GEN 1:1 Muga na maki lobo ni rata, a Vure i rata rike a hunu a malala.
GEN 1:2 A malala i uka ma i manga ia ngane. I tabuli tavula kunana. A uvo i kavitagua a utu. A hanuna Vure kunana i rara polomeli vona.
GEN 1:3 Muri a Vure i ta maea, “Ge palala.” Ngane i palala.
GEN 1:4 I masia a hini palala i kamumu. Muri i kalipida a hini palala, a uvo.
GEN 1:5 A Vure i vunua a hini palala a parava, a uvo i vunua a rodo. I rodo i palala. Iea a mugana maka parava.
GEN 1:6 Muri a Vure i ta maea, “Ge bele tara koropala ge kalipidea a naru ge tabuli na hini ge rua.”
GEN 1:7 Lakea, a Vure i ratea a koropala, i kalipidea a naru i tabuli polomeli ranga, i tabuli polotano ranga. Muri i bele manga a ngava i taki.
GEN 1:8 A koropala iea i vunua a hunu. I rodo i palala. Iea a ruana parava.
GEN 1:9 Muri a Vure i ta maea, “A naru polotano na hunu ge tua lakea na hini ranga, ge bele a hini ge vu.” Muri i bele manga a ngava i taki.
GEN 1:10 A hini vu a Vure i vunua a malala. A hini vona a naru i vunua a dari. I matai a maki i rata i kamumu.
GEN 1:11 Muri a Vure i ta maea, “A malala ge vakabele a maka varili, a kai, a uve ni varo, turana maka kai ri gi tahoka a kanena turana a vutuna ri gi vakabele tabu a hamone ria.” Muri i bele manga a ngava i taki.
GEN 1:12 A malala i tuvu vona a maka varili, a kai, a uve ni varo, turana a maka kai ri tahoka a kanena turana a vutuna ri gi vakabele tabu a hamone ria. A Vure i matai a maki i rata i kamumu.
GEN 1:13 I rodo, i palala. Iea a toluna parava.
GEN 1:14 Muri a Vure i ta maea, “Ge tahoka a maka maki ri gi para polomeli na koropalana hunu, ri gi vakalipida a hini palala, a rodo. Ri gi vakasiri a parava, a pida, a tahuna na haro, a tahuna na vala.
GEN 1:15 A maka maki ri para na koropala bara ri vakapalala a malala.” Muri i bele manga a ngava i taki.
GEN 1:16 A Vure i rata a nipara dagi i rua. A viri dagi ne vona ni matakari a parava. A viri kiroko ne vona ni matakari a rodo. A hada ranga i rata rike.
GEN 1:17 I ru ria na koropala na hunu ne vona ni vakapalala a malala,
GEN 1:18 bara ri matakari a parava, a rodo, bara ri kalipida a hini palala, a hini uvo. A Vure i matai a maki i rata i kamumu.
GEN 1:19 I rodo i palala. Iea a vana parava.
GEN 1:20 Muri a Vure i ta maea, “A dari ge vonu vona a maka maki mahuri, ri gi laho lae na kabune ria. A maka kadirovo ri gi bebe polomeli na koropalana malala a hunu.”
GEN 1:21 Lakea a Vure i rata rike a maka kabuna manu lobo, a maki dagi na utu, ri huru lae vona, ri vakavonu a dari, ri gi vakabele tabu a hamone ria. A maka kadirovo ranga, a Vure i rata rike ria ri gi vakabele tabu a hamone ria. A Vure i matai a maki i rata i kamumu,
GEN 1:22 i gamai ria i ta maea, “Mua a maki lobo na dari, mu bele kupo mu vakavonu a dari, mua a maka kadirovo mu bele kupo na robo.”
GEN 1:23 I rodo i palala. Iea a limana parava.
GEN 1:24 Muri a Vure i ta maea, “A maka maki mahuri ri gi vakabele tabu a kabu ne ria: a sipsip a bulmakau, a maki kiroko ri karaka lae na robo, a livoa hateka.” Muri i bele manga a ngava i taki.
GEN 1:25 A Vure i rata rike a maka livoa, a sipsip a bulmakau, a maki i karaka lae na malala, ria lobo ri gi vakabele tabu a hamone ria. A Vure i matai a maki i rata i kamumu.
GEN 1:26 Muri i ta maea, “Te ge rata rike a bakovi ge manga teu, ge matakari a manu na dari, a kadirovo, a sipsip a bulmakau, turana a maka maki ri karaka lae na malala.”
GEN 1:27 Lakea a Vure i rata rikea a bakovi i manga ia. I muri mai ia, i rata rike varago a bakovi, a ngatavine.
GEN 1:28 A Vure i gamai rua i taki rua, “Muru bele kupo, muru vakavonu a malala, muru matakaria. Muru matakari a maka manu na dari, a maka kadirovo, turana a maki mahuri lobo na robo.”
GEN 1:29 Muri a Vure i ta maea, “Iau a habi marua a maka maki ni varo, turana a maka kai ri tahoka a kanena i vona a vutuna, bara a maki ni kani ne marua.”
GEN 1:30 Na maka kadirovo, a maka maki kiroko ri karaka na malala, a maki lobo i mahuri, a Vure i habi ne ria a maka pagana rau bara ri kani. Muri i bele manga a hini i taki.
GEN 1:31 A Vure i matai a maka maki i rata i kamumu hateka. I rodo i palala. Iea a polotarana parava.
GEN 2:1 Na naro iea kunana, a Vure i rata rike a hunu a malala, turana a maki lobo.
GEN 2:2 Na poloruana parava a Vure i malo, a vuhuna i vakalobo pali a leho vona.
GEN 2:3 A Vure i gamaia a poloruana parava, i ru hereherea, a vuhuna na parava iea i lobo a leho vona ni rata rike a maki lobo, i malo.
GEN 2:4 A ngava na hunu a malala ni rata rike i maea: Na tahuna e BAKOVI DAGI a Vure i rata rike a hunu a malala,
GEN 2:5 a varili i uka ma i gaga ma na malala. A maka kai na robo ranga, i uka ma ri mapoda ma, a vuhuna e BAKOVI DAGI a Vure i uka ma i vakaboru a vala. A malala, i uka viri ge leho vona.
GEN 2:6 Pali a maka naru ri tua rike kunana na malala, ri vakamea a hini polomeli na malala.
GEN 2:7 Muri e BAKOVI DAGI a Vure i pipia na habulo a bakovi, i vaki dilia na ruperena a bangona nimahuri, i bele a bakovi mahuri.
GEN 2:8 Muri, e BAKOVI DAGI a Vure i varoa a hania o Iden na nirikena haro. I rua vonga a bakovi i rata rikea.
GEN 2:9 E BAKOVI DAGI a Vure i rata rike a maka kai legelege ri mapoda na malala, a maka kai mata kamumu, i kamumu a kanena ni kanina. Na kurukuruna hania a kai i rua ru pesi: a kai i habi a nimahuri, turana a kai i habi a lohokanga na naro kamumu na naro hale.
GEN 2:10 A naru dagi i tua tala vonga o Iden i bako va, ne vona ni vakamea a hania.
GEN 2:11 A bakona muga ni gale e Pison, i tua marogo lae na robo e Havila, a robo na gol.
GEN 2:12 A robo iea i vona a kai manginoro, a gol kamumu turana a maka kedo na mahala ranga.
GEN 2:13 A ruana bakona naru dagi ni gale e Gihon, i tua marogo lae na robo e Kus.
GEN 2:14 A rana toluna bakona naru dagi tara e Tigris. I tua na tabeke na nirikena haro na robo e Asiria. A vana bakona naru dagi ni gale e Iupretis.
GEN 2:15 E BAKOVI DAGI a Vure i bolea a bakovi i vakamadea na hania o Iden ge leho vona ge matakaria.
GEN 2:16 E BAKOVI DAGI a Vure i vakukua a bakovi, i ta maea, “A maka kanena kai lobo o kani,
GEN 2:17 pali a kai i habi a lohokanga na naro kamumu na naro hale, naha ni kania a kanena. Muholi hateka, na tahuna o kania bara o mate.”
GEN 2:18 E BAKOVI DAGI a Vure i ta maea, “I uka ma i kamumu a bakovi ge ia kikeri. Ga ratea tara turana ge tuhoria.”
GEN 2:19 E BAKOVI DAGI a Vure i rata rike pali na malala a maka livoa na robo turana a maka kadirovo. I bole lakea na bakovi ge matai ria ge vunu a rane ria takutaku. E rei a rana i vunu ria vona takutaku bara i tabuli liu a rana.
GEN 2:20 A bakovi i vunu a rana a maka sipsip a bulmakau, a kadirovo, a livoa na robo, pali i uka tara ge mata manga e Adam ga rihina.
GEN 2:21 Lakea e BAKOVI DAGI a Vure i ratea e Adam i mahita mate. Na tahuna i mahita mate i paru talea a karona, muri i kavitagu mulea na bobona.
GEN 2:22 Muri i pipia a ngatavine na karo i paru talea na bakovi, muri i tuli lakea vona a ngatavine.
GEN 2:23 E Adam i masia, i ta maea, “Iea ngane a turagu a vuhuna ni bole tala na tuhagu, na bobogu, ga galea a ‘ngatavine’.”
GEN 2:24 I mavonga, a bakovi bara i pe e tamana e kinana i madoko turana e girihina, a kakaine rua ge taku.
GEN 2:25 A bakovi rua e girihina ru bobo, i uka ma ru maruhu.
GEN 3:1 A mata i moro hateka na rabu na taminga, i rangi a maka livoa lobo e BAKOVI DAGI a Vure i rata rike. I nanea a ngatavine, “I muholi a Vure i taki marua, nahea muru gu kani a maka kanena kai lobo na hania?”
GEN 3:2 A ngatavine i koli, i ta maea, “Maria bara miri kani lobo a maka kanena kai na hania,
GEN 3:3 pali a Vure i taki maria tabu nahea miri gi kani a kanena kai na kurukuruna hania, nahea miri gi padoi ia, ma ga miri gi mate.”
GEN 3:4 Lakea a mata i takia a ngatavine, “I uka ma muru gu mate. I uka liu.
GEN 3:5 A Vure i lohoka, bara muru kania, a matane marua bara i palala, bara muru manga a Vure na nilohoka na naro kamumu na naro hale.”
GEN 3:6 Ngane a ngatavine i masia a kanena kai i kamumu na nikanina, i kamumu na matana, i ngaru ni tahoka a niluhoi dagi. I bolea, i kania. Muri i bole a kalavana i habia ne girihina, ia tara i kani.
GEN 3:7 Muri a matane rua i palala, ru matakilala rua ru bobo, pali ru rahi a pagana kai a pik, ru kapikari rua vona.
GEN 3:8 Muri a bakovi turana e girihina ru longoa e BAKOVI DAGI a Vure i lalaho na hania na malunga. Lakea ru vano ru pesi kapiloho vona na kai na hania.
GEN 3:9 Lakea e BAKOVI DAGI a Vure i galea a bakovi, “Adam, ioe vai?”
GEN 3:10 E Adam i koli mule, i ta maea, “A longo ioe o laho na hania, a mangenge. A kapiloho a vuhuna a bobo.”
GEN 3:11 Lakea a Vure i nanea, “E re i taki ioe o bobo? Ra ioe, o kania a kanena kai a ta pupukari ioe vona?”
GEN 3:12 A bakovi i koli, i ta maea, “Ra ngatavine o vakamade turagu, ia kunana i habia nau a kanena kai, a kania.”
GEN 3:13 Muri e BAKOVI DAGI a Vure i nanea a ngatavine, “A ra o ratea ke?” Lakea a ngatavine i koli, “A mata i tami iau a kania a kanena kai.”
GEN 3:14 Pali e BAKOVI DAGI a Vure i takia a mata, “Ngane a ruduraha ioe bara o bole a nimadihi polomeli liu na maka sipsip a bulmakau, a livoa, a vuhuna ioe o rata a naro hale. Ngane bara o laho na ngalamu, o todo a habulo na parava vakaroro.
GEN 3:15 Bara ioe a pile na ngatavine, e huriki a hamomu ranga bara ria a pile na hamona ngatavine. A hamona ngatavine bara i paha momo a gimu, pali ioe bara o kara tatea a vahana.”
GEN 3:16 Muri a Vure i takia a ngatavine, i ta maea, “Ioe bara o bole a nimadihi dagi ni singou, ni poda a koma. Ra nimadihi, i uka ma go hatakia. Pali bara o ngarua e girihimu, e girihimu bara i matakari ioe.”
GEN 3:17 Muri i takia e Adam, “Ioe, o longototo e girihimu o kania a kanena kai a ta pupukari vona, ‘Naha ni kania’. Ngane a rudurahea a malala a vuhuna o longotaro iau. Na parava vakaroro bara o leho, o kani.
GEN 3:18 A malala bara i vakabele a poto a barakau. Ioe bara o kani a maki o varo na hania.
GEN 3:19 Bara i kani ioe a mavidia, o kani. Bara o rura i vano, i harena na tahuna o mate vona. Muri, bara o hamule lakea na habulo ra a vakabele ioe vona. Ioe a habulo, bara o hamule lakea tabu na habulo.”
GEN 3:20 E Adam i vunua a rane girihina e Eva, a vuhuna bara ia e kinane huriki lobo.
GEN 3:21 E BAKOVI DAGI a Vure i rahi a varakia na kulina kanirau, i vakarea rua.
GEN 3:22 Muri e BAKOVI DAGI a Vure i ta maea, “A bakovi ngane i manga teu, i lohoka na vilo kamumu, na vilo hale. Nahea ge made tabukoi koea, ma ge padoi a kai na nimahuri, ge kania, ge mahuri vakaroro.”
GEN 3:23 Lakea e BAKOVI DAGI a Vure i tono talea na hania o Iden a bakovi, ge hamule, ge leho na malala ni rata rike ia vona.
GEN 3:24 A Vure i tono talea pali a bakovi, muri i vakapesi na nirikena haro na hania o Iden ranga agelo, turana a vito i hube i vito vito lae, ri gi tagaria a dala lakea na kai na nimahuri.
GEN 4:1 E Adam i mahita turana e girihina, e Eva, i singou, i podea e Kain. Lakea e Eva i ta maea, “I tuhori iau e BAKOVI DAGI, a vakabelea a bakovi.”
GEN 4:2 Muri i podea e Abel, e tarine Kain. E Abel i matakari a sipsip, e Kain i leho na hania.
GEN 4:3 Na parava tara e Kain i bole ranga maki ni kani na hania ge a nihabi ne BAKOVI DAGI.
GEN 4:4 Pali e Abel i bole a maka tuna sipsip a tabua i vi. Lakea e BAKOVI DAGI i ngarua a nihabi ne Abel,
GEN 4:5 pali a nihabi ne Kain, i uka ma i ngarua. Ngane e Kain i madihi a hatena, i robo a matana.
GEN 4:6 Muri e BAKOVI DAGI i nanea e Kain, “I navai i madihi a hatemu, i robo a matamu?
GEN 4:7 Ioe bara o rata a rabu malamala bara ngarua a nihabi vomu. Ioe, i uka ma o rata a rabu malamala, a rabu hale i pesi kalidoga ge rabalaki ioe. O matakari a nilaho vomu, bara i lobo a naro hale vomu.”
GEN 4:8 Ngane e Kain i turea e tarina, i ta maea, “Abel, tu lakea na hania.” Lakea ru vano. Na tahuna ru bele na hania, lakea e Kain i ubi matea e tarina.
GEN 4:9 Muri e BAKOVI DAGI i nanea e Kain, “Avia e tarimu e Abel?” E Kain i koli mule i ta maea, “I uka ma a masia. Ra iau, ge iau a vora ni matakari e tarigu?”
GEN 4:10 Lakea e BAKOVI DAGI i ta maea, “A ra o ratea ke? O longo valai! A darane tarimu i tangi valai nau pali na malala, ga kolia a nimate vona.
GEN 4:11 Ngane bara ruduraha ioe, ga lili tala ioe na malala, ra i todo a darane tarimu na limamu.
GEN 4:12 Ngane na tahuna o leho na malala, i uka ma ge vakabele a maki ni kani vomu. I uka ma go made tata, bara o kanipede viliha.”
GEN 4:13 E Kain i kide i ta maea, “I kupo polo a maka maregoa nau.
GEN 4:14 Ngane o lili tala iau na malala bara kapiloho na matamu. Bara a uka tanga, a kanipede. Pali e re i matavisi iau bara i rabalaki iau.”
GEN 4:15 E BAKOVI DAGI i koli mule, i ta maea, “I uka ma ge mavonga. A viri bara i rabalaki ioe bara i bolea a nikoli dagi balaka polorua.” Muri i rua ne Kain tara kilakila ne vona ni matakilaka vona, i uka ma ni gi rabalaki.
GEN 4:16 Muri e Kain i pea e BAKOVI DAGI, i vano i made na robo e Nod, na tabeke na nirikena haro o Iden.
GEN 4:17 E Kain i mahita turana e girihina, muri i singou e girihina, i podea e Enok. E Kain i ratea a tanga dagi i vunua e Enok, i muri mai a rane tuna.
GEN 4:18 E Enok i vakabelea e Irad, e Irad e tamane Mehusael, e Mehusael e tamane Metusael, e Metusael e tamane Lamek.
GEN 4:19 E Lamek i parangi a ngatavine ala rua. A rane rua e Ada e Sila.
GEN 4:20 E Ada i podea e Iabal. Iabal e tamane huriki ri matakari a sipsip a bulmakau, ri made na kape.
GEN 4:21 E turana a rana e Iubal, e tamane huriki ri lohoka ni sigi a gita, ni vaki a piloli.
GEN 4:22 E Sila tara i tahoka e tuna, a rana e Tubal-Kain, ia a mari ni rata a kira na aen a kapa. E kurabana a rana e Nama.
GEN 4:23 E Lamek i vakalongo e girihina rua, i ta maea, “Ada o Sila, muru longo valai muru longo a ngavagu. Iau a rabalakia a bakovi i rata tuhare iau, i tolo iau, a koma tamuhane.
GEN 4:24 A viri bara i rabalakia e Kain, a nikoli vona bara i bole dagi. Pali a viri bara i rabalaki iau, muholi hateka a nikoli vona bara i bole dagi hateka!”
GEN 4:25 E Adam i mahita turana tabu e girihina, lakea e girihina i podea a koma bakovi, i vunua e Set. Lakea e girihina i ta maea, “A Vure i habi tabua nau a koma ge bole a murine Abel, ra i rabalakia e Kain.”
GEN 4:26 E Set i tahoka e tuna bakovi, i vunua e Enos. Na tahuna iea, e huriki a bakovi ri vakatubu ni kavurikea a rane BAKOVI DAGI.
GEN 5:1 Iea a nitana kabu ne Adam ni here puru: Na tahuna a Vure i rata rike a bakovi, i ratea i manga ia.
GEN 5:2 I rata rike a bakovi a ngatavine, muri i gamai rua. Na tahuna i rata rike rua, i vunu rua a “bakovi.”
GEN 5:3 Na tahuna e Adam i tahoka a pida i 130 i vakabelea e tuna a bakovi i manga ia. I vunua e Set.
GEN 5:4 Muri ne Set ni poda, ni poda tabu ranga e tuna a bakovi a ngatavine. Muri e Adam i tahoka tabu a pida i 800.
GEN 5:5 A pida ne Adam, ni gi palupu lobo, i 930, muri i mate.
GEN 5:6 E Set i tahoka a pida i 105 ngane, i vakabelea e Enos.
GEN 5:7 Muri ne Enos ni poda, e Set i tahoka tabu a pida i 807, i vakabele tabu ranga e tuna a bakovi a ngatavine.
GEN 5:8 A pida ne Set, ni gi palupu lobo, i 912, muri i mate.
GEN 5:9 Na tahuna e Enos i tahoka a pida i 90, i vakabelea e Kenan.
GEN 5:10 Muri ne Kenan ni poda, e Enos i tahoka tabu a pida i 815, i vakabele tabu ranga e tuna a bakovi a ngatavine.
GEN 5:11 A pida ne Enos, ni gi palupu lobo i 905, muri i mate.
GEN 5:12 Na tahuna e Kenan i tahoka a pida i 70, i vakabelea e Mahalale.
GEN 5:13 Muri ne Mahalale ni poda, e Kenan i tahoka tabu a pida i 840, i vakabele tabu ranga e tuna a bakovi a ngatavine.
GEN 5:14 A pida ne Kenan, ni gi palupu lobo, i 910, muri i mate.
GEN 5:15 Na tahuna e Mahalale i tahoka a pida i 65, i vakabelea e Iared.
GEN 5:16 Muri ne Iared ni poda, e Mahalale i tahoka tabu a pida i 830, i vakabele tabu ranga e tuna a bakovi a ngatavine.
GEN 5:17 A pida ne Mahalale ni gi palupu lobo, i 895, muri i mate.
GEN 5:18 Na tahuna e Iared i tahoka a pida i 162, i vakabelea e Enok.
GEN 5:19 Muri ne Enok ni poda, e Iared i tahoka tabu a pida i 800, i vakabele tabu ranga e tuna a bakovi a ngatavine.
GEN 5:20 A pida ne Iared, ni gi palupu lobo, i 962, muri i mate.
GEN 5:21 Na tahuna e Enok i tahoka a pida i 65, i vakabelea e Metusela.
GEN 5:22 Muri ne Metusela ni poda, e Enok i laho turana Vure na pida i 300, i vakabele tabu ranga e tuna a bakovi a ngatavine.
GEN 5:23 A pida ne Enok, ni gi palupu lobo, i 365.
GEN 5:24 Muri a Vure i bolea e Enok, i uka ma ni matai tabu, a vuhuna a Vure i ngaru hatekea.
GEN 5:25 Na tahuna e Metusela i tahoka a pida i 187, i vakabelea e Lamek.
GEN 5:26 Muri ne Lamek ni poda, e Metusela i tahoka tabu a pida i 782, i vakabele tabu ranga e tuna a bakovi a ngatavine.
GEN 5:27 A pida ne Metusela, ni gi palupu lobo, i 969, muri i mate.
GEN 5:28 Na tahuna e Lamek i tahoka a pida i 182, i vakabelea e tuna a bakovi,
GEN 5:29 i vunua e Noa. Lakea e tamana i ta maea, “Hosi e BAKOVI DAGI i rudurahea a malala, mi leho hateka mi bole a nimadihi, pali a koma iea bara i vakasihomo mia.”
GEN 5:30 Muri ne Noa ni poda, e Lamek i tahoka tabu a pida i 595 i vakabele tabu ranga e tuna a bakovi a ngatavine.
GEN 5:31 A pida ne Lamek, ni gi palupu lobo, i 777, muri i mate.
GEN 5:32 Na tahuna e Noa i tahoka a pida i 500, ni gale e tamane Sem, e Ham, e Iapet.
GEN 6:1 Na tahuna e huriki a bakovi a ngatavine ri bele kupo na malala, ri vakabele e huriki e tune ria ngatavine.
GEN 6:2 E huriki a tuna Vure ri matai ria ri mata kamumu hateka, lakea e rei ne ria i ngaru ni parangi, bara ri parangi a ngatavine ri ngaru.
GEN 6:3 Muri e BAKOVI DAGI i ta maea, “A hanugu i uka ma ge made pololilo na bakovi na parava vakaroro, a vuhuna ia a bakovi na malala kunana. A pida ne ria ge harena kunana ne 120.”
GEN 6:4 Na tahuna iea, e huriki a kabu ne Nepilin ri made na malala. Lakea e huriki a tuna Vure bakovi ri parangi na ngatavine na malala, ri vakabele huriki a hamone ria. Re huriki nga, ria a bakovi hateka, a rane ria i dagi na tahuna iea.
GEN 6:5 E BAKOVI DAGI i matai a narone huriki na malala i hale liu, a maki ri luhoi kunanea a naro hale.
GEN 6:6 I kilu vona a hini i rata rike e huriki koea na malala.
GEN 6:7 I tapuhaki i ta maea, “Iau ga vakalobo koea na malala e huriki a bakovi a rata rike. Pali ga vakalobo tabu a maka livoa, a kadirovo, turana a maka maki lobo ri laho na robo, a vuhuna iau a kilu vona a hini a rata rike a maka maki nga.”
GEN 6:8 Pali e BAKOVI DAGI i vivi vona e Noa.
GEN 6:9 Iea a nita na narone Noa: E Noa ia a bakovi kamumu, a narona i kiripiripi na matane huriki a bakovi na tahuna iea. I laho turana Vure.
GEN 6:10 E Noa i tahoka e tuna i ala tolu: e Sem, e Ham e Iapet.
GEN 6:11 Na matana Vure, a malala i vonu na maka naro hale. E huriki ri tagege, ri vaubi lae.
GEN 6:12 A Vure i masia a malala i vonu na maka naro hale, a vuhuna a maka narone ria i hale hateka.
GEN 6:13 Lakea, a Vure i takia e Noa, “Iau ga ratapile e huriki lobo, a vuhuna a malala i vonu vona a maka naro hale ne ria. Muholi hateka, iau ga ratapile lobo e huriki a bakovi, turana a malala.
GEN 6:14 Pali ioe, o haea a agarungu vomu, o haea na kai a saipres. O nagi pololiloa, muri o kavitagu a hini pololilo, a hini polovavo na kasita.
GEN 6:15 Ra agarungu iea o hae maea: a niolana ge 150 mita, a nibolana ge 25 mita, a nipesina ge 15 mita.
GEN 6:16 Na tahuna o hae a mapana roho na agarungu, nahea a mapana ge padoi liu a gagana. Ge tabuli a hini ge 5 mita. A tabekena agarungu ge tolu: ge polotano tara, na kurukuruna tara, ge polomeli tara. Na gagana tara o rua a hinebi.
GEN 6:17 Iau ga rudua a marungulolo ge ratapile a maka maki polotano na hunu, a maka maki mahuri ri bango na ruperene ria, a maki lobo na malala bara ri mate.
GEN 6:18 Pali iau ga rata a ngava dagi turamu, muri bara o rike na agarungu vomu turana e girihimu, e tumu, e kamu.
GEN 6:19 O vakaha dili na agarungu a maki lobo ri laho na robo, ge ruarua, a toga, a kinana.
GEN 6:20 O vakaha turane mua, ge ruarua a maka kadirovo, a livoa, a maki lobo mahuri legelege.
GEN 6:21 O bole tabu a maki ni kani, o ru kamumu, ne vona e mua turana a maka maki mahuri o vakarike.”
GEN 6:22 Lakea e Noa i rata lobo a maki a Vure i taki vona ge rata.
GEN 7:1 E BAKOVI DAGI i takia e Noa, “O dili na agarungu turane huriki a kabu vomu, a vuhuna ioe kikeri a bakovi kamumu ne huriki a bakovi lobo.
GEN 7:2 O bole turamu na kabu na kanirau kabakaba, a toga ge polorua, a kinana ge polorua. Na kanirau mutomuto, a toga ge polorua, a kinana ge polorua.
GEN 7:3 Na kadirovo, a toga ge polorua, a kinana ge polorua, ne vona ni vakabele a hamone ria na malala.
GEN 7:4 Muri na parava ge polorua, ga vakaborua na malala a vala. Ge boru na parava ge ravulu va, a rodo ge ravulu va. Iau ga vakalobo a maka maki mahuri a rata rike koea na malala.”
GEN 7:5 Lakea e Noa i muri mai a ngava lobo e BAKOVI DAGI i vakuku ia vona.
GEN 7:6 Na tahuna a marungulolo i bele koea na malala, e Noa i tahoka a pida i 600.
GEN 7:7 Muri e Noa turana e girihina, e tuna mai e kana mai, ri rike na agarungu, ri gi kapiloho vona a marungulolo.
GEN 7:8 A maka kanirau ri varihi, a kanirau kabakaba, a kanirau mutomuto, a kadirovo turana a maki lobo ri karaka na robo,
GEN 7:9 a kinana, a toga ri valai mai e Noa, ri rike na agarungu, i manga a hini a Vure i vakukua e Noa vona.
GEN 7:10 Pali i lobo a parava i polorua, i bele ngane na malala a marungulolo.
GEN 7:11 Na parava i ravulu a polona i polorua na ruana keva, e Noa i tahoka pali a pida i 600, i vakatubu na parava iea, a maka naru polotano na bobona malala ri tuka, a maka niroga na naru na hunu ri mapuka.
GEN 7:12 A vala dagi i boru ngane na malala na parava i ravulu va, a rodo i ravulu va.
GEN 7:13 Na parava iea kunana e Noa turane girihina, e tuna ala tolu: e Sem, e Ham, e Iapet turane girihine tou, ri rike na agarungu.
GEN 7:14 Ri rike turana a kabu na kanirau lobo, a kabu na sipsip a bulmakau lobo, a kabu na maki lobo ri laho na malala, a kabu na kadirovo, a maki lobo i tahoka a karapane ria.
GEN 7:15 A maka maki legelege ri mahuri, ri bango na ruperene ria, ri valai turana a rihine ria, ri valai mai e Noa, ri rike na agarungu.
GEN 7:16 A maka livoa, a toga a kinana, ri rike na agarungu, i muri maia a nitana Vure i vakuku e Noa vona. Muri e BAKOVI DAGI i tukari tahoa e Noa.
GEN 7:17 Na parava i ravulu va, a vala i boru mavonga, i vonu a naru i kavitagua a malala, lakea a agarungu i pasi langa na naru polomeli liu na malala.
GEN 7:18 A naru i lolo rike hateka, i kavitagua a malala, lakea a agarungu i pasi na bokona dari.
GEN 7:19 A naru i bubu rike mavonga, i kavitagu a maka lolo dagi lobo.
GEN 7:20 Muri a naru i kavitagu a maka mapana lolo i polomeli na mita i polorua.
GEN 7:21 A maki lobo ri laho na malala ri pasiri: e huriki a bakovi lobo turana a sipsip a bulmakau, a livoa, a maka maki ri laho na robo.
GEN 7:22 A maki lobo na malala ri bango na ruperene ria, ri mate.
GEN 7:23 A maki lobo ri mahuri koea na malala, ri lobo liu. E huriki a bakovi a ngatavine, a maka kanirau, a kadirovo turana a maki lobo ri laho na robo, ri lobo liu na malala. A kabu ne Noa turana a maka maki mahuri pololilo na agarungu kunana ri mahuri.
GEN 7:24 A naru i kavitagua a malala na parava i 150.
GEN 8:1 Pali a Vure, i uka ma i longo­kabu­rungi e Noa turana a maka kanirau, a sipsip a bulmakau ra ri kapiloho na agarungu. I rudua a vilu i ngalu langa vona a dari, lakea a dari i hoho puru.
GEN 8:2 Ngane a Vure i tukari a maka matana naru na bobona malala a hunu, lakea a vala i lobo na niboru valai meli na hunu.
GEN 8:3 Pali a naru i vakatubu ni hoho puru na malala. Muri na parava i 150 a naru i hoho puru lobo.
GEN 8:4 Na parava i ravulu a polona i polorua, na poloruana keva, a agarungu i koro na mapana lolo e Ararat.
GEN 8:5 A dari i hoho puru, lakea na mugana parava na ravuluna keva i lele a maka mapana lolo.
GEN 8:6 I lobo a parava i ravulu va, lakea e Noa i talea a matatalana agarungu,
GEN 8:7 i vakabebe talea a kokoa, i bebe lae polovavo, i davea a dari ge hoho puru.
GEN 8:8 Muri i vakabebe talea a balu ge kasisia a dari i hoho puru pali, o i tabana.
GEN 8:9 A balu i uka ma i puruvisi a hini ge toka vona, a vuhuna a naru i tabana ni kavitagua a malala, lakea i bebe mule ne Noa na agarungu. E Noa i toto tala a limana i bole dilia a balu.
GEN 8:10 I dava na parava i polorua tabu na agarungu, muri i vakabebe tabua a balu.
GEN 8:11 Na tahuna a balu i hamule na malunga, i gogoa a pagana kai a oliv i karaputu karabea. Ngane e Noa i lohoka a dari i hoho puru pali.
GEN 8:12 I dava tabu na parava i polorua, muri i vakabebe tabua a balu, pali na tahuna iea a balu i uka ma i hamule.
GEN 8:13 Na tahuna e Noa i tahoka a pida i 601, na mugana parava na mugana keva, a naru i hoho puru liu na malala. I kalipidea a hini polomeli na agarungu, i masia a malala i kere.
GEN 8:14 Na parava i ravulu rua a polona i polorua (27) na ruana keva, a malala i kere liu.
GEN 8:15 Muri a Vure i takia e Noa,
GEN 8:16 “Ioe, turana e girihimu, e tumu mai turana e girihine tou, mu pagitala na agarungu.
GEN 8:17 O vakalaho tala a maka maki mahuri takutaku, ra ri turamu. A maka kadirovo, a maka kanirau, a maka maki lobo ri karaka na robo, ri gi poda kupo na malala, ri gi vole, ri gi vakavonu a malala, a kabune ria.”
GEN 8:18 Muri e Noa i pagitala, turana e girihina, e tuna mai, turana e girihine tou.
GEN 8:19 A maka kanirau, a maki lobo ri laho na robo, a kadirovo lobo, a maki legelege lobo ri mahuri na malala ri laho na tete, ri pagitala na agarungu.
GEN 8:20 Muri e Noa i kisia a dede-kedo ne BAKOVI DAGI, i bole ranga kanirau kabakaba, a kadirovo kabakaba, i rabalaki i gutu-vuro ria i habi ne Bakovi Dagi.
GEN 8:21 Na tahuna e BAKOVI DAGI i burongi a mangina maki nga i huli lakea vona, lakea i taki mulea, “Iau i uka ma ga ruduraha tabua a malala ne vona ni koli a naro hale ne huriki. I muholi a naro hale ne ria i vakatubu na tahuna ri kiroko vona. Pali ngane, i uka ma ga ratapile tabu a maka maki mahuri, ge manga a hini a rata pali.
GEN 8:22 “A malala bara i tahoka a parava, a rodo, a tahuna ni varo a hania, a tahuna ni mirio a hania, a tahuna na malangia, a tahuna ni kakarongo, a tahuna na haro, a tahuna na vala. A maka tahuna nga i uka ma ge lobo, bara ri tabuli vakaroro na malala.”
GEN 9:1 Muri a Vure i gamai e Noa turana e tuna mai i taki ria, “Mu bele kupo, mu vakavonu a malala.
GEN 9:2 A kanirau lobo na malala, a kadirovo lobo, a maki lobo ri karaka na malala, a manu lobo, bara ri mangenge ne mua. Ngane a ru na limane mua.
GEN 9:3 A maka maki mahuri ri laho ga maki ni kani ne mua, i manga a hini muga a habi ne mua a kobo mu kani. Pali ngane a habi a maki lobo ga maki ni kani ne mua.
GEN 9:4 Pali a bobona maki i vona a dara, naha ni kani, a vuhuna a dara i habi a nimahuri.
GEN 9:5 Pali e rei a bakovi, a kanirau, a livoa hateka i rabalakia tara viri, i muholi hateka bara kolia. E rei i rabalaki a viri tara, iau bara kolia vona a naro i ratea.
GEN 9:6 E rei a bakovi i rabalakia a viri tara, ia kunana bara i mate na limana bakovi, a vuhuna iau a Vure a rata rikea a bakovi i manga iau.
GEN 9:7 Pali mua, mu bele kupo mu vakavonua a malala.”
GEN 9:8 Muri a Vure i takia e Noa turana e tuna mai,
GEN 9:9 “Ngane ga vakatubua a ngava dagi turamu, turana e huriki a hamomu ri gi bele muri ma,
GEN 9:10 turana a maki mahuri ra ri turane mua: a maka kadirovo, a sipsip a bulmakau, a kanirau, turana a maki lobo ri pagitala turane mua na agarungu, ra maka maki mahuri lobo na malala.
GEN 9:11 Iau a rua a ngava dagi nau turane mua. A ta muholi, a marungulolo i uka ma ge ratapile tabu a maka maki mahuri. Muholi hateka a marungulolo i uka ma ge ratapile tabu a malala.”
GEN 9:12 Muri, a Vure i ta maea, “Iau a rua a kuriki na bubu, ge a nivakasiri na ngava dagi nau na maka maki mahuri na malala. Ra kuriki iea a nivakasiri na ngava dagi a rata turane mua, turana a maka maki mahuri ri turane mua na agarungu. Ra ngava iea i lakea tabu ne huriki a hamomu bara ri bele muri ma.
GEN 9:14 Na tahuna iau a ru a bubu polomeli na hunu, a kuriki bara i pesi vona.
GEN 9:15 Iau bara luhoi mule a ngava dagi a ratea turana a maka maki mahuri na malala. Nahea tabu a marungulolo ge ratapile lobo a maka maki mahuri.
GEN 9:16 Na tahuna a kuriki i pesi na bubu, bara masia, a luhoi mule a ngava dagi i tabuli vakaroro turagu, turana a kabu na maki mahuri na malala.”
GEN 9:17 Muri a Vure i takia e Noa, “A kuriki a nivakasiri na ngava dagi, a habia na maka maki mahuri na malala.”
GEN 9:18 E tune Noa to pagitala na agarungu ra nga: e Sem, e Ham, e Iapet. (E Ham e tamana e Kenan).
GEN 9:19 re tune Noa nga, tou a vuhuna e huriki lobo. To vakabele e huriki, muri ri mariu viliha lae na malala.
GEN 9:20 E Noa a bakovi ni leho na hania, i vakatubu ni varo a vain na hania vona.
GEN 9:21 Na parava tara, i ninu ranga vain vona, i manga, i mahita bobo pololilo na kape vona.
GEN 9:22 E Ham e tamane Kenan, i masia e tamana i mahita bobo, lakea i pagitala, i vakalongo e turana rua polovavo.
GEN 9:23 Lakea e Sem rua e Iapet ru nugu gaviri na bitone rua a varakia, ru laho bitona ru kavitagua e tamane rua, ra i mahita bobo. Ru matahere, a vuhuna ru koi ni masia e tamane rua i bobo.
GEN 9:24 Na tahuna e Noa i hadongo, i palala a gina, ni vakalongo vona a naro i ratea vona e tuna, ra kabina ruru.
GEN 9:25 Lakea e Noa i tahatea i ta maea, “E Kenan ni gi ruduraha! Bara ia a vorakato ne turana rua.”
GEN 9:26 Muri i ta maea tabu, “Ni gi kavurike e BAKOVI DAGI, a Vure ne Sem, pali e Kenan bara ia a vorakato ne Sem kunana.
GEN 9:27 A Vure ge hudo talea a hamone Iapet, e huriki a hamona ri gi made turana a hamone Sem, pali e Kenan ge ia a vorakato ne Iapet.”
GEN 9:28 Muri na marungulolo, e Noa i made tabu na pida i 350.
GEN 9:29 A pida vona ni gi palupu lobo i 950, muri i mate.
GEN 10:1 Iea a nitane tune Noa ala tolu: e Sem, e Ham, e Iapet. Ra bakovi nga to vakabele muri na marungulolo e huriki e tune tou bakovi.
GEN 10:2 A rane huriki e tune Iapet, a bakovi, ra nga: e Gomer, e Magog, e Madai, e Iavan, e Tubal, e Mesek, e Tiras.
GEN 10:3 A rane huriki e tune Gomer, a bakovi, ra nga: e Askenas, e Ripat, e Togama.
GEN 10:4 A rane huriki e tune Iavan, a bakovi, ra nga: e Elisa, e Tarsis, e Kitim, e Dodanim.
GEN 10:5 E huriki ri made tabukoi na dari ria a hamone Iavan. Ri mariu tala turana a kabu ne ria, a nita taku, ri lakea na robo takutaku ne ria.
GEN 10:6 A rane huriki e tune Ham, a bakovi, ra nga: e Kus, e Misram, e Put, e Kenan.
GEN 10:7 A rane huriki e tune Kus, a bakovi, ra nga: e Seba, e Havila, e Sabta, e Rama, e Sabteka. E tune Rama a bakovi ra nga: e Seba e Dedan.
GEN 10:8 E Kus i tahoka e tuna tara a rana e Nimrod. E Nimrod ia a ubu na malala.
GEN 10:9 Na tahuna e huriki ri ngaru ni kavurike a bakovi tara bara ri ta maea, “A bakovi iea i manga e Nimrod, re BAKOVI DAGI i ratea ia a bakovi hateka na pinango.”
GEN 10:10 E Nimrod i matakari a maka tanga dagi na robo nga: e Babel, e Erek, e Akad, e Kalne na robo e Babel.
GEN 10:11 I pea a robo iea, i mariu lakea o Asiria i ratea vonga a tanga e Ninive, e Rehobot-Ir, e Kala, e Resen.
GEN 10:12 A tanga dagi e Resen i pesi na kurukuruna e Ninive e Kala.
GEN 10:13 A rane huriki e tuna e Misram ra nga: e Lud, e Anamim, e Lehab, e Naptu,
GEN 10:14 e Patrus, e Kaslu (a vuhuna e huriki a Palestina), e Kaptor.
GEN 10:15 A rane huriki e tune Kenan a bakovi ra nga: e Sidon a tabua. E tarina e Het,
GEN 10:16 e Iebus, e Amor, e Girgas,
GEN 10:17 e Hivi, e Arki, e Sin,
GEN 10:18 e Arva, e Semar, e Hamat. Muri e huriki a kabu ne Kenan ri mariu viliha.
GEN 10:19 A vanagi na robo e Kenan i tubu o Sidon, i polo lakea o Gerar, i lokovonga liu o Gasa, muri i kaogo vonga i lakea mai e Sodoma, e Gomora, e Adma, e Seboim, lakea i harena o Lasa.
GEN 10:20 Re huriki a kabu nga, a hamone Ham, ri tahoka a nita ne ria takutaku, ri made ramai a kabu ne ria.
GEN 10:21 E tarina e Iapet a rana e Sem. E Sem tara i tahoka e huriki e tuna. E huriki a kabu ne Eber ria lobo ri mapoda tala ne Sem.
GEN 10:22 A rane huriki e tune Sem bakovi, ra nga: e Elam, e Asur, e Arpaksad, e Lud, e Aram.
GEN 10:23 A rane huriki e tune Aram bakovi, ra nga: e Us, e Hul, e Geter, e Mas.
GEN 10:24 E Arpaksad e tamane Sela, e Sela e tamane Eber.
GEN 10:25 E Eber i tahoka e tuna bakovi ala rua: e Ioktan, e Peleg. E Peleg ni gale maea, a vuhuna na tahuna iea e huriki ri vapida viliha lae.
GEN 10:26 E Ioktan i tahoka e tuna ranga, a rane ria ra nga: e Almodad, e Selep, e Hasarmavet, e Ierah,
GEN 10:27 e Hadoram, e Usal, e Dikla,
GEN 10:28 e Obal, e Abimael, e Seba,
GEN 10:29 e Opir, e Havila, e Iobab. E huriki a bakovi nga, ria e tune Ioktan.
GEN 10:30 A robo ri made vona i tubu o Mesa, i lokovonga o Separ na tabeke i vona a lolo na robo na nirikena haro.
GEN 10:31 Re huriki a kabu nga a hamone Sem, ri tahoka a nita ne ria takutaku, ri made ramai a kabu ne ria.
GEN 10:32 Re huriki a bakovi nga ria a hamone huriki e tune Noa, ri made ramai a kabu ne ria takutaku. E huriki a kabu na malala ri mapoda tala ne ria muri na marungulolo.
GEN 11:1 Ngane e huriki na malala ri tahoka a nita i taku ri vata vona.
GEN 11:2 Ri mariu lakea na nirikena haro ri matavisia a bilane Sinar, ri made vona.
GEN 11:3 Muri ri vata, ri ta maea, “Mu valai, si gi pipi, si gi rata kamumu a brik, si gi gutu kamumu, ri gi tora.” I uka ma ri bole a kedo, ri bole a brik. Muri ri hudo na kasita a brik.
GEN 11:4 Muri ri ta maea, “Mu valai, si gi haea a vuhutanga ne hita. Ge pesi vona tara roho dagi, a mapana ge padoi a hunu, bara si tahoka a rane hita vona. Si gi made tata, i uka ma si gi mariu viliha lae na malala.”
GEN 11:5 Pali e BAKOVI DAGI i puru valai, ge kasisia a tanga dagi turana a mapana roho dagi e huriki a bakovi ri haea.
GEN 11:6 Lakea e BAKOVI DAGI i ta maea, “Re huriki nga ri pesi taku, ri tahoka a nita i taku ri vakatubu ni haea a mapana roho, pali a ra maki ri luhoi ni rata, bara ri rata kunana.
GEN 11:7 Te ge puru te ge vakavaroru a nitane ria, i uka ma ri gi valongokilala a ngava.”
GEN 11:8 Lakea, e BAKOVI DAGI i kalipida ria vonga, ri mariu viliha lae na malala, i uka ma ri hae tabua a vuhutanga iea.
GEN 11:9 Ni gale a vuhutanga iea e Babel, a vuhuna e BAKOVI DAGI i vakavilihea a nitane huriki na malala. I vakatubu vonga, e BAKOVI DAGI i vakalipida ria, i vakamariu viliha lae ria, ri lakea na robo lobo na malala.
GEN 11:10 A nita na kabu ne Sem i maea: i lobo a pida i rua muri na marungulolo, e Sem i tahoka a pida i 100, lakea i vakabelea e Arpaksad.
GEN 11:11 Muri i tahoka tabu a pida i 500, i vakabele e huriki e tuna a bakovi a ngatavine.
GEN 11:12 E Arpaksad i tahoka a pida i 35, i vakabelea e Sela.
GEN 11:13 Muri i tahoka tabu a pida i 403, i vakabele e huriki e tuna a bakovi a ngatavine.
GEN 11:14 E Sela i tahoka a pida i 30, i vakabelea e Eber.
GEN 11:15 Muri i tahoka tabu a pida i 403, i vakabele e huriki e tuna a bakovi a ngatavine.
GEN 11:16 E Eber i tahoka a pida i 34, i vakabelea e Peleg,
GEN 11:17 muri i tahoka tabu a pida i 430, i vakabele e huriki e tuna a bakovi a ngatavine.
GEN 11:18 E Peleg i tahoka a pida i 30, i vakabelea e Reu,
GEN 11:19 muri i tahoka tabu a pida i 209, i vakabele e huriki e tuna bakovi a ngatavine.
GEN 11:20 E Reu i tahoka a pida i 32, i vakabelea e Serug,
GEN 11:21 muri i tahoka tabu a pida i 207, i vakabele e huriki e tuna a bakovi a ngatavine.
GEN 11:22 E Serug i tahoka a pida i 30, i vakabelea e Nahor,
GEN 11:23 muri i tahoka tabu a pida i 200, i vakabele e huriki e tuna a bakovi a ngatavine.
GEN 11:24 E Nahor i tahoka a pida i 29, i vakabelea e Tera,
GEN 11:25 muri i tahoka tabu a pida i 119, i vakabele e huriki e tuna a bakovi a ngatavine.
GEN 11:26 E Tera i tahoka a pida i 70, i vakabele e Abram, e Nahor, e Haran.
GEN 11:27 A nita na kabu ne Tera i maea: e Tera ia e tamane Abram, e Nahor, e Haran. E Haran ia e tamane Lot.
GEN 11:28 Na tahuna e Tera i tabana ni mahuri, e tuna, e Haran, i mate na tanga ni poda ia vona o Ur, na robo e Kaldia.
GEN 11:29 E Abram rua e Nahor ru tahoka e girihine rua. E Sarai, e girihine Abram. E Milka e girihine Nahor. E Milka rua e Iska, e tamane rua e Haran.
GEN 11:30 E Sarai i lame, i uka e tuna.
GEN 11:31 E Tera i tuli e tuna e Abram, e tubuna e Lot (e tune Haran), e lahuana e Sarai (e girihine Abram), ri pea a tanga e Ur na robo ne Kaldia, ri mariu lakea o Kenan. Pali na tahuna ri bele o Haran, ri made vonga.
GEN 11:32 E Tera i tahoka a pida i 205, muri i mate vonga o Haran.
GEN 12:1 E BAKOVI DAGI i takia e Abram, “O pe a tanga vomu, e huriki a viri vomu, a kabu ne tamamu, o lakea vona a robo ga vakasiri ioe vona.
GEN 12:2 Ga gamai ioe, ga rata e huriki a kabu vomu ri gi ala kupo. Ga ratea a ramu ge dagi, go gamai e huriki.
GEN 12:3 E huriki ri gamai ioe, iau tara ga gamai ria. Pali e rei a viri i ruduraha ioe, bara ruduraha ia. Ne vomu kunana, ga gamai lobo e huriki a bakovi na malala.”
GEN 12:4 Lakea e Abram i muri mai a nita i takia vona e BAKOVI DAGI, i vano. E Lot tara i vano turana. E Abram i tahoka a pida i 75 na tahuna i pea e Haran.
GEN 12:5 I vano turana e girihina e Sarai, e Lot e tune tarina, e huriki a vora na leho, turana a maka mahala vona i vakabele o Haran. Ri havai maia a robo e Kenan, ri lokovonga, ri bele vonga.
GEN 12:6 Na tahuna ri bele o Kenan, ri lakea na hini i pesi vona a kai dagi ni gale e More, na tanga e Sekem. Na tahuna iea e huriki a Kenan ri made vona a robo iea.
GEN 12:7 Pali e BAKOVI DAGI i bele ne Abram i ta maea, “Ga habia ne huriki a hamomu a malala iea.” Lakea i kisia vonga a dede-kedo na hini i bele vona e BAKOVI DAGI.
GEN 12:8 Pali muri i pea a hini ngi, i havai maia a lolo i pesi na tabeke na nirikena haro na tanga e Betel. I vakapesia vonga a kape vona na kurukuruna tanga e Betel na nirolona haro, e Ai na nirikena haro. I ratea vonga a dede-kedo ne BAKOVI DAGI, i vasileki vona a rane BAKOVI DAGI.
GEN 12:9 Muri e Abram i malaga, i laho lokovonga na robo e Negev.
GEN 12:10 Ngane i bele vona a pago a tanga i made vona e Abram. Lakea, i puru o Egipto, ge tanga taro vonga, a vuhuna i hateka a pago.
GEN 12:11 Na tahuna ta ge dili o Egipto, i varea e girihina, e Sarai, i ta maea, “Ioe a ngatavine mata kamumu.
GEN 12:12 Bara ri matai ioe e huriki a bakovi o Egipto, bara ri ta maea, ‘Ra ngatavine iea e girihina.’ Muri bara ri rabalaki iau, pali bara o mahuri ke.
GEN 12:13 O taki ria, ge ioe e kurabagu, pali iau bara ni rata kamumu, i uka ma ri gi rabalaki iau.”
GEN 12:14 E Abram i bele o Egipto, lakea e huriki a bakovi vonga ri masia e girihina i mata kamumu hateka.
GEN 12:15 Lakea e huriki a bolekori ne Parao ri masia, ri vakalongoa e Parao. Muri ri tulia e Sara i lakea na ruma dagi vona.
GEN 12:16 Lakea e Parao i rata kamumua e Abram, a vuhuna i pahaluhoia e Sara, ta e kurabana. Muri e Parao i habi ne Abram a maka sipsip, a bulmakau, a donki, a kamel a toga a kinana, turana e huriki a vora bakovi a ngatavine.
GEN 12:17 Pali e BAKOVI DAGI i vakamadihi na maka gilanga dagi e Parao, turana e huriki ri leho vona, a vuhuna e Sarai i made na ruma ne Parao.
GEN 12:18 Lakea e Parao i galea e Abram, i nanea, “Ioe o rata navai iau? I navai i uka ma o ta kavakava vona a ngatavine iea ge girihimu?
GEN 12:19 I navai a hini o tami iau o takia e Sarai ta e kurabamu, lakea iau a bolea ta ga parangi vona? Pali ra ngatavine iea, ia e girihimu! O bolea o vano turana!”
GEN 12:20 Muri e Parao i rudu e huriki a tagari vona, ri tono tala o Egipto e Abram rua e girihina, turana a maki lobo ne rua.
GEN 13:1 Lakea e Abram rua e girihina ru pea e Egipto ru hamule sike o Negev, turana a maki lobo ne rua. E Lot tara i turane rua.
GEN 13:2 E Abram i tahoka a mahala i kupo: a maka sipsip a bulmakau, a silva, a gol.
GEN 13:3 I pea e Negev i laho tope dili tope tala na maka tanga. Muri i vano i bele o Betel, na hini i vakapesi muga a kape vona na kurukuruna e Betel, e Ai,
GEN 13:4 ra hini i kisi a dede-kedo muga vona. I vasileki tabu vonga ne BAKOVI DAGI.
GEN 13:5 Ngane e Lot, ra i laho turana e Abram, ia tara i tahoka a mahala i kupo. I tahoka a kabuna sipsip, a kabuna bulmakau. E huriki a vora vona ranga, ri ala kupo.
GEN 13:6 Lakea i uka ma i kupo a malala ge vona a varili ne vone rua ru gu made palupu vona, a vuhuna i kupo a kabuna sipsip a bulmakau ne rua.
GEN 13:7 Lakea e huriki a vora ne Abram ri vagege turana e huriki a vora ne Lot. Na tahuna iea e huriki a Kenan a Peres ria ranga ri made vona a malala iea.
GEN 13:8 Pali e Abram i takia e Lot, “Nahea tu gu vata puhaki. E huriki a vora ne tarua ranga, nahea ri gi vata puhaki, a vuhuna tarua a viri ala taku.
GEN 13:9 Masia, a malala dagi i tabana, pali ngane tu gu vapida. Ioe bara o ngaru ni lakea na nirikena haro, iau bara lakea na nirolona haro. Pali ioe bara o lakea na nirolona haro, iau bara lakea na nirikena haro.”
GEN 13:10 Lakea e Lot i mata rike i masia a bila ne Iordan, i vano i harena o Soar i vona a maka naru. I mata manga a hania ne BAKOVI DAGI, i manga a malala ne huriki a Egipto, tabukoi o Soar. Ra hini nga i muga ne BAKOVI DAGI i ratapile e Sodoma e Gomora.
GEN 13:11 Lakea e Lot i bolea a bila ne Iordan na tabeke na nirikena haro.
GEN 13:12 Ru vapida, lakea e Abram i vano i made na malala ne huriki a Kenan. Pali e Lot i made na kurukuruna maka tanga dagi na bilane Iordan. I ratea a tanga vona tabukoi ne Sodoma.
GEN 13:13 Re huriki a bakovi o Sodoma ria a viri hale, ri rata vakaroro a naro hale hateka na matane BAKOVI DAGI.
GEN 13:14 E Lot i vano pali, lakea e BAKOVI DAGI i takia e Abram, i ta maea, “O pesi vonga o mata sike, o mata puru, o mata lakea na nirikena haro, o mata lakea na nirolona haro.
GEN 13:15 Ra maka robo o matai, ga habi vomu turane huriki a hamomu, ge ne mua vakaroro.
GEN 13:16 Iau ga rata e huriki a hamomu ri gi ala kupo manga a habulo na malala, pali e rei i kara ni gi a habulo, ia kunana bara i gi e huriki a hamomu.
GEN 13:17 O vano, o laho vona a niolana, a nibolana a malala, a vuhuna iau ga habia vomu.”
GEN 13:18 Lakea e Abram i pukea a kape vona, i mariu lakea o Hebron. I ratea a tanga vona tabukoi na kai dagi ne Mamare, na hini i kisi muga a dede-kedo ne BAKOVI DAGI vona.
GEN 14:1 Na tahuna iea, e Amrapel a hariki o Sinar re Babilon, e Ariok, a hariki o Elasar, e Kedor a hariki o Elam, e Tidal a hariki o Goim, ri vadili vapopo a tara,
GEN 14:2 ri vaubi turana a tara ne Bera a hariki o Sodoma, e Birsa a hariki o Gomora, e Sinab a hariki o Adma, e Semeber a hariki o Seboim. A hariki o Bela re Soar, ia tara i dili turane ria.
GEN 14:3 Re huriki a hariki nga ri vadili vapopo ri ru palupu a tara ne ria na maloku ne Sidim ra Dari Mate.
GEN 14:4 Re huriki nga, e Kedor i matakari ria na pida i ravulu a polona i rua. Pali na tahuna ri bele na pida i ravulu a polona i tolu, ri koi na narone Kedor, lakea ri vaubi turana e huriki a tara vona.
GEN 14:5 Na pida i ravulu a polona i va, e Kedor turana e huriki a hariki ri muri vona, ri vaubi turana a tara ne Repait iea o Asterot Karanaim. Ri ratapile a tara ne Sus iea o Ham. Ri ratapile a tara ne Em iea o Save Kiriataim.
GEN 14:6 Ri ratapile a tara ne Hori na lolo na robo e Seir, i vano i harena o El Paran tabukoi na tabeke i ngeki.
GEN 14:7 Ri vuru mule vonga, ri lakea mai e En-Mispat re Kades, ri rata a vabinga. Ri bole lobo a robo ne huriki a Amalek turana a robo ne huriki a Amor ra ri made o Hasason-Tamar.
GEN 14:8 Muri a hariki i ala lima na tanga e Sodoma, e Gomora, e Adma, e Seboim, e Bela re Soar, ri puru na Maloku ne Sidim.
GEN 14:9 Ri paha taga vonga, ri dava a tara ne Kedor a hariki o Elam, e Tidal a hariki o Goim, e Amrapel a hariki o Sinar, e Ariok a hariki o Elasar. A tara na hariki o Sodoma i lima, a tara na hariki o Elam i va.
GEN 14:10 Ra Maloku ne Sidim i tahoka a maka lovo na kolta. Na tahuna ri ha a tara na hariki o Sodoma o Gomora, ri boru puru na lovo ranga, pali ranga ri ha sike na kupona.
GEN 14:11 Lakea e huriki a tara ne huriki a hariki ala va ri bole lobo a maka mahala, a maki ni kani ne huriki a tara ne Sodoma e Gomora, ri vano turana.
GEN 14:12 E Lot, e tune tarine Abram, i made o Sodoma na tahuna iea. Ia tara ni lakavu, ni bole turana a maka mahala vona.
GEN 14:13 A bakovi i ha na vabinga, i vano i vakalongoa e Abram, ra Hibru. E Abram i made tabukoi na maka kai dagi ne Mamare. E Mamare e turana e Eskol e Aner, tou a hamone Amor, pali to taga turane Abram.
GEN 14:14 Na tahuna e Abram i longo ni lakavu e tune tarina, i gale palupu e huriki a tara ni vaubi ala 318, na kabu vona kunana, ri vano ri matakana a hariki ala va nga, ri harena na tanga e Dan.
GEN 14:15 Na rodo e Abram i kalipopoa a tara vona, ri valili vona e huriki a pile, ri vano ri harena o Hoba meli o Damaskus.
GEN 14:16 E Abram i bole mulea e Lot, e tuna e tarina, turana a maka mahala vona, e huriki a ngatavine turana e huriki a viri ranga.
GEN 14:17 E Abram i ratapilea a tara ne Kedor turana e huriki a hariki ri taga palupu, muri i hamule. A hariki o Sodoma i longoa, i vano i halala ia na Maloku e Save ra Maloku na Hariki.
GEN 14:18 Muri e Melkisadek, a hariki o Salem i bole valai a bret a vain. E Melkisadek ia a prister na Vure Meli Liu.
GEN 14:19 I gamaia ngane e Abram i ta maea, “A Vure Meli Liu i rata rike a hunu a malala i gamai ioe.
GEN 14:20 Ni gi kavurike a Vure Meli Liu, i ru na limamu e huriki a pile vomu.” Lakea e Abram, i ru na naguna i ravulu a maki lobo i bole, i habi ne Melkisadek a naguna i taku.
GEN 14:21 A hariki o Sodoma i takia e Abram, i ta maea, “A ngaru go bole lobo a maka mahala, pali e huriki a bakovi nau kunana ri gi hamule mai iau.”
GEN 14:22 Pali e Abram i koli mule, i ta maea, “Iau a kaba pali ne BAKOVI DAGI, a Vure Meli Liu, i rata rike a hunu a malala. Iau a rata a ngava dagi pali,
GEN 14:23 i uka ma ga bole ranga maki vomu. A maki lili kiroko i manga a motana vahapolo ranga i uka ma ga bole, a vuhuna muri ma bara o ta maea, ‘Iau kunana a tuhoria e Abram i tahoka a mahala i kupo.’
GEN 14:24 Iau i uka ma ga bolea tara maki. A maki bara bole kunana ra maki ri kani pali e huriki a tara nau. Pali a turagu nga ala tolu e Aner, e Eskol, e Mamare, to go bole ne tou.”
GEN 15:1 Muri a nitane BAKOVI DAGI i bele ne Abram na vurena, i ta maea, “Abram, naha ni mangenge, iau a galeu vomu, ga rata kamumu hateka ioe.”
GEN 15:2 Lakea e Abram i nana maea, “Bakovi Dagi, ioe a matakari na maki lobo, a ra go habia nau? Iau a bala e tugu. A viri bara i bole a murigu re Elieser o Damaskus.
GEN 15:3 Ioe i uka ma o habia nau tara koma. A vora nau bara i bole lobo a mahala nau.”
GEN 15:4 Muri a ngava ne BAKOVI DAGI i bele vona, “Ra bakovi iea i uka ma ge bole a murimu. E tumu muholi a viri bara i bole a murimu.”
GEN 15:5 Muri e Bakovi Dagi i tuli talea e Abram i takia, “O mata rike na hunu, o toni ni gi lobo a hada nga.” Muri i takia, “E huriki a hamomu bara ri kupo manga a hada nga.”
GEN 15:6 E BAKOVI DAGI i galea e Abram a bakovi malamala, a vuhuna i luhoi a nitana.
GEN 15:7 I taki tabua e Abram, “Iau e BAKOVI DAGI. Iau kunana a bole tala ioe na tanga e Ur na robo e Kaldia, a habia vomu ra malala iea, ngane ge ne vomu liu.”
GEN 15:8 Lakea e Abram i ta maea, “Bakovi Dagi, ioe a matakari na maki lobo, ga matakilala navia a malala iea ge ne nau?”
GEN 15:9 Lakea a Vure i koli mulea, i ta maea, “O vano o bole valai a kinana bulmakau, a meme, a sipsip a toga. A pida ne tou ge tolu. O bole turana a balu tano, a balu havura.”
GEN 15:10 Lakea e Abram i bole a maka maki nga, i habi na Vure. Muri i poka a maka maki nga, i bale ruarua. Pali a kadirovo i rua i uka ma i poka.
GEN 15:11 Muri i valai a maka loha ta ri gi gogo a maka kania nga, pali e Abram i lili tala ria.
GEN 15:12 I tabukoi ge rolo a haro, i mahita mate e Abram, lakea a uvo vatubi i kavitagua, i ratea i mangenge hateka.
GEN 15:13 Lakea e BAKOVI DAGI i takia, “Muholi hateka, e huriki a hamomu bara ria a mosi na robo basi tara, bara ni vakavora, ni vakamadihi ria na pida i 400.
GEN 15:14 Pali iau bara ratapilea a tanga ra i vakavora ria, muri bara ri pagitala turana a mahala i kupo.
GEN 15:15 Pali ioe bara o made na nivalemu ge harena na tahuna o gare liu vona, o mate, ni tanu.
GEN 15:16 E huriki a hamomu ri vakatubu ne kukulima, bara ri hamule valai koea muri ma. Pali i uka ma ge ioe, a vuhuna a naro hale ne huriki a Amor i uka ma i hale hateka ma.”
GEN 15:17 I rolo pali a haro, i bele a uvo lakea i bele a hubena kanono turana a ulo i vona a pokona, ru tabuli na kurukuruna kania.
GEN 15:18 Na parava iea, e BAKOVI DAGI i ratea a ngava dagi turane Abram, i ta maea, “Iau a habia ne huriki a hamomu a malala iea, i vakatubu na naru e Vadi o Egipto i harena na naru dagi e Iupretis,
GEN 15:19 turana a maka robo na kabu ne Ken, ne Kenis, ne Kadmon,
GEN 15:20 ne Hiti, ne Peres, ne Repaim,
GEN 15:21 ne Amor, ne Kenan, ne Girgas, ne Iebus.”
GEN 16:1 E Sarai, e girihine Abram, i uka ma i poda a koma, pali a vorakato na ngatavine o Egipto i leho vona, a rana e Hagar.
GEN 16:2 Lakea e Sarai i takia e Abram, i ta maea, “E BAKOVI DAGI i uka ma i ngaru iau ga tahoka a koma. O vano o mahita turana a vora ngatavine nau, ge tahoka a koma. Muri ga paua a koma, ga vakabele a kabu tarua vona.” E Abram i longo vona a ngavane Sarai.
GEN 16:3 Lakea e Sarai i bolea a vorakato vona, a ngatavine o Egipto, i habia ne girihina i parangi vona. Na tahuna iea, e Abram i made pali vonga o Kenan na pida i ravulu.
GEN 16:4 E Abram i mahita turana e Hagar, muri i singou. Na tahuna e Hagar i lohoka vona i singou, i vakatubu ni tagege i biu a ngatavine dagi vona e Sarai.
GEN 16:5 Lakea e Sarai i tahatea e Abram, i ta maea, “Ioe a vuhuna ra a nimadihi i bele nau. A habia vomu a vorakato nau ngane i singou, i tagege hateka. Pali e BAKOVI DAGI kunana bara i vara tarua ma.”
GEN 16:6 E Abram i koli mulea a nitane girihina, i ta maea, “A vorakato vomu ngane i made na limamu. O rata virihia vona a ra maki o ngarua vona.” I vakatubu vonga, e Sarai i tepua e Hagar, muri e Hagar i ha.
GEN 16:7 Na dala lakea o Sur, tabukoi na naru kiroko na tabeke i ngeki, i luve taho e Hagar vonga a agelo ne BAKOVI DAGI.
GEN 16:8 Lakea a agelo i ta maea, “Hagar, ioe a vora ne Sarai, o valai vai? Pali ngane go loko vai?” E Hagar i koli, i ta maea, “Iau a ha na ngatavine dagi nau, e Sarai.”
GEN 16:9 Lakea a agelo ne BAKOVI DAGI i tono mulea i takia, “O hamule mai e kabe Sarai, naha ni tagege tabu, o longototoa a ngavana.”
GEN 16:10 Lakea a agelo ne BAKOVI DAGI i voro polo liu a nita, i ta maea, “Ga vakabele ge kupo e huriki a hamomu, bara ni keri ni gi.”
GEN 16:11 A agelo ne BAKOVI DAGI i taki tabua e Hagar, “Ngane o singou, bara o podea a bakovi, o vunua a rana e Ismael, a vuhuna e BAKOVI DAGI i longoa a nitangi vomu.
GEN 16:12 E tumu bara i mata ringangi manga a donki, bara i tepu e huriki lobo. E huriki lobo ranga bara ri tepua. A nimade vona turana e huriki a viri vona i uka ma ge kamumu.”
GEN 16:13 E Hagar i vunua a rana e BAKOVI DAGI ra i ta turana, “A Vure i matai iau.” A vuhuna i ta maea, “A masia pali a Viri i matai iau.
GEN 16:14 Lakea ni gale liu ra lomu iea, “a naru na Viri Mahuri i matai iau.” A naru iea i tabana na kurukuruna e Kades e Bered.
GEN 16:15 Muri, e Hagar i podea e tune Abram bakovi, lakea e Abram i vunua e Ismael.
GEN 16:16 E Abram i tahoka a pida i 86 na tahuna e Hagar i podea e Ismael.
GEN 17:1 Na tahuna e Abram i tahoka a pida i 99, i bele vona e BAKOVI DAGI i takia, “Iau a Vure Tuhaka, o laho na matagu, o rata a naro malamala.
GEN 17:2 Ga vakatorea a ngava dagi ne tarua, e huriki a hamomu ri gi bele kupo.”
GEN 17:3 Muri e Abram i turume i lolu puru na matana Vure, lakea a Vure i takia,
GEN 17:4 “Iau ga ratea vomu tara ngava dagi, ioe ga vuhuna e huriki a kabu ge ala kupo.
GEN 17:5 Ioe i uka ma ni gi gale tabu ge Abram, ngane a ramu e Abraham, a vuhuna a rata ioe ge ioe e tamane huriki a kabu ge kupo.
GEN 17:6 Ga ratea a kabu vomu ge vakabele e huriki a kabu i ala kupo, i ranga bara ria a hariki.
GEN 17:7 Iau ga vakatorea vomu a ngava dagi. Ra ngava dagi iea ge tabuli vakaroro vomu, ne huriki a hamomu ri gi bele muri ma. A ngava dagi i maea: Iau a Vure Muholi vomu, a Vure ne huriki a hamomu.
GEN 17:8 Ra malala e Kenan, ngane o made manga a mosi vona, ga habia vomu, ge vomu liu. Muri ga habi poloa ne huriki a hamomu. Pali iau, ge iau a Vure ne ria.”
GEN 17:9 Muri a Vure i takia e Abraham, i ta maea, “Ioe turana e huriki a hamomu mu longototo a ngavagu.
GEN 17:10 Ra ngava dagi i lakea vomu, i lakea ne huriki a hamomu mu gu longototo kamumua: e huriki a bakovi lobo na kabu vomu ni gi pala a kuline ria.
GEN 17:11 Ra naro ni vapala a kuli, ne vona ni vakasiri a ngava dagi a habia vomu.
GEN 17:12 E huriki a hamomu ri gi muri mai a naro iea, ri gi pala a kulina koma bakovi, ri tahoka a parava i polotolu. E huriki a koma bakovi, i uka ma a hamomu, ni poda na tabeke vomu, a tuna vora ni kona na tanga basi, ngi ranga ni gi pala kuline ria.
GEN 17:13 E huriki a koma ni poda na tabeke vomu o ni kona na moni, ni gi pala a kuline ria. Ra ngava dagi nau i lakea na kuline mua ni pala ge tabuli vakaroro.
GEN 17:14 A bakovi i uka ma ni pala a kulina, ni gi tonotala na kabu vona, a vuhuna i uka ma i ramai a ngava dagi nau.”
GEN 17:15 A Vure i taki tabua e Abraham, “E girihimu i uka ma ni gi gale tabu ge Sarai, ngane ni gi gale ge Sara.
GEN 17:16 Iau ga gamaia e Sara ge podea tara e tumu a bakovi. Ga gamaia e Sara ge ia e kinana e huriki a kabu i kupo, e huriki a hariki bara ri bele vona.”
GEN 17:17 Muri e Abraham i lolu puru liu na malala, i nongo, i taki mulea, “Iau a gare, a tahoka a pida i 100 pali, pali ga vakaluve navia a koma bakovi? Pali e Sara tara i gare, i tahoka a pida i ravulu polo va (90). Pali ge poda navia a koma?”
GEN 17:18 Lakea e Abraham i takia a Vure, “O gamaia e Ismael, ge manga ra koma o takia.”
GEN 17:19 Lakea a Vure i ta maea, “Muholi, pali e girihimu e Sara ge podea a koma bakovi, o vunua a rana e Isak. Ga vakatora a ngava dagi nau vona, turana e huriki a hamona.
GEN 17:20 A nitamu i lakea ne Ismael a longoa pali. Muholi hateka ia tara ga gamaia, ga ratea ge tahoka, ge bele kupo e huriki a hamona. Ge ia e tamane huriki a matakari i ala ravulu a polona i rua (12), ga ratea a kabu vona ge dagi.
GEN 17:21 Pali a ngava dagi nau ga habi kunanea ne Isak. E Sara ge poda na parava maea na pida muri.”
GEN 17:22 Na tahuna a Vure i ta lobo i pea e Abraham, i sike.
GEN 17:23 Muri e Abraham i ramaia a nitana Vure, i bole e tuna e Ismael turana e huriki ni poda na tabeke vona, a vora ni kona, e huriki a bakovi lobo na tabeke vona, ni pala ria.
GEN 17:24 E Abraham i tahoka a pida i ravulu polova a polona i polova (99), ni pala a kulina.
GEN 17:25 E tuna, e Ismael, i tahoka a pida i ravulu a polona i tolu (13), ni pala a kulina.
GEN 17:26 Na parava iea kunana e Abraham rua e tuna e Ismael ni pala a kuline rua,
GEN 17:27 turane huriki a bakovi ri made turana e Abraham, e huriki ni poda na tabeke vona, e huriki a vora ni kona na mosi, ni pala a kuline ria.
GEN 18:1 E BAKOVI DAGI i bele ne Abraham tabukoi na maka kai dagi o Mamare. A haro i kara hateka lakea i made na matana kape vona.
GEN 18:2 E Abraham i mata rike i matai a mosi i ala tolu to pesi tabukoi vona. Na tahuna i matai tou, i pesi rike na kape, i tagui tou, i lolu puru ge vakasiri a ningaru vona ne tou.
GEN 18:3 Lakea i ta maea, “Matou a bakovi dagi ngane naha ni laho polo, iau a hulu mavonga, a ngaru matou moto malo ge popote.
GEN 18:4 Moto made dili na taruna kai, ni gi bole valai a naru moto vahilolo a vahane matou vona.
GEN 18:5 Ga bole ranga maki moto kani, moto tuhaka, muri moto go laho, a vuhuna moto bele nau.” A mosi nga to koli a ngavana, to ta maea, “Kamumu hateka, o rata manga a hini o taki.”
GEN 18:6 Lakea e Abraham i laho malaviriri lakea na kape i takia e Sara, “O mala­viriri, o bole a plaoa ge 22 lita, o pulo, o rata ranga bret.”
GEN 18:7 Muri i nunu lakea na kabuna bulmakau, i rabalakia a tuna bulmakau gavutuvutu, i habia na vora vona, i papa hari ni gutuna.
GEN 18:8 Ni gutu lobo a tuna bulmakau, muri i bole turana sis, a namona ruru na bulmakau i ru puru na ngalane tou. To kakani tou, pali e Abraham i pesi dava tabukoi ne tou na taruna kai.
GEN 18:9 Ngane a mosi nga to nanea, “Avia e girihimu e Sara?” E Abraham i koli, i ta maea “Ia pololilo na kape.”
GEN 18:10 Muri e BAKOVI DAGI i ta rike i ta maea, “Iau ga hamule valai tabu na tahuna maea na pida muri, e girihimu bara i tahoka pali e tuna a bakovi.” Pali e Sara i pesi kunana na matana kape na bitona e Bakovi Dagi, i longo a ngava i taki.
GEN 18:11 E Abraham rua e Sara ru gare pali, a pida ne rua i kupo. E Sara i polotaroa pali a pida na ni vakabele a koma.
GEN 18:12 Lakea e Sara i luhoi kadoa a ngava i takia a bakovi dagi, lakea i nongo vaki mule ia, i ta maea, “Iau i malulu pali a kuligu, e girihigu tara i gare, ra ngane ga pitei navai vona a ngava iea.”
GEN 18:13 Muri e BAKOVI DAGI i takia e Abraham, i ta maea, “A ra vuhuna e Sara i nongo, i ta maea, ‘Iau ga singou navai? Iau a gare pali.’
GEN 18:14 A maki lobo a maki tavula ne BAKOVI DAGI. Na tahuna a hamule valai tabu na tahuna maea na pida muri e Sara bara i tahoka pali e tuna a bakovi.”
GEN 18:15 Pali e Sara i mangenge i ta maea, “Iau i uka ma a nongo.” Lakea e Bakovi Dagi i takia, “Muholi, ioe o nongo.”
GEN 18:16 Na tahuna to pesi rike a mosi nga to go vano, to tuva puru, to masia e Sodoma. E Abraham i turane tou ge rupolo tou.
GEN 18:17 Muri e BAKOVI DAGI i taki mule ia, “A maki ga ratea i uka ma ga ta ruhulolo ne Abraham.
GEN 18:18 Muholi, e huriki a hamone Abraham bara ri ala kupo, ri pesi tora hateka. A kabu lobo na malala ni gi gamai na limana kunana.
GEN 18:19 Iau a vulakia e Abraham, ge vara e huriki e tuna, e huriki a viri vona ri gi longototoa a ngavagu. Ri gi rata a naro ge kamumu ge kiripiripi, lakea iau bara habia ne Abraham a maki a ta muholi vona ga habia vona.”
GEN 18:20 Muri e BAKOVI DAGI i ta maea, “A ngava ni taki virihi e Sodoma e Gomora i dagi hateka, a naro hale ne huriki vonga i hale liu,
GEN 18:21 Iau ga puru lokovonga ga matai a narone ria i manga a hini a longo pali o i uka. Ge uka, a ngaru ni longo.”
GEN 18:22 A bakovi ala rua nga ru ngalakapulo, ru laho lakea o Sodoma. Pali e BAKOVI DAGI rua e Abraham ru pesi mule vonga.
GEN 18:23 Lakea e Abraham i pesi tabukoi vona i nanea, “Ioe go ratapile e huriki ri naro kamumu turana e huriki ri naro hale?
GEN 18:24 Ge navai e huriki ri ravulu lima, a narone ria i kamumu, a tanga dagi go ratapilea? I kara ioe go luhoi e huriki kamumu ala ravulu lima, o koria a tanga dagi.
GEN 18:25 I uka ma a naro kamumu ra naro ta go ratea, go ratapile e huriki a bakovi kamumu turana e huriki a bakovi hale. Bara o rata e huriki ri naro hale, e huriki ri naro kamumu ri palupulupu. I uka ma a naro kamumu na Matakari na malala ra naro go ratea.”
GEN 18:26 Lakea e BAKOVI DAGI i ta maea, “Iau bara matavisi e huriki o Sodoma ri ala ravulu lima i kamumu a narone ria, i uka ma ga ratapilea a tanga dagi, a vuhuna bara dodo ria.”
GEN 18:27 Muri e Abraham i takia “Bakovi Dagi, iau i uka ma a mangenge ni ta turamu. Iau a maki tavula, a manga a habulo.
GEN 18:28 Pali ge uka a viri ala ravulu lima a narone ria i kamumu, pali ge tahoka kunana a viri ge ala 45, a tanga dagi go ratapilea?” E Bakovi Dagi i koli mule i ta maea, “Bara i tahoka a viri ala 45, i uka ma ga ratapilea a tanga dagi.”
GEN 18:29 E Abraham i nana tabu, “Pali ge tahoka a viri ge ala ravulu va ni gi matavisi, ge navai?” E Bakovi Dagi i koli mule, i ta maea, “Bara i tahoka a viri ala ravulu va, i uka ma ga ratapilea a tanga dagi.”
GEN 18:30 E Abraham i nana tabu, “O hatenono, o longotaro ga ta. Pali ge tahoka a viri ge ala ravulu tolu ni gi matavisi vonga, i kamumu a narone ria, a ra go ratea?” E Bakovi Dagi i koli, i ta maea, “Iau bara matavisi a viri i ravulu tolu vonga, i uka ma ga ratapilea a tanga dagi.”
GEN 18:31 Muri e Abraham i nana tabu, “Bakovi Dagi, iau a rata hateka a ngava i lakea vomu, pali ge tahoka a viri ge ravulu rua ni gi matavisi vonga i kamumu a narone ria, a ra go ratea?” E Bakovi Dagi i koli mule, i ta maea, “Bara i tahoka a viri ala ravulu rua, i uka ma ga ratapilea a tanga dagi.”
GEN 18:32 Muri e Abraham i nana tabu, “Bakovi Dagi naha ni tahate, ga nana ioe balaka taku tabu. Pali a viri ge ala ravulu ni gi matavisi vonga, i kamumu a narone ria, ge navai?” E Bakovi Dagi i koli mule, i ta maea, “Bara i tahoka a viri i ala ravulu, i uka ma ga ratapilea a tanga dagi.”
GEN 18:33 E BAKOVI DAGI i ta lobo turana e Abraham, muri i vano. Pali e Abraham i hamule mai a tanga vona.
GEN 19:1 Na malunga, a agelo ala rua ru bele tahoa e Lot na poridala na tanga dagi e Sodoma. Na tahuna i matai rua, i pesi rike i tagui rua. I lolu puru ge vakasiri a ningaru vona ne rua.
GEN 19:2 Lakea i ta maea, “Marua a bakovi dagi ngane, iau a bakovi tavula. Muru valai te ge lakea na ruma nau. Muru vahilolo a vahane marua, te ge mahita. Kuduvi na hatelanga muru vuho tala, muru vano.” Lakea ru koli ru ta maea, “I uka. Miri gi mahita na mailo.”
GEN 19:3 Lakea e Lot i ta hinituhana ne rua, ru gu lakea turana na ruma vona. To bele na ruma, lakea e Lot i gutu a bret i uka is, turana a maka kania ranga. Muri i habi ne rua, ru kani.
GEN 19:4 Muga ne rua ru gu mahita, e huriki a bakovi lobo, a riau a gare, na tabeke lobo na tanga dagi e Sodoma, ri pesi haluia a ruma.
GEN 19:5 Ri galea e Lot, “Avai ra mosi nga ru valai ngane na rodo? O turari tala valai ne mia, mi gi tari rua.”
GEN 19:6 Lakea e Lot i pagitala, i tukari mulea a logo na ruma. I ta turana e huriki a bakovi,
GEN 19:7 i ta maea, “Mua o huriki a turagu, a naro mu ratea i hale, naha ni ratea.
GEN 19:8 Mu longo valai. A tahoka e tugu a sirula i ala rua. Ga taparaki lakea ne mua, mu rata virihi rua vona, a ningaru ne mua. Pali a mosi nga, naha ni rata hale rua, a vuhuna ru mahita na ruma nau, a matakari rua.”
GEN 19:9 Ri gege mule, ri ta maea, “O pesi lakene. Ioe, i uka ma ioe a bakovi koea go pelekado a narone mia. O Lot, o longo valai, bara mi ratapile a mosi nga, pali ioe bara mi ratapile hateka ioe.” Ri kopea e Lot, ri boletugu lokovongea ta ri gi pukea a logo.
GEN 19:10 Pali e vikirua a mosi pololilo, ru toto tala, ru turari mulea na ruma e Lot, ru tukaria a logo.
GEN 19:11 Muri ru ratapile e huriki a bakovi dagi, e huriki a riau, ra ri vapesihi tabukoi na mataruma. Ru rata ria i uvo a matane ria, i uka ma ri masia a logo.
GEN 19:12 Muri a bakovi nga ru takia e Lot, “Ioe o tahoka a viri vomu, e lahuamu, e tumu bakovi, e tumu ngatavine o a viri ranga pololilo na tanga dagi, o vano o tuli ria o ha turane ria.
GEN 19:13 Maria miri gi ratapilea e Sodoma, a vuhuna a ngava ni kau virihi maia i hale hateka. E BAKOVI DAGI i longo pali a maka rabu hale ni rata na tanga iea. I rudu maria miri gi ratapilea. Ioe o tahoka ranga viri vomu, e lahuamu, e tumu pololilo koea na tanga dagi, o vakaha ria ngane.”
GEN 19:14 Lakea e Lot i vano, i ta turana e lahuana rua, ra ru ngaru ni parangi e tuna ngatavine ala rua. I ta maea, “Muru marata malaviriri, muru pagitala vona a tanga iea, a vuhuna e BAKOVI DAGI ta ge ratapilea e Sodoma!” Pali e lahuana rua, ru luhoi ta i ta padikede.
GEN 19:15 I mavida a more, lakea a agelo na Vure ala rua ru ta tuhaka maia e Lot, ru ta maea, “O malaviriri! O tuli tala e girihimu, e tumu ngatavine ala rua, mu ha. Ma ge uka, bara mu bole a vuranga na tahuna e Bakovi Dagi i ratapilea a tanga dagi iea.”
GEN 19:16 Na tahuna e Lot i loho paepae, a bakovi nga ru nugu a limana, a limane girihina, a limane tuna ngatavine ala rua, ru turari tala ria na tanga dagi, a vuhuna e BAKOVI DAGI i dodo ria.
GEN 19:17 Na tahuna ru turari tala ria pali, lakea a agelo tara i ta maea, “Mu nunu malaviriri, mu vakakori mua. Naha ni matagege, naha ni malo na bila. Mu nunu lakea na lolo, ge uka, bara mu mate.”
GEN 19:18 Lakea e Lot i taki rua, “I uka, marua a viri dagi nau, muru longo valai.
GEN 19:19 Iau a vora marua, muru dodo iau muru rata kamumu iau pali, muru korimule iau pali. Iau a keri ni nunu lakea na lolo, ma ge ratapile iau a vuranga, ga mate.
GEN 19:20 O mata lakea. A tanga kiroko tara i tabukoi, ga nunu lokovonga. O taparaki iau ga ha lokovonga na tanga kiroko iea, ga vakakori a kuligu vonga.”
GEN 19:21 Lakea a agelo i takia, “A longoa pali a ninana vomu, i uka ma ga ratapilea ra tanga o takia.
GEN 19:22 O ha lokovonga malaviriri, i uka ma ga rata ranga hini, ga dava ioe o bele taro na tanga kiroko.” Ra tanga kiroko iea ni gale e Soar.
GEN 19:23 Na tahuna e Lot i bele o Soar i hera pali a haro.
GEN 19:24 Muri e BAKOVI DAGI i vakaboru valai na hunu a bega i vila, i boru puru ne Sodoma e Gomora.
GEN 19:25 I ratapile a maloku, a tanga dagi turana e huriki lobo ri made vona, a maka kai ra ri pesi na robo.
GEN 19:26 Pali e girihine Lot i matagege i vulo ia a kedo, i pesi tata liu.
GEN 19:27 Na hatelanga pokopoko na parava muri, e Abraham i pesi rike i hamule lakea na tabeke i ta turana e BAKOVI DAGI vona.
GEN 19:28 I mata puru o Sodoma o Gomora, i mata lokovonga liu i masia a bila i poko bulolo, i manga a pokona kanunga.
GEN 19:29 A Vure i ratapile lobo ra tanga dagi nga na bila na hini i made muga vona e Lot. Pali a Vure i luhoia e Abraham, i turari talea e Lot na vuranga, na tahuna i ratapile a tanga dagi nga.
GEN 19:30 E Lot, tou e tuna ngatavine ala rua, to mangenge ni made o Soar, lakea to vano to made na lolo, pololilo na babe.
GEN 19:31 Na parava tara, e tuna dagi i takia e tarina, “E tamane tarua i gare, pali ngane i uka tara bakovi ge made tabukoi ge mahita turane tarua, i manga a vilone hita lobo na malala.
GEN 19:32 Tu gu vakaninua na vain e tamane tarua, muri tu gu mahita turana, tu gu vakabele a hamone teu.”
GEN 19:33 Na rodo iea ru vakaninua na vain e tamane rua, lakea e tuna dagi i dili i mahita turana. E Lot, i uka ma i hatakia re tuna dagi, na tahuna i mahita turana o na tahuna i pesi rike.
GEN 19:34 Na parava muri, a viri dagi i takia a viri kiroko, “Baroko na rodo a mahita turana e tata. Barama na rodo tu gu vakaninu tabua na vain, o dili ke, o mahita turana bara tu vakabele a hamone teu.”
GEN 19:35 Lakea ru ratea e tamane rua i ninu tabu a vain vona a rodo iea, muri a viri kiroko i dili i mahita turana. Pali i manga a hini muga, i uka ma i hatakia re tuna kiroko na tahuna i mahita turana o na tahuna i pesi rike.
GEN 19:36 Lakea re tune Lot varago nga, ru singou mule ne tamane rua.
GEN 19:37 A viri dagi i podea e tuna bakovi, i vunua e Moab. Ra bakovi iea, a vuhuna a kabu ne Moab mona.
GEN 19:38 A viri kiroko tara i podea a koma bakovi, i vunua e Ben-Ami. Ra bakovi iea, a vuhuna kabu ne Amon mona.
GEN 20:1 Ngane e Abraham i pea a tanga e Mamare, i mariu lakea na robo e Negev i made na kurukuruna tanga e Kades e Sur. I made popote o Gerar,
GEN 20:2 lakea i tamirabu ne huriki vonga vona e girihina e Sara i ta maea, “Ra ngatavine iea e kurabagu.” Lakea e Abimelek, a hariki o Gerar, i longo mavonga, lakea i talo rike a ngava ne Sara ge valai vona.
GEN 20:3 Na rodo i mahita e Abimelek, i vurena vona a Vure, i takia, “Ioe bara o mate, a vuhuna a ngatavine o bolea i parangi pali.”
GEN 20:4 E Abimelek i uka ma i lakea tabukoi ma vona a ngatavine, lakea i ta maea, “Bakovi Dagi, ioe go ratapilea a viri i kiripiripi a vilona?
GEN 20:5 E Abraham i takia te kurabana e Sara, pali e Sara tara i takia te kurabana e Abraham. Iau a uka ngava. A naro a ratea i kavakava, i kamumu kunana na niluhoi nau.”
GEN 20:6 Lakea a Vure i taki tabua na vurena, “Muholi, a lohoka vona a naro o ratea na niluhoi kamumu kunana, lakea a matakari ioe, i uka ma o ratea a naro hale, na ni mahita turana.
GEN 20:7 Ngane o taparaki mulea e girihine Abraham, a vuhuna ia a propet nau. Muri bara i vasileki vomu, i uka ma go mate. Ioe i uka ma go taparaki mulea e girihina, muholi hateka ioe turana e huriki a viri vomu, bara mu mate.”
GEN 20:8 Na hatelanga pokopoko e Abimelek i gale palupu e huriki a bolekori vona, i vakalongo ria vona a maka ngava i vurena vona, lakea ri mangenge hateka.
GEN 20:9 Muri e Abimelek i gale dilia e Abraham i nanea, “Ioe o rata navai mia? Iau a rata hale navai ioe, o vakarare iau na harikianga nau? Ra naro o ratea i uka ma i kamumu.”
GEN 20:10 Muri i nana tabua, “A ra vuhuna o ratea a rabu iea?”
GEN 20:11 Lakea e Abraham i koli mule, i ta maea, “A luhoi ta e huriki na tanga koea i uka ma ri mangenge na Vure, ma ri gi rabalaki iau, ri gi bolea e girihigu.
GEN 20:12 I muholi ngi, e Sara e kurabagu, e tamane maria i taku, e kinane maria i herehere, lakea iau a bolea a parangi vona.
GEN 20:13 Na tahuna a Vure i taki iau ga pea a tabeke nau ga lakea na robo basi, a takia e Sara a ta maea: na tabeke tu gu lakea vona, o tami rabu, o vakasiri iau manga iau a hatemu o ta maea, ‘E Abraham e kurabagu.’”
GEN 20:14 Muri e Abimelek i talo mulea e Sara i bole a maka sipsip, a bulmakau, a vora ngatavine a vora bakovi, i habi ne Abraham.
GEN 20:15 Lakea e Abimelek i takia e Abraham i ta maea, “Ra tabeke nga a robo nau. O matai ranga tabeke o made vona.”
GEN 20:16 I taki tabua e Sara i ta maea, “Ga habi ne kurabamu a kedo silva i 1000, ne vona ni vakalobo a maregoa i bele vomu. Na matane huriki a bakovi a ngatavine, ioe i uka ma o rata a naro hale.”
GEN 20:17 Muri e Abraham i vasileki na Vure, lakea i korimulea e Abimelek. I korimule tabu e girihine Abimelek turana e huriki a vorakato ngatavine ri gi poda.
GEN 20:18 A vuhuna e BAKOVI DAGI i rata e huriki a ngatavine lobo na tabeke ne Abimelek, ri lame, a vuhuna e Abimelek i rata a rabu hale, i parangi vona e Sara, re girihine Abraham.
GEN 21:1 E BAKOVI DAGI i rata kamumua e Sara, i muri mai a ngava i takia vona, lakea i habia vona a ningaru i taki mugea.
GEN 21:2 E Sara i singou i podea a koma na tahuna e Abraham i gare pali. E Sara i podea a koma na tahuna e Bakovi Dagi i taki mugea pali.
GEN 21:3 E Abraham i vunua a koma i podea e Sara, e Isak.
GEN 21:4 Na tahuna e Isak i tahoka a parava i polotolu, e Abraham i muri mai a nitana Vure, i palea a kuline tuna.
GEN 21:5 E Abraham i tahoka a pida i 100, lakea e Sara i podea e Isak.
GEN 21:6 Muri, e Sara i ta maea, “A Vure i habia nau a nipitei. E rei i longoa a velengagu bara i vivi turagu.”
GEN 21:7 E Sara i ta tabu, “Muga, e rei a viri ge takia e Abraham ne Sara ge tahoka a koma? Ngane e Abraham i gare, pali a podea vona e tuna bakovi.”
GEN 21:8 E Isak i kulabo, lakea i pile a ruru. Na tahuna i pile a ruru, lakea e Abraham i made maia.
GEN 21:9 E Hagar, ra ngatavine o Egipto, ia tara i podea ne Abraham a koma bakovi. Na parava tara, e Sara i masia a koma iea i rehi turana e tuna,
GEN 21:10 lakea i takia e Abraham, “O lili talea ra vorakato ngatavine turana e tuna. E tuna vorakato ngatavine, i uka ma ru gu vaveru vona e tugu e Isak, a mahala vomu.”
GEN 21:11 Ra ngava iea, i ratea e Abraham i loho lege lae a vuhuna e Ismael tara e tuna.
GEN 21:12 Pali a Vure i takia, “Naha ni luhoi lege lae vona a koma bakovi turana a vorakato ngatavine vomu. O longo maia a ngava i taki ioe vona e Sara, a vuhuna e Isak bara i vakabele e huriki a hamomu.
GEN 21:13 E tuna vorakato ngatavine vomu tara ga ratea ge vakabele e huriki a hamona ri gi ala kupo, a vuhuna ia tara e tumu.”
GEN 21:14 Na hatelanga pokopoko na parava muri, e Abraham i bole ranga maki ni kani turana a naru ni kiru dili na kulina meme, i vakakube e Hagar vona, i rudua ge vano turana e tuna. E Hagar i vano i laho viliha na tabeke i ngeki ne Bersiba.
GEN 21:15 A naru na buroi i lobo, lakea e Hagar i vakamadea e tuna na taruna kai kiroko.
GEN 21:16 Muri i laho lokovonga popote, i made puru, a vuhuna i koi ni masia e tuna ge mate. E Hagar i made puru i vakatubu ni tangi.
GEN 21:17 Muri a Vure i longoa a koma i tangi, lakea a agelo i gale valai meli na hunu i ta maea, “Hagar i navai? Naha ni mangenge. A Vure i longoa pali a nitangi ne tumu.
GEN 21:18 O vano o tuli pesia, o tangotata tora ia, a vuhuna iau ga ratea ge bele kupo e huriki a hamona.”
GEN 21:19 Muri a Vure i vakapalala a matane Hagar, lakea i masia a lomu. I vano i kirua a buroi, i vakaninua e tuna.
GEN 21:20 A Vure i matakaria e Ismael, i koru rike. I made na tabeke i ngeki, ia a mari ni voro a kiniperi.
GEN 21:21 Na tahuna i made na tabeke i ngeki e Paran, e kinana i vakaparangia na ngatavine o Egipto.
GEN 21:22 Na parava tara e Abimelek turane Pikol, a burena tara vona, ru lakea ne Abraham. Lakea e Abimelek i takia, “A Vure i turamu na maki lobo o rata.
GEN 21:23 Ngane o kaba o ta muholi nau na matana Vure, naha ni tami iau, e huriki e tugu, turana e huriki a hamogu. Ioe a mosi, o vakasiri a naro kamumu nau turana a malala o made vona, i manga iau a rata a naro kamumu vomu.”
GEN 21:24 Lakea e Abraham i koli mule, i ta maea, “Iau a ta muholi.”
GEN 21:25 Muri e Abraham i hehea e Abimelek na lomu vona e huriki a vora ne Abimelek ri radia.
GEN 21:26 Lakea e Abimelek i ta maea, “Iau i uka ma a lohoka vona a viri i ratea a naro iea. Ioe i uka ma o vakalongo muga iau. Mona kunana a longoa a ngava iea.”
GEN 21:27 Lakea e Abraham i bole ranga sipsip a bulmakau, i habi ne Abimelek, ru valongo mai a ngava.
GEN 21:28 E Abraham i bole tala na kabu na sipsip vona, a tuna sipsip a kinana i polorua, i ru here ria.
GEN 21:29 Lakea e Abimelek i nanea e Abraham, “I navai o bole a tuna sipsip a kinana i polorua, o ru here ria?”
GEN 21:30 E Abraham i ta maea, “O bole na limagu a tuna sipsip a kinana i polorua nga, ge vakasiri, iau a kelia ra lomu iea.”
GEN 21:31 Ra tanga iea ni gale Bersiba, a vuhuna ra bakovi ala rua nga ru valongo mai a nita muholi vonga.
GEN 21:32 Muri na ngava dagi ni rata o Bersiba, e Abimelek rua e Pikol, a burena tara vona, ru hamule lakea na robo na Palestina.
GEN 21:33 E Abraham i varoa o Bersiba a kai a tamaris, lakea i kavurikea vonga a rana e BAKOVI DAGI, a Vure Vakaroro.
GEN 21:34 Muri e Abraham i made tabaka na robo na Palestina na parava i kupo.
GEN 22:1 Muri na parava ranga i polo, a Vure i ngaru ni tonia e Abraham. Lakea i galea, “Abraham!” E Abraham i longo, i ta maea, “Iau ieni.”
GEN 22:2 Lakea a Vure i takia, “O bolea e tumu e Isak, re tumu a hatemu, i ala taku kunana. O havai maia a robo e Moria. Na tahuna o bele vonga, ga vakasiria vomu tara lolo. O sike maia, o rabalakia vonga e tumu, o habia nau, ge manga a nihabi gutu-vuro.”
GEN 22:3 Na hatelanga pokopoko na parava muri e Abraham i hadongo i kisia a donki vona. Muri i vakarike na bitona donki a kai i popo puru ne vona ni gutu a nihabi vona. Muri i tuli e Isak turana a vora vona ala rua, ri havai maia a robo i takia vona a Vure.
GEN 22:4 Na toluna parava i tuva e Abraham i masia a lolo.
GEN 22:5 Muri i taki a vora vona ala rua i ta maea, “Muru dava koea turana a donki. Miri gi sike taro maria, miri gi kavurike a Vure, muri miri gi puru valai.
GEN 22:6 Muri e Abraham i vakakaloho e Isak vona a galesi na kai, ne vona a nihabi gutu-vuro. I pi a kanono, i bole a vito ia. Na tahuna ru laho sike,
GEN 22:7 lakea e Isak i galea e Abraham, “O tata?” E Abraham i koli mule, i ta maea, “O tugu, i navai?” Lakea e Isak i nanea, “A kanono a kai koea, pali i vai a tuna sipsip ne vona a nihabi gutu-vuro?”
GEN 22:8 E Abraham i koli, i ta maea, “O tugu, a Vure bara i habia ne tarua a tuna sipsip ne vona a nihabi gutu-vuro.” E Isak i nana lobo e tamana, muri ru laho sike.
GEN 22:9 Na tahuna ru bele na mapana lolo, na hini a Vure i taki e Abraham vona, lakea e Abraham i ratea vonga a dede-kedo. I ru vapopo langa vona a kai. Muri i kolotatea e tuna, i bolea i vakatabuli langea na kai.
GEN 22:10 Muri i bole rikea a vito, ta ge rabalakia e tuna.
GEN 22:11 Pali a agelo ne BAKOVI DAGI i gale valai na hunu i ta maea, “Abraham, Abraham!” E Abraham i ta maea, “Iau ieni.”
GEN 22:12 Lakea a agelo i takia, i ta maea, “Naha ni padoia a koma, naha ni ratea vona tara maki. Ngane a lohoka vomu o mangenge a Vure, a vuhuna i uka ma o vakatokua vona e tumu, re tumu i ala taku kunana.”
GEN 22:13 Muri e Abraham i taratavaga rike, i masia a sipsip a toga i koro na kai kiroko a pelengana. Lakea i bolea, i rabalakia, i habia, i bole a murine tuna.
GEN 22:14 Lakea e Abraham i vunua a lolo iea, “E BAKOVI DAGI i habi.” Pali i vakatubu vonga i valai mona, e huriki ri ta maea, “Na lolo ne BAKOVI DAGI i habi.”
GEN 22:15 A agelo ne BAKOVI DAGI i gale valai tabu na hunu i takia e Abraham,
GEN 22:16 i ta maea, “E BAKOVI DAGI i kaba mule na rana, i vakalongo maea: ‘A vuhuna o ratea a naro i kamumu hateka i uka ma o vakatokua nau e tumu, re tumu i ala taku kunana,
GEN 22:17 ngane ga gamai ioe, ga rata e huriki a hamomu ri gi ala kupo manga a hada na hunu, a hire na lavu. E huriki a hamomu ri gi vadede langa vona e huriki a pile ne ria, ri gi bole a vuhutanga ne ria.
GEN 22:18 I kamumu o longototo a ngavagu. Ngane ga rata e huriki a hamomu ri gi rata kamumu e huriki lobo na malala.”
GEN 22:19 Muri e Abraham rua e Isak ru hamule mai a vora ra ru dava tano, to hamule lakea o Bersiba. Lakea e Abraham i made vonga.
GEN 22:20 Muri, e Abraham ni vakalongo maea, “E Milka, e girihine Nahor, i poda e huriki a koma bakovi.
GEN 22:21 A tabua e Us. E tarina e Bus, e Kemuel re tamane Aram,
GEN 22:22 e Kesed, e Haso, e Pildas, e Idlap, e Betuel.”
GEN 22:23 E Betuel e tamane Rebeka. E Milka i poda e huriki a koma a bakovi i polotolu ne Nahor, re turane Abraham.
GEN 22:24 E girihina tara, a rana e Reuma. Ia tara i poda e huriki e tuna a bakovi. A rane ria ra nga: e Teba, e Gaham, e Tahas, e Maka.
GEN 23:1 E Sara i tahoka a pida i 127,
GEN 23:2 muri i mate na tanga e Kiriat-Araba, a rana tara e Hebron na robo e Kenan. Lakea e Abraham i dodo hatekea, i taringia.
GEN 23:3 Muri e Abraham i pesi rike na dahana podane girihina, i taki e huriki a kabu ne Hiti, i ta maea,
GEN 23:4 “Iau a mosi a made koea. Mu habi nau ranga malala ga kona, ga tanu e girihigu vona.”
GEN 23:5 Lakea e huriki a kabu ne Hiti ri koli mule, ri ta maea,
GEN 23:6 “Bakovi dagi, o longo valai, ioe a kakaina tanga. O tanua e girihimu na tabeke o ngaru ni tanua vona. Mia takutaku, i uka ma mi gi vakatoku ioe vona a tabeke go tanu e girihimu vona.”
GEN 23:7 Lakea e Abraham i pesi rike i lolu puru mai e huriki a tahona malala, i kavurike ria,
GEN 23:8 i ta maea, “Mua bara mu longo ga tanua koea e girihigu, pali a ngaru mua mu gu nanea e Epron e tune Sohar vona
GEN 23:9 ra babe ni gale e Makpela, ra na harena malala vona. Mu takia ge habia nau ga kona talea vona, ga tanua vona e girihigu turane huriki ri gi mate muri ma.”
GEN 23:10 E Epron i made vonga turana e huriki a kabu vona a Hiti, lakea i takia e Abraham na matane huriki ri made vonga na poridala na tanga dagi, i ta maea,
GEN 23:11 “Bakovi dagi, i uka ma ge mavonga. O longo valai. Ga habia vomu a malala. A babe tara, i vona ra malala iea. A habi vomu na matane huriki a viri nau. O vano o tanua e girihimu.”
GEN 23:12 E Abraham i lolu puru mai e huriki a tahona malala i kavurike ria,
GEN 23:13 i takia e Epron na matane ria lobo, “O longo valai, ioe o ngaru, ga konea a malala iea. O longo mai iau, ga tanua vonga e girihigu.”
GEN 23:14 E Epron i koli mulea e Abraham i ta maea,
GEN 23:15 “Bakovi dagi, o longo valai, a mapana malala i 50 kilo silva. A maki tavula ne tarua. O vano o tanu kunanea e girihimu.”
GEN 23:16 E Abraham i longo maia a nita ne Epron, ra i takia na matana e huriki a kabu vona, lakea i habi vona a 50 kilo silva, i muri mai a mapana maki ni vangoli ni vahabi a maki na tahuna iea.
GEN 23:17 I mavonga, a robo ne Epron, o Makpela, i tabukoi o Mamare, turana a malala, a babe, a maka kai pololilo vona i bole lobo.
GEN 23:18 E huriki a kabu ne Hiti ri bele vona na tahuna iea ri lohoka vona a malala iea, ne vona e Abraham ngane.
GEN 23:19 Muri e Abraham i rua a podane girihina, e Sara, pololilo na babe na malala e Makpela, tabukoi o Mamare, re Hebron, na robo e Kenan.
GEN 23:20 Ra malala turana babe, a kabu ne Hiti i habia ne Abraham ge tanu a viri vona.
GEN 24:1 Ngane e Abraham i gare i tahoka a pida i kupo. E BAKOVI DAGI i gamaia na maka maki i rata.
GEN 24:2 Lakea i takia a matakari na vora na ruma vona, ra viri i matakari a maka mahala vona, “O ru polotanoa na labugu a limamu.
GEN 24:3 A vuhuna a ngaru ioe go ta muholi ne BAKOVI DAGI a Vure na hunu a malala. I uka ma go habikaria e girihine tugu ne huriki a ngatavine na kabu ne Kenan, re huriki a made turane ria.
GEN 24:4 O hamule lakea na robo a vuhuna vona, ne huriki a viri nau, o habikaria vonga e girihine tugu, e Isak.”
GEN 24:5 Lakea a vora i nanea, “Pali a ngatavine ge koi ni valai vona a robo iea, ga marata navai? E tumu, ga bole lokovongea na robo o vuhuna vona, o ge uka?”
GEN 24:6 E Abraham i koli mule, i ta maea, “Naha ni bole lokovongea na robo a vuhuna vona.
GEN 24:7 E BAKOVI DAGI, a Vure na hunu, ra i bole tala iau na tabeke ne tata, i rata a ngava dagi i ta maea, ‘Ga habia ne huriki a hamomu a robo iea.’ Bara i rudu mugea a agelo vona, ge habikaria vonga e girihine tugu.
GEN 24:8 Pali a ngatavine ge koi ni hamule turamu, ra ngava dagi o ta muholi vona nau, naha ni loho paepae vona. E tugu kunana naha ni bole lokovongea.”
GEN 24:9 Lakea a vora i ru polotanoa na labuna bakovi dagi vona, e Abraham, a limana, i ta muholi ge ramai a ngava ni taki vona.
GEN 24:10 Muri a vora iea i lalu a kamel i ravulu na bakovi dagi vona, i vakarike a maka mahala vona, i vano. I havai maia a tanga dagi e Nahor na robo e Mesapotamia, a rana tara e Aram Naharaim.
GEN 24:11 Na malunga i vakapasike tabukoi na lomu a kamel vona polovavo na tanga dagi, i dava e huriki a ngatavine ri gi kiru.
GEN 24:12 Muri i vasileki maea, “BAKOVI DAGI, ioe a Vure na matakari nau e Abraham, o habi a mulangia nau mona, o vakasiri a naro kamumu vomu na matakari nau e Abraham.
GEN 24:13 Iau a pepesi na dahana lomu iea, e huriki a ngatavine na tanga dagi ri gi valai, ri gi kiru a naru.
GEN 24:14 Pali iau ga takia tara ngatavine, ‘O habi nau a naru na ulo ga ninu.’ Pali ia ge ta maea, ‘O ninu. A kamel vomu ranga ga vakaninu ria.’ Ra ngatavine iea kunana a viri o vulakia na vora vomu, e Isak. Na naro iea kunana bara lohoka, ioe o rata a naro kamumu na matakari nau.”
GEN 24:15 I uka ma i vakaloboa ma a nivasileki vona, e Rebeka i kube vilia a ulo. E Rebeka, e tamana e Betuel. E Betuel ia e tune Milka rua e Nahor. E Nahor e turane Abraham.
GEN 24:16 Re Rebeka, ia a sirula, i mata kamumu hateka. I uka tara bakovi ge mahita turana ma. E Rebeka i puru na naru, i kirua a ulo vona, i sike valai tabu.
GEN 24:17 Lakea a vora i laho malaviriri lakea vona, i taguia, i ta maea, “O habi nau a naru popote vomu na ulo, ga ninu.”
GEN 24:18 Lakea e Rebeka i ta maea, “Bakovi dagi, o ninu.” Lakea i malaviriri kunana i bole purua a ulo i habia vona, i ninu.
GEN 24:19 I habi lobo a naru vona i ninu, lakea i ta maea, “Ga habi na kamel vomu ranga naru, ri gi ninu, ri gi maru.”
GEN 24:20 I malaviriri kunana, i liki vuroki na gaga a lingena naru, i nunu hamule na lomu i kiru tabu a naru, i vakaninu a maka kamel, ri maru.
GEN 24:21 A vora, i uka ma i takia tara ngava, i matanono kunanea, ge matakilalea, e BAKOVI DAGI i habi a mulangia vona, o i uka.
GEN 24:22 A maka kamel ri ninu lobo, lakea a vora i valiki talea a malau haluilui, ni rata na gol turana a bio i rua, ngi ranga ni rata na gol. A nimavana a malau haluilui i 5.5 gram. A nimavana bio i 110 gram.
GEN 24:23 Muri i nana, “Ioe e tune rei? A ruma e tamamu, i tahoka a hini mi gi mahita taro vona na rodo?”
GEN 24:24 Lakea e Rebeka i koli mulea i ta maea, “Iau e tune Betuel. E sisi bakovi e Nahor. E sisi ngatavine e Milka.
GEN 24:25 Mi tahoka a varili i kupo a maka kamel vomu bara ri kani. A ruma ne tata tara i ngavaka, i tahoka a hini bara mu mahita vona na rodo.”
GEN 24:26 Lakea a vora i lolu puru i kavurikea e BAKOVI DAGI,
GEN 24:27 i ta maea, “Iau a kavurike e BAKOVI DAGI, a Vure na matakari nau e Abraham, i uka ma i vakatoku a naro kamumu vona, a niluhoi kamumu na matakari nau. Pali iau, a nilaho nau iea, e BAKOVI DAGI i vakasiri iau vona a tabeke na kabu na matakari nau.”
GEN 24:28 Lakea a koma ngatavine i nunu i vakalongo e huriki na tabeke ne kinana, na maka maki i bele.
GEN 24:29 E Leban e kurabana e Rebeka, i laho hari lakea na naru.
GEN 24:30 Na tahuna i matai a malau haluilui, a bio na limane kurabana, i longo a ngava i taki vona e Rebeka na nita i taki vona a bakovi. Lakea i vano i pugaia tabukoi na naru, i pesi turana a maka kamel.
GEN 24:31 Lakea e Leban i ta maea, “O valai, e BAKOVI DAGI i gamai ioe pali. I navai a hini o pepesi koea? Iau a kado purua pali a roho, a tabeke na kamel ranga a kado puru.”
GEN 24:32 Muri a bakovi i vano i lakea na roho, lakea ri bole puru na kamel a maka mahala. Ri vakani a maka kamel, a naru ni bole lakea vona ge vahilolo a vahana turana e huriki a bakovi ri havai turana.
GEN 24:33 Ri bole a maka maki ni kani ri ru na ngalana, lakea a bakovi i ta maea, “Ga taki taro mua vona a ngava a laho vona, muri si gi kani.” Lakea e Leban i koli mule i ta maea, “O vakalongo mia taro.”
GEN 24:34 Lakea a vora i ta maea, “Iau a vora ne Abraham.
GEN 24:35 E BAKOVI DAGI i gamai kamumua a matakari nau. Ia a viri na mahala. I habi vona a maka sipsip, a bulmakau, a silva, a gol, a vora bakovi, a vora ngatavine, a kamel, a donki.
GEN 24:36 E girihina matakari nau, e Sara, i gare liu, pali i podea a koma bakovi, lakea e tamana i habi lobo vona a maka mahala vona.
GEN 24:37 Lakea a matakari nau i taki iau ga ta muholi vona, i ta maea, ‘Naha ni bolea e girihine tugu ne huriki a ngatavine na kabu ne Kenan, ra malala ne ria a made vona.
GEN 24:38 O hamule lakea na kabu ne tata, na kabu nau, o bole ne ria e girihine tugu.’
GEN 24:39 “Muri a nanea a matakari nau, ‘Pali a ngatavine ge koi ni hamule turagu?’
GEN 24:40 “Lakea i ta maea, ‘Iau a laho turane BAKOVI DAGI. Ia bara i rudua a agelo vona ge laho turamu, ge ratea a nihavai vomu ge mulangi, bara o bolea e girihine tugu na kabu ne tata.
GEN 24:41 O lakea na kabu nau, pali ria ri gi koi ni habia vomu a ngatavine, ra ngava dagi a taki ioe vona, naha ni luhoi hatekea.’
GEN 24:42 “Na tahuna a valai na naru mona, a vasileki maea, ‘BAKOVI DAGI, a Vure na matakari nau e Abraham. O habi a mulangia vona a ngava ra a havai maia.
GEN 24:43 Iau a pepesi na dahana naru. A ngatavine tara ge valai ge kiru, ga takia, “Kamumu, o bole valai a naru popote na ulo vomu, ga ninu.”
GEN 24:44 A ngatavine ge kolia a ngava, ge ta maea, “O ninu. A kamel vomu ranga ga vakaninu ria.” ra ngatavine iea kunana e BAKOVI DAGI i vulakia ne vona e tuna matakari nau, ge parangi vona.’
GEN 24:45 “Iau i uka ma a vakaloboa ma na hategu a nivasileki, lakea e Rebeka i kube valai a ulo. I puru na naru i kiru, lakea a takia, ‘O habi nau a naru ga ninu.’
GEN 24:46 “Lakea e Rebeka i bole purua na gina a ulo, i ta maea, ‘O ninu, a kamel vomu ranga ga vakaninu.’ A ninu lobo, muri i vakaninu a maka kamel.
GEN 24:47 “Lakea a nanea, ‘Ioe e tune rei?’ “Lakea i ta maea, ‘Iau e tune Betuel. E sisi bakovi e Nahor. E sisi ngatavine e Milka.’ “Muri a vakarodoa na ruperena a malau haluilui, a vakarodoa na limana a bio.
GEN 24:48 A lolu puru a kavurikea e BAKOVI DAGI, a Vure na matakari nau e Abraham, a vuhuna i vakasiri iau vona a dala kamumu, a bolea vona a ngatavine na kabu na matakari nau, ge girihine tuna.
GEN 24:49 Ioe ngane o vakasiri a naro kamumu, a naro kiripiripi na matakari nau. O taki iau ngane. Ge uka o taki iau, bara ramaia a dala tara.”
GEN 24:50 Muri e Leban rua e Betuel ru koli mulea, ru ta maea, “E BAKOVI DAGI i vakasiria ra naro iea. Maria i uka ma miri gi takia tara ngava.
GEN 24:51 E Rebeka, ia koea. O tulia, o vano turana, ge parangi e tune bakovi dagi vomu, ge muri maia a ngavane BAKOVI DAGI.”
GEN 24:52 Na tahuna a vora i longo a hini ru taki, i lolu puru na malala, i kavurikea e BAKOVI DAGI.
GEN 24:53 Muri i bole tala a maka gogo ni rata na silva, a gol, a maka varakia mata legelege, i habi ne Rebeka. I bole a mahala ranga i habi ne kurabana, rua e kinana.
GEN 24:54 I habi pali a maki, lakea a vora turana e huriki a bakovi ri havai turana ri kani, ri ninu, ri mahita vonga. Na hatelanga a vora i hadongo, i ta maea, “Iau ga hamule lakea na matakari nau.”
GEN 24:55 Pali e kurabana e kinana ru koli ru ta maea, “I uka, a ngatavine ge made taro turane mia na parava ge ravulu, muri ge vano.”
GEN 24:56 Lakea a vora i taki rua, “Naha ni vakapae iau, e BAKOVI DAGI i habi a mulangia pali, na nihavai nau. Iau ga vano, ga hamule lakea na matakari nau.”
GEN 24:57 Muri ru ta maea, “Te ge galea a ngatavine, te ge nanea.”
GEN 24:58 Lakea ru galea e Rebeka, ru nanea, “Ioe go vano turana a bakovi iea?” I koli mule, i ta maea, “Ga vano”.
GEN 24:59 Lakea ru talo e Rebeka turana a vora ngatavine vona, ru vano turana a vora ne Abraham, turana e huriki a bakovi vona.
GEN 24:60 Ru gamaia e Rebeka, ru takia, “Rebeka, bara ioe e kinane huriki ala kupo. E huriki a hamomu bara ri puka ri bole a maka tanga dagi ne huriki a pile ne ria.”
GEN 24:61 Muri e Rebeka rua a vora ngatavine vona, ru rike na kamel, ru vano turana a vora ne Abraham turana e huriki a bakovi vona. Ngane a vora i tulia e Rebeka ru vano.
GEN 24:62 E Isak i pea pali a tabeke ne Bia Lahai Roi, ngane i made na robo e Negev.
GEN 24:63 Na malunga i laho na hania. I mata rike, i matai a kamel ri laho valai.
GEN 24:64 E Rebeka tara i mata muga, i masia e Isak. I raga na kamel,
GEN 24:65 i nanea a vora, “E rei ra bakovi na hania i laho valai, ge tagui hita?” A vora i koli mule, i ta maea, “A bakovi dagi nau.” Lakea e Rebeka i bolea a hineva, i kavitagua a matana.
GEN 24:66 Lakea a vora i taki e Isak vona a maki lobo i rata.
GEN 24:67 Muri e Isak i bolea e Rebeka, i lakea na kape ne kinana, i parangi vona. E Isak i ngarua e girihina, i kamumu ngane a niluhoi vona, i uka ma i luhoi tabua e kinana i mate.
GEN 25:1 E Abraham i bole tabua tara e girihina, a rana e Ketura.
GEN 25:2 Ra ngatavine iea i poda e Simran, e Ioksan, e Medan, e Midian, e Isbak, e Sua.
GEN 25:3 E Ioksan e tamane Seba rua Dedan. E huriki a Asuri, a Letusi, a Leumi ria a hamone Dedan.
GEN 25:4 E huriki a bakovi e tune Midian a rane ria ra nga: e Epa, e Eper, e Hanok, e Abida, e Elda. Re huriki nga ria a hamone Ketura.
GEN 25:5 E Abraham i pe mule ne Isak a mahala lobo vona.
GEN 25:6 Pali na tahuna i tabana ni mahuri, i habi ranga mahala ne huriki e tuna bakovi, i poda e huriki e girihina ranga. Lakea i rudu ria ri gi made na robo na nirikena haro, basi ne tuna, e Isak.
GEN 25:7 E Abraham I tahoka a pida i 175,
GEN 25:8 i gare liu, i matai a maka pida i kamumu i kupo. Muri i taravango dilia a nilobona bangona, i mate. Ni bole, i made turana e huriki a viri vona ri mate pali.
GEN 25:9 E Isak rua e Ismael ru tanua e tamane rua na babe o Makpela, tabukoi o Mamare na malala e Epron, e tune Sohar, ra kabune Hiti.
GEN 25:10 Ra malala iea e Abraham i konea ne huriki a kabu ne Hiti. E Abraham ni tanu vonga turana e girihina, e Sara.
GEN 25:11 Muri ne Abraham i mate, a Vure i gamaia e Isak. Muri e Isak i vano i made tabukoi o Bia Lahai Roi.
GEN 25:12 A nita ne Ismael, e tune Abraham, i podea e Hagar, a ngatavine o Egipto ra vora ngatavine ne Sara.
GEN 25:13 A rane huriki e tune Ismael i ramai a nipodane ria. A tabua ne Ismael e Nebaiot. Muri ni poda e Kedar, e Adbil, e Mibsam,
GEN 25:14 e Misma, e Duma, e Masa,
GEN 25:15 e Hadad, e Tema, e Ietur, e Napis, e Kedema.
GEN 25:16 Re huriki a bakovi nga ria e tune Ismael, ra vuhuna a kabu i ravulu a polona i rua. A tanga, a robo ri rata a mada vona ni gale virihi mai ria vona.
GEN 25:17 E Ismael i tahoka a pida i 137, muri i taravango dilia a nilobona bangona, i mate. Ni bole i made turana a viri vona ri mate pali.
GEN 25:18 E huriki a hamona ri made vona a robo i vakatubu o Havila i lakea o Sur, i tabukoi na harena e Egipto na dala lakea o Asiria. Re huriki a kabu nga, i uka ma ri vamade kamumu. Ri vatepu.
GEN 25:19 Iea a nitane Isak, e tune Abraham.
GEN 25:20 E Isak i tahoka a pida i ravulu va i parangi vona e Rebeka, e tune Betuel. E Betuel ia a hamona kabune Aram, i made na robo e Padan-Aram re Mesapotamia. E Rebeka e kurabane Leban, ia tara a hamone Aram.
GEN 25:21 E girihine Isak i lame, lakea e Isak i vasileki ne BAKOVI DAGI, ge tuhoria e girihina. E BAKOVI DAGI i longototoa a nivasileki vona, i singou e Rebeka.
GEN 25:22 Na palona i tahoka a koma i rua, ru varata tuhare bala pololilo, lakea e Rebeka i ta maea, “I navai i bele maea nau a hini?” Pali i vano i vasileki ge nana e BAKOVI DAGI vona a naro iea.
GEN 25:23 Muri e BAKOVI DAGI i takia, “A boge pololilo na palomu ru gu vakabele a kabu ge rua. Ra kabu i rua nga bara ru vapida. A kabu tara bara i tora hateka vona a kabu tara, a tabua bara ia a vora ne tarina.”
GEN 25:24 I valai ngane a parava vona na ni poda, lakea i poda a boge bakovi ala rua.
GEN 25:25 A tabua i vururu a kulina, a kakaina i vona lobo a vungana, lakea ni vunu e Esau.
GEN 25:26 Na tahuna ni poda e tarina i tangotatea a vahane Esau, lakea ni gale e Iakop. E Isak i tahoka a pida i ravulu polotara ni poda ra boge nga.
GEN 25:27 Na tahuna ru dagi pali, e Esau ia a bakovi ni laho na robo, i moro na pinango. Pali e Iakop i madoru, i made kunana na kape.
GEN 25:28 E Isak i ngarua e Esau, a vuhuna i bole bala a kania, i kani. E Rebeka i ngarua e Iakop.
GEN 25:29 Na parava tara, e Esau i hamule na pinango, i vitolo hateka. I masia e Iakop i nono a kania vona,
GEN 25:30 lakea i takia e Iakop, “A vitolo iau. O malaviriri kunana o habi nau ranga kania vururu vomu ga kani.” Na naro iea kunana ni gale visi vona e Idom.
GEN 25:31 E Iakop i koli mule i ta maea, “Tu gu vangoli taro a murine tarua. O taki iau ge iau a tabua.”
GEN 25:32 Lakea e Esau i ta maea, “O longo valai, iau a mate na vitoloa, ra murigu a tabua, a ra i kamumu vona?”
GEN 25:33 E Iakop i ta maea, “O kaba taro, o taki iau ge iau a tabua.” Lakea e Esau i ta muholi vona, ru vangoli a murine rua.
GEN 25:34 Muri e Iakop i habi ne Esau ranga bret turana a naruna bin, lakea i kani i ninu. Muri i pesi rike i vano. Na naro iea kunana, e Esau i lohopile vona a murina, ia a tabua.
GEN 26:1 Ngane a pago i bele na robo e Kenan i manga a hini muga na tahuna ne Abraham. E Isak i vano, i lakea ne Abimelek, a hariki ne huriki a Palestina, na tanga e Gerar.
GEN 26:2 Na parava tara, e BAKOVI DAGI i bele ne Isak, i ta maea, “Naha ni puru o Egipto, o made vona a malala ga vakasiri ioe vona.
GEN 26:3 O made popote vona a malala iea. Iau ga made turamu, ga gamai ioe. Ra malala iea ga habia vomu turane huriki a hamomu, bara vakatorea ra nita dagi a ta muholi vona ne tamamu, e Abraham.
GEN 26:4 Ga rata e huriki a hamomu ri gi kupo manga a hada na hunu. Ga habia ne ria a robo iea. Na hamomu kunana, ga gamai e huriki lobo na malala,
GEN 26:5 a vuhuna e Abraham i ramai tora a nitagu a vinara nau.”
GEN 26:6 Lakea e Isak i made vonga na tanga e Gerar.
GEN 26:7 E huriki na tanga ri nanea vona e girihina, lakea e Isak i ta maea, “Ia e kurabagu.” I koi ni taki ria vona e Rebeka ge girihina, a vuhuna i mangenge. I luhoi maea, “E huriki a bakovi na tanga bara ri rabalaki iau, ri bolea e Rebeka, a vuhuna i mata kamumu hateka.”
GEN 26:8 Ngane e Isak i made tabaka pali na tanga iea. Na parava tara, e Abimelek, a hariki ne huriki a Palestina, i mata tala na mataruma, i masia e Isak i kakoa e girihina, e Rebeka.
GEN 26:9 Lakea, e Abimelek i galea e Isak, i nanea, “Ra ngatavine iea, e girihimu! I navai o takia ta ia e kurabamu?” Lakea e Isak i koli mulea, i ta maea, “A vuhuna a luhoi maea, bara takia e girihigu, e huriki a bakovi bara ri rabalaki iau, ri bolea e Rebeka.”
GEN 26:10 Muri e Abimelek i ta maea, “A ra o ratea ne mia? A bakovi tara bara i mahita turane girihimu, bara mi tahoka a ngava!”
GEN 26:11 Lakea, e Abimelek i vara e huriki a tahotanga, i ta maea, “E rei a viri i rata hale a bakovi iea turane girihina, bara ni rabalaki.”
GEN 26:12 E Isak i rata a hania, i varo a maki ni kani vona a robo iea. Na pida iea kunana i vona hateka a maki ni kani a hania, a vuhuna e BAKOVI DAGI i gamaia.
GEN 26:13 E Isak i tahoka a mahala i kupo. A mahala vona i bele kupo, i rata ia a viri na mahala.
GEN 26:14 E Isak i tahoka a maka kabuna sipsip, a kabuna bulmakau, a vora ni leho, i rata ngane e huriki a Palestina ri masigoro na mahala vona.
GEN 26:15 Lakea e huriki a Palestina ri bole a malala, ri kavitagu a lovo na naru e huriki a vora ne tamana, e Abraham, ri keli hosi.
GEN 26:16 Muri, e Abimelek i takia e Isak, “O pe mia, o vano, a vuhuna o tuhaka hateka ne mia.”
GEN 26:17 Lakea e Isak i pe a hini nga i vano i made na maloku ne Gerar.
GEN 26:18 I keli tabu a maka lomu, ra ri kavitagu e huriki a Palestina na tahuna e Abraham i mate. Lakea i gale tabu ria vona a rane ria, i vunu ria vona e Abraham.
GEN 26:19 E huriki a vora ne Isak ri keli lae na maloku, ri matavisia a narubele.
GEN 26:20 Lakea e huriki a vora na ni matakari a sipsip o Gerar, ri tahate e huriki a vora na ni matakari a sipsip ne Isak, ri ta maea, “Ra lomu iea ne mia.” Lakea e Isak i vunua a lomu iea e Esek a vuhuna ri vagege turana.
GEN 26:21 Muri ri kelia a lomu tara, pali ri vatahate tabu maia, lakea i vunua e Sitna.
GEN 26:22 I pe a hini ngi, i lakea i keli tabua a lomu tara, pali i uka viri ge tahate vona. I vunua e Rehobot, lakea i ta maea, “Ngane e BAKOVI DAGI i habia ne hita a tabeke iea bara si leho vona, si tahoka a maki kupogala.”
GEN 26:23 Muri, i pe a hini nga, i lakea o Bersiba.
GEN 26:24 Na rodo tara e BAKOVI DAGI i bele vona, i takia, “Iau a Vure ne tamamu e Abraham. Naha ni mangenge. Iau a made turamu. Iau ga gamai ioe, ga vakabele kupo e huriki a hamomu, a vuhuna e Abraham ia a vora nau.”
GEN 26:25 E Isak i haea vonga a dede-kedo i kavurikea a rane BAKOVI DAGI. Muri i vakapesia vonga a kape vona, lakea e huriki a vora vona ri kelia a naru.
GEN 26:26 E Abimelek i pea a tanga e Gerar, i valai mai e Isak turana e Ahusat, ra bakovi ni habi a niluhoi vona, e Pikol, ra ubu na tara na vabinga vona.
GEN 26:27 Lakea e Isak i nana tou, “I navai moto valai nau? I uka ma i hosi hateka moto tahate iau, moto tono tala iau.”
GEN 26:28 Lakea to takia, “Mete matakilaka vona e BAKOVI DAGI i turamu, lakea mete ngaru si gi valongo mai a ngava. A ngava ge maea,
GEN 26:29 ‘Ioe i uka ma go rata hale mateu. I manga mateu hosi, i uka ma mete rata hale ioe. Mete rata kamumu ioe, muri mete rudu ioe o vano na ni valemu. Ra ngane e BAKOVI DAGI i gamai ioe.’”
GEN 26:30 E Isak i ratea a habu ne tou, to kani, to ninu.
GEN 26:31 Na hatelanga pokopoko to kaba takutaku vona a nita muholi. Muri to tarulu purua e Isak, to vano.
GEN 26:32 Na parava iea kunana, e huriki a vora ne Isak ri valai ri vakalongoa vona a naru ri kelia pali. Ri ta maea, “Mi matavisia a naru!”
GEN 26:33 Lakea i vunua e Siba. Mona ni gale liu a tanga iea e Bersiba.
GEN 26:34 E Esau i tahoka a pida i ravulu va, i parangi vona e Iudit, e tune Biri, a kabu ne Hiti. E girihina tara, e Basemat, e tune Elon, ia tara a kabu ne Hiti.
GEN 26:35 Ngane e Isak e Rebeka ru loho lege lae vona e tune rua i parangi na ngatavine o Hiti.
GEN 27:1 E Isak i gare ngane, i kepa a matana, i uka ma i matai kamumu a maka maki. Lakea i galea e Esau, e tuna a tabua, i ta maea, “O tugu.” E Esau i koli mule i ta maea, “Iau ieni.”
GEN 27:2 Lakea e Isak i ta maea, “Iau a gare ngane, a popote ga mate.
GEN 27:3 Ngane o bolea a kiniperi, turana a maheto vomu, o lakea na robo, o pango, o padia tara kania ge ne nau.
GEN 27:4 Muri o nonoa tara maki ni kani ra a ngarua, i nami kamumu hateka, o bole vilia nau ga kania. Muri ga gamai ioe, ga dava a nimate iau.”
GEN 27:5 E Rebeka i longo panahoa e Isak i takikia e tuna, e Esau. Na tahuna e Esau i vano pali ge pango kana a kania,
GEN 27:6 lakea e Rebeka i takia e tuna, e Iakop, i ta maea, “O longo valai. Iau a longo panahoa e tamamu i takia e tukamu, e Esau, i ta maea,
GEN 27:7 ‘O pango kanea tara kania, o rata ranga maki ni kani ge nami kamumu ga kani. Muri ga gamai ioe na matane BAKOVI DAGI, ga dava a nimategu.’
GEN 27:8 Ngane, o tugu, o longo valai, o rata a maki ga taki ioe vona.
GEN 27:9 O lakea mai a kabuna meme, o rabalaki a tuna meme ge rua, ge gavutuvutu. O bole valai nau ga ratea tara maki ni kani, ra i namika, ge manga a hini i ngaru e tamamu.
GEN 27:10 Muri o bole lakea vona, ge kani, ge gamai ioe, ge dava a ni mate ia.”
GEN 27:11 Lakea e Iakop i takia e kinana, e Rebeka, “E tukagu i kuli vungaka, pali iau a kuli rularula.
GEN 27:12 Pali e tata ge nugu kilaka iau, ga ta navai? I mata manga iau a tamia e tata, lakea bara i ruduraha iau, i uka ma ge gamai iau.”
GEN 27:13 Lakea e kinana i takia, “O tugu, a niruduraha bara i valai nau. O rata a hini a taki. O vano o bole valai ra maki a taki ioe vona.”
GEN 27:14 Lakea i vano i rabalaki a meme kiroko i rua, i bole lakea ne kinana, i rata a maki ni kani i namika, i manga a hini i ngaru e tamana.
GEN 27:15 Muri e Rebeka i bolea a padirodo kamumu ne Esau i tabuli na ruma, i vakarodo e Iakop vona.
GEN 27:16 Muri i bole tabua a kulina meme, i kavitagu vona a limana a lohone Iakop, a vuhuna i rularula.
GEN 27:17 Lakea i bole a maki ni kani i namika turana a bret i rata, i habi ne Iakop.
GEN 27:18 I bole lakea ne tamana i gale, “Tata.” Lakea e Isak i koli mulea, “Iau ieni. Ioe e rei ke?”
GEN 27:19 Lakea e Iakop i tamia e tamana, i ta maea, “Iau e Esau, e tumu a tabua. A rata pali a maki o taki iau vona. O made kamumu o kani a kania vomu, muri o gamai iau.”
GEN 27:20 E Isak i nanea e tuna, “Ioe o mulangi, o hamule malaviriri polo?” Lakea e Iakop i ta maea, “E BAKOVI DAGI a Vure vomu i habi a mulangia nau.”
GEN 27:21 Lakea e Isak i takia e Iakop, “O karuku valai tabukoi, ga nugua a kulimu, ioe muholi e tugu e Esau, o i uka?”
GEN 27:22 Lakea e Iakop i karuku tabukoi lokovonga ne tamana, lakea e Isak i bakaia, i ta maea, “A nitamu i manga e Iakop, a limamu i manga e Esau.”
GEN 27:23 Pali e Isak i uka ma i matakilalea e Iakop, a vuhuna i kuli vungaka manga e tukana e Esau, lakea i gamaia.
GEN 27:24 Muri i nanea, “Ra ioe, ioe muholi e tugu e Esau?” E Iakop i koli mule, i ta maea, “Iau kunana.”
GEN 27:25 Lakea e Isak i ta maea, “O tugu, o habi nau ranga kania vomu ga kani, muri ga gamai ioe.” Lakea e Iakop i bole lokovonga vona a maki ni kani, i kani. A vain ranga i bole lokovonga vona i ninu.
GEN 27:26 Lakea e tamana i takia, “Tugu, o valai, o nguru iau.”
GEN 27:27 Lakea e Iakop i lokovonga i ngurua e tamana, lakea e tamana i burongia a mangina a varakia vona, i gamaia, i ta maea, “A mangine tugu i mangi manga a hania i gamaia e BAKOVI DAGI.
GEN 27:28 A Vure bara i vakaborua na hunu a simuru i vakamea a hania vomu, i rike kamumu vona a vit, a vain.
GEN 27:29 E huriki e turamu mai bara ria a vora vomu. A maka tanga lobo bara ri polotano vomu. Bara ioe a bakovi dagi ne huriki e turamu. E rei i ruduraha ioe, a Vure bara i ruduraha ia. E rei i gamai ioe, a Vure bara i gamai ria.”
GEN 27:30 E Isak i gamai loboa e Iakop, muri e Iakop i pesi rike, i vano. I uka ma i pea ma a tabeke ne tamana, i bele na pinango e tukana, e Esau.
GEN 27:31 Ia tara i rata a maki ni kani i nami kamumu, i bole lakea ne tamana. Lakea i takia, “O tata, o made kamumu. O kani a kania nga, muri o gamai iau.”
GEN 27:32 Lakea e tamana e Isak i nanea, “Ioe e rei ke?” E Esau i ta maea, “Iau e Esau, e tumu a tabua.”
GEN 27:33 E Isak i turutu i vakulu a tagana, lakea i nanea, “E rei a viri i pango muga, i bole valai pali a kania? A kani pali, a gamaia, o valai muri ke. I muholi, ra bakovi iea a gamaia pali!”
GEN 27:34 Na tahuna e Esau i longoa a ngava i taki e tamana, i upu tala a nangi, i tangi. Lakea i takia e tamana, “Tata, o gamai iau, iau tara!”
GEN 27:35 Lakea e tamana i takia, “E tarimu i valai i tami iau, a gamaia. I bolea pali a maki kamumu.”
GEN 27:36 E Esau i ta maea, “Ni gale lato vona a rana e Iakop. Ngane i balaka rua a hini i kau a maki nau. I muga i ngaru ge ia a tabua, a longo maia. Pali ngane i tamia e tata, i gamaia!” Muri i nanea, “Ioe o tahoka ranga maki kamumu o ru mule, go gamai iau vona?”
GEN 27:37 Pali e Isak i koli mulea, i ta maea, “Iau a rua pali ge ia a bakovi dagi vomu. E turana mai bara ria a vora vona. Bara i tahoka a vit a vain i kupo. Pali o tugu, ga rata navai ioe?”
GEN 27:38 Lakea e Esau i takia e tamana, “Tata, ioe o tahoka tara maki kamumu i tabana? Tata, iau tara o gamai iau.” Muri i upu tala tabu a nangi, i tangi.
GEN 27:39 Lakea e tamana i takia, “A tanga vomu bara i pesi basi na robo i vole vona a maki, basi na robo i boru langa vona a simuru na rodo.
GEN 27:40 Bara o made kunana na vabinga na bainat, bara ioe a vora ne tarimu. Muri bara o longotaroa, i uka ma ge matakari ioe tabu.”
GEN 27:41 E Esau i tahoka a rongova ne Iakop, a vuhuna e Isak i gamaia e Iakop. Lakea Esau i ta maea, “E tata i popote bara i mate. Ia ge mate, bara si taringi taroa, muri bara rabalakia e Iakop.”
GEN 27:42 Ni vakalongo e Rebeka vona a ngava i takia e Esau, lakea i rudu a ngava ne Iakop, ge valai vona, i takia, “E tukamu e Esau i luhoi na ni rabalaki ioe.
GEN 27:43 Tugu, ngane o longo mai a hini ga taki. O ha lakea ne hamu e Leban na tanga e Haran.
GEN 27:44 O made turana popote, ge lobo taro a rongova vona e tukamu,
GEN 27:45 ge longokaburungia a hini o rata virihia vona. Muri ga talo rike a ngava vomu, o hamule valai. I navai a hini muru gu velu varago nau na parava i taku?”
GEN 27:46 Muri e Rebeka i takia e Isak, “Iau i koi a kuligu pali vona ra ngatavine ne Hiti ala rua nga. E Iakop bara i bole e girihina na robo koea, na kabu ne Hiti, i manga ra ngatavine nga, iau a koi ni made koea. Ge rata iau a maki tara ga mate.”
GEN 28:1 Lakea e Isak i galea e Iakop, i gamaia, i vakukua, “Naha ni parangi na ngatavine o Kenan.
GEN 28:2 O lakea malaviriri o Padan-Aram na robo e Mesapotamia, na tabeke e tamane kinamu, e Betuel. O bole talea vonga ne hamu e Leban, tara e tuna a ngatavine, ge girihimu.
GEN 28:3 A Vure Tuhaka ge gamai ioe, go vakabele, go vakakupo e huriki a hamomu.
GEN 28:4 E Bakovi Dagi ge gamai ioe turana e huriki a hamomu, i manga a hini i gamaia e Abraham hosi. Muri bara o bolea a malala, ra o made manga mosi vona ngane, ra malala a Vure i habia ne Abraham.”
GEN 28:5 Lakea e Isak i rudua e Iakop i vano i lakea o Padan-Aram ne hana e Leban, e tune Betuel, ra hamone Aram. E Leban e kurabane Rebeka. E Rebeka e kinane Iakop rua e Esau.
GEN 28:6 E Esau i lohoka vona ngane e Isak i gamaia e Iakop, muri i rudua i lakea o Padan-Aram ge bolea vonga e girihina. Na tahuna i gamaia i vakukua nahea ge parangi a ngatavine o Kenan.
GEN 28:7 E Iakop i longototo e tamana e kinana, i vano i lakea o Padan-Aram.
GEN 28:8 Pali e Esau i lohoka vona ngane e tamana i uka ma i ngaru a ngatavine o Kenan.
GEN 28:9 Lakea, i vano i parangi vona e Mahalat, e tune Ismael e kurabane Nebaiot.
GEN 28:10 E Iakop i malaga o Bersiba, ge lakea o Haran.
GEN 28:11 I bele vona a tabeke tara, i mahita, a vuhuna i rolo a haro. I bolea tara kedo i ru polotano na gina, i kaloho langa vona, i mahita.
GEN 28:12 Na tahuna i mahita i vurena, i masia a nirike ni vakapesi na malala, i padoia a hunu, lakea e huriki a agelo na Vure ri puru rike vona.
GEN 28:13 E BAKOVI DAGI i pesi polo meli vona, i ta maea, “Iau e BAKOVI DAGI, a Vure ne tubumu e Abraham, e tamamu e Isak, ga habia vomu, ne huriki a hamomu a malala o mahita vona.
GEN 28:14 E huriki a hamomu bara ri ala kupo manga a habulo na malala. Bara mu made vona a hini i vakatubu na nirolona haro, i lakea mai a nirikena haro, a hini i sike lakea i puru lakea. E huriki a viri lobo na malala ga gamai ria, a vuhuna iau a gamai e huriki a hamomu.
GEN 28:15 Iau ga laho turamu, ga matakari ioe na hini o lakea vona. Muri ga bole mule valai ioe koea na malala iea. I uka ma ga pe ioe ngane, bara rata taro a maka maki a taki ioe vona.”
GEN 28:16 E Iakop i hadongo, i luhoi maea, “Muholi, e BAKOVI DAGI i made vona a hini nga, pali iau i uka ma a lohoka vona.”
GEN 28:17 I mangenge, i ta maea, “Iau a mangenge hateka vona a tabeke iea, a vuhuna ra tabeke iea a roho na Vure, a dili dala na hunu.”
GEN 28:18 Na hatelanga pokopoko na parava muri, e Iakop i bolea a kedo, ra i kaloho langa vona, i toto pesia ga kilakila. Muri i bolea a nibiri, i guru langea vona.
GEN 28:19 Lakea i vunua a tanga iea e Betel. Ra tanga dagi iea, ni gale muga e Lus.
GEN 28:20 Muri, e Iakop i ratea tara nita dagi, i ta maea, “A Vure bara i laho turagu, ge matakari iau na ni lahogu iea, ge habi a maki ni kani ga kani, a varakia ga rodo,
GEN 28:21 muri ge bole mule iau na tabeke ne tata na nivalemu, e BAKOVI DAGI bara ia a Vure nau.
GEN 28:22 Ra kedo iea a vakapesia i manga a kilakila ge vakasiri a hini nga ga hae a roho vomu vona. A maki i ravulu o habi nau bara habi mulea vomu a tabekena i taku.”
GEN 29:1 Muri e Iakop i laho liu i bele na robo ne huriki na nirikena haro.
GEN 29:2 Na tahuna i bele, i matai a kabuna sipsip i tolu, ri mahita tabukoi na lomu, a vuhuna a lomu iea, a naru ne ria. A lomu ni kavitagu na kedo dagi.
GEN 29:3 Na tahuna a maka kabuna sipsip ri bele palupu ni ninu, e huriki a vora ni matakari a sipsip bara ri kule talea a kedo dagi i kavitagu a lomu ri ninu a maka sipsip, muri ri kavitagu tabua.
GEN 29:4 E Iakop i nana e huriki a matakari na sipsip, “Turagu mai, mua a viri vai?” Ri koli mule ri ta maea, “Mia a bakovi o Haran.”
GEN 29:5 Lake i nana tabu, “E Leban, e tubune Nahor, mu lohoka vona o i uka?” Ri koli mule, ri ta maea, “Mi lohoka vona.”
GEN 29:6 Muri i nana tabu, “Pali i kamumu, o i uka?” Ri koli mule, ri ta maea, “I kamumu kunana. Mata lakea, e Resel, e tuna a ngatavine i valai turana a kabu na sipsip vona.”
GEN 29:7 Lakea e Iakop i ta maea, “Pali mua? A haro i tabana, pali i navai mu malaviriri hateka mu gale palupu a kabu na sipsip? Mu vakaninu, mu bole hamule ria, ri gi kani a varili.”
GEN 29:8 Ri koli mule, ri ta maea, “I uka ma mi gi rata mavonga. A kabuna sipsip bara ri bele palupu taro, muri bara mi kule talea a kedo ni tukari a lomu vona, mi vakaninu ria.”
GEN 29:9 E Iakop i tabana na ni ta turane huriki a matakari na sipsip, i bele e Resel turana a kabu na sipsip ne tamana, a vuhuna ia tara a matakari na sipsip.
GEN 29:10 Na tahuna i masia e Resel, e tune hana, e Leban, i valai turana a kabuna sipsip vona, i vano i kule talea a kedo na matana lomu, i vakaninu a maka sipsip ne hana.
GEN 29:11 Lakea e Iakop i ngurua e Resel, i vakatubu ni tangi.
GEN 29:12 I vakalongoa e Resel ia e tune Rebeka, e kurabane tamana. Lakea e Resel i nunu lakea na tanga, i vakalongoa e tamana.
GEN 29:13 Na tahuna e Leban i longoa a velenga ne Iakop, e tune kurabana, i bele, i laho malaviriri kunana, ge tagui ia. Lakea i rakoa, i ngurua, i tuli lakea na ruma. I tuverei ne hana na maki i bele vona.
GEN 29:14 Lakea e Leban i takia e Iakop, “Muholi, ioe a daragu.” E Iakop i made turane Leban na keva i taku,
GEN 29:15 lakea e Leban i takia, “Ioe e tune kurabagu muholi. Pali a koi ioe go leho tavula. O taki iau, ge riva a mapana leho vomu?”
GEN 29:16 E Leban i tahoka e tuna ngatavine ala rua. A tabua e Lea, e tarina e Resel.
GEN 29:17 E Lea, a matana i havuhavu, pali e Resel, i labeka, i mata kamumu.
GEN 29:18 E Iakop i ngarua e Resel, lakea i takia e Leban, “Ga leho taro vomu na pida ge polorua, muri ga parangi vona e Resel, e tumu kiroko.”
GEN 29:19 Lakea e Leban i ta maea, “I kamumu bara o bolea, ma ge nabirei vona a viri na kabu tara. Ngane o made turagu.”
GEN 29:20 Lakea e Iakop i leho na pida i polorua, ge bolea e Resel, pali ra pida nga, i manga a parava popote kunana, a vuhuna i ngaru hatekea e Resel.
GEN 29:21 Muri e Iakop i takia e Leban, “O habia nau ngane e tumu, ga parangi vona. A vakalobo pali a pida o taki ga leho vona.”
GEN 29:22 Lakea e Leban i gale palupu e huriki na tanga, i ratea a habu.
GEN 29:23 I rodo a hini, i bolea e Lea, i habia ne Iakop, i mahita turana.
GEN 29:24 E Leban i habia ne Lea a vorakato ngatavine, a rana e Silpa, ge a vora vona.
GEN 29:25 Na hatelanga, i turutu vona e Lea i mahita turana. Lakea e Iakop i takia e Leban, “Ioe o rata navai iau? Iau a leho vomu ta ga parangi vona e Resel. I navai a hini o tami iau?”
GEN 29:26 Lakea e Leban i koli mulea, “I uka ma a rabune mia koea a ngatavine i muri ge parangi languia a viri i muga.
GEN 29:27 Pali ngane, o vakalobo taroa a parava na habu ge polorua ne marua e Lea muru parangi. Muri ga habi tabua vomu e tarina. Pali ioe bara o leho tabu na pida i polorua.”
GEN 29:28 E Iakop i longo vona a ngava iea. Muri i lobo a parava i polorua na habu, lakea e Leban i habi tabua vona e tuna e Resel, ge girihina.
GEN 29:29 E Bila, a vorakato ngatavine, i habi tabua ne Resel ge ia a vora vona.
GEN 29:30 E Iakop i mahita turane Resel, a vuhuna i ngaru hatekea ne Lea. Muri i leho tabu ne Leban na pida i polorua.
GEN 29:31 E BAKOVI DAGI i masia e Lea, i uka ma i ngaru hatekea e Iakop, lakea i tuhoria i tahoka a koma, pali e Resel i lame.
GEN 29:32 E Lea i singou. Muri i podea a koma bakovi, i vunua e Reuben. Lakea i ta maea, “E BAKOVI DAGI i masia pali a nimadihi nau. Pali ngane e girihigu bara i ngaru iau.”
GEN 29:33 Muri e Lea i singou tabu. Na tahuna i poda tabua tara koma bakovi, i ta maea, “E BAKOVI DAGI i longo e Iakop i uka ma i ngaru iau, lakea i habi tabua nau a koma bakovi.” Lakea i vunua e Simion.
GEN 29:34 Muri e Lea i singou tabu. Na tahuna i poda a koma bakovi tabu i ta maea, “Ngane e girihigu bara i madoko nau, a vuhuna a poda vona pali a koma bakovi ala tolu.” Lakea i vunua e Levi.
GEN 29:35 E Lea i singou tabu. Na tahuna i poda tabua tara koma bakovi, i ta maea, “Ngane bara kavurikea a rane BAKOVI DAGI.” Lakea i vunua e Iuda. Muri i lobo ni singou.
GEN 30:1 Na tahuna e Resel i masia i uka ma i poda ne Iakop ranga koma, i madihi a hatena vona e tukana. Lakea i takia e Iakop, “O habi a koma nau. Ge uka, bara mate.”
GEN 30:2 E Iakop, i madihi a hatena, lakea i takia, “Iau i uka ma iau a Vure a rata ioe o lame.”
GEN 30:3 Muri e Resel i ta maea, “O bolea e Bila, a vora ngatavine nau. O mahita turana ge poda ranga koma ga pau.”
GEN 30:4 Lakea e Resel i habia ne Iakop e Bila ge girihina. Lakea e Iakop i mahita turana,
GEN 30:5 i singou, i podea a koma bakovi.
GEN 30:6 Ngane e Resel i ta maea, “A Vure i matakilaka nau, i longo a nigale nau, i habia nau a koma bakovi.” Na naro iea kunana, i vunua e Dan.
GEN 30:7 A vora ne Resel, e Bila, i singou tabu i podea a koma bakovi. Ngane i rua e tune Iakop i poda.
GEN 30:8 Lakea e Resel i ta maea, “A vaubi bala ne tukagu, ngane a bolea pali.” Lakea i vunua e Naptali.
GEN 30:9 E Lea i masia i uka ma i poda tabu, lakea i bolea a vorakato ngatavine vona, i habia e Iakop ge girihina.
GEN 30:10 Ra vora ne Lea, e Silpa, i podea ne Iakop a koma bakovi.
GEN 30:11 Lakea e Lea i ta maea, “A nabirei vona!” Lakea i vunua e Gad.
GEN 30:12 E Silpa, a vorakato e Lea, i poda tabu. Ngane i rua e tune Iakop i poda.
GEN 30:13 Lakea e Lea i ta maea, “A vivi hateka. Ngane e huriki a ngatavine bara ri gale iau ‘a ngatavine ni vivi.’” Lakea i vunua e Aser.
GEN 30:14 Na tahuna ni mirio a vit, e Reuben i lakea na hania, i matavisi ranga vuana kai manginoro. I bole lakea ne kinana, e Lea. Muri e Resel i nongi e Lea, “Iau a masia e tumu i habi vomu ranga vuana kai manginoro, o habi nau ranga.”
GEN 30:15 Pali e Lea i marikoi, i ta maea, “Ioe o rata marogoa pali e girihigu. Pali ngane o ngaru ni bole tabu ranga vuana kai manginoro ne tugu?” Lakea e Resel i ta maea, “Kamumu hateka, ioe bara o habi nau ranga vuana kai manginoro, o mahita turana barama na rodo e Iakop.”
GEN 30:16 Na malunga e Iakop i hamule na hania, lakea e Lea i vano i tagui ia, i ta maea, “Iau a kona ioe pali na vuana kai manginoro i bole e tugu. Na rodo o mahita turagu.” Na rodo iea e Iakop i mahita turana e Lea.
GEN 30:17 A Vure i longototoa a ninana ne Lea, lakea i singou i podea a limana e tune Iakop.
GEN 30:18 Muri e Lea i ta maea, “A Vure i habi nau a maki a nanea vona, a vuhuna a habia ne girihigu a vora ngatavine nau.” Lakea e Lea i vunua e tuna e Isikar.
GEN 30:19 E Lea i singou tabu, i podea a polotarana e tune Iakop.
GEN 30:20 Muri i ta maea, “A Vure i habi tavulea nau tara maki kamumu. Ngane e girihigu bara i togo iau, a vuhuna a poda vona e huriki e tuna a bakovi, i polotara.” Lakea i vunua e Sebulun.
GEN 30:21 Muri i podea a koma ngatavine, i vunua e Daina.
GEN 30:22 A Vure i luhoia e Resel, i longoa a nivasileki vona, i gamaia ge singou.
GEN 30:23 Muri e Resel i singou, i podea a koma bakovi. Lakea i ta maea, “A Vure i bole vuroki a nimaruhu nau.”
GEN 30:24 I vunua e Iosep, lakea i ta maea, “A ngarua e BAKOVI DAGI ge habi tabua nau tara koma bakovi.”
GEN 30:25 Muri ne Resel i podea e Iosep, lakea e Iakop i takia e Leban, “Iau ga pe ioe, ga hamule lakea na tanga nau.
GEN 30:26 Iau a leho kamumu hateka vomu. O lohoka vona a maka leho lobo a rata vomu, o habi nau e huriki e girihigu, e huriki e tugu, ri gi vano turagu.”
GEN 30:27 Lakea e Leban i ta maea, “O made turagu. Na naro kamumu vomu kunana iau a tahoka a mahala i kupo. Iau a matakilaka, e BAKOVI DAGI i gamai iau a vuhuna ioe o made turagu.”
GEN 30:28 Lakea i ta maea, “O taki iau vona a mapamu, bara kona ioe.”
GEN 30:29 E Iakop i takia, “O lohoka vona a leho a ratea vomu, a matakaria a kabuna sipsip vomu, ri bele kupo.
GEN 30:30 Ra kabuna sipsip popote o tahoka muga, ngane ria a kabu dagigala, a vuhuna e BAKOVI DAGI i gamai ioe na tahuna a made turamu. Pali ngane, o luhoi kamumu. A ngaru go habi nau ranga maki.”
GEN 30:31 Lakea e Leban i nana, “Pali a ra o ngaru ga habi vomu?” E Iakop i koli, i ta maea, “A koi go habi nau a maki viliha. O rata kunanea tara naro, muri bara matakari tabu a kabuna sipsip vomu.
GEN 30:32 Mona ga bole tala na kabuna sipsip vomu a maka sipsip logologo, a tuna sipsip kokoa, a meme logologo, ga mapagu.
GEN 30:33 Muri bara o matai kamumu a sipsip a meme a bole vomu. Na tahuna o matai a meme i uka ma i logologo, a tuna sipsip i uka ma i kokoa o matavisi i laho turana a kabuna nau, bara o lohoka vona iau kunana a panaho.”
GEN 30:34 Lakea e Leban i ta maea, “I kamumu! O rata manga a hini o taki.”
GEN 30:35 Na parava iea kunana, e Leban i vakalaho herehere a maka meme a toga, a kinana logologo keakea, a tuna sipsip kokoa, i habi ne huriki e tuna bakovi ri matakari.
GEN 30:36 E Leban i vano turane ria, ri laho na parava i tolu, turana a kabuna sipsip, a meme. Ri vano ri bele vona a tara tanga. Pali e Iakop i matakaria a kabuna sipsip a meme ne Leban.
GEN 30:37 Muri, e Iakop i tolo karaba a rahana kai a popla, a almon, a plein, i rina a kulina, i tabuli kavakava a hini keakea pololilo.
GEN 30:38 I bole ra rahana kai i rina, i ru tabukoi na murina ni ninu. Na tahuna ri ngaru ni varadi a kabuna meme, bara ri valai ri ninu,
GEN 30:39 ri varadi tabukoi na rahana kai. Muri a maka kinana bara ri poda, e tune ria ri logologo.
GEN 30:40 Muri e Iakop i kalipida a maka tuna sipsip a meme na kabuna. I rata a kabuna sipsip a meme vona ri mata lakea na kabuna sipsip a meme logologo na sipsip a meme kokoa ne Leban. Na naro iea kunana, e Iakop i kalipida a sipsip a meme vona, i uka ma i ru turana a kabuna sipsip a meme ne Leban.
