཟེར་ན། སྡིག་ཉེས་ཀྱིས་བཀའ་ཁྲིམས་ཀྱི་ཐབས་བྱས་ཏེ་ང་ལ་མགོ་སྐོར་བཏང་ནས་བཀའ་ཁྲིམས་ཀྱིས་ང་བསད།
ROM 7:12 དེའི་ཕྱིར་ཆོས་ཁྲིམས་ནི་དམ་པ་ཡིན་ཏེ། དེའི་ནང་གི་བཀའ་ཁྲིམས་ཀྱང་དམ་པ་དང༌། དྲང་བདེན་ཉིད་དང་ལྡན་པ། བཟང་པོ་བཅས་ཡིན་ནོ།
ROM 7:13 འོ་ན་གང་བཟང་པོ་ཡིན་པ་དེ་ང་འཆི་བའི་རྒྱུ་རྐྱེན་དུ་གྱུར་བ་ཡིན་ནམ། དེ་རྩ་བ་ནས་མིན། སྡིག་ཉེས་ངན་པ་ཡིན་པར་སྟོན་པའི་ཕྱིར་དེས་གང་བཟང་པོ་ཡིན་པའི་སྒོ་ནས་ང་ལ་འཆི་བ་བསྐྱེད་དུ་བཅུག དེ་ནི་བཀའ་ཁྲིམས་ཀྱི་ངང་ནས་སྡིག་ཉེས་དེ་དཔེ་མི་སྲིད་པའི་ངན་པར་མངོན་པའི་ཆེད་དུ་ཡིན།
ROM 7:14 ཆོས་ཁྲིམས་དཀོན་མཆོག་ལས་བྱུང་བ་ངེད་རྣམས་ཀྱིས་ཤེས། འོན་ཀྱང་ང་ལ་མིའི་རིགས་ཀྱི་སྡིག་པའི་རང་གཤིས་ཡོད་པས། སྡིག་ཉེས་ལ་བྲན་གཡོག་ལྟར་བཙོངས།
ROM 7:15 ངའི་སྤྱོད་ལམ་མི་རྟོགས། གང་ཡིན་ཞེ་ན། ངས་གང་འདོད་པ་དེ་མི་བྱེད་དེ། གང་སྡང་བ་དེ་རང་བྱེད།
ROM 7:16 ངས་མི་འདོད་པ་ལྟར་བྱས་ན། ངས་ཆོས་ཁྲིམས་བཟང་པོ་ཡིན་པ་ཁས་ལེན་བྱེད།
ROM 7:17 དོན་དམ་དུ་ང་རང་གིས་དེ་ལྟར་བྱེད་པ་མ་ཡིན་ཏེ། ངའི་ནང་དུ་གནས་པའི་སྡིག་ཉེས་ཀྱིས་བྱེད།
ROM 7:18 ངའི་སྡིག་པའི་རང་གཤིས་ལ་བཟང་པོ་ཅིའང་མེད་པར་ངས་ཤེས། གང་ལགས་ཤེ་ན། བཟང་པོ་བྱེད་པར་འདོད་ནའང༌། ངས་སྒྲུབ་མི་ཐུབ།
ROM 7:19 ངས་འདོད་པའི་བཟང་པོ་དེ་མི་བྱེད། འོན་ཀྱང་ངས་མི་འདོད་པའི་ངན་པ་དེ་བྱེད།
ROM 7:20 གལ་སྲིད་ངས་མི་འདོད་པའི་བྱ་བ་བྱས་ན། ང་རང་གིས་བྱེད་པ་མ་ཡིན་ཏེ། ངའི་ནང་དུ་གནས་པའི་སྡིག་ཉེས་ཀྱིས་བྱེད།
ROM 7:21 དེ་བས་ན་ངས་བཟང་པོ་བྱེད་འདོད་པའི་ཚེ་ངན་པ་ངའི་འཁྲིས་སུ་ཡོད་པའི་གནས་ལུགས་རྟོགས།
ROM 7:22 ངའི་སེམས་ཀྱི་གཏིང་ནས་དཀོན་མཆོག་གི་ཁྲིམས་ལ་དགའ་བར་བྱེད་མོད།
ROM 7:23 ངའི་ལུས་ཀྱི་ནང་ན་ཁྲིམས་གཞན་ཞིག་ཡོད་པར་ཤེས། དེས་སེམས་ཀྱི་ཁྲིམས་ལ་རྒོལ་ཞིང༌། ང་ནི་ངའི་ལུས་ལ་གནས་པའི་ཁྲིམས་ཀྱི་བཙོན་པར་སྒྱུར།
ROM 7:24 ང་ཉམ་ཐག་པ་ཡིན་ཏེ། འཆི་བས་དབང་དུ་སྒྱུར་བའི་ལུས་འདི་ལས་ང་ཐར་བར་བྱེད་མཁན་སུ་ཡིན།
ROM 7:25 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་བཀའ་དྲིན་ཆེ་ཞུའོ། མདོར་བསྡུས་ན་ངའི་སེམས་ཀྱིས་དཀོན་མཆོག་གི་ཁྲིམས་ལ་གཡོག་བྱེད་ཀྱང༌། ངའི་སྡིག་པའི་རང་གཤིས་ཀྱིས་སྡིག་ཉེས་ཀྱི་ཁྲིམས་ལ་གཡོག་བྱེད་དོ། །
ROM 8:1 དེའི་ཕྱིར་ད་ནས་མཱ་ཤི་ཀ་ཡེ་ཤུའི་ནང་ན་གནས་པ་རྣམས་ལ་ཆད་པ་ཅིའང་མེད།
ROM 8:2 གང་ལགས་ཟེར་ན། ཚེ་གསར་པ་གནང་བའི་དམ་པའི་ཐུགས་ཉིད་ཀྱི་བཀའ་ཁྲིམས་ཀྱིས་མཱ་ཤི་ཀ་ཡེ་ཤུ་བརྒྱུད་ནས་ཁྱེད་རྣམས་སྡིག་ཉེས་དང་འཆི་བའི་དབང་ལས་བསྒྲལ་བར་མཛད།
ROM 8:3 མིའི་རིགས་ཀྱི་སྡིག་པའི་རང་གཤིས་ཀྱི་དབང་གིས་སྟོབས་ཉམས་པར་གྱུར་བའི་ཆོས་ཁྲིམས་ཀྱིས་བྱེད་མ་ཐུབ་པ་དེ་དཀོན་མཆོག་གིས་བསྒྲུབས་པར་མཛད། ཁོང་གིས་རང་ཉིད་ཀྱི་སྲས་སྡིག་ཅན་གྱི་ལུས་དང་འདྲ་བའི་སྐུ་གཟུགས་དང་ལྡན་པར་ངེད་རྣམས་ཀྱི་སྡིག་ཉེས་སེལ་བའི་དོན་དུ་མཆོད་པར་འགྱུར་བའི་ཕྱིར་མངགས་ཏེ། མིའི་རིགས་ཀྱི་རང་གཤིས་ལ་གནས་པའི་སྡིག་ཉེས་ཁྲིམས་ཐག་གཅོད་པར་མཛད།
ROM 8:4 དེ་ནི་སྡིག་པའི་རང་གཤིས་ལྟར་འཚོ་བ་མིན་པར་དམ་པའི་ཐུགས་ཉིད་བཞིན་དུ་འཚོ་བ་ངེད་རྣམས་ཀྱི་ནང་ན་ཆོས་ཁྲིམས་ཀྱི་དྲང་བདེན་གྱི་དགོས་པ་སྒྲུབ་པའི་ཆེད་དུ་ཡིན།
ROM 8:5 སྡིག་པའི་རང་གཤིས་དང་བསྟུན་པའི་སྤྱོད་པ་བྱེད་མཁན་རྣམས་ཀྱིས་སྡིག་ཉེས་ཀྱི་སྐོར་བློ་གཅིག་ཏུ་སེམས། འོན་ཀྱང་དམ་པའི་ཐུགས་ཉིད་དང་བསྟུན་པའི་སྤྱོད་པ་བྱེད་མཁན་རྣམས་ཀྱིས་ཐུགས་ཉིད་གང་མཉེས་པའི་སྐོར་བློ་གཅིག་ཏུ་སེམས།
ROM 8:6 སྡིག་པའི་རང་གཤིས་ལ་བློ་གཅིག་ཏུ་སེམས་པའི་འབྲས་བུ་ནི་འཆི་བ་ཡིན། འོན་ཀྱང་དམ་པའི་ཐུགས་ཉིད་ལ་བློ་གཅིག་ཏུ་བསམས་ན་དཔག་ཏུ་མེད་པའི་ཚེ་དང་ཞི་བདེ་ཡིན་ནོ།
ROM 8:7 དེའི་ཕྱིར་སྡིག་པའི་རང་གཤིས་ལ་བློ་གཅིག་ཏུ་སེམས་པ་འདིས་དཀོན་མཆོག་ལ་རྒོལ། དེས་དཀོན་མཆོག་གི་བཀའ་ཁྲིམས་མི་སྲུང་ཞིང་སྲུང་ཡང་མི་སྲིད་པས།
ROM 8:8 སྡིག་པའི་རང་གཤིས་ལྟར་མི་ཚེ་སྐྱེལ་བ་རྣམས་ཀྱིས་དཀོན་མཆོག་ཐུགས་མཉེས་པ་བྱེད་མི་ཐུབ།
ROM 8:9 གལ་ཏེ་དཀོན་མཆོག་གི་ཐུགས་ཉིད་ཁྱེད་རྣམས་ལ་དངོས་སུ་བཞུགས་ན། ཁྱེད་ཚོ་སྡིག་ཅན་གྱི་རང་གཤིས་མིན་ཏེ་དམ་པའི་ཐུགས་ཉིད་ཀྱི་དབང་འོག་ཏུ་ཡོད། གལ་ཏེ་སུ་ཞིག་ལ་མཱ་ཤི་ཀའི་ཐུགས་ཉིད་མེད་ན། མཱ་ཤི་ཀའི་ཁོངས་གཏོགས་མིན།
ROM 8:10 གལ་ཏེ་མཱ་ཤི་ཀ་ཁྱེད་ཚོའི་ནང་བཞུགས་ན། སྡིག་ཉེས་ཀྱི་རྐྱེན་གྱིས་ལུས་ཤི་བ་ཡིན་ཡང༌། དཀོན་མཆོག་གི་སྤྱན་སྔར་ཁྱེད་ཚོ་རྣམ་པར་དག་པ་ཡིན་པས་སེམས་གསོན་ནོ།
ROM 8:11 ཡེ་ཤུ་འཆི་བ་ནས་སླར་གསོན་དུ་མཛད་མཁན་གྱི་དམ་པའི་ཐུགས་ཉིད་ཁྱེད་རྣམས་ཀྱི་ནང་ལ་བཞུགས་ན། དེ་ལྟར་མཛད་མཁན་གྱིས་ཁྱེད་རྣམས་ཀྱི་ནང་ལ་བཞུགས་ཏེ་ཁོང་གི་དམ་པའི་ཐུགས་ཉིད་ཀྱི་སྒོ་ནས་ཁྱེད་ཀྱི་མི་རྟག་པའི་ལུས་ཀྱང་གསོན་པོར་མཛད་པར་འགྱུར་ངེས་ཡིན།
ROM 8:12 སྤུན་ཟླ་རྣམས། དེའི་ཕྱིར་སྡིག་པའི་རང་གཤིས་དང་བསྟུན་པའི་སྤྱོད་པ་བྱེད་མི་དགོས།
ROM 8:13 གང་ཡིན་ཞེ་ན། སྡིག་པའི་རང་གཤིས་དང་བསྟུན་པའི་སྤྱོད་པ་བྱས་ན་འཆི་བར་ངེས། འོན་ཀྱང་དམ་པའི་ཐུགས་ཉིད་ཀྱི་སྒོ་ནས་སྡིག་པའི་སྤྱོད་པ་མེད་པར་བྱས་ན་གསོན་པོར་འགྱུར།
ROM 8:14 གང་ཡིན་ཟེར་ན། དཀོན་མཆོག་གི་དམ་པའི་ཐུགས་ཉིད་ཀྱིས་འཁྲིད་པ་ཐམས་ཅད་ནི་དཀོན་མཆོག་གི་སྲས་ཡིན།
ROM 8:15 ཡང་དཀོན་མཆོག་གིས་ཁྱེད་རྣམས་ལ་གནང་བའི་ཐུགས་ཉིད་ཀྱིས་ཁྱེད་ཚོ་ཞེད་སྣང་དང་ལྡན་པའི་བྲན་གཡོག་མིན་ཏེ། ཁོང་གི་སྲས་སུ་འགྱུར་བར་མཛད། ཁོང་གི་སྒོ་ནས་ངེད་རྣམས་ཀྱིས་ཨབ་པཱ་ཡབ་ཅེས་འབོད།
ROM 8:16 ཐུགས་ཉིད་ཀྱིས་ང་ཚོའི་སེམས་དང་འགྲོགས་ཏེ་ངེད་རྣམས་དཀོན་མཆོག་གི་སྲས་དང་སྲས་མོ་ཡིན་པར་བདེན་དཔང་མཛད།
ROM 8:17 དེས་ན་ངེད་རྣམས་ནི་དཀོན་མཆོག་གི་སྲས་དང་སྲས་མོ་ཡིན་ན། མཱ་ཤི་ཀ་དང་མཉམ་དུ་དཀོན་མཆོག་གི་ཞལ་ཆད་འཛིན་མཁན་ཡང་ཡིན། གལ་ཏེ་ངེད་རྣམས་མཱ་ཤི་ཀ་དང་མཉམ་དུ་སྡུག་བསྔལ་མྱོང་ན་ཁོང་དང་ལྷན་དུ་འགྲོགས་ཏེ་གཟི་བརྗིད་དང་ལྡན་པར་འགྱུར་རོ། །
ROM 8:18 ངའི་བསམ་པར། དེང་དུས་ཀྱི་སྡུག་བསྔལ་ནི་མ་འོངས་པའི་དུས་སུ་ངེད་རྣམས་ལ་མངོན་པར་འགྱུར་བའི་གཟི་བརྗིད་དང་བསྡུར་ན་ཅི་ཡང་མིན།
ROM 8:19 དཀོན་མཆོག་གིས་གང་བཀོད་པ་ཐམས་ཅད་ཀྱིས་དཀོན་མཆོག་གི་སྲས་རྣམས་མངོན་སུམ་དུ་འགྱུར་བར་གདུང་ཞིང་སྒུག
ROM 8:20 གང་ལགས་ཟེར་ན། དཀོན་མཆོག་གིས་གང་བཀོད་པ་རྣམས་རང་གི་འདོད་པ་ལྟར་མེད་དེ། ཁོང་གི་དགོངས་པ་ལྟར་དོན་མེད་པའི་དབང་དུ་བཅུག དེ་ནི་རེ་བ་བྱེད་དེ་གང་བཀོད་པ་འཇིག་པ་ལས་བསྒྲལ་ནས་དཀོན་མཆོག་གི་སྲས་དང་སྲས་མོ་རྣམས་ཀྱི་གཟི་བརྗིད་དང་ལྡན་པའི་རང་དབང་འཐོབ་པའི་ཆེད་དུ་ཡིན།
ROM 8:22 ད་ལྟའི་བར་དུ་དཀོན་མཆོག་གིས་གང་བཀོད་པ་ཐམས་ཅད་སྦྲུམ་མར་སྐྱེ་ཟུག་ལང་བ་ལྟར་འཁུན་སྒྲ་འབྱིན་པ་ངེད་ཀྱིས་ཤེས།
ROM 8:23 དེ་མ་ཟད་དམ་པའི་ཐུགས་ཉིད་ལོ་ཏོག་གི་ཕུད་དང་ལྡན་པ་ངེད་རྣམས་ཀྱང་དཀོན་མཆོག་གི་སྲས་སུ་གྱུར་བ་དང༌། ང་ཚོའི་ལུས་པོ་སྡིག་ཉེས་དང་སྡུག་བསྔལ་ལས་སྒྲོལ་ཏེ་མི་འཇིག་པའི་ལུས་གསར་པ་འཐོབ་པར་རེ་སྒུག་བྱེད་དུས་ཁོག་ན་འཁུན་སྒྲ་འབྱིན།
ROM 8:24 གང་ཡིན་ཞེ་ན། རེ་བའི་ནང་དུ་ངེད་རྣམས་ཐར་བར་གྱུར། འོན་ཀྱང་མིག་གིས་གང་མཐོང་ཟིན་པ་དེར་རེ་བ་བྱེད་རྒྱུ་མེད་དེ། མིག་གིས་མཐོང་ཟིན་པ་ལ་སུས་རེ་སྒུག་བྱེད།
ROM 8:25 འོན་ཏེ་གང་རེ་བ་བྱེད་པ་དེ་མི་མཐོང་ན། ངེད་རྣམས་ཀྱིས་བཟོད་པའི་སྒོ་ནས་རེ་སྒུག་བྱེད།
ROM 8:26 དེ་བཞིན་དུ་དམ་པའི་ཐུགས་ཉིད་ཀྱིས་ང་ཚོ་སྟོབས་མེད་པར་རོགས་པ་གནང༌། ངེད་རྣམས་ཀྱིས་སྨོན་ལམ་ཇི་ལྟར་འདེབས་དགོས་པ་མི་ཤེས་ཀྱང༌། དམ་པའི་ཐུགས་ཉིད་ཀྱིས་ཚིག་གིས་སྨྲ་བར་མི་ཐུབ་པའི་འཁུན་སྒྲས་ང་ཚོའི་དོན་ལ་ཞུ་ངོ་མཛད།
ROM 8:27 ཡང་ངེད་རྣམས་ཀྱི་སེམས་ལ་གཟིགས་མཁན་གྱིས་དམ་པའི་ཐུགས་ཉིད་ཀྱི་དགོངས་པ་མཁྱེན། གང་ལགས་ཤེ་ན། དཀོན་མཆོག་གི་དགོངས་པ་ལྟར་དམ་པའི་ཐུགས་ཉིད་ཀྱིས་དད་ལྡན་པ་རྣམས་ཀྱི་དོན་ལ་ཞུ་ངོ་མཛད་པས་སོ།
ROM 8:28 དཀོན་མཆོག་གིས་དོན་ཐམས་ཅད་མཉམ་དུ་མཛད་དེ་ཁོང་ལ་བརྩེ་ཞིང་ཁོང་གི་དགོངས་པ་ལྟར་བོས་པ་རྣམས་ལ་ཕན་པའི་ཆེད་དུ་ཡིན་པ་ངེད་རྣམས་ཀྱིས་ཤེས།
ROM 8:29 གང་ཡིན་ཞེ་ན། ཁོང་གི་སྲས་ནི་སྤུན་ཟླ་མང་པོའི་ནང་ནས་སྔོན་སྐྱེས་སུ་འགྱུར་བའི་ཆེད་དུ་དཀོན་མཆོག་གིས་སྔར་བདམས་པ་རྣམས་ཁོང་གི་སྲས་དང་འདྲ་བར་འགྱུར་བའི་ཕྱིར་བསྐོས་པར་མཛད།
ROM 8:30 ཡང་ཁོང་གིས་སྔར་བསྐོས་པ་རྣམས་བོས་པར་ཡང་མཛད། བོས་པ་རྣམས་རྣམ་པར་དག་པར་ཡང་མཛད། རྣམ་པར་དག་པར་གྱུར་བ་རྣམས་གཟི་བརྗིད་དང་ལྡན་པར་ཡང་མཛད་དོ། །
ROM 8:31 འོ་ན་དོན་དེ་རྣམས་ཀྱི་སྐོར་ལ་ཅི་སྨྲ། གལ་སྲིད་དཀོན་མཆོག་གིས་ངེད་ཀྱི་ཕྱོགས་མཛད་ན་ངེད་རྣམས་ལ་སུས་རྒོལ་ཐུབ།
ROM 8:32 རང་གི་སྲས་ཀྱང་ཕངས་སེམས་མི་མཛད་པར་ངེད་ཐམས་ཅད་ཀྱི་དོན་དུ་གཏོད་པར་མཛད་མཁན་གྱིས་སྲས་དང་མཉམ་དུ་ཐུགས་རྗེའི་སྒོ་ནས་ངེད་རྣམས་ལ་དོན་ཐམས་ཅད་ཀྱང་མ་གནང་བ་དེ་ཅི་ལ་སྲིད།
ROM 8:33 དཀོན་མཆོག་གིས་བདམས་པར་མཛད་པ་རྣམས་ལ་ཉེས་སྐྱོན་འཛུགས་མཁན་སུ་ཡིན། དཀོན་མཆོག་ནི་རྣམ་པར་དག་པར་མཛད་མཁན་ཡིན་པས།
ROM 8:34 ཁྲིམས་གཅོད་གཏོང་མཁན་སུ་ཡིན་ནམ། མཱ་ཤི་ཀ་ཡེ་ཤུ་ཡིན་ནམ། མིན་ཏེ་ཁོང་ནི་གྲོངས་ཤིང༌། དེ་བས་ཀྱང་སྐུ་གསོན་པོར་བཞེངས་སུ་གྱུར་ནས་དཀོན་མཆོག་གི་ཕྱག་གཡས་སུ་བཞུགས་མཁན་དེ་ཡིན་པ་མ་ཟད། ཁོང་གིས་ངེད་རྣམས་ཀྱི་དོན་དུ་ཞུ་ངོ་མཛད།
ROM 8:35 མཱ་ཤི་ཀའི་བྱམས་པ་ལས་ངེད་རྣམས་སུས་ཕྲལ། སྡུག་བསྔལ་ལམ། དཀའ་ངལ་ལམ། མནར་གཅོད་དམ། མུ་གེའམ། གོས་མེད་པའམ། ཉེན་ཁའམ། རལ་གྲི་ལ་སོགས་པས་ངེད་རྣམས་ཁོང་གི་བྱམས་པ་ལས་ཕྲལ་ཐུབ་པ་ཡིན་ནམ།
ROM 8:36 མདོ་ལས། ཁྱེད་ཀྱི་ཆེད་དུ་ང་ཚོ་ཉིན་ལྟར་གསོད། ། གཞན་གྱིས་ངེད་རྣམས་བཤས་རྒྱུའི་ལུག་བཞིན་རྩི། ། ཞེས་འཁོད།
ROM 8:37 གནས་ཚུལ་དེ་ལྟར་ཡིན་ཡང་ངེད་རྣམས་ལ་བྱམས་པར་མཛད་མཁན་བརྒྱུད་ནས་ང་ཚོ་རབ་ཏུ་རྒྱལ་ལོ།
ROM 8:38 གང་ལགས་ཟེར་ན། འཆི་ཚེའམ། ཕོ་ཉའམ། གདོན་འདྲེའམ། ད་ལྟའམ། མ་འོངས་པའི་གནས་ཚུལ་ལམ། མཐུ་ལྡན་པའམ།
ROM 8:39 མཐོ་གཏིང་ངམ། དཀོན་མཆོག་གིས་གང་བཀོད་པ་ཐམས་ཅད་ལས་གང་ཞིག་གིས་ཀྱང་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་བརྒྱུད་ནས་མངོན་པའི་དཀོན་མཆོག་གི་བྱམས་པ་ལས་ང་ཚོ་ཕྲལ་མི་ཐུབ་པར་ངས་ཡིད་ཆེས་ངེས་པ་རྙེད་དོ། །
ROM 9:1 མཱ་ཤི་ཀའི་ཐོག་ནས་རྫུན་གཏམ་མིན་ཏེ་བདེན་པ་ཤོད། དམ་པའི་ཐུགས་ཉིད་ཀྱི་ཐོག་ནས་ངའི་སེམས་ཀྱིས་བདེན་དཔང་བྱེད་དེ།
ROM 9:2 ངའི་སེམས་ལ་སྡུག་བསྔལ་ཆེན་པོ་དང་མྱ་ངན་རྒྱུན་ཆད་མེད་པར་མྱོང༌།
ROM 9:3 ངའི་མི་རིགས་དང་ཤ་རུས་གཅིག་པའི་སྤུན་གྱི་དོན་དུ་དཀོན་མཆོག་གི་ཆད་པ་རྟག་ཏུ་ཕོག་ཤིང༌། མཱ་ཤི་ཀ་དང་ཁ་བྲལ་བར་འགྱུར་བ་ལྟར་ཡིན་ཡང་ང་དེ་ལྟར་མོས་སོ།
ROM 9:4 ཁོ་ཚོ་ཡི་སི་ར་ཨེལ་པ་ཡིན་ཞིང༌། དཀོན་མཆོག་གིས་ཁོ་རྣམས་སྲས་སུ་བསྒྱུར་བར་མཛད་ནས་ཁོ་ཚོར་གཟི་བརྗིད་དང༌། ཞལ་ཆད་རྣམས་དང༌། ཆོས་ཁྲིམས། མཆོད་ཁང་ཆེན་མོར་ཞབས་ཏོག་བྱེད་པ། ཞལ་གྱིས་བཞེས་པ་རྣམས་གནང་བས།
ROM 9:5 ཁོ་རྣམས་ལ་ཨབ་ར་ཧམ་ལ་སོགས་པའི་མེས་པོ་རྣམས་ཡོད་ཅིང༌། ཁོ་ཚོའི་བུ་རྒྱུད་ལས་མཱ་ཤི་ཀ་བྱུང་སྟེ། ཁོང་ནི་བླ་ན་མེད་པ་དང༌། དུས་རྟག་ཏུ་བཀུར་སྟི་དང་ལྡན་པའི་དཀོན་མཆོག་ཡིན་ནོ། ། ཨ་མེན།
ROM 9:6 དཀོན་མཆོག་གིས་གང་ཞལ་གྱིས་བཞེས་པ་དེ་སྟོང་བར་མ་གྱུར། གང་ཡིན་ཞེ་ན། ཡི་སི་ར་ཨེལ་གྱི་བུ་རྒྱུད་ཐམས་ཅད་དཀོན་མཆོག་ལ་གཏོགས་པའི་མི་དངོས་མིན་ནོ།
ROM 9:7 ཨབ་ར་ཧམ་གྱི་བུ་རྒྱུད་ཡིན་ཚད་སྲས་དང་སྲས་མོ་དངོས་མིན། དེ་ལས་ལྡོག་སྟེ་མདོ་ལས། ཨི་སཱག་བརྒྱུད་ནས་ཁྱོད་ཀྱི་བུ་རྒྱུད་རྩི་བར་འགྱུར་ཞེས་གསུངས།
ROM 9:8 དེའི་དོན་ནི་ཨབ་ར་ཧམ་གྱི་བུ་རྒྱུད་ཐམས་ཅད་དཀོན་མཆོག་གི་སྲས་དང་སྲས་མོ་རྣམས་མིན་ཏེ། དཀོན་མཆོག་གི་ཞལ་ཆད་ཀྱི་བུ་རྒྱུད་ཚོ་ཨབ་ར་ཧམ་གྱི་བུ་རྒྱུད་དུ་རྩི།
ROM 9:9 ཞལ་གྱིས་བཞེས་པའི་བཀའ་འདི་ལྟར་ཡིན། དུས་འདི་ཙམ་ལ་ང་ཡོང་ཞིང་ས་རཱ་ལ་བུ་ཞིག་སྐྱེ་བར་འགྱུར།
ROM 9:10 དེ་མ་ཟད། རེ་པེ་ཀཱ་ཡི་མཚེ་མ་ལ་ཕ་གཅིག་རང་ཡོད་དེ་ང་ཚོའི་མེས་པོ་ཨི་སཱག་ཡིན།
ROM 9:11 མཚེ་མ་དེ་གཉིས་མ་སྐྱེས་པ་དང༌། བཟང་ངན་ཅིའང་མ་བྱས་པའི་གོང༌། མིའི་བྱ་བར་མ་བརྟེན་པར་དཀོན་མཆོག་གི་ཐུགས་དགོངས་བཞིན་འདམ་པར་མཛད་པ་སྒྲུབ་ཕྱིར།
ROM 9:12 ཁོ་མོ་ལ། བུ་རྒན་པས་བུ་གཞོན་པར་གཡོག་བྱེད་པར་འགྱུར་ཞེས་གསུངས།
ROM 9:13 དེ་ལྟར་གསུང་རབ་ཀྱི་མདོ་ལས་ངས་ཡ་ཀོབ་ལ་བྱམས་ཤིང་ཨེ་སའུ་ལ་སྡང་ཞེས་བྲིས།
ROM 9:14 འོ་ན་ང་ཚོས་ཅི་ཟེར། དཀོན་མཆོག་དྲང་བདེན་མིན་པ་ལགས་སམ། དེ་མི་སྲིད།
ROM 9:15 གང་ལགས་ཤེ་ན། ཁོང་གིས་ལུང་སྟོན་པ་མོ་ཤེ་ལ། ང་ཡིས་སུ་ལ་བྱམས་པར་སེམས་པ་དེ་ལ་བྱམས། ། ང་ནི་སུ་ལ་སྙིང་རྗེར་སེམས་པ་དེ་ལ་བརྩེ། ། ཞེས་གསུངས།
ROM 9:16 དེའི་ཕྱིར་མིའི་བསམ་འདུན་ནམ་འབད་རྩོལ་མ་ཡིན་པར་བཀའ་དྲིན་ཅན་གྱི་དཀོན་མཆོག་ལ་རྟེན་ནོ།
ROM 9:17 ཡང་གསུང་རབ་ལས་ཨེ་ཇེབ་ཡུལ་གྱི་རྒྱལ་པོ་ཕར་ཨོ་ལ། ཁྱོད་བརྒྱུད་ནས་ངའི་ནུས་མཐུ་སྟོན་ཞིང༌། ངའི་མིང་འཛམ་གླིང་ཀུན་ལ་སྒྲོག་པའི་དོན་འདི་རང་གི་ཕྱིར་ངས་ཁྱོད་བསྐོས་པ་ཡིན་ཞེས་གསུངས།
ROM 9:18 དེ་བས་ན་དཀོན་མཆོག་གི་དགོངས་པ་ལྟར་སུ་ལ་ཐུགས་རྗེ་གནང་ཞིང༌། སུ་ལ་སེམས་མཁྲེགས་པོར་འདོད་ཀྱང་དེ་ལ་མཛད།
ROM 9:19 དེའི་ཕྱིར་ཁྱེད་ཀྱིས་ང་ལ། ཁོང་གིས་ཅིའི་ཕྱིར་ངེད་རྣམས་ལ་ད་དུང་སྐྱོན་འདོགས་པར་མཛད། ཁོང་གི་དགོངས་པར་རྒོལ་ཐུབ་མཁན་སུ་ཡིན་ཞེས་ཟེར་བར་འགྱུར།
ROM 9:20 འོན་ཀྱང་དཀོན་མཆོག་ལ་ཁ་ལན་སློག་མཁན་མི་ཁྱོད་སུ་ཡིན། གང་བཟོས་པ་དེས་བཟོ་མཁན་ལ། ཁྱེད་ཀྱིས་ཅིའི་ཕྱིར་ང་འདི་ལྟར་བཟོས་པ་ཡིན་ཞེས་ཟེར་རམ།
ROM 9:21 རྫ་མཁན་ལ་འཇིམ་པའི་གོང་པོ་གཅིག་ལས་སྣོད་ཆས་མཆོག་དམན་གཉིས་སུ་སྤྱོད་པ་བཟོ་བའི་དབང་ཆ་མེད་དམ།
ROM 9:22 དེ་ལྟར་དཀོན་མཆོག་ལ་ཐུགས་ཁྲོ་དང་ནུས་མཐུ་སྟོན་པར་མཛད་པའི་དབང་ཆ་ཡོད་ནའང༌། ཁོང་གི་ཐུགས་ཁྲོ་བབ་སའི་གཏོར་བཤིག་ཏུ་འགྲོ་བའི་མི་རྣམས་ལ་ཤིན་ཏུ་ཐུགས་བཟོད་པར་སྒོམ།
ROM 9:23 དེ་ནི་གཟི་བརྗིད་དང་ལྡན་པར་འགྱུར་བར་སྔར་གྲ་སྒྲིག་མཛད་དེ། ཁོང་གིས་ཐུགས་རྗེ་གནང་བ་རྣམས་ལ་བླ་ན་མེད་པའི་གཟི་བརྗིད་སྟོན་པར་མཛད་པའི་ཆེད་དུ་ཡིན།
ROM 9:24 ཡང་ཁོང་གིས་ཡ་ཧུ་དཱ་པ་མ་ཟད་ཡ་ཧུ་དཱ་པ་མིན་པ་ལས་ཀྱང་བདམས་པར་མཛད་པ་རྣམས་ནི་ང་ཚོ་ཡིན།
ROM 9:25 ཁོང་གིས་ལུང་སྟོན་པ་ཧོ་ཤེ་ཨ་བརྒྱུད་ནས། ང་ཡི་མ་ཡིན་མི་རྣམས་ལ། ། ང་ཡི་མི་རྣམས་ཞེས་སུ་འབོད། ། ཐུགས་བརྩེའི་ཡུལ་མིན་མི་རྣམས་ལ། ། ང་ཡི་ཐུགས་བརྩེའི་མི་ཞེས་འབོད། །
ROM 9:26 ཡང༌། ཁྱོད་ནི་ང་ཡི་མི་མ་ཡིན་ཞེས་བརྗོད་པའི་སར། ། གཏན་དུ་གནས་པའི་དཀོན་མཆོག་སྲས་རྣམས་ཞེས་སུ་འབོད། ། ཞེས་གསུངས།
ROM 9:27 ཡང་ལུང་སྟོན་པ་ཡེ་ཤ་ཡཱ་ཡིས་ཡི་སི་ར་ཨེལ་གྱི་སྐོར་ལ་འདི་ལྟར་བོས། ཡི་སི་ར་ཨེལ་ཡུལ་གྱི་བུ་རྒྱུད་རྣམས། ། མཚོ་འགྲམ་བྱེ་མ་བཞིན་དུ་མང་ན་ཡང༌། ། ཐར་བར་མཛད་པ་ཉུང་ཤས་ཙམ་ཞིག་གོ །
ROM 9:28 འཇིག་རྟེན་འདི་ལ་གཙོ་བོ་དཀོན་མཆོག་གིས། ། ཁྲིམས་གཅོད་མ་འགྱངས་ཡོངས་སུ་མཛད་ཕྱིར་ཡིན། ། ཞེས་གསུངས།
ROM 9:29 ཡང་ལུང་སྟོན་པ་ཡེ་ཤ་ཡཱ་ཡིས་ལུང་བསྟན་པ་ལྟར། ནུས་མཐུ་ཀུན་དང་ལྡན་པའི་དཀོན་མཆོག་གིས། ། ང་ཚོའི་བུ་རྒྱུད་འཇོག་པར་མ་མཛད་ན། ། སཱ་དོམ་དང་ནི་གྷོ་མོ་ར་བཞིན་གྱུར། ། ཞེས་གསུངས།
ROM 9:30 འོ་ན་ང་ཚོས་ཅི་ཟེར། ཡ་ཧུ་དཱ་པ་མིན་པ་རྣམས་རྣམ་པར་དག་པར་འབད་བརྩོན་མ་བྱས་ཀྱང༌། དད་པ་ལས་འབྱུང་བའི་རྣམ་པར་དག་པ་ཐོབ།
ROM 9:31 འོན་ཀྱང་ཡི་སི་ར་ཨེལ་གྱིས་ཆོས་ཁྲིམས་སྒྲུབ་པ་ལས་འབྱུང་བའི་དྲང་བདེན་ཉིད་ལ་འབད་བརྩོན་བྱས་ཀྱང་ཆོས་ཁྲིམས་དེ་མ་བསྒྲུབས།
ROM 9:32 དེ་ཅིའི་ཕྱིར་ཞེ་ན། ཁོ་ཚོས་དད་པ་ལ་མ་བརྟེན་ཏེ་དགེ་བའི་ལས་ལ་བརྟེན་པའི་ཚུལ་དུ་དེ་ལ་འབད་བརྩོན་བྱས་པའི་ཕྱིར་རོ། ཁོ་ཚོའི་ཕྱིར་ཆོས་ཁྲིམས་དེ་ནི་འགག་རྡོ་ལྟ་བུར་གྱུར་ཏེ།
ROM 9:33 མདོ་ལས་བཀོད་པ་ལྟར་ན། ལྟོས་ཤིག་ང་ཡིས་ཙི་ཡོན་ཡུལ་ལ་ནི། ། རྐང་པ་ཐོགས་ཤིང་འགྱེལ་བར་བྱེད་པ་ཡི། ། རྡོ་ཞིག་བཞག་པས་མི་ནི་སུ་ཞིག་གིས། ། ཁོང་ལ་དད་ན་སྐྱེངས་པར་མི་འགྱུར་རོ། ། ཞེས་གསུངས་སོ། །
ROM 10:1 སྤུན་ཟླ་རྣམས། ཡ་ཧུ་དཱ་པ་རྣམས་ཐར་བར་འགྱུར་བའི་ཆེད་དུ་ངས་སེམས་གཏིང་ནས་དཀོན་མཆོག་ལ་སྨོན་ལམ་འདེབས།
ROM 10:2 ཁོ་ཚོར་དཀོན་མཆོག་གི་དོན་ལ་བརྩོན་སེམས་ཡོད་པ་ངས་བདེན་དཔང་བྱེད། འོན་ཀྱང་དེ་ནི་རྟོགས་པ་ལ་མི་བརྟེན།
ROM 10:3 དཀོན་མཆོག་ལས་འབྱུང་བའི་རྣམ་པར་དག་པར་མཛད་ཐབས་མ་རྟོགས་པས། ཁོ་ཚོས་ཆོས་ཁྲིམས་སྲུང་བའི་སྒོ་ནས་དྲང་བདེན་དུ་འགྱུར་བར་བརྩོན་ནས་དཀོན་མཆོག་གི་དྲང་བདེན་གྱི་ཐབས་ལམ་དང་ལེན་མ་བྱས།
ROM 10:4 དད་པ་བྱེད་མཁན་ཐམས་ཅད་དཀོན་མཆོག་དང་འབྲེལ་བ་ཡང་དག་པ་འཐོབ་པའི་ཕྱིར་མཱ་ཤི་ཀ་ནི་ཆོས་ཁྲིམས་ཀྱི་དོན་སྒྲུབ་པར་མཛད་དོ། །
ROM 10:5 ཆོས་ཁྲིམས་ཀྱི་བཀའ་སྒྲུབ་པར་བརྟེན་པའི་དྲང་བདེན་ཉིད་ཀྱི་སྐོར་ལུང་སྟོན་པ་མོ་ཤེ་ཡིས། ཆོས་ཁྲིམས་ཀྱི་བཀའ་སྒྲུབ་མཁན་དེ་གསོན་པར་འགྱུར་ཞེས་བྲིས།
ROM 10:6 འོན་ཀྱང་དཀོན་མཆོག་དང་འབྲེལ་བ་ཡང་དག་པ་འཐོབ་པའི་ལམ་དད་པར་བརྟེན་པ་དེས་དཀོན་མཆོག་གི་ཞིང་ཁམས་ལ་སུ་འགྲོ་བར་བྱ། (དེ་ནི་མཱ་ཤི་ཀ་མར་འཁྲིད་པའི་ཕྱིར་ཡིན་)
ROM 10:7 ཡང་ན། གཤིན་པོའི་ཡུལ་ལ་སུ་འགྲོ་བར་བྱ། (དེ་ནི་མཱ་ཤི་ཀ་ཡར་འཁྲིད་པའི་ཕྱིར་ཡིན་) ཞེས་མ་སེམས་ཞིག་ཅེས་གསུངས།
ROM 10:8 དོན་དམ་དུ་དེས་འདི་ལྟར་གསུངས་ཏེ། བཀའ་དེ་ནི་ཁྱོད་དང་ཉེ་སྟེ། ཁྱོད་ཀྱི་ཁ་དང་སེམས་ལ་བཞུགས་སོ་ཞེས་གསུངས། བཀའ་དེ་ཅི་ཡིན་ཞེ་ན། ངེད་རྣམས་ཀྱིས་སྒྲོག་པའི་དད་པའི་བཀའ་ཡིན་ཏེ།
ROM 10:9 གལ་ཏེ་ཁྱེད་ཀྱིས་ཁ་ཡིས་ཡེ་ཤུ་གཙོ་བོ་ཡིན་པ་ཁས་ལེན་བྱས་ཤིང༌། སེམས་ཀྱིས་ཀྱང་དཀོན་མཆོག་གིས་ཁོང་འཆི་བ་ནས་སླར་གསོན་པར་མཛད་པ་དེ་ལ་དད་པ་བྱས་ན། ཁྱེད་ངེས་པར་ཐར་བར་འགྱུར་རོ།
ROM 10:10 གང་ལགས་ཟེར་ན། སེམས་ནས་དད་པ་བྱེད་པ་ལ་དཀོན་མཆོག་དང་ཡང་དག་པའི་འབྲེལ་བ་འཐོབ་ཅིང༌། ཁ་ནས་ཁས་ལེན་བྱེད་པ་ལ་ཐར་པ་འཐོབ།
ROM 10:11 གསུང་རབ་ཀྱི་མདོ་ལས་སུས་ཀྱང་ཁོང་ལ་དད་པ་བྱེད་པ་དེ་སྐྱེངས་པར་མི་འགྱུར་ཞེས་འཁོད།
ROM 10:12 གང་ཡིན་ཟེར་ན། དོན་འདིར་ཡ་ཧུ་དཱ་པ་དང་ཡ་ཧུ་དཱ་པ་མིན་པ་གཉིས་ཀྱི་བར་དུ་དབྱེ་བ་མེད་དེ། ཐམས་ཅད་ཀྱི་གཙོ་བོ་གཅིག་རང་ཡིན་ཞིང༌། ཁོང་གི་མཚན་བརྗོད་མཁན་ཐམས་ཅད་ལ་ལྷག་པར་བྱིན་གྱིས་རླབས།
ROM 10:13 གང་ཡིན་ཞེ་ན། གཙོ་བོའི་མཚན་བརྗོད་མཁན་ཐམས་ཅད་ཐར་བར་འགྱུར་ངེས་ཡིན་ཞེས་བྲིས་པའི་ཕྱིར་རོ།
ROM 10:14 འོ་ན། ཁོང་ལ་དད་པ་མ་བྱས་ན་ཇི་ལྟར་བརྗོད། ཡང་ཅི་ཡང་མ་ཐོས་ན་ཇི་ལྟར་དད། སྒྲོག་མཁན་མེད་ན་ཁོ་ཚོས་ཇི་ལྟར་ཐོས།
ROM 10:15 མ་མངགས་ན་ཇི་ལྟར་སྒྲོག མདོ་ལས་འདི་ལྟར་ཏེ། འཕྲིན་བཟང་སྒྲོག་མཁན་གྱི་ཞབས་ནི་ཇི་ལྟ་བུ་མཛེས་ཞེས་བྲིས།
ROM 10:16 འོན་ཀྱང་མི་མང་ཆེ་བས་འཕྲིན་བཟང་ལ་མ་ཉན་ཏེ། ལུང་སྟོན་པ་ཡེ་ཤ་ཡཱ་ཡིས། ཀྱེ་གཙོ་བོ་ལགས། ང་ཚོའི་འཕྲིན་ལ་སུས་ཡིད་ཆེས་བྱས་པ་ཡིན་ཞེས་བྲིས།
ROM 10:17 དེའི་ཕྱིར་དད་པ་ནི་གང་ཐོས་པ་ལས་འབྱུང་ཞིང༌། གང་ཐོས་པ་དེ་མཱ་ཤི་ཀའི་བཀའ་ལས་འབྱུང༌།
ROM 10:18 ཡ་ཧུ་དཱ་པས་ཐོས་མ་མྱོང་ངམ། ཐོས་སོ། གང་ཡིན་ཞེ་ན། དེ་ཚོའི་གསུང་སྐད་ས་གཞི་ཡོངས་སུ་ཁྱབ། ། དེ་ཚོའི་བཀའ་ཚིག་འཛམ་གླིང་ཐ་གྲུར་ཁྱབ། ། ཞེས་འཁོད།
ROM 10:19 ཡང་ཡི་སི་ར་ཨེལ་གྱིས་མ་རྟོགས་སམ་ཞེས་དྲིས་ན། དང་པོར་ལུང་སྟོན་པ་མོ་ཤེ་ཡིས་མདོ་ལས། ང་ཡིས་མི་རིགས་མ་ཡིན་པར་བརྟེན་ཁྱོད་ཚོར་ཕྲག་དོག་སློང༌། ། ང་ཡིས་རྨོངས་པའི་མི་རིགས་ལ་བརྟེན་ཁྱོད་ཚོར་ཁོང་ཁྲོ་སློང༌། ། ཞེས་འཁོད།
ROM 10:20 ཡང་ལུང་སྟོན་པ་ཡེ་ཤ་ཡཱ་ཡིས་བློ་ཁོག་ཆེན་པོས། འཚོལ་མི་མ་ཡིན་པ་ལ་ང་རང་རྙེད། ། མཇལ་འདོད་མེད་པ་རྣམས་ལ་ང་ཡིས་མངོན། ། ཞེས་གསུངས།
ROM 10:21 འོན་ཀྱང་ཡི་སི་ར་ཨེལ་གྱི་སྐོར་ལ་ཁོང་གིས། བཀའ་ལ་མི་ཉན་རྒོལ་བའི་མི་རྣམས་ལ། ། བསུ་ཕྱིར་ང་ཡིས་ཉིན་གང་ལག་གཉིས་བརྐྱངས། ། ཞེས་གསུངས་སོ། །
ROM 11:1 འོ་ན་ངས་འདྲི་བར་བྱ་སྟེ། དཀོན་མཆོག་གིས་རང་ཉིད་ཀྱི་མི་རིགས་སྤངས་པར་མཛད་པ་ཡིན་ནམ། དེ་མི་སྲིད། གང་ལགས་ཤེ་ན། ང་རང་ནི་ཡི་སི་ར་ཨེལ་པ་སྟེ་མེས་པོ་ཨབ་ར་ཧམ་གྱི་བུ་རྒྱུད་དང༌། པེན་ཡ་མཱིན་ཚོ་ཁག་གི་མི་ཞིག་ཡིན།
ROM 11:2 དཀོན་མཆོག་གིས་སྔར་བདམས་ཏེ་རང་ཉིད་ཀྱི་མི་རིགས་སྤངས་པར་མ་མཛད། མདོ་ལས་ལུང་སྟོན་པ་ཨེ་ལི་ཡཱ་ཡིས་དཀོན་མཆོག་གི་མདུན་དུ་ཡི་སི་ར་ཨེལ་ལ་སྐྱོན་བརྗོད་པའི་སྒྲུང་དེ་མི་ཤེས་སམ།
ROM 11:3 ཨེ་ལི་ཡཱ་ཡིས་གཙོ་བོ་དཀོན་མཆོག་ལགས། ཁོ་ཚོས་ཁྱེད་ཀྱི་ལུང་སྟོན་པ་རྣམས་བསད། མཆོད་ཁྲི་རྣམས་བཤིག ང་གཅིག་པུར་ལུས་པ་དང་ཁོ་ཚོས་ང་ཡང་གསོད་ཐབས་འཚོལ་ཞེས་བཤད།
ROM 11:4 འོན་ཀྱང་དཀོན་མཆོག་གིས་དེའི་ལན་དུ་གང་གསུངས་ཞེ་ན། ངས་ངའི་དོན་དུ་ལྷ་སྦ་ཨལ་ལ་ཕྱག་མ་འཚལ་མཁན་བདུན་སྟོང་ཉར་ཡོད་ཅེས་གསུངས།
ROM 11:5 དེ་ལྟར་ད་ལྟའང་དཀོན་མཆོག་གི་ཐུགས་རྗེ་ཡིས་བདམས་པའི་ལྷག་མ་ཞིག་ཡོད།
ROM 11:6 དེ་ནི་ཐུགས་རྗེ་ལ་བརྟེན་ན་བྱ་བ་བཟང་པོ་ལ་མི་རྟེན། དེ་ལྟར་མ་ཡིན་ན། ཐུགས་རྗེ་དེ་ཐུགས་རྗེ་དངོས་གནས་མིན།
ROM 11:7 མདོར་བསྡུས་ན་ཡི་སི་ར་ཨེལ་གྱིས་འབད་པས་གང་བཙལ་བ་དེ་མ་ཐོབ། འོན་ཀྱང་བདམས་པའི་མི་རྣམས་ལ་ཐོབ་སྟེ། ལྷག་མ་རྣམས་ཀྱི་སེམས་མཁྲེགས་པོར་གྱུར།
ROM 11:8 དེ་ལྟར་གསུང་རབ་ཀྱི་མདོ་ལས། དཀོན་མཆོག་ཉིད་ཀྱིས་ཁོ་ཚོ་ལ། ། གོ་ཚོར་མེད་པའི་སེམས་པ་དང༌། ། མ་མཐོང་བ་ཡི་མིག་ཟུང་དང༌། ། ཉན་ཤེས་ཉམས་པའི་རྣ་ཅོག་བཅས། ། གནང་སྟེ་དེ་རིང་བར་དུ་གནས། ། ཞེས་འཁོད།
ROM 11:9 ཡང་རྒྱལ་པོ་དཱ་བིད་ཀྱིས། ཁོ་ཚོའི་གསོལ་སྟོན་རྒྱ་རྙི་དོང་རྙི་དང༌། ། འགག་རྡོ་འཁོན་ལན་ཉིད་དུ་གྱུར་བར་ཤོག །
ROM 11:10 ཁོ་ཚོས་མ་མཐོང་ཆེད་དུ་མིག་གཉིས་པོ། ། སྒྲིབ་ཅིང་རྐེད་པ་ནམ་ཡང་གུག་གྱུར་ཅིག ། ཅེས་གསུངས།
ROM 11:11 ཡ་ཧུ་དཱ་པ་རྣམས་ས་སྟེང་དུ་འགྱེལ་བ་དེ་ནམ་ཡང་ལངས་རྒྱུ་མེད་དམ། དེ་མི་སྲིད། ཡ་ཧུ་དཱ་པ་རྣམས་ཀྱིས་དཀོན་མཆོག་གིས་གནང་བའི་ཐར་ལམ་དང་ལེན་མ་བྱས་པས་ཡ་ཧུ་དཱ་པ་མིན་པ་རྣམས་ལ་ཐར་པ་ཐོབ། དེ་ནི་ཡ་ཧུ་དཱ་པ་རྣམས་ཐར་པ་འདོད་དུ་འཇུག་པའི་ཆེད་དུ་ཡིན།
ROM 11:12 འོ་ན། ཡ་ཧུ་དཱ་པས་དཀོན་མཆོག་གི་ཐར་ལམ་དང་ལེན་མ་བྱས་པ་དང་ཁོ་ཚོ་ཕམ་པ་དེས་འཇིག་རྟེན་དང་ཡ་ཧུ་དཱ་པ་མིན་པ་རྣམས་ལ་བྱིན་རླབས་ཐོབ། མ་འོངས་པར་ཁོ་ཚོ་དཀོན་མཆོག་གི་ཐར་པར་ཚུད་པའི་ཚད་ལོན་ན་དེ་ཅི་ལས་ཀྱང་ལྷག་པའི་བྱིན་རླབས་ཐོབ་རྒྱུ་ཡིན།
ROM 11:13 ད་ངས་ཁྱེད་ཚོ་ཡ་ཧུ་དཱ་པ་མིན་པ་རྣམས་ལ་སྨྲ་བར་བྱ་སྟེ། ང་ནི་ཡ་ཧུ་དཱ་པ་མིན་པ་རྣམས་ལ་མངགས་པའི་སྐུ་ཚབ་ཡིན་པས་ངའི་ཞབས་ཕྱི་བྱེད་པར་མཐོང་ཆེན་པོ་བྱེད་བཞིན་ཡོད།
ROM 11:14 དེ་ནི་ཐབས་གང་གིས་ངའི་མི་རིགས་ཐར་པ་འདོད་དུ་འཇུག་ནས་མ་མཐར་ཡང་ཁོ་རྣམས་ལས་ཁ་གཅིག་ཐར་བར་འགྱུར་བའི་ཆེད་དུ་ཡིན།
ROM 11:15 དཀོན་མཆོག་གིས་ཁོ་ཚོ་སྤོང་བ་ནི་འཇིག་རྟེན་པ་རྣམས་དང་འདུམ་པའི་དོན་ཡིན་ན། ཁོ་ཚོའི་དང་ལེན་མཛད་པ་ནི་དེ་བས་ཀྱང་འཆི་བ་ནས་སླར་གསོན་པའི་དོན་མ་ཡིན་ནམ།
ROM 11:16 བག་ཟན་གྱི་ཕུད་དེ་ལྷད་མེད་པ་ཡིན་ན། ཆ་ཚང་ལྷད་མེད་པ་ཡིན། ལྗོན་ཤིང་གི་རྩ་བ་ལྷད་མེད་པ་ཡིན་ན་དེའི་ཡལ་གའང་ལྷད་མེད་པ་ཡིན།
ROM 11:17 དཀོན་མཆོག་གིས་ལྗོན་ཤིང་གི་ཡལ་ག་དེ་བཅད་ནས་ཁྱེད་ཚོ་ནགས་ཚལ་གྱི་སྐྱུར་རུ་ཤིང་གི་ཡལ་ག་ལྗོན་ཤིང་དང་སྦྱོར་འདེབས་བྱས་ཏེ་ཤིང་བཟང་པོའི་རྩ་བའི་བཅུད་དང་ལྡན་པར་གྱུར།
ROM 11:18 དེའི་ཕྱིར་ཡལ་ག་གཞན་རྣམས་ཀྱི་དྲུང་དུ་རང་བསྟོད་མ་བྱོས་ཤིག གལ་ཏེ་དེ་ལྟར་བྱས་ན། རྩ་བ་ཁྱོད་ལ་བརྟེན་པ་མ་ཡིན་ཏེ། ཁྱོད་རྩ་བ་ལ་བརྟེན་པ་དྲན་པར་གྱིས་ཤིག
ROM 11:19 ཁྱོད་ཀྱིས་ང་ལྗོན་ཤིང་ལ་སྦྱོར་འདེབས་པའི་ཆེད་དུ་ཡལ་ག་གཞན་རྣམས་བཅད་པ་ཡིན་ཞེས་ཟེར་ཡོང༌།
ROM 11:20 དེ་བདེན་པ་ཡིན། འོན་ཀྱང་ཁོ་ཚོ་དད་པ་མ་བྱས་པའི་རྐྱེན་གྱིས་བཅད་པ་ཡིན་ཞིང༌། ཁྱོད་ནི་དད་པ་བྱེད་པའི་རྐྱེན་གྱིས་གནས་སོ། དེའི་ཕྱིར་ང་རྒྱལ་མི་བྱེད་དེ་ཞེད་སྣང་བྱེད་དགོས།
ROM 11:21 གང་ཡིན་ཞེ་ན། དཀོན་མཆོག་གིས་རང་བྱུང་གི་ཡལ་ག་བཅད་པར་མཛད་ན། ཁྱོད་ཀྱང་གཅོད་པར་འགྱུར་སྲིད།
ROM 11:22 དཀོན་མཆོག་གི་བཀའ་དྲིན་དང་ནན་པོ་གཉིས་ལ་ལྟོས་ཤིག བཀའ་ལ་མ་ཉན་པ་རྣམས་ལ་ནན་པོ་མཛད། ཁོང་གི་བཀའ་དྲིན་ལ་མུ་མཐུད་ནས་བརྟེན་ན་ཁྱོད་རྣམས་ལ་བཀའ་དྲིན་མཛད། འོན་ཀྱང་དེ་ལྟར་མ་བྱས་ན། ཁྱོད་ཚོའང་གཅོད་པར་འགྱུར།
ROM 11:23 ཡི་སི་ར་ཨེལ་པ་དེ་དག་ཀྱང་དད་པ་མེད་པའི་གནས་ལ་མི་གནས་ན་ལྗོན་ཤིང་ལ་སྦྱོར་འདེབས་གནང་བར་འགྱུར། གང་ལགས་ཤེ་ན། དཀོན་མཆོག་གིས་ཁོ་རྣམས་སྦྱོར་འདེབས་མཛད་ཐུབ་པས་སོ།
ROM 11:24 ཁྱོད་རྣམས་ནགས་ཚལ་གྱི་སྐྱུར་རུ་ཤིང་ལས་བཅད་ནས། རང་བྱུང་ཁམས་དང་མི་མཐུན་པར་སྐྱུར་རུ་ཤིང་བཟང་པོ་ལ་སྦྱོར་འདེབས་བྱས་པ་ཡིན་ན། རང་བཞིན་གྱི་ཡལ་ག་ནི་རང་གི་སྐྱུར་རུ་ཤིང་ལ་དེ་ལས་ལྷག་པར་སྦྱོར་འདེབས་བྱེད་པར་འགྱུར།
ROM 11:25 སྤུན་ཟླ་རྣམས། ཁྱེད་ཚོས་རང་མཁས་པར་མི་རྩི་བའི་ཕྱིར་དཀོན་མཆོག་གིས་སྔར་མངོན་པར་མ་མཛད་པའི་བདེན་པ་འདི་ཤེས་པར་གྱིས་ཤིག ཡ་ཧུ་དཱ་པ་མིན་པ་རྣམས་དཀོན་མཆོག་གི་ཐར་པར་ཚུད་པའི་ཚད་མ་ལོན་པའི་བར་དུ་ཡི་སི་ར་ཨེལ་གྱི་ཆ་ཤས་ཞིག་སེམས་མཁྲེགས་པོར་གྱུར།
ROM 11:26 དེ་ལྟར་ཡི་སི་ར་ཨེལ་ཆ་ཚང་ཐར་བར་འགྱུར། གསུང་རབ་ཀྱི་མདོར། ཙི་ཡོན་ཡུལ་ནས་སྐྱབས་མགོན་ཞིག ། ཕེབས་ཏེ་ཡི་སི་ར་ཨེལ་གྱི། ། དད་མེད་སེམས་དེ་བསྒྱུར་བར་མཛད། །
ROM 11:27 ང་ཡིས་ཁོ་ཚོར་བཞག་པའི་དམ་བཅའ་ནི། ། ཁོ་ཚོའི་སྡིག་ཉེས་སེལ་བ་དེ་ཡིན་ནོ། ། ཞེས་འཁོད།
ROM 11:28 འཕྲིན་བཟང་གི་ཆ་ནས་ཁོ་ཚོ་ཁྱེད་རྣམས་ཀྱི་ཕྱིར་དཀོན་མཆོག་གི་དགྲ་བོར་རྩི། འོན་ཀྱང་མེས་པོ་རྣམས་ལ་གནང་བའི་ཞལ་ཆད་སྒྲུབ་པའི་ཕྱིར་དཀོན་མཆོག་གིས་བདམས་པར་མཛད་པའི་ཆ་ནས་ཁོ་རྣམས་གཅེས་པར་རྩི།
ROM 11:29 གང་ཡིན་ཞེ་ན། དཀོན་མཆོག་གི་གནང་སྦྱིན་དང་འབོད་གནང་བ་དེ་འགྱུར་མི་སྲིད་དོ།
ROM 11:30 སྔར་ཡ་ཧུ་དཱ་པ་མིན་པ་ཁྱེད་ཚོས་དཀོན་མཆོག་གི་བཀའ་ལ་མ་ཉན་ཀྱང༌། ཡ་ཧུ་དཱ་པས་བཀའ་ལ་མ་ཉན་པའི་རྐྱེན་གྱིས་ད་ལྟ་ཁྱེད་རྣམས་ལ་ཐུགས་རྗེ་ཐོབ།
ROM 11:31 དེ་ལྟར་ཡ་ཧུ་དཱ་པ་ཚོས་ད་ལྟ་བཀའ་ལ་མི་ཉན་ཀྱང༌། ཁྱེད་ལ་གནང་བའི་ཐུགས་རྗེའི་རྐྱེན་གྱིས་ཁོ་ཚོ་ལ་ཡང་ད་ལྟ་ཐུགས་རྗེ་འཐོབ་པར་འགྱུར།
ROM 11:32 གང་ཡིན་ཟེར་ན། མི་ཐམས་ཅད་ལ་ཐུགས་རྗེ་གཟིགས་པའི་ཆེད་དུ་དཀོན་མཆོག་གིས་ཁོ་ཚོ་ཚང་མ་བཀའ་ལ་མ་ཉན་པའི་ཁོངས་སུ་མཛད།
ROM 11:33 ཨེ་མ། དཀོན་མཆོག་གི་ནི་ཤེས་རབ་དང༌། ། མཁྱེན་རྒྱ་ཟབ་ཅིང་ཡངས་པ་ལ། ། ཁོང་གི་རྟོག་དཔྱོད་དཔོག་པར་དཀའ། ། ཁོང་གི་ཐབས་ལམ་རྟོགས་མི་ནུས། །
ROM 11:34 སུ་ཡིས་ཁོང་གི་དགོངས་པ་ཤེས། ། ཁོང་གི་གྲོས་འདེབས་མཁན་དེ་སུ། །
ROM 11:35 སུ་ཡིས་ཁོང་ལ་ཅི་ཕུལ་ནས། ། ཁོང་གིས་དེའི་ལན་འཇལ་དགོས་སམ། །
ROM 11:36 ཐམས་ཅད་ཁོང་ལས་འབྱུང་བ་དང༌། ། ཁོང་ལ་བརྟེན་ཅིང་ཁོང་གི་ཕྱིར། ། སྙན་དང་གྲགས་པའི་གཟི་བརྗིད་དག ། ཁོང་ལ་ནམ་ཡང་ཐོབ་པར་ཤོག ། ཨ་མེན། །
ROM 12:1 དེའི་ཕྱིར་སྤུན་ཟླ་རྣམས། དཀོན་མཆོག་གིས་ཁྱེད་ཚོར་ཐུགས་རྗེ་གནང་བས་ཁྱེད་ཀྱི་ལུས་ནི་གསོན་པོ་དང་དམ་པ། དཀོན་མཆོག་ཐུགས་མཉེས་པའི་མཆོད་པ་ལྟར་འབུལ་བར་སྐུལ། དེ་ནི་ཁྱེད་ཚོའི་བདེན་པའི་བསྙེན་བཀུར་ཡིན།
ROM 12:2 འཇིག་རྟེན་འདིའི་བྱེད་ལུགས་ལ་མ་བལྟས་པར་དཀོན་མཆོག་གི་དགོངས་པ་བཟང་པོ་དང༌། ཁོང་ཐུགས་མཉེས་པ་དང༌། ཕུན་སུམ་ཚོགས་པ་གང་ཡིན་ཤེས་པའི་ཕྱིར་ཁྱེད་ཀྱི་སེམས་གསར་དུ་སྒྱུར་བའི་ཐོག་ནས་མི་གསར་པར་གྱུར་ཅིག
ROM 12:3 ང་ལ་གནང་བའི་ཐུགས་རྗེའི་སྒོ་ནས་ངས་ཁྱེད་ཚོ་རེ་རེར་རང་མཐོང་ཆེན་པོ་མི་བྱེད་པར་དཀོན་མཆོག་གིས་ཁྱེད་ལ་གནང་བའི་དད་པའི་ཚད་དང་བསྟུན་ཏེ། རང་ཉིད་ལ་གདེང་འཇོག་འཚམ་པོར་བྱས་ནས་སོམས་ཞེས་བསྒོའོ།
ROM 12:4 ལུས་གཅིག་ལ་ཡན་ལག་མང་པོ་ཡོད་ཅིང༌། ཡན་ལག་རེ་རེར་ནུས་པ་མི་གཅིག་པ་ཡོད་པ་བཞིན།
ROM 12:5 དེ་ལྟར་ངེད་རྣམས་མི་མང་པོ་ཡོད་ཀྱང་མཱ་ཤི་ཀའི་ནང་དུ་ལུས་གཅིག་ཏུ་གྱུར་ཞིང༌། སོ་སོ་ཕན་ཚུན་གྱི་ཡན་ལག་ཡིན།
ROM 12:6 ངེད་རྣམས་ལ་གནང་བའི་ཐུགས་རྗེ་དང་བསྟུན་ཏེ་ང་ཚོ་རེ་རེར་གནང་སྦྱིན་མི་འདྲ་བ་ཡོད། གལ་སྲིད་མི་ཞིག་གི་གནང་སྦྱིན་དཀོན་མཆོག་གི་བཀའ་གསུང་པ་ཡིན་ན། དད་པའི་ཚད་བཞིན་དུ་དེ་སྒྲོགས་དགོས།
ROM 12:7 ཞབས་ཏོག་པ་ཡིན་ན་ཞབས་ཏོག་སྒྲུབ་དགོས་པ་དང༌། སློབ་མཁན་ཡིན་ན་སློབ་སྟོན་བྱེད་དགོས།
ROM 12:8 སྐུལ་འདེད་མཁན་ཡིན་ན་སྐུལ་བར་བྱེད་དགོས། སྦྱིན་པ་གཏོང་མཁན་ཡིན་ན་གཏོང་ཕོད་ཆེ་བའི་ངང་ནས་གཏོང་དགོས། འགོ་ཁྲིད་ཡིན་ན་འབད་བརྩོན་བྱེད་དགོས། གཞན་ལ་སྙིང་རྗེ་བྱེད་མཁན་ཡིན་ན་དགའ་བའི་ངང་ནས་དེ་ལྟར་བྱེད་དགོས།
ROM 12:9 བྱམས་པ་ནི་བཅོས་མིན་ཞིག་དགོས། ངན་པར་སྡང་ཞིང་བཟང་པོ་ཟུངས་ཤིག
ROM 12:10 སྤུན་ལྟར་ཕན་ཚུན་ལ་སྙིང་ནས་བྱམས་པ་བྱོས། གཅིག་གིས་གཅིག་ལ་བརྩོན་སེམས་ཀྱིས་བཀུར་སྟི་བྱོས་ཤིག
ROM 12:11 བརྩོན་འགྲུས་ཉམས་སུ་མ་འཇུག བརྩོན་སེམས་དང་ལྡན་པ་གྱིས་ཤིག གཙོ་བོ་ལ་ཞབས་ཕྱི་བྱོས།
ROM 12:12 རེ་བ་ལ་བརྟེན་ནས་དགའ། སྡུག་བསྔལ་མྱོང་དུས་བཟོད་པ་སྒོམ། སྨོན་ལམ་ལ་རྟག་ཏུ་གནས་པར་གྱིས་ཤིག
ROM 12:13 དད་ལྡན་རྣམས་ལ་གང་དགོས་པར་རོགས་རམ་བྱེད་ཅིང༌། མགྲོན་པོ་གང་ཡིན་ལ་སྣེ་ལེན་བྱོས།
ROM 12:14 ཁྱེད་ཚོར་གནོད་འཚེ་བྱེད་མཁན་ལ་བྱིན་གྱིས་རློབས། ཁོ་ཚོར་དམོད་མོ་མི་བྱེད་པར་བྱིན་གྱིས་རློབས་ཤིག
ROM 12:15 དགའ་བར་བྱེད་མཁན་རྣམས་དང་མཉམ་དུ་དགའ་ཞིང༌། མྱ་ངན་མཁན་རྣམས་དང་མྱ་ངན་མཉམ་མྱོང་གྱིས་དང༌།
ROM 12:16 ཕན་ཚུན་མཐུན་ནས་གནས་པར་གྱིས་ཤིག རང་མཐོང་ཆེན་པོ་མི་བྱེད་པར་དམའ་བ་རྣམས་དང་འགྲོགས། རང་མཁས་པ་ཡིན་པར་མ་རློམས་ཤིག
ROM 12:17 སུ་ལ་ཡང་ངན་པར་ངན་ལན་མ་འཇལ་ཞིག མི་ཐམས་ཅད་ཀྱི་དྲུང་དུ་ཡ་རབས་བྱེད་ཅིག
ROM 12:18 གལ་ཏེ་སྲིད་ན་གང་ཐུབ་ཅི་ཐུབ་ཀྱིས་མི་ཐམས་ཅད་དང་ཞི་བདེར་གནས་ཤིག
ROM 12:19 གཅེས་པ་རྣམས། དགྲ་ཤ་ནམ་ཡང་མ་ལེན་ཞིག དཀོན་མཆོག་གི་ཐུགས་ཁྲོ་ལ་ཆོལ། གང་ཡིན་ཞེ་ན། གསུང་རབ་ཀྱི་མདོ་ལས། གཙོ་བོས། ངན་པ་བྱེད་མཁན་རྣམས་ལ་ཆད་པ་གཏོང་རྒྱུ་ཡིན། ངས་ལན་འཇལ་ལོ་ཞེས་གསུངས།
ROM 12:20 ཁྱེད་ཀྱི་དགྲ་བོ་ལྟོགས་ན་ཁ་ཟས་དང༌། ། སྐོམ་པས་མནར་ན་བཏུང་བྱ་སྟེར་བར་བྱ། ། དེ་ལྟར་བྱས་ན་དགྲ་བོའི་མགོ་སྟེང་ལ། ། སོལ་བ་དམར་མོའི་མེ་ཁོག་བཞག་པ་ཡིན། །
ROM 12:21 ངན་པ་ཡིས་འཕམ་པར་མ་འགྱུར་ཏེ་བཟང་པོ་ཡིས་ངན་པ་ཆོམ་ཞིག །
ROM 13:1 མི་རེ་རེས་སྲིད་དབང་གི་དབང་སྒྱུར་མཁན་གྱི་བཀའ་ལ་ཉན་དགོས། གང་ལགས་ཟེར་ན། དེར་ཡོད་པའི་དབང་ནི་དཀོན་མཆོག་གིས་བཀོད་པ་ཡིན་གྱིས། དཀོན་མཆོག་གིས་བཀོད་པ་ལས་གཞན་པའི་དབང་མེད་དོ།
ROM 13:2 དེའི་ཕྱིར་སུས་ཀྱང་དབང་སྒྱུར་མཁན་གྱི་བཀའ་བརྒལ་ན་དེས་དཀོན་མཆོག་གི་བཀའ་ལ་རྒོལ། ཡང་དཀོན་མཆོག་གི་བཀའ་ལ་རྒོལ་མཁན་རྣམས་ལ་ཁྲིམས་གཅོད་ཕོག་པར་འགྱུར།
ROM 13:3 གང་ཡིན་ཞེ་ན། སྤྱོད་ལམ་བཟང་པོ་བྱེད་མཁན་མིན་ཏེ་ངན་པ་བྱེད་མཁན་རྣམས་དབང་སྒྱུར་མཁན་ལ་འཇིགས་དགོས། གལ་ཏེ་དབང་སྒྱུར་གྱི་འཇིགས་པ་ལས་ཐར་བར་འདོད་ན། སྤྱོད་ལམ་བཟང་པོ་བྱོས་ཤིག དེ་རྗེས་ཁོས་ཁྱེད་ལ་བསྟོད་པར་འགྱུར།
ROM 13:4 ཁྱོད་ལ་ཕན་པའི་ཕྱིར་ཁོ་ནི་དཀོན་མཆོག་གི་ཞབས་ཕྱི་ཡིན། འོན་ཀྱང་ཁྱོད་ཀྱིས་ངན་པ་བྱས་ན་འཇིགས་དགོས། གང་ལགས་ཤེ་ན། ཁོས་དོན་མེད་དུ་རལ་གྲི་ཐོགས་པ་མ་ཡིན། ཁོ་ནི་ངན་པ་བྱེད་མཁན་ལ་ཐུགས་ཁྲོའི་ཆད་པ་གཅོད་པའི་དཀོན་མཆོག་གི་ཞབས་ཕྱི་ཡིན།
ROM 13:5 དེའི་ཕྱིར་ཁོ་ཚོའི་བཀའ་ལ་ཉན་དགོས། དེ་ནི་ཉེས་ཆད་ལ་འཛེམ་པ་ཙམ་མ་ཟད་སེམས་དྲང་པོར་གནས་ཕྱིར་ཡང་ཡིན།
ROM 13:6 ཁྱོད་ཚོས་ཁྲལ་འཇལ་དགོས་པའི་རྒྱུ་མཚན་དེ་ཡིན། གང་ཡིན་ཟེར་ན། དབང་ལྡན་པ་རྣམས་ནི་དོན་དེ་རང་ལ་དམ་འཛིན་བྱེད་མཁན་དཀོན་མཆོག་གི་ཞབས་ཕྱི་ཡིན་པས་སོ།
ROM 13:7 མི་ཐམས་ཅད་ལ་གང་སྤྲོད་དགོས་པ་དེ་སྤྲོད་ཅིག ཁྲལ་ལེན་མཁན་ལ་ཁྲལ་དང༌། ཚོང་ཁྲལ་སྡུད་མཁན་ལ་ཚོང་ཁྲལ་འཇོལ་ཞིག གུས་འོས་པ་ལ་གུས་ཤིང༌། བཀུར་སྟི་འོས་པ་ལ་བཀུར་སྟི་བྱོས་ཤིག
ROM 13:8 གཅིག་གིས་གཅིག་ལ་བྱམས་པ་བྱེད་པ་མ་གཏོགས་པར་མི་སུ་ལའང་བུ་ལོན་འཇལ་རྒྱུ་ལུས་མ་འཇུག གང་ཡིན་ཞེ་ན། གཞན་ལ་བྱམས་པ་བྱེད་མཁན་གྱིས་ཆོས་ཁྲིམས་བསྒྲུབས་པས་སོ།
ROM 13:9 ལོག་གཡེམ་མ་བྱེད། མིའི་སྲོག་མ་གཅོད། རྐུ་མ་མ་རྐུས། ཧམ་འདོད་མ་བྱེད་ལ་སོགས་པའི་བཀའ་ཁྲིམས་ནི། ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག་ཅེས་པའི་བཀའ་ཡིས་སྙིང་དོན་སྡུད།
ROM 13:10 བྱམས་པ་ནི་ཁྱིམ་མཚེས་ལ་གནོད་པ་མི་བྱེད། དེར་བརྟེན་བྱམས་པ་ནི་ཆོས་ཁྲིམས་སྒྲུབ་པའོ། །
ROM 13:11 དུས་སྐབས་འདི་རྟོགས་ཏེ་དེ་ལྟར་བྱོས་ཤིག ང་ཚོས་ཐོག་མར་དད་པ་སྐྱེས་པའི་དུས་དེ་ལས་ཀྱང་ད་ལྟ་ངེད་ཀྱི་ཐར་པ་ཉེ་བར་ཡོང་བས་གཉིད་སད་པའི་དུས་ལ་འབབ།
ROM 13:12 མཚན་མོ་འདས་ཤིང་ཉི་མ་ཤར་གྲབས་ཡོད་པས་མུན་པའི་ཁྲོད་ཀྱི་བྱ་བ་སྤངས་ནས་འོད་ཀྱི་ཁྲབ་གྱོན་དགོས།
ROM 13:13 བག་མེད་ལོངས་སྤྱོད་དང༌། ར་བཟི། ལོག་གཡེམ། འདོད་ཆགས། ཁ་རྩོད། ཕྲག་དོག་བཅས་མེད་པར་ཉིན་མོ་དང་བསྟུན་པའི་སྤྱོད་ལམ་བཟང་པོ་བྱེད་དགོས།
ROM 13:14 དེ་ལས་ལྡོག་སྟེ་གཙོ་བོ་ཡེ་ཤུ་མཱ་ཤི་ཀ་གོས་ལྟར་གྱོན་པ་དང༌། སྡིག་པའི་རང་གཤིས་ཀྱི་འདོད་པ་སྐོང་བར་མ་སོམས་ཤིག །
ROM 14:1 ལྟ་ཚུལ་གྱི་སྐོར་རྩོད་གླེང་མི་བྱེད་པར་དད་པ་དམན་པའང་དང་ལེན་བྱོས་ཤིག
ROM 14:2 མི་ཞིག་གིས་ཟས་རིགས་ཐམས་ཅད་ཟ་ཆོག་པར་དད་པ་བྱེད་ཀྱང༌། དད་པ་དམན་པས་སྔོ་ཚོད་ཁོ་ན་ཟ།
ROM 14:3 ཟས་རིགས་ཐམས་ཅད་ཟ་མཁན་གྱིས་ཟས་རིགས་ཐམས་ཅད་མི་ཟ་མཁན་ལ་མཐོང་ཆུང་མ་བྱེད་ཅིང༌། ཟས་རིགས་ཐམས་ཅད་མི་ཟ་མཁན་གྱིས་ཟས་རིགས་ཐམས་ཅད་ཟ་མཁན་ལ་སྐྱོན་འཛུགས་མ་བྱོས་ཤིག གང་ཡིན་ཟེར་ན། དཀོན་མཆོག་གིས་ཁོ་ཡང་དང་ལེན་མཛད།
ROM 14:4 མི་གཞན་གྱི་གཡོག་པོར་སྐྱོན་འཛུགས་བྱེད་མཁན་ཁྱོད་སུ་ཡིན། ཁོའི་བདག་པོ་ནི་ཁོ་ལ་གདེང་འཇོག་འཐོབ་བམ་མི་འཐོབ་པར་ཐག་གཅོད་བྱེད་མཁན་ཡིན། ཡང་ཁོ་གནས་པར་འགྱུར་ངེས་ཡིན། གང་ཡིན་ཞེ་ན། གཙོ་བོ་ནི་ཁོ་བརྟན་པོར་གནས་པར་མཛད་མཁན་ཡིན།
ROM 14:5 མི་གཅིག་གིས་ཉིན་མོ་གཅིག་གཞན་ལས་བཟང་བར་རྩི་མོད། གཞན་ཞིག་གིས་ཉིན་མོ་ཐམས་ཅད་གཅིག་པར་རྩི། མི་རེ་རེས་སོ་སོའི་སེམས་ལ་ཐེ་ཚོམ་མེད་པར་བྱེད་དགོས།
ROM 14:6 ཉིན་མོ་གཅིག་གཞན་ལས་བཟང་བར་རྩི་མཁན་གྱིས་གཙོ་བོའི་དོན་ལ་དེ་ལྟར་བྱེད། ཟས་རིགས་ཐམས་ཅད་ཟ་མཁན་གྱིས་གཙོ་བོ་ལ་བཀུར་སྟི་ཞུ་ཆེད་ཟ། གང་ལགས་ཟེར་ན། ཁོས་དཀོན་མཆོག་ལ་བཀའ་དྲིན་ཆེ་ཞུ། ཟས་རིགས་ཐམས་ཅད་མི་ཟ་མཁན་གྱིས་ཀྱང་དཀོན་མཆོག་ལ་བཀའ་དྲིན་ཆེ་ཞུས་ཏེ་གཙོ་བོ་ལ་བཀུར་སྟི་ཞུ།
ROM 14:7 ངེད་རྣམས་སུས་ཀྱང་རང་གི་དོན་དུ་ཡང་མི་འཚོ། རང་གི་དོན་དུ་ཡང་མི་ཤི
ROM 14:8 འཚོ་ན་གཙོ་བོའི་དོན་དུ་འཚོ། ཤི་ན་གཙོ་བོའི་དོན་དུ་ཤི དེའི་ཕྱིར་ངེད་རྣམས་འཚོ་ནའང་ཤི་ནའང་གཙོ་བོའི་ཡིན།
ROM 14:9 ཤི་གསོན་གཉིས་ཀ་གཙོ་བོའི་ཡིན་པའི་ཆེད་དུ་མཱ་ཤི་ཀ་གྲོངས་ནས་སླར་གསོན་པར་གྱུར་བ་ཡིན།
ROM 14:10 ཁྱོད་ཀྱིས་སྤུན་ཟླ་ལ་སྐྱོན་འཛུགས་ཅིའི་ཕྱིར་བྱེད། ཡང་ན་ཅིའི་ཕྱིར་སྤུན་ཟླ་ལ་མཐོང་ཆུང་བྱེད། གང་ལགས་ཤེ་ན། ང་ཚོ་ཐམས་ཅད་ཁྲིམས་གཅོད་མྱོང་བར་དཀོན་མཆོག་གི་བཞུགས་ཁྲིའི་དྲུང་དུ་འགྲོ་དགོས།
ROM 14:11 མདོ་ལས་བཀོད་པ་ལྟར་ན། གཙོ་བོས་ང་རང་གསོན་པའི་སྒོ་ནས་ནི། ། བདེན་ཚིག་སྨྲ་རྒྱུར་སྐྱེ་བོ་ཐམས་ཅད་ཀྱིས། ། པུས་མོ་ང་ཡི་མདུན་དུ་འཛུགས་པ་དང༌། ། སྨྲ་ལྕེ་ཀུན་གྱིས་ང་ནི་དཀོན་མཆོག་ཉིད། ། ཡིན་པ་ཁས་སུ་ལེན་པར་བྱེད་པའོ། །
ROM 14:12 དེ་བས་ན་ང་ཚོ་རེ་རེས་བཟང་ངན་ཅི་བྱེད་པའི་སྐོར་དཀོན་མཆོག་ལ་རྩིས་འབུལ་ཞུ་བར་བྱ།
ROM 14:13 དེའི་ཕྱིར་ད་ཕྱིན་ཆད་གཅིག་གིས་གཅིག་ལ་སྐྱོན་འདོགས་མ་བྱོས། དེ་ལས་ལྡོག་སྟེ་ང་ཚོས་སྤུན་ཟླ་རྣམས་ལ་བར་ཆད་དམ་འགོག་རྐྱེན་མི་བཟོ་བའི་ཐག་གཅོད་བྱེད་དགོས།
ROM 14:14 ང་གཙོ་བོ་ཡེ་ཤུའི་དད་ལྡན་པ་ཞིག་གིས་ངས་ཡིད་ཆེས་གཏིང་ཟབ་ཀྱི་སྒོ་ནས་འདི་ལྟར་ཤེས། དངོས་པོ་གང་ཡང་རང་བཞིན་གྱིས་མི་གཙང་བ་མ་ཡིན། འོན་ཀྱང་སུ་ཞིག་གིས་དེ་མི་གཙང་བར་བརྩིས་ན་ཁོའི་ཕྱིར་མི་གཙང་བ་ཡིན།
ROM 14:15 ཁྱོད་ཀྱིས་གང་ཟ་བའི་རྐྱེན་གྱིས་ཁྱོད་ཀྱི་སྤུན་ཟླ་སེམས་འཁྲུགས་པར་གྱུར་ན། དེ་བྱམས་སེམས་བཞིན་དུ་མི་སྤྱོད། སྤུན་ཟླའི་ཆེད་དུ་མཱ་ཤི་ཀ་གྲོངས་པས་ཁྱོད་ཀྱིས་གང་ཟ་བའི་རྐྱེན་གྱིས་འཇིག་པར་མ་བྱེད།
ROM 14:16 དེའི་ཕྱིར་ཁྱོད་ཀྱིས་བཟང་པོ་རྩི་བ་དེ་ལ་ངན་པ་ཟེར་དུ་མ་འཇུག
ROM 14:17 གང་ཡིན་ཞེ་ན། དཀོན་མཆོག་གི་རྒྱལ་སྲིད་ནི་ཟ་འཐུང་མིན་ཏེ། དྲང་བདེན་ཉིད་དང༌། ཞི་བདེ། དམ་པའི་ཐུགས་ཉིད་ལས་འབྱུང་བའི་དགའ་སྤྲོ་བཅས་ཡིན།
ROM 14:18 འདི་ལྟའི་སྒོ་ནས་མཱ་ཤི་ཀ་ལ་ཞབས་ཏོག་ཞུ་མཁན་དེ་ལ་དཀོན་མཆོག་ཐུགས་མཉེས་ཤིང༌། མི་རྣམས་ཀྱང་དགའ།
ROM 14:19 དེ་བས་ན་ངེད་རྣམས་ཀྱིས་ཞི་བདེ་དང་ཕན་ཚུན་བློ་སྒོ་འབྱེད་པར་འབད་རྩོལ་བྱེད་དགོས།
ROM 14:20 ཟས་ཀྱི་དོན་དུ་དཀོན་མཆོག་གི་འཕྲིན་ལས་མ་འཇིག ཟས་ཐམས་ཅད་གཙང་མ་ཡིན་ཡང༌། ཟས་རིགས་ཐམས་ཅད་ཟ་བའི་སྒོ་ནས་མི་གཞན་ལ་བར་ཆད་བཏང་ན་དེ་ཡང་མི་དག་པ་ཡིན།
ROM 14:21 ཤ་ཟ་བའམ་རྒུན་ཆང་འཐུང་བ་དང༌། སྤུན་ཟླ་རྣམས་ལ་བར་ཆད་ཅིའང་བཟོ་བ་དེ་གང་ཡང་མ་བྱས་ན་ལེགས་སོ།
ROM 14:22 དོན་དེའི་སྐོར་ཁྱེད་ཀྱི་བསམ་ཚུལ་རང་གི་སེམས་ནང་དཀོན་མཆོག་གི་དྲུང་དུ་སྲུང༌། སུ་ཞིག་གིས་གང་བྱས་ན་བྱེད་ཆོག་པའི་བྱ་བར་སྐྱོན་འཛུགས་མི་བྱེད་པ་དེ་བདེ་བ་ཡིན།
ROM 14:23 འོན་ཀྱང་ཐེ་ཚོམ་ཅན་གྱིས་བཟས་ན། དད་པ་ལས་བྱུང་བ་མ་ཡིན་པས་ཆད་པ་ཕོག་པར་འགྱུར། གང་ཡིན་ཟེར་ན། དད་པ་ལས་མི་འབྱུང་བ་ཐམས་ཅད་ནི་སྡིག་ཉེས་ཡིན་ནོ། །
ROM 15:1 དད་པ་བརྟན་པོ་ཡོད་མཁན་ངེད་རྣམས་ཀྱིས་དད་པ་ཆུང་བ་དག་གིས་གང་མི་ཐུབ་པའི་བྱ་བར་བཟོད་པ་སྒོམ་དགོས་ཏེ། རང་འདོད་ལྟར་བྱེད་མི་རུང༌།
ROM 15:2 ང་ཚོ་མི་རེ་རེས་ཁོ་ལ་ཕན་པ་དང་དད་པ་ཡར་རྒྱས་གཏོང་བའི་ཕྱིར་ཁྱིམ་མཚེས་ལ་དགའ་བར་བྱེད་དགོས།
ROM 15:3 གང་ཡིན་ཞེ་ན། མཱ་ཤི་ཀས་ཀྱང་རང་གི་ཐུགས་འདོད་ལྟར་མ་མཛད། མདོ་ལས། ཁྱེད་ལ་སྨད་ར་གཏོང་མཁན་གྱི་སྨད་ར་ང་ལ་ཕོག་གོ་ཅེས་བྲིས།
ROM 15:4 གང་ཡིན་ཞེ་ན། སྔར་མདོ་ལ་གང་བྲིས་པ་ཐམས་ཅད་ངེད་རྣམས་ལ་སློབ་སྟོན་གྱི་དོན་དུ་བྲིས་པ་ཡིན་ཏེ། བཟོད་པའི་སེམས་དང་མདོ་ལས་འབྱུང་བའི་སྐུལ་མའི་སྒོ་ནས་ངེད་རྣམས་རེ་བ་དང་ལྡན་པར་འགྱུར་བའི་ཕྱིར་ཡིན།
ROM 15:5 བཟོད་སེམས་དང་སྐུལ་མ་གནང་མཁན་དཀོན་མཆོག་གིས་མཱ་ཤི་ཀ་ཡེ་ཤུ་ལྟར་ཁྱེད་ཚོ་ཕན་ཚུན་འཆམ་མཐུན་ངང་ནས་གནས་པར་ཤོག
ROM 15:6 དེ་ནི་ཁྱེད་ཚོས་ཐུན་མོང་ཐོག་ཁ་ཞེ་གཉིས་མེད་ཀྱིས་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་པ་འབུལ་བའི་ཕྱིར་རོ། །
ROM 15:7 དེར་བརྟེན་དཀོན་མཆོག་གི་གཟི་བརྗིད་འཕེལ་བར་འགྱུར་བའི་ཆེད་དུ་མཱ་ཤི་ཀ་ཡིས་ཁྱེད་རྣམས་དང་ལེན་མཛད་པ་ལྟར་ཁྱེད་རྣམས་ཀྱིས་ཀྱང་ཕན་ཚུན་དང་ལེན་བྱོས་ཤིག
ROM 15:8 མེས་པོ་རྣམས་ལ་གནང་བའི་ཞལ་ཆད་སྒྲུབ་པར་མཛད་ཅིང༌། ཡ་ཧུ་དཱ་པ་མིན་པ་རྣམས་ཀྱིས་ཁོང་གི་ཐུགས་རྗེའི་དོན་དུ་དཀོན་མཆོག་ལ་བསྟོད་བསྔགས་བྱེད་པའི་ཕྱིར། མཱ་ཤི་ཀ་ནི་དཀོན་མཆོག་གི་བདེན་པ་སྟོན་པར་མཛད་དེ་ཡ་ཧུ་དཱ་པ་རྣམས་ཀྱི་གཡོག་པོར་གྱུར་ཞེས་ངས་ཟེར། མདོ་ལས་བཀོད་པ་ལྟར་ན། དེའི་ཕྱིར་ང་ཡིས་ཕྱི་པའི་ཁྲོད། ། ཁྱེད་ལ་བསྟོད་ཅིང་ཁྱེད་ཉིད་ཀྱི། ། མཚན་ལ་ང་ཡིས་བསྟོད་དབྱངས་འབུལ། །
ROM 15:10 ཡང་ཁོང་གིས། ཕྱི་པ་རྣམས་ཀྱང་ཁོང་གི་ནི། ། འབངས་དང་མཉམ་དུ་དགའ་བར་བྱོས། ། ཞེས་གསུངས།
ROM 15:11 ཡང༌། ཁྱེད་ཚོ་ཕྱི་པ་ཐམས་ཅད་ཀྱིས། ། གཙོ་བོའི་ཕྱོགས་ལ་བསྟོད་པ་ཕུལ། ། ཀུན་གྱིས་ཁོང་ལ་བསྟོད་དབྱངས་ཕུལ། ། ཞེས་འཁོད།
ROM 15:12 ཡང་ལུང་སྟོན་པ་ཡེ་ཤ་ཡཱ་ཡིས། མ་འོངས་པ་ཡི་དུས་ཤིག་ལ། ། ཡེ་སེའི་སྲས་ཤིག་འཁྲུང་བར་འགྱུར། ། དེ་ཡིས་ཕྱི་པར་དབང་བསྒྱུར་ནས། ། ཕྱི་པའི་རེ་བ་ཁོང་ལ་བཅོལ། ། ཞེས་གསུངས།
ROM 15:13 རེ་བ་བཅོལ་བ་དང་ལྡན་པའི་དཀོན་མཆོག་གིས་ཁྱེད་ཚོས་ཁོང་ལ་དད་པ་བྱེད་དེ་དམ་པའི་ཐུགས་ཉིད་ཀྱི་ནུས་མཐུ་ཡིས་ཁྱེད་ཚོའི་རེ་བ་མང་དུ་འཕེལ་བའི་ཕྱིར། ཁྱེད་རྣམས་ལ་དགའ་སྤྲོ་དང་ཞི་བདེ་ཡིས་ཁེངས་པར་མཛད་པར་གྱུར་ཅིག
ROM 15:14 ངའི་སྤུན་ཟླ་རྣམས། ཁྱེད་ཚོར་བྱམས་སེམས་དང་རྟོགས་པ་ཡིས་ཁེངས་ཏེ། ཕན་ཚུན་སློབ་སྟོན་བྱེད་ཐུབ་མཁན་ཡིན་པར་ང་རང་གིས་ཐེ་ཚོམ་མེད་པར་ཤེས།
ROM 15:15 འོན་ཏེ་གནད་དོན་ཁ་ཤས་ཀྱི་སྐོར་ཁྱེད་རྣམས་ལ་དྲན་སྐུལ་བྱེད་ཆེད་ངས་བློ་ཁོག་ཆེན་པོས་འདིར་བྲིས་པ་ཡིན། དེའི་རྒྱུ་མཚན་ནི་དཀོན་མཆོག་གིས་ང་ལ་གནང་བའི་ཐུགས་རྗེ་སྟེ།
ROM 15:16 ཡ་ཧུ་དཱ་པ་མིན་པ་རྣམས་ཀྱི་ཆེད་དུ་མཱ་ཤི་ཀ་ཡེ་ཤུའི་ཞབས་ཕྱི་བྱེད་པ་དང༌། དམ་པའི་ཐུགས་ཉིད་ཀྱིས་ཡ་ཧུ་དཱ་པ་མིན་པ་རྣམས་ལ་དམ་པར་མཛད་ནས་ཁོ་རྣམས་དཀོན་མཆོག་ཐུགས་མཉེས་པའི་མཆོད་པར་འགྱུར་བའི་ཕྱིར། ངས་དཀོན་མཆོག་གི་འཕྲིན་བཟང་སྒྲོག་སྟེ་མཆོད་གཡོག་པའི་ལས་བྱེད་པ་དེ་ཡིན།
ROM 15:17 དེའི་ཕྱིར་ང་མཱ་ཤི་ཀ་ཡེ་ཤུའི་ནང་ན་ཡོད་པས་ངས་དཀོན་མཆོག་གི་ཆེད་དུ་བྱས་པའི་བྱ་བ་དེ་ངོམས་སུ་ཆོག་པ་ཡོད།
ROM 15:18 མཱ་ཤི་ཀ་ཡིས་ང་བརྒྱུད་ནས་གང་མཛད་པ་མ་གཏོགས་པའི་གཏམ་གཞན་ཅིའང་ངས་ཤོད་མི་ཕོད། རྟགས་དང་ངོ་མཚར་བའི་དོན་དང་དེ་བཞིན། དམ་པའི་ཐུགས་ཉིད་ཀྱི་ནུས་མཐུ་བརྒྱུད་ནས་ངས་གང་བཤད་པ་དང་གང་བྱས་པའི་སྒོ་ནས་ཡ་ཧུ་དཱ་པ་མིན་པ་རྣམས་དཀོན་མཆོག་གི་བཀའ་ལ་ཉན་དུ་བཅུག དེ་ལྟར་ངས་ཡེ་རུ་ཤ་ལེམ་ནས་ཐ་ན་ཨི་ལི་རི་ཀོན་ཞིང་ཆེན་གྱི་བར་དུ་མཱ་ཤི་ཀའི་འཕྲིན་བཟང་ཕྱོགས་བཞིར་བསྒྲགས།
ROM 15:20 མི་གཞན་ཞིག་གིས་བཏིང་བའི་རྩིག་རྨང་སྟེང་མི་རྩིག་པའི་ཕྱིར། སྔོན་ལ་མཱ་ཤི་ཀའི་མཚན་མ་ཤེས་པའི་ས་ཆར་ང་འཕྲིན་བཟང་སྒྲོག་པར་འདོད།
ROM 15:21 མདོ་ལས་བཀོད་པ་ལྟར་ན། ཁོང་ཉིད་གཏན་ནས་རྒྱུས་མེད་པའི། ། མི་རྣམས་ཀྱིས་ནི་མཐོང་བར་འགྱུར། ། ཁོང་ཉིད་གཏན་ནས་ཐོས་མེད་པའི། ། མི་རྣམས་ཀྱིས་ནི་ཤེས་པར་འགྱུར། །
ROM 15:22 དེའི་རྐྱེན་གྱིས་ཐེངས་མང་པོ་ཁྱེད་ཀྱི་རྩར་འགྲོ་འདོད་ཀྱང༌། ང་བཀག་བྱུང༌།
ROM 15:23 འོན་ཀྱང་ད་ལྟ་ཡུལ་འདི་རྣམས་སུ་ངའི་ལས་ཀ་ཚར་བར་གྱུར་ཞིང༌། ལོ་མང་པོའི་སྔོན་ནས་བཟུང་ཁྱེད་རྣམས་མཇལ་བར་འདོད་པས།
ROM 15:24 སི་པེན་ཡུལ་དུ་འགྲོ་བའི་ཞོར་ལ་དེ་ལྟར་བྱེད་པའི་འཆར་གཞི་ཡོད། ཁྱེད་ཚོ་དང་དུས་ཐུང་ངུ་འགྲོགས་ནས་ཁྱེད་ཀྱིས་ང་དེ་ཕྱོགས་སུ་སྐྱེལ་བར་རེ་བ་བྱེད།
ROM 15:25 འོན་ཀྱང་ད་ལྟ་དད་ལྡན་རྣམས་ལ་སྦྱིན་པ་འབུལ་བའི་ཕྱིར་ང་ཡེ་རུ་ཤ་ལེམ་ལ་འགྲོ
ROM 15:26 གང་ཡིན་ཟེར་ན། མ་ཀེ་དོན་ཡཱ་དང༌། ཨ་ཀ་ཡཱ་ཡུལ་གཉིས་ཀྱི་དད་ལྡན་པས་ཡེ་རུ་ཤ་ལེམ་གྱི་དད་ལྡན་རྣམས་ཀྱི་ཁྲོད་དུ་དབུལ་པོ་རྣམས་ལ་སྦྱིན་པ་གཏོང་བར་དགའ།
ROM 15:27 ཁོ་ཚོས་དེ་ལྟར་སྦྱིན་པར་དགའ་ཡང་དོན་དངོས་ཐོག་ཁོ་ཚོ་ནི་ཡ་ཧུ་དཱ་པ་ཚོའི་བུ་ལོན་པ་ནང་བཞིན་ཡིན། གང་ཡིན་ཞེ་ན། ཡ་ཧུ་དཱ་པ་མིན་པ་རྣམས་ལ་སེམས་ཉིད་ཀྱི་བྱིན་རླབས་ལས་སྐལ་བ་བཟང་པོ་ཐོབ་པ་ཡིན་པས། ཡ་ཧུ་དཱ་པས་ཡ་ཧུ་དཱ་པ་མིན་པ་རྣམས་ཀྱི་ནོར་རྫས་ལས་སྐལ་བ་ཞིག་འཐོབ་པར་རིགས་སོ།
ROM 15:28 དེའི་ཕྱིར་ངས་ལས་ཀ་འདི་བསྒྲུབས་ཏེ་གང་བསྡུས་པ་ཁོ་ཚོའི་ལག་ཏུ་གཏད་ནས་ང་སི་པེན་ཡུལ་ལ་འགྲོ་བའི་ཞོར་ལ་ཁྱེད་རྣམས་དང་མཇལ་རྒྱུ་ཡིན།
ROM 15:29 ང་ཁྱེད་ཀྱི་རྩར་ཡོང་བའི་ཚེ་མཱ་ཤི་ཀའི་བྱིན་རླབས་ཡོངས་སུ་གང་བ་དང་བཅས་པར་ཡོང་བ་ངས་ཤེས།
ROM 15:30 སྤུན་ཟླ་རྣམས། གཙོ་བོ་ཡེ་ཤུ་མཱ་ཤི་ཀ་དང་དམ་པའི་ཐུགས་ཉིད་ཀྱི་བྱམས་པའི་སྒོ་ནས་ངའི་ཕྱིར་དཀོན་མཆོག་ལ་སྨོན་ལམ་འདེབས་ཏེ་ང་དང་མཉམ་དུ་འབད་བརྩོན་བྱེད་པར་སྐུལ།
ROM 15:31 ཡ་ཧུ་དཱ་ཡུལ་དུ་དད་པ་དང་མི་ལྡན་པ་རྣམས་ལས་ཐར་བ་དང༌། ཡེ་རུ་ཤ་ལེམ་ལ་ངས་ཞབས་ཏོག་ཞུ་བ་དེ་དད་ལྡན་རྣམས་དགའ་བར་འགྱུར་བའི་ཕྱིར་སྨོན་ལམ་འདེབས་ཤིག
ROM 15:32 དེ་ནི་དཀོན་མཆོག་གི་དགོངས་པ་ལྟར་ང་དགའ་སྤྲོའི་ངང་ནས་ཁྱེད་ཀྱི་རྩར་ཡོང་ཞིང༌། ཁྱེད་དང་འགྲོགས་ཏེ་ངལ་གསོ་བར་འགྱུར་བའི་ཆེད་དུ་ཡིན།
ROM 15:33 ཞི་བདེ་གནང་མཁན་གྱི་དཀོན་མཆོག་ཁྱེད་ཚོ་ཐམས་ཅད་དང་མཉམ་དུ་འགྲོགས་པར་ཤོག ཨ་མེན། །
ROM 16:1 ངས་ཁྱེད་རྣམས་ལ་ཀེན་གྲེ་གྲོང་ཁྱེར་ཆོས་ཚོགས་ཀྱི་ཞབས་ཏོག་མ་སྟེ་ང་ཚོའི་སྲིང་མོ་ཕེ་སྦེ་འོས་སྦྱོར་བྱེད།
ROM 16:2 ཁོང་གིས་ང་ཚུད་པའི་མི་མང་པོར་རོགས་པ་གནང་བས། ཁྱེད་རྣམས་ནས་ཁོང་ལ་གང་དགོས་པ་གནང་ཞིང༌། དཀོན་མཆོག་གི་མི་རྣམས་ལ་བྱེད་འོས་པའི་ཚུལ་གྱིས་གཙོ་བོའི་ཐོག་ནས་ཁོང་བསུས་ཤིག
ROM 16:3 མཱ་ཤི་ཀ་ཡེ་ཤུའི་དོན་དུ་ངའི་ལས་གྲོགས་པི་རི་སི་ཀཱ་དང་ཨ་ཀུ་ལཱ་གཉིས་ལ་འཚམས་འདྲི་ཞུ།
ROM 16:4 ངའི་སྲོག་སྐྱོབ་པའི་ཆེད་དུ་སྔར་ཁོང་གཉིས་ལ་ཉེན་ཁ་ཆེན་པོ་བྱུང་མྱོང་བས། ང་གཅིག་པོ་མིན་ཏེ་ཡ་ཧུ་དཱ་པ་མིན་པ་རྣམས་ཀྱི་ཆོས་ཚོགས་ཐམས་ཅད་ཀྱིས་ཁོང་ཚོར་བཀའ་དྲིན་ཆེ་ཞུ།
ROM 16:5 ཁོང་ཚོའི་ཁང་པར་འཚོགས་པའི་ཆོས་ཚོགས་ལ་འཚམས་འདྲི་ཞུ། ཨེ་ཞེ་ཡཱ་ཞིང་ཆེན་ལ་མཱ་ཤི་ཀར་དད་ལྡན་དུ་འགྱུར་བ་དང་པོ་ཡིན་པའི་ངའི་གཅེས་པའི་གྲོགས་པོ་ཨེ་པེ་ནེ་ཏུ་ལ་འཚམས་འདྲི་ཞུ།
ROM 16:6 ཁྱེད་ཚོའི་དོན་དུ་དཀའ་བ་སྤྱོད་མཁན་མིར་ཡམ་ལ་འཚམས་འདྲི་ཞུ།
ROM 16:7 སྐུ་ཚབ་ཀྱི་ནང་ནས་མིང་གྲགས་ཆེ་བ་དང༌། ང་ཡི་སྔོན་དུ་མཱ་ཤི་ཀ་ལ་དད་པར་འགྱུར་མཁན་ཏེ་ངའི་སྤུན་དང་བཙོན་གྲོགས་ཨན་དྲོ་ནི་ཀུ་དང་ཡུན་ཡཱ་གཉིས་ལ་འཚམས་འདྲི་ཞུ།
ROM 16:8 གཙོ་བོའི་ནང་ན་ངའི་གཅེས་པའི་གྲོགས་པོ་ཨམ་པི་ལི་ཡ་ཊུ་ལ་འཚམས་འདྲི་ཞུ།
ROM 16:9 མཱ་ཤི་ཀའི་ནང་ན་ངེད་རྣམས་ཀྱི་ལས་གྲོགས་ཨུར་སྦ་ནུ་དང༌། ངའི་གཅེས་པའི་གྲོགས་པོ་སི་ཏ་ཀི་སི་ལ་འཚམས་འདྲི་ཞུ།
ROM 16:10 མཱ་ཤི་ཀའི་ཐོག་ནས་གདེང་འཇོག་ཐོབ་པ་ཨ་པེ་ལེ་ལ་འཚམས་འདྲི་ཞུ། ཨ་རི་སི་ཏོ་བུལ་གྱི་ཁྱིམ་མི་རྣམས་ལ་འཚམས་འདྲི་ཞུ།
ROM 16:11 ངའི་སྤུན་ཧེ་རོ་དི་ཡོན་དང༌། གཙོ་བོའི་ནང་ན་ཡོད་པའི་ནར་ཀི་སོའི་ཁྱིམ་མི་རྣམས་ལ་འཚམས་འདྲི་ཞུ།
ROM 16:12 གཙོ་བོའི་ནང་ན་ལས་གྲོགས་ཏྲི་ཕེ་ནཱ་དང་ཏྲི་ཕོ་སཱ་གཉིས་ལ་འཚམས་འདྲི་ཞུ། གཙོ་བོའི་ནང་ན་དཀའ་བ་སྤྱོད་མཁན་གཅེས་པའི་གྲོགས་པོ་པེར་སིས་ལ་འཚམས་འདྲི་ཞུ།
ROM 16:13 གཙོ་བོ་ཡིས་འདམ་པའི་རུ་ཕུ་སུ་དང༌། ངའི་མ་དང་འདྲ་བ་ཁོང་གི་ཡུམ་ལའང་འཚམས་འདྲི་ཞུ།
ROM 16:14 ཨ་སིན་ཀེ་རེ་ཏུ་དང༌། ཕེ་ལེ་གོན། ཧེར་མཱེ། པ་ཏྲོ་བཱ། ཧེར་མཱ། ཁོ་ཚོ་དང་འགྲོགས་པའི་སྤུན་ཟླ་རྣམས་ལ་འཚམས་འདྲི་ཞུ།
ROM 16:15 ཕི་ལོ་ལོ་གུ་དང༌། ཡུ་ལི་ཡཱ། ནེ་རེ་ཡུ་དང་ཁོང་གི་སྲིང་མོ། ད་དུང་ཨོ་ལིམ་པཱ་དང༌། ཁོ་རྣམས་དང་འགྲོགས་པའི་དད་ལྡན་རྣམས་ལ་འཚམས་འདྲི་ཞུ།
ROM 16:16 བྱམས་སེམས་ཀྱི་ཐོག་ནས་གཅིག་གིས་གཅིག་ལ་འོ་ཡིས་འཚམས་འདྲི་ཞུ། མཱ་ཤི་ཀའི་ཆོས་ཚོགས་ཐམས་ཅད་ཀྱིས་ཁྱེད་རྣམས་ལ་འཚམས་འདྲི་ཞུ།
ROM 16:17 སྤུན་ཟླ་རྣམས། ཁྱེད་ཀྱིས་ཐོས་པའི་བསྟན་པ་ལ་རྒོལ་ཏེ་དབྱེན་སྦྱོར་མཁན་དང་བར་ཆད་བཟོ་མཁན་རྣམས་ལ་དོགས་ཟོན་བྱེད་ཅིང་དེ་ལ་གཡོལ་བར་སྐུལ།
ROM 16:18 གང་ལགས་ཤེ་ན། དེ་ལྟ་བུའི་མི་རྣམས་ཀྱིས་ངེད་རྣམས་ཀྱི་གཙོ་བོ་མཱ་ཤི་ཀར་ཞབས་ཏོག་ཞུ་བ་མིན་ཏེ་རང་གི་འདོད་ཆགས་ལ་གཡོག་བྱེད་དོ། འཇམ་ཞིང་ངོ་བསྟོད་བྱེད་པའི་གཏམ་གྱིས་ཁོ་ཚོས་ངན་པའི་ཆ་ལ་རྒྱུས་མེད་པ་རྣམས་ལ་གཡོ་སྒྱུ་བྱེད།
ROM 16:19 ཁྱེད་ཚོས་དཀོན་མཆོག་གི་བཀའ་ལ་ཉན་པའི་ལོ་རྒྱུས་མི་ཐམས་ཅད་ལ་གྲགས་པས་ང་དགའ་ཡང༌། ངའི་རེ་བར་ཁྱེད་རྣམས་བཟང་པོའི་ཆ་ནས་མཁས་ཤིང་ངན་པའི་ཆ་ལ་རྒྱུས་མེད་པར་འགྱུར།
ROM 16:20 རིང་པོར་མ་ལོན་པར་ཞི་བདེ་གནང་བའི་དཀོན་མཆོག་གིས་ཁྱེད་ཀྱི་ཞབས་འོག་ཏུ་བདུད་སཱ་ཏན་རྫི་བར་འགྱུར། ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་རྣམས་ལ་ལྡན་པར་གྱུར་ཅིག
ROM 16:21 ངའི་ལས་གྲོགས་ཐི་མོ་ཐེ་དང༌། ངའི་སྤུན་ལུ་ཀི་ཡཱུ། ཡཱ་སོན། སོ་སི་པཱ་ཏྲོ་ཡིས་ཁྱེད་ཚོར་འཚམས་འདྲི་ཞུ།
ROM 16:22 པའུ་ལུས་གསུངས་པའི་འཕྲིན་ཡིག་འདི་འབྲི་མཁན་ང་ཏེར་ཏི་ཡུ་ཡིས་གཙོ་བོའི་ཐོག་ནས་ཁྱེད་ཚོར་འཚམས་འདྲི་ཞུ།
ROM 16:23 ང་དང་ཆོས་ཚོགས་ཡོངས་ཀྱི་སྣེ་ལེན་པ་ག་ཡུ་ཡིས་ཁྱེད་ཚོར་འཚམས་འདྲི་ཞུ། གྲོང་ཁྱེར་གྱི་ཕྱག་མཛོད་ཨེ་ར་སི་ཏུ་དང་སྤུན་ཟླ་ཁུ་ཨར་ཏུ་ཡིས་ཁྱེད་རྣམས་ལ་འཚམས་འདྲི་ཞུ།
ROM 16:25 མཇུག་ཏུ་གཙོ་བོ་ཡེ་ཤུའི་སྐོར་ངས་སྒྲོག་པའི་འཕྲིན་བཟང་དང༌། དཀོན་མཆོག་གིས་སྔར་མི་མངོན་པའི་བདེན་པ་བཞིན་དུ་ཁོང་གིས་ཁྱེད་རྣམས་ཀྱི་དད་པ་སྲ་བརྟན་དུ་མཛད་ཐུབ།
ROM 16:26 འོན་ཀྱང་ལུང་སྟོན་པའི་མདོ་བརྒྱུད་ནས་བདེན་པ་དེ་ནི་ད་ལྟ་མངོན་པར་གྱུར་ཞིང༌། ཐོག་མཐའ་མེད་པའི་དཀོན་མཆོག་གི་བཀའ་དེ་བཞིན་མི་རིགས་ཐམས་ཅད་ལ་སྒྲོགས། དེ་ནི་དད་པ་སྐྱེས་ནས་ཁོ་ཚོས་ཁོང་གི་བཀའ་ལ་ཉན་པའི་ཆེད་དུ་ཡིན།
ROM 16:27 དཀོན་མཆོག་ཀུན་མཁྱེན་གཅིག་པོར་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་གཏན་དུ་གཟི་བརྗིད་དང་ལྡན་པར་གྱུར་ཅིག ཨ་མེན། །
1CO 1:1 དཀོན་མཆོག་གི་དགོངས་པ་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ཏུ་བསྐོས་པ་ང་པའུ་ལུ་དང༌། ངེད་ཀྱི་སྤུན་ཟླ་སོ་ཐེ་ནཱེ་ཡིས་
1CO 1:2 ཀོ་རིན་ཐུ་གྲོང་ཁྱེར་ལ་ཡོད་པའི་དཀོན་མཆོག་གི་ཆོས་ཚོགས། མཱ་ཤི་ཀ་ཡེ་ཤུའི་ཐོག་ནས་དཀོན་མཆོག་གིས་དམ་པར་འགྱུར་ཕྱིར་བོས་པ་རྣམས་དང༌། ཁོ་ཚོ་དང་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་མཚན་བརྗོད་མཁན་གང་དུ་གནས་པ་ཐམས་ཅད་ལ།
1CO 1:3 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག
1CO 1:4 མཱ་ཤི་ཀ་ཡེ་ཤུའི་སྒོ་ནས་ཁྱེད་ཚོར་གནང་བའི་ཐུགས་རྗེའི་རྐྱེན་གྱིས་ངས་ངའི་དཀོན་མཆོག་ལ་ཁྱེད་ཀྱི་དོན་ལ་རྒྱུན་དུ་བཀའ་དྲིན་ཆེ་ཞུ།
1CO 1:5 མཱ་ཤི་ཀ་ཡིས་ཁྱེད་ཚོར་གཏམ་དང་ཤེས་རབ་རྣམ་པ་ཀུན་ནས་བྱིན་རླབས་ལྷག་པར་གནང་བས།
1CO 1:6 ཁྱེད་ཀྱི་ཁྲོད་དུ་མཱ་ཤི་ཀའི་སྐོར་གྱི་དཔང་པོ་དེ་བདེན་པ་ཡིན་པ་ར་སྤྲོད་བྱས།
1CO 1:7 དེའི་ཕྱིར་ང་ཚོའི་གཙོ་བོ་ཡེ་ཤུ་མཱ་ཤི་ཀ་མངོན་སུམ་དུ་འབྱོན་པར་རེ་སྒུག་བྱེད་དུས་ཁྱེད་ཚོ་ལ་ཐུགས་ཉིད་ཀྱི་གནང་སྦྱིན་དགོས་པ་ཅིའང་མེད།
1CO 1:8 ང་ཚོའི་གཙོ་བོ་ཡེ་ཤུ་མཱ་ཤི་ཀ་ཡང་བསྐྱར་འབྱོན་པའི་ཉིན་མོར་ཁྱེད་ཚོ་སྐྱོན་མེད་པ་ཡིན་པའི་ཆེད་དུ་ཁོང་གིས་ཁྱེད་རྣམས་མཐའ་མཇུག་བར་དུ་བརྟན་པོར་གནས་པར་འགྱུར།
1CO 1:9 ཁོང་གི་སྲས་ཏེ་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀ་དང་འགྲོགས་པའི་ཕྱིར་ཁྱེད་ཚོ་འབོད་པ་གནང་མཁན་དཀོན་མཆོག་ནི་བློ་གཏད་ཆོག་པ་ཡིན་ནོ། །
1CO 1:10 སྤུན་ཟླ་རྣམས། ཁྱེད་ཚོ་བློ་སེམས་གཅིག་མཐུན་ཡོང་བའི་ཆེད་དང༌། ཁྱེད་ཚོའི་ནང་ནས་ལྟ་བ་མི་མཐུན་པ་མི་ཡོང་བའི་ཕྱིར། ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་མཚན་གྱི་ཐོག་ནས་ཁྱེད་ཚོ་ཐམས་ཅད་ཡིད་མཐུན་པར་འགྱུར་བ་ངས་ཁྱེད་ཚོར་སྐུལ།
1CO 1:11 སྤུན་ཟླ་རྣམས། ཁྱེད་ཚོའི་ཁྲོད་དུ་འཐབ་རྩོད་ཡོད་པ་ཁ་ལཱོའི་ཁྱིམ་མིས་ང་ལ་བཤད་བྱུང༌།
1CO 1:12 ངས་འདི་ལྟར་བཤད་པའི་དོན་ནི་ཁྱེད་ཚོའི་ནང་ནས་ཁག་གཅིག་གིས་ང་པའུ་ལུའི་ཕྱོགས་དང༌། ཡང་ཁག་གཅིག་གིས་ང་ཨ་པོ་ལོ་སི་ཡང་ན། ཀེ་ཕཱ། ཁག་གཅིག་གིས་ང་མཱ་ཤི་ཀའི་ཕྱོགས་ཡིན་ཞེས་ཟེར།
1CO 1:13 མཱ་ཤི་ཀ་གྱེས་པ་ཡིན་ནམ། པའུ་ལུ་ཁྱེད་ཀྱི་དོན་ལ་རྒྱང་ཤིང་སྒང་ལ་བརྒྱངས་པ་ཡིན་ནམ། ཡང་ན་པའུ་ལུའི་མིང་གི་ཐོག་ནས་ཁྲུས་གསོལ་ལེན་པ་ཡིན་ནམ།
1CO 1:14 སུས་ཀྱང་ངའི་མིང་གི་ཐོག་ནས་ཁྲུས་གསོལ་ལེན་མི་ཞེས་ཟེར་བའི་ཕྱིར། ངས་ཀ་རི་སི་པཱུ་དང་ག་ཡུ་མ་གཏོགས་ཁྱེད་ཚོའི་ནང་ནས་མི་སུ་ཞིག་ལ་ཡང་ཁྲུས་གསོལ་མ་བྱས་པས་ངས་དཀོན་མཆོག་ལ་བཀའ་དྲིན་ཆེ་ཞུ།
1CO 1:16 (ངས་སེ་ཏེ་ཕ་ནཱ་ཡི་ཁྱིམ་མི་ལའང་ཁྲུས་གསོལ་བྱས། དེ་མིན་ངས་མི་གཞན་ལ་ཁྲུས་གསོལ་བྱས་ཡོད་མེད་གསལ་པོ་མི་དྲན་)
1CO 1:17 གང་ཡིན་ཟེར་ན། མཱ་ཤི་ཀ་ཡིས་ང་ཁྲུས་གསོལ་བྱེད་པར་མ་མངགས་ཀྱིས། འཕྲིན་བཟང་སྒྲོག་པར་མངགས། ཡང་མཱ་ཤི་ཀའི་རྒྱང་ཤིང་དོན་མེད་པར་མི་འགྱུར་བའི་ཕྱིར། དེ་ནི་མིའི་ངག་ཐོག་གི་ཤེས་རབ་མིན།
1CO 1:18 འཇིག་པར་འགྱུར་བ་རྣམས་ཀྱིས་རྒྱང་ཤིང་གི་བསྟན་པ་དེ་བླུན་རྟགས་སུ་རྩི། འོན་ཀྱང་ཐར་བར་འགྱུར་བ་ངེད་རྣམས་ཀྱིས་དཀོན་མཆོག་གི་ནུས་མཐུར་རྩི།
1CO 1:19 གསུང་རབ་ཀྱི་མདོ་ལས། མཁས་པའི་ཤེས་རབ་ང་ཡིས་མེད་པར་བྱ། ། བློ་ལྡན་བློ་གྲོས་ང་ཡིས་དོར་བར་བྱ། ། ཞེས་འཁོད།
1CO 1:20 ཤེས་རབ་ཅན་དང༌། ཆོས་ཁྲིམས་ལ་མཁས་པའི་མི། དུས་འདིའི་རྩོད་གླེང་བྱེད་མཁན་གང་དུ་ཡོད། དཀོན་མཆོག་གིས་འཇིག་རྟེན་འདིའི་ཤེས་རབ་བླུན་པར་མ་མཛད་དམ།
1CO 1:21 དཀོན་མཆོག་གི་མཁྱེན་རབ་ཀྱི་དགོངས་འཆར་བཞིན་དུ། འཇིག་རྟེན་པས་རང་གི་རིག་པའི་སྒོ་ནས་དཀོན་མཆོག་ངོ་མ་ཤེས། དེའི་ཕྱིར་ངེད་རྣམས་ཀྱིས་བླུན་པ་ཞེས་ཟེར་བའི་འཕྲིན་སྒྲོག་པའི་སྒོ་ནས་དཀོན་མཆོག་གིས་དད་ལྡན་རྣམས་ཐར་དུ་འཇུག་པར་དགོངས།
1CO 1:22 ཡ་ཧུ་དཱ་པ་རྣམས་ཀྱིས་ངོ་མཚར་བའི་རྟགས་འདོད་ཅིང༌། གྷི་རིག་པ་རྣམས་ཀྱིས་ཤེས་རབ་འཚོལ་ཡང༌།
1CO 1:23 ངེད་རྣམས་ཀྱིས་རྒྱང་ཤིང་སྒང་ལ་བསད་པའི་མཱ་ཤི་ཀའི་བསྟན་པ་སྒྲོག དེ་ནི་ཡ་ཧུ་དཱ་པ་རྣམས་ཀྱིས་འགག་རྡོ་དང༌། ཡ་ཧུ་དཱ་མིན་པ་རྣམས་ཀྱིས་བླུན་པར་རྩི།
1CO 1:24 འོན་ཀྱང་དཀོན་མཆོག་གིས་བོས་པ་རྣམས་ཏེ་ཡ་ཧུ་དཱ་པ་དང་ཡ་ཧུ་དཱ་པ་མིན་པ་རྣམས་ཀྱི་དོན་དུ་མཱ་ཤི་ཀ་ནི་དཀོན་མཆོག་གི་ནུས་མཐུ་དང་མཁྱེན་རབ་ཡིན་ནོ།
1CO 1:25 གང་ཡིན་ཞེ་ན། མི་རྣམས་ཀྱི་ཆ་ནས་དཀོན་མཆོག་གི་བླུན་པ་དེ་མིའི་ཤེས་རབ་ལས་ཁྱད་དུ་འཕགས་པ་དང༌། དེ་བཞིན་མི་རྣམས་ཀྱི་ཆ་ནས་དཀོན་མཆོག་གི་སྟོབས་ཞན་པ་དེ་མིའི་སྟོབས་ལས་ལྷག་པར་ཆེ།
1CO 1:26 སྤུན་ཟླ་རྣམས། དཀོན་མཆོག་གིས་ཁྱེད་ཚོ་འབོད་དུས་གང་ཡིན་པ་དྲན་པར་གྱིས་ཤིག འཇིག་རྟེན་འདིའི་ཆ་ནས་ཁྱེད་ཚོའི་ནང་ནས་མཁས་པ་མང་པོ་མེད། དབང་ལྡན་མང་པོ་མེད། སྐུ་དྲག་མང་པོ་མེད་ཀྱང༌།
1CO 1:27 ཤེས་རབ་ཅན་ལ་ངོ་ཚ་འབེབས་པའི་ཆེད་དུ་དཀོན་མཆོག་གིས་འཇིག་རྟེན་གྱི་བླུན་པོ་བདམས་ཤིང༌། སྟོབས་ཅན་རྣམས་ལ་ངོ་ཚ་འབེབས་པའི་ཆེད་དུ་འཇིག་རྟེན་གྱི་ཞན་པོ་བདམས།
1CO 1:28 འཇིག་རྟེན་པས་གང་གལ་ཆེ་བར་རྩི་བ་དེ་སྟོང་པ་ཡིན་པ་མཛད་པའི་ཕྱིར། དཀོན་མཆོག་གིས་འཇིག་རྟེན་པས་གང་དམན་པ་དང་མཐོང་ཆུང་གི་ཡུལ་ཡོད་པ་སྟེ། གང་ཡང་མེད་པར་རྩི་བའང་དེ་བདམས་པར་མཛད།
1CO 1:29 དེ་ནི་དཀོན་མཆོག་གི་དྲུང་དུ་སུས་ཀྱང་རང་བསྟོད་བྱེད་མི་ཐུབ་པའི་ཆེད་དུ་ཡིན།
1CO 1:30 ཁོང་གི་རྐྱེན་གྱིས་ཁྱེད་ཚོ་མཱ་ཤི་ཀ་ཡེ་ཤུའི་ནང་ན་ཡོད། མཱ་ཤི་ཀ་ནི་ང་ཚོའི་དོན་ལ་དཀོན་མཆོག་ནས་ང་ཚོའི་ཤེས་རབ་དང་དྲང་བདེན་ཉིད། ང་ཚོའི་དམ་པ་དང་ཐར་ལམ་བཅས་སུ་གྱུར།
1CO 1:31 སུ་ཞིག་གིས་བསྟོད་པ་ཕུལ་འདོད་ན་གཙོ་བོས་གང་མཛད་པ་དེ་བསྟོད་པར་བྱོས་ཤིག་ཅེས་པའི་མདོ་འགྲུབ་པའི་ཆེད་དུ་ཡིན་ནོ། །
1CO 2:1 སྤུན་ཟླ་རྣམས། ང་ཐོག་མར་ཁྱེད་ཀྱི་རྩར་ཡོང་སྐབས་ངས་གཏམ་ཤོད་མཁས་པོའམ་ཤེས་རབ་མཐོ་པོའི་སྒོ་ནས་དཀོན་མཆོག་གི་གསང་བ་བསྒྲགས་པ་མ་བྱས།
1CO 2:2 དེ་ནི་ངས་ཁྱེད་ཚོ་མཉམ་དུ་ཡོད་དུས་ཡེ་ཤུ་མཱ་ཤི་ཀ་དང༌། ཁོང་རྒྱང་ཤིང་སྒང་ལ་བཀྲོངས་པའི་སྐོར་མ་གཏོགས་གཞན་ཅིའང་ཁྱེད་ལ་མི་སྒྲོག་པར་ཐག་གཅོད་བྱས་པའི་ཕྱིར་རོ།
1CO 2:3 ང་ལུས་སྟོབས་ཞན་པ་དང་འཇིགས་ནས་ཤིན་ཏུ་འདར་ཏེ་ཁྱེད་ཚོའི་སར་ཡོང༌།
1CO 2:4 ཁྱེད་ཀྱི་དད་པ་ནི་མིའི་ཤེས་རབ་ལ་མི་རྟེན་པར་དཀོན་མཆོག་གི་ནུས་མཐུ་ལ་རྟེན་པའི་ཕྱིར། ངས་བློ་སེམས་འགུགས་པའི་མཁས་པའི་གཏམ་མ་ཡིན་གྱིས། དམ་པའི་ཐུགས་ཉིད་ཀྱི་ནུས་མཐུ་སྟོན་པའི་སྒོ་ནས་གཏམ་བཤད་དེ་ཆོས་བསྟན།
1CO 2:6 སེམས་ཉིད་སྨིན་པ་རྣམས་ཀྱི་ཁྲོད་དུ་ང་ཚོས་ཤེས་རབ་ཀྱིས་གཏམ་བཤད་མོད། འོན་ཀྱང་ཤེས་རབ་དེ་ནི་དུས་འདི་དང༌། ཡང་ན་དུས་འདིའི་འཇིག་ཏུ་འགྲོ་བའི་དབང་སྒྱུར་མཁན་གྱི་ཤེས་རབ་མ་ཡིན།
1CO 2:7 ང་ཚོས་བཤད་པའི་ཤེས་རབ་ནི་དཀོན་མཆོག་གི་གསང་ཞིང་སྦས་པའི་ཤེས་རབ་དེ་ཡིན། ཤེས་རབ་དེ་ནི་འཇིག་རྟེན་མ་བཀོད་པའི་སྔོན་ལ་དཀོན་མཆོག་གིས་ངེད་རྣམས་གཟི་བརྗིད་དང་ལྡན་པར་མཛད་པའི་ཕྱིར་དགོངས་སོ།
1CO 2:8 དུས་འདིའི་དབང་སྒྱུར་མཁན་རྣམས་ལས་སུས་ཀྱང་ཤེས་རབ་དེ་མ་རྟོགས། རྟོགས་པ་ཡིན་ན་ཁོ་ཚོས་གཟི་བརྗིད་ཀྱི་བདག་པོ་རྒྱང་ཤིང་སྒང་ལ་མི་གསོད།
1CO 2:9 གསུང་རབ་ཀྱི་མདོ་ལས། དཀོན་མཆོག་ལ་ནི་བརྩེ་བ་ལྡན་པ་ཡི། ། མི་རྣམས་ཆེད་དུ་གྲ་སྒྲིག་གང་མཛད་པ། ། དེ་དག་མིག་གིས་མ་མཐོང་རྣས་མ་གོ ། བསམ་པའི་ནང་དུ་དེ་དག་མ་འཁོར་རོ། ། ཞེས་འཁོད།
1CO 2:10 དཀོན་མཆོག་གིས་དམ་པའི་ཐུགས་ཉིད་བརྒྱུད་ནས་དོན་དེ་རྣམས་ང་ཚོར་མངོན་པར་མཛད། གང་ཡིན་ཞེ་ན། དམ་པའི་ཐུགས་ཉིད་ཀྱིས་དོན་ཐམས་ཅད་དང༌། ཐ་ན་དཀོན་མཆོག་གི་གཏིང་ཟབ་པའི་གསང་བ་ཡང་དཔོག་པས་སོ།
1CO 2:11 མི་ཞིག་གི་རང་གི་སེམས་ཀྱིས་མ་གཏོགས་མི་དེའི་བསམ་པ་སུས་ཤེས། དེ་ལྟར་དཀོན་མཆོག་གི་དམ་པའི་ཐུགས་ཉིད་ཀྱིས་མ་གཏོགས་སུས་ཀྱང་དཀོན་མཆོག་གི་དགོངས་པ་མི་ཤེས།
1CO 2:12 ང་ཚོར་ཐོབ་པ་ནི་འཇིག་རྟེན་འདིའི་ཤེས་རབ་མིན་ཏེ་དཀོན་མཆོག་ནས་བྱུང་བའི་དམ་པའི་ཐུགས་ཉིད་ཡིན། དེ་ནི་དཀོན་མཆོག་གིས་ང་ཚོར་ཐུགས་རྗེ་ཡིས་གནང་བ་རྣམས་རྟོགས་པའི་ཆེད་དུའོ།
1CO 2:13 ང་ཚོས་གང་བཤད་པའི་དོན་རྣམས་མིའི་ཤེས་རབ་ཀྱི་སྒོ་ནས་གསལ་བཤད་མ་བྱས། དེ་ལས་ལྡོག་སྟེ་ང་ཚོས་དམ་པའི་ཐུགས་ཉིད་ཀྱིས་གནང་བའི་ཚིག་གིས་ཐུགས་ཉིད་དང་ལྡན་པ་རྣམས་ལ་ཁོང་གི་བདེན་པ་འདི་ཚོ་གསལ་བཤད་བྱེད།
1CO 2:14 དཀོན་མཆོག་གི་ཐུགས་ཉིད་མི་ལྡན་པ་རྣམས་ཀྱིས་དཀོན་མཆོག་གི་ཐུགས་ཉིད་ནས་ཡོང་བའི་བདེན་པ་དེ་རྣམས་བླུན་རྟགས་ཡིན་པར་རྩི་པས་དང་ལེན་མི་བྱེད། གང་ལགས་ཤེ་ན། དོན་དེ་རྣམས་དཀོན་མཆོག་གི་ཐུགས་ཉིད་ཀྱི་སྒོ་ནས་ཧ་གོ་དགོས་པས་སོ།
1CO 2:15 དཀོན་མཆོག་གི་ཐུགས་ཉིད་དང་ལྡན་པ་ཡིས་དོན་ཐམས་ཅད་དཔོག་ཀྱང༌། གཞན་སུས་ཀྱང་ཁོ་དཔོག་མི་ཐུབ།
1CO 2:16 གཙོ་བོར་གྲོས་འདེབས་བྱེད་པའི་ཕྱིར། ། སུ་ཡིས་ཁོང་གི་ཐུགས་ཤེས་སམ། ། འོན་ཀྱང་ང་ཚོར་མཱ་ཤི་ཀའི་ཐུགས་ཡོད་དོ། །
1CO 3:1 སྤུན་ཟླ་རྣམས། སྔོན་ང་ཁྱེད་ཚོའི་རྩར་ཡོད་དུས་སེམས་ཉིད་སྨིན་པ་རྣམས་ལ་སྨྲས་པ་བཞིན་དུ་ཁྱེད་ཚོར་གཏམ་བྱས་ཐུབ་མེད། ཁྱེད་ཚོ་འཇིག་རྟེན་འདིའི་མི་རྣམས་དང༌། ཡང་ན་མཱ་ཤི་ཀའི་ཆ་ནས་བྱིས་པ་ལྟར་ངས་ཁྱེད་ཚོར་སྨྲས་པ་ཡིན།
1CO 3:2 ངས་ཁྱོད་ཚོར་མི་དར་མའི་ཁ་ལག་མ་སྟེར་བར་འོ་མ་སྟེར་བ་ཡིན། གང་ཡིན་ཞེ་ན། ཁྱོད་ཚོས་དར་མའི་ཁ་ལག་བཟས་ཐུབ་མེད། ད་ལྟའང་ཟ་མི་ཐུབ།
1CO 3:3 དེ་ནི་ཁྱོད་ཚོ་འཇིག་རྟེན་འདིའི་མི་དང་འདྲ་བ་ཡིན་པས་སོ། ཁྱོད་ཚོའི་ཁྲོད་དུ་ཕྲག་དོག་དང་འཐབ་རྩོད་ཡོད་དུས་འཇིག་རྟེན་འདིའི་མི་དང་འདྲ་བ་མ་ཡིན་ནམ། ཁྱོད་ཚོས་སྡིག་པའི་རང་གཤིས་དང་བསྟུན་པའི་སྤྱོད་པ་མི་བྱེད་དམ།
1CO 3:4 མི་ཞིག་གིས་ང་པའུ་ལུའི་ཕྱོགས་ཡིན་ཞེས་པ་དང༌། གཞན་ཞིག་གིས་ང་ཨ་པོ་ལོ་སིའི་ཕྱོགས་ཡིན་ཞེས་ཟེར་ན་ཁྱོད་ཚོས་འཇིག་རྟེན་འདིའི་མི་རྣམས་དང་འདྲ་བར་སྤྱོད་པ་མི་བྱེད་དམ།
1CO 3:5 འོ་ན་ཨ་པོ་ལོ་སི་སུ་ཡིན། པའུ་ལུ་སུ་ཡིན། གཙོ་བོས་རེ་རེར་ལས་ཀ་བགོས་གནང་བ་བཞིན་དུ་ཁྱོད་རྣམས་དད་པ་སྐྱེ་བར་རོགས་པ་བྱེད་པའི་ཞབས་ཕྱི་ཤ་སྟག་ཡིན།
1CO 3:6 ངས་ས་བོན་བཏབ་ཅིང༌། ཨ་པོ་ལོ་སི་ཡིས་ཆུ་བཏང་ཡང༌། དཀོན་མཆོག་གིས་སྐྱེད་དུ་བཅུག་པར་མཛད།
1CO 3:7 དེ་བས་ན་ས་བོན་འདེབས་མཁན་དང༌། ཆུ་གཏོང་མཁན་གཉིས་ཅིའང་མ་ཡིན། སྐྱེད་དུ་འཇུག་མཁན་དཀོན་མཆོག་ཁོ་ན་གལ་ཆེན་པོ་ཡིན།
1CO 3:8 ས་བོན་འདེབས་མཁན་དང་ཆུ་གཏོང་མཁན་གཉིས་ལ་དམིགས་ཡུལ་གཅིག་ཡོད་དེ། སོ་སོའི་ལས་ཀ་བཞིན་དུ་གླ་ཆ་འཐོབ་པར་འགྱུར།
1CO 3:9 ང་ཚོ་ནི་དཀོན་མཆོག་གི་ལས་གྲོགས་ཡིན་ཞིང༌། ཁྱེད་ཚོ་ནི་དཀོན་མཆོག་གི་ཞིང་ཁའམ་ཁང་ཆེན་དང་འདྲ་བ་ཡིན།
1CO 3:10 དཀོན་མཆོག་གིས་ང་ལ་གནང་བའི་ཐུགས་རྗེའི་སྒོ་ནས་ངས་འཛུགས་སྐྲུན་མཁས་པ་ལྟར་རྩིག་རྨང་ཞིག་བཏིང་ཞིང༌། གཞན་གྱིས་དེའི་ཁར་རྩིག འོན་ཏེ་མི་རེ་རེས་ཅི་ལྟར་རྩིག་པ་ལ་དོ་སྣང་བྱེད་དགོས།
1CO 3:11 གང་ཡིན་ཟེར་ན། ཡེ་ཤུ་མཱ་ཤི་ཀ་ཡིན་པའི་རྩིག་རྨང་ཞིག་བཏིང་ཟིན་པ་ལས་སུས་ཀྱང་རྩིག་རྨང་གཞན་འདིང་མི་སྲིད་པས་སོ།
1CO 3:12 གལ་ཏེ་སུ་ཞིག་གིས་གསེར་རམ། དངུལ་ལམ། རིན་ཆེན་གྱི་རྡོའམ། ཤིང་ངམ། རྩྭ་སྐམ་པོའམ། སོག་མ་བཅས་ཀྱིས་རྩིག་རྨང་དེའི་ཁར་བརྩིགས་ན།
1CO 3:13 མི་རེ་རེའི་ལས་ཀ་ཡི་སྤུས་ཚད་མ་འོངས་པར་གསལ་པོ་མཐོང་བར་འགྱུར། གང་ཡིན་ཟེར་ན། མཱ་ཤི་ཀ་འབྱོན་པའི་ཉིན་མོར་མེ་ཡིས་མངོན་པར་འགྱུར། དེ་དུས་མི་རེ་རེའི་ལས་ཀར་མེ་ཡིས་ཚོད་བགམ་བྱས་པས་དེ་དག་ཅི་ལྟར་ཡིན་པ་མཚོན།
1CO 3:14 སུ་ཞིག་གིས་རྩིག་རྨང་དེའི་ཁར་གང་བརྩིགས་པ་གནས་ན་ཁོ་ལ་བྱ་དགའ་འཐོབ་པར་འགྱུར།
1CO 3:15 མེ་ཡིས་མི་སུ་ཞིག་གི་ལས་ཀ་བསྲེགས་ན་གྱོང་གུན་ཕོག་ཡང༌། ཁོ་རང་མེ་ལས་འབྲོས་མཁན་ལྟར་ཐར་བར་འགྱུར།
1CO 3:16 ཁྱེད་ཚོ་དཀོན་མཆོག་གི་བཞུགས་གནས་ཡིན་ཞིང༌། དཀོན་མཆོག་གི་དམ་པའི་ཐུགས་ཉིད་ཁྱེད་ཀྱི་ནང་ན་བཞུགས་པར་མི་ཤེས་སམ།
1CO 3:17 སུ་ཞིག་གིས་དཀོན་མཆོག་གི་བཞུགས་གནས་བཤིག་ན་དཀོན་མཆོག་གིས་ཁོ་མེད་པར་མཛད། གང་ཡིན་ཞེ་ན། དཀོན་མཆོག་གི་བཞུགས་གནས་དམ་པ་ཡིན་ཞིང༌། ཁྱེད་ཚོ་ནི་བཞུགས་གནས་དེ་ཡིན་པས་སོ། །
1CO 3:18 རང་མགོ་རང་གིས་མ་སྐོར་ཞིག མི་སུ་ཞིག་གིས་འཇིག་རྟེན་འདིའི་ཆ་ནས་མཁས་པ་ཡིན་པར་བསམས་ན། ཤེས་རབ་དང་ལྡན་པར་འགྱུར་བའི་ཆེད་དུ་བླུན་པོར་འགྱུར་དགོས།
1CO 3:19 གང་ཡིན་ཞེ་ན། དཀོན་མཆོག་གི་ཆ་ནས་འཇིག་རྟེན་འདིའི་ཤེས་རབ་བླུན་པ་ཡིན། གསུང་རབ་ཀྱི་མདོ་ལས། ཤེས་རབ་དང་ལྡན་པ་རྣམས་གཡོ་ཐབས་ཀྱི་ཁྲོད་དུ་དཀོན་མཆོག་གིས་འཛིན་ནོ་ཞེས་བྲིས་དང༌།
1CO 3:20 ཤེས་རབ་དང་ལྡན་པ་རྣམས་ཀྱི་བསམ་པ་སྟོང་པ་ཡིན་པར་གཙོ་བོས་མཁྱེན་ཞེས་བྲིས།
1CO 3:21 དེའི་ཕྱིར་སུའི་རྗེས་སུ་འབྲངས་པའམ་སུའི་ཁོངས་སུ་གཏོགས་པའི་སྐོར་ལ་འུད་ཤོབ་བྱེད་མི་རུང༌། གང་ལགས་ཤེ་ན། དོན་ཐམས་ཅད་ཁྱེད་ཀྱི་ཡིན།
1CO 3:22 པའུ་ལུ་ཡང་ན། ཨ་པོ་ལོ་སི་ཡང་ན། ཀེ་ཕཱའམ། འཇིག་རྟེན་ནམ། ཚེའམ། འཆི་བའམ། ད་ལྟའི་དོན་ནམ། མ་འོངས་པའི་དོན་ལ་སོགས་པ་ཐམས་ཅད་ཁྱེད་ཚོའི་ཁོངས་སུ་གཏོགས་ལ།
1CO 3:23 ཁྱེད་ཚོ་མཱ་ཤི་ཀའི་ཁོངས་སུ་གཏོགས་ཤིང༌། མཱ་ཤི་ཀ་དཀོན་མཆོག་གི་ཁོངས་སུ་གཏོགས་སོ། །
1CO 4:1 མི་རྣམས་ཀྱིས་ང་ཚོ་ནི་མཱ་ཤི་ཀའི་ཞབས་ཕྱི་དང༌། དཀོན་མཆོག་གི་གསང་བའི་དོན་གྱི་གཉེར་པ་ལྟར་རྩི་དགོས།
1CO 4:2 གཉེར་པ་ནི་བློ་གཏད་ཆོག་པ་ཡིན་དགོས།
1CO 4:3 ཁྱེད་ཚོ་དང༌། ཡང་ན་མིའི་ཁྲིམས་ར་གང་ཞིག་གིས་ང་ལ་དཔྱད་པ་བཏང་ན་དེ་ང་ལ་གལ་ཆེན་པོ་མིན། ངས་རང་གི་ལས་ཀའི་སྤུས་ཚད་ལའང་དཔྱོད་པ་མི་གཏོང༌།
1CO 4:4 ང་རྒྱུ་དག་ཡོད་པའི་མི་ཞིག་ཡིན་ཡང་དེ་ཡིས་ང་ལ་ཉེས་པ་མེད་པ་ར་སྤྲོད་བྱེད་མི་ཐུབ། ང་ལ་དཔྱད་པ་གཏོང་མཁན་དེ་གཙོ་བོ་ཡིན།
1CO 4:5 དེའི་ཕྱིར་བཀོད་པའི་དུས་ལ་མ་བབས་པའི་སྔོན་དུ་མི་སུ་ལའང་དཔྱད་པ་མི་གཏོང་ཞིག མུན་པར་སྦས་པའི་དོན་གསལ་བར་གནང་བ་དང༌། སེམས་ཀྱི་དམིགས་ཡུལ་མངོན་པར་མཛད་མཁན་གཙོ་བོ་མ་འབྱོན་པའི་བར་དུ་སྒུགས་ཤིག དེའི་དུས་སུ་མི་རེ་རེར་དཀོན་མཆོག་ནས་བསྟོད་པ་འཐོབ་པར་འགྱུར།
1CO 4:6 སྤུན་ཟླ་རྣམས། གང་བྲིས་པའི་དོན་ལས་མི་འདའ་ཞེས་པའི་དོན་སློབ་པའི་ཆེད་དང༌། ཁྱེད་རྣམས་ལ་ཕན་པའི་ཕྱིར་ངས་ང་རང་དང་ཨ་པོ་ལོ་སི་དཔེ་རུ་བཞག དེ་ནི་ཁྱོད་ཚོ་དགེ་རྒན་གྱི་ཐོག་ནས་རང་མཐོང་ཅན་དུ་མི་འགྱུར་བ་དང་ཁྱོད་ཚོ་ལས་སུས་ཀྱང་ཕྱོགས་རིས་མི་བྱེད་པའི་ཆེད་དུ་ཡིན།
1CO 4:7 ཁྱོད་མི་གཞན་ལས་གལ་ཆེ་བར་སུས་རྩི། གཞན་ལས་མ་ཐོབ་པ་ཁྱོད་ལ་གང་ཡོད། ཡང་གཞན་ལས་ཐོབ་པ་ཡིན་ན། མ་ཐོབ་པ་ལྟར་ཅིའི་ཕྱིར་རང་བསྟོད་བྱེད།
1CO 4:8 ཁྱོད་ཚོར་གང་འདོད་པ་ཐམས་ཅད་ཡོད་པ་དང༌། ཕྱུག་པོར་གྱུར་ཟིན་ནོ། ང་ཚོ་མེད་པར་ཁྱོད་ཚོ་རྒྱལ་པོར་གྱུར། དོན་དམ་དུ་ང་ཚོ་ཁྱོད་རྣམས་དང་བཅས་པར་དབང་སྒྱུར་བའི་ཕྱིར་ཁྱོད་དངོས་གནས་རྒྱལ་པོར་གྱུར་ན་ཅི་མ་རུང༌།
1CO 4:9 ངའི་བསམ་པར་སྲོག་ཁྲིམས་གཏོང་བའི་མི་རྣམས་དང་འདྲ་བར་དཀོན་མཆོག་གིས་སྐུ་ཚབ་ངེད་རྣམས་རུ་སྒྲིག་གི་མཇུག་ཏུ་སྟོན་པར་མཛད། འཇིག་རྟེན་ཁམས་དང༌། དཀོན་མཆོག་གི་ཕོ་ཉ། མི་རྣམས་ཀྱི་མདུན་དུ་ང་ཚོ་ལྟད་མོར་གྱུར།
1CO 4:10 མཱ་ཤི་ཀའི་དོན་དུ་ང་ཚོ་བླུན་པོ་ཡིན་ཡང༌། ཁྱོད་རྣམས་མཱ་ཤི་ཀའི་ཐོག་ནས་མཁས་པ་ཡིན། ང་ཚོ་སྟོབས་ཞན་ཡང༌། ཁྱོད་ཚོ་སྟོབས་ཆེ། ཁྱོད་རྣམས་ལ་བཀུར་སྟི་དང༌། ང་ཚོར་སྨད་པ་འཐོབ།
1CO 4:11 དུས་འདིར་བར་ང་ཚོ་ལྟོགས་ཤིང་སྐོམ། གོས་དང་བྲལ་བ། གཞན་གྱིས་བརྡུངས་པ། རང་ཁྱིམ་མེད་པ་ཡིན་ཞིང༌།
1CO 4:12 རང་གི་ལག་གཉིས་ལ་བརྟེན་ནས་ངལ་རྩོལ་བྱེད། གཞན་གྱིས་དམོད་མོ་འདེབས་སྐབས་ངེད་ཀྱིས་བདེ་བའི་ལན་སློག མནར་གཅོད་མྱོང་དུས་བཟོད་པ་སྒོམ།
1CO 4:13 གཞན་གྱིས་དམའ་འབེབས་བྱེད་སྐབས་ང་ཚོས་ངག་འཇམ་པོས་ལན་བྱེད། ད་ལྟའི་བར་དུ་ཡང་ང་ཚོ་འཇིག་རྟེན་གྱི་གད་སྙིགས་དང༌། དངོས་པོ་ཀུན་གྱི་ལྷག་རོར་རྩི།
1CO 4:14 འདི་དག་ནི་ཁྱོད་ཚོར་ངོ་ཚ་འབེབས་པའི་ཆེད་དུ་བྲིས་པ་མ་ཡིན་གྱིས། ངའི་གཅེས་པའི་ཕྲུ་གུ་ལྟར་ཁ་ཏ་བསླབ་བྱ་བྱེད་པའི་ཆེད་དུ་ཡིན།
1CO 4:15 མཱ་ཤི་ཀའི་ཐོག་ནས་ཁྱོད་རྣམས་ལ་ལྟ་སྐྱོང་བྱེད་མཁན་ཁྲི་ཙམ་ཡོད་ནའང་ཕ་མང་པོ་མེད་པས། ངས་ཁྱེད་ཚོར་འཕྲིན་བཟང་སྒྲོག་པའི་དུས་མཱ་ཤི་ཀ་ཡེ་ཤུའི་ཐོག་ནས་ང་ཁྱོད་ཚོའི་ཕ་རུ་གྱུར།
1CO 4:16 དེའི་ཕྱིར་ང་ལ་དཔེ་ལྟ་བར་ཁྱོད་རྣམས་ལ་སྐུལ།
1CO 4:17 དེ་བས་གཙོ་བོའི་ངང་ནས་ངའི་གཅེས་པའི་བུ་བློ་གཏད་ཆོག་པ་ཐི་མོ་ཐེ་ཁྱོད་ཀྱི་རྩར་བཏང་བ་ཡིན། ཁོང་གིས་ངས་མཱ་ཤི་ཀའི་ཐོག་ནས་ཡུལ་ཀུན་ཏུ་ཆོས་ཚོགས་ཐམས་ཅད་ལ་སློབ་པའི་རྩ་དོན་དག་ཁྱོད་ཚོར་དྲན་སྐུལ་བྱེད།
1CO 4:18 ཁྱོད་ཚོའི་ཁྲོད་དུ་མི་ཁ་ཤས་ཀྱིས་ང་ཁྱོད་ཚོའི་སར་མི་ཡོང་བསམ་ནས་ང་རྒྱལ་ཅན་དུ་གྱུར།
1CO 4:19 འོན་ཀྱང་གཙོ་བོའི་དགོངས་པ་ཡིན་ན་རིང་པོར་མ་ལོན་པར་ང་ཁྱོད་ཀྱི་རྩར་ཡོང་ནས་ང་རྒྱལ་ཅན་ཚོའི་གཏམ་མ་ཡིན་པར་ཁོ་ཚོར་ནུས་མཐུ་གང་ཡོད་པ་ཤེས་པར་འགྱུར།
1CO 4:20 གང་ལགས་ཤེ་ན། དཀོན་མཆོག་གི་རྒྱལ་སྲིད་ནི་གཏམ་ལ་མི་བརྟེན་ཏེ་ནུས་མཐུ་ལ་བརྟེན་པའི་ཕྱིར་རོ།
1CO 4:21 ཁྱོད་ཚོར་ཅི་འདོད། ང་ཁྱོད་ཀྱི་རྩར་དབྱུག་པ་འཁུར་ནས་ཡོང་བའམ། བྱམས་སེམས་དང་སེམས་དུལ་པོའི་ངང་ནས་ཡོང་ངམ། །
1CO 5:1 ལྷ་ཆོས་པའི་ཁྲོད་དུའང་བྱེད་མི་ཆོག་པའི་ལོག་གཡེམ་ཁྱོད་ཚོའི་ཁྲོད་དུ་ཡོད་པའི་གཏམ་དངོས་སུ་གོ་བྱུང་སྟེ། མི་ཞིག་གིས་རང་གི་ཕའི་བཟའ་ཟླ་མཉམ་དུ་འདུས།
1CO 5:2 དེ་ལྟར་སྤྱོད་མཁན་ཁྱོད་ཚོའི་ཁྲོད་ནས་འདོན་མི་དགོས་སམ། དེར་ཁྱོད་ཚོ་འགྱོད་གདུང་མི་སྐྱེ་བར་དེ་ལས་ལྡོག་དེ་ང་རྒྱལ་བྱེད།
1CO 5:3 ང་ནི་ལུས་ཀྱི་ཆ་ནས་ཁྱོད་ཚོའི་ཁྲོད་དུ་མེད་ནའང་སེམས་ཀྱི་ཆ་ནས་ཁྱོད་ཚོའི་རྩར་ཡོད། ང་རང་དངོས་སུ་ཁྱོད་ཚོ་དང་མཉམ་དུ་ཡོད་པ་བཞིན་དེ་ལྟར་སྤྱོད་མཁན་ལ་ཁྲིམས་གཅོད་བྱས་ཟིན་ནོ།
1CO 5:4 ཁྱོད་ཚོས་ངེད་ཀྱི་གཙོ་བོ་ཡེ་ཤུའི་མཚན་གྱི་ཐོག་ནས་འདུས་ཏེ་ངའི་སེམས་དང་གཙོ་བོ་ཡེ་ཤུའི་དབང་ཡང་ཁྱོད་ཚོ་མཉམ་དུ་ཡོད་དུས།
1CO 5:5 སྡིག་པའི་རང་གཤིས་མེད་པ་བྱེད་ཕྱིར་མི་འདི་བདུད་སཱ་ཏན་ལ་གཏོད་ཅིག དེ་ནི་གཙོ་བོ་ཡེ་ཤུ་འབྱོན་པའི་ཉིན་མོར་ཁོའི་སེམས་ཐར་བར་འགྱུར་བའི་ཕྱིར་རོ།
1CO 5:6 ཁྱོད་ཚོས་འུད་ཤོབ་བྱེད་པ་དེ་མི་ལེགས། སྐྱུར་རྩི་ཅུང་ཟད་ཅིག་གིས་བག་ཟན་ཧྲིལ་པོ་སྐྱུར་བར་བྱེད་པ་དེ་མི་ཤེས་སམ།
1CO 5:7 ཁྱོད་ཚོ་དོན་དངོས་ཐོག་སྐྱུར་རྩི་མེད་པ་ཡིན་པས་བག་ཟན་གསར་པར་འགྱུར་བའི་ཆེད་དུ་སྡིག་ཉེས་ཡིན་པའི་སྐྱུར་རྩི་རྙིང་པ་དེ་སྤོངས་ཤིག གང་ཡིན་ཞེ་ན། མཱ་ཤི་ཀ་ངེད་རྣམས་ཀྱི་པེ་སག་དུས་ཆེན་གྱི་ལུ་གུ་མཆོད་པ་ཕུལ་ཟིན་པས་སོ།
1CO 5:8 དེའི་ཕྱིར་གནོད་སེམས་དང་ངན་སེམས་ཡིན་པའི་སྐྱུར་རྩི་རྙིང་པ་མ་ཡིན་གྱིས། བཅོས་མིན་དང་བདེན་པ་ཡིན་པའི་སྐྱུར་རྩི་མེད་པའི་བག་ལེབ་ཀྱིས་ང་ཚོས་དུས་ཆེན་གཏོང་དགོས།
1CO 5:9 ངས་སྔར་ཁྱོད་ཚོར་བཏང་བའི་འཕྲིན་ཡིག་ལ་ལོག་གཡེམ་བྱེད་མཁན་དང་མི་འགྲོགས་ཞེས་པ་ནི།
1CO 5:10 འཇིག་རྟེན་འདིར་ལོག་གཡེམ་བྱེད་པའམ། ཧམ་སེམས་ཅན་ནམ། མགོ་སྐོར་གཏོང་མཁན། ལྷ་ཆོས་པ་སོགས་དང་མི་འགྲོགས་པ་ཞེས་པའི་དོན་རྩ་བ་ནས་མ་ཡིན། དེ་ལྟར་ཡིན་ན་འཇིག་རྟེན་འདི་ལས་ཕྱིར་ཐོན་དགོས་པ་ཡིན།
1CO 5:11 འོན་ཀྱང་སྤུན་ཟླ་ཡིན་ཞེས་ཟེར་བའི་ལོག་གཡེམ་བྱེད་མཁན་ནམ། ཧམ་སེམས་ཅན་དང༌། ལྷ་ཆོས་པའམ། དམའ་འབེབས་གཏོང་མཁན་ནམ། ར་བཟི་མཁན་ནམ། མགོ་སྐོར་གཏོང་མཁན་སོགས་དང་མི་འགྲོགས་ཞེས་ད་ལྟ་ཁྱོད་རྣམས་ལ་འབྲི། དེ་བཞིན་དུ་རྣམས་དང་ཁ་ལག་ཀྱང་མ་ཟ་ཤིག
1CO 5:12 ཆོས་ཚོགས་ཀྱི་ཕྱི་ལ་ཡོད་པ་རྣམས་ལ་ཁྲིམས་གཅོད་བྱེད་པ་དེ་ང་དང་འབྲེལ་བ་ཅི་ཡོད། ཁྱོད་ཚོས་ཆོས་ཚོགས་ཀྱི་ནང་ལ་ཡོད་པ་རྣམས་ལ་ཁྲིམས་གཅོད་མི་བྱེད་དམ།
1CO 5:13 དཀོན་མཆོག་གིས་ཆོས་ཚོགས་ཀྱི་ཕྱི་ལ་ཡོད་པ་རྣམས་ལ་ཁྲིམས་གཅོད་མཛད། ངན་པ་བྱེད་མཁན་ཁྱོད་ཚོའི་ནང་ནས་སྐྲོད་ཅིག །
1CO 6:1 ཁྱོད་ཚོའི་ནང་ནས་རྩོད་པ་བྱུང་ན་དད་ལྡན་གྱི་དྲུང་དུ་མི་འགྲོ་བར། དད་མེད་པའི་དྲུང་དུ་ཁ་མཆུ་རྒྱག་པར་ནུས་སམ།
1CO 6:2 ནམ་ཞིག་དད་ལྡན་རྣམས་ཀྱིས་འཇིག་རྟེན་ལ་ཁྲིམས་གཅོད་བྱེད་པར་འགྱུར་བ་དེ་མི་ཤེས་སམ། ཡང་ཁྱོད་རྣམས་འཇིག་རྟེན་ལ་ཁྲིམས་གཅོད་བྱེད་མཁན་ཡིན་ན། གལ་ཆེན་མིན་པའི་རྩོད་པ་ཆུང་ངུ་དེ་ཙམ་ལ་ཁྲིམས་གཅོད་བྱེད་མི་ཐུབ་བམ།
1CO 6:3 ང་ཚོས་དཀོན་མཆོག་གི་ཕོ་ཉ་རྣམས་ལ་ཁྲིམས་གཅོད་བྱེད་པར་འགྱུར་བ་དེ་མི་ཤེས་སམ། དེ་ལྟར་ཡིན་ན། ང་ཚོས་ཚེ་འདིའི་དོན་རྣམས་ལ་དེ་བས་ཀྱང་ཁྲིམས་གཅོད་བྱེད་ཐུབ་པ་དགོས།
1CO 6:4 འོ་ན་དེ་ལྟའི་རྩོད་པ་བྱུང་ན་ཆོས་ཚོགས་ཀྱི་ཁོངས་སུ་མ་གཏོགས་པའི་དྲུང་དུ་ཁྱོད་ཚོ་ཅིའི་ཕྱིར་འགྲོ
1CO 6:5 ཁྱོད་ཚོར་ངོ་ཚ་འབེབས་པའི་ཆེད་དུ་ངས་དེ་ལྟར་བཤད། སྤུན་ཟླའི་རྩོད་པ་བར་འདུམ་གཏོང་ཐུབ་པའི་ཤེས་རབ་ཅན་གཅིག་ཀྱང་ཁྱོད་ཚོའི་ནང་ན་མེད་པ་དེ་ཅི་ལྟར་སྲིད།
1CO 6:6 དེའི་ཚབ་ལ་སྤུན་ཟླ་གཅིག་གིས་གཅིག་ལ་ཁ་མཆུ་རྒྱག་པ་མ་ཟད། དད་མེད་པ་རྣམས་ཀྱི་དྲུང་དུ་ཁྲིམས་རར་འགྲོ
1CO 6:7 དོན་དངོས་སུ་སྤུན་ཟླ་གཅིག་གིས་གཅིག་ལ་ཁ་མཆུ་རྒྱག་པ་དེས་ཁྱོད་ཚོ་འཕམ་པར་གྱུར་ཟིན་ནོ། དེ་ལས་གཞན་གྱིས་ཁྱོད་ཚོར་སྡུག་པོའམ། མགོ་སྐོར་བཏང་ན་མི་ལེགས་སམ།
1CO 6:8 དེ་ལས་ལྡོག་སྟེ་ཁྱོད་ཚོ་རང་གིས་སྡུག་པོ་དང་མགོ་སྐོར་གཏོང་བ་མ་ཟད། སྤུན་ཟླ་རྣམས་ལའང་དེ་ལྟར་བྱེད།
1CO 6:9 ཉེས་ཅན་རྣམས་དཀོན་མཆོག་གི་རྒྱལ་སྲིད་ལ་འཛུལ་མི་སྲིད་པ་དེ་མི་ཤེས་སམ། མགོ་མ་འཁོར་ཞིག འདོད་ལོག་སྤྱོད་མཁན་ནམ། ལྷ་ཆོས་པའམ། ལོག་གཡེམ་བྱེད་པའམ། ཕོ་གཉིས་མཉམ་དུ་སྤྱོད་པའམ།
1CO 6:10 རྐུ་མའམ། ཧམ་སེམས་ཅན་ནམ། ར་བཟི་མཁན་ནམ། དམའ་འབེབས་གཏོང་མཁན། མགོ་སྐོར་གཏོང་མཁན་བཅས་ནི་དཀོན་མཆོག་གི་རྒྱལ་སྲིད་ལ་འཛུལ་མི་སྲིད།
1CO 6:11 ཁྱོད་ཚོའི་ནང་ནས་ཁ་ཤས་སྔར་དེ་ལྟར་ཡིན་ཡང༌། གཙོ་བོ་ཡེ་ཤུ་མཱ་ཤི་ཀའི་མཚན་དང༌། ངེད་ཀྱི་དཀོན་མཆོག་གི་དམ་པའི་ཐུགས་ཉིད་ཀྱི་ཐོག་ནས་ཁྱོད་ཚོ་གཙང་བར་གྱུར། དམ་པར་གྱུར། ཡང་དག་པར་གྱུར་རོ། །
1CO 6:12 ཁྱོད་ཚོས་ངས་ཐམས་ཅད་བྱེད་ཆོག་ཅེས་ཟེར་ཡང༌། ངའི་ལན་ནི་ཐམས་ཅད་ཀྱིས་ཕན་པར་མི་འགྱུར། ཁྱོད་ཚོས་ངས་ཐམས་ཅད་བྱེད་ཆོག་ཅེས་ཟེར་ཡང༌། གང་གིས་ཀྱང་ང་ལ་དབང་དུ་མི་སྒྱུར།
1CO 6:13 ཁྱོད་ཚོས་ཟས་ནི་ཕོ་བའི་ཕྱིར་དང༌། ཕོ་བ་ཟས་ཀྱི་ཕྱིར་ཡིན་ཞེས་ཟེར་བ་བདེན་ཡང༌། ནམ་ཞིག་དཀོན་མཆོག་གིས་གཉིས་ཀ་མེད་པར་མཛད་ཡོང༌། ལུས་ནི་ལོག་གཡེམ་གྱི་ཕྱིར་མིན་ཏེ་གཙོ་བོའི་ཕྱིར་ཡིན་ཞིང༌། གཙོ་བོ་ནི་ལུས་ཀྱི་ཕྱིར་རོ།
1CO 6:14 ཡང་དཀོན་མཆོག་གིས་གཙོ་བོ་སླར་གསོན་དུ་མཛད་པ་མ་ཟད། ཁོང་གི་ནུས་མཐུའི་སྒོ་ནས་ངེད་རྣམས་ཀྱང་འཆི་བ་ནས་སློང་བར་མཛད་ངེས་ཡིན།
1CO 6:15 ཁྱོད་ཀྱི་ལུས་ནི་མཱ་ཤི་ཀའི་སྐུ་གཟུགས་ཀྱི་ཡན་ལག་ཡིན་པར་མི་ཤེས་སམ། འོ་ན་ངས་མཱ་ཤི་ཀའི་སྐུ་གཟུགས་ཀྱི་ཡན་ལག་སྨད་འཚོང་མའི་ཡན་ལག་ལ་སྦྱོར་རམ། དེ་གཏན་ནས་མི་སྲིད།
1CO 6:16 སྨད་འཚོང་མ་དང་འགྲོགས་མཁན་ནི་མོ་དང་ལུས་གཅིག་ཏུ་འགྱུར་བར་མི་ཤེས་སམ། མདོ་ལས་གཉིས་པོ་ལུས་གཅིག་ཏུ་འགྱུར་ཞེས་གསུངས་པས་སོ།
1CO 6:17 འོན་ཀྱང་གཙོ་བོ་དང་འགྲོགས་པ་ཁོང་གི་ཐུགས་དང་གཅིག་ཏུ་འགྱུར།
1CO 6:18 ལོག་གཡེམ་འཛེམས་ཤིག མི་རྣམས་ཀྱིས་བྱེད་པའི་སྡིག་ཉེས་གཞན་ཐམས་ཅད་ལུས་ཀྱི་ཕྱི་ལ་ཡིན་ཡང༌། ལོག་གཡེམ་བྱེད་མཁན་གྱིས་རང་གི་ལུས་ལ་སྡིག་ཉེས་བྱེད།
1CO 6:19 ཁྱོད་ཀྱི་ལུས་ནི་དམ་པའི་ཐུགས་ཉིད་ཀྱི་མཆོད་ཁང་ཡིན་ཞིང༌། དམ་པའི་ཐུགས་ཉིད་དཀོན་མཆོག་ནས་ཐོབ་སྟེ་ཁྱོད་ལ་བཞུགས་པར་མི་ཤེས་སམ། ཁྱོད་ཀྱི་ལུས་ཁྱོད་ཀྱི་མ་ཡིན།
1CO 6:20 གང་ཡིན་ཟེར་ན། ཁྱོད་ཚོ་བླུ་རིན་གྱིས་ཉོས། དེའི་ཕྱིར་ལུས་ཀྱིས་དཀོན་མཆོག་ལ་བཀུར་སྟི་བྱོས་ཤིག །
1CO 7:1 ད་ཁྱེད་རྣམས་ཀྱིས་ང་ལ་བྲིས་པའི་དོན་གྱི་སྐོར་ལ། སྐྱེས་པ་དང་བུད་མེད་མཉམ་དུ་མ་འདུས་ན་ལེགས་ཞེས་ཟེར་ཡང༌།
1CO 7:2 ལོག་གཡེམ་གྱི་ལས་མང་པོ་ཐོན་པའི་རྐྱེན་གྱིས་སྐྱེས་པ་རེར་བཟའ་ཟླ་རེ་དང༌། བུད་མེད་རེར་ཁྱོ་ག་རེ་ཡོད་དགོས།
1CO 7:3 ཁྱོ་ག་རང་གི་བཟའ་ཟླ་དང༌། དེ་བཞིན་དུ་བུད་མེད་རང་གི་ཁྱོ་ག་དང་མཉམ་དུ་འདུ་དགོས།
1CO 7:4 བཟའ་ཟླའི་ལུས་ནི་མོ་རང་གི་དབང་འོག་ཏུ་མེད་ཀྱི། ཁྱོ་གའི་དབང་འོག་ཏུ་ཡོད། དེ་བཞིན་དུ་ཁྱོ་གའི་ལུས་ནི་ཁོ་རང་གི་དབང་འོག་ཏུ་མེད་ཀྱི། བཟའ་ཟླའི་དབང་འོག་ཏུ་ཡོད།
1CO 7:5 བཟའ་ཚོ་གཉིས་རེ་ཞིག་སྨོན་ལམ་འདེབས་པའི་ཆེད་དུ་ཕན་ཚུན་མོས་མཐུན་བྱས་པ་དེ་མ་གཏོགས་མཉམ་དུ་འདུ་རྒྱུ་མ་འགོག་ཅིག ཁྱོད་ཚོས་རང་ཚོད་ཟིན་མི་ཐུབ་པས། བདུད་སཱ་ཏན་གྱིས་ཁྱོད་ཚོར་བསླུ་བྲིད་མི་བྱེད་པའི་ཕྱིར་ཡང་བསྐྱར་མཉམ་དུ་འདུ་དགོས།
1CO 7:6 དེ་ནི་བཀའ་རྒྱ་མིན་གྱི། ངའི་བསླབ་བྱ་ཡིན།
1CO 7:7 ང་ཕོ་ཧྲེང་ཞིག་གི་ངོས་ནས་མི་ཐམས་ཅད་ང་རང་དང་འདྲ་བ་ཡིན་པར་འདོད་ཀྱང༌། མི་སོ་སོར་དཀོན་མཆོག་ནས་གནང་སྦྱིན་རེ་ཡོད་དེ། ཁ་ཅིག་ལ་ཕོ་ཧྲེང་མོ་ཧྲེང་གི་གནང་སྦྱིན། ཡང་ཁ་ཅིག་ལ་བཟའ་ཚང་གི་འཚོ་བའི་གནང་སྦྱིན་ཐོབ་ཡོད།
1CO 7:8 གཉེན་སྒྲིག་བྱེད་མ་མྱོང་བ་དང་ཡུགས་མོ་རྣམས་ལ་ང་བཞིན་དུ་གཉེན་སྒྲིག་མ་མྱོང་བར་གནས་ན་ལེགས་པར་ཟེར།
1CO 7:9 འོན་ཀྱང་ཁོ་ཚོས་རང་ཚོད་ཟིན་མ་ཐུབ་ན་གཉེན་སྒྲིག་བྱེད་པར་ཆོག གང་ཡིན་ཞེ་ན། འདོད་ཆགས་ཀྱིས་མེ་འབར་བ་ལས་གཉེན་སྒྲིག་བྱས་ན་ལེགས།
1CO 7:10 གཉེན་སྒྲིག་བྱས་ཡོད་པ་རྣམས་ལ་ང་མིན་ཏེ་གཙོ་བོས་བུད་མེད་རང་གི་ཁྱོ་བོ་དང་ཁ་བྲལ་མི་ཆོག་པའི་བཀའ་གནང༌།
1CO 7:11 (འོན་ཀྱང་ཁ་བྲལ་ན་མོ་རང་ཁྱོ་བོ་མེད་པར་གནས་དགོས་པའམ། ཁྱོ་བོ་དང་འདུམ་པར་འགྱུར་དགོས་) ཁྱོ་བོ་ཡང་རང་གི་བཟའ་ཟླ་དང་ཁ་བྲལ་མི་ཆོག
1CO 7:12 གཙོ་བོས་མིན་ཏེ་ང་ཡིས་དེ་མིན་གཞན་དག་ལ་ཟེར་རྒྱུར། གལ་ཏེ་སྤུན་ཟླ་ཞིག་ལ་བཟའ་ཟླ་དད་པ་མི་བྱེད་མཁན་གཅིག་ཡོད་ཅིང༌། ཁོ་མོས་ཁོང་དང་སྡོད་པར་དགའ་ན། ཁོ་མོ་དང་ཁ་བྲལ་མི་ཆོག་ཅེས་ཟེར།
1CO 7:13 ཡང་བུད་མེད་གཅིག་ལ་ཁྱོ་ག་དད་པ་མི་བྱེད་མཁན་ཅིག་ཡོད་ཅིང༌། ཁོ་ནི་མོ་རང་དང་སྡོད་པར་དགའ་ན། ཁོ་དང་ཁ་བྲལ་མི་ཆོག
1CO 7:14 གང་ལགས་ཟེར་ན། ཁྱོ་ག་དད་པ་མི་བྱེད་མཁན་ནི་རང་གི་བཟའ་ཟླའི་སྒོ་ནས་དམ་པ་རུ་གྱུར་ཞིང༌། བུད་མེད་དད་པ་མི་བྱེད་མཁན་རང་གི་དད་ལྡན་ཁྱོ་གའི་སྒོ་ནས་དམ་པ་རུ་གྱུར། དེ་མིན་ན་ཁྱེད་ཀྱི་ཕྲུ་གུ་དམ་པ་མིན། འོན་ཀྱང་ད་ལྟ་ཁོ་ཚོ་དམ་པ་ཡིན།
1CO 7:15 གལ་ཏེ་དད་པ་མི་བྱེད་མཁན་དེ་རང་གི་བཟའ་ཟླ་དང་ཁ་བྲལ་ན་འབྲལ་དུ་ཆུག དེ་ལྟར་བྱུང་ན་སྤུན་ཟླ་ཕོ་མོ་སུ་ཡང་བཅིངས་པ་མ་ཡིན། གང་ཡིན་ཟེར་ན། དཀོན་མཆོག་གིས་ཁྱེད་ཚོ་ཞི་བདེའི་ནང་གནས་པའི་ཕྱིར་བོས་པ་གནང་ངོ༌།
1CO 7:16 ཆུང་མ་རྣམས། ཁྱེད་ཀྱི་སྒོ་ནས་སོ་སོའི་ཁྱོ་ག་མི་ཐར་བ་ཇི་ལྟར་ཤེས། ཁྱོ་ག་ཚོ། ཁྱེད་ཀྱི་སྒོ་ནས་སོ་སོའི་ཆུང་མ་མི་ཐར་བ་ཇི་ལྟར་ཤེས།
1CO 7:17 གཙོ་བོས་མི་རེ་རེར་ཅི་བསྐོས་པ་དང༌། དཀོན་མཆོག་གིས་ཁྱེད་ཚོ་བོས་པ་བཞིན་དུ་མི་ཚེ་སྐྱེལ་དགོས། དེ་ནི་ངས་ཆོས་ཚོགས་ཐམས་ཅད་ལ་བཀའ་བསྒོས་པ་དེ་ཡིན།
1CO 7:18 དཔེར་ན། དཀོན་མཆོག་གིས་སུ་ཞིག་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པར་བོས་ན་ཁོ་ནི་རྟགས་དེ་དང་ལྡན་པར་གནས་དགོས། དཀོན་མཆོག་གིས་སུ་ཞིག་ཡ་ཧུ་དཱ་པའི་ཆོས་ཀྱི་རྟགས་དང་མི་ལྡན་པར་བོས་ན་ཁོས་རྟགས་དེ་ལེན་མི་རུང༌།
1CO 7:19 ཡ་ཧུ་དཱ་པའི་ཆོས་ཀྱི་རྟགས་ལེན་ཡོད་མེད་ལ་ཁྱད་པར་མེད་དེ། དཀོན་མཆོག་གི་བཀའ་སྲུང་བ་དེ་འབའ་ཞིག་གལ་ཆེའོ།
1CO 7:20 མི་རེ་རེ་བོས་པའི་སྐབས་སུ་ཇི་ལྟར་ཡོད་པ་དེ་ལྟར་གནས་དགོས།
1CO 7:21 བོས་པའི་སྐབས་སུ་ཁྱེད་བྲན་གཡོག་ཡིན་ནམ། དེའི་རྐྱེན་པས་སེམས་ཁྲལ་མ་བྱེད། གལ་ཏེ་བྲན་གཡོག་ལས་ཐར་བར་འགྱུར་བའི་གོ་སྐབས་བྱུང་ན་དེ་ལེན་ཞིག
1CO 7:22 གང་ཡིན་ཞེ་ན། ཇི་ལྟར་གཙོ་བོའི་ཐོག་ནས་བོས་པའི་བྲན་གཡོག་ནི་གཙོ་བོས་ཐར་དུ་བཅུག་པའི་མི་ཞིག་ཡིན། དེ་ལྟར་བྲན་གཡོག་མིན་པ་བོས་པ་དེ་མཱ་ཤི་ཀའི་ཞབས་ཕྱི་ཡིན།
1CO 7:23 ཁྱེད་ཚོ་བླུ་རིན་གྱིས་ཉོས་པས་མི་རྣམས་ཀྱི་བྲན་གཡོག་ཏུ་མ་འགྱུར་ཞིག
1CO 7:24 སྤུན་ཟླ་རྣམས། མི་རེ་རེ་བོས་པའི་སྐབས་སུ་ཇི་ལྟར་ཡོད་པ་དེ་ལྟར་དཀོན་མཆོག་དང་འགྲོགས་ཏེ་གནས་དགོས།
1CO 7:25 ད་གཉེན་སྒྲིག་བྱེད་མ་མྱོང་བའི་གཞོན་ནུ་མ་རྣམས་ལ་དེའི་ཐད་གཙོ་བོའི་བཀའ་ཁྲིམས་ང་ལ་མེད་ཀྱང༌། ང་ནི་ཐུགས་རྗེའི་སྒོ་ནས་གཙོ་བོས་བློ་གཏད་ཆོག་པར་མཛད་པའི་མི་ཞིག་ཡིན་ཞིང་ངས་བསམ་འཆར་ཤོད།
1CO 7:26 ངའི་བསམ་པ་ལ། དེང་སྐབས་ཀྱི་སྡུག་བསྔལ་ཡོད་པའི་རྐྱེན་གྱིས་ཁྱེད་ཇི་ལྟར་ཡོད་པ་དེ་ལྟར་བསྡད་ན་ལེགས།
1CO 7:27 ཁྱེད་ལ་ཆུང་མ་ཡོད་ན། ཁ་འབྲལ་ཐབས་མ་བྱེད། མེད་ན་ཆུང་མ་མ་འཚོལ།
1CO 7:28 གལ་ཏེ་གཉེན་སྒྲིག་བྱས་ན་ཁྱེད་ཀྱིས་སྡིག་ཉེས་ཀྱི་ལས་མ་བྱས། ཡང་གཞོན་ནུ་མ་ཞིག་གིས་གཉེན་སྒྲིག་བྱས་ན་སྡིག་ཉེས་ཀྱི་ལས་མ་བྱས་ཀྱང༌། གཉེན་སྒྲིག་བྱས་པ་རྣམས་ནི་འཇིག་རྟེན་འདིར་སྡུག་བསྔལ་མྱོང་ཞིང༌། ངའི་ངོས་ནས་དེ་ཁྱེད་རྣམས་ལ་འཕོག་པར་མི་འདོད།
1CO 7:29 སྤུན་ཟླ་རྣམས། ངའི་དོན་འདི་ལྟར་ཡིན། བསྐོས་པའི་དུས་ཚོད་རིང་པོ་མེད་པས་ད་ཕྱིན་ཆད་ཆུང་མ་ཡོད་པ་རྣམས་ཀྱིས་ཆུང་མ་མེད་པ་ལྟར་འཚོ་བ་སྐྱེལ་དགོས།
1CO 7:30 ངུ་མཁན་རྣམས་ཀྱིས་མི་ངུ་བ་ལྟར་དང༌། དགའ་བ་རྣམས་ཀྱིས་དགའ་བ་མ་ཡིན་པ་ལྟར་འཚོ་བ་སྐྱེལ་དགོས། ཉོ་མཁན་རྣམས་ཀྱིས་རྒྱུ་ནོར་མེད་པ་ལྟར་དང༌།
1CO 7:31 འཇིག་རྟེན་ལ་སྤྱོད་པ་རྣམས་ཀྱིས་མི་སྤྱོད་པ་ལྟར་སྤྱོད་དགོས། གང་ཡིན་ཟེར་ན། འཇིག་རྟེན་འདིའི་རྣམ་པ་འདའ་བཞིན་ཡོད་པས་སོ།
1CO 7:32 ངའི་རེ་བར་ཁྱེད་ཚོ་སེམས་ཁྲལ་ལས་ཐར་བར་འགྱུར། བཟའ་ཟླ་མེད་པའི་སྐྱེས་པ་དེས་གཙོ་བོའི་དོན་ལ་སེམས་ཁུར་བྱེད་དེ། གང་ལ་ཁོང་གི་ཐུགས་མཉེས་པ་དེ་བཞིན་དུ་སྤྱོད།
1CO 7:33 འོན་ཀྱང་བཟའ་ཟླ་ཡོད་པའི་སྐྱེས་པ་དེས་འཇིག་རྟེན་གྱི་དོན་ལ་སེམས་ཁུར་བྱེད་དེ། གང་ལ་ཆུང་མ་དགའ་བ་དེ་བཞིན་དུ་སྤྱོད་པས།
1CO 7:34 ཁོའི་སེམས་ཀྱི་དོན་གཉེར་ཕྱོགས་གཉིས་སུ་གྱེས། ཁྱོ་བོ་མེད་པ་དང༌། ཡང་ན་གཉེན་སྒྲིག་བྱས་མ་མྱོང་བའི་གཞོན་ནུ་མ་ཡིས་ལུས་སེམས་གཉིས་དམ་པར་འགྱུར་བའི་ཕྱིར་གཙོ་བོ་གང་ལ་ཐུགས་མཉེས་པའི་དོན་དུ་སེམས་ཁུར་བྱེད། འོན་ཀྱང་ཁྱོ་བོ་ཡོད་པ་དེས་འཇིག་རྟེན་གྱི་དོན་ལ་སེམས་ཁུར་བྱེད་དེ། གང་ལ་ཁོ་མོའི་ཁྱོ་བོ་ལ་དགའ་བ་དེ་བཞིན་དུ་སྤྱོད།
1CO 7:35 ཁྱེད་ཚོ་ལ་ཕན་པའི་ཕྱིར་ངས་དེ་ལྟར་བཤད་དེ། ཁྱེད་ཚོར་བཀག་རྒྱ་བཟོས་པ་མ་ཡིན་གྱིས། སྤྱོད་ལམ་འོས་པ་དང༌། གཙོ་བོར་ཞབས་ཕྱི་སེམས་གཉིས་སུ་མ་གྱེས་པའི་ཕྱིར་རོ། །
1CO 7:36 གལ་ཏེ་མི་སུ་ཞིག་ལ་བག་མ་ལེན་རྒྱུའི་གཞོན་ནུ་མ་ཞིག་ཡོད་དེ། ཁོས་ཁོ་མོ་ལ་སྤྱོད་ལམ་མི་འོས་པ་བྱེད་པར་བསམས་ཤིང༌། ཁོ་མོ་རྒས་ཏེ་གཉེན་སྒྲིག་བྱེད་དགོས་ན། ཁོའི་བསམ་པ་བཞིན་བྱེད་ཆོག སྡིག་ཉེས་མེད་པས་གཉེན་སྒྲིག་བྱེད་པར་ཆོག
1CO 7:37 འོན་ཀྱང་སེམས་བརྟན་ཞིང༌། ཐབས་མེད་པའི་བྱ་བ་མ་ཐུག་པ་དང༌། རང་ཚོད་ཟིན་ཐུབ་པའི་མི་དེས་གཉེན་སྒྲིག་མི་བྱེད་པར་ཐག་བཅད་ན་ལེགས་པར་བྱེད།
1CO 7:38 དེའི་ཕྱིར་གཞོན་ནུ་མ་དང་གཉེན་སྒྲིག་བྱེད་མཁན་ལེགས་པར་བྱེད་ཀྱང་གཉེན་སྒྲིག་མི་བྱེད་མཁན་དེ་བས་ལེགས་པར་བྱེད།
1CO 7:39 ཁྱོ་བོ་གསོན་དུས་ཆུང་མ་ཡང་བསྐྱར་གཉེན་སྒྲིག་བྱེད་མི་ཆོག ཁྱོ་བོ་ཤི་ན་ཁོ་མོས་སུ་ཞིག་ལ་དགའ་བ་དང་གཉེན་སྒྲིག་བྱེད་པར་ཆོག འོན་ཏེ་ཁྱོ་བོ་གསར་པ་དེ་གཙོ་བོའི་ཁོངས་སུ་གཏོགས་པ་ཞིག་དགོས།
1CO 7:40 འོན་ཀྱང་ངའི་བསམ་པར་ཁོ་མོ་ཁྱོ་བོ་མེད་པར་གནས་ན་སྐྱིད་པ་ཡིན། དེ་ནི་ངའི་བསམ་ཚུལ་ཡིན་ཏེ་ངའང་དཀོན་མཆོག་གི་ཐུགས་ཉིད་དང་ལྡན་པ་ཡིན་པར་སེམས་སོ། །
1CO 8:1 ད་ལྷ་སྐུ་རྣམས་ལ་ཕུལ་བའི་ཟས་ཀྱི་སྐོར་ལ་ཁྱེད་རྣམས་ཀྱིས་གསུངས་པ་ལྟར། ང་ཚོ་ཚང་མར་ཤེས་བྱ་ཡོད་པ་ངེད་རྣམས་ཀྱིས་ཤེས། ཤེས་བྱ་ཡིས་ང་རྒྱལ་སྐྱེད། འོན་ཏེ་བྱམས་སེམས་ཀྱིས་ཡར་སྐྱེད་གཏོང༌།
1CO 8:2 མི་ཞིག་གིས་ངས་ཇི་ཞིག་ཤེས་སྙམ་ན་ཁོས་ཇི་འདྲ་ཤེས་དགོས་པ་དེ་ད་དུང་མི་ཤེས།
1CO 8:3 འོན་ཀྱང་མི་ཞིག་གིས་དཀོན་མཆོག་ལ་གཅེས་པར་བཟུང་ན་དཀོན་མཆོག་གིས་ཁོ་ངོ་མཁྱེན་ནོ།
1CO 8:4 ལྷ་སྐུ་རྣམས་ལ་ཕུལ་བའི་ཟས་ཟ་བའི་སྐོར་ནས་བཤད་ན་ལྷ་སྐུ་རྣམས་ནི་འཇིག་རྟེན་ཐོག་ཅི་ཡང་མ་ཡིན་པ་དང༌། དཀོན་མཆོག་གཅིག་པུ་ལས་གཞན་དཀོན་མཆོག་མེད་པར་ངེད་རྣམས་ཀྱིས་ཤེས།
1CO 8:5 བྱས་ན། ཞིང་ཁམས་སམ། ས་ལ་ལྷ་ཞེས་བྱ་བ་ཡོད་པ་དང༌། ལྷ་དང་གཙོ་བོ་ཟེར་བ་མང་པོ་ཡོད་ཀྱང༌།
1CO 8:6 ངེད་རྣམས་ཀྱི་ཆ་ནས་ཡབ་དཀོན་མཆོག་གཅིག་རང་ཡིན། ཁོང་ལས་དངོས་པོ་ཐམས་ཅད་འབྱུང་ཞིང༌། ངེད་རྣམས་ནི་ཁོང་གི་ཆེད་དུ་གནས། ཡང་གཙོ་བོ་གཅིག་སྟེ་ཡེ་ཤུ་མཱ་ཤི་ཀ་ཡིན། ཁོང་གི་སྒོ་ནས་དངོས་པོ་ཐམས་ཅད་འབྱུང་ཞིང༌། ངེད་རྣམས་ཁོང་གི་སྒོ་ནས་གནས་སོ། །
1CO 8:7 འོན་ཀྱང་མི་ཐམས་ཅད་ལ་དེའི་ཤེས་བྱ་མེད། སྔོན་སྐུ་འདྲ་བརྟེན་རྒྱུར་གོམས་པས་མི་ཁ་ཤས་ཀྱིས་ད་ལྟའི་བར་དུ་ཡང་ཟས་ཟ་བ་དེ་སྐུ་འདྲར་ཕུལ་བའི་ཟས་སུ་སེམས་པ་དང༌། ཁོ་ཚོའི་དྲང་སེམས་ཞན་པས་ངན་རུལ་དུ་འགྱུར།
1CO 8:8 ཟས་ཟ་བའི་སྒོ་ནས་ངེད་རྣམས་དཀོན་མཆོག་དང་ཉེ་བར་མི་འགྲོ མ་བཟས་ན་གནོད་པ་མེད་ལ། བཟས་ན་ཕན་འདོགས་ཀྱང་མེད།
1CO 8:9 འོན་ཏེ་ཁྱེད་ཀྱི་རང་དབང་འདི་དྲང་སེམས་ཞན་པ་རྣམས་ལ་སྡིག་ཉེས་ཀྱི་རྒྱུ་རྐྱེན་དུ་མི་འགྱུར་བར་དོགས་ཟོན་གྱིས་ཤིག
1CO 8:10 གང་ཡིན་ཞེ་ན། དྲང་སེམས་ཞན་པ་ཞིག་གིས་ཁྱོད་ཤེས་བྱ་དང་ལྡན་པས་ལྷ་ཁང་ལ་ཟས་ཟ་བར་མཐོང་ན། ཁོས་ལྷ་སྐུ་ལ་མཆོད་པ་དེ་ཟ་བར་མི་སྐུལ་ལམ།
1CO 8:11 དེའི་ཕྱིར་ཁྱོད་ཀྱི་ཤེས་བྱའི་སྒོ་ནས་དྲང་སེམས་ཞན་པ་དེ་འཕྲོ་བརླག་འགྲོ་བར་འགྱུར། མཱ་ཤི་ཀ་སྤུན་ཟླ་དེའི་ཆེད་དུ་ཡང་བཀྲོངས།
1CO 8:12 སྤུན་ཟླ་རྣམས་ལ་སྡིག་ཉེས་དེ་ལྟར་བྱེད་དེ། ཁོ་ཚོའི་དྲང་སེམས་ཞན་པ་དེ་གནོད་པའི་སྒོ་ནས་ཁྱོད་རྣམས་ཀྱིས་མཱ་ཤི་ཀ་ལ་སྡིག་པ་བྱེད།
1CO 8:13 གལ་ཏེ་ངས་གང་ཟས་པ་དེ་སྤུན་ཟླའི་སྡིག་ཉེས་ཀྱི་རྒྱུ་རྐྱེན་དུ་གྱུར་ན། སྤུན་ཟླས་སྡིག་ཉེས་མི་བྱེད་པའི་ཕྱིར་ངས་ནམ་ཡང་ཤ་མི་ཟའོ། །
1CO 9:1 ང་ལ་རང་དབང་མེད་དམ། ང་སྐུ་ཚབ་ཅིག་མ་ཡིན་ནམ། ངས་ང་ཚོའི་གཙོ་བོ་ཡེ་ཤུ་མཐོང་མ་མྱོང་ངམ། ཁྱེད་ཚོ་ནི་གཙོ་བོའི་ངང་ནས་ངའི་ལས་དོན་གྱི་འབྲས་བུ་མ་ཡིན་ནམ།
1CO 9:2 མི་གཞན་གྱི་ཆ་ནས་ང་སྐུ་ཚབ་མ་ཡིན་ནའང༌། ཁྱེད་ཚོའི་དོན་དུ་ཡིན། གང་ལགས་ཟེར་ན། ཁྱེད་ཚོ་ནི་གཙོ་བོའི་ངང་ནས་ང་སྐུ་ཚབ་ཡིན་པ་ར་སྤྲོད་པའི་རྟགས་ཡིན།
1CO 9:3 ང་ལ་འདྲི་གཅོད་བྱེད་མཁན་རྣམས་ལ་ངའི་གསལ་བཤད་འདི་ལྟར་ཡིན།
1CO 9:4 ང་ཚོར་ཟ་འཐུང་བྱེད་པའི་དབང་ཆ་མེད་དམ།
1CO 9:5 སྐུ་ཚབ་གཞན་དག་དང༌། གཙོ་བོའི་གཅུང་པོ་རྣམས། དེ་བཞིན་ཀེ་ཕཱ་དང་འདྲ་བར་ང་ཚོར་དད་ལྡན་པའི་བཟའ་ཟླ་འཁྲིད་པའི་དབང་ཆ་མེད་དམ།
1CO 9:6 ཡང་ན། ང་དང་པར་ན་པཱ་གཉིས་ཁོ་ནར་འཚོ་བའི་ཕྱིར་ལས་ཀ་མི་བྱེད་པའི་དབང་ཆ་མེད་དམ།
1CO 9:7 རང་གི་འགྲོ་སོང་བཏང་ནས་དམག་མི་སུས་བྱེད། རྒུན་འབྲུམ་གྱི་ལྡུམ་ར་ཞིག་བཟོས་ནས་དེའི་འབྲས་བུ་ལས་སུས་མི་ཟ། ཡང་ཁྱུ་འཚོས་ནས་དེའི་འོ་མ་ལས་སུས་མི་འཐུང༌།
1CO 9:8 ངས་མིའི་རིགས་ཀྱི་ཆ་ནས་དེ་ལྟར་ཟེར་རམ། བཀའ་ཁྲིམས་ཀྱིས་ཀྱང་དེ་ལྟར་གསུངས་པ་མ་ཡིན་ནམ།
1CO 9:9 མོ་ཤེའི་བཀའ་ཁྲིམས་ནང་གཡུལ་ལས་བྱེད་པའི་གླང་གོག་ལ་ཁ་ར་མ་གཡོགས་ཤིག་ཅེས་བྲིས་པ་ནི་དཀོན་མཆོག་གིས་བ་གླང་འཚོ་བའི་སྐོར་གསུངས་སམ།
1CO 9:10 ངེད་རྣམས་གཅིག་པོར་ཕན་པའི་ཕྱིར་གསུངས་སམ། དེ་ནི་ངེད་རྣམས་ལ་ཕན་པའི་ཆེད་དུ་བྲིས་པ་ཡིན། གང་ཡིན་ཟེར་ན། ཞིང་རྨོ་མཁན་དང་གཡུལ་ལས་བྱེད་མཁན་གཉིས་ཀྱིས་སྟོན་ཐོག་གི་སྐལ་བ་འཐོབ་ཆེད་རེ་བའི་ངང་ནས་ལས་ཀ་བྱེད་རུང༌།
1CO 9:11 ངེད་རྣམས་ཀྱིས་ཁྱེད་ཚོར་སེམས་ཉིད་ཀྱི་ས་བོན་བཏབ་ན། ཁྱེད་ཚོ་ནས་དངོས་པོའི་འབྲས་བུ་སྡུད་མི་རུང་ངམ།
1CO 9:12 གཞན་རྣམས་ལ་ཁྱེད་ཚོའི་རྒྱུ་ནོར་ལས་རྒྱབ་སྐྱོར་ཐོབ་པའི་དབང་ཆ་ཡོད་ན། ང་ཚོར་དེ་ལས་ལྷག་པ་མེད་དམ། འོན་ཀྱང་ང་ཚོས་དབང་ཆ་དེ་བཞིན་མི་བྱེད་པར། དེ་ལས་ལྡོག་སྟེ་མཱ་ཤི་ཀའི་འཕྲིན་བཟང་བར་དུ་མི་གཅོད་པའི་ཕྱིར་ཐམས་ཅད་བཟོད་པར་བྱེད།
1CO 9:13 མཆོད་ཁང་ནང་ལས་ཀ་བྱེད་མཁན་རྣམས་ཀྱིས་མཆོད་ཁང་གི་ཁ་ལག་ཟ་ཞིང༌། མཆོད་ཁྲི་ལ་གཡོག་བྱེད་པ་རྣམས་དེའི་གང་ལ་གང་མཆོད་པ་ལས་སྐལ་བ་འཐོབ་པར་ཁྱེད་ཚོས་མི་ཤེས་སམ།
1CO 9:14 དེ་ལྟར་འཕྲིན་བཟང་སྒྲོག་མཁན་རྣམས་ལ་འཕྲིན་བཟང་སྒྲོག་པའི་སྒོ་ནས་འཚོ་བའི་རྒྱབ་སྐྱོར་འཐོབ་དགོས་པར་གཙོ་བོས་བཀའ་གནང་ངོ༌། །
1CO 9:15 འོན་ཀྱང་ངས་དབང་ཆ་དེ་བཞིན་དུ་མ་བྱས་ཤིང༌། དབང་ཆ་དེ་ཚོ་འཐོབ་པའི་ཆེད་དུ་དོན་འདི་རྣམས་མི་འབྲི། གང་ལགས་ཤེ་ན། ངས་རིན་མེད་པར་འཕྲིན་བཟང་བསྒྲགས་ཟེར་བའི་སྤོབས་པ་དེ་བརླག་པ་ལས༌༌༌༌ང་ཤི་ན་དགའ།
1CO 9:16 འོན་ཏེ་ངས་འཕྲིན་བཟང་བསྒྲགས་པར་སྤོབས་པ་སྐྱེ་དོན་མེད། གང་ཡིན་ཟེར་ན། ངས་འཕྲིན་བཟང་ངེས་པར་སྒྲོག་དགོས། དེ་མ་བསྒྲགས་ན་ང་ལ་ཆད་པ་ཕོག་ཉེན་ཡོད།
1CO 9:17 གལ་སྲིད་རང་དགའ་བ་བཞིན་དུ་འཕྲིན་བཟང་བསྒྲགས་ན་ང་ལ་བྱ་དགའ་ཞིག་ཡོད། དཀོན་མཆོག་གིས་འཕྲིན་བཟང་སྒྲོག་པའི་ལས་འགན་ང་ལ་བཅོལ་བས་སྒྲོག་དགོས་བྱུང་ངོ༌། །
1CO 9:18 འོ་ན། ངའི་བྱ་དགའ་གང་ཡིན། འཕྲིན་བཟང་སྒྲོག་པ་ལས་འབྱུང་བའི་དབང་ཆ་མི་བྱེད་པར་ངས་རིན་མེད་ཀྱི་ཐོག་ནས་འཕྲིན་བཟང་སྒྲོག་པ་དེ་ཡིན།
1CO 9:19 ང་མི་སུ་ཞིག་ལ་ཡང་རྟེན་དགོས་མེད་ཀྱང༌། མི་མང་པོ་དད་སེམས་འགུགས་པའི་ཕྱིར་ཐམས་ཅད་ཀྱི་གཡོག་པོར་གྱུར།
1CO 9:20 ཡ་ཧུ་དཱ་པ་རྣམས་དད་སེམས་འགུགས་པའི་ཕྱིར་ཡ་ཧུ་དཱ་པ་རྣམས་ལ་ང་ཁོང་ཚོ་ལྟར་གྱུར། མོ་ཤེའི་བཀའ་ཁྲིམས་སྲུང་མཁན་རྣམས་དད་སེམས་འགུགས་པའི་ཕྱིར་ང་རང་ནི་བཀའ་ཁྲིམས་ཀྱི་འོག་ཏུ་མིན་ཡང༌། བཀའ་ཁྲིམས་ཀྱི་འོག་ཏུ་ཡོད་མཁན་རྣམས་ལ་ང་ཁོང་ཚོ་ལྟར་གྱུར།
1CO 9:21 བཀའ་ཁྲིམས་མེད་པ་རྣམས་ལ་ང་བཀའ་ཁྲིམས་མེད་པ་ལྟར་གྱུར། (འོན་ཀྱང་ང་དཀོན་མཆོག་གི་བཀའ་ཁྲིམས་དང་བྲལ་བ་མིན་ཏེ་མཱ་ཤི་ཀའི་བཀའ་ཁྲིམས་འོག་ཏུ་ཡོད་) དེ་ནི་བཀའ་ཁྲིམས་མེད་པ་རྣམས་དད་སེམས་འགུགས་པའི་ཆེད་དུ་ཡིན།
1CO 9:22 དད་པ་ཆུང་བ་རྣམས་དད་སེམས་འགུགས་པའི་ཕྱིར་ང་དད་པ་ཆུང་བ་ལྟར་གྱུར། ཐབས་གང་གིས་མི་ཁ་ཤས་སྐྱོབ་པའི་ཕྱིར་ང་ནི་མི་ཐམས་ཅད་ལ་ཁོང་ཚོ་ལྟར་གྱུར།
1CO 9:23 འཕྲིན་བཟང་གི་དོན་ལ་ངས་དེ་ཐམས་ཅད་བྱེད། དེ་ནི་ང་ལ་མི་གཞན་དང་མཉམ་དུ་འཕྲིན་བཟང་གི་བྱིན་རླབས་ཀྱི་སྐལ་བ་འཐོབ་པའི་ཆེད་དུ་ཡིན།
1CO 9:24 བང་རྩལ་འགྲན་བསྡུར་བྱེད་སྐབས་རྒྱུག་ཤར་གློད་མཁན་ཐམས་ཅད་རྒྱུག་ནའང་བྱ་དགའ་འཐོབ་མཁན་གཅིག་ལས་མེད་པ་ཁྱེད་ཀྱིས་མི་ཤེས་སམ། བྱ་དགའ་འཐོབ་པའི་ཆེད་དུ་རྒྱུག་ཅིག
1CO 9:25 ལུས་རྩལ་པ་རྣམས་ཀྱིས་དོན་ཐམས་ཅད་ལ་རང་ཚོད་འཛིན། ཁོ་ཚོས་འཇིག་པར་འགྱུར་བའི་བྱ་དགའ་ཞིག་འཐོབ་པའི་ཕྱིར་དེ་ལྟར་བྱེད། འོན་ཏེ་ངེད་རྣམས་ཀྱིས་འཇིག་པར་མི་འགྱུར་བའི་བྱ་དགའ་ཞིག་འཐོབ་པའི་ཕྱིར་བྱེད།
1CO 9:26 དེའི་ཕྱིར་ངས་དམིགས་ཡུལ་མེད་པར་མི་རྒྱུག ཡང་ན་མཁའ་རླུང་ལ་རྡུང་བ་ལྟར་མི་འཐབ་ཀྱིས།
1CO 9:27 ངས་རང་གི་ལུས་གཅུན་ནས་དེ་ངའི་བྲན་གཡོག་ཏུ་འཇུག དེ་ནི་མི་གཞན་ལ་འཕྲིན་བཟང་སྒྲོག་པའི་རྗེས་སུ་ང་རང་བྱ་དགའ་འཐོབ་མི་འོས་པ་ཞིག་མི་འགྱུར་བའི་ཆེད་དུ་ཡིན་ནོ། །
1CO 10:1 སྤུན་ཟླ་རྣམས། འདི་དྲན་པར་གྱིས་ཤིག ངེད་རྣམས་ཀྱི་ཕ་མེས་ཐམས་ཅད་སྤྲིན་པའི་འོག་ཏུ་ཡོད་ཅིང༌། རྒྱ་མཚོ་བརྒྱུད་ནས་ཕེབས།
1CO 10:2 སྤྲིན་པའི་འོག་ཏུ་ཡོད་པ་དང༌། རྒྱ་མཚོ་བརྒྱུད་ནས་ཕེབས་པ་དེ་ནི་ཁྲུས་གསོལ་ནང་བཞིན་ཡོད། དེས་ཁོ་ཚོ་ཚང་མ་ལུང་སྟོན་པ་མོ་ཤེའི་རྗེས་སུ་འབྲང་མཁན་དུ་གྱུར་བར་མཚོན།
1CO 10:3 ཐམས་ཅད་ཀྱིས་དཀོན་མཆོག་ནས་བྱུང་བའི་ངོ་མཚར་བའི་ཟས་གཅིག་པ་བཟས་ཤིང༌།
1CO 10:4 ཐམས་ཅད་ཀྱིས་ངོ་མཚར་གྱི་བཏུང་བ་གཅིག་པ་བཏུངས། གང་ཡིན་ཟེར་ན། ཁོང་ཚོས་བཏུངས་པ་དེ་ནི་ཁོ་ཚོ་དང་མཉམ་དུ་འགྲུལ་བའི་ངོ་མཚར་གྱི་བྲག་ལས་འོངས་ཤིང༌། བྲག་དེ་ནི་མཱ་ཤི་ཀ་ཡིན།
1CO 10:5 འོན་ཀྱང་ཁོ་ཚོ་མང་ཆེ་བར་དཀོན་མཆོག་གི་ཐུགས་མ་མཉེས་པས་ཁོ་ཚོའི་སྤུར་འབྲོག་སྟོང་དུ་འཐོར་བར་གྱུར།
1CO 10:6 ཁོ་ཚོ་ངན་པ་འདོད་ཀྱང༌། ང་ཚོ་ངན་པ་མི་འདོད་པའི་ཕྱིར་བྱ་བ་དེ་ཚོ་ང་ཚོའི་དཔེ་རུ་སྒྱུར།
1CO 10:7 ཁོ་ཚོའི་ནང་ནས་ཁ་ཤས་དང་འདྲ་བར་ལྷ་སྐུ་རྣམས་ལ་བསྙེན་བཀུར་མ་བྱོས་ཤིག མདོ་ལས་བཀོད་པ་ལྟར། མི་རྣམས་ཟ་འཐུང་བྱེད་པར་མར་བསྡད་པ་དང༌། རྩེད་མོ་རྩེ་བར་ཡར་ལངས་ཞེས་བྲིས།
1CO 10:8 ཡང་ཁོ་ཚོའི་ནང་ནས་ལ་ལས་ལོག་གཡེམ་བྱས་པའི་རྐྱེན་གྱིས་ཉིན་གཅིག་ལ་སྟོང་ཕྲག་ཉི་ཤུ་རྩ་གསུམ་ཤི་བས་ང་ཚོས་ཀྱང་དེ་ལྟར་མ་བྱེད་ཅིག
1CO 10:9 ཡང་ཁོ་ཚོའི་ནང་ནས་ཁ་ཤས་ཀྱིས་མཱ་ཤི་ཀ་ལ་ཉམས་ཚོད་བྱས་པའི་རྐྱེན་གྱིས་སྦྲུལ་གྱིས་བསད་པས་ང་ཚོས་ཀྱང་དེ་ལྟར་མ་བྱེད་ཅིག
1CO 10:10 ཡང་ཁོ་ཚོའི་ནང་ནས་ཁ་ཤས་ཀྱིས་ཡིད་མ་རངས་པའི་གཏམ་བཤད་པའི་རྐྱེན་གྱིས་སྲོག་འཇོམས་མཁན་གྱི་ཕོ་ཉས་ཁོ་ཚོར་མེད་པར་བྱས་པས་དེ་ལྟར་མ་བྱོས་ཤིག
1CO 10:11 བྱ་བ་དེ་ཚོ་ནི་མེས་པོ་རྣམས་ལ་དཔེ་ལྟར་བྱུང་ཞིང༌། ང་ཚོ་དུས་ཀྱི་མཐའ་མར་བབས་ཡོད་པ་རྣམས་ལ་སློབ་པའི་ཆེད་དུ་བྲིས།
1CO 10:12 དེའི་ཕྱིར་བརྟན་པོར་གནས་སྙམ་པ་དེས་ཁོ་ཚོ་ལྟར་སྡིག་ཉེས་མི་བྱེད་པའི་ཕྱིར་དོགས་ཟོན་བྱེད་དགོས།
1CO 10:13 མི་ཐམས་ཅད་ལ་མྱོང་བའི་བསླུ་བྲིད་ལས་ཁྱེད་ཚོ་ལ་མ་མྱོང༌། དཀོན་མཆོག་ནི་ཐུགས་གཏད་ཆོག་པ་ཡིན་ཞིང༌། ཁྱེད་ཚོར་བཟོད་མི་ཐུབ་པའི་བསླུ་བྲིད་མྱོང་དུ་མི་འཇུག ཁྱེད་ཚོས་བཟོད་ཐུབ་པའི་ཆེད་དུ་བསླུ་བྲིད་མྱོང་སྐབས་ཁོང་གིས་དེ་ལས་ཐར་བའི་ལམ་སྟོན་པར་མཛད་དོ། །
1CO 10:14 དེའི་ཕྱིར་ངའི་གཅེས་པ་རྣམས། ལྷ་སྐུ་རྣམས་ལ་བསྙེན་བཀུར་བྱེད་པ་འཛེམས་ཤིག
1CO 10:15 ངས་བློ་རིག་གསལ་བའི་མི་རྣམས་ལ་སྨྲ་བས། ངས་གང་ཟེར་བ་དེ་བདེན་པ་ཡིན་མིན་ཁྱེད་ཚོས་བརྡར་ཤ་གཅོད་ཅིག
1CO 10:16 གཙོ་བོའི་དྲན་རྟེན་གྱི་ཞལ་ཟས་སྤྱོད་སའི་ཕོར་པ་ལ་བཀའ་དྲིན་ཆེ་ཞུ་བ་དེ་མཱ་ཤི་ཀའི་སྐུ་ཁྲག་དང༌། བག་ལེབ་དུམ་བུར་བགོས་པ་དེ་མཱ་ཤི་ཀའི་སྐུ་གཟུགས་ཐུན་མོང་དུ་ལོངས་སྤྱོད་བྱེད་པ་མ་ཡིན་ནམ།
1CO 10:17 བག་ལེབ་དེ་གཅིག་ཡིན་པས་ང་ཚོ་མི་མང་ཡང་དེ་ལས་མཉམ་དུ་ཟ་བའི་རྐྱེན་གྱིས་ལུས་གཅིག་ཏུ་གཏོགས་པ་ཡིན།
1CO 10:18 ཡི་སི་ར་ཨེལ་པ་རྣམས་ལ་ལྟོས་ཤིག མཆོད་ཁྲིའི་སྟེང་དུ་ཕུལ་བའི་ཞལ་ཟས་ཟ་མཁན་རྣམས་ཀྱིས་དཀོན་མཆོག་དང་ཕན་ཚུན་གྱི་འབྲེལ་བ་ལོངས་སུ་མི་སྤྱོད་དམ།
1CO 10:19 འོ་ན་ངས་ཅི་ཟེར། སྐུ་འདྲ་ལ་གང་མཆོད་པ་ལ་ཕན་པ་ཡོད་པ་ཡིན་ནམ། ཡང་ན་སྐུ་འདྲ་རྣམས་ངོ་མ་ཡིན་ཞེས་ཟེར་རམ།
1CO 10:20 དེ་མ་ཡིན། ངའི་དོན་ནི་སྐུ་འདྲ་ལ་གང་མཆོད་པ་དེ་དཀོན་མཆོག་ལ་མིན་ཏེ་གདོན་འདྲེ་རྣམས་ལ་མཆོད་དོ། ཁྱེད་ཚོ་གདོན་འདྲེ་དང་འབྲེལ་བ་རྣམས་སུ་འགྱུར་བར་མི་འདོད།
1CO 10:21 གཙོ་བོའི་མཆོད་ཞལ་དང་གདོན་འདྲེའི་ཕོར་པ་གཉིས་ཀ་འཐུང་བ་དེ་མི་སྲིད། ཡང་གཙོ་བོའི་དྲན་རྟེན་གྱི་ཞལ་ཟས་དང་གདོན་འདྲེ་ཡི་ཟས་ཟ་བ་དེའང་མི་སྲིད།
1CO 10:22 ཡང་ན་ངེད་རྣམས་ཀྱིས་གཙོ་བོ་ལ་ཐུགས་ཁྲོ་སློང་ངམ། ང་ཚོ་ཁོང་ལས་སྟོབས་ཤུགས་ཆེ་བ་ཡིན་ནམ།
1CO 10:23 ཁྱོད་ཚོས་ཐམས་ཅད་བྱེད་ཆོག་ཅེས་ཟེར་ཡང༌། དེ་ཐམས་ཅད་ཀྱིས་མི་ཕན། ཁྱོད་ཚོས་ཐམས་ཅད་བྱེད་ཆོག་ཅེས་ཟེར་ཡང༌། ཐམས་ཅད་ཀྱིས་ཡར་སྐྱེད་མི་ཡོང༌།
1CO 10:24 རང་དོན་མི་འཚོལ་གྱིས་གཞན་དོན་འཚོལ་ཞིག
1CO 10:25 དྲང་སེམས་རྒྱུ་མཚན་དུ་བྱས་ནས་སྐུ་འདྲ་ལ་མཆོད་པ་ཕུལ་ཡོད་མེད་སྐད་ཆ་མི་འདྲི་བར་ཤ་ཁྲོམ་དུ་གང་ཡང་འཚོང་བ་དེ་ཟ་རུང༌།
1CO 10:26 གང་ལགས་ཟེར་ན། འཇིག་རྟེན་དང་དེར་ཡོད་པ་ཐམས་ཅད་ནི་གཙོ་བོའི་ཡིན་ནོ།
1CO 10:27 གལ་ཏེ་དད་ལྡན་མིན་པ་ཞིག་གིས་ཁྱེད་རྣམས་མགྲོན་ལ་གདན་འདྲེན་ཞུས་ཏེ་འགྲོ་འདོད་ན། དྲང་སེམས་རྒྱུ་མཚན་དུ་བྱས་ནས་སྐད་ཆ་མི་འདྲི་བར་ཁྱེད་ཀྱི་མདུན་དུ་ཟས་གང་ཡང་བཞག་པ་དེ་ཟོ་ཞིག
1CO 10:28 འོན་ཀྱང་གལ་སྲིད་མི་སུ་ཞིག་གིས་ཁྱེད་ཚོར་འདི་ལྷ་ལ་མཆོད་པའི་ཤ་ཡིན་ཞེས་ཟེར་ན་ཁོ་རང་དང་དྲང་སེམས་ཀྱི་ཕྱིར་མ་ཟ་ཞིག
1CO 10:29 ངའི་དོན་ནི་ཁྱེད་ཀྱི་དྲང་སེམས་མིན་ཏེ་མི་གཞན་གྱི་དྲང་སེམས་ཡིན། གང་ཡིན་ཞེ་ན། མི་གཞན་གྱི་དྲང་སེམས་ཀྱིས་ངའི་རང་དབང་ལ་ཅིའི་ཕྱིར་ཚོད་འཛིན་བྱེད།
1CO 10:30 བཀའ་དྲིན་གྱི་ཐོག་ནས་བཟས་ན་ངས་གང་བཀའ་དྲིན་ཆེ་ཞུས་པའི་རྐྱེན་གྱིས་ཅིའི་ཕྱིར་དམའ་འབེབས་གཏོང་བར་འགྱུར།
1CO 10:31 དེ་བས་ན་ཁྱེད་ཚོས་ཟའམ། འཐུང་ངམ། གང་བྱེད་ནའང༌། དཀོན་མཆོག་གི་གཟི་བརྗིད་ཀྱི་ཆེད་དུ་ཐམས་ཅད་བྱོས་ཤིག
1CO 10:32 མི་ཐམས་ཅད་ལ་ཕན་པའི་ཆེད་དུ་ངས་ཐམས་ཅད་བྱེད། ཁོ་ཚོ་ཐར་བའི་ཕྱིར་ངས་རང་དོན་མི་འཚོལ་གྱིས་མང་པོའི་དོན་འཚོལ། དེ་བཞིན་ཁྱེད་ཚོས་ཀྱང་ཡ་ཧུ་དཱ་པ་དང༌། ཡ་ཧུ་དཱ་པ་མིན་པ། དཀོན་མཆོག་གི་ཆོས་ཚོགས་བཅས་ལ་ཕོག་ཐུག་མ་གཏོང་ཞིག །
1CO 11:1 ངས་མཱ་ཤི་ཀ་ལ་དཔེ་ལྟ་བ་ལྟར་ཁྱེད་ཚོས་ཀྱང་ང་ལ་དཔེ་ལྟ་ཞིག
1CO 11:2 དོན་ཐམས་ཅད་དུ་ང་དྲན་ཞིང༌། ངས་ཇི་ལྟར་གཏད་པ་བཞིན་དུ་ལུགས་སྲོལ་སྲུང་བས་ཁྱེད་ཚོར་བསྟོད།
1CO 11:3 ཁྱེད་ཚོས་འདི་རྟོགས་པར་གྱིས་ཤིག མཱ་ཤི་ཀ་ནི་སྐྱེས་པ་རེ་རེའི་དབུ་ཡིན། སྐྱེས་པ་ནི་བུད་མེད་ཀྱི་མགོ་ཡིན། དཀོན་མཆོག་ནི་མཱ་ཤི་ཀའི་དབུ་ཡིན་ནོ།
1CO 11:4 སྐྱེས་པ་སུ་ཞིག་གིས་རང་གི་མགོ་ལ་གང་ཞིག་གྱོན་ནས་སྨོན་ལམ་འདེབས་པའམ་དཀོན་མཆོག་གི་བཀའ་བསྒྲགས་ན་ཁོའི་དབུ་སྟེ་མཱ་ཤི་ཀ་ལ་དམའ་འབེབས་གཏོང༌།
1CO 11:5 འོན་ཀྱང་བུད་མེད་སུ་ཞིག་གིས་རང་གི་མགོ་ལ་གང་ཞིག་མི་གྱོན་པར་སྨོན་ལམ་འདེབས་པའམ་དཀོན་མཆོག་གི་བཀའ་བསྒྲགས་ན་ཁོའི་མགོ་ལ་དམའ་འབེབས་གཏོང༌། གང་ལགས་ཤེ་ན། དེ་ནི་སྐྲ་ཚང་མ་གཞར་བ་དང་གཅིག་པ་ཡིན་པས་སོ།
1CO 11:6 བུད་མེད་ཅིག་གིས་རང་གི་མགོ་ལ་གང་ཞིག་མི་གྱོན་ན་སྐྲ་ཚང་མ་ཡང་འབྲེག་དགོས། འོན་ཀྱང་སྐྲ་འབྲེག་པའམ་གཞར་བ་ནི་ངོ་ཚ་བའི་རྒྱུ་རྐྱེན་ཡིན་པས་རང་གི་མགོ་ལ་གང་རུང་ཞིག་གྱོན་དགོས།
1CO 11:7 སྐྱེས་པ་ནི་དཀོན་མཆོག་གི་དཔེ་དང་གཟི་བརྗིད་ཡིན་པས་དཀོན་མཆོག་ལ་བསྙེན་བཀུར་བྱེད་དུས་མགོ་ལ་གང་ཡང་གྱོན་མི་རུང༌། འོན་ཀྱང་བུད་མེད་ནི་སྐྱེས་པའི་གཟི་བརྗིད་ཡིན།
1CO 11:8 གང་ཡིན་ཞེ་ན། སྐྱེས་པ་བུད་མེད་ལས་མི་འབྱུང་གི བུད་མེད་སྐྱེས་པ་ལས་འབྱུང༌།
1CO 11:9 ཡང་སྐྱེས་པ་ནི་བུད་མེད་ཀྱི་དོན་དུ་མ་བཀོད་ཀྱི། བུད་མེད་སྐྱེས་པའི་དོན་དུ་བཀོད།
1CO 11:10 དེའི་ཕྱིར་དཀོན་མཆོག་གི་ཕོ་ཉ་རྣམས་ཀྱི་དོན་དུ་བུད་མེད་ཀྱི་མགོ་ལ་དབང་འོག་ཏུ་ཚུད་པའི་རྟགས་ཤིག་ཡོད་པར་དགོས།
1CO 11:11 དེ་ལྟར་ཡིན་ཡང་གཙོ་བོའི་ཆ་ནས་བུད་མེད་ནི་སྐྱེས་པ་ལ་མི་རྟེན་པ་མིན་ཞིང༌། སྐྱེས་པ་ནི་བུད་མེད་ལ་མི་རྟེན་པའང་མིན།
1CO 11:12 གང་ཡིན་ཞེ་ན། ཇི་ལྟར་བུད་མེད་སྐྱེས་པ་ལས་འབྱུང་བ་བཞིན། སྐྱེས་པའང་བུད་མེད་ལས་སྐྱེ། འོན་ཀྱང་ཐམས་ཅད་དཀོན་མཆོག་ནས་འབྱུང༌།
1CO 11:13 བུད་མེད་ཀྱིས་རང་གི་མགོ་ལ་གང་ཡང་མི་གྱོན་པར་དཀོན་མཆོག་ལ་སྨོན་ལམ་འདེབས་རུང་ངམ་མི་རུང༌། ཁྱེད་ཚོས་བརྡར་ཤ་གཅོད་ཅིག
1CO 11:14 སྐྱེས་པ་ཞིག་ལ་སྐྲ་རིང་པོ་ཡོད་ན་ཁོ་ལ་སྨད་ཅིང༌།
1CO 11:15 བུད་མེད་ལ་སྐྲ་ནི་མགོ་འགེབས་པའི་ཕྱིར་གནང་བས། བུད་མེད་ལ་སྐྲ་རིང་པོ་ཡོད་ན་ཁོ་མོའི་རྒྱན་ཡིན་པར་བཀོད་པས་ཀྱང་མི་ཤེས་སམ།
1CO 11:16 གལ་ཏེ་སུ་ཞིག་གིས་འདིའི་སྐོར་རྩོད་པར་འདོད་ན། ང་ཚོ་དང་དཀོན་མཆོག་གི་ཆོས་ཚོགས་ལ་ལུགས་སྲོལ་འདི་ལས་གཞན་ཅིའང་མེད་དོ། །
1CO 11:17 ཁྱེད་རྣམས་འཛོམས་ནས་ཕན་འདོགས་མིན་ཏེ་གནོད་པ་འབྱུང་བའི་རྐྱེན་གྱིས་ངས་གཤམ་དུ་ཡོད་པའི་སློབ་སྟོན་བྱེད་དེ་ཁྱེད་ཚོར་མི་བསྟོད།
1CO 11:18 དང་པོ་ནི། ཁྱེད་ཚོ་ཆོས་ཚོགས་མཉམ་དུ་འཛོམ་དུས་ཁྱེད་ཚོའི་ནང་ནས་མི་མཐུན་པའི་ཕྱོགས་ཁག་ཡོད་པར་ཐོས་པས་ངས་ཡིད་ཆེས་ཅུང་ཟད་ཡོད།
1CO 11:19 གང་ཡིན་ཟེར་ན། ཁྱེད་ཚོའི་ནང་ནས་དཀོན་མཆོག་གི་གདེང་འཇོག་འཐོབ་པ་རྣམས་མངོན་སུམ་དུ་འགྱུར་བའི་ཕྱིར་ཁྱེད་ཚོའི་དཀྱིལ་ལ་ཕྱོགས་ཁག་འབྱུང་བར་དགོས།
1CO 11:20 ཁྱེད་ཚོ་འཛོམ་དུས་གཙོ་བོའི་དྲན་རྟེན་གྱི་ཞལ་ཟས་སྤྱོད་པར་མིན།
1CO 11:21 གང་ཡིན་ཞེ་ན། ཟ་བའི་སྐབས་སུ་རེ་རེས་རང་གི་ཟས་གཞན་ལས་སྔར་ཟ་སྟེ། ཁ་ཤས་ལྟོགས། ཁ་ཤས་བཟི།
1CO 11:22 ཁྱོད་ཚོར་ཟ་འཐུང་གི་ཕྱིར་ཁང་པ་མེད་དམ། ཡང་ན་དཀོན་མཆོག་གི་ཆོས་ཚོགས་ལ་མཐོང་ཆུང་བྱེད་དེ་ཅི་ཡང་མེད་པ་རྣམས་ལ་ངོ་ཚ་རུ་འཇུག་གམ། ངས་ཁྱོད་ཚོར་ཅི་སྨྲ་བར་བྱ། ཁྱོད་རྣམས་ལ་བསྟོད་པར་བྱའམ། ངས་དོན་འདིའི་ཕྱིར་ཁྱོད་ཚོར་མི་བསྟོད་དོ།
1CO 11:23 གང་ལགས་ཟེར་ན། ང་ལ་གཙོ་བོ་ནས་གང་ཐོབ་ཅིང་ཁྱེད་རྣམས་ལ་གཏད་པ་དེ་འདི་ལྟར་ཡིན། རྒྱབ་གཏོད་མྱོང་བའི་མཚན་མོར་གཙོ་བོ་ཡེ་ཤུས་བག་ལེབ་ཕྱག་ཏུ་བསྣམས་ཤིང༌།
1CO 11:24 དཀོན་མཆོག་ལ་བཀའ་དྲིན་ཆེ་ཞུས་ཏེ་དུམ་བུར་བགོས་ནས་“འདི་ནི་ངའི་ལུས་ཡིན་ཏེ་ཁྱེད་རྣམས་ཀྱི་དོན་དུ་སྦྱིན་པ་ཡིན། ང་དྲན་པའི་ཕྱིར་འདི་ལྟར་བྱོས་ཤིག་”ཅེས་གསུངས།
1CO 11:25 དེ་བཞིན་དུ་ཞལ་ཟས་བཞེས་པའི་རྗེས་སུ་ཁོང་གིས་ཕོར་པ་ཕྱག་ཏུ་བསྣམས་ཏེ་“ཕོར་པ་འདི་ནི་ངའི་ཁྲག་གིས་བཀོད་པའི་ཞལ་ཆད་གསར་པ་ཡིན། དེ་ག་དུས་འཐུང་ནའང་ང་དྲན་པའི་ཕྱིར་འདི་ལྟར་བྱོས་ཤིག་”ཅེས་གསུངས།
1CO 11:26 གང་ཡིན་ཞེ་ན། ཁྱེད་ཚོས་ག་དུས་བག་ལེབ་དེ་ཟ་ཞིང་ཕོར་པ་དེ་ལས་འཐུང་སྐབས་ཁོང་སླར་མ་ཕེབས་པའི་བར་དུ་གཙོ་བོ་གྲོངས་པ་སྒྲོག་གོ །
1CO 11:27 དེའི་ཕྱིར་མི་འོས་པའི་ཚུལ་དུ་བག་ལེབ་དེ་ཟ་ཞིང༌། ཡང་ན་གཙོ་བོའི་མཆོད་ཞལ་དེ་ལས་འཐུང་བ་དེ་ནི་གཙོ་བོའི་སྐུ་གཟུགས་དང་སྐུ་ཁྲག་ལ་བལྟས་ནས་སྡིག་ཉེས་བྱས་པ་ཡིན།
1CO 11:28 དེས་ན་མི་ཞིག་གིས་རང་གི་སེམས་ལ་ལྟ་ཚོད་ཞིབ་ཕྲ་བྱེད་དགོས། དེ་ནས་བག་ལེབ་དེ་ཟ་ཞིང་ཕོར་པ་དེ་ལས་འཐུང་བར་རུང༌།
1CO 11:29 གང་ལགས་ཤེ་ན། མཱ་ཤི་ཀའི་སྐུ་གཟུགས་ངོས་འཛིན་མི་བྱེད་པར་ཟ་འཐུང་མཁན་ནི་དེ་ལྟར་ཟ་དང་འཐུང་བའི་རྐྱེན་གྱིས་དཀོན་མཆོག་གི་ཁྲིམས་གཅོད་ཁོ་ལ་འཕོག་པར་འགྱུར་ངེས་ཡིན།
1CO 11:30 དེ་བས་ན་ཁྱེད་ཚོའི་ནང་ནས་ལུས་སྟོབས་ཞན་པ་དང༌། ན་བ་མང་པོ་ཡོད་ཅིང༌། ཁ་ཤས་འཆི་བ་ཡང་ཡོད།
1CO 11:31 དེ་ལས་ལྡོག་སྟེ་ང་ཚོས་རང་གི་སེམས་ལ་ལྟ་ཚོད་ཞིབ་ཕྲ་བྱས་ན། ཁྲིམས་གཅོད་འཕོག་པར་མི་འགྱུར།
1CO 11:32 གཙོ་བོས་ང་ཚོར་ཁྲིམས་གཅོད་མཛད་པ་ནི་ང་ཚོ་གཅུན་པའི་ཆེད་དུ་ཡིན། དེ་ནི་འཇིག་རྟེན་པ་དང་མཉམ་དུ་ཆད་པ་མི་འཕོག་པའི་ཕྱིར་རོ།
1CO 11:33 དེའི་ཕྱིར་ངའི་སྤུན་ཟླ་རྣམས། ཁྱེད་ཚོ་གཙོ་བོའི་དྲན་རྟེན་གྱི་ཞལ་ཟས་སྤྱོད་པར་འཛོམ་དུས་ཕན་ཚུན་སྒུག་ཅིག
1CO 11:34 སུ་ཞིག་ལྟོགས་ན་རང་གི་ཁྱིམ་དུ་ཟས་ཟ་དགོས། དེ་ནི་ཁྱེད་ཚོ་འཛོམ་དུས་ཁྲིམས་གཅོད་མི་འཕོག་པའི་ཆེད་དུ་ཡིན། ང་སླེབས་པའི་རྗེས་སུ་དོན་གཞན་གྱི་སྐོར་བསླབ་བྱ་སྟོན་པར་བྱའོ། །
1CO 12:1 སྤུན་ཟླ་རྣམས། དམ་པའི་ཐུགས་ཉིད་ཀྱི་གནང་སྦྱིན་གྱི་སྐོར་ཁྱེད་ཚོས་ཤེས་དགོས།
1CO 12:2 ཁྱེད་རྣམས་སྔར་ལྷ་རྣམས་ལ་དད་པའི་དུས་སུ་ཐབས་གང་གིས་བསླུ་བྲིད་བྱས་ནས་སྨྲ་མི་ཐུབ་པའི་སྐུ་འདྲ་རྣམས་ལ་མཆོད་པ་ཕུལ་བ་དེ་ཁྱེད་ཚོས་ཤེས།
1CO 12:3 དེའི་ཕྱིར་དམ་པའི་ཐུགས་ཉིད་ཀྱི་སྒོ་ནས་སྨྲ་མཁན་སུས་ཀྱང་ཡེ་ཤུར་དམོད་མོ་འདེབས་ཞེས་ཟེར་མི་སྲིད་པ་དང༌། དམ་པའི་ཐུགས་ཉིད་ཀྱི་སྒོ་ནས་སྨྲ་བ་མ་གཏོགས་པར་སུས་ཀྱང་ཡེ་ཤུ་གཙོ་བོ་ཡིན་ཞེས་ཟེར་མི་སྲིད་པ་ངས་ཁྱེད་ཚོར་ཟེར།
1CO 12:4 གནང་སྦྱིན་མི་འདྲ་བ་ཡོད་ཀྱང་དམ་པའི་ཐུགས་ཉིད་ནི་གཅིག་རང་ཡིན།
1CO 12:5 ཡང་ལས་ཚན་གྱི་རིགས་མི་འདྲ་བ་ཡོད་ཀྱང་གཙོ་བོ་གཅིག་རང་ཡིན་ཏེ།
1CO 12:6 འཕྲིན་ལས་མི་འདྲ་བ་ཡོད་ཀྱང་དེ་ཚོ་ཐམས་ཅད་མི་ཀུན་ལ་མཛད་མཁན་དཀོན་མཆོག་རང་ཡིན།
1CO 12:7 ཐམས་ཅད་ལ་ཕན་པའི་ཕྱིར་དམ་པའི་ཐུགས་ཉིད་ཀྱི་གནང་སྦྱིན་མི་རེ་རེར་གནང་བ་ཡིན།
1CO 12:8 དམ་པའི་ཐུགས་ཉིད་ཀྱི་སྒོ་ནས་གཅིག་ལ་ཤེས་རབ་ཀྱི་གཏམ་བརྗོད་པ་དང༌། ཐུགས་ཉིད་དེ་རང་གི་སྒོ་ནས་གཅིག་ལ་རྟོགས་པའི་གཏམ་བརྗོད་པ།
1CO 12:9 ཐུགས་ཉིད་དེ་རང་གི་སྒོ་ནས་གཅིག་ལ་དད་པ། ཐུགས་ཉིད་དེའི་སྒོ་ནས་གཅིག་ལ་ནད་སེལ་བའི་གནང་སྦྱིན།
1CO 12:10 གཅིག་ལ་ངོ་མཚར་བའི་རྟགས་བྱེད་པའི་གནང་སྦྱིན། གཅིག་ལ་ལུང་བསྟན། གཅིག་ལ་སེམས་ཉིད་མི་འདྲ་བ་དབྱེ་བ་འབྱེད་པ། གཅིག་ལ་མི་འདྲ་བའི་སྐད་རིགས་ཤོད་པ། གཅིག་ལ་སྐད་སྒྱུར་བ་བཅས་གནང་བ་ཡིན།
1CO 12:11 དེ་ཚོ་ཐམས་ཅད་ནི་དམ་པའི་ཐུགས་ཉིད་གཅིག་པུ་ཁོ་ན་ཡིས་མཛད་ཅིང༌། ཁོང་གིས་རང་གི་དགོངས་པ་ལྟར་སོ་སོར་བགོད་པ་གནང༌།
1CO 12:12 ལུས་ནི་གཅིག་པོ་ཡིན་ཡང་ཡན་ལག་མང་པོ་ཡོད་དེ། དེའི་ཡན་ལག་མང་པོ་ཡོད་ཀྱང་ལུས་གཅིག་ཁོ་ན་ཡིན་པ་ལྟར། དེ་བཞིན་དུ་མཱ་ཤི་ཀའང་ཡིན།
1CO 12:13 གང་ཡིན་ཟེར་ན། ཡ་ཧུ་དཱ་པ་ཡིན་རུང་མིན་རུང༌། བྲན་གཡོག་ཡིན་རུང་རང་དབང་ཅན་ཡིན་རུང༌། ང་ཚོ་ཐམས་ཅད་དམ་པའི་ཐུགས་ཉིད་གཅིག་པོའི་སྒོ་ནས་ཁྲུས་གསོལ་བླངས་ཏེ་ལུས་གཅིག་གི་ཡན་ལག་ཏུ་གྱུར་བ་མ་ཟད། ཐུགས་ཉིད་གཅིག་པོ་དེ་ཐོབ།
1CO 12:14 ལུས་ལ་ཡན་ལག་གཅིག་མིན་པར་མང་པོ་ཡོད།
1CO 12:15 གལ་སྲིད་རྐང་པས་ང་ལག་པ་མིན་པས་ལུས་ཀྱི་ཡན་ལག་མིན་ཞེས་ཟེར་ན། དེའི་རྐྱེན་གྱིས་ལུས་ཀྱི་ཡན་ལག་མིན་པར་མི་འགྱུར།
1CO 12:16 ཡང་གལ་ཏེ་རྣ་བས་ང་མིག་མིན་པས་ལུས་ཀྱི་ཡན་ལག་མིན་ཞེས་ཟེར་ན། དེའི་རྐྱེན་གྱིས་ལུས་ཀྱི་ཡན་ལག་མིན་པར་མི་འགྱུར།
1CO 12:17 ལུས་ཧྲིལ་པོ་མིག་ཡིན་ན་རྣ་བའི་དབང་པོ་གང་དུ་ཡོད། ལུས་ཧྲིལ་པོ་རྣ་བ་ཡིན་ན་སྣོམ་པའི་དབང་པོ་གང་དུ་ཡོད།
1CO 12:18 འོན་ཀྱང་དཀོན་མཆོག་གིས་རང་གི་དགོངས་པ་ལྟར་ཡན་ལག་རེ་རེ་ལུས་ཀྱི་གནས་སོ་སོར་བཞག་པར་མཛད།
1CO 12:19 དེ་ཚོ་ཐམས་ཅད་ཡན་ལག་གཅིག་པུ་ཡིན་ན་ལུས་གང་དུ་ཡོད།
1CO 12:20 ཡན་ལག་མང་པོ་ཡོད་ཀྱང་ལུས་ནི་གཅིག་ཡིན།
1CO 12:21 མིག་གིས་ལག་པ་ལ། ཡང་ན་མགོ་ཡིས་རྐང་པ་ལ། ང་ལ་ཁྱོད་མི་དགོས་ཞེས་ཟེར་མི་རུང༌།
1CO 12:22 དེ་ལས་ལྡོག་སྟེ་ལུས་ཀྱི་ཡན་ལག་མཐོང་སྣང་ལ་ཞན་པ་རྣམས་མེད་དུ་མི་རུང་བ་ཡིན།
1CO 12:23 ང་ཚོས་སྣང་ཆུང་རྩི་བའི་ཡན་ལག་རྣམས་ལ་ལྷག་པར་རྩི་ཞིང༌། ངོ་ཚ་ཡོད་པའི་ཡན་ལག་རྣམས་ལ་ལྷག་པར་གོས་ཀྱིས་རྒྱན།
1CO 12:24 ཡན་ལག་བསྟན་འོས་པ་རྣམས་ལ་དེ་མི་དགོས། དཀོན་མཆོག་གིས་ལུས་ཀྱི་ཡན་ལག་སྒྲིག་པར་མཛད་དེ། ཡན་ལག་དམན་པ་ལ་བཀུར་སྟི་ལྷག་པར་གནང༌།
1CO 12:25 དེ་ནི་ལུས་ལ་མི་མཐུན་པ་མེད་པར་ཡན་ལག་རྣམས་ཀྱིས་གཅིག་གིས་གཅིག་ལ་སེམས་ཁུར་བྱེད་པའི་ཆེད་དུ་ཡིན།
1CO 12:26 ཡན་ལག་གཅིག་སྡུག་བསྔལ་མྱོང་ན་ཡན་ལག་ཐམས་ཅད་མཉམ་དུ་སྡུག་བསྔལ་མྱོང༌། ཡན་ལག་གཅིག་ལ་བཀུར་སྟི་བྱས་ན་ཐམས་ཅད་ཀྱིས་མཉམ་དུ་དགའ་བར་བྱེད།
1CO 12:27 ཁྱེད་ཚོ་ནི་མཱ་ཤི་ཀའི་སྐུ་གཟུགས་ཡིན་ཏེ། རེ་རེ་དེའི་ཡན་ལག་ཡིན་ནོ།
1CO 12:28 དཀོན་མཆོག་གིས་ཆོས་ཚོགས་ཀྱི་ནང་ལ་དང་པོ་སྐུ་ཚབ། གཉིས་པ་ལུང་སྟོན་པ། གསུམ་པ་སློབ་དཔོན། ངོ་མཚར་བའི་རྟགས་སྒྲུབ་མཁན། ནད་སེལ་བའི་གནང་སྦྱིན་དང་ལྡན་པ། རོགས་བྱེད་པ། འགོ་འཛིན་པ། མི་འདྲ་བའི་སྐད་རིགས་ཤོད་མཁན་བཅས་བཀོད་པར་མཛད།
1CO 12:29 ཐམས་ཅད་སྐུ་ཚབ་ཡིན་ནམ། ཐམས་ཅད་ལུང་སྟོན་པ་ཡིན་ནམ། ཐམས་ཅད་སློབ་དཔོན་ཡིན་ནམ། ཐམས་ཅད་ཀྱིས་ངོ་མཚར་བའི་རྟགས་བྱེད་མཁན་ཡིན་ནམ།
1CO 12:30 ཐམས་ཅད་ལ་ནད་སེལ་བའི་གནང་སྦྱིན་ཡོད་དམ། ཐམས་ཅད་ལ་སྐད་རིགས་གཞན་ཤོད་པའི་གནང་སྦྱིན་དང༌། ཡང་ན་སྐད་སྒྱུར་བའི་གནང་སྦྱིན་ཡོད་དམ།
1CO 12:31 འོན་ཀྱང་གནང་སྦྱིན་ཆེ་བ་རྣམས་ལ་འབད་རྩོལ་གྱིས་ཤིག ད་ངས་ཁྱེད་རྣམས་ལ་བླ་ན་མེད་པའི་ལམ་སྟོན་པར་བྱའོ། །
1CO 13:1 གལ་ཏེ་ངས་མི་དང་དཀོན་མཆོག་གི་ཕོ་ཉ་རྣམས་ཀྱི་སྐད་རིགས་སུ་གཏམ་བྱས་ཀྱང་བྱམས་སེམས་མེད་ན། ང་ནི་སྒྲ་སྐད་ཆེ་བའི་འཁར་རྔ་དང༌། ཡང་ན་འཁྲོལ་བའི་སྦུབ་ཆལ་དང་འདྲ།
1CO 13:2 གལ་སྲིད་ང་ལ་ལུང་བསྟན་པའི་གནང་སྦྱིན་ཡོད་ཅིང་གསང་བ་དང་ཤེས་བྱ་ཐམས་ཅད་རྟོགས་ལ། རི་བོ་སྤོ་ནུས་པའི་དད་པ་ཀུན་དང་ལྡན་ཡང༌། བྱམས་སེམས་མེད་ན། ང་ནི་ཅིའང་མིན།
1CO 13:3 གལ་ཏེ་དབུལ་པོ་རྣམས་ལ་ངའི་རྒྱུ་ནོར་ཐམས་ཅད་སྦྱིན་ཞིང༌། ངའི་ལུས་སྲོག་གསོན་སྲེག་བཏང་ནའང༌། བྱམས་སེམས་མེད་ན། ང་ལ་ཅིའང་མི་ཕན།
1CO 13:4 བྱམས་པ་ནི་བཟོད་པ་དང་བཀའ་དྲིན་ལྡན་པ། ཕྲག་དོག་མེད་པ། རང་བསྟོད་མེད་པ། ང་རྒྱལ་མེད་པ།
1CO 13:5 མ་རབས་མེད་པ། རང་དོན་མི་འཚོལ་བ། སུན་སྣང་མི་སྐྱེ་བ། འཁོན་འཛིན་མི་འཆང་བ།
1CO 13:6 དྲང་བདེན་མིན་པ་ལ་མི་དགའ་སྟེ་བདེན་པ་ལ་དགའ་བ།
1CO 13:7 དོན་ཐམས་ཅད་ལ་བཟོད་པ། དོན་ཐམས་ཅད་ལ་ཡིད་ཆེས་པ། དོན་ཐམས་ཅད་ལ་རེ་བ་བྱེད་པ། དོན་ཐམས་ཅད་ལ་སྡུག་རུས་བྱེད་པ་ཞིག་ཡིན་ནོ། །
1CO 13:8 བྱམས་པ་ལ་རྫོགས་པའི་མཐའ་མེད་ཀྱང༌། ལུང་བསྟན་མེད་པར་འགྱུར། སྐད་རིགས་གཞན་ཤོད་པའི་གནང་སྦྱིན་འགག་པར་འགྱུར། ཤེས་བྱ་མེད་པར་འགྱུར་རོ།
1CO 13:9 གང་ཡིན་ཞེ་ན། ང་ཚོས་ཆ་ཤས་ཙམ་ཤེས་ཤིང་ཆ་ཤས་ཙམ་ལུང་དུའང་སྟོན།
1CO 13:10 འོན་ཀྱང་ཡོངས་སུ་རྫོགས་པ་དེ་འོང་བའི་ཚེ་མ་ཚང་བ་མེད་པར་འགྱུར།
1CO 13:11 བྱིས་པའི་དུས་སུ་ངའི་གཏམ་དང༌། བློ་གྲོས། བསམ་པ་བྱིས་པ་ལྟར་ཡིན་ལ། དར་མར་གྱུར་བའི་ཚེ་ངས་བྱིས་པའི་སྤྱོད་ཚུལ་སྤངས།
1CO 13:12 དེ་ལྟར་ད་ལྟ་ང་ཚོས་རབ་རིབ་མེ་ལོང་ལ་ལྟ་བ་ལྟར་གསལ་པོ་མི་མཐོང་ཡང༌། ཕྱིས་སུ་གདོང་གཏུགས་ནས་མཐོང༌། ད་ལྟ་ངས་ཆ་ཤས་ཙམ་ལས་མི་ཤེས་ནའང༌། ཕྱིས་སུ་དཀོན་མཆོག་གིས་ང་ཡོངས་སུ་མཁྱེན་པ་ལྟར་ངས་ཀྱང་ཤེས།
1CO 13:13 མདོར་ན། དད་པ་དང༌། རེ་བ། བྱམས་པ་གསུམ་པོ་གནས་ཡོད་ཀྱང༌། དེ་ཚོའི་ནང་ནས་མཆོག་ཏུ་གྱུར་བ་ནི་བྱམས་པའོ། །
1CO 14:1 བྱམས་སེམས་ཀྱི་ལས་ལ་འབད་རྩོལ་བྱོས་ཤིང༌། དམ་པའི་ཐུགས་ཉིད་ཀྱི་གནང་སྦྱིན་རྣམས་ལ་འབད་རྩོལ་གྱིས། ཁྱད་པར་དུ་ལུང་བསྟན་པའི་གནང་སྦྱིན་དེ་རྩོལ་ཤིག
1CO 14:2 གང་ལགས་ཟེར་ན། སྐད་རིགས་གཞན་ཤོད་པའི་གནང་སྦྱིན་ཡོད་པ་དེས་མི་རྣམས་ལ་མིན་ཏེ་དཀོན་མཆོག་ལ་སྨྲ། ཁོས་དམ་པའི་ཐུགས་ཉིད་ཀྱི་སྒོ་ནས་གསང་བ་སྨྲ་བས་སུས་ཀྱང་ཁོའི་གཏམ་མི་གོ
1CO 14:3 འོན་ཀྱང་ལུང་བསྟན་ཤོད་པ་དེས་མི་རྣམས་ལ་ཡར་སྐྱེད་དང༌། སྐུལ་ལྕག སེམས་གསོ་བའི་གཏམ་སྨྲ།
1CO 14:4 སྐད་རིགས་གཞན་ཤོད་པའི་གནང་སྦྱིན་ཡོད་པ་དེས་རང་ཉིད་ཡར་སྐྱེད་གཏོང༌། འོན་ཀྱང་ལུང་བསྟན་ཤོད་པ་དེས་ཆོས་ཚོགས་ཡར་སྐྱེད་གཏོང༌།
1CO 14:5 ཁྱེད་ཚོ་ཚང་མ་ལ་སྐད་རིགས་གཞན་ཤོད་པའི་གནང་སྦྱིན་ཡོད་པ་ང་དགའ་ཡང༌། དེ་ལས་ཁྱེད་ཚོས་ལུང་བསྟན་པ་ལ་ང་ལྷག་པར་དགའ། སྐད་རིགས་གཞན་ཤོད་མཁན་དེས་ཆོས་ཚོགས་ཡར་སྐྱེད་གཏོང་བའི་ཕྱིར་སྐད་དེ་གཞན་གྱིས་མ་བསྒྱུར་ན། ཁོ་ལས་ལུང་དུ་སྟོན་མཁན་ཆེའོ། །
1CO 14:6 འོ་ན་སྤུན་ཟླ་རྣམས། གལ་ཏེ་ང་ཁྱེད་ཚོའི་རྩར་ཡོང་ནས་སྐད་རིགས་གཞན་བཤད་ན། གསང་བའམ། ཤེས་རབ་བམ། ལུང་བསྟན་ནམ། བསླབ་བྱ་མ་བསྟན་ན་ཁྱེད་ཚོར་ཅི་ཕན།
1CO 14:7 དཔེར་ན་གླིང་བུའམ། སྒྲ་སྙན་ལ་སོགས་པའི་རོལ་ཆ་སེམས་མེད་རྣམས་ཀྱི་སྒྲ་གདངས་གསལ་པོ་མེད་ན། རོལ་དབྱངས་གང་ཞིག་འཁྲོལ་བ་དེ་ཅི་ལྟར་ཤེས།
1CO 14:8 ཡང་དམག་དུང་གི་སྐད་གསལ་པོ་མ་བཏང་ན་དམག་འཐབ་པར་སུས་གྲ་སྒྲིག་བྱེད།
1CO 14:9 དེ་བཞིན་དུ་ཁྱེད་ཚོས་ཁ་ཡིས་གོ་དོན་རྟོགས་པའི་གཏམ་མ་བཤད་ན། གཏམ་གྱི་དོན་ཅི་ལྟར་ཤེས། བར་སྣང་ལ་གཏམ་བྱེད་པ་ལྟར་ཡིན།
1CO 14:10 འཇིག་རྟེན་ལ་སྐད་རིགས་འདྲ་མིན་མང་པོ་ཡོད་ཀྱང༌། དོན་མེད་པའི་སྐད་རིགས་གཅིག་ཀྱང་མེད།
1CO 14:11 གལ་ཏེ་ངས་སྐད་ཀྱི་དོན་མ་ཤེས་ན། སྐད་ཤོད་མཁན་གྱི་ཆ་ནས་ང་ཕྱི་རྒྱལ་པ་ཡིན་ཞིང༌། ངའི་ཆ་ནས་ཁོ་ཡང་ཕྱི་རྒྱལ་པ་ཡིན།
1CO 14:12 མདོར་ན་ཁྱེད་ཚོས་དམ་པའི་ཐུགས་ཉིད་ཀྱི་གནང་སྦྱིན་རྣམས་ཧུར་བརྩོན་འཚོལ་བས། ཆོས་ཚོགས་ཡར་སྐྱེད་གཏོང་བའི་གནང་སྦྱིན་བརྩོན་ལེན་གྱིས་ཤིག
1CO 14:13 དེའི་ཕྱིར་སྐད་རིགས་གཞན་ཤོད་པའི་གནང་སྦྱིན་ཡོད་པ་དེས་སྐད་སྒྱུར་ནུས་པའི་གནང་སྦྱིན་ཐོབ་པར་སྨོན་ལམ་འདེབས་དགོས།
1CO 14:14 གལ་སྲིད་སྐད་རིགས་གཞན་ཐོག་ནས་སྨོན་ལམ་བཏབ་ན། སེམས་ཉིད་ཀྱིས་སྨོན་ལམ་འདེབས་ཀྱང༌། ངའི་བློ་གྲོས་ལ་ཕན་པའི་འབྲས་བུ་མེད།
1CO 14:15 འོ་ན་ཅི་ལྟར་བྱ། ངས་སེམས་ཉིད་དང་བློ་གྲོས་གཉིས་པོས་སྨོན་ལམ་འདེབས་ཤིང༌། སེམས་ཉིད་དང་བློ་གྲོས་གཉིས་པོས་མགུར་གླུ་ལེན་པར་བྱ།
1CO 14:16 དེ་ལྟར་མ་བྱས་ན་སེམས་ཉིད་ཀྱིས་དཀོན་མཆོག་ལ་བསྟོད་པ་ཕུལ་ན། གནང་སྦྱིན་དེ་དང་མི་ལྡན་པས་ཁྱོད་ཀྱི་གཏམ་མི་ཤེས་ཏེ་ཁྱོད་ཀྱི་བཀའ་དྲིན་གྱི་རྗེས་སུ་ཨ་མེན་ཞེས་ཅི་ལྟར་ཟེར།
1CO 14:17 ཁྱོད་ཀྱིས་བཀའ་དྲིན་ལེགས་པར་ཞུ་ཡང༌། གཞན་པ་དེ་ལ་ཡར་སྐྱེད་མི་ཡོང༌།
1CO 14:18 ཁྱེད་ཚོ་ཐམས་ཅད་ལས་ངས་ལྷག་པར་སྐད་རིགས་གཞན་ཤོད་པས་དཀོན་མཆོག་ལ་བཀའ་དྲིན་ཞུ།
1CO 14:19 འོན་ཀྱང་ཆོས་ཚོགས་ཀྱི་ནང་ན་སྐད་རིགས་གཞན་གྱི་ཚིག་ཁྲི་སྨྲ་བ་ལས། མི་གཞན་ལ་བསླབ་བྱ་སྟོན་པའི་ཕྱིར་བློ་གྲོས་ཀྱིས་ཚིག་ལྔ་སྨྲ་བར་ང་ལྷག་པར་དགའོ། །
1CO 14:20 སྤུན་ཟླ་རྣམས། བསམ་བློའི་ཆ་ནས་བྱིས་པ་ལྟར་མུ་མཐུད་མ་བྱོས་ཤིག དེ་ལས་ལྡོག་སྟེ་ངན་པའི་ཐོག་ལ་བྱིས་པར་འགྱུར་ལ། བསམ་བློའི་ཆ་ནས་དར་མར་འགྱུར་ཞིག
1CO 14:21 གསུང་རབ་ཀྱི་མདོ་ལས། སྐད་རིགས་གཞན་དང་ཕྱི་པའི་ཁ་ཡིས་ནི། ། ང་ཡི་མི་སྡེ་རྣམས་ལ་བརྗོད་འགྱུར་ཀྱང༌། ། ཁོ་ཚོས་མི་ཉན་ནོ་ཞེས་གཙོ་བོས་གསུངས། ། ཞེས་འཁོད།
1CO 14:22 དེ་བས་ན་སྐད་རིགས་གཞན་སྨྲ་བའི་གནང་སྦྱིན་ནི་དད་ལྡན་ལ་མིན་ཏེ་དད་མེད་པ་རྣམས་ཀྱི་ཆེད་དུ་རྟགས་ཤིག་ཡིན། འོན་ཀྱང་ལུང་བསྟན་པ་ནི་དད་མེད་པ་ལ་མིན་ཏེ་དད་ལྡན་རྣམས་ཀྱི་ཕྱིར་རྟགས་ཤིག་ཡིན།
1CO 14:23 དེར་བརྟེན་ཆོས་ཚོགས་ཧྲིལ་པོ་འཛོམ་དུས་ཐམས་ཅད་ཀྱིས་སྐད་རིགས་གཞན་བཤད་ན། དེའི་དོན་མི་རྟོགས་པའམ། དད་མེད་པ་རྣམས་ཡོང་ན། དེ་ཚོས་ཁྱེད་ཚོ་སྨྱོ་བ་ཡིན་པར་མི་སྨྲའམ།
1CO 14:24 འོན་ཀྱང་གལ་སྲིད་ཐམས་ཅད་ཀྱིས་ལུང་བསྟན་དུས་དད་མེད་པའམ་དོན་མི་རྟོགས་པ་ཞིག་དེར་སླེབས་ན། ཐམས་ཅད་ཀྱིས་ཁོའི་སྡིག་པའི་སྐྱོན་གསལ་པོར་སྟོན་ཞིང༌། ཁྲིམས་གཅོད་བྱེད་དེ།
1CO 14:25 སེམས་ཀྱི་གསང་བ་མངོན་པར་འགྱུར་བས། མི་དེས་ཕྱག་འཚལ་ནས་དཀོན་མཆོག་ལ་བསྙེན་བཀུར་ཞུ་ཞིང༌། ཁོས་དཀོན་མཆོག་ཁྱེད་ཚོའི་ཁྲོད་དུ་ངེས་པར་བཞུགས་ཞེས་ཟེར་འོང༌།
1CO 14:26 འོ་ན་སྤུན་ཟླ་རྣམས། ཅི་བྱ་ཞེ་ན། ཁྱེད་ཚོ་འཛོམ་པའི་དུས་སུ་གཅིག་ལ་མགུར་གླུ། གཅིག་ལ་བསླབ་བྱ། གཅིག་ལ་གསང་བ་མངོན་པར་གསལ་བ། གཅིག་གིས་སྐད་རིགས་གཞན་ཤོད་པ། གཅིག་ལ་བསྒྱུར་འགྲེལ་བཅས་ཡོད། དེ་ཐམས་ཅད་ཆོས་ཚོགས་ཡར་སྐྱེད་གཏོང་བའི་ཆེད་དུ་བྱེད་དགོས།
1CO 14:27 མི་གཉིས་སམ། མང་ཤོས་གསུམ་གྱིས་རེ་མོས་བྱེད་དེ་སྐད་རིགས་གཞན་ཤོད་ཆོག གཅིག་གིས་ངེས་པར་དུ་སྒྱུར་དགོས།
1CO 14:28 སྐད་སྒྱུར་མཁན་མེད་ན། ཁོ་ཚོས་ཆོས་ཚོགས་ཀྱི་ནང་དུ་ཁ་ཁུ་སིམ་པོར་སྡོད་དེ་རང་ཉིད་སོ་སོ་དང་དཀོན་མཆོག་ལ་སྨྲ་དགོས།
1CO 14:29 ལུང་སྟོན་པ་གཉིས་གསུམ་གྱིས་སྨྲ་ཆོག གཞན་གྱིས་སྨྲ་བའི་དོན་དཔྱོད་དགོས།
1CO 14:30 གལ་ཏེ་དེར་སྡོད་པའི་མི་གཞན་ལ་གང་ཞིག་མངོན་པར་གྱུར་ན། དང་པོ་དེ་ཁ་ཁུ་སིམ་པོར་སྡོད་དགོས།
1CO 14:31 གང་ལགས་ཤེ་ན། ཁྱེད་ཚོ་ཐམས་ཅད་ཀྱིས་རེ་མོས་བྱས་ནས་ལུང་དུ་སྟོན་ཐུབ། དེ་ནི་ཐམས་ཅད་ལ་སློབ་ཅིང་སྐུལ་བར་འགྱུར་བའི་ཆེད་དུ་ཡིན།
1CO 14:32 ལུང་སྟོན་པའི་སེམས་ཉིད་རྣམས་ནི་ལུང་སྟོན་པའི་དབང་འོག་ཏུ་ཡོད།
1CO 14:33 གང་ཡིན་ཞེ་ན། དཀོན་མཆོག་ནི་ཟང་ཟིང་མིན་ཏེ་ཞི་བདེའི་དཀོན་མཆོག་ཡིན་ནོ། ། དཀོན་མཆོག་གི་མི་རྣམས་ཀྱི་ཆོས་ཚོགས་ཐམས་ཅད་ཀྱི་ལག་ལེན་འདི་ལྟར་ཏེ།
1CO 14:34 བུད་མེད་རྣམས་ཆོས་ཚོགས་སུ་ཁ་ཁུ་སིམ་པོར་སྡོད་དགོས། ཁོང་ཚོ་སྨྲ་བར་མི་ཆོག་སྟེ། ལུང་སྟོན་པ་མོ་ཤེའི་ཆོས་ཁྲིམས་ཀྱིས་ཀྱང་གསུངས་པ་བཞིན་དུ་ཁོང་རྣམས་དབང་འོག་ཏུ་ཡོད་དགོས།
1CO 14:35 བུད་མེད་ཅིག་གིས་ཆོས་ཚོགས་སུ་སྨྲ་བར་ངོ་གནོང་བའི་རྒྱུ་རྐྱེན་ཡིན་པས། ཇི་ཞིག་ཤེས་པར་འདོད་ན་ཁྱིམ་དུ་རང་གི་ཁྱོ་ལ་འདྲི་དགོས།
1CO 14:36 དཀོན་མཆོག་གི་བཀའ་ཁྱོད་རྣམས་ནས་བྱུང་བ་ཡིན་ནམ། ཡང་ན་ཁྱོད་རྣམས་འབའ་ཞིག་ལ་སླེབས་སམ།
1CO 14:37 སུ་ཞིག་གིས་རང་ལུང་སྟོན་པའམ་ཐུགས་ཉིད་ཀྱི་གནང་སྦྱིན་དང་ལྡན་པ་ཞིག་ཡིན་སྙམ་ན། ངས་ཁྱེད་ཚོར་བྲིས་པ་ནི་གཙོ་བོའི་བཀའ་ཡིན་པར་ཁོས་ཁས་ལེན་བྱེད་དགོས།
1CO 14:38 འོན་ཀྱང་དེ་ཁས་ལེན་མི་བྱེད་པ་ནི་ཁས་ལེན་མི་བྱེད་པར་འགྱུར།
1CO 14:39 དེའི་ཕྱིར་ངའི་སྤུན་ཟླ་རྣམས། ལུང་བསྟན་པ་བརྩོན་ལེན་བྱེད་ཅིང༌། སྐད་རིགས་གཞན་ཤོད་པ་མ་འགོག
1CO 14:40 དོན་ཐམས་ཅད་འོས་འཚམས་དང༌། གོ་རིམ་ལྡན་པའི་སྒོ་ནས་བྱེད་དགོས་སོ། །
1CO 15:1 སྤུན་ཟླ་རྣམས། ངས་ཁྱེད་ཚོར་སྔར་བསྒྲགས་པའི་འཕྲིན་བཟང་ཁྱེད་རྣམས་ལ་དྲན་སྐུལ་བྱེད་པར་འདོད། འཕྲིན་བཟང་དེ་ཁྱེད་ཚོས་དང་ལེན་བྱས་ཤིང༌། དེ་ལ་བརྟན་པོར་ཡང་གནས།
1CO 15:2 ངས་ཁྱེད་ཚོར་བསྒྲགས་པའི་འཕྲིན་བཟང་ལ་བརྟན་པོར་གནས་ན་དེའི་སྒོ་ནས་ཁྱེད་རྣམས་ཐར་བར་འགྱུར། དེ་མིན་ཁྱེད་ཚོས་དོན་མེད་དུ་དད་པ་བྱས།
1CO 15:3 ང་ལ་ཐོབ་ནས་གལ་ཆེ་ཤོས་གང་ཡིན་པ་ལྟར་ཁྱེད་རྣམས་ལ་གཏད་པ་ནི་འདི་ལྟར་ཡིན། གསུང་རབ་བཞིན་དུ་ང་ཚོའི་སྡིག་ཉེས་ཀྱི་ཕྱིར་མཱ་ཤི་ཀ་གྲོངས་ཏེ།
1CO 15:4 དུར་དུ་བཅུག་ནས་གསུང་རབ་ལ་བྲིས་པ་ལྟར་ཉིན་གསུམ་པར་ཁོང་སླར་སྐུ་གསོན་པོར་བཞེངས་སུ་གྱུར།
1CO 15:5 ཡང་ཁོང་ཀེ་ཕཱ་དང༌། དེ་ནས་བཅུ་གཉིས་པོ་ལ་མངོན་སུམ་དུ་གྱུར་ནས།
1CO 15:6 སྤུན་ཟླ་ལྔ་བརྒྱ་ལས་མང་བ་ལ་དུས་གཅིག་ཏུ་མངོན་པར་གྱུར། ཁོང་ཚོ་ལས་ཁ་ཤས་གྲོངས་ཀྱང༌། མང་ཆེ་བ་ད་ལྟའི་བར་དུ་གསོན་པོར་གནས།
1CO 15:7 དེ་ནས་ཡ་ཀོབ་དང༌། དེའི་རྗེས་སུ་སྐུ་ཚབ་ཐམས་ཅད་ལ་མངོན་པར་གྱུར།
1CO 15:8 ཡང་ཁོང་ཚོ་ཐམས་ཅད་ཀྱི་རྗེས་སུ། དུས་མ་རན་པའི་སྐྱེ་བ་དང་འདྲ་བའི་ང་ལའང་མངོན་པར་གྱུར།
1CO 15:9 དཀོན་མཆོག་གི་ཆོས་ཚོགས་ལ་མནར་གཅོད་བྱས་པས་ང་ནི་སྐུ་ཚབ་རྣམས་ལས་དམའ་ཤོས་ཡིན་ཞིང༌། སྐུ་ཚབ་ཅེས་ཟེར་བར་མི་འོས།
1CO 15:10 འོན་ཀྱང་དཀོན་མཆོག་གི་ཐུགས་རྗེའི་སྒོ་ནས་ང་འདི་ལྟར་ཡིན་ཞིང༌། ཁོང་གིས་ང་ལ་གནང་བའི་ཐུགས་རྗེ་དེ་དོན་མེད་པར་མ་གྱུར་གྱིས། ཁོང་ཚོ་ཐམས་ཅད་ལས་ངས་ལྷག་པར་དཀའ་ལས་བརྒྱབ། ང་རང་གིས་མ་བརྒྱབ་སྟེ། ང་དང་འགྲོགས་པའི་དཀོན་མཆོག་གི་ཐུགས་རྗེས་མཛད།
1CO 15:11 འོ་ན་ངའམ། ཁོང་ཚོ་ཡིན་རུང༌། ངེད་རྣམས་ཀྱིས་དེ་ལྟར་སྒྲོག་ཅིང༌། ཁྱེད་ཚོས་དེ་ལྟར་དད་པ་བྱས།
1CO 15:12 མཱ་ཤི་ཀ་འཆི་བ་ནས་སྐུ་གསོན་པོར་གྱུར་བ་བསྒྲགས་ན། ཁྱོད་ཚོའི་ནང་ནས་ཁ་ཤས་ཀྱིས་འཆི་བ་ནས་སླར་གསོན་དུ་འགྱུར་མེད་པ་དེ་ཅི་ལྟར་ཟེར།
1CO 15:13 འཆི་བ་ནས་སླར་གསོན་པ་མེད་ན། མཱ་ཤི་ཀའང་འཆི་བ་ནས་སྐུ་གསོན་པོར་བཞེངས་སུ་མ་གྱུར།
1CO 15:14 ཡང་མཱ་ཤི་ཀ་སྐུ་གསོན་པོར་བཞེངས་སུ་མ་གྱུར་ན། ང་ཚོས་གང་སྒྲོག་པ་དང༌། ཁྱོད་ཚོའི་དད་པ་གཉིས་ནི་དོན་མེད་ཡིན།
1CO 15:15 དེ་མ་ཟད་འཆི་བ་ནས་སླར་གསོན་པ་མེད་ན། དཀོན་མཆོག་གིས་མཱ་ཤི་ཀ་སྐུ་གསོན་པོར་བཞེངས་སུ་མ་མཛད་ཅིང༌། ཁོང་སྐུ་གསོན་པོར་བཞེངས་སུ་གྱུར་བ་བཤད་པས་ང་ཚོ་དཀོན་མཆོག་ལ་རྫུན་གྱི་དཔང་པོ་བྱེད་མཁན་དུ་འགྱུར།
1CO 15:16 གང་ཡིན་ཞེ་ན། འཆི་བ་ནས་སླར་གསོན་པ་མེད་ན་མཱ་ཤི་ཀའང་འཆི་བ་ནས་སླར་གསོན་དུ་མ་གྱུར།
1CO 15:17 ཡང་མཱ་ཤི་ཀ་སླར་གསོན་དུ་མ་གྱུར་ན་ཁྱོད་ཚོའི་དད་པ་སྟོང་པ་ཡིན་ལ། ད་དུང་སྡིག་ཉེས་ཀྱི་ནང་དུ་གནས།
1CO 15:18 དེ་ལྟར་ཡིན་ན་མཱ་ཤི་ཀ་ལ་དད་དེ་གྲོངས་པ་རྣམས་འཇིག་པར་གྱུར།
1CO 15:19 གལ་ཏེ་ཚེ་འདི་འབའ་ཞིག་གི་ཕྱིར་མཱ་ཤི་ཀ་ལ་རེ་བ་བྱས་ན། མི་ཐམས་ཅད་ལས་ང་ཚོ་སྡུག་གོ །
1CO 15:20 འོན་ཀྱང་མཱ་ཤི་ཀ་དངོས་གནས་འཆི་བ་ནས་སླར་གསོན་པོར་གྱུར་བས། ཁོང་ནི་གཤིན་པོ་རྣམས་ལས་སླར་གསོན་དུ་འགྱུར་བ་རྣམས་ནས་དང་པོ་ཡིན།
1CO 15:21 མི་གཅིག་ནས་འཆི་བ་བྱུང་བས། མི་གཅིག་ནས་འཆི་བ་ནས་སླར་གསོན་པོར་འགྱུར་བ་དེའང་བྱུང༌།
1CO 15:22 ཨ་དམ་གྱི་སྒོ་ནས་མི་ཚང་མ་འཆི་བ་ལྟར། མཱ་ཤི་ཀའི་སྒོ་ནས་མི་ཚང་མ་གསོན་པོར་མཛད་པར་འགྱུར།
1CO 15:23 འོན་ཀྱང་དེ་ནི་རིམ་པ་བཞིན་དུ་འབྱུང༌། ལོ་ཏོག་གི་ཕུད་དང་པོ་དེ་མཱ་ཤི་ཀ་ཡིན་ཞིང༌། དེ་ནས་ཁོང་སླར་ཕེབས་པའི་སྐབས་སུ་ཁོང་གི་ཁོངས་སུ་གཏོགས་པ་རྣམས་འཆི་བ་ནས་སླར་གསོན་པོར་འགྱུར།
1CO 15:24 དེ་ནས་མངའ་ཐང་དང༌། དབང་དང༌། མཐུ་གང་ཡོད་པ་མེད་པར་མཛད་རྗེས་ཁོང་གིས་ཡབ་དཀོན་མཆོག་ལ་རྒྱལ་སྲིད་གཏད་པར་གནང་ནས་དུས་ཀྱི་མཐའ་མ་འོང་བར་འགྱུར།
1CO 15:25 ཡང་མཱ་ཤི་ཀས་དགྲ་བོ་ཐམས་ཅད་ཁོང་གི་ཞབས་འོག་ཏུ་མ་འཇུག་པའི་བར་དུ་ཁོང་གིས་དབང་སྒྱུར་དགོས།
1CO 15:26 མེད་པར་མཛད་རྒྱུ་ཡིན་པའི་དགྲ་བོ་མཐའ་མ་ནི་འཆི་བ་ཡིན།
1CO 15:27 གང་ལགས་ཤེ་ན། དཀོན་མཆོག་གིས་དོན་ཐམས་ཅད་མཱ་ཤི་ཀའི་ཞབས་འོག་ཏུ་བཅུག་པར་མཛད། འོན་ཀྱང་གསུང་རབ་ནང་དོན་ཐམས་ཅད་དབང་འོག་ཏུ་འཇུག་པར་གྱུར་ཞེས་འཁོད་པའི་ཐམས་ཅད་ཅེས་པ་ནི་མཱ་ཤི་ཀའི་དབང་འོག་ཏུ་འཇུག་མཁན་དཀོན་མཆོག་རང་ཉིད་མ་གཏོགས་པ་གསལ་པོ་ཡིན།
1CO 15:28 དཀོན་མཆོག་གིས་ཐམས་ཅད་མཱ་ཤི་ཀའི་དབང་འོག་ཏུ་འཇུག་པར་མཛད་ནས་སྲས་མཱ་ཤི་ཀ་རང་ཉིད་ཐམས་ཅད་དབང་འོག་ཏུ་འཇུག་མཁན་དཀོན་མཆོག་གི་དབང་འོག་ཏུ་འཇུག་པར་འགྱུར། དེ་ནི་དཀོན་མཆོག་ཡོད་ཚད་ཀྱི་ཡོད་ཚད་ཡིན་པའི་ཕྱིར་རོ།
1CO 15:29 དེ་མིན་གཤིན་པོའི་དོན་ལ་ཁྲུས་གསོལ་ལེན་པ་རྣམས་ཀྱིས་ཅི་བྱེད་པར་འགྱུར། གཤིན་པོ་སླར་གསོན་པོར་མཛད་མི་སྲིད་ན་ཁོ་ཚོས་ཅིའི་ཕྱིར་གཤིན་པོའི་དོན་ལ་ཁྲུས་གསོལ་ལེན།
1CO 15:30 ཡང་ང་ཚོ་ནི་ཆུ་ཚོད་རེ་བཞིན་རང་ལ་སྲོག་ཉེན་བཟོ་བའི་དོན་ཅི་ཡིན།
1CO 15:31 སྤུན་ཟླ་རྣམས། མཱ་ཤི་ཀ་ཡེ་ཤུ་ང་ཚོའི་གཙོ་བོ་བརྒྱུད་ནས་ཁྱེད་ཚོ་ངའི་སྤོབས་པ་ཡིན་ངེས་པ་ལྟར། ང་ལ་ཉིན་རེ་བཞིན་འཆི་བའི་ཉེན་ཁ་ཡོད།
1CO 15:32 གལ་ཏེ་མིའི་རིགས་ཀྱི་ཆ་ནས་ངས་ཨེ་ཕེ་སུ་གྲོང་ཁྱེར་དུ་གཅན་གཟན་དང་འཐབས་ན་ང་ལ་ཅི་ཕན། གལ་ཏེ་གཤིན་པོ་རྣམས་སླར་གསོན་པ་མེད་ན། གསུང་རབ་ནང་འཁོད་པ་ལྟར། སང་ཉིན་ང་ཚོ་འཆི་རྒྱུ་ཡིན་པས་ད་ནས་ཟ་འཐུང་ལོངས་སྤྱོད་བྱའོ་ཞེས་གསུངས།
1CO 15:33 མགོ་མ་འཁོར་ཞིག ཁ་དཔེ་ལྟར་གྲོགས་ངན་པས་སྤྱོད་བཟང་རློག
1CO 15:34 བློ་ཁུག་སྟེ་སྡིག་ཉེས་མ་བྱེད་ཅིག ཁྱོད་ཚོའི་ནང་ནས་ཁ་ཤས་ཀྱིས་དཀོན་མཆོག་ཀྱང་ངོ་མི་ཤེས་པས་ཁྱོད་ཚོ་ངོ་ཚ་བར་འགྱུར་དགོས།
1CO 15:35 མི་ཞིག་གིས་གཤིན་པོ་ཅི་ལྟར་ལང༌། ཅི་ལྟ་བུའི་གཟུགས་དང་ལྡན་ཏེ་འོང་ཞེས་འདྲི།
1CO 15:36 བླུན་པོ་ཁྱོད། ཁྱོད་ཀྱིས་བཏབ་པའི་ས་བོན་མ་ཤི་ན་སྐྱེ་བར་མི་འགྱུར།
1CO 15:37 ཡང་ཁྱོད་ཀྱིས་བཏབ་པ་ནི་སྐྱེ་རྒྱུ་ཡིན་པའི་རྩི་ཤིང་ལ་སོགས་པའི་གཟུགས་མིན་ཏེ། གྲོ་ལ་སོགས་པའི་འབྲུ་རྡོག་འབའ་ཞིག་ཡིན།
1CO 15:38 དཀོན་མཆོག་གིས་རང་གི་དགོངས་པ་ལྟར་ས་བོན་དེ་དང༌། ས་བོན་རིགས་རེར་སོ་སོའི་གཟུགས་གནང༌།
1CO 15:39 གཟུགས་པོ་ནི་གཅིག་པ་མ་ཡིན། མི་དང༌། དུད་འགྲོ བྱ་བྱིའུ། ཉའི་གཟུགས་སོ་སོ་ཡིན།
1CO 15:40 དེ་ལྟར་ནམ་མཁའ་ལ་གཟུགས་དང་ས་ལ་གཟུགས་ཀྱང་ཡོད། ནམ་སའི་གཟུགས་གཉིས་ཀྱི་གཟི་བརྗིད་མི་འདྲ་བ་ཡིན།
1CO 15:41 ཉི་མ་དང༌། ཟླ་བ། སྐར་མའི་གཟི་བརྗིད་སོ་སོ་ཡིན་ཏེ། སྐར་མ་དང་སྐར་མའི་གཟི་བརྗིད་ཀྱང་མི་འདྲ།
1CO 15:42 གཤིན་པོ་རྣམས་འཆི་བ་ནས་སླར་གསོན་པའང་དེ་ལྟར་ཡིན། འཇིག་པའི་གཟུགས་ཤིག་འདེབས་ཀྱང༌། འཇིག་རྒྱུ་མེད་པའི་གཟུགས་ཤིག་གསོན་པོར་ལང་བར་མཛད་པར་འགྱུར།
1CO 15:43 གཟུགས་པོ་ནི་གཟི་བརྗིད་མེད་པར་ས་ལ་འདེབས་ཀྱང༌། གཟི་བརྗིད་དང་ལྡན་ཏེ་གསོན་པོར་ལང་བར་འགྱུར། སྟོབས་མེད་པར་འདེབས་ཀྱང༌། སྟོབས་དང་ལྡན་པར་གསོན་པོར་ལང་བར་འགྱུར།
1CO 15:44 ཤ་ཁྲག་གི་གཟུགས་བཏབ་ནས་སེམས་ཉིད་ཀྱི་གཟུགས་གསོན་པོར་ལང༌། ཤ་ཁྲག་གི་གཟུགས་ཡོད་ན་སེམས་ཉིད་ཀྱི་གཟུགས་ཀྱང་ཡོད།
1CO 15:45 དེའི་ཕྱིར་གསུང་རབ་ནང་མི་དང་པོ་ཨ་དམ་སྲོག་དང་ལྡན་པར་གྱུར་ཞེས་བྲིས་འདུག ཨ་དམ་ཕྱི་མ་མཱ་ཤི་ཀ་དེ་ཚེ་གནང་བའི་ཐུགས་ཉིད་གཅིག་ཏུ་གྱུར།
1CO 15:46 འོན་ཀྱང་སེམས་ཉིད་ཡིན་པ་དེ་དང་པོ་མིན། ཤ་ཁྲག་གི་གཟུགས་དང་པོ་ཡིན་ཞིང༌། དེ་ནས་སེམས་ཉིད་ཀྱི་གཟུགས་ཕྱི་མ་ཡིན།
1CO 15:47 མི་དང་པོ་ས་ནས་ཡིན་ཞིང༌། ས་སྟེང་གི་ཐལ་བ་ལས་བྱུང༌། མི་ཕྱི་མ་དེ་དཀོན་མཆོག་གི་ཞིང་ཁམས་ནས་ཡིན།
1CO 15:48 ས་ནས་ཡིན་པ་རྣམས་ས་ནས་ཡིན་པའི་མི་དེ་དང་འདྲ་བ་ཡིན་ཞིང༌། དཀོན་མཆོག་གི་ཞིང་ཁམས་ནས་ཡིན་པ་རྣམས་དཀོན་མཆོག་གི་ཞིང་ཁམས་ནས་ཡིན་པའི་མི་དེ་དང་འདྲ་བ་ཡིན།
1CO 15:49 ད་ལྟ་ང་ཚོ་ས་ནས་ཡིན་པའི་མི་དེ་དང་འདྲ་བ་ཡིན། ཕྱིས་སུ་ངེད་རྣམས་དཀོན་མཆོག་གི་ཞིང་ཁམས་ནས་ཡིན་པའི་མི་དེ་དང་འདྲ་བར་འགྱུར།
1CO 15:50 སྤུན་ཟླ་རྣམས། ངས་འདི་ལྟར་སྨྲ། ཤ་ཁྲག་གི་གཟུགས་པོ་དང་ལྡན་པ་རྣམས་དཀོན་མཆོག་གི་རྒྱལ་སྲིད་ལ་འཛུལ་བར་མི་སྲིད། ཡང་འཇིག་པ་ལ་འཇིག་རྒྱུ་མེད་པ་མི་འཐོབ།
1CO 15:51 ཉོན་ཞིག ངས་ཁྱེད་རྣམས་ལ་གསང་བ་ཞིག་སྨྲ་སྟེ། ང་ཚོ་ཐམས་ཅད་མི་འཆི་ཡང༌། ཐམས་ཅད་སྒྱུར་འོང༌།
1CO 15:52 དུང་སྐད་མཐའ་མ་སྒྲོག་པའི་ཚེ། མིག་ཟུང་གདངས་བཙུམ་གྱི་ཡུན་ཙམ་ལ། དུང་སྐད་བསྒྲགས་ནས་གཤིན་པོ་རྣམས་མི་འཇིག་པར་གསོན་པོར་མཛད་པར་འགྱུར་ཞིང༌། ང་ཚོ་ཡང་སྒྱུར་ངེས་སོ།
1CO 15:53 གང་ཡིན་ཞེ་ན། འཇིག་པའི་གཟུགས་པོ་འདི་འཇིག་རྒྱུ་མེད་པ་དང༌། འཆི་བའི་གཟུགས་པོ་འདི་འཆི་རྒྱུ་མེད་པ་འགྱུར་དགོས།
1CO 15:54 འཇིག་པའི་གཟུགས་པོ་འདི་འཇིག་རྒྱུ་མེད་པ་དང༌། འཆི་བའི་གཟུགས་པོ་འདི་འཆི་རྒྱུ་མེད་པར་འགྱུར་སྐབས། གསུང་རབ་ནང་དུ། འཆི་བ་ཕམ་ནས་ཡོངས་སུ་མེད་པར་གྱུར་ཞེས་འཁོད་པ་ལྟར་འགྲུབ་པར་འགྱུར།
1CO 15:55 ཡང་གསུང་རབ་ཀྱི་མདོ་ལས། ཝ་ཡེ་འཆི་བ། ཁྱོད་ཀྱི་རྒྱལ་ཁ་གང་དུ་ཡོད། ། ཁྱོད་ཀྱི་མདུང་ཡང་གང་དུ་ཡོད། ། ཅེས་གསུངས།
1CO 15:56 འཆི་བའི་མདུང་ནི་སྡིག་ཉེས་དང༌། སྡིག་ཉེས་ཀྱི་དབང་ནི་ཆོས་ཁྲིམས་ཡིན།
1CO 15:57 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་སྒོ་ནས་ང་ཚོར་རྒྱལ་བ་གནང་བའི་དཀོན་མཆོག་ལ་བཀའ་དྲིན་ཆེ་ཞུའོ།
1CO 15:58 དེའི་ཕྱིར་ངའི་གཅེས་པའི་སྤུན་ཟླ་རྣམས། གཙོ་བོའི་ནང་ཁྱེད་ཀྱི་དཀའ་ལས་དོན་མེད་མིན་པར་ཤེས་པས། བརྟན་པོ་དང་གཡོ་བ་མེད་པར་གནས་ཏེ་རྟག་ཏུ་གཙོ་བོའི་ཕྱག་ལས་ལ་ཧུར་བརྩོན་གྱིས་ཤིག །
1CO 16:1 ད་དཀོན་མཆོག་གི་མི་རྣམས་ལ་ཕན་པའི་ཞལ་འདེབས་ཀྱི་སྐོར་ངས་ག་ལད་ཡཱ་ཡུལ་གྱི་ཆོས་ཚོགས་རྣམས་ལ་བཤད་པ་བཞིན་དུ་ཁྱེད་ཚོས་ཀྱང་བྱོས་ཤིག
1CO 16:2 ང་སླེབས་སྐབས་ཞལ་འདེབས་བསྡུ་མི་དགོས་པའི་ཕྱིར་མི་རེ་རེས་གཟའ་འཁོར་རེའི་ཉིན་དང་པོར་རང་རང་གི་གླ་ཆར་གཞིགས་ཏེ་དངུལ་ཁག་བགོས་ནས་གསོག་དགོས།
1CO 16:3 དེར་སླེབས་ནས་ངས་ཁྱེད་ཀྱི་གདེང་འཇོག་ཐོབ་པའི་མི་རྣམས་ངོ་སྤྲོད་ཡི་གེ་དང་བཅས་པར་ཁྱེད་ཚོའི་སྦྱིན་པ་ཡེ་རུ་ཤ་ལེམ་ལ་སྐྱེལ་བར་གཏོང༌།
1CO 16:4 ངའང་འགྲོ་བར་འོས་ན་ཁོ་ཚོ་ང་དང་མཉམ་དུ་འགྲོ་བར་འགྱུར།
1CO 16:5 མ་ཀེ་དོན་ཡཱ་ཡུལ་བརྒྱུད་ནས་འགྲོ་བའི་འཆར་གཞི་ཡོད་པས་དེར་ཕྱིན་པའི་རྗེས་སུ་ང་ཁྱེད་ཀྱི་རྩར་འོང༌།
1CO 16:6 ང་ཁྱེད་ཚོའི་རྩར་དུས་རེ་ཞིག་གམ། ཡང་ན་དགུན་ཁ་ཚང་མ་དེར་སྡོད་སྲིད། དེ་ནས་ང་གང་སར་འགྲོ་བའང་ཁྱེད་ཚོས་ལམ་དུ་སྐྱེལ་རོགས།
1CO 16:7 ང་ད་ལྟ་ཕར་འགྲོ་བའི་ལམ་ཞོར་ལ་ཁྱེད་ཚོ་འཕྲད་པར་མི་འདོད། གཙོ་བོས་ཆོག་མཆན་གནང་ན་རྗེས་སུ་ང་ཁྱེད་ཚོ་དང་མཉམ་དུ་ཡུན་རིང་སྡོད་པའི་རེ་བ་ཡོད།
1CO 16:8 ཉི་མ་ལྔ་བཅུ་པའི་དུས་ཆེན་གྱི་བར་དུ་ང་ཨེ་ཕེ་སུ་གྲོང་ཁྱེར་དུ་སྡོད་པར་འགྱུར།
1CO 16:9 གང་ཡིན་ཟེར་ན། འབྲས་བུ་དང་ལྡན་པའི་ལས་ཀ་བྱེད་པར་གོ་སྐབས་མང་པོ་ཡོད་ཀྱང༌། ང་ལ་ངོ་རྒོལ་བྱེད་མཁན་ཡང་མང་པོ་ཡོད།
1CO 16:10 ང་ལྟར་ཐི་མོ་ཐེ་ཡིས་གཙོ་བོའི་ཕྱག་ལས་བྱེད་པས། གལ་སྲིད་ཁོང་དེར་སླེབས་ན། ཁྱེད་ཚོའི་ཁྲོད་དུ་འཇིགས་རྒྱུ་ཅིའང་མེད་པར་སྡོད་དུ་འཇུག
1CO 16:11 སུས་ཀྱང་ཁོང་ལ་མཐོང་ཆུང་བྱེད་མི་ཆོག ཁོང་ངའི་རྩར་ཡོང་བའི་ཆེད་དུ་ཞི་བདེའི་ངང་ནས་ལམ་དུ་སྐྱེལ་ཞིག ང་དང་སྤུན་ཟླ་རྣམས་ཁོང་སླེབས་རྒྱུར་སྒུག་བསྡད་ཡོད།
1CO 16:12 ད་ངེད་ཀྱི་སྤུན་ཟླ་ཨ་པོ་ལོ་སིའི་སྐོར་ཁོང་སྤུན་ཟླ་གཞན་དང་མཉམ་དུ་ཁྱེད་ཚོའི་རྩར་འགྲོ་བར་ངས་ནན་གྱིས་བསྐུལ། ད་ལྟ་ཡོང་བར་རྩ་བ་ནས་མི་འདོད་ཀྱང༌། གོ་སྐབས་འཐོབ་པའི་ཚེ་ཡོང་བར་འགྱུར།
1CO 16:13 དོགས་ཟོན་གྱིས་ཤིག དད་པ་བརྟན་པོར་གནས་ཏེ་བློ་ཁོག་ཆེན་པོ་དང་སེམས་ཤུགས་ཆེན་པོ་བྱོས།
1CO 16:14 གང་བྱེད་པ་ཐམས་ཅད་བྱམས་པའི་སྒོ་ནས་སྒྲུབས་ཤིག
1CO 16:15 སྤུན་ཟླ་རྣམས། སེ་ཏེ་ཕ་ནཱ་ཡི་ཁྱིམ་ཚང་ནི་ཨ་ཀ་ཡཱ་ཡུལ་གྱི་དད་པ་བྱེད་མཁན་དང་པོ་ཡིན་ཞིང༌། ཁོང་ཚོར་དཀོན་མཆོག་གི་མི་རྣམས་ལ་ཞབས་ཏོག་བྱེད་པར་བརྩོན་སེམས་ཡོད་པ་ཁྱེད་རྣམས་ཀྱིས་ཤེས་པས།
1CO 16:16 ངས་དེ་ལྟར་གྱི་མི་རྣམས་དང༌། ལས་ལ་རོགས་བྱེད་མཁན་རེ་རེའི་ཁ་ལ་ཉན་པར་སྐུལ།
1CO 16:17 སེ་ཏེ་ཕ་ནཱ་དང༌། ཕོར་ཏུ་ནཱ་ཏུ་སི་དང༌། ཨ་ཀ་ཡ་ཀུ་གསུམ་སླེབས་པས་ང་དགའ། ཁྱེད་ཚོ་མེད་པས་གང་བྱེད་མ་ཐུབ་པ་དེ་ཁོང་ཚོས་ང་ལ་རོགས་པ་བྱས།
1CO 16:18 ཁོང་ཚོས་ང་དང་ཁྱེད་རྣམས་ལ་སེམས་གསོ་བཏང་བས། དེ་ལྟ་བུའི་མི་རྣམས་ལ་གུས་བཀུར་བྱེད་དགོས།
1CO 16:19 ཨེ་ཞེ་ཡཱ་ཡུལ་གྱི་ཆོས་ཚོགས་ཀྱིས་ཁྱེད་ཚོར་འཚམས་འདྲི་ཞུ། ཨ་ཀུ་ལཱ་དང་པི་རི་སི་ཀཱ་དང༌། ཁོ་ཚོའི་ཁང་པར་འཛོམས་པའི་ཆོས་ཚོགས་ཀྱིས་གཙོ་བོའི་ངང་ནས་ཁྱེད་ཚོར་མཛའ་བརྩེའི་འཚམས་འདྲི་ཞུ།
1CO 16:20 སྤུན་ཟླ་ཐམས་ཅད་ཀྱིས་ཁྱེད་ཚོར་འཚམས་འདྲི་ཞུ། བྱམས་སེམས་ཀྱི་ཐོག་ནས་གཅིག་གིས་གཅིག་ལ་འོ་ཡིས་འཚམས་འདྲི་ཞུས།
1CO 16:21 འཚམས་འདྲི་ཞུ་བ་འདི་ནི་ང་རང་པའུ་ལུའི་ལག་པས་འབྲི།
1CO 16:22 སུ་ཞིག་གིས་གཙོ་བོ་གཅེས་པར་མི་བཟུང་ན་ཁོ་ནི་རྒྱང་འབུད་གཏོང་བར་འགྱུར། གཙོ་བོ་ཕེབས་པར་ཤོག
1CO 16:23 གཙོ་བོ་ཡེ་ཤུའི་ཐུགས་རྗེ་ཁྱེད་རྣམས་ལ་ལྡན་པར་གྱུར་ཅིག
1CO 16:24 མཱ་ཤི་ཀ་ཡེ་ཤུའི་ངང་ནས་ངའི་བྱམས་པ་ཁྱེད་ཐམས་ཅད་དང་མཉམ་དུ་གནས་པར་གྱུར་ཅིག ཨ་མེན། །
2CO 1:1 དཀོན་མཆོག་གི་དགོངས་པ་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་དང༌། ངེད་ཀྱི་སྤུན་ཟླ་ཐི་མོ་ཐེ་གཉིས་ཀྱིས་ཀོ་རིན་ཐུ་གྲོང་ཁྱེར་ལ་ཡོད་པའི་དཀོན་མཆོག་གི་ཆོས་ཚོགས་དང༌། ཨ་ཀ་ཡཱ་ཡུལ་ཕྱོགས་ཀུན་ཏུ་ཡོད་པའི་དཀོན་མཆོག་གི་མི་ཐམས་ཅད་ལ་འཕྲིན་ཡིག་འདི་ཕུལ་ལོ།
2CO 1:2 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་རྣམས་ལ་འཐོབ་པར་གྱུར་ཅིག
2CO 1:3 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་པ་ཡོང་བར་ཤོག ཐུགས་རྗེའི་ཡབ་དང་སེམས་གསོ་གནང་བའི་དཀོན་མཆོག་ཡིན་ཏེ།
2CO 1:4 ཁོང་གིས་ངེད་རྣམས་ཀྱི་སྡུག་བསྔལ་ཐམས་ཅད་ལ་སེམས་གསོ་མཛད། དེ་ནི་དཀོན་མཆོག་གིས་ང་ཚོ་ལ་གནང་བའི་སེམས་གསོ་འདི་བཞིན་ང་ཚོས་ཀྱང་སྡུག་བསྔལ་གང་ཡང་མྱོང་བའི་མི་རྣམས་ལ་སེམས་གསོ་གཏོང་ཐུབ་པའི་ཆེད་དུ་ཡིན།
2CO 1:5 གང་ཡིན་ཟེར་ན། ང་ཚོས་མཱ་ཤི་ཀའི་སྡུག་བསྔལ་ག་ཚོད་ཀྱི་མང་བ་མྱོང་བ། དེ་ཙམ་གྱིས་མཱ་ཤི་ཀ་ནས་ང་ཚོས་སེམས་གསོའང་མྱོང༌།
2CO 1:6 ང་ཚོས་སྡུག་བསྔལ་མྱོང་བ་ནི། ཁྱེད་ཚོ་ལ་སེམས་གསོ་དང་ཐར་པའི་ཆེད་དུ་ཡིན། ང་ཚོས་སེམས་གསོ་མྱོང་བ་དེའང་ཁྱེད་ཚོའི་སེམས་བདེ་བའི་ཆེད་དུ་ཡིན། སེམས་གསོ་འདིས་ཁྱེད་ཚོས་ང་ཚོས་མྱོང་བའི་སྡུག་བསྔལ་དེ་འདྲ་བཟོད་ཐུབ།
2CO 1:7 ཡང་ཁྱེད་ཚོས་ང་ཚོའི་སྡུག་བསྔལ་མཉམ་དུ་མྱོང་བ་ལྟར་ང་ཚོའི་སེམས་གསོ་ཡང་མཉམ་དུ་ཐོབ་པར་ཤེས་པས། ང་ཚོས་ཁྱེད་ཚོའི་ཕྱིར་རེ་བ་བརྟན་པོ་བཅངས་ཡོད།
2CO 1:8 སྤུན་ཟླ་རྣམས། ང་ཚོ་ལ་ཨེ་ཞེ་ཡཱ་ཡུལ་དུ་བྱུང་བའི་སྡུག་བསྔལ་ཁྱེད་ཚོས་ཤེས་དགོས། ང་ཚོ་ཚད་ལས་བརྒལ་བའི་དཀའ་སྡུག་གིས་མནར་ནས་བཟོད་ཐབས་མེད་པར་གྱུར་བས་གསོན་པོར་ལུས་པའི་རེ་བའང་ཟད།
2CO 1:9 ང་ཚོས་འཆི་ངེས་སྙམ། འོན་ཀྱང་དེ་ནི་ང་ཚོས་རང་ལ་མིན་ཏེ་གཤིན་པོ་རྣམས་ལ་སླར་གསོན་པོར་མཛད་མཁན་དཀོན་མཆོག་ལ་བློ་གཏད་བྱེད་པའི་ཆེད་དུ་ཡིན།
2CO 1:10 དེ་ལྟར་གྱི་འཆི་ཉེན་ལས་ཐར་བར་མཛད་མཁན་གྱིས་ང་ཚོར་སྐྱོབ་པར་འགྱུར་ངེས་ཡིན་ཞིང༌། ཁོང་གིས་ང་ཚོ་ཡང་བསྐྱར་སྐྱོབ་པ་དེར་ང་ཚོས་ཡིད་རྟོན་ནས་རེ་བ་བྱེད།
2CO 1:11 ཁྱེད་ཚོས་ཀྱང་གསོལ་སྨོན་འདེབས་པའི་སྒོ་ནས་ང་ཚོར་རོགས་པ་གནང་སྟེ། སྨོན་ལམ་མང་པོའི་ཐོག་ནས་ང་ཚོར་གནང་བའི་བྱིན་རླབས་ཀྱི་དོན་ལ་མི་མང་པོས་བཀའ་དྲིན་ཆེ་ཞུ་བར་འགྱུར།
2CO 1:12 ང་ཚོས་འཇིག་རྟེན་པ་དང༌། ལྷག་པར་དུ་ཁྱེད་རྣམས་ཀྱི་ཁྲོད་དུ་འཇིག་རྟེན་པའི་ཤེས་རབ་ཀྱི་སྒོ་ནས་མིན་པར། དཀོན་མཆོག་གི་ཐུགས་རྗེའི་ཐོག་ནས་དྭངས་གཙང་དང་ལྷད་མེད་ཀྱིས་སྤྱོད་ལམ་བྱས། དེར་ང་ཚོའི་དྲང་སེམས་ཀྱི་དཔང་པོ་བྱེད། དེ་ནི་ང་ཚོའི་སྤོབས་པ་ཡིན།
2CO 1:13 ཡང་ཁྱེད་ཚོས་ཀློག་པ་དང་རྟོགས་ཐུབ་པ་དེ་ལས་ང་ཚོས་ཁྱེད་རྣམས་ལ་གཞན་ཅིའང་མི་འབྲི། ཁྱེད་ཚོས་ཆ་ཤས་ཙམ་གྱིས་གོ་བ་ལྟར་ཆ་ཚང་པོར་གོ་བའི་རེ་བ་ཡོད། དེ་ནས་གཙོ་བོ་ཡེ་ཤུ་ཡང་བསྐྱར་འབྱོན་པའི་ཉིན་མོར་ཁྱེད་ཚོ་ནི་ང་ཚོའི་སྤོབས་པའི་རྒྱུ་རྐྱེན་དང༌། ང་ཚོ་ཡང་ཁྱེད་ཚོའི་སྤོབས་པའི་རྒྱུ་རྐྱེན་ཡིན་པར་འགྱུར།
2CO 1:15 དེ་ངེས་པར་དུ་ཤེས་པས་ཁྱེད་རྣམས་ལ་བྱིན་རླབས་ཐེངས་གཉིས་འཐོབ་པའི་ཆེད་དུ་ངས་ཁྱེད་ཀྱི་རྩར་སྔོན་ལ་ཡོང་བའི་འཆར་གཞི་ཡོད།
2CO 1:16 མ་ཀེ་དོན་ཡཱ་ཡུལ་དུ་འགྲོ་བའི་ཞོར་ལ་ངས་ཁྱེད་ཀྱི་རྩར་ཡོང་བ་དང༌། མ་ཀེ་དོན་ཡཱ་ཡུལ་ནས་ཕྱིར་ལོག་དུས་ཁྱེད་ཀྱིས་ང་ཡ་ཧུ་དཱ་ཡུལ་གྱི་ལམ་དུ་སྐྱེལ་བར་བསམས།
2CO 1:17 དེ་ལྟར་བསམས་དུས་ངས་བློ་རྩེ་གཉིས་བྱས་པ་ཡིན་ནམ། ཡང་ན་དུས་གཅིག་ལ་ཡིན་དང་མིན་ཟེར་བའི་འཇིག་རྟེན་འདིའི་མི་དང་འདྲ་བ་ངས་འཆར་གཞི་བཟོའམ།
2CO 1:18 འོན་ཀྱང་དཀོན་མཆོག་ཐུགས་གཏད་ཆོག་པ་ཡིན་པ་ལྟར་ང་ཚོས་ཁྱེད་རྣམས་ལ་ཡིན་དང་མིན་གྱི་གཏམ་མ་བཤད།
2CO 1:19 ང་དང༌། སིལ་ཝ་ནུ། ཐི་མོ་ཐེ་གསུམ་གྱིས་ཁྱེད་ཚོར་བསྒྲགས་པའི་དཀོན་མཆོག་གི་སྲས་ཡེ་ཤུ་མཱ་ཤི་ཀ་ནི་ཡིན་དང་མིན་མ་ཡིན། ཁོང་རྟག་ཏུ་ཡིན་ཁོ་ན་ཡིན་ནོ།
2CO 1:20 གང་ཡིན་ཞེ་ན། ཁོང་གི་སྒོ་ནས་དཀོན་མཆོག་གི་ཞལ་ཆད་རེ་རེ་འགྲུབ། དེའི་ཕྱིར་དཀོན་མཆོག་གི་གཟི་བརྗིད་ཀྱི་ཆེད་དུ་ཁོང་བརྒྱུད་ནས་ང་ཚོས་ཨ་མེན་ཞེས་བརྗོད།
2CO 1:21 ངེད་དང་ཁྱེད་ཚོ་གཉིས་མཱ་ཤི་ཀའི་ནང་ན་བརྟན་པོར་གནས་པར་མཛད་མཁན་ནི་དཀོན་མཆོག་ཡིན། ཁོང་གིས་ང་ཚོ་བསྐོས་ཏེ།
2CO 1:22 རྒྱ་ཡིས་བཏབ་ཅིང༌། དམ་པའི་ཐུགས་ཉིད་འགན་ལེན་ལྟར་ངེད་རྣམས་ཀྱི་སེམས་ལ་བཞག་པར་མཛད།
2CO 1:23 ང་ཀོ་རིན་ཐུ་གྲོང་ཁྱེར་ལ་ཕྱིར་མ་ལོག་པའི་རྒྱུ་རྐྱེན་ནི་ཁྱེད་ཚོར་བཀའ་བཀྱོན་མི་འཕོག་པའི་ཆེད་དུ་ངས་དཀོན་མཆོག་དཔང་དུ་བཙུགས་པ་ཡིན།
2CO 1:24 ངེད་རྣམས་ཀྱིས་ཁྱེད་ཚོའི་དད་པ་ལ་བཙན་ཤེད་མི་བྱེད་ཀྱི། ཁྱེད་ཚོ་དགའ་སྤྲོ་ཡོང་བའི་ཆེད་དུ་ང་ཚོ་ཁྱེད་ཀྱི་ལས་གྲོགས་ཡིན། གང་ལགས་ཟེར་ན། དད་པའི་སྒོ་ནས་ཁྱེད་ཚོ་བརྟན་པོར་གནས་པས་སོ། །
2CO 2:1 ད་ངས་ཁྱེད་རྣམས་མ་སྐྱོ་བའི་ཕྱིར་ཡང་བསྐྱར་ཁྱེད་ཚོའི་རྩར་མ་འོང་བའི་ཐག་གཅོད་བྱས།
2CO 2:2 གང་ཡིན་ཞེ་ན། གལ་ཏེ་ངས་ཁྱེད་རྣམས་སེམས་སྐྱོ་བར་བཅུག་ན། ངས་སེམས་སྐྱོ་བར་བཅུག་པ་དེ་ལས་གཞན་སུས་ང་སེམས་སྐྱིད་པོ་བཟོ།
2CO 2:3 ཡང་ངས་ཁྱེད་རྣམས་ལ་སྔར་བྲིས་པའི་འཕྲིན་ཡིག་གི་དོན་ནི། ང་ཡོང་སྐབས་ང་སེམས་སྐྱིད་པོ་བཟོ་དགོས་པ་རྣམས་ཀྱིས་ང་སེམས་སྐྱོ་བར་མི་འཇུག་པའི་ཕྱིར་ཡིན། ང་དགའ་བ་དེ་ཁྱེད་ཚོ་ཚང་མ་ཡང་དགའ་བར་འགྱུར་བར་ངས་ཡིད་ཆེས་བྱས།
2CO 2:4 ངས་སེམས་འཁྲུགས་པ་དང་ཡིད་སྐྱོ་བའི་མིག་ཆུས་ཁེངས་བཞིན་ཁྱེད་ཚོར་འཕྲིན་ཡིག་བྲིས་པ་དེ། ཁྱེད་ཚོ་ལ་སེམས་སྡུག་ཡོང་བའི་ཕྱིར་མ་ཡིན་གྱི། ངས་ཁྱེད་རྣམས་ལ་ལྷག་པར་བྱམས་པ་དེ་ཁྱེད་ཚོས་ཤེས་པའི་ཕྱིར་ཡིན།
2CO 2:5 སུ་ཞིག་གིས་སེམས་སྡུག་ཏུ་བཅུག་ན། འུར་བཤད་མི་བྱེད་དེ། ང་མིན་པར་ཁྱེད་ཐམས་ཅད་སེམས་སྐྱོ་བར་ཅུང་ཙམ་བཅུག
2CO 2:6 ཁྱེད་ཚོ་མང་ཆེ་བས་དེ་ལྟ་བུའི་མི་ལ་ཉེས་ཆད་བཏང་བ་ནི་འོས་སོ།
2CO 2:7 སེམས་སྡུག་ཆེ་བའི་བསྔལ་གྱིས་མི་གནོན་པའི་ཕྱིར། ཁྱེད་ཚོས་ཁོ་ལ་གུ་ཡངས་གཏོང་ཞིང་སེམས་གསོ་བྱེད་དགོས།
2CO 2:8 དེའི་ཕྱིར་ཁྱེད་ཚོས་ཡང་བསྐྱར་ཁོ་ལ་བྱམས་པ་སྟོན་པར་སྐུལ།
2CO 2:9 ཁྱེད་ཚོས་རྣམ་པ་ཀུན་ཏུ་ཁ་ལ་ཉན་ནམ་མི་ཉན་ཉམས་ཚོད་བྱེད་པའི་ཕྱིར་ངས་ཁྱེད་ཚོར་བྲིས།
2CO 2:10 ཁྱེད་ཚོས་སུ་ཞིག་ལ་གུ་ཡངས་བཏང་ན་ངས་ཀྱང་གུ་ཡངས་གཏོང༌། ཡང་ངས་གང་ཞིག་ལ་གུ་ཡངས་བཏང་བ་དེ་ནི་མཱ་ཤི་ཀའི་དྲུང་དུ་ཁྱེད་ཚོར་ཕན་པའི་ཆེད་དུ་ཡིན།
2CO 2:11 ཡང་བདུད་སཱ་ཏན་གྱིས་ང་ཚོར་མགོ་སྐོར་མི་གཏོང་བའི་ཕྱིར་དེ་ལྟར་བྱེད། གང་ལགས་ཤེ་ན། ཁོའི་ཇུས་ངན་ང་ཚོས་ཤེས་པས་སོ། །
2CO 2:12 དེ་སྔོན་ང་མཱ་ཤི་ཀའི་འཕྲིན་བཟང་སྒྲོག་པར་ཏྲོ་ཡཱ་གྲོང་ཁྱེར་དུ་སླེབས་ནས་གཙོ་བོས་ང་ལ་གོ་སྐབས་གནང་བྱུང་ཡང༌།
2CO 2:13 ངའི་སྤུན་ཟླ་ཐེ་ཏུ་མ་རྙེད་སྟབས་སེམས་བདེ་བར་བསྡད་མ་ཐུབ་པས། ཁོ་ཚོ་དང་ཁ་གྱེས་ནས་ང་མ་ཀེ་དོན་ཡཱ་ཡུལ་དུ་ཕྱིན།
2CO 2:14 མཱ་ཤི་ཀའི་སྒོ་ནས་རྒྱལ་བའི་རུ་སྒྲིག་ལ་ང་ཚོ་རྟག་ཏུ་འཁྲིད་མཁན་དཀོན་མཆོག་ལ་བཀའ་དྲིན་ཆེ་ཞུའོ། ཁོང་གིས་ང་ཚོའི་སྒོ་ནས་ཁོང་ངོ་ཤེས་པའི་དྲི་བཟང་ཕྱོགས་ཀུན་ཏུ་ཁྱབ་པར་མཛད།
2CO 2:15 གང་ཡིན་ཞེ་ན། ཐར་བར་འགྱུར་བ་དང༌། འཇིག་པར་འགྱུར་བ་རྣམས་ལ་ང་ཚོ་དཀོན་མཆོག་གི་སྤྱན་སྔར་མཱ་ཤི་ཀའི་དྲི་བཟང་ཡིན་ཏེ།
2CO 2:16 ང་ཚོ་ནི་ཁ་ཅིག་ལ་འཆི་བའི་དྲི་ངན་ལྟར་ཡིན་པ་དང༌། ཁ་ཅིག་ལ་ཚེ་ཡི་དྲི་བཟང་ཡིན། འཕྲིན་བཟང་སྒྲོག་པའི་ལས་ཀ་དེ་བྱེད་འོས་པ་སུ་ཡིན།
2CO 2:17 མི་མང་པོ་དང་མི་འདྲ་བར་ང་ཚོ་རྒྱུ་ནོར་འཐོབ་ཕྱིར་དཀོན་མཆོག་གི་བཀའ་སྒྲོག་མཁན་མ་ཡིན། དེ་ལས་ལྡོག་སྟེ་དཀོན་མཆོག་ནས་མངགས་པ་ལྟར་མཱ་ཤི་ཀའི་སྒོ་ནས་དཀོན་མཆོག་གི་སྤྱན་སྔར་ང་ཚོས་ལྷག་བསམ་ཟོལ་མེད་ཀྱིས་སྨྲའོ། །
2CO 3:1 ང་ཚོས་ཡང་བསྐྱར་རང་བསྟོད་བྱེད་པར་འགོ་འཛུགས་སམ། ཡང་ན་མི་གཞན་ཁ་ཤས་ལྟར་ང་ཚོར་ཁྱེད་ཚོའི་ཕྱིར་རམ་ཁྱེད་ཚོ་ལས་མཚམས་སྦྱོར་ཡི་གེ་དགོས་སམ།
2CO 3:2 ཁྱེད་ཚོ་ནི་ང་ཚོའི་སེམས་ལ་བྲིས་པའི་མི་ཐམས་ཅད་ཀྱིས་གོ་ཞིང་ཀློག་པའི་ཡི་གེ་ཡིན།
2CO 3:3 ཁྱེད་ཚོ་ནི་མཱ་ཤི་ཀའི་ཡི་གེ་མངོན་སུམ་ཡིན་ཞིང་ང་ཚོ་ལ་བརྟེན་ནས་བྱུང༌། དེ་ནི་སྣག་ཚས་བྲིས་པ་མ་ཡིན་གྱིས། གཏན་དུ་གནས་པའི་དཀོན་མཆོག་གི་ཐུགས་ཉིད་ཀྱིས་ཕྱག་བྲིས་གནང༌། རྡོ་ལེབ་སྟེང་བྲིས་པ་མིན་ཏེ་མི་རྣམས་ཀྱི་སེམས་ལ་བྲིས་པ་ཞིག་ཡིན།
2CO 3:4 མཱ་ཤི་ཀའི་སྒོ་ནས་དཀོན་མཆོག་ལ་ཡིད་ཆེས་བྱས་པས་ང་ཚོས་ཡིད་རྟོན་དང་ལྡན་ཏེ་དེ་ལྟར་བརྗོད།
2CO 3:5 ང་ཚོས་སོ་སོར་གང་ཞིག་སྒྲུབ་པའི་འཇོན་ཐང་ཡོད་པར་མི་སེམས་པར། ང་ཚོའི་འཇོན་ཐང་ནི་དཀོན་མཆོག་ནས་ཡིན།
2CO 3:6 ཁོང་གིས་ཡི་གེ་མིན་ཏེ་ཐུགས་ཉིད་ཀྱི་ཞལ་ཆད་གསར་པའི་ཞབས་ཏོག་པར་འགྱུར་བའི་འཇོན་ཐང་ང་ཚོར་གནང༌། གང་ཡིན་ཟེར་ན། བཀའ་ཁྲིམས་ཀྱི་ཡི་གེས་གསོད་ཀྱང་དམ་པའི་ཐུགས་ཉིད་ཀྱིས་གསོན་པོར་མཛད་དོ། །
2CO 3:7 ཡང་ཡི་སི་ར་ཨེལ་པ་རྣམས་ཀྱིས་མོ་ཤེའི་ཞལ་ལ་ལྟ་མ་ཕོད་པའི་གཟི་བརྗིད་ཀྱིས་འགོ་བཙུགས་ཀྱང༌། རྡོ་ལེབ་ལ་བརྐོས་པའི་ཡི་གེ་དང་ལྡན་པའི་ཞབས་ཏོག་ཡིན་པའི་ཆོས་ལམ་རྙིང་མ་ནི་འཆི་བའི་རྒྱུ་རྐྱེན་དུ་གྱུར། གཟི་བརྗིད་དེ་ཉམས་ཀྱང་མོ་ཤེའི་ཞལ་དཀོན་མཆོག་གི་གཟི་བརྗིད་ཀྱིས་འཕྲོས།
2CO 3:8 དམ་པའི་ཐུགས་ཉིད་ཀྱི་ཞབས་ཏོག་ཡིན་པའི་ཆོས་ལམ་གསར་པ་ལ་དེ་བས་ཀྱང་གཟི་བརྗིད་མི་ལྡན་ནམ།
2CO 3:9 མི་རྣམས་ལ་ཁྲིམས་གཅོད་གཏོང་བའི་ཆོས་ལམ་རྙིང་པ་གཟི་བརྗིད་ཅན་ཡིན་ན། མི་རྣམས་ལ་རྣམ་པར་དག་པར་བྱེད་པའི་ཆོས་ལམ་གསར་པ་དེ་བས་ཀྱང་གཟི་བརྗིད་ལྡན་དགོས།
2CO 3:10 དོན་དམ་དུ་ཆོས་ལམ་གསར་པའི་གཟི་བརྗིད་ལྷག་པར་ཆེ་བས་ཆོས་ལམ་རྙིང་པའི་གཟི་བརྗིད་ཉམས་པར་གྱུར།
2CO 3:11 ཉམས་པར་གྱུར་བ་དེ་གཟི་བརྗིད་ཅན་ཡིན་ན། རྒྱུན་དུ་གནས་པ་དེ་ལྷག་པར་གཟི་བརྗིད་དང་ལྡན་པའོ། །
2CO 3:12 དེས་ན་དེ་ལྟར་ཆེ་བའི་རེ་བ་ཞིག་ཡོད་པས་བློ་ཁོག་ཆེན་པོས་འཕྲིན་བཟང་སྒྲོག
2CO 3:13 ཡི་སི་ར་ཨེལ་པ་རྣམས་ཀྱིས་ཉམས་པར་འགྲོ་བའི་གཟི་བརྗིད་མི་ལྟ་བའི་ཕྱིར། ལུང་སྟོན་པ་མོ་ཤེ་ཡིས་ཞལ་ལ་གདོང་ཁེབས་གཡོགས་པ་ལྟར་ང་ཚོས་མི་བྱེད།
2CO 3:14 འོན་ཀྱང་ཁོ་ཚོའི་སེམས་མཁྲེགས་པོར་གྱུར་ཞིང༌། དེ་རིང་གི་བར་དུ་ཡང་ཞལ་ཆད་རྙིང་མ་ཀློག་སྐབས་གདོང་ཁེབས་དེ་སྔར་ལྟར་གནས། རྒྱུ་མཚན་ནི་མཱ་ཤི་ཀར་དད་པ་ཁོ་ནས་གདོང་ཁེབས་དེ་མེད་པར་མཛད་པས་སོ།
2CO 3:15 ད་ལྟའི་བར་དུའང་ལུང་སྟོན་པ་མོ་ཤེའི་ཆོས་ཁྲིམས་ཀློག་སྐབས་ཁོ་ཚོའི་སེམས་ལ་ཁེབས་དེ་གནས་ཀྱང༌།
2CO 3:16 གཙོ་བོ་ལ་དད་པ་སྐྱེ་བའི་སྐབས་སུ་ཁེབས་དེ་མེད་པར་མཛད།
2CO 3:17 གཙོ་བོ་ནི་ཐུགས་ཉིད་ཡིན་ཞིང༌། གཙོ་བོའི་ཐུགས་ཉིད་བཞུགས་སར་རང་དབང་ཡོད།
2CO 3:18 ཡང་གདོང་ཁེབས་མེད་པས་ང་ཚོ་ཐམས་ཅད་དཀོན་མཆོག་གི་གཟི་བརྗིད་མེ་ལོང་ནས་གཟུགས་བརྙན་འཆར་བ་ལྟར། གཙོ་བོའི་ཐུགས་ཉིད་ནས་འཕེལ་བའི་གཟི་བརྗིད་དང་ལྡན་པར་རིམ་པ་ནས་རིམ་པར་ཁོང་དང་འདྲ་བ་མཛད་བཞིན་ཡོད་དོ། །
2CO 4:1 དེའི་ཕྱིར་དཀོན་མཆོག་གི་ཐུགས་རྗེའི་སྒོ་ནས་ཞབས་ཏོག་འདི་ཡོད་པས་ང་ཚོ་ཡིད་མི་ཞུམ།
2CO 4:2 དེ་ལས་ལྡོག་སྟེ་སྤྱོད་ལམ་ངོ་ཚ་ཅན་དང་གསང་བ་འཛེམས་ཏེ་ང་ཚོས་གཡོ་ཐབས་དང༌། དཀོན་མཆོག་གི་བཀའ་ལ་འཁྱོག་བཤད་མི་བྱེད། བདེན་པ་གསལ་པོར་བསྟན་པའི་སྒོ་ནས་དཀོན་མཆོག་གི་སྤྱན་སྔར་ང་ཚོས་མི་རེ་རེའི་དྲང་སེམས་ལ་རེ་འབོད་བྱེད།
2CO 4:3 ང་ཚོས་སྒྲོག་པའི་འཕྲིན་བཟང་ལ་ཁེབས་ཀྱིས་སྒྲིབ་པ་ལྟར་སྣང་ཡང༌། འཇིག་པར་འགྱུར་བ་རྣམས་འབའ་ཞིག་ལ་སྒྲིབ་པ་ཡིན།
2CO 4:4 དཀོན་མཆོག་གི་གཟུགས་བརྙན་རང་ཡིན་ཏེ་མཱ་ཤི་ཀའི་གཟི་བརྗིད་ཀྱི་འཕྲིན་བཟང་གི་འོད་མི་མཐོང་བའི་ཕྱིར། འཇིག་རྟེན་འདིའི་བདུད་སཱ་ཏན་གྱིས་དད་པ་མེད་པ་རྣམས་ཀྱི་སེམས་རྨོངས་པར་བྱས།
2CO 4:5 ང་ཚོས་རང་དོན་མི་སྒྲོག ཡེ་ཤུ་མཱ་ཤི་ཀ་གཙོ་བོ་ཡིན་པ་དང༌། ཁོང་གི་དོན་ལ་ང་ཚོ་ནི་ཁྱེད་ཀྱི་ཞབས་ཕྱི་ཡིན་པ་སྒྲོག
2CO 4:6 མཱ་ཤི་ཀའི་སྒོ་ནས་དཀོན་མཆོག་གི་གཟི་བརྗིད་ཀྱི་རྟོགས་པའི་འོད་ང་ཚོར་གནང་བའི་ཆེད་དུ། མུན་པ་ལས་འོད་འབྱུང་ཞིག་ཅེས་གསུང་མཁན་དཀོན་མཆོག་གིས་ཁོང་གི་འོད་ངེད་རྣམས་ཀྱི་སེམས་ལ་འཕྲོ་བར་མཛད།
2CO 4:7 དཔག་ཏུ་མེད་པའི་ནུས་མཐུ་འདི་ནི་ང་ཚོའི་མ་ཡིན་ཏེ་དཀོན་མཆོག་གི་ཡིན་པར་སྟོན་པའི་ཕྱིར་རྩ་ཆེའི་ནོར་བུ་འདི་རྫ་སྣོད་ཀྱི་ནང་ལ་ཡོད།
2CO 4:8 རྣམ་པ་ཀུན་ནས་སྡུག་གི་གཟིར་ཡང་རྫི་བར་མ་གྱུར། ག་བྱེད་འདི་བྱེད་མེད་པར་གྱུར་ཡང༌། རེ་བ་མ་ཟད།
2CO 4:9 མནར་གཅོད་མྱོང་ཡང་དོར་བ་མིན། བསྒྱེལ་ཡང་མི་འཆི།
2CO 4:10 ཡེ་ཤུའི་སྐུ་ཚེ་ང་ཚོའི་གཟུགས་པོའི་སྒོ་ནས་མངོན་པར་འགྱུར་བའི་ཕྱིར་ཁོང་གི་གྲོངས་པ་ང་ཚོའི་གཟུགས་པོར་རྟག་ཏུ་འཁུར།
2CO 4:11 ཁོང་གི་སྐུ་ཚེ་ང་ཚོའི་མི་རྟག་པའི་གཟུགས་པོར་མངོན་པར་འགྱུར་བའི་ཕྱིར། ཡེ་ཤུའི་དོན་ལ་ང་ཚོ་འཚོ་བའི་དུས་རྟག་ཏུ་འཆི་བའི་ལག་ཏུ་གཏོད་བཞིན་ཡོད།
2CO 4:12 དེའི་ཕྱིར་འཆི་བས་ང་ཚོའི་ནང་དང༌། དཔག་ཏུ་མེད་པའི་ཚེ་ཡིས་ཁྱེད་ཚོའི་ནང་ལ་ལས་ཀ་བྱེད།
2CO 4:13 མདོ་ལས་བཀོད་པ་ལྟར། ངས་དད་པ་བྱས་པས་སྨྲས་པ་ཡིན་ཞེས་བྲིས། དད་པ་དེ་རང་གིས་ང་ཚོས་ཀྱང་དད་པ་བྱེད་པས་སྨྲ།
2CO 4:14 གང་ཡིན་ཞེ་ན། གཙོ་བོ་ཡེ་ཤུ་སླར་གསོན་དུ་མཛད་མཁན་དཀོན་མཆོག་གིས་ང་ཚོའང་ཁོང་དང་མཉམ་དུ་སླར་གསོན་པར་མཛད་ནས། ང་ཚོ་དང་ཁྱེད་རྣམས་ཁོང་གི་དྲུང་དུ་འཁྲིད་པར་འགྱུར་བར་ཤེས་པས་སོ།
2CO 4:15 དེ་ཐམས་ཅད་ཁྱེད་རྣམས་ལ་ཕན་པའི་ཆེད་དུ་ཡིན་པ་དང༌། ཐུགས་རྗེ་འཐོབ་མཁན་མང་པོར་འགྱུར་བས་བཀའ་དྲིན་ཆེ་ཞུ་བ་རྣམས་ཀྱང་འཕེལ་བར་འགྱུར། དེ་ནི་དཀོན་མཆོག་གི་གཟི་བརྗིད་ལ་བསྟོད་པ་འབུལ་བ་དེ་བས་ཆེ་རུ་འགྲོ་བའི་ཕྱིར་རོ། །
2CO 4:16 དེ་བས་ན་ང་ཚོ་ཡིད་ཐང་མི་ཆད། ང་ཚོའི་ཕྱི་ལུས་ཉམས་སུ་འགྱུར་ཡང་ནང་སེམས་ཉིན་རེ་བཞིན་གསར་དུ་མཛད་པར་འགྱུར།
2CO 4:17 ཡུད་ཙམ་གྱི་སྡུག་བསྔལ་ཡང་པོ་འདི་ཡིས་ང་ཚོའི་དོན་ལ་རྟག་ཏུ་གནས་ཏེ་བླ་ན་མེད་པའི་གཟི་བརྗིད་སྒྲུབ།
2CO 4:18 གང་ལགས་ཟེར་ན། ང་ཚོས་མཐོང་བ་རྣམས་ལ་མི་ལྟ་བར་མི་མཐོང་བ་རྣམས་ལ་ལྟ། མཐོང་བ་རྣམས་མི་རྟག་པ་ཡིན། འོན་ཀྱང་མི་མཐོང་བ་རྣམས་རྟག་ཏུ་གནས་སོ། །
2CO 5:1 དེ་བས་ན་ང་ཚོའི་ལུས་པོ་དེ་ས་སྟེང་གི་གུར་ལྟར་བཤིག་པའི་དུས་སུ། ང་ཚོ་ལ་དཀོན་མཆོག་ནས་ཁང་པ་མིའི་ལག་པས་མ་བཟོས་པ་རྟག་པར་གནས་ཏེ་དཀོན་མཆོག་གི་ཞིང་ཁམས་སུ་ཆགས་པ་ཞིག་ཡོད་པ་ང་ཚོས་ཤེས།
2CO 5:2 ས་སྟེང་གི་གུར་འདི་ལ་སྡོད་དུས་དཀོན་མཆོག་གི་ཞིང་ཁམས་སུ་ཆགས་པའི་ཁང་པ་དེ་གོས་གསར་ལྟར་གོན་པར་འདོད་པས་ང་ཚོས་དབུགས་རིང་ཕྱུང༌།