GEN 30:41 Na tahuna a maka sipsip, a meme gavutuvutu ri ngaru ni varadi, bara i ru tabukoi na naru a maka rahana kai, bara ri matai, ri varadi.
GEN 30:42 Na tahuna a maka sipsip, a meme tekiteki ri ngaru ni varadi, i uka ma i ru a maka rahana kai nga. I mavonga, a maka sipsip tekiteki ri lakea ne Leban, pali e Iakop i bole a maka sipsip gavutuvutu.
GEN 30:43 Na vilo iea kunana e Iakop i vakabele kupo a maki vona. I tahoka a maka kabuna sipsip a meme, e huriki a vora bakovi, a vora ngatavine, a maka kamel, a donki.
GEN 31:1 E Iakop i longo e huriki e tune Leban ri ta maea, “E Iakop i bole lobo a maki ne tamane hita. Ngane i tahoka a mahala i kupo.”
GEN 31:2 Lakea e Iakop i masia a narone Leban i mapulo, i uka ma i manga a narona muga.
GEN 31:3 Muri e BAKOVI DAGI i takia e Iakop, “O hamule lakea na robo ne tamamu, ne huriki a viri vomu. Iau ga turamu.”
GEN 31:4 Lakea e Iakop i talo rike a ngava ne Resel rua e Lea, ru gu masia na hini i matakari a kabuna sipsip vona.
GEN 31:5 Lakea e Iakop i taki rua, “Iau a masia a narone tamane marua, i uka ma i manga a narona muga. Pali a Vure ne tata i made turagu.
GEN 31:6 Marua, muru lohoka, iau a rata a leho dagi ne tamane marua,
GEN 31:7 pali e tamane marua i tami iau. I balaka ravulu i pulo viliha a mapagu. Pali a Vure, i uka ma i ngarua e Leban ge rata hale iau.
GEN 31:8 I muga i ta maea, ‘A maka sipsip padikuku ga mapamu.’ Lakea a kabuna sipsip ri poda a maka sipsip padikuku. Muri i ta maea, ‘A maka sipsip logologo ga mapamu.’ Lakea a kabuna sipsip ri poda a maka sipsip logologo kunana.
GEN 31:9 Na naro iea a Vure i bole ne tamane marua a kabuna sipsip, i habi nau.
GEN 31:10 Na tahuna a maka meme ri varadi, a vurena vona a maka meme a toga logologo, ri radi a maka kinana meme.
GEN 31:11 A vurena vona a agelo na Vure i gale iau, i ta maea, ‘Iakop.’ Lakea a koli, a ta maea, ‘Iau ieni.’
GEN 31:12 Lakea i taki iau i ta maea, ‘O mata rike o matai a maka meme a toga logologo, ria kunana ri radi a maka kinana meme. Iau a masia pali a naro hale i rata virihi ioe vona e Leban.
GEN 31:13 Iau kunana a Vure, ra i bele vomu o Betel, na tabeke o taki a ngava dagi nau vona, muri o gamaia o rua vona a kedo, ga kilakila. Ngane o pe malaviriria a robo iea, o hamule lakea na robo vomu.’”
GEN 31:14 Muri e Resel e Lea ru tapuhaki, ru ta maea, “E tamane maria i uka ma i vakatahoka maria vona tara maki.
GEN 31:15 I rata maria miri manga a mosi. I habi maria vomu, i vakalobo pali a mahala o kona maria vona.
GEN 31:16 Muholi ra maka mahala, a Vure i bole mule ne tamane maria, bara ne maria, ne tune maria. Pali ngane o muri maia a ngava a Vure i taki ioe vona.”
GEN 31:17 Lakea e Iakop i vakarike na kamel e huriki e tuna e girihina.
GEN 31:18 Ri pea ngane a robo iea, ri hamule lakea ne tamana e Isak, na robo e Kenan. A maka kabuna sipsip a meme i lili muga. I vakamariu lobo a maka mahala i vakabele o Padan-Aram, re Mesapotamia.
GEN 31:19 Na tahuna i vano e Leban, ge pala­kudu a vuna sipsip, lakea e Resel i panaho a maka hanuna vure ne tamana.
GEN 31:20 E Iakop tara, i tamia e Leban, ra bakovi o Aram, i uka ma i vakalongoa ge vano.
GEN 31:21 I ha turana a maki lobo vona. I vano i pagepoloa a naru dagi e Iupretis. I laho lokovonga liu na maka kupona na robo e Gilead.
GEN 31:22 A parava i tolu i lobo, e Leban i longoa e Iakop i ha pali.
GEN 31:23 Lakea e Leban i bole e huriki a kabu vona, ri nunu muri maia e Iakop. Muri na parava i polorua, ri pakaraua na maka kupona na robo e Gilead.
GEN 31:24 Na rodo, e Leban, ra bakovi o Aram, i vurena. A Vure i bele vona i ta maea, “Naha ni ratea tara ngava ge hale o ge kamumu ge lakea ne Iakop.”
GEN 31:25 E Iakop i vakapesia a kape na kupona na robo e Gilead, lakea e Leban i pakaraua vonga, ia tara i vakapesi a kape vonga turana e huriki a kabu vona.
GEN 31:26 Lakea e Leban i takia e Iakop, “Ra ioe, i navai o tami iau, o ha turana e tugu ngatavine ala rua i manga a viri ni lakavu na vabinga?
GEN 31:27 I navai o tami iau, o ha kapiloho? I navai i uka ma o vakalongo iau, ga talo kamumu ioe na ralova turana a nangina kude a golo?
GEN 31:28 I navai i uka ma o vakalongo iau, ga nguru e tubugu mai turane kinane ria? A naro o ratea i hale liu.
GEN 31:29 Iau a tahoka a nitora na ni ratapile ioe. Pali baroko na rodo, a Vure ne tamamu i taki iau, i ta maea, ‘Naha ni ratea tara ngava ge hale o ge kamumu ge lakea ne Iakop.’
GEN 31:30 Pali ngane o vano, a vuhuna o ngaru hateka ni hamule na tanga vomu. Pali i navai o panaho a maka vure nau?”
GEN 31:31 Lakea e Iakop i takia e Leban, “Iau a mangenge, a ha kapiloho, a vuhuna ma go rata virihi iau vona ranga hini, go bole hamule e tumu ngatavine.
GEN 31:32 Pali e rei o matavisia i bole a maka vure vomu, ia bara i mate. Na matane huriki a kabu vomu, o valai, o lei a maka maki, pali ioe bara o matavisi a maka maki vomu, o bole mule.” E Iakop, i uka ma i lohoka vona e Resel i panaho a maka vure ne tamana.
GEN 31:33 Lakea e Leban i dili na kape ne Iakop, na kape ne Lea, na kape na vora ngatavine ala rua, i uka ma i matavisi ranga maki. I pagitala na kape ne Lea, i vano i dili na kape ne Resel.
GEN 31:34 E Resel i bole pali a maka vure ne tamana, i ru pololilo na murina ni made na kamel, i made langa vona. E Leban i lei lobo a maka maki na kape, i uka ma i matavisia tara maki.
GEN 31:35 E Resel i takia e tamana, “Bakovi dagi, naha ni tahate iau, a keri ni pesi na matamu, a vuhuna a matai a keva.” Pali i matakana viliha lae, i uka ma i matavisi a maka vure vona.
GEN 31:36 E Iakop i madihi a hatena, i tahatea e Leban, i nanea, “A ra maki hale a ratea? A ra naro hale a ratea o nunu muri nau vona?
GEN 31:37 Ngane o lei lobo pali a maka maki nau, pali a ra maki vomu o matavisia? Ioe bara o matavisia tara maki vomu, o vakasiria ne huriki lobo. O ru tala na matane huriki a kabu vomu, a kabu nau, ri gi pelekado a ngavane tarua.
GEN 31:38 Na tahuna iau a made turamu na pida i ravulu rua, a maka sipsip, a meme, ri poda kamumu kunana. Pali i uka ma a kania tara sipsip a toga vomu.
GEN 31:39 Iau i uka ma a vakasiria vomu ma tara sipsip a meme ge rabalakia a livoa hateka. A maka sipsip a meme i velu, a kuloi ria. A maka sipsip a meme ni panaho na rodo o na hini palala, bara o taki iau a kona.
GEN 31:40 Na parava i kupo a haro i kani pile iau. Na rodo i ratapile iau a malangia, i uka ma a mahita kamumu.
GEN 31:41 Na pida i ravulu rua a made turamu, a naromu i maea kunana. A leho vomu na pida i ravulu a polona i va, a bole e tumu ngatavine ala rua. Na pida i polotara a bole a maka sipsip a meme vomu. Balaka kupo o pulo viliha a mapagu.
GEN 31:42 Bara a Vure ne sisi e Abraham, ra Vure e Isak i kavurike balea, i uka ma ge made turagu, muholi hateka bara laho pa a limagu a hamule. A Vure i matai a nimadihi nau, a leho dagi a ratea na limagu, pali baroko na rodo i tahate ioe, a vuhuna i uka ma o rata a naro kamumu.”
GEN 31:43 Lakea e Leban i gegea e Iakop i ta maea, “Ra ngatavine nga e tugu, e huriki a koma nga, e tubugu. A maka sipsip a meme nga, a sipsip a meme nau. A maka maki o matai nga, a maka maki nau. Pali ngane ga rata navai e tugu ngatavine, turana e tune rua ru poda?
GEN 31:44 O valai ngane, tu gu valongo mai a ngava ne tarua, tu gu ratea a ngava dagi, bara tu luhoi a maki tu ratea.”
GEN 31:45 Lakea e Iakop i bolea tara kedo dagi, i toto pesia ne vona a nivakasiri.
GEN 31:46 Muri i taki e huriki a kabu vona ri gi ru palupu ranga kedo. Lakea ri ru palupu a maka kedo, muri ria lobo ri kani palupu tabukoi na kupona kedo iea.
GEN 31:47 E Leban i vunua na nita Aram a hini nga e Iegar Sahaduta. Pali e Iakop i vunua na nita Hibru e Galid.
GEN 31:48 E Leban i ta maea, “Ra kupona kedo iea, ne vona ni vakasiri a ngava tu ratea mona.” Pali ni gale liu a tabeke iea e Galid.
GEN 31:49 A rana tara, e Mispa, a vuhuna e Leban i ta maea, “E BAKOVI DAGI bara i matakari tarua, na tahuna i uka ma tu matai tabu tarua.
GEN 31:50 Ioe bara o rata hale e tugu ngatavine rua, o bole tabu e huriki a ngatavine karaba ge girihimu, o luhoi kamumu. I uka a viri ge matai tarua, a Vure kunana i matai a hini tu rata.”
GEN 31:51 Lakea e Leban i taki tabua e Iakop, “O masia a kupona kedo turana a kedo dagi a totopesia na kurukurune tarua.
GEN 31:52 A kupona kedo turana a kedo dagi a toto pesia ne vona ni vakasiri a ngava dagi tu ratea. Iau i uka ma ga polotaro ga lakene, ga vaubi turamu. Pali ioe tara, i uka ma go polotaro go valai, go vaubi turagu.
GEN 31:53 A Vure ne Abraham, a Vure ne Nahor, a Vure ne tamane rua bara i pelekado a narone tarua.” Lakea e Iakop i kaba vona a ngava dagi na rana Vure ne tamana, e Isak.
GEN 31:54 Muri i habi meli na lolo a nihabi na Vure. I gale e huriki a kabu vona ri kani palupu. Ri kani lobo, ri mahita tabu vonga.
GEN 31:55 Na hatelanga pokopoko, na parava muri, e Leban i nguru, i gamai e huriki e tubuna, e tuna. Muri i pe ria, i hamule lakea na tanga vona.
GEN 32:1 E Iakop tara i vano mai a hini ge lakea vona, lakea e huriki a agelo na Vure ri bele vona.
GEN 32:2 E Iakop i matai ria, i ta maea, “Ra hini nga a mada na Vure.” Lakea i vunua a tanga iea e Mahanaim.
GEN 32:3 E Iakop i rudu muga e huriki a vinuru ri gi vakalongoa e tukana e Esau i made o Seir, na robo e Idom.
GEN 32:4 I taki e huriki a vinuru vona ri gi vakalongoa a matakari ne ria, e Esau, ri gi ta maea, ‘A vora vomu e Iakop ta ge vakalongo ioe vona a hini i made turane Leban, pali ngane i ngaru ni hamule valai vomu.
GEN 32:5 I tahoka a maka kabu na bulmakau, a donki, a sipsip, a meme, a vora bakovi, a vora ngatavine. I rudu valai a ngava vomu, ioe a matakari vona, ta go rata a naro kamumu vona.’”
GEN 32:6 Ri hamule valai ne Iakop, ri ta maea, “Mi lakea ne tukamu e Esau, mi vakalongoa pali. Ngane ge muri valai turana e huriki a tara vona ri ala 400, ri gi tagui ioe.”
GEN 32:7 E Iakop i mangenge, i loho lege lae, i vakalipida na tete i rua a tara vona. A maka kabuna sipsip, a meme, a bulmakau, a kamel ngi ranga i vakalipida na tete i rua.
GEN 32:8 E Iakop i luhoi maea, “E Esau bara i valai, i vaubi turana a tete tara, a tete i uka ma i vaubi bara i ha.”
GEN 32:9 Muri e Iakop i vasileki, i ta maea, “O Vure ne sisi e Abraham, ne tata e Isak. BAKOVI DAGI ioe a viri o taki iau ga hamule lakea na viri nau, na robo nau, go vakamade kamumu iau.
GEN 32:10 Iau a vora vomu, i uka ma i kamumu a vilogu, pali ioe o dodo iau, o rata a naro kamumu nau. Hosi a pagepolo na naru dagi e Iordan turana a kodo nau kunana, pali ngane a tahoka a tara i rua.
GEN 32:11 A vasileki vomu, o kori iau na limane turagu e Esau, a vuhuna a mangenge vona, ma ge valai, ge vaubi turagu turane huriki a ngatavine e tune ria.
GEN 32:12 Pali ioe o ta maea, ‘Muholi iau ga vakamade kamumu ioe, ga rata e huriki a hamomu ri gi bele kupo manga a hire na dari, bara ni keri ni gi.’”
GEN 32:13 I mahita vonga vona a rodo iea, pali i pelekado a maka maki i bole a maka mahala ge habi ne turana e Esau.
GEN 32:14 Lakea i ru palupu a kinana meme i 200, a meme a toga i ravulu rua, a kinana sipsip i 200, a sipsip a toga i ravulu rua,
GEN 32:15 a kinana a kamel i ravulu tolu turana tuna, a kinana bulmakau i ravulu va, a bulmakau a toga i ravulu, a donki a kinana i ravulu rua, a donki a toga i ravulu.
GEN 32:16 I taki e huriki a vora vona ri matakari a maka kabuna sipsip a bulmakau takutaku, i ta maea, “Mu laho muga. Naha ni vakalaho palupu a maka kabuna sipsip a bulmakau.”
GEN 32:17 Lakea e Iakop i takia a vora i laho muga, “E tukagu e Esau, ge tagui ioe, ge nana ranga, ‘Ioe o leho ne rei? I vai a tanga go lakea vona? A sipsip a bulmakau ne rei ra ri laho na ngalamu?’
GEN 32:18 Pali o takia, o ta maea, ‘A maka sipsip a bulmakau nga, ne vona a vora vomu, e Iakop. A maka sipsip a bulmakau nga ge habi vomu, ioe a bakovi dagi vona. Ia ge muri valai.’”
GEN 32:19 E Iakop i taki tabu a ruana, a toluna vora, e huriki a vora lobo ri matakaria a kabuna sipsip a bulmakau, i ta maea, “Na tahuna mu taguia e Esau, mu takia a ngava ge palupulupu kunana.
GEN 32:20 Mu ta tora vona a ngava, ‘A vora vomu e Iakop i muri valai.’” A vuhuna e Iakop i luhoi maea, “Na naro iea kunana bara luke mulea e Esau na maka mahala a vakaru muga, lakea na tahuna miri vakorokoro, bara i rata kamumu iau.”
GEN 32:21 Lakea e Iakop i vakaru muga a maka mahala vona, i mahita vonga na mada ia.
GEN 32:22 Na rodo iea, e Iakop i bole e girihina rua, a vora ngatavine vona ala rua, turana e tuna mai ala ravulu a polona i taku, ri pagepoloa a naru e Iabok.
GEN 32:23 I rudu muga ria turana a maka maki lobo vona.
GEN 32:24 Pali ia kikeri i made mule. I bele tahoa tara bakovi ru valoi mavonga na rodo, i palala taho rua a hini.
GEN 32:25 Na tahuna ru valoi, a bakovi i keri ni vakaborua e Iakop, lakea i ubi a labune Iakop, i maparu a tagana.
GEN 32:26 Muri i ta maea a bakovi, “O taparaki iau ga vano. I palala pali a hini.” E Iakop i koli mule, i ta maea, “O gamai taro iau, muri o vano ke.”
GEN 32:27 Lakea a bakovi i nanea, “E rei a ramu?” I koli mule, i ta maea, “A ragu e Iakop.”
GEN 32:28 Muri a bakovi i ta maea, “A ramu ngane i uka ma ge Iakop tabu. A ramu ngane ni gi gale ge Israel, a vuhuna o valoi turana Vure, o valoi turana e huriki a bakovi, o rangi ria pali.”
GEN 32:29 Lakea e Iakop i takia, “O taki iau vona a ramu!” A bakovi i koli, i ta maea, “I navai o nana vona a ragu?” Muri i gamaia e Iakop.
GEN 32:30 Lakea, e Iakop i galea ra mada iea e Peniel, muri i ta maea, “A masia pali a matana Vure, pali i uka ma a mate.”
GEN 32:31 Na tahuna i pea e Penuel a haro i hera pali, i kodo a vuhuna i maparu a tagana.
GEN 32:32 Na tahuna iea, i valai mona, e huriki a kabu ne Israel i uka ma ri kani kilala a pona sipsip a bulmakau. Ri ramaia a vilo iea, a vuhuna a Vure i ubia a labune Iakop, i maparu a tagana.
GEN 33:1 E Iakop i mata muga, i masia e Esau i valai turana e huriki a bakovi ala 400, lakea i kalipida e Lea, e Resel, a vora ngatavine ala rua, e huriki a koma.
GEN 33:2 I vakalaho muga a vora ngatavine turane huriki e tune rua, e Lea turana e huriki e tuna ri laho na kurukuruna, e Resel e Iosep ru laho muri.
GEN 33:3 E Iakop kunana i laho muga, i lolu puru na malala balaka polorua na tahuna i laho lokovonga ge taguia e tukana.
GEN 33:4 Lakea e Esau i nunu lokovonga ne Iakop, i taguia, i rakoa, i ngurua ru vataringi.
GEN 33:5 Muri i mata rike e Esau, i matai e huriki a ngatavine a koma, lakea i nana, “E rei e huriki ri turamu?” Lakea e Iakop i koli mulea i ta maea, “Iau a vora vomu. A Vure i rata a naro kamumu nau, i habi nau e huriki a koma nga.”
GEN 33:6 Muri a vora ngatavine turane huriki e tune rua, ri laho valai ri lolu puru.
GEN 33:7 E Lea turane e tuna mai ri muri mai ria, ri lolu puru. E Resel rua e Iosep ru muri, rua ranga ru lolu puru.
GEN 33:8 Lakea e Esau i nana, “Ra maka sipsip a bulmakau a matai, go bole lokovai?” Lakea e Iakop i ta maea, “Bakovi dagi nau, ta ga habi vomu, go rata kamumu iau.”
GEN 33:9 Pali e Esau i koli mulea i ta maea, “Tarigu, iau a tahoka i kupo hateka. O matakari a maka sipsip a bulmakau nga, ge ne vomu.”
GEN 33:10 E Iakop i hehe, i ta maea, “I uka ma ge mavonga. Ngane tu vamatai tabu, o bole nau a maki nga. Ra ngane a matai a matamu, i manga a matai a matana Vure, a vuhuna o vivi ni tagui iau.
GEN 33:11 Ngane a ngaru go bole a mahala nga a vuhuna a Vure i rata a vilo kamumu nau, a tahoka a maki i kupo.” E Iakop i ta hinituhana, lakea e Esau i bole a maka mahala nga.
GEN 33:12 Muri e Esau i ta maea, “Tu vano, iau ga laho turamu.”
GEN 33:13 Lakea e Iakop i ta maea, “Tukagu, e huriki a koma, i uka ma ri paki kamumu ma. Pali iau a luhoi hateka a maka sipsip, a bulmakau ra ri vakaruru, ma ri gi laho hateka na parava i taku, ma ri gi mate.
GEN 33:14 Tukagu, o laho muga ke. Ge laho muri e tarimu. Ga bae a maka sipsip a bulmakau turane huriki e tugu mai, bara mi pakarau ioe o Seir.”
GEN 33:15 Lakea e Esau i ta maea, “Ga taparaki vomu ranga vora nau ri gi laho turamu.” Pali e Iakop i koli, i ta maea, “Ge vona ra? A ngaru kunana ioe go ngaru iau”
GEN 33:16 Na parava iea, e Esau i vakatubu ni laho mule lakea o Seir.
GEN 33:17 Pali e Iakop i lakea o Sukot, i ratea vonga a tanga vona, i hae a kape na sipsip a bulmakau vona. Lakea ni gale liu ra mada iea e Sukot.
GEN 33:18 Muri e Iakop i pea e Padan-Aram, re Mesapotamia, i bele na robo e Kenan, i ru a mada vona tabukoi na tanga dagi e Sekem.
GEN 33:19 Lakea i bole a kedo silva i 100, i kona ne tamane Sekem, na kabune Hamor, a malala i vakapesi a kape vona.
GEN 33:20 Lakea i vakapesia vonga a dede-kedo, i galea, “A Vure a Vure ne Israel.”
GEN 34:1 E Daina, e tune Iakop, e Lea i vano ge matai e huriki a ngatavine na tanga dagi.
GEN 34:2 E Hamor, a bakovi dagi na kabu na Hivi, i matakaria ra tanga dagi iea. E tuna, e Sekem. Na tahuna e Sekem i masia e Daina, i lakavua.
GEN 34:3 E Sekem i ngaru hatekea e Daina, e tune Iakop. Lakea i lukea na ngava, ge ngarua.
GEN 34:4 Muri e Sekem i takia e tamana, i ta maea, “O tulia a ngatavine iea ge girihigu.”
GEN 34:5 Na tahuna e Iakop i longoa e Daina ni lakavu, i uka ma i takia tara ngava. I dava kunana e huriki e tuna ri gi hamule taro, a vuhuna ria lobo ri vano ri matakari a sipsip.
GEN 34:6 Muri e tamane Sekem i vano, ge ta turane Iakop.
GEN 34:7 Na tahuna e huriki e kurabane Daina ri hamule na robo, ri longoa e Daina ni lakavu, i madihi a hatene ria, a vuhuna e Sekem i rata a rabu hale na kabu ne Israel na ni mahita turane Daina, re tune Iakop. Ra naro iea i hale hateka.
GEN 34:8 Lakea e Hamor i taki ria, “E tugu e Sekem i ngarua e Daina. Mu habia vona ge girihina.
GEN 34:9 Si gi vaparangi vakuloi. Mu habi valai ne mia a ngatavine. Mia ranga bara mi habi lakene mua a ngatavine.
GEN 34:10 Mu made turane mia, mu leho vona a malala na tabeke mu ngaru. Mu vahabi, mu vakona, bara mu tahoka a mahala vona a malala iea.”
GEN 34:11 Lakea e Sekem i takia e tamane Daina turana e huriki e kurabana, i ta maea, “Mua bara mu longo mai iau, bara habi tavula ne mua a maki mu nana iau vona.
GEN 34:12 Mu takia a mapana ngatavine, turana ranga maki, bara habi ne mua. Pali a ngatavine iea, mu habia nau ge girihigu.”
GEN 34:13 E huriki e tune Iakop ri longo tamilalu, ri tami e Hamor rua e tuna e Sekem, a vuhuna e kurabane ria, e Daina, ni rata a naro hale vona.
GEN 34:14 Lakea ri taki rua, “I uka ma mi gi longo mai marua. I uka ma mi gi habia e kurabane mia na bakovi i uka ma ni pala a kulina, ma ge habi a nimaruhu ne mia.
GEN 34:15 Bara mi longo mai ioe na maki i taku kunana. Mi ngaru mu gu pala a kuline huriki a bakovi lobo, ri gi manga mia.
GEN 34:16 Muri bara mi habi mua e huriki a ngatavine ne mia. Mua ranga bara mu habi ne mia e huriki a ngatavine. Bara mi made turane mua, muri bara hita a viri ala taku.
GEN 34:17 Pali mua, i uka ma mu longo mai mia, ni gi pala a kuline mua, bara mi bole mulea e kurabane mia, mi vano.”
GEN 34:18 A nitane ria i nangi kamumu ne Hamor rua e tuna, e Sekem.
GEN 34:19 A riau iea, ri kavurike hatekea e huriki a kabu ne tamana, i malaviriri kunana i muri mai a ngava ri taki, a vuhuna i ngaru hatekea e Daina.
GEN 34:20 E Hamor rua e tuna e Sekem, ru lakea na poridala na tanga dagi, ru ta turana e huriki a bakovi vonga.
GEN 34:21 Ru ta maea, “A narone e huriki a bakovi nga i kamumu. Ri gi made turane hita na malala ne hita, ri gi rata harikia ne ria. A malala i tabuli tavula, i uka viri ge leho vona. Ngane si gi parangi na ngatavine ne ria, pali ria ranga bara ri parangi na ngatavine ne hita.
GEN 34:22 Pali si gi valongo mai vona tara ngava. E huriki a bakovi ne hita, ni gi pala a kuline ria, si gi manga ria. Muri bara ri longo ni made na malala ne hita, bara hita a viri ala taku kunana.
GEN 34:23 A maka mahala, a sipsip, a bulmakau ranga, bara ne hita. Si gi longo mai ria, bara ri made turane hita.”
GEN 34:24 E huriki a bakovi ri pagitala na poridala na tanga dagi, ri longo vona a nitane Hamor rua e tuna e Sekem. Lakea ni pala a kuline e huriki a bakovi lobo na tanga dagi.
GEN 34:25 I rongo ria a voko, ri malo kunana. I lobo a parava i tolu, lakea e tune Iakop ala rua, e Simion e Levi, ra to kinana taku e Daina, ru bole a bainat ne rua, ru vaubi turana e huriki a bakovi na tanga dagi, ru rabalaki ria.
GEN 34:26 Ru rabalaki na bainat e Hamor rua e tuna e Sekem, lakea ru bole mulea e Daina na ruma ne Sekem.
GEN 34:27 Ri sike e huriki e tune Iakop ranga, ri matai a podane huriki ri mate, ri bole a maki lobo na tanga dagi, a vuhuna e Sekem i rata a naro hale ne kurabane ria.
GEN 34:28 Ri bole a maka sipsip a bulmakau, a donki, a mahala lobo i tabuli pololilo, i tabuli polovavo na tanga dagi.
GEN 34:29 Ri bole a maka mahala, e huriki a ngatavine, e huriki a koma, ri bole a maki lobo na tanga dagi.
GEN 34:30 Muri e Iakop i taki e Simion rua e Levi, “Marua muru rata hale a nimadegu. Muru rata iau ngane i uka ma a made kamumu na matane huriki a Kenan a Peres, re huriki a tahona a robo iea. Hita, i uka ma si ala kupo. E huriki nga bara ri vadili palupu, bara ri ratapile iau turane huriki a kabu nau.”
GEN 34:31 Lakea ru nana maea, “O luhoi navai, miri gi mata taroa e kurabane maria, ni gi rata manga a ngoi?”
GEN 35:1 Muri a Vure i takia e Iakop, “O sike o Betel, o made vona, o kisia a dede-kedo nau na tabeke a bele vomu na tahuna o ha ne turamu e Esau.”
GEN 35:2 Lakea e Iakop i taki e huriki a kabu vona, i ranga e huriki ri turana, i ta maea, “Mu vuroki a maka vure taminga mu tahoka, mu kurudu pasi mua, mu rodo a varakia karaba.
GEN 35:3 Mu valai, si gi lakea o Betel, ga haea vonga a dede-kedo na Vure, a vuhuna i kori iau na tahuna na vuranga, i laho turagu na maka robo a lakea vona.”
GEN 35:4 Lakea ri habi ne Iakop a maka vure taminga ne ria, turana a maka pato na talingane ria, i tanu ria na taruna kai a ok tabukoi o Sekem.
GEN 35:5 Muri ri vano, lakea a Vure i rata e huriki a bakovi na maka tanga dagi tabukoi vonga ri mangenge, i uka ma ri valili ria.
GEN 35:6 E Iakop turane huriki a tara vona, ri bele o Lus, re Betel na robo ne huriki a Kenan.
GEN 35:7 I kisia vonga a dede-kedo, i galea a hini ngi “A Vure ne Betel”, a vuhuna a Vure i bele vona vonga na tahuna i ha ne tukana.
GEN 35:8 E Debora, a vora ngatavine ne Rebeka i mate vonga, lakea i tanua na taruna kai a ok na tabeke mule puru ne Betel. Ni gale liu a kai iea “A Kai ni Tangi.”
GEN 35:9 Muri ne Iakop i pe e Padan-Aram, a Vure i bele tabu vona i gamaia.
GEN 35:10 Lakea a Vure i takia, “A ramu e Iakop, pali ngane i uka ma ni gi gale tabu ge Iakop, ni gi gale e Israel.” Lakea i vunua e Israel.
GEN 35:11 Muri a Vure i takia, i ta maea, “Iau a Vure Tuhaka, o vakabele e huriki a hamomu, ri gi vakavonu a malala. Ge ioe a vuhuna e huriki a kabu lobo. E huriki a hamomu ranga, ge ria a hariki.
GEN 35:12 Ra robo a habia ne Abraham rua e Isak, ngane a habia vomu. Muri ga habia ne huriki a hamomu.”
GEN 35:13 Muri a Vure i pea e Iakop na hini i ta turana vona, i sike.
GEN 35:14 E Iakop i rua a kedo ga kilakila ni gi vakasiri a tabeke i ta turana Vure vona. Lakea i guru langa na kedo a naruna vain, a naruna oliv, ge vakasiri a nihabi vona na Vure.
GEN 35:15 E Iakop i vunua a tabeke i ta turana Vure vona a “Roho na Vure”.
GEN 35:16 E Iakop turane huriki a tara vona ri pea e Betel, ri lakea na tanga dagi e Eprata. Ri tabukoi ni bele vonga, i pahea a koma i keri ni poda e Resel.
GEN 35:17 Na tahuna i hataki a nimadihi na nipoda, a ngatavine bolekori i takia, “Naha ni mangenge, bara o poda tabua a koma bakovi.”
GEN 35:18 Na tahuna e Resel i popote ge mate i vunua e tuna bakovi e Ben-Oni. Muri e tamana i vunu herea e Bensamin.
GEN 35:19 E Resel i mate, ni tanu na dala lakea o Eprata, ngane ni gale e Betlehem.
GEN 35:20 E Iakop i rua a kilakilana polomeli na lovona. I mona a kilakilana i vakasiria a lovo ne Resel.
GEN 35:21 E Israel i laho lokovonga, i polotaroa a tanga e Eder, i haea a kape vona.
GEN 35:22 Na tahuna e Israel i made vona a robo iea, lakea e Reuben i mahita turana e Bila, a ngatavine i parangi tabu vona e tamana. Lakea i vano a nita i bele ne Iakop vona ra naro hale i ratea e Reuben. E Iakop i tahoka e tuna a bakovi ala ravulu a polona i rua.
GEN 35:23 E huriki e tune Lea a bakovi, a rane ria ra nga: e Reuben, a tabua ne Iakop, e Simion, e Levi, e Iuda, e Isikar, e Sebulun.
GEN 35:24 E tune Resel a bakovi a rane rua ra nga: e Iosep e Bensamin.
GEN 35:25 E tune Bila, a vorakato ne Resel, a bakovi a rane rua ra nga: e Dan e Naptali.
GEN 35:26 E tune Silpa, a vorakato ne Lea, a bakovi a rane rua ra nga: e Gad e Aser. Re huriki a bakovi nga, e tune Iakop ni poda o Padan-Aram.
GEN 35:27 E Iakop i bele taho e tamana na tanga e Mamare, i tabukoi na tanga dagi e Kiriat-Araba, re Hebron. E Abraham e Isak ru made vonga hosi.
GEN 35:28 E Isak i tahoka a pida i 180,
GEN 35:29 i gare liu, muri i mate. I vano i made turane huriki a viri vona ri mate pali. Muri e Esau rua e Iakop ru tanua.
GEN 36:1 E Esau, a rana tara e Idom, i kupo a hamona.
GEN 36:2 I parangi a ngatavine o Kenan i ala tolu: E Ada, e tune Elon, a bakovi o Hiti; e Oholibama, e tune Anah, e tubune Sibion, a bakovi o Hivi;
GEN 36:3 e Basemat, e tune Ismael, e turane Nebaiot.
GEN 36:4 E Ada i podea ne Esau a koma bakovi i vunua e Elipas. E Basemat i podea e Ruel.
GEN 36:5 E Oholibama i poda e Ieus, e Ialam, e Kora. Re huriki a bakovi nga e Esau i vakabele na robo e Kenan.
GEN 36:6 Muri e Esau i pea vonga e Iakop i mariu lakea na tabeke tara. I vano turana e girihina ala tolu, e tuna mai, e huriki ri made turana. I bole a maka sipsip a bulmakau a mahala i vakabele o Kenan i vano.
GEN 36:7 E Esau i pea e Iakop, a vuhuna i kupo hateka a maka sipsip a bulmakau ne rua, i kiroko a malala.
GEN 36:8 I vano, i made na kupona na robo e Seir, re Idom.
GEN 36:9 E Esau a vuhuna e huriki o Idom, ra ri made na kupona na robo e Seir.
GEN 36:10 E tune Esau a bakovi e Elipas, e kinana e Ada; e Ruel, e kinana e Basemat.
GEN 36:11 E huriki e tune Elipas a bakovi ra nga: e Teman, e Omar, e Sepo, e Gatam, e Kenas.
GEN 36:12 E Elipas, e tune Esau, i tahoka a vora ngatavine tara a rana e Timna. I podea vona e Amalek. E huriki a bakovi nga e tubune Esau rua e Ada.
GEN 36:13 E huriki e tune Ruel a bakovi a rane ria ra nga, e Nahat, e Sera, e Sama, e Misa. E huriki a bakovi nga e tubune Esau rua e Basemat.
GEN 36:14 E Oholibama, e girihine Esau tara i poda e Ieus, e Ialam, e Kora. E Oholibama, e tune Anah ngatavine. E Anah, e tune Sibion ngatavine.
GEN 36:15 Re huriki a hariki nga a hamone Esau. A tabua ne Esau rua e Ada e Elipas. E tune Elipas a bakovi ra nga: e Teman, e Omar, e Sepo, e Kenas,
GEN 36:16 e Kora, e Gatam, e Amalek. Re huriki a hariki nga, e tune Elipas, e tubune Ada, ri matakari na robo e Idom.
GEN 36:17 E huriki a hariki e tune Ruel, re tune Esau, ra nga: e Nahat, e Sera, e Sama, e Misa. E huriki a hariki nga, e tune Ruel, ri matakari o Idom. Ria e tubune Esau rua e Basemat.
GEN 36:18 E huriki a hariki nga, e tune Esau rua e Oholibama: e Ieus, e Ialam, e Kora. E huriki a hariki nga, a hamone Esau rua e Oholibama re tune Anah.
GEN 36:19 Re huriki a hariki nga ria a hamone Esau, a rana tara e Idom, ri matakaria a kabu ne ria.
GEN 36:20 E huriki a hamone Seir a bakovi o Hori ri made vona a robo e Idom: e Lotan, e Sobal, e Sibion, e Anah,
GEN 36:21 e Disan, e Eser, e Dison. Re huriki a hariki nga e tuna e Seir, ri matakaria a kabu ne Hori na robo e Idom.
GEN 36:22 E tune Lotan bakovi ra nga: e Hor, e Heman. E Timna e kurabane Lotan.
GEN 36:23 E huriki e tune Sobal bakovi ra nga: e Alvan, e Manahat, e Ebal, e Sepo, e Onam.
GEN 36:24 E tune Sibion bakovi ra nga: e Aia e Anah, re Anah i matakari a maka donki ne tamana e Sibion na tabeke i ngeki, i matavisia a navuha.
GEN 36:25 E Anah e tuna e Dison e Oholibama.
GEN 36:26 E tune Dison bakovi, a rane ria ra nga: e Hemdan, e Esban, e Itran, e Keran.
GEN 36:27 E tune Eser bakovi ra nga: e Bihan, e Savan, e Akan.
GEN 36:28 E tune Disan bakovi ra nga: e Us, e Aran.
GEN 36:29 A hariki na kabu ne Hori ra nga: e Lotan, e Sobal, e Sibion, e Anah,
GEN 36:30 e Dison, e Eser, e Disan. Re huriki nga a hariki na kabu ne Hori. Ri matakari a tabeke takutaku ne ria na robo e Seir.
GEN 36:31 Muga na tahuna e Israel i uka hariki, e huriki a hariki nga ri matakari o Idom:
GEN 36:32 e Bela tune Beor i matakari o Idom. A tanga dagi vona e Dinhaba.
GEN 36:33 Na tahuna e Bela i mate, e Iobab, e tune Sera, i valai na tanga e Bosra, i bole a murina.
GEN 36:34 Na tahuna e Iobab i mate, e Husam i bole a murina. A robo vona e Teman.
GEN 36:35 Na tahuna e Husam i mate, e Hadad tune Bedad i bole a murina. E huriki a tara vona ri ratapile e huriki o Midian na robo e Moab. A tanga dagi vona e Avit.
GEN 36:36 Na tahuna e Hada i mate, e Samla i bole a murina. A tanga dagi vona e Mesreka.
GEN 36:37 Na tahuna e Samla i mate, e Sahul i bole a murina. A tanga dagi vona e Rehobot i pesi na dahana naru dagi, e Iupretis.
GEN 36:38 Na tahuna e Sahul i mate, e Bal-hanan e tune Akbor i bole a murina.
GEN 36:39 Na tahuna e Bal-hanan e tune Akbor i mate, e Hadar i bole a murina. A tanga dagi vona e Pau. A rana e girihina, e Mahetabel, e kinana e Matred, e tune Mesahab.
GEN 36:40 E huriki a hariki, a hamone Esau ri matakari na robo ni vunu virihi ria vona, a rane ria ra nga: e Timna, e Alva, e Dethet,
GEN 36:41 e Oholibama, e Ela, e Pinon,
GEN 36:42 e Kenas, e Teman, e Mibsa,
GEN 36:43 e Magdiel, e Iram. Re huriki nga ria a hariki ne Idom. E Idom a rana tara e Esau. E Esau a vuhuna a kabu ne Idom. E huriki a hariki nga ri tahoka a tanga takutaku ne ria na robo ri made vona, lakea ni vunu muri mai ria a tanga nga.
GEN 37:1 E Iakop i made na malala e Kenan, hosi e tamana i made vona.
GEN 37:2 Iea ngane a nitane Iakop: E Iosep a riau i tahoka a pida i ravulu a polona i polorua (17). I tuhori e huriki e tukana ni matakari a kabuna sipsip. E huriki e tukana nga, e tune Bila rua e Silpa, e girihine Iakop varago. E tukana mai bara ri rata a naro hale, e Iosep bara i vano i taki tala ne tamana.
GEN 37:3 E Israel i ngaru hatekea e Iosep ne huriki e tuna bakovi lobo, a vuhuna i podea e kinana na tahuna e Iakop i gare. Lakea e Iakop i ratea a varakia mageregere i habia vona.
GEN 37:4 Na tahuna e huriki e tukana ri masia e tamane ria i ngaru hatekea e Iosep, ri tepua, i uka ma ri rata kamumua.
GEN 37:5 Na parava tara e Iosep i vurena, i tuvereia ne tukana mai a vurena. Na tahuna e huriki e tukana ri longoa, i madihi hateka a hatene ria.
GEN 37:6 E Iosep i taki ria, “Mu longoa a vuregu, ga tuvereia.
GEN 37:7 Na tahuna si rotu a galesi na vit na hania, a galesi nau i pesi tamoro. Pali a galesi ne mua ri pesi haluia, ri lolu puru maia.”
GEN 37:8 Na tahuna e tukana mai ri longoa, ri nanea, “Ioe o luhoi ge ioe a matakari ne mia? Ioe o ngaru mia mi gi longototo a ngavamu?” Lakea ri tepu hatekea vona a nuverei na vurena.
GEN 37:9 Muri i vurena tabu, i tuverei poloa ne tukana mai a vurena, i ta maea, “Mu longo valai, iau a vurena tabu, a vurena vona a haro, a keva, a hada i ravulu a polona i taku ri lolu puru ma iau.”
GEN 37:10 I tuvereia ne tamana, e huriki e tukana ra vurena, lakea e tamana i tahatea, i ta maea, “O vurena navai ke? Ioe o ngaru e kinamu, iau, e tukamu mai, mi gi lolu puru na ngalamu?”
GEN 37:11 I madihi a hatene ria e huriki e tukana, pali e tamana i luhoi kado kunanea a vurene Iosep.
GEN 37:12 Na parava tara, e huriki e tukane Iosep ri vano ri matakari a kabuna sipsip tabukoi o Sekem.
GEN 37:13 Lakea e Israel i takia e Iosep, “Ioe o lohoka vona a hini i matakari a sipsip vona e huriki e tukamu tabukoi o Sekem? O vano, o lokovonga mai ria.” E Iosep i koli mule i ta maea, “A lohoka vona.”
GEN 37:14 Lakea i takia, “O vano o gosi e huriki e tukamu, o vakarakoli a maka kabu na sipsip, muri o hamule, o vakalongo iau.” E Israel, turana e huriki a kabu vona, ri made na maloku ne Hebron, i rudu talea vonga e Iosep. Na tahuna e Iosep i bele o Sekem,
GEN 37:15 a bakovi tara i matavisia i laho viliha vonga i nanea, “A ra o matakanea?”
GEN 37:16 I ta maea ia, “Iau a matakana e huriki e tukagu. O vakalongo iau vona a hini ri matakari a kabuna sipsip vona.”
GEN 37:17 Lakea a bakovi i ta maea, “Ri mariu pali koea. A longo ria ri taki ni lakea o Dotan.” Lakea e Iosep i muri mai ria, i luve taho ria tabukoi o Dotan.
GEN 37:18 E huriki e tukana mai ri masia i laho valai, ri varodo a ngava ri gi rabalakia.
GEN 37:19 Ri varodo a ngava, ri ta maea, “Mata lakea. I valai ngane a koma na nivurena.
GEN 37:20 Mu valai, si gi rabalakia, si gi voro purua na lovo a podana. Muri bara si taki ta a livoa hateka i rabalakia. Muri si gi masia a ra maki ge bele vona a vurena.”
GEN 37:21 Na tahuna e Reuben i longoa, i ngaru ni koria e Iosep, lakea i ta maea, “Nahea si gi rabalakia,
GEN 37:22 si gi vakatua a darana. Si gi voro puru kunanea koea na lovo na tabeke i ngeki.” E Reuben i ta mavonga, a vuhuna i ngaru ge koria e Iosep, ge tuli hamulea ne tamana.
GEN 37:23 Na tahuna e Iosep i luve taho ria, ri lakavua, ri kali talea a varakia rengerenge vona.
GEN 37:24 Ri bolea, ri voro purua na lovo i uka naru.
GEN 37:25 Na tahuna ri made puru, ri gi kani, ri matai e huriki a Ismael ri valai o Giliat, ri gi puru o Egipto. Ri vakarike na maka kamel ne ria a mahala kamumu: a maki ni kani manginoro, a marasin ni bole na kai, a nibiri mangisipa.
GEN 37:26 Lakea e Iuda i taki e huriki e turana, “A ra maki kamumu vona si gi rabalaki kapilohoa e tarine hita?
GEN 37:27 Mu valai, si gi habia ne huriki a Ismael, ri gi konea. Nahea si gi rabalakia, a vuhuna ia e tarine hita muholi.” Lakea ri longototoa.
GEN 37:28 E huriki a Midian, a tara na ni vangoli a mahala, ri valai, ri laho polo. Ri matai e huriki e turana ri lalu rikea na lovo, ri habia ne huriki a Ismael, ri konea e Iosep na kedo silva i ravulu rua, muri ri bole lakea o Egipto.
GEN 37:29 Na tahuna e Reuben i hamule lakea na lovo, i uka ma i masia e Iosep, lakea i rapea a varakia vona.
GEN 37:30 I hamule lakea ne huriki e tarina i ta maea, “E Iosep, i uka ma ia na lovo! Ga navai iau?”
GEN 37:31 Lakea, ri rabalakia tara meme, ri bole a darana, ri ravu na varakia e Iosep.
GEN 37:32 Muri ri bole lakea ne tamane ria a varakia rengerenge, ri ta maea, “A varakia iea mi matavisia. O matai kamumua, ma ge ne tumu e Iosep.”
GEN 37:33 E Iakop i matakilalea a varakia, lakea i ta maea, “Muholi hateka! A varakia ne tugu e Iosep. A livoa hateka tara i rabalakia, i kararapea e Iosep.”
GEN 37:34 Muri, i rapea a varakia vona, i rodo a varakia nikalo, i taringia na parava i kupo e tuna.
GEN 37:35 E huriki e tuna bakovi, e tuna ngatavine ri valai, ri gi lukea, pali i koi ne ria ri gi lukea, i taki ria, “Naha ni luke mule iau. Ga tangi tangi, ga mate, ga muri mai e tugu.” Lakea e Iakop i tangi mavonga.
GEN 37:36 Na tahuna e huriki a Midian ri bele o Egipto ri habia ne Potipar e Iosep, i konea. E Potipar a bolekori ne Parao, a ubu na tagari vona.
GEN 38:1 Na parava tara, e Iuda i pe e huriki e turana, i puru na tanga e Adulam, i made turana a bakovi a rana e Hira.
GEN 38:2 I matavisia vonga a ngatavine, e tune Sua, a bakovi o Kenan, I parangi vona.
GEN 38:3 A ngatavine i singou, i podea a koma bakovi, i vunua e Er.
GEN 38:4 I singou tabu, i poda tabua a koma bakovi, i vunua e Onan.
GEN 38:5 Muri i poda tabua a koma bakovi tara, i vunua e Sela. Na tahuna e Iuda i made o Kesib, lakea e girihina i podea e Sela.
GEN 38:6 Muri e Iuda i vulakia e Tamar ge girihine Er, e tuna a tabua.
GEN 38:7 A narone Er, i uka ma i kamumu na matane BAKOVI DAGI, lakea e BAKOVI DAGI i rabalakia.
GEN 38:8 Lakea e Iuda i takia e Onan, “O mahita turana e girihine tukamu, o vakabelea vona e tuna, ge muri mai a rabune hita.”
GEN 38:9 Pali e Onan i lohoka vona a koma bara i vakabelea, i uka ma ge tuna. Lakea na tahuna i mahita turana e girihine tukana, i guru tavulea a naruna na malala. I rata mavonga a vuhuna i koi ni vakabele a hamone tukana.
GEN 38:10 A naro i ratea i hale na matane BAKOVI DAGI, lakea i rabalaki tabua e Onan.
GEN 38:11 Lakea e Iuda i takia e kana, e Tamar, “I mate pali e girihimu, o hamule lakea na ruma e tamamu, o rukua e Sela ge koru rike taro.” E Iuda i luhoi maea, “E Sela bara i parangi vona a ngatavine iea, ia tara bara i mate manga e tukana rua.” Muri e Tamar i vano, i hamule lakea na ruma e tamana.
GEN 38:12 Muri na keva ranga, e girihine Iuda i mate, re tune Sua. E Iuda i kalo lobo vona, muri i sike o Timna, ge matai e huriki a bakovi ri pali a vuna sipsip vona. E turana, e Hira, na tanga e Adula, i sike turana.
GEN 38:13 Lakea tara viri i takia e Tamar, “E kamu ge lakea o Timna, ge pali a vuna sipsip vona.”
GEN 38:14 Lakea e Tamar i kali talea a mohu vona, i bolea a hineva, i kavitagua a matana, ge ratea i uka ma ni gi matakilala. I vano, i made na poridala na tanga e Enaim, na dala lakea o Timna. I rata mavonga, a vuhuna e Sela ngane i koru rike, pali e Iuda i uka ma i ratea tara ngava ne Tamar ge parangi vona.
GEN 38:15 Na tahuna e Iuda i masia, i pahaluhoi ta ia a ngoi, a vuhuna i kavitagua a matana.
GEN 38:16 I uka ma i matakilalea, ge kana. Lakea i lokovonga mai ia na dahana dala, i takia, “O valai ga mahita turamu.” Lakea e Tamar i nanea, “Ga mahita turamu, a ra go habia nau?”
GEN 38:17 I koli mulea a nitana i ta maea, “Bara habia vomu tara meme karaba.” Lakea e Tamar i nana tabu, “O habi taroa nau tara maki, muri bara habi mulea na tahuna o bole vilia a meme.”
GEN 38:18 E Iuda i nana maea, “A ra maki ga habi vomu?” E Tamar i koli, i ta maea, “O habi nau a kodo vomu, turana a maki ni ru a kilakilamu vona, turana a motana.” Lakea i habi ne Tamar a maki i ngaru, muri i mahita turana, i singou.
GEN 38:19 I mahita turana lobo, lakea e Tamar i hamule, i kali talea a hineva i kavitagu a matana, i rodo mulea a mohu vona.
GEN 38:20 Muri e Iuda i vakarua ne Hira a meme ge habia ne Tamar, ge bole mule a maki i habi vona. I vano, i uka ma i matavisia e Tamar.
GEN 38:21 Lakea i nana e huriki a bakovi, ra ri made vonga, “Avia ra ngoi i made bala na dala o Enaim?” Lakea ri ta maea, “Ra hini ngi, i uka ngoi vona.”
GEN 38:22 Lakea e Hira i hamule lakea ne Iuda, i ta maea, “I uka ma a matavisia a ngatavine, pali e huriki a bakovi vonga ranga ri ta maea, ‘Ra hini ngi, i uka ngoi vona.’”
GEN 38:23 Lakea e Iuda i ta maea, “Ge a ra. Ge bole liu ra maki a habi vona, ma ga tu gu bole hamule bara ni nongovaki tarua. I uka maki. A vakarua pali vona a meme karaba, pali i uka ma o matavisia.”
GEN 38:24 A keva i tolu i lobo, ni vakalongo e Iuda, “E kamu e Tamar i ngoi viliha, ngane i singou.” Lakea e Iuda i ta maea, “Mu bole talea, mu gutua na kanono ge mate.”
GEN 38:25 Na tahuna ni bole tala ni gi gutu, i rudu a ngava lakea ne lahuana i ta maea, “Iau a singou na bakovi i habi nau a maki nga. A maki ni ru a kilakilana a viri vona turana a motana, a kodo. Mu matakilala, a maki e rei?”
GEN 38:26 E Iuda i matakilala a maki nga, lakea i ta maea, “Ra ngatavine iea, i uka ngava. Iau a viri a tahoka a ngava, a vuhuna i uka ma a habia ge girihine tugu e Sela.” Muri e Iuda i uka ma i mahita turana tabu.
GEN 38:27 Na parava ta ge poda vona ri mata­kilalea i tahoka a boge na palona.
GEN 38:28 Na tahuna i popoda, a boge tara i toto tala muga a limana, lakea a ngatavine bolekori i bolea a hotu vururu, i kolo tatea na limana koma, i ta maea, “A koma iea ge pori taro.”
GEN 38:29 Pali a koma iea i turari mulea a limana, i pori muga a koma tara. Lakea i ta maea, “Ioe o rede, o pori muga.” Muri ni vunu e Peres.
GEN 38:30 Muri e turana ra ni kolotata na hotu vururu a limana, i pori, ni vunu e Sera.
GEN 39:1 E huriki a Ismael ri turaria e Iosep i lakea o Egipto, ri habia ne Potipar i konea. E Potipar a bolekori ne Parao, a ubu na tagari na vabinga vona.
GEN 39:2 E BAKOVI DAGI i matakaria e Iosep, i leho kamumu kunana na ruma e Potipar.
GEN 39:3 E Potipar i masia i kamumu a vilona, a vuhuna e BAKOVI DAGI i laho turana, i matakaria.
GEN 39:4 E Potipar i masia a leho vona i vivi, i ru ia ge ia a bolekori vona. I ru ia ge matakari a ruma vona, turana a maki lobo pololilo vona.
GEN 39:5 E BAKOVI DAGI i gamaia e Potipar, a vuhuna i rata kamumua e Iosep, i ru ia a matakari na ruma turana a maki lobo vona. I gamai tabu a maki lobo na hania vona.
GEN 39:6 E Potipar i ule lakea lobo ne Iosep a maki lobo i matakari. Na tahuna e Iosep i matakari a ruma ne Potipar, e Potipar i uka ma i luhoi lege vona tara maki. A maki i luhoi kunanea, a kinani. E Iosep i mata kamumu, i koru labeka.
GEN 39:7 I polo a parava ranga, e girihine Potipar i masia, i masigoroa, i takia, “O valai, o mahita turagu.”
GEN 39:8 Pali e Iosep i marikoi, lakea i takia, “Iau a matakari vona a hini nga. E girihimu i habi na limagu a maki lobo na ruma. I uka ma i luhoi lege vona tara maki.
GEN 39:9 I uka a viri ge matakaria a ruma, iau kunana a matakaria. E girihimu i uka ma i hatekakaria nau tara maki. Ioe kunana i hatekakari iau vomu, a vuhuna ioe e girihina. Ga rata a naro hale navai na matana Vure?”
GEN 39:10 Na parava vakaroro i ngere maia na ngava e Iosep. Pali e Iosep i marikoi hateka ni lokovonga tabukoi vona, o ni mahita turana.
GEN 39:11 Na parava tara i dili na ruma e Iosep ge rata a leho vona. E huriki a vora na ruma, i uka ma ria pololilo.
GEN 39:12 Lakea a ngatavine i tangotatea na varakia vona e Iosep, i takia, “O valai o mahita turagu.” Pali e Iosep i pe purua na limana ngatavine a varakia vona, i ha tala na ruma ia.
GEN 39:13 A ngatavine i masia a varakia i ha taroa na limana,
GEN 39:14 lakea i gale e huriki a vora na ruma i ta maea, “Mata lakea, ra koma o Hibru ni bole valai na ruma ne hita. I ngaru ni ratapile hita! I valai ta ge mahita turagu, lakea a haloho iau.
GEN 39:15 I longo iau a haloho, i pe purua tabukoi nau a varakia vona, i ha tala na ruma ia.”
GEN 39:16 A ngatavine i bolea a varakia ne Iosep, i davea e girihina ge hamule na tanga, ge vakasiria vona.
GEN 39:17 Lakea i tuverei maea ne girihina, “Ra vorakato na Hibru o bole vilia na ruma tarua, i valai ta ge rata a naro hale nau.
GEN 39:18 Na tahuna a haloho iau, i pe tabukoi nau a varakia vona, i ha tala na ruma ia.”
GEN 39:19 Muri ne Potipar i longoa e girihina i ta maea, “Ra naro iea i rata virihi iau vona a vorakato vomu.” I madihi a hatena.
GEN 39:20 Lakea e Potipar i ru dilia na bavi e Iosep, na hini ni ru vona e huriki ri longotaro a nita na hariki. Pali na tahuna e Iosep i made na bavi,
GEN 39:21 e BAKOVI DAGI i matakaria, i ratea a matakari na bavi i ngarua.
GEN 39:22 Lakea a tagari na bavi i rua e Iosep i matakari e huriki lobo na bavi, turana a leho lobo ni rata pololilo.
GEN 39:23 A tagari na bavi, i uka ma i loho lege vona a leho e Iosep i rata, a vuhuna e BAKOVI DAGI i matakaria, i rata kamumu a maka leho.
GEN 40:1 Na parava ranga muri, a vora ni ninu kilehi a vain ne Parao turana a vora ni gutu a bret vona, ru rata a naro e Parao i uka ma i ngaru.
GEN 40:2 E Parao i madihi a hatena vona a vora vona nga, ra matakari na vain, a matakari na bret.
GEN 40:3 Lakea i ru dili rua na roho na ubu ne huriki a tagari, ra na bavi ni ru dili e Iosep vona.
GEN 40:4 A ubu na tagari i habi rua ne Iosep ge matakari. Ru made tabaka popote na bavi,
GEN 40:5 lakea na rodo tara ru vurena varago, pali a vurene rua i uka ma i palupulupu. A nituveve na vurene rua ranga, i uka ma i palupulupu.
GEN 40:6 Na hatelanga e Iosep i valai mai rua, i matai rua ru loholege vona a vurene rua.
GEN 40:7 Lakea i nana ra bakovi nga, ra ru made turana na ruma na matakari vona, “I navai muru mata matasia mavonga mona?”
GEN 40:8 Ru koli, ru ta maea, “Maria miri vurena, pali i uka tara viri koea ge tuveve polo a ngava kapiloho na vurene maria.” Lakea e Iosep i ta maea, “A Vure kunana i kara ni tuveve a nita kapiloho na vurene marua. Muru tuverei a vurena marua, ga longo.”
GEN 40:9 Lakea a matakari na vain i tuvereia ne Iosep a vurena, “Iau a vurena vona a kai a vain,
GEN 40:10 i tahoka a rahana i tolu. Muri kunana na pagana i koru rike, i pura, i rara liu a kanena.
GEN 40:11 A bolea a kikei ne Parao, a bebe purua vona a naruna vain, muri a habia vona.”
GEN 40:12 Muri e Iosep i tuvevea vona a vurena, “A rahana i tolu i manga a parava i tolu.
GEN 40:13 A parava i tolu ge lobo, e Parao bara i bole mule ioe, o leho tabu vona, o habi tabu a kikei na vain vona, i manga hosi o leho vona.
GEN 40:14 Na tahuna o pagitala o made kamumu o luhoi iau, o rata a naro kamumu nau. O takia e Parao ge bole tala iau na bavi.
GEN 40:15 Ra iau, hosi ni turari na robo ne huriki a Hibru, ni bole valai koea. Na tahuna a made koea i uka ma ratea tara naro hale, pali ni vakamadihi tavula a kuligu, ni ru dili na bavi.”
GEN 40:16 Na tahuna a matakari na roho na bret i longoa e Iosep i tuveve kamumu a vurena bakovi i matakari a vain, lakea i takia, “Iau tara a tahoka a vuregu: a vurena a kube a kulopi na bret i tolu.
GEN 40:17 A kulopi polo meli liu, i vonu vona a maka bret legelege ne Parao. Pali a maka kadirovo ri valai ri karapasi tala a bret a kube na kulopi.”
GEN 40:18 E Iosep i tuvevea a vurena, “A nita kapiloho na vuremu i maea: a kulopi i tolu i manga a parava i tolu.
GEN 40:19 Ge lobo a parava i tolu, e Parao bara i vakatavore ioe na kai. Muri, a maka kadirovo bara ri valai ri kania a bobomu.”
GEN 40:20 Muri na parava i tolu, e Parao i rata a habu na parava ni poda vona, i kani turana e huriki a bolekori. I bole valai a matakari na vain, a matakari na bret, i vakapesi rua na matane huriki a bolekori vona.
GEN 40:21 Lakea i takia a bakovi i matakari a vain ge hamule lakea na leho vona, ge habi tabu a kikei na vain ne Parao.
GEN 40:22 Pali a bakovi i matakari na bret, ni bole ni vakatavore na kai, i manga a ngava e Iosep i tuveve polo vona.
GEN 40:23 Na tahuna a matakari na vain i pagitala, i uka ma i luhoi tabua e Iosep, i longokaburungia.
GEN 41:1 Muri na pida i rua, e Parao i vurena ta i pepesi na dahana naru dagi e Nail.
GEN 41:2 I matai a bulmakau i polorua ri gavutuvutu, ri pagitala na naru, ri kani na dahane Nail.
GEN 41:3 Muri a bulmakau i polorua ri teki ri pagitala tabu na naru dagi, ri kani na dahana naru turana a maka bulmakau ri valai muga.
GEN 41:4 Muri ra bulmakau ri teki, ri kani a bulmakau i polorua, ri gavutuvutu. Muri e Parao i hadongo.
GEN 41:5 I mahita mule, i vurena tabu. I matai a paruna vit i parukaruka, i polorua, ri toto tala na vuhuna i taku.
GEN 41:6 Muri i matai tabu a paruna vit kaka kiroko i polorua. I pori a dari pida, i kave ria ri malai.
GEN 41:7 Lakea a kanena vit kaka kiroko ri todo a kanena kaka dagi. Muri i hadongo, i luhoi kadoa a vurena.
GEN 41:8 Na hatelanga i loholege lae vona a vurena. Lakea i rudu a ngava lakea ne huriki a bakovi na malulu, a bakovi na lohokanga na robo e Egipto, ri gi valai vona. I tuverei ne ria a vurena, pali i uka tara viri ge tuvevea.
GEN 41:9 A matakari na vain i longo visia ngane e Iosep, lakea i takia e Parao, “Iau a longo visia tara ngava.
GEN 41:10 Hosi o tahate maria a bakovi i matakari a roho na bret vomu. O rudu dili maria na ruma na ubu ne huriki a tagari vomu.
GEN 41:11 Na rodo tara, a vurena iau. Ia tara i vurena. A vurene maria i tahoka a pelegona.
GEN 41:12 Na tahuna iea i tahoka tara koma na Hibru i made turane maria. Ia a vorakato na matakari ne huriki a tagari na roho hariki vomu. Miri takia vona a vurene maria, lakea i tuveve polo ne maria a ngava kapiloho na vurene maria.
GEN 41:13 Muri i bele a maki i manga a hini i tuveve polo ne maria. A bole mule a leho nau iau, pali a bakovi na bret ni vakatavore.”
GEN 41:14 E Parao i longoa a ngava iea, i taki e huriki a vora vona ri gi bole vilia vona e Iosep. Ri vano malaviriri kunana, ri bole talea na bavi. I pagitala i ali a karirana, i kuloi a varakia vona, muri i lakea ne Parao.
GEN 41:15 Lakea e Parao i takia e Iosep, “Iau a vurena, i uka tara bakovi ge tuveve poloa nau a vuregu. A longo ioe ta o lohoka na ni tuveve polo a vurena viri, lakea a rudu a ngava vomu.”
GEN 41:16 Lakea e Iosep i ta maea, “Iau a keri. Pali a Vure kunana a viri bara i tuveve poloa vomu a ngava kapiloho na vuremu.”
GEN 41:17 Muri e Parao i tuverei poloa ne Iosep a vurena, “Iau a vurena ta a pepesi na dahana naru dagi e Nail.
GEN 41:18 A matai a bulmakau i polorua ri gavutuvutu, ri pagitala na naru dagi ri kani na dahana.
GEN 41:19 Muri a bulmakau i polorua ri pagitala tabu na naru dagi. Ri teki, ri mata marango. I uka ma a matai hosi na robo o Egipto ranga bulmakau ri gi mata marango maea.
GEN 41:20 Ra maka bulmakau ri teki, muri ri todo a bulmakau gavutuvutu i polorua, ra ri pagitala muga.
GEN 41:21 Ri kani lobo, i uka ma ni matai ge lolo a kavutune ria. Ri tabana na ni teki manga a hini muga. Muri a hadongo.
GEN 41:22 “A mahita puru tabu, a matai a maka paruna vit ri parukaruka ri toto tala na vuhuna i taku.
GEN 41:23 Muri a matai tabu a paruna vit i polorua i uka ma ri parukaruka. I uka ma ri parukaruka, a vuhuna a dari pida i pori i kave ria ri malai.
GEN 41:24 Lakea a maka paruna vit kaka kiroko ri todo a paruna vit kaka dagi i polorua. A vakalongo e huriki a bakovi na malulu vona a vuregu, pali ri keri ni tuveve poloa nau.”
GEN 41:25 Lakea e Iosep i takia e Parao, “Ra vuremu nga, ru palupulupu. A Vure i vakasiria vomu a naro i popote ta ge ratea.
GEN 41:26 Ra bulmakau gavutuvutu i polorua, a paruna vit koru kamumu i polorua, i manga a pida i polorua. Ra vuremu nga, i taku kunana a ngava kapiloho vona.
GEN 41:27 Ra tekina bulmakau i polorua, ri pagitala muri, i manga a pida i polorua. Pali ra paruna malaina vit i polorua i kave ria a dari pida, ngi ranga i manga a pida i polorua. I vakasiri a pida na pago i polorua.
GEN 41:28 I manga a hini a taki ioe vona. A Vure i vakasiria vomu a naro bara i ratea tabukoi kunana.
GEN 41:29 Ngane a pida i polorua bara i bele kupo vomu a maki ni kani na robo e Egipto.
GEN 41:30 Muri bara i bele a pida na pago i polorua. E huriki lobo bara ri longokaburungia a tahuna na maruanga o Egipto. A pago bara i ratapilea a robo lobo.
GEN 41:31 E huriki a ngatavine a bakovi bara ri longokaburungia a tahuna i vole vona a maki ni kani, a vuhuna a pago bara i madihi hateka.
GEN 41:32 Ra vuremu nga i rua, i taku kunana a pelegona, a vuhuna a Vure i luhoi mugea pali a maki ta ge ratea, tabukoi kunana.
GEN 41:33 Ngane o matakanea a bakovi maratarata ge lohoka, o rua ge matakaria a robo e Egipto.
GEN 41:34 O ru ranga bolekori ri gi tuhoria, ri gi matakaria a robo. Na pida i polorua na maruanga, e huriki a bolekori ri gi nagi na tabeke ge lima a maki ni kani lobo na hania. A tabeke ge taku ri gi habia na hariki, ni gi ru kadolu.
GEN 41:35 Na pida na maruanga nga, o taki e huriki a bolekori ri gi ru dili kamumu a vit na roho dagi na maka tanga dagi.
GEN 41:36 Ra maki ni kani nga ni gi ru kamumu, bara ni kani na pida i polorua na tahuna a pago ge bele o Egipto, lakea e huriki a bakovi a ngatavine i uka ma ri gi mate na vitoloa.”
GEN 41:37 A ngava ne Iosep i nangi kamumu hateka ne Parao turana e huriki a bolekori vona.
GEN 41:38 Lakea e Parao i nana e huriki a bolekori, “Si gi bolea vai tara bakovi ge manga ra bakovi iea i ta vona a hanuna Vure?”
GEN 41:39 Lakea e Parao i takia e Iosep, “A Vure i vakasiria vomu a ngava iea. I uka tara viri ge maratarata ge lohoka manga ioe.
GEN 41:40 Ngane ga ru ioe go muga na robo e Egipto. E huriki a viri nau lobo, ri gi longototo kunanea a ngavamu. Iau kunana, a polomeli vomu, a vuhuna iau a hariki.”
GEN 41:41 Lakea e Parao i takia e Iosep, “Masia, ngane a ru ioe o matakaria a robo e Egipto.”
GEN 41:42 Muri i kali talea a paga na kukulimana, i vakarodoa na kukulimane Iosep. A paga iea i vakasiri a nitora ne Parao. I vakarodoa na padirodo kamumu hateka, i vakahurakia na gogo ni rata na gol.
GEN 41:43 E Parao i habia ne Iosep a karis, ge vakanunua, a vuhuna e Iosep i paha muria. E huriki a bakovi ri nunu muga, ri gale maea, “Mu malele ha na dala.” Na naro iea kunana e Parao i rua e Iosep i matakari o Egipto.
GEN 41:44 Muri e Parao i takia e Iosep i ta maea, “Iau e Parao. A ngavagu i maea, i uka tara viri ge rata a maki na ningaru vona kunana. Ri gi nana taro ioe, muri ri gi rata a maki.”
GEN 41:45 Lakea e Parao i vunua e Iosep e Sapenat-Panea. Muri i habia vona a ngatavine, i parangi vona. A rana e Asenat, e tune Potipera, a prister na tanga e Heliopolis. Lakea e Iosep i laho i matai lobo a maka tanga na robo e Egipto.
GEN 41:46 Na tahuna e Iosep i tahoka a pida i ravulu tolu, i vakatubu ni leho ne Parao, a hariki o Egipto. I pea e Parao i vano i matai a tanga lobo na robo e Egipto.
GEN 41:47 Na pida na maruanga i polorua, i koru kamumu a maki ni kani.
GEN 41:48 Lakea e Iosep i ru palupu a maka maki ni kani. I laho na tanga lobo, i bole palupu, i ru dili na roho a maka maki ni kani. A maka hania i pesi halui a tanga tara, bara i bole a maki ni kani ne ria, i ru dili na roho dagi na tanga iea.
GEN 41:49 A maka vit e Iosep i ru kadolu i kupo hateka, manga a hire na dari. I keri ni gi, a vuhuna i kupo hateka.
GEN 41:50 Muga na pida na pago, e Asenat i poda ne Iosep a koma bakovi ala rua. E Asenat e tune Potipera, a prister o Heliopolis.
GEN 41:51 E Iosep i vunua a tabua vona e Manase, lakea i ta maea, “A Vure i rata iau a longokaburungi a naro hale ni rata nau koea, turana a naro hale i rata nau e huriki a viri nau.”
GEN 41:52 A paha muri tabua vona i vunua e Epraim, lakea i ta maea, “A Vure i habi a hamogu na tanga a bole a nimadihi vona.”
GEN 41:53 A pida na maruanga i polorua i lobo,
GEN 41:54 i bele ngane a pida na pago i polorua, i manga a ngava e Iosep i taki. E huriki na robo basi, ngi ranga, a pago i bele ne ria. Pali pololilo o Egipto i tahoka a maki ni kani.
GEN 41:55 Na tahuna e huriki a Egipto ri hataki a harena pago, ri tangi lakea ne Parao ge habi a maki ni kani ne ria. Lakea e Parao i taki ria, “Mu lakea ne Iosep, mu muri mai a ngavana.”
GEN 41:56 Ngane a pago i hale hateka vonga o Egipto, lakea e Iosep i tala a maka roho ni ru kadolu a vit vona, i habi a vit ne ria, ri kona, a vuhuna a pago i hale liu.
GEN 41:57 E huriki na robo basi ranga ri valai o Egipto, ri kona a vit ne Iosep, a vuhuna i hale liu a pago na maka tanga lobo na malala.
GEN 42:1 Na tahuna e Iakop i longo i tahoka a vit o Egipto, i taki e huriki e tuna, “I navai mu made mu loho tavula?
GEN 42:2 A longo ta i tahoka a vit o Egipto. Mu puru lokovonga, mu kona ranga, ma si gi mate na vitoloa.”
GEN 42:3 Muri e huriki e turane Iosep ala ravulu ri puru o Egipto, ri kona a vit vonga.
GEN 42:4 Pali e Bensamin, re tarine Iosep, i uka ma i longo vona e Iakop ge vano, a vuhuna i mangenge vona ma ge bole a vuranga.
GEN 42:5 Na tahuna e huriki ranga ri vano ri gi kona a vit, e huriki e tune Iakop ranga, ri vano turane ria, a vuhuna a pago i bele pali na robo e Kenan.
GEN 42:6 E Iosep ngane i matakari o Egipto. I habi tala a vit ne huriki lobo ri kona. Na tahuna e huriki e turana mai ri bele, ri turume na ngalana.
GEN 42:7 Na tahuna i matai e huriki e turana mai, i matakilala liu ria, i tami rabu ta ia a bakovi tara. Lakea i tapuhaki, i nana ria, “Ra mua, mu valai vai ngane?” Ri ta maea ria, “Mi valai na robo e Kenan, ta mi gi kona a maki ni kani.”
GEN 42:8 E Iosep i matakilala e tukana mai, pali ria i uka ma ri matakilalea.
GEN 42:9 Ngane i longovisia a vurena i vurena ne ria, lakea i taki ria, “Ra mua, mua a kasisi! Mu valai ni kasisi a hini i uka ma ni tagakari.”
GEN 42:10 Ri ta maea ria, “Bakovi dagi, i uka ma i mavonga. Mia a vora vomu kunana, mi valai ta mi gi kona kunana a maki ni kani.
GEN 42:11 E tamane mia i taku. Mia e huriki a bakovi kamumu, i uka ma mia a kasisi.”
GEN 42:12 E Iosep i ta maea, “I uka liu! Mu valai kunana ni kasisi a hini i uka ma ni tagakari na robo ne mia.”
GEN 42:13 Ri ta maea ria, “Bakovi dagi, mia mi ala ravulu a polona i rua, e tamane mia i taku kunana. Ngane i made o Kenan. E tarine mia i made turana. E tarine mia tara i velu pali.”
GEN 42:14 Lakea e Iosep i taki ria tabu, “I manga a hini a taki pali. Mua e huriki a kasisi!
GEN 42:15 Ngane bara toni a ngavane mua, i muholi o i uka. E tarine mua ge valai taro, ge pesi na matagu, muri mu vano. Ge uka, muholi hateka na rana e Parao, i uka ma mu gu vano.
GEN 42:16 Mu rudua tara ne mua ge vano ge tuli vilia e tarine mua. Mua lobo bara mu dili taro na bavi, ni gi toni a ngavane mua. Muholi hateka na rane Parao, mua e huriki a kasisi!”
GEN 42:17 Lakea i ru dili ria na bavi na parava i tolu.
GEN 42:18 A parava i tolu i lobo, lakea e Iosep i taki ria, “Mu longo mai a ngavagu, bara mu mahuri, a vuhuna iau a bakovi na Vure.
GEN 42:19 Pali bara mua a viri ni ta muholi, a viri ge ala taku kunana ge made na bavi. Mua lobo mu bole ra vit mu kona pali, mu bole mule mai a kabu ne mua, ra ri vitolo.
GEN 42:20 E tarine mua kunana mu tuli vilia nau, bara matakilaka vona a ngavane mua. Bara mu rata mavonga, i uka ma mu gu mate.” Lakea ri longo vona a nitane Iosep.
GEN 42:21 Ri tango mule ria na ngava ri ta maea, “Muholi hateka, si rata halea hosi e tarina hita, ngane si bole a vuranga. Si masia i tangi, i gale hita si gi dodo ia, pali hita i uka ma si longo maia. Pali ngane a nimadihi i bele ne hita.”
GEN 42:22 Lakea e Reuben i gege tala, i ta maea, “A taki navai mua hosi? A taki mua naha ni rata halea e Iosep, pali mua i uka ma mu longo! Ra maregoa i bele ne hita ngane ne vona ni koli e tarine hita i mate.”
GEN 42:23 I uka ma ri lohoka vona e Iosep i longokilala a ngava ri taki, a vuhuna na tahuna i ta turane ria, a bakovi ni pulo a ngava i pulo puru a ngava vona.
GEN 42:24 E Iosep i longokilala a ngava ri taki, lakea i pesi gaviri i tangi. Muri i hamule i ta turane ria tabu. Lakea e Iosep i taki e huriki a vora vona, ri tangotatea e Simion, ri kolotatea na matane huriki e turana.
GEN 42:25 Muri i taki e huriki a vora ri gi tahoni na kulopi ne ria a vit. A moni silva ri kona a vit vona ranga, ni tahoni mule takutaku na kulopi ne ria. A maki ni kani ne ria na dala ranga ni tahoni. Lakea e huriki a vora ri muri mai a ngavane Iosep.
GEN 42:26 Ri ru rike na donki a maka kulopi na vit, ri vano.
GEN 42:27 I rodo a hini, lakea ri ru a mada. A turane ria tara i vukea a kulopi vona ge bole a maki ni kani na donki, lakea i matavisi a moni silva na ngutuna kulopi vona.
GEN 42:28 I vakalongo e huriki a turana i ta maea, “Ra kedo silva nau ni tahoni mule na kulopi!” Na tahuna ri longo a ngava iea, i lege a lohone ria, i vuruke a tagane ria, ri gi navai, lakea ri ta maea, “A Vure i rata navai hita?”
GEN 42:29 Na tahuna ri bele o Kenan, ri vakalongoa e tamane ria e Iakop vona a maka maregoa i bele ne ria.
GEN 42:30 Ri ta maea, “Ra bakovi dagi na robo e Egipto, i tapuhaki mai mia i luhoi mia ta mia a kasisi.
GEN 42:31 Pali mi takia, mi ta maea, ‘Mia a viri ni ta muholi, i uka ma mia a kasisi.
GEN 42:32 Mi ala ravulu a polona i rua. E tamane mia i taku kunana. I velu ne mia tara, i made turana e tamane mia o Kenan a kabina ruru.’
GEN 42:33 “Muri ra bakovi dagi na robo e Egipto i taki mia i ta maea, ‘Ngane bara toni mua, mu ta muholi, o i uka. Ge made turagu tara. Mua lobo mu bole a maki ni kani, mu hamule mu kori e huriki a viri mua.
GEN 42:34 Na tahuna mu hamule valai, mu tulia e tarine mua ge valai nau. Bara matakilala mua i uka ma mua a kasisi, mua a viri ni ta muholi. Muri bara habi mulea e turane mua, pali mua bara mu valai, mu vahabi, mu vakona a maki koea, na ningaru ne mua kunana.’”
GEN 42:35 Na tahuna ri guru tala a vit na kulopi ne ria, ri matavisi a kedo silva ni tahoni mule na kulopi takutaku ne ria! Lakea ri turutu, ri mangenge. E tamane ria tara i matai a kedo silva nga.
GEN 42:36 Muri i taki ria, “Ra mua, mu ratapile pali e tugu rua. E Iosep i velu muga, pali ngane e Simion i velu tabu. Ngane mu ngaru tabua e Bensamin ge turane mua ge pe iau. Ngane a maki lobo i uka ma i kamumu nau!”
GEN 42:37 Muri e Reuben i takia e tamana, “Iau i uka ma ga bole mulea e Bensamin, o rabalaki e tugu ala rua. O rua na limagu ga matakaria. Muri bara bole mulea.”
GEN 42:38 Pali e Iakop i koli a nitana i ta maea, “E tugu i uka ma ge puru turane mua. I mate pali e turana. Ia kikeri i tabana. Iau a gare ngane. Ge bele vona a vuranga na dala, bara matasia liu iau, a mate.”
GEN 43:1 Ngane a pago na robo ne Kenan i dagi hateka.
GEN 43:2 Na tahuna ri kani lobo a maki ni kani ri bole o Egipto, lakea e Iakop i taki e huriki e tuna, “Mu hamule, mu kona tabu a maki ni kani ne hita.”
GEN 43:3 Lakea e Iuda i takia e tamana, “O tata, ra bakovi dagi o Egipto i taki tora mia, i uka ma mi gi bole lokovongea e tarine mia, i koi hateka ni matai tabu a matane mia.
GEN 43:4 Ioe bara o longo vona e Bensamin ge turane mia, bara mi puru, mi kona a maki ni kani vomu.
GEN 43:5 Ioe i uka ma go longo vona e Bensamin ge turane mia, i uka ma mi gi puru, a vuhuna a bakovi dagi vonga i taki tora mia, mi gi bole lokovongea e tarine mia, ge uka, i koi hateka ni matai a matane mateu tabu.”
GEN 43:6 Lakea e Israel i nana, “I navai mu vakalongoa mu tahoka e tarine mua? Ngane mu vakahale a nimadegu.”
GEN 43:7 Ri koli a nitane tamane ria, ri ta maea, “Ra bakovi dagi iea i ta hinituhana, i nana na kabu ne mia i nana maea, ‘E tamane mua i tabana? I tahoka e turane mua tara?’ Lakea mia mi koli mule kunanea a ninana. Pali mia, mi gi lohoka navai vona, ia ge ta maea, ‘Mu tuli puru vilia e tarine mua?’”
GEN 43:8 Lakea e Iuda i takia e tamana, e Israel, “E Bensamin ge turagu, mi gi vano ngane. Ge uka, hita turana e huriki a koma, bara si mate na pago.
GEN 43:9 Iau kunana ga matakaria e Bensamin. Iau kunana bara bole a ngava vona. Iau i uka ma ga tuli mulea go masia, pali a maregoa ge rike nau, ge tabuli turagu vakaroro.
GEN 43:10 Ioe i uka ma o ta putuputu, bara mi puru balaka rua pali.”
GEN 43:11 E tamane ria, e Israel, i longo mavonga a ngava, lakea i taki ria, “A ngava bara i mavonga, pali bara mu rata maea. Mu tahoni na kulopi ranga maki kamumu na robo ne hita, mu bole puru na bakovi dagi, mu vakapalala a matana vona. Mu bole a maka kania kamumu: a marasin ni bole na kai, a ame, a tangari ni gale a pistasio, a almon.
GEN 43:12 A kedo silva mu bole ge nagu rua. Bara mu koli mule ra kedo silva ni tahoni ruru hosi na kulopi ne mua.
GEN 43:13 Ngane mu tulia e tarine mua, mu hamule mai a bakovi dagi.
GEN 43:14 A Vure Tuhaka ge ratea a niluhoi na bakovi dagi ge dodo mua ge vakapagetalea e turane mua tara, ge turane Bensamin, mu gu hamule valai. Pali iau ngane bara matasia, a matasia liu.”
GEN 43:15 Lakea e huriki e turana mai ri bole a mahala, a kedo silva nagu ruarua, turana e Bensamin ri vano, ri puru o Egipto, ri bele ne Iosep.
GEN 43:16 Na tahuna e Iosep i masia e Bensamin i turane ria i takia a vora vona, “O bole lakea na ruma e huriki a bakovi nga. O rabalakia tara sipsip a bulmakau, o gutua. Na haro ri gi kani turagu.”
GEN 43:17 Lakea a vora i muri maia a ngavane Iosep, i tuli lakea na ruma e huriki a bakovi.
GEN 43:18 Ngane ri mangenge na tahuna ni tuli lakea na ruma ne Iosep. Ri luhoi maea, “Ri tuli valai hita koea na ruma a vuhuna, na tahuna si valai muga, ni tahoni mule na kulopi ne hita a moni silva. Ngane bara ri ratapile hita, ri nugu tata hita, bara hita a vorakato ne ria. A donki ne hita ranga bara ri bole.”
GEN 43:19 Ri masia a vora ne Iosep i pesi na matana ruma, ri lakea vona, ri ta maea,
GEN 43:20 “Bakovi dagi, o longo valai taro. Hosi mi puru valai koea, mi kona a maki ni kani.
GEN 43:21 Na tahuna mi hamule, i hapu a rodo mi rata a mada. Lakea mi lei a kulopi ne mia, mi matavisi a kedo silva ra mi kona a maki ni kani vona ni tahoni mule takutaku na kulopi ne mia. Pali ngane mi bole mule tabu ra moni silva nga.
GEN 43:22 A moni silva mi kona a maki ni kani vona ranga, mi bole hamule valai. I uka ma mi lohoka vona a viri i tahoni mule ruru na kulopi a moni silva.
GEN 43:23 Lakea a vora i ta maea, “Kamumu hateka. Naha ni mangenge. A Vure ne mua, ra Vure ne tamane mua, i habi mule ne mua ra mahala ni tahoni na kulopi. Pali ra moni silva mu kona a maki ni kani vona, a bole pali.” Muri i tuli talea ne ria e Simion.
GEN 43:24 Muri a vora i tuli e huriki a bakovi ri lakea na ruma ne Iosep. I habi a naru ne ria, ri vahilolo a vahane ria, i vakani a donki ne ria.
GEN 43:25 Na tahuna ri longoa e Iosep ge kani turane ria na haro, ri ru palupu a maka mahala ri gi habi vona.
GEN 43:26 Na tahuna e Iosep i bele na ruma, ri habi vona a maka mahala. Lakea ri turume puru na ngalana.
GEN 43:27 I tagui lobo ria, muri i nana vona e tamane ria, “Avia e tamane mua, ra mu vakalongo iau vona hosi? I kamumu kunana?”
GEN 43:28 Ri ta maea ria, “E tamane mia, a vora vomu, i kamumu kunana.” Muri ri turume puru na ngalana ri kavurikea.
GEN 43:29 Na tahuna i ta turane ria i masia ngane e Bensamin, ra ru kinana taku, lakea i nana, “Ra koma iea e tarine mua, ra mu vakalongo iau vona hosi?” Lakea i ta tabu maea, “Tugu, a Vure bara i matakari ioe.”
GEN 43:30 E Iosep i dodo hateka na ni masina e tarina, lakea i ha tala i pesi kapiloho na tabeke na ruma tara, i tangi.
GEN 43:31 I tangi lobo, muri i vahiloloa a matana. I hatenono kunana, i pagitala i taki e huriki a vora ri gi habi a maki ni kani ne huriki a bakovi.
GEN 43:32 E Iosep i made herehere, i kani. E huriki e turana mai ri made palupu na dede tara ri kani. E huriki a Egipto ra ri turana, ri made na tabeke tara, a vuhuna e huriki a Egipto i uka ma ri rere ni kani palupu turana e huriki a Hibru.
GEN 43:33 E huriki e turana mai ni vakamade muri mai a hisi ne ria, i vakatubu na tabua, i vano i harena na kabina ruru. Na tahuna i vakamade maea ria, ri turutu, ri vamatanono.
GEN 43:34 Ni veru tala na tabeke e Iosep i kani vona a maki ni kani i lakea ne ria. A maki ni kani ne Bensamin i kupo hateka, i kara a bakovi ala lima ri gi kani. Lakea ri kani, ri ninu turane Iosep.
GEN 44:1 Ri kani lobo, lakea e Iosep i takia a vora i matakari a ruma, i ta maea, “O tahoni a kulopi ne huriki a bakovi ge vonu, a moni silva ranga o tahoni mule ge tabuli polomeli na ngutuna kulopi.
GEN 44:2 O tahoni na kulopi na koma kiroko a kedo silva, turana a kikei silva nau.” Lakea a vora i ramai a ngavane Iosep.
GEN 44:3 Na hatelanga pokopoko e huriki a bakovi ri malaga, ri vano turana a maka donki ne ria.
GEN 44:4 I uka ma ri vano basi ma na vuhutanga, lakea e Iosep i takia a vora vona, “O nunu muri mai ria malaviriri. Na tahuna o pakarau ria, o taki ria, o ta maea, ‘Ra mua, ni rata kamumu, pali i navai mu rata hale mia?
GEN 44:5 Avia a kikei na bakovi dagi nau? Ra kikei iea ne vona ni ninu, ni kasisi a maki kapiloho. A naro hale hateka ra mu ratea.’”
GEN 44:6 Na tahuna i pakarau ria, i taki ria vona a ngavane Iosep.
GEN 44:7 Lakea ri ta maea, “Bakovi dagi, a ra vuhuna o taki maea mia? Mia e huriki a vora vomu i uka ma mi gi ratea a naro iea!
GEN 44:8 O longo valai. Na tahuna mi pe a robo e Kenan mi bole hamule valai a moni silva, ra ni tahoni puru na kulopi ne mia na tahuna mi valai muga. Pali ngane i navai mi gi panaho a moni silva, a moni gol na ruma na bakovi dagi vomu?
GEN 44:9 Pali ngane e rei a viri ni matavisi i bolea a kikei, ni gi rabalaki. Pali mia lobo bara mia a vorakato vomu.”
GEN 44:10 Lakea a vora i ta maea, “Kamumu hateka. Ga rata manga a hini mu taki. E rei a viri ni matavisi i bolea a kikei, ia kunana ge ia a vorakato nau. Mua lobo bara mu hamule.”
GEN 44:11 Lakea ri vakaraga a kulopi ne ria, ri vuka.
GEN 44:12 Lakea a vora ne Iosep i vakatubu ni lei a kulopi ne ria, i doko na tabua, i vano i harena na kabina ruru. Lakea i matavisia na kulopi e Bensamin a kikei.
GEN 44:13 Ri ngapa, lakea ri rape a varakia ne ria. Muri ri vakarike tabu na donki a galesi ne ria, ri hamule lakea na vuhutanga.
GEN 44:14 E Iosep i tabana na ruma na tahuna e Iuda i hamule turane huriki e tarina. Ri mangenge hateka, lakea ri tabuli puru na malala, na ngalane Iosep.
GEN 44:15 Lakea e Iosep i nana ria, “A ra maki mu ratea? Mua, i uka ma mu lohoka nau? Iau a tahoka a malulu ne vona ni lohoka na maki kapiloho.”
GEN 44:16 Lakea e Iuda i ta maea, “Bakovi dagi, pali a ra mi gi takia vomu? Pali mi gi ta navai? Mi gi vakasiri navai mia, ge mia a viri kamumu? A Vure ngane i taki talea a naro hale ne mia. Ngane bara mia lobo a vorakato vomu, turana a viri ni matavisi a kikei na kulopi vona.”
GEN 44:17 Lakea e Iosep i ta maea, “I uka ma ga ratea a naro ia! E rei a bakovi ni matavisi vona a kikei, ia kunana ge ia a vorakato nau. Mua lobo bara mu laho mule kamumu ne tamane mua.”
GEN 44:18 Lakea e Iuda i lokovonga ne Iosep i takia, “Bakovi dagi, o longo valai. Iau a vora vomu. A tahoka a ngava vomu. A lohoka vomu ioe o manga e Parao, naha ni tahate iau.
GEN 44:19 Hosi mi valai koea, o nana maea mia, ‘Mu tahoka e tamane mua o e turane mua tara?’
GEN 44:20 Lakea mi ta maea, ‘E tamane mia i gare liu, i made turana na tanga e tarine mia, a bakovi. E turana, ra ru kinana taku, i mate pali. E tamane mia i ngaru hatekea ra koma iea, a vuhuna ni poda na tahuna i gare vona.’
GEN 44:21 “Lakea ke o ta maea, ‘Mu tuli vilia nau, ga masia.’
GEN 44:22 Lakea mi taki ioe mi ta maea, ‘A koma i uka ma ge pea e tamana. Bara i pea, bara i mate e tamana.’
GEN 44:23 Lakea ke o taki mia o ta maea, ‘A bakovi kiroko i uka ma ge valai, a koi hateka ni matai mule a matane mua.’
GEN 44:24 Muri mi hamule, mi takia e tamane mia vona a ngava o taki mia vona.
GEN 44:25 “Lakea i ta maea, ‘Mu hamule tabu, mu kona tabu a maki ni kani ne hita.’
GEN 44:26 Mi takia, mi ta maea, ‘Mia mi gi puru tabu, e tarine mia ge turane mia. Bara i uka, ra bakovi dagi iea, bara i koi ni matai tabu a matane mia.’
GEN 44:27 “Lakea e tamane mia i ta maea, ‘Mu lohoka vona e kinane mua tara, i poda a koma bakovi ala rua.
GEN 44:28 I ha taro iau pali tara, i uka ma a matai tabua. A luhoi kunanea i rabalakia pali a livoa hateka.
GEN 44:29 Ngane mu ngaru ni bolea a viri tara ge turane mua. Ge bele vona a maki tara, bara matasia liu, bara mate.’
GEN 44:30 “E tamane mia i ngaru hatekea ra koma iea. Ngane ra koma iea, i uka ma ge hamule turane mia,
GEN 44:31 i uka ma ge masia ge turane mia, bara mi tugu talea a nidodo vona, bara i mate.
GEN 44:32 Iau a takia e tata, iau kunana ga matakaria, lakea a takia, ‘Iau i uka ma ga bole hamule vilia vomu a koma iea, a maregoa ge rike nau bara i madoko nau na parava vakaroro.’
GEN 44:33 “Ngane a nana ioe, ga made koea, ge iau a vorakato vomu. E tarigu ge hamule turane huriki e tukana.
GEN 44:34 E tarigu i uka ma ge turagu, ga hamule navai ne tata iau? Naha ni rata iau ga masia a nimadihi ge bele ne tata.”
GEN 45:1 E Iosep i popote ge upu tala a nangi na matane huriki a vora vona, lakea i taki ria, “Mua lobo mu pagitala taro!” E huriki a vora ri pagitala lobo, lakea e Iosep i taki tala mule ia ne huriki e turana.
GEN 45:2 Muri i upu tala a nangi, i tangi. E huriki a Egipto ri pesi polovavo ri longoa e Iosep i tangi. E huriki lobo na roho ne Parao ri longoa a velengana.
GEN 45:3 Lakea i vakalongo e huriki e turana, “Iau e Iosep! Avia e tata, i tabana ni mahuri?” Pali e huriki e turana ri keri ni tara­totoa, a vuhuna ri mangenge hateka.
GEN 45:4 Muri i taki e huriki e turana, “Mu karuku valai nau.” Ri karuku valai vona, lakea i taki ria, “Iau e turane mua e Iosep. Hosi mu habi iau ne huriki a Egipto!
GEN 45:5 Ngane naha ni mangenge. Naha ni vatahate ne nau mu habi iau koea. A Vure kunana i rudu muga iau, ga kori mua.
GEN 45:6 A pida i rua i lakea pali, a robo lobo ri pago. A pida i lima i tabana bara i uka viri ge bole a maki ni kani na hania.
GEN 45:7 A Vure i rudu muga iau ne mua ga kori mua, i uka ma mu gu mate na pago. Pali ra naro i ratea ge korimule mua vona i tebi liu.
GEN 45:8 “Hosi, i uka ma i mua, mu rudu valai iau koea. A Vure kunana i rudu valai iau koea. I rata iau a manga tabu e tamane Parao. I rata iau a bakovi dagi na tabeke vona, a matakari lobo vona a robo e Egipto.
GEN 45:9 Ngane mu hamule malaviriri mai e tata, mu takia, ‘E tumu e Iosep i ta maea: a Vure i rata iau a bakovi dagi na robo e Egipto. O malaviriri kunana o puru valai nau,
GEN 45:10 bara o made vona a robo e Gosen, ra i tabukoi kunana nau. Ioe turane huriki e tumu, e tubumu bara mu made vona a robo iea, turana a maka kabuna sipsip a bulmakau.
GEN 45:11 Iau bara matakari mua vonga, a vuhuna a pida i lima na pago i tabana. Bara i uka, ioe turane huriki a kabu vomu, a sipsip a bulmakau vomu, bara mu vitolo.
GEN 45:12 Ngane mua turane Bensamin, mu matai iau, i uka ma iau a viri tara a ta turane mua. Iau kunana e Iosep a ta turane mua.
GEN 45:13 Mu takia e tata iau ngane ni ru langa liu, a matakari na robo e Egipto. A maki lobo mu matai koea ranga mu vakalongoa vona. Mu vano ngane, mu tulia e tata ge puru valai malaviriri.”
GEN 45:14 I ta lobo, muri i rakoa e tarina e Bensamin i tangi. E Bensamin tara i rakoa i tangi.
GEN 45:15 I nguru, i taringi e huriki e turana lobo. Muri i ta turane ria.
GEN 45:16 Na tahuna e Parao turane huriki a bakovi vona ri longo a velengane huriki e turane Iosep ri bele na ruma hariki vona, ri vivi hateka.
GEN 45:17 Lakea e Parao i takia e Iosep, “O taki e huriki e turamu, ri gi rata maea. Ri gi vakarike na donki a maka popou ne mua, ri gi hamule lakea na robo e Kenan,
GEN 45:18 ri gi tuli valai nau e tamane mua turana a kabu ne mua. Ga habi ne ria ranga malala kamumu o Egipto, ri gi leho vona ri gi vakabele a maki ni kani ge kupo.
GEN 45:19 “Ngane a rudu ioe o taki ria, ri gi bole koea o Egipto ranga karis, ri gi vano ri gi vakarike e tune ria, e girihine ria. E tamane mua tara ri gi vakarikea, ge valai.
GEN 45:20 Nahea ri gi loho pae vona a maka mahala ri tahoka. Ge naha vonga ngi. Ri gi valai bara habi ne ria a maka mahala na robo e Egipto.”
GEN 45:21 Muri e huriki e tune Israel ri muri mai a ngavane Parao, lakea e Iosep i bole a maka karis i habi ne ria. A maki ni kani na dala ranga i habi.
GEN 45:22 I habi takutaku ne ria a maka varakia karaba. Pali i habi ne Bensamin a varakia i lima turana a kedo silva i 300.
GEN 45:23 I bole a donki a toga i ravulu, i vakarike ne ria a maka mahala kamumu na robo e Egipto i vakaru ne tamana. I bole a maka vit, a bret, turana a maka kania kamumu ranga, i vakarike na donki a kinana i ravulu, i vakaru ne tamana, ge kani laho na dala.
GEN 45:24 Muri i ru polo e huriki e turana, ri vano. Na tahuna ri malaga ri gi vano i taki ria, “Mu laho kamumu, naha ni vatahate na dala.”
GEN 45:25 Ri pea e Egipto, ri vano ri sike na robo e Kenan ne tamane ria e Iakop.
GEN 45:26 Lakea ri takia, “E Iosep i mahuri! Muholi hateka, ngane ia a matakari o Egipto.” E Iakop i turutu. I luhoi ta ri tatami.
GEN 45:27 Pali na tahuna ri tuverei poloa vona a maka maki i taki ria vona e Iosep, i matai a maka karis ni rudu ge bolea, i kamumu ngane a niluhoi vona.
GEN 45:28 Muri e Israel i ta maea, “Muholi hateka! E tugu i tabana ni mahuri. Ga puru ga masia, muri ga mate.”
GEN 46:1 E Israel i ru palupu lobo a maka mahala vona, i bole e huriki a kabu vona ri vano ri bele vona a tanga e Bersiba. Muri i bolea a sipsip a bulmakau i rabalaki, i habi na Vure ne tamana e Isak.
GEN 46:2 Na rodo i vurena vona a Vure i bele vona i galea, “Iakop! Iakop!” E Iakop i ta maea, “Iau ieni.”
GEN 46:3 Lakea a Vure i ta maea, “Iau a Vure, a Vure ne tamamu. Naha ni mangenge ni puru o Egipto. Ga rata ioe ge ioe a vuhuna kabu dagi tara.
GEN 46:4 Ga puru turamu o Egipto, muri ga taparaki mule ioe. Na tahuna o mate, e Iosep ge tanu ioe.”
GEN 46:5 E huriki e tune Israel, ri vakarike na karis e tamane ria turana e huriki e tune ria, e girihine ria. A maka karis nga, i rudu sike e Parao, ge bole ria. Ngane e Iakop i pea e Bersiba.
GEN 46:6 Ri vakamariu lakea o Egipto a maka sipsip a bulmakau, a mahala ra ri vakabele o Kenan.
GEN 46:7 E Iakop i mariu lakea o Egipto turana e huriki e tuna bakovi, e tuna ngatavine, e tubuna mai.
GEN 46:8 A rane e huriki a hamone Israel ri puru o Egipto ra nga: E Iakop turana e Reuben, a tabua vona.
GEN 46:9 E huriki e tune Reuben a bakovi ra nga: e Hanok, e Palu, e Herson, e Karmi.
GEN 46:10 E huriki e tune Simion a bakovi ra nga: e Iemuel, e Iamin, e Ohad, e Iakin, e Sohar, e Saul. E Saul, e kinana a ngatavine o Kenan.
GEN 46:11 E huriki e tune Levi a bakovi ra nga: e Gerson, e Kohat, e Merari.
GEN 46:12 E huriki e tune Iuda a bakovi ra nga: e Er, e Onan, e Sela, e Peres, e Sera. E Er rua e Onan ru mate na robo e Kenan. E tune Peres a bakovi ra nga: e Hesron, e Hamul.
GEN 46:13 E huriki e tune Isikar a bakovi ra nga: e Tola, e Puva, e Iob, e Simron.
GEN 46:14 E huriki e tune Sebulun a bakovi ra nga: e Sered, e Elon, e Ialil.
GEN 46:15 E huriki tune Iakop nga i poda e Lea o Padan-Aram. E Daina e kurabane ria, ia tara ni poda vonga. E huriki a hamone Iakop rua e Lea ri ala ravulu tolu a polona i tolu.
GEN 46:16 E huriki e tune Gad a bakovi ra nga: e Sipion, e Hagi, e Suni, e Esbon, e Eri, e Arodi, e Areli.
GEN 46:17 E huriki e tune Aser a bakovi ra nga: e Imna, e Isva, e Isvi, e Beria. E kurabane ria a rana e Sera. E tune Beria a bakovi ra nga: e Heber e Malkiel.
GEN 46:18 Re huriki nga ri ala ravulu a polona i polotara, a hamone Iakop rua e Silpa. Ra ngatavine iea, e Leban i habia ne Lea, ga vorakato vona.
GEN 46:19 E Iosep e Bensamin, e kinane rua e Resel, re girihine Iakop tara.
GEN 46:20 Na tahuna e Iosep i made o Egipto, i parangi vona e Asenat, e tuna prister tara a rana e Potipera na tanga e Heliopolis. E Asenat i poda e Epraim rua e Manase.
GEN 46:21 E huriki e tune Bensamin a bakovi: e Bela, e Beker, e Asbel, e Gera, e Naman, e Ehi, e Ros, e Mupim, e Hupim, e Ard.
GEN 46:22 Re huriki a bakovi nga, a hamone Iakop rua e Resel, ri ala ravulu a polona i va.
GEN 46:23 E tune Dan a bakovi i taku kunana. A rana e Husim.
GEN 46:24 E huriki e tune Naptali a bakovi: e Iasiel, e Guni, e Ieser, e Silem.
GEN 46:25 Re huriki a bakovi nga, a hamone Iakop rua e Bila, ra ngatavine e Leban i habia ne Resel ga vora vona. Ni gi palupu, ri ala polorua.
GEN 46:26 E huriki a hamone Iakop, ra ri lakea o Egipto, ri ala ravulu polo tara a polona i polotara (66). I uka ma ni gi e huriki e girihine ria.
GEN 46:27 Ni gi turane tune Iosep ala rua ra ni poda o Egipto, ria lobo ri ala ravulu polo rua (70).
GEN 46:28 E Iakop i rudua e Iuda ge muga ge takia e Iosep ge tagui ria o Gosen. Na tahuna ri laho lokovonga na robo e Gosen,
GEN 46:29 e Iosep i bolea a karis vona, i lakea o Gosen, ge taguia e tamana, re Israel. Na tahuna i masia e tamana, i rakoa i mate ni taringia.
GEN 46:30 Lakea e Israel i takia e Iosep, “Ngane iau ga mate, a vuhuna a matai ioe pali, o tabana ni mahuri.”
GEN 46:31 Muri e Iosep i taki e huriki e turana, a kabu vona, i ta maea, “Ga lakea ne Parao ga takia ga ta maea, ‘E huriki e turagu, a kabu nau, ra ri made na robo e Kenan, ri valai pali.
GEN 46:32 E huriki a bakovi nga ri matakari a sipsip. Ri bole valai ngane a kabu na sipsip, a bulmakau, a maka mahala lobo ne ria.’
GEN 46:33 Na tahuna e Parao ge gale dili mua ge nana na a ra leho mu lohoka vona,
GEN 46:34 mu ta maea, ‘Bakovi dagi, mi matakari a sipsip a bulmakau na tahuna mi kiroko vona i valai i harena mona. I manga a leho i rata e tamane mia muga.’ Muri bara i longo vona a robo e Gosen bara mu made vona, a vuhuna e huriki a tahotanga ri marikoi hateka ni made turana e huriki ri matakari a sipsip.”
GEN 47:1 Lakea e Iosep i vano i vaka­longoa e Parao i ta maea, “E tata turane huriki e turagu ri pea a robo e Kenan, ri bele pali na robo e Gosen. Ri valai turana a kabuna sipsip, a bulmakau, a mahala lobo ri tahoka.”
GEN 47:2 I vulaki e turana ala lima i vakasiri ria ne Parao.
GEN 47:3 Lakea e Parao i nana ria, “A ra leho mu lohoka na niratana?” Ri ta maea ria, “Bakovi dagi. A leho mi lohoka vona, ni matakari a sipsip, i manga a leho i rata e tamane mia muga.
GEN 47:4 Mi valai mi gi made tamilalu koea, a vuhuna a pago i hale hateka na robo e Kenan. A maka sipsip ne mia, i uka liu a varili ri gi kani. Pali ngane, o longo mai mia, mi gi rata a tanga na robo e Gosen.”
GEN 47:5 Lakea e Parao i takia e Iosep, i ta maea, “E tamamu, e turamu mai ri valai vomu.
GEN 47:6 A robo e Egipto ioe o matakaria. O matai a malala ge kamumu hateka, o vakamade vona e tamamu, e turamu mai. O vakamade ria o Gosen. A bakovi maratarata, o ru ge matakari a sipsip a bulmakau nau.”
GEN 47:7 Muri e Iosep i tuli dilia e tamana i vaka­siria ne Parao. E Iakop i taguia i gamai e Parao,
GEN 47:8 lakea e Parao i nanea, “I riva a pida vomu?”
GEN 47:9 I ta maea ia, “A pida a laho viliha lae vona i 130. A pida nga i uka ma i kupo. Pali a bole a nimadihi hateka ne ria, i uka ma i manga a pida ne huriki a gare nau hosi i kupo hateka.”
GEN 47:10 Ru vata lobo, lakea e Iakop i gamaia e Parao. Muri i pagitala.
GEN 47:11 E Iosep i vakamadea e tamana, e huriki e turana o Egipto. I habi ne ria a malala kamumu ri leho vona na robo e Remeses, i manga a hini i taki e Parao.
GEN 47:12 Muri e Iosep i bole a maki ni kani i habi tabu ne tamana, e huriki e turana, e huriki lobo, ra ri valai turane tamana. A maki ni kani ni habi muri mai a naguna koma ri tahoka.
GEN 47:13 A pago i kara hateka, i ratapile a robo e Egipto e Kenan, i uka maki ni kani.
GEN 47:14 E Iosep i ru kadolu a maka moni ra ri kona a vit vona e huriki a Egipto a Kenan, i bole lakea na ruma dagi e Parao.
GEN 47:15 Na tahuna i lobo a moni ne ria e huriki a Egipto a Kenan, lakea e huriki a Egipto ri valai ne Iosep ri ta maea, “O habi mia ranga maki ni kani. I navai mi gi mate na matamu? A moni ne mia i lobo liu pali.”
GEN 47:16 Lakea e Iosep i ta maea, “Mu bole valai a maka sipsip a bulmakau ne mua, si gi vangoli. Ga habi ne mua a maki ni kani, mu habi nau a sipsip a bulmakau ne mua, a vuhuna i lobo liu pali a moni ne mua.”
GEN 47:17 Lakea ri habi ne Iosep a maka sipsip a bulmakau, lakea i habi ne ria a vit. Ri bole valai a hos, a sipsip, a bulmakau, a meme, a donki ra ri habi valai vona. Na pida iea i kori ria na maki ni kani, a vuhuna ri bole valai vona a maka sipsip a bulmakau.
GEN 47:18 I lobo a pida iea, ri valai tabu na pida muri, ri ta maea, “Bakovi dagi, i uka ma mi gi ta kapiloho vomu. I lobo liu pali a moni ne mia, a sipsip a bulmakau mi habi lobo vomu. I uka ranga maki ge tabana mi gi habi vomu. A malala, a kakaine mia kunana i tabana.
GEN 47:19 Naha ni matataro mia mi gi mate na vitoloa, a malala mia ranga i hale liu. O matakari mia na maki ni kani, pali mia ge mia a vorakato vomu. A malala ne mia ranga o kona. O habi ne mia a vutuna vit mi gi varo, i uka ma mi gi mate. A malala ranga i uka ma ge hale ge manga a tabeke i ngeki.”
GEN 47:20 Lakea e Iosep i kona lobo a malala o Egipto i habi ne Parao. E huriki lobo o Egipto ri habi a malala ne ria ni kona, a vuhuna a pago i hale hateka. A malala lobo o Egipto ne vona e Parao kunana.
GEN 47:21 E huriki lobo o Egipto ria a vorakato vona.
GEN 47:22 E huriki a prister kunana e Parao i uka ma i kona a malala ne ria, a vuhuna i habi vakaroro a maki ni kani ne ria. Lakea i uka ma ri habi ni gi kona a malala ne ria.
GEN 47:23 E Iosep i taki e huriki i ta maea, “Muholi hateka, a kona mua turana a malala, ngane mua lobo a vorakato ne Parao. Mu bole a vutuna vit, mu varo na hania.
GEN 47:24 Na tahuna ni mirio, mu kalipida na tabeke ge lima, mu habi ne Parao a tabekena tara. Ra a tabekena nga i va i tabana, mu varo a vutuna ranga, mu bole ranga ge kani e tune mua, a kabu ne mua.”
GEN 47:25 Lakea ri ta maea, “Bakovi dagi, kamumu hateka o kori mia. Ngane bara mia a vorakato ne Parao kunana.”
GEN 47:26 I vakatubu na tahuna iea, e Iosep i rua o Egipto a vinara na malala. A vinara i maea, “A maka maki ni varo na hania ni gi ru na naguna ge lima. A naguna ge taku ni gi habi ne Parao. A naguna i va ge bole a tahona.” Ra vinara vona i tabana ni ramai mona. A malala ne huriki a prister kunana, e Parao i uka ma i bole.
GEN 47:27 E huriki a Israel ri rata a tanga na robo e Gosen vonga o Egipto. Ri bole a malala ri leho vona, ri tahoka a mahala i kupo. A hamone ria ranga i vakatubu ni bele kupo.
GEN 47:28 E Iakop i made o Egipto na pida i ravulu a polona i polorua. A pida vona lobo i 147.
GEN 47:29 Na tahuna i popote ge mate, i galea e tuna e Iosep i takia, i ta maea, “Ioe o ngaru hateka iau. O ru polotanoa na labugu a limamu, o ta muholi o longo mai iau, o rata kamumu iau. Naha ni tanu iau o Egipto.
GEN 47:30 O kaloho tala iau koea o Egipto, o tanu iau, turana e huriki a gare nau mai, na hini ni tanu ria vona.” E Iosep i koli mule, i ta maea, “Bara rata manga a hini o taki.”
GEN 47:31 Lakea e Iakop i ta maea, “O ta muholi nau.”
GEN 48:1 Muri na parava ranga ni vaka­longo maea e Iosep, “E tamamu i giloa.” Lakea i tuli e tuna rua, e Manase e Epraim, to go masia.
GEN 48:2 Na tahuna e Iosep i bele, ri takia e Iakop, ri ta maea, “E tumu e Iosep i valai ge matai ioe.” Lakea e Israel i makali kamumu, i made rike na kiri.
GEN 48:3 Muri i takia e Iosep i ta maea, “A Vure Tuhaka i bele nau na tanga e Lus, na robo e Kenan i gamai iau vonga,
GEN 48:4 i ta maea, ‘Ga rata ioe go tahoka a maka maki, ge bele kupo a hamomu. Ga vakamade palupu e huriki a hamomu ga habia ne ria a malala ge vona e ria liu muri ma.’
GEN 48:5 E tumu e Epraim rua e Manase, ra ni poda koea o Egipto muga ne iau a valai koea, ngane ga pau, ge nau. Bara ru manga e Reuben rua e Simion ra rua e tugu.
GEN 48:6 E huriki a koma o vakabele muri ne rua ne vomu ngi. Na tahuna ri vaveru a malala takutaku ne ria, e huriki a koma nga bara ri pesi muri ne Epraim e Manase.
GEN 48:7 Na tahuna a hamule o Padan, a dodo hatekea e kinamu e Resel i mate tabukoi o Eprata na robo e Kenan. Lakea a tanu tabukoi ia na dala lakea o Eprata, re Betlehem.”
GEN 48:8 Na tahuna e Iakop i matai e tune Iosep ala rua, i nana, “E rei a koma nga?”
GEN 48:9 Lakea e Iosep i vakalongoa e tamana i ta maea, “Ra koma nga, e tugu a bakovi i habi nau a Vure koea.” Lakea e Iakop i ta maea, “O bole valai nau, ga gamai rua.”
GEN 48:10 E Israel i kepa, i uka ma i matai kamumu a maki, a vuhuna i gare. Lakea e Iosep i vakapesi tabukoi ne Iakop e tuna rua, lakea e Israel i rako i nguru rua.
GEN 48:11 Muri e Israel i takia e Iosep i ta maea, “A luhoi i uka ma ga matai tabu a matamu, pali ngane a Vure i tuhori iau, a matai ioe turane tumu rua.”
GEN 48:12 Muri e Iosep i tuli tala rua na vahane Israel, i lolu puru na ngalane tamana, i padoi a malala a gina.
GEN 48:13 Muri e Iosep i tulia e Epraim, i laho lokovoga na maurina e Israel, i tulia e Manase i laho lokovonga na limana kanena e Israel.
GEN 48:14 Pali e Israel i toto vahau a limana. I nugua na limana kanena a gine Epraim ra viri i pahamuri a tabua, i nugua na limana maurina a gine Manase a tabua.
GEN 48:15 Lakea i gamaia e Iosep i ta maea, “A Vure ne sisi e Abraham, ne tata e Isak, i matakari iau na parava vakaroro i valai i harena mona.
GEN 48:16 I bele manga a agelo i kori iau na maki hale, ge gamai a koma nga. Ge rata a hamone rua ge bele kupo. Muri bara ri luhoi a ragu, a rane tata e Isak, e sisi e Abraham.”
GEN 48:17 Na tahuna e Iosep i masia e tamana i ru langa a limana a kanena na gine Epraim, i marikoi, lakea i bolea a limane tamana i kalia na gine Epraim ge lakea na gina e Manase.
GEN 48:18 Lakea e Iosep i takia e tamana i ta maea, “O tata, i uka ma ge mavonga. A tabua ra iea, o ru langea na gina a limamu a kanemu.”
GEN 48:19 Pali e tamana i koi, i ta maea, “O tugu, a lohoka vona a hini ngi. A lohoka vona e huriki a hamona bara ri kupo. Pali a hamone tarina bara ri ala kupo hateka, ge manga e huriki a kabu ri ala kupo, ri vadili vapopo.”
GEN 48:20 Na parava iea, e Israel i gamai rua i ta maea, “Na tahuna e huriki a kabu ne Israel, ri ngaru ni gamai a viri, bara ri ta maea, ‘A Vure ge matakari ioe i manga a hini i matakari e Epraim rua e Manase.’” Na naro iea kunana, i ru mugea ne Manase e Epraim.
GEN 48:21 Muri e Israel i takia e Iosep, i ta maea, “Iau a tabukoi ga mate. Pali a Vure ge turamu ge bole hamule ioe na robo ne huriki a gare vomu.
GEN 48:22 Ioe kunana, naha e huriki e turamu, ga habia vomu a robo a bolea ne huriki a Amor na tahuna a vaubi turane ria na bainat, na kiniperi nau.”
GEN 49:1 Muri e Iakop i gale palupu e huriki e tuna, i ta maea, “Mu valai ga taki mua vona a maki bara i bele ne mua muri ma.
GEN 49:2 “Mua o huriki e tune Iakop, iau e Israel e tamane mua, a ngaru mua mu gu vapopo, mu gu longo a ngava ga taki mua vona:
GEN 49:3 “O Reuben, ioe a tabua nau. A vakabele ioe na tahuna a riau, a tuhaka vona. O tero o gao hateka ne huriki e tugu.
GEN 49:4 Pali ioe a raha. Ngane i uka ma go muga tabu, a vuhuna o mahita turane girihigu tara, o rata halea a kiri nau i katoki.
GEN 49:5 “O Simion o Levi muru kinana taku, a bainat a lebo marua.
GEN 49:6 Iau i uka ma ga ta turane marua kapiloho. Iau i uka ma ga made turane marua na vaponga, a vuhuna na tahuna muru tahate, muru rabalaki a bakovi. A bulmakau ranga muru ubiputu a vahane ria i manga a rihiva marua.
GEN 49:7 Ngane a ruduraha marua, a vuhuna muru hini hatena. E huriki a hamone marua bara ri made viliha turana a kabu ne Israel.
GEN 49:8 “O Iuda, e huriki a turamu bara ri kavurike rike a ramu. Ioe bara o hori a lohone huriki a pile vomu. E huriki a turamu bara ri lolu puru na matamu.
GEN 49:9 O Iuda, ioe o manga a tuna laion, i lakavu a kania, i hamule na murina, i mahita i po a kanimatana. I uka a viri ge kinikoi ia.
GEN 49:10 A kodo-hariki i tabuli na limamu, bara o matakari vakaroro, i harena na tahuna o bele na tanga e Silo, o matakari e huriki ala kupo.
GEN 49:11 A Vuhuna Iuda, a maka kaina vain vona i kupo. Bara o kolo tata a donki vomu na rahana, o loi a varakia vomu na naruna.
GEN 49:12 A Vuhuna Bara o ninu hateka a vain, i vururu a matamu, o ninu hateka a namona ruru, a ngimu bara i kea manga a ruruna bulmakau.
GEN 49:13 A Vuhuna “E Sebulun, bara i made tabukoi na dari, a roa vona, bara i tahoka a bala kamumu na girimo ge pasi vona, a robo vona bara i harena o Sidon.
GEN 49:14 A Vuhuna “E Isikar, i gao manga a donki, pali i mahita turana a popou vona.
GEN 49:15 A Vuhuna Bara i masia a malala i kamumu, i ngarua ge made vona. Muri bara ia a vorakato, i rata a leho dagi.
GEN 49:16 “E Dan, ia ra kabu, bara i matakari e huriki a Israel.
GEN 49:17 E Dan, i manga a mata hale i tabuli na dahana dala. Na tahuna a hos i nunu valai, bara i to tala, i kara tatea a vahana, i boru a bakovi i made na hos.
GEN 49:18 O BAKOVI DAGI, a ngaru ioe go kori iau.
GEN 49:19 “E Gad, e huriki a panaho, bara ri valai ri vaubi turana, pali bara i gege ria i lili mule ria.
GEN 49:20 “E Aser, a malala vona bara i vakabele a maki ni kani kamumu, i kara ge kani a hariki.
GEN 49:21 “E Naptali, i manga a kinana dia i laho viliha, i vakabele e tuna ri mata kamumu.
GEN 49:22 “E Iosep i manga a kai a vain i pesi tabukoi na lomu, i kupo a kanena. A rahana i kupo i rako rike na nure.
GEN 49:23 E huriki ri vaubi na kiniperi ri gao hateka, bara ri valili ia ri vaubi turana.
GEN 49:24 Pali bara i nugu tata torea a kiniperi vona, a vuhuna a limana i vaga hateka, na nitora na Vure Tuhaka Hateka ne Iakop, a Matakari, a Kedo ne Israel.
GEN 49:25 A Vure Tuhaka ne tamamu ge matakari ge gamai ioe. Bara i rudu vilia vomu na hunu a vala, i rata a naru ri gi bele kupo na malala; i rata e huriki a ngatavine na kabu vomu ri vakabele a koma i kupo.
GEN 49:26 A Vuhuna Iau e tamamu a ngaru ioe, ge maragisi vomu a maki lobo. A maki kamumu a ngaru go bole bara i bele kupo bara ri kavitagu a maka lolo. Iosep, a maki lobo bara ri tabuli na limamu, a vuhuna ioe a bakovi dagi ne huriki e turamu lobo.
GEN 49:27 A Vuhuna “E Bensamin i manga a kaugara i rabalaki a kania. Na hatelanga i kani a maki i rabalaki. Na malunga i veru a maki i kani kaleva.”
GEN 49:28 Re huriki nga, a kabu i ravulu a polona i rua ne Israel. Ra maka ngava nga, e Iakop i taki virihi ria vona na tahuna i gamai takutaku ria.
GEN 49:29 Muri e Iakop i tarulu mule e huriki e tuna, i ta maea, “Iau a tabukoi ga mate. A ngaru mua mu gu tanu iau na dahana e huriki a gare nau, na babe na malala e Epron, a bakovi o Hiti.
GEN 49:30 Ra babe iea i tabuli na malala e Makpela tabukoi o Mamare, na robo e Kenan. Ra babe iea turana a malala, e Abraham i kona ne Epron, a bakovi o Hiti.
GEN 49:31 E tamarane mua e Abraham e Sara, e tubune mua e Isak e Rebeka, e kinane mua e Lea ni tanu vonga.
GEN 49:32 Ra babe iea turana a malala, ni kona na kabu ne Hiti.”
GEN 49:33 Na tahuna e Iakop i tarulu lobo ria, i karuku lakea na kiri vona, i mahita puru. Muri i taravango a nilobona bangona i mate, i vano i made turana e huriki a viri vona ri mate pali.
GEN 50:1 Na tahuna e Iosep i masia e tamana i mate, i mahita rike vona, i ngurua i taringia.
GEN 50:2 Muri i taki e huriki a dokta ri gi ru a marasin vona a podane Israel, i uka ma ge mavuru malaviriri. Lakea ri rata manga a hini i taki.
GEN 50:3 Ra leho ni ru a marasin na podana viri mate bara i bole a parava i ravulu va. A podane Israel tara ni ru a marasin vona na parava i ravulu va. E huriki a Egipto ri taringia e Israel na parava i ravulu polorua.
GEN 50:4 Muri i lobo a parava na nitangi, lakea e Iosep i takia a bolekori ne Parao i ta maea, “Ioe o ngaru iau, o bolea a ngava nau o vakalongo e Parao vona, o ta maea,
GEN 50:5 ‘Na tahuna e tata i popote ge mate, i takia e Iosep ge ta muholi na matana, i ta maea, “Iau a tabukoi ga mate. O tanu iau na babe a keli purua na robo e Kenan.” Ngane a ngaru ni sike ga tanua e tata, muri ga hamule valai.’”
GEN 50:6 E Parao i longo vona a ngavane Iosep, lakea i ta maea, “O sike o tanua e tamamu, a vuhuna o kaba na matana pali.”
GEN 50:7 Lakea e Iosep i sike i tanua e tamana, turane huriki a bolekori, a bakovi dagi ne Parao, e huriki a bakovi dagi lobo na robo o Egipto.
GEN 50:8 E huriki a kabu ne Iosep, e huriki e turana mai, turane huriki a kabu ne tamana, ria lobo ri vano. E huriki a koma kunana ri made mule turana a maka kabu na sipsip, a bulmakau na robo e Gosen.
GEN 50:9 E huriki a bakovi ri rike na karis na hos, ngi ranga ri sike turana. I kupo hateka e huriki ri vano turana.
GEN 50:10 Na tahuna ri bele o Atad, tabukoi o Iordan, ri upu tala a nangi. E Atad a tanga na ni vilatala a vinina vit. Ri vapopo vonga na parava i polorua, ri taringia vonga e tamana.
GEN 50:11 E huriki a Kenan ri matai ria, ri vapopo o Atad, ri ta maea, “E huriki a Egipto ri vapopo ri rata runga na viri mate.” Lakea ni gale liu ra tanga i tabukoi na naru dagi e Iordan, e Abel-misraim.
GEN 50:12 E huriki e tune Iakop ri muri mai kunanea a ngava e Iakop i tarulu mule ria vona.
GEN 50:13 Ri bole lakea na robo e Kenan, ri tanua na babe na malala e Makpela, tabukoi o Mamare. Ra babe turana a malala, e Abraham i kona ne Epron, a bakovi o Hiti.
GEN 50:14 Muri ne Iosep i tanu loboa e tamana, i hamule puru o Egipto turana e huriki e turana. E huriki lobo ri do rikea, ria ranga ri hamule puru.
GEN 50:15 Na tahuna e tamane ria i mate, lakea e huriki e turana ri ta maea, “Si gi navai ngane? E Iosep ma ge koli a naro hale si ratea vona hosi.”
GEN 50:16 Lakea ri talo rike a ngava ne Iosep, ri ta maea, “Na tahuna e tamane hita i popote ge mate, i tarulu mule mia, i ta maea,
GEN 50:17 ‘Mu takia e Iosep, ge longokaburungi a naro hale mu rata virihia vona hosi.’ Ngane, mi ngaru ni nana ioe go longokaburungi a naro hale ne huriki a vora na Vure ne tamamu.” Na tahuna e Iosep ni vakalongo vona a ngava ne turana mai, i tangi.
GEN 50:18 Muri ri lokovonga, e huriki e turana mai ri turume puru na matana, ri ta maea, “Mia ngane bara mia a vorakato vomu.”
GEN 50:19 Pali e Iosep i ta maea, “Naha ni mangenge, iau, i uka ma iau a Vure.
GEN 50:20 Hosi mu ngaru ni ratapile iau, a vuhuna a Vure i ngaru mua mu gu rata mavonga. Muri a valai a made koea, a kori e huriki ala kupo.
GEN 50:21 Pali ngane, naha ni mangenge, a vuhuna bara matakari mua, turane huriki e tune mua.” Lakea e Iosep i luke mule ria, i pasi valo puru a hatene ria.
GEN 50:22 E Iosep i made o Egipto turane huriki a kabu ne tamana. I tahoka a pida i 110 i mate.
GEN 50:23 Na tahuna e Iosep i mahuri, e Epraim i vakabele e huriki e tuna, e tubuna. E tune Manase, a rane Makir, i vakabele e huriki e tuna, lakea e Iosep i pau ria.
GEN 50:24 Muri e Iosep i taki e huriki e turana, i ta maea, “Iau a tabukoi ga mate. Pali a Vure ge matakari mua. Muri bara mu ha taroa a robo iea, mu sike lakea na robo a Vure i vakasiria, i ta muholi vona ge habia ne Abraham, e Isak, e Iakop.”
GEN 50:25 Muri e Iosep i taki e huriki e tune Israel bakovi ri gi kaba vona a nita muholi. A nita muholi i maea, “Na tahuna a Vure ge valai ge korimule mua, mu bole tala koea a maka tuhagu, mu kaloho sike turane mua.”
GEN 50:26 E Iosep i tahoka a pida i 110, muri i mate. Ni ru a marasin na podana, i uka ma ge mavuru malaviriri. Muri ni kapo, i tabuli vonga o Egipto.
EXO 1:1 E huriki e tune Israel turana a kabu ne ria ri puru o Egipto turane Iakop ra nga,
EXO 1:2 e Reuben, e Simion, e Levi, e Iuda,
EXO 1:3 e Isikar, e Sebulun, e Bensamin,
EXO 1:4 e Dan, e Naptali, e Gad, e Aser.
EXO 1:5 E Iosep i lokovonga muga. Na tahuna iea e huriki a hamone Iakop ri ala ravulu polorua.
EXO 1:6 Muri e Iosep, e turana mai, e huriki a hulu turana ri mate.
EXO 1:7 Pali e huriki a hamone Israel ri bele kupo, ri gao hateka, ri bele kupo o Egipto.
EXO 1:8 Muri na pida i kupo a hariki karaba i matakari o Egipto. Ra hariki iea i uka ma i lohoka ne Iosep.
EXO 1:9 Lakea i taki e huriki a viri vona, “E huriki a Israel ri bele kupo, ri rangi hita.
EXO 1:10 A vabinga tara bara i bele, bara ri taga turane huriki a pile, ri vaubi turane hita. Muri bara ri ha taroa a robo ne hita, ri vano. Si gi matakanea tara dala si gi rata ria nahea ri gi ala kupo hateka.”
EXO 1:11 Lakea e huriki a Egipto ri taki e huriki a matakari ri gi vakuku e huriki a Israel ri gi leho hateka. Ri rata a tanga dagi i rua e Pitom, e Rameses ne vona ni ru kadolu a maki ni kani ne Parao.
EXO 1:12 E huriki a Egipto ri ratapile e huriki a Israel. Pali e huriki a Israel ri tababana ni bele kupo, lakea e huriki a Egipto ri mangenge ne ria,
EXO 1:13 ri rata ria ri leho hateka.
EXO 1:14 A nimade ne ria ngane i hale liu, a vuhuna i uka ma ri malo. Ri vakuku ria ri gi rata a brik ne vona a ruma. Ri vakataki ria, ri gi leho hateka na hania, i uka ma ri dodo ria.
EXO 1:15 Na parava tara a hariki ne Egipto, e Parao, i taki a ngatavine o Hibru, e Sipra e Pua, a leho ne rua ni tuhori e huriki a ngatavine ni poda, i ta maea,
EXO 1:16 “Na tahuna muru tuhoria tara ngatavine o Hibru ge poda a koma bakovi, muru rabalakia a koma. A ngata­vine ge poda a koma ngatavine, naha ni rabalakia a koma.”
EXO 1:17 Pali ra ngatavine nga ru mangenge na Vure, i uka ma ru ramaia a nitana hariki, i uka ma ru rabalaki e huriki a koma bakovi.
EXO 1:18 Lakea a hariki i gale valai tabu a ngatavine nga, i nana rua, “I navai i uka ma muru ramaia a ngava a taki marua vona, muru gu rabalaki a koma bakovi?”
EXO 1:19 Ru koli ru ta maea, “E huriki a ngatavine o Hibru i uka ma ri manga e huriki a ngatavine o Egipto. Ri gao hateka ri poda malaviriri kunana. Maria i uka ma miri bele malaviriri, bara ri poda muga pali.”
EXO 1:20 Lakea a Vure i rata kamumu a ngatavine nga, ru tahoka koma, a vuhuna ru togoa. Muri e huriki a Israel ri bele kupo, ri gao hateka.
EXO 1:22 Lakea e Parao i vakuku e huriki a Egipto, i ta maea, “Mu bole e huriki a koma bakovi na Hibru, mu voro puru na naru dagi e Nail, ri gi pasiri. Pali naha ni rabalaki a koma ngatavine.”
EXO 2:1 Ngane a bakovi tara na kabu ne Levi i parangi vona a ngatavine, ia tara a kabu ne Levi.
EXO 2:2 Muri a ngatavine i singou i podea a koma bakovi. E kinana i masia i mata kamumu hateka, lakea i ruhuloloa na keva i tolu.
EXO 2:3 Na tahuna a koma i kulabo, e kinana i keri ni ruhuloloa. Muri e kinana i vaia na pagana gili a kulopi, i pipi karia na kasita, i vakamahitea vona a koma, i ruhuloloa na ganu na dahana naru e Nail.
EXO 2:4 E kurabana koma i pesi basi popote, i matanonoa a a ra maki ge bele vona.
EXO 2:5 I uka ma i tabaka, i masia e tune Parao ngatavine i valai turane huriki a vora ngatavine vona, ge hilolo. Na tahuna i hilolo, e huriki a vora ngatavine vona ri laho viliha na dahana naru, ri davea. Lakea e tune Parao i masia a kulopi i papasi na naru pololilo na ganu, i rudua a vora vona ge bole vilia.
EXO 2:6 Na tahuna i avea a kulopi, i masia a koma bakovi i mahita pololilo na kulopi, i tatangi. Lakea i dodoa i ta maea, “Ra koma iea a tuna Hibru.”
EXO 2:7 Muri e kurabana i valai i takia e tune Parao, “Ioe o ngaru, ga vano ga takia tara ngatavine na Hibru ge matakaria vomu a koma.”
EXO 2:8 Lakea e tune Parao i ta maea, “I kamumu. O vano o takia tara ngatavine ge valai.” Lakea e kurabana i vano i takia e kinana muholi, i valai.
EXO 2:9 Na tahuna e kinana i valai, lakea e tune Parao i takia, “O bokea a koma, o matakaria ge ne nau, muri ga kona ioe.” Lakea e kinana i bokea, i vakarurua, i matakaria.
EXO 2:10 Na tahuna a koma i koru rike, e kinana i boko lakea ne tune Parao i paua ge tuna. Muri i ta maea, “Ra koma iea i papasi na naru, a matavisia. Ngane a vunua a rana e Moses.”
EXO 2:11 Na tahuna e Moses i koru rike pali, i vano i matai e huriki a viri vona ni vakavora hateka. I masia tara Egipto i ubi halea tara Hibru.
EXO 2:12 I mata lae, i uka ma i masia tara viri ge pesi tabukoi, lakea i rabalakia a bakovi o Egipto, i tanua na hire.
EXO 2:13 Na parava muri e Moses i hamule tabu i matai a Hibru ala rua ru vaubi. Lakea i takia a viri i vakatubu a vabinga, “I navai o ubia e turamu?”
EXO 2:14 A bakovi i koli, i ta maea, “E rei i ru ioe ge ioe a matakari, go pelekado a narone mia? I navai, o luhoi ni rabalaki iau, ge manga a hini o rabalakia a bakovi o Egipto ravi?” Na tahuna e Moses i longoa a ngava iea i mangenge, i luhoi maea, “E huriki ri lohoka vona pali a naro a ratea.”
EXO 2:15 Na tahuna e Parao i longoa a naro i ratea e Moses, i madihi a hatena, i ngaru ni rabalakia. Muri e Moses i ha lakea na robo ne huriki a Midian. Na tahuna i bele vonga i made na dahana lomu.
EXO 2:16 Na robo iea i tahoka tara prister. I tahoka e tuna ngatavine ala polorua. E Moses i made na dahana lomu i matai e huriki a ngatavine nga ri valai ri gi kiru a maka buroi ne ria, ri gi vakaninu a kabuna sipsip, a meme ne tamane ria.
EXO 2:17 Pali i ranga matakari na sipsip ri valai, ri tono tala e huriki a ngatavine nga. Lakea e Moses i hateka ne huriki a ngatavine, i lili e huriki a bakovi, i vakaninu a maka sipsip, a meme ne ria.
EXO 2:18 Na tahuna ri hamule, e tamane ria e Ietro i nana, “I navai mu hamule malaviriri?”
EXO 2:19 Ri koli ri ta maea, “A bakovi o Egipto tara i tuhori mia, lakea e huriki a tahona sipsip i uka ma ri valili ne mia. Muri i vakaninu a sipsip a meme ne mia.”
EXO 2:20 Lakea e tamane ria i nana, “Ra bakovi iea i made vai? I navai mu pe ia vonga? Mu vano mu takia ge valai ge kani turane hita.” Muri ri vano ri takia e Moses, i valai.
EXO 2:21 E Ietro i ngarua e Moses ge made turana. Lakea i habia ne Moses e tuna, e Sipora, i parangi vona.
EXO 2:22 Muri e Sipora i singou i podea a koma bakovi. Lakea e Moses i taki mule ia i ta maea, “Iau a mosi a made vona a tanga iea. Ngane ga vunua a koma iea e Gersom.”
EXO 2:23 Na pida nga, e Moses i made o Midian, a hariki o Egipto i mate. E huriki a Egipto ri vakavora hateka e huriki a Israel, lakea ri dedo, ri tangi, ri nanea a Vure ge tuhori ria.
EXO 2:24 A Vure i longoa a nitangi ne ria, i luhoi a ngava dagi i takia ne Abraham ne Isak ne Iakop.
EXO 2:25 Lakea a Vure i matai e huriki a Israel ri made hale hateka, i luhoi hateka ria.
EXO 3:1 E Moses i matakari a maka sipsip a meme ne lahuana e Ietro, a prister ne Midian. Na parava tara e Moses i vakalaho a maka sipsip a meme, i lakea na tabeke na nirolona haro na tabeke i ngeki, i bele o Horeb, a lolo na Vure.
EXO 3:2 A agelo ne BAKOVI DAGI i bele vona, i manga a kanono i hube langa na kai kiroko tara. Pali e Moses i masia a kai i hube vona a kanono, pali i uka ma i nono.
EXO 3:3 Lakea i ta maea, “Ga lokovonga tabukoi, ga masia a maki i hube. I navai a kai kiroko iea i uka ma i nono?”
EXO 3:4 E BAKOVI DAGI i made na kurukuruna kai kiroko, i masia e Moses i valai tabukoi, lakea i galea, “Moses, Moses!” E Moses i koli, i ta maea, “Iau ieni.”
EXO 3:5 Lakea a Vure i takia, “Naha ni valai tabukoi. O kali tala a vahapolo vomu, a vuhuna a malala o pepesi vona, a tabea.
EXO 3:6 Iau a Vure ne huriki a gare vomu. Iau a Vure ne Abraham, ne Isak, ne Iakop.” E Moses i longoa a ngava iea i kavitagua a matana, a vuhuna i mangenge ni masia a matana Vure.
EXO 3:7 Lakea e BAKOVI DAGI i takia, “Iau a matai e huriki a Egipto ri vakavora hateka e huriki a viri nau. Ngane ri gale iau ga korimule ria na limane huriki a matakari hale. A longoa a nigale ne ria, a lohoka hateka vona a nimadihi ri bolea.
EXO 3:8 Ngane a puru valai ga korimule ria na limane huriki a Egipto, ga taparaki ria vona a malala kamumu i vona a maki ni kani. Ra malala iea, ngane e huriki a Kenan, a Hiti, a Amor, a Peres, a Hivi, a Iebus ri made vona.
EXO 3:9 A longoa pali a nitangi ne huriki a Israel, a masia pali a naro hale ne huriki a Egipto ri rata virihi ria vona.
EXO 3:10 Ngane o lakea ne Parao, o takia go tuli e huriki a viri nau, ri gi pea e Egipto.”
EXO 3:11 Pali e Moses i takia a Vure, “Iau e rei a bakovi ga lakea ne Parao, ga takia ga tuli tala e huriki a Israel o Egipto?”
EXO 3:12 Lakea a Vure i ta maea, “Iau a made turamu. Ngane ga habia vomu tara kilakila ge vakasiri ioe, iau a rudu ioe. Ra kilakila iea ge maea, na tahuna o tuli tala e huriki a Israel o Egipto, ri gi valai, mu kavurike iau na lolo iea.”
EXO 3:13 Lakea e Moses i takia a Vure, “Na tahuna ga lakea ne huriki a Israel, ga taki maea ria, a Vure ne huriki a gare ne mua i rudu iau a valai. Pali ma ri gi nana ranga, ri gi ta maea, ‘E rei a rana?’ Ga ta navai?”
EXO 3:14 Lakea a Vure i takia e Moses, i ta maea, “Iau ra Iau. O taki maea e huriki a Israel, ‘Iau ra Iau i rudu iau a valai ne mua.’”
EXO 3:15 A Vure i taki tabua e Moses ge taki e huriki a Israel, ge ta maea, “E BAKOVI DAGI, ra Vure na gare ne mua e Abraham, e Isak, e Iakop i rudu iau a valai.” Muri i ta maea, “A ragu i tabuli vakaroro. E huriki a hamone mua ri gi gale maea a rana muri ma.
EXO 3:16 “O vano, o gale palupu e huriki a bakovi dagi ne Israel. O vakalongo ria ne nau, iau e BAKOVI DAGI a Vure na gare ne ria e Abraham, e Isak, e Iakop a bele vomu. O taki ria vona iau a matakari ria, a matai pali a maka maki ni rata virihi ria vona o Egipto.
EXO 3:17 A luhoi muga pali ta ga bole tala ria na tanga na nimadihi o Egipto. Muri ga bole sike ria na robo ne huriki a Kenan, a Hiti, a Amor, a Peres, a Hivi, a Iebus. Ra malala iea i kamumu, i vona a maki ni kani.
EXO 3:18 “O taki e huriki a gare o Israel ri gi longo maia a nitamu, ri gi ramaia. Muri o bole ria ri gi lakea na hariki o Egipto ri gi ta maea, ‘E BAKOVI DAGI, a Vure ne mia a Hibru, i made turane mia. Ngane mi valai mi gi nana ioe ta go longo ne mia, mi gi lakea taro na tabeke i ngeki. Mi gi laho na parava ge tolu, muri mi gi habi a nihabi ne Bakovi Dagi a Vure ne mia.’
EXO 3:19 “Pali iau a lohoka vona a hariki, e Parao, i uka ma i ngaru mu gu vano. Na nitora nau kunana bara mu vano.
EXO 3:20 I mavonga iau bara vakasiria a nitora nau, ga rata a maka niturutu ga ratapile e huriki a Egipto. Muri e Parao bara i longo ne mua mu vano.
EXO 3:21 “Muri na tahuna a vakamadihi e huriki a Egipto, bara ri mangenge ne mua, ri habi tavula a maki ne mua. Na tahuna mu mariu tala i uka ma mu gu laho pa.
EXO 3:22 E huriki a ngatavine o Israel bara ri taki e huriki a ngatavine o Egipto ri made tabukoi ne ria, e huriki ri made na ruma ne ria, bara ri habi ne ria a maka kala, a mahala ni rata na gol, a silva. Ra mahala nga bara mu vakabagetu e huriki e tune mua vona. Na naro iea kunana bara mu vakalobo liu a maka mahala o Egipto.”
EXO 4:1 E Moses i koli, i ta maea, “Pali e huriki a Israel ri gi koi ni luhoi a nitagu ri gi koi ni ramai a ngavagu, ri gi ta maea, ‘O tatami! E BAKOVI DAGI i uka ma i luve taho ioe.’”
EXO 4:2 Lakea e BAKOVI DAGI i nanea, “A ra o bolea na limamu?” E Moses i koli, i ta maea, “A kodo na nilaho.”
EXO 4:3 I takia e Moses, “O voro purua na malala a kodo!” Lakea e Moses i voro purua na malala a kodo vona, i vulo a mata. Na tahuna i masia, lakea ta ge ha.
EXO 4:4 Pali e BAKOVI DAGI i takia, “Naha ni ha! O tangotatea na kuna.” Lakea e Moses i tangotatea a kuna, i mareli hamule i manga kodo tabu.
EXO 4:5 Muri e BAKOVI DAGI i takia, “Na tahuna o lakea ne huriki a Israel, o ratea a nivakasiri iea, bara ri matakilaka vona, iau e BAKOVI DAGI a bele vomu. Ra iau a Vure na gare ne ria e Abraham, e Isak, e Iakop.”
EXO 4:6 E BAKOVI DAGI i taki tabua e Moses, “O ru dilia na nirodo vomu a limamu!” Lakea e Moses i ru dilia na nirodo vona a limana. Na tahuna i turari talea, i masia a limana i tuvu vona a patala, i kea manga a kamagi.
EXO 4:7 “I taki tabua, “O ru dili tabua na nirodo vomu a limamu!” Lakea e Moses i ru dilia na nirodo vona a limana. Muri i turari talea, i matapado a limana.
EXO 4:8 Lakea e Bakovi Dagi i takia, “E huriki nga, i uka ma ri gi longo mai a nitamu, i uka ma ri gi luhoi a nivakasiri ni rata muga, a ruana nivakasiri bara i rata ria ri luhoi tora.
EXO 4:9 Pali ra nivakasiri nga i rua ri matai, i uka ma ri luhoi ge muholi o ri gi longo mai ioe. O kirua a naru e Nail o gurua na malala bara i mapulo i manga a dara.”
EXO 4:10 Lakea e Moses i takia, “BAKOVI DAGI, ra iau, i uka ma iau a bakovi ni ta na matane huriki ala kupo. Ngane o ta turagu, pali iau i uka ma iau a bakovi ni ta hateka. A ngavagu i mava na nita, i uka ma a ta kamumu.”
EXO 4:11 Lakea e BAKOVI DAGI i koli, i ta maea, “E rei i rata a viri i ta? E rei i rata a viri i ngava rubu, i kepa? Iau kunana a rata ria.
EXO 4:12 O vano ngane, bara tovo ioe, a tuhori ioe na ngava go taki.”
EXO 4:13 Pali e Moses i ta maea, “Bakovi Dagi, iau a vilikoma. O rudua tara viri.”
EXO 4:14 Lakea e BAKOVI DAGI i madihi a hatena, i tahatea e Moses, “I navai o vilikoma? E tukamu e Aron i made, a hamone Levi, bara i tuhori ioe. A lohoka vona i ta pagapaga. Ngane i laho valai ge tagui ioe, bara i vivi ni matai ioe.
EXO 4:15 O taki polo vona a ngava ge taki. Iau ga tuhori marua, bara muru ta kamumu. Ga taki marua vona a ra maki muru gu rata.
EXO 4:16 Ioe o taki polo ne Aron a ngava ge taki ge vakalongo ne huriki. Na matane Aron, ioe o manga a Vure, o habi a ngava vona ge vakalongo e huriki.
EXO 4:17 Ngane o bolea a kodo vomu o vano, o rata a maka nivakasiri vona.”
EXO 4:18 E Moses i ta turana lobo e Bakovi Dagi, muri i hamule mai e lahuana e Ietro, i takia, “Iau a ngaru ga hamule lakea o Egipto, ga kasisi e huriki a viri nau, ri mate pali o i uka.” E Ietro i longo maia a nitana, lakea i takia, “I kamumu. O vano na nivalemu.”
EXO 4:19 Pali e Moses i uka ma i pea ma e Midian, lakea e BAKOVI DAGI i takia, “Ngane o puru o Egipto. Hosi, re huriki ta ri gi rabalaki ioe, ri mate pali.”
EXO 4:20 Lakea e Moses i vakarike na donki e girihina, e tuna bakovi ala rua, i bolea a kodo na Vure i puru turane tou o Egipto.
EXO 4:21 Muri e BAKOVI DAGI i takia, “Na tahuna o bele o Egipto o rata a maka nivakasiri na matane Parao. Iau a habia vomu a nitora ni ratana a nivakasiri. Pali iau bara ratea e Parao i gigitora i uka ma ge longo vona e huriki a Israel ri gi vano.
EXO 4:22 Muri o takia e Parao o ta maea, ‘A kabu ne Israel i manga a koma bakovi a tabua ne BAKOVI DAGI.
EXO 4:23 A taki ioe, “O longo ne ria e huriki e tugu, ri gi vano ri gi vasileki nau.” Ioe bara o koi, e Bakovi Dagi bara i rabalakia e tumu bakovi, a tabua.’”
EXO 4:24 Na tahuna e Moses i laho puru o Egipto, i rodo a hini i mahitatutu na dala. Na tahuna i mahita e BAKOVI DAGI i valai ta ge rabalakia.
EXO 4:25 Lakea e Sipora i bole rikea a voko, i palea a kulina kapune tuna i vakapadoi a vahane Moses vona, i ta maea, “Muholi, ioe e girihigu, pali ioe a bakovi o mahuri na dara.”
EXO 4:26 Lakea e Bakovi Dagi i uka ma i rabalakia e Moses. E Sipora i luhoi a naro ni vapala a kuli, lakea i ta maea, “Ioe a bakovi o mahuri na dara.”
EXO 4:27 E BAKOVI DAGI i takia e Aron, i ta maea, “O lakea na tabeke i ngeki o taguia vonga e Moses.” Muri i vano i taguia, i ngurua e Moses na lolo na Vure.
EXO 4:28 Lakea e Moses i taki e Aron vona a nita lobo e BAKOVI DAGI i taki vona ge vakalongo, i tuverei vona a maka nivakasiri e BAKOVI DAGI i taki vona ge rata.
EXO 4:29 Muri e Moses e Aron ru gale palupu e huriki a gare ne Israel.
EXO 4:30 Lakea e Aron i vakalongo ria vona a maka ngava e BAKOVI DAGI i taki ne Moses. Muri i rata tabu ranga nivakasiri na matane ria.
EXO 4:31 E huriki ri longoa a nitane Moses ri lohoka vona i muholi. Na tahuna ri longoa e BAKOVI DAGI i tagui ria, ri matai e huriki a Egipto ri vakavora hateka ria, ri lolu ri kavurikea a Vure.
EXO 5:1 Muri e Moses e Aron ru lakea ne Parao ru takia, “E BAKOVI DAGI, a Vure ne huriki a Israel, i taki go longo ne ria, ri gi lakea na tabeke i ngeki ri gi vasileki.”
EXO 5:2 Pali e Parao i koli, i ta maea, “E rei ra BAKOVI DAGI iea? Pali i navai ga longototoa ne mua a Israel mu gu vano? Iau i uka ma a lohoka vona a BAKOVI DAGI ne mua, i uka ma a ngaru mua mu gu vano.”
EXO 5:3 Lakea ru ta maea, “A Vure ne huriki a Hibru i bele ne maria. I taki maria miri gi tuli e huriki a Israel mi gi laho na parava ge tolu lakea na tabeke i ngeki, mi gi habi a nihabi ne BAKOVI DAGI a Vure ne mia. O longo ne mia mi gi vano. Mia i uka ma mi gi vano, bara i vakahale mia na gilanga dagi o na vabinga dagi.”
EXO 5:4 Pali a hariki o Egipto i taki e Moses e Aron, “I navai muru ngaru ni rata e huriki ri gi ha na leho ne ria? Muru tuli hamule ria na leho!
EXO 5:5 Ngane mu ala kupo hateka, mu ngaru ni hataro a leho ne mua.”
EXO 5:6 Na parava iea e Parao i vakuku e huriki a matakari na vorakato, i ta maea,
EXO 5:7 “Naha ni habi a varili ge kere ne huriki a Israel ri gi rata a brik, i manga a hini ri rata vakaroro. Ria kunana, ri gi vano ri gi bole a varili.
EXO 5:8 Pali mu taki ria ri gi rata a naguna brik ra ri rata vakaroro. Naha ni kali mule o ge popote a brik ri gi rata. Re huriki nga ri tuha malulu, lakea ri ngaru ni vano ri gi habi a nihabi na Vure.
EXO 5:9 Mu habi a leho ge kupo ne ria. Mu rata ria ri gi leho hateka, nahea ri gi longo mai a maka ngava taminga.”
EXO 5:10 Muri e huriki a matakari ri taki e huriki a Israel, ri ta maea, “E Parao i taki mia, nahea mi gi habi tabu a varili ne mua.
EXO 5:11 Mu vano mu matakana a varili, mu rata a brik ge manga a hini muga, naha ni rata ge popote.”
EXO 5:12 Lakea ri laho viliha o Egipto ri matakana a varili ri gi rata a brik vona.
EXO 5:13 E huriki a matakari na vorakato ri ta hinituhana ri ta maea, “A leho mu rata ge manga a leho mu rata muga na tahuna mi habi a varili ne mua.”
EXO 5:14 Lakea ri ubi e huriki a matakari ne Israel ni ru ri gi matakari a leho, ri ta maea, “I navai i uka ma mu rata a brik ge manga a hini mu rata muga?”
EXO 5:15 Muri e huriki a matakari ne Israel ri lakea ne Parao, ri ta maea, “I navai o rata maea mia?
EXO 5:16 Ra mia, i uka viri ge habi a varili ne mia, pali ni taki mi gi rata a brik. Ngane ri ubi mia. Mi uka a maregoa. A maregoa i tabuli ne huriki a viri vomu.”
EXO 5:17 Lakea e Parao i taki ria, “Mu tuha malulu! Mu kolomare mu ngaru ni lakea na tabeke i ngeki mu gu habi a nihabi ne BAKOVI DAGI.
EXO 5:18 Mu hamule, mu leho. A varili i uka ma ni gi habi ne mua. Pali mu rata a brik ge palupulupu manga a hini mu rata muga.”
EXO 5:19 E huriki a matakari ne Israel ri longoa a nitane Parao ri gi rata a brik ge manga a hini ri rata vakaroro. Ngane ri lohoka vona a maregoa dagi i bele ne ria pali.
EXO 5:20 Na tahuna ri pea e Parao ri vano ri matavisi e Moses e Aron ru dava ria.
EXO 5:21 Lakea ri taki e Moses e Aron, “E BAKOVI DAGI i matai pali a narone marua, bara i ratapile marua, a vuhuna muru ratea e Parao turane huriki a bolekori vona, ri luhoi mia ta mia a maki tavula. Ra marua, ngane muru vakarike a hatene Parao bara i rabalaki mia.”
EXO 5:22 Muri e Moses i lakea tabu ne BAKOVI DAGI i ta maea, “BAKOVI DAGI, i navai o rata hale e huriki a viri vomu? I navai o rudu iau a valai?
EXO 5:23 I vakatubu na tahuna a habi a ngava vomu ne Parao, i valai i harena mona, e Parao i vakavora hateka ria. Pali i uka ma o ratea tara maki ge tuhori ria.”
EXO 6:1 Muri e BAKOVI DAGI i takia e Moses, “Ngane bara o masia a naro ga ratea ne Parao. Muholi hateka, na tuhakanga nau ga ratea ge longo ne mua mu vano. Na tuhakanga nau ga kinikuia ge tono tala mua na robo vona.”
EXO 6:2 A Vure i taki tabua e Moses, “Iau kunana e BAKOVI DAGI.
EXO 6:3 Hosi a bele ne Abraham, ne Isak, ne Iakop. To lohoka vona Iau A Vure Tuhaka. Pali iau i uka ma a vakalongo tou vona a ragu ge BAKOVI DAGI to go lohoka vona.
EXO 6:4 A ta turane tou na ngava dagi, a ta muholi hateka ga habia ne tou a malala e Kenan, ra malala to made muga vona manga a mosi.
EXO 6:5 E huriki a Egipto ri vakavora hateka e huriki a Israel ri rata ria ri tangi. Ngane a longoa pali a nitangi ne ria. A luhoi tabua a ngava dagi a takia ne ria.
EXO 6:6 “Ngane o vakalongo e huriki a Israel vona a nitagu, ‘Iau kunana e BAKOVI DAGI. Ga korimule mua na limane huriki a Egipto na maka maregoa ri rata virihi mua vona. Na nitora dagi nau ga pelekado ria ga ratapile ria, ga korimule mua.
EXO 6:7 Ga bole mua ge mua a ngate nau, pali iau ge iau a Vure ne mua. Muri bara tuli tala mua o Egipto, a tanga ni vakavora mua vona. Na tahuna iea bara mu lohoka vona iau kunana e BAKOVI DAGI, a Vure ne mua.
EXO 6:8 Ga taparaki mua na malala a ta muholi vona ga habia ne Abraham, ne Isak, ne Iakop. Ga habia ne mua a malala iea bara mu made liu vona. Iau e BAKOVI DAGI a takia pali a ngava iea.’”
EXO 6:9 E Moses i vakalongo e huriki a Israel vona a ngava iea, pali ria i uka ma ri longo maia, a vuhuna ri bole a nimadihi dagi, i viliha a niluhoi ne ria.
EXO 6:10 Muri e BAKOVI DAGI i takia e Moses,
EXO 6:11 “O vano o takia e Parao a hariki o Egipto, ge longo ne ria e huriki a Israel ri gi vano.”
EXO 6:12 Pali e Moses i koli, i ta maea, “E huriki a Israel i uka ma ri longototo a ngava a taki ria vona. Pali e Parao ge longototo navai a nitagu, a vuhuna a ta korokoro.”
EXO 6:13 Ngane e BAKOVI DAGI i taki e Moses e Aron ru gu takia e Parao ge vakamariu tala o Egipto e huriki a Israel.
EXO 6:14 E huriki a gare na maka kabu ne Israel ra nga, e Reuben a tabua ne Israel. E tuna bakovi i va, e Hanok, e Palu, e Herson, e Karmi. E huriki a hamone Reuben, ri mapoda tala na bakovi nga.
EXO 6:15 E Simion e tuna i polotara, e Iemuel, e Iamin, e Ohad, e Iakin, e Sohar, e Saul. E kinane Saul a ngatavine o Kenan. E huriki a hamone Simion ri mapoda na bakovi nga.
EXO 6:16 E Levi e tuna i tolu, e Gerson, e Kohat, e Merari. E Levi i tahoka a pida i 137, muri i mate.
EXO 6:17 E Gerson i tahoka e tuna i rua, e Libni e Simei.
EXO 6:18 E tune Kohat i va, e Amram, e Ishar, e Hebron, e Usiel. E Kohat i tahoka a pida i 133, muri i mate.
EXO 6:19 E Merari e tuna i rua, e Mali e Musi. Ra bakovi nga ru mapoda tala na kabu ne Levi, ni ramai na nuverei ne rua.
EXO 6:20 E Amram i parangi mule e balona e Iokebet, lakea e Iokebet i poda e Aron e Moses. E Amram i tahoka a pida i 137, muri i mate.
EXO 6:21 E Ishar e tuna i tolu, e Kora, e Nepeg, e Sikri.
EXO 6:22 E Usiel e tuna i tolu, e Misael, e Elsapan, e Sitri.
EXO 6:23 E Aron i parangi e Eliseba e tune Aminadab, e kurabane Nason. E Eliseba i poda e Nadap, e Abihu, e Eleasar, e Itamar.
EXO 6:24 E Kora i tahoka e tuna ala tolu, e Asir, e Elkana, e Abiasap. Ra bakovi nga to mapoda tala na kabu ne Kora.
EXO 6:25 E Eleasar e tune Aron bakovi i parangi e tune Putiel ngatavine, lakea i podea e Pinias. Re huriki a gare nga a hamone Levi ni here ramai a kabu takutaku ne ria.