2CO 5:3 ཁང་པ་དེ་གོན་པས་ང་ཚོ་གོས་མེད་པར་མི་མཐོང༌།
2CO 5:4 གུར་འདིར་སྡོད་དུས་ང་ཚོས་སྡུག་བསྔལ་གྱིས་དབུགས་རིང་ཕྱུང༌། གོས་མེད་པར་མི་འདོད་དེ། དཀོན་མཆོག་གི་ཞིང་ཁམས་ནས་འབྱུང་བའི་ཁང་པ་ཡིས་གོན་འདོད། དེ་ནས་དཔག་ཏུ་མེད་པའི་ཚེ་ཡིས་མི་རྟག་པ་འདི་མེད་པ་བྱེད་པར་འགྱུར།
2CO 5:5 དོན་འདི་རང་གི་ཕྱིར་ང་ཚོ་གྲ་སྒྲིག་མཛད་མཁན་དཀོན་མཆོག་གི་ཡིན་ལ། ཁོང་གིས་འགན་ལེན་ལྟར་དམ་པའི་ཐུགས་ཉིད་ང་ཚོར་གནང་ངོ༌། །
2CO 5:6 དེའི་ཕྱིར་ང་ཚོ་རྟག་ཏུ་ཡིད་རྟོན་པར་གནས། ལུས་འདི་ལ་གནས་པའི་བར་དུ་གཙོ་བོ་དང་མཉམ་དུ་མི་གནས་པར་ཤེས།
2CO 5:7 མིག་གིས་མཐོང་བ་ལྟར་མིན་ཏེ་དད་པའི་སྒོ་ནས་མི་ཚེ་སྐྱེལ།
2CO 5:8 འོ་ན་ཡིད་རྟོན་བྱེད་དེ་ལུས་འདི་དང་བྲལ་ནས་གཙོ་བོ་དང་མཉམ་དུ་གནས་པར་དགའ།
2CO 5:9 དེའི་ཕྱིར་ལུས་འདིའི་ནང་ཡོད་རུང་མེད་རུང༌། ང་ཚོས་ཁོང་ཐུགས་མཉེས་པ་བྱེད་པའི་ཕྱིར་བརྩོན།
2CO 5:10 གང་ཡིན་ཞེ་ན། ལུས་འདིར་གནས་པའི་དུས་སུ་ང་ཚོས་གང་བྱས་པའི་ལས་བཟང་ངན་ཇི་བྱས་པ་འཇལ་བའི་ཕྱིར་ངེད་ཐམས་ཅད་མཱ་ཤི་ཀ་ཁྲིམས་དཔོན་གྱི་བཞུགས་ཁྲིའི་མདུན་དུ་ལང་དགོས།
2CO 5:11 གཙོ་བོ་ལ་འཇིགས་པར་འོས་པ་ཤེས་པས་ང་ཚོས་མི་གཞན་ལ་བློ་འགུགས་བྱེད་པར་བརྩོན། དཀོན་མཆོག་གི་སྤྱན་སྔར་ང་ཚོ་ཅི་ལྟར་ཡིན་པ་གསལ་པོ་ཡིན་ཞིང༌། ཁྱེད་ཚོའི་དྲང་སེམས་ཀྱི་ནང་དུའང་དེ་གསལ་པོ་ཡིན་པར་ངས་རེ་བ་བྱེད།
2CO 5:12 ང་ཚོས་ཁྱེད་ཚོར་ཡང་བསྐྱར་རང་བསྟོད་མི་བྱེད་དེ། ཕྱིའི་སྣང་ཚུལ་ངོམ་ཞིང་ནང་སེམས་ངོམ་རྒྱུ་མེད་པ་རྣམས་ལ་ཁྱེད་ཀྱིས་ལན་འདེབས་ཐུབ་པའི་ཕྱིར། ཁྱེད་ཚོ་ལ་ང་ཚོའི་དོན་དུ་སྤོབས་པའི་རྒྱུ་རྐྱེན་ཅིག་སྟེར།
2CO 5:13 ང་ཚོ་སྨྱོ་བ་ལྟར་ན་དེ་ནི་དཀོན་མཆོག་ལ་གཟི་བརྗིད་ཡོང་བའི་ཆེད་དུ་ཡིན། སེམས་ཁམས་བདེ་ན་ཁྱེད་ཚོར་ཕན་པ་ཐོབ་པའི་ཕྱིར་ཡིན།
2CO 5:14 མཱ་ཤི་ཀའི་བྱམས་པ་ཡིས་ང་ཚོར་དབང་སྒྱུར་བས། མི་ཞིག་ཚང་མའི་ཚབ་ལ་གྲོངས་པའི་རྐྱེན་གྱིས་ཐམས་ཅད་ཤི་བར་ང་ཚོས་ཡིད་ཆེས་ངེས་རྙེད་ཡིན།
2CO 5:15 ཡང་ཁོང་ཚང་མའི་ཚབ་ལ་གྲོངས་པའི་དོན་ནི་ཚེ་སྲོག་གསར་པ་ཐོབ་པ་རྣམས་ད་ཕྱིན་ཆད་རང་གི་དོན་ལ་མ་ཡིན་གྱི། ཁོ་ཚོའི་དོན་ལ་གྲོངས་ནས་སླར་གསོན་པོར་འགྱུར་མཁན་མཱ་ཤི་ཀའི་དོན་ལ་མི་ཚེ་སྐྱེལ་བའི་ཆེད་དུ་ཡིན།
2CO 5:16 དེའི་ཕྱིར་ད་ནས་བཟུང་ང་ཚོས་འཇིག་རྟེན་པའི་ཆ་ནས་མི་སུ་ལ་ཡང་མི་རྩི། དེ་སྔོན་ང་ཚོས་མཱ་ཤི་ཀ་ལ་དེ་བཞིན་དུ་བརྩིས་ནའང༌། ད་ཕྱིན་ཆད་དེ་ལྟར་མི་བྱེད།
2CO 5:17 དེ་བས་ན་མཱ་ཤི་ཀའི་ནང་དུ་ཡོད་པ་རྣམས་ནི་གསར་དུ་གྱུར་བ་ཡིན། ལྟོས་དང༌། རྙིང་མ་རྣམས་འདས་ཤིང་གསར་པ་རྣམས་བྱུང་འདུག་ཨང༌།
2CO 5:18 དེ་ཐམས་ཅད་དཀོན་མཆོག་ནས་འབྱུང༌། མཱ་ཤི་ཀའི་སྒོ་ནས་ཁོང་གིས་ང་ཚོ་ཁོང་དང་སྡུམ་པར་མཛད་ནས། ངེད་རྣམས་ལ་བར་སྡུམ་བྱེད་པའི་ཞབས་ཏོག་གནང་བྱུང༌།
2CO 5:19 དེ་ཅི་ཡིན་ཟེར་ན། མི་རྣམས་ཀྱི་སྡིག་ཉེས་མི་རྩི་བར། དཀོན་མཆོག་གིས་མཱ་ཤི་ཀའི་སྒོ་ནས་འཇིག་རྟེན་ཁོང་རང་དང་བར་སྡུམ་མཛད་ཅིང༌། སྡུམ་པའི་འཕྲིན་དེ་ང་ཚོ་ལ་གཏད་བྱུང༌།
2CO 5:20 དེ་བས་ན། ང་ཚོ་མཱ་ཤི་ཀའི་སྐུ་ཚབ་ཡིན་ཏེ། དཀོན་མཆོག་གིས་ང་ཚོའི་ངང་ནས་མི་རྣམས་ལ་སྐུལ་བར་མཛད། མཱ་ཤི་ཀའི་ཚབ་ལ་ཁྱེད་ཚོར་ནན་གྱིས་སྐུལ་ཏེ་དཀོན་མཆོག་དང་བར་སྡུམས་བྱོས་ཤིག
2CO 5:21 མཱ་ཤི་ཀའི་སྒོ་ནས་དཀོན་མཆོག་དང་ང་ཚོ་ཡང་དག་པའི་འབྲེལ་བ་ཐོབ་པའི་ཕྱིར། དཀོན་མཆོག་གིས་སྡིག་ཉེས་མེད་པའི་མཱ་ཤི་ཀ་ང་ཚོའི་དོན་དུ་སྡིག་ཅན་ཡིན་པར་རྩིའོ། །
2CO 6:1 ང་ཚོ་དཀོན་མཆོག་དང་ལྷན་དུ་ལས་ཀ་བྱེད་པས། ང་ཚོས་ཁྱེད་རྣམས་ལ་དཀོན་མཆོག་གི་ཐུགས་རྗེ་དོན་མེད་དུ་མ་ལེན་པར་སྐུལ།
2CO 6:2 ཁོང་གིས་གསུངས་པ་ལྟར། དུས་ལ་བབས་པས་ང་ཡིས་ཁྱེད་ལ་ཉན། ། ཐར་པའི་ཉིན་མོར་ཁྱེད་ལ་སྐྱོབ་རོགས་བྱས། ། ཅེས་འཁོད་ཡོད། ལྟོས་ཤིག ད་ལྟ་དུས་ལ་བབས་པ་ཡིན། ད་ལྟ་ཐར་པའི་ཉིན་མོ་ཡིན་ནོ།
2CO 6:3 ཞབས་ཏོག་འདི་ལ་སྐྱོན་མི་འདོགས་པའི་ཕྱིར་ང་ཚོས་གཞན་ལ་སུ་ཞིག་གི་ལམ་ལ་གེགས་པར་མི་གཏོང༌།
2CO 6:4 རྣམ་པ་ཀུན་ནས་ང་ཚོ་དཀོན་མཆོག་གི་ཞབས་ཕྱི་བཅོས་མིན་ཡིན་པར་སྟོན་ཏེ། བཟོད་པ་ཆེན་པོ་དང༌། སྡུག་བསྔལ་དང༌། དཀའ་ངལ་དང༌། རྐྱེན་ངན་དང༌།
2CO 6:5 ཉེས་རྡུང་ཕོག་པ། བརྩོན་འཇུག་དང༌། ཟིང་ཆ་དང༌། ངལ་རྩོལ་དང༌། གཉིད་མི་ཁུག་པ་དང༌། ལྟོགས་པ་དང༌།
2CO 6:6 དག་པའི་སྤྱོད་ལམ་དང༌། ཤེས་རབ་དང༌། ངང་རྒྱུད་རིང་པོ་དང༌། དྲིན་དང༌། དམ་པའི་ཐུགས་ཉིད་དང༌། བཅོས་མིན་གྱི་བྱམས་སེམས་དང༌།
2CO 6:7 བདེན་པའི་གཏམ་དང༌། དཀོན་མཆོག་གི་ནུས་མཐུ་དང༌། ལག་པ་གཡས་གཡོན་ལ་དྲང་བདེན་གྱི་མཚོན་ཆ་ལྡན་པ་དང༌།
2CO 6:8 སྟོད་རུང་སྨད་རུང༌། བཟང་ངན་ཅི་བརྗོད་རུང༌། གཡོ་རྒྱུ་ཅན་ལྟར་རྩི་ནའང་བདེན་པ་ཡིན།
2CO 6:9 ང་ཚོ་ནི་མིང་གྲགས་མེད་པ་ལྟར་རྩི་ཡང་གྲགས་ཅན་ཡིན། འཆི་བ་ལ་ཐུག་ཀྱང་གསོན་པོ་ཡིན། ཉེས་ཆད་བཅད་ཀྱང་མ་བསད།
2CO 6:10 སེམས་སྐྱོ་ནའང་རྟག་ཏུ་དགའ་བར་བྱེད། དབུལ་པོར་རྩི་ནའང་མི་མང་པོ་ལ་ནོར་སྦྱིན། ཅི་ཡང་མེད་པར་རྩི་ཡང་ཐམས་ཅད་ཡོད་མཁན་ཡིན།
2CO 6:11 ཀྱེ་ཀོ་རིན་ཐུ་པ་རྣམས། ཁྱེད་ཚོར་ཁ་གསང་པོར་བརྗོད་ཅིང༌། ང་ཚོའི་སེམས་ཀྱི་སྒོ་ཁྱེད་ཚོར་འབྱེ།
2CO 6:12 ང་ཚོས་ཁྱེད་ཚོར་གཅེས་པ་མཚམས་མ་བཞག་ཀྱང༌། ཁྱེད་ཚོས་ང་ཚོར་གཅེས་པ་བཞག་པར་གྱུར།
2CO 6:13 དེའི་ལན་དུ་ངའི་ཕྲུ་གུར་སྨྲ་བ་ལྟར་ཁྱེད་ཚོའི་སེམས་ཀྱི་སྒོ་འབྱེད་ཅིག་ཅེས་བརྗོད།
2CO 6:14 དད་མེད་པ་རྣམས་དང་འགྲོགས་ནས་གཉའ་ཤིང་མ་ཁུར་ཞིག གང་ལགས་ཤེ་ན། དྲང་བདེན་དང་ཁྲིམས་འགལ་ལ་འབྲེལ་བ་ཅི་ཡོད། འོད་དང་མུན་པ་ལ་འབྲེལ་བ་ཅི་ཡོད།
2CO 6:15 མཱ་ཤི་ཀ་དང་བདུད་པེ་ལི་ཡཱར་ལ་མཐུན་པ་ཅི་ཡོད། དད་པ་ཅན་དང་དད་མེད་པ་ཞིག་ལ་འབྲེལ་བ་ཅི་ཡོད།
2CO 6:16 ཡང་དཀོན་མཆོག་གི་མཆོད་ཁང་དང་སྐུ་འདྲ་རྣམས་ལ་མཐུན་པ་ཅི་ཡོད། ང་ཚོ་ནི་གཏན་དུ་གནས་པའི་དཀོན་མཆོག་གི་མཆོད་ཁང་ཡིན་ཏེ། དཀོན་མཆོག་གིས་གསུངས་པ་བཞིན། ང་ཉིད་ཁོ་ཚོའི་དཀྱིལ་དུ་གནས། ། ཁོ་ཚོའི་ཁྲོད་དུ་རྒྱུ་བར་བྱེད། ། ང་ཉིད་ཁོ་ཚོའི་དཀོན་མཆོག་དང༌། ། དེ་རྣམས་ང་ཡི་འབངས་སུ་འགྱུར། ། ཞེས་འཁོད།
2CO 6:17 དེའི་ཕྱིར་གཙོ་བོས་འདི་སྐད་གསུངས། ཁོ་ཚོ་བྲལ་ནས་ཐོན་པ་དང༌། ། མི་གཙང་བ་དང་མ་རེག་ཅིག ། དེས་ན་ཁྱེད་རྣམས་དང་དུ་ལེན། །
2CO 6:18 ང་ནི་ཁྱེད་ཀྱི་ཡབ་འགྱུར་ཞིང༌། ། ཁྱེད་ཚོ་སྲས་དང་སྲས་མོར་འགྱུར། ། ཀུན་དབང་གཙོ་བོས་འདི་སྐད་གསུངས། ། ཞེས་འཁོད་ཡོད་དོ། །
2CO 7:1 གཅེས་པའི་སྤུན་ཟླ་རྣམས། ང་ཚོ་ལ་ཞལ་ཆད་འདི་ཚོ་ཡོད་པས། རང་གི་ལུས་དང་སེམས་གཉིས་ལ་མི་གཙང་བར་བྱེད་པ་ཐམས་ཅད་ལས་དག་པར་བྱེད་དགོས། དེ་ལྟར་དཀོན་མཆོག་ལ་བསྙེན་བཀུར་བྱེད་པའི་སྒོ་ནས་ང་ཚོས་ཡོངས་སུ་རྫོགས་པའི་དམ་པ་ཞིག་བྱེད་པར་བྱ།
2CO 7:2 ང་ཚོའི་ཆེད་དུ་སེམས་ཀྱི་སྒོ་འབྱེད་དང༌། ང་ཚོས་སུ་ལ་ཡང་སྡུག་པོ་མ་བཏང༌། ངན་རུལ་བྱེད་དུ་མ་བཅུག སུ་ཡང་མ་སྤྱད།
2CO 7:3 ཁྱེད་ཚོར་སྐྱོན་འཛུགས་བྱེད་པར་དེ་མི་སྨྲ། ངས་སྔར་བཤད་པ་ལྟར། ཁྱེད་ཚོ་ངེད་རྣམས་ཀྱི་སེམས་ལ་ཡོད་དེ་མཉམ་ཤི་མཉམ་གསོན་ཡིན།
2CO 7:4 ངས་ཁྱེད་ཚོར་བློ་ཁོག་ཆེན་པོས་བྱེད། ང་ཁྱེད་ཚོ་ལ་སྤོབས་པ་ཆེན་པོ་ཡོད། ཁྱེད་ཚོས་ང་ལ་སེམས་གསོ་མང་པོ་བཏང་ཞིང༌། སྡུག་བསྔལ་ཐམས་ཅད་མྱོང་དུས་དགའ་སྤྲོ་ཆེན་པོས་ཁེངས།
2CO 7:5 དཔེར་ན། མ་ཀེ་དོན་ཡཱ་ཡུལ་དུ་སླེབས་སྐབས་ང་ཚོའི་གཟུགས་པོ་ལ་ངལ་གསོ་མ་བྱུང༌། ཕྱི་ལ་འཁྲུག་པ་དང་ནང་ལ་འཇིགས་པ་ཡོད་པས་ཕྱོགས་ཀུན་ནས་སྡུག་བསྔལ་མང་པོ་བྱུང༌།
2CO 7:6 འོན་ཀྱང་བློ་ཕམ་པ་རྣམས་ལ་སེམས་གསོ་མཛད་མཁན་དཀོན་མཆོག་གིས་ཐེ་ཏུ་སླེབས་པའི་སྒོ་ནས་ང་ཚོར་སེམས་གསོ་མཛད།
2CO 7:7 ཡང་ཁོང་ཡོང་བ་གཅིག་པུས་མ་ཟད་དེ། ཁོང་ལ་ཁྱེད་རྣམས་ལས་བྱུང་བའི་སེམས་གསོ་དང༌། ཁྱེད་ཚོས་ང་ཤིན་ཏུ་དྲན་པ་དང༌། ཁྱེད་ཀྱི་གནོང་འགྱོད། ངའི་དོན་ལ་བརྩོན་སེམས་ཀྱི་གཏམ་བཤད་པས་ངའི་དགའ་སྤྲོ་སྔོན་ལས་ཆེ་བར་འགྱུར།
2CO 7:8 སྔར་བྲིས་པའི་ཡི་གེ་དེ་ཡིས་ངས་ཁྱེད་ཚོར་སེམས་སྐྱོ་བར་བྱས་ཀྱང་འགྱོད་པ་མ་སྐྱེ། (འོན་ཀྱང་དོན་དམ་དུ་ངས་ཁྱེད་ཚོར་དུས་ཐུང་ངུ་སེམས་སྡུག་བྱེད་པ་མཐོང་བས་འགྱོད་པ་སྐྱེས་)
2CO 7:9 ཁྱེད་ཚོ་སེམས་སྐྱོ་བར་གྱུར་བ་མ་ཡིན་གྱིས། སྤྱོད་པ་ངན་པ་སྤངས་ནས་སེམས་བསྒྱུར་བ་ཙམ་དུ་འགྱོད་པ་སྐྱེ་བས་ད་ང་དགའ་བར་འགྱུར། སེམས་སྐྱོ་བ་དེ་དཀོན་མཆོག་གི་ཐུགས་དགོངས་ཡིན་པས། ང་ཚོའི་སྒོ་ནས་ཁྱེད་རྣམས་ལ་གནོད་པ་ཅིའང་མ་བྱུང༌།
2CO 7:10 དཀོན་མཆོག་གི་ཐུགས་དགོངས་བཞིན་སེམས་སྐྱོ་བ་དེ་ལས་སེམས་བསྒྱུར་བ་འབྱུང༌། སེམས་སྐྱོ་བ་དེ་ནི་འགྱོད་པ་མེད་པ་ཡིན་ཞིང༌། དེ་ལས་ཐར་པ་འབྱུང༌། འོན་ཀྱང་འཇིག་རྟེན་གྱི་སེམས་སྐྱོ་བ་ལས་འཆི་བ་འབྱུང་ངོ༌།
2CO 7:11 དཀོན་མཆོག་གི་དགོངས་པ་ལྟར་སེམས་སྐྱོ་བ་འདི་ཡིས་ཁྱེད་རྣམས་ལ་ཇི་ལྟ་བུའི་བརྩོན་འགྲུས། སྐྱོན་མེད་སྟོན་པའི་བརྩོན་སེམས། ཉེས་ཅན་པ་དེ་ལ་རྒོལ་བ། འཇིགས་པ། དྲན་པ། བརྩོན་སེམས། སྡིག་ཉེས་ལ་ཆད་པ་གཅོད་འདོད་པ་བཅས་ཁྱེད་ཚོའི་ནང་ལ་བསྐྱེད་པའི་འབྲས་བུ་ལ་ལྟོས་ཤིག རྣམ་པ་ཀུན་ནས་ཁྱེད་ཚོས་དོན་འདིའི་ཐོག་སྐྱོན་མེད་གཙང་མ་ཡིན་པར་བསྟན།
2CO 7:12 དེའི་ཕྱིར་ངས་ཁྱེད་ཚོར་ཡི་གེ་དེ་བྲིས་ཀྱང༌། ཉེས་ཅན་པ་དེའམ། ཉེས་པ་འཕོག་པའི་མིའི་དོན་ལ་མ་ཡིན་གྱི། དཀོན་མཆོག་གི་སྤྱན་སྔར་ཁྱེད་ཚོས་ངེད་རྣམས་ལ་ཅི་འདྲའི་འབད་བརྩོན་བྱེད་པ་སྟོན་པའི་ཆེད་དུ་ཡིན།
2CO 7:13 དེ་བས་ན་ང་ཚོར་སེམས་གསོ་ཐོབ། དེས་མ་ཟད་ཐེ་ཏུ་དགའ་བར་གྱུར་བས་ང་ཚོས་དེ་བས་ཀྱང་དགའ་བར་བྱས། གང་ཡིན་ཞེ་ན། ཁྱེད་ཚོ་ཐམས་ཅད་ཀྱིས་ཁོང་བློ་བདེ་བར་བཅུག
2CO 7:14 ཁོའི་མདུན་དུ་ངས་ཁྱེད་ཚོར་གང་ཞིག་ལ་སྤོབས་པ་བྱས་པ་ལས་ངོ་ཚ་བར་མ་གྱུར། ངེད་ཀྱིས་ཁྱེད་ཚོར་བཤད་པ་ཐམས་ཅད་བདེན་པ་ཡིན་པ་ལྟར། ཐེ་ཏུའི་མདུན་དུ་ཁྱེད་ཀྱི་སྐོར་སྤོབས་པ་བྱས་པ་ཡང་བདེན་པ་ཡིན་པ་ར་སྤྲོད་བྱུང༌།
2CO 7:15 ཡང་ཐེ་ཏུས་ཁྱེད་ཚོ་ཐམས་ཅད་ཀྱིས་ཁ་ལ་ཉན་པ་དང༌། འཇིགས་ཤིང་འདར་བའི་སྒོ་ནས་ཁོང་ལ་སྣེ་ལེན་ཞུས་པར་དྲན་པས་ཁོང་གིས་ཁྱེད་རྣམས་ལ་སྔར་ལས་ལྷག་པར་གཅེས།
2CO 7:16 རྣམ་པ་ཀུན་ཏུ་ཁྱེད་ཚོ་ལ་ཡིད་ཆེས་བརྟན་པོ་ཡོད་པས་ངས་དགའ་བར་བྱེད་དོ། །
2CO 8:1 སྤུན་ཟླ་རྣམས། དཀོན་མཆོག་གིས་མ་ཀེ་དོན་ཡཱ་ཡུལ་གྱི་ཆོས་ཚོགས་རྣམས་ལ་གནང་བའི་ཐུགས་རྗེའི་སྐོར་ཁྱེད་ཚོས་ཤེས་པར་འདོད་དེ།
2CO 8:2 སྡུག་བསྔལ་ཚབས་ཆེན་གྱི་ཉམས་ཚོད་མྱོང་དུས་ཁོ་ཚོའི་དགའ་སྤྲོ་ཆེན་པོ་དང༌། ཆེས་དབུལ་ཕོངས་ཡིན་ཡང་གཏོང་ཕོད་ཆེན་པོ་བྱེད།
2CO 8:3 ཁོ་ཚོས་ཇི་ཐུབ་ཀྱིས་སྦྱིན་པ་བཏང་བ་མ་ཟད། རང་གི་འདོད་པ་ལྟར་དེ་ལས་ལྷག་པ་བཏང་བར་ངས་དཔང་པོ་བྱེད།
2CO 8:4 དཀོན་མཆོག་གི་མི་རྣམས་ལ་སྦྱིན་པ་གཏོང་བའི་སྐལ་བ་འཐོབ་པའི་ཆེད་དུ་ང་ཚོར་ཡང་ཡང་ནན་གྱིས་ཞུས་ཤིང༌།
2CO 8:5 ང་ཚོའི་རེ་བ་ལས་ལྷག་པར་བྱས་ཏེ་ཁོ་ཚོས་དང་ཐོག་རང་གཙོ་བོ་ལ་ཕུལ་བ་དང༌། དཀོན་མཆོག་གི་དགོངས་པ་ལྟར་ང་ཚོ་ལའང་གཏད།
2CO 8:6 དེའི་ཕྱིར་ཐེ་ཏུ་ཡིས་སྔར་ལས་ཀ་དེ་འགོ་བཙུགས་པས། ཁོང་གིས་ཁྱེད་ཚོའི་ཁྲོད་དུ་ཐུགས་རྗེའི་ལས་ཀ་འདི་སྒྲུབ་དགོས་པར་ང་ཚོས་སྐུལ།
2CO 8:7 དད་པ་དང༌། གཏམ། རྟོགས་པ། ཀུན་ལ་བརྩོན་འགྲུས་བྱེད་པ། ང་ཚོར་བྱམས་པ། དོན་ཐམས་ཅད་ཁྱེད་ཚོས་ལེགས་པར་བཞིན་དུ་བྱེད་པ། སྦྱིན་པ་གཏོང་བའི་ཐུགས་རྗེའི་ལས་ཀ་འདི་ཡང་ལེགས་པར་གྱིས་ཤིག
2CO 8:8 དེ་ནི་བཀའ་རྒྱ་མིན་ཏེ་གཞན་གྱི་བརྩོན་སེམས་དང་སྡུར་བའི་སྒོ་ནས་ཁྱེད་ཚོའི་བྱམས་སེམས་ལྷད་ཡོད་མེད་ཚོད་ལྟ་བྱེད་པར་འདོད།
2CO 8:9 ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོས་ཤེས་ཏེ། ཁོང་ཕྱུག་པོ་ཡིན་ཡང་ཁྱེད་ཚོའི་དོན་ལ་དབུལ་པོར་གྱུར། དེ་ནི་ཁོང་གི་དབུལ་ཕོངས་ཀྱི་སྒོ་ནས་ཁྱེད་ཚོ་དཀོན་མཆོག་གི་སྤྱན་སྔར་ཕྱུག་པོར་འགྱུར་བའི་ཆེད་དུ་ཡིན།
2CO 8:10 ཡང་ཁྱེད་ཚོར་ཕན་པའི་ཕྱིར་དོན་འདིར་ངའི་བསླབ་བྱ་འདི་ལྟར་ཡིན་ཏེ། ན་ནིང་ཁྱེད་ཚོ་སྦྱིན་པ་གཏོང་འགོ་བཙུགས་མཁན་དང་པོ་ཡིན་པ་མ་ཟད། སྦྱིན་པ་གཏོང་བར་འདོད་མཁན་དང་པོའང་ཡིན་པས།
2CO 8:11 ད་སྦྱིན་པའི་ལས་ཀ་དེ་སྒྲུབ་ཅིག སྔར་བྱེད་འདོད་པ་ལ་དགའ་བ་ལྟར་རྒྱུ་ནོར་ཡོད་པའི་ཚད་བཞིན་དུ་སྒྲུབ་དགོས།
2CO 8:12 སྦྱིན་པ་གཏོང་སེམས་ཡོད་ན། མེད་པ་ཕུལ་བར་མི་དགོས་ཀྱི། གང་ཡོད་པའི་ཚད་བཞིན་དུ་སྦྱིན་པ་བཏང་ན་དེ་དཀོན་མཆོག་ཐུགས་མཉེས།
2CO 8:13 དེ་ནི་གཞན་གྱི་འཚོ་བའི་ཁུར་པོ་ཡང་པོ་དང་ཁྱེད་ཚོར་སྡུག་པོ་གཏོང་བ་མིན། ཐམས་ཅད་ཆ་མཉམ་པར་འགྱུར་བའི་ཆེད་དུ་ཡིན།
2CO 8:14 ད་ལྟ་ཁྱེད་ཀྱི་རྒྱུ་ནོར་འབེལ་བས་ཁོ་ཚོའི་དགོས་པ་སྐོང་ཞིང༌། རྗེས་སུ་ཁོ་ཚོའི་རྒྱུ་ནོར་འབེལ་བས་ཁྱེད་ཚོའི་དགོས་པ་སྐོང་ཐུབ། དེ་ནས་ཁྱེད་ཚོ་ཆ་མཉམ་པར་འགྱུར།
2CO 8:15 གསུང་རབ་ཀྱི་མདོ་ལས། མང་པོ་བསྡུས་ཀྱང་ལྷག་མ་མེད། ། ཉུང་ངུ་བསྡུས་ཀྱང་ཆད་པ་མེད། ། ཅེས་འཁོད་ཡོད།
2CO 8:16 ངས་ཁྱེད་ཚོར་ཕན་པའི་བརྩོན་སེམས་ཡོད་པ་བཞིན་དུ། དེ་ལྟར་དཀོན་མཆོག་གིས་བརྩོན་སེམས་དེ་ཐེ་ཏུ་ལ་གནང༌། དེའི་ཕྱིར་དཀོན་མཆོག་ལ་བཀའ་དྲིན་ཆེ་ཞུའོ།
2CO 8:17 ཐེ་ཏུ་ཡིས་ང་ཚོས་སྐུལ་བར་ཉན་པ་མ་ཟད། བརྩོན་སེམས་ལྡན་པས་རང་ཉིད་ཀྱི་འདོད་པ་ལྟར་ཁྱེད་ཚོའི་རྩར་འགྲོ་བཞིན་ཡོད།
2CO 8:18 ཡང་འཕྲིན་བཟང་སྒྲོག་པས་ཆོས་ཚོགས་ཚང་མའི་ཁྲོད་དུ་སྙན་གྲགས་ཅན་གྱི་སྤུན་ཟླ་དེ་ང་ཚོས་ཁོང་དང་མཉམ་དུ་གཏོང་བཞིན་ཡོད།
2CO 8:19 དེ་མ་ཟད་གཙོ་བོའི་གཟི་བརྗིད་འཕེལ་བར་བྱེད་ཅིང༌། རོགས་པ་བྱེད་པའི་བརྩོན་སེམས་ཡོད་པ་སྟོན་པའི་ཕྱིར། ང་ཚོས་སྦྱིན་པ་གཏོང་བའི་ཐུགས་རྗེའི་ལས་ཀ་འདི་བྱེད་དུས་ཆོས་ཚོགས་རྣམས་ཀྱིས་སྤུན་ཟླ་དེ་ང་ཚོ་དང་མཉམ་དུ་འགྲུལ་བར་བདམས།
2CO 8:20 དེ་ནི་ང་ཚོས་དོ་དམ་བྱེད་བཞིན་པའི་གཏོང་ཕོད་ཅན་གྱི་སྦྱིན་པ་འདིའི་དོན་དུ་མི་སུ་ཞིག་གིས་ང་ཚོར་སྐྱོན་འདོགས་བྱེད་མི་དགོས་པའི་ཆེད་དུ་ཡིན།
2CO 8:21 གང་ལགས་ཤེ་ན། གཙོ་བོའི་སྤྱན་སྔར་མ་ཟད། མི་རྣམས་ཀྱི་མདུན་དུའང་ང་ཚོས་ཡང་དག་པའི་ལས་བྱེད་པར་སེམས།
2CO 8:22 ཡང་ཁོང་ཚོ་དང་མཉམ་དུ་ང་ཚོས་སྤུན་ཟླ་གཞན་ཞིག་གཏོང༌། ང་ཚོས་ཐེངས་མང་པོར་ཁོང་ལ་ཉམས་ཚོད་བྱས་ནས་དོན་མང་པོར་བརྩོན་སེམས་ཡོད་པར་ར་སྤྲོད་བྱས། ཁྱེད་ཚོ་ལ་ཡིད་ཆེས་ཤིན་ཏུ་བྱེད་དེ། ད་ལྟ་ཁོའི་བརྩོན་སེམས་དེ་སྔོན་ལས་ཆེ་བར་གྱུར།
2CO 8:23 ཐེ་ཏུ་ནི་ངའི་རོགས་པ་དང༌། ཁྱེད་ཚོར་ཞབས་ཏོག་བྱེད་པའི་ཕྱིར་ངའི་ལས་རོགས་ཀྱང་ཡིན། ངེད་ཀྱི་སྤུན་ཟླ་རྣམས་ནི་ཆོས་ཚོགས་རྣམས་ཀྱི་ཕོ་ཉ་དང་མཱ་ཤི་ཀའི་གཟི་བརྗིད་སྟོན་མཁན་ཡིན།
2CO 8:24 དེའི་ཕྱིར་ཆོས་ཚོགས་རྣམས་ཀྱི་མདུན་དུ་ཁོ་ཚོར་ཁྱེད་ཚོའི་བྱམས་པ་དང༌། ངེད་རྣམས་ཀྱིས་ཁྱེད་ཚོར་སྤོབས་པ་བྱེད་པའི་རྒྱུ་རྐྱེན་སྟོན་ཅིག །
2CO 9:1 དཀོན་མཆོག་གི་མི་རྣམས་ལ་སྦྱིན་པ་གཏོང་བའི་སྐོར་ངས་ཁྱེད་ཚོར་ཡི་གེ་འབྲི་མི་དགོས།
2CO 9:2 གང་ཡིན་ཟེར་ན། ཁྱེད་ཚོའི་སྦྱིན་པ་གཏོང་སེམས་ཤེས་པས། ངས་ཨ་ཀ་ཡཱ་ཡུལ་གྱི་དད་ལྡན་རྣམས་ན་ནིང་ནས་སྦྱིན་པ་གཏོང་བའི་གྲ་སྒྲིག་ཡོད་ཅེས་ཟེར་ཏེ་མ་ཀེ་དོན་ཡཱ་ཡུལ་པ་རྣམས་ལ་ཁྱེད་ཚོར་བསྟོད། ཁྱེད་ཀྱི་བརྩོན་སེམས་ཀྱིས་ཁོ་ཚོ་མང་ཆེ་བ་སྦྱིན་པ་གཏོང་བར་བསྐུལ།
2CO 9:3 དོན་འདིར་ཁྱེད་ཚོར་བསྟོད་པ་དེ་དོན་མེད་དུ་མི་འགྱུར་བ་དང༌། ངས་སྨྲས་པ་ལྟར་ཁྱེད་ཚོ་སྦྱིན་པ་གཏོང་བར་གྲ་སྒྲིག་བྱ་རྒྱུའི་ཕྱིར་ངས་སྤུན་ཟླ་དེ་རྣམས་གཏོང༌།
2CO 9:4 དེ་མིན་མ་ཀེ་དོན་ཡཱ་ཡུལ་པ་ཁ་ཤས་ང་དང་མཉམ་དུ་ཡོང་ནས་ཁྱེད་ཚོས་གཏོང་བའི་སྦྱིན་པ་གྲ་སྒྲིག་བྱས་མེད་པར་མཐོང་ན། དོན་འདིར་ང་ཚོ་ངོ་ཚ་འབྱུང་ཉེན་ཡོད་ལ་ཁྱེད་ཚོ་ནི་བཤད་མི་དགོས་སོ།
2CO 9:5 དེའི་ཕྱིར་ཁྱེད་ཀྱིས་སྔར་ཁ་ཆད་བྱས་པའི་སྦྱིན་པ་དེ་གྲ་སྒྲིག་བྱས་ཟིན་པའི་ཆེད་དུ་ངས་སྤུན་ཟླ་རྣམས་ངའི་སྔོན་དུ་ཁྱེད་ཀྱི་རྩར་གཏོང་དགོས་སྙམ། དེ་ནས་ཁྱེད་ཚོས་གྲ་སྒྲིག་བྱས་ཟིན་པའི་སྦྱིན་པ་དེ་གཏོང་ཕོད་པ་ཡིན་པ་ལས་མི་འདོད་བཞིན་དུ་མིན་པར་སྟོན།
2CO 9:6 ངའི་དོན་འདི་ཡིན། ས་བོན་ཉུང་ངུ་འདེབས་མཁན་ལ་ལོ་ཏོག་ཉུང་ངུ་འབྱུང༌། ས་བོན་མང་པོ་འདེབས་མཁན་ལ་ལོ་ཏོག་མང་པོ་འབྱུང༌།
2CO 9:7 ལག་པ་བཀྲེན་པོའམ། བཙན་གྱིས་གཏོང་བ་མ་ཡིན་པར། ཁྱེད་ཚོ་རེ་རེའི་སེམས་ཀྱིས་ཐག་བཅད་པ་ལྟར་འབུལ་དགོས། གང་ཡིན་ཟེར་ན། དགའ་སྤྲོ་སྦྱིན་པ་གཏོང་མཁན་ལ་དཀོན་མཆོག་ཐུགས་མཉེས་སོ།
2CO 9:8 ཡང་དཀོན་མཆོག་གིས་གཏོང་ཕོད་ཆེན་པོས་ཁྱེད་ཚོར་མཁོ་བ་ཐམས་ཅད་གནང་ཐུབ། དེ་ནས་ཁྱེད་རྣམས་ལ་གང་དགོས་པ་རྟག་ཏུ་ཡོད་པས་ཁྱེད་ཚོས་ལས་བཟང་མི་འདྲ་བ་མང་པོ་སྒྲུབ་ཐུབ།
2CO 9:9 གསུང་རབ་ཏུ། གཏོང་ཕོད་ཆེན་པོས་དབུལ་པོར་སྦྱིན། ། ཁོང་གི་དྲང་བདེན་རྟག་ཏུ་གནས། ། ཞེས་འཁོད།
2CO 9:10 ས་བོན་འདེབས་མཁན་ལ་ས་བོན་དང༌། ཟ་བྱེད་ཀྱི་བག་ལེབ་མཁོ་འདོན་གནང་མཁན་དཀོན་མཆོག་གིས་ཁྱེད་ལ་ས་བོན་མཁོ་འདོན་གནང་ཞིང་མང་དུ་གཏོང་སྟེ། ཁྱེད་ཀྱི་དྲང་བ་ཉིད་ཀྱི་ལོ་ཏོག་སྤེལ་བར་མཛད།
2CO 9:11 ཁྱེད་ཚོས་རྟག་ཏུ་གཏོང་ཕོད་ཆེན་པོས་སྦྱིན་པ་གཏོང་ཐུབ་པའི་ཕྱིར། ཁྱེད་ཚོ་རྣམ་པ་ཀུན་ཏུ་ཕུན་སུམ་ཚོགས་པར་འགྱུར། དེ་ནས་ང་ཚོའི་སྒོ་ནས་མི་རྣམས་ཀྱིས་དཀོན་མཆོག་ལ་བཀའ་དྲིན་ཆེ་ཞུ་འོང༌།
2CO 9:12 གང་ཡིན་ཞེ་ན། སྦྱིན་པའི་ཞབས་ཏོག་འདི་ཡིས་དཀོན་མཆོག་གི་མི་རྣམས་ཀྱི་དགོས་མཁོ་སྒྲུབ་པ་མ་ཟད། ཁོ་ཚོས་དགའ་བའི་ངང་ནས་དཀོན་མཆོག་ལ་བཀའ་དྲིན་ཆེ་མང་པོ་ཞུ།
2CO 9:13 སྦྱིན་པའི་ཞབས་ཏོག་འདི་བརྒྱུད་ནས། ཁོ་ཚོས་དཀོན་མཆོག་ལ་བསྟོད་པ་ཕུལ་བར་འགྱུར། གང་ལགས་ཤེ་ན། ཁྱེད་ཀྱིས་ཁོ་ཚོ་དང་དད་ལྡན་ཀུན་ལ་གཏོང་ཕོད་བྱས་པ་དེས། ཁྱེད་ཚོས་མཱ་ཤི་ཀའི་འཕྲིན་བཟང་ཁས་ལེན་ནས་ཉན་པ་ར་སྤྲོད་བྱེད།
2CO 9:14 དཀོན་མཆོག་གིས་ཁྱེད་ཚོར་ཚད་མེད་པའི་ཐུགས་རྗེ་གནང་བས་ཁོ་ཚོས་ཀྱང་ཤིན་ཏུ་བརྩེ་བའི་ངང་ནས་ཁྱེད་ཚོར་སྨོན་ལམ་འདེབས་པར་འགྱུར།
2CO 9:15 བརྗོད་ལས་འདས་པའི་གནང་སྦྱིན་གྱི་དོན་དུ་དཀོན་མཆོག་ལ་ཐུགས་རྗེ་ཆེ་ཞུའོ། །
2CO 10:1 ཁ་ཅིག་གིས་ཁྱེད་ཚོའི་རྩར་ཡོད་དུས་སྙེམས་ཆུང་ཡིན་པ་དང༌། ཁྱེད་ཚོ་དང་བྲལ་ན་སྤོབས་པ་ཅན་ཡིན་ཟེར་ཏེ། ང་རང་པའུ་ལུ་ཡིས་མཱ་ཤི་ཀའི་སྙེམས་ཆུང་དང༌། ཐུགས་དུལ་པོའི་སྒོ་ནས་ཁྱེད་ཚོར་རེ་འབོད་བྱེད།
2CO 10:2 ང་ཁྱེད་ཚོའི་རྩར་ཡོད་དུས། ཁྱེད་ཚོའི་ནང་ནས་ལ་ལས་ང་ཚོས་འཇིག་རྟེན་པའི་སྤྱོད་ལམ་ལྟར་བྱེད་སྙམ་པ་དེ་ཚོར་འགག་པ་བརྒྱབ་ཕོད་པའི་བློ་ཁོག་ཆེན་པོ་དེ་བྱེད་མི་དགོས་པ་ཁྱེད་ཚོར་ཞུ་བ་ཆེན་པོ་ཕུལ།
2CO 10:3 ང་ཚོ་འཇིག་རྟེན་འདི་ལ་མི་ཚེ་སྐྱེལ་ཡང༌། འཇིག་རྟེན་པའི་ལུགས་སྲོལ་ལྟར་དམག་འཐབ་མི་བྱེད།
2CO 10:4 གང་ལགས་ཟེར་ན། ངེད་རྣམས་ཀྱི་མཚོན་ཆ་ནི་འཇིག་རྟེན་གྱི་མཚོན་ཆ་མ་ཡིན་གྱི། དཀོན་མཆོག་གི་ནུས་མཐུ་དང་ལྡན་པའི་མཁར་རྫོང་གཏོར་བཤིག་གཏོང་ཐུབ་པའི་མཚོན་ཆ་ཡིན།
2CO 10:5 ཁུངས་མེད་ཀྱི་རྩོད་གླེང་དང༌། དཀོན་མཆོག་གི་ཤེས་རབ་ལ་རྒོལ་བའི་སྤོབས་སེམས་ཀྱི་གེགས་བར་རེ་རེ་བཞིན་བཅོམ་ནས། མཱ་ཤི་ཀའི་བཀའ་ལ་ཉན་པའི་ཕྱིར་ང་ཚོས་གཞན་གྱི་བསམ་བློ་ཡོད་ཚད་དབང་དུ་སྡུད།
2CO 10:6 ཡང་ཁྱེད་ཚོས་མཱ་ཤི་ཀའི་བཀའ་ལ་ཡོངས་སུ་ཉན་པར་གྱུར་ནས་མི་ཉན་པ་ཐམས་ཅད་ལ་ཉེས་ཆད་གཏོང་བར་གྲ་སྒྲིག་བྱས་ཡོད།
2CO 10:7 ཕྱི་ཚུལ་ཁོ་ནར་མི་ལྟ་བར་དོན་དངོས་ལ་ལྟོས་ཤིག གལ་ཏེ་མི་སུ་ཞིག་གིས་ཡིད་རྟོན་པར་ང་མཱ་ཤི་ཀའི་ཡིན་སྙམ་ན། ཁོ་ནི་མཱ་ཤི་ཀའི་ཁོངས་སུ་གཏོགས་པ་ལྟར། ང་ཚོའང་མཱ་ཤི་ཀའི་ཁོངས་སུ་གཏོགས་པ་ཡིན་པ་བསམ་བློ་གཏོང་དགོས།
2CO 10:8 ཁྱེད་ཚོ་ཡར་རྒྱས་གཏོང་བ་ལས་མེད་པར་མི་བཟོ་བའི་ཕྱིར། གཙོ་བོས་ང་ཚོར་གནང་བའི་དབང་ཆའི་སྐོར་རྗོད་པ་མང་དྲགས་ཀྱང༌། ང་ངོ་ཚ་བར་མི་འགྱུར།
2CO 10:9 ངས་བྲིས་པའི་ཡི་གེས་ཁྱེད་ཚོར་འཇིགས་སྣང་སྐུལ་མཁན་དང་འདྲ་བར་མཐོང་བར་མི་འདོད།
2CO 10:10 གང་ཡིན་ཞེ་ན། ཁ་ཤས་ཀྱིས་པའུ་ལུས་བྲིས་པའི་ཡི་གེ་དྲག་པོ་དང་དབང་ཤུགས་ལྡན་ཡིན་ཡང༌། འདིར་སླེབས་ན་ཁོ་རང་ཉམ་ཆུང་དང་གཏམ་ལ་མི་མཁས་ཞེས་བརྗོད།
2CO 10:11 དེ་ལྟར་རྗོད་མཁན་གྱིས་འདི་ཡང་ཤེས་དགོས་ཏེ། ང་ཚོ་དེར་མེད་པའི་དུས་སུ་ཡི་གེའི་སྒོ་ནས་གང་སྨྲས་པ་ནི་དེར་སླེབས་ནས་ང་ཚོས་བྱེད་པར་བྱ།
2CO 10:12 རང་བསྟོད་བྱེད་མཁན་གྱི་གྲལ་དུ་རྩི་བའམ་སྡུར་བ་ང་ཚོས་མི་ཕོད། ཁོ་ཚོས་རང་གི་ཚད་རང་ལ་རྒྱག་ཅིང༌། ཁོ་རང་དང་སྡུར་བས་ཤེས་རབ་མི་ལྡན་པ་ཞིག་རེད་ཨང༌།
2CO 10:13 འོན་ཀྱང་ང་ཚོས་ཚད་ལས་འདས་པའི་སྤོབས་པ་མི་བྱེད། ཁྱེད་ཚོའི་མཚམས་ལ་ཐུག་སྟེ། དཀོན་མཆོག་གིས་ང་ཚོ་ལ་འཇལ་བའི་རྒྱ་ཁྱོན་གྱི་ཚད་ལ་གནས།
2CO 10:14 ང་ཚོས་ཁྱེད་ཚོ་ང་ཚོའི་དབང་འོག་ཏུ་ཡོད་པ་བཤད་པར་དེ་ཚད་ལས་མི་རྒལ། གང་ལགས་ཤེ་ན། མཱ་ཤི་ཀའི་འཕྲིན་བཟང་དང་བཅས་པར་ཁྱེད་ཚོའི་བར་དུ་སླེབས་པ་དང་པོ་ཡིན།
2CO 10:15 ང་ཚོ་ཚད་ལས་མི་རྒལ་ཞིང༌། གཞན་གྱིས་བསྒྲུབས་པའི་ལས་ཀྱི་སྐོར་འུད་ཤོབ་མི་ཤོད་ཀྱང༌། ཁྱེད་ཀྱི་དད་པ་འཕེལ་ནས་ངེད་ཀྱི་རྒྱ་ཁྱོན་གྱི་ཚད་ཁྱེད་ཚོའི་ཁྲོད་དུ་རྒྱ་ཆེ་རུ་འགྲོ་བའི་རེ་བ་ཡོད།
2CO 10:16 དེ་ནས་མི་གཞན་གྱི་ས་ཆར་བསྒྲུབས་པའི་ལས་ཀྱི་སྐོར་འུད་ཤོབ་མི་ཤོད་པར། ང་ཚོས་ཁྱེད་ཀྱི་ཕར་ཕྱོགས་སུ་ཆགས་པའི་ཡུལ་དུ་འཕྲིན་བཟང་སྒྲོག་ཐུབ།
2CO 10:17 གསུང་རབ་ལྟར། སུ་ཞིག་གིས་བསྟོད་པ་འཕུལ་འདོད་ན་གཙོ་བོས་གང་མཛད་པ་དེ་བསྟོད་པར་བྱོས་ཤིག
2CO 10:18 གང་ལགས་ཤེ་ན། གདེང་འཇོག་འཐོབ་པའི་མི་ནི་རང་ལ་རང་བསྟོད་བཏང་ནས་མ་ཡིན་པར་གཙོ་བོས་བསྟོད་པ་གཏོང་བ་དེ་ཡིན་ནོ། །
2CO 11:1 ངའི་ཅུང་ཟད་ལྐུགས་རྟགས་ཚ་བའི་སྐད་ཆ་ལ་ཁྱེད་ཚོས་བཟོད་པ་སྒོམ་པར་འདོད། དོན་དངོས་ཐོག་ཁྱེད་ཚོས་བཟོད་པ་སྒོམ་བཞིན་ཡོད།
2CO 11:2 དཀོན་མཆོག་ལྟར་ངས་ཁྱེད་ཚོར་སེམས་ཁུར་ཆེན་པོ་བྱེད་དེ། ཁྱེད་ཚོ་གཙང་བའི་གཞོན་ནུ་མ་བཞིན་ངས་ཁྱོ་ག་མཱ་ཤི་ཀ་ཁོ་ནར་བག་མར་བཏང་བ་ཡིན།
2CO 11:3 སྦྲུལ་གྱིས་གཡོ་ཐབས་ཀྱི་སྒོ་ནས་ཧ་ཝ་ལ་མགོ་སྐོར་བཏང་བ་ལྟར། ཁྱེད་ཚོའི་སེམས་ཀྱང་མཱ་ཤི་ཀར་ལྷག་བསམ་དང་དྲང་པོ་ཡོད་པ་དེ་ལས་བསླུ་བར་འགྱུར་བའི་འཇིགས་པ་ཡོད།
2CO 11:4 གང་ཡིན་ཞེ་ན། མི་སུ་ཞིག་ཡོང་ནས་སྔར་ང་ཚོས་མ་བསྒྲགས་པའི་ཡེ་ཤུ་གཞན་ཞིག་གི་སྐོར་བསྒྲགས་པའམ། ཡང་ན་ཁྱོད་ཀྱིས་སྔར་མ་ཐོབ་པའི་སེམས་ཉིད་གཞན་ཞིག་ཐོབ་པའམ། ཡང་ན་སྔར་ཁྱོད་ཀྱིས་དང་ལེན་བྱས་པའི་འཕྲིན་བཟང་དེ་ལས་འཕྲིན་བཟང་རྫུན་མ་ཞིག་དང་ལེན་བྱས་ན། ཁྱོད་ཚོས་ཐེ་ཚོམ་མེད་པའི་ངང་ནས་དང་ལེན་བྱེད།
2CO 11:5 ངའི་བསམ་པར། ང་ནི་མཆོག་ཏུ་གྱུར་བའི་སྐུ་ཚབ་ཡིན་ཟེར་མཁན་རྣམས་ལས་རྩ་བ་ནས་དམན་པ་མེད།
2CO 11:6 ང་སྨྲ་མ་མཁས་ཀྱང་རྟོགས་པ་དང་ལྡན་པ་ཞིག་ཡིན་པ་ཐབས་ཀུན་གྱིས་རྣམ་པ་ཐམས་ཅད་ནས་ང་ཚོས་ཁྱོད་ཚོར་གསལ་པོར་བསྟན།
2CO 11:7 ངས་རང་དམའ་བར་བཏང་ནས་ཁྱེད་ཚོ་མཐོ་སར་འདེགས་པའི་ཕྱིར་ཁྱེད་ཚོར་དཀོན་མཆོག་གི་འཕྲིན་བཟང་རིན་མེད་པར་བསྒྲགས། དེ་ནི་སྡིག་ཉེས་ཡིན་ནམ།
2CO 11:8 ཁྱོད་ཚོར་ཞབས་ཏོག་བྱེད་པའི་ཕྱིར་ངས་ཕྲོགས་པ་ནང་བཞིན་ཆོས་ཚོགས་གཞན་དག་ནས་གླ་ཆ་བླངས་པ་ཡིན།
2CO 11:9 ང་ཁྱོད་ཚོའི་རྩར་ཡོད་དུས་མཁོ་ཆས་མེད་པར་གྱུར་ནའང་ཁྱོད་ཚོར་ཁུར་པོ་བཟོས་མེད། གང་ཡིན་ཟེར་ན། མ་ཀེ་དོན་ཡཱ་ཡུལ་ནས་ཡོང་བའི་སྤུན་ཟླ་རྣམས་ཀྱིས་ང་ལ་རྒྱབ་སྐྱོར་བྱས། དོན་ཐམས་ཅད་དུ་ངས་སྔར་ཁྱོད་ཚོར་ཁུར་པོ་མ་བཟོས་པ་ལྟར། མུ་མཐུད་ངས་ཁྱོད་ཚོར་ཁུར་པོ་མི་བཟོ།
2CO 11:10 ངའི་སེམས་ནང་ན་ཡོད་པའི་མཱ་ཤི་ཀའི་བདེན་པ་དཔང་དུ་བཙུགས་ནས། ངས་རིན་མེད་པར་ཁྱོད་ཚོར་འཕྲིན་བཟང་སྒྲོག་པའི་སྤོབས་པ་དེ་ཨ་ཀ་ཡཱ་ཡུལ་ལ་སུས་ཀྱང་འགོག་པར་མི་འགྱུར།
2CO 11:11 ཅི་ལགས་ཟེར་ན། ངས་ཁྱོད་ཚོར་གཅེས་པར་མི་འཛིན་པའི་ཕྱིར་རམ། ངས་ཁྱོད་ཚོར་གཅེས་པ་དེ་དཀོན་མཆོག་གིས་མཁྱེན་ནོ།
2CO 11:12 འོན་ཀྱང་ངས་ད་ལྟ་གང་བྱེད་པ་དེ་མུ་མཐུད་དེ་ལྟར་བྱ། དེ་ནས་ཁོ་ཚོའི་ལས་ཀ་ང་ཚོའི་ལས་ཀ་དང་འདྲ་བ་ཡིན་ཞེས་ཟེར་འདོད་མཁན་རྣམས་ཀྱིས་འུད་ཤོབ་བྱེད་པའི་གོ་སྐབས་མེད་པར་འགྱུར།
2CO 11:13 དེ་ལྟ་བུའི་མི་རྣམས་ནི་སྐུ་ཚབ་རྫུན་མ་དང༌། གཡོ་སྒྱུའི་ལས་བྱེད་མཁན། མཱ་ཤི་ཀའི་སྐུ་ཚབ་ཡིན་མདོག་བྱེད་མཁན་དེ་ཚོ་ཡིན།
2CO 11:14 བདུད་སཱ་ཏན་གྱིས་ཀྱང་འོད་ཀྱི་ཕོ་ཉ་ཡིན་མདོག་བྱེད་པས་དེ་ངོ་མཚར་ཆེ་བ་མིན།
2CO 11:15 དེའི་ཕྱིར་ཁོའི་གཡོག་པོས་ཀྱང་དྲང་བ་ཉིད་ཀྱི་གཡོག་པོ་ཡིན་མདོག་བྱས་ན་ངོ་མཚར་ཆེ་བ་མིན། ཁོ་ཚོའི་ལས་ཀའི་མཇུག་འབྲས་དེ་ཁོ་ཚོའི་བྱ་སྤྱོད་དང་མཐུན་ནོ། །
2CO 11:16 སུ་ཞིག་གིས་ང་བླུན་པོ་ཡིན་པར་མ་སོམས་ཤིག་ཅེས་ངས་ཡང་བསྐྱར་རྗོད། གལ་ཏེ་དེ་ལྟར་བསམས་ན། ངས་ཀྱང་རང་བསྟོད་ཏོག་ཙམ་བྱེད་པའི་ཕྱིར་ང་ལྐུགས་པ་ཡིན་པར་དང་ལེན་གྱིས་ཤིག
2CO 11:17 ངས་གང་ཟེར་བ་འདི་ནི་གཙོ་བོ་ནས་མ་ཡིན་ཏེ། ངས་ལྐུགས་པ་ནང་བཞིན་སྐད་ཆ་ཤོད།
2CO 11:18 མི་མང་པོས་འཇིག་རྟེན་གྱི་ལུགས་སྲོལ་ལྟར་རང་བསྟོད་བྱེད་པས་ངས་ཀྱང་རང་བསྟོད་བྱེད།
2CO 11:19 ཁྱོད་ཚོ་ཤེས་རབ་དང་ལྡན་པས་དགའ་བའི་ངང་ནས་ལྐུགས་པ་རྣམས་ལ་བཟོད་སྒོམ་བྱེད།
2CO 11:20 མི་སུ་ཞིག་གིས་ཁྱོད་ཚོར་བྲན་གཡོག་ཏུ་བཅུག་གམ། བཤུ་གཞོག་བཏང་ངམ། མགོ་སྐོར་བཏང་ངམ། རང་མཐོང་ཆེན་པོ་བྱས་སམ། འགྲམ་ལྕག་བརྒྱབ་ནའང་ཁྱོད་ཚོས་དེ་ལ་བཟོད་པར་བྱེད།
2CO 11:21 དེ་ལྟར་བྱེད་པ་ང་ཚོ་སྟོབས་ཞན་པ་ཡིན་ཞེས་ངས་ངོ་ཚ་བའི་ངང་ནས་ཟེར། ངས་ལྐུགས་པའི་གཏམ་ཤོད་དེ། གཞན་གྱིས་རང་བསྟོད་བྱེད་པར་ཕོད་ན་ངས་ཀྱང་དེ་ལྟར་བྱེད་ཕོད།
2CO 11:22 ཁོ་ཚོ་ཡ་ཧུ་དཱ་པ་ཡིན་ནམ། ངའང་ཡིན། ཁོ་ཚོ་ཡི་སི་ར་ཨེལ་པ་ཡིན་ནམ། ངའང་ཡིན། ཁོ་ཚོ་མེས་པོ་ཨབ་ར་ཧམ་གྱི་བུ་རྒྱུད་ཡིན་ནམ། ངའང་ཡིན།
2CO 11:23 ཁོ་ཚོ་མཱ་ཤི་ཀའི་ཞབས་ཕྱི་ཡིན་ནམ། ངས་སྨྱོ་བ་ལྟར་རྗོད་དེ། ང་དེ་བས་ཀྱང་ཡིན། ངས་ཁོ་ཚོ་ལས་ཧུར་བརྩོན་ཆེ་བའི་ལས་ཀ་བྱས། བརྩོན་ཁང་ལ་ཐེངས་མང་བ་བཅུག ང་ལ་རྟ་ལྕག་གིས་དྲག་པར་བརྡུངས་ཤིང༌། སྲོག་ཉེན་ཡང་ཡང་མྱོང༌།
2CO 11:24 ཡ་ཧུ་དཱ་པ་རྣམས་ཀྱིས་ང་ལ་རྟ་ལྕག་གཅིག་གིས་མ་གཏོགས་བཞི་བཅུ་ཐེངས་ལྔ་བརྡུངས།
2CO 11:25 ཐེངས་གསུམ་ང་ལ་དབྱུག་པས་བརྡུངས། ཐེངས་གཅིག་རྡོ་རུབ་བཏང༌། ཐེངས་གསུམ་གྲུ་གཟིངས་བཤིག ཉིན་མཚན་གཅིག་རིང་ང་རྒྱ་མཚོའི་དཀྱིལ་ལ་ལུས།
2CO 11:26 ཐེངས་མང་འགྲུལ་བྱེད་དུས་ང་ལ་གཙང་པོའི་ཉེན་ཁ་ཐུག་ཅིང༌། ཇག་པའི་ཉེན་ཁ་ཐུག ཕ་ཡུལ་གཅིག་པ་དང་ཡ་ཧུ་དཱ་མིན་པ་ནས་ཉེན་ཁ་ཐུག གྲོང་ཁྱེར་དང༌། དབེན་སྟོང་ལ་འགྲོ་དུས་ཉེན་ཁ་བྱུང༌། རྒྱ་མཚོའི་ཉེན་ཁ་བྱུང༌། སྤུན་ཟླ་རྫུན་མ་ནས་བྱུང་བའི་ཉན་ཁ་ཐུག
2CO 11:27 ངལ་རྩོལ་བྱེད་པ་དང་དཀའ་ངལ་མྱོང་བ། ཐེངས་མང་པོ་གཉིད་མི་ལོག་པར་སྡོད་པ། ལྟོགས་པ་དང་སྐོམ་པ། ལན་མང་པོ་ཟས་མེད་པ། གྲང་ངར་དང་གོས་དང་བྲལ་བ་ང་ལ་བྱུང༌།
2CO 11:28 དེས་མ་ཚད་ང་ལ་ཆོས་ཚོགས་ཚང་མར་དོ་སྣང་བྱེད་པས་ཉིན་ལྟར་སེམས་ཁྲལ་ཡོད།
2CO 11:29 གཞན་རྣམས་སྟོབས་ཞན་པར་འགྱུར་ན་ངའང་སྟོབས་ཞན་པར་འགྱུར། གཞན་རྣམས་བསླུ་བྲིད་པར་གྱུར་ན་ང་བསླུ་བྲིད་བྱེད་མཁན་ལ་ཁོང་ཁྲོ་སྐྱེ།
2CO 11:30 གལ་སྲིད་ངས་རང་བསྟོད་བྱེད་དགོས་ན་ང་རང་གི་ཞན་ཆའི་ཐད་ལ་རང་བསྟོད་བྱེད།
2CO 11:31 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་སྟེ་རྒྱུན་དུ་བསྟོད་བསྔགས་པ་དེས་ང་རྫུན་མི་ཤོད་པར་མཁྱེན་ནོ།
2CO 11:32 དཱ་མེ་སེག་གྲོང་ཁྱེར་དུ་རྒྱལ་པོ་ཨ་རེ་ཊ་ཡི་སྤྱི་ཁྱབ་ཀྱིས་ང་འཛིན་བཟུང་བའི་ཕྱིར་གྲོང་ཁྱེར་བསྲུངས་ཀྱང༌།
2CO 11:33 ང་སླེ་པོ་ཆེན་པོ་ཞིག་གི་ནང་དུ་ལྕགས་རིའི་ཨི་ཁུང་བརྒྱུད་ནས་མར་ཕབ་པས་དེའི་ལག་པ་ནས་བྲོས་ནས་ཐར་བར་གྱུར་རོ། །
2CO 12:1 ངས་རང་བསྟོད་བྱེད་པ་ཕན་མེད་ཡིན་ཡང་དེ་འདྲ་མ་བྱེད་ཐབས་མེད་ཡིན། ངས་མུ་མཐུད་གཙོ་བོས་གནང་བའི་ཞལ་གཟིགས་དང་མངོན་དུ་བྱུང་བའི་སྐོར་བཤད་རྒྱུར།
2CO 12:2 ལོ་བཅུ་བཞིའི་སྔོན་དུ་དཀོན་མཆོག་གི་ཞིང་ཁམས་གསུམ་པར་མྱུར་དུ་ཡར་ཁྲིད་པའི་མཱ་ཤི་ཀ་ལ་དད་ལྡན་པ་ཞིག་ཡོད་པ་ངས་ངོ་ཤེས། ཁོ་ལུས་དང་ལྡན་ནམ་ཡང་ན་མི་ལྡན་པར་ཡར་ཁྲིད་པ་ངས་མི་ཤེས་དེ་དཀོན་མཆོག་གིས་མཁྱེན།
2CO 12:3 ཡང་མི་དེ་དཀོན་མཆོག་གི་ཞིང་ཁམས་སུ་མྱུར་དུ་ཡར་ཁྲིད་ནས་མི་ཡིས་རྗོད་མི་ཆོག་པ་དང་སྨྲ་མི་སྲིད་པའི་གསུང་ཐོས་པ་ངས་ཤེས། དེ་ནི་ལུས་དང་བཅས་སམ་ལུས་དང་བྲལ་བར་བྱུང་ངས་མི་ཤེས་ཏེ་དཀོན་མཆོག་གིས་མཁྱེན།
2CO 12:5 མི་འདི་ལྟ་བུའི་ཆེད་དུ་ངས་བསྟོད་པར་བྱེད། འོན་ཏེ་ང་རང་ལ་སྟོབས་ཞན་པ་ཕུད་རང་བསྟོད་མི་བྱེད།
2CO 12:6 ངས་རང་བསྟོད་བྱེད་འདོད་ནའང་ང་གླེན་པ་མིན། གང་ཡིན་ཞེ་ན། ངས་བདེན་པར་སྨྲའོ། འོན་ཀྱང་མི་སུ་ཞིག་གིས་ངའི་སྤྱོད་ལམ་མཐོང་བའམ་ངའི་ཁ་ནས་གང་ཐོས་པ་དེ་ལས་ལྷག་པར་མི་རྩི་བའི་ཕྱིར་ངས་དེ་ལྟར་མི་བྱེད།
2CO 12:7 ཡང་ངར་མངོན་དུ་བྱུང་བ་དེ་ཤིན་ཏུ་ཆེ་བས་ང་རྒྱལ་མི་སྐྱེ་བའི་ཕྱིར། ང་ལ་མནར་གཅོད་བྱེད་པར་ངའི་ལུས་ནང་ལ་ཚེར་མ་ཞིག་གནང་བྱུང་བ་དེ་ནི་བདུད་སཱ་ཏན་གྱི་ཕོ་ཉ་ཞིག་ཡིན།
2CO 12:8 དེ་ལས་འབྲལ་བའི་ཕྱིར་ངས་གཙོ་བོ་ལ་ཞུ་བ་ཆེན་པོ་ཐེངས་གསུམ་ཕུལ་ཡང༌།
2CO 12:9 ཁོང་གིས་ང་ལ་ངའི་ཐུགས་རྗེ་ཁྱོད་ལ་འདང་ངེས་ཡོད། གང་ལགས་ཟེར་ན། ངའི་ནུས་མཐུ་སྟོབས་ཞན་པའི་དུས་ལ་ཡོངས་སུ་རྫོགས་པར་འགྱུར་རོ་ཞེས་གསུངས། དེའི་ཕྱིར་ངས་ངའི་ཞན་ཆའི་ཐད་ལ་དེ་བས་སྤོབས་པ་བྱེད། དེ་ནས་མཱ་ཤི་ཀའི་ནུས་མཐུ་ང་ལ་གནས་པར་འགྱུར།
2CO 12:10 དེ་བས་ན་མཱ་ཤི་ཀའི་དོན་དུ་ཞན་པ་དང༌། དམའ་འབེབས། དཀའ་ངལ། མནར་གཅོད། རྐྱེན་ངན་སོགས་ལ་ངས་དགའ་བའི་ངང་ནས་བཟོད་པར་བྱེད། གང་ལགས་ཤེ་ན། ང་ཞན་པའི་ཚེ་དེ་དུས་སྟོབས་དང་ལྡན་ནོ། །
2CO 12:11 ང་ལྐུགས་པར་གྱུར། དེ་ནི་ཁྱོད་ཚོས་ང་དེ་ལྟར་བཟོས། ཁྱོད་ཚོས་ང་ལ་སྔར་ནས་བསྟོད་འོས་པ་ཡིན། གང་ལགས་ཟེར་ན། ང་ནི་ཅིའང་མ་ཡིན་ཡང་སྐུ་ཚབ་མཆོག་ཏུ་གྱུར་བ་ཟེར་མཁན་རྣམས་ལས་དམའ་བ་རྩ་བ་ནས་མེད།
2CO 12:12 རྟགས་དང༌། ངོ་མཚར་བའི་དོན། ནུས་མཐུ་ལྡན་པའི་ལས་ཀ་སྟེ་སྐུ་ཚབ་དངོས་ཀྱི་རྟགས་ནི་ཁྱོད་ཚོའི་ཁྲོད་དུ་བཟོད་པ་ཆེན་པོས་བསྒྲུབས་པར་གྱུར།
2CO 12:13 ཁྱོད་ཚོ་ཆོས་ཚོགས་གཞན་ལས་ཅི་ལྟར་དམའ་བར་རྩིས་པ་ཡིན། ངས་བྱས་པ་ནི་ཁྱོད་ཚོར་ཁུར་པོ་མ་བཟོས་པ་དེ་ཡིན། ནོར་འཁྲུལ་དེར་དགོངས་དག་ཞུ་རྒྱུ་ཡིན།
2CO 12:14 ད་ཐེངས་གསུམ་པར་ཁྱོད་ཚོའི་རྩར་ཡོང་བའི་གྲ་སྒྲིག་ཡོད། ངས་ཁྱོད་ཚོར་ཁུར་པོ་མི་བཟོ། གང་ཡིན་ཞེ་ན། ངས་ཁྱོད་ཀྱི་ནོར་མི་འཚོལ་གྱི། ཁྱོད་རང་འཚོལ། ཕྲུ་གུས་ཕ་མའི་དོན་ལ་མ་ཡིན་གྱི། ཕ་མས་ཕྲུ་གུའི་ཆེད་དུ་དངུལ་གསོག་དགོས་པས་སོ།
2CO 12:15 ཁྱོད་ཚོའི་ཕྱིར་ནོར་མ་ཟད་ང་རང་ཡང་སྦྱིན་པར་དགའོ། ངས་ཁྱོད་ཚོར་ལྷག་པར་གཅེས་པར་བཟུང་ན། ཁྱོད་ཚོས་ང་ལ་ཉུང་ངུ་གཅེས་པར་འཛིན་ནམ།
2CO 12:16 གང་ལྟར་ངས་ཁྱོད་ཚོར་ཁུར་པོ་མ་བཟོས། འོན་ཀྱང་ཁྱོད་ཚོའི་ནང་ནས་ཁ་ཤས་ཀྱིས་ང་གཡོ་སྒྱུ་ཅན་ཡིན་ཞིང༌། གཡོ་ཐབས་ཀྱིས་ཁྱོད་ཚོར་མགོ་སྐོར་བཏང་བར་བརྗོད།
2CO 12:17 ངས་ཁྱོད་ཚོའི་རྩར་མི་སུ་ཞིག་བཏང་ནས་ཁྱོད་ཚོར་བཤུ་གཞོག་བཏང་བ་ཡིན་ནམ།
2CO 12:18 ངས་ཐེ་ཏུ་ལ་བསྐུལ་ནས་སྤུན་ཟླ་ཞིག་དང་མཉམ་དུ་བཏང༌། ཐེ་ཏུ་ཡིས་ཁྱོད་ཚོར་བཤུ་གཞོག་བཏང་ངམ། ང་ཚོ་གཉིས་བློ་སེམས་གཅིག་མཐུན་ནས་སྤྱོད་ལམ་མ་མཐུན་ནམ།
2CO 12:19 ད་ལྟའི་བར་དུ་ང་ཚོས་ཁྱོད་རྣམས་ལ་ང་ཚོ་ཉེས་སྐྱོན་མེད་པའི་སྐོར་གསལ་བཤད་བྱས་པར་སེམས་སམ། མ་ཡིན་ཏེ། མཱ་ཤི་ཀའི་སྒོ་ནས་དཀོན་མཆོག་གི་སྤྱན་སྔར་ང་ཚོས་སྨྲའོ། གཅེས་པ་རྣམས། ང་ཚོས་གང་བྱེད་པ་ཐམས་ཅད་ཁྱོད་ཚོར་ཡར་རྒྱས་ཡོང་བའི་ཆེད་དུ་ཡིན།
2CO 12:20 ང་དེར་སླེབས་ནས་ཁྱོད་ཚོ་ནི་ངའི་འདོད་པ་བཞིན་དུ་མེད་པ་དང༌། ཁྱོད་ཚོའི་འདོད་པ་བཞིན་དུ་ངའང་མེད་པར་མཐོང་བ་དང༌། ཁྱོད་ཚོའི་ནང་ནས་ཁ་རྩོད་དང༌། ཕྲག་དོག ཁོང་ཁྲོ། མི་མཐུན་པའི་ཕྱོགས་ཁག དམའ་འབེབས་གཏོང་བ། གཏམ་ངན། ང་རྒྱལ། སྒྲིག་ལམ་མེད་པ་བཅས་ཡོད་པར་འཇིགས།
2CO 12:21 དེར་ཡང་བསྐྱར་སླེབས་ནས་ཁྱོད་ཚོའི་དྲུང་དུ་ངའི་དཀོན་མཆོག་གིས་ང་ལ་དམའ་བར་མཛད་པའི་འཇིགས་པ་དང༌། མི་མང་པོས་སྔར་བྱས་པའི་མི་གཙང་བ་དང༌། ལོག་གཡེམ། འདོད་ཆགས་བཅས་པའི་སྡིག་ཉེས་མ་སྤངས་པའི་རྐྱེན་གྱིས་ང་མྱ་ངན་བྱེད་དགོས་པར་འཇིགས་སོ། །
2CO 13:1 ད་ཐེངས་གསུམ་པར་ང་ཁྱོད་ཚོའི་རྩར་ཡོང་བཞིན་ཡོད། མདོ་ལས་བཀོད་པ་ལྟར། ར་སྤྲོད་བྱེད་པའི་ཕྱིར་ཉེས་འགེལ་ཅི་ལ་ཡང་དཔང་པོ་བྱེད་མཁན་གཉིས་གསུམ་དགོས།
2CO 13:2 ཐེངས་གཉིས་པ་དེར་ཡོད་དུས་ངས་སྔར་སྡིག་ཉེས་བྱས་པ་དང་གཞན་ཐམས་ཅད་ལ་ཉེན་བརྡ་བཏང༌། ད་ང་དེར་མེད་ཀྱང་ངས་ཡང་བསྐྱར་འདི་ལྟར་ཟེར། དེར་ལོག་སྐབས་ངས་ཁོ་ཚོར་བཟོད་སྒོམ་མི་བྱེད།
2CO 13:3 རྒྱུ་མཚན་ནི་ཁྱོད་ཚོས་མཱ་ཤི་ཀས་ང་བརྒྱུད་ནས་གསུང་པ་དེ་ར་སྤྲོད་བྱེད་འདོད། ཁོང་ནི་ཁྱོད་ཚོའི་དོན་སྒྲུབ་པར་སྟོབས་ཞན་པ་མ་ཡིན་གྱི། ཁྱོད་ཚོའི་ཁྲོད་དུ་ནུས་མཐུ་ཧ་ཅང་ཆེ།
2CO 13:4 ཁོང་ནི་སྟོབས་མེད་པའི་ངང་ནས་རྒྱང་ཤིང་སྒང་ལ་བསད་ཀྱང༌། དཀོན་མཆོག་གི་ནུས་མཐུ་ཡིས་གསོན། དེ་ལྟར་ང་ཚོའང་ཁོང་གི་ནང་ན་སྟོབས་མེད་པ་ཡིན་ཡང༌། ཁྱོད་ཚོར་གཡོག་བྱེད་པའི་ཕྱིར་དཀོན་མཆོག་གི་ནུས་མཐུའི་སྒོ་ནས་ངེད་རྣམས་ཁོང་དང་མཉམ་དུ་གསོན་ནོ། །
2CO 13:5 དད་པ་ལ་གནས་སམ་མི་གནས་པར་ཤེས་པའི་ཕྱིར་ཁྱོད་ཚོ་རང་གིས་རང་ལ་ཚོད་ལྟ་གྱིས་ཤིག རང་གིས་རང་ལ་བརྟག་དཔྱད་བྱོས་ཤིག ཚད་མ་ལོན་པ་མ་གཏོགས་ཡེ་ཤུ་མཱ་ཤི་ཀ་ཁྱོད་ཚོའི་ནང་ན་བཞུགས་པར་མི་ཤེས་སམ།
2CO 13:6 ང་ཚོ་ཚད་མ་ལོན་པ་མ་ཡིན་པར་ཁྱོད་ཚོས་ཤེས་པའི་རེ་བ་ཡོད།
2CO 13:7 ང་ཚོ་ཚད་ལོན་པ་ཡིན་པར་མཐོང་བའི་ཕྱིར་མ་ཡིན་གྱི། ང་ཚོ་ཚད་མ་ལོན་པ་ལྟར་ཡོད་ཀྱང་ཁྱོད་ཚོས་འོས་པ་གང་ཡིན་པ་བྱེད་པའི་ཕྱིར། ཁྱོད་ཚོས་ངན་པ་མི་བྱེད་པ་ང་ཚོས་དཀོན་མཆོག་ལ་གསོལ་བ་འདེབས།
2CO 13:8 གང་ཡིན་ཞེ་ན། བདེན་པ་ལ་རྒོལ་བའི་དབང་ཆ་མེད་དེ། ང་ཚོས་བདེན་པ་དང་མཐུན་པ་འབའ་ཞིག་བྱེད་ཐུབ།
2CO 13:9 ང་ཚོ་སྟོབས་ཞན་པ་དང་ཁྱེད་ཚོ་སྟོབས་དང་ལྡན་པའི་ཚེ་ང་ཚོ་དགའ་བར་བྱེད། ཡང་ཁྱེད་ཚོ་སེམས་ཉིད་སྨིན་པར་འགྱུར་བའི་ཕྱིར་ང་ཚོས་གསོལ་བ་འདེབས།
2CO 13:10 ང་ཡོང་ནས་གཙོ་བོས་ང་ལ་གནང་བའི་དབང་གིས་ཁྱོད་ཚོར་དབང་ཆ་ནན་པོ་སྤྱོད་མི་དགོས་པའི་ཕྱིར་ང་དེར་མེད་པའི་དུས་སུ་དོན་འདི་རྣམས་འབྲི། དབང་དེ་ནི་ཁྱེད་ཚོ་ཡར་རྒྱས་གཏོང་བ་ལས་རྒུད་དུ་མི་འཇུག་པའི་ཆེད་དུ་ཡིན།
2CO 13:11 མཐར་སྤུན་ཟླ་རྣམས། དགའ་བར་གྱིས། ཡོངས་སུ་རྫོགས་པར་འགྱུར་བའི་འབད་རྩོལ་བྱེད། ངའི་སྐུལ་མ་ལ་ཉན། ཡིད་མཐུན་ཏེ་ཁྱེད་ཚོ་མཉམ་དུ་ཞི་བདེར་གནས། བྱམས་པ་དང་ཞི་བདེ་གནང་མཁན་དཀོན་མཆོག་ཁྱེད་ཚོ་དང་མཉམ་དུ་བཞུགས་པར་འགྱུར།
2CO 13:12 བྱམས་སེམས་ཀྱི་ཐོག་ནས་གཅིག་གིས་གཅིག་ལ་འོ་ཡིས་འཚམས་འདྲི་ཞུས།
2CO 13:13 དད་ལྡན་ཐམས་ཅད་ཀྱིས་ཁྱེད་ཚོར་འཚམས་འདྲི་ཞུ།
2CO 13:14 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་དང༌། དཀོན་མཆོག་གི་བྱམས་པ། དམ་པའི་ཐུགས་ཉིད་དང་འགྲོགས་པ་དེ་ཁྱེད་ཐམས་ཅད་ལ་ལྡན་པར་གྱུར་ཅིག །
GAL 1:1 མིའི་ཕྱོགས་ནས་སམ། མི་རྣམས་ལ་བརྟེན་ནས་མ་བཏང་བར། ཡེ་ཤུ་མཱ་ཤི་ཀ་དང་ཁོང་འཆི་བ་ནས་སླར་གསོན་པར་མཛད་མཁན་ཡབ་དཀོན་མཆོག་གིས་མངགས་པའི་སྐུ་ཚབ་པའུ་ལུ་ང་དང༌།
GAL 1:2 འདིར་མཉམ་དུ་ཡོད་པའི་སྤུན་ཟླ་ཐམས་ཅད་ཀྱིས་ག་ལད་ཡཱ་ཡུལ་དུ་ཡོད་པའི་དད་ལྡན་ཆོས་ཚོགས་རྣམས་ལ་འཕྲིན་ཡིག་འདི་ཕུལ་ལོ།
GAL 1:3 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་རྣམས་ལ་འཐོབ་པར་གྱུར་ཅིག
GAL 1:4 ང་ཚོ་དུས་ངན་པ་འདི་ལས་སྐྱོབ་པའི་ཕྱིར་ང་ཚོ་སྡིག་ཉེས་ལས་ཐར་དུ་འཇུག་པར་ཁོང་གིས་རང་སྲོག་བློས་བཏང་གནང༌། དེ་ནི་ང་ཚོའི་ཡབ་དཀོན་མཆོག་གི་དགོངས་པ་ལྟར་ཡིན་པས།
GAL 1:5 དུས་གཏན་དུ་ཁོང་ལ་གཟི་བརྗིད་དང་ལྡན་པར་གྱུར་ཅིག ཨ་མེན།
GAL 1:6 ཁྱོད་རྣམས་ཀྱིས་མཱ་ཤི་ཀའི་ཐུགས་རྗེའི་སྒོ་ནས་འབོད་གནང་མཁན་དེ་མགྱོགས་པོར་འདོར་བ་དང༌། འཕྲིན་བཟང་གཞན་ཞིག་ལ་ཡིད་ཆེས་པས་ང་ཡ་མཚན་ཆེན་པོ་སྐྱེས།
GAL 1:7 འཕྲིན་བཟང་གཞན་དེ་དོན་དམ་དུ་འཕྲིན་བཟང་རྩ་བ་ནས་མ་ཡིན། ཁྱོད་རྣམས་ཀྱི་སེམས་དཀྲུགས་ཏེ་མཱ་ཤི་ཀའི་འཕྲིན་བཟང་འཁྱོག་བཤད་བྱེད་འདོད་མཁན་ཁ་ཤས་ཡོད།
GAL 1:8 འོན་ཀྱང་ང་ཚོའམ། ཡང་ན་དཀོན་མཆོག་གི་ཞིང་ཁམས་ནས་བབས་པའི་ཕོ་ཉ་ཞིག་གིས་སྔར་ང་ཚོས་ཁྱོད་རྣམས་ལ་བསྟན་པའི་འཕྲིན་བཟང་དང་མི་མཐུན་པ་ཞིག་བཤད་ན། དེར་དམྱལ་ཁམས་ལ་དུས་རྟག་ཏུ་གནས་ཏེ་ཆད་པ་ཕོག་པར་འགྱུར།
GAL 1:9 ང་ཚོས་སྔར་སྨྲས་པ་ལྟར་ད་ལྟ་ཡང་བསྐྱར་ཤོད་རྒྱུ་ཡིན། གལ་ཏེ་མི་སུ་ཞིག་གིས་ཁྱོད་རྣམས་ཀྱིས་སྔར་དང་ལེན་བྱས་པའི་འཕྲིན་བཟང་དང་མི་མཐུན་པ་ཞིག་བསྒྲགས་ན། མི་དེར་དམྱལ་ཁམས་སུ་དུས་རྟག་ཏུ་གནས་ཏེ་ཆད་པ་ཕོག་པར་འགྱུར།
GAL 1:10 ད་ལྟ་ངས་མིའམ་དཀོན་མཆོག་གི་བཀུར་སྟི་འཚོལ་ལམ། ཡང་ན་ངས་མི་རྣམས་དགྱེས་པར་བརྩོན་ནམ། གལ་ཏེ་ད་དུང་མི་རྣམས་དགའ་བར་བྱེད་འདོད་ན་ང་མཱ་ཤི་ཀའི་ཞབས་ཕྱི་མིན་ནོ། །
GAL 1:11 ངའི་སྤུན་ཟླ་རྣམས། ངས་བསྒྲགས་པའི་འཕྲིན་བཟང་དེ་ནི་མིའི་སེམས་ལས་མ་བྱུང་བ་ཁྱེད་ཚོས་ཤེས་པར་འདོད།
GAL 1:12 གང་ལགས་ཤེ་ན། ངས་འཕྲིན་བཟང་དེ་མི་རྣམས་ནས་དང་ལེན་མ་བྱས། སུས་ཀྱང་ང་ལ་མ་བསྟན། ཡེ་ཤུ་མཱ་ཤི་ཀ་ཡིས་ང་ལ་མངོན་པར་མཛད་པས་དང་ལེན་བྱས།
GAL 1:13 སྔར་ངས་ཡ་ཧུ་དཱ་པའི་ཆོས་ལུགས་འཛིན་པའི་དུས་སུ་དཀོན་མཆོག་གི་ཆོས་ཚོགས་ལ་གནོད་ཆེན་པོ་སྐྱེལ་ཏེ་མེད་པར་བྱེད་ཐབས་བྱས་པའི་སྤྱོད་ཚུལ་གྱི་སྐོར་ཁྱེད་ཀྱིས་ཐོས་མྱོང༌།
GAL 1:14 མེས་པོའི་ལུགས་སྲོལ་འཛིན་པར་བརྩོན་སེམས་ཧ་ཅང་ཆེན་པོ་ཡོད་པས། ང་དང་ན་མཉམ་ཡིན་པའི་ཕ་ཡུལ་གཅིག་པ་རྣམས་ཀྱི་ནང་ནས་ང་ཡ་ཧུ་དཱ་པའི་ཆོས་ལ་འབད་བརྩོན་ལྷག་པར་ཆེ་བ་ཡིན།
GAL 1:15 འོན་ཀྱང་དཀོན་མཆོག་གིས་ང་སྐྱེས་དུས་ནས་འདེམས་པར་མཛད་པ་དང་ཁོང་གི་ཐུགས་རྗེའི་སྒོ་ནས་འབོད་གནང་སྟེ། ངས་ཡ་ཧུ་དཱ་པ་མིན་པ་རྣམས་ཀྱི་ཁྲོད་དུ་ཁོང་གི་འཕྲིན་བཟང་སྒྲོག་པའི་ཕྱིར་དཀོན་མཆོག་གིས་རང་གི་སྲས་ང་ལ་མངོན་པར་མཛད་པ་ཐུགས་མཉེས་སྐབས།
GAL 1:16 མི་སུ་དང་ཡང་གྲོས་བསྡུར་མ་བྱས་པར། ང་ལས་སྔོན་དུ་སྐུ་ཚབ་ཏུ་གྱུར་བ་རྣམས་མཇལ་དུ་ཡེ་རུ་ཤ་ལེམ་ལ་མ་སོང་གི ཨ་རབ་ཡུལ་ལ་འཕྲལ་དུ་ཕྱིན་ནས་བསྡད་དེ་དཱ་མེ་སེག་གྲོང་ཁྱེར་ལ་ལོག
GAL 1:18 དེ་ནས་ལོ་གསུམ་གྱི་རྗེས་སུ་སྐུ་ཚབ་པེ་ཏྲོ་ཐུག་པའི་ཆེད་དུ་ང་ཡེ་རུ་ཤ་ལེམ་ལ་སོང་ནས་ཉིན་བཅོ་ལྔའི་བར་ཁོང་དང་མཉམ་དུ་བསྡད་ན་ཡང༌།
GAL 1:19 གཙོ་བོའི་གཅུང་པོ་ཡ་ཀོབ་མ་གཏོགས་སྐུ་ཚབ་གཞན་རྣམས་ཕྲད་མ་བྱུང༌།
GAL 1:20 ངས་ཁྱོད་རྣམས་ལ་བདེན་པར་སྨྲས་པ་ལས་དཀོན་མཆོག་གི་མདུན་དུ་རྫུན་གཏམ་བཤད་པ་མིན།
GAL 1:21 དེ་ནས་ང་སི་རི་ཡཱ་དང་ཀི་ལིག་ཡཱ་ཡུལ་དུ་ཕྱིན་པ་ཡིན།
GAL 1:22 ཡ་ཧུ་དཱ་ཡུལ་དུ་མཱ་ཤི་ཀའི་ཆོས་ཚོགས་ཀྱི་མི་རྣམས་ཀྱིས་ང་ད་དུང་མ་མཐོང༌།
GAL 1:23 ཁོ་ཚོས་སྔར་ང་ཚོར་གནོད་སྐྱེལ་ཞིང་ཆོས་ལུགས་མེད་པ་བཟོ་ཐབས་བྱས་པ་ཁོ་རང་གིས་ད་ལྟ་འཕྲིན་བཟང་སྒྲོག་བཞིན་འདུག་ཅེས་ཟེར་བའི་གཏམ་དེ་ཁོ་ན་ཐོས་པས།
GAL 1:24 ངའི་དོན་དུ་དཀོན་མཆོག་ལ་བསྟོད་པ་ཕུལ་ལོ། །
GAL 2:1 དེ་ནས་ལོ་ངོ་བཅུ་བཞིའི་རྗེས་སུ་པར་ན་པཱ་དང་མཉམ་དུ་ཐེ་ཏུ་ཡང་འཁྲིད་དེ་ང་ཡང་བསྐྱར་ཡེ་རུ་ཤ་ལེམ་ལ་ཡར་ཕྱིན་པ་ཡིན།
GAL 2:2 ང་མངོན་དུ་བྱུང་བའི་བཀའ་ལྟར་ཕྱིན་ཏེ། ངས་ཡ་ཧུ་དཱ་པ་མིན་པ་རྣམས་ཀྱི་ནང་དུ་སྒྲོག་པའི་འཕྲིན་བཟང་དེ་དབུ་འཁྲིད་ཟེར་མཁན་རྣམས་ལ་ཟུར་དུ་གསལ་བཤད་བྱས། དེ་ནི་ངས་གང་བྱས་པའམ། བྱེད་བཞིན་པ་དེ་དོན་མེད་པར་མི་འགྱུར་བའི་ཕྱིར་ཡིན།
GAL 2:3 ང་དང་མཉམ་དུ་ཡོད་པའི་ཐེ་ཏུ་ནི་གྷི་རིག་པ་ཡིན་ཡང་ཡ་ཧུ་དཱ་པའི་ཆོས་ཀྱི་རྟགས་བརྒྱབ་ཏུ་མ་བཅུག
GAL 2:4 ང་ཚོ་ཆོས་ཁྲིམས་ཀྱི་བྲན་གཡོག་ལྟར་དུ་འཇུག་འདོད་པའི་སྤུན་ཟླ་རྫུན་མ་རྣམས་ནི་ང་ཚོའི་ཁྲོད་དུ་གསང་བར་ཞུགས་ཏེ་མཱ་ཤི་ཀ་ཡེ་ཤུའི་ནང་ན་ཡོད་པའི་རང་དབང་ལ་སོ་ལྟ་བྱེད་པའི་རྐྱེན་གྱིས།
GAL 2:5 འཕྲིན་བཟང་གི་བདེན་པ་ཁྱེད་རྣམས་ལ་རྟག་ཏུ་གནས་པའི་ཕྱིར་ང་ཚོས་དེ་ཚོར་ཡུད་ཙམ་ཡང་མགོ་མ་སྒུར།
GAL 2:6 ཡང་འགོ་འཁྲིད་ཟེར་མཁན་རྣམས་ནི་(སྔར་དེ་ཚོ་ཅི་ལྟར་ཡིན་མིན་ང་ལ་ཁྱད་པར་མེད། གང་ལགས་ཤེ་ན། དཀོན་མཆོག་ལ་ཕྱོགས་རིས་ཅི་ཡང་མེད་) དེ་ཚོས་ངའི་བསྟན་པར་ཅི་ཡང་མ་བསྣན་པ་མ་ཟད།
GAL 2:7 དེ་ལས་ལྡོག་སྟེ་པེ་ཏྲོས་ཡ་ཧུ་དཱ་པ་རྣམས་ལ་འཕྲིན་བཟང་སྒྲོག་པའི་ལས་འགན་བཅོལ་བ་ནང་བཞིན། ངའང་ཡ་ཧུ་དཱ་པ་མིན་པ་རྣམས་ལ་སྒྲོག་པའི་ལས་འགན་བཅོལ་བ་ཡིན་པར་ཁོང་ཚོས་ཤེས།
GAL 2:8 གང་ཡིན་ཟེར་ན། པེ་ཏྲོ་ཡ་ཧུ་དཱ་པ་རྣམས་ཀྱི་དཀྱིལ་ལ་སྐུ་ཚབ་ཀྱི་ལས་ཀ་བྱེད་རྒྱུ་མངགས་མཁན་དེ་ཉིད་ཀྱིས་ང་ཡང་ཡ་ཧུ་དཱ་པ་མིན་པ་རྣམས་ཀྱི་ཁྲོད་དུ་སྐུ་ཚབ་ཀྱི་ལས་ཀ་བྱེད་རྒྱུར་མངགས།
GAL 2:9 ཀུན་གྱིས་གོང་དུ་བཀུར་བའི་འགོ་འཁྲིད་རྣམས་ཡ་ཀོབ་དང༌། པེ་ཏྲོ། ཡོ་ཧ་ནན་བཅས་ཀྱིས་ང་ལ་གནང་བའི་ཐུགས་རྗེ་རྟོགས་པས། ང་ཚོ་ཡ་ཧུ་དཱ་པ་མིན་པ་རྣམས་ལ་འགྲོ་བ་དང༌། དེ་ཚོ་ཡ་ཧུ་དཱ་པ་རྣམས་ལ་འགྲོ་བའི་མོས་མཐུན་གྱི་རྟགས་ཤིག་བསྟན་པའི་ཕྱིར་ཁོ་ཚོས་ང་དང་པར་ན་པཱ་གཉིས་ལ་ལག་པ་བཏང༌།
GAL 2:10 ཡང་དེ་ཚོས་ང་ཚོར་དབུལ་པོ་རྣམས་ལ་སེམས་འཁུར་གནང་རྒྱུའི་རེ་འབོད་བྱས། ང་དོན་དེ་རང་སྒྲུབ་པར་འདོད་དོ། །
GAL 2:11 འོན་ཀྱང་ཨན་ཏི་ཡོག་ཡཱ་གྲོང་ཁྱེར་ལ་སླེབས་པའི་རྗེས་སུ་པེ་ཏྲོས་ཉེས་པས་ངས་དད་ལྡན་རྣམས་ཀྱི་མདུན་དུ་ཁོང་ཐད་དཀར་ངོ་རྒོལ་བྱས།
GAL 2:12 གང་ཡིན་ཞེ་ན། སྔར་ཁོ་ཡ་ཧུ་དཱ་པ་མིན་པའི་སྤུན་ཟླ་རྣམས་དང་མཉམ་དུ་ཡང་ཡང་ཁ་ལག་བཟས། འོན་ཀྱང་ཡ་ཀོབ་ཀྱི་རྩ་ནས་མི་ཁ་ཤས་སླེབས་པའི་རྗེས་སུ་ཡ་ཧུ་དཱ་པའི་ཆོས་ཀྱི་རྟགས་བརྒྱབ་དགོས་ཟེར་བའི་ཕྱོགས་ཁག་ལ་འཇིགས་པས་ཁོ་ཡ་ཧུ་དཱ་པ་མིན་པའི་སྤུན་ཟླ་རྣམས་དང་མ་འགྲོགས་ཏེ་སོ་སོར་བསྡད།
GAL 2:13 ཡ་ཧུ་དཱ་པ་ཡིན་པའི་སྤུན་ཟླ་གཞན་པ་རྣམས་ཁོ་དང་མཉམ་དུ་ཚུལ་འཆོས་བྱས་པས་པར་ན་པཱ་ཡང་མགོ་འཁོར་ཐེབས་ནས་དེ་ལྟར་བྱས།
GAL 2:14 འཕྲིན་བཟང་གི་བདེན་པ་དང་མི་མཐུན་པའི་སྤྱོད་པ་དེ་མཐོང་ནས་དེ་ཚོ་ཚང་མའི་མདུན་དུ་ངས་པེ་ཏྲོ་ལ་“ཁྱོད་ཡ་ཧུ་དཱ་པ་ཡིན་ཡང་ཕྱི་པའི་ལུགས་སྲོལ་བྱས་ན། ཁྱོད་ཀྱིས་ཕྱི་པ་རྣམས་ལ་ཡ་ཧུ་དཱ་པའི་ལུགས་སྲོལ་བྱེད་དུ་འཇུག་པ་དེ་ཅི་ཡིན་”ཅེས་སྨྲས།
GAL 2:15 ང་ཚོ་ཕྱི་པའི་སྡིག་ཅན་ཟེར་མཁན་མིན་ཏེ། སྐྱེས་པ་ནས་ཡ་ཧུ་དཱ་པ་ཡིན་པ་རྣམས་ཀྱིས་
GAL 2:16 རང་གི་དགེ་བའི་ལས་མ་ཡིན་གྱིས། ཡེ་ཤུ་མཱ་ཤི་ཀ་ལ་དད་པའི་སྒོ་ནས་མི་རྣམས་ཡང་དག་པར་གྱུར་བར་ཤེས་ཏེ། ང་ཚོ་ཡང་མཱ་ཤི་ཀ་ཡེ་ཤུ་ལ་དད་པ་བྱས་སོ། དེ་ནི་ཆོས་ཁྲིམས་ཀྱི་དགེ་བའི་ལས་ལ་བརྟེན་པར་མ་ཡིན་གྱིས། དད་པའི་སྒོ་ནས་ང་ཚོ་ཡང་དག་པར་གྱུར་བའི་ཕྱིར་ཡིན། གང་ལགས་ཟེར་ན། ཆོས་ཁྲིམས་སྲུང་བའི་སྒོ་ནས་མི་རྣམས་ཡང་དག་པར་འགྱུར་མི་སྲིད།
GAL 2:17 ངེད་རྣམས་མཱ་ཤི་ཀའི་སྒོ་ནས་ཡང་དག་པར་གྱུར་བར་བརྩོན་ཡང་ད་དུང་ང་ཚོ་ཡང་སྡིག་ཉེས་ཅན་དུ་འགྱུར་བ་ཡིན་ན། མཱ་ཤི་ཀས་མི་རྣམས་ལ་སྡིག་ཉེས་བྱེད་དུ་འཇུག་གམ། དེ་གཏན་ནས་མི་སྲིད།
GAL 2:18 ངས་སྔར་གང་བཤིག་པ་དེ་སླར་ཡང་བརྩིགས་ན་ང་ཆོས་ཁྲིམས་དང་འགལ་མཁན་ཡིན་པ་སྟོན་གྱི་ཡོད།
GAL 2:19 ཆོས་ཁྲིམས་སྲུང་བའི་སྒོ་ནས་ང་ཆོས་ཁྲིམས་ཀྱི་ཆ་ནས་ཤི་ཟིན་པ་ལྟར་གྱུར། དེ་ནི་དཀོན་མཆོག་གི་སྤྱན་སྔར་ང་གསོན་པའི་ཕྱིར་ཡིན།
GAL 2:20 ང་ཡེ་ཤུ་མཱ་ཤི་ཀ་དང་མཉམ་དུ་རྒྱང་ཤིང་སྒང་ལ་བརྒྱངས་ནས་ཤི་ཟིན་པས་ང་ནི་རང་འདོད་ལྟར་མི་འཚོ་སྟེ། མཱ་ཤི་ཀ་ངའི་སེམས་ལ་བཞུགས། ད་ལྟ་ང་འཇིག་རྟེན་འདིར་འཚོ་བ་ནི། ང་ལ་བྱམས་ཤིང་སྲོག་བློས་གཏོང་མཁན་དཀོན་མཆོག་གི་སྲས་ལ་དད་པའི་སྒོ་ནས་འཚོ།
GAL 2:21 ངས་དཀོན་མཆོག་གི་ཐུགས་རྗེ་རྩིས་མེད་དུ་མི་གཏོང༌། གང་ལགས་ཤེ་ན། གལ་ཏེ་ཆོས་ཁྲིམས་སྲུང་བའི་སྒོ་ནས་ང་ཚོ་ཡང་དག་པར་འགྱུར་ན། མཱ་ཤི་ཀ་དོན་མེད་དུ་གྲོངས་པ་ཡིན་ནོ། །
GAL 3:1 ག་ལད་ཡཱ་པ་བླུན་པོ་ཁྱོད། ངས་གཙོ་བོ་ཡེ་ཤུ་མཱ་ཤི་ཀ་རྒྱང་ཤིང་སྒང་ལ་གྲོངས་པ་དེ་ཁྱོད་ཚོའི་མིག་མདུན་དུ་གསལ་པོར་བསྟན་ཀྱང༌། སུས་ཁྱོད་རྣམས་ལ་མགོ་སྐོར་བཏང་བ་ཡིན།
GAL 3:2 དོན་འདི་གཅིག་པོ་ང་ལ་སྨྲོས་ཤིག དཀོན་མཆོག་གི་དམ་པའི་ཐུགས་ཉིད་ནི་ཆོས་ཁྲིམས་བསྲུངས་པའི་སྒོ་ནས་ཐོབ་བམ། ཡང་ན་འཕྲིན་བཟང་ཐོས་ཤིང་དད་པའི་སྒོ་ནས་ཐོབ།
GAL 3:3 ཁྱོད་རྣམས་དེ་ལྟར་བློ་གྲོས་མེད་དམ། དཀོན་མཆོག་གི་དམ་པའི་ཐུགས་ཉིད་ཀྱི་ཐོག་ནས་ཚེ་གསར་པ་འགོ་བཙུགས་ནས་ད་ལྟ་རང་ཉིད་ཀྱི་འབད་བརྩོན་གྱི་སྒོ་ནས་ཁྱོད་རྣམ་པར་དག་པར་འགྱུར་ཐབས་བྱེད་དམ།
GAL 3:4 ཁྱོད་རྣམས་སྡུག་བསྔལ་དེ་ཙམ་དོན་མེད་པར་མྱོང་ངམ། དངོས་གནས་དོན་མེད་པ་རང་ཡིན་ནམ།
GAL 3:5 བྱས་ན། ཆོས་ཁྲིམས་སྲུང་བའི་སྒོ་ནས་སམ། ཡང་ན་འཕྲིན་བཟང་ཐོས་ནས་དད་པའི་རྐྱེན་གྱིས་དཀོན་མཆོག་གིས་ཁྱོད་རྣམས་ལ་དམ་པའི་ཐུགས་ཉིད་གནང་ཞིང་ཁྱོད་ཚོའི་ཁྲོད་དུ་ངོ་མཚར་བའི་དོན་མཛད་དམ།
GAL 3:6 དཔེར་ན། གསུང་རབ་ཀྱི་མདོ་ལས་ཨབ་ར་ཧམ་གྱིས་དཀོན་མཆོག་ལ་དད་པ་བྱས་པས། དེ་ནི་དཀོན་མཆོག་གིས་ཁོང་རྣམ་པར་དག་པའི་མི་ཞིག་ལ་བརྩིས་གནང་ངོ་ཞེས་བཀོད་པ་ཡིན་པས།
GAL 3:7 དད་ལྡན་རྣམས་ནི་ཨབ་ར་ཧམ་གྱི་བུ་ཡིན་པ་ཤེས་པར་གྱིས་ཤིག
GAL 3:8 དཀོན་མཆོག་གིས་དད་པའི་སྒོ་ནས་ཡ་ཧུ་དཱ་པ་མིན་པ་རྣམས་ཡང་དག་པར་མཛད་རྒྱུ་ཡིན་པ་གསུང་རབ་ཀྱིས་སྔོན་དུ་བསྟན་ཏེ་ཨབ་ར་ཧམ་ལ་ཁྱོད་བརྒྱུད་ནས་འཛམ་གླིང་གི་མི་རིགས་ཐམས་ཅད་བྱིན་གྱིས་རློབ་པར་འགྱུར་ཞེས་ཏེ་སྔར་འཕྲིན་བཟང་གསུངས།
GAL 3:9 དེའི་ཕྱིར་མཱ་ཤི་ཀ་ལ་དད་པ་ཡོད་པ་རྣམས་ནི་དད་ལྡན་པ་ཨབ་ར་ཧམ་དང་མཉམ་དུ་བྱིན་གྱིས་རློབ་པར་འགྱུར།
GAL 3:10 དཀོན་མཆོག་གི་སྤྱན་སྔར་ཡང་དག་པར་འགྱུར་བའི་ཕྱིར་ཆོས་ཁྲིམས་སྲུང་བར་རྟེན་མཁན་ཡོད་ཚད་ལ་ཆད་པ་གཅོད་པར་འགྱུར། གང་ཡིན་ཞེ་ན། ཆོས་ཁྲིམས་ཀྱི་མདོ་ལས་བྲིས་པའི་དོན་ཐམས་ཅད་རྟག་པར་མི་སྒྲུབ་མཁན་ཀུན་ལ་ཆད་པ་གཅོད་པར་འགྱུར་ཞེས་འཁོད།
GAL 3:11 ཆོས་ཁྲིམས་སྲུང་བའི་སྒོ་ནས་སུ་ཡང་དཀོན་མཆོག་གི་སྤྱན་སྔར་ཡང་དག་པར་མི་འགྱུར་བ་དེ་གསལ་པོ་ཡིན། གང་ཡིན་ཞེ་ན། དྲང་ལྡན་པ་ནི་དད་པའི་སྒོ་ནས་གསོན་པར་འགྱུར་ཞེས་འཁོད།
GAL 3:12 འོན་ཀྱང་ཆོས་ཁྲིམས་ནི་དད་པ་ལ་མི་རྟེན། དེ་ལས་ལྡོག་སྟེ་ཆོས་ཁྲིམས་ཐམས་ཅད་ཀྱི་ལས་རྟག་ཏུ་སྒྲུབ་མཁན་དེ་གསོན་པར་འགྱུར་ཞེས་གསུང་རབ་ནང་འཁོད།
GAL 3:13 མཱ་ཤི་ཀ་ཡིས་ང་ཚོའི་ཚབ་ལ་ཆོས་ཁྲིམས་དང་འགལ་བའི་ཆད་པ་མྱོང་བའི་བླུ་རིན་གྱིས་ང་ཚོ་ཆོས་ཁྲིམས་དང་འགལ་བའི་ཆད་པ་ལས་ཐར་བར་མཛད་དོ། དེ་ནི་གསུང་རབ་ནང་སུ་ཞིག་རྒྱང་ཤིང་སྒང་ལ་བརྒྱངས་པ་དེ་དཀོན་མཆོག་གི་ཆད་པ་ཕོག་འོས་པ་ཡིན་ནོ་ཞེས་བཀོད་པས་སོ།
GAL 3:14 མཱ་ཤི་ཀ་ཡེ་ཤུ་བརྒྱུད་ནས་ཨབ་ར་ཧམ་ལ་ཞལ་ཆད་གནང་བའི་བྱིན་རླབས་ཡ་ཧུ་དཱ་པ་མིན་པ་རྣམས་ལ་འབབ་པའི་ཆེད་དང༌། ང་ཚོས་དད་པ་བྱེད་པའི་སྒོ་ནས་ཞལ་ཆད་གནང་བའི་ཐུགས་ཉིད་འཐོབ་པའི་ཕྱིར་ཁོང་གིས་ང་ཚོ་ཐར་བར་མཛད་དོ། །
GAL 3:15 སྤུན་ཟླ་རྣམས། རྒྱུན་གཏན་གྱི་དཔེ་ཞིག་བཞག་ན། མི་ཞིག་གིས་ཁ་ཆེམས་ཡི་གེར་མཛུབ་ཐེལ་བརྒྱབ་ཚར་ནས་སུས་ཀྱང་སུབ་མི་ཆོག་ལ། སྣོན་ཡང་མི་ཆོག
GAL 3:16 ཞལ་ཆད་རྣམས་ནི་ཨབ་ར་ཧམ་དང་ཁོང་གི་བུ་རྒྱུད་ལ་གནང་བ་ཡིན། གསུང་རབ་ནང་སྲས་མང་པོའི་སྐོར་ལ་བུ་རྒྱུད་རྣམས་མ་བྲིས་ཀྱི། སྲས་གཅིག་གི་སྐོར་ལ་བུ་ཅེས་བྲིས། སྲས་དེ་ནི་མཱ་ཤི་ཀ་ཡིན་ནོ།
GAL 3:17 ངས་བཤད་པའི་དོན་འདི་ལྟར་ཡིན། དཀོན་མཆོག་གིས་གཏན་འཁེལ་གནང་ཟིན་པའི་ཞལ་ཆད་དེ་ལོ་བཞི་བརྒྱ་སུམ་ཅུའི་རྗེས་སུ་བྱུང་བའི་ཆོས་ཁྲིམས་ཀྱིས་དོན་མེད་དུ་གཏོང་མི་སྲིད། ཞལ་གྱིས་བཞེས་པ་དེ་ཡང་མེད་པར་མི་བཟོ།
GAL 3:18 གལ་ཏེ་དཀོན་མཆོག་གིས་ཞལ་ཆད་གནང་བའི་བྱིན་རླབས་དེ་ཆོས་ཁྲིམས་ལ་བརྟེན་ན། ཞལ་ཆད་ལ་མི་རྟེན། འོན་ཀྱང་དཀོན་མཆོག་གིས་ཨབ་ར་ཧམ་ལ་དེ་ཞལ་ཆད་ཀྱིས་གནང༌།
GAL 3:19 འོ་ན་ཆོས་ཁྲིམས་ཀྱི་དོན་ཅི་ཡིན་ཞེ་ན། ཞལ་ཆད་གནང་ཡོད་པའི་སྲས་མ་ཕེབས་པའི་བར་དུ་ཁྲིམས་དང་འགལ་བའི་དོན་སྟོན་པའི་ཕྱིར་ཡིན། ཆོས་ཁྲིམས་ནི་དཀོན་མཆོག་གི་ཕོ་ཉ་བརྒྱུད་ནས་བར་མི་མོ་ཤེ་ཡིས་བཙུགས།
GAL 3:20 བར་མི་ནི་ཕྱོགས་གཅིག་ནས་མ་ཡིན་ཏེ་དཀོན་མཆོག་གཅིག་པུ་རང་ཡིན།
GAL 3:21 ཆོས་ཁྲིམས་ཀྱིས་དཀོན་མཆོག་གི་ཞལ་ཆད་རྣམས་ལ་རྒོལ་ལམ། དེ་མི་སྲིད། གང་ཡིན་ཞེ་ན། དཔག་ཏུ་མེད་པའི་ཚེ་གནང་ཐུབ་པའི་ཁྲིམས་ཤིག་སྟེར་བ་ཡིན་ན། དཀོན་མཆོག་གི་སྤྱན་སྔར་ཡང་དག་པར་འགྱུར་བ་དེ་ཁྲིམས་སྲུང་བ་ལས་འབྱུང་བ་ཡིན།
GAL 3:22 འོན་ཀྱང་གསུང་རབ་ལྟར་མི་ཐམས་ཅད་སྡིག་ཉེས་ཀྱི་བཙོན་པ་ཡིན། དེ་ནི་ཡེ་ཤུ་མཱ་ཤི་ཀ་ལ་དད་པའི་སྒོ་ནས་དད་ལྡན་རྣམས་ལ་ཞལ་ཆད་འགྲུབ་པའི་ཕྱིར་ཡིན།
GAL 3:23 གཙོ་བོ་ཡེ་ཤུ་ལ་དད་པ་མ་བྱུང་བའི་སྔོན་ལ། དད་པ་དེ་མངོན་སུམ་དུ་མ་འགྱུར་བའི་བར་དུ་ཆོས་ཁྲིམས་ཀྱིས་ང་ཚོ་བཙོན་པ་ལྟར་བཀག་ཉར་བྱས།
GAL 3:24 ང་ཚོ་དད་པའི་སྒོ་ནས་ཡང་དག་པར་འགྱུར་བའི་ཕྱིར། མཱ་ཤི་ཀ་མ་ཕེབས་པའི་བར་དུ་ཆོས་ཁྲིམས་ནི་ང་ཚོའི་ལྟ་རྟོག་བྱེད་མཁན་བཞིན་དུ་གྱུར།
GAL 3:25 འོན་ཀྱང་ད་ལྟ་དད་པ་མངོན་སུམ་དུ་གྱུར་བས་ང་ཚོ་ལྟ་རྟོག་བྱེད་མཁན་ཞིག་གི་དབང་འོག་ཏུ་མེད།
GAL 3:26 གང་ཡིན་ཞེ་ན། མཱ་ཤི་ཀ་ཡེ་ཤུ་ལ་དད་པའི་རྐྱེན་གྱིས་ཁྱེད་ཚོ་ཐམས་ཅད་དཀོན་མཆོག་གི་སྲས་ཡིན།
GAL 3:27 མཱ་ཤི་ཀའི་ཐོག་ནས་ཁྲུས་གསོལ་ལེན་མཁན་ཐམས་ཅད་ནི་མཱ་ཤི་ཀ་གོས་སུ་གྱོན་པ་དང་མཚུངས།
GAL 3:28 ཁྱེད་ཚོ་ཚང་མ་མཱ་ཤི་ཀ་ཡེ་ཤུའི་ཐོག་ནས་གཅིག་ཏུ་གྱུར་བ་ཡིན་པས་ད་ནས་བཟུང་ཡ་ཧུ་དཱ་པའམ་གྷི་རིག་པ། གཡོག་པོའམ་གཡོག་པོ་མིན་པ། ཕོའམ་མོ་བཅས་ཀྱི་དབྱེ་བ་མེད།
GAL 3:29 ཁྱེད་ཚོའང་གཙོ་བོ་ཡེ་ཤུ་མཱ་ཤི་ཀའི་ཁོངས་སུ་གཏོགས་པས། ཨབ་ར་ཧམ་གྱི་བུ་རྒྱུད་ཡིན་ཏེ། དཀོན་མཆོག་གི་ཞལ་ཆད་དང་བསྟུན་པའི་བྱིན་རླབས་འཐོབ་པར་འགྱུར་རོ། །
GAL 4:1 ངས་བཤད་པའི་དོན་འདི་ལྟར་ཡིན། ཕྱུག་བདག་གི་བུ་ནི་ཐམས་ཅད་ཀྱི་བདག་པོ་ཡིན་ཡང༌། ཕྲུ་གུ་ཡིན་དུས་གཡོག་པོ་དང་ཁྱད་པར་མེད་དེ།
GAL 4:2 ཕ་ཡིས་བསྐོས་པའི་དུས་ཙམ་གྱི་བར་དུ་བུ་རྫི་དང༌། གཉེར་པའི་དབང་འོག་ཏུ་གནས་དགོས།
GAL 4:3 དེ་ལྟར་ང་ཚོ་ཡང་ཕྲུ་གུ་ཡིན་པའི་དུས་སུ་འཇིག་རྟེན་འདིའི་ལྷ་ཚོགས་རྣམས་ལ་བྲན་གཡོག་རྒྱུག་ཀྱང༌།
GAL 4:4 དུས་ལ་ཡོངས་སུ་འབབ་སྐབས་དཀོན་མཆོག་གིས་བུད་མེད་ལས་འཁྲུངས་ཤིང་ཆོས་ཁྲིམས་ཀྱི་དབང་འོག་ཏུ་ཡོད་པའི་རང་གི་སྲས་དེ་མངགས།
GAL 4:5 དེ་ནི་རང་སྲོག་བློས་བཏང་བ་ལས་བླུ་རིན་གྱིས་ཆོས་ཁྲིམས་ཀྱི་དབང་འོག་ཏུ་ཡོད་པ་རྣམས་ཐར་ཞིང༌། ང་ཚོ་ཁོང་གི་སྲས་སུ་མཛད་པའི་ཕྱིར་ཡིན།
GAL 4:6 ཁྱེད་ཚོ་སྲས་དང་སྲས་མོ་ཡིན་པས་དཀོན་མཆོག་གིས་སྲས་ཀྱི་དམ་པའི་ཐུགས་ཉིད་“ཨབ་པཱ་ཡབ་”ཅེས་འབོད་དེ་ང་ཚོའི་སེམས་སུ་མངགས་ཡོད།
GAL 4:7 ད་ནས་བཟུང་ཁྱེད་བྲན་གཡོག་མིན་ཏེ་དཀོན་མཆོག་གི་སྲས་ཡིན། ཁོང་གི་སྲས་ཡིན་པས་དཀོན་མཆོག་གིས་ཞལ་ཆད་གནང་བའི་བྱིན་རླབས་ཐམས་ཅད་ཁྱེད་ལ་གནང་ངེས་སོ། །
GAL 4:8 སྔར་དཀོན་མཆོག་ངོ་མ་ཤེས་པའི་དུས་སུ་ཁྱེད་ཚོས་དཀོན་མཆོག་མ་ཡིན་པའི་ལྷ་ཟེར་མཁན་རྣམས་ལ་བྲན་གཡོག་རྒྱུག
GAL 4:9 འོན་ཀྱང་ད་ལྟ་ཁྱེད་ཀྱིས་དཀོན་མཆོག་ངོ་ཤེས་པ་ནི༌༌༌༌། དོན་དམ་དུ་དཀོན་མཆོག་གིས་ཁྱེད་ཚོ་ངོ་མཁྱེན་པ་ཡིན་ཏེ། ཁྱོད་ཚོ་ཅིའི་ཕྱིར་ནུས་མཐུ་དང་ཕན་ཐོགས་མེད་པའི་འཇིག་རྟེན་འདིའི་ལྷ་རྣམས་ཀྱི་ཕྱོགས་སུ་སླར་ཡང་ལོག་འགྲོ དེ་ཚོར་བྲན་གཡོག་བྱེད་འདོད་པ་དེ་ཅི་ལ་སྲིད།
GAL 4:10 ཁྱོད་ཚོས་དཀོན་མཆོག་གི་ཐུགས་མཉེས་ཆེད་དུ་ཉིན་མོ་དང༌། ཟླ་བ། ནམ་དུས། ལོ་ལ་སོགས་པའི་དུས་ཆེན་སྲུང༌།
GAL 4:11 ངས་ཁྱོད་ཀྱི་ཕྱིར་ལས་བྱས་པ་དེ་དོན་མེད་པར་སོང་བའི་དོགས་པ་བྱེད།
GAL 4:12 སྤུན་ཟླ་རྣམས། ང་ཁྱེད་དང་འདྲ་བར་གྱུར་བ་ཡིན་པས་ཁྱེད་ང་དང་འདྲ་བར་འགྱུར་ཞིག་ཅེས་ཞུ་བ་འབུལ། ཁྱེད་ཀྱིས་ང་ལ་སྡུག་པོ་བཏང་མ་བྱུང༌།
GAL 4:13 དང་ཐོག་ང་ན་བས་ཁྱེད་ཚོར་འཕྲིན་བཟང་བཤད་པ་ཁྱེད་ཀྱིས་ཤེས།
GAL 4:14 ང་ན་བའི་རྐྱེན་གྱིས་ཁྱེད་རྣམས་དཀའ་ངལ་མྱོང་ནའང༌། ཁྱེད་ཀྱིས་ང་ལ་མཐོང་ཆུང་མ་བྱས་པ་དང་ཞེན་པ་མ་ལོག་པ་མ་ཟད། དཀོན་མཆོག་གི་ཕོ་ཉ་དང༌། མཱ་ཤི་ཀ་ཡེ་ཤུ་ཁོང་དང་འདྲ་བར་ང་བསུས།
GAL 4:15 ཁྱེད་ཚོའི་དགའ་སྤྲོ་དེ་གང་དུ་སོང༌། དེའི་ཚེ་བྱས་ཐུབ་ན་ཁྱེད་ཚོས་རང་གི་མིག་བཏོན་ནས་ང་ལ་སྟེར་བར་འགྱུར་བ་ལ་ངས་དཔང་པོ་བྱེད།
GAL 4:16 ད་ལྟ་ཁྱེད་ཚོར་བདེན་པ་བཤད་པའི་སྒོ་ནས་ང་ཁྱེད་ཚོའི་དགྲ་བོར་གྱུར་བ་ཡིན་ནམ།
GAL 4:17 འཕྲིན་བཟང་འཁྱོག་བཤད་བྱེད་མཁན་རྣམས་ལ་ཁྱེད་ཚོ་དང་འགྲོགས་པར་བརྩོན་སེམས་ཡོད་ནའང༌། དེ་ནི་ཁྱེད་ཚོར་ཕན་པའི་ཕྱིར་མ་ཡིན། ཁྱེད་ཚོ་ཁོ་རྣམས་དང་འགྲོགས་པའི་བརྩོན་སེམས་ཡོད་པ་བྱེད་ཆེད་ཁྱེད་རྣམས་ང་ཚོ་ལས་འབྲེལ་བ་རྒྱང་དུ་གཏོང་འདོད།
GAL 4:18 ང་ཁྱེད་ཚོ་དང་མཉམ་དུ་ཡོད་པའི་དུས་ཙམ་མ་ཟད། རྟག་ཏུ་དོན་བཟང་པོ་བྱེད་པར་བརྩོན་སེམས་ཡོད་ན་ལེགས།
GAL 4:19 ངའི་གཅེས་པའི་ཕྲུ་གུ་རྣམས། མཱ་ཤི་ཀའི་གཤིས་རྒྱུད་ཁྱེད་རྣམས་ལ་མ་འབྱུང་བའི་བར་དུ་ང་སྐྱེ་ཟུག་མྱོང་བའི་སྦྲུམ་མ་དང་འདྲ་བ་ཡིན་ཏེ།
GAL 4:20 ཁྱེད་རྣམས་ཀྱི་དོན་ལ་བྱ་ཐབས་མེད་པས་སྐད་གདངས་སྒྱུར་ནས་ང་ཁྱེད་ཚོ་དང་མཉམ་དུ་ཡོད་ན་ཅི་མ་རུང༌།
GAL 4:21 ཁྱོད་ཚོ་ཆོས་ཁྲིམས་ཀྱི་དབང་འོག་ཏུ་གནས་པར་འདོད་པ་རྣམས་ང་ལ་སྨྲོས་ཤིག ཆོས་ཁྲིམས་ཀྱི་དོན་མི་རྟོགས་སམ།
GAL 4:22 གསུང་རབ་ཀྱི་མདོ་ལས་ཨབ་ར་ཧམ་ལ་བུ་གཉིས་ཡོད་དེ། བྲན་མོ་ལས་གཅིག་དང༌། རང་དབང་ཡོད་པའི་བུད་མེད་ལས་གཅིག་སྐྱེས་ཞེས་བཀོད།
GAL 4:23 བྲན་མོ་ལས་སྐྱེས་པའི་བུ་ནི་འཇིག་རྟེན་གྱི་ལུགས་སུ་སྐྱེས། འོན་ཀྱང་རང་དབང་ཡོད་པའི་བུད་མེད་ལས་སྐྱེས་པའི་བུ་དཀོན་མཆོག་གིས་ཞལ་ཆད་གནང་བའི་དབང་གིས་སྐྱེས།
GAL 4:24 དེ་ནི་དཔེ་ཞིག་ཡིན། བུད་མེད་དེ་གཉིས་པོ་ཞལ་ཆད་གཉིས་པོ་ཡིན། གཅིག་རི་བོ་སི་ནཱ་ལས་བྱུང་བ་དེ་ཆོས་ཁྲིམས་ཀྱི་བྲན་པོར་འགྱུར་བའི་ཕྲུ་གུ་སྐྱེ་སྟེ་བུད་མེད་ཧ་གར་ཞེས་པ་དེ་ཡིན།
GAL 4:25 ཧ་གར་ནི་ཨ་རབ་ཡུལ་ལ་ཆགས་པའི་རི་བོ་སི་ནཱ་ཡིན་ཞིང༌། དེང་སྐབས་ཀྱི་ཡེ་རུ་ཤ་ལེམ་གྲོང་ཁྱེར་མཚོན། གང་ལགས་ཤེ་ན། རང་གི་ཕྲུ་གུ་དང་མཉམ་དུ་ཆོས་ཁྲིམས་ཀྱི་བྲན་པོ་ཡིན།
GAL 4:26 འོན་ཀྱང་བུད་མེད་གཞན་པ་ས་རཱ་ནི་སྟེང་གི་ཡེ་རུ་ཤ་ལེམ་མཚོན། ཁོང་ནི་རང་དབང་ཡོད་པའི་བུད་མེད་ཡིན་ཏེ་ང་ཚོའི་མ་ཡུམ་ཡིན་ནོ།
GAL 4:27 གསུང་རབ་ནང་འཁོད་པ་ལྟར་ན། བུད་མེད་མོ་གཤམ་དགའ་སྤྲོ་སྐྱེད། ། མངལ་ཟུག་མ་མྱོང་བདེ་བར་རྩིས། ། ཁྱོ་ལྡན་བུ་མེད་རྣམས་ལས་ནི། ། ཁྱོ་མེད་པ་ལ་བུ་ཕྲུག་མང༌། །
GAL 4:28 སྤུན་ཟླ་རྣམས། ཁྱེད་ཚོ་ཨི་སཱག་ལྟར་དཀོན་མཆོག་གིས་ཨབ་ར་ཧམ་ལ་གནང་བའི་ཞལ་ཆད་ཀྱི་ཕྲུ་གུ་ཡིན།
GAL 4:29 འོན་ཀྱང་དེའི་སྐབས་སུ་འཇིག་རྟེན་གྱི་ལུགས་སུ་སྐྱེས་པ་དེས་དམ་པའི་ཐུགས་ཉིད་ཀྱི་དབང་གི་སྒོ་ནས་སྐྱེས་པ་དེ་ལ་གནོད་བསྐྱལ་བ་བཞིན། ད་ལྟའང་ཆོས་ཁྲིམས་ཀྱི་བྲན་པོ་རྣམས་ཀྱིས་དེ་ལྟར་བྱེད།
GAL 4:30 གསུང་རབ་ཀྱི་མདོ་ལས་ཅི་ཞིག་བྲིས། བྲན་མོ་དང་མོའི་བུ་སྐྲོད་ཅིག གང་ལགས་ཟེར་ན། བྲན་མོའི་བུ་ནི་རང་དབང་ཡོད་པའི་བུད་མེད་ཀྱི་བུ་དང་མཉམ་དུ་དཀོན་མཆོག་གིས་ཞལ་ཆད་གང་གནང་བ་དེ་མི་འཐོབ་པས་སོ་ཞེས་བཀོད།
GAL 4:31 སྤུན་ཟླ་རྣམས། དེའི་ཕྱིར་བྲན་མོའི་ཕྲུ་གུ་མིན་ཏེ་ང་ཚོ་རང་དབང་ཡོད་པའི་བུད་མེད་ཀྱི་ཕྲུ་གུ་ཡིན་ནོ། །
GAL 5:1 མཱ་ཤི་ཀ་ཡིས་ང་ཚོ་རང་དབང་གི་ཕྱིར་སྒྲོལ་བས། བརྟན་པོར་གནས་ཏེ་སུས་ཀྱང་ཆོས་ཁྲིམས་ཀྱི་གཉའ་ཤིང་ཁྱེད་རྣམས་ལ་ཡང་བསྐྱར་འཁུར་ཏུ་མི་འཇུག
GAL 5:2 ཉོན་ཅིག ཡ་ཧུ་དཱ་པའི་ཆོས་ཀྱི་རྟགས་ལེན་ན། མཱ་ཤི་ཀ་ཁྱོད་རྣམས་ལ་ཅི་ཡང་མི་ཕན་ཞེས་ང་པའུ་ལུས་ཁྱོད་རྣམས་ལ་སྨྲའོ།
GAL 5:3 ཁྱོད་ཚོས་ཆོས་ཁྲིམས་ཀྱི་བཀའ་ཐམས་ཅད་སྲུང་དགོས་ཞེས་ངས་ཡང་བསྐྱར་ཡ་ཧུ་དཱ་པའི་ཆོས་ཀྱི་རྟགས་ལེན་མཁན་རེ་རེར་དཔང་པོ་བྱེད།
GAL 5:4 ཆོས་ཁྲིམས་སྲུང་བའི་སྒོ་ནས་དཀོན་མཆོག་གི་སྤྱན་སྔར་ཡང་དག་པར་འགྱུར་བར་འདོད་པ་རྣམས་ནི་མཱ་ཤི་ཀ་དང་འབྲེལ་བ་གཅོད་པར་གྱུར་ཏེ་ཐུགས་རྗེ་ལས་བྲལ་ལོ།
GAL 5:5 འོན་ཀྱང་དད་པའི་སྒོ་ནས་དམ་པའི་ཐུགས་ཉིད་བརྒྱུད་ང་ཚོས་དཀོན་མཆོག་གིས་ཞལ་ཆད་གནང་བའི་རྣམ་པར་དག་པ་ལ་རྟེན་ཏེ་ཡིད་རྟོན་ནས་སྒུག
GAL 5:6 གང་ལགས་ཟེར་ན། མཱ་ཤི་ཀ་ཡེ་ཤུའི་སྤྱན་སྔར་ཡ་ཧུ་དཱ་པའི་ཆོས་ཀྱི་རྟགས་ལེན་ཡོད་མེད་དེ་དོན་མེད་ཡིན། དད་ལྡན་རྣམས་ཀྱིས་བྱམས་པའི་སྒོ་ནས་ལས་བྱེད་པ་དེ་འབའ་ཞིག་གལ་ཆེའོ། །
GAL 5:7 སྔར་ཁྱོད་ཚོ་རྒྱུག་ཤར་གློད་པ་ལྟར་གྱི་ཧུར་སེམས་ཆེ་ཡང༌། བདེན་པའི་བཀའ་ལ་ཉན་རྒྱུར་སུས་བཀག
GAL 5:8 སྐུལ་མ་དེ་ཁྱོད་ཚོ་འབོད་གནང་མཁན་ཡབ་དཀོན་མཆོག་ནས་མ་བྱུང༌།
GAL 5:9 སྐྱུར་རྩི་ཅུང་ཟད་ཅིག་གིས་བག་ཟན་ཧྲིལ་པོ་སྐྱུར་བར་བྱེད།
GAL 5:10 གཙོ་བོ་ཡེ་ཤུ་ལ་དད་པའི་ཐོག་ནས་ངས་ཁྱོད་ཚོ་ལོག་ལྟ་བྱེད་མཁན་དུ་མི་འགྱུར་བར་ཡིད་རྟོན་བྱེད། འོན་ཀྱང་ཁྱོད་ཚོ་དཀྲུག་མཁན་སུ་ཡིན་ཡང་དཀོན་མཆོག་གི་ཆད་པ་ཕོག་ངེས་སོ།
GAL 5:11 སྤུན་ཟླ་རྣམས། གལ་ཏེ་ངས་ད་དུང་ཡ་ཧུ་དཱ་པའི་ཆོས་ཀྱི་རྟགས་རྒྱག་དགོས་བསྒྲགས་ན། གཞན་གྱིས་ང་ལ་ཅིའི་ཕྱིར་གནོད་སྐྱེལ། དེ་ལྟར་ཡིན་ན་ལོག་ལྟ་བྱེད་མཁན་གྱི་ཆ་ནས་རྒྱང་ཤིང་གི་བར་ཆད་མེད་པར་གྱུར།
GAL 5:12 ཁྱོད་ཚོ་དཀྲུག་མཁན་རྣམས་རང་གིས་རང་ལ་ཤ་གཅོད་པར་ཅི་མ་རུང༌།
GAL 5:13 སྤུན་ཟླ་རྣམས། ཁྱོད་ཚོ་རང་དབང་ཐོབ་ཕྱིར་བོས་པ་ཡིན། འོན་ཀྱང་དེ་ནི་སྡིག་པའི་རང་གཤིས་དང་བསྟུན་ནས་ལས་བྱེད་པའི་གོ་སྐབས་སུ་འགྱུར་མ་འཇུག ཁྱོད་ཚོས་བྱམས་པའི་ངང་ནས་གཅིག་གིས་གཅིག་ལ་གཡོག་བྱོས་ཤིག
GAL 5:14 ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག་ཅེས་པའི་བཀའ་གཅིག་གིས་ཆོས་ཁྲིམས་ཧྲིལ་པོ་སྡུད།
GAL 5:15 འོན་ཀྱང་གཅིག་གིས་གཅིག་ལ་སོ་བརྒྱབ་ནས་བཟས་ན་ཁྱོད་ཚོ་མེད་པར་མི་བྱ་བའི་ཕྱིར་དོགས་ཟོན་གྱིས་ཤིག
GAL 5:16 ངས་བཤད་པའི་དོན་འདི་ལྟར་ཡིན། དམ་པའི་ཐུགས་ཉིད་ཀྱི་སྣེ་འཁྲིད་དང་བསྟུན་ཏེ་མི་ཚེ་སྐྱེལ་ཞིང༌། ཁྱེད་ཚོས་སྡིག་པའི་རང་གཤིས་ཀྱི་འདོད་པ་མི་བསྒྲུབ།
GAL 5:17 གང་ཡིན་ཞེ་ན། སྡིག་པའི་རང་གཤིས་ཀྱིས་དམ་པའི་ཐུགས་ཉིད་ལ་རྒོལ་ཞིང༌། དམ་པའི་ཐུགས་ཉིད་ཀྱིས་སྡིག་པའི་རང་གཤིས་ལ་ཡང་རྒོལ་ཏེ། ཁྱེད་ཚོས་རང་གི་འདོད་པ་ལྟར་མི་བྱེད་པའི་ཕྱིར་དེ་གཉིས་གཅིག་གིས་གཅིག་ལ་རྒོལ།
GAL 5:18 འོན་ཀྱང་དམ་པའི་ཐུགས་ཉིད་ཀྱིས་ཁྱེད་རྣམས་འཁྲིད་ན། ཆོས་ཁྲིམས་ཀྱི་དབང་འོག་ཏུ་མེད།
GAL 5:19 སྡིག་པའི་རང་གཤིས་ཀྱི་ལས་རྣམས་གསལ་པོ་ཡིན་ཏེ། ལོག་གཡེམ་དང༌། མི་གཙང་བ། བག་མེད་སྤྱོད་པ།
GAL 5:20 ལྷ་ལ་རྟེན་པ། མཐུ་སྔགས། སྡང་སེམས། འཁྲུག་རྩོད། ཕྲག་དོག ཁོང་ཁྲོ་ལངས་བདེ་བ། ཁ་རྩོད། མི་མཐུན་པའི་ཕྱོགས་ཁག
GAL 5:21 འཁོན་སེམས། ར་བཟི་བ། བག་མེད་ཅན་གྱི་ཐུགས་སྤྲོ་ལ་སོགས། དེ་ལྟར་བྱེད་མཁན་དཀོན་མཆོག་གི་རྒྱལ་སྲིད་ལ་འཛུལ་བར་མི་སྲིད་པས། སྔར་ངས་ཁྱེད་རྣམས་ལ་བཤད་པ་ལྟར་ད་ལྟའང་དོགས་ཟོན་བྱེད་དོ།
GAL 5:22 འོན་ཀྱང་དམ་པའི་ཐུགས་ཉིད་ཀྱི་འབྲས་བུ་ནི་བྱམས་སེམས་དང༌། དགའ་སྤྲོ། ཞི་བདེ། བཟོད་པ། དྲིན་གཟོ། སེམས་བཟང་པོ། བློ་གཏད་ཆོག་པ།
GAL 5:23 སེམས་དུལ་པོ། རང་ཚོད་ཟིན་པ་ཡིན་ཏེ། འདི་དག་དང་མི་མཐུན་པའི་བཀའ་ཁྲིམས་མེད།
GAL 5:24 ཡང་མཱ་ཤི་ཀ་ཡེ་ཤུའི་ཁོངས་སུ་གཏོགས་པ་རྣམས་ཀྱིས་འདོད་ཆགས་དང་ལྡན་པའི་སྡིག་པའི་རང་གཤིས་རྒྱང་ཤིང་སྒང་ལ་བརྒྱངས་ཏེ་བསད་པ་ཡིན་ནོ།
GAL 5:25 དམ་པའི་ཐུགས་ཉིད་ཀྱིས་ངེད་རྣམས་འཁྲིད་པས། ཐུགས་ཉིད་དང་བསྟུན་ཏེ་མི་ཚེ་སྐྱེལ་དགོས།
GAL 5:26 ང་ཚོས་རང་བསྟོད་བྱེད་པའམ། གཞན་ལ་འཁྲུག་རྐྱེན་སློང་བ། ཕྲག་དོག་བཅས་བྱེད་མི་རུང་ངོ༌། །
GAL 6:1 སྤུན་ཟླ་རྣམས། མི་ཞིག་གིས་དཀོན་མཆོག་གི་བཀའ་དང་འགལ་ན། དམ་པའི་ཐུགས་ཉིད་དང་ལྡན་པ་རྣམས་ཀྱིས་འཇམ་པོའི་ངང་ནས་ཁོ་སླར་གསོ་བྱེད་དགོས། ཁྱེད་ཚོ་ཡང་བསླུ་བར་མི་འགྱུར་བའི་ཕྱིར་དོགས་ཟོན་གྱིས་ཤིག
GAL 6:2 གཅིག་གི་ཁུར་པོ་གཅིག་གིས་ཁུར་ཞིག དེ་ལྟར་བྱས་ན་ཁྱེད་ཚོས་མཱ་ཤི་ཀའི་བཀའ་ཁྲིམས་སྒྲུབ་བོ།
GAL 6:3 མི་ཞིག་ཅིའང་མ་ཡིན་པ་དེས་གལ་ཆེན་པོ་ཡིན་སྙམ་ན། རང་གིས་རང་ལ་མགོ་སྐོར་གཏོང་མཁན་ཡིན།
GAL 6:4 མི་རེ་རེས་རང་གི་སྤྱོད་ལམ་ལ་བརྟག་དཔྱད་བྱེད་དགོས། དེ་ལྟར་བྱས་ན་མི་གཞན་གྱི་སྤྱོད་པ་དང་སྡུར་མི་དགོས་པར་རང་གི་སྤྱོད་ལམ་ལ་ཡིད་ཚིམ་པར་འགྱུར།
GAL 6:5 གང་ཡིན་ཞེ་ན། རེ་རེས་རང་གི་ཁུར་པོ་འཁུར་དགོས།
GAL 6:6 དཀོན་མཆོག་གི་བཀའི་སློབ་མ་རྣམས་ཀྱིས་བཟང་པོ་ཐམས་ཅད་སློབ་དཔོན་ལ་བགོ་བཤའ་རྒྱག་དགོས།
GAL 6:7 མགོ་མ་འཁོར་ཞིག སུས་ཀྱང་དཀོན་མཆོག་ལ་འཕྱ་སྨོད་བྱེད་མི་སྲིད། མི་ཞིག་གིས་གང་བཏབ་པ་དེའི་འབྲས་བུ་འཐོབ་པར་འགྱུར་བས་སོ།
GAL 6:8 སྡིག་པའི་རང་གཤིས་དང་བསྟུན་པའི་སྤྱོད་པ་བྱེད་མཁན་ལ་རང་གཤིས་དེ་ནས་འཆི་བའི་འབྲས་བུ་འཐོབ། འོན་ཀྱང་དམ་པའི་ཐུགས་ཉིད་དང་བསྟུན་པའི་སྤྱོད་པ་བྱེད་མཁན་ལ་ཐུགས་ཉིད་ནས་དཔག་ཏུ་མེད་པའི་ཚེ་སྲོག་གི་འབྲས་བུ་འཐོབ།
GAL 6:9 ང་ཚོས་བཟང་པོ་བྱེད་པར་ཡིད་ཐང་མ་ཆད་ཅིག དེ་ལྟར་བྱས་ན་དུས་ལ་འབབ་སྐབས་འབྲས་བུ་འཐོབ་པར་འགྱུར།
GAL 6:10 དེའི་ཕྱིར་གོ་སྐབས་ཅི་བྱུང་ཡང་ང་ཚོས་མི་ཐམས་ཅད་དང༌། ཁྱད་པར་དུ་དད་ལྡན་གྱི་སྤུན་ཟླ་རྣམས་ལ་བཟང་པོ་བྱེད་དགོས།
GAL 6:11 ངས་རང་གི་ལག་པས་བྲིས་པའི་ཡི་གེ་ཆེན་པོ་འདི་ལ་གཟིགས་དང༌།
GAL 6:12 མཱ་ཤི་ཀའི་རྒྱང་ཤིང་གི་དོན་དུ་གནོད་འཚེ་མི་མྱོང་བའི་ཕྱིར་ཕྱི་ཚུལ་ལ་དང་བསྟོད་བྱེད་མཁན་རྣམས་ཀྱིས་ཁྱེད་ཚོ་ཡ་ཧུ་དཱ་པའི་ཆོས་ཀྱི་རྟགས་ལེན་དུ་འཇུག་ཐབས་བྱེད།
GAL 6:13 ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་རྣམས་ཀྱིས་ཆོས་ཁྲིམས་མི་སྲུང་ན་ཡང༌། ཁྱེད་ཚོའི་སྐོར་རང་བསྟོད་བྱེད་པའི་ཕྱིར་ཁྱེད་རྣམས་ལ་ཡ་ཧུ་དཱ་པའི་ཆོས་ཀྱི་རྟགས་རྒྱག་ཏུ་འཇུག་པར་འདོད།
GAL 6:14 འོན་ཀྱང་གཙོ་བོ་ཡེ་ཤུ་མཱ་ཤི་ཀའི་རྒྱང་ཤིང་མ་གཏོགས་པར་ངས་གཞན་ཞིག་ལ་ཅི་ནས་ཀྱང་མི་བསྟོད། གཙོ་བོ་ཡེ་ཤུ་རྒྱང་ཤིང་སྒང་ལ་གྲོངས་པའི་སྒོ་ནས་ང་འཇིག་རྟེན་འདིའི་ཆ་ནས་ཤི་བ་དང༌། འཇིག་རྟེན་འདི་ཡང་ངའི་ཆ་ནས་མེད་པ་ལྟར་གྱུར།
GAL 6:15 ཡ་ཧུ་དཱ་པའི་ཆོས་ཀྱི་རྟགས་དང་ལྡན་ཡོད་མེད་དེ་དོན་མེད་ཡིན། འོན་ཀྱང་གསར་དུ་སྐྱེ་བ་དེ་གལ་ཆེའོ།
GAL 6:16 ཡང་རྩ་དོན་དེ་བཞིན་དུ་སྲུང་མཁན་དང༌། དཀོན་མཆོག་གི་ཡི་སི་ར་ཨེལ་ལ་ཞི་བདེ་དང་ཐུགས་རྗེ་འབབ་པར་ཤོག
GAL 6:17 ངའི་གཟུགས་པོར་ཡེ་ཤུའི་རྨ་རྟགས་ཡོད་པས་ད་ནས་བཟུང་སུས་ཀྱང་ང་ལ་སྡུག་པོ་མ་གཏོང༌།
GAL 6:18 སྤུན་ཟླ་རྣམས། ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོའི་སེམས་ལ་བཞུགས་པར་གྱུར་ཅིག ཨ་མེན། །
EPH 1:1 དཀོན་མཆོག་གི་ཐུགས་དགོངས་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་ཡིས། ཨེ་ཕེ་སུ་གྲོང་ཁྱེར་དུ་ཡོད་པའི་དཀོན་མཆོག་གི་མི་རྣམས་ཏེ། མཱ་ཤི་ཀ་ཡེ་ཤུའི་ཐོག་ནས་ལྷག་བསམ་ཆེ་བ་རྣམས་ལ་འཕྲིན་ཡིག་འདི་ཕུལ་ལོ།
EPH 1:2 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག
EPH 1:3 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་པ་འབུལ་བར་ཤོག མཱ་ཤི་ཀའི་ཐོག་ནས་ཁོང་གིས་ང་ཚོར་སེམས་ཉིད་ཀྱི་བྱིན་རླབས་ཐམས་ཅད་ཞིང་ཁམས་སུ་གནང༌།
EPH 1:4 ང་ཚོ་དཀོན་མཆོག་གི་སྤྱན་སྔར་དམ་པ་དང་སྐྱོན་མེད་པར་འགྱུར་བའི་ཆེད་དུ་འཇིག་རྟེན་མ་བཀོད་པའི་སྔོན་ལ་ཁོང་གིས་མཱ་ཤི་ཀའི་ཐོག་ནས་ངེད་རྣམས་བདམས།
EPH 1:5 བྱམས་པའི་སྒོ་ནས་ཁོང་གི་བཀའ་དྲིན་ལྡན་པའི་ཐུགས་དགོངས་བཞིན་དུ་ཡེ་ཤུ་མཱ་ཤི་ཀ་བརྒྱུད་ནས་ང་ཚོ་ཁོང་གི་སྲས་སུ་འགྱུར་བའི་ཕྱིར་སྔར་འདམ་པར་མཛད།
EPH 1:6 དེ་ནི་ཁོང་གི་གཟི་བརྗིད་དང་ལྡན་པའི་ཐུགས་རྗེ་ལ་བསྟོད་པའི་ཆེད་དུ་ཡིན། ཐུགས་རྗེ་དེ་དཀོན་མཆོག་གི་གཅེས་པའི་སྲས་ཀྱི་སྒོ་ནས་ང་ཚོར་གནང༌།
EPH 1:7 ཁོང་གི་སྐུ་ཁྲག་ཡིན་པའི་བླུ་རིན་གྱི་ངང་ནས་ང་ཚོའི་སྡིག་ཉེས་སེལ་ཏེ་ཐར་པ་ཐོབ། དེ་ནི་ཁོང་གི་དཔག་ཏུ་མེད་པའི་ཐུགས་རྗེ་བཞིན་དུ་ང་ཚོར་ལྷག་པར་གནང༌། ཤེས་རབ་དང་རྟོགས་པ་ཐམས་ཅད་ཀྱིས་མཱ་ཤི་ཀ་བརྒྱུད་ནས་དཀོན་མཆོག་ཐུགས་དགྱེས་པ་བཞིན་དུ་ཁོང་གི་ཐུགས་དགོངས་ཀྱི་གསང་བ་ང་ཚོར་མངོན་པར་མཛད།
EPH 1:10 ཡང་ཁོང་གི་ཐུགས་དགོངས་ནི་དུས་ལ་འབབ་སྐབས་སུ་གནམ་ས་གཉིས་ལ་གང་ཡོད་པ་ཐམས་ཅད་གཅིག་ཏུ་བསྡུས་ནས་མཱ་ཤི་ཀའི་དབང་འོག་ཏུ་འཇུག་པ་དེ་ཡིན།
EPH 1:11 རང་ཉིད་ཀྱི་ཐུགས་དགོངས་བཞིན་དུ་བྱ་བ་ཐམས་ཅད་སྒྲུབ་མཁན་དཀོན་མཆོག་གིས་སྔར་ནས་བསྐོས་པས། མཱ་ཤི་ཀའི་སྒོ་ནས་ང་ཚོ་ལའང་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་སྐལ་བ་ཐོབ་བྱུང༌།
EPH 1:12 དེ་ནི་མཱ་ཤི་ཀ་ལ་ཐོག་མར་རེ་སྒུག་བྱེད་མཁན་ང་ཚོ་ཁོང་གི་གཟི་བརྗིད་ཀྱི་བསྟོད་པའི་དོན་ལ་འཚོ་བའི་ཆེད་དུ་ཡིན།
EPH 1:13 ཁྱེད་ཚོས་ཀྱང་ཐར་པ་གནང་བའི་བདེན་པའི་བཀའ་འཕྲིན་ཐོས་ནས། མཱ་ཤི་ཀ་ལ་དད་པ་བྱས་པས་ཁྱེད་ཚོ་དཀོན་མཆོག་གིས་སྔར་ནས་ཞལ་ཆད་གནང་བའི་དམ་པའི་ཐུགས་ཉིད་ཡིན་པའི་རྒྱ་ཡིས་བཏབ་པར་གྱུར།
EPH 1:14 དཀོན་མཆོག་གི་ཁོངས་མི་རྣམས་ཐར་བར་འགྱུར་བའི་བར་དུ། དམ་པའི་ཐུགས་ཉིད་ནི་ང་ཚོར་འཐོབ་རྒྱུ་ཡིན་པའི་བྱིན་རླབས་ཀྱི་གཏའ་མ་ཡིན། དེ་ནི་དཀོན་མཆོག་གི་གཟི་བརྗིད་ཀྱི་བསྟོད་པ་ཡོང་བའི་ཆེད་དུ་ཡིན།
EPH 1:15 དེ་བས་ན་ཁྱེད་ཚོས་གཙོ་བོ་ཡེ་ཤུ་ལ་དད་ཅིང༌། དཀོན་མཆོག་གི་མི་ཐམས་ཅད་ལ་གཅེས་པར་འཛིན་པའི་སྐོར་ཐོས་པས།
EPH 1:16 སྨོན་ལམ་འདེབས་པའི་དུས་སུ་ངས་ཁྱེད་ཚོ་གླེང་བ་དང༌། ཁྱེད་ཚོའི་དོན་དུ་རྒྱུན་ཆད་མེད་པར་བཀའ་དྲིན་ཆེ་ཞུ།
EPH 1:17 ཁྱེད་ཚོས་ཁོང་དེ་བས་ཡག་པ་ངོ་ཤེས་པའི་ཕྱིར། གཟི་བརྗིད་དང་ལྡན་པའི་ཡབ་སྟེ་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་དཀོན་མཆོག་གིས་ཁྱེད་ཚོར་ཤེས་རབ་དང་རྟོགས་པའི་ཐུགས་ཉིད་གནང་བའི་སྨོན་ལམ་འདེབས།
EPH 1:18 དེ་ནི་ཁྱེད་ཚོའི་བློ་སྒོ་ཕྱེ་ནས་ཁོང་གིས་ཁྱེད་ཚོར་བོས་པའི་རེ་བ་དང༌། དཀོན་མཆོག་གིས་ཁོང་གི་མི་རྣམས་ལ་ཞལ་གྱིས་བཞེས་པའི་བྱིན་རླབས་ཕུན་སུམ་ཚོགས་པ་གང་ཡིན་ཞིང༌།
EPH 1:19 ང་ཚོ་དད་ལྡན་རྣམས་ཀྱི་དོན་ལ་ཁོང་གི་བླ་ན་མེད་པའི་ནུས་མཐུ་གང་ཡིན་པ་ཁྱེད་ཚོས་ཤེས་པའི་ཆེད་དུ་ཡིན། ནུས་མཐུ་དེ་རང་གིས་
EPH 1:20 དཀོན་མཆོག་གིས་མཱ་ཤི་ཀ་འཆི་བ་ནས་སླར་གསོན་པར་མཛད་ནས་ཞིང་ཁམས་སུ་ཁོང་གི་ཕྱོགས་གཡས་ལ་བཞུགས་སུ་བཅུག་གོ
EPH 1:21 དེར་མཱ་ཤི་ཀ་ནི་ཁྲིམས་དང༌། དབང༌། ནུས་མཐུ། མངའ་ཐང༌། གོ་མིང་ཐམས་ཅད་ཀྱི་སྟེང་ལ། དུས་འདིར་མ་ཟད་མ་འོངས་པའི་དུས་སུའང་བཞུགས་སོ།
EPH 1:22 ཡང་དོན་ཐམས་ཅད་མཱ་ཤི་ཀའི་ཞབས་འོག་ཏུ་བཅུག་པར་མཛད་ཅིང་དཀོན་མཆོག་གིས་ཁོང་ཐམས་ཅད་ཀྱི་དབུ་རུ་བསྐོས་ནས་ཆོས་ཚོགས་ལ་གནང༌།
EPH 1:23 ཆོས་ཚོགས་ནི་ཁོང་གི་སྐུ་ལུས་ཡིན་ཏེ། ཅི་ཡོད་པ་ཐམས་ཅད་ཡོངས་སུ་རྫོགས་པ་མཛད་མཁན་གྱིས་ཡོངས་སུ་རྫོགས་པར་འགྱུར་རོ། །
EPH 2:1 སྔོན་ཆད་ཁྱེད་ཚོ་ནི་ཆོས་ཁྲིམས་དང་འགལ་བ་དང༌། སྡིག་ཉེས་ཀྱི་རྐྱེན་གྱིས་འཆི་བ་དང་འདྲ་བ་ཡིན་ཏེ།
EPH 2:2 འཇིག་རྟེན་འདིའི་ལུགས་སྲོལ་ངན་པ་སྲུང་ཞིང༌། མི་མཐོང་བའི་ཡུལ་གྱི་དབང་པོ་བདུད་རྒྱལ་ཏེ་དཀོན་མཆོག་གི་བཀའ་ལ་མི་ཉན་པ་རྣམས་ལ་དབང་སྒྱུར་བྱེད་མཁན་གྱི་རྗེས་སུ་འབྲངས།
EPH 2:3 སྔར་ང་ཚོ་ཐམས་ཅད་ཀྱང་ཁོ་ཚོའི་ཁྲོད་དུ་བསྡད་དེ་འདོད་ཆགས་ཀྱི་དབང་འོག་ཏུ་ཡོད་ཅིང༌། ལུས་སེམས་ཀྱི་འདོད་པ་ལྟར་སྤྱོད་པ་བྱས་པས། གཞན་རྣམས་ལྟར་དཀོན་མཆོག་གི་ཆད་པ་ཕོག་འོས་པ་ཡིན།
EPH 2:4 འོན་ཀྱང་ཐུགས་རྗེ་ཕྱུག་པའི་དཀོན་མཆོག་གིས་ང་ཚོར་ཤིན་ཏུ་བྱམས་ཤིང་གཅེས་པས།
EPH 2:5 ང་ཚོས་སྡིག་ཉེས་ཀྱི་ལས་བྱས་པའི་རྐྱེན་གྱིས་འཆི་བ་དང་འདྲ་བ་ཡིན་ཡང༌། མཱ་ཤི་ཀ་དང་མཉམ་དུ་སླར་གསོན་དུ་མཛད། (ཐུགས་རྗེའི་སྒོ་ནས་ཁྱེད་ཚོར་ཐར་པ་ཐོབ་)
EPH 2:6 ཡང་ཁོང་དང་ལྷན་དུ་སླར་གསོན་དུ་མཛད་ནས་མཱ་ཤི་ཀ་ཡེ་ཤུའི་ཐོག་ནས་ང་ཚོ་ཁོང་དང་མཉམ་དུ་ཞིང་ཁམས་ལ་སྡོད་དུ་བཅུག
EPH 2:7 དེ་ནི་མ་འོངས་པའི་དུས་སུ་ཁོང་གིས་མཱ་ཤི་ཀ་ཡེ་ཤུ་བརྒྱུད་ནས་ང་ཚོར་བཀའ་དྲིན་མཛད་པའི་སྒོ་ནས་ཁོང་གི་བླ་ན་མེད་པའི་ཐུགས་རྗེ་སྟོན་པའི་ཆེད་དུ་ཡིན་པས་སོ།
EPH 2:8 གང་ཡིན་ཞེ་ན། ཐུགས་རྗེའི་སྒོ་ནས་ཁྱེད་ཚོ་དད་པ་ཡིས་ཐར་བར་གྱུར། དེ་ནི་ཁྱེད་རྣམས་ལས་མ་འབྱུང༌། དཀོན་མཆོག་གི་གནང་སྦྱིན་ཡིན།
EPH 2:9 མི་སུས་ཀྱང་རང་བསྟོད་མི་བྱེད་པའི་ཕྱིར། ཐར་པ་དེ་ནི་རང་གི་བྱ་སྤྱོད་ལས་བྱུང་བ་མ་ཡིན་ནོ།
EPH 2:10 གང་ལགས་ཟེར་ན། ང་ཚོ་ཁོང་གི་བཟོ་བཀོད་སྤུས་ལེགས་ཤིག་ཡིན་ཏེ། མཱ་ཤི་ཀ་ཡེ་ཤུའི་ཐོག་ནས་དཀོན་མཆོག་གིས་སྔར་གྲ་སྒྲིག་མཛད་ཟིན་པའི་ལས་བཟང་གི་ཆེད་དུ་ང་ཚོ་བཀོད་པ་ཡིན།
EPH 2:11 དེའི་ཕྱིར་སྐྱེས་དུས་ནས་ཡ་ཧུ་དཱ་པ་མིན་པ་རྣམས། སྔར་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་རྣམས་ཀྱིས་ཁྱེད་ཚོར་ཆོས་ཀྱི་རྟགས་མེད་པའི་ལྷ་ཆོས་པ་ཞེས་ཟེར་ཞིང༌། ཡ་ཧུ་དཱ་པའི་ཆོས་ཀྱི་རྟགས་ནི་མིའི་ལག་པས་ལུས་སྟེང་དུ་རྟགས་གང་བྱེད་པ་ཁོ་ན་ཡིན།
EPH 2:12 དེའི་དུས་སུ་ཁྱེད་རྣམས་མཱ་ཤི་ཀ་དང་འབྲེལ་བ་མེད་ཅིང༌། ཡི་སི་ར་ཨེལ་གྱི་རྒྱལ་སྲིད་ལ་མི་གཏོགས། དཀོན་མཆོག་གིས་གང་ཞལ་གྱིས་བཞེས་པ་དང་ཁ་བྲལ་ཏེ། ཁྱེད་ཚོ་རེ་བ་མེད་ཅིང༌། འཇིག་རྟེན་འདིར་དཀོན་མཆོག་དང་འབྲེལ་བ་མེད་པ་ཡིན་པར་ཁྱེད་ཚོས་དྲན་པར་གྱིས་ཤིག
EPH 2:13 འོན་ཀྱང་མཱ་ཤི་ཀ་ཡེ་ཤུའི་ཐོག་ནས་སྔོན་ལ་ཐག་རིང་དུ་བསྡད་པ་ཁྱེད་རྣམས་ད་ལྟ་མཱ་ཤི་ཀའི་སྐུ་ཁྲག་གི་སྒོ་ནས་ཐག་ཉེ་བར་ཁྲིད་པ་ཡིན།
EPH 2:14 གང་ཡིན་ཞེ་ན། ཁོང་ཉིད་ངེད་རྣམས་ཀྱི་སྡུམ་མཛད་མཁན་ཡིན། ཁོང་གིས་ཡ་ཧུ་དཱ་པ་དང༌། ཡ་ཧུ་དཱ་པ་མིན་པ་རྣམས་གཅིག་ཏུ་མཛད་ཅིང༌། སྡང་སེམས་ཀྱི་བར་ཆད་གཏོར་བཤིག་མཛད།
EPH 2:15 མཱ་ཤི་ཀའི་ནང་ན་གཉིས་པོ་དེ་ལས་མི་གསར་པ་གཅིག་ཏུ་མཛད་པའི་ཆེད་དུ་ཁོང་གིས་བཀའ་ཁྲིམས་དང་སྒྲིག་ལམ་ལྡན་པའི་ཆོས་ཁྲིམས་མེད་པར་མཛད། དེ་ལྟར་དེ་གཉིས་བསྡུམས་ནས།
EPH 2:16 སྐུ་གཟུགས་གཅིག་པོའི་ཐོག་ནས་རྒྱང་ཤིང་སྒང་ལ་གྲོངས་པའི་སྒོ་ནས་འདི་གཉིས་པོ་དཀོན་མཆོག་དང་སྡུམ་པར་མཛད་དེ་ཁོ་ཚོའི་སྡང་སེམས་དེ་མེད་པར་ཡང་མཛད།
EPH 2:17 ཁོང་ཕེབས་ནས་ཁྱེད་ཚོ་ཐག་རིང་པོ་ཡོད་པ་རྣམས་དང༌། ཐག་ཉེ་པོ་ཡོད་པ་གཉིས་ལ་ཞི་བདེའི་འཕྲིན་བཟང་བསྒྲགས།
EPH 2:18 གང་ལགས་ཤེ་ན། མཱ་ཤི་ཀ་བརྒྱུད་ནས་ང་ཚོ་གཉིས་ཀ་དམ་པའི་ཐུགས་ཉིད་གཅིག་གི་སྒོ་ནས་ཡབ་དང་འབྲེལ་བ་བྱེད་སྲིད།
EPH 2:19 དེའི་ཕྱིར་ད་ཕྱིན་ཆད་ཁྱེད་ཚོ་ཕྱི་པའམ་ངོ་མི་ཤེས་པ་མིན་ཏེ། དམ་པར་འགྱུར་བ་རྣམས་དང་ཡུལ་གཅིག་པ་དང༌། དཀོན་མཆོག་གི་ཁྱིམ་མི་ཡིན།
EPH 2:20 ཁྱིམ་མིའི་ཁང་པ་དེའི་རྨང་གཞི་ནི་སྐུ་ཚབ་དང་ལུང་སྟོན་པ་རྣམས་ཡིན་ལ། རྨང་རྡོ་གཙོ་བོ་ནི་མཱ་ཤི་ཀ་ཡེ་ཤུ་རང་ཉིད་ཡིན།
EPH 2:21 མཱ་ཤི་ཀར་བརྟེན་ཏེ་ཁང་པ་ཆ་ཚང་གཅིག་ཏུ་སྦྲེལ་ནས་གཙོ་བོའི་མཆོད་ཁང་དམ་པ་ཞིག་ཏུ་འགྱུར།
EPH 2:22 ཁོང་བརྒྱུད་ནས་ཁྱེད་ཚོའང་དམ་པའི་ཐུགས་ཉིད་ཀྱི་ངང་ནས་དཀོན་མཆོག་གི་བཞུགས་གནས་ཤིག་ཏུ་སྐྲུན་བཞིན་ཡོད་དོ། །
EPH 3:1 དེའི་ཕྱིར་ང་པའུ་ལུ་ཁྱེད་ཡ་ཧུ་དཱ་པ་མིན་པ་རྣམས་ཀྱི་དོན་དུ་མཱ་ཤི་ཀ་ཡེ་ཤུའི་བཙོན་པ་ཡིན།
EPH 3:2 ཁྱེད་རྣམས་ལ་ཕན་པའི་ཆེད་དུ་ང་ལ་དཀོན་མཆོག་གི་ཐུགས་རྗེ་སྤེལ་བའི་ལས་འགན་གནང་བ་ཁྱེད་ཚོས་ཐོས་ཡོད།
EPH 3:3 ངས་སྔར་རགས་ཙམ་བྲིས་པ་ལྟར་མངོན་སུམ་དུ་གྱུར་བའི་སྒོ་ནས་ང་གསང་བ་དེའི་ཤེས་མཁན་དུ་གྱུར།
EPH 3:4 དེ་བཀླགས་ནས་ང་ནི་མཱ་ཤི་ཀའི་གསང་བ་རྟོགས་མཁན་ཡིན་པ་ཁྱེད་ཚོས་ཤེས་ཐུབ།
EPH 3:5 གསང་བ་དེ་སྔོན་གྱི་མི་རབས་ལ་མངོན་སུམ་དུ་མ་མཛད་ཀྱང༌། ད་ལྟ་དམ་པའི་ཐུགས་ཉིད་ཀྱི་སྒོ་ནས་ཁོང་གི་སྐུ་ཚབ་དམ་པ་དང༌། ལུང་སྟོན་པ་རྣམས་ལ་མངོན་པར་མཛད།
EPH 3:6 གསང་བ་དེ་ནི་འཕྲིན་བཟང་བརྒྱུད་ནས་མཱ་ཤི་ཀ་ཡེ་ཤུའི་ཐོག་ནས་ཡ་ཧུ་དཱ་པ་མིན་པ་རྣམས་ཡ་ཧུ་དཱ་པ་དང་མཉམ་དུ་དཀོན་མཆོག་གི་བྱིན་རླབས་ཀྱི་བགོ་སྐལ་ཐོབ་མཁན་དང༌། སྐུ་ལུས་གཅིག་གི་ཡན་ལག དཀོན་མཆོག་གི་ཞལ་ཆད་འཛིན་མཁན་བཅས་སུ་གྱུར།
EPH 3:7 ཁོང་གི་ནུས་མཐུ་ཡིས་ང་ལ་གནང་བའི་དཀོན་མཆོག་གི་ཐུགས་རྗེ་བཞིན་དུ་ང་ནི་འཕྲིན་བཟང་དེའི་ཞབས་ཏོག་ཏུ་གྱུར།
EPH 3:8 ང་དཀོན་མཆོག་གི་མི་རྣམས་ལས་དམའ་ཤོས་ཡིན་ཡང༌། མཱ་ཤི་ཀའི་དཔག་ཏུ་མེད་པའི་ཐུགས་རྗེ་དེ་ཡ་ཧུ་དཱ་པ་མིན་པ་རྣམས་ལ་སྒྲོག་པ་དང༌།
EPH 3:9 ཐམས་ཅད་འགོད་པ་གནང་མཁན་དཀོན་མཆོག་གི་ནང་ན་གནའ་སྔ་མོ་ནས་སྦས་པའི་གསང་བ་མི་ཐམས་ཅད་ལ་མངོན་པར་བྱེད་པའི་ཐུགས་རྗེ་དེ་ང་ལ་གནང་བྱུང༌།
EPH 3:10 དེ་ནི་ཆོས་ཚོགས་ཀྱི་སྒོ་ནས་ཞིང་ཁམས་སུ་སྡོད་པའི་མཐུ་ལྡན་དང་དབང་ཅན་རྣམས་ལ་དཀོན་མཆོག་གི་ཤེས་རབ་རྣམ་པ་སྣ་ཚོགས་ད་ལྟ་མངོན་པར་འགྱུར་བའི་ཆེད་དུ་ཡིན།
EPH 3:11 ཡང་དེ་ནི་དཀོན་མཆོག་གིས་ཐོག་མཐའ་མེད་པའི་ཐུགས་དགོངས་བཞིན་དུ་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་བརྒྱུད་ནས་བསྒྲུབས་པར་མཛད།
EPH 3:12 ཁོང་བརྒྱུད་ནས་ང་ཚོ་འཇིགས་པ་མེད་པར་ཡིད་རྟོན་བྱེད་ཅིང་དད་པའི་སྒོ་ནས་དཀོན་མཆོག་གི་མདུན་དུ་འགྲོ་བའི་ལམ་ཡོད།
EPH 3:13 དེའི་ཕྱིར་ངའི་སྡུག་བསྔལ་ཁྱེད་རྣམས་ལ་ཕན་པའི་ཆེད་དུ་ཡིན་པས་ཡིད་ཐང་མི་ཆད་པའི་ཞུ་བ་ཞུ།
EPH 3:14 དེ་བས་ན། གནམ་ས་གཉིས་ལ་ཡོད་པའི་ཁྱིམ་ཚང་རེ་རེ་ལ་མིང་བྱུང་བའི་ཡབ་ཀྱི་དྲུང་དུ་པུས་མོ་སར་བཙུགས་ཏེ་ངས་སྨོན་ལམ་འདི་ལྟར་འདེབས།
EPH 3:16 ཁོང་གི་དཔག་ཏུ་མེད་པའི་གཟི་བརྗིད་དང་མཚུངས་ཏེ། ཁོང་གི་ཐུགས་ཉིད་ཀྱི་སྒོ་ནས་ཁྱེད་ཚོའི་སེམས་སྟོབས་ཤུགས་ཀྱིས་བརྟན་པར་འགྱུར་ཞིང༌།
EPH 3:17 དད་པའི་སྒོ་ནས་མཱ་ཤི་ཀ་ནི་ཁྱེད་ཚོའི་སེམས་ཀྱི་ནང་དུ་བཞུགས་པ་དང༌། བྱམས་པའི་རྨང་གཞི་ལ་བརྟེན་ནས།
EPH 3:18 དད་ལྡན་ཐམས་ཅད་དང་མཉམ་དུ་མཱ་ཤི་ཀའི་བྱམས་པ་ནི་ཚད་ལས་འདས་པ་ཡིན་པ་རྟོགས་ཐུབ་པ་དང༌།
EPH 3:19 དཀོན་མཆོག་གི་ཚེ་སྲོག་དང་ནུས་ཤུགས་ཀྱིས་ཁྱེད་ཚོ་གང་བར་འགྱུར་བའི་ཆེད་དུ། ཁྱེད་ཚོས་བློ་ཡུལ་ལས་འདས་པའི་བྱམས་པ་དེ་རྟོགས་པར་ཤོག
EPH 3:20 ད་ང་ཚོའི་ནང་དུ་ལས་སྒྲུབ་པའི་ནུས་མཐུའི་སྒོ་ནས་ང་ཚོས་ཞུ་བ་དང་བསམ་པ་ཐམས་ཅད་དེ་བས་ལྷག་པར་མཛད་ཐུབ་མཁན་ཁོང་ལ།
EPH 3:21 ཆོས་ཚོགས་དང་མཱ་ཤི་ཀ་ཡེ་ཤུའི་ཐོག་ནས་དུས་རྒྱུན་དུ་མི་རབས་ནས་མི་རབས་ཐམས་ཅད་དུ་བསྟོད་པ་ཕུལ་བར་ཤོག ཨ་མེན། །
EPH 4:1 དེའི་ཕྱིར་གཙོ་བོའི་བཙོན་པ་ང་པའུ་ལུ་ཡིས་དཀོན་མཆོག་གིས་ཁྱེད་རྣམས་བོས་པར་མཛད་པ་དང་འཚམ་པའི་སྤྱོད་པ་བྱེད་པར་ནན་གྱིས་སྐུལ།
EPH 4:2 སྙེམས་ཆུང་ཀུན་དང༌། སེམས་དུལ་པོ་དང༌། བཟོད་སེམས་ཀྱིས་བྱམས་པའི་སྒོ་ནས་གཅིག་གིས་གཅིག་ལ་བཟོད་པ་སྒོམ་སྟེ།
EPH 4:3 དམ་པའི་ཐུགས་ཉིད་ལས་བྱུང་བའི་གཅིག་མཐུན་དེ་ཞི་བདེ་བརྒྱུད་ནས་སྲུང་བར་འབད་རྩོལ་གྱིས་ཤིག
EPH 4:4 དཀོན་མཆོག་གིས་ཁྱེད་རྣམས་རེ་བ་གཅིག་ལ་བོས་པར་མཛད་པ་ལྟར། ལུས་གཅིག་དང་ཐུགས་ཉིད་གཅིག་ཡིན་ཞིང༌།
EPH 4:5 གཙོ་བོ་གཅིག དད་པ་གཅིག ཁྲུས་གསོལ་གཅིག
EPH 4:6 ཐམས་ཅད་ཀྱི་ཡབ་དང་དཀོན་མཆོག་གཅིག་སྟེ། ཐམས་ཅད་ཀྱི་སྟེང་དང༌། ཐམས་ཅད་ཀྱི་ཁྲོད། ཐམས་ཅད་ཀྱི་ནང་བཞུགས་སོ།
EPH 4:7 ང་ཚོ་རེ་རེ་ལ་མཱ་ཤི་ཀའི་གནང་སྦྱིན་གྱི་ཚད་དང་བསྟུན་ཏེ་ཐུགས་རྗེ་གནང་བ་ཡིན།
EPH 4:8 གསུང་རབ་ཀྱི་མདོའི་ནང་འཁོད་པ་ལྟར། ནམ་མཁར་ཕེབས་དུས་བཙོན་པའི་ཚོགས་ཁྲིད་ནས། ། མི་སྡེ་རྣམས་ལ་གནང་སྦྱིན་སྣ་ཚོགས་བསྩལ། ། ཞེས་སོ།
EPH 4:9 (ཁོང་ནམ་མཁར་ཕེབས་ཞེས་ཟེར་བའི་དོན་ནི་སྔར་ས་གཞིའི་ས་ཆ་དམའ་པོ་ལ་ཡང་བབས་པའི་དོན་མ་ཡིན་ནམ།
EPH 4:10 མར་འབབ་མཁན་ནི་ཞིང་ཁམས་ཐམས་ཅད་ཀྱི་སྟེང་དུ་ཡར་ཕེབས་མཁན་དེ་རང་ཡིན། དེ་ནི་ཁོང་གིས་འཇིག་རྟེན་ཁམས་ཡོངས་སུ་ཁེངས་པར་མཛད་པའི་ཕྱིར་རོ་)
EPH 4:11 ཡང་མཱ་ཤི་ཀའི་གནང་སྦྱིན་ཏེ་ཁ་ཤས་སྐུ་ཚབ། ཁ་ཤས་ལུང་སྟོན་པ། ཁ་ཤས་འཕྲིན་བཟང་སྒྲོག་མཁན། ཁ་ཤས་ཆོས་འཁྲིད་མཁན་དང་སློབ་དཔོན་བཅས་སུ་བསྐོས།
EPH 4:12 ཁོང་ཚོས་དཀོན་མཆོག་གི་མི་རྣམས་ལ་ཞབས་ཏོག་བྱེད་པའི་སྦྱོང་བརྡར་སྤྲོད་ཅིང༌། མཱ་ཤི་ཀའི་སྐུ་ལུས་ཡིན་པའི་ཁོང་གི་ཆོས་ཚོགས་ལ་ཡར་རྒྱས་གཏོང་བའི་ཕྱིར་རོ།
EPH 4:13 མཐར་ང་ཚོ་ཐམས་ཅད་དད་པ་དང༌། དཀོན་མཆོག་གི་སྲས་ཀྱི་རྟོགས་པ་ལ་གཅིག་ཏུ་འགྱུར་ཏེ། སྨིན་ཞིང་ཡོངས་སུ་རྫོགས་ལ། མཱ་ཤི་ཀའི་བླ་ན་མཐོ་བའི་ཚད་དང་ལྡན་པར་འགྱུར།
EPH 4:14 དེར་བརྟེན་ད་ནས་བཟུང་ང་ཚོ་བྱིས་པ་ལྟར་མིན་ཏེ། རྒྱ་མཚོའི་རྦ་རླབས་ལྟར་འཕྱུར་བའམ། ལོག་ལྟ་སྣ་ཚོགས་འཛིན་པའི་བསྟན་པ་རླུང་གིས་འདེད་པའམ། མི་རྣམས་ཀྱི་གཡོ་ཐབས་སམ། མགོ་སྐོར་གཏོང་བའི་ཇུས་ངན་གྱིས་བསླུ་བྲིད་མི་བྱེད་པར།
EPH 4:15 བྱམས་སེམས་ཀྱི་སྒོ་ནས་བདེན་གཏམ་སྨྲ་ཞིང༌། རྣམ་པ་ཀུན་ནས་ང་ཚོའི་དབུ་ལྟར་ཡིན་པའི་མཱ་ཤི་ཀའི་ཐོག་ནས་སྨིན་ཞིང་ཡོངས་སུ་རྫོགས་པར་འགྱུར་དགོས།
EPH 4:16 མཱ་ཤི་ཀ་དབུ་ལྟར་ཡིན་པའི་ལུས་ཧྲིལ་པོ་རྩ་རྒྱུས་ཀྱིས་སྦྲེལ་ཏེ། ཡན་ལག་རེའི་སྟོབས་ཚད་བཞིན་དུ་བྱམས་པའི་སྒོ་ནས་ལུས་བཞེངས་ཤིང་ཡར་སྐྱེད།
EPH 4:17 གཙོ་བོའི་ངང་ནས་ངས་འདི་ལྟར་ཟེར་ཞིང་སྐུལ། ད་ནས་བཟུང་ཁྱེད་ཚོ་ལྷ་ཆོས་པ་རྣམས་ཀྱི་དོན་མེད་པའི་སེམས་བཞིན་དུ་མི་ཚེ་སྐྱེལ་མི་ཆོག
EPH 4:18 རྨོངས་པས་བློ་གྲོས་མུན་པར་གྱུར་ཏེ། གཏི་མུག་དང་སེམས་མཁྲེགས་པོར་གྱུར་བའི་རྐྱེན་གྱིས་ཁོ་རྣམས་དཀོན་མཆོག་གི་ཚེ་དང་བྲལ་བ་དང༌།
EPH 4:19 སེམས་མཁྲེགས་པོར་གྱུར་བས་འདོད་ཆགས་ལ་དགའ་ཞིང༌། ཁོ་ཚོས་མི་གཙང་བའི་ལས་ཀྱི་རིགས་ཀུན་ལ་བརྩོན་སེམས་དང་སེར་སྣ་ཡིས་སྤྱོད་པར་བྱེད།
EPH 4:20 འོན་ཀྱང་ཁྱེད་ཚོས་མཱ་ཤི་ཀའི་སྐོར་དེ་ལྟར་བསླབས་པ་མིན།
EPH 4:21 ཁོང་གི་སྐོར་ཐོས་ནས་ཡེ་ཤུ་ལས་འབྱུང་བའི་བདེན་པ་བསླབས།
EPH 4:22 སྔོན་གྱི་སྤྱོད་པ་ངན་པ་སྤངས་ནས་འདོད་ཆགས་ཀྱིས་རུལ་བའི་མི་ཚེ་རྙིང་པ་དོར་ཞིང༌།
EPH 4:23 སེམས་གསར་དུ་སྐྱེས་ནས།
EPH 4:24 དཀོན་མཆོག་གི་དཔེ་ལྟར་དངོས་སུ་རྣམ་པར་དག་པ་དང་དམ་པ་བཅས་ཀྱི་སྒོ་ནས་བཀོད་པའི་མི་ཚེ་གསར་པ་གོས་སུ་གྱོན་པར་ཁྱེད་ཚོས་བསླབས།
EPH 4:25 དེའི་ཕྱིར་རྫུན་གཏམ་སྤངས་ནས་ཁྱེད་ཚོ་ཚང་མས་ཁྱིམ་མཚེས་ལ་བདེན་གཏམ་སྨྲ་དགོས། གང་ཡིན་ཞེ་ན། ང་ཚོ་ཕན་ཚུན་ཁོངས་མི་ཡིན།
EPH 4:26 ཁོང་ཁྲོ་བསླངས་ན་ཡང་སྡིག་ཉེས་ཀྱི་ལས་མ་བྱེད་ཅིག ཉི་མ་ནུབ་པའི་སྔོན་ལ་ཁོང་ཁྲོ་ཞི་བར་བྱ་སྟེ།
EPH 4:27 བདུད་ལ་གོ་སྐབས་མ་སྤྲོད་ཅིག
EPH 4:28 རྐུན་པོས་ད་ནས་བཟུང་མ་རྐུ་བར་དབུལ་པོ་རྣམས་ལ་སྦྱིན་པ་གཏོང་ཐུབ་པའི་ཕྱིར། རང་གི་ལག་པ་གཉིས་ལ་བརྟེན་ནས་དྲང་པོའི་ལས་ལ་འབད་བརྩོན་བྱེད་དགོས།
EPH 4:29 གཙོག་གཏམ་མ་ཤོད་ཅིག ཁྱེད་ཀྱི་གཏམ་ཉན་མཁན་རྣམས་ལ་ཕན་པའི་ཕྱིར་གོ་སྐབས་བཞིན་དུ་བློ་སྒོ་འབྱེད་པའི་གཏམ་ཁོ་ན་ཤོད།
EPH 4:30 དཀོན་མཆོག་གི་དམ་པའི་ཐུགས་ཉིད་ལ་ཐུགས་སྐྱོ་བར་མ་བྱེད་ཅིག དཀོན་མཆོག་གིས་ཐར་པའི་ཉིན་མོའི་བར་དུ་ཁྱེད་རྣམས་ལ་དམ་པའི་ཐུགས་ཉིད་ཀྱི་རྒྱ་ཡིས་བཏབ་པར་མཛད།
EPH 4:31 འཁོན་འཛིན་དང༌། ཁོང་ཁྲོ། ཞེ་སྡང༌། འཐབ་རྩོད། དམའ་འབེབས་གཏོང་བ། ངན་སེམས་ཐམས་ཅད་སྤོངས་ཤིག
EPH 4:32 དཀོན་མཆོག་གིས་མཱ་ཤི་ཀའི་སྒོ་ནས་ཁྱེད་རྣམས་ཀྱི་སྡིག་ཉེས་བསལ་ཟིན་པས། ཁྱེད་ཚོས་ཀྱང་གཅིག་གིས་གཅིག་ལ་བཟང་པོ་བྱེད་ཅིང༌། གཞན་ལ་གཅེས་པར་འཛིན་ནས་ཕན་ཚུན་གུ་ཡངས་གཏོང་ཞིག །
EPH 5:1 དེའི་ཕྱིར་གཅེས་པའི་སྲས་དང་སྲས་མོ་ལྟར་དཀོན་མཆོག་ལ་དཔེ་ལྟ་བྱེད་དགོས།
EPH 5:2 མཱ་ཤི་ཀས་ང་ཚོར་བྱམས་ཤིང༌། རང་སྲོག་བློས་བཏང་སྟེ་ང་ཚོའི་དོན་དུ་དཀོན་མཆོག་ལ་དྲི་ཞིམ་གྱི་འབུལ་བ་དང་མཆོད་པ་ལྟར་གནང་བས། ཁྱེད་ཚོས་ཀྱང་གཞན་ལ་བྱམས་པའི་སྒོ་ནས་མི་ཚེ་སྐྱེལ་དགོས།
EPH 5:3 འོན་ཀྱང་ཁྱེད་ཚོ་ནི་དཀོན་མཆོག་གི་སྤྱན་སྔར་དམ་པར་མཛད་པ་ཡིན་པས། ལོག་གཡེམ་མམ། མི་གཙང་བ། སེར་སྣ་བཅས་ཀྱི་མིང་ཙམ་ཡང་ཁྱེད་ཚོའི་ཁྲོད་དུ་སྨྲ་མི་རུང༌།
EPH 5:4 ཡང་འཆལ་གཏམ། ངག་ཀྱལ། མ་རབས་ཐ་ཤལ་ལ་སོགས་པའི་གཏམ་སྨྲ་མི་རུང་བས། དེའི་ཚབ་ལ་དཀོན་མཆོག་ལ་བཀའ་དྲིན་ཆེ་ཞུ།
EPH 5:5 གང་ཡིན་ཞེ་ན། ལོག་གཡེམ་མམ། མི་གཙང་བ་བྱེད་མཁན་ནམ། སེར་སྣ་ཅན་ཏེ་ལྷ་ཆོས་པ་ཡིན་པའི་མི་སུ་ལ་ཡང་མཱ་ཤི་ཀ་དང་དཀོན་མཆོག་གི་རྒྱལ་སྲིད་ཀྱི་སྐལ་བ་རྩ་བ་ནས་མེད་པར་ཤེས་པར་གྱིས་ཤིག
EPH 5:6 བྱ་བ་དེའི་ཕྱིར་དཀོན་མཆོག་གི་ཆད་པ་བཀའ་ལ་མི་ཉན་པ་རྣམས་ལ་ཕོག་ངེས་ཡིན་པས། སུ་ཞིག་གིས་སྙིང་པོ་མེད་པའི་གཏམ་གྱིས་ཁྱེད་ཚོར་མགོ་སྐོར་གཏོང་དུ་མ་འཇུག་ཅིག
EPH 5:7 དེ་བས་ན་ཁོ་ཚོ་དང་མ་འགྲོགས་ཤིག
EPH 5:8 སྔར་ཁྱེད་ཚོ་མུན་པ་ལྟར་ཡིན་ཡང༌། ད་གཙོ་བོའི་རྐྱེན་གྱིས་འོད་སྣང་ཡིན་པས། འོད་སྣང་དང་ལྡན་པ་རྣམས་ལྟར་མི་ཚེ་སྐྱེལ།
EPH 5:9 (འོད་སྣང་གི་འབྲས་བུ་ནི་རྣམ་པ་ཐམས་ཅད་དུ་བཟང་པོ་དང༌། དྲང་པོ། བདེན་པ་ཡིན་)
EPH 5:10 གཙོ་བོ་གང་ལ་ཐུགས་མཉེས་པ་དེ་ཤེས་པར་གྱིས་ཤིག
EPH 5:11 མུན་པ་དང་ལྡན་པའི་དོན་མེད་ཀྱི་ལས་ངན་མཉམ་སྤྱོད་མི་བྱེད་པར། དེ་ཚོ་ཐེར་འདོན་གྱིས་ཤིག
EPH 5:12 རྒྱུ་མཚན་ནི་ཁོ་ཚོས་གསང་བའི་སྒོ་ནས་གང་བྱེད་པ་དེ་སྨྲ་བའང་ངོ་ཚ་བ་ཞིག་ཡིན།
EPH 5:13 འོད་སྣང་གིས་ཐེར་འདོན་གང་བྱས་པ་ཐམས་ཅད་མཐོང་བར་འགྱུར། གང་ལགས་ཤེ་ན། ཐམས་ཅད་མངོན་པར་བྱེད་མཁན་ནི་འོད་སྣང་ཡིན།
EPH 5:14 དེའི་ཕྱིར། གཉིད་མཚོར་ལྷུང་བའི་མི་རྣམས་གཉིད་གསོད་ལ། ། འཆི་བའི་གནས་ལས་གསོན་པོར་ལོངས་ཤིག་ཨང༌། ། མཱ་ཤི་ཀ་ཡི་འོད་སྣང་ཁྱེད་ལ་འཕྲོ། ། ཞེས་སོ། །
EPH 5:15 དེ་བས་ན་བླུན་པོ་མིན་པར་ཤེས་རབ་ཅན་གྱི་མི་ཚེ་སྐྱེལ་ཏེ་སྤྱོད་ལམ་ལ་རྟོག་ཞིབ་བྱེད་ཅིག
EPH 5:16 དུས་འདི་ངན་པ་ཡིན་པས་གོ་སྐབས་ཅི་བྱུང་ཡང་ལས་བཟང་པོ་བྱེད་དགོས།
EPH 5:17 བླུན་པོ་མི་བྱེད་པར་གཙོ་བོའི་ཐུགས་དགོངས་གང་ཡིན་པ་ཤེས་པར་གྱིས་ཤིག
EPH 5:18 ཆང་རག་གིས་བཟི་བར་མི་འགྱུར། གང་ཡིན་ཞེ་ན། དེ་ནི་བག་མེད་ཀྱི་སྤྱོད་ཚུལ་ཡིན། འོན་ཏེ་དམ་པའི་ཐུགས་ཉིད་ཀྱིས་ཁེངས་པར་གྱིས།
EPH 5:19 གསུང་མགུར་དང༌། བསྟོད་དབྱངས། མགུར་གླུའི་ནང་དོན་རྣམས་ཕན་ཚུན་གཏམ་གླེང་བྱ་ཞིང༌། སེམས་ནས་གཙོ་བོ་ལ་བསྟོད་གླུ་དང་རོལ་དབྱངས་ཕུལ་ཞིག
EPH 5:20 ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་མཚན་གྱི་སྒོ་ནས་རྟག་ཏུ་དོན་ཐམས་ཅད་ཀྱི་ཆེད་དུ་ཡབ་དཀོན་མཆོག་ལ་བཀའ་དྲིན་ཆེ་ཞུ།
EPH 5:21 མཱ་ཤི་ཀ་ལ་གུས་བཀུར་བྱེད་པས་ཕན་ཚུན་ཁ་ལ་ཉོན།
EPH 5:22 ཆུང་མ་རྣམས། ཁྱེད་ཚོས་གཙོ་བོའི་བཀའ་ལ་ཉན་པ་ལྟར་ཁྱོ་གའི་ཁ་ལའང་ཉན།
EPH 5:23 གང་ལགས་ཟེར་ན། མཱ་ཤི་ཀ་ནི་ཉིད་ཀྱི་སྐུ་ལུས་ཡིན་པའི་ཆོས་ཚོགས་ཀྱི་དབུ་དང་སྐྱབས་མགོན་ཡིན་པ་ལྟར། ཁྱོ་གའང་ཆུང་མའི་མགོ་ཡིན།
EPH 5:24 ཆོས་ཚོགས་མཱ་ཤི་ཀའི་དབང་འོག་ཏུ་ཡོད་པ་ལྟར། ཆུང་མ་རྣམས་རྣམ་པ་ཐམས་ཅད་ལ་ཁྱོ་གའི་དབང་འོག་ཏུ་གནས་དགོས།
EPH 5:25 ཁྱོ་ག་རྣམས། ཆུང་མ་ལ་བྱམས་པར་གྱིས་ཤིག གང་ཡིན་ཟེར་ན། མཱ་ཤི་ཀས་ཀྱང་ཆོས་ཚོགས་ལ་བྱམས་ཤིང༌། དེའི་དོན་ལ་རང་གི་སྲོག་བློས་བཏང༌།
EPH 5:26 དེ་ནི་ཆོས་ཚོགས་དམ་པར་མཛད་པའི་ཆེད་དུ། བཀའ་དང་ཆུ་ཡིས་ཁྲུས་ནས་གཙང་བར་མཛད་དེ།
EPH 5:27 ཁོང་ཉིད་ཀྱི་དོན་དུ་དྲི་མའམ། གཉེར་མ་ལྟ་བུ་ལ་སོགས་པའི་སྐྱོན་ཅིའང་མེད་པར། གཟི་བརྗིད་ཅན་དང༌། དམ་པ། སྐྱོན་མེད་པར་འགྱུར་བའི་ཕྱིར་རོ།
EPH 5:28 དེ་ལྟར་ཁྱོ་ག་རྣམས་ཀྱིས་ཀྱང་ཁོ་ཚོའི་ཆུང་མ་རྣམས་རང་གི་ལུས་ལྟར་བྱམས་པ་བྱེད་དགོས། ཆུང་མ་ལ་བྱམས་པ་བྱེད་མཁན་གྱིས་རང་ལ་བྱམས་སོ།
EPH 5:29 མི་སུས་ཀྱང་རང་གི་ལུས་ལ་ནམ་ཡང་མ་སྡང་བར། དེ་ལ་ཟས་སྟེར་ཞིང་གསོ་བ་ལྟར། དེ་བཞིན་དུ་མཱ་ཤི་ཀ་ཡིས་རང་གི་སྐུ་ལུས་ཡིན་པའི་ཆོས་ཚོགས་ལ་བྱམས་སྐྱོང་མཛད།
EPH 5:30 གང་ཡིན་ཟེར་ན། ང་ཚོ་ནི་ཁོང་གི་སྐུ་ལུས་ཀྱི་ཡན་ལག་ཡིན་པའི་ཕྱིར་རོ།
EPH 5:31 དེའི་རྐྱེན་གྱིས་སྐྱེས་པས་རང་གི་ཕ་མ་བཞག་ནས་རང་གི་བཟའ་ཟླ་དང་མཉམ་དུ་འདུས་ཤིང༌། ཁོ་གཉིས་ཤ་རུས་གཅིག་ཏུ་གྱུར་ནས་སོ་སོ་བ་མིན་ཏེ་གཅིག་རང་ཡིན་ནོ།
EPH 5:32 གསང་བ་དེ་ཆེན་པོ་ཞིག་ཡིན་ཡང༌། ངས་མཱ་ཤི་ཀ་དང་ཁོང་གི་སྐུ་ལུས་ཡིན་པའི་ཆོས་ཚོགས་ཀྱི་སྐོར་སྨྲ།
EPH 5:33 འོན་ཀྱང་ཁྱེད་ཚོ་རེ་རེས་ཆུང་མ་ལ་རང་དང་འདྲ་བར་བྱམས་པར་བྱེད་དགོས་ཤིང༌། ཆུང་མས་རང་གི་ཁྱོ་ག་ལ་གུས་བཀུར་བྱེད་དགོས་སོ། །
EPH 6:1 ཕྲུ་གུ་རྣམས། གཙོ་བོ་ལ་བརྟེན་ནས་ཕ་མའི་བཀའ་ལ་ཉོན་ཞིག དེ་ནི་འོས་པ་ཡིན་པས་སོ།
EPH 6:2 རང་གི་ཕ་དང་མ་ལ་བརྩི་བཀུར་གྱིས་ཤིག་ཅེས་པ་དེ་ཞལ་ཆད་དང་ལྡན་པའི་བཀའ་དང་པོ་ཡིན།
EPH 6:3 དེ་ནས་ཁྱོད་ལེགས་ཤིང་ས་གཞིའི་སྟེང་ཚེ་རིང་བར་འགྱུར་ཞེས་གསུངས།
EPH 6:4 ཡང་ཁྱེད་ཕ་རྣམས། རང་གི་ཕྲུ་གུ་ལ་ཁོང་ཁྲོ་མ་སློང་བར། གཙོ་བོའི་སློབ་སྟོན་དང་སྒྲིག་ལམ་གྱིས་གསོ་སྐྱོང་བྱེད་ཅིག
EPH 6:5 བྲན་གཡོག་རྣམས། ཁྱེད་ཚོས་མཱ་ཤི་ཀའི་བཀའ་ལ་ཉན་པ་ལྟར། འཇིགས་ཤིང་བཀུར་ནས་བཅོས་མིན་གྱིས་འཇིག་རྟེན་འདིའི་བདག་པོ་རྣམས་ཀྱི་བཀའ་ལ་ཉོན།
EPH 6:6 ཁོ་ཚོས་ལྟ་དུས་མི་རྣམས་དགྱེས་པ་ཁོ་ན་མ་ཡིན་གྱི། མཱ་ཤི་ཀའི་ཞབས་ཕྱི་དང་འདྲ་བར་སེམས་ནས་དཀོན་མཆོག་གི་ཐུགས་དགོངས་བཞིན་དུ་སྒྲུབ་དགོས།
EPH 6:7 མི་རྣམས་ཀྱི་དོན་དུ་མིན་གྱིས། གཙོ་བོ་ལ་ཞབས་ཏོག་བྱེད་པ་ལྟར་དགའ་བའི་ངང་ནས་ཞབས་ཏོག་བྱེད།
EPH 6:8 བྲན་གཡོག་དང༌། ཡང་ན་མི་རང་དབང་ཅན་གྱིས་ལས་བཟང་པོ་གང་བྱས་པའང༌། གཙོ་བོས་ང་ཚོར་བཟང་ལན་མཛད་ངེས་ཡིན་པ་ཤེས་པས་སོ།
EPH 6:9 བདག་པོ་རྣམས། ཁྱེད་ཚོས་ཀྱང་གཡོག་པོ་རྣམས་ལ་དེ་ལྟར་བྱེད་དགོས། ཁོ་ཚོར་རྫིག་རྫིག་མ་གཏོང་ཞིག དཀོན་མཆོག་གི་ཞིང་ཁམས་སུ་ཁྱེད་དང་བྲན་གཡོག་གཉིས་ལ་ཕྱོགས་རིས་ཅི་ཡང་མེད་པའི་བདག་པོ་གཅིག་རང་ཡོད་པར་ཤེས་པའི་ཕྱིར་རོ། །
EPH 6:10 མཇུག་མཐར་འདི་ལྟར་སྨྲ་སྟེ། གཙོ་བོའི་ནུས་སྟོབས་ལ་བརྟེན་ནས་ཤུགས་ཆེན་པོར་གྱུར་ཅིག
EPH 6:11 བདུད་ཀྱི་གཡོ་ཐབས་ལ་རྒོལ་ཏེ་བརྟན་པོར་གནས་ཐུབ་པའི་ཆེད་དུ་དཀོན་མཆོག་གི་གོ་ཆ་ཚང་མ་གྱོན་ཅིག
EPH 6:12 གང་ཡིན་ཞེ་ན། ང་ཚོས་མི་རྣམས་ལ་མི་འཐབ་ཀྱི། མཐུ་ལྡན་དང༌། དབང་ཅན། འཇིག་རྟེན་འདིའི་མུན་པའི་དབང་སྒྱུར་བ། ཞིང་ཁམས་ཀྱི་ངན་དབང་ཅན་རྣམས་ལ་འཐབ།
EPH 6:13 དེ་བས་ན། ངན་པའི་ཉིན་མོ་དེ་ལ་ངོ་རྒོལ་བྱེད་ཐུབ་པ་དང༌། ཐམས་ཅད་བསྒྲུབས་ཚར་ནས་བརྟན་པོར་གནས་པའི་ཕྱིར། དཀོན་མཆོག་གི་གོ་ཆ་ཚང་མ་གྱོན་ཅིག
EPH 6:14 བརྟན་པོར་གནས་ཤིང༌། རྐེད་པ་ལ་བདེན་པ་ཉིད་ཀྱི་སྐེ་རགས་བཅིངས་ཏེ། དྲང་བ་ཉིད་ཀྱི་བྲང་ཁྲབ་གྱོན།
EPH 6:15 ཞི་བདེའི་འཕྲིན་བཟང་ལས་འབྱུང་བའི་གྲ་སྒྲིག་གི་ལྷམ་རྐང་པར་གྱོན།
EPH 6:16 དེ་ཚོ་ཐམས་ཅད་དང་བཅས་པར་དད་པའི་ཕུབ་ལག་ཏུ་ཟུངས། དེ་ཡིས་ཁྱེད་ཚོས་སྡིག་སྤྱོད་མཁན་ཞེས་བྱ་བའི་མེ་ལྕེ་འབར་བའི་མདའ་ཐམས་ཅད་གསོད་ཐུབ།
EPH 6:17 ཡང་མགོ་ལ་ཐར་པའི་ལྕགས་ཞྭ་གྱོན་དང༌། དཀོན་མཆོག་གི་བཀའ་ཡིན་པའི་དམ་པའི་ཐུགས་ཉིད་ཀྱི་རལ་གྲི་འཁུར་ཞིག
EPH 6:18 དམ་པའི་ཐུགས་ཉིད་ཀྱི་སྒོ་ནས་རྟག་ཏུ་གསོལ་བ་དང་སྨོན་ལམ་འདེབས་ཤིང༌། བློ་གསལ་བར་གནས་ཏེ་རྒྱུན་མི་ཆད་པར་དད་ལྡན་ཐམས་ཅད་ཀྱི་ཆེད་དུ་སྨོན་ལམ་ཞུ།
EPH 6:19 ངའི་དོན་ལའང་སྨོན་ལམ་འདེབས་ཏེ། ངས་གཏམ་བྱེད་པའི་ཚེ་འཕྲིན་བཟང་གི་གསང་བ་འཇིགས་པ་མེད་པར་སྒྲོག་པའི་ཕྱིར་སྨྲ་དབང་ང་ལ་གནང་བར་འགྱུར།
EPH 6:20 འཕྲིན་བཟང་དེའི་དོན་དུ་ང་ནི་ལྕགས་སྒྲོག་གིས་བཅིངས་པའི་སྐུ་ཚབ་ཡིན། ངས་འཆད་འོས་པ་ལྟར། འཕྲིན་བཟང་དེ་འཇིགས་པ་ཅི་ཡང་མེད་པར་སྒྲོག་པའི་སྨོན་ལམ་ཐོབ་ཅིག
EPH 6:21 ཁྱེད་ཚོས་ཀྱང་ངའི་གནས་ཚུལ་དང་ལས་ཀ་གང་བྱེད་པ་ཤེས་པའི་ཕྱིར། གཅེས་པའི་སྤུན་ཟླ་དང་གཙོ་བོའི་ངང་ནས་ཞབས་ཕྱི་བློ་གཏད་ཆོག་པ་ཏི་ཀི་ཀུ་ཡིས་ཁྱེད་རྣམས་ལ་ཐམས་ཅད་འཆད་པར་འགྱུར།
EPH 6:22 ཁྱེད་ཚོར་སེམས་གསོ་བྱེད་པ་དང༌། ཁྱེད་ཚོས་ང་ཚོའི་གནས་སྟངས་ཀྱི་སྐོར་ཤེས་པའི་ཕྱིར་ངས་ཁོང་ཁྱེད་ཚོའི་རྩར་བཏང་བ་ཡིན།
EPH 6:23 ཡབ་དཀོན་མཆོག་དང༌། གཙོ་བོ་ཡེ་ཤུ་མཱ་ཤི་ཀ་ནས་ཞི་བདེ་དང༌། དད་པ་དང་ལྡན་པའི་བྱམས་སེམས་སྤུན་ཟླ་རྣམས་ལ་འཐོབ་པར་གྱུར་ཅིག
EPH 6:24 ང་ཚོའི་གཙོ་བོ་ཡེ་ཤུ་མཱ་ཤི་ཀ་ལ་དུས་ནམ་ཡང་གཅེས་པར་འཛིན་མཁན་ཐམས་ཅད་ལ་ཐུགས་རྗེ་འབབ་པར་ཤོག །
PHI 1:1 པའུ་ལུ་དང་ཐི་མོ་ཐེ་མཱ་ཤི་ཀ་ཡེ་ཤུའི་ཞབས་ཕྱི་གཉིས་ཀྱིས། ཕི་ལིབ་པཱི་གྲོང་ཁྱེར་དུ་མཱ་ཤི་ཀ་ཡེ་ཤུའི་ནང་ན་ཡོད་པའི་དཀོན་མཆོག་གི་མི་ཐམས་ཅད་དང༌། ཆོས་ཚོགས་ཀྱི་དོ་དམ་པ་དང་ལས་འཛིན་པ་རྣམས་ལ་འཕྲིན་ཡིག་འདི་ཕུལ་ལོ།
PHI 1:2 ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག
PHI 1:3 ངས་ཁྱེད་ཚོ་དྲན་ཐེངས་རེ་རེར་ངའི་དཀོན་མཆོག་ལ་བཀའ་དྲིན་ཆེ་ཞུ།
PHI 1:4 ཁྱེད་ཚོ་ཐམས་ཅད་ཀྱི་དོན་ལ་གསོལ་བ་འདེབས་པའི་ཚེ་ངས་རྒྱུན་དུ་དགའ་བའི་ངང་ནས་སྨོན་ལམ་འདེབས།
PHI 1:5 དེ་ནི་ཉིན་དང་པོ་ནས་ད་ལྟའི་བར་དུ་ཁྱེད་ཚོས་འཕྲིན་བཟང་གི་ལས་བྱེད་པར་ང་ལ་རོགས་རམ་བྱས་པས་སོ།
PHI 1:6 ཁྱེད་ཚོའི་ཁྲོད་དུ་བྱ་བ་བཟང་པོ་འགོ་འཛུགས་མཁན་དཀོན་མཆོག་གིས་མཱ་ཤི་ཀ་ཡེ་ཤུ་སླར་འབྱོན་པའི་ཉིན་མོའི་བར་དུ་སྒྲུབ་པར་ཡང་མཛད་རྒྱུ་ཡིན་པ་དེ་ངར་ཡིད་ཆེས་ཡོད།
PHI 1:7 ངས་ཁྱེད་ཚོ་ཐམས་ཅད་ཀྱི་སྐོར་ལ་དེ་ལྟར་བསམས་ན་འོས་སོ། གང་ཡིན་ཟེར་ན། ཁྱེད་ཚོ་རྟག་ཏུ་ངའི་སེམས་ལ་གནས་ཏེ། ང་བཙོན་ལ་འཇུག་པ་དང༌། འཕྲིན་བཟང་གསལ་བཤད་བྱེད་པ་དང༌། མི་རྣམས་ཀྱི་དད་པ་བརྟན་པོར་བྱེད་པའི་ཆ་ནས་ཁྱེད་ཚོ་ནི་ང་དང་མཉམ་དུ་དཀོན་མཆོག་གི་ཐུགས་རྗེ་འཐོབ་མཁན་ཡིན།
PHI 1:8 ངས་མཱ་ཤི་ཀ་ཡེ་ཤུའི་ཐུགས་བརྩེ་ཡིས་ཁྱེད་ཐམས་ཅད་དྲན་པ་དེ་དཀོན་མཆོག་ངའི་དཔང་པོ་མཛད་མཁན་ཡིན།
PHI 1:9 ཡང་ངས་འདི་ལྟར་གསོལ་བ་འདེབས་ཏེ། ཁྱེད་ཚོའི་བྱམས་སེམས་དེ་ཤེས་རབ་དང་རྟོགས་པ་ཐམས་ཅད་ཀྱི་སྟེང་སྔར་ལས་ལྷག་པར་འཕེལ་ནས།
PHI 1:10 ཁྱེད་ཚོས་གང་མཆོག་ཡིན་པ་བླངས་ཏེ་མཱ་ཤི་ཀའི་ཉིན་མོའི་བར་དུ་བཅོས་མིན་དང་སྐྱོན་མེད་པར་འགྱུར་བའི་ཆེད་དང༌།
PHI 1:11 དཀོན་མཆོག་གི་གཟི་བརྗིད་དང་བསྟོད་པ་འཕེལ་བའི་ཕྱིར་ཡེ་ཤུ་མཱ་ཤི་ཀ་ལ་བརྟེན་ནས་རྣམ་པར་དག་པའི་འབྲས་བུ་ཡིས་ཁྱེད་ཚོ་གང་བར་འགྱུར།
PHI 1:12 སྤུན་ཟླ་རྣམས། ང་ལ་གང་བྱུང་བ་དེས་དོན་དམ་དུ་འཕྲིན་བཟང་འཕེལ་བར་བྱས་པ་ཤེས་པར་གྱིས་ཤིག
PHI 1:13 གོང་མའི་རྒྱལ་པོའི་ཕོ་བྲང་གི་སྲུང་དམག་ཚང་མ་དང༌། གཞན་མི་ཐམས་ཅད་ཀྱིས་ང་མཱ་ཤི་ཀའི་དོན་ལ་བཙོན་དུ་བཅུག་པ་དེ་ཤེས་པར་གྱུར།
PHI 1:14 མ་ཟད་ང་བཙོན་དུ་བཅུག་པའི་རྐྱེན་གྱིས་སྤུན་ཟླ་མང་ཆེ་བས་གཙོ་བོ་ལ་བརྟེན་ཏེ་དཀོན་མཆོག་གི་བཀའ་འཇིགས་པ་མེད་པར་སྒྲོག་པའི་བློ་སྟོབས་ཆེ་བར་གྱུར།
PHI 1:15 དོན་དམ་དུ་མི་ལ་ལས་མཱ་ཤི་ཀའི་ཆོས་སྟོན་པ་ནི་ཕྲག་དོག་ཅན་དང་ཁ་རྩོད་ལ་དགའ་མཁན་ཡིན་ཡང༌། ལ་ལས་སེམས་བཟང་པོ་ཡིས་ཆོས་སྟོན།
PHI 1:16 རྗེས་མ་རྣམས་ཀྱིས་བྱམས་སེམས་ཀྱི་ངང་ནས་མཱ་ཤི་ཀའི་ཆོས་སྟོན་པ་ནི། ང་འཕྲིན་བཟང་གསལ་བཤད་བྱེད་པའི་ཕྱིར་བསྐོས་པ་ཡིན་པ་ཤེས་པས་ཡིན།
PHI 1:17 འོན་ཀྱང༌། ང་བཙོན་ཁང་ལ་ཡོད་དུས་ང་ལ་སྡུག་པོ་གཏོང་བར་བསམས་ནས་སྔ་མ་རྣམས་ཀྱིས་སེམས་བཟང་ནས་མིན་པར་འགྲན་སེམས་ནས་ཆོས་སྟོན།
PHI 1:18 དེ་ལྟར་ཡིན་པར་ཅི་སྨྲ། སྔ་རྗེས་ཀྱི་བདེན་རྫུན་གང་ཡིན་ཡང་མཱ་ཤི་ཀའི་ཆོས་སྒྲོག་བཞིན་ཡོད་པས་ང་ད་ལྟ་དགའ་སྟེ། རྗེས་མའང་དགའ་བར་འགྱུར།
PHI 1:19 གང་ཡིན་ཞེ་ན། གནས་ཚུལ་འདི་ནི་ཁྱེད་ཚོའི་སྨོན་ལམ་དང༌། ཡེ་ཤུ་མཱ་ཤི་ཀའི་ཐུགས་ཉིད་ཀྱི་རོགས་རམ་བརྒྱུད་ནས་ང་སྐྱོབ་པའི་རྒྱུར་འགྱུར་བར་ངས་ཤེས།
PHI 1:20 ངས་སྙིང་ཐག་པ་ནས་རེ་སྨོན་བྱེད་པའི་དོན་གང་ལའང་ངོ་མི་ཚ་བར། ང་སྙིང་སྟོབས་ཆེན་པོས་གསོན་རུང་ཤི་རུང་སྔར་ལྟར་དུས་རྟག་ཏུ་མཱ་ཤི་ཀ་ངའི་ལུས་ཀྱི་སྒོ་ནས་འཕག་པར་འདོད།
PHI 1:21 གང་ལགས་ཟེར་ན། ང་ནི་འཚོ་བ་མཱ་ཤི་ཀའི་དོན་དུ་ཡིན། ཤི་ནའང་ལེགས་སོ།
PHI 1:22 གལ་ཏེ་ང་མུ་མཐུད་གསོན་པོར་གནས་ན་ངའི་བྱ་བར་མཱ་ཤི་ཀའི་དོན་དུ་འབྲས་བུ་དང་ལྡན་པ་ཡིན་པས། ཡང་སྙིང་ཤི་གསོན་གང་ཞིག་འདམ་རྒྱུ་ཡིན་པ་མི་ཤེས།
PHI 1:23 ང་ནི་ཐེ་ཚོམ་ནང་དུ་ཚུད། འཇིག་རྟེན་འདི་ལས་འདས་ཏེ་མཱ་ཤི་ཀ་དང་མཉམ་དུ་གནས་འདོད། འདི་ལས་ལྷག་པ་མེད་པས་སོ།
PHI 1:24 འོན་ཀྱང༌། ཁྱེད་ཚོར་ཕན་པའི་ཆེད་དུ་ང་གསོན་པོར་གནས་པ་དེ་བས་གལ་ཆེའོ།
PHI 1:25 དེའི་ཡིད་ཆེས་ཀྱི་ངེས་པ་རྙེད་དེ། ཁྱེད་ཚོ་དད་པའི་ནང་ཡར་སྐྱེད་དང་དགའ་བ་འབྱུང་བའི་ཕྱིར་ང་གསོན་པོར་གནས་ནས་མུ་མཐུད་ཁྱེད་ཚོ་ཐམས་ཅད་དང་མཉམ་དུ་སྡོད་པ་ངས་ཤེས།
PHI 1:26 དེ་ནི་ང་ཁྱེད་ཚོའི་རྩར་ཕྱིར་ལོག་སྐབས་ངའི་རྐྱེན་གྱིས་ཁྱེད་ཚོ་མཱ་ཤི་ཀའི་ཐོག་ནས་དེ་བས་དགའ་སྤྲོ་འཕེལ་བའི་ཆེད་དུ་ཡིན།
PHI 1:27 གང་ལྟར་ཁྱེད་ཚོས་བྱ་སྤྱོད་ཚང་མ་མཱ་ཤི་ཀའི་འཕྲིན་བཟང་དང་མཐུན་པར་གྱིས་ཤིག དེ་ནས་ང་ཁྱེད་ཚོ་དང་མཇལ་རུང་མི་མཇལ་རུང༌། ཁྱེད་ཚོ་བློ་སེམས་གཅིག་མཐུན་གྱི་སྒོ་ནས་བརྟན་པོར་གནས་ཤིང༌། འཕྲིན་བཟང་ལ་བརྟེན་པའི་དད་པ་དེའི་དོན་དུ་བློ་རྩེ་གཅིག་སྒྲིམ་གྱིས་བརྩོན་པའི་གཏམ་ངས་ཐོས་པར་འགྱུར།
PHI 1:28 དགྲ་བོ་རྣམས་ལ་གང་ཡིན་ཡང་མི་སྐྲག་པ་དེ་ནི་ཁོ་ཚོ་ལ་འཇིག་པ་དང༌། ཁྱེད་ཚོ་ལ་ཐར་པ་འབྱུང་བའི་སྔ་ལྟས་ཡིན། ཐར་པ་དེ་ནི་དཀོན་མཆོག་ནས་འབྱུང་བས་མ་འཇིགས་ཤིག
PHI 1:29 མཱ་ཤི་ཀ་ལ་དད་པ་བྱེད་པ་མ་ཟད། ཁོང་གི་དོན་ལ་སྡུག་བསྔལ་མྱོང་བའང་དཀོན་མཆོག་གིས་ཁྱེད་རྣམས་ལ་གནང་བ་ཡིན།
PHI 1:30 གང་ལགས་ཟེར་ན། ང་ལ་བྱུང་བའི་འཐབ་རྩོད་སྔར་མཐོང་བ་དང་ད་ལྟ་ཐོས་པ་དེ་བཞིན་ཁྱེད་ཚོ་ལའང་འབྱུང་ངོ༌། །
PHI 2:1 ཁྱེད་ཚོ་ལ་མཱ་ཤི་ཀའི་ཐོག་ནས་སྐུལ་མ་གང་ཞིག་དང༌། བྱམས་པའི་སེམས་གསོ་དང༌། དམ་པའི་ཐུགས་ཉིད་ཀྱི་འགྲོགས་པ་དང༌། བརྩེ་སེམས་སམ་ཐུགས་རྗེ་བཅས་ཅིའང་ཡོད་ན།
PHI 2:2 བློ་སེམས་གཅིག་མཐུན་པ་དང༌། གཅིག་གིས་གཅིག་ལ་བརྩེ་བར་འཛིན་པ་དང༌། དམིགས་པ་གཅིག་མཐུན་གྱི་སྒོ་ནས་ངའི་དགའ་སྤྲོ་རྫོགས་པར་བྱེད་ཅིག
PHI 2:3 བྱ་བ་གང་ལ་ཡང་འགྲན་སེམས་སམ། ང་རྒྱལ་ཅིའང་མི་བྱེད་པར་དམའ་ས་བཟུང་སྟེ་རང་ལས་གཞན་རྣམས་གལ་ཆེ་བར་རྩིས།
PHI 2:4 མི་རེ་རེས་རང་དོན་ཁོ་ན་མ་གཉེར་བར་གཞན་གྱི་དོན་ཡང་གཉེར་དགོས།
PHI 2:5 མཱ་ཤི་ཀ་ཡེ་ཤུ་ཡིས་གང་དགོངས་པ་ལྟར་ཁྱེད་ཚོས་ཀྱང་སོམས་དགོས་ཏེ།
PHI 2:6 ཁོང་དང་དཀོན་མཆོག་ངོ་བོ་གཅིག་ཡིན་ཡང༌། ། དཀོན་མཆོག་མཉམ་པར་དེ་ལྟར་མི་འཛིན་པར། །
PHI 2:7 རང་གི་གཟི་བརྗིད་མངའ་ཐང་ཡོངས་དོར་ཏེ། ། བྲན་གཡོག་ཞིག་གི་ངོ་བོ་བླངས་ནས་ནི། ། མི་ཡི་རྣམ་པས་འཇིག་རྟེན་འདི་རུ་འཁྲུངས། །
PHI 2:8 མི་ཡི་རྣམ་པ་གྱུར་ནས་དམའ་ས་བཟུང༌། ། དཀོན་མཆོག་བཀའ་ལ་ཡོངས་སུ་ཉན་པར་མཛད། ། ཐ་ན་རྒྱང་ཤིང་སྟེང་དུ་གྲོངས་པ་འོ། །
PHI 2:9 དེའི་ཕྱིར་དཀོན་མཆོག་གིས་ནི་ཁོང་ཡོངས་སུ། ། འཕགས་ནས་མཚན་ཡང་ཀུན་ལས་མཐོ་བར་མཛད། །
PHI 2:10 དེས་ན་ཡེ་ཤུའི་མཚན་དེ་བརྗོད་པ་ཡིས། ། ས་སྟེང་ས་བླ་ས་འོག་ཐམས་ཅད་ཀུན། ། པུས་མོ་ས་ལ་བཙུགས་ཏེ་ཕྱག་འཚལ་ནས། །
PHI 2:11 ངག་གིས་ཡབ་ཆེན་དཀོན་མཆོག་བསྟོད་པའི་ཕྱིར། ། ཡེ་ཤུ་མཱ་ཤི་ཀ་ནི་གཙོ་བོ་རུ། ། ཡིན་པའི་ཁས་ལེན་ཡོངས་སུ་བྱ་བར་འགྱུར། །
PHI 2:12 དེའི་ཕྱིར་ངའི་གཅེས་པའི་སྤུན་ཟླ་རྣམས། ཁྱེད་ཚོས་སྔར་ངའི་ཁ་ལ་རྟག་ཏུ་ཉན་པ་ལྟར། ང་དེར་ཡོད་པའམ། ཡང་ན་ད་ལྟ་དེར་མེད་པའི་དུས་སུ་སྔར་ལས་ལྷག་པར་འཇིགས་ཤིང་འདར་བའི་ངང་ནས་རང་ལ་ཐོབ་ཟིན་པའི་ཐར་པ་སྒྲུབས།
PHI 2:13 གང་ཡིན་ཞེ་ན། ཁྱེད་ཚོའི་ནང་ན་འཕྲིན་ལས་མཛད་མཁན་དཀོན་མཆོག་ཡིན་ཞིང༌། ཁོང་གང་ཐུགས་མཉེས་པ་དེ་འདོད་ཅིང་སྒྲུབ་པའི་ནུས་པ་ཁྱེད་ཚོར་གནང་ངོ༌།
PHI 2:14 ཡིད་མ་རངས་པའི་གཏམ་དང༌། ཁ་རྩོད་ཅིའང་མེད་པར་བྱ་བ་ཐམས་ཅད་བྱེད་ཅིག
PHI 2:15 དེ་ནས་ཁྱེད་ཚོ་སྐྱོན་མི་བརྗོད་པ་དང་ཉེས་པ་མེད་པ། དཀོན་མཆོག་གི་སྲས་དང་སྲས་མོ་དྲི་མ་མེད་པར་གྱུར་ནས། གཡོ་ཅན་དང་ལོག་པའི་མི་རབས་ཀྱི་ཁྲོད་དུ་འཇིག་རྟེན་ལ་འོད་སྣང་འཕྲོ་བ་ལྟར་སྟེ།
PHI 2:16 ཁྱེད་ཚོས་ཚེ་སྲོག་གི་བཀའ་བཟུང་བའི་སྒོ་ནས་མཱ་ཤི་ཀའི་ཉིན་མོར་ངའི་ལས་སྟོང་རྒྱུགས་མིན་པ་དང་ངལ་རྩོལ་དེ་འབྲས་མེད་དུ་མ་གྱུར་བ་ངས་གཟེངས་མཐོན་པོས་བརྗོད།
PHI 2:17 འོན་ཀྱང༌། གལ་ཏེ་ཁྱེད་ཚོའི་དད་པའི་མཆོད་པ་དང་བསྙེན་བཀུར་གྲུབ་པའི་ཕྱིར་ངའི་ཁྲག་གསེར་སྐྱེམས་ཕུལ་བ་ལྟར་ཐོན་ན་ཡང༌། ང་དགའ་བ་མ་ཟད་ཁྱེད་ཚོ་ཐམས་ཅད་དང་མཉམ་དུ་དགའ་བར་བྱེད།
PHI 2:18 ཁྱེད་ཚོས་ཀྱང་དེ་ལྟར་དགའ་ཞིང་ང་དང་མཉམ་དུ་དགའ་བར་བྱེད་དགོས།
PHI 2:19 ཁྱེད་ཚོའི་གནས་ཚུལ་ཐོས་ནས་ངའང་དགའ་བར་འགྱུར་བའི་ཕྱིར། གཙོ་བོ་ཡེ་ཤུའི་ཐོག་ནས་ངས་ཐི་མོ་ཐེ་ཁྱེད་ཚོའི་རྩར་མྱུར་དུ་གཏོང་བའི་རེ་བ་བྱེད།
PHI 2:20 རྒྱུ་མཚན་ནི་ཁྱེད་ཚོའི་དོན་ལ་བདེན་པར་སེམས་ཁུར་བྱེད་མཁན་ཁོ་དང་འདྲ་བ་ངའི་རྩར་གཞན་མེད།
PHI 2:21 ཁོ་ཚོས་གཞན་ཐམས་ཅད་ཡེ་ཤུ་མཱ་ཤི་ཀའི་དོན་དུ་མི་གཉེར་བར་རང་དོན་གཉེར།
PHI 2:22 འོན་ཀྱང་ཐི་མོ་ཐེའི་རིན་ཐང་ཆེ་བ་ཁྱེད་རྣམས་ཀྱིས་ཤེས་ཏེ། བུ་ཡིས་ཕ་དང་མཉམ་དུ་གང་བྱེད་པ་ལྟར་ཐི་མོ་ཐེ་ཡིས་ང་དང་མཉམ་དུ་འཕྲིན་བཟང་གི་ལས་ཀ་བྱས་པས་སོ།
PHI 2:23 དེའི་ཕྱིར་ང་ལ་དོན་གང་འབྱུང་བ་ཤེས་མ་ཐག་ཏུ་ཁོ་ཁྱེད་ཀྱི་རྩར་མྱུར་དུ་གཏོང་བའི་རེ་བ་ཡོད་ཅིང༌།
PHI 2:24 ངའང་རིང་པོར་མ་ལོན་པར་གཙོ་བོ་ལ་བརྟེན་ནས་དེར་སླེབས་ཐུབ་པའི་ཡིད་ཆེས་ཡོད།
PHI 2:25 ངའི་སྤུན་ཟླ་དང་ལས་རོགས། དཔུང་གྲོགས། ཁྱེད་ཚོའི་བང་ཆེན་དང་ངའི་མཁོ་ཆས་སྒྲིག་མཁན་ཨེ་པབ་རོ་དི་ཊུ་ཁྱེད་ཚོའི་རྩར་ལོག་གཏོང་རྒྱུ་གལ་ཆེ་བར་སེམས།
PHI 2:26 གང་ལགས་ཤེ་ན། ཁྱེད་ཚོ་ཐམས་ཅད་ཤིན་ཏུ་དྲན་ཞིང༌། ཁྱེད་ཚོས་ཁོང་ནད་ཀྱིས་བཏབ་པའི་གཏམ་ཐོས་པས་ཁོང་སེམས་འཁྲུགས་པར་གྱུར།
PHI 2:27 དངོས་གནས་བྱས་ན་ཁོང་འཆི་ལ་ཉེ་བའི་ནད་ཀྱིས་བཏབ་ཀྱང༌། དཀོན་མཆོག་གིས་ཁོང་ལ་ཐུགས་རྗེ་གནང༌། ང་ལ་མྱ་ངན་སྟེང་དུ་མྱ་ངན་མ་འབྱུང་བའི་ཆེད་དུ་དཀོན་མཆོག་གིས་ཁོང་གཅིག་པུ་མ་ཟད་ང་ལ་ཡང་ཐུགས་རྗེ་གནང་བྱུང༌།
PHI 2:28 དེའི་ཕྱིར་ཁོང་ཁྱེད་ཚོའི་རྩར་དེ་བས་ཀྱང་ལོག་གཏོང་འདོད་ཡོད། དེ་ནས་ཁོང་དང་མཇལ་ནས་ཁྱེད་ཚོ་དགའ་བར་འགྱུར་ཞིང༌། ངའི་སེམས་ཁྲལ་ཡང་ཇེ་ཆུང་དུ་འགྲོ་བར་འགྱུར།
PHI 2:29 གཙོ་བོའི་ངང་ནས་དགའ་བར་བྱེད་དེ་ཁོང་ལ་སྣེ་ལེན་བྱེད་ཅིང༌། ཁོང་དང་འདྲ་བ་རྣམས་ལ་བཀུར་སྟི་བྱེད།
PHI 2:30 གང་ཡིན་ཟེར་ན། མཱ་ཤི་ཀའི་ལས་ཀྱི་དོན་ལ་ཁོང་འཆི་ལ་ཉེ་བ་ཙམ་བྱུང་ཞིང༌། ཁྱེད་ཚོའི་ཚབ་ལ་ང་ལ་གཡོག་བྱེད་པའི་ཕྱིར་ཉེན་ཁ་ཆེན་པོ་མྱོང་ངོ༌། །
PHI 3:1 མདོར་ན་སྤུན་ཟླ་རྣམས། གཙོ་བོའི་ངང་ནས་དགའ་བར་གྱུར་ཅིག ངས་དོན་འདི་རྣམས་ཡང་བསྐྱར་ཁྱེད་ཚོར་བྲིས་ན་ང་མི་བསུན་ཞིང༌། ཁྱེད་ཚོར་ཕན་ནོ། །
PHI 3:2 ཁྱི་དང་འདྲ་བའི་མི་ངན་ཏེ་ཐར་པ་འཐོབ་པའི་ཕྱིར་ཡ་ཧུ་དཱ་པའི་ཆོས་ཀྱི་རྟགས་ངེས་པར་དུ་དགོས་ཞེས་པའི་མི་ལ་དོགས་ཟོན་གྱིས་ཤིག
PHI 3:3 གང་ཡིན་ཞེ་ན། ང་ཚོ་ནི་ཡ་ཧུ་དཱ་པའི་རྟགས་བདེན་པ་དང་ལྡན་ཏེ་དཀོན་མཆོག་གི་དམ་པའི་ཐུགས་ཉིད་ཀྱི་སྒོ་ནས་བསྙེན་བཀུར་བྱེད་ཅིང༌། མཱ་ཤི་ཀ་ཡེ་ཤུ་ལ་དགའ་བར་བྱེད་དེ་ཆོས་ཀྱི་རྟགས་ལེན་ལ་སོགས་པའི་མིའི་ལུགས་སྲོལ་ལ་མི་རྟེན།
PHI 3:4 དོན་དམ་དུ། ང་རང་ལ་མིའི་ལུགས་སྲོལ་ལ་རྟེན་པའི་རྒྱུ་མཚན་ཡོད། མི་གཞན་ཞིག་ལ་མིའི་ལུགས་སྲོལ་ལ་རྟེན་པའི་རྒྱུ་མཚན་ཡོད་བསམས་ན། ཁོ་ལས་ང་ལ་མང་བ་ཡོད།
PHI 3:5 ང་ནི་སྐྱེས་ནས་ཉིན་བརྒྱད་པར་ཡ་ཧུ་དཱ་པའི་ཆོས་ཀྱི་རྟགས་དང་ལྡན་ཏེ། ཡི་སི་ར་ཨེལ་མི་རིགས་ལ་གཏོགས་པ་དང༌། པེན་ཡ་མཱིན་ཚོ་པའི་མི་ཞིག ཤ་གཙང་རུས་གཙང་གི་ཡ་ཧུ་དཱ་པ་ཞིག ཆོས་ཁྲིམས་ཀྱི་ཆ་ནས་ཕཱ་རུ་ཤི་པ་ཞིག
PHI 3:6 ཆོས་ཚོགས་ལ་འབད་པའི་ཐོག་ནས་མནར་གཅོད་བྱེད་མཁན་ཡིན་ཏེ། ཆོས་ཁྲིམས་སྲུང་བའི་ཆ་ནས་སྐྱོན་མེད་པ་ཞིག་ཡིན།
PHI 3:7 འོན་ཀྱང་ངས་སྔར་ཁེ་ཕན་དུ་བརྩིས་པ་རྣམས་ད་ཆ་མཱ་ཤི་ཀའི་དོན་དུ་གྱོང་གུན་དུ་རྩི།
PHI 3:8 དེས་མ་ཟད་མཱ་ཤི་ཀ་ཡེ་ཤུ་ངའི་གཙོ་བོ་ངོ་ཤེས་པ་དེའི་བླ་ན་མེད་པའི་རིན་ཐང་གི་རྐྱེན་གྱིས་ངས་གཞན་ཐམས་ཅད་ཀྱང་གྱོང་གུན་དུ་རྩི། ཁོང་གི་ཆེད་དུ་ཐམས་ཅད་བརླག་མྱོང་ཞིང་དེ་ཚོ་གད་སྙིགས་སུ་རྩི། དེ་ནི་མཱ་ཤི་ཀ་འཐོབ་པའི་ཆེད་དང༌།
PHI 3:9 ཁོང་གི་ནང་ན་གནས་པའི་ཕྱིར་རོ། ཆོས་ཁྲིམས་སྲུང་བ་ལས་མ་ཡིན་ཏེ། མཱ་ཤི་ཀ་ལ་དད་པ་བྱེད་པའི་སྒོ་ནས་ང་ལ་དཀོན་མཆོག་དང་འབྲེལ་བ་ཡང་དག་པ་ཐོབ། དེ་ནི་དཀོན་མཆོག་ལས་འབྱུང་ཞིང༌། དད་པ་ལ་བརྟེན་ནོ།
PHI 3:10 ཁོང་ངོ་ཤེས་པ་དང༌། ཁོང་འཆི་བ་ནས་སླར་གསོན་པར་གྱུར་བའི་ནུས་མཐུ་ཤེས་པར་འདོད། ང་འཆི་བ་ཙམ་དུ་ཁོང་དང་མཉམ་པར་སྡུག་བསྔལ་མྱོང་བར་འདོད།
PHI 3:11 དེ་ནི་ཐབས་གང་གི་ཐོག་ནས་ང་འཆི་བ་ནས་སླར་གསོན་དུ་འགྱུར་བའི་ཕྱིར་རོ། །
PHI 3:12 དོན་དེ་རྣམས་ཐོབ་ཟིན་པ་མ་ཡིན། ཡོངས་སུ་རྫོགས་པར་གྱུར་བ་ཡང་མ་ཡིན། འོན་ཏེ་མཱ་ཤི་ཀ་ཡེ་ཤུ་ཡིས་ང་དོན་གང་གི་ཕྱིར་བཟུང་བ་དེ་ངའི་འཛིན་པའི་ཕྱིར་འབད་རྩོལ་བྱེད།
PHI 3:13 སྤུན་ཟླ་རྣམས། ངས་དོན་དེ་རྣམས་ཐོབ་ཚར་བར་མི་རྩི་ཡང་ངས་འདི་གཅིག་པོ་བྱེད་དེ། གང་འདས་པ་བརྗེད་ནས་མ་འོངས་པ་ལ་གང་སྒྲུབ་པར་འབད་རྩོལ་བྱེད་པས།
PHI 3:14 དཀོན་མཆོག་གིས་མཱ་ཤི་ཀ་ཡེ་ཤུའི་སྒོ་ནས་ང་ཞིང་ཁམས་སུ་བོས་པའི་བྱ་དགའ་འཐོབ་པའི་ཕྱིར་ངས་དམིགས་ཡུལ་གྱི་ཕྱོགས་སུ་ཐད་ཀར་རྒྱུག་གོ
PHI 3:15 དེར་བརྟེན། ང་ཚོའི་ཁྲོད་ཀྱི་སྨིན་ཞིང་ཡོངས་སུ་རྫོགས་པར་འགྱུར་བ་རྣམས་ཀྱིས་དེ་ལྟར་སེམས་སྐྱེད་དགོས། ཡང་དོན་གཅིག་ལ་ལྟ་བ་མི་མཐུན་ན་དཀོན་མཆོག་གིས་དོན་དེའང་ཁྱེད་ལ་མངོན་པར་མཛད།
PHI 3:16 འོན་ཀྱང་ཐོབ་ཟིན་པའི་ཚད་གཞི་དེ་བཞིན་དུ་ང་ཚོས་སྤྱོད་པར་བྱེད་དགོས།
PHI 3:17 སྤུན་ཟླ་རྣམས། ཁྱེད་ཚོ་ཚང་མས་ང་མིག་དཔེར་འཛིན་ཅིང༌། ང་ཚོའི་དཔེ་ལྟར་མི་ཚེ་སྐྱེལ་བ་རྣམས་ལ་ལྟོས།
PHI 3:18 རྒྱུ་མཚན་ནི་མི་མང་པོས་མཱ་ཤི་ཀའི་རྒྱང་ཤིང་གི་དགྲ་བོ་ལྟར་སྤྱོད་པར་བྱེད། ངས་སྔར་ལན་མང་པོ་ཁོ་ཚོའི་སྐོར་ལ་ཁྱེད་རྣམས་ལ་སྨྲས་ཤིང༌། ད་ལྟའང་མིག་ལ་མཆི་མ་དང་བཅས་པར་བཤད་ཡོད།
PHI 3:19 ཁོ་ཚོ་འཇིག་པ་འགྱུར་ངེས་སོ། ཁོ་ཚོའི་ལྷ་ནི་སོ་སོའི་གྲོད་ཁོག་ཡིན། ཁོ་ཚོས་ངོ་ཚ་གྲགས་པར་འཛིན། འཇིག་རྟེན་འདི་ལ་བློ་གཅིག་ཏུ་སེམས།
PHI 3:20 འོན་ཀྱང་ངེད་རྣམས་ནི་དཀོན་མཆོག་གི་ཞིང་ཁམས་ཀྱི་མངའ་འབངས་ཡིན་ལ། དེ་ནས་འབྱོན་པའི་སྐྱབས་མགོན་ཞིག་སྟེ་གཙོ་བོ་ཡེ་ཤུ་མཱ་ཤི་ཀ་ང་ཚོས་ཡིད་རྟོན་ནས་སྒུག
PHI 3:21 དོན་ཐམས་ཅད་ཁོང་གི་དབང་འོག་ཏུ་སྒྱུར་ཐུབ་པའི་ནུས་མཐུའི་སྒོ་ནས་ང་ཚོའི་མིའི་ལུས་དམན་པ་འདི་ཡང་ཁོང་གི་གཟི་བརྗིད་དང་ལྡན་པའི་སྐུ་གཟུགས་དང་འདྲ་བར་མཛད་པར་འགྱུར་རོ། །
PHI 4:1 དེའི་ཕྱིར་ངའི་མཛའ་ཞིང་བརྩེ་ལ། སྙིང་ནས་དྲན་པའི་སྤུན་ཟླ་ཚོ། ཁྱེད་ཚོ་ནི་ངའི་དགའ་སྤྲོ་དང༌། ཅོད་པན་དང་འདྲ་བ་ཡིན་པས་གཙོ་བོའི་ཐོག་ནས་དེ་ལྟར་བརྟན་པོར་གནས་ཤིག
PHI 4:2 ངས་བུད་མེད་ཡུ་ཨོ་དི་ཡཱ་དང་སིན་ཏི་ཀེ་གཉིས་ལ་གཙོ་བོའི་ངང་ནས་ཡིད་མཐུན་པར་སྐུལ།
PHI 4:3 ངའི་བདེན་པའི་ལས་རོགས། ཁྱེད་ཀྱིས་ཀྱང་བུད་མེད་དེ་གཉིས་ལ་རོགས་རམ་བྱེད་པར་ཞུ། གང་ཡིན་ཟེར་ན། ཁོ་ཚོས་ཁི་ལུ་མིན་ཐུ་ལ་སོགས་པའི་ངའི་ལས་རོགས་གཞན་ང་དང་མཉམ་དུ་འཕྲིན་བཟང་གི་ཕྱིར་འབད་རྩོལ་བྱས། ཁོ་ཚོའི་མིང་ནི་དཔག་ཏུ་མེད་པའི་ཚེའི་མདོ་ལ་འཁོད་ཡོད།
PHI 4:4 གཙོ་བོ་ལ་བརྟེན་ནས་རྟག་ཏུ་དགའ་བར་གྱིས་ཤིག ངས་ཡང་བསྐྱར་ཁྱེད་ཚོར་དགའ་བར་གྱིས་ཤིག་ཅེས་སྨྲ།
PHI 4:5 མི་ཐམས་ཅད་ཀྱིས་ཁྱེད་ཚོའི་སེམས་དུལ་བ་དེ་ཤེས་པར་གྱིས་ཤིག གཙོ་བོ་འབྱོན་པ་ལ་ཉེའོ།
PHI 4:6 སེམས་ཁྲལ་གང་ཡང་མི་བྱེད་པར་རྣམ་པ་ཐམས་ཅད་དུ་སྨོན་ལམ་དང་གསོལ་བ་ཐུགས་རྗེ་ལེགས་འབུལ་གྱི་སྒོ་ནས་དཀོན་མཆོག་ལ་ཞུ།
PHI 4:7 ཡང་དཀོན་མཆོག་གི་བསམ་ཡུལ་ལས་འདས་པའི་ཞི་བདེ་ཡིས་མཱ་ཤི་ཀ་ཡེ་ཤུའི་སྒོ་ནས་ཁྱེད་ཚོའི་བློ་སེམས་སྲུང་བར་འགྱུར།
PHI 4:8 མདོར་ན་སྤུན་ཟླ་རྣམས། ཁྱེད་ཚོས་བདེན་པ་གང་ཡིན་པ་དང༌། བཀུར་སྟི་གང་ཡིན་པ། དྲང་པོ་གང་ཡིན་པ། དག་པ་གང་ཡིན་པ། ཡིད་དུ་འོང་བ་གང་ཡིན་པ། སྙན་པ་དང༌། བཟང་པོ་གང་ཡིན་པ། བསྟོད་འོས་པ་བཅས་པའི་དོན་དེ་རྣམས་ཀུན་ལ་བསམ་བློ་གཏོང་ཞིག
PHI 4:9 ཁྱེད་ཚོས་ང་ནས་གང་བསླབས་པ་དང༌། དང་ལེན་བྱས་པ་དང༌། ཐོས་པ་དང༌། མཐོང་བ་དེ་དག་ཉམས་ལེན་བྱེད་དགོས། ཡང་ཞི་བདེ་གནང་མཁན་དཀོན་མཆོག་ཁྱེད་ཚོ་དང་མཉམ་དུ་བཞུགས་པར་འགྱུར།
PHI 4:10 ཁྱེད་ཚོས་ད་ལྟ་ཡང་བསྐྱར་ང་ལ་སེམས་ཁུར་བྱེད་པས་ངས་གཙོ་བོ་ལ་བརྟེན་ནས་ཤིན་ཏུ་དགའ་བར་བྱེད། དོན་དམ་དུ་ཁྱེད་ཚོས་སྔར་ནས་སེམས་ཁུར་བྱས་ཀྱང་ང་ལ་རོགས་རམ་བྱེད་པའི་གོ་སྐབས་མ་བྱུང༌།
PHI 4:11 ང་ལ་མཁོ་ཆས་མེད་པས་དེ་ལྟར་མི་ཟེར། རྒྱུ་མཚན་ནི་ང་ལ་ཅི་ཡོད་པ་དེར་ཆོག་ཤེས་བྱེད་པ་ཤེས་ཟིན་པ་ཡིན།
PHI 4:12 ངས་དམན་པའི་དུས་ལ་ཇི་ལྟར་བྱེད་པ་དང༌། ལོངས་སྤྱོད་ཡོད་པའི་དུས་ཀྱང་ཇི་ལྟར་བྱེད་པ་ཤེས། འགྲང་བ་ཡང་ན་ལྟོགས་པ། ལྷག་པའམ་ཡང་ན་ཆད་པ། གནས་བབས་ཀུན་ལ་ཇི་ལྟར་བཟོད་པ་སྒོམ་པའི་གསང་བ་དེ་ཤེས།
PHI 4:13 ང་ལ་སྟོབས་ཤུགས་གནང་མཁན་གྱི་སྒོ་ནས་ངས་ཐམས་ཅད་བྱེད་ཐུབ་བོ།
PHI 4:14 འོན་ཀྱང་ང་སྡུག་བསྔལ་མྱོང་དུས་ཁྱེད་ཚོས་ང་ལ་རོགས་རམ་བྱས་པས་དེ་ལེགས།
PHI 4:15 འཕྲིན་བཟང་ཐོག་མར་སྒྲོག་པའི་སྐབས་སུ་ང་མ་ཀེ་དོན་ཡཱ་ཡུལ་ནས་ཁ་བྲལ་བའི་རྗེས། ཁྱེད་ཚོ་མ་གཏོགས་ཆོས་ཚོགས་ཕར་སྤྲོད་ཚུར་ལེན་གྱི་རོགས་རམ་མ་བྱས་པ་ཁྱེད་ཕི་ལིབ་པཱི་པ་རྣམས་ཀྱིས་ཤེས།
PHI 4:16 ང་ཐེ་ས་ལོ་ནི་ཀེ་གྲོང་ཁྱེར་ལ་ཡོད་དུས་ཀྱང་ཁྱེད་ཚོས་ང་ལ་སྦྱིན་པ་ཐེངས་འགའ་བཏང༌།
PHI 4:17 རང་གི་དོན་ལ་སྦྱིན་པ་མི་འཚོལ་བར་ངས་ཁྱེད་རྣམས་ཀྱི་དོན་ལ་དཀོན་མཆོག་གི་དྲུང་དུ་ཕན་པའི་འབྲས་བུ་འཚོལ།
PHI 4:18 ཁྱེད་ཚོས་ཨེ་པབ་རོ་དི་ཊུ་བརྒྱུད་གང་བསྐུར་བ་དེ་འབྱོར་ནས་ང་ལ་གང་དགོས་ཡོད་པ་མ་ཟད་ལྷག་མའང་ཡོད་པས་ཡིད་ཚིམ་པར་གྱུར། ཁྱེད་ཀྱིས་བསྐུར་བའི་གནང་སྦྱིན་ནི་དྲི་ཞིམ་གྱི་མཆོད་པ་དཀོན་མཆོག་གི་ཐུགས་སུ་བྱོན་པ་དང་མཉེས་པ་ཞིག་ཡིན།
PHI 4:19 ཡང་ངའི་དཀོན་མཆོག་གིས་རང་གི་གཟི་བརྗིད་དང་ལྡན་པའི་ནོར་བཞིན་དུ་མཱ་ཤི་ཀ་ཡེ་ཤུ་བརྒྱུད་ནས་ཁྱེད་ཚོར་དགོས་པ་ཐམས་ཅད་མཁོ་འདོན་མཛད་པར་འགྱུར།
PHI 4:20 ངེད་རྣམས་ཀྱི་དཀོན་མཆོག་དང་ཡབ་ལ་དུས་གཏན་དུ་གཟི་བརྗིད་དང་ལྡན་པར་གྱུར་ཅིག ཨ་མེན།
PHI 4:21 མཱ་ཤི་ཀ་ཡེ་ཤུའི་ངང་ནས་དད་ལྡན་རེར་འཚམས་འདྲི་ཞུས། ང་དང་མཉམ་དུ་ཡོད་པའི་སྤུན་ཟླ་རྣམས་ཀྱིས་ཁྱེད་ཚོར་འཚམས་འདྲི་ཞུ།
PHI 4:22 དད་ལྡན་ཐམས་ཅད་དང༌། ཁྱད་པར་དུ་གོང་མ་སེ་སར་གྱི་ཕོ་བྲང་ལ་བཞུགས་པ་རྣམས་ཀྱིས་ཁྱེད་ཚོར་འཚམས་འདྲི་ཞུ།
PHI 4:23 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོའི་སེམས་ལ་གནས་པར་གྱུར་ཅིག །
COL 1:1 དཀོན་མཆོག་གི་ཐུགས་དགོངས་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་དང༌། ངེད་རྣམས་ཀྱི་སྤུན་ཟླ་ཐི་མོ་ཐེ་ཡིས།
COL 1:2 ཀོ་ལོ་སཱ་གྲོང་ཁྱེར་དུ་ཡོད་པའི་དཀོན་མཆོག་གི་མི་རྣམས་ཏེ། མཱ་ཤི་ཀའི་ཐོག་ནས་སྤུན་ཟླ་ལྷག་བསམ་ཆེ་བ་རྣམས་ལ་འཕྲིན་ཡིག་འདི་ཕུལ་ལོ། ང་ཚོའི་ཡབ་དཀོན་མཆོག་ནས་ཐུགས་རྗེ་དང་ཞི་བདེ་ཁྱེད་རྣམས་ལ་འཐོབ་པར་གྱུར་ཅིག
COL 1:3 ཁྱེད་ཚོའི་དོན་ལ་སྨོན་ལམ་འདེབས་དུས་ངེད་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་རྟག་པར་བཀའ་དྲིན་ཆེ་ཞུ།
COL 1:4 གང་ཡིན་ཟེར་ན། ཁྱེད་ཚོས་མཱ་ཤི་ཀ་ཡེ་ཤུ་ལ་དད་པ་བྱེད་ཅིང༌། དཀོན་མཆོག་གི་མི་ཐམས་ཅད་ལ་ཡང་བྱམས་པ་བྱེད་པའི་སྐོར་ང་ཚོས་ཐོས།
COL 1:5 དད་པ་དང་བྱམས་པ་དེ་ནི་ཁྱེད་ཚོའི་དོན་དུ་དཀོན་མཆོག་གི་ཞིང་ཁམས་ལ་བཅོལ་བའི་རེ་བ་ལས་འབྱུང་ཞིང༌། བདེན་པ་ཉིད་ཀྱི་བཀའ་སྟེ་འཕྲིན་བཟང་ལས་ཁྱེད་ཚོས་སྔར་ཐོས་པ་དེ་ཡིན།
COL 1:6 འཕྲིན་བཟང་དེ་ཁྱེད་རྣམས་ལ་བསྒྲགས་ཡོད་ཅིང༌། འཇིག་རྟེན་ཀུན་ལ་འབྲས་བུ་སྐྱེད་ཅིང་དར་བ་བཞིན། དེ་ལྟར་ཁྱེད་ཚོས་འཕྲིན་བཟང་ཐོས་ཤིང་བདེན་པའི་ངང་ནས་དཀོན་མཆོག་གི་ཐུགས་རྗེ་རྟོགས་པའི་ཉིན་མོ་ནས་བཟུང་ཁྱེད་ཚོའི་ཁྲོད་དུ་ཡང་དར།
COL 1:7 ཁྱེད་ཚོས་ང་ཚོའི་གཅེས་པའི་གཡོག་པོ་གཅིག་པ་ཨེ་པབ་རཱ་ནས་འཕྲིན་བཟང་ཐོས། ཁོང་ནི་ང་ཚོའི་ཚབ་ལ་མཱ་ཤི་ཀའི་ཞབས་ཕྱི་ལྷག་བསམ་དག་པ་ཡིན་ཞིང༌།
COL 1:8 དམ་པའི་ཐུགས་ཉིད་ལས་འབྱུང་བའི་ཁྱེད་ཚོའི་བྱམས་སེམས་ཀྱི་སྐོར་ང་ཚོར་བཤད།
COL 1:9 དེའི་ཕྱིར་ང་ཚོས་དེའི་སྐོར་ཐོས་པའི་ཉིན་མོ་ནས་བཟུང༌། ཐུགས་ཉིད་ལ་གཏོགས་པའི་ཤེས་རབ་དང་རྟོགས་པ་ཐམས་ཅད་དང་ལྡན་ཏེ་ཁྱེད་ཚོས་དཀོན་མཆོག་གི་ཐུགས་དགོངས་གསལ་པོར་རྟོགས་རྒྱུར་རྒྱུན་ཆད་མེད་པར་སྨོན་ལམ་འདེབས།
COL 1:10 དེ་ནས་ཁྱེད་ཚོའི་སྤྱོད་ལམ་གཙོ་བོའི་དོན་དུ་འོས་པ། རྣམ་པ་ཀུན་ནས་དཀོན་མཆོག་ཐུགས་དགྱེས་ཏེ། ལས་བཟང་པོ་ཐམས་ཅད་ཀྱི་སྒོ་ནས་འབྲས་བུ་སྐྱེད་ཅིང༌། དཀོན་མཆོག་གི་རྟོགས་པ་འཕེལ་ཏེ།
COL 1:11 ཁོང་གི་གཟི་བརྗིད་དང་ལྡན་པའི་ནུས་མཐུ་ལས་འབྱུང་བའི་དབང་གིས་ཁྱེད་ཚོ་སེམས་བརྟན་པོར་འགྱུར། བཟོད་སེམས་ཀྱིས་ཐམས་ཅད་བཟོད་པ་སྒོམ་ཞིང༌། དགའ་བའི་ངང་ནས།
COL 1:12 ཡབ་དཀོན་མཆོག་ལ་བཀའ་དྲིན་ཆེ་ཞུ། ཁོང་གིས་འོད་ཀྱི་རྒྱལ་ཁམས་སུ་ཁྱེད་ཚོར་ཞལ་ཆད་གནང་བའི་བྱིན་རླབས་ཀྱི་སྐལ་བ་འཐོབ་འོས་པར་མཛད།
COL 1:13 དཀོན་མཆོག་གིས་ང་ཚོ་མུན་པའི་དབང་འོག་ནས་བསྐྱབས་ཏེ་ཁོང་གི་གཅེས་པའི་སྲས་ཀྱི་རྒྱལ་སྲིད་དུ་ཁྲིད་པར་མཛད།
COL 1:14 ཁོང་གི་སྲས་བརྒྱུད་ནས་ང་ཚོ་སྐྱོབ་པར་འགྱུར་ལ། སྡིག་ཉེས་སེལ་བ་ཐོབ།
COL 1:15 མཱ་ཤི་ཀ་ནི་མིག་གིས་མཐོང་མི་ཐུབ་པའི་དཀོན་མཆོག་གི་གཟུགས་བརྙན་ཡིན་ཏེ། བཀོད་པ་ཐམས་ཅད་ཀྱི་སྔོན་སྐྱེས་ཡིན།
COL 1:16 གང་ཡིན་ཞེ་ན། ཁོང་གི་སྒོ་ནས་གནམ་ས་གཉིས་ལ་ཡོད་པ་ཐམས་ཅད་དང༌། མིག་གིས་མཐོང་ཐུབ་མིན། རྒྱལ་པོ་རྣམས་དང༌། རྒྱལ་སྲིད། མཐུ་ལྡན། དབང་ཅན་གང་ཡིན་རུང༌། ཐམས་ཅད་ཁོང་བརྒྱུད་ནས་བཟོས་ཤིང༌། ཁོང་གི་དོན་ལ་བཀོད་པ་ཡིན།
COL 1:17 ཁོང་ནི་ཐམས་ཅད་ལས་སྔ་མ་ཡིན་ཞིང༌། ཁོང་གི་ཐོག་ནས་ཆ་ཚང་བརྟན་པོར་གནས།
COL 1:18 ཁོང་གི་སྐུ་གཟུགས་ཡིན་པའི་ཆོས་ཚོགས་དེ་ཁོང་དབུ་ལྟར་ཡིན་ལ། རྣམ་པ་ཀུན་ལས་མཆོག་ཏུ་འགྱུར་བའི་ཆེད་དུ་ཁོང་ནི་ཐོག་མ་དང༌། འཆི་བ་ནས་སྔོན་སྐྱེས་ཡིན།
COL 1:19 གང་ཡིན་ཟེར་ན། དཀོན་མཆོག་གི་ཚང་བ་ཐམས་ཅད་ཁོང་གི་ནང་དུ་གནས་པར་མཛད་པ་ལ་ཡབ་དཀོན་མཆོག་ཐུགས་མཉེས་ཤིང༌།
COL 1:20 ཁོང་གི་སྐུ་ཁྲག་རྒྱང་ཤིང་སྟེང་ཐོན་པ་དེ་ཡིས་ཞི་བདེ་བསྐྲུན་པའི་སྒོ་ནས། ཁོང་བརྒྱུད་ནས་དཀོན་མཆོག་གིས་གནམ་ས་གཉིས་ཀྱི་དོན་ཐམས་ཅད་རང་ཉིད་དང་སྡུམ་པར་མཛད།
COL 1:21 ཁྱེད་ཚོ་སྔར་སྤྱོད་པ་ངན་པ་བྱས་ཏེ་དཀོན་མཆོག་ནས་འབྲེལ་བ་རྒྱང་པ་དང༌། སེམས་ནང་དཀོན་མཆོག་ལ་སྡང་སེམས་ཅན་ཡིན་ཡང༌།
COL 1:22 ད་ལྟ་མཱ་ཤི་ཀའི་སྐུ་གྲོངས་པའི་སྒོ་ནས་དཀོན་མཆོག་གིས་ཁྱེད་རྣམས་རང་ཉིད་དང་སྡུམ་པར་མཛད་ཡོད། དེ་ནི་ཁྱེད་ཚོ་དམ་པ་དང༌། སྐྱོན་མེད་པ། སྐྱོན་བརྗོད་རྒྱུ་ཡང་མེད་པར་ཁོང་གི་མདུན་དུ་སྐྱེལ་བའི་ཆེད་དུ་ཡིན།
COL 1:23 འོན་ཀྱང་འཕྲིན་བཟང་གི་རེ་བ་མི་སྤོང་བར་ཁྱེད་ཚོས་མུ་མཐུད་ནས་དད་པ་ལ་བརྟན་པོར་གནས་དགོས། ཁྱེད་ཚོས་ཐོས་པའི་འཕྲིན་བཟང་དེ་ནམ་མཁའི་འོག་ཏུ་འཇིག་རྟེན་ཀུན་ལ་གྲགས་པ་ཡིན་ལ། ང་པའུ་ལུ་དེའི་ཞབས་ཏོག་ཏུ་གྱུར།
COL 1:24 ད་ངས་ཁྱེད་ཚོའི་དོན་ལ་མྱོང་བའི་དཀའ་ངལ་ལ་དགའ་བར་བྱེད་དེ། མཱ་ཤི་ཀའི་སྐུ་གཟུགས་ཡིན་པའི་ཆོས་ཚོགས་ཀྱི་ཆེད་དུ་ཁོང་གི་སྡུག་བསྔལ་ལྷག་མ་དེ་ངའི་ལུས་ལ་མུ་མཐུད་རྫོགས་པར་བྱེད།
COL 1:25 ཁྱེད་རྣམས་ལ་ཕན་པའི་ཕྱིར་དཀོན་མཆོག་གིས་ང་ལ་གནང་བའི་ལས་འགན་དང་མཚུངས་ཏེ་ང་ཆོས་ཚོགས་ཀྱི་ཞབས་ཏོག་ཏུ་གྱུར། དེ་ནི་དཀོན་མཆོག་གི་བཀའ་ཡོངས་སུ་སྒྲོག་པའི་ཆེད་དུ་ཡིན།
COL 1:26 དེ་ཅི་ཡིན་ཞེ་ན། འདས་པའི་དུས་ཀྱི་མི་དང༌། མི་རབས་ནས་མི་རབས་བར་དུ་སྦས་ཡོད་པའི་གསང་བ་དེ་དཀོན་མཆོག་གི་མི་རྣམས་ལ་ད་ལྟ་མངོན་པར་མཛད།
COL 1:27 དཀོན་མཆོག་གིས་དཔག་ཏུ་མེད་པའི་གཟི་བརྗིད་ཀྱི་གསང་བ་དེ་ཡ་ཧུ་དཱ་པ་མིན་པའི་མི་རིགས་ཀྱི་ཁྲོད་དུ་ཇི་ལྟར་རྩ་ཆེན་ཡིན་པ་ཉིད་ཀྱི་མི་རྣམས་ལ་མངོན་པར་གནང་བ་ཐག་གཅོད་མཛད། གསང་བ་དེ་ནི་མཱ་ཤི་ཀ་ཁྱེད་ཚོའི་སེམས་ལ་བཞུགས་ཏེ་ཁོང་གི་གཟི་བརྗིད་མཉམ་དུ་ལོངས་སུ་སྤྱོད་པའི་རེ་བ་ཡིན་ནོ།
COL 1:28 མི་ཐམས་ཅད་མཱ་ཤི་ཀའི་ཐོག་ནས་ཡོངས་སུ་རྫོགས་པར་གྱུར་ཅིང་དཀོན་མཆོག་གི་མདུན་དུ་སྐྱེལ་བའི་ཕྱིར། ཤེས་རབ་ཀུན་གྱིས་མི་རེ་རེར་ཁ་ཏ་བྱེད་ཅིང་སློབ་སྟེ་ང་ཚོས་མཱ་ཤི་ཀའི་སྐོར་སྒྲོག
COL 1:29 དེ་སྒྲུབ་པའི་ཆེད་དུ་ངའི་ལུས་སྟེང་ལ་ཤུགས་ཆེན་གྱི་འཕྲིན་ལས་མཛད་པའི་ཁོང་གི་ནུས་མཐུ་ལ་བརྟེན་ནས་ངས་འབད་རྩོལ་བྱེད་དོ། །
COL 2:1 ཁྱེད་རྣམས་དང༌། ལའོ་ཌི་ཀེ་ཡཱ་གྲོང་ཁྱེར་གྱི་མི་རྣམས། དེ་བཞིན་ངའི་གདོང་མཐོང་མ་མྱོང་བའི་མི་ཐམས་ཅད་ལ་ཕན་པའི་ཕྱིར་ངས་དཀའ་ངལ་ཇི་ཙམ་སྤྱད་པ་ཁྱེད་ཚོས་ཤེས་པར་འདོད།
COL 2:2 ངས་དེ་ལྟར་བྱེད་པའི་དོན་ནི་ཁོ་ཚོར་སེམས་གསོ་ཐོབ་ནས། བྱམས་སེམས་ཀྱིས་གཅིག་ཏུ་འགྱུར་བའི་ཆེད་དུ་ཡིན། དེ་ནས་ངེས་པར་དུ་རྟོགས་པ་ཚང་བ་དང་ལྡན་པར་གྱུར་ནས་ཁོ་ཚོས་དཀོན་མཆོག་གི་གསང་བ་སྟེ་མཱ་ཤི་ཀ་ཤེས་པར་འགྱུར།
COL 2:3 ཁོང་གི་ནང་དུ་ཤེས་བྱ་དང་རྟོགས་པའི་གཏེར་ཐམས་ཅད་སྦས་ཡོད།
COL 2:4 མི་སུས་ཀྱང་ཁྱེད་ཚོར་གཏམ་སྙན་པོས་མགོ་སྐོར་མི་གཏོང་བའི་ཕྱིར་འདི་ལྟར་སྨྲ།
COL 2:5 ང་ནི་ལུས་ཀྱི་ཆ་ནས་ཁྱོད་ཚོའི་ཁྲོད་དུ་མེད་ནའང་སེམས་ཀྱི་ཆ་ནས་ཁྱོད་ཚོའི་རྩར་ཡོད། ངས་ཁྱེད་ཚོའི་སྒྲིག་ལམ་དང་མཱ་ཤི་ཀ་ལ་དད་སེམས་བརྟན་པོ་ཡོད་པ་ཤེས་པས་དགའ་བར་བྱེད།
COL 2:6 དེ་བས་ན། ཁྱེད་ཚོས་གཙོ་བོ་མཱ་ཤི་ཀ་ཡེ་ཤུ་དང་ལེན་བྱས་པས་མཱ་ཤི་ཀ་པ་ལྟར་མི་ཚེ་སྐྱེལ་ཏེ།
COL 2:7 ཁོང་གི་ནང་ན་རྩ་བ་བཙུགས་ཤིང༌། མཱ་ཤི་ཀ་ཡིན་པའི་རྨང་གཞིའི་ཐོག་རྩིག་སྟེ་ཁྱེད་སྔར་བསླབས་པ་ལྟར་དད་པ་ལ་བརྟན་པོར་གནས། བཀའ་དྲིན་ཆེ་ཞུ་བའི་སེམས་དེ་བས་མང་དུ་འཕེལ།
COL 2:8 མི་སུ་ཞིག་གིས་སྟོང་ཞིང་མགོ་སྐོར་བའི་མཚན་ཉིད་ཀྱི་སྒོ་ནས་ཁྱེད་ཚོ་འཛིན་དུ་མ་འཇུག་ཅིག རྒྱུ་མཚན་ནི་གཏམ་དེ་མཱ་ཤི་ཀ་མིན་ཏེ། མིའི་ལུགས་སྲོལ་དང༌། འཇིག་རྟེན་འདིའི་ལྷ་ཚོགས་རྣམས་ལ་རྟེན་ཞིང༌།
COL 2:9 མཱ་ཤི་ཀའི་ནང་ན་དཀོན་མཆོག་གི་ངོ་བོ་མཐའ་དག་གཟུགས་དང་བཅས་པར་བཞུགས་པས་སོ།
COL 2:10 ཁོང་གི་ཐོག་ནས་ཁྱེད་ཚོ་ཚང་བར་མཛད་པར་གྱུར། ཁོང་ནི་དབང་དང༌། ནུས་མཐུ་ཐམས་ཅད་ཀྱི་དབུ་ལྟར་ཡིན།
COL 2:11 ཡང་མཱ་ཤི་ཀའི་ཐོག་ནས་ཁྱེད་ཚོ་ནི་ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་ལྟར་གྱུར། མཱ་ཤི་ཀའི་རྟགས་དེ་མི་ཡི་ལག་པས་རེག་པ་མ་ཡིན་ཏེ་སྡིག་ཉེས་ཀྱི་རང་གཤིས་ཀྱི་དབང་ལས་སྒྲོལ་བར་འགྱུར་བ་དེ་ཡིན།
COL 2:12 ཁྲུས་གསོལ་ལེན་པའི་སྒོ་ནས་ཁོང་དང་མཉམ་དུ་དུར་དུ་བཅུག་པ་ལྟར། ཁོང་འཆི་བ་ནས་སླར་གསོན་དུ་མཛད་པའི་དཀོན་མཆོག་གི་ནུས་མཐུ་ལ་དད་པ་བྱེད་པའི་ངང་ནས་ཁྱེད་ཚོ་སླར་གསོན་པར་མཛད།
COL 2:13 ཡང་ཁྱེད་ཚོར་དཀོན་མཆོག་དང་འབྲེལ་བ་ཡག་པོ་མེད་ཅིང༌། ཁྲིམས་དང་འགལ་བའི་རྐྱེན་གྱིས་སྡིག་ཉེས་ཁྲོད་དུ་ཤི་བ་དང་འདྲ་བའི་ཚེ། ང་ཚོའི་ཁྲིམས་དང་འགལ་བའི་ལས་ངན་ཐམས་ཅད་བསལ་ནས་དཀོན་མཆོག་གིས་མཱ་ཤི་ཀ་དང་མཉམ་དུ་ཁྱེད་ཚོ་སླར་གསོན་པར་མཛད།
COL 2:14 ཆོས་ཁྲིམས་ཀྱི་བུན་ཡིག་ང་ཚོར་སྐྱོན་བརྗོད་པ་དེ་བསལ་ནས་ཁོང་གིས་རྒྱང་ཤིང་ལ་གཟེར་གྱིས་བརྒྱབ་སྟེ་མེད་པར་མཛད།
COL 2:15 ཁོང་གིས་མཐུ་ལྡན་དང་དབང་ཅན་རྣམས་ཀྱི་མཚོན་ཆ་ཕྲོགས་ནས། རྒྱང་ཤིང་ཐོག་ཁོ་ཚོ་ལས་རྒྱལ་ཏེ་ཁོ་ཚོ་མངོན་སུམ་དུ་ངོ་ཚ་རུ་འཇུག
COL 2:16 དེའི་ཕྱིར་ཟ་འཐུང་ངམ། དུས་ཆེན། གནམ་གང༌། ངལ་གསོ་བའི་ཉིན་ལ་སོགས་པའི་ཕྱིར་མི་སུས་ཀྱང་ཁྱེད་ཚོ་ལ་སྐྱོན་བརྗོད་བྱེད་དུ་མ་འཇུག་ཅིག
COL 2:17 དེ་ཚོ་ཐམས་ཅད་འོང་རྒྱུ་ཡིན་པ་རྣམས་ཀྱི་གྲིབ་མ་ཁོ་ན་ཡིན། འོན་ཀྱང་ངོ་མ་དེ་མཱ་ཤི་ཀའི་ཁོངས་སུ་གཏོགས།
COL 2:18 རང་གི་དོན་དུ་དམན་ས་འཛིན་པ་དང༌། དཀོན་མཆོག་གི་ཕོ་ཉ་རྣམས་ལ་བསྙེན་བཀུར་བྱེད་མཁན་སུ་ཞིག་གིས་ཁྱེད་ཚོ་ལ་འཐོབ་རྒྱུ་ཡིན་པའི་བྱ་དགའ་འཕྲོག་ཏུ་མ་འཇུག་ཅིག དེ་ལྟར་གྱི་མིས་རང་གི་མིག་གིས་མཐོང་བའི་ཞལ་གཟིགས་ཀྱི་གཏམ་མང་པོ་བྱེད་ཅིང༌། མིའི་ལུགས་སྲོལ་ལྟར་བསམ་བློ་གཏོང་བའི་རྐྱེན་གྱིས་ང་རྒྱལ་ཅན་དུ་གྱུར་ཅིང༌།
COL 2:19 སྐུ་ལུས་ཀྱི་དབུ་ལྟར་ཡིན་པའི་མཱ་ཤི་ཀ་དང་མ་འགྲོགས། ཁོང་ལ་བརྟེན་ནས་ལུས་ཧྲིལ་པོ་རྩ་རྒྱུས་ཀྱིས་སྦྲེལ་ཏེ་དཀོན་མཆོག་གིས་སྐྱེད་དུ་བཅུག་པ་ལྟར་ཆེ་རུ་སྐྱེ།
COL 2:20 ཁྱེད་ཚོ་མཱ་ཤི་ཀ་དང་མཉམ་དུ་གྲོངས་ནས་འཇིག་རྟེན་གྱི་ལྷ་ཚོགས་རྣམས་ཀྱི་དབང་ལས་སྒྲོལ་བས། ཅིའི་ཕྱིར་འཇིག་རྟེན་འདི་ལ་གཏོགས་པའི་མི་ལྟར་གྱི་སྤྱོད་པ་བྱེད།
COL 2:21 འདི་མ་འཆང༌། འདི་མ་མྱོང༌། འདི་མ་གཏུག་ཅེས་ཟེར་བའི་སྒྲིག་ལམ་ཅིའི་ཕྱིར་སྲུང༌།
COL 2:22 དེ་ཚོ་ཐམས་ཅད་མི་རྣམས་ཀྱིས་བེད་སྤྱོད་བྱས་ནས་འཇིག་པར་འགྱུར་ལ། མིའི་ལུགས་སྲོལ་དང་མིའི་བསྟན་པ་ཁོ་ན་ཡིན།
COL 2:23 དེ་ཚོར་རང་དགའ་བར་བཅོས་པའི་ཆོས་དང༌། དམན་ས་འཛིན་པའི་སེམས། དཀའ་ཐུབ་བཅས་ཡོད་པས་ཤེས་རབ་ཀྱི་འཁྲུལ་སྣང་ཡོད་ཀྱང༌། ལུས་ཀྱི་འདོད་ཆགས་འགོག་པར་མི་ཕན་ནོ། །
COL 3:1 ཁྱེད་ཚོ་མཱ་ཤི་ཀ་དང་མཉམ་དུ་སླར་གསོན་པས། མཱ་ཤི་ཀའི་བཞུགས་གནས་དཀོན་མཆོག་གི་ཕྱག་གཡས་སུ་དེའི་དོན་འཚོལ་ཞིག
COL 3:2 ས་ལ་ཡོད་པའི་དོན་ལ་བསམ་བློ་མི་གཏོང་བར། སྟེང་ལ་ཡོད་པའི་དོན་ལ་མུ་མཐུད་ནས་བསམ་བློ་གཏོང་ཞིག
COL 3:3 རྒྱུ་མཚན་ནི་ཁྱེད་ཚོ་ཤི་ཟིན་པས། ཁྱེད་ཀྱི་ཚེ་མཱ་ཤི་ཀ་དང་མཉམ་དུ་དཀོན་མཆོག་གི་ནང་ན་སྦས་ཡོད།
COL 3:4 ཁྱེད་ཚོའི་ཚེ་ཡིན་པའི་མཱ་ཤི་ཀ་སླར་ཡང་འཇིག་རྟེན་ལ་མངོན་པའི་སྐབས་སུ། ཁྱེད་ཚོའང་ཁོང་དང་མཉམ་དུ་གཟི་བརྗིད་དང་ལྡན་པར་མངོན་པར་འགྱུར།
COL 3:5 དེའི་ཕྱིར་ཁྱེད་ཚོའི་འཇིག་རྟེན་གྱི་རང་གཤིས་ལ་གཏོགས་པ་སྟེ། ལོག་གཡེམ་དང༌། མི་གཙང་བ། འདོད་ཆགས། འདོད་པ་ངན་པ། ལྷ་སྐུ་རྣམས་ལ་རྟེན་པ་ཡིན་ཏེ་སེར་སྣ་ལ་སོགས་པ་དེ་གསོད་ཅིག
COL 3:6 བྱ་བ་དེའི་ཕྱིར་དཀོན་མཆོག་གི་ཆད་པ་ནི་བཀའ་ལ་མི་ཉན་པ་རྣམས་ལ་ཕོག་པར་འགྱུར་ངེས་ཡིན།
COL 3:7 འདོད་པ་དེའི་དབང་འོག་ཏུ་ཡོད་དུས་སྔར་ཁྱེད་ཚོས་དེ་ལྟར་སྤྱོད་པ་བྱས་ཀྱང༌།
COL 3:8 ད་ཁྱེད་ཚོས་ཁོང་ཁྲོ་དང༌། ཁྲོ་བ། ངན་སེམས། དམའ་འབེབས་གཏོང་བ། སྨད་ར་གཏོང་བ་བཅས་ཐམས་ཅད་སྤོང་དགོས།
COL 3:9 ཕན་ཚུན་ལ་རྫུན་གཏམ་མ་ཤོད་ཅིག གང་ཡིན་ཟེར་ན། ཁྱེད་ཚོས་རང་གཤིས་རྙིང་པ་དང་དེའི་སྤྱོད་པ་ངན་པ་ཕུད་དེ།
COL 3:10 རང་གཤིས་གསར་པ་གོས་སུ་གྱོན་ཟིན་ནོ། དེ་ནི་དུས་རྟག་ཏུ་རྟོགས་པའི་ཐོག་ནས་འགོད་པ་གནང་མཁན་གྱི་གཟུགས་བརྙན་ལྟར་གསར་དུ་མཛད།
COL 3:11 གསར་དུ་མཛད་པ་དེའི་ཆ་ནས་གྷི་རིག་གི་རིགས་དང་ཡ་ཧུ་དཱའི་རིགས། ཡ་ཧུ་དཱ་པའི་ཆོས་ཀྱི་རྟགས་ཡོད་པ་དང་མེད་པ། ཕྱི་རྒྱལ་བ། སི་ཁེའུ་ཐེ་པ། བྲན་གཡོག རང་དབང་ཅན་བཅས་ལ་དབྱེ་བ་ཅིའང་མེད་པར། མཱ་ཤི་ཀ་ནི་ཡོད་ཚད་ཡིན་ཞིང༌། ཐམས་ཅད་ནང་ལ་བཞུགས་སོ། །
COL 3:12 དེའི་ཕྱིར་ཁྱེད་ཚོ་དཀོན་མཆོག་གིས་བདམས་པ་སྟེ་དམ་པ་དང་གཅེས་པ་ཡིན་པས། སྙིང་རྗེ་དང༌། བཀའ་དྲིན། སྙེམས་ཆུང༌། སེམས་དུལ་པོ། བཟོད་སེམས་བཅས་གོས་སུ་གྱོན།
COL 3:13 གཅིག་གིས་གཅིག་ལ་བཟོད་པ་སྒོམ་ནས། གཅིག་གིས་གཞན་ལ་སྐྱོན་བརྗོད་ན། གཙོ་བོས་ཁྱེད་ལ་སྡིག་ཉེས་སེལ་བ་ལྟར་ཁྱེད་ཚོས་ཀྱང་ཕན་ཚུན་ལ་གུ་ཡངས་གཏོང་དགོས།
COL 3:14 ཚང་མའི་ཐོག་ཏུ་ཕུན་སུམ་ཚོགས་པའི་འཆིང་བ་ཡིན་ཏེ་བྱམས་སེམས་གོས་སུ་གྱོན།
COL 3:15 ཡང་ཁྱེད་ཚོ་ལུས་གཅིག་གི་ངང་ནས་བསྡུས་ཏེ། མཱ་ཤི་ཀའི་ཞི་བདེ་ལ་བོས་པ་ཡིན་པས། ཞི་བདེ་དེ་ཁྱེད་ཀྱི་སེམས་ལ་དབང་སྒྱུར་དུ་འཇུག་དགོས། ཡང་དཀོན་མཆོག་ལ་བཀའ་དྲིན་ཆེ་ཞུས་ཤིག
COL 3:16 མཱ་ཤི་ཀའི་བཀའ་ཁྱེད་ཚོའི་ནང་དཔག་ཏུ་མེད་པར་བཞུགས་དགོས། ཤེས་རབ་ཐམས་ཅད་ཀྱིས་ཕན་ཚུན་སློབ་སྟོན་དང་ཁ་ཏ་བྱེད། བཀའ་དྲིན་ཆེ་ཞུ་སྟེ་དཀོན་མཆོག་ལ་གསུང་མགུར་དང༌། བསྟོད་དབྱངས། མགུར་གླུ་ལེན།
COL 3:17 ཡང་ལུས་ངག་གཉིས་ཀྱི་སྒོ་ནས་ཅི་བྱེད་ཀྱང༌། ཐམས་ཅད་གཙོ་བོ་ཡེ་ཤུའི་མཚན་གྱི་སྒོ་ནས་བྱེད་དེ། ཡབ་དཀོན་མཆོག་ལ་ཁོང་བརྒྱུད་ནས་བཀའ་དྲིན་ཆེ་ཞུས།
COL 3:18 ཁྱེད་ཆུང་མ་རྣམས། གཙོ་བོ་ལ་གཏོགས་པའི་མི་རྣམས་འོས་པ་ལྟར་ཁྱོ་གའི་ཁ་ལ་ཉོན།
COL 3:19 ཁྱེད་ཁྱོ་ག་རྣམས། ཆུང་མ་ལ་རྩུབ་པ་མི་བྱེད་པར་ཁོང་རྣམས་ལ་བྱམས་པར་གྱིས་ཤིག
COL 3:20 ཁྱོད་ཕྲུ་གུ་རྣམས། དོན་ཐམས་ཅད་ལ་ཕ་མའི་བཀའ་ལ་ཉོན་ཞིག གང་ཡིན་ཞེ་ན། དེ་ལ་གཙོ་བོའི་ཐུགས་མཉེས་པས་སོ།
COL 3:21 ཁྱེད་ཕ་རྣམས། རང་གི་ཕྲུ་གུ་ལ་ཁོང་ཁྲོ་མ་སློང༌། བསླངས་ན་ཁོ་ཚོ་ཡིད་ཐང་ཆད་པར་འགྱུར་སྲིད།
COL 3:22 ཁྱེད་བྲན་གཡོག་རྣམས། ཁྱེད་ཚོའི་བདག་པོས་ལྟ་དུས་དགྱེས་པ་ཁོ་ན་མ་ཡིན་གྱི། བཅོས་མིན་ཏེ་གཙོ་བོ་ལ་བཀུར་སྟི་བྱེད་དེ་འཇིག་རྟེན་འདི་ལ་ཁྱེད་ཚོའི་བདག་པོ་ཡིན་པ་རྣམས་ཀྱི་བཀའ་ཐམས་ཅད་ལ་ཉོན།
COL 3:23 ཁྱེད་ཚོས་གང་བྱེད་ཀྱང༌། མི་རྣམས་ཀྱི་དོན་དུ་མིན་ཏེ་གཙོ་བོ་ལ་གཡོག་བྱེད་པ་ལྟར་སེམས་ཀྱི་གཏིང་ནས་བྱེད་དགོས།
COL 3:24 གང་ཡིན་ཞེ་ན། གཙོ་བོ་ནས་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་སྐལ་བ་བྱ་དགའ་ལྟར་འཐོབ་རྒྱུ་ཡིན་པར་ཤེས། ཁྱེད་ཚོས་གཙོ་བོ་མཱ་ཤི་ཀ་ལ་གཡོག་བྱེད།
COL 3:25 ཕྱོགས་རིས་ཅི་ཡང་མེད་པར་ངན་པ་བྱེད་མཁན་ལ་ངན་ལན་སློག་པར་འགྱུར་བས་སོ། །
COL 4:1 བདག་པོ་རྣམས། ཁྱེད་ཚོ་ལའང་དཀོན་མཆོག་གི་ཞིང་ཁམས་སུ་བདག་པོ་ཞིག་བཞུགས་པར་ཤེས་པས། ཁྱེད་ཀྱི་བྲན་གཡོག་ལ་དྲང་པོ་དང་འདྲ་མཉམ་གྱིས་ཤིག
COL 4:2 བཀའ་དྲིན་ཆེ་ཞུ་བའི་སྒོ་ནས་བློ་གསལ་བར་གནས་པས་རྒྱུན་མི་ཆད་པར་སྨོན་ལམ་འདེབས་དགོས།
COL 4:3 ང་ནི་མཱ་ཤི་ཀའི་གསང་བ་དེའི་དོན་ལ་བཙོན་པ་ཡིན་ཏེ། ང་ཚོས་གསང་བ་དེ་འཆད་པའི་ཕྱིར་དཀོན་མཆོག་གིས་བཀའ་སྒྲོག་པའི་གོ་སྐབས་མཛད་པའི་ཆེད་དུ་ང་ཚོའི་དོན་ལའང་སྨོན་ལམ་འདེབས།
COL 4:4 ངས་གཏམ་ཤོད་འོས་པ་ལྟར། ངས་གསང་བ་དེ་གསལ་པོར་འཆད་པར་སྨོན་ལམ་ཡང་ཐོབ་ཅིག
COL 4:5 གོ་སྐབས་གང་འབྱུང་ན་ཡང་ལས་བཟང་པོ་བྱེད་དེ། མཱ་ཤི་ཀ་ལ་དད་པ་མེད་པ་རྣམས་ཀྱི་མདུན་དུ་ཤེས་རབ་ཀྱིས་སྤྱོད་པ་བྱེད་དགོས།
COL 4:6 མི་རེ་ལ་ལན་ཅི་ལྟར་འདེབས་པར་དགོས་པ་ཤེས་པའི་ཕྱིར་ཁྱེད་ཚོའི་གཏམ་ནི་རྟག་ཏུ་སྙན་ཞིང་ཚྭ་ཡི་བྲོ་བ་ལྟར་ལྡན་དགོས།
COL 4:7 ཏི་ཀི་ཀུ་ཡིས་ཁྱེད་རྣམས་ལ་ངའི་གནས་ཚུལ་ཐམས་ཅད་འཆད་པར་འགྱུར། ཁོང་ནི་གཅེས་པའི་སྤུན་ཟླ་དང༌། ཞབས་ཕྱི་བློ་གཏད་ཆོག་པ་གཙོ་བོའི་ངང་ནས་གཡོག་པོ་གཅིག་པ་ཡིན།
COL 4:8 ཁྱེད་ཚོར་སེམས་གསོ་བྱེད་པ་དང༌། ཁྱེད་ཚོས་ང་ཚོའི་གནས་སྟངས་ཀྱི་སྐོར་ཤེས་པའི་ཕྱིར་ངས་ཁོང་ཁྱེད་ཚོའི་རྩར་བཏང་བ་ཡིན།
COL 4:9 ཁོང་དང་མཉམ་དུ་ཁྱེད་ཚོའི་ཕ་ཡུལ་གཅིག་པ་སྟེ་ང་ཚོའི་གཅེས་པའི་སྤུན་ཟླ་བློ་གཏད་ཆོག་པ་ཨོ་ནེ་སི་མུ་ཡང་བཏང་བ་ཡིན། ཁོང་ཚོས་འདིར་བྱུང་བ་ཐམས་ཅད་ཁྱེད་ཚོར་འཆད་པར་འགྱུར།
COL 4:10 ངའི་བཙོན་གྲོགས་ཨ་རིས་ཐར་ཀུ་དང༌། པར་ན་པཱ་ཡི་སྤུན་མར་ཀུ་ཡིས་ཀྱང་ཁྱེད་ཚོར་འཚམས་འདྲི་ཞུ། (ཁྱེད་ཚོར་སྔར་ནས་ཁོང་གི་སྐོར་བཀའ་སློབ་ཐོབ། ཁྱེད་ཚོའི་རྩར་སླེབས་ན་ཁོང་ལ་སྣེ་ལེན་བྱེད་དགོས་)
COL 4:11 ཡང་ཡུ་སི་ཏཱུ་ཞེས་ཟེར་བའི་ཡེ་ཤུ་ཡིས་ཁྱེད་ཚོ་ལ་འཚམས་འདྲི་ཞུ། ཁོང་ཚོ་གསུམ་ནི་ཡ་ཧུ་དཱ་པའི་དད་ལྡན་རྣམས་ཀྱི་ནང་ནས་དཀོན་མཆོག་གི་རྒྱལ་སྲིད་ཀྱི་དོན་ལ་ངའི་ལས་རོགས་ཁོ་ན་ཡིན་ཏེ། ང་ལ་སེམས་གསོ་བྱས།
COL 4:12 ཁྱེད་ཚོ་ལས་གཅིག་པ་ཡིན་ཏེ་མཱ་ཤི་ཀ་ཡེ་ཤུའི་ཞབས་ཕྱི་ཨེ་པབ་རཱ་ཡིས་ཁྱེད་ཚོ་ལ་འཚམས་འདྲི་ཞུ། ཁོང་གིས་ཁྱེད་ཚོ་དཀོན་མཆོག་གི་ཐུགས་དགོངས་བཞིན་དུ་ཆ་ཚང་བ་དང༌། ཡོངས་སུ་རྫོགས་པར་འགྱུར་བའི་ཕྱིར་རྟག་ཏུ་སྨོན་ལམ་ལ་འབད་བརྩོན་བྱེད།
COL 4:13 ཁོང་གིས་ཁྱེད་ཚོ་དང༌། ལའོ་ཌི་ཀེ་ཡཱ་དང་ཧི་ར་པོ་ལི་གྲོང་ཁྱེར་གྱི་མི་རྣམས་ཀྱི་དོན་ལ་དཀའ་ལས་བརྒྱབ་པར་ངས་བདེན་དཔང་བྱེད།
COL 4:14 གཅེས་པའི་སྨན་པ་ལུ་ཀཱ་དང༌། དེ་མཱ་གཉིས་ཀྱིས་ཁྱེད་ཚོ་ལ་འཚམས་འདྲི་ཞུ།
COL 4:15 ལའོ་ཌི་ཀེ་ཡཱ་ལ་ཡོད་པའི་སྤུན་ཟླ་རྣམས་དང༌། ནིམ་ཕཱ་དང༌། ཁོ་མོའི་ཁང་པར་འཛོམས་པའི་ཆོས་ཚོགས་ལ་འཚམས་འདྲི་ཞུ།
COL 4:16 ཡི་གེ་འདི་ཁྱེད་ཚོས་བཀླགས་ཚར་ནས་ལའོ་ཌི་ཀེ་ཡཱ་པ་རྣམས་ཀྱི་ཆོས་ཚོགས་ལ་ཀློག་ཏུ་ཆུག ཡང་ལའོ་ཌི་ཀེ་ཡཱ་ལ་བཏང་བའི་ཡི་གེ་དེ་ཁྱེད་ཚོས་ཀྱང་ཀློག་ཅིག
COL 4:17 ཨར་ཀིབ་པུ་ལ་འདི་ལྟར་བརྗོད་དང༌། གཙོ་བོའི་ངང་ནས་ཐོབ་པའི་ལས་འགན་དེ་སྒྲུབས་ཤིག
COL 4:18 ང་པའུ་ལུ་ཡིས་རང་གི་ལག་པས་འཚམས་འདྲི་འདི་བྲིས། ང་བཙོན་པ་ཡིན་པ་དྲན་པར་གྱིས་ཤིག ཐུགས་རྗེ་ཁྱེད་ཚོ་ཐམས་ཅད་ལ་འཐོབ་པར་གྱུར་ཅིག །
1TH 1:1 པའུ་ལུ་དང་སིལ་ཝ་ནུ། ཐི་མོ་ཐེ་གསུམ་གྱིས་ཐེ་ས་ལོ་ནི་ཀེ་གྲོང་ཁྱེར་དུ་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཆོས་ཚོགས་ལ་འཕྲིན་ཡིག་འདི་ཕུལ་ལོ། ཐུགས་རྗེ་དང་ཞི་བདེ་ཁྱེད་རྣམས་ལ་ལྡན་པར་གྱུར་ཅིག
1TH 1:2 ང་ཚོས་སྨོན་ལམ་ག་དུས་འདེབས་ཀྱང་ཁྱེད་ཚོ་ཚང་མའི་ཕྱིར་དཀོན་མཆོག་ལ་ཐུགས་རྗེ་ཆེ་རྟག་ཏུ་ཞུ།
1TH 1:3 ང་ཚོའི་ཡབ་དཀོན་མཆོག་གི་དྲུང་དུ་ཁྱེད་ཚོའི་དད་པ་ལས་སྐྱེས་པའི་ལས་ཀ་དང༌། བྱམས་སེམས་ལས་སྐྱེས་པའི་ངལ་རྩོལ་དང༌། རེ་བ་ལས་སྐྱེས་པའི་བཟོད་སྒོམ་བཅས་ང་ཚོའི་གཙོ་བོ་ཡེ་ཤུ་མཱ་ཤི་ཀའི་སྒོ་ནས་རྒྱུན་མི་ཆད་པར་དྲན་ནོ།
1TH 1:4 དཀོན་མཆོག་གི་གཅེས་པའི་སྤུན་ཟླ་རྣམས། ཁོང་གིས་ཁྱེད་ཚོ་བསྐོས་པ་ཡིན་པར་ང་ཚོས་ཤེས།
1TH 1:5 གང་ཡིན་ཞེ་ན། ང་ཚོའི་འཕྲིན་བཟང་ནི་ཁྱེད་ཀྱི་ཁྲོད་དུ་གཏམ་བརྗོད་འབའ་ཞིག་མ་ཡིན་ཏེ། ནུས་མཐུ་དང༌། དམ་པའི་ཐུགས་ཉིད། ཡིད་ཆེས་ངེས་པ་རྙེད་པ་བཅས་ཀྱིས་སླེབས་པས་སོ། ཁྱེད་ལ་ཕན་པའི་ཕྱིར་ང་ཚོའི་སྤྱོད་ལམ་ཇི་ལྟར་ཡིན་ཁྱེད་ཀྱིས་ཤེས།
1TH 1:6 ཁྱེད་ཚོ་ནི་ངེད་རྣམས་དང་གཙོ་བོ་ཡེ་ཤུར་དཔེ་བལྟས་ཏེ། སྡུག་བསྔལ་ཆེན་པོ་མྱོང་ཡང་དམ་པའི་ཐུགས་ཉིད་ལས་བྱུང་བའི་དགའ་སྤྲོའི་ངང་ནས་འཕྲིན་བཟང་དང་ལེན་བྱས་པས།
1TH 1:7 ཁྱེད་ཚོས་མ་ཀེ་དོན་ཡཱ་དང་ཨ་ཀ་ཡཱ་ཡུལ་གཉིས་ཀྱི་དད་པ་བྱེད་མཁན་ཚང་མར་མིག་དཔེ་གནང༌།
1TH 1:8 གཙོ་བོའི་བཀའ་ཁྱེད་རྣམས་ཀྱི་ཁྲོད་ནས་མ་ཀེ་དོན་ཡཱ་དང་ཨ་ཀ་ཡཱ་ཡུལ་ལ་དར་བ་མ་ཟད་ཁྱེད་ཚོས་དཀོན་མཆོག་ལ་དད་པ་བྱེད་པའི་ལོ་རྒྱུས་ཕྱོགས་ཀུན་ཏུ་གྲགས་པས། ང་ཚོས་དེའི་སྐོར་ལ་ཅིའང་ཟེར་མི་དགོས།
1TH 1:9 ཡུལ་མི་ཉིད་ཀྱིས་ང་ཚོའི་འཚམས་འདྲི་བྱས་པའི་སྐོར་གཏམ་སྨྲས་ཏེ། ཁྱེད་ཚོས་ཇི་ལྟར་བདེན་ཞིང་ངོ་མཚར་བའི་མཛད་པ་སྒྲུབ་མཁན་དཀོན་མཆོག་ལ་ཞབས་ཕྱི་བྱེད་པའི་ཕྱིར་ལྷ་སྐུ་སྤངས་ནས་དཀོན་མཆོག་ལ་བསྙེན་བཀུར་ཞུས་པ་དང༌།
1TH 1:10 དཀོན་མཆོག་གི་ཞིང་ཁམས་ནས་དཀོན་མཆོག་གི་སྲས་ཕེབས་རྒྱུར་རེ་སྒུག་བྱེད་ཅིང༌། སྲས་དེ་ནི་དཀོན་མཆོག་གིས་འཆི་བ་ལས་སླར་གསོན་དུ་མཛད་པའི་གཙོ་བོ་ཡེ་ཤུ་དེ་ཡིན། ཁོང་གིས་མི་རྣམས་སྡིག་ཉེས་བྱས་པའི་རྐྱེན་གྱིས་དཀོན་མཆོག་གི་མ་འོངས་པའི་ཐུགས་ཁྲོ་ལས་ང་ཚོ་སྐྱོབ་པར་མཛད་དོ། །
1TH 2:1 སྤུན་ཟླ་རྣམས། ང་ཚོའི་འཚམས་འདྲི་ཕན་མེད་མ་ཡིན་པ་ཁྱེད་ཉིད་ཀྱིས་ཤེས།
1TH 2:2 སྔར་ང་ཚོ་ཕི་ལིབ་པཱི་གྲོང་ཁྱེར་དུ་སྡུག་པོ་དང་སྨད་ར་མྱོང་བ་ཡང་ཁྱེད་ཉིད་ཀྱིས་ཤེས་མོད། འོན་ཀྱང་དེའི་རྗེས་སུ་ངོ་རྒོལ་ཤུགས་ཆེན་བྱུང་ཡང་དཀོན་མཆོག་ནས་བྱུང་བའི་ཡིད་རྟོན་གྱིས་ང་ཚོས་ཁོང་གི་འཕྲིན་བཟང་ཁྱེད་རྣམས་ལ་བསྒྲགས་ཕོད།
1TH 2:3 ང་ཚོའི་སྐུལ་མ་ནི་ནོར་འཁྲུལ་ལམ་མི་གཙང་བ་ལས་འབྱུང་བ་མིན་ལ་གཞན་ལ་མགོ་སྐོར་གཏོང་བ་ཡང་མིན།
1TH 2:4 ང་ཚོར་དཀོན་མཆོག་གི་གདེང་འཇོག་ཐོབ་ནས་ཁོང་གི་དགོངས་པ་ལྟར་འོས་པ་ཡིན་པས་དཀོན་མཆོག་གིས་ང་ཚོར་འཕྲིན་བཟང་སྒྲོག་པའི་ལས་ཀ་བཅོལ་གནང༌། མི་རྣམས་དགྱེས་པའི་ཕྱིར་མ་ཡིན་གྱིས། ང་ཚོའི་སེམས་ལ་ཉམས་ཚོད་མཛད་མཁན་དཀོན་མཆོག་ཐུགས་མཉེས་པ་བྱེད་པའི་ཕྱིར་ང་ཚོས་སྨྲ།
1TH 2:5 ཁྱེད་ཚོས་ཤེས་གསལ་ལྟར་ང་ཚོས་སུ་ལ་ཡང་ངོ་བསྟོད་གཏན་ནས་མ་བྱས། འདོད་རྔམས་སོགས་ཀྱང་མ་བྱས་པ་དཀོན་མཆོག་ང་ཚོའི་དཔང་པོ་ཡིན།
1TH 2:6 ཁྱེད་ཚོ་ཡང་ན་མི་གཞན་རྣམས་ཀྱིས་བསྟོད་པ་མ་བཙལ།
1TH 2:7 གཙོ་བོ་ཡེ་ཤུ་མཱ་ཤི་ཀའི་སྐུ་ཚབ་ལྟར་དེའི་དབང་ཆ་ང་ཚོར་ཡོད་ཀྱང་ང་ཚོས་དབང་ཆ་དེ་མ་སྤྱད་པར། འོ་མ་སྟེར་བའི་ཨ་མས་རང་གི་ཕྲུ་གུར་གཅེས་སྐྱོང་བྱེད་པ་ལྟར་ཁྱེད་ཚོར་བྱམས་པོ་བྱས།
1TH 2:8 ང་ཚོས་ཁྱེད་རྣམས་ལ་དེ་ལྟར་གཅེས་པོ་བྱས་ཏེ་དཀོན་མཆོག་གི་འཕྲིན་བཟང་ཁྱེད་རྣམས་ལ་སྒྲོག་པ་མ་ཟད། ང་ཚོའི་རང་སྲོག་བརླག་ཀྱང་ཁྱེད་ཚོར་རོགས་པ་བྱེད་པར་དགའ།
1TH 2:9 སྤུན་ཟླ་རྣམས། ང་ཚོའི་འབད་བརྩོན་དང་དཀའ་ལས་ཁྱེད་ཚོས་དྲན། ཁྱེད་ཚོར་ཁུར་པོ་མི་བཟོ་བའི་ཆེད་དུ་ང་ཚོས་ཉིན་མཚན་མེད་པར་ལས་ཀ་བྱས། དེ་ལྟར་ང་ཚོས་ཁྱེད་རྣམས་ལ་དཀོན་མཆོག་གི་འཕྲིན་བཟང་བསྒྲགས།
1TH 2:10 ཁྱེད་ཚོ་དད་ལྡན་རྣམས་ཀྱི་ཁྲོད་དུ་ང་ཚོའི་སྤྱོད་ལམ་ལྷད་མེད་པ་དང་དྲང་པོ་སྐྱོན་མེད་པ་ཡིན་པར་ཁྱེད་དང་དཀོན་མཆོག་གཉིས་ཀ་དཔང་པོ་མཛད་མཁན་ཡིན།
1TH 2:11 ཁྱེད་ཀྱིས་ཤེས་པ་ལྟར་ཕ་ཡིས་རང་གི་ཕྲུ་གུར་གང་བྱེད་བཞིན་ཁྱེད་ཚོ་རེ་རེར་ཁོང་གི་རྒྱལ་སྲིད་དང་གཟི་བརྗིད་ལ་འབོད་པ་གནང་མཁན་དཀོན་མཆོག་ཐུགས་མཉེས་པའི་མི་ཚེ་སྐྱེལ་བར་ང་ཚོས་སྐུལ་མ་དང་སེམས་གསོ་བཏང༌།
1TH 2:13 ང་ཚོ་བརྒྱུད་ནས་ཐོས་པའི་དཀོན་མཆོག་གི་བཀའ་དེ་ཁྱེད་ཚོས་དང་ལེན་བྱེད་སྐབས། མི་ཡིས་བཤད་པའི་གཏམ་བཞིན་དུ་མ་ཡིན་གྱིས། དཀོན་མཆོག་རང་གི་བཀའ་ལྟར་དང་ལེན་བྱས། དེས་ཁྱེད་ཚོ་དད་ལྡན་རྣམས་ཀྱི་ནང་དུ་འཕྲིན་ལས་སྒྲུབ་པས་ང་ཚོས་དཀོན་མཆོག་ལ་རྒྱུན་ཆད་མེད་པར་བཀའ་དྲིན་ཆེ་ཞུ།
1TH 2:14 སྤུན་ཟླ་རྣམས། ཡ་ཧུ་དཱ་ཡུལ་ལ་དཀོན་མཆོག་གི་ཆོས་ཚོགས་སུ་ཡོད་པའི་མཱ་ཤི་ཀ་ཡེ་ཤུ་ལ་དད་ལྡན་རྣམས་ནི་ཁྱེད་ཚོའི་མིག་དཔེ་ཏུ་གྱུར། ཡ་ཧུ་དཱ་པ་རྣམས་ཀྱིས་ཇི་ལྟར་དེར་ཡོད་པའི་ཆོས་ཚོགས་སུ་སྡུག་པོ་བཏང་བ་བཞིན། ཁྱེད་ཚོའི་ཕ་ཡུལ་གཅིག་པས་ཀྱང་ཁྱེད་ཚོར་སྡུག་པོ་བཏང༌།
1TH 2:15 ཡ་ཧུ་དཱ་པས་ལུང་སྟོན་པ་རྣམས་དང་གཙོ་བོ་ཡེ་ཤུ་གཉིས་བསད་ནས་ང་ཚོའང་བསྐྲད། དཀོན་མཆོག་ལ་མཉེས་པར་མི་བྱེད་དེ་མི་ཐམས་ཅད་ལ་ངོ་རྒོལ་བྱེད། ང་ཚོས་ཡ་ཧུ་དཱ་པ་མིན་པ་རྣམས་ལ་ཐར་ལམ་གསལ་བཤད་བྱེད་པར་མི་དེ་ཚོས་བཀག་འགོག་དང་སྡིག་ཉེས་མུ་མཐུད་ནས་གསོག འོན་ཀྱང་དེ་ཚོའི་ཐོག་ཏུ་དཀོན་མཆོག་གི་ཐུགས་ཁྲོ་གཞི་ནས་བབས་སོ། །
1TH 2:17 སྤུན་ཟླ་རྣམས། ང་ཚོ་དུས་ཐུང་ངུ་ལུས་ཀྱི་ཐོག་ནས་ཁྱེད་དང་བྲལ་ཡང༌། སེམས་ཀྱི་ནང་དུ་མ་བྲལ་ཏེ་ཁྱེད་རྣམས་ཤིན་ཏུ་དྲན་པས་ཁྱེད་ཀྱི་གདོང་མཐོང་འདོད་ཤིན་ཏུ་ཆེ།
1TH 2:18 ང་ཚོའི་ནང་ནས་ལྷག་པར་དུ་ང་རང་པའུ་ལུ་ཁྱེད་ཀྱི་རྩར་ཐེངས་འགའ་ཡོང་འདོད་ཀྱང༌། བདུད་སཱ་ཏན་གྱིས་ང་ཚོ་བཀག
1TH 2:19 གཙོ་བོ་ཡེ་ཤུ་འབྱོན་སྐབས་སུ་ཁོང་གི་དྲུང་དུ་ང་ཚོའི་རེ་བའམ། དགའ་སྤྲོ། གུས་བཀུར་གྱི་ཅོད་པན་སུ་ཡིན། ཁྱེད་ཚོ་མ་ཡིན་ནམ།
1TH 2:20 ཁྱེད་ཚོ་ནི་ང་ཚོའི་གཟི་བརྗིད་དང་ང་ཚོའི་དགའ་སྤྲོ་ཡིན་ནོ། །
1TH 3:1 དེའི་ཕྱིར་འགྲོ་འདོད་བཟོད་ཐབས་མེད་པ་བྱུང་སྐབས་ང་ཚོ་ཨ་ཐེ་ནེ་གྲོང་ཁྱེར་དུ་གཅིག་པུར་ལུས་པར་བསམས་ཏེ།
1TH 3:2 ཁྱེད་ཚོའི་དད་པ་བརྟན་པོ་དང་བློ་སྟོབས་སྤེལ་བའི་ཆེད་དུ་གཙོ་བོ་ཡེ་ཤུའི་འཕྲིན་བཟང་སྒྲོག་པའི་ཕྱིར་དཀོན་མཆོག་གི་ལས་གྲོགས་ཡིན་པ་དང་ང་ཚོའི་སྤུན་ཐི་མོ་ཐེ་ང་ཚོས་ཁྱེད་ཀྱི་རྩར་བཏང༌།
1TH 3:3 དེ་ནི་སྡུག་བསྔལ་དེས་མི་སུ་ཞིག་དཀྲུག་པར་མི་བྱེད་པའི་ཕྱིར་ཡིན། དོན་དེ་རྣམས་ནི་ང་ཚོ་མྱོང་རྒྱུ་ཡིན་པར་ཁྱེད་ཀྱིས་ཤེས།
1TH 3:4 དངོས་གནས་བྱས་ན་ང་ཚོ་ཁྱེད་དང་མཉམ་དུ་ཡོད་སྐབས་སྡུག་བསྔལ་མ་བྱུང་བའི་སྔོན་དུ་ང་ཚོས་ཡང་ཡང་མནར་གཅོད་མྱོང་རྒྱུ་ཡིན་ཞེས་བཤད་པ་དང་ཁྱེད་ཚོས་རྟོགས་པ་བཞིན་དུ་དེ་ལྟར་བྱུང་ངོ༌།
1TH 3:5 དེར་བརྟེན་ང་བཟོད་ཐབས་མེད་པའི་སྐབས་ཁྱེད་ཚོའི་དད་པའི་སྐོར་ཤེས་པའི་ཕྱིར་ཐི་མོ་ཐེ་བཏང༌། གང་ལགས་ཟེར་ན། བསླུ་བྲིད་བྱེད་མཁན་གྱིས་ཁྱེད་ཚོར་མགོ་སྐོར་བཏང་སྟེ་ང་ཚོའི་དཀའ་ལས་དོན་མེད་དུ་འགྲོ་བའི་སེམས་ཁྲལ་ཡོད་པས་སོ། །
1TH 3:6 ད་ལྟ་ཐི་མོ་ཐེ་ཁྱེད་ཀྱི་ས་ནས་སླེབས་ཏེ་ཁྱེད་ཀྱི་དད་པ་དང་བྱམས་སེམས་ཀྱི་གཏམ་བཟང་ང་ཚོར་བཤད་པ་མ་ཟད། ཁོང་གིས་ང་ཚོས་ཇི་ལྟར་ཁྱེད་རྣམས་མཇལ་འདོད་པ་བཞིན། དེ་ལྟར་ཁྱེད་རྣམས་ཀྱིས་ཀྱང་རྟག་ཏུ་ང་ཚོ་དྲན་པ་དང་ང་ཚོ་ཐུག་འདོད་ཡོད་ཅེས་གསུངས།
1TH 3:7 སྤུན་ཟླ་རྣམས། དེའི་ཕྱིར་ང་ཚོ་སྡུག་བསྔལ་དང་མནར་གཅོད་གྲངས་ལས་འདས་པ་མྱོང་ཡང་ཁྱེད་ཀྱི་དད་པའི་རྐྱེན་གྱིས་ང་ཚོའི་སེམས་ཁྱེད་ཚོ་ལ་བལྟས་ནས་གསོ་བར་གྱུར།
1TH 3:8 ཁྱེད་ཚོས་གཙོ་བོ་ཡེ་ཤུ་ལ་དད་པ་བརྟན་པོ་བྱས་ན་ང་ཚོའི་སེམས་བདེ་བར་འགྱུར།
1TH 3:9 ཁྱེད་ཀྱི་དད་པའི་རྐྱེན་གྱིས་དཀོན་མཆོག་གི་མདུན་དུ་ང་ཚོར་དགའ་སྤྲོ་ཆེན་པོ་སྦྱིན། དེའི་ཕྱིར་དཀོན་མཆོག་ལ་ལྡེང་ངེས་ཀྱི་བཀའ་དྲིན་ཆེ་ཞེས་ང་ཚོས་ཅི་ལྟར་ཞུ།
1TH 3:10 ང་ཚོས་ཉིན་མཚན་མེད་པར་ཁྱེད་ཚོ་ཡང་བསྐྱར་མཇལ་བ་དང་ཁྱེད་ཚོའི་དད་པ་ལ་བལྟས་ནས་གང་དགོས་གསོབ་པ་དེ་སྙིང་ཐག་པ་ནས་གསོལ་འདེབས་བྱེད།
1TH 3:11 ད་ང་ཚོའི་ཡབ་དཀོན་མཆོག་ཉིད་དང་ང་ཚོའི་གཙོ་བོ་ཡེ་ཤུས་ཁྱེད་རྩར་འགྲོ་བའི་ལམ་གྲ་སྒྲིག་གནང་བར་ཤོག
1TH 3:12 ང་ཚོས་ཇི་ལྟར་ཁྱེད་རྣམས་ལ་བྱམས་པ་བཞིན། དེ་ལྟར་ཁྱེད་རྣམས་ཕན་ཚུན་དང་མི་ཐམས་ཅད་ལ་བཅངས་པའི་བྱམས་སེམས་དེ་གཙོ་བོ་ཡེ་ཤུས་སྤེལ་ནས་ཕུན་སུམ་ཚོགས་པར་མཛོད་ཅིག
1TH 3:13 མ་ཟད་གཙོ་བོ་ཡེ་ཤུ་དང་ཁོང་གི་སྐྱེ་བོ་དམ་པ་ཚང་མ་འབྱོན་སྐབས་སུ་ང་ཚོའི་ཡབ་དཀོན་མཆོག་གི་མདུན་དུ་ཁྱེད་ཚོ་དམ་པ་དང་སྐྱོན་མེད་པ་ཡིན་པའི་ཕྱིར་ཁོང་གིས་ཁྱེད་ཀྱི་སེམས་བརྟན་པོར་མཛད་པར་ཤོག །
1TH 4:1 སྤུན་ཟླ་རྣམས། གཞན་ཡང་དཀོན་མཆོག་ཐུགས་དགྱེས་པའི་སྤྱོད་ལམ་ང་ཚོས་ཁྱེད་ཚོར་བསྟན་ནས་དོན་དམ་དུ་ཁྱེད་ཚོས་དེ་ལྟར་བྱེད་བཞིན་ཡོད། གཙོ་བོ་ཡེ་ཤུའི་སྒོ་ནས་ང་ཚོས་བཅོས་མིན་གྱིས་སེམས་གཏིང་ནས་དེ་བས་ཀྱང་བྱེད་དགོས་པར་རེ་འབོད་བྱེད།
1TH 4:2 གཙོ་བོ་ཡེ་ཤུའི་དབང་ཆར་བསྟན་ནས་ང་ཚོས་ཁྱེད་རྣམས་ལ་སྟེར་བའི་བསླབ་བྱ་དེ་ཁྱེད་ཀྱིས་ཤེས་ཏེ།
1TH 4:3 དཀོན་མཆོག་གི་དགོངས་པ་འདི་ལྟར་ཡིན། ཁྱེད་རྣམས་དམ་པར་འགྱུར་དགོས་པ་དང༌། ལོག་གཡེམ་འཛེམ་ནས་དཀོན་མཆོག་ངོ་མི་ཤེས་པའི་ཆོས་མེད་པ་རྣམས་དང་འདྲ་བར་འདོད་ཆགས་ཆེན་པོ་མ་ཡིན་གྱིས། དམ་པ་དང་འཚམས་པར་རེ་རེས་རང་ཚོད་ཟིན་དགོས།
1TH 4:6 དོན་དེར་མི་སུ་ཞིག་གིས་རང་གི་སྤུན་ལ་སྡུག་པོ་གཏོང་མི་རུང༌། མགོ་སྐོར་ཡང་མི་གཏོང༌། གང་ལགས་ཟེར་ན། སྔར་ང་ཚོས་ཁྱེད་ཚོར་སྨྲས་པ་དང་ཐ་ཚིག་ནན་པོ་བྱས་པ་ལྟར་གཙོ་བོ་ཡིས་དེ་ལྟ་བུའི་སྡིག་ཉེས་བྱེད་མཁན་ལ་ཆད་པ་གནང་རྒྱུ་ཡིན།
1TH 4:7 དཀོན་མཆོག་གིས་ང་ཚོ་མི་གཙང་བར་འགྱུར་དུ་མ་བོས་ཀྱིས། དམ་པར་འགྱུར་དུ་བོས་པར་མཛད།
1TH 4:8 དེའི་ཕྱིར་བསླབ་བྱ་དེ་མི་ལེན་མཁན་ནི་མིའི་དབང་ཆ་དང་ལེན་མི་བྱེད་པ་མ་ཡིན་གྱིས། ཁྱེད་ཚོར་དམ་པའི་ཐུགས་ཉིད་གནང་མཁན་དཀོན་མཆོག་དང་ལེན་མི་བྱེད་དོ།
1TH 4:9 སྤུན་གྱིས་ཕན་ཚུན་བྱམས་པ་བྱེད་པའི་སྐོར་མི་སུ་ཞིག་གིས་ཁྱེད་རྣམས་ལ་འབྲི་མི་དགོས། གང་ཡིན་ཞེ་ན། ཁྱེད་རྣམས་གཅིག་གིས་གཅིག་ལ་བྱམས་པ་བྱེད་པར་དཀོན་མཆོག་གིས་བསླབས་གནང་བ་ཡིན་ཏེ།
1TH 4:10 དོན་དམ་དུ་མ་ཀེ་དོན་ཡཱ་ཡུལ་གང་སར་སྡོད་པའི་སྤུན་ལ་ཁྱེད་ཚོས་བྱམས་པ་བྱེད་བཞིན་ཡོད་མོད། འོན་ཀྱང་ང་ཚོས་ཁྱེད་སྤུན་ཟླ་རྣམས་ལ་དེ་བས་ཀྱང་དེ་ལྟར་བྱེད་པར་སྐུལ།
1TH 4:11 ང་ཚོས་སྔར་བཀོད་པ་བཏང་བ་ལྟར། གཞན་གྱི་དོན་ལ་ཐེ་ཇུས་མི་བྱེད་པར་ཞི་འཇམ་གྱི་ངང་ནས་མི་ཚེ་སྐྱོལ་བ་དང༌། རང་གི་ལག་པས་ལས་ཀ་བྱེད་པར་འབད་རྩོལ་ཤིན་ཏུ་བྱོས།
1TH 4:12 དེ་ལྟར་བྱས་ན་དད་མེད་པ་རྣམས་ཁྱེད་ཚོར་གུས་བཀུར་བྱེད་རྒྱུ་ཡིན་ལ་ཁྱེད་ཚོས་མི་གཞན་ལ་རེ་ལྟོས་བྱེད་མི་དགོས།
1TH 4:13 སྤུན་ཟླ་རྣམས། ཁྱེད་ཚོས་རེ་བ་མེད་པའི་མི་གཞན་ལྟར་མྱ་ངན་མི་བྱེད་པའི་ཕྱིར་ཁྱེད་ཚོས་གྲོངས་པ་རྣམས་ཀྱི་སྐོར་ལ་མི་ཤེས་པར་ང་ཚོ་མི་འདོད།
1TH 4:14 གཙོ་བོ་ཡེ་ཤུ་གྲོངས་ནས་སྐུ་གསོན་པོར་བཞེངས་སུ་གྱུར་བར་ང་ཚོས་ཡིད་ཆེས་བྱེད་པ་བཞིན་དུ། དེ་ལྟར་དཀོན་མཆོག་གིས་གཙོ་བོ་ཡེ་ཤུ་ལ་དད་པའི་སྒོ་ནས་གྲོངས་པ་རྣམས་ནི་ཁོང་དང་མཉམ་དུ་འཁྲིད་པ་གནང་རྒྱུ་ཡིན་པར་ང་ཚོས་ཡིད་ཆེས་བྱེད་དོ།
1TH 4:15 ང་ཚོས་ཁྱེད་རྣམས་ལ་གཙོ་བོ་ཡེ་ཤུའི་བཀའ་ལས་འདི་ལྟར་སྒྲོག་སྟེ། གཙོ་བོ་འབྱོན་པའི་དུས་གསོན་པོར་ལུས་པའི་ངེད་རྣམས་ནི་གྲོངས་ཟིན་པ་རྣམས་ལས་ཅི་ནས་ཀྱང་སྔོན་དུ་དཀོན་མཆོག་གི་དྲུང་དུ་མི་འགྲོ
1TH 4:16 གསུང་སྐད་ཆེན་པོ་དང་ཕོ་ཉ་མཆོག་གི་འབོད་སྒྲ་དཀོན་མཆོག་གི་དུང་ཆེན་གྱི་སྐད་བཅས་ཀྱིས་གཙོ་བོ་ཉིད་ཞིང་ཁམས་ནས་མར་འབབ་པ་དང༌། གཙོ་བོ་ཡེ་ཤུ་ལ་དད་མཁན་འདས་ཟིན་པ་རྣམས་དང་པོར་ལང་བར་འགྱུར།
1TH 4:17 དེ་ནས་གཙོ་བོ་ནམ་མཁར་མཇལ་བའི་ཕྱིར་ང་ཚོ་གསོན་ཞིང་ལུས་པ་རྣམས་དེ་ཚོ་དང་མཉམ་དུ་སྤྲིན་པའི་ནང་མྱུར་དུ་འཁྱེར་བར་འགྱུར། དེ་ལྟར་ང་ཚོ་གཙོ་བོ་དང་མཉམ་དུ་གཏན་དུ་གནས་པའོ།
1TH 4:18 དེའི་ཕྱིར་གཏམ་དེ་ཡིས་ཕན་ཚུན་སེམས་གསོ་བར་གྱིས་ཤིག །
1TH 5:1 སྤུན་ཟླ་རྣམས། དུས་དང་ནམ་དུས་དེའི་སྐོར་ལ་ཁྱེད་ལ་འབྲི་མི་དགོས།
1TH 5:2 གང་ཡིན་ཞེ་ན། གཙོ་བོ་ཡང་བསྐྱར་འབྱོན་པའི་ཉིན་མོ་ནི་དུས་ངེས་མེད་ཀྱི་མཚན་མོའི་རྐུན་མ་བཞིན་གློ་བུར་དུ་ཡོང་རྒྱུ་ཡིན་པར་ཁྱེད་ཉིད་ཀྱིས་ལེགས་པར་ཤེས།
1TH 5:3 མི་ཚོས་ཞི་བ་དང་བདེ་འཇགས་ཞེས་ཟེར་བའི་སྐབས་སུ་སྦྲུམ་མར་སྐྱེ་ཟུག་ལང་བ་ལྟར་གཏོར་བཤིག་གི་ལས་དེ་ཚོར་གློ་བུར་དུ་བབ་རྒྱུ་ཡིན། དེ་ཚོ་བྲོས་བྱོལ་དུ་ཐར་མི་ཐུབ།
1TH 5:4 སྤུན་ཟླ་རྣམས། ཁྱེད་ཚོ་མུན་ནག་གི་ཁྲོད་དུ་མི་སྡོད་པས་གཙོ་བོའི་ཉིན་མོ་ནི་དུས་ངེས་མེད་ཀྱི་རྐུན་མ་ལྟར་ཡོང་རྒྱུར་ཁྱེད་ཚོ་ཧ་ལས་པར་མི་འགྱུར།
1TH 5:5 གང་ཡིན་ཟེར་ན། ཁྱེད་ཚོ་ཚང་མ་ནི་འོད་དང་ཉིན་མོའི་སྲས་ཡིན་པས་སོ། ང་ཚོ་མཚན་མོའམ་མུན་ནག་ཏུ་སྡོད་མཁན་མ་ཡིན།
1TH 5:6 དེར་བརྟེན་ང་ཚོ་གཞན་ལྟར་གཉིད་མི་རུང༌། བློ་གསལ་བར་གནས་ཏེ་ང་ཚོས་རང་ཚོད་ཟིན་དགོས།
1TH 5:7 གཉིད་ཁུག་མཁན་རྣམས་ནི་མཚན་མོར་གཉིད་ཁུག་ཅིང༌། ར་བཟི་མཁན་རྣམས་ཀྱང་མཚན་མོར་ར་བཟི།
1TH 5:8 ང་ཚོ་ཉིན་མོར་སྡོད་མཁན་ཡིན་པས་རང་ཚོད་ཟིན་ཏེ་དད་པ་དང་བྱམས་སེམས་ཀྱི་བྲང་ཁྲབ་གྱོན་ཅིང༌། ཐར་པའི་རེ་བའི་ལྕགས་ཞྭ་གྱོན་དགོས།
1TH 5:9 གང་ལགས་ཟེར་ན། དཀོན་མཆོག་གིས་ང་ཚོ་ཁོང་གི་ཐུགས་ཁྲོ་མྱོང་བར་བསྐོས་པ་མ་གནང་བར། ང་ཚོ་གཙོ་བོ་ཡེ་ཤུ་བརྒྱུད་ནས་ཐར་པ་འཐོབ་པའི་ཕྱིར་བསྐོས་སོ།
1TH 5:10 ང་ཚོ་གསོན་རུང་ཤི་རུང་ཁོང་དང་མཉམ་དུ་གནས་པའི་ཕྱིར་ཁོང་ང་ཚོའི་ཆེད་དུ་གྲོངས།
1TH 5:11 དེའི་ཕྱིར་ཁྱེད་ཚོས་ད་ལྟ་བྱེད་པ་བཞིན་དུ་ཕན་ཚུན་བློ་སྒོ་ཕྱེས་ཤིང་སེམས་གསོ་བར་བྱོས་ཤིག
1TH 5:12 སྤུན་ཟླ་རྣམས། ཁྱེད་ཚོའི་ཁྲོད་དུ་དཀའ་ལས་རྒྱག་མཁན་དང་ཁ་ཏ་བྱས་ཏེ་གཙོ་བོའི་དབང་ཆ་དང་ལྡན་པའི་དབུ་ཁྲིད་ཡིན་པ་རྣམས་ལ་གུས་བཀུར་བྱེད་པར་ང་ཚོས་སྐུལ།
1TH 5:13 དེ་ཚོའི་འཕྲིན་ལས་ཀྱི་རྐྱེན་གྱིས་བྱམས་སེམས་ཀྱི་ངང་ནས་དེ་ཚོར་གུས་ཞབས་དང་བཀུར་སྟི་བྱོས། ཁྱེད་ཚོ་མཉམ་དུ་ཞི་བདེར་གནས་ཤིག
1TH 5:14 སྤུན་ཟླ་རྣམས་ང་ཚོས་ཁྱེད་ལ་འདི་ལྟར་སྐུལ། ལེ་ལོ་ཅན་ལ་བཀའ་བཀྱོན་གནང་དང༌། བློ་ཁོག་ཆུང་བ་རྣམས་ལ་སེམས་གསོ་གཏོང་ཞིང༌། སྐྱོ་པོ་རྣམས་ལ་རོགས་པ་གནང་ལ་མི་ཚང་མར་བཟོད་པ་སྒོམ་ཞིག
1TH 5:15 སུས་ཀྱང་ངན་ལན་མ་བྱོས། ཁྱེད་ཚོས་རྟག་ཏུ་དད་ལྡན་གཞན་རྣམས་དང་མི་ཚང་མར་བཟང་པོ་བྱེད་པར་བརྩོན་ཅིག
1TH 5:16 རྟག་ཏུ་དགའ་བར་གྱུར་ཅིག
1TH 5:17 རྒྱུན་ཆད་མེད་པར་སྨོན་ལམ་ཐོབ་ཅིང༌།
1TH 5:18 གནས་ཚུལ་གང་ལའང་བཀའ་དྲིན་ཆེ་ཞུས། དེ་ནི་ཁྱེད་ཕྱིར་མཱ་ཤི་ཀ་ཡེ་ཤུའི་ངང་ནས་དཀོན་མཆོག་གི་དགོངས་པ་ཡིན་ནོ།
1TH 5:19 དམ་པའི་ཐུགས་ཉིད་ཀྱི་འཕྲིན་ལས་ལ་མ་རྒོལ་ཏེ་ལུང་བསྟན་ལ་མཐོང་ཆུང་མ་བྱས་པར་དེ་ཚོ་ཚང་མར་ལྟ་ཚོད་ཞིབ་ཕྲ་བྱས་ནས་གང་ལེགས་པ་དེ་ཟུངས། ངན་སྤྱོད་ཀུན་ལ་འཛེམས་ཤིག
1TH 5:23 ད་ཞི་བདེ་གནང་མཁན་དཀོན་མཆོག་ཉིད་ཀྱིས་ཁྱེད་རྣམས་ཡོངས་སུ་དམ་པར་སྒྱུར་བར་ཤོག ང་ཚོའི་གཙོ་བོ་ཡེ་ཤུ་མཱ་ཤི་ཀ་མ་འབྱོན་པའི་བར་དུ་ཁྱེད་ཚོ་ལུས་སེམས་དང་སེམས་ཉིད་སྐྱོན་མེད་དུ་སྲུང་བར་ཤོག་ཅིག
1TH 5:24 ཁྱེད་ཚོ་འབོད་པ་གནང་མཁན་དཀོན་མཆོག་བློ་གཏད་ཆོག་པ་ཡིན་པས་དེ་ལྟར་སྒྲུབ་རྒྱུ་ཡིན་ནོ།
1TH 5:25 སྤུན་ཟླ་རྣམས། ང་ཚོའི་ཆེད་དུ་གསོལ་སྨོན་ཞུས།
1TH 5:26 སྤུན་ཟླ་ཐམས་ཅད་ལ་བྱམས་སེམས་ཀྱི་ཐོག་ནས་འོ་ཡིས་འཚམས་འདྲི་ཞུས།
1TH 5:27 གཙོ་བོ་ཡེ་ཤུའི་དབང་ཆ་ཡིས་ངས་ཡིག་གེ་འདི་སྤུན་ཟླ་ཐམས་ཅད་ལ་ཀློག་ཏུ་འཇུག་པར་བཀོད་པ་གཏོང༌།
1TH 5:28 ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་རྣམས་ལ་ལྡན་པར་གྱུར་ཅིག །
2TH 1:1 པའུ་ལུ་དང་སིལ་ཝ་ནུ། ཐི་མོ་ཐེ་གསུམ་གྱིས་ཐེ་ས་ལོ་ནི་ཀེ་གྲོང་ཁྱེར་དུ་ངེད་ཀྱི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཆོས་ཚོགས་ལ་འཕྲིན་ཡིག་འདི་ཕུལ་ལོ།
2TH 1:2 ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་རྣམས་ལ་འཐོབ་པར་གྱུར་ཅིག
2TH 1:3 སྤུན་ཟླ་རྣམས། ཁྱེད་ཀྱི་དོན་ལ་ང་ཚོས་རྟག་ཏུ་དཀོན་མཆོག་ལ་བཀའ་དྲིན་ཆེ་ཞུ་དགོས། དེ་ནི་ང་ཚོས་བྱེད་འོས་པ་ཡིན། གང་ཡིན་ཟེར་ན། ཁྱེད་ཀྱི་དད་སེམས་ལྷག་པར་ཆེ་རུ་འཕེལ་ཞིང༌། ཕན་ཚུན་ལ་བྱམས་པའི་སེམས་དེའང་ཇེ་ཆེར་འགྲོ་བཞིན་ཡོད།
2TH 1:4 དེའི་ཕྱིར་སྡུག་བསྔལ་དང་མནར་གཅོད་ཐམས་ཅད་མྱོང་དུས་བཟོད་པ་དང་དད་པ་ལ་བརྟན་པོར་གནས་པས། དཀོན་མཆོག་གི་ཆོས་ཚོགས་རྣམས་ཀྱི་ཁྲོད་དུ་ང་ཚོས་ཁྱེད་ཚོར་བསྟོད།
2TH 1:5 དེ་ནི་དཀོན་མཆོག་གི་དྲང་བདེན་ཉིད་དང་ལྡན་པའི་ཁྲིམས་གཅོད་ཀྱི་དཔང་རྟགས་ཡིན་པས། ཁྱེད་ཚོ་དཀོན་མཆོག་གི་རྒྱལ་སྲིད་དུ་འཇུག་པར་འོས་པ་ཡིན་པར་རྩི། དེའི་དོན་ལ་ཁྱེད་ཚོ་སྡུག་བསྔལ་མྱོང་བཞིན་ཡོད།
2TH 1:6 དཀོན་མཆོག་དྲང་བདེན་ཡིན་པས། ཁོང་གིས་ཁྱེད་ལ་མནར་གཅོད་བྱེད་པ་རྣམས་ཀྱི་ལན་སྡུག་བསྔལ་ཡིས་འཇལ་ཞིང༌།