EXO 6:26 E BAKOVI DAGI i taki e Aron e Moses, rua kunana ru gu bole tala e huriki a Israel o Egipto.
EXO 6:27 Rua kunana ru gu takia e Parao a hariki o Egipto ge longo ne huriki a Israel ri gi vano. Rua kunana, e Aron e Moses, ru gu rata a ngava.
EXO 6:28 Na tahuna e BAKOVI DAGI i ta turane Moses o Egipto
EXO 6:29 i ta maea, “Iau e BAKOVI DAGI. O vano o vakalongoa e Parao, a hariki o Egipto, na maka ngava a taki ioe vona.”
EXO 6:30 Pali e Moses i takia e BAKOVI DAGI, “O lohoka vona iau a ta korokoro, i navai e Parao ge longo mai iau?”
EXO 7:1 Muri e BAKOVI DAGI i takia e Moses, “O masia, iau a rata ioe, o manga a Vure na matane Parao. E tukamu e Aron i manga a propet vomu ge habi a ngava vomu ne Parao.
EXO 7:2 O taki e Aron vona a maka ngava a taki vomu. Muri ge takia e Parao ge longo vona e huriki a Israel ri gi mariu tala na robo vona.
EXO 7:3 Pali iau ga ratea a hatene Parao ge madihi, muri ga rata a maka nivakasiri o Egipto.
EXO 7:4 E Parao i uka ma ge longototo a ngavamu, bara ratapilea e Egipto, ga pelekado ga vakamadihi e huriki a tahotanga, ga vakamariu e huriki a viri nau, re huriki a Israel.
EXO 7:5 Na tahuna ga ratapile e huriki a Egipto, bara vakamariu e huriki a Israel. E huriki a Egipto bara ri matakilaka nau, iau kunana e BAKOVI DAGI.”
EXO 7:6 E Moses e Aron ru ramai lobo a ngava e BAKOVI DAGI i taki.
EXO 7:7 Na tahuna ru ta turane Parao, e Moses i tahoka a pida i ravulu polotolu (80), e Aron i tahoka a pida i ravulu polotolu a polona i tolu (83).
EXO 7:8 E BAKOVI DAGI i taki e Moses e Aron,
EXO 7:9 “Na tahuna e Parao ge taki marua, muru gu rata a nivakasiri, muru vakasiria vona iau a rudu marua. Ioe o Moses, o takia e Aron ge bolea a kodo vona, ge voro purua na malala, ge vulo a mata.”
EXO 7:10 Muri e Moses e Aron ru lakea ne Parao ru vakalongoa vona a ngava ne BAKOVI DAGI i taki. E Aron i voro purua a kodo vona na matane Parao, na matane huriki a bolekori, i vulo a mata.
EXO 7:11 Muri e Parao i gale palupu e huriki a bakovi na lohokanga, a bakovi na malulu o Egipto, ri toni ni ratea a maki iea na malulu ne ria.
EXO 7:12 Lakea ri voro puru a maka kodo ne ria ri vulo a mata. Pali a kodo ne Aron i todo a maka kodo ne ria.
EXO 7:13 E Parao i masia a nivakasiri, pali i gigitora, i uka ma i longo mai a nitane Moses e Aron, i manga a ngava e BAKOVI DAGI i taki.
EXO 7:14 Muri e BAKOVI DAGI i takia e Moses, “E Parao i gigitora hateka, i marikoi ne huriki a Israel ri gi vano.
EXO 7:15 Na hatelanga bara i lakea na naru dagi e Nail. O vano o bulo ia vonga. O bolea a kodo vomu ra i vulo a mata, o davea na gagana naru dagi.
EXO 7:16 O takia e Parao, o ta maea ‘E BAKOVI DAGI, a Vure ne huriki a Hibru, i rudu iau ga taki ioe, o longo vona e huriki a Hibru ri gi vano, ri gi kavurikea na tabeke i ngeki. Pali i valai i harena mona i uka ma o longo mai ria.
EXO 7:17 Ngane e BAKOVI DAGI i ta maea, “Ioe bara o masia a maki ga ratea, bara o lohoka vona iau kunana e BAKOVI DAGI. O masia, bara lagua na kodo nau a naru dagi e Nail, bara i vulo a dara.
EXO 7:18 Muri a maka manu na naru dagi bara ri mate, ri mavuru. E huriki a Egipto i uka ma ri gi nua.” ’”
EXO 7:19 E BAKOVI DAGI i takia e Moses, “O takia e Aron ge bolea a kodo vona ge toto langa na maka naru dagi, na naru kiroko, na hini ni keli kudu i tua vona a naru, na lomu, na darilomu ne Egipto, bara ri mapulo a dara. A dara bara i tabuli na hini lobo o Egipto. A naru ri kiru na tavila na buroi, ngi ranga bara i vona a dara.”
EXO 7:20 Lakea e Moses e Aron ru rata a maki e BAKOVI DAGI i taki rua vona. Na matane Parao, na matane huriki a bolekori vona, e Aron i bolea a kodo i lagua a naru dagi e Nail, i vulo a dara.
EXO 7:21 A maka manu ri mate ri mavuru, i uka ma ni ninu a naru. A dara i bele na tabeke lobo ne Egipto.
EXO 7:22 E huriki a bakovi na malulu o Egipto ria ranga ri rata ra naro i ratea e Aron. Lakea e Parao i gigitora, i uka ma i longototo e Moses e Aron. I tababana ni hehe, i manga a ngava e BAKOVI DAGI i taki mugea.
EXO 7:23 E Parao i hamule na ruma-hariki vona, i uka ma i mangenge vona a maki i bele.
EXO 7:24 Muri e huriki a Egipto ri keli a maka lovo na gagane Nail ri kiru, a vuhuna ri keri ni ninu na naru dagi.
EXO 7:25 A dara i kavitagu mavongea e Nail na parava i polorua muri ne BAKOVI DAGI i puloa a naru i manga a dara.
EXO 8:1 Muri e BAKOVI DAGI i takia e Moses ge lakea ne Parao ge takia, “E BAKOVI DAGI i ta maea, ‘O longo vona e huriki a viri nau ri gi valai, ri gi vasileki nau.
EXO 8:2 Ioe i uka ma go longo ne ria ri gi valai, bara rudu a maka bura ri gi ratapilea a malala vomu.
EXO 8:3 A maka bura bara ri bele, ri vakavonua e Nail. Muri bara ri pe a naru, ri dili na ruma-hariki vomu, ri dili na tabeke ni mahita na kiri vomu, na ruma ne huriki a bolekori vomu, na ruma ne huriki a viri vomu. Bara ri dili na murina kanono, na murina hini ni rata bret.
EXO 8:4 Bara ri page rike vomu, ri page rike ne huriki a viri vomu, a bolekori vomu.’”
EXO 8:5 Muri e BAKOVI DAGI i takia e Moses, “O takia e Aron ge toto langa a kodo vona na maka naru dagi, na naru kiroko, na naru na golu, na lomu, na darilomu. Ge rata a maka bura ri gi bele kupo hateka na robo e Egipto.”
EXO 8:6 Lakea e Aron i toto langa na maka naru ne Egipto a limana. Muri a maka bura ri bele ri vakavonua a robo.
EXO 8:7 E huriki a bakovi na malulu, ria ranga ri rata mavonga. Ri rata a maka bura ri pe a naru ri rike na malala ne Egipto.
EXO 8:8 Lakea e Parao i gale valai vona e Moses e Aron i taki rua, “Muru vasileki ne BAKOVI DAGI ge lili vuroki a maka bura na tabeke ne mia, muri bara longo vona e huriki a viri ne mua ri gi vano, ri gi habi a nihabi ne BAKOVI DAGI.”
EXO 8:9 Lakea e Moses i koli, i ta maea, “O vulakia tara parava ga vasileki, ga tuhori ioe turana e huriki a bolekori vomu, e huriki a viri vomu. Muri a maka bura bara ri pe a ruma ne mua, ri hamule puru ne Nail.”
EXO 8:10 Lakea e Parao i ta maea, “O vasileki kuduvi.” E Moses i koli, i ta maea, “Ga rata manga a hini o taki, bara o lohoka vona i uka tara viri ge manga e BAKOVI DAGI, a Vure ne mia.
EXO 8:11 A maka bura bara ri pe a ruma vomu, ri pe e huriki a bolekori vomu, a viri vomu, ri hamule puru na naru dagi.”
EXO 8:12 Muri e Moses e Aron ru pea e Parao ru vano. Lakea e Moses i vasileki ne BAKOVI DAGI ge lili vuroki a maka bura.
EXO 8:13 E BAKOVI DAGI i longo vona a nivasileki ne Moses, lakea a maka bura ri tabuli na ruma, na poridala, na hania ri mate.
EXO 8:14 E huriki ri poi a maka bura ri ru kadolu, a robo i mavuru.
EXO 8:15 Na tahuna e Parao i matai a maka bura ri mate lobo, i gigitora, i uka ma i longo mai e Moses e Aron, i manga a ngava e BAKOVI DAGI i taki.
EXO 8:16 Muri e BAKOVI DAGI i takia e Moses, “O takia e Aron ge toto talea a kodo vona ge lagu a habulo na malala, ge mapulo ge ria a namo, ri gi bebe viliha na robo e Egipto.
EXO 8:17 Lakea ru rata mavonga. E Aron i toto tala a kodo, i lagu a habulo na malala. A habulo lobo na robo e Egipto, ri mapulo ri manga a namo, ri kani e huriki a bakovi, a maka livoa.
EXO 8:18 Pali e huriki a bakovi na malulu ri toni ni vakabele a namo, ri keri. A maka namo ri ratapile e huriki a bakovi, a maka livoa.
EXO 8:19 Lakea e huriki a bakovi na malulu ri takia e Parao, “A Vure kunana i ratea a maki iea.” Pali e Parao i gigitora, i uka ma i longo mai a nitane Moses e Aron, i manga a ngava e BAKOVI DAGI i taki.
EXO 8:20 E BAKOVI DAGI i takia e Moses, “Na hatelanga pokopoko e Parao bara i puru na naru dagi. O vano o taguia, o takia, ‘E BAKOVI DAGI i ta maea: O longo vona e huriki a viri nau ri gi vano ri gi kavurike iau.
EXO 8:21 Ioe i uka ma o longo ne ria, bara rudu a maka lango, ri lakene vomu, ne huriki a bolekori vomu, ne huriki a viri vomu. A ruma ne huriki a Egipto bara i vonu vona a lango. A hini i pesi vona a ruma ranga, bara i voi vona a lango.
EXO 8:22 “‘Na tahuna a maka lango ri gi bele, ga matakaria a malala e Gosen, ra tabeke i made vona e huriki a viri nau. A maka lango i uka ma ge vonu vonga, bara o lohoka vona, iau e BAKOVI DAGI na malala iea.
EXO 8:23 Iau i uka ma ga ratea na viri nau a naro iea, ge manga a naro a ratea na viri vomu. Ra nivakasiri iea ge bele kuduvi.’”
EXO 8:24 Lakea e BAKOVI DAGI i rata a maka lango ri dili na ruma-hariki vona, na ruma ne huriki a bolekori, a viri vona, ri ratapilea e Egipto.
EXO 8:25 Muri e Parao i gale e Moses e Aron i taki rua, “Mu vano mu habi a nihabi na Vure ne mua. Mu rata kunana koea na malala iea.”
EXO 8:26 Pali e Moses i koli, i ta maea, “Bara mi rata mavonga, i uka ma ge kamumu. A maka nihabi mi gi habi ne BAKOVI DAGI a Vure ne mia, i uka ma ge mata kamumu na matane huriki a Egipto. Bara mi rata mavonga, bara ri tahate ne mia, ri padi mia na kedo.
EXO 8:27 Mi gi laho na parava ge tolu na tabeke i ngeki, mi gi habi a nihabi ne BAKOVI DAGI a Vure ne mia, i manga a hini i taki mia vona.”
EXO 8:28 Lakea e Parao i ta maea, “Ngane a longo ne mua mu gu vano, mu gu habi a nihabi ne BAKOVI DAGI a Vure ne mua na tabeke i ngeki. Pali naha ni laho basi hateka. Ngane mu vasileki ge tuhori iau.”
EXO 8:29 Lakea e Moses i takia, “Muri ga pe ioe, ga vasileki ne BAKOVI DAGI ge lili vuroki a maka lango. Kuduvi a maka lango bara ri ha tala na ruma-hariki vomu, na ruma ne huriki a bolekori vomu, na ruma ne huriki a viri vomu. Pali naha ni tami mia tabu, go hatekakari mia, nahea mi gi vano mi gi habi a nihabi ne BAKOVI DAGI.”
EXO 8:30 E Moses i pea e Parao i vano i vasileki ne BAKOVI DAGI.
EXO 8:31 Lakea e BAKOVI DAGI i rata a maki e Moses i nana vona. I lili vuroki a maka lango ne Parao, ne huriki a bolekori, ne huriki a viri vona, i uka ma ni matai tabu ranga lango.
EXO 8:32 Pali e Parao i tababana ni gigitora, i marikoi ne huriki a Israel ri gi vano.
EXO 9:1 Muri e BAKOVI DAGI i takia e Moses ge lakea ne Parao ge takia, “E BAKOVI DAGI, a Vure ne huriki a Hibru, i ta maea, ‘O longo vona e huriki a viri nau ri gi vano ri gi kavurike iau.
EXO 9:2 Ioe bara o hatekakari ria, i uka ma o ngaru ria ri gi vano, o nugu tata ria,
EXO 9:3 bara rudua a gilanga dagi ge ratapile a maka bulmakau a sipsip lobo vomu, a maka hos, a donki, a kamel, turana a sipsip, a meme.
EXO 9:4 Pali a maka bulmakau a sipsip ne huriki a Israel, iau e BAKOVI DAGI, ga matakari, i uka ma ri gi mate manga ne huriki a Egipto.’”
EXO 9:5 E BAKOVI DAGI i vulakia a parava i ta maea, “Kuduvi ga ratea a maki iea.”
EXO 9:6 Na parava muri i rata a bulmakau a sipsip ne huriki a Egipto ri mate, pali ne huriki a Israel i uka ma ri mate.
EXO 9:7 Lakea e Parao i rudu a bakovi ri gi kasisi a maka bulmakau a sipsip ne huriki a Israel ri mate o i uka. Ri matai a bulmakau a sipsip ne ria, ri kamumu kunana. Pali e Parao i tababana ni gigitora, i uka ma i longo ne huriki a Israel ri gi vano.
EXO 9:8 Muri e BAKOVI DAGI i taki e Moses e Aron, “Muru lakea na roho ni rata a brik muru bole ranga habulo muru lakea ne Parao. Na tahuna muru luve vona, e Moses ge voro rike a habulo ge matai.
EXO 9:9 Ra habulo bara i poko viliha na tabeke lobo ne Egipto. Na tahuna a habulo i boru puru ne huriki a bakovi a ngatavine na maka hos a bulmakau, a loto bara i tuvu ne ria. Muri ri mapoka, ri vakabele a ngarava dagi.”
EXO 9:10 Muri ru bole a habulo, ru vano ru pesi na matane Parao, lakea e Moses i voro rike a habulo. A habulo i vakabele a loto, muri ri mapoka, ri vakabele a ngarava dagi ne huriki a bakovi, a ngatavine, a hos, a bulmakau.
EXO 9:11 E huriki a bakovi na malulu i uka ma ri bele ne Moses, a vuhuna i tuvu ne ria a loto turane huriki lobo o Egipto.
EXO 9:12 Pali e BAKOVI DAGI i ratea e Parao i gigitora, i uka ma i longo mai e Moses e Aron, i manga a ngava i taki muga e Moses vona.
EXO 9:13 Muri e BAKOVI DAGI i takia e Moses ge lakea ne Parao na hatelanga pokopoko ge taguia ge takia, “E BAKOVI DAGI a Vure ne huriki a Hibru i ta maea, ‘O longo vona e huriki a viri nau, ri gi vano, ri gi kavurike iau.
EXO 9:14 Ge uka, ga rudua a vuranga dagi ge ratapile ioe turana e huriki a bolekori, e huriki a viri vomu. Muri bara mu lohoka vona, i uka tara viri na malala ge manga iau.
EXO 9:15 Iau a tabukoi kunana ga ratapile e huriki a viri vomu, ga ratapile ria na vuranga, bara ri lobo liu na malala.
EXO 9:16 Pali iau a matataro mua i uka ma mu bole a vuranga ma, ga vakasiri mua vona a nitora dagi nau, lakea e huriki bara ri vakarere a ragu na tabeke lobo na malala.
EXO 9:17 Pali ioe o hehe hateka, o marikoi vona e huriki a viri nau ri gi vano.
EXO 9:18 Ngane o longo, kuduvi na tahuna maea ga rudu vilia a vala-kedo. Ra vala-kedo maea i uka ma i boru hosi koea o Egipto, i tubu na tahuna e Egipto ni rata rike karaba, i valai i harena mona.
EXO 9:19 Ngane o vakuku e huriki ri gi vakaha dili na roho a maka bulmakau turana a maki lobo ri mahuri ri laho polovavo, a vuhuna e huriki a bakovi, a maka hos, a bulmakau i uka ma ri gi dili na roho, a vala-kedo bara i boru langa ne ria, i rabalaki ria.’”
EXO 9:20 E huriki a bolekori ranga ne Parao ri mangenge vona a nitane BAKOVI DAGI, ri vakaha dili na roho e huriki a vora, a maka hos a bulmakau.
EXO 9:21 Pali i ranga e huriki i uka ma ri mangenge vona a nitane BAKOVI DAGI, ri longotaro a nitana, ri mata taro e huriki a vora, a maka hos a bulmakau ri laho polovavo.
EXO 9:22 Muri e BAKOVI DAGI i takia e Moses, “O toto rike na hunu a limamu, ge boru puru a vala-kedo na tabeke lobo ne Egipto, ge ratapile e huriki a bakovi, a hos, a bulmakau, a maki ni kani na hania.”
EXO 9:23 Na tahuna e Moses i toto rike na hunu a kodo vona, e BAKOVI DAGI i rudu vilia a vala-kedo, i kururu, i maravila i puru na malala. Muri a vala-kedo i boru langa na tabeke lobo ne Egipto.
EXO 9:24 A vala-kedo i boru hateka. A hini i kururu i maravila ni matai, ni longo na tabeke lobo ne Egipto. Ra vala-kedo iea i hale hateka. Hosi e huriki a Egipto i uka ma ri matai a vala-kedo ge boru maea.
EXO 9:25 A vala-kedo i ratapile e huriki a bakovi a ngatavine, turana a maka hos a bulmakau, a maki i tabuli polovavo na tabeke lobo ne Egipto. Ra vala-kedo, i ratapile a maki ni varo na hania, a maka kai ni kani a kanena.
EXO 9:26 Pali na robo e Gosen, ra tabeke i made vona e huriki a Israel, a vala-kedo i uka ma i boru vonga.
EXO 9:27 Muri e Parao i talo rike a ngava ne Moses e Aron ru gu valai vona. Na tahuna ru bele, e Parao i taki rua, “Iau a rata a naro hale pali. E BAKOVI DAGI i rata a naro kamumu, pali iau turane huriki a viri nau mi rata a naro hale.
EXO 9:28 A ngaru marua muru gu vasileki ne BAKOVI DAGI ge vakalobo a vala-kedo, a hini kururu. Muri bara longo ne mua mu vano malaviriri kunana.”
EXO 9:29 Lakea e Moses i koli, i ta maea, “Na tahuna ga pagitala na tanga dagi ga toto rike a limagu, ga vasileki ne Bakovi Dagi, a vila, a hini kururu bara ru lobo. A vala-kedo i uka ma ge boru tabu. Muri bara o lohoka vona ra malala iea ne vone Bakovi Dagi.
EXO 9:30 Pali iau a lohoka vona, ioe turane huriki a bolekori vomu i uka ma mu mangenge ne BAKOVI DAGI a Vure.”
EXO 9:31 Na tahuna iea a maka kai kiroko ni rata hotu na kuline ria ri lubu, a maka rais ri moro i ratapile a vala-kedo.
EXO 9:32 Pali a maka kanena vit kunana i uka ma ri hale, a vuhuna a maka vit i uka ma ri lua ma.
EXO 9:33 Muri e Moses i pea a tanga dagi i pagitala. Na tahuna i toto rike a limana i vasileki ne BAKOVI DAGI, a vila, a hini kururu ru lobo. A vala-kedo tara i lobo ni boru.
EXO 9:34 Na tahuna e Parao i uka ma i longo a hini ge kururu ge maravila, ge matai a vala-kedo ge boru, i rata a naro hale tabu turane huriki a bolekori, ri gigitora, ri koi ne huriki a Israel ri gi vano.
EXO 9:35 Muholi hateka, e Parao i gigitora hateka, i uka ma i longo ne huriki a Israel ri gi vano, i manga a ngava e BAKOVI DAGI i taki polo ne Moses.
EXO 10:1 E BAKOVI DAGI i takia e Moses, “O vano o masia e Parao. Iau a ratea i gigitora, e huriki a bolekori vona ri gigitora, ga rata a maka nivakasiri na kurukurune ria.
EXO 10:2 Muri ma bara o tuverei polo ne huriki e tumu, e tubumu, a maka nivakasiri a rata virihi e huriki a Egipto vona. Lakea mua lobo bara mu lohoka vona, iau kunana e BAKOVI DAGI.”
EXO 10:3 Lakea e Moses e Aron ru lakea ne Parao ru takia, “E BAKOVI DAGI a Vure ne mia e huriki a Hibru i ta maea, ‘I balaka riva go longotaro a ngavagu, go marikoi ni longo mai iau? O taki e huriki a viri nau, ri gi vano ri gi kavurike iau.
EXO 10:4 Ioe go marikoi ne ria ri gi vano, kuduvi ga rudu a maka koa ri gi valai ri gi vonu vona a robo vomu.
EXO 10:5 Bara ri bebe lae vona a robo vomu, ri kavitagua a malala. A maki ni kani, a kai i uka ma i ratapile a vala-kedo, a maka koa bara ri ratapile ria ri vakalobo liu.
EXO 10:6 Bara ri vonu na ruma-hariki vomu, ri vonu na ruma ne huriki a bolekori a viri lobo vomu o Egipto. Hosi na tahuna ne huriki a gare ne mua, i valai i harena mona, a maka koa maea i uka ma ni matai.’” Muri e Moses i ngalakapulo, i pea e Parao i pagitala.
EXO 10:7 E huriki a bolekori ri takia e Parao, “I balaka riva a hini go longotaro a bakovi nga? Ngane ru habi a maregoa ne hita. O longo ne ria ri gi vano ri gi kavurikea e BAKOVI DAGI, a Vure ne ria. Ra ioe, i uka ma o masia e Egipto i hale liu pali?”
EXO 10:8 Muri e Moses e Aron ni tuli hamule ne Parao, i taki rua, “Mu vano mu vasileki ne BAKOVI DAGI, a Vure ne mua. Pali mu taki iau ngane, e rei ge vano?”
EXO 10:9 Lakea e Moses i koli, i ta maea, “Mia lobo mi gi vano turane huriki a gare, a bakovi, a ngatavine, e tune mia, a maka bulmakau, a sipsip, a meme, a vuhuna bara mi rata a nivasileki dagi ne BAKOVI DAGI.”
EXO 10:10 Lakea e Parao i ta maea, “I uka liu! A marikoi vona e huriki a ngatavine, a koma ri gi laho turane mua. I padi iau a mana pali, bara mu rata a naro hale ne mia.
EXO 10:11 Iau a marikoi! E huriki a bakovi kunana ri gi vano ri gi vasileki ne BAKOVI DAGI.” E Parao i ta lobo, muri e huriki a bolekori vona ri tono tala e Moses e Aron.
EXO 10:12 Muri e BAKOVI DAGI i takia e Moses, “O toto tala a limamu, o toto langa na robo e Egipto ge valai a maka koa, ri gi kani a maki ri tababana.”
EXO 10:13 Lakea e Moses i toto tala a kodo vona, lakea e BAKOVI DAGI i ratea a vilu i ngalu valai na nirikena haro na parava i taku, a rodo i taku. Na hatelanga a maka koa ri bele.
EXO 10:14 Ri valai ri toka na tabeke lobo ne Egipto, ri ratapile a maki. Ra maka koa ri kupo hateka. E huriki a Egipto i uka ma ri matai hosi a maka koa ge kupo hateka maea, muri i uka ma ri gi matai tabu.
EXO 10:15 Ri kavitagua a malala i katoki. Ri kani a maka varili, a pagana kai, a kanena kai i ratapile kaleva a vala-kedo. I uka liu tara maki ge goma ni gi matai tabu na robo e Egipto.
EXO 10:16 E Parao i malaviriri kunana i talo rike a ngava ne Moses e Aron ru gu valai vona. Lakea i taki rua i ta maea, “Iau a rata a naro hale ne BAKOVI DAGI, a Vure ne mua. A rata a naro hale ne mua.
EXO 10:17 A ngaru marua muru gu puga vuroki tabua a naro hale nau. Muru vasileki ne BAKOVI DAGI ne mua, muru takia ge rata vurokia a maki na matenga ri ratapile a robo nau.”
EXO 10:18 Ru pea e Parao, muri e Moses i vano i vasileki ne BAKOVI DAGI.
EXO 10:19 Lakea e BAKOVI DAGI i puloa a vilu dagi i rudua i pori valai na nirolona haro. I kave lakea na Dari Vururu a maka koa, i uka ma ni matai tabu o Egipto.
EXO 10:20 Pali e BAKOVI DAGI i ratea e Parao i gigitora, i uka ma i longo ne huriki a Israel ri gi vano.
EXO 10:21 Muri e BAKOVI DAGI i takia e Moses, “O toto rike na hunu a limamu, ge bele a uvo ge kavitagua e Egipto. Ra uvo iea ni hataki.”
EXO 10:22 Lakea e Moses i toto rikea na hunu a limana, i bele a uvo vatubi, i kavitagua e Egipto na parava i tolu.
EXO 10:23 E huriki a Egipto ri keri ni matai mule ria, ri made kunana na ruma. Pali a tabeke i made vona e huriki a Israel i uka ma i bele vona a uvo vatubi.
EXO 10:24 Muri e Parao i galea e Moses i takia, “Mu vano ngane mu vasileki ne BAKOVI DAGI ne mua. E huriki a ngatavine a koma, ria ranga, ri gi vano turane mua. Pali a maka bulmakau, a sipsip, a meme ge tabuli.”
EXO 10:25 Pali e Moses i koli, i ta maea, “I uka ma ge mavonga. A maki ngi ranga mi gi bole, bara mi habi ne BAKOVI DAGI, a Vure ne mia.
EXO 10:26 Mi gi bole lobo a maka sipsip a meme, bara mi vulaki ranga ge a nihabi ne BAKOVI DAGI a Vure. Pali mi gi vano taro, mi gi bele na murina nivasileki, mi gi pelekado a sipsip a bulmakau ge a nihabi ne BAKOVI DAGI.”
EXO 10:27 Pali e BAKOVI DAGI i ratea e Parao i gigitora, i uka ma i longo ne ria ri gi vano.
EXO 10:28 Lakea e Parao i takia e Moses, “Muru hataroa a tanga iea! Naha ni hamule valai! Marua muru pesi na matagu tabu, bara muru mate!”
EXO 10:29 E Moses i koli, i ta maea, “I manga a hini o taki, i uka ma miri gi valai tabu miri gi matai ioe.”
EXO 11:1 E BAKOVI DAGI i takia e Moses, “Ga habi tabua ne Parao turane huriki a Egipto tara vuranga. Muri bara i longo ne mua mu vano. Na tahuna i longo ne mua mu vano, bara i turahari mua, i lili tala mua.
EXO 11:2 O taki e huriki a Israel ri gi lakea ne huriki a Egipto ri made tabukoi ne ria, ri gi nongi ne ria a mahala na gol a silva.”
EXO 11:3 E BAKOVI DAGI i rata e huriki a Egipto ri togo e huriki a Israel. Pali na matane huriki a bolekori ne Parao turane huriki a Egipto, ri masia e Moses ia a bakovi dagi hateka.
EXO 11:4 Lakea e Moses i takia e Parao, “E BAKOVI DAGI i ta maea, ‘Na kururodo ga laho lobo na robo e Egipto.
EXO 11:5 E huriki a tabua bakovi o Egipto ri gi mate. Ga tubu na tabua bakovi vomu, ra viri ge bole a murimu, ge matakari o Egipto, ge harena na tabua ne huriki a vora ngatavine ri leho ni vila a vit ni rata a bret. A tabua na maka bulmakau a sipsip, ngi ranga ri gi mate.
EXO 11:6 A halohoa dagi bara ni longo na tabeke lobo ne Egipto. Ra runga maea i uka ma ni longo hosi, i uka ma ni gi longo tabu muri ma.
EXO 11:7 Pali iau i uka ma ga ratea tara maki hale ge bele ne huriki a Israel o na sipsip a bulmakau ne ria.’ Muri bara o matakilaka vona ra naro e BAKOVI DAGI i ratea ne huriki a Egipto, i uka ma ge ratea ne huriki a Israel.
EXO 11:8 E huriki a bolekori vomu bara ri valai, ri lolu na matagu ri ta maea, o vano ngane! Ioe turane huriki a viri vomu, mu vano malaviriri! Ra vuranga nga ge bele taro, muri iau ga pea e Egipto.” E Moses i madihi hateka a hatena, i pea e Parao, i pagitala.
EXO 11:9 Muri e BAKOVI DAGI i takia e Moses, “E Parao i uka ma ge longo mai ioe, ga rata tabu ranga nivakasiri na robo e Egipto.”
EXO 11:10 A maka nivakasiri nga, e Moses e Aron ru rata na matane Parao. Pali e BAKOVI DAGI i ratea i gigitora, i uka ma i ngaru e huriki a Israel ri gi vano.
EXO 12:1 Na tahuna e Moses e Aron ru tababana o Egipto, e BAKOVI DAGI i taki rua,
EXO 12:2 “Ra keva iea, a mugana keva na pida.
EXO 12:3 O taki e huriki a Israel, na ravuluna parava na keva iea, a bakovi takutaku ge lavea tara tuna sipsip ge kania a kabu vona.
EXO 12:4 A kabu kiroko, i uka ma i kara ge kani kiria a tuna sipsip, ge takia tara kabu i made tabukoi ge valai ge kani turana. E huriki a bakovi, a ngatavine, a koma ri gi vaveru kamumu a bobona, ri gi kani.
EXO 12:5 Mu vulaki a sipsip a toga o a meme a toga gavutuvutu, a pida vona ge taku, pali naha ni lave a viri i tahoka a gilanga.
EXO 12:6 A maka sipsip a bulmakau ni gi matakari kamumu ge harena na parava ge ravulu a polona i va na keva iea. Na malunga liu, e huriki a Israel ri gi rabalaki a maka tuna sipsip.
EXO 12:7 A darana sipsip ni gi bole, ni gi kalu varago a dahana mataruma, a tabeke polomeli na mataruma.
EXO 12:8 Na rodo iea mu gutu na kanono a maka tuna sipsip turana a lahia lahaha, mu kani kinika na bret i uka is.
EXO 12:9 Naha ni hoda a bobona sipsip a bulmakau, naha ni nono na ulo. Mu gutu kunana na kanono a mapana, a vahana, a mahalana.
EXO 12:10 Naha ni ru ranga bobona sipsip a bulmakau ge palala taho a hini. A bobona mu kani kaleva, mu gutu ge vuro lobo liu.
EXO 12:11 Na tahuna mu kani, mu rea tata a varakia ne mua, mu rodo a vahapolo, mu nugu a kodo na nilaho. Mu kani malaviriri, a vuhuna ra kinani iea ne vona ni luhoi a parava iau e Bakovi Dagi a pagepolo mua, i uka ma a ratapile mua.
EXO 12:12 “Na rodo iea ga lakea na tabeke lobo ne Egipto, ga rabalaki e huriki a tabua bakovi, a tabua toga na sipsip, a bulmakau. Iau kunana e BAKOVI DAGI, bara ratapile a maka vure ne huriki a Egipto.
EXO 12:13 Ra dara mu kalu na mataruma ne mua ge tabuli ga kilakila ne mua. Na tahuna a matai a dara mu kalu na mataruma, bara pagepolo a ruma ne mua. Ra vuranga iea i uka ma ge padoi mua na tahuna a ratapile e huriki a Egipto.”
EXO 12:14 Muri a Vure i ta maea, “Mu luhoi vaka­roroa ra parava iea na maka nivakasiri a rata ne mua. Na pida lobo e huriki a hamone mua, ria ranga, bara ri luhoi mulea a parava iea. Ra parava iea, a parava ne BAKOVI DAGI.
EXO 12:15 Na parava ge polorua mu kani a bret i uka ma ni vuli turana is. Na mugana parava mu vuroki a is i tabuli na ruma ne mua. E rei a viri i kani a bret i tahoka a is na parava nga, ni gi lili tala na kabu ne Israel.
EXO 12:16 Na mugana parava, na poloruana parava mu vapopo palupu mu vasileki. Naha ni leho vona a parava i rua nga, mu kisi puru kunana a kinani ge kani e huriki.
EXO 12:17 “Na pida lobo mu luhoia ra Parava Dagi na Bret i Uka Is, a vuhuna a vakamariu tala mua o Egipto na parava iea.
EXO 12:18 Na mugana keva mu kani a bret i uka is. Mu vakatubu na malunga na parava na keva i ravulu a polona i va, ge harena na malunga na parava na keva i ravulu rua a polona i taku.
EXO 12:19 Na parava ge polorua nahea a is ge tabuli na ruma mua. A viri i kani a bret i tahoka is, mu lili talea na kabu ne Israel. A mosi tara mu rata mavongea.
EXO 12:20 Na tahuna mu made na hini vai, na parava iea, naha ni kani a bret i tahoka a is.”
EXO 12:21 E Moses i gale palupu e huriki a gare ne Israel i taki ria, “Mu hamule mu vulaki a tuna sipsip na kabu takutaku, mu rabalaki ne vona a Habu na Nipagepolo.
EXO 12:22 Mu guru dili na tavila a dara. Mu putu a rahana kai a hisop, mu lutu na dara i tabuli na tavila, mu kalu varago a dahana mataruma, a hini polomeli na mataruma. Mu made pololilo na ruma ge harena na hatelanga.
EXO 12:23 E BAKOVI DAGI bara i lakea na tabeke lobo ne Egipto ge rabalaki e huriki a koma bakovi, a tabua. Na tahuna i matai a dara na mataruma ne mua, bara i pagepolo. I uka ma ge rudua a agelo vona ge dili na ruma ge ratapile mua.
EXO 12:24 “Mu longo kamumu! Ra nita nga ge tabuli vakaroro turane mua, turane huriki a hamone mua.
EXO 12:25 Na tahuna mu dili vona a malala e BAKOVI DAGI i ta muholi vona ge habia ne mua, mu ratea a habu iea, mu luhoi mulea a parava iea.
EXO 12:26 Na tahuna e huriki e tune mua ri gi nana, ‘I navai a vuhuna ra habu iea?’
EXO 12:27 Mu koli mu ta maea, ‘Si ratea a Habu na Nipagepolo iea, si habi a nihabi ne Bakovi Dagi, a vuhuna si luhoi mulea a parava i pagepolo a ruma ne hita, i rabalaki e huriki a koma bakovi, a tabua, ne Egipto.’” Muri ri lolu puru ri kavurikea a Vure.
EXO 12:28 E huriki a Israel ri rata lobo a maki e BAKOVI DAGI i taki e Moses e Aron ru gu rata.
EXO 12:29 Na kururodo e BAKOVI DAGI i rabalaki e huriki a tabua bakovi ne Egipto. I vakatubu na tabua ne Parao i harena na tabua ne huriki a vorakato. A tabua a toga na maka bulmakau a sipsip, ngi ranga i rabalaki.
EXO 12:30 Na rodo iea kunana, e Parao turane huriki a bolekori vona, e huriki a Egipto, ri hadongo ri matai e huriki a tabua bakovi ri mate. Na tabeke lobo ne Egipto e huriki lobo ri rata runga, a vuhuna a ruma takutaku i tahoka a matenga.
EXO 12:31 Na rodo iea kunana, e Parao i gale e Moses e Aron i taki rua, “Muru vano malaviriri turane huriki a Israel, mu pe mule e huriki a viri nau. Mu vano mu kavurikea e BAKOVI DAGI, i manga a ngava mu taki iau vona.
EXO 12:32 Mu bole a maka sipsip, a meme, a bulmakau mu vano. Iau tara mu vasileki na Vure ge rata kamumu iau.”
EXO 12:33 E huriki a Egipto ri turahari e huriki a Israel ri gi vano, ri ta maea, “Mu vano malaviriri, ma ge uka, mia lobo mi gi mate.”
EXO 12:34 Lakea e huriki a Israel ri bole a bret i uka ma ni vuli turana is, ri ru na tavila ri kavitagu na kala, ri kaloho, ri vano.
EXO 12:35 Ri nongi ne huriki a Egipto a maka varakia, a maki ni rata na gol a silva, i ramaia a nitane Moses i taki ria vona.
EXO 12:36 E BAKOVI DAGI i rata e huriki a Egipto ri habi tavula a maka mahala ne ria. Na naro iea kunana e huriki a Israel ri bole lobo a mahala ne Egipto.
EXO 12:37 E huriki a Israel ri malaga o Rameses ri lakea o Sukot. E huriki ri mariu ri ala 600,000, a ngatavine a koma i uka ma ni gi.
EXO 12:38 E huriki i uka ma ria a Israel ranga ri dili turane ria ri vano turana a maka sipsip a bulmakau ne ria.
EXO 12:39 Na tahuna ri gutu a bret ri gi bole turane ria, i uka ma ri vuli turana is, a vuhuna e huriki a Egipto ri turahari ria, i uka ma ri kisi kamumu a kinani.
EXO 12:40 E huriki a Israel ri made na pida i 430 na robo e Egipto.
EXO 12:41 Muri na pida i 430, na parava iea kunana, e huriki a tara ne BAKOVI DAGI ri pe a robo e Egipto, ri mariu tala.
EXO 12:42 Na rodo iea kunana e BAKOVI DAGI i matakari kamumu e huriki a Israel, i bole tala ria o Egipto ri vano. Na pida lobo e huriki a hamone ria ri gi luhoi mulea ra rodo iea, ri gi kavurikea e BAKOVI DAGI.
EXO 12:43 E BAKOVI DAGI i taki e Moses e Aron, “A vinara na Habu na Nipagepolo i maea, ‘E huriki a mosi nahea ri gi kani na habu.
EXO 12:44 A vorakato ni kona i kara ge kani na habu, na tahuna ni pala pali a kulina.
EXO 12:45 A viri i made popote turane mua, a viri i leho ni gi kona, nahea ge kani na habu.’
EXO 12:46 “E huriki ri kani a tuna sipsip ri gi kani palupu kunana na ruma ni gutu a kinani vona. Naha ni bole tala ranga bobona. Naha ni raputu ranga tuhana.
EXO 12:47 E huriki a Israel ri gi rata palupua a habu iea.
EXO 12:48 “A bakovi basi i made turane mua i ngaru ni dili na Habu Nipagepolo ne BAKOVI DAGI, ni gi pala taro a kulina. Muri bara i manga a tahotanga, i dili na habu. A viri i uka ma ni pala a kulina, nahea ge kani na habu.
EXO 12:49 A vinara i taku kunana ge ramai e huriki a tahotanga e huriki a mosi ra ri made turane mua.”
EXO 12:50 E huriki a Israel ri ramai kunanea a vinara e BAKOVI DAGI i taki e Moses e Aron vona.
EXO 12:51 Na parava iea kunana e BAKOVI DAGI i vakamariu tala o Egipto e huriki a Israel.
EXO 13:1 E BAKOVI DAGI i takia e Moses,
EXO 13:2 “E huriki a Israel ri gi habi lobo nau e huriki a tabua bakovi, turana a tabua toga na maka sipsip a bulmakau.”
EXO 13:3 Muri e Moses i taki e huriki, “Na pida lobo mu luhoi mule vakaroroa a parava iea, naha ni kani a bret i vona is. Ra parava iea e BAKOVI DAGI i tuli tala mua o Egipto, a tanga na nivakavora. Na nitora vona kunana i vakamariu tala mua.
EXO 13:4 Mona na keva e Abib mu malaga koea. Ra keva iea a mugana keva na pida.
EXO 13:5 E BAKOVI DAGI i ta tora pali ge habia ne mua a malala ne huriki a Kenan, a Hiti, a Amor, a Hivi, a Iebus. Ra malala iea i kamumu, i vona a maki ni kani. Na tahuna e BAKOVI DAGI ge taparaki lakea mua vona a malala iea, mu ratea a habu iea, na keva iea, na pida lobo.
EXO 13:6 “Mu kani a bret i uka is na parava ge polorua. Na poloruana parava mu rata a habu ne BAKOVI DAGI.
EXO 13:7 Na maka parava nga, e huriki ri gi kani kunana a bret i uka is. Nahea tara maki ge tahoka a is ni gi matai ge tabuli tabukoi o ge tabuli na tabeke ne mua.
EXO 13:8 Na tahuna a habu iea ge bele, mu vakalongo e huriki e tune mua mu ta maea, ‘A habu iea si ratea, si luhoi mulea a tahuna e BAKOVI DAGI i vakamariu tala mia o Egipto mi valai.’
EXO 13:9 Ra habu iea i manga a kilakila na limane mua, na dumene mua. Bara i rata mua mu luhoi, mu vata vona a vinara ne BAKOVI DAGI, a vuhuna na nitora dagi vona i vakamariu tala hita o Egipto.
EXO 13:10 Na pida lobo mu ratea a habu iea na parava iea.
EXO 13:11 “Na tahuna e BAKOVI DAGI ge taparaki mua na malala e Kenan i habia ne mua, ra i ta muholi vona hosi ne huriki a gare ne mua,
EXO 13:12 mu habi vona e huriki e tune mua a tabua bakovi, a tabua toga na sipsip a bulmakau.
EXO 13:13 Na tahuna mu ngaru ni konamulea tara tuna tabua na donki a toga, mu kuloia vona tara tuna sipsip. Ge uka, mu horia a lohona donki. Pali e huriki a tabua bakovi ne mua mu kona mule.
EXO 13:14 “Muri ma, e huriki e tune mua bara ri nana, ‘I navai a vuhuna a naro iea?’ Mu koli mu ta maea, ‘E huriki a Egipto ri vakavora hateka mia na robo ne ria, pali e BAKOVI DAGI, na nitora dagi vona, i tuli tala mia mi valai.
EXO 13:15 Na tahuna e Parao i hehe i uka ma i ngaru mia mi gi vano, e BAKOVI DAGI i rabalaki e huriki a tabua bakovi, a maka tabua na sipsip a bulmakau, a toga ne huriki a Egipto. Ngane si luhoi mulea a naro i ratea ne mia, si habi e huriki a tabua bakovi turana a maka tabua toga na sipsip a bulmakau ne BAKOVI DAGI. Na naro iea kunana mi korimule e huriki e tune mia a tabua bakovi.
EXO 13:16 Si ratea a naro iea si gi luhoi tabua e BAKOVI DAGI i bole tala mia o Egipto i vakamariu valai mia koea na nitora vona. Ra nita iea i manga a kilakila ni topi na limane hita na dumene hita.’”
EXO 13:17 Na tahuna e Parao i longo vona e huriki a Israel ri gi vano, a Vure i uka ma i vakasiri ria vona a dala kapo tabukoi na dari i sike na robo e Palestina. I rata mavonga a vuhuna i luhoi maea, “Ma ri gi vakorokoro e huriki a kabu ranga, ri gi vaubi turane ria, bara ri mangenge, ri hamule tabu o Egipto.”
EXO 13:18 Lakea a Vure i bole ria, ri laho halui a tabeke i ngeki, ri vano ri bele na Dari Vururu. Na tahuna ri mariu tala o Egipto, ri bole a maki na vabinga ri vano.
EXO 13:19 E Moses i bole a tuhane Iosep i vano turana, a vuhuna hosi e Iosep i taki e huriki a Israel i ta maea, “Muholi hateka, muri ma na tahuna a Vure ge vakamariu tala mua o Egipto, mu bole a tuhagu mu vano turana.”
EXO 13:20 Muri ri malaga tala na tanga e Sukot ri vano ri bele na tanga e Etam na harena tabeke i ngeki.
EXO 13:21 Na haro e BAKOVI DAGI i made pololilo na bubu, i muga ria i vakasiri ria na dala. Na rodo i made pololilo na kanono, i muga ria ge habi a nipara.
EXO 13:22 Na haro a bubu i muga ria, na rodo a kanono i muga ria.
EXO 14:1 Muri e BAKOVI DAGI i takia e Moses,
EXO 14:2 “O taki e huriki a Israel ri gi hamule, ri gi rata a mada tabukoi na tanga e Pihahirot. Ra tanga iea i pesi na kurukuruna tanga e Migdol, a Dari Vururu, tabukoi na tanga e Balsepon.
EXO 14:3 E Parao bara i luhoi e huriki a Israel ri ruru na tabeke i ngeki, i uka hini ri gi lakea vona.
EXO 14:4 Iau ga ratea e Parao ge madihi a hatena ge lili ria. Pali iau bara ratapilea turana a tara na vabinga vona, ga vakadagia a ragu na maki a ratea vona. Muri e huriki a Egipto bara ri lohoka vona, iau kunana e BAKOVI DAGI.” E huriki a Israel ri longototoa a nitane Bakovi Dagi, ri hamule.
EXO 14:5 Na tahuna e Parao ni vakalongo ne huriki a Israel ri ha, e Parao turane huriki a bolekori vona ri pulo a niluhoi ne ria, ri deke, ri ta maea, “I navai si matataro e huriki a Israel ri vano? Ngane i uka viri ge leho ne hita.”
EXO 14:6 Lakea e Parao i bolea a karis vona, i gale palupu a tara na vabinga vona.
EXO 14:7 I vulaki a maka vagana karis i 600 ne Egipto, turane huriki ri vakanunu ria.
EXO 14:8 E BAKOVI DAGI i ratea e Parao a hariki o Egipto i gigitora, i nunu muri ne huriki a Israel, i matakana ria. Pali e huriki a Israel ri lohoka vona pali, ri mulangi, ri vivi ri vano.
EXO 14:9 A tara na vabinga ne Egipto turana a maka hos a karis, ri nunu muri ne huriki a Israel. Ri pakarau ria na tahuna ri malo na dahana Dari Vururu, tabukoi na tanga e Pihahirot e Balsepon.
EXO 14:10 Na tahuna e Parao turana a tara na vabinga vona ri valai tabukoi, e huriki a Israel ri matai ria, ri mangenge hateka, ri galea e BAKOVI DAGI ge tuhori ria.
EXO 14:11 Lakea ri tahatea e Moses, “I navai o tuli valai mia koea na tabeke i ngeki? O luhoi e huriki a Egipto ri uka a hini ri gi tanu e huriki ri mate vona, o bole valai mia koea na tabeke i ngeki mi gi mate? I kamumu hateka mi gi made o Egipto mi gi mate vonga.
EXO 14:12 Na tahuna si tababana o Egipto, mi taki ioe nahea si gi ha, si gi made vonga ge hita a vorakato ne ria. Ngane i hale hateka si gi mate tavula koea na tabeke i ngeki.”
EXO 14:13 Lakea e Moses i taki ria, “Naha ni mangenge. Mu hatenono, bara mu matai a maki e BAKOVI DAGI ge rata ge korimule mua. E huriki a Egipto mu matai mona, muri i uka ma mu gu matai tabu ria.
EXO 14:14 E BAKOVI DAGI bara i vaubi ni tuhori mua. Pali mua i uka ma mu gu ratea tara maki, bara mu matanono kunana.”
EXO 14:15 Muri e BAKOVI DAGI i takia e Moses, “I navai o tangi valai nau? O taki e huriki a Israel ri gi malaga ri gi laho.
EXO 14:16 O toto rikea a kodo vomu o toto langa na dari, ge vakalipida na tabeke ge rua, ge lahopolo na mahasi e huriki.
EXO 14:17 Iau ga rata e huriki a Egipto ge madihi a hatene ria, ri gi valili ne mua a Israel. Muri ga ratapilea e Parao turana a tara na vabinga vona ra ri rike na karis a hos. A maki ga ratea bara vakadagi a ragu vona.
EXO 14:18 Ga ratapilea e Parao, muri e huriki a Egipto bara ri matakilaka nau, iau kunana e BAKOVI DAGI.”
EXO 14:19 Muri a agelo na Vure ra i muga a tara na vabinga ne Israel, i pe a hini muga i lukumuri na bitone ria. A bubu tara i pe a hini muga i pesi muri.
EXO 14:20 Na rodo malaku, a bubu i pesi mavonga na kurukuruna tara ne Israel, a tara ne Egipto. Ra bubu i ratea a tabeke i pesi vona e huriki a Egipto i uvo hateka, pali a tabeke i pesi vona e huriki a Israel i palala. Lakea e huriki a Egipto i uka ma ri lakea tabukoi ne huriki a Israel.
EXO 14:21 Muri e Moses i toto langa na dari a limana. Na rodo e BAKOVI DAGI i ratea a vilu dagi i pori valai na nirikena haro, i tugu mulea a dari i vakalipida na tete i rua.
EXO 14:22 Lakea e huriki a Israel ri laho polo na tabeke i mahasi na kurukuruna. A dari i pesi manga a nure na kanene ria, na maurine ria.
EXO 14:23 E huriki a Egipto ri nunu muri ne ria, turane huriki ri rike na hos a karis, ri dili na kurukuruna dari.
EXO 14:24 Na malabeonga e BAKOVI DAGI i made na bubu a kanono, i matapuru na tara na vabinga ne Egipto i vakaviliha a niluhoi ne ria, ri varoru.
EXO 14:25 I rata a maka parere na karis i koro vona a kokota, ri keri ni nunu. Lakea ri ta maea, “Si hamule! E BAKOVI DAGI i tuhori e huriki a Israel ri vaubi ne hita. Si ha malaviriri, si pe mule ria.”
EXO 14:26 Muri e BAKOVI DAGI i takia e Moses, “O toto langa na dari a limamu ge hamule mai a murina a dari, ge kavitagu e huriki a Egipto turana a maka karis a hos ne ria.”
EXO 14:27 Lakea e Moses i toto langa na dari a limana. Na hatelanga a dari i hamule mai a murina. E huriki a Egipto ri toni ni ha, pali ri keri, lakea e BAKOVI DAGI i vakapasiri ria, ri mate.
EXO 14:28 A dari i hamule mai a murina i kavitagu e huriki a tara na vabinga ne Parao, turana a maka karis a hos ne ria, ra ri nunu muri ne huriki a Israel, i uka tara viri ge mahuri.
EXO 14:29 Pali e huriki a Israel ri laho polo na hini i mahasi, ri bele na tabeke tara. A dari i pesi manga a nure na kanene ria, a maurine ria.
EXO 14:30 Na parava iea kunana e BAKOVI DAGI i korimule e huriki a Israel na limane huriki a Egipto. E huriki a Israel ri matai a maka podane huriki a Egipto ri vatabulihi na lavu na Dari Vururu.
EXO 14:31 Na tahuna e huriki a Israel ri masia a nitora dagi ne BAKOVI DAGI i rata virihi e huriki a Egipto vona, ri mangenge ne BAKOVI DAGI ri longototoa turana a vora vona e Moses.
EXO 15:1 Muri e Moses turane huriki a Israel ri kaloloa a linge, ri kavurikea e BAKOVI DAGI: “Si gi kaloloa a linge ge longoa e BAKOVI DAGI, a vuhuna a nitora vona i dagi hateka. I voro puru na dari a hos turane huriki ri rike ne ria.
EXO 15:2 E BAKOVI DAGI i vakatora mia, i rata mia mi kalolo. I korimule mia. Ia a Vure ne mia si gi kavurikea, ia a Vure ne tamane mia si gi kavurikea a rana.
EXO 15:3 E BAKOVI DAGI i gao hateka na vabinga; a rana e BAKOVI DAGI.
EXO 15:4 I taribubu a maka karis, a tara na vabinga ne Parao. E huriki a vagana ubu ne Parao ri pasiri na Dari Vururu.
EXO 15:5 A bokona dari i rere tagu ria; ri pasiri na utu manga a kedo.
EXO 15:6 “BAKOVI DAGI, a limamu a kanemu i gao hateka, i ratapile e huriki a pile.
EXO 15:7 Na nitora dagi vomu o ratapile e huriki ri marikoi ioe. A rongova vomu i gutu manga a kanono; i gutu e huriki i manga a kanono i rungani a lulu.
EXO 15:8 A bangomu i manga a vilu dagi, i ratea a dari i rere, i vakalipopo, i gatuka, i pesi manga a nure.
EXO 15:9 “A pile i bibi i ta maea, ‘Ga valili, ga nugutata ria. Ga bole ga veru a maka mahala ne ria; a maki a ngaru ni bole bara bole kunana. Ga lalu talea a bainat nau ga rabalaki ria.’
EXO 15:10 Pali ioe o bango tala balaka taku kunana, a dari i kavitagu ria. Ri pasiri puru na lilodari manga a kedo.
EXO 15:11 “BAKOVI DAGI, i uka tara vure ge manga ioe. Ioe a hariki dagi, o malamala hateka, a nitora vomu i dagi hateka. A bagetua vomu i kamumu hateka. O rata a maka nivakasiri, e huriki ri turutu, ri mangenge.
EXO 15:12 O toto tala a limamu a kanemu, lakea a malala i mapuka, i todo ria.
EXO 15:13 “O dodo mia, o kori mia o vakasiri mia na dala. Na nitora vomu o rupolo mia na tanga kamumu vomu.
EXO 15:14 E huriki bara ri longoa a velengana maki i bele, ri mangenge hateka. E huriki a Palestina ranga ri mangenge.
EXO 15:15 Nimariu E huriki a matakari o Idom ri mangenge hateka, e huriki a ubu na tara o Moab i vakulu a tagane ria, a nitora ne huriki a Kenan i lobo tavula.
EXO 15:16 Nimariu Ri masia a nitora dagi vomu, ri mangenge, ri keri ni ratea tara maki. Ri pesi tavula kunana manga a kedo, i harena ne huriki a viri vomu ri vano. BAKOVI DAGI, ioe kunana o bole tala mia o Egipto, ngane mi laho malimali.
EXO 15:17 Nimariu O taparaki valai mia koea, mi gi made kamumu na lolo vomu, na tabeke o hae a roho vomu vona.
EXO 15:18 Nimariu BAKOVI DAGI, a nimatakari vomu i tabuli vakaroro.”
EXO 15:19 A Dari Vururu i mahasi, lakea e huriki a Israel ri laho polo. Muri e BAKOVI DAGI i ratea a dari i hamule mai a murina, i kavitagu a tara na vabinga ne Parao, turana a maka karis a hos ne ria.
EXO 15:20 Muri e Miriam, a propet ngatavine, e kurabane Aron, i bolea a kude i kalolo i raulo turane huriki a ngatavine.
EXO 15:21 E Miriam i kaloloa a linge iea, “Si gi kalolo lakea ne BAKOVI DAGI a linge, a vuhuna i mulangi na vabinga dagi. I voro puru na dari a maka hos turana e huriki ri rike ne ria.”
EXO 15:22 Muri e Moses i muga ne huriki a Israel ri pea a Dari Vururu, ri laho na parava i tolu lakea na tabeke i ngeki ne Sur, i uka ma ri masia tara naru.
EXO 15:23 Na tahuna ri bele na tanga e Mara, i uka ma ri nua a naru vona, a vuhuna i nami hurari.
EXO 15:24 Lakea e huriki ri tahatea e Moses, “A ra mi gi nua ngane?”
EXO 15:25 Muri e Moses i vasileki ne BAKOVI DAGI, lakea e BAKOVI DAGI i vakasiria vona tara rahana kai. I bolea a rahana kai i voro puru na naru, i nami kamumu a naru. Na tanga iea e BAKOVI DAGI i habia ne huriki a Israel tara vinara ge toni ria vona ri gi ramaia o ge uka.
EXO 15:26 I taki ria, “Mu longo kamumu a nitagu. Iau e BAKOVI DAGI a Vure ne mua. A vakamahuri mua na gilanga. Mu longototo iau, mu rata a naro ge kamumu, mu ramai a maka vinara, a nitovo nau, i uka ma ga ratapile mua na maka gilanga, i manga a hini a rata ne huriki a Egipto.”
EXO 15:27 Muri e huriki a Israel ri vano ri bele o Elim. Ra tanga iea i tahoka a naru i ravulu a polona i rua, a kai a det i ravulu polorua (70). Lakea ri hae vonga a kape ne ria tabukoi na naru.
EXO 16:1 A keva i rua, a parava i ravulu a polona i lima i polo na tahuna ri pea pali e Egipto, ngane e huriki a Israel ri pea e Elim. Ri vano ri bele na tabeke i ngeki ne Sin, na koropalane Elim e Sinai.
EXO 16:2 Na tahuna ri made na tabeke i ngeki, ri deke ne Moses e Aron.
EXO 16:3 Ri ta maea, “I kamumu hateka mi gi mate na limane BAKOVI DAGI o Egipto! Na tahuna mi made vonga mi kani a kinani legelege, mi maru. Pali marua muru tamitala valai mia koea, muru ngaru mia lobo mi gi mate na vitoloa na tabeke i ngeki.”
EXO 16:4 Muri e BAKOVI DAGI i takia e Moses, “Iau ga vakaboru valai na hunu a bret. Mu bole, mu kani. Na parava takutaku e huriki ri gi vano ri gi leba. Ga toni ria vona a naro iea, ri gi longototo a nitagu, o ge uka.
EXO 16:5 Na polotarana parava ri gi leba ne vona a parava ge rua.”
EXO 16:6 Lakea e Moses e Aron ru gale palupu e huriki a Israel ru ta maea, “Na malunga bara mu lohoka vona e BAKOVI DAGI, ra i bole tala mua o Egipto,
EXO 16:7 bara mu masia a nipara vona na hatelanga, a vuhuna mu deke hateka vona. Ra maria, maria a bakovi tavula, pali i navai mu deke valai ne maria?”
EXO 16:8 E Moses i ta tabu i ta maea, “Na malunga e BAKOVI DAGI ge habi a kania ne mua, na hatelanga ge habi a bret ne mua, a vuhuna i longoa pali a nideke ne mua. Ra maria, maria e rei muholi? Ra mua, i uka ma mu deke ne maria, mu deke ne BAKOVI DAGI.”
EXO 16:9 Muri e Moses i takia e Aron, “O taki e huriki ri gi valai tabukoi ne BAKOVI DAGI, a vuhuna i longoa pali a nideke ne ria.”
EXO 16:10 Na tahuna e Aron i ta, e huriki a Israel ri mata lokovonga na tabeke i ngeki ri masia a nipara ne BAKOVI DAGI i parai a bubu.
EXO 16:11 Lakea e BAKOVI DAGI i takia e Moses,
EXO 16:12 “A longoa pali a nideke ne huriki a Israel. O vano o taki ria, na malunga bara ri kani a kania, na hatelanga bara ri kani a bret. Muri bara ri lohoka vona, iau kunana e BAKOVI DAGI, a Vure ne ria.”
EXO 16:13 Na malunga a maka kadirovo ri bebe valai ri toka viliha na mada. Na hatelanga a simuru i vakamea a dahana mada.
EXO 16:14 Na tahuna a simuru i malaharere, a maka maki i keakea ri tabuli viliha na tabeke i ngeki.
EXO 16:15 Na tahuna e huriki a Israel ri matai a maki nga, ri vanana, “A ra maki nga?” Lakea e Moses i taki ria, “Ra maki nga a bret, e BAKOVI DAGI i habi mu gu kani.
EXO 16:16 E BAKOVI DAGI i vakuku maea, ‘A bakovi ge tahoni na ningaru vona a bret ge kani a kabu vona, a ulo kiroko na bret ge taku ne vona a viri ala taku, ge vakanakana e huriki ri made na kape vona.’”
EXO 16:17 E huriki a Israel ri rata manga a hini i taki. Ri bole kupo hateka ranga, ri bole popote ranga.
EXO 16:18 Pali muri ri veru kamumu a bret. E huriki ri poi i kupo, ri kani, pali i uka kalavana ge tabuli mule. E huriki ri poi i popote, ri kani, ri maru. E huriki lobo ri poi, i kara ria.
EXO 16:19 Muri e Moses i taki ria, “Naha ni ru mule ranga bret mu gu kani kuduvi.”
EXO 16:20 Pali e huriki ranga i uka ma ri longo mai a nitane Moses, lakea ri ru here ranga bret ne vona a hini kuduvi. Na hatelanga, a maka bret ri mavuru, i pidi ne ria a mata kiroko. Lakea e Moses i tahate ria.
EXO 16:21 Na hatelanga lobo e huriki ri bole a bret na ningaru ne ria. A bakovi i taku i tahoni vona a bret na ulo kiroko i taku. Na tahuna a haro i hera a maka bret, ri malaharere tavula.
EXO 16:22 Na polotarana parava ri bole kadolu a bret ne vona a parava i rua. A bakovi i taku i tahoni na ulo kiroko i rua a bret vona. E huriki a matakari ne Israel ri vakalongo e Moses vona a maki ri rata.
EXO 16:23 Muri e Moses i taki ria, “Kuduvi, a Parava Nimalo, ni gamai ne BAKOVI DAGI. A maki ni kani mu ngaru ni gutu o nono, mu gutu mu nono ngane. A maki ni kani ranga ri tababana, ngi ranga mu ru ne vona a hini kuduvi.”
EXO 16:24 Ri ramai a nitane Moses, ri gutu a maki ni kani, ri ru kamumu ranga ne vona a parava muri. Ra maki ni kani nga i uka ma ri mavuru, ge pidi ne ria a mata kiroko.
EXO 16:25 Na parava muri e Moses i taki ria, “Mu kani a maki mu kani kaleva ravi. Mona a Parava Nimalo ne BAKOVI DAGI, i uka ma mu gu matavisi na malala ranga bret.
EXO 16:26 Na parava i polotara mu bole a bret, pali na poloruana parava, a Parava Nimalo, a bret i uka ma ge boru valai na hunu.
EXO 16:27 Pali ranga e huriki ri vano ta ri gi bole a bret, pali i uka ma ri matavisi.
EXO 16:28 Lakea e BAKOVI DAGI i takia e Moses, “Balaka riva mu marikoi ni longo a nitagu, mu gu ramai a vinara nau?
EXO 16:29 Mu longo kamumu, iau e BAKOVI DAGI a habia ne mua a Parava Nimalo. A rata mavonga, a vuhuna na polotarana parava a habi a maki ni kani ne vona a parava i rua. Na poloruana parava mua lobo mu gu made na kape ne mua. Nahea tara viri ge laho viliha.”
EXO 16:30 Lakea e huriki ri malo vona a poloruana parava.
EXO 16:31 E huriki a Israel ri galea a bret iea a mana. Ra maki iea i keakea i manga a kanena kai tara. I nami manga a bisket ni kani turana a ame.
EXO 16:32 Muri e Moses i taki ria, “E BAKOVI DAGI i taki mua mu gu bolea a ulo kiroko, mu gu tahoni a mana vona, ge tabuli ni gi vakatungu e huriki a hamone mua vona. Muri ma, bara ri masia a bret e Bakovi Dagi i habia ne mua, na tahuna i vakamariu tala mua o Egipto, i tuli valai mua koea.”
EXO 16:33 Muri e Moses i takia e Aron, “O bolea tara ulo kiroko o tahoni vona a mana. O ru na ngalane BAKOVI DAGI, muri ma e huriki a hamone hita bara ri masia.”
EXO 16:34 Lakea e Aron i bolea a ulo kiroko i tahoni ranga mana, i ru tabukoia na tava ni ru a vinara na Vure vona. I ramaia a ngava e BAKOVI DAGI i takia e Moses vona.
EXO 16:35 E huriki a Israel ri kani kunana a mana na pida i ravulu va, i harena na tahuna ri bele na nagi na malala kamumu e Kenan.
EXO 16:36 (Na tahuna iea ri tahoka a ulo ni matai a mavana maki vona. I tara i manga a ulo kiroko. I tara i manga a ulo kiroko i ravulu ni ru vapopo.)
EXO 17:1 E huriki a Israel ri ramai a nitane BAKOVI DAGI, ri pea a tabeke i ngeki e Sin. Na tahuna e Bakovi Dagi i taki ria ri gi vano, bara ri malaga ri vano. Ri vano ri bele na tanga e Repidim, ri rata a mada, pali ra tanga iea i uka naru.
EXO 17:2 Lakea ri tahatea e Moses ri ta maea, “O matakanea ngane a naru mi gi nua!” E Moses i koli, i ta maea, “I navai mu tahate iau? Mu ngaru ni toni a nitora ne BAKOVI DAGI?”
EXO 17:3 Pali e huriki ri mate na marohua, ri deke lakea ne Moses, ri ta maea, “Ge ra o tuli tala mia o Egipto? O ngaru mi gi mate turane huriki e tune mia, a sipsip a bulmakau ne mia?”
EXO 17:4 Muri e Moses i vasileki ne BAKOVI DAGI i ta maea, “A ra ga rata virihi ria vona e huriki nga? Ri tahate hateka, ri ngaru ni padimate iau na kedo.”
EXO 17:5 Lakea e BAKOVI DAGI i takia e Moses, “O laho muga o taki e huriki a gare ne Israel ri gi laho turamu. O bolea a kodo, ra o lagu e Nail vona, o vano.
EXO 17:6 Iau ga pesi langa na kedo na lolo e Horeb, ga dava mua vonga. Na tahuna o valai tabukoi, o bolea a kodo vomu o ubia a kedo dagi, ge bele a naru ge ninu e huriki a viri vomu.” E huriki a gare ri masia e Moses, i ubia a kedo dagi i bele a naru.
EXO 17:7 Ri galea a hini nga e Masa e Meriba, a vuhuna e huriki a Israel ri tahate, ri ta maea, “E BAKOVI DAGI i made turane hita, o i uka?” Na naro iea kunana ri ngaru ni tonia e BAKOVI DAGI.
EXO 17:8 Muri e huriki a Amalek ri valai ri vaubi turane huriki a Israel o Repidim.
EXO 17:9 Lakea e Moses i takia e Iosua, i ta maea, “O vulaki ranga bakovi ne hita. Kuduvi mu vano mu vaubi turane huriki a Amalek. Iau ga pesi langa na lolo, ga nugua a kodo na Vure.”
EXO 17:10 Lakea e Iosua i bole ranga bakovi, ri vano ri vaubi turane huriki a Amalek. E Moses turana e Aron e Hur to sike na lolo.
EXO 17:11 Na tahuna e Moses i toto rike a limana, e huriki a Israel ri vaubi kinigao. Pali na tahuna i totopuru a limana e huriki a Amalek ri vaubi kinigao.
EXO 17:12 Muri e Moses i malulu a limana, i uka ma i toto rike tabu. Lakea e Aron e Hur ru vakamade rikea na kedo. I pesi na dahana koea tara, i pesi na dahana lake tara, ru nugu rike a limana, i harena na haro i rolo.
EXO 17:13 Lakea e Iosua turane huriki a tara vona ri rangi, ri ratapile e huriki a tara ne Amalek.
EXO 17:14 Muri e BAKOVI DAGI i takia e Moses, “O herea na puhu a ngava iea ge luhoia e huriki, e Iosua tara ge longoa a ngava. A ngava i maea: iau ga vakalobo liu e huriki a Amalek, i uka ma ni gi luhoi mule tabu.”
EXO 17:15 E BAKOVI DAGI i ta lobo, lakea e Moses i ratea tara dede i galea, “E BAKOVI DAGI ia a Nivakasiri nau.”
EXO 17:16 Lakea e Moses i ta maea, “E huriki a Amalek ri gege a nitora ne Bakovi Dagi. I mavonga e BAKOVI DAGI bara i vaubi turane huriki a hamone ria vakaroro.”
EXO 18:1 Ngane e Ietro, a prister o Midian, e lahuane Moses, i longo a nuverei na maki a Vure i rata ne Moses turane huriki a Israel, na tahuna e BAKOVI DAGI i vakamariu tala ria o Egipto.
EXO 18:2 Na parava tara, i valai i gosia e Moses. Na tahuna i lakea pali, e Moses i rudua e girihina e Sipora i lakea ne tamana. Ngane e Ietro i talo mulea e Sipora,
EXO 18:3 turane tune Moses ala rua bakovi. A tabua a rane Gersom. Muga e Moses i ta maea, “Iau a mosi, a valai a made na robo basi.”
EXO 18:4 A koma bakovi tara a rana e Elieser. Muga e Moses i ta maea, “A Vure ne tata mai i tuhori iau, i korimule iau na limane Parao.”
EXO 18:5 E Ietro turane Sipora, e tune Moses ala rua ri lakea na tabeke i ngeki tabukoi na lolo na Vure, ra tabeke e Moses i rata a mada i made muga vona.
EXO 18:6 E Ietro i talo rike a ngava ne Moses i ta maea, “Iau e Ietro e lahuamu. Ngane a valai turane girihimu, e tumu bakovi ala rua.
EXO 18:7 Na tahuna e Moses i longoa a ngava iea i vano i tagui e Ietro na dala. E Moses i lolu puru na ngalane Ietro, i ngurua a garena. Ru vatagui lobo, muri ru dili na kape.
EXO 18:8 Lakea e Moses i vakalongo e Ietro vona a maki lobo e BAKOVI DAGI i rata ne huriki a Egipto, i tuhori e huriki a Israel. I vakalongo e Ietro vona a maka maregoa i bele ne ria na dala, na naro e BAKOVI DAGI i tuhori i matakari ria.
EXO 18:9 E Ietro i vivi na tahuna i longo a maka nuverei ne BAKOVI DAGI i rata, i korimule e huriki a Israel na limane huriki a Egipto.
EXO 18:10 Lakea i ta maea, “Ni gi kavurike a rane BAKOVI DAGI, i korimule mua na limane huriki a Egipto, na limane Parao.
EXO 18:11 Ngane a lohoka vona e BAKOVI DAGI i rangi a vure lobo, a vuhuna i matakari mua na tahuna e huriki a Egipto ri vakavora hateka mua.”
EXO 18:12 Ru tuverei lobo, lakea e Ietro i bole a maka nihabi gutu-vuro turana a nihabi ranga, i habi na Vure. Muri e Aron turane huriki a gare ne Israel ri valai ri kani a bret turane Ietro na matana Vure.
EXO 18:13 Na parava muri e Moses i made i talangaki a maka maregoa ne huriki a Israel. E huriki ri ngaru ni masia ri pesi haluia na hatelanga i harena na malunga.
EXO 18:14 E Ietro i matai a maki e Moses i rata ge tuhori e huriki, lakea i takia, “Ioe o rata hateka a leho ni tuhori e huriki. I navai ioe kunana o ratea a leho iea, na tahuna ri valai ri pesi halui ioe na hatelanga i harena na malunga?”
EXO 18:15 Lakea e Moses i koli, i ta maea, “Ri ngaru ni lohoka na maki a Vure i ngaru ri gi rata, lakea ri valai nau.
EXO 18:16 Na tahuna a bakovi ala rua ru tahoka a rongova na maki tara, bara ru valai nau, a pelekado rua, a vakalobo a rongova ne rua. Muri bara tovo rua na maka vinara na Vure.”
EXO 18:17 Lakea e Ietro i takia, “Ioe i uka ma o lohoka ni ratena a leho iea.
EXO 18:18 Ra leho iea i mava hateka vomu. Ioe kikeri i uka ma o kara ni ratena. Bara i vakamalulu a tuhamu.
EXO 18:19 O longo valai, ga taki ioe vona tara naro go ratea vona a leho vomu. Ioe o ramaia, a Vure bara i turamu. I kamumu hateka go vakalongo a nitana Vure ne huriki. A maka leho ranga, o habi ne ria.
EXO 18:20 Pali ioe, o tovo ria na maka vinara lobo na Vure. O taki ria vona a vinara ri gi ramai, a leho ri gi rata.
EXO 18:21 O vulaki a bakovi maratarata ri lohoka, ri ta muholi, ri ngaru a Vure, ge ria a bolekori. Ri gi matakari e huriki ge ala 1,000, ge ala 100, ge ala 10.
EXO 18:22 Re huriki nga, ge ria a bakovi ni pelekado a ngava. Ria kunana ri gi pelekado a maregoa kiroko. Pali a maka maregoa dagi ri gi taparaki valai vomu, o pelekado. Na naro iea kunana bara ri tuhori ioe, i uka ma go marego hateka.
EXO 18:23 O ramaia a ngava a taki ioe vona, a vuhuna a Vure kunana i ngaru ioe go ratea. Ioe bara o ramai a ngava nau, i uka ma ge malulu a tuhamu. Muri e huriki bara ri hamule na tanga ne ria ri vivi.”
EXO 18:24 E Moses i longo mai a ngava kamumu ne Ietro.
EXO 18:25 I vulaki e huriki a bakovi kamumu na lohokanga ne Israel, i ru ria a bolekori, ri matakari e huriki ala 1,000, ala 100, ala 10.
EXO 18:26 A leho ne ria ri longo a ngava na maregoa, ri pelekado. A maka maregoa kiroko ri pelekado. Pali a maka maregoa dagi ri bole lakea ne Moses i pelekado.
EXO 18:27 Muri e Moses i taloa e lahuana, i hamule mai a robo vona.
EXO 19:1 E huriki a Israel ri mariu tala o Repidim ri vano. Na mugana parava na toluna keva na tahuna ri pe e Egipto, ri bele na tabeke i ngeki ne Sinai, ri rata a mada tabukoi na lolo.
EXO 19:3 Muri e Moses i sike na lolo ge taguia e BAKOVI DAGI, lakea a Vure i galea, i takia, “O vakalongo e huriki a hamone Iakop, ra kabu ne Israel, vona a maka ngava nga.
EXO 19:4 Mu matai a maki a rata pali ne huriki a Egipto. A boko mua manga a loha i boko e tuna na karapana, a taparaki valai mua koea.
EXO 19:5 Mua bara mu longo mai iau, mu ramaia a ngava dagi nau, bara vulaki mua ge mua a tara nau. A maki lobo, e huriki lobo na malala, ria ranga ne nau.
EXO 19:6 A ngaru mua mu gu made malamala, ge mua e huriki a viri nau, mu gu rata a leho manga a prister. Ra ngava nga o vakalongo e huriki a Israel vona.”
EXO 19:7 E Moses i pea a lolo, i puru, i gale palupu e huriki a gare ne Israel, i taki ria vona a ngava lobo ne BAKOVI DAGI.
EXO 19:8 Ri ta palupu ri ta maea, “Mi gi rata a maki e BAKOVI DAGI i taki.” Muri e Moses i vano, i taki e BAKOVI DAGI vona a ngava ne huriki ri taki.
EXO 19:9 Lakea e BAKOVI DAGI i takia e Moses, “Iau ga made na bubu dagi ga valai vomu. E huriki ri gi longo iau a ta turamu, bara ri luhoi vakaroroa a nitamu i muholi.” Muri e Moses i taki e BAKOVI DAGI vona a maka ngava i taki e huriki.
EXO 19:10 E BAKOVI DAGI i takia e Moses, “O vano o taki e huriki, mona, kuduvi ri gi taki tala a naro hale ne ria, ri gi loi na naru a maka varakia ne ria.
EXO 19:11 Girira na toluna parava ri gi dava iau, ga puru valai na lolo e Sinai, ria lobo ri gi matai iau.
EXO 19:12 O ru haluia na lolo a nagi, o taki ria nahea a viri ge pagepoloa, ge sike na mapana lolo. A viri ge pagepoloa a nagi iea, bara ni rabalaki.
EXO 19:13 Pali nahea ni gi ubi na lima. Ni gi padimate na kedo o na maheto. A bakovi o a sipsip a bulmakau ge pagepoloa a nagi iea, i uka ma ge mahuri. I tahoka a parava bara mu sike valai na lolo, na tahuna mu longo a tavure i sidi.”
EXO 19:14 Lakea e Moses i pe a lolo, i puru i taki e huriki ri gi loi a varakia ne ria, ri gi pelekado ria, ri gi kavurikea a Vure.
EXO 19:15 Muri e Moses i taki ria, “Mu kisi puru mua, ge vakatubu mona ge harena girira. Naha ni mahita turana a ngatavine.”
EXO 19:16 Na hatelanga na toluna parava, a bubu i kururu i pelaka, i maravila lae, i kavitagua a lolo. A tavure i tangi dagi hateka. E huriki ri made na mada ri mangenge hateka.
EXO 19:17 Muri e Moses i tuli tala ria na mada, ri pesi na dahana lolo, ri taguia a Vure.
EXO 19:18 A lolo e Sinai i vuruke, a pokona kanono i kavitagua, a vuhuna e BAKOVI DAGI i puru valai turana a kanono dagi i made pololilo vona.
EXO 19:19 A nangina tavure i tangi dagi hateka. Muri e Moses i ta turana Vure. A bubu i kururu i pelaka. E Moses i longoa a Vure i ta pololilo na bubu i koli a nitana.
EXO 19:20 Muri e BAKOVI DAGI i puru na mapana lolo, i galea e Moses i valai vona. Lakea e Moses i sike na lolo.
EXO 19:21 Lakea e BAKOVI DAGI i takia, “O puru o taki tora e huriki, nahea ge ruru a vurene ria ri gi polo taroa a nagi, ri gi valai ri gi matai iau. A viri ge polotaroa a nagi iea ge matai iau, bara i mate.
EXO 19:22 E huriki a prister ra ri valai tabukoi nau, ria ranga, ri gi pelekado ria, ri gi valai tabukoi na matagu. Ge uka bara a ratapile ria.”
EXO 19:23 E Moses i takia e BAKOVI DAGI, “E huriki i uka ma ri gi sike valai na lolo e Sinai, a vuhuna o habi tora a ngava ne ria nahea ri gi sike valai. O taki iau ga ru halui a nagi na lolo, ga vakalongo ria vona ra tabeke ni ru halui a nagi vona o tabea pali.”
EXO 19:24 E BAKOVI DAGI i koli, i ta maea, “O puru o takia e Aron, ge sike valai turamu. Pali e huriki a prister, a bakovi a ngatavine nahea ri gi polotaroa a nagi, ri gi sike valai nau. E rei i longotaro a ngava bara ratapilea.”
EXO 19:25 Lakea e Moses i puru i vakalongo e huriki.
EXO 20:1 A Vure i taki e huriki a Israel i ta maea,
EXO 20:2 “Iau kunana e BAKOVI DAGI a Vure ne mua, a bole tala mua o Egipto, ra tanga ni vakavora mua vona.
EXO 20:3 “Mu ramai iau kunana, naha ni ramai a maka vure ranga.
EXO 20:4 “Naha ni kau na kai o na kedo a hanuna vure o a hanuna maki i tabuli polomeli na hunu, i tabuli polotano na malala, i tabuli polotano na dari.
EXO 20:5 Naha ni turume ni kavurike ria, a vuhuna iau e BAKOVI DAGI, iau a Vure ne mua, i uka ma ga matataroa tara vure ge kuloi iau. E huriki ri marikoi iau, bara ratapile e huriki a hamone ria ge harena ne tubune ria o ne tamarane ria.
EXO 20:6 E huriki ri ngaru iau, ri gi ramai a maka vinara nau, bara ngaru vakaroro ria, a ngaru a hamone ria i ravulu rangale (1,000).
EXO 20:7 “Naha ni kurahi tavulea a ragu, e BAKOVI DAGI, a Vure ne mua. A viri i kurahi tavulea a ragu bara i tahoka a ngava.
EXO 20:8 “Mu luhoi mulea a Parava Nimalo, mu ru herea ge a parava nau kunana.
EXO 20:9 Mu leho na parava i polotara, na vik i taku,
EXO 20:10 pali a poloruana parava ia a Parava Nimalo ne BAKOVI DAGI, a Vure ne mua. Ra parava iea naha ni leho, mu malo vona turane huriki e tune mua, a vora ne mua, a sipsip a bulmakau ne mua, e huriki a mosi ri made turane mua.
EXO 20:11 Mu rata mavonga, a vuhuna na parava i polotara, e BAKOVI DAGI i rata rike a hunu, a malala, a dari, a maki lobo i tabuli ne tou. Pali na poloruana parava, i malo, i gamaia a Parava Nimalo, i ratea i malamala.
EXO 20:12 “Mu togo e kinane mua e tamane mua, lakea bara mu made tabaka na malala e BAKOVI DAGI, a Vure ne mua i habia ne mua.
EXO 20:13 “Naha ni rabalaki a viri.
EXO 20:14 “Naha ni rata a naro na molenga.
EXO 20:15 “Naha ni panaho.
EXO 20:16 “Naha ni tami a turamu na ngava.
EXO 20:17 “Naha ni ngutu na ruma na viri tara o ne girihina, ne huriki a vora vona, a bulmakau a donki vona, a mahala vona.”
EXO 20:18 Na tahuna e huriki a Israel ri longoa a bubu i kururu, ri longoa a tavure i sidi, ri masia a pokona kanono i kavitagua a lolo, ri mangenge, i vakulu a tagane ria. Lakea ri karuku hamule, ri pesi basi,
EXO 20:19 ri takia e Moses, “Ioe kunana o ta turane mia mi gi longo. Pali a Vure nahea ge ta valai ne mia, ma mi gi mate.”
EXO 20:20 Lakea e Moses i taki ria, “Naha ni mangenge, a Vure i valai ge toni mua kunana, mu gu mangenge vona, nahea mu gu rata a naro hale.”
EXO 20:21 E huriki ri pesi basi, pali e Moses kunana i lokovonga tabukoi na hini i uvo vatubi i made vona a Vure.
EXO 20:22 Muri e Bakovi Dagi i takia e Moses, “O taki e huriki a Israel e BAKOVI DAGI i ta maea, ‘Mu matai pali iau a made na hunu a ta turane mua.
EXO 20:23 Naha ni rata a maka vure na gol a silva mu gu kavurike ria. Mu kavurike iau kunana.
EXO 20:24 Mu ratea na malala a dede, mu habi vonga a maka sipsip a bulmakau, ge a nihabi gutu-vuro, ge a nihabi na nivalemu. Na tahuna mu rata mavonga mu kavurike iau, bara rata kamumu mua.
EXO 20:25 Na tahuna mu hae a dede, naha ni haea na kedo ni ubikeve na modona a aen, a vuhuna i uka ma ge kamumu na matagu.
EXO 20:26 Naha ni ratea a dede ge rike hateka mu gu vakapesi a nirike vona, mu gu habi a nihabi. Na tahuna mu rike vona, ma ga ni matai a tagane mua.’”
EXO 21:1 A Vure i takia e Moses, “O vaka­longo e huriki a Israel vona a vinara nga.
EXO 21:2 Na tahuna o kona a vorakato na Hibru, ge leho kunana vomu na pida ge polotara. Na poloruana pida o rudua ge hamule na tanga vona, pali nahea ge kona ioe muri ge vano.
EXO 21:3 A vorakato i uka ma i parangi na tahuna o bolea vona, ia kunana ge vano. Pali ia ge tahoka e girihina muga na tahuna o kona ia vona, ge bolea e girihina ge vano turana.
EXO 21:4 Na tahuna a matakari vona i habia na vorakato a ngatavine i parangi vona, i tahoka a koma, a ngatavine turane huriki e tuna ri gi made mule, a bakovi kunana ge vano.
EXO 21:5 Pali a vorakato iea ge marikoi ni vano, a vuhuna i ngaru hateka e girihina, e huriki e tuna,
EXO 21:6 lakea a matakari vona ge bole lakea na matana roho na Vure, ge bolea a maki i vere ge paditalea a talingana. Muri bara i leho liu vona ge harena na tahuna i mate.
EXO 21:7 “Na tahuna a bakovi i habia e tuna a ngatavine ni gi kona ge ia a vorakato, na poloruana pida nahea ni gi longo vona ge vano manga e huriki a vorakato bakovi.
EXO 21:8 Na tahuna a matakari ge parangi vona a ngatavine, muri i marikoi vona, e tamana ngatavine ge konamulea, a vuhuna a matakari vona i uka ma i rata a naro kamumu vona, nahea ge habia na robo basi ni gi kona.
EXO 21:9 Na tahuna a matakari i ngarua e tuna bakovi ge parangi vona a ngatavine, ge rata kamumua, ge manga a hini i rata kamumua e tuna ngatavine.
EXO 21:10 Na tahuna i parangi tabu a ngatavine tara, ge matakari kamumua ra ngatavine muga. Ge habi a maki ni kani, a varakia, ge mahita turana, manga a hini muga.
EXO 21:11 Ia i uka ma i rata a maki i tolu nga, ge longo vona a ngatavine ge vano, pali nahea ge habi na ngatavine ranga moni.
EXO 21:12 “A bakovi i ubimatea tara bakovi, ra bakovi iea ni gi rabalaki.
EXO 21:13 Pali ia i uka ma i luhoi ge rabalakia a bakovi iea, i ngapa vona a hini i mate, ra bakovi i rabalaki a viri ge ha lakea na tanga a ngarua ge lakea vona.
EXO 21:14 A bakovi i madihi a hatena i rabalakia a turana, muri i ha lakea na dede nau ge vakakori ia, mu bole tala ia mu rabalakia.
EXO 21:15 “E rei a viri i toni ni rabalaki e tamana e kinana, ni gi rabalaki.
EXO 21:16 “A bakovi i panahoa tara viri ge ia a vorakato vona o ge habia ni gi kona, na tahuna ni matavisi, ni gi rabalaki.
EXO 21:17 “E rei a viri i harogi e tamana o e kinana, ni gi rabalaki.
EXO 21:18 “A bakovi i ala rua ru vatahate, lakea a viri tara i padia na kedo o ubia a turana, i uka ma i mate, i mahita kunana na kiri,
EXO 21:19 muri i bole a kodo i laho, ra bakovi i ubia i uka rarenga. Pali ge koli a moni vona ge vatovotovo turana a maka parava, i uka ma i leho vona, ge matakaria ge tavaga.
EXO 21:20 “A bakovi i ubi a vorakato bakovi o a vorakato ngatavine na lebo i mate liu na parava iea, a bakovi i ubia ni gi vakamadihi.
EXO 21:21 Pali bara vora iea i tavaga muri na parava i taku o i rua, naha ni vakamadihia a bakovi, a vuhuna ra vorakato iea, a vorakato vona kunana.
EXO 21:22 “Na tahuna e huriki ri vaubi, lakea ni ubi a ngatavine i singou, muri i podea a koma i mate, e girihina ngatavine ge vakalongoa a mari ni pelekado a maregoa, ge takia a bakovi i ubi a ngatavine ge konea.
EXO 21:23 Pali a ngatavine ge bole a vuranga dagi, mu kolia a naro i rata virihia vona. A ngatavine ge mate, a bakovi i rabalakia ni gi rabalaki.
EXO 21:24 Na tahuna a matana viri, a ngina viri, a limana viri, a vahana viri ni ratapile, mu koli mu rata mavongea na bakovi i vakatubua a rongova.
EXO 21:25 Na tahuna a bakovi i gutua a kuline girihina na kanono, i padia na vito i bele a ngarava, i lagua na lebo, ni gi koli ni gi rata mavonga a bakovi iea.
EXO 21:26 “Na tahuna a bakovi i ubia a matana vorakato i ratapilea, ge takia a vorakato ge vano, ge kolia a matana ni ubi.
EXO 21:27 Na tahuna i ubia a vorakato vona i masigo a ngina, a vorakato iea nahea ge leho tabu vona, a mapana ra ngina i masigo.
EXO 21:28 “Na tahuna a bulmakau i rabalaki a viri, a bulmakau ni gi padimate na kedo, nahea ni gi kani a bobona. Pali a tahona bulmakau nahea ni gi kau virihi na ngava.
EXO 21:29 Na tahuna a bulmakau i valili i rabalaki bala a viri, ni gi taki a tahona ge ru dilia na nure. Pali ia ge marikoi, lakea a bulmakau i rabalakia tabu tara viri, a bulmakau turana a tahona ni gi rabalaki.
EXO 21:30 Pali na tahuna ni gi taki ge konea a maregoa vona, ge konea, ge vakakori ia i uka ma ge mate.
EXO 21:31 A bulmakau ge rabalaki a koma, mu ramai kunanea a vinara iea.
EXO 21:32 A bulmakau ge rabalakia tara vorakato, a tahona bulmakau ge habia na tahona vorakato a moni silva i 30, muri a bulmakau ni gi padimate na kedo.
EXO 21:33 “Na tahuna a bakovi i talea a hinebi na lovo o i kelia a lovo dagi i uka ma i tukaria a hinebi, lakea a bulmakau o a donki i boru puru vona i mate,
EXO 21:34 a tahona lovo ge konea a tahona bulmakau, a donki ge bolea ge ne vona.
EXO 21:35 “Na tahuna a bulmakau na bakovi tara i rabalakia a bulmakau na bakovi tara, ra bakovi nga ru gu habia a bulmakau i mahuri ni gi kona. Muri ru gu vaveru a moni, ru gu pokea a bulmakau i mate, ru gu vaveru tabu.
EXO 21:36 Pali, bara bulmakau iea i vaubi i rabalaki bala a bulmakau ranga, a vuhuna a tahona i uka ma i ru dilia na nure, a tahona ge ngulia na tahona bulmakau i mate a bulmakau i mahuri, ge bolea a bulmakau i mate ge ne vona.
EXO 22:1 “A bakovi i panaho a bulmakau o a sipsip, i rabalakia o i habia ni kona, ge koli mule na tahona, a bulmakau ge lima, a sipsip ge va.
EXO 22:2 Ia ge uka a maki ni koli mule a maki i panaho, ra matapanaho iea ni gi habi ni gi kona, ge a mapana ra maki i panaho. Na tahuna a bulmakau o a sipsip ni gi matai i tababana ni mahuri, ge koli balaka rua a maki i panaho. “Na tahuna a matapanaho ni matavisi i puka a ruma, i panaho a maki na rodo, ni gi rabalaki. A bakovi i rabalakia, i uka ngava. Pali a bakovi i panaho na haro ni rabalaki, a viri i rabalakia i tahoka a ngava.
EXO 22:5 “Na tahuna a bakovi i matataroa a bulmakau a sipsip vona i laho viliha, i dili tavula na hania na viri tara, a tahona a bulmakau a sipsip ge koli a maki i kani a bulmakau a sipsip vona.
EXO 22:6 “Na tahuna a bakovi i rata a kanono, muri a kanono i nono lakea na hania na bakovi tara, i nono a hania vona turana a maka vit i ru kadolu, a bakovi i vakatubu a kanono ge koli a maki i ratapile a kanono.
EXO 22:7 “A bakovi i habi a moni na turana ge matakari, ni panaho na ruma vona a moni. Na tahuna a matapanaho ni matavisi, a matapanaho ge koli balaka rua a moni i panaho.
EXO 22:8 Pali a bakovi ni panaho i uka ma ni matavisi, ni gi bole a tahona ruma ge lakea na mari ni pelekado a maregoa, ge nanea, i panaho a moni o i uka.
EXO 22:9 “Na tahuna a bakovi ala rua ru vakau vona tara bulmakau, a donki, a sipsip, a kala, a maki i velu, ra bakovi nga ru gu lakea na mari ni pelekado a maregoa, ni gi longo a maregoa ne rua. A bakovi i kau tavula a maki ge koli balaka rua a maki i kau na turana.
EXO 22:10 “Na tahuna a bakovi i habia na turana a bulmakau, a sipsip o a maki tara ge matakaria, muri i mate, o ni padiha, o ni lakavu i uka ma ni matai,
EXO 22:11 ra bakovi i habi a bulmakau, a bakovi i bole a bulmakau ru gu dili na roho nau, lakea a bakovi i bole a bulmakau ge kaba na ragu ge ta maea, ‘Muholi hateka, i uka ma a ratapilea a bulmakau vona.’ A tahona bulmakau ge longo maia a nikaba na turana, nahea ge kolia a bulmakau vona i velu.
EXO 22:12 Pali a bulmakau iea ni panaho vona, ge kona lakea na tahona.
EXO 22:13 Na tahuna a livoa hateka i rabalakia tara sipsip a bulmakau, a turana ge bole ranga balena i kani kalevea a livoa hateka ge vakasiri. Lakea i uka ma ge konea a maki i rabalakia a livoa hateka.
EXO 22:14 “A bakovi i bolea ne turana tara bulmakau ge rata taro a leho vona, muri a bulmakau i bole a gilanga i mate, a bakovi iea ge kona lakea na tahona.
EXO 22:15 Pali a maregoa ge bele na bulmakau na tahuna a tahona ia vonga, a bakovi i bolea nahea ge konea, a vuhuna a moni i habi pali na tahuna i habikaria.
EXO 22:16 “A bakovi i lakavua a sirula, i uka ma ni habikari ge parangi vona, ra bakovi iea ge konea a ngatavine, muri ge bolea a ngatavine iea ge girihina.
EXO 22:17 E tamana ngatavine i marikoi vona a bakovi iea ge parangi e tuna, i kamumu kunana. Pali a bakovi iea ge konea a ngatavine, ge manga a mapana sirula ni tovo.
EXO 22:18 “A ngatavine i tahoka a malulu ni gi rabalaki.
EXO 22:19 “E rei a bakovi o a ngatavine i tari a ligo, a sipsip, o a bulmakau tara, ra bakovi o a ngatavine iea ni gi rabalaki.
EXO 22:20 “E huriki ri gi habi a nihabi nau kunana, e BAKOVI DAGI. A viri i habi a nihabi na vure ranga ni gi rabalaki.
EXO 22:21 “Naha ni rata hale mu gu vakamarego e huriki a mosi, a vuhuna hosi mu made manga a mosi na robo e Egipto.
EXO 22:22 Naha ni rata hale e huriki a havuri, a duku.
EXO 22:23 Na tahuna mu rata hale ria bara ri tangi valai nau, a longo a nitangi ne ria,
EXO 22:24 mu vakarike a hategu, bara rudu valai e huriki a pile ri gi rabalaki mua. Muri e huriki a ngatavine ne mua bara ria a havuri, e huriki e tune mua bara ria a duku.
EXO 22:25 “Na tahuna mu habi a moni na matasia tara ne huriki a viri nau, ge koli kunana a moni i bole. Naha ge habi langa tabu ranga moni.
EXO 22:26 Na tahuna a viri ge bole taroa tara maki vomu, ge habia vomu a varakia vona ge a kilakila na maki i bole, o habi mulea muga na haro ge rolo a varakia vona,
EXO 22:27 a vuhuna a bakovi iea i tahoka kunana a varakia i taku ge kavitagua vona na rodo. Bara o vakatokua, ge kavitagua na a ra? Na tahuna i tangi valai nau bara tuhoria, a longo maia a nitangi vona, a vuhuna iau a dodo e huriki lobo.
EXO 22:28 “Naha ni harogia a Vure, naha ni harogi a matakari ne mua.
EXO 22:29 “Naha ni vakatoku ni habi nau a vit, a vain, a oliv ri moro muga. E huriki a koma tabua bakovi, ngi ranga mu habi nau.
EXO 22:30 Mu habi nau tabu a tabua na bulmakau a sipsip. A tuna bulmakau a sipsip ni gi poda, ge laho turane kinana na parava ge polorua. Na polotoluna parava mu habia nau.
EXO 22:31 “Iau a vulaki mua a Israel ge mua a viri nau. Naha ni kani a bobona sipsip a bulmakau i rabalaki a livoa hateka na robo. Mu voro lakea na ligo ge kani.
EXO 23:1 “Na tahuna mu longoa tara ngava taminga, naha ni vakalongo lae. Naha ni tuhoria a bakovi, ge tami a mari ni pelekado a maregoa na tahuna i pelekadoa a ngava vona.
EXO 23:2 Naha ni ramai e huriki ri rata a naro hale. Naha ni tuhori e huriki ri gi tami a mari ni pelekado a maregoa.
EXO 23:3 I mavonga tabu, naha ni tuhoria a matasia ge tatami na tahuna i pesi na matana mari ni pelekado a maregoa.
EXO 23:4 “Na tahuna mu matai a bulmakau, a donki na gimane mua i puka a nure i laho viliha, mu bae mulea na tahona.
EXO 23:5 Na tahuna mu matai a donki na gimane mua i kaloho a maki i boru, mu tuhoria a donki vona ge kaloho rikea a maki i boru turana.
EXO 23:6 “Na tahuna a matasia ge lakea na mari ni pelekado a maregoa ge longoa a ngava vona, naha ni tami virihia na ngava.
EXO 23:7 Naha ni rata a ngava taminga ni kau virihia na ngava hale a bakovi i malamala, ma ni gi rabalaki tavula. Ra bakovi i kau virihi tavula a viri na ngava, a uka ma ga pugea a naro hale vona.
EXO 23:8 Na tahuna a bakovi i luke mua na moni mu gu tuhoria na ngava, mu gu tami a mari ni pelekado a maregoa, naha ni bole a moni. Ra naro maea i vakaviliha a niluhoi na ngava na bakovi kamumu.
EXO 23:9 “Naha ni rata hale e huriki a mosi ri made na tanga ne mua, a vuhuna hosi mua ranga mu made manga a mosi o Egipto.
EXO 23:10 “Na pida i polotara mu leho na hania mu ru kadolu a maki ni kani.
EXO 23:11 Na poloruana pida, naha ni leho na hania, a malala ge malo. Naha ni bole a maki ni kani i rike na muriki na tahuna a malala i malo. A vinara i taku kunana mu ratea na hania na viri i varo a oliv. E huriki a matasia kunana ri gi bole a maki ni kani na muriki, muri a maka livoa ri gi kani paru a maki na muriki i bole kaleva e huriki a matasia.
EXO 23:12 “Na vik lobo mu leho na parava ge polotara, na parava polorua naha ni leho, a vuhuna a maka donki, a bulmakau, e huriki a vorakato, a mosi ri laho ri made turane mua ri gi malo, ri gi bole a nitora.
EXO 23:13 “Mu longo kamumu mu ramai a maka ngava a habi ne mua. Naha ni vasileki na maka vure ranga, naha ni gale a rane ria.
EXO 23:14 “A habu ge tolu ne vona ni kavurike iau, ge balaka tolu na pida lobo.
EXO 23:15 “Mu ratea a Habu na Bret i Uka Is, mu kavurike iau. Mu kani a bret i uka is na parava ge polorua i manga a ngava a taki mua vona. A habu iea mu ratea na keva e Abib, a vuhuna na keva iea kunana mu mariu tala o Egipto. Na tahuna mu valai ni kavurike iau, mua takutaku mu bole a nihabi mu habi nau.
EXO 23:16 “Mu rata a Habu na Nimirio na tahuna mu vakatubu ni vila kadolu a vit i moro. Na nilobona pida na keva i rara vona a maka kanena kai, mu pasi a maka kanena kai, mu malo na maka kape ne mua, mu ratea a Habu na Nivapopo.
EXO 23:17 “Na pida lobo mu rata a habu nga i tolu, mu kavurike iau e Bakovi Dagi a Vure.
EXO 23:18 “Na tahuna mu habi a nihabi nau, naha ni habi a sipsip a bulmakau turana a bret i tahoka a is. Mu gutu lobo a vina, ra mu habi nau. Naha ge tabuli ranga ge palala taho a hini na parava muri.
EXO 23:19 “Mu bole a maki ni kani ri moro muga, mu bole lakea na roho e BAKOVI DAGI a Vure ne mua. Naha ni nono a tuna meme na namona ruru ne kinana.
EXO 23:20 “Mu longo kamumu, ga rudua a agelo nau ge muga mua, ge matakari mua na dala. Ge vano ge taparaki mua na robo a kisi purua ne mua.
EXO 23:21 Mu longototoa, mu ramaia a ngavana, a vuhuna iau a made turana. A agelo nau i uka ma ge puga a naro hale ne huriki ri longotaro a ngavana.
EXO 23:22 “Mua bara mu longototo a ngavana, iau bara a taga ne mua ga ratapile e huriki a pile ne mua.
EXO 23:23 “A agelo nau bara i muga mua, mu bele na malala ne huriki a Amor, a Hiti, a Peres, a Kenan, a Hivi, a Iebus. Muri bara vakalobo liu ria.
EXO 23:24 Naha ni lolu puru ni kavurike a maka vure ne ria. Naha ni ramai a naro na nivasileki ne ria. Mu ratapile, mu ubikeve a maka vure ne ria ni rata na kedo.
EXO 23:25 Mu kavurike iau kunana, e BAKOVI DAGI a Vure ne mua. Mu rata mavonga bara rata kamumu mua, a vakani, a vakaninu, a vakatavaga mua na gilanga.
EXO 23:26 Ga matakari e huriki a ngatavine ri singou ri gi poda kamumu. Ria lobo bara ri tahoka a koma. Ga matakari mua bara mu made tabaka na malala.
EXO 23:27 “Ga muga mua, ga vakamangenge, ga vakavaroru e huriki a pile ne mua, bara ri ngalakapulo ri ha.
EXO 23:28 Ga rudu muga a maka vuvu ri gi tura e huriki a Hivi, a Kenan, a Hiti, ri gi lili tala ria.
EXO 23:29 Pali iau, i uka ma ga lili tala ria na pida ge taku, a vuhuna maka livoa hateka bara ri bele kupo, ri tahona vona a robo, ri ratapile mua.
EXO 23:30 Ga lili tala gosi ria, ge harena na tahuna mu bele kupo mu bolea a malala ne ria.
EXO 23:31 “A harena malala ne mua ge vakatubu na Dari Vururu na tabeke ne Akaba ge vano ge harena na Dari na Kurukuruna Malala. Na tabeke mule sike ge vakatubu na naru dagi e Iupretis ge harena na tabeke i ngeki tano. Ga habi a nitora ne mua, bara mu dili vona a malala iea mu ratapile e huriki ri made vona, mu lili tala ria.
EXO 23:32 Naha ni valongo mai a ngava turane ria, naha ni ramai a vure ne ria.
EXO 23:33 Naha ni longo ne ria ri gi made na robo ne mua, ma ri gi piu rike mua, mu gu rata a naro hale nau. Mua bara mu kavurike a maka vure ne ria, bara mu matasia, mu bala maki!”
EXO 24:1 Muri e BAKOVI DAGI i takia e Moses, “A ngaru ioe, e Aron, e Nadap, e Abihu turane huriki a gare ne Israel ri ala ravulu polorua, mu sike valai na lolo, mu pesi basi, mu kavurike iau.
EXO 24:2 Ioe kikeri o valai tabukoi nau. E huriki a matakari nahea ri gi valai tabukoi; e huriki a bakovi a ngatavine ria ranga nahea ri gi valai tabukoi.”
EXO 24:3 E Moses i vano i vakalongo e huriki na maka vinara ne BAKOVI DAGI, lakea ri ta taku ri ta maea, “Mi gi ramai a ngava lobo e BAKOVI DAGI i taki.”
EXO 24:4 Lakea e Moses i here puru na puhu a ngava lobo e BAKOVI DAGI i taki. Na parava muri e Moses i hadongo na hatelanga pokopoko i haea a dede na gagana lolo. I ru tabukoi na dede a kedo i ravulu a polona i rua, ga kilakila na kabu ne Israel.
EXO 24:5 Muri i rudu ranga koma tamuhane ne Israel, ri habi a nihabi gutu-vuro ne BAKOVI DAGI. Ri rabalaki a bulmakau karaba ne vona a nihabi na nivalemu turana Vure.
EXO 24:6 Muri na nihabi, e Moses i bole a darana bulmakau i guru puru na tavila ranga, i voro tamali langa na dede ranga.
EXO 24:7 Muri i bolea a Puhu na Ngava Dagi, i gi poloa ne huriki. Ri longoa ri ta maea, “Mi gi ramai kunanea a nitane BAKOVI DAGI.”
EXO 24:8 Muri e Moses i bolea a dara i tabuli na tavila i voro tamali langa ne huriki. Lakea i ta maea, “Ra dara iea i vakatorea a ngava dagi e BAKOVI DAGI i ratea ne mua na tahuna i habi a nitana ne mua.”
EXO 24:9 Muri e Moses, e Aron, e Nadap, e Abihu turane huriki a gare ne Israel ri ala ravulu polorua ri sike na lolo,
EXO 24:10 ri masia a Vure ne huriki a Israel. Ri masia i pesi langa na maki i mata manga a dala ni rata na kedo tara parahidi gomagoma ni gale a sapira. I gomagoma i manga a hunu.
EXO 24:11 Muholi ri masia a Vure, pali i uka ma i ratapile e huriki a gare ne Israel. Muri ri kani ri ninu vonga.
EXO 24:12 E BAKOVI DAGI i takia e Moses, “O sike valai na lolo, o pesi tabukoi nau. A here pali na kedo i rua a vinara nau. Ga habi vomu a kedo nga i rua, o tovo e huriki vona.”
EXO 24:13 Muri e Moses i longo maia a nitana, i bolea a vora vona e Iosua ru sike na lolo na Vure.
EXO 24:14 E Moses i taki e huriki a gare, “Mu dava koea miri gi sike taro na lolo, muri miri gi hamule valai. E Aron e Hur ru gu made turane mua. E rei i tahoka a maregoa, ge lakea ne rua ru gu pelekadoa.”
EXO 24:15 Muri e Moses i sike na lolo, a bubu i kavitagua a lolo.
EXO 24:16 A nipara na Vure i paraia a lolo. Na parava i polotara a bubu i kavitagua a lolo. Na poloruana parava e BAKOVI DAGI i ta tala na bubu, i galea e Moses.
EXO 24:17 E huriki a Israel ri masia a nipara ne BAKOVI DAGI i manga a kanono na mapana lolo.
EXO 24:18 E Moses i dili na bubu i laho sike na lolo, i made vonga na parava i ravulu va.
EXO 25:1 E BAKOVI DAGI i takia e Moses,
EXO 25:2 “O taki e huriki a Israel ri gi bole a maka nihabi ri gi habi nau. A maki ri ngaru ni habi na hatene ria o bole.
EXO 25:3 O bole ne ria a gol, a silva, a bras;
EXO 25:4 a vuna sipsip ge gomagoma, ge vururu, ge kuakua; a kala kamumu ni rata na vuna meme,
EXO 25:5 na kulina sipsip a toga ni kalu vururu; a kulina lui a bokona kai a akas;
EXO 25:6 a namona oliv ne vona a lam; a havu ranga ni vuli turana a nibiri ne vona ni gamai; a havu ranga ne vona a havu mangisipa;
EXO 25:7 a kedo oniks; a kedo parahidi ni gi kolo dili na bagetua na ngalana prister.
EXO 25:8 “O taki e huriki ri gi haea tara kape nau ga made turane ria.
EXO 25:9 A maka mahalana kape ge manga a hini a taki polo vomu.
EXO 25:10 “O taki e huriki ri gi ratea a Tava na Ngava Dagi na mavilana kai a akas. A niolana ge 110 sentimita, a nibolana ge 66 sentimita, a nipesina ge 66 sentimita.
EXO 25:11 O bole a gol kabakaba, o kavitagu a hini pololilo a hini polovavo na tava, a harena a tava ranga o kavitagu na gol.
EXO 25:12 O rata na gol a halui ge va o kolotata dili na vahana tava i va. O kolo na tabekena tava tara ge rua, na tabeke tara ge rua.
EXO 25:13 O rata o naviri na gol a tabekena kai a akas ge rua, ge a binole.
EXO 25:14 O rodo na halui ra binole nga; ge dili na tabeke koea tara, na tabeke lake tara, ne vona ni kaloho a tava.
EXO 25:15 Ra binole nga, ru gu tabuli kunana na halui. Naha ni lalu tala.
EXO 25:16 Muri ga habi vomu a tabekena kedo i rua ru tahoka a Ngava Dagi, o ru pololilo na tava.
EXO 25:17 “O ratea na gol kabakaba a matana tava. Ra matana tava iea a murina nidodo. A niolana ge 110 sentimita, a nibolana ge 66 sentimita.
EXO 25:18 O bole a gol kabakaba o ubi, o rata a hanuna agelo ge rua.
EXO 25:19 A agelo tara ge pesi na kanena tava, a agelo tara ge pesi na maurina tava. O rata na tabekena gol ge taku na matana tava a agelo nga.
EXO 25:20 Ra agelo nga, ru gu vangalai, ru gu pesi langa na murina nidodo. A karapane rua, ru gu vulala tala ge kavitagua a matana tava.
EXO 25:21 Ga habi vomu a tabekena kedo ge rua ru tahoka a Ngava Dagi ni here ne rua, o ru dili na tava o tukaria a matana.
EXO 25:22 Iau ga made na tabeke ni puga vuroki a naro hale, na kurukuruna a agelo nga polomeli na matana Tava na Ngava Dagi o tagui iau vonga. Ga vakalongo ioe vona a maka vinara nau, muri o habi ne huriki a Israel ri gi ramai.
EXO 25:23 “O ratea na kai a akas a dede. A niolana ge 88 sentimita, a nibolana ge 44 sentimita, a nipesina ge 66 sentimita.
EXO 25:24 O kavitagua na gol kabakaba, o ratea a gol ge ola o ru haluia na harena.
EXO 25:25 A nigatukana gol ge 8 sentimita. A maka tabekena gol kiroko ni gi ru halui a harena dede.
EXO 25:26 O rata na gol a halui ge va, ni gi kolotata dili na vahana nimodo na dede i va.
EXO 25:27 Ra halui nga ge tabuli tabukoi na harena dede.
EXO 25:28 O kau a tabekena kai a akas ge a binole na dede.
EXO 25:29 O rata a maka pelete a tavila ne vona a havu mangisipa, a buroi a kikei ne vona ni guru dili a nihabi na naru. A maki nga mu rata na gol kabakaba.
EXO 25:30 Na parava vakaroro, a maka bret mu habi nau, mu ru na dede ga matai.”
EXO 25:31 E Bakovi Dagi i takia e Moses, “O bole a gol kabakaba o ratea a butu ne vona ni ru langa a maka lam vona. A butuna lam o rata maea, O ubi na ama a gol o rata a murina ni vakapesi a lam, a lebona lam, a bako, a hanuna keke. O rata na tabekena gol ge taku.
EXO 25:32 Ra butu na lam ge tahoka a bakona ge polotara. Ge tolu na tabeke tara, ge tolu na tabeke tara.
EXO 25:33 A bakona ge taku ge tahoka a hanuna keke ge tolu, ge manga a purana kai a almon.
EXO 25:34 A butuna lam tara ge mavonga. Ge tahoka a hanuna keke ge va ge manga a purana kai a almon.
EXO 25:35 O rata a hanuna pagana keke na taruna murina lam. A keke i taku ge tabuli na taruna murina lam i rua.
EXO 25:36 O rata na tabekena gol kabakaba ge taku a bako, a maka hanuna keke.
EXO 25:37 “Muri o rata a lam ge polorua o ru na maka bako. O ru kamumu a lam ne ria, ri gi parai a hini pololilo na kape nau.
EXO 25:38 O bole a gol kabakaba o rata a kaira ne vona ni nugu a kanono, a pelete ne vona habulo.
EXO 25:39 O bole a gol kabakaba ge 35 kilo, o rata a butuna lam turana a maka mahalana.
EXO 25:40 Na tahuna o rata a maki nga, o ramai kamumua a naro a vakasiri ioe vona na lolo.
EXO 26:1 “O kavitagua a mailo nau na kala kamumu ge ravulu. O vakabagetu na hotu gomagoma, na hotu vururu, na hotu kuakua. O rahi dili a hanuna a agelo na kala.
EXO 26:2 O rata a maka kala nga ge palupulupu; a kala i taku a niolana ge 12 mita, a nibolana ge 2 mita.
EXO 26:3 O rahi palupu a kala ge lima. A kala ge lima tabu ngi ranga o rahi palupu.
EXO 26:4 O rata ranga halui na harena kala gomagoma ne vona ni varaki palupu a kala dagi nga i rua. O kolo dili na kala dagi nga a maka halui.
EXO 26:5 O kolo dili na harena kala muga a halui ge ravulu lima, na kala tara ge ravulu lima. A maka halui nga ge tabuli vakanakana.
EXO 26:6 O rata a kinau ge ravulu lima, mu varaki palupu a kala nga, ru gu mata manga a kala ge taku.
EXO 26:7 “Muri o ratea tara kala dagi ge kavitagua a mailo nau. O rata a maka kala ge 11, ni rata na vuna meme.
EXO 26:8 A maka kala ge palupulupu; a kala i taku a niolana ge 13 mita, a nibolana ge 2 mita.
EXO 26:9 O rahi palupu taro ge lima, muri o rahi palupu ge polotara. O rata kamumua a polotarana kala ge kavitagua a matana kape.
EXO 26:10 O rahi dili na harena kala muga a halui ge ravulu lima, na kala tara ge ravulu lima.
EXO 26:11 “O rata na bras a kinau ge ravulu lima, o kolo na halui ne vona ni varaki palupu a kala nga i rua, ge manga a kala dagi i taku.
EXO 26:12 Ra hini i tavore tala, ge tavore kunana na bitona mailo nau.
EXO 26:13 A niolana kala i kavitagu a kape ge ola popote; a harena tara ge tabuli tavula ge 50 sentimita, na harena tara ge 50 sentimita.
EXO 26:14 O rata tabu a kala ge rua ge kavitagu a kape, a kulina sipsip a toga ni kalu vururu, a kulina lui ge kavitagu a hini polomeli.
EXO 26:15 “O rata a maka mito na mailo na Vure na kai a akas.
EXO 26:16 A niolana a maka mito ge 4 mita, a nibolana ge 66 sentimita.
EXO 26:17 A mito ge ola popote, bara ni ru dili na dupina vuhu-butu i tabuli polotano. A maka mito na mailo nau ni gi rata ge maea kunana.
EXO 26:18 Na tabeke mule puru mu rata a mito na nure ge ravulu rua,
EXO 26:19 a vuhu-butu ni rata na silva ge ravulu va, ri gi tahoka a dupi ni vakapesi a mito. A vuhu-butu ge rua ru gu tabuli polotano na mito i taku.
EXO 26:20 A nure na tabeke mule sike, ia tara o rata mavongea, o rata a mito ge ravulu rua,
EXO 26:21 a vuhu-butu ni rata na silva ge ravulu va. A vuhu-butu ge rua ru gu tabuli polotano na mito ge taku.
EXO 26:22 O rata a mito ge polotara ri gi pesi na bitona mailo nau na nirolona haro.
EXO 26:23 A mito ge rua ru gu tabuli na nimodo i rua na bitona kape.
EXO 26:24 O lapi palupu a mito ge rua na nimodona kape i rua mu vakapesi. A nimodo i rua tabu mu rata mavonga.
EXO 26:25 A bitona kape ge tahoka a mitona nure ge polotolu, a vuhu-butu ni rata na silva ge ravulu a polona i polotara. A vuhu-butu i rua ru gu tabuli polotano na mito i taku.
EXO 26:26 “O bole a kai a akas ge lima, o lapi tavalavala na nure na gagana mailo na Vure.
EXO 26:27 O rata ge lima na gagana mule puru, ge lima na gagana mule sike, ge lima na bitona mailo nau na gagana nirolona haro.
EXO 26:28 Ra karona nure tavalavala na kurukuruna, ge tubu na harena iea ge lobo na harena tara.
EXO 26:29 O kavitagu a maka mitona kape na gol. O ru dili ranga halui ni rata na gol, ge tangotata a maka karo ni ru tavalavala na nure. A maka karona, ngi ranga ni gi kavitagu na gol.
EXO 26:30 Muri o vakapesia a mailo na Vure, ge ramaia a ngava a taki ioe vona na lolo.
EXO 26:31 “O ratea tara kala o vakabagetua na hotu gomagoma, na hotu kuakua, na hotu vururu ni rata na vuna sipsip. O rahi dili vona a hanuna a agelo.
EXO 26:32 O bole a kai a akas ge va o rata a butu, o naviri na gol turana a kinau ni rata na gol, o vakapesi na vuhu-butu i va ni rata na silva.
EXO 26:33 O vakatavorea a kala na maka kinau, muri o bolea a Tava na Ngava Dagi, o rua na bitona kala. Ra kala iea ge nagi mulea a Tabeke Nitaba Hateka na Tabeke Nitaba.
EXO 26:34 O rua a Tava na Ngava Dagi na Tabeke Nitaba Hateka, o tukaria a matana. Ra matana tava, a murina nidodo.
EXO 26:35 O rua a dede polovavo na Tabeke Nitaba, na tabeke mule sike na mailo na Vure; a butuna lam o vakapesia na tabeke tano.
EXO 26:36 “O ratea a kala dagi ge a hinebi na kape. O vakabagetua na hotu gomagoma, na hotu vururu, na hotu kuakua ni rata na vuna sipsip.
EXO 26:37 O rata na kai a akas a butu ge lima o naviri na gol. O bole a kinau ni rata na gol o kolo dili na maka butu ne vona ni vakatavore a kala. O rata na bras a vuhu-butu ge lima, ge tahoka a dupi ne vona ni vakapesi a maka butu.
EXO 27:1 “O ratea na kai a akas a dede na nihabi gutu-vuro a nipesina ge 1 mita 30 sentimita. A harena i va ge palupulupu, ge 2 mita 20 sentimita.
EXO 27:2 O kau a tupi ge va na tabekena kai a akas iea, o ru na nimodo na dede i va, o naviria a dede na bras.
EXO 27:3 O bole ranga bras o rata a ulo ne vona a habulo, a maka nikuri, a maka tavila, a maka mego, a maka mola.
EXO 27:4 O ratea na bras a mola ge kabelabela ne vona ni tunu a kanono. O rata a halui ge va na nimodo na dede, ne vona ni rodo polo a binole.
EXO 27:5 O bolea a mola o ru pololiloa na kurukuruna hini polomeli, a hini polotano na dede.
EXO 27:6 O bole a tabekena kai a akas o kau kamumu, o naviri na bras ge a binole.
EXO 27:7 Na tahuna a dede ni kaloho, a binole ni gi rodo dili na halui nga.
EXO 27:8 O ratea a dede ge ngava lokaloka na mavilana kai, ge manga a naro a vakasiri ioe vona na lolo.
EXO 27:9 “O rahia a kala ge ola ni gi kapi halui a mailo na kape. Na tabeke mule puru a niolana kala ge 44 mita ni gi kapi a nure vona.
EXO 27:10 O bolea a kala o vakatavorea na butu i ravulu rua ni rata na bras. Ra butu nga, o vakapesi langa na vuhu-butu i ravulu rua ni rata na bras. O rata na silva a kinau na kala, a karona nure.
EXO 27:11 O rata mavongea a nure na tabeke mule sike. A niolana kala ge 44 mita ni gi kapi a nure vona. O bolea a kala o vakatavorea na butu i ravulu rua ni rata na bras. Ra butu nga, ge pesi langa na vuhu-butu i ravulu rua ni rata na bras.
EXO 27:12 “Na tabeke na nirolona haro mu vakatavore vonga a kala, a niolana ge 22 mita. O vakapesi vonga a butu ge ravulu, a vuhu-butu ge ravulu ni rata na bras.
EXO 27:13 A nure na tabeke na nirikena haro na hini i vona a logo, a niolana ge 22 mita.
EXO 27:14 Na tabeke tara polovavo na logo o vakatavorea vonga a kala, a niolana ge 6 mita 60 sentimita. O vakapesi langa vonga na vuhu-butu ge tolu, a butu ge tolu.
EXO 27:15 Na tabeke tara na logo ge mavonga kunana.
EXO 27:16 “Na matana kape o vakatavorea tara kala kamumu a niolana ge 9 mita. O rahi dili a maka bagetua vona na maka hotu gomagoma, na hotu vururu, na hotu kuakua ni rata na vuna sipsip. O vakapesi a butu ge va na vuhu-butu ni rata na bras o vakatavorea a kala.
EXO 27:17 O rata na silva kinau, o varaki a maka butu na nure na karo ni rata na silva. O bole a bras o rata a vuhu-butu ne vona ni vakapesi a butu.
EXO 27:18 A niolana nure ge 44 mita, a nibolana ge 22 mita, a nipesina ge 2 mita 20 sentimita. O bole a kala keakea kamumu ni gi naviri vona a nure iea. O bole a bras ni gi rata a vuhu-butu ne vona ni vakapesi a butuna nure.
EXO 27:19 A maka mahalana kape ni gi rata na bras, turana a maka niroka ne vona ni tua kamumu ni vakatora a kape, a niroka na nure.
EXO 27:20 “O taki e huriki a Israel ri gi habi a namona oliv ni gi guru dili na lam ge para vakaroro.
EXO 27:21 E Aron turane huriki e tuna bakovi, ri gi bole dili na kape a lam ne vona ni tagui iau. Ra lam iea, ni gi ru polovavo na kala i naviri mule a Tava na Ngava Dagi. Na parava lobo ri gi guru dili a namona oliv na lam ge para na roho nau, e BAKOVI DAGI, ge vakatubu na malunga ge harena na hatelanga. E huriki a Israel turane huriki a hamone ria, ri gi ramai vakaroroa a vinara iea.
EXO 28:1 “Na tahuna o hamule o taki e turamu e Aron turana e tuna bakovi, e Nadap, e Abihu, e Eleasar, e Itamar, ri gi valai vomu. O tuli tala ria na kurukurune huriki a Israel, o gamai ria ge ria a prister nau.
EXO 28:2 O rata a maka bagetua ni gamai ne Aron ge rodo, ge mata tebi, ge mata hateka vona.
EXO 28:3 O taki e huriki a mari ni rahi a bagetua, ri gi rata a maka bagetua ne Aron, ge rodo na tahuna ge bele manga a prister nau.
EXO 28:4 E huriki a mari ri gi vakabagetu a bagetua nga, a kala kiroko na ngala, a kala kiroko tara, a nirodo ola ola, a siot, a hoi, a palabele. A maka bagetua ni gamai nga, ne vona e Aron turane huriki e tuna bakovi, ri gi bagetu vona na tahuna ri rata a leho na prister.
EXO 28:5 Ri gi vakabagetu a maka nirodo nga, na hotu gomagoma, na hotu kuakua, na hotu vururu ni rata na vuna sipsip, a hotu ni rata na gol.
EXO 28:6 “A bagetua na prister ni gi rata na hotu gomagoma, a hotu vururu, a hotu kuakua, a vuna sipsip ni kalu vururu. Muri ni gi vakabagetu na gol. A palabele na loho ni gi rata ge tangotatea a bagetua, a palabele tara ne vona ni rea halui a kakaina prister.
EXO 28:9 “O bole a kedo oniks i rua, o here a rane huriki e tune Israel i ravulu a polona i rua.
EXO 28:10 O here a rane ria ge ramai a nipodane ria. A rana bakovi ala polotara o here na kedo tara, a rana bakovi polotara tabu o here na kedo tara.
EXO 28:11 Ra leho iea, o habia na bakovi i lohoka ni here na kedo, ge here a rane huriki e tune Israel. O bole a gol ge rata a bagetua ge nugutata tora a kedo nga.
EXO 28:12 O kolo ra kedo nga na palabele i rua na loho, ge tabuli ga kilakila na kabu i ravulu a polona i rua ne Israel. E Aron ge huraki na lohona a rane ria na matane BAKOVI DAGI, ne vona ni luhoi mule e huriki a viri vona.
EXO 28:13 O taki ria ri gi rata na gol a bagetua ge rua,
EXO 28:14 a sen ge rua ni gi rata na gol kabakaba ni gi viri, ni gi kolo dili na bagetua na gol.
EXO 28:15 “O bolea tara tabekena kala kamumu o ratea tara kala, ne vona ni ru na ngalana prister dagi. Ra kala iea ne vona ni bole a lohokanga na ningaru na Vure. Ra kala iea o vakabagetua na hotu ni rata na gol, na hotu gomagoma, na hotu kuakua, na hotu vururu.
EXO 28:16 A niolana kala kiroko iea ge 44 sentimita, a nibolana ge 22 sentimita. Ni gi pilu na kurukuruna ge tabuli palupu a harena ge rua.
EXO 28:17 O kolo dili na tete ge va a kedo parahidi. Na mugana tete o kolo dili a kedo a rubi, a topas, a beril.
EXO 28:18 Na ruana tete o kolo dili a kedo a emeral, a sapaia, a daiman.
EXO 28:19 Na toluna tete o kolo dili a kedo a iasint, a aget, a ametis.
EXO 28:20 Na vana tete o kolo dili a kedo a krisolait, a oniks, a iaspa. O kolo a kedo parahidi na bagetua kiroko na gol, muri o kolo dilia na kala.
EXO 28:21 O here a rane huriki e tune Israel ala ravulu a polona i rua na kedo nga. A kedo ge taku ni gi here vona a rana a kabu ge taku.
EXO 28:22 “O bole a gol kabakaba, o ubi ge lili kiroko, o viri a sen ge rua, ge manga a mota ge ne vona a kala na ngala.
EXO 28:23 O rata a halui ge rua, ni gi varomu na nimodo polomeli na kala kiroko na ngala.
EXO 28:24 O bole a sen nga o varomu na halui i rua.
EXO 28:25 Na harena sen nga i rua o varomu dili na palabele a bagetua, ge nugutata a kala na prister dagi.
EXO 28:26 O rata tabu a halui ge rua o kolo pololilo, polotano na nimodo na kala na ngalana prister.
EXO 28:27 O rata na gol a halui ge rua, o kolo na palabele i nugutata a kala, tabukoi na palabele a prister i rea halui ia vona.
EXO 28:28 O bole a mota gomagoma o kolo dili na kala na ngala a halui ge rua, muri o kolo lakea tabu na bagetua, bara i tabuli tora a bagetua na ngala.
EXO 28:29 “Na tahuna e Aron i dili na Tabeke Nitaba, bara i bolea a kala kiroko iea, i tahoka a rane huriki a kabu ne Israel i ravulu a polona i rua, ge kolotatea na ngalana. Na tahuna a masia i kolotatea na ngalana a kala kiroko iea, iau, e BAKOVI DAGI, bara luhoi mule e huriki a viri nau, a Israel.
EXO 28:30 O ru a kedo i rua ne vona ni bole a lohokanga na ningaru na Vure, pololilo na poket na kala na ngalana prister. Na tahuna e Aron i dili i pesi na matane BAKOVI DAGI, ge bole dili ra kedo nga. Na parava vakaroro ge koloa na ngalana ra kala iea, ge valai, ge bole a lohokanga na a ra maki e huriki a Israel ri gi rata.
EXO 28:31 “O rata a nirodo ola ola na hotu gomagoma.
EXO 28:32 A murina gigi ge dili vona, ni gi rahi na hotu gatuka, i uka ma ge marape.
EXO 28:33 O bole a hotu gomagoma, a hotu kuakua, a hotu vururu, o rahi dili a naro ge manga a kanena kai a pomigranet polotano na bagetua na prister. Na koropalana pomigranet, o rahi dili a belo kiroko ni rata na gol ge tavore.
EXO 28:35 E Aron ge rodoa a bagetua iea, ge ratea a leho na prister. Na tahuna i valai tabukoi nau na Tabeke Nitaba, na tahuna i hamule pori, e huriki bara ri longoa a nangina belo. Ia i uka ma i ramaia a naro iea bara i mate.
EXO 28:36 “O bolea a gol kabakaba, o ratea a hulongi, o herea vona a ngava iea, ‘Ne vona e BAKOVI DAGI.’
EXO 28:37 Muri o bolea a mota gomagoma o kolotatea a hulongi, muga na hoi na prister dagi.
EXO 28:38 Na parava vakaroro e Aron ge kubea ra hoi iea i tahoka a hulongi. Lakea iau bara bolea vona a nihabi ni gamai i habia nau e huriki a Israel. Ria bara ri rata ruru ranga naro na nihabi, e Aron bara i bole a rarenga.
EXO 28:39 “O bole a hotu kamumu, mu rahia a harena siot ge tora. O ratea a hoi na kala kamumu ge kubea e Aron. O bolea a tabekena kala o ratea a palabele kiroko, o rahi dili vona a maka bagetua kamumu.
EXO 28:40 O rata a maka siot, a palabele kiroko, a hoi, ne vona e huriki e tune Aron bakovi, ri gi bagetu vona, ri gi mata hateka na matane huriki.
EXO 28:41 O vakarodoa na bagetua e Aron, e huriki e tuna. O vakarodo lobo ria, muri o gamai ria, o biri ria na nibiri, o habi ria nau, ge ria a prister, ri gi rata a leho nau.
EXO 28:42 “O rahi a poho ri gi rodo, ma ge lele a tagane ria.
EXO 28:43 E Aron turane huriki e tuna, ri gi rodo a poho nga na tahuna ri lakea na dede, ri gi rata a leho pololilo na Tabeke Nitaba, o na tahuna ri dili na Kape na Vaponga nau. Ria i uka ma ri rata mavonga, bara ri tahoka a ngava, a rabalaki ria. “E Aron turane huriki a hamona ri gi ramai vakaroroa a vinara iea.
EXO 29:1 “Ngane ga taki ioe vona a maki go ratea ne Aron turane huriki e tuna, ge ria a prister nau. O bole a bulmakau, a sipsip a toga karaba ge rua ge gavutuvutu.
EXO 29:2 O bole a bret kamumu ge uka a is, o vuli turana a namona oliv, o rata a bret a bisket.
EXO 29:3 O ru dili na kulopi a maka bret a bisket o bole valai nau turana a bulmakau, a sipsip nga ge rua.
EXO 29:4 “O tuli valai na matana kape nau e huriki e tune Aron bakovi, o vahilolo ria na naru.
EXO 29:5 Muri o vakarodoa na bagetua na prister e Aron. O vakarodoa na siot, a nirodo ola ola, a kala kiroko, a kala na ngala, o vakarea ia vona a palabele.
EXO 29:6 O bolea a hoi o vakakubea vona. Muri o bolea a hulongi ni gamai, o pipi dilia na hoi vona.
EXO 29:7 Muri o bolea a nibiri o guru langea na gina o gamaia.
EXO 29:8 O gamai loboa e Aron o tuli valai e huriki e tuna, o vakarodo ria na siot,
EXO 29:9 o vakarea ria na palabele, o kae a hoi na gine ria. Ra naro o ratea i vakasiri e Aron turana e tuna mai, ria e huriki a prister nau. Re huriki a bakovi nga, turane huriki a hamone ria bara ri rata vakaroro a leho na prister.
EXO 29:10 “O bole lakea na matana kape nau a bulmakau ge a nihabi. Muri e Aron turane huriki e tuna ri gi ru langa a limane ria na mapana.
EXO 29:11 O rabalakia na matagu a bulmakau, tabukoi na matana kape nau.
EXO 29:12 O bole ranga darana bulmakau na kuku limamu, o ru na tupina dede. Muri o bole paru a dara i tababana, o guru polotano na dede.
EXO 29:13 O bole a maka mahalana bulmakau turana a hatena, a vuanalipina, o gutu na dede.
EXO 29:14 Pali a bobona bulmakau, a kulina, a tamudina, o bole tala, o rungani polovavo na mada. Ra bulmakau iea, a nihabi ne vona ni puga vuroki a naro hale.
EXO 29:15 “O bolea a sipsip a toga ge a nihabi. E Aron turana e tuna mai, ri gi ru langa a limane ria na gina tuna sipsip.
EXO 29:16 Muri o rabalakia a sipsip, o bole a darana, o voro langa na tabeke na dede i va.
EXO 29:17 O poka kesikesia, o vahilolo a vahana ge rua, a maka mahalana, o ru langa na mapana.
EXO 29:18 O gutu ge vuro lobo liu a sipsip na dede, ge a nihabi gutu-vuro na kanono ne vona e BAKOVI DAGI. Lakea iau bara burongi a mangina bara vivi.
EXO 29:19 “O bole tabua tara sipsip, o taki e Aron turana e tuna mai, ri gi ru langa a limane ria vona.
EXO 29:20 O rabalakia a sipsip iea, o bole ranga darana o ravu na kanena taruna talingana e Aron, e tuna mai. Muri o bole tabu a dara o ravu na kukukoru na limana a kanena, a kukukoru na vahana a kanene ria. O bole paru a dara i tababana, o voro langa na tabeke lobo na dede.
EXO 29:21 Muri o bole ranga dara i tabuli na gagana dede, a nibiri, o voro langa ne Aron turane huriki e tuna. O voro langa tabu na bagetua ne ria a dara, a nibiri. A naro o ratea ne ria, i vakasiri a bagetua ne ria a maki nau.
EXO 29:22 “O bole tabua tara sipsip a toga, o pokea, o bole lobo a maka vina ge a nihabi na tahuna ni gamai a prister. O bolea a kuna, a kinakena, a hatelilo, a hatekato, a hatelipi turana a vina, a gepena kanena.
EXO 29:23 Na kulopi na bret i uka is, ra nihabi nau, o bole tala a bret ni gutu na namona oliv, a bret tara i uka ma ni gutu na namona oliv, a bisket.
EXO 29:24 Muri o habi a bret a balena sipsip ne Aron, turane huriki e tuna. Ri gi bole a nihabi nga ri gi tabari iau vona, ge a nihabi na nitabari.
EXO 29:25 O bole na limane ria a maki ni kani, o gutu na dede turana maka nihabi gutu-vuro, ge a nihabi na kanono ne vona e BAKOVI DAGI. Lakea iau bara burongi a mangina bara vivi.
EXO 29:26 O bolea a siana sipsip ni poka muri ne vona ni gamai e Aron, o tabari iau vona. Muri o bolea ge ne vomu.
EXO 29:27 “Na tahuna o ngaru ni ratea tara bakovi ge ia a prister, o bole a siana, a pona sipsip, o tabari iau vona. Muri o habi ne huriki a prister ra maka balena nga.
EXO 29:28 E huriki a Israel ri gi rata vakaroroa a nihabi iea, ri gi habia nau e BAKOVI DAGI a sipsip, ne vona a nivalemu. Muri ri gi habi ne Aron turane tuna mai a siana, a gepena sipsip, ri gi kani.
EXO 29:29 “Muri ne Aron ge mate, a maka bagetua vona na prister ge vabole polo vona e huriki a hamona. E rei ni gamai ge ia a prister dagi ge bole a murina, ge rodo a maka bagetua nga. Ra bagetua nga ge rodo na parava ge polorua, na tahuna i rata a leho na Tabeke Nitaba pololilo na Kape na Vaponga.
EXO 29:31 “Na tahuna o gamai e Aron, e huriki e tuna, o bolea a bobona sipsip a toga ra o habia nau, o ru dili na ulo o nono pololiloa na mailo nitaba.
EXO 29:32 E Aron turane tuna mai ri gi bole a bobona sipsip a bret i tababana na kulopi, ri gi kani na matana Kape na Vaponga.
EXO 29:33 Ri gi kani ra maki ni kani ni habi nau, ga puga vuroki a naro hale ne ria, na tahuna ni gamai ria ge ria a prister. E huriki a prister kunana ri gi kani ra kinani nga. E huriki a bakovi tavula nahea ri gi kani a vuhuna ni gamai.
EXO 29:34 A bobona sipsip a bret ranga ge palala taho a hini, naha ni kani. Ra maka kinani nga ni gamai, ni gi gutu na kanono ge vuro.
EXO 29:35 “O ratea a leho iea ni gamai e Aron turane huriki e tuna na parava ge polorua, ge manga a naro a vakuku ioe vona.
EXO 29:36 Na parava lobo o habia nau tara bulmakau, ge a nihabi ni kavitagu a naro hale. Ra nihabi iea ge ratea a dede nau ge matapado na matagu. O guru langa na dede a nibiri, o gamaia ga dede nau.
EXO 29:37 O gamaia a dede iea na parava ge polorua, ga maki nau kunana. A viri tara ge nugua, a maki tara ge padoia bara i malamala.
EXO 29:38 “Na parava vakaroro o bole a tuna sipsip ge rua, a pida ne rua ge taku, o habi na dede.
EXO 29:39 O habia na hatelanga tara na malunga liu tara.
EXO 29:40 O bolea a kilo ge taku na plaoa o vuli turana a lita ge taku na namona oliv, o habi nau turana a sipsip. O guru tabua a lita na vain ge taku, ge a nihabi na vain.
EXO 29:41 O tabari tabua nau na malunga liu a sipsip tara. O bole a bret ge manga a hini muga turana a namona oliv, a vain, mu habi nau ge manga a nihabi na hatelanga, ge a nihabi gutu-vuro na kanono ne BAKOVI DAGI. Lakea iau bara burongi a mangina bara vivi.
EXO 29:42 Ra nihabi ni gutu-vuro ge rata vakaroroa e huriki a hamone mua na matana Kape na Vaponga, iau e BAKOVI DAGI ga tagui mua vonga, ga ta turane mua.
EXO 29:43 A nipara dagi nau ge bele na kape, ge ratea a tabeke iea, a tabeke nau kunana. Nahea tara viri ge valai vona.
EXO 29:44 “Ga gamai a kape, a dede, ga maki nau kunana. Ga gamai tabu e Aron turane huriki e tuna, ri gi rata a leho nau manga a prister.
EXO 29:45 Ga made turane huriki a Israel, ge iau a Vure ne ria.
EXO 29:46 Ri gi lohoka kamumu nau, iau kunana a tuli tala ria o Egipto, a taparaki valai ria koea ga made turane ria. Iau kunana e BAKOVI DAGI a Vure ne ria.
EXO 30:1 “O bolea a kai a akas o haea a dede ne vona ni habi a havu mangisipa nau.
EXO 30:2 A niolana dede ge 45 sentimita a nibolana tara ge 45 sentimita, a nipesina ge 90 sentimita. O kau ge va a tupi na nimodona dede i va.
EXO 30:3 A hini polomeli, o kavitagu na gol kabakaba a tupi. A harena dede mu kavitagua na tabekena gol ge ola.
EXO 30:4 O rata na gol a halui ge rua, o rua koea tara, na tabeke lake tara, ne vona ni rodo dili a binole. O kolotata ra halui nga polotano tabukoi na gol, o kolotata na harehare.
EXO 30:5 O kau a tabekena kai a akas ge rua, ga binole na dede. O kavitagu na gol a binole nga.
EXO 30:6 O bolea a dede o rua polovavo na kala dagi, i naviri mule a Tava na Ngava Dagi, tabukoi na murina nidodo polomeli na tava, na hini ga tagui ioe vona.
EXO 30:7 “Na hatelanga lobo e Aron ge valai ge rata kamumu a maka lam, ge namia a havu mangisipa ge vakabele a pokona kanono manginoro.
EXO 30:8 Na malunga liu ge nami tabua a havu mangisipa, na tahuna i valai ge nami a maka lam. Ra nihabi iea, e huriki a hamone mua ri gi ratea vakaroro muri ma na matane BAKOVI DAGI.
EXO 30:9 Na dede iea, naha ni tabari iau vona a havu mangisipa, a sipsip ni gutu-vuro, a vit, a vain i uka ma ni gamai.
EXO 30:10 Na parava ge taku kunana na pida lobo e Aron ge ratea a dede iea ge matapado na matagu. Ge bole ranga dara na sipsip ra mu habi ni puga vuroki a naro hale, mu ru na tupina dede. Ra dede iea ni gamaia, ne nau kunana. E huriki a hamomu ri gi rata maea muri ma.”
EXO 30:11 Muri e BAKOVI DAGI i takia e Moses,
EXO 30:12 “Na tahuna o bole a rane huriki a Israel, o here puru na puhu, o taki ria ri gi habi tavula nau ranga mahala. Ge uka, a gilanga dagi bara i bele i ratapile ria.
EXO 30:13 E huriki ni here a rane ria ri gi habi a moni silva ge polotara na gram, ge a nihabi ne BAKOVI DAGI.
EXO 30:14 O here puru a rane huriki ri tahoka a pida i ravulu rua, i rike. Ria lobo ri gi habi a moni nau.
EXO 30:15 A bakovi na mahala, nahea ge habi kupo. A matasia, nahea ge habi popote. A bakovi i taku ge habi kunana nau a moni silva maea, ne vona ni kavitagu a naro hale vona, i uka ma ge mate.
EXO 30:16 Ra moni nga ne vona ni matakari a kape nau. Ga matai a moni, ga luhoi e huriki a Israel, ga kavitagu a naro hale ne ria.”
EXO 30:17 E BAKOVI DAGI i takia e Moses,
EXO 30:18 “Mu bole ranga bras mu ratea tara tavila, mu ratea tara dede ne vona ni ru langa a tavila vona. Mu kiru na tavila a naru, mu ru na koropalana a dede, a Kape na Vaponga.
EXO 30:19 E Aron turane huriki e tuna ri gi vahilolo a limane ria, a vahane ria vona.
EXO 30:20 E huriki ri ngaru ni dili na roho nau o ri gi valai tabukoi na dede nau, ri gi habi a nihabi ni gutu na kanono ne BAKOVI DAGI, ri gi vahilolo taro a limane ria, a vahane ria, i uka ma ri gi mate.
EXO 30:21 Muholi hateka, ri gi vahilolo a limane ria a vahane ria, i uka ma ri gi mate. E huriki a hamone Aron kunana, bara ri ramaia a vinara iea.”
EXO 30:22 E BAKOVI DAGI i takia e Moses,
EXO 30:23 “O bole kadolu a maka mangisipa kamumu. O bolea a mir, a nimavana a kilo ge polotara. O bole ranga havu ni gale a sinamon, a nimavana a kilo ge tolu.
EXO 30:24 O bole ranga havu ni rata na kulina kai a kasia, a nimavana a kilo ge polotara. O bole a namona oliv a lita ge taku; o guru dili na maki nga.
EXO 30:25 O vuli ge bele manga a nibiri. Ra nibiri iea ni taba, ne vona ni gamai a maki nau.
EXO 30:26 “O bolea a nibiri iea, o gamaia a Kape na Vaponga, a Tava na Ngava Dagi,
EXO 30:27 a dede turana a maka mahalana, a butuna lam turana a maka mahalana, a dede na havu mangisipa,
EXO 30:28 a dede ne vona a nihabi gutu-vuro turana a maka mahalana, a tavila na hilova turana a dede vona.
EXO 30:29 O gamai a maki nga, ga maki nau kunana. A bakovi o a maki tara ge padoi a maki nga, bara i matapado.
EXO 30:30 “Muri o gamai e Aron turane huriki e tuna bakovi, ge ria a prister, ri gi rata a leho nau.
EXO 30:31 O taki e huriki a Israel, o ta maea, ‘Mua, turane huriki a hamone mua, mu bolea a nibiri iea mu gamai a maki nau.
EXO 30:32 Naha ni guru langa na bakovi tavula. Naha ni rata a nibiri ne mua ge maea. Ra nibiri iea ni taba, naha ni padoia.
EXO 30:33 A bakovi i ratea tara nibiri maea, o ge guru langa tavulea na bakovi tavula tara, ra bakovi iea i uka ma ge made turane huriki a viri vona.’”
EXO 30:34 E BAKOVI DAGI i takia e Moses, “O bole a stakti, a onika, a bulukana a keke ni gale a golbanum, a bulukana a kai a balsam, o vuli ge vakabele a havu na havu mangisipa. A nimavana maki nga ge palupulupu.
EXO 30:35 O bole a maki nga, o vuli kamumu, o rata a havu na havu mangisipa. O bole a mami popote o ru puru na havu ge ratea ge matapado ge malamala.
EXO 30:36 O tutu kamumu a maki nga, ge bele a havu, muri o bole dili na Kape na Vaponga ranga, o ru tabukoi na Tava na Ngava Dagi na hini ga tagui mua vona. Ra havu iea i malamala hateka.
EXO 30:37 Nahea tara bakovi ge ratea tara havu maea ge habia mua. Ra havu iea ni gi ru herehere ge nau kunana, e BAKOVI DAGI.
EXO 30:38 E rei a viri i ratea tara havu ge maea, ra bakovi iea i uka ma i kara ge made turane huriki a viri vona.”
EXO 31:1 E BAKOVI DAGI i takia e Moses,
EXO 31:2 “O longo, a vulakia pali e Besalel e tune Uri bakovi, e tubune Hur na kabu ne Iuda.
EXO 31:3 A habia vona a Hanuna Vure, turana a nitora, a lohokanga, a niluhoi ni ratana a maki legelege.
EXO 31:4 Ge rata a maka maki kamumu na gol, na silva, na bras.
EXO 31:5 Ge rata a maki na kedo parahidi, na maka kai, na maki legelege ranga, ge vakabagetu a kape nau.
EXO 31:6 A vulaki tabua e Oholiap, e tune Ahisimak na kabu ne Dan, ge leho turana e Besalel. A habi tabu a lohokanga ne huriki ranga, ri gi rata a maki a ngaru ri gi rata.
EXO 31:7 Ri gi rata a Kape na Vaponga, a Tava na Ngava Dagi turana a murina nidodo, a maka mahalana kape.
EXO 31:8 Ri gi rata a dede turana a maka mahalana, a butuna lam ni rata na gol kamumu turana a maka mahalana dede na havu mangisipa.
EXO 31:9 Ri gi haea a dede na nihabi gutu-vuro turana mahalana, a tavila ni vahilolo a lima a vaha turana a dedena.
EXO 31:10 Ri gi rahi a maka bagetua kamumu ne Aron, ne huriki e tuna, ri gi rodo ri gi rata a leho na prister.
EXO 31:11 Ri gi rata a nibiri ne vona ni gamai a maki nau, a havu mangisipa ni gi rungani na Tabeke Nitaba. Ri gi rata a maki nga, ge manga kunana a ngava a taki ioe vona na lolo.”
EXO 31:12 E BAKOVI DAGI i takia e Moses,
EXO 31:13 “O vano o taki e huriki a Israel, ‘A parava polorua, ia a Parava Nimalo nau. Na vik vakaroro mu malo vona a parava iea, ra a habia mua mu gu ramaia ngane, e huriki a hamone mua ri gi ramai vakaroroa, ge ia a kilakila ne mua muri ma. A rata mavonga, a vuhuna bara mu lohoka vona iau e BAKOVI DAGI, a vulaki mua ge mua a viri nau.
EXO 31:14 Ra Parava Nimalo a parava nau, a malo vona. A viri i longotaro a vinara nau, i leho vona a parava iea, ni gi rabalaki.
EXO 31:15 Na maka vik lobo mu tahoka a parava i polotara mu leho vona, pali a parava polorua, a parava nau, a Parava Nimalo. E rei a viri i rata a leho vona a parava iea, ni gi rabalaki.
EXO 31:16 E huriki a Israel, ri gi malo vona a parava iea, e huriki a hamone ria ri gi ramai vakaroroa a ngava dagi iea na maka pida ge valai.
EXO 31:17 Ra parava iea a kilakila na ngava dagi a ratea turane huriki a Israel, ri gi luhoi vakaroroa. Na parava i polotara a rata rike a hunu a malala, pali na poloruana parava a taparaki a maka leho lobo, a malo.”
EXO 31:18 Na tahuna e Bakovi Dagi i ta lobo turane Moses na lolo e Sinai, i habi ne Moses a tabekena kedo i rua na Ngava Dagi, ra ia a Vure i here na limana.
EXO 32:1 E Moses i made tabaka hateka na lolo, i uka ma i malaviriri ni puru valai. Lakea e huriki ri pesi halui e Aron ri takia, “I uka ma si lohoka vona a ra maki i bele ne Moses meli na lolo. I tuli tala hita o Egipto, i taparaki valai hita koea. Pali ngane si gi rata ranga vure, ri gi muga ri gi vakasiri a dala ne hita.”
EXO 32:2 Lakea e Aron i taki ria, “Mu paru tala a maka pato ni rata na gol na talingane girihine mua, e tune mua, mu bole valai nau.”
EXO 32:3 Ri longo maia a nitane Aron, ri paru tala na talingane huriki a ngatavine a maka pato ni rata na gol, ri bole valai vona.
EXO 32:4 E Aron i bole a maka gol, i gutu na kanono ri naru. I guru dili na lovo ni keli i manga a bulmakau, i ratea a hanuna bulmakau. Muri e huriki a Israel ri ta maea, “Ra maki iea, a vure ne hita. I tuli tala hita o Egipto, i taparaki valai hita koea.”
EXO 32:5 Na tahuna e Aron i masia, i ratea a dede tabukoi vona. Lakea i ta maea, “Kuduvi si gi ratea tara habu, si gi kavurikea e BAKOVI DAGI.”
EXO 32:6 Na hatelanga pokopoko na parava muri, e huriki ri bole valai a maka sipsip a bulmakau, ge a nihabi gutu-vuro. Ri bole valai tabu a nihabi na nivalemu. Muri ri kani, ri ninu, ri rehi turane huriki a ngatavine.
EXO 32:7 Lakea e BAKOVI DAGI i takia e Moses, “O puru malaviriri. E huriki o tuli tala o Egipto ri rata hateka a naro hale.
EXO 32:8 Ri longokaburungia a dala a takia ne ria ri gi ramaia. Ri ratea na gol a tuna bulmakau, ri kavurikea, ri habi a nihabi vona. Lakea ri ta maea, ‘Ra maki iea a vure ne hita, i tuli tala hita o Egipto, i taparaki valai hita koea.’”
EXO 32:9 Lakea e BAKOVI DAGI i takia e Moses, “Iau a lohoka vona e huriki nga, ri tagege hateka.
EXO 32:10 Iau, i madihi a hategu ne ria. Ngane ga ratapile ria, naha ni hatekakari iau. Muri ga rata ioe, turane huriki a hamomu bara mu kuloi ria, mu bele kupo.”
EXO 32:11 Pali e Moses i vasileki tora ne BAKOVI DAGI, a Vure vona, i ta maea, “BAKOVI DAGI, nahea ge madihi hateka a hatemu, go ratapile ria. Ioe kunana o bole tala ria o Egipto na nitora dagi vomu.
EXO 32:12 Ioe bara o ratapile ria, e huriki a Egipto bara ri ta maea, ‘A Vure i tami e huriki a viri vona, i bole tala o Egipto, i tuli lakea ria na lolo, i rabalaki ria.’ Pali naha ni ratea ra naro iea. I kamumu hateka o taparakia a rongova o puloa a niluhoi vomu, naha ni rabalaki e huriki a viri vomu.
EXO 32:13 O luhoi mule a vora vomu e Abraham, e Isak, e Iakop. O kaba, o taki tou o ta maea, ‘A ta muholi hateka, e huriki a hamone matou ge kupo manga a hada na hunu. Ra malala a ta muholi vona, ga habia ne matou, bara habia ne huriki a hamone matou.’”
EXO 32:14 E Moses i vasileki maea, lakea e BAKOVI DAGI i puloa a niluhoi vona, i uka ma i ratapile e huriki a viri vona.
EXO 32:15 Muri e Moses i ngalakapulo, i bole a tabekena kedo i rua e Bakovi Dagi i here a Ngava Dagi vona, i puru.
EXO 32:16 A Vure kunana i rata ra kedo nga, i here vona a vinara.
EXO 32:17 Na tahuna e Iosua i longo e huriki ri kalolo, i takia e Moses, “O longo puru! A longo a nangine huriki ri vaubi na mada.”
EXO 32:18 Pali e Moses i koli, i ta maea, “I uka ma a nangine huriki ri mulangi na vabinga, i uka ma a nangine huriki ri pinadi na vabinga. a nangine huriki ri kalolo a longoa.”
EXO 32:19 E Moses i valai tabukoi na mada i masia a tuna bulmakau ni rata na gol. I matai e huriki ri raulo haluia a bulmakau, i madihi a hatena. Lakea i voro puru ra tabekena kedo nga ru momo kesikesi na dahana lolo.
EXO 32:20 Lakea e Moses i bolea ra bulmakau i ratea e huriki, i rungania na kanono, i ubimomoa i havula kesi. Muri i bole a habulona, i voro puru na naru, i vakuku e huriki a Israel ri nua a naru.
EXO 32:21 Lakea e Moses i nanea e Aron, “Re huriki nga a ra ri ratea vomu, o mata taro ria ri ratea ra naro hale dagi iea?”
EXO 32:22 E Aron i kolia e Moses, i ta maea, “Bakovi dagi, naha ni tahate iau. O lohoka vona a narone ria. Ri ngaru hateka ni rata a naro hale.
EXO 32:23 Ri taki iau, ri ta maea, ‘I uka ma mi lohoka vona a ra maki i bele vona e Moses, ra bakovi i bole tala hita o Egipto. O rata puru ne mia ranga vure ge muga, ge vakasiri a dala ne mia.’
EXO 32:24 Muri a taki ria, ‘E rei a viri i tahoka a gol ge kali tala.’ Lakea ri habi nau a gol, a voro rike na kanono, i bele a tuna bulmakau.”
EXO 32:25 E Moses i lohoka vona e huriki ri rata a naro hale, a vuhuna e Aron i matataro ria. I luhoi ma ge matai ria e huriki a pile bara ri biu, ri nongo vaki ria.
EXO 32:26 Muri i vano i pesi na poridala na mada i ta maea, “E rei i ngaru ni ramai e Bakovi Dagi, ge valai ge pesi turagu.” Lakea e huriki a bakovi na kabu ne Levi ri valai ri pesi halui ia.
EXO 32:27 Muri e Moses i taki ria, “E BAKOVI DAGI, a Vure ne hita a Israel i taki mu gu bole a maka bainat, mu lakea na tabeke lobo na mada mu rabalaki e huriki a turane mua.”
EXO 32:28 Lakea e huriki a kabu ne Levi ri rata manga a hini e Moses i taki. Na parava iea kunana ri rabalaki e huriki ri ala 3,000.
EXO 32:29 Muri e Moses i taki e huriki a hamone Levi i ta maea, “Ngane mu rabalaki pali e huriki, i uka ma mu togo e huriki e turane mua, e tune mua. Na naro iea kunana, mu bele manga e huriki a prister ne BAKOVI DAGI. Mona e BAKOVI DAGI i rata kamumu mua.”
EXO 32:30 Na parava muri e Moses i taki e huriki, “Ra naro hale mu ratea i hale hateka. Pali ngane ga sike tabu na lolo, ga takia e BAKOVI DAGI, ge puga vuroki a naro hale ne mua.”
EXO 32:31 Muri e Moses i sike na lolo i takia e BAKOVI DAGI, “A dodo hateka re huriki nga, ri rata a naro hale dagi. Ri ratea na gol a vure.
EXO 32:32 Pali ngane a nana ioe, ta go puga vuroki a naro hale ne ria. Pali ge uka, a ngaru ioe go ravunu vurokia a ragu na puhu vomu.”
EXO 32:33 Pali e BAKOVI DAGI i takia e Moses, “I uka ma ge mavonga. Iau ga ravunu vuroki kunana a rane huriki ri rata a naro hale.
EXO 32:34 O vano ngane, o tuli e huriki ri gi lakea vona a tanga, a taki ioe vona ri gi lakea vona. O longo kamumu. A agelo nau ge muga, ge vakasiri a dala ne mua. Pali na tahuna ga hamule valai, ga ratapile e huriki ri rata a naro hale.”
EXO 32:35 Muri e BAKOVI DAGI i rudua a gilanga dagi, i ratapile e huriki, a vuhuna ri simaia e Aron i ratea na gol a hanuna tuna bulmakau.
EXO 33:1 E BAKOVI DAGI i takia e Moses, “Ngane, o vano turane huriki o bole tala o Egipto, mu pea a tanga iea, mu lakea na malala a ta muholi vona ga habia ne mua. Hosi a ta muholi vona ne Abraham, ne Isak, ne Iakop, a ta maea, ‘Ga habia ne huriki a hamone matou a malala iea.’
EXO 33:2 Ga rudua a agelo nau, ge muga mua, ge vakasiri a dala ne mua. Iau bara lili tala e huriki a Kenan, a Amor, a Hiti, a Peres, a Hivi, a Iebus ra ri made vona a malala iea.
EXO 33:3 Mu vano mu made vona a malala kamumu i vona a maki ni kani. Pali iau i uka ma ga turane mua, a vuhuna mu tagege hateka. Ma ga turane mua, ga ratapile mua na dala.”
EXO 33:4 Na tahuna ri longoa a nitane Bakovi Dagi, ri mangenge, i uka ma ri bagetu na nirodo kamumu ne ria.
EXO 33:5 E BAKOVI DAGI i takia e Moses ge vakalongo e huriki a Israel vona a nitana, “Mu tagege hateka. Iau bara vano turane mua o ga made popote turane mua, bara ratapile mua. Ngane mu longo, mu kali tala a maka bagetua ne mua ni rata na gol, ga luhoi kamumu a ra naro ga rata virihi mua vona.”
EXO 33:6 Na tahuna ri pe a lolo e Sinai, i uka ma ri bagetu na nirodo kamumu.
EXO 33:7 Na tahuna e huriki a Israel ri lakea na tabeke tara, ri vakapesi a kape ne ria. Pali e Moses bara i vakapesi basi popote na mada a kape ni tagui e BAKOVI DAGI. E rei a viri i ngaru ni lohoka na ningaru vona, bara i lakea vona a kape iea.
EXO 33:8 Na tahuna e Moses i dili vona a kape iea, e huriki ri made na kape ne ria bara ri pesi ri matanonoa e Moses i laho dili.
EXO 33:9 Na tahuna i dili pali, a bubu bara i puru valai i pesi tabukoi na matana kape. E huriki ri longoa e BAKOVI DAGI i made pololilo na bubu, i ta turane Moses.
EXO 33:10 Bara ri pesi na matana kape ne ria, ri masia a bubu i pesi tabukoi na matana kape na Vure, lakea ri lolu ri kavurikea a Vure.
EXO 33:11 E BAKOVI DAGI i ta turane Moses i manga a bakovi i ta turana a bakovi tara. Na tahuna ru vata lobo, e Moses i hamule na mada. Pali a koma tamuhane, e Iosua, a bolekori ne Moses, e tune Nun, i made mule na kape.
EXO 33:12 E Moses i takia e BAKOVI DAGI, “Muga o taki iau ga matakari e huriki ri gi lakea na malala ne ria. Pali i uka ma o taki iau vona e rei a bakovi ge turagu ge tuhori iau. Muga o ta maea, ‘A lohoka kamumu vomu, a ngaru ioe.’
EXO 33:13 Ioe o ngaru iau, o taki iau vona a niluhoi vomu, ga lohoka kamumu vomu, ga rata vakaroro a maki o ngaru. O luhoi kamumu, e huriki a bakovi a ngatavine o vulaki pali, ngane ria a viri vomu.”
EXO 33:14 E Bakovi Dagi i koli, i ta maea, “Iau ga vano turamu, ga habi a nivalemu vomu o malo.”
EXO 33:15 Lakea e Moses i taki tabua e Bakovi Dagi, “Ioe o marikoi ni vano turane mia, naha ni matataro mia mi gi pea a tabeke iea.
EXO 33:16 Ioe i uka ma o vano turane mia, mi gi lohoka navai vomu o ngaru mia? Ioe bara o vano turane mia, e huriki a kabu ranga bara ri lohoka vona, e huriki a Israel ria a viri vomu.”
EXO 33:17 Lakea e BAKOVI DAGI i takia e Moses, “Iau ga rata manga a hini o taki, a vuhuna a ngaru ioe, a lohoka kamumu vomu.”
EXO 33:18 Muri e Moses i takia, “A ngaru ioe go vakasiri iau vona a bagetua vomu.”
EXO 33:19 E BAKOVI DAGI i koli, i ta maea, “Iau ga vakasiria vomu a naro kamumu nau, ga vakalongoa vomu a ragu e BAKOVI DAGI. O longo kamumu! Na tahuna a ngaru ni rata kamumu a viri, bara rata kamumua. Na tahuna a ngaru ni dodo a viri, bara dodoa.
EXO 33:20 Pali i uka ma o kara ni masia a matagu. A viri i matai a matagu bara i mate.
EXO 33:21 “Mata lakea, a kedo dagi i tabuli tabukoi nau, o pesi langa vona.
EXO 33:22 Na tahuna a bagetua nau ge valai tabukoi vomu, ga ru dili ioe na dupina kedo ga kavitagu ioe na limagu, ge harena na tahuna a polotaro ioe.
EXO 33:23 Muri ga bole talea a limagu, o masia a bitogu, pali a matagu i uka ma go masia.”
EXO 34:1 E BAKOVI DAGI i takia e Moses, “O kau a tabekena kedo ge rua, ge manga ra kedo nga o bimomo kesikesi rira. Ga here tabu a ngava ge manga a ngava a here na kedo muga.
EXO 34:2 Kuduvi na hatelanga o bole a tabekena nga, o sike na mapana lolo e Sinai, o tagui iau vonga.
EXO 34:3 Nahea tara viri ge valai turamu. A koi vona tara viri ge valai ge made vona a lolo iea. E huriki lobo ri gi made na taruna. A maka sipsip, a bulmakau nahea ri gi valai ri gi kani tabukoi a varili na lolo.”
EXO 34:4 Lakea e Moses i kau a tabekena kedo i rua i manga a kedo muga, i bole sike na lolo, i ramai a ngava e BAKOVI DAGI i vakuku ia vona.
EXO 34:5 E BAKOVI DAGI i puru valai turana a bubu, i pesi turane Moses na lolo, i vakalongo mulea a rana, e BAKOVI DAGI.
EXO 34:6 I polo na ngalane Moses, i vakalongo maea, “Iau e BAKOVI DAGI, iau e BAKOVI DAGI. Iau a Vure na nidodo na ni rata kamumu e huriki. Iau i uka ma a tahate malaviriri e huriki. A ngaru hateka e huriki a bakovi a ngatavine, a ramai lobo a ngava nau.
EXO 34:7 A ngaru hateka e huriki ri ala ravulu rangale (1,000), i manga a ngava a ta muholi vona pali. A puga vuroki a naro hale ne huriki ri longotaro a nitagu, ri putu puru a vinara, ri rata a naro hale. Pali e huriki ri rata a naro hale, ri tahoka a ngava, ga vakamadihi ria turana e huriki a hamone ria, re huriki e tubune ria, e tamarane ria.”
EXO 34:8 Muri na Vure i ta lobo, e Moses i malaviriri kunana i lolu puru na malala, i kavurikea.
EXO 34:9 Lakea e Moses i takia, “Bakovi Dagi, ioe bara o ngaru muholi iau, a ngaru ioe go vano turane mia. I muholi ngi, re huriki nga ri longotaro hateka a ngava, a ngaru go puga vuroki a naro hale ne ria, o bole mia, ge mia e huriki a viri vomu.”
EXO 34:10 E BAKOVI DAGI i takia e Moses, “Ngane a ta muholi, ga vakasiri na matane mua lobo a maka nivakasiri dagi, i uka ma a vakasiri ma ne huriki lobo na malala. A maka kabu ranga bara ri matai a maki legelege a rata ni tuhori mua, bara ri luhoi lege, ri mangenge.
EXO 34:11 Mu ramai a vinara nau a taki ioe vona mu gu ramai. Iau ga muga ga lili tala e huriki a Amor, a Kenan, a Hiti, a Peres, a Hivi, a Iebus na malala ne ria.
EXO 34:12 Mu matadoko, naha ni valongo mai a ngava dagi turane huriki na tanga mu gu lakea vona, ma ri gi turari mua, mu gu longotaro a ngava nau, mu gu velu.
EXO 34:13 Mu ratapile a maki na nivasileki ne ria. Mu ubikeve a maka dede a butu ni rata na kedo, mu ubivila a kai ni kau a hanuna vure ngatavine, e Asera.
EXO 34:14 Mu kavurike kunana iau, e BAKOVI DAGI ne mua. Naha ni kavurike a vure ranga, a vuhuna i uka ma ga matataroa tara vure ge kuloi iau.
EXO 34:15 “Naha ni valongo mai na ngava turane huriki na tanga nga. Re huriki nga ri kavurike, ri habi a maka nihabi na maka vure ne ria. Mua bara mu valongo mai a ngava turane ria, bara ri taki mua mu vapopo turane ria, mu kani a kinani ri habi na maka vure ne ria.
EXO 34:16 Re huriki nga, bara ri taki e huriki a riau ne mua ri parangi a ngatavine ne ria. Mua bara mu rata mavonga, re huriki a ngatavine nga, bara ri turari e huriki e girihine ria, ri ha taro iau, ri kavurike a maka vure ne ria, manga a viri i rata a naro na molenga.
EXO 34:17 “Naha ni rata a maka vure na aen mu gu kavurike ria.
EXO 34:18 “Mu luhoi mulea a tahuna mu mariu tala o Egipto, mu ratea a Habu na Bret i Uka Is. Na keva e Abib na pida lobo, mu kani a bret i uka is na parava ge polorua, i manga a hini a taki.
EXO 34:19 “E huriki a tabua a bakovi, a maka tabua na bulmakau a sipsip ne mua, ge nau kunana.
EXO 34:20 Mu ngaru ni kona mule a maka tuna tabua na donki, mu habia a tuna sipsip ge a makulina. Mua i uka ma mu konamulea, mu hori a lohona a donki. E huriki a tabua bakovi ne mua, ria ranga mu kona mule.
EXO 34:21 “Na vik lobo mu tahoka a parava na leho i polotara, pali na poloruana parava naha ni rata a leho. A poloruana parava ge bele na tahuna na nivaro o na nimirio, naha ni leho vona a parava iea.
EXO 34:22 “Mu luhoia a Habu na Nimirio, ra habu ni bole kadolu a maka kanena vit ri moro muga. Na keva ni pasi a maka kanena kai ri rara, mu luhoia a Habu na Nimalo na Kape.
EXO 34:23 Ge balaka tolu na pida, e huriki a bakovi ne mua, ri gi kavurike e BAKOVI DAGI a Vure ne huriki a Israel.
EXO 34:24 Iau ga lili tala e huriki ri made ngane vona a malala, ga hudotalea a harena malala ne mua. Balaka tolu na pida i taku, mu valai mu kavurike iau e BAKOVI DAGI a Vure ne mua. I mavonga e huriki a pile i uka ma ri gi bolea a malala ne mua.
EXO 34:25 “Naha ni habi nau a bret i tahoka a is, na tahuna mu habi a sipsip a bulmakau nau. Nahea ge tabuli ranga nihabi, mu kani kaleva na Habu na Nipagepolo ge palala taho a hini.
EXO 34:26 “Na pida lobo, na tahuna mu mirio a maki ri moro muga na hania, mu bole valai nau, iau e BAKOVI DAGI a Vure ne mua. “Naha ni guru puru na ulo a namona ruru na meme mu gu nono a tuna meme vona.”
EXO 34:27 E BAKOVI DAGI i takia e Moses, “O here puru a ngava nga na puhu, a vuhuna a burena a maka ngava dagi a rata turamu, a rata turane huriki a Israel.”
EXO 34:28 Lakea e Moses i made turane BAKOVI DAGI na lolo na parava i ravulu va, a rodo i ravulu va, i uka ma i kani, i uka ma i ninu. I here a nita na ngava dagi na tabekena kedo i bole sike e Moses. A ngava nga ra vinara na Vure i ravulu.
EXO 34:29 Na tahuna e Moses i pe a lolo e Sinai i puru, i bole a tabekena kedo i rua ni here vona a Ngava Dagi. A matane Moses i parahidi, a vuhuna i ta turane Bakovi Dagi. Pali ia i uka ma i lohoka vona a matana i parahidi.
EXO 34:30 Na tahuna e Aron turane huriki a Israel ri masia a matane Moses i para hateka, ri mangenge, i uka ma ri valai tabukoi vona.
EXO 34:31 Pali e Moses i gale e Aron turane huriki a matakari ne Israel, ri valai vona, i ta turane ria.
EXO 34:32 Muri e huriki a Israel ri valai tabukoi ne Moses, i vara ria na maka vinara e BAKOVI DAGI i habi vona na lolo e Sinai.
EXO 34:33 Na tahuna e Moses i vara lobo ria, i bolea a kala i kavitagua a matana.
EXO 34:34 Pali na tahuna e Moses i dili na kape, bara i kali talea a kala, i ta turane BAKOVI DAGI. Na tahuna i pagitala, bara i vakalongo e huriki a Israel vona a ngava e BAKOVI DAGI i takia vona.
EXO 34:35 E huriki a Israel ri masia a matane Moses i parahidi. Na tahuna i vakalongo ria lobo na vinara, i kavitagu a matana na kala, i harena na tahuna i hamule dili tabu na kape i ta turane Bakovi Dagi.
EXO 35:1 E Moses i gale palupu e huriki a Israel i taki ria, “E BAKOVI DAGI i taki mua mu gu ramai a vinara nga:
EXO 35:2 Na vik lobo mu tahoka a parava i polotara ni leho. Pali a poloruana parava ia a Parava Nimalo, a tabea, naha ni rata a leho, a vuhuna a parava ne BAKOVI DAGI. A viri i leho vona a parava iea, ni gi rabalaki.
EXO 35:3 A leho kiroko ni nami a kanono tara naha ni ratea.”
EXO 35:4 Muri e Moses i taki e huriki a Israel na ngava e BAKOVI DAGI i taki.
EXO 35:5 “Iau bara vivi vona a nihabi na viri i ngaru ni habi a maki. Na tahuna mu ngaru ni habi a maki, mu habi a gol, a silva, a bras,
EXO 35:6 a kala kamumu, a maka vuna sipsip i gomagoma, i kuakua, i vururu, a kala ni rata na vuna meme,
EXO 35:7 a kulina sipsip a toga ni kalu vururu, a kulina lui, a kai a akas,
EXO 35:8 a namona oliv ne vona a lam, a havu mangisipa ni vuli turana a namona oliv ne vona ni gamai, ne vona a havu mangisipa.
EXO 35:9 A kedo oniks, a kedo parahidi ranga, mu habi ni gi topi na harena bagetua, a kala kiroko na ngalana prister.
EXO 35:10 “E huriki a mari ni ratana maki, ri gi valai, ri gi rata a maki e BAKOVI DAGI i vakuku ria vona;
EXO 35:11 a kape, a maki ni kapi a kape, a maka kinau, a maka mito na nure, a maka karo ni gi kolo tavalavala na gaga, a maka butu, a maka vuhu-butu ge pesi langa vona a butu;
EXO 35:12 a tava turana a binolena, a murina nidodo, a kala dagi ne vona ni kapikari a tava;
EXO 35:13 a dede turana a mahalana, a binolena dede, a bret ni gamai;
EXO 35:14 a butu na lam turana a mahalana, a namona oliv ne vona a lam;
EXO 35:15 a dede na havu mangisipa turana a binolena, a nibiri nigamai, a havu mangisipa, a kala dagi ni gi vakatavore na matana kape;
EXO 35:16 a dede na nihabi gutu-vuro turana a bras ni gi kolo na vahana, a binolena, a mahalana, a tavila turana a dede vona;
EXO 35:17 a kala dagi, a maka butu turana a maka vuhu-butu ne vona ni tura halui a mailo na kape;
EXO 35:18 a maka niroka na butuna kape, a maka niroka na mitona nure turana a maka motane ria;
EXO 35:19 a maka bagetua kamumu ni rodo ni leho na kape. Ra bagetua ni taba ne Aron, a nirodo ne huriki e tuna bakovi, ri gi rodo na tahuna ri rata a leho na prister.”
EXO 35:20 Muri e huriki a Israel ri pea e Moses ri vano.
EXO 35:21 A nitane Moses i vakarike a hatene huriki, ri ngaru ni habi a maki. E huriki a mari ni leho ri valai ne Moses ri tuhoria. Ri bole valai a maki ne vona a leho na Kape na Vaponga, ne vona ni kavurike a Vure, ne vona ni rata a bagetua ni taba na prister.
EXO 35:22 Ri bole valai a maki legelege, a pato, a bio, a bagetua ranga ni rata na gol, ge a nihabi nitabari ne BAKOVI DAGI.
EXO 35:23 E huriki ri bole valai a kala kamumu, a maka vuna sipsip a meme i gomagoma, i kuakua, i vururu, a kulina sipsip a toga ni kalu vururu, a kulina lui.
EXO 35:24 E huriki ri tahoka a silva a bras, ri bole valai ri habi ne Bakovi Dagi. E huriki ri tahoka a kai a akas, ri bole valai ne vona ni hae a kape.
EXO 35:25 E huriki a mari ngatavine ri lohoka ni rata a hotu, ri bole a maka vuna sipsip i gomagoma, i kuakua, i vururu, ri rata a hotu. Ri rata a hotu keakea ne vona ni ratana kala kamumu.
EXO 35:26 E huriki a ngatavine ri lohoka kamumu ni ratana maki na vuna meme, ri rata.
EXO 35:27 E huriki a matakari ri bole valai a maka kedo parahidi ne vona ni rahi dili na harena kala kiroko na ngalana prister dagi.
EXO 35:28 Ri bole valai a maka maki mangisipa, a namona oliv, ne vona a lam, a nibiri ne vona ni gamai, a havu mangisipa.
EXO 35:29 E huriki a bakovi a ngatavine o Israel ri ngaru ni habi tavula a maki ne vona a leho ne BAKOVI DAGI, ri ramaia a ngava e BAKOVI DAGI i vakuku e Moses vona.
EXO 35:30 Muri e Moses i taki e huriki a Israel, “Mu masia, e BAKOVI DAGI i vulakia pali e Besalel, e tune Uri bakovi, e tubune Hur na kabu ne Iuda.
EXO 35:31 A Hanuna Vure i habia a lohokanga kamumu vona ni ratana a maki na limana.
EXO 35:32 I lohoka pali ni ratana maki na gol, a silva, a bras,
EXO 35:33 ni ratana maka kedo parahidi ge a bagetua, ni kau a hanuna maki, ni rata a maki ranga na lima.
EXO 35:34 E Bakovi Dagi i habi a lohokanga vona turane Oholiap, e tune Ahisimak bakovi na kabu ne Dan, ru gu tovo e huriki ni ratana maki na limane ria.
EXO 35:35 I habi a lohokanga kamumu na bakovi nga, ru gu rata a maka leho ni ubi kamumu a kedo parahidi, ni kau a hanuna maki na kai, ni rahi a maka kala kamumu. Ru lohoka ni ratana maka bagetua na hotu ni rata na maka vuna sipsip i gomagoma, i kuakua, i vururu. Ra bakovi nga, ru mari hateka ni ratana maki na limane rua.
EXO 36:1 Nimariu “E BAKOVI DAGI i habi a loho­kanga kamumu ne Besalel e Oholiap turana a mari ranga, ri gi haea a kape. A leho ne ria ri gi ramai kunanea a nitane BAKOVI DAGI.”
EXO 36:2 Muri e Moses i gale e Besalel e Oholiap, turana e huriki a mari e BAKOVI DAGI i habi a lohokanga ne ria, ri ngaru hateka ni ratana leho ri valai.
EXO 36:3 Lakea e Moses i habi ne huriki a mari a maka nihabi na kape ri ru kadolu. Pali na hatelanga takutaku e huriki a Israel ri tababana ni habina maki ri ngaru ri gi habi.
EXO 36:4 E huriki a mari, ri matai a maki i kupo hateka,
EXO 36:5 lakea ri takia e Moses, “E huriki ri habi i kupo hateka a maka maki e BAKOVI DAGI i ngaru.”
EXO 36:6 Lakea e Moses i talo rike a ngava viliha na mada, i taki e huriki, “Naha ni habi tabu ranga maki ne vona a kape.” Ri longoa a nitana, i uka ma ri habi tabu ranga maki,
EXO 36:7 a vuhuna a maka maki ri habi pali i kupo hateka, bara i tabuli tavula ranga.
EXO 36:8 E huriki a mari ri haea a mailo na Vure, ri bole a maka kala i ravulu ri vakabagetu na hotu gomagoma, na hotu kuakua, na hotu vururu ni rata na vuna sipsip, ri rahi na kala nga a hanuna agelo.
EXO 36:9 A niolana a kala i taku i ravulu a polona i rua a mita, a nibolana i rua a mita. A maka kala lobo ri palupulupu.
EXO 36:10 Ri rahi palupu a maka kala i lima, ri hudo tala i manga a kala i taku. A kala i lima tabu ranga ni rahi palupu.
EXO 36:11 Ri rata a maka halui na kala gomagoma ni varomu na harena kala dagi nga i rua.
EXO 36:12 Na kala muga ri kolo dili na harena a halui i ravulu lima. Na harena a kala tara ri kolo dili tabu a halui i ravulu lima.
EXO 36:13 Ri rata na gol a kinau i ravulu lima, ri varaki palupu a tabekena kala dagi nga i rua, i bele manga a kala i taku.
EXO 36:14 Ri ratea a kala dagi ne vona ni kavitagu a mailo na Vure. Ra kala dagi iea ni rata na kala i ravulu a polona i taku, ni rata na vuna meme.
EXO 36:15 A niolana a kala i taku i ravulu a polona i tolu a mita, a nibolana i rua a mita. A maka kala nga ri palupulupu.
EXO 36:16 A kala i lima ni rahi palupu, a kala i polotara tabu ranga ni rata mavonga.
EXO 36:17 Ri kolo na harena kala tara a halui i ravulu lima, na kala tara i ravulu lima.
EXO 36:18 Ri rata na bras a kinau i ravulu lima ne vona ni varaki palupu a kala nga i rua, ge manga a kala i taku.
EXO 36:19 Muri ri ratea tara kadis na kulina sipsip a toga, ni kalu vururu, ne vona ni kavitagu tabu a mailo. Ri rata tabua a toluna kadis na kulina lui, ri ru langa tabua.
EXO 36:20 Ri rata na kai a akas a maka mito ne vona a mailo.
EXO 36:21 A niolana a mito i va a mita, a nibolana mito i ravulu polotara a polona i polotara (66) a sentimita.
EXO 36:22 Ri rata a maka mito ge ola popote, ne vona ni vonu dili na vuhu-butu ge vakatora a nure. A maka mito ri palupulupu.
EXO 36:23 Ri vakapesi na tabeke mule puru a mito i ravulu rua,
EXO 36:24 turana a maka vuhu-butu i ravulu va ni rata na silva, ge pesi langa vona a maka mito. A vuhu-butu i rua ru tabuli polotano na mito i taku.
EXO 36:25 A mito i ravulu rua tabu ranga ri vakapesi na tabeke mule sike.
EXO 36:26 Ri rata na silva a vuhu-butu i ravulu va ge pesi langa vona a mito.
EXO 36:27 Ri vakapesi na bitona mailo a mito i polotara, na tabeke na nirolona haro,
EXO 36:28 turana a mito i rua na nimodo na bitona mailo.
EXO 36:29 Ra mito na nimodo i tahoka a mito ni lapi turana. A nimodo i rua tabu ni rata mavonga.
EXO 36:30 Na bitona mailo i tahoka a mito i polotolu, a vuhu-butu ni rata na silva i ravulu a polona i polotara (16), ne vona ni vakatora a mito na nure. A vuhu-butu i rua, ru tabuli polotano na mito i taku.
EXO 36:31 Ri kau na kai a akas a karo ri ru tavalavala, ge vakatora a gagana nure. A karo i lima ni kolotata na tabeke tano,
EXO 36:32 i lima na tabeke meli, i lima na bitona mailo na nirolona haro.
EXO 36:33 Ri ratea a karo tavalavala na kurukuruna nure, i tubu na tabeke koea, i harena na tabeke tara.
EXO 36:34 Ri naviri na gol a maka mito, ri kolo dili na karo a maka halui ni rata na gol, ri gi tangotata a maka karo tavalavala ni lapi na gagana. Ra maka karo nga, ngi ranga ni kavitagu na gol.
EXO 36:35 Ri rahia a kala dagi ri vakatavorea pololilo na kape. Muri ri vakabagetua na hotu ni rata na vuna sipsip gomagoma, na vuna sipsip kuakua, na vuna sipsip vururu. Ri rahi dili na kala dagi iea a hanuna agelo.
EXO 36:36 Ri rata na kai a akas a butu i va, ne vona ni vakatavorea ra kala dagi iea. Ri kavitagu na gol a maka butu nga, ri kolo dili ne ria a maka kinau. Ri rata na silva a vuhu-butu i va, ge pesi vona a butu.
EXO 36:37 Na matana mailo na Vure ri vakatavorea a kala dagi ni vai na vuna sipsip gomagoma, na vuna sipsip kuakua, na vuna sipsip vururu, ni rahi dili vona a bagetua legelege.
EXO 36:38 Ri rata a butu i lima, ri kolo dili ne ria a maka kinau, ne vona ni vakatavore a kala. Muri ri kavitagu na gol a mapana butu, a karona kape. Ri rata na bras a vuhu-butu i lima i pesi langa vona a maka butu.
EXO 37:1 E Besalel i ratea na kai a akas a Tava na Ngava Dagi. A niolana i 110 sentimita, a nibolana i 66 sentimita, a nipesina i 66 sentimita.
EXO 37:2 I naviri na gol kabakaba a hini pololilo a hini polovavo, i naviri na gol olaola a harena.
EXO 37:3 I rata na gol a halui i va, i kolo dili na vahana i va, i rua na tabeke koea, i rua na tabeke tara.
EXO 37:4 Muri i kau na kai a akas a binole i rua, i naviri na gol.
EXO 37:5 I rodo dili na halui ra binole nga, ne vona ni kaloho a tava.
EXO 37:6 A tabeke polomeli na tava, a murina nidodo, ni rata na gol kabakaba. A niolana i 110 sentimita, a nibolana i 66 sentimita.
EXO 37:7 I bolea a tabekena gol ni ubi na ama ni rata a agelo i rua, ru pasike na hirina murina nidodo.
EXO 37:8 I tara i pasike na kanena, i tara i pasike na maurina. Ra agelo nga turana a murina nidodo ni rata na tabekena gol i taku.
EXO 37:9 Ra agelo nga, ru vangalai, ru vulala tala a karapane rua ru kavitagua a matana tava.
EXO 37:10 Ri ratea a dede na kai a akas. A niolana i 88 sentimita, a nibolana i 44 sentimita, a nipesina i 66 sentimita.
EXO 37:11 Muri ri kavitagua na gol kabakaba ri lili haluia a harena na tabekena gol ola ola.
EXO 37:12 A harena dede ni kavitagu na lilina gol. A nibolana i 8 sentimita. Muri ri lili haluia vona a gol gatuka.
EXO 37:13 Ri rata na gol a halui i va, ri kolo na nimodo i va na vahana dede.
EXO 37:14 Ra halui nga, ni ru tabukoi na harehare polomeli, ne vona ni rodo dili a binole.
EXO 37:15 Ri kau na tabekena kai a akas a binole, ri naviri na gol.
EXO 37:16 Ri rata na gol kabakaba a maka mahalana dede, a maka tavila, a pelete, a kikei ne vona ni ratana a nihabi na vain.
EXO 37:17 Ri rata tabua na gol kabakaba a butuna lam. Ri ubia na ama a tabekena gol, ri ratea a vuhu-butu ne vona ni vakapesi a butu. Ri rata loboa a butuna lam ri vakabagetua na maka keke ni rata na gol. A maki nga ri rata i manga a maki i taku.
EXO 37:18 A butuna lam i tahoka a bakona i polotara. I tolu na tabeke koea, i tolu na tabeke tara.
EXO 37:19 Ri vakabagetu a bakona takutaku na keke i tolu, i manga a purana kai a almon.
EXO 37:20 Ri vakabagetu a butuna lam na keke i va ni rata manga a purana a kai a almon.
EXO 37:21 Ri rata a pagana keke kiroko, a pagana i taku i polotano na bako i rua.
EXO 37:22 A tabekena gol kabakaba ni tutu ni rata vona a maki nga i manga a maki i taku.
EXO 37:23 Muri ri bole a gol kabakaba ri rata a lam i polorua ne vona ni ru na bako, a maka pelete, a maka kaira ne vona ni kapi a kanono.
EXO 37:24 Ri bole a gol kabakaba i 34 kilo, ri rata a butuna lam turana a maka mahalana.
EXO 37:25 Ri ratea a dede na havu mangisipa na kai a akas. A harena i va i palupulupu i 45 sentimita, a nipesina i 90 sentimita. A dede i tahoka a tupina i va ni rata na nimodo na dede.
EXO 37:26 Ri kavitagu a hini polomeli, a gagana i va, a tupina i va na gol, muri i raro haluia a harena na tabekena gol ola ola.
EXO 37:27 Muri ri rata na gol a halui i rua ne vona ni rodo polo a binole. Ra halui nga, ni kolo tabukoi na harena polomeli.
EXO 37:28 Muri ri kau na kai a akas a binole i rua, ri naviri na gol ne vona ni kaloho a dede na havu mangisipa.
EXO 37:29 Muri ri ratea a nibiri, ra nibiri iea ni taba ne vona ni gamai a maki, a havu mangisipa i ratea a mari.
EXO 38:1 E Besalel turane huriki a mari ri ratea a dede na kai a akas, ne vona a nihabi gutu-vuro. A tabekena dede i va i palupulupu i 2 mita 2 sentimita, a nipesina i 1 mita 30 sentimita.
EXO 38:2 Ri kau a tupi na nimodo i va na dede, ri vakamadoko turana a dede i manga a maki i taku. Muri ri naviri loboa na bras a dede.
EXO 38:3 Ri bole a bras ri rata a maka pelete ne vona ni bole a kanono, a maka nikuri, a maka tavila, a maka kaira, a maka tavila ne vona ni bole a habulona kanono.
EXO 38:4 Ri bole a bras, ri rata a maki i va i tahoka a dupi, ri kolo na vahana dede, polotano na maki ni raro halui na kurukuruna dede.
EXO 38:5 Ri rata na bras a halui i va, ri kolo tata na nimodona na dede i va. Ra halui nga, ne vona ni rodo dili a binole.
EXO 38:6 Ri kau a tabekena a kai a akas i rua ga binole, ri naviri na bras.
EXO 38:7 Ri rodo dili na halui a binole na tabekena dede i rua. Ra dede iea i manga a tava ni rata na kai, pali a hini polotano i uka kai.
EXO 38:8 Ri bole a bras ne huriki a ngatavine ri leho na matana Kape na Vaponga, ri rata a tavila na hilova turana a dedena.
EXO 38:9 Ri rahia a kala dagi ne vona ni tura halui a kape. Na tabeke mule puru a niolana kala i 44 mita.
EXO 38:10 Ri bole a maka bras ri rata a mito i ravulu rua, a vuhu-butu ni vakapesi langa na mito vona i ravulu rua. Pali a maka karona a maka kinau ni rata na silva.
EXO 38:11 Na tabeke mule sike i mavonga kunana.
EXO 38:12 A nure na tabeke na nirolona haro i tahoka tara kala i tavore vonga, a niolana i 22 mita, i tahoka a mito i ravulu ni rata na bras turana a vuhu-butu i ravulu. A maka kinau na butu, a maka karona ni rata na silva.
EXO 38:13 A nure na tabeke na nirikena haro ia tara i 22 mita, a logo i vonga.
EXO 38:14 Na tabeke tara na dilidala i tahoka a kala, a niolana i 6 mita 60 sentimita, i tahoka a butu i tolu, a vuhu-butu i tolu.
EXO 38:15 A tabekena logo tara i rata mavongea.
EXO 38:16 A maka kala kamumu kunana ni rata ni kavitagu a nure.
EXO 38:17 A maka vuhu-butu ni vakapesi a maka mito vona ni rata na bras. A maka kinau a maka karo ne vona ni vakatora a maka mito, ni rata na silva. Ri naviri a maka mapana mito na silva kunana. Muri ri varaki palupu a maka mito na nure na karona ni rata na silva.
EXO 38:18 Ri ratea a kala kamumu na dilidala. Ri rahi dili a maka bagetua vona na maka hotu ni rata na vuna sipsip gomagoma, na vuna sipsip kuakua, na vuna sipsip vururu. A niolana kala i 9 mita, a nipesina i 2 mita 20 sentimita, i manga a kala na nure.
EXO 38:19 Ri vakatavorea a kala iea na butu i va, i pesi langa na vuhu-butu i va ni rata na bras. A maka kinau, a tavana mapana mito, a maka karo ni rata na silva.
EXO 38:20 A maka niroka ni rata na bras, ne vona ni tua, ni vakatora a mota na nure a kape.
EXO 38:21 Ni gi palupu a maka gol, a silva, a bras ni hae a kape na Ngava Dagi vona. E Moses kunana i taki e huriki a Levi ri ratea a leho iea. E Itamar e tune Aron a prister, i matakaria ra leho iea.
EXO 38:22 E Besalel, e tune Uri bakovi e tubune Hur na kabu ne Iuda, i rata lobo a maki e BAKOVI DAGI i vakuku e Moses vona ge rata.
EXO 38:23 A bakovi i leho turana, e Oholiap, e tune Ahisimak na kabu ne Dan. A leho vona ni kau a maki legelege na kedo. I lohoka tabu ni rahi a bagetua na maka hotu legelege, na hotu gomagoma, na hotu kuakua, na hotu vururu ni rata na vuna sipsip.
EXO 38:24 A maka gol i habi e huriki ne vona ni hae a mailo vona, ni gi palupu a nimavane ria i 998 kilo.
EXO 38:25 A maka silva, a nimavane ria i 3,430 kilo. A rane huriki ri habi a maka silva ni here puru na puhu.
EXO 38:26 E huriki ri tahoka a pida i ravulu rua i rike, ri habi a silva i 6 gram. E huriki ri habi a silva ri ala 603,550.
EXO 38:27 Ni bole palupu a kilo na silva i 3,400 ni rata a vuhu-butu i 100 ne vona ni vakapesi a maka mito na nure, a vuhu-butu na butu ne vona ni vakatavore a kala dagi i naviri mulea a Tabeke Nitaba Hateka. A vuhu-butu i taku a nimavana i 34 kilo.
EXO 38:28 A silva i tababana i 30 kilo. Lakea ni bole ni rata a maka kinau, a maka karo, a naviri ni kavitagu a mapana mito.
EXO 38:29 A nimavana a maka bras ni habi i 2,425 kilo.
EXO 38:30 Ni bole a bras nga ni rata a vuhu-butu na matana Kape na Vaponga, a dede turana a maki ri tahoka a dupi, a maka mahalana dede,
EXO 38:31 a maka vuhu-butu na nure ni tura halui a kape, turana a vuhu-butu na dilidala na nure, a maka niroka na nure na mailo na Vure.
EXO 39:1 E Besalel turane huriki a mari ri bole a maka vuna sipsip i gomagoma, i kuakua, i vururu ni rata a bagetua kamumu na prister, ge rodo na tahuna ri leho na Tabeke Nitaba. A maka bagetua kamumu ne Aron, ni rata ramai a nitane BAKOVI DAGI i taki e Moses vona.
EXO 39:2 A bagetua nga ni vakabagetu na hotu ni rata na gol, na hotu ni rata na maka vuna sipsip gomagoma, i kuakua, i vururu.
EXO 39:3 A gol ni ubi na ama i lili kiroko liu, ne vona ni rahi dili na bagetua turana a hotu gomagoma, i kuakua, i vururu.
EXO 39:4 Muri ni rata a palabele na loho i rua, ne vona ni huraki a bagetua, bara i tavore na lohona prister.
EXO 39:5 A palabele ni rata na lilina kala ne vona ni tango tata a bagetua iea. A maka bagetua ni rata na hotu ni rata na gol, na hotu ni rata na maka vuna sipsip gomagoma, i kuakua, i vururu, i ramaia a nitane BAKOVI DAGI i vakuku e Moses vona.
EXO 39:6 Ri here a rane huriki e tune Israel bakovi na kedo oniks i rua, ni vakabagetu na gol.
EXO 39:7 Muri ni kolotata a kedo nga na palabele ra i nugutata a kala na lohona prister, i ramaia a ngava e BAKOVI DAGI i vakuku e Moses vona. Ra kedo nga ne vona ni luhoi mule e huriki e tune Israel bakovi.
EXO 39:8 Ri rata a kala na ngalana prister manga a bagetua ranga na prister. Ni vakabagetu na hotu ni rata na gol, na hotu ni rata na maka vuna sipsip gomagoma, i kuakua, i vururu.
EXO 39:9 A kala na ngala ni pilu kamumu na kurukuruna, a niolana, a nibolana i palupulupu, i 22 sentimita.
EXO 39:10 A maka kedo ni kolo na tete i va. Na tete muga ni kolo dili a sardius, a topas, a karbanakel.
EXO 39:11 Na ruana tete ni kolo dili a kedo a emeral, a sapaia, a daiman.
EXO 39:12 Na toluna tete ni kolo dili a iasin, a aget, a ametis.
EXO 39:13 Na vana tete ni kolo dili a beril, a oniks, a iaspa. A kedo i taku ni vakabagetu na gol, muri ri varomu dili na bagetua.
EXO 39:14 A rane huriki e tune Israel ni here takutaku na kedo i ravulu a polona i rua, ge a kilakila na kabu takutaku ne Israel.
EXO 39:15 A sen i rua ni rata na gol kabakaba ne vona ni tangotata a kala na ngala,
EXO 39:16 a bagetua na gol i rua, a halui ni rata na gol i rua. Ni varomu a halui nga, polomeli na nimodona kala na ngala.
EXO 39:17 Muri ni ru a sen i rua ni rata na gol, a halui i rua na harena kala na ngala.
EXO 39:18 A bagetua na gol ni varomu dili na harena sen, ni kolo dili na palabele i nugutata a kala.
EXO 39:19 Ni rata na gol a halui i rua, ni kolo polotano na nimodona kala na ngala tabukoi na kala dagi.
EXO 39:20 A halui gol i rua ni rata tabu ni varomu na palabele i rua i nugutata a bagetua, polomeli na palabele ni rea halui a kakai.
EXO 39:21 Ni bole a mota gomagoma, ni varomu a halui i rua na kala na ngala i lakea na halui i rua na bagetua dagi. A kala na ngala i madoko tata na palabele, i uka ma ge mavuka, i ramaia a ngava e BAKOVI DAGI i vakuku e Moses vona.
EXO 39:22 E Besalel turane huriki a mari ri bole a hotu gomagoma ri rahi a nirodo ola ola ne vona ni kolo turana a bagetua.
EXO 39:23 Ni rahi halui a murina hini ni rodo dili a gina viri vona, lakea i uka ma ge marape.
EXO 39:24 A hotu legelege ni bole ni rahi dili a maki i manga a kanena kai a pomigranet. A maka belo ni rata na gol kabakaba. A pomigranet a belo ni rahi na harena bagetua polotano. A maka belo ni ru na maka kurukuruna pomigranet ri tavore, i ramaia a ngava e BAKOVI DAGI i vakuku e Moses vona.
EXO 39:27 A maka maki ne Aron turane huriki e tuna ri rodo, ni rata na kala kamumu, a nirodo ola ola, a hoi, a poho, a palabele, a paga. Ri bole a maka hotu legelege ni rahi dili a bagetua kamumu, ri ramai a ngava e BAKOVI DAGI i taki.
EXO 39:30 A hulongi na prister ni rata na gol kabakaba, ge vakasiria i leho ne BAKOVI DAGI kunana. A nita ni here vona i maea, “Ne vona e BAKOVI DAGI.”
EXO 39:31 Ni bole a mota gomagoma ni kolo na hoi a hulongi, i ramaia a ngava e BAKOVI DAGI i vakuku e Moses vona.
EXO 39:32 E huriki a Israel ri ru palupu lobo a maka mahalana kape, e BAKOVI DAGI i vakuku e Moses vona ge bole.
EXO 39:33 Muri ri habi ne Moses a kape turana a maka mahalana, a maka kinau, a maka mito, a maka karo, a maka butu, a maka vuhu-butu ne vona ni vakapesi a maka butu,
EXO 39:34 a kadis na kape ni rata na kulina sipsip a toga, a kadis tara ni rata na kulina lui, a kala dagi ne vona ni naviri mule a Tabeke Nitaba Hateka,
EXO 39:35 a Tava na Ngava Dagi turana a binolena i rua. Ra hini polomeli na tava a murina nidodo.
EXO 39:36 Ri bole valai a dede turana a maka mahalana, a maka bret ne vona ni ru na dede,
EXO 39:37 a butu na lam ni rata na gol kabakaba, a maka lam turana a namona oliv.
EXO 39:38 Ri bole valai a dede ni rata na gol, a nibiri ne vona ni gamai a maki na nivasileki, a havu mangisipa, a kala ne vona a matana kape.
EXO 39:39 Ri bole valai a dede ni rata na bras turana a tabekena bras ni vakamadoko na vahana dede, a binole ni kaloho a dede, a maka mahalana dede, a tavila ni hilolo turana a dede vona;
EXO 39:40 a maka kala na nure, a maka mito, a maka butu, a maka vuhu ni vakapesi a butu vona, a kala dagi na logo na kape, a maka mota ne vona ni kolotata a maki, a maka niroka ne vona ni tua a mota, a maka maki ne vona ni rata a leho pololilo na kape,
EXO 39:41 a maka bagetua kamumu ni gi rodo, ni gi rata a leho pololilo na Tabeke Nitaba, a maka bagetua ne Aron, ne huriki e tuna.
EXO 39:42 E huriki a Israel ri rata lobo a maka maki e BAKOVI DAGI i vakuku e Moses vona.
EXO 39:43 E Moses i lei kamumu a maki ri rata, i vivi, a vuhuna ri rata lobo a maki e BAKOVI DAGI i vakukua vona. Muri e Moses i gamai ria.
EXO 40:1 E BAKOVI DAGI i takia e Moses,
EXO 40:2 “O longo, na mugana parava na keva, mu vakapesia a mailo nau.
EXO 40:3 O bolea a Tava na Ngava Dagi o ru dilia o vulala karia na kala dagi.
EXO 40:4 O ru dilia a dede o ru langa vona a maka mahalana. Muri o ru dilia a butuna lam o ru langa na bakona a maka lam.
EXO 40:5 O bolea a dede ni rata na gol ne vona a havu mangisipa, o vakatabulia tabukoi na Tava na Ngava Dagi, polovavo na kala i naviri mule a tava. O vakatavorea a kala na matana mailo na Vure.
EXO 40:6 O bolea a dede ne vona a nihabi gutu-vuro, o ru tabukoia na matana kape.
EXO 40:7 O rua na koropalana Kape na Vaponga a dede na nihabi gutu-vuro, a tavila, o kiru dili a naru vona.
EXO 40:8 O vonu a maka mito o tura haluia a mailo nau, o vakatavorea a kala dagi na matana.
EXO 40:9 “Muri o bolea a nibiri, o gamai a mailo nau turana a maka mahalana ga maki nau.
EXO 40:10 A dede ne vona a nihabi gutu-vuro tara, o gamaia turana a maka mahalana.
EXO 40:11 A tavila turana a dede vona, ngi ranga o gamai.
EXO 40:12 “O tuli lakea na matana Kape na Vaponga e Aron turane huriki e tuna a bakovi, o vahilolo ria vonga.
EXO 40:13 Muri o vakarodoa na bagetua na prister e Aron, o guru langa a nibiri vona, o gamaia ge ia a prister.
EXO 40:14 Muri o tuli valai tabukoi e huriki e tuna bakovi, o vakabagetu ria na bagetua na prister.
EXO 40:15 O gamai ria ge manga a hini o gamaia e tamane ria, ge ria a prister nau. Muri e huriki a hamone ria bara ri rata a leho na prister vakaroro.”
EXO 40:16 E Moses i rata lobo a maka leho e BAKOVI DAGI i taki vona ge rata.
EXO 40:17 Na mugana parava, na mugana keva, na ruana pida muri na tahuna ri mariu tala o Egipto, a mailo na Vure ni vakapesi.
EXO 40:18 Na tahuna i vakapesi a mailo na Vure, i bole a maka vuhu-butu, i ru na malala ne vona ni vakapesi a maka mito. I ru tavalavala a maka karona nure; i vakapesi a maka butu ne vona ni vakatavore a kala.
EXO 40:19 Muri i ru langea na mailo na Vure a kadis, i kavitagu tabua a kape, i manga a ngava e BAKOVI DAGI i vakukua vona.
EXO 40:20 I bole a kedo i rua ni here vona a Ngava Dagi, i ru dili na Tava na Ngava Dagi. I rodo dili a binole na halui na tava, i kavitagua a matana tava. Ra matana tava a murina nidodo.
EXO 40:21 Muri i ru pololilo na kape a tava, i vakatavorea a kala dagi i naviri mulea, i manga a ngava e BAKOVI DAGI i vakuku e Moses vona.
EXO 40:22 E Moses i ru dilia na Tabeke Nitaba a dede na tabeke mule sike.
EXO 40:23 Muri i bole a maka bret, i ru na dede na matane BAKOVI DAGI, i manga a ngava i vakukua vona.
EXO 40:24 Muri i ru dilia na Kape na Vaponga na hini mule puru, tabukoi na dede a butuna lam.
EXO 40:25 Muri i vakapesi a maka lam na bakona butu, i nami i para na matane BAKOVI DAGI, i ramaia a ngava i vakuku e Moses vona.
EXO 40:26 I ru dilia a dede ni rata na gol na Kape na Vaponga polovavo na kala.
EXO 40:27 I rungani langea na dede a havu mangisipa, i ramaia a ngava e BAKOVI DAGI i vakukua vona.
EXO 40:28 Muri i vakatavorea a kala na matana mailo na Vure.
EXO 40:29 Muri i bole a dede na nihabi gutu-vuro i ru tabukoia na matana mailo na Vure. Ra dede iea ne vona ni gutu-vuro a sipsip, a vit, i ramaia a ngava e BAKOVI DAGI i vakukua vona.
EXO 40:30 I ru a tavila na koropalana dede, a Kape na Vaponga, i guru dili a naru, ne vona ni hilolo.
EXO 40:31 Muri e Moses e Aron turane huriki e tune Aron bakovi ri vahilolo a limane ria, a vahane ria vona a naru iea.
EXO 40:32 Muga ne ria ri dili na kape o ri lakea na dede, bara ri vahilolo taro a limane ria a vahane ria, i ramaia a ngava e BAKOVI DAGI i vakuku e Moses vona.
EXO 40:33 Muri e Moses i tura halui a mailo na Vure a dede, i vakatavorea a kala na poridala na nure. Ngane i vakalobo liu a maka leho.
EXO 40:34 A leho i lobo, muri a bubu i kavitagua a Kape na Vaponga, a parana e BAKOVI DAGI i paraia a mailo vona.
EXO 40:35 Pali e Moses i keri ni dili na Kape na Vaponga, a vuhuna a bubu i pesi langa vona, a parana e BAKOVI DAGI i paraia.
EXO 40:36 Na tahuna a bubu i pe a mailo na Vure, e huriki a Israel bara ri bole a maka galesi ne ria, ri ramaia.
EXO 40:37 Pali a bubu bara i tababana ni pesi langa na mailo na Vure, i uka ma ri gi vano. Na tahuna ri masia a bubu i pea a mailo, ngane bara ri pesi rike ri ramaia.
EXO 40:38 A bubu ne BAKOVI DAGI i pesi langa na mailo na Vure na haro, a kanono i para pololilo na bubu na rodo. Ra maki nga i maea kunana, i matai e huriki a Israel na tahuna ri havai.
LEV 1:1 E Levi E BAKOVI DAGI i gale pololilo na Kape na Vaponga, i takia e Moses i ta maea,
LEV 1:2 E Levi “O taki e huriki a Israel, a viri i ngaru ni habi a nihabi nau, ge bolea tara bulmakau, a sipsip, o a meme ge habia.
LEV 1:3 “Bara a viri i ngaru ni habi a nihabi gutu-vuro nau, ge bolea a bulmakau a toga ge gavutuvutu. Ge ratea a nihabi iea, ge taparaki lakea tabukoi na matana Kape na Vaponga, lakea iau, e BAKOVI DAGI, bara ngarua.
LEV 1:4 Ge ru langea na gina bulmakau iea a limana, lakea iau bara ngarua a nihabi vona, bara i kavitagua a naro hale vona.
LEV 1:5 Muri ge rabalakia a bulmakau iea na matane BAKOVI DAGI, lakea e huriki a prister, e tune Aron bakovi, ri gi bole a darana, ri gi lakea na dede i tabuli tabukoi na matana Kape na Vaponga, ri gi voro tamali na tabeke lobo na dede.
LEV 1:6 Muri ra bakovi iea ge riri talea a kulina bulmakau, ra nihabi gutu-vuro, ge poka kesikesia.
LEV 1:7 E huriki a prister, e tune Aron, ri gi tunua na dede a kanono, ri gi ru langa na kanono a kai.
LEV 1:8 Muri ri gi bole a maka bobona, a gina, a maka vina ri gi ru langa na kanono na dede.
LEV 1:9 Pali a mahalana, a vahana, ge loi kamumu na naru. Muri ge habi na prister ge gutu lobo na dede, ge a nihabi gutu-vuro, ge a nihabi ni gutu na kanono. Na tahuna e BAKOVI DAGI i burongi a mangina kinani, bara i vivi.
LEV 1:10 “Bara a viri i habi a sipsip o a meme ne vona ni habi gutu-vuro, ge bolea a toga ge gavutuvutu.
LEV 1:11 Ge rabalakia na matane BAKOVI DAGI na tabeke mule sike na dede. E huriki a prister ri gi bole a darana, ri gi voro tamali lakea na tabeke lobo na dede.
LEV 1:12 Ge poka kesikesia, ge bole a mapana, a vina, ge habi na prister, ge ru langa na kanono na dede.
LEV 1:13 Pali a maka mahalana, a pakana ge vahilolo na naru. Muri ge habi na prister ge gutu lobo na dede, ge a nihabi gutu-vuro, ge a nihabi ni gutu na kanono. Na tahuna e BAKOVI DAGI i burongi a mangina kinani, bara i vivi.
LEV 1:14 “Bara a viri i ngaru ni habi a kadirovo ge a nihabi gutu-vuro ne BAKOVI DAGI, ge bolea tara balu, ge habia na prister.
LEV 1:15 Muri a prister ge bolea a balu ge lakea na dede, ge horia a lohona ge mate. Ge rakudu talea a gina balu, ge gutua na kanono na dede, ge guru tala na gagana dede a darana.
LEV 1:16 Ge pasi vuroki a vuna balu, ge kini talea a guruna ra i tabuli vona a maki i kani, ge vuroki lakea na tabeke ni ru kadolu a habulo vona, na tabeke na nirikena haro na dede.
LEV 1:17 A prister ge nugua na karapana balu ge tua tala, pali nahea ge tuarape kesikesia. Muri ge habi na prister ge gutu langa na kanono na dede, ge a nihabi gutu-vuro, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.”
LEV 2:1 E BAKOVI DAGI i taki tabua e Moses, “Na tahuna a bakovi tara i ngaru ni habi ne BAKOVI DAGI ranga vit, ge vila tala a kulina vit, ge bole a kanena, ge rata a plaoa kamumu. Ge guru langa vona a namona oliv, a havu mangisipa.
LEV 2:2 Muri ge bole a maki nga ge lakea ne huriki e tune Aron, re huriki a prister. A prister tara ge ragamu tala na limana ranga plaoa kamumu, turana a namona oliv, a havu mangisipa. Muri ge habi na prister ge gutu langa na dede, ge a nihabi ni gutu na kanono. A nihabi iea ge ratea e BAKOVI DAGI ge luhoia. Na tahuna e BAKOVI DAGI i burongia a mangina kinani, bara i vivi.
LEV 2:3 A maka nihabi na vit i tababana ni gi habi ne Aron turane huriki e tuna bakovi, ra nihabi iea, a nihabi ni gutu na kanono ni taba ne vona e BAKOVI DAGI.
LEV 2:4 “Mua bara mu ngaru ni gutu a bret na oven ge a nihabi, naha ni vuli turana a is. Mu bole a plaoa kamumu mu vuli turana a namona oliv, mu rata a bret, ge a nihabi. Mua mu marikoi ni rata a bret, mu rata a bisket ge i uka is, mu ravu na namona oliv.
LEV 2:5 Mua bara mu ngaru ni nono a plaoa na ulo kabelabela ge a nihabi, mu bole a plaoa kamumu ge uka is, mu vuli turana a namona oliv, mu gutu.
LEV 2:6 Mu pua a bret ge momo, mu guru langa vona a namona oliv, ge a nihabi na vit.
LEV 2:7 Mua bara mu rata a bret ge a nihabi, mu gutu na ulo, mu bole a plaoa kamumu, mu vuli turana a namona oliv.
LEV 2:8 Mu bolea a nihabi na vit, mu rata a maki nga, mu taparaki lakea na prister ge bole lakea na dede, ge habi ne BAKOVI DAGI.
LEV 2:9 Muri a prister ge bole tala na nihabi na vit a tabekena popote, a maki iea ge ratea e BAKOVI DAGI ge luhoia. Ge gutu na dede, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.
LEV 2:10 A maka nihabi na vit i tababana ni gi habi ne Aron turane huriki e tuna bakovi, ra nihabi iea, a nihabi ni gutu na kanono ni taba ne vona e BAKOVI DAGI.
LEV 2:11 “Naha ni vuli a is turana plaoa ge a nihabi na vit ne BAKOVI DAGI, a vuhuna i uka ma go gutu a is, a ame na nihabi go habi ne BAKOVI DAGI na kanono.
LEV 2:12 Ioe bara o ngaru, o vuli a is, a ame turana a maki i moro muga na hania, ge a nihabi ne BAKOVI DAGI, pali naha ni gutu na dede ge huli manginoro a mangina.
LEV 2:13 A maka nihabi lobo na vit, ni gi ru a mami vona. Naha ni longokaburungi ni ru a mami na maka nihabi ne mua, a vuhuna a mami a kilakila na ngava dagi mu rata turana Vure. Mu ru a mami na maka nihabi lobo.
LEV 2:14 “Mua bara mu habi ne BAKOVI DAGI a vit i moro muga na hania, mu tutu, mu gutu na kanono, muri mu habi vona.
LEV 2:15 Mu bole a namona oliv, a havu mangisipa mu guru langa na maka vit, ge a nihabi na vit.
LEV 2:16 A prister ge bole tala a vit popote, a namona oliv, turana a maka havu mangisipa, a maki nga ge ratea e BAKOVI DAGI ge luhoia, ge a nihabi ni gutu na kanono lakea vona.”
LEV 3:1 E BAKOVI DAGI i taki tabua e Moses, “A bakovi bara i habi a nihabi na nivalemu lakea ne BAKOVI DAGI, ge bolea a bulmakau a toga o a bulmakau a kinana ge gavutuvutu, ge habia ne BAKOVI DAGI.
LEV 3:2 Ra bakovi iea ge ru langea na gina bulmakau a limana, muri ge rabalakia a bulmakau na matana Kape na Vaponga. E huriki a prister, re huriki e tune Aron, ri gi voro tamali a darana bulmakau na tabeke lobo na dede.
LEV 3:3 Ra bakovi iea ge bole tala na nihabi na nivalemu maka vina i kavitagu a mahalana bulmakau, a maka vina pololilo na mahalana bulmakau, turana a vuanalipi i rua, turana a vina i rako taho rua, a kinake tara ni riri tala turana a vuanalipi. Ge habi na prister, ge gutu na kanono, ge a nihabi ne BAKOVI DAGI.
LEV 3:5 E huriki e tune Aron ri gi gutu na dede a maki nga turana maka nihabi ni gutu-vuro i tabuli na kanono, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.
LEV 3:6 “A bakovi bara i habia a tuna sipsip o a meme ge a nihabi na nivalemu lakea ne BAKOVI DAGI, ge bolea a toga o a kinana, ge gavutuvutu.
LEV 3:7 Na tahuna i habia a tuna sipsip ge a nihabi, ge rua na matane BAKOVI DAGI.
LEV 3:8 Ra bakovi iea ge ru langea a limana na gina sipsip, muri ge rabalakia a sipsip na matana Kape na Vaponga. Muri e huriki e tune Aron, ri gi voro tamali a darana sipsip na tabeke lobo na dede.
LEV 3:9 Muri ge bole tala na nihabi na nivalemu a tabekena sipsip ni gi gutu, ge a nihabi ni gutu na kanono ne BAKOVI DAGI. Ge bole a maka vina, a vina i kavitagu a mahalana, a vina na mahalana, a vina na kuna. A kuna sipsip ni gi pala tala tabukoi liu na tuha burena.
LEV 3:10 Ge hali tala a vuanalipi i rua turana a vina i rako taho rua, a kinake tara ni riri tala turana a vuanalipi.
LEV 3:11 A prister ge gutu langa na dede a maki nga ge a kinani, ge a nihabi ni gutu na kanono ne BAKOVI DAGI.
LEV 3:12 “Na tahuna a bakovi ge habi a meme ge a nihabi, ge bole lakea na matane BAKOVI DAGI.
LEV 3:13 Ra bakovi iea ge ru langea na gina meme a limana, muri ge rabalakia a meme na matana Kape na Vaponga. Muri e huriki e tune Aron, ri gi voro tamali a darana meme na tabeke lobo na dede.
LEV 3:14 Na nihabi iea, a bakovi ge habi a nihabi ni gutu na kanono ne BAKOVI DAGI: ge bole tala a vina i kavitagu a mahalana meme, a maka vina pololilo na mahalana,
LEV 3:15 turana a vuanalipi i rua turana a vina i rako taho rua, a kinake tara ni riri tala turana a vuanalipi.
LEV 3:16 A prister ge gutu a maki nga na dede ge a kinani, ge a nihabi ni gutu na kanono, i manginoro a mangina. A vina nga ne vona e BAKOVI DAGI.
LEV 3:17 “Ra vinara iea ge tabuli turana a hamone mua vakaroro. I vai a tabeke mu made vona, bara mu ramai kunanea: Naha ni kani a vina kanirau o mu gu ninu a darana.”
LEV 4:1 E BAKOVI DAGI i takia e Moses,
LEV 4:2 “O taki e huriki a Israel e rei a viri i rata ruru a naro hale, i putu puru a maka vinara ne BAKOVI DAGI, ge ramai a naro nga:
LEV 4:3 “Na tahuna a prister dagi i rata a naro hale i habi a rarenga ne huriki, ge bolea tara bulmakau karaba, a toga ge gavutuvutu, ge habia ne BAKOVI DAGI ne vona a nihabi na naro hale vona.
LEV 4:4 A prister ge bolea a bulmakau iea ge lakea na matana Kape na Vaponga na matane BAKOVI DAGI, ge ru langa a limana na gina bulmakau. Muri ge rabalakia na matane BAKOVI DAGI.
LEV 4:5 A prister ni gamai ge bole ranga darana bulmakau iea, ge bole dili na Kape na Vaponga.
LEV 4:6 Muri a prister ge lutua na dara a kukulimana, ge voro tamali balaka polorua na matane BAKOVI DAGI tabukoi na kala dagi i naviri mule a Tabeke Nitaba Hateka.
LEV 4:7 Muri a prister ge lakea na dede na havu mangisipa i pesi na matane BAKOVI DAGI pololilo na Kape na Vaponga, ge ru na maka tupi na dede ranga dara. A darana bulmakau a toga i tababana, ge bole tala na matana Kape na Vaponga, ge guru na taruna dede na nihabi gutu-vuro.
LEV 4:8 Muri ge bole tala na nihabi na naro hale a vina, ra vina i kavitagu a mahalana, a vina pololilo na mahalana,
LEV 4:9 turana a vuanalipi i rua turana a vina i rako taho rua, a kinake tara ni riri tala turana a vuanalipi.
LEV 4:10 A prister ge gutu a mahalana nga, ge gutu na dede na nihabi gutu-vuro. Ge rata manga a vina bulmakau ni rata na nihabi na nivalemu.
LEV 4:11 Pali ge bole a kulina, a bobona, a gina, a maka vahana, a maka mahalana, a tahena,
LEV 4:12 a maka tabekena i tababana, ge bole tala na mada na hini i matapado ni guru a habulo vona, ge gutu na kanono vonga polomeli na mola.
LEV 4:13 “Na tahuna e huriki a Israel ri rata ruru a naro hale, ri putu puru a vinara ne BAKOVI DAGI, pali ria i uka ma ri lohoka vona, ra naro ri ratea ri tahoka a ngava vona.
LEV 4:14 Muri na tahuna ri matakilaka vona a naro hale ne ria, ri gi bole lakea na matana Kape na Vaponga tara bulmakau karaba a toga, ge a nihabi na naro hale ne ria.
LEV 4:15 Na matane BAKOVI DAGI, e huriki a gare na vaponga ri gi ru langa a limane ria na gina bulmakau, muri ri gi rabalakia na matane BAKOVI DAGI.
LEV 4:16 Muri a prister ni gamai ge bole dili na Kape na Vaponga ranga darana,
LEV 4:17 ge lutua na dara a kukulimana, ge voro tamali balaka polorua na matane BAKOVI DAGI tabukoi na kala dagi i naviri mule a Tabeke Nitaba Hateka.
LEV 4:18 Ge lakea na dede i pesi na matane BAKOVI DAGI pololilo na Kape na Vaponga, ge ravu na maka tupina dede ranga dara. A darana bulmakau a toga i tababana, ge bole paru, ge guru na taruna dede na nihabi gutu-vuro na matana Kape na Vaponga.
LEV 4:19 Muri ge bole a vina lobo, ge gutu na dede,
LEV 4:20 ge rata manga a naro i ratea na nihabi na naro hale vona. I mavonga kunana a prister ge rata a nihabi ge kavitagu ria, lakea bara ni puga vuroki a naro hale ne ria.
LEV 4:21 Muri ge bole talea a bulmakau a toga iea na mada, ge gutua na kanono, i manga a hini i gutu muga a bulmakau na naro hale vona. Ra bulmakau e huriki a Israel ri habia, a nihabi na naro hale ne ria.
LEV 4:22 “Na tahuna a matakari tara i rata ruru a naro hale, i putu puru a vinara ne BAKOVI DAGI, a Vure vona, ra naro i ratea, i tahoka a ngava vona.
LEV 4:23 Muri ge matakilaka vona a naro hale i ratea, ge bolea tara meme a toga ge gavutuvutu, ge a nihabi.
LEV 4:24 Na matane BAKOVI DAGI ge ru langa a limana na gina meme, muri ge rabalakia na hini ni rabalaki a maka kanirau ne vona a nihabi gutu-vuro. Iea a nihabi na naro hale.
LEV 4:25 Muri a prister ge lutua na darana meme iea a kukulimana, ra nihabi na naro hale, ge ravu na maka tupina dede na nihabi gutu-vuro. Muri ge bole paru a dara i tababana, ge guru na taruna dede.
LEV 4:26 Muri ge gutu a vina meme iea na dede, ge manga a naro i ratea na nihabi na nivalemu. I mavonga kunana a prister ge rata a nihabi ne vona ni kavitagu a matakari iea, a naro hale vona ni gi puga vuroki.
LEV 4:27 “Na tahuna a bakovi tavula tara i rata ruru a naro hale, i putu puru a vinara ne BAKOVI DAGI, ra naro i ratea, i tahoka a ngava vona.
LEV 4:28 Na tahuna i matakilaka vona a naro hale i ratea, ge bole vilia tara meme a kinana ge gavutuvutu, ge a nihabi na naro hale vona.
LEV 4:29 Ge ru langea a limana na gina meme iea, ra nihabi na naro hale, muri ge rabalakia na tabeke ni gutu a nihabi gutu-vuro.
LEV 4:30 Muri a prister ge lutua na darana meme a kukulimana, ge ravu na maka tupina dede na nihabi gutu-vuro, ge bole paru a dara i tababana, ge guru na taruna dede.
LEV 4:31 Ge bole tala a vina meme lobo, ge manga a naro ni bole tala a vina na nihabi na nivalemu, ge gutu na dede. Na tahuna e BAKOVI DAGI i burongi a mangina kinani, bara i vivi. I mavonga kunana a prister ge kavitagua a bakovi iea, a naro hale vona ni gi puga vuroki.
LEV 4:32 “A bakovi bara i habia tara tuna sipsip ge a nihabi na naro hale, ge bolea a sipsip a kinana ge gavutuvutu.
LEV 4:33 Ge ru langea a limana na gina sipsip, ra nihabi na naro hale, muri ge rabalakia na hini ni rabalaki a maka kanirau ne vona a nihabi gutu-vuro.
LEV 4:34 Muri a prister ge lutu a kukulimana na darana sipsip, ra nihabi na naro hale, ge ravu na maka tupina dede na nihabi gutu-vuro, ge bole paru a dara i tababana, ge guru na taruna dede.
LEV 4:35 Ge bole tala lobo a vina tuna sipsip, ge manga a naro ni rata na nihabi na nivalemu. A prister ge gutu na dede langa na maka nihabi ni gutu na kanono ne BAKOVI DAGI. I mavonga kunana a prister ge rata a nihabi ne vona ni kavitagu a bakovi iea, a naro hale vona ni gi puga vuroki.”
LEV 5:1 E BAKOVI DAGI i taki tabua e Moses, “Na tahuna ni tuli tara viri ge vakalongo a mari ni pelekado a ngava na maki i masia na bakovi tara i ratea, o na maki i longoa na bakovi tara i takia, pali ra bakovi iea i uka ma i taki talea a maki i masia o i longoa, ra bakovi iea i rata a naro hale, bara ni vakamadihi.
LEV 5:2 “Na tahuna a bakovi i padoia tara maki i mate i manga a kanirau, a sipsip, a bulmakau, a maki i karaka viliha, ra bakovi iea i muto. Na tahuna a bakovi iea i lohoka vona a maki i ratea, i tahoka a ngava.
LEV 5:3 “Na tahuna a bakovi tara i padoia a maki muto na bakovi tara, pali i uka ma i lohoka vona ra bakovi iea i muto. Na tahuna i lohoka vona a naro i ratea, i tahoka a ngava na naro hale vona.
LEV 5:4 “Na tahuna a bakovi tara i kaba tavula ni ratana a maki hale o ni ratana a maki kamumu, i uka ma i lohoka vona a naro hale i ratea. Na tahuna i lohoka vona, i tahoka a ngava.
LEV 5:5 “Na tahuna a bakovi i lohoka vona i ratea tara naro hale maea, ge taki tala a naro hale vona ne BAKOVI DAGI.
LEV 5:6 Ne vona ni koli a naro hale vona, a bakovi ge habia tara tuna sipsip o a meme ge a kinana, ge a nihabi na naro hale. A prister ge kavitagua a bakovi iea na naro hale vona.
LEV 5:7 “Pali ia ge uka a moni ni kona a sipsip, ge bole a balu ge rua ge bole valai ne BAKOVI DAGI, ge vakalobo a maregoa vona. A balu tara ge a nihabi ni puga vuroki a naro hale, a balu tara ge a nihabi ni gutu-vuro.
LEV 5:8 Ge bole lakea na prister ra balu nga, lakea a prister ge habi mugea tara, ne vona ni puga vuroki a naro hale. A prister ge horia a lohona balu, pali nahea ge rakudu talea a mapana.
LEV 5:9 A prister ge voro tamali a darana popote na gagana dede. A darana ranga ge bole paru, ge guru polotano na dede. Ra balu iea a nihabi na naro hale.
LEV 5:10 Muri ge habia a balu tara ge a nihabi gutu-vuro, ge ramaia a naro na vinara na nihabi. I mavonga kunana a prister ge habia a balu ne vona ni kavitagu a bakovi iea, lakea a naro hale vona bara ni puga vuroki.
LEV 5:11 “Pali na tahuna a bakovi ge uka a moni ni kona a balu ge rua, ge bole vilia a kilo na plaoa ge taku, ne vona a naro hale i ratea. Nahea ge ru a namona oliv o ge ru a havu mangisipa vona, a vuhuna ra plaoa iea a nihabi na naro hale.
LEV 5:12 Ge bole lakea na prister, ge ragamu tala ranga, a nihabi iea ge ratea e BAKOVI DAGI ge luhoia. Lakea a prister ge gutu na dede a plaoa popote nga, turana a nihabi na maki ni kani ni gutu na kanono ne vona e BAKOVI DAGI. Ra plaoa iea a nihabi na naro hale.
LEV 5:13 I mavonga a prister ge rata a nihabi ne vona ni kavitagu a bakovi iea, lakea a naro hale vona ni gi puga vuroki. A plaoa i tababana, ge bole a prister, i manga a nihabi na vit.”
LEV 5:14 E BAKOVI DAGI i takia e Moses i ta maea,
LEV 5:15 “Na tahuna a bakovi tara i longokaburungi ni habi a maki ni taba ne BAKOVI DAGI, i manga a hini i taki ge habi, i rata a naro hale. Ra bakovi iea ge bole vilia a sipsip a toga, ge habia ne BAKOVI DAGI ge vakaloboa a naro hale vona. A prister ge takia vona a mapana sipsip ge konea vona ge ramaia a mapana maki ni kona na mailo na Vure. Muri a bakovi iea ge bole vilia na prister tara sipsip a toga, a mapana ge maea.
LEV 5:16 Ra maki ni taba i uka ma i habi muga ne BAKOVI DAGI, ngane ge habi ge ru langa tabu ranga ( ). Muri a prister ge habia a sipsip iea ge a nihabi na rarenga, ge kavitagua a bakovi iea, lakea a naro hale vona bara ni puga vuroki.
LEV 5:17 “A bakovi tara bara i putu puru ruru a vinara ne BAKOVI DAGI, pali i uka ma i lohoka vona, ra bakovi iea i rata a naro hale, bara i tahoka a ngava.
LEV 5:18 Lakea ge bole lakea na prister a tuna sipsip a toga ge gavutuvutu. A prister ge takia i riva a mapana, ge a nihabi na rarenga. Lakea a prister ge kavitagua a bakovi iea na hini i rata ruru a naro hale, lakea a naro hale vona bara ni puga vuroki.
LEV 5:19 Iea a nihabi na rarenga, a vuhuna i rata a naro hale na matane BAKOVI DAGI.”
LEV 6:1 E BAKOVI DAGI i takia e Moses,
LEV 6:2 “Bara a bakovi i putu puru a vinara ne BAKOVI DAGI, i rata a naro hale na tahuna i panaho, i tami, i rata marogo a maki na turana i matakari, i biu a turana,
LEV 6:3 i matavisia tara maki i uka ma i habi mulea, i kaba tavula i uka ma i muholi a nitana, ra bakovi iea i rata a naro hale.
LEV 6:4 A bakovi i rata a naro hale nga, ge koli a naro hale nga i rata. Na tahuna i rata a nihabi na rarenga vona, ge koli mule taro na tahona a maki nga. A bakovi ge bole a maki, ge habi mulea, turana a maki popote tabu ( ).
LEV 6:6 A bakovi ge koli a rarenga vona, ge bolea tara sipsip a toga ge gavutuvutu, ge lakea na prister, ge ratea a nihabi na rarenga ne BAKOVI DAGI. A prister ge takia i riva a mapana.
LEV 6:7 Muri a prister ge kavitagua a bakovi iea, na matane BAKOVI DAGI, lakea ra naro hale i ratea i tahoka a ngava vona, bara ni puga vuroki.”
LEV 6:8 E BAKOVI DAGI i takia e Moses,
LEV 6:9 “O vakuku e Aron turane huriki e tuna na vinara na nihabi gutu-vuro. Ra nihabi iea ri gi gutu na dede, a kanono ge nono mavonga na rodo malaku, ge harena na hatelanga.
LEV 6:10 Muri a prister ge rodo a nirodo ola ola, a poho ni rata na kala kamumu, ge lakea na dede ge bole a habulo i vona a havu na nihabi gutu-vuro, ge ru tabukoi na dede.
LEV 6:11 Muri ge kali tala a nirodo ola ola vona ge rodo a nirodo ola ola ranga, ge bole tala na mada a havu na kanono, ge ru na tabeke i matapado.
LEV 6:12 A kanono na dede ni gi rata ge nono vakaroro, nahea ge mate. Na hatelanga lobo a prister ge tunu rikea a kanono, ge bole a maka sipsip a bulmakau na nihabi gutu-vuro ge gutu. A maka vina sipsip a bulmakau na nihabi na nivalemu ranga ge gutu vonga.
LEV 6:13 A kanono ge nono vakaroro na dede, nahea ge mate.
LEV 6:14 “A vinara na nihabi na vit i maea: e huriki e tune Aron ri gi bolea a nihabi na vit, ri gi habia ne BAKOVI DAGI tabukoi na dede.
LEV 6:15 I tara ne ria ge ragamu ranga plaoa kamumu ge guru langa vona a namona oliv, a havu mangisipa. Muri ge gutu a plaoa na kanono na dede. Ra plaoa popote nga, ge ratea e BAKOVI DAGI ge luhoia. Na tahuna e BAKOVI DAGI i burongi a mangina kinani, bara i vivi.
LEV 6:16 A maka plaoa i tababana ge kani e Aron turane huriki e tuna bakovi. Ri gi bole a plaoa ri gi rata a bret i uka is, ri gi kani na Tabeke Nitaba, na matana Kape na Vaponga.
LEV 6:17 A bret nahea ni gi vuli turana is ni gi gutu, a vuhuna ra nihabi iea ni taba, i manga a nihabi na naro hale, a nihabi na rarenga. A habi ne huriki a prister a kalavana plaoa ge ne ria, ra kalavana maki ni gutu na kanono ni habi nau, a habi ne ria.
LEV 6:18 E huriki a bakovi na kabu ne Aron kunana ri gi kani a nihabi ni gutu na kanono ne BAKOVI DAGI. Ra vinara iea ni gi ramai vakaroro muri ma. A ra maki i padoi a nihabi nga, ni taba.”
LEV 6:19 E BAKOVI DAGI i takia e Moses i ta maea,
LEV 6:20 “E huriki e tune Aron bakovi ri gi habi a nihabi ne BAKOVI DAGI na tahuna ri bole karaba a leho na prister. Na parava ni gamai tara ne ria ge ia a prister, ge habia nau tara nihabi. Ge bolea tara kilo i taku na plaoa, ge a nihabi na vit, ge habia na hatelanga a kalavana tara, na malunga a kalavana tara.
LEV 6:21 A prister ge vuli kamumu a plaoa turana a namona oliv, ge gutu na ulo kabelabela. Muri ge keve kesikesi, ge habi ne BAKOVI DAGI manga a nihabi na vit, na tahuna i burongia a mangina kinani bara i vivi.
LEV 6:22 E rei a hamone Aron a bakovi ni gamai ge bole a murina, ge habi a nihabi iea ne BAKOVI DAGI. I manga a hini e BAKOVI DAGI i vakuku ria ri gi ramai vakaroro. E huriki a prister bara ri gutu-vuro lobo liu a nihabi.
LEV 6:23 E huriki a prister nahea ri gi kani a nihabi na vit ri bole valai e huriki. A kanono ge gutu ge vuro lobo liu, a havulana kunana ge tabuli.”
LEV 6:24 E BAKOVI DAGI i takia e Moses i ta maea,
LEV 6:25 “O vakuku e Aron turane huriki e tuna na vinara na naro hale. A nihabi iea ni gi rabalaki na murina ni rabalaki a kanirau na nihabi gutu-vuro na matane BAKOVI DAGI. A nihabi iea ni taba hateka.
LEV 6:26 A prister ge habia a nihabi iea ne vona a naro hale, ia kunana ge kani a nihabi na tabeke ni taba, ra na matana Kape na Vaponga.
LEV 6:27 A ra maki i padoia a bobona nihabi iea, bara ni taba. A darana nihabi iea ni gi voro tamali na varakia tara, mu vahiloloa na tabeke ni taba.
LEV 6:28 A prister ge nonoa a nihabi iea na ulo ni rata na taka, muri ge ubipodea ra ulo iea. Pali ia ge nonoa na ulo ni rata na bras, ge tuhari kamumua, muri ge loi kamumua na naru.
LEV 6:29 E rei a bakovi na tara na prister i kara ge kani a nihabi iea, a vuhuna ra nihabi iea ne vona e BAKOVI DAGI.
LEV 6:30 Pali a nihabi na naro hale, a darana sipsip o a bulmakau vona ni bole dili na Kape na Vaponga, ne vona ni kavitagu a naro hale ne huriki na Tabeke Nitaba, nahea ri gi kani a bobona. Ni gi gutu na kanono.”
LEV 7:1 E BAKOVI DAGI i takia e Moses ta maea, “A nihabi na rarenga i kiripiripi hateka. A vinara na nihabi iea i maea:
LEV 7:2 A sipsip a toga na nihabi na rarenga ni gi rabalaki na tabeke ni rabalaki a kanirau na nihabi gutu-vuro. A darana ni gi voro tamali na gagana dede i va.
LEV 7:3 A vina ri gi habi nau na dede turana a vina na kuna, a kinakena,
LEV 7:4 a vuanalipi i rua turana a vina, a kinake i kavitagu a hate turana a mahalana ranga.
LEV 7:5 A prister ge gutu-vuro a vina nga na dede ge habi nau. Ra sipsip iea a nihabi na rarenga.
LEV 7:6 Ra nihabi na rarenga i kiripiripi hateka. E huriki a prister ri kara ni kanina. Ri gi kania na tabeke nitaba.
LEV 7:7 A nihabi na rarenga i manga kunana a nihabi na naro hale. A vinara ne rua i taku kunana. A prister i habi a nihabi iea, i kavitagu e huriki vona, ge bole a bobona kanirau, ge kani.
LEV 7:8 A prister i rata a nihabi gutu-vuro ne huriki a bakovi, ge bole a kulina ge vona.
LEV 7:9 I manga kunana a prister i rata a nihabi na vit ni gutu na oven, na ulo, na ulo kabelabela. Ge bole ge kani.
LEV 7:10 A maka nihabi na vit ni vuli, o i uka ma ni vuli turana namona oliv, ge vaveru e huriki e tune Aron.
LEV 7:11 “A nita na nihabi na nivalemu turane BAKOVI DAGI i maea:
LEV 7:12 “Na tahuna a bakovi i ngaru ni habi a nihabi ni kavurikea e BAKOVI DAGI, ge habi turana a bret i uka is ni vuli turana namona oliv. Ge habi turana a bisket ni ravu na namona oliv, a skon ni vuli kamumu turana a namona oliv.
LEV 7:13 Ra nihabi na nivalemu vona, i habi ne vona ni kavurike e BAKOVI DAGI, ge bole ranga bret i tahoka is ge habi turana.
LEV 7:14 A bakovi ge bole takutaku na maka nihabi na bret ge habi ne BAKOVI DAGI. Ra bret nga ne vona a prister ra i voro tamali a darana sipsip, a bulmakau ne vona a nihabi na nivalemu.
LEV 7:15 Ra bobona sipsip, a bulmakau ni rata a nihabi vona, a bakovi ge kani lobo na parava iea kunana, nahea ge tabuli ranga balena ge palala taho a hini.
LEV 7:16 “Pali i tebi a nihabi na bakovi i ngaru ni rata a nihabi ne vona ni ta muholi, o ge habi nau a nihabi na ningaru vona. A bobona sipsip, a bulmakau ni gi kani na parava iea. A bobona ni kani kaleva i kara ni gi kani na parava muri.
LEV 7:17 A bobona sipsip, a bulmakau na nihabi ni kani kaleva na parava muri, ni gi gutu na kanono na toluna parava, ge vuro lobo liu.
LEV 7:18 A viri i kani a bobona sipsip, a bulmakau ni kani kaleva na toluna parava, na tahuna i habia a nihabi na nivalemu, i uka ma ga ngarua, a vuhuna a nihabi vona i muto na matana Vure. E rei i kania a bobona sipsip, a bulmakau iea i tahoka a ngava.
LEV 7:19 “Na tahuna a bobona sipsip, a bulmakau i padoi a maki muto, naha ni kani. Ni gi bole ni gi gutu na kanono ge vuro lobo liu. E huriki ri matapado na matagu ri gi kani ra bobona sipsip, a bulmakau.
LEV 7:20 Pali a bakovi i uka ma i matapado, i kania a bobona sipsip, a bulmakau na nihabi na nivalemu ne BAKOVI DAGI, ni gi tono tala na kabu vona.
LEV 7:21 A viri i muto na tahuna i padoi a maki i muto na bakovi na ngatavine, a maki i muto na kanirau, a maki i muto na maki i karaka viliha, a maki ranga ri muto ri muma hateka, lakea i kani a bobona sipsip a bulmakau na nihabi na nivalemu ne BAKOVI DAGI, na tahuna i rata mavonga, ia tara ni gi tono tala na kabu vona.”
LEV 7:22 E BAKOVI DAGI i takia e Moses i ta maea,
LEV 7:23 “O vakalongo e huriki a Israel o ta maea: Naha ni kani a vina bulmakau, a sipsip, a meme.
LEV 7:24 Naha ni kani a vina sipsip, a bulmakau i mate tavula, a vina sipsip, a bulmakau i rabalaki a kanirau hateka. Mu bole a vina mu rata a maki ranga vona. Pali naha ni kani.
LEV 7:25 A bakovi i kani a vina kanirau, ra i kara ni gi habi ne BAKOVI DAGI manga a nihabi ni gutu na kanono, ni gi tono tala na kabu vona.
LEV 7:26 E LeviI uka ma ngi kunana. Naha ni kani a darana maki tara. I vai a tanga mu made vona, naha ni kani a darana kadirovo, a darana kanirau.
LEV 7:27 A bakovi a ngatavine i longotaroa a vinara iea, ni gi tono tala na kabu vona.” A Kalavana Kinani ne Vona e Huriki a Prister
LEV 7:28 E BAKOVI DAGI i takia e Moses i ta maea,
LEV 7:29 “O vakalongo e huriki a Israel o ta maea: A viri i ngaru ni habi a kanirau ge a nihabi na nivalemu, ge ru hereherea tara balena ge vona e BAKOVI DAGI.
LEV 7:30 Ra bakovi iea ge bole valai a vina turana siana, ge a nihabi ni gutu na kanono. A prister ge bolea a siana ge tabari e BAKOVI DAGI vona.
LEV 7:31 A prister ge gutu a vina sipsip, a bulmakau na dede, pali a siana sipsip, a bulmakau ge ne vona e Aron, e huriki e tuna.
LEV 7:32 A pona na kanena ri gi habia na prister, ge manga a sika vona na nihabi na nivalemu ne mua.
LEV 7:33 E rei e tune Aron i rata a nihabi na nivalemu na darana, na vina kanirau, ge bole a pona na kanena kanirau iea.
LEV 7:34 Iau e BAKOVI DAGI a bole tala na nihabi na nivalemu ne huriki a Israel a siana, ra ni tabari iau vona, a pona sipsip, a bulmakau, a habi ne Aron a prister, turane huriki e tuna bakovi. E huriki a prister kunana ri gi bole vakaroro ne huriki a Israel a maka kalavana nihabi nga.
LEV 7:35 “Ra kalavana nihabi nga, ni bole valai ne BAKOVI DAGI, ge a nihabi ni gutu na kanono. E BAKOVI DAGI i pasivunu a kalavana nihabi nga ne vona e Aron turane huriki e tuna bakovi, na parava ni gamai ria ri gi leho manga a prister vona.
LEV 7:36 Na tahuna ni gamai ria, e BAKOVI DAGI i vakuku e huriki a Israel, ri gi habi ne huriki a prister ra kalavana nga. Ra vinara iea ri gi ramai vakaroroa muri ma.
LEV 7:37 “Ra ngava nga, a vinara na nihabi gutu-vuro, a nihabi na vit, a nihabi na naro hale, a nihabi na rarenga, a nihabi na bakovi ni gamai ge ia a prister, a nihabi na nivalemu.
LEV 7:38 E BAKOVI DAGI i habi ne Moses a vinara nga na lolo e Sinai, na tahuna e huriki a Israel ri made na tabeke i ngeki. Na parava e BAKOVI DAGI i vakuku e huriki a Israel ri gi habi a nihabi, i habi ne ria a vinara nga.”
LEV 8:1 E BAKOVI DAGI i takia e Moses i ta maea,
LEV 8:2 “O tuli e Aron turane huriki e tuna bakovi. O bole a nirodo ola ola, a nibiri ne vona ni gamai, a bulmakau a toga ge a nihabi na naro hale, a sipsip a toga ge rua, a kulopi na bret i uka is.
LEV 8:3 Muri o gale palupu e huriki a bakovi a ngatavine ri gi valai na matana Kape na Vaponga.”
LEV 8:4 E Moses i rata a maki e BAKOVI DAGI i vakuku ia vona, i gale palupu e huriki lobo, ri vapopo na matana Kape na Vaponga.
LEV 8:5 E Moses i taki ria, “E BAKOVI DAGI i vakuku iau vona tara maki ga ratea ngane.”
LEV 8:6 I gale e Aron turane tuna mai, ri valai ri pesi na matane huriki, i vahilolo ria na naru.
LEV 8:7 Muri i vakarodoa na nirodo e Aron, i bolea a kala i manga a palabele, i vakarea ia vona. Muri i vakarodoa e Aron na nirodo ola ola, i vakarea ia na kala dagi. I bolea a palabele ni vakabagetu, i kolo tatea a kala dagi ne Aron.
LEV 8:8 I bolea a kala na ngala i koloa na ngalane Aron. I bole a kedo kiroko i rua ne vona ni bole a lohokanga na ningaru na Vure, i ru pololilo na kala na ngala.
LEV 8:9 I bolea a hoi i ru halui a gine Aron vona. Muri i bolea a hulongi ni rata na gol, i topia na hini muga na hoi. Ra hulongi iea, i vakasiri e Aron ia a bakovi na Vure. E Moses i rata a maki nga, i ramai a ngava e BAKOVI DAGI i vakuku ia vona.
LEV 8:10 Muri e Moses i bolea a nibiri, i gamai a Mailo na Vure turana a maka maki i tabuli pololilo vona, ge ne vona e BAKOVI DAGI kunana.
LEV 8:11 I bole tabua a nibiri i voro tamali langa na dede balaka polorua, i gamai a maka mahala ri tabuli vona, a tavila na hilova turana a dede kiroko vona. A maka maki nga ne vona e BAKOVI DAGI kunana.
LEV 8:12 I bolea a nibiri i guru langea na gine Aron, i gamaia, ge vona e BAKOVI DAGI kunana.
LEV 8:13 Muri e Moses i tuli e huriki e tune Aron ri valai, i vakarodo ria na nirodo, i vakarea ria na palabele, i vakatama ria na tama, i ramaia a ngava e BAKOVI DAGI i vakukua vona.
LEV 8:14 Muri e Moses i bolea a bulmakau a toga, ge a nihabi na naro hale. Lakea e Aron turana e tuna mai ri ru langa a limane ria na gina.
LEV 8:15 Muri e Moses i rabalakia a bulmakau, i lutu a kukulimana na darana, i ravu na maka tupina dede na nihabi gutu-vuro. Na naro iea kunana i gamaia a dede i matapado na matana Vure. Muri i bole paru a darana i tababana, i guru na taruna dede, i gamaia, i kavitagua.
LEV 8:16 Lakea e Moses i bole a vina pololilo na mahalana, a kinake i kavitagu a hate, a vuanalipi i rua turana vina, i gutu-vuro na dede.
LEV 8:17 Pali i bole ranga balena bulmakau turana a kulina, a bobona, a tahena, i gutu-vuro polovavo na mada, i ramai a ngava e BAKOVI DAGI i vakuku e Moses vona.
LEV 8:18 Muri e Moses i bolea tara sipsip a toga ge a nihabi gutu-vuro. Lakea e Aron turane huriki e tuna ri ru langa a limane ria na gina.
LEV 8:19 Muri e Moses i rabalakia, i bole a darana, i voro tamali langa na tabekena dede i va.
LEV 8:20 I pala kesikesia a sipsip, i gutu a gina, a vina, a balena.
LEV 8:21 I vahilolo a maka mahalana, a vahana. I gutu loboa langa na dede. Ra sipsip iea a nihabi gutu-vuro ni rata na kanono, i manginoro a mangina. Ia a nihabi ni gutu na kanono ne BAKOVI DAGI, i ramaia a ngava e BAKOVI DAGI i vakuku e Moses vona.
LEV 8:22 Muri e Moses i bole tabua tara sipsip a toga, ne vona ni gamai a bakovi ge ia a prister. Lakea e Aron turane huriki e tuna ri ru langa a limane ria na gina sipsip.
LEV 8:23 Muri e Moses i rabalakia a sipsip iea, i bole ranga darana, i ravu na taruna talingana kanena ne Aron, na kukukoru na limana kanena, na kukukoru na vahana kanena.
LEV 8:24 Muri i tuli valai e huriki e tune Aron, i ravu a dara na taruna talingana kanene ria, na kukukoru na limana kanena ne ria, a vahana kanena ne ria. I bole paru a dara i tababana, i voro tamali lakea na tabekena dede i va.
LEV 8:25 Muri i bole a vina, a vina na kuna, a vina na mahalana, a kinake i kavitagu a hate, a vuanalipi i rua turana a vina, a pona kanena.
LEV 8:26 Muri e Moses i lakea na kulopi i vonu vona a bret i uka is, i tabuli na matane BAKOVI DAGI, i bole tala a bret i uka is, a bret ni gutu na namona oliv, a bisket i taku, i ru langa na vina, a pona kanena.
LEV 8:27 Lakea e Moses i ru a maki ni kani nga na limane Aron turane huriki e tuna, ri bole na limane ria, ri tabari e BAKOVI DAGI vona.
LEV 8:28 Muri e Moses i bole mule ne ria a maki ni kani, i gutu-vuro na dede turana a nihabi gutu-vuro ranga. Ra maki nga, a nihabi ni gamai e huriki a prister, i manginoro a mangina. Ia a nihabi ni gutu na kanono ne BAKOVI DAGI.
LEV 8:29 Muri e Moses i bolea a siana, i tabari e BAKOVI DAGI vona, manga a nihabi nitabari. Ra balena sipsip a toga iea, a sika ne Moses na nigamai e huriki a prister, i manga a ngava e BAKOVI DAGI i vakuku e Moses vona.
LEV 8:30 E Moses i bole a merena nibiri na nigamai, turana a dara i tabuli na dede, i voro tamali langa ne Aron, ne huriki e tuna, na nirodo ne ria. Na naro iea kunana e Moses i gamai e Aron, e huriki e tuna, turana a maka nirodo ne ria.
LEV 8:31 Muri e Moses i taki e Aron turane huriki e tuna, i ta maea, “Mu nono a balena sipsip o a bulmakau iea na matana Kape na Vaponga. Mu kani kinika na maka bret ri tabuli na kulopi. Ra kulopi iea i tahoka a maka bret, a bisket ne vona a nihabi nigamai. Na naro iea bara mu ramai a ngava a vakuku e Moses vona, a ta maea, ‘E Aron, e huriki e tuna ri gi kani.’
LEV 8:32 Na tahuna mu kani mu maru, a maka kalavana maki ni kani mu gutu-vuro na kanono.
LEV 8:33 Muri mu pagitala na matana Kape na Vaponga, mu made vonga na parava ge polorua, ge harena na tahuna ge lobo a parava ge polorua na Habu na Nigamai.
LEV 8:34 E BAKOVI DAGI i taki hita si gi rata a maki i manga a hini si rata mona, bara i kavitagu mua.
LEV 8:35 I taki iau pali, ta mu gu made na matana kape na haro, na rodo, ge harena na parava i polorua mu gu rata a maki i taki. Bara mu longotaro a ngavana, bara mu mate, a vuhuna ra ngava iea e BAKOVI DAGI i vakuku iau vona.”
LEV 8:36 E Aron turane huriki e tuna, ri ramai kunana a ngava lobo e BAKOVI DAGI i vakuku e Moses vona.
LEV 9:1 Na polotoluna parava, e Moses i gale palupu e Aron turana e huriki e tuna bakovi, e huriki a gare ne Israel.
LEV 9:2 Lakea i takia e Aron i ta maea, “O bolea tara bulmakau karaba a toga, a sipsip a toga ru gavutuvutu, o habi ne BAKOVI DAGI. A bulmakau ge a nihabi na naro hale, a sipsip ge a nihabi gutu-vuro.
LEV 9:3 O taki e huriki a Israel ri gi bolea tara meme a toga, ge a nihabi na naro hale, a tuna bulmakau, a tuna sipsip, ru pida takutaku, ru gavutuvutu, ge a nihabi gutu-vuro.
LEV 9:4 Muri e huriki ri gi habi a bulmakau, a sipsip a toga, ge a nihabi na nivalemu. A nihabi na vit ni vuli turana namona oliv, ia tara ni gi habi ne BAKOVI DAGI. Ri gi rata a maki nga, a vuhuna mona e BAKOVI DAGI ge bele, ri gi masia na matane ria.
LEV 9:5 E huriki ri bole valai na matana Kape na Vaponga a maka maki e Moses i vakuku ria vona ri gi bole. Muri e huriki lobo ri valai tabukoi ri pesi na matane BAKOVI DAGI.
LEV 9:6 Lakea e Moses i taki ria, i ta maea, “E BAKOVI DAGI i taki mua mu gu ratea a nihabi, muri bara mu masia a bagetua vona.”
LEV 9:7 Muri e Moses i takia e Aron i ta maea, “O valai na dede o ratea a nihabi na naro hale vomu, a nihabi gutu-vuro vomu. O rata a nihabi ge rua, ne vona ni kavitagu ioe, ne vona ni kavitagu e huriki, i ramaia a ngava e BAKOVI DAGI i vakuku.”
LEV 9:8 Lakea e Aron i valai na dede i rabalakia a bulmakau karaba, ra nihabi na naro hale vona.
LEV 9:9 Muri e huriki e tuna, ri bole valai vona a dara, lakea i lutua a kukulimana na dara, i ravu na tupi i va na dede. Muri i guru tala paru na taruna dede a dara i tababana.
LEV 9:10 Pali i gutu-vuro na dede a vina, a vuanalipi, a kinake i kavitagu a hate, i ramai a ngava e BAKOVI DAGI i vakuku e Moses vona.
LEV 9:11 Pali a bobona, a kulina bulmakau i bole tala, i gutu-vuro polovavo na mada.
LEV 9:12 Muri e Aron i vakalobo a leho nga, i rabalakia tara kanirau ge a nihabi gutu-vuro. E huriki e tuna ri bole a dara ri habi vona, i voro tamali langa na gagana dede i va.
LEV 9:13 Ri habi vona a mapana, a maka balena kanirau, i gutu-vuro langa na dede.
LEV 9:14 Muri i loi a maka mahalana, a vahana i rua, i gutu langa na dede turana nihabi gutu-vuro.
LEV 9:15 Muri e Aron i bole a nihabi ne huriki, i rabalakia a meme, i habia, ge a nihabi na naro hale ne huriki, i manga a nihabi muga.
LEV 9:16 I bole valai tabu a nihabi gutu-vuro, i habia, i ramaia a nita na vinara.
LEV 9:17 I bole valai tabu a nihabi na vit, i ragamu tala ranga, i gutu-vuro na dede. I gutu turana a nihabi gutu-vuro ni rata na hatelanga.
LEV 9:18 Muri e Aron i rabalaki a bulmakau a sipsip a toga, ge a nihabi na nivalemu ne huriki. Lakea e huriki e tuna ri bole a darana sipsip, a bulmakau, ri habi vona, i voro tamali na gagana dede i va.
LEV 9:19 Pali e Aron i bole a vina sipsip, a bulmakau nga: a vina kuna, a vuanalipi, a kinake i kavitagu a hate.
LEV 9:20 I bole a vina i ru langa na siana sipsip, a bulmakau nga, i gutu-vuro na dede.
LEV 9:21 Pali a siana, a pona bulmakau a sipsip, e Aron i tabari e BAKOVI DAGI vona, i manga a nihabi na nitabari, i ramai a ngava e BAKOVI DAGI i vakuku e Moses vona.
LEV 9:22 Na tahuna e Aron i habi lobo a nihabi na naro hale, a nihabi gutu-vuro, a nihabi na nivalemu, i toto langa a limana ne huriki, i gamai ria. Muri i pea a dede i puru.
LEV 9:23 Muri e Moses e Aron ru dili na Kape na Vaponga. Na tahuna ru pagitala ru gamai e huriki. Muri ri masia a bagetua ne BAKOVI DAGI i bele kavakava.
LEV 9:24 Malaviriri kunana a kanono i pagitala valai ne BAKOVI DAGI, i vakalobo liu a maka nihabi gutu-vuro, turana a balena vina kanirau. Na tahuna e huriki ri masia a naro iea i bele, ri haloho, ri tabuli bararapuru na malala.
LEV 10:1 Na tahuna iea e tune Aron ala rua, e Nadap, e Abihu, ru pi a kanono, ru ru dili na ulo kiroko ni rata na aen, ru guru puru a havu mangisipa na ulo, ru habi a kanono i uka ma ni taba ne BAKOVI DAGI. Pali e BAKOVI DAGI i uka ma i taki rua ru gu rata mavonga.
LEV 10:2 Lakea i malaviriri kunana e BAKOVI DAGI i rudua a kanono i puru valai i gutu parina rua ru mate na matana.
LEV 10:3 Muri e Moses i takia e Aron, “E BAKOVI DAGI i ta maea: ‘E huriki ri leho nau, ri gi lohoka kamumu vona iau a kiripiripi. Na matane huriki lobo, bara vakasiri ria vona a nitora dagi, a bagetua nau.’” E Aron i longoa a nita iea, i uka ngavana.
LEV 10:4 Muri e Moses i gale e Misael, e Elsapan, e tune Usiel, e tamane Aron kiroko, ru valai vona. Lakea i taki rua i ta maea, “Muru valai, muru kaloho tala a podane turane marua na mailo na Vure, muru bole tala na mada.”
LEV 10:5 Ru vano ru kaloho tala na mada a podane rua, i manga a ngava e Moses i vakuku. Pali uka ma ru kali tala a nirodo na bakovi nga ru mate.
LEV 10:6 Ngane e Moses i habi a ngava tabu ne Aron turana e tuna ala rua, e Eleasar, e Itamar. I taki tou i ta maea, “Nahea ge patoka a vune matou, naha ni rape a varakia matou, ma ga moto rata mavonga bara moto mate, a rongova ne BAKOVI DAGI bara i bele ne huriki. Pali e huriki a viri ne mua a Israel, ria ri gi kalo vona ra bakovi nga e BAKOVI DAGI i rabalaki rua na kanono.
LEV 10:7 Naha ni pe taroa a Kape na Vaponga, ma moto go mate. A gamai matou pali, matou a vora ne BAKOVI DAGI kunana.” I mavonga, to longoa a nitane Moses, to ramaia.
LEV 10:8 E BAKOVI DAGI i takia e Aron i ta maea,
LEV 10:9 “Na tahuna ioe turana e tumu ala rua moto dili na Kape na Vaponga, naha ni ninu a vain a naru vagole, ma moto go mate. Ra vinara iea, ge ramai vakaroroa e huriki a hamone matou.
LEV 10:10 Moto tovo matou ni matakilaka vona a maki ni taba, a maki i uka ma ni taba, a maki i kaba, a maki i muto.
LEV 10:11 Bara moto tovo e huriki a Israel na maka vinara e BAKOVI DAGI i vakuku e Moses vona.”
LEV 10:12 E Moses i taki e Aron turana e tuna ala rua ru tababana ni mahuri, e Eleasar, e Itamar, i ta maea, “Moto bole a vit i tababana na nihabi ni gutu na kanono ne BAKOVI DAGI, moto rata a bret i uka is, moto kani tabukoi na dede, a vuhuna a bret iea ni taba.
LEV 10:13 Moto kani na hini ni taba pololilo na nure na Kape na Vaponga. A naguna vit ni gutu kaleva ra ni habi ne BAKOVI DAGI, moto bole ge ne matou, ne vona e tune matou bakovi, moto bole tala na nihabi ni gutu na kanono ne BAKOVI DAGI, i ramaia a ngava ni vakuku iau vona.
LEV 10:14 Pali matou turana e huriki e tune matou bakovi, e tune matou ngatavine, mu bolea na nihabi na nivalemu ne huriki a Israel a siana ni tabari, a pona a sipsip, a bulmakau. A tabeke tara i matapado na matana Vure, moto vano moto kani vonga.
LEV 10:15 E huriki a bakovi, a ngatavine ri gi habi a vahana, a siana bulmakau, a sipsip turana a vina, moto bole moto tabari e BAKOVI DAGI vona. Muri moto gutu-vuro na dede a vina, pali moto bole a pona, a siana, moto kani. Ra pona, a siana sipsip, a bulmakau bara ne matou kunana vakaroro, turana e huriki e tune matou, i manga a ngava e BAKOVI DAGI i vakuku.”
LEV 10:16 Na tahuna e Moses i nana kado tou na a ra maki to ratea vona a meme na nihabi na naro hale, to takia ta to gutua pali na kanono! Lakea e Moses i tahate e Eleasar e Itmar, i ta maea,
LEV 10:17 “I navai i uka ma moto kani a nihabi na naro hale pololilo na kape? Ra nihabi iea ni taba hateka. Ni habi ne matou, moto go kube a rarenga ne huriki, moto go kavitagu ria na matane BAKOVI DAGI.
LEV 10:18 Matou i uka ma moto bole a darana nihabi ge dili na Tabeke Nitaba, pali i navai i uka ma moto kani pololiloa vonga, ge ramaia a ngava iau a vakuku mua vona?”
LEV 10:19 Lakea e Aron i takia e Moses, “O longo, mona e huriki ri habi a nihabi na naro hale ne ria, a nihabi gutu-vuro. Pali ge a ra, a maki hale i bele nau pali. I mavonga, na tahuna ga kani a nihabi na naro hale mona, e BAKOVI DAGI ge ngarua a narogu?”
LEV 10:20 Na tahuna e Moses i longoa a ngavane Aron, i kamumu a lohona.
LEV 11:1 E BAKOVI DAGI i taki e Moses e Aron,
LEV 11:2 ru gu taki e huriki a Israel ru gu ta maea, “A maki mahuri ri laho na malala, mu gu kani, ra nga:
LEV 11:3 a sipsip, a bulmakau a tagulana vahana ria i bako, ri ngau a varili manga a bulmakau.
LEV 11:4 “Pali naha ni kani a kanirau manga a kamel, a gola, a murongi talinga ola, a vuhuna ri ngau a varili manga a bulmakau, pali i uka ma i bako a tagulana vahane ria. Ri muto ni kani.
LEV 11:7 Naha ni kani a boro, a vuhuna a tagulana vahana i bako, pali i uka ma i ngau a varili. I muto ni kani.
LEV 11:8 Naha ni kani ra maka kania nga, naha ni nugu na tahuna ri mate, a vuhuna ri muto.
LEV 11:9 “A maki na naru, na dari bara mu kani, ra nga: a maka manu ri tahoka a honane ria a pelengane ria.
LEV 11:10 Pali a kabuna maki mahuri na naru, na dari, i uka honane ria, i uka pelengane ria, naha ni kani. Mu pile.
LEV 11:11 A maka maki nga mu pile, lakea naha ni kani ria, naha ni nugu ria na tahuna ri mate.
LEV 11:12 Mu longo kamumu, naha ni kani a manu i uka pelengane ria, a honane ria. Mu pile.
LEV 11:13 “Naha ni kani a kadirovo nga, a vuhuna ri muto. Mu pile: a loha, a kinikinimanu, pangopango-kaba,
LEV 11:14 a luama vokuvoku, a luama katokato, a maka luama viliha,
LEV 11:15 a maka kokoa viliha,
LEV 11:16 a kadirovo i manga a mengo, a haloho, a nae, a maka loha viliha,
LEV 11:17 a kuku kiroko, a kadirovo i manga a pato ni gale a komaran, a kuku dagi,
LEV 11:18 a maka kuku viliha, a kadirovo i manga a kongo,
LEV 11:19 a kadirovo ni gale a stork, a maka luhou viliha, a kadirovo ni gale a hupoe, a kopa.
LEV 11:20 “Naha ni kani a maki ri tahoka a karapane ria, ri laho na vahane ria i va. Mu pile.
LEV 11:21 Pali mu kani a maki ri tahoka a karapane ria, ri laho na vahane ria i va, ri page viliha na malala.
LEV 11:22 I mavonga mu kani a maka koa lobo.
LEV 11:23 Pali a maki ri tahoka a karapane ria, ri tahoka a vahane ria i va, mu pile.
LEV 11:24 “Naha ni padoi a maki nga. A viri i padoia tara maki i mate, bara i muto i harena na malunga liu.
LEV 11:25 A viri i bole rikea tara maki i mate, ra bakovi iea i muto, ge loi pasi a varakia vona, pali bara i muto mavonga i harena na malunga liu.
LEV 11:26 “A maka kanirau a tagulana vahane ria i uka ma i bako hateka, o i uka ma ri ngau a varili, ri muto. A viri i padoi a kanirau nga, bara i muto.
LEV 11:27 A maka kanirau ri laho na vahane ria i va, i kabelabela a vahane ria, ri muto. Naha ni padoia tara ge mate. A viri i padoi a podana kanirau i mate, bara i muto mavonga i harena na malunga liu.
LEV 11:28 A bakovi i bole rikea a kanirau i mate, ge vahiloloa a varakia vona, pali ia bara i muto mavonga i harena na malunga liu, a vuhuna ra maki nga ri muto.
LEV 11:29 “Na maka kanirau ri laho lae na malala ri muto: a murongi, a kuruve, a kapore, a karapoda-dole, a tabelebako, a miho.
LEV 11:31 Ra maki nga ri laho viliha na malala, ri muto. Naha ni padoi na tahuna ri mate. Mua bara mu rata mavonga, bara mu muto i harena na malunga liu.
LEV 11:32 Na tahuna a maki nga ri mate ri boru langa na maki tara, ra maki iea i muto. A podana ge boru langa na maki ni rata na kai, na kala, na kulina bulmakau, na beke, ra maki lobo nga ri muto. Mu bole mu loi na naru, pali bara ri muto mavonga i harena na malunga liu.
LEV 11:33 Bara maki tara i mate i boru dili na ulo, a maka maki i tabuli pololilo ri muto. Mu bolea a ulo mu ubipodea.
LEV 11:34 A maki ni kani i tabuli pololilo vona, i muto. A naru i tabuli pololilo vona, ia tara i muto.
LEV 11:35 Bara podana maki mate i boru langa na stov, na oven ni rata na taka, ra maki nga ru muto, mu ubipoda.
LEV 11:36 Pali bara a maki mate i boru langa na naru i tua, o na lomu, a naru i uka ma ge muto. Pali a maki i padoi a maki nga i mate, bara i muto.
LEV 11:37 A maki i mate i boru langa na vutuna maki ni varo, a vutuna maki i kamumu kunana, i uka ma ri muto.
LEV 11:38 Pali a vutuna maki i tabuli na naru, lakea a maki i mate i boru langa ne ria, ra vutuna maki nga ri muto.
LEV 11:39 “A kanirau tara ra i kara ni gi kani, i mate, a viri i padoia bara i muto i harena na malunga liu.
LEV 11:40 A viri i kania a balena kanirau iea o i nugua, ge vahilolo a maka varakia vona. Pali ia bara i muto mavonga i harena na malunga liu.
LEV 11:41 “Naha ni kani a maki kiroko ri karaka o ri laho tabukoi viliha na malala, a maki i kupo a vahana.
LEV 11:43 Naha ni kani a maki nga. Bara mu kani, mu muto.
LEV 11:44 Iau e BAKOVI DAGI, a Vure ne mua. Mu habi mua nau, bara mu kiripiripi, a vuhuna iau a kiripiripi. Naha ni kani a maka kuruve, a maki kiroko ranga ri karaka viliha na malala, ma mu gu muto.
LEV 11:45 Iau e BAKOVI DAGI, a bole tala mua o Egipto a taparaki valai mua koea, ge iau a Vure ne mua. Mu ramai a naro ge kiripiripi, a vuhuna iau a kiripiripi.
LEV 11:46 “Mu bolea pali ra vinara iea. I taki a maka kanirau, a maka kadirovo, a maka manu, a maka maki kiroko ri karaka ri laho na malala.
LEV 11:47 Mu pelekado kamumu a maki matapado, a maki muto, a maki mahuri mu gu kani, a maki mahuri i uka ma mu gu kani.”
LEV 12:1 E BAKOVI DAGI i takia e Moses i ta maea,
LEV 12:2 “O taki e huriki a Israel, na tahuna a ngatavine i singou, i poda a koma bakovi, a ngatavine bara i muto na parava i polorua, i manga a hini i matai a keva.
LEV 12:3 Na polotoluna parava ni gi pala a kulina koma bakovi.
LEV 12:4 Muri a ngatavine ge made tabu na ruma na parava ge ravulu tolu a polona i tolu (33), a vuhuna a darana i tua tala na tahuna i poda a koma. Nahea ge nugua tara maki ni gamai, o ge lakea na mailo na Vure, a vuhuna i muto. Ra ngatavine iea bara i muto mavonga ge harena na tahuna ni vakamatapado.
LEV 12:5 Pali na tahuna a ngatavine ge poda a koma ngatavine, a ngatavine bara i muto na parava i ravulu a polona i va, i manga na tahuna i matai a keva. A ngatavine ge made tabu na ruma na parava ge ravulu polotara a polona i polotara (66), muri ge matapado, a vuhuna a darana i tua tala na tahuna i poda a koma vona.
LEV 12:6 “Na tahuna a maka parava ni vaka­matapado i lobo, a ngatavine ge habi na prister na matana Kape na Vaponga tara tuna sipsip, a pida vona i taku, ge a nihabi ni gutu-vuro. Ge habi tabua a balu, ge a nihabi na naro hale.
LEV 12:7 A prister ge bole a sipsip, a balu na ngatavine, ge habi ne BAKOVI DAGI, ge kavitagua a ngatavine. Ngane bara i matapado, a darana i uka ma ge rata tabu ia ge muto. A ngatavine i poda a koma bakovi o a koma ngatavine, ge ramaia a vinara iea.
LEV 12:8 Pali a ngatavine iea ge uka a moni ni kona a tuna sipsip, ge bole valai a balu ge rua. A balu tara ne vona a nihabi gutu-vuro. A balu tara ne vona a nihabi na naro hale. A prister ge habi ne BAKOVI DAGI a balu nga i rua, ge kavitagua a ngatavine. Muri a ngatavine bara i matapado na matane BAKOVI DAGI.”
LEV 13:1 E BAKOVI DAGI i taki e Moses e Aron i ta maea,
LEV 13:2 “Na tahuna a viri i tahoka a ngarava, a loto, a maki tara i kavuvu i vururu na kulina, lakea i vakabele a patala, a bakovi ni gi tuli lakea ne Aron a prister, o ge lakea ne tuna tara a prister.
LEV 13:3 A prister ge lei kamumua a hini i hale na kulina. Na tahuna i matai a vungana na kulina i kea, a gilanga i dupi dili na kulina, ra gilanga iea a patala. Muri na prister i lei loboa, ge vakalongoa i muto.
LEV 13:4 Pali a hini hale na kulina i uka ma i kea a vungana ge dupi, ge tonoa ge hamule na ruma vona, ge made kikeri tabu na parava ge polorua.
LEV 13:5 Na poloruana parava a prister ge lei tabua. Pali a prister ge masia i uka ma i mavu i rako lae na kulina a gilanga, ge takia a bakovi ge made kikeri tabu na parava ge polorua.
LEV 13:6 Na poloruana parava a prister ge matai tabua, a gilanga na kulina i lobo o i uka. A gilanga ge lobo, a prister ge takia i matapado, ra gilanga iea a gilanga tavula. Muri a bakovi ge vahilolo a maka varakia vona, ge matapado ia.
LEV 13:7 Pali muri na parava i vakasiri ia na prister, a gilanga na kulina i bele tabu, a bakovi iea ge vano ge matai tabua a prister.
LEV 13:8 A prister ge lei kamumu tabua a gilanga na kulina. A gilanga ge rako lae na kulina, ra bakovi iea i tahoka a patala. A prister ge vakalongoa i muto.
LEV 13:9 “A viri i tahoka a patala ni gi tuli lakea na prister.
LEV 13:10 A prister ge lei kamumua a kulina, ge masia a kulina i vaki, i kea, i ratea a vungana i kea, i mapoka a hini i vaki,
LEV 13:11 ra bakovi iea i tahoka a patala. A prister ge vakalongoa a bakovi iea i muto. Ngane a prister i lohoka vona, ra bakovi iea i muto, pali nahea ge tonoa ge made kikeri.
LEV 13:12 “Na tahuna a prister i masia a patala i rako lae na kulina viri, i tubu na gina i puru na vahana,
LEV 13:13 a prister ge lei kamumu tabua a kulina. Ia ge masia a gilanga i rako lobo na kulina, i ratea a kulina i kea, a kulina ge kea lobo, ra bakovi iea i matapado, a vuhuna a kulina i kea lobo pali.
LEV 13:14 Pali na tahuna a patala i mapoka, i tabuli kavakava a bobona, ra bakovi iea i muto.
LEV 13:15 A prister ge lei tabua a patala, ge masia i mapoka, i tabuli kavakava a bobona, ra bakovi iea i muto. Ra gilanga maea i hale hateka.
LEV 13:16 Pali na tahuna a gilanga i lobo, i keke a murina, ra bakovi iea ge hamule lakea tabu na prister.
LEV 13:17 A prister ge lei kamumua a kulina a bakovi iea, bara i masia i lobo, i keke a murina a patala, ra bakovi iea i matapado. Muri ge vakalongoa i matapado pali.
LEV 13:18 “A viri tara ge tahoka a loto na kulina, a loto vona i mavu,
LEV 13:19 muri a murina loto i keke, i vaki tala, i vururu, ra bakovi iea ge lakea na prister.
LEV 13:20 A prister ge lei kamumua a murina loto na bakovi. Na tahuna i mata visi a vungana na tabeke i vaki i kea, a ngarava vona i ngara i dupi, a prister ge takia a bakovi iea i muto. I tahoka a patala.
LEV 13:21 Pali na tahuna a prister iea i lei kamumu a loto, i masia i uka ma i ngara, i uka ma i kea a vungana, ge tonoa ge made kikeri na parava ge polorua.
LEV 13:22 Muri na parava ge polorua ge lobo, a loto ge vaki dagi, ra loto iea a maki hale, lakea a prister ge takia a bakovi i muto.
LEV 13:23 Pali bara a loto iea i tabuli na hini i taku kunana, i uka ma i rako ge tuvu lakea na hini ranga, ra loto iea a vuruna loto muga, a prister ge takia a bakovi iea i matapado.
LEV 13:24 “Na tahuna a viri i gutua a kanono a kulina, i lele a bobona, i vururu keakea o i keakea,
LEV 13:25 a prister ge lei kamumua a ngarava vona, ge masia a vungana ge kea na hini i gutua a kanono, i ngara i dupi, ra gilanga iea a patala. A hini i gutua a kanono i vakabelea a patala. A prister ge takia i muto.
LEV 13:26 Pali na tahuna a prister i lei a kulina, i uka ma i matai a vungana ge kea na hini i gutua a kanono, i uka ma i ngara, a prister ge takia a bakovi ge made kikeri na parava ge polorua.
LEV 13:27 Na poloruana parava a prister ge lei kamumu tabua a bakovi. A gilanga vona ge rako lae, a prister ge takia i muto. I tahoka a patala.
LEV 13:28 Pali a ngarava i uka ma i ngara, a harena kanono i kamumu kunana, a prister ge vakalongoa a bakovi iea i matapado, a vuhuna a ngarava vona a murina hini i gutua a kanono.
LEV 13:29 “Na tahuna a bakovi, a ngatavine i vona a vuruputuka a gina, o i pero a sivana,
LEV 13:30 a prister ge lei kamumua. A prister ge masia a vuruputuka, a pero ge dupi dili na kulina, a vungana ge ngango ngango, i makudu lae a vuna, ngane a prister ge vakalongoa i muto. A gilanga vona, a patala, i makali.
LEV 13:31 Na tahuna a prister i lei kamumua a vuruputuka a pero na bakovi, i matai i uka ma i dupi dili, a vuna i uka ma i koru rike ma, ge takia a bakovi ge made kikeri taro na parava ge polorua.
LEV 13:32 Na poloruana parava, a prister ge lei tabua a kulina bakovi iea. A vuruputuka a pero i uka ma i tuvu lakea na hini ranga, i uka ma i ngango a vungana, i uka ma i dupi dili,
LEV 13:33 a bakovi iea ge ali a vuna na gina, a sivana, pali nahea ge ali a hini i tuvu vona a vuruputuka a pero. Muri a prister ge takia ge made kikeri na parava ge polorua.
LEV 13:34 Na poloruana parava, a prister ge lei tabua a vuruputuka a pero na bakovi iea. A vuruputuka a pero i uka ma i ngara, ge takia a bakovi iea i matapado. Muri ge loi a maka kala vona bara i matapado ia.
LEV 13:35 Pali a vuruputuka a pero ge rako lae muri na tahuna a prister i takia i matapado,
LEV 13:36 a prister ge lei tabua a kulina, i masia i rako lae na kulina a gilanga, nahea ge matakana a vuna i ngango, a vuhuna a bakovi iea i muto.
LEV 13:37 Pali a prister i lei kamumua a bakovi, i matai a vuruputuka a pero i uka ma i ngara, i tuvu mule a ivu, a prister ge takia a bakovi iea i matapado.
LEV 13:38 “Na tahuna a bakovi, a ngatavine tara i tahoka a maki i keke lae na kulina,
LEV 13:39 a prister ge lei kamumua a hini keke. I uka ma i kea hateka, a maki tavula. A bakovi iea i matapado.
LEV 13:40 “Na tahuna a vuna bakovi i makudu tala na gina i lete, ra bakovi iea i mata­pado.
LEV 13:41 A vuna bakovi i makudu na hini polomeli na dumena, i lete, ra bakovi iea i matapado.
LEV 13:42 Pali bara a ngarava tara ge bele na lete vona i vururu i kea, ra gilanga iea a patala.
LEV 13:43 Muri a prister ge lei kamumua a ngarava iea, ge vururu ge vona kume, ra ngarava iea i mata manga a patala.
LEV 13:44 Ra gilanga i tabuli na gina i hale hateka, a patala. A prister ge takia a bakovi iea i muto.
LEV 13:45 “A viri i tahoka tara ngarava hale maea ra patala, ge rea na matutuna varakia, nahea ge pelengea a vuna. Ge kavitagua a ngavana na limana, ge gale maea, ‘Iau a muto! Iau a muto!’
LEV 13:46 A bakovi i tahoka a gilanga maea, i muto. Ge pagitala na mada, ge made kikeri polovavo.
LEV 13:47 “Na parava ranga a limuta i tuvu na maka varakia ni rata na vuna sipsip, na kala, na kulina bulmakau.
LEV 13:49 Ra maki iea ge goma o ge vururu, bara i rako lae, ni gi bole ni gi vakasiri na prister.
LEV 13:50 A prister ge bolea ge lei kamumua, ge ru herehere na tabeke tara, ge harena na parava ge polorua.
LEV 13:51 Na poloruana parava ge lei kamumu tabua. A limuta ge tuvu lobo vona, bara i ratapilea. A maki i tuvu vona i muto.
LEV 13:52 A prister ge bole a maki nga ge rungani na kanono, a vuhuna a maki i manga a patala i bele ne ria.
LEV 13:53 “Bara prister ge masia a maki iea i maea kunana, i uka ma i tuvu tala tabu na maka varakia,
LEV 13:54 ge taki ria ri gi loi a maka varakia, ri gi ru here na parava ge polorua tabu.
LEV 13:55 Muri a prister ge lei tabu a maka varakia, muri na tahuna ni loi, ge matai a limuta i tababana vonga o i uka. Na tahuna i matai i tababana vonga, pali i uka ma i vulala tala, ge vakalongo ra maka varakia ri muto. Mu gu rungani na kanono. A limuta ge tabuli na ngalana, o na bitona, mu rungania.
LEV 13:56 “Pali a prister ge lei kamumu tabu a maka varakia ni loi, ge masia a maki i manga a limuta i lobo o i uka. Bara i lobo, ge rape tala a hini i madoko vona a limuta ge vuroki.
LEV 13:57 Muri a limuta ge bele tabu na varakia, na maki ni rata na kulina bulmakau, a tahona a maki nga ge bole ge rungani na kanono.
LEV 13:58 Pali na tahuna i loi a maka kala o a maki ni rata na kulina bulmakau, i malavuroki a limuta, ge vahilolo tabu, bara ri matapado.”
LEV 13:59 Ra ngava iea a vinara na maki i manga a patala i vakahale a maki ri muto: ra nirodo, a kala ni rata na hotu kamumu, a vuna sipsip, a maka maki ni rata na vuna bulmakau. Ra vinara iea i taki a maki i matapado, a maki i muto.
LEV 14:1 E BAKOVI DAGI i takia e Moses i ta maea,
LEV 14:2 “Ra ngava iea a vinara na viri i tahoka a patala. Na tahuna a gilanga vona i lobo, i ngaru ni matapado, ni gi tuli lakea na prister.
LEV 14:3 A prister ge tuli talea na mada, ge lei kamumua a gilanga vona. A gilanga na patala vona i lobo muholi,
LEV 14:4 a prister bara i vakuku ria, ri bole polo vona a kadirovo mahuri kaba­kaba ge rua, a mavilana a kai a sida, a mota vururu, a rahana kai a hisop.
LEV 14:5 A prister ge vakuku ria ri gi bolea tara ulo, ri gi kiru a naru, ri gi bole vilia. Muri ri gi bole langea na ulo tara kadirovo mahuri, ri gi rabalakia, ge sisi puru na ulo a darana.
LEV 14:6 A prister ge bole tabua tara kadirovo mahuri, a mavilana kai a sida, a mota vururu, a rahana kai a hisop, ge lutu na naru i tahoka a dara.
LEV 14:7 Muri ge voro tamali balaka polorua langa na bakovi i vona a patala a dara. A prister ge vakalongoa i matapado pali, muri ge bole talea a kadirovo mahuri ge vakabebea.
LEV 14:8 “A bakovi i ngaru ni matapado, ge vahilolo a varakia vona, ge ali vuroki a vuna na kakaina, ge hilolo ge matapado. Muri bara i dili valai na mada, pali bara i made polovavo taro na kape vona na parava ge polorua.
LEV 14:9 Na poloruana parava ge ali vuroki lobo a maka vuna na kakaina, a vungana na matana, a karirana. Ge hilolo, ge loi a maka kala vona, muri bara i matapado.
LEV 14:10 “Na polotoluna parava ge bole a tuna sipsip a toga ge rua ge gavutuvutu, a sipsip a kinana ge gavutuvutu a pida vona ge taku, a kilo na plaoa kamumu ge tolu ni vuli turana namona oliv ge a nihabi na vit. Ge bole turana a kikei na namona oliv.
LEV 14:11 A prister ge tulia a bakovi iea turana a maka nihabi vona, ge lakea na matana Kape na Vaponga na matane BAKOVI DAGI.
LEV 14:12 “A prister ge bolea tara sipsip turana a kikei na namona oliv, ge a nihabi na rarenga. Muri ge tabari e BAKOVI DAGI vona, ge manga a nihabi.
LEV 14:13 Muri a prister ge rabalakia a tuna sipsip na tabeke ni rabalaki a sipsip, a bulmakau na nihabi na naro hale, na nihabi gutu-vuro. A prister ge rata mavonga, a vuhuna ra nihabi iea a nihabi na rarenga, i manga kunana a nihabi na naro hale. Ra nihabi nga ni gamai hateka ne vona e huriki a prister kunana.
LEV 14:14 A prister ge bole ranga darana sipsip ge ravu polotano na talingana kanena bakovi. Ge bole tabu ranga ge ravu na kukukoru na limana a vahana a kanena.
LEV 14:15 Muri a prister ge bole a namona oliv ge guru langa na bolana limana a maurina.
LEV 14:16 Muri ge lutua na namona oliv iea a kukulimana a kanena, ge voro tamali balaka polorua na matane BAKOVI DAGI.
LEV 14:17 I ranga namona oliv i tababana ni gi ravu na talingana kanena bakovi ra ni vakamatapado, na kukukoru na limana kanena, na kukukoru na vahana kanena, polomeli na dara na nihabi na rarenga.
LEV 14:18 A namona oliv i tababana na limana, a prister ge ravu na gina bakovi ta ni gi vakamatapado, ge kavitagua na matane BAKOVI DAGI.
LEV 14:19 Muri a prister ge habi a nihabi na naro hale, ge kavitagua a bakovi ge matapado. Muri ge rabalakia a tuna sipsip ne vona a nihabi gutu-vuro.
LEV 14:20 Muri ge habia a sipsip, a bulmakau iea na dede, turana a nihabi na vit, ge kavitagua a bakovi iea, ge matapado.
LEV 14:21 “Pali a bakovi i uka moni ni kona a maki ge a nihabi ni vakamatapado mule ia, ge bolea tara tuna sipsip a toga, ge a nihabi na rarenga. Muri a prister ge bolea, ge tabari rike e BAKOVI DAGI vona, ne vona ni kavitagua a bakovi iea. A bakovi ge bolea a kilo na plaoa kamumu ge taku, ge vuli turana a namona oliv, ge rata a nihabi na vit. Ge bole turana a kikei na namona oliv ge rua.
LEV 14:22 Ge bole valai a balu ge rua, a vuhuna i uka moni ni kona a sipsip. A balu muga, ge a nihabi na naro hale, a balu muri ge a nihabi ni gutu-vuro.
LEV 14:23 “Na polotoluna parava, ge bole lakea na prister na matana Kape na Vaponga a balu nga, na matane BAKOVI DAGI, ne vona ni vakamatapado ia.
LEV 14:24 A prister ge bolea a tuna sipsip ne vona a nihabi na rarenga, turana a namona oliv, ge tabari e BAKOVI DAGI vona.
LEV 14:25 A prister ge rabalakia a tuna sipsip iea, ge ratea a nihabi na rarenga. Ge bole a dara popote na sipsip, ge ravu na talingana bakovi, ra talingana a kanena. Ge bole ranga, ge ru tabu na kukukoru na limana a kanena, na vahana a kanena.
LEV 14:26 A prister ge bole a namona oliv ge guru langa na bolana limana a maurina,
LEV 14:27 ge lutua a kukulimana a kanena na naruna oliv iea, ge voro tamali balaka polorua na matane BAKOVI DAGI.
LEV 14:28 Muri a prister ge ravu a namona oliv na talingana a kanena bakovi, na kukukoru na limana a kanena, na kukukoru na vahana a kanena. A naro iea ge ratea na tabeke ni ru a darana sipsip na nihabi na rarenga.
LEV 14:29 A namona oliv ranga i tababana, ge ravu na gina bakovi i ngaru ia ge matapado. Na naro iea, a prister i rata a nihabi ne vona ni kavitagu a bakovi iea na matane BAKOVI DAGI.
LEV 14:30 A prister ge bole a balu nga i rua i bole valai a bakovi ge a nihabi,
LEV 14:31 ge habia tara ge a nihabi na naro hale. A viri tara ge a nihabi gutu-vuro, turana a nihabi na vit. Na naro iea, a prister i kavitagua a bakovi iea na matane BAKOVI DAGI, ra i ngaru ni matapado.
LEV 14:32 Ra vinara iea a vinara na viri i tahoka a patala, pali i uka moni ni kona a nihabi na nivakamatapado.”
LEV 14:33 E BAKOVI DAGI i taki e Moses e Aron,
LEV 14:34 “Muri bara mu vano mu made na malala e Kenan, ra malala a habia ne mua, ge ne mua liu. Na tahuna mu made pali o Kenan, ga ratea a limuta ge tuvu na ruma tara,
LEV 14:35 lakea a tahona ruma i masia a maki iea i bele na ruma vona, ge lakea na prister, ge vakalongoa vona a limuta i bele na ruma vona.
LEV 14:36 Muri a prister ge vakukua a tahona ruma ge bole tala na ruma a maki lobo vona, ma ge muto. Muri a prister ge dili ge lei a ruma.
LEV 14:37 Ge lei kamumua a maki i vakahale a gagana ruma. Na tahuna i matai a maki gomagoma i vururu ri rata a maka dupi kiroko pololilo na gagana ruma,
LEV 14:38 a prister ge pagitala ge tukaria a hinebi, ge vakalongoa vona a ruma ge mata kopu na parava ge polorua.
LEV 14:39 Na poloruana parava a prister ge hamule ge lei kamumu tabua a ruma. A maki iea ge rako lae na gagana ruma,
LEV 14:40 a prister ge vakuku ria ri gi puka vuroki a maka kedo i rako ne ria a limuta, ri gi vuroki na lovo na lulu polovavo na tanga dagi.
LEV 14:41 Ri gi haruri vuroki a maka simen ni kavitagu a gaga vona pololilo na ruma, ri gi bole tala tabu ri gi vuroki na murina lulu polovavo na tanga.
LEV 14:42 Muri ri gi bole a maka kedo karaba ri gi kuloi a maka kedo ri vuroki, ri gi kapi tabua a gagana ruma. Ri gi bole a simen karaba, ri gi pipikari tabu a murina a hini ni haruri vuroki a simen hale vona.
LEV 14:43 “Na tahuna a limuta ge bele tabu na gagana ruma, muri ne ria ri rata a maka leho nga,
LEV 14:44 a prister ge hamule tabu na ruma ge lei tabua. A maki iea i rako lae, i vakahale a ruma. A ruma iea i muto.
LEV 14:45 Lakea ri gi pukea a ruma, ri gi vuroki a maka kedo, a simen, a kai. Ri gi kaloho tala na tanga dagi, ri gi vuroki na murina lulu.
LEV 14:46 A bakovi tara i dili vona a ruma ni tukari, a bakovi iea i muto, bara i muto mavonga i harena na malunga liu.
LEV 14:47 E rei a viri i kani o i mahita vona a ruma iea, ge vahilolo a maka varakia vona.
LEV 14:48 “Na tahuna a prister i valai ge matai a ruma, i matai a gagana ruma i kamumu, i uka ma i tuvu vona a limuta, ge taki ria vona a ruma i matapado, a vuhuna a limuta ta ge ratapile a ruma i uka ma i bele tabu.
LEV 14:49 A naro ni rata kamumu a ruma ge matapado na matana Vure i maea: A prister ge bole a kadirovo ge rua, a mavilana kai a sida, a mota vururu, a rahana kai a hisop.
LEV 14:50 I ranga e huriki ri gi bolea a ulo ri gi kiru a naru, ri gi bole vilia. A prister ge bole langea na ulo a kadirovo tara, ge rabalakia, ge sisi puru na ulo a darana.
LEV 14:51 Muri ge bole a mavilana a kai a sida, a rahana kai a hisop, a mota vururu turana a kadirovo mahuri tara. Ge lutu a maki nga na ulo i vona a dara a naru, ge voro tamali langa na ruma balaka polorua.
LEV 14:52 A prister ge rata maea a ruma, lakea bara i matapado.
LEV 14:53 Muri bara i pugea a kadirovo mahuri i bebe lakea na robo. Ra naro iea ne vona ni vakalobo a maki i muto na ruma, lakea a ruma bara i matapado.”
LEV 14:54 Ra vinara nga ne vona a gilanga na kuli ra patala, a hini i makali,
LEV 14:55 ne vona a limuta i tuvu na varakia na ruma,
LEV 14:56 ne vona a loto, a pero, a vuruputuka.
LEV 14:57 Ra vinara nga ne vona a gilanga na kuli, a limuta, ri vakasiri mua na maki i matapado, na maki i muto.
LEV 15:1 E BAKOVI DAGI i taki e Moses e Aron, i ta maea,
LEV 15:2 “O taki e huriki a Israel, a bakovi i tahoka a kume i pagitala na kapuna, ra kume iea i rata ia i muto.
LEV 15:3 Na tahuna kume i pagitala turana a miha, o i gatuka i roga mule a dalana miha, ra bakovi iea i muto.
LEV 15:4 A kiri vona i muto, a maki lobo i made vona, ngi ranga i muto.
LEV 15:5 “E rei a viri i nugu a kiri vona o i made na hini i made muga vona, ge loi pasi a maka varakia vona, ge hilolo ia, pali bara i muto mavonga i harena na malunga liu.
LEV 15:7 “A viri i padoi a bakovi i tahoka a gilanga iea, bara i muto i harena na malunga liu. Muri ge loi pasi a kala vona, ge hilolo ia.
LEV 15:8 “A bakovi i tahoka a gilanga iea i kalupe tahoa tara viri, ra viri i kalupe tahoa i muto, bara i muto i harena na malunga liu. Muri ge loi pasi a varakia vona, ge hilolo ia.
LEV 15:9 “A bakovi i tahoka a gilanga iea i made na sarel na hos, ra sarel iea i muto.
LEV 15:10 A viri i padoi a sarel vona, bara i muto i harena na malunga liu. A viri i kaloho a sarel na bakovi i giloa, ra bakovi i kaloho a sarel i muto bara i harena na malunga liu. Muri ge hilolo, ge loi a varakia vona, bara i matapado.
LEV 15:11 “Ra bakovi i tahoka a gilanga i uka ma i loi pasi a limana lakea i padoia a tara viri, ra viri i padoia bara i muto i harena na malunga liu. Muri ge loi pasi a varakia vona, ge hilolo ia.
LEV 15:12 “Ia bara i padoi a ulo, ra ulo i padoia ni gi ubipoda. Pali ia ge padoi a tavila, ra tavila iea ni gi loi pasi.
LEV 15:13 “Na tahuna a bakovi i lobo a gilanga vona, ra bakovi iea ge dava na parava ge polorua tabu, muga ne ia ge matapado. Ge lobo a parava i polorua, ge loi pasi a varakia vona, ge hilolo ia, bara i matapado.
LEV 15:14 Na polotoluna parava ge bole a balu ge rua, ge lakea na Kape na Vaponga ge habi na prister.
LEV 15:15 A prister iea ge bole a balu nga, ge rata a leho vona. A balu muga ge a nihabi na naro hale, a balu tara ge a nihabi gutu-vuro. Na naro iea kunana a prister ge kavitagua na matane BAKOVI DAGI a bakovi i lobo a gilanga vona.
LEV 15:16 “A bakovi tara i mahita i maguru tavula a kuvena, ra bakovi iea i muto, bara i muto i harena na malunga liu. Muri ge vahilolo loboa a kakaina, bara i matapado.
LEV 15:17 A kuvena ge maguru taho a kala vona, o a maki ni rata na kulina bulmakau, ra maki nga ri muto, bara i muto i harena na malunga liu. Muri ge bole ge vahilolo.
LEV 15:18 A bakovi i mahita turana a ngatavine, ra bakovi a ngatavine nga ru muto, bara ru muto i harena na malunga liu, muri bara ru hilolo, ru matapado.
LEV 15:19 “A ngatavine i matai a keva, bara i muto mavonga na parava i polorua. A viri i padoia bara i muto i harena na malunga liu.
LEV 15:20 A maki lobo i mahita vona i made vona, ri muto.
LEV 15:21 E rei a viri i padoi a kiri o a maki i made vona, bara i muto i harena na malunga liu. Muri ge vahilolo a varakia vona ge hilolo, ge matapado.
LEV 15:23 A ra maki a ngatavine i made vona, a moke o a maki tara, e rei a viri i padoia bara i muto, i harena na malunga liu.
LEV 15:24 A bakovi i mahita turana a ngatavine i matai a keva, ra bakovi iea i muto, bara i harena na parava ge polorua. Ra kiri i mahita vona bakovi i muto.
LEV 15:25 “A ngatavine i pori vona a dara na parava ranga na tahuna i uka ma i matai a keva, o na tahuna i tua mavonga a darana na tahuna i matai a keva, bara i muto ge harena na dara i lobo ni tua tala vona, i manga a hini i matai a keva.
LEV 15:26 A kiri i mahita vona, a hini i made vona, ngi ranga i muto.
LEV 15:27 A viri i padoi a maki nga, bara i muto i harena na malunga liu. Muri ge loi a kala vona, ge hilolo ia.
LEV 15:28 “Muri na dara i lobo ni tua, ge dava na parava ge polorua, muri bara i matapado.
LEV 15:29 Na polotoluna parava ge bole a balu ge rua, ge bole lakea na matana Kape na Vaponga, ge habi na prister.
LEV 15:30 A prister ge habia tara ne vona a nihabi na naro hale, i tara ne vona a nihabi gutu-vuro. Na naro iea a prister bara i kavitagua a ngatavine na matane BAKOVI DAGI, a vuhuna i muto na hini i pori vona a dara.
LEV 15:31 “Muru habi tora a ngava ne huriki a Israel, ri gi matakari kamumu ria na tahuna ri muto na matagu. A mailogu i tabuli na kurukurune ria. Na tahuna ri muto nahea ri gi dili vona, ma ri gi mate, a vuhuna ri vakamutoa a mailogu.”
LEV 15:32 Ra vinara nga, ne vona a bakovi i rali tala a kume na kakaina, a kuve i maguru tala tavula na kapuna, i rata ia i muto.
LEV 15:33 I taki tabu, a ngatavine na tahuna i matai a keva, a kume i rali tala na muduna bakovi, o a ngatavine i pori vona a dara, a bakovi i mahita turana a ngatavine i muto.
LEV 16:1 Hosi e tune Aron bakovi ala rua ru habi a nihabi ne BAKOVI DAGI, pali e BAKOVI DAGI i uka ma i taki rua ru gu habi a nihabi, lakea i rabalaki rua.
LEV 16:2 Muri e BAKOVI DAGI i takia e Moses, “O takia e turamu e Aron, nahea ge dili na ningaru vona na Tabeke Nitaba Hateka na bitona kala dagi. Pali na tahuna i ngaru e rei a kilala ge dili vona, ge dili. A vuhuna iau a made pololilo na bubu, a bele kavakava na murina nidodo na Tava na Ngava Dagi. Ia ge dili tavula na tabeke iea, bara i mate.
LEV 16:3 “Na tahuna e Aron ge dili na Tabeke Nitaba Hateka, muga ge bolea tara bulmakau karaba a toga, ge rata a nihabi na naro hale, a sipsip a toga tara ge bolea, ge a nihabi ni gutu-vuro.
LEV 16:4 Na tahuna e Aron ge dili na Tabeke Nitaba Hateka, ge hilolo, ge rodo a maka nirodo keakea na prister: a poho, a nirodo ola ola, a palabele, a hoi.
LEV 16:5 E huriki a Israel ri gi bole a meme a toga ge rua ne vona ni rata a nihabi na naro hale, a sipsip a toga tara ne vona a nihabi gutu-vuro, ri gi habi ne Aron.
LEV 16:6 “E Aron ge habia a nihabi na bulmakau, ne vona ni puga vuroki a naro hale vona, ne vona ni kavitagu ia turane huriki a kabu vona.
LEV 16:7 Muri ge bole lakea ne BAKOVI DAGI na matana Kape na Vaponga a meme nga i rua.
LEV 16:8 E Aron ge bole a kedo ge rua i tahoka a ngava. Ne vona e BAKOVI DAGI tara, ne vona e Asasel tara. Ge ruhulolo a kedo nga, ge bole tala takutaku ge kurahi iau vona tara, ge kurahi e Asasel vona tara.
LEV 16:9 E Aron ge bolea ra meme i kurahi e BAKOVI DAGI vona, ge habia, ge a nihabi na naro hale ne huriki.
LEV 16:10 Pali a meme i kurahi e Asasel vona, nahea ge rabalakia. Ni gi bole mahuri lakea na matane BAKOVI DAGI, ni gi vakakaloho vona a maka naro hale ne huriki, ge kaloho lakea ne Asasel na tabeke i ngeki.
LEV 16:11 “E Aron ge bole valai a nihabi ni puga vuroki a naro hale, ge ramaia ra naro iea, ge kavitagu ia turane huriki na kabu vona. Muri ge rabalakia a bulmakau a toga, ge a nihabi na naro hale vona.
LEV 16:12 Muri ge bole lakea na dede a ulo kiroko ni rata na aen, ge ru dili a katona kanono vona, ge bole lakea na matane BAKOVI DAGI na Tabeke Nitaba Hateka. Ge ragamu na limana balaka rua a havu mangisipa, ge guru dili na ulo i vona a katona kanono. A pokona a ulo bara i kavitagua a murina nidodo na Tava na Ngava Dagi. E Aron nahea ge masia a hini nga, ma ge mate.
LEV 16:14 Ge bole ranga darana bulmakau iea ge lutua a kukulimana, ge voro tamali langa na murina nidodo na Tava na Ngava Dagi, na tabeke na nirikena haro. Muri ge bole tabu na kukulimana, ge voro tamali balaka polorua na ngalana murina nidodo.
LEV 16:15 “Muri ge rabalakia ra meme ni habi na naro hale ne huriki. Ge bole dilia na Tabeke Nitaba Hateka a darana, ge voro tamali langa na murina nidodo na Tava na Ngava Dagi, na hini muga na murina nidodo, i manga a hini i rata pali na darana bulmakau.
LEV 16:16 Na naro iea kunana i kavitagu a naro hale ne huriki a Israel, i ratea a Tabeke Nitaba Hateka i matapado, a vuhuna ri tagege, ri longotaro a nitane BAKOVI DAGI, ri rata a naro hale, lakea i muto ra hini nga. A Kape na Vaponga i pesi na kurukurune ria, pali a naro hale ne ria i rata a maki na kape ri muto. E Aron ge bole a dara popote ge voro langa na kape, ge matapado tabu, i manga a naro i rata na Tabeke Nitaba Hateka.
LEV 16:17 E Aron ge ratea a nihabi iea ne vona ni kavitagu ia, e huriki a kabu vona, turana e huriki a Israel. Na tahuna i dili na Tabeke Nitaba Hateka nahea tara viri ge dili na Kape na Vaponga, ge harena na tahuna e Aron i pagitala.
LEV 16:18 “Muri ge pagitala, ge lakea na dede ra i tabuli na matane BAKOVI DAGI, ge rata a leho ni kavitagua. Ge bole a darana bulmakau, a meme, ge ru na tupina dede.
LEV 16:19 Muri ge lutua a kukulimana tara na dara, ge voro tamali balaka polorua langa na dede. Na naro iea kunana i ratea a dede nitaba, i matapado na naroanga ne huriki a Israel.
LEV 16:20 “Muri ne Aron ge kavitagu loboa a Tabeke Nitaba Hateka, a Kape na Vaponga, a dede na nihabi ni gutu-vuro, ge bole lakea na matana kape a meme mahuri.
LEV 16:21 Muri ge ru langa varago na gina meme mahuri a limana, ge taki tala a maka vilo hale, a maka tagenga, a naro hale lobo ne huriki a Israel. Na naro iea kunana, i ru langa na gina meme a maka naro hale ne ria. Muri ge habia na bakovi ni vulaki pali, ge turaria lakea na tabeke i ngeki a meme, ge taparakia vonga.
LEV 16:22 Ra meme iea ge kaloho a naro hale lobo ne huriki a Israel. A viri i turaria, ge taparakia na tabeke i ngeki.
LEV 16:23 “Muri na leho iea ge lobo, e Aron ge dili na Kape na Vaponga, ge kali tala vonga a maka nirodo i rodo na tahuna i dili na Tabeke Nitaba Hateka, ge taparaki vonga.
LEV 16:24 Ge vano ge hilolo na naru pololilo na nure i pesi halui a kape. Muri ge dili tabu na kape, ge rodo ge bagetu na maka bagetua na prister dagi. Na tahuna i pagitala ge rata a nihabi gutu-vuro ge rua, i tara ne vona, i tara ne huriki, ne vona ni kavitagu ia, ni kavitagu e huriki.
LEV 16:25 Ge gutu langa na dede a vina sipsip, a bulmakau nevona a nihabi na naro hale ne huriki.
LEV 16:26 “Ra bakovi i taparakia a meme i lakea ne Asasel, ge kali tala a maka varakia vona, ge hilolo, ge dili tabu na mada.
LEV 16:27 Ri gi bole tala na mada a bulmakau, a meme, ra muga ni bole lakea na Tabeke Nitaba Hateka a darane rua ne vona a nihabi na naro hale. Ni gi gutu a kuline rua, a bobone rua, a tahene rua, ri gi vuro lobo liu.
LEV 16:28 Ra bakovi i gutu-vuro a sipsip, a bulmakau nga, ge vano ge vahilolo a nirodo vona, ge hilolo ia, muri ge dili tabu na mada.”
LEV 16:29 E BAKOVI DAGI i ta tabu, “Mu ramai vakaroroa a vinara iea. Na ravuluna parava, na poloruana keva, mua a Israel turane huriki a mosi ri made ne mua, mu peremu na kinani, naha ni raulo, naha ni leho, mu malo kunana.
LEV 16:30 A vuhuna na parava iea kunana a prister ge rata a nihabi ne vona ni kavitagu mua, bara mu matapado na matane BAKOVI DAGI.
LEV 16:31 Ra parava dagi iea, a Parava Nimalo. Mu malele ha na maki nivivi, mu malo kunana. Ra vinara iea mu ramai vakaroroa.
LEV 16:32 E rei a prister ni gamai ge bole a murine tamana, ge ia a prister dagi, ia kunana ge ratea a leho ge kavitagu e huriki, ge rodoa a nirodo keakea na prister.
LEV 16:33 Muri ge rata a nihabi ni kavitagu, ge matapado a Tabeke Nitaba Hateka, a Kape na Vaponga, a dede, e huriki a prister, e huriki a Israel lobo.
LEV 16:34 “Ra vinara iea mu ramai vakaroroa. A vinara iea ni kavitagu a naro hale, ni gi rata balaka taku na maka pida lobo, ne vona a naro hale ne huriki a Israel.” E Moses i rata lobo a maki e BAKOVI DAGI i vakuku ia vona ge rata.
LEV 17:1 E BAKOVI DAGI i takia e Moses,
LEV 17:2 “O taki e Aron turana e tuna mai, e huriki lobo a Israel vona a maka vinara nga e BAKOVI DAGI i vakuku ria vona:
LEV 17:3 Na tahuna a bakovi tara i habi a bulmakau, a tuna sipsip, a meme pololilo o polovavo na mada,
LEV 17:4 pali i uka ma i bole vilia na matana Kape na Vaponga, ge habia manga a nihabi ne BAKOVI DAGI na matana mailo vona, i putu puru a vinara, i vakatua a dara, i tahoka a ngava. Ni gi tono tala na kabu vona.
LEV 17:5 Ra vinara iea i ta pupukari ne huriki a Israel nahea ri gi rabalaki a sipsip, a bulmakau, ri gi rata a nihabi polovavo na mada. Ri gi bole a sipsip, a bulmakau ri gi lakea na matana Kape na Vaponga, ri gi rata a nihabi na nivalemu turane BAKOVI DAGI.
LEV 17:6 Muri a prister ge bolea a darana sipsip, a bulmakau, ge voro tamali na gagana dede tabukoi na matana kape, ge gutu na dede a vina sipsip, a bulmakau. Na tahuna e BAKOVI DAGI i burongi a mangina bara i vivi.
LEV 17:7 Pali nahea ri gi habi tabu a nihabi na meme taua. Na tahuna ri rata mavonga, ri manga a ngoi, ri mata here ne BAKOVI DAGI ri kavurike viliha a vure ranga. Ra maka vinara nga ge tabuli tora turane ria, e huriki a hamone ria bara ri ramai vakaroro muri ma.
LEV 17:8 “O taki ria e rei tara ne ria, o a mosi tara i made turane ria, i ngaru ni habi a nihabi ni gutu-vuro,
LEV 17:9 pali i uka ma i taparaki lakea na matana Kape na Vaponga ni gi habi ne BAKOVI DAGI, bara ni tono tala na kabu vona.
LEV 17:10 “E rei tara ne ria na kabu ne Israel o a mosi tara i made turane ria, i rabalakia a kanirau, i ninu o i kani a darana, bara iau a pile vona, ni gi lili tala na kabu vona.
LEV 17:11 A dara i habi a nimahuri ne huriki a bakovi, a kanirau, i mavonga a taki maea mua. A prister ge guru na dede a darana kanirau, ne vona ni kavitagu a nimahuri vona, a vuhuna a dara kunana a maki ge kavitagu e huriki ri gi mahuri.
LEV 17:12 I mavonga e BAKOVI DAGI i taki e huriki a Israel, nahea tara ne ria, o a mosi tara i made turane ria, ge kani a bobona maki i vona a dara.
LEV 17:13 “Na tahuna a Israel tara o a mosi tara i pango, i lakavua tara kanirau, o a kadirovo i kara ni kanina, ge guru tala na malala a darana, ge kavitagua na malala,
LEV 17:14 a vuhuna a nimahuri ne huriki lobo, a nimahuri na maka kanirau i tabuli na dara. Na naro iea kunana, e huriki a Israel nahea ri gi kani a bobona kanirau i vona a dara. A viri i kani a bobona sipsip, a bulmakau i vona a dara bara ni tonotala na kabu vona.
LEV 17:15 Na tahuna a tahotanga o a mosi i kani a maki i mate, o i lakavua a kanirau hateka, ra bakovi iea i muto, bara i harena na malunga liu. Muri ge loi a maka varakia vona ge hilolo ia, bara i matapado.
LEV 17:16 Ia i uka ma ge loi na naru a varakia vona, i uka ma ge hilolo, bara i tahoka a ngava.”
LEV 18:1 E BAKOVI DAGI i takia e Moses,
LEV 18:2 ge taki e huriki a Israel, ge ta maea, “Iau kunana e BAKOVI DAGI, a Vure ne mua.
LEV 18:3 Hosi mu made na robo e Egipto, pali naha ni ramai a maka narone ria. Ngane ga taparaki mua lakea na malala e Kenan, pali naha ni ramai a narone ria, a vinara ne ria.
LEV 18:4 Mu ramai kunana a vinara nau, mu rata kunana a maki a taki mua vona mu gu rata. Iau e BAKOVI DAGI a Vure ne mua, a habi ne mua a ngava nga.
LEV 18:5 Mu rata lobo a vilo kamumu a ngaru mu gu rata, mu ramai a maka vinara a habi ne mua. E rei a viri i rata maea, bara i made kamumu. Iau e BAKOVI DAGI a takia a ngava iea.
LEV 18:6 “Iau e BAKOVI DAGI a habi ne mua a vinara nga: Naha ni masigoro ni mahita turana, ni parangi vona tara ngatavine na kabu vomu. Ra naro maea, i muma hateka.
LEV 18:7 “Naha ni mahita turane kinamu. Bara o rata mavonga, o vakamaruhu e tamamu.
LEV 18:8 “Naha ni mahita turana a ngatavine i parangi tabu vona e tamamu. Bara o rata mavonga, o vakamaruhu e tamamu.
LEV 18:9 “Naha ni mahita turane kurabamu, o e tune tamamu ngatavine, o e tune kinamu ngatavine. Ra ngatavine nga e kurabamu. I made na ruma vomu, o i made na tabeke tara, ia e kurabamu kunana.
LEV 18:10 “Naha ni mahita turana e tubumu ngatavine, re tune tumu bakovi a ngatavine, e tune tumu ngatavine a ngatavine. Ra naro iea bara i rata ioe o maruhu hateka.
LEV 18:11 “Naha ni mahita turane tune girihine tamamu ngatavine, a vuhuna ia e tune tamamu. Ra ngatavine iea e kurabamu.
LEV 18:12 “Naha ni mahita turana e kurabane tamamu, a vuhuna ia e balomu.
LEV 18:13 “Naha ni mahita turana e kinamu tara, a vuhuna ia a viri vomu.
LEV 18:14 “Naha ni mahita turana e girihine tamamu tara, a vuhuna ra ngatavine iea e kinamu. Bara o mahita turana, o rata e tamamu tara i maruhu.
LEV 18:15 “Naha ni mahita turana e girihine tumu bakovi, a vuhuna ia e kamu.
LEV 18:16 “Naha ni mahita turana e girihine turamu, a vuhuna ia e kua vomu. Ioe bara o rata mavonga, bara o vakamaruhu e turamu.
LEV 18:17 “Naha ni mahita turana a ngatavine, turana e tuna a ngatavine. Naha ni mahita turana e tubumu, a vuhuna ia e tubumu. A naro iea i muma hateka.
LEV 18:18 “Naha ni parangi tabu e tarine girihimu na tahuna i tababana ni mahuri e girihimu, ma go rata rua ru gu vatahate mule ne rua. Ra naro iea i uka ma i kamumu.
LEV 18:19 “Naha ni mahita turana a ngatavine i matai a keva, a vuhuna na tahuna iea i muto.
LEV 18:20 “Naha ni mahita turana e girihina bakovi i made tabukoi vomu, bara o rata mavonga o muto.
LEV 18:21 “Naha ni habi e tune mua ne Molek. Bara mu rata mavonga, mu vakahale a rana Vure ne mua. Iau e BAKOVI DAGI a takia a ngava iea.
LEV 18:22 “Naha ni mahita turana a bakovi tara i manga a naro ni mahita turana ngatavine. Ra naro iea i muma hateka.
LEV 18:23 “Naha ni tari a ligo, a boro, a maki maea. A ngatavine tara nahea ge rata mavonga. Ra naro iea i muma hateka, i rata a viri i muto na matagu.
LEV 18:24 “Naha ni rata a maka naro hale nga, ma mu gu muto na matagu. E huriki i uka ma ri lohoka na Vure muholi, ri made na robo e Kenan, ri rata a maka naro hale nga, ri muto na matagu. I mavonga a vakatubu ni lili tala ria, mu gu bole a malala ne ria.
LEV 18:25 A naro hale ne ria i ratea a malala iea i muto. Lakea a rata halea a malala ne ria, i marikoi ne ria, i lua tala ria.
LEV 18:26 Pali mua turana e huriki a mosi ri made turane mua, mu ramai a maka vinara nau a habi ne mua. Naha ni ramai a narone huriki ri made muga na robo iea, a vuhuna a narone ria i mavuru hateka, a marikoi vona.
LEV 18:27 Mu lohoka vona e huriki ri made muga vona a robo iea, a narone ria i mavuru, i ratea a malala i muto.
LEV 18:28 Naha ni rata mavonga. Mua bara mu rata mavonga, a malala bara i lua tala mua i manga a hini i lua tala e huriki ri made muga vonga.
LEV 18:29 “E rei tara ne mua i ratea tara naro mavuru maea, bara ni tono tala na kabu vona.
LEV 18:30 Mu ramai a maka ngava a habi ne mua. Naha ni ramai a maka naro mavuru ne huriki ri made muga vona a malala iea. Mua bara mu ramai a maka naro mavuru nga, bara mu muto na matagu. Mu longo, iau e BAKOVI DAGI a Vure ne mua a taki a ngava nga.”
LEV 19:1 E BAKOVI DAGI i takia e Moses,
LEV 19:2 ge taki e huriki a Israel, ge ta maea, “Mu ramai a naro malamala, a vuhuna iau e BAKOVI DAGI, a Vure ne mua, a malamala.
LEV 19:3 Mua takutaku mu togo e kinane mua e tamane mua. Mu malo na Parava Nimalo. Iau e BAKOVI DAGI a Vure ne mua, a takia a ngava iea.
LEV 19:4 Naha ni ha taro iau mu gu kavurike a vure ranga. Naha ni kau na kai, na aen a vure, mu gu kavurike. Iau e BAKOVI DAGI a Vure ne mua, a takia a ngava iea.
LEV 19:5 “Na tahuna mu rata a nihabi na nivalemu ne BAKOVI DAGI, mu ramai a vinara a habi ne mua. Mua bara mu rata mavonga, bara ngaru a nihabi ne mua.
LEV 19:6 A bobona kanirau na nihabi na nivalemu ni gi kani na parava ni rabalaki vona, o na parava muri. I ranga ge tabuli polo na toluna parava, naha ni kani, mu gutu na kanono ge vuro.
LEV 19:7 A viri i kani a bobona kanirau na toluna parava, i uka ma ga ngarua a nihabi vona, a vuhuna i muto.
LEV 19:8 E rei a bakovi i kani a bobona sipsip, a bulmakau na toluna parava i vakahale a maki ni habi nau, i tahoka a ngava, bara ni tono tala na kabu vona.
LEV 19:9 “Na tahuna mu mirio a vit, naha ni mirio na harena hania, naha ni hamule mu gu poi a masigo. Ge tabuli ngi.
LEV 19:10 Na tahuna mu pasi pali a kanena vain, naha ni hamule tabu ni poi kado a masigo, a kanena mu pasi kaleva na rahana. Ge tabuli ngi ne vona e huriki a matasia, a mosi. Iau e BAKOVI DAGI a Vure ne mua, a takia a ngava iea.
LEV 19:11 “Naha ni panaho a maki, naha ni tami a viri ni rata marogo a maki vona. Naha ni ta marapusi.