2TH 1:7 ཁྱེད་ཚོ་སྡུག་བསྔལ་མྱོང་བ་རྣམས་དང༌། ངེད་རྣམས་ལའང་བདེ་བ་གནང༌། དེ་ནི་གཙོ་བོ་ཡེ་ཤུ་དཀོན་མཆོག་གི་ཞིང་ཁམས་ནས་རང་གི་ནུས་སྟོབས་དང་ལྡན་པའི་ཕོ་ཉའི་འཁོར་དང་བཅས་པར་མེ་ལྕེའི་འབར་བའི་ནང་ནས་མངོན་པར་འགྱུར་བའི་སྐབས་སུ་འབྱུང་བར་འགྱུར།
2TH 1:8 དེ་དུས་གཙོ་བོས་དཀོན་མཆོག་ངོ་མི་ཤེས་པ་རྣམས་དང༌། ངེད་ཀྱི་གཙོ་བོ་ཡེ་ཤུའི་འཕྲིན་བཟང་ལ་མི་ཉན་པ་རྣམས་ལ་གནོད་ལན་འཇལ།
2TH 1:9 གཙོ་བོ་དང་ཁོང་གི་གཟི་བརྗིད་ལྡན་པའི་མཐུ་དང་ཁ་བྲལ་ཏེ། འཇིག་པ་མཐའ་མེད་པའི་ཉེས་ཆད་ཁོ་ཚོར་འབབ།
2TH 1:10 དེ་ནི་གཙོ་བོ་འབྱོན་པའི་ཉིན་མོར་འབྱུང་ངོ༌། ཉིན་དེར་ཁོང་གི་སྐྱེ་བོ་དམ་པ་རྣམས་ནས་གཙོ་བོར་གཟི་བརྗིད་འཐོབ་པ་དང༌། དད་པ་བྱེད་མཁན་ཐམས་ཅད་ཀྱི་ཁྲོད་དུ་ཁོང་ངོ་མཚར་བར་འགྱུར། མི་དེ་རྣམས་ནང་ཁྱེད་ཚོ་ཚུད་ཡོད། གང་ལགས་ཤེ་ན། ཁྱེད་ཚོས་ང་ཚོས་སྨྲས་པའི་དཔང་པོར་ཡིད་ཆེས་པས་སོ།
2TH 1:11 དེའི་ཕྱིར་ཁྱེད་ཚོའི་དོན་ལ་ང་ཚོས་རྟག་པར་སྨོན་ལམ་འདེབས་ཏེ། ངེད་ཀྱི་དཀོན་མཆོག་གིས་ཁྱེད་ཚོ་འབོད་འོས་པར་བརྩི་སྟེ། ཁོང་གི་ནུས་མཐུའི་སྒོ་ནས་ཁྱེད་ཚོས་བཟང་པོ་བྱེད་པའི་འདོད་པ་ཐམས་ཅད་དང༌། དད་པ་ནས་སྐྱེས་པའི་ལས་སྒྲུབ་པར་མཛོད་ཅེས་ཞུས།
2TH 1:12 དེ་ནི་ང་ཚོའི་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་བཞིན་དུ། ཁྱེད་ཚོ་བརྒྱུད་ནས་ང་ཚོའི་གཙོ་བོ་ཡེ་ཤུའི་མཚན་གཟི་བརྗིད་དང་ལྡན་པར་འགྱུར་ཞིང༌། ཁོང་བརྒྱུད་ནས་ཁྱེད་ཚོའང་གཟི་བརྗིད་དང་ལྡན་པར་འགྱུར་བའི་ཕྱིར་རོ། །
2TH 2:1 ད་སྤུན་ཟླ་རྣམས། ང་ཚོའི་གཙོ་བོ་ཡེ་ཤུ་མཱ་ཤི་ཀ་ཡང་བསྐྱར་འབྱོན་པ་དང༌། ང་ཚོ་ཁོང་དང་འཇལ་བར་འདུ་བའི་སྐོར་ཞུ་རྒྱུ་ཡིན།
2TH 2:2 གཙོ་བོའི་ཉིན་མོ་ལ་བབས་ཟིན་པ་ཡིན་ཞེས་ཟེར་བའི་ལུང་བསྟན་ནམ། འཕྲིན། ང་ཚོ་ནས་ཡིན་པ་ལྟ་བུའི་ཡི་གེ་སོགས་དེས་ཁྱེད་ཚོ་སླ་བར་སེམས་འཁྲུག་པ་དང༌། ཡང་ན་འཇིགས་པར་མ་འགྱུར་བར་སྐུལ།
2TH 2:3 སུས་ཀྱང་ཐབས་གང་སྤྱད་ནས་ཁྱེད་རྣམས་ལ་མགོ་སྐོར་གཏོང་དུ་མ་འཇུག་ཅིག གང་ཡིན་ཞེ་ན། དང་པོར་ངོ་ལོག་བྱས་པ་དང༌། འཇིག་ཏུ་འགྲོ་བ་སྟེ་ཁྲིམས་དང་བྲལ་བའི་མི་དེ་མི་མངོན་པའི་བར་དུ་ཉིན་མོ་དེ་མི་འོང༌།
2TH 2:4 མི་དེས་ལྷ་ཞེས་ཟེར་མཁན་དང༌། བསྙེན་བཀུར་བྱེད་པའི་རྟེན་ཐམས་ཅད་ལ་ངོ་རྒོལ་བྱེད་ཅིང༌། རང་ཉིད་ཐམས་ཅད་ལས་འཕགས་པར་བྱས་ནས་དཀོན་མཆོག་གི་མཆོད་ཁང་ཆེན་མོའི་ནང་ལ་བསྡད་དེ་རང་ཉིད་དཀོན་མཆོག་ཡིན་ཞེས་ཟེར།
2TH 2:5 ང་ཁྱེད་ཚོའི་རྩར་ཡོད་དུས་དོན་དེ་རྣམས་བཤད་པ་མི་དྲན་ནམ།
2TH 2:6 ཡང་དུས་ལ་འབབ་སྐབས་ཁོ་མངོན་པར་འགྱུར་བའི་ཕྱིར་ད་ལྟ་གང་གིས་འགོག་པ་དེ་ཁྱེད་ཚོས་ཤེས།
2TH 2:7 གང་ལགས་ཟེར་ན། ད་ལྟའང་ཁྲིམས་དང་བྲལ་བའི་གསང་བ་དེས་ལས་བྱེད་བཞིན་འདུག འོན་ཀྱང་འགོག་མཁན་དེ་མེད་པར་འགྱུར་བའི་བར་དུ་ལུས་སོ།
2TH 2:8 དེ་ནས་ཁྲིམས་དང་བྲལ་བ་དེ་མངོན་པར་འགྱུར། གཙོ་བོ་ཡེ་ཤུས་རང་གི་ཞལ་གྱི་དབུགས་ཀྱིས་དེ་འཇོམས་ཤིང༌། ཁོང་འབྱོན་པའི་གཟི་བརྗིད་ཀྱིས་དེ་མེད་པར་མཛད།
2TH 2:9 ཁྲིམས་དང་བྲལ་བ་དེ་བདུད་སཱ་ཏན་གྱི་མཐུ་སྟོབས་དང་ལྡན་ཏེ་ཡོང་ཞིང༌། དབང་ཐམས་ཅད་དང་བཅས་པར་ངོ་མཚར་ཅན་གྱི་རྟགས། ཡ་མཚན་གྱི་ལས་རྫུན་མ་བསྒྲུབས་ནས།
2TH 2:10 འཇིག་པར་འགྱུར་བ་རྣམས་ལ་ལས་ཀ་ངན་པ་སྣ་ཚོགས་ཀྱིས་གཡོ་སྒྱུ་བྱེད། གང་ཡིན་ཞེ་ན། ཁོ་ཚོས་ཐར་པ་གནང་བའི་བདེན་པ་ཉིད་ལ་དང་ལེན་མ་འདོད་པས་སོ།
2TH 2:11 དེའི་ཕྱིར་དཀོན་མཆོག་གིས་ཁོ་ཚོར་ནུས་མཐུ་དང་ལྡན་པའི་འཁྲུལ་བའི་སེམས་ཤིག་བཏང་ནས། ཁོ་ཚོས་རྫུན་ལ་ཡིད་ཆེས་པར་འགྱུར།
2TH 2:12 དེ་ནི་སྤྱོད་ལམ་ངན་པ་ལ་དགའ་སྟེ་བདེན་པ་ལ་ཡིད་མི་ཆེས་མཁན་ཐམས་ཅད་ཉེས་ཆད་གཅོད་པར་འགྱུར་བའི་ཆེད་དུ་ཡིན།
2TH 2:13 གཙོ་བོས་གཅེས་པའི་སྤུན་ཟླ་རྣམས། ཁྱེད་ཀྱི་དོན་ལ་ང་ཚོས་རྟག་པར་དཀོན་མཆོག་ལ་བཀའ་དྲིན་ཆེ་ཞུ་དགོས། གང་ལགས་ཤེ་ན། ཐར་པ་འཐོབ་པའི་ཕྱིར་དཀོན་མཆོག་གིས་ཁྱེད་ཚོ་ཐོག་མ་ནས་བདམས་པས། ཐར་པ་དེ་ནི་ཁྱེད་ཚོ་དམ་པ་རུ་མཛད་མཁན་དམ་པའི་ཐུགས་ཉིད་དང༌། བདེན་པ་ཉིད་ལ་ཡིད་ཆེས་བྱེད་པའི་སྒོ་ནས་འབྱུང་ངོ༌།
2TH 2:14 ང་ཚོའི་གཙོ་བོ་ཡེ་ཤུ་མཱ་ཤི་ཀའི་གཟི་བརྗིད་ཀྱི་སྐལ་བ་ཁྱེད་ཚོར་འཐོབ་པའི་ཆེད་དུ། ང་ཚོས་བསྒྲགས་པའི་འཕྲིན་བཟང་གི་སྒོ་ནས་ཁོང་གིས་དོན་དེའི་ཕྱིར་ཁྱེད་ཚོ་བོས་པ་གནང་བ་ཡིན།
2TH 2:15 དེས་ན་སྤུན་ཟླ་རྣམས། བརྟན་པོར་གནས་ཤིག ང་ཚོས་སྨྲས་པའི་གཏམ་དང༌། ཡང་ན་ཡི་གེ་ལ་བྲིས་པའི་སྒོ་ནས་བསྟན་པའི་རྒྱུན་སྲོལ་དམ་པོར་འཛིན་དགོས།
2TH 2:16 ད་ངེད་ཀྱི་གཙོ་བོ་ཡེ་ཤུ་མཱ་ཤི་ཀ་ཉིད་དང༌། ང་ཚོར་བྱམས་ཤིང་ཐུགས་རྗེའི་སྒོ་ནས་མཐའ་མེད་པའི་སེམས་གསོ་དང༌། རེ་བ་བཟང་པོ་གནང་མཁན་ཏེ་ང་ཚོའི་ཡབ་དཀོན་མཆོག་གིས་
2TH 2:17 ཁྱེད་ཚོའི་སེམས་གསོ་ཞིང༌། ངག་དང་ལས་བཟང་པོ་ཐམས་ཅད་ལ་བརྟན་པོར་མཛད་པར་ཤོག །
2TH 3:1 མཇུག་ཏུ་སྤུན་ཟླ་རྣམས། ང་ཚོའི་དོན་ལ་སྨོན་ལམ་འདེབས་སྐབས། ཁྱེད་ཚོའི་ཁྲོད་དུ་བྱུང་བ་ལྟར། གཙོ་བོའི་བཀའ་མགྱོགས་པོར་དར་ཞིང་བཀུར་སྟི་དང་ལྡན་པར་འགྱུར་བའི་གསོལ་སྨོན་ཞུས།
2TH 3:2 ཡང་ང་ཚོ་བག་མེད་ཅན་དང་ངན་སེམས་ཅན་ལས་སྒྲོལ་བའི་དོན་ལའང་སྨོན་ལམ་འདེབས། གང་ཡིན་ཟེར་ན། མི་ཐམས་ཅད་ཀྱིས་དད་པ་མི་བྱེད།
2TH 3:3 འོན་ཀྱང་གཙོ་བོ་ནི་ཐུགས་གཏད་ཆོག་པ་ཡིན་པས་ཁོང་གིས་ཁྱེད་ཚོའི་དད་སེམས་བརྟན་པོར་མཛད་ཅིང༌། ངན་པ་ལས་སྲུང་བར་མཛད།
2TH 3:4 ཁྱེད་ཚོས་ད་ལྟ་ང་ཚོས་བཀའ་བསྒོས་པ་བཞིན་དུ་བྱེད་པ་དང་རྗེས་མའང་བྱེད་རྒྱུ་ཡིན་པ་ང་ཚོས་གཙོ་བོའི་ཐོག་ནས་ཡིད་རྟོན་བྱེད།
2TH 3:5 གཙོ་བོས་ཁྱེད་ཚོའི་སེམས་དཀོན་མཆོག་གི་བྱམས་པ་དང་མཱ་ཤི་ཀའི་བཟོད་སེམས་ལ་སློབ་ཏུ་འཁྲིད་པར་ཤོག
2TH 3:6 སྤུན་ཟླ་རྣམས། ད་ང་ཚོའི་གཙོ་བོ་ཡེ་ཤུ་མཱ་ཤི་ཀའི་མཚན་གྱི་ཐོག་ནས་ཁྱེད་ཚོར་འདི་ལྟར་བཀའ་སྒོ། ང་ཚོ་ལས་ཐོས་པའི་བསྟན་པ་དང་མི་མཐུན་པར་ལེ་ལོར་གནས་པའི་སྤུན་ཟླ་རྣམས་དང་མ་འགྲོགས་ཤིག
2TH 3:7 གང་ཡིན་ཞེ་ན། ཁྱེད་ཚོས་ང་ཚོ་ལ་དཔེ་ལྟ་དགོས་པར་ཤེས། ཁྱེད་ཚོ་དང་མཉམ་དུ་ཡོད་དུས་ང་ཚོ་ལེ་ལོ་ཅན་མིན་ཏེ།
2TH 3:8 རིན་མ་བྱིན་པར་མི་སུ་ཞིག་གི་ཀྱང་ཁ་ལག་མ་བཟས། ཁྱེད་ཚོར་ཁུར་པོ་མི་བཟོ་བའི་ཆེད་དུ་ང་ཚོས་འབད་བརྩོན་དང་དཀའ་བས་ཉིན་མཚན་མེད་པར་ལས་ཀ་བྱས།
2TH 3:9 ང་ཚོར་དེ་བཞིན་དུ་བྱེད་ཆོག་པའི་དབང་ཆ་མེད་པ་མ་ཡིན་ཏེ། ཁྱེད་ཚོས་ང་ཚོ་ལ་དཔེ་ལྟ་བྱེད་པའི་དོན་དུ་ཡིན།
2TH 3:10 ང་ཚོས་ཁྱེད་ཚོ་དང་མཉམ་དུ་ཡོད་དུས་གལ་ཏེ་སུ་ཞིག་གིས་ལས་ཀ་བྱེད་མི་འདོད་ན། ཟ་མི་ཆོག་ཅེས་པའི་བཀའ་བསྒོས།
2TH 3:11 རྒྱུ་མཚན་ནི་ཁྱེད་ཚོའི་ཁྲོད་དུ་ཁ་ཤས་ལེ་ལོ་ཅན་ཡིན་ཏེ། ལས་ཀ་མ་བྱས་པར་གཞན་གྱི་དོན་ལ་ཐེ་ཇུས་བྱེད་པ་ཐོས།
2TH 3:12 གཙོ་བོ་ཡེ་ཤུ་མཱ་ཤི་ཀའི་ཐོག་ནས་ང་ཚོས་དེ་ལྟར་གྱི་མི་རྣམས་ལ་ཚུགས་པོའི་སྒོ་ནས་ལས་ཀ་བྱེད་དགོས་ཤིང༌། རང་ཁ་རང་གསོ་དགོས་པར་བཀའ་སྒོ་ཞིང་སྐུལ།
2TH 3:13 སྤུན་ཟླ་རྣམས། ལས་བཟང་པོ་བྱེད་པར་ཡིད་ཐང་མ་ཆད་ཅིག
2TH 3:14 སུ་ཞིག་གིས་ཡི་གེ་འདིའི་བསླབ་བྱར་དོ་སྣང་མ་བྱས་ན། མི་དེ་ལ་ནན་གྱིས་ལྟོས་ཤིག ཁོ་ངོ་ཚ་རུ་འགྱུར་བའི་ཆེད་དུ་ཁོ་དང་མ་འགྲོགས་ཤིག
2TH 3:15 འོན་ཀྱང་ཁོ་དགྲ་བོ་ལྟར་མི་རྩི་བར་སྤུན་ཟླ་ལྟར་བརྩིས་ནས་ཁོ་ལ་ཁ་ཏ་བྱེད་ཅིག
2TH 3:16 ད་ཞི་བདེའི་གཙོ་བོ་ཉིད་ཀྱིས་དུས་དང་རྣམ་པ་ཀུན་ཏུ་ཁྱེད་ཚོར་ཞི་བདེ་གནང་བར་ཤོག གཙོ་བོ་ཁྱེད་ཚོ་ཐམས་ཅད་དང་འགྲོགས་པར་ཤོག
2TH 3:17 ང་པའུ་ལུ་རང་གི་ལག་པས་འཚམས་ཞུ་འདི་བྲིས། དེ་ནི་ངའི་འབྲི་སྟངས་ཡིན་པས། ངའི་ཡི་གེ་ཐམས་ཅད་ཀྱི་རྟགས་འདི་ཡིན།
2TH 3:18 ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོ་ཐམས་ཅད་ལ་ལྡན་པར་གྱུར་ཅིག །
1TI 1:1 ངེད་རྣམས་ཀྱི་སྐྱབས་མགོན་དཀོན་མཆོག་དང༌། རེ་བ་བཅོལ་བའི་མཱ་ཤི་ཀ་ཡེ་ཤུ་གཉིས་ཀྱི་བཀའ་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་ཡིས་
1TI 1:2 དད་པའི་ཐོག་ནས་ངའི་བདེན་པའི་བུ་ལྟར་ཡིན་པ་ཐི་མོ་ཐེ་ལ་འཕྲིན་ཡིག་འདི་ཕུལ་ལོ། ཡབ་དཀོན་མཆོག་དང་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་ནས་ཐུགས་རྗེ་དང༌། བཀའ་དྲིན། ཞི་བདེ་བཅས་ཁྱེད་ལ་འཐོབ་པར་གྱུར་ཅིག
1TI 1:3 མ་ཀེ་དོན་ཡཱ་ཡུལ་ལ་འགྲོ་བའི་སྐབས་སུ་ངས་ཁྱེད་ལ་སྔར་བསྐུལ་བ་ལྟར། ཨེ་ཕེ་སུ་གྲོང་ཁྱེར་ལ་གནས་ཤིག དེ་ནི་ཁྱེད་ཀྱིས་མི་ཁ་ཤས་ལ་ཆོས་ལོག་མ་སྟོན་ཞིང༌།
1TI 1:4 སྙིང་པོ་མེད་པའི་སྒྲུང་དང༌། རྫོགས་མཐའ་མེད་པའི་སྐྱེས་རབས་ལ་དོ་སྣང་མི་བྱེད་པའི་བཀའ་སྒོ་བའི་ཆེད་དུ་ཡིན། དད་པའི་སྒོ་ནས་སྒྲུབ་པའི་དཀོན་མཆོག་གི་འཕྲིན་ལས་ཀྱི་ཚབ་ལ་བྱ་བ་དེ་ཚོ་ལས་རྩོད་གླེང་འབྱུང་བའི་ཕྱིར་རོ།
1TI 1:5 ངེད་རྣམས་ཀྱི་བསླབ་བྱའི་དམིགས་ཡུལ་ནི་སྙིང་ཐག་པ་དང༌། སེམས་བཟང་པོ། བཅོས་མིན་གྱི་དད་པ་གསུམ་ལས་འབྱུང་བའི་བྱམས་སེམས་ཡིན།
1TI 1:6 མི་ཁ་ཤས་ཀྱིས་དོན་དེ་ཚོ་དོར་ནས་སྙིང་པོ་མེད་པའི་གཏམ་སྨྲ་ཞིང༌།
1TI 1:7 རང་གིས་གང་བཤད་པ་དང༌། ཡིད་རྟོན་བྱེད་པའི་དོན་མི་རྟོགས་ཀྱང༌། ཆོས་ཁྲིམས་ཀྱི་སློབ་དཔོན་དུ་འགྱུར་བར་འདོད།
1TI 1:8 མི་ཞིག་གིས་ཆོས་ཁྲིམས་ཡང་དག་པའི་སྒོ་ནས་བཀོལ་ན་དེ་བཟང་པོ་ཡིན་པ་ང་ཚོས་ཤེས།
1TI 1:9 ཆོས་ཁྲིམས་ནི་དྲང་ལྡན་རྣམས་མ་ཡིན་པར། ཁྲིམས་འགལ་མཁན་དང༌། ངོ་ལོག་པ། དཀོན་མཆོག་ལ་བཀུར་སྟི་མི་བྱེད་པ། སྡིག་ཉེས་ཅན། ཆོས་མེད་པ། དཀོན་མཆོག་ལ་སྡང་བ། ཕ་མའམ་མི་གཞན་གསོད་མཁན།
1TI 1:10 ལོག་གཡེམ་བྱེད་མཁན། ཕོ་གཉིས་མཉམ་དུ་སྤྱོད་པ། བྲན་གཡོག་ཉོ་འཚོང་མཁན། རྫུན་གཏམ་ཤོད་མཁན། མནའ་ལ་མི་རྩི་མཁན་དང༌། ཡང་དག་པའི་བསྟན་པ་དང་མི་མཐུན་པའི་དོན་གང་ཞིག་གི་ཆེད་དུ་གནང་བ་ཡིན་པ་དེ་ང་ཚོས་ཤེས།
1TI 1:11 ཡང་དག་པའི་བསྟན་པ་དེ་ནི། བསྟོད་འོས་པའི་དཀོན་མཆོག་གི་གཟི་བརྗིད་དང་ལྡན་པའི་འཕྲིན་བཟང་དང་མཐུན། དེ་ང་ལ་བཅོལ་བ་ཡིན།
1TI 1:12 ང་ལ་ནུས་པ་གནང་མཁན་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་ལ་བཀའ་དྲིན་ཆེ་ཞུ། གང་ཡིན་ཟེར་ན། ཁོང་གིས་ང་བློ་གཏད་ཆོག་པ་ཞིག་ཡིན་པར་བརྩིས་ནས་ཞབས་ཏོག་གི་ལས་སུ་བསྐོས་པས་སོ།
1TI 1:13 སྔར་ང་ནི་དཀོན་མཆོག་ལ་སྐུར་བ་འདེབས་མཁན་དང༌། དད་ལྡན་རྣམས་ལ་མནར་གཅོད་གཏོང་མཁན་གྱི་གདུག་རྩུབ་ཆེ་བའི་མི་ཞིག་ཡིན་ཡང༌། ངས་དོན་ལ་རྨོངས་ཤིང་དད་པ་མེད་པར་དེ་བཞིན་དུ་བྱས་པས་ང་ལ་ཐུགས་རྗེ་གནང་བྱུང༌།
1TI 1:14 ཐུགས་རྗེ་དེ་ནི་མཱ་ཤི་ཀ་ཡེ་ཤུ་ལས་འབྱུང་བའི་དད་པ་དང་བྱམས་སེམས་དང་མཉམ་དུ་ང་ལ་ལྷག་པར་གནང༌།
1TI 1:15 མཱ་ཤི་ཀ་ཡེ་ཤུ་སྡིག་ཉེས་ཅན་རྣམས་སྐྱོབ་པའི་ཕྱིར་འཇིག་རྟེན་དུ་བྱོན་ནོ་ཞེས་པའི་གཏམ་འདི་ནི་བདེན་ཞིང་ཧ་ཅང་ཁས་ལེན་བྱེད་འོས་པ་ཞིག་ཡིན་ཏེ། སྡིག་ཉེས་ཅན་དེ་ཚོའི་ཁྲོད་དུ་ང་ནི་སྡུག་ཤོས་ཡིན།
1TI 1:16 དེ་ནི་ཡེ་ཤུ་མཱ་ཤི་ཀས་སྡིག་ཉེས་ཅན་ཆེ་ཤོས་ང་ལ་ཐུགས་རྗེ་གནང་བ་སྟེ། ང་ཐོག་ནས་ཁོང་གི་ཚད་མེད་ཀྱི་བཟོད་བསྲན་མངོན་ལ། ཁོང་ལ་རྗེས་སུ་དད་པ་བྱས་ནས་དཔག་ཏུ་མེད་པའི་ཚེ་འཐོབ་མཁན་ཚོའི་དཔེ་སྟོན་པའི་ཆེད་དུ་ཡིན།
1TI 1:17 ད་གཏན་དུ་གནས་པའི་རྒྱལ་པོ། འཆི་བ་མེད་པ། མིག་གིས་མཐོང་མི་ཐུབ་པ། གཅིག་ལགས་པའི་དཀོན་མཆོག་ལ་བཀུར་སྟི་དང་བསྟོད་པ་དུས་རྒྱུན་དུ་འབུལ་བར་གྱུར་ཅིག ཨ་མེན།
1TI 1:18 ངའི་བུ་ཐི་མོ་ཐེ། ཁྱོད་ཀྱི་སྐོར་སྔར་ལུང་བསྟན་གནང་བ་བཞིན་དུ་ངས་ཁྱོད་ལ་དེ་ལྟར་བསྐུལ། ལུང་བསྟན་དེ་ཚོའི་སྒོ་ནས་ཁྱོད་ཀྱིས་དམག་འཐབ་ལེགས་པོ་གྱིས་ཤིག
1TI 1:19 དད་པ་དང་སེམས་བཟང་ལ་བརྟན་པོར་གནས། མི་ཁ་ཤས་ཀྱིས་སེམས་བཟང་པོ་དོར་ནས་དད་སེམས་མཚོ་ལ་གྲུ་ལྟར་ནུབ།
1TI 1:20 ཁོ་ཚོའི་ནང་ནས་ཧི་མེ་ནཱ་ཡུ་དང་ཨ་ལིག་ཟན་ཌེར་གཉིས་ཀྱིས་སླར་དཀོན་མཆོག་ལ་སྐུར་བ་མི་འདེབས་པའི་ཆེད་དུ་ངས་བདུད་སཱ་ཏན་ལ་གཏད་ཟིན་ནོ། །
1TI 2:1 ངས་ཐོག་མར་མི་ཐམས་ཅད་དང༌། རྒྱལ་པོ། དཔོན་པོ་ཐམས་ཅད་ཀྱི་དོན་དུ་གསོལ་བ་དང༌། སྨོན་ལམ། ཞུ་བ། བཀའ་དྲིན་ཆེ་བཅས་ཞུ་རྒྱུར་སྐུལ། དེ་ནི་ཆོས་སེམས་དང་ལྡན་པར་དཀོན་མཆོག་གི་ཐུགས་མཉེས་པར་བྱེད་དེ་ང་ཚོ་ཞི་འཇམ་གྱི་ངང་ནས་མི་ཚེ་སྐྱེལ་བའི་ཆེད་དུ་ཡིན།
1TI 2:3 ངེད་རྣམས་ཀྱི་སྐྱབས་མགོན་དཀོན་མཆོག་གི་སྤྱན་སྔར་དེ་ནི་ལེགས་ཤིང་འོས་པ་ཡིན།
1TI 2:4 ཁོང་གིས་མི་ཐམས་ཅད་ཐར་བར་འགྱུར་ཏེ་བདེན་པ་རྟོགས་པར་དགོངས།
1TI 2:5 དཀོན་མཆོག་གཅིག་ཡིན་ལ། དཀོན་མཆོག་དང་མི་རྣམས་ཀྱི་བར་ལ་བར་འདུམ་གཏོང་མཁན་གཅིག་ཡོད། མི་དེ་ནི་མཱ་ཤི་ཀ་ཡེ་ཤུ་ཡིན་ནོ།
1TI 2:6 ཁོང་གིས་མི་ཐམས་ཅད་ཀྱི་དོན་ལ་རང་ཉིད་བླུ་རིན་གནང་བའི་སྒོ་ནས་དུས་ལ་འབབ་སྐབས་དཀོན་མཆོག་གིས་རང་གི་དགོངས་པ་མངོན་པར་མཛད།
1TI 2:7 ངས་རྫུན་གཏམ་མི་ཟེར་བར་བདེན་པ་ཟེར། དོན་དེའི་ཕྱིར་ང་ཆོས་སྒྲོག་མཁན་དང༌། སྐུ་ཚབ་དང༌། ཡ་ཧུ་དཱ་པ་མིན་པ་རྣམས་ལ་དད་པ་དང་བདེན་པ་སྟོན་མཁན་དུ་བསྐོས།
1TI 2:8 གནས་གང་དུ་འཛོམས་ཀྱང་སྐྱེས་པ་རྣམས་ཀྱིས་ཁྲོ་བའམ་རྩོད་གླེང་མེད་པར། ལག་པ་གཙང་མ་ཡར་བཏེགས་ཏེ་སྨོན་ལམ་འདེབས་པར་ང་འདོད་དོ།
1TI 2:9 དེ་དང་འདྲ་བར་བུད་མེད་རྣམས་ཀྱིས་འོས་པའི་གོས་གྱོན་ཏེ། ཁྲེལ་དང་བག་ཡོད་ཀྱིས་ལུས་རྒྱན་དགོས། ཚུལ་དང་མི་མཐུན་པའི་མགོའི་སྐྲའམ། གསེར་རམ། མུ་ཏིག་གམ། རིན་ཆེ་བའི་གོས་ཀྱིས་མ་ཡིན་པར།
1TI 2:10 བྱ་བ་བཟང་པོས་རྒྱན་དགོས། དེ་ནི་དཀོན་མཆོག་ལ་གུས་བཀུར་བྱེད་པ་ཁས་ལེན་མཁན་བུད་མེད་ལ་འོས་སོ།
1TI 2:11 བུད་མེད་རྣམས་ཀྱིས་ཁ་ཁུ་སིམ་པོར་བསྡད་ནས་ཁ་ལ་རབ་ཏུ་ཉན་ཏེ་སློབ་དགོས།
1TI 2:12 བུད་མེད་རྣམས་ཀྱིས་ཆོས་སྟོན་པའམ། སྐྱེས་པ་ལ་དབང་སྒྱུར་བ་ངས་ཆོག་མཆན་མི་འགོད་དེ། ཁོ་མོ་ཁ་ཁུ་སིམ་པོར་སྡོད་དགོས།
1TI 2:13 གང་ཡིན་ཞེ་ན། དང་པོར་ཨ་དམ་དང༌། དེའི་རྗེས་ལ་ཧ་ཝ་བཟོས་པར་མཛད་པས་སོ།
1TI 2:14 ཡང་ཨ་དམ་མིན་ཏེ་བུད་མེད་སླུ་བར་གྱུར་ནས་དཀོན་མཆོག་གི་བཀའ་དང་འགལ་མཁན་དུ་གྱུར།
1TI 2:15 འོན་ཀྱང་བག་དང་ལྡན་ཏེ་དད་སེམས་དང༌། བྱམས་སེམས། དམ་པ་བཅས་ལ་གནས་ན། ཕྲུ་གུ་སྐྱེད་པའི་སྒོ་ནས་བུད་མེད་ཐར་བར་འགྱུར་རོ། །
1TI 3:1 མི་ཞིག་གིས་ཆོས་ཚོགས་ཀྱི་དོ་དམ་པའི་ལས་འཛིན་འདོད་ན། ལས་འཛིན་མཆོག་འདོད་དོ་ཞེས་པའི་གཏམ་འདི་ནི་ཁས་ལེན་བྱེད་འོས་པ་ཞིག་ཡིན།
1TI 3:2 དོ་དམ་པ་ནི་སྐྱོན་བརྗོད་རྒྱུ་མེད་པ་དང༌། བུད་མེད་གཅིག་གི་ཁྱོ་ག་ཡིན་པ། བག་དང་ལྡན་པ། རང་ཚོད་ཟིན་པ། སྤྱོད་ལམ་བཟང་པོ། མགྲོན་པོ་གང་ཡིན་ལ་སྣེ་ལེན་བྱེད་མཁན། སློབ་དཔོན་བྱེད་ཐུབ་པ།
1TI 3:3 ར་བཟི་མཁན་ནམ་གདུག་རྩུབ་ཅན་མ་ཡིན་པ། སེམས་དུལ་པོ། མཐུན་པ་ལ་དགའ་བ། དངུལ་ལ་མི་ཆགས་མཁན།
1TI 3:4 རང་གི་ཕྲུ་གུ་རྣམས་ཁ་ལ་ཉན་པོ་དང་ཡ་རབས་ཀྱི་ཚུལ་དང་ལྡན་ཏེ་ཁྱིམ་ཚང་ལེགས་པར་སྐྱོང་མཁན་ཡིན་དགོས།
1TI 3:5 མི་ཞིག་གིས་རང་གི་ཁྱིམ་ཚང་སྐྱོང་སྟངས་མ་ཤེས་ན། དཀོན་མཆོག་གི་ཆོས་ཚོགས་ཇི་ལྟར་སྐྱོང་ཐུབ།
1TI 3:6 ང་རྒྱལ་སྐྱེས་ནས་བདུད་ཀྱི་ཆད་པ་མི་ཚུད་པའི་ཕྱིར་དོ་དམ་པ་དེ་དད་ལྡན་གསར་པ་ཞིག་མི་རུང༌།
1TI 3:7 དེ་མ་ཟད་སྐྱོན་བརྗོད་རྒྱུ་ཅིའང་མི་ཡོང་ཞིང༌། བདུད་ཀྱི་རྙི་དོང་དུ་མི་ལྷུང་བའི་ཕྱིར་དད་ལྡན་མ་ཡིན་པ་རྣམས་ཀྱིས་ཁོང་ལ་བཀུར་སྟི་བྱེད་འོས་པ་ལྟར་རྩི་དགོས།
1TI 3:8 དེ་དང་འདྲ་བར་ཆོས་ཚོགས་ཀྱི་ལས་འཛིན་པ་རྣམས་ཀྱང་ཡ་རབས་དང༌། ཁ་ཞེ་གཉིས་མེད། ཆང་རག་མང་པོ་མི་འཐུང་མཁན། དངུལ་ལ་མི་ཆགས་པ་བཅས་ཡིན་དགོས་པ་དང༌།
1TI 3:9 རང་གཤིས་བཟང་པོ་དང་ལྡན་ཏེ་དད་སེམས་ཀྱི་གསང་བ་ལ་བརྟན་པོར་འཛིན་མཁན་ཡིན་དགོས།
1TI 3:10 ཁོ་ཚོ་ལ་སྔོན་དུ་ཚོད་ལྟ་བྱེད་དགོས། སྐྱོན་བརྗོད་རྒྱུ་ཅི་ཡང་མེད་ན་ཆོས་ཚོགས་ཀྱི་ལས་འཛིན་པར་བསྐོ་ཆོག
1TI 3:11 དེ་དང་འདྲ་བར་བུད་མེད་རྣམས་ནི་ཡ་རབས་དང༌། རྒྱབ་བཤད་རྒྱག་མཁན་མིན་པ། བག་དང་ལྡན་པ། རྣམ་པ་ཐམས་ཅད་ལ་བློ་གཏད་ཆོག་པ་ཡིན་དགོས།
1TI 3:12 ཆོས་ཚོགས་ཀྱི་ལས་འཛིན་པ་རྣམས་ཆུང་མ་གཅིག་གི་ཁྱོ་ག་དང༌། རང་གི་ཕྲུ་གུ་དང་ཁྱིམ་ཚང་ལེགས་པར་སྐྱོང་མཁན་ཡིན་དགོས།
1TI 3:13 ལས་འཛིན་པ་ལེགས་པར་བྱེད་མཁན་རྣམས་ལ་གོ་ས་མཐོ་པོ་དང༌། མཱ་ཤི་ཀ་ཡེ་ཤུ་ལ་དད་པ་བརྟན་པོ་འཐོབ།
1TI 3:14 རིང་པོར་མ་ལོན་པར་ཁྱེད་ཀྱི་རྩར་ཡོང་བའི་རེ་བ་བྱེད་དེ་ངས་དོན་འདི་རྣམས་འབྲི།
1TI 3:15 འོན་ཀྱང་གལ་ཏེ་ང་འགོར་སྲིད་ན། ཁྱེད་ཀྱིས་དཀོན་མཆོག་གི་ཁྱིམ་ཚང་ལ་སྤྱོད་ལམ་ཇི་ལྟར་བྱེད་དགོས་པ་ཤེས་པའི་ཕྱིར་ངས་འབྲི། ཁྱིམ་ཚང་དེ་ནི་གཏན་དུ་གནས་པའི་དཀོན་མཆོག་གི་ཆོས་ཚོགས་དང༌། བདེན་པ་ཉིད་དེའི་ཀ་བ་དང་རྨང་གཞི་ཡིན།
1TI 3:16 ཤ་ཁྲག་བརྒྱུད་ནས་མཱ་ཤི་ཀ་ཉིད་མངོན། ། དམ་པའི་ཐུགས་ཉིད་ཀྱིས་ནི་ཡང་དག་བསྟན། ། ནམ་མཁའི་ཕོ་ཉ་རྣམས་ཀྱིས་གཟིགས་གྱུར་ལ། ། རྒྱལ་ཁམས་ཀུན་ལ་ཉིད་ཀྱི་འཕྲིན་བཟང་བསྒྲགས། ། འཇིག་རྟེན་མི་རྣམས་ཁོང་ལ་དད་པར་བྱས། ། གཟི་བརྗིད་ངང་ནས་དཀོན་མཆོག་ཞིང་དུ་དྲངས། ། ཅེས་པ་འདི་ནི་ང་ཚོའི་དད་སེམས་ཀྱི་གསང་བ་གལ་ཆེན་ཞིག་ཡིན་པ་ཐེ་ཚོམ་མེད་དོ། །
1TI 4:1 དམ་པའི་ཐུགས་ཉིད་ཀྱིས་གསལ་པོར་གསུངས་པ་ལྟར། དུས་ཕྱི་མར་མི་ཁ་ཤས་དད་པ་སྤངས་ནས་སེམས་ཉིད་གཡོ་སྒྱུ་ཅན་དང་གདོན་འདྲེ་རྣམས་ཀྱི་ལོག་ལྟ་ལ་དོ་སྣང་བྱེད་པར་འགྱུར།
1TI 4:2 དེ་ནི་བཟང་ངན་ཤེས་མི་ཐུབ་པའི་རྫུན་ཤོད་མཁན་གྱི་ཁ་བཤད་དོན་ལ་མི་གནས་པའི་སྒོ་ནས་འབྱུང་འོང༌། ཁོ་ཚོའི་སེམས་ནི་ལྕགས་སྲེག་གིས་ཚིག་པ་ལྟར་ཡིན་པས་སོ།
1TI 4:3 ཁོ་ཚོས་གཉེན་སྒྲིག་མ་བྱེད་ཅེས་པ་དང༌། ཟས་རིགས་ཁ་ཤས་ཟ་མི་ཆོག་ཅེས་ཟེར། བདེན་པ་ཤེས་ནས་དད་ལྡན་རྣམས་ཀྱིས་བཀའ་དྲིན་ཆེ་ཞུ་ཞིང་ཟ་བའི་ཕྱིར་དཀོན་མཆོག་གིས་ཟས་དེ་ཚོ་བཟོས་པ་གནང༌།
1TI 4:4 གང་ལགས་ཟེར་ན། དཀོན་མཆོག་གིས་བཀོད་པར་མཛད་པ་ཐམས་ཅད་ལེགས་པོ་ཡིན་ཏེ། བཀའ་དྲིན་ཆེ་ཞུས་ནས་ཐོབ་ན་གང་ཡང་འདོར་མི་དགོས།
1TI 4:5 དཀོན་མཆོག་གི་བཀའ་དང་སྨོན་ལམ་གྱི་སྒོ་ནས་དག་པར་འགྱུར་བས་སོ། །
1TI 4:6 གལ་ཏེ་ཁྱེད་ཀྱིས་དོན་འདི་ཚོ་སྤུན་ཟླ་རྣམས་ལ་བསྟན་ན། དད་པའི་བཀའ་དང་ཁྱེད་ཀྱིས་སྔར་ནས་བསྲུངས་ཏེ་བདེན་པའི་བསྟན་པ་ལ་བརྟེན་ནས་ཁྱེད་ནི་མཱ་ཤི་ཀ་ཡེ་ཤུའི་ཞབས་ཕྱི་བཟང་པོ་ཡིན་པར་འགྱུར།
1TI 4:7 འཇིག་རྟེན་པའི་སྙིང་པོ་མེད་པའི་སྒྲུང་དང་རྒན་མོའི་འཆོལ་གཏམ་དོར་ནས། ཆོས་སེམས་དང་ལྡན་པའི་ཕྱིར་རང་གིས་རང་ལ་སྦྱོང་བརྡར་གྱིས་དང༌།
1TI 4:8 གང་ཡིན་ཞེ་ན། ལུས་ཀྱི་རྩལ་སྦྱོང་ལ་ཕན་ཐོགས་ཅུང་ཟད་ཡོད་ཀྱང༌། མི་ཚེ་འདི་དང་ཕྱི་མ་གཉིས་ལ་ཕན་པས་ཆོས་སེམས་ནི་རྣམ་པ་ཐམས་ཅད་ལ་ཕན་ཐོགས་ཆེའོ།
1TI 4:9 གཏམ་འདི་ནི་བདེན་ཞིང་ཧ་ཅང་ཁས་ལེན་བྱེད་འོས་པ་ཞིག་ཡིན།
1TI 4:10 དོན་དེའི་ཕྱིར་ང་ཚོས་འབད་བརྩོན་བྱེད། གང་ལགས་ཤེ་ན། མི་ཐམས་ཅད་དང་ཁྱད་པར་ཏུ་དད་ལྡན་རྣམས་ཀྱི་སྐྱབས་མགོན་གཏན་དུ་གནས་པའི་དཀོན་མཆོག་ལ་ང་ཚོས་ཡིད་རྟོན་ངང་རེ་བ་བཅངས།
1TI 4:11 དོན་འདི་ཚོ་མི་རྣམས་ལ་སྐུལ་ཞིང་སྟོན།
1TI 4:12 ཁྱེད་རང་ལོ་ན་གཞོན་པར་མི་སུས་ཀྱང་མཐོང་ཆུང་བྱེད་དུ་མ་ཆུག དེ་ལས་ལྡོག་སྟེ་ངག་དང༌། སྤྱོད་ལམ། བྱམས་སེམས། དད་སེམས། བཅོས་མིན་གྱི་སྒོ་ནས་དད་ལྡན་རྣམས་ལ་མིག་དཔེ་སྟོན།
1TI 4:13 ང་མ་སླེབས་པའི་བར་དུ་མི་རྣམས་ལ་གསུང་རབ་ཀློག་པ་དང༌། སྐུལ་མ། ཆོས་སྟོན་པ་བཅས་ལ་བརྩོན་པར་བྱེད་ཅིག
1TI 4:14 ཁྱེད་ཀྱི་ནང་ན་ཡོད་པའི་ཆོས་ཀྱི་གནང་སྦྱིན་ལ་སྣང་མེད་མ་བྱེད། དེ་ནི་ཆོས་ཚོགས་ཀྱི་འགན་འཁུར་བ་རྣམས་ཀྱིས་ཁྱེད་ལ་ཕྱག་བཞག་ནས་ལུང་བསྟན་པའི་སྒོ་ནས་གནང་བ་ཡིན།
1TI 4:15 མི་ཐམས་ཅད་ཀྱིས་ཁྱེད་ཀྱི་ཡར་སྐྱེད་མཐོང་བའི་ཕྱིར་དོན་འདི་རྣམས་ལ་དམ་འཛིན་བྱེད་ཅིང་ཉམས་སུ་ལོངས་ཤིག
1TI 4:16 ཁྱེད་ཀྱིས་རང་ཉིད་དང་རང་གི་ཆོས་སྟོན་པ་ལ་དོ་སྣང་ལེགས་པོ་བྱེད། དོན་འདི་རྣམས་མཐར་ཕྱིན་པ་བྱས་ན་ཁྱེད་དང་ཁྱེད་ཀྱི་གཏམ་ལ་ཉན་མཁན་ཡང་ཐར་བར་འགྱུར་ངེས་སོ། །
1TI 5:1 རྒན་པོ་ལ་ཚིག་རྩུབ་མ་ཤོད་པར། ཕ་ལྟར་བརྩིས་ནས་ཁ་ཏ་བྱེད། གཞོན་ནུ་རྣམས་ལ་ནུ་བོ་ལྟར་ཤོད།
1TI 5:2 རྒན་མོ་རྣམས་ལ་ཨ་མ་དང༌། གཞོན་ནུ་མ་རྣམས་ལ་སྲིང་མོ་ལྟར་བཅོས་མིན་སེམས་ཀྱིས་སྨྲོས་ཤིག
1TI 5:3 གཉེར་སྐྱོང་བྱེད་མཁན་མེད་པའི་ཡུགས་མོ་རྣམས་ལ་བཀུར་སྟི་བྱེད་ཅིག
1TI 5:4 འོན་ཀྱང་ཡུགས་མོ་ཞིག་ལ་ཕྲུ་གུའམ། ཚ་བོ་ཚ་མོ་ཡོད་ན། ཁོ་ཚོས་ཐོག་མར་རང་གི་ཁྱིམ་ལ་ཆོས་སེམས་ཉམས་ལེན་བྱེད་པར་སློབ་དགོས་ཤིང༌། ཕ་མའི་དྲིན་ལན་འཇལ་དགོས། དེ་ནི་དཀོན་མཆོག་ཐུགས་མཉེས་པ་ཡིན་པས་སོ།
1TI 5:5 གཉེར་སྐྱོང་བྱེད་མཁན་མེད་པའི་ཡུགས་མོ་ཞིག་གིས་དཀོན་མཆོག་ལ་རེ་བ་བྱེད་ཅིང༌། ཉིན་མཚན་མེད་པར་གསོལ་བ་དང་སྨོན་ལམ་འདེབས་ཤིང་གནས།
1TI 5:6 འོན་ཀྱང་འདོད་ཡོན་ལ་ཆགས་པའི་ཡུགས་མོ་ནི་གསོན་ཡང་ཤི་བ་དང་འདྲའོ།
1TI 5:7 ཁོ་ཚོ་སྐྱོན་བརྗོད་རྒྱུ་མེད་པར་འགྱུར་བའི་ཕྱིར་དོན་དེ་རྣམས་སྐུལ།
1TI 5:8 གལ་ཏེ་མི་སུ་ཞིག་གིས་རང་གི་གཉེན་ཉེ་རྣམས་དང༌། ཁྱད་པར་དུ་རང་གི་ཁྱིམ་ཚང་གཉེར་སྐྱོང་མ་བྱས་ན། མི་དེས་དད་པ་སྤངས་པས་དད་པ་མེད་པ་ཞིག་ལས་སྡུག་གོ
1TI 5:9 ཡུགས་མོའི་མིང་ཐོ་ལ་བཀོད་ན། ཡུགས་མོ་ནི་ལོ་དྲུག་ཅུ་ཡན་ཡིན་པ་དང༌། སྐྱེས་པ་གཅིག་ཁོ་ནའི་བཟའ་ཟླ་ཡིན་པ།
1TI 5:10 བྱ་བ་བཟང་པོ་བྱེད་པའི་མིང་གྲགས་ཡོད་པ། ཕྲུ་གུ་གསོ་སྐྱོང་བྱས་པ། མགྲོན་པོ་ལ་སྣེ་ལེན་བྱས་པ། དད་ལྡན་གྱི་རྐང་པ་འཁྲུད་མྱོང་བ། དཀའ་སྡུག་འཕྲད་པའི་མི་ལ་རོགས་རམ་བྱས་པ་དང༌། བྱ་བ་བཟང་པོ་ཀུན་ལ་དམ་འཛིན་བྱེད་མཁན་ཞིག་ཡིན་དགོས།
1TI 5:11 ཡུགས་མོ་གཞོན་ནུ་མ་རྣམས་ཀྱི་མིང་ཐོ་ལ་མ་ཁོད་ཅིག གང་ཡིན་ཞེ་ན། མཱ་ཤི་ཀ་དང་འགལ་ནས་འདོད་ཆགས་རྒྱས་པའི་དུས་སུ་སླར་གཉེན་སྒྲིག་བྱེད་པར་འདོད་པས།
1TI 5:12 སྔར་བཞག་པའི་དམ་བཅའ་དོར་བས་ཉེས་ཆད་འཕོག་པར་འགྱུར།
1TI 5:13 དེ་མ་ཟད་ཁོ་ཚོ་ལེ་ལོ་ཅན་དུ་གྱུར་ནས་དོན་མེད་དུ་ཁྱིམ་ཚང་མང་པོར་འཁྱམས་ནས། རྒྱབ་བཤད་རྒྱག་མཁན་དང་གཞན་གྱི་དོན་ལ་ཐེ་ཇུས་བྱེད་མཁན་དུ་གྱུར་ཏེ་སྨྲ་མི་འོས་པའི་གཏམ་ཡང་སྨྲ།
1TI 5:14 དེའི་ཕྱིར་ངས་ཡུགས་མོ་གཞོན་ནུ་མ་རྣམས་སླར་གཉེན་སྒྲིག་བྱེད་ཅིང༌། ཕྲུ་གུ་སྐྱེད་དེ། ཁྱིམ་ཚང་སྐྱོང་བར་སྐུལ། དེས་ན་དགྲ་བོར་ང་ཚོར་སྐྱོན་འཛུགས་བྱེད་པའི་གོ་སྐབས་མི་རྙེད།
1TI 5:15 དེ་ཅིའི་ཕྱིར་ཞེ་ན། ཡུགས་མོ་ཁ་ཤས་དད་པ་སྤངས་ནས་བདུད་སཱ་ཏན་གྱི་རྗེས་སུ་འབྲངས་ཟིན་ནོ།
1TI 5:16 བུད་མེད་དད་ལྡན་སུ་ཞིག་གི་ཁྱིམ་ལ་གཉེར་སྐྱོང་བྱེད་མཁན་མེད་པའི་ཡུགས་མོ་ཞིག་ཡོད་ན། ཆོས་ཚོགས་ལ་ཁུར་པོ་མི་བཟོ་བའི་ཆེད་དུ་ཁོ་མོས་དེ་ལ་གཉེར་སྐྱོང་བྱེད་དགོས། དེ་ནས་ཆོས་ཚོགས་ཀྱིས་ཡུགས་མོ་ངོ་མ་རྣམས་ལ་གཉེར་སྐྱོང་བྱེད་ཐུབ།
1TI 5:17 ཆོས་ཚོགས་ཀྱི་འགན་འཁུར་བ་ལེགས་པར་བདག་སྐྱོང་བྱེད་མཁན་དང༌། ཁྱད་པར་དུ་ཁོ་རྣམས་ལས་ཆོས་སྟོན་པ་དང་སློབ་སྟོན་བྱེད་མཁན་ལ་དེ་བས་ལྷག་པའི་བརྩི་བཀུར་འཐོབ་འོས།
1TI 5:18 གང་ལགས་ཤེ་ན། གསུང་རབ་ཀྱི་མདོའི་ནང་འཁོད་པ་ལྟར། གཡུལ་གཏོང་བའི་གླང་གོག་ལ་ཁ་ར་མ་གཡོགས་ཤིག་ཅེས་དང༌། ལས་བྱེད་མཁན་ལ་གླ་ཆ་ཐོབ་པར་འོས་སོ་ཞེས་གསུངས།
1TI 5:19 སུ་ཞིག་གིས་ཆོས་ཚོགས་ཀྱི་འགན་འཁུར་བ་ཞིག་ལ་སྐྱོན་འཛུགས་བྱས་ན། མི་གཉིས་སམ་གསུམ་གྱིས་དཔང་པོ་མ་བྱས་ན་དེ་མ་རྩི།
1TI 5:20 གཞན་རྣམས་ཀྱིས་ཀྱང་སྡིག་ཉེས་བྱེད་པར་འཇིགས་པའི་ཕྱིར། སྡིག་ཉེས་མུ་མཐུད་ནས་བྱེད་བཞིན་པ་རྣམས་མི་ཐམས་ཅད་ཀྱི་དྲུང་དུ་བཀའ་བཀྱོན་བྱེད།
1TI 5:21 དཀོན་མཆོག་དང༌། མཱ་ཤི་ཀ་ཡེ་ཤུ་དང༌། ཁོང་གིས་བདམས་པའི་ཕོ་ཉ་རྣམས་ཀྱི་མདུན་དུ། ཕྱོགས་རིས་མེད་པར་བསླབ་བྱ་འདི་རྣམས་སྲུང་དགོས་ཤིང༌། ཕྱོགས་ཞེན་ཅིའང་མི་བྱེད་པར་ངས་ཁྱེད་ལ་ནན་གྱིས་སྐུལ།
1TI 5:22 མི་སུ་ཞིག་གི་ལུས་སྟེང་ལ་མྱུར་དུ་ལག་པ་མ་བཞག་པར་གཞན་གྱི་སྡིག་ཉེས་ཀྱི་ལས་དང་མ་འགྲོགས་ཤིག རང་ཉིད་གཙང་མར་སྲུང་ཞིག
1TI 5:23 ཁྱེད་ལ་ནད་མང་པོ་བྱུང་ཞིང༌། ལྟོ་ཆས་འཇུ་བར་ཕན་པའི་ཕྱིར། ད་ནས་བཟུང་ཆུ་ཁོ་ན་མི་འཐུང་བར་རྒུན་ཆང་ཉུང་ངུའང་འཐུང༌།
1TI 5:24 མི་ཁ་ཤས་ཀྱི་སྡིག་ཉེས་གསལ་པོ་ཡིན་པས། སྡིག་ཉེས་དེ་ཁོ་ཚོའི་སྔོན་ལ་ཁྲིམས་གཅོད་སར་འགྲོ མི་གཞན་རྣམས་ཀྱི་སྡིག་ཉེས་ནི་རྗེས་སུ་ངེས་པར་འོང༌།
1TI 5:25 དེ་དང་འདྲ་བར་བྱ་བ་བཟང་པོ་འགའ་ཤས་མངོན་གསལ་ཡིན་ལ། འགའ་ཤས་མངོན་གསལ་མིན་ཡང་སྦས་མི་ཐུབ་བོ། །
1TI 6:1 དཀོན་མཆོག་གི་མཚན་དང༌། ང་ཚོའི་ཆོས་ལ་སྨད་ར་མི་གཏོང་བའི་ཕྱིར། བྲན་གཡོག་གི་གཉའ་ཤིང་འོག་ཏུ་ཡོད་ཚད་ཀྱིས་རང་གི་བདག་པོ་ལ་བཀུར་སྟི་ཡོངས་སུ་བྱེད་འོས་པར་རྩི་དགོས།
1TI 6:2 སུ་ལ་བདག་པོ་དད་ལྡན་པ་ཞིག་ཡོད་པ་དེས་སྤུན་ཟླ་ཡིན་བསམས་ཏེ་བརྩི་མེད་མི་བྱེད་པར། ཕན་པ་འཐོབ་མཁན་ནི་དད་ལྡན་དང་གཅེས་པ་རྣམས་ཡིན་པས་ལྷག་པར་གཡོག་བྱེད་དགོས། དོན་འདི་ཚོ་སློབ་ཅིང་སྐུལ།
1TI 6:3 མི་སུ་ཞིག་གིས་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡང་དག་པའི་གསུང་དང༌། ཆོས་སེམས་དང་མི་མཐུན་པའི་བསྟན་པ་གཞན་ཞིག་བསྒྲགས་ན།
1TI 6:4 ཁོ་ནི་ང་རྒྱལ་ཅན་ཡིན་པས་གང་ཡང་མི་རྟོགས་ཤིང༌། ཚིག་གི་རྩོད་པ་དང་མི་མཐུན་པ་ལ་དགའ་བའི་ནད་ཕོག་པ་ཡིན། དེ་ཚོ་ལས་ཕྲག་དོག ཁ་རྩོད། སྨད་ར་གཏོང་བ། བསམ་པ་ངན་པ་དང༌།
1TI 6:5 ལོག་ལྟ་འཛིན་ཞིང་བདེན་པ་དང་བྲལ་བ་རྣམས་ཀྱི་ཁྲོད་དུ་རྒྱུན་ཆད་མེད་པའི་རྩོད་གླེང་བཅས་འབྱུང༌། ཁོ་ཚོའི་བསམ་པར་ཆོས་སེམས་ནི་ནོར་འཐོབ་པའི་ཐབས་ཤིག་ཡིན་པར་སྙམ།
1TI 6:6 དོན་དམ་དུ་ཆོག་ཤེས་དང་བཅས་པའི་ཆོས་སེམས་ནི་ནོར་གྱི་མཆོག་གོ
1TI 6:7 རྒྱུ་མཚན་ནི་ང་ཚོས་འཇིག་རྟེན་འདིར་གང་ཡང་ཁྱེར་མ་ཡོང་ཞིང༌། དེ་ནས་ཅི་ཡང་འཁྱེར་མི་ཐུབ་པས།
1TI 6:8 ང་ཚོར་ཟས་དང་གོས་ཡོད་ན་ཆོག
1TI 6:9 ཕྱུག་པོར་འགྱུར་འདོད་པ་རྣམས་ནི་བསླུ་བྲིད་དང༌། བླུན་ཞིང་གནོད་པའི་འདོད་ཆགས་ཀྱི་དོང་རྙི་ལ་ལྷུང༌། འདོད་ཆགས་དེ་ཚོའི་སྒོ་ནས་མི་རྣམས་ཕུང་བ་དང་འཇིག་པར་འགྱུར།
1TI 6:10 རྒྱུ་ནོར་ལ་ཆགས་པ་དེ་ངན་པ་སྣ་ཚོགས་ཀྱི་འབྱུང་རྩ་ཡིན། དེ་ལ་ཆགས་པས་མི་ཁ་ཤས་དད་པ་ལོག་ནས་རང་ཉིད་ལ་རྐྱེན་ངན་མང་པོ་འཕྲད་མྱོང༌།
1TI 6:11 འོན་ཀྱང་དཀོན་མཆོག་གི་སྐྱེས་བུ་ཁྱེད་རང་དོན་དེ་ཚོ་བསྐྱུར་ཞིང༌། དྲང་བདེན་གྱི་ལས། ཆོས་སེམས། དད་པ། བྱམས་སེམས། བཟོད་སེམས་དང༌། ཞི་དུལ་བཅས་ལ་འབད་བརྩོན་གྱིས།
1TI 6:12 ང་ཚོའི་དད་པའི་ལམ་གྱི་དོན་དུ་དམག་འཐབ་ལེགས་པོ་བྱོས། ཁྱེད་བོས་པའི་དཔག་ཏུ་མེད་པའི་ཚེ་དེ་ཟུངས། དཔང་པོ་མང་པོའི་དྲུང་དུ་ཁྱེད་ཀྱིས་དེ་ཁས་ལེན་ལེགས་པོ་བྱས།
1TI 6:13 སྲོག་ཆགས་ཐམས་ཅད་ལ་ཚེ་གནང་མཁན་དཀོན་མཆོག་དང༌། སྤྱི་ཁྱབ་ཕོན་ཏི་ཡུ་པི་ལ་ཏུའི་དྲུང་དུ་ཁས་ལེན་ལེགས་པར་མཛད་མཁན་མཱ་ཤི་ཀ་ཡེ་ཤུའི་སྤྱན་སྔར།
1TI 6:14 ངས་ང་ཚོའི་གཙོ་བོ་ཡེ་ཤུ་མཱ་ཤི་ཀ་མངོན་པ་སླར་མི་འབྱོན་པའི་བར་དུ་དྲི་མའམ། སྐྱོན་བརྗོད་རྒྱུ་ཅིའང་མེད་པར་བཀའ་དེ་སྲུང་དགོས་པ་ཁྱེད་ལ་ནན་གྱིས་སྐུལ།
1TI 6:15 དུས་ལ་འབབ་ཚེ་དཀོན་མཆོག་གིས། ། མཱ་ཤི་ཀ་ཉིད་མངོན་པར་མཛད། ། བླ་ན་མཐོ་བའི་དབང་སྒྱུར་མཁན། ། རྒྱལ་པོའི་རྒྱལ་པོ་གཙོ་བོའི་གཙོ། །
1TI 6:16 གཏན་དུ་འཆི་མེད་གཅིག་པུ་ལགས། ། གམ་བཅར་མི་ནུས་འོད་ཟེར་ནང༌། ། སུས་ཀྱང་མ་མཐོང་མཐོང་མི་འགྱུར། ། ཁོང་ལ་རྟག་ཏུ་བསྙེན་བཀུར་དང༌། ། འཛད་མེད་སྲིད་དབང་མངའ་བར་ཤོག ། ཨ་མེན། །
1TI 6:17 འཇིག་རྟེན་འདིའི་ཕྱུག་པོ་རྣམས་ཀྱིས་ང་རྒྱལ་མི་བྱེད་ཅིང༌། མི་རྟག་པའི་རྒྱུ་ནོར་ལ་རེ་ལྟོས་མི་བྱེད་པར། ང་ཚོས་ལོངས་སུ་སྤྱོད་པའི་ཕྱིར་ཐམས་ཅད་གནང་མཁན་དཀོན་མཆོག་ལ་བློ་གཏད་བྱེད་པར་སྐུལ།
1TI 6:18 ཁོ་ཚོ་བྱ་བ་བཟང་པོ་བྱེད་པ་དང༌། དོན་བཟང་པོ་སྒྲུབ་པ། གཏོང་ཕོད་ཆེ་བ་དང༌། སྦྱིན་པ་ལ་དགའ་བར་ཡང་སྐུལ།
1TI 6:19 དེ་ལྟར་བྱས་ན་ཚེ་སྲོག་ངོ་མ་འཛིན་པའི་ཆེད་དུ་ཁོ་ཚོས་རྨང་གཞི་བཟང་པོ་ཞིག་རང་གི་དུས་ཕྱི་མའི་ཕྱིར་འདིང་རྒྱུའི་གྲ་སྒྲིག་བྱེད།
1TI 6:20 ཀྱེ་ཐི་མོ་ཐེ། ཁྱེད་ལ་གང་བཅོལ་བ་དེ་སྲུངས་ཤིག ཆོས་དང་མི་མཐུན་ལ་སྙིང་པོ་མེད་པའི་བླུན་གཏམ་དང༌། འཇིག་རྟེན་པས་འཁྲུལ་ནས་གང་ལ་ཤེས་རབ་ཡིན་ཟེར་བ་དེ་བདེན་པ་དང་འགལ་བའི་སྟོང་གཏམ་འཛེམས་ཤིག
1TI 6:21 ཁ་ཤས་ཀྱིས་དོན་དེ་ཚོ་དང་ལེན་བྱས་ནས་དད་པ་སྤངས། ཐུགས་རྗེ་ཁྱེད་རྣམས་ལ་འཐོབ་པར་གྱུར་ཅིག །
2TI 1:1 མཱ་ཤི་ཀ་ཡེ་ཤུའི་ཐོག་ནས་དཔག་ཏུ་མེད་པའི་ཚེའི་ཞལ་ཆད་བཞིན་དུ། དཀོན་མཆོག་གི་ཐུགས་དགོངས་ལྟར་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་ཡིས།
2TI 1:2 གཅེས་པའི་བུ་ཐི་མོ་ཐེ་ལ་འཕྲིན་ཡིག་འདི་ཕུལ་ལོ། ཡབ་དཀོན་མཆོག་དང༌། མཱ་ཤི་ཀ་ཡེ་ཤུ་ང་ཚོའི་གཙོ་བོ་ནས་ཐུགས་རྗེ་དང༌། བྱམས་པ། ཞི་བདེ་ཁྱེད་ལ་འཐོབ་པར་གྱུར་ཅིག
2TI 1:3 ངས་དཀོན་མཆོག་ལ་བཀའ་དྲིན་ཆེ་ཞུ་སྟེ་སྔར་གྱི་མེས་པོ་ལྟར་སེམས་བཟང་པོས་དཀོན་མཆོག་ལ་ཞབས་ཏོག་བྱེད། སྨོན་ལམ་འདེབས་དུས་ཁྱེད་ཉིན་མཚན་མེད་པར་དྲན།
2TI 1:4 སྔར་ཁྱེད་དང་ཁ་བྲལ་དུས་ཀྱི་སྐྱོ་གདུང་གི་མིག་ཆུ་དྲན་པས་རང་སེམས་དགའ་བས་མྱོས་ཕྱིར་ཁྱེད་མཇལ་བར་ཤིན་ཏུ་འདོད།
2TI 1:5 ཁྱེད་ཀྱི་བཅོས་མིན་གྱི་དད་པ་དེ་དྲན། ངས་དད་པ་དེ་ནི་དང་པོ་ཁྱེད་ཀྱི་རྨོ་བོ་ལོ་ཨེ་སི་དང༌། ཡུམ་ཡུ་ནི་ཀེ་གཉིས་ཀྱི་སེམས་ལ་ཡོད་པ་དེ་ཁྱེད་ཀྱི་སེམས་ལའང་ཡོད་པ་ཐེ་ཚོམ་མེད་པར་ཤེས།
2TI 1:6 དེའི་ཕྱིར་ངས་ལག་པ་འཇོག་པའི་སྒོ་ནས་ཁྱེད་ཀྱི་ནང་ན་ཡོད་པའི་དཀོན་མཆོག་གི་གནང་སྦྱིན་དེ་མེ་རོ་ལྟར་སླར་གསོ་བར་དྲན་སྐུལ་བྱེད།
2TI 1:7 རྒྱུ་མཚན་ནི་དཀོན་མཆོག་གིས་ང་ཚོར་གནང་བ་དེ་འཇིགས་སྣང་གི་སེམས་མ་ཡིན་ཏེ། ནུས་མཐུ་དང་བྱམས་པ། རང་ཉིད་བཅུན་པའི་སེམས་བཅས་ཡིན་ནོ། །
2TI 1:8 དེའི་ཕྱིར་ང་ཚོའི་གཙོ་བོ་ལ་དཔང་པོ་བྱེད་པའི་ཆེད་དང༌། མཱ་ཤི་ཀའི་བཙོན་པར་གྱུར་བ་ངའི་ཕྱིར་གནོང་འགྱོད་མ་བྱེད། དཀོན་མཆོག་གི་ནུས་མཐུ་ལ་བརྟེན་ནས་འཕྲིན་བཟང་གི་དོན་དུ་ང་དང་མཉམ་དུ་སྡུག་བསྔལ་མྱོང་དགོས།
2TI 1:9 ང་ཚོས་བྱས་པའི་ལས་ཀྱི་རྐྱེན་གྱིས་མ་ཡིན་པར། རང་གི་ཐུགས་དགོངས་དང་ཐུགས་རྗེའི་རྐྱེན་གྱིས་དཀོན་མཆོག་གིས་ང་ཚོ་བསྐྱབས་ནས་དམ་པའི་སྤྱོད་ལམ་སྐྱོང་བར་བོས་གནང་མཛད། ཐུགས་རྗེ་དེ་ནི་འཇིག་རྟེན་མ་བཀོད་པའི་གོང་ནས་མཱ་ཤི་ཀ་ཡེ་ཤུ་བརྒྱུད་ང་ཚོར་གནང་བ་ཡིན།
2TI 1:10 དེ་ཡང་ད་ལྟ་ང་ཚོའི་སྐྱབས་མགོན་མཱ་ཤི་ཀ་ཡེ་ཤུ་འབྱོན་པའི་སྒོ་ནས་ཐུགས་རྗེ་དེ་མངོན་པར་མཛད། འཆི་བ་མེད་པར་མཛད་ནས། འཕྲིན་བཟང་བརྒྱུད་དཔག་ཏུ་མེད་པའི་ཚེ་དང་མི་འཇིག་པ་མངོན་སུམ་དུ་གནང༌།
2TI 1:11 འཕྲིན་བཟང་དེའི་དོན་ལ་ང་ནི་སྒྲོག་མཁན་དང༌། སྐུ་ཚབ། སློབ་དཔོན་ལ་བསྐོས་པ་ཡིན།
2TI 1:12 དེའི་ཕྱིར་སྡུག་བསྔལ་འདི་ཙམ་མྱོང་ཡང༌། ང་ལ་གནོང་འགྱོད་མེད། གང་ཡིན་ཟེར་ན། ངས་སུ་ལ་དད་པ་བྱས་པ་དེ་ངོ་ཤེས་ཤིང༌། གཙོ་བོའི་སླར་འབྱོན་པའི་ཉིན་མོ་དེའི་བར་དུ་ངས་ཁོང་ལ་གང་བཅོལ་བ་ཁོང་གིས་སྲུང་ཐུབ་པ་ཐེ་ཚོམ་མེད་པར་ཤེས་སོ།
2TI 1:13 མཱ་ཤི་ཀ་ཡེ་ཤུ་ལ་བརྟེན་ནས་དད་པ་དང་བྱམས་སེམས་ཀྱིས་ང་ལས་ཐོས་པའི་བསྟན་པ་ཡང་དག་པ་དེ་བརྟན་པོར་ཟུངས་ཤིག
2TI 1:14 ང་ཚོའི་ནང་དུ་བཞུགས་པའི་དམ་པའི་ཐུགས་ཉིད་ཀྱི་སྒོ་ནས་ཁྱེད་ལ་སྔར་གཏད་པའི་བདེན་པའི་བསྟན་པ་དེ་སྲུངས་ཤིག
2TI 1:15 ཕི་གེལ་ལུ་དང་ཧེར་མོ་གེ་ནཱེ་གཉིས་ཀ་ཚུད་པའི་ཨེ་ཞེ་ཡཱ་ཞིང་ཆེན་ལ་ཡོད་པའི་དད་ལྡན་པ་ཐམས་ཅད་ཀྱིས་ང་བསྐྱུར་བ་ཁྱེད་ཀྱིས་ཤེས།
2TI 1:16 གཙོ་བོས་ཨོ་ནེ་སི་ཕུ་རུ་ཡི་ཁྱིམ་ལ་ཐུགས་རྗེ་གནང་བར་ཤོག ཁོང་གིས་ང་ལ་ཐེངས་མང་སེམས་གསོ་བྱས་ཤིང༌། ང་བཙོན་པ་ཡིན་པར་ངོ་མི་གནོང་བར།
2TI 1:17 རོ་མཱ་གྲོང་ཁྱེར་ལ་སླེབས་རྗེས་བརྩོན་སེམས་ཀྱིས་ང་བཙལ་ནས་རྙེད།
2TI 1:18 གཙོ་བོའི་སླར་འབྱོན་པའི་ཉིན་མོ་དེར་གཙོ་བོས་ཁོང་ལ་ཐུགས་རྗེ་གནང་བར་ཤོག ཡང་ང་ཨེ་ཕེ་སུ་གྲོང་ཁྱེར་ལ་ཡོད་དུས་ཁོང་གིས་ང་ལ་རོགས་རམ་ཇི་ཙམ་གནང་བ་ཁྱེད་ཀྱིས་ལེགས་པར་ཤེས་སོ། །
2TI 2:1 དེའི་ཕྱིར་ངའི་བུ། མཱ་ཤི་ཀ་ཡེ་ཤུའི་ཐུགས་རྗེའི་ངང་ནས་སེམས་ཤུགས་ཆེན་པོ་སྐྱེད་ཅིག
2TI 2:2 ཁྱེད་ཀྱིས་དཔང་པོ་མང་པོའི་དྲུང་དུ་ང་ལས་ཐོས་པའི་བསྟན་པ་དེ་གཞན་ལའང་སློབ་ཐུབ་མཁན་གྱི་བློ་གཏད་ཆོག་པའི་མི་རྣམས་ལ་གཏོད།
2TI 2:3 མཱ་ཤི་ཀ་ཡེ་ཤུའི་དམག་མི་བཟང་པོ་ལྟར་ང་དང་མཉམ་དུ་སྡུག་བསྔལ་བཟོད་བསྲན་བྱེད།
2TI 2:4 དམག་འཐབ་པའི་དུས་སུ་དམག་མི་སུས་ཀྱང་རྒྱུན་གཏན་གྱི་བྱ་བ་མི་བྱེད། གང་ཡིན་ཞེ་ན། རང་ཉིད་ལ་དམག་སྐུལ་རྒྱག་མཁན་དམག་དཔོན་དེ་དགྱེས་པར་འདོད་པས་སོ།
2TI 2:5 ཡང་སྒྲིག་ལམ་བཞིན་དུ་འགྲན་བསྡུར་མ་བྱས་ན། ལུས་རྩལ་པ་སུའང་ལ་བྱ་དགའི་ཅོད་པན་མི་འཐོབ།
2TI 2:6 དཀའ་སྤྱད་འབད་བརྩོན་བྱེད་མཁན་གྱི་ཞིང་པ་ལ་ལོ་ཏོག་གི་སྐལ་བ་ཐོག་མ་དེ་འཐོབ་འོས་སོ།
2TI 2:7 ངས་སྨྲས་པའི་དོན་ལ་བསམ་གཞིགས་བྱེད། གང་ཡིན་ཞེ་ན། གཙོ་བོས་ཁྱེད་ལ་དོན་འདི་ཀུན་རྟོགས་པའི་ཤེས་རབ་གནང་བར་འགྱུར།
2TI 2:8 རྒྱལ་པོ་དཱ་བིད་ཀྱི་བུ་རྒྱུད་ཡེ་ཤུ་མཱ་ཤི་ཀ་འཆི་བ་ནས་སླར་གསོན་པ་དྲན་ཞིག དེ་ནི་ངས་སྟོན་པའི་འཕྲིན་བཟང་ཡིན།
2TI 2:9 འཕྲིན་བཟང་དེའི་དོན་ལ་ངས་ཉེས་ཅན་པ་བཞིན་ལྕགས་སྒྲོག་གིས་འཆིང་བའི་བར་དུ་སྡུག་བསྔལ་མྱོང༌། འོན་ཀྱང་དཀོན་མཆོག་གི་བཀའ་ནི་འཆིང་ཐབས་བྲལ།
2TI 2:10 དེའི་ཕྱིར་ཁོ་ཚོ་ལའང་མཐའ་མེད་པའི་གཟི་བརྗིད་དང༌། མཱ་ཤི་ཀ་ཡེ་ཤུའི་ཐོག་ནས་ཐར་པ་འཐོབ་པའི་ཕྱིར། བདམས་པ་རྣམས་ཀྱི་དོན་ལ་ངས་ཐམས་ཅད་བཟོད་པར་བྱེད།
2TI 2:11 གཏམ་འདི་ཁས་ལེན་བྱེད་འོས་པ་ཞིག་ཡིན་ཏེ། མཱ་ཤི་ཀ་དང་ལྷན་དུ་འཆི་གྱུར་ན། ། ཁོང་དང་མཉམ་དུ་ངེད་རྣམས་གསོན་ཡང་ངེས། །
2TI 2:12 གལ་ཏེ་བཟོད་པའི་གོ་ཆ་བརྟན་གྱུར་ན། ། ཁོང་དང་སྟབས་ཅིག་རྒྱལ་སྲིད་སྐྱོང་བར་ངེས། ། ངེད་ཀྱིས་ཁོང་ཉིད་དང་དུ་མི་ལེན་ན། ། ཁོང་གིས་ངེད་ཅག་རྒྱབ་ཏུ་བསྐྱུར་ཡང་ངེས། །
2TI 2:13 ངེད་ཀྱི་དད་སེམས་བསྐྱུར་ཡང་ཁོང་མིན་ཏེ། ། ཁོང་གིས་རང་ཉིད་སྤང་བ་སྲིད་ན་དཀོན། ། ཞེས་སོ། །
2TI 2:14 དོན་དེ་རྣམས་ཀྱི་སྐོར་ཁོ་ཚོར་དྲན་པར་སྐུལ། དཀོན་མཆོག་གི་སྤྱན་སྔར་ཁོ་ཚོར་ཚིག་གི་རྩོད་པ་འཛེམ་དགོས་པའི་ཁ་ཏ་བྱེད། དེ་ནི་ཕན་པ་མེད་ཅིང༌། ཐོས་མཁན་ཚོ་ཕུང་བར་འགྱུར་བ་ཁོ་ན་ཡིན་པས་སོ།
2TI 2:15 དཀོན་མཆོག་གི་གདེང་འཇོག་འཐོབ་པའི་ཕྱིར་འབད་བརྩོན་གྱིས་ཤིག ངོ་གནོང་མི་དགོས་པའི་ལས་བྱེད་མཁན་ལྟར་བདེན་པའི་བཀའ་གསལ་པོར་སྟོན།
2TI 2:16 དཀོན་མཆོག་ལ་བཀུར་སྟི་མི་བྱེད་པ་དང་འཆོལ་གཏམ་ལ་འཛེམས་ཤིག དེས་ཆོས་སེམས་མེད་པའི་གནས་སུ་འདྲེན་པར་བྱེད།
2TI 2:17 ཁོ་ཚོའི་གཏམ་དེ་ནད་སྐྲན་ལྟར་ཁྱབ། ཁོ་ཚོའི་ཁྲོད་དུ་ཧི་མེ་ནཱ་ཡུ་དང་ཕི་ལེ་ཏུ་ཡིན་ཏེ།
2TI 2:18 ཁོ་ཚོས་སླར་གསོན་དུ་མཛད་པ་བྱུང་ཟིན་ནོ་ཞེས་ཟེར་ནས་བདེན་པ་དང་བྲལ་ཞིང༌། ཁ་ཤས་དད་ལོག་སྐྱེ་བར་བྱེད།
2TI 2:19 འོན་ཀྱང་དཀོན་མཆོག་གི་བདེན་པའི་རྨང་གཞི་བརྟན་པོ་གནས་ཏེ། གཙོ་བོས་རང་གི་མི་རྣམས་སུ་ཡིན་མིན་མཁྱེན་ནོ་ཞེས་དང༌། གཙོ་བོའི་མཚན་བརྗོད་མཁན་ཐམས་ཅད་ཀྱིས་ངན་པ་སྤོང་དགོས་ཞེས་བཀའ་རྒྱའི་སྟེང་འཁོད་ཡོད།
2TI 2:20 དཔེར་ན་ཕོ་བྲང་ཞིག་གི་ནང་གསེར་དང་དངུལ་གྱི་སྣོད་ཆས་ཡོད་པ་མ་ཟད། ཤིང་དང་རྫའི་སྣོད་ཆས་ཀྱང་ཡོད། ཁ་ཅིག་དམིགས་བསལ་གྱི་དུས་སྐབས་དང༌། ཁ་ཅིག་རྒྱུན་དུ་བེད་སྤྱོད་གཏོང་ཕྱིར་ཡིན།
2TI 2:21 འོ་ན། གལ་ཏེ་སུ་ཞིག་གིས་རང་ཉིད་ངན་པ་ལས་དག་པར་བྱས་ན། ཁོ་ནི་དམིགས་བསལ་གྱི་སྣོད་ཡིན་ཏེ། གཙང་བ་དང༌། ཕོ་བྲང་གི་བདག་པོ་ལ་ཕན་པ། ལས་བཟང་པོ་ཀུན་བྱེད་པར་གྲ་སྒྲིག་ཡོད་པ་ཞིག་ཏུ་འགྱུར།
2TI 2:22 གཞོན་ནུའི་འདོད་པ་སྤངས་ནས། བཅོས་མིན་གྱིས་གཙོ་བོའི་མཚན་བརྗོད་མཁན་དང་བཅས་པར་དྲང་བདེན། དད་སེམས། བྱམས་སེམས། ཞི་བདེ་བཅས་འཚོལ་ཞིག
2TI 2:23 བླུན་ཞིང་རྨོངས་པའི་གཏམ་ལས་ཁ་རྩོད་འབྱུང་བར་ཤེས་པས་འཛེམས་ཤིག
2TI 2:24 ཡང་གཙོ་བོའི་ཞབས་ཕྱི་ནི་ཁ་རྩོད་ལ་མི་དགའ་བར། ཐམས་ཅད་ལ་ཞི་འཇམ་བྱེད་པ་དང༌། མཁས་པའི་སློབ་དཔོན། བཟོད་སེམས་དང་ལྡན་པ།
2TI 2:25 སེམས་དུལ་པོའི་ངང་ནས་རྒོལ་མཁན་རྣམས་ལ་ཡོ་བསྲང་བྱེད་དགོས། དཀོན་མཆོག་གིས་ཁོ་ཚོས་སྤྱོད་ངན་སྤངས་ཤིང་སེམས་བསྐྱུར་ལ་བདེན་པ་ཤེས་པར་གོ་སྐབས་གནང་ན།
2TI 2:26 ཁོ་ཚོ་བློ་ཁུག་སྟེ། བདུད་ཀྱི་འདོད་པ་བཞིན་དུ་བྱེད་པའི་ཕྱིར་བཙོན་དུ་བཟུང་ཡོད་ཀྱང༌། ཁོའི་རྙི་ལས་ཐར་བར་སྲིད་དོ། །
2TI 3:1 མཐའ་མཇུག་གི་དུས་སུ་དཀའ་རྙོག་འོང་བ་ཤེས་པར་གྱིས་ཤིག
2TI 3:2 གང་ལགས་ཤེ་ན། མི་རྣམས་ནི་རང་ལ་ཆགས་པ་དང༌། རྒྱུ་ནོར་ལ་ཞེན་པ། འུད་ཤོབ་བྱེད་མཁན། ང་རྒྱལ་ཅན། སྨད་ར་གཏོང་མཁན། ཕ་མའི་ཁ་ལ་མི་ཉན་པ། བཀའ་དྲིན་མི་ཚོར་བ། དམ་པ་མིན་པ།
2TI 3:3 བརྩེ་སེམས་མེད་པ། གཞན་ལ་གུ་ཡངས་མི་གཏོང་བ། དམའ་འབེབས་གཏོང་མཁན། རང་ཚོད་མི་ཟིན་པ། གདུག་རྩུབ་ཆེ་བ། བཟང་པོ་ལ་མི་དགའ་བ།
2TI 3:4 ངོ་ལོག་པ། རྗེས་འབྲས་ལ་མི་ལྟ་བ། ཁེངས་དྲེགས་ཅན། དཀོན་མཆོག་ལ་དགའ་བ་ལས་འདོད་ཆགས་ལ་ལྷག་པར་དགའ་བ།
2TI 3:5 ཆོས་སེམས་ཀྱི་ཚུལ་ཙམ་ལས་དོན་གྱི་སྙིང་པོ་དང་བྲལ། ཁོ་ཚོ་དང་མ་འགྲོགས་ཤིག
2TI 3:6 ཁོ་ཚོའི་ཁྲོད་དུ་ཁ་ཤས་གཡོ་ཐབས་ཀྱིས་ཁྱིམ་ཚང་ནང་འཛུལ་ནས། སྡིག་ཉེས་ཀྱིས་གནོན་ཞིང་འདོད་པ་སྣ་ཚོགས་ཀྱིས་མགོ་སྐོར་གཏོང་སླ་བའི་བུད་མེད་རྣམས་ལ་དབང་སྒྱུར།
2TI 3:7 བུད་མེད་དེ་ཚོས་རྒྱུན་དུ་བསླབས་ཀྱང་བདེན་པ་གཏན་ནས་རྟོགས་མི་ཐུབ།
2TI 3:8 ཡཱན་ནེ་དང་ཡཱམ་པ་རཱེ་ཞེས་ཟེར་མཁན་གཉིས་ཀྱིས་སྔར་ལུང་སྟོན་པ་མོ་ཤེ་ལ་རྒོལ་བ་ལྟར། དད་སེམས་མི་དྲང་བ་དང༌། ལོག་ལྟ་འཛིན་པའི་སེམས་པ་འདི་ཚོས་ཀྱང་བདེན་པ་ལ་རྒོལ།
2TI 3:9 འོན་ཀྱང་མོ་ཤེའི་དུས་སུ་བྱུང་བ་ལྟར། མི་ཐམས་ཅད་ཀྱི་དྲུང་དུ་ཁོ་ཚོའི་བླུན་སེམས་མངོན་པར་གསལ་བས། དར་བར་མི་འགྱུར།
2TI 3:10 འོན་ཀྱང་ཁྱེད་ཀྱིས་ངའི་བསྟན་པ་དང༌། སྤྱོད་ལམ། དམིགས་ཡུལ། དད་སེམས། བཟོད་སྒོམ། བྱམས་སེམས། བཟོད་བསྲན།
2TI 3:11 ང་ལ་མནར་གཅོད་དང༌། ཨན་ཏི་ཡོག་ཡཱ་གྲོང་ཁྱེར་དང༌། ཨི་ཀོན་ཡཱུ་གྲོང་ཁྱེར། ལིས་ཏྲཱ་གྲོང་ཁྱེར་བཅས་སུ་ང་ལ་བྱུང་བའི་སྡུག་བསྔལ་ཤེས། ངས་སྡུག་བསྔལ་བཟོད་ཀྱང་དེ་ཚོ་ཐམས་ཅད་ལས་གཙོ་བོས་ང་བསྐྱབས་པར་མཛད།
2TI 3:12 དོན་དམ་དུ་མཱ་ཤི་ཀ་ཡེ་ཤུའི་ཐོག་ནས་ཆོས་དང་མཐུན་པའི་མི་ཚེ་སྐྱེལ་བར་འདོད་པ་ཐམས་ཅད་གནོད་འཚེ་མྱོང་བར་འགྱུར་རོ།
2TI 3:13 ཡང་ངན་སེམས་ཅན་དང་མགོ་སྐོར་གཏོང་མཁན་རྣམས་མགོ་སྐོར་ཐེབས་ཤིང༌། གཞན་ལའང་བསླུ་བྲིད་བྱེད་དེ་སྔར་ལས་ཀྱང་ངན་པར་འགྲོ
2TI 3:14 འོན་ཀྱང་ཁྱེད་ཀྱིས་སུ་ལས་བསླབས་པ་ཤེས་པས་གང་སྦྱངས་པ་དང༌། དེའི་ངེས་ཤེས་རྙེད་པའི་དོན་རྣམས་མུ་མཐུད་སེམས་ལ་བརྟན་པོར་ཟུངས་དགོས།
2TI 3:15 ཡང་ཁྱེད་ཀྱིས་ཆུང་ངུ་ནས་དམ་པའི་གསུང་རབ་ཤེས། དེས་ནི་མཱ་ཤི་ཀ་ཡེ་ཤུ་ལ་དད་པའི་སྒོ་ནས་ཐར་པའི་ཤེས་རབ་ཐོབ་ཐུབ་བོ།
2TI 3:16 གསུང་རབ་ཐམས་ཅད་ནི་དཀོན་མཆོག་གི་ཐུགས་ཉིད་ལས་བྱུང་བས། སློབ་སྟོན་པ་དང༌། སྐྱོན་སྟོན་པ། ཡོ་བསྲང་བྱེད་པ། དྲང་བདེན་ཉིད་ཀྱི་ཕྱོགས་སུ་འདྲེན་པ་བཅས་མཆོག་ཏུ་ཕན།
2TI 3:17 དེ་ནི་དཀོན་མཆོག་ལ་གཏོགས་པའི་མི་རྣམས་ནུས་ཅན་དུ་འགྱུར་ཏེ། ལས་བཟང་པོ་ཀུན་བྱེད་ཐུབ་པའི་ཕྱིར་རོ། །
2TI 4:1 ངས་དཀོན་མཆོག་དང༌། ཤི་གསོན་གཉིས་ལ་ཁྲིམས་གཅོད་མཛད་མཁན་མཱ་ཤི་ཀ་ཡེ་ཤུའི་མདུན་དུ། ཁོང་སླར་མངོན་སུམ་དུ་འབྱོན་པ་དང༌། ཁོང་གི་རྒྱལ་སྲིད་བརྒྱུད་ནས་ཁྱེད་ལ་ནན་གྱིས་སྐུལ་ཏེ།
2TI 4:2 དཀོན་མཆོག་གི་བཀའ་སྒྲོགས་ཤིག དུས་ལ་བབ་ཀྱང་རུང་མ་བབ་ཀྱང་རུང་བཟོད་སེམས་ཆེན་པོ་དང་སློབ་གསོའི་ངང་ནས་མི་རྣམས་ལ་སྐྱོན་སྟོན་དང༌། ཁ་ཏ། སེམས་གསོ་བཅས་གྱིས་ཤིག
2TI 4:3 གང་ཡིན་ཟེར་ན། མི་རྣམས་ཀྱིས་ཡང་དག་པའི་བསྟན་པ་དང་ལེན་བྱེད་པར་མི་དགའ་བའི་དུས་ལ་འབབ་པར་འགྱུར། རང་གི་ཤེས་འདོད་པ་ལྟར་ཆོས་སྟོན་པ་མང་པོ་འཚོལ་ཞིང༌།
2TI 4:4 བདེན་པའི་བསྟན་པ་ལ་མ་ཉན་པར་སྙིང་པོ་མེད་པའི་སྒྲུང་ལ་ཡིད་ཆེས་པར་འགྱུར།
2TI 4:5 འོན་ཀྱང༌། ཁྱེད་ནི་རང་ཚོད་ཟུངས། སྡུག་བསྔལ་བཟོད། འཕྲིན་བཟང་སྒྲོགས། ཁྱེད་ཀྱི་ལས་འགན་ཐམས་ཅད་སྒྲུབས་ཤིག
2TI 4:6 ང་རང་ནི་གསེར་སྐྱེམས་ལྟར་མཆོད་པའི་ཚུལ་དུ་ཕུལ་ཏེ། ང་འཇིག་རྟེན་འདི་ལས་འདའ་བའི་དུས་ལ་འབབ་སོང༌།
2TI 4:7 ངས་དམག་འཐབ་ལེགས་པོ་བྱས་ཟིན། རྒྱུག་དགོས་པའི་ལམ་བརྒྱུགས་ཟིན། དད་པ་ཡང་བསྲུངས་སོ།
2TI 4:8 ད་ཕྱིན་ཆད་རྣམ་པར་དག་པ་མཚོན་པའི་ཅོད་པན་ངའི་དོན་དུ་བཞག་ཡོད། དེ་ནི་ཉིན་མོ་དེར་དྲང་བདེན་གྱི་ཁྲིམས་གཅོད་མཛད་མཁན་གཙོ་བོས་ང་ལ་གནང་བ་མ་ཟད། ཁོང་འབྱོན་རྒྱུར་གཏིང་ནས་རེ་སྒུག་བྱེད་མཁན་ཐམས་ཅད་ལའང་གནང་བར་འགྱུར་རོ། །
2TI 4:9 མགྱོགས་པོར་ངའི་རྩར་ཡོང་བར་བརྩོན་ཞིག
2TI 4:10 གང་ཡིན་ཞེ་ན། འཇིག་རྟེན་འདིར་ཆགས་མཁན་གྱི་མི་དེ་མཱ་ང་བསྐྱུར་ནས་ཐེ་ས་ལོ་ནི་ཀེ་གྲོང་ཁྱེར་ལ་སོང༌། ཀ་རེ་སི་ཀེན་ནི་ག་ལད་ཡཱ་ཡུལ་དང༌། ཐེ་ཏུ་ནི་དལ་མེ་ཡཱ་ཡུལ་ལ་སོང༌།
2TI 4:11 ལུ་ཀཱ་གཅིག་པུ་ང་དང་མཉམ་དུ་ཡོད། མར་ཀུས་ངའི་ཞབས་ཏོག་ཏུ་ཕན་པས་ཁྱེད་དང་མཉམ་དུ་ཁྲིད་ཤོག
2TI 4:12 ཏི་ཀི་ཀུ་ངས་ཨེ་ཕེ་སུ་གྲོང་ཁྱེར་ལ་བཏང༌།
2TI 4:13 ཏྲོ་ཡཱ་གྲོང་ཁྱེར་དུ་ངས་ཀར་པུའི་རྩར་བཞག་པའི་ཕྱི་གོས་དང༌། དཔེ་ཆ། ཁྱད་པར་དུ་ཀོ་ཤོག་རྣམས་ཁྱེད་ཡོང་བའི་སྐབས་སུ་འཁུར་ཤོག
2TI 4:14 ཟངས་བཟོ་བ་ཨ་ལིག་ཟན་ཌེར་ཡིས་ང་ལ་གནོད་པ་ཆེན་པོ་བྱས་བྱུང༌། ཁོའི་བྱ་བ་བཞིན་དུ་གཙོ་བོས་ལན་སློག་པར་འགྱུར།
2TI 4:15 ཁོས་ང་ཚོའི་བསྟན་པར་འབད་པས་རྒོལ་བས། ཁྱེད་ཀྱིས་ཀྱང་ཁོ་ལ་དོགས་ཟོན་གྱིས་ཤིག
2TI 4:16 ང་ཁྲིམས་དཔོན་གྱི་དྲུང་དུ་ཁྲིད་པའི་ཐེངས་དང་པོར་སུས་ཀྱང་ངའི་ཕྱོགས་མ་བྱས་པར་ཐམས་ཅད་ཀྱིས་ང་སྤངས་པས། དེའི་ལན་ཁོང་ཚོར་མི་འཕོག་པར་སྨོན།
2TI 4:17 འོན་ཏེ་ངའི་ཕྱོགས་སུ་ཞུགས་པའི་གཙོ་བོས་ང་ལ་སེམས་ཤུགས་གནང་བྱུང༌། དེ་ནི་ང་བརྒྱུད་ནས་འཕྲིན་བཟང་ཆ་ཚང་བསྒྲགས་ཏེ་ཡ་ཧུ་དཱ་པ་མིན་པ་ཐམས་ཅད་ཀྱིས་ཐོས་པའི་ཕྱིར་རོ། ཡང་ང་སེང་གེའི་ཁ་ནས་སྒྲོལ་བ་ལྟར་བསྐྱབས་པར་མཛད།
2TI 4:18 བྱ་བ་ངན་པ་ཐམས་ཅད་ལས་གཙོ་བོས་ང་སྐྱོབ་པར་མཛད་ངེས་ལ། ཁོང་གིས་ནམ་མཁའི་རྒྱལ་སྲིད་དུ་ང་བདེ་བར་འཁྲིད་དོ། ཁོང་ལ་དུས་གཏན་དུ་བསྟོད་པ་འབུལ་བར་ཤོག ཨ་མེན།
2TI 4:19 པི་རི་སི་ཀཱ་དང་ཨ་ཀུ་ལཱ་གཉིས་དང༌། ཨོ་ནེ་སི་ཕུ་རུ་ཡི་ཁྱིམ་གྱི་མི་རྣམས་ལ་འཚམས་འདྲི་ཞུས།
2TI 4:20 ཨེ་ར་སི་ཏུ་ནི་ཀོ་རིན་ཐུ་གྲོང་ཁྱེར་དུ་བསྡད། ཏྲོ་ཕེ་མུ་ནད་ཀྱིས་བཏབ་པས་མི་ལེ་ཏུ་གྲོང་ཁྱེར་ལ་བཞག་པ་ཡིན།
2TI 4:21 དགུན་དུས་མ་ཟིན་གོང་འདིར་ཡོང་བའི་འབད་རྩོལ་གྱིས་ཤིག ཡུ་པུ་ལུ་དང༌། པུ་དེན། ལི་ནུ། ཀ་ལོ་དི་ཡཱ་ལ་སོགས་པའི་སྤུན་ཟླ་ཐམས་ཅད་ཀྱིས་ཁྱེད་ལ་འཚམས་འདྲི་ཞུ།
2TI 4:22 གཙོ་བོ་ཁྱེད་ཀྱི་སེམས་ནང་བཞུགས་པར་ཤོག ཐུགས་རྗེ་ཁྱེད་རྣམས་ལ་འཐོབ་པར་གྱུར་ཅིག །
TIT 1:1 དཀོན་མཆོག་གིས་བདམས་པའི་མི་རྣམས་ཀྱི་དད་པ་འཕེལ་བའི་ཆེད་དང༌། བདེན་པ་རྟོགས་ཏེ་དད་ལྡན་རྣམས་ཀྱི་སྤྱོད་ཚུལ་གྱིས་དཀོན་མཆོག་གི་ཐུགས་མཉེས་པར་བྱེད་པའི་ཕྱིར། དཀོན་མཆོག་གིས་ང་པའུ་ལུ་ཞབས་ཕྱི་དང་ཡེ་ཤུ་མཱ་ཤི་ཀའི་སྐུ་ཚབ་ལྟར་བཀོད་དེ།
TIT 1:2 འཇིག་རྟེན་མ་བཀོད་པའི་སྔོན་ནས་དཀོན་མཆོག་རྫུན་གསུང་མི་སྲིད་པ་དེས་ཁོང་གི་མི་རྣམས་ལ་དཔག་ཏུ་མེད་པའི་ཚེ་ཡི་ཞལ་ཆད་གནང་བས་དེ་ཚོས་ཡིད་རྟོན་ནས་དེ་ལ་བརྟེན།
TIT 1:3 ང་ཚོའི་སྐྱབས་མགོན་དཀོན་མཆོག་གིས་ང་ལ་ཆོས་བསྟན་དགོས་པའི་བཀའ་གནང་བས། དུས་ལ་འབབ་སྐབས་ཁོང་གི་བཀའ་མངོན་པར་མཛད།
TIT 1:4 ང་ཚོའི་ཐུན་མོང་གི་དད་པའི་ཐོག་ནས་ངའི་བདེན་པའི་བུ་ཐེ་ཏུ་ལ་ང་པའུ་ལུ་ཡིས་འཕྲིན་ཡིག་འདི་འབུལ་ལོ། ། ཡབ་དཀོན་མཆོག་དང་ང་ཚོའི་སྐྱབས་མགོན་མཱ་ཤི་ཀ་ཡེ་ཤུ་ནས་དཀོན་མཆོག་གི་ཐུགས་རྗེ་དང་ཞི་བདེ་ཁྱེད་ལ་ལྡན་པར་གྱུར་ཅིག
TIT 1:5 ངས་ཁྱེད་ཀེ་རེ་ཊེ་ཡུལ་ལ་བཞག་དགོས་དོན་ནི་ཚར་མེད་པའི་ལས་རྣམས་སྒྲུབ་པའི་ཆེད་དང༌། ངས་བཀའ་བསྒོས་པ་ལྟར་ཁྱེད་ཀྱིས་གྲོང་ཁྱེར་རེར་འགན་འཁུར་བ་རྣམས་སྐོ་བའི་ཕྱིར་ཡིན།
TIT 1:6 འགན་འཁུར་བ་དེ་རྣམས་ནི་སྐྱོན་མེད་པ་དང༌། བཟའ་ཟླ་གཅིག་གི་ཁྱོ་ག་ཡིན་དགོས་པ་མ་ཟད། ཁོའི་ཕྲུ་གུ་ནི་དད་ལྡན་དང་བག་ཡོད་པ་ཞིག་ཡིན་པ་དང་ཕ་མའི་ཁ་ལ་མི་ཉན་པའི་སྐྱོན་བརྗོད་མེད་པ་ཞིག་ཡིན་དགོས།
TIT 1:7 དོ་དམ་པ་ནི་དཀོན་མཆོག་གི་འཕྲིན་ལས་སྒྲུབ་མཁན་ཡིན་པས་སྐྱོན་མེད་པ་ཡིན་དགོས་པ་དང༌། རང་ལ་མི་ཆགས་པ། ཁོང་ཁྲོ་ལངས་བདེ་བ། རྒུན་ཆང་ལ་སོགས་མང་པོ་འཐུང་མཁན། འཐབ་པ་དང༌། དངུལ་ལ་ཆགས་པ་མ་ཡིན་པར།
TIT 1:8 ཀུན་ལ་སེམས་རྩ་འཁོལ་བ་དང༌། བཟང་པོ་ལ་དགའ་བ། རང་ཚོད་ཟིན་པ། དྲང་པོ། དམ་པ། བག་ཡོད་དང་ལྡན་པ་བཅས་ཡིན་དགོས།
TIT 1:9 མི་གཞན་ལ་ཡང་དག་པའི་བསླབ་བྱ་སྟོན་པ་དང༌། བདེན་པའི་གནས་ལུགས་བརྟན་པོར་འཛིན་དགོས། དེ་ལྟར་བྱུང་ཚེ་གཞན་གྱིས་རྒོལ་བ་འཇོམས་པར་བྱེད་ནུས་པ་དང་བདེན་པའི་ཆོས་ཀྱིས་གཞན་ལ་སྐུལ་མ་གཏོང་ཐུབ།
TIT 1:10 གང་ལགས་ཟེར་ན། ངོ་རྒོལ་བྱེད་མཁན་མང་པོ་ཡོད། དེ་ཚོ་སྙིང་པོ་མེད་པའི་གཏམ་ཤོད་མཁན་དང་མགོ་སྐོར་གཏོང་མཁན་ཡིན་ཏེ་མང་ཆེ་ཤོས་ཡ་ཧུ་དཱ་པའི་ཆོས་ཀྱི་རྟགས་བརྒྱབ་དགོས་ཟེར་བའི་ཕྱོགས་ཁག་ནས་ཡིན།
TIT 1:11 མི་འདི་རྣམས་ཀྱི་ཁ་བཀག་དགོས། གང་ཡིན་ཟེར་ན། དེ་ཚོས་དངུལ་འཐོབ་པའི་ཆེད་དུ་ཕན་མེད་ཀྱི་བསླབ་བྱ་སྟོན་པའི་སྒོ་ནས་མི་ཚང་མང་པོ་དད་ལོག་ཏུ་འགྱུར་བར་བྱེད།
TIT 1:12 ཀེ་རེ་ཊེ་པའི་སྙན་ངག་པ་ཞིག་གིས། ཀེ་རེ་ཊེ་པ་རྣམས་ཀྱིས་ནི། ། རྟག་ཏུ་རྫུན་གཏམ་ཁོ་ན་སྨྲ། ། གཅན་གཟན་ངན་པ་དང་འདྲ་བའི། ། གྲོད་ཆེན་ལེ་ལོ་ཅན་ཞིག་ཡིན། ། ཞེས་བཤད།
TIT 1:13 གོང་དུ་བཤད་པ་དེ་ནི་བདེན་པ་ཡིན། དེ་ཚོའི་དད་པ་སྐྱོན་མེད་པར་འབྱུང་བའི་ཆེད་དང༌། དེ་ཚོས་ཡ་ཧུ་དཱ་པའི་སྙིང་པོ་མེད་པའི་སྒྲུང་ཡང་ན་བདེན་པ་སྤོང་མཁན་གྱི་བསྟན་པ་ལ་དོ་སྣང་མི་བྱེད་པའི་ཆེད་དུ་དེ་ཚོར་ནན་གྱིས་སྐུལ།
TIT 1:15 བཅོས་མིན་གྱི་མི་རྣམས་ལ་དངོས་པོ་ཐམས་ཅད་གཙང་མ་ཡིན། མི་གཙང་མ་དང་དད་མེད་པ་རྣམས་ལ་གང་ཡང་གཙང་མ་མིན། གང་ལགས་ཟེར་ན། དེ་ཚོའི་བློ་དང་སེམས་ངན་རུལ་དུ་གྱུར་བས་སོ།
TIT 1:16 དེ་ཚོས་དཀོན་མཆོག་ངོ་ཤེས་ཞེས་ཟེར་ཡང་ལས་ངན་བྱེད་པའི་སྒོ་ནས་ཁོང་ངོ་མི་ཤེས་པ་མཚོན་པས། དེ་ཚོ་ནི་སྐྱུག་བྲོ་བ་དང༌། ཁ་ལ་མི་ཉན་པ། ལས་བཟང་པོ་གང་ཡང་བྱེད་མི་ཐུབ་པ་ཡིན་ནོ། །
TIT 2:1 འོན་ཀྱང་ཁྱེད་ཀྱིས་སྐྱོན་མེད་པའི་བསྟན་པ་དང་མཐུན་པའི་ཆོས་སྟོན་ཅིག
TIT 2:2 རྒད་པོ་རྣམས་ནི་ཚོད་ཤེས་པ་དང༌། བཙུན་པ། རང་ཚོད་ཟིན་པ་མ་ཟད། དད་པ་དང༌། བྱམས་པ། བཟོད་པ་དང་ལྡན་པ་བཅས་སྐྱོན་མེད་དུ་གནས་དགོས་པར་ཁྱེད་ཀྱིས་ཆོས་སྟོན་དགོས།
TIT 2:3 དེ་བཞིན་དུ་རྒད་མོ་རྣམས་སྤྱོད་ཚུལ་དམ་པ་དང༌། རྒུན་ཆང་ལ་སོགས་མང་པོ་མི་འཐུང་མཁན། དམའ་འབེབས་མི་གཏོང་བ། བཟང་པོ་སྟོན་མཁན་བཅས་ཡིན་དགོས་པར་ཁྱེད་ཀྱིས་ཆོས་སྟོན་དགོས།
TIT 2:4 དེ་ནས་རྒད་མོ་རྣམས་ཀྱིས་གཞོན་ནུ་མ་རྣམས་ལ་དེ་ཚོའི་ཁྱོ་ག་དང་ཕྲུ་གུ་ལ་གཅེས་པར་འཛིན་པ་དང༌། རང་ཚོད་ཟིན་པ། ལྷད་མེད་པ། ནང་ལས་བྱེད་པ། བཟང་པོ་བྱེད་པ། རང་གི་ཁྱོ་གའི་ཁ་ལ་ཉན་མཁན་ཡིན་དགོས་པ་སྟོན་པའི་ཕྱིར་རོ། དེ་ལྟར་སུས་ཀྱང་དཀོན་མཆོག་གི་བཀའ་ལ་སྨོད་པར་མི་བྱ།
TIT 2:6 དེ་བཞིན་ཁྱེད་ཀྱིས་གཞོན་ནུ་རྣམས་རང་ཚོད་ཟིན་མཁན་ཡིན་པར་སྐུལ་དགོས་ལ།
TIT 2:7 དོན་ཐམས་ཅད་ལས་བཟང་གི་དཔེ་རུ་བྱོས་ཤིག གལ་ཏེ་ཁྱེད་ཀྱི་ཆོས་བསྟན་པ་བཅོས་མིན་དང༌། བཙུན་པ།
TIT 2:8 སྐྱོན་མེད་པ། སྐྱོན་བརྗོད་བྱེད་མི་སྲིད་པ་བཅས་ཡིན་ན། ངོ་རྒོལ་བྱེད་མཁན་གྱིས་ང་ཚོའི་སྐོར་ངན་གཏམ་ཤོད་མི་ཐུབ་པས་ངོ་ཚ་བར་འགྱུར།
TIT 2:9 བྲན་གཡོག་རྣམས་ཀྱིས་བདག་པོའི་ཁ་ལ་ཉན་པ་དང༌། དོན་ཐམས་ཅད་ལ་དེ་ཚོ་དགའ་བར་བྱེད་པ། ཕྱིར་མི་རྒོལ་བ།
TIT 2:10 མི་རྐུ་བར་དྲང་པོ་ཡིད་ཆེས་བཅས་བྱེད་པར་སྐུལ་དགོས། དེ་ནི་ང་ཚོའི་སྐྱབས་མགོན་དཀོན་མཆོག་གི་བསྟན་པ་ལ་མི་རྣམས་ཀྱིས་བཀུར་སྟི་བྱེད་པའི་ཕྱིར་ཡིན།
TIT 2:11 མི་ཐམས་ཅད་སྐྱོབ་པའི་ཕྱིར་དཀོན་མཆོག་གི་ཐུགས་རྗེ་མངོན་པར་གྱུར།
TIT 2:12 དཀོན་མཆོག་གི་ཐུགས་རྗེ་དེས་ཆོས་མེད་པ་དང་འཇིག་རྟེན་གྱི་འདོད་ཆགས་དོར་ནས་དུས་འདིར་རང་ཚོད་ཟིན་པ་དང༌། དྲང་བ། དམ་པ་ཡིན་དགོས་པར་ང་ཚོར་སྟོན།
TIT 2:13 དུས་དེའི་རིང་ལ་ང་ཚོའི་རླབས་ཆེ་བའི་རེ་སྒུག་བྱེད་པ་ནི་བླ་ན་མེད་པའི་དཀོན་མཆོག་སྐྱབས་མགོན་ཡེ་ཤུ་མཱ་ཤི་ཀའི་གཟི་བརྗིད་མངོན་པ་བྱེད་རྒྱུ་དེ་ཡིན།
TIT 2:14 ཡེ་ཤུས་ང་ཚོ་ལས་ངན་ཐམས་ཅད་ལས་བླུ་རིན་གྱིས་ཐར་དུ་འཇུག་པ་དང༌། རང་གི་དོན་དུ་ལས་བཟང་བྱེད་པར་བརྩོན་སེམས་ཡོད་པའི་འབངས་མི་ལྷད་མེད་པར་མཛད་པའི་ཕྱིར་ཁོང་གིས་རང་གི་སྲོག་བློས་བཏང༌།
TIT 2:15 དོན་འདི་རྣམས་དབང་གིས་སྟོན་ཞིང༌། མི་རྣམས་ལ་སྐུལ་མ་དང་བཀའ་བཀྱོན་ཡང་གཏོང་ཞིག མི་སུས་ཀྱང་ཁྱེད་ལ་སྣང་མེད་བྱེད་དུ་མ་འཇུག་ཅིག །
TIT 3:1 དཔོན་རིགས་དང་དབང་སྒྱུར་མཁན་གྱི་བཀའ་ལ་ཉན་དགོས་པ་དང༌། ལས་བཟང་གང་ཡང་བྱེད་པར་གྲ་སྒྲིག་དགོས་པ།
TIT 3:2 མི་སུ་ལ་ཡང་དམའ་འབེབས་མི་གཏོང་བ། ཞི་བདེ་དང་བྱམས་སེམས་ཅན་ཡིན་པ། ཐམས་ཅད་ལ་ཡ་རབས་བཅས་བྱེད་པ་མི་རྣམས་ལ་དྲན་པར་སྐུལ།
TIT 3:3 གང་ཡིན་ཞེ་ན། ང་ཚོའང་སྔོན་མ་གླེན་པ་དང༌། ཁ་ལ་མི་ཉན་པ། མགོ་འཁོར་བ། འདོད་ཆགས་ལ་གཡོག་བྱེད་པ། ཕྲག་དོག་བྱེད་མཁན་ཡིན། དུས་དེར་གཞན་གྱིས་ང་ཚོར་སྡང་བར་བྱེད་ལ་ང་ཚོས་གཞན་ལའང་སྡང་བར་བྱེད།
TIT 3:4 འོན་ཀྱང་ང་ཚོའི་སྐྱབས་མགོན་དཀོན་མཆོག་གི་ཐུགས་རྗེ་དང་བྱམས་པ་མངོན་པར་གྱུར་སྐབས།
TIT 3:5 ང་ཚོའི་དགེ་བའི་ལས་ལ་བརྟེན་ནས་མ་ཡིན་པར། ཁོང་རང་གི་ཐུགས་རྗེའི་ཐོག་ནས་གསར་དུ་སྐྱེ་བའི་ཁྲུད་པ་དང་དམ་པའི་ཐུགས་ཉིད་ཀྱིས་གསར་དུ་མཛད་པ་བརྒྱུད་ནས་ཁོང་གིས་ང་ཚོ་སྐྱབས་པར་མཛད།
TIT 3:6 ང་ཚོའི་སྐྱབས་མགོན་ཡེ་ཤུ་མཱ་ཤི་ཀ་བརྒྱུད་ནས་ཁོང་གིས་དམ་པའི་ཐུགས་ཉིད་ང་ཚོར་ལྷག་པར་གནང་བ་ཡིན་ཏེ།
TIT 3:7 ཁོང་གི་ཐུགས་རྗེ་ཡི་སྒོ་ནས་ང་ཚོ་ཡང་དག་པར་གྱུར་བ་དང༌། ང་ཚོ་དཔག་ཏུ་མེད་པའི་ཚེ་ཡི་རེ་བ་ཡོད་པའི་ཤུལ་འཛིན་མཁན་དུ་འགྱུར་བའི་ཕྱིར་རོ། །
TIT 3:8 དོན་འདི་རྣམས་བདེན་པ་ཡིན་པས་ངའི་རེ་བར་ཁྱེད་ཀྱིས་ཡིད་རྟོན་ནས་སྒྲོག་པར་བྱེད། དེ་ནས་དད་ལྡན་རྣམས་ཀྱིས་ལས་བཟང་པོར་འབད་རྩོལ་བྱེད། དོན་འདི་ཚོ་བཟང་པོ་དང་མི་རྣམས་ལ་ཕན་པའི་ཕྱིར་ཡིན།
TIT 3:9 བླུན་པོའི་རྩོད་པ་དང༌། སྐྱེས་རབས། མི་མཐུན་པ། ཆོས་ཁྲིམས་ཀྱི་རྩོད་གླེང་ནི་ཕན་མེད་དང་དོན་མེད་ཡིན་པས་འཛེམས་ཤིག
TIT 3:10 ནང་འཁྲུག་ལ་དགའ་བའི་མིར་ཁ་ཏ་ཐེངས་དང་པོ་དང་གཉིས་པ་བྱས་པའི་རྗེས་སུ་སྤོངས་ཤིག
TIT 3:11 དེ་ལྟ་བུའི་མི་ནི་ལོག་པ་དང་སྡིག་ཉེས་ཅན་ཡིན་པར་ཤེས་ཏེ་རང་གིས་རང་ལ་ཁྲིམས་གཅོད་བྱས་ཚར་བ་ཡིན།
TIT 3:12 ངས་ཨར་ཏེ་མཱ་ཡང་ན་ཏི་ཀི་ཀུ་ཁྱེད་རྩར་གཏོང་སྐབས་ཁྱེད་ཀྱིས་ནཱི་ཀོ་པོ་ལི་སི་གྲོང་ཁྱེར་དུ་ངའི་རྩར་ཡོང་བའི་འབད་རྩོལ་བྱོས་ཤིག ང་དགུན་དུས་དེར་གནས་པར་ཐག་གཅོད་བྱས་པས་སོ།
TIT 3:13 ཁྲིམས་རྩོད་མཁན་སི་ནཱ་སི་དང་ཨ་པོ་ལོ་སི་གཉིས་ལ་ལམ་བར་དུ་རོགས་པ་བྱས་ཏེ་ཁོ་ཚོར་གང་དགོས་ན་ཡང་གཏོང་ཞིག
TIT 3:14 དད་ལྡན་རྣམས་ལ་འབྲས་བུ་དང་ལྡན་པའི་ཆེད་དང༌། དགོས་པ་གལ་ཆེ་བར་རོགས་རམ་བྱེད་པའི་ཕྱིར་ང་ཚོའི་མི་རྣམས་ཀྱིས་རྒྱུན་དུ་ལས་བཟང་བྱེད་དགོས།
TIT 3:15 ང་དང་མཉམ་དུ་ཡོད་པའི་མི་ཐམས་ཅད་ཀྱིས་ཁྱེད་ལ་འཚམས་འདྲི་ཞུ། སུས་དད་པའི་ཐོག་ནས་ང་ཚོ་ལ་བརྩེ་བར་འཛིན་པ་ལ་འཚམས་འདྲི་ཞུས། ཐུགས་རྗེ་ཁྱེད་ཐམས་ཅད་དང་ལྡན་པར་གྱུར་ཅིག །
PHM 1:1 མཱ་ཤི་ཀ་ཡེ་ཤུའི་དོན་དུ་བཙོན་ནང་ཡོད་པའི་ང་པའུ་ལུ་དང༌། ང་ཚོའི་སྤུན་ཟླ་ཐི་མོ་ཐེ་གཉིས་ཀྱིས། ངེད་རྣམས་ཀྱི་གཅེས་པའི་སྤུན་ཟླ་དང་ལས་གྲོགས་ཕི་ལེ་མོན་དང༌།
PHM 1:2 ངེད་ཀྱི་སྲིང་མོ་ཨ་ཕི་ཡཱ། ང་ཚོའི་དཔུང་གྲོགས་ཨར་ཀིབ་པུ་དང༌། དེ་བཞིན་ཁྱེད་ཀྱི་ཁང་པར་འཛོམས་པའི་ཆོས་ཚོགས་སུ་འཕྲིན་ཡིག་འདི་ཕུལ་ལོ།
PHM 1:3 ང་ཚོའི་ཡབ་དཀོན་མཆོག་དང༌། གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ཚོར་འཐོབ་པར་གྱུར་ཅིག
PHM 1:4 ངའི་སྤུན་ཟླ་ཕི་ལེ་མོན། ངས་ཁྱེད་ཀྱི་དོན་ལ་སྨོན་ལམ་འདེབས་པའི་དུས་སུ་ངའི་དཀོན་མཆོག་ལ་རྟག་ཏུ་བཀའ་དྲིན་ཆེ་ཞུ།
PHM 1:5 གང་ཡིན་ཟེར་ན། ངས་ཁྱེད་ཀྱིས་དཀོན་མཆོག་གི་མི་ཐམས་ཅད་ལ་བྱམས་ཤིང༌། གཙོ་བོ་ཡེ་ཤུ་ལ་དད་པ་བྱེད་པའི་སྐོར་ཐོས་པས་སོ།
PHM 1:6 ང་ཚོའི་ཐུན་མོང་གི་དད་པ་ཡིས་མཱ་ཤི་ཀའི་ཐོག་ནས་ཁྱེད་ལ་ཡོད་པའི་བྱིན་རླབས་ཐམས་ཅད་ཀྱི་ཤེས་པ་རྒྱས་པར་འགྱུར་བའི་ཆེད་དུ་ངས་གསོལ་སྨོན་འདེབས།
PHM 1:7 ངའི་སྤུན་ཟླ། ཁྱེད་ཀྱིས་དཀོན་མཆོག་གི་མི་རྣམས་ལ་སེམས་གསོ་བར་བྱས་པས། ཁྱེད་ཀྱི་བྱམས་སེམས་ཀྱི་རྐྱེན་གྱིས་ང་ལ་དགའ་སྤྲོ་དང་སེམས་གསོ་ཆེན་པོ་བྱུང༌།
PHM 1:8 དེའི་ཕྱིར་མཱ་ཤི་ཀའི་ཐོག་ནས་ཁྱེད་ལ་འཚམ་པའི་བཀའ་སྒོ་བའི་བློ་སྟོབས་ཡོད་ནའང༌།
PHM 1:9 ང་པའུ་ལུ་མི་རྒན་པོ་དང༌། ད་ལྟ་མཱ་ཤི་ཀ་ཡེ་ཤུའི་དོན་དུ་བཙོན་པ་ཞིག་ཡིན་པས། བྱམས་པའི་རྐྱེན་གྱིས་ཁྱེད་ལ་ཞུ་བ་ཞིག་ཞུ།
PHM 1:10 ངའི་བུ་དང་འདྲ་བའི་ཨོ་ནེ་སི་མུ་ཡི་དོན་ལ་ཁྱེད་ལ་རེ་འབོད་བྱེད། བཙོན་དུ་ཡོད་དུས་ང་ནི་ཁོའི་ཕ་ལྟར་གྱུར།
PHM 1:11 སྔོན་མ་ཁོས་ཁྱེད་ལ་མ་ཕན་ཡང༌། ད་ལྟ་ཁྱེད་དང་ང་གཉིས་ལ་ཕན།
PHM 1:12 ང་རང་གི་སྙིང་དང་འདྲ་བའི་ཁོང་ཁྱེད་ཀྱི་རྩར་ཕྱིར་ལོག་གཏོང༌།
PHM 1:13 ང་འཕྲིན་བཟང་གི་རྐྱེན་གྱིས་བཙོན་ཁང་ལ་ཡོད་དུས། ཁྱེད་ཀྱི་ཚབ་ལ་ཁོང་གིས་ང་ལ་གཡོག་བྱེད་པའི་ཕྱིར་ང་དང་མཉམ་དུ་སྡོད་པར་དགའ།
PHM 1:14 འོན་ཏེ་ཁྱེད་ཀྱི་ཆོག་མཆན་མེད་པར་ཅི་ཡང་བྱེད་མི་འདོད། དེ་ནི་ཁྱེད་ཀྱི་ལས་བཟང་པོ་དབང་ཡོད་ཀྱིས་མ་ཡིན་པར་རང་འགུལ་གྱིས་བྱེད་པའི་ཕྱིར་ཡིན།
PHM 1:15 གཅིག་བྱས་ན་ཁྱེད་དང་དུས་རེ་ཞིག་ཁ་བྲལ་བའི་དོན་ནི་ཁོང་ཁྱེད་ལ་དུས་གཏན་དུ་འཐོབ་པའི་ཕྱིར་ཡིན་སྲིད།
PHM 1:16 བྲན་གཡོག་མ་ཡིན་པར། བྲན་གཡོག་ལས་ལྷག་པའི་གཅེས་པའི་སྤུན་ཟླའི་ཚུལ་དུ་ཁོ་ང་ལ་དེ་ལྟར་ཤིན་ཏུ་ལྷག་པར་མི་དང་གཙོ་བོ་གཉིས་ཀའི་ནང་དུ་ཁྱེད་རང་ལའང་དེ་ལྟར་ཡིན།
PHM 1:17 ང་ནི་ཁྱེད་ཀྱི་ལས་གྲོགས་ཡིན་པར་བརྩིས་ན། ང་རང་ཡིན་པ་ལྟར་ཁོང་ཡང་བསུས།
PHM 1:18 ཁོང་གིས་ཁྱེད་ལ་ཉེས་པ་ཞིག་བྱས་སམ། བུ་ལོན་ཞིག་བླངས་ན་ངའི་བུ་ལོན་ལྟར་རྩིས།
PHM 1:19 ང་པའུ་ལུ་རང་གི་ལག་པས་ཡི་གེ་འདི་བྲིས། ངས་བུ་ལོན་དེ་འཇལ། (ངས་ཁྱེད་ལ་ཁྱེད་ཉིད་ཀྱང་ངའི་བུ་ལོན་ཡིན་ཟེར་མི་དགོས་)
PHM 1:20 ངའི་སྤུན་ཟླ། གཙོ་བོའི་ངང་ནས་ཁྱེད་ནས་ང་ལ་ཕན་པ་ཞིག་དགོས། མཱ་ཤི་ཀའི་ཐོག་ནས་ང་ལ་སེམས་གསོ་བྱེད།
PHM 1:21 ཁྱེད་ཀྱིས་ངའི་ཁ་ལ་ཉན་རྒྱུ་ཡིན་པར་ཡིད་ཆེས་བརྟན་པོ་ཡོད། ཁྱེད་ཀྱིས་ངས་ཞུ་བ་ལས་ལྷག་པར་བྱེད་རྒྱུ་ཡིན་པར་ཤེས་ཏེ་ཁྱེད་ལ་ཡི་གེ་འདི་འབྲི།
PHM 1:22 ད་དུང་ངའི་དོན་ལ་གནས་ཚང་ཞིག་གྲ་སྒྲིག་གནང༌། གང་ཡིན་ཞེ་ན། ཁྱེད་ཚོའི་གསོལ་སྨོན་ལ་བརྟེན་ནས་ང་ཁྱེད་ཚོའི་རྩར་འོང་བའི་རེ་བ་ཡོད།
PHM 1:23 མཱ་ཤི་ཀ་ཡེ་ཤུའི་ཐོག་ནས་ངའི་བཙོན་གྲོགས་ཨེ་པབ་རཱ་དང༌།
PHM 1:24 ངའི་ལས་རོགས་ཡིན་པའི་མར་ཀུ་དང༌། ཨ་རིས་ཐར་ཀུ། དེ་མཱ། ལུ་ཀཱ་བཅས་ཀྱིས་ཁྱེད་ལ་འཚམས་འདྲི་ཞུ།
PHM 1:25 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོའི་སེམས་ལ་ལྡན་པར་གྱུར་ཅིག །
HEB 1:1 འདས་པའི་དུས་སུ་དཀོན་མཆོག་གིས་ལུང་སྟོན་པ་རྣམས་བརྒྱུད་ནས་ཐེངས་མང་པོ་དང་ཐབས་སྣ་ཚོགས་ཀྱིས་ང་ཚོའི་མེས་པོ་རྣམས་ལ་གསུངས་ཀྱང༌།
HEB 1:2 ད་མཐའ་མའི་དུས་འདིར་ཁོང་གི་སྲས་བརྒྱུད་ནས་ང་ཚོར་གསུངས་ཏེ། སྲས་ནི་ཡོད་དོ་ཅོག་གི་རྒྱུད་འཛིན་པར་བསྐོས་ཤིང༌། ཁོང་བརྒྱུད་ནས་དཀོན་མཆོག་གིས་འཇིག་རྟེན་ཁམས་དང་དེར་ཡོད་པ་ཐམས་ཅད་བཀོད་པ་གནང༌།
HEB 1:3 སྲས་ནི་དཀོན་མཆོག་གི་གཟི་བརྗིད་ཀྱི་འོད་ལས་མངོན་པར་གསལ་ཞིང༌། དཀོན་མཆོག་གི་ངོ་བོ་ཡང་དག་པར་མཚོན། ཁོང་གི་ནུས་མཐུ་དང་ལྡན་པའི་བཀའ་ཡིས་ཡོད་དོ་ཅོག་སྐྱོང་བར་མཛད། སྡིག་ཉེས་དག་པར་མཛད་ཐབས་གནང་ནས་ཞིང་ཁམས་སུ་གཟི་བརྗིད་དང་ལྡན་པའི་དཀོན་མཆོག་གི་ཕྱག་གཡས་སུ་བཞུགས།
HEB 1:4 དཀོན་མཆོག་གིས་སྲས་ལ་གནང་བའི་མཚན་ནི་དཀོན་མཆོག་གི་ཕོ་ཉ་རྣམས་ཀྱི་མཚན་ལས་ཆེ་བ་ཡིན་པ་ལྟར། དེ་བཞིན་སྲས་དེ་དཀོན་མཆོག་གི་ཕོ་ཉ་རྣམས་ལས་འཕགས་པའང་ཡིན།
HEB 1:5 དཀོན་མཆོག་གིས། ཁྱེད་ནི་ང་ཡི་བུ་ཉིད་ཡིན་པས་ན། ། དེ་རིང་ང་ནི་ཁྱེད་ཀྱི་ཕ་རུ་གྱུར། ། ཡང༌། ང་ནི་ཁྱེད་ཀྱི་ཕར་འགྱུར་ཅིང༌། ། ཁྱེད་ནི་ང་ཡི་བུ་རུ་འགྱུར། ། ཞེས་ཕོ་ཉ་རྣམས་ལས་སུ་ཞིག་ལ་གསུངས་མྱོང་ངམ།
HEB 1:6 ཡང༌། དཀོན་མཆོག་གིས་རང་གི་སྔོན་དུ་སྐྱེས་པའི་སྲས་འཇིག་རྟེན་ལ་མངགས་དུས། དཀོན་མཆོག་གི་ནི་ཕོ་ཉ་ཀུན། ། ཁོང་ལ་བསྙེན་བཀུར་བྱོས་ཤིག་ཨང༌། ། ཞེས་གསུངས།
HEB 1:7 ཕོ་ཉའི་སྐོར་ལ་དཀོན་མཆོག་གིས། ཁོང་གིས་ཕོ་ཉ་རླུང་ལྟར་དང༌། ། འཁོར་གཡོག་མེ་ལྕེ་ལྟ་བུར་མཛད། ། ཅེས་གསུངས།
HEB 1:8 འོན་ཀྱང་སྲས་ཀྱི་སྐོར་ལ། ཀྱེ། དཀོན་མཆོག་ཁྱེད་ཀྱི་སྲིད་ཁྲི་གཏན་དུ་གནས། ། ཁྱེད་ཀྱི་རྒྱལ་སྲིད་དྲང་བདེན་ཉིད་ཀྱིས་སྐྱོང༌། །
HEB 1:9 ཁྱེད་ཉིད་དྲང་བདེན་ལ་དགྱེས་ངན་པར་སྡང༌། ། དེའི་ཕྱིར་གང་ཞིག་ཁྱེད་ཀྱི་དཀོན་མཆོག་གིས། ། ཁྱེད་ལ་དགའ་བའི་སྣུམ་བྱུགས་གྲོགས་རྣམས་ལ། ། བྱུགས་པ་དེ་ལས་ལྷག་པ་ཉིད་དུ་གྱུར། ། ཞེས་གསུངས།
HEB 1:10 ཡང་ཁོང་གིས། ཀྱེ། གཙོ་བོ་ཉིད་ཀྱིས་ཐོག་མར་ས་གཞི་བཀོད། ། ཁྱེད་ཀྱི་ཕྱག་གིས་གནམ་ཡང་བསྐྲུན་པར་མཛད། །
HEB 1:11 གནམ་ས་འཇིག་ཀྱང་ཁྱེད་ཉིད་ནམ་ཡང་གནས། ། དེ་དག་གྱོན་གོས་བཞིན་དུ་ཟད་པར་འགྱུར། །
HEB 1:12 ཁྱེད་ཀྱིས་དེ་དག་ཕྱི་གོས་བཞིན་དུ་བསྒྲིལ། ། དེ་དག་ཕྱི་གོས་བཞིན་དུ་བརྗེ་བར་འགྱུར། ། འོན་ཏེ་ཁྱེད་ཉིད་གཏན་དུ་འགྱུར་བ་མེད། ། ཁྱེད་ཀྱི་ལོ་ཟླར་མུ་དང་མཐའ་མེད་དོ། ། ཞེས་གསུངས།
HEB 1:13 འོན་ཀྱང༌། ཁྱེད་ཀྱི་དགྲ་རྣམས་ཁྱེད་ཀྱི་ཞབས་འོག་ཏུ། ། ང་ཡིས་མ་བཅུག་བར་དུ་ཁྱེད་རང་ཉིད། ། ང་ཡི་གཡས་སུ་དེ་བར་བཞུགས་སུ་གསོལ། ། ཞེས་དཀོན་མཆོག་གིས་ཕོ་ཉ་རྣམས་ལས་སུ་ཞིག་ལ་གསུངས་མྱོང་ངམ།
HEB 1:14 དཀོན་མཆོག་གི་ཕོ་ཉ་ཐམས་ཅད་ནི་ཐར་པ་འཐོབ་པ་རྣམས་ཀྱི་དོན་དུ་མངགས་པའི་གཡོག་བྱེད་པའི་སེམས་ཉིད་མ་ཡིན་ནམ།
HEB 2:1 དེའི་ཕྱིར་ང་ཚོས་གང་ཐོས་པ་དེ་ལ་སྔོན་ལས་ལྷག་པར་དོ་སྣང་བྱེད་དགོས། དེ་མིན་ང་ཚོར་བདེན་པའི་ལམ་ལས་ཤོར་བའི་ཉེན་ཁ་ཡོད།
HEB 2:2 དཀོན་མཆོག་གི་ཕོ་ཉ་རྣམས་བརྒྱུད་ནས་བསྒྲགས་པའི་འཕྲིན་ནི་བདེན་པར་སྟོན་པ་ཡིན་ཞིང༌། ཆོས་ཁྲིམས་དང་འགལ་བ་དང་བཀའ་ལ་མ་ཉན་པ་རེ་རེར་ཚང་མར་འོས་པའི་ཉེས་ཆད་ཐོབ་པ་ཡིན་ན།
HEB 2:3 དེ་ལྟ་བུ་ཐར་པ་ཆེན་པོ་ལ་དོ་སྣང་མ་བྱས་ན་ང་ཚོ་ཇི་ལྟར་ཐར་བར་འགྱུར། ཐར་པ་དེ་ནི་གཙོ་བོ་ཡེ་ཤུ་བརྒྱུད་ནས་དང་པོར་བསྒྲགས་ཤིང༌། ཐོས་པ་རྣམས་ཀྱིས་ངེད་རྣམས་ལ་ར་སྤྲོད་བྱས།
HEB 2:4 ངོ་མཚར་ཆེ་བའི་རྟགས་དང་དོན། ངོ་མཚར་བའི་ལས་སྣ་ཚོགས་དང༌། དམ་པའི་ཐུགས་ཉིད་ཀྱི་གནང་སྦྱིན་རང་གི་ཐུགས་དགོངས་ལྟར་གནང་བའི་སྒོ་ནས་དཀོན་མཆོག་གིས་ཀྱང་བདེན་དཔང་མཛད།
HEB 2:5 ང་ཚོས་སྨྲ་བའི་མ་འོངས་པའི་རྒྱལ་སྲིད་དེ་ནི་དཀོན་མཆོག་གིས་ཕོ་ཉ་རྣམས་ཀྱིས་དབང་བསྒྱུར་དུ་བཅུག་པ་མ་མཛད།
HEB 2:6 འོན་ཀྱང་མི་ཞིག་གིས་མདོ་ཞིག་གི་ནང་ལ་དཔང་པོ་བྱེད་པའི་གཏམ་སྟེ། མི་ནི་ཅི་ཡིན་ཁྱེད་ཀྱིས་ཐུགས་འཁུར་མཛད། ། མི་བུ་ཅི་ཡིན་ཁྱེད་ཀྱིས་ལྟ་སྐྱོང་མཛད། །
HEB 2:7 གནས་སྐབས་ཁོ་ནི་ཕོ་ཉ་ལས་དམའ་མཛད། ། དཔལ་དང་བཀུར་འོས་ཅོད་པན་རྒྱན་དུ་མཛད། །
HEB 2:8 ཡོད་ཚད་ཁོ་ཡི་རྐང་པའི་འོག་ཏུ་བཅུག ། དཀོན་མཆོག་གིས་དོན་ཐམས་ཅད་ཁོའི་རྐང་པ་འོག་ཏུ་བཅུག་པར་མཛད་ནས་ཁོའི་འོག་ཏུ་མ་བཅུག་པ་གང་ཡང་ལུས་པར་མ་མཛད། འོན་ཀྱང་ཐམས་ཅད་ཁོའི་དབང་འོག་ཏུ་བཅུག་ཡོད་པ་ང་ཚོས་ད་ལྟ་མི་མཐོང་ཡང༌།
HEB 2:9 ཡེ་ཤུ་མཐོང༌། མཐོང་བ་ནི་ཕོ་ཉ་རྣམས་ལས་རེ་ཞིག་དམའ་བར་མཛད་པའི་ཡེ་ཤུ་ཡིན། ཁོང་ནི་ང་ཚོའི་དོན་ལ་འཆི་བའི་སྡུག་བསྔལ་མྱོང་བས་ད་ལྟ་ཁོང་བཀུར་སྟི་འོས་པ་དང་གཟི་བརྗིད་དང་ལྡན་པ་ཡིན། དེ་ནི་དཀོན་མཆོག་གི་ཐུགས་རྗེའི་སྒོ་ནས་མི་ཐམས་ཅད་ཀྱི་དོན་ལ་ཁོང་གིས་འཆི་བའི་སྡུག་བསྔལ་མྱོང་བའི་ཕྱིར་རོ།
HEB 2:10 ཡོད་དོ་ཅོག་བཀོད་པ་གནང་ཞིང༌། ཡོད་དོ་ཅོག་སུ་གཏོགས་པའི་དཀོན་མཆོག་གིས་སྲས་མང་པོ་གཟི་བརྗིད་དང་ལྡན་པར་མཛད་པའི་ཕྱིར། ཁོ་ཚོ་ཐར་བར་འཁྲིད་མཁན་གྱི་དེད་དཔོན་སྡུག་བསྔལ་མྱོང་བའི་སྒོ་ནས་ཡོངས་སུ་རྫོགས་པ་དེ་འོས་སོ།
HEB 2:11 མི་རྣམས་དམ་པ་རུ་མཛད་མཁན་ཡེ་ཤུ་དང་དམ་པ་རུ་འགྱུར་བ་ཐམས་ཅད་ལ་ཡབ་གཅིག་ཡོད་པས་ཡེ་ཤུས་ཁོ་ཚོར་སྤུན་ཟླ་ཞེས་གསུང་བ་ལ་ཐུགས་ཚ་མི་གནང༌།
HEB 2:12 ཁོང་གིས་དཀོན་མཆོག་ལ། ང་ཡིས་ཁྱེད་ཀྱི་མཚན་སྙན་སྤུན་ཟླར་བསྒྲག ། ཆོས་ཚོགས་ཁྲོད་དུ་ཁྱེད་ལ་བསྔགས་པ་བརྗོད། ། ཅེས་གསུངས།
HEB 2:13 ཡང་ཁོང་གིས། ང་ཡིས་ཁོང་ལ་དད་པས་བརྟེན་པར་བྱ། ། ཅེས་དང༌། ཡང༌། གཟིགས་དང༌། འདི་ལ་ཡོད་པའི་ང་དང་དཀོན་མཆོག་གིས། ། ང་ལ་གནང་བའི་བུ་ཕྲུག་མཉམ་དུ་ཡོད། ། ཅེས་གསུངས།
HEB 2:14 དཀོན་མཆོག་གི་སྲས་དང་སྲས་མོ་རྣམས་ལ་ཤ་ཁྲག་ལས་གྲུབ་པའི་མིའི་ལུས་པོ་དང་ལྡན་པ་ཡིན་པས་ཡེ་ཤུའང་མིའི་ལུས་པོ་དང་ལྡན་པར་འཁྲུངས། དེ་ནི་ཁོང་འགྲོངས་པའི་སྒོ་ནས་ཁོང་གིས་འཆི་བའི་བདག་པོ་སྟེ་བདུད་རྒྱལ་པོ་མེད་པར་མཛད་ཅིང༌།
HEB 2:15 འཆི་བའི་འཇིགས་པས་ཚེ་གང་བཅིངས་པའི་མི་རྣམས་ཡོད་པ་ཐམས་ཅད་སྐྱོབ་པའི་ཆེད་དུ་ཡིན།
HEB 2:16 ཁོང་གིས་དཀོན་མཆོག་གི་ཕོ་ཉ་རྣམས་ལ་རོགས་པ་མི་མཛད་དེ། ཨབ་ར་ཧམ་གྱི་རྒྱུད་པ་རྣམས་ལ་རོགས་པ་མཛད་པ་དེ་གསལ་ལོ།
HEB 2:17 དེའི་ཕྱིར་དཀོན་མཆོག་གི་ཐུགས་ཁྲོ་དག་པར་མཛད་དེ་མི་རྣམས་ཀྱི་སྡིག་ཉེས་སེལ་བ་དང༌། ཁོང་གི་སྤྱན་སྔར་བླ་ཆེན་ཐུགས་རྗེ་ཅན་དང་བློ་གཏད་ཆོག་པར་འགྱུར་བའི་ཆེད་དུ། ཡེ་ཤུ་ནི་རྣམ་པ་ཀུན་ནས་ཁོང་གི་སྤུན་ཟླ་དང་འདྲ་བ་འགྱུར་དགོས།
HEB 2:18 ཁོང་ལ་བསླུ་བྲིད་མྱོང་དུས་སྡུག་བསྔལ་བྱུང་བས། ཁོང་གིས་བསླུ་བྲིད་མྱོང་བ་རྣམས་ལ་རོགས་པ་མཛད་ཐུབ་བོ། །
HEB 3:1 དེའི་ཕྱིར་དཀོན་མཆོག་གི་ཞིང་ཁམས་སུ་བོས་པར་མཛད་པའི་དམ་པའི་སྤུན་ཟླ་རྣམས། ངེད་རྣམས་ཀྱིས་ཁས་ལེན་བྱེད་པའི་སྐུ་ཚབ་དང་བླ་ཆེན་གཙོ་བོ་ཡེ་ཤུ་དེ་ལ་བསམ་བློ་ཞིབ་ཕྲ་གཏོང༌།
HEB 3:2 དཀོན་མཆོག་གི་ཕོ་བྲང་ནང་ལ་ལུང་སྟོན་པ་མོ་ཤེ་བློ་གཏད་ཆོག་པ་ཡིན་པ་ལྟར། ཡེ་ཤུས་ཀྱང་ཁོང་བསྐོས་པར་མཛད་མཁན་གྱི་ཐུགས་དགོངས་ཐམས་ཅད་བསྒྲུབས།
HEB 3:3 འོན་ཀྱང་ཁང་པ་ལས་དེ་རྩིག་མཁན་ལ་ལྷག་པར་བཀུར་སྟི་བྱེད་འོས་པ་ལྟར། མོ་ཤེ་ལས་ཡེ་ཤུ་ནི་ལྷག་པར་དཔལ་དང་ལྡན་པར་བརྩིས་སོ།
HEB 3:4 གང་ཡིན་ཟེར་ན། ཁང་པ་རེ་རེ་ལ་རྩིག་མཁན་རེ་རེ་ཡོད་ཀྱང༌། ཡོད་ཚད་སྐྲུན་པར་མཛད་མཁན་ནི་དཀོན་མཆོག་ཡིན་ནོ།
HEB 3:5 མོ་ཤེ་ནི་དཀོན་མཆོག་གི་ཕོ་བྲང་ནང་བློ་གཏད་ཆོག་པའི་ཞབས་ཕྱི་ལྟ་བུ་ཞིག་ཡིན། དཀོན་མཆོག་གིས་མ་འོངས་པར་གསུང་བའི་བཀའ་ཡི་སྐོར་མོ་ཤེས་དཔང་པོ་བྱས།
HEB 3:6 འོན་ཀྱང་མཱ་ཤི་ཀ་ནི་དཀོན་མཆོག་གི་ཕོ་བྲང་ནང་བློ་གཏད་ཆོག་པའི་སྲས་ཞིག་ཡིན། གལ་ཏེ་ང་ཚོས་མཱ་ཤི་ཀ་ལ་བློ་གདེང་དང་དགའ་བའི་ངང་ནས་རེ་བ་བརྟན་པོར་གནས་ན་ང་ཚོ་ནི་ཕོ་བྲང་གི་ནང་འཁོར་ཡིན།
HEB 3:7 དེའི་ཕྱིར་དམ་པའི་ཐུགས་ཉིད་ཀྱིས་གསུངས་པ་ལྟར། ཁྱེད་ཚོས་དེ་རིང་ཁོང་གི་བཀའ་ཐོས་ན། །
HEB 3:8 འབྲོག་སྟོང་གནས་སུ་ཉམས་ཚོད་བྱས་པའི་སྐབས། ། ངོ་ལོག་དུས་ཀྱི་སེམས་གྱོང་ལྟར་མ་བྱེད། །
HEB 3:9 གནས་དེར་ཁྱེད་ཚོའི་མེས་པོས་ལོ་བཞི་བཅུར། ། ང་ཡི་མཛད་པ་མཐོང་ཡང་ཉམས་ཚོད་བླངས། །
HEB 3:10 དེའི་ཕྱིར་དེ་ཚོར་ཁྲོས་ནས་འདི་ལྟར་སྨྲས། ། དེ་ཚོའི་སེམས་ནི་རྟག་ཏུ་གྱ་གྱུ་ཅན། ། ང་ཡི་ལམ་ནི་དེ་ཚོས་ཅི་མ་ཤེས། །
HEB 3:11 དེས་ན་དེ་དག་ནམ་ཡང་ངའི་བདེ་བར། ། མི་འཇུག་ཅེས་པའི་ཁྲོ་བའི་མནའ་ཚིག་བོར། ། ཞེས་གསུངས་སོ། །
HEB 3:12 སྤུན་ཟླ་རྣམས། ཁྱེད་ཚོའི་ནང་ནས་སུ་ཞིག་ལའང་དད་མེད་ཀྱི་སེམས་ངན་པ་དང་ལྡན་ཏེ་གཏན་དུ་གནས་པའི་དཀོན་མཆོག་སྤོང་བ་ལ་དོགས་ཟོན་གྱིས་ཤིག
HEB 3:13 ཁྱེད་ཚོའི་ནང་ནས་སུ་ཡང་སྡིག་པས་བསླུས་ནས་སེམས་མཁྲེགས་པོ་མི་འགྱུར་བའི་ཕྱིར། དེ་རིང་ཞེས་ཟེར་བའི་རིང་འདིར་ཉིན་ལྟར་གཅིག་གིས་གཅིག་ལ་བློ་སྟོབས་སྤེལ་ཞིག
HEB 3:14 གང་ཡིན་ཞེ་ན། གལ་ཏེ་ང་ཚོའི་ཐོག་མའི་བློ་གདེང་མཐའ་མའི་བར་དུ་བརྟན་པོར་དང་དུ་བླངས་ན། ང་ཚོ་མཱ་ཤི་ཀ་དང་སྐལ་བ་མཉམ་པར་ལོངས་སུ་སྤྱོད་པར་གྱུར།
HEB 3:15 མདོའི་ནང་ལ། ཁྱེད་ཚོས་དེ་རིང་ཁོང་གི་བཀའ་ཐོས་ན། ། ངོ་ལོག་དུས་ཀྱི་སེམས་གྱོང་ལྟར་མ་བྱེད། ། ཅེས་འཁོད།
HEB 3:16 འོ་ན། ཐོས་ནས་ངོ་ལོག་བྱེད་མཁན་རྣམས་སུ་ཡིན། ལུང་སྟོན་པ་མོ་ཤེ་ཡིས་འགོ་འཁྲིད་དེ་ཨེ་ཇེབ་ཡུལ་ནས་ཐོན་པ་ཐམས་ཅད་མ་ཡིན་ནམ།
HEB 3:17 དཀོན་མཆོག་ལོ་བཞི་བཅུའི་བར་དུ་སུ་ལ་ཐུགས་མ་དགྱེས། སྡིག་ཉེས་བྱས་པས་འབྲོག་སྟོང་དུ་ཤི་བ་རྣམས་མ་ཡིན་ནམ།
HEB 3:18 ཡང་ཁོང་གིས་དབུ་མནའ་བཞེས་ཏེ་ངའི་བདེ་བའི་ནང་ལ་འཛུལ་རུ་མི་འཇུག་ཅེས་སུ་ལ་གསུངས། ཁོང་གི་བཀའ་ལ་མ་ཉན་པ་རྣམས་མ་ཡིན་ནམ།
HEB 3:19 དེའི་ཕྱིར་ཁོ་ཚོས་དད་པ་མ་བྱས་པའི་རྐྱེན་གྱིས་དེར་འཛུལ་མ་ཐུབ་པ་དེ་ང་ཚོས་ཤེས་སོ། །
HEB 4:1 དེ་བས་ན་ཁོང་གི་བདེ་བར་འཛུལ་བའི་ཞལ་ཆད་གནང་ཡོད་དུས་ཁྱེད་ཚོའི་ནང་ནས་སུ་ཡང་དེར་འཛུལ་མི་ཐུབ་སྙམ་པའི་བསམ་པ་ཙམ་ལའང་དོགས་ཟོན་གྱིས་ཤིག
HEB 4:2 ཁོ་ཚོ་ལྟར་ངེད་རྣམས་ལའང་འཕྲིན་བཟང་བསྒྲགས་པ་ཡིན། འོན་ཀྱང་འཕྲིན་བཟང་གི་བཀའ་ལ་ཉན་པ་རྣམས་མ་ཡིན་པ་ལྟར་དད་པ་མེད་པས་དེ་ཚོ་ལ་མ་ཕན།
HEB 4:3 འཇིག་རྟེན་ཁམས་བཀོད་པ་ནས་བཟུང་ཁོང་གི་འཕྲིན་ལས་གྲུབ་ཀྱང༌། དཀོན་མཆོག་གིས། དེས་ན་དེ་དག་ནམ་ཡང་ངའི་བདེ་བར། ། མི་འཇུག་ཅེས་པའི་ཁྲོ་བའི་མནའ་ཚིག་བོར། ། ཞེས་གསུངས། ང་ཚོ་དད་པ་བྱས་པ་རྣམས་བདེ་བ་དེའི་ནང་ལ་འཛུལ།
HEB 4:4 ཉི་མ་བདུན་པའི་སྐོར་མདོ་ཞིག་ན། ཡང་དཀོན་མཆོག་གིས་འཕྲིན་ལས་ཐམས་ཅད་གྲུབ་ནས་ཉི་མ་བདུན་པར་ངལ་གསོས་ནས་བཞུགས་ཞེས་གསུངས།
HEB 4:5 ཡང་མདོ་དེ་ལས། ཁོ་རྣམས་ངའི་བདེ་བའི་ནང་ལ་ནམ་ཡང་མི་འཛུལ་ཞེས་གསུངས།
HEB 4:6 སྔར་འཕྲིན་བཟང་ཐོས་པ་རྣམས་ཀྱིས་དད་པ་མ་བྱས་པས་བདེ་བ་དེར་མ་ཞུགས། གཞན་རྣམས་ནང་དུ་འཇུག་རྒྱུ་ཡིན་པས།
HEB 4:7 དཀོན་མཆོག་གིས་དེ་རིང་ཞེས་པའི་དུས་གཞན་ཞིག་ཡང་བསྐྱར་བསྐོས་པ་གནང་ཞིང༌། ཁོང་གིས་ལོ་མང་པོའི་རྗེས་སུ་རྒྱལ་པོ་དཱ་བིད་བརྒྱུད་ནས་གོང་དུ་བཤད་པ་ལྟར། ཁྱེད་ཚོས་དེ་རིང་ཁོང་གི་བཀའ་ཐོས་ན། ། སེམས་པ་མཁྲེགས་ཤིང་གྱོང་པོ་མ་བྱེད་ཅིག ། ཅེས་གསུངས།
HEB 4:8 གལ་ཏེ་ལུང་སྟོན་པ་ཡོ་ཤུ་ཨ་ཡིས་ཁོ་ཚོར་བདེ་བ་གནང་བ་ཡིན་ན། དཀོན་མཆོག་གིས་དེའི་རྗེས་སུ་ཉིན་མོ་གཞན་ཞིག་གི་སྐོར་མི་གསུང༌།
HEB 4:9 དེའི་ཕྱིར་དཀོན་མཆོག་གི་མི་རྣམས་ཀྱི་དོན་ལ་ངལ་གསོ་བའི་ཉིན་མོ་ཞིག་བཞག་ཡོད།
HEB 4:10 དཀོན་མཆོག་ཉིད་ཀྱི་འཕྲིན་ལས་གྲུབ་ནས་ངལ་གསོས་ནས་བཞུགས་པ་ལྟར། དཀོན་མཆོག་གི་བདེ་བའི་ནང་དུ་འཛུལ་མཁན་གྱིས་ཀྱང་རང་གི་ལས་རྣམས་བྱས་ཚར་ནས་ངལ་གསོ་བྱེད།
HEB 4:11 དེ་བས་ན་མི་སུས་ཀྱང་ཁོ་ཚོ་བཀའ་ལ་མ་ཉན་པའི་དཔེ་དེ་བླངས་པའི་སྒོ་ནས་མི་ནོར་བའི་ཕྱིར། ང་ཚོས་བདེ་བ་དེ་ལ་ཞུགས་པར་འབད་རྩོལ་ཤིན་ཏུ་བྱེད་དགོས།
HEB 4:12 དཀོན་མཆོག་གི་བཀའ་ནི་གསོན་ཤུགས་ལྡན་ཞིང་ནུས་མཐུ་དང་ལྡན་པ། རལ་གྲི་ཁ་གཉིས་མ་ཀུན་ལས་ཀྱང་རྣོ་བ་ཡིན་པས། བློ་དང་སེམས་དང༌། ཚིགས་དང་རྐང་མར་གཉིས་ཀུན་ལ་འཛུལ་ཞིང་འབྱེད་པ་མ་ཟད། བསམ་པ་དང་འདོད་དོན་རྣམས་འོས་མིན་ཐག་གཅོད་བྱེད།
HEB 4:13 གང་བཀོད་པ་ཐམས་ཅད་དཀོན་མཆོག་གི་སྤྱན་སྔར་མ་མངོན་པ་ཅི་ཡང་མེད། ང་ཚོས་གང་ཞིག་སུ་ལ་རྩིས་འབུལ་ཞུ་དགོས་པའི་སྤྱན་སྔར་ཐམས་ཅད་མངོན་པར་གསལ་ལོ། །
HEB 4:14 དཀོན་མཆོག་གི་སྲས་ཡེ་ཤུ་དཀོན་མཆོག་གི་ཞིང་ཁམས་སུ་ཕེབས་པའི་བླ་ཆེན་གཙོ་བོ་ཁྱད་དུ་འཕགས་པ་ངེད་རྣམས་ལ་ཡོད་པས། ང་ཚོས་ཁས་ལེན་བྱེད་པའི་དད་པ་དེ་དམ་པོར་འཛིན་དགོས།
HEB 4:15 ངེད་རྣམས་ཀྱི་བླ་ཆེན་གཙོ་བོས་ང་ཚོའི་ཞན་ཆ་མཁྱེན། གང་ལགས་ཟེར་ན། ང་ཚོ་དང་འདྲ་བར་རྣམ་པ་ཀུན་ནས་ཉམས་ཚོད་མྱོང་ཡང༌། སྡིག་པ་མ་མཛད།
HEB 4:16 དེའི་ཕྱིར་ང་ཚོར་བཀའ་དྲིན་དང༌། རོགས་པ་དགོས་པའི་དུས་སུ་ཐུགས་རྗེ་འཐོབ་པའི་ཕྱིར། ཐུགས་རྗེ་དང་ལྡན་པའི་དཀོན་མཆོག་གི་བཞུགས་ཁྲིའི་དྲུང་དུ་གདེང་ཚོད་དང་ལྡན་པའི་སྒོ་ནས་འགྲོའོ། །
HEB 5:1 བླ་ཆེན་གཙོ་བོ་རེ་རེ་བཞིན་མི་རྣམས་ཀྱི་ཁྲོད་ནས་བདམས། ཁོང་ནི་དཀོན་མཆོག་གི་སྤྱན་སྔར་མི་རྣམས་ཀྱི་ཚབ་བྱེད་པ་དང༌། སྡིག་ཉེས་དག་པའི་ཕྱིར་དཀོན་མཆོག་ལ་འབུལ་བ་དང་དམར་མཆོད་རྣམས་འབུལ་བའི་ཆེད་དུ་སྐོ།
HEB 5:2 མི་ཤེས་པ་དང་ལམ་ནོར་བ་རྣམས་ལ་བཟོད་པ་དང་ལྡན་པར་སྙིང་རྗེ་བྱེད་ཐུབ། གང་ལགས་ཤེ་ན། ཁོ་རང་ལ་ཡང་ཞན་ཆ་ཡོད་པས།
HEB 5:3 མི་རྣམས་ཀྱི་ཆེད་དུ་མ་ཟད། རང་ཉིད་ཀྱི་སྡིག་ཉེས་དག་པའི་དོན་དུའང་དམར་མཆོད་འབུལ་དགོས།
HEB 5:4 སུ་ལ་ཡང་རང་འདོད་པའི་རྐྱེན་གྱིས་གོ་ས་དེ་མི་ལེན་པར། བླ་ཆེན་གཙོ་བོ་ཨ་རོན་ལྟར་དཀོན་མཆོག་གིས་མི་དེ་བོས་པར་མཛད་པ་ཁོ་ནར་འཐོབ།
HEB 5:5 དེ་བཞིན་དུ་བླ་ཆེན་གཙོ་བོར་འགྱུར་བའི་ཕྱིར་མཱ་ཤི་ཀ་ཡིས་རང་ལ་བཀུར་སྟི་མཛད་པ་མ་ཡིན་པར། དཀོན་མཆོག་གིས་ཁོང་བསྐོས་ཏེ། ཁྱེད་ནི་ང་ཡི་བུ་ཉིད་ཡིན་པས་ན། ། དེ་རིང་ང་ནི་ཁྱེད་ཀྱི་ཕ་རུ་གྱུར། ། ཞེས་གསུངས།
HEB 5:6 ཡང་མདོ་གཞན་ལས། མེལ་ཀི་ཟེ་དེག་གི་དཔེ་ལྟར། ། ཁྱེད་ནི་གཏན་གྱི་བླ་ཆེན་ཡིན། ། ཞེས་འཁོད།
HEB 5:7 ཡེ་ཤུ་འཇིག་རྟེན་འདིར་བཞུགས་པའི་དུས་སུ་བཤུམས་ཏེ་གསུང་སྐད་ཆེན་པོས་ཁོང་འཆི་བ་ལས་སྐྱོབ་ཐུབ་མཁན་དཀོན་མཆོག་ལ་གསོལ་སྨོན་དང་ཞུ་བ་ཕུལ་བས། དཀོན་མཆོག་ལ་བཀུར་སྟི་མཛད་པའི་རྐྱེན་གྱིས་ཁོང་ལ་གསན་ནོ།
HEB 5:8 ཁོང་ནི་སྲས་ཡིན་ཡང༌། ཁོང་གིས་སྡུག་བསྔལ་མྱོང་བའི་སྒོ་ནས་བཀའ་ལ་ཉན་པར་བསླབས་ཤིང༌།
HEB 5:9 ཡོངས་སུ་རྫོགས་པར་མཛད་ནས་ཁོང་གི་བཀའ་ལ་ཉན་མཁན་ཐམས་ཅད་ཀྱི་ཕྱིར་གཏན་དུ་ཐར་པ་ཐོབ་པའི་འབྱུང་ཁུངས་སུ་གྱུར་ཏེ།
HEB 5:10 དཀོན་མཆོག་གིས་ཁོང་ལ་མེལ་ཀི་ཟེ་དེག་དཔེ་ལྟར་བླ་ཆེན་གཙོ་བོར་བསྐོས་པར་མཛད།
HEB 5:11 དེའི་སྐོར་ལ་ང་ཚོར་སྨྲ་རྒྱུ་མང་པོ་ཡོད་ཀྱང༌། ཁྱེད་ཚོ་སེམས་གྱོང་པོར་གྱུར་བས་གསལ་བཤད་བྱེད་པར་ཁག་པོ་ཡིན།
HEB 5:12 ད་ལྟ་ཁྱེད་ཚོ་སློབ་དཔོན་གྱུར་དགོས་ཀྱང༌། མི་ཞིག་གིས་ཁྱེད་རྣམས་ལ་དཀོན་མཆོག་གི་བཀའ་ཡི་ཐོག་མའི་རྩ་དོན་ཡང་བསྐྱར་སློབ་དགོས། ཁྱེད་ཚོར་བྱིས་པ་ལྟར་ཟས་མིན་ཏེ་འོ་མ་དགོས།
HEB 5:13 གང་ཡིན་ཟེར་ན། འོ་མ་ཁོ་ན་འཐུང་མཁན་ནི་བྱིས་པ་ཡིན་པས་རྣམ་པར་དག་པའི་སྐོར་བསྟན་པ་དེ་མི་ཤེས།
HEB 5:14 འོན་ཀྱང་ཟས་ནི་སེམས་ཉིད་སྨིན་པ་རྣམས་ཀྱི་ཆེད་དུ་ཡིན། ཁོ་ཚོར་ལག་ལེན་བྱེད་པའི་སྒོ་ནས་བཟང་ངན་གྱི་དབྱེ་བ་འབྱེད་པའི་མཁས་པར་གྱུར་རོ། །
HEB 6:1 དེའི་ཕྱིར་མཱ་ཤི་ཀའི་རྩ་བའི་བསྟན་པའི་སྐོར་བཞག་ནས་ངེད་རྣམས་སྨིན་ཞིང་ཡོངས་སུ་རྫོགས་པར་འགྱུར་དགོས། དགེ་བ་གསོག་པའི་ལམ་སྟོང་པ་དོར་བ། དཀོན་མཆོག་ལ་དད་པ་དང༌།
HEB 6:2 ཁྲུས་གསོལ་དང༌། ཕྱག་འཇོག་པའི་བསྟན་པ་དང༌། འཆི་བ་ནས་སླར་གསོན་པར་འགྱུར་བ་དང༌། མཐའ་མའི་ཁྲིམས་གཅོད་བཅས་ཀྱི་རྨང་གཞིའི་བསྟན་པ་ཡང་ཡང་མི་སློབ།