LEV 19:12 “Na tahuna mu ta muholi ni rata a maki, naha ni kaba tavula na ragu ni tami a viri. I uka ma mu ramai a nita muholi mu rata, mu vakahale a ragu. Iau e BAKOVI DAGI a Vure ne mua, a takia a ngava iea.
LEV 19:13 “Naha ni rata hale a viri mu gu panaho a maki vona. Na tahuna mu taki a viri ge rata a leho ne mua, mu kona liu ia na parava iea. Naha ni nugu mule a mapana, mu gu habi kuduvi.
LEV 19:14 “Naha ni harogi a viri i vou. Naha ni ru na dala a maki, ge sibo vona a kepa ge boru. Mu mangenge vona a Vure ne mua. Iau e BAKOVI DAGI, a takia a ngava iea.
LEV 19:15 “Na tahuna mu varamai na ngava, mu rata a naro kamumu na nipelekado a ngava. Naha ni tuhori a matasia, o go mangenge na bakovi na mahala. A ngava mu rata ge malamala kunana.
LEV 19:16 “Naha ni laho viliha ni padimomo a turamu. A bakovi tara ni vakapesi na ngava ni gi pelekado, pali ra ngava ni padi virihi ia vona i uka ma i muholi, mu ta tala mu tuhoria. Bara mu ngavarubu, bara ni rabalaki tavula a bakovi iea. Iau e BAKOVI DAGI, a takia a ngava iea.
LEV 19:17 “Na tahuna a viri i rata hale ioe, naha ni mata robo vona. O pelekado a ngava muru vatahate vona. Ma go ru mavongea na niluhoi vomu a ngava muru vatahate vona, bara o dili na naro hale.
LEV 19:18 “Naha ni koli a naro hale na viri i rata virihi ioe vona, naha ni tepu vakaroroa. O ngaru e huriki a turamu, i manga a hini o ngaru mule ioe. Iau e BAKOVI DAGI a takia a ngava iea.
LEV 19:19 “Mu ramai a maka vinara nau. Naha ni mata taroa a sipsip ge radia a meme, ge vakabele a tuna. Naha ni varo palupu na hania ge taku a vutuna maki legelege. Naha ni rodo a nirodo i uka ma ni rata na maki i taku.
LEV 19:20 “Na tahuna a bakovi i mahita turana a vorakato ngatavine, ni taki ta ni gi habi na bakovi tara ge konea ge matukapaga, pali ra bakovi iea i uka ma i konea ma, mu tuli rua lakea na tabeke ni vapelekado. Muri ni gi vakamadihi rua. Pali naha ni rabalaki rua, a vuhuna ra ngatavine iea, i uka ma ni vakamatukapaga ma.
LEV 19:21 A viri i mahita turana a vorakato ge lavea tara sipsip a toga, ge bole lakea na matana Kape na Vaponga, ge a nihabi na rarenga.
LEV 19:22 A prister ge bolea a sipsip iea, ge rata a nihabi na rarenga na matane BAKOVI DAGI, ge kavitagua a bakovi iea, na naro hale i ratea. Lakea a naro hale vona bara ni puga vuroki.
LEV 19:23 “Na tahuna mu lakea na malala e Kenan, mu varo a maka kai i vona a kanena. Pali naha ni kani a kanena kai na pida ge tolu.
LEV 19:24 Na vana pida mu habi ne BAKOVI DAGI a maka kanena kai, ne vona ni kavurike iau vona.
LEV 19:25 Na limana pida mu kani a maka kanena kai. Mua bara mu ramai a maka ngava nau, a maka kai ne mua bara ri vua kupo. Iau e BAKOVI DAGI a Vure ne mua, a takia a ngava iea.
LEV 19:26 “Naha ni kani a bobona kanirau i vona a dara. Naha ni rata a malulu legelege.
LEV 19:27 “Naha ni pali a ivu na tabalane mua, naha ni palakudu ge kapo a ivu na sivane mua.
LEV 19:28 “Naha ni tolo a kuline mua na tahuna a viri i mate, naha ni siri a kuline mua. Iau e BAKOVI DAGI a takia a ngava iea.
LEV 19:29 “Naha ni ramai a narone huriki ri kavurike a vure ranga, ri mata taro e tune ria ngatavine ge ria a ngoi. Bara mu rata mavonga, mu ha taro iau, mu ramai a maka vure ranga, a maka naro hale bara ri bele kupo na tanga ne mua.
LEV 19:30 “Naha ni leho na Parava Nimalo. Mu rata kamumua mu togoa a mailo nau. Iau e BAKOVI DAGI a takia a ngava iea.
LEV 19:31 “Na tahuna mu ngaru a niluhoi kamumu, naha ni lakea ne huriki a bakovi na malulu, a bakovi na muto. Bara mu rata mavonga, mu muto na matagu. Iau e BAKOVI DAGI a Vure ne mua, a takia a ngava iea.
LEV 19:32 “Mu rata kamumu mu togo e huriki a gare. Mu mangenge nau, a Vure ne mua. Iau e BAKOVI DAGI a takia a ngava iea.
LEV 19:33 “Naha ni rata hale e huriki a mosi ri made na malala ne mua.
LEV 19:34 Mu rata kamumu ria, i manga a hini mu rata kamumu a bakovi o Israel. Mu ngaru ria i manga a hini mu ngaru mule mua, a vuhuna hosi mu made manga a mosi o Egipto. Iau e BAKOVI DAGI, a Vure ne mua, a takia a ngava iea.
LEV 19:35 “Na tahuna mu rovai a maki, mu guru dili a maki, mu gi a maki ge kona e huriki, naha ni ta tami.
LEV 19:36 Mu rovai kamumu, mu guru kamumu, mu gi kamumu a maka maki. Iau e BAKOVI DAGI a Vure ne mua, a tuli tala mua na robo o Egipto, a takia a ngava iea.
LEV 19:37 “Iau e BAKOVI DAGI a Vure ne mua, a vakuku mua mu gu longototo a maka vinara nau, a nitagu.”
LEV 20:1 E BAKOVI DAGI i takia e Moses
LEV 20:2 ge taki e huriki a Israel, ge ta maea, “E rei tara ne mua, o a mosi i made turane mua, ge habi e tuna ne Molek ge a nihabi, ra bakovi iea ni gi rabalaki. E huriki a tahotanga ri gi padimatea na kedo.
LEV 20:3 Ra bakovi i habi e tuna ne Molek, i rata a mailo nau i muto, i ratapile a ragu. Ra bakovi iea a pile nau, bara lili talea ne huriki a Israel.
LEV 20:4 Pali na tahuna e huriki ri mata taroa a bakovi iea i habia tara e tuna ne Molek, lakea i uka ma ri rabalakia,
LEV 20:5 iau bara marikoi vona turane huriki a kabu vona, bara lili tala ria na kabu ne ria, a vuhuna ri kavurikea e Molek.
LEV 20:6 “Na tahuna a bakovi tara i lakea na bakovi na malulu o na bakovi na muto, ra bakovi iea i pe iau pali, i ramai a naro na uvo. Ra bakovi iea bara a ngalahere vona, a lili talea ne huriki a viri vona.
LEV 20:7 “I mavonga, mu habi mua nau bara mu laho malamala, a vuhuna iau, e BAKOVI DAGI a Vure ne mua.
LEV 20:8 Mu longototo a vinara nau, a vuhuna iau e BAKOVI DAGI a rata mua mu malamala.
LEV 20:9 “E rei a viri i harogi e tamana o e kinana, ni gi rabalaki, a vuhuna ia kunana i vakabele mule a vuranga vona.
LEV 20:10 “Bara a bakovi i rata a naro na molenga ne girihina bakovi tara, ra bakovi a ngatavine nga ni gi rabalaki, a vuhuna rua kunana ru vakabele a vuranga ne rua.
LEV 20:11 “Bara bakovi i mahita turane girihine tamana, i vakahale e tamana. A bakovi a ngatavine nga ni gi rabalaki. Rua kunana ru vakabele a vuranga ne rua.
LEV 20:12 “Bara bakovi i mahita turana e kana, a bakovi a ngatavine nga ni gi rabalaki. Rua kunana ru vakabele a vuranga ne rua.
LEV 20:13 “Bara bakovi i mahita turana a bakovi turana, i manga i mahita turana a ngatavine, ra bakovi nga ru rata a naro i muma hateka ni gi rabalaki, a vuhuna a naro ru ratea i uka ma i ramai a vilo, rua kunana ru vakabele a vuranga ne rua.
LEV 20:14 “Bara bakovi i parangi a ngatavine turana e kinana, tou lobo ni gi gutu na kanono, a vuhuna to rata a naro hale hateka. Ra naro maea nahea ni gi mata taro ge bele ne mua.
LEV 20:15 “Bara bakovi i tari a ligo o a maki tara, ra bakovi iea ni gi rabalaki, a ligo tara ni gi rabalaki.
LEV 20:16 “Bara ngatavine i lakea mai a ligo i mahita turana, a ngatavine turana a ligo ni gi rabalaki; a vuhuna a ngatavine a ligo ru vakabele mule a vuranga ne rua.
LEV 20:17 “Bara bakovi i parangi mule e kurabana, o e tune tamana, o e tune kinana, ra bakovi a ngatavine nga a narone rua i muma hateka. Ni gi lili tala na kabu ne rua, ru gu hatakia a maregoa na naro ru ratea.
LEV 20:18 “Bara bakovi i mahita turana a ngatavine na tahuna a ngatavine i matai a keva, a bakovi a ngatavine nga ru rata a naro i muto, ni gi lili tala na kabu ne rua.
LEV 20:19 “Naha ni mahita turana e balomu o kinamu tara, a vuhuna bara o vakahale a viri vomu, marua varago bara ni vakamadihi na naro muru ratea.
LEV 20:20 “Bara bakovi i mahita turane girihine tamana tara o e girihine hana, ra bakovi iea i vakamaruhu e tamana tara o e hana. A bakovi a ngatavine nga bara ni vakamadihi na narone rua, i uka ma ru gu vakabele a koma.
LEV 20:21 “Bara bakovi i parangi polo vona e girihine turana, ra bakovi iea i vakahale e turana, i muto. Ra bakovi a ngatavine nga, bara ru bala e tune rua.
LEV 20:22 “Mu ramai a ngava dagi, a vinara nau. A malala e Kenan ngane ga taparaki lokovonga mua vona, i uka ma ge lua tala mua, bara mu vivi ni made vona.
LEV 20:23 Naha ni ramai a narone huriki ri made na uvo vonga. Ri rata a naro hale nga lakea a marikoi hateka ne ria. Ngane ga lili tala ria na robo iea, muri bara mu bolea.
LEV 20:24 A taki mua pali na maka uve, a kai ni kani, ri koru kamumu vona a malala iea. Ga habia ne mua, ge ne mua liu. Iau e BAKOVI DAGI a Vure ne mua, a vulaki tala mua ne huriki a kabu ranga ge mua e huriki a viri nau.
LEV 20:25 “Mu pelekado a kanirau, a kadirovo i kaba mu kani, pali naha ni kani a viri i muto. A taki mua pali vona a maka kanirau, a kadirovo, a maki kiroko ri karaka ri muto, naha ni kani a vuhuna ri muto.
LEV 20:26 Lakea bara mu malamala na matagu, a vuhuna iau e BAKOVI DAGI a malamala, a ru here mua ne huriki a kabu ranga ge mua e huriki a ngate nau.
LEV 20:27 “E huriki a bakovi na malulu, a bakovi na muto, mu padimate na kedo. Ria kunana ri vakabele mule a vuranga ne ria.”
LEV 21:1 E BAKOVI DAGI i takia e Moses, “O taki e huriki a prister re huriki e tune Aron o ta maea. ‘A prister nahea ge kalo na tahuna a viri i mate na kabu vona, nahea ge padoi a podana. Ra naro maea i rata ia i muto na matagu.
LEV 21:2 Pali na tahuna a viri vona i mate, i kara ni kalo, ni padoi a podana: re kinana, e tamana, e tuna, e turana,
LEV 21:3 e kurabana a sirula i made na ruma e tamana. A prister i kamumu ge kalo ne kurabana i mate, pali bara i muto.
LEV 21:4 Pali nahea ge vano ge taringia e lahuana o e kana i mate, ma ge muto na matagu.
LEV 21:5 “‘E huriki a prister nahea ri gi ali vuroki a ivu na gine ria, nahea ri gi pali vuroki a karira na garene ria, nahea ri gi tolotolo a kuline ria, ri gi vakasiri ria ri dodo.
LEV 21:6 Ri gi malamala na matana Vure ne ria, nahea ri gi vakahale a rana. Ri gi malamala, a vuhuna ri rata a nihabi na kanono, ri habi ne BAKOVI DAGI. Ra nihabi nga i manga a maki ni kani na Vure ne ria.
LEV 21:7 “‘Naha ni parangi na ngatavine a ngoi, o na ngatavine i parangi pali, o na ngatavine i mahita turana a bakovi tara pali, a vuhuna e huriki a prister ria ne vona a Vure kunana.
LEV 21:8 Mua mu matai e huriki a prister ri malamala, a vuhuna ri habi a nihabi na Vure ne mua. Iau e BAKOVI DAGI, a Vure ne mua, a malamala, a rata e huriki a ngate nau ri malamala.
LEV 21:9 “‘Bara e tuna prister a ngatavine i ngoi viliha, i vakamaruhu e tamana. Mu bolea mu gutua na kanono, ge mate.
LEV 21:10 “‘A prister dagi ni gamai, ni bole tala ne huriki e turana, ge rata a leho vona, na tahuna ni guru langa a nibiri na gina, ni vakarodo na nirodo na prister. Pali na tahuna i ramai a naro ni kalo na tahuna a viri vona i mate, nahea ge ratea a vuna ge patoka, nahea ge rape a maka varakia vona.
LEV 21:11 A prister dagi nahea ge lakea na hini i tabuli vona a podana a viri i mate, ma ge muto na matagu. E tamana e kinana ru mate, ngi ranga nahea ge lokovonga.
LEV 21:12 Nahea ge ha taroa a mailo na Vure vona ge lakea na ruma i tabuli vona a viri i mate. Ia bara i rata mavonga i ratea a mailo nau i muto. Iau a gamaia pali na nibiri, a habia ne mua ge ia a prister dagi. Iau e BAKOVI DAGI a takia a ngava iea.
LEV 21:13 “‘A prister dagi ge parangi a sirula,
LEV 21:14 nahea ge parangi a havuri, a ngatavine i pilea e girihina, a ngoi, a ngatavine ni mahita turana pali. Ra ngatavine maea, nahea ge parangi ne ria. Ge parangi kunana a sirula na kabu vona ne Levi.
LEV 21:15 Ia i uka ma i longo maia a nitagu, e huriki e tuna bara ri muto na matagu. Iau e BAKOVI DAGI, a ratea i malamala.’”
LEV 21:16 E BAKOVI DAGI i takia e Moses i ta maea,
LEV 21:17 “O takia e Aron, nahea tara hamona ge nabatabuna ge habi a nihabi nau. Ra vinara iea ge tabuli vakaroro.
LEV 21:18 E huriki a bakovi ri nabatabuna nahea ri gi habi a nihabi nau: ra kepa, a beu, a rupere mabebe, a mata marango,
LEV 21:19 a vaha maputu, a lima maputu,
LEV 21:20 a bito poku, a moku, a mata gelo, a bakovi i tuvu vona a pero, a bakovi i dole.
LEV 21:21 Nahea tara hamone Aron a prister, ge nabatabuna ge valai tabukoi, ge habi a nihabi ni gutu na kanono na Vure vona.
LEV 21:22 Pali i kara ni kani a kinani ni taba mu habi na Vure vona, ge bole tala na kinani a habi ne mua a prister mu gu kani.
LEV 21:23 Pali a vuhuna i nabatabuna, nahea ge lakea tabukoi na kala dagi i kavitagu a Tabeke Nitaba Hateka, nahea ge lakea tabukoi na dede i pesi vonga, ma ge vakamuto a mailo nau. Iau e BAKOVI DAGI a rata a maki nga i malamala.”
LEV 21:24 Ra ngava nga, e Moses i vakalongo e Aron, e huriki e tuna, e huriki a Israel.
LEV 22:1 E BAKOVI DAGI i takia e Moses,
LEV 22:2 “O taki e Aron turane huriki e tuna bakovi, ri gi togo a nihabi ni taba e huriki a Israel ri habi nau, ma ri gi vakahalea a ragu. Iau e BAKOVI DAGI, a takia a ngava iea.
LEV 22:3 “Na tahuna a bakovi tara na kabu na prister i muto, nahea ge valai tabukoi na maka nihabi ni taba ne huriki a Israel ri habi nau. A viri ge valai tabukoi, bara lili talea, i uka ma ge leho manga a prister tabu na matagu. Ra vinara iea mu ramai vakaroroa. Iau e BAKOVI DAGI, a takia a ngava iea.
LEV 22:4 “Na tahuna a bakovi tara na hamone Aron ge tuvu vona a patala, o ge pori a kume na ngarava vona, nahea ge kani a maki ni kani ni taba, ge matapado taro, muri ge kani. A prister i padoi a podana viri mate, o i padoi a kuvena i maguru tala mule vona, o i padoi a maki ri muto ri karaka viliha, o i padoi a bakovi i muto, i muto na matagu,
LEV 22:6 bara i muto mavonga i harena na malunga liu. Muri ge hilolo kamumu taro na naru, ge kani a nihabi ni habi nau. Ia i uka ma i hilolo, nahea ge kani.
LEV 22:7 Muri na haro i rolo, bara i matapado, ge kani a nihabi ni taba, a vuhuna a maki ni kani ri habi nau, ne vone ria e huriki a prister.
LEV 22:8 Nahea ge kani a bobona sipsip, a bulmakau i mate tavula o i rabalakia a kanirau hateka. Na tahuna i kani a bobona, bara i muto na matagu. Iau e BAKOVI DAGI, a takia a ngava iea.
LEV 22:9 “E huriki a prister ri gi ramai lobo a maka vinara a habi ne ria. Ria i uka ma ri ramai a vinara, bara ri tahoka a ngava, a rabalaki ria. Iau e BAKOVI DAGI, a gamai ria ge ria a prister nau, a takia a ngava iea.
LEV 22:10 “E huriki a bakovi tavula nahea ri gi kani a maka nihabi ni taba. E huriki a mosi, a vora na prister, ngi ranga nahea ri gi kani.
LEV 22:11 Pali a vorakato i konea a prister ge vona, o ni poda na tabeke vona, i kara ge kani a maki ni kani i bole a prister.
LEV 22:12 Bara prister i tahoka e tuna a ngatavine, i parangi a bakovi tavula, i uka ma ia a prister, ra ngatavine iea nahea ge kani a maki ni kani ni gamai.
LEV 22:13 Pali ra ngatavine iea ge mate e girihina o ni pile, i uka e tuna, i hamule lakea ne tamana i made turana, ra ngatavine iea i kara ni kani a maki ni kani na prister. Pali e huriki a bakovi tavula, i uka ma ri gi kania.
LEV 22:14 “A bakovi tavula i kani ruru a maki ni kani ni gamai, ge koli lakea na prister a maki i kani, ge ru langa tabu ranga.
LEV 22:15 E huriki a prister ri gi matadoko, nahea tara bakovi tavula ge kani a maki ni kani ni taba, ma ri gi rata hale a nihabi ne huriki a Israel ri habi ne BAKOVI DAGI.
LEV 22:16 Bara ri mata taroa tara bakovi tavula i kani a maki ni kani ni taba, ra bakovi iea i tahoka a ngava, ge koli a maki ni kani na prister, a vuhuna iau kunana e BAKOVI DAGI a rata ria ri malamala.”
LEV 22:17 E BAKOVI DAGI i takia e Moses,
LEV 22:18 “O taki e Aron, e huriki e tuna, turane huriki a Israel. Na tahuna a bakovi tara ne mua, a mosi tara i made turane mua, i habi a nihabi gutu-vuro ne vona ni vakaloboa tara nita muholi i takia ne BAKOVI DAGI, o na ningaru vona kunana,
LEV 22:19 ge bolea tara bulmakau, a sipsip, o a meme, ge a toga ge gavutuvutu, lakea bara ngarua a nihabi vona.
LEV 22:20 Pali na tahuna i habi nau a maki nabatabuna, bara pile, i uka ma ga ngaru.
LEV 22:21 A bakovi i ngaru ni habi ne BAKOVI DAGI a nihabi na nivalemu ne vona ni vakalobo a nita muholi vona, o ge habi na ni ngaru vona kunana, ge bolea tara sipsip o a bulmakau, ge gavutuvutu. Ia bara i rata mavonga, bara ngarua a nihabi vona.
LEV 22:22 Naha ni habia ne BAKOVI DAGI a sipsip, a bulmakau i kepa, i maputu a vahana, i tekiteki, i tahoka a ngarava. Naha ni habi na dede a kanirau maea, ge a nihabi ni gutu na kanono lakea ne BAKOVI DAGI.
LEV 22:23 Na tahuna mu habi a nihabi na ningaru ne mua kunana, mu bole a sipsip, a bulmakau i laho puru rike, i uka maki. Pali naha ni habi nau a sipsip, a bulmakau maea ge vona a nihabi na nita muholi. I uka ma ga ngarua.
LEV 22:24 Naha ni habi ne BAKOVI DAGI a kanirau ni ratapile a dolena, ni pala a dolena, ni kini momo a dolena, ni rape a dolena. Naha ni ratea a naro iea na tahuna mu made na malala ne mua.
LEV 22:25 Naha ni habi ne BAKOVI DAGI a nihabi na kinani mu bole na mosi. Ra sipsip, a bulmakau maea, i uka ma i kamumu na matagu, i uka ma ga ngaru.”
LEV 22:26 E BAKOVI DAGI i takia e Moses i ta maea,
LEV 22:27 “Na tahuna a tuna bulmakau, a tuna sipsip, a tuna meme ni poda, ge laho turane kinana na parava ge polorua taro. Muri bara mu ngaru, mu bole lakea na dede mu habia, ge a nihabi ni gutu na kanono lakea ne BAKOVI DAGI. Iau bara ngarua.
LEV 22:28 Pali naha ni rabalaki a bulmakau turana e tuna, a sipsip turana e tuna, a meme turana e tuna na parava i taku kunana.
LEV 22:29 Na tahuna mu rata a nihabi mu gu kavurike e BAKOVI DAGI vona, mu ramai a vinara na nihabi bara ngaru a nihabi ne mua.
LEV 22:30 A maka nihabi ni gi kani lobo na parava iea kunana. Naha ni gi ru ranga ni gi kani na hatelanga kuduvi. Iau e BAKOVI DAGI, a takia a ngava iea.
LEV 22:31 “Iau e BAKOVI DAGI a ngaru mua, mu gu longototo mu gu ramai a maka vinara nau.
LEV 22:32 Naha ni vakahalea a ragu. Mua o huriki a kabu ne Israel, a ngaru mua lobo mu gu matakilaka nau a kiripiripi. Iau e BAKOVI DAGI a rata mua mu kiripiripi.
LEV 22:33 A tuli tala mua o Egipto a taparaki valai mua koea, ge iau a Vure ne mua. Iau e BAKOVI DAGI, a takia a ngava iea.”
LEV 23:1 E BAKOVI DAGI i takia e Moses,
LEV 23:2 ge taki e huriki a Israel na maka habu dagi ne BAKOVI DAGI ri gi ramai, ge ta maea, “Na tahuna mu vapopo mu kavurike iau vona a parava nga a vulaki.
LEV 23:3 “Mu tahoka a parava i polotara ni rata a leho. Pali na poloruana parava, a Parava Nimalo, naha ni leho vona. Mu vapopo mu kavurike iau. Na hini vai mu made vona mu luhoia a Parava Nimalo ne BAKOVI DAGI, mu ratea ge a parava nau.
LEV 23:4 “Ngane ga taki mua vona a maka parava dagi e BAKOVI DAGI i vulaki, mu gu rata a habu vona. Na pida lobo mu vapopo vona a parava nga, mu vasileki.
LEV 23:5 Na parava ravulu a polona i va (14th) na mugana keva, ge vakatubu na haro i rolo, mu ratea a Habu na Nipagepolo.
LEV 23:6 Na parava ravulu a polona i lima (15th) na keva iea kunana, a Habu na Bret I Uka Is mu vakatubua. Na parava ge polorua mu kani a bret i uka ma ni vuli turana a is.
LEV 23:7 Na mugana parava na vik mu vapopo mu kavurike iau, naha ni rata a leho mu rata na parava vakaroro.
LEV 23:8 Mu rata a nihabi ni gutu na kanono ne BAKOVI DAGI na parava ge polorua. Na poloruana parava mu vapopo tabu, mu kavurike iau. Na parava iea naha ni rata a leho mu rata bala.”
LEV 23:9 E BAKOVI DAGI i takia e Moses,
LEV 23:10 ge taki e huriki a Israel, ge ta maea, “Na tahuna mu vano mu made vona a malala iau a habia ne mua, mu mirio a vit, mu bole lakea na prister a galesi na vit mu rotu muga.
LEV 23:11 Na parava muri na Parava Nimalo, a prister ge tabari e BAKOVI DAGI vona a nihabi nga, bara i ngaru mua.
LEV 23:12 Na parava mu tabaria a nihabi na vit, mu habi turana a tuna sipsip ge gavutuvutu, ge tahoka a pida i taku, ge a nihabi gutu-vuro ne BAKOVI DAGI.
LEV 23:13 Mu bole a kilo na plaoa ge rua, mu vuli turana a namona oliv, ge a nihabi na vit ni gutu na kanono ne vona e BAKOVI DAGI. Mu habi turana a nihabi ni gutu-vuro, i manginoro a mangina. Mu bole a lita na vain ge taku, ge a nihabi na vain, mu habi turana a nihabi nga i rua.
LEV 23:14 Pali mua, i uka ma mu bole valai nau, iau a Vure ne mua, a galesi na vit nga, naha ni kani a vit mu bole karaba na hania. Na tahuna mu habi pali, ngane mu kara ni kani a bret i uka is, o ni vuli turana a is. Ra vinara nga, ge ramai vakaroro e huriki a hamone mua muri ma.
LEV 23:15 “I tubu na parava muri na Parava Nimalo, ra parava mu tabari iau vona a galesi na vit, mu gi a vik ge polorua.
LEV 23:16 Mu gi a parava ge ravulu lima, muri na vik i polorua ge lobo, mu habi tabua a nihabi na vit karaba ne BAKOVI DAGI.
LEV 23:17 Mu bole tala na hini mu made vona a balena bret ge rua, ra bret mu rata na kilo i rua na plaoa kamumu, mu vuli turana a is, mu gutu. Muri mu tabari iau e BAKOVI DAGI vona a nihabi na kanena maki i moro muga.
LEV 23:18 Mu habi turana maki ranga, ra bret iea. Mu habi a tuna sipsip ge polorua, a pida na viri taku i taku, a bulmakau a toga, a sipsip a toga ge rua. A sipsip, a bulmakau nga ri gi gavutuvutu, mu habi nau ge a nihabi ni gutu-vuro. Mu habi turana a nihabi na vit, a nihabi na vain. Ra nihabi maea i huli kamumu a mangina, a ngaru hatekea.
LEV 23:19 Mu bolea tara meme a toga, mu rata a nihabi na naro hale. A sipsip a toga ge rua, a pida ne rua ge taku, ge a nihabi na nivalemu.
LEV 23:20 A prister ge bole a maki nga ge tabari e BAKOVI DAGI vona, turana a bret ni rata na vit i moro muga. Ra nihabi nga, a maki nau kunana, bara habi ne huriki a prister.
LEV 23:21 Na parava mu ratea a nihabi iea, mu vapopo mu vasileki. Naha ni rata a leho mu rata bala vona a parava iea. E huriki a hamone mua ri bele muri ma, na hini vai ri made vona, ri gi ramai vakaroroa a vinara iea.
LEV 23:22 “Na tahuna mu mirio a vit na malala ne mua, naha ni bole a vit na harena hania. Naha ni hamule tabu ni poi a masigo. Ge tabuli vonga ngi, ge bole e huriki a matasia, e huriki a mosi. Iau e BAKOVI DAGI a Vure ne mua, a takia a ngava iea.”
LEV 23:23 E BAKOVI DAGI i takia e Moses
LEV 23:24 ge taki e huriki a Israel, ge ta maea, “Na mugana parava na poloruana keva naha ni leho, mu malo. Na tahuna mu longo a nangina tavure, mu vapopo mu vasileki.
LEV 23:25 Na parava iea naha ni rata a leho mu rata vakaroro, pali mu bole a nihabi ni rata na kanono mu habi nau.”
LEV 23:26 E BAKOVI DAGI i takia e Moses,
LEV 23:27 “Na ravuluna parava na poloruana keva, mu vapopo mu ratea a habu ni kavitagu e huriki. Na parava iea mu vapopo, mu vasileki. Mu peremu ni kani, mu habi a nihabi ni gutu na kanono ne BAKOVI DAGI.
LEV 23:28 Naha ni leho vona a parava iea, a vuhuna ia a Parava na Nikavitagu. A prister ge rata a nihabi ni kavitagu mua na matane BAKOVI DAGI a Vure ne mua.
LEV 23:29 A viri i uka ma i vakaperemua na parava iea, bara ni lili tala na kabu vona.
LEV 23:30 E rei a bakovi i rata a leho vona a parava iea, bara ratapilea.
LEV 23:31 Naha ni ratea tara leho. Mu ramai vakaroroa a vinara iea. E huriki a hamone mua ri bele muri ma, na hini vai ri made vona, ria ranga ri gi ramaia a vinara iea.
LEV 23:32 Mu malo kamumu vona a parava iea. Ra habu iea ge vakatubu na polovana parava na malunga liu, ge harena na malunga liu tabu na ravuluna parava. Na parava iea naha ni kania tara maki, naha ni vakavivi mua vona tara maki.”
LEV 23:33 E BAKOVI DAGI i takia e Moses,
LEV 23:34 ge taki e huriki a Israel, ge ta maea, “Na parava i ravulu a polona i lima, na poloruana keva mu vakatubua a Habu na Kape ne BAKOVI DAGI. Mu made na maka kape na parava ge polorua.
LEV 23:35 Na mugana parava na vik iea, mu vapopo mu vasileki, naha ni rata a leho mu rata na parava vakaroro.
LEV 23:36 Na parava lobo na vik iea mu ratea a nihabi ni gutu na kanono ge lakea ne BAKOVI DAGI. Na polotoluna parava mu vapopo tabu mu kavurike iau, mu ratea a nihabi tara ni gutu na kanono ge lakea ne BAKOVI DAGI, mu vakaloboa a habu iea. Na parava iea naha ni rata a leho mu rata na parava vakaroro.
LEV 23:37 “Iau a vulaki a parava nga, ge ria a habu ne BAKOVI DAGI. Mu vapopo mu vasileki, mu habi a nihabi ni gutu-vuro, a nihabi na vit, a nihabi na vain, a nihabi ranga na parava nga.
LEV 23:38 Ra nihabi nga ni rata langa tabu na nihabi na Parava Nimalo ne BAKOVI DAGI, ranga maki mu habi nau, a nihabi na nita muholi, turana a nihabi na ningaru ne mua.”
LEV 23:39 E BAKOVI DAGI i taki tabua e Moses na Habu na Kape, i ta maea, “Na parava ravulu a polona i lima na keva polorua, muri kunana ne mua mu mirio, mu ratea a habu ne BAKOVI DAGI na parava ge polorua. Na mugana parava, na polotoluna parava na habu mu malo, naha ni leho.
LEV 23:40 Na mugana parava mu bole ranga kanena kai kamumu, a pagana niuniu, a rahana kai i paga bolabola, a rahana kai i paga madilidili, mu pitei na matane BAKOVI DAGI na parava ge polorua.
LEV 23:41 Na pida lobo na poloruana keva mu rata a habu ne BAKOVI DAGI na parava ge polorua. E huriki a hamone mua, ria ranga ri gi ramaia a vinara iea.
LEV 23:42 Mua a tahotanga o Israel mu made na kape na hania na parava ge polorua,
LEV 23:43 lakea e huriki a hamone mua bara ri lohoka vona a tahuna a tuli tala mua o Egipto mu valai koea, mu made na maka kape kiroko maea. Iau e BAKOVI DAGI, a Vure ne mua, a takia a ngava iea.”
LEV 23:44 E Moses i longo a ngava nga, i vakalongo e huriki a Israel vona a maka habu i vulaki e BAKOVI DAGI.
LEV 24:1 E BAKOVI DAGI i takia e Moses,
LEV 24:2 “O vakuku e huriki a Israel ri gi bole valai a namona oliv, ne vona a maka lam ri tabuli pololilo na kape nau. E huriki a prister ri gi nami na rodo vakaroro a lam nga.
LEV 24:3 E Aron ge nami ria na malunga liu, ri gi para na rodo ge harena na hatelanga pokopoko. A lam nga ri gi tabuli polovavo na kala dagi i naviri mule a Tava na Ngava Dagi na Kape na Vaponga. A vinara iea, a habia ne mua, mu gu ramai vakaroroa. E huriki a hamone mua ranga, ri gi ramaia.
LEV 24:4 E Aron ge matakari kamumu a maka lam ri tabuli langa na butu ni rata na gol kabakaba, ri gi para vakaroro na matane BAKOVI DAGI.
LEV 24:5 “O bole a plaoa kamumu o rata a bret ge ravulu a polona i rua. O guru tala a kilo ge rua na plaoa, o ratea a bret ge taku.
LEV 24:6 Muri o ru a bret nga na dede ni rata na gol na matagu. O ru na tete ge rua a maka bret, a bret ge polotara na tete i taku.
LEV 24:7 O ru ranga havu mangisipa ni gi rungani, ge huli a mangina turana a tete na bret ge rua, muri ri gi habi ne BAKOVI DAGI a havu mangisipa, ge a nihabi ni gutu na kanono, ge ratea e BAKOVI DAGI ge luhoi mule ra bret nga.
LEV 24:8 E Aron ge ru na dede na matane BAKOVI DAGI a maka bret na Parava Nimalo lobo. A nihabi iea, a nihabi ne huriki a Israel, ri gi ramai vakaroroa a ngava dagi iea, ri gi ratea a naro iea.
LEV 24:9 Ra bret nga ne vona e Aron turane huriki a prister na kabu vona. Ri gi kani pololilo na Tabeke Nitaba, a vuhuna ra maki ni kani nga a kalavana nihabi ni taba hateka, ni gutu na kanono ni habi nau. Ra kalavana nga, ne vona e huriki a prister ri gi kani vakaroro.”
LEV 24:10 A bakovi tara, e tamana a Egipto, e kinana a Israel. A rane kinana e Selomit, e tune Dibri na kabu ne Dan. Re tune Selomit i made na mada, i vaubi turana a Israel tara. Na tahuna ru vaubi, ra bakovi iea i kurahi a rane BAKOVI DAGI i harogia. Muri ri turari lakea ne Moses.
LEV 24:12 Lakea e Moses i ru dilia na bavi, ge davea e BAKOVI DAGI, ge takia na a ra naro ge rata virihia vona.
LEV 24:13 Lakea e BAKOVI DAGI i takia e Moses,
LEV 24:14 “O turari talea na mada a bakovi iea. E huriki ri longoa i harogi iau, ri gi ru langa na gina a limane ria. Ri rata mavonga, ri gi vakasiria ra bakovi iea i tahoka a maregoa pali, ri gi padimatea na kedo.
LEV 24:15 Muri o taki e huriki a Israel, e rei a viri i harogi iau, i tahoka a ngava. Bara i bole a vuranga vona.
LEV 24:16 A Israel, o a mosi i kurahi a ragu na tahuna i harogirogi, ra bakovi iea ni gi padimate na kedo.
LEV 24:17 “E rei a viri i rabalaki a bakovi, ni gi rabalaki.
LEV 24:18 E rei a viri i rabalaki a kanirau na bakovi tara, ge kolia a kanirau na bakovi iea.
LEV 24:19 Bara bakovi i ratapile a kakaina viri, mu koli mu ratapilea a kakaina.
LEV 24:20 Bara bakovi i ubiputu a tuhana viri, mu koli mu ubiputua a tuhana. A bakovi i ratapile a matana viri, mu koli mu ratapilea a matana. A bakovi i ubisigo a ngina viri, mu koli mu ubisigo a ngina. A bakovi i rata hale navai a viri, mu koli mu rata mavongea.
LEV 24:21 A bakovi i rabalaki a kanirau, ge kolia a kanirau i rabalakia. Pali a bakovi i rabalaki a viri, a bakovi iea ni gi rabalaki.
LEV 24:22 Ra vinara iea ne vona e mua e huriki a tahotanga ne Israel, turana a mosi ri made turane mua. Iau e BAKOVI DAGI, a Vure ne mua, a takia a ngava iea.”
LEV 24:23 Muri e Moses i taki e huriki a Israel, ri turari talea ra bakovi i harogia a Vure, ri padimatea na kedo. Na naro iea kunana e huriki a Israel ri ramaia a vinara e BAKOVI DAGI i vakuku e Moses vona.
LEV 25:1 E BAKOVI DAGI i takia e Moses na lolo e Sinai,
LEV 25:2 ge taki e huriki a Israel, ge ta maea, “Na tahuna mu made pali vona a malala a habia ne mua, na poloruana pida lobo naha ni varo a maki ni kani na hania. Ge tabuli tavula a malala. A malala ge malo, ge manga a hini mu malo na Parava Nimalo. Mu rata mavonga, mu togoa a pida iea, a vuhuna a pida ne BAKOVI DAGI.
LEV 25:3 Na pida i polotara mu varo a maki ni kani, mu puri kamumu a rahana vain, mu ru kadolu a kanena maki ni varo na hania.
LEV 25:4 Pali na poloruana pida naha ni leho vona a malala, ge malo. Pali ra pida iea a pida ne BAKOVI DAGI. Naha ni varo a maki ni kani, naha ni puri a rahana vain ne mua.
LEV 25:5 Naha ni mirio a vit i rike tavula, naha ni pasi a kanena vain i uka ma ni puri a rahana. Mu mata taro ge tabuli, a vuhuna na pida iea a malala ge malo.
LEV 25:6 Pali na pida iea a maki ni kani ri rike tavula na malala ne vona ni kani kunana. I uka ma ne vona ni ru palupu, o ni gi rata a vain vona. Mua, turana a vora ne mua, e huriki a mosi, mu kani.
LEV 25:7 A maka bulmakau, a sipsip, a meme, a kanirau ri tegi, ria ranga ri gi kani.
LEV 25:8 “Balaka polorua mu gi a pida ge polorua, ge bele na pida i ravulu va a polona i polova (49).
LEV 25:9 Muri na ravuluna parava na poloruana keva, mu pupu a tavure na tabeke lobo na robo ne mua. Ra parava iea a parava dagi ni kavitagu e huriki.
LEV 25:10 A pida i ravulu lima (50) ge vakatubu na tahuna mu vaki a tavure vona, ra pida iea a pida ne BAKOVI DAGI. Mu vakalongo e huriki vona a maregoa ne ria i lobo ngane, ri gi made kamumu. Na pida iea a viri i kona a malala na bakovi tara, ge habi mulea na tahona, o ge habi mulea na hamona tara. E huriki a vora ri gi pe a tahone ria, ri gi hamule mai a kabu ne ria.
LEV 25:11 Ra ravulu limana pida (50th), a pida ne huriki lobo ri gi made kamumu ri gi vivi. Na pida iea naha ni varo a maki ni kani na malala ne mua, naha ni bole a vit i rike tavula, naha ni pasi a kanena vain na rahana i uka ma ni puri.
LEV 25:12 Mu luhoi kamumu, ra pida iea, a pida ni vaki a tavure, a pida nau kunana. Mu kani kunana a maki i rike tavula na malala ne mua.
LEV 25:13 “Na Pida na Nihabimule a Maki iea mua e huriki mu habi a malala ni kona, mu bole mule a malala ne mua.
LEV 25:14 “Na tahuna mu habi a malala ne huriki ranga ri gi konea, mu luhoi kamumu i riva a pida i tababana ge bele vona a Pida na Nihabimule a Maki. Mu gi kamumu, ge balaka riva ge varo a maki, ge mirio, lakea a mapana malala ge ramai i riva a pida i tababana.
LEV 25:16 A pida i kupo i tababana, a mapana ge rike. A pida i popote i tababana, a mapana ge puru, a vuhuna i uka ma i kona a malala, i kona a maki ni kani i bole vona a malala iea.
LEV 25:17 Naha ni tami a turamu. Mu mangenge na Vure ne mua, mu rata a maka naro kamumu kunana. Iau e BAKOVI DAGI a Vure ne mua, a takia a ngava iea.
LEV 25:18 “I mavonga mu ramai kamumu a maka ngava, a vinara ne BAKOVI DAGI. Bara mu rata mavonga bara mu made kamumu vona a malala iea.
LEV 25:19 A malala bara i vakabele a maki ni kani i kupo, bara mu made kamumu hateka vona a malala iea.
LEV 25:20 Ma ge ranga ne mua ge nana maea, ‘A ra mi gi kania vona na poloruana pida na tahuna i uka ma mi varo a maki ni kani?’
LEV 25:21 Naha ni loho lege lae. E BAKOVI DAGI bara i gamai a malala na polotarana pida, ge bele kupo a maki ni kani, mu kani na pida i tolu.
LEV 25:22 Na tahuna mu varo a maki ni kani na polotoluna pida, bara mu tababana ni kani a maki mu mirio na polotarana pida. Bara mu tahoka a maki ni kani i harena na maki ni kani karaba i moro na polovana pida.
LEV 25:23 “Na tahuna a bakovi i kona a malala, nahea ge bolea ge ne vona liu. A vuhuna i uka ma malala vona. A malala ne nau, a ru mua mu gu made vona, manga a mosi ni vakamade tamilalu na malala.
LEV 25:24 A bakovi tara ne mua i konamulea a malala ne mua, ge lohoka kamumu vona, a tahona malala i ngaru ni konamulea ge bole mulea a malala.
LEV 25:25 “Bara bakovi tara i bala maki i ngaru ni habi a malala vona ni gi kona, a kabu vona muholi ge koria ge konamulea, muri ge habi mulea vona.
LEV 25:26 Bara bakovi i uka viri vona ge tuhoria, ia kunana ge konea. Na tahuna i kupo a maka moni vona, ge konamulea a malala iea.
LEV 25:27 Ge gi i riva a pida i tababana ge kona a maka pida ni koli a maki nga, ge gi i riva a mapana a kanena maki ni varo ge vakabele a malala na pida nga. Ge bole a moni ga mapana kanena maki nga, ge habi na bakovi i kona a malala vona hosi, ge bole mulea a malala iea.
LEV 25:28 Pali a bakovi iea ge uka moni, i uka ma i konamulea a malala iea, a malala ge tabuli na bakovi i konea, ge harena na Pida na Nihabimule a Maki ge bele tabu muri ma. Na tahuna a pida iea i bele, a bakovi i kona a malala ge habi mulea na tahona a malala.
LEV 25:29 “Bara bakovi i tahoka a ruma i pesi na tanga dagi ni tura halui na nure, i konea a bakovi tara, a tahona i tahoka a pida i taku ni konamulea a ruma vona.
LEV 25:30 Bara pida i taku i lobo, lakea i uka ma i konamulea a ruma, ra ruma iea ngane ne vona a bakovi i konea turane huriki a hamona. I uka ma ge habi mulea na Pida na Nihabimule a Maki.
LEV 25:31 Pali a maka ruma ri pesi na tanga kiroko i uka ma ni tura halui, mu luhoi kamumu, ri manga kunana a hania. A tahona ruma i kara ni konamulea a ruma vona. Na Pida na Nihabimule a Maki a bakovi i konea pali a ruma, ge habi mulea na tahona a ruma.
LEV 25:32 “Pali e huriki a Levi nahea ri gi ramaia a vinara iea. Ria ri ngaru ni kona mule a ruma na tanga dagi ni tura halui a nure, bara ri kona mule.
LEV 25:33 Na tahuna a Levi tara i habi a ruma vona ni kona, pali i marikoi ni konamulea, ra bakovi i konea a ruma ge habi mulea na Levi na Pida na Nihabimule a Maki a ruma, a vuhuna mua lobo a Israel e BAKOVI DAGI i habi a malala ne mua, pali e huriki a Levi i uka ma i habi a malala ne ria. I habi kunana a maka tanga dagi ne ria. A maka ruma ri pesi na maka tanga dagi ne vona e huriki a Levi kunana vakaroro.
LEV 25:34 Pali a malala na harena maka tanga dagi ne huriki a Levi, nahea ge kona e huriki. Ra malala ngi ne vona e huriki a Levi vakaroro.
LEV 25:35 “Na tahuna a Israel tara i made tabukoi vomu i bala maki, o tuhoria ge manga a naro mu rata virihi e huriki a mosi vona. Mu rata mavonga a hulu matasia bara i vivi ni made turane mua.
LEV 25:36 Na tahuna i bole a moni ne mua, ge koli kunana a moni i bole. Naha ni takia ge ru langa tabu ranga. Na tahuna i kona a maki ni kani, naha ni vakarike hateka a mapana ni bole a moni dagi vona. Mu mangenge vona a Vure, bara a hulu matasia i made turane mua.
LEV 25:38 Iau e BAKOVI DAGI a Vure ne mua. A tuli tala mua o Egipto, a taparaki valai mua koea, a habia ne mua a robo e Kenan, ge iau a Vure ne mua.
LEV 25:39 “Na tahuna a turamu tara i matasia hateka, i ngaru mua mu gu konea ge ia a vorakato, naha ni takia ge rata hateka a leho manga e huriki a vorakato.
LEV 25:40 Ge made turane mua, manga a vora. Ge leho ne mua, ge harena na Pida na Nihabimule a Maki.
LEV 25:41 Na pida iea, ia turane girihina, e huriki e tuna ri gi pe mua, ri gi hamule mai a kabu ne ria ri made na malala ne tubune ria.
LEV 25:42 Hosi e huriki a Israel ri made manga a vorakato o Egipto. Muri a tuli tala ria vonga, ge ria a vora nau. Ngane naha ni kona mule a viri ne ria ge a vorakato ne ria.
LEV 25:43 Naha ni vakavora hateka ria. Mu togo iau, mu rata kamumu ria.
LEV 25:44 “Mu ngaru ni bole a vorakato, mu bole tala na maka robo basi.
LEV 25:45 Mua mu ngaru tabu, mu kona e huriki a mosi ri made na tanga ne mua, turana a kabu ne ria ni poda ria na malala ne mua, ge ria a vorakato ne mua.
LEV 25:46 Na tahuna mu mate, e huriki e tune mua a bakovi ri gi bole e huriki a vorakato, ri gi rata a leho ne ria vakaroro. Na tahuna e huriki a viri ne mua ri leho manga a vorakato, naha ni vakavora hateka ria.
LEV 25:47 “Na tahuna a mosi tara i tahoka hateka a mahala i made turane mua, pali a turane mua tara i bala a mahala, ra mosi iea i kara ge konea a turane mua ge a vorakato vona, o ge ia a vorakato na kabu vona tara.
LEV 25:48 Muri na mosi i konea a Israel iea, ge ia a vorakato vona, a viri vona tara i kara ni konamulea,
LEV 25:49 o e tamana tara, o e turana tara, o a viri na kabu vona tara, ria ranga ri kara ni konamulea. Pali ra bakovi iea ge tahoka a moni, bara i kara ni kona mule ia, ge vano.
LEV 25:50 Ge gi palupu a maka pida ri tababana ge harena na Pida na Nihabimule a Maki. A matakari iea ge ru a mapana a vora na pida nga. Ra bakovi iea o a kabu vona tara, ge konamulea na mapa ge maea:
LEV 25:51 a pida vona i kupo i tababana, a bakovi iea ge koli mule a moni i kupo lakea na matakari, ge kona mule ia;
LEV 25:52 a pida vona i popote i tababana na Pida na Nihabimule a Maki, ge koli mule a moni popote lakea na mata­kari, ge ramai a maka pida i leho vona, ge kona mule ia.
LEV 25:53 A matakari ge luhoia ra vorakato iea ge manga a vora ni kona na pida takutaku, nahea ge vakavora hatekea.
LEV 25:54 “Ra bakovi iea i uka ma ni kona mule vona tara naro iea, ia turane huriki e tuna ri gi hamule mai a kabu ne ria na Pida na Nihabimule a Maki.
LEV 25:55 Naha ni mata taroa tara Israel ge ia a vorakato vakaroro, a vuhuna iau a tuli tala mua o Egipto, a taparaki valai mua koea, ge mua a vora nau. Iau e BAKOVI DAGI a Vure ne mua, a takia a ngava iea.’”
LEV 26:1 E BAKOVI DAGI i taki tabua e Moses, ge taki e huriki a Israel, ge ta maea, “Naha ni kau na kai na kedo a hanuna vure ranga, o mu gu bole a kedo dagi mu gu vakapesi, ge a vure ne mua mu gu turume na ngalana, a vuhuna iau e BAKOVI DAGI a Vure ne mua.
LEV 26:2 “Naha ni leho na Parava Nimalo. Mu togoa a mailo nau. Iau e BAKOVI DAGI, a takia a ngava iea.
LEV 26:3 “Mua bara mu ramai a vinara nau, mu rata a maki a ngaru mu gu rata,
LEV 26:4 bara ratea a vala i boru, i rata a maki ni kani ri rike kamumu na malala ne mua. A maka kai bara ri vua kamumu.
LEV 26:5 A maki ni kani bara ri bele kupo. Bara mu mirio mavonga a vit i harena na tahuna a vain i rara ni pasi. Bara mu pasi mavonga a kanena vain i rara, i harena na tahuna mu varo tabu a vit. Bara mu kani mu maru, mu made kamumu na malala ne mua.
LEV 26:6 “Iau bara habi a nivalemu ne mua mu made kamumu. Na tahuna mu mahita, i uka ma mu gu mangenge vona tara maki. Ga lili vuroki a maka livoa hateka na robo ne mua. E huriki a pile i uka ma ri gi ratapile mua.
LEV 26:7 Na tahuna mu vaubi turane huriki a pile, bara mu valili ne ria, mu ratapile ria.
LEV 26:8 A bakovi i ala lima ne mua bara ri valili na pile ala ravulu mule ma murina balaka taku (100). A bakovi i ala ravulu mule ma murina balaka taku (100) ne mua bara ri valili na pile ala ravulu rangale (10,000), ri ratapile ria.
LEV 26:9 “Iau bara rata kamumu mua, a habi ne mua e huriki e tune mua ri ala kupo. Bara vakatorea a ngava dagi a takia ne mua hosi.
LEV 26:10 A maki ni kani mu mirio na pida muga, bara i tabuli i harena na pida muri. A maki mu kani kaleva, bara mu vuroki tala, mu bole a maki ni kani karaba, mu ru na murine ria.
LEV 26:11 Iau ga made na mailo nau na kurukurune mua, i uka ma ga ngalahere ne mua.
LEV 26:12 Ga laho turane mua, ge iau a Vure ne mua, mua ge mua e huriki a tara nau.
LEV 26:13 Iau e BAKOVI DAGI a Vure ne mua. Hosi mua a vorakato o Egipto ni vakavora hateka, muri a tuli tala mua vonga, a taparaki valai mua koea, lakea i uka ma ge mua a vorakato tabu ne ria. A ratapilea a nitora na bakovi i vakavora hateka mua, ngane mu laho na pesivahane mua.
LEV 26:14 “Pali mua mu longotaro a ngavagu i uka ma mu ramai a vinara nau,
LEV 26:15 mu putu puru a vinara nau, mu ngalahere na ngavagu, mu longotaro a ngava dagi a rata turane mua,
LEV 26:16 bara vakamadihi mua maea: bara vakamangenge hateka mua, a habi a gilanga dagi ne mua, ra gilanga iea bara i rata a kuline mua i rongo, bara mu kepa, ge ratea a kakaine mua i malosi. Bara mu varo a maki ni kani na hania, pali i uka ma mu gu kani a kanena, a vuhuna e huriki a pile bara ri valai, ri kani a maki mu varo.
LEV 26:17 Iau bara iau a pile ne mua. E huriki a pile bara ri valai, ri vaubi turane mua, ri ratapile mua, ri matakari mua. Na tahuna i uka viri ge valili ne mua, bara mu mangenge tavula mu ha.
LEV 26:18 “Muri na tahuna a vakamadihi mua na naro nga, pali i uka ma mu ramai tabu a ngavagu, bara vakamadihi hateka mua.
LEV 26:19 Bara ratapile a tagenga, a nitora ne mua. A vala i uka ma ge boru, a malala bara i tora manga a kedo.
LEV 26:20 A maki ni kani i uka ma ri gi koru rike na hania, a maka kai i uka ma ri gi vua. A tuhakanga ne mua bara i lobo tavula.
LEV 26:21 “Na tahuna a maka maregoa nga ri bele ne mua, pali mu tababana ni tagege, bara luhoi a maka naro hale mu rata, a habi mua a maregoa hale, i dagi hateka na maregoa muga.
LEV 26:22 Ga rudu a maka livoa hateka ri gi lakene ri gi rabalaki e huriki e tune mua, a maka bulmakau ne mua, ga rata mua mu ala popote, i uka viri ge laho na dala ne mua.
LEV 26:23 “Muri na tahuna a vakamadihi maea mua, i uka ma mu longototo a nitagu, mu tababana ni tagege,
LEV 26:24 bara luhoi a naro hale ne mua, a ratapile mua hateka tabu.
LEV 26:25 Mu ratapilea pali a ngava dagi, ngane ga rudu e huriki a pile ri gi vaubi turane mua. Na tahuna mu made pololilo na tanga dagi ni tura halui, mu luhoi ta mu made kamumu, pali bara rudua a gilanga dagi i ratapile mua. Na tahuna mu bole a maregoa na gilanga, bara habi mua na limane huriki a pile ne mua.
LEV 26:26 Na tahuna iea bara vakaperemu mua na maki ni kani. A ngatavine ala ravulu bara ri vatunu vona a kanono i taku, ri gutu a maki ni kani popote. Muri bara mu vaveru, mu kani, pali i uka ma mu gu maru.
LEV 26:27 “Muri na hini a rata a naro nga, pali mu tababana ni tagege mu longotaro a ngavagu,
LEV 26:28 bara tahate hateka na naro hale mu rata, iau kunana a habi a nimadihi dagi hateka ne mua.
LEV 26:29 Muri bara mu vitolo hateka, mu rabalaki mu kani e huriki e tune mua.
LEV 26:30 Iau bara ratapile a maka roho na nivasileki na maka vure ne mua meli na lolo, bara puka a maka dede na havu mangisipa. Bara rabalaki mua, a voro rike a podane mua na hanuna vure a ratapile muga pali. Lakea bara marikoi hateka ne mua.
LEV 26:31 Ga ratapile a tanga dagi, a roho na nivasileki ne mua. I uka ma ga ngaru a maka nihabi mu rata.
LEV 26:32 Ga ratapile hatekea a malala ne mua. Na tahuna e huriki a pile ne mua ri bolea a malala iea ri made vona, bara ri turutu vona a maki i bele vona.
LEV 26:33 Bara rata e huriki a pile ri vaubi turane mua, ri lili tala mua, mu vapida lae mu mariu lakea na maka tanga basi. A malala ne mua bara i tabuli tavula, a maka tanga dagi ne mua bara ni ratapile.
LEV 26:34 “Na tahuna mu made na malala ne huriki a pile, a malala ne mua bara i tabuli tavula i malo. Muga na tahuna mu made vona a malala iea, i uka ma mu habi a nimalo vona a malala na poloruana pida ge ramai a ngava a taki. Pali na tahuna a malala i tabuli tavula, bara i malo kamumu.
LEV 26:36 “Na tahuna mu made na robo ne huriki a pile, bara rata mua mu mangenge hateka. Bara mu longo tavulea a nangina vilu i ngalu a pagana kai, bara mu ha, i manga ni valili ne mua na tahuna na vabinga. Na tahuna mu ha, bara mu boru, mu ratapile lae mua na tahuna i uka viri ge valili ne mua.
LEV 26:37 Bara mu boru langa, mu tabuli taho lae mua, i manga a viri i lele a bainat na vabinga, pali i uka viri ge valili mua na bainat. Na tahuna e huriki a pile ri ngaru ni vaubi turane mua, bara mu keri ni vaubi turane ria.
LEV 26:38 Muri bara mu mate na robo ne huriki a pile, a malala ne ria bara i todo mua.
LEV 26:39 E huriki ranga ne mua ri tababana na robo ne huriki a pile, bara i takutaku i bole a vuranga i lobo tavula, a vuhuna e huriki a gare ne mua ri rata a maka naro hale.
LEV 26:40 “Pali muri e huriki ne mua bara ri taki tala a naro hale ne ria, ne huriki a gare ne ria, a vuhuna ra ri tagege ri longotaro a ngavagu.
LEV 26:41 Mu tagege, lakea iau a vakamadihi mua, a rudu lakea mua na robo ne huriki a pile. Pali na tahuna e huriki a hamone mua ri hatakia pali a nimadihi na naro hale, ri pulo a vilone ria ri duku.
LEV 26:42 Muri bara luhoi mulea a ngava dagi a ratea turana e Iakop, e Isak, e Abraham, ga luhoi mulea a malala e Kenan.
LEV 26:43 Pali muga mu pe purua a malala ge malo na pida ge kupo, ge bole a murina a maka pida i uka ma mu ru a malona a malala ge malo. Mu bole a nimadihi na naro hale mu rata, na hini mu ngalahere na maka vinara mu longotaro a ngavagu.
LEV 26:44 Na tahuna mu made na robo ne huriki a pile, i uka ma ga pe puru mua liu, o ga ratapile lobo mua. Ma ga rata mavonga, a ngava dagi a rata turane mua bara i lobo tavula. Iau e BAKOVI DAGI a Vure ne mua, i uka ma ga ratea a naro maea.
LEV 26:45 Ga luhoi mua, ga luhoi tabua a ngava dagi a ratea ne huriki e tubune mua. A vakasiri a nitora dagi nau na maka tanga lobo, na tahuna a tuli tala ria na robo e Egipto, a taparaki valai ria koea. A bole valai ria nau, ge iau a Vure ne ria. Iau e BAKOVI DAGI, a takia a ngava iea.”
LEV 26:46 A vinara nga e BAKOVI DAGI i habi ne Moses na lolo e Sinai, ge ramai e huriki a Israel.
LEV 27:1 E BAKOVI DAGI i takia e Moses,
LEV 27:2 ge taki e huriki a Israel, ge ta maea, “A viri i ta muholi ge habi ranga viri lakea nau, ge habi na prister ranga moni ge vakatorea a nita muholi vona.
LEV 27:3 Ge pasia a mapana bakovi o ngatavine vona ge maea: a bakovi i tahoka a pida i ravulu rua, i harena na pida i ravulu polotara (60), ni gi kona na moni silva i 50, i ramai a nimavana moni na mailo ne BAKOVI DAGI.
LEV 27:4 A ngatavine i tahoka a pida i ravulu rua, i harena na pida i ravulu polotara (60), ni gi kona na moni silva i 30.
LEV 27:5 A viri i tahoka a pida i lima, i harena na pida i ravulu rua, a bakovi ni gi kona na moni silva i 20. A ngatavine ni gi kona na moni silva i ravulu.
LEV 27:6 A koma i tahoka a keva i taku, i harena na pida i lima, a koma bakovi ni gi kona na moni silva i lima. A koma ngatavine ni gi kona na moni silva i tolu.
LEV 27:7 A viri a pida vona i rangi a pida i ravulu polotara (60), a bakovi ni gi kona na silva moni i 15. A ngatavine ni gi kona na silva moni i ravulu.
LEV 27:8 Na tahuna a bakovi i ratea a nita tora iea, i uka moni ge kona mule ia, o ge kona mule a turana, a bakovi iea ge lakea na prister. A prister ge kali purua a mapana bakovi iea, bara i kara ni kona.
LEV 27:9 “Bara bakovi i ta muholi ge habia ne BAKOVI DAGI tara kanirau ge a nihabi, ge habia a kanirau ra a taki mua vona ta mu gu habia. A kanirau maea mu habia ni taba.
LEV 27:10 Ra bakovi iea, nahea ge kuloia a kanirau ge habia nau a viri nabatabuna. Nahea ge kuloia a kanirau nabatabuna ge habia nau a viri gavutuvutu. Ia ge rata mavonga, ra kanirau varago nga bara ne nau kunana.
LEV 27:11 A kanirau i muto nahea ni gi habi ne BAKOVI DAGI. A kanirau maea ni gi bole lakea taro na prister.
LEV 27:12 A prister ge masia a kanirau iea i muto o i kaba, ge takia a mapana. Ra mapana nahea ni gi pulo.
LEV 27:13 A bakovi iea i ngaru ge konamulea ra kanirau iea, ge konamulea na moni i takia a prister, ge ru langa tabu ranga ( ).
LEV 27:14 “Bara bakovi i habi a ruma vona i malamala lakea ne BAKOVI DAGI, a prister ge matai taroa a ruma iea i kamumu o i hale, lakea a prister ge takia a mapana. Ra mapana nahea ni gi pulo.
LEV 27:15 Bara bakovi iea ge ngaru ni konamulea, ge habi nau a mapana ruma, ge ru langa tabu ranga ( ).
LEV 27:16 “Bara bakovi i habi ne BAKOVI DAGI a tabekena malala na kabu vona, a prister ge matai kamumua a malala, ge riva a vutuna vit ni gi varo vona a malala iea. A malala iea i kara ni gi varo vona a vutuna vit ge ravulu rua a kilo vona, a mapana malala iea ge a moni silva i ravulu lima (50).
LEV 27:17 Bara i habia nau na Pida na Nihabimule a Maki, a mapana ge tabuli mavonga, nahea ni gi pulo lae.
LEV 27:18 Pali ia ge habia nau muri na Pida na Nihabimule a Maki, a prister ge gi palupu a maka pida ri tababana, ge bele na pida ni vakoli, ge kali purua a mapana malala iea.
LEV 27:19 Bara bakovi i habi a malala vona nau, ia ge ngaru ni konamulea a malala iea, ge konamulea na mapana i takia a prister, ge ru langa tabu ranga ( ).
LEV 27:20 Bara i uka ma i konamulea nau a malala iea, o i habia na bakovi tara i konea, ra malala iea i uka ma ni gi kona mule na tahuna a Pida Nivakoli i valai tabu.
LEV 27:21 Na tahuna a Pida na Nihabimule a Maki ge bele, a bakovi i konea a malala iea ge habia ne BAKOVI DAGI. Lakea ra malala iea ge tabuli ga malala nau liu, bara habia ne huriki a prister.
LEV 27:22 “Bara bakovi i habia ne BAKOVI DAGI a hania i konea, i uka ma a tabeke na malala ne tubuna,
LEV 27:23 a prister ge gi kadolu i riva a pida i tababana ge bele vona a Pida na Nihabimule a Maki. Ge takia a mapana malala ge harena vona a pida iea. Na pida iea kunana ge habia na prister a mapana malala. Ra mapana malala i malamala na matane BAKOVI DAGI.
LEV 27:24 Na Pida na Nihabimule a Maki, a bakovi ge habi mulea na tahona a malala vona.
LEV 27:25 A mapana maki nga ni gi pasi ramai a moni na mailo ne BAKOVI DAGI.
LEV 27:26 “Na tahuna mu habia ne BAKOVI DAGI a kanirau, naha ni bolea a tabua na kanirau, a vuhuna a tabua na maka kanirau ne BAKOVI DAGI. A tabua na bulmakau a sipsip, ngi ranga ne BAKOVI DAGI.
LEV 27:27 Pali bara tabua i podea a kanirau i muto, mu konamulea na mapana i takia a prister, mu ru langa tabu ranga ( ). Na tahuna a bakovi i marikoi ni konamulea a kanirau, a prister ge takia tara viri ge konea na mapana i takia.
LEV 27:28 “Na tahuna a bakovi i ru herea tara maki ge ne vona e BAKOVI DAGI, i manga a bakovi, a ngatavine, a kanirau, a malala i bolea ne tubuna, nahea ge takia tara bakovi ge konea, ia tara i uka ma ge konamulea na prister, a vuhuna i malamala hateka a maki ni taba ne BAKOVI DAGI.
LEV 27:29 “A bakovi ni ru here ni gi ratapile, nahea ni gi kona mule, ni gi rabalaki.
LEV 27:30 “A maki ni kani ni varo na hania, i manga a vuana vit, a vutuna kai, mu ru kadolu na galesi ge ravulu. Muri mu habia nau e BAKOVI DAGI, a galesi ge taku i malamala na matagu.
LEV 27:31 Bara bakovi tara i ngaru ni kona mule ranga maki ni kani nga, ge konamulea na mapana, ge ru langa tabu ranga ( ).
LEV 27:32 Bara o tahoka a sipsip o a bulmakau i ravulu, o ru herea ge taku, ge malamala lakea ne BAKOVI DAGI.
LEV 27:33 Ra kanirau o habia nau i kamumu o i hale, naha ni kuloia. Pali bara o kuloia ra kanirau nga, rua varago ru malamala, i uka ma ni gi kona mule.”
LEV 27:34 A vinara nga e BAKOVI DAGI i habi ne Moses na lolo e Sinai, ge longo e huriki a Israel, ri gi ramai.
NUM 1:1 Na mugana parava na ruana keva na ruana pida muri ne huriki a Israel ri pea e Egipto, e BAKOVI DAGI i ta turane Moses pololilo na Kape na Vaponga na tabeke i ngeki ne Sinai. I ta maea,
NUM 1:2 “Ioe turane Aron muru gi a rane huriki a bakovi ne Israel, muru here ramai a kabu ne ria, a rane ria.
NUM 1:3 Muru here puru, ge ramai a tara ne ria, a rana e huriki a bakovi lobo o Israel ri tahoka a pida i ravulu rua i rike, ri kara ni vaubi, ge ria a nugumaheto.
NUM 1:4 Muru vulaki a bakovi a garena kabu takutaku ne Israel ge tuhori marua.
NUM 1:5 “A bakovi ri gi tuhori marua na leho, ra nga: na kabu ne Reuben, muru bolea e Elisur, e tune Sedeur.
NUM 1:6 Na kabu ne Simion, muru bolea e Selumiel, e tune Surisadai.
NUM 1:7 Na kabu ne Iuda, muru bolea e Nason, e tune Aminadab.
NUM 1:8 Na kabu ne Isikar, muru bolea e Nataniel, e tune Suar.
NUM 1:9 Na kabu ne Sebulun, muru bolea e Eliab, e tune Helon.
NUM 1:10 Ne tune Iosep na kabu ne Epraim, muru bolea e Elisama, e tune Amihud. Na kabu ne Manase, muru bolea e Gemaliel, e tune Pedasur.
NUM 1:11 Na kabu ne Bensamin, muru bolea e Abidana, e tune Gideoni.
NUM 1:12 Na kabu ne Dan, muru bolea e Ahieser, e tune Amisadai.
NUM 1:13 Na kabu ne Aser, muru bolea e Pagiel, e tune Okran.
NUM 1:14 Na kabu ne Gad, muru bolea e Eliasap, e tune Deuel.
NUM 1:15 Na kabu ne Naptali, muru bolea e Ahira, e tune Enan.”
NUM 1:16 Re huriki nga ni vulaki tala na vaponga. Ria e huriki a nupesi na maka kabu ne Israel.
NUM 1:17 E Moses e Aron ru bole a gare nga ni vulaki.
NUM 1:18 Na mugana parava na ruana keva ri vapopo, lakea e huriki a gare ri gi palupu e huriki a bakovi ri tahoka a pida i ravulu rua i rike. Ri here na kabu ne tamane ria a rane ria,
NUM 1:19 i ramai a ngava e BAKOVI DAGI i vakuku e Moses vona. Na tahuna e Moses i gi palupu a rane ria, e huriki a Israel ri made na tabeke i ngeki ne Sinai.
NUM 1:20 Na kabu ne Reuben, ra tabua ne Israel, ri bole e huriki a bakovi ri tahoka a pida i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:21 E huriki a bakovi na kabu ne Reuben, ni gi palupu lobo ri ala 46,500.
NUM 1:22 Na kabu ne Simion, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:23 E huriki a bakovi na kabu ne Simion, ni gi palupu lobo ri ala 59,300.
NUM 1:24 Na kabu ne Gad, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:25 E huriki a bakovi na kabu ne Gad, ni gi palupu lobo ri ala 45,650.
NUM 1:26 Na kabu ne Iuda, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:27 E huriki a bakovi na kabu ne Iuda, ni gi palupu lobo ri ala 74,600.
NUM 1:28 Na kabu ne Isikar, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:29 E huriki a bakovi na kabu ne Isikar, ni gi palupu lobo ri ala 54,400.
NUM 1:30 Na kabu ne Sebulun, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:31 E huriki a bakovi na kabu ne Sebulun, ni gi palupu lobo ri ala 57,400.
NUM 1:32 Ne huriki a hamone Iosep, ra kabu ne Epraim, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:33 E huriki a bakovi na kabu ne Epraim, ni gi palupu lobo ri ala 40,500.
NUM 1:34 Na kabu ne Manase, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:35 E huriki a bakovi na kabu ne Manase, ni gi palupu lobo ri ala 32,200.
NUM 1:36 Na kabu ne Bensamin, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:37 E huriki a bakovi na kabu ne Bensamin, ni gi palupu lobo ri ala 35,400.
NUM 1:38 Na kabu ne Dan, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:39 E huriki a bakovi na kabu ne Dan, ni gi palupu lobo ri ala 62,700.
NUM 1:40 Na kabu ne Aser, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:41 E huriki a bakovi na kabu ne Aser, ni gi palupu lobo ri ala 41,500.
NUM 1:42 Na kabu ne Naptali, ri bole e huriki a bakovi a pida ne ria i ravulu rua i rike, ge ria a nugumaheto. Ri here a rane ria i ramai a kabu ne tamane ria.
NUM 1:43 E huriki a bakovi na kabu ne Naptali, ni gi palupu lobo ri ala 53,400.
NUM 1:44 E huriki a nugumaheto nga, e Moses e Aron, ru gi palupu. E huriki a nupesi ala ravulu a polona i rua (12) ne Israel, ri kori rua na leho iea ni here puru a rane ria.
NUM 1:45 A bakovi a pida ne ria i ravulu rua i rike, ri kara ni tuhori a tara na vabinga ne Israel. Ni here a rane ria i ramai a kabu ne tamane ria.
NUM 1:46 E huriki a bakovi, ni gi palupu lobo ri ala 603,550.
NUM 1:47 Na tahuna ni here puru a rane huriki, e huriki a bakovi na kabu ne Levi i uka ma ni here a rane ria,
NUM 1:48 a vuhuna e BAKOVI DAGI i takia e Moses i ta maea,
NUM 1:49 “Na tahuna o here puru a rane huriki a Israel, naha ni here a rane huriki a bakovi na kabu ne Levi. Naha ni gi ria.
NUM 1:50 Pali, o habi a leho ne ria ri gi matakari a kape na Ngava Dagi turana a maka mahalana, ri gi rata a leho ne ria. Ri gi kalohoa a kape turana a maka mahalana, ri gi matakari. A maka kape ne ria ri gi vakapesi halui na kape nau.
NUM 1:51 Na tahuna mu mariu tala na mada mu gu lakea na mada tara, e huriki a bakovi ne Levi kunana ri gi pukea a kape, ri gi kaloho a maka mahalana. Na tahuna mu rata a mada karaba, ria kunana ri gi vakapesia a kape. E huriki na kabu ranga nahea ri gi valai tabukoi na kape. E rei a viri ge rata mavonga, mu rabalakia.
NUM 1:52 A kabu ranga ne Israel ri gi vapopo turana kabu ne ria, ri gi vakapesi maka kape ne ria, ri gi vakabebe a kilakila na kabu takutaku ne ria.
NUM 1:53 Pali e huriki na kabu ne Levi ri gi vakapesi haluia a kape na Ngava Dagi, a maka kape ne ria ri gi tagaria, ma ge valai tabukoi vona tara viri, ge rata iau ga tahate ga vakabele a vuranga ne mua a Israel.”
NUM 1:54 Lakea e Moses i vakalongo e huriki a Israel vona a ngava iea, ri rata a maka maki i manga a ngava e BAKOVI DAGI i vakuku ia vona.
NUM 2:1 E BAKOVI DAGI i taki e Moses e Aron i ta maea,
NUM 2:2 “Na tahuna e huriki a Israel ri gi rata a mada, a bakovi takutaku ge vakapesia a kape vona tabukoi na kilakila na kabu vona. A kape ne ria ri gi vakapesi halui a Kape na Vaponga, ge mata lakea vona.
NUM 2:3 Na tabeke na nirikena haro, e huriki a hamone Iuda ri gi vakapesi a kape ne ria tabukoi na kilakila ne ria, i ramai a tara ne ria. A gare ne ria e Nason, e tune Aminadab.
NUM 2:4 A tara vona ri ala 74,600.
NUM 2:5 Tabukoi ne ria a kabu ne Isikar. A nupesi ne ria e Nataniel, e tune Suar.
NUM 2:6 A tara vona ri ala 54,400.
NUM 2:7 Muri ne ria a kabu ne Sebulun. A nupesi ne ria e Eliab, e tune Helon.
NUM 2:8 A tara vona ri ala 57,400.
NUM 2:9 A kabu i tolu nga na mada ne Iuda ri ala 186,400. Na tahuna ni laho, a kabu nga bara to laho muga.
NUM 2:10 Na tabeke mule puru, a kabu ne Reuben ri gi vakapesi a kape ne ria tabukoi na kilakila ne ria. A nupesi ne ria e Elisur, e tune Sedeur.
NUM 2:11 A tara vona ri ala 46,500.
NUM 2:12 Tabukoi ne ria a kabu ne Simion. A nupesi ne ria e Selumiel, e tune Surisadai.
NUM 2:13 A tara vona ri ala 59,300.
NUM 2:14 Muri ne ria, a kabu ne Gad. A nupesi ne ria e Eliasap, e tune Ruel.
NUM 2:15 A tara vona ri ala 45,650.
NUM 2:16 Ra mada ne Reuben, a kabu i tolu nga, ri ala 151,450. Na tahuna ni laho, ri gi pahamuri a maka kabu na mada muga, ra kabu ne Iuda.
NUM 2:17 Na tahuna ri laho ri gi vakabebe ri gi vakasiri a kilakila ne ria. E huriki na kabu ne Levi ri gi kaloho a mahalana Kape na Vaponga ge laho na kurukuruna. A kabu ranga ri gi laho ramai a muri ne ria ri made vona na mada.
NUM 2:18 Na tabeke na nirolona haro a kabu ne Epraim ri gi vakapesi a kape ne ria tabukoi na kilakila ne ria ge ramai a tara ne ria. A nupesi ne ria e Elisama, e tune Amihud.
NUM 2:19 A tara vona ri ala 40,500.
NUM 2:20 Tabukoi ne ria a kabu ne Manase. A nupesi ne ria e Gamaliel, e tune Pedasur.
NUM 2:21 A tara vona ri ala 32,200.
NUM 2:22 Muri ne ria a kabu ne Bensamin. A nupesi ne ria e Abidana, e tune Gideoni.
NUM 2:23 A tara vona ri ala 35,400.
NUM 2:24 A kabu nga i tolu, ri made na mada ne Epraim ri ala 108,100. Na tahuna ri laho ri gi pahamuri a maka kabu na mada ne Reuben.
NUM 2:25 Na tabeke mule sike a mada ne Dan. A kabu ne Dan ri gi hae a kape ne ria tabukoi na kilakila ne ria. A nupesi ne ria e Ahieser, e tune Amisadai.
NUM 2:26 A tara vona ri ala 62,700.
NUM 2:27 Tabukoi ne ria a kabu ne Aser. A nupesi ne ria e Pagiel, e tune Okran.
NUM 2:28 A tara vona ri ala 41,500.
NUM 2:29 Muri ne ria a kabu ne Naptali. A nupesi ne ria e Ahira, e tune Enan.
NUM 2:30 A tara vona ri ala 53,400.
NUM 2:31 A kabu nga ri made na mada ne Dan ri ala 157,600. Na tahuna ni laho ri gi laho na iku, ri gi ramai a kilakila ne ria.
NUM 2:32 Iea e huriki a Israel ni gi palupu lobo i ramai a kabu ne tamane ria. Ni gi palupu lobo e huriki na mada takutaku i ramai a tara ne ria, ri ala 603,550.
NUM 2:33 Pali a kabu ne Levi i uka ma ni gi turane huriki a Israel, i ramaia a ngava e BAKOVI DAGI i vakuku e Moses vona.
NUM 2:34 E huriki a Israel ri rata lobo a maki e BAKOVI DAGI i vakuku e Moses vona ri gi rata. E huriki lobo ri vakapesi a kape ne ria tabukoi na kilakila na kabu ne ria. Na tahuna ri laho, bara ri laho turana a kabu ne ria.
NUM 3:1 Na tahuna e BAKOVI DAGI i ta turane Moses na lolo e Sinai, a kabu ne Moses e Aron i maea:
NUM 3:2 E Aron i tahoka e tuna bakovi ala va. A tabua e Nadap. To pahamuria e Abihu, e Eleasar, e Itamar.
NUM 3:3 E tune Aron nga ni biri, ge ria a prister.
NUM 3:4 Na tahuna ri made na tabeke i ngeki ne Sinai, e Nadap e Abihu ru habi a kanono ne BAKOVI DAGI, na tahuna e BAKOVI DAGI i uka ma i taki rua ru gu habi vona. Lakea e BAKOVI DAGI i rabalaki rua, ru bala liu a hamone rua. Pali e Eleasar e Itmar kunana ru leho manga a prister na tahuna e Aron i tabana ni mahuri.
NUM 3:5 E BAKOVI DAGI i takia e Moses i ta maea,
NUM 3:6 “O tuli valai e huriki a bakovi ne Levi ga gamai ria, ge ria a bolekori ne Aron.
NUM 3:7 Ri gi leho na leho na Kape na Vaponga, ri gi tuhori e huriki a prister turana e huriki lobo.
NUM 3:8 Na tahuna ri leho, ri gi matakari kamumu a mahalana kape, ri gi matakari kamumu e huriki a Israel.
NUM 3:9 E huriki a Levi ri tahoka a leho i taku kunana. Ne huriki a Israel lobo, ria kunana ri gi rata vakaroro a leho ne Aron, turane huriki e tuna.
NUM 3:10 O vulaki kunana e Aron, turana e huriki e tuna, ri gi leho manga a prister. Pali e huriki ranga ri gi valai tabukoi, ni gi rabalaki.”
NUM 3:11 E BAKOVI DAGI i takia e Moses i ta maea,
NUM 3:12 “Ngane a vulaki e huriki a bakovi na kabu ne Levi, ge ria a tara nau kunana. Na tahuna a rabalaki a koma tabua ne huriki a Egipto, a vulaki a tabua bakovi ne huriki a Israel, a maka sipsip, a bulmakau, ge ne nau. Pali ngane i uka ma ga bole a tabua bakovi ne huriki a Israel, a vuhuna a kabu ne Levi ri bole a murine ria, ge ria a vora nau. Iau e BAKOVI DAGI a takia a ngava iea.”
NUM 3:14 Na tabeke i ngeki ne Sinai e BAKOVI DAGI i takia e Moses i ta maea,
NUM 3:15 “O gi e huriki a hamone Levi, o here ramai a kabu ne tamane ria takutaku. O here a rane huriki a koma bakovi ne ria ri tahoka a keva i taku i rike.”
NUM 3:16 Lakea e Moses i ramai a maka ngava e BAKOVI DAGI i vakukua vona.
NUM 3:17 E Levi i tahoka e tuna bakovi to ala tolu: e Gerson, e Kohat, e Merari.
NUM 3:18 A rane tune Gerson a bakovi ra nga: e Libni rua e Simei.
NUM 3:19 A rane tune Kohat ra nga: e Amram, e Ishar, e Hebron, e Usiel.
NUM 3:20 A rane tune Merari ra nga: e Mali, e Musi. E huriki a hamone Levi ri pesi muri mai a rane huriki e tubune ria nga.
NUM 3:21 E huriki a hamone Gerson ri tahoka a kabu i rua: a kabu ne Libni, a kabu ne Simei.
NUM 3:22 A koma bakovi ne ria ri tahoka a keva i taku i rike, ni gi palupu, ri ala 7,500.
NUM 3:23 Re huriki nga ri rata a mada ne ria na dahana Kape na Vaponga na tabeke na nirolona haro.
NUM 3:24 E Eliasap e tune Lael ia a nupesi ne ria.
NUM 3:25 A leho ne ria ni matakari a Kape na Vaponga, a maki ni kapina, a kala dagi na matana kape,
NUM 3:26 a mota, a kala ni kapi halui a kape, a dede, a kala na ngavana nure. Ri gi rata lobo a leho ni matakari a maki nga.
NUM 3:27 E huriki a Kohat ri tahoka a kabu i va: a kabu ne Amram, a kabu ne Isar, a kabu ne Hebron, a kabu ne Usiel.
NUM 3:28 E tune ria bakovi ri tahoka a keva i taku i rike, ri ala 8,600. A leho ne ria ni tagari a kape.
NUM 3:29 Ra hamone Kohat nga, ri gi rata a mada ne ria na tabeke mule puru na kape.
NUM 3:30 E Elisapan, e tune Usiel, ia a nupesi ne ria.
NUM 3:31 A leho ne ria ni matakari a Tava na Ngava Dagi, a dede, a butu na lam, a maka dede na nihabi, a maka pelete, a ulo ni rata a leho na Tabeke Nitaba, a kala dagi ni vulalakari a Tabeke Nitaba Hateka, a maki ranga ni rata na kape. Ri gi rata lobo a maka leho ni matakari a maki nga.
NUM 3:32 E Eleasar, e tune Aron a prister, i matakari e huriki a matakari na kabu ne Levi. I matakari e huriki ri rata leho pololilo na tabeke ni taba na kape.
NUM 3:33 E huriki a Merari ri tahoka a kabu i rua: a kabu ne Mali, a kabu ne Musi.
NUM 3:34 E huriki e tune ria bakovi ri tahoka a keva ne ria i taku i rike, ri ala 6,200.
NUM 3:35 A nupesi ne ria e Suriel, e tune Abihail. E huriki a tara nga, ri gi rata a mada ne ria mule sike na kape.
NUM 3:36 A leho ne ria ni matakari a maka karona kape, a maka butuna kape, a maka tava ni vakapesi langa a maka butu, a maka kai ne vona ni roka a maka butu, turana a maka maki ranga ne vona ni vakatora a kape.
NUM 3:37 A maka butu, a tava ni vakapesi langa a butu na nure ni tura halui a kape, a maka niroka, a mota ni kolotata a kape vona, ngi ranga bara ri matakari.
NUM 3:38 E Moses, e Aron turane huriki e tuna, ri gi vakapesi a kape ne ria na tabeke na nirikena haro na matana kape na Vure. Ri gi madekari a Tabeke Nitaba, ri gi matakari e huriki a Israel, ma ri gi valai tabukoi, ni gi rabalaki.
NUM 3:39 E Moses e Aron ru ramai a nitane BAKOVI DAGI, ru gi e huriki a bakovi na kabu ne Levi ri tahoka pali a keva i taku i rike, ri ala 22,000.
NUM 3:40 E BAKOVI DAGI i takia e Moses i ta maea, “E huriki a tabua bakovi ne mua a Israel, ne nau kunana. O gi e huriki a tabua bakovi ri tahoka a keva i taku i rike, o here a rane ria.
NUM 3:41 Pali iau bara kuloi ne huriki na kabu ne Levi, re huriki a bakovi nga, ga bole e huriki a Levi ge ria a tara nau. Ga bole tabu a maka tabua na bulmakau ne huriki a Levi, ge bole a murine ria, a maka bulmakau ne huriki a Israel. Iau e BAKOVI DAGI a ta maea.”
NUM 3:42 Lakea e Moses i muri maia a nitane BAKOVI DAGI i gi e huriki a tabua bakovi ne huriki a Israel.
NUM 3:43 Ri tahoka a keva i taku i rike, ri ala 22,273.
NUM 3:44 E BAKOVI DAGI i takia e Moses i ta maea,
NUM 3:45 “Ngane o habi nau a kabu ne Levi, ri gi kuloi e huriki a tabua bakovi ne huriki a Israel, ge ria a tara nau. Ri gi habi nau a bulmakau ne ria, ge kuloi a maka bulmakau ne huriki a Israel. Iau e BAKOVI DAGI a ta maea.
NUM 3:46 A tabua bakovi ne huriki a Israel ri kupo hateka ne huriki a Levi, ri ala 273. Ngane mu kona mule, re huriki a bakovi nga, ri ala 273.
NUM 3:47 O bole a silva moni ge lima takutaku na bakovi ne ria, ne vona ni kona mule ria. A nimavana silva i ramai a nimavana maki na tahuna iea.
NUM 3:48 O habi a moni nga ne Aron turane huriki e tuna, ga mapane huriki a Israel ri ala 473.”
NUM 3:49 Lakea e Moses i bole a moni ge kona mule e huriki a tabua ne Israel, e huriki a Levi i uka ma ri kuloi ria.
NUM 3:50 E Moses i bole a moni silva i 1,365, i ramai a nimavana moni na tahuna iea.
NUM 3:51 Muri e Moses i habi a moni, a makoli ne Aron, ne huriki e tuna bakovi, i ramai a nita ne BAKOVI DAGI i vakuku e Moses vona.
NUM 4:1 E BAKOVI DAGI i taki e Moses e Aron, i ta maea,
NUM 4:2 “Muru here a rane huriki a bakovi na tara ne Kohat, na kabu ne Levi.
NUM 4:3 Muru here a rane huriki a bakovi ri tahoka a pida i ravulu tolu, i harena na pida i ravulu lima, re huriki a bakovi ri kara ni rata a leho pololilo na Kape na Vaponga.
NUM 4:4 “A leho ne ria ne vona ni matakari a Kape na Vaponga, a maka maki ni taba hateka.
NUM 4:5 Na tahuna e huriki a Israel ri gi pea a mada ni lakea na tabeke tara, e Aron turane huriki e tuna bakovi ri gi dili na Kape na Vaponga, ri gi parua a kala dagi i naviri dili a Tava na Ngava Dagi, ri gi kavitagua a tava na kala iea.
NUM 4:6 Ri gi naviri purua a kala na kulina lui kamumu, ri gi ru polomelia a kala gomagoma ne vona ni kavitagu loboa, bara ri rodo polo na halui a binole i rua, ri kalohoa.
NUM 4:7 “Ri gi bole a kala gomagoma, ri gi kavitagua a dede ni ru langa a bret vona, ge a nihabi ne BAKOVI DAGI. Ri gi bole a pelete, a tavila na havu mangisipa, a maka pelete na maka nihabi ranga, a maka botol ne vona a nihabi na vain, a bret ni vakasiri vakaroro ni gi ru langa palupu lobo na kala gomagoma.
NUM 4:8 Ri gi kavitagu lobo na kala vururu a maka maki nga, ri gi bole a kulina lui ri gi kavitagua a kala vururu, ri gi rodo dili na halui a binole ge rua.
NUM 4:9 “Ri gi bolea a kala gomagoma, ri gi kavitagua a butuna lam, a maki ni kisi a vik vona, a pelete kiroko ne vona ni tahoni a habulo na kanono, a maka botol na vel.
NUM 4:10 Ri gi kavitagua ra kala gomagoma iea na kulina lui, ri gi ru langa na maki tara bara ni kaloho.
NUM 4:11 “Muri ri gi kavitagua na kala gomagoma a dede ni rata na gol, ri gi kavitagua ra kala iea na kulina lui, ri gi rodo dili na halui a binole.
NUM 4:12 Muri ri gi bolea a kala gomagoma, ri gi bunu a maka tavila ni rata a leho ne ria na Tabeke Nitaba. Muri ri gi bunu kari tabua na kulina lui, ri gi ru langa na binole, bara ri kaloho.
NUM 4:13 “Ri gi bole tala na dede a habulo, ri gi kavitagua na kala kuakua a dede.
NUM 4:14 Ri gi bole lobo a maka maki ni rata a leho ne ria vona na dede: a maka tavila ni guru a habulo, a maka kinau, a maka savol kiroko, a maka pelete kiroko ne vona ni bole a dara na nihabi. Ri gi ru langa na dede a maka maki, muri ri gi kavitagu na kulina lui, ri gi rodo dili na halui a binole ge rua, bara ri kaloho.
NUM 4:15 “Na tahuna e Aron, e tuna mai ri kavitagu lobo a maki i taba, muri e huriki e tune Kohat bara ri kaloho a maka mahala na kape, pali nahea ri gi padoi a maka maki nga. Ria bara ri padoi, bara ri mate. Na tahuna ri pe a mada, e Aron turane huriki e tuna, ri gi kavitagu kamumu a maka maki nga. Ra maki nga, e huriki e tune Kohat kunana ri kaloho.
NUM 4:16 “E Eleasar, e tune Aron a prister, ge matakari a kape, a vel na lam, a namona oliv ne vona ni gamai e huriki a prister, a havu mangisipa, a maka nihabi na vit, a nibiri, turana a maka maki nau ri tabuli na kape.”
NUM 4:17 E BAKOVI DAGI i taki e Moses e Aron, i ta maea,
NUM 4:18 “Na tahuna e huriki a Kohat ri valai tabukoi na maki nau, mu matadoko ne ria, ma ri gi ratea tara naro hale, ga rabalaki ria. I mavonga kunana, e Aron turane huriki e tuna, ri gi dili muga taro, ri gi ru a leho na bakovi takutaku na kabu ne Kohat. Ri gi taki ria vona a ra maki ri gi kaloho.
NUM 4:20 Pali e huriki a Kohat, nahea ri gi dili na kape, ri gi matai a maka maki ni taba, ma ga rabalaki ria.”
NUM 4:21 E BAKOVI DAGI i takia e Moses i ta maea,
NUM 4:22 “O gi e huriki a bakovi na tara ne Gerson, re huriki a hamone Levi.
NUM 4:23 O here puru a rane huriki ri tahoka a pida i 30, i harena na pida i 50, re huriki ri kara ni rata a leho pololilo na Kape na Vaponga.
NUM 4:24 Ri tahoka a leho ni kaloho a maka maki nga:
NUM 4:25 a kadis, a kala i kavitagua, a kulina lui i kavitagu a kala, a kala dagi na mataroho,
NUM 4:26 a maka mota, a maka kala ne vona ni kapi halui a nure na kape, a dede, a kala dagi na mataroho na nure, a maka maki kiroko ne vona ni vakatora a kape, a nure. A kabu ne Gerson i tahoka a leho ni kaloho kamumu a maka maki nga.
NUM 4:27 E Aron, turane huriki e tuna bakovi, ri gi matakari e huriki a Gerson, ri gi vakasiri ria vona a maki ri gi kaloho.
NUM 4:28 E huriki a Gerson ri gi rata a maka leho nga na kape. E Itmar, e tune Aron a prister, ge matakari ria.
NUM 4:29 “Na kabu ne Merari, o here puru ge ramai e huriki a gare ne ria a rane ria.
NUM 4:30 O here puru a rane huriki a bakovi ri tahoka a pida ne ria i 30, i harena ne 50, re huriki ri kara ni rata a leho pololilo na Kape na Vaponga.
NUM 4:31 Ri tahoka a leho ni kaloho a butu na kape, a maka kai ne vona ni vakatora a nure, a maka vuhubutu ne vona ni vakapesi a butu,
NUM 4:32 a maka butu na nure, a maka vuhubutu ni vakapesi langa a maka butu na nure vona, a maka mota ne vona ni vakatora a nure, a maka maki ranga na nure. O taki a bakovi takutaku a ra maki ge kaloho.
NUM 4:33 E huriki a Merari ri gi rata a maka leho nga na Kape na Vaponga. E Itamar, e tune Aron a prister, ge matakari ria.”
NUM 4:34 Lakea e Moses, e Aron, turane huriki a nupesi, ri here puru a rane huriki na kabu ne Kohat i ramai a rane huriki a kabu ne ria.
NUM 4:35 A pida ne ria i ravulu tolu, i harena ne ravulu lima. Re huriki ri kara ni rata a leho pololilo na Kape na Vaponga.
NUM 4:36 E huriki ni here a rane ria, ri ala 2,750.
NUM 4:37 E Moses, e Aron ru here a rane huriki na kabu ne Kohat ri gi leho na roho na vaponga, i ramai a nitane BAKOVI DAGI i vakuku e Moses vona.
NUM 4:38 A Kabu ne Gerson, ngi ranga ni here muri mai a rana nupesi ne ria, a rane ria.
NUM 4:39 A pida ne ria i ravulu tolu, i harena ne ravulu lima, ri kara ni leho na roho na vaponga.
NUM 4:40 Ni gi palupu ria, ri ala 2,630.
NUM 4:41 Re huriki nga, a rane huriki na kabu ne Gerson, ri leho na roho na vaponga, i ramaia a ngava ne BAKOVI DAGI.
NUM 4:42 E huriki a Merari, ngi ranga, ni gi ramai a vuhune ria na kabu takutaku ne ria.
NUM 4:43 A bakovi ri tahoka a pida i ravulu tolu, i harena na pida i ravulu lima, ri valai, ri leho na roho na vaponga.
NUM 4:44 Ni gi ramai a kabu ne ria, ri ala 3,200.
NUM 4:45 Re huriki nga a hamone Merari, e BAKOVI DAGI i vakuku e Moses, e Aron vona ru gu gi.
NUM 4:46 Lakea e Moses, e Aron, turana e huriki a nupesi ne Israel, ri gi e huriki a hamone Levi i ramai a kabu takutaku ne ria.
NUM 4:47 A bakovi a pida ne ria i ravulu tolu, i harena na pida i ravulu lima, ri valai, ri rata a leho ni kaloho a maka mahalana kape,
NUM 4:48 Ni gi palupu lobo ria, ri ala 8,580.
NUM 4:49 Ri ramai a nitane BAKOVI DAGI i vakuku e Moses vona, ri here puru lobo a rane huriki na kabu ne Levi. Ri gi rata a leho, ri gi kaloho a maka mahalana kape.
NUM 5:1 E BAKOVI DAGI i takia e Moses i ta maea,
NUM 5:2 “O vakuku e huriki a Israel ri gi tono tala e huriki ri tahoka a gilanga na patala, ri tahoka a kume i rali tala na ngarava, a kakaine ria i rali tala vona a naru o a dara, e huriki ri padoi a viri i mate. Re huriki nga, i uka ma ri matapado na matagu, ri gi made polovavo na mada.
NUM 5:3 Mu tono tala e huriki a bakovi a ngatavine ri muto, ma ri gi ratea a mada na hini a made vona ge muto.”
NUM 5:4 Lakea e huriki a Israel ri muri mai a ngava e BAKOVI DAGI i taki e Moses vona, ri tono tala e huriki ri tahoka a maka gilanga maea.
NUM 5:5 E BAKOVI DAGI i takia e Moses i ta maea,
NUM 5:6 ge taki e huriki a Israel, ge ta maea, “A viri i ngalahere nau, i rata a naro hale na viri tara, lakea i matakilaka vona a naro hale vona, a bakovi iea i tahoka a ngava.
NUM 5:7 Ge taki tala a naro hale vona, ge konea a naro hale i ratea. Ge habi a moni ge karea a naro hale i ratea. Ge ru langa tabu ge popote ( ), ge habi lakea na viri i rata a naro hale vona.
NUM 5:8 Pali na tahuna a viri i bole a moni i mate pali, i uka viri vona ge bole a mapa, a bakovi i habi a moni ge habi ne BAKOVI DAGI, ge bole e huriki a prister. Ge habi tabua a sipsip a toga, ge a nihabi ne vona ni kavitagu a naro hale vona.
NUM 5:9 Na tahuna e huriki a Israel ri taparaki valai a maki ni gamai ri gi habi nau, ra maki nga ne vone huriki a prister ra ri bole na limane ria.
NUM 5:10 A prister takutaku ge bole a nihabi nga ge ne vona.”
NUM 5:11 E BAKOVI DAGI i takia e Moses ge taki e huriki a Israel, ge ta maea,
NUM 5:12 “A ngatavine tara ge ruru ge rata a naro na molenga,
NUM 5:13 lakea i mahita kapiloho turana a bakovi tara, e girihina i uka ma i masia, i katoki, i muto ngane. Ge uka tara viri ge matai rua,
NUM 5:14 lakea e girihina i bage vona a ngatavine iea ra i vakamuto mule ia, o ge bage tavula vona e girihina, pali e girihina i uka ma i vakamuto mule ia,
NUM 5:15 ge tuli lakea na prister a ngatavine. A bakovi ge bole a kilo ge taku na plaoa ni rata na barli, ge a nihabi. Pali nahea ge guru langa a namona oliv vona a nihabi iea, o ge ru a havu mangisipa, a vuhuna ra nihabi iea ne vona a bakovi i bage ne girihina, i ratea a nihabi ni gi matakilaka vona e girihina i rata a naro hale, o i uka.
NUM 5:16 “A prister ge tuli vilia a ngatavine ge pesi na matagu tabukoi na dede.
NUM 5:17 A prister ge guru dili na ulo kiroko a naru ni gamai. Ge dili na kape ge bole ranga malala, ge ru na naru bara i nami hurari a naru.
NUM 5:18 Na tahuna a ngatavine i tabana ni pesi na matagu, a prister ge vuka a vuna ngatavine ni viri, ge tabuli tavula a vuna. A prister ge bole a plaoa na nihabi na bakovi i bage ne girihina, ge ru na limana ngatavine. A prister ge nugua a ulo na naru vagole. Ra naru iea ne vona ni ruduraha.
NUM 5:19 A prister ge ratea a ngatavine ge kaba ge ta maea, ‘Ioe i uka ma o mahita turana tara bakovi, i uka ma o vakamuto mule ioe na tahuna o made na tarune kakaimu, a naru ni ruduraha i uka ma ge ratapile ioe.
NUM 5:20 Pali ioe bara o ruru o rata a naro na molenga na tahuna o made na tarune girihimu, o vakamuto mule ioe, o mahita turana a bakovi tara i uka ma e girihimu.’
NUM 5:21 Ngane a prister ge hudotala a ngava tabu, ge ta maea, ‘Ioe bara o ratea a naro iea, e BAKOVI DAGI i kara ni rata ioe a maki tavula liu na matane huriki, bara i dili na kavutumu i ratea a palomu i repo, ge veo a tagamu.
NUM 5:22 Ra naru iea ge rata ioe, bara i dili na kavutumu i ratea a tamudimu i repo, bara i veu a tagamu.’ “A ngatavine ge koli ge ta maea, ‘I muholi. E BAKOVI DAGI ge rata mavonga.’
NUM 5:23 “A prister ge herea ra ngava hateka iea na raukea, ge vahiloloa a nihere na ulo i tahoka a naru vagole vona.
NUM 5:24 Muri a prister ge habia na ngatavine a naru iea, ge nua, ge vakahalea a kavutuna.
NUM 5:25 Pali muga, a prister ge bolea a plaoa na nihabi na limana ngatavine, ge tabari iau vona. Muri ge bole lakea na dede.
NUM 5:26 Ge bole a plaoa popote ge ratea e BAKOVI DAGI ge luhoia, ge gutu na dede ge a nihabi. Muri ge habia na ngatavine a naru vagole iea ge nua.
NUM 5:27 Bara a ngatavine iea i mahita muga turana tara bakovi, a naru iea bara i rata ia i bole a nimadihi dagi, bara i repo a kavutuna, i veo a tagana. Na tahuna e huriki a viri vona ri ngaru ni harogi a viri tara bara ri ta maea, “A Vure ge rata hale ioe, i manga a hini i rata halea a ngatavine iea.
NUM 5:28 Pali bara ngatavine iea i uka ma i ratea tara naro hale, ra ngatavine iea i matapado na matagu, bara i uka ngava na matane BAKOVI DAGI, bara i kara ni singou, ni poda a koma.
NUM 5:29 “Na tahuna a ngatavine i mahita turana tara bakovi, e girihina i bage vona, mu ramai kunanea a vinara iea.
NUM 5:30 Mu ramai tabua a vinara iea na tahuna a bakovi i tahoka a niluhoi hale i bage ne girihina ta i mahita turana a bakovi tara. A bakovi ge luhoi maea, ge tulia a ngatavine ge pesi na matagu tabukoi na dede, ge rata a prister a maki nga.
NUM 5:31 E girihina ngatavine bara i uka ngava, pali na tahuna a ngatavine i tahoka a ngava, bara i bole a mapana na naro hale i ratea.”
NUM 6:1 E BAKOVI DAGI i takia e Moses,
NUM 6:2 ge taki e huriki a Israel ge ta maea, “A bakovi o a ngatavine i rata a nita muholi ge habi mule ia ne nau na tahuna ranga,
NUM 6:3 nahea ge ninu a vain o ge ninu a bia. Nahea ge ninu a naruna vain, nahea ge kani a kanena vain i rara, nahea ge kani a kanena vain ni rara na haro.
NUM 6:4 Na parava vakaroro ge nugutatea a nita muholi iea, ne vona ni habi mule ia ne nau, nahea ge kani a maki ni rata na kai, a vain. A pagana o kulina kanena vain, ngi ranga nahea ge kani.
NUM 6:5 “Na parava vakaroro ge ramaia a nita muholi iea ge habi mule ia ne nau. Nahea ge palakudua a vuna, nahea ge alia a karirana. Ra bakovi iea ne nau kunana. Na tahuna nga nahea ge palakudu a vuna o ge ali a karirana, lakea bara i malamala.
NUM 6:6 Na parava vakaroro na tahuna i habi mule ia ne BAKOVI DAGI, nahea ge lakea tabukoi na podana viri i mate.
NUM 6:7 E tamana, e kinana, a viri vona ranga ri mate, nahea ge lakea tabukoi ne ria, ma ge muto na matagu. A vuna i ola, i vakasiri i habi mule ia na Vure.
NUM 6:8 Na parava vakaroro ge ramaia ra nita muholi ne vona ni habi mule ia ne nau, bara i malamala.
NUM 6:9 “Bara bakovi tara ge mate vakaturutu na dahana, ra matenga na bakovi iea bara i vakamuto a vuna, ra i ta muholi vona ge nau. Ra bakovi iea ge dava na parava i polorua ge palia a vuna. Na parava nga i uka ma ge matapado na matagu.
NUM 6:10 Na polotoluna parava ge bole a balu ge rua, ge bole valai na matana Kape na Vaponga, ge habi nau.
NUM 6:11 A prister ge bolea tara, ge habia nau, ge a nihabi ni puga vuroki a naro hale, a balu tara ge a nihabi ni gi gutu-vuro. Ra bakovi i made tabukoi na podana bakovi i mate, i muto pali, ra nihabi nga i rua, ru kavitagua a bakovi iea. Na parava iea kunana, ra bakovi iea ge ru a kilakila vona tabu a vuna, ge ne nau tabu.
NUM 6:12 Ge vakatubu tabu, ge gi a maka parava i ta muholi vona ge habi mule ia ne nau. Nahea ge luhoi ra parava ranga muga ra i habi ia ne nau, a vuhuna ra vuna i ta muholi vona ta ge nau i muto pali. Ra bakovi iea i muto pali, ngane ge bole vilia nau tara tuna sipsip a toga, a pida vona ge taku, ge a nihabi na rarenga.
NUM 6:13 “Na tahuna a bakovi i hudotalea pali a nita muholi vona, ni gi bole ge pesi tabukoi na mataroho na Kape na Vaponga.
NUM 6:14 Ge habi nau a nihabi ge tolu. Ge bolea tara tuna sipsip a toga ge tahoka a pida ge taku, ge a nihabi gutu-vuro, a tuna sipsip a kinana ge tahoka a pida ge taku, ge a nihabi na rarenga, a sipsip a toga ge gavutuvutu, ge a nihabi na nivalemu.
NUM 6:15 Ge bole a bret i uka is ge tahoni na kulopi, ge bole valai, ge a nihabi. Ra kulopi iea ge tahoka a maka tabekena bret dagi ni rata na plaoa kamumu, ni vuli turana a namona oliv, turana a maka bisket ni ravu na vel. Ge ramaia a narona a nihabi iea ge ratea a nihabi na vit, a nihabi na vain.
NUM 6:16 “A prister ge habi nau a maki nga ge rata a nihabi na naro hale, a nihabi gutu-vuro.
NUM 6:17 Muri ge rabalakia a sipsip a toga, ge habi turana a maka bret ni tahoni na kulopi, ge a nihabi na nivalemu ne BAKOVI DAGI. A nihabi na vit, a vain ranga ge rata.
NUM 6:18 Na tahuna a bakovi i hudotalea pali a nita muholi vona, ge made tabukoi na mataroho na Kape na Vaponga ge palia a vuna, ge bole a vuna ge ru na kanono ni gutu a nihabi na nivalemu vona.
NUM 6:19 “Muri a prister ge bolea a gepena sipsip a toga, ge nonoa na ulo. Na tahuna a bobona sipsip i munae pali, a prister ge bole ranga bobona, ge bole talea na kulopi tara balena bret turana a bisket ge taku, ge ru na limana bakovi iea.
NUM 6:20 Muri a prister ge bole mule na bakovi a maki ni kani nga, ge tabari iau vona. Ra nihabi iea, ne nau kunana, ge bole a prister ge kani. A siana, a pona sipsip a toga, ngi ranga ne vona a prister. Na tahuna a prister i rata lobo a maka naro nga, a bakovi iea i kara ni ninu a vain tabu.
NUM 6:21 “Iea a vinara na bakovi i ta muholi ge habi mule ia ne nau e BAKOVI DAGI. Na tahuna a bakovi tara i ta muholi ge habia nau tara maki, ra ngava dagi i takia ge ta muholi vona.”
NUM 6:22 E BAKOVI DAGI i takia e Moses, “O takia e Aron turane huriki e tuna bakovi, ri gi gamai e huriki a Israel vona a ngava kamumu nau. Ri gi ta maea,
NUM 6:24 ‘E BAKOVI DAGI ge gamai mua, ge tagari mua.
NUM 6:25 A matane BAKOVI DAGI ge parai mua, ge rata kamumu mua.
NUM 6:26 E BAKOVI DAGI ge hate kamumu ne mua, ge habi a nivalemu ne mua.’
NUM 6:27 “Na naro iea kunana, e huriki a Israel bara ri galea a ragu e BAKOVI DAGI. Muri bara gamai ria.”
NUM 7:1 Na parava e Moses i vakalobo ni vakapesia a kape, muri i bolea a nibiri i gamai a kape turana a maka mahalana, a dede turana a maka mahalana. i rata ria ri malamala.
NUM 7:2 E huriki a nupesi na kabu takutaku ri bole valai a maka nihabi ne BAKOVI DAGI. Re huriki nga, ria a nupesi ne Israel, ri matakari a leho ni gi palupu a rane huriki.
NUM 7:3 Ri bole valai na kape ne BAKOVI DAGI a karis i polotara, a bulmakau i ravulu a polona i rua, ri habi ne BAKOVI DAGI. A karis i taku ne vona a nupesi i ala rua. A nupesi i taku i bole vilia a bulmakau i taku.
NUM 7:4 Lakea e BAKOVI DAGI i takia e Moses i ta maea,
NUM 7:5 “O bole a maka nihabi i habi nau e huriki a nupesi, o habi ne huriki a kabu ne Levi. Ri gi rata a leho vona pololilo na Kape na Vaponga. A leho ne ria ri gi rata a leho ni kaloho a maka mahalana kape.”
NUM 7:6 Lakea e Moses i bole a maka karis, a bulmakau i habi ne huriki a kabu ne Levi.
NUM 7:7 I habi na kabu ne Gerson a karis i rua, a bulmakau i va, ri gi rata a leho vona.
NUM 7:8 I habi na kabu ne Merari a karis i va, a bulmakau i polotolu, ri gi rata a leho vona. E Itmar, e tune Aron a prister, i matakari ria.
NUM 7:9 Pali e Moses i uka ma i habi a karis, a bulmakau ne huriki na kabu ne Kohat, a vuhuna a maki na kape ni gamai bara ri kaloho kunana.
NUM 7:10 Na tahuna ni gamai a dede, e huriki a nupesi ri bole valai a maka nihabi ri habi na Vure.
NUM 7:11 Lakea e BAKOVI DAGI i takia e Moses, “E huriki a nupesi na kabu takutaku ri gi habi a nihabi ne ria, ne vona ni gamai a dede. Na parava takutaku, a nupesi i taku ge bole valai a nihabi vona.”
NUM 7:12 Na mugana parava, a nupesi ne huriki a Iuda, e Nason e tune Aminadab, i bole valai a nihabi vona:
NUM 7:13 a pelete silva, a nimavana i 130 sekel, a tavila silva, a nimavana i 70 sekel. Ra nimavana maki nga, i ramai a nimavana a sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:14 a vidiru ni rata na gol, a nimavana i 10 sekel, i vonu vona a havu mangisipa;
NUM 7:15 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:16 a meme a toga, ne vona a nihabi na naro hale;
NUM 7:17 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga a nihabi ne Nason e tune Aminadab.
NUM 7:18 Na ruana parava (2nd), a nupesi ne huriki a Isikar, e Nataniel e tune Suar, i bole valai a nihabi vona:
NUM 7:19 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:20 a vidiru ni rata na gol a nimavana i 10 sekel, i vonu vona a havu mangisipa;
NUM 7:21 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:22 a meme a toga, ne vona a nihabi na naro hale;
NUM 7:23 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima a pida ne ria i taku, ne vona a nihabi na nivalemu. Ra maki nga, a nihabi ne Nataniel e tune Suar.
NUM 7:24 Na toluna parava (3rd), a nupesi ne huriki a Sebulun, e Eliab e tune Helon, i bole valai a nihabi vona:
NUM 7:25 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana a sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:26 a vidiru ni rata na gol a nimavana i 10 sekel, i vonu vona a havu mangisipa;
NUM 7:27 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:28 a meme a toga ne vona a nihabi na naro hale;
NUM 7:29 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga, a nihabi ne Eliab e tune Helon.
NUM 7:30 Na vana parava (4th), a nupesi na kabu ne Reuben, e Elisur e tune Sedeur, i bole valai a nihabi vona:
NUM 7:31 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:32 a vidiru ni rata na gol a nimavana i 10 sekel, i vonu vona a havu mangisipa;
NUM 7:33 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:34 a meme a toga, ne vona a nihabi na naro hale;
NUM 7:35 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga, a nihabi ne Elisur e tune Sedeur.
NUM 7:36 Na limana parava (5th), a nupesi na kabu ne Simion, e Selumiel e tune Surisadai, i bole valai a nihabi vona:
NUM 7:37 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana namina oliv, ne vona a nihabi na vit;
NUM 7:38 a vidiru ni rata na gol, a nimavana i 10 sekel, i vonu vona a havu mangisipa;
NUM 7:39 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:40 a meme a toga, ne vona a nihabi na naro hale;
NUM 7:41 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga, a nihabi ne Selumiel, e tune Surisadai.
NUM 7:42 Na polotarana parava (6th), a nupesi na kabu ne Gad, e Eliasap e tune Deuel, i bole valai a nihabi vona:
NUM 7:43 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:44 a vidiru ni rata na gol, a nimavana i 10 sekel, i vonu vona a havu mangisipa;
NUM 7:45 a tuna bulmakau a toga, a sipsip a toga, a tuna sipsip a toga a pida vona i taku, ge a nihabi gutu-vuro;
NUM 7:46 a meme a toga, ne vona a nihabi na naro hale;
NUM 7:47 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga a nihabi ne Eliasap, e tune Deuel.
NUM 7:48 Na poloruana parava (7th), a nupesi na kabu ne Epraim, e Elisama e tune Amihud, i bole valai a nihabi vona:
NUM 7:49 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:50 a vidiru ni rata na gol, a nimavana i 10 sekel, i vonu vona a havu mangisipa;
NUM 7:51 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:52 a meme a toga ge a nihabi na naro hale;
NUM 7:53 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga, a nihabi ne Elisama, e tune Amihud.
NUM 7:54 Na polotoluna parava (8th), a nupesi na kabu ne Manase, e Gamaliel e tune Pedasur, i bole valai a nihabi vona:
NUM 7:55 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ge a nihabi na vit;
NUM 7:56 a vidiru ni rata na gol, a nimavana i 10 sekel, i vonu vona a havu mangisipa;
NUM 7:57 a tuna bulmakau a toga, a sipsip a toga, a tuna sipsip a toga i tahoka a pida i taku, ge a nihabi gutu-vuro;
NUM 7:58 a meme a toga, ne vona a nihabi na naro hale;
NUM 7:59 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga a nihabi ne Gamaliel, e tune Pedasur.
NUM 7:60 Na polovana parava (9th), a nupesi na kabu ne Bensamin, e Abidana e tune Gideoni, i bole valai a nihabi vona:
NUM 7:61 a pelete silva a nimavana i 130 sekel, a tavila silva, a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:62 a vidiru ni rata na gol, a nimavana i 10 sekel, i vonu vona a havu mangisipa;
NUM 7:63 a tuna bulmakau a toga, a sipsip a toga, a tuna sipsip a toga a pida vona i taku, ge a nihabi gutu-vuro;
NUM 7:64 a meme a toga ge a nihabi na naro hale;
NUM 7:65 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga, a nihabi ne Abidana, e tune Gideoni.
NUM 7:66 Na ravuluna parava (10th), a nupesi na kabu ne Dan, e Ahieser, e tune Amisadai, i bole valai a nihabi:
NUM 7:67 a pelete silva a nimavana i 130 sekel, a tavila silva, a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:68 a vidiru ni rata na gol a nimavana i 10 sekel, i vonu vona a havu mangisipa;
NUM 7:69 a tuna bulmakau a toga, a sipsip a toga, a tuna sipsip a toga a pida vona i taku, ge a nihabi gutu-vuro;
NUM 7:70 a meme a toga, ge a nihabi na naro hale;
NUM 7:71 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ge a nihabi na nivalemu. Ra maki nga, a nihabi ne Ahieser, e tune Amisadai.
NUM 7:72 Ne ravulu a mugana parava (11th), a nupesi na kabu ne Aser, e Pagiel e tune Okran, i bole valai a nihabi vona:
NUM 7:73 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana sekel na kape na tahuna iea. Ru vonu na plaoa kamumu ni vuli turana a namona oliv, ne vona a nihabi na vit;
NUM 7:74 a vidiru ni rata na gol, a nimavana i 10 sekel, i vonu vona a havu mangisipa;
NUM 7:75 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:76 a meme a toga, ge a nihabi na naro hale;
NUM 7:77 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga a nihabi ne Pagiel, e tune Okran.
NUM 7:78 Ne ravulu a ruana parava (12th), a nupesi na kabu ne Naptali, e Ahira e tune Enan, i bole valai a nihabi vona:
NUM 7:79 a pelete silva a nimavana i 130 sekel, a tavila silva a nimavana i 70 sekel. Ra nimavana pelete a tavila nga, i ramai a nimavana a sekel na kape na tahuna iea, ru vonu na plaoa kamumu ni vuli turana a namona oliv, ne vona a nihabi na vit;
NUM 7:80 a vidiru ni rata na gol, a nimavana i 10 sekel i vonu na havu mangisipa;
NUM 7:81 a tuna bulmakau a toga, a sipsip a toga, a tuna sipsip a toga a pida vona i taku, ne vona a nihabi gutu-vuro;
NUM 7:82 a meme a toga, ge a nihabi na naro hale;
NUM 7:83 a bulmakau a toga i rua, a sipsip a toga i lima, a meme a toga i lima, a tuna sipsip a toga i lima ri tahoka a pida i taku, ne vona a nihabi na nivalemu. Ra maki nga a nihabi ne Ahira, e tune Enan.
NUM 7:84 Ra maki nga lobo e huriki a nupesi ne Israel ri habi na tahuna ni gamai a dede. Muri ri gi a maka nihabi na dede: a pelete silva i ravulu a polona i rua, a tavila silva i ravulu a polona i rua, a vidiru gol i ravulu a polona i rua.
NUM 7:85 A nimavana pelete silva takutaku i 130 sekel, a tavila silva takutaku i 70 sekel. A maka nimavana silva lobo i 2,400 sekel, i ramai a nimavana sekel na kape na tahuna iea.
NUM 7:86 Ri taparaki valai a vidiru gol i ravulu a polona i rua, a nimavana vidiru takutaku i 10 sekel. A nimavana gol lobo i 120 sekel.
NUM 7:87 Ri taparaki valai a tuna bulmakau a toga i 12, a sipsip a toga i 12, a tuna sipsip a toga i 12 ri tahoka a pida i taku, ne vona a nihabi gutu-vuro, turana a maka plaoa ne vona a nihabi na vit; a meme a toga i 12, ne vona a nihabi na naro hale.
NUM 7:88 Ri taparaki valai a bulmakau a toga i 24, a sipsip a toga i 60, a meme a toga i 60, a tuna sipsip a toga i 60, ne vona a nihabi na nivalemu. Ra nihabi nga ni habi muri na dede ni gamai.
NUM 7:89 Na tahuna e Moses i dili na Kape na Vaponga ge ta turane BAKOVI DAGI, i longoa a lohona, i ta tala na murina ni dodo, na kurukuruna a agelo i rua na Tava na Ngava Dagi, i ta turana.
NUM 8:1 E BAKOVI DAGI i takia e Moses i ta maea,
NUM 8:2 “O takia e Aron na tahuna i ru a lam i polorua na maka butu ne ria pololilo na Tabeke Nitaba, ge ru kamumu ri gi paraia a kurukuruna a hini pololilo.”
NUM 8:3 Lakea e Aron i ramaia a nita e BAKOVI DAGI i vakuku e Moses vona, i ru a maka lam na rahana butu ri paraia a kurukuruna Tabeke Nitaba.
NUM 8:4 A maka butu na lam ni rata maea. Ni bole a gol, ni ubi na ama ni rata a butu, a maka rahana, a maka bagetua vona ri manga a keke. Ri rata manga a hini e BAKOVI DAGI i taki e Moses vona.
NUM 8:5 Muri e BAKOVI DAGI i takia e Moses i ta maea,
NUM 8:6 “O gale tala ne huriki a Israel, e huriki a Levi, o rata ria ri gi matapado na matagu.
NUM 8:7 O rata maea: O bole ranga naru ne vona ni rata a bakovi ge matapado na matagu, o voro tamali langa ne ria. Ri gi ali lobo a vune ria, a vungane ria, ri gi loi pasi a maka kala ne ria. Bara ri rata lobo ri matapado.
NUM 8:8 Muri ri gi bolea tara bulmakau karaba a toga, turana ranga plaoa ni vuli turana namona oliv, ne vona a nihabi na vit, ni gi habi turana bulmakau. Ri gi bolea tara bulmakau a toga, ne vona a nihabi na naro hale.
NUM 8:9 O taki e huriki a Levi ri gi pesi tabukoi na mataroho na Kape na Vaponga, turana e huriki a Israel lobo.
NUM 8:10 Na tahuna e huriki a Levi ri pesi na matagu, mua e huriki a Israel mu ru langa a limane mua na gine ria.
NUM 8:11 E Aron ge bole a murine huriki a Israel, ge habi nau e huriki a Levi, ge a nihabi na nitabari. Na naro iea kunana e huriki a Levi bara ri kara ni rata a leho nau.
NUM 8:12 “Muri e huriki a Levi ri gi ru langa a limane ria na gina bulmakau nga i rua. Ri gi habia tara, ge a nihabi na naro hale, a bulmakau tara, ge a nihabi gutu-vuro. Ra nihabi nga i rua, ne vona ni kavitagu a naro hale ne huriki a Levi.
NUM 8:13 E huriki a Levi ri gi pesi na matane Aron turane huriki e tuna. O habi ria nau ge manga a nihabi na nitabari.
NUM 8:14 Na naro iea kunana e huriki a Levi ri tebi ne huriki a tara ranga ne Israel, ge ne nau kunana.
NUM 8:15 “Na tahuna o rata ria ri matapado pali, o habi ria ne nau ri gi manga a nihabi na nitabari, ngane ri kara ni rata a leho na Kape na Vaponga.
NUM 8:16 A bole e huriki a Levi ge ne nau, a vuhuna ri bole a murine huriki a tabua ne huriki a Israel.
NUM 8:17 O longo kamumu. E huriki a tabua ne huriki a Israel, a tabua na maka bulmakau a sipsip ne nau kunana. A ru here ria pali na tahuna a rabalaki e huriki a tabua bakovi ne huriki a Egipto.
NUM 8:18 I mavonga a bole e huriki a Levi ri gi kuloi e huriki a tabua bakovi ne huriki a Israel.
NUM 8:19 A bole tala ne huriki a Israel e huriki a Levi. A habi ne Aron turane huriki e tuna a bakovi, ri gi rata a leho a taki e huriki a Israel vona ri gi rata pololilo na Kape na Vaponga, ri gi kavitagu e huriki a Israel, i uka ma mu gu lakea tabukoi na Tabeke Nitaba, ma mu gu lokovonga tabukoi bara ratapile mua.”
NUM 8:20 E Moses e Aron turane huriki a Israel lobo, ri rata ne huriki a Levi a maki e BAKOVI DAGI i vakuku e Moses vona.
NUM 8:21 E huriki a Levi ri muri mai a naro ni matapado na matane BAKOVI DAGI, ri loi pasi a varakia ne ria. Lakea e Aron i habi ria ne BAKOVI DAGI ri manga a nihabi na nitabari. I rata a nihabi ni kavitagu a naro hale ne ria ri gi matapado.
NUM 8:22 E huriki ri rata a maki lobo ne huriki a Levi, i manga a ngava e BAKOVI DAGI i vakuku e Moses vona. I mavonga e huriki a Levi ri kara ni rata a leho pololilo na Kape na Vaponga. E Aron turane huriki e tuna ri matakari ria.
NUM 8:23 E BAKOVI DAGI i takia e Moses i ta maea,
NUM 8:24 “E huriki a Levi ri tahoka a pida ne ria i ravulu rua a polona i lima i rike, ri kara ni rata a leho pololilo na Kape na Vaponga.
NUM 8:25 Ri kara ni ratea a leho iea ge harena na tahuna ri tahoka a pida i ravulu lima, muri bara ri malo.
NUM 8:26 Muri nahea ri gi nugu tabua a leho iea, pali bara ri tuhori kunana e huriki ri leho na Kape na Vaponga. O habia a ngava iea ne huriki a Levi ri gi rata maea.”
NUM 9:1 Na mugana keva na ruana pida, muri ne huriki a Israel ri pe e Egipto ri made na tabeke i ngeki ne Sinai, lakea e BAKOVI DAGI i takia e Moses i ta maea,
NUM 9:2 “Ne ravulu a vana parava (14th) na keva iea, na malunga liu e huriki a Israel ri gi rabalaki a maka sipsip ge a nihabi, ri gi ratea a Habu na Nipagepolo ri gi luhoia a parava a pagepolo ria, a rabalaki e huriki a tabua ne Egipto. Ra parava iea, a parava muholi na habu. Mu ramai a maka vinara lobo vona mu kani.”
NUM 9:4 Lakea e Moses i taki e huriki a Israel ri gi ratea a habu iea, ne vona ni luhoi mule a parava a Vure i tuhori e huriki a Israel ri made kamumu.
NUM 9:5 Ri ratea a habu iea na malunga liu na parava i ravulu a polona i va na mugana keva na malala golea ne Sinai, i ramai a ngava e BAKOVI DAGI i vakuku e Moses vona.
NUM 9:6 Pali ranga bakovi ri padoi a podana bakovi i mate, lakea i uka ma ri matapado na matana Vure. I mavonga i uka ma ri kara ni ratana a habu na parava vona muholi. Na parava na habu ri lakea ne Moses e Aron,
NUM 9:7 ri ta maea, “Mi nugu a podana bakovi i mate, i uka ma mi matapado. Pali i navai i uka ma mi gi vapopo turane huriki mi gi habi a nihabi ne BAKOVI DAGI?”
NUM 9:8 Lakea e Moses i koli i ta maea, “Mu dava popote taro, ga nana taroa e BAKOVI DAGI.”
NUM 9:9 Lakea e BAKOVI DAGI i takia e Moses
NUM 9:10 ge taki e huriki a Israel, ge ta maea, “Na tahuna mua, e huriki a hamone mua ri nugu a podana bakovi i mate ri muto, o ri havai na tanga basi, ri kara ni ratea a Habu na Nipagepolo ne BAKOVI DAGI.
NUM 9:11 Pali na ruana keva na malunga liu ne ravulu a vana parava (14th), ri gi ratea a habu iea. Ri gi ramai lobo a maka vinara na habu iea. Ri gi kania a sipsip iea turana a bret i uka is, a kobo i lahaha. Nahea ri gi ru mule ranga bobona sipsip ge vona a hini kuduvi. Na tahuna ri poka a sipsip nahea ri gi biputu a tuhana.
NUM 9:13 Pali e rei a viri i matapado na matagu, o i uka ma i havai lakea na tanga basi, lakea i uka ma i ratea a habu iea na mugana keva. Ni gi tono tala ne huriki a tara nau, a vuhuna i uka ma i habi a nihabi nau na tahuna i rata a nihabi. I mavonga ge kaloho mulea a nimavana naro hale vona.
NUM 9:14 “Na tahuna a mosi tara i made turane mua i ngaru ni ratea a Habu na Nipagepolo ne BAKOVI DAGI turane mua, ra bakovi iea i kara, pali ge ramai lobo a maka vinara na habu iea. E huriki a tahotanga, a mosi ri gi ramai kunanea a vinara iea kunana.
NUM 9:15 Na parava ri vakapesi a kape na Ngava Dagi, a bubu i puru valai i kavitagua a Mailo na Vure. Na rodo ri masia a bubu i manga a kanono.
NUM 9:16 Na parava vakaroro a bubu i kavitagua a kape. Na rodo vakaroro a hubena kanono i kavitagua a kape.
NUM 9:17 Na tahuna a bubu i pe a kape i vano, e huriki a Israel ri bole a maki ne ria ri muri maia. Na tahuna a bubu i pesi na tabeke tara, e huriki a Israel ri rata a mada karaba na tabeke iea.
NUM 9:18 Na tahuna e BAKOVI DAGI i ta, e huriki a Israel ri pe a mada ri vano, na tahuna i ta tabu ri rata a mada karaba. Na tahuna a bubu i tababana ni pesi na Mailo na Vure, ri made kunana na mada.
NUM 9:19 Na tahuna a bubu i pesi tabaka na Mailo na Vure, e huriki bara ri ramai a nita ne BAKOVI DAGI ri made na mada.
NUM 9:20 Na parava ranga a bubu i pesi langa na Mailo na Vure na parava popote kunana, o na keva ranga, o na pida i taku, muri i malaga tabu i vano. Na tahuna a bubu i malaga i vano, e huriki a Israel ri masia ri malaga ri ramaia. I uka ma ri gi loho rua vona ni malaga na rodo o na haro. Na tahuna iea kunana bara ri malaga ri vano.
NUM 9:22 I uka ma ni lohopae vona ge balaka riva a bubu ge pesi na Mailo na Vure, ge harena na parava i rua, o na keva i taku, o na pida i taku, re huriki a Israel i uka ma ri gi malaga ri gi vano. Pali na tahuna a bubu i malaga i vano, ria ranga ri malaga ri pea a tanga ri laho.
NUM 9:23 Na tahuna e BAKOVI DAGI i vakuku e huriki a Israel, bara ri rata a mada. Na tahuna i vakuku tabu, bara ri bole a maka maki lobo ne ria, ri malaga, ri lakea na tabeke tara. E BAKOVI DAGI i habia ne Moses a nita iea, lakea e Moses i vakalongo e huriki, ri ramaia.
NUM 10:1 E BAKOVI DAGI i takia e Moses,
NUM 10:2 “Ngane mu bole ranga silva mu ubi na ama, mu rata a tavure ge rua. Mu vaki a tavure na tahuna mu ngaru ni gale palupu e huriki, ri gi kisi puru a maki ri gi laho.
NUM 10:3 Na tahuna mu vaki varago a tavure i rua, e huriki lobo ri gi valai na matana Kape na Vaponga.
NUM 10:4 Pali na tahuna mu vaki a tavure i taku kunana, e huriki a nupesi kunana na kabu ri gi valai ri gi vapopo turamu.
NUM 10:5 Na tahuna mu vakikapo a tavure, e huriki ri made na tabeke na nirikena haro na kape nau, ri gi malaga ri gi vano.
NUM 10:6 Na tahuna mu vakikapo tabu a tavure, e huriki a tara ri made na tabeke mule puru na kape, ri gi malaga ri gi vano. Mu vakikapo kunana a tavure na tahuna mu rata kilakila ni pe a mada, mu gu vano.
NUM 10:7 Pali na tahuna mu ngaru ni gale palupu e huriki ri gi valai ri gi vapopo, mu vakilalu a tavure.
NUM 10:8 E huriki e tune Aron kunana, re huriki a prister, ri gi vaki a tavure. Mua turane huriki a hamone mua mu ramaia ra vinara iea vakaroro.
NUM 10:9 Na tahuna e huriki a pile ri gi bele ri gi vaubi ne mua na malala ne mua, mu vaki a tavure ge malaga e huriki ri gi vaubi ne ria. Mua bara mu rata mavonga, ngane iau e BAKOVI DAGI a Vure ne mua, bara luhoi mua, a korimule mua ne huriki a pile.
NUM 10:10 Na maka parava dagi ni vasileki, i manga na keva karaba o na maka parava dagi ranga, mu vaki a tavure na tahuna mu rata a nihabi gutu-vuro, a nihabi na nivalemu. Bara luhoi mua, a tuhori mua. Iau e BAKOVI DAGI a Vure ne mua, a ta pali.
NUM 10:11 Ne ravulu ruana parava (20th) na ruana keva na ruana pida, muri ne huriki a Israel ri pe e Egipto, a bubu i pe a kape na Ngava Dagi, i vano.
NUM 10:12 Lakea e huriki a Israel, ri malaga ri pe mulea a malala golea ne Sinai, ri laho lokovonga. A bubu i vano i pesi na malala golea ne Paran.
NUM 10:13 E BAKOVI DAGI i habi taro a nita ne Moses, muri e Moses i taki e huriki a Israel ri malaga ri laho lokovonga.
NUM 10:14 A mada tara ne Iuda, ne Isikar, ne Sebulun ri muga. Ri vapida na tara ne ria, ri nugu a kilakila ne ria, ri laho lokovonga. E Nason e tune Aminadab i matakaria a kabu nga.
NUM 10:15 E Nataniel e tune Suar i matakari e huriki a Isikar.
NUM 10:16 E Eliab e tune Helon i matakari e huriki a Sebulun.
NUM 10:17 E huriki e tune Gerson, e huriki e tune Merari na kabu ne Levi, ri muri mai ra tara nga. Ri pukea a kape na Mailo na Vure, ri bole a mahalana kape ri kaloho lokovonga.
NUM 10:18 Muri e huriki na mada tara ne Reuben, ne Simion, ne Gad ri vapida na maka tara kiroko, ri bole a kilakila ne ria, ri malaga ri vano. E Elisur e tune Sedeur bakovi i matakari lobo ra tara nga i tolu.
NUM 10:19 E Selumiel e tune Surisadai i matakari e huriki a tara ne Simion.
NUM 10:20 E Eliasap e tune Deuel i matakari e huriki a tara ne Gad.
NUM 10:21 Muri e huriki a Kohat na kabu ne Levi ri kaloho a maka mahalana Mailo na Vure ni gamai, ri malaga ri vano. Na tahuna e huriki a Kohat ri bele na murina mada karaba, a kabu ne Levi ranga ri muga ri vakapesia pali a kape na Mailo na Vure. Na tahuna a tara ne Kohat ri bele, ri habi ne huriki a prister a maka maki ri kaloho, ri ru dili na kape.
NUM 10:22 Muri a mada tara ne Epraim, ne Manase, ne Bensamin ri vapida na maka tara kiroko ri nugu a kilakila ne ria, ri malaga ri vano. E Elisama e tune Amihud i matakari ra tara nga i tolu.
NUM 10:23 E Gamaliel e tune Pedasur i matakaria a kabu ne Manase.
NUM 10:24 E Abidana e tune Gideoni i matakaria a kabu ne Bensamin.
NUM 10:25 A iku na mada tara ne Dan, ne Aser, ne Naptali ri tagari a tabeke muri. Ri vapida na maka tara kiroko, ri nugu a kilakila ne ria, ri malaga ri vano. E Ahieser e tune Amisadai i matakari ra tara nga i tolu.
NUM 10:26 E Pagiel e tune Okran i matakaria a kabu ne Aser.
NUM 10:27 E Ahira e tune Enan i matakaria a kabu ne Naptali.
NUM 10:28 Na tahuna e huriki a Israel bara ri malaga ri pea a mada, bara ri laho palupu maea kunana ri vano.
NUM 10:29 Lakea e Moses i takia e lavona, e Hobab, e tune Ietro a bakovi na robo e Midian, i ta maea, “Ngane mi gi malaga mi gi laho maia a robo tara e BAKOVI DAGI i taki ge habia ne mia. I ta muholi pali ta mi gi made kamumu hateka vona a robo iea. Ioe o ngaru o valai turane mia, ga veru ga habi vomu a maka maki kamumu ge kupo.”
NUM 10:30 Pali e Hobab i koli i ta maea, “I uka, ga hamule na tanga nau, na kabu nau.”
NUM 10:31 Pali e Moses i ta maea, “Lavogu, o longo valai. Naha ni pe mia. Ioe o lohoka vona i vai a hini ni gi ru a mada vona na tabeke i ngeki iea, bara o vakasiri a dala ne mia.
NUM 10:32 Ioe bara o valai turane mia, bara mi veru kamumu a maka maki e BAKOVI DAGI i habi ne mia, bara mi habi vomu ranga.”
NUM 10:33 E huriki a Israel ri pe mulea a lolo ne BAKOVI DAGI e Sinai, ri laho na parava i tolu. Ri kalohoa a Tava na Ngava Dagi ne BAKOVI DAGI, ri laho muga ri gi bele na tabeke tara ri gi malo vona.
NUM 10:34 Na tahuna ri laho, a bubu ne BAKOVI DAGI i tabuli polomeli ne ria. Na maka parava lobo na haro a bubu i tabuli maea kunana.
NUM 10:35 Na tahuna ri ngaru ni kaloho loko­vongea a Tava na Ngava Dagi, e Moses bara i taki ria, i ta maea, “BAKOVI DAGI, o pesi rike, o vaubi ne huriki a pile vomu, o lili viliha ria, o rata e huriki i uka ma ri ngaru ioe ri gi ha viliha.”
NUM 10:36 Na tahuna ri malo, ri rua na malala a Tava na Ngava Dagi, e Moses bara i ta maea, “BAKOVI DAGI, o hamule valai ne mia a Israel mi ala ravulu i rangale (10,000,000).”
NUM 11:1 E huriki a Israel ri tapuhaki na maregoa i bele ne ria, lakea e BAKOVI DAGI i longo. E BAKOVI DAGI i madihi a hatena, i rudua a kanono i boru langa na mada. Lakea a kanono i gutua a tabeke na mada tara na harehare.
NUM 11:2 Muri e huriki ri galea e Moses ge tuhori ria. E Moses i longo ria, i vasileki ne BAKOVI DAGI, i mate a kanono.
NUM 11:3 Ri galea a rana a tanga iea e Tabera, a vuhuna a kanono ne BAKOVI DAGI i gutu ria.
NUM 11:4 E huriki a bakovi, a ngatavine na tanga basi ri laho turane huriki a Israel ri ala kupo. Ri ngaru a maki ni kani ge kupo, lakea ri deke ri ngaru ni kani a kania. E huriki a Israel ranga ri deke mavonga ri ta maea, “Mi ngaru ni kani a kania. Pali mi gi bole vai?
NUM 11:5 Mi luhoi mulea e Egipto na tahuna mi kani a maka manu mi bole tavula, mi kani a maka karero, a melon, a nian, a galik.
NUM 11:6 Pali ngane a nitora ne mia i lobo pali, mi bala a maki ni kani. A mana kunana i tahoka, pali mi marikoi hateka vona.”
NUM 11:7 A mana a maki kiroko i kabelabela, i manga a vutuna bin, i tora manga a rerena tangari.
NUM 11:8 Na tahuna a simuru i boru langa na mada, a mana tara i boru turana. Na hatelanga e huriki a bakovi, a ngatavine bara ri laho viliha na mada, ri poi a mana. Muri bara ri bole a kedo, ri tutu, i bele manga a plaoa. Bara ri nono na ulo, ri bole ranga ri rata a bisket vona, i manga a bisket ni gutu turana a namona oliv.
NUM 11:10 E huriki a bakovi, a ngatavine ri pesi turana a kabu ne ria na matana kape, ri tangi hateka, i longo ria e Moses. Lakea e BAKOVI DAGI i madihi hateka a hatena ne ria, pali e Moses i luhoi lege.
NUM 11:11 Lakea i takia e BAKOVI DAGI i ta maea, “I navai o rata hale iau? I navai i uka ma o vivi nau? I navai o habi kikeri a leho nau ga matakari e huriki nga?
NUM 11:12 Iau i uka ma vakabele ria na tamudine kinane ria. Iau i uka ma iau e kinane ria ga poda ria. Pali i navai o taki iau ga leho manga a tagari, ga boko ria manga a koma kiroko na limagu, i vakatubu o Egipto i lakea liu na malala o ta muholi vona go habia ne huriki a gare ne ria?
NUM 11:13 Re huriki a bakovi a ngatavine ri tangi ri nana iau na kania. Pali ga bole vai a maka kania ge kupo? Iau i uka ma kara ni matakana a kania ne ria.
NUM 11:14 Iau kikeri kunana i uka ma kara ni matakari e huriki nga. I uka ma kara ni matakari ria.
NUM 11:15 Ioe o ngaru ni rata maea iau, i kamumu hateka o dodo iau o rabalaki liu iau, i uka ma ga leho hateka tabu ga bole a maregoa nga.”
NUM 11:16 Lakea e BAKOVI DAGI i takia e Moses i ta maea, “O gale a gare ala ravulu polorua ri gi valai nau. O tuli kunana e huriki a bakovi o lohoka ne ria, ri lohoka ni matakari. O tuli valai ria koea na Kape na Vaponga, ri gi vapopo turagu, ri gi pesi turamu.
NUM 11:17 Ga puru valai ga ta turamu vonga. Ga bole ranga nitora na hanugu i tabuli pali vomu, ga habi ne ria. Ri gi tuhori ioe, ri gi bole a maregoa ne huriki a bakovi, a ngatavine, i uka ma ge ioe kunana go bole lobo.
NUM 11:18 “Ngane o taki e huriki o ta maea, ‘Mu ramaia a naro ge rata mua mu gu matapado na matana Vure. Mu kisi puru mua, kuduvi bara mu kani a kania. E BAKOVI DAGI i longo mua mu deke hateka na kania. I longo mua, mu taki mua ta mu made kamumu o Egipto. Mu longo. Ngane e BAKOVI DAGI ge habi a kania ne mua mu kani.
NUM 11:19 I uka ma mu gu kani na parava ge taku, o ga parava ge rua, o ga parava ge lima, o ga parava ge ravulu, o ga parava ge ravulu rua. I uka.
NUM 11:20 Bara mu kani a kania na keva i taku, muri bara mu kide tala ni kani a kania bara mu ngaru ni muta. E BAKOVI DAGI i made na kurukurune mua, pali mu ngalahere mu deke lakea vona mu ta maea, “I navai mi pe a robo e Egipto mi valai?” ’”
NUM 11:21 Pali e Moses i koli i ta maea, “BAKOVI DAGI, o longo. Iau a made turane huriki a bakovi ri ala 600,000, lakea o taki ta go habi a kania ne ria na keva i taku. Go matakana a kania vai go habi ne ria?
NUM 11:22 Bara mi rabalaki lobo a maka bulmakau, a sipsip, pali ra maka sipsip, a bulmakau nga i uka ma ge kara ria, a manu lobo na dari ranga i uka ma ge kara ria.”
NUM 11:23 E BAKOVI DAGI i koli e Moses i ta maea, “O luhoi navai, o luhoi a nitora nau i uka ma i kara? I uka ma ge tabaka bara o matai. Bara o lohoka vona a maki a ta vona ge bele o ge i uka.”
NUM 11:24 E Moses i longo, muri i pagitala i taki e huriki vona a ngava e BAKOVI DAGI i takia. I tagui e huriki a gare ri ala ravulu polorua, i taki ria ri gi pesi halui a kape.
NUM 11:25 Muri e BAKOVI DAGI i puru valai na bubu iea, i ta turane Moses. Lakea e BAKOVI DAGI i bole a nitora na hanuna, ra i habi muga ne Moses i habi ne huriki a gare ala ravulu polorua. Na tahuna a hanuna i valai i made turane ria, popote kunana ri vakalongo a nita propet, pali i uka ma ri rata lokovonga liu.
NUM 11:26 Pali a gare ala rua, e Eldat, e Medad, i uka ma ru lakea na kape turane huriki ranga. Ru tababana ni made na mada ne BAKOVI DAGI. Pali e BAKOVI DAGI i habia ne rua a hanuna ru ta propet na mada.
NUM 11:27 Muri a riau tara i nunu lakea ne Moses i ta maea, “E Eldat, e Medad ra ru made na mada, ru rata a nita propet.”
NUM 11:28 E Iosua, e tune Nun, a bolekori ne Moses, i leho turana na tahuna i riau vona, i valai i harena mona. E Iosua i longo a nitana riau, lakea i takia e Moses i ta maea, “Bakovi dagi nau, o vano o taki rua naha ru gu ta.”
NUM 11:29 Pali e Moses i koli a ngava i ta maea, “O luhoi ge kuloi iau ranga bakovi? Naha ni loho lege lae? Iau a ngaru e BAKOVI DAGI ge habi a hanuna ne huriki a bakovi a ngatavine lobo, ri gi rata a nita propet.”
NUM 11:30 E Moses i ta lobo, muri i hamule lakea na mada turane huriki a gare ne Israel.
NUM 11:31 E BAKOVI DAGI i ratea a vilu i pori valai na dari, i vakabebe valai a maka kadirovo, ri puru halui a mada ri vatabuli taho, ri kupo lolo rike na mita i taku. Ri toka viliha pololilo na mada, ri toka polovavo na mada. Ri laho viliha, ri kavitagu loboa a tabeke dagi na malala, i harena na maka kilomita i kupo na dahana mada.
NUM 11:32 E huriki a bakovi a ngatavine ri leho na haro, a rodo ri lakavu a maka kadirovo. Na parava muri ri rata mavonga tabu. A bakovi, a ngatavine ri lakavu a maka kadirovo i kupo, a nimavane ria i harena na 22 kilo i rike. Ri poka a maka kadirovo ri rara pololilo na mada ge kere.
NUM 11:33 Na tahuna ri vakatubu ni kani a maka bobona kadirovo, e BAKOVI DAGI i malaviriri kunana i madihi a hatena ne ria, i rudua a gilanga dagi hateka i valai ne ria, i kupo ne ria ri mate.
NUM 11:34 Ri tanu a podane ria vona a tanga iea. Ri vunua a tanga iea e Kibrot-Hatava, a vuhuna ri tanu vonga e huriki ri kaningaru.
NUM 11:35 Muri ri pea e Kibrot-Hatava ri lakea na tanga e Haserot, ri ratea vonga a mada ne ria.
NUM 12:1 Na tahuna ri tababana ni made o Haserot, e Aron, e Miriam ru biu e Moses, a vuhuna e Moses i parangi na ngatavine o Kus.
NUM 12:2 Lakea ru ta maea, “E BAKOVI DAGI i habi kikeri a ngava ne Moses? I uka liu. Tarua ranga i habi a nita ne tarua.” E BAKOVI DAGI i longoa ne rua a ngava iea.
NUM 12:3 Ra bakovi e Moses, ia a bakovi ni vakakiroko mule ia. I uka tara bakovi na malala ge vakakiroko mule ia ge manga e Moses.
NUM 12:4 Na tahuna ru ta lobo, e BAKOVI DAGI i malaviriri kunana i taki e Moses, e Aron, e Miriam i ta maea, “Moto valai na Kape na Vaponga.” Lakea to malaga to vano.
NUM 12:5 Lakea e BAKOVI DAGI i puru valai na bubu i pesi na matana kape, i gale tala i ta maea, “O Aron, o Miriam muru valai.” Ru longo, ru karuku lokovonga popote.
NUM 12:6 Lakea e BAKOVI DAGI i ta maea, “Muru longoa a nitagu. Na tahuna a propet tara i made turane mua a Israel, iau e BAKOVI DAGI a vakasiri iau vona na vurena, a habi a ngava nau na vurena.
NUM 12:7 Pali a vora nau e Moses i uka ma i manga e huriki a propet ranga. A naro a ratea vona i tebi. A habi lobo vona a maka leho nau, a lohoka vona bara i rata.
NUM 12:8 I mavonga, a ta turana i manga a bakovi i ta turana e turana. A ta kavakava vona, i uka ma ta vakakika. Ia tara i matai iau. Pali i navai i uka ma muru mangenge ni harogi e Moses, a vora nau?”
NUM 12:9 E BAKOVI DAGI i tahate hateka ne rua, muri i pe rua i vano.
NUM 12:10 A bubu ne BAKOVI DAGI i pe a kape, i malaviriri kunana a gilanga na patala i kavitagua a kuline Miriam, i kea hateka a kulina manga a kamagi. Muri e Aron i matagege, i masia a gilanga hale i kavitagua a kuline Miriam.
NUM 12:11 Lakea e Aron i takia e Moses i ta maea, “Bakovi dagi, maria miri manga, miri rata a naro hale. O dodo maria, naha ni rata maria miri gi bolea a maregoa na naro hale ne maria.
NUM 12:12 Naha ni matataroa e Miriam ge mata manga a koma i mate pololilo na palone kinana, pali na tahuna i podea e kinana i marina pali a kulina.”
NUM 12:13 Lakea e Moses i nana torea e BAKOVI DAGI i ta maea, “O Vure, a ngaru hateka go ratea e Miriam ge matapado.”
NUM 12:14 Lakea e BAKOVI DAGI i koli i ta maea, “E tamane Miriam bara i kalupe tahoa a matane Miriam, bara i maruhu na parava i polorua. I mavonga kunana e Miriam ge made polovavo taro na mada na parava i polorua, muri ge dili tabu.”
NUM 12:15 Lakea ri vakamade polovavo na mada e Miriam na parava i polorua. E huriki a ngatavine, a bakovi i uka ma ri malaga ri gi lakea na hini ranga. Ri davea e Miriam ni gi tuli hamule valai taro.
NUM 12:16 Muri ri pea e Haserot, ri vano ri rata a mada na tabeke i ngeki ne Paran.
NUM 13:1 E BAKOVI DAGI i takia e Moses,
NUM 13:2 “Ioe o lohoka vona ra robo e Kenan ga habia ne mua e huriki a Israel. I mavonga o vulaki tala a ubu na tara takutaku na kabu i ravulu a polona i rua, o rudu ria ri gi vano ri gi kasisia a robo e Kenan.”
NUM 13:3 Na tahuna ri made na tabeke i ngeki ne Paran, i longototoa a ngava ne BAKOVI DAGI i rudu a ubu na tara ne huriki a Israel, ri vano.
NUM 13:4 A rane ria ra nga: e Samua e tune Sakur, ni bole tala na kabu ne Reuben.
NUM 13:5 E Sapat e tune Hori, ni bole tala na kabu ne Simion.
NUM 13:6 E Keleb e tune Iepune, ni bole tala na kabu ne Iuda.
NUM 13:7 E Igal e tune Iosep, ni bole tala na kabu ne Isikar.
NUM 13:8 E Hosea e tune Nun, ni bole tala na kabu ne Epraim.
NUM 13:9 E Palti e tune Rapu, ni bole tala na kabu ne Bensamin.
NUM 13:10 E Gadiel e tune Sodi, ni bole tala na kabu ne Sebulun.
NUM 13:11 E Gadi e tune Susi, ni bole tala na kabu ne Iosep, ra kabu ne Manase.
NUM 13:12 E Amiel e tune Gemali, ni bole tala na kabu ne Dan.
NUM 13:13 E Setur e tune Mikael, ni bole tala na kabu ne Aser.
NUM 13:14 E Nabi e tune Vopsi, ni bole tala na kabu ne Naptali.
NUM 13:15 E Guel e tune Maki, ni bole tala na kabu ne Gad.
NUM 13:16 E Moses i rudu e huriki a bakovi nga, ri vano ri gi kasisi a maka tabeke lobo ne Kenan. E Moses i vunu herea e Hosea e tune Nun, i galea e Iosua.
NUM 13:17 Na tahuna e Moses i rudu ria ri gi kasisi a robo e Kenan, i taki ria i ta maea, “Mu sike lakea na tabeke ne Negev, mu polo sike na lolo.
NUM 13:18 Mu matai kamumua ra tanga iea, mu matakilaka vona ra tanga iea i navai. Mu matai kamumu e huriki a bakovi vonga ri gao o i uka, ri ala kupo o i uka.
NUM 13:19 Mu matai kamumua a malala na robo iea, i kamumu o i hale. Mu matai kamumu a maka tanga ne ria ni tura halui o i uka.
NUM 13:20 Mu matai kamumua a malala i kamumu ni varo a maki vona o i uka, i vona kai o i uka. Mu toni a pakianga ne mua, mu bole mule ranga kanena kai na robo iea.” Na tahuna iea, i tubu ni rara a maka vain.
NUM 13:21 Lakea e huriki a bakovi nga ri vano ri matai a maka tabekena malala lobo, i vakatubu na tabeke i ngeki ne Sin na tabeke mule puru, i lakea i harena na tanga e Rehob, tabukoi na ngutuna dala, i lakea na tanga e Lebo-Hamat na tabeke mule sike.
NUM 13:22 Muga ri lakea na tabeke ne Negev, ri vano ri bele na tanga e Hebron. E huriki a tara ne Ahiman, ne Sesai, ne Talmai ri made o Hebron. Re huriki nga, ria a hamona bakovi hateka tara, a rana e Anak. Ra tanga e Hebron ni rata muga, muri na pida i polorua e huriki a Egipto ri ratea a tanga e Soan.
NUM 13:23 Lakea e huriki a kasisi ri vano ri bele na maloku ne Eskol, ri valikudua a rahana kai a vain i parukaruka vona a kanena. Ra rahana iea i mava hateka, a bakovi i taku i uka ma i kara ge kaloho kiria. Lakea a bakovi ala rua ru koloa na binole ru kalohoa. Ri pasi tabu a maka kanena kai a pik, a maka kanena kai a pomigranet.
NUM 13:24 Muri e huriki a Israel ri vunua ra maloku iea e Eskol, a vuhuna e huriki a kasisi ri valikudu a rahana kai a vain vonga.
NUM 13:25 I lobo a parava i ravulu va, e huriki a bakovi ri hamule ni kasisi a robo.
NUM 13:26 Muri ri hamule valai ne Moses, e Aron, ne huriki a Israel, ri made na tanga e Kades na tabeke i ngeki ne Paran, ri vakalongo ria na maka maki ri matai, ri vakasiri a maka kanena kai ri bole.
NUM 13:27 Lakea ri takia e Moses ri ta maea, “Ra robo o rudu lakea mia vona ta ga mi gi masia, mi masia pali. A malala vona i kamumu hateka, i kamumu ni varo a maki ni kani. O matai a maka kanena kai mi bole vonga.
NUM 13:28 Pali e huriki na robo iea ri gao hateka. A maka tanga ne ria ni tura halui na nure ri tora hateka. Mi matai vonga e huriki a hamone Anak.
NUM 13:29 E huriki a Amalek ri made mule puru na tabeke ne Negev. E huriki a Hiti, a Iebus, a Amor ri made na lolo. E huriki a Kenan ri made tabukoi na dari na Kurukuruna Malala, pali i ranga ri made na gagane Iordan.”
NUM 13:30 E huriki a Israel ri longo a maka nitane huriki a matakari ri mangenge, ri rata viliha a ngava. Lakea e Keleb i tahate ria na matane Moses i ta maea, “I navai mu ta hateka? Ngane si gi lokovonga, si gi vaubi turane ria, si gi bolea a malala ne ria, a vuhuna si tahoka a nitora, si kara ni rangi ria, si gi bolea a malala iea.”
NUM 13:31 Pali i ranga kasisi ri vano turane Keleb ri masia a robo iea ri ta maea, “E huriki na tanga iea ri gao hateka. I uka ma si kara ni vaubi turane ria.
NUM 13:32 Re huriki nga ri marapusi, ri tami e huriki a Israel vona a robo ri masia. Ri ta maea, A malala na robo iea i hale liu. I uka ma i koru kamumu vona a maka maki. E huriki a bakovi mi matai vonga ri koru dagi ri ola hateka.
NUM 13:33 Re huriki a bakovi nga, e huriki a Nepilim, a hamone Anak. Mi matai ria, mi luhoi mule mia, mia a maki tavula liu, mi manga a koa. Ria ranga ri matai mia, mi manga a koa.”
NUM 14:1 Na rodo iea e huriki lobo, ri tangi ri haloho.
NUM 14:2 Ri deke ne Moses e Aron ri ta maea, “I kamumu hateka si gi mate o Egipto, o si gi mate koea na malala golea!
NUM 14:3 I navai e BAKOVI DAGI i ngaru ni tuli lakea hita vona a robo karaba iea. Hita bara si lokovonga bara ri rabalaki hita na vabinga, ri bole e huriki e girihine hita, e tune hita, bara ri manga a vorakato ne ria. I kamumu si gi hamule lakea o Egipto.”
NUM 14:4 Ri vata mule ne ria ri ta maea, “Si vulakia tara matakari ge bole mule hita lakea o Egipto.”
NUM 14:5 Na tahuna ri ta maea, lakea e Moses e Aron ru lolu na matane huriki lobo.
NUM 14:6 Lakea e Iosua e tune Nun, e Keleb e tune Iepune, ra turane huriki a ubu na tara nga ri kasisi e Kenan, ru rihate vona a ngava iea ru rape a varakia ne rua.
NUM 14:7 Lakea ru taki e huriki a bakovi a ngatavine ru ta maea, “Ra malala mi laho polo vona i kamumu hateka.
NUM 14:8 E BAKOVI DAGI ge vivi ne hita bara, i bole lakea hita vona malala iea i kamumu hateka ni varo a maki ni kani vona, bara i habia ne hita.
NUM 14:9 Naha ni longotaro e BAKOVI DAGI, naha ni mangenge ne huriki ri made vona a robo iea, ria a maki tavula, bara si ratapile ria. E BAKOVI DAGI i made turane hita. I ratapile pali e huriki a vure taminga ta i matakari ria. Naha ni mangenge ne ria.”
NUM 14:10 Pali e huriki a Israel i uka ma ri ngarua a ngavane Keleb. Lakea ri taki ta ri gi padi rua na kedo, ru gu mate. Ta ri gi rata mavonga, i malaviriri kunana e huriki ri masia a nipara dagi ne BAKOVI DAGI i para polomeli na Kape na Vaponga. Lakea i uka ma ri padi rua na kedo.
NUM 14:11 E BAKOVI DAGI i takia e Moses i ta maea, “Ge balaka riva e huriki nga ri gi longotaro iau? I uka ma ri luhoi tora iau. A rata a maka nivakasiri ri matai, pali i uka ma ri luhoi tora iau.
NUM 14:12 Ngane ga rudua a gilanga dagi ge ratapile ria. Pali iau ga rata ioe, ge ioe a kabu dagi i gao hateka ne ria.”
NUM 14:13 Pali e Moses i koli i ta maea, “BAKOVI DAGI, na nitora vomu, o bole tala ria o Egipto e huriki o tuli valai ria koea. Ioe bara o ratapile ria, e huriki a Egipto bara ri longoa a velengana a naro o ratea ne ria.
NUM 14:14 Bara ri vakalongo e huriki ri made vona ngane na robo iea. Re huriki nga ri longoa pali a velengamu o made turane mia, o bele kavakava na tahuna a bubu vomu i pesi langa na matana kape. O made na bubu na haro, na rodo o made na kanono o muga mia.
NUM 14:15 Ioe bara o rabalaki palupu lobo e huriki a tara vomu, e huriki a tara ranga ri longoa a ramu i dagi, bara ri ta maea,
NUM 14:16 ‘E BAKOVI DAGI i keri ni tuli e huriki a tara vona ri gi lakea na robo i ta muholi vona hosi ta ge habia ne ria, lakea i rabalaki ria na tabeke i ngeki.’
NUM 14:17 “Bakovi Dagi, a ngaru go vakasiri a nitora dagi vomu o ratea a maki o ta muholi vona go ratea. Ioe kunana o ta maea,
NUM 14:18 ‘Iau, e BAKOVI DAGI, i uka ma ge madihi malaviriri a hategu. A ngaru hateka e huriki, pali ga muri mai vakaroro a nitagu. A puga vuroki a naro hale na tagenga ne ria. Pali bara vakamadihi e huriki ri rata a naro hale, ge ramai a hamone ria, ge harena ne tamarane ria, e kukulimane ria.’
NUM 14:19 BAKOVI DAGI, ioe o ngaru mia lobo i uka ma o mapulo kilala. I mavonga a nana ioe go puga vuroki a naro hale ne huriki nga, i manga a hini o rata na tahuna ri pe e Egipto i valai i harena mona, o rata vakaroro i valai i harena mona.”
NUM 14:20 E BAKOVI DAGI i longo a nitane Moses, i koli i ta maea, “A puga vuroki pali a naro hale ne ria i manga a hini o taki iau vona ga rata.
NUM 14:21 Iau a Vure mahuri, a nitora, a nipara nau i tabuli na tabeke lobo na malala.
NUM 14:22 I muholi hateka e huriki a bakovi a ngatavine ri longotaro ri toha iau, i uka ma ri gi lakea na robo ta ga habia ne ria. Ri masia a nipara i vakasiri ria ne nau a made turane ria. Ri matai a maka nivakasiri a rata pali o Egipto a rata pali na tabeke i ngeki. Pali ri longotaro vakaroro a nitagu.
NUM 14:23 I uka liu tara ne ria ge dili vona a robo iea a ta muholi vona, ta ga habia ne huriki a hamone mua.
NUM 14:24 Pali a vora nau e Keleb, a niluhoi vona i tebi, i ramaia a ningaru nau muholi. Ngane ga taparaki lokovongea vona a robo i masia pali, ge made vona, muri ge bolea e huriki a hamona.
NUM 14:25 Ra robo iea e huriki a Amalek, a Kenan ri made na maloku vona. Kuduvi, mua lobo mu mariu tala mu hamule lakea na tabeke i ngeki, mu laho lokovonga na Dari Vururu.”
NUM 14:26 E BAKOVI DAGI i taki e Moses e Aron i ta maea,
NUM 14:27 “Balaka kupo e huriki a tara hale nga ri tapuhaki bala nau. A longo pali i tohai a kuligu vona a nitane ria. Garika ri gi voro taparaki a nitane ria?
NUM 14:28 Ngane o taki ria vona a nitagu, a ta maea, ‘Iau e BAKOVI DAGI a made vakaroro a ta muholi ne mua, a longo mua pali mu taki ta mu gu mate iene, ngane ga rata manga a hini mu taki.
NUM 14:29 Na tahuna mu mate, a podane mua bara ri tabuli viliha na tabeke i ngeki. Mu tapuhaki mu ta hateka nau. Ngane e huriki a bakovi ri tahoka a pida i ravulu rua i rike, i uka ma ri gi lakea vona a robo iea.
NUM 14:30 A ta muholi ta ga bole mua, mu gu made vona a robo iea, pali ngane mua lobo i uka ma mu gu vano. E Keleb e tune Iepune, rua e Iosua e tune Nun kunana ru gu vano.
NUM 14:31 Mu taki e huriki na robo iea, ta ri gi vaubi turane mua, ri gi rangi mua, ri gi bole e huriki e tune mua. Pali i uka. Iau bara taparaki e huriki a koma nga ri gi lakea na robo ra i uka ma mu ngarua, bara ri bolea ri made vakaroro vona.
NUM 14:32 Pali mua i uka ma mu gu lokovonga, bara mu mate, mu bera na tabeke i ngeki iea.
NUM 14:33 E huriki e tune mua bara ri laho viliha na tabeke i ngeki na pida i ravulu va, ge harena na tahuna mua lobo bara mu mate. Mu ha taro iau, mu manga a ngatavine i ha taro e girihina i ngoi viliha lae. Lakea e huriki a koma bara ri bole a maregoa na naro hale ne mua.
NUM 14:34 Mu lakea vona a robo iea, mu masia na parava i ravulu va. Ngane bara mu bolea a maregoa na naro hale ne mua, ge harena na pida i ravulu va. A pida i taku ge bole a murina a parava i taku, ra mu kasisia a robo iea. Ra naro iea ge rata mua bara mu lohoka vona iau i uka ma ngarua a naro na tagenga ne mua.’
NUM 14:35 Iau, e BAKOVI DAGI, a ta muholi bara vakalobo e huriki a bakovi a ngatavine, ri tahoka a niluhoi i taku ni tagege ni ngalahere nau. Mua takutaku bara mu mate koea na tabeke i ngeki. Iau e BAKOVI DAGI a takia a ngava iea.”
NUM 14:36 E huriki a bakovi e Moses i rudu ria ri gi kasisia a robo iea ri hamule, ri tami e huriki ri ta maea, “A robo iea i hale. Ra ngava iea kunana i rata e huriki ri deke ne BAKOVI DAGI.” Lakea e BAKOVI DAGI i ratea a gilanga dagi i bele ne huriki a bakovi nga, ri malaviriri kunana ri mate.
NUM 14:38 E huriki a bakovi ri vano ri masia a robo iea, ri mate lobo. Pali e Keleb e tune Iepune, turana e Iosua e tune Nun kunana ru mahuri.
NUM 14:39 E Moses i vakalongo lobo a nitane BAKOVI DAGI ne huriki a Israel, lakea ri tangi hateka.
NUM 14:40 Na hatelanga pokopoko, na parava muri ri vano, ri sike na lolo. Ri taki mule ria, “Si rata pali a naro hale. Si vano, si gi dili na tanga e BAKOVI DAGI i ta muholi vona si gi bolea.”
NUM 14:41 Pali e Moses i taki ria, i ta maea, “Naha ni vano. I navai mu gu tagege mu gu longotaro a nitane BAKOVI DAGI? Na tahuna bara mu lokovonga i uka ma mu gu rangi ria.
NUM 14:42 Naha ni lokovonga, e huriki a pile bara ri rangi mua, a vuhuna e BAKOVI DAGI i uka ma i made turane mua.
NUM 14:43 Na tahuna bara mu lokovonga, e huriki a Amalek a Kenan bara ri vaubi turane mua, ri rabalaki mua mu mate. E BAKOVI DAGI i uka ma ge pesi turane mua na vabinga, a vuhuna mu ngalahere vona i uka ma mu muri vona.”
NUM 14:44 E Moses i taki ria vona a nita iea, pali i uka ma ri longototo. Ri malaga rike ri lakea na tanga na lolo. Pali e Moses i uka ma i vano turane ria, i made na mada. Re huriki nga i uka ma ri bolea a Tava na Ngava Dagi ne BAKOVI DAGI, i tabuli na mada.
NUM 14:45 Muri e huriki a Amalek a Kenan ri pe a tanga ne ria na lolo ri puru valai, ri vaubi turane huriki a Israel ri rangi ria. Ri valili ne huriki a Israel i harena na tanga e Horma.
NUM 15:1 E BAKOVI DAGI i takia e Moses,
NUM 15:2 ge taki e huriki a Israel ge ta maea, “Na tahuna mu lakea vona a robo ta ga habia ne mua,
NUM 15:3 mu habi nau a maka bulmakau, a sipsip, a meme ne mua. Mu rata a nihabi gutu-vuro o a nihabi ni ramai a nita muholi, o a nihabi na habu dagi na lotu, o a nihabi na ni ngaru ne mua kunana. A mangina nihabi nga ri mangi kamumu hateka nau.
NUM 15:4 Na tahuna a bakovi i bole vilia tara sipsip o a meme ge a nihabi, ge habi turana a kilo i taku na plaoa, ge vuli turana a lita i taku na namona oliv, ne vona ni rata a nihabi gutu-vuro. A lita i taku na vain ge guru na dede, ge a nihabi na vain.
NUM 15:6 Na tahuna o habi a sipsip a toga, o bole a kilo na plaoa ge rua, o vuli turana a namona oliv a lita ge taku a kalavana, turana a vain ge harena na lita ge taku a kalavana, ge habi nau ge a nihabi na vain. A mangina a nihabi iea a ngaru hatekea.
NUM 15:8 Na tahuna o habi a bulmakau a toga ge a nihabi gutu-vuro, o ne vona ni ramai a nita muholi, o ne vona a nivalemu,
NUM 15:9 o bole a kilo na plaoa ge tolu, o vuli turana a namona oliv a lita ge rua.
NUM 15:10 O bole valai a lita i rua na vain, o habi a maki nga turana a bulmakau a toga. Iau e BAKOVI DAGI a ngaru a mangina a nihabi nga.
NUM 15:11 “Mua o huriki a tahotanga o Israel mu ramai vakaroro a vinara nga, na tahuna mu habi a bulmakau, a sipsip, a meme ge a nihabi. Na tahuna a burongi a mangina nihabi nga bara ngaru.
NUM 15:14 E huriki a mosi ri made turane mua ria ranga ri ramai a vinara nga.
NUM 15:15 A vinara i taku kunana mu ramaia, turana e huriki a mosi ri made turane mua. Ra vinara iea ge tabuli vakaroro, ge ramaia e huriki a hamone mua ri bele muri ma. A vuhuna, a matai mua turane huriki a mosi mu palupulupu kunana.
NUM 15:16 Mua o huriki a Israel a mosi mu ramai kunanea a naro ge taku ni ratana a nihabi.”
NUM 15:17 E BAKOVI DAGI i takia e Moses,
NUM 15:18 ge taki e huriki a Israel ge ta maea, “Ngane ga bole mua ga taparaki mua lakea vona a malala ta ga habia ne mua bara mu made vona.
NUM 15:19 Na tahuna mu kani vona a malala iea, mu bole ranga maki ni kani mu habi nau ge a nihabi, a vuhuna iau e BAKOVI DAGI ne mua.
NUM 15:20 Muri na vit ni mirio, na tahuna mu rata a bret na plaoa, mu habia nau a bret mu gutu mugea, ge a nihabi na vit.
NUM 15:21 Mua turane huriki a hamone mua, mu ramai a vinara iea mu habia nau a bret mu gutu mugea, ge a nihabi na vit.
NUM 15:22 “Mu longo ne Moses a maka vinara nga, e huriki a hamone mua ri bele muri ma ria ranga bara ri longo polo ne mua. Pali ranga bakovi i uka ma ri gi luhoi kamumu, bara ri page poloa a vinara.
NUM 15:24 Na tahuna mua a Israel i uka ma mu luhoi kamumu mu pagepolo ranga vinara, i kamumu bara mu habia tara bulmakau a toga, ge a nihabi gutu-vuro, turana a nihabi na vit, a nihabi na vain, a meme a toga tara, ge a nihabi na naro hale. Na tahuna a burongi a mangine ria a ngaru hateka ria.
NUM 15:25 A prister ge ratea a nihabi ge kavitagu e huriki a Israel. Na tahuna a masia bara puga vuroki a naro hale ne ria, a vuhuna i uka ma ri luhoi kamumu ri page poloa a vinara nau.
NUM 15:26 Iau bara puga vuroki a maka naro hale ne huriki a Israel ne huriki a mosi ri made turane ria, ra ri rata ruru a naro hale nga.
NUM 15:27 “Bara bakovi tara i rata ruru a naro hale, ra bakovi iea ge habia a meme ge taku a kinana i tahoka a pida i taku, ge a nihabi na naro hale.
NUM 15:28 Na matane BAKOVI DAGI, a prister ge habia a sipsip ge kavitagua a viri i rata ruru a naro hale. Na tahuna ni kavitagu a bakovi iea, a naro hale vona bara ni puga vuroki.
NUM 15:29 Na tahuna a Israel tara o a mosi tara i rata ruru a naro hale, a vinara ge ramaia ge taku kunana.
NUM 15:30 Pali a viri i longotaro a nitagu i rata a naro hale, i manga i harogi iau. Ra bakovi iea ni gi rabalaki. Naha ni varoru vona ge ia a tahotanga o ge ia a mosi,
NUM 15:31 a vuhuna ra bakovi iea i longotaro a nitagu. Na ningaru vona kunana i putu purua tara vinara nau. Mu rabalakia ra bakovi iea, a vuhuna i tahoka a ngava.”
NUM 15:32 Na tahuna e huriki a Israel ri tabana na tabeke i ngeki, ri masia a bakovi i popo a kai na Parava Nimalo.
NUM 15:33 Lakea ri tuli lakea na matane Moses e Aron, ne huriki lobo a Israel.
NUM 15:34 Ri ru dili taroa na bavi, a vuhuna i uka ma ri lohoka vona a ra maki ri gi ratea vona.
NUM 15:35 Lakea e BAKOVI DAGI i takia e Moses i ta maea, “Mua e huriki a Israel mu rabalakia ra bakovi iea na kedo polovavo na mada.”
NUM 15:36 Lakea e huriki a bakovi a ngatavine ri longototo a nitane BAKOVI DAGI, ri tuli talea na mada ri padimatea na kedo.
NUM 15:37 E BAKOVI DAGI i takia e Moses,
NUM 15:38 ge taki e huriki a Israel ge ta maea, “Mu bole a hotu mu rata a maka potu, mu varomu na nimodo na varakia ne mua. Na potu takutaku mu varomua a hotu gomagoma ge taku. Mua turane huriki a hamone mua ri gi bele muri ma, mu ramaia ra vinara iea.
NUM 15:39 Na tahuna mu matai a maka potu nga, bara mu luhoi a maka vinara lobo a habi ne mua, mu ramai. Lakea i uka ma mu gu pe iau, mu gu ramai a ningaru ne mua kunana mu gu rata a naro hale.
NUM 15:40 Ra potu nga bara ri rata mua, mu gu ramai a maka vinara nau bara mu made kamumu ge mua e huriki a tara nau.
NUM 15:41 Iau e BAKOVI DAGI, a Vure ne mua, a bole tala mua o Egipto, ge iau a Vure ne mua. Iau e BAKOVI DAGI a Vure ne mua, a ta pali.”
NUM 16:1 E Kora, e tune Ishar bakovi na kabu ne Levi, turana a bakovi ala tolu na kabu ne Reuben, ri longotaro e Moses. A rana bakovi nga: e Datan, e Abiram, rua e tune Eliab, e On e tune Pelet.
NUM 16:2 Ra bakovi nga turana ranga nupesi ne Israel ri ala 250 ri longotaro a ngavane Moses. Re huriki nga ria a tara na vaponga.
NUM 16:3 Ri valai ne Moses e Aron ri taki rua ri ta maea, “Muru rata polomugamuga hateka. Hita lobo a tara na vaponga ne BAKOVI DAGI ni gamai, i uka ma i marua kunana. E BAKOVI DAGI i made turane hita lobo. I navai muru bibi rike mule marua muru matakari mia?”
NUM 16:4 Na tahuna e Moses i longoa a ngava iea, i tabuli ngalabarara puru na malala i vasileki.
NUM 16:5 Muri i pesi rike i taki e Kora turana e huriki a tara vona i ta maea, “Kuduvi na hatelanga e BAKOVI DAGI bara i vakasiri e rei e huriki a tara vona. E rei e huriki a bakovi i vulaki, bara i taki ria ri valai tabukoi vona.
NUM 16:6 Ioe o Kora turane huriki a tara ri muri vomu, kuduvi na hatelanga mu bole a maka pelete,
NUM 16:7 mu ru a kanono a havu mangisipa ne ria. Mu bole, mu pesi na matane BAKOVI DAGI. A bakovi e BAKOVI DAGI ge vulakia, a bakovi iea ni gamai. Mua o huriki a Levi mu rata polo muga muga hateka.”
NUM 16:8 Lakea e Moses i taki tabu e Kora i ta maea, “Mua o huriki a Levi mu longo.
NUM 16:9 E BAKOVI DAGI a Vure ne hita a Israel, i vulaki tala mua ne huriki a Israel mu gu lakea tabukoi vona mu gu rata a leho vona na Mailo vona, mu gu pesi na matane huriki a bakovi a ngatavine ni tuhori ria. A Vure i taki mua turana a kabu ne Levi lobo mu gu ratea a leho iea, bara mu tahoka a rane mua. Pali i navai? Mu luhoia ra leho iea a maki tavula? I navai mu ngaru ge mua a prister?
NUM 16:11 Ari mua, i navai mu padi momoa e Aron? Ra mua, i uka ma mu padi momo kunana e Aron, mu padi momo e BAKOVI DAGI a Vure ne hita.”
NUM 16:12 Lakea e Moses i rudua tara viri i vano i taki e Datan rua e Abiram ru gu valai taro vona. Pali ru koli ru ta maea, “Maria i uka ma miri gi lakene.
NUM 16:13 O tuli tala mia na tanga kamumu e Egipto, o taparaki valai mia koea na tabeke i ngeki go rabalaki mia. Pali i uka ma ngi kunana. Ngane o ngaru ni matakari mia lobo.
NUM 16:14 Ioe i uka ma o taparaki mia, mi gi lakea na robo ge tahoka a malala kamumu mi gi tahoka a hania na maki ni kani, a hania na vain. O luhoi ge mia a manga o tami mia? Maria i uka ma miri gi lakene.”
NUM 16:15 E Moses i longoa a ngava iea i madihi a hatena, i takia e BAKOVI DAGI i ta maea, “Naha ni bole a maka nihabi ne huriki a tara nga ri habi vomu. Ri taki ta a matakari hale ria. Pali iau i uka ma bolea tara donki ne ria. I uka ma rata hale ria.”
NUM 16:16 Muri e Moses i takia e Kora i ta maea, “Kuduvi, ioe turane huriki a bakovi ala 250 ri ramai ioe, mu valai na matane BAKOVI DAGI. E Aron tara ge valai. Mua takutaku mu bole valai na dede ne BAKOVI DAGI a pelete na havu mangisipa.
NUM 16:18 Na hatelanga e huriki a bakovi nga ri bole takutaku a pelete na havu mangisipa, ri pesi turane Moses e Aron na matana Kape na Vaponga.
NUM 16:19 Muri e Kora i vakalipopo e huriki ri pesi tabukoi na matana Kape na Vaponga, ri mata lakea ne Moses e Aron. Na tahuna ri vapopo, e BAKOVI DAGI i ratea a bagetua vona i bele kavakava i masia e huriki.
NUM 16:20 Lakea e BAKOVI DAGI i taki e Moses e Aron i ta maea,
NUM 16:21 “Muru malele ha ne huriki a bakovi a ngatavine nga. Ngane kunana ga rabalaki ria.”
NUM 16:22 Pali e Moses e Aron ru tabuli ngalabarara na malala, ru takia e BAKOVI DAGI ru ta maea, “Vure, ioe kunana o rata e huriki a bakovi a ngatavine ri made. I navai i madihi a hatemu ne huriki nga na naro hale na bakovi ala taku i ratea?”
NUM 16:23 Lakea e BAKOVI DAGI i takia e Moses,
NUM 16:24 “O taki e huriki ri gi malele ha vona a kape ne Kora, ne Datan, ne Abiram ri gi pesi basi popote.”
NUM 16:25 Lakea e Moses i vano i matai e Datan e Abiram, e huriki a gare ne Israel ri ramaia.
NUM 16:26 Lakea e Moses i taki e huriki a bakovi a ngatavine i ta maea, “Mu karuku mule na kape na bakovi hale nga. Naha ni padoi ranga maki ne tou, ma mu gu vurua turane tou na naro hale ne tou.”
NUM 16:27 Lakea ri malele ha na kape ne Kora, ne Datan, ne Abirama. Pali e Datan, e Abiram ru pagitala ru pesi na matana kape ne rua, turane girihine rua, e tune rua.
NUM 16:28 Lakea e Moses i taki e huriki i ta maea, “Ngane bara mu masia tara maki ge bele, bara mu lohoka vona, e BAKOVI DAGI kunana i rudu iau ga matakari mua, ga rata a leho vona. Iau i uka ma a rata leho na ni ngaru nau.
NUM 16:29 Na tahuna e huriki nga bara ri mate manga kunana e huriki ri mate pali, bara mu lohoka vona e BAKOVI DAGI i uka ma i rudu iau.
NUM 16:30 Pali e BAKOVI DAGI ge rata rikea a naro karaba tara, a malala ge mapoka, ge ngavapanganga, lakea e huriki ri boru dili na lovo turana a maka maki ne ria, ri puru na murine huriki ri mate pali, na tahuna ri tabana ni mahuri, bara mu lohoka vona re huriki nga ri ngalahere ne BAKOVI DAGI.”
NUM 16:31 E Moses i ta lobo, i malaviriri kunana a malala i pesi vona e Datan e Abiram i mapoka, i vakabele a lovo dagi.
NUM 16:32 Lakea a malala i ngavapanganga, i todoa e Kora turana a tara vona, a kape ne ria, a maka maki ne ria.
NUM 16:33 Ri tabana ni mahuri ri boru puru na murine huriki ri mate pali turana a maka maki ne ria. A malala i makapirubu tabu, i uka ma ni matai ria tabu.
NUM 16:34 Na tahuna ri boru puru ri gale dagi hateka. Lakea e huriki a bakovi a ngatavine o Israel ri pesi tabukoi ri ta maea, “Si gi ha malaviriri, ma ge mapoka a malala ge todo hita!”
NUM 16:35 E BAKOVI DAGI i rudua a kanono, i valai i gutu parina e huriki a bakovi ala 250, ra ri rata a nihabi na havu mangisipa.
NUM 16:36 Muri e BAKOVI DAGI i takia e Moses i ta maea,
NUM 16:37 “O takia e Eleasar e tune Aron a prister, ge bole a maka pelete ne huriki ri nono na kanono, ge voro viliha basi a katona kanono i tabuli ne ria. Ge rata mavonga, a vuhuna a pelete nga a taba.
NUM 16:38 Ra maka pelete ne huriki a bakovi ri mate a taba, a vuhuna ri valai na matagu ri rata a nihabi na havu mangisipa. O tutu a pelete nga ge kabela, o naviri a dede vona, ge manga a kilakila na matane huriki a Israel.”
NUM 16:39 E Moses i takia e Eleasar, a prister i bole a pelete nga, i habi ne huriki a mari ri tutu kamumu a maki ge kabela, ne vona ni naviri a dede
NUM 16:40 Ra maki ni tutu i kabela ni kavitagu a dede vona, ge habi a niluhoi dagi ne huriki a Israel. Ri gi lohoka vona e huriki a tara ne Aron kunana ri gi lakea tabukoi na dede, ne vona ni habi a havu mangisipa na matane BAKOVI DAGI. E rei a bakovi tara i ratea a nihabi iea, e BAKOVI DAGI bara i ratapilea, i manga a hini i ratapile e Kora turana a tara vona. Lakea e Eleasar i rata a maka maki e BAKOVI DAGI i taki e Moses vona.
NUM 16:41 Na parava muri, e huriki lobo ri tapuhaki ne Moses e Aron, ri ta maea, “Muru rabalaki pali ranga e huriki a tara ne BAKOVI DAGI.”
NUM 16:42 Na tahuna e huriki lobo ri vapopo ri tahate e Moses e Aron, ri mata lakea na Kape na Vaponga. Ri masia a bubu i kavitagua a kape, a bagetua dagi ne BAKOVI DAGI i bele kavakava.
NUM 16:43 E Moses e Aron ru vano ru pesi na matana Kape na Vaponga.
NUM 16:44 Lakea e BAKOVI DAGI i takia e Moses,
NUM 16:45 “Muru pesi ha. Muru vano muru pesi basi popote ne huriki a bakovi a ngatavine, bara ratapile ria malaviriri kunana. Ru longoa a ngava iea, ru ngalabarara puru na malala.”
NUM 16:46 Lakea e Moses i takia e Aron, “O bole a pelete na havu mangisipa, o bole na dede a katona kanono o rua na pelete vomu. O bole lakea malaviriri ne huriki a bakovi a ngatavine, o rata a nihabi ge kavitagu ria na rongova na Vure, a vuhuna e BAKOVI DAGI i madihi a hatena ne ria, i vakabele a gilanga dagi ne ria pali.”
NUM 16:47 Lakea e Aron i muri mai a nitane Moses. I bole a pelete ne vona ni rata a nihabi na havu mangisipa, i nunu lakea ne huriki a bakovi a ngatavine ri vapopo. I masia a gilanga hale i bele pali ne ria. Lakea e Aron i ratea a nihabi na havu mangisipa, ne vona ni kavitagu ria.
NUM 16:48 Lakea e Aron i pesi na kurukurune huriki ri mate pali, e huriki ri mahuri, i rata a nihabi. Muri a gilanga iea i lobo.
NUM 16:49 Pali e huriki ri mate vona a gilanga iea i 14,700. E huriki ri mate turane Kora, i uka ma ni gi turane ria.
NUM 16:50 Na tahuna a gilanga i lobo, e Aron i hamule mai e Moses na matana Kape na Vaponga.
NUM 17:1 E BAKOVI DAGI i takia e Moses,
NUM 17:2 “O taki e huriki a Israel ri gi habi vomu a kodo ge ravulu a polona i rua (12), ge bole a murina a maka kabu ne Israel. O here puru a rana gare na kodo ne ria takutaku.
NUM 17:3 Ne huriki a hamone Levi, o herea a rane Aron na kodo.
NUM 17:4 Muri o ru a maka kodo nga pololilo na Kape na Vaponga tabukoi na Tava na Ngava Dagi, na tabeke a tagui bala mua vona.
NUM 17:5 A tuvu bara i gaga rike na kodo na viri a vulakia. Bara ri masia a kodo iea, ri lohoka vona, a vulakia pali a bakovi ge leho manga a prister. Na naro iea kunana, iau bara tangokapi a ngavane huriki a Israel, i uka ma ri gi ta barangungu mai ioe, i manga a hini ngane ri rata.
NUM 17:6 E Moses i habia ne huriki a Israel a nita iea, lakea e huriki a matakari takutaku ri habi a kodo ne Moses. A kabu i taku i tahoka a kodo i taku. A kodo lobo i ravulu a polona i rua. A kodo i vona a rane Aron ni ru turana a kodo ne huriki a kabu.
NUM 17:7 Muri e Moses i bole a maka kodo i ru tabukoi na Tava na Ngava Dagi na matane BAKOVI DAGI pololilo na kape.
NUM 17:8 Na parava muri e Moses i dili na kape. I masia a kodo i vona a rane Aron, a kodo ne huriki a Levi, i tuvu i tahoka a vuana i vakabele a kanena kai a almon, ri rara pali.
NUM 17:9 E Moses i bole a maka kodo ri tabuli na matane BAKOVI DAGI, i kaloho tala i vakasiri e huriki a Israel. Ri matai pali, muri i valai e huriki a matakari ri bole mule a maka kodo ne ria.
NUM 17:10 E BAKOVI DAGI i takia e Moses i ta maea, “A kodo i tahoka a rane Aron o bole mule lakea na kape o ru tabukoia na Tava na Ngava Dagi, ge a kilakila ge rata e huriki a bakovi a ngatavine na tagenga ri gi luhoi kamumu. Ra naro iea bara i vakalobo a nita barangungu ne ria, i uka ma ri gi tapuhaki tabu ne nau.”
NUM 17:11 Lakea e Moses i ramai a ngava e BAKOVI DAGI i vakukua vona.
NUM 17:12 Muri e huriki a Israel ri takia e Moses, “Ngane bara mi bole a nimadihi.
NUM 17:13 E rei a viri i lakea tabukoi na Mailo ne BAKOVI DAGI, bara i mate. Na naro iea kunana bara mi mate.”
NUM 18:1 E BAKOVI DAGI i takia e Aron, “Na tahuna ioe, turana e huriki a Levi, e huriki e tumu, i uka ma mu rata kamumu a leho na Mailo nau, bara mu tahoka a maregoa mu bole a vuranga vona. Pali ioe turane huriki e tumu mu rata a naro hale na leho na prister, bara mu bole a maregoa vona.
NUM 18:2 O bole e huriki a bakovi na kabu vomu e Levi, ri gi leho turamu ri gi tuhori ioe, na tahuna ioe turane huriki e tumu mu leho na kape na Ngava Dagi.
NUM 18:3 Ri gi rata a maka leho o habi ne ria, a maka leho ne ria na kape. Pali nahea ri gi padoi a maka maki ri tabuli na Tabeke Nitaba o ri tabuli na dede. Ria ri gi padoi a maki nga, ioe turane ria bara mu mate.
NUM 18:4 E huriki a Levi kunana ri gi leho turamu ri gi rata muholi a leho pololilo na Kape na Vaponga. E huriki a mosi i uka ma ri gi valai tabukoi vomu.
NUM 18:5 “Ioe turane huriki e tumu bakovi kunana mu leho pololilo na Tabeke Nitaba na dede, lakea i uka ma ge madihi a hategu ne mua e huriki a Israel, i uka ma ga rata hale mua tabu.
NUM 18:6 Mu longo, iau kunana a vulaki e huriki na kabu vomu, e Levi, na kurukurune huriki a Israel, a habi tavula ria vomu turane huriki e tumu bakovi. Re huriki nga, ria bakovi nau kunana, ri gi rata a leho pololilo na Kape na Vaponga.
NUM 18:7 Pali ioe turane huriki e tumu bakovi kunana mu rata a maka leho na prister pololilo na Tabeke Nitaba. A leho na prister a habi tavulea ne mua. Ra leho na dede, a leho na tabeke ni taba, a leho ne mua. A bakovi tara i uka ma a vulakia i valai ge ratea a leho iea, ni gi rabalaki.”
NUM 18:8 E BAKOVI DAGI i takia e Aron i ta maea, “Iau kunana a ru ioe a prister go matakari a nihabi malamala e huriki a Israel ri habi nau. A habi a maki ni taba lobo vomu turane huriki a hamomu. Ra naro iea ni gi rata vakaroro.
NUM 18:9 A maka nihabi a taba hateka, naha ni gutu na dede, o bole, ra nihabi na vit, a nihabi na naro hale, a nihabi na rarenga. A maka maki e huriki ri habi nau ge a nihabi, a habi vomu turane huriki e tumu.
NUM 18:10 Mu kani a nihabi nga a taba. E huriki a bakovi ri gi kani, ri gi luhoi ra maki nga a maki malamala.
NUM 18:11 “Mu bole a maka nihabi ranga, e huriki a Israel ranga ri habi nau, ra nihabi na nitabari. A maki ni kani nga a habi vomu ne huriki e tumu na parava vakaroro. E huriki na kabu vomu ri matapado pali na matagu, ri gi kani a kania nga.
NUM 18:12 “Iau bara habi tabu ne mua a maki ri moro muga na hania na oliv, na vain, na vit na pida takutaku.
NUM 18:13 Ra maki ri moro muga muga, ne vone mua kunana. E huriki a bakovi a ngatavine na kabu vomu ri matapado na matagu, ri gi bole ri gi kani.
NUM 18:14 A maka maki e huriki a Israel ri habi nau a ta kari ria vona, i uka ma ri gi kona mule, ne vone mua kunana.
NUM 18:15 “E huriki a tabua ne huriki a Israel, a maka tabua na sipsip a bulmakau, ra ri habi ne BAKOVI DAGI, a habi vomu. Ri gi kona mule e huriki a tabua ne ria, turana maka tabua na livoa i uka ma ri matapado na matagu.
NUM 18:16 E huriki a Israel ri gi kona mule e huriki e tune ria ri tahoka a keva i taku na silva sekel i lima, i ramai a nimavana sekel na kape na tahuna iea.
NUM 18:17 “Pali i uka ma ri gi kona mule a tabua na bulmakau, a sipsip a meme, a vuhuna ni taba ria. Mu rabalaki ria, mu voro tamali na dede a darane ria, mu gutu na dede a vine ria, ge a nihabi. Na tahuna a burongi a mangina a nihabi nga, bara ngarua.
NUM 18:18 A bobona nihabi nga, ne vone mua kunana, i manga a siana, a pona a kanena, a maka nihabi na nitabari ranga.
NUM 18:19 Ra maka nihabi e huriki a Israel ri habi nau, ngane a habi vomu turane huriki e tumu na parava vakaroro. A ngava muholi iea a ratea turamu turana e huriki a hamomu, ge tabuli vakaroro na matagu.”
NUM 18:20 Lakea e BAKOVI DAGI i takia e Aron i ta maea, “Naha ni bole ranga tabekena malala ne Israel, ge ne vone huriki e tune mua. A vuhuna, a maki mu bala vona, bara mu bole nau, iau e BAKOVI DAGI.
NUM 18:21 “Na tahuna e huriki a Israel ri bole valai nau a naguna maki ni kani i ravulu, bara habia ne huriki a Levi a naguna i taku. Ra naguna iea i manga a mapane ria ri rata a leho ni matakari a Kape na Vaponga.
NUM 18:22 Na parava vakaroro muri ma, e huriki a Israel nahea ri gi valai tabukoi na Kape na Vaponga, ma ri gi tahoka a ngava, bara ri mate.
NUM 18:23 Pali e huriki a Levi kunana ri gi matakaria a Kape na Vaponga. E rei a viri i putu puru a vinara na kape, e huriki a Levi kunana bara ri bole a nimadihi vona. Ra vinara iea ge tabuli vakaroro. E huriki a hamomu ranga ri gi ramaia. E huriki a Levi ri uka malala, a kabu ranga na Israel ri tahoka.
NUM 18:24 Na tahuna e huriki ri ru kadolu a maki na naguna i ravulu, ri habia nau a naguna i taku ge a nihabi nau, a habi poloa ne huriki a Levi. Na naro iea kunana a taki ria vona pali, i uka ma ri gi bole a tabekena malala pololilo ne Israel.”
NUM 18:25 E BAKOVI DAGI i takia e Moses,
NUM 18:26 “O taki e huriki a Levi o ta maea, ‘E huriki a Israel ri gi ru na naguna ge ravulu a maki ni kani, a naguna ge taku ri gi habia ne mua. Mu bolea a naguna iea mu ru tabu na naguna ge ravulu, muri mu habia ne BAKOVI DAGI a naguna ge taku.
NUM 18:27 E BAKOVI DAGI ge masia a nihabi iea ge manga a nihabi na vit karaba, a vain karaba, e huriki ri habi vona.
NUM 18:28 Mu rata mavonga, mua ranga bara mu habi a nihabi ne BAKOVI DAGI. Ra tabekena ne BAKOVI DAGI, muri mu habia ne Aron.
NUM 18:29 Mu veru kamumu a maka maki ni kani mu bole, mu vulaki tala a maki i kamumu hateka ge ne vona e BAKOVI DAGI.’
NUM 18:30 “O taki e huriki a Levi o ta maea, ‘Na tahuna mu habi lobo a maki ni kani kamumu ne BAKOVI DAGI, mu kani a kalavana i tababana, i manga e huriki a Israel ri kani a kalavana vit a vain, muri na nihabi i ratea ne BAKOVI DAGI.
NUM 18:31 Ra maki ni kani nga, i manga a mapa ne mua mu rata a leho pololilo na Kape na Vaponga. I mavonga mua, turane huriki a kabu ne mua, mu vano mu kani a kalavana maki ni kani na hini lobo.
NUM 18:32 Mu habi muga a maki ni kani kamumu, bara mu uka ngava. Pali i uka ma mu habi muga, mu kani, bara mu vakahale a nihabi ni taba ne huriki a Israel. Ngane mu tahoka a ngava, bara mu mate.’”
NUM 19:1 E BAKOVI DAGI i taki e Moses e Aron,
NUM 19:2 “A vinara tara a ngaru ni gi ramai ra iea: E huriki a Israel ri gi bolea tara bulmakau vururu, a kinana ge gavutuvutu, i uka ma ni rata a leho vona ma. Ri gi bole vilia ne marua.
NUM 19:3 Muru habia ra bulmakau iea ne Eleasar a prister. Ni gi bole tala na mada a bulmakau, ni gi rabalaki na matana.
NUM 19:4 E Eleasar a prister ge bole a darana bulmakau popote, ge lutua na dara a kukulimana ge taku, ge voro tamali balaka polorua lakea na matana Kape na Vaponga.
NUM 19:5 E Eleasar ge matanono ria ri gi gutu vuroa a bulmakau. Ni gi gutu a kulina, a bobona, a darana, a maka mahalana, ge vuro lobo liu.
NUM 19:6 E Eleasar ge bolea a kai a sida, a rahana kai a hisop, a mota vururu, ge voro rike na kanono ni gutu a bulmakau vona.
NUM 19:7 Muri a prister ge loi pasi a maka varakia vona ge hilolo ia. A prister ge rata lobo a leho, muri ge dili na mada. Pali bara i muto na matagu i harena na haro i rolo.
NUM 19:8 A bakovi i gutua a bulmakau, ia tara ge loi pasi a maka varakia vona, ge hilolo. Ia tara bara i muto na matagu i harena na haro i rolo.
NUM 19:9 “Muri a bakovi tara i matapado na matagu, ge vano ge bole a havulana kanono ra ni gutu a bulmakau vona, ge bole tala na mada ge ru na tabeke i matapado na matagu. Ra habulona kanono ni gi ru kamumu, e huriki a Israel ri gi ru na naru, ne vona ni vahilolo ria, ge loi pasi a maki i muto na matagu. Ria ranga ri gi hilolo vona a naro iea, ne vona ni loi pasi a naro hale.
NUM 19:10 Ra bakovi i bole a habulona kanono ge loi pasi a maka varakia vona. Pali ia tara bara i muto, i harena na haro i rolo. Ra vinara iea ge tabuli vakaroro. Mu ramaia. E huriki a mosi ri made turane mua, ria ranga ri gi ramaia.
NUM 19:11 “A bakovi tara i padoi a bakovi i mate, ra bakovi iea bara i muto na parava i polorua.
NUM 19:12 Pali ia ge vahilolo ia na naru na toluna parava, lakea na poloruana parava bara i matapado. Pali ia i uka ma ge vahilolo pasi ia na toluna parava, a poloruana parava, i uka ma ge matapado.
NUM 19:13 A bakovi i padoi a podana viri, i uka ma i rata ia ge matapado, bara i muto mavonga. A vuhuna i uka ma i bolea ra naru ni rata a viri ge matapado, i uka ma ni voro tamali langa a naru vona. Ra naro iea i ratea a kape nau, i muto na matagu, lakea ra bakovi iea i uka ma ge made turane huriki a tara nau.
NUM 19:14 “A bakovi o a ngatavine i mate pololilo na kape, e huriki a bakovi ri made pololilo na kape iea, e huriki ri dili na kape, bara ri muto na matagu na parava i polorua.
NUM 19:15 A maka ulo, a tavila, a maka maki ri uka a matane ria ri tabuli pololilo na kape, ria ranga ri muto.
NUM 19:16 A bakovi i laho polovavo na tanga i padoi a podana bakovi ni rabalaki, o i padoi a podana bakovi i mate tavula kunana, o i padoi a tuhana bakovi, o i paha a lovo, ra bakovi iea bara i muto na matagu na parava i polorua.
NUM 19:17 “A naro ni rata vuroki a hini muto na bakovi o na ngatavine i maea. Mu ru na ulo ranga havulana bulmakau ni gutu-vuro ne vona a nihabi ni vakamatapado. Mu kirua na ulo a naru.
NUM 19:18 A bakovi i matapado na matagu ge bolea a rahana kai a hisop ge lutua na naru, ge voro tamali lakea na kape i mate vona a bakovi ne huriki a bakovi a ngatavine, na maka maki lobo ri tabuli pololilo na kape. A bakovi i padoi a tuhana bakovi i mavuru pali, o i padoi a podana viri i mate pali, o i padoi a podana bakovi ni rabalaki, o i paha a lovo. Ra bakovi i matapado na matagu, ge voro tamali a naru vona a bakovi i muto na matagu.
NUM 19:19 Na toluna parava, a poloruana parava, ra bakovi i matapado ge voro tamali langa na bakovi i muto a naru. Ra bakovi i ngaru ni matapado, ge loi pasi a maka varakia vona, ge hilolo. Na tahuna a haro i rolo na poloruana parava, bara i matapado.
NUM 19:20 “Pali bara bakovi tara i muto, i uka ma i ramai a naro ni vakamatapado, ra bakovi iea bara i muto mavonga na matagu. A vuhuna i uka ma ni guru langa a naru na ni ratana a bakovi ge matapado. Ra bakovi iea i ratea a kape nau i muto, lakea ni gi tono tala e huriki a tara nau.
NUM 19:21 E huriki a Israel ri gi ramai vakaroroa a vinara iea. A bakovi i guru langa a naru na bakovi tara ge rata ia ge matapado, ge loi pasi a maka varakia vona. A bakovi tara i padoia a naru ne vona ni rata a bakovi ge matapado, ra bakovi iea i muto na matagu i harena na haro i rolo.
NUM 19:22 A bakovi i muto i padoi a maki ranga, ra maki i padoi ri muto na matagu. E rei a bakovi i padoi a maki nga, ia tara i muto na matagu, bara i muto mavonga i harena na haro i rolo.”
NUM 20:1 Na mugana keva e huriki a Israel ri bele na tabeke i ngeki ne Sin, ri made na tanga e Kades. Na tahuna ri tabana ni made o Kades, e Miriam, e kurabane Moses e Aron, i mate, ni tanu vonga.
NUM 20:2 Ra hini nga i uka naru, lakea e huriki ri vapopo ri deke ne Moses e Aron,
NUM 20:3 ri ta maea, “Mi luhoi, i kamumu, mi gi mate hosi na matane BAKOVI DAGI turane huriki a viri ne mia.
NUM 20:4 I navai o bole valai mia koea na tabeke i ngeki? O ngaru mia turana a maka sipsip a bulmakau ne mia, mi gi mate koea na malala golea?
NUM 20:5 I navai o bole tala mia o Egipto o bole valai mia koea na tanga hale, i uka ma i kara mi gi varo a maki ni kani vona? Ra tanga iea i uka vit, i uka kanena kai kamumu, i uka kai a vain. I uka naru koea mi gi ninu.”
NUM 20:6 E Moses e Aron ru longoa a ngava iea, ru pe e huriki ru vano ru tabuli ngalabarara na matana Kape na Vaponga. A nipara ne BAKOVI DAGI i bele ne rua.
NUM 20:7 Lakea e BAKOVI DAGI i takia e Moses i ta maea,
NUM 20:8 “O bolea a kodo. Marua e Aron muru vakalipopo e huriki. Na matane ria o ta lakea na kedo dagi, ge bele a naru. Na naro iea, bara o ratea a naru i bele na kedo. E huriki a bakovi a ngatavine turana a maka sipsip a bulmakau ne ria, bara ri ninu.”
NUM 20:9 E Moses i ramaia a nita ne BAKOVI DAGI, i vano i bolea na kape a kodo vona.
NUM 20:10 E Moses rua e Aron ru vakalipopo e huriki tabukoi vona ra kedo iea, lakea e Moses i taki ria, i ta maea, “Mu longo valai, mua e huriki a bakovi a ngatavine ni longotaro a ngava. Mu luhoi miri gi bole tala a naru vona a kedo iea?”
NUM 20:11 Muri e Moses i toto rike a limana, i ubi balaka rua a kedo na kodo vona. I tua tala na kedo a naru dagi, lakea e huriki turana a bulmakau a sipsip ne ria ri ninu.
NUM 20:12 Pali e BAKOVI DAGI i taki e Moses e Aron, “Mona marua i uka ma muru luhoi tora iau, i uka ma muru togo iau na matane huriki a Israel. Ngane i uka ma muru gu taparaki lakea e huriki na robo a ta muholi vona ga habia ne ria.”
NUM 20:13 Ra maki iea i bele na naru e Meriba, ra tanga e Moses i ratea a naru i tua tala na kedo. Na tanga e Meriba e huriki a Israel ri tapuhaki ne BAKOVI DAGI, lakea e BAKOVI DAGI i vakasiri ria, ia i malamala.
NUM 20:14 E huriki a Israel ri made na tanga e Kades, lakea e Moses i rudu ranga vinuru ri gi habi a ngava na hariki o Idom. Ri lokovonga ri ta maea, “Mi taparaki a ngava ne huriki a tara ne mua, re huriki a Israel. Ri taki ioe ri ta maea, Ioe o lohoka vona a maka maregoa i bele ne mia.
NUM 20:15 O lohoka vona e huriki a gare ne mia ri vano ri made o Egipto na pida i kupo. E huriki a Egipto ri rata hale mia.
NUM 20:16 Lakea mi galea e BAKOVI DAGI ge tuhori mia. I longototo mia i rudua tara agelo vona i valai. I tuli tala mia o Egipto, i taparaki valai mia koea. “Ngane mi made o Kades, ra tanga i pesi na harena robo vomu.
NUM 20:17 Mi ngaru go longo ne mia mi gi laho polo vona a robo vomu. Mia turana a maka bulmakau ne mia i uka ma mi gi page dili, mi gi padikudu viliha lae na hania na vit, a vain ne mua, i uka ma mi gi kiru a naru na maka lomu ne mua. Mi gi laho na dala dagi na hariki kunana, mi gi page poloa a robo vomu.”
NUM 20:18 Pali a hariki o Idom i taki e huriki a Israel i ta maea, “I uka liu, naha ni laho polo na robo ne mia. Mua bara mu laho polo na robo ne mia bara si vaubi.”
NUM 20:19 E huriki a Israel ri taki ria ri ta maea, “Mi ngaru ni ramai a dala dagi kunana. Na tahuna mi ninu a naru ne mua o mi vakaninu a bulmakau, a sipsip ne mia, bara mi konea a naru. Mi ngaru ni laho polo kunana na robo ne mua, e ra pali.”
NUM 20:20 Pali a hariki o Idom i ta tora hateka i ta maea, “I uka liu, naha ni laho polo.” Lakea a tara ne huriki a Idom ri pagitala valai, ri gi vaubi ne huriki a Israel.
NUM 20:21 E huriki a Idom ri marikoi e huriki a Israel ri gi laho polo na robo ne ria, lakea e huriki a Israel ri pe mulea e Idom ri ramai a dala tara.
NUM 20:22 E huriki a Israel lobo ri pe mulea e Kades, ri laho lokovonga ri bele na lolo e Hor,
NUM 20:23 na harena a robo e Idom. Ri made vona a lolo iea, lakea e BAKOVI DAGI i taki e Moses e Aron i ta maea,
NUM 20:24 “Aron, i uka ma go lakea vona a robo a taki ta ga habia ne huriki a Israel. Ioe bara o mate a vuhuna muru longotaro a ngavagu na naru e Meriba.
NUM 20:25 O Moses, o tungari e Aron turane tuna e Eleasar moto sike na lolo e Hor.
NUM 20:26 O kali tala a maka bagetua na prister e Aron o vakarodo e Eleasar, a vuhuna e Aron bara i mate vona a lolo iea.”
NUM 20:27 Lakea e Moses i ramai a nitane BAKOVI DAGI, i tuli e Aron e Eleasar to sike na lolo. E huriki a Israel ri matai tou to vano.
NUM 20:28 Na tahuna to bele meli, lakea e Moses i kali tala a maka bagetua ne Aron i vakarodo e Eleasar, e tune Aron, vona. E Aron i made na lolo i mate. Muri e Moses e Eleasar ru raga puru na lolo.
NUM 20:29 Na tahuna e huriki a bakovi a ngatavine ri lohoka vona e Aron i mate pali, ria lobo ri taringia na parava i ravulu tolu.
NUM 21:1 A hariki o Arad na robo e Kenan, i made o Negev, i longo e huriki a Israel ri ramai a dala ne Atarim. Lakea i bole e huriki a nugumaheto vona ri vaubi turane huriki a Israel. Ri lakavu ranga Israel ri vano turane ria.
NUM 21:2 E huriki a Israel ri ratea tara ngava dagi ne BAKOVI DAGI, ri ta maea, “Ioe bara o habi mia na limane ria, bara mi ratapile lobo a tanga ne ria.”
NUM 21:3 E BAKOVI DAGI i longoa a nitane ria i kori ria, ri rangi e huriki a Kenan. Lakea e huriki a Israel ri ratapile hateka e huriki a Kenan turana a tanga ne ria. Ri galea liu a tanga iea e Horma.
NUM 21:4 E huriki a Israel ri pe mulea a lolo e Hor, ri ramai a dala dagi i lakea na Dari Vururu, na tabeke ne Akaba, a vuhuna ri ngaru ni polo gege vona a robo ne huriki a Idom. Ri laho laho, ri kide tala.
NUM 21:5 Ri tapuhaki na Vure ne Moses ri ta maea, “I navai muru tuli tala mia o Egipto mi gi mate tavula koea na tabeke i ngeki? I uka maki ni kani koea! I uka naru! Mi marikoi vona ra mana mi kani balea, i uka ma a maki ni kani muholi.”
NUM 21:6 E BAKOVI DAGI i longo a nitapuhaki ne ria, lakea i rudu a maka mata hale ri valai ne huriki a Israel ri kanipile ria, lakea i kupo ri mate.
NUM 21:7 E huriki a bakovi a ngatavine ri valai ne Moses ri ta maea, “Mi rata a naro hale pali ne BAKOVI DAGI na tahuna mi tapuhaki ne marua e BAKOVI DAGI. Ngane o vasileki ne BAKOVI DAGI ge lili vuroki a maka mata nga.” Lakea e Moses i vasileki ne ria.
NUM 21:8 E BAKOVI DAGI i longoa a nivasileki ne Moses lakea i takia, “O ratea tara hanuna mata hale o vakatavorea na kai ge ola. E rei a viri i kani ia a mata, ge mata rike maia bara i mahuri.”
NUM 21:9 Lakea e Moses i ratea na bras tara hanuna mata i vakatavorea na kai i ola. Na tahuna a mata hale i kani ria, bara ri mata rike maia, bara ri mahuri.
NUM 21:10 E Huriki a Israel ri pea a lolo e Hor ri laho lokovonga ri bele na tanga e Obot, ri rata a mada.
NUM 21:11 Muri ri pea e Obot ri vano ri bele na tanga e Abarim, ri rata a mada. Ra tanga e Abarim i pesi na nirikena haro na robo e Moab, na tabeke i ngeki.
NUM 21:12 Muri ri pea a hini nga, ri vano ri rata a mada na maloku ne Sered.
NUM 21:13 Muri ri pea e Sered ri tulu poloa a naru e Arnon, ri rata a mada na tabeke mule sike na naru e Arnon, na tabeke i ngeki. Ra tabeke i ngeki iea i dili na robo ne huriki a Amor. Ra naru e Arnon i nagi a robo e Moab e Amor.
NUM 21:14 A Puhu na Nuverei na Vabinga ne BAKOVI DAGI i taki a tanga e Vahep na tabeke ne Supa, a maka maloku na naru e Arnon,
NUM 21:15 turana a maka maloku i lokovonga i harena na tanga e Ar, i lokovonga i harena na robo e Moab.
NUM 21:16 Muri ri pea a tabeke iea ri vano ri bele o Bia, ra tanga iea i tahoka a naru ni keli. Ra tabeke e BAKOVI DAGI i takia e Moses vona a naru iea hosi, i ta maea, “O gale palupu e huriki a bakovi a ngatavine ga habi a naru ne ria.”
NUM 21:17 Na parava iea e huriki a Israel ri ratea tara linge, ri kaloloa: “Naru, o bubu rike, o tua lokovonga, mi gi masia mi gi kalolo a linge na nivivi.
NUM 21:18 E huriki a gare ri bole a kodo-hariki, ri kelia a lomu iea.” Muri ri pea a tabeke i ngeki iea ri lakea na tanga e Matana.
NUM 21:19 Ri pea e Matana ri lakea na tanga e Nahaliel, muri ri pea e Nahaliel ri lakea na tanga e Bamot.
NUM 21:20 Ri pea e Bamot ri lakea na maloku ne Moab. Ra maloku iea i tabukoi na lolo e Pisga. Ra lolo iea e huriki bara ri pesi vona ri tuva lakea na tabeke i ngeki.
NUM 21:21 Muri e huriki a Israel ri rudu a vinuru ne Sihon a hariki o Amor, ri ta maea,
NUM 21:22 “Mi gi laho polo vona a robo vomu. I uka ma mi gi page dili mai a maka hania na vit o a hania na vain ne mua. A naru ne mua na lomu ranga i uka ma mi gi ninu. Mi gi ramai kunana a dala dagi na hariki, bara mi pe mule a robo ne mua.”
NUM 21:23 Pali a hariki e Sihon i marikoi. I gale palupu e huriki a nugumaheto vona, ri lakea na tanga e Iahas na tabeke i ngeki, ri vaubi turane huriki a Israel.
NUM 21:24 Pali e huriki a Israel ri rabalaki na bainat e huriki a Amor ri ala kupo, ri bolea a malala ne ria, i vakatubu na naru e Arnon, i vano i harena na naru e Iabok na tabeke mule sike. Ra hini nga a harena a robo e Amon. E huriki a Amon ri tahoka e huriki a tara na maheto ri tora hateka, ri tagaria a harena malala ne ria.
NUM 21:25 Lakea e huriki a Israel ri bolea a tanga e Hesbon, turana a maka tanga tabukoi vona. Ri bole lobo tabu a maka tanga ne huriki a Amor, ri made vona,
NUM 21:26 a vuhuna e Hesbon a tanga ne Sihon, a hariki ne huriki a Amor. Hosi e Sihon i vaubi turana a tara na hariki ne huriki a Moab, i bole lobo a maka tabekena malala vona, i harena na naru e Arnon.
NUM 21:27 I mavonga e huriki ri bole visia a linge iea: “Mu valai o Hesbon ra tanga na hariki e Sihon. Ni gi rata tabu e Hesbon ge pesi tora.
NUM 21:28 Ni Gi Hosi e huriki a tara na nugumaheto ne Hesbon, e Sihon ri pea a tanga, ri vano ri vaubi hateka, na tanga e Ar na robo e Moab, i manga a kanono i gutu a rehi. E huriki a nugumaheto ri ratapilea a tanga iea, ri vakalobo liu e huriki a bakovi dagi ri made na lolo, na naru e Arnon.
NUM 21:29 Ai-o Moab! Bara mu tahoka a maregoa dagi hateka. Mua o huriki a ngate ne Kemos, bara mu vurua. Ra vure ne mua, i rata e huriki ri ramaia, ri pemo pali, ri made manga a bakovi i laho viliha. I ratea e Sihon, a hariki ne huriki a Amor i nugu tata e huriki e tuna mua ngatavine. Ri vora tavula vona.
NUM 21:30 Pali ngane mi rabalaki ria pali, re huriki a tara na tanga dagi e Hesbon, i vano i harena na tanga e Dibon. Mi ratapile hateka ria, i vano i harena na tanga e Nopa, tabukoi na tanga e Medeba.”
NUM 21:31 Lakea e huriki a Israel ri bole a maka tanga ne huriki a Amor.
NUM 21:32 Muri e Moses i rudu e huriki ri kasisia a tanga e Iaser. Lakea e huriki a Israel ri vaubi o Iaser, ri bolea a tanga iea turana a maka tanga tabukoi. Ri lili tala e huriki a Amor ra ri made vona a tanga iea.
NUM 21:33 Muri e huriki a Israel ri ngalakapulo, ri ramaia a dala i lakea na robo e Basan. Lakea e Og, a hariki o Bosan, turane huriki a nugumaheto vona, ri valai ri vaubi turane huriki a Israel na tanga e Edrei.
NUM 21:34 E BAKOVI DAGI i takia e Moses i ta maea, “Naha ni mangenge ne ria, bara tuhori mua mu ratapile ria, mu bolea a malala ne ria. Bara mu ratapilea i manga a hini mu ratapilea e Sihon, a hariki o Amor, ra i matakari o Hesbon.”
NUM 21:35 Lakea e huriki a Israel ri ramaia ra ngava iea ri rabalakia a hariki e Og, turana e huriki e tuna bakovi, e huriki a tara na nugumaheto vona, e huriki a bakovi a ngatavine na tanga vona, i uka liu tara viri ge mahuri. Muri e huriki a Israel ri bolea a malala ne ria.
NUM 22:1 Muri e huriki a Israel ri pea a tabeke iea, ri vano ri rata a mada na bilane e Moab. Ra bila iea i tabuli na nirikena haro na tabeke mule lokovonga ne Iordan, tabukoi o Ieriko.
NUM 22:2 E Balak, e tune Sipor bakovi, ia a hariki ne Moab. I longo a maka maki e huriki a Israel ri rata ne huriki a Amor.
NUM 22:3 Ia turane huriki a Moab ri matai e huriki a tara bulolo ne Israel, ri mangenge hateka ne ria.
NUM 22:4 Lakea e huriki a Moab ri taki e huriki a matakari ne huriki a Midian ri ta maea, “I uka ma ge tabaka re huriki a tara bulolo nga bara ri vakalobo a maka maki ri tabuli viliha na tabeke ne hita, i manga a maka bulmakau ri kani a varili.”
NUM 22:5 Lakea a hariki e Balak i rudu e huriki a vinuru ri gi takia e Balam, e tune Beor bakovi, ge valai ge masia. E Balam i made na tanga e Petor tabukoi na naru e Iupretis, na robo ne huriki a Amav. E Balak i taki e huriki a vinuru vona ri gi takia e Balam ri gi ta maea, “E huriki a bakovi a ngatavine ri pea a robo e Egipto. Ria a tara dagi hateka. Ngane ri made tabukoi ne mia.
NUM 22:6 Re huriki nga ri gao hateka, i uka ma i kara mi gi rangi ria. I mavonga, i ngaru ioe, go valai go ruduraha ria. Ioe bara o rata mavonga, bara mi vaubi hateka, bara mi rangi ria, mi lili tala ria na malala ne mia. A viri o gamaia bara i made kamumu. A viri o rudurahea bara i bole a vuranga.”
NUM 22:7 Lakea e huriki a gare ne Moab e Midian ri vano ri gi vakalongo e Balam vona a ngava iea. Ri bole ranga moni ri gi kona e Balam vona, ge ruduraha e huriki a Israel. Ri vano ri bele ne Balam ri takia vona a ngavana hariki e Balak.
NUM 22:8 Lakea e Balam i taki ria, i ta maea, “Mu mahita na ruma nau na rodo. Bara taki mua vona a ngava e BAKOVI DAGI ge taki iau vona.” Lakea ri mahita vonga.
NUM 22:9 A Vure i valai ne Balam i nanea, “E rei re huriki ri made turamu?”
NUM 22:10 E Balam i takia a Vure, i ta maea, “E Balak, e tune Sipor, a hariki o Moab i rudu valai ria ri gi vakalongo iau, ri ta maea,
NUM 22:11 e huriki a bakovi a ngatavine, ri valai o Egipto ri laho viliha na robo e Moab. I ngaru iau ga ruduraha e huriki a Israel, lakea a Vure ge ratapile ria, ge gao na vabinga ia ge lili tala ria.”
NUM 22:12 Lakea a Vure i takia e Balam i ta maea, “Naha ni vano turana re huriki a bakovi nga. Naha ni ruduraha e huriki nga, a vuhuna iau a gamai ria pali.”
NUM 22:13 Na hatelanga e Balam i lakea na gare ne huriki a vinuru ne Balak i ta maea, “Mu hamule mai a robo ne mua. Iau i uka ma ga vano, a vuhuna e BAKOVI DAGI i hatekakari iau.”
NUM 22:14 Lakea e huriki a vinuru ri hamule ri takia e Balak ri ta maea, “E Balam i marikoi ni valai turane mia.”
NUM 22:15 Muri e Balak i rudu e huriki a matakari ri dagi hateka ne huriki a matakari muga,
NUM 22:16 ri lakea ne Balam ri ta maea, “E Balak, e tune Sipor i ngaru go lakea taro vona. Nahea tara maki ge vakapae ioe.
NUM 22:17 O valai bara i habi vomu a maka mahala i kupo, bara i rata a maki lobo o ngaru ge rata. I ngaru ioe go valai go ruduraha e huriki nga.”
NUM 22:18 Pali e Balam i koli i ta maea, “Iau a uka ngava vona e Balak. I ngaru ge habia nau a roho-hariki vona i vonu vona a maka silva, a gol, i uka ma ga lakene, a vuhuna a keri ni longotaro a nitane BAKOVI DAGI a Vure nau.
NUM 22:19 Pali mu mahita na roho nau na rodo, ga dava taroa e BAKOVI DAGI i tahoka ranga ngava ge habi nau o i uka.”
NUM 22:20 Na rodo iea a Vure i valai ne Balam i takia, i ta maea, “Re huriki a bakovi nga ri valai ri taki ioe go vano turane ria. I kamumu, o vano turane ria. Pali a ngaru go rata lobo a maka ngava ga taki ioe vona go rata. Naha ni rata tabua tara maki.”
NUM 22:21 Na hatelanga e Balam i kisia a donki vona, i rike vona, i vano turane huriki a matakari nga o Moab.
NUM 22:22 I tura a bakovi ala rua, ru laho turana. Pali a Vure i tahate hateka ne Balam na tahuna i vano turane ria. Lakea i rudua a agelo ne BAKOVI DAGI ge pesi karia a dala ge hehea.
NUM 22:23 A donki vona i masia a agelo ne BAKOVI DAGI i toto silala a bainat vona, lakea i toni ni polo lele vona. Pali e Balam i hotua a donki vona ge hamule mai a dala.
NUM 22:24 Muri a agelo ne BAKOVI DAGI i muga, i pesi kari na dala bala holoholo na kurukuruna a hania na vain i rua. A hania nga ni tura kari na kedo.
NUM 22:25 Na tahuna a donki i masia a agelo ne BAKOVI DAGI, i polo lele, i koro na nure, i kapi tatea na nure a vahane Balam. Lakea e Balam i hotu tabua a donki vona.
NUM 22:26 A agelo ne BAKOVI DAGI i muga tabu i pesi kari a dala i bala holoholo liu, i uka hini ge polo lele vona na maurina o na kanena a donki.
NUM 22:27 Na tahuna a donki i masia a agelo i pesi kari tabua a dala, i mahita puru na dala. Lakea e Balam i madihi tata a hatena, i bolea a lebo i hotua a donki.
NUM 22:28 E BAKOVI DAGI i ratea a donki i ta, i takia e Balam i ta maea, “A ra a ratea vomu o hotu iau balaka tolu?”
NUM 22:29 E Balam i takia a donki i ta maea, “O rata iau a mata manga a manga lakea a hotu ioe. Iau ga tahoka a bainat bara rabalaki ioe ngane kunana.”
NUM 22:30 Lakea a donki i ta maea, “Iau a donki vomu o rike nau na tahuna a karaba vona i valai i harena mona. I hosi, iau a rata maea ioe?” Lakea e Balam i koli i ta maea, “I uka”.
NUM 22:31 Lakea e BAKOVI DAGI i vakapalalea a matane Balam, i masia a agelo ne BAKOVI DAGI i pesi kari a dala, i toto silala a bainat vona. Lakea i tabuli ngalabarara puru na malala.
NUM 22:32 Lakea a agelo ne BAKOVI DAGI i takia, i ta maea, “I navai o hotu balaka tolu maea a donki vomu? O longo, iau a valai a pesi karia a dala, ga gege ioe, a vuhuna iau i uka ma vivi vomu go vano.”
NUM 22:33 Pali a donki vomu i matai iau i polo lele nau balaka tolu. A donki i uka ma ge polo lele, bara rabalaki ioe pali, pali a donki bara i mahuri.
NUM 22:34 Muri e Balam i koli a ngavana agelo ne BAKOVI DAGI, i ta maea, “Iau a ratea a rabu hale i uka ma i kamumu, i uka ma lohoka vomu o pesi karia a dala. Ngane i uka ma o vivi vona a nilaho nau, ga hamule na tanga.”
NUM 22:35 Pali a agelo ne BAKOVI DAGI i takia, i ta maea, “I uka maki, o vano turana e huriki nga. Pali a ngaru ioe go taki kunana a ngava nau, a ngava ranga naha ni taki.” Lakea e Balam i vano turana e huriki a bolekori ne Balak.
NUM 22:36 Na tahuna e Balak i longoa e Balam i laho valai na dala, lakea i vano i taguia na tanga dagi e Moab. A tanga iea i pesi tabukoi na naru e Arnon, ra nagi ne Moab.
NUM 22:37 Lakea e Balak i takia e Balam, “Muga a rudu e huriki a vinuru ri lakene ri taki tora ioe go valai. I navai i uka ma o valai? O luhoi iau a keri ni habi a mahala vomu?”
NUM 22:38 Lakea e Balam i koli i ta maea, “Naha ni ta kupo lae, iau a valai pali. Pali ga vakalongo kunana a ngavana Vure i habi nau. Iau a keri ni rata a ngava ranga.”
NUM 22:39 Muri e Balam i vano turane Balak ru lakea na tanga e Kiriat-Husot.
NUM 22:40 Lakea e Balak i rabalaki ranga bulmakau a sipsip, ge a nihabi. I habi ne Balam ne huriki a bolekori vona ranga balena.
NUM 22:41 Na hatelanga e Balak i tulia e Balam ru sike na tanga e Bamot-Bal. E Balam i pesi vonga i tuva puru i matai ranga e huriki a Israel ri pesi tano.
NUM 23:1 E Balam i takia e Balak, i ta maea, “O rata koea a dede ge polorua nau, o kisi a bulmakau a toga ge polorua, a sipsip a toga ge polorua.”
NUM 23:2 Lakea e Balak i rata a maki e Balam i takia ge rata, lakea ru rata a nihabi na dede i polorua, ru rata a nihabi na bulmakau a toga, a sipsip a toga na maka dede takutaku.
NUM 23:3 Muri e Balam i takia e Balak i ta maea, “O pesi tabukoi na nihabi gutu-vuro vomu, iau ga pesi tala, ga masia e BAKOVI DAGI ge tagui iau o ge uka? Ia ge taki iau vona tara maki, ga valai ga vakalongo ioe.” Muri i sike na mapana lolo.
NUM 23:4 Lakea a Vure i taguia e Balam. Lakea e Balam i takia a Vure i ta maea, “Iau a rata a dede i polorua, a rata a nihabi na bulmakau a toga, a sipsip a toga, na dede kedo takutaku.”
NUM 23:5 Muri e BAKOVI DAGI i habi a ngava ne Balam, i ta maea, “O hamule ne Balak o takia vona a ngava iea.”
NUM 23:6 Na tahuna e Balam i hamule, i masia e Balak i pesi turane huriki a bakovi dagi na robo e Moab, tabukoi na nihabi gutu-vuro.
NUM 23:7 Lakea e Balam i vakalongo ria na nita vakakika, i ta maea, “E Balak a hariki o Moab i bole valai iau koea. I bole tala iau o Siria, na tabeke na nirikena haro, a valai koea. I taki iau i ta maea, ‘Iau a ngaru go valai koea, go ruduraha e huriki a Israel.’
NUM 23:8 “A Vure i uka ma i ruduraha ria, pali iau, i navai ga ruduraha na vai ria? E BAKOVI DAGI i uka ma i pelekado ria, ga pelekado navai ria?
NUM 23:9 A pesi na mapana lolo kedo kedo a matai ria. A matai e huriki ri made herehere. Ri lohoka vona i uka ma ri manga e huriki na robo ranga.
NUM 23:10 “A hamone huriki a Israel bara ri ala kupo hateka ri manga a habulo na malala. I uka tara viri ge kara ni gi palupu ria. A ngaru ga made manga ria ge harena na parava a mate vona. Muholi hateka, a ngaru ni made na nivalemu, ga mate manga a bakovi malamala.”
NUM 23:11 Muri e Balak i takia e Balam i ta maea, “I navai o ratea nau a rabu maea? A bole valai ioe koea, go ruduraha e huriki a pile. Pali i uka ma o rata mavonga, o gamai ria.”
NUM 23:12 Lakea e Balam i koli i ta maea, “Pali a ra ngava ga taki tabua? Iau bara taki kunana a ngava e BAKOVI DAGI i habi nau.”
NUM 23:13 Muri e Balak i takia e Balam i ta maea, “O valai turagu ngane tu gu lakea na tanga tara, go matai ria. I uka ma go matai lobo ria. O pesi vona a tabeke iea, a ngaru go ruduraha puru ria.”
NUM 23:14 Lakea ru sike na bilane Sopim na mapana lolo e Pisga. I rata vonga a dede i polorua, i rata a nihabi na bulmakau a toga a sipsip a toga na dede takutaku.
NUM 23:15 Lakea e Balam i takia e Balak i ta maea, “O pesi tabukoi na nihabi gutu-vuro, ga vano taro iau, ga ta turana Vure na harehare.”
NUM 23:16 E Balam i vano, lakea e BAKOVI DAGI i bele vona, i takia na maka nita ge taki. Muri i ta maea, “O hamule o vakalongoa e Balak vona a nita iea.”
NUM 23:17 I hamule i masia e Balak turane huriki a bakovi dagi o Moab tabukoi na maka nihabi gutu-vuro. Lakea e Balak i nanea e Balam i ta maea, “E BAKOVI DAGI i ta navai?”
NUM 23:18 Lakea e Balam i vakalongoa vona a nita vakakika iea, “O Balak, tune Sipor, o longoa a ngava ga taki.
NUM 23:19 A Vure i uka ma i tatami kilala ge manga hita. Ia bara i ta muholi vona tara maki ge ratea, bara i ratea. I ta kunana na maki i ngaru ge bele, bara i bele.
NUM 23:20 A Vure i taki iau ga gamai ria. Ia kunana i gamai ria. A keri ni pulo a niluhoi vona.
NUM 23:21 A maka maki a matai ge bele ne huriki a Israel, i uka ma ge rata hale ria. E BAKOVI DAGI a Vure ne ria i made turane ria. Ri vivi, ri magulu rike, a vuhuna ia a hariki ne ria.
NUM 23:22 A Vure i bole tala ria o Egipto. I vaubi turane huriki a pile vona. I gao hateka i manga a bulmakau i tegi.
NUM 23:23 Na tahuna e huriki a pile ri ubi e huriki a Israel na muto o ri ruduraha, i uka ma ge rata hale ria. Ngane e huriki bara ri taki virihi e huriki a Israel, ri ta maea, ‘Mu matai a maka maki dagi a Vure i rata.’
NUM 23:24 E huriki a Israel ri pesi rike manga a laion i gao hateka. I uka ma ri malo malaviriri. Bara ri kani a bobona, ri ninu a darana kania. Muri bara ri malo.”
NUM 23:25 Muri e Balak i takia e Balam i ta maea, “Pali, naha ni ruduraha ria, naha ni gamai ria!”
NUM 23:26 Lakea e Balam i koli i ta maea, “Hosi a taki ioe bara rata kunana a maki e BAKOVI DAGI i taki iau vona ga rata.
NUM 23:27 Lakea e Balak i takia e Balam maea, “O valai turagu ga taparaki ioe lakea na tanga tara. A Vure ma ge matai ioe o pesi na tabeke tara, bara i longo ioe go ruduraha ria.”
NUM 23:28 Muri i tulia e Balam ru sike na mapana lolo e Peor, ru tuva lokovonga liu ru masia a tabeke i ngeki.
NUM 23:29 Lakea e Balam i takia, i ta maea, “O rata a dede ge polorua koea. O kisi a bulmakau a toga ge polorua, a sipsip a toga ge polorua.”
NUM 23:30 E Balak i longoa a ngava iea i rata manga a hini e Balam i taki. I rata a nihabi na bulmakau a toga, a sipsip a toga, na dede takutaku.
NUM 24:1 Ngane e Balam i lohoka vona e BAKOVI DAGI i ngaru ni gamai e huriki a Israel, lakea i uka ma i rata a malulu ge kasisi manga a hini muga i rata. I mata lakea na tabeke i ngeki.
NUM 24:2 I matai a maka kape ne huriki a Israel ri vapesihi ramai a kabu takutaku ne ria. Muri a Hanuna Vure i bele vona,
NUM 24:3 i ta vakakika, i ta maea: “Iea a nitane Balam, e tune Beor. A nita iea na viri i para hateka a matana, i matai kamumu a maka maki.
NUM 24:4 A nitana viri i longo a nitana Vure, ra viri i matai a vurena i valai na Vure Tuhaka Hateka, ra viri i tabuli puru, i palala a gina.
NUM 24:5 A matai a maka kape ne huriki a Israel, ri mata kamumu hateka.
NUM 24:6 Ra maka kape nga ri ola manga a kai a det, ri manga a hania ni rata na gagana naru dagi, ri manga a maka kai dagi e BAKOVI DAGI i varo, ri manga a maka kai a sida ri pesi na dahana naru.
NUM 24:7 A naru ge vonu pasilua, ge maguru tala na tavila vona. E huriki a hamona i uka ma ri gi bala a naru. A hariki ne ria, a rana bara i dagi, i gao hateka na hariki e Agag. A hariki o Israel bara i matakari e huriki ri ala kupo.
NUM 24:8 A Vure i bole tala ria o Egipto, a vuhuna a Vure i made turane ria, ri gao hateka, manga a bulmakau i tegi. Ri vakalobo liu e huriki a pile ne ria. Ri raputu a tuhane huriki a pile, ri padimate ria na maheto.
NUM 24:9 E Israel i manga a laion, i mahita. E rei ge vangoa? Ni gi gamai e huriki ri gamai ioe. Ni gi ruduraha e huriki ri ruduraha ioe!”
NUM 24:10 E Balak i madihi tata a hatena, i kanipilu a limana i takia e Balam i ta maea, “Iau a gale valai ioe koea ta go ruduraha e huriki a pile nau, pali i balaka tolu o gamai ria.
NUM 24:11 Ge a ra ngane, a marikoi. O hamule lakea na tanga vomu. Muga a ta muholi ni habi a maka mahala vomu, pali e BAKOVI DAGI i putu tagu a dalamu, i uka ma go bole ngane.”
NUM 24:12 Lakea e Balam i koli i ta maea, “A taki a vinuru o rudu valai ri gi bole iau a ta maea,
NUM 24:13 ‘E Balak ge ngaru ni habi a maka gol, a maka silva, ri tabuli na ruma-hariki vona, iau i uka ma ga bole, a vuhuna i uka ma ga ratea tara maki na ningaru nau, ma ga longotaro a nitane BAKOVI DAGI. Ga vakalongo kunana a ngava e BAKOVI DAGI i ngaru ga vakalongo.’
NUM 24:14 Ngane ga hamule mai e huriki a viri nau. Pali ga taki taro ioe vona a maka maki e huriki a Israel ri gi rata na tara vomu muri ma.”
NUM 24:15 Lakea e Balam i ta vakakika i ta maea, “Iau e Balam e tune Beor, mu longoa a nita vakakika nau. A matagu i para hateka a matai kamumu a maka maki.
NUM 24:16 A nitana viri i longo a nitana Vure, ra viri i lohoka na lohokanga na Vure Meli Liu, ra viri i matai a vurena i valai na Vure Tuhaka Hateka, ra viri i tabuli puru, i palala a gina.
NUM 24:17 A masia, pali i tabana, a masia, pali i uka ma i tabuli tabukoi. A hada bara i pagitala valai ne Iakop, a kodo hariki bara i pesi rike o Israel. Bara i ubi momo a dumena matana e huriki a Moab, bara i ubi momo a gine huriki e tune Set.
NUM 24:18 E Idom bara ni ratapile, a pile vona e Seir tara bara ni ratapile, pali a Israel bara i gao hateka.
NUM 24:19 A matakari bara i valai na kabu ne Iakop. Bara i ratapile e huriki ri tababana ni mahuri na tanga.”
NUM 24:20 Muri e Balam i matai e huriki a Amalek, i vakalongo a nita vakakika ne ria i ta maea: “E huriki a Amalek, muga ri gao hateka. Muri bara ri bole a vuranga dagi.”
NUM 24:21 Muri i matai e huriki a Keni, i vakalongo a nita vakakika ne ria i ta maea: “Ra tanga mu made i uka viri ge ratapilea. A tanga mu made vona i pesi tora manga a nuna loha i tabuli langa na kedo na mapana lolo.
NUM 24:22 Ni Gi Pali e huriki a Asur bara ri vaubi turane mua, bara ri ratapile mua, ri lakavu e huriki a tara ne mua.
NUM 24:23 Muri e Balam i vakalongo tabua tara nita vakakika i ta maea: Na tahuna a Vure ge ratea ra naro iea, e rei ge mahuri?
NUM 24:24 Ni Gi E huriki a Saiprus bara ri rike na aga ne ria ri valai ri vakamadihi e huriki a Asur e huriki a Eber. Pali ria ranga bara ri vurua.”
NUM 24:25 Muri e Balam i malaga i hamule mai a tanga vona, e Balak tara i malaga i hamule mai a tanga vona.
NUM 25:1 Na tahuna e huriki a Israel ri made na maloku ne Sitim, lakea e huriki a bakovi o Israel ri tubu ni rata a narona molenga turane huriki a ngatavine o Moab.
NUM 25:2 Re huriki a ngatavine nga ri gale e huriki a bakovi o Israel ri gi rata a nihabi i lakea na maka vure ne ria, ri lokovonga ne huriki a Moab ri kani turane ria, ri turume na ngalana vure ne ria.
NUM 25:3 Lakea e huriki a Israel ri rihi a vure e Bal o Peor, lakea e BAKOVI DAGI i tahate ria.
NUM 25:4 Muri e BAKOVI DAGI i takia e Moses, i ta maea, “O turari lobo e huriki a matakari ne mua e huriki a Israel, ra ri rata a naro hale, o vakatavore ria, o rabalaki ria na matane BAKOVI DAGI na haro. Bara mu rata mavonga ge lobo a rongova nau ne huriki a Israel.”
NUM 25:5 Lakea e Moses i taki e huriki a mari ni pelekado ne Israel i ta maea, “Mua takutaku mu rabalaki lobo e huriki na kabu ne mua ra ri rihi e Bal o Peor.”
NUM 25:6 Na tahuna e Moses turane huriki a bakovi a ngatavine ri tangi tabukoi na matana Kape na Vaponga, ri masia tara bakovi o Israel i bolea tara ngatavine o Midian i dili turana na kape vona.
NUM 25:7 Na tahuna e Pinias, e tune Eleasar e tubune Aron a prister, i matai rua, i pe e huriki a bakovi a ngatavine, i vano i bole a maheto vona,
NUM 25:8 i muri mai rua i dili na kape na bakovi iea, i paditata rua na maheto ru mate. Muri i lobo a gilanga dagi, ra i ratapile e huriki a Israel.
NUM 25:9 E huriki ala 24,000 ri mate.
NUM 25:10 Lakea e BAKOVI DAGI i takia e Moses i ta maea,
NUM 25:11 “E Pinias, e tune Eleasar e tubune Aron a prister, i vakalobo liu a rongova nau ne huriki a Israel, i rabalaki rua pali, ngane a uka a rongova ne ria. I bage ne huriki a Israel, i manga iau a bage ne ria. I mavonga i uka ma ga vakalobo liu ria.
NUM 25:12 I mavonga o takia e Pinias, ngane iau a rata a ngava dagi na nivalemu turana.
NUM 25:13 A ngava dagi iea ne vona e huriki a hamona, ri gi leho vakaroro manga a prister nau, a vuhuna e Pinias i bage ne huriki a Israel, i ramai a narona Vure vona. A naro e Pinias i ratea i kavitagu e huriki a Israel.
NUM 25:14 A bakovi o Israel e Pinias i rabalakia turana a ngatavine o Midian, a rana e Simri. E Simri e tune Salu, a hamone Simion, ia a gare na kabu vona.
NUM 25:15 A ngatavine o Midian, a rana e Kosbi e tune Sur, a gare ne Midian.
NUM 25:16 Muri e BAKOVI DAGI i takia e Moses i ta maea,
NUM 25:17 “Mu vano mu rata tuhare e huriki a Midian mu rabalaki ria,
NUM 25:18 a vuhuna ri vakamarego mua na tahuna ri tami mua na narone kurabane ria, e Kosbi, e tuna ngatavine na bakovi dagi tara o Midian. Ra ngatavine iea, ni rabalaki na tahuna a gilanga dagi i bele, a vuhuna a maka naro i bele o Peor.”
NUM 26:1 Muri na gilanga dagi i lobo, e BAKOVI DAGI i taki e Moses, e Eleasar e tune Aron a prister, i ta maea,
NUM 26:2 “Ngane muru here puru a rane huriki a bakovi ne huriki a kabu lobo ne Israel ri tahoka a pida i ravulu rua i rike, ri kara ni vaubi, ge ria a nugumaheto ne Israel.”
NUM 26:3 Na maloku ne Moab na dahane Iordan tabukoi na tanga e Ieriko, e Moses e Eleasar a prister ru taki e huriki a Israel ru ta maea,
NUM 26:4 “Mu bole a rane huriki a bakovi ri tahoka a pida i ravulu rua i rike, ge ramaia a nitane BAKOVI DAGI i habia ne Moses.” Re huriki a Israel ri mariu tala o Egipto, ni gi palupu ra nga:
NUM 26:5 E huriki a hamone Reuben a tabua ne Israel ra nga: a kabu ne Hanok, a kabu ne Palu,
NUM 26:6 a kabu ne Herson, a kabu ne Karmi.
NUM 26:7 Ra kabu ne Reuben nga, ri vakabele e huriki ri ala 43,730.
NUM 26:8 E Eliab e tune Palu bakovi.
NUM 26:9 E huriki e tune Eliab a bakovi ra nga: e Nemuel, e Datan, e Abiram. Hosi e huriki a Israel ri ru e Datan, e Abiram ru matakari, pali ru longotaro a nitane Moses e Aron. Ra bakovi nga, turana a tara ne Kora, ri longotaro e BAKOVI DAGI.
NUM 26:10 Lakea a malala i mapoka i bele a lovo dagi, to boru puru na lilona malala, lakea a malala i kavitagu tou. To mate na tahuna a kanono i ratapile e huriki a turane Kora ri ala 250, i manga a kilakila. Na naro iea kunana a Vure i habi a niluhoi dagi ne huriki, nahea ri gi ramai a naro hale nga.
NUM 26:11 Pali a kabu ne Kora i uka ma i lobo.
NUM 26:12 E huriki a hamone Simion ra nga: a kabu ne Nemuel, a kabu ne Iamin, a kabu ne Iakin,
NUM 26:13 a kabu ne Sera, a kabu ne Saul.
NUM 26:14 Ra kabu ne Simion nga ri vakabele e huriki a bakovi ri ala 22,200.
NUM 26:15 E huriki a hamone Gad ra nga: a kabu ne Sepon, a kabu ne Hagi, a kabu ne Suni,
NUM 26:16 a kabu ne Osni, a kabu ne Eri,
NUM 26:17 a kabu ne Arod, a kabu ne Areli.
NUM 26:18 Ra kabu ne Gad nga, ri vakabele e huriki a bakovi ri ala 40,500.
NUM 26:19 E Er, e Onan e tune Iuda, pali ru mate o Kenan.
NUM 26:20 E huriki a hamone Iuda ra nga: a kabu ne Sela, a kabu ne Peres, a kabu ne Sera.
NUM 26:21 E huriki a hamone Peres ra nga: a kabu ne Hesron, a kabu ne Hamul.
NUM 26:22 Ra kabu ne Iuda nga ri vakabele e huriki a bakovi ri ala 76,500.
NUM 26:23 E huriki a hamone Isikar ra nga: a kabu ne Tola, a kabu ne Puva, a kabu ne Iasup, a kabu ne Simron. Ra kabu ne Puvi ri vunu mule ria e Pun.
NUM 26:25 Ra kabu ne Isikar nga ri vakabele e huriki a bakovi ri ala 64,300.
NUM 26:26 E huriki a hamone Sebulun ra nga: a kabu ne Sered, a kabu ne Elon, a kabu ne Ialil.
NUM 26:27 Ra kabu ne Sebulun nga, to vakabele e huriki a bakovi ri ala 60,500.
NUM 26:28 E huriki a hamone Iosep i ramai a kabu ne ria ri bele ne Manase rua e Epraim ra nga:
NUM 26:29 E huriki a hamone Manase ra nga: e Makir, e tune Manase e tamane Gilead. E huriki a hamone Gilead ra nga: a kabu ne Ieser, a kabu ne Helek,
NUM 26:31 a kabu ne Asriel, a kabu ne Sekem,
NUM 26:32 a kabu ne Semida, a kabu ne Heper.
NUM 26:33 E Selopehad, e tune Heper bakovi, i uka e tuna ga bakovi. I tahoka kunana e tuna ngatavine. A rane ria ra nga: e Mala, e Noa, e Hoglah, e Milka, e Tirsa.
NUM 26:34 Ra kabu ne Manase nga, ri vakabele e huriki a bakovi ri ala 52,700.
NUM 26:35 E huriki a hamone Epraim ra nga: a kabu ne Sutela, a kabu ne Beker, a kabu ne Tahan.
NUM 26:36 A kabu ne Eran ria a hamone Sutela.
NUM 26:37 Ra kabu ne Epraim nga, ri vakabele e huriki a bakovi ri ala 32,500. A kabu ne Manase a kabu ne Epraim, ru vuhuna ne Iosep.
NUM 26:38 E huriki a hamone Bensamin ra nga: a kabu ne Bela, a kabu ne Asbel, a kabu ne Ahiram,
NUM 26:39 a kabu ne Sepupam, a kabu ne Hupam.
NUM 26:40 E Ard, e Naman, rua e tune Bela.
NUM 26:41 Ra kabu ne Bensamin nga, ri vakabele e huriki a bakovi ri ala 45,600.
NUM 26:42 E huriki a hamone Dan ri tahoka a kabu i taku kunana, ra kabu ne Suam.
NUM 26:43 Ra kabu iea i vakabele e huriki a bakovi ri ala 64,400.
NUM 26:44 E huriki a hamone Aser ra nga: a kabu ne Imna, a kabu ne Isvi, a kabu ne Beria.
NUM 26:45 A hamone Beria ra nga: a kabu ne Heber, a kabu ne Malkiel.
NUM 26:46 E Aser i tahoka e tuna ngatavine a rana e Sera.
NUM 26:47 Ra kabu ne Aser nga, ri vakabele e huriki a bakovi ri ala 53,400.
NUM 26:48 E huriki a hamone Naptali ra nga: a kabu ne Iasiel, a kabu ne Guni,
NUM 26:49 a kabu ne Ieser, a kabu ne Silem.
NUM 26:50 Ra kabu ne Naptali nga, ri vakabele e huriki a bakovi ri ala 45,400.
NUM 26:51 E huriki a Israel a bakovi ni gi palupu lobo, ri ala 601,730.
NUM 26:52 Muri e BAKOVI DAGI i takia e Moses i ta maea,
NUM 26:53 “O veru a malala na kabu takutaku ne Israel.
NUM 26:54 Mu rehi na rihiva na satu mu veru a tabekena malala. O habi a malala dagi vona na kabu i tahoka a tara i kupo, o habi a malala kiroko vona na kabu a tara vona i uka ma i kupo hateka, ge ramai a vuhuna kabu takutaku.
NUM 26:57 E huriki a hamone Levi ra nga: a kabu ne Gerson, a kabu ne Kohat, a kabu ne Merari,
NUM 26:58 turana a kabu ne Libni, a kabu ne Hebron, a kabu ne Mali, a kabu ne Musi, a kabu ne Kora. E Kohat e tamane Amram.
NUM 26:59 E Amram i parangi e Iokebet, a ngatavine na kabu ne Levi, ni poda na tahuna ri tababana ni made o Egipto. E Iokebet i poda e Aron e Moses, e kurabane rua e Miriam.
NUM 26:60 Muri e Aron i parangi, i vakabele e tuna bakovi ri ala va: e Nadap, e Abihu, e Eleasar, e Itamar.
NUM 26:61 Pali e Nadap e Abihu ru mate na tahuna ru bolea a kanono ru habia ne BAKOVI DAGI, na tahuna e BAKOVI DAGI i uka ma i taki rua ru gu ratea.
NUM 26:62 E huriki a bakovi na kabu ne Levi ri tahoka a keva i taku i rike, ni gi palupu ri ala 23,000. E huriki na kabu ne Levi i uka ma ni gi turana a kabu ranga ne Israel, a vuhuna i uka ma ri bole a malala manga a maka kabu ranga.
NUM 26:63 A maka kabu nga, e Moses, e Eleasar a prister, ru gi palupu tabukoi na maloku ne Moab, na gagana naru e Iordan tabukoi o Ieriko.
NUM 26:64 Pali e Moses, e Aron a prister, ru gi palupu hosi e huriki na tabeke i ngeki o Sinai. E huriki nga ri mate lobo pali.
NUM 26:65 A vuhuna e BAKOVI DAGI i taki re huriki nga i ta maea, “Re huriki a bakovi nga, bara ri mate na tabeke i ngeki.” Lakea ri mate na tabeke i ngeki, pali e Keleb e tune Iepune bakovi, e Iosua e tune Nun bakovi, rua kunana i uka ma ru mate.
NUM 27:1 E Mala, e Noa, e Hoglah, e Milka, e Tirsa, e huriki a ngatavine e tune Selopehad, ri deke. E Selopehad e tune e Heper, e Heper e tune Gilead, e Gilead e tune Makir, e Makir e tune Manase, e Manase e tune Iosep.
NUM 27:2 Na parava tara a ngatavine nga ri vano ri pesi na matana Kape na Vaponga, na matane Moses, e Eleasar a prister, ne huriki a matakari, ne huriki a bakovi a ngatavine, ri ta maea,
NUM 27:3 “E tamane mia i mate na tabeke i ngeki, pali i uka ma i turana e huriki a tara ne Kora ra ri longotaro a nitane BAKOVI DAGI. Ia kunana i rata a naro hale, i mate. Pali i uka e tuna bakovi.
NUM 27:4 I muholi ngi i uka e tuna ga bakovi ge bole a murina, pali i navai a rane tamane mia ge velu tavula ne hita e huriki a Israel? I mavonga o habi mia ranga tabekena malala, na kabu ne tamane mia.”
NUM 27:5 Lakea e Moses i bole lakea ne BAKOVI DAGI a nitane ria.
NUM 27:6 Lakea e BAKOVI DAGI i takia, i ta maea,
NUM 27:7 “A nitane huriki e tune Selopehad i kamumu. O habi ne ria ranga tabekena malala na kabu ne tamane ria, ri gi tahoka.
NUM 27:8 “O taki e huriki a Israel o ta maea, ‘A bakovi ge uka e tuna bakovi, i tahoka kunana e tuna ngatavine, muri i mate, e huriki e tuna ngatavine ri gi bole a maki vona.
NUM 27:9 Ge uka e tuna ngatavine, e huriki e turana ri gi bole a maki vona.
NUM 27:10 Ge uka e turana, e huriki e turane tamana ri gi bole a maki vona.
NUM 27:11 Ge uka e turane tamana, e tune turane tamana ge bole a maki vona. E huriki a Israel lobo ri gi ramaia a vinara iea.’”
NUM 27:12 E BAKOVI DAGI i takia e Moses i ta maea, “O sike na lolo e Abarim, o tuvaia a malala ta ga habia ne huriki a Israel.
NUM 27:13 O matai taroa muri bara o mate ke, i manga e turamu e Aron i mate.
NUM 27:14 A vuhuna muru longotaro a nitagu na tabeke i ngeki ne Sin. Na tahuna e huriki a bakovi a ngatavine ri tapuhaki ne nau na naru e Meriba, o marikoi ni vakasiri a nitora dagi nau ne ria.” Ra lomu e Meriba i tabuli o Kades na tabeke i ngeki ne Sin.
NUM 27:15 Lakea e Moses i takia e BAKOVI DAGI i ta maea,
NUM 27:16 “O Vure, ioe e BAKOVI DAGI, ioe kunana a vuhuna a nimahuri ne huriki lobo. A nana ioe go vulakia tara bakovi ge matakari e huriki,
NUM 27:17 ge tuhori ria ri gi made kamumu, ge muga ria na vabinga. Lakea e huriki a tara vomu i uka ma ri gi laho viliha lae, ri gi manga a maka sipsip ri uka a matakari ne ria.”
NUM 27:18 Lakea e BAKOVI DAGI i takia e Moses, “O vulakia e Iosua e tune Nun, a vuhuna a hanugu i tabuli vona, o ru langa a limamu vona.
NUM 27:19 O takia e Iosua ge pesi na matane Eleasar a prister, na matane huriki a Israel lobo. O vakalongo ria vona e Iosua i kuloi ioe, o habia vona pali a leho vomu.
NUM 27:20 O habi vona ranga nitora vomu, lakea e huriki a Israel ri gi longototoa.
NUM 27:21 Pali e Iosua ge lakea ne Eleasar a prister ge lohoka kamumu vona a ningaru nau. E Eleasar ge bolea a kedo kiroko e Urim, ge bole a lohokanga na ningaru nau. Muri ge vakalongo e Iosua turane huriki a bakovi a ngatavine na maki lobo ri gi rata.”
NUM 27:22 Lakea e Moses i rata a maki e BAKOVI DAGI i taki ia vona ge rata. I bole vilia e Iosua, i vakapesia tabukoi na matane Eleasar a prister, na matane huriki.
NUM 27:23 Lakea e Moses i ru langa a limana na gine Iosua i taki ria ne Iosua ge bole a murina. E Moses i rata lobo a maki e BAKOVI DAGI i ngaru ge rata.
NUM 28:1 E BAKOVI DAGI i takia e Moses,
NUM 28:2 “O vakuku e huriki a Israel o ta maea, ‘Mua o huriki a Israel, mu bole a maki ni kani, mu gutu na dede, ge a nihabi. Mu rata a nihabi ge manginoro, ga ngaru. A nihabi nga, mu rata na parava a taki mua vona mu gu rata.’
NUM 28:3 Moses, o taki e huriki a Israel o ta maea, ‘Na parava vakaroro mu bole a tuna sipsip a toga gavutuvutu ge rua, ru tahoka a pida i taku, ge a nihabi gutu-vuro.
NUM 28:4 Mu habia ne BAKOVI DAGI na hatelanga tara, na malunga tara.
NUM 28:5 Na hatelanga mu bole a kilo na plaoa ge taku, mu vuli turana a namona oliv a lita ge taku, mu habi turana a sipsip ge taku.
NUM 28:6 Ra nihabi gutu-vuro iea mu ratea na parava vakaroro. Hosi ni vakatubu na lolo e Sinai ra nihabi iea. Ge a nihabi ni gutu na kanono. Na tahuna e BAKOVI DAGI i burongi a mangina, bara i vivi.
NUM 28:7 Mu bole a lita na naru vagole ge taku, mu habi turana a sipsip iea, mu guru tala na tabeke ni taba.
NUM 28:8 Na malunga liu mu habia nau a sipsip tara turana a nihabi na vit, a nihabi na vain, i manga a hini mu rata na hatelanga. Ra nihabi ni gutu na kanono, e BAKOVI DAGI i ngaru a mangina.
NUM 28:9 “‘Na Parava Nimalo mu habi a sipsip gavutuvutu ge rua, a toga, ru gu tahoka a pida ge taku. Mu bole a kilo na plaoa ge rua, mu vuli turana a namona oliv, ge a nihabi na vit. Muri mu rata a nihabi na vit, a nihabi na vain turana a sipsip.
NUM 28:10 Ra nihabi gutu-vuro mu rata na maka Parava Nimalo lobo, ge turana ra nihabi mu habi na parava vakaroro, ra nihabi gutu-vuro, a nihabi na vain.
NUM 28:11 “‘Na mugana parava na maka keva lobo mu rata a nihabi ne BAKOVI DAGI, ra nihabi gutu-vuro. Mu habi a bulmakau karaba a toga ge rua, a sipsip a toga ge taku, a tuna sipsip gavutuvutu a toga ge polorua, ri tahoka a pida i taku.
NUM 28:12 A nihabi na vit turana a sipsip a bulmakau mu rata maea. Mu bole a kilo ge tolu na plaoa, mu vuli turana a namona oliv, mu habi turana a bulmakau ge taku. Mu bole a kilo na plaoa ge taku, mu vuli turana a namona oliv, mu habi turana a sipsip a toga.
NUM 28:13 Mu bole a kilo na plaoa ge taku mu vuli turana a namona oliv, mu habi turana a tuna sipsip ge taku. Ra nihabi gutu-vuro, e BAKOVI DAGI i ngaru a mangina.
NUM 28:14 Mu bole a lita ge rua na vain, mu habi turana a bulmakau a toga. A lita na vain ge taku a kalavana mu habi turana a sipsip a toga. A lita na vain ge taku mu habi turana a tuna sipsip. Mu rata maea kunana na maka nihabi gutu-vuro, na mugana parava na keva takutaku na pida lobo.
NUM 28:15 Mu habi turana a nihabi gutu-vuro, a nihabi na vain, a meme a toga ge a nihabi na naro hale.
NUM 28:16 “‘Na ravulu a polovana parava (14th) na mugana keva a Habu na Nipagepolo ne BAKOVI DAGI.
NUM 28:17 Na parava i ravulu a polona i lima (15) a nivakatubuna a habu. Na parava i polorua mu kani a bret i uka is.
NUM 28:18 Na mugana parava na parava dagi nga e huriki lobo ri gi vapopo ri gi vasileki. Naha ni rata a leho mu rata na parava vakaroro.
NUM 28:19 Mu rata a nihabi ne BAKOVI DAGI. Mu habi a bulmakau a toga karaba ge rua, a sipsip a toga ge taku, a tuna sipsip gavutuvutu, a toga ge polorua, ri tahoka a pida ne ria i taku. Mu gutu ria na kanono, ge a nihabi gutu-vuro.
NUM 28:20 Mu habi a kilo ge tolu na plaoa, mu vuli turana a namona oliv, mu habi turana a bulmakau a toga takutaku. Mu habi a kilo na plaoa ge rua, mu vuli turana a namona oliv, mu habi turana a sipsip a toga takutaku.
NUM 28:21 A kilo i taku na plaoa mu vuli turana a namona oliv, mu habi turana a tuna sipsip takutaku.
NUM 28:22 Mu habia tara meme a toga, ge a nihabi na naro hale. Ra nihabi iea bara i kavitagu mua.
NUM 28:23 Mu rata a nihabi nga turana a maka nihabi mu rata vakaroro na hatelanga.
NUM 28:24 Na naro iea kunana, mu kisi a kinani na nihabi na kanono na parava takutaku, na parava ge polorua. Na tahuna e BAKOVI DAGI i burongi a mangina, bara i vivi. Ra nihabi na kinani ni gi habi langa tabu na nihabi gutu-vuro, a nihabi na vain ra mu rata na parava vakaroro.
NUM 28:25 Na poloruana parava, mu vapopo mu vasileki. Naha ni rata a leho mu rata na parava vakaroro.
NUM 28:26 “‘Na parava dagi na Habu na Nimirio, mu bole a vit i moro muga mu habi ne BAKOVI DAGI. Mu vapopo ni kavurikea e BAKOVI DAGI, naha ni rata a leho mu rata na parava vakaroro.
NUM 28:27 Mu bole a bulmakau karaba a toga ge rua, a sipsip a toga ge taku, a tuna sipsip a toga ge polorua, ri tahoka a pida i taku. Mu habi ge a nihabi gutu-vuro. Na tahuna e BAKOVI DAGI i burongi a mangina, bara i vivi.
NUM 28:28 A bulmakau takutaku a kinina a nihabi na vit, ra kilo na plaoa i tolu ni vuli turana a namona oliv. A sipsip a toga, a kinina a nihabi na vit, ra kilo i rua na plaoa, ni vuli turana a namona oliv.
NUM 28:29 Mu habi a kilo na plaoa ge taku, turana a sipsip ge taku.
NUM 28:30 Mu habi a meme a toga ge taku, ne vona ni kavitagu mua.
NUM 28:31 Na tahuna mu rata a maka nihabi nga, a maka sipsip a bulmakau mu habi ge gavutuvutu. A nihabi na vain, a nihabi gutu-vuro, a nihabi na vit ranga, mu rata, i manga a hini mu rata na parava vakaroro.’”
NUM 29:1 E BAKOVI DAGI i takia e Moses, “Na mugana parava na poloruana keva, mu vapopo mu vasileki, naha ni rata a leho mu rata na parava vakaroro. Ra parava iea, a parava ni vaki a tavure.
NUM 29:2 Mu rata a nihabi gutu-vuro ge lakea ne BAKOVI DAGI. I ngaru hateka a mangina. Mu rata a nihabi na bulmakau karaba ge taku a toga, a sipsip a toga, a tuna sipsip gavutuvutu a toga ge polorua a pida ne ria ge taku.
NUM 29:3 Mu rata a nihabi na vit, ge a kinina maka nihabi nga. Mu bole a maka plaoa kamumu ni rata na vit, mu vuli turana a namona oliv, bara mu ratea vona a nihabi iea. Mu habi a kilo na plaoa ge tolu, ge a kinina bulmakau a toga, a kilo na plaoa ge rua, ge a kinina sipsip a toga,
NUM 29:4 a kilo i taku, ge a kinina sipsip takutaku.
NUM 29:5 Mu bole tabua a meme ge taku, ge a nihabi na naro hale, ge kavitagu mua.
NUM 29:6 Mu rata a maka nihabi nga, mu rata tabu a nihabi gutu-vuro, a nihabi na vit ra mu rata na mugana parava na keva lobo. Mu habi tabu a nihabi ni rata na parava takutaku, ra nihabi gutu-vuro, a nihabi na vit, a nihabi na vain. Na tahuna e BAKOVI DAGI i burongi a mangina a nihabi na kanono nga, bara i vivi.
NUM 29:7 “Na ravuluna parava (10th) na polo­ruana keva (7th), mu vapopo mu vasileki. Mu peremu ni kani, naha ni rata a petoanga, naha ni rata a leho vona a parava iea.
NUM 29:8 Mu bolea tara bulmakau karaba a toga, a sipsip a toga, a tuna sipsip gavutuvutu a toga ge polorua, a pida ne ria ge taku. Mu habi ne BAKOVI DAGI ge a nihabi gutu-vuro. Na tahuna e BAKOVI DAGI i burongi a mangina, bara i vivi.
NUM 29:9 Mu gutu a nihabi na vit turana a nihabi gutu-vuro. Mu bole a plaoa kamumu na vit, mu vuli turana a namona oliv, mu habi. Mu habi a kilo na plaoa ge tolu, ge a kinina bulmakau a toga, a kilo na plaoa ge rua, ge a kinina sipsip a toga,
NUM 29:10 mu habi a kilo na plaoa ge taku, ge a kinina tuna sipsip a toga takutaku.
NUM 29:11 Mu habi tabu a meme a toga, ge a nihabi na naro hale. Mu habi tabu a nihabi ni kavitagu mua, a nihabi gutu-vuro mu rata vakaroro turana a nihabi na vit, a nihabi na vain.
NUM 29:12 “Ne ravulu a pololimana parava (15th) na poloruana keva, mu vapopo mu vasileki. Naha ni rata a leho mu rata na parava vakaroro. Mu rata a habu ne BAKOVI DAGI na parava ge polorua.
NUM 29:13 Mu rata a nihabi ni gutu na kanono ne BAKOVI DAGI. I ngaru a mangina a maka nihabi nga. Mu habi a bulmakau karaba a toga ge ravulu a polona i tolu (13), a sipsip a toga ge rua, a tuna sipsip a toga ge ravulu a polona i va (14), ri tahoka a pida i taku. Ria lobo ri gavutuvutu.
NUM 29:14 Mu bole a plaoa mu vuli turana a namona oliv, ne vona ni rata a nihabi na vit. Mu bole a kilo na plaoa ge tolu ge a kinina bulmakau takutaku, a kilo na plaoa ge rua ge a kinina sipsip a toga ge takutaku,
NUM 29:15 a kilo na plaoa ge taku ge a kinina sipsip takutaku.
NUM 29:16 Mu habia tara meme a toga ge a nihabi na naro hale. Mu habi tabu a nihabi na parava takutaku, ra nihabi gutu-vuro, a nihabi na vit, a nihabi na vain.
NUM 29:17 “Na ruana parava, mu habi a bulmakau karaba a toga ge ravulu a polona i rua, a sipsip a toga ge rua, a tuna sipsip a toga ge ravulu a polona i va ri tahoka a pida ne ria i taku. Ria lobo ri gavutuvutu.
NUM 29:18 A nihabi na bulmakau a toga, a sipsip a toga, a tuna sipsip, a kinina ne ria ge a nihabi na vit, a nihabi na vain, ge ramai a ngava a taki mua vona.
NUM 29:19 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.
NUM 29:20 “Na toluna parava, mu habi a bul­makau ge ravulu a polona i taku, a toga, a sipsip a toga ge rua. A tuna sipsip a toga ge ravulu a polona i va, ri tahoka a pida ne ria i taku. Ria lobo ri gavutuvutu.
NUM 29:21 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona.
NUM 29:22 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.
NUM 29:23 “Na vana parava, mu habi a bulmakau a toga ge ravulu, a sipsip a toga ge rua, a tuna sipsip a toga ge polorua, a pida ne ria ge taku. Ria lobo ri gavutuvutu.
NUM 29:24 A nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona.
NUM 29:25 Mu habi tabu a meme a toga, ge a nihabi na naro hale. A nihabi gutu-vuro, tara, ra mu habi na parava vakaroro turana a nihabi na vit, a nihabi na vain, mu habi.
NUM 29:26 “Na limana parava, mu habi a bul­makau a toga ge polova, a sipsip a toga ge rua, a tuna sipsip a toga ge ravulu a polona i va, ri tahoka a pida ne ria i taku. Ria lobo ri gavutuvutu.
NUM 29:27 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona.
NUM 29:28 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.
NUM 29:29 “Na polotarana parava, mu habi a bul­makau a toga ge polotolu, a sipsip a toga ge rua, a tuna sipsip a toga ge ravulu a polona i va, ri tahoka a pida i taku. Ria lobo ri gavutuvutu.
NUM 29:30 A nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona.
NUM 29:31 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vaka­roro turana a nihabi na vit, a nihabi na vain, mu habi.
NUM 29:32 “Na poloruana parava, mu habi a bulmakau a toga ge polorua, a sipsip a toga ge rua, a tuna sipsip a toga ge ravulu a polona i va, ri tahoka a pida ne ria i taku. Ria lobo ri gavutuvutu.
NUM 29:33 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a hini a taki mua vona.
NUM 29:34 Mu habi tabu a meme a toga, ge a nihabi na naro hale. A nihabi gutu-vuro tara, ra mu habi na parava vakaroro turana a nihabi na vit, a nihabi na vain, mu habi.
NUM 29:35 “Na polotoluna parava, mua lobo mu vapopo ni vasileki, naha ni rata a leho mu rata na parava vakaroro.
NUM 29:36 Mu rata a nihabi na kanono ne BAKOVI DAGI. I ngaru a mangina. Ra nihabi iea, mu bolea a bulmakau a toga ge taku, a sipsip a toga ge taku, a tuna sipsip a toga ge polorua ri gi tahoka a pida i taku. Ria lobo ri gavutuvutu. Mu bole mu rata a nihabi gutu-vuro.
NUM 29:37 A maka nihabi na bulmakau a toga, a sipsip a toga, a tuna sipsip, a kinine ria ge a nihabi na vit, a nihabi na vain, ge ramai a ngava a taki mua vona.
NUM 29:38 Mu habi tabu a meme a toga, ge a nihabi na naro hale. A nihabi ni gutuvuro tara, ra mu habi na parava vakaroro turana a nihabi na vit, a nihabi na vain, mu habi.
NUM 29:39 “A nihabi nga, mu kisi turana a maki mu ta muholi mu gu habia ne BAKOVI DAGI, a maki mu ngaru ni habi ne BAKOVI DAGI. Mu kisi, mu habi na habu takutaku ne mua, ra a nihabi gutu-vuro, a nihabi na vit, a nihabi na vain, a nihabi na nivalemu.”
NUM 29:40 E Moses i taki e huriki a bakovi a ngatavine o Israel na maka maki e BAKOVI DAGI i vakuku ia vona.
NUM 30:1 E Moses i taki e huriki a nupesi na kabu takutaku ne Israel, i ta maea, “E BAKOVI DAGI i vakuku hita:
NUM 30:2 Na tahuna a bakovi tara i rata a nita muholi ge habia ne BAKOVI DAGI tara maki, o i ta muholi vona tara maki i uka ma ge ratea, ge ramai a nita muholi i ratea.
NUM 30:3 “Na tahuna a sirula i tabana na ruma e tamana, lakea i ta muholi ne BAKOVI DAGI ge ratea tara maki, o i ta muholi ge pilea tara maki,
NUM 30:4 pali e tamana i longo vona a ngava iea, lakea i uka ma i ta, a nita muholi na sirula iea bara i tabana.
NUM 30:5 Pali e tamana ge longo vona a nita muholi ne tuna a sirula, lakea i ta pupukari vona, a nita muholi lobo vona i uka ma ge tabuli. E BAKOVI DAGI bara i puga vuroki a nita muholi vona a vuhuna e tamana i ta pupukari vona.
NUM 30:6 “Na tahuna a sirula i ta muholi vona tara maki ge ratea, o i kaba tavula na maki tara, muri i parangi,
NUM 30:7 lakea e girihina i longo vona a nita muholi vona, pali na parava iea i uka ma i ta, a nita muholi na ngatavine iea bara i tabana.
NUM 30:8 Pali e girihina ge longo vona a nita muholi i rata hosi a ngatavine iea, lakea na parava iea i ta pupukari ia vona, ngane a nita muholi, o a nikaba tavula vona bara i uka nitora. E BAKOVI DAGI bara i puga vuroki a nita muholi vona a ngatavine iea.
NUM 30:9 “Na tahuna a havuri, o a ngatavine i pilea e girihina, i kaba ge ratea tara maki o i ta kari mule vona nahea ge ratea tara maki, ge ramai kunana a nita muholi vona.
NUM 30:10 “Na tahuna a ngatavine i parangi i kaba ni ratea tara maki,
NUM 30:11 lakea e girihina i longoa a nita muholi vona, i uka ma i ta pupukari vona, a nita muholi lobo vona ge tabuli.
NUM 30:12 Pali na tahuna e girihina i longo vona a nita muholi vona, lakea na parava iea i ta pupukari vona, a nita muholi lobo na ngatavine i uka ma ge tabuli, e BAKOVI DAGI i puga vuroki a nita muholi vona, a vuhuna e girihina i ta pupukari vona.
NUM 30:13 E girihina ngatavine iea i kara ge longo maia a nita muholi na ngatavine o ge ta pupukari vona a nikaba na ngatavine.
NUM 30:14 Pali na tahuna a bakovi i uka ma i rata malaviriria tara ngava ge lakea na ngatavine na tahuna i longoa a nita muholi vona, a ngatavine ge ratea a maki i ta muholi vona ge ratea. E girihina ngatavine i vakatorea, a vuhuna i uka ma i ta pupukari na parava i longo vona a nita muholi na ngatavine.
NUM 30:15 Pali a bakovi ge ta pupukari vona muri na parava ranga, ia kunana i tahoka a ngava na naro hale na hini i putu puru a nita muholi.
NUM 30:16 Ra vinara nga e BAKOVI DAGI i habi ne Moses, i taki virihi a bakovi rua e girihina, a bakovi rua e tuna ngatavine, ra i tababana ni made na ruma vona.
NUM 31:1 E BAKOVI DAGI i takia e Moses,
NUM 31:2 “O koli a naro e huriki a Midian ri rata virihi e huriki a Israel vona. Muri bara o mate.”
NUM 31:3 Lakea e Moses i taki e huriki a Israel i ta maea, “Mu bole a maka maki na vabinga, mu vano mu vaubi turane huriki a Midian. E BAKOVI DAGI i ngaru mu gu koli a narone ria.
NUM 31:4 Mu rudu e huriki a bakovi ala 1,000 na kabu takutaku ne Israel, ri gi vaubi.”
NUM 31:5 Lakea a bakovi ala 12,000, ra 1,000 na kabu takutaku ne Israel, ni habi ne ria a maki na vabinga.
NUM 31:6 Lakea e Moses i rudu ria ri gi vaubi, ra bakovi ala 1,000 na kabu takutaku. E Pinias e tune Eleasar a prister, i turane ria. I bole a maka maki ni taba na kape, a maka tavure ni gale ria ri gi lakea na vabinga, ni gale hamule ria na vabinga.
NUM 31:7 Lakea ri vano ri vaubi ne huriki a Midian i manga a ngava e BAKOVI DAGI i vakuku e Moses vona, ri rabalaki e huriki a bakovi lobo.
NUM 31:8 Ri rabalaki turana e huriki ranga a hariki o Midian ri ala lima: e Evi, e Rekem, e Sur, e Hur, e Reba. E Balam, e tune Beor, ia tara ni padimate na bainat.
NUM 31:9 E huriki a Israel ri turari e huriki a ngatavine, e huriki a koma, ri bole polo a maka bulmakau, a maka sipsip, a maka maki kamumu ne huriki a Midian.
NUM 31:10 Muri ri rungani a maka mada, a tanga ne huriki a Midian.
NUM 31:11 Ri turari e huriki a ngatavine, a koma, ri bole a maka bulmakau a sipsip, a maka mahala,
NUM 31:12 ri bole valai ne Moses ne Eleasar a prister, ne huriki a Israel ri made na bilane Moab, na gagana naru e Iordan tabukoi o Ieriko.
NUM 31:13 E Moses e Eleasar a prister, turane huriki a matakari ne Israel ri vano ri tagui e huriki a nugumaheto polovavo na mada.
NUM 31:14 Muri e Moses i tahate e huriki a ubu ri matakari a nugumaheto ri ala 1,000, e huriki a ubu ri matakari a nugumaheto ri ala 100, ra ri hamule pali na vabinga.
NUM 31:15 Lakea i nana ria i ta maea, “I navai i uka ma mu rabalaki e huriki a ngatavine?
NUM 31:16 Ria kunana ri longo mai a nita ne Balam ri rata e huriki a bakovi a ngatavine ne hita ri ngalahere ne BAKOVI DAGI, na tahuna ri made o Peor. Lakea a gilanga dagi i bele ne huriki a tara ne BAKOVI DAGI.
NUM 31:17 Ngane mu rabalaki e huriki a koma bakovi, e huriki a ngatavine ri mahita turana a bakovi pali.
NUM 31:18 Pali naha ni rabalaki e huriki a koma ngatavine, a sirula. Mu bole ria ge ne mua.
NUM 31:19 “Mua e huriki mu rabalaki a viri, o mu padoi a podana viri, mu made polovavo na mada na parava ge polorua. Na toluna parava, na poloruana parava, mua turane huriki a ngatavine mu bole na vabinga, mu rata a naro ni matapado.
NUM 31:20 Mu vakamatapado a varakia ne mua, a maki lobo ni rata na kulina bulmakau, a vuna meme, a kai.”
NUM 31:21 Lakea e Eleasar a prister i taki e huriki a nugumaheto ri hamule na vabinga i ta maea, “Ngane ga taki mua vona a vinara e BAKOVI DAGI i habi ne Moses.
NUM 31:22 A maka maki i uka ma ge nono, manga a gol, a silva, a aen, a kapa, a bras, mu parai na kanono, ri gi matapado. Pali a maka maki bara i nono, mu loi pasi na naru ni vakamatapado, ri gi matapado.
NUM 31:24 Na poloruana parava, mu loi pasi a maka varakia ne mua, bara mu matapado na matana Vure, mu dili pololilo na mada.”
NUM 31:25 E BAKOVI DAGI i takia e Moses i ta maea,
NUM 31:26 “Mua e Eleasar a prister, e huriki a matakari na maka kabu, mu gi palupu e huriki a vorakato, a maka sipsip a bulmakau, a maki lobo e huriki a nugumaheto ri bole na vabinga.
NUM 31:27 Mu ru na tabeke ge rua. Mu habi ne huriki ri lakea na vabinga a tabeke tara, a tabeke tara mu habi ne huriki ri made na mada.
NUM 31:28 O bole a takis nau vona e huriki a vorakato, a bulmakau, a donki, a sipsip, a meme ra o habi ne huriki a nugumaheto. Ne huriki a vorakato ala 500 ri bole, o bole talea ge taku. Na maka bulmakau, a donki, a sipsip, a meme i 500 ri bole, o bole talea ge taku.
NUM 31:29 O bole o habi ne Eleasar a prister ge manga a takis ri habi nau.
NUM 31:30 E huriki a vorakato, a bulmakau, a donki, a sipsip, a meme, a kanirau ranga, ra o habi ne huriki ri made na mada, ngi ranga o bole a takis ne ria. Ne huriki a vorakato ala ravulu lima o bolea ge taku. Na maka bulmakau, a donki, a sipsip, a meme i ravulu lima o bole talea ge taku. O bole, o habi ne huriki a kabu ne Levi, ra ri matakari a kape ne BAKOVI DAGI.”
NUM 31:31 Lakea e Moses e Eleasar ru rata a maki e BAKOVI DAGI i vakuku rua vona ru gu rata.
NUM 31:32 E huriki a nugumaheto ri bole na vabinga a maki nga: a maka sipsip i 675,000,
NUM 31:33 a maka bulmakau i 72,000,
NUM 31:34 a maka donki i 61,000,
NUM 31:35 e huriki a sirula ri ala 32,000.
NUM 31:36 A kalavana maki ni bole na vabinga i bole e huriki a nugumaheto i maea: A maka sipsip i 337,500,
NUM 31:37 ri habi ne BAKOVI DAGI mana a takis i 675.
NUM 31:38 Ni Gi A maka bulmakau i 36,000, ri habi ne BAKOVI DAGI manga a takis i 72.
NUM 31:39 Ni Gi A maka donki i 30,500, ri habi ne BAKOVI DAGI manga a takis i 61.
NUM 31:40 Ni Gi E huriki a vorakato ri ala 16,000, ri habi ne BAKOVI DAGI manga a takis i ala 32.
NUM 31:41 Lakea i manga a hini e BAKOVI DAGI i vakuku e Moses vona, e Moses i habi ne Eleasar a prister a maki nga turana e huriki a vorakato, i manga a takis ne BAKOVI DAGI.
NUM 31:42 A kalavana maki ni bole na vabinga, e Moses i habi ne huriki ri made na mada, ra nga:
NUM 31:43 E huriki a bakovi a ngatavine ri bole a maka sipsip ri 337,500,
NUM 31:44 Ni Gi a maka bulmakau ri 36,000,
NUM 31:45 Ni Gi a maka donki ri 30,500,
NUM 31:46 Ni Gi e huriki a vorakato ri ala 16,000.
NUM 31:47 Na tabeke na maka maki ni bole na vabinga, ra ni habi ne huriki a Israel, e Moses i bole tala a takis. Ne huriki a vorakato ala ravulu lima, na maka kanirau i ravulu lima, e Moses i bole tala i taku, i manga a hini e BAKOVI DAGI i vakukua vona ge ratea. I habi ne huriki a Levi, ra ri matakari a kape ne BAKOVI DAGI.
NUM 31:48 Muri e huriki a ubu ri matakari a nugumaheto ala 1,000, e huriki a ubu ri matakari a nugumaheto ala 100 ri lakea ne Moses,
NUM 31:49 ri takia, “Bakovi dagi, mi gi palupu pali e huriki a nugumaheto mi matakari, i uka tara ne ria ge velu.
NUM 31:50 Ngane mi gi habi vomu a maka bagetua na gol, mi paru tala na limane ria, na lohone ria, na talingane ria. Mi ngaru ni habi ne BAKOVI DAGI a maka mahala nga, ge a mapana ni kona mule mia ge kavitagu mia.”
NUM 31:51 Lakea e Moses e Eleasar a prister ru bole a gol a maka bagetua nga.
NUM 31:52 A nimavana maka bagetua nga i 16,750 sekel.
NUM 31:53 Pali e huriki a nugumaheto takutaku, ri bole na vabinga ranga maki.
NUM 31:54 E Moses e Eleasar a prister, ru bole ne huriki a ubu a maka gol, ru vano ru ru na Kape na Vaponga. Ru rata mavonga, e huriki a Israel ri gi luhoi mule e BAKOVI DAGI i matakari ria.
NUM 32:1 A kabu ne Reuben ne Gad ri tahoka a maka bulmakau i kupo hateka. Ri matai a malala na tabeke ne Iaser, e Gilead i tahoka a maka varili kamumu ge kani a maka bulmakau.
NUM 32:2 Lakea ri lakea ne Moses e Eleasar a prister, ne huriki a nupesi ri ta maea,
NUM 32:3 “Ra tabekena malala iea e BAKOVI DAGI i tuhori hita vona, si bolea, i kamumu hateka. A tanga e Atarot, e Dibon, e Iaser, e Nimra, e Hesbon, e Eleale, e Sebam, e Nebo, e Beon, ri pesi vona. A malala i kamumu hateka na bulmakau a sipsip ri gi kani vona. Pali mia, e huriki a vora ne marua, mi tahoka a bulmakau a sipsip.
NUM 32:5 Mi ngaru mu gu habia ne mia a tabekena malala iea. Mi marikoi go rata mia mi gi tulu poloa a naru e Iordan, mi gi lakea na tabeke lake.”
NUM 32:6 Lakea e Moses i ta tora na kabu ne Reuben, na kabu ne Gad i ta maea, “I navai mu gu made koea mua, mu gu matataro e huriki a viri ne mua ri gi lakea na vabinga?
NUM 32:7 Mu ngaru ni vakahale a niluhoi ne huriki a Israel ranga? Mu marikoi ne ria ri gi tulupoloa a naru e Iordan ri gi lakea na robo e BAKOVI DAGI i habia ne ria? I navai mu rata mavonga?
NUM 32:8 Hosi e huriki e tamane mua ri rata mavonga, na tahuna mi made na tanga e Kades-Barnea, a rudu tala ria ri gi kasisia a robo e Kenan.
NUM 32:9 Ri vano ri harena na maloku ne Eskol ri masia a robo iea, pali na tahuna ri hamule ri rata e huriki a viri ne ria a Israel ri mangenge, i uka ma ri dili vona a robo iea e BAKOVI DAGI i habia ne ria.
NUM 32:10 Lakea na tahuna iea, e BAKOVI DAGI i madihi a hatena ne ria, i kaba i ta maea,
NUM 32:11 ‘E huriki a bakovi ri tahoka a pida i ravulu rua i rike, ra ri pe e Egipto ri valai, i uka ma ri luhoi tora iau na hatene ria. Muholi hateka, re huriki nga, i uka tara ne ria ge dili vona a malala a ta muholi vona ne Abraham, ne Isak, ne Iakop.
NUM 32:12 A bakovi ala rua kunana ru gu vano, re Keleb e tune Iepune na kabu ne Kenas, e Iosua e tune Nun, a vuhuna ru luhoi tora iau na hatene rua, ru ramai iau e BAKOVI DAGI.’
NUM 32:13 Lakea e BAKOVI DAGI i tahate e huriki a bakovi a ngatavine, i rata ria ri laho viliha lae na tabeke i ngeki na pida i ravulu va, i harena ne huriki ri rata a naro hale na matana ri mate lobo e huriki na hisi iea.
NUM 32:14 “Ngane mu kuloi e huriki e tamane mua, mu manga a tara ni rata a naro hale, ge madihi hateka a hatene BAKOVI DAGI ne hita e huriki a Israel.
NUM 32:15 Mua o huriki a kabu ne Reuben, e Gad, bara mu lobo ni ramai e BAKOVI DAGI, bara i ngalahere ne hita a Israel, bara i pe mule tabu hita na tabeke i ngeki, lakea mua kunana bara mua a vuhuna a vuranga si bolea.”
NUM 32:16 Muri ri lakea ne Moses, ri takia, “Mi gi tura halui taro koea a nure na maka bulmakau a sipsip ne mia. Mi gi rata taro a maka tanga ne girihine mia, e tune mia.
NUM 32:17 I mavonga, e girihine mia, e tune mia ri gi made kamumu na tanga ni tura halui, i uka ma ge ratapile ria e huriki a taho tanga. Muri mi gi bole a maki na vabinga, mi gi muga ne huriki a Israel na vabinga, mi gi taparaki ria na maka tanga ne ria.
NUM 32:18 E huriki a kabu takutaku ne hita e huriki a Israel ri gi bole taro a tabekena malala ne ria, muri mi gi hamule na tanga ne mia.
NUM 32:19 Mia i uka ma mi gi bole ranga malala na tabekene Iordan tara, a vuhuna mi bole pali a tabekena malala koea na nirikena haro ne Iordan.”
NUM 32:20 Lakea e Moses i koli ria i ta maea, “Mua bara mu ta muholi, bara mu kisi puru na vabinga e huriki a nugumaheto ne mua, na matane BAKOVI DAGI.
NUM 32:21 Mua bara mu kisi puru mua na vabinga na matane BAKOVI DAGI, mu tulu poloa a naru e Iordan, mu kori e huriki a turane mua, ge vano ge harena na tahuna e BAKOVI DAGI i lili tala e huriki a pile vona.
NUM 32:22 Mua bara mu rata lobo a maki nga, muri, na tahuna a malala lobo i tabuli na limane hita na matane BAKOVI DAGI, bara mu hamule valai na tanga ne mua, a leho ne mua bara i lobo na matane BAKOVI DAGI, na matane huriki a Israel. Lakea a malala koea bara a malala ne mua na matane BAKOVI DAGI.
NUM 32:23 “Pali mua i uka ma mu gu ramai a ngava nga, bara mu rata halea e BAKOVI DAGI. I muholi hateka, a naro hale ne mua bara i bele kavakava.
NUM 32:24 Mu rata puru taro a maka tanga ne mua, a maka nure na sipsip ne mua. Pali mu ramai a nita muholi ne mua.”
NUM 32:25 Lakea e huriki a tara ne Reuben, a tara ne Gad, ri takia e Moses ri ta maea, “Bakovi dagi, mia a vora vomu kunana, bara mi longo mai a ngava o taki.
NUM 32:26 E huriki a ngatavine a koma, a maka bulmakau a sipsip, ri gi made na maka tanga na tabeke e Gilead.
NUM 32:27 Pali mia e huriki a vora vomu, mi gi kisi mule mia na vabinga, mi gi tulu poloa a naru e Iordan, mi gi vano mi gi vaubi na matane BAKOVI DAGI, i manga a ngava o taki.”
NUM 32:28 Lakea e Moses i vakuku e Eleasar a prister, e Iosua e tune Nun, e huriki a nupesi na kabu takutaku ne huriki a Israel,
NUM 32:29 i ta maea, “E huriki a Gad, a Reuben ri gi kisi mule ria na vabinga, ri gi tulu poloa a naru e Iordan turane mua na matane BAKOVI DAGI, lakea mu bole a malala e Kenan, ngane mu habi ne huriki a Gad, e huriki a Reuben a malala na tabeke ne Gilead, ga malala ne ria.
NUM 32:30 Pali ria i uka ma ri gi kisi mule ria na vabinga, i uka ma ri gi tulu poloa e Iordan turane mua, bara ri bole kunana a malala o Kenan turane mua.”
NUM 32:31 Lakea e huriki a bakovi na kabu ne Gad, ne Reuben, ri koli ri ta maea, “O bakovi dagi, i kamumu, mi gi rata a maki e BAKOVI DAGI i taki.
NUM 32:32 Mi gi kisi mule mia na vabinga, mi gi tulu poloa e Iordan na matane BAKOVI DAGI, mi gi bele vona a robo e Kenan. Pali a malala mi gi bolea, a malala koea na tabekena nirikena haro ne Iordan.”
NUM 32:33 Lakea e Moses i habi na kabu ne Gad, a kabu ne Reuben, a kalavana kabu ne Manase, re tune Iosep, i habi ne ria a harikianga ne Sihon, a hariki ne huriki a Amor. I habi tabu ne ria a harikianga ne Og, a hariki o Basan, a malala lobo vona, turana a maka tanga, a tabeke tabukoi ne ria.
NUM 32:34 E huriki a hamone Gad ri hae rike tabu a maka nulitanga. Ri rata a tanga e Dibon, e Atarot, e Aroe,
NUM 32:35 e Atrot-Sopan, e Iaser, e Iogebeha.
NUM 32:36 Ri hae rike tabu e Bet-Nimra, e Bet-Haran ru tura halui a nure dagi turana a nure na meme a sipsip.
NUM 32:37 E huriki a hamone Reuben ri hae tabu a tanga e Hesbon, e Eleale, e Kiriataim,
NUM 32:38 e Nebo, Bal-Meon. Ri vunu kuluia a rane Bal-Meon ri galea e Sipma. Ri habi a rana karaba ne ria a maka tanga ri rata rike tabu.
NUM 32:39 E huriki e tune Makir, re tune Manase, ri lakea o Gilead ri vaubi ne huriki a Amor, ri lili tala ria, ri bolea a malala ne ria.
NUM 32:40 Lakea e Moses i habia ne Makir a malala ne huriki a Gilead, i made vona.
NUM 32:41 E Iair, tara hamone Manase, i vano i vaubi i bole ranga tanga i gale ria e Havot-Iair.
NUM 32:42 E Noba, i vano i bolea a tanga e Kenat turana a maka tanga kiroko tabukoi vona. I galea a tanga iea e Noba, i ramai a rana.
NUM 33:1 Iea ngane a nilaho ne huriki a Israel ri pe e Egipto. Ri laho na tara takutaku, i matakari ria e Moses e Aron.
NUM 33:2 E Moses i here puru a nilaho ne ria, a vuhuna e BAKOVI DAGI i vakukua ge rata mavonga. Iea ngane a nilaho ne ria, i ramai a hini ri rata a mada vona.
NUM 33:3 E huriki a Israel ri pea a tanga e Remeses na ravulu i pololimana parava na mugana keva, na parava muri na Habu na Nipagepolo. Ri laho tala vaganagana na matane huriki a Egipto lobo.
NUM 33:4 Na tahuna iea e huriki a Egipto ri tanu e huriki e tune ria a tabua, ra i rabalaki e BAKOVI DAGI. I ratapile tabu a maka vure ne ria, ge vakasiri a nitora vona.
NUM 33:5 E huriki a Israel ri pea e Remeses, ri rata a mada o Sukot.
NUM 33:6 Ri pea e Sukot, ri rata a mada o Etam na harena tabeke i ngeki.
NUM 33:7 Ri pea e Etam, ri hamule mae e Pihahirot na tabeke na nirikena haro na tanga e Balsepon, ri rata a mada o Migdol.
NUM 33:8 Ri pea e Pihahirot ri polo kudua a Dari Vururu, ri vano ri bele na tabeke i ngeki. Ri laho na parava i tolu na tabeke i ngeki ne Etam, ri rata a mada o Mara.
NUM 33:9 Ri pea e Mara, ri rata a mada o Elim. Ra tanga iea i tahoka a naru bele i ravulu a polona i rua, a maka kai a det ri ravulu polorua.
NUM 33:10 Ri pea e Elim, ri rata a mada tabukoi na Dari Vururu.
NUM 33:11 Ri pea a Dari Vururu, ri rata a mada na tabeke i ngeki ne Sin.
NUM 33:12 Ri pea a tabeke i ngeki ne Sin, ri rata a mada o Dopka.
NUM 33:13 Ri pea e Dopka, ri rata a mada o Alus.
NUM 33:14 Ri pea e Alus, ri rata a mada o Repidim. Ra tanga iea i uka naru ge ninu e huriki.
NUM 33:15 Ri pea e Repidim, ri rata a mada na tabeke i ngeki ne Sinai.
NUM 33:16 Ri pea a tabeke i ngeki ne Sinai, ri rata a mada o Kibrot-Hatava.
NUM 33:17 Ri pea e Kibrot-Hatava, ri rata a mada o Haserot.
NUM 33:18 Ri pea e Haserot, ri rata a mada o Ritma.
NUM 33:19 Ri pea e Ritma, ri rata a mada o Rimon-Peres.
NUM 33:20 Ri pea e Rimon-Peres, ri rata a mada o Libna.
NUM 33:21 Ri pea e Libna, ri rata a mada o Risa.
NUM 33:22 Ri pea e Risa, ri rata a mada o Kehelata.
NUM 33:23 Ri pea e Kehelata, ri rata a mada na lolo e Seper.
NUM 33:24 Ri pea a lolo e Seper, ri rata a mada o Harada.
NUM 33:25 Ri pea e Harada, ri rata a mada o Makelot.
NUM 33:26 Ri pea e Makelot, ri rata a mada o Tahat.
NUM 33:27 Ri pea e Tahat, ri rata a mada o Tera.
NUM 33:28 Ri pea e Tera, ri rata a mada o Mitka.
NUM 33:29 Ri pea e Mitka, ri rata a mada o Hasmona.
NUM 33:30 Ri pea e Hasmona, ri rata a mada o Moserot.
NUM 33:31 Ri pea e Moserot, ri rata a mada o Bene-Iakan.
NUM 33:32 Ri pea e Bene-Iakan, ri rata a mada o Hor-Hagidigad.
NUM 33:33 Ri pea e Hor-Hagidigad, ri rata a mada o Iotbata.
NUM 33:34 Ri pea e Iotbata, ri rata a mada o Abrona.
NUM 33:35 Ri pea e Abrona, ri rata a mada o Esion-Geber.
NUM 33:36 Ri pea e Esion-Geber, ri rata a mada o Kades na tabeke i ngeki ne Sin.
NUM 33:37 Ri pea e Kades ri rata a mada na lolo e Hor, na nagi na malala ne huriki a Idom.
NUM 33:38 Ri made na hini nga. Na mugana parava na limana keva, na pida i ravulu va muri ne ria ri pe e Egipto, e Aron a prister i longototo a nitane BAKOVI DAGI, i sike na lolo e Hor. Muri i mate vonga.
NUM 33:39 A pida vona i 123, na tahuna i mate na lolo e Hor.
NUM 33:40 A hariki na robo e Arad na tabeke mule puru ne Kenan i longo a velengane huriki a Israel ri valai.
NUM 33:41 E huriki a Israel ri pea a lolo e Hor, ri rata a mada o Salmona.
NUM 33:42 Ri pea e Salmona, ri rata a mada o Punon.
NUM 33:43 Ri pea e Punon, ri rata a mada o Obot.
NUM 33:44 Ri pea e Obot, ri rata a mada o Ie-Abarim na malala ne huriki a Moab.
NUM 33:45 Ri pea e Ie-Abarim, ri rata a mada o Dibon-Gad.
NUM 33:46 Ri pea e Dibon-Gad, ri rata a mada o Almon-Diplataim.
NUM 33:47 Ri pea e Almon-Diplataim, ri rata a mada na lolo e Abarim, tabukoi o Nebo.
NUM 33:48 Ri pea a lolo e Abarim, ri rata a mada na bilane Moab, tabukoi o Ieriko na gagane Iordan.
NUM 33:49 Ri rata a mada na gagana naru e Iordan, tabukoi o Bet-Iesimot i vano i harena o Abel-Sitim.
NUM 33:50 Ri made na bilane Moab tabukoi o Ieriko na dahana naru e Iordan, lakea e BAKOVI DAGI i vakukua e Moses,
NUM 33:51 ge taki maea e huriki a Israel, “Na tahuna mu tulu poloa a naru e Iordan, mu dili na robo e Kenan,
NUM 33:52 mu lili tala e huriki a tahotanga. Mu ratapile a maka hanuna vure ne ria, a murina ni vasileki ne ria.
NUM 33:53 Muri mu bolea a malala mu made vona, a vuhuna e BAKOVI DAGI i habia mua a malala iea.
NUM 33:54 Mu rehi na rihiva na satu, mu vaveru vona a malala na kabu takutaku ne mua. A kabu ge kupo e huriki a bakovi a ngatavine vona, mu habi a malala dagi. A kabu kiroko, mu habi a malala ge namimule. A ra malala ri gi bolea, nahea ri gi vagege lae vona. Mu veru tala a malala, ge ramai a rana vuhuna kabu takutaku ne mua.
NUM 33:55 “Pali mua i uka ma mu gu lili tala e huriki a tahotanga, bara ri habi a maregoa ne mua manga a barakau i kau a matane mua, a kamagane mua. Bara ri vaubi ne mua vona a robo iea mu made vona.
NUM 33:56 I mavonga, a maki ta ga ratea ne ria, bara ratea ne mua.”
NUM 34:1 E BAKOVI DAGI i takia e Moses,
NUM 34:2 ge vakuku e huriki a Israel ge ta maea, “Na tahuna mu dili na malala e Kenan, a malala ni gi habi ne mua, bara ni nagi maea:
NUM 34:3 “A nagi i tubu tano liu na malala golea ne Sin i ramai a nagi ne Idom. Na nirikena haro, a nagi i tubu tano na ruperena Dari Mate.
NUM 34:4 Muri i polo tano na bala na lolo e Akrabim, i padi kudua a kurukuruna tabeke ne Sin i vano i harena na tabeke mule puru ne Kades-Barnea. A nagi i kaogo lakea na tanga e Hasar-Adar i harena na tanga e Asmon.
NUM 34:5 A nagi i kaogo vonga i ramaia a naru mara e Vadi o Egipto, i vano i lobo na Dari na Kurukuruna Malala.
NUM 34:6 “A lavu na Dari na Kurukuruna Malala, i tabuli manga a nagi ne mua na tabeke na nirolona haro.
NUM 34:7 “A nagi na tabeke mule sike i pe mulea a Dari na Kurukuruna Malala, i lakea maia a lolo e Hor.
NUM 34:8 Muri i pe mulea e Hor i lakea ne Lebo-Hamat. A nagi i vano i polo lakea na tanga e Sedad,
NUM 34:9 e Sipron i harena na tanga e Hasar-Enan. A nagi iea, a nagi ne mua na tabeke mule sike.
NUM 34:10 “A nagi na nirikena haro i tubu o Hasar-Enan i lakea maia a tanga e Sepam.
NUM 34:11 A nagi i pe mulea e Sepam i puru lakea na tanga e Ripla, na tabeke na nirikena haro na tanga e Ain, i puru lakea na maka kupona na dahana darilomu e Kineret na tabeke na nirikena haro.
NUM 34:12 A nagi i puru i ramaia a naru e Iordan, i harena na Dari Mate. Ra nagi nga, a maka nagina harena malala ne mua, na tabeke lobo.”
NUM 34:13 Lakea e Moses i vakuku e huriki Israel i ta maea, “E BAKOVI DAGI i ru a nagi na malala ne mua a kabu i polova turana a kalavana kabu ne Manase. Mu rehi na rihiva na satu mu vulaki a tabekena malala ne mua.
NUM 34:14 A kabu ne Reuben, a kabu ne Gad, a kalavana kabu ne Manase to bole pali a malala ne tou.
NUM 34:15 To bole pali a malala na tabeke na nirikena haro, na gagana e Iordan, tabukoi o Ieriko.”
NUM 34:16 E BAKOVI DAGI i takia e Moses i ta maea,
NUM 34:17 “E Eleasar a prister, e Iosua e tune Nun, ru gu verua a malala ne huriki.
NUM 34:18 O bole tala takutaku na maka kabu a bakovi ge tuhori rua.
NUM 34:19 A rane huriki a bakovi ra nga: Na kabu ne Iuda, e Keleb, e tune Iepune.
NUM 34:20 Na kabu ne Simion, e Selumuel, e tune Amihud.
NUM 34:21 Na kabu ne Bensamin, e Elidat, e tune Kilson.
NUM 34:22 Na kabu ne Dan, a nupesi e Buki, e tune Iokli.
NUM 34:23 Na kabu ne Manase a hamone Iosep, a nupesi e Haniel, e tune Epod.
NUM 34:24 Na kabu ne Epraim, a nupesi e Kemuel, e tune Siptan.
NUM 34:25 Na kabu ne Sebulun, a nupesi e Elisapan, e tune Parnak.
NUM 34:26 Na kabu ne Isikar, a nupesi e Paltiel, e tune Asan.
NUM 34:27 Na kabu ne Aser, a nupesi e Ahihud, e tune Selomi.
NUM 34:28 Na kabu ne Naptali, a nupesi e Pedahel e tune Amihud.”
NUM 34:29 E huriki a nupesi nga, e BAKOVI DAGI i vakuku ria ri gi veru a malala ne Kenan ne huriki a Israel.
NUM 35:1 Na tahuna e huriki a Israel ri made na bilane Moab na tabeke mule lokovonga ne Iordan tabukoi na tanga e Ieriko, e BAKOVI DAGI i takia e Moses,
NUM 35:2 “O vakuku e huriki a Israel ri gi ru here ranga tanga na tabeke na malala ne ria, ri gi habi ne huriki a Levi ri gi made vona. Ri gi habi tabu ne huriki a Levi a malala tabukoi na tanga nga, ge ne vona a maka sipsip a bulmakau ne ria.
NUM 35:3 A tanga nga ne huriki a Levi ri gi made vona. A maka malala tabukoi na tanga nga, ne vona a maka sipsip, a meme, a bulmakau ne ria.
NUM 35:4 “Ra malala i vona a varili ge tabuli halui a tanga, ge vakatubu na nure na tanga, ge pagitala ge harena na mita i 450.
NUM 35:5 Ra tanga i kamumu ge pesi na kurukuruna malala. A maravana na harena tara ge lakea na harena tara, ge 900 mita.
NUM 35:6 “Na tanga nga, a tanga i polotara ne vona ni kapiloho. E rei a viri i rabalaki tara turana, ge ha ge kapiloho vona tara tanga nga. Mu habi tabu ne huriki a Levi a tanga ge ravulu va a polona i rua.
NUM 35:7 A malala i tahoka a varili kamumu ge tabuli tabukoi na maka tanga nga. A maka tanga ne huriki a Levi, ni gi palupu lobo i ravulu va a polona i polotolu (48).
NUM 35:8 Na tahuna mu bole a tanga nga ne huriki a Israel, mu habi ne huriki a Levi ge kupo a tanga na kabu dagi, ge popote na kabu kiroko.”
NUM 35:9 Lakea e BAKOVI DAGI i takia e Moses ge taki e huriki a Israel,
NUM 35:10 “Na tahuna mu tulu polo loboa a naru e Iordan mu dili na robo e Kenan,
NUM 35:11 mu vulaki ranga tanga ne vona ni kapiloho. Na tahuna a viri i rabalaki rurua e turana, bara i ha lakea vona tara tanga nga, ge made vonga.
NUM 35:12 Ra maka tanga nga, ri gi tabuli manga a tanga ni kapiloho, a turana bakovi i mate i uka ma ge kolia a nimatena bakovi. A bakovi i rabalaki rurua tara turana bara i made kamumu vonga, ge dava a parava na ni vapelekado.
NUM 35:13 “Mu vulaki a tanga ge polotara kunana ne vona a tanga ni kapiloho.
NUM 35:14 Ge tolu na tabeke na nirikena haro ne Iordan, ge tolu na robo e Kenan.
NUM 35:15 Ra tanga nga ri gi pesi manga a tanga ni kapiloho ne huriki a Israel, ne huriki a mosi. E rei a viri i rabalaki rurua tara turana, ge ha lakea vona tara tanga nga, ge kapiloho.
NUM 35:16 “Pali a bakovi ge ubi matea a turana na modona aen, ia a bakovi ni rabalaki a viri. Ni gi rabalaki.
NUM 35:17 A bakovi ge ubi matea a turana na kedo, ia a bakovi ni rabalaki a viri. Ni gi rabalaki.
NUM 35:18 A bakovi ge ubi matea a turana na modona kai, ia a bakovi ni rabalaki a viri. Ni gi rabalaki.
NUM 35:19 A turana bakovi i mate kunana, bara i koli. Ge padimatea a bakovi i rabalakia e turana na tahuna i matavisia.
NUM 35:20 E rei a viri i marikoi a bakovi tara, lakea i kopea, i boru, i mate, o i padia na maki tara i mate,
NUM 35:21 o i dakia i mate, ra bakovi iea ni gi rabalaki, a vuhuna ia a viri ni rabalaki a viri. E turana bakovi i mate ge koli, ge rabalakia na tahuna i matavisia.
NUM 35:22 “Pali a viri i uka ma i marikoi e turana, pali i kopea, i boru, i mate, o i voro tavula a maki, i padimatea, o i uka ma i masia i voro a kedo i padimatea, a naro mu gu ratea ge maea. E huriki na vaponga ri gi ramai a vinara, ri gi pelekado kamumu a viri i padimate ruru a viri, turana a viri i ngaru ni koli a matenga.
NUM 35:25 A bakovi i rabalaki a viri, e huriki na vaponga ri gi korimulea na limana viri koli, ri gi rudu mulea ge made na tanga ni kapiloho. Ge made kapiloho vonga ge harena na tahuna a prister dagi ge mate, ra prister ni biri na nibiri ni gamai.
NUM 35:26 “Pali na tahuna a prister dagi i uka ma i mate ma, ra bakovi i rabalaki a viri ge ha taro a tanga ni kapiloho, ge page tala,
NUM 35:27 lakea a viri i koli ge masia, ge rabalakia, bara i uka ngava.
NUM 35:28 A vuhuna a bakovi i rabalaki a viri nahea ge ha taroa a tanga ni kapiloho, ge harena na tahuna a prister dagi ge mate. Na tahuna a prister dagi i mate, bara i hamule lakea na tanga vona.
NUM 35:29 “Mua turane huriki a hamone mua, na tahuna mu made na hini vai, mu ramaia a vinara iea.
NUM 35:30 “Na tahuna ni rata a ngavana ra bakovi i rabalaki a viri, pali bara a viri i ala rua o ala tolu to masia, to rata a ngava i palupulupu, mu rabalakia ra bakovi iea. Pali bara a bakovi i ala taku kunana i masia, nahea ni gi rabalaki.
NUM 35:31 “A bakovi i rabalaki a viri, nahea ni gi kona mule ia na moni, ni gi rabalaki kunana.
NUM 35:32 A bakovi i rabalaki a viri, i ha, i kapiloho na tanga ni kapiloho, nahea mu gu bole a moni vona, ge konea a dalana ge hamule mai a tanga vona, na tahuna i uka ma i mate ma a prister dagi.
NUM 35:33 “Naha ni vakamuto a malala, ra mu made vona. A malala bara i muto na tahuna a dara i tua langa vona. A dala i taku kunana bara mu kavitagu a malala i tua vona a dara, i maea: ge tua a dara na viri i rabalaki a viri.
NUM 35:34 Naha ni ratea a malala mu made vona ge muto, a vuhuna iau, e BAKOVI DAGI, a made turane mua e huriki a Israel.”
NUM 36:1 E Iosep e tamane Manase, e Manase e tamane Makir, e Makir e tamane Gilead. Na parava tara e huriki a hamone Gilead ri lakea ne Moses, ne huriki a nupesi ne Israel,
NUM 36:2 ri ta maea, “E BAKOVI DAGI i taki mua, mu gu rehi na rihiva na satu, mu gu veru a malala ne mia e huriki a Israel. Pali i taki tabu mua, mu gu habi a malala na turane mia e Selopehad ge lakea ne huriki e tuna ngatavine.
NUM 36:3 Pali ria bara ri parangi a bakovi na kabu ranga, a tabekena malala ne ria bara i lakea na kabu ne girihine ria, i uka ma ge ne mia tabu. A malala mu habia ne mia bara i kiroko liu.
NUM 36:4 Na pida Nihabimule a Maki, na tahuna ri bole mule a malala ni habi ne huriki ranga, a tabekena malala ne huriki e tune Selopehad, ra tara ne huriki e girihine ria, bara ri bole i dili turana a malala ne ria. Ra malala iea bara ni bole tala na malala na kabu ne mia.”
NUM 36:5 Lakea e BAKOVI DAGI i vakukua e Moses ge vakuku e huriki a Israel maea, “A nitane huriki a kabu ne Manase i kamumu.
NUM 36:6 E huriki e tune Selopehad ngatavine takutaku ri gi parangi a bakovi na ningaru ne ria, pali ri gi parangi mule a bakovi na kabu ne tamane ria kunana.
NUM 36:7 I mavonga a maka tabekena malala na kabu takutaku ne Israel, bara ri tabuli mule na kabu ne mua kunana. A kabu ranga i uka ma ri gi bole.
NUM 36:8 E huriki a ngatavine ri gi bole a maki ne tamane ria i mate, pali ri gi parangi mule kunana a bakovi na kabu ne tamane ria. Mua bara mu rata mavonga, mua e huriki a Israel takutaku bara mu bole a tabekena malala a mahala ne tubune mua kunana.
NUM 36:9 Naha ni longo mai a kabu ranga ri gi bole a malala ne mua. A kabu takutaku ge tangotatea a malala vona.”
NUM 36:10 Lakea e huriki e tune Selopehad ngatavine, ri ramai a nitane BAKOVI DAGI i vakuku e Moses vona.
NUM 36:11 E huriki e tune Selopehad e Mala, e Tirsah, e Hoglah, e Milka, e Noa, ri parangi mule a bakovi na kabu ne tamane ria.
NUM 36:12 Ri parangi e huriki a bakovi na kabu ne Manase, e tune Iosep, lakea a tabekena malala ne ria i tabuli mule na kabu ne tamane ria.
NUM 36:13 Ra vinara lobo nga e BAKOVI DAGI i habi ne huriki a Israel, na limane Moses, na bilane Moab, na tabeke mule lokovonga na naru e Iordan tabukoi o Ieriko.
DEU 1:1 Ra puhu iea i vakalongo a ngava ne Moses i taki ne huriki a Israel na tahuna ri made na malala golea tabukoi na naru e Iordan, na tabeke na nirikena haro. Ri made na maloku ne Iordan, tabukoi na tanga e Sup. A tanga e Paran i pesi na tabeke tara, a tanga e Topel, e Leban, e Haserot, e Disahab to pesi na tabeke tara.
DEU 1:2 Na tahuna a viri i malaga na lolo e Sinai bara i ramaia a dala na lolo na robo e Idom, i laho na parava i ravulu a polona i taku, i bele o Kades-Barnea.
DEU 1:3 E huriki a Israel ri pea e Egipto hosi, ri laho viliha na malala golea na pida i ravulu va. Na mugana parava na keva ravulu a polona i taku, e Moses i taki e huriki a Israel vona a ngava lobo a Vure i vakukua vona,
DEU 1:4 muri na tahuna e BAKOVI DAGI i ratapilea e Sihon, a hariki ne huriki a Amor. E Sihon i matakaria a tanga e Hesbon. E BAKOVI DAGI i ratapile tabua e Og, a hariki ne Basan. E Og i matakari a tanga e Astarot e Edrei.
DEU 1:5 Na tahuna e huriki a Israel ri made na nirikena haro na naru e Iordan, na tabekena malala ne huriki a Moab, e Moses i vakatubu ni vara e huriki na vinara, na nitana Vure.
DEU 1:6 E Moses i vara ria, i ta maea, “Na tahuna si made na lolo e Sinai, e BAKOVI DAGI a Vure ne hita i taki hita i ta maea, ‘Mu made tabaka pali vona a lolo iea, ngane mu vano.
DEU 1:7 Mu pe a hini nga mu laho lakea na tanga na lolo ne Amor, na maka tabeke tabukoi vona. Ra maloku ne Iordan, na lolo, na bila, na tabekena malala mule puru, a malala na lavu na Dari na Kurukuruna Malala. Mu lakea na malala ne huriki a Kenan, na malala na tabeke mule lokovonga na lolo e Lebanon, i lokovonga liu na naru dagi e Iupretis.
DEU 1:8 Ra maka malala nga lobo, iau e BAKOVI DAGI a ta muholi vona ga habi ne huriki a gare ne mua e Abraham, e Isak, e Iakop, ne huriki a hamone tou. Mu vano mu lokovonga mu bolea.’
DEU 1:9 “Muga a taki mua a ta maea, ‘A leho ni matakari mua i dagi hateka. Iau kikeri i uka ma a kara.
DEU 1:10 E BAKOVI DAGI a Vure ne hita i rata mua mu bele kupo hateka, manga a maka hada na hunu.
DEU 1:11 A ngarua e BAKOVI DAGI a Vure ne huriki a gare ne hita ge rata mua mu gu ala kupo hateka, a ngarua ge rata a maki ge bele ne mua ge kamumu kunana, i manga a ngava i ta muholi vona ne mua.
DEU 1:12 Pali i navai iau kunana ga bole a nideke, a maka maregoa ne mua? Iau kikeri i uka ma a kara.
DEU 1:13 Ngane a ngaru mu gu vulaki ranga bakovi na lohokanga, a bakovi ni togo, a bakovi i lohoka pali ni matakari e huriki. Mu vulaki takutaku ne huriki a kabu ne mua, ga ru ria ri gi matakari mua.’
DEU 1:14 A taki mua maea, mu longo ni ratana.
DEU 1:15 Lakea a vulaki e huriki a bakovi na lohokanga, a bakovi kamumu, ra mu vulaki na kabu takutaku ne mua. A ru ria ri matakari e huriki ri ala rangale (1,000), i ranga ri matakari e huriki ri ala ravulu mule ma murina balaka taku (100), e huriki ri ala ravulu lima (50), e huriki ri ala ravulu (10). A vulaki tabu e huriki a bolekori na kabu takutaku.
DEU 1:16 “Na tahuna iea a tovo maea e huriki a matakari, ‘Mu talangaki kamumu a maka maregoa i bele ne huriki a bakovi a ngatavine. Mu pelekado kamumu a maka maregoa ne mua, o a maregoa na turane mua na mosi.
DEU 1:17 Mu pelekado e huriki lobo na naro ge taku. Naha ni togo a bakovi dagi o a matasia. Naha ni mangenge vona tara viri, a vuhuna a Vure kunana bara i vakapalalea a niluhoi ne mua na tahuna mu vapelekado. A maka maregoa dagi hateka, i uka ma mu kara ni vakamahoto, mu bole valai nau ga pelekado.’
DEU 1:18 Na tahuna iea tabu, a tovo mua na maki lobo mu gu rata.”
DEU 1:19 “Muri si pe mulea a lolo e Sinai, si laho lakea na malala golea i mata ringangi, si vano si bele na maka lolo ne Amor, i ramaia a nivakuku ne BAKOVI DAGI a Vure ne hita. Na tahuna si bele pali na tanga e Kades-Barnea,
DEU 1:20 a taki mua a ta maea, ‘Ngane si bele pali na maka lolo ne Amor, a Vure ne hita i ngaru ge habia ne mua ngane a robo iea.
DEU 1:21 Mu masia a malala iea, e BAKOVI DAGI a Vure ne huriki a gare ne hita i habia ne mua ngane. Mu vano mu made vona, i manga a ngava i taki mua vona pali. Naha ni mangenge, naha ni loho lege lae.’
DEU 1:22 “Pali mu valai nau mu ta maea, ‘Si gi rudu ranga bakovi, ri gi muga ri gi kasisia a robo iea. Ri gi vakasiri hita vona a dala si gi ramaia, a maka tanga si gi bele vona.’
DEU 1:23 “Iau a luhoi i kamumu si gi ramai a ngava mu taki. Lakea a vulaki tala a bakovi i ravulu a polona i rua na kabu takutaku ne hita.
DEU 1:24 Ri lakea na maka tanga na lolo ri harena na maloku ne Eskol, ri kasisi viliha vonga.
DEU 1:25 Muri ri bole mule valai ne hita ranga kanena kai. Lakea ri ta maea, ‘Ra malala e BAKOVI DAGI a Vure ta ge habia ne hita i kamumu hateka.’
DEU 1:26 “Ri vakalongo hita, pali mua mu tagege hateka, mu longotaro a nitane BAKOVI DAGI a Vure ne hita, i uka ma mu ngaru ni lakea vona a robo iea.
DEU 1:27 Mu made na maka kape ne mua, mu deke hateka mule ne mua, mu ta maea, ‘E BAKOVI DAGI i uka ma i ngaru hita, lakea i bole tala hita o Egipto ge habi hita ne huriki a Amor, ri gi rata hale hita.