HEB 6:3 དཀོན་མཆོག་གི་དགོངས་པ་ཡིན་ན་ང་ཚོས་དེ་ལྟར་བྱ།
HEB 6:4 ལན་གཅིག་བློ་སྒོ་ཕྱེ་ནས་དཀོན་མཆོག་གི་གནང་སྦྱིན་མྱོང་ཞིང༌། དམ་པའི་ཐུགས་ཉིད་དང་འགྲོགས་པར་གྱུར་བ་དང༌།
HEB 6:5 དཀོན་མཆོག་གི་བཀའ་བཟང་པོ་ཡིན་པར་ཤེས་པ་དང༌། མ་འོངས་པའི་དུས་ཀྱི་ནུས་མཐུ་མཐོང་ཟིན་པ་རྣམས་ནི།
HEB 6:6 དད་པ་དོར་ན། ཡང་བསྐྱར་སེམས་སྒྱུར་ཞིང་གསོ་བར་མི་སྲིད། གང་ཡིན་ཞེ་ན། དེ་ནི་ཁོ་ཚོ་རང་གིས་དཀོན་མཆོག་གི་སྲས་རྒྱང་ཤིང་སྒང་ལ་ཡང་བསྐྱར་བསད་ནས་ཁོང་ལ་མངོན་སུམ་དུ་མཐོང་ཆུང་བྱེད་པ་དང་མཚུངས་སོ།
HEB 6:7 དཔེར་ན་ཡང་ཡང་བབས་པའི་ཆར་ཆུ་འཐུང་བའི་ས་ཞིང་གིས་འདེབས་ལས་བྱེད་མཁན་ཞིང་པ་རྣམས་ལ་ཕན་པའི་འབྲས་བུ་བསྐྱེད་ན་དཀོན་མཆོག་གི་བྱིན་རླབས་འཐོབ།
HEB 6:8 འོན་ཀྱང་ཚེར་མ་དང་རྩྭ་ངན་བསྐྱེད་ན། ཕན་མེད་དང་དམོད་པ་ཕོག་ལ་ཉེ་ཞིང༌། མཐའ་མར་མེ་ཡིས་སྲེག་པར་འགྱུར།
HEB 6:9 གཅེས་པའི་སྤུན་ཟླ་རྣམས། ང་ཚོས་དེ་ལྟར་སྨྲས་ནའང་ཁྱེད་ཚོར་ཐར་པ་དང་འབྲེལ་བའི་བྱིན་རླབས་ཐོབ་པར་ང་ཚོས་ཡིད་རྟོན་བྱེད།
HEB 6:10 དཀོན་མཆོག་དྲང་བདེན་ཉིད་དང་ལྡན་པ་ཡིན་པས། ཁྱེད་ཀྱིས་བྱས་པའི་ལས་བཟང་པོ་དང༌། ཁོང་ལ་བརྩེ་སེམས་ཀྱི་སྒོ་ནས་སྔར་ཁོང་གི་མི་རྣམས་ལ་ཞབས་ཏོག་བྱས་པ་དང༌། ད་ལྟ་ཡང་བྱེད་པ་བརྗེད་པར་མི་མཛད།
HEB 6:11 ཡང་ང་ཚོས་ཁྱེད་ཚོ་རེ་རེ་བཞིན་བརྩོན་སེམས་དེ་ལྟར་ཚེའི་མཐའ་མའི་བར་དུ་སྟོན་པར་འགྱུར་བའི་རེ་བ་བྱེད། དེ་ནས་ཁྱེད་ཚོས་གང་རེ་སྒུག་བྱེད་པ་བདེན་པར་འབྱུང་ངེས་ཡིན།
HEB 6:12 དེ་ནི་ཁྱེད་ཚོ་ལེ་ལོ་ཅན་དུ་མི་འགྱུར་བར། དད་པ་དང་བཟོད་པའི་སྒོ་ནས་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་བགོ་སྐལ་འཐོབ་པ་རྣམས་ཀྱི་དཔེ་ལྟ་བྱེད་མཁན་དུ་འགྱུར་བའི་ཆེད་དུ་ཡིན།
HEB 6:13 དཀོན་མཆོག་གིས་མེས་པོ་ཨབ་ར་ཧམ་ལ་ཞལ་ཆད་གནང་བའི་ཚེ། རང་ཉིད་ལས་ཆེ་བ་ཞིག་མེད་པས་ཁོང་ཉིད་ཀྱིས་དཔང་དུ་བཙུགས་ཏེ་འདི་ལྟར་གསུངས།
HEB 6:14 ངས་ཁྱོད་ལ་ངེས་པར་དུ་བྱིན་གྱིས་བརླབས་ཤིང༌། ཁྱོད་ཀྱི་བུ་རྒྱུད་མང་དུ་སྤེལ་བར་བྱའོ་ཞེས་གསུངས།
HEB 6:15 དེའི་ཕྱིར་ཨབ་ར་ཧམ་གྱིས་ངང་རྒྱུད་རིང་པོས་བསྒུགས་ནས་གང་ཞལ་གྱིས་བཞེས་པ་དེ་ཐོབ།
HEB 6:16 མི་རྣམས་ཀྱིས་རང་ལས་ཆེ་བ་ཞིག་དཔང་དུ་བཙུགས་ཏེ་མནའ་སྐྱེལ། བརྟན་པོར་བྱེད་པའི་མནའ་ཡིས་རྩོད་རྙོག་ཀུན་ཞི་བར་བྱེད།
HEB 6:17 དེ་བཞིན་དུ་རང་ཉིད་ཀྱི་དགོངས་པ་འགྱུར་བ་མེད་པ་ཡིན་པར་ཞལ་ཆད་འཛིན་མཁན་རྣམས་ལ་སྟོན་པར་མཛད་པ་དགོངས་པས། དཀོན་མཆོག་གིས་དབུ་མནའ་བཞེས།
HEB 6:18 དཀོན་མཆོག་གིས་ཞལ་ཆད་དང་མནའ་གཉིས་གནང༌། དེ་ཚོ་གཉིས་འགྱུར་བ་མེད་པ་ཡིན། གང་ལགས་ཟེར་ན། དཀོན་མཆོག་གིས་རྫུན་གསུང་མི་སྲིད། དེ་ནི་དཀོན་མཆོག་གི་མདུན་དུ་སྐྱབས་འཐོབ་པའི་ཕྱིར་འབྲོས་མཁན་ང་ཚོར་སྐུལ་མ་ཐོབ་ཅིང༌། བློ་སྟོབས་ཆེན་པོས་ཁོང་གིས་གནང་བའི་རེ་བ་འཛིན་པའི་ཕྱིར་རོ།
HEB 6:19 རེ་བ་དེ་ནི་སེམས་ཀྱི་གཏིང་རྡོ་ལྟར་ངེས་ཤིང་བརྟན་པོ་ཡིན། དེས་ངེད་རྣམས་མཆོད་ཁང་ཆེན་མོའི་ནང་གི་ཡོལ་བ་བརྒྱུད་ནས་དཀོན་མཆོག་གི་གནས་མཆོག་ཏུ་འཁྲིད།
HEB 6:20 ཡེ་ཤུ་ནི་སྔོན་འགྲོ་བ་ལྟར་ང་ཚོའི་དོན་ལ་གནས་མཆོག་དེའི་ནང་དུ་ཕེབས་ཟིན། གནའ་བོའི་མེལ་ཀི་ཟེ་དེག་དཔེ་ལྟར་ཁོང་ནི་ངེད་རྣམས་ཀྱི་གཏན་གྱི་བླ་ཆེན་གཙོ་བོར་གྱུར་བ་ཡིན་ནོ། །
HEB 7:1 མེལ་ཀི་ཟེ་དེག་དེ་ནི་ཤཱ་ལེམ་གྲོང་ཁྱེར་གྱི་རྒྱལ་པོ་དང༌། བླ་ན་མེད་པའི་དཀོན་མཆོག་གི་མཆོད་དཔོན་ཡིན། མེས་པོ་ཨབ་ར་ཧམ་རྒྱལ་པོ་རྣམས་ལས་རྒྱལ་བའི་དམག་འཐབ་ནས་ཕྱིར་ལོག་པའི་དུས་སུ་མེལ་ཀི་ཟེ་དེག་ཁོང་དང་མཇལ་ནས་བྱིན་རླབས་གནང་ཞིང༌།
HEB 7:2 ཨབ་ར་ཧམ་གྱིས་ཁོང་ལ་བཅོམ་ནོར་ཐམས་ཅད་ལས་བཅུ་ཆ་གཅིག་ཕུལ། དང་པོ་མེལ་ཀི་ཟེ་དེག་གི་མཚན་གྱི་དོན་ནི་དྲང་བདེན་ཉིད་ཀྱི་རྒྱལ་པོ་དང༌། དེ་ནས་ཤཱ་ལེམ་གྱི་རྒྱལ་པོ་ཞེས་པའི་དོན་ནི་ཞི་བདེའི་རྒྱལ་པོ་ཡིན།
HEB 7:3 ཁོང་ལ་ཕའམ། མའམ། སྐྱེས་རབས་སམ། འཁྲུངས་འདས་ཀྱི་དུས་ཚོད་མེད། ཁོང་ནི་དཀོན་མཆོག་གི་སྲས་དང་འདྲ་བར་དུས་རྒྱུན་དུ་བླ་ཆེན་ཞིག་ལྟར་གནས་སོ།
HEB 7:4 ཁོང་ནི་ཅི་ཙམ་ཆེན་པོ་ཡིན་པར་གཟིགས་དང༌། ཐ་ན་མེས་པོ་ཨབ་ར་ཧམ་གྱིས་ཀྱང་ཁོང་ལ་དམག་འཐབ་ནས་བྱུང་བའི་བཅོམ་ནོར་ལས་བཅུ་ཆ་གཅིག་ཕུལ།
HEB 7:5 ལུང་སྟོན་པ་མོ་ཤེའི་ཆོས་ཁྲིམས་ལྟར་ན་ལེ་ཝིའི་རྒྱུད་པ་ཡིན་ཞིང༌། མཆོད་དཔོན་གྱི་གོ་གནས་ཐོབ་མཁན་རྣམས་ཀྱིས་ཨབ་ར་ཧམ་གྱི་བུ་རྒྱུད་ཡིན་ཡང་ཁོ་ཚོའི་སྤུན་ཡི་སི་ར་ཨེལ་པ་རྣམས་ནས་ཡོང་འབབ་ཀྱི་བཅུ་ཆ་གཅིག་སྡུད་དགོས།
HEB 7:6 འོན་ཀྱང་མེས་པོ་ལེ་ཝིའི་རྒྱུད་པ་མ་ཡིན་པའི་མེལ་ཀི་ཟེ་དེག་གིས་ཨབ་ར་ཧམ་ནས་ནོར་གྱི་བཅུ་ཆ་གཅིག་བསྡུས་ཏེ་དཀོན་མཆོག་གི་ཞལ་ཆད་འཛིན་མཁན་ཨབ་ར་ཧམ་ལ་བྱིན་རླབས་གནང༌།
HEB 7:7 ཆུང་ངུ་ལ་ཆེན་པོས་བྱིན་རླབས་གནང་བ་དེ་རྩོད་རྒྱུ་མེད།
HEB 7:8 ཕྱོགས་གཅིག་ནས་འཆི་རྒྱུ་ཡིན་པའི་མཆོད་དཔོན་རྣམས་ཀྱིས་ཡོང་འབབ་ཀྱི་བཅུ་ཆ་གཅིག་སྡུད་པ་དང༌། ཕྱོགས་གཞན་ནས་གསུང་རབ་ལས་གསུངས་པ་ལྟར་ནམ་ཡང་འཚོ་བའི་མི་དེས་བཅུ་ཆ་གཅིག་སྡུད།
HEB 7:9 ད་དུང་བཅུ་ཆ་གཅིག་སྡུད་མཁན་ལེ་ཝི་ཡིས་ཁོ་ཚོའི་མེས་པོ་ཨབ་ར་ཧམ་བརྒྱུད་ནས་མེལ་ཀི་ཟེ་དེག་ལ་བཅུ་ཆ་གཅིག་ཕུལ་བརྗོད་སྲིད།
HEB 7:10 གང་ཡིན་ཞེ་ན། མེལ་ཀི་ཟེ་དེག་གིས་ཨབ་ར་ཧམ་ཐུག་པའི་ཚེ་ལེ་ཝིའི་ས་བོན་ཁོའི་མེས་པོ་ཨབ་ར་ཧམ་གྱི་གཟུགས་པོའི་ནང་གནས་ཡོད་པའི་ཕྱིར་རོ།
HEB 7:11 ལེ་ཝིའི་མཆོད་དཔོན་གྱི་རྒྱུད་ལ་བརྟེན་ནས་ཆོས་ཁྲིམས་མི་རྣམས་ལ་གནང་བ་ཡིན། དེའི་རྒྱུད་ཀྱིས་དཀོན་མཆོག་གི་དགོངས་པ་སྐྱོན་མེད་པར་བསྒྲུབས་པ་ཡིན་ན། མཆོད་དཔོན་ཨ་རོན་དང་མི་འདྲ་བར་མེལ་ཀི་ཟེ་དེག་དང་འདྲ་བ་མཆོད་དཔོན་གཞན་ཞིག་ཅི་ལ་དགོས།
HEB 7:12 མཆོད་དཔོན་རྣམས་ཀྱི་ལམ་ལུགས་བརྗེ་བའི་སྐབས་སུ་ཆོས་ཁྲིམས་ཀྱང་བརྗེ་དགོས།
HEB 7:13 ང་ཚོས་བཤད་པའི་བླ་ཆེན་དེ་ནི་ཚོ་ཁག་གཞན་ལ་གཏོགས་ཏེ། ཚོ་ཁག་དེ་ནས་མི་སུས་ཀྱང་མཆོད་ཁྲི་ལ་ཞབས་ཏོག་རྩ་བ་ནས་བསྒྲུབས་མ་མྱོང༌།
HEB 7:14 ཚང་མས་ཤེས་གསལ་ལྟར་ངེད་རྣམས་ཀྱི་གཙོ་བོ་ཡེ་ཤུ་མེས་པོ་ཡ་ཧུ་དཱ་ཡི་རྒྱུད་པ་ཡིན། ཚོ་ཁག་དེའི་སྐོར་ལུང་སྟོན་པ་མོ་ཤེ་ཡིས་མཆོད་དཔོན་གྱི་སྐོར་ཅིའང་མ་གསུངས།
HEB 7:15 མེལ་ཀི་ཟེ་དེག་དང་འདྲ་བའི་མཆོད་དཔོན་གཞན་ཞིག་བྱུང་ན་དོན་དེ་ནི་སྔོན་ལས་གསལ་བར་འགྱུར།
HEB 7:16 གང་ལགས་ཤེ་ན། མི་དེ་ཆོས་ཁྲིམས་ཀྱི་བཀའ་ལྟར་བརྒྱུད་པ་ལ་བརྟེན་ནས་མ་ཡིན་པར། དཔག་ཏུ་མེད་པའི་ཚེའི་ནུས་མཐུ་ལ་བརྟེན་ནས་བླ་ཆེན་དུ་གྱུར།
HEB 7:17 ཁོང་གི་སྐོར་ལ། མེལ་ཀི་ཟེ་དེག་གི་དཔེ་ལྟར། ། ཁྱེད་ནི་གཏན་གྱི་བླ་ཆེན་ཡིན། ། ཞེས་འཁོད།
HEB 7:18 སྔོན་གྱི་སྒྲིག་ལམ་དེ་ནུས་མཐུ་དང་ཕན་ཐོགས་མེད་པས་ཕར་བཞག་པ་དང༌།
HEB 7:19 སྔོན་གྱི་ཆོས་ཁྲིམས་དེས་ཅིའང་ཡོངས་སུ་རྫོགས་པར་མ་བྱས་པས། དཀོན་མཆོག་གིས་རེ་བ་དེ་ལས་བཟང་བ་ཞིག་གནང༌། དེའི་སྒོ་ནས་ངེད་རྣམས་དཀོན་མཆོག་དང་ཉེ་བར་ཡོང༌།
HEB 7:20 དཀོན་མཆོག་གིས་ཡེ་ཤུ་བླ་ཆེན་དུ་གྱུར་བའི་དབུ་མནའ་བཞེས། འོན་ཀྱང་མི་གཞན་རྣམས་མནའ་དང་བྲལ་བར་བླ་ཆེན་དུ་གྱུར།
HEB 7:21 དཀོན་མཆོག་གིས་ཡེ་ཤུ་ཁོ་ནར་འདི་ལྟར་གསུངས་ཏེ། དཀོན་མཆོག་གིས་ནི་དབུ་མནའ་བཞེས། ། ཁོང་གི་བཀའ་ལ་འགྱུར་བ་མེད། ། ཁྱེད་ནི་གཏན་གྱི་བླ་ཆེན་ཡིན། །
HEB 7:22 དབུ་མནའ་བཞེས་པར་བརྟེན་ནས་ཡེ་ཤུའང་ཞལ་ཆད་སྔོན་ལས་བཟང་བའི་འགན་བཞེས་མཁན་དུ་གྱུར།
HEB 7:23 སྔོན་གྱི་མཆོད་དཔོན་རྣམས་མང་པོ་ཡོད་ཀྱང་འཆི་བས་བར་ཆད་དེ་གོ་སར་གནས་མ་ཐུབ།
HEB 7:24 འོན་ཀྱང་ཡེ་ཤུ་རྟག་ཏུ་གནས་པའི་རྐྱེན་གྱིས་བླ་ཆེན་གྱི་གོ་སར་འགྱུར་བ་མེད།
HEB 7:25 དེའི་ཕྱིར་ཁོང་གིས་ཁོ་ཚོའི་དོན་དུ་ཞུ་ངོ་མཛད་པའི་ཕྱིར་རྒྱུན་དུ་གསོན་པོར་བཞུགས་པས། ཁོང་བརྒྱུད་ནས་དཀོན་མཆོག་དང་ཉེ་བར་ཡོང་མཁན་རྣམས་ཡོངས་སུ་ཐར་བ་མཛད་ཐུབ།
HEB 7:26 དེ་ལྟར་བླ་ཆེན་མཆོག་དམ་པ། སྐྱོན་མེད་པ། དྲི་མ་མེད་པ། སྡིག་ཉེས་ཅན་རྣམས་དང་བྲལ་བ། ཞིང་ཁམས་རྣམས་ལས་མཐོ་བར་མཛད་པར་གྱུར་བའི་བླ་ཆེན་གཙོ་བོ་དེ་ནི་ང་ཚོར་དགོས་པ་དེའོ།
HEB 7:27 བླ་ཆེན་གཙོ་བོ་གཞན་རྣམས་དང་མི་འདྲ་བར་ཁོང་གིས་སྔོན་ལ་རང་དང་དེ་ནས་མི་རྣམས་ཀྱི་སྡིག་ཉེས་ཀྱི་དོན་ལ་དམར་མཆོད་ཉིན་ལྟར་འབུལ་མི་དགོས། འོན་ཀྱང་ཁོང་གིས་མི་རྣམས་ཀྱི་སྡིག་ཉེས་སེལ་བའི་ཕྱིར་རང་སྲོག་བློས་བཏང་གནང་བའི་སྒོ་ནས་གཅིག་པུས་རྟག་ཏུ་གནས་པ་དེ་བསྒྲུབས་སོ།
HEB 7:28 ཆོས་ཁྲིམས་ལྟར་ན་མི་རྣམས་བླ་ཆེན་གཙོ་བོར་སྐོ། ཁོ་ཚོ་མི་ཡིན་པས་ཞན་ཆ་ཅན་ཡིན་ཡང༌། ཆོས་ཁྲིམས་ཀྱི་རྗེས་སུ་བྱུང་བའི་དབུ་མནའ་ཡིས་སྲས་དེ་བསྐོས། ཁོང་ནི་ནམ་ཡང་ཡོངས་སུ་རྫོགས་པའི་བླ་ཆེན་དུ་གྱུར་རོ། །
HEB 8:1 ང་ཚོས་སྨྲ་བའི་སྙིང་དོན་གཙོ་བོ་གང་ཡིན་ཞེ་ན། ཞིང་ཁམས་ལ་བླ་ན་མེད་པའི་གཟི་བརྗིད་ཀྱི་བཞུགས་ཁྲིའི་གཡས་སུ་བཞུགས་ཏེ།
HEB 8:2 མི་རྣམས་ཀྱིས་མ་བཙུགས་པར་དཀོན་མཆོག་གིས་བཙུགས་པར་མཛད་པའི་གུར་མཆོག་ངོ་མ་དང༌། མཆོད་ཁང་ཡང་དག་པའི་ནང་ལ་ཞབས་ཏོག་མཛད་པའི་བླ་ཆེན་གཙོ་བོ་དེ་ང་ཚོར་ཡོད།
HEB 8:3 བླ་ཆེན་གཙོ་བོ་ཀུན་འབུལ་བ་དང་དམར་མཆོད་འབུལ་བའི་ཆེད་དུ་སྐོ་བས། བླ་ཆེན་གཙོ་བོ་འདི་ལའང་མཆོད་པ་གང་ཞིག་འབུལ་བར་དགོས།
HEB 8:4 ཆོས་ཁྲིམས་ལྟར་མཆོད་པ་འབུལ་མཁན་བླ་ཆེན་གཞན་ཡོད་པས། ཁོང་ད་ལྟ་འཇིག་རྟེན་འདིར་བཞུགས་པ་ཡིན་ན་བླ་ཆེན་དུ་རྩ་བ་ནས་མི་འགྱུར་བ་ཡིན།
HEB 8:5 ཁོ་ཚོའི་མཆོད་ཁང་ནི་དཀོན་མཆོག་ཞིང་ཁམས་ཀྱི་གནས་མཆོག་གི་དཔེ་དང་གཟུགས་ཤིག་ཡིན། དེའི་རྐྱེན་གྱིས་ལུང་སྟོན་པ་མོ་ཤེ་ཡིས་གུར་མཆོག་འཛུགས་གྲབས་ཡོད་པའི་དུས་སུ་དཀོན་མཆོག་གིས་ཁོང་ལ་རིའི་སྟེང་དུ་ཁྱོད་ལ་སྟོན་པའི་དཔེ་ལྟར་ཐམས་ཅད་ངེས་པར་དུ་བཟོས་ཤིག་ཅེས་གསུངས།
HEB 8:6 འོན་ཀྱང་ད་ལྟ་ངེད་རྣམས་ཀྱི་བླ་ཆེན་གཙོ་བོ་ཡེ་ཤུ་ལ་མཆོད་དཔོན་གྱི་ལམ་ལུགས་སྔ་མ་ལས་ཞབས་ཏོག་ལྷག་པར་བཟང་བ་ཞིག་ཐོབ། ཁོང་ནི་སྔོན་ལས་ལྷག་པར་བཟང་བའི་ཞལ་ཆད་རྣམས་ལ་རྟེན་པའི་ཞལ་ཆད་ཀྱི་བར་མི་ཡིན།
HEB 8:7 ཞལ་ཆད་དང་པོ་དེ་ལ་སྐྱོན་མེད་པ་ཡིན་ན། གཉིས་པ་འཚོལ་མི་དགོས་སོ།
HEB 8:8 དཀོན་མཆོག་གིས་མི་རྣམས་ལ་བཀའ་བཀྱོན་མཛད་དེ་འདི་ལྟར་གསུངས། ལྟོས་དང༌། ཉིན་མོ་དེ་ནི་སླེབས་གྲབས་ཡོད། ། ང་ཡིས་ཡི་སི་ར་ཨེལ་དང༌། ། ཡ་ཧུ་དཱ་པའི་རིགས་གཉིས་ལ། ། ཞལ་ཆད་གསར་པ་འཛུགས་པར་བྱ། །
HEB 8:9 འདི་ནི་ང་ཡིས་ཁོ་ཚོའི་མེས་པོ་ཡི། ། ལག་ནས་འཁྲིད་དེ་ཨེ་ཇེབ་ཡུལ་ནས་ནི། ། ཐོན་པའི་སྐབས་ཀྱི་ཞལ་ཆད་དང་མི་འདྲ། ། ཁོ་ཚོས་ང་ཡི་ཞལ་ཆད་མ་བསྲུངས་པས། ། ངས་ཀྱང་ཁོ་ཚོར་ཁ་ཡ་མ་བྱས་སོ། །
HEB 8:10 དུས་དེའི་རྗེས་སུ་ང་དང་ནི། ། ཡི་སི་ར་ཨེལ་རིགས་བར་ལ། ། གསར་དུ་བཙུགས་པའི་ཞལ་ཆད་ནི། ། ང་ཡི་བཀའ་ཁྲིམས་ཁོ་ཚོ་ཡི། ། བློ་ལ་བཞག་ཅིང་སེམས་ལ་འབྲི། ། ང་ཡིས་ཁོ་ཚོའི་དཀོན་མཆོག་བྱ། ། ཁོ་ཚོ་ང་ཡི་འབངས་མིར་འགྱུར། །
HEB 8:11 ཁོ་ཚོ་སོ་སོས་གྲོང་པ་ཁྱིམ་མཚེས་དང༌། ། ཡང་ན་རང་གི་བུ་སྤུན་རྣམས་ལ་ནི། ། གཙོ་བོ་ངོ་ཤེས་དགོས་ཞེས་སློབ་མི་དགོས། ། ཁོ་ཚོ་ཆུང་བ་དང་ནི་ཆེ་བ་ཀུན། ། ཚང་མས་ང་ཡི་ངོ་ནི་ཤེས་པས་སོ། །
HEB 8:12 ང་ཡིས་ཁོ་ཚོའི་སྡིག་ཉེས་དང༌། ། སྤྱོད་ངན་ནམ་ཡང་མི་བརྩི་འོ། ། ཞེས་གསུངས།
HEB 8:13 ཁོང་གིས་ཞལ་ཆད་གསར་པའི་སྐོར་གསུངས་པས་སྔར་ཡོད་པ་དེ་རྙིང་པར་མཛད། རྙིང་ཞིང་རྒས་པ་དེ་མེད་པ་འགྱུར་བར་ཐུག་གོ །
HEB 9:1 ཞལ་ཆད་སྔ་མ་ལའང་དཀོན་མཆོག་ལ་བསྙེན་བཀུར་བྱེད་པའི་སྒྲིག་ལམ་དང༌། འཇིག་རྟེན་གྱི་མཆོད་ཁང་ཡོད།
HEB 9:2 གུར་མཆོག་གཅིག་བཟོས་པ་ཡིན། དེའི་ནང་གི་གནས་དང་པོར་མར་མེའི་སྟེགས་བུ་དང༌། གསོལ་ཅོག དཀོན་མཆོག་གི་སྐུ་མདུན་གྱི་བག་ལེབ་བཅས་ཡོད་དེ། ས་ཆ་འདིར་གནས་དམ་པ་ཞེས་ཟེར།
HEB 9:3 ཡང་ཡོལ་བ་གཉིས་པའི་རྒྱབ་ལ་དམ་པའི་དམ་པ་ཞེས་ཟེར་བའི་གནས་གཉིས་པའི་ནང་ལ།
HEB 9:4 བདུག་སྤོས་བདུག་སའི་གསེར་གྱི་མཆོད་ཁྲི་དང༌། ཞལ་ཆད་ཀྱི་སྒམ་གསེར་གྱིས་ཡོངས་སུ་བཏུམས་པ་ཞིག་ཡོད། སྒམ་དེའི་ནང་ལ་མན་ནཱ་ཟེར་བའི་ཟས་ཀྱིས་གང་བའི་གསེར་གྱི་བུམ་པ་དང༌། མཆོད་དཔོན་ཨ་རོན་གྱི་མྱུ་གུ་ཐོན་པའི་དབྱུག་པ་དང༌། ཞལ་ཆད་འཁོད་པའི་རྡོ་ལེབ་རྣམས་ཡོད།
HEB 9:5 སྒམ་དེའི་སྟེང་ལ་ཀེ་རུབ་ཅེས་ཟེར་བའི་གཟི་བརྗིད་དང་ལྡན་པའི་སྲུང་མཁན་གྱི་གཤོག་པ་ཐུགས་རྗེའི་བཞུགས་ཁྲིའི་སྟེང་ལ་བརྐྱངས། ད་ལྟ་དེ་རྣམས་ཀྱི་སྐོར་ཞིབ་པར་སྨྲ་མི་ཐུབ།
HEB 9:6 མཆོད་ཆས་འདི་ཚོ་དེ་ལྟར་བསྒྲིགས་པའི་རྗེས་སུ། མཆོད་དཔོན་རྣམས་ཞབས་ཏོག་བྱེད་པའི་ཆེད་དུ་གུར་མཆོག་གི་གནས་དང་པོའི་ནང་ལ་ཡང་ཡང་འགྲོ
HEB 9:7 འོན་ཀྱང་གུར་མཆོག་གི་གནས་གཉིས་པའི་ནང་ལ་བླ་ཆེན་གཙོ་བོ་འབའ་ཞིག་ལོ་རེར་ནང་ཐེངས་གཅིག་རེ་འགྲོ་སྟེ། ཁྲག་མེད་པར་མི་འགྲོ ཁྲག་དེ་ནི་རང་དང༌། མི་རྣམས་ཀྱིས་མི་ཤེས་པར་བསགས་པའི་སྡིག་ཉེས་ཀྱི་དོན་དུ་ཕུལ་ལོ།
HEB 9:8 དེའི་སྒོ་ནས་དམ་པའི་ཐུགས་ཉིད་ཀྱིས་གུར་མཆོག་དང་པོ་ད་དུང་གནས་པའི་རིང་གནས་མཆོག་ལ་འགྲོ་བའི་ལམ་མངོན་པར་མ་གྱུར་བར་མཚོན་པར་མཛད།
HEB 9:9 དེ་ནི་དེང་དུས་ཀྱི་དཔེ་ཞིག་ཡིན། འབུལ་བ་དང་མཆོད་པ་ཡིས་བསྙེན་བཀུར་བྱེད་མཁན་གྱི་སེམས་ནང་གི་སྡིག་པའི་དྲི་མ་སེལ་མི་ཐུབ་པར་མཚོན།
HEB 9:10 རྒྱུ་མཚན་ནི་ཟ་བ་དང་བཏུང་བ་དང་ཁྲུས་རྒྱག་པ་སྣ་ཚོགས་ཏེ་ལུས་ཀྱི་སྒྲིག་ལམ་ཁོ་ནར་ཡིན་ཞིང༌། ཐབས་ལམ་གསར་དུ་བཅོས་པའི་དུས་ལ་མ་བབས་པའི་བར་དུ་བཙུགས།
HEB 9:11 མཱ་ཤི་ཀ་ནི་ད་ལྟ་བྱུང་བའི་ལེགས་པོ་རྣམས་ཀྱི་བླ་ཆེན་གཙོ་བོར་གྱུར་བས། དཀོན་མཆོག་གི་ཞིང་ཁམས་སུ་ཡོད་པའི་གུར་མཆོག་ཆེ་ཞིང་ཡོངས་སུ་རྫོགས་པའི་ནང་དུ་ཕེབས། གུར་མཆོག་དེ་ནི་མིས་ལག་པས་མ་བཟོས་ཤིང༌། འཇིག་རྟེན་འདི་ལ་ཡང་མི་གཏོགས།
HEB 9:12 ར་དང་བེའུ་རྣམས་ཀྱི་ཁྲག་མིན་པར། རང་གི་སྐུ་ཁྲག་གིས་ལན་གཅིག་གིས་དུས་རྟག་ཏུ་གནས་མཆོག་ལ་ཞུགས་ནས་གཏན་དུ་གནས་པའི་ཐར་པ་ཞིག་ཐོབ།
HEB 9:13 ར་དང་གླང་གི་ཁྲག་དང༌། བེའུ་མོའི་བསྲེགས་པའི་གོ་ཐལ་གཏོར་ནས་མི་གཙང་བར་གྱུར་བ་རྣམས་དམ་པ་རུ་བྱས་ན།
HEB 9:14 མཱ་ཤི་ཀའི་སྐུ་ཁྲག་གིས་ངེད་རྣམས་ཀྱི་སེམས་དེ་ལས་ལྷག་པར་དག་པར་མི་བྱེད་དམ། རྟག་ཏུ་གནས་པའི་དམ་པའི་ཐུགས་ཉིད་ཀྱི་སྒོ་ནས་ཁོང་གིས་སྐྱོན་དང་བྲལ་བའི་རང་ཉིད་དཀོན་མཆོག་ལ་ཕུལ་གནང༌། ཁོང་གིས་ང་ཚོས་གཏན་དུ་གནས་པའི་དཀོན་མཆོག་ལ་བསྙེན་བཀུར་བྱེད་པའི་ཕྱིར་རང་གི་སྐུ་ཁྲག་གིས་ང་ཚོ་དགེ་བ་གསོག་པའི་ལམ་སྟོང་པ་དེ་ལས་ཐར་བར་མཛད།
HEB 9:15 དེ་བས་ན་མཱ་ཤི་ཀ་ནི་ཞལ་ཆད་གསར་པ་ཞིག་གི་བར་མི་ཡིན། ཞལ་ཆད་སྔ་མ་བཞིན་དུ་བྱས་པའི་སྡིག་པའི་ཉེས་ཆད་ལས་ཐར་བའི་ཕྱིར་ཁོང་གྲོངས་པས། དེ་ནི་དཀོན་མཆོག་གིས་བོས་པ་རྣམས་ལ་ཞལ་གྱིས་བཞེས་པའི་གཏན་གྱི་བྱིན་རླབས་འཐོབ་པའི་ཕྱིར་རོ།
HEB 9:16 དཔེར་ན་ཁ་ཆེམས་ཤིག་ཡོད་ན། དེ་འཇོག་མཁན་ཤི་ཚར་བ་ར་སྤྲོད་བྱེད་དགོས།
HEB 9:17 གང་ལགས་ཤེ་ན། ཁ་ཆེམས་འཇོག་མཁན་གསོན་པོར་ཡོད་རིང་ཁ་ཆེམས་གཏན་ནས་མི་ཕན། ཤི་ཟིན་པའི་རྗེས་སུ་རྩི།
HEB 9:18 དེའི་ཕྱིར་ཞལ་ཆད་སྔ་མའང་ཁྲག་མེད་པར་མ་བཙུགས།
HEB 9:19 ལུང་སྟོན་པ་མོ་ཤེ་ཡིས་ཆོས་ཁྲིམས་ལྟར་བཀའ་རེ་རེ་བཞིན་མི་ཚོགས་ཀུན་ལ་བསྒྲགས་ནས། བེའུ་དང་ར་རྣམས་ཀྱི་ཁྲག ཆུ་དང༌། བལ་དམར་པོ་དང༌། ཧི་སོབ་ཅེས་ཟེར་བའི་རྩི་ཤིང་གི་ལོ་མ་དང་བཅས་བླངས་ནས་ཆོས་ཁྲིམས་ཀྱི་དཔེ་ཆ་དང་མི་ཐམས་ཅད་ལ་གཏོར་ཏེ།
HEB 9:20 དཀོན་མཆོག་གིས་ཁྱེད་ཚོར་བཀའ་གནང་བའི་ཞལ་ཆད་ཀྱི་ཁྲག་འདི་ཡིན་ཞེས་གསུངས།
HEB 9:21 དེ་དང་འདྲ་བར་གུར་མཆོག་དང་དེའི་མཆོད་རྫས་ཀྱི་སྣོད་ཆས་ཐམས་ཅད་ལའང་ཁྲག་གཏོར།
HEB 9:22 ཆོས་ཁྲིམས་བཞིན་དུ་ཕལ་ཆེར་ཐམས་ཅད་ཁྲག་གིས་གཙང་བར་བྱེད་པས། ཁྲག་མ་ཐོན་པར་སྡིག་ཉེས་སེལ་ཐབས་མེད།
HEB 9:23 དེའི་ཕྱིར་གུར་མཆོག་དང་དེར་ཡོད་པ་ཐམས་ཅད་དཀོན་མཆོག་གི་ཞིང་ཁམས་སུ་ཡོད་པ་རྣམས་ཀྱི་འདྲ་དཔེ་ཡིན་པས་དམར་མཆོད་ཀྱིས་གཙང་བར་བྱེད་དགོས། འོན་ཀྱང་དཀོན་མཆོག་གི་ཞིང་ཁམས་སུ་ཡོད་པའི་དངོས་པོ་དེ་རང་ནི་དེ་ལས་ལེགས་པའི་དམར་མཆོད་ཀྱིས་གཙང་བར་བྱེད་དགོས།
HEB 9:24 མཱ་ཤི་ཀ་ནི་བདེན་པའི་གནས་མཆོག་གི་འདྲ་དཔེ་ཡིན་ཏེ་མིའི་ལག་པས་བཟོས་པའི་གུར་མཆོག་གི་ནང་ལ་མ་ཕེབས་པར། ང་ཚོའི་བར་མི་དུ་ད་ལྟ་དཀོན་མཆོག་མཇལ་བའི་ཕྱིར་ཞིང་ཁམས་རང་ལ་ཞུགས།
HEB 9:25 ཡང་བླ་ཆེན་གཙོ་བོ་རང་གི་ཁྲག་མིན་པ་ཁྱེར་ནས་ལོ་རེ་བཞིན་གནས་མཆོག་ནང་དུ་འགྲོ དེ་མ་ཡིན་པ་ལྟར་མཱ་ཤི་ཀ་ཞིང་ཁམས་སུ་ཞུགས་ཏེ་རང་ཉིད་དམར་མཆོད་ཡང་ཡང་ཕུལ་བར་མི་མཛད།
HEB 9:26 དེ་མིན་ན་འཇིག་རྟེན་བཀོད་པ་ནས་བཟུང་ཁོང་གིས་ལན་མང་པོ་སྡུག་བསྔལ་མྱོང་དགོས། འོན་ཀྱང་རང་ཉིད་དམར་མཆོད་དུ་གྱུར་ནས་སྡིག་ཉེས་སེལ་བའི་ཕྱིར་ད་དུས་ཀྱི་མཐར་ལན་གཅིག་ཁོ་ནར་བྱོན།
HEB 9:27 ཡང་ཇི་ལྟར་མི་རྣམས་ཐེངས་གཅིག་འཆི་ནས་དེའི་རྗེས་སུ་དཀོན་མཆོག་གི་ཁྲིམས་གཅོད་པར་ཐག་གཅོད་མཛད་པ་ལྟར།
HEB 9:28 དེ་ལྟར་མཱ་ཤི་ཀའང་ལན་གཅིག་མི་མང་པོའི་སྡིག་ཉེས་འཁྱེར་བའི་ཆེད་རང་ཉིད་དམར་མཆོད་དུ་གྱུར། སྡིག་པ་སེལ་བའི་ཕྱིར་མ་ཡིན་པར་ཁོང་ལ་ཡིད་རྟོན་ནས་སྒུག་མཁན་རྣམས་ལ་སྐྱོབ་པའི་ཕྱིར་ལན་གཉིས་པར་འབྱོན་ནོ། །
HEB 10:1 ཆོས་ཁྲིམས་ནི་བདེན་པ་རྣམས་རང་ཉིད་མ་ཡིན་པར། འབྱུང་རྒྱུ་ཡིན་པའི་དོན་བཟང་པོ་རྣམས་ཀྱི་གྲིབ་མ་ཞིག་དང་འདྲ་བ་ཡིན་པས། དེས་ལོ་རེ་བཞིན་ཡང་ནས་ཡང་དུ་ཕུལ་བའི་དམར་མཆོད་ཀྱི་སྒོ་ནས་བསྙེན་བཀུར་ཞུ་བ་རྣམས་ལ་ཡང་དག་པར་བྱེད་མི་སྲིད།
HEB 10:2 དེ་མིན་ན་བསྙེན་བཀུར་ཞུ་མཁན་རྣམས་ལན་གཅིག་གིས་གཙང་བར་གྱུར་ཏེ་གནོངས་མེད་པར་གྱུར་བས། མཆོད་པ་དེ་འབུལ་བར་མི་ཆད་དམ།
HEB 10:3 འོན་ཀྱང་མཆོད་པ་དེ་རྣམས་ཀྱིས་མི་རྣམས་ལ་རང་ཉིད་ལ་སྡིག་ཉེས་ལུས་པར་ལོ་རེ་བཞིན་དྲན་གསོ་བྱེད།
HEB 10:4 རྒྱུ་མཚན་ནི་གླང་དང་རའི་ཁྲག་འབུལ་བའི་སྒོ་ནས་སྡིག་ཉེས་སེལ་མི་སྲིད།
HEB 10:5 དེའི་ཕྱིར་མཱ་ཤི་ཀ་འཇིག་རྟེན་དུ་བྱོན་པའི་སྐབས་སུ་ཁོང་གིས། ཁྱེད་ཉིད་དམར་མཆོད་འབུལ་རྟེན་མི་འདོད་ཀྱང༌། ། ཁྱེད་ཀྱིས་ང་ལ་ལུས་ཕུང་གནང་བར་མཛད། །
HEB 10:6 སྦྱིན་སྲེག་སྡིག་བཤགས་མཆོད་པ་ནི་མི་མགུའོ། །
HEB 10:7 དེ་ནས་ང་ཡིས་བརྗོད་དོན་འདི་ལྟ་སྟེ། ། གཟིགས་དང་དཀོན་མཆོག་ང་རང་སླེབས་འོང་སྟེ། ། ཁྱེད་ཀྱི་ཐུགས་དགོངས་ལྟར་དུ་སྒྲུབ་པར་བྱེད། ། མདོ་ཡི་སྟེང་དུ་ང་ཡི་དོན་དེ་འཁོད། ། ཞེས་གསུངས།
HEB 10:8 གོང་དུ་གསུངས་པར། དམར་མཆོད་དང་འབུལ་རྟེན། སྦྱིན་སྲེག་དང་སྡིག་བཤགས་མཆོད་པ་རྣམས་ལ་ཁྱེད་མི་མཉེས་ཤིང་མི་འདོད་དོ། (འདི་ཀུན་ཆོས་ཁྲིམས་ལྟར་ཕུལ་བ་ཡིན་)
HEB 10:9 དེ་ནས་ཁོང་གིས་གསུངས་པར། གཟིགས་དང་ང་འདིར་འོང་བ་ནི། ། ཁྱེད་ཀྱི་ཐུགས་དགོངས་སྒྲུབ་ཕྱིར་ཡིན། ། ཞེས་གསུངས། ཁོང་གིས་ཞལ་ཆད་སྔོན་མ་བསྣུབས་པ་དེ། ཕྱི་མ་འཛུགས་པའི་ཕྱིར་ཡིན།
HEB 10:10 དཀོན་མཆོག་གི་དགོངས་པ་དེ་ཡིས་ཡེ་ཤུ་མཱ་ཤི་ཀའི་སྐུ་གཟུགས་ལན་གཅིག་རྟག་ཏུ་གནས་པ་མཆོད་པར་འབུལ་བའི་སྒོ་ནས་ངེད་རྣམས་དམ་པ་རུ་གྱུར་བ་ཡིན།
HEB 10:11 མཆོད་དཔོན་རེ་རེས་ཉིན་ལྟར་བཞེངས་ཏེ་ཞབས་ཏོག་སྒྲུབ་ཅིང་མཆོད་པ་གཅིག་མཚུངས་ཡང་ཡང་ཕུལ་ན་ཡང་སྡིག་ཉེས་ནམ་ཡང་སེལ་མི་སྲིད།
HEB 10:12 འོན་ཀྱང་མཱ་ཤི་ཀ་ཡིས་ནམ་ཡང་སྡིག་ཉེས་སེལ་བའི་དམར་མཆོད་ལན་གཅིག་ཁོ་ན་ཕུལ་ནས་དཀོན་མཆོག་གི་ཕྱག་གཡས་ངོས་སུ་བཞུགས།
HEB 10:13 དེ་ནས་བཟུང་ཁོང་གི་དགྲ་བོ་རྣམས་ཞབས་འོག་ཏུ་བཅུག་པའི་བར་དུ་སྒུག་སྟེ་བཞུགས།
HEB 10:14 མཆོད་པ་ལན་གཅིག་འབུལ་བ་དེའི་སྒོ་ནས་ཁོང་གིས་དམ་པ་རུ་མཛད་པ་རྣམས་ནམ་ཡང་ཡང་དག་པར་མཛད།
HEB 10:15 དམ་པའི་ཐུགས་ཉིད་ཀྱིས་ཀྱང་ངེད་རྣམས་ལ་བདེན་དཔང་མཛད། དང་པོར་ཁོང་གིས།
HEB 10:16 གཙོ་བོ་དཀོན་མཆོག་གིས་གསུངས་པར། ། དུས་དེའི་རྗེས་སུ་ང་དང་ནི། ། ཁོ་རང་ཚོ་ཡི་བར་གཉིས་ལ། ། གསར་དུ་བཙུགས་པའི་ཞལ་ཆད་ནི། ། ང་ཡི་བཀའ་ཁྲིམས་ཁོ་ཚོ་ཡི། ། བློ་ལ་བཞག་ཅིང་སེམས་ལ་འབྲི། ། ཞེས་གསུངས།
HEB 10:17 ཡང་ཁོང་གིས། ང་ཡིས་ཁྱོད་ཚོའི་སྡིག་ཉེས་དང༌། ། སྤྱོད་ངན་ནམ་ཡང་མི་བརྩི་འོ། ། ཞེས་གསུངས།
HEB 10:18 དེ་ཚོ་སེལ་ན་སྡིག་ཉེས་ཕྱིར་མཆོད་པ་འབུལ་མི་དགོས།
HEB 10:19 དེའི་ཕྱིར་སྤུན་ཟླ་རྣམས། ཡེ་ཤུའི་སྐུ་ཁྲག་གི་སྒོ་ནས་ངེད་རྣམས་ལ་གནས་མཆོག་ནང་དུ་འགྲོ་བའི་སྤོབས་པ་ཡོད།
HEB 10:20 ང་ཚོའི་དོན་དུ་ཡེ་ཤུས་གྲོངས་པའི་སྒོ་ནས་ཡོལ་བ་ཕྱེ་སྟེ་གནས་མཆོག་ཏུ་འགྲོ་བའི་སྲོག་དང་ལྡན་པའི་ལམ་གསར་པ་ཞིག་བཀོད་པར་མཛད།
HEB 10:21 ཡང་ངེད་རྣམས་ལ་བླ་ན་མེད་པའི་བླ་ཆེན་ཞིག་གིས་དཀོན་མཆོག་གི་ཕོ་བྲང་ལ་དབང་སྒྱུར་གྱི་ཡོད་པས།
HEB 10:22 ང་ཚོར་གནོངས་ཡོད་པའི་སེམས་ནི་མཱ་ཤི་ཀའི་སྐུ་ཁྲག་གིས་གཏོར་ནས་དག་པར་གྱུར་ཞིང༌། ལུས་ཀྱང་ཆུ་གཙང་མས་ཁྲུས་ཏེ་དྲང་སེམས་དང་ཡིད་ཆེས་ཀྱིས་ཁེངས་བཞིན་དུ་ང་ཚོ་དཀོན་མཆོག་གི་མདུན་དུ་འགྲོ
HEB 10:23 ཞལ་ཆད་མཛད་མཁན་ཁོང་ནི་བློ་གཏད་ཆོག་པ་ཡིན་པས། ང་ཚོས་ཁས་ལེན་བྱེད་པའི་དད་པ་ལ་བརྟན་པོར་འཛིན་དགོས།
HEB 10:24 ཡང་བྱམས་སེམས་སྐྱེད་པ་དང་ལས་བཟང་པོ་བྱེད་ཕྱིར་ང་ཚོས་གཅིག་གིས་གཅིག་ལ་ཇི་ལྟར་སྐུལ་བའི་སྐོར་སེམས་དགོས།
HEB 10:25 མི་ཁ་ཤས་ཀྱི་གོམས་གཤིས་བཞིན་དུ་ངེད་རང་གི་འདུ་འཛོམས་མི་སྤོང་བར། ཉིན་མོ་དེ་ཉེ་བར་སླེབས་པ་མཐོང་སྟེ་སྔོན་ལས་ལྷག་པར་གཅིག་གིས་གཅིག་ལ་སྐུལ།
HEB 10:26 གང་ཡིན་ཞེ་ན། བདེན་པ་རྟོགས་པའི་རྗེས་སུ་ང་ཚོས་ད་དུང་རྐང་བཙུགས་ནས་སྡིག་ཉེས་བྱས་ན། སྡིག་ཉེས་སེལ་བའི་དམར་མཆོད་གཞན་མེད་ཅིང༌།
HEB 10:27 དཀོན་མཆོག་གི་ཁྲིམས་གཅོད་ཕོག་རྒྱུར་སྒུག་པའི་འཇིགས་སྐྲག་དང༌། དཀོན་མཆོག་གི་དགྲ་བོ་རྣམས་མེད་པར་བྱེད་པའི་མེ་དྲག་པོ་ཞིག་གི་ཉེན་ཁའང་ཡོད།
HEB 10:28 མི་སུས་ཀྱང་ལུང་སྟོན་པ་མོ་ཤེའི་ཆོས་ཁྲིམས་དང་འགལ་ན། མི་གཉིས་སམ་གསུམ་གྱིས་དཔང་པོ་བྱས་པའི་སྒོ་ནས་ཁོ་སྙིང་རྗེ་མེད་པར་སྲོག་གཅོད་པར་འགྱུར་དགོས།
HEB 10:29 དེ་བས་ན་དཀོན་མཆོག་གི་སྲས་རྡོག་རོལ་དུ་གཏོང་ཞིང༌། ཁོ་ཚོ་དམ་པ་རུ་མཛད་པའི་ཞལ་ཆད་ཀྱི་སྐུ་ཁྲག་རྩིས་མེད་དུ་གཏོང་ཞིང༌། ཐུགས་རྗེ་གནང་མཁན་དམ་པའི་ཐུགས་ཉིད་ལ་སྨད་ར་གཏོང་མཁན་ལ་ཉེས་ཆད་ཅི་ཙམ་ལྗིད་པོ་ཕོག་འོས་པར་བསམ་བློ་གཏོང་ཞིག
HEB 10:30 གང་ལགས་ཤེ་ན། ངན་པ་བྱེད་མཁན་རྣམས་ལ་ཆད་པ་གཏོང་རྒྱུ་ཡིན། ངས་ལན་འཇལ་ལོ་ཞེས་དང༌། གཙོ་བོས་ཁོང་གི་མི་རྣམས་ལ་ཁྲིམས་གཅོད་མཛད་པར་འགྱུར་ཞེས་གསུང་མཁན་ངེད་རྣམས་ཀྱིས་ངོ་ཤེས་པས་སོ།
HEB 10:31 དབང་ཀུན་དང་ལྡན་པའི་དཀོན་མཆོག་གི་ཕྱག་ཏུ་ལྷུང་བ་ནི་འཇིགས་སྐྲག་སྐྱེ་འོས་པ་ཞིག་གོ
HEB 10:32 སྔོན་དུས་དྲན་པར་གྱིས་ཤིག དད་པའི་སྒོ་ཕྱེ་བར་གྱུར་ནས་ཁྱེད་ཚོས་སྡུག་བསྔལ་གྱི་འཐབ་མོ་ཆེན་པོ་ཞིག་བཟོད་པར་བྱས།
HEB 10:33 དེའི་ཚེ་ཁྱེད་ཚོ་སྐབས་འགར་མི་མང་པོའི་མདུན་དུ་དམའ་འབེབས་དང་གནོད་འཚེ་མྱོང་ཞིང༌། སྐབས་འགར་དེ་ལྟར་སྡུག་བསྔལ་མྱོང་མཁན་རྣམས་ཀྱི་མཉམ་འགྲོགས་སུ་གྱུར།
HEB 10:34 ཁྱེད་ཚོས་བཙོན་པ་རྣམས་ལ་སྙིང་རྗེ་བྱས་ཤིང༌། ནོར་དེ་ལས་བཟང་བ་དང་གཏན་དུ་གནས་པ་ཡོད་པར་ཤེས་པས། ཁྱེད་ཚོའི་ནོར་རྫས་འཕྲོག་པ་ལ་ཡང་དགའ་སྤྲོའི་ངང་ནས་མྱོང༌།
HEB 10:35 དེའི་ཕྱིར་ཁྱེད་ཚོའི་བློ་སྟོབས་མ་ཉམས་ཤིག དེས་ཁྱེད་ཚོ་ལ་བྱ་དགའ་ཆེན་པོ་འཐོབ་ཡོང༌།
HEB 10:36 ཁྱེད་ཚོས་དཀོན་མཆོག་གི་དགོངས་པ་བསྒྲུབས་ནས་གང་ཞལ་གྱིས་བཞེས་པ་འཐོབ་པའི་ཆེད་དུ་བཟོད་སྒོམ་དགོས།
HEB 10:37 གང་ལགས་ཟེར་ན། དུས་ནི་ཅུང་ཟད་ཙམ་ཞིག་ནས། ། འབྱོན་མཁན་འབྱོན་ཞིང་ནར་འགྱངས་མེད། །
HEB 10:38 ངའི་དྲང་བདེན་མི་དད་པའི་སྒོ་ནས་འཚོ། ། གལ་ཏེ་སུས་ཀྱང་ཕྱིར་འཐེན་བྱས་པ་ན། ། དེ་རྣམས་ལ་ནི་ངའི་སེམས་དགའ་མི་འགྱུར། ། ཞེས་འཁོད་ཡོད།
HEB 10:39 འོན་ཀྱང་ང་ཚོ་ནི་འཇིག་པར་འགྲོ་བའི་ཕྱིར་འཐེན་མཁན་རྣམས་ཀྱི་ནང་ནས་མ་ཡིན་གྱི། དད་པ་ཡོད་པས་ཐར་པ་དང་ལྡན་པ་རྣམས་ཀྱི་ནང་ནས་ཡིན་ནོ། །
HEB 11:1 དད་པ་ནི་རེ་བ་གནས་ས་ལ་བློ་གདེང་དང༌། མིག་གིས་མི་མཐོང་བ་དེ་རྣམས་ལ་ཡིད་ཆེས་ངེས་པ་རྙེད་པ་དེའོ།
HEB 11:2 དད་པའི་སྒོ་ནས་གནའ་བོའི་དུས་ཀྱི་མི་རྣམས་ལ་དཀོན་མཆོག་གི་གདེང་འཇོག་ཐོབ།
HEB 11:3 དད་པའི་སྒོ་ནས་དཀོན་མཆོག་གི་བཀའ་ཡིས་འཇིག་རྟེན་ཁམས་བཀོད་པ་དང༌། མིག་གིས་མཐོང་བ་ནི་མི་སྣང་བ་ལས་མཛད་པ་ཡིན་པ་ང་ཚོས་རྟོགས།
HEB 11:4 དད་པའི་སྒོ་ནས་མེས་པོ་ཧ་བེལ་གྱིས་ཁོའི་སྤུན་ཀཱ་ཡིན་ལས་ལེགས་པའི་མཆོད་པ་ཞིག་དཀོན་མཆོག་ལ་ཕུལ་བས། དྲང་ལྡན་པ་ཞིག་ཡིན་པར་མཚོན་ཞིང༌། ཁོང་གི་མཆོད་པ་ལ་དཀོན་མཆོག་གི་གདེང་འཇོག་ཐོབ། ཧ་བེལ་ཤི་ཡང་དད་པའི་དཔེའི་སྒོ་ནས་ད་དུང་ང་ཚོར་གཏམ་བྱེད།
HEB 11:5 དད་པའི་སྒོ་ནས་ཧེ་ནོག་ཡར་དྲངས་ནས་འཆི་བ་མ་མྱོང༌། དཀོན་མཆོག་གིས་ཁོང་ཡར་ཁྲིད་གནང་བས་མི་རྙེད་པར་གྱུར། ཁོང་ཡར་འདྲངས་པའི་སྔོན་ལ་དཀོན་མཆོག་གི་ཐུགས་མཉེས་པའི་མི་ཡིན་པར་གདེང་འཇོག་ཐོབ།
HEB 11:6 དད་པ་མེད་པར་དཀོན་མཆོག་ཐུགས་མཉེས་མི་སྲིད། གང་ཡིན་ཟེར་ན། དཀོན་མཆོག་གི་དྲུང་དུ་ཡོང་བ་དེས་དཀོན་མཆོག་ཡོད་པ་དང༌། ཁོང་འཚོལ་མཁན་རྣམས་ལ་བྱ་དགའ་གནང་མཁན་ཡིན་པར་དད་པ་བྱེད་དགོས་པས་སོ།
HEB 11:7 མེས་པོ་ནོ་ཨ་ཡིས་དད་པའི་སྒོ་ནས་དཀོན་མཆོག་གིས་ཁོང་ལ་ད་དུང་མ་མཐོང་བ་རྣམས་ཀྱི་སྐོར་ལ་ཐ་ཚིག་སྒྲོག་པར་མཛད་པའི་སྐབས་སུ། རང་གི་ནང་མི་སྐྱོབ་པའི་ཕྱིར་བསྙེན་བཀུར་བྱས་ཏེ་གྲུ་གཟིངས་ཤིག་བཟོས། དེའི་སྒོ་ནས་ཁོང་གིས་འཇིག་རྟེན་གྱི་སྐྱོན་གསལ་པོར་བསྟན་ཞིང༌། དད་པ་ལས་འབྱུང་བའི་རྣམ་པར་དག་པ་ཡི་ཞལ་ཆད་ཐོབ།
HEB 11:8 དད་པའི་སྒོ་ནས་མེས་པོ་ཨབ་ར་ཧམ་ནི་དཀོན་མཆོག་གི་ཞལ་ཆད་ལྟར་འཐོབ་རྒྱུ་ཡིན་པའི་ཡུལ་ཞིག་ལ་འགྲོ་བར་བོས་པའི་ཚེ། གང་དུ་འགྲོ་བ་མི་ཤེས་ཀྱང་བཀའ་དེ་ལ་ཉན།
HEB 11:9 དད་པའི་སྒོ་ནས་གནས་གཡར་བ་ལྟར་ཞལ་ཆད་མཛད་པའི་ཡུལ་དེ་ལ་བསྡད་དེ། ཁོང་དང་ཞལ་ཆད་འཛིན་མཁན་ཡིན་པའི་ཨི་སཱག་དང་ཡ་ཀོབ་ལྟར་གུར་རྣམས་ལ་བསྡད།
HEB 11:10 རྒྱུ་མཚན་ནི་ཁོང་གིས་དཀོན་མཆོག་གིས་འཆར་འགོད་དང་སྐྲུན་གནང་བའི་གཏན་གྱི་རྨང་གཞི་ཡོད་པའི་གྲོང་ཁྱེར་མཆོག་དེ་ཡིད་རྟོན་ནས་བསྒུགས།
HEB 11:11 དད་པའི་སྒོ་ནས་ས་རཱ་ཡིས་ཀྱང་ཞལ་ཆད་མཛད་མཁན་དེ་ཐུགས་གཏད་ཆོག་པར་བརྩིས་པས། རྒས་མོར་གྱུར་ཡང་ཕྲུ་གུ་སྐྱེ་ཐུབ་པའི་ནུས་པ་ཐོབ།
HEB 11:12 དེ་བས་ན་སྐུ་ཕུང་དང་འདྲ་བའི་མི་ཞིག་ལས་བུ་རྒྱུད་ནམ་མཁའི་སྐར་མ་མང་པོ་དང༌། མཚོ་འགྲམ་གྱི་བྱེ་མ་བཞིན་གྲངས་མེད་བྱུང༌།
HEB 11:13 དེ་ཚོ་ཐམས་ཅད་ཀྱིས་མ་འཆི་བར་དུ་དད་པ་ལ་བརྟེན་ཏེ། གང་ཞལ་གྱིས་བཞེས་པ་མ་ཐོབ་ཀྱང༌། ཐག་རིང་ནས་མཐོང་ཞིང་དགའ་བསུ་བྱས། འཇིག་རྟེན་འདིར་རང་ཉིད་གནས་གཡར་བ་དང༌། མགྲོན་པོར་ངོས་འཛིན་བྱས།
HEB 11:14 དེ་ལྟར་སྨྲ་བའི་མི་རྣམས་ཀྱིས་འདི་ངའི་ཕ་ཡུལ་ཡིན་ཟེར་ཐུབ་པའི་ལུང་པ་ཞིག་སྒུག་མཁན་ཡིན་པར་གསལ་སྟོན་བྱེད།
HEB 11:15 ཡུལ་གང་ནས་ཐོན་པ་དེ་དྲན་པ་ཡིན་ན་དེར་ལོག་པའི་གོ་སྐབས་བྱུང་ཡོད།
HEB 11:16 འོན་ཀྱང་ཁོ་ཚོས་དེ་ལས་ལེགས་པའི་ཡུལ་ཏེ་དཀོན་མཆོག་གི་ཞིང་ཁམས་སུ་ཡོད་པ་དེ་རེ་སྒུག་བྱེད་མཁན་ཡིན། དེའི་ཕྱིར་དཀོན་མཆོག་གིས་ཁོ་ཚོའི་དོན་ལ་གྲོང་ཁྱེར་མཆོག་ཅིག་བཤམས་པར་མཛད་ཅིང༌། ཁོང་ཁོ་ཚོའི་དཀོན་མཆོག་ཅེས་ཟེར་བར་ཐུགས་ཚ་མི་གནང༌།
HEB 11:17 དཀོན་མཆོག་གིས་མེས་པོ་ཨབ་ར་ཧམ་ལ་ཨི་སཱག་བརྒྱུད་ནས་ཁྱོད་ཀྱི་བུ་རྒྱུད་རྩི་བར་འགྱུར་ཞེས་གསུངས་ཀྱང༌། ཉམས་ཚོད་བླངས་པའི་ཚེ་དད་པའི་སྒོ་ནས་ཞལ་ཆད་འཛིན་མཁན་ཨབ་ར་ཧམ་གྱིས་རང་གི་བུ་གཅིག་པོ་ཨི་སཱག་མཆོད་པར་འབུལ་གྲབས་བྱས།
HEB 11:19 ཨབ་ར་ཧམ་གྱིས་དཀོན་མཆོག་གིས་མི་རྣམས་འཆི་བ་ལས་སླར་གསོན་དུ་མཛད་ཐུབ་པར་སྙམ་ཞིང༌། ཁོང་ལ་བུ་ཨི་སཱག་འཆི་བ་ལས་ལོག་པ་བཞིན་ཐོབ།
HEB 11:20 དད་པའི་སྒོ་ནས་མེས་པོ་ཨི་སཱག་གིས་མ་འོངས་པའི་དོན་ལ་བལྟས་ཏེ་ཁོང་གི་བུ་ཡ་ཀོབ་དང་ཨེ་སའུ་གཉིས་ལ་བྱིན་རླབས་གནང༌།
HEB 11:21 དད་པའི་སྒོ་ནས་མེས་པོ་ཡ་ཀོབ་གྲོངས་པའི་སྐབས་སུ་ཡོ་སེབ་ཀྱི་བུ་རེ་རེ་ལ་བྱིན་རླབས་གནང་སྟེ། འཁར་བ་ལ་བསྙེས་ཏེ་དཀོན་མཆོག་ལ་བསྙེན་བཀུར་བྱས།
HEB 11:22 དད་པའི་སྒོ་ནས་མེས་པོ་ཡོ་སེབ་འཆི་བ་ལ་ཐུག་པའི་ཚེ་ཡི་སི་ར་ཨེལ་གྱི་བུ་རྒྱུད་ཨེ་ཇེབ་ཡུལ་ནས་འཐོན་པའི་སྐོར་སྨྲ་ཞིང༌། རང་གི་རུས་པ་དུར་དུ་འཇུག་པའི་སྐོར་ལ་བཀའ་གནང༌།
HEB 11:23 དད་པའི་སྒོ་ནས་ལུང་སྟོན་པ་མོ་ཤེའི་ཕ་མ་ཡིས་ཁོང་འཁྲུངས་ནས་ཕྲུ་གུ་མཛེས་པ་ཞིག་ཡོད་པར་མཐོང་སྟེ། རྒྱལ་པོའི་བཀའ་ལ་མི་འཇིགས་པར། ཟླ་བ་གསུམ་རིང་ཁོང་སྦས་ནས་བཞག
HEB 11:24 དད་པའི་སྒོ་ནས་ལུང་སྟོན་པ་མོ་ཤེ་ན་སོ་ལོན་ནས་ཨེ་ཇེབ་ཀྱི་རྒྱལ་པོ་ཕར་ཨོ་ཡི་སྲས་མོའི་བུ་ཟེར་བའི་མིང་དང་ལེན་མ་བྱས་ཏེ།
HEB 11:25 སྡིག་ཉེས་ཀྱི་ལོངས་སྤྱོད་མི་རྟག་པ་ལས། ཁོང་གིས་དཀོན་མཆོག་གི་མི་རྣམས་དང་མཉམ་དུ་མནར་གཅོད་མྱོང་བར་བདམས།
HEB 11:26 མ་འོངས་པའི་བྱ་དགའ་ལ་བལྟས་ཏེ། ཨེ་ཇེབ་ཀྱི་གཏེར་ལས་མཱ་ཤི་ཀའི་དོན་ལ་སྡུག་བསྔལ་མྱོང་བའི་ནོར་ཆེ་བར་བརྩིས།
HEB 11:27 དད་པའི་སྒོ་ནས་རྒྱལ་པོའི་ཁྲོ་བ་ལ་མ་འཇིགས་པར་མོ་ཤེ་ཨེ་ཇེབ་ནས་ཐོན། མིག་གིས་མཐོང་མི་སྲིད་པའི་དཀོན་མཆོག་ལ་ནན་གྱིས་བལྟས་ནས་ཁོང་གིས་བཟོད་པ་བསྒོམས།
HEB 11:28 དད་པའི་སྒོ་ནས་ཁོང་གིས་པེ་སག་ཟེར་བའི་དུས་ཆེན་བསྲུངས་ཤིང༌། སྔོན་སྐྱེས་ཀྱི་བུ་རྣམས་མེད་པ་བཟོ་བའི་ཕོ་ཉ་ཡིས་ཡི་སི་ར་ཨེལ་གྱི་སྔོན་སྐྱེས་པའི་བུ་རྣམས་ལ་གནོད་པ་མི་བྱེད་པའི་ཕྱིར་ཁྲག་གཏོར།
HEB 11:29 དད་པའི་སྒོ་ནས་ཡི་སི་ར་ཨེལ་པ་རྣམས་སྐམ་ས་འགྲོ་བ་ལྟར་རྒྱ་མཚོ་དམར་པོ་བརྒྱུད་ནས་ཕྱིན། འོན་ཀྱང་ཨེ་ཇེབ་པ་རྣམས་དེ་ལྟར་བྱེད་པར་ཕྱིན་པས་ཆུ་ལ་ནུབ་སྟེ་ཤིའོ།
HEB 11:30 དད་པའི་སྒོ་ནས་ཡི་སི་ར་ཨེལ་པ་རྣམས་ཡེ་རུ་ཀོ་གྲོང་ཁྱེར་གྱི་ལྕགས་རི་ཉི་མ་བདུན་གྱི་བར་དུ་བསྐོར་ནས་ལྕགས་རི་དེ་རྡིབ།
HEB 11:31 དད་པའི་སྒོ་ནས་སྨད་འཚོང་མ་ར་ཧབ་ཀྱིས་སོ་པ་རྣམས་ལ་ཞི་བདེའི་ངང་ནས་སྣེ་ལེན་བྱས་པས། བཀའ་ལ་མ་ཉན་པ་རྣམས་དང་མཉམ་དུ་མ་ཤིའོ། །
HEB 11:32 ད་ཅི་སྨྲ། གི་དེ་ཡོན་དང༌། པཱ་རག སམ་སོན། ཡེབ་ཐཱ། དཱ་བིད། ཤ་མུ་ཨེལ་དང༌། ལུང་སྟོན་པ་རྣམས་ཀྱི་སྐོར་སྨྲ་ལོང་མེད།
HEB 11:33 དད་པའི་སྒོ་ནས་ཁོ་ཚོས་རྒྱལ་ཁམས་བཅོམ། ཁྲིམས་གཅོད་བདེན་པར་བྱས། གང་ཞལ་གྱིས་བཞེས་པ་ཐོབ། སེང་གེའི་ཁ་བཀག
HEB 11:34 མེ་དྲག་བསད། རལ་གྲིའི་ཁ་ལས་ཐར། སྟོབས་ཞན་པ་ལས་སྟོབས་ཅན་དུ་བསྒྱུར་ཞིང༌། དམག་གི་དཔའ་བོར་གྱུར་ནས་ཕྱི་རྒྱལ་གྱི་དམག་དཔུང་འབྲོས་སུ་བཅུག
HEB 11:35 བུད་མེད་རྣམས་ལ་རང་གི་ནང་མི་རྣམས་འཆི་བ་ནས་གསོན་པོར་གྱུར་ནས་ཐོབ། གཞན་རྣམས་མནར་གཅོད་མྱོང༌། འཆི་བ་ནས་སླར་གསོན་ཏེ་ཚེ་འདི་ལས་ལེགས་པ་འཐོབ་པའི་ཕྱིར་སྡུག་བསྔལ་དེ་ལས་སྒྲོལ་བའི་ཆེད་དུ་དཀོན་མཆོག་སྤོང་བར་ཁས་ལེན་མ་བྱས།
HEB 11:36 གཞན་རྣམས་ཀྱིས་འཕྱ་དམོད་དང༌། རྟ་ལྕག་གིས་བརྡུངས་པར་གྱུར་བ་མ་ཟད། ལྕགས་ཐག་གིས་བཅིངས་ནས་བཙོན་དུ་འཇུག་པའང་མྱོང༌།
HEB 11:37 ཁོ་ཚོ་རྡོ་རུབ་བཏང་ནས་བསད། སོག་ལེ་ཡིས་བསད། རལ་གྲི་ཡིས་བསད། ཁོ་ཚོས་ར་དང་ལུག་གི་ལྤགས་པ་གྱོན་ཏེ་འཁྱམས། དབུལ་ཞིང༌། མནར་གཅོད། སྡུག་བསྔལ་དྲག་པོ་མྱོང༌།
HEB 11:38 འཇིག་རྟེན་འདི་ལ་ཁོ་ཚོ་གནས་པ་འོས་པ་མིན་པས། ཁོ་ཚོ་འབྲོག་སྟོང་དང༌། རི་དང༌། བྲག་ཕུག ས་དོང་རྣམས་ལ་བསྡད་དུ་བཅུག
HEB 11:39 ཁོ་ཚོ་ཐམས་ཅད་དད་པའི་སྒོ་ནས་དཀོན་མཆོག་གི་གདེང་འཇོག་ཐོབ་ཀྱང༌། གང་ཞལ་གྱིས་བཞེས་པ་དེ་མ་ཐོབ།
HEB 11:40 གང་ཡིན་ཟེར་ན། དཀོན་མཆོག་གིས་ང་ཚོའི་དོན་ལ་དེ་ལས་ལེགས་པ་ཞིག་གནང་བས། ང་ཚོ་དང་བྲལ་བར་ཁོ་རྣམས་ཡོངས་སུ་རྫོགས་པར་མི་མཛད་པའི་ཕྱིར་རོ། །
HEB 12:1 དེའི་ཕྱིར་དེ་ལྟར་མང་བའི་དཔང་པོ་རྣམས་ནི་སྤྲིན་པ་བཞིན་ང་ཚོ་བསྐོར་བས། བར་ཆད་ཀུན་དང༌། ངེད་རྣམས་ལ་འཁྱུད་པར་སླ་བའི་སྡིག་ཉེས་ཕར་བཞག་སྟེ་བཟོད་པའི་སྒོ་ནས་ང་ཚོའི་མདུན་ལ་ཡོད་པའི་རྒྱུག་ལམ་སྟེང་རྒྱུགས་དགོས།
HEB 12:2 ངེད་རྣམས་ཀྱི་དད་པའི་འགོད་པ་པོ་དང་ཡོངས་སུ་རྫོགས་པར་མཛད་མཁན་ཡེ་ཤུའི་ཕྱོགས་སུ་ནན་གྱིས་ལྟ་དགོས། ཁོང་གི་མདུན་དུ་བཞག་པའི་དགའ་སྤྲོའི་དོན་ལ་དེའི་འཕྱ་དམོད་རྩིས་མེད་དུ་བཏང་སྟེ་རྒྱང་ཤིང་གི་སྡུག་བསྔལ་བཟོད་ནས་དཀོན་མཆོག་གི་བཞུགས་ཁྲིའི་གཡས་སུ་བཞུགས།
HEB 12:3 ཁྱེད་ཚོ་ཡིད་ཐང་མི་ཆད་པ་དང༌། སེམས་ཤུགས་མི་ཉམས་པའི་ཕྱིར། སྡིག་ཅན་རྣམས་ཀྱི་སྡང་སེམས་དེ་ཙམ་བཟོད་མཁན་ཁོང་བསམ་ཞིབ་བྱེད།
HEB 12:4 ཁྱེད་ཚོས་སྡིག་ཉེས་དང་འཛིང་དུས་ཁྲག་ཐོན་པའི་བར་དུ་ད་དུང་མ་སླེབས།
HEB 12:5 ཡང་ཁོང་གིས་ཁྱེད་རྣམས་ལ་སྲས་ལྟར་སྐུལ་མ་གཏོང་བ་བརྗེད་ཏེ། ངའི་བུ། གཙོ་བོས་གཅུན་པར་སྣང་མེད་མི་བྱེད་ཅིང༌། ། བཀའ་བཀྱོན་མཛད་དུས་ཡིད་ཐང་མ་ཆད་ཅིག །
HEB 12:6 དེ་ནི་གཙོ་བོས་བྱམས་པར་གཅུན་པ་དང༌། ། བུ་རུ་རྩི་བ་རྣམས་ལ་གཅུན་པས་སོ། ། ཞེས་གསུངས།
HEB 12:7 སྡུག་བསྔལ་མྱོང་བ་དེ་གཅུན་པའི་ཕྱིར་ཡིན་ཏེ། དཀོན་མཆོག་གིས་ཁྱེད་ཚོ་སྲས་ལྟར་གཅུན་པར་མཛད། ཕ་ཡིས་མ་བཅུན་པའི་བུ་ཡོད་དམ།
HEB 12:8 ཐམས་ཅད་དང་ལྷན་གཅིག་ཁྱེད་གཅུན་པར་མ་གྱུར་ན། ཁྱེད་ཚོ་བུ་མ་ཡིན་པས་བྱི་ཕྲུག་ཡིན།
HEB 12:9 མ་ཟད་ང་ཚོར་རང་ཉིད་གཅུན་པའི་ཕ་ཡོད་དེ། ཁོང་རྣམས་ལ་གུས་བཀུར་བྱས། དེ་བས་ཀྱང་མགོ་སྒུར་ངང་ནས་ང་ཚོའི་སེམས་ཉིད་ཀྱི་ཡབ་དཀོན་མཆོག་གི་བཀའ་ལ་ཉན་ཏེ་འཚོ་བར་མི་འོས་སམ།
HEB 12:10 ཕ་རྣམས་ཀྱིས་དུས་རེ་ཞིག་གི་བར་དུ་གང་ལེགས་པ་བསམ་པ་ལྟར་ང་ཚོ་བཅུན་པ་ཡིན་ཡང༌། དཀོན་མཆོག་གིས་ངེད་རྣམས་ལ་ཁོང་གི་དམ་པ་ཉིད་ཀྱི་སྐལ་བ་འཐོབ་པ་དང༌། ང་ཚོར་ཕན་པའི་ཆེད་དུ་ཁོང་གིས་ང་ཚོ་གཅུན་པར་མཛད།
HEB 12:11 གཅུན་པ་མྱོང་བའི་སྐབས་དགའ་བ་ལས་སྡུག་པའི་རྒྱུ་མང་བ་མཐོང་ཡང༌། གཅུན་མྱོང་མཁན་རྣམས་ལ་རྗེས་སུ་དྲང་བ་ཉིད་ཀྱི་ཞི་བདེའི་འབྲས་བུ་འཐོབ་པར་འགྱུར།
HEB 12:12 དེའི་ཕྱིར་སྟོབས་མེད་པའི་ལག་པ་དང་འདར་བའི་པུས་མོ་བརྟན་པར་བྱེད་ཅིང༌།
HEB 12:13 རྐང་པའི་དོན་ལ་ལམ་བདེ་བར་བཟོས། དེ་ནས་རྐང་པ་ཞ་བ་ཚིགས་ནས་མི་བུད་པར་གསོ་བར་འགྱུར།
HEB 12:14 མི་ཐམས་ཅད་དང་ཞི་བདེར་གནས་པ་དང༌། དམ་པ་རུ་འགྱུར་བའི་ཆེད་དུ་འབད་རྩོལ་ཤིན་ཏུ་བྱེད་དགོས། དམ་པ་མེད་ན་མི་སུས་ཀྱང་གཙོ་བོ་མཇལ་བར་མི་སྲིད།
HEB 12:15 ཁྱེད་ཚོའི་ཁྲོད་དུ་མི་ཚང་མ་དཀོན་མཆོག་གི་ཐུགས་རྗེ་འཐོབ་མཁན་ཡིན་པར་བྱོས་ཤིག སུ་ཞིག་གིས་རྙོག་དྲ་བཟོ་མཁན་རྩ་བ་ངན་པ་ལྟར་ཡར་སྐྱེས་ནས་མང་པོར་མི་གཙང་བར་མི་བྱེད་པའི་ཕྱིར་དོགས་ཟོན་གྱིས་ཤིག
HEB 12:16 དུས་ཞིག་གི་ཟས་ཀྱི་ཕྱིར་མེས་པོ་ཨེ་སའུ་ཡིས་རང་གི་ནོར་སྐལ་བཙོངས། ཁོ་དང་འདྲ་བར་མི་སུ་ཞིག་ཆོས་མེད་པའམ་ལོག་གཡེམ་བྱེད་མཁན་དུ་འགྱུར་བར་དོགས་ཟོན་གྱིས་ཤིག
HEB 12:17 ཁྱེད་ཚོས་ཤེས་གསལ་ལྟར། དེའི་རྗེས་སུ་ཁོས་ནོར་སྐལ་འཐོབ་འདོད་དེ། མཆི་མ་ཤོར་ཞིང་ནན་གྱིས་བཙལ་ཡང༌། སེམས་བསྒྱུར་བའི་གོ་སྐབས་མ་རྙེད་པས་མ་ཐོབ།
HEB 12:18 གནའ་བོའི་ཡི་སི་ར་ཨེལ་པ་དང་མི་འདྲ་བར་ཁྱེད་ཚོ་ནི་ལག་པས་རེག་ཐུབ་པའི་རི་དང༌། མེ་འབར་བ། ནམ་མཁའ་བསྒྲིབས་པ། མུན་ནག རླུང་འཚུབ།
HEB 12:19 དམག་དུང་གི་སྒྲ་ཆེན་པོ་དང༌། གསུང་སྐད་ཀྱི་སྒྲ་ཡི་ས་ཆ་དང་ཉེ་བར་མ་སླེབས། གསུང་སྐད་ཀྱི་སྒྲ་དེ་ཐོས་མཁན་རྣམས་འཇིགས་སྐྲག་སྐྱེས་ནས་ང་ཚོར་ད་དུང་མ་གསུངས་ཞེས་ནན་གྱིས་ཞུ་བ་ཕུལ།
HEB 12:20 དུད་འགྲོ་ཞིག་གིས་ཀྱང་རི་ལ་རེག་ན་རྡོ་རུབ་བཏང་ནས་གསོད་དགོས་ཞེས་པའི་བཀའ་དེ་ཁོ་ཚོས་བཟོད་མ་ཐུབ།
HEB 12:21 ལུང་སྟོན་པ་མོ་ཤེ་ཡིས་ཀྱང་ང་འཇིགས་ནས་འདར་བཞིན་ཡོད་ཅེས་གསུང་བ་ཙམ་དུ་གང་བྱུང་བ་དེ་འཇིགས་སུ་རུང་བ་ཞིག་ཡོད།
HEB 12:22 འོན་ཀྱང་ཁྱེད་ཚོ་ནི་རི་བོ་ཙི་ཡོན་དང༌། གཏན་དུ་གནས་པའི་དཀོན་མཆོག་གི་གྲོང་ཁྱེར་མཆོག་སྟེ་དཀོན་མཆོག་གི་ཞིང་ཁམས་སུ་ཆགས་པའི་ཡེ་རུ་ཤ་ལེམ་དང༌། དཀོན་མཆོག་གི་ཕོ་ཉ་གྲངས་ལས་འདས་པ་དགའ་བའི་ངང་ནས་འཚོགས་པ་དང༌།
HEB 12:23 དཀོན་མཆོག་གི་ཞིང་ཁམས་སུ་མིང་བཀོད་ཡོད་པའི་སྔོན་སྐྱེས་རྣམས་ཀྱི་ཆོས་ཚོགས་དང༌། ཐམས་ཅད་ལ་ཁྲིམས་གཅོད་མཛད་མཁན་དཀོན་མཆོག་དང༌། ཡོངས་སུ་རྫོགས་པའི་དྲང་ལྡན་རྣམས་ཀྱི་སེམས་ཉིད་རྣམས་དང༌།
HEB 12:24 ཞལ་ཆད་གསར་པའི་བར་མི་ཡེ་ཤུ་དང༌། ཧ་བེལ་གྱི་ཁྲག་ལས་གཏམ་ལྷག་པར་བཟང་པོ་སྨྲ་སྟེ་སྐུ་ཁྲག་གཏོར་བ་དེའི་མདུན་དུ་སླེབས།
HEB 12:25 གསུང་མཁན་གྱི་བཀའ་ལ་ནན་གྱིས་ཉོན་ཞིག གང་ཡིན་ཞེ་ན། ཡི་སི་ར་ཨེལ་གྱི་མི་རྣམས་ཀྱིས་འཇིག་རྟེན་འདིར་ལུང་སྟོན་པ་མོ་ཤེའི་བཀའ་ལ་མ་ཉན་པས་མ་ཐར་བ་ཡིན་ན། ངེད་རྣམས་ཀྱིས་ཞིང་ཁམས་ནས་གསུང་མཁན་གྱི་བཀའ་ལ་མ་ཉན་ན་ཐར་བར་འགྱུར་མི་སྲིད།
HEB 12:26 དེའི་དུས་སུ་ཁོང་གི་གསུང་སྐད་ཀྱིས་ས་གཞི་གཡོས་ཀྱང༌། ད་ལྟ་ཁོང་གིས་ད་དུང་ལན་གཅིག་ངས་ས་གཞི་མ་ཟད། ནམ་མཁའ་ཡང་གཡོ་བ་བྱེད་པར་བྱའོ་ཞེས་ཞལ་གྱིས་བཞེས།
HEB 12:27 ད་དུང་ལན་གཅིག་ཅེས་པའི་དོན་ནི་གང་གཡོ་མི་ཐུབ་པ་རྣམས་གནས་པའི་ཕྱིར། གང་བཀོད་པ་རྣམས་གཡོས་ནས་མེད་པར་འགྱུར་བ་དེ་ཡིན།
HEB 12:28 དེའི་ཕྱིར་ང་ཚོར་གཡོ་མི་སྲིད་པའི་རྒྱལ་སྲིད་འཐོབ་པས་དཀོན་མཆོག་ལ་བཀའ་དྲིན་ཆེ་ཞུ་དགོས། དེའི་སྒོ་ནས་ང་ཚོས་དད་ཞིང་གུས་པས་དཀོན་མཆོག་ལ་ཐུགས་མཉེས་པའི་བསྙེན་བཀུར་ཞུ།
HEB 12:29 གང་ལགས་ཟེར་ན། ངེད་རྣམས་ཀྱི་དཀོན་མཆོག་ནི་སྲེག་པར་བྱེད་པའི་མེ་ལྟར་ཡིན་ནོ། །
HEB 13:1 སྤུན་ཟླ་རྣམས་ཀྱིས་ཕན་ཚུན་བྱམས་པ་བྱེད་པར་གནས་དགོས།
HEB 13:2 མགྲོན་པོ་གང་ཡིན་ལ་སྣེ་ལེན་བྱེད་དགོས་པ་མ་བརྗེད། དེ་ལྟར་བྱས་པའི་སྒོ་ནས་ཁ་ཅིག་གིས་རང་གིས་མི་ཤེས་པར་དཀོན་མཆོག་གི་ཕོ་ཉ་རྣམས་ལ་སྣེ་ལེན་བྱས་པའི་ཕྱིར་རོ།
HEB 13:3 བཙོན་པ་རྣམས་རང་ཡང་བཙོན་དུ་འཇུག་པ་ལྟར་དྲན་དགོས་པ་དང༌། མནར་གཅོད་མྱོང་བ་རྣམས་རང་ཡང་སྡུག་བསྔལ་མྱོང་བ་ལྟར་དྲན་ཞིག
HEB 13:4 དཀོན་མཆོག་གིས་ལོག་གཡེམ་དང་འདོད་ལོག་བྱེད་མཁན་རྣམས་ལ་ཉེས་ཆད་མཛད་རྒྱུ་ཡིན་པས། གཉེན་སྒྲིག་ནི་ལོག་གཡེམ་གྱིས་མི་གཙང་བར་མི་འགྱུར་བར་ཐམས་ཅད་ཀྱིས་གུས་བཀུར་བྱེད་དགོས།
HEB 13:5 ནོར་རྫས་གང་ཡོད་པར་ཡིད་ཚིམ་པར་འགྱུར་ཏེ་སེམས་ཡོངས་སུ་དངུལ་ལ་མ་ཆགས། གང་ལགས་ཤེ་ན། དཀོན་མཆོག་གིས། ངས་ཁྱོད་དང་ནམ་ཡང་མི་བྲལ། ། གཏན་ནས་སྤོང་བར་མི་བྱ་འོ། ། ཞེས་གསུངས།
HEB 13:6 དེའི་ཕྱིར་ང་ཚོས་བློ་སྟོབས་ཆེན་པོས། གཙོ་བོས་ང་ལ་རོགས་བྱེད་པས། ། འཇིགས་པའི་རྒྱུ་མཚན་ང་ལ་མེད། ། མི་ཡིས་ང་ལ་ཅི་ཞིག་བྱེད། ། ཞེས་ཟེར་ཐུབ།
HEB 13:7 ཁྱེད་ཚོའི་འགོ་ཁྲིད་པ་རྣམས་ཏེ་དཀོན་མཆོག་གི་བཀའ་ཁྱེད་ཚོར་སྒྲོག་མཁན་མ་བརྗེད་པར། ཁོ་ཚོའི་སྤྱོད་ལམ་གྱི་འབྲས་བུ་ལ་བལྟས་ཏེ་དེ་ཚོའི་དད་སེམས་ལ་དཔེ་ལྟ་བྱེད་ཅིག
HEB 13:8 ཡེ་ཤུ་མཱ་ཤི་ཀ་ནི་ཁ་སང་དང༌། དེ་རིང༌། དུས་རྒྱུན་དུ་མི་འགྱུར་བར་གནས་སོ།
HEB 13:9 ལོག་ལྟ་སྣ་ཚོགས་ལྡན་པའི་བསྟན་པ་ཡིས་སླུ་བར་མ་འགྱུར། གང་ཡིན་ཟེར་ན། ཕན་མི་ཐོགས་པའི་ཆོ་གའི་སྒྲིག་ལམ་གྱིས་གྲ་སྒྲིག་བྱས་པའི་ཟས་ལ་བརྟེན་པ་ལས། ཐུགས་རྗེ་ཡིས་སེམས་བརྟན་པོར་བྱས་ན་ལེགས།
HEB 13:10 ང་ཚོར་མཆོད་ཁྲི་ཞིག་ཡོད་པ་དང༌། དེའི་སྟེང་གི་མཆོད་པ་གུར་མཆོག་ནང་ལ་གཡོག་བྱེད་པ་རྣམས་ཀྱིས་ཟ་མི་ཆོག
HEB 13:11 སྡིག་ཉེས་སེལ་བའི་མཆོད་པ་འབུལ་བའི་སྐབས་བླ་ཆེན་གཙོ་བོས་དུད་འགྲོའི་ཁྲག་གནས་མཆོག་ནང་དུ་འཁྱེར་ཡང་རོ་རྣམས་སྒར་གྱི་ཕྱི་རོལ་དུ་མེ་ཡིས་སྲེག་པར་བྱེད།
HEB 13:12 དེ་བཞིན་དུ་རང་གི་སྐུ་ཁྲག་གི་སྒོ་ནས་མི་རྣམས་དམ་པ་རུ་མཛད་པའི་ཕྱིར་ཡེ་ཤུ་ཡིས་ཀྱང་གྲོང་ཁྱེར་གྱི་རྒྱལ་སྒོའི་ཕྱི་རོལ་དུ་སྡུག་བསྔལ་མྱོང༌།
HEB 13:13 དེ་ལྟར་ངེད་རྣམས་ཀྱིས་ཀྱང་སྒར་གྱི་ཕྱི་རོལ་དུ་ཁོང་གི་དྲུང་དུ་ཕྱིན་ནས། ཁོང་ལ་བབས་པའི་འཕྱ་དམོད་བཟོད་པར་བྱེད་དགོས།
HEB 13:14 འཇིག་རྟེན་འདིར་གཏན་དུ་གནས་པའི་གྲོང་ཁྱེར་མེད་པས། ང་ཚོས་མ་འོངས་པའི་གྲོང་ཁྱེར་མཆོག་རེ་སྒུག་བྱེད།
HEB 13:15 ཡེ་ཤུ་ཡི་སྒོ་ནས་ངེད་རྣམས་ཀྱིས་རྟག་ཏུ་དཀོན་མཆོག་ལ་བསྟོད་པའི་མཆོད་པ་འབུལ་དགོས། དེ་ནི་ཁོང་གི་མཚན་ཁས་ལེན་བྱེད་པའི་ངག་གི་འབྲས་བུ་ཡིན།
HEB 13:16 དྲིན་དང་ཕན་ཚུན་རོགས་པ་བྱེད་པར་དྲན་པར་གྱིས་ཤིག དེ་བཞིན་དུ་མཆོད་པ་རྣམས་དཀོན་མཆོག་ཐུགས་མཉེས་པའི་ཕྱིར་རོ། །
HEB 13:17 ཁྱེད་ཚོའི་འགོ་ཁྲིད་པ་རྣམས་ཀྱིས་ཁྱེད་ཚོ་ལ་སེམས་ཁུར་བྱེད་ཅིང༌། དཀོན་མཆོག་ལ་རྩིས་འབུལ་ཞུ་བར་འགྱུར་བས། ཁོ་ཚོའི་བཀའ་ལ་ཉན་ཏེ་མགོ་སྒུར། ཁོ་ཚོས་སེམས་སྐྱོ་བ་མིན་པར་དགའ་བའི་ངང་ནས་ལས་བྱེད་པའི་ཕྱིར་བཀའ་ལ་ཉན། དེ་མིན་ན་ཁྱེད་ཚོར་མི་ཕན།
HEB 13:18 ངེད་རྣམས་ཀྱིས་ནོངས་མེད་པ་ཡིན་པར་ཤེས་ཤིང༌། རྣམ་པ་ཀུན་ནས་རྒྱུ་དག་དང་ལྡན་པའི་སྤྱོད་པ་བྱེད་པར་འདོད་དེ། ང་ཚོའི་དོན་ལ་སྨོན་ལམ་འདེབས།
HEB 13:19 ཁྱེད་ཚོའི་རྩར་མགྱོགས་པོ་ལོག་པར་འགྱུར་བའི་ཕྱིར་སྨོན་ལམ་དེ་ལྟར་འདེབས་པ་ངས་ནན་གྱིས་སྐུལ།
HEB 13:20 ཞི་བདེ་གནང་མཁན་གྱི་དཀོན་མཆོག་སྟེ། གཏན་དུ་གནས་པའི་ཞལ་ཆད་ཀྱི་སྐུ་ཁྲག་གི་ངང་ནས་ལུག་རྣམས་ཀྱི་ལུག་རྫི་ཆེན་པོ་ཡིན་ཏེ་ངེད་རྣམས་ཀྱི་གཙོ་བོ་ཡེ་ཤུ་འཆི་བ་ནས་སློང་བར་མཛད་མཁན་གྱིས།
HEB 13:21 རང་གི་ཐུགས་དགོངས་སྒྲུབ་པའི་ཕྱིར་བཟང་པོ་ཐམས་ཅད་ཁྱེད་ཚོར་གནང་བར་འགྱུར་ཞིང༌། དཀོན་མཆོག་གི་སྤྱན་སྔར་གང་ཐུགས་མཉེས་པ་ཡིན་པ་དེ་ཡེ་ཤུ་མཱ་ཤི་ཀ་བརྒྱུད་ནས་ངེད་རྣམས་ཀྱི་ནང་ན་སྒྲུབ་པར་ཤོག ཁོང་ལ་རྟག་ཏུ་གཟི་བརྗིད་དང་ལྡན་པར་གྱུར་ཅིག ཨ་མེན།
HEB 13:22 སྤུན་ཟླ་རྣམས། ངས་ཁྱེད་ཚོར་ཡི་གེ་ཐུང་ཐུང་ཞིག་བྲིས་པས་འདི་ནང་གི་སྐུལ་མ་བཟོད་པར་སྐུལ།
HEB 13:23 ང་ཚོའི་སྤུན་ཟླ་ཐི་མོ་ཐེ་བཙོན་ཁང་ནས་གྲོལ་བ་ཤེས་དགོས། གལ་ཏེ་ཁོང་ངའི་རྩར་མགྱོགས་པོར་སླེབས་ན། ང་ཁོང་དང་མཉམ་དུ་ཁྱེད་ཚོའི་རྩར་འོང༌།
HEB 13:24 ཁྱེད་ཚོའི་འགོ་ཁྲིད་པ་དང༌། དད་ལྡན་པ་ཐམས་ཅད་ལ་འཚམས་འདྲི་ཞུས། དབྱི་ཏ་ལི་ཡུལ་ནས་ཡིན་པ་རྣམས་ཀྱིས་ཁྱེད་ཚོར་འཚམས་འདྲི་ཞུ།
HEB 13:25 ཐུགས་རྗེ་ཁྱེད་ཚོ་ཐམས་ཅད་ལ་ལྡན་པར་གྱུར་ཅིག །
JAM 1:1 དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཞབས་ཕྱི་ཡ་ཀོབ་ཀྱིས་འཇིག་རྟེན་དུ་འཐོར་བར་གྱུར་བའི་ཡ་ཧུ་དཱ་པའི་ཚོ་ཁག་བཅུ་གཉིས་པོར་འཚམས་འདྲི་ཞུ།
JAM 1:2 ངའི་སྤུན་ཟླ་རྣམས། ཉམས་ཚོད་སྣ་ཚོགས་མྱོང་སྐབས་དགའ་སྤྲོ་ཁོ་ནར་རྩིས་ཤིག
JAM 1:3 གང་ལགས་ཟེར་ན། དད་པ་ལ་ཚོད་ལྟ་མྱོང་བའི་སྒོ་ནས་བཟོད་པའི་སེམས་སྐྱེ་བ་ཁྱེད་ཀྱིས་ཤེས།
JAM 1:4 ཡང་ཁྱེད་ཚོ་མ་ཚང་བ་མེད་པར་སྨིན་ཞིང་ཡོངས་སུ་རྫོགས་པར་འགྱུར་བའི་ཆེད་དུ་བཟོད་པའི་སེམས་དེས་བྱ་བ་ཚར་བར་བྱེད་དུ་ཆུག
JAM 1:5 ཁྱེད་ཚོའི་ནང་ནས་སུ་ཞིག་ལ་ཤེས་རབ་མ་ཚང་ན། སྐྱོན་འདོགས་ཅི་ཡང་མི་མཛད་པར་ཐམས་ཅད་ལ་ལྷག་པར་གནང་མཁན་དཀོན་མཆོག་ལ་གསོལ་བ་འདེབས་ཤིང༌། གནང་བར་འགྱུར།
JAM 1:6 འོན་ཀྱང་མི་དེས་ཐེ་ཚོམ་ཅི་ཡང་མེད་པར་དད་པའི་ངང་ནས་གསོལ་བ་འདེབས་དགོས། གང་ལགས་ཟེར་ན། ཐེ་ཚོམ་ལྡན་པ་ནི་རྒྱ་མཚོའི་རྦ་རླབས་རླུང་གིས་འདེད་ཅིང་འཕྱུར་བ་དང་འདྲ་བ་ཡིན།
JAM 1:7 ཡང་བློ་རྩེ་གཉིས་ཅན་ཏེ་སྤྱོད་ལམ་ཀུན་ལ་མི་བརྟན་པས་གཙོ་བོ་དཀོན་མཆོག་ནས་ཅི་ཞིག་འཐོབ་རྒྱུ་ཡིན་པ་མ་སོམས་ཤིག
JAM 1:9 དཀོན་མཆོག་གིས་སྤུན་ཟླ་དམའ་བ་ལ་མཐོ་བར་མཛད་པས་ཁོས་དགའ་བར་བྱེད་དགོས།
JAM 1:10 ཡང་དཀོན་མཆོག་གིས་ཕྱུག་པོ་ལ་དམའ་བར་མཛད་པས་ཁོས་དགའ་བར་བྱེད་འོས། གང་ཡིན་ཞེ་ན། རྩྭ་ཐང་གི་མེ་ཏོག་ལྟར་ཁོ་འདའ་བར་འགྱུར་ཏེ།
JAM 1:11 ཉི་མ་ཤར་ནས་དེའི་ཚ་རླུང་དྲག་པོས་མེ་ཏོག་སྐམ་ཞིང༌། འདབ་མ་སར་ལྷུངས་ནས་དེའི་མཛེས་སྡུག་འཇིག་པར་འགྱུར། དེ་ལྟར་ཕྱུག་པོའང་ལས་ཀ་བྱེད་པའི་ལམ་དུ་འཇིག་པར་འགྱུར།
JAM 1:12 ཉམས་ཚོད་མྱོང་དུས་བཟོད་བསྲན་བྱེད་མཁན་མི་དེ་བདེའོ། ཁོ་ལ་གདེང་འཇོག་ཐོབ་ནས་གཙོ་བོས་ཁོང་ལ་བརྩེ་བར་འཛིན་མཁན་རྣམས་ལ་དཔག་མེད་ཚེ་ཡི་ཅོད་པན་ཞལ་གྱིས་བཞེས་པ་དེ་འཐོབ་ངེས་ཡིན།
JAM 1:13 བསླུ་བྲིད་མྱོང་སྐབས་མི་སུ་ཞིག་གིས་“དཀོན་མཆོག་གིས་ང་ལ་བསླུ་བྲིད་མཛད་”ཅེས་ཟེར་མི་རུང༌། གང་ཡིན་ཞེ་ན། ངན་པས་དཀོན་མཆོག་ལ་བསླུ་བྲིད་བྱེད་མི་སྲིད་ཅིང༌། ཁོང་ཉིད་ཀྱིས་སུ་ལ་ཡང་བསླུ་བྲིད་མཛད་མི་སྲིད།
JAM 1:14 འོན་ཀྱང་མི་རྣམས་རང་རང་གི་འདོད་ཆགས་ཀྱིས་སླུ་ཞིང་འདྲེན་ཏེ་བསླུ་བྲིད་མྱོང༌།
JAM 1:15 དེ་ནས་འདོད་ཆགས་ཀྱི་འབྲས་བུ་སྨིན་ཏེ་སྡིག་ཉེས་སྐྱེ་ཞིང༌། སྡིག་ཉེས་ཀྱི་འབྲས་བུ་སྨིན་ཏེ་འཆི་བ་སྐྱེ།
JAM 1:16 ངའི་གཅེས་པའི་སྤུན་ཟླ་རྣམས། མགོ་མ་འཁོར་ཞིག
JAM 1:17 གནང་སྦྱིན་བཟང་པོ་དང་ཡང་དག་པ་ཀུན་སྟེང་ནས་ཉི་ཟླ་སྐར་གསུམ་གྱི་འགོད་པ་གནང་མཁན་ཡབ་དཀོན་མཆོག་ལས་འབབ། ཁོང་ལ་འགྱུར་བའམ་གཡོ་བའི་གྲིབ་མས་མ་གོས་ཤིང་འགྱུར་མེད་ལགས་སོ།
JAM 1:18 ཁོང་གིས་གང་བཀོད་པའི་ནང་ནས་ང་ཚོ་ནི་ལོ་ཏོག་གི་ཕུད་དུ་འགྱུར་བའི་ཆེད་དུ། ཁོང་གི་དགོངས་པ་ལྟར་བདེན་པའི་བཀའ་ཡི་སྒོ་ནས་ང་ཚོ་གསར་དུ་སྐྱེ་བར་མཛད།
JAM 1:19 ངའི་གཅེས་པའི་སྤུན་ཟླ་རྣམས། མི་ཐམས་ཅད་ཉན་པ་ལ་མགྱོགས། ཤོད་པ་ལ་དལ་ཞིང༌། ཁོང་ཁྲོ་ལངས་མི་བདེ་བར་འགྱུར་དགོས་པ་ཤེས་པར་གྱིས་ཤིག
JAM 1:20 གང་ལགས་ཟེར་ན། མི་རྣམས་ཀྱི་ཁོང་ཁྲོས་དཀོན་མཆོག་གི་དྲང་བདེན་གྱི་བྱ་བ་སྒྲུབ་མི་སྲིད།
JAM 1:21 དེའི་ཕྱིར་མི་གཙང་བ་ཀུན་དང་ངན་སེམས་ལྷག་མ་དག་སྤངས་ཏེ། སྙེམས་ཆུང་ངང་ནས་ཁྱེད་ཚོ་ཐར་བར་མཛད་ཐུབ་པའི་བཀའ་ཁྱེད་ཀྱི་སེམས་སུ་བཞག་པ་དེ་དང་ལེན་བྱོས་ཤིག
JAM 1:22 རང་གིས་རང་ལ་མགོ་སྐོར་གཏོང་བའི་བཀའ་ཐོས་མཁན་འབའ་ཞིག་ཏུ་མི་འགྱུར་བར། བཀའ་སྒྲུབ་མཁན་དུ་འགྱུར་ཞིག
JAM 1:23 བཀའ་ཐོས་ནས་མི་སྒྲུབ་མཁན་ནི་མེ་ལོང་ལ་བལྟས་ནས་རང་གི་གདོང་པ་མཐོང་མཁན་ལྟར་ཡིན།
JAM 1:24 གང་ལགས་ཤེ་ན། རང་ལ་བལྟས་ཏེ་མེ་ལོང་དང་ཁ་བྲལ་རྗེས་འཕྲལ་དུ་ཅི་ལྟར་ཡོད་པ་བརྗེད།
JAM 1:25 འོན་ཀྱང་ཡང་དག་པ་དང་སྡིག་ཉེས་དང་འཆི་བ་ལས་ཐར་བའི་བཀའ་ཁྲིམས་ལ་ནན་གྱིས་བལྟས་ནས། བརྩོན་འགྲུས་བྱེད་མཁན་ནི་བཀའ་ཐོས་ནས་བརྗེད་པ་མིན་ཏེ་བཀའ་སྒྲུབ་ནས་ལག་ལེན་བྱེད་པ་ཡིན་པས་ཁོའི་བྱ་བ་ལ་བྱིན་གྱིས་བརླབས་པར་འགྱུར་རོ། །
JAM 1:26 གལ་ཏེ་མི་ཞིག་གིས་ང་ཆོས་སེམས་དང་ལྡན་པའི་མི་ཞིག་ཡིན་སྙམ་ནས་རང་གི་ལྕེ་ལ་ཁ་ལོ་མ་སྒྱུར་བར་རང་གིས་རང་ལ་མགོ་སྐོར་བཏང་ན། མི་དེའི་ཆོས་ཕན་མེད་ཡིན།
JAM 1:27 ཡབ་དཀོན་མཆོག་གི་སྤྱན་སྔར་བཅོས་མིན་དང་སྐྱོན་མེད་པའི་ཆོས་ནི་སྡུག་བསྔལ་མྱོང་བའི་དྭ་ཕྲུག་དང་ཡུགས་མོ་རྣམས་ལ་བྱམས་སྐྱོང་བྱེད་ལ། རང་ཉིད་ལ་ཡང་འཇིག་རྟེན་གྱི་མི་གཙང་བ་མ་འགོ་བར་སྲུང་བ་དེ་ཡིན་ནོ། །
JAM 2:1 ངའི་སྤུན་ཟླ་རྣམས། ཁྱེད་ཚོ་ནི་ང་ཚོའི་གཟི་བརྗིད་དང་ལྡན་པ་གཙོ་བོ་ཡེ་ཤུ་མཱ་ཤི་ཀ་ལ་དད་མཁན་ཡིན་པས་ཕྱོགས་རིས་མ་བྱོས་ཤིག
JAM 2:2 དཔེར་ན་མི་གོས་སྤུས་ལེགས་ཤིང་གསེར་གྱི་སོར་གདུབ་གྱོན་པ་ཞིག་དང༌། དབུལ་པོ་གོས་ཧྲུལ་པོ་གྱོན་པ་ཞིག་ཀྱང་ཁྱོད་ཚོའི་ཚོགས་པར་ཡོང་ནས།
JAM 2:3 གོས་སྤུས་ལེགས་གྱོན་པ་དེར་བརྩི་བཀུར་བྱས་ནས་ཁྱོད་ཀྱིས་“གལ་ཆེ་སར་བཞུགས་གདན་འཇགས་”ཞེས་ཟེར་ཞིང༌། དབུལ་པོ་དེར་“དེར་ལངས་ནས་སྡོད་”ཡང་ན་“ངའི་རྐང་པའི་འཁྲིས་ལ་སྡོད་ཅིག་”ཅེས་ཟེར་ན།
JAM 2:4 ཁྱོད་ཚོའི་ནང་ནས་དབྱེ་བ་ཕྱེ་པས་ངན་སེམས་ཀྱིས་སྐུལ་བའི་ཁྲིམས་དཔོན་དུ་མ་གྱུར་རམ།
JAM 2:5 ངའི་གཅེས་པའི་སྤུན་ཟླ་རྣམས། ཉོན་ཞིག འཇིག་རྟེན་འདིའི་ངོས་ནས་དབུལ་པོ་རྣམས་ནི་དད་པའི་ཆ་ནས་ཕྱུག་པོར་འགྱུར་བ་དང༌། ཁོང་ལ་བརྩེ་བ་རྣམས་ལ་ཞལ་ཆད་གནང་བའི་རྒྱལ་སྲིད་འཛིན་མཁན་དུ་འགྱུར་བར་དཀོན་མཆོག་གིས་བདམས་པར་མ་མཛད་དམ།
JAM 2:6 འོན་ཀྱང་ཁྱོད་རྣམས་ཀྱིས་དབུལ་པོར་རྩིས་མེད་བཏང༌། ཕྱུག་པོ་རྣམས་ནི་ཁྱོད་ལ་བཙན་གནོན་བྱེད་མཁན་དང༌། ཁྱོད་ཁྲིམས་རར་གཏུག་མཁན་མ་ཡིན་ནམ།
JAM 2:7 ཡང་ཁོ་རྣམས་ནི་ཁྱེད་ཚོ་དང་སྡེབ་པའི་མཚན་མཆོག་ལ་སྐུར་བ་འདེབས་མཁན་མ་ཡིན་ནམ།
JAM 2:8 གལ་ཏེ་ཁྱེད་རྣམས་ཀྱིས་ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག་ཅེས་པའི་གསུང་རབ་ལྟར་གྱི་ཆེས་མཐོའི་ཁྲིམས་བསྒྲུབས་ན་ཁྱེད་ཚོས་ལེགས་པར་བྱེད།
JAM 2:9 འོན་ཀྱང་ཕྱོགས་རིས་བྱས་ན་ཁྱོད་རྣམས་ཀྱིས་སྡིག་ཉེས་ཀྱི་ལས་བྱས་པ་ཡིན་ལ། བཀའ་ཁྲིམས་ཀྱིས་ཁྱོད་རྣམས་ཁྲིམས་དང་འགལ་མཁན་ཡང་ཡིན་པར་སྟོན།
JAM 2:10 སུས་ཀྱང་ཆོས་ཁྲིམས་ཆ་ཚང་བསྲུངས་ནས་སྣེ་གཅིག་དང་འགལ་ན་ཐམས་ཅད་འགལ་མཁན་ལ་རྩི་བར་གྱུར་རོ།
JAM 2:11 གང་ཡིན་ཞེ་ན། ལོག་གཡེམ་མ་བྱེད་ཅེས་གསུང་མཁན་དེས་རང་གིས་མིའི་སྲོག་མ་གཅོད་ཅེས་ཀྱང་གསུངས། འོ་ན་ཁྱོད་ཀྱིས་ལོག་གཡེམ་མི་བྱེད་ཀྱང་མིའི་སྲོག་བཅད་ན། ཁྱོད་ཁྲིམས་དང་འགལ་མཁན་དུ་གྱུར་རོ།
JAM 2:12 སྡིག་ཉེས་དང་འཆི་བ་ལས་ཐར་བའི་བཀའ་ཁྲིམས་ཀྱིས་ཁྲིམས་གཅོད་མྱོང་རྒྱུ་ཡིན་པ་ལྟར་གཏམ་དང་སྤྱོད་པ་བྱོས་ཤིག
JAM 2:13 གང་ལགས་ཤེ་ན། གཞན་ལ་སྙིང་རྗེ་མ་བྱེད་མཁན་རྣམས་ལ་དཀོན་མཆོག་གིས་ཐུགས་བརྩེ་མེད་པར་ཁྲིམས་གཅོད་པར་འགྱུར་ཡང༌། སྙིང་རྗེ་ཡིས་ཁྲིམས་གཅོད་ལས་རྒྱལ་ལོ། །
JAM 2:14 ངའི་སྤུན་ཟླ་རྣམས། གལ་སྲིད་མི་ཞིག་གིས་དད་པ་མཚོན་བྱེད་ཀྱི་བྱ་བ་མ་བྱས་པར་དད་པ་ཡོད་ཅེས་སྨྲས་ན་ཅི་ཕན། དད་པ་དེས་ཁོ་ཐར་བར་བྱེད་ཐུབ་བམ།
JAM 2:15 གལ་ཏེ་སྤུན་ཟླ་ཞིག་ལ་གོས་སམ་ཉིན་རེའི་ཁ་ཟས་མི་འདང་བར།
JAM 2:16 གཟུགས་པོར་གང་དགོས་པ་མ་སྦྱིན་པར་ཁྱོད་ཚོའི་ནང་ནས་མི་ཞིག་གིས་“བདེ་བའི་ངང་ནས་སོང༌། དྲོད་དང་འགྲང་བར་འགྱུར་བར་ཤོག་”ཅེས་ཟེར་ན་ཅི་ཕན།
JAM 2:17 དེའི་ཕྱིར་བྱ་བ་མི་སྒྲུབ་པའི་དད་པ་ནི་སྟོང་པའོ། །
JAM 2:18 འོན་ཀྱང་མི་ཞིག་གིས་“ཁྱེད་ལ་དད་པ་ཡོད། ང་ལ་བྱ་བ་བཟང་པོ་ཡོད་”ཅེས་ཟེར་ཡོང༌། ཁྱོད་ཀྱིས་ང་ལ་བྱ་སྤྱོད་དང་བྲལ་ཏེ་རང་གི་དད་པ་བསྟན་ན། ངས་ཁྱོད་ལ་བྱ་སྤྱོད་ཀྱི་སྒོ་ནས་ངའི་དད་པ་སྟོན་པར་བྱ།
JAM 2:19 ཁྱོད་ཀྱིས་དཀོན་མཆོག་གཅིག་རང་ཡིན་པར་དད་པ་བྱེད། དེ་ལེགས་སོ། གདོན་འདྲེས་ཀྱང་དེ་ལྟར་བྱེད་དེ་འཇིགས་ནས་འདར།
JAM 2:20 བླུན་པོ་ཁྱོད། བྱ་སྤྱོད་དང་བྲལ་ཏེ་དད་པ་ཕན་མེད་ཡིན་པ་སྟོན་པར་འདོད་དམ།
JAM 2:21 ང་ཚོའི་མེས་པོ་ཨབ་ར་ཧམ་གྱིས་རང་གི་བུ་ཨི་སཱག་མཆོད་པ་འབུལ་བརྩིས་བྱས་ཏེ་མཆོད་ཁྲིའི་སྟེང་ལ་བཞག་པ་དེ། བྱ་བའི་སྒོ་ནས་ཡང་དག་པར་མ་བརྩིས་སམ།
JAM 2:22 དེའི་སྟེང་ནས་དད་པ་དང་བྱ་བ་བྱེད་པ་གཉིས་མཉམ་དུ་འགྲོགས་ཤིང་བྱ་བ་བྱས་པས་དད་པ་ཚང་བར་གྱུར་བ་དེ་གསལ་ལོ།
JAM 2:23 ཡང་གསུང་རབ་ལས་ཨབ་ར་ཧམ་གྱིས་དཀོན་མཆོག་ལ་དད་པ་བྱས་པས། དཀོན་མཆོག་གིས་ཁོང་རྣམ་པར་དག་པའི་མི་ཞིག་ལ་བརྩིས་གནང་ངོ་ཞེས་པའི་བཀའ་གྲུབ་ཅིང༌། ཁོང་ལ་དཀོན་མཆོག་གི་མཛའ་གྲོགས་ཞེས་བྱ་བ་ཡིན།
JAM 2:24 དད་པ་ཁོ་ན་མ་ཡིན་གྱིས། བྱ་བའི་སྒོ་ནས་མི་ཞིག་ཡང་དག་པར་རྩི་བ་དེ་གསལ་ལོ།
JAM 2:25 དེ་བཞིན་དུ་ཐ་ན་སྨད་འཚོང་མ་ར་ཧབ་ཀྱིས་སོ་པ་རྣམས་སྣེ་ལེན་བྱས་ནས་ཁོ་ཚོ་ལམ་གཞན་ལ་ཕྱིར་བཏང་བས་བྱ་བའི་སྒོ་ནས་རྣམ་པར་དག་པར་གྱུར་བ་མ་ཡིན་ནམ།
JAM 2:26 དེ་བས་ན་ཇི་ལྟར་སེམས་དང་བྲལ་བའི་ལུས་ནི་རོ་ཡིན་པ་བཞིན། དེ་ལྟར་བྱ་བ་དང་བྲལ་བའི་དད་པ་ཡང་སྟོང་པ་ཡིན་ནོ། །
JAM 3:1 ངའི་སྤུན་ཟླ་རྣམས། ཁྱེད་ཚོའི་ཁྲོད་དུ་མི་མང་པོ་ཆོས་སློབ་མཁན་དུ་འགྱུར་མི་རུང༌། གང་ཡིན་ཟེར་ན། ང་ཚོ་སློབ་མཁན་ནི་ཁྲིམས་ལྷག་པར་དམ་པོ་གཅོད་པར་འགྱུར་བ་ཁྱེད་ཀྱིས་ཤེས།
JAM 3:2 ང་ཚོ་ཚང་མས་དོན་མང་པོར་འཕྱུགས་པས། སུ་ཡང་གཏམ་ལ་མ་འཕྱུགས་པ་དེ་མ་ཚང་བ་མེད་པ་ཞིག་ཡིན་ཏེ་ལུས་ཧྲིལ་པོའང་གཅུན་ཐུབ་བོ།
JAM 3:3 ཡང་རྟ་གཅུན་པའི་ཕྱིར་ཁ་ལ་སྲབ་གཡོགས་ན་དེའི་ལུས་ཧྲིལ་པོའང་གཅུན་ཐུབ།
JAM 3:4 ཡང་དཔེ་གཞན་ཞིག་གྲུ་གཟིངས་ལ་བལྟས་ན། དེ་ཚོ་ཆེ་ཞིང་རླུང་ཆེན་གྱིས་འདེད་ཀྱང༌། མཇུག་གི་སྐྱ་བོ་ཆུང་ཆུང་གིས་གྲུ་པའི་འདོད་པ་ལྟར་གྱི་སར་ཁ་ལོ་སྒྱུར་ཐུབ།
JAM 3:5 དེ་བཞིན་ལྕེ་ནི་ལུས་ཀྱི་ཡན་ལག་ཆུང་ཆུང་ཞིག་ཡིན་ཡང་དོན་ཆེན་གྱི་སྐོར་འུད་ཤོབ་བྱེད། མེ་ཆུང་ངུ་ཞིག་གིས་ཅི་ལྟར་ཆེ་བའི་ཤིང་ནགས་སྲེག
JAM 3:6 ཡང་ལྕེ་ནི་མེ་སྟེ། ང་ཚོའི་ཡན་ལག་གི་ནང་ནས་ལྕེ་དེས་དྲང་པོ་མེད་པའི་འཇིག་རྟེན་མཚོན། དེས་ལུས་ཧྲིལ་པོ་མི་གཙང་བར་བྱེད་ཅིང༌། མི་ཚེའི་འཁོར་ཆ་ཚང་སྤར་བ་དང༌། དམྱལ་ཁམས་ཀྱིས་མེ་ཡིན་པའི་ལྕེ་སྤར་རོ།
JAM 3:7 མིའི་རིགས་ཀྱིས་གཅན་གཟན་དང༌། བྱ་བྱིའུ། ལྟོ་བགྲོད། རྒྱ་མཚོའི་སྲོག་ཆགས་རིགས་ཀུན་འདུལ་བར་བྱེད་ཅིང༌། བཏུལ་ཟིན་ཀྱང༌།
JAM 3:8 སུས་ཀྱང་ལྕེ་འདུལ་མི་ཐུབ། དེ་ནི་མི་བརྟན་པ་དང་ངན་པ་ཡིན་ཏེ། སྲོག་ལེན་དུག་ཆུ་ཡིས་གང༌།
JAM 3:9 ང་ཚོས་ལྕེ་ཡིས་ང་ཚོའི་གཙོ་བོ་ཡིན་པའི་ཡབ་ལ་བསྟོད་བསྔགས་བྱེད་ཅིང༌། ལྕེ་ཡིས་དཀོན་མཆོག་གི་དཔེ་རུ་བཀོད་པའི་མི་རྣམས་ལ་དམོད་མོ་ཡང་འདེབས་པས།
JAM 3:10 ཁ་གཅིག་ནས་བསྟོད་པ་དང་དམོད་མོ་གཉིས་ཀ་འཐོན། ངའི་སྤུན་ཟླ་རྣམས། དེ་ལྟར་མི་རུང་ངོ༌།
JAM 3:11 ཆུ་མིག་གི་ཁ་གཅིག་ལས་འཐུང་ཆུ་དང་ཚྭ་ཆུ་གཉིས་ཀ་འཐོན་ནམ།
JAM 3:12 ངའི་སྤུན་ཟླ་རྣམས། བསེ་ཡབ་ཟེར་བའི་ཤིང་སྡོང་ལས་སྐྱུར་རུའམ། རྒུན་འབྲུམ་ཤིང་ལས་བསེ་ཡབ་སྐྱེ་མི་སྲིད་པ་ལྟར། དེ་ལྟར་ཚྭ་ཆུ་ལས་འཐུང་ཆུ་འབྱུང་བར་མི་སྲིད།
JAM 3:13 ཁྱེད་ཚོའི་ནང་ནས་མཁས་ཤིང་བློ་གྲོས་ཅན་སུ་ཡིན། མི་དེས་སྤྱོད་ལམ་བཟང་པོ་དང༌། ཤེས་རབ་ལས་བྱུང་བའི་སེམས་དུལ་པོའི་སྒོ་ནས་སྟོན་དགོས།
JAM 3:14 འོན་ཀྱང་ཁྱོད་ཚོའི་སེམས་ལ་ཕྲག་དོག་དྲག་པོ་དང་འདོད་པ་ཚ་པོ་ཡོད་ན། རང་གི་ཤེས་རབ་སྐོར་འུད་ཤོབ་བྱེད་པའི་སྒོ་ནས་རྫུན་གཏམ་མ་ཤོད་ཅིག
JAM 3:15 འདི་ལྟར་གྱི་ཤེས་རབ་ནི་དཀོན་མཆོག་གི་ཞིང་ཁམས་ནས་འབབ་པ་མ་ཡིན་ཏེ། འཇིག་རྟེན་འདིའི་ཤེས་རབ། སྡིག་ཉེས་འདོད་པའི་ཤེས་རབ། བདུད་ཀྱི་ཤེས་རབ་ཡིན་ནོ།
JAM 3:16 གང་ཡིན་ཞེ་ན། ཕྲག་དོག་དང་འདོད་པ་ཚ་པོ་ཡོད་སར་མི་མཐུན་པ་དང་ངན་སྤྱོད་ཀུན་ཡང་ཡོད།
JAM 3:17 འོན་ཀྱང་དཀོན་མཆོག་གི་ཞིང་ཁམས་ནས་བྱུང་བའི་ཤེས་རབ་ནི་དང་པོར་བཅོས་མིན་དང༌། གཉིས་པར་ཞི་བདེ་ལ་དགའ་བ། དེ་བཞིན་སེམས་དུལ་པོ། ཡ་རབས། སྙིང་རྗེ་འབྲས་བཟང་དང་ལྡན་པ། ཕྱོགས་རིས་སམ་ཁ་བཤད་དོན་ལ་མི་གནས་པ་ཅི་ཡང་མེད་པ་ཞིག་ཡིན།
JAM 3:18 ཡང་ཞི་བདེ་སྐྲུན་མཁན་གྱིས་ཞི་བའི་ངང་ནས་ས་བོན་བཏབ་སྟེ་ཡང་དག་པའི་འབྲས་བུ་འཐོབ་བོ། །
JAM 4:1 ཁྱོད་ཚོའི་ཁྲོད་དུ་རྩོད་པ་དང་འཁྲུག་པ་གང་ནས་འབྱུང༌། ཁྱོད་ཚོའི་སེམས་ནང་དུ་འཐབ་བཞིན་པའི་འདོད་ཆགས་ནས་མ་འབྱུང་ངམ།
JAM 4:2 འདོད་ཆགས་ཀྱིས་གང་འདོད་པ་མི་འཐོབ་པས་ཁྱོད་ཚོས་མིའི་སྲོག་གཅོད། ཧམ་འདོད་བྱས་ནས་གང་འདོད་པ་མི་འཐོབ་པས་རྩོད་ཅིང་འཁྲུག ཁྱོད་ཚོས་དཀོན་མཆོག་ལ་གསོལ་བ་མི་འདེབས་པའི་རྐྱེན་གྱིས་གང་འདོད་པ་མི་འཐོབ།
JAM 4:3 ཁྱོད་ཚོས་གསོལ་བ་འདེབས་ཀྱང་མི་འཐོབ། གང་ཡིན་ཟེར་ན། གང་འཐོབ་པ་དེ་རང་གི་འདོད་པ་ལྟར་སྤྱོད་པའི་ཕྱིར་དང་ཀུན་སློང་ངན་པའི་སྒོ་ནས་གསོལ་བ་འདེབས་པས་སོ།
JAM 4:4 དམ་ཚིག་མི་སྲུང་མཁན་ཁྱོད་རྣམས། འཇིག་རྟེན་འདི་ལ་ཆགས་པ་ནི་དཀོན་མཆོག་ལ་སྡང་བ་ཡིན་པ་མི་ཤེས་སམ། དེའི་ཕྱིར་སུ་ཡང་འཇིག་རྟེན་གྱི་གྲོགས་པོར་འགྱུར་འདོད་པ་དེ་དཀོན་མཆོག་གི་དགྲ་བོར་འགྱུར།
JAM 4:5 ཡང་ན་དཀོན་མཆོག་གིས་ང་ཚོར་གནས་སུ་བཅུག་པའི་སེམས་ནི་ཕྲག་དོག་གིས་གང་ཞེས་པའི་གསུང་རབ་ནང་གི་བཀའ་དེ་དོན་མེད་པར་སེམས་སམ།
JAM 4:6 འོན་ཀྱང་ཁོང་གིས་དེ་ལས་ལྷག་པའི་ཐུགས་རྗེ་གནང༌། དེའི་ཕྱིར་གསུང་རབ་ཀྱི་མདོ་ལས། དཀོན་མཆོག་གིས་ནི་ང་རྒྱལ་ཅན་ལ་རྒོལ། ། ཉམས་ཆུང་རྣམས་ལ་ཐུགས་རྗེ་གནང་བར་མཛད། ། ཅེས་གསུངས།
JAM 4:7 དེ་བས་ན་ཁྱོད་རྣམས་ཀྱིས་དཀོན་མཆོག་གི་བཀའ་སྲུང་ཞིག བདུད་ལ་རྒོལ་བར་བྱེད་ཅིང༌། ཁོ་འབྲོས་པར་འགྱུར།
JAM 4:8 དཀོན་མཆོག་དང་ཉེ་བར་སོང་དང༌། ཁོང་ཁྱོད་དང་ཉེ་བར་འབྱོན་པར་འགྱུར། སྡིག་ཉེས་ཅན་གྱི་མི་ཚོ། ཁྱོད་ཚོའི་ལག་པ་གཙང་བར་བྱོས་ཤིག བློ་རྩེ་གཉིས་ཅན་གྱི་མི་རྣམས། ཁྱོད་ཚོའི་སེམས་གཙང་བར་བྱོས་ཤིག
JAM 4:9 མྱ་ངན་བྱེད་དེ་ངུས་ཤིང་སྨྲེ་སྔགས་ཐོན་ཞིག ཁྱོད་ཚོའི་གད་མོ་ནི་ངུ་འབོད་དང༌། ཁྱོད་ཚོའི་སྐྱིད་པོ་ནི་ཡིད་འཕམ་པར་སྒྱུར་ཞིག
JAM 4:10 གཙོ་བོ་དཀོན་མཆོག་གི་སྤྱན་སྔར་རང་གིས་རང་ལ་དམའ་ས་བཟུང་ཞིང༌། ཁོང་གིས་ཁྱོད་ལ་མཐོ་བར་མཛད་དོ། །
JAM 4:11 སྤུན་ཟླ་རྣམས། གཅིག་གིས་གཅིག་ལ་དམའ་འབེབས་མ་གཏོང་ཞིག སྤུན་ཟླ་ལ་དམའ་འབེབས་གཏོང་བའམ་སྐྱོན་འདོགས་བྱེད་པ་དེ་བཀའ་ཁྲིམས་ལ་དམའ་འབེབས་གཏོང་ཞིང་སྐྱོན་འདོགས་བྱེད་པ་ཡིན། འོན་ཀྱང་བཀའ་ཁྲིམས་ལ་དམའ་འབེབས་བཏང་ན། ཁྱོད་ནི་བཀའ་ཁྲིམས་སྒྲུབ་མཁན་མིན་ཏེ་སྐྱོན་འདོགས་བྱེད་མཁན་ཡིན།
JAM 4:12 ཐར་ཞིང་མེད་པར་མཛད་ཐུབ་པའི་ཁྲིམས་འགོད་པ་དང་ཁྲིམས་དཔོན་གཅིག་རང་ཡིན་པས། ཁྱིམ་མཚེས་ལ་སྐྱོན་འདོགས་བྱེད་ནུས་པ་ཁྱོད་སུ་ཡིན།
JAM 4:13 དེ་རིང་ཡང་ན་སང་ཉིན་གྲོང་ཁྱེར་ཞིག་ལ་ཕྱིན་ནས་ལོ་གཅིག་གི་བར་དུ་ཉོ་ཚོང་བྱེད་པ་ལ་ཁེ་བཟང་འཐོབ་པར་འགྱུར་ཞེས་ཟེར་མཁན་ཁྱོད་རྣམས་ད་ཉོན་ཞིག
JAM 4:14 སང་ཉིན་ཅི་ལྟར་ཡིན་མིན་ཁྱོད་ཚོས་མི་ཤེས། ཁྱོད་ཀྱི་མི་ཚེ་ཅི་ལྟར་ཡིན། ཁྱོད་ནི་དུས་ཐུང་ངུ་མངོན་ཏེ་མི་སྣང་བར་འགྱུར་བའི་སྨུག་པ་ལྟར་ཡིན།
JAM 4:15 ཁྱོད་ཀྱིས་“གཙོ་བོ་དཀོན་མཆོག་གི་དགོངས་པ་ཡིན་ན། ང་ཚོ་གསོན་པར་འགྱུར་ཞིང་འདི་དང་འདི་ལྟ་བུ་ཞིག་བྱེད་པར་བྱའོ་”ཞེས་ཟེར་དགོས།
JAM 4:16 འོན་ཀྱང་ད་ལྟ་ཁྱོད་ཚོས་ཁེངས་དྲེགས་ངང་ནས་འུད་ཤོབ་བྱེད། དེ་ལྟར་གྱི་གཏམ་ཐམས་ཅད་ངན་པ་ཡིན།
JAM 4:17 དེ་བས་ན། བཟང་པོ་ཤེས་ཀྱང་མི་སྒྲུབ་མཁན་དེས་སྡིག་ཉེས་ཀྱི་ལས་བྱེད་པའོ། །
JAM 5:1 ད་ཁྱོད་ཕྱུག་པོ་རྣམས་ང་ལ་ཉོན་ཞིག ཁྱོད་ལ་འབབ་རྒྱུ་ཡིན་པའི་སྡུག་བསྔལ་གྱི་རྐྱེན་གྱིས་ངུས་ཤིང་སྨྲེ་སྔགས་ཐོན་ཞིག
JAM 5:2 ཁྱོད་ཀྱི་རྒྱུ་ནོར་རུལ་ཞིང༌། མུག་པས་གྱོན་གོས་བཟས་ཚར་རོ།
JAM 5:3 ཁྱོད་ཀྱི་གསེར་དང་དངུལ་ལ་གཡའ་ཆགས་ཤིང༌། གཡའ་དེས་ཁྱོད་ལ་སྐྱོན་ཡོད་པ་ར་སྤྲོད་བྱེད་ཅིང༌། མེ་ལྟར་ཁྱོད་ཀྱི་ཤ་སྲེག་པར་འགྱུར། དུས་ཀྱི་མཐའ་མར་ཁྱོད་ཀྱིས་རྒྱུ་ནོར་བསགས་སོ།
JAM 5:4 ཉོན་ཞིག ཁྱོད་ཀྱི་ཞིང་རྔ་མཁན་རྣམས་ཀྱི་གླ་ཆ་ཁྱོད་ཀྱིས་གཡོ་ཐབས་ཀྱིས་ཉར་བས་གླ་ཆ་དེས་འབོད་བཞིན་འདུག ཡང་དབང་ཀུན་དང་ལྡན་པའི་དཀོན་མཆོག་གིས་རྔ་མཁན་ཚོའི་སྐད་ངན་གསན།
JAM 5:5 ཁྱོད་ཚོས་འཇིག་རྟེན་འདིར་རང་འདོད་ལྟར་བདེ་བ་དང་རྒྱས་སྤྲོད་བྱེད་པའི་ངང་ནས་མི་ཚེ་བསྐྱལ་ཏེ། ཁྲིམས་གཅོད་ཀྱི་ཉིན་མོར་ཉེས་ཆད་ཕོག་ངེས་ཡིན།
JAM 5:6 ཁྱོད་ཀྱིས་ཉེས་མེད་ཀྱི་མི་རྣམས་ལ་ཁྲིམས་གཅོད་བྱས་ནས་བསད། ཁོ་ཚོས་ཁྱོད་ལ་རྒོལ་བར་མི་བྱེད།
JAM 5:7 དེའི་ཕྱིར་སྤུན་ཟླ་རྣམས། གཙོ་བོ་མ་འབྱོན་པའི་བར་དུ་བཟོད་པར་བྱེད། སྟོན་ཆར་དང་དཔྱིད་ཆར་མ་འབབ་པའི་བར་དུ་ཞིང་པས་བཟོད་སྒོམ་བྱེད་དེ་ས་གཞི་ནས་འབྱུང་བའི་རིན་ཐང་ཆེ་བའི་ལོ་ཏོག་སྒུག་ཅིང་སྡོད་པའི་དཔེ་ལ་ལྟོས་ཤིག
JAM 5:8 ཁྱེད་ཀྱིས་ཀྱང་བཟོད་པར་བྱེད་དགོས། གཙོ་བོ་སླེབས་པར་ཉེ་བ་ཡིན་པས་ཡིད་སེམས་བརྟན་པོར་གནས་ཤིག
JAM 5:9 སྤུན་ཟླ་རྣམས། ཁྱེད་ཚོར་ཁྲིམས་གཅོད་མི་ཕོག་པའི་ཆེད་དུ་གཅིག་གིས་གཅིག་ལ་མ་རངས་པའི་གཏམ་མ་ཤོད། ལྟོས་ཤིག ཁྲིམས་དཔོན་སྒོའི་འགྲམ་ལ་བཞེངས་ནས་འདུག
JAM 5:10 སྤུན་ཟླ་རྣམས། ཁྱོད་ཚོས་གཙོ་བོ་དཀོན་མཆོག་གི་མཚན་གྱི་ཐོག་ནས་གསུངས་པའི་ལུང་སྟོན་པ་རྣམས་ནི་སྡུག་བསྔལ་མྱོང་དུས་བཟོད་པ་སྒོམ་པའི་མིག་དཔེར་ཟུངས་ཤིག
JAM 5:11 ང་ཚོས་བཟོད་སེམས་ཡོད་པའི་མི་རྣམས་ནི་བདེ་བར་རྩི། ཁྱེད་ཚོས་ཡོབ་ཀྱིས་བཟོད་སྒོམ་བྱས་པའི་སྐོར་ཐོས་མྱོང་ལ། མཐའ་མར་གཙོ་བོས་གང་མཛད་པ་ཡང་ཤེས། གང་ཡིན་ཟེར་ན། གཙོ་བོ་དཀོན་མཆོག་ནི་བྱམས་དང་ཐུགས་རྗེ་ཅན་ཡིན་པས་སོ། །
JAM 5:12 ངའི་སྤུན་ཟླ་རྣམས། ད་ཉོན་ཞིག གལ་ཆེ་ཤོས་ནི་དཀོན་མཆོག་གི་ཞིང་ཁམས་སམ། ས་གཞི་དཔང་དུ་མ་འཛུགས་ཏེ་མནའ་ཅིའང་མ་སྐྱོལ་ཞིག ཁྱེད་ཚོར་ཁྲིམས་གཅོད་མི་ཕོག་པའི་ཆེད་དུ་ཡིན་ན་ཡིན་དང་མིན་ན་མིན་གྱི་གཏམ་དྲང་པོ་ཤོད་ཅིག
JAM 5:13 ཁྱོད་ཚོའི་ཁྲོད་དུ་སུ་ཞིག་ལ་སྡུག་བསྔལ་ཡོད་དམ། ཁོས་སྨོན་ལམ་འདེབས་དགོས། སུ་ཞིག་ལ་དགའ་སྤྲོ་ཡོད་དམ། ཁོས་བསྟོད་གླུ་ལེན་དགོས།
JAM 5:14 ཁྱེད་ཚོའི་ནང་ན་ནད་པ་ཡོད་དམ། ཁོས་ཆོས་ཚོགས་ཀྱི་འགན་འཁུར་བ་རྣམས་བོས་ནས་ཁོང་ཚོས་གཙོ་བོའི་མཚན་གྱི་ཐོག་ནས་ནད་པར་སྣུམ་འབྱུག་སྟེ་སྨོན་ལམ་འདེབས་དགོས།
JAM 5:15 དཀོན་མཆོག་ལ་དད་པའི་ངང་ནས་འདེབས་པའི་སྨོན་ལམ་གྱིས་ནད་པ་དེ་ནད་ལས་ཐར་བར་འགྱུར་ཞིང༌། གཙོ་བོས་ཁོ་གསོ་བར་མཛད། གལ་ཏེ་ནད་པ་དེས་སྡིག་ཉེས་ཀྱི་ལས་བྱས་པ་ཡིན་ན་སེལ་བར་འགྱུར།
JAM 5:16 དེའི་ཕྱིར་ཁྱེད་ཀྱི་སྡིག་ཉེས་གཅིག་གིས་གཅིག་ལ་ཁས་བླངས་ཤིང༌། ནད་ལས་ཐར་བར་འགྱུར་བའི་ཕྱིར་ཕན་ཚུན་སྨོན་ལམ་ཐོབ་ཅིག དྲང་ལྡན་པ་ཞིག་གི་སྨོན་ལམ་ལ་བྱ་བ་སྒྲུབ་ཐུབ་པའི་དབང་ཤུགས་ཆེན་པོ་ཡོད།
JAM 5:17 ལུང་སྟོན་པ་ཨེ་ལི་ཡཱ་ནི་ང་ཚོའི་རང་གཤིས་དང་འདྲ་བ་ཞིག་ཡིན་ཏེ། ཆར་པ་མི་འབབ་པའི་སྨོན་ལམ་ནན་གྱིས་བཏབ་པས་ལོ་གསུམ་དང་ཟླ་བ་དྲུག་གི་བར་དུ་ས་ལ་ཆར་པ་མ་བབས།
JAM 5:18 དེ་ནས་ཁོང་གིས་ཡང་བསྐྱར་སྨོན་ལམ་བཏབ་པས། ནམ་མཁའ་ནས་ཆར་པ་བབས་ཤིང་ས་གཞི་ནས་འབྲས་བུ་སྐྱེས།
JAM 5:19 ངའི་སྤུན་ཟླ་རྣམས། ཁྱེད་ཚོའི་ནང་ནས་སུ་ཞིག་གིས་འཕྲིན་བཟང་གི་བདེན་པའི་ལམ་སྤངས་པ་དེ། གཞན་གྱིས་ཁོ་ལེགས་བཅོས་བཏང་ན།
JAM 5:20 སྡིག་ཉེས་ཅན་ཞིག་ནོར་བའི་ལམ་ནས་ཚུར་འཁྲིད་མཁན་དེས་སྡིག་ཅན་གྱི་སེམས་འཆི་བ་ལས་ཐར་བར་བྱེད་ཅིང༌། སྡིག་ཉེས་མང་པོ་སེལ་དུ་འཇུག་པ་དེ་ཤེས་པར་གྱིས་ཤིག །
1PE 1:1 ཡེ་ཤུ་མཱ་ཤི་ཀའི་སྐུ་ཚབ་ང་པེ་ཏྲོ་ཡིས། དཀོན་མཆོག་གིས་བདམས་པའི་མི་རྣམས་ཏེ་པོན་ཏུ་དང༌། ག་ལད་ཡཱ། ཀ་པ་དོག་ཡཱ། ཨེ་ཞེ་ཡཱ། པི་ཐིན་ཡཱ་ཞིང་ཆེན་གནས་གཡར་བ་ལྟར་སྡོད་མཁན་རྣམས་ལ་འཕྲིན་ཡིག་འདི་ཕུལ་ལོ།
1PE 1:2 ཡབ་དཀོན་མཆོག་གིས་སྔ་མོ་ནས་ཁྱེད་ཚོ་མཁྱེན་ནས་བདམས་ཤིང༌། ཁོང་གི་དམ་པའི་ཐུགས་ཉིད་ཀྱིས་ཁྱེད་ཚོ་དམ་པར་མཛད། དེ་ནི་ཡེ་ཤུ་མཱ་ཤི་ཀའི་བཀའ་ལ་ཉན་པ་དང༌། ཁོང་གི་སྐུ་ཁྲག་གཏོར་བའི་སྒོ་ནས་ཁྱེད་ཚོ་དག་པར་འགྱུར་བའི་ཆེད་དུ་ཡིན། ཁྱེད་ཚོ་ལ་ཐུགས་རྗེ་དང་ཞི་བདེ་འཕེལ་བར་གྱུར་ཅིག
1PE 1:3 ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་པ་འབུལ་བར་ཤོག ཁོང་གི་ཐུགས་རྗེ་ཆེན་པོས་ཡེ་ཤུ་མཱ་ཤི་ཀ་འཆི་བ་ནས་སླར་གསོན་པ་བརྒྱུད་ནས་ཁོང་གིས་ངེད་རྣམས་ལ་ཚེ་སྲོག་གསར་པ་སྐྱེ་བ་དང༌། རྟག་ཏུ་གནས་པའི་རེ་བ་གནང་བ་མ་ཟད།
1PE 1:4 དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་བགོ་སྐལ་མི་འཇིག་པ། དྲི་མ་མེད་པ། མི་ཡལ་བ་ཞིག་ཀྱང་གནང་ངོ༌། དེ་ནི་ཁྱེད་ཚོའི་ཕྱིར་དཀོན་མཆོག་གི་ཞིང་ཁམས་སུ་ཉར་ཡོད།
1PE 1:5 ཐར་པ་དེ་མ་འཐོབ་པའི་བར་དུ་དཀོན་མཆོག་གིས་རང་གི་ནུས་མཐུར་བརྟེན་ནས་ཁྱེད་ཚོའི་དད་པ་བརྒྱུད་དེ་ཁྱེད་རྣམས་སྲུང་བཞིན་ཡོད། ཐར་པ་དེ་ནི་དུས་མཐའ་མར་མངོན་སུམ་དུ་འགྱུར་ངེས་ཡིན།
1PE 1:6 དུས་ཐུང་ངུར་ཉམས་ཚོད་སྣ་ཚོགས་ཀྱི་སྡུག་བསྔལ་མྱོང་དགོས་ནའང༌། བྱིན་རླབས་དེ་ཐམས་ཅད་ཐོབ་པའི་རྐྱེན་གྱིས་ཁྱེད་ཚོ་ཧ་ཅང་དགའ་བར་བྱེད།
1PE 1:7 ཁྱེད་ཚོའི་དད་པ་བདེན་པ་ཡིན་པར་སྟོན་ཞིང༌། ཡེ་ཤུ་མཱ་ཤི་ཀ་བྱོན་ནས་མངོན་སུམ་དུ་འགྱུར་བའི་ཚེ་ཁྱེད་ལ་བསྟོད་པ་དང༌། གཟི་བརྗིད། བཀུར་སྟི་བཅས་འཐོབ་པའི་ཆེད་དུ་ཉམས་ཚོད་དེ་ཚོ་བྱུང༌། དཔེར་ན་འཇིག་ཏུ་འགྲོ་བའི་གསེར་ཡང་མེ་ཡིས་བཙོ་སྦྱང་བྱེད་དེ། ཁྱེད་ཚོའི་དད་པ་གསེར་ལས་རིན་ཐང་ཆེའོ།
1PE 1:8 ཁྱེད་རྣམས་གཙོ་བོ་ཡེ་ཤུ་མཇལ་མ་མྱོང་ཡང་ཁོང་ལ་གཅེས་པར་འཛིན་ཞིང༌། ད་ལྟ་མི་མཐོང་ཡང་ཁོང་ལ་དད་པ་བྱེད་དེ། བརྗོད་ལས་འདས་པ་དང་གཟི་བརྗིད་ཀྱིས་ཁེངས་པའི་དགའ་སྤྲོ་ཆེན་པོས་ཁྱེད་ཚོ་དགའ་བར་བྱེད།
1PE 1:9 གང་ཡིན་ཟེར་ན། ཁྱེད་ཚོའི་དད་པའི་འབྲས་བུ་སྟེ་ཐར་པ་འཐོབ་བཞིན་ཡོད།
1PE 1:10 ཁྱེད་རྣམས་ལ་འབྱུང་བར་འགྱུར་བའི་ཐུགས་རྗེ་བརྗོད་མཁན་ལུང་སྟོན་པ་རྣམས་ཀྱིས་ཐར་པ་དེའི་སྐོར་ཞིབ་ཕྲ་རྩད་གཅོད་བྱས་ཏེ།
1PE 1:11 ཁོང་ཚོའི་སེམས་ནང་ལ་བཞུགས་པའི་མཱ་ཤི་ཀའི་ཐུགས་ཉིད་ཀྱིས་མཱ་ཤི་ཀའི་སྡུག་བསྔལ་དང་དེའི་རྗེས་སུ་འབྱུང་བའི་གཟི་བརྗིད་ཀྱི་སྐོར་ལུང་བསྟན་པའི་ཚེ། དེའི་དུས་སམ་གནས་ཚུལ་གང་ཡིན་པ་དཔྱད་པར་འདོད།
1PE 1:12 རང་ཉིད་ལ་མིན་ཏེ་ཁྱེད་ཚོར་ཞབས་ཕྱི་ཞུས་པ་དེ་ལུང་སྟོན་པ་རྣམས་ལ་མངོན་པར་གྱུར། ད་ལྟ་དཀོན་མཆོག་གི་ཞིང་ཁམས་ནས་མངགས་པའི་དམ་པའི་ཐུགས་ཉིད་ཀྱི་དབང་གི་སྒོ་ནས་ཆོས་སྟོན་པ་རྣམས་ཀྱིས་ཁྱེད་ཚོ་ལ་འཕྲིན་བཟང་དེ་བསྒྲགས། དཀོན་མཆོག་གི་ཕོ་ཉ་རྣམས་ཀྱིས་ཀྱང་དོན་དེ་ཚོ་མཁྱེན་པར་འདོད།
1PE 1:13 དེའི་ཕྱིར་སོ་སོའི་སེམས་གྲ་སྒྲིག་བྱེད་དེ་རང་ཚོད་ཟིན་ནས་ཡེ་ཤུ་མཱ་ཤི་ཀ་མངོན་པར་འགྱུར་བའི་དུས་སུ་ཁྱེད་ཚོར་གནང་རྒྱུ་ཡིན་པའི་ཐུགས་རྗེ་ལ་རེ་བ་མཐའ་གཅིག་ཏུ་བྱེད་ཅིག
1PE 1:14 ཁ་ལ་ཉན་པའི་ཕྲུ་གུ་ལྟར་སྔར་གྱི་རྨོངས་པའི་དབང་གིས་འདོད་ཆགས་མི་བྱེད་པར།
1PE 1:15 ཁྱེད་ཚོ་བོས་གནང་མཁན་ནི་དམ་པ་ཡིན་པས་སྤྱོད་ལམ་ཚང་མ་དམ་པར་བྱོས་ཤིག
1PE 1:16 གང་ཡིན་ཞེ་ན། མདོ་ལས། ང་ནི་དམ་པ་ཡིན་པས་ཁྱོད་ཚོའང་དམ་པར་ངེས་པར་འགྱུར་དགོས་ཞེས་འཁོད།
1PE 1:17 ཕྱོགས་རིས་མེད་པར་སོ་སོས་བྱ་བ་གང་བྱས་པར་གཞིགས་ནས་ཁྲིམས་གཅོད་མཛད་མཁན་ལ་ཁྱེད་ཚོས་ཡབ་ཅེས་ཞུ་བས། གནས་གཡར་བ་ལྟར་འཇིག་རྟེན་འདིར་སྡོད་རིང་དཀོན་མཆོག་ལ་བཀུར་སྟི་བྱེད་དེ་མི་ཚེ་སྐྱེལ་དགོས།
1PE 1:18 མེས་པོ་ལས་བྱུང་བའི་དོན་མེད་ཀྱི་ལུགས་སྲོལ་ལྟར་ཁྱེད་ཚོ་གསེར་རམ་དངུལ་ལ་སོགས་པའི་འཇིག་ཏུ་འགྲོ་བའི་རིན་གྱིས་བླུས་པ་མ་ཡིན་གྱིས།
1PE 1:19 སྐྱོན་དང་དྲི་མ་བྲལ་བའི་ལུ་གུ་ལྟར་གྱི་མཱ་ཤི་ཀའི་སྐུ་ཁྲག་རིན་ཐང་ཆེ་བ་དེས་བླུས་པ་ཁྱེད་ཚོས་ཤེས།
1PE 1:20 དཀོན་མཆོག་གིས་འཇིག་རྟེན་བཀོད་པའི་སྔོན་ལ་ཁོང་ནི་བདམས་ཀྱང༌། ད་དུས་མཐའ་མར་ཁྱེད་ཚོའི་དོན་དུ་མངོན་པར་གྱུར།
1PE 1:21 ཁྱེད་ཚོ་མཱ་ཤི་ཀ་བརྒྱུད་ནས་དཀོན་མཆོག་ལ་དད་པ་སྐྱེས། དཀོན་མཆོག་གིས་ཁོང་འཆི་བ་ནས་སླར་གསོན་པར་མཛད་ནས་གཟི་བརྗིད་གནང་བས། ཁྱེད་ཚོ་དཀོན་མཆོག་ལ་དད་ཅིང་རེ་བ་བྱེད།
1PE 1:22 བདེན་པའི་བཀའ་ལ་ཉན་པའི་སྒོ་ནས་སེམས་དག་པར་བྱས་ཏེ། སྤུན་ཟླ་རྣམས་ལ་སྙིང་ཐག་པ་ནས་བྱམས་པར་བྱེད་པས། གཅིག་གིས་གཅིག་ལ་སེམས་ཀྱི་གཏིང་ནས་བྱམས་པ་བྱེད།
1PE 1:23 གང་ལགས་ཟེར་ན། ཁྱེད་ཚོ་མི་རྟག་པའི་ས་བོན་མིན་ཏེ་རྒྱུན་དུ་གནས་པའི་ས་བོན་ལས་ཡང་བསྐྱར་སྐྱེས། ས་བོན་དེ་ནི་འཚོ་བའི་སྤྱོད་ལམ་སྟོན་པའི་དཀོན་མཆོག་གི་བཀའ་རྟག་ཏུ་གནས་པ་དེ་ཡིན་ནོ། །
1PE 1:24 ཤ་ཁྲག་གདོས་བཅས་རྩྭ་དང་འདྲ། ། དཔལ་ཡོན་གཟི་བརྗིད་མེ་ཏོག་འདྲ། ། རྩྭ་སྐམ་མེ་ཏོག་རྙིད་འགྱུར་ཀྱང༌། །
1PE 1:25 གཙོ་བོའི་བཀའ་ནི་རྒྱུན་དུ་གནས། ། བཀའ་དེ་ནི་ཁྱེད་ཚོར་བསྒྲགས་པའི་འཕྲིན་བཟང་ཡིན་ནོ། །
1PE 2:1 དེའི་ཕྱིར་ངན་སེམས་དང༌། མགོ་སྐོར། ཁ་བཤད་དོན་ལ་མི་གནས་པ། ཕྲག་དོག སྨད་ར་གཏོང་བ་ཚང་མ་སྤོངས་ཤིག
1PE 2:2 ཁྱེད་ཚོས་གཙོ་བོའི་ཐུགས་རྗེ་མྱངས་པས། ཁྱེད་ཚོས་དམར་འབྱར་རྣམས་ལྷད་མེད་པའི་འོ་མ་ལ་གདུང་བ་ལྟར། དཀོན་མཆོག་གི་བཀའ་ལ་གདུང་བར་གྱིས་ཤིག དེ་ནས་ཁྱེད་ཚོ་ཐར་པའི་ཐོག་ནས་འཚར་ལོངས་འབྱུང༌།
1PE 2:4 ཁྱེད་ཚོ་དཀོན་མཆོག་གི་གསོན་པོའི་རྨང་རྡོ་མཱ་ཤི་ཀའི་མདུན་དུ་ཡོང་བཞིན་ཡོད། མི་རྣམས་ཀྱིས་ཁོང་དང་ལེན་མ་བྱས་ཀྱང༌། དཀོན་མཆོག་གི་སྤྱན་སྔར་ཁོང་བདམས་པ་དང་རྩ་ཆེན་ཡིན།
1PE 2:5 ཁྱེད་ཚོ་ཡང་གསོན་པའི་རྡོ་ལྟར་དཀོན་མཆོག་གི་ཐུགས་ཉིད་ཀྱི་ཕོ་བྲང་ལ་རྩིག་བཞིན་ཡོད་པ་མ་ཟད། དམ་པའི་ཆོས་དཔོན་ཡང་ཡིན། ཡེ་ཤུ་མཱ་ཤི་ཀ་བརྒྱུད་ནས་ཁྱེད་ཚོས་དཀོན་མཆོག་ཐུགས་མཉེས་པའི་སེམས་ཉིད་ཀྱི་མཆོད་པ་འབུལ།
1PE 2:6 མདོ་ལས་འཁོད་པ་ལྟར། ལྟོས་དང་ཙི་ཡོན་ཡུལ་གྲུར་ང་ཡིས་ནི། ། བདམས་པའི་རྩ་ཆེན་རྨང་རྡོ་ལེགས་པར་རྩིག ། ཁོང་ལ་དད་པ་ངོ་ཚར་མི་ལྷུང་ངོ༌། ། ཞེས་འཁོད།
1PE 2:7 དེས་ན་དད་ལྡན་རྣམས་ལ་ཁོང་ནི་རྩ་ཆེན་ཡིན་ཏེ། མ་དད་པ་རྣམས་ལ་ནི། བཟོ་བ་རྣམས་ཀྱིས་དོར་བའི་རྡོ། ། ཁང་པའི་རྨང་རྡོ་རང་དུ་གྱུར། ། ཞེས་འཁོད།
1PE 2:8 ཡང༌། ལམ་གྱི་བཀག་རྡོ་དང་ནི་ལྷུང་བའི་བྲག ། དེ་བཞིན་དུ་ཁོ་ཚོ་ལྷུང་བའི་རྒྱུ་མཚན་ནི་ཐོག་མར་བཀོད་པ་ལྟར་བཀའ་ལ་མ་ཉན་པས་སོ། །
1PE 2:9 འོན་ཀྱང་མུན་པ་ལས་ཁོང་གི་ཡ་མཚན་ཆེ་བའི་འོད་ནང་དུ་བོས་པར་མཛད་མཁན་དཀོན་མཆོག་གི་ཁྱད་དུ་འཕགས་པའི་མཛད་པ་སྒྲོག་པའི་ཕྱིར། ཁྱེད་ཚོ་ནི་བདམས་པའི་མི་རིགས་དང༌། རྒྱལ་རིགས་ཀྱི་ཆོས་དཔོན། མི་རྒྱུད་དམ་པ། དཀོན་མཆོག་གི་ཁོངས་མི་བཅས་ཡིན་ནོ། །
1PE 2:10 སྔར་སོང་ཁྱེད་ཚོ་འབངས་མི་མ་ཡིན་ཡང༌། ། ད་ཆ་དཀོན་མཆོག་གི་འབངས་མི་རུ་གྱུར། ། སྔར་སོང་ཁྱེད་ཚོར་ཐུགས་རྗེ་མ་ཐོབ་ཀྱང༌། ། ད་ནི་ཁྱེད་ཚོར་ཐུགས་རྗེ་ཐོབ་པར་གྱུར། །
1PE 2:11 གཅེས་པའི་སྤུན་ཟླ་རྣམས། ཁྱེད་ཚོ་གནས་གཡར་བ་དང་ངོ་མི་ཤེས་པ་ལྟར་འཇིག་རྟེན་འདིར་སྡོད་པས། ངས་ཁྱེད་ཚོའི་སེམས་ཉིད་ལ་རྒོལ་བའི་འདོད་ཆགས་སྤོང་བར་སྐུལ།
1PE 2:12 དད་མེད་པ་རྣམས་ཀྱི་ཁྲོད་དུ་སྤྱོད་ལམ་བཟང་པོ་བྱོས་ཤིག དེ་ནས་ཁོ་ཚོས་ཁྱེད་རྣམས་ངན་པ་བྱེད་མཁན་ཡིན་ཞེས་ཟེར་ཡང༌། ཁྱེད་ཚོའི་སྤྱོད་ལམ་བཟང་པོ་མཐོང་ནས་དཀོན་མཆོག་གི་འབྱོན་པའི་ཉིན་མོར་ཁོ་ཚོས་ཁོང་ལ་བསྟོད་བསྔགས་བྱེད་པར་འགྱུར།
1PE 2:13 ཁྱེད་ཚོས་གཙོ་བོའི་དོན་དུ་སྲིད་འཛིན་པ་ཐམས་ཅད་ལ་བཀུར་དགོས་ཏེ། དབང་ཆ་མཐོ་ཤོས་ཀྱི་རྒྱལ་པོའམ། ཡང་ན་ཁོང་གིས་མངགས་པའི་སྤྱི་ཁྱབ་རྣམས་ལ་བཀུར་དགོས། སྤྱི་ཁྱབ་རྣམས་མངགས་པའི་རྒྱུ་མཚན་ནི་ངན་པ་བྱེད་མཁན་རྣམས་ལ་ཆད་པ་གཏོང་ཞིང༌། ལེགས་སྤྱོད་མཁན་ལ་བསྟོད་པ་བྱེད་པའི་ཕྱིར་རོ།
1PE 2:15 གང་ལགས་ཤེ་ན། ཁྱེད་ཚོས་བཟང་པོ་བྱེད་པའི་སྒོ་ནས་བླུན་པོའི་གཏམ་འགོག་རྒྱུ་དེ་དཀོན་མཆོག་གི་ཐུགས་དགོངས་ཡིན།
1PE 2:16 ཁྱེད་ཚོ་དཀོན་མཆོག་གི་ཞབས་ཕྱི་ཡིན་ཏེ་རང་དབང་ལྡན་པ་ལྟར་མི་ཚེ་སྐྱེལ། འོན་ཀྱང་རང་དབང་ལ་ཁ་གཡར་ཏེ་ངན་པའི་ལས་མ་བྱེད།
1PE 2:17 མི་ཐམས་ཅད་ལ་བཀུར་སྟི་བྱོས། སྤུན་ཟླ་རྣམས་ལ་བྱམས་ཤིག དཀོན་མཆོག་ལ་བསྙེན་བཀུར་བྱེད་ཅིང༌། རྒྱལ་པོ་ལ་བཀུར་སྟི་བྱོས།
1PE 2:18 བྲན་གཡོག་རྣམས། སོ་སོའི་བདག་པོ་ལ་བཀུར་སྟི་ཆེན་པོས་ཁ་ལ་ཉན་དགོས། སེམས་བཟང་པོ་དང་འཇམ་པོ་ཁོ་ན་ལ་མ་ཡིན་པར། དྲག་པོ་རྣམས་ལའང་འདི་ལྟར་བྱེད་དགོས།
1PE 2:19 རྒྱུ་མཚན་ནི། གལ་ཏེ་དཀོན་མཆོག་གི་སྐོར་བསམ་བློ་བཏང་ནས་མི་འོས་པའི་སྡུག་བསྔལ་བཟོད་པར་བྱས་ན། དེ་ནི་དཀོན་མཆོག་གི་སྤྱན་སྔར་བསྟོད་པའི་རྒྱུ་ཡིན།
1PE 2:20 སྡིག་ལས་བྱས་པས་ཉེས་རྡུང་བཟོད་ན་བསྟོད་པའི་རྒྱུ་ཅི་ཡིན། འོན་ཀྱང་བཟང་པོ་བྱས་ནས་སྡུག་བསྔལ་བྱུང་བ་བཟོད་ན་དཀོན་མཆོག་གི་སྤྱན་སྔར་བསྟོད་པའི་རྒྱུ་ཡིན།
1PE 2:21 ཁྱེད་ཚོ་དོན་འདི་རང་ལ་བོས་པ་ཡིན། གང་ཡིན་ཟེར་ན། མཱ་ཤི་ཀའི་རྗེས་སུ་འབྲང་བའི་ཕྱིར། ཁྱེད་ཚོའི་དོན་ལ་སྡུག་བསྔལ་མྱོང་བའི་སྒོ་ནས་ཁོང་གིས་ཁྱེད་ཚོ་ལ་མིག་དཔེ་ཞིག་བཞག་པར་མཛད།