DEU 1:28 I navai si gi lakea vona a hini nga? Na tahuna e huriki a bakovi mi rudu ria ri gi kasisia a robo iea, ri hamule ri taki mia ta e huriki a bakovi ri made vona a robo iea ri ola hateka ri gao hateka, mi mangenge. Ri made pololilo na maka tanga vonga, ni tura halui na nure-kedo i padoi a bubu. Ri matai tabu e huriki a bakovi ri koru dagi hateka, re huriki a hamone Anak.’
DEU 1:29 “Lakea a taki mua a ta maea, ‘Naha ni mangenge vona e huriki nga.
DEU 1:30 E BAKOVI DAGI a Vure ne hita bara i muga ne mua, i vaubi ni tuhori mua i manga hosi i rata ne huriki a Egipto
DEU 1:31 na malala golea. Mu matai pali a naro i ratea, i taparaki valai mua koea na hini mu made vona ngane, i manga a bakovi i boko e tuna.’
DEU 1:32 A taki mavonga mua, pali i uka ma mu longokilala a ngava, i uka ma mu luhoi torea e BAKOVI DAGI a Vure ne mua.
DEU 1:33 Hosi i muga ne mua, i vakasiri a dala ne mua, ge matakana a hini mu gu vakapesi a kape ne mua vona. Na rodo i muga ne mua, i manga a kanono i hube, na haro i muga ne mua, i manga a bubu.
DEU 1:34 “E BAKOVI DAGI i longo mua mu deke hateka, i madihi a hatena. Lakea i ta tora hateka i ta maea,
DEU 1:35 ‘Mua a bakovi a ngatavine hale, i uka ma mu gu lakea vona ngane a robo a ta muholi vona ta ga habia ne huriki a gare ne mua.
DEU 1:36 E Keleb, e tune Iepune kikeri kunana ge vano ge made vona a robo iea. I ramai lobo a ngava nau, lakea ga habia vona turane huriki a hamona, ra robo iea i masia.’
DEU 1:37 “A naro mu ratea i ratea e BAKOVI DAGI, i madihi a hatena nau tabu na maki mu ratea, lakea i ta maea, ‘Moses, ioe tara i uka ma go dili vona a robo iea.
DEU 1:38 Pali a viri i pahamuri ioe, e Iosua e tune Nun, ia kunana ge dili. O vakatorea a niluhoi ne Iosua, a vuhuna bara i bole dili e huriki a Israel vona a robo iea.’
DEU 1:39 “Muri e BAKOVI DAGI i taki hita lobo i ta maea, ‘E huriki e tune mua kiroko, i uka ma ri lohoka vona tara maki ge kamumu o ge hale bara ri dili vona a robo iea. Re huriki a koma mu taki ge rabalaki e huriki a pile, ga habia ne ria a robo iea ri gi made vona.
DEU 1:40 Pali ngane mu ngalakapulo! Mu hamule lakea na malala golea. Mu ramaia a dala i lakea na Dari Vururu na tabeke ne Akaba.’
DEU 1:41 “Mu taki iau mu ta maea, ‘Moses, mi rata a naro hale na matane BAKOVI DAGI. Ngane mi gi vano mi gi vaubi i manga a ngava e BAKOVI DAGI i vakuku mia vona.’ Lakea mu bagetu na bagetua na vabinga, mu luhoi e huriki a bakovi na lolo ge ria a hulu tavula mu gu ratapile ria.
DEU 1:42 “Lakea e BAKOVI DAGI i taki iau i ta maea, ‘Mu hatekakari ria nahea ri gi vano ri gi vaubi. A vuhuna iau i uka ma ga tagari ria, ma ge ratapile ria e huriki a pile.’
DEU 1:43 “A habi a ngavane BAKOVI DAGI ne mua. Pali mu gege i uka ma mu longototo a ngavana, mu vano kunana mu lakea na maka tanga na lolo mu vaubi ne huriki a pile.
DEU 1:44 E huriki a Amor ri made vona a hini nga, ri pagitala valai, ri valili mule mua, ri manga a vuvu i valili ne mua. Ri valili mua, mu ha puru na tanga e Seir, ri lokovonga liu ri harena na tanga e Horma.
DEU 1:45 Muri mu hamule mu tangi, mu gale e BAKOVI DAGI ge kori mua, pali i uka ma i longo mai mua.
DEU 1:46 Lakea mu made na tanga e Kades na parava i kupo.”
DEU 2:1 E Moses i tabana ni vara, i ta maea, “Muri si ngalakapulo, si hamule lakea na malala golea, si ramaia a dala lakea na Dari Vururu. Si ramai kunanea a ngava e BAKOVI DAGI i taki hita vona pali. Si laho viliha na parava i kupo na lolo na robo e Idom.
DEU 2:2 “Muri e BAKOVI DAGI i taki iau, i ta maea,
DEU 2:3 ‘A parava i kupo mu laho halui a maka lolo nga. Ngane mu laho sike.’
DEU 2:4 I taki iau ga taki mua vona a nita vakalohoka iea, ‘Ngane bara mu laho polo na maka lolo ne Idom, ra malala ne huriki a viri ne mua, ra kabune Esau. Bara ri mangenge ne mua,
DEU 2:5 pali mua naha ni rata tuhare ria. A vuhuna iau i uka ma ga habia ne mua tara tabekena malala ne ria. Ra robo e Idom a habia na kabune Esau.
DEU 2:6 Mu kona kunana a maki ni kani a naru vona a robo iea, mu vano.’
DEU 2:7 “E BAKOVI DAGI a Vure ne hita, i rata lobo a maka maki ne mua ri bele kamumu. I matakari kamumu mua na tahuna mu laho na malala golea na pida i ravulu va, i made turane mua i uka ma mu bala vona tara maki.
DEU 2:8 “Muri si laho tabu si polotaroa a malala na kabu ne Esau, si pahapidea a dala i vakatubu na tanga e Elat e Esion-Geber i lakea na Dari Mate. Si kau marogo, si lakea na malala golea na robo e Moab.
DEU 2:9 “Lakea e BAKOVI DAGI i taki iau i ta maea, ‘Naha ni rata hale e huriki a Moab, re huriki nga, e huriki a hamone Lot. Naha ni rata a vabinga ne ria, a vuhuna a habia ne ria a tanga e Ar. Iau i uka ma ga habi ne mua tara tabekena malala ne ria.’
DEU 2:10 “(A kabune Emim ri made vona hosi a tanga e Ar. Re huriki nga ri ala kupo, ri gao hateka, ri ola manga e huriki a Anak.
DEU 2:11 Ri manga e huriki a Anak lakea ni gale ria, ria e huriki a Repaim, pali e huriki a Moab ri gale re huriki nga, a Emim.
DEU 2:12 Hosi e huriki a Hori ri made o Seir, pali e huriki a hamone Esau ri ratapile ria ri bolea a robo ne ria ri made vona. Muri e huriki a Israel ri rata manga e huriki a Esau ri bolea a robo e BAKOVI DAGI i habia ne ria.)
DEU 2:13 “Muri e BAKOVI DAGI i ta maea, ‘Mu pesi rike mu tulupoloa a naru e Sered.’ Lakea si tulupoloa a naru.
DEU 2:14 Muri na pida i ravulu tolu a polona i polotolu (38), na tahuna si pe e Kades-Barnea i valai i harena na tahuna si tulu poloa a naru e Sered, e huriki a bakovi na vabinga ri tababana ni mahuri vona a tahuna iea, ria lobo ngane ri mate pali. I ramaia a ngava e BAKOVI DAGI i taki.
DEU 2:15 Muholi hateka, e BAKOVI DAGI i tahoka a rongova dagi ne ria, lakea i vakalobo liu ria.
DEU 2:16 “Muri ne huriki a bakovi na vabinga ri mate lobo pali,
DEU 2:17 e BAKOVI DAGI i taki iau,
DEU 2:18 ‘Mona bara mu laho polo na kurukuruna malala ne huriki a Moab na dala lakea o Ar.
DEU 2:19 Na tahuna mu tabukoi vona a malala ne huriki a Amon re huriki a hamone Lot, naha ni ratea tara maki ge rata ria ri gi tahate o mu gu vakatubu a vabinga ne ria, a vuhuna iau a habia pali ne ria a malala iea, i uka ma ga habia ne mua tara tabekena malala ne ria.’
DEU 2:20 “(Ra malala iea, ni taki ta malala ne huriki a Repaim, a vuhuna hosi ri made vona a tabeke iea. Pali e huriki a Amon ri gale re huriki nga, ria e huriki a Samsum.
DEU 2:21 Ria ranga ri koru ola manga e huriki a Anak. Ri ala kupo ri gao hateka. Pali e BAKOVI DAGI i vakalobo ria. Lakea e huriki a Amon ri bolea a malala ri made vona.
DEU 2:22 I manga kunana a naro e BAKOVI DAGI i ratea ne huriki a hamone Esau, ra ri made ngane na maka lolo ne Idom. E BAKOVI DAGI i vakalobo e huriki a Hori, lakea e huriki a Idom ri bolea a malala ne ria ri made vona.
DEU 2:23 Ri manga kunana e huriki a Kaptor na bodu e Krit ri vakalobo e huriki a Avim, ra ri made tabukoi na dari i vano i harena tano o Gasa. Ri bolea a malala ne huriki a Avim ri made vona).
DEU 2:24 “Si pe mulea e Moab, lakea e BAKOVI DAGI i taki hita i ta maea, ‘Mu malaga mu tulupoloa a naru e Arnon. Ngane ga rua na limane mua a bakovi o Amor e Sihon, a hariki ne Hesbon, turana a malala vona. Mu pesi rike mu vaubi vona mu bolea a malala vona.
DEU 2:25 Mona ga rata e huriki na tanga lobo ri gi mangenge hateka ne mua. Na tahuna ri longo a rane mua bara ri mangenge hateka ne mua.’
DEU 2:26 “Na tahuna mu made na malala golea ne Kedemot, a rudu ranga vinuru ri lakea na hariki e Sihon o Hesbon.
DEU 2:27 Ri lokovonga ri bele, lakea ri takia ri ta maea, ‘Ioe go longo ne mia, mi gi laho polo vona a robo vomu? Mi gi ramai kunana a rosi.
DEU 2:28 I uka ma mi gi bole tavula a maki ni kani a naru. Bara mi kona. Mi ngaru ni laho polo kunana vona a robo vomu,
DEU 2:29 mi gi tulu poloa a naru e Iordan, mi gi bele vona a malala e BAKOVI DAGI a Vure ta ge habia ne mia. E huriki a hamone Esau ri made na robo e Idom, e huriki a Moab ri made na tanga e Ar, ria lobo ri longo ne mia mi gi laho polo na robo ne ria.’
DEU 2:30 “Pali a hariki e Sihon o Hesbon i uka ma i longo ne hita si gi laho polo vona a robo vona. A vuhuna e BAKOVI DAGI a Vure ne hita i rata ia i uka ma i longo mai hita, i ngarua ge habia na limane mua, mu gu bole poloa a malala vona.
DEU 2:31 “Lakea e BAKOVI DAGI i taki iau, ‘Iau a vakatubu ni habia na limane mua a hariki e Sihon turana a maka malala vona. Mu bolea a malala iea mu made vona.’
DEU 2:32 “Muri e Sihon i bele turane huriki a tara vona ri gi vaubi turane hita, tabukoi na tanga e Iahas.
DEU 2:33 Lakea e BAKOVI DAGI, a Vure ne hita, i tuhori hita si rabalakia, turana e huriki e tuna bakovi, a tara na vabinga vona.
DEU 2:34 Na tahuna iea kunana si bole lobo a tanga vona si ratapile. Si rabalaki lobo e huriki a bakovi, a ngatavine, a koma, i uka tara viri ge mahuri.
DEU 2:35 Si bole a maka sipsip a bulmakau, turana a maki lobo na maka tanga.
DEU 2:36 E BAKOVI DAGI a Vure ne hita i tuhori hita si ratapile a maka tanga, i vakatubu na tanga e Aroer, tabukoi na naru e Arnon, na tanga i pesi na gagana naru, i vano i harena na robo ne huriki a Gilead. I uka tara nure ge tora hateka na tanga nga, ge rege mule hita.
DEU 2:37 Pali e BAKOVI DAGI a Vure i ta kari hita, nahea si gi lakea tabukoi na malala ne huriki a Amon, o na naru e Iabok, o na maka tanga ri pesi na lolo.”
DEU 3:1 E Moses i tababana ni vara, i ta maea, “Muri si ngalakapulo si sike na tabeke meli na dala lakea na robo e Basan, lakea a hariki e Og i valai turana e huriki a nugumaheto vona ri gi vaubi ne hita tabukoi na tanga e Edrei.
DEU 3:2 Lakea e BAKOVI DAGI i taki iau i ta maea, ‘Naha ni mangenge vona, a habia pali na limane mua, turana e huriki a tara vona, a maka malala vona lobo. Bara o rata kunanea vona a naro o rata virihi e Sihon a hariki o Amor i matakari o Hesbon.’
DEU 3:3 “Lakea e BAKOVI DAGI i habia na limane hita a hariki e Og o Basan turana e huriki a tara vona, lakea si rabalaki lobo ria.
DEU 3:4 Na tahuna iea si bole lobo a maka tanga, i uka ma si bole kalevea tara. Si bole na robo e Argob a tanga i ravulu polotara (60). Re Argob a robo na hariki e Og. E Og i made na tanga e Basan i matakaria a robo iea.
DEU 3:5 Ra maka tanga nga ri tahoka a nure-kedo ni tura halui ria vona, ri tora hateka, a maka nitukari ne ria ranga ri tora hateka. A maka tanga kiroko i kupo ri uka a nure-kedo.
DEU 3:6 Si ratapile liu a maka tanga, si rabalaki e huriki a bakovi, a ngatavine, a koma. Si rata kunanea a naro i manga a hini si rata virihi a hariki e Sihon vona, na tanga e Hesbon.
DEU 3:7 Pali si bole lobo a maka bulmakau a sipsip, a mahala vona a maka tanga nga.
DEU 3:8 “Na tahuna iea kunana si bole a malala ne Sihon e Og, ra hariki ne Amor. Ra tabekena malala nga ri tabuli na nirikena haro na naru e Iordan, i vakatubu na naru e Arnon na tabeke tano i vano i harena o Hermon na tabeke meli.
DEU 3:9 Pali e huriki a Sidon ri galea ra lolo e Hermon, e Sirion. E huriki a Amor ri galea e Senir.
DEU 3:10 Si bole lobo a maka tanga ri tabuli na bila na lolo, si bole a maka robo ne huriki a Gilead a Basan, i vano i harena na tanga e Saleka e Edrei. Ra maka tanga nga ri tabuli na malala na hariki e Og.
DEU 3:11 “A hariki e Og, ia a nilobona a hariki ne huriki a Repaim. A kiri vona ni rata na aen. A niolana kiri iea i va a mita vona, a nibolana i rua a mita vona. Ra kiri iea i tababana na tanga e Raba na robo e Amon.
DEU 3:12 “Na tahuna si bole pali a maka tanga nga, a habi ne huriki a kabu ne Reuben ne Gad ra malala i vakatubu na tanga e Aroer, tabukoi na naru e Arnon. A habia ne ria tabu a tabekena malala tara na lolo na robo e Gilead, turana a maka tanga ne ria.
DEU 3:13 A habi lobo tabu na kalavana kabu ne Manase a malala e Gilead e Basan. Hosi e Basan i matakaria a hariki e Og. Ra tabeke ne Argob o Basan, hosi a malala ne huriki a Repaim.
DEU 3:14 Muri e Iair, a hamone Manase, i bole loboa a malala ne Argob, iea o Basan. Ra malala iea i vano i harena na robo e Gesur e Makat. Lakea i vunu mule na rana a tabeke iea, a maka tanga ne Havot-Iair.
DEU 3:15 “Iau a habia ne huriki a Makir a malala e Gilead. E huriki a Makir a hamone Manase.
DEU 3:16 A habi tabu na kabu ne Reuben, na kabu ne Gad a malala i vakatubu na robo ne huriki a Gilead i vano i harena na naru e Arnon. A harena malala na tabeke tano i vano i harena vona a naru iea. A malala ne ria na nirikena haro, i vano i harena na naru e Iabok. Ra naru e Iabok, ia a harena robo e Amon.
DEU 3:17 Na tabeke na nirolona haro a nagi na robo ne ria i harena na naru e Iordan. Na tabeke meli a harena i vakatubu na darilomu e Galili i vano i harena na Dari Mate na tabeke tano, tabukoi na lolo e Pisga, tabukoi na nirikena haro na Dari Mate.
DEU 3:18 “Na tahuna iea, a vakuku mua a ta maea, ‘E BAKOVI DAGI a Vure ne hita, i habia ne mua pali a malala iea i tabuli na nirikena haro na naru e Iordan, mu gu made vona. Ngane e huriki a bakovi ne mua ri gi bole a maki na vabinga, ri gi tulu poloa a naru e Iordan, ri gi tuhori e huriki a Israel ri gi bolea a malala iea.
DEU 3:19 E huriki e girihine mua, e tune mua, ri gi made vona a maka tanga a habi ne mua. A lohoka vona mu tahoka a maka sipsip a bulmakau i kupo, pali ria ranga ri gi dava taro na tanga.
DEU 3:20 Mu tuhori e huriki a turane mua, ge harena na tahuna ri bolea a malala e BAKOVI DAGI a Vure ne hita ge habi ne ria, na tabeke na nirolona haro na naru e Iordan. Mu made turane ria, ge harena na tahuna e BAKOVI DAGI ge vakamade ria kamumu na malala iea, i manga a hini i rata ne mua. Muri mu hamule mai a robo a habi ne mua pali.’
DEU 3:21 “Muri a takia e Iosua a ta maea, ‘O matai pali a maki e BAKOVI DAGI a Vure ne hita i rata na hariki e Og, na hariki e Sihon. A naro i taku kunana bara i rata ne huriki a hariki ranga mu vaubi ne ria, mu bole a malala ne ria.
DEU 3:22 Naha ni mangenge ne ria, e BAKOVI DAGI a Vure ne hita, ia kunana bara i tuhori mua, i vaubi polo ne mua.’
DEU 3:23 “Na tahuna iea a vasileki tora hateka, a ta maea,
DEU 3:24 ‘Bakovi Dagi, ioe a Vure muholi, a lohoka vomu o tubu ni vakasiri iau na maka maki dagi bara o rata. E rei a vure tabu ge made na hunu o na malala ge rata a maka maki dagi o rata pali?
DEU 3:25 Iau a ngaru ioe go longo nau ga tulu poloa a naru e Iordan ga lokovonga na tabeke tara, ga masia ra malala i kamumu hateka ni varo a maka maki ni kani vona, a maka tanga kamumu na lolo turana a lolo e Lebanon.’
DEU 3:26 “Pali e BAKOVI DAGI i uka ma i longo maia a nivasileki nau, a vuhuna mua kunana mu ratea e BAKOVI DAGI i tahate, i uka ma i longo mai iau. Lakea i ta maea ‘Naha ni ta, ma go nana iau tabu vona a maki o nana vona.
DEU 3:27 O sike na mapana lolo e Pisga, o mata sike, o mata puru, o mata lakea na nirikena haro, o mata lakea na nirolona haro. O matai kamumu a hini nga, a vuhuna ioe i uka ma go tulu poloa a naru e Iordan, go dili vona a malala iea.
DEU 3:28 O matai kunanea pali a malala. O vakukua e Iosua o vakatorea a niluhoi vona, ge muga e huriki ri gi bole a malala ge ne vone ria.’
DEU 3:29 Lakea si made na maloku tabukoi na tanga e Bet-Peor.”
DEU 4:1 E Moses i tababana ni vara, i ta maea, “O huriki a Israel, mu ramai a maka vinara a tovo mua vona, bara mu made kamumu, mu dili mu made vona a malala e BAKOVI DAGI a Vure ne huriki a gare ne mua i habia ne mua ngane.
DEU 4:2 Naha ni hudo talea na vinara tara ngava karaba, ra maka vinara ne BAKOVI DAGI a Vure ne hita a habi ne mua. Naha ni vurokia tara ne ria. Mu ramai lobo a vinara nga.
DEU 4:3 Mua lobo mu masia pali a maki e BAKOVI DAGI i rata o Bal-Peor. I kupo e huriki ri kavurike a vure e Bal na tanga iea, lakea e BAKOVI DAGI a Vure ne hita i ratapile ria.
DEU 4:4 Pali mua e huriki mu pesi tora ni ramai e BAKOVI DAGI a Vure ne hita, mu tababana ni mahuri.
DEU 4:5 “A tovo mua lobo pali na maka vinara, i manga a hini e BAKOVI DAGI a Vure ne hita i taki iau vona. Ngane bara mu dili mu bolea a robo iea mu gu made vona. Na tahuna mu made vona, mu ramai a maka vinara.
DEU 4:6 Mu ramai muholi a maka vinara nga, lakea e huriki na kabu ranga bara ri lohoka vona mua mu tahoka a niluhoi kamumu, mu tahoka a maka lohokanga dagi. Na tahuna ri longoa a maka vinara nga bara ri ta maea, ‘Re huriki a bakovi a ngatavine nga, ri tahoka a niluhoi kamumu, ri rangi hita.’
DEU 4:7 “Mu luhoi e huriki a tara ranga. I uka maki vona ri tahoka a nitora dagi, i uka tara vure ge matakari ria ge tuhori ria, ge manga e BAKOVI DAGI a Vure ne hita i rata ne hita. E BAKOVI DAGI i made vakaroro tabukoi ne hita, na tahuna si galea, i tuhori hita.
DEU 4:8 E huriki ranga, ri uka a vinara ge malamala ge manga a maka vinara a tovo mua vona.
DEU 4:9 “Mu matadoko kamumu. Na tahuna mu made na malala iea, naha ni longokaburungi a maka maki mu matai pali. Mu vakalongo e huriki e tune mua, e tubune mua
DEU 4:10 na parava mu pesi tabukoi ne BAKOVI DAGI a Vure ne hita na lolo e Sinai. Na tahuna iea a Vure i taki iau i ta maea, ‘Moses, o gale palupu e huriki ri gi vapopo, ri gi longo a maka ngava ga taki. A ngaru ria ri gi togo ri gi ramai iau kunana na tahuna ri made na malala. Ri gi tovo e huriki e tune ria, lakea e huriki e tune ria ri gi ramai iau.’
DEU 4:11 “A Vure i ta lobo, muri mua lobo mu valai mu pesi tabukoi na lolo, mu matai a uvo a havu ru kavitagua a lolo, a kanono i hube rike na hunu.
DEU 4:12 Pali re BAKOVI DAGI i made pololilo vona a kanono iea i ta, mu longoa a nitana, pali i uka ma mu masia a kakaina, mu longo kunanea a lohona.
DEU 4:13 Na tahuna iea a Vure i habia ne mua a vinara vona i ravulu, i here na tabekena kedo i rua. Ra vinara nga, ri manga a maka ngava dagi i rata turane mua. I taki mua mu gu ramai a maka vinara nga.
DEU 4:14 E BAKOVI DAGI i taki iau ga tovo mua vona a maka vinara ranga, mu gu ramai na tahuna mu made vona a maka tabekena malala, ra a taki mua vona mu gu bole, mu gu made vona.
DEU 4:15 “Na tahuna e BAKOVI DAGI i made na kanono na lolo e Sinai i ta lakea ne mua, i uka ma mu masia tara maki ge a kilakilana, mu longo kunanea a lohona. Ngane mu matadoko kamumu,
DEU 4:16 naha ni kau a maki ni kavurike. Mua bara mu rata mavonga, bara mu rata a naro hale. Naha ni rata a hanuna bakovi, a hanuna ngatavine, a hanuna livoa, a hanuna kadirovo, a hanuna mata, a hanuna manu, ge a vure ne mua.
DEU 4:19 Naha ni kavurike a maka maki mu matai na hunu, ra haro, a keva, a maka hada. E BAKOVI DAGI a Vure ne hita, i ru a maki nga ne vona e huriki lobo.
DEU 4:20 Pali mua, e BAKOVI DAGI i bole tala mua o Egipto i taparaki valai mua koea, i manga kunana a hini i bole tala mua na kanono i kara hateka. I bole valai mua koea ge rata mua ge mua e huriki a tara vona, i manga mua mona.
DEU 4:21 “A maregoa ne mua, e BAKOVI DAGI a Vure ne mua i madihi a hatena nau. I kaba, i taki iau nahea ga tulu poloa a naru e Iordan, ga lakea vona a robo iea i tahoka a malala kamumu hateka, ta ge habi poloa ne mua.
DEU 4:22 Iau i uka ma ga tulu poloa a naru e Iordan, bara mate koea kunana. Pali mua bara mu tulu poloa a naru, mu made na tabeke lake na malala kamumu hateka.
DEU 4:23 Mu matakari kamumu mua, naha ni vurokia a ngava dagi ne BAKOVI DAGI a Vure ne hita i ratea ne mua. Mu ramaia a nitana, i uka ma mu gu rata a hanuna maki legelege, mu gu kavurike.
DEU 4:24 Naha ni rata mavonga, a vuhuna e BAKOVI DAGI a Vure ne hita i bage, maea naha ni kavurike a vure ranga. A Vure i manga a kanono i kara hateka, bara i gutu parina e huriki a pile vona.
DEU 4:25 “Muri na tahuna mu made tabaka pali vona a malala iea mu tahoka e huriki e tune mua e tubune mua, naha ni ratea tara hanuna maki. Mua bara mu rata a maki maea, mu rata a naro hale hateka na matana Vure, bara i ratea i tahate hateka.
DEU 4:26 Mu longo ngane a gale a hunu a malala, ru gu longoa a nita tora nau a ratea ne mua. Mua bara mu longotaro a nitana Vure, mu matadoko! A Vure bara i malaviriri kunana i bole vuroki mua na malala na tabeke lake ne Iordan, ra ta mu gu bolea ngane, bara mu lobo liu.
DEU 4:27 E BAKOVI DAGI bara i lili tala mua, mu made viliha turana a maka kabu ranga, pali a tara popote kunana bara ri mahuri.
DEU 4:28 Na robo nga, bara mu kavurike a maka vure ni rata na kai, na kedo. Ra vure nga, i uka ma ri matai a maki, i uka ma ri longo a nita, i uka ma ri kani a maki, i uka ma ri burongi a maki.
DEU 4:29 Na tahuna iea bara mu kilu, mu ngaru ni hamule valai ne BAKOVI DAGI a Vure ne hita. A ningaru ne mua, a niluhoi ne mua, bara i tora hateka ni matakanea, muri bara mu valai tabukoi vona.
DEU 4:30 Pali na tahuna mu tahoka a maregoa dagi, a maka maki hale ri bele ne mua, bara mu pulo a hatene mua, mu ramai a nitane BAKOVI DAGI a Vure ne mua.
DEU 4:31 Ia a Vure na nidodo. I uka ma ge pe mua, o ge rata hale mua, o ge longokaburungia a nita na ngava dagi i ratea ne huriki a gare ne mua hosi.
DEU 4:32 “Mu luhoi mulea a tahuna hosi, na tahuna i uka ma mu bele ma, na tahuna a Vure i rata rike a bakovi na malala. I tahoka tara maki dagi maea ge bele, o a maki dagi maea ni gi longo?
DEU 4:33 I tahoka ranga kabu hosi ri longoa a Vure i ta tala na kanono i mahuri?
DEU 4:34 E BAKOVI DAGI a Vure ne hita i bole tala hita o Egipto, i taparaki valai hita koea, i rata hita, hita e huriki a tara vona. Na matane mua i rata a maka leho i kupo na nitora vona. I rata a maka gilanga dagi ri bele ne huriki a Egipto, i vaubi hateka ne ria. I rata a maka nivakasiri, i rata a maka maki dagi i rata ria ri mangenge hateka. I tahoka tabu tara vure i kara ni ratana a maka maki nga? I uka liu.
DEU 4:35 “E BAKOVI DAGI i vakasiri mua vona a maki nga, mu gu lohoka vona ia kikeri ia a Vure, i uka tabu tara vure.
DEU 4:36 I ngaru ni tovo mua, i ngaru mu gu longoa a ngavana ra i ta valai na hunu. Na malala mu masia a kanono dagi vona, i made pololilo vona, i ta lakea ne mua.
DEU 4:37 E BAKOVI DAGI i ngaru hateka e huriki a gare ne mua, i vulaki mua, ge mua e huriki a tara vona. Na nitora dagi vona i bole tala mua o Egipto, i taparaki valai mua koea.
DEU 4:38 Na tahuna mu laho valai i ratapile a maka kabu hateka. A nigao ne ria i dagi hateka na nigao ne mua. I rata mavonga, i ngaru ni bole valai mua, ge habia ne mua a malala ne ria, ra mu made vona ngane.
DEU 4:39 “Ngane naha ni longokaburungi a maki nga. E BAKOVI DAGI, a Vure na hunu, na malala. I uka tabu tara vure.
DEU 4:40 Mu ramai lobo a maka vinara vona i habi ne mua ngane. Mua, turane huriki a hamone mua, bara mu made kamumu. Bara mu made tabaka vona a malala e BAKOVI DAGI a Vure ne hita, i habia ne mua.”
DEU 4:41 Muri e Moses i ru herehere a tanga i tolu na tabeke na nirikena haro na naru e Iordan.
DEU 4:42 Ra tanga nga ge tabuli manga a tanga na nikapiloho ne huriki ri rabalaki ruru a turane ria. Re huriki a bakovi maea ri gi ha lakea vona tara tanga nga, ge vakakori ia.
DEU 4:43 Ra tanga nga, e Beser, e Ramot, e Golan. E Beser a tanga ni kapiloho na kabu ne Reuben, i pesi na lolo. E Ramot a tanga ni kapiloho na kabu ne Gad, i pesi na malala ne huriki a Gilead. E Golan a tanga ni kapiloho na kabu ne Manase, i pesi na malala e Basan.
DEU 4:44 E Moses i habi a maka vinara na Vure ne huriki a Israel.
DEU 4:45 I habi a vinara nga muri ne ria ri pea e Egipto ri valai ri made tabukoi na naru e Iordan na maloku, tabukoi na tanga ne Bet-Peor. Ra tabeke iea i tabuli na malala ne Sihon, a hariki ne huriki a Amor. Hosi i made na tanga e Hesbon i matakaria a malala iea. Lakea e Moses turane huriki a Israel ri ratapile ria na vabinga na tahuna ri pea e Egipto.
DEU 4:47 Ri made na malala vona, na malala ne Og, a hariki ne Basan. Ra hariki ne huriki a Amor nga, ru made na tabeke na nirikena haro na naru e Iordan.
DEU 4:48 Ra malala e huriki a Israel ri bole pali, a nagina i tubu na tanga e Aroer, tabukoi na naru e Arnon, i vano i harena na lolo e Sion re Hermon.
DEU 4:49 Ri bole turana a maka malala lobo na tabeke na nirikena haro na naru e Iordan, i vano i harena na Dari Mate na niragana lolo e Pisga.
DEU 5:1 E Moses i gale palupu e huriki a bakovi a ngatavine ne Israel, ri valai palupu ri vapopo, i taki ria, “Mua o huriki a Israel, mu longo kamumu a maka vinara ga taki mua vona ngane, mu tovo mu ramai kamumu.
DEU 5:2 E BAKOVI DAGI a Vure ne hita, i rata a ngava dagi turane hita na lolo e Sinai.
DEU 5:3 I uka ma i rata kunana a ngava dagi ne huriki e tamane hita kunana, hita mona ranga i rata a ngava dagi turane hita.
DEU 5:4 E BAKOVI DAGI i made pololilo na kanono, i ngalai hita, i ta turane hita na lolo.
DEU 5:5 Na tahuna iea e BAKOVI DAGI i taki iau ga habia ne mua a ngavana, a vuhuna mu mangenge na kanono, i uka ma mu sike na lolo. Lakea e BAKOVI DAGI i ta maea,
DEU 5:6 ‘Iau e BAKOVI DAGI a Vure ne mua. Na tahuna mua a vorakato o Egipto, a bole tala mua vonga, a taparaki valai mua koea.
DEU 5:7 “‘Naha ni kavurike a vure ranga. Mu kavurike iau kunana.
DEU 5:8 “‘Naha ni rata a hanuna maki ri tabuli na hunu, ri tabuli na malala, ri tabuli pololilo na dari.
DEU 5:9 Naha ni turume puru mu gu kavurike ria. Iau kunana e BAKOVI DAGI, a Vure ne mua, a bage ne mua naha ni kavurike a vure ranga. Bara vakamadihi a hamone huriki i uka ma ri ngaru iau, ge harena ne tubune ria, ne tamarane ria.
DEU 5:10 Pali e huriki a bakovi a ngatavine ri ngaru hateka iau, ri ramai a vinara nau, bara ngaru hateka e huriki a hamone ria, ri ala rangale (1,000) ri gi bele muri ma.
DEU 5:11 “‘Naha ni kaba tavula vona a rane BAKOVI DAGI a Vure ne hita, a vuhuna e huriki ri kaba tavula na ragu bara ri tahoka a ngava.
DEU 5:12 “‘Iau e BAKOVI DAGI a Vure ne mua, a vakuku mua, mu tabea a Parava Nimalo ga parava nau kunana.
DEU 5:13 Mu rata a maka leho ge harena na parava i polotara.
DEU 5:14 A parava polorua a Parava Nimalo, a parava nau. Na parava iea, mua turane huriki e tune mua, e huriki a vora ne mua, a maka sipsip a bulmakau ne mua, e huriki a mosi ri made turane mua, mua lobo naha ni leho. Lakea e huriki a vora bakovi a vora ngatavine ne mua, ria ranga ri gi malo manga mua.
DEU 5:15 Mu luhoi mule a tahuna mua a vorakato iea o Egipto, na nitora dagi nau, iau e BAKOVI DAGI a Vure ne mua a bole valai mua koea. Na naro a rata virihi mua vona kunana, a vakuku mua mu gu ramai kamumua a vinara na Parava Nimalo.
DEU 5:16 “‘Mu togo e tamane mua e kinane mua, i manga iau e BAKOVI DAGI a Vure ne mua a vakuku mua. Bara mu rata mavonga, a maki lobo mu rata bara ri bele kamumu, bara mu made tabaka na malala ra habia ne mua ngane.
DEU 5:17 “‘Naha ni rabalaki a viri.
DEU 5:18 “‘Naha ni mole.
DEU 5:19 “‘Naha ni panaho.
DEU 5:20 “‘Naha ni kau virihi tavula na ngava a viri.
DEU 5:21 “‘Naha ni ngutu na girihina bakovi tara. Naha ni ngutu na ruma vona, na malala vona, ne huriki a vora vona, na maka sipsip a bulmakau vona, na maka mahala vona.
DEU 5:22 “‘Na tahuna mu vapopo na dahana lolo, e BAKOVI DAGI i made pololilo na kanono na bubu na hini i uvo hateka. I ta dagi hateka, i habi ne mua a maka vinara lobo nga. I uka ma i habi tabu ne mua ranga. Muri i here a maka vinara nga na tabekena kedo i rua, i habi nau.’
DEU 5:23 “Na tahuna a kanono i kavitagua a lolo iea, mu longoa a lohona viri i ta pololilo na hini i uvo, lakea e huriki a matakari na kabu, a gare ne mua, ri valai nau ri ta maea,
DEU 5:24 ‘E BAKOVI DAGI a Vure ne hita i vakasiri a bagetua a nitora dagi vona na tahuna si longoa i ta tala na kanono. Ngane si lohoka vona na tahuna a Vure i ta turana a bakovi, a bakovi i uka ma ge mate.
DEU 5:25 Pali mia bara mi longoa a Vure i ta turane mia tabu, bara mi mate. Ra kanono iea i hube hateka, mi pesi tabukoi vona, pali i navai i uka ma mi mate?
DEU 5:26 E rei a viri i uka ma ge mate, na tahuna i longoa a Vure mahuri i ta tala na kanono, i manga a hini mi longoa balaka taku pali?
DEU 5:27 O Moses, o hamule, o longo a ngava lobo ne BAKOVI DAGI a Vure ne hita ge taki. Muri o valai o vakalongo mia, mi gi longo, mi gi ramai.’
DEU 5:28 “E BAKOVI DAGI i longo a maka ngava mu taki iau vona, lakea i taki iau i ta maea, ‘Iau a longo pali a nitane huriki a bakovi a ngatavine, a nitane ria i malamala.
DEU 5:29 A ngaru ria ri gi luhoi maea vakaroro, ri gi togo iau, ri gi longototo a maka vinara nau vakaroro. Muri a leho lobo ne ria, ne huriki a hamone ria bara ri kamumu vakaroro.
DEU 5:30 Ngane o vano o taki ria ri gi hamule mai a kape ne ria.
DEU 5:31 Pali ioe o Moses o made turagu, ga habi vomu a vinara lobo nau. O tovo e huriki a bakovi a ngatavine na maka vinara nau, ri gi ramai kamumu na malala a habia ne ria ri gi made vona.’”
DEU 5:32 Lakea e Moses i vara e huriki a Israel i ta maea, “Mu matadoko, mu ramai lobo a maka vinara ne BAKOVI DAGI a Vure ne hita i habi ne mua. Naha ni longotaroa tara vinara. Naha ni makope lakea na maurine mua o na kanene mua.
DEU 5:33 Mu ramai lobo a maka vinara e BAKOVI DAGI a Vure i vakuku mua vona, a maki mu rata bara ri bele kamumu, mu made tabaka na malala mu gu bolea ngane.”
DEU 6:1 E Moses i ta tabu i ta maea, “Ra vinara nga, e BAKOVI DAGI a Vure ne hita, i taki iau ga tovo mua vona. Na tahuna mu bele vona a robo iea, ra ta mu gu bolea mu gu made vona, mu ramai lobo a vinara nga.
DEU 6:2 Na tahuna vakaroro mu made na malala iea, mua turane huriki a hamone mua, mu togoa e BAKOVI DAGI a Vure ne hita. Mu ramai lobo a vinara vona i habi mua ngane, bara mu mahuri malaku.
DEU 6:3 Mua o huriki a Israel mu longo kamumu a vinara nga, mu ramai. Muri a maki lobo mu rata, bara ri bele kamumu kunana, mu bele kupo, mu made vona a malala i vona a maki ni kani. E BAKOVI DAGI a Vure ne huriki a gare ne hita i ta muholi vona a ngava iea.
DEU 6:4 “Mua o huriki a Israel mu longo kamumu. E BAKOVI DAGI ia kunana a Vure ne hita.
DEU 6:5 Mu ngaru hatekea e BAKOVI DAGI a Vure ne mua. Mu ngarua na hatene mua lobo, na niluhoi ne mua lobo, na nitora ne mua lobo.
DEU 6:6 Na parava vakaroro mu luhoi a maka vinara a habi ne mua pali.
DEU 6:7 Mu tovo e huriki e tune mua vona a vinara nga. Mu vakalongo ria vona na tahuna mu made na tanga, na tahuna mu laho, na tahuna mu malo, na tahuna mu hadongo.
DEU 6:8 Mu kolotata puru na limane mua, mu kolo na dumene mua, ge manga a kilakila i uka ma mu gu longokaburungi.
DEU 6:9 Mu here a vinara nga na dahana logo na ruma ne mua, na poridala ne mua.
DEU 6:10 “E BAKOVI DAGI a Vure ne hita, i kaba i ta muholi ne huriki a gare ne hita e Abraham, e Isak, e Iakop ge habia ne mua tara robo i tahoka a maka tanga dagi ri vonu na mahala, i uka ma mu ratea.
DEU 6:11 A maka maki ri kamumu hateka bara ri vonu na ruma ne mua, ra maki i uka ma mu ru dili. Bara i tahoka ranga lomu ri tabuli vonga, i uka ma mu keli. Bara i tahoka a maka hania na vain a oliv, i uka ma mu leho vona. E BAKOVI DAGI ge taparaki lakea ne mua vona a robo iea, ge habi ne mua a maki nga. Na tahuna mu kani bara mu maru.
DEU 6:12 Mu matadoko, naha ni lohopilea e BAKOVI DAGI. Ia kunana i bole tala mua o Egipto na tahuna ni vakavora mua vonga, i taparaki valai mua koea.
DEU 6:13 “Mu togoa e BAKOVI DAGI a Vure ne hita. Mu kavurike ia kunana, mu rata a nita muholi ne mua na rana kunana.
DEU 6:14 Naha ni ramai a vure ne huriki a tara ri made tabukoi ne mua.
DEU 6:15 Mua bara mu kavurike a vure nga, e BAKOVI DAGI bara i madihi hateka a hatena ne mua, bara i vakalobo mua manga a kanono i gutu vuro a maki. A vuhuna e BAKOVI DAGI a Vure ne hita i made turane hita, i bage ne hita nahea si gi kavurike a vure ranga.
DEU 6:16 “Naha ni toni a nitora ne BAKOVI DAGI a Vure ne hita, i manga a hini mu rata na tanga e Masa.
DEU 6:17 A tuhane mua nahea ge malulu, mu ramai muholi a maka vinara i habi ne mua turana a ngava lobo i habi.
DEU 6:18 Mu rata lobo a maka maki e BAKOVI DAGI i taki ri kamumu ri malamala. Muri a maki lobo mu ngaru ni rata bara ri bele kamumu. Bara mu bolea, ra malala kamumu e BAKOVI DAGI i kaba, i ta muholi vona ne huriki a gare ne mua, ge habia ne mua.
DEU 6:19 Bara mu lili vuroki e huriki a pile ne mua, i manga a nita i ta muholi vona ge rata.
DEU 6:20 “Muri ma, na tahuna e huriki e tune mua bara ri nana maea mua, ‘I navai e BAKOVI DAGI, a Vure ne hita i ngaru si gi ramai a vinara nga?’
DEU 6:21 Mu koli ria mu ta maea, ‘Mi leho manga a vorakato na hariki o Egipto, lakea e BAKOVI DAGI i bole mule mia na nitora vona.
DEU 6:22 Muholi hateka, na matane mia, mi matai a maka nivakasiri legelege, a maka maki hale hateka i rata virihi e huriki a Egipto, i rata virihi a hariki ne ria, i rata virihi e huriki a bolekori vona.
DEU 6:23 I bole tala mia na robo e Egipto, i taparaki valai mia koea, ge habia ne mia a malala iea, i ramaia a nita i ta muholi vona ne huriki a gare ne hita.
DEU 6:24 Muri e BAKOVI DAGI a Vure ne hita, i taki hita si gi ramai lobo a vinara nga, si gi togoa. Hita bara si rata mavonga, bara i matakari kamumu hita vakaroro, bara si mahuri, i manga ngane.
DEU 6:25 Hita bara si ramai kamumu a maka vinara lobo, e BAKOVI DAGI a Vure ne hita bara i vivi, bara i gale hita, ge hita a bakovi a ngatavine malamala.’”
DEU 7:1 E Moses i ta tabu i ta maea, “Na tahuna e BAKOVI DAGI a Vure ne hita, ge taparaki mua vona a malala mu gu bolea, bara i lili tala e huriki a tara ri made vona ngane. Na tahuna mu laho lokovonga na malala iea, bara i lili tala e huriki a tara dagi i polorua, a nigao ne ria i rangi a nigao ne mua. Re huriki a Hiti, a Girgas, a Amor, a Kenan, a Peres, a Hivi, a Iebus.
DEU 7:2 Na tahuna e BAKOVI DAGI a Vure ne hita ge tuhori mua, mu ratapile ria, mu rabalaki lobo ria. Naha ni rata a ngava dagi turane ria, naha ni dodo ria.
DEU 7:3 Naha ni vangoli a ngatavine turane ria,
DEU 7:4 a vuhuna bara ri turari e huriki e tune mua ri vano basi ne BAKOVI DAGI, bara ri kavurike a maka vure ne ria. E huriki a koma bara ri rata mavonga, e BAKOVI DAGI bara i madihi a hatena ne mua, bara i malaviriri kunana i ratapile mua.
DEU 7:5 Na tahuna mu bolea a malala ne ria, mu ratapile a maki na lotu ne ria. Mu puka a maka dede, mu ubikeve a maka butu-kedo, mu ubiputu a hanune Asera, a vure ngatavine, mu rungani a maka hanuna vure ne ria.
DEU 7:6 Mu rata mavonga, a vuhuna e BAKOVI DAGI a Vure ne hita i tabea a kabu ne mua ge vona kunana. A Vure i vulaki mua na kurukurune huriki lobo na malala, ge mua a ngate vona.
DEU 7:7 “Mua, i uka ma mua a tara dagi, ge rangi e huriki a tara ranga, lakea e BAKOVI DAGI ge luhoi mua, ge vulaki mua. Mua a tara kiroko kunana.
DEU 7:8 Pali e BAKOVI DAGI i ngaru hateka mua, i ngaru ni ramaia a nikaba i ratea ne huriki a gare ne hita. Na ngava iea kunana, i tuhori mua na nitora dagi vona, na tahuna mu leho manga a vorakato o Egipto, i bole mule mua na limane Parao, ra hariki o Egipto.
DEU 7:9 Mu luhoi kamumua a maki iea. E BAKOVI DAGI a Vure ne hita, ia kunana a Vure muholi. I muri mai a nitana vakaroro, bara i ramai a nita muholi vona. A ngava dagi na ningaru na Vure i rata virihi e huriki ri ala rangale (1,000) ri ngarua ri ramai a vinara vona.
DEU 7:10 Pali bara i koli i ratapile e huriki i uka ma ri ngarua.
DEU 7:11 I mavonga mu ramai kamumu a maka nita mu bole pali, mu ramai kamumu a vinara a habi ne mua ngane.
DEU 7:12 “Na tahuna mu longo a vinara nga mu ramai muholi, e BAKOVI DAGI a Vure ne hita bara i ramai a ngava dagi muholi vona, lakea bara i ngaru vakaroro mua, i manga a ngava i kaba vona ne huriki a gare ne mua hosi.
DEU 7:13 Bara i ngaru hateka mua, i rata kamumu mua, bara mu tahoka e huriki e tune mua ri ala kupo, ri vakabele e huriki a hamone mua ri ala kupo. Bara i rata kamumu a maka hania ne mua, bara mu tahoka a vit, a vain, a namona oliv. Bara i vakavole a maka bulmakau a sipsip. Bara i habi lobo ne mua a maka maki na robo iea, ra i ta muholi vona ne huriki a gare hosi ge habi ne mua.
DEU 7:14 I uka ranga viri na malala a Vure ge habi kupo a maki ne ria, ge manga a hini i rata virihi mua vona. E huriki a ngatavine a bulmakau ne mua, i uka ma ri gi lame, bara ri poda.
DEU 7:15 E BAKOVI DAGI bara i matakari kamumu mua, i uka ma mu gu bole a gilanga legelege. I uka ma ge rudu valai a maka gilanga hale, ra mu matai ne huriki a Egipto, ge bele ne mua. Ra gilanga nga bara i rata ri bele ne huriki a pile ne mua.
DEU 7:16 Mu vakalobo liu e huriki e BAKOVI DAGI a Vure ne hita i ru na limane mua, naha ni dodo ria. Naha ni kavurike a vure ne ria. Mua bara mu kavurike a vure ne ria, bara mu vurua.
DEU 7:17 “Naha ni luhoi e huriki nga ge ria a tara bulolo, i uka ma mu kara ni ratapile ria.
DEU 7:18 Naha ni mangenge ne ria. Mu luhoi mule ra maki nga e BAKOVI DAGI a Vure ne hita i rata virihi a hariki o Egipto turana a tara vona.
DEU 7:19 Mu luhoi mule a maka gilanga hale hateka mu matai ri bele o Egipto. Mu luhoi mule a maka nivakasiri a maka leho dagi e BAKOVI DAGI a Vure ne mua i rata. Mu luhoi mule ra leho dagi hateka a Vure i rata, ge bole mule mua o Egipto. A Vure bara i rata virihi ne huriki nga ra mu mangenge ne ria, ra naro i taku.
DEU 7:20 Pali na tahuna i ranga ne ria ri ha ri kapiloho, bara i rudu a maka vuvu ri gi vano ri gi kani ria.
DEU 7:21 Naha ni mangenge ne huriki a tara nga, a vuhuna e BAKOVI DAGI a Vure ne hita i made turane mua. I tahoka a nitora lobo, e huriki lobo ri gi mangenge vona.
DEU 7:22 Bara i lili tala gosigosi e huriki a tara nga na tahuna mu lokovonga tabukoi. Naha ni ratapile malaviriri ria. Na tahuna mu rabalaki malaviriri ria, a maka livoa hateka na robo bara ri bele kupo, ri rabalaki mua.
DEU 7:23 E BAKOVI DAGI a Vure ne mua ge tuhori mua mu gu ratapile e huriki a pile ne mua. Bara i rata ria ri mangenge hateka, ge harena na tahuna mu vakalobo ria.
DEU 7:24 E huriki a hariki ne ria ranga, bara i ru na limane mua. Mu rabalaki ria, muri e huriki i uka ma ri gi luhoi tabu ria. I uka tara viri ge tangotata mua, bara mu rabalaki lobo ria.
DEU 7:25 Mu rungani a maka vure ne ria ni kau na kedo. Naha ni ngutu ni bole a maka gol a silva, ra ni vakabagetu a vure ne ria vona, a vuhuna ri muma hateka ne BAKOVI DAGI a Vure ne mua.
DEU 7:26 Naha ni bole dili na ruma ne mua a maka maki ri muma hateka. A Vure i taki a maki nga ni gi ratapile, pali mua bara mu bole, bara mu tahoka a vuranga turane ria. Ra vure ne ria, ri muma hateka, mu ngalahere ne ria.”
DEU 8:1 E Moses i ta tabu i ta maea, “Mu ramai kamumu a maka vinara a habi ne mua ngane. Muri bara mu made kamumu mu bele kupo. Bara mu kara ni bolena a malala i ta muholi vona ge habia ne huriki a gare ne mua.
DEU 8:2 Mu luhoi kamumua e BAKOVI DAGI a Vure ne hita, i muga mua, i tuhori mua vona a nilaho dagi mu ratea. Mu laho viliha na malala golea na pida i ravulu va. Lakea i rudu valai ranga maregoa ge toni mua, ge lohoka vona, mu gu ramai lobo a vinara vona o ge uka.
DEU 8:3 I vakamatasia mua, i rata mua mu vitolo, muri i habi a mana ne mua mu kani. Ra maki ni kani iea, mua turane huriki e tubune mua i uka ma ri kania hosi. I rata mavonga mu gu lohoka vona hita e huriki a bakovi, i uka ma si gi bole a nimahuri na maki ni kani kunana. Si bole a nimahuri na nita lobo ne BAKOVI DAGI.
DEU 8:4 Na pida nga, a varakia ne mua i uka ma i marape. A vahane mua ranga i uka ma i vaki, i kamumu kunana.
DEU 8:5 Mu lohoka vona e BAKOVI DAGI a Vure ne hita, i vara hita, i manga a tamana koma i varea e tuna.
DEU 8:6 “I mavonga kunana, mu rata a maka maki e BAKOVI DAGI a Vure ne mua i taki mua vona. Mu ramai a maka vinara vona, mu togoa.
DEU 8:7 A vuhuna i taparaki mua lakea na robo kamumu hateka. Ra robo iea i tahoka a maka naru dagi, a maka lomu. I ranga naru ri tua polotano na malala, ri tua tala na maloku, na dahana lolo.
DEU 8:8 Ra robo iea i vakabele a maka vit, a maka barli, i vakabele a maka kanena kai a vain, a kanena kai a pik, a kanena kai a pomigranet, a kanena kai a oliv, a ame.
DEU 8:9 Na tahuna mu made vona a malala iea i uka ma mu gu vitolo, i uka ma mu gu bala vona tara maki. A maka kedo na robo iea i vona maka aen, a maka kapa bara mu matavisi na maka lolo.
DEU 8:10 Bara mu kani marumaru. Muri bara mu kavurikea e BAKOVI DAGI a Vure ne hita, na robo kamumu i habia ne mua.
DEU 8:11 “Mu matadoko, naha ni lohopile ne BAKOVI DAGI a Vure ne mua, ma mu gu longotaro a maka vinara na Vure a habi ne mua ngane.
DEU 8:12 Na tahuna mu tahoka pali a maki ni kani, mu rata pali a maka ruma kamumu,
DEU 8:13 na tahuna a maka bulmakau, a sipsip, a gol, a silva, a maka mahala ne mua ri bele kupo,
DEU 8:14 naha ni bibi rike mule a rane mua, mu gu lohopile vona e BAKOVI DAGI a Vure ne hita. Ia kunana i bole mule mua o Egipto na tahuna mu leho manga a vorakato vonga.
DEU 8:15 Ia kunana i muga mua na malala golea e huriki ri mangenge vona, i tahoka a maka mata hale, a kira. Na tabeke iea i kere hateka, i ratea a naru i tua tala na kedo dagi, mu nua.
DEU 8:16 Na malala golea i habi a mana ne mua mu kani. Ra maki ni kani iea e huriki a gare ne mua hosi i uka ma ri kania. I rudu tabu ranga maregoa ge toni mua. Muri bara i rata a maki kamumu ri bele ne mua.
DEU 8:17 Na tahuna mu tahoka a mahala i kupo, naha ni luhoi ra maka mahala nga, mu vakabele na nitora ne mua.
DEU 8:18 E BAKOVI DAGI a Vure ne hita, ia kunana i habi a nitora ne hita si gi bole a maka mahala. Naha ni lohopile vona a ngava nga. I rata mavonga, a vuhuna i tababana ni ramai a ngava dagi i taki e huriki a gare ne mua vona hosi.
DEU 8:19 “A taki tora mua, mua bara mu lohopile ne BAKOVI DAGI mu ramai mu kavurike a vure ranga, muholi hateka bara mu mate.
DEU 8:20 I manga e huriki na maka tanga ranga i ratapile na matane mua na tahuna mu vaubi ne ria. Pali mua i uka ma mu gu ramaia a nitane BAKOVI DAGI a Vure ne mua, mua ranga bara mu mate manga ria.
DEU 9:1 E Moses i ta tabu i ta maea, “Mua o huriki a Israel mu longo. I tabukoi ngane mu gu tulu poloa a naru e Iordan, bara mu vano mu lili tala e huriki ri gao hateka ne mua, mu bolea a malala ne ria. Ri tahoka a maka tanga, ni tura halui na nure-kedo i padoi a bubu.
DEU 9:2 Re huriki nga ri gao ri ola hateka, re huriki a Anak. Mu longo pali a velengane ria re huriki nga, i uka tara viri ge rangi ria ma na vabinga.
DEU 9:3 Pali ngane mu lohoka kamumu maea, e BAKOVI DAGI a Vure ne hita, ge muga ne mua, ge manga a kanono i hube i kara hateka. Na tahuna mu laho lokovonga bara i ratapile a maka nitora ne ria. I mavonga bara mu vaubi turane ria, mu lili tala ria, mu ratapile ria malaviriri, i manga a ngava i ta muholi vona ge rata.
DEU 9:4 “Muri ne BAKOVI DAGI a Vure ne hita i lili tala ria pali, ma mu gu taki mule mua, mu gu ta maea, ‘A BAKOVI DAGI i habia ne hita a malala iea, a vuhuna i matai hita, hita e huriki a bakovi a ngatavine malamala.’ Ra niluhoi maea i uka ma i muholi. E BAKOVI DAGI i matai re huriki a bakovi a ngatavine ra ri made vona ngane a malala iea, ri rata a maka naro hale hateka, ge lili tala ria.
DEU 9:5 Naha ni luhoi mu kamumu mu lohoka ni rata a maka naro kamumu, lakea mu gu bolea a malala iea. E BAKOVI DAGI a Vure ne mua bara i lili tala ria, a vuhuna ria e huriki a bakovi hale hateka. Lakea tabu i ngaru ge bele muholi a nita muholi i kaba lakea ne huriki a gare hosi ne Abraham, ne Isak, ne Iakop.
DEU 9:6 Muholi hateka ra malala iea i rike kamumu hateka vona a maki, pali e BAKOVI DAGI i uka ma i habia mua ge a mapana a naro kamumu ne mua. Ra mua, mua a bakovi a ngatavine na tagenga.
DEU 9:7 “Naha ni longokaburungi, na tahuna mu made na malala golea mu ratea e BAKOVI DAGI a Vure ne mua i madihi a hatena. Na tahuna mu pe e Egipto i valai i harena mona, mu longotaro a nitane BAKOVI DAGI.
DEU 9:8 Na lolo e Sinai mu ratea e BAKOVI DAGI i madihi a hatena, i tabukoi ge ratapile mua.
DEU 9:9 Iau a sike na lolo ta ga bole a tabekena kedo i rua, e BAKOVI DAGI i here puru a maka nita muholi i rata turane mua. Iau a made vonga na parava i ravulu va, a rodo i ravulu va, i uka ma a kania tara maki, i uka ma a ninu.
DEU 9:10 Lakea e BAKOVI DAGI i habi nau a tabekena kedo i rua, i here vona a ngava i habi mua na tahuna mu vapopo na dahana lolo, i made pololilo na kanono ia.
DEU 9:11 “Muri na parava i ravulu va, a Vure i habi nau a tabekena kedo nga i rua, i here a ngava dagi vona.
DEU 9:12 Lakea i taki iau i ta maea, ‘O pe a lolo o puru malaviriri kunana, a vuhuna e huriki a tara vomu, ra o bole ria o Egipto o taparaki valai ria koea, ri rata a naro hale. Ri malaviriri kunana ri ngalahere vona a maka vinara nau, ri ratea a vure ne ria na gol.’
DEU 9:13 “Lakea e BAKOVI DAGI i taki tabu iau i ta maea, ‘Iau a lohoka pali ne huriki nga, ri tagege hateka.
DEU 9:14 Ngane a ngaru ni ratapile lobo ria, i uka ma ni gi luhoi tabu. Naha ni hatekakari iau. Ga rata maea, muri ga rata mua a kabu dagi i gao hateka, i rangi e huriki nga.’
DEU 9:15 “Lakea a bole a tabekena kedo nga i rua, a Vure i here puru vona a nita muholi, a pe a mapana lolo, a raga puru. Na tahuna iea a kanono dagi i hube na lolo, a niparana i parai rikea a hunu.
DEU 9:16 Iau a puru valai pali, i muholi hateka, a matai mua mu ngalahere na maka vinara ne BAKOVI DAGI a Vure ne hita. Mu ratea a hanuna bulmakau na gol, ge a vure ne mua. Na naro iea kunana mu rata a naro hale na Vure.
DEU 9:17 Na matane mua, a voro puru a tabekena kedo nga i rua, ru makeve liu.
DEU 9:18 “Muri a hamule sike tabu ne BAKOVI DAGI a mahita ngalabarara puru na malala na haro, na rodo, i harena na parava i ravulu va. I uka ma a kani, i uka ma a ninu. A rata mavonga, a vuhuna mu rata a naro hale ne BAKOVI DAGI, mu ratea i madihi a hatena.
DEU 9:19 E BAKOVI DAGI i madihi hateka a hatena, i luhoi ni vakalobo liu mua, lakea a mangenge hateka. Pali e BAKOVI DAGI i longo mai iau tabu.
DEU 9:20 E BAKOVI DAGI i tahate hateka ne Aron, i ngaru ni ratapilea. Lakea a vasileki ga tuhoria e Aron, ga tuhori mua.
DEU 9:21 A bulmakau mu ratea i vakabele a naro hale ne mua. Lakea a bolea a bulmakau, a voro rikea na kanono. Muri a ubimomoa i momo kesikesi i manga a habulo tavula, lakea a guru purua na naru i tua raga valai na lolo, i tua pasi vurokia.
DEU 9:22 “Na tahuna mu made na tanga e Tabera, e Masa, e Kibrot-Hatava mu ratea e BAKOVI DAGI i madihi a hatena.
DEU 9:23 Hosi mu made o Kades-Barnea i taki mua mu gu vano mu gu made vona a malala i ngaru ge habia ne mua. Pali mu longotaro a nitana, i uka ma mu luhoi tora ia, i uka ma mu ramai a nitana.
DEU 9:24 Na tahuna a vakatubu ni leho turane mua i valai i harena mona, mu tagege hateka ne BAKOVI DAGI.
DEU 9:25 “Na tahuna mu tababana mu made na dahana lolo, a sike na lolo a mahita ngalabarara puru na malala na matane BAKOVI DAGI, na haro na rodo i harena na parava i ravulu va. A rata mavonga, a vuhuna e BAKOVI DAGI i taki ge ratapile mua lobo.
DEU 9:26 Lakea a vasileki maea, ‘O Bakovi Dagi, ioe a Vure, naha ni ratapile huriki a bakovi a ngatavine vomu. Ioe kunana o bole tala ria o Egipto na nitora dagi vomu, o taparaki valai ria koea.
DEU 9:27 O luhoia e Abraham, e Isak, e Iakop tou a vora vomu, naha ni luhoi a maka tagenga, a maregoa, a naro hale ne huriki nga.
DEU 9:28 E huriki a Egipto ma ri gi taki ioe, ‘I uka ma o kara ni taparaki lakea na malala o ta muholi vona ta go habia ne ria.’ Ma ri gi ta maea, ‘Ioe i uka ma o ngaru e huriki a tara vomu, i mavonga o bole lakea ria na malala golea o rabalaki ria.’
DEU 9:29 O BAKOVI DAGI, re huriki nga, o vulaki ria ge ria a tara vomu. Na nitora dagi vomu, o bole tala ria o Egipto, o taparaki valai ria koea.”
DEU 10:1 E Moses i ta tabu i ta maea, “Na tahuna iea e BAKOVI DAGI i taki iau i ta maea, ‘O kau a tabekena kedo ge rua ge manga a tabekena a habi vomu muga, o kau ranga kai o ratea tara tava. O bole valai nau na mapana lolo.
DEU 10:2 Ga here tabu na tabekena kedo nga a maka vinara, ra maka vinara nga muga a here na tabekena kedo i rua o ubikeve. O bole, o ru dili na tava.’
DEU 10:3 “Lakea a ratea a tava na mavilana kai a akas, a ubikeve a tabekena kedo i rua ru manga a viri muga, a bole sike na lolo.
DEU 10:4 Lakea e BAKOVI DAGI i here puru tabu na tabekena kedo nga i rua, a nita i manga kunana a nita muga. E BAKOVI DAGI i here puru a vinara i ravulu, ra i taki mua vona na tahuna i made pololilo na kanono ia, mu made na dahana lolo mua. I here puru lobo, i habi nau a tabekena kedo nga i rua.
DEU 10:5 A ngalakapulo, a raga puru na lolo. A ru dili na tava ra tabekena kedo nga i rua, i ramaia a ngava e BAKOVI DAGI i taki iau vona pali. Ra kedo nga i rua, ru tababana pololilo na tava.
DEU 10:6 “Muri e huriki a Israel ri pea a lomu ne huriki a Iakan, ri lakea na tanga e Moserot. E Aron i mate na tanga iea, ni tanu vonga. E tuna, e Eleasar, i bole a murina, i ratea a leho na prister.
DEU 10:7 Ri malaga vonga ri lakea na tanga e Gudgoda, muri ri lokovonga tabu o Iotbata, ra tanga i kupo vona a maka naru.
DEU 10:8 “Hosi e huriki a Israel ri made na lolo e Sinai, lakea e BAKOVI DAGI i vulaki e huriki a bakovi na kabune Levi ri gi kaloho a Tava na Ngava Dagi. Re huriki a bakovi nga ri gi leho manga a prister, ri gi taki e huriki a bakovi a ngatavine ne BAKOVI DAGI ge rata kamumu ria. Ra leho iea ri ratea i valai i harena mona.
DEU 10:9 I mavonga, a kabune Levi i uka ma ri bolea tara tabekena malala ge manga maka kabu ne Israel ranga. A maki kamumu ri bole poloa, ra leho na prister ne BAKOVI DAGI, i manga a hini e BAKOVI DAGI a Vure ne hita i taki pali.
DEU 10:10 “Iau a made na mapana lolo na haro, na rodo i harena na parava i ravulu va, i manga a hini muga. E BAKOVI DAGI i longo a nivasileki nau, lakea i uka ma i ratapile mua.
DEU 10:11 Muri i taki iau i ta maea, ‘O lakea mai e huriki nga, o taparaki ria vona a malala a ta muholi vona ne huriki a gare ne mua hosi ga habia ne ria.’”
DEU 10:12 E Moses i vara tabu i ta maea, “Mua o huriki a Israel mu longo, a ra maki e BAKOVI DAGI, a Vure ne hita, i taki mua mu gu rata? Mu togoa e BAKOVI DAGI a Vure ne mua, mu laho na dalana, mu ngarua, mu ramai lobo a nitana na hatene mua, na niluhoi ne mua.
DEU 10:13 Mu ramai lobo a vinara vona, ra ngane a habi ne mua. Mua bara mu ramai lobo, bara mu made kamumu.
DEU 10:14 “A hunu i tabuli polomeli liu, ne vona e BAKOVI DAGI a Vure ne mua. A malala turana a maka maki ri tabuli vona, ria ranga ne vona e BAKOVI DAGI.
DEU 10:15 E BAKOVI DAGI i ngaru hateka e huriki a gare ne mua, lakea i uka ma i vulakia tara kabu. I vulaki mua kunana, ge mua a viri vona, ra ngane mua a viri vona.
DEU 10:16 I mavonga mu vorotaparaki a naro na tagenga, mu ramai kamumu a maka nitane BAKOVI DAGI,
DEU 10:17 a vuhuna e BAKOVI DAGI a Vure ne hita i rangi a maka vure ranga, a maka maki ri tahoka a nitora ne ria. I dagi hateka, i gao hateka, a maka maki lobo ri gi mangenge vona, ri gi togoa. I uka ma i ngaru a viri i ta rularula ge vokoa na ngava.
DEU 10:18 I rata a naro malamala ne huriki a bakovi a ngatavine, e girihine ria ri mate pali, ne huriki a duku. I ngaru e huriki a mosi ri made turane hita i habi a maki ni kani, a varakia ne ria.
DEU 10:19 Mua ranga mu ngaru e huriki a mosi nga, a vuhuna mua ranga hosi mu made o Egipto manga a mosi.
DEU 10:20 Mu togoa e BAKOVI DAGI a Vure ne hita, mu kavurike ia kunana. Mu nugutata tora ia, mu kaba na rana kunana.
DEU 10:21 Mu kavurikea a rana, ia kunana a Vure ne hita. Mua lobo mu matai a maka maki legelege i rata ge tuhori mua.
DEU 10:22 Na tahuna e huriki a gare ne mua ri lakea o Egipto ri ala ravulu polorua kunana. Pali ngane, e BAKOVI DAGI a Vure ne hita, i rata mua mu ala kupo hateka.”
DEU 11:1 E Moses i ta tabu i ta maea, “Mu ngaru hatekea e BAKOVI DAGI a Vure ne hita, mu ramai vakaroroa a vinara vona.
DEU 11:2 Mu matai a maka maki e BAKOVI DAGI i rata ge tovo mua vona. Mua kunana mu matai a maki nga, i uka ma e huriki e tune mua. Mu masia a nitora na Vure i dagi hateka.
DEU 11:3 Mu masia e BAKOVI DAGI i rata a maka nivakasiri legelege. Mu matai a maka maki i rata ne Parao, i rata na robo vona e Egipto.
DEU 11:4 Mu matai pali e BAKOVI DAGI i vakalobo liu e huriki a tara na nugumaheto iea o Egipto, turana a maka hos a karis ne ria na tahuna ri valili ne mua. Muri i ratea a Dari Vururu i kavitagu ria.
DEU 11:5 Mu lohoka vona pali a maka maki e BAKOVI DAGI i rata ge tuhori mua na malala golea, na tahuna i uka ma mu bele vona ma a hini si made vona ngane.
DEU 11:6 Mu luhoi a maka maki i rata ne Datan rua e Abiram, re tune Eliab bakovi, ra hamone Reuben. Mua lobo mu masia a malala i mata ka, lakea rua varago turana a kabu, a kape, a maka maki lobo ne rua, ri boru dili na lovo, lakea a malala i kavitagu ria.
DEU 11:7 Muholi hateka, mua kunana mu matai a maka maki dagi a Vure i rata.
DEU 11:8 “Mu ramai a maka vinara a habi ne mua ngane, lakea bara mu gao, mu tulu poloa a naru iea, mu bolea a malala ra ta mu gu bolea ngane,
DEU 11:9 lakea bara mu made tabaka vona a malala i vona a maki ni kani, ra robo e BAKOVI DAGI i ta muholi vona ge habia ne huriki a gare ne mua, ne mua e huriki a hamone ria.
DEU 11:10 Ra robo ngane mu gu bolea, i uka ma i manga a robo mu made vona hosi. Na tahuna mu ngaru ni varo a hamona maki ni kani o Egipto, mu leho hateka ni kiru a naru, mu bole lakea na hania ni gi vakamea a malala vona.
DEU 11:11 Pali ra robo ngane ta mu gu vano mu gu bolea, a robo na maka lolo, na maloku, a vala i boru langa na malala.
DEU 11:12 E BAKOVI DAGI a Vure ne hita, i lohoka kamumu vona a malala iea, i matakari vakaroroa na keva lobo na pida.
DEU 11:13 “I mavonga mu ramai lobo a vinara a habi ne mua mona: mu ngaru hatekea e BAKOVI DAGI a Vure ne hita, mu habi a hatene mua, a niluhoi ne mua, mu rata a leho vona.
DEU 11:14 Mua bara mu rata mavonga, bara vakaborua a vala i boru langa na maka hania, na matatalanga i lakea na matadilinga, bara mu maru na maki ni kani, na vain, na namona oliv.
DEU 11:15 I uka ma mu gu bala vona tara maki. A maka bulmakau ne mua bara ri tahoka a maka varili ni kani.
DEU 11:16 “Naha ni matataro e huriki a kabu ranga ri gi vakaviliha a niluhoi ne mua. Ria bara ri vakaviliha a niluhoi ne mua, bara mu ngalahere ne BAKOVI DAGI, mu kavurike a maka vure ranga, mu rata a leho ne ria.
DEU 11:17 Mua bara mu ramaia a naro iea, e BAKOVI DAGI bara i tahate mua, i tukaria a hunu, a vala i uka ma ge boru ge vakamea a malala. Muri a maka uve i uka ma ri gi rike kamumu. I uka ma ge tabaka bara mu mate vona a robo kamumu e BAKOVI DAGI i habia ne mua.
DEU 11:18 “Mu ru dili na hatene mua, na niluhoi ne mua a vinara nga. Mu kolotata puru na limane mua, mu ru na dumene mua, ge manga a kilakila i uka ma mu gu longokaburungi.
DEU 11:19 Mu tovo e huriki e tune mua vona a vinara nga. Mu vakalongo ria vona na tahuna mu made na tanga, na tahuna mu laho, na tahuna mu malo, na tahuna mu hadongo.
DEU 11:20 Mu here a vinara nga na dahana logo na ruma ne mua, na poridala ne mua.
DEU 11:21 Mua bara mu rata mavonga, mua turane huriki e tune mua bara mu made tabaka hateka vona a robo e BAKOVI DAGI a Vure ne hita i ta muholi vona ge habia ne huriki a gare ne mua hosi. Bara mu made vakaroro vona, i manga a hunu i tabuli vakaroro polomeli na malala.
DEU 11:22 “Mu ramai kamumu a ngava lobo a taki mua vona pali. Mu ngaru hatekea e BAKOVI DAGI a Vure ne hita, mu ramai loboa a maka ngava vona, mu tangotata tora vona.
DEU 11:23 I mavonga bara i lili tala e huriki a tara ranga, na tahuna mu lokovonga tabukoi. Muri bara mu made vona a malala ne huriki a tara dagi ri gao hateka ne mua.
DEU 11:24 A malala mu laho vona, bara mu bolea a malala ne mua. A nagi na malala ne mua ge vakatubu na tabeke i ngeki na tabeke mule puru, i lakea mai a lolo e Lebanon na tabeke mule sike. A nagi bara i vakatubu na naru e Iupretis na tabeke na nirikena haro, i lakea mai a Dari na Kurukuruna Malala na tabeke na nirolona haro.
DEU 11:25 I uka tara viri ge putukari a dala ne mua. Na tabeke lobo na malala mu lakea vona, e BAKOVI DAGI a Vure ne hita, bara i rata e huriki a bakovi a ngatavine ri mangenge ne mua, i manga a ngava i taki.
DEU 11:26 “Iau a vakasiri mua na dala i rua bara mu ramai. A dala muga a Vure bara i gamai mua. A dala tara a Vure bara i ruduraha mua.
DEU 11:27 Mua bara mu longototo a maka vinara ne BAKOVI DAGI a Vure ne hita, ra i habi mua mona, a Vure bara i gamai mua.
DEU 11:28 Pali na tahuna mu pe a dala ni longototo a vinara, mu ngalahere mu kavurike a maka vure ranga, ra i uka ma mu lohoka ne ria muga. E BAKOVI DAGI a Vure ne mua bara i ruduraha mua.
DEU 11:29 Na tahuna i taparaki mua lakea na robo mu ngaru ni made vona, mu lakea na lolo e Gerisim, mu gale e BAKOVI DAGI ge gamai mua. Na lolo e Ebal mu gale e BAKOVI DAGI ge ruduraha e huriki ri rata a naro hale.
DEU 11:30 Ra lolo nga i rua, ru tabuli na tabeke na nirolona haro na naru e Iordan, na malala ne huriki a Kenan ranga ri made na maloku ne Iordan. Ra lolo nga ru pesi na nirolona haro, i uka ma ru basi na kai dagi na tanga e More tabukoi na tanga e Gilgal.
DEU 11:31 I uka ma ge tabaka bara mu tulu poloa a naru e Iordan, mu vano mu made vona a malala e BAKOVI DAGI a Vure ne hita i ngaru ni habia ne mua. Na tahuna mu bolea mu made vona pali,
DEU 11:32 mu matadoko mu ramai a vinara lobo, ra a habi ne mua ngane.”
DEU 12:1 E Moses i ta tabu i ta maea, “Mu longo kamumu a vinara nga. Mu ramai kamumu na tahuna mu made na malala e BAKOVI DAGI a Vure ne huriki a gare ne mua i ngaru ge habia ne mua.
DEU 12:2 Na tahuna mu bolea pali a robo iea, mu ratapile a maka tanga, re huriki a tahona ri kavurike a maka vure ranga na lolo, na kupona, na taruna kai buroro.
DEU 12:3 Mu puka a maka dede ne ria, mu ubimomo a maka butu-kedo na lotu. Mu rungania a hanuna vure ngatavine e Asera ra ni kau na kai, mu bole a maka kira mu tolo a maka hanuna vure ne ria ni kau na kai. Muri i uka ma ni gi luhoi tabu a rane ria na maka tanga nga.
DEU 12:4 “Na tahuna mu kavurikea e BAKOVI DAGI a Vure ne hita, naha ni ratea a naro ge manga ne huriki a bakovi ri kavurike a maka vure ranga.
DEU 12:5 E BAKOVI DAGI ge vulakia tara tanga ge taku kunana pololilo na malala na kabu ne mua, lakea e huriki bara ri valai vona a tanga iea.
DEU 12:6 Na tanga iea, mu rata a maka nihabi legelege ne mua, a nihabi gutu-vuro, a maka nihabi ranga. Na tahuna mu veru a maki, mu ru na naguna ge ravulu, a naguna ge taku mu habia na Vure. Ra naguna i taku iea, mu bole lakea na murina tanga ni vasileki. Mu bole tabu ranga nihabi mu ta muholi vona mu gu habi ne BAKOVI DAGI, a maka nihabi mu habi na ningaru ne mua, a maka tuna bulmakau a sipsip a tabua.
DEU 12:7 Na tanga iea, na matane BAKOVI DAGI a Vure ne hita, mua turane huriki a kabu ne mua, mu kani mu vivi vona a maka maki kamumu e BAKOVI DAGI i gamai mua vona.
DEU 12:8 “Na tahuna mu tahoka a tanga ni kavurike a Vure, naha ni rata a nihabi na tabeke tara. Ngane mu rata mavonga,
DEU 12:9 a vuhuna i uka ma mu dili ma vona a malala e BAKOVI DAGI i ngaru ge habia ne mua, mu gu made kamumu vona na nivalemu, mu gu malo.
DEU 12:10 Na tahuna mu tulu poloa a naru e Iordan, e BAKOVI DAGI bara i taki mua mu bolea a malala iea mu made vona. Bara i matakari kamumu mua, e huriki a pile i uka ma ri gi valai tabukoi ne mua, bara mu made na nivalemu.
DEU 12:11 Na mailo vona na tanga iea mu bole valai a maka maki a taki mua vona pali, ra nihabi gutu-vuro, a maka nihabi ranga, a naguna i taku na maka naguna maki i ravulu, a maki ranga mu ngaru ni habi ne BAKOVI DAGI, a maka nihabi kamumu ne vona ni ta muholi vona ne BAKOVI DAGI.
DEU 12:12 Mua, e huriki e tune mua, a vora ne mua, e huriki a Levi ri made na tanga ne mua, mua lobo mu lakea tabukoi ne BAKOVI DAGI a Vure ne mua, mu vivi vona. Mu luhoi kamumu e huriki a Levi ri uka a malala.
DEU 12:13 Naha ni ramaia a ningaru ne mua mu gu rata a nihabi gutu-vuro na maka tanga viliha.
DEU 12:14 Mu rata a nihabi na tanga ra i takia e BAKOVI DAGI ge vulakia pololilo na malala na kabu ne mua. Na tanga iea kunana mu rata a nihabi gutu-vuro, a maki ranga a vakuku mua vona mu gu rata.
DEU 12:15 “Pali i uka ma a hatekakari mua vona ni rabalaki a maka sipsip a bulmakau mu gu kani na hini mu made vona. A maka maki kamumu e BAKOVI DAGI i habi ne mua mu kani, naha ni luhoi lege vona a hini mu matapado o i uka ma mu matapado na matana Vure. Mu kani na maka tabeke viliha mu made vona, i manga a hini mu kani a maka kanirau.
DEU 12:16 Pali naha ni ninu a darane ria. Mu guru vuroki na malala manga a naru.
DEU 12:17 Naha ni kani a maki nga na tanga ne mua. Ra naguna i taku na maka naguna maki i ravulu na vit, na vain, na namona oliv, na maka tuna bulmakau a maka sipsip a tabua, a nihabi mu ta muholi vona mu gu habi ne BAKOVI DAGI, a nihabi mu habi na ningaru ne mua, a nihabi ranga.
DEU 12:18 Mua turane huriki e tune mua, e huriki a vora bakovi a vora ngatavine, e huriki a Levi ri made na tanga ne mua, mu kani ra maka nihabi nga. Pali mu kani a maka nihabi nga na matane BAKOVI DAGI a Vure ne hita, na tanga ge taku kunana i vulakia ne vona ni vasileki. Mu kani na tanga iea, mu vivi vona a maka maki mu leho hateka mu vakabele.
DEU 12:19 Na parava vakaroro na tahuna mu tababana ni made vona a malala iea, naha ni matataro ni tuhori e huriki a Levi.
DEU 12:20 “Muri ma, na tahuna e BAKOVI DAGI i ratea a robo ne mua i dagi hateka, i manga a ngava i ta muholi vona ge rata, mu kani a sipsip a bulmakau na parava mu ngaru ni kani a sipsip a bulmakau vona.
DEU 12:21 A tanga ni vasileki ge basi, mu rata manga a hini a taki mua vona. Mu rabalakia a bulmakau, a sipsip, mu kani na tabeke ne mua. Mu rata mavonga na parava mu ngaru.
DEU 12:22 Naha ni loho lege lae vona a viri i matapado o i muto, ge kani a sipsip a bulmakau.
DEU 12:23 Pali naha ni ninu a darana sipsip a bulmakau. A dara a vuhuna nimahuri. Naha ni kani a bobona sipsip a bulmakau i turana a dara.
DEU 12:24 Naha ni ninu a darana kania. Mu guru vuroki na malala manga a naru.
DEU 12:25 Naha ni ninu a darana sipsip a bulmakau, lakea a maka maki bara i bele kamumu ne mua, ne tune mua na tahuna mu rata a naro kamumu na matane BAKOVI DAGI, a Vure ne mua.
DEU 12:26 “Pali mu bole a maki ni gamai, mu bole lakea na tanga e BAKOVI DAGI i vulakia ne vona ni vasileki.
DEU 12:27 Na tanga iea mu rata a nihabi ni gutu-vuro, mu gutu a bobona, a darana sipsip a bulmakau na dede ne BAKOVI DAGI a Vure ne mua. Na maka nihabi ranga, mu guru rike na dede a darana sipsip a bulmakau, pali a maka bobona mu kani.
DEU 12:28 Mu ramai kamumu a maka vinara a taki mua vona pali, lakea a maka maki bara i bele kamumu ne mua, ne tune mua na tahuna mu rata a naro kamumu na matane BAKOVI DAGI, a Vure ne mua.
DEU 12:29 “E BAKOVI DAGI a Vure ne mua, bara i ratapile e huriki a tahotanga na tahuna mu dili na malala ne ria, muri bara mu bolea a malala mu made vona.
DEU 12:30 Na tahuna a Vure i ratapile ria pali, mu matadoko, naha ni ramai a maka naro ni kavurike a vure ne ria. Naha ni nana maea, ‘E huriki i uka ma ria a Iuda, ri vasileki navai? Mia ranga mi gi vasileki manga ria.’
DEU 12:31 Na tahuna mu kavurikea e BAKOVI DAGI a Vure ne mua, naha ni kavurikea manga e huriki i uka ma ria a Iuda ri rata. Na tahuna ri kavurike a maka vure ne ria, ri rata a maka naro i muma hateka, e BAKOVI DAGI i marikoi vona. A naro tara ri ratea ri rabalaki e huriki e tune ria bakovi, e tune ria ngatavine, ri gutu na kanono, ge a nihabi na maka vure ne ria.
DEU 12:32 “Mu rata lobo a maka maki, ge manga a hini a taki mua vona. Naha ni hudo tala a vinara, naha ni lohopile na vinara.”
DEU 13:1 E Moses i ta tabu i ta maea, “Na tahuna a propet o a bakovi tara i lohoka ni tuveve polo a vurena viri, ge valai ge rata a nivakasiri,
DEU 13:2 ge ngaru ni rata ioe go ramai a vure ranga i uka ma o kavurike muga, pali a nivakasiri ge bele
DEU 13:3 naha ni longo maia. E BAKOVI DAGI a Vure ne mua i toni ioe kunana, ge matai ioe o ngaru hatekea na hatemu lobo, na niluhoi vomu lobo, o i uka.
DEU 13:4 Mu togoa e BAKOVI DAGI, mu ramai ia kunana. Mu longototoa a ngavana, mu ramai a maka vinara vona, mu leho vona, mu pesi tora ni ramaia.
DEU 13:5 Pali mu rabalaki e huriki a propet turane huriki ri tuveve polo a vurena viri, na tahuna ri taki mua mu gu longotaro a nitane BAKOVI DAGI a Vure, ra i bole tala mua o Egipto na tahuna mua a vorakato. Re huriki a bakovi maea ria a bakovi hale, ri ngaru ni turari tala mua na dala e BAKOVI DAGI i ngaru mua mu gu ramaia. Mu rabalaki e huriki a bakovi hale maea na mailo ne mua.
DEU 13:6 “Na tahuna e turamu, e tumu, e girihimu ra o ngaru hatekea, e turamu tara i voko ioe, i ngaru ioe go kavurike a vure ranga, naha ni longototo, a vuhuna ioe turane huriki a gare vomu hosi, i uka ma mu kavurike a vure ranga.
DEU 13:7 E huriki a bakovi a ngatavine na tabeke lobo na malala ri kavurike a maka vure ranga. Pali ioe naha ni ngutu ne huriki nga, ra ri made tabukoi o ri made basi vomu.
DEU 13:8 A bakovi o a ngatavine i ngaru ni turari mua mu gu vasileki na vure ranga, naha ni longo maia na tahuna ge ta namikamika mai mua. Mu rege talea a nitana. Naha ni dodoa, naha ni tuhoria.
DEU 13:9 Mu muga mai ia, mu rabalakia a viri i toni ni turari mua. Mu bole a maka kedo mu padimatea. Muri e huriki ranga ri gi valai ri gi tuhori mua, ri gi padi tabua na kedo.
DEU 13:10 Mu voro a maka kedo, mu padia ge mate liu. A vuhuna i ngaru ni turari tala basi mua ne BAKOVI DAGI a Vure ne mua. Mu luhoi mulea a Vure i bole tala mua o Egipto, na tahuna mu leho manga a vorakato vonga.
DEU 13:11 Mu rabalaki e huriki ri ngaru ni turari tala mua. Muri e huriki a Israel lobo bara ri longoa a velengana a maki iea, bara ri mangenge, ri matakari kamumu ria, i uka ma ri gi rata tabua a naro hale iea.
DEU 13:12 “Na tahuna mu made pali vona a malala e BAKOVI DAGI a Vure ne mua i habia ne mua, bara mu longoa tara ngava i maea,
DEU 13:13 ‘I ranga huluvonga ne mua ri vakamanga a niluhoi ne huriki ri gi kavurike a vure ranga, i uka ma ri vasileki ne ria hosi.’
DEU 13:14 Na tahuna mu longo a maka ngava tavula maea, mu bakai kamumu a vuhuna a ngava. A ngava ge muholi ri ratea a naro i muma hateka iea,
DEU 13:15 mu rabalaki re huriki nga turana a maka bulmakau ne ria.
DEU 13:16 Mu bole a maka mahala ne ria, mu ru kadolu na kurukuruna tanga. Muri mu rungania a tanga iea turana a maki lobo ri tabuli vona, ge manga a nihabi gutu-vuro na Vure ne mua. Ra tanga iea ni ratapile, ge tabuli mavonga liu, nahea ni gi hae tabu.
DEU 13:17 Naha ni bolea tara maki vona a tanga iea, ra ta ni gi rungani na kanono, i maea e BAKOVI DAGI bara i lobo a rongova vona, i dodo mule mua tabu, i rata mua mu bele kupo hateka, i manga a ngava i ta muholi vona ne huriki a gare ne mua hosi.
DEU 13:18 E BAKOVI DAGI a Vure ne mua bara i ratea a maki iea na tahuna mu ramai lobo a vinara vona a habi ne mua ngane, mu rata a maka maki ge malamala na matana.”
DEU 14:1 E Moses i ta tabu i ta maea, “Mua o huriki a Israel, mua e tune BAKOVI DAGI a Vure ne mua. Na tahuna mu taringi a viri i mate, naha ni pala viliha a kuline mua, naha ni ali a vune mua, mu gu gigi marina.
DEU 14:2 Ra mua a kabu ni taba lakea ne BAKOVI DAGI a Vure ne mua, a vuhuna i vulaki tala mua ne huriki a kabu lobo na malala, i ru mua ge mua a viri vona kikeri.
DEU 14:3 “Naha ni kani a maka kania ri muto na matane BAKOVI DAGI.
DEU 14:4 A maki mu kani: a bulmakau, a sipsip, a meme,
DEU 14:5 a dia, a gesel, a dia mokumoku, a meme i tegi, a ibeks, a entelop, a sipsip na lolo,
DEU 14:6 a maki a tagulana vahane ria ri mavida na tabeke i rua, ri kani a varili manga a bulmakau, mu kani.
DEU 14:7 Pali ranga maki ri kani a varili manga a bulmakau, a tagulana vahane ria i mapida rua, naha ni kani. A maki ranga: a kamel, a rabit, a murongi na kedokedo; ri kani a varili manga a bulmakau, pali a tagulana vahane ria i uka ma i mapida rua, bara mu lohoka vona a kania maea i muto na matana Vure.
DEU 14:8 Naha ni kani a boro. A boro i tahoka a tagulana a vahana, pali i uka ma i kani a varili manga a bulmakau, naha ni kani, naha ni padoi na tahuna i mate, a vuhuna ri muto ne mua.
DEU 14:9 “Na maki lobo ri tabuli na dari, mu kani a maka manu ri tahoka a honane ria a pelengane ria.
DEU 14:10 Pali naha ni kani a maka manu ri uka a honane ria, a pelengane ria. Mu luhoi kamumu, a maka manu nga ri muto ne mua.
DEU 14:11 “Mu kani a maka kadirovo ri matapado na matana Vure.
DEU 14:12 Pali naha ni kani a loha, a pangopango-kaba, a pangopango-kaba katokato,
DEU 14:13 a luama, a kinikinimanu legelege,
DEU 14:14 a maka kokoa legelege;
DEU 14:15 a pelenga-sike-o-bao, a haloho, a nae, a maka hani legelege;
DEU 14:16 a kuku kiroko, a kuku dagi, a kuku keakea,
DEU 14:17 a kuku na malala golea, a pangopango-kaba na dari, a pato na darilomu,
DEU 14:18 a ko, a luhou, a kopa, a kadirovo ni gale a hupoe.
DEU 14:19 A maka maki kiroko ri karaka ri tahoka a karapane ria, ri muto, naha ni kani.
DEU 14:20 A maka maki ranga ri tahoka a karapane ria ri matapado, mu kani ngi.
DEU 14:21 “Naha ni kani a maka sipsip a bulmakau ri mate tavula. Mu habi ne huriki a mosi ri made viliha na tanga ne mua ri gi kani, ge uka ri gi kona. Pali mua a kabu ni taba lakea ne BAKOVI DAGI a Vure ne mua. “Naha ni guru dili na ulo a namona ruruna meme, go nono a tuna meme vona.
DEU 14:22 “A maki ni kani mu bole na hania na pida lobo mu ru na naguna ge ravulu, a naguna ge taku mu ru hereherea.
DEU 14:23 Muri mu bole lakea na murina ni vasileki a maki mu ru herehere. Mu kani na matane BAKOVI DAGI a vit, a vain, a namona oliv, a tabua na bulmakau na sipsip. Mu rata mavonga bara mu tovo a naro ni togo e BAKOVI DAGI a Vure ne mua.
DEU 14:24 Na tahuna mu made basi, i uka ma mu kara ni bolena a maki ni kani kamumu a Vure i habi ne mua mu gu bole lakea na tanga ni vasileki e BAKOVI DAGI i vulakia, naha ni loho lege.
DEU 14:25 Mu habi ne huriki a bakovi ri gi kona, muri mu bole lakea na tanga ni vasileki a mapana.
DEU 14:26 Ra maka moni nga, bara mu kona a maka maki mu ngaru: a bulmakau, a sipsip, a vain a naru vagole, a maka maki ranga mu ngaru. Na tanga ni vasileki, na matane BAKOVI DAGI, mua turane huriki e tune mua, mu kani a maka maki nga, bara mu vivi hateka.
DEU 14:27 Pali naha ni longokaburungi e huriki a Levi. Mu tuhori ria. Re huriki nga ri uka a malala, a ruma, a mahala.
DEU 14:28 “Muri na maka pida i tolu lobo mu bole ra naguna i taku na maka naguna a maki i ravulu, mu ru kadolu na roho tara na tanga mua.
DEU 14:29 Ra maki ni kani nga ne vona e huriki a Levi, a vuhuna ri uka a malala, a ruma. Ra maki ni kani nga tabu, bara mu luhoi e huriki a mosi, e huriki a duku, e huriki a havuri ri made na tanga ne mua. Re huriki nga ri gi valai, ri gi bole na ningaru ne ria a maki ni kani. Mu rata mavonga, lakea e BAKOVI DAGI bara i gamai mua.”
DEU 15:1 E Moses i ta tabu i ta maea, “Muri na maka pida i polorua naha ni luhoi tabu a maka makoli ne mua.
DEU 15:2 A naro mu gu ratea ge maea. A bakovi i habi a moni ne turana, nahea ge takia e turana ge koli a makoli vona, a vuhuna e BAKOVI DAGI i taki si gi longokaburungi a makoli.
DEU 15:3 A mosi i bole a maki ne mua, mu takia ge koli a makoli vona. Pali naha ni taki e huriki a tahotanga ri gi koli a makoli.
DEU 15:4 “E BAKOVI DAGI a Vure ne mua bara i rata kamumu mua vona a robo i ngarua ge habia ne mua. Bara i uka tara viri ge bala vona tara maki,
DEU 15:5 na tahuna mu longototo a nitane BAKOVI DAGI mu ramai lobo a maka ngava ra i habi ne mua.
DEU 15:6 E BAKOVI DAGI bara i rata kamumu mua, i manga a ngava i ta muholi vona hosi. E huriki ri ala kupo bara ri bole a makoli ne mua, pali mua naha ni bole a makoli ne ria. Bara mu matakari a maka tabeke i kupo, pali bara i uka tara tabeke ge matakari mua.
DEU 15:7 “Na tahuna a turane mua tara i made vona a tanga na tabeke e BAKOVI DAGI a Vure ne mua ge habia ne mua, ge bala vona tara maki, naha ni ngalahere vona, mu tuhoria.
DEU 15:8 Mu dodoa mu habi vona a maki i bala vona.
DEU 15:9 Naha ni matai a pida ni koli a makoli i tabukoi, mu gu vakatoku a maki, i uka ma mu gu tuhori ria. Naha ni ramaia a niluhoi hale iea ge bele ne mua. Mua mu marikoi ni habi a moni vona, a bakovi iea bara i gale e BAKOVI DAGI i koli a maka naro hale ne mua. Muri bara mu tahoka a ngava na matana Vure.
DEU 15:10 Mu habi lobo vona a maka maki i nana vona, lakea e BAKOVI DAGI bara i rata a maka leho ne mua ri bele kamumu.
DEU 15:11 Bara i tahoka ranga ne hita a Israel ri bala a maki vakaroro. A luhoi mavonga lakea a ta maea, mu dodo, mu kori, mu rata kamumu ria.”
DEU 15:12 “Na tahuna a viri tara ne hita a Hibru i habi mule ia ge leho manga a vorakato vomu, ge leho ne vomu na pida ge polotara kunana. Na poloruana pida o tonoa ge vano.
DEU 15:13 Na tahuna i pe puru a leho vomu, naha ni vakalaho pa ia ge hamule na tanga vona.
DEU 15:14 O habi vona a sipsip, a vit, a vain i manga kunana e BAKOVI DAGI i gamai ioe.
DEU 15:15 O luhoi mulea a tahuna mu made manga a vorakato o Egipto, lakea e BAKOVI DAGI, a Vure ne mua, i bole mule mua vonga. Na naro iea kunana, ngane a habia ne mua a vinara iea.
DEU 15:16 “Pali a vora ge ta maea, ‘A marikoi ni ha taro mua, a vuhuna a ngaru mua, a made kamumu turane mua.’
DEU 15:17 Lakea mu tulia ge lakea na mataruma ne mua, mu bolea tara maki ge vere mu padi tala a talingana, bara i leho manga a vora ne mua, ge harena na tahuna ge mate vona. A vora ngatavine tara, mu rata mavongea.
DEU 15:18 Naha ni luhoi lege na tahuna mu tonoa a vora ne mua ge vano, a vuhuna a vora iea i rata a leho ne mua na pida i polotara pali, i uka ma mu kona hatekea. Na tahuna mu rata kamumua, e BAKOVI DAGI a Vure ne mua bara i rata a maka leho ne mua ri bele kamumu.
DEU 15:19 “Mu vulaki a maka tuna tabua na bulmakau na sipsip ne mua, mu habi ne BAKOVI DAGI a Vure ne mua. Ra maka tuna bulmakau a sipsip nga ga toga, naha ni rata a tuna bulmakau ri gi leho, naha ni pali kudu a vuna tuna sipsip.
DEU 15:20 Na pida lobo mua turane huriki a kabu mua, mu bole a kania nga mu lakea na tabeke na murina ni vasileki na tabeke e BAKOVI DAGI a Vure ne mua i vulakia, mu kani vonga.
DEU 15:21 A maka bulmakau a sipsip ri gi tahoka a ngarava, ge marogo a maka vahane ria, ge kepa, ri nabatabuna, naha ni habi ne BAKOVI DAGI a Vure ne mua.
DEU 15:22 A maka sipsip a bulmakau nga mu kani na tanga mua, i manga kunana a hini mu kani a kania na robo. E huriki ri matapado, e huriki ri muto na matana Vure, ria lobo ri gi kani.
DEU 15:23 Pali naha ni ninu a darana sipsip a bulmakau, mu guru vuroki puru na malala manga a naru.”
DEU 16:1 E Moses i ta tabu i ta maea, “Na keva e Abib na pida lobo mu ratea a Habu na Nipagepolo, mu kavurikea a rane BAKOVI DAGI a Vure ne hita. A vuhuna hosi na rodo tara na keva iea i bole tala mua o Egipto.
DEU 16:2 Mu lakea vona a murina ni vasileki e BAKOVI DAGI ge vakasiri mua vona, mu rabalakia tara bulmakau o tara sipsip, ge a nihabi ne BAKOVI DAGI a Vure ne mua. Mu kania a sipsip a bulmakau iea ne vona ni luhoi mule a parava na Nipagepolo.
DEU 16:3 Na tahuna mu ratea a habu iea, naha ni kania a bret i tahoka a is. Na parava ge polorua mu kani kunana a bret i uka is, a vuhuna hosi mu papahari mu kani a bret i uka is, mu ha tala o Egipto. Mu kania a bret iea ne vona ni luhoi mule a parava mu pe e Egipto mu valai. Mu luhoi vakaroroa ra maki iea ge harena na tahuna mu mate vona.
DEU 16:4 Na parava nga i polorua naha ni ru a is na ruma ne mua. Na mugana parava mu kania a sipsip a bulmakau na nihabi, mu kani lobo liu na rodo, naha ni kani kaleva ranga ge tabuli, ge palala taho a hini.
DEU 16:5 “Na tahuna mu rabalaki a sipsip a bulmakau mu gu kania mu gu luhoia a parava na Nipagepolo, naha ni rabalakia pololilo na tanga e BAKOVI DAGI i habia ne mua.
DEU 16:6 Mu rabalakia na murina ni vasileki, mu rata a nihabi na Nipagepolo lakea vona. Mu rabalakia na tahuna a haro i rolo, a vuhuna mu pe e Egipto na tahuna a haro i rolo.
DEU 16:7 Mu gutua mu kania na murina ni vasileki, na hatelanga mu hamule na tanga ne mua.
DEU 16:8 Na parava ge polotara kunana mu kani kunana a bret i uka is. Na poloruana parava mu vapopo, mu vasileki ne BAKOVI DAGI a Vure ne mua. Na parava iea naha ni rata a leho.
DEU 16:9 “Na tahuna mu vakatubu ni mirio a vit na hania, mu vakatubu ni gi a vik ge polorua.
DEU 16:10 Mu vulakia a nilobona parava na poloruana vik, ge a Habu na Nimirio ni kavurike e BAKOVI DAGI a Vure ne hita, mu kavurikea na hini i habi a maka maki ni kani ne mua. Na ningaru ne mua kunana mu bole ranga, mu habi ne BAKOVI DAGI ge a nihabi, ge manga a hini i gamai mua.
DEU 16:11 Mu lakea na tabeke ni vasileki, na matane BAKOVI DAGI mu kavurike ia vonga. Mua turane huriki e tune mua, a vora bakovi a vora ngatavine, e huriki a kabu ne Levi, e huriki a mosi, e huriki a tuna duku, e huriki a havuri, e huriki lobo ri made na tanga ne mua, mua lobo mu pitei palupu.
DEU 16:12 Mu luhoi mulea a tahuna mu leho manga a vorakato o Egipto, i mavonga mu ramai kamumu lobo a maka vinara.
DEU 16:13 “Muri ne mua mu vila vuroki a maka vinina vit, mu pahabebe pali a maka vutuna vain, mu ratea a Habu na Kape na parava ge polorua.
DEU 16:14 Mua turana e huriki e tune mua, e huriki a vora bakovi a vora ngatavine, e huriki a kabu ne Levi, e huriki a mosi, e huriki a tuna duku, e huriki a havuri, e huriki lobo ri made na tanga ne mua, mu kani mu vivi.
DEU 16:15 Mu lakea vona a tabeke ni vasileki, mu kavurikea e BAKOVI DAGI a Vure ne mua. Mu luhoia e BAKOVI DAGI i gamai a maka hania, a maka leho ne mua ri bele kamumu, bara mu vivi hateka.
DEU 16:16 “Na parava ge tolu na pida lobo e huriki a bakovi lobo ne mua ri gi valai na matane BAKOVI DAGI na tabeke ni vasileki. Ra parava ni vasileki i tolu ra nga: A Habu Na Bret I Uka Is, a Habu na Nimirio, a Habu na Kape. Mua o huriki a bakovi takutaku naha ni laho pa mu gu valai ne BAKOVI DAGI.
DEU 16:17 Mu bole valai a nihabi. Mu luhoia a Vure i habi a maka maki kamumu i kupo ne mua, mu koli, mu bole ranga mu habi mule vona.”
DEU 16:18 “Na kabu takutaku ne mua, mu vulaki ranga mari ni pelekado a maregoa, i ranga ge a bolekori na maka tanga e BAKOVI DAGI a Vure ne mua ge habi ne mua. Re huriki nga ri gi pelekado kamumu a maregoa ne huriki na naro malamala kunana.
DEU 16:19 Nahea ri gi tami e huriki, nahea ri gi tuhori ranga e huriki, nahea ri gi pahadanu ranga e huriki. Nahea tara viri ge habi tavula a moni ne ria, a vuhuna a maki ni habi tavula ne vona ni vakaviliha a niluhoi ne huriki a bakovi malamala, ne huriki ri tahoka a niluhoi kamumu, i uka ma ri gi pelekado kamumu a ngava.
DEU 16:20 Mu rata vakaroro a ngava muholi, mu ramai a naro malamala, lakea bara mu made kamumu, mu bolea a malala e BAKOVI DAGI a Vure ne mua ge habia ne mua.
DEU 16:21 “Na tahuna mu rata a dede ne BAKOVI DAGI a Vure ne hita, naha ni varo tabukoi vona ranga kai, ge ne vona a vure ngatavine e Asera.
DEU 16:22 Naha ni vonu a butu-kedo ne vona mu gu vasileki vona. Ra naro maea i hale hateka na matane BAKOVI DAGI a Vure ne mua.”
DEU 17:1 E Moses i ta tabu i ta maea, “Naha ni bolea a bulmakau a toga a sipsip i nabatabuna, mu gu habi ne BAKOVI DAGI a Vure ne mua. A naro iea i muma hateka na matane BAKOVI DAGI.
DEU 17:2 “Na tahuna ranga bakovi a ngatavine ri made na tanga tara e BAKOVI DAGI i habia ne mua, bara ri ratapilea a ngava dagi ne BAKOVI DAGI a Vure ne mua, ra naro iea kunana bara ri rata a naro hale.
DEU 17:3 Re huriki nga bara ri putu puru a vinara na Vure, ri kavurike a vure ranga, ri kavurike a haro, a keva, a hada, a taki ria nahea ri gi rata.
DEU 17:4 Mua bara mu longo a viri i rata maea, mu kasisi kamumua, a ra vuhuna a maki i ratea. Na tahuna a maki i muma hateka iea ge bele muholi ne mua e huriki a Israel,
DEU 17:5 mu bole talea na tanga a viri i ratea a naro iea, mu padia na kedo ge mate.
DEU 17:6 Ge tahoka a viri ge ala rua o ge ala tolu to go masia ra viri i rata a naro hale iea, mu rabalakia. A viri ge ala taku ge masia, naha ni rabalakia.
DEU 17:7 E huriki ri masia a viri iea i rata a naro hale, ri gi voro muga a kedo ri gi padia, muri i ranga e huriki ri gi padia na kedo. Mu padia ge mate bara mu bole vurokia a maki hale i bele na kurukurune mua.
DEU 17:8 “Na tahuna ranga maregoa i dagi hateka, lakea e huriki a mari ni pelekado a maregoa ri made na maka tanga ne mua bara ri keri ni pelekado ra maregoa maea: a viri i rabalaki a pile vona, a maregoa na viri i vatahate na malala, a maregoa na viri i vaubi i rabalakia a turana. Na tahuna a maka maregoa nga i taga hateka ne huriki a mari ni longona a ngava ri gi pelekado, mu lakea na tabeke e BAKOVI DAGI a Vure ne mua ge vakasiri mua vona.
DEU 17:9 Mu vakalongo e huriki a prister na kabu ne Levi, a mari ni longo a ngava, ri gi pelekado ri gi vakaloboa.
DEU 17:10 Ria kunana ri gi pukatala a ngava na tahuna na nivapelekado, mu ramai a maki ri taki mua vona. Mu bolea ne ria a ngava, mu ramai muholi a maka ngava ri taki mua vona.
DEU 17:12 A bakovi tara i uka ma i longo mai a nitana mari ni longona a maregoa o a ngava na prister i rata a leho na matane BAKOVI DAGI, mu rabalakia a bakovi iea ge mate. I mavonga kunana bara mu bole vurokia a naro hale iea ne huriki a Israel.
DEU 17:13 E huriki bara ri longoa a velengana maki iea, ri mangenge, bara i uka tara viri ge tagege tabu.
DEU 17:14 “Na tahuna mu bolea a malala e BAKOVI DAGI a Vure ne hita i ngaru ge habia ne mua, mu made vona, mu ngaru ge matakari mua tara hariki i manga e huriki na tabeke ranga.
DEU 17:15 Na tahuna iea, mu ule lakea ne BAKOVI DAGI ge vulakia a bakovi ge ia a hariki. Naha ni vulakia na ningaru ne mua. A hariki mu vulakia ge ia a tahotanga, nahea ge ia a mosi.
DEU 17:16 A hariki, nahea ge bole a maka hos vona ge kupo. Nahea ge rudu e huriki a bakovi ri gi puru o Egipto, ri gi kona a maka hos. A vuhuna, e BAKOVI DAGI i taki e huriki a tara vona nahea ri gi hamule puru o Egipto tabu.
DEU 17:17 A hariki, nahea ge parangi a ngatavine ge ala kupo, a vuhuna bara ri rata ia i ngalahere ne BAKOVI DAGI, i uka ma ge bole a maka gol a silva ge kupo.
DEU 17:18 “Na tahuna a bakovi ge bele manga a hariki, ge bolea na kabu ne Levi a puhu ni here a vinara na Vure vona, ge here poloa.
DEU 17:19 Na parava vakaroro a hariki ge bolea a puhu ge gia a vinara ne BAKOVI DAGI a Vure vona, ge ramai muholi a maka vinara vona.
DEU 17:20 Lakea i uka ma ge bibi rike mule a rana, ge vakakiroko e huriki a viri vona a Israel. Nahea tabu ge matataro a maka vinara ne BAKOVI DAGI. Ge ramai a maka naro nga, bara i leho manga a hariki na pida i kupo. Muri ma e huriki a hariki bara ri bele na kabu vona.”
DEU 18:1 E Moses i ta tabu i ta maea, “E huriki a prister na kabu ne Levi, i uka ma ri gi bole a malala ge manga a maka kabu ranga ne hita a Israel. A maki ni kani ne ria, ri gi bole na nihabi e huriki ri habi ne BAKOVI DAGI.
DEU 18:2 A kabu ne Levi i uka ma ge bole a malala ge manga a maka kabu ranga. A maki kamumu ri bolea, ra leho manga a prister ne BAKOVI DAGI, i manga a ngava i ta muholi vona hosi.
DEU 18:3 “Na tahuna a bakovi tara i rabalakia tara bulmakau a toga, a sipsip i habi na Vure ge a nihabi ge bole a bobona na gepena, a bobona na dumena, a bobona na garena, a maka mahalana ge habi ne huriki a prister.
DEU 18:4 Mu bole a maka vit ri moro muga, a vain ni bebe muga, a naruna oliv ni rata muga, a vuna sipsip ni pali muga, mu habi ne huriki a prister.
DEU 18:5 E BAKOVI DAGI a Vure ne mua i uka ma i vulaki na kabu ranga ne Israel e huriki a prister, ri gi rata a leho vakaroro na rana. I vulaki kunana ria na kabu ne Levi.
DEU 18:6 “A bakovi na kabu ne Levi tara ge ngaru, bara i pe a tanga vona, i lakea na tabeke ni vasileki.
DEU 18:7 Lakea bara i rata a leho na prister ne BAKOVI DAGI a Vure ne hita, turana e huriki a kabu vona ranga, ra ri leho na tanga iea.
DEU 18:8 E huriki a prister ri gi bole a maki ni kani ge palupulupu. Pali a maki ranga tabu i habi a kabu ne ria, ri gi bole.
DEU 18:9 “Na tahuna mu bele vona a tanga e BAKOVI DAGI a Vure i habia ne mua, naha ni ramai a naro i muma hateka na maka kabu ri made muga vonga pali.
DEU 18:10 Naha ni rabalaki e huriki e tune mua ge a nihabi na kanono. Naha ni nana a vure ranga, ri gi vakasiri mua na maki. Naha ni matataro e huriki, ri gi rata a naro na malulu, a naro na hanitu, a naro ni rata a muto, a naro ni rata a maguli. Naha ni ta turana a hanuna a viri i mate.
DEU 18:12 E BAKOVI DAGI a Vure ne hita i marikoi hateka ne huriki ri gi rata a maka naro i muma hateka maea. Na naro iea kunana bara i lili tala e huriki a tahotanga vona a maka tabeke na tahuna mu lokovonga tabukoi.
DEU 18:13 A niluhoi ne mua ge lakea kunana ne BAKOVI DAGI a Vure ne mua.
DEU 18:14 E huriki a viri nga mu ngaru ni lokovonga, mu gu bole a malala ne ria ri ramai a nitane huriki a bakovi na malulu, ri ngaru ni longo a ra maki a vure ranga ri taki. Pali e BAKOVI DAGI a Vure ne mua, i marikoi hateka mu gu ramai a narone ria.
DEU 18:15 “Pali e BAKOVI DAGI, a Vure ne mua, bara i vulakia tara turane mua ge ia a propet manga iau, mu ramaia a nitana.
DEU 18:16 Na tahuna mu vapopo tabukoi na lolo e Sinai, mu nanea e BAKOVI DAGI nahea ge ta tabu. Mu marikoi ni masina a kanono dagi a Vure i made pololilo vona, a vuhuna mu mangenge hateka, mu luhoi bara mu longoa i ta, mu masia, ma mu gu mate.
DEU 18:17 “I mavonga, e BAKOVI DAGI i taki iau i ta maea, ‘A ninana ne ria i kamumu.
DEU 18:18 Ga vulakia na kurukurune ria tara bakovi ge ia a propet, ge manga ioe. Ga habi vona a maka ngava nau, ra a vakuku ia vona, ge vakalongo e huriki vona.
DEU 18:19 Na ragu kunana a propet ge vakalongo a ngava. I ranga ge longotaro, bara i tahoka a ngava.
DEU 18:20 Pali na tahuna a propet tara i taki tavula a ngava na ragu, bara i mate. A propet tara i vakalongo a ngava na rana maka vure taminga, bara i mate.’
DEU 18:21 “Mu gu lohoka navai vona a nita na propet i valai ne BAKOVI DAGI o i uka?
DEU 18:22 Mu lohoka vona na tahuna a propet i vakalongo a ngava na rane BAKOVI DAGI, pali a maki i taki i uka ma i bele, ra propet iea i uka ma i bole a ngava ne BAKOVI DAGI. I vakalongo a ngava na ningaru vona kunana, naha ni mangenge vona.”
DEU 19:1 E Moses i ta tabu, i ta maea, “E BAKOVI DAGI a Vure ne mua bara i ratapile a maka kabu lobo na tabeke ta ge habia ne mua, bara mu bole lobo a tanga a ruma ne ria. Na tahuna mu made kamumu,
DEU 19:2 mu nagia na tabeke ge tolu a robo iea e BAKOVI DAGI i habia ne mua. Na tabeke ge taku ge tahoka a tanga ge taku. A bakovi i uka ma ge malulu a tuhana ni ha lokovonga. A bakovi tara i rabalaki a viri i kara ni ha lokovonga, ge kapiloho vonga.
DEU 19:4 “A bakovi tara i rabalaki rurua tara turana, i uka ma ru varatatuhare muga, ra bakovi iea ge ha lakea vona tara tanga nga, ge made vonga.
DEU 19:5 I manga i maea, a bakovi ala rua ru lakea na robo ru tolo a kai, lakea a bakovi i tolo a kai, i maparu a kira vona i rabalakia a turana, ra bakovi iea ge ha lakea vona tara tanga, ge vakakoria.
DEU 19:6 A tanga i taku kunana bara i pesi, i uka ma ge kamumu hateka. A tanga bara i pesi basi hateka, lakea a bakovi ni koli a matenga na turana bara i madihi a hatena, i nugutatea, i rabalaki tavulea a bakovi iea. Pali ra bakovi i rabalaki ruru a turana, i uka ngava. A kira kunana i maparu i rabalakia a turana.
DEU 19:7 Na naro iea kunana a taki tora mua mu ru here a tanga ge tolu, ge ne mua.
DEU 19:8 “Muri e BAKOVI DAGI bara i hudo tala a malala ne mua ge dagi, i manga a hini i ta muholi vona ne huriki a gare ne mua hosi. Bara i habi loboa ne mua a malala i ta muholi vona ne ria.
DEU 19:9 Na tahuna iea mu vulaki tabu a tanga ge tolu. Na tahuna mu rata lobo a maka maki a vakuku mua vona, mu ngaru hatekea e BAKOVI DAGI a Vure ne mua, mu ramai vakaroroa a nitana, bara i habi loboa ne mua ra malala iea.
DEU 19:10 Mu vulaki tabu a tanga ge tolu ne vona ni kapiloho. Na tahuna mu made vona a malala iea, bara mu uka a ngava vona a bakovi mu rabalaki ruru.
DEU 19:11 “Bara bakovi tara i tepua a turana, i kapiloho i rabalakia, muri i ha lakea vona tara tanga nga,
DEU 19:12 e huriki a matakari na tanga vona ri gi nana e huriki a matakari na tanga ni kapiloho, ri gi rudu hamulea na tanga vona. Muri bara ni habi lakea na bakovi ge koli a vuranga ne turana, ge rabalakia.
DEU 19:13 Naha ni dodoa, a vuhuna i rabalaki tavulea a bakovi o Israel. A naro iea kunana bara i vakalobo a rarenga, mu made na nivalemu.
DEU 19:14 “Naha ni palele a nagi na malala mu ru vanagi vona a turamu, a vuhuna ra nagi iea ni ru hosi na malala iea, e BAKOVI DAGI a Vure ne mua ta ge habia ne mua mu gu made vona.
DEU 19:15 “Na tahuna a bakovi ala taku kunana i masia a bakovi i rata a naro hale, i vakalongo na nivapelekado, a mari ni longo a ngava nahea ge longo maia. A viri ge masia ge ala rua o ge ala tolu, bara i kara ni pelekado.
DEU 19:16 “A bakovi tara i toni ni habi a vuranga vona tara bakovi, i tatami ta i putu puru a vinara,
DEU 19:17 ra bakovi nga varago ru gu lakea ru gu pesi na matane BAKOVI DAGI, lakea a mari ni longo a ngava, a prister, ru gu kado a nitane rua na matane BAKOVI DAGI.
DEU 19:18 E huriki a mari ni longo a ngava ri gi kado kamumu a ngava. Na tahuna ri lohoka vona a bakovi i taki tala a turana i tatami, i kau virihi tavulea na ngava,
DEU 19:19 ra bakovi iea ge bole a nikoli ra ni taki ta ge bolea a bakovi ni pelekado. Mu rata mavonga, bara mu rata vurokia ra naro hale maea.
DEU 19:20 E huriki lobo bara ri longoa a velengana maki, bara ri mangenge, ri matadoko nahea tara bakovi ge rata tabua a naro maea.
DEU 19:21 Naha ni dodo a bakovi na taminga. Ia ge ngaru a turana ge mate, ia kunana ge mate. Ia ge ngaru a matana, a ngina, a limana, a vahana turana ni gi ratapile, a naro iea kunana ni gi rata virihi ia vona.”
DEU 20:1 E Moses i ta tabu i ta maea, “Na tahuna mu vano mu vaubi turane huriki a pile ne mua mu matai a maka karis a hos e huriki a tara na vabinga ri ala kupo hateka, naha ni mangenge ne ria. A vuhuna e BAKOVI DAGI a Vure ne mua i bole tala mua o Egipto, i taparaki valai mua koea, bara i matakari mua.
DEU 20:2 Na tahuna mu ngalai e huriki a pile, a prister tara ge pesi ge vara e huriki a tara na vabinga ge ta maea,
DEU 20:3 ‘O huriki a bakovi o Israel, mu longo kamumu. Ngane bara mu vaubi. Naha ni mangenge ne huriki a pile, nahea ge malulu a limane mua, nahea ge vakulu a tagane mua.
DEU 20:4 A Vure ne mua bara i turane mua, i tuhori mua mu mulangi na vabinga.’
DEU 20:5 “Muri e huriki a ubu na tara bara ri taki e huriki a nugumaheto ri ta maea, ‘Ge tahoka ranga bakovi koea ri hae karaba a ruma ne ria, i uka ma ri made vona ma, i uka ma ri nana a Vure ge gamaia? Ge tahoka ranga koea, ri gi hamule na tanga, ma ri gi bole a vuranga na vabinga ge bole a viri ranga a ruma ne ria.
DEU 20:6 Ge tahoka ranga bakovi koea ri varo karaba a hania na vain ne ria, i uka ma ri rata a vain ma? Ge tahoka ranga bakovi maea ge ria koea ri gi hamule na tanga, ma ri gi vurua na vabinga ge bole a viri ranga a maka hania na vain ne ria.
DEU 20:7 Ge tahoka a bakovi ranga koea ni habikari a ngatavine ne ria? Ge tahoka ranga bakovi maea koea, ri gi hamule na tanga, ma ri gi vurua na vabinga, ma ge parangi a bakovi ranga a ngatavine ni habikari ne ria.’
DEU 20:8 “E huriki a ubu ri gi taki tabu ria ri gi ta maea, “I tahoka ranga bakovi koea ri mangenge i vakulu a tagane ria? Ge tahoka a bakovi maea koea, ri gi hamule na tanga, ma ri gi rata e huriki a nugumaheto ranga ri gi mangenge.”
DEU 20:9 Na tahuna ri rata lobo a maka ngava, ri gi vulaki e huriki a bolekori na tara takutaku na vabinga.
DEU 20:10 “Na tahuna mu ngaru ni vaubi na tanga i tahoka a nure dagi, mu lokovonga tabukoi vona, muga mu taki e huriki a tahotanga mu ta maea, ‘I kamumu hateka si gi valongo mai a ngava nahea si gi vaubi. Mu habi tavulea a tanga iea ge valai ne mia.’
DEU 20:11 Ria ri gi longo mai mua, ri gi tala a maka logo na nure dagi, mu matakari ria ge ria a vorakato ne mua.
DEU 20:12 Pali ri gi marikoi a ngava ne mua, ri ngaru ni vaubi ne mua, e huriki a nugumaheto ne mua ri gi pesi haluia a tanga.
DEU 20:13 E BAKOVI DAGI a Vure ne mua bara i tuhori mua, mu bolea a tanga. Na tahuna mu bolea, mu rabalaki lobo e huriki a bakovi ri made vonga.
DEU 20:14 Pali mu bole e huriki a ngatavine, e huriki a koma, a maka bulmakau, turana a maki ne ria ranga na tanga. A maki lobo ne huriki a pile mu rata na ningaru ne mua, a vuhuna e BAKOVI DAGI i habi ne mua a maki nga.
DEU 20:15 Mu rata mavonga kunana na maka tanga ri pesi basi na malala ne mua.
DEU 20:16 “Na tahuna mu bolea tara tanga i pesi pololilo na malala e BAKOVI DAGI ta ge habia ne mua, mu rabalaki lobo e huriki.
DEU 20:17 Mu rabalaki e huriki a Hiti, e huriki a Amor, e huriki a Kenan, e huriki a Peres, e huriki a Hivi, e huriki a Iebus, i ramaia a ngava e BAKOVI DAGI i taki mua vona.
DEU 20:18 Mu rabalaki ria, ma ri gi tovo mua na naro i muma hateka ni kavurike a maka vure ne ria, bara mu rata a naro hale ne BAKOVI DAGI a Vure ne mua.
DEU 20:19 “Na tahuna mu vaubi mu gu bolea tara tanga, mu pesi haluia na parava i kupo, mu tolo puru a maka kai ri pesi tabukoi na tanga, naha ni tolo vurokia a maka kai ni kani, a vuhuna a maka kai i uka ma ria a pile ne mua.
DEU 20:20 A maka kai ranga mu tolo mu rata a maki ge tuhori mua na vabinga, ge harena na tahuna mu ratapile e huriki a pile ne mua mu bolea a tanga ne ria.”
DEU 21:1 E Moses i ta tabu i ta maea, “Na tahuna mu masia a podana viri ni rabalaki, i tabuli na malala e BAKOVI DAGI ta ge habia ne mua, i uka ma mu lohoka vona e rei a viri i rabalakia,
DEU 21:2 a naro mu ratea ge maea. E huriki a gare, a mari ni pelekado a ngava, ri gi vano ri gi masia a maravana a hini i tabuli vona, i basi o i tabukoi na tanga.
DEU 21:3 Muri e huriki a gare na tanga iea a poda i tabuli tabukoi vona, ri gi vulakia tara bulmakau a kinana karaba i uka ma ni rata a leho vona ma.
DEU 21:4 Ri gi bole puru na naru i uka ma i mara kilala. Na tabekena malala i uka ma ni rata a hania vona ma, ni gi ubiputu vonga a lohona bulmakau.
DEU 21:5 E huriki a prister na kabu ne Levi, ria ranga ri gi puru vona a hini nga, a vuhuna ria ranga ri tahoka a leho ni longo a nivapelekado na tahuna a bakovi tara i ubia a bakovi tara. E BAKOVI DAGI a Vure ne mua i ru ria ri gi rata a leho vona, ri gi gamai e huriki.
DEU 21:6 E huriki a gare na tanga i pesi tabukoi hateka na hini i tabuli vona a poda, ri gi vahilolo a limane ria polomeli na bulmakau,
DEU 21:7 ri gi ta maea, ‘Mia i uka ma mi rabalakia a bakovi iea. I uka ma mi lohoka vona e rei i ratea a rabu iea.
DEU 21:8 O BAKOVI DAGI, o puga vuroki a naro hale ne mia a Israel, ra mia e huriki o korimule. Ra bakovi iea i uka ngava. Ni rabalaki tavula i mate. Naha ni kau virihi mia, ma mi gi rare vona a marego na bakovi ni rabalaki tavula.’
DEU 21:9 Mua bara mu rata mavonga, e BAKOVI DAGI i uka ma ge kau virihi mua, ma mu gu rare vona a maregoa na bakovi ni rabalaki.
DEU 21:10 “Na tahuna e BAKOVI DAGI a Vure ne mua i tuhori mua, mu mulangi na vabinga, mu lakavu ranga pile,
DEU 21:11 muri a bakovi tara ne mua ge ngarua tara ngatavine i mata kamumu ne ria ge parangi vona, ge rata maea.
DEU 21:12 A bakovi iea ge bolea a ngatavine ge lakea na ruma vona, ge pali vuroki lobo a vuna, ge pisi a tagulana limana,
DEU 21:13 ge kuloi a maka varakia vona. A ngatavine ge made na ruma vona ge taringi e tamana e kinana na keva ge taku, muri ge parangi vona.
DEU 21:14 Muri na tahuna i uka ma i ngaru tabua, ge tonoa ge vano, i uka ma ge ia a vorakato tabu, a vuhuna i turaria i mahita turana. Nahea ge luhoia a ngatavine iea ga vorakato ge matataroa tara bakovi ge konea.
DEU 21:15 “Na tahuna a bakovi i parangi na ngatavine i rua, bara i ngaru hatekea tara, pali a viri tara i uka ma ge ngaru hatekea. Muri ru singou ru poda, pali ra ngatavine i uka ma i ngaru hatekea i poda mugea a bakovi a tabua vona, muri e girihina tara i podea a koma bakovi.
DEU 21:16 Na tahuna a bakovi i ngaru ni veru a maka mahala vona, nahea ge habi a mahala vona lakea na tuna ngatavine i ngaru hatekea.
DEU 21:17 Ge habi balaka rua ne tuna a tabua a maka mahala, ge manga ne huriki a tabua ri bole bala. I muholi ngi e kinana a koma a tabua, i uka ma a ngatavine i ngaru hatekea, pali ra koma iea a tabua, a bakovi iea i vakabelea, bara i bole a maka mahala na tabua.
DEU 21:18 “Na tahuna a bakovi i tahoka e tuna a bakovi, pali a koma iea i tagege i longotaro vakaroro a ngava ne tamana, ne kinana, lakea ru lagua, pali i uka ma i hataki,
DEU 21:19 e tamana e kinana ru gu lakea na tanga, ru gu taki tala ne huriki a gare.
DEU 21:20 Ru gu taki e huriki a gare ru gu ta maea, ‘E tune maria i putungingi, i longotaro a ngava, i uka ma i longo mai a ngava miri taki. I ninu hateka, i vuroki tavula a maka moni maria.’
DEU 21:21 Muri e huriki na tanga ri gi padia na kedo ge mate. Ge vakasiri e huriki, nahea ri gi ratea a naro hale maea na kurukurune ria. E huriki a Israel bara ri longoa a velenga na maki i bele, bara ri mangenge.
DEU 21:22 “Na tahuna a bakovi tara i rata a naro hale dagi, muri ni rabalaki, ni vakatavore na kai a podana,
DEU 21:23 a podana nahea ge tavore mavonga na rodo ge palala tahoa a hini. A podana ni gi tanu na parava iea kunana, a vuhuna a Vure i rudurahea a bakovi ni vakatavore na kai. Mua i uka ma mu tanu malaviriria a podana, a malala e BAKOVI DAGI a Vure ne mua i habia ne mua bara i muto.”
DEU 22:1 E Moses i ta tabu i ta maea, “Na tahuna mu masia tara bulmakau o a sipsip ne turane mua tara i puka a nure, i pagitala i laho viliha, naha ni matataroa ge laho viliha mavonga. Mu bolea ge hamule na tahona.
DEU 22:2 A tanga na tahona sipsip a bulmakau ge basi, o i uka ma mu lohoka vona a tahona, mu bole lakea na tanga ne mua a sipsip a bulmakau. Muri na tahuna a tahona i matakanea ge valai, mu habia vona.
DEU 22:3 Na tahuna mu matavisia a donki, a kala, a maki tara ni pe, a naro mu ramaia ge maea kunana.
DEU 22:4 “Na tahuna mu masia a donki o a bulmakau ne turane mua i boru puru na dala, naha ni matataroa ge tabuli mavonga, mu tuhoria e turane mua mu tuli pesia a donki vona.
DEU 22:5 “E huriki a ngatavine nahea ri gi rodo a padirodo na bakovi. E huriki a bakovi nahea ri gi rodo a nirodo na ngatavine. E BAKOVI DAGI a Vure ne mua i marikoi ni matai a naro i muma maea.
DEU 22:6 “Na tahuna mu masia tara nuna kadirovo i tabuli na kai o na malala, a kinana i pasike langa na tuna i tutu poda o i uka ma i tutupoda ma, naha ni lakavu a kinana turana a tuna.
DEU 22:7 Mua mu ngaru, mu bole a maka tuna. Pali a kinana naha ni lakavua, ge vano. Mu rata mavonga bara mu made tabaka vona a malala iea, e BAKOVI DAGI bara i habi a maki i kupo ne mua.
DEU 22:8 “Na tahuna mu rata a ruma karaba mu tura halui a gagana na mapana ruma na mota, ma ge boru puru na malala tara bakovi ge mate, bara ioe a vuhuna ke.
DEU 22:9 “Naha ni varo na hania na vain a vutuna maki ranga. Mua bara mu varo a vutuna maki ranga vonga, naha ni pasi a kanena vain, naha ni bole a maka maki ni varo vonga, a vuhuna ri muto.
DEU 22:10 “Naha ni kolotata palupu na aen a bulmakau turana a donki ru gu due a malala na hania.
DEU 22:11 “Naha ni rodo a nirodo ni rata na vuna sipsip turana a hotu-silka.
DEU 22:12 “Mu bole a maki ge panga, mu rahi dili na nimodo i va na nirodo ne mua.
DEU 22:13 “Na tahuna a bakovi i parangi vona tara ngatavine, i mahita turana, muri i pilea,
DEU 22:14 i ta hale maia, i vakahale a rana i ta maea, ‘Na tahuna a parangi vona a ngatavine a hatakia i mahita turana a bakovi tara pali.’
DEU 22:15 A bakovi i rata maea a ngava, e tamana e kinana a ngatavine ru gu bolea a maki ge vakasiri ria, ra ngatavine iea i uka ma i mahita turana tara bakovi. Ru gu bole lakea na dilidala na tanga, ru gu vakasiria ne huriki a matakari.
DEU 22:16 E tamana ngatavine ge taki e huriki a matakari ge ta maea, ‘A habia na bakovi iea e tugu i parangi vona. Pali ngane i pilea.
DEU 22:17 A bakovi iea i tatami i ta maea, “A mahita turana a ngatavine iea, a hatakia i mahita turana a bakovi tara hosi.” Pali mu masia a kala iea ge vakasiri hita, e tune maria i uka ma i mahita turana muga tara bakovi.’ Muri ge ru purua na malala na ngalane huriki a gare a kala.
DEU 22:18 E huriki a gare ri gi bole a lebo, ri gi lagua e girihina ngatavine iea.
DEU 22:19 Muri ge konea a ngava i rata tavulea na moni silva i ravulu mule ma murina balaka taku (100). A moni ni gi habi ne tamana ngatavine, a vuhuna i vakamaruhua a sirula ne Israel. Ra ngatavine iea ge made liu, ge girihina ge harena na tahuna i mate.
DEU 22:20 “Pali bara ngava iea ge muholi i uka maki ni gi vakasiri a ngatavine i made malamala,
DEU 22:21 e huriki a matakari ri gi bole lakea na mataruma ne tamana a ngatavine, lakea e huriki a bakovi na tanga vona ri gi padia na kedo ge mate. A vuhuna i rata a naro na maruhua na kurukurune hita, i mahita turana a bakovi, i manga a ngoi na tahuna i tababana na ruma ne tamana. Ra naro ni rata virihi vona ge vakasiri e huriki, nahea ni gi ramaia ra naro iea.
DEU 22:22 “Na tahuna mu masia a bakovi i mahita turane girihina bakovi tara, mu rabalaki varago ra bakovi a ngatavine nga. A naro mu ratea bara i vakaloboa a naro hale iea o Israel.
DEU 22:23 “Na tahuna mu masia tara bakovi i mahita turana a ngatavine ni habikari pali na bakovi tara,
DEU 22:24 mu bole tala rua, mu padi rua na kedo ru gu mate. Ra ngatavine i made na tanga e huriki ri kara ni longoa a nihaloho vona, pali i uka ma i gale ni gi kori. I mavonga ge mate. A bakovi tara ge mate, a vuhuna i mahita turana a ngatavine ni habikari. I mavonga kunana bara mu vakaloboa a naro hale iea na kurukurune mua.
DEU 22:25 “Na tahuna a ngatavine tara ni habikari pali, i uka ma i made tabukoi na tanga, lakea tara bakovi i masia i lakavua, a bakovi kunana ni gi rabalaki.
DEU 22:26 Ra naro iea i manga kunana a bakovi i ubi e turana i rabalakia. Naha ni ratea na ngatavine tara maki, a vuhuna i uka ma i ratea tara naro hale ge mate vona.
DEU 22:27 Ra bakovi iea i tangotatea polovavo na tanga a ngatavine iea. A ngatavine i gale e huriki ri gi koria, pali i uka viri i longoa a nitangi vona ge koria.
DEU 22:28 “Na tahuna mu masia tara bakovi i lakavu a ngatavine i uka ma ni habikari ma,
DEU 22:29 a bakovi iea ge habi ne tamana ngatavine a moni silva ge ravulu lima (50), muri ge parangi vona a ngatavine. A vuhuna ra bakovi iea i turari tuharea a ngatavine, i mahita turana. A bakovi iea ge parangi liu vona a ngatavine iea, nahea ge pilea.
DEU 22:30 “A bakovi nahea ge mahita turana e girihine tamana, ma ge vakamaruhua e tamana.”
DEU 23:1 E Moses i ta tabu i ta maea, “A bakovi ni pala a dolena o ni pala vuroki a kapuna, i uka ma ge dili na vaponga ne BAKOVI DAGI.
DEU 23:2 “Na tahuna a bakovi i tulia a ngatavine i uka ma e girihina, muri i singou a ngatavine, i poda a koma, a koma iea i uka ma ge dili na vaponga ne BAKOVI DAGI. E huriki a hamona ranga i uka ma ri gi dili na vaponga ne BAKOVI DAGI, ge harena na hamona i ravulu.
DEU 23:3 “E huriki a Amon, a Moab turana e huriki a hamone ria, ria ranga i uka ma ri gi dili turane huriki a tara ne BAKOVI DAGI, ge harena na hamone ria i ravulu.
DEU 23:4 A vuhuna na tahuna si pe e Egipto si valai, i uka ma ri habi a maki ni kani, a naru ne mua. Ri konea e Balam, ri takia ge takia a Vure ge ruduraha mua. E Balam, e tamana e Beor, a tanga vona e Petor na tabeke ne Mesapotamia.
DEU 23:5 Pali e BAKOVI DAGI a Vure ne mua, i uka ma i longototoa e Balam ge ruduraha mua. I gamai mua, a vuhuna a Vure i ngaru hateka mua.
DEU 23:6 I mavonga vakaroro, naha ni tuhori re huriki nga ri gi made kamumu ri gi tahoka a maki.
DEU 23:7 “I tahoka ranga Idom a Egipto bara ri made turane mua. Naha ni luhoi hale ne ria e huriki a Idom, a vuhuna ria a viri ne mua. E huriki a Egipto nga ranga, naha ni luhoi hale ne ria, a vuhuna hosi mu made manga mosi na robo ne ria.
DEU 23:8 Ge vakatubu ne huriki e tamarane ria, bara ri dili turane huriki a tara ne BAKOVI DAGI.”
DEU 23:9 “Na tahuna mu lakea na vabinga, e huriki a nugumaheto ne mua ri made na mada, ri gi mangenge vona a maki i uka ma i kamumu na matana Vure.
DEU 23:10 Na tahuna a bakovi i mahita na rodo i vurena guru, ge pagitala na mada ge made vonga.
DEU 23:11 Na malunga ge hilolo pasia. Na tahuna a haro ge rolo, ge hamule dili tabu na mada.
DEU 23:12 “E huriki a nugumaheto ri gi tahoka a tabeke ni ragilengi vona polovavo na mada.
DEU 23:13 Na tahuna ri ngaru ni ragilengi ri gi bole a aro, ri gi pagitala, ri gi keli na aro a lovo. Na tahuna ri ragilengi lobo ri gi kavitagu mule a lovo.
DEU 23:14 E BAKOVI DAGI a Vure ne hita, bara i made turane mua vakaroro na mada, ge tuhori mua bara mu rangi e huriki a pile. I mavonga a mada ni gi taba, ge ne BAKOVI DAGI kunana, lakea i uka ma ge masia tara maki ge muto na kurukurune mua, ge ngalahere ne mua.”
DEU 23:15 E Moses i ta tabu i ta maea, “Na tahuna a vorakato i ha na tahona, ge valai ge nana mua mu gu tuhoria, naha ni tono mulea.
DEU 23:16 Ia ge ngaru ni made vona tara tanga ne mua, i kamumu ge lokovonga ge vulakia tara tanga mua ge made vona, naha ni rata halea.
DEU 23:17 “Mua o huriki a bakovi a ngatavine o Israel, naha ni rata mua ge mua a ngoi na roho ni vasileki na vure taminga.
DEU 23:18 Naha ni bole a moni na molenga mu gu bole valai na roho ne BAKOVI DAGI a Vure ne mua, ge vakaloboa tara ngava dagi mu ratea na Vure. A Vure ne mua i uka ma i ngarua a naro maea.
DEU 23:19 “Na tahuna mu longo vona e turane mua tara ge koli a makoli ne mua na moni o na maki ni kani o na maki ranga tabu, naha ni takia ge ru langa tabu ranga moni ge kolia a makoli vona.
DEU 23:20 Pali e huriki a mosi, ri gi ru langa tabu na makoli ne ria ranga moni, ri gi koli a makoli ne ria. Ne huriki a kabukabu, naha ni taki ria ri gi ru langa tabu ranga moni. Mu ramaia a vinara ne BAKOVI DAGI a Vure ne mua, bara i gamai lobo a maki mu rata vona na malala bara mu vano mu made vona.
DEU 23:21 “Na tahuna mu ratea tara ngava muholi turane BAKOVI DAGI a Vure ne mua, mu rata malaviriria. A Vure i uka ma ge lohopile vona a nita muholi iea, pali mua i uka ma mu ramaia, bara mu tahoka a ngava.
DEU 23:22 Mua i uka ma mu rata a ngava muholi turane BAKOVI DAGI, bara mu uka a ngava.
DEU 23:23 Pali mua mu rata a ngava muholi na ningaru ne mua kunana, mu ramai muholia a nita muholi mu ratea.
DEU 23:24 “Na tahuna mu polokudu a hania na vain ne turane mua, mu kani a kanena vain na ningaru ne mua. Pali naha ni tahoni na kulopi mu gu vano turana.
DEU 23:25 Na tahuna mu polokudu a hania na vit ne turane mua, a vutuna vit mu vila na limane mua mu kani. Pali naha ni vali ranga vit na vito.”
DEU 24:1 E Moses i ta tabu i ta maea, “Na tahuna a bakovi i parangi a ngatavine, muri i matavisia vona tara maregoa, lakea i uka ma i ngaru tabua, ge herea tara raukea ge habia na ngatavine, muri ge tonoa ge vano.
DEU 24:2 Lakea a ngatavine ge vano ge matavisia tara bakovi ge parangi vona.
DEU 24:3 Muri a bakovi iea tara i uka ma i ngaru tabua, ia tara ge here tabua a raukea ge vakaloboa a parangia, ge habia na ngatavine, ge tonoa ge vano. Pali na tahuna e girihina i parangi muri vona i mate,
DEU 24:4 e girihina muga nahea ge parangi tabu vona. Ge lohoka vona ra ngatavine iea i muto pali na matane BAKOVI DAGI, nahea ge parangi vona. Ia ge parangi tabu vona ngatavine iea, e BAKOVI DAGI i uka ma i ngarua a naro muma iea. I mavonga, na tahuna mu bolea pali a malala e BAKOVI DAGI i ngaru ge habia ne mua, naha ni ratea ra naro hale iea.
DEU 24:5 “A bakovi i parangi karaba nahea ni gi rudu ge dili na tara na vabinga, o ge rata ranga leho dagi. Ge made tavula na tanga ge harena na pida i taku, ge rata kamumua a hatene girihina.
DEU 24:6 “Na tahuna mu longo vona tara bakovi ge bole a makoli ne mua, mu ngaru ge habia mua tara maki ge a kilakilana ge koli mule a makoli vona, naha ni bole a maka kedo ni tutu a vit vona, ma mu gu bole a maka kedo ni leho vona, i uka ma ge kisi a maki ni kani vona.
DEU 24:7 “Na tahuna a bakovi i lakavua tara kabu vona a Israel i bolea ge a vorakato vona, o ge matataroa tara viri i konea ge a vorakato vona, mu rabalakia a bakovi i ratea a naro iea. Mu rata mavonga, bara mu vakaloboa ra naro hale iea.
DEU 24:8 “Na tahuna a maka patala ri bele tavula na kuline mua, mu rata lobo a maka maki e huriki a prister na kabu ne Levi ri taki mua vona mu gu rata. Mu ramai lobo a maka ngava a vakuku ria vona.
DEU 24:9 Mu luhoi kadoa a maki e BAKOVI DAGI a Vure ne mua i ratea ne Miriam, na tahuna si pea e Egipto si valai.
DEU 24:10 “Na tahuna mu longo vona a kabukabu ge bole a makoli ne mua, naha ni dili na ruma vona mu gu bole a maki i ngaru ge habi ne mua, ge a kilakila vona ge koli a makoli.
DEU 24:11 Mu dava polovavo, ia kunana ge bole pori vilia a maki ge a kilakila.
DEU 24:12 Ia ge a hulu matasia, ge habia mua a mavidana kala dagi ge a kilakila vona ge koli a makoli, naha ni nugu tatea ge harena kuduvi.
DEU 24:13 Mu habi mulea vona na tahuna a haro i uka ma i rolo ma, ge kavitagua vona na tahuna i mahita. Muri a bakovi iea bara i kavurike mua, e BAKOVI DAGI a Vure ne mua bara i ngarua a naro malamala ne mua.
DEU 24:14 “A vora ne mua ge bala vona tara maki, naha ni rata halea. I uka maki vona ge ia a kabukabu o ge ia a bakovi basi i made na tanga ne mua.
DEU 24:15 Na malunga lobo mu habi a mapana leho i rata vona a parava iea. A vuhuna i bala a maki i dava ni bole a moni. Mua i uka ma mu habi a moni vona, bara i tangi lakea ne BAKOVI DAGI, bara mu tahoka a ngava na naro hale ne mua.
DEU 24:16 “Na tahuna a bakovi tara i rata a naro hale, naha ni koli mu gu rabalaki e tamana o e kinana. I mavonga kunana na tahuna e tamane ria e kinane ria ru rata a naro hale, naha ni rabalaki e huriki e tune rua. Mu rabalaki kunanea a viri i rata a naro hale.
DEU 24:17 “Naha ni rata hale ni radi a maki ne huriki a mosi, a tuna duku, a havuri. Na tahuna a havuri i makoli vona tara maki, naha ni bolea a nirodo vona ge a mapana.
DEU 24:18 Mu luhoi mule, na tahuna mu leho manga a vorakato o Egipto, e BAKOVI DAGI a Vure ne mua i vakaha tala mua. Mua mu made hale maea, lakea a habia mua a vinara iea.
DEU 24:19 “Na tahuna mu mirio a vit na hania, mu matataro vonga a masigona, naha ni hamule mu gu poi. Na tahuna mu pasi a kanena oliv o a kanena vain, naha ni hamule tabu mu gu pasi a kanena ri tababana ni tavore. Mu pe vonga ngi, bara i bole e huriki a ngatavine na kabu basi, e huriki a tuna duku, e huriki a havuri. I mavonga e BAKOVI DAGI a Vure ne mua, bara i gamai mua, a maki lobo mu rata bara ri bele kamumu.
DEU 24:22 Mu luhoi mule a tahuna mu leho manga a vorakato o Egipto, i hale a nimadene mua vonga, lakea a vakuku maea mua.”
DEU 25:1 E Moses i ta tabu i ta maea, “Na parava ranga bara a bakovi ala rua ne mua a Israel, ru lakea na mari ni pelekado a maregoa ru gu pelekadoa a maregoa ne rua. Muri a mari ni pelekado a maregoa bara i matakilaka vona a bakovi i tahoka a rarenga, a bakovi tara i uka.
DEU 25:2 A mari ni pelekado ge taki ni gi lagu a bakovi i tahoka a rarenga. A bakovi iea ni gi lagu ge ramaia a naro hale i ratea.
DEU 25:3 Ri gi lagua balaka ravulu va kunana. Ma ri gi lagu balaka kupo hateka ge maruhu na matane mua.
DEU 25:4 “Naha ni kolotata a ngavana bulmakau na tahuna i leho ni rata vuroki a vinina vit.”
DEU 25:5 E Moses i ta tabu i ta maea, “Na tahuna a maki tari rua ru made vona tara malala, a viri tara ne rua i uka e tuna ga bakovi lakea i mate, e girihina nahea ge parangi lakea na kabu tara. E turana a bakovi i mate ge parangi vona.
DEU 25:6 A tabua na ngatavine ge podea ni gi gale ge tuna a bakovi i mate. I mavonga a hamona i uka ma ge lobo.
DEU 25:7 “A turana bakovi i mate ge marikoi ni parangi vona a ngatavine iea, a ngatavine ge lakea na tanga ge matai e huriki a gare ge ta maea, ‘E turane girihigu i marikoi ni ramai a vinara, ge parangi nau ge vakabele a hamone turana, ma ge lobo liu na kabu ne Israel a hamona.’
DEU 25:8 E huriki a gare na tanga ri gi gale vilia, ri gi ta turana. Ia ge tababana ni marikoi,
DEU 25:9 a havuri ge bele na matane huriki a gare, ge kali talea tara vahapolo ne turane girihina, ge kalupe tahoa a matana ge ta maea, ‘A rabu maea mi rata virihi a bakovi i uka ma i ngaru ni tuhori e turana ge vakabele e huriki a hamona.’
DEU 25:10 Lakea mua e huriki a Israel bara mu galea a kabu na bakovi iea ‘A kabu na bakovi ni kali tala a vahapolo vona.’”
DEU 25:11 E Moses i ta tabu i ta maea, “Na tahuna a bakovi i ala rua ru vaubi, lakea e girihina a bakovi tara i tuhoria e girihina, i tuea a dolena bakovi tara,
DEU 25:12 naha ni dodoa a ngatavine iea, mu palakudua a limana.
DEU 25:13 “Na tahuna a viri tara i valai na ruma vomu i kona a maki, naha ni pulo viliha a naguna maki mu habi.
DEU 25:15 Mu habi ge manga a naguna mu habi bala, i mavonga bara mu made tabaka na malala, e BAKOVI DAGI a Vure ne mua i taki ge habia ne mua.
DEU 25:16 E BAKOVI DAGI a Vure ne mua i marikoi a bakovi i rata a maka naro na taminga maea.
DEU 25:17 “Mu luhoi mule a naro hale e huriki a Amalek ri rata virihi mua vona na tahuna mu pe e Egipto mu valai.
DEU 25:18 I uka ma ri mangenge na Vure, lakea ri luve na niane mua na tahuna i malulu pali a tuhane mua, ri luve valai muri, ri vaubi turane mua. Lakea ri rabalaki e huriki ri kodo ri laho muri.
DEU 25:19 E BAKOVI DAGI a Vure ne hita i habia ne mua a robo iea, bara i matakari kamumu mua mu made na nivalemu. Pali na parava tara bara mu rabalaki e huriki a Amalek i uka ma ni gi luhoi mule tabu. Naha ni longokaburungia a ngava iea.”
DEU 26:1 E Moses i ta tabu i ta maea, “Muri na tahuna mu made pali vona a malala e BAKOVI DAGI a Vure ne mua i habia ne mua mu gu made vona,
DEU 26:2 mua takutaku mu bole a maki ni kani ri moro muga na hania na robo iea, mu tahoni na kulopi mu bole lakea vona a tabeke a Vure i vulakia ge made vona ge vakarere a rana vona.
DEU 26:3 Mu lakea na prister i matakari a nihabi mu taki maea, ‘Iau a valai na malala e BAKOVI DAGI i ta muholi vona ne huriki a gare ne mia ge habia ne mia.’
DEU 26:4 “E huriki a prister ri gi bole a kulopi na limane mua ri gi ru tabukoi na dede ne BAKOVI DAGI a Vure ne mua.
DEU 26:5 Na matana Vure mu ratea a ngava iea, ‘A gare ne mia e Abraham, a bakovi o Aram, i pea a tanga vona i laho viliha, i bolea a kabu vona ri vano ri made o Egipto, ri bele kupo ri gau hateka.
DEU 26:6 Muri e huriki a Egipto ri rata hale mia, ri vakavora hateka mia vonga.
DEU 26:7 Lakea mi tangi lakea ne BAKOVI DAGI a Vure ne huriki a gare ne hita, ge kori mia na nimade hale ne mia, na leho dagi ne mia, na hini ri pahadanu mia.
DEU 26:8 Lakea e BAKOVI DAGI i rata a leho dagi hateka i korimule mia o Egipto. I rata a maka nivakasiri, a maki hale i bele ne ria.
DEU 26:9 Muri i bole valai mia koea i habia ne mia a malala i vona a maki ni kani iea.
DEU 26:10 I mavonga ngane, o BAKOVI DAGI, a habi vomu a maka maki ni kani ri moro muga na malala o habi nau.’ “O ta lobo, muri o bole a kulopi o ru tabukoi na matane BAKOVI DAGI a Vure ne mua, o kavurikea vonga.
DEU 26:11 Mu vivi vona a maka maki kamumu i habi pali ne mua, turane huriki a kabu ne mua. E huriki a kabu ne Levi, turane huriki a viri basi ranga ri gi vivi turane mua.
DEU 26:12 “Na pida i tolu lobo, mu bole a maki ni kani ri bele na hania ne mua, mu ru na naguna ge ravulu. Mu veru ne huriki a kabu ne Levi, na viri basi ri made turane mua, ne huriki a tuna duku a havuri. Mu rata mavonga e huriki nga bara ri tahoka a maki ni kani, ri kani ri maru.
DEU 26:13 Na tahuna mu rata lobo a leho nga, mu taki maea e BAKOVI DAGI a Vure ne hita, ‘A maki lobo o ngaru mia mi gi habi vomu, mi veru lobo pali, i uka ranga ge tabuli mule na ruma ne mia. Mi habi ne huriki a kabu ne Levi, na viri basi ri made turane mia, ne huriki a tuna duku, ne huriki a havuri. Mi ramai lobo a maka nitamu. Mia i uka ma mi longotaro a nitamu mi gi longokaburungi.
DEU 26:14 I uka ma mi kani a kalavana maki ni kani vomu na tahuna mi taringi a bakovi i mate. Na tahuna mi muto na matamu i uka ma mi bole tala na ruma mia ranga maki ni kani nga, i uka ma mi bole ranga mi gi habi ne huriki ri mate pali. O Vure, ioe e BAKOVI DAGI nau, a rata lobo a maki i manga a hini o vakuku iau vona ga rata.
DEU 26:15 O made na hunu na tanga kamumu vomu o tabea, o mata puru valai ne mia e huriki a Israel, o gamai mia. O gamaia a malala o habi ne mia, i manga a hini o ta muholi vona ne huriki a gare ne mia hosi, ra malala i vona a maki ni kani.
DEU 26:16 “Na parava iea e BAKOVI DAGI a Vure ne mua i ngaru mu gu ramai a maka vinara na hatene mua, na niluhoi ne mua.
DEU 26:17 Mona mu vakalongo pali, e BAKOVI DAGI ia a vure ne mua. Mu ta muholi pali mu gu ramai a narona, a maka vinara vona, mu gu rata a maki lobo i taki.
DEU 26:18 Mona e BAKOVI DAGI i vakalongo, ge mua e huriki a ngate vona, i manga a hini i ta muholi vona. I taki mua mu gu ramai lobo a maka vinara vona.
DEU 26:19 Ge vakarere, ge ru langa a rane mua na maka kabu lobo i rata rike. Pali i taba mua ge mua a kabu vona kunana, i manga a ngava i taki.”
DEU 27:1 E Moses i pesi turane huriki a gare ne huriki a Israel, i vakuku e huriki i ta maea, “Mu ramai a maka vinara a habi ne mua mona.
DEU 27:2 Na parava mu tulu poloa a naru e Iordan, mu gu lakea vona a malala e BAKOVI DAGI a Vure ne mua ge habia ne mua, mu bole a maka kedo dagi mu kavitagu na simen.
DEU 27:3 Muri na tahuna mu bele vona a malala kamumu iea e BAKOVI DAGI a Vure ne huriki a gare ne hita hosi i ta muholi vona ge habia, mu here langa na kedo a maka ngava na vinara.
DEU 27:4 Na tahuna mu bele pali na tabeke mule lokovonga ne Iordan, mu vakapesi a maka kedo nga na lolo e Ebal, mu kavitagu na simen i manga ngane a taki mua.
DEU 27:5 Mu bole ranga kedo mu ratea a dede. E huriki ri hae a dede nahea ri gi ubikeve a kedo ri gi haea vona a dede.
DEU 27:6 Mu bole a maka kedo i uka ma ni ubikeve, mu haea vona a dede ne BAKOVI DAGI a Vure ne mua. A maka nihabi ni gutu-vuro mu rata langa na dede lakea ne BAKOVI DAGI a Vure ne hita,
DEU 27:7 turana a nihabi na nivalemu turana Vure. Mu kani mu vivi vona a bobona sipsip a bulmakau na nihabi, ne vona ni rata a nivalemu na matane BAKOVI DAGI a Vure ne hita.
DEU 27:8 Na maka kedo mu kavitagu na simen, mu here langa kamumu ne ria a maka vinara.”
DEU 27:9 Muri e Moses turane huriki a prister na kabu ne Levi, ri gi taki e huriki a Israel ri gi ta maea, “Mua lobo mu vulai, mu longo valai. Mua ngane mua e huriki a tara ne BAKOVI DAGI a Vure ne hita.
DEU 27:10 Mu longototo a maka nitana, mu ramai a maka vinara vona a habi ne mua mona.”
DEU 27:11 E Moses i vakuku tabu e huriki a Israel i ta maea,
DEU 27:12 “Na tahuna mu tulu poloa pali a naru e Iordan, a kabu ne Simion, ne Levi, ne Iuda, ne Isikar, ne Iosep, ne Bensamin ri gi lakea na lolo e Gerisim, ri gi habi a ngava kamumu ne huriki.
DEU 27:13 A kabu ne Reuben, ne Gad, ne Aser, ne Sebulun, ne Dan, ne Naptali ri gi pesi na lolo e Ebal ri gi taki ne huriki a maka niruduraha.
DEU 27:14 “E huriki a Levi ri gi ta tora lakea ne huriki a Israel ri gi ta maea:
DEU 27:15 ‘A viri ge kau a vure taminga na kai o na kedo o na aen i kavurike kapilohoa, a Vure bara i habi a vuranga vona a bakovi iea. Ra maka maki nga ri kau, a Vure i marikoi hateka ri gi kavurike.’ E huriki lobo ri gi koli ri gi ta maea, ‘A ngava i muholi hateka.’
DEU 27:16 “‘A bakovi i rata hale e tamana e kinana, a Vure bara i habi a vuranga vona a bakovi iea.’ E huriki lobo ri gi koli ri gi ta maea, ‘A ngava i muholi hateka.’
DEU 27:17 “‘A bakovi ge palele a nagi na malala na turana, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:18 “‘A bakovi i tamia na dala a kepa i uka ma i ramai a dala vona, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:19 “‘A Bakovi i rata hale e huriki a mosi, e huriki a tuna duku, e huriki a havuri, a Vure bara i habi a vuranga vona.’ Muri e huriki lobo ri gi koli ri gi ta maea, ‘A ngava i muholi hateka.’
DEU 27:20 “‘A bakovi i mahita turane girihine tamana, a Vure bara i habi a vuranga vona a bakovi iea. Ra naro i ratea i vakamaruhu e tamana.’ E huriki lobo ri gi koli ri gi ta maea, ‘A ngava i muholi hateka.’
DEU 27:21 “‘A bakovi tara i tari a ligo o a boro o a maki tara, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:22 “‘A bakovi i mahita turane kurabana, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:23 “‘A bakovi i mahita turane lahuana ngatavine, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:24 “‘A Bakovi i kapiloho i rabalakia a turana, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:25 “‘A bakovi ni kona i rabalaki tavulea a viri tara, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’
DEU 27:26 “‘A bakovi i uka ma i nugutata tora a vinara ge ramai, a Vure bara i habi a vuranga vona.’ E huriki lobo ri gi koli ri gi ta maea, ‘A ngava i muholi hateka.’”
DEU 28:1 E Moses i ta tabu i ta maea, “Na tahuna mu ramai a nitane BAKOVI DAGI a Vure ne mua, mu ramai kamumu a maka vinara vona a habi ne mua ngane, bara i vakadagi a rane mua, mu rangi a kabu lobo na malala.
DEU 28:2 Mu ramai a maka nitane BAKOVI DAGI a Vure ne mua, bara i habi ne mua a maki kamumu nga:
DEU 28:3 “Bara i gamai a maka tanga, a hania ne mua.
DEU 28:4 “Bara i gamai e huriki e tune mua, i rata a maka maki ni kani ri bele kupo na hania. A maka bulmakau a sipsip ranga, bara i habi kupo ne mua.