1PE 2:22 ཁོང་གིས་སྡིག་ཉེས་ཅི་ཡང་མ་མཛད་ཅིང༌། ། ཞལ་ནས་བསླུ་བྲིད་མགོ་སྐོར་གཏམ་མ་གསུངས། །
1PE 2:23 མཱ་ཤི་ཀར་དམའ་འབེབས་གཏོང་མཁན་རྣམས་ལ་ལན་སློག་པར་མ་མཛད། སྡུག་བསྔལ་མྱོང་སྐབས་ཁོང་གིས་འཇིགས་སྣང་མ་སྐུལ་བར་དྲང་བདེན་གྱིས་ཁྲིམས་གཅོད་གཏོང་མཁན་ལ་བཅོལ།
1PE 2:24 ངེད་རྣམས་སྡིག་ཉེས་ཀྱི་ཆ་ནས་ཤི་ཞིང༌། དྲང་བདེན་ཉིད་ཀྱི་དོན་ལ་འཚོ་བའི་ཕྱིར། ཁོང་ཉིད་ཀྱིས་རྒྱང་ཤིང་སྟེང་ང་ཚོའི་སྡིག་ཉེས་ཀྱི་ཆད་པ་རང་གི་སྐུ་ལུས་ཐོག་མྱངས། ཁོང་གི་རྨ་ཡིས་ཁྱེད་རྣམས་གསོས་པར་གྱུར་རོ།
1PE 2:25 སྔར་ཁྱེད་ཚོ་ལུག་ལྟར་ཁྱམས་ཀྱང༌། ད་ཁྱེད་ཚོའི་སེམས་སྲུང་མཁན་གྱི་རྫི་བོའི་དྲུང་དུ་ཕྱིར་ལོག་གོ །
1PE 3:1 དེ་བཞིན་དུ་ཁྱེད་ཆུང་མ་རྣམས་ཀྱིས་ཁྱོ་གའི་དབང་ཆ་དང་ལེན་བྱེད་དགོས། དེ་ནི་ཁྱོ་གའི་ནང་ནས་ཁ་ཤས་ཀྱིས་དཀོན་མཆོག་གི་བཀའ་ལ་མ་ཉན་ཡང༌། ཁྱེད་ཚོའི་སྤྱོད་ལམ་ལྷད་མེད་ཅིང་བག་ཡོད་པ་མཐོང་ནས། ཤོད་མི་དགོས་པར་ཁྱེད་ཀྱི་སྤྱོད་ལམ་བཟང་པོས་འགུགས་པའི་ཆེད་དུ་ཡིན་ནོ།
1PE 3:3 མཛེས་སྡུག་ལྡན་པའི་ཕྱིར་མགོའི་སྐྲ་ལྷས་པའམ། གསེར་གྱི་རྒྱན་ཆའམ། རིན་ཆེ་བའི་གོས་ལ་སོགས་ལ་མ་བརྟེན་པར།
1PE 3:4 ཁྱེད་ཀྱི་རྒྱན་ཆ་ནི་ནང་སེམས་སུ་ནམ་ཡང་ཞི་འཇམ་ལྷིང་འཇགས་ཁོ་ན་དགོས་ཏེ། དེ་ནི་དཀོན་མཆོག་གི་སྤྱན་སྔར་རིན་ཆེན་ཡིན།
1PE 3:5 གནའ་བོའི་དུས་སུ་དཀོན་མཆོག་ལ་རེ་བའི་བུད་མེད་དམ་པ་རྣམས་ཀྱིས་ཁྱོ་གའི་དབང་ཆ་དང་ལེན་བྱེད་པ་དེ་རྒྱན་དུ་བརྩི།
1PE 3:6 དཔེར་ན། མེས་པོ་ས་རཱ་ཡིས་རང་གི་ཁྱོ་ག་ཨབ་ར་ཧམ་ལ་བདག་པོ་ཞེས་ཟེར་བས་ཁོང་གི་བཀའ་ལ་ཉན། ཅིས་ཀྱང་མི་འཇིགས་པར་བཟང་པོ་བྱས་ན་ཁྱེད་ཚོ་ནི་ཁོང་གི་བུ་མོ་ཡིན།
1PE 3:7 དེ་བཞིན་དུ་ཁྱེད་ཁྱོ་ག་རྣམས། ཆུང་མ་ལ་བཀུར་སྟི་བྱེད་ཅིང༌། སེམས་བཟང་པོས་ཁོ་མོ་དང་མཉམ་དུ་འཚོ་བ་སྐྱེལ། དེ་ལྟར་བྱས་ན་སོ་སོའི་སྨོན་ལམ་ལ་བར་ཆད་མི་འབྱུང༌། ཁོང་ཚོ་ཁྱེད་ལས་སྟོབས་ཆུང་ཡང༌། ཁྱེད་དང་མཚུངས་པར་དཀོན་མཆོག་གིས་ཐུགས་རྗེས་གནང་བའི་དཔག་ཏུ་མེད་པའི་ཚེ་འཛིན་མཁན་ཡིན།
1PE 3:8 མཇུག་མཐར་ཁྱེད་ཐམས་ཅད་སེམས་མཐུན་པ་དང༌། སྙིང་རྗེ། ཕན་ཚུན་ལ་བྱམས་པ། བརྩེ་སེམས། སེམས་དུལ་པོ་དང་ལྡན་པར་བྱེད་དགོས།
1PE 3:9 ངན་པར་ངན་ལན་མ་འཇལ་ཞིང༌། སྨད་ར་གཏོང་མཁན་ལ་སྨད་ར་མ་གཏོང་བར་བྱིན་གྱིས་རློབས་ཤིག གང་ཡིན་ཞེ་ན། ཁྱེད་ཚོ་དེའི་ཕྱིར་བོས། དེ་ནི་ཁྱེད་ཚོར་བྱིན་རླབས་འཐོབ་པའི་ཕྱིར་རོ།
1PE 3:10 དེས་ན་མདོ་ལས། གལ་ཏེ་སུ་ཡང་སྲོག་ལ་གཅེས་པ་དང༌། ། བདེ་སྐྱིད་རྫོགས་ལྡན་དུས་ཤིག་མཐོང་འདོད་ན། ། ཚིག་རྩུབ་གཡོ་སྒྱུའི་ངན་གཏམ་མ་སྨྲ་ཞིག །
1PE 3:11 ངན་པ་སྤངས་ནས་སྤྱོད་བཟང་སྤེལ་བ་དང༌། ། ཞི་མཐུན་ལམ་བཟང་རྟག་ཏུ་འཚོལ་ཤིག་ཨང༌། །
1PE 3:12 གང་ལགས་ཤེ་ན་དཀོན་མཆོག་སྤྱན་ཉིད་ཀྱིས། ། དྲང་ལྡན་པ་རྣམས་གཟིགས་པར་འགྱུར་བ་དང༌། ། སྙན་ཅོག་གཏོད་ནས་ཁོ་ཚོའི་སྨོན་ལམ་གསན། ། འོན་ཏེ་ངན་སྤྱོད་མཁན་ལ་ཞལ་སློག་གོ ། ཅེས་འཁོད།
1PE 3:13 བཟང་པོ་བྱེད་པའི་ཕྱིར་བརྩོན་སེམས་ཡོད་ན། ཁྱེད་ཚོར་གནོད་པ་བྱེད་མཁན་སུ་ཡོད།
1PE 3:14 བཟང་པོ་བྱས་པའི་རྐྱེན་གྱིས་སྡུག་བསྔལ་མྱོང་ནའང་ཁྱེད་རྣམས་ལ་བྱིན་རླབས་འཐོབ་པར་འགྱུར། ཁོ་ཚོར་མ་འཇིགས་ཤིང༌། སེམས་འཁྲུག་པར་མ་འགྱུར།
1PE 3:15 སེམས་ནང་ན་མཱ་ཤི་ཀ་གཙོ་བོ་ཡིན་པ་ལ་བསྙེན་བཀུར་བྱེད། ཁྱེད་ལ་ཡོད་པའི་ཐར་པའི་རེ་བ་དེའི་རྒྱུ་མཚན་སྐོར་འདྲི་མཁན་ལ་སེམས་དུལ་བ་དང་གུས་པས་ལན་འདེབས་རྒྱུར་རྒྱུན་དུ་གྲ་སྒྲིག་བྱས་ཏེ་སྡོད།
1PE 3:16 མཱ་ཤི་ཀའི་སྤྱོད་ལམ་བཟང་པོར་སྨད་ར་གཏོང་མཁན་རྣམས་ནི་ངོ་ཚ་རུ་འགྱུར་བའི་ཕྱིར་ཁྱེད་ཚོས་གནོངས་མེད་པ་བྱེད་དགོས།
1PE 3:17 སྡུག་བསྔལ་མྱོང་བ་དཀོན་མཆོག་གི་ཐུགས་དགོངས་ཡིན་ན། ངན་པ་ལས་བཟང་པོ་བྱེད་པའི་ཕྱིར་སྡུག་བསྔལ་མྱོང་བ་ལེགས་སོ།
1PE 3:18 ངེད་རྣམས་དཀོན་མཆོག་གི་མདུན་དུ་འཁྲིད་པའི་ཕྱིར། མཱ་ཤི་ཀ་དྲང་བདེན་གྱིས་དྲང་བདེན་མིན་པའི་སྡིག་ཉེས་སེལ་བའི་དོན་དུ་ཐེངས་གཅིག་གྲོངས། སྐུ་ལུས་ཀྱི་ཆ་ནས་གྲོངས་ཀྱང༌། ཐུགས་ཉིད་ཀྱི་སྒོ་ནས་གསོན།
1PE 3:19 ཁོང་གིས་ཐུགས་ཉིད་བརྒྱུད་ནས་བཙོན་ལ་ཕེབས་ཏེ་དེར་ཡོད་པའི་སེམས་ཉིད་རྣམས་ལ་ཆོས་བསྟན་གནང༌།
1PE 3:20 ཁོ་ཚོ་ནི་སྔར་ནོ་ཨ་ཡིས་གྲུ་གཟིངས་བཟོ་བའི་དུས་དཀོན་མཆོག་གིས་ཐུགས་རྒྱུད་རིང་པོས་སྒུག་གནང་བའི་སྐབས་སུ་བཀའ་ལ་མ་ཉན་པ་རྣམས་ཡིན། གྲུ་གཟིངས་དེ་ལ་བསྡད་ནས་ཆུ་ལོག་ལས་མི་ཉུང་ངུ་ཞིག་སྟེ་མི་བརྒྱད་ལས་ཐར་མེད།
1PE 3:21 ཆུ་དེ་ནི་ཡེ་ཤུ་མཱ་ཤི་ཀ་སླར་གསོན་པའི་སྒོ་ནས་ད་ལྟ་ཁྱེད་ཚོ་ཐར་བར་བྱེད་པའི་ཁྲུས་གསོལ་མཚོན། ལུས་ཀྱི་མི་གཙང་བ་དག་པར་བྱེད་པ་མ་ཡིན་གྱིས། གནོངས་མེད་པར་འགྱུར་བའི་ཕྱིར་དཀོན་མཆོག་ལ་རེ་འབོད་བྱེད་པ་ཞིག་ཡིན།
1PE 3:22 ཡེ་ཤུ་མཱ་ཤི་ཀ་ནི་ཞིང་ཁམས་སུ་ཕེབས་ནས་དཀོན་མཆོག་གི་ཕྱག་གཡས་སུ་བཞུགས་ཏེ། དཀོན་མཆོག་གི་ཕོ་ཉ་དང༌། དབང་ལྡན། མཐུ་ལྡན་རྣམས་ཁོང་གི་དབང་འོག་ཏུ་ཡོད་དོ། །
1PE 4:1 དེའི་ཕྱིར་མཱ་ཤི་ཀས་སྐུ་ལུས་ཀྱི་སྡུག་བསྔལ་མྱོང་བས། དེ་ལྟ་བུའི་སེམས་ཀྱིས་རང་བརྟན་པར་བྱེད། གང་ལགས་ཟེར་ན། ལུས་ཀྱི་སྡུག་བསྔལ་མྱོང་བ་དེས་སྡིག་ཉེས་དང་བྲལ།
1PE 4:2 དེ་ནི་ད་ཕྱིན་ཆད་ཁྱེད་ཚོ་ཤ་ཁྲག་གི་ལུས་རྒྱུན་མ་ཆད་བར་འཇིག་རྟེན་དུ་སྡོད་རིང་མིའི་འདོད་ཆགས་ལྟར་མ་ཡིན་གྱིས། དཀོན་མཆོག་གི་ཐུགས་དགོངས་ལྟར་མི་འཚེ་སྐྱེལ་བའི་ཕྱིར་རོ།
1PE 4:3 ཁྱེད་ཚོ་སྔོན་དད་མེད་པ་རྣམས་ཀྱི་འདོད་པ་ལྟར་བག་མེད་ལོངས་སྤྱོད་དང༌། འདོད་ཆགས། ར་བཟི་བ། ལོག་གཡེམ། བག་མེད་ཅན་གྱི་ཐུགས་སྤྲོ། ཆོས་ལོག་པའི་སྐུ་འདྲར་བཀུར་བ་ལ་སོགས་བྱེད་པའི་འདས་ཟིན་གྱི་དུས་དེ་འདངས་ངེས་ཡིན།
1PE 4:4 དེ་ལྟར་གྱི་དཔེ་མི་སྲིད་པའི་སྤྱོད་ལམ་ངན་པ་ཁོ་ཚོ་དང་མཉམ་དུ་མི་བྱེད་པ་དད་མེད་པ་རྣམས་ཀྱིས་མཐོང་ནས་ཧ་ལས་པས། ཁྱེད་ཚོར་སྨད་ར་གཏོང༌།
1PE 4:5 འོན་ཀྱང་ཁོ་ཚོས་འཆི་གསོན་གཉིས་ཀར་ཁྲིམས་གཅོད་གཏོང་རྒྱུ་ཡིན་པ་ཁོང་ལ་རྩིས་འབུལ་ཞུ་དགོས།
1PE 4:6 གཤིན་པོ་རྣམས་ལའང་འཕྲིན་བཟང་བསྒྲགས་པའི་རྒྱུ་མཚན་ནི། མི་ཡིན་པའི་ཆ་ནས་འཇིག་རྟེན་པ་ལྟར་ཁྲིམས་གཅོད་གཏོང་ཡང༌། ཁོ་ཚོས་སེམས་ཉིད་ཀྱི་ཆ་ནས་དཀོན་མཆོག་གི་དགོངས་པ་ལྟར་འཚོ་བའི་ཆེད་དུ་ཡིན།
1PE 4:7 དོན་ཐམས་ཅད་ཀྱི་མཐའ་སླེབས་པར་ཉེ་བས། སྨོན་ལམ་འདེབས་པའི་ཕྱིར་རང་ཚོད་ཟིན་པ་དང༌། བློ་གསལ་པོར་གནས་ཤིག
1PE 4:8 གལ་ཆེ་ཤོས་ནི་གཅིག་གིས་གཅིག་ལ་སེམས་གཏིང་ནས་བྱམས་པར་འཛིན་ཞིག གང་ལགས་ཤེ་ན། བྱམས་པ་ཡིས་སྡིག་ཉེས་མང་པོ་གུ་ཡངས་གཏོང་ཐུབ་པས་སོ།
1PE 4:9 མ་རངས་པའི་གཏམ་མི་བཤད་པར་གཅིག་གིས་གཅིག་ལ་སྣེ་ལེན་བྱེད།
1PE 4:10 ཁྱེད་ཚོའི་ནང་ནས་མི་རེ་རེ་ལ་དཀོན་མཆོག་ནས་གནང་སྦྱིན་ཞིག་ཐོབ་ཟིན་པས། དཀོན་མཆོག་གི་ཐུགས་རྗེ་སྣ་ཚོགས་ཀྱི་གཉེར་པ་མཁས་པ་ལྟར་དེ་ཡིས་གཅིག་གིས་གཅིག་ལ་རོགས་བྱེད།
1PE 4:11 ཆོས་ཤོད་མཁན་རྣམས་ཀྱིས་དཀོན་མཆོག་གི་བཀའ་གསུང་པ་དེ་རང་ལྟར་ཤོད་དགོས། རོགས་བྱེད་མཁན་གྱིས་དཀོན་མཆོག་གིས་གནང་བའི་སྟོབས་ཀྱིས་རོགས་བྱེད་དགོས། དེ་ནས་དོན་ཐམས་ཅད་ཐོག་ནས་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་གཟི་བརྗིད་དང་ལྡན་པར་འགྱུར། དུས་གཏན་དུ་གཟི་བརྗིད་དང་དབང་ཁོང་གི་ཡིན་ནོ། ། ཨ་མེན།
1PE 4:12 གཅེས་པའི་སྤུན་ཟླ་རྣམས། ཁྱེད་ཚོ་ཚོད་ལྟ་བྱེད་པའི་ཕྱིར་བྱུང་བའི་མེ་ལྟ་བུའི་སྡུག་བསྔལ་གྱི་རྐྱེན་གྱིས་ཁྱེད་ལ་ཁྱད་མཚར་ཞིག་འབྱུང་བ་ཡིན་མ་བསམ་མམ་ཡང་ན་ཡ་མཚན་མ་སྐྱེད།
1PE 4:13 དེ་ལས་ལྡོག་སྟེ་ཁྱེད་ཚོས་མཱ་ཤི་ཀའི་སྡུག་བསྔལ་ཇི་ཙམ་མྱོང་བ་དེ་ཙམ་གྱི་དགའ་བར་གྱུར་ཅིག དེ་ནས་ཁོང་གི་གཟི་བརྗིད་མངོན་པར་འགྱུར་བའི་ཚེ་ཁྱེད་ཚོ་ཧ་ཅང་དགའ་བར་གྱུར།
1PE 4:14 ཁྱེད་རྣམས་ལ་མཱ་ཤི་ཀའི་མཚན་གྱི་རྐྱེན་པས་དམའ་འབེབས་བྱས་ན་བདེའོ། གང་ཡིན་ཟེར་ན། དཀོན་མཆོག་གི་གཟི་བརྗིད་དང་ལྡན་པའི་དམ་པའི་ཐུགས་ཉིད་ཁྱེད་རྣམས་ལ་གནས་པའི་ཕྱིར་རོ།
1PE 4:15 གལ་ཏེ་ཁྱེད་ཚོའི་ཁྲོད་དུ། མི་གསོད་མཁན་ནམ། རྐུན་མའམ། ཉེས་ཅན་ནམ། གཞན་གྱི་དོན་ལ་ཐེ་ཇུས་བྱེད་མཁན་གྱི་ཐོག་ནས་སྡུག་བསྔལ་མྱོང་ན་མི་འོས་སོ།
1PE 4:16 འོན་ཀྱང་སུ་ཞིག་མཱ་ཤི་ཀ་པ་ཡིན་པས་སྡུག་བསྔལ་བྱུང་ན། ངོ་ཚ་བར་མི་འགྱུར་ཏེ་མཚན་དེ་ལ་ཡོད་པའི་ཕྱིར་དཀོན་མཆོག་ལ་བསྟོད་ཅིག
1PE 4:17 ད་དཀོན་མཆོག་ཉིད་ཀྱི་མི་རྣམས་ནས་འགོ་འཛུགས་ཏེ་ཁྲིམས་གཅོད་གཏོང་བའི་དུས་ལ་བབས། ངེད་རྣམས་ནས་འགོ་བཙུགས་ན། དཀོན་མཆོག་གི་འཕྲིན་བཟང་ལ་མ་ཉན་པ་རྣམས་ལ་ཅི་འབྱུང་བར་འགྱུར།
1PE 4:18 ཡང་མདོ་ལས། དྲང་བདེན་རྣམས་ཀྱང་ཐར་དཀའ་ན། ། དད་མེད་སྡིག་ཅན་ཅི་ཞིག་བྱེད། ། ཅེས་འཁོད།
1PE 4:19 དེའི་ཕྱིར་དཀོན་མཆོག་གི་ཐུགས་དགོངས་བཞིན་དུ་སྡུག་བསྔལ་མྱོང་བ་རྣམས་ཀྱིས་འགོད་པ་གནང་མཁན་གྱི་བློ་གཏད་ཆོག་པའི་དཀོན་མཆོག་ལ་རང་ཉིད་བཅོལ་ནས་མུ་མཐུད་བཟང་པོ་བྱེད་དགོས་སོ། །
1PE 5:1 ང་རང་ཆོས་ཚོགས་ཀྱི་འགན་ཁུར་བ་དང༌། མཱ་ཤི་ཀའི་སྡུག་བསྔལ་གྱི་དཔང་པོ་དང༌། མངོན་པར་འགྱུར་བའི་གཟི་བརྗིད་ཀྱི་སྐལ་བ་འཐོབ་མཁན་ཡིན་པས། ཁྱེད་ཚོའི་ནང་ནས་ཆོས་ཚོགས་ཀྱི་འགན་ཁུར་བ་རྣམས་ལ་འདི་ལྟར་སྐུལ།
1PE 5:2 དཀོན་མཆོག་གིས་ཁྱེད་རྣམས་ལ་གཏོད་གནང་བའི་མི་རྣམས་རྫི་བོས་ལུག་ཁྱུ་ལྟར་སྐྱོངས། མི་འདོད་པར་མིན་གྱིས། དགའ་བའི་ངང་ནས་འགན་དེ་འཁུར། རྒྱུ་ནོར་ལ་ཆགས་པའི་སྒོ་ནས་མིན་པར། དཀོན་མཆོག་ལ་ཞབས་ཏོག་སྒྲུབ་པའི་བརྩོན་སེམས་ཀྱིས་སྐྱོངས་ཤིག
1PE 5:3 ཁྱེད་ལ་གཏད་པའི་ལུག་ཁྱུ་སྟེ་མི་རྣམས་ལ་བཙན་ཤེད་མི་བྱེད་པར་མིག་དཔེ་སྟོན་ཞིག
1PE 5:4 རྫི་བོ་མཆོག་དེ་མངོན་པར་འགྱུར་བའི་ཚེ། ཁྱེད་རྣམས་ལ་གཟི་བརྗིད་དང་ལྡན་པའི་མི་འཇིག་པའི་ཅོད་པན་འཐོབ་པར་འགྱུར་ངེས་ཡིན།
1PE 5:5 དེ་བཞིན་དུ་ཁྱེད་གཞོན་ནུ་རྣམས་ཀྱིས་ཆོས་ཚོགས་ཀྱི་འགན་ཁུར་བའི་བཀའ་ལ་ཉན་དགོས། ཁྱེད་ཚོ་ཐམས་ཅད་ཉམས་ཆུང་གི་ཐོག་ནས་གཅིག་གིས་གཅིག་ལ་རོགས་བྱེད་དགོས། གང་ཡིན་ཞེ་ན། དཀོན་མཆོག་གིས་ནི་ང་རྒྱལ་ཅན་ལ་རྒོལ། ། ཉམས་ཆུང་རྣམས་ལ་ཐུགས་རྗེ་གནང་བར་མཛད། །
1PE 5:6 དེའི་ཕྱིར་དཀོན་མཆོག་གི་དབང་ལྡན་པའི་ཕྱག་འོག་ཏུ་རང་ཉིད་ཀྱིས་དམའ་ས་བཟུང་ཞིང༌། དུས་ལ་བབས་པའི་ཚེ་ཁོང་གིས་ཁྱེད་ཚོ་མཐོ་བར་མཛད།
1PE 5:7 ཁོང་གིས་ཁྱེད་རྣམས་ལ་གཟིགས་སྐྱོང་མཛད་པས། ཁྱེད་ཀྱི་སེམས་ཁྲལ་ཐམས་ཅད་ཁོང་ལ་གཏོད།
1PE 5:8 རང་ཚོད་ཟིན་ནས་དོགས་ཟོན་བྱེད་ཅིག བདུད་རྒྱལ་ཏེ་ཁྱེད་ཚོའི་དགྲ་བོ་ནི་ངར་སྐད་འདོན་པའི་སེང་གེ་ལྟར་གང་སར་མྱུལ་ནས་ཟ་རྒྱུའི་མི་ཞིག་འཚོལ།
1PE 5:9 ཁོ་བཀག་སྟེ་ཁྱེད་ཚོའི་དད་པ་ལ་བརྟན་པོར་གནས། གང་ལགས་ཤེ་ན། འཇིག་རྟེན་ཡོངས་སུ་ཁྱེད་ཀྱི་སྤུན་ཟླ་རྣམས་དེ་ལྟར་གྱི་སྡུག་བསྔལ་མྱོང་བར་ཤེས་པའི་ཕྱིར་རོ།
1PE 5:10 ཡང་ཁྱེད་ཚོ་དུས་ཐུང་ངུ་སྡུག་བསྔལ་མྱོང་བའི་རྗེས་སུ། མཱ་ཤི་ཀའི་སྒོ་ནས་རང་གི་རྟག་ཏུ་གནས་པའི་གཟི་བརྗིད་དུ་བོས་མཁན་ཐུགས་རྗེ་ཐམས་ཅད་དང་ལྡན་པའི་དཀོན་མཆོག་ཉིད་ཀྱིས་ཁྱེད་རྣམས་ལ་སླར་གསོ་བ་དང༌། རྒྱབ་སྐྱོར། ནུས་ཤུགས། རྨང་གཞི་སྲ་བརྟན་བཅས་དང་ལྡན་པར་མཛད་ངེས་ཡིན།
1PE 5:11 ཁོང་དུས་གཏན་དུ་མངའ་ཐང་དང་ལྡན་པར་གྱུར་ཅིག ཨ་མེན།
1PE 5:12 ངས་བློ་གཏད་ཆོག་པར་རྩི་བའི་སྤུན་ཟླ་སིལ་ཝ་ནུ་བརྒྱུད་ནས་ཡིག་གེ་ཐུང་ངུ་འདི་བྲིས། ཁྱེད་ཚོར་སྐུལ་ཞིང༌། ཡི་གེ་འདིར་བཀོད་པ་ནི་དཀོན་མཆོག་གི་ཐུགས་རྗེ་བདེན་པ་ཡིན་པར་དཔང་པོ་བྱེད་པའི་ཆེད་དུ་ཡིན། དེ་ལ་བརྟན་པོར་གནས་ཤིག
1PE 5:13 སྦ་བི་ལོན་གྲོང་ཁྱེར་ལ་ཡོད་པའི་ཆོས་ཚོགས་ཁྱེད་རྣམས་ལྟར་བདམས་པ་དང༌། ངའི་བུ་ལྟར་ཡིན་པ་མར་ཀུས་ཁྱེད་ཚོར་འཚམས་འདྲི་ཞུ།
1PE 5:14 བྱམས་སེམས་ཀྱི་ཐོག་ནས་གཅིག་གིས་གཅིག་ལ་འོ་ཡིས་འཚམས་འདྲི་ཞུས། མཱ་ཤི་ཀའི་ནང་ན་གནས་པ་ཁྱེད་ཚོ་ཐམས་ཅད་ལ་ཞི་བདེ་དང་ལྡན་པར་གྱུར་ཅིག །
2PE 1:1 ཡེ་ཤུ་མཱ་ཤི་ཀའི་ཞབས་ཕྱི་དང་སྐུ་ཚབ་སི་མེ་ཡོན་པེ་ཏྲོ་ཡིས། ངེད་ཀྱི་དཀོན་མཆོག་དང་སྐྱབས་མགོན་ཡེ་ཤུ་མཱ་ཤི་ཀའི་དྲང་བདེན་ཉིད་ཀྱི་སྒོ་ནས་ང་ཚོའི་རྩ་ཆེ་བའི་དད་པ་དང་གཅིག་པ་འཐོབ་མཁན་རྣམས་ལ་འཕྲིན་ཡིག་འདི་ཕུལ་ལོ།
2PE 1:2 ཁྱེད་རྣམས་ལ་དཀོན་མཆོག་དང་ང་ཚོའི་གཙོ་བོ་ཡེ་ཤུ་རྟོགས་པ་བརྒྱུད་ནས་ཐུགས་རྗེ་དང༌། ཞི་བདེ་འཕེལ་བར་གྱུར་ཅིག
2PE 1:3 དཀོན་མཆོག་གིས་རང་གི་ནུས་མཐུའི་སྒོ་ནས་ཚེ་དང་ཆོས་སེམས་ལ་གང་དགོས་པ་ཐམས་ཅད་ང་ཚོར་གནང་བ་ཡིན། དེ་ནི་ཁོང་གི་གཟི་བརྗིད་དང་ཐུགས་བཟང་པོ་བརྒྱུད་ནས་ང་ཚོ་བོས་པར་མཛད་མཁན་རྟོགས་པའི་སྒོ་ནས་དེ་ཐམས་ཅད་ཐོབ།
2PE 1:4 དོན་དེ་རྣམས་ཀྱི་སྒོ་ནས་ཁོང་གིས་ཉིད་ཀྱི་རྩ་ཆེ་དང་བླ་ན་མེད་པའི་ཞལ་ཆད་རྣམས་ང་ཚོར་གནང་བ་ཡིན། དེ་ཚོ་བརྒྱུད་ནས་ཁྱེད་ཚོ་དཀོན་མཆོག་གི་རང་གཤིས་ལ་ལོངས་སུ་སྤྱོད་པ་དང༌། འདོད་པ་ངན་པའི་རྐྱེན་གྱིས་འཇིག་རྟེན་ནང་ཡོད་པའི་ངན་རུལ་ལས་ཐར་བར་གྱུར།
2PE 1:5 ཡང་དོན་དེ་ཉིད་ཀྱི་ཕྱིར་དད་པའི་སྟེང་སྤྱོད་ལམ་བཟང་པོ་དང༌། སྤྱོད་ལམ་བཟང་པོའི་སྟེང་རྟོགས་པ།
2PE 1:6 རྟོགས་པའི་སྟེང་ཚོད་འཛིན་དང༌། ཚོད་འཛིན་གྱི་སྟེང་བཟོད་པ། བཟོད་པའི་སྟེང་ཆོས་སེམས་དང་ལྡན་པ་དང༌།
2PE 1:7 ཆོས་སེམས་དང་ལྡན་པའི་སྟེང་སྤུན་ཟླ་རྣམས་ལ་བྱམས་པ་དང༌། སྤུན་ཟླ་རྣམས་ལ་བྱམས་པའི་སྟེང་མི་ཚང་མར་བྱམས་པར་ཁ་སྣོན་རྒྱག་པར་འབད་རྩོལ་བྱེད་དགོས།
2PE 1:8 རྒྱུ་མཚན་ནི་དོན་དེ་རྣམས་ཁྱེད་ཚོར་ཡོད་ཅིང་འཕེལ་བར་གྱུར་ན། ཁྱེད་ཚོ་ང་ཚོའི་གཙོ་བོ་ཡེ་ཤུ་མཱ་ཤི་ཀ་རྟོགས་པའི་ནང་ཕན་མེད་པའམ། འབྲས་བུ་མེད་པར་མི་འགྱུར།
2PE 1:9 སུ་ཞིག་ལ་སྤྱོད་བཟང་དེ་ཚོ་མེད་ན་ཉེ་མཐོང་ངམ་ལོང་བ་དང་འདྲ་བ་ཞིག་ཡིན་ཏེ། སྔར་བྱས་པའི་སྡིག་ཉེས་རྣམས་དག་པར་མཛད་པ་བརྗེད་པས་སོ།
2PE 1:10 དེའི་ཕྱིར་སྤུན་ཟླ་རྣམས། ཁྱེད་ཚོ་དཀོན་མཆོག་གིས་བོས་པ་དང་བདམས་པ་དེ་བརྟན་པོར་འགྱུར་བའི་ཆེད་དེ་བས་བརྩོན་ཞིག དེ་ལྟར་བྱས་ན་ཁྱེད་ཚོ་ཐར་པའི་ལམ་ལས་ཁ་བྲལ་ནས་ནམ་ཡང་མི་ལྷུང༌།
2PE 1:11 དེ་ལྟར་ན་དཀོན་མཆོག་གིས་ཁྱེད་ཚོ་ང་ཚོའི་གཙོ་བོ་དང་སྐྱབས་མགོན་ཡེ་ཤུ་མཱ་ཤི་ཀའི་མཐའ་མེད་པའི་རྒྱལ་སྲིད་དུ་དགའ་བསུ་ཞུ་ནས་ཞུགས་པར་འགྱུར།
2PE 1:12 ཁྱེད་ཚོས་དོན་དེ་རྣམས་ཤེས་ཤིང༌། ཁྱེད་ལ་ཡོད་པའི་བདེན་པ་ལ་བརྟན་པོར་གནས་ཀྱང༌། ངས་རྟག་ཏུ་དོན་དེ་ཚོའི་སྐོར་དྲན་སྐུལ་བྱེད་པར་འདོད།
2PE 1:13 ང་ལུས་ཕུང་གི་གུར་འདིའི་ནང་ཡོད་རིང་ཁྱེད་ཚོར་དྲན་སྐུལ་བྱེད་པ་དེ་འོས་པར་སེམས།
2PE 1:14 གང་ཡིན་ཟེར་ན། ང་ཚོའི་གཙོ་བོ་ཡེ་ཤུ་མཱ་ཤི་ཀས་ང་ལ་གསལ་པོར་བསྟན་པ་ལྟར་ངའི་ལུས་ཕུང་གི་གུར་འདི་རྡིབས་པའི་དུས་ཉེ་བ་ཡིན་པར་ཤེས།
2PE 1:15 ང་འཆི་བའི་རྗེས་སུ་ཡང་ཁྱེད་ཚོས་རྟག་ཏུ་དོན་འདི་རྣམས་དྲན་ཐུབ་པའི་ཆེད་དུ་ངས་བརྩོན་པར་བྱེད་རྒྱུ་ཡིན།
2PE 1:16 ང་ཚོས་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ནུས་མཐུ་དང་སླར་ཕེབས་རྒྱུའི་སྐོར་ཁྱེད་ཚོར་སྒྲོག་སྐབས་རྟོག་བཟོའི་སྒྲུང་མ་བཤད་དེ། ཁོང་གི་གཟི་བརྗིད་ང་ཚོའི་མིག་གིས་མཐོང་བས་བརྗོད་པ་ཡིན།
2PE 1:17 དཀོན་མཆོག་གི་བླ་ན་མེད་པའི་གཟི་བརྗིད་དང་ལྡན་པའི་གསུང་དེས་ཁོང་ལ། འདི་ནི་ངའི་གཅེས་པའི་སྲས་ཡིན། དེ་ལ་ངའི་སེམས་དགའོ་ཞེས་གསུང་སྐབས་ཁོང་ལ་ཡབ་དཀོན་མཆོག་ནས་བཀུར་སྟི་དང་གཟི་བརྗིད་ཐོབ།
2PE 1:18 གནས་རི་ལ་ཁོང་དང་མཉམ་དུ་ཡོད་པའི་དུས་སུ་དཀོན་མཆོག་གི་ཞིང་ཁམས་ནས་བྱུང་བའི་གསུང་དེ་ང་ཚོ་ཉིད་ཀྱིས་ཐོས་པས།
2PE 1:19 ལུང་སྟོན་པའི་བཀའ་བདེན་པ་ཡིན་པ་ང་ཚོར་དེ་བས་ངེས་པ་རྙེད། དེ་ནི་མུན་པའི་གནས་ལ་འབར་བའི་མར་མེ་དང་འདྲ་བ་ཡིན་པས། སྐྱ་རེངས་ཤར་ཞིང༌། ཁྱེད་ཚོའི་སེམས་ལ་ཞོགས་པའི་སྐར་མ་མ་ཤར་བའི་བར་དུ། ཁྱེད་ཚོས་ཁོང་ཚོའི་བཀའ་ལ་དོ་ནན་བྱས་ན་ལེགས།
2PE 1:20 ཁྱེད་ཚོས་ཐོག་མར་འདི་ཤེས་པར་གྱིས་ཤིག གསུང་རབ་ཀྱི་ལུང་བསྟན་གང་ཡང་རུང་ལུང་སྟོན་པའི་བསམ་པ་ལས་མ་བྱུང༌།
2PE 1:21 གང་ཡིན་ཞེ་ན། ལུང་བསྟན་གང་ཡང་མིའི་བསམ་འདུན་ལས་མ་བྱུང་བར། དམ་པའི་ཐུགས་ཉིད་ཀྱིས་སྐུལ་བས་མི་རྣམས་ཀྱིས་དཀོན་མཆོག་གི་གསུང་བཞིན་བཤད་དོ། །
2PE 2:1 གནའ་བོའི་ཡི་སི་ར་ཨེལ་པའི་ཁྲོད་དུ་ལུང་སྟོན་པ་རྫུན་མ་རྣམས་བྱུང་བ་ལྟར། ད་ལྟའང་ཁྱེད་ཚོའི་ཁྲོད་དུ་སློབ་དཔོན་རྫུན་མ་རྣམས་འབྱུང་ཡོང༌། ཁོ་ཚོས་གསང་བའི་སྒོ་ནས་ཁྱེད་ཚོའི་ཁྲོད་དུ་འཇིག་པ་སྐྱེད་པའི་ཆོས་ལོག་སྟོན་པར་འགྱུར་བ་མ་ཟད། ཁོ་ཚོ་བླུ་རིན་གྱིས་ཉོ་མཁན་གཙོ་བོ་ཡེ་ཤུ་ཡང་དང་ལེན་མི་བྱེད་པས་རང་ཉིད་མྱུར་དུ་འཇིག་པའི་རྒྱུ་རྐྱེན་དུ་འགྱུར།
2PE 2:2 མི་མང་པོས་ཁོ་ཚོའི་འདོད་ཆགས་ཀྱི་སྤྱོད་ལམ་ལྟར་བྱེད་པས་བདེན་པའི་ལམ་ལ་སྨད་ར་གཏོང་བར་འགྱུར།
2PE 2:3 ཡང་ཁོ་ཚོས་སེར་སྣའི་སྒོ་ནས་རྫུན་གཏམ་གྱིས་ཁྱེད་ཚོར་མགོ་སྐོར་གཏོང་བར་འགྱུར། འོན་ཀྱང་དཀོན་མཆོག་གིས་ཁོ་ཚོར་གནའ་སྔ་མོ་ནས་ཁྲིམས་གཅོད་མཛད་པས་ཁོ་ཚོ་འཇིག་པར་འགྱུར་ངེས་ཡིན།
2PE 2:4 གལ་སྲིད་དཀོན་མཆོག་གིས་སྡིག་ཉེས་ཀྱི་ལས་བྱས་པའི་ཕོ་ཉའང་ཐར་བར་མི་མཛད་པར་དམྱལ་ཁམས་སུ་འཕངས་ནས། དེ་དག་ལྕགས་ཐག་གིས་བཅིངས་ཏེ་མུན་ནག་གི་ནང་ལ་ཁྲིམས་གཅོད་ཀྱི་ཉིན་མོའི་བར་དུ་བཞག་པར་མཛད་པ་དང༌།
2PE 2:5 དཀོན་མཆོག་ལ་མི་ཉན་པ་རྣམས་ཀྱི་འཇིག་རྟེན་ལ་ཆུ་ལོག་མཛད་པའི་ཚེ། སྤྱོད་པ་བཟང་པོ་སྒྲོག་མཁན་ནོ་ཨ་དང་ཁོང་གི་ནང་མི་བདུན་བསྐྱབས་ཤིང༌། གནའ་བོའི་འཇིག་རྟེན་དེ་མེད་པར་མཛད།
2PE 2:6 དེའི་རྗེས་དཀོན་མཆོག་ལ་མི་ཉན་པ་རྣམས་ལ་གང་འབྱུང་བའི་དཔེ་མཛད་པའི་ཕྱིར་སཱ་དོམ་དང་གྷོ་མོ་ར་གྲོང་ཁྱེར་ཁྲིམས་ཐག་བཅད་ནས་ཐལ་བར་གཏོར་བཤིག་མཛད་དུས།
2PE 2:7 ཁོང་གིས་ཁྲིམས་མེད་པ་རྣམས་ཀྱི་འདོད་ལོག་སྤྱོད་པས་སེམས་ཕངས་པར་གྱུར་མཁན་དྲང་ལྡན་པའི་མི་ལོཌ་ད་ཟེར་མཁན་སྒྲོལ་བར་མཛད་ན།
2PE 2:8 (ཁོ་ཚོའི་ཁྲོད་དུ་ཉིན་ལྟར་གནས་པའི་ཚེ་དྲང་ལྡན་པའི་མི་དེས་ཁོ་ཚོའི་ཁྲིམས་དང་འགལ་བའི་སྤྱོད་ལམ་མཐོང་ཞིང་ཐོས་པས་ཁོའི་དྲང་ལྡན་པའི་སེམས་མནར་བར་གྱུར་)
2PE 2:9 དེའི་ཐོག་ནས་དཀོན་མཆོག་གིས་ཆོས་སེམས་དང་ལྡན་པ་རྣམས་ཉམས་ཚོད་ལས་ཐར་ཞིང༌། དཀོན་མཆོག་ལ་མི་ཉན་པ་རྣམས་དང༌། ལྷག་པར་དུ་འདོད་ལོག་གི་ངང་ནས་སྤྱོད་པ་བྱེད་ཅིང༌། དབང་ཆ་དང་ལེན་མི་བྱེད་མཁན་རྣམས་ཁྲིམས་གཅོད་གཏོང་བའི་ཉིན་མོའི་བར་དུ་ཆད་པའི་ནང་འཇོག་པར་མཛད་ཚུལ་ཡང་མཁྱེན། ཁོ་ཚོ་ང་རྒྱལ་ཆེ་ཞིང་རང་འདོད་བྱེད་མཁན་ཡིན་པས་གཟི་བརྗིད་དང་ལྡན་པ་རྣམས་ལ་སྐུར་བ་འདེབས་པར་མི་འཇིགས།
2PE 2:11 འོན་ཀྱང་མི་དེ་ཚོ་ལས་སྟོབས་དང་དབང་ཆེ་བའི་ཕོ་ཉ་རྣམས་ཀྱིས་ཀྱང་གཙོ་བོའི་མདུན་དུ་ཁོ་ཚོར་སྐུར་བ་མི་འདེབས།
2PE 2:12 མི་དེ་རྣམས་ནི་བཟུང་ནས་གསོད་པའི་ཕྱིར་སྐྱེས་པའི་བློ་གྲོས་མེད་པའི་གཅན་གཟན་དང་འདྲ་བ་ཡིན་ཏེ། རང་བཞིན་གྱི་འདོད་པ་ལྟར་སྤྱོད་པ་བྱེད། ཁོ་ཚོས་གང་མི་རྟོགས་པ་ལ་སྐུར་བ་འདེབས། ཁོ་ཚོ་ཡང་གཅན་གཟན་དང་འདྲ་བར་འཇིག་པར་འགྱུར་ངེས།
2PE 2:13 ཁོ་ཚོར་གནོད་འཚེ་སྐྱེལ་བའི་འབྲས་བུ་གནོད་འཚེ་འཐོབ་པར་འགྱུར། ཉིན་མོར་ཡང་བག་མེད་ལོངས་སྤྱོད་བྱེད་པ་དགའ་བར་རྩི་ཞིང༌། ཁྱེད་ཚོ་དང་མཉམ་དུ་གསོལ་སྟོན་གཤོམ་དུས་གཡོ་སྒྱུ་ལོངས་སུ་སྤྱོད་པར་བྱེད་པ་དེ་རྣམས་གཙོག་ཅིང་སྐྱོན་ཅན་ཡིན་ནོ།
2PE 2:14 ལོག་གཡེམ་གྱིས་གང་བའི་མིག་གིས་ལྟ་ཞིང་སྡིག་ཉེས་བཀག་ཐབས་མེད། སེམས་བརྟན་པོ་མེད་པ་རྣམས་ལ་བསླུ་བྲིད་བྱེད། མི་དེ་རྣམས་སེར་སྣ་ལ་གོམས་ཤིང༌། དམོད་པ་ཕོག་པའི་རིགས་ཡིན།
2PE 2:15 དྲང་བའི་ལམ་དོར་ནས་འཁྱོག་ལམ་སྟེ། པེ་ཨོར་གྱི་བུ་པཱ་ལཱམ་གྱི་རྗེས་སུ་འབྲངས། ཁོ་ནི་སྡིག་པའི་འབྲས་བུ་ལ་ཆགས།
2PE 2:16 ཁོས་བཀའ་ལས་འགལ་བས་བཀའ་སྐྱོན་ཐོབ། སྨྲ་མི་ཤེས་པའི་བོང་བུ་ཡིས་མིའི་སྐད་ཀྱིས་སྨྲས་ནས་ལུང་སྟོན་པ་པཱ་ལཱམ་གྱི་སྨྱོ་བའི་བྱ་བ་བཀག
2PE 2:17 མི་དེ་ཚོ་ཆུ་སྐམ་པའི་ཆུ་མིག་དང༌། རླུང་གིས་འདེད་པའི་སྨུག་པ་དང་འདྲ་བ་ཡིན། ཁོ་ཚོའི་ཆེད་དུ་སྨག་རུམ་ཉར་ཡོད།
2PE 2:18 ཁོ་ཚོས་དོན་མེད་ང་རྒྱལ་གྱི་གཏམ་བཤད་ཅིང༌། འདོད་ཆགས་ཀྱི་སྒོ་ནས་འཁྲུལ་བ་རྣམས་ཀྱི་ནང་ནས་ཐར་མ་ཐག་པ་རྣམས་ལ་བསླུ་བྲིད་བྱེད།
2PE 2:19 ཁོ་ཚོས་མི་རྣམས་ལ་རང་དབང་སྤྲོད་རྒྱུ་ཁ་ཆད་བྱེད་ཀྱང་ཁོ་ཚོ་རང་ཉིད་ངན་རུལ་གྱི་བྲན་གཡོག་ཡིན། རྒྱུ་མཚན་ནི་མི་ཞིག་གང་གི་དབང་འོག་ཏུ་ཕྱིན་པ་དེའི་བྲན་གཡོག་ཡིན།
2PE 2:20 ངེད་རྣམས་ཀྱི་གཙོ་བོ་དང་སྐྱབས་མགོན་ཡེ་ཤུ་མཱ་ཤི་ཀ་རྟོགས་པའི་སྒོ་ནས་འཇིག་རྟེན་གྱི་མི་གཙང་བ་ལས་ཐར་ནས་སླར་ཡང་མི་གཙང་བས་བཅིངས་ཏེ་ཕམ་ན། གནས་ཚུལ་སྔ་མ་ལས་ཕྱི་མ་ངན།
2PE 2:21 དྲང་བདེན་ཉིད་ཀྱི་ལམ་ཤེས་ནས་ཁོ་ཚོར་བཅོལ་བའི་བཀའ་དམ་པ་སྤངས་པ་ལས་ལམ་དེ་ནམ་ཡང་མ་ཤེས་ན་ལེགས།
2PE 2:22 ཁ་དཔེ་ལ་བཤད་པ་བདེན་པ་ཡིན་ཏེ། ཁྱི་རང་གི་སྐྱུག་པར་ལོག་ཅེས་པ་དང༌། ཕག་མོ་བཀྲུས་རྗེས་སླར་ཡང་འདམ་པར་འགྲེ་ཞེས་པ་ཁོ་རྣམས་ལ་བྱུང་ངོ༌། །
2PE 3:1 གཅེས་པའི་སྤུན་ཟླ་རྣམས། འདི་ནི་ངས་ཁྱེད་རྣམས་ལ་བྲིས་པའི་འཕྲིན་ཡིག་གཉིས་པ་ཡིན་ཞིང༌། འཕྲིན་ཡིག་གཉིས་ཀའི་ནང་དོན་ནི་ངས་འབད་པས་ཁྱེད་ཚོར་སེམས་དྲང་པོ་སྐྱེད་དུ་བཅུག་པར་དྲན་སྐུལ་བྱེད་ཆེད་ཡིན།
2PE 3:2 ལུང་སྟོན་པ་དམ་པ་རྣམས་ཀྱིས་སྔར་གསུངས་པའི་བཀའ་དང༌། གཙོ་བོ་དང་སྐྱབས་མགོན་གྱིས་སྐུ་ཚབ་རྣམས་བརྒྱུད་ནས་གནང་བའི་གསུང་དེ་ངས་ཁྱེད་ཚོས་དྲན་པར་འདོད།
2PE 3:3 དང་པོར་འདི་ཤེས་པར་གྱིས་ཤིག དུས་མཐའ་མ་ལ་བདེན་པར་འཕྱ་སྨོད་བྱེད་མཁན་འབྱུང་བར་འགྱུར། སྨད་ར་གཏོང་ཞིང་རང་གི་འདོད་ཆགས་བཞིན་དུ་སྤྱོད་པར་བྱེད་དེ།
2PE 3:4 ཁྱེད་ཚོར། ཡེ་ཤུ་མཱ་ཤི་ཀ་འབྱོན་པའི་ཞལ་ཆད་གང་དུ་ཡོད། མེས་པོ་འདས་པ་ནས་བཟུང་དོན་ཐམས་ཅད་ཇི་ལྟར་འཇིག་རྟེན་བཀོད་པ་ནས་གང་ཡོད་པ་དེ་ལྟར་ད་ལྟའང་མི་འགྱུར་བར་གནས་སོ་ཞེས་ཟེར་ཡོང༌།
2PE 3:5 དེ་ལྟར་ཟེར་ན་དཀོན་མཆོག་གི་བཀའ་ཡི་སྒོ་ནས་ནམ་མཁའ་གནའ་སྔ་མོ་ནས་ཡོད་པ་དང༌། ས་ཡང་ཆུ་ལས་བྱུང་ཞིང་ཆུ་ལ་བརྟེན་ནས་གནས་ཏེ། དེའི་སྒོ་ནས་གནའ་བོའི་འཇིག་རྟེན་ཆུ་ལོག་གིས་འཇིག་པ་ཡིན་པར་ཁོ་ཚོས་རྐང་བཙུགས་ཏེ་བརྗེད་པར་བྱེད།
2PE 3:7 ཡང་དཀོན་མཆོག་གི་བཀའ་བཞིན་ད་ལྟའི་གནམ་ས་མེ་ཡིས་སྲེག་ཆེད་བཞག་ཡོད། དེ་གཉིས་ཁྲིམས་གཅོད་པའི་ཉིན་མོ་དང་དཀོན་མཆོག་གི་བཀའ་ལ་མི་ཉན་པ་རྣམས་ལ་མེད་པ་བཟོ་བའི་བར་དུ་བཞག་ཡོད།
2PE 3:8 འོན་ཀྱང་གཅེས་པའི་སྤུན་ཟླ་རྣམས། གཙོ་བོའི་ཆ་ནས་ཉིན་མོ་གཅིག་ནི་ལོ་སྟོང་དང་འདྲ་བ་ཡིན་ཞིང༌། ལོ་སྟོང་ནི་ཉིན་མོ་གཅིག་དང་འདྲ་བ་ཡིན་པ་མ་བརྗེད་པ་གྱིས་ཤིག
2PE 3:9 མི་ཁ་ཤས་ཀྱིས་གཙོ་བོས་ཞལ་ཆད་སྒྲུབ་པར་དུས་ཚོད་རིང་པོ་འགོར་བར་སེམས་ཀྱང་དོན་དངོས་ཐོག་དེ་ལྟར་མ་ཡིན། མི་སུ་ཞིག་ཀྱང་འཇིག་པར་མི་འགྱུར་བར་ཐམས་ཅད་ཀྱིས་སྤྱོད་པ་ངན་པ་རྣམས་སྤངས་ནས་སེམས་བསྒྱུར་བར་ཁོང་གིས་ཐུགས་ངང་རྒྱུད་རིང་པོས་སྒུག་བཞིན་ཡོད།
2PE 3:10 འོན་ཀྱང་གཙོ་བོའི་ཉིན་མོ་དུས་ངེས་མེད་ཀྱི་རྐུན་མ་དང་འདྲ་བར་ཡོང༌། དེ་དུས་ནམ་མཁའ་འུར་སྒྲ་དང་བཅས་པར་འདའ་ཞིང༌། འབྱུང་བ་རྣམས་མེ་ཡིས་འཇིག་པར་འགྱུར། ས་གཞི་དང་དེའི་སྟེང་གི་དངོས་པོ་ཐམས་ཅད་བསྲེག་པར་འགྱུར།
2PE 3:11 ཐམས་ཅད་དེ་ལྟར་འཇིག་པར་འགྱུར་བས་ཁྱེད་ལ་སྤྱོད་ལམ་བཟང་པོ་དང་ཆོས་སེམས་ཇི་ལྟ་བུ་ཞིག་ཡོད་དགོས།
2PE 3:12 ཁྱེད་ཚོས་དཀོན་མཆོག་གི་ཉིན་མོ་རེ་སྒུག་བྱེད་དེ་ཉིན་མོ་དེ་མགྱོགས་པོར་འོང་བའི་ཕྱིར་འབད་བརྩོན་བྱེད་དགོས། ཉིན་མོ་དེར་ནམ་མཁའ་འབར་ནས་འཇིག་ཅིང༌། འབྱུང་བ་རྣམས་མེ་ཡིས་ཞུ་བར་འགྱུར།
2PE 3:13 འོན་ཀྱང་ཁོང་གིས་ཞལ་གྱིས་བཞེས་པ་བཞིན་དུ་ནམ་མཁའ་གསར་པ་དང་ས་གཞི་གསར་པ་ཞིག་འབྱུང་བ་ང་ཚོས་རེ་སྒུག་བྱེད། དེ་ལ་དྲང་བདེན་ཉིད་གནས་པར་འགྱུར།
2PE 3:14 དེའི་ཕྱིར་གཅེས་པའི་སྤུན་ཟླ་རྣམས། དོན་དེ་ཚོར་རེ་སྒུག་བྱེད་དུས་ཁྱེད་ཚོས་དཀོན་མཆོག་གི་དྲུང་དུ་དྲི་མ་མེད་པ་དང༌། སྐྱོན་བརྗོད་རྒྱུ་མེད་པ། ཞི་བདེ་དང་ལྡན་པ་ཡིན་པར་བརྩོན་ཅིག
2PE 3:15 དྲན་སྐུལ་བྱེད་དགོས་པར་ངེད་རྣམས་ཀྱི་གཙོ་བོའི་ཐུགས་ངང་རྒྱུད་རིང་པོ་ནི་མི་རྣམས་ཐར་པ་ཐོབ་པའི་གོ་སྐབས་ཡོང་ཆེད་ཡིན། དེ་ལྟར་ང་ཚོའི་གཅེས་པའི་སྤུན་ཟླ་པའུ་ལུ་ཡིས་ཀྱང་དཀོན་མཆོག་གིས་ཁོང་ལ་གནང་བའི་ཤེས་རབ་བཞིན་དུ་ཁྱེད་ཚོར་བྲིས།
2PE 3:16 ཁོང་གི་འཕྲིན་ཡིག་ཐམས་ཅད་ཀྱི་ནང་དོན་དེ་ཚོའི་སྐོར་བྲིས་ཡོད། དེའི་ནང་ལ་རྟོགས་པར་དཀའ་བའི་དོན་ཁ་ཤས་ཡོད་དེ། སློབ་སྦྱོང་བྱེད་མྱོང་མེད་པ་དང་སེམས་བརྟན་པོ་མེད་པ་རྣམས་ཀྱིས་མདོ་གཞན་ལ་གང་བྱེད་པ་ལྟར་དོན་དེ་ཚོ་ལའང་འཁྱོག་བཤད་བྱེད་པས་མཐར་རང་ཉིད་འཇིག་པའི་རྒྱུར་འགྱུར།
2PE 3:17 དེའི་ཕྱིར་གཅེས་པའི་སྤུན་ཟླ་རྣམས། དོན་དེ་ཚོ་སྔོན་ནས་རྟོགས་ཟིན་པས། ཁྲིམས་འགལ་བ་རྣམས་ཀྱིས་ནོར་འཁྲུལ་གྱིས་མི་བསླུ་བ་དང༌། གནས་བརྟན་པོ་མི་བརླག་པའི་ཕྱིར་དོགས་ཟོན་གྱིས་ཤིག
2PE 3:18 ང་ཚོའི་གཙོ་བོ་དང་སྐྱབས་མགོན་ཡེ་ཤུ་མཱ་ཤི་ཀའི་ཐུགས་རྗེ་དང་རྟོགས་པའི་ནང་རྒྱས་པར་གྱུར་ཅིག ད་ལྟ་ནས་དུས་ནམ་ཡང་ཁོང་ལ་གཟི་བརྗིད་དང་ལྡན་པར་གྱུར་ཅིག ཨ་མེན། །
1JO 1:1 ཚེ་སྲོག་གི་བཀའ། ཐོག་མ་ནས་གང་ཡིན་པ། ང་ཚོས་རང་གི་མིག་གིས་མཐོང་ཞིང་རྣ་བས་ཐོས་པ། གང་ལ་བལྟས་ཤིང་ལག་པས་ཡང་གཏུགས་པ། དེ་ནི་ང་ཚོས་ཁྱེད་ཚོར་སྒྲོག
1JO 1:2 ཡང་ཚེ་སྲོག་དེ་མངོན་སུམ་དུ་གྱུར་བ་དང་ང་ཚོས་མཐོང་མྱོང་བས་དེ་ལ་དཔང་པོ་བྱེད། དེ་ཐོག་མར་ཡབ་དཀོན་མཆོག་དང་བཞུགས་ནས་ང་ཚོར་མངོན་སུམ་དུ་གྱུར་ཏེ་དཔག་ཏུ་མེད་པའི་ཚེ་དེ་ང་ཚོས་ཁྱེད་རྣམས་ལ་སྒྲོག
1JO 1:3 ཁྱེད་ཚོའང་ངེད་རྣམས་དང་ལྷན་དུ་འགྲོགས་པའི་ཕྱིར་ང་ཚོས་གང་མཐོང་ཞིང་ཐོས་པ་དེ་ཁྱེད་རྣམས་ལ་སྒྲོག ང་ཚོ་མཉམ་དུ་འགྲོགས་པ་ནི་ཡབ་དཀོན་མཆོག་དང་ཁོང་གི་སྲས་ཡེ་ཤུ་མཱ་ཤི་ཀ་ཡིན་ནོ།
1JO 1:4 ང་ཚོ་དགའ་སྤྲོས་ཁེངས་པར་འགྱུར་བའི་ཕྱིར་དོན་འདི་རྣམས་འབྲི།
1JO 1:5 དེ་ཡང་ཁོང་ནས་ཐོས་ཤིང་ཁྱེད་ཚོར་སྒྲོག་པའི་འཕྲིན་འདི་ལྟར་ཡིན་ཏེ། དཀོན་མཆོག་ནི་འོད་ཡིན་ཞིང༌། ཁོང་མུན་པ་དང་གཏན་ནས་བྲལ་ལོ།
1JO 1:6 གལ་ཏེ་ང་ཚོ་ཁོང་དང་འགྲོགས་ཞེས་ཟེར་ནས་མུ་མཐུད་མུན་པའི་ནང་འཚོས་ན། དེ་ནི་རྫུན་སྨྲ་སྟེ་བདེན་པ་བཞིན་དུ་སྤྱོད་པ་མ་ཡིན།
1JO 1:7 ཁོང་ཉིད་འོད་ཀྱི་ནང་ན་བཞུགས་པ་ལྟར་ངེད་རྣམས་ཀྱང་འོད་ནང་འཚོས་ན། ང་ཚོ་གཅིག་དང་གཅིག་ལྷན་དུ་འགྲོགས་ཏེ། ཁོང་གི་སྲས་ཡེ་ཤུའི་སྐུ་ཁྲག་གིས་ང་ཚོའི་སྡིག་ཉེས་ཐམས་ཅད་འདག་པར་མཛད།
1JO 1:8 གལ་ཏེ་ངེད་རྣམས་ཀྱིས་ང་ཚོར་སྡིག་ཉེས་མེད་ཅེས་ཟེར་ན། ང་ཚོས་རང་མགོ་རང་གིས་སྐོར་ཞིང་བདེན་པ་ངེད་རྣམས་ལ་མེད།
1JO 1:9 གལ་ཏེ་ང་ཚོས་རང་གི་སྡིག་ཉེས་ཁས་བླངས་ན། དཀོན་མཆོག་ནི་བློ་གཏད་ཆོག་པ་དང་ཡང་དག་པ་ཡིན་པས་སྡིག་ཉེས་སེལ་ཞིང་དྲང་པོ་མེད་པའི་དྲི་མ་ལས་ཡོངས་སུ་འདག་པར་མཛད།
1JO 1:10 གལ་ཏེ་ང་ཚོས་སྡིག་པའི་ལས་མ་བྱས་ཞེས་ཟེར་ན། ང་ཚོས་དཀོན་མཆོག་རྫུན་གསུང་མཁན་ཡིན་པར་སྨྲ་ཞིང་ཁོང་གི་བཀའ་ངེད་རྣམས་ལ་མེད་དོ། །
1JO 2:1 ངའི་གཅེས་པའི་ཕྲུ་གུ་རྣམས། ཁྱོད་ཚོས་སྡིག་པའི་ལས་མི་བྱེད་པའི་ཕྱིར་ངས་དོན་འདི་རྣམས་འབྲི། འོན་ཀྱང་མི་སུ་ཞིག་གིས་སྡིག་པའི་ལས་བྱས་ན་ཡབ་དཀོན་མཆོག་གི་དྲུང་དུ་ངེད་རྣམས་ལ་ཞུ་བ་ཕུལ་མཁན་ཅིག་ཡོད་དེ་ཁོང་ནི་ཡེ་ཤུ་མཱ་ཤི་ཀ་ཡང་དག་པ་དེ་ཡིན།
1JO 2:2 ཁོང་ཉིད་དཀོན་མཆོག་གི་ཐུགས་ཁྲོ་ལས་ཐར་བའི་དམར་མཆོད་ཡིན་ཏེ། ཁོང་གིས་བློས་བཏང་བས་ང་ཚོ་ཙམ་མ་ཟད་འཇིག་རྟེན་ཀུན་གྱི་སྡིག་ཉེས་སེལ་ལོ།
1JO 2:3 གལ་ཏེ་ངེད་རྣམས་ཀྱིས་ཁོང་གི་བཀའ་ཁྲིམས་བསྲུངས་ན་ཁོང་ངོ་ཤེས་པར་ངེས་པ་རྙེད།
1JO 2:4 ངས་ཁོང་ངོ་ཤེས་ཞེས་ཟེར་མཁན་གྱིས་ཁོང་གི་བཀའ་ཁྲིམས་མ་བསྲུངས་ན་རྫུན་ཤོད་མཁན་ཡིན་ཞིང་ཁོ་ལ་བདེན་པ་མེད།
1JO 2:5 འོན་ཀྱང་གལ་ཏེ་སུ་ཞིག་གིས་ཁོང་གི་བཀའ་བསྲུངས་ན། མི་དེའི་སྟེང་དུ་དཀོན་མཆོག་གི་བྱམས་པ་ཡོངས་སུ་རྫོགས་པར་གྱུར་བར་ངེས་སོ། མི་སུ་ཞིག་གིས་ཁོང་གི་ནང་ན་གནས་ཡོད་ཅེས་ཟེར་ན་དེས་ཡེ་ཤུའི་སྤྱོད་ལམ་བཞིན་དུ་གནས་པར་བྱེད་དགོས། དེ་བརྒྱུད་ང་ཚོ་ཁོང་གི་ནང་ན་གནས་ཡོད་པ་ངེས་པར་དུ་ཤེས།
1JO 2:7 ངའི་གཅེས་པ་རྣམས། ངས་ཁྱོད་རྣམས་ལ་བཀའ་གསར་པ་མི་འབྲི་སྟེ། སྔར་ནས་ཁྱོད་ཚོར་ཡོད་པའི་བཀའ་རྙིང་པ་ཞིག་ཡིན། དེ་ནི་ཁྱོད་རྣམས་ཀྱིས་ཐོས་མྱོང་བའི་བཀའ་དེ་ཡིན།
1JO 2:8 འོན་ཀྱང་ངས་ཁྱོད་རྣམས་ལ་འབྲི་བཞིན་པའི་བཀའ་དེ་གསར་པའང་ཡིན། དེའི་བདེན་པ་ཡེ་ཤུ་དང་ཁྱོད་གཉིས་ལ་སྟོན། གང་ཡིན་ཟེར་ན། མུན་པ་འདའ་ཞིང་བདེན་པའི་འོད་འཕྲོ་བཞིན་ཡོད་པས་སོ།
1JO 2:9 སུས་ཀྱང་ང་འོད་ཀྱི་ནང་ན་ཡོད་ཅེས་ཟེར་ནས་སྤུན་ཟླར་སྡང་ན་ད་དུང་མུན་པར་གནས།
1JO 2:10 སྤུན་ཟླར་བྱམས་པ་བྱེད་མཁན་འོད་ལ་གནས་ཞིང༌། ཁོ་ལ་བསླུ་བྲིད་ཀྱི་རྒྱུ་རྐྱེན་ཅིའང་མེད།
1JO 2:11 འོན་ཀྱང་སྤུན་ཟླར་སྡང་མཁན་མུན་པའི་ནང་ལ་ཡོད་ཅིང་མུན་པར་འཚོ། མུན་པས་ཁོའི་མིག་ལོང་བར་བྱས་པས་ཁོས་འགྲོ་བའི་ལམ་མི་ཤེས།
1JO 2:12 ང་ཡིས་ཕྲུ་གུ་རྣམས་ལ་འབྲི། ། ཁྱེད་ཚོའི་སྡིག་ཉེས་མཐའ་དག་ནི། ། ཡེ་ཤུའི་མཚན་ནས་སེལ་བའི་ཕྱིར། །
1JO 2:13 ང་ཡིས་ཕ་ཡི་མཆོག་ལ་འབྲི། ། ཐོག་མ་ཉིད་ནས་ཡོད་པའི་ཁོང༌། ། སུ་ཡིན་ཁྱེད་ཚོས་ཤེས་པས་སོ། ། ང་ཡིས་གཞོན་ནུ་རྣམས་ལ་འབྲི། ། ཁྱེད་ཚོས་བདུད་ཀྱི་རྒྱལ་པོ་ལས། ། རྣམ་པར་རྒྱལ་བར་བྱས་པས་སོ། ། ང་ཡིས་ཕྲུ་གུ་རྣམས་ལ་འབྲི། ། ཡབ་ཆེན་ངོ་ཤེས་བྱུང་བས་སོ། །
1JO 2:14 ང་ཡིས་ཕ་ཡི་མཆོག་ལ་འབྲི། ། ཐོག་མ་ཉིད་ནས་ཡོད་པའི་ཁོང༌། ། སུ་ཡིན་ཁྱེད་ཚོས་ཤེས་པས་སོ། ། ང་ཡིས་གཞོན་ནུ་རྣམས་ལ་འབྲི། ། ཁྱེད་ཚོར་སྟོབས་ཤུགས་ཆེར་ལྡན་ལ། ། སེམས་སུ་དཀོན་མཆོག་བཀའ་གནས་ཤིང༌། ། བདུད་ལས་རྣམ་པར་རྒྱལ་བས་སོ། །
1JO 2:15 འཇིག་རྟེན་འདིའམ་འདིའི་ནང་ན་གང་ཡོད་པར་མ་ཆགས་ཤིག གལ་ཏེ་སུ་ཞིག་གིས་འཇིག་རྟེན་འདི་ལ་ཆགས་ན་ཡབ་དཀོན་མཆོག་ལ་བརྩེ་བ་དེ་ཁོ་ལ་མེད་དོ།
1JO 2:16 གང་ཡིན་ཞེ་ན། འཇིག་རྟེན་འདི་ལ་ཡོད་པ་ཐམས་ཅད་དེ། ལུས་ཀྱི་འདོད་ཆགས། མིག་གི་འདོད་པ། ནོར་ལས་འབྱུང་བའི་ང་རྒྱལ་བཅས་ནི་ཡབ་ལས་མི་འབྱུང་བར་འཇིག་རྟེན་འདི་ལས་འབྱུང༌།
1JO 2:17 འཇིག་རྟེན་འདི་དང་དེའི་འདོད་ཆགས་འདའ་བཞིན་ཡོད། འོན་ཀྱང་དཀོན་མཆོག་གི་དགོངས་པ་བཞིན་དུ་སྒྲུབ་མཁན་རྒྱུན་དུ་གནས།
1JO 2:18 ཕྲུ་གུ་རྣམས། ད་ལྟ་དུས་ཀྱི་མཐའ་མ་ཡིན། ཁྱོད་རྣམས་ཀྱིས་ཐོས་པ་བཞིན་མཱ་ཤི་ཀའི་བསྟན་དགྲ་ཡོང་བར་འགྱུར། ད་ཆ་མཱ་ཤི་ཀའི་བསྟན་དགྲ་མང་པོ་ཐོན་པས། ངེད་རྣམས་ཀྱིས་དུས་མཐའ་མ་ཡིན་པར་ཤེས་སོ།
1JO 2:19 དེ་རྣམས་ང་ཚོ་ལས་ཐོན་པས། ང་ཚོའི་ཁོངས་གཏོགས་གཏན་ནས་མིན། གལ་ཏེ་ང་ཚོའི་ཁོངས་གཏོགས་ཡིན་ན་ང་ཚོ་མཉམ་དུ་གནས་པ་ཡིན། འོན་ཀྱང་ང་ཚོ་ལས་འཐོན་པའི་སྒོ་ནས་ཁོ་ཚོ་ཐམས་ཅད་ཀྱིས་ང་ཚོའི་ཁོངས་གཏོགས་མིན་པར་སྟོན།
1JO 2:20 ཡང་དམ་པ་དེས་དམ་པའི་ཐུགས་ཉིད་ཀྱི་དབང་ཁྱོད་ཚོར་གནང་བས་ཁྱོད་ཚོ་ཐམས་ཅད་ཀྱིས་བདེན་པ་ཤེས།
1JO 2:21 ཁྱེད་ཚོས་བདེན་པ་མི་ཤེས་པའི་རྐྱེན་གྱིས་ངས་འབྲི་བ་མིན་ཏེ། ཁྱེད་ཚོས་བདེན་པ་ཤེས་ཤིང་རྫུན་གང་ཡང་བདེན་པ་ལས་མི་འབྱུང་བ་ཤེས་པས་ངས་ཁྱེད་ཚོར་འབྲི།
1JO 2:22 རྫུན་ཤོད་མཁན་སུ་ཡིན། ཡེ་ཤུ་ནི་མཱ་ཤི་ཀ་མ་ཡིན་ཞེས་ཟེར་མཁན་དེ་ཡིན། མི་དེ་ཡབ་སྲས་གཉིས་ཁས་ལེན་མི་བྱེད་པ་ཞིག་ཡིན་པས་མཱ་ཤི་ཀའི་བསྟན་དགྲ་ཡིན།
1JO 2:23 སྲས་ཁས་ལེན་མི་བྱེད་པ་ལ་ཡབ་ཀྱང་མེད། སྲས་ཁས་ལེན་བྱེད་པ་ལ་ཡབ་ཀྱང་ཡོད།
1JO 2:24 ཁྱོད་ཀྱིས་སྔར་ནས་གང་ཐོས་པ་དེ་སེམས་ལ་གནས་པར་འགྱུར་ཞིག སྔར་ནས་གང་ཐོས་པ་དེ་ཁྱེད་ཚོའི་ནང་ལ་གནས་ན། ཁྱེད་ཚོའང་སྲས་དང་ཡབ་མཉམ་དུ་གནས་པར་འགྱུར།
1JO 2:25 ཁོང་གིས་ང་ཚོར་ཞལ་ཆད་གང་གནང་བ་དེ་ནི་དཔག་ཏུ་མེད་པའི་ཚེ་ཡིན།
1JO 2:26 ཁྱེད་ཚོ་མགོ་སྐོར་གཏོང་འདོད་མཁན་རྣམས་ལ་དམིགས་ནས་ངས་དོན་འདི་ཚོ་འབྲི།
1JO 2:27 ཡང་མཱ་ཤི་ཀ་ནས་ཐོབ་པའི་དམ་པའི་ཐུགས་ཉིད་ཀྱི་དབང་ནི་ཁྱེད་ཚོའི་སེམས་ལ་གནས་པས། སུས་ཀྱང་ཁྱེད་ཚོར་སློབ་མི་དགོས། གང་ཡིན་ཞེ་ན། དམ་པའི་ཐུགས་ཉིད་ཀྱིས་ཁྱེད་ཚོར་དོན་ཐམས་ཅད་ཀྱི་སྐོར་གསུང་ཞིང༌། ཁོང་གི་གསུང་ནི་རྫུན་མིན་ཏེ་བདེན་པ་ཡིན་པས་ཁོང་གིས་གསུངས་པ་བཞིན་ཁོང་གི་ནང་ལ་གནས་པར་གྱིས་ཤིག
1JO 2:28 ད་གཅེས་པའི་ཕྲུ་གུ་རྣམས། ཁོང་མངོན་པར་འགྱུར་བའི་ཚེ་ཁོང་གི་དྲུང་དུ་ང་ཚོ་ཡིད་རྟོན་དང་ལྡན་ཏེ་ཁོང་ཕེབས་པར་ངོ་གནོངས་མི་དགོས་པའི་ཆེད་དུ་ཁོང་གི་ནང་ལ་གནས་པར་གྱིས་ཤིག
1JO 2:29 ཁོང་ཡང་དག་པ་ཡིན་པར་ཁྱེད་ཀྱིས་ཤེས་པས་ཡང་དག་པའི་ལས་བྱེད་མཁན་ཐམས་ཅད་ཁོང་ལས་སྐྱེས་པ་ཡིན་པར་ཡང་ཤེས་སོ། །
1JO 3:1 ལྟོས་དང༌། ཡབ་ཀྱིས་ང་ཚོར་གནང་བའི་བྱམས་པ་ཅི་ལྟར་ཆེའོ། ངེད་རྣམས་ལ་དཀོན་མཆོག་གི་སྲས་དང་སྲས་མོ་ཟེར། དེ་ལྟར་ཡིན་ཡང་ཡིན། འཇིག་རྟེན་འདིའི་མི་རྣམས་ཀྱིས་ཁོང་ངོ་མ་ཤེས་པས་ང་ཚོའང་ངོ་མི་ཤེས།
1JO 3:2 ངའི་གཅེས་པ་རྣམས། ད་ལྟ་ང་ཚོ་དཀོན་མཆོག་གི་སྲས་དང་སྲས་མོ་ཡིན་ཞིང༌། རྗེས་མ་ང་ཚོ་ཅི་ལྟར་འགྱུར་བ་དེ་ད་དུང་མ་མངོན། ཡེ་ཤུ་འཐོན་པའི་ཚེ་ཁོང་ཅི་ལྟར་ཡིན་པ་དེ་ལྟར་མཐོང་བར་འགྱུར་བས་ང་ཚོ་ཁོང་དང་འདྲ་བ་ཡིན་པར་ང་ཚོས་ཤེས།
1JO 3:3 ཁོང་དེ་འདྲའི་རེ་སྒུག་བྱེད་མཁན་ཐམས་ཅད་ཀྱིས། རང་འདག་པར་བྱེད་དེ། ཁོང་དྲི་མ་མེད་པ་ལྟར་རོ། །
1JO 3:4 སུས་ཀྱང་སྡིག་ཉེས་ལག་ལེན་བྱེད་པ་དེ་བཀའ་ཁྲིམས་འགལ་མཁན་ཡང་ཡིན། སྡིག་ཉེས་ནི་བཀའ་ཁྲིམས་དང་འགལ་བའོ།
1JO 3:5 ཡེ་ཤུ་སྡིག་ཉེས་སེལ་བའི་ཆེད་དུ་མངོན་པར་ཁྱེད་ཚོས་ཤེས་ཤིང༌། ཁོང་གི་ནང་ན་སྡིག་ཉེས་མེད།
1JO 3:6 སུ་ཞིག་ཁོང་གི་ནང་དུ་གནས་ན་སྡིག་ཉེས་ལག་ལེན་མི་བྱེད། སུས་ཀྱང་སྡིག་ཉེས་མུ་མཐུད་ནས་བྱས་ན་ཁོང་མ་མཇལ་ལ་ངོ་ཡང་མ་ཤེས།
1JO 3:7 ཕྲུ་གུ་རྣམས། མི་སུས་ཀྱང་ཁྱོད་ལ་མགོ་སྐོར་གཏོང་དུ་མ་འཇུག་ཅིག ཁོང་ཡང་དག་པ་ཡིན་པ་ལྟར། ཡང་དག་པའི་ལས་བྱེད་མཁན་ཡང་ཡང་དག་པ་ཡིན།
1JO 3:8 སྡིག་ཉེས་ལག་ལེན་བྱེད་མཁན་ནི་བདུད་ཀྱི་ཁོངས་སུ་གཏོགས་པ་ཡིན། གང་ཡིན་ཟེར་ན། བདུད་ཀྱིས་ཐོག་མ་ནས་སྡིག་པའི་ལས་བྱས་པས་སོ། དཀོན་མཆོག་གི་སྲས་མངོན་པར་གྱུར་བའི་དོན་ནི་བདུད་ཀྱི་བྱ་བ་མེད་པར་མཛད་པའི་ཆེད་དུ་ཡིན།
1JO 3:9 སུ་ཞིག་དཀོན་མཆོག་ལས་སྐྱེས་པ་དེས་སྡིག་པའི་ལས་མུ་མཐུད་ནས་མི་བྱེད། གང་ལགས་ཟེར་ན། དཀོན་མཆོག་གི་ས་བོན་ཁོའི་ནང་ན་གནས་པས་སོ། དཀོན་མཆོག་ལས་སྐྱེས་པས་ཁོས་སྡིག་པའི་ལས་མུ་མཐུད་ནས་བྱེད་མི་སྲིད།
1JO 3:10 ཡང་དག་པའི་ལས་མི་བྱེད་མཁན་ནམ། ཡང་ན་སྤུན་ཟླར་བྱམས་པ་མི་བྱེད་པ་ནི་དཀོན་མཆོག་གི་ཁོངས་གཏོགས་མིན། དེའི་སྒོ་ནས་དཀོན་མཆོག་གི་སྲས་དང་སྲས་མོ་རྣམས་དང་བདུད་ཀྱི་ཕྲུ་གུ་གང་ཡིན་པ་ཤེས།
1JO 3:11 ང་ཚོས་གཅིག་གིས་གཅིག་ལ་བྱམས་པ་བྱེད་དགོས་པ་ནི་ཁྱོད་ཚོས་སྔར་ནས་ཐོས་པའི་འཕྲིན་ཡིན།
1JO 3:12 བདུད་ཀྱི་ཁོངས་གཏོགས་ཡིན་པའི་རང་གི་གཅུང་པོ་སྲོག་གཅོད་མཁན་ཀཱ་ཡིན་ནང་བཞིན་ལ་མ་འགྱུར་ཞིག ཅིའི་ཕྱིར་བསད་ཞེ་ན། ཀཱ་ཡིན་གྱི་བྱ་བ་ངན་པ་ཡིན་ཞིང༌། ཁོའི་གཅུང་པོའི་བྱ་བ་དྲང་པོ་ཡིན་པས་སོ།
1JO 3:13 སྤུན་ཟླ་རྣམས། འཇིག་རྟེན་འདིའི་མི་རྣམས་ཀྱིས་ཁྱེད་ཚོར་སྡང་ན་ཡ་མཚན་མ་སྐྱེད་ཅིག
1JO 3:14 སྤུན་ཟླར་བྱམས་པ་བྱས་པའི་རྐྱེན་གྱིས་ང་ཚོ་འཆི་བ་ནས་གསོན་པོར་གྱུར་ཡོད་པ་ངེད་ཀྱིས་ཤེས། བྱམས་པ་མི་བྱེད་མཁན་ནི་འཆི་བའི་ནང་ལ་གནས་སོ།
1JO 3:15 སུས་ཀྱང་སྤུན་ཟླར་སྡང་བ་དེ་ནི་སྲོག་གཅོད་མཁན་ཡིན། ཡང་སྲོག་གཅོད་མཁན་སུ་ལའང་དཔག་ཏུ་མེད་པའི་ཚེ་མི་གནས་པ་ཁྱེད་ཚོས་ཤེས།
1JO 3:16 ཡེ་ཤུས་ང་ཚོའི་དོན་ལ་རང་གི་སྐུ་སྲོག་བློས་བཏང་གནང༌། དེའི་སྟེང་ནས་བྱམས་པ་དངོས་གང་ཡིན་པ་ངེད་ཀྱིས་ཤེས། ངེད་རྣམས་ཀྱིས་ཀྱང་སྤུན་ཟླ་རྣམས་ཀྱི་ཆེད་དུ་རང་སྲོག་གཏོང་དགོས།
1JO 3:17 འཇིག་རྟེན་འདིའི་རྒྱུ་ནོར་ཡོད་པ་ཞིག་གིས་སྤུན་ཟླ་དགོས་ཆས་མེད་པར་མཐོང་ནས་སྙིང་རྗེ་མ་བྱས་ན། དཀོན་མཆོག་གི་བྱམས་པ་ཁོའི་ནང་ན་ཅི་ལྟར་གནས།
1JO 3:18 གཅེས་པའི་ཕྲུ་གུ་རྣམས། ང་ཚོས་ངག་དང་ཚིག་ཙམ་གྱི་སྒོ་ནས་མ་ཡིན་པར་ལག་ལེན་དངོས་ཀྱི་ནང་ནས་བྱམས་སྐྱོང་བྱེད་དགོས།
1JO 3:19 བྱ་བ་དེ་ཡིས་ང་ཚོ་བདེན་པའི་ཁོངས་གཏོགས་ཡིན་པ་ཤེས་པར་འགྱུར་ཞིང༌། ངེད་ཀྱི་སེམས་ཁོང་གི་སྤྱན་སྔར་བློ་བདེར་སྡོད་པར་བྱེད། གང་ཡིན་ཞེ་ན། གལ་ཏེ་ང་ཚོའི་སེམས་ཀྱིས་རང་ལ་སྡིག་ཉེས་འདུག་ཅེས་ཟེར་ན་དཀོན་མཆོག་ནི་ངེད་ཀྱི་སེམས་ལས་ཆེ་བ་ཡིན་ཞིང་ཁོང་གིས་དོན་ཐམས་ཅད་མཁྱེན་ནོ།
1JO 3:21 གཅེས་པ་རྣམས། ངེད་ཀྱི་སེམས་ཀྱིས་རང་ལ་སྡིག་ཉེས་འདུག་ཅེས་མི་ཟེར་ན་དཀོན་མཆོག་གི་སྤྱན་སྔར་ང་ཚོར་གདེང་ཚོད་ཡོད།
1JO 3:22 ང་ཚོས་ཁོང་གི་བཀའ་ཁྲིམས་སྲུང་ཞིང་ཁོང་གི་ཐུགས་མཉེས་པའི་བྱ་བ་བྱེད་པས་ང་ཚོས་གང་ཡང་ཞུས་པ་དེ་ཁོང་ལས་འཐོབ་པར་འགྱུར།
1JO 3:23 དཀོན་མཆོག་གི་བཀའ་ནི་ཁོང་གི་སྲས་ཡེ་ཤུ་མཱ་ཤི་ཀའི་མཚན་ལ་དད་པ་བྱེད་ཅིང༌། ཁོང་གིས་ང་ཚོར་བཀའ་གནང་བ་ལྟར་ང་ཚོས་གཅིག་གིས་གཅིག་ལ་བྱམས་པ་བྱེད་དགོས་པ་དེ་ཡིན།
1JO 3:24 དཀོན་མཆོག་གི་བཀའ་སྲུང་མཁན་ཁོང་གི་ནང་ན་གནས་ཤིང༌། ཁོང་ཡང་ཁོའི་ནང་བཞུགས། ཡང་ཁོང་ང་ཚོའི་ནང་ན་བཞུགས་པའི་རྟགས་ནི་ཁོང་གིས་ང་ཚོར་གནང་བའི་དམ་པའི་ཐུགས་ཉིད་དེ་ཡིན་ནོ། །
1JO 4:1 གཅེས་པ་རྣམས། སེམས་ཉིད་ཡིན་ཚད་ལ་ཡིད་མ་ཆེས་ཤིག སེམས་ཉིད་དཀོན་མཆོག་ནས་ཡིན་མིན་ལྟ་ཚོད་ཞིབ་ཕྲ་བྱོས། གང་ཡིན་ཟེར་ན། ལུང་སྟོན་པ་རྫུན་མ་མང་པོ་འཇིག་རྟེན་ལ་ཐོན་པས་སོ།
1JO 4:2 ཡེ་ཤུ་མཱ་ཤི་ཀ་གཟུགས་དང་ལྡན་པར་འཇིག་རྟེན་འདིར་ཕེབས་ཞེས་ཟེར་བའི་སེམས་ཉིད་རེ་རེ་ནི་དཀོན་མཆོག་ནས་ཡིན། དེ་ལྟར་ཁྱེད་ཚོས་དཀོན་མཆོག་གི་དམ་པའི་ཐུགས་ཉིད་ངོ་ཤེས།
1JO 4:3 ཡང་ཡེ་ཤུ་ཁས་ལེན་མི་བྱེད་པའི་སེམས་ཉིད་རེ་རེ་ནི་དཀོན་མཆོག་ནས་མིན་པས། མཱ་ཤི་ཀའི་བསྟན་དགྲའི་སེམས་ཉིད་ཡིན། སེམས་ཉིད་དེ་ཡོང་གི་ཡོད་པ་ཁྱེད་ཚོས་ཐོས་ཡོད་ལ་ད་ལྟ་འཇིག་རྟེན་འདིར་སླེབས་ཟིན།
1JO 4:4 གཅེས་པའི་ཕྲུ་གུ་རྣམས། ཁྱོད་ཚོ་དཀོན་མཆོག་ནས་ཡིན་པས་ཁོ་ཚོ་ལས་རྒྱལ་ཟིན་ནོ། གང་ཡིན་ཞེ་ན། འཇིག་རྟེན་ལ་ཡོད་པ་དེ་ལས་ཁྱོད་ཚོའི་ནང་ལ་བཞུགས་མཁན་དེ་ཆེའོ།
1JO 4:5 ཁོ་ཚོ་ནི་འཇིག་རྟེན་འདི་ནས་ཡིན་པས་འཇིག་རྟེན་གྱི་ཆ་ནས་གཏམ་བྱེད་ཅིང༌། འཇིག་རྟེན་པས་ཁོ་ཚོའི་གཏམ་ལ་ཉན།
1JO 4:6 ང་ཚོ་དཀོན་མཆོག་ནས་ཡིན་པས། དཀོན་མཆོག་ངོ་ཤེས་པ་དེས་ང་ཚོ་ལ་ཉན། དཀོན་མཆོག་ནས་མ་ཡིན་པ་དེས་ང་ཚོ་ལ་མི་ཉན། དེའི་སྒོ་ནས་ངེད་རྣམས་ཀྱིས་བདེན་པའི་སེམས་ཉིད་དང་ལོག་པའི་སེམས་ཉིད་ཤེས་སོ། །
1JO 4:7 གཅེས་པ་རྣམས། བྱམས་པ་ནི་དཀོན་མཆོག་ནས་ཡིན་པས་ང་ཚོས་གཅིག་གིས་གཅིག་ལ་བྱམས་པ་བྱེད་དགོས། བྱམས་པ་བྱེད་མཁན་ཚང་མ་དཀོན་མཆོག་ལས་སྐྱེས་ཤིང༌། དཀོན་མཆོག་ངོ་ཤེས།
1JO 4:8 དཀོན་མཆོག་ནི་བྱམས་པ་ཡིན་པས་བྱམས་པ་མི་བྱེད་མཁན་དེས་དཀོན་མཆོག་ངོ་མི་ཤེས།
1JO 4:9 དཀོན་མཆོག་གི་བྱམས་པ་ང་ཚོའི་ཁྲོད་དུ་མངོན་པར་གྱུར་བ་དེ་ལྟར་ཡིན། ང་ཚོ་ཁོང་བརྒྱུད་ནས་འཚོ་ཞིང་དཔག་ཏུ་མེད་པའི་ཚེ་འཐོབ་པའི་ཕྱིར་དཀོན་མཆོག་གིས་རང་གི་སྲས་གཅིག་པོ་དེ་འཇིག་རྟེན་ལ་མངགས།
1JO 4:10 བྱམས་པ་ནི་ང་ཚོས་དཀོན་མཆོག་ལ་བྱམས་པ་མ་བྱས་ཏེ། དཀོན་མཆོག་གིས་ང་ཚོར་བྱམས་པར་མཛད་པ་ཡིན་ཞིང༌། ང་ཚོ་སྡིག་ཉེས་ལས་ཐར་བར་མཛད་པའི་དམར་མཆོད་དུ་ཁོང་གི་སྲས་མངགས་པ་ཡིན།
1JO 4:11 གཅེས་པ་རྣམས། དཀོན་མཆོག་གིས་ང་ཚོར་དེ་ལྟར་བྱམས་པ་མཛད་པས། ངེད་ཀྱིས་ཀྱང་གཅིག་གིས་གཅིག་ལ་བྱམས་པ་བྱེད་དགོས།
1JO 4:12 སུས་ཀྱང་དཀོན་མཆོག་གཏན་ནས་མཐོང་མ་མྱོང༌། འོན་ཀྱང་ང་ཚོས་གཅིག་གིས་གཅིག་ལ་བྱམས་པ་བྱས་ན། དཀོན་མཆོག་ང་ཚོའི་ནང་ལ་བཞུགས་ཤིང༌། ཁོང་གི་བྱམས་པ་ང་ཚོའི་ནང་ཡོངས་སུ་རྫོགས་པར་འགྱུར།
1JO 4:13 ཁོང་གིས་དམ་པའི་ཐུགས་ཉིད་ང་ཚོར་གནང་བའི་སྒོ་ནས་ང་ཚོ་ཁོང་གི་ནང་ན་གནས་ཤིང༌། ཁོང་ང་ཚོའི་ནང་ན་བཞུགས་པ་དེ་ཤེས།
1JO 4:14 ཡབ་ཀྱིས་འཇིག་རྟེན་གྱི་སྐྱབས་མགོན་དུ་སྲས་མངགས་ཡོད་པ་ང་ཚོས་མཐོང་མྱོང་ཞིང་དེ་ལ་དཔང་པོ་བྱེད།
1JO 4:15 སུ་ཞིག་གིས་ཡེ་ཤུ་ནི་དཀོན་མཆོག་གི་སྲས་ཡིན་པར་ཁས་ལེན་བྱས་ན། དཀོན་མཆོག་དེའི་ནང་ན་བཞུགས་པ་དང༌། ཁོ་དཀོན་མཆོག་གི་ནང་ན་གནས།
1JO 4:16 དེར་བརྟེན་དཀོན་མཆོག་གིས་ང་ཚོར་བྱམས་པ་ངེད་ཀྱིས་ཤེས་ཤིང་དེ་ལ་ཡིད་རྟོན་བྱེད། དཀོན་མཆོག་ནི་བྱམས་པའོ། བྱམས་པའི་ནང་ལ་གནས་མཁན་དཀོན་མཆོག་གི་ནང་ན་གནས་ཤིང༌། དཀོན་མཆོག་ཀྱང་ཁོའི་ནང་ན་བཞུགས།
1JO 4:17 དེ་ལྟར་བྱམས་པ་ནི་ང་ཚོའི་ཁྲོད་དུ་ཡོངས་སུ་རྫོགས་པར་གྱུར། ཁྲིམས་གཅོད་པའི་ཉིན་མོར་ང་ཚོ་འཇིགས་པ་དང་བྲལ་བར་འགྱུར་ཏེ། དེ་ནི་འཇིག་རྟེན་འདིར་ང་ཚོ་ཁོང་དང་འདྲ་བ་ཡིན་པས་སོ།
1JO 4:18 བྱམས་པ་ལ་འཇིགས་པ་མེད་པས། ཡོངས་སུ་རྫོགས་པའི་བྱམས་པ་དེས་འཇིགས་པ་ཕྱིར་སྐྲོད། གང་ཡིན་ཞེ་ན། འཇིགས་པའི་རྒྱུ་རྐྱེན་ཆད་པ་ཡིན་པས། འཇིགས་པ་ཡོད་པའི་མིར་བྱམས་པ་ད་དུང་ཡོངས་སུ་རྫོགས་པར་མི་འགྱུར།
1JO 4:19 ཁོང་གིས་སྔོན་དུ་ང་ཚོར་བྱམས་པར་མཛད་པས་ངེད་ཀྱིས་ཀྱང་བྱམས་པ་བྱེད།
1JO 4:20 མི་ཞིག་གིས་ངས་དཀོན་མཆོག་ལ་གཅེས་པར་འཛིན་ཞེས་ཟེར་བཞིན་དུ་རང་གི་སྤུན་ཟླར་སྡང་ན་ཁོ་རྫུན་ཤོད་མཁན་ཡིན། གང་ལགས་ཤེ་ན། མིག་གིས་མཐོང་བཞིན་ཡོད་པའི་སྤུན་ཟླར་མི་བྱམས་མཁན་དེས་མིག་གིས་མཐོང་མ་མྱོང་བའི་དཀོན་མཆོག་ལ་གཅེས་མི་སྲིད།
1JO 4:21 ཡང་དཀོན་མཆོག་ལ་གཅེས་པར་འཛིན་མཁན་གྱིས་ཁོའི་སྤུན་ཟླ་ལའང་བྱམས་པར་བྱེད་དགོས། དེ་ནི་ཁོང་གིས་ང་ཚོར་གནང་བའི་བཀའ་ཡིན་ནོ། །
1JO 5:1 སུ་ཞིག་ཡིན་ཡང་ཡེ་ཤུ་ནི་མཱ་ཤི་ཀ་ཡིན་པར་ཡིད་ཆེས་བྱེད་མཁན་དེ་དཀོན་མཆོག་ལས་སྐྱེས་པ་ཡིན་པས། ཡབ་ལ་བྱམས་པ་བྱེད་མཁན་དེས་བུ་ཕྲུག་ལའང་བྱམས།
1JO 5:2 ང་ཚོས་དཀོན་མཆོག་ལ་གཅེས་པར་འཛིན་ཞིང་ཁོང་གི་བཀའ་ཁྲིམས་སྲུང་བའི་སྒོ་ནས་དཀོན་མཆོག་གི་སྲས་དང་སྲས་མོ་རྣམས་ལའང་བྱམས་པར་ཤེས།
1JO 5:3 གང་ཡིན་ཞེ་ན། ཁོང་གི་བཀའ་ཁྲིམས་སྲུང་བ་དེ་ནི་དཀོན་མཆོག་ལ་གཅེས་པར་འཛིན་པའོ། ཁོང་གི་བཀའ་ཁྲིམས་སྲུང་བ་དེ་དཀའ་བ་མིན།
1JO 5:4 གང་ལགས་ཤེ་ན། གང་ཞིག་དཀོན་མཆོག་ལས་སྐྱེས་པ་དེས་འཇིག་རྟེན་འདི་ལས་རྒྱལ། ཡང་འཇིག་རྟེན་ལས་རྒྱལ་བ་ནི་ང་ཚོའི་དད་པ་ཡིན་ནོ།
1JO 5:5 འཇིག་རྟེན་འདི་འཇོམས་མཁན་སུ་ཡིན་ཞེ་ན། ཡེ་ཤུ་ནི་དཀོན་མཆོག་གི་སྲས་ཡིན་པར་དད་པ་བྱེད་མཁན་དེ་ཁོ་ནའོ། །
1JO 5:6 ཆུ་ཁྲག་དང་བཅས་པའི་སྒོ་ནས་བྱོན་པ་ནི་ཡེ་ཤུ་མཱ་ཤི་ཀ་ཡིན། ཁོང་ཆུ་གཅིག་པོའི་སྒོ་ནས་མ་ཡིན་གྱིས། ཆུ་དང་ཁྲག་གཉིས་ཀྱི་སྒོ་ནས་བྱོན། ཡང་དམ་པའི་ཐུགས་ཉིད་ཀྱིས་ཁོང་ལ་དཔང་པོ་མཛད། གང་ཡིན་ཞེ་ན། དམ་པའི་ཐུགས་ཉིད་བདེན་པའོ།
1JO 5:7 དཔང་པོ་གསུམ་ཡོད་དེ།
1JO 5:8 དམ་པའི་ཐུགས་ཉིད་དང༌། ཆུ། ཁྲག་ཡིན་ཞིང༌། དེ་གསུམ་གྱི་དཔང་པོ་གཅིག་པའོ།
1JO 5:9 ང་ཚོས་མིའི་དཔང་པོ་ཁས་ལེན་བྱས་ན། དཀོན་མཆོག་གི་དཔང་པོ་དེ་བས་ཀྱང་གལ་ཆེ་བ་ཡིན། གང་ཡིན་ཟེར་ན། དཀོན་མཆོག་གི་དཔང་པོ་ནི་རང་གི་སྲས་ལ་དཔང་པོ་མཛད་པ་དེའོ།
1JO 5:10 དཀོན་མཆོག་གི་སྲས་ལ་དད་པ་བྱེད་མཁན་རྣམས་ཀྱི་སེམས་ནང་དུ་དཔང་པོ་དེ་ཡོད། དཀོན་མཆོག་ལ་ཡིད་ཆེས་མི་བྱེད་མཁན་གྱིས་ཁོང་རྫུན་གསུང་མཁན་ཡིན་པར་སྨྲ། གང་ཡིན་ཞེ་ན། དཀོན་མཆོག་གིས་ཉིད་ཀྱི་སྲས་ལ་དཔང་པོ་གང་མཛད་པ་དེ་ལ་ཡིད་མ་ཆེས་པས་སོ།
1JO 5:11 དཔང་པོ་དེ་ནི་དཀོན་མཆོག་གིས་ང་ཚོར་དཔག་ཏུ་མེད་པའི་ཚེ་གནང་བ་ཡིན་ཞིང༌། ཚེ་དེ་ཁོང་གི་སྲས་ནང་ན་ཡོད་དོ།
1JO 5:12 སྲས་དང་འགྲོགས་པ་དེ་ལ་དཔག་ཏུ་མེད་པའི་ཚེ་ཡང་ཡོད། དཀོན་མཆོག་གི་སྲས་དང་མི་འགྲོགས་པ་དེ་ལ་ཚེ་ཡང་མེད།
1JO 5:13 དཀོན་མཆོག་གི་སྲས་ཀྱི་མཚན་ལ་དད་པ་བྱེད་མཁན་ཁྱེད་རྣམས་ལ་དཔག་ཏུ་མེད་པའི་ཚེ་ཡོད་པར་ཤེས་པའི་ཕྱིར་དོན་འདི་རྣམས་ཁྱེད་ཚོར་བྲིས།
1JO 5:14 ཁོང་གི་སྤྱན་སྔར་ང་ཚོར་ཡོད་པའི་གདེང་ཚོད་ནི་ཁོང་གི་ཐུགས་དགོངས་བཞིན་དུ་ཅིའང་ཞུས་ན་ཁོང་གིས་གསན་པ་དེའོ།
1JO 5:15 ཡང་གལ་ཏེ་ངེད་ཀྱིས་ཅི་ཞིག་ཞུས་པ་དེ་གསན་པར་ཤེས་ན། གང་ཞུས་པ་དེ་ཁོང་ལས་ཐོབ་པར་ཡང་ཤེས།
1JO 5:16 གལ་ཏེ་སུ་ཞིག་གིས་སྤུན་ཟླས་འཆི་བ་ལ་མི་ཐུག་པ་ཙམ་གྱི་སྡིག་ཉེས་བྱེད་པར་མཐོང་ན། ཁོས་གསོལ་བ་འདེབས་དགོས་ཤིང༌། དཀོན་མཆོག་གིས་འཆི་བ་ལ་མི་ཐུག་པ་ཙམ་གྱི་སྡིག་ཉེས་བྱེད་མཁན་དེར་ཚེ་གནང་བར་འགྱུར། འབྲས་བུ་འཆི་བ་ལ་ཐུག་པའི་སྡིག་ཉེས་ཡང་ཡོད། དེའི་ཐད་ལ་ངས་གསོལ་བ་འདེབས་དགོས་ཞེས་མི་ཟེར།
1JO 5:17 དྲང་བདེན་མ་ཡིན་པའི་བྱ་བ་ཐམས་ཅད་སྡིག་ཉེས་ཡིན། འོན་ཀྱང་འཆི་བ་ལ་མི་ཐུག་པའི་སྡིག་ཉེས་ཡང་ཡོད།
1JO 5:18 དཀོན་མཆོག་ལས་སྐྱེས་པ་རྣམས་ཀྱིས་སྡིག་ཉེས་ལག་ལེན་མི་བྱེད་པར་ངེད་ཀྱིས་ཤེས། དཀོན་མཆོག་གི་སྲས་ཀྱིས་ཁོ་ཚོ་སྲུང་ཞིང༌། བདུད་ཀྱིས་ཁོ་ཚོར་གནོད་པ་བྱེད་མི་ཐུབ།
1JO 5:19 ང་ཚོ་དཀོན་མཆོག་གི་ཁོངས་གཏོགས་ཡིན་པ་དང༌། འཇིག་རྟེན་ཧྲིལ་པོ་འདི་བདུད་ཀྱི་དབང་འོག་ཏུ་ཡོད་པར་ང་ཚོས་ཤེས།
1JO 5:20 ཡང་དཀོན་མཆོག་གི་སྲས་བྱོན་ཞིང༌། ངེད་རྣམས་ལ་རྟོགས་པ་གནང་བར་ཤེས། དེ་ནི་ང་ཚོས་བདེན་པ་ཡིན་པའི་ཁོང་ངོ་ཤེས་པའི་ཆེད་དུ་ཡིན། ཡང་ང་ཚོ་བདེན་པ་ཡིན་པའི་ཁོང་གི་ནང་ན་ཡོད་དེ། ཁོང་གི་སྲས་ཡེ་ཤུ་མཱ་ཤི་ཀ་དེ་ཡིན། ཁོང་ནི་དཀོན་མཆོག་དངོས་དང༌། དཔག་ཏུ་མེད་པའི་ཚེ་ཡིན།
1JO 5:21 གཅེས་པའི་ཕྲུ་གུ་རྣམས། ལྷ་སྐུ་རྣམས་ལ་འཛེམས་ནས་ཁོ་ཚོ་གཏན་ནས་མ་བསྟེན་ཞིག །
2JO 1:1 དཀོན་མཆོག་གིས་བདམས་པའི་སྐུ་མཁྱེན་མ་དང་ཁོང་གི་སྲས་རྣམས་ལ་ང་ཆོས་ཚོགས་ཀྱི་འགན་འཁུར་བ་ཡིས་འཕྲིན་ཡིག་འདི་ཕུལ་ལོ། དེ་ཡང་ངེད་རྣམས་ལ་གནས་ཤིང་རྒྱུན་དུ་ཡོད་པའི་བདེན་པ་དེའི་རྐྱེན་གྱིས། ང་རང་ཙམ་མ་ཟད་བདེན་པ་ཤེས་མཁན་ཐམས་ཅད་ཀྱིས་ཁྱེད་ཚོར་གཅེས་པར་འཛིན།
2JO 1:3 ཡབ་དཀོན་མཆོག་དང་ཁོང་གི་སྲས་ཡེ་ཤུ་མཱ་ཤི་ཀ་ནས་ཐུགས་རྗེ་དང་བཀའ་དྲིན། ཞི་བདེ་བཅས་བདེན་པ་དང་བྱམས་པའི་སྒོ་ནས་ངེད་རྣམས་དང་ལྡན་པར་འགྱུར།
2JO 1:4 ཡབ་ཀྱིས་ང་ཚོར་བཀའ་གནང་ཡོད་པ་ལྟར་ཁྱེད་ཀྱི་སྲས་ཁ་ཤས་ཀྱིས་བདེན་པ་བཞིན་དུ་སྤྱོད་པར་མཐོང་ནས་ང་ཧ་ཅང་དགའ་པོ་བྱུང༌།
2JO 1:5 ད་ཡང་སྐུ་མཁྱེན་མ། ངེད་ཀྱིས་གཅིག་གིས་གཅིག་ལ་བྱམས་པ་བྱེད་དགོས་པ་དེ་ཞུ་བ་ཕུལ། བཀའ་ཁྲིམས་གསར་པ་ཞིག་འབྲི་བ་མིན་ཏེ། སྔར་ནས་ཡོད་པའི་བཀའ་ཁྲིམས་ཞིག་ཡིན།
2JO 1:6 ཡང་བྱམས་པ་ནི། ང་ཚོས་ཁོང་གི་བཀའ་ཁྲིམས་བཞིན་དུ་སྤྱོད་པ་དེ་ཡིན་ནོ། ཁྱེད་ཚོས་སྔར་ནས་ཐོས་པ་ལྟར་ཁོང་གི་བཀའ་ཁྲིམས་ནི་བྱམས་སེམས་བཞིན་དུ་སྤྱོད་དགོས་པ་དེ་ཡིན།
2JO 1:7 གང་ཡིན་ཞེ་ན། མགོ་སྐོར་གཏོང་མཁན་མང་པོ་འཇིག་རྟེན་དུ་ཐོན་ཡོད། དེ་ཚོས་ཡེ་ཤུ་མཱ་ཤི་ཀ་མིའི་ལུས་བཞེས་ནས་བྱོན་པ་ཁས་ལེན་མི་བྱེད། ཁོ་ནི་མགོ་སྐོར་གཏོང་བ་དང༌། མཱ་ཤི་ཀའི་བསྟན་དགྲ་ཡིན།
2JO 1:8 ང་ཚོས་འབད་པས་གང་བསྒྲུབས་པ་དེ་མེད་པར་མི་འགྱུར་བར་དོགས་ཟོན་གྱིས་ཤིག དེ་ནི་བྱ་དགའ་ཆ་ཚང་འཐོབ་པའི་ཆེད་དུ་ཡིན།
2JO 1:9 སུས་ཀྱང་མཱ་ཤི་ཀ་ནས་བྱུང་བའི་བསྟན་པར་མ་གནས་པར་དེ་ལས་བརྒལ་ན་དཀོན་མཆོག་དང་མི་འགྲོགས། བསྟན་པ་དེར་གནས་ན་ཡབ་སྲས་གཉིས་དང་འགྲོགས།
2JO 1:10 སུ་ཞིག་གིས་བསྟན་པ་འདི་མི་སྟོན་པར་ཁྱེད་ཀྱི་རྩར་ཡོང་ན། ཁྱེད་ཀྱིས་ཁོ་ཁང་པར་མ་བསུས་ཤིག སྐད་ཆ་གང་ཡང་མ་ཤོད་ཅིག
2JO 1:11 གང་ལགས་ཤེ་ན། ཁོ་ལ་སྐད་ཆ་བཤད་པ་དེས་ཀྱང་ལས་ངན་སྤྱོད་པ་ཁོ་དང་མཉམ།
2JO 1:12 ངས་ཁྱེད་རྣམས་ལ་འབྲི་རྒྱུ་མང་པོ་ཡོད་ཀྱང༌། ཤོག་བུ་དང་སྣག་ཚ་སྤྱད་ནས་དེ་ལྟར་བྱེད་མི་འདོད། ང་ཚོ་དགའ་སྤྲོས་ཁེངས་པར་འགྱུར་བའི་ཕྱིར་ཁྱེད་རྣམས་ལ་ངོ་གཏུགས་ནས་གཏམ་གླེང་བྱེད་པར་འདོད།
2JO 1:13 དཀོན་མཆོག་གིས་བདམས་པའི་ཁྱེད་ཀྱི་ལྕམ་སྲིང་གི་སྲས་རྣམས་ཀྱིས་ཁྱེད་ལ་འཚམས་འདྲི་ཞུའོ། །
3JO 1:1 ང་ཆོས་ཚོགས་ཀྱི་འགན་འཁུར་བ་ཡིས་བདེན་པ་ལ་གཅེས་པར་འཛིན་པའི་ག་ཡུ་ལ་འཕྲིན་ཡིག་འདི་ཕུལ་ལོ།
3JO 1:2 ངའི་གཅེས་པའི་གྲོགས་པོ། ཁྱོད་ཀྱི་སེམས་བདེ་བ་ཡིན་པ་ལྟར། དོན་ཐམས་ཅད་དང༌། ལུས་ཁམས་ཀྱང་བདེ་པོ་ཡིན་པར་ངས་རེ་བ་བྱེད།
3JO 1:3 སྤུན་ཟླ་ཁ་ཤས་འདིར་ཡོང་སྟེ། ཁྱོད་ཀྱིས་བདེན་པའི་ལམ་ལ་གནས་ཤིང༌། བདེན་པ་བཞིན་དུ་སྤྱོད་པར་བྱེད་པའི་གཏམ་བཤད་པ་ཐོས་ནས་ང་ཤིན་ཏུ་དགའ་བར་གྱུར།
3JO 1:4 ངའི་ཕྲུ་གུས་བདེན་པའི་ལམ་ལ་གནས་པ་ཐོས་པ་དེ་ལས་ཆེ་བའི་དགའ་སྤྲོ་ང་ལ་མེད།
3JO 1:5 གཅེས་པའི་གྲོགས་པོ། སྤུན་ཟླ་དེ་ཚོ་ངོ་མི་ཤེས་པ་ཡིན་ཡང༌། ཁྱེད་ཀྱིས་བློ་གཏད་ཆོག་པའི་ངང་ནས་ཁོ་ཚོར་རོགས་རམ་བྱེད།
3JO 1:6 ཆོས་ཚོགས་ཀྱི་མདུན་དུ་ཁོ་ཚོས་ཁྱེད་ཀྱི་བྱམས་སེམས་ལ་དཔང་པོ་བྱས། དཀོན་མཆོག་གི་ཞབས་ཕྱི་བྱེད་འོས་པའི་ཚུལ་དུ་ཁོ་ཚོ་ཕར་བཏང་ན་ལེགས།
3JO 1:7 གང་ཡིན་ཟེར་ན། ཁོ་ཚོ་དད་པ་མི་བྱེད་མཁན་རྣམས་ལས་རྒྱབ་སྐྱོར་ཅིའང་མ་ལེན་པར་མཱ་ཤི་ཀ་ཡི་ཕྱག་ལས་བྱེད་པའི་ཆེད་དུ་ཕྱིར་ཕེབས།
3JO 1:8 དེས་ན་ང་ཚོ་བདེན་པའི་དོན་དུ་མཉམ་དུ་ལས་བྱེད་པའི་ཕྱིར་ང་ཚོས་དེ་ལྟར་གྱི་མི་རྣམས་ལ་རྒྱབ་སྐྱོར་བྱེད་དགོས།
3JO 1:9 སྔར་ངས་ཆོས་ཚོགས་ལ་འཕྲིན་ཡིག་ཅིག་བྲིས་པ་ཡིན་ཡང༌། ཁོ་ཚོའི་ནང་ནས་ཆེ་འདོད་ཅན་གྱི་དིའོ་ཏྲེ་ཕེ་ཡིས་ང་ཚོའི་དབང་ལ་མི་རྩི།
3JO 1:10 དེའི་ཕྱིར་ང་ཡོང་ན་ཁོས་གང་བྱེད་པའི་སྐོར་མངོན་སུམ་དུ་གཏམ་བྱེད་རྒྱུ་ཡིན། ང་ཚོར་དམའ་འབེབས་གཏོང་ཞིང༌། དེ་ཡིས་ཚིམ་པར་མ་གྱུར་བས་ཁོས་སྤུན་ཟླ་རྣམས་བསུ་བར་མི་བྱེད་ཅིང༌། བསུ་བར་འདོད་པ་རྣམས་འགོག་སྟེ་ཁོ་ཚོ་ཆོས་ཚོགས་ནས་འབུད།
3JO 1:11 གཅེས་པའི་གྲོགས་པོ། ངན་པ་མིན་ཏེ་བཟང་པོར་དཔེ་ལྟོས་ཤིག བཟང་པོ་བྱེད་མཁན་དཀོན་མཆོག་ནས་ཡིན། ངན་པ་བྱེད་མཁན་དཀོན་མཆོག་དང་མཇལ་མྱོང་མེད།
3JO 1:12 མི་ཐམས་ཅད་དང་བདེན་པ་ཉིད་ཀྱིས་དེ་མེ་ཏྲི་ཡུ་ལ་བསྟོད་བསྔགས་བྱེད། ང་ཚོས་ཀྱང་ཁོང་ལ་བསྟོད་བསྔགས་བྱེད། ཡང་ང་ཚོའི་དཔང་པོ་བདེན་པ་ཡིན་པར་ཁྱེད་ཀྱིས་ཤེས།
3JO 1:13 ཁྱེད་ལ་འབྲི་རྒྱུ་མང་པོ་ཡོད་ཀྱང༌། སྣག་ཚ་དང་སྙུག་གུ་སྤྱད་ནས་དེ་ལྟར་བྱེད་མི་འདོད།
3JO 1:14 ཁྱེད་དང་རིང་པོ་མ་ལོན་པར་མཇལ་བའི་རེ་བ་ཡོད། དེ་ནས་ང་ཚོས་ངོ་གཏུགས་ནས་གཏམ་གླེང་བྱེད།
3JO 1:15 ཞི་བདེ་ཁྱེད་ལ་ལྡན་པར་གྱུར་ཅིག གྲོགས་པོ་རྣམས་ཀྱིས་ཁྱེད་ལ་འཚམས་འདྲི་ཞུ། དེར་ཡོད་པའི་གྲོགས་པོ་རྣམས་ལ་ངའི་ཚབ་བྱས་ཏེ་མིང་རེ་རེ་ནས་འབོད་དེ་འཚམས་འདྲི་ཞུའོ། །
JUD 1:1 ཡེ་ཤུ་མཱ་ཤི་ཀའི་ཞབས་ཕྱི་དང༌། ཡ་ཀོབ་ཀྱི་ནུ་བོ་ང་ཡ་ཧུ་དཱ་ཡིས། བོས་པའི་སྤུན་ཟླ་རྣམས་ཏེ་ཡབ་དཀོན་མཆོག་གི་ཐོག་ནས་གཅེས་པ་དང༌། ཡེ་ཤུ་མཱ་ཤི་ཀའི་དོན་དུ་བསྲུངས་པ་རྣམས་ལ་འཕྲིན་ཡིག་འདི་ཕུལ་ལོ།
JUD 1:2 སྙིང་རྗེ་དང༌། ཞི་བདེ་དང༌། བྱམས་སེམས་ཁྱེད་ཚོ་ལ་རྒྱས་པར་གྱུར་ཅིག
JUD 1:3 གཅེས་པའི་སྤུན་ཟླ་རྣམས། སྔར་ང་ཚོའི་ཐུན་མོང་གི་ཐར་པའི་སྐོར་ལ་ངས་ཁྱེད་ཚོར་འབྲི་བའི་བརྩོན་སེམས་ཡོད་ཀྱང༌། ད་ལན་གཅིག་དུས་ཐམས་ཅད་ཀྱི་ཆེད་དཀོན་མཆོག་གི་མི་རྣམས་ལ་གཏད་པའི་དད་པའི་ཕྱིར་ཁྱེད་ཚོས་འབད་རྩོལ་བྱེད་དུ་སྐུལ་བར་འབྲི་དགོས་པ་བྱུང༌།
JUD 1:4 རྒྱུ་མཚན་ནི་སྔར་ནས་བྲིས་པ་བཞིན་ཆད་པ་ཕོག་རྒྱུ་ཡིན་པའི་མི་ཁ་ཅིག་ཁྱེད་ཚོའི་ཁྲོད་དུ་གསང་བའི་ངང་ནས་ཞུགས། ཁོ་ཚོ་ནི་དཀོན་མཆོག་ལ་མི་ཉན་པ་ཡིན་ཞིང༌། ང་ཚོའི་དཀོན་མཆོག་གི་ཐུགས་རྗེ་འདོད་ཆགས་ཀྱི་སྙད་འདོགས་སུ་སྒྱུར་མཁན་དང༌། ངེད་རྣམས་ཀྱི་བདག་པོ་གཅིག་པོ་དང་གཙོ་བོ་ཡེ་ཤུ་མཱ་ཤི་ཀ་ཁས་ལེན་མི་བྱེད་མཁན་ཡིན།
JUD 1:5 ཁྱེད་ཚོས་འདི་ཐམས་ཅད་ལེགས་པར་ཤེས་ཀྱང་ངས་འདི་དྲན་སྐུལ་བྱེད་པར་འདོད་དེ། སྔར་གཙོ་བོས་ཨེ་ཇེབ་ཡུལ་ནས་ཁོང་གི་འབངས་མི་བསྐྱབས། དེའི་རྗེས་སུ་ཁོང་གིས་དད་པ་མི་བྱེད་མཁན་རྣམས་མེད་པར་མཛད།
JUD 1:6 ཡང་དཀོན་མཆོག་གི་ཕོ་ཉ་ཁ་ཅིག་ནི་རང་གི་གོ་གནས་མི་སྲུང་བར་འོས་པའི་གནས་ལས་བྲལ་བས། ཁོང་གིས་ཁྲིམས་གཅོད་ཆེན་མོའི་ཉིན་གྱི་ཆེད་དུ་མི་འཇིག་པའི་ལྕགས་ཐག་གིས་བཅིངས་ནས་མུན་ནག་གི་ནང་ལ་བཞག་པར་མཛད།
JUD 1:7 དེ་བཞིན་དུ་སཱ་དོམ་དང་གྷོ་མོ་ར་དང་མཐའ་འཁོར་གྲོང་ཁྱེར་གྱི་མི་རྣམས་ཀྱིས་མི་དེ་ཚོ་ལྟར་ལོག་གཡེམ་དང་ཚུལ་མིན་གྱི་འདོད་ཆགས་བྱས་པས། མི་འཇིག་པའི་མེའི་ཆད་པ་ཕོག་པའི་སྒོ་ནས་དཔེ་ཞིག་ཏུ་གྱུར།
JUD 1:8 དེ་ལྟར་དཀོན་མཆོག་ལ་མི་ཉན་པ་དེ་ཚོས་རང་གི་རྨི་ལམ་ལ་བརྟེན་པའི་སྒོ་ནས་སྤྱོད་པ་ངན་པ་བྱས་པས་རང་ལུས་མི་གཙང་བར་བྱེད་ཅིང༌། དབང་ཆ་ཁས་མི་ལེན། གཟི་བརྗིད་དང་ལྡན་པ་རྣམས་ལ་སྐུར་བ་འདེབས།
JUD 1:9 འོན་ཀྱང་དཀོན་མཆོག་གི་ཕོ་ཉ་མཆོག་མི་ཀ་ཨེལ་གྱིས་ལུང་སྟོན་པ་མོ་ཤེའི་སྐུ་ཕུང་གི་ཕྱིར་བདུད་རྒྱལ་དང་རྩོད་གླེང་བྱེད་པའི་ཚེ། ཁོ་ལ་སྐུར་བ་འདེབས་པར་མ་ཕོད་དེ། གཙོ་བོས་ཁྱོད་ལ་བཀའ་བཀྱོན་མཛོད་ཅིག་ཅེས་གསུངས།
JUD 1:10 མི་དེ་ཚོས་གང་མི་ཤེས་པ་ལ་སྨད་ར་གཏོང་ཞིང༌། བློ་གྲོས་མེད་པའི་དུད་འགྲོ་དང་འདྲ་བར་རང་བཞིན་གྱི་འདོད་པ་ལྟར་སྤྱོད་པ་བྱེད་པའི་རྐྱེན་གྱིས་རང་ཉིད་འཕུང༌།
JUD 1:11 ཁོ་ཚོར་ཡ་རེ་ང༌། གང་ཡིན་ཟེར་ན། ཁོ་ཚོ་སྤུན་སྲོག་གཅོད་མཁན་ཀཱ་ཡིན་གྱི་རྗེས་སུ་འབྲངས་ཤིང༌། རྒྱུ་ནོར་འཐོབ་པའི་ཕྱིར་ཁོ་ཚོས་ལུང་སྟོན་པ་རྫུན་མ་པཱ་ལཱམ་གྱི་ནོར་འཁྲུལ་ལམ་ལ་འཛུལ་བ་དང༌། ངོ་ལོག་བྱེད་མཁན་ཀོ་རཱེ་ཡི་ཟིང་ཆའི་ཁྲོད་དུ་འཇིག་པར་གྱུར།
JUD 1:12 བག་ལེབ་བགོ་བཤའ་རྒྱག་པར་འཛོམས་པའི་ཚེ་མི་དེ་རྣམས་གཙོག་པའི་དྲི་མ་དང་འདྲ་བ་ཡིན་ཞིང༌། ངོ་ཚ་ཁྲེལ་མེད་ངང་ནས་ཁྱེད་ཚོ་དང་མཉམ་དུ་ཟ། ཁོ་ཚོ་ནི་འཛེམ་བག་མེད་པའི་ལུག་རྫི་ལྟར་རང་ཉིད་ཁོ་ན་རྒྱགས་པ་བྱེད། རླུང་གིས་འདེད་དེ་ཆར་པ་མེད་པའི་སྤྲིན་པ་དང༌། འབྲས་བུ་མེད་ཅིང་རྩ་བཀོག་བཏང་ནས་ཐེངས་གཉིས་ཤི་བའི་སྟོན་ཀའི་ཤིང་སྡོང་དང་འདྲ་བ་ཡིན།
JUD 1:13 ཁོ་ཚོ་ནི་རྒྱ་མཚོའི་རྦ་རླབས་འཁྲུགས་པ་ལྟར་ངོ་ཚའི་ལྦུ་བ་ཁོ་ན་སྐྱེ། འཁྱམ་པོ་འདྲ་བའི་སྐར་མ་སྨག་རུམ་ལ་རྟག་པར་གནས་དགོས།
JUD 1:14 ཨ་དམ་གྱི་མི་རབས་བདུན་པ་ཧེ་ནོག་གིས་ཁོ་ཚོའི་སྐོར་ལ་འདི་ལྟར་ལུང་བསྟན་གནང་སྟེ། ལྟོས་ཤིག གཙོ་བོ་དང་ཁོང་གི་དམ་པ་སྟོང་ཕྲག་མང་པོ་དང་བཅས་པར་འབྱོན་ཞིང༌།
JUD 1:15 ཁོང་གིས་མི་ཐམས་ཅད་ལ་ཁྲིམས་གཅོད་མཛད་ཅིང༌། དཀོན་མཆོག་ལ་མི་ཉན་པ་ཐམས་ཅད་ཀྱིས་བྱས་པའི་བྱ་བ་ཐམས་ཅད་དང༌། དཀོན་མཆོག་ལ་མི་ཉན་པའི་སྡིག་ཉེས་ཅན་རྣམས་ཀྱིས་ཁོང་ལ་ཞུ་བའི་རྒོལ་ཚིག་ཐམས་ཅད་ཀྱི་ཕྱིར་ཆད་པ་མཛད་པར་འགྱུར་ངེས་སོ་ཞེས་གསུངས།
JUD 1:16 མི་དེ་རྣམས་ནི་མ་རངས་པའི་གཏམ་བྱེད་མཁན་དང༌། སྐྱོན་འདོགས་བྱེད་མཁན་དང༌། རང་གི་འདོད་ཆགས་བཞིན་དུ་སྤྱོད་མཁན་དང༌། རང་བསྟོད་པ་ཡིན། རང་ལ་ཕན་པའི་ཕྱིར་མི་རྣམས་ལ་ངོ་བསྟོད་བྱེད།
JUD 1:17 གཅེས་པའི་སྤུན་ཟླ་རྣམས། ང་ཚོའི་གཙོ་བོ་ཡེ་ཤུ་མཱ་ཤི་ཀའི་སྐུ་ཚབ་རྣམས་ཀྱིས་སྔར་སྨྲས་པའི་བཀའ་རྣམས་དྲན་པར་གྱིས་ཤིག
JUD 1:18 ཁོང་ཚོས་དུས་མཐའ་མར་འཕྱ་སྨོད་བྱེད་མཁན་འབྱུང་ཡོང༌། མི་དེ་ཚོས་རང་གི་ཚུལ་མིན་གྱི་འདོད་ཆགས་བཞིན་སྤྱོད་པ་བྱེད་ཡོང་ཞེས་ཁྱེད་ཚོར་གསུངས།
JUD 1:19 ཁོ་ཚོས་མི་མཐུན་པའི་ཕྱོགས་ཁག་བཟོ་ཞིང༌། སྡིག་པའི་རང་གཤིས་ཀྱི་དབང་འོག་ཏུ་ཡོད་དེ་དམ་པའི་ཐུགས་ཉིད་དང་མི་ལྡན།
JUD 1:20 གཅེས་པའི་སྤུན་ཟླ་རྣམས། ཁྱེད་ཀྱི་དད་པ་ཤིན་ཏུ་དམ་པའི་ཐོག་ནས་རང་ཉིད་ཡར་རྒྱས་གཏོང་དགོས། དམ་པའི་ཐུགས་ཉིད་ཀྱི་སྒོ་ནས་སྨོན་ལམ་འདེབས་ཤིང༌།
JUD 1:21 དཀོན་མཆོག་གི་བྱམས་པ་ལ་གནས་ཏེ། ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེའི་སྒོ་ནས་ང་ཚོར་གནང་རྒྱུ་ཡིན་པའི་དཔག་ཏུ་མེད་པའི་ཚེ་ལ་རེ་སྒུག་བྱེད།
JUD 1:22 དད་སེམས་ལ་ཐེ་ཚོམ་སྐྱེ་མཁན་དེ་ཚོར་སྙིང་རྗེ་སྐྱེད་དགོས།
JUD 1:23 གཞན་རྣམས་མེའི་ཁྲོད་ནས་བཟུང་སྟེ་སྐྱོབ་ཞིང༌། ཁ་ཅིག་ལ་འཇིགས་པ་ཡིས་སྙིང་རྗེ་སྐྱེད་དགོས། འོན་ཏེ་ཁོ་ཚོའི་སྡིག་པའི་རང་གཤིས་ཀྱིས་གཙོག་པ་བྱེད་པའི་གོས་ལ་ཡང་ཐུག་པ་མི་བྱེད།
JUD 1:24 ད་ཁྱེད་ལམ་ནོར་བ་ལས་སྐྱོབ་ཐུབ་པ་དང༌། སྐྱོན་མེད་ཅིང་དགའ་དགའ་སྤྲོ་སྤྲོའི་ངང་ནས་ཁོང་ཉིད་ཀྱི་གཟི་བརྗིད་ཀྱི་སྤྱན་སྔར་གནས་ཐུབ་སྟེ།
JUD 1:25 ངེད་ཀྱི་སྐྱབས་མགོན་དཀོན་མཆོག་གཅིག་པོ་ཁོང་ལ་ང་ཚོའི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་གཟི་བརྗིད་དང༌། རྔམ་བརྗིད། མངའ་ཐང༌། དབང་བཅས་དུས་རབས་ཐམས་ཅད་ཀྱི་སྔོན་དང༌། ད་ལྟ། རྒྱུན་ནས་རྒྱུན་དུ་ལྡན་པར་གྱུར་ཅིག ཨ་མེན། །
REV 1:1 ཡེ་ཤུ་མཱ་ཤི་ཀ་ཡིས་རང་གི་ཞབས་ཕྱི་རྣམས་ལ་རིང་པོར་མ་ལོན་པར་གང་འབྱུང་དགོས་པ་དེ་སྟོན་པའི་ཕྱིར། དཀོན་མཆོག་གིས་ཡེ་ཤུ་ལ་མངོན་པར་མཛད་པ་འདི་གནང༌། ཡེ་ཤུས་རང་ཉིད་ཀྱི་ཕོ་ཉ་བརྒྱུད་ཁོང་གི་ཞབས་ཕྱི་ཡོ་ཧ་ནན་གྱི་རྩར་བཏང་གནང་བའི་སྒོ་ནས་མངོན་པར་མཛད།
REV 1:2 ཡོ་ཧ་ནན་གྱིས་དཀོན་མཆོག་གི་བཀའ་དང་ཡེ་ཤུ་མཱ་ཤི་ཀས་དཔང་པོ་མཛད་པ། རང་གིས་གང་མཐོང་བ་ཐམས་ཅད་ལ་བདེན་དཔང་བྱས།
REV 1:3 དུས་འདི་སླེབས་ལ་ཉེ་བས། ལུང་བསྟན་འདི་ཀློག་པ་དང་ཐོས་ཏེ། དེའི་ནང་ལ་གང་བྲིས་པ་བཞིན་སྲུང་མཁན་རྣམས་བདེ་བ་ཡིན་ནོ། །
REV 1:4 ང་ཡོ་ཧ་ནན་གྱིས་ཨེ་ཞེ་ཡཱ་ཞིང་ཆེན་ལ་ཡོད་པའི་ཆོས་ཚོགས་བདུན་པོ་ལ་འཕྲིན་ཡིག་འདི་ཕུལ་ལོ། ད་ལྟ་བཞུགས་པ་དང༌། སྔར་ཡོད་པ་དང༌། རྗེས་སུ་འབྱོན་པར་འགྱུར་བ་ཁོང་དང༌། ཁོང་གི་བཞུགས་ཁྲིའི་དྲུང་དུ་ཡོད་པའི་ཐུགས་ཉིད་བདུན་པོ་དང༌།
REV 1:5 བདེན་དཔང་མཛད་མཁན། གཤིན་པོ་རྣམས་ཀྱི་སྔོན་དུ་འཁྲུང་པ། འཇིག་རྟེན་རྒྱལ་པོ་རྣམས་ཀྱི་དབང་སྒྱུར་མཁན་སྟེ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ཚོ་ལ་འཐོབ་པར་གྱུར་ཅིག ངེད་རྣམས་ལ་བྱམས་ཤིང༌། ཉིད་ཀྱི་སྐུ་ཁྲག་གིས་ང་ཚོ་སྡིག་ཉེས་ལས་བསྒྲལ་ཏེ།
REV 1:6 ང་ཚོ་ཁོང་གི་ཡབ་དཀོན་མཆོག་ལ་ཞབས་ཏོག་སྒྲུབ་པའི་མཆོད་དཔོན་གྱི་རྒྱལ་འབངས་སུ་མཛད་མཁན་ཁོང་དུས་རྒྱུན་དུ་གཟི་བརྗིད་མངའ་ཐང་དང་ལྡན་པར་གྱུར་ཅིག ཨ་མེན།
REV 1:7 ལྟོས་ཤིག སྤྲིན་དང་བཅས་ཏེ་ཁོང་ཉིད་མཁའ་ལས་འབྱོན། ། ཁོང་ལ་མདུང་བཙུགས་མི་ངན་དག་དང་ནི། ། སྐྱེ་འགྲོ་ཀུན་གྱིས་དེ་ལྟར་མཐོང་བར་འགྱུར། ། རིགས་ཀུན་ཁོང་གི་དོན་དུ་སྨྲེ་སྔགས་འདོན། ། གཏམ་འདི་བདེན་ནོ། ཨ་མེན།
REV 1:8 གཙོ་བོ་དཀོན་མཆོག་གིས་“ང་ནི་ཨལ་ཕཱ་དང་ཨོ་མེ་གཱ་སྟེ་ཐོག་མ་དང་མཐའ་མ་ཡིན་ལ། ད་ལྟ་བཞུགས་པ་དང༌། སྔར་ཡོད་པ་དང༌། རྗེས་སུ་འབྱོན་པར་འགྱུར་བའི་དབང་ཀུན་དང་ལྡན་པ་དེའོ་”ཞེས་གསུངས་སོ། །
REV 1:9 ཡེ་ཤུའི་ཐོག་ནས་སྡུག་བསྔལ་དང༌། རྒྱལ་སྲིད་དང༌། བཟོད་པའི་ནང་ལ་ཁྱེད་ཚོ་དང་མཉམ་དུ་འགྲོགས་པའི་སྤུན་ཟླ་ཡོ་ཧ་ནན་ང་ནི། དཀོན་མཆོག་གི་བཀའ་དང་ཡེ་ཤུ་ལ་དཔང་པོ་བྱེད་པའི་རྐྱེན་གྱིས་པད་མོ་ཞེས་ཟེར་བའི་གླིང་ཕྲན་ལ་ཡོད་པ་ཡིན།
REV 1:10 གཙོ་བོའི་ཉིན་མོར་ང་དཀོན་མཆོག་གི་དམ་པའི་ཐུགས་ཉིད་ཀྱི་དབང་འོག་ཏུ་ངའི་རྒྱབ་ལ་དུང་ཆེན་གྱི་སྒྲ་དང་འདྲ་བའི་གསུང་སྐད་ཆེན་པོ་ཞིག་ཐོས།
REV 1:11 དེས་“ཁྱོད་ཀྱིས་གང་མཐོང་བ་དེ་དེབ་ལ་བྲིས་ནས་གྲོང་ཁྱེར་ཨེ་ཕེ་སུ་དང༌། སི་མིར་ནཱ། པེར་ག་མོ། ཐི་ཡ་ཏི་རཱ། སར་དཱི། ཕི་ལ་དེལ་ཕི་ཡཱ། ལའོ་ཌི་ཀེ་ཡཱ་བཅས་ཀྱི་ཆོས་ཚོགས་བདུན་པོ་ལ་སྐུར་ཅིག་”ཅེས་གསུངས།
REV 1:12 ང་ལ་བཀའ་མོལ་གསུང་མཁན་གྱི་ཕྱོགས་སུ་ཕྱིར་བསྐོར་ཏེ། ངས་གསེར་གྱི་སྟེགས་བུ་བདུན་དང༌།
REV 1:13 དེ་ཚོའི་དཀྱིལ་ལ་མིའི་གཟུགས་དང་ལྡན་པ་སྟེ། ཞབས་ལ་ཐུག་པའི་ན་བཟའ་དང༌། སྐུ་བྲང་ལ་གསེར་གྱི་སྐུ་རས་བཞེས་པ་ཞིག་མཐོང༌།
REV 1:14 ཁོང་གི་དབུ་དང་དབུ་སྐྲ་ནི་བལ་དཀར་པོའམ་གངས་ལྟར་དཀར་བ་དང༌། སྤྱན་ནི་མེ་ལྕེ་དང་འདྲ་བ་ཡིན།
REV 1:15 ཁོང་གི་ཞབས་ནི་མེ་ཐབ་ནང་ལྷད་བཏོན་བཞིན་པའི་ལི་དང་འདྲ་བ་ཡིན་པ་དང༌། ཁོང་གི་གསུང་སྐད་ནི་རྦབ་ཆུ་ཆེན་པོ་ཞིག་གི་འུར་སྒྲ་དང་འདྲ་བ་ཡིན།
REV 1:16 ཁོང་གི་ཕྱག་གཡས་སུ་སྐར་མ་བདུན་ཡོད་དེ། ཁོང་གི་ཞལ་ནས་རལ་གྲི་ཁ་གཉིས་མ་རྣོ་པོ་ཞིག་ཐོན་པ་དང༌། ཞལ་གདོང་ནི་ཉི་མའི་གཟི་བརྗིད་ཆེན་པོ་ཞིག་དང་འདྲ་བ་ཡིན།
REV 1:17 ཁོང་མཇལ་ནས་ང་གཤིན་པོ་ཞིག་དང་འདྲ་བར་ཁོང་གི་ཞབས་དྲུང་དུ་འགྱེལ། ཁོང་གིས་ཕྱག་གཡས་པ་ངའི་ལུས་ལ་བཞག་ནས་“མ་འཇིགས་ཤིག ང་ནི་ཐོག་མ་དང་མཐའ་མ་ཡིན་པ་དང༌།
REV 1:18 གསོན་པོ་དེ་ཡིན། སྔར་ང་ཤི་ཡང༌། ལྟོས་ཤིག ད་ང་རྟག་ཏུ་གསོན་པོར་གནས། འཆི་བ་དང་གཤིན་ཁམས་ཀྱི་ལྡེ་མིག་ང་ལ་ཡོད།
REV 1:19 དེའི་ཕྱིར་ཁྱོད་ཀྱིས་གང་མཐོང་བ་དང༌། ད་ལྟ་ཡོད་པ་དང༌། རྗེས་སུ་འབྱུང་བ་རྣམས་ཡི་གེར་བྲིས་ཤིག
REV 1:20 ཁྱོད་ཀྱིས་ངའི་ལག་གཡས་སུ་མཐོང་བའི་སྐར་མ་བདུན་པོའི་གསང་བ་དང༌། གསེར་གྱི་སྟེགས་བུ་བདུན་ནི་དོན་འདི་ལྟར་ཏེ། སྐར་མ་བདུན་པོ་ནི་ཆོས་ཚོགས་བདུན་གྱི་ཕོ་ཉ་ཡིན་ཞིང༌། སྟེགས་བུ་བདུན་པོ་ནི་ཆོས་ཚོགས་བདུན་པོ་ཡིན་ནོ། །”
REV 2:1 “ཨེ་ཕེ་སུ་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག ཁོང་གི་ཕྱག་གཡས་སུ་སྐར་མ་བདུན་པོ་འཛིན་པ་སྟེ་གསེར་གྱི་སྟེགས་བུ་བདུན་པོའི་དཀྱིལ་ལ་ཞབས་འཆག་མཛད་མཁན་གྱིས་
REV 2:2 ངས་ཁྱོད་ཀྱི་བྱ་བ་དང༌། དཀའ་ལས་དང༌། བཟོད་སེམས་ཤེས། ཁྱོད་ཀྱིས་ངན་པ་རྣམས་དང་ལེན་མི་བྱེད་ཅིང༌། སྐུ་ཚབ་མ་ཡིན་པར་ཡིན་ཞེས་ཟེར་མཁན་རྣམས་ལ་ཉམས་ཚོད་བླངས་ནས་ཁོ་ཚོ་རྫུན་ཡིན་པར་རྟོགས།
REV 2:3 ངའི་མིང་གི་དོན་ལ་བཟོད་པ་སྒོམ་ནས་སྡུག་བསྔལ་མྱོང་བ་དང་ཡིད་ཐང་མ་ཆད་པའང་ཤེས།
REV 2:4 འོན་ཀྱང་ཁྱོད་ཀྱིས་ཐོག་མར་ཡོད་པའི་བྱམས་སེམས་དོར་བ་དེར་སྐྱོན་བརྗོད་བྱེད།
REV 2:5 དེའི་ཕྱིར་ཁྱོད་གང་ལས་ལྷུངས་པ་དྲན་ནས་སྤྱོད་པ་ངན་པ་རྣམས་སྤངས་ཏེ་སེམས་བསྒྱུར་ཞིང༌། ཁྱོད་ཀྱིས་ཐོག་མར་བྱ་བའི་ལས་བྱོས་ཤིག དེ་ལྟར་མ་བྱས་ན་ང་ཁྱོད་ཀྱི་རྩར་ཡོང་ནས་ཁྱོད་ཀྱི་སྟེགས་བུ་རང་གི་གནས་ལས་ཕར་འཁྱེར་བར་བྱ།
REV 2:6 འོན་ཀྱང་ཁྱོད་ཚོར་ལེགས་ཆ་འདི་ཡོད་དེ། ངས་ནི་ཀོ་ལཱ་པ་རྣམས་ཀྱི་ལས་ལ་སྡང་བ་ལྟར་ཁྱོད་ཀྱིས་ཀྱང་སྡང༌།
REV 2:7 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག སུ་རྒྱལ་བ་དེ་ལ་ངས་དཀོན་མཆོག་གི་ལྡུམ་རའི་ནང་གི་སྲོག་དང་ལྡན་པའི་ཤིང་གི་འབྲས་བུ་ཟ་བའི་དབང་ཆ་གནང་བར་བྱ་”ཞེས་གསུངས་སོ། །
REV 2:8 “ཡང་སི་མིར་ནཱ་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག ཐོག་མ་དང་མཐའ་མ་ཡིན་ཏེ། གྲོངས་ནས་སླར་གསོན་པོར་གྱུར་བ་ཁོང་གིས་
REV 2:9 ཁྱོད་ཀྱི་སྡུག་བསྔལ་དང་དབུལ་ཕོངས་ངས་ཤེས། (དོན་དམ་དུ་ཁྱོད་ཚོ་བདེའོ་) ཡ་ཧུ་དཱ་པ་མིན་ཡང་ཡིན་ཟེར་བའི་བདུད་སཱ་ཏན་གྱི་ཚོགས་པ་ཡིན་པ་རྣམས་ཀྱིས་ཁྱོད་ལ་སྨད་པའང་ངས་ཤེས།
REV 2:10 ཁྱོད་སྡུག་བསྔལ་གང་མྱོང་རྒྱུ་ཡིན་པ་ལ་མ་འཇིགས་ཤིག ཉོན་དང༌། ཁྱོད་ཚོར་ཉམས་ཚོད་ལེན་པའི་ཕྱིར་བདུད་ཀྱིས་ཁྱོད་ཚོའི་ནང་ནས་ཁ་ཤས་བཙོན་དུ་འཇུག་པ་དང༌། ཉིན་བཅུའི་བར་དུ་ཁྱོད་ཚོར་སྡུག་བསྔལ་འབྱུང་བར་འགྱུར། མ་འཆི་བར་དུ་དད་པ་མ་ཉམས་པར་བརྟན་པོར་གནས་ན་ངས་ཁྱོད་ལ་ཚེའི་ཅོད་པན་སྟེར་བར་བྱ།
REV 2:11 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག སུ་རྒྱལ་བ་དེ་ལ་འཆི་བ་གཉིས་པ་ཡིས་གནོད་འཚེ་གཏོང་བར་མི་འགྱུར་”ཞེས་གསུངས་སོ། །
REV 2:12 “ཡང་པེར་ག་མོ་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག རལ་གྲི་ཁ་གཉིས་མ་རྣོ་པོ་ཡོད་མཁན་གྱིས་
REV 2:13 ཁྱོད་བདུད་སཱ་ཏན་གྱི་ཁྲི་ཡོད་སར་སྡོད་པ་དེ་ངས་ཤེས། སཱ་ཏན་གྱི་སྡོད་སར་ཁྱོད་ཚོའི་གྲོང་ཁྱེར་དུ་ངའི་བློ་གཏད་ཆོག་པའི་དཔང་པོ་ཨན་ཏི་པཱ་གསོད་སྐབས་སུའང་ང་ལ་དད་པ་མ་སྤོང་བར་ཁྱོད་ཀྱིས་ངའི་མིང་ལ་རྟེན།
REV 2:14 འོན་ཀྱང་སྐྱོན་ཁ་ཤས་ངས་ཁྱོད་ལ་བརྗོད་དེ། ཁྱོད་ཚོའི་ནང་ནས་པཱ་ལཱམ་ཟེར་བའི་བསྟན་པ་འཛིན་མཁན་གྱི་མི་ཁ་ཤས་ཡོད། པཱ་ལཱམ་གྱིས་ཡི་སི་ར་ཨེལ་པ་རྣམས་ལ་ལྷ་སྐུ་ལ་ཕུལ་བའི་མཆོད་རྫས་ཟ་བ་དང༌། ལོག་གཡེམ་གྱི་བསླུ་བྲིད་བྱེད་པ་པཱ་ལག་ལ་བསླབས།
REV 2:15 འདི་ལྟར་ནི་ཀོ་ལཱ་པ་རྣམས་ཀྱི་བསྟན་པ་འཛིན་མཁན་གྱི་མི་ཁ་ཤས་ཁྱོད་ཚོའི་ནང་དུ་ཡོད་པས།
REV 2:16 སྤྱོད་པ་ངན་པ་སྤངས་ནས་སེམས་སྒྱུར་ཅིག དེ་མིན་ང་ཁྱོད་ཀྱི་རྩར་མགྱོགས་པོ་ཡོང་ཞིང༌། ངའི་ཁ་ཡི་རལ་གྲི་ཡིས་ཁོ་ཚོར་འཐབ་པར་བྱ།
REV 2:17 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག སུ་རྒྱལ་བ་དེ་ལ་ངས་སྦས་པའི་མན་ནཱ་ཟེར་བའི་ཟས་དང༌། རྡོ་དཀར་པོ་ཞིག་སྟེར་བར་བྱ། རྡོ་དཀར་པོ་དེ་འཐོབ་མཁན་མ་གཏོགས་པར་གཞན་སུས་ཀྱང་མི་ཤེས་པའི་མིང་གསར་པ་ཞིག་འབྲིའོ་”ཞེས་གསུངས་སོ། །
REV 2:18 “ཐི་ཡ་ཏི་རཱ་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག སྤྱན་ནི་མེ་ལྕེ་དང་འདྲ་བ་དང༌། ཞབས་ནི་ཕུར་ནས་འོད་ཐོན་པའི་ལི་དང་འདྲ་བ་ཡིན་པའི་དཀོན་མཆོག་གི་སྲས་ཀྱིས་
REV 2:19 ཁྱོད་ཀྱི་བྱ་བ་སྟེ། བྱམས་སེམས་དང༌། དད་པ། ཞབས་ཏོག བཟོད་སེམས། མཐའ་མའི་བྱ་བ་རྣམས་ནི་སྔོན་མ་རྣམས་ལས་ཆེ་བ་ཡིན་པར་ངས་ཤེས།
REV 2:20 འོན་ཀྱང་སྐྱོན་འདི་ངས་ཁྱོད་ལ་བརྗོད་དེ། ཁྱོད་ཀྱིས་ལུང་སྟོན་མཁན་ཞིག་ཡིན་ཞེས་ཟེར་བའི་བུད་མེད་ཡེ་ཟེ་བེལ་དང་ལེན་བྱེད། ཁོ་མོས་བསྟན་པར་ངའི་ཞབས་ཕྱི་རྣམས་ལོག་གཡེམ་དང༌། ལྷ་སྐུ་ལ་ཕུལ་བའི་མཆོད་རྫས་ཟ་བར་བསླུ་བྲིད་བྱེད།
REV 2:21 ཁོ་མོ་ལ་སྤྱོད་པ་ངན་པ་སྤངས་ནས་སེམས་བསྒྱུར་བའི་གོ་སྐབས་སྤྲད་ཀྱང༌། རང་གི་ལོག་གཡེམ་སྤོང་བར་མི་འདོད།
REV 2:22 ལྟོས་ཤིག ངས་ཁོ་མོ་ལ་ནད་འདེབས་པར་བྱ། ཁོ་ཚོས་ཁོ་མོའི་བྱ་བ་སྤངས་ནས་སེམས་མ་བསྒྱུར་ན། ངས་ཁོ་མོ་དང་ལོག་གཡེམ་བྱེད་མཁན་རྣམས་ལ་སྡུག་བསྔལ་ཆེན་པོ་གཏོང་བར་འགྱུར།
REV 2:23 ཡང་ངས་ཁོ་མོའི་ཕྲུ་གུ་རྣམས་གསོད་པར་བྱ། དེ་ནས་ཆོས་ཚོགས་ཐམས་ཅད་ཀྱིས་ང་ནི་བློ་སེམས་ལ་གཟིགས་མཁན་ཡིན་པ་ཤེས་པར་འགྱུར་ལ། ཁྱོད་ཚོའི་ནང་ནས་རེ་རེ་ལ་རང་གི་བྱ་བ་བཞིན་དུ་ལན་འདེབས་པར་བྱ།
REV 2:24 འོན་ཏེ་བསྟན་པ་དེ་མི་འཛིན་པར། སཱ་ཏན་གྱི་གཏིང་ཟབ་ཀྱི་དོན་ཞེས་གྲགས་པའི་བསྟན་པ་སློབ་མ་མྱོང་བ་ཐི་ཡ་ཏི་རཱ་པ་ལྷག་མ་ཁྱོད་ཚོར་ངས་ཁུར་པོ་གཞན་ཞིག་མི་འགེལ་ཏེ།
REV 2:25 ཁྱོད་ལ་ཡོད་པ་དེ་ང་མ་སླེབས་པའི་བར་དུ་བརྟན་པོར་ཟུངས་ཤིག
REV 2:26 སུ་རྒྱལ་ཞིང་ངའི་འཕྲིན་ལས་མཐའ་མའི་བར་དུ་བྱེད་མཁན་ལ། ང་ཡིས་ཁོང་ལ་རྒྱལ་སྐྱོང་དབང་ཆ་སྦྱིན། །
REV 2:27 ཁོང་གིས་ལྕགས་རྒྱུག་སྤྱད་ནས་ཁོ་ཚོ་སྐྱོང༌། ། རྫ་ཡི་ཁོག་མ་བཞིན་དུ་ཞིབ་མོར་བཅོམ། ། དེ་ལྟར་ངའང་ངའི་ཡབ་ནས་དབང་ཆ་ཐོབ།
REV 2:28 ཡང་ངས་ཁོ་ལ་ཐོ་རེངས་ཀྱི་སྐར་མ་སྟེར་བར་བྱ།
REV 2:29 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག་”ཅེས་གསུངས་སོ། །
REV 3:1 “སར་དཱི་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག དཀོན་མཆོག་གི་ཐུགས་ཉིད་བདུན་པོ་དང༌། སྐར་མ་བདུན་པོ་ཡོད་པ་དེས། ངས་ཁྱོད་ཀྱི་བྱ་བ་ཤེས་ཏེ། གསོན་པོའི་སྙན་གྲགས་ཡོད་ཀྱང་དོན་དམ་དུ་ཤི་བ་ཡིན།
REV 3:2 ངའི་དཀོན་མཆོག་གི་སྤྱན་སྔར་ཁྱོད་ཀྱི་བྱ་བ་མི་ཚང་བ་ཡིན་པར་རྩི་བས། གཉིད་ལས་སོད་ཅིང༌། རྫོགས་ལ་ཉེ་བའི་ལྷག་མ་དེ་བརྟན་པོ་བྱོས།
REV 3:3 དེའི་ཕྱིར་གང་ཐོབ་པ་དང་ཐོས་པ་དེ་དྲན་ཞིང་སྲུངས་ཏེ་སྤྱོད་པ་ངན་པ་རྣམས་སྤངས་ནས་སེམས་སྒྱུར་ཞིག གཉིད་མི་བསད་ན་ང་དུས་ངེས་མེད་ཀྱི་རྐུན་མ་ལྟར་ཡོང་སྟེ། ཁྱོད་ཀྱིས་ང་ཡོང་བའི་དུས་ཚོད་མི་ཤེས།
REV 3:4 འོན་ཀྱང་སར་དཱི་ལ་རང་གི་གོས་མི་གཙང་བར་མ་བྱས་པའི་མི་ཁ་ཤས་ཡོད། ཁོ་རྣམས་འོས་པ་ཡིན་པས་གོས་དཀར་པོ་གྱོན་ཏེ་ང་དང་མཉམ་དུ་འགྲུལ་བར་འགྱུར།
REV 3:5 སུ་རྒྱལ་བ་དེ་ཁོ་ཚོ་དང་འདྲ་བར་གོས་དཀར་པོ་གྱོན་པར་འགྱུར། ཁོའི་མིང་ནི་དཔག་ཏུ་མེད་པའི་ཚེའི་མདོ་ལས་ངས་མི་སུབ་ལ། ངའི་ཡབ་དང་ཁོང་གི་ཕོ་ཉ་རྣམས་ཀྱི་མདུན་དུ་ངས་མི་དེ་ཁས་ལེན་བྱེད་པར་འགྱུར།
REV 3:6 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག་”ཅེས་གསུངས་སོ། །
REV 3:7 “ཕི་ལ་དེལ་ཕི་ཡཱ་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག དམ་པ་དང་ནི་བདེན་པ་སྟེ། ། དཱ་བིད་ལྡེ་མིག་ཡོད་པ་གང༌། ། ཕྱེས་པ་སུས་ཀྱང་རྒྱག་མི་ཐུབ། ། བརྒྱབ་ན་སུས་ཀྱང་ཕྱེ་མི་ཐུབ། ། དེས་འདི་ལྟར་གསུངས་ཏེ།
REV 3:8 ངས་ཁྱོད་ཀྱི་བྱ་བ་ཤེས། ལྟོས་ཤིག ངས་སུས་ཀྱང་རྒྱག་མི་ཐུབ་པའི་སྒོ་ཕྱེས་པ་ཞིག་ཁྱོད་ཀྱི་དྲུང་དུ་བཞག ཁྱོད་སྟོབས་ཅུང་ཟད་ཆུང་བ་ཡིན་ཡང༌། ཁྱོད་ཀྱིས་ངའི་བཀའ་བསྲུངས་པ་དང་ངའི་མིང་མ་སྤངས་པ་ངས་ཤེས།
REV 3:9 ཉོན་ཞིག ངས་ཡ་ཧུ་དཱ་པ་མིན་ཡང་ཡིན་ཟེར་བའི་བདུད་སཱ་ཏན་གྱི་ཚོགས་ཡིན་པའི་རྫུན་བཤད་པ་རྣམས་ཡོང་ནས་ཁྱོད་ཀྱི་རྐང་པའི་དྲུང་དུ་ཕྱག་འཚལ་དུ་འཇུག་པར་བྱ། ཁོ་ཚོ་ངས་ཁྱོད་ལ་བྱམས་པ་བྱས་པ་ངོ་ཤེས་མཁན་དུ་འགྱུར་ངེས་ཡིན།
REV 3:10 ཁྱོད་ཀྱིས་ངའི་བཟོད་པ་བྱེད་དགོས་པའི་བཀའ་བསྲུངས་པས། ས་ལ་ཡོད་པ་རྣམས་ལ་ཉམས་ཚོད་ལེན་པའི་ཕྱིར་འཇིག་རྟེན་ལ་ཡོངས་སུ་འབབ་རྒྱུའི་ཉམས་ཚོད་ཀྱི་དུས་ལས་ཁྱོད་སྲུང་བར་བྱ།
REV 3:11 ང་མགྱོགས་པོ་ཡོང་བས། སུས་ཀྱང་ཁྱོད་ཀྱི་ཅོད་པན་མི་འཕྲོག་པའི་ཕྱིར་ཁྱོད་ལ་གང་ཡོད་པ་དེ་བརྟན་པོར་ཟུངས་ཤིག
REV 3:12 ངས་སུ་རྒྱལ་བ་དེ་ངའི་དཀོན་མཆོག་གི་མཆོད་ཁང་ནང་གི་ཀ་བ་ཞིག་ཏུ་བྱ་ཞིང༌། ཁོ་དེར་རྒྱུན་དུ་གནས་པར་འགྱུར། དེའི་སྟེང་དུ་ངའི་དཀོན་མཆོག་གི་མཚན་དང༌། ངའི་མིང་གསར་པ་དང༌། ངའི་དཀོན་མཆོག་གི་གྲོང་ཁྱེར་གྱི་མིང་སྟེ་ཡེ་རུ་ཤ་ལེམ་གསར་པ་ཞེས་ངས་འབྲི་བར་བྱ། གྲོང་ཁྱེར་དེ་ནི་དཀོན་མཆོག་གི་ཞིང་ཁམས་ནས་འབབ་པར་འགྱུར།
REV 3:13 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག་”ཅེས་གསུངས་སོ། །
REV 3:14 “ལའོ་ཌི་ཀེ་ཡཱ་གྲོང་ཁྱེར་གྱི་ཆོས་ཚོགས་ཀྱི་ཕོ་ཉ་ལ་འདི་ལྟར་བྲིས་ཤིག ཨ་མེན་ཞེས་ཟེར་བ། བློ་གཏད་ཆོག་པ་དང་བདེན་དཔང་མཛད་མཁན་ཏེ་དཀོན་མཆོག་གིས་བཀོད་པ་རྣམས་ལ་དབང་སྒྱུར་མཁན་དེས་
REV 3:15 ངས་ཁྱོད་ཀྱི་བྱ་བ་ཤེས་ཏེ། ཁྱོད་ནི་ཚ་པོ་མིན་ཞིང་གྲང་མོའང་མིན། ངའི་རེ་བ་ལ་ཁྱོད་ཚ་པོ་དང༌། ཡང་ན་གྲང་མོ་ཡིན།
REV 3:16 ཁྱོད་འདྲོད་འཇམ་ཡིན་ཏེ་ཚ་བ་ཡང་ན་གྲང་མོ་ཡང་མིན་པས་ཁྱོད་ངའི་ཁ་ནས་འདོར་བར་བྱ།
REV 3:17 ཁྱོད་ཀྱིས་ང་ཕྱུག་པོ་ཡིན། རྒྱུ་ནོར་དང་ལྡན་ཏེ་ཅིའང་མི་དགོས་ཞེས་ཟེར་ཡང༌། ཁྱོད་ཀྱིས་ཁྱོད་ཉིད་ཉམ་ཐག་པ་དང༌། སྡུག་ཕོག་པ་དང༌། དབུལ་པོ་དང༌། ལོང་བ་དང༌། གཅེར་བུ་ཡིན་པར་མི་ཤེས་པའི་རྐྱེན་གྱིས།
REV 3:18 ཁྱོད་བདེན་པ་ཕྱུག་པོར་འགྱུར་བའི་ཕྱིར་མེ་ཡིས་ལྷད་བཏོན་པའི་གསེར་དང༌། ཁྱོད་གཅེར་བུའི་ངོ་ཚ་མི་ཡོང་བའི་ཕྱིར་གོས་དཀར་པོ་དང༌། མིག་གིས་མཐོང་བའི་ཕྱིར་མིག་ལ་འབྱུག་པའི་སྨན་ང་ལས་ཉོ་བར་ཁ་ཏ་བྱེད།
REV 3:19 ངས་བྱམས་པ་རྣམས་ལ་བཀྱོན་ཞིང་སྒྲིག་ལམ་བཅུན་པས། བརྩོན་སེམས་ཡོད་པར་སྒྱུར་ལ། སྤྱོད་པ་ངན་པ་སྤངས་ནས་སེམས་སྒྱུར་ཅིག
REV 3:20 ཉོན་དང༌། ང་སྒོ་འགྲམ་དུ་འོང་ནས་སྒོ་རྡུང་བཞིན་ཡོད། སུ་ཞིག་གིས་ངའི་སྐད་སྒྲ་ཐོས་ནས་སྒོ་མོ་ཕྱེ་ན། ང་དེའི་ནང་དུ་འཛུལ་ནས་ངེད་གཉིས་ལྷན་དུ་ཟས་རིགས་ལ་ལོངས་སྤྱོད་པར་བྱེད།
REV 3:21 ང་རང་རྒྱལ་བར་གྱུར་ནས་ངའི་ཡབ་དང་མཉམ་དུ་ཁོང་གི་བཞུགས་ཁྲིའི་སྟེང་བསྡད་པ་ལྟར། སུ་རྒྱལ་བ་དེ་ང་དང་མཉམ་དུ་ངའི་ཁྲི་སྟེང་དུ་སྡོད་པའི་དབང་ཆ་སྟེར།
REV 3:22 རྣ་བ་ཡོད་པ་དེས་དམ་པའི་ཐུགས་ཉིད་ཀྱིས་ཆོས་ཚོགས་ལ་གསུངས་པ་དེ་ཉོན་ཞིག་”ཅེས་གསུངས་སོ། །
REV 4:1 དེ་ནས་ངས་བལྟས་ཏེ་དཀོན་མཆོག་གི་ཞིང་ཁམས་སུ་སྒོ་ཕྱེས་པ་ཞིག་འདུག སྔར་གྱི་དུང་ཆེན་དང་འདྲ་བའི་གསུང་སྐད་དེས་ང་ལ་“ཡར་ཤོག་ལ། དོན་འདི་རྣམས་ཀྱི་རྗེས་སུ་གང་འབྱུང་དགོས་པ་རྣམས་ཁྱོད་ལ་སྟོན་པར་བྱ་”ཞེས་གསུངས་མ་ཐག
REV 4:2 ང་དཀོན་མཆོག་གི་དམ་པའི་ཐུགས་ཉིད་ཀྱི་དབང་འོག་ཏུ་ཡོད་པ་དང༌། དཀོན་མཆོག་གི་ཞིང་ཁམས་སུ་བཞུགས་ཁྲི་ཞིག་ཡོད་ཅིང༌། དེ་ལ་བཞུགས་པ་ཞིག་འདུག
REV 4:3 ཁོང་གི་སྐུའི་རྣམ་པ་ནི་འོད་འཕྲོ་བའི་ནོར་བུ་སྣ་ཚོགས་དང་འདྲ་བ་ཡིན། ཁོང་གི་བཞུགས་ཁྲིའི་མཐའ་འཁོར་ལ་མར་གད་དང་འདྲ་བའི་འཇའ་ཞིག་འདུག
REV 4:4 ཡང་བཞུགས་ཁྲི་དེའི་མཐའ་འཁོར་ལ་བཞུགས་ཁྲི་ཉི་ཤུ་རྩ་བཞི་ཡོད་པ་དང༌། ཁྲི་དེ་རྣམས་ལ་ན་བཟའ་དཀར་པོ་དང༌། དབུ་ལ་གསེར་གྱི་ཅོད་པན་གྱོན་པའི་རྒན་པོ་ཉི་ཤུ་རྩ་བཞི་བཞུགས།
REV 4:5 བཞུགས་ཁྲི་ནས་གློག་འཁྱུག་པ་དང༌། སྒྲ་སྣ་ཚོགས་དང༌། འབྲུག་སྒྲ་འཐོན། བཞུགས་ཁྲིའི་དྲུང་དུ་དཔལ་འབར་མེ་འབར་བ་བདུན་ཡོད། དེ་ཚོ་ནི་དཀོན་མཆོག་གི་ཐུགས་ཉིད་བདུན་པོ་ཡིན་ནོ།
REV 4:6 ཡང་བཞུགས་ཁྲིའི་མདུན་དུ་ཤེལ་གྱི་རྒྱ་མཚོ་ནི་དྭངས་ཤེལ་དང་འདྲ་བ་ཞིག་ཡོད་ཅིང༌། བཞུགས་ཁྲིའི་མཐའ་འཁོར་ལ་ཕྱོགས་བཞིར་རྒྱབ་མདུན་ཐམས་ཅད་མིག་གིས་གང་བའི་སེམས་ཅན་བཞི་ཡོད་དེ།
REV 4:7 དང་པོ་ནི་སེང་གེ་དང་འདྲ་བ། གཉིས་པ་དེ་བ་གླང་དང་འདྲ་བ། གསུམ་པ་དེ་མིའི་ངོ་དང་ལྡན་པ། བཞི་པ་དེ་བྱ་གླག་འཕུར་བ་དང་འདྲ་བ་ཡིན།
REV 4:8 སེམས་ཅན་བཞི་པོ་རེ་རེ་ལ་གཤོག་པ་དྲུག་ལྡན་ལ་ཕྱི་ནང་གཉིས་པོ་མིག་གིས་གང་བའི་སེམས་ཅན་གྱིས་ཉིན་མཚན་མེད་པར། དམ་པ་དམ་པ་དམ་པ། ། གཙོ་བོ་དཀོན་མཆོག་དབང་ཀུན། ། འདས་དང་ད་ལྟ་མ་འོངས། ། དུས་གསུམ་ཀུན་ཏུ་གནས་སོ། ། ཞེས་གསུང་བཞིན་འདུག
REV 4:9 སེམས་ཅན་དེ་ཚོས་བཞུགས་ཁྲི་ལ་བཞུགས་མཁན་རྟག་ཏུ་གནས་པ་ལ་གཟི་བརྗིད་དང༌། བཀུར་སྟི་དང༌། ཐུགས་རྗེ་ཆེ་ཞུ་བའི་སྐབས་སུ།
REV 4:10 རྒན་པོ་ཉི་ཤུ་རྩ་བཞི་པོས་བཞུགས་ཁྲི་ལ་བཞུགས་མཁན་གྱི་མདུན་དུ་ཕྱག་བཙལ་ནས། དུས་གཏན་དུ་གནས་པ་ལ་བསྙེན་བཀུར་ཞུ། ཁོང་ཚོའི་ཅོད་པན་རྣམས་བཞུགས་ཁྲིའི་མདུན་དུ་བཞག་ནས།
REV 4:11 ང་ཚོའི་གཙོ་བོ་ང་ཚོའི་དཀོན་མཆོག་ལགས། ། གཟི་བརྗིད་དཔལ་ཡོན་དབང་དང་ལྡན་པར་འོས། ། གནམ་སར་ཡོད་པ་ཐམས་ཅད་ཁྱེད་ཀྱིས་བཀོད། ། ཡོད་ཚད་ཁྱེད་ཀྱི་ཐུགས་དགོངས་བཞིན་དུ་གནས། ། ཞེས་གསུང་བཞིན་འདུག །
REV 5:1 དེ་ནས་བཞུགས་ཁྲི་ལ་བཞུགས་མཁན་གྱི་ཕྱག་གཡས་སུ་ངས་ཕྱི་ནང་གཉིས་ལ་བྲིས་པའི་ཤོག་སྒྲིལ་ཕྱག་རྒྱ་བདུན་གྱིས་བཏབ་པ་ཞིག་མཐོང༌།
REV 5:2 ཡང་ངས་དཀོན་མཆོག་གི་ཕོ་ཉ་དབང་ཆེན་པོ་དང་ལྡན་པ་ཞིག་མཐོང༌། དེས་གསུང་སྐད་ཆེན་པོས་“ཤོག་སྒྲིལ་གྱི་ཕྱག་རྒྱ་བཅད་ནས་འབྱེད་འོས་པ་སུ་ཡིན་”ཞེས་གསུངས་ཀྱང༌།
REV 5:3 དཀོན་མཆོག་གི་ཞིང་ཁམས་སམ། ས་སྟེང་དུའམ། སའི་འོག་ཏུ་ཤོག་སྒྲིལ་ཕྱེ་ནས་ནང་ལ་ལྟ་ཐུབ་མཁན་སུའང་མེད།
REV 5:4 ཤོག་སྒྲིལ་འབྱེད་པའམ་དེའི་ནང་ལ་ལྟ་བར་འོས་པ་སུའང་མེད་པས་ངས་མང་པོ་ངུས།
REV 5:5 དེ་ནས་རྒན་པོ་ནང་ནས་ཤིག་གིས་ང་ལ་“མ་ངུ༌། ལྟོས་ཤིག ཡུ་དཱ་ཚོ་པ་ནས་ཡིན་པའི་སེང་གེ་སྟེ། རྒྱལ་པོ་དཱ་བིད་ཀྱི་རྩ་བ་ཁོང་གིས་རྒྱལ་བས་ཤོག་སྒྲིལ་དེའི་ཕྱག་རྒྱ་བདུན་གཅོད་ཅིང་འབྱེད་ཐུབ་བོ་”ཞེས་གསུངས།
REV 5:6 ངས་སེམས་ཅན་བཞི་དང་བཞུགས་ཁྲི་དང་རྒན་པོ་རྣམས་ཀྱི་ཁྲོད་དུ་བསད་པའི་རྟགས་དང་ལྡན་པའི་ལུ་གུ་བཞེངས་ཡོད་པ་ཞིག་མཐོང༌། ཁོང་ལ་ར་ཅོ་བདུན་དང་སྤྱན་བདུན་ཡོད་དེ། སྤྱན་བདུན་ནི་དཀོན་མཆོག་གི་ཐུགས་ཉིད་བདུན་པོ་ས་གཞི་ཐམས་ཅད་ལ་མངགས་པ་རྣམས་ཡིན།
REV 5:7 ཁོང་ཕེབས་ནས་བཞུགས་ཁྲི་ལ་བཞུགས་མཁན་གྱི་ཕྱག་གཡས་ནས་ཤོག་སྒྲིལ་དེ་བཞེས།
REV 5:8 དེ་ལྟར་མཛད་ནས་སེམས་ཅན་བཞི་པོ་དང་རྒན་པོ་ཉི་ཤུ་རྩ་བཞི་ཡིས་ལུ་གུའི་མདུན་དུ་ཕྱག་བཙལ་ཏེ། རེ་རེའི་ཕྱག་ལ་པི་ཝང་དང༌། བདུག་སྤོས་ཀྱིས་གང་བའི་གསེར་གྱི་ཕོར་པ་ཡོད་པ་དེ་དཀོན་མཆོག་གི་མི་རྣམས་ཀྱི་སྨོན་ལམ་ཡིན།
REV 5:9 ཡང་ཁོང་རྣམས་མགུར་མ་གསར་པ་བཞེས་ཏེ། ཁྱེད་ཀྱིས་ཤོག་སྒྲིལ་ཐོགས་པ་དང༌། ། ཕྱག་རྒྱ་འབྱེད་པ་རབ་ཏུ་འོས། ། ཁྱེད་ནི་སྔོན་དུས་བཀྲོངས་མྱོང་བས། ། ཚོ་པ་སྐད་དང་མི་རིགས་དང༌། ། རྒྱལ་ཁབ་འདྲ་མིན་སྣ་ཚོགས་ལས། ། ཁྲག་གིས་བླུ་བར་མཛད་ནས་ནི། ། དཀོན་མཆོག་གི་ཕྱིར་གཏོགས་པར་མཛད། །
REV 5:10 ང་ཚོའི་དཀོན་མཆོག་གི་ཆེད་དུ། ། རྒྱལ་འབངས་དང་ནི་མཆོད་དཔོན་མཛད། ། ས་སྟེང་ཀུན་ཏུ་མངའ་དབང་སྒྱུར། ། ཞེས་སོ། །
REV 5:11 དེ་ནས་ངས་བལྟས་ཏེ། བཞུགས་ཁྲི་དང༌། སེམས་ཅན་དང༌། རྒན་པོ་རྣམས་ཀྱི་མཐའ་འཁོར་ལ་དཀོན་མཆོག་གི་ཕོ་ཉ་གྲངས་ལས་འདས་པ་རྣམས་ཀྱི་སྐད་ཐོས།
REV 5:12 ཁོང་རྣམས་ཀྱིས་སྐད་ཆེན་པོས། བསད་པའི་ལུ་གུ་དབང་ཆ་དང༌། ། ཕུན་ཚོགས་ཤེས་རབ་ནུས་སྟོབས་དང༌། ། གཟི་བརྗིད་དཔལ་ཡོན་བསྟོད་པར་འོས། ། ཞེས་སོ། །
REV 5:13 ཡང་ངས་དཀོན་མཆོག་གི་ཞིང་ཁམས་དང༌། སའི་སྟེང་དང༌། སའི་འོག་དང༌། རྒྱ་མཚོ་ལ་ཡོད་པའི་སེམས་ཅན་ཏེ་གང་བཀོད་པ་ཐམས་ཅད་ཀྱིས། བཞུགས་ཁྲིའི་སྟེང་དུ་བཞུགས་མཁན་དང༌། ། ལུ་གུ་བཀུར་སྟི་གཟི་བརྗིད་ཆེ། ། དཔལ་ཡོན་མངའ་ཐང་རྒྱས་པ་ནི། ། ཇི་སྲིད་བསྐལ་བརྒྱའི་བར་དུ་བརྟན། ། ཞེས་སྨྲས་པ་ཐོས།
REV 5:14 སེམས་ཅན་བཞི་པོས་“ཨ་མེན་”ཞེས་ཟེར་ཞིང༌། རྒན་པོ་རྣམས་ཀྱིས་ཕྱག་བཙལ་ལོ། །
REV 6:1 དེ་ནས་ངས་ལུ་གུ་ཡིས་ཤོག་སྒྲིལ་དེའི་ཕྱག་རྒྱ་བདུན་ནས་དང་པོ་གཅོད་པར་མཐོང་ནས། སེམས་ཅན་བཞི་པོ་ལས་གཅིག་གིས་འབྲུག་སྒྲ་དང་འདྲ་བའི་སྐད་ཀྱིས་“ཤོག་”ཅེས་གསུངས་པ་ཐོས།
REV 6:2 ངས་བལྟས་ཏེ་དེར་རྟ་དཀར་པོ་ཞིག་དང༌། དེའི་སྟེང་ཞོན་མཁན་ལ་གཞུ་ཞིག་ཡོད་པ་མཐོང༌། ཁོ་ལ་ཅོད་པན་སྟེར་ནས་རྒྱལ་བ་དང་བཅས་རྒྱལ་བ་འཐོབ་པའི་ཆེད་དུ་ཐོན།
REV 6:3 ལུ་གུས་ཕྱག་རྒྱ་གཉིས་པ་གཅོད་པར་མཛད་པའི་ཚེ། ངས་སེམས་ཅན་གཉིས་པ་དེས་“ཤོག་”ཅེས་གསུངས་པ་ཐོས་པ་དང༌།
REV 6:4 རྟ་གཞན་མེ་དང་འདྲ་བའི་དམར་པོ་ཞིག་ཐོན། དེའི་སྟེང་ཞོན་མཁན་ལ་རལ་གྲི་ཆེན་པོ་ཞིག་དང༌། འཇིག་རྟེན་ནས་ཞི་བདེ་ལེན་ཏེ་མི་རྣམས་ཀྱིས་གཅིག་གི་གཅིག་ལ་གསོད་དུ་འཇུག་པའི་དབང་གནང་བ་ཡིན།
REV 6:5 ལུ་གུས་ཕྱག་རྒྱ་གསུམ་པ་གཅོད་པར་མཛད་པའི་ཚེ། ངས་སེམས་ཅན་གསུམ་པ་དེས་“ཤོག་”ཅེས་གསུངས་པ་ཐོས་པ་དང༌། ངས་བལྟས་ནས་དེར་རྟ་ནག་པོ་ཞིག་ཡོད་པ་དེའི་སྟེང་ཞོན་མཁན་ལག་ལ་རྒྱ་མ་ཞིག་ཡོད་པ་མཐོང༌།
REV 6:6 ཡང་ངས་སེམས་ཅན་བཞི་པོའི་དཀྱིལ་དུ་“གྲོ་རྒྱ་མ་གང་གི་རིན་གོང་ནི་ཉིན་གཅིག་གི་གླ་ཆ་དང༌། ནས་རྒྱ་མ་གསུམ་གྱི་རིན་གོང་ནི་ཉིན་གཅིག་གི་གླ་ཆ་ཡིན་ཏེ། སྣུམ་དང་རྒུན་ཆང་ལ་གནོད་སྐྱོན་མ་གཏོང་ཞིག་”ཅེས་སྐད་དང་འདྲ་བ་ཞིག་གིས་གསུངས་པ་ཐོས།
REV 6:7 ལུ་གུས་ཕྱག་རྒྱ་བཞི་པ་གཅོད་པར་མཛད་པའི་ཚེ། ངས་སེམས་ཅན་བཞི་པ་དེས་“ཤོག་”ཅེས་གསུངས་པ་ཐོས་པ་དང༌།
REV 6:8 ངས་བལྟས་ནས་དེར་རྟ་སྐྱ་དཀར་ཞིག་ཡོད་ཅིང༌། དེའི་སྟེང་ཞོན་མཁན་གྱི་མིང་འཆི་བ་ཡིན་ཏེ། གཤིན་པོའི་ཁམས་དེའི་རྗེས་སུ་འབྲངས། དེ་གཉིས་ལ་རལ་གྲི་དང༌། མུ་གེ་དང༌། འགོས་ནད་དང༌། ས་གཞིའི་གཅན་གཟན་གྱི་སྒོ་ནས་འཇིག་རྟེན་གྱི་མི་བཞི་ཆ་གཅིག་གསོད་པའི་ཕྱིར་དབང་ཆ་གནང༌།
REV 6:9 ལུ་གུས་ཕྱག་རྒྱ་ལྔ་པ་གཅོད་པར་མཛད་པའི་ཚེ། ངས་མཆོད་ཁྲིའི་འོག་ཏུ་དཀོན་མཆོག་གི་བཀའ་དང༌། ཡེ་ཤུ་ལ་བདེན་དཔང་བྱེད་པའི་རྐྱེན་གྱིས་བསད་པའི་མི་རྣམས་ཀྱི་སེམས་ཉིད་མཐོང༌།
REV 6:10 ཁོ་ཚོས་སྐད་ཆེན་པོས་“ཀྱེ། དབང་ཀུན་དང་ལྡན་པའི་དཀོན་མཆོག་དམ་པ་དང་བདེན་པ་ལགས། འཇིག་རྟེན་གྱི་མི་རྣམས་ལ་ཁྲིམས་གཅོད་མཛད་ཅིང༌། ང་ཚོའི་ཁྲག་གཟིགས་ནས་ངེད་རྣམས་ཀྱི་སྲོག་ལེན་པར་ང་ཚོས་དུས་ཡུན་ཇི་ཙམ་སྒུག་དགོས་”ཞེས་གསུངས།
REV 6:11 དེ་ནས་ཁོ་ཚོ་རེ་རེ་ལ་གོས་དཀར་པོ་རེ་རེ་གནང་བར་གྱུར་ལ། ཁོ་རྣམས་དང་འདྲ་བར་གསོད་པར་འགྱུར་དེ་གཡོག་པོ་གཅིག་པ་ཡིན་པའི་མི་རྣམས་དང༌། ཁོ་ཚོའི་སྤུན་ཟླ་རྣམས་ཀྱི་གྲངས་ཚང་བའི་བར་དུ་དུས་ཐུང་ངུ་ངལ་གསོས་ནས་སྡོད་དགོས་པར་ཁོ་ཚོར་བསྐུལ།
REV 6:12 ངས་བལྟས་ཏེ་ལུ་གུས་ཕྱག་རྒྱ་དྲུག་པ་གཅོད་པར་མཛད་པའི་ཚེ། ས་ཡོམ་ཆེན་པོ་བྱུང་ཞིང༌། ཉི་མ་སྣམ་བུ་ནག་པོ་ལྟར་དང༌། ཉ་གང་ཟླ་བ་ཁྲག་ལྟར་དམར་པོར་གྱུར་ལ།
REV 6:13 རླུང་དྲག་པོས་སྒུལ་བའི་བསེ་ཡབ་ཤིང་ལས་མ་སྨིན་པའི་འབྲས་བུ་ལྷུངས་པ་ལྟར། སྐར་མ་རྣམས་ནམ་མཁའ་ནས་ས་ལ་ལྷུངས་པར་མཐོང༌།
REV 6:14 ནམ་མཁའ་ནི་འགྲིལ་བཞིན་པའི་ཤོག་སྒྲིལ་ལྟར་ཡལ་བར་གྱུར་ཞིང༌། རི་དང་གླིང་ཕྲན་ཐམས་ཅད་སོ་སོའི་གནས་ལས་སྤོས་པར་གྱུར།
REV 6:15 དེ་ནས་ས་གཞིའི་རྒྱལ་པོ་དང༌། དཔོན་རིགས་དང༌། དམག་དཔོན་དང༌། ཕྱུག་པོ་དང༌། དབང་ལྡན་དང༌། བྲན་གཡོག་དང་རང་དབང་ཅན་ཐམས་ཅད་ཀྱིས་བྲག་ཕུག་དང་རིའི་བྲག་གི་ནང་ཡིབས་ཏེ།
REV 6:16 རི་དང་བྲག་ལ་“བཞུགས་ཁྲི་ལ་བཞུགས་མཁན་གྱི་ཞལ་དང་ལུ་གུའི་ཐུགས་ཁྲོ་ལས་གཡོལ་བའི་ཕྱིར་ང་ཚོའི་སྟེང་དུ་བབས་ཤིག
REV 6:17 གང་ཡིན་ཟེར་ན། ཁོང་ཚོའི་ཐུགས་ཁྲོའི་ཉིན་མོ་སླེབས་པས་སུས་བཟོད་ཐུབ་པར་བྱེད་”ཅེས་སྨྲས་སོ། །
REV 7:1 དེ་རྗེས་ངས་དཀོན་མཆོག་གི་ཕོ་ཉ་བཞི་ས་གཞིའི་མཐའ་བཞི་ལ་བཞེངས་ཏེ་རླུང་གང་ཞིག་སའམ། རྒྱ་མཚོའམ། ཤིང་གང་ལ་ཡང་མི་རྒྱུག་པའི་ཆེད་དུ་ས་གཞིའི་རླུང་བཞི་པོ་འགོག་པར་མཐོང༌།
REV 7:2 ཡང་ངས་ཕོ་ཉ་གཞན་ཞིག་ཉི་མ་ཤར་བའི་ཕྱོགས་ནས་ཡར་འབྱོན་པ་མཐོང༌། དེ་ལ་གཏན་དུ་གནས་པའི་དཀོན་མཆོག་གི་ཕྱག་རྒྱ་ཡོད་ཅིང༌། ཕོ་ཉ་དེས་ས་གཞི་དང་རྒྱ་མཚོ་ལ་གནོད་སྐྱོན་གཏོང་བའི་དབང་ཆ་ཐོབ་པའི་ཕོ་ཉ་བཞི་ལ་སྐད་ཆེན་པོས་
REV 7:3 “ང་ཚོའི་དཀོན་མཆོག་གི་ཞབས་ཕྱི་རྣམས་ཀྱི་དཔྲལ་བ་ལ་རྟགས་རྒྱག་མ་ཚར་བའི་བར་དུ། སའམ། རྒྱ་མཚོའམ། ཤིང་རྣམས་ལ་གནོད་སྐྱོན་མ་གཏོང་ཞིག་”ཅེས་གསུངས།
REV 7:4 ཡི་སི་ར་ཨེལ་གྱི་ཚོ་པ་ཐམས་ཅད་ནས་ཕྱག་རྒྱ་ཡིས་བཏབ་པའི་གྲངས་ནི་ཆིག་འབུམ་བཞི་ཁྲི་བཞི་སྟོང་ཡོད་པ་ཐོས་ཏེ།
REV 7:5 ཡུ་དཱ་ཚོ་པ་ལས་སྟོང་ཕྲག་བཅུ་གཉིས། རུ་པེན་ཚོ་པ་ལས་སྟོང་ཕྲག་བཅུ་གཉིས། གཱད་ཚོ་པ་ལས་སྟོང་ཕྲག་བཅུ་གཉིས།
REV 7:6 ཨ་ཤེར་ཚོ་པ་ལས་སྟོང་ཕྲག་བཅུ་གཉིས། ནབ་ཐ་ལི་ཚོ་པ་ལས་སྟོང་ཕྲག་བཅུ་གཉིས། མཱ་ན་ཟེ་ཚོ་པ་ལས་སྟོང་ཕྲག་བཅུ་གཉིས།
REV 7:7 སི་མེ་ཡོན་ཚོ་པ་ལས་སྟོང་ཕྲག་བཅུ་གཉིས། ལེ་ཝི་ཚོ་པ་ལས་སྟོང་ཕྲག་བཅུ་གཉིས། ཨི་སཱ་ཀར་ཚོ་པ་ལས་སྟོང་ཕྲག་བཅུ་གཉིས།
REV 7:8 ཟ་བུ་ལུན་ཚོ་པ་ལས་སྟོང་ཕྲག་བཅུ་གཉིས། ཡོ་སེབ་ཚོ་པ་ལས་སྟོང་ཕྲག་བཅུ་གཉིས། པེན་ཡ་མཱིན་ཚོ་པ་ལས་སྟོང་ཕྲག་བཅུ་གཉིས་སོ། །
REV 7:9 དེ་ནས་ངས་རྒྱལ་ཁབ་དང༌། ཚོ་པ། མི་རིགས། སྐད་རིགས་ཐམས་ཅད་ནས་ཡིན་པའི་གྲངས་ལས་འདས་པའི་མི་ཚོགས་ཆེན་མོ་ལུ་གུ་དང་བཞུགས་ཁྲིའི་མདུན་དུ་ལང་བ་མཐོང༌། གོས་དཀར་པོ་གྱོན་ཞིང༌། ཤིང་ཏ་ལའི་ཡལ་ག་ཁོ་ཚོའི་ལག་ཏུ་འཁྱེར་ཏེ།
REV 7:10 ཁོ་ཚོས་སྐད་ཆེན་པོས། བཞུགས་ཁྲིར་བཞུགས་པའི་ང་ཚོ་ཡི། ། དཀོན་མཆོག་དང་ནི་ལུ་གུ་ལས། ། ཐར་པ་ཞེས་པ་འབྱུང་བ་ཡིན། ། ཞེས་གསུངས།
REV 7:11 དཀོན་མཆོག་གི་ཕོ་ཉ་ཐམས་ཅད་བཞུགས་ཁྲི་དང་རྒན་པོ་རྣམས་དང་སེམས་ཅན་བཞིའི་མཐའ་འཁོར་ལ་བཞེངས་ཏེ། བཞུགས་ཁྲིའི་མདུན་དུ་ཕྱག་བཙལ་ནས་དཀོན་མཆོག་ལ་བསྙེན་བཀུར་བྱས་ཏེ།
REV 7:12 ཨ་མེན། ངེད་ཀྱི་དཀོན་མཆོག་བཀུར་སྟི་དང༌། ། གཟི་བརྗིད་ཤེས་རབ་ཐུགས་རྗེ་དང༌། ། དཔལ་ཡོན་མངའ་དབང་མཐུ་སྟོབས་ཏེ། ། ཇི་སྲིད་བསྐལ་བརྒྱའི་བར་དུ་བརྟན། ། ཨ་མེན། ཞེས་གསུངས།
REV 7:13 དེ་ནས་རྒན་པོ་ཞིག་གིས་ང་ལ་“གོས་དཀར་པོ་གྱོན་པ་རྣམས་ནི་སུ་ཡིན། གང་ནས་བྱུང་”ཞེས་གསུངས་པས།
REV 7:14 ངས་ཁོང་ལ་“སྐུ་ཞབས་ལགས། ཁྱེད་ཀྱིས་མཁྱེན་ནོ་”ཞེས་ཟེར་བས་ཁོང་གིས་ང་ལ་“འདི་རྣམས་ནི་སྡུག་བསྔལ་ཆེན་མོ་ལས་ཐོན་ཏེ། རང་གི་གོས་རྣམས་ལུ་གུའི་སྐུ་ཁྲག་གིས་བཀྲུས་ནས་དཀར་པོ་བྱས་པ་རྣམས་ཡིན།
REV 7:15 དེ་ཕྱིར་དེ་རྣམས་དཀོན་མཆོག་གི ། བཞུགས་ཁྲིའི་དྲུང་དུ་བསྡད་ནས་ནི། ། ཉིན་མཚན་མེད་པར་མཆོད་ཁང་ནང༌། ། ཞབས་ཏོག་ཞུ་བཞིན་བཞུགས་ཁྲིའི་སྟེང༌། ། བཞུགས་མཁན་དེ་ཡིས་དེ་རྣམས་སྐྱོང༌། །
REV 7:16 དེ་རྣམས་ནམ་ཡང་བཀྲེས་སྐོམ་དང༌། ། ཉི་མ་ཡང་ན་ཚ་བ་སོགས། ། གང་ཡང་ཕོག་པར་མི་འགྱུར་རོ། །
REV 7:17 གང་ཡིན་ཟེར་ན་བཞུགས་ཁྲི་ཡི། ། དཀྱིལ་དུ་བཞུགས་པའི་ལུ་གུ་དེས། ། དེ་རྣམས་ཀྱི་ནི་རྫི་བོ་མཛད། ། ཚེ་སྲོག་ཆུ་མིག་འགྲམ་དུ་འཁྲིད། ། དཀོན་མཆོག་གིས་ནི་དེ་ཚོ་ཡི། ། མཆི་མ་ཐམས་ཅད་འཕྱི་བར་མཛད། །” ཅེས་གསུངས་སོ། །
REV 8:1 ལུ་གུས་ཕྱག་རྒྱ་བདུན་པ་གཅོད་པར་མཛད་པའི་ཚེ། ཆུ་ཚོད་ཕྱེད་ཙམ་གྱི་བར་དུ་དཀོན་མཆོག་གི་ཞིང་ཁམས་སྒྲ་མེད་དུ་གྱུར།
REV 8:2 ཡང་ངས་དཀོན་མཆོག་གི་མདུན་དུ་ལངས་ཏེ་སྡོད་པའི་ཕོ་ཉ་བདུན་པོ་དེ་ཚོ་མཐོང༌། ཁོ་རྣམས་ལ་དུང་ཆེན་བདུན་གནང༌།
REV 8:3 ཕོ་ཉ་གཞན་ཞིག་གསེར་གྱི་བསངས་ཕོར་འཁྱེར་ཏེ་མཆོད་ཁྲིའི་མདུན་དུ་ཡོང་ནས་ལངས། དཀོན་མཆོག་གི་མི་ཐམས་ཅད་ཀྱི་སྨོན་ལམ་དང་བཅས་བཞུགས་ཁྲིའི་མདུན་དུ་གསེར་གྱི་མཆོད་ཁྲིའི་ཁར་ཕུལ་བའི་ཕྱིར། ཁོང་ལ་བདུག་སྤོས་མང་པོ་ཐོབ།
REV 8:4 བདུག་སྤོས་ཀྱི་དུ་བ་ནི་དཀོན་མཆོག་གི་མི་རྣམས་ཀྱི་སྨོན་ལམ་དང་བཅས་པར་ཕོ་ཉ་དེའི་ཕྱག་ནས་ཡར་དཀོན་མཆོག་གི་མདུན་དུ་སླེབས།
REV 8:5 དེ་ནས་ཕོ་ཉ་དེས་མཆོད་ཁྲིའི་མེ་ཡིས་བསངས་ཕོར་བཀང་ནས་ས་གཞི་ལ་འཕངས་ཏེ། གློག་འཁྱུག་པ་དང༌། སྒྲ་སྣ་ཚོགས། འབྲུག་སྒྲ་དང༌། ས་ཡོམ་བྱུང༌།
REV 8:6 དུང་ཆེན་བདུན་ཡོད་པའི་ཕོ་ཉ་བདུན་པོས་དུང་ཆེན་གཏོང་རྒྱུའི་གྲ་སྒྲིག་བྱས།
REV 8:7 ཕོ་ཉ་དང་པོས་རང་གི་དུང་ཆེན་བུས་ནས་སེར་བ་དང་མེ་ཁྲག་འདྲེས་པ་བྱུང་སྟེ་ས་གཞི་ལ་འཕངས་ནས་ས་གཞིའི་གསུམ་ཆ་གཅིག་དང༌། ཤིང་རྣམས་ཀྱི་གསུམ་ཆ་གཅིག་དང༌། རྩྭ་སྔོན་པོ་ཐམས་ཅད་མེས་ཚིག་པར་གྱུར།
REV 8:8 ཕོ་ཉ་གཉིས་པས་རང་གི་དུང་ཆེན་བུས་ནས་མེ་འབར་བའི་རི་ཆེན་པོ་དང་འདྲ་བ་ཞིག་རྒྱ་མཚོ་ལ་འཕངས། རྒྱ་མཚོའི་གསུམ་ཆ་གཅིག་ཁྲག་ཏུ་གྱུར་ཏེ།
REV 8:9 རྒྱ་མཚོ་ནང་ལ་ཡོད་པའི་སེམས་ཅན་གསུམ་ཆ་གཅིག་ཤི་ནས། གྲུ་གཟིངས་ཀྱི་གསུམ་ཆ་གཅིག་འཇིག་པར་གྱུར།
REV 8:10 ཕོ་ཉ་གསུམ་པས་རང་གི་དུང་ཆེན་བུས་ནས་མེ་འབར་བའི་དཔལ་འབར་དང་འདྲ་བའི་སྐར་མ་ཆེན་པོ་ཞིག་ནམ་མཁའ་ནས་གཙང་པོ་རྣམས་ཀྱི་གསུམ་ཆ་གཅིག་དང༌། ཆུ་མིག་རྣམས་ལ་ལྷུངས།
REV 8:11 སྐར་མ་དེའི་མིང་ནི་ཁ་ཏིག་ཡིན། ཆུ་རྣམས་ཀྱི་གསུམ་ཆ་གཅིག་ཁ་ཏིག་ཏུ་གྱུར་བས་མི་མང་པོ་ཤི
REV 8:12 ཕོ་ཉ་བཞི་པས་རང་གི་དུང་ཆེན་བུས་ནས་ཉི་མའི་གསུམ་ཆ་གཅིག་དང༌། ཟླ་བའི་གསུམ་ཆ་གཅིག་དང༌། སྐར་མ་རྣམས་ཀྱི་གསུམ་ཆ་གཅིག་ལ་ཕོག་སྟེ། དེ་ཚོ་ལས་གསུམ་ཆ་གཅིག་མུན་ནག་ཏུ་གྱུར་བས། ཉིན་མོ་དང་མཚན་མོའི་གསུམ་ཆ་གཅིག་ལ་འོད་མ་འཕྲོས།
REV 8:13 དེ་ནས་ངས་བལྟས་པ་དང༌། ནམ་མཁའི་དཀྱིལ་ལ་བྱ་གླག་འཕུར་བ་ཡིས་སྐད་ཆེན་པོས་“ཆག་སྒོ་ཆེན་པོ། ཆག་སྒོ་ཆེན་པོ། ཆག་སྒོ་ཆེན་པོ། ཕོ་ཉ་གཞན་གསུམ་གྱིས་ད་ལྟ་དུང་ཆེན་འབུད་དགོས་པའི་རྐྱེན་གྱིས་ས་གཞི་ལ་སྡོད་པའི་མི་རྣམས་ལ་ཆག་སྒོ་ཆེན་པོ་འབྱུང་ངེས་ཡིན་”ཞེས་སྨྲས་པ་ཐོས་སོ། །
REV 9:1 ཕོ་ཉ་ལྔ་པས་རང་གི་དུང་ཆེན་བུས་ནས་ངས་ནམ་མཁའ་ནས་ས་ལ་ལྷུངས་པའི་སྐར་མ་ཞིག་མཐོང༌། སྐར་མ་དེ་ལ་གཏིང་མཐའ་མེད་པའི་དོང་གི་སྒོའི་ལྡེ་མིག་གནང་བ་དང༌།
REV 9:2 དེས་གཏིང་མཐའ་མེད་པའི་དོང་གི་སྒོ་ཕྱེ་སྟེ་མེ་ཐབ་ཆེན་པོའི་དུ་བ་ལྟར་ས་དོང་དེ་ནས་དུ་བ་ཐོན་པས་ཉི་མ་དང་ནམ་མཁའ་གཉིས་བསྒྲིབས།
REV 9:3 དུ་བ་དེ་ནས་འབུ་ཆ་ག་པ་རྣམས་ས་གཞི་ལ་བྱུང་ཞིང༌། དེ་ཚོར་ས་གཞིའི་སྡིག་པ་རྭ་ཅན་ལ་ཡོད་པའི་ནུས་པ་ལྟར་གནང༌།
REV 9:4 འབུ་ཆ་ག་པ་རྣམས་ལ་ས་གཞི་ལ་ཡོད་པའི་རྩྭའམ། རྩི་ཤིང་ངམ། ཤིང་གང་ལའང་གནོད་པ་མི་བྱེད་པར། དཀོན་མཆོག་གི་རྟགས་དཔྲལ་བ་ལ་མེད་པའི་མི་རྣམས་ཁོ་ནར་གནོད་པ་བྱེད་པའི་བཀའ་བཏང༌།
REV 9:5 དེ་ཚོ་ལ་སུ་ཞིག་མི་གསོད་པར་ཟླ་བ་ལྔའི་བར་དུ་མནར་གཅོད་གཏོང་བའི་ཆོག་མཆན་གནང༌། མི་རྣམས་ཀྱིས་མྱོང་བའི་སྡུག་བསྔལ་ནི་སྡིག་པ་རྭ་ཅན་གྱིས་མི་ཞིག་ལ་མདུང་རྒྱག་པ་དང་འདྲ་བ་ཡིན།
REV 9:6 དེའི་དུས་སུ་མི་རྣམས་ཀྱིས་འཆི་བ་འཚོལ་ཡང་མི་རྙེད་དེ། ཤི་བར་འདོད་ཀྱང་འཆི་བ་དེ་རྣམས་ལས་འབྲོས་ཡོང༌།
REV 9:7 འབུ་ཆ་ག་པ་དེ་ཚོ་དམག་སར་འགྲོ་བའི་རྟ་དང་འདྲ་བ་ཡིན་ཏེ། མགོ་ལ་གསེར་གྱི་ཅོད་པན་དང་འདྲ་བ་ཡིན་ཞིང༌། གདོང་ནི་མིའི་ངོ་གདོང་དང་འདྲ་བ་ཡིན།
REV 9:8 དེ་ཚོའི་སྐྲ་ནི་བུད་མེད་རྣམས་ཀྱི་སྐྲ་དང༌། སོ་ནི་སེང་གེའི་སོ་དང་འདྲ་བ་ཡིན།
REV 9:9 ལུས་ལ་ལྕགས་ཀྱི་བྲང་ཁྲབ་གྱོན་ཞིང༌། ཤོག་པའི་སྒྲ་ནི་རྟ་དང་ཤིང་རྟ་མང་པོ་དམག་སར་རྒྱུག་པའི་འུར་སྒྲ་དང་འདྲ་བ་ཡིན།
REV 9:10 དེ་ཚོའི་མཇུག་མ་སྡིག་པ་རྭ་ཅན་གྱི་མཇུག་མ་མདུང་ལྡན་དང་འདྲ་བ་ཡིན་པས། མཇུག་མ་དེ་ལ་ཟླ་བ་ལྔའི་བར་དུ་མི་རྣམས་ལ་མནར་གཅོད་གཏོང་བའི་ནུས་པ་གནང་ཡོད།
REV 9:11 དེ་ཚོའི་རྒྱལ་པོ་གཏིང་མཐའ་མེད་པའི་དོང་གི་ཕོ་ཉ་ཡིན། ཁོའི་མིང་ལ་ཡ་ཧུ་དཱ་པའི་སྐད་དུ་ཨ་བད་དཱོན་དང་གྷི་རིག་སྐད་དུ་ཨ་པོལ་ཡོན་ཞེས་ཟེར།
REV 9:12 ཆག་སྒོ་ཆེན་པོ་དང་པོ་ཚར་སོང༌། ལྟོས་ཤིག ད་དུང་ཆག་སྒོ་གཉིས་འབྱུང་བར་འགྱུར།
REV 9:13 ཕོ་ཉ་དྲུག་པས་རང་གི་དུང་ཆེན་བུས་ནས་ངས་དཀོན་མཆོག་གི་མདུན་དུ་ཡོད་པའི་གསེར་གྱི་མཆོད་ཁྲིའི་རྭ་བཞི་ནས་འབྱུང་བའི་གསུང་སྐད་ཀྱིས།
REV 9:14 དུང་ཆེན་ཡོད་པའི་ཕོ་ཉ་དྲུག་པ་ལ་“ཡུ་ཧྥ་ལ་ཏི་གཙང་པོ་ཆེན་པོར་བཅིངས་ཡོད་པའི་ཕོ་ཉ་བཞི་གློད་ཅིག་”ཅེས་གསུངས་པའི་སྐད་ཐོས།
REV 9:15 ཆུ་ཚོད་དང་ཉིན་མོ་དང་ཟླ་བ་དང་ལོ་དེའི་ཆེད་དུ་བཤམས་ཡོད་པའི་ཕོ་ཉ་བཞི་པོ་མིའི་རིགས་གསུམ་ཆ་གཅིག་གསོད་པའི་ཕྱིར་གློད་པར་གྱུར།
REV 9:16 ངས་རྟ་དམག་རྣམས་ཀྱི་གྲངས་ཏེ་དུང་ཕྱུར་གཉིས་ཡིན་ཟེར་བ་ཐོས།
REV 9:17 ཞལ་གཟིགས་ཀྱི་སྒོ་ནས་ངས་མཐོང་བའི་རྟ་དང་དེ་ཚོར་ཞོན་མཁན་རྣམས་འདི་ལྟར་ཡིན་ཏེ། ཁོ་ཚོའི་བྲང་ཁྲབ་ཀྱི་ཁ་དོག་ནི་མེ་དང་འདྲ་བའི་དམར་པོ་དང༌། སྔོན་པོ་དང༌། མུ་ཟི་དང་འདྲ་བའི་གསེར་པོ་ཡིན་ཞིང༌། དེ་ཚོའི་མགོ་ནི་སེང་གེའི་མགོ་དང་འདྲ་བ་ཡིན། དེ་ཚོའི་ཁ་ནས་མེ་དང༌། དུ་བ་དང༌། མུ་ཟི་ཐོན།
REV 9:18 རྟ་ཡི་ཁ་ནས་ཐོན་པའི་མེ་དང༌། དུ་བ་དང༌། མུ་ཟི་ཡིན་ཏེ་གནོད་འཚེ་འདི་ཚོ་གསུམ་གྱིས་མིའི་རིགས་གསུམ་ཆ་གཅིག་བསད།
REV 9:19 རྟ་རྣམས་ཀྱི་ནུས་པ་ནི་ཁའི་ནང་དང་མཇུག་མའི་སྟེང་ལ་ཡོད། མཇུག་མའི་སྟེང་ལ་མགོ་ཡོད་པའི་དུག་སྦྲུལ་དང་འདྲ་བས། མགོ་དེ་ཚོ་ཡིས་གནོད་པ་བྱེད།
REV 9:20 གནོད་པ་དེ་ཡིས་མ་བསད་པའི་མི་ལྷག་མ་རྣམས་ཀྱིས་གདོན་འདྲེ་དང༌། གསེར་དང༌། དངུལ་དང༌། ལི་དང༌། རྡོ་དང༌། ཤིང་ལས་བཟོས་ཏེ་མཐོང་ཐོས་འགྲུལ་གསུམ་མི་ཐུབ་པའི་རང་གི་ལག་པས་བཟོས་པའི་སྐུ་བརྙན་རྣམས་མ་སྤངས་པར་ད་དུང་བསྙེན་བཀུར་བྱས།
REV 9:21 ཡང་ཁོ་ཚོས་མི་སྲོག་གཅོད་པ་དང༌། མཐུ་རྒྱག་པ་དང༌། ལོག་གཡེམ་དང༌། རྐུ་བའི་སྤྱོད་པ་མ་སྤངས་ཤིང་སེམས་མ་བསྒྱུར་རོ། །
REV 10:1 ཡང་ངས་དཀོན་མཆོག་གི་ཕོ་ཉ་དབང་ཆེན་པོ་དང་ལྡན་པ་གཞན་ཞིག་དཀོན་མཆོག་གི་ཞིང་ཁམས་ནས་འབབ་པ་མཐོང་བྱུང༌། ན་བཟའ་ལ་སྤྲིན་ཞིག་དང༌། དབུའི་སྟེང་ལ་འཇའ་གསོལ། ཞལ་རས་ཉི་མ་དང༌། ཞབས་ཟུང་མེ་འབར་བའི་ཀ་བ་ལྟར་ཡོད་དེ།
REV 10:2 ཁོང་གི་ཕྱག་ལ་ཁ་ཕྱེ་ཡོད་པའི་ཤོག་སྒྲིལ་ཆུང་ཆུང་ཞིག་ཡོད། རང་གི་ཞབས་གཡས་པ་རྒྱ་མཚོ་དང༌། གཡོན་པ་སྐམ་ས་ལ་བཞག་ནས།
REV 10:3 སེང་གེའི་ང་རོ་ལྟར་གསུང་སྐད་ཆེན་པོས་འབོད་པའི་རྗེས་སུ་འབྲུག་སྒྲ་བདུན་པོ་བརྒྱབ།
REV 10:4 འབྲུག་སྒྲ་བདུན་པོས་སྐད་བཏོན་ནས་ངས་འབྲི་བར་བརྩམས་ཏེ། དཀོན་མཆོག་གི་ཞིང་ཁམས་ནས་གསུང་སྐད་ཅིག་གིས་“འབྲུག་སྒྲ་བདུན་པོས་གསུངས་པ་དེ་རྒྱ་ཡིས་བཏབ་ནས་མ་བྲིས་ཤིག་”ཅེས་གསུངས་པའི་སྐད་ཅིག་ཐོས།
REV 10:5 ངས་མཐོང་བའི་ཕོ་ཉ་རྒྱ་མཚོ་དང་སྐམ་ས་ལ་བཞེངས་པ་དེས་རང་གི་ཕྱག་གཡས་པ་དཀོན་མཆོག་གི་ཞིང་ཁམས་ཀྱི་ཕྱོགས་སུ་བཏེགས་ཏེ།
REV 10:6 ཞིང་ཁམས་དང་དེའི་ནང་ཡོད་པ་དང༌། ས་གཞི་དང་དེའི་ནང་ཡོད་པ་དང༌། རྒྱ་མཚོ་དང་དེའི་ནང་ཡོད་པ་འགོད་པ་གནང་མཁན་དུས་གཏན་དུ་གནས་པ་ཁོང་དཔང་དུ་བཙུགས་ནས་མནའ་བསྐྱལ་ཏེ་“ད་མི་འགོར་བར།
REV 10:7 དཀོན་མཆོག་གིས་རང་གི་ཞབས་ཕྱི་ལུང་སྟོན་པ་རྣམས་ལ་སྔོན་དུ་བསྒྲགས་པར་མཛད་པ་ལྟར། ཕོ་ཉ་བདུན་པས་རང་གི་དུང་ཆེན་འབུད་པའི་ཚེ་དཀོན་མཆོག་གི་གསང་བའི་དོན་སྒྲུབ་པར་འགྱུར་”ཞེས་གསུངས།
REV 10:8 དེ་ནས་དཀོན་མཆོག་གི་ཞིང་ཁམས་ནས་ངས་ཐོས་པའི་གསུང་སྐད་དེས་ཡང་བསྐྱར་ང་ལ་“སོང་ལ། རྒྱ་མཚོ་དང་སྐམ་ས་ལ་བཞེངས་ཏེ་ཕོ་ཉ་དེའི་ཕྱག་ལ་ཁ་ཕྱེ་ཡོད་པའི་ཤོག་སྒྲིལ་ལེན་ཞིག་”ཅེས་གསུངས་པས།
REV 10:9 ཕོ་ཉའི་མདུན་དུ་སོང་ནས་ངས་ཤོག་སྒྲིལ་ཆུང་ཆུང་དེ་ང་ལ་གནང་བར་ཞུས། ཁོང་གིས་ང་ལ་“ལེན་ལ་ཟོ་ཞིག དེས་ཁྱོད་ཀྱི་ཕོ་བའི་ནང་ཁ་ཏིག་ཏུ་སྒྱུར་ཡང༌། ཁ་ལ་སྦྲང་རྩི་ལྟར་མངར་མོར་འགྱུར་”ཞེས་གསུངས།
REV 10:10 དེ་བས་ན་ངས་ཕོ་ཉའི་ཕྱག་ནས་ཤོག་སྒྲིལ་ཆུང་ངུ་དེ་བླངས་ནས་བཟས་པ་དང༌། ཁ་ལ་སྦྲང་རྩི་ལྟར་མངར་མོ་ཡོད་ཀྱང༌། བཟས་ནས་ངའི་ཕོ་བའི་ནང་ལ་ཁ་ཏིག་ཏུ་གྱུར།
REV 10:11 ཁོང་གིས་ང་ལ་“ཁྱོད་ཀྱིས་ཡང་བསྐྱར་མི་རིགས་དང༌། རྒྱལ་ཁབ། སྐད་རིགས། རྒྱལ་པོ་མང་པོའི་སྐོར་ལུང་བསྟན་དགོས་”ཞེས་གསུངས་སོ། །
REV 11:1 དེ་ནས་དབྱུག་པ་དང་འདྲ་བའི་ཐིག་ཤིང་ཞིག་ང་ལ་གནང་ནས་སུ་ཞིག་གིས་ང་ལ་“སོང་ལ། དཀོན་མཆོག་གི་མཆོད་ཁང་དང་མཆོད་ཁྲི་འཇལ་ཞིང༌། དེར་བསྙེན་བཀུར་བྱེད་མཁན་རྣམས་ཀྱི་གྲངས་རྩིས་ཤིག
REV 11:2 འོན་ཀྱང་མཆོད་ཁང་གི་ཕྱི་ཕྱོགས་སུ་ཡོད་པའི་ར་བ་ཞོག་ལ་མ་འཇལ། རྒྱུ་མཚན་ནི་དེ་ཡ་ཧུ་དཱ་པ་མིན་པ་རྣམས་ལ་གནང་བས་ཟླ་བ་བཞི་བཅུ་ཞེ་གཉིས་ཀྱི་བར་དུ་གྲོང་ཁྱེར་མཆོག་རྐང་པས་རྫི་བར་འགྱུར།
REV 11:3 ངའི་དཔང་པོ་གཉིས་ལ་དབང་ཆ་གནང་བར་འགྱུར་ལ། རྩྭ་རས་གྱོན་ཏེ་འདི་གཉིས་ཀྱིས་ཉི་མ་ཆིག་སྟོང་ཉིས་བརྒྱ་དྲུག་ཅུའི་བར་དུ་ལུང་བསྟན་པར་འགྱུར་”ཞེས་གསུངས།
REV 11:4 དཔང་པོ་འདི་གཉིས་ནི་སྐྱུར་རུ་ཤིང་གཉིས་དང༌། ས་གཞིའི་གཙོ་བོའི་མདུན་དུ་ཡོད་པའི་སྟེགས་བུ་གཉིས་ཡིན་ནོ།
REV 11:5 སུ་ཞིག་གིས་ཁོང་རྣམས་ལ་གནོད་པར་འདོད་ན་ཁོང་ཚོའི་ཁ་ནས་མེ་འཐོན་ཞིང་དགྲ་བོ་འཇིག་པས། ཁོང་རྣམས་ལ་གནོད་པ་བྱེད་འདོད་མཁན་དེ་ལྟར་གསོད་པར་འགྱུར་དགོས།
REV 11:6 ཁོང་ཚོས་ལུང་སྟོན་པའི་དུས་སུ་ཆར་པ་འགོག་པའི་ཕྱིར་ནམ་མཁའི་ཆུའི་སྒོ་རྒྱག་པའི་དབང་ཆ་དང༌། ཆུ་རྣམས་ཁྲག་ཏུ་སྒྱུར་བ་དང༌། ག་དུས་འདོད་ཀྱང་ཆག་སྒོ་ཆེན་པོའི་རིགས་ཀུན་ས་གཞི་ལ་གཏོང་བའི་དབང་ཆ་ཡོད།
REV 11:7 ཁོང་ཚོས་དཔང་པོ་བྱས་ཚར་བའི་རྗེས་སུ་གཏིང་མཐའ་མེད་པའི་དོང་ནས་འཐོན་པའི་གཅན་གཟན་དེས་ཁོང་རྣམས་ལ་དམག་འཐབ་བྱས་ནས་རྒྱལ་ཏེ་དེ་གཉིས་གསོད་པར་འགྱུར།
REV 11:8 དཔེ་མཚོན་ཙམ་གྱི་མིང་ལ་སཱ་དོམ་དང་ཨེ་ཇེབ་ཞེས་ཟེར་བའི་གྲོང་ཁྱེར་དེར། ཁོང་ཚོའི་གཙོ་བོ་རྒྱང་ཤིང་སྒང་ལ་གྲོངས་པའི་གྲོང་ཁྱེར་ཆེན་པོའི་ལམ་ལ་ཁོང་ཚོའི་སྐུ་སྤུར་ལུས་པར་འགྱུར།
REV 11:9 མི་རིགས་དང༌། ཚོ་པ། སྐད་རིགས། རྒྱལ་ཁབ་བཅས་ལས་མི་རྣམས་ཀྱིས་ཉིན་གསུམ་དང་ཕྱེད་ཀའི་རིང་ལ་ཁོང་ཚོའི་སྤུར་ལ་ལྟ་ཞིང༌། དུར་ཁང་དུ་འཇུག་ཏུ་མི་འཇུག
REV 11:10 ཡང་ས་སྟེང་མི་རྣམས་ཀྱིས་སེམས་དགའ་ཞིང་རྟེན་འབྲེལ་བྱེད་པར་འགྱུར་ཏེ། གཅིག་གིས་གཅིག་ལ་ལག་རྟགས་སྤྲོད་ཡོང༌། གང་ལགས་ཟེར་ན། ལུང་སྟོན་པ་འདི་གཉིས་ཀྱིས་ས་སྟེང་མི་རྣམས་ལ་གནོད་པ་བྱས་པའི་ཕྱིར་རོ།
REV 11:11 འོན་ཀྱང་ཉིན་གསུམ་དང་ཕྱེད་ཀའི་རྗེས་སུ་དཀོན་མཆོག་ལས་བྱུང་བའི་སྲོག་གི་དབུགས་ཁོང་གཉིས་ལ་ཞུགས་ཏེ་རྐང་པ་བཙུགས་ནས་བཞེངས་པས། དེ་མཐོང་མཁན་འཇིགས་སྐྲག་སྐྱེས།
REV 11:12 དེ་ནས་ཁོང་ཚོས་དཀོན་མཆོག་གི་ཞིང་ཁམས་ནས་བྱུང་བའི་གསུང་སྐད་ཆེན་པོས་ཁོང་ཚོར་“ཡར་ཤོག་”ཅེས་གསུངས་པ་ཐོས་པས། དགྲ་བོས་ལྟ་དུས་ཁོང་གཉིས་སྤྲིན་གྱི་ནང་ལ་ཞིང་ཁམས་སུ་སོང༌།
REV 11:13 འཕྲལ་དུ་ས་ཡོམ་ཆེན་པོ་བྱུང་སྟེ། གྲོང་ཁྱེར་གྱི་བཅུ་ཆ་གཅིག་རྡིབ་པས་མི་བདུན་སྟོང་བསད། ལྷག་མ་རྣམས་འཇིགས་སྐྲག་སྐྱེས་ནས་ཞིང་ཁམས་སུ་བཞུགས་པའི་དཀོན་མཆོག་ལ་བཀུར་སྟི་བྱས།
REV 11:14 ཆག་སྒོ་ཆེན་པོ་གཉིས་པ་དེ་ཚར་རོ། ཆག་སྒོ་ཆེན་པོ་གསུམ་པ་མྱུར་དུ་འབྱུང་བར་འགྱུར།
REV 11:15 ཕོ་ཉ་བདུན་པས་རང་གི་དུང་ཆེན་བུས་ནས། དཀོན་མཆོག་གི་ཞིང་ཁམས་སུ་གསུང་སྐད་ཆེན་པོ་སྣ་ཚོགས་ཀྱིས། འཇིག་རྟེན་རྒྱལ་སྲིད་ང་ཚོའི་གཙོ་བོ་དང༌། ། ཁོང་གི་མཱ་ཤི་ཀ་ཡི་རྒྱལ་སྲིད་གྱུར། ། ཁོང་གིས་རྒྱལ་སྲིད་ནམ་ཡང་སྐྱོང་བར་འགྱུར། ། ཞེས་གསུངས།
REV 11:16 དཀོན་མཆོག་གི་མདུན་དུ་སོ་སོའི་ཁྲི་རྣམས་ལ་བཞུགས་པའི་རྒན་པོ་ཉི་ཤུ་རྩ་བཞི་པོས་དཀོན་མཆོག་ལ་ཕྱག་བཙལ་ཏེ་ཁོང་ལ།
REV 11:17 འདས་དང་ད་ལྟ་བཞུགས་པ་ཡི། ། གཙོ་བོ་དཀོན་མཆོག་དབང་ཀུན་ལགས། ། ཁྱེད་ཀྱིས་དབང་ཆེན་བཞེས་ནས་ནི། ། རྒྱལ་སྲིད་སྐྱོང་བ་འགོ་ཚུགས་དེར། ། ང་ཚོས་བཀའ་དྲིན་ཆེ་ཞེས་ཞུ། །
REV 11:18 མི་རིགས་ཁྲོས་ནས་ཁྱེད་ཀྱི་ཐུགས་ཁྲོ་ཡང༌། ། ཡོང་བའི་དུས་ལ་བབས་ཏེ་གཤིན་པོ་ལ། ། ཁྲིམས་གཅོད་མཛད་ཅིང་ཁྱེད་ཀྱི་ཞབས་ཕྱི་དང༌། ། ལུང་སྟོན་པ་དང་དམ་པ་རྣམས་པ་དང༌། ། ཁྱེད་ལ་བཀུར་སྟི་ཞུ་མཁན་དེ་དག་སྟེ། ། མཐོ་དམན་མེད་པའི་མི་ལ་བྱ་དགའ་གནང༌། ། ས་གཞི་གཏོར་བཤིག་གཏོང་མཁན་དེ་དག ། གཏོར་བཤིག་མཛད་པའི་དུས་ལའང་བབས་པའོ། ། ཞེས་གསུངས།
REV 11:19 དཀོན་མཆོག་གི་ཞིང་ཁམས་སུ་ཆགས་པའི་མཆོད་ཁང་ཆེན་མོ་ཕྱེ་ནས། དེའི་ནང་ལ་ཁོང་གི་ཞལ་ཆད་ཀྱི་རྟེན་སྒམ་མཐོང་བར་གྱུར། གློག་འཁྱུག་པ་དང༌། སྒྲ་སྣ་ཚོགས། འབྲུག་སྒྲ ས་ཡོམ། སེར་བ་ཆེན་པོ་བྱུང་ངོ༌། །
REV 12:1 ནམ་མཁའ་ལ་ངོ་མཚར་ཅན་གྱི་རྟགས་ཤིག་མཐོང་བར་གྱུར་ཏེ། བུད་མེད་ཅིག་གོས་ལ་ཉི་མ་གྱོན་པ་དང༌། རྐང་པའི་འོག་ཏུ་ཟླ་བ་དང༌། མགོ་ལ་སྐར་མ་བཅུ་གཉིས་ཀྱི་ཅོད་པན་ཡོད།
REV 12:2 ཁོ་མོ་མངལ་དང་ལྡན་པས་སྐྱེ་ཟུག་བྱུང་བས་ངུ་འབོད་བཏོན།
REV 12:3 དེ་ནས་ནམ་མཁའ་ལ་ངོ་མཚར་ཅན་གྱི་རྟགས་གཞན་ཞིག་མཐོང་བར་གྱུར་ཏེ། མགོ་བདུན་དང་རྭ་ཅོ་བཅུ་ཡོད་པའི་འབྲུག་དམར་པོ་ཆེན་པོ་ཞིག་བྱུང་སྟེ། མགོ་རེ་རེ་ལ་ཅོད་པན་རེ་རེ་ཡོད།
REV 12:4 དེས་ནམ་མཁའི་སྐར་མ་གསུམ་ཆ་གཅིག་མཇུག་མ་བརྒྱབ་ནས་ས་གཞི་ལ་འཕངས། ཁོ་མོའི་བུ་དེ་སྐྱེས་རྗེས་ཟ་བའི་ཆེད་དུ་འབྲུག་དེ་མངལ་དང་ལྡན་པའི་བུད་མེད་ཀྱི་མདུན་དུ་བསྡད།
REV 12:5 ཁོ་མོ་ལ་སྲས་ཤིག་སྐྱེས། ཁོང་ནི་ལྕགས་རྒྱུག་གིས་མི་རིགས་ཐམས་ཅད་ལ་དབང་སྒྱུར་མཁན་དུ་འགྱུར། ཁོ་མོའི་སྲས་དེ་དཀོན་མཆོག་དང་ཁོང་གི་བཞུགས་ཁྲིའི་མདུན་དུ་ཕྲོགས་ནས།
REV 12:6 ཁོ་མོ་འབྲོག་སྟོང་དུ་བྲོས། དེར་ཉི་མ་ཆིག་སྟོང་ཉིས་བརྒྱ་དྲུག་ཅུའི་བར་དུ་གསོ་སྐྱོང་བྱེད་པའི་ཕྱིར་དཀོན་མཆོག་གིས་སྔར་ནས་གནས་ཤིག་བཤམས་པར་མཛད།
REV 12:7 ཡང་དཀོན་མཆོག་གི་ཞིང་ཁམས་སུ་དམག་བྱུང་སྟེ་ཕོ་ཉ་མཆོག་མི་ཀ་ཨེལ་དང་དེའི་ཕོ་ཉ་རྣམས་ཀྱིས་འབྲུག་ལ་དམག་འདྲེན་པ་དང༌། འབྲུག་དང་དེའི་ཕོ་ཉ་རྣམས་ཀྱིས་འཐབས་ཀྱང༌།
REV 12:8 ཕམ་ནས་ཕྱིན་ཆད་ཞིང་ཁམས་སུ་གནས་མི་སྲིད་པར་གྱུར།
REV 12:9 གནའ་བོའི་དུས་ནས་ཡོད་པ། སྦྲུལ་དང་སཱ་ཏན་ཞེས་བྱ་བ། འཇིག་རྟེན་གྱི་མི་རྣམས་ལ་བསླུ་བྲིད་བྱེད་མཁན་འབྲུག་ཆེན་པོ་དེ་རང་གི་ཕོ་ཉ་དང་བཅས་པ་ས་གཞི་ལ་མར་འཕངས།
REV 12:10 ཡང་དཀོན་མཆོག་གི་ཞིང་ཁམས་ནས་ངས། ངེད་ཀྱི་དཀོན་མཆོག་གི་དྲུང་དུ་ང་ཚོ་ཡི། ། སྤུན་ཟླ་རྣམས་ལ་ཉིན་མཚན་ཀུན་ཏུ་ནི། ། སྐྱོན་འདོགས་བྱེད་མཁན་དེ་མར་འཕངས་པས་ན། ། ངེད་ཀྱི་དཀོན་མཆོག་གི་ནི་ཐར་པ་དང༌། ། ནུས་སྟོབས་རྒྱལ་སྲིད་ཁོང་གི་མཱ་ཤི་ཀའི། ། དབང་ཆ་འདི་ཡང་འདི་རུ་ཕེབས་པའོ། །
REV 12:11 སྤུན་ཟླ་རྣམས་ཀྱིས་འཆི་བ་ལ་ཐུག་ཀྱང༌། ། རང་སྲོག་མ་ཆགས་ལུ་གུའི་སྐུ་ཁྲག་དང༌། ། ཁོང་ཚོའི་དཔང་པོ་བྱས་པའི་སྒོ་ནས་ནི། ། སྐྱོན་འདོགས་མཁན་དེ་རྒྱལ་བར་གྱུར་བའོ། །
REV 12:12 དེར་རྟེན་ནམ་མཁའ་དང་ནི་དེ་ཡི་ནང༌། ། བཞུགས་མཁན་ཐམས་ཅད་དགའ་བར་གྱིས་ཤིག་ཨང༌། ། འོན་ཏེ་ས་གཞི་དང་ནི་རྒྱ་མཚོ་དག ། ཁྱོད་ཚོ་ཡ་རེ་ང་སྟེ་གང་ལགས་ན། ། དུས་ཐུང་ལས་མེད་ཤེས་པའི་བདུད་རྒྱལ་དེ། ། ཁོང་ཁྲོ་ཆེན་པོས་ཁྱོད་ཚོའི་སར་བབས་སོ། ། ཞེས་གསུངས་པའི་སྐད་ཅིག་ཐོས།
REV 12:13 འབྲུག་གིས་རང་ས་གཞི་ལ་འཕངས་པ་ཤེས་ནས་སྲས་སྐྱེས་པའི་བུད་མེད་དེའི་རྗེས་སུ་བསྙེགས།
REV 12:14 འོན་ཏེ་སྦྲུལ་གྱི་རྩ་ནས་འབྲོག་སྟོང་དུ་བཤམས་པར་མཛད་པའི་གནས་ལ་འཕུར་བའི་ཕྱིར་ཁོ་མོ་ལ་བྱ་གླག་ཆེན་པོའི་གཤོག་པ་གཉིས་གནང༌། དེར་ཁོ་མོ་དུས་ཤིག་དང༌། དུས་རྣམས། དུས་ཕྱེད་ཀའི་བར་དུ་གསོ་སྐྱོང་འབྱུང་བར་འགྱུར།
REV 12:15 ཆུ་ལོག་གི་ནང་ལ་འཁྱེར་བའི་ཆེད་དུ་སྦྲུལ་གྱིས་རང་གི་ཁ་ནས་བུད་མེད་དེའི་རྗེས་སུ་གཙང་པོ་དང་འདྲ་བའི་ཆུ་བཏང་ཡང༌།
REV 12:16 ས་གཞི་ཡིས་བུད་མེད་དེ་ལ་རོགས་པ་བྱས་ཏེ། རང་གི་ཁ་ཕྱེ་ཞིང༌། འབྲུག་གིས་རང་གི་ཁ་ནས་བཏང་བའི་ཆུ་མིད།
REV 12:17 དེའི་ཕྱིར་འབྲུག་ནི་བུད་མེད་ལ་ཤིན་ཏུ་ཁྲོས་ནས། ཁོ་མོའི་བུ་རྒྱུད་གཞན་རྣམས་ཏེ། དཀོན་མཆོག་གི་བཀའ་སྲུང་ཞིང༌། ཡེ་ཤུའི་དཔང་པོ་ལ་རྟེན་པ་རྣམས་ལ་དམག་འདྲེན་དུ་ཕར་སོང༌། དེ་ནས་འབྲུག་ནི་རྒྱ་མཚོའི་འགྲམ་གྱི་བྱེ་མའི་སྟེང་དུ་ལངས་ནས་བསྡད་དོ། །
REV 13:1 དེ་ནས་ངས་རྒྱ་མཚོའི་ནང་ནས་འཐོན་པའི་གཅན་གཟན་ཞིག་མཐོང༌། དེ་ལ་རྭ་ཅོ་བཅུ་དང༌། མགོ་བདུན། རྭ་ཅོའི་སྟེང་ལ་ཅོད་པན་བཅུ། མགོ་རྣམས་ལ་དཀོན་མཆོག་ལ་སྐུར་བ་འདེབས་པའི་མིང་ཡོད།
REV 13:2 ངས་མཐོང་བའི་གཅན་གཟན་ནི་གཟིག་དང་འདྲ་བ་ཡིན་ཏེ། དེའི་རྐང་པ་རྣམས་ནི་དོམ་གྱི་རྐང་པ་དང་འདྲ་བ་དང༌། དེའི་ཁ་ནི་སེང་གེའི་ཁ་དང་འདྲ་བ་ཡིན། འབྲུག་གིས་རང་གི་ནུས་མཐུ་དང༌། བཞུགས་ཁྲི་དང༌། དབང་ཆ་ཆེན་པོ་གཅན་གཟན་དེ་ལ་སྟེར།
REV 13:3 དེའི་མགོ་ནང་ནས་གཅིག་ལ་འཆི་ལ་ཐུག་པའི་རྨ་དང་འདྲ་བ་ཞིག་ཡོད་ཀྱང༌། རྨ་དེ་གསོས་པར་གྱུར་བས། འཇིག་རྟེན་ཡོངས་ཡ་མཚན་སྐྱེས་ཏེ་གཅན་གཟན་དེའི་རྗེས་སུ་འབྲངས།
REV 13:4 འབྲུག་གིས་རང་གི་དབང་གཅན་གཟན་དེ་ལ་སྟེར་བའི་རྐྱེན་གྱིས་ཁོ་ཚོས་འབྲུག་ལ་བསྙེན་བཀུར་བྱས། གཅན་གཟན་ལ་ཡང་བསྟོད་པ་བྱས་ཏེ་“གཅན་གཟན་དེ་དང་འདྲ་བ་སུ་ཡིན། ཁོ་ལ་དམག་འདྲེན་ཐུབ་མཁན་སུ་ཡིན་”ཞེས་བཤད།
REV 13:5 རང་བསྟོད་བྱེད་དེ་དཀོན་མཆོག་ལ་སྐུར་བ་འདེབས་པ་དང༌། ཟླ་བ་བཞི་བཅུ་ཞེ་གཉིས་ཀྱི་བར་དུ་སྲིད་བྱེད་པའི་དབང་གཅན་གཟན་དེ་ལ་གནང་བ་ཡིན།
REV 13:6 དཀོན་མཆོག་ལ་སྐུར་བ་འདེབས་པའི་ཕྱིར། དེས་ཁོང་གི་མཚན་དང༌། བཞུགས་གནས་ཏེ་དཀོན་མཆོག་གི་ཞིང་ཁམས་སུ་བཞུགས་པ་རྣམས་ལ་སྨད་ར་གཏོང་བར་བརྩམས།
REV 13:7 ཡང་དཀོན་མཆོག་གི་མི་རྣམས་ལ་དམག་འདྲེན་ཏེ་ཁོ་རྣམས་ལས་རྒྱལ་བ་དང༌། ཚོ་པ། མི་རིགས། སྐད་རིགས། རྒྱལ་ཁབ་ཐམས་ཅད་ལ་སྲིད་བྱེད་པའི་དབང་ཆ་ཁོ་ལ་གནང་བ་ཡིན།
REV 13:8 འཇིག་རྟེན་གྱི་མི་ཐམས་ཅད་དེ། འཇིག་རྟེན་གསར་དུ་བཀོད་པའི་སྔོན་ནས་བཀྲོངས་པའི་ལུ་གུའི་དཔག་ཏུ་མེད་པའི་ཚེའི་མདོ་ལ་མ་འཁོད་པ་རྣམས་ཀྱིས་གཅན་གཟན་དེ་ལ་བསྙེན་བཀུར་བྱེད་པར་འགྱུར།
REV 13:9 རྣ་བ་ཡོད་པ་རྣམས་ཀྱིས་ཉོན་ཅིག
REV 13:10 བཙོན་དུ་བསྐོས་ན་བཙོན་དུ་འགྲོ ། གྲི་ཡིས་བསད་ན་གྲི་འོག་འཆི། ། འདི་ནི་དཀོན་མཆོག་གི་མི་རྣམས་ལ་བཟོད་པ་དང་དད་པའི་སྐུལ་མ་ཞིག་ཡིན།
REV 13:11 དེ་ནས་ངས་ས་ནས་འཐོན་པའི་གཅན་གཟན་གཞན་ཞིག་མཐོང༌། དེ་ལ་ལུ་གུ་ལྟར་རྭ་ཅོ་གཉིས་ཡོད་དེ་འབྲུག་ལྟར་སྨྲས།
REV 13:12 གཅན་གཟན་དང་པོའི་དབང་ཐམས་ཅད་དེའི་དྲུང་དུ་སྒྱུར། དེས་ས་གཞི་དང་དེར་ཡོད་པ་རྣམས་ཀྱིས་འཆི་ལ་ཐུག་པའི་རྨ་གསོས་པར་གྱུར་བའི་གཅན་གཟན་དང་པོ་ལ་བསྙེན་བཀུར་བྱེད་དུ་འཇུག
REV 13:13 དེས་མི་རྣམས་ཀྱི་མཐོང་སར་ནམ་མཁའ་ནས་ས་གཞི་ལ་མེ་འབེབས་པ་ཙམ་དུ་ངོ་མཚར་བའི་རྟགས་སྟོན།
REV 13:14 གཅན་གཟན་དང་པོའི་དྲུང་དུ་ངོ་མཚར་བའི་རྟགས་སྟོན་པར་བཅུག་པའི་དབང་གིས་ས་གཞི་ལ་སྡོད་པ་རྣམས་ལ་བསླུ་བྲིད་བྱས། ཁོ་རྣམས་ལ་རལ་གྲི་ཡིས་རྨ་བཟོས་ཀྱང་སླར་གསོན་པོར་གྱུར་བའི་གཅན་གཟན་གྱི་འདྲ་སྐུ་བཟོ་དགོས་པའི་མངག་བྱ་བྱས།
REV 13:15 ཡང་གཅན་གཟན་གཉིས་པ་ལ་གཅན་གཟན་དང་པོའི་འདྲ་སྐུ་ཡིས་གཏམ་སྨྲ་བའི་ཕྱིར་དབུགས་གཏོང་བའི་ནུས་མཐུ་གནང་བས་འདྲ་སྐུ་དེས་གཏམ་བྱེད་པར་གྱུར་ཞིང༌། གཅན་གཟན་དང་པོའི་འདྲ་སྐུ་ལ་བསྙེན་བཀུར་མི་བྱེད་པ་ཐམས་ཅད་གསོད་དུ་འཇུག
REV 13:16 དེ་མ་ཟད་གཅན་གཟན་དེས་མི་མཐོ་དམན་དང༌། ཕྱུག་པོ་དང་དབུལ་པོ། རང་དབང་ཅན་དང་བྲན་གཡོག་ཐམས་ཅད་ཀྱི་ལག་པ་གཡས་པའམ། དཔྲལ་བ་ལ་རྟགས་ཤིག་རྒྱག་ཏུ་འཇུག
REV 13:17 དེ་ནི་གཅན་གཟན་དང་པོའི་རྟགས་ཏེ། དེའི་མིང་ངམ། དེའི་མིང་གི་ཨང་གྲངས་དང་ལྡན་པ་མ་གཏོགས་པར་མི་སུས་ཀྱང་ཉོ་འཚོང་བྱེད་མི་ཆོག་པའི་ཕྱིར་རོ།
REV 13:18 དོན་དེ་རྟོགས་པར་ཤེས་རབ་དགོས། ཤེས་རབ་ལྡན་པ་སུས་ཀྱང་གཅན་གཟན་གྱི་ཨང་གྲངས་རྩི་དགོས། གང་ལགས་ཤེ་ན། ཨང་གྲངས་དེ་ནི་མི་ཞིག་གི་ཨང་གྲངས་ཡིན་ཏེ། དྲུག་བརྒྱ་དྲུག་ཅུ་རེ་དྲུག་ཡིན་ནོ། །
REV 14:1 དེ་ནས་ངས་ལུ་གུ་དེ་རི་བོ་ཙི་ཡོན་ལ་བཞེངས་ཏེ། ཁོང་གི་མཚན་དང་ཁོང་གི་ཡབ་ཀྱི་མཚན་ཁོ་ཚོའི་དཔྲལ་བ་ལ་བྲིས་པའི་མི་ཆིག་འབུམ་བཞི་ཁྲི་བཞི་སྟོང་ཁོང་དང་མཉམ་དུ་ཡོད་པ་མཐོང༌།
REV 14:2 ཡང་དཀོན་མཆོག་གི་ཞིང་ཁམས་ནས་ངས་རྦབ་ཆུ་ཆེན་པོ་ཞིག་གི་འུར་སྒྲ་དང༌། འབྲུག་སྒྲ་ཆེན་པོ་དང་འདྲ་བའི་གསུང་སྐད་ཅིག་ཐོས། དེ་ནི་པི་ཝང་གཏོང་བའི་སྒྲ་ལྟར་ཡིན།
REV 14:3 ཁོང་ཚོས་བཞུགས་ཁྲི་དང༌། སེམས་ཅན་བཞི་པོ་དང༌། རྒན་པོ་རྣམས་ཀྱི་མདུན་དུ་མགུར་མ་གསར་པ་ཞིག་བཞེས། ས་གཞི་ལས་བླུ་རིན་གྱིས་ཉོས་པའི་མི་ཆིག་འབུམ་བཞི་ཁྲི་བཞི་སྟོང་མ་གཏོགས་པར་སུས་ཀྱང་མགུར་མ་དེ་སློབ་མི་ཐུབ།
REV 14:4 དེ་རྣམས་ནི་བུད་མེད་རྣམས་ཀྱིས་མི་གཙང་བར་མི་བྱེད་མཁན་ཡིན་ཏེ་བུད་མེད་དང་འདུས་མ་མྱོང་བ་རྣམས་ཡིན། ལུ་གུ་གང་ཕེབས་ནའང་ཁོང་གི་རྗེས་སུ་འབྲང༌། དེ་རྣམས་ནི་དཀོན་མཆོག་དང་ལུ་གུ་ལ་ལོ་ཏོག་གི་ཕུད་ལྟར་མཆོད་པ་ཕུལ་བའི་ཕྱིར་མི་རྣམས་ཀྱི་ནང་ནས་བླུ་རིན་གྱིས་ཉོས་པ་ཡིན།
REV 14:5 ཁོང་ཚོས་རྫུན་གཏམ་མ་བཤད་དེ་སྐྱོན་མེད་པ་ཡིན།
REV 14:6 དེ་ནས་ངས་ཕོ་ཉ་གཞན་ཞིག་ནམ་མཁའི་དབྱིངས་སུ་འཕུར་བ་མཐོང༌། དེ་ལ་རྒྱལ་ཁབ་དང༌། ཚོ་པ། སྐད་རིགས། མི་རིགས་ཏེ་ས་གཞི་ལ་སྡོད་པ་ཐམས་ཅད་ལ་སྒྲོག་པའི་ཆེད་དུ་རྒྱུན་དུ་གནས་པའི་འཕྲིན་བཟང་ཡོད།
REV 14:7 ཁོང་གིས་སྐད་ཆེན་པོས་“དཀོན་མཆོག་གིས་ཁྲིམས་གཅོད་མཛད་པའི་དུས་ལ་བབས་པས་ཁོང་ལ་བཀུར་སྟི་བྱེད་ཅིང་བསྟོད་པ་ཕུལ་ཞིག ཞིང་ཁམས་དང༌། ས་གཞི། རྒྱ་མཚོ། ཆུ་མིག་འགོད་པ་གནང་མཁན་ལ་བསྙེན་བཀུར་ཞུས་ཤིག་”ཅེས་གསུངས།
REV 14:8 དེ་ནས་ཕོ་ཉ་གཉིས་པ་ཞིག་བྱུང་བ་དང༌། ཁོང་གིས་“མི་རིགས་ཀུན་ལ་རང་གི་ལོག་གཡེམ་གྱི་རྒུན་ཆང་འཐུང་དུ་འཇུག་པས། སྦ་བི་ལོན་གྲོང་ཁྱེར་ཆེན་མོ་འཇིག་པར་གྱུར་རོ། ཡོངས་སུ་འཇིག་པར་གྱུར་རོ་”ཞེས་གསུངས།
REV 14:9 དེ་ནས་ཕོ་ཉ་གསུམ་པ་ཞིག་བྱུང་བ་དང༌། ཁོང་གིས་སྐད་ཆེན་པོས་“གལ་ཏེ་སུ་ཞིག་གིས་གཅན་གཟན་དང་དེའི་འདྲ་སྐུ་ལ་བསྙེན་བཀུར་བྱས་པ་དང༌། ཁོའི་དཔྲལ་བའམ་ལག་ལ་རྟགས་ཤིག་ཐོབ་ན།
REV 14:10 ཁོས་ཀྱང་དཀོན་མཆོག་གི་ཐུགས་ཁྲོའི་མཆོད་ཞལ་ལ་བླུགས་ཏེ་དཀོན་མཆོག་གི་ཐུགས་ཁྲོ་ཡིན་པའི་རྒུན་ཆང་ལྷད་མེད་པ་འཐུང་བར་འགྱུར། དཀོན་མཆོག་གི་ཕོ་ཉ་དམ་པ་རྣམས་དང༌། ལུ་གུའི་མདུན་དུ་ཁོ་ནི་མེ་དང༌། མེ་འབར་བའི་མུ་ཟི་ཡིས་མནར་གཅོད་གཏོང་བར་འགྱུར།
REV 14:11 གཅན་གཟན་དང་དེའི་འདྲ་སྐུ་ལ་བསྙེན་བཀུར་བྱེད་མཁན་དང༌། སུས་དེའི་མིང་གི་རྟགས་ལེན་མཁན་རྣམས་ནི་ཉིན་མཚན་མེད་པར་ངལ་གསོ་མེད་པ་ཡིན་ཏེ། དེ་ཚོར་མནར་གཅོད་བྱེད་པའི་མེའི་དུ་བ་རྒྱུན་དུ་འཕྱུར་”ཞེས་གསུངས།
REV 14:12 འདི་ནི་དཀོན་མཆོག་གི་བཀའ་ལ་ཉན་ཞིང༌། ཡེ་ཤུ་ལ་དད་པ་བྱེད་མཁན་ཏེ་དཀོན་མཆོག་གི་མི་རྣམས་ཀྱིས་བཟོད་པ་སྒོམ་པའི་སྐུལ་མ་ཞིག་ཡིན།
REV 14:13 ཡང་ངས་དཀོན་མཆོག་གི་ཞིང་ཁམས་ནས་གསུངས་པའི་སྐད་གཅིག་གིས་“ད་ཕྱིན་ཆད་གཙོ་བོའི་ནང་ན་ཤི་བའི་གཤིན་པོ་རྣམས་བདེའོ་ཞེས་བྲིས་ཤིག་”ཅེས་གསུངས་པ་ཐོས། ཡང་དམ་པའི་ཐུགས་ཉིད་ཀྱིས་“ལགས་ཡིན། ཁོ་ཚོའི་འབྲས་བུ་ཁོ་ཚོའི་རྗེས་སུ་འབྲང་བས་དེ་ཚོའི་དཀའ་ལས་ནས་ངལ་གསོ་འཐོབ་པར་འགྱུར་”ཞེས་གསུངས།
REV 14:14 དེ་ནས་ངས་སྤྲིན་པ་དཀར་པོ་ཞིག་དང༌། དེའི་སྟེང་དུ་མིའི་བུ་དང་འདྲ་བ་ཞིག་བཞུགས་ཡོད་པ་མཐོང༌། ཁོང་གི་དབུ་ལ་གསེར་གྱི་ཅོད་པན་དང་ཕྱག་ལ་ཟོར་བ་རྣོན་པོ་ཞིག་ཡོད།
REV 14:15 ཕོ་ཉ་གཞན་ཞིག་མཆོད་ཁང་ནས་ཐོན་ཏེ་སྤྲིན་ལ་བཞུགས་པ་ལ་སྐད་ཆེན་པོས་“ས་གཞིའི་ལོ་ཏོག་ཡོངས་སུ་སྨིན་ཞིང༌། རྔ་བའི་དུས་ལ་བབས་པས་ཟོར་བ་རྒྱག་སྟེ་རྔ་བར་མཛོད་”ཅེས་གསུངས།
REV 14:16 སྤྲིན་ལ་བཞུགས་པ་ཁོང་གིས་རང་གི་ཟོར་བ་ས་གཞིའི་སྟེང་ལ་བརྒྱབ་ནས་དེ་བརྔས།
REV 14:17 དེ་ནས་ཕོ་ཉ་གཞན་ཞིག་དཀོན་མཆོག་གི་ཞིང་ཁམས་སུ་ཡོད་པའི་མཆོད་ཁང་གི་ནང་ནས་ཐོན་ཞིང༌། དེ་ལའང་ཟོར་བ་རྣོན་པོ་ཞིག་ཡོད།
REV 14:18 ཡང་ཕོ་ཉ་གཞན་ཞིག་མེ་ལ་དབང་སྒྱུར་མཁན་དེ་མཆོད་ཁྲི་ནས་ཐོན་ཞིང༌། ཁོང་གིས་ཟོར་བ་རྣོན་པོ་ཡོད་པ་ལ་སྐད་ཆེན་པོས་“རྒུན་འབྲུམ་སྨིན་པས་ས་གཞིའི་རྒུན་འབྲུམ་ཤིང་ལ་ཁྱེད་ཀྱི་ཟོར་བ་རྒྱག་ཅིང་དེའི་རྒུན་འབྲུམ་ཆག་པ་སྡུད་ཅིག་”ཅེས་གསུངས།
REV 14:19 ཕོ་ཉ་དེས་ས་གཞི་ལ་ཟོར་བ་བརྒྱབ་ནས་རྒུན་འབྲུམ་གྱི་ཆག་པ་བསྡུས་ཏེ། དཀོན་མཆོག་གི་ཐུགས་ཁྲོ་ཡིན་པའི་རྒུན་ཆང་འཚིར་བྱེད་ཀྱི་ཆང་གཞོང་ཆེན་པོར་འཕངས།
REV 14:20 གྲོང་ཁྱེར་གྱི་ཕྱི་ལོགས་སུ་རྒུན་འབྲུམ་བཙིར་ཏེ་ཆང་གཞོང་དེ་ནས་རིང་ཚད་སྤྱི་ལེ་གསུམ་བརྒྱ་ཙམ་དང་མཐོ་ཚད་སྨི་གཅིག་དང་ཕྱེད་ཀ་ཙམ་གྱི་ཁྲག་ཐོན་ནོ། །
REV 15:1 དེ་ནས་ངས་དཀོན་མཆོག་གི་ཞིང་ཁམས་སུ་རྟགས་ཆེ་ཞིང་ཡ་མཚན་ཆེན་པོ་ཞིག་མཐོང་སྟེ། ཕོ་ཉ་བདུན་གྱིས་དཀོན་མཆོག་གི་ཐུགས་ཁྲོ་རྫོགས་པའི་ཆག་སྒོ་མཐའ་མ་བདུན་པོ་དེ་ཚོ་འཁྱེར་ཡོད།
REV 15:2 ངས་མེ་དང་འདྲེས་པའི་ཤེལ་གྱི་རྒྱ་མཚོ་འདྲ་བ་ཞིག་དང༌། དེའི་འགྲམ་ལ་གཅན་གཟན་དང༌། དེའི་འདྲ་སྐུ་དང་དེའི་མིང་གི་ཨང་གྲངས་ལས་རྒྱལ་བ་རྣམས་དཀོན་མཆོག་གི་པི་ཝང་འཁྱེར་བ་མཐོང༌།
REV 15:3 ཁོ་ཚོས་དཀོན་མཆོག་གི་ཞབས་ཕྱི་མོ་ཤེའི་མགུར་མ་དང༌། ལུ་གུའི་མགུར་མ་བཞེས་ཏེ། གཙོ་བོ་དཀོན་མཆོག་དབང་ཀུན་ནི། ། ཁྱེད་ཀྱི་མཛད་པ་ངོ་མཚར་ཆེ། ། མི་རིགས་ཡོངས་ཀྱི་རྒྱལ་པོ་ལགས། ། ཁྱེད་ཀྱི་འཕྲིན་ལས་དྲང་བདེན་ཆེ། །
REV 15:4 སུ་ཞིག་ཁྱེད་ལ་མི་བཀུར་ལ། ། ཁྱེད་མཚན་གཟི་བརྗིད་མི་རྩི་ཀྱེ། ། ཁྱེད་ནི་དམ་པ་གཅིག་པུ་སྟེ། ། མི་ཀུན་ཁྱེད་མདུན་ཕྱག་འཚལ་འོང༌། ། གཞུང་དྲང་མཛད་པ་མངོན་ཕྱིར་རོ། ། ཞེས་སོ། །
REV 15:5 དེ་རྗེས་ངས་བལྟས་ཏེ་དཀོན་མཆོག་གི་ཞིང་ཁམས་སུ་མཆོད་ཁང་གི་དཔང་པོའི་གུར་མཆོག་ཕྱེས་པ་མཐོང༌།
REV 15:6 ཆག་སྒོ་བདུན་འཁྱེར་བའི་ཕོ་ཉ་བདུན་མཆོད་ཁང་གི་ནང་ནས་ཐོན། ཁོང་རྣམས་ཀྱིས་དྲི་མ་མེད་པའི་ན་བཟའ་གཙང་ལ་བཀྲག་མདངས་ལྡན་པ་ཞིག་དང༌། སྐུ་བྲང་ལ་གསེར་གྱི་སྐུ་རས་བཞེས།
REV 15:7 སེམས་ཅན་བཞི་པོ་ལས་གཅིག་གིས་ཕོ་ཉ་བདུན་པོ་ལ་རྟག་ཏུ་གནས་པའི་དཀོན་མཆོག་གི་ཐུགས་ཁྲོ་ཡིས་གང་བའི་གསེར་གྱི་ཕོར་པ་བདུན་གནང་ནས།
REV 15:8 མཆོད་ཁང་ནི་དཀོན་མཆོག་གི་གཟི་བརྗིད་དང་ནུས་མཐུ་ལས་བྱུང་བའི་དུ་བས་གང་བས། ཕོ་ཉ་བདུན་གྱི་ཆག་སྒོ་བདུན་དེ་མ་ཚར་བའི་བར་དུ་མི་སུའང་དེའི་ནང་ལ་འགྲོ་མ་ཐུབ་བོ། །
REV 16:1 དེ་ནས་ངས་མཆོད་ཁང་ནས་ཕོ་ཉ་བདུན་པོ་ལ་གསུངས་པའི་སྐད་ཆེན་པོས་“སོང་ལ། དཀོན་མཆོག་གི་ཐུགས་ཁྲོའི་ཕོར་པ་བདུན་པོ་ནས་ས་གཞི་ལ་ཤོས་ཤིག་”ཅེས་གསུངས་པའི་སྐད་ཅིག་ཐོས།
REV 16:2 ཕོ་ཉ་དང་པོ་སོང་ནས་རང་གི་ཕོར་པ་ནས་ས་གཞི་ལ་བཤོས་ཏེ། གཅན་གཟན་གྱི་རྟགས་ལྡན་ཞིང་དེའི་འདྲ་སྐུ་ལ་བསྙེན་བཀུར་བྱས་པའི་མི་རྣམས་ལ་གཟེར་རྒྱག་པའི་རྨ་རྣག་ཅན་དུ་གྱུར།
REV 16:3 ཕོ་ཉ་གཉིས་པས་རང་གི་ཕོར་པ་ནས་རྒྱ་མཚོ་ལ་བཤོས་ཏེ། རོའི་ཁྲག་དང་འདྲ་བར་གྱུར་ནས་རྒྱ་མཚོའི་སྲོག་ཆགས་ཐམས་ཅད་ཤིའོ།
REV 16:4 ཕོ་ཉ་གསུམ་པས་རང་གི་ཕོར་པ་ནས་གཙང་པོ་དང་ཆུ་མིག་རྣམས་བཤོས་ཏེ་ཁྲག་ཏུ་གྱུར།
REV 16:5 ཆུ་རྣམས་ཀྱི་ཕོ་ཉ་ཡིས། ད་ལྟ་བཞུགས་དང་སྔར་ཡོད་པའི། ། དམ་པ་ཁྱེད་ཀྱིས་འདི་ལྟ་བུར། ། ཁྲིམས་གཅོད་མཛད་པས་དྲང་བདེན་ཡིན། །
REV 16:6 དེ་ཚོས་ཁྱེད་ཀྱི་དམ་པ་དང༌། ། ལུང་སྟོན་པ་རྣམས་བསད་པས་ན། ། ས་སྟེང་ཁྲག་ཐོན་ཁྱེད་ཀྱིས་ནི། ། ཁོ་ཚོས་འཐུང་ཕྱིར་ཁྲག་ཀྱང་གནང༌། ། འདི་ལྟར་ཆད་པ་ཕོག་འོས་སོ། ། ཞེས་གསུངས་པ་ངས་ཐོས།
REV 16:7 ཡང་མཆོད་ཁྲི་ཡིས། ཀྱེ། གཙོ་བོ་དཀོན་མཆོག་དབང་ཀུན་ནི། ། ཁྱེད་ཀྱི་ཁྲིམས་གཅོད་དྲང་བདེན་ཡིན། ། ཞེས་གསུངས་པ་ངས་ཐོས།
REV 16:8 ཕོ་ཉ་བཞི་པས་རང་གི་ཕོར་པ་ནས་ཉི་མ་ལ་བཤོས་ནས། མི་རྣམས་མེས་སྲེག་པའི་དབང་དེ་ཉི་མ་ལ་གནང་བས།
REV 16:9 ཁོ་རྣམས་མེ་ཚན་དྲག་པོས་ཚིག་ནས། ཆག་སྒོ་དེའི་དབང་ཡོད་མཁན་དཀོན་མཆོག་ལ་བསྟོད་པ་མ་ཕུལ་བར་ཁོང་གི་མཚན་ལ་སྐུར་བ་བཏབ་ནས་རང་གི་སྤྱོད་པ་ངན་པ་མ་སྤངས་ཏེ་སེམས་མ་བསྒྱུར།
REV 16:10 ཕོ་ཉ་ལྔ་པས་རང་གི་ཕོར་པ་ནས་གཅན་གཟན་གྱི་ཁྲི་ལ་བཤོས་ནས། ཁོའི་རྒྱལ་སྲིད་མུན་ནག་ཏུ་བྱས་ཏེ་སྡུག་བསྔལ་ཆེན་པོ་མྱོང་བས་མི་རྣམས་ཀྱིས་རང་གི་ལྕེ་ལ་སོ་བརྒྱབ་པ་དང༌།
REV 16:11 རང་གི་ཟུག་དང་རྨ་ཡི་རྐྱེན་གྱིས་ཁོ་ཚོས་ཞིང་ཁམས་སུ་བཞུགས་མཁན་དཀོན་མཆོག་ལ་སྐུར་བ་བཏབ་ཅིང༌། རང་གི་སྤྱོད་པ་ངན་པ་མ་སྤངས་པར་སེམས་མ་བསྒྱུར།
REV 16:12 ཕོ་ཉ་དྲུག་པས་རང་གི་ཕོར་པ་ནས་གཙང་པོ་ཆེན་པོ་ཡུ་ཧྥ་ལ་ཏི་ལ་བཤོས་ནས། ཤར་ཕྱོགས་ནས་ཡོང་བའི་རྒྱལ་པོ་རྣམས་ཀྱི་ལམ་གྲ་སྒྲིག་བྱེད་པའི་ཕྱིར་དེའི་ཆུ་སྐམ་སར་གྱུར།
REV 16:13 ཡང་འབྲུག་གི་ཁ་དང༌། གཅན་གཟན་གྱི་ཁ། ལུང་སྟོན་པ་རྫུན་མའི་ཁ་ནས་ངས་སྦལ་པ་དང་འདྲ་བའི་གདོན་འདྲེ་མི་གཙང་བ་གསུམ་འཐོན་པ་མཐོང༌།
REV 16:14 དེ་ཚོ་ནི་ངོ་མཚར་བའི་རྟགས་སྒྲུབ་མཁན་གདོན་འདྲེ་ཡིན་ཏེ། དབང་ཀུན་ལྡན་པའི་དཀོན་མཆོག་གི་ཁྲིམས་གཅོད་ཉིན་མོར་འབྱུང་བའི་དམག་འཐབ་ཀྱི་ཆེད་དུ་འཛམ་གླིང་ཡོངས་ཀྱི་རྒྱལ་པོ་སྡུད་པའི་ཕྱིར་དེ་ཚོ་འཐོན།
REV 16:15 (“ཉོན་ཞིག ང་དུས་ངེས་མེད་ཀྱི་རྐུན་མ་ལྟར་ཡོང་སྟེ། གཅེར་བུ་མི་མཐོང་བ་དང༌། ངོ་ཚ་བར་མི་འགྱུར་བའི་ཕྱིར་གཉིད་མ་ལོག་པར་རང་གི་གོས་གྱོན་པ་དེ་བདེའོ་”)
REV 16:16 གདོན་འདྲེ་དེ་རྣམས་ཀྱིས་ཡ་ཧུ་དཱ་པའི་སྐད་དུ་ཧར་མ་གེ་ཌོན་ཞེས་ཟེར་བའི་ས་ཆར་རྒྱལ་པོ་རྣམས་བསྡུས།
REV 16:17 ཕོ་ཉ་བདུན་པས་རང་གི་ཕོར་པ་ནས་མཁའ་རླུང་ལ་བཤོས་ཏེ། མཆོད་ཁང་གི་བཞུགས་ཁྲི་ནས་གསུང་སྐད་ཆེན་པོས་“ད་འགྲུབ་བོ་”ཞེས་གསུངས་པ་དང༌།
REV 16:18 གློག་འཁྱུག་པ་དང༌། སྒྲ་སྣ་ཚོགས། འབྲུག་སྒྲ མིའི་རིགས་ས་ལ་བཀོད་པ་ནས་བཟུང་བྱུང་མ་མྱོང་བའི་ས་ཡོམ་དྲག་པོ་ཞིག་བྱུང༌།
REV 16:19 གྲོང་ཁྱེར་ཆེན་པོ་ཆ་གསུམ་དུ་གས་ཏེ། ས་གཞིའི་གྲོང་ཁྱེར་གཞན་རྣམས་འཇིག་པར་འགྱུར། དཀོན་མཆོག་གིས་སྦ་བི་ལོན་ཆེན་མོ་ཞེས་ཟེར་བའི་གྲོང་ཁྱེར་ཐུགས་སུ་དྲན་ནས་གྲོང་ཁྱེར་དེ་ལ་དཀོན་མཆོག་གི་ཐུགས་ཁྲོ་ཡིན་པའི་རྒུན་ཆང་གིས་གང་བའི་མཆོད་ཞལ་ནས་འཐུང་དུ་འཇུག
REV 16:20 གླིང་ཕྲན་ཐམས་ཅད་ཡལ་བ་དང་རི་རྣམས་མེད་པར་སོང༌།
REV 16:21 རེ་རེ་ལ་སྤྱི་རྒྱ་བཞི་བཅུའི་སེར་བ་ཆེན་པོ་ཡོད་པ་མི་རྣམས་ལ་བབས་ཤིང༌། ཆག་སྒོ་དེ་ལྟར་ཆེ་བའི་རྐྱེན་གྱིས་ཁོ་ཚོས་དཀོན་མཆོག་ལ་སྐུར་བ་བཏབ་བོ། །
REV 17:1 ཕོར་པ་བདུན་ཡོད་པའི་ཕོ་ཉ་བདུན་ལས་གཅིག་ངའི་རྩར་ཡོང་ནས་ང་ལ་“འདིར་ཤོག་ལ། ཆུ་མང་པོའི་སྟེང་ལ་སྡོད་པའི་སྨད་འཚོང་མ་ཆེན་མོའི་ཉེས་ཆད་ཁྱོད་ལ་སྟོན་པར་བྱ།
REV 17:2 ཁོ་མོ་དང་མཉམ་དུ་ས་གཞིའི་རྒྱལ་པོ་རྣམས་ཀྱིས་ལོག་གཡེམ་བྱས། ཁོ་མོའི་ལོག་གཡེམ་གྱི་རྒུན་ཆང་གིས་ས་གཞི་ལ་སྡོད་པ་རྣམས་ར་བཟི་བར་གྱུར་”ཞེས་གསུངས།
REV 17:3 དམ་པའི་ཐུགས་ཉིད་ཀྱི་དབང་འོག་ཏུ་ཕོ་ཉ་དེས་ང་དབེན་གནས་ཤིག་ལ་འཁྲིད་ཅིང༌། གཅན་གཟན་དམར་པོ་ལ་སྡོད་པའི་བུད་མེད་མཐོང༌། མགོ་བདུན་དང་རྭ་ཅོ་བཅུ་ཡོད་པའི་གཅན་གཟན་དེ་ནི་དཀོན་མཆོག་ལ་སྐུར་བ་འདེབས་པའི་མིང་གིས་ཁེངས།
REV 17:4 བུད་མེད་དེས་མདོག་དམར་པོ་དང་རྒྱ་སྨུག་གི་གོས་གྱོན་ཏེ། གསེར་དང༌། ནོར་བུ་རིན་པོ་ཆེ་དང༌། མུ་ཏིག་རྣམས་ཀྱིས་བརྒྱན། ཁོ་མོའི་ལག་ཏུ་རང་གི་ལོག་གཡེམ་གྱི་དྲི་མ་དང་ལོག་གཡེམ་གྱི་རྫས་མི་གཙང་བ་རྣམས་ཀྱིས་གང་བའི་གསེར་གྱི་ཕོར་པ་ཞིག་ཡོད།
REV 17:5 ཁོ་མོའི་དཔྲལ་བ་ལ། སྦ་བི་ལོན་གྲོང་ཁྱེར་ཆེན་མོ། སྨད་འཚོང་མ་རྣམས་དང་ས་སྟེང་མི་གཙང་བ་རྣམས་ཀྱི་ཨ་མ་ཞེས་པའི་གསང་བའི་མིང་བྲིས་ཡོད།
REV 17:6 བུད་མེད་དེ་དཀོན་མཆོག་གི་མི་རྣམས་ཀྱི་ཁྲག་དང༌། ཡེ་ཤུའི་དཔང་པོའི་ཁྲག་གིས་བཟི་ཡོད་པ་ངས་མཐོང༌། ཁོ་མོ་མཐོང་ནས་ཡ་མཚན་ཆེན་པོ་སྐྱེས།
REV 17:7 ཕོ་ཉ་དེས་ང་ལ་“ཅིའི་ཕྱིར་ཡ་མཚན་པོར་གྱུར། བུད་མེད་དེ་དང༌། ཁོ་མོ་འཁུར་བའི་མགོ་བདུན་དང་རྭ་ཅོ་བཅུ་ཡོད་པའི་གཅན་གཟན་གྱི་གསང་བ་ཁྱོད་ལ་གསལ་བཤད་བྱེད་པར་བྱ།
REV 17:8 ཁྱོད་ཀྱིས་མཐོང་བའི་གཅན་གཟན་ནི་སྔར་ཡོད་པ་དང༌། ད་ལྟ་མེད་པ། རྗེས་སུ་གཏིང་མཐའ་མེད་པའི་དོང་ནས་འཐོན་ཞིང༌། འཇིག་པར་འགྲོ་བར་འགྱུར། ས་གཞི་ལ་སྡོད་མཁན་ཏེ། འཇིག་རྟེན་གསར་དུ་བཀོད་པ་ནས་དཔག་ཏུ་མེད་པའི་ཚེའི་མདོ་ལ་མིང་མ་འཁོད་པ་རྣམས་ཀྱིས་གཅན་གཟན་དེ་སྔར་ཡོད་པ། ད་ལྟ་མེད་པ། རྗེས་སུ་འོང་བ་མཐོང་ནས་ཡ་མཚན་དུ་འགྱུར།
REV 17:9 དོན་དེ་རྟོགས་པར་ཤེས་རབ་དགོས། མགོ་བདུན་པོ་ནི་བུད་མེད་བསྡད་ཡོད་པའི་རི་བདུན་དང༌། རྒྱལ་པོ་བདུན་མཚོན།
REV 17:10 རྒྱལ་པོ་དེ་རྣམས་ལས་རྒྱལ་པོ་ལྔ་ཤི་ཟིན། གཅིག་ད་ལྟ་ཡོད། གཞན་པ་དེ་ད་དུང་མ་འོང༌། འོང་ནས་དུས་ཐུང་ངུ་ལ་ངེས་པར་གནས་དགོས།
REV 17:11 སྔར་ཡོད་པ་དང༌། ད་ལྟ་མེད་པའི་གཅན་གཟན་ནི་རྒྱལ་པོ་བརྒྱད་པ་ཡིན་ཡང༌། རྒྱལ་པོ་བདུན་པོ་ལྟར་ཡིན་དེ་འཇིག་པར་འགྲོ་བར་འགྱུར།
REV 17:12 ཁྱོད་ཀྱི་མཐོང་བའི་རྭ་ཅོ་བཅུ་ནི་རྒྱལ་ཁམས་ད་དུང་མ་འཐོབ་པའི་རྒྱལ་པོ་བཅུ་ཡིན་ཏེ། ཁོ་ཚོ་ལ་གཅན་གཟན་དང་བཅས་པར་ཆུ་ཚོད་གཅིག་གི་བར་དུ་རྒྱལ་པོའི་དབང་འཐོབ་པར་འགྱུར།
REV 17:13 ཁོ་རྣམས་སེམས་མཐུན་ནས་རང་གི་དབང་གཅན་གཟན་ལ་གཏོད་པར་འགྱུར།
REV 17:14 ཁོ་ཚོས་ལུ་གུ་ལ་དམག་འདྲེན་ཡང༌། ལུ་གུས་རྒྱལ་པོ་དེ་རྣམས་ལས་རྒྱལ་བར་འགྱུར། གང་ལགས་ཤེ་ན། ལུ་གུ་ཁོང་ནི་གཙོ་བོ་རྣམས་ཀྱི་གཙོ་བོ་དང་རྒྱལ་པོ་རྣམས་ཀྱི་རྒྱལ་པོ་ཡིན་པས། ཁོང་དང་མཉམ་དུ་ཡོད་པ་རྣམས་ཏེ་བོས་པ་དང༌། བདམས་པ་དང༌། བློ་གཏད་ཆོག་པ་ཡིན་པས་སོ་”ཞེས་གསུངས།
REV 17:15 དེ་ནས་ཕོ་ཉ་དེས་ང་ལ་“ཁྱོད་ཀྱིས་མཐོང་བའི་སྨད་འཚོང་མ་སྡོད་པའི་ཆུ་རྣམས་ཀྱིས་མི་རིགས་དང༌། མང་ཚོགས། རྒྱལ་ཁབ། སྐད་རིགས་མཚོན།
REV 17:16 ཡང་ཁྱོད་ཀྱིས་མཐོང་བའི་རྭ་ཅོ་བཅུ་དང་གཅན་གཟན་གྱིས་སྨད་འཚོང་མ་ལ་སྡང་ནས་ཁོ་མོའི་རྒྱུ་ནོར་འཕྲོག་སྟེ་གོས་མེད་པར་བྱེད། ཁོ་མོའི་ཤ་ཟ་ཞིང་མེ་ཡིས་སྲེག་པར་འགྱུར།
REV 17:17 དཀོན་མཆོག་གི་དགོངས་པ་མ་སྒྲུབ་པའི་བར་དུ་རྒྱལ་པོ་བཅུ་སེམས་གཅིག་ཏུ་གྱུར་ནས་རང་གི་རྒྱལ་ཁམས་གཅན་གཟན་ལ་གཏོད་དུ་བཅུག་པའི་སྒོ་ནས་དཀོན་མཆོག་གིས་དེ་རྣམས་ལ་རང་གི་དོན་སྒྲུབ་ཏུ་འཇུག་པར་མཛད།
REV 17:18 ཁྱོད་ཀྱིས་མཐོང་བའི་བུད་མེད་དེས་ས་གཞིའི་རྒྱལ་པོ་རྣམས་ལ་དབང་སྒྱུར་བའི་གྲོང་ཁྱེར་ཆེན་མོ་མཚོན་”ཞེས་གསུངས་སོ། །
REV 18:1 དེའི་རྗེས་སུ་ངས་དཀོན་མཆོག་གི་ཞིང་ཁམས་ནས་འབབ་པའི་ཕོ་ཉ་དབང་ཆེན་པོ་དང་ལྡན་པ་ཞིག་མཐོང༌། དེའི་གཟི་བརྗིད་ཀྱི་འོད་ཟེར་ས་གཞི་ལ་འཕྲོ།
REV 18:2 ཁོང་གིས་སྐད་ཆེན་པོས། གྲོང་ཁྱེར་ཆེན་མོ་སྦ་བི་ལོན། ། དེ་ནི་འཇིག་སྟེ་བདུད་རྣམས་དང༌། ། འདྲེ་ཡི་གནས་ས་མི་གཙང་བ། ། མི་དགའི་འདབ་ཆགས་ཚང་དུ་གྱུར། །
REV 18:3 མི་རིགས་ཀུན་གྱིས་སྦ་བི་ལོན། ། ཁོ་མོའི་མི་གཙང་འདོད་ཆགས་ཀྱི། ། རྒུན་ཆང་བཏུངས་ཤིང་ས་གཞི་ཡི། ། རྒྱལ་པོ་རྣམས་ཀྱིས་ཁོ་མོ་དང༌། ། ལོག་གཡེམ་བྱས་ཤིང་ཚོང་དཔོན་རྣམས། ། ཁོ་མོའི་འདོད་ཡོན་བརྒྱུད་ནས་ཕྱུག ། ཞེས་གསུངས།
REV 18:4 དེ་ནས་ངས་དཀོན་མཆོག་གི་ཞིང་ཁམས་ནས་བྱུང་བའི་སྐད་གཞན་ཞིག་གིས། ང་ཡི་མི་རྣམས་ཁོ་མོ་ལྷན། ། སྡིག་ལས་མཉམ་དུ་མི་བྱེད་དང༌། ། ཁོ་མོའི་ཆག་སྒོ་མི་ཡོང་ཕྱིར། ། སྦ་བི་ལོན་ནས་ཐོན་ཤིག་ཨང༌། །
REV 18:5 དེ་ལྟར་བྱེད་པའི་རྒྱུ་མཚན་ནི། ། ཁོ་མོའི་སྡིག་པའི་ཕུང་པོ་དེ། ། ནམ་མཁར་ཐུག་ལྟར་དཀོན་མཆོག་གིས། ། ཁོ་མོའི་ཉེས་པ་དྲན་པར་མཛད། །
REV 18:6 ཁོ་མོས་གང་བྱས་ཁོ་མོ་ལ། ། དེ་ལྟར་གྱིས་ཤིག་དེ་ལས་ཀྱང༌། ། ལན་ནི་ལྡབ་གཉིས་ཁོ་མོར་འཇོལ། ། ཁོ་མོས་གྲ་སྒྲིག་བྱས་པ་ཡི། ། རྒུན་ཆང་དེ་ལས་ལྡབ་གཉིས་ཀྱིས། ། གར་བ་ཁོ་མོའི་ཕོར་པར་བླུགས། །
REV 18:7 ཁོ་མོས་ང་ལ་རྒྱལ་མོ་ཡིན། ། ཡུགས་མོ་མིན་ཞིང་ང་ལ་ནི། ། མྱ་ངན་ནམ་ཡང་མི་ཡོང་བསམས། ། དེ་ཕྱིར་ཁོ་མོས་རང་ཉིད་ལ། ། ཅི་ཙམ་བསྟོད་དང་ལོངས་སུ་སྤྱོད། ། དེ་ཙམ་གྱིས་ནི་སྡུག་པོ་དང༌། ། མྱ་ངན་ཁོ་མོར་གཏོང་ཞིག་ཨང༌། །
REV 18:8 དེའི་ཕྱིར་ཁོ་མོར་ཉིན་གཅིག་ནང༌། ། རིམས་ནད་དང་ནི་མྱ་ངན་དང༌། ། མུ་གེ་ཕོག་ཡོང་ཁོ་མོ་ལ། ། ཁྲིམས་གཅོད་མཛད་མཁན་སྟོབས་ཅན་གྱི། ། གཙོ་བོ་དཀོན་མཆོག་ཡིན་པས་ན། ། ཁོ་མོ་མེ་ཡིས་སྲེག་པར་འགྱུར། ། ཞེས་གསུངས།
REV 18:9 ཁོ་མོ་དང་མཉམ་དུ་རྒྱས་སྤྲོད་དང་ལོག་གཡེམ་བྱེད་མཁན་ས་གཞིའི་རྒྱལ་པོ་རྣམས་ཀྱིས་ཁོ་མོ་འཚིག་པ་ལས་འཐུལ་བའི་དུ་བ་མཐོང་བའི་ཚེ། ཁོ་མོའི་དོན་དུ་ངུ་ཞིང་སྨྲེ་སྔགས་འདོན་པར་འགྱུར།
REV 18:10 ཁོ་མོའི་སྡུག་བསྔལ་གྱིས་འཇིགས་ཤིང་རྒྱང་རིང་ནས་ཁོ་ཚོས། ཡ་རེ་ང༌། ཡ་རེ་ང༌། གྲོང་ཁྱེར་ཆེན་མོ་སྦ་བི་ལོན། ། བཙན་ཡང་ཁྱེད་ཀྱི་ཆད་པ་ནི། ། ཆུ་ཚོད་གཅིག་ཙམ་ཕོག་པར་གྱུར། ། ཞེས་བཤད་པར་འགྱུར།
REV 18:11 སུས་ཀྱང་དེ་ཚོའི་ཚོང་ཟོག་མི་ཉོ་བས། ས་གཞིའི་ཚོང་དཔོན་རྣམས་ཀྱིས་མོའི་དོན་དུ་ངུ་ཞིང་སྨྲེ་སྔགས་འདོན་པར་འགྱུར།
REV 18:12 ཚོང་ཟོག་དེ་རྣམས་ནི་གསེར་དང༌། དངུལ་དང༌། ནོར་བུ་རིན་པོ་ཆེ་དང༌། མུ་ཏིག་དང༌། རས་སྤུས་ལེགས་དང༌། རས་རྒྱ་སྨུག་དང༌། དར་གོས་དང༌། རས་དམར་པོ་དང༌། དྲི་ཞིམ་གྱི་ཤིང་རིགས་སྣ་ཚོགས་དང༌། གླང་ཆེན་གྱི་མཆེ་བ་ལས་བཟོས་པའི་དངོས་པོ་རིགས་སྣ་ཚོགས་དང༌། རིན་ཆེ་བའི་ཤིང་དང༌། ལི། ལྕགས། རྡོ་ཀ་མ་རུ་བཅས་ལས་བཟོས་པའི་དངོས་པོ་རིགས་སྣ་ཚོགས་དང༌།
REV 18:13 སྤོས་ཆུ་དང་སྣུམ་རྩ་ཆེན་རིགས་སྣ་ཚོགས་དང༌། བདུག་སྤོས་དང༌། རྒུན་ཆང་དང༌། སྐྱུར་རུ་ཤིང་གི་སྣུམ་དང༌། གྲོ་ཕྱེ། གྲོ་དང༌། ཕྱུགས་རིགས་དང༌། ལུག རྟ། ཤིང་རྟ་དང༌། བྲན་གཡོག་དང་མི་སྲོག་ཡིན་ནོ།
REV 18:14 ཁོ་ཚོས། ཁྱོད་ཀྱིས་གདུང་བའི་འབྲས་བུ་ཁྱོད་ལས་ཤོར། ། ཁྱོད་ཀྱི་རྒྱས་སྤྲོད་རྒྱུ་ནོར་མེད་པར་གྱུར། ། དེ་དག་ཁྱོད་ལ་ནམ་ཡང་འཐོབ་མི་འགྱུར། ། ཞེས་བཤད་པར་འགྱུར།
REV 18:15 དངོས་པོ་དེ་རྣམས་ཀྱི་ཚོང་དཔོན་ཁོ་མོ་ལས་ཕྱུག་པོར་འགྱུར་མཁན་རྣམས་ནི་ཁོ་མོའི་སྡུག་བསྔལ་གྱིས་འཇིགས་ལ་རྒྱང་རིང་ནས་ངུ་ཞིང་སྨྲེ་སྔགས་འདོན་པར་འགྱུར་དེ།
REV 18:16 ཡ་རེ་ང་ལ་ཡ་རེ་ང༌། ། རས་ནི་སྤུས་ལེགས་རྒྱ་སྨུག་དང༌། ། དམར་པོ་དེ་བཞིན་རིན་ཆེན་གསེར། ། ནོར་བུ་རིན་ཆེན་མུ་ཏིག་གིས། ། བརྒྱན་པའི་གྲོང་ཁྱེར་ཆེན་མོ་འདི། །
REV 18:17 ཆུ་ཚོད་གཅིག་ཙམ་དུས་ཐུང་ནས། ། རྒྱུ་ནོར་ཐམས་ཅད་ཕུང་བར་གྱུར། ། ཞེས་སོ། གྲུ་དཔོན་དང༌། འགྲུལ་པ། གྲུ་པ་ཐམས་ཅད་རྒྱ་མཚོ་ལས་འཚོ་བ་རྙེད་ཚད་ཐག་རིང་ནས།
REV 18:18 ཁོ་མོ་འཚིག་པ་ལས་འཐུལ་བའི་དུ་བ་མཐོང་བའི་ཚེ་སྐད་ཆེན་པོས་“གྲོང་ཁྱེར་ཆེན་མོ་འདི་ལྟར་གྱི་གྲོང་ཁྱེར་གཞན་གང་ན་ཡོད་དམ་”ཞེས་བོད།
REV 18:19 རང་གི་མགོ་ལ་ཐལ་བ་གཏོར་ནས་ངུ་ཞིང་སྨྲེ་སྔགས་འདོན་ཏེ་ཁོ་ཚོས་སྐད་ཆེན་པོས། ཡ་རེ་ང་ལ་ཡ་རེ་ང༌། ། སྔར་སོང་རྒྱ་མཚོར་གྲུ་ཡོད་པ། ། ཁོ་མོའི་ནོར་གྱིས་ཕྱུག་པོ་ཆགས། ། འདི་ལྟར་གྲོང་ཁྱེར་ཆེན་མོ་དེ། ། ཆུ་ཚོད་གཅིག་ལ་ཕུང་བར་གྱུར། །
REV 18:20 ཀྱེ་མ་མཁའ་དང་དམ་པ་རྣམས། ། སྐུ་ཚབ་པ་དང་ལུང་སྟོན་པ། ། དཀོན་མཆོག་གིས་ནི་ཁོ་མོ་ལ། ། གང་བྱས་པ་དེའི་ཁྲིམས་གཅོད་མཛད། ། དེས་ན་ཁྱེད་ཀྱིས་དགའ་བར་གྱིས། ། ཞེས་བཤད།
REV 18:21 དེ་ནས་ཕོ་ཉ་སྟོབས་ཅན་ཞིག་གིས་རང་འཐག་གི་རྡོ་ཆེན་པོ་དང་འདྲ་བ་ཞིག་བསྒྲུགས་ནས་རྒྱ་མཚོ་ལ་འཕངས་ཏེ། འདི་ལྟར་གྲོང་ཁྱེར་སྦ་བི་ལོན། ། ཆེན་པོ་འདི་ཡང་དྲག་པོ་ཡིས། ། འཕངས་ནས་ནམ་ཡང་མཐོང་མི་འགྱུར། །
REV 18:22 ཁྱོད་ནང་པི་ཝང་གཏོང་མཁན་དང༌། ། གླུ་ལེན་མཁན་དང་གླིང་བུ་མཁན། ། དུང་ཆེན་གཏོང་མཁན་དག་གི་དབྱངས། ། ནམ་ཡང་དེ་རུ་ཐོས་མི་འགྱུར། ། བཟོ་རིགས་གང་གི་བཟོ་པ་ཡང༌། ། ཁྱོད་ནང་ནམ་ཡང་ཡོད་མི་འགྱུར། ། དེ་བཞིན་རང་འཐག་གི་སྐད་ཀྱང༌། ། ཁྱོད་ཀྱི་ནང་དུ་ཐོས་མི་འགྱུར། །
REV 18:23 ཁྱོད་ཀྱི་ཚོང་དཔོན་ས་སྟེང་མི་ཆེན་ནི། ། མི་རིགས་ཐམས་ཅད་ཁྱོད་ཀྱི་མཐུ་བརྒྱབ་ནས། ། མགོ་སྐོར་བཏང་བས་མར་མེའི་འོད་དག་ནི། ། ཁྱོད་ནང་ནམ་ཡང་འཕྲོ་བར་མི་འགྱུར་རོ། ། མག་པ་བག་མའི་སྐད་ཀྱང་ཁྱོད་ནང་དུ། ། ནམ་ཡང་ཐོས་པའི་གོ་སྐབས་མེད་པར་འགྱུར། །
REV 18:24 ཁོ་མོའི་ནང་དུ་ལུང་སྟོན་པ་དང་ནི། ། དམ་པ་རྣམས་དང་ས་སྟེང་ལ་བསད་པ། ། ཐམས་ཅད་ཀྱི་ནི་ཁྲག་དག་དེར་འདུག་གོ ། ཅེས་གསུངས་སོ། །
REV 19:1 དེའི་རྗེས་སུ་ངས་དཀོན་མཆོག་གི་ཞིང་ཁམས་ནས་མི་ཚོགས་ཆེན་པོའི་སྐད་དང་འདྲ་བ་ཞིག་གིས། ཧ་ལེ་ལུ་ཡཱ། ངེད་ཀྱི་དཀོན་མཆོག་ལས་ཐར་པ་འབྱུང་ངོ༌། ། གཟི་བརྗིད་མངའ་དབང་ཁོང་ནི་མ་གཏོགས་མེད། །
REV 19:2 ཁོང་གི་ཁྲིམས་གཅོད་དྲང་བདེན་ཡིན། ། ལོག་གཡེམ་གྱིས་ནི་ས་གཞི་དེ། ། བསླུ་བྲིད་བྱེད་མཁན་སྨད་འཚོང་མ། ། ཆེན་མོར་ཁོང་གིས་ཁྲིམས་གཅོད་མཛད། ། མོ་ཡིས་ཁོང་གི་ཞབས་ཕྱི་བསད། ། དེ་ཡི་སྲོག་ལེན་བཞེས་པས་སོ། ། ཞེས་སྨྲ་བ་ཐོས་བྱུང༌།
REV 19:3 སླར་ཡང་ཁོང་ཚོས་སྐད་ཆེན་པོས། ཧ་ལེ་ལུ་ཡཱ། ཁོ་མོ་འཚིག་པའི་དུ་བ་ནི། ། རྒྱུན་ཆད་མེད་པར་འཕྱུར་བར་འགྱུར། ། ཞེས་གསུངས།
REV 19:4 རྒན་པོ་ཉི་ཤུ་རྩ་བཞི་པོ་དང་སེམས་ཅན་བཞི་པོས་བཞུགས་ཁྲི་ལ་བཞུགས་པའི་དཀོན་མཆོག་ལ་ཕྱག་བཙལ་ཏེ་“ཨ་མེན། ཧ་ལེ་ལུ་ཡཱ་”ཞེས་གསུངས།
REV 19:5 དེ་ནས་བཞུགས་ཁྲི་ནས་གསུང་སྐད་ཅིག་བྱུང་སྟེ། དཀོན་མཆོག་ཞབས་ཕྱི་གཏོགས་པ་ཀུན། ། མཐོ་དམན་མེད་པ་བཀུར་སྟི་ཡིས། ། ངེད་ཀྱི་དཀོན་མཆོག་ལ་བསྟོད་དོ། །
REV 19:6 དེ་ནས་ངས་མི་ཚོགས་ཆེན་པོའི་སྐད་དང༌། རྦབ་ཆུ་ཆེན་པོ་ཞིག་གི་འུར་སྒྲ་དང༌། འབྲུག་སྒྲ་དང་འདྲ་བའི་སྐད་ཅིག་གིས། ཧ་ལེ་ལུ་ཡཱ་གཙོ་བོ་ལགས། ། ངེད་ཀྱི་དཀོན་མཆོག་དབང་ཀུན་ལྡན། ། ཁོང་གི་རྒྱལ་སྲིད་སྐྱོང་བས་སོ། །
REV 19:7 ལུ་གུའི་བག་སྟོན་དུས་ལ་བབས་པ་དང༌། ། ཁོང་གི་བག་མས་གྲ་སྒྲིག་བྱས་པ་ཡིས། ། ཁོང་ལ་བསྟོད་པ་འབུལ་ཞིང་དགའ་བར་གྱིས། །
REV 19:8 དཀར་གཙང་སྤུས་ལེགས་རས་དེ་བག་མར་གནང༌། ། ཞེས་ཐོས། (རས་སྤུས་ལེགས་དེས་དད་ལྡན་རྣམས་ཀྱི་བྱ་བ་བཟང་པོ་མཚོན་ནོ་)
REV 19:9 དེ་ནས་ཕོ་ཉ་དེས་ང་ལ་“ལུ་གུའི་བག་སྟོན་ལ་བོས་པ་རྣམས་བདེའོ་ཞེས་བྲིས་ཤིག་”ཅེས་གསུངས་པ་དང༌། ཁོང་གིས་ང་ལ་“བཀའ་འདི་ནི་དཀོན་མཆོག་གི་གསུང་བདེན་པའོ་”ཞེས་གསུངས།
REV 19:10 ངས་ཁོང་ལ་ཕྱག་འཚལ་བར་བརྩམས་ནས་ཁོང་གིས་ང་ལ་“དེ་ལྟར་མ་བྱེད་ཅིག ང་ནི་ཁྱོད་དང་ཁྱོད་ཀྱི་སྤུན་ཟླ་རྣམས་ཏེ་ཡེ་ཤུའི་དཔང་པོ་ལ་འཛིན་མཁན་གྱི་གཡོག་པོ་གཅིག་པ་ཡིན་པས་དཀོན་མཆོག་ལ་བསྙེན་བཀུར་བྱེད་ཅིག གང་ལགས་ཤེ་ན། ཡེ་ཤུའི་དཔང་པོ་ནི་ལུང་སྟོན་གྱི་སྙིང་པོ་ཡིན་ནོ་”ཞེས་གསུངས་སོ། །
REV 19:11 དེ་ནས་ངས་དཀོན་མཆོག་གི་ཞིང་ཁམས་ཕྱེ་བར་མཐོང་སྟེ། རྟ་དཀར་པོ་ཞིག་འདུག དེ་ལ་འཆིབ་མཁན་ལ་བློ་གཏད་ཆོག་པ་དང་བདེན་དཔང་མཛད་མཁན་ཞེས་བྱ་སྟེ། ཁོང་གིས་དྲང་བདེན་ཉིད་ཀྱིས་ཁྲིམས་གཅོད་དང་དམག་འཐབ་མཛད།
REV 19:12 ཁོང་གི་སྤྱན་ནི་མེ་ལྕེ་དང་འདྲ་བ་ཡིན་ཞིང༌། ཁོང་གི་དབུ་ལ་ཅོད་པན་མང་པོ་ཡོད། ཁོང་མ་གཏོགས་མི་གཞན་སུས་ཀྱང་མི་ཤེས་པའི་མཚན་ཁོང་ཉིད་ལ་བྲིས།
REV 19:13 ཁོང་གིས་གསོལ་བའི་ན་བཟའ་ནི་ཁྲག་ལ་སྦངས་པ་དང༌། ཁོང་གི་མཚན་ལ་དཀོན་མཆོག་གི་བཀའ་ཞེས་བྱ།
REV 19:14 དཀོན་མཆོག་གི་ཞིང་ཁམས་སུ་ཡོད་པའི་དམག་དཔུང་ནི་དཀར་པོ་དང་དྲི་མ་མེད་པའི་རས་སྤུས་ལེགས་གྱོན་ཞིང༌། རྟ་དཀར་པོ་རྣམས་ལ་བཞོན་ཏེ་ཁོང་གི་རྗེས་སུ་འབྲངས།
REV 19:15 ཁོང་གི་ཞལ་ནས་རལ་གྲི་རྣོ་པོ་ཞིག་ཐོན་པ་དེས་ཁོང་གིས་མི་རིགས་རྣམས་ལ་འཇོམས་པར་མཛད། ཁོང་གིས་ལྕགས་རྒྱུག་གིས་མི་རིགས་རྣམས་ལ་དབང་སྒྱུར། དབང་ཀུན་དང་ལྡན་པའི་དཀོན་མཆོག་གི་ཐུགས་ཁྲོ་དྲག་པོའི་ཆང་གཞོང་ནང་དུ་རྒུན་འབྲུམ་རྫི་བར་མཛད།
REV 19:16 ཁོང་གི་ན་བཟའ་དང་ཁོང་གི་བརླ་ཤ་ལ། རྒྱལ་པོ་རྣམས་ཀྱི་རྒྱལ་པོ་དང་གཙོ་བོ་རྣམས་ཀྱི་གཙོ་བོ་ཞེས་པའི་མཚན་བྲིས་ཡོད།
REV 19:17 དེ་ནས་ངས་ཉི་མའི་སྟེང་དུ་བཞེངས་པའི་ཕོ་ཉ་ཞིག་མཐོང༌། དེས་ནམ་མཁའི་དཀྱིལ་ལ་འཕུར་བའི་བྱ་ཐམས་ཅད་ལ་སྐད་ཆེན་པོས་“ཤོག་ལ། དཀོན་མཆོག་གི་དགོངས་ཟས་ཆེན་མོ་ལ་འཛོམས་ཤིག
REV 19:18 དེ་ནི་ཁྱོད་ཚོས་རྒྱལ་པོ་རྣམས་དང༌། དམག་དཔོན་དང༌། སྟོབས་ཅན་དང༌། རྟ་དང་དེའི་སྟེང་ཞོན་པ་རྣམས་དང༌། རང་དབང་ཅན་དང་བྲན་གཡོག མི་མཐོ་དམན་ཀུན་གྱི་ཤ་ཟ་བའི་ཕྱིར་རོ་”ཞེས་གསུངས།
REV 19:19 ངས་གཅན་གཟན་དང༌། ས་གཞིའི་རྒྱལ་པོ་རྣམས་དང༌། དེ་ཚོའི་དམག་དཔུང་རྣམས་ཀྱིས་རྟ་ལ་འཆིབ་མཁན་དང་ཁོང་གི་དམག་དཔུང་ལ་དམག་འདྲེན་པའི་ཕྱིར་འདུས་པ་མཐོང༌།
REV 19:20 གཅན་གཟན་དེ་དང༌། དེའི་དྲུང་དུ་ངོ་མཚར་བའི་རྟགས་སྟོན་པའི་ལུང་སྟོན་པ་རྫུན་མ་དེ་གཉིས་ཀ་བཟུང༌། ལུང་སྟོན་པ་རྫུན་མ་དེས་ངོ་མཚར་བའི་རྟགས་དེ་རྣམས་ཀྱི་སྒོ་ནས་གཅན་གཟན་གྱི་རྟགས་བླངས་ནས་དེའི་འདྲ་སྐུ་ལ་བསྙེན་བཀུར་བྱེད་མཁན་རྣམས་ལ་བསླུ་བྲིད་བྱས། གཅན་གཟན་དང་ཁོའི་ལུང་སྟོན་པ་རྫུན་མ་དེ་གཉིས་ཀ་ནི་མེས་འབར་བའི་མུ་ཟིའི་མཚོ་ལ་གསོན་པོར་འཕངས།
REV 19:21 རྟ་ལ་འཆིབ་མཁན་གྱི་ཞལ་ནས་ཐོན་པའི་རལ་གྲི་ཡིས་ལྷག་མ་རྣམས་བསད་ནས། ཁོ་ཚོའི་ཤ་ཡིས་བྱ་ཐམས་ཅད་ཚིམ་པར་གྱུར་རོ། །
REV 20:1 དེ་ནས་ངས་གཏིང་མཐའ་མེད་པའི་དོང་གི་ལྡེ་མིག་དང་ཕྱག་ཏུ་ལྕགས་ཐག་ཆེན་པོ་འཁྱེར་བའི་ཕོ་ཉ་ཞིག་དཀོན་མཆོག་གི་ཞིང་ཁམས་ནས་འབབ་པ་མཐོང༌།
REV 20:2 ཕོ་ཉ་དེས་གནའ་བོའི་དུས་ནས་ཡོད་པའི་སྦྲུལ་ཏེ། བདུད་ཀྱི་རྒྱལ་པོ་དང་སཱ་ཏན་ཞེས་བྱ་བའི་འབྲུག་བཟུང་ནས་ལོ་སྟོང་ཕྲག་གཅིག་གི་བར་དུ་བཅིངས་ནས།
REV 20:3 ལོ་ཆིག་སྟོང་དེ་རྫོགས་པའི་བར་དུ་མི་རིགས་རྣམས་ལ་བསླུ་བྲིད་མི་བྱེད་པའི་ཕྱིར་ཕོ་ཉ་དེས་བདུད་གཏིང་མཐའ་མེད་པའི་དོང་ནང་ལ་འཕངས་ཏེ། སྒོ་ལྕགས་བརྒྱབ་ནས་རྒྱ་ཡིས་བཏབ། དེའི་རྗེས་སུ་དུས་ཐུང་རིང་ཁོ་འགྲོལ་ངེས་ཡིན།
REV 20:4 དེ་ནས་ངས་བཞུགས་ཁྲི་རྣམས་མཐོང༌། དེར་བཞུགས་མཁན་ལ་ཁྲིམས་གཅོད་མཛད་པའི་དབང་ཆ་གནང༌། ཡང་ངས་ཡེ་ཤུའི་དཔང་པོ་བྱས་པ་དང་དཀོན་མཆོག་གི་བཀའ་བསྒྲགས་པའི་དོན་དུ་མགོ་བཅད་པ་རྣམས་ཏེ། གཅན་གཟན་ནམ་དེའི་འདྲ་སྐུ་ལ་བསྙེན་བཀུར་མ་བྱས་ཤིང༌། དཔྲལ་བའམ་ལག་པ་ལ་དེའི་རྟགས་མ་བླངས་པ་རྣམས་ཀྱི་སེམས་ཉིད་མཐོང༌། ཁོ་ཚོ་སླར་གསོན་པོར་གྱུར་ནས་མཱ་ཤི་ཀ་དང་མཉམ་དུ་ལོ་སྟོང་ཕྲག་གཅིག་གི་བར་དུ་དབང་བསྒྱུར།
REV 20:5 འདི་ནི་སླར་གསོན་པོར་འགྱུར་བ་དང་པོ་ཡིན། (ལོ་སྟོང་ཕྲག་གཅིག་དེ་མ་རྫོགས་པའི་བར་དུ་གཤིན་པོ་གཞན་རྣམས་སླར་གསོན་པོར་མ་གྱུར་)
REV 20:6 སླར་གསོན་པོར་འགྱུར་བ་དང་པོ་རྣམས་ནི་བདེ་བ་དང་དམ་པ་ཡིན་ནོ། འཆི་བ་གཉིས་པས་ཁོ་རྣམས་ལ་དབང་བྱེད་མི་སྲིད་དེ། དཀོན་མཆོག་དང་མཱ་ཤི་ཀའི་མཆོད་དཔོན་དུ་གྱུར་ནས་མཱ་ཤི་ཀ་དང་མཉམ་དུ་ལོ་སྟོང་ཕྲག་གཅིག་གི་བར་དུ་དབང་སྒྱུར་རོ། །
REV 20:7 ལོ་ཆིག་སྟོང་དེ་རྫོགས་པའི་ཚེ་སཱ་ཏན་བཙོན་ནས་གློད་གྲོལ་གཏོང་བར་འགྱུར་ཞིང༌།
REV 20:8 ས་གཞིའི་མཐའ་བཞི་ལ་ཡོད་པའི་མི་རིགས་ཏེ་གོག་དང་མཱ་གོག་ཅེས་བྱ་བ་ལ་བསླུ་བྲིད་བྱས་ནས། སྡུད་དེ་དམག་འཐབ་པའི་ཕྱིར་འཐོན། དེའི་གྲངས་ནི་རྒྱ་མཚོའི་བྱེ་མ་དང་འདྲ་བ་ཡིན།
REV 20:9 དེ་ཚོས་ས་གཞིའི་ཐང་ཆེན་བརྒལ་ནས་གཅེས་པའི་གྲོང་ཁྱེར་དང༌། དཀོན་མཆོག་གི་མི་རྣམས་ཀྱི་དམག་སྒར་བསྐོར། དཀོན་མཆོག་གི་ཞིང་ཁམས་ནས་མེ་བབས་པ་དང༌། ཁོ་ཚོ་ཐམས་ཅད་འཇིག་པར་བྱས།
REV 20:10 ཡང་དེ་རྣམས་ལ་བསླུ་བྲིད་བྱེད་མཁན་བདུད་ནི་མེ་འབར་བའི་མུ་ཟིའི་མཚོའི་ནང་དུ་འཕངས། དེར་གཅན་གཟན་དང་ལུང་སྟོན་པ་རྫུན་མའང་ཡོད་དེ། ཉིན་མཚན་མེད་པར་དུས་རྒྱུན་དུ་ཁོ་རྣམས་མནར་གཅོད་གཏོང་བར་འགྱུར།
REV 20:11 དེ་ནས་ངས་བཞུགས་ཁྲི་དཀར་པོ་ཆེན་པོ་ཞིག་དང་དེའི་སྟེང་དུ་བཞུགས་མཁན་ཞིག་མཐོང༌། ཁོང་གི་མདུན་ནས་ས་གཞི་དང་ཞིང་ཁམས་བྲོས་ཏེ་མི་མཐོང་བར་གྱུར།
REV 20:12 ངས་གཤིན་པོ་རྣམས་མཐོ་དམན་མེད་པར་ཀུན་བཞུགས་ཁྲིའི་མདུན་དུ་ལངས་ནས་བསྡད་པ་མཐོང་ཞིང༌། མདོ་རྣམས་ཁ་ཕྱེ། མདོ་གཞན་ཏེ་དཔག་ཏུ་མེད་པའི་ཚེའི་མདོའང་ཁ་ཕྱེ་ལ། དེར་གང་བྲིས་པ་ལྟར་གཤིན་པོ་རྣམས་རང་གི་བྱས་པ་བཞིན་དུ་ཁྲིམས་གཅོད་པར་གྱུར།
REV 20:13 རྒྱ་མཚོས་དེའི་ནང་ལ་ཡོད་པའི་གཤིན་པོ་རྣམས་དང༌། འཆི་བ་དང་གཤིན་པོའི་ཁམས་ཀྱིས་དེའི་ནང་ལ་ཡོད་པའི་གཤིན་པོ་རྣམས་ཕྱིར་བཏང་ནས། སོ་སོས་བྱས་པ་ལྟར་རེ་རེ་ལ་ཁྲིམས་གཅོད་མཛད།
REV 20:14 དེ་ནས་འཆི་བ་དང་གཤིན་པོའི་ཁམས་ཉིད་མེའི་མཚོའི་ནང་དུ་འཕངས། མེའི་མཚོ་དེ་ནི་འཆི་བ་གཉིས་པ་དེ་ཡིན་ནོ།
REV 20:15 སུ་ཞིག་གི་མིང་དཔག་ཏུ་མེད་པའི་ཚེའི་མདོ་ཡི་ནང་དུ་འཁོད་མེད་ན། མེའི་མཚོ་དེའི་ནང་ལ་འཕངས་པར་གྱུར་རོ། །
REV 21:1 སྔོན་གྱི་ནམ་མཁའ་དང༌། སྔོན་གྱི་ས་གཞི་འདས་ནས་རྒྱ་མཚོའང་མེད་པར་གྱུར་བས་ངས་ནམ་མཁའ་དང་ས་གཞི་གསར་པ་མཐོང༌།
REV 21:2 ཡང་ངས་གནས་མཆོག་ཡེ་རུ་ཤ་ལེམ་གྱི་གྲོང་ཁྱེར་གསར་པ་ནི་རང་གི་མག་པའི་དོན་ལ་རྒྱན་གྱིས་བརྒྱན་པའི་བག་མ་དང་འདྲ་བར་དཀོན་མཆོག་གི་ཞིང་ཁམས་ནས་བབས་པ་མཐོང༌།
REV 21:3 བཞུགས་ཁྲི་ནས་གསུང་སྐད་ཆེན་པོས་“ལྟོས་ཤིག དཀོན་མཆོག་གི་བཞུགས་གནས་མི་རྣམས་དང་མཉམ་དུ་ཡིན་ཏེ། ཁོང་ཁོ་ཚོའི་ཁྲོད་དུ་བཞུགས་པར་འགྱུར། ཁོ་ཚོ་ནི་ཁོང་གི་མི་རྣམས་དང༌། དཀོན་མཆོག་རང་ཉིད་ཁོ་ཚོ་དང་མཉམ་དུ་བཞུགས་པར་འགྱུར།
REV 21:4 ཁོ་ཚོའི་མིག་ནས་མཆི་མ་ཐམས་ཅད་ཁོང་གིས་འཕྱི་བར་མཛད། སྔོན་གྱི་དོན་འདས་ཟིན་པས་འཆི་བ་ཡང་མེད། མྱ་ངན་ནམ། ངུ་འབོད་དམ། ཟུག་ཀྱང་མེད་པར་འགྱུར་རོ་”ཞེས་གསུང་བ་ངས་ཐོས།
REV 21:5 བཞུགས་ཁྲི་ལ་བཞུགས་མཁན་གྱིས་“ལྟོས་ཤིག ངས་དོན་ཐམས་ཅད་གསར་དུ་མཛད་བཞིན་ཡོད་”ཅེས་གསུངས་པ་དང༌། སླར་ཡང་ཁོང་གིས་“ཚིག་འདི་རྣམས་ཡིད་བརྟན་འཕེར་ཞིང་བདེན་པ་ཡིན་པས་བྲིས་ཤིག་”ཅེས་གསུངས།
REV 21:6 དེ་ནས་ཁོང་གིས་ང་ལ་“བསྒྲུབས་སོ། ང་ནི་ཨལ་ཕཱ་དང་ཨོ་མེ་གཱ་སྟེ་ཐོག་མ་དང་མཐའ་མ་ཡིན། སུ་སྐོམ་པ་དེ་ལ་ངས་དཔག་ཏུ་མེད་པའི་ཚེའི་ཆུ་མིག་ལས་རིན་མེད་དུ་སྟེར་བར་བྱ།
REV 21:7 སུས་རྒྱལ་བ་ནི་དོན་འདི་རྣམས་ཀྱི་འཛིན་མཁན་དུ་འགྱུར། ང་ཁོའི་དཀོན་མཆོག་དང་ཁོ་ངའི་བུ་ཡིན་པར་འགྱུར།
REV 21:8 འོན་ཀྱང་བློ་ཁོག་ཆུང་བའི་མི་དང༌། དད་པ་མེད་པ་དང༌། མི་གཙང་སྤྱོད་པ་དང༌། མི་སྲོག་གཅོད་པ་དང༌། ལོག་གཡེམ་བྱེད་པ་དང༌། མཐུ་རྒྱག་པ་དང༌། ལྷ་རྣམས་ལ་རྟེན་མཁན་དང༌། རྫུན་ཤོད་མཁན་ཐམས་ཅད་ནི་མེ་འབར་བའི་མུ་ཟིའི་མཚོ་ལ་གནས་དགོས། དེ་ནི་འཆི་བ་གཉིས་པ་ཡིན་ནོ་”ཞེས་གསུངས་སོ། །
REV 21:9 དེ་ནས་མཐའ་མའི་ཆག་སྒོ་བདུན་གྱིས་གང་བའི་ཕོར་པ་བདུན་ཡོད་པའི་ཕོ་ཉ་བདུན་པོ་ལས་གཅིག་ངའི་རྩར་ཡོང་སྟེ་ངར་“ཤོག་ལ། ངས་ཁྱོད་ལ་ལུ་གུའི་མནའ་མ་སྟོན་པར་བྱ་”ཞེས་གསུངས།
REV 21:10 དམ་པའི་ཐུགས་ཉིད་ཀྱི་དབང་འོག་ཏུ་ཁོང་གིས་ང་རི་ཆེན་མཐོན་པོ་ཞིག་ལ་འཁྲིད་དེ། གནས་མཆོག་ཡེ་རུ་ཤ་ལེམ་གྱི་གྲོང་ཁྱེར་དཀོན་མཆོག་གི་ཞིང་ཁམས་ནས་མར་བབས་པ་ང་ལ་བསྟན་བྱུང༌།
REV 21:11 དེ་ལ་དཀོན་མཆོག་གི་གཟི་བརྗིད་དང་ལྡན་ཞིང༌། དེའི་འོད་ཟེར་ནི་ནོར་བུ་རིན་པོ་ཆེའམ། དྭངས་ཤེལ་དམར་པོ་དང་འདྲ་བ་ཡིན།
REV 21:12 དེ་ལ་ལྕགས་རི་མཐོ་ལ་ཆེ་བ་ཞིག་ཡོད་དེ། དེ་ལ་རྒྱལ་སྒོ་བཅུ་གཉིས་དང༌། རེ་རེ་ལ་ཕོ་ཉ་རེ་དང༌། ཡི་སི་ར་ཨེལ་གྱི་ཚོ་པ་བཅུ་གཉིས་པོའི་མིང་རྒྱལ་སྒོ་ལ་འཁོད་ཡོད།
REV 21:13 ཤར་ལྷོ་ནུབ་བྱང་དུ་རྒྱལ་སྒོ་གསུམ་རེ་ཡོད།
REV 21:14 གྲོང་ཁྱེར་གྱི་ལྕགས་རི་ལ་རྨང་རྡོ་བཅུ་གཉིས་ཡོད་ཅིང༌། དེ་རྣམས་ལ་ལུ་གུའི་སྐུ་ཚབ་བཅུ་གཉིས་ཀྱི་མཚན་འཁོད་ཡོད།
REV 21:15 ང་ལ་གསུང་མཁན་གྱི་ཕོ་ཉ་དེ་ལ་གྲོང་ཁྱེར་དང༌། དེའི་རྒྱལ་སྒོ་དང་ལྕགས་རི་འཇལ་བའི་ཕྱིར་གསེར་གྱི་ཐིག་ཤིང་ཞིག་ཡོད།
REV 21:16 གྲོང་ཁྱེར་གྲུ་བཞི་ཡིན་ཏེ། དེའི་རིང་ཚད་དང་ཞེང་ཚད་གཅིག་མཚུངས་ཡིན། ཁོང་གིས་ཐིག་ཤིང་གིས་གྲོང་ཁྱེར་བཅལ་ནས་དེའི་རིང་ཚད་དང༌། ཞེང་ཚད། མཐོ་ཚད་རྣམས་མཚུངས་ཏེ་སྤྱི་ལེ་ཉིས་སྟོང་བཞི་བརྒྱ་རེ་ཡོད།
REV 21:17 ཁོང་གིས་དེའི་ལྕགས་རིའི་ཚད་བཅལ་ནས་སྨི་དྲུག་ཅུ་རེ་དྲུག་ཡིན་ཏེ། ཚད་དེ་ནི་མིའི་ཚད་ཡིན་ཏེ་ཕོ་ཉའི་ཚད་ཡང་ཡིན།
REV 21:18 ལྕགས་རི་དེ་ཁྱུང་སྐྱུགས་ཤེས་ཟེར་བའི་ནོར་བུ་རིན་པོ་ཆེ་ཞིང༌། གྲོང་ཁྱེར་ནི་དྭངས་ཤེལ་ལྟར་གསལ་ལ་ལྷད་མེད་པའི་གསེར་ལས་བཟོས།
REV 21:19 ལྕགས་རིའི་རྨང་རྡོ་ནི་ནོར་བུ་རིན་པོ་ཆེ་རིགས་ཐམས་ཅད་ཀྱིས་བརྒྱན། རྨང་རྡོ་དང་པོ་དེ་ཁྱུང་སྐྱུགས། གཉིས་པ་དབང་སྔོན། གསུམ་པ་བེལ་སྣབས། བཞི་པ་མར་གད།
REV 21:20 ལྔ་པ་གཟི། དྲུག་པ་གཟི་དམར། བདུན་པ་སྦི་ཞི་སེར་པོ། བརྒྱད་པ་ནལ། དགུ་པ་སྦི་ཞི་དམར་པོ། བཅུ་པ་ཧྥེ་ཙུའི་ཤེལ་རྡོ། བཅུ་གཅིག་པ་མ་ནུ་ཧོ་སྨུག་པོ། བཅུ་གཉིས་པ་དཀར་གོང་གིས་བརྒྱན།
REV 21:21 རྒྱལ་སྒོ་བཅུ་གཉིས་མུ་ཏིག་བཅུ་གཉིས་ཡིན་ཏེ། རྒྱལ་སྒོ་རེ་རེ་མུ་ཏིག་གཅིག་ལས་བཟོས། གྲོང་ཁྱེར་གྱི་གཞུང་ལམ་ལྷད་མེད་པའི་གསེར་ནི་དྭངས་ཤེལ་ལྟར་གསལ།
REV 21:22 གཙོ་བོ་དཀོན་མཆོག་དབང་ཀུན་དང་ལྡན་པ་དང་ལུ་གུ་ནི་གྲོང་ཁྱེར་གྱི་མཆོད་ཁང་ཡིན་པས། ངས་དེའི་ནང་ལ་མཆོད་ཁང་ཞིག་མ་མཐོང༌།
REV 21:23 དཀོན་མཆོག་གི་གཟི་བརྗིད་གྲོང་ཁྱེར་དེའི་འོད་ཟེར་ཡིན་ཞིང་དེའི་མར་མེ་ལུ་གུ་ཡིན་པས། དེ་ལ་ཉི་མའམ་ཟླ་བའི་འོད་ཟེར་མི་དགོས།
REV 21:24 མི་རིགས་རྣམས་འོད་དེའི་སྒོ་ནས་འཚོ་ཞིང༌། ས་གཞིའི་རྒྱལ་པོ་རྣམས་ཀྱིས་རང་གི་གཟི་བརྗིད་དེའི་ནང་དུ་འཁྱེར་བར་འགྱུར།
REV 21:25 དེར་མཚན་མོ་མེད་པས། གྲོང་ཁྱེར་གྱི་རྒྱལ་སྒོ་རྣམས་ཉིན་གང་པོ་ཕྱེ་བར་འགྱུར།
REV 21:26 མི་རྣམས་ཀྱིས་མི་རིགས་སོ་སོའི་དཔལ་དང་བཀུར་སྟི་དེའི་ནང་ལ་འཁྱེར་ཡོང༌།
REV 21:27 མི་གཙང་བའི་རིགས་གང་རུང་ངམ། བག་མེད་སྤྱོད་པ་དང༌། རྫུན་ཤོད་མཁན་སུའང་དེའི་ནང་དུ་འགྲོ་བར་མི་སྲིད། ལུ་གུའི་དཔག་ཏུ་མེད་པའི་ཚེའི་མདོ་ལ་མིང་འཁོད་པ་རྣམས་འབའ་ཞིག་དེའི་ནང་དུ་འགྲོའོ། །
REV 22:1 དེ་ནས་ཕོ་ཉས་ང་ལ་ཚེ་སྲོག་གི་ཆུ་དང་ལྡན་པའི་གཙང་པོ་བསྟན་པར་མཛད། དེ་ནི་དྭངས་ཤེལ་ལྟར་གསལ་ཞིང༌། དཀོན་མཆོག་དང་ལུ་གུའི་བཞུགས་ཁྲི་ནས་འབྱུང་སྟེ།
REV 22:2 གྲོང་ཁྱེར་གྱི་གཞུང་ལམ་དཀྱིལ་དུ་རྒྱུག གཙང་པོའི་གཡས་གཡོན་གཉིས་ལ་འབྲས་བུ་རིགས་བཅུ་གཉིས་སྨིན་པའི་སྲོག་དང་ལྡན་པའི་ཤིང་ཡོད་དེ། ཟླ་བ་རེ་བཞིན་འབྲས་བུ་སྐྱེད། དེའི་ལོ་མ་ནི་མི་རིགས་རྣམས་གསོས་པའི་ཆེད་དུ་ཡིན།
REV 22:3 དམོད་པར་གྱུར་བ་གང་ཡང་ཕྱིན་ཆད་དེར་མེད། དཀོན་མཆོག་དང་ལུ་གུའི་བཞུགས་ཁྲི་གྲོང་ཁྱེར་དེའི་ནང་ལ་ཡོད་དེ། ཁོང་གི་ཞབས་ཕྱི་རྣམས་ཀྱིས་ཁོང་ལ་བསྙེན་བཀུར་བྱེད་པར་འགྱུར།
REV 22:4 ཁོ་རྣམས་ཀྱིས་ཁོང་གི་ཞལ་མཐོང་ཞིང༌། ཁོང་གི་མཚན་ཁོ་ཚོའི་དཔྲལ་བ་ལ་འཁོད་པར་འགྱུར།
REV 22:5 ཕྱིན་ཆད་དེར་མཚན་མོ་མེད་དེ། གཙོ་བོ་དཀོན་མཆོག་ཉིད་ཁོ་ཚོའི་འོད་ཟེར་ཡིན་པས་མར་མེའམ་ཉི་མའི་འོད་མི་དགོས། ཁོ་ཚོས་རྒྱུན་ནས་རྒྱུན་དུ་དབང་སྒྱུར་བར་འགྱུར་ངེས་ཡིན།
REV 22:6 ཕོ་ཉ་དེས་ང་ལ་“ཚིག་འདི་རྣམས་ཡིད་བརྟན་འཕེར་ཞིང་བདེན་པ་ཡིན། ལུང་སྟོན་པའི་སེམས་ཉིད་ཀྱི་དཀོན་མཆོག་སྟེ་གཙོ་བོ་ཡིས། མྱུར་དུ་གང་འབྱུང་དགོས་པ་དེ་རང་གི་ཞབས་ཕྱི་རྣམས་ལ་སྟོན་པར་མཛད་པའི་ཕྱིར་ཉིད་ཀྱི་ཕོ་ཉ་མངགས་”ཞེས་གསུངས།
REV 22:7 (“ཉོན་ཞིག ང་མགྱོགས་པོ་ཡོང་ངེས་ཡིན། མདོ་འདིའི་ལུང་བསྟན་རྣམས་ཀྱི་བཀའ་སྲུང་མཁན་དེ་བདེའོ་”ཞེས་གསུངས་)
REV 22:8 དོན་འདི་རྣམས་ཐོས་ཤིང་མཐོང་མཁན་ནི་ང་ཡོ་ཧ་ནན་ཡིན། དེ་ཚོ་ཐོས་ཤིང་མཐོང་བའི་ཚེ། ང་ལ་དེ་རྣམས་བསྟན་པའི་ཕོ་ཉའི་ཞབས་ཀྱི་མདུན་དུ་ངས་ཕྱག་བཙལ་ཡང༌།
REV 22:9 ཁོང་གིས་ང་ལ་“དེ་ལྟར་མ་བྱེད་ཅིག ང་ནི་ཁྱོད་དང༌། ཁྱོད་ཀྱི་སྤུན་ཟླ་ལུང་སྟོན་པ་རྣམས་དང༌། མདོ་འདིའི་བཀའ་སྲུང་མཁན་རྣམས་ཀྱི་གཡོག་པོ་གཅིག་པ་ཡིན། དཀོན་མཆོག་ལ་བསྙེན་བཀུར་གྱིས་ཤིག་”ཅེས་གསུངས།
REV 22:10 ཁོང་གིས་ང་ལ་“དུས་དེ་སླེབས་ལ་ཉེ་བས། མདོ་འདིའི་ལུང་བསྟན་རྒྱ་ཡིས་མ་འདེབས།
REV 22:11 ངན་པ་བྱེད་མཁན་ལ་ད་དུང་ངན་པ་བྱེད་དུ་ཆུག མི་གཙང་བ་སྤྱོད་མཁན་ལ་ད་དུང་མི་གཙང་བ་སྤྱོད་དུ་ཆུག སྤྱོད་པ་བཟང་པོ་བྱེད་མཁན་ལ་ད་དུང་སྤྱོད་པ་བཟང་པོ་བྱེད་དུ་ཆུག དམ་པ་ཡིན་པ་དེ་ད་དུང་དམ་པའི་སྤྱོད་པ་བྱེད་དུ་ཆུག་”ཅེས་གསུངས།
REV 22:12 (“ཉོན་ཞིག ང་མགྱོགས་པོར་ཡོང་ཞིང༌། མི་རེ་རེ་ལ་རང་གི་བྱ་བ་ལྟར་ལན་འཇལ་བའི་ཕྱིར་ངའི་བྱ་དགའ་ཆད་གཅོད་འཁྱེར་ཡོད།
REV 22:13 ང་ནི་ཨལ་ཕཱ་དང་ཨོ་མེ་གཱ་སྟེ། དང་པོ་དང་མཇུག་ཤོས། ཐོག་མ་དང་མཐའ་མ་དེ་ཡིན་ནོ་”)
REV 22:14 སྲོག་དང་ལྡན་པའི་ཤིང་གི་འབྲས་བུ་ལས་ཟ་བའི་དབང་ཆ་འཐོབ་ཅིང༌། རྒྱལ་སྒོ་རྣམས་བརྒྱུད་ནས་གྲོང་ཁྱེར་ལ་ཞུགས་པའི་ཕྱིར་གོས་འཁྲུད་མཁན་རྣམས་བདེའོ།
REV 22:15 ཕྱི་ཕྱོགས་སུ་ཁྱི་འདྲ་བ་དང༌། མཐུ་རྒྱག་པ་དང༌། ལོག་གཡེམ་བྱེད་པ་དང༌། མི་སྲོག་གཅོད་པ་དང༌། ལྷ་རྣམས་ལ་རྟེན་མཁན་དང༌། རྫུན་ཤོད་པ་ལ་དགའ་ཞིང་སྨྲ་མཁན་ཐམས་ཅད་ཡོད།
REV 22:16 “འཕྲིན་འདི་ཆོས་ཚོགས་རྣམས་ལ་སྒྲོག་པའི་ཕྱིར་ང་ཡེ་ཤུ་ཡིས་ངའི་ཕོ་ཉ་ཁྱེད་ཚོའི་རྩར་མངགས། ང་ནི་རྒྱལ་པོ་དཱ་བིད་ཀྱི་རྩ་བ་དང་བུ་རྒྱུད་དང༌། ཐོ་རེངས་ཀྱི་སྐར་མ་འོད་ཟེར་ཆེན་པོ་དེ་ཡིན་ནོ་”ཞེས་གསུངས།
REV 22:17 དམ་པའི་ཐུགས་ཉིད་དང་མནའ་མ་ཡིས་“ཕེབས་ཤོག་”ཅེས་གསུངས། ཡང་ཐོས་མཁན་གྱིས་ཀྱང་“ཕེབས་ཤོག་”ཅེས་སྨྲ་བར་གྱུར་ཅིག སྐོམ་པ་རྣམས་ཚུར་ཡོང་བར་གྱུར་ཅིག དཔག་ཏུ་མེད་པའི་ཚེའི་ཆུ་འཐུང་འདོད་པ་རྣམས་ཀྱིས་རིན་མེད་པར་ལེན་ཞིག
REV 22:18 མདོ་འདིའི་ལུང་བསྟན་གྱི་བཀའ་ཐོས་མཁན་ཐམས་ཅད་ལ་ངས་ཉེན་བརྡ་འདི་ལྟར་གཏོང་སྟེ། སུ་ཞིག་གིས་དེ་ལ་བསྣན་ན། དཀོན་མཆོག་གིས་མདོ་འདི་ལ་བྲིས་པའི་ཆག་སྒོ་ཡིས་མི་དེ་ལ་ཆད་པ་གཏོང་བར་མཛད་ངེས་ཡིན།
REV 22:19 ཡང་སུ་ཞིག་གིས་མདོ་འདི་ལ་བྲིས་པའི་ལུང་བསྟན་གྱི་བཀའ་ལས་གང་ཞིག་ཕྲིས་ན། དཀོན་མཆོག་གིས་མདོ་འདི་ལ་བྲིས་པའི་སྲོག་དང་ལྡན་པའི་ཤིང་དང་གནས་མཆོག་གྲོང་ཁྱེར་གྱི་སྐལ་བ་མི་དེ་ལས་བཞེས་པར་འགྱུར་ངེས་ཡིན།
REV 22:20 དོན་འདི་རྣམས་ལ་དཔང་པོ་བྱེད་མཁན་གྱིས་“ལགས་ཡིན། ང་མགྱོགས་པོ་ཡོང་ངོ་”ཞེས་གསུངས། ཨ་མེན། གཙོ་བོ་ཡེ་ཤུ་བྱོན་ཤོག
REV 22:21 གཙོ་བོ་ཡེ་ཤུའི་ཐུགས་རྗེ་དད་ལྡན་ཐམས་ཅད་ལ་འཐོབ་པར་གྱུར་ཅིག ཨ་མེན། །