DEU 28:5 “Bara i gamai a maka hania na vit turana a maki ranga mu varo na hania.
DEU 28:6 “A Vure bara i gamai a maka leho ne mua ri bele kamumu hateka.
DEU 28:7 “E BAKOVI DAGI bara i tuhori mua i ratapile e huriki a pile, i rata ria ri ha vapida na maka dala i kupo.
DEU 28:8 E BAKOVI DAGI a Vure ne mua bara i rata a maka leho ne mua ri bele kamumu, bara i rata a maka vit ne mua ri bele kupo, bara mu vakavonu a maka roho ni ru palupu a maka maki ni kani. Bara i matakari mua vona a robo ge habia ne mua.
DEU 28:9 “Na tahuna mu ramai a maka ngava ne BAKOVI DAGI a Vure ne mua, mu rata a maka maki ge manga a hini i taki, bara i taba mua a kabu vona kunana, i manga a ngava i ta muholi vona hosi.
DEU 28:10 Muri e huriki na malala bara ri matakilaka vona e BAKOVI DAGI kunana i vulaki mua, ge mua e huriki a tara vona, lakea bara ri mangenge ne mua.
DEU 28:11 E BAKOVI DAGI bara i habi ne mua e huriki e tune mua ri ala kupo, a maka bulmakau ri kupo, a maka maki ni kani na hania bara ri bele kupo vona a robo i ta muholi vona ge habia ne mua.
DEU 28:12 “E BAKOVI DAGI i matakari a vala, bara i vakaboru na tahuna na vala. Bara i rata a maka leho ne mua ri bele kamumu hateka. Lakea e huriki ranga bara ri nana mua na maki mu habi, pali mua i uka ma mu gu ngaru ni nana ria.
DEU 28:13 Mua bara mu ramai kamumu a ngava lobo ne BAKOVI DAGI a Vure ne mua, bara i rata mua mu muga ne huriki, i uka ma mu gu muri ne ria. Bara mu tahoka vakaroro a maka maki i kupo, i uka ma mu gu bala vona tara maki.
DEU 28:14 Pali a ngaru mua mu gu ramai lobo a maka vinara, naha ni longotaro mu gu ramai a vure ranga, mu gu rata a leho ne ria.
DEU 28:15 “Pali mua bara mu longotaro a nitane BAKOVI DAGI a Vure ne mua, i uka ma mu ramai kamumu a maka vinara vona ra a habi mua ngane, a maka vuranga bara ri bele ne mua ri vakahale mua.
DEU 28:16 “Bara ri ratapile a maka tanga, a hania ne mua.
DEU 28:17 “Bara ri ratapile a maka hania na vit turana a maki ranga mu varo na hania.
DEU 28:18 “Bara ri ratapile e huriki e tune mua, ri rata a maka maki ni kani bara ri uka a kanena. A maka bulmakau a sipsip ranga, i uka ma ri gi poda kupo.
DEU 28:19 “A maka leho mu rata bara ri bele hale kunana.
DEU 28:20 “Na tahuna mu ngalahere ne BAKOVI DAGI mu rata a naro hale, bara i rata a maka maki hale legelege ri bele ne mua. Bara i vakamanga mua, a maki lobo mu rata bara ri tabuli viliha ri hale. I uka ma ge tabaka bara mu bole a vuranga.
DEU 28:21 Bara i rudu a maka gilanga legelege i bele ne mua, i vakalobo liu mua vona a malala mu gu bolea.
DEU 28:22 E BAKOVI DAGI bara i vakamadihi mua na maka gilanga hale, a kuline mua bara i vaki i rongo, bara i ratea a haro i kara hateka, i rudua a vilu dagi i ratapile a maka maki ni kani na hania. Ra maka maki hale nga bara ri tabuli turane mua ge harena na tahuna mu mate vona.
DEU 28:23 A vala i uka ma ge boru, a malala bara i tora manga kedo.
DEU 28:24 E BAKOVI DAGI bara i kuloia a vala i rudua a vilu dagi i valai turana a habulo a hire, ge harena na tahuna mua lobo bara ni ratapile.
DEU 28:25 “E BAKOVI DAGI bara i matataro e huriki a pile ri ratapile mua. Bara mu laho na dala i taku mu vano mai ria na vabinga, pali bara ri pahalili mua, mu ha vapida na maka dala i kupo. E huriki lobo na malala bara ri matai a maki nga ri bele ne mua, bara ri mangenge hateka.
DEU 28:26 A maka kadirovo a livoa bara ri valai ri kani a maka podane mua, bara i uka viri ge lili tala ria.
DEU 28:27 E BAKOVI DAGI bara i rata a maka loto ri tuvu ne mua, i manga a hini i rata virihi e huriki a Egipto. Bara i rata a maka ngarava dagi ri tuvu viliha na kuline mua. A maka buhira bara ri tuvu lae na kuline mua, ri makali hateka, pali mua mu uka dala mu gu ratea a gilanga iea ge lobo.
DEU 28:28 E BAKOVI DAGI bara i vakaviliha a maka niluhoi ne mua, i vakakepa mua bara mu vuru viliha lae.
DEU 28:29 Na haro bara mu laho manga a viri i kepa mu matakanea a dala, pali i uka ma mu gu matavisia. A maka maki mu rata i uka ma ri gi bele kamumu. Vakaroro bara ri vakahale mua ri panaho a maka maki ne mua, bara i uka viri ge tuhori mua.
DEU 28:30 “Na tahuna mu habikaria a ngatavine ge parangi na bakovi, a bakovi iea i uka ma ge parangi vona. A bakovi tara bara i parangi vona. Bara mu hae a ruma, pali i uka ma mu gu made vona. Bara mu varo a hania na vain, pali i uka ma mu gu kani a kanena.
DEU 28:31 E huriki a pile bara ri rabalaki a maka bulmakau ne mua na matane mua, pali i uka ma mu gu kani ranga. Bara mu matanono kunana, ni turari tala a maka donki ne mua, i uka ma mu gu bole mule. Bara ri valai ri bole a maka sipsip ne mua, bara i uka viri ge kori mua ni bole mule.
DEU 28:32 Bara mu matanono kunana e huriki a bakovi na tanga basi ri boko e huriki e tune mua, ri vano turana. Na parava vakaroro bara mu pasimata ne huriki e tune mua ri gi hamule. Bara mu matanonoa a dala, pali bara mu mata mata bara i madihi tavula a matane mua. Bara i uka tara maki mu gu ratea mu gu bole mule e huriki e tune mua.
DEU 28:33 E huriki a bakovi na robo basi i uka ma mu lohoka vona, bara ri valai ri bole lobo a maka maki ni kani mu leho hateka ni varo. Vakaroro bara ri rata hale mua, ri vakamadihi mua.
DEU 28:34 Bara mu matai a maka maki hale nga, a niluhoi ne mua bara ri viliha lae.
DEU 28:35 E BAKOVI DAGI bara i rata a maka ngarava hale ri bele na maka vahane mua, a maka loto bara ri tuvu viliha na kakaine mua. Bara mu uka a dala mu gu rata ge kere a maka ngarava, ge lobo a maka loto.
DEU 28:36 “E BAKOVI DAGI bara i bole mua turana a hariki ne mua mu lakea vona tara robo, hosi mua turane huriki e tubune mua i uka ma mu lokovonga vona. Bara mu made vona a tanga iea, mu kavurike a vure taminga ne ria, ra ni kau na kai, na kedo.
DEU 28:37 E BAKOVI DAGI bara i lili tala mua vona a tanga iea, mu laho viliha. E huriki bara ri matai a maki hale ri bele ne mua, bara ri turutu, ri nongo vaki ri padikede mua.
DEU 28:38 “Bara mu varo a maka maki ni kani i kupo, pali a maka koa bara ri ratapile ria, mu bole a maki popote kunana.
DEU 28:39 Bara mu varo a vain na hania mu matakari, pali a maka mata kiroko bara ri ratapile ria. Lakea i uka ma mu gu pasi a kanena vain mu gu rata a vain.
DEU 28:40 A maka kai a oliv ri koru kamumu na malala ne mua, pali na tahuna a maka kanena oliv i uka ma ri rara ma, bara ri mapasi tavula puru na malala, i uka ma mu gu bole a namone ria.
DEU 28:41 Bara mu tahoka e huriki e tune mua, pali i uka ma ri gi made tata turane mua. E huriki a pile bara ri valai, ri bole lakea ria na tanga ne ria.
DEU 28:42 A maka koa bara ri ratapile a maka kai, a maki ni kani na hania ne mua.
DEU 28:43 “E huriki a mosi ri made na robo ne mua bara ri gao hateka ne mua, pali mua bara mu tuha malulu.
DEU 28:44 Bara ri tahoka a maka maki i kupo, i kara mu gu nana mu gu bole ne ria, pali i uka ma ri gi nana ri gi bole ne mua.
DEU 28:45 “Ra ni ruduraha nga bara ri bele ne mua ge harena na tahuna bara mu lobo liu, a vuhuna i uka ma mu ramaia a nitane BAKOVI DAGI a Vure ne mua, i uka ma mu ramai a maka vinara vona i habi ne mua.
DEU 28:46 Bara ri manga a nivakasiri ri tabuli vakaroro ne mua turane huriki a hamone mua.
DEU 28:47 E BAKOVI DAGI a Vure ne mua i habi ne mua a maka maki i kupo, pali mua i uka ma mu vivi, mu gu hate taku mu gu rata a leho vona.
DEU 28:48 I mavonga e BAKOVI DAGI bara i rudu e huriki a pile ri valai ri vaubi ne mua, bara mu rata a leho ne ria. Bara mu vitolo, mu marohu, mu bala a varakia turana a maka maki ranga. E huriki a pile ne mua bara ri vadede langa ne mua ge harena na tahuna ri pahabebe mua.
DEU 28:49 “E BAKOVI DAGI bara i bole valai e huriki na tanga basi, i uka ma mu lohoka na nitane ria. Bara ri valai vakaturutu manga a loha i lakavu a manu.
DEU 28:50 Na tahuna ri valai i uka ma ri gi dodoa tara viri. A koma a gare ranga i uka ma ri gi dodo.
DEU 28:51 Bara ri bole lobo a maka bulmakau, a sipsip, a maki ni kani na hania, a vit, a vain, a naruna oliv, muri bara mu vitolo mu mate.
DEU 28:52 “E huriki a pile bara ri pesi halui a maka tanga ne mua, i harena na maka nure dagi na tanga ne mua ri mapuka, muri bara ri ratapile a maka tanga na robo e BAKOVI DAGI a Vure ne mua i habia ne mua.
DEU 28:53 Na tahuna e huriki a pile bara ri valai ri pesi haluia a tanga ne mua, bara mu bala a maki ni kani, mu rabalaki e huriki e tune mua, e BAKOVI DAGI a Vure ne mua i habi ne mua.
DEU 28:54 Na tahuna iea e huriki a bakovi i uka ma ri kara ni rabalaki e tune ria, ria ranga bara ri rabalaki e huriki e tune ria ri kani. Pali i uka ma ri gi habi ne turane ria, ne girihine ria, ne tune ria ri mahuri ranga balena koma, a vuhuna i uka ranga maki ni kani ge tababana.
DEU 28:56 A ngatavine na tagenga na kurukurune mua, ia tara, a naro bara ri ratea i maea kunana. Ia ge poda a koma na tahuna e huriki a pile ri pesi haluia a tanga, bara i kani kapilohoa turana a kirina e tuna, i uka ma ge habi a kalavana ne girihina o ne huriki e tuna ri mahuri, a vuhuna na maregoa dagi e huriki a pile ri rata na maka tanga.
DEU 28:58 “Mua i uka ma mu ramai kamumu a maka nita na vinara i tabuli vona a puhu iea, i uka ma mu togo a rane BAKOVI DAGI a Vure ne mua ra i polomeli hateka,
DEU 28:59 e BAKOVI DAGI bara i rudu a maka gilanga hale legelege, ri rike ri madoko tata ne mua vakaroro turane huriki a hamone mua.
DEU 28:60 A maka gilanga hale ri madoko ne mua, ri manga a maka gilanga mu matai o Egipto, ra mu mangenge hateka ne ria.
DEU 28:61 E BAKOVI DAGI bara i rudu valai ne mua tabu a maka gilanga hale, a rane ria i uka ma ri tabuli na puhu iea, ri vakalobo liu mua.
DEU 28:62 Hosi mu ala kupo manga a hada na hunu. Pali ngane i uka ma ge kupo ne mua mu gu mahuri, a vuhuna i uka ma mu ramai a nitane BAKOVI DAGI a Vure ne mua.
DEU 28:63 Muga e BAKOVI DAGI i ngaru hateka ge rata mua mu gu bele kupo mu gu tahoka a maki. Pali ngane e BAKOVI DAGI i ngaru hateka ge ratapile, ge vakalobo liu mua vona a malala mu ngaru ni vano ni made vona.
DEU 28:64 “E BAKOVI DAGI bara i vakalipida mua mu made turana a maka kabu lobo na malala, mu kavurike a maka vure ne ria ni kau na kedo, na kai, hosi mua turane huriki a gare ne mua i uka ma mu lohoka vona.
DEU 28:65 Na tahuna mu made turana a maka kabu nga, i uka ma mu gu matavisi a nimade kamumu. Bara mu bala a tanga na tabeke mu taki ta a malala ne mua. E BAKOVI DAGI bara i rata mua mu luhoi viliha, i madihi a hatene mua, bara mu luhoi mu velu pali.
DEU 28:66 Na parava vakaroro bara mu luhoi ni bole a vuranga. Na haro, na rodo bara mu mangenge hateka na matenga.
DEU 28:67 A maka maki mu matai bara ri rata mua mu mangenge hateka. Lakea mu ngarua a parava ge lobo malaviriri. Na maka hatelanga lobo bara mu ta maea, ‘Ge malunga malaviriri a hini, bara i kamumu.’ Na maka malunga lobo bara mu ta maea, ‘Ge hatelanga malaviriri a hini, bara i kamumu.’
DEU 28:68 E BAKOVI DAGI i taki i uka ma mu gu hamule lakea tabu o Egipto. Pali i uka maki, bara i vakarike mua na aga mu puru o Egipto, mu ngaru e huriki a pile ri gi kona mua ge mua a vorakato ne ria, pali bara i uka viri ge kona mua.”
DEU 29:1 A ngava nga e BAKOVI DAGI i taki e Moses vona ge vakalongo e huriki a Israel na robo e Moab. I hudoa a ngava dagi i ratea ne ria na lolo e Sinai.
DEU 29:2 E Moses i gale palupu e huriki a Israel i taki maea ria, “Mu matai pali a maka maki e BAKOVI DAGI i rata virihi ne Parao, a hariki o Egipto, turana e huriki a bolekori vona, a robo vona.
DEU 29:3 Mu matai a maka nitoni dagi, a nivakasiri, a niturutu dagi i rata.
DEU 29:4 Pali e BAKOVI DAGI i uka ma i rata mua mu gu lohoka vona a vuhuna a maka naro nga, i uka ma i rata mua mu gu matapara, i uka ma i rata mua mu gu longokilala a ngava, mu made mavonga i valai i harena mona.
DEU 29:5 E BAKOVI DAGI i ta maea, ‘Na pida i ravulu va a tuli polo mua na tabeke i ngeki, a maka varakia a vahapolo ne mua i uka ma ri matutu.
DEU 29:6 Mu bala a bret, a vain, a naru vagole, pali a matakari kamumu mua, mu gu matakilaka vona iau kunana e BAKOVI DAGI, a Vure ne mua.’
DEU 29:7 “Na tahuna si bele vona a tanga iea, a hariki e Sihon o Hesbon, a hariki e Og o Basan, ru valai ru gu vaubi turane hita. Pali si rangi ria na vabinga,
DEU 29:8 si bolea a malala ne ria, si veru ne huriki a kabu ne Reuben, a kabu ne Gad, a kalavana kabu ne Manase.
DEU 29:9 I mavonga mu ramaia a nita na ngava dagi iea, a maki mu rata bara ri bele kamumu.
DEU 29:10 “Ngane mu pesi na matane BAKOVI DAGI a Vure ne mua. Mua o huriki a matakari, a gare, a bolekori, a bakovi
DEU 29:11 turane huriki e girihine mua e tune mua, e huriki a viri basi ri made koea ri popo a maka kai, ri kiru a naru ne mua,
DEU 29:12 ngane mu made koea mu gu bolea a ngava dagi karaba, e BAKOVI DAGI a Vure ne mua i ratea ne mua. Mu ta muholi mu gu ramaia a ngava dagi iea.
DEU 29:13 Bara i mavonga e BAKOVI DAGI bara i rata mua, mua e huriki a tara vona, ia ge ia a Vure ne mua, i manga a ngava i ta muholi vona ne mua, ne huriki a gare ne mua e Abraham, e Isak, e Iakop.
DEU 29:14 Ra hita si pesi mona koea, a Vure i uka ma i rata virihi kunana hita vona ra ngava dagi iea. I uka, e huriki a hamone hita muri ma ranga i rata virihi ria vona. Hita lobo si gi ta muholi ni ramaia a ngava dagi iea.
DEU 29:16 “Mu luhoi mule mua, mu made navai hosi o Egipto. Mu luhoi mule a maka maki mu matai na tahuna mu polokudu a malala ne huriki a bakovi.
DEU 29:17 Mu matai a maka vure ni kau na kai, na kedo, na gol, na silva. Ra maka vure nga, a maki hale hateka.
DEU 29:18 Mu matadoko, nahea tara bakovi, a ngatavine, a kabu ge ngalahere ne BAKOVI DAGI a Vure ne hita, ge kavurike a maka vure ne huriki na robo basi. Naha ni ratea a naro iea. Ra naro iea i manga a kana lubo i tuvu rike vona a tuvuna, muri bara i ratapile e huriki.
DEU 29:19 “Mua lobo mu matadoko, nahea tara viri i pesi mona koea ge longoa a nita tora a vakalongo mua vona, i luhoi ge kara ni polo lele vona ra ngava dagi a vakalongo, ra naro maea bara i rata mua mu bole a vuranga, turane huriki a viri kamumu, e huriki a viri hale.
DEU 29:20 E BAKOVI DAGI i uka ma ge puga vuroki a naro hale na bakovi maea. A Vure bara i madihi a hatena vona, i manga a kanono i nono i kara hateka. Ra maki hale a puhu iea i taki, bara ri bele vona, i vano i harena na tahuna e BAKOVI DAGI i vakalobo liu ia.
DEU 29:21 E BAKOVI DAGI bara i bole talea na kabu ne Israel a bakovi iea i ratapilea, i muri mai a ngava i taki na puhu na vinara, ne huriki ri longotaro a ngava dagi vona.
DEU 29:22 “Muri e huriki a hamone mua turane huriki na robo basi, ri matai a maka maki hale, a maregoa dagi e BAKOVI DAGI i rata i bele na robo ne mua.
DEU 29:23 A maka hania bara ri hale ri tabuli tavula. A maka maki ni kani bara i dili ne ria a mami a bega, i uka ma ri gi koru. A maka varili ranga i uka ma ri gi gaga vona a malala iea. A robo ne mua bara i manga e Sodoma, e Gomora, e Adma, e Seboim. Ra tanga nga e BAKOVI DAGI i ratapile hosi na tahuna i madihi a hatena ne huriki ri rata a naro hale.
DEU 29:24 E huriki na tabeke lobo na malala bara ri nana viliha ri ta maea, ‘I navai e BAKOVI DAGI i rata maea a robo ne ria? I navai i madihi hateka a hatena?’
DEU 29:25 “E huriki bara ri koli ri ta maea, ‘A vuhuna ri ngalahere vona a ngava dagi e BAKOVI DAGI a Vure i ratea ne huriki a gare ne ria, na tahuna i bole tala ria o Egipto i tuli valai ria koea.’
DEU 29:26 Ri kavurike a maka vure ranga. Ra maka vure i uka ma ri kavurike hosi, e BAKOVI DAGI i hatekakari ria nahea ri gi kavurike a maka maki maea.
DEU 29:27 I mavonga, lakea e BAKOVI DAGI i madihi a hatena, i rata a maka maki hale i tabuli na puhu, i bele na robo ne ria.
DEU 29:28 E BAKOVI DAGI i tahoka a rongova dagi ne ria, lakea i lili tala ria na malala ne ria, i rudu ria lakea na tanga tebi. Mona ranga ri made maea kunana.
DEU 29:29 “A maki kapiloho ne vona kunana e BAKOVI DAGI a Vure ne hita, pali a maki i puka talea ne hita ra vinara, lakea hita lobo turane huriki a hamone hita si gi ramai a nitana vinara vakaroro.”
DEU 30:1 E Moses i ta tabu i ta maea, “Ngane mu lohoka vona a dala i rua mu gu ramai. A dala ni bolena a maki kamumu, a dala ni bolena a maki hale. Mu vulakia a dala mu gu ramaia. Na tahuna a maka maki hale ri bele ne mua, mu made na kurukurune huriki a kabu ranga, na tanga e BAKOVI DAGI a Vure ne mua i rudu lakea mua vona, mu luhoi ra dala nga a vakasiri mua.
DEU 30:2 Na tahuna mua, turane huriki a hamone mua, mu pulo a vilone mua mu ramaia e BAKOVI DAGI na hatene mua, mu luhoi tora a maka vinara a habi ne mua ngane,
DEU 30:3 e BAKOVI DAGI a Vure ne mua bara i dodo mua. Bara i bole mule mua vona a robo i rudu lakea mua vona, i tuli valai mua koea na robo ne mua. A maka maki ne mua bara i rata ri bele kamumu tabu.
DEU 30:4 Naha ni loho paepae vona na tahuna mu made na robo i basi, a vuhuna e BAKOVI DAGI a Vure ne mua bara i vakalipopo mua i taparaki mule valai tabu mua.
DEU 30:5 Bara mu made kamumu vona tabu a malala i made vona e huriki a gare ne mua hosi. Lakea e BAKOVI DAGI a Vure ne mua bara i rata mua mu bele kupo mu tahoka a mahala i kupo, mu rangi e huriki a gare ne mua.
DEU 30:6 Bara i rata mua turane huriki a hamone mua, mu pulo a niluhoi ne mua, mu ramai a ngavana, bara mu ngaru hatekea, mu made vakaroro vona a malala iea.
DEU 30:7 A maka maki hale a taki mua vona, e BAKOVI DAGI bara i rata i bele ne huriki a pile i uka ma ri ngaru mua, ri rata hale mua.
DEU 30:8 Pali mua bara mu longo, mu ramai tabu a maka vinara vona ngane a habi ne mua.
DEU 30:9 E BAKOVI DAGI bara i rata a maka leho ne mua ri bele kamumu. Bara mu tahoka e huriki e tune mua ri ala kupo, a maka bulmakau i kupo, a maka maki ni kani bara ri koru kamumu na hania. E BAKOVI DAGI bara i vivi ne mua, i habi a maka mahala i kupo ne mua, i manga a naro i rata ne huriki a gare ne mua.
DEU 30:10 Pali mua mu ramaia a nitane BAKOVI DAGI a Vure ne mua, turana a maka vinara vona ri tabuli na puhu iea. Mu hamule valai vona, mu ngaru hatekea na hatene mua, na niluhoi ne mua.
DEU 30:11 “A ngava ngane a habia ne mua mu gu lohoka vona mu gu ramai, i uka ma i tora hateka ne mua.
DEU 30:12 Ra ngava iea i uka ma i tabuli polomeli na bubu. Naha ni nana, ‘E rei a viri ge sike ge bole puru valai a maka vinara, mi gi longo mi gi ramai?’
DEU 30:13 Ra vinara nga i uka ma i tabuli na tabekena dari tara, lakea ma mu gu nana, ‘E rei a viri ge lakea lake ge bole valai a maka vinara mi gi longo mi gi ramai?’
DEU 30:14 I uka, ra ngava nga i tabuli tabukoi hateka ne mua, pololilo na hatene mua, na ngutune mua. Ngane mu lohoka vona mu kara ni vakalongo, mu ramai vakaroroa a nita iea.
DEU 30:15 “Ngane a vakasiri mua vona a dala ni made kamumu, a dala bara mu bole a nimadihi a vuranga vona.
DEU 30:16 Mona a taki tora mua mu ngaru hatekea e BAKOVI DAGI a Vure ne mua, mu ramai a maka nitana, mu rata a maka naro i ngaru. Muri bara i rata kamumu mua mu bele kupo, mu made tabaka vona a malala bara mu dili mu bolea ngane.
DEU 30:17 “Pali mua bara mu longotaro a ngavana, mu longototo e huriki ranga ri luke mua mu kavurike a vure ne ria,
DEU 30:18 bara mu velu liu. Mu longo, iau a vakalongo kavakava mua. Mua bara mu longotaro a ngava, bara i ratapile mua, i uka ma mu gu made tabaka vona a malala bara mu bolea na tabeke ne Iordan mule lokovonga.
DEU 30:19 “Mu lohoka vona i tahoka a dala ni mahuri, a dala na matenga. Na dala tara a Vure bara i rata kamumu mua, na dala tara bara mu bole a vuranga vona. Ngane mu vulaki e rei a dala mu gu ramaia. Ga gale a hunu a malala ru gu matai mua, ru gu lohoka vona e rei a dala mu vulakia. Pali iau a ngaru mua mu gu ramaia a dala ni made kamumu, lakea mua turane huriki e tune mua mu gu made tabaka.
DEU 30:20 I maea bara mu ngaru hatekea e BAKOVI DAGI a Vure ne mua, mu longototo a nitana na hatene mua vakaroro. Bara mu rata mavonga, e huriki a hamone mua bara ri made tabaka vona a robo e BAKOVI DAGI i ta muholi vona ge habia ne huriki a gare ne mua hosi e Abraham, e Isak, e Iakop.”
DEU 31:1 Muri e Moses i pagitala i taki e huriki a Israel i ta maea,
DEU 31:2 “Iau a tahoka a pida i 120 i uka ma kara ni matakari mua tabu. E BAKOVI DAGI tara i taki iau, nahea ga tulu poloa a naru e Iordan.
DEU 31:3 E BAKOVI DAGI a Vure ne mua ge muga mua, ge ratapile e huriki ri made vona a tabeke iea, muri bara mu bolea a malala ne ria. E Iosua ge matakari mua i manga a ngava e BAKOVI DAGI i taki.
DEU 31:4 E BAKOVI DAGI ge ratapile e huriki ri made vona a robo iea, i manga a hini i ratapile a robo ne Sihon ne Og, a hariki ne huriki a Amor.
DEU 31:5 E BAKOVI DAGI ge tuhori mua bara mu rangi ria. Mu rata virihi ria vona a maka maki a taki ta mu gu rata virihi ria vona.
DEU 31:6 Mu pesi tora, nahea ge vakulu a tagane mua, mu gu mangenge ne ria. E BAKOVI DAGI a Vure ne mua bara i made turane mua. I uka ma ge lohopile mua o ge matataro mua mu gu made tavula.”
DEU 31:7 Muri e Moses i galea e Iosua i valai vona, na matane huriki a Israel i taki ria, i ta maea, “O pesi tora, naha ni mangenge ge vakulu a tagamu. O muga e huriki, o veru o habi ne ria ra malala e BAKOVI DAGI i ta muholi vona ne huriki a gare ge habia ne mua.
DEU 31:8 E BAKOVI DAGI ge laho turamu ge muga ioe. I uka ma ge pe ioe o ge matataro ioe go bole a vuranga. Naha ni mangenge, naha ni loholege.”
DEU 31:9 E Moses i here a maka vinara i habi ne huriki a prister na kabu ne Levi, ne huriki a gare ne Israel. E huriki a Levi ri matakari a Tava na Ngava Dagi ne BAKOVI DAGI.
DEU 31:10 E Moses i taki ria, i ta maea, “Na Habu na Kape na poloruana pida, ra pida ni vakalobo a maka makoli,
DEU 31:11 na tahuna ri valai ri gi kavurike e BAKOVI DAGI a Vure ne mua na tabeke a Vure i vulakia, mu gi polo ne huriki a Israel a vinara.
DEU 31:12 Mu gale palupu e huriki a bakovi, a ngatavine, a koma, a mosi ri made na vuhu tanga, ri gi vapopo ri gi longo a vinara. Ri gi longo a vinara, ri gi togoa e BAKOVI DAGI a Vure ne mua, ri gi ramai kamumu a maka nitana.
DEU 31:13 Mu rata mavonga, e huriki a hamone mua i uka ma ri longo a vinara ma ri gi longo, ri gi togo vakaroroa e BAKOVI DAGI na tahuna ri made vona a malala na tabeke mule lokovonga ne Iordan.”
DEU 31:14 Muri e BAKOVI DAGI i takia e Moses i ta maea, “I tabukoi ngane bara o mate. O galea e Iosua ge valai na kape nau, ga vakasiria vona a leho a ngaru ia ge ratea.” Lakea e Moses e Iosua ru lakea na Kape na Vaponga.
DEU 31:15 Muri e BAKOVI DAGI i bele i made pololilo na bubu tabukoi polomeli na matana kape.
DEU 31:16 E BAKOVI DAGI i takia e Moses i ta maea, “Tabukoi ngane bara o mate. Muri e huriki bara ri pe iau ri ratapilea ra ngava dagi a taki ria vona. Bara ri ngalahere nau ri kavurike a maka vure na robo iea ra ri ngaru ni bolena.
DEU 31:17 Na tahuna ri rata maea, bara i madihi a hategu ne ria. Bara pe ria a ngalahere ne ria, bara ri bole a vuranga. A maka maki hale ri kupo bara i ratapile ria. Bara i kupo a maka maki hale i bele ne ria. Muri bara ri ta maea, ‘A Vure i uka ma i made turane hita, i bele ne hita a maka maregoa nga.’
DEU 31:18 Bara marikoi liu ni tuhori ria na tahuna iea, a vuhuna ri rata a naro hale ri kavurike a maka vure ranga.
DEU 31:19 “Ngane a ngaru ni tovo ioe vona tara linge, o here purua. O tovo poloa ne huriki a Israel, muri ma ra nitana linge iea bara i taki tala ria.
DEU 31:20 Na tahuna a bole dili ria vona a robo kamumu iea, i manga a hini a ta muholi vona ne huriki a gare ne ria hosi. Bara ri made kamumu ri bole a maka maki ni kani i kupo vona a robo iea. Na tahuna iea bara ri ngalahere nau bara ri kavurike a maka vure taminga. Bara ri ngalahere ri ratapilea a ngava dagi a taki ria vona.
DEU 31:21 Muri a maka maki hale legelege bara i bele ne ria. Na tahuna hale iea, e huriki i uka ma ri gi longokaburungia a linge iea, bara ri kaloloa turane huriki e tune ria. Ra linge iea bara i vakapalala a niluhoi ne ria, i taki tala a naro hale ri rata. Iau i uka ma bole dili ria vona ma a malala iea, pali a lohoka vona pali a niluhoi ne ria.”
DEU 31:22 Na parava iea kunana e Moses i herea a linge iea i tovo e huriki a Israel vona.
DEU 31:23 E BAKOVI DAGI i takia e Iosua tune Nun, i ta maea, “O pesi tora, naha ni luhoi lege lae. Ioe kunana bara o taparaki e huriki a Israel lakea vona a robo a ta muholi vona ga habia ne ria. Iau kunana bara made turamu vakaroro.”
DEU 31:24 Na tahuna e Moses i here puru lobo a maka nitana vinara na puhu,
DEU 31:25 i taki e huriki a prister na kabu ne Levi, ri gi matakaria a Tava na Ngava Dagi ne BAKOVI DAGI.
DEU 31:26 Ri gi bolea a puhu i vona a vinara na Vure, ri gi ru tabukoia na Tava na Ngava Dagi, lakea ge takitala a naro hale ne ria.
DEU 31:27 A lohoka vona e huriki ri tagege ri longotaro a ngava. Na tahuna a tababana, ri longotaro a nitane BAKOVI DAGI, ri putu puru a maka vinara vona, na tahuna a mate pali, a luhoi kilala ra naro na tagenga ne ria bara i bele dagi hateka.
DEU 31:28 O gale palupu e huriki a matakari a bolekori ne huriki a kabu lobo, ri gi valai tabukoi nau. A ngaru ga habia ne ria a nitana linge iea. Ga gale a hunu a malala, ru gu matai iau a ratea ne mua a nita iea.
DEU 31:29 A lohoka vona na tahuna a mate pali, e huriki bara ri mapulo, bara i hale a vilone ria, i uka ma ri gi ramaia a nita a habia ne mua. Bara mu rata a maka naro hale i kupo, bara mu ratea e BAKOVI DAGI i tahate i rudu a maka maki hale ri bele ne mua.”
DEU 31:30 Na tahuna e huriki a Israel ri vapopo, e Moses i tovo ria vona a linge iea:
DEU 32:1 “Ioe a hunu, o longo valai ga ta. Ioe a malala, o talinga valai, o longoa a nita na ngavagu.
DEU 32:2 A nitagu ge rata kamumu mua, ge manga a simuru. I boru valai na hunu i rata a varili i rike. A nitagu ge manga a vala i boru, i rata a maka uve ri koru kamumu.
DEU 32:3 Ngane ga vakalongo a rane BAKOVI DAGI, mu kavurikea a rana a Vure ne hita.
DEU 32:4 I manga a kedo i tabuli vakaroro, i ramai kunana a ngavana i uka ma i tatami, a narona i kamumu i malamala.
DEU 32:5 “Pali mua i uka ma mu mavonga. Mua a bakovi a ngatavine na taminga. mu pulo lae a nita, mu putu puru a nita-muholi. Mua a mari ni rata a naro hale. I mavonga i uka ma ge mua e tuna.
DEU 32:6 Pali e BAKOVI DAGI ia e tamane mua. I vakabele mua lobo, i rata mua, mua a kabu i taku. Pali i navai mu ratea vona a naro maea? Mua a manga, mu uka a niluhoi kamumu.
DEU 32:7 “Mu luhoi mule a maka maki ri bele hosi. Mu nana e tamane mua ri gi vakasiri mua. Mu nana e huriki a gare ne mua ri gi tuverei polo ne mua.
DEU 32:8 Na tahuna a Vure Meli Liu, i veru a malala ne huriki a bakovi, i vakasiri na kabu takutaku a tabeke ge made vona. I ru a harena malala ne ria. E huriki a Israel ranga, e BAKOVI DAGI i ramai a ravulune ria, i vakasiri a harena malala ne ria.
DEU 32:9 Pali i vulakia a kabu ne Iakop ge matakaria.
DEU 32:10 “I matavisi e huriki a Israel ri laho viliha na tabeke i ngeki, na hini i tahoka a vilu dagi. E BAKOVI DAGI i matavisi ria i tuhori ria. I matakari ria, i manga a hini i matakari mule ia.
DEU 32:11 I matakari kamumu e huriki a Israel i uka ma ri bole a vuranga, i manga a loha i vakabebe a maka tuna ri bebe. Na tahuna e tuna i boru, bara i bebe polotano, i bokea na karapana i uka ma ge vurua.
DEU 32:12 E BAKOVI DAGI kunana i vakasiri a dala ne huriki a tara vona. I uka tara vure na tanga tara ge tuhori ria.
DEU 32:13 “I tono ria ri matakari a tabeke na lolo, a maka maki ni kani ri koru kamumu. Ri bole a ame na kedo ri kani. A maka kai a oliv ri koru kamumu na kedokedo.
DEU 32:14 Ri bole na bulmakau, na meme a namona ruru ne ria ri ninu. A maka bulmakau a sipsip ne ria ri gavutuvutu, a maka sipsip gavutuvutu o Basan. A vit ne ria i kamumu hateka. A kanena vain ne ria ri koru kamumu.
DEU 32:15 “E huriki a Iesurun ri kani hateka ri koru dagi, pali ri tagege. A Vure i rata rike ria, na nitora vona i bole mule ria. Pali ri ngalahere vona, ri pea.
DEU 32:16 Ri kavurike a vure ranga. Ri ratea e BAKOVI DAGI i bage, i tahate ria.
DEU 32:17 Ri habi a maka nihabi na taua. Pali ra maka taua nga i uka ma a vure muholi. Ri ramai a maka vure karaba e huriki a gare ne ria hosi uka ma ri lohoka ne ria.
DEU 32:18 Ri lohopile vona a Vure i rata rike ria, i tahoka a nitora lobo.
DEU 32:19 “Na tahuna e BAKOVI DAGI i masia a naro hale ne huriki e tuna, i tahate ria, i ngalahere ne ria.
DEU 32:20 Lakea i ta maea, ‘Re huriki nga ri tagege ri longotaro a nitagu. A maka maregoa ge bele ne ria, i uka ma ga tuhori ria.
DEU 32:21 Ri ramai a maka vure ranga, ra maka maki tavula. Ra narone ria i madihi a hategu ne ria, a tahate ria. Ngane ga bolea tara kabu i uka rana i naro tavula, i naro mangamanga, ga rudu lakea ne huriki a Israel, ge vakamadihi a hatene ria.
DEU 32:22 Na tahuna iea a rongova nau ge gutu manga a kanono, ge gutu parina lobo a maka maki na malala. A rongova nau ge nunu polotano na malala, na murine huriki ri mate pali, ge gutu parina a maka kedo i pesi langa ne ria a lolo.
DEU 32:23 “Ga rata a maka vuranga legelege ge bele ne ria, ge manga a bakovi i tahoka a maka maheto i padi e huriki a pile vona.
DEU 32:24 Ga rata ria ri gi vitolo, ri gi giloa na maka gilanga hale, muri ri gi mate. Ga rudu a maka livoa hateka turana a maki ri kara ri karaka viliha na malala ge kani ria.
DEU 32:25 Na tahuna ri pesi na dala, e huriki a pile bara i rabalaki ria na vabinga. E huriki ri kapiloho na ruma, bara ri mangenge hateka ri mate. E huriki a pile bara ri rabalaki lobo e huriki a riau, a sirula, a koma kiroko, a gare.
DEU 32:26 Muga a luhoi ga vakalobo liu ria, i uka ma ni gi luhoi mule tabu.
DEU 32:27 Pali iau bara rata e huriki a pile bara ri bibi rike ria ri ta maea, ‘Mi ratapile pali e huriki a tara ne BAKOVI DAGI na nitora ne mia. E BAKOVI DAGI ne ria i uka ma i ratea a maki iea ge bele.’”
DEU 32:28 “E huriki a Israel ri uka a niluhoi kamumu, a niluhoi ne ria i kapo.
DEU 32:29 Bara ri tahoka a niluhoi, ri lohoka vona a maki i vakahale ria.
DEU 32:30 I navai a pile i ala taku kunana ge rangi e huriki a Israel ri ala 1,000? I navai a pile i ala rua kunana ru rangi e huriki ri ala 10,000? A vuhuna e BAKOVI DAGI a Vure Tuhaka ne ria i marikoi, i ngalahere ne ria pali.
DEU 32:31 E huriki a pile ri lohoka vona a maka vure ne ria i uka nitora. Pali a Vure ne huriki a Israel i tahoka a nitora i manga a kedo dagi.
DEU 32:32 A narone huriki a pile ne huriki a Israel i mavuru hateka, i manga a narone huriki a Sodoma a Gomora. Ri manga a kai a vain i vakabele a maka kanena i nami magaruru.
DEU 32:33 “A narone ria i manga a vain ni rata turana a luna mata.
DEU 32:34 “E BAKOVI DAGI i tababana ni luhoi a maka maki e huriki a pile ne Israel ri rata.
DEU 32:35 I davea a parava bara i ratapile ria. Bara i koli a maka naro hale ne ria i vakamadihi ria. I uka ma ge tabaka bara ri boru puru ri vurua.”
DEU 32:36 “Na tahuna e BAKOVI DAGI i matai a maka nitora na viri vona i lobo, pali i ranga ne ria ri tababana, bara i dodo e huriki ri rata a leho vona, i korimule ria.
DEU 32:37 Muri e BAKOVI DAGI bara i nana e huriki, “Avai a maka vure ra ri kori mua.
DEU 32:38 Ri kani a vina sipsip a bulmakau ri ninu a nihabi na vain ne mua? Ri gi pesi rike ri gi tuhori mua ri gi korimule mua.
DEU 32:39 “Pali mu lohoka vona iau kunana, iau a Vure Muholi. I uka tara vure ge manga iau. A habi a nimahuri na bakovi. A bole vuroki a nimahuri na bakovi. A ratapile a bakovi, a vakamahuri a bakovi. Iau a ngaru ni ratea tara maki, bara ratea.
DEU 32:40 Muholi hateka iau kunana iau a Vure a made vakaroro. A ratea a nita muholi a ta maea,
DEU 32:41 ga pelekado a naro hale ne huriki, ga halua a bainat nau ge vere hateka. Ga bolea a bainat iea ga koli ga rabalaki e huriki a pile nau, ga ratapile e huriki uka ma ri ngaru iau.
DEU 32:42 Ga padi e huriki ri ngaru ni vaubi turagu, a darane ria ge madoko na kiniperi. E huriki i uka ma ri mate na vabinga, ria ranga ga rabalaki.”
DEU 32:43 Mua o huriki na robo basi, mu vivi turana e huriki a ngate na Vure, a vuhuna a Vure bara i ratapile e huriki ri rabalaki e huriki a ngate vona, i koli a naro hale ne huriki a pile. Pali i ratea a malala ne huriki a tara vona i matapado hateka na matana.
DEU 32:44 E Moses, turane Iosua e tune Nun bakovi, ru vakalongo e huriki a Israel vona a nitana linge iea.
DEU 32:45 E Moses i vakalongo lobo pali a maka nita ne huriki a Israel,
DEU 32:46 lakea i ta tabu i ta maea, “Mu matadoko, mu ramai lobo a maka vinara ngane a habi ne mua. Mu vakalongo e huriki e tune mua, ria ranga ri gi ramai vakaroro a vinara nga.
DEU 32:47 Ra ngava nga i uka ma a maki tavula, ria a vuhuna nimahuri ne mua. Mu ramai kamumua, bara mu made tabaka na malala mu gu bolea na tabeke mule lokovonga ne Iordan.”
DEU 32:48 Na parava iea kunana e BAKOVI DAGI i takia e Moses i ta maea,
DEU 32:49 “O sike na maka lolo ne Abarim na malala ne huriki a Moab. Ra maka lolo nga ri pesi tabukoi na naru e Iordan, a tanga e Ieriko i pesi na tabeke mule lokovonga. O pesi na lolo e Nebo o tuva lokovonga vona a robo e Kenan, ra ngane a ngaru ni habia ne huriki a Israel ge ne vone ria.
DEU 32:50 Ioe bara o mate vona a lolo iea, i manga e turamu e Aron i mate na lolo e Hor, muri bara o vano o made turane huriki a viri vomu ri mate.
DEU 32:51 Marua muru mate, a vuhuna muru longotaro a nitagu, i uka ma muru togoa a ragu i malamala na matane huriki a Israel na tahuna muru made o Meriba, tabukoi o Kades, na tabeke i ngeki o Sin.
DEU 32:52 Ngane bara o tuva lokovonga kunana vona a malala iea. Pali i uka ma go lokovonga, go dili vona ra malala ga habia ne huriki a Israel.”
DEU 33:1 E Moses ra bakovi i vakalongo a nitana Vure, a parava vona ni mate i valai tabukoi, lakea i gamai e huriki a Israel,
DEU 33:2 i taki ria i ta maea, “E BAKOVI DAGI i made na lolo e Sinai, i valai i bele manga a haro na robo e Idom. A parana na lolo e Paran i parai e huriki a tara vona. A agelo i ravulu e rangale (1,000) ri made turana. A kanono dagi i hube na limana a kanena.
DEU 33:3 A Vure i ngaru hateka e huriki a tara vona, re huriki ri malamala i matakari ria. Ri turume ri lolu puru na matana, ri ramai a maka vinara vona.
DEU 33:4 Iau e Moses a habi ne mua a maka vinara nga mu gu ramai. Ra vinara nga a nita muholi hateka ne hita e huriki a hamone Iakop.
DEU 33:5 E BAKOVI DAGI ia a hariki ne Iesurun. Na tahuna a maka kabu ne Israel turane huriki a gare ne ria ri vapopo, i matakari ria.”
DEU 33:6 E Moses i gamai a kabu ne Reuben i ta maea, “A kabu ne Reuben i kiroko, pali ra kabu iea i uka ma ge lobo.”
DEU 33:7 I taki a kabu ne Iuda i ta maea, “O BAKOVI DAGI o luhoi e huriki a Iuda ri nana ioe go tuhori ria. O bole valai ria ri gi dili turane huriki a tara ranga. O tuhori ria, ri vaubi ne huriki a pile.”
DEU 33:8 I taki a kabu ne Levi i ta maea, “BAKOVI DAGI, o habi na kabu ne Levi, re huriki a vora kamumu vomu, a kedo e Tumim e Urim, ra kedo nga ru vakasiri a ningaru vomu ne ria. O toni ria na tanga e Masa, na naru e Meriba.
DEU 33:9 Ri tora hateka ni ramai a nitamu a ngava dagi vomu. I uka ma ri ramai a ningaru ne tamane ria, ne turane ria, ne tune ria. Ri ramai kunana a ningaru vomu.
DEU 33:10 Ri gi tovo e huriki a Israel ri gi ramai a vinara vomu. Ri gi rungani a havu mangisipa na matamu, ri gi rata a nihabi gutu-vuro na dede vomu.
DEU 33:11 BAKOVI DAGI, o kori e huriki na kabu ne Levi ri gi pesi tora, bara o vivi vona a leho ri rata. O pahadanu e huriki a pile ne ria i uka ma ri gi pesi rike tabu.”
DEU 33:12 I taki a kabu ne Bensamin i ta maea, “BAKOVI DAGI o gamai e huriki na kabu ne Bensamin o made tabukoi ne ria, o matakari kamumu ria na parava vakaroro.”
DEU 33:13 I taki a kabu ne Iosep i ta maea, “BAKOVI DAGI, o habi a simuru na hunu, a naru na malala na kabu ne Iosep, ge vakabele a naru ge kupo na tabeke vona.
DEU 33:14 Ge ratea a haro i para langa na hania ne ria, ge rata a maka uve ri gi koru kamumu na maka keva lobo.
DEU 33:15 A maka lolo hosi ge kamumu a malala ne ria ni gi rata vonga a maka hania, ge koru kamumu vona a maka uve.
DEU 33:16 A maki ni kani kamumu ge vonu vona a malala ne Iosep. E BAKOVI DAGI i made pololilo na kai kiroko i nono, i taki iau ge rata kamumu hatekea a kabu iea, a vuhuna e Iosep i tahoka a rana ne huriki e turana.
DEU 33:17 A hamone Iosep ri gao hateka manga a tabua na bulmakau a toga i tahoka a pelengana. A kabu ne Manase ri ala kupo i manga a pelengana tara, a kabu ne Epraim ri ala kupo hateka i manga a pelengana tara. Na pelengana nga i rua i padi a kabu tebi, i kope lae ria ri laho viliha ri harena na nilobona malala.”
DEU 33:18 I taki a kabu ne Sebulun i ta maea, “Mua a kabu ne Sebulun ra leho ni vakuloi a maki turana a robo basi ge nunu kamumu. A leho na kabu ne Isikar ni vakuloi a maki ne huriki a tahotanga, ia tara ge nunu kamumu.
DEU 33:19 Ra kabu nga ru gu gale ranga kabu ri gi valai na lolo ne rua, ri gi rata a nihabi malamala. Ru gu rata a leho ni vakuloi a maki na mahala ru bole na dari na lavu. Bara ru bole hateka a moni vona a maka leho nga.”
DEU 33:20 I taki a kabu ne Gad i ta maea, “A Vure i ratea a malala na kabu ne Gad i bele dagi, i mavonga mua lobo mu kavurikea a rana. A kabu ne Gad i manga a laion i dava i po a kanimatana ge rabalaki a kania vona, ge kinirape tala a vahana a kulina gina.
DEU 33:21 Na tahuna e huriki a matakari ne Isarel ri vapopo ni verua a malala, a kabu ne Gad ri vulakia tara tabekena malala i bolea. Ra tabekena malala a kabu ne Gad i bolea i kamumu hateka, i kara e huriki a matakari kunana ri gi bolea. A kabu ne Gad i ramai malamala a nita na vinara ne BAKOVI DAGI.”
DEU 33:22 I taki a kabu ne Dan i ta maea, “A kabu ne Dan i manga a tuna laion, i pe a robo e Basan i page page valai.”
DEU 33:23 I taki a kabu ne Naptali i ta maea, “BAKOVI DAGI, o habi a maki kamumu ne huriki a Naptali. A Darilomu e Galili i tabuli na malala ne ria, a harena malala i polotaroa a naru i puru lokovonga popote.”
DEU 33:24 I taki a kabu ne Aser i ta maea, “BAKOVI DAGI, o rata kamumua a kabu ne Aser. A maka kabu lobo ne Israel ri ngarua. A maka kai a oliv ge kupo na malala vona ge bole a naruna ge kupo.
DEU 33:25 A nure na tanga ne ria ge tahoka a logo dagi ni gi rata na aen. Ri gi made kamumu vakaroro, i uka ma ri gi mangenge.
DEU 33:26 “Mua o huriki a Israel i uka tara vure ge manga a Vure ne Iesurun. I tahoka a nitora dagi i made pololilo na nipara dagi, i laho puru rike na bubu ge tuhori hita.
DEU 33:27 A Vure i made vakaroro, i nugutata hita vakaroro na limana i uka ma i pe hita. Na tahuna mu vano mu bolea a malala ne mua, bara i lili tala e huriki a pile ne mua, i taki mua bara mu rabalaki lobo ria.
DEU 33:28 Muri a kabu ne Iakop ge made kamumu, e huriki a pile i uka ma ri gi valai ri gi vaubi turane ria. Ra tabeke iea a simuru i boru i vakamea a malala i koru kamumu vona a maka vit a vain.
DEU 33:29 Mua o huriki a Israel, mu vivi hateka, e BAKOVI DAGI i uka ma i tuhoria tara kabu, ge manga a hini i tuhori mua. E BAKOVI DAGI i manga a galeu ne mua i manga a bainat ne mua. I tagari mua na tahuna na vabinga, i rata mua mu rangi ria. E huriki a pile ne mua bara ri tangi valai ne mua ri taki mu gu dodo ria. Pali mua bara mu pahadanu ria mu ratapile ria.”
DEU 34:1 E Moses i pea a bila ne Moab i sike na lolo e Nebo, na mapane Pisga na tabeke na nirikena haro na tanga e Ieriko. E Moses i pesi vona a hini nga, lakea e BAKOVI DAGI i vakasiri loboa vona a malala ge habia ne huriki a Israel. E BAKOVI DAGI i vakasiria vona a tabekena malala ne huriki a Gilead, i lakea i harena na tanga e Dan na tabeke mule sike.
DEU 34:2 I vakasiria vona a malala ne huriki a Naptali, ne huriki a Epraim, ne huriki a Manase, a malala ne huriki a kabu ne Iuda, i vano i harena na Dari na Kurukuruna Malala na nirolona haro.
DEU 34:3 I vakasiri e Moses vona a malala na tabeke mule puru ne Iuda, a bila i vakatubu o Ieriko, i vano i harena o Soar na tabeke mule puru. Ra tanga e Ieriko i tahoka a maka kai a det i kupo.
DEU 34:4 Muri e BAKOVI DAGI i takia e Moses i ta maea, “A ta muholi ne Abraham, ne Isak, ne Iakop ta ga habi ne huriki a hamone ria ra malala iea. A vakasiria vomu a malala, pali i uka ma go dili vona.”
DEU 34:5 Lakea e Moses, a vora ne BAKOVI DAGI, i mate na malala ne huriki a Moab, i manga a ngava e BAKOVI DAGI i takia vona.
DEU 34:6 E BAKOVI DAGI i tanua a podane Moses na maloku ne Moab, na tabeke mule lokovonga na tanga e Bet-Peor. I valai i harena mona, i uka tara viri ge lohoka vona a lovo ne Moses.
DEU 34:7 E Moses i tahoka a pida i 120 i mate. I tababana ni gao, a matana i kamumu kunana.
DEU 34:8 Na tahuna e Moses i mate pali, e huriki a Israel ri made na maloku ne Moab, ri taringia i harena na parava i ravulu tolu.
DEU 34:9 Muri ne Moses i mate, a Vure i habi a lohokanga kamumu ne Iosua e tune Nun, a vuhuna e Moses i ru langa a limana vona. E huriki ri longototoa a nitane Iosua ri ramai a maka vinara e BAKOVI DAGI i vakuku e Moses vona.
DEU 34:10 I valai i harena mona i uka tara propet o Israel ge manga e Moses. E BAKOVI DAGI i ta turane Moses i manga a bakovi i ta turana e turana.
DEU 34:11 E BAKOVI DAGI i rudu e Moses ge rata a maka nivakasiri dagi legelege ne vona ni ratapile e Parao, a hariki o Egipto, turana e huriki a bolekori vona, a robo vona lobo. E huriki a propet ranga, i uka ma ri kara ni ratana a maka nivakasiri i manga ne Moses i rata.
DEU 34:12 I uka ma ri kara ni rata a maka maki dagi ri gi vakamangenge e huriki a bakovi a ngatavine, i manga a hini e Moses i rata na matane huriki a Israel.
JOS 1:1 Muri ne Moses a vora ne BAKOVI DAGI i mate, e BAKOVI DAGI i takia e Iosua, e tune Nun, a bolekori ne Moses i ta maea,
JOS 1:2 “A vora nau e Moses i mate pali, ngane mu kisi puru a maka maki ne mua. Ioe turane huriki a Israel mu tulu poloa a naru e Iordan, mu vano, mu bele vona a malala ga habia ne mua.
JOS 1:3 A ta muholi vona pali ne Moses, a malala mu laho vona ga habia ne mua.
JOS 1:4 A nagi na malala mu gu bolea ge tubu mule puru na tabeke i ngeki, ge sike lakea na lolo e Lebanon. Muri ge kaogo vonga ge lakea mai a nirikena haro na naru dagi e Iupretis. A malala ne huriki a Hiti, ia tara mu bolea. Ge kaogo vonga ge lakea mai a nirolona haro, ge harena na Dari na Kurukuruna Malala.
JOS 1:5 O Iosua na tahuna o matakari e huriki a Israel, i uka tara kabu ge rangi mua na vabinga. Iau ga made turamu ge manga a hini a made turane Moses. Iau i uka ma ga pe ioe.
JOS 1:6 “O pesi tora, naha ni mangenge. O bole e huriki nga, o taparaki ria lakea na malala a ta muholi vona ne huriki a gare ne mua ga habia ne mua.
JOS 1:7 O pesi tora kunana, naha ni mangenge, naha ni loho paepae. O matakari, o ramai kamumu a maka vinara e Moses a vora nau i habi vomu. Naha ni longotaro tara. Ioe bara o ramai kamumu a maka vinara nga, e rei a tabeke o lakea vona, i uka ma go bole a vuranga, bara o made kamumu kunana.
JOS 1:8 Naha ni lohopile vona a puhu na vinara. Na haro na rodo o tovo kamumu a maka vinara. O matai kamumu, o ramai muholi a maka nita ri tabuli na vinara. Ioe bara o rata mavonga, a maka maki ranga o rata bara ri bele kamumu.
JOS 1:9 A taki ioe pali, o pesi tora, naha ni mangenge, naha ni loho paepae. A vuhuna iau e BAKOVI DAGI a Vure vomu, ga laho turamu na tabeke lobo.”
JOS 1:10 Lakea e Iosua i taki e huriki a matakari ne Israel i ta maea,
JOS 1:11 “Mu dili na mada, mu taki e huriki ri gi kisi puru a maka maki ni kani, a galesi ne ria. Ge lobo a parava ge tolu, si gi tulu poloa a naru e Iordan, si gi bolea ra malala e BAKOVI DAGI a Vure ne hita ge habi ne hita, ga malala ne hita liu.”
JOS 1:12 Lakea e Iosua i taki a kabu ne Reuben, ne Gad, a kalavana kabu ne Manase i ta maea,
JOS 1:13 “Mu luhoi kamumu a maka ngava e Moses i taki mua vona pali, i ta maea, ‘E BAKOVI DAGI a Vure ne mua ge habia ne mua a malala iea, mu gu made vona.’
JOS 1:14 Ngane mu bolea pali a tabekena malala ne mua i manga a ngava e Moses i taki. E huriki a ngatavine, a koma, a maka sipsip a bulmakau ne mua ri gi made koea na malala e Moses i habia ne mua, na tabeke mule valai na naru e Iordan. Pali e huriki a nugumaheto ne mua ri gi muga, ri gi tulu poloa a naru, ri gi tagari, ri gi tuhori na vabinga e huriki a viri mua,
JOS 1:15 ge harena na tahuna e BAKOVI DAGI a Vure ne hita, ge habia ne hita a malala, ge made kamumu vona e huriki a viri mua. Muri mu hamule valai na malala e Moses i habi ne mua pali, na tabeke koea ne Iordan na nirikena haro.”
JOS 1:16 E huriki a bakovi ri longototo a nitane Iosua ri koli, ri ta maea, “I kamumu mi gi ramai a ngava o taki. I vai a hini o ngaru go rudu lakea mia vona, mi gi lokovonga kunana.
JOS 1:17 Mi gi ramai a ngavamu ge manga a hini mi ramai a nitane Moses. E BAKOVI DAGI, a Vure vomu, ge made turamu ge manga a hini i made turane Moses.
JOS 1:18 A viri i tagege, i longotaro a ngavamu na a ra maki o vakuku ria vona ri gi rata, pali i uka ma ri rata, bara ni rabalaki. Pali ioe o pesi tora, naha ni mangenge.”
JOS 2:1 E huriki a Israel ri tababana ni made o Sitim, lakea e Iosua i rudu a bakovi ala rua ru vano, ru kasisia a robo e Kenan. I taki rua, i ta maea, “Muru vano, muru matai kapilohoa a tanga dagi e Ieriko turana a malala i tabuli tabukoi vona.” Muri a bakovi nga ru vano ru bele vona tara ruma na ngatavine a ngoi, a rana e Rahap, ru made turana.
JOS 2:2 Lakea ranga viri ri takia a hariki o Ieriko, ri ta maea, “O matadoko! Mona na rodo, i ranga Israel ri valai ta ri gi kasisia a robo vomu.”
JOS 2:3 Na tahuna a hariki i longoa a nita iea, i rudu ranga viri ri lakea ne Rahap, ri ta maea, “O tuli tala valai a viri ri made na ruma vomu, ri valai ni kasisia a robo iea.”
JOS 2:4 Pali e Rahap i ruhulolo a bakovi nga ala rua, lakea i taki a bakovi i rudu valai a hariki i ta maea, “I muholi, i ranga viri ri valai na ruma nau. Pali i uka ma a lohoka vona i vai a hini ri valai vona.
JOS 2:5 Na malunga, tabukoi na tahuna ni tukari a hinebi dagi na tanga dagi, ri pe a hini nga. I uka ma a lohoka vona a hini ri lakea vona. Pali mua bara mu nunu muri ne ria, bara mu bole ria.”
JOS 2:6 E Rahap i rata a ngava nga i tami ria, pali i tuli sike na mapana ruma a bakovi o Israel nga, i ruhulolo rua polotano na galesi na vit i ru kadolu vonga.
JOS 2:7 E huriki a bakovi na hariki ri longo a nitane Rahap, ri pea a tanga dagi. Muri e huriki a tagari ri tukaria a hinebi dagi. E huriki a tara na hariki ri vano ri gi matakana ra bakovi o Israel nga ala rua ru valai ni kasisi. Ri matakana rua, ri vano ri harena na gagana naru e Iordan.
JOS 2:8 A bakovi o Israel nga i uka ma ru mahita ma, lakea e Rahap i rike na ruma
JOS 2:9 i taki rua i ta maea, “A lohoka vona e BAKOVI DAGI i habia pali ne mua a Israel a robo iea. A taki muholi marua, mia mi mangenge hateka, i vakulu a tagane mia ne mua,
JOS 2:10 a vuhuna e huriki ri tuverei polo ne mia vona e BAKOVI DAGI i ratea a Dari Vururu i mara na tahuna mu pea e Egipto. Mi longo tabua pali, mua mu rabalaki e Sihon e Og a hariki o Amor, turana e huriki a nugumaheto ne rua, na tabeke mule lokovonga ne Iordan.
JOS 2:11 Mi longo a ngava mi mangenge hateka ne mua. Ngane mia lobo mi uka a nitora. E BAKOVI DAGI a Vure ne mua, ia a Vure na hunu a malala.
JOS 2:12 Ngane muru ta muholi na matane BAKOVI DAGI, muru matakari kamumu e huriki a kabu nau, ge manga a hini a matakari kamumu marua. Muru habia nau tara maki ga kilakila, ge vakatorea a nita muholi ne marua.
JOS 2:13 Mua o huriki a Israel, naha ni rabalaki e tata e nana, e huriki e kurabagu e turagu ngatavine, turane huriki a kabu ne ria. Naha ni matataro e huriki a bakovi ri gi rabalaki mia.”
JOS 2:14 Lakea a bakovi nga ru koli a ngavana, ru ta maea, “Miri ta muholi na matamu. Maria bara miri ratapilea a nita muholi iea, e BAKOVI DAGI bara i ratapile maria. Ioe i uka ma go taki e huriki a Ieriko vona na maka maki miri rata, maria i uka ma miri gi tatami ni tuhori ioe, na tahuna e BAKOVI DAGI i habia ne mia a robo iea.”
JOS 2:15 A ruma e Rahap i doga na nure na tanga dagi. I ranga a turutu ri tahoka a nimatatala polomeli na nure na tanga dagi. E Rahap i bolea tara mota i vakatalepe purua, ru gu roe puru vona a bakovi nga.
JOS 2:16 Lakea i taki rua i ta maea, “Muru vano, muru kapiloho na dahana lolo na parava ge tolu, ma ge matai marua e huriki a tara na hariki. Na tahuna ri hamule valai pali o Ieriko, muru vano muru hamule lakea ne huriki a viri ne marua.”
JOS 2:17 A bakovi nga ru takia e Rahap ru ta maea, “Ioe bara o rata lobo a maki miri taki ioe vona, maria i uka ma miri gi tatami vona a nita muholi miri ratea pali vomu.
JOS 2:18 Ngane o longo kamumu! Na tahuna mi gi bele koea, o koloa a mota vururu na nimatatala, na hini miri roe puru vona. O taki e tamamu e kinamu, e huriki e turamu turana e huriki a kabu ne ria, ri gi valai ri gi vapopo na ruma vomu.
JOS 2:19 I tara ne ria ge ha taro a ruma, ge laho viliha ni gi rabalaki, a maregoa vona, i uka ma ga maregoa ne maria. Pali i tara ne mua ge bole a vuranga pololilo na ruma, a maregoa maria.
JOS 2:20 Pali o matadoko! Ioe bara o taki e huriki a Ieriko na maki miri rata, a nita muholi ne maria bara i lobo.”
JOS 2:21 E Rahap i koli i ta maea, “A ngaru a nitane marua.” I ta mavonga, lakea i rudu rua ru vano. Muri i kolotatea na nimatatala vona a mota vururu.
JOS 2:22 Ra bakovi nga ru vano ru bele na lolo ru kapiloho vonga. E huriki a tara na hariki ri matakana rua na maka tanga na parava i tolu. Pali i uka ma ri matavisi rua, lakea ri hamule lakea o Ieriko.
JOS 2:23 Muri ra bakovi nga ru pe a lolo, ru puru valai, ru tulu poloa a naru e Iordan, ru vano ru bele ne Iosua e tune Nun, ru taki vona a maki lobo ru rata.
JOS 2:24 Ru takia e Iosua ru ta maea, “Muholi hateka, e BAKOVI DAGI i habi ne hita pali a robo iea. E huriki a tahotanga ri mangenge hateka ne hita.”
JOS 3:1 E Iosua i hadongo na hatelanga pokopoko turane huriki a Israel, ri pea a mada na tanga e Sitim, ri vano ri bele na naru e Iordan. Ri rata a mada na gagana, i uka ma ri tulu poloa.
JOS 3:2 Muri na parava i tolu e huriki a matakari ri laho pololilo na mada,
JOS 3:3 ri taki e huriki ri ta maea, “Na tahuna mu matai e huriki a prister na kabu ne Levi ri gi malaga, ri gi kalohoa a Tava na Ngava Dagi ne BAKOVI DAGI a Vure ne hita, mu malaga, mu ramai ria.
JOS 3:4 I mavonga bara mu lohoka vona a dala mu gu ramaia, a vuhuna i uka ma mu lakea ma vona a hini nga. Pali naha ni laho tabukoi na Tava na Ngava Dagi. Mu marava basi vona ge harena na kilomita ge taku.”
JOS 3:5 E Iosua i taki e huriki i ta maea, “Mu ramaia a naro ni matapado na matane BAKOVI DAGI, a vuhuna kuduvi e BAKOVI DAGI ge rata a maka nivakasiri na kurukurune mua.”
JOS 3:6 Muri i taki e huriki a prister, “Mu bolea a Tava na Ngava Dagi, mu laho muga ne huriki.” E huriki a prister ri ramai a ngava i taki e Iosua.
JOS 3:7 E BAKOVI DAGI i takia e Iosua i ta maea, “Ngane ga tubu ni rata e huriki a Israel ri gi kavurike a ramu, ri gi lohoka vona iau a made turamu, i manga a hini a laho turane Moses.
JOS 3:8 O taki e huriki a prister ri gi kaloho maea a Tava na Ngava Dagi, ‘Na tahuna mu bele na naru e Iordan, mu puru na naru, mu pesi pololilo vonga mu dava.’”
JOS 3:9 E BAKOVI DAGI i ta lobo, lakea e Iosua i taki e huriki a Israel i ta maea, “Mu valai tabukoi, mu longoa a nitane BAKOVI DAGI a Vure ne mua.
JOS 3:10 Ngane bara mu lohoka vona e BAKOVI DAGI a Vure ne hita i tahoka a nimahuri, i made turane hita, ge lili tala e huriki a Kenan, a Hiti, a Hivi, a Peres, a Girgas, a Amor, a Iebus. Bara mu matakilaka hateka vona a nitora vona
JOS 3:11 na tahuna a Tava na Ngava Dagi ne BAKOVI DAGI na malala lobo ge muga mua, mu tulu poloa a naru e Iordan.
JOS 3:12 Mu vulaki takutaku na maka kabu ne Israel a bakovi ge ravulu a polona i rua.
JOS 3:13 E huriki a prister ri gi kalohoa a Tava na Ngava Dagi ne BAKOVI DAGI na tabeke lobo na malala. Na tahuna ri tovo puru a vahane ria na naru, a naru bara i kere a hini ri laho polo vona, a vuhuna ra naru i tua valai na matana, bara i roga mule, i lolo.”
JOS 3:14 Muri e huriki a Israel ri pe a mada, ri vano ri tulu poloa a naru e Iordan. E huriki a prister ri kalohoa a Tava na Ngava Dagi ri muga.
JOS 3:15 Ra tahuna iea a tahuna ni mirio na hania, a naru e Iordan i tua hateka. Na tahuna e huriki a prister ra ri kaloho a tava ri bele vonga, ri tovo puru a vahane ria na gagana naru,
JOS 3:16 lakea a naru i roga, i uka ma i tua tabu. Ra naru i tua valai meli i tabuli manga a lolo i vano i harena na tanga e Adam, ra tanga i pesi tabukoi na tanga e Saretan. A naru i tua lakea na Dari Mate i kere liu. E huriki ri laho polo ri bele na tabeke tara tabukoi o Ieriko.
JOS 3:17 E huriki a Israel ri laho polo na hini kere. E huriki a prister ri kalohoa a Tava na Ngava Dagi ne BAKOVI DAGI, ri pesi mavonga na hini kere na kurukuruna a naru e Iordan, i harena ne huriki ri laho polo lobo.
JOS 4:1 Na tahuna e huriki ri laho polo lobo vona a naru e Iordan, e BAKOVI DAGI i takia e Iosua,
JOS 4:2 “O vulaki a bakovi ge ala ravulu a polona i rua. O bole tala ria na kabu takutaku ne Israel.
JOS 4:3 O taki ria ri gi bole a kedo ge ravulu a polona i rua na kurukuruna naru e Iordan, na hini i pesi vona e huriki a prister. Ri gi bole a kedo nga ri gi bole lakea na hini mu rata a mada vona na rodo.”
JOS 4:4 Lakea e Iosua i vulaki a bakovi ala ravulu a polona i rua na kabu takutaku ne Israel,
JOS 4:5 i taki ria, i ta maea, “Mu puru na naru e Iordan, mu ule mule e huriki a prister ri kaloho a Tava na Ngava Dagi ne BAKOVI DAGI a Vure ne mua. A bakovi ge taku ge bolea a kedo ge taku. Ra kedo nga i ravulu a polona i rua i muri mai a kabu ne Israel. Mu bole mu kaloho valai.
JOS 4:6 A maka kedo nga ge a kilakila ne vona ni vakalohoka e huriki na maka maki dagi e BAKOVI DAGI i rata. Muri ma na tahuna e huriki a hamone mua ri gi nana, ‘I navai a kedo nga ri tabuli maea?’
JOS 4:7 Mu koli mu ta maea, ‘A naru e Iordan i mara, ni kaloho polo a Tava na Ngava Dagi ne BAKOVI DAGI. I mavonga ra kedo nga ne vona ni vakalohoka vakaroro e huriki a Israel vona.’”
JOS 4:8 Lakea e huriki a bakovi ri rata manga a ngava e Iosua i taki. Ri puru na kurukuruna naru e Iordan, ri bole a kedo i ravulu a polona i rua, i ramai a kabu ne ria a Israel i ravulu a polona i rua, ri kaloho valai na mada, ri ru kadolu.
JOS 4:9 E Iosua i bole tabu a kedo i ravulu a polona i rua na kurukuruna e Iordan, i vakapesi na hini ri pesi vona e huriki a prister ri kaloho a Tava na Ngava Dagi. A maka kedo nga ri tababana mona.
JOS 4:10 E huriki a prister ri pesi na kuru­kurune Iordan i harena na tahuna e Iosua i rata lobo a maka maki e BAKOVI DAGI i vakuku ia vona, i ramaia a ngava ne Moses. E huriki ri malaviriri kunana ri bele na gagana tara.
JOS 4:11 Na tahuna ri bele pali, e huriki a prister ri kalohoa a Tava na Ngava Dagi, ri muri, ri bele taho ria, ri vano ri pesi muga tabu ne huriki.
JOS 4:12 E huriki a tara ne Reuben, ne Gad, a kalavana a kabu ne Manase ri bole a maka lebo na vabinga, ri muga e huriki, i manga a ngava e Moses i taki.
JOS 4:13 E huriki ri lakea na vabinga ri ala rangale ravulu va (40,000). Na matane BAKOVI DAGI ri vano ri bele na bila tabukoi na tanga dagi e Ieriko.
JOS 4:14 E huriki a Israel ri matai a maka maki e BAKOVI DAGI i rata vona a parava iea, ri togoa e Iosua, i manga hosi ri togoa e Moses.
JOS 4:15 E BAKOVI DAGI i takia e Iosua
JOS 4:16 ge taki e huriki a prister ri gi kalohoa a Tava na Ngava Dagi, ri gi pagitala na naru e Iordan, ri gi sike valai.
JOS 4:17 Lakea e Iosua i taki ria. “Mu pea a naru e Iordan mu sike valai.”
JOS 4:18 Na tahuna e huriki a prister ri kaloho a Tava na Ngava Dagi ne BAKOVI DAGI ri bele pali na gagana tara, a naru e Iordan i tuka, i tua hateka tabu.
JOS 4:19 E huriki a Israel ri laho poloa a naru e Iordan na ravuluna parava na mugana keva, ri rata a mada na tanga e Gilgal, tabukoi o Ieriko na tabeke na nirikena haro.
JOS 4:20 E Iosua i vakapesi o Gilgal a maka kedo i bole e huriki a bakovi na naru e Iordan.
JOS 4:21 Lakea e Iosua i taki e huriki a Israel i ta maea, “Muri ma e huriki a hamone mua ri gi nana e huriki e tamane ria, ‘I navai a maka kedo ni ru palupu maea?’
JOS 4:22 E huriki e tamane ria ri gi koli ri gi ta maea, ‘Ra kedo nga a kilakilane huriki a Israel ri laho polo na naru e Iordan na tahuna i mara.’
JOS 4:23 A ru a kedo nga, a vuhuna e BAKOVI DAGI a Vure ne hita i ratea a naru e Iordan i mara, lakea si valai si bele koea, i manga a hini i ratea a Dari Vururu i mara, si laho polo vona si valai.
JOS 4:24 E BAKOVI DAGI a Vure ne hita i ratea a maki iea, ge vakasiri e huriki na tabeke lobo na malala ri gi lohoka vona a nitora vona, lakea si gi kavurike vakaroroa.”
JOS 5:1 E huriki a hariki o Amor ri made na tabeke na nirolona haro ne Iordan, e huriki a hariki o Kenan ri made na harena a Dari na Kurukuruna Malala, ri longo a velengane BAKOVI DAGI i ratea a naru e Iordan i mara i laho polo vona e huriki a Israel. E huriki a hariki nga, ri longo e huriki a Israel ri valai tabukoi, ri mangenge hateka, i vakulu a tagane ria.
JOS 5:2 Muri e BAKOVI DAGI i takia e Iosua i ta maea, “O tubi a voko, o pala tabu a kuline huriki a bakovi o Israel, ge manga e huriki a gare ne mua ri rata hosi.
JOS 5:3 Lakea e Iosua i tubi a voko, i pala a kuline huriki na kupona tara. Ra kupona iea ni gale ‘A Kupona Ni Vapala a Kuli’.
JOS 5:4 A vuhuna a naro e Iosua i ratea i maea. E huriki a bakovi ri kara ni vaubi na tahuna ri pe e Egipto ri mate lobo pali na dala na tabeke i ngeki.
JOS 5:5 Na tahuna e huriki a Israel ri pea e Egipto ni pala a kuline huriki a bakovi, pali i uka ma ni pala a kuline huriki a bakovi ni poda na tabeke i ngeki.
JOS 5:6 E huriki a Israel ri laho viliha na tabeke i ngeki na pida i ravulu va. Na tahuna iea e huriki a bakovi ri kara ni vaubi na tahuna ri pea e Egipto ri mate lobo, a vuhuna ri longotaro a nitane BAKOVI DAGI. I muholi ngi, e BAKOVI DAGI i ta muholi ne huriki a gare, ge habia ne huriki a Israel a malala i vona a maki ni kani. Pali i taki ria tabu ne huriki ri longotaro a ngava, i uka ma ri gi masia a malala iea.
JOS 5:7 Na tahuna ri laho viliha na tabeke i ngeki, i uka ma ni pala a kuline huriki a koma bakovi ri gi bole a murine ria, lakea e Iosua i ratea ne ria a naro iea.
JOS 5:8 Ni pala a kuline huriki a bakovi lobo, muri ri made vonga na mada ge kere taro a harena voko ne ria.
JOS 5:9 Muri e BAKOVI DAGI i takia e Iosua i ta maea, “Hosi mu leho manga a vorakato o Egipto mu maruhu hateka. Ngane a bole vurokia ne mua a nimaruhu iea.” Lakea ni gale liu a tanga iea e Gilgal.
JOS 5:10 E huriki a Israel ri made na mada ne ria, na bila tabukoi o Ieriko. Na rodo na parava ravulu a polona i va, na mugana keva ri ratea a Habu na Nipagepolo.
JOS 5:11 Na parava muri e huriki a Israel ri kani a bret i uka is, turana a vit ni gutu na kanono. Ra maki ni kani nga ni mirio na malala e Kenan. Ri gutu a barli, ri rata a bret i uka is, ri kani.
JOS 5:12 Na parava muri a mana i uka ma i boru valai tabu na malala. E huriki a Israel ri kani kunana a maka maki ri bole o Kenan.
JOS 5:13 Na parava tara e Iosua i made tabukoi o Ieriko i masia tara bakovi i pepesi, i nugua a bainat. E Iosua i lokovonga vona i nanea, “Ioe a nugumaheto ne mia o ioe a pile?”
JOS 5:14 A bakovi iea i koli i ta maea, “I uka. Iau a ubu na tara ne BAKOVI DAGI. Ngane a valai.” Lakea e Iosua i lolu puru i padoi a malala a gina, i kavurikea a bakovi iea i ta maea, “Iau a vora vomu. A ra o ngarua ga ratea?”
JOS 5:15 A ubu na tara ne BAKOVI DAGI i takia e Iosua i ta maea, “O kali tala a vahapolo vomu. Ra malala o pepesi vona a tabea.” Lakea e Iosua i kali tala a vahapolo vona.
JOS 6:1 E huriki a Ieriko ri longo e huriki a Israel ri valai tabukoi, lakea ri hebi torea a nihebi na nure dagi, nahea a viri tara ge laho virivarola vona a hini ngi.
JOS 6:2 Pali e BAKOVI DAGI i takia e Iosua i ta maea, “O longo kamumu! Ga habia vomu e Ieriko turana a hariki vona, e huriki a nugumaheto vona.
JOS 6:3 Ioe turane huriki a nugumaheto vomu mu laho haluia a tanga balaka taku na parava ge taku. Mu rata mavonga na parava ge polotara.
JOS 6:4 A prister ala polorua ri gi laho muga na Tava na Ngava Dagi ri gi bole a maka tavure ni rata na pelengana sipsip. Na poloruana parava ioe turane huriki a nugumaheto mu laho halui a tanga balaka polorua. E huriki a prister ri gi vaki a tavure.
JOS 6:5 Muri e huriki a prister ri gi vaki lalu a maka nangina tavure, mu magulu rike taku, ge mapuka a nure na tanga, mu dili kunana.”
JOS 6:6 Lakea e Iosua e tune Nun i gale valai vona e huriki a prister i taki ria, i ta maea, “Mu kalohoa a Tava na Ngava Dagi ne BAKOVI DAGI. A prister ala polorua ri gi bole a tavure, ri gi muga na tava.”
JOS 6:7 Muri e Iosua i taki e huriki a bakovi a ngatavine, “Mu vano ngane. Mu laho haluia a tanga, e huriki a nugumaheto ri gi laho muga na tava.
JOS 6:8 Ri rata manga a hini e Iosua i taki. A prister ala polorua ri laho na matene BAKOVI DAGI, ri muga na Tava na Ngava Dagi ri vaki a tavure.
JOS 6:9 I ranga nugumaheto ri laho muga ne huriki a prister ri vaki a tavure, i ranga nugumaheto ri laho muri na Tava na Ngava Dagi. Na tahuna ri lalaho e huriki a prister ri vaki mavonga a tavure.
JOS 6:10 Pali e Iosua i taki ria nahea ri gi magulu o ri gi ta viliha ge harena na tahuna ge rudu vakuku ria.
JOS 6:11 Lakea i rudu e huriki a prister turana a Tava ne BAKOVI DAGI ri laho haluia a tanga dagi balaka taku. Muri ri hamule, ri made na mada vona a rodo iea.
JOS 6:12 E Iosua i hadongo na hatelanga pokopoko, e huriki a prister ri kaloho tabua a Tava ne BAKOVI DAGI, ri vano turana.
JOS 6:13 Ra prister ala polorua nga ri bole a maka tavure ri laho muga na Tava ne BAKOVI DAGI ri vaki. I ranga nugumaheto ri laho muga ne ria. I ranga nugumaheto ri laho muri na Tava ne BAKOVI DAGI. Na tahuna ri lalaho e huriki a prister ri vaki mavonga a tavure.
JOS 6:14 Na ruana parava ri rata mavonga tabu, muri ri hamule tabu na mada. Ri rata maea kunana na parava i polotara.
JOS 6:15 Na poloruana parava na hatelanga pokopoko ri hadongo, ri laho haluia a tanga dagi i manga a hini muga. Pali na parava iea ri laho halui balaka polorua a tanga dagi.
JOS 6:16 Na tahuna ri laho halui a tanga dagi balaka polorua, e huriki a prister ri vaki a maka tavure, lakea e Iosua i taki e huriki, i ta maea, “Mu magulu rike, e BAKOVI DAGI i habia ne hita pali a tanga dagi iea.
JOS 6:17 Si gi ratapilea a tanga dagi iea turana a maka maki lobo ri tabuli vona, ge ne vona e BAKOVI DAGI. Ra ngoi iea, e Rahap kunana, turana a kabu vona pololilo na ruma vona, naha ni rabalaki, a vuhuna i ruhulolo a kasisi si rudu valai ru gu kasisia a tanga dagi.
JOS 6:18 Naha ni bolena tara maki na tanga dagi. Ra maki nga ne vona e BAKOVI DAGI. A viri bara i bolea tara maki, bara i bole dili a maregoa a vuranga na mada ne hita a Israel.
JOS 6:19 A maki lobo ni rata na silva, na gol, na bras, na aen ni tabari pali ne BAKOVI DAGI. Mu bole valai na Tava vona.”
JOS 6:20 Lakea e huriki ri magulu, e huriki a prister ri vaki a maka tavure. Na tahuna e huriki ri longo a nangina tavure, ria lobo ri magulu rike taku, i mapuka a nure dagi. Muri ri dili ri bolea a tanga dagi.
JOS 6:21 Ri rabalaki lobo e huriki a tahotanga na bainat. Ri rabalaki lobo e huriki a bakovi, a ngatavine, a koma, a gare, a maka bulmakau, a sipsip, a donki.
JOS 6:22 Lakea e Iosua i taki ra bakovi ru valai muga ru kasisi a tanga dagi, i ta maea, “Muru dili na ruma na ngoi, muru tuli vilia turana a kabu vona, ge manga a nita muru ta muholi vona.”
JOS 6:23 Lakea ru dili, ru tuli pori vilia e Rahap turana e tamana, e kinana, e huriki e kurabana, e huriki a vora vona. Ru bole ria ri vakamade tabukoi na mada ne huriki a Israel.
JOS 6:24 Muri ri rungania a tanga dagi turana a maki lobo ri tabuli pololilo vona. Pali e huriki a Israel ri bole a maka maki kamumu na tanga dagi, ri ru na tava na roho ne BAKOVI DAGI.
JOS 6:25 E Iosua i uka ma i rabalakia e Rahap turana a kabu vona, a vuhuna e Rahap i ruhulolo a kasisi nga na tahuna ru dili o Ieriko ru matai panahoa. Re huriki a hamone Rahap ri made turane huriki a Israel i valai i harena mona.
JOS 6:26 Lakea e Iosua i habi tora a ngava ne huriki, i ta maea, “A bakovi tara ge rata tabua a tanga dagi e Ieriko, e BAKOVI DAGI bara i habi a vuranga vona: Na tahuna i tubu ni rata a leho na tanga dagi iea, e tuna bakovi a tabua bara i mate. Na tahuna i rata a maka nihebi dagi na tanga dagi e tuna a kabina ruru bara i mate.”
JOS 6:27 I mavonga e BAKOVI DAGI i laho turane Iosua, e huriki lobo na robo iea ri bibi rikea a rana.
JOS 7:1 Muga e BAKOVI DAGI i taki e huriki a Israel nahea ri gi bole ranga maki. A maki lobo ge nono. Pali e Akan i longotaroa a ngava iea, i panaho ranga maki. Lakea e BAKOVI DAGI i madihi a hatena ne huriki a Israel. E Akan e tune Karmi, e Karmi e tune Sapdi, e Sapdi e tune Sera na kabu ne Iuda.
JOS 7:2 E Iosua i made o Ieriko i rudu e huriki a bakovi ri lakea o Ai, ra tanga i pesi na tabeke na nirikena haro na tanga e Betel, tabukoi na tanga e Betaven. I taki ria ri gi lokovonga ri gi kasisia a tanga iea. Lakea e huriki nga ri vano, ri rata manga a ngava i taki e Iosua.
JOS 7:3 Muri ri hamule, ri vakalongoa e Iosua, ri ta maea, “Naha ni taki e huriki lobo ri gi lokovonga, a vuhuna a tanga i kiroko. O rudu kunana e huriki ri gi ala 2,000 o ge ala 3,000, ri gi lokovonga ri gi vaubi vona a tanga e Ai.”
JOS 7:4 Muri e huriki a nugumaheto ri ala 3,000 ri lokovonga. Pali e huriki a bakovi o Ai ri valili mule ne ria.
JOS 7:5 Ri tubu ni valili ne huriki a Israel na nihebi dagi na tanga dagi i harena o Sebarim. Ri rabalaki e huriki ri ala ravulu tolu a polona i polotara (36) na dala lakea na lolo. Ni rata mavonga e huriki a Israel ri mangenge, i uka ma ri pesi tora.
JOS 7:6 E Iosua i longo a vuranga i bele ne ria, i dodo hateka i rape a maka varakia vona. I mahita ngalatudu tabukoi na Tava ne BAKOVI DAGI. E huriki a gare o Israel ranga ri mahita ngalatudu turana, ri tabuli mavonga i harena na haro i rolo. Ri vorotapa na gine ria a habulo, ge a kilakila ne ria ri dodo hateka.
JOS 7:7 Muri e Iosua i ta maea, “Bakovi Dagi, ioe a Vure muholi, i navai o bole valai mia koea na tabeke ne Iordan iea? O ngaru go habi mia na limane huriki a Amor ri gi ratapile mia? I navai i uka ma o taki mia mi gi made mule na tabeke lake ne Iordan?
JOS 7:8 Bakovi Dagi, e huriki a Israel ri mangenge ne huriki a pile, ri hamule pali. A ra ngava ga takia ngane?
JOS 7:9 E huriki a Kenan, e huriki a viri na robo iea bara ri longoa a velengana vuranga iea, ri pesi halui mia, ri rabalaki lobo mia. A ra go ratea go ratapile e huriki nga? Re huriki nga bara ri ta hale, ri biu a ramu.”
JOS 7:10 Lakea e BAKOVI DAGI i takia e Iosua i ta maea, “O pesi rike! I navai o mahita ngalatudu na malala?
JOS 7:11 E huriki a Israel ri rata a naro hale pali, ri longotaro a ngava dagi nau a ratea ne ria. Muga a hatekakari ria, nahea ri gi bole a maka maki o Ieriko. Pali ri longotaro a nitagu. Ri panaho pali a maki a taki ta ri gi ratapile. Ri tatami, ri ruhulolo turana a maka maki ne ria.
JOS 7:12 I mavonga e huriki a Israel i uka ma ri gi gao ri gi vaubi ne huriki a pile. Ri ha ne huriki a pile, a vuhuna ria kunana ri vakabele a vuranga ne ria. Ri panaho pali a maki a taki nahea ri gi bole. Mua i uka ma mu gu ratapile a maki nga, iau i uka ma ga made tabu turane mua.
JOS 7:13 “O pesi rike, o vano o kisi e huriki ri gi matapado, ri gi valai na matagu kuduvi, a vuhuna iau e BAKOVI DAGI a tahoka a ngava ne mua. E huriki a Israel ri panaho a maka maki ni tabari iau vona, a ngaru ri gi vuroki. Ge uka, e huriki a pile bara ri rangi mua na vabinga.
JOS 7:14 Na hatelanga kuduvi mu bele palupu. Iau ga pasitalea tara kabu, a maka kabu kiroko vona ri gi pagitala, ri gi pesi muri vona. Muri ga pasitalea tara kabu kiroko, a maka kabu kiroko liu vona ri gi pagitala, ri gi pesi muri vona. Muri ga pasitalea tara kabu kiroko liu, e huriki a bakovi vona ri gi pagitala ri gi pesi muri vona.
JOS 7:15 Muri ga vakasiria e rei a bakovi i panaho a maki ni tabari iau vona. Muri mu gutua na kanono turana a kabu vona, a maka maki vona lobo. Ra bakovi iea i rata a naro hale, i vakamaruhu e huriki a Israel. I longotaroa a ngava dagi iau e BAKOVI DAGI a rata turane ria.”
JOS 7:16 E Iosua i hadongo na hatelanga poko­poko i gale palupu a kabu takutaku ne Israel. I vakasiri a kabu ne Iuda i tahoka a maregoa.
JOS 7:17 Muri i vulaki talea na kabu ne Iuda a kabu ne Sera. Muri i vulaki tala tabua na kabu ne Sera a kabu ne Sapdi.
JOS 7:18 Muri e Iosua i vakapesi na tete e huriki a bakovi na kabu e Sapdi i gale talea e Akan. E Akan e tune Karmi, e tubune Sapdi, a hamone Sera, a kabu ne Iuda.
JOS 7:19 E Iosua i takia e Akan i ta maea, “O tugu, ngane o pesi na matane BAKOVI DAGI a Vure ne hita e huriki a Israel, o kavurikea. O vakalongo kavakava na maka maki o bole. Naha ni ruhuloloa nau tara maki.”
JOS 7:20 E Akan i koli i ta maea, “Muholi a rata a naro hale ne BAKOVI DAGI a Vure ne Israel. Ngane ga taki ioe vona a maki a ratea.
JOS 7:21 Na tahuna si vaubi si bole a maka maki o Ieriko, a matai a varakia kamumu o Babel, a tabekena silva a nimavana i 4 kilo, a tabekena gol a nimavana i 1 kilo. A ngaru hateka a maki nga a bole. A bole dili na kape nau a tanu na malala, a silva i tabuli polotano liu.”
JOS 7:22 Lakea e Iosua i rudu ranga bakovi ri nunu lakea na kape, ri matai a maka maki ri tabuli manga a hini i taki e Akan. A silva i tabuli polotano liu.
JOS 7:23 Ri bole a maka maki nga, ri valai ne Iosua ne huriki a Israel lobo. Ri ru na malala na matane BAKOVI DAGI.
JOS 7:24 E Iosua turana e huriki a Israel ri bolea e Akan turana a maka silva, a varakia, a tabekena gol, e huriki e tuna bakovi e tuna ngatavine, a maka bulmakau, a donki, a sipsip, a maka maki lobo vona, ri bole lakea na maloku ne Akor.
JOS 7:25 Lakea e Iosua i takia, “Ge a ra o habi a maregoa dagi ne mia? Ngane ioe tara, e BAKOVI DAGI ge habi a maregoa dagi vomu.” Muri e huriki a Israel ri bole a maka kedo ri padimatea e Akan turana a kabu vona. Ri rungani turana a maka maki lobo ne ria.
JOS 7:26 Ri bole a maka kedo ri ru langa na podane Akan. Ra maka kedo nga ri tababana. Lakea e BAKOVI DAGI i lobo a nihatemadihi vona. I maea ni gale liu a hini nga, “A Maloku ne Akor.”
JOS 8:1 E BAKOVI DAGI i takia e Iosua, “Naha ni mangenge, naha ni loho paepae. O bole e huriki a nugumaheto mu vano mu vaubi turane huriki a bakovi o Ai. Ga tuhori ioe go rangia a hariki o Ai. Ga habi vomu e huriki a bakovi, a tanga, a malala vona.
JOS 8:2 O vakalobo liu a tanga e Ai turana a hariki vona, ge manga a hini o rata virihi a tanga e Ieriko turana a hariki vona. Pali ngane mu bole a maka bulmakau a mahala ne Ai. Mu kisi a maka lebo na vabinga mu vano mu vaubi vona a tanga iea. O rudu muga ranga nugumaheto, ri gi kapiloho na pogi na tanga.”
JOS 8:3 Lakea e Iosua turane huriki a nugumaheto vona ri kisi a lebo na vabinga ne ria, ri gi lakea o Ai. I vulaki a nugumaheto ala 30,000 ri gao hateka, i rudu muga ria na rodo.
JOS 8:4 I vakuku ria i ta maea, “Mu vano, mu kapiloho na pogi na tanga, mu dava a vabinga. Naha ni vano basi hateka. Ge para a matane mua.
JOS 8:5 Pali iau turane huriki a nugumaheto ranga, mi gi laho tamoro dili na tanga. Na tahuna e huriki a bakovi o Ai ri gi pori valai ri gi vaubi, mi gi ha manga a hini si rata muga.
JOS 8:6 Mi gi tamitala ria, ri gi valili ne mia ri gi marava basi vona a tanga. Muri bara ri ta maea, ‘Ri ha ne hita i manga a hini muga.’ Na tahuna mi tamitala ria ri gi marava basi,
JOS 8:7 mu pe a hini mu kapiloho vona mu dili, mu bolea a tanga. E BAKOVI DAGI a Vure ne hita ge habia na limane mua a tanga iea.
JOS 8:8 Na tahuna mu bolea pali a tanga, mu rungania na kanono ge manga a ngava e BAKOVI DAGI i vakuku. Ra ngava iea a ngava nau, mu ramai kamumua.”
JOS 8:9 Lakea e Iosua i rudu ria ri vano, ri kapiloho na ngutumiri na tabeke na nirolona haro, na kurukuruna tanga e Ai e Betel, ri dava. Pali na rodo iea e Iosua i tababana na mada.
JOS 8:10 Na hatelanga pokopoko e Iosua i hadongo i gale valai e huriki a nugumaheto ri vapopo. Ia turane huriki a matakari o Israel ri muga ne huriki a nugumaheto ri lakea mai e Ai.
JOS 8:11 E huriki a nugumaheto ri vano turane Iosua, ri lokovonga tabukoi na tanga ri rata a mada, na tabeke mule sike. A maloku i nagi mule ria na dilidala o Ai.
JOS 8:12 E Iosua i rudu e huriki a nugumaheto ala 5,000 ri vano ri kapiloho na tabeke na nirolona haro na tanga, na kurukurune Betel e Ai.
JOS 8:13 Ngane e huriki a nugumaheto ri dava. A tara dagi i rata a mada na tabeke mule sike na tanga. A tara na nugumaheto tara i rata a mada na tabeke na nirolona haro, ri gi burai e huriki a pile. E Iosua i vano i mahita na maloku vona a rodo iea.
JOS 8:14 Na tahuna a hariki o Ai i matai e huriki a nugumaheto ne Iosua ri rata a mada tabukoi na tanga na tabeke mule sike, i papa hari turane huriki a nugumaheto vona, ri pagitala ri vaubi turane huriki a Israel o Araba. Pali a hariki o Ai i uka ma i lohoka vona a vabinga i bele na bitona.
JOS 8:15 Lakea e Iosua turane huriki a tara vona ri tamilalu ni ha lakea na tabeke i ngeki.
JOS 8:16 A hariki i matai e huriki a Israel ri ha, i gale tala lobo e huriki a bakovi na tanga ri gi valili ne huriki a Israel. Ri valili ne Iosua, ri marava basi na tanga.
JOS 8:17 E huriki a nugumaheto ne Ai ne Betel ri vano lobo ri valili ne huriki a Israel. A dilidala na tanga i mataka mavonga, i uka viri ge tagaria.
JOS 8:18 E BAKOVI DAGI i takia e Iosua, “O nugu rikea a maheto vomu o toto lakea ne Ai, ga habia vomu ngane a tanga iea.” E Iosua i ramaia a ngava e BAKOVI DAGI i takia.
JOS 8:19 Na tahuna i rata mavonga lobo, e huriki a nugumaheto ri kapiloho ri masia a hini i rata. Ri malaviriri kunana ri pesi rike, ri nunu dili na tanga. Ri bolea a tanga, ri malaviriri kunana ri rungania.
JOS 8:20 E Iosua turane huriki a Israel ri tamilalu ni ha ne huriki a Ai, ri masia a pokona kanono i poko rike na tanga, ri lohoka vona a tara na nugumaheto tara i bolea pali a tanga, i rungania. Ri ngalakapulo ri rabalaki e huriki a Ai. Na tahuna e huriki a Ai ta ri gi mata hamule na tanga ne ria, ria ranga ri masia a pokona kanono. Ngane ri lohoka i uka hini ri gi lakea vona ri gi kapiloho na tara ne Iosua.
JOS 8:22 Ngane e huriki a nugumaheto ne Israel ra ri dili na tanga, ri pagitala ri polo halui e huriki a bakovi o Ai, ri rabalaki lobo ria.
JOS 8:23 Pali a hariki o Ai kunana i uka ma ri rabalakia. Ri lakavua, ri bole lakea ne Iosua.
JOS 8:24 Na tahuna e huriki a Israel ri rabalaki lobo e huriki a pile, na tabeke i ngeki na hini ni valili lokovonga ria vona, muri ri hamule lakea o Ai ri rabalaki lobo e huriki a tahotanga ri made vonga.
JOS 8:25 E huriki o Ai ri mate vona a parava iea ri ala 12,000,
JOS 8:26 a vuhuna e Iosua i toto lakea ne Ai a maheto vona i harena ne huriki lobo ri mate.
JOS 8:27 Muri e huriki a Israel ri bole a maka bulmakau a maki lobo ne Ai, ri ramaia a ngava e BAKOVI DAGI i taki e Iosua vona.
JOS 8:28 Lakea e Iosua i rungania a tanga e Ai. A maka luluna i tabuli mavonga i valai i harena mona.
JOS 8:29 E Iosua i vakatavorea a hariki o Ai na kai tara, i tabuli mavonga a podana i harena na malunga. Muri e Iosua i taki ranga bakovi ri bolea a podana ri vurokia tabukoi na dilidala na tanga. Ri bole a maka kedo ri ru langa na podana. Ra maka naguna kedo nga ri tababana mona.
JOS 8:30 Na parava iea e Iosua i ratea a dede ne BAKOVI DAGI, a Vure ne huriki a Israel, meli na lolo e Ebal.
JOS 8:31 I ramai a ngavane Moses, a vora ne BAKOVI DAGI, i taki e huriki a Israel vona. A vinara ne Moses i ta maea, “Mu ratea tara dede. Naha ni ubikeve na aen a kedo mu gu ratea vona.” Muri e huriki a Israel ri rata polomeli na dede iea a nihabi ni gutu-vuro, a nihabi na nivalemu.
JOS 8:32 Na tabeke iea e huriki a Israel ri vido vona e Iosua i here tabua na kedo a vinara, ra i herea hosi e Moses.
JOS 8:33 E huriki a Israel turana e huriki a mosi, a tahotanga, e huriki a gare, e huriki a matakari, e huriki a bolekori, e huriki a mari ni pelekado a maregoa, ri pesi na tabeke varago na Tava na Ngava Dagi ne BAKOVI DAGI, ri ngalai e huriki a prister na kabu ne Levi ri kalohoa. A tete tara i pesi tabukoi na lolo e Gerisim, a tete tara i pesi tabukoi na lolo e Ebal. Ri ramaia a nitane Moses a vora ne BAKOVI DAGI i taki ge gamai e huriki a Israel.
JOS 8:34 Muri e Iosua i gi a vinara ne Moses, a nitane BAKOVI DAGI ge rata kamumu ria, ge habi a vuranga ne ria.
JOS 8:35 A nita na vinara ne Moses, e Iosua i gi lobo i longo e huriki a Israel. E huriki a ngatavine, a koma, a mosi ria ranga ri longo.
JOS 9:1 E huriki a hariki ri made na nirolona haro na naru e Iordan, e huriki a hariki na lolo, a tanga na kupona, a tanga na bila tabukoi na Dari na Kurukuruna Malala i harena na malala ne huriki a Lebanon, ria lobo ri longo a maka maki i rata e huriki a Israel. Re huriki a hariki nga, a hariki ne huriki a Hiti, a Amor, a Kenan, a Peres, a Hivi, a Iebus.
JOS 9:2 Ri longoa a ngava iea, ri vadili palupu ri vaubi ne Iosua turane huriki a Israel.
JOS 9:3 A kabu ne Hivi i made na tanga e Gibeon, pali na tahuna ri longo a velengana a maka maki e Iosua i rata na tanga e Ieriko e Ai,
JOS 9:4 ri varodo a ngava ri gi tamia e Iosua ge luhoi ria ge ria a vinuru. Lakea ri bole a maka marapena kulopi, a matutuna a buroi na vain, ri tahoni a maka maki ni kani, ri ru langa na maka donki ri vano.
JOS 9:5 Ri rea na matutuna varakia, ri rodo a matutuna vahapolo, ri bole a maka madeana bret i pu, ri vano turana.
JOS 9:6 E Iosua i made na mada o Gilgal, lakea e huriki a Hivi nga ri vano ri bele vona, ri taki e Iosua e huriki a Israel ri ta maea, “A tanga mi malaga vona i basi hateka. Mi ngaru ni rata a ngava dagi ne vona ni made kamumu turane mua.”
JOS 9:7 Pali e huriki a Israel ri taki e huriki a Hivi ri ta maea, “I navai mi gi rata a ngava dagi turane mua? Mi luhoi i uka ma mua a viri basi.”
JOS 9:8 Lakea e huriki a Hivi ri takia e Iosua ri ta maea, “Mi ngaru ni leho manga a vora ne mua.” Lakea e Iosua i nana ria, “E rei a kabu ne mua? Mu valai vai?”
JOS 9:9 Lakea ri tuverei ri ta maea, “Mi malaga na tanga basi, a vuhuna mi longoa a nuverei ne BAKOVI DAGI a Vure ne mua. Mi longo a nuverei na maka maki i rata o Egipto.
JOS 9:10 Mi longo a maka maki i rata na hariki ala rua o Amor na tabeke ne Iordan. Re Sihon a hariki na tanga e Hesbon, e Og a hariki na robo e Basan, hosi i made na tanga e Astarot.
JOS 9:11 E huriki a gare ne mia turane huriki lobo na robo ne mia ri taki mia, ri ta maea, ‘Mu bole ranga maki ni kani ne mua, mu vano mu taguia a kabu iea, mu ta maea, “Mia e huriki a vora mua. Mu ratea ne mia tara ngava dagi si gi made kamumu palupu.’”
JOS 9:12 O matai a maka bret ne mia. Na tahuna mi malaga na tanga mi laho valai a maka bret ni gutu karaba. Pali ngane o matai. A bret nga ri madea ri pu pali.
JOS 9:13 A maka kulina meme nga a kuli karaba na tahuna mi guru dili a vain ne ria, pali o matai ngane ri matutu pali. A maka varakia a vahapolo ne mia ri matutu pali na dala malaku.”
JOS 9:14 Lakea e huriki a bakovi o Israel ri bole a maka maki ne ria, pali i uka ma ri nana e BAKOVI DAGI na niluhoi vona.
JOS 9:15 E Iosua i rata kamumu e huriki a Hivi, i rata a ngava dagi na nivalemu turane ria, i uka ma ge rabalaki ria. E huriki a matakari o Israel ranga ri ta muholi ri gi ramaia a ngava dagi iea.
JOS 9:16 Ri rata loboa a ngava dagi, pali muri na parava i tolu ri lohoka vona re huriki nga i uka ma ria a viri basi, a tanga ne ria i tabukoi kunana.
JOS 9:17 Ngane e huriki a Israel ri malaga ri vano, muri na parava i tolu ri bele na maka tanga ne huriki a bakovi nga. A rana a maka tanga ne ria e Gibeon, e Kepira, e Berot, e Kiriat-Iearim.
JOS 9:18 Pali e huriki a Israel i uka ma ri rabalaki ria, a vuhuna e huriki a matakari ne ria ri ta muholi na ngava dagi turane huriki nga na rane BAKOVI DAGI a Vure ne ria. E huriki a Israel ri tahate e huriki a matakari ne ria vona a naro ri ratea.
JOS 9:19 Pali e huriki a matakari ri koli ri ta maea, “Mi ratea pali turane ria a ngava dagi na rane BAKOVI DAGI a Vure ne hita. Naha ni rabalaki ria.
JOS 9:20 Ri gi made, a vuhuna si ta muholi turane ria pali. Hita bara si rabalaki ria, e BAKOVI DAGI bara i habi a vuranga ne hita.
JOS 9:21 Ngane ri gi made, naha ni rabalaki. Pali a leho ri gi rata ri gi popo a kai, ri gi kiru a naru ne hita lobo.” E huriki a Israel ri longototo a nitane huriki a matakari ne ria, i uka ma ri rabalaki e huriki nga.
JOS 9:22 Muri e Iosua i gale valai e huriki a Hivi na tanga e Gibeon i taki ria, i ta maea, “I navai mu tami mia? Mu taki mua ta mu malaga na tanga basi mu valai. Pali mua mu made tabukoi kunana.
JOS 9:23 Mu tami mia, ngane e BAKOVI DAGI bara i rata hale mua. Na parava vakaroro bara mu leho ni popo a kai, ni kiru a naru na roho na Vure ne mia.”
JOS 9:24 E huriki a Hivi ri koli ri ta maea, “Mi longo a nitane BAKOVI DAGI a Vure ne mua i taki e Moses a vora vona, ge habia ne mua ra malala iea. Na tahuna mu bele, bara mu vakalobo liu e huriki ri made vona a malala iea. Lakea mi mangenge hateka ne mua, mi tami mua.
JOS 9:25 Pali ngane mi made na limamu. A ra maki i kamumu o ngaru go rata virihi mia vona, o rata kunana.”
JOS 9:26 E Iosua i tuhori e huriki a Hivi lakea e huriki a Israel i uka ma ri rabalaki ria.
JOS 9:27 Pali e Iosua i vakavora ria ni popo a kai, ni kiru a naru ne huriki a Israel, ri rata a leho na dede na roho ne BAKOVI DAGI. E huriki a Hivi ri rata a maka leho nga na maka tanga e BAKOVI DAGI i vulaki ga murina ni vasileki. Mona re huriki a Hivi ri tababana ni rata a maka leho nga.
JOS 10:1 E Adoni-Sedek, a hariki o Ierusalem, i longo a velengane Iosua i bolea a tanga e Ai, i rabalaki lobo e huriki a tahotanga turana a hariki ne ria, i manga a naro ri rata virihi a tanga e Ieriko turana a hariki vona. I longo e huriki a Gibeon ri rata a ngava dagi, ri made kamumu turane huriki a Israel.
JOS 10:2 E huriki a bakovi a ngatavine o Ierusalem ri mangenge hateka, a vuhuna a tanga e Gibeon i manga kunana a maka tanga ri tahoka a hariki. E Gibeon i dagi hateka, i rangia a tanga e Ai. E huriki a bakovi ri gao hateka na vabinga. E huriki a Ierusalem ri mangenge hateka ne ria.
JOS 10:3 Lakea e Adoni-Sedek i talo rike a ngava ne Hoham a hariki na tanga e Hebron, ne Piram a hariki na tanga e Iarmut, ne Iapia a hariki na tanga e Lakis, ne Debir a hariki na tanga e Eklon.
JOS 10:4 I taki e huriki a hariki nga i ta maea, “Mu valai mu tuhori mia, si gi vaubi turane huriki a Gibeon, a vuhuna ri rata a nivalemu ne Iosua turane huriki a Israel.”
JOS 10:5 Ra hariki ala lima nga, a hariki o Ierusalem, o Hebron, o Iarmut, o Lakis, o Eklon, ria a kabu ne Amor. Ri vadili palupu a tara na vabinga, ri vano ri pesi haluia a tanga e Gibeon, ri vaubi ne ria.
JOS 10:6 E huriki a bakovi o Gibeon ri talo rike a ngava lakea ne Iosua na mada o Gilgal, ri ta maea, “E huriki a hariki ne Amor na maka tanga na lolo, ri vadili vapopo ri valai pali ri gi vaubi turane mia. O valai malaviriri o tuhori mia, naha ni lohopile mia.”
JOS 10:7 E Iosua i longoa a ngava iea, i pesi rike turana a tara na vabinga vona, turana e huriki a bakovi hateka na maheto vona. Ri pe e Gilgal ri vano ri gi tuhori e huriki a Gibeon.
JOS 10:8 E BAKOVI DAGI i taki e Iosua i ta maea, “Naha ni mangenge vona e huriki nga. A habi ria pali na limamu. I uka tara viri ge rangi mua.”
JOS 10:9 E Iosua turane huriki a tara na nugumaheto vona ri laho na rodo, ri vano ri bele o Amor. E huriki a Amor ri turutu ne ria, lakea e huriki a Israel ri vakatubu a vabinga.
JOS 10:10 Na tahuna e huriki a Amor ri matai e huriki a tara na nugumaheto ne Israel ri valai, e BAKOVI DAGI i rata ria ri mangenge, i vakaviliha a niluhoi ne ria. Lakea e huriki a Israel ri ratapile e huriki a Amor iea o Gibeon, ri valili puru ne ria na dala tabukoi na tanga e Bet-Horon. Ri ratapile e huriki a Amor i puru lakea, i harena na tanga e Aseka e Makeda.
JOS 10:11 Na tahuna e huriki a Amor ri ha ramaia a dala na lolo i raga o Bet-Horon, e BAKOVI DAGI i vakaboru a vala-kedo, i padimate e huriki a Amor, i vano i harena o Aseka. E huriki ri mate na vala-kedo i kupo hateka na viri e huriki a Israel ri rabalaki na bainat.
JOS 10:12 Na parava iea e BAKOVI DAGI i tuhori e huriki a Israel ri ratapile e huriki a Amor. E Iosua i vasileki ne BAKOVI DAGI na matane huriki a Israel i ta maea, “Ioe a haro o pesi polomeli ne Gibeon. Ioe a keva o pesi polotano na maloku ne Aialon.”
JOS 10:13 Lakea a haro i tabuli mavonga, a keva tara i uka ma i rolo, i harena ne huriki a Israel ri rangi e huriki a pile. A haro i uka ma i rolo malaviriri. I tabuli mavonga na hunu i manga a parava i taku. A nuverei na maki iea ni here na puhu ne Iasar.
JOS 10:14 I paru hosi i valai i harena mona i uka tara parava ge manga a parava iea. Ra maki iea i bele, a vuhuna e BAKOVI DAGI i longototoa a bakovi i ala taku, i tuhori e huriki a Israel na vabinga.
JOS 10:15 Muri e Iosua turane huriki a tara na nugumaheto vona ri hamule lakea na mada ne ria o Gilgal.
JOS 10:16 Pali re huriki a hariki nga ala lima ri ha, ri kapiloho na babe tara tabukoi na tanga e Makeda.
JOS 10:17 I ranga e huriki a bakovi ri matai ria ri vakalongo e Iosua na hini ri kapiloho vona.
JOS 10:18 Lakea e Iosua i taki e huriki a tara na nugumaheto vona i ta maea, “Mu kule a maka kedo dagi nga, mu tukaria a matana babe, mu ru ranga tagari ri gi matakaria.
JOS 10:19 Pali naha ni made tavula vona a hini nga. Mu ramai e huriki a pile mu vaubi turane ria. Naha ni matataro ria ri gi vano ri gi bele na tanga ne ria, a vuhuna e BAKOVI DAGI a Vure ne hita i taki pali bara si rangi ria.”
JOS 10:20 E Iosua turane huriki a Israel ri valili ne ria, ri rabalaki e huriki ala kupo. Pali i ranga ri ha, ri kapiloho na tanga ne ria.
JOS 10:21 Muri e huriki a tara na nugumaheto ri hamule lakea ne Iosua na mada e Makeda. I uka tara ne ria ge bole a vuranga. Muri e huriki a tahotanga o Kenan i uka ma ri ta hale tabu ne huriki a Israel.
JOS 10:22 Muri e Iosua i ta maea, “Mu talea a matana babe, mu tuli valai nau ra hariki nga ala lima.”
JOS 10:23 Ri vano ri tuli valai ra hariki o Ierusalem, o Hebron, o Iarmut, o Lakis, o Eklon.
JOS 10:24 Na tahuna e huriki ri bole lakea ne Iosua a hariki nga, e Iosua i gale palupu e huriki a Israel, i taki e huriki a ubu na tara i ta maea, “Mu valai mu pahatata a lohona a hariki nga.” Lakea ri pagitala valai, ri pahatata a lohone ria.
JOS 10:25 Lakea e Iosua i taki e huriki a Israel i ta maea, “Naha ni mangenge, naha ni loho paepae. Mu pesi tora, a vuhuna e BAKOVI DAGI bara i rata maea kunana e huriki a pile ne mua.”
JOS 10:26 Muri e Iosua i rabalaki e huriki a hariki nga, i vakatavore ria na kai i lima. Ri tavore mavonga i harena na haro i rolo.
JOS 10:27 Na malunga liu, e Iosua i taki e huriki a bakovi ri bole a podane ria, ri voro dili na babe ri kapiloho vona muga. Ri bole a maka kedo dagi ri kavitagua a matana babe. Ra maka kedo nga ri tababana vonga.
JOS 10:28 Na parava iea kunana e Iosua i bolea a tanga e Makeda, i nugutatea a hariki vona. I rabalaki lobo e huriki a tahotanga, i uka tara viri ge mahuri. A naro i rata virihi a hariki o Ieriko vona, i rata virihi tabua na hariki o Makeda.
JOS 10:29 Muri ne ria ri bolea a tanga e Makeda, e Iosua turana e huriki a Israel, ri pe a hini ngi ri lakea na tanga e Lipna, ri vakatubu a vabinga vonga.
JOS 10:30 E BAKOVI DAGI i tuhori ria, ri mulangi na vabinga ri bolea a tanga, ri tangotatea a hariki vona. Lakea e Iosua i rabalaki lobo e huriki a tahotanga, i uka tara viri ge mahuri. I ratea na hariki iea a naro i rata virihi a hariki o Ieriko vona.
JOS 10:31 Muri e Iosua turane huriki a Israel ri pea e Lipna, ri lakea o Lakis. Lakea i pesi haluia, i ratea vonga a vabinga.
JOS 10:32 E BAKOVI DAGI i tuhori ria, lakea na parava muri ri mulangi na vabinga, ri bolea e Lakis. E Iosua i uka ma i matataroa tara viri ge mahuri. I rabalaki lobo e huriki a tahotanga, i manga a naro i rata virihi e huriki a Lipna.
JOS 10:33 Muri e Horam a hariki na tanga e Geser, i valai ge kori e huriki a Lakis. Pali e Iosua i rangi tabua na vabinga turane huriki a tara vona. E Iosua i uka ma i matataroa tara viri ge mahuri. I rabalaki lobo e huriki.
JOS 10:34 Muri e Iosua turane huriki a Israel ri pe e Lakis, ri lakea o Eklon. Ri pesi haluia a tanga iea, ri vaubi ne huriki a Eklon.
JOS 10:35 Ri bolea na parava iea kunana a tanga e Eklon. E Iosua i rabalaki lobo e huriki a tahona i manga a hini i rata o Lakis.
JOS 10:36 Muri e Iosua turane huriki a Israel ri pea e Eklon ri lakea o Hebron, ri vaubi ne huriki a Hebron.
JOS 10:37 Ri bolea a tanga iea, ri rabalakia a hariki vona, turana e huriki a tahotanga, e huriki na maka tanga ri pesi tabukoi vonga. E Iosua i ratapile hatekea e Hebron i manga a hini i rata virihi e Eklon, i uka tara viri ge mahuri.
JOS 10:38 Muri e Iosua turana e huriki a Israel, ri lakea na tanga e Debir ri vaubi ne huriki a Debir.
JOS 10:39 Ri bolea a tanga iea turana a hariki vona, a maka tanga ri pesi tabukoi vona. Ri tangotatea a hariki, ri rabalaki lobo e huriki a tahotanga. E Iosua i ratea ne Debir, turana a hariki vona, a naro i rata virihi e Hebron, e Lipna turana a hariki ne rua.
JOS 10:40 E Iosua i bole a maka tanga na tabeke lobo, na tabeke mule puru ne Negev, na maka kupona na nirolona haro, na bilane Iordan. I uka ma i matataroa tara viri ge mahuri, i rabalaki lobo ria, turana e huriki a hariki ne ria. I rata manga a hini e BAKOVI DAGI a Vure ne Israel i takia vona.
JOS 10:41 E Iosua i bole lobo a maka robo, i tubu o Kades-Barnea na tabeke mule puru i lakea na tanga e Gasa tabukoi na lavu, i tubu na tabeke na malala ne Gosen i lakea na tanga e Gibeon na tabeke mule sike.
JOS 10:42 Na tahuna iea kunana, e BAKOVI DAGI a Vure ne huriki a Israel, i tuhoria e Iosua na vabinga, i rangi lobo e huriki a hariki nga, i bole a maka malala ne ria.
JOS 10:43 Muri e Iosua turane huriki a Israel, ri hamule na mada ne ria o Gilgal.
JOS 11:1 E Iabin a hariki na tanga e Hasor i longo a maka nuverei na maka maki e Iosua i rata. I talo rike a ngava lakea ne Iobap a hariki na tanga e Madon, a hariki na tanga e Simron, a hariki na tanga e Aksap.
JOS 11:2 I talo rike tabu a ngava ne huriki a hariki na tanga na lolo na tabeke mule sike, ne huriki a hariki na bilane Iordan na tabeke mule puru na darilomu e Galili, ne huriki a hariki ri made na kupona na tabeke na nirolona haro, ne huriki a hariki ri made na lavu tabukoi na tanga e Dor.
JOS 11:3 I talo rike a ngava tabu lakea ne huriki a Kenan ri made tabukoi na naru e Iordan, ne huriki a tara ri made na maka tanga na lolo, re huriki a Amor, a Hiti, a Peres, a Iebus. I talo rike tabu a ngava lakea ne huriki a Hivi ra ri made tabukoi na lolo e Hermon na malala ne huriki a Mispa.
JOS 11:4 E huriki a hariki nga ri longoa a ngava iea, ri valai turane huriki a nugumaheto ne ria. E huriki a nugumaheto ne ria ri ala kupo hateka manga a hire na lavu. A maka hos a karis ne ria ranga i kupo hateka.
JOS 11:5 Ri ru palupu e huriki a tara ne ria, ri vaubi turane huriki a Israel. A mada ne ria ri ratea tabukoi na naru e Merom.
JOS 11:6 Lakea e BAKOVI DAGI i takia e Iosua, “Naha ni mangenge ne ria. Kuduvi na tahuna maea ga tuhori e huriki a Israel ri gi rabalaki e huriki a pile. Mu toloputu a maka vahana hos ne ria, mu rungani a maka karis ne ria.”
JOS 11:7 Na tahuna e huriki a pile ri tababana ni kisi puru a maki na vabinga ne ria, e Iosua turane huriki a nugumaheto vona ri malaviriri kunana ri vakatubu a vabinga ne ria na naru e Merom.
JOS 11:8 E BAKOVI DAGI i tuhori e huriki a Israel ri mulangi na vabinga, ri rangi e huriki a pile. E huriki a Israel ri valili sike ne ria i harena na tanga e Sidon e Misrepot-Maim. Muri ri valili ne ria, ri lakea na tabeke na nirikena haro na maloku ne Mispa. Ri vaubi turane ria, ri vakalobo liu ria.
JOS 11:9 Lakea e Iosua i toloputu a maka vahana hos i rungani a maka karis ne ria, i ramai a ngava i takia e BAKOVI DAGI.
JOS 11:10 Na tahuna iea e Iosua i hamule, i bolea a tanga e Hasor, i rabalakia a hariki vona. E Hasor i matakari a robo lobo nga.
JOS 11:11 E huriki a Israel ri rabalaki lobo e huriki a tahotanga ne Hasor, i uka tara viri ge mahuri. Muri ri rungania a tanga iea.
JOS 11:12 E Iosua i nugutata lobo e huriki a hariki i bole a maka tanga ne ria. I rabalaki lobo e huriki a tahona, i manga a ngava i taki e Moses a vora ne BAKOVI DAGI.
JOS 11:13 Pali e huriki a Israel i uka ma ri rungani a maka tanga ni rata na maka kupona. A tanga i takia e Iosua ni gi rungani kunana e Hasor.
JOS 11:14 E huriki a Israel ri bole lobo a mahala a bulmakau na tanga nga. I uka ma ri togoa tara viri. Ri rabalaki lobo ria.
JOS 11:15 Muga e BAKOVI DAGI i habi a ngava na vora vona e Moses. Muri e Moses i habi ne Iosua a ngava nga, lakea e Iosua i ramai lobo. E Iosua i rata lobo a maki i manga a ngava e BAKOVI DAGI i taki e Moses vona.
JOS 11:16 E Iosua turane huriki a nugumaheto vona ri bole loboa a malala iea, i vakatubu meli i harena tano. Ri bole lobo a maka tabeke na lolo a rihuhu, a maka tabeke lobo ne Negev ne Gosen, a maka kupona na tabeke na nirolona haro, a maloku ne Iordan, ra maka bila a kupona ne Israel.
JOS 11:17 A kilakilana malala iea i tubu na lolo e Alak tabukoi o Idom na tabeke mule puru, i lakea liu na tanga e Bal-Gad na maloku ne Lebanon tabukoi na lolo e Hermon na tabeke mule sike. E Iosua i vaubi tabaka turane huriki a hariki nga, i rabalaki lobo ria.
JOS 11:19 Pali e huriki a Hivi na tanga e Gibeon, ri valongo mai a ngava turane huriki a Israel, ri made turane ria na nivalemu. Pali e huriki na maka tanga ranga, i uka ma ri rata mavonga, lakea e huriki a Israel ri ratapile ria.
JOS 11:20 E BAKOVI DAGI kunana i rata e huriki a pile ri pesi tora na vabinga, lakea e huriki a Israel i uka ma ri dodo ria. E huriki a Israel ri ramai a ngava hosi e BAKOVI DAGI i habia ne Moses, lakea ri vakalobo liu ria.
JOS 11:21 Na tahuna iea e Iosua i vano i ratapilea a kabu ne Anak, ra ri made na maka lolo na tanga e Hebron, e Debir, e Anab na maka tabeke ranga ne Iuda, ne Israel. E Iosua i vakalobo liu e huriki nga, i ratapile a maka tanga ne ria.
JOS 11:22 I uka tara Anak ge made o Israel. Pali i tahoka kunana a viri popote ri made na tanga e Gasa, e Gat, e Asdod.
JOS 11:23 E Iosua i bole loboa a malala iea, i manga a ngava e BAKOVI DAGI i taki e Moses vona. E Iosua i habia ne huriki a Israel ga robo ne ria liu. I ru a nagi na malala iea, i veru tala takutaku na kabu ne Israel. Muri i uka tabu a vabinga vona a malala iea.
JOS 12:1 E huriki a Israel ri mulangi na vabinga, ri bole lobo a maka malala na tabeke na nirikena haro ne Iordan. A harena malala iea i tubu na maloku na naru e Arnon, i lakea na maloku ne Iordan i harena na lolo e Hermon. Muga e huriki a Israel ri rangi a hariki ala rua na vabinga. Ra hariki nga e Sihon e Og.
JOS 12:2 E Sihon a hariki o Amor i made na tanga e Hesbon. A harena robo vona i tubu na tanga e Aroer na harena na maloku ne Arnon, i polo na kurukuruna maloku iea i harena na naru e Iabok. A naru e Iabok i nagi e huriki a Arnon a Amon. Ra malala iea a tabekena robo e Gilead.
JOS 12:3 Na tabeke na nirikena haro na maloku ne Iordan, a nagi i vakatubu na darilomu e Galili, i lakea na tanga e Bet-Iesimot tabukoi na Dari Mate, i puru lakea i harena na taruna lolo e Pisga.
JOS 12:4 E huriki a Israel ri vaubi ne Og a hariki na robo e Basan, ri ratapilea. E Hok a hamone Repaim. Hosi e huriki a Repaim ri ala kupo, pali ngane ri ala popote kunana. E Og i matakari a tanga e Astarot e Edrei,
JOS 12:5 a tabekena lolo e Hermon, a tanga e Saleka a maka tabeke lobo na robo e Basan i harena na nagi ne huriki a Gesur a Makat. I matakari tabu a tabekena robo e Gilead, i harena na nagi na robo ne Sihon a hariki o Hesbon.
JOS 12:6 E Moses turane huriki a Israel ri ratapile a hariki nga ala rua na vabinga. Lakea e Moses a vora ne BAKOVI DAGI i habia a malala iea na kabu ne Reuben, na kabu ne Gad, na kalavana kabu ne Manase.
JOS 12:7 E Iosua turane huriki a Israel ri ratapile lobo e huriki a hariki na maka tanga na tabeke na nirolona haro ne Iordan, i tubu na tanga e Bal-Gad na maloku ne Lebanon, i harena na lolo e Halak tabukoi na robo e Idom.
JOS 12:8 Ri bole a maka tanga na lolo, a tanga na kupona na tabeke na nirolona haro, a maloku ne Iordan, a maka kupona tabukoi o Iordan, a tabeke i ngeki, a robo e Negev na tabeke mule puru. Hosi e huriki a Hiti, a Amor, a Kenan, a Peres, a Hivi, a Iebus ri made vona a malala iea. E huriki a Israel ri rangi e huriki a hariki na tanga nga:
JOS 12:9 e Ieriko, e Ai tabukoi o Betel,
JOS 12:10 e Ierusalem, e Hebron,
JOS 12:11 e Iarmut, e Lakis,
JOS 12:12 e Eklon, e Geser,
JOS 12:13 e Debir, e Geder,
JOS 12:14 e Horma, e Arad,
JOS 12:15 e Lipna, e Adulam,
JOS 12:16 e Makeda, e Betel,
JOS 12:17 e Tapua, e Heper,
JOS 12:18 e Apek, e Lasaron,
JOS 12:19 e Madon, e Hasor,
JOS 12:20 e Simron-Meron, e Aksap,
JOS 12:21 e Tanak, e Megido,
JOS 12:22 e Kedes, e Iokneam na tabeke ne Karmel,
JOS 12:23 e Dor ia o Napat-Dor, e Goim na tanga e Gilgal,
JOS 12:24 e Tirsa. E huriki a Israel ri ratapile e huriki a hariki ala ravulu tolu a polona i taku, ri bole a maka tanga ne ria.
JOS 13:1 Na tahuna e Iosua i kupo a pida vona i gare, e BAKOVI DAGI i takia, “Ioe o gare ngane. Pali i kupo a malala i uka ma o bole ma.
JOS 13:2 Ra malala ne huriki a Palestina, a malala ne huriki a Gesur i tababana:
JOS 13:3 i tubu na naru e Sihor na nirikena haro o Egipto, i lakea na robo e Ekron na tabeke mule sike, ra tabeke iea i matakaria e Kenan; a malala ne huriki a matakari o Palestina ri made o Gasa, o Asdod, o Askelon, o Get, o Ekron; a malala ne huriki a Avim
JOS 13:4 na tabeke mule puru; a malala ne huriki a Kenan; a tanga e Meara na malala ne huriki a Sidon, i lakea na tanga e Apek na nagi na malala ne huriki a Amor;
JOS 13:5 a malala ne huriki a Gebal; a malala lobo ne Lebanon i tubu na tabeke na nirikena haro na tanga e Bal-Gad, tabukoi na lolo e Hermon, i harena na dala lakea o Hamat;
JOS 13:6 a malala ne huriki e Sidon ri made na maka tanga na kurukuruna maka lolo ne Lebanon; a tanga e Misrepot-Maim. Iau kunana ga lili tala a kabu nga, o bole a malala ne ria, o veru na maka kabu ne Israel, ge ne ria liu. O ramai a ngava a taki.
JOS 13:7 O verua ra malala nga na kabu i polova turana a kalavana kabu ne Manase, ri gi bole, ge ne ria liu.”
JOS 13:8 A kabu ne Reuben, ne Gad, a kalavana kabu ne Manase, ri bole a malala na tabeke na nirikena haro na naru e Iordan. E Moses a vora ne BAKOVI DAGI i habi ne ria pali.
JOS 13:9 A malala ne ria i tubu na tanga e Aroer na harena maloku na naru e Arnon, i lakea mai a tanga i pesi na kurukuruna maloku iea. Ra malala iea i bole loboa a bilane Medeba i harena na tanga e Dibon.
JOS 13:10 Ri bole lobo a maka tanga ne Sihon, a hariki ne huriki a Amor. Hosi e Sihon i made na tanga e Hesbon, i matakari a maka tanga i harena na nagi ne huriki a Amon.
JOS 13:11 Ri bole tabua a malala ne huriki a Gilead, a tabeke ne huriki a Gesur a Makat, a tabeke na lolo e Hermon, a tabeke na robo e Basan i harena na tanga e Saleka,
JOS 13:12 a malala lobo i matakari e Og na tahuna i matakari e Astarot e Edrei. E Og a hamone Repaim, ia a iku ne huriki a hariki lobo e Moses i rangi, i lili tala na vabinga.
JOS 13:13 Pali e huriki a Israel i uka ma ri lili e huriki a Gesur a Makat. Ri tababana ni made turane ria i harena mona.
JOS 13:14 Pali e Moses i uka ma i habia na kabu ne Levi tara tabekena malala. A maka nihabi ne huriki ri habi ne BAKOVI DAGI a Vure ne Israel, e huriki a Levi ri bole, i ramaia a nitane BAKOVI DAGI.
JOS 13:15 E Moses i habi a tabekena malala na kabu takutaku ne Reuben, ri bole ne vone ria liu.
JOS 13:16 A nagi na malala ne ria i tubu na tanga e Aroer na harena maloku ne Arnon, i lokovonga na tanga i pesi na kurukuruna maloku iea. Ra tabekena malala iea i bole loboa a bilane Medeba.
JOS 13:17 Muri a nagi i lakea na tanga e Hesbon i lokovonga i bele na maka tanga na bila: e Dibon, e Bamot-Bal, e Bet Bal-Meon,
JOS 13:18 e Iahas, e Kedemot, e Mepat,
JOS 13:19 e Kiriataim, e Sipma, e Seret-Sahar ra tanga i pesi na kupona na bila,
JOS 13:20 e Bet-Peor turana a maka tanga na gagana lolo e Pisga e Bet-Iesimot,
JOS 13:21 turana a maka tanga ranga na bila. Ra tanga nga, ne vona e huriki a Amor, hosi i matakari a hariki e Sihon, ra hariki na tanga e Hesbon. E Moses i rangia na vabinga, muri i rangi tabu e huriki a matakari ne huriki a Midian, a Evi, a Rekem, a Sur, a Hur, a Reba. Re huriki a matakari nga ri made vona a malala iea, lakea a hariki e Sihon i habi a leho ne ria ri matakari a tabekena malala ne ria takutaku.
JOS 13:22 E Balam e tune Beor a bakovi na lohokanga na maki ge bele muri ma, ia tara e huriki a Israel ri rabalakia.
JOS 13:23 A naru e Iordan i nagia a malala na kabu ne Reuben. Ri bolea a malala ri vaveru, a malala ne ria liu.
JOS 13:24 E Moses i veru tabua a tabekena malala iea na kabu ne Gad, ri bole a malala ne ria liu.
JOS 13:25 I habia ne ria a maka tanga na robo e Iaser turana a maka tanga na robo e Gilead, a malala ne huriki a Amon i harena na tanga e Aroer pololilo na malala ne huriki a Amor, tabukoi na tanga e Raba na tabeke na nirikena haro.
JOS 13:26 Ra malala iea i tubu na tanga e Hesbon, i harena na tanga e Ramat-Mispe e Betonim. I tubu tabu na tanga e Mahanaim i harena na nagi na tanga e Debir.
JOS 13:27 Ri bole tabu a tanga nga na maloku ne Iordan: e Bet-Haram, e Bet-Nimra, e Sukot, e Sapon, a tabekena malala na hariki e Sihon na tanga e Hesbon. A nagi na malala ne huriki a Gad i tubu na naru e Iordan, i lakea na nirikena haro, i sike lakea i harena na darilomu e Galili.
JOS 13:28 Ra maka tanga nga, e huriki a hamone Gad ri bole ne vone ria liu.
JOS 13:29 E Moses i habi tabua na hamona kalavana kabu ne Manase tara tabekena malala, ri bolea a malala ne ria liu.
JOS 13:30 A malala i tubu na tanga e Mahanaim i bole loboa a tabeke ne Basan, hosi e Og a hariki o Basan i matakaria. E huriki a Manase ri bole tabu a tanga i ravulu polotara ne huriki a Iair na robo e Basan.
JOS 13:31 Ra malala iea i dili turana a tabeke na robo e Gilead, e Astarot, e Edrei ra tanga i made vona a hariki e Og. E Moses i habia a malala iea na kalavana kabu ne Makir, e tune Manase.
JOS 13:32 E Moses i veru na kabu nga a malala na gagane Iordan na tabeke na nirikena haro na tanga e Ieriko, na tahuna ri made na bilane Moab.
JOS 13:33 Pali e Moses i uka ma i habi ne huriki a hamone Levi ranga malala. E BAKOVI DAGI a Vure ne Israel, ia kunana a maki kamumu ri bolea, i manga a ngava i ta muholi vona pali.
JOS 14:1 Iea a nuverei na maka tabekena malala na kabu takutaku ne Israel ri bole pololilo ne Kenan. Na tahuna e huriki a Israel ri tababana ni made na tabeke na nirikena haro na naru e Iordan, e Moses i habi a tabekena malala na kabu i rua turana a kalavana kabu tara ne Israel. Pali e Moses i uka ma i habia na kabu ne Levi tara tabekena malala. Ngane e huriki a Israel ri bele pali na malala e Kenan na tabeke na nirolona haro na naru e Iordan. Lakea e prister Eleasar, e Iosua e tune Nun, turane huriki a matakari na kabu takutaku ne Israel, ri ramai a ngava ne BAKOVI DAGI i ratea ne Moses. Ri rehi na rihiva na satu, ri veru ne huriki a kabu i polova turana a kalavana kabu tara ne ria a malala.
JOS 14:4 Na tahuna ri veru a malala, ri kalipida na kabu i rua e huriki a hamone Iosep, a kabu ne Manase, a kabu ne Epraim. Lakea i uka ma ri habia na kabu ne Levi tara tabekena malala. A kabu ne Levi i bole kunana ranga tanga. Ra tanga nga ri tahoka a tabekena malala ni vakani a bulmakau a sipsip vona.
JOS 14:5 E huriki a Israel ri ramai a ngava e BAKOVI DAGI i taki e Moses vona, ri vaveru vona a malala e Kenan.
JOS 14:6 I ranga bakovi ne Iuda ri bele ne Iosua o Gilgal. Lakea e Keleb e tune Iepune na kabu ne Kenas i takia e Iosua i ta maea, “Na tahuna si made o Kades-Barnea, e BAKOVI DAGI i takia e Moses a vora vona na maki ge ratea ne tarua. O lohoka vona a maki i takia.
JOS 14:7 Na tahuna iea a tahoka a pida i ravulu va, lakea e Moses a vora ne BAKOVI DAGI i rudu iau a vano a kasisia ra robo iea. A lokovonga, muri a hamule, a vakalongo e Moses na maka maki a matai, i uka ma a tamia.
JOS 14:8 Pali e huriki ri vano turagu ri rata tebi a ngava, lakea i rata e huriki ri mangenge. Pali iau a ramai kamumu a nitane BAKOVI DAGI, a Vure ne hita.
JOS 14:9 Lakea e Moses i ratea nau tara nita muholi, i ta maea, ‘O ramai kamumua na hatemu e BAKOVI DAGI a Vure nau, i mavonga ioe turane huriki e tumu bara mu bolea ra tabekena malala o laho vona.’”
JOS 14:10 “E huriki a Israel ri tababana ni made na tabeke i ngeki, e BAKOVI DAGI i taki e Moses vona ngava iea. A pida i ravulu va a polona i lima i lobo pali. E BAKOVI DAGI i tuhori iau a tababana ni mahuri, manga a ngava i ta muholi vona ne Moses. Ngane a tahoka a pida i ravulu polotolu a polona i lima.
JOS 14:11 Pali a tababana ni gao i manga hosi na tahuna e Moses i rudu iau a kasisia a robo iea. A tuhagu i tababana a kara ni vano ni vaubi.
JOS 14:12 Ngane o habia nau a malala iea na lolo, e BAKOVI DAGI i takia na tahuna a vakalongo a maki a matai. O longo iau a vakalongo ioe vona e huriki a bakovi hateka ne Anak ri made vona a hini nga, na maka tanga ni tura halui na nure i tora hateka. Pali ge BAKOVI DAGI i made turagu, bara lili tala e huriki a bakovi nga, i manga a ngava e BAKOVI DAGI i taki pali.”
JOS 14:13 E Iosua i longoa a ngava iea i nanea e BAKOVI DAGI ge rata kamumua e Keleb e tune Iepune, lakea e Iosua i habia vona a tanga e Hebron.
JOS 14:14 E Keleb i ramai kamumu a nitane BAKOVI DAGI a Vure ne Israel. I mavonga, e Hebron i tabuli liu a malala ne huriki a hamone Keleb, e tune Iepune, a kabune Kenas.
JOS 14:15 Hosi a rana e Hebron e Kiriat-Arba. E Arba a bakovi hateka ne huriki a Anak. Muri ne Keleb i bolea pali a malala, ri made na nivalemu e huriki, i uka tabu a vabinga.
JOS 15:1 A kabu ne Iuda i bolea a malala ni vulaki ge ne huriki a hamone Iuda. A nagi na malala ne huriki a Iuda i puru lakea i harena na robo e Idom, i lokovonga liu na tabeke i ngeki ne Sin.
JOS 15:2 Ra nagi iea i tubu na harena Dari Mate na tabeke mule puru,
JOS 15:3 i vano i polotaroa a dala i sike na lolo e Akrabim i lakea na tabeke i ngeki ne Sin. A nagi i puru lokovonga liu na tabeke tano ne Kades-Barnea, i vano i polotaroa a tanga e Hesron, i lokovonga i bele na tanga e Adar. Muri a nagi i kaogo lakea na tanga e Karka,
JOS 15:4 i vano i bele na tanga e Asmon, i ramaia a naru kiroko na nagi ne Egipto, i lokovonga i harena na Dari na Kurukuruna Malala. A nagi ne huriki a Iuda na tabeke mule puru i lobo vona a hini nga.
JOS 15:5 A nagi na malala na nirikena haro, ra Dari Mate, i vano i harena na ngutuna naru e Iordan. A nagi na tabeke mule sike i tubu na Dari Mate na ngutune Iordan,
JOS 15:6 i lakea na tanga e Bet-Hogla, i sike lokovonga na tanga e Bet-Araba, i lokovonga na hini i tabuli vona a kedo dagi e Bohan. Ra kedo iea ni vunu ramai e tune Reuben bakovi.
JOS 15:7 I tubu na maloku ne Akor, a nagi i lakea mai a tanga e Debir, muri i sike i kaogo, i lakea na tanga e Gilgal. Na tahuna o pesi o Gilgal bara o masia a bala ni ramai i sike na lolo na tanga e Adumim, na tabeke mule puru na maloku. A nagi i lakea mai a lomu ne En-Semes, i lokovonga, i polotaroa a lomu ne En-Rogel.
JOS 15:8 Muri a nagi i ramai a maloku ne tune Hinom bakovi na tabeke mule puru na tanga e Iebus, re Ierusalem. A nagi i sike maia a lolo, i pesi na harena maloku na Hinom na tabeke na nirolona haro. Ra lolo iea i pesi mule sike na robo ne huriki a Repaim.
JOS 15:9 A nagi i lakea mai a lomu ne Neptoa, i vano i bele na maka tanga tabukoi na lolo e Epron. A nagi i kaogo vonga, i lakea mai a tanga e Bala, a rana tara e Kiriat-Iearim.
JOS 15:10 Muri a nagi i kaogo lakea na tabeke na nirolona haro, i vano i bele na lolo e Seir, i sike na lolo e Iearim, a rana tara e Kesalon. A nagi i puru lakea na tanga e Bet-Semes i vano i polotaroa a tanga e Timna.
JOS 15:11 Muri a nagi i lakea mai a lolo i pesi na tabeke mule sike na tanga e Ekron, i kaogo lakea na tanga e Sikeron, i polotaroa a lolo e Bala, i bele na tanga e Iapnel. Ra nagi iea i harena na dari.
JOS 15:12 A nagi na malala ne huriki a Iuda na tabeke na nirolona haro, ra Dari na Kurukuruna Malala. E huriki a hamone Iuda ri made pololilo vona a nagi iea.
JOS 15:13 Hosi e BAKOVI DAGI i takia e Iosua ge habia ne Keleb e tune Iepune a tabekena malala tara ne huriki a Iuda. E Iosua i ramaia a ngava ne BAKOVI DAGI i habia ne Keleb a tanga e Hebron, a rana tara e Kiriat-Arba. E Arba a hamone Anak.
JOS 15:14 I vonga o Hebron, e Keleb i lili tala a kabu ne Anak i tolu: e Sesai, e Ahiman, e Talmai.
JOS 15:15 Muri e Keleb i pea a tanga iea, i vano i vaubi ne huriki na tanga e Debir. Muga ni gale a tanga iea e Kiriat-Seper.
JOS 15:16 Lakea e Keleb i ta maea, “A bakovi i vaubi i bolea e Kiriat-Seper na vabinga, ge parangi vona e Aksa, e tugu a ngatavine.”
JOS 15:17 Lakea e Otniel, e tune Kenas a bakovi, e turane Keleb i bolea a tanga iea. Muri e Keleb i habia vona e Aksa, i parangi vona.
JOS 15:18 Na tahuna e Aksa i valai ne Otniel, e Aksa i ta tora ne Otniel ge nanea e Keleb, ge habia vona tara tabekena malala. Muri e Aksa i vano i masia e Keleb. Na tahuna e Aksa i page puru na donki vona e Keleb i nanea, “A ra o ngarua?”
JOS 15:19 Lakea e Aksa i takia e tamana i ta maea, “A ngaru ioe go habi tavulea nau tara maki. O habia nau pali a malala pololilo ne Negev na tabeke mule puru, pali i uka naru vona. Ngane o habi nau ranga lomu.” Lakea e Keleb i habi vona a lomu mule sike, a lomu mule puru.
JOS 15:20 E huriki a hamone Iuda ri bole a malala nga ge ne ria. A kabu i taku i bolea vona a tabekena malala.
JOS 15:21 Na tabeke mule puru ne Negev na nagi ne Idom, e huriki a hamone Iuda ri bole a tanga nga: e Kapsel, e Eder, e Iagur,
JOS 15:22 e Kina, e Dimona, e Adada,
JOS 15:23 e Kedes, e Hasor, e Itnan,
JOS 15:24 e Sip, e Telem, e Bealot,
JOS 15:25 e Hasor-Hadata, e Keriot-Herson a rana tara e Hasor,
JOS 15:26 e Amam, e Sema, e Molada,
JOS 15:27 e Hasar-Gada, e Hesmon, e Bet-Pelet,
JOS 15:28 e Hasar-Sual, e Bersiba, e Bisiotia,
JOS 15:29 e Bala, e Im, e Esem,
JOS 15:30 e Eltolad, e Kesil, e Horma,
JOS 15:31 e Siklak, e Matmana, e Sansana,
JOS 15:32 e Lebaot, e Silhim, e Ain, e Rimon. Ra maka tanga dagi turana a maka tanga kiroko, na tabeke iea, ni gi palupu i ravulu rua a polona i polova.
JOS 15:33 Na tabeke na nirolona haro na bila, a tanga ra nga: e Estaol, e Sora, e Asna,
JOS 15:34 e Sanoa, e En-Ganim, e Tapua, e Enam,
JOS 15:35 e Iarmut, e Adulam, e Soko, e Aseka,
JOS 15:36 e Saraim, e Aditaim, e Gedera (a rana tara Gederotaim). A tabeke iea i tahoka a maka tanga dagi turana a maka tanga kiroko i ravulu a polona i va.
JOS 15:37 A maka tanga ri pesi na tabeke na vahana lolo: e Senan, e Hadasa, e Migdal-Gad,
JOS 15:38 e Dilean, e Mispa, e Ioktel,
JOS 15:39 e Lakis, e Boskat, e Eklon,
JOS 15:40 e Kabon, e Lamas, e Kitlis,
JOS 15:41 e Gederot, e Bet-Dagon, e Nama, e Makeda. A tabeke iea i tahoka a maka tanga dagi turana a maka tanga kiroko i ravulu a polona i polotara.
JOS 15:42 A tabeke na kurukuruna vahana lolo a tanga ra nga: e Lipna, e Eter, e Asan,
JOS 15:43 e Ipta, e Asna, e Nesip,
JOS 15:44 e Keila, e Aksib, e Maresa. A tabeke iea i tahoka a maka tanga dagi i polova turana a maka tanga kiroko ri pesi tabukoi ne ria.
JOS 15:45 A tabeke tabukoi na dari a tanga ra nga: e Ekron turana a maka tanga kiroko,
JOS 15:46 a maka tanga dagi a tanga kiroko ri pesi tabukoi ne Asdod, i tubu o Ekron i lakea na nirolona haro na dari na Kurukuruna Malala.
JOS 15:47 E Asdod e Gasa turana a maka tanga dagi a tanga kiroko ri pesi tabukoi ne rua, i vano i harena na naru kiroko e Vadi, na nagi ne Egipto na tabeke mule puru, i vano i harena na Dari na Kurukuruna Malala, na nirolona haro.
JOS 15:48 Na tabeke na kupona tanga ra nga. e Samir, e Iatir, e Soko,
JOS 15:49 e Dana, e Kiriat-Sana, a rana tara e Debir,
JOS 15:50 e Anab, e Estemoa, e Anim,
JOS 15:51 e Gosen, e Holon, e Gilo. A robo iea i tahoka a maka tanga dagi i ravulu a polona i taku, turana a maka tanga kiroko ri pesi tabukoi ne ria.
JOS 15:52 A maka tanga ri pesi na kupona ne Iuda ra nga: e Arab, e Duma, e Esan,
JOS 15:53 e Ianim, e Bet-Tapua, e Apeka,
JOS 15:54 e Humta, e Kiriat-Araba, a rana tara e Hebron, e Sior. A tabeke iea i tahoka a tanga dagi i polova, turana a maka tanga kiroko ri pesi tabukoi ne ria.
JOS 15:55 A maka tanga ri pesi na tabeke tano na kupona ra nga: E Maon, e Karmel, e Sip, e Iuta,
JOS 15:56 e Iesril, e Iokdeam, e Sanoa,
JOS 15:57 e Kain, e Gibea, e Timna. A robo iea i tahoka a maka tanga dagi i ravulu, turana a maka tanga kiroko ri pesi tabukoi ne ria.
JOS 15:58 A maka tanga ri pesi na kurukuruna kupona ne Iuda ra nga: e Halhul, e Bet-Sur, e Gedor,
JOS 15:59 e Marat, e Bet-Anot, e Eltekon. A robo iea i tahoka a maka tanga dagi i polotara, turana a maka tanga kiroko ri pesi tabukoi ne ria.
JOS 15:60 A tanga ru pesi na tabeke tara na kupona ra nga: e Kiriat-Bal, a rana tara e Kiriat-Iearim, e Raba. Ra tabeke iea i tahoka a tanga dagi i rua, turana a maka tanga kiroko.
JOS 15:61 A maka tanga ri pesi na tabeke i ngeki ra nga: e Bet-Araba, e Midin, e Sekaka,
JOS 15:62 e Nibsan, e Tanga-Mami, e En-Gedi. Ra tabeke iea i tahoka a tanga dagi i polotara, turana a maka tanga kiroko.
JOS 15:63 Pali e huriki a Iuda i uka ma ri kara ni lili tala e huriki a Iebus, ra ri made o Ierusalem. E huriki a Iebus ri made turane huriki a Iuda i valai i harena mona.
JOS 16:1 A kabu ne Manase ne Epraim rua a hamone Iosep. A nagi na malala ni habi ne huriki a hamone Iosep i tubu na tabeke na nirikena haro na lomu ne Ieriko tabukoi na naru e Iordan. Muri i vano i polotaroa a tabeke i ngeki i lokovonga na maka lolo i harena na tanga e Betel. I tubu o Betel, re Lus, a nagi i lakea na tanga e Atarot-Adar, ra tanga i made vona e huriki a Arka. Muri a nagi i lakea na nirolona haro i bele na tabeke ne huriki a Iaplet, i lokovonga liu na tanga e Bet-Horon na maloku. Muri a nagi i lakea mai a tanga e Geser, i vano i bele na Dari na Kurukuruna Malala.
JOS 16:5 A nagi na malala na kabu ne Epraim i tubu na tanga e Atarot-Adar na tabeke na nirikena haro, i vano i harena na tanga e Bet-Horon.
JOS 16:6 A nagi i vano i bele na Dari na Kurukuruna Malala. A tanga e Mikmeta i pesi mule sike na malala ne ria. Na tabeke na nirikena haro a nagi i kaogo na tanga e Tanat-Silo, i lakea mai a nirikena haro i harena na tanga e Ianoa.
JOS 16:7 Muri a nagi i puru lakea na tanga e Atarot e Nara, i vano i bele na tanga e Ieriko. Muri i lokovonga liu i harena na naru e Iordan.
JOS 16:8 A nagi i tubu tabu na tanga e Tapua, i lakea mai a nirolona haro i bele na naru e Kana, i vano i harena na Dari na Kurukuruna Malala, ni veru na kabu takutaku ne Epraim.
JOS 16:9 Ra malala iea turana a maka tanga dagi, a tanga kiroko ri pesi tabukoi ne ria ni habi na kabu ne Epraim. I ranga Epraim ri made turana a kabu ne Manase na tanga dagi, na tanga kiroko ne ria.
JOS 16:10 Pali e huriki a Epraim i uka ma ri lili tala e huriki a Kenan ri made na tanga e Geser. Ngane e huriki a Kenan ri tababana ni made turane ria, lakea e huriki a Epraim ri vakavora ria na leho.
JOS 17:1 A tabekena malala tara ni habi na kabu ne Manase, e tune Iosep a tabua. E tune Manase a tabua e Makir, e tamane Gilead. E Makir a bakovi hateka na vabinga, lakea ni vakasiri vona a tabekena malala e Gilead e Basan, ge ne vona e huriki a kabu vona.
JOS 17:2 E huriki a hamone Manase e tune Iosep, a rane ria ra nga: e Abieser, e Helek, e Asriel, e Sekem, e Heper, e Semida. E huriki a Israel ri habi ne huriki a Manase ra malala i tabuli na tabekena nirolona haro ne Iordan.
JOS 17:3 E Selopehad e tune Heper, e Heper e tune Gilead, e Gilead e tune Makir, e Makir e tune Manase. Pali e Selopehad i uka e tuna bakovi. I tahoka kunana e huriki e tuna ngatavine. A rane ria ra nga: e Mala, e Noa, e Hoglah, e Milka, e Tirsa.
JOS 17:4 Ra ngatavine nga ri vano, ri matai a prister e Eleasar turane Iosua e tune Nun, e huriki a matakari, ri taki ria, “E BAKOVI DAGI i vakukua e Moses ge habia na kabu ne mia tara tabekena malala.” Lakea ri habia ne ria a malala, ge manga ne huriki a turane ria a bakovi.
JOS 17:5 I mavonga e huriki a hamone Manase ri bole a tabekena malala i ravulu, na nirolona haro ne Iordan, turana a tabeke i rua tabu ne Gilead ne Basan,
JOS 17:6 a vuhuna e huriki a Israel ri habi a malala ne huriki e tune Selopehad a ngatavine. I ranga hamone Manase ri bolea a malala ne Gilead ne Basan na tabeke na nirikena haro ne Iordan.
JOS 17:7 A nagina malala na kabu ne Manase i tubu na malala na kabu ne Aser na tabeke mule sike, i vano i bele na tanga e Mikmeta, na tabeke na nirikena haro na tanga e Sekem. A nagi i puru lakea na tanga ne huriki a En-Tapua.
JOS 17:8 A malala na tanga e Tapua ne vona a kabu ne Manase. A tanga e Tapua i pesi na nagi na kabu ne Manase, pali e Tapua a tanga ne huriki a kabu ne Epraim.
JOS 17:9 A nagi i puru na naru kiroko e Kana. A maka tanga ri pesi mule puru na naru iea, ne vona a kabu ne Epraim. Ra tanga nga ri pesi na kurukuruna maka tanga ne huriki a Manase. A nagi na kabu ne Manase i tabuli mule sike na naru e Kana, i vano i bele na Dari na Kurukuruna Malala.
JOS 17:10 A malala i tabuli mule puru na naru e Kana, ne vona e huriki a Epraim. A malala i tabuli mule sike, ne vona e huriki a Manase. Na tabeke na nirolona haro, a Dari na Kurukuruna Malala i tabuli manga a nagi ne ria. Na tabeke mule sike, a nagine huriki a Manase i vano i harena na malala ne huriki a Aser na tabeke na nirolona haro, na malala ne huriki a Isikar na nirikena haro.
JOS 17:11 Pololilo na malala ne huriki a Isikar a Aser, e huriki a Manase ri bole a maka tanga nga: e Bet-San turana a maka tanga ri pesi tabukoi vona, e Napat-Dor, e Endor, e Tanka, e Megido turana a maka tanga ri pesi tabukoi ne ria.
JOS 17:12 Pali e huriki a Manase ri keri ni lili tala e huriki a Kenan ri made vona a maka tanga nga. E huriki a Kenan ri tababana ni made vonga.
JOS 17:13 Pali na tahuna e huriki a Israel ri kinigao hateka, ri rata e huriki a Kenan ri leho manga a vorakato, pali i uka ma ri lili tala lobo ria.
JOS 17:14 Muri e huriki a hamone Iosep ri vano ri takia e Iosua, “I navai o habia ne mia a tabekena malala i taku kunana? Ra malala iea i uka ma i kara mia, a vuhuna e BAKOVI DAGI i rata kamumu mia, mi bele kupo.”
JOS 17:15 Lakea e Iosua i koli i ta maea, “A malala ne Epraim na lolo i uka ma i kara mua, mu lakea na kururobo ne huriki a Peres a Repaim, mu tolo puru a hini mu made vona.”
JOS 17:16 Lakea e huriki a hamone Iosep ri ta maea, “A tabekena lolo i uka ma i kara mia, pali mia bara mi ngaru ni bolena a bila, i uka ma mi kara, a vuhuna re huriki a Kenan ri made na tanga e Bet-San na maka tanga tabukoi vona, na maloku na tanga e Iesril, ri tahoka a maka karis na vabinga ni rata na aen.”
JOS 17:17 Lakea e Iosua i taki e huriki a hamone Epraim e Manase, “Muholi hateka, mu ala kupo mu gao hateka. A tabekena malala i taku i uka ma i kara mua. Ge mavonga, mu bole tabu ranga tabekena malala.
JOS 17:18 Ngane bara mu bole tabu a maka malala na kupona. Muholi ngi a kururobo, bara mu tolo lava mu bole, ge ne mua liu. E huriki a Kenan na tabeke iea ri gao ri tahoka a maka karis ni rata na aen, pali bara mu lili tala ria.
JOS 18:1 E huriki a Israel ri vaubi ri bole lobo pali a maka tanga, muri ri vano ri vapopo na tanga e Silo, ri vakapesia vonga a Kape na Vaponga.
JOS 18:2 Pali a kabu i polorua ri tababana ni bole a tabekena malala ne ria.
JOS 18:3 Lakea e Iosua i taki e huriki a Israel i ta maea, “E BAKOVI DAGI a Vure ne huriki a gare ne mua i habia ne mua a malala iea, pali i navai mu dava tabaka hateka, mu gu bole a tabekena malala ne mua?
JOS 18:4 Mu vulaki a bakovi ge ala tolu na kabu takutaku, ga rudu lakea ria na maka tabekena malala lobo, ri gi nagi tala a malala ri ngaru ni bole. Muri ri gi hamule valai tabu nau.
JOS 18:5 Ri gi nagi a tabekena malala ge polorua. A kabu ne Iuda ge made na tabeke mule puru, a kabu ne Iosep ge made na tabeke mule sike.
JOS 18:6 Mu here a nitana maka tabekena malala nga, mu bole valai. Muri ga rehi na rihiva na satu na matane BAKOVI DAGI a Vure ne hita, ga matakilaka vona i vai a tabekena malala ge habi ne mua.
JOS 18:7 Pali a kabu ne Levi ge leho manga a prister ne BAKOVI DAGI, lakea i uka ma ge bole a tabekena malala. A kabu ne Gad ne Reuben turana a kalavana kabu ne Manase, to bole pali a malala ne tou na tabeke na nirikena haro ne Iordan, re Moses a vora ne BAKOVI DAGI i habi ne tou.”
JOS 18:8 E Iosua i taki e huriki a bakovi ri gi here puru a nitana malala, i ta maea, “Mu vano mu kasisi lobo a maka tabekena malala, mu here puru a nitana, mu bole valai nau. Ga rehi na rihiva na satu, ga lohoka vona i vai a tabekena malala e BAKOVI DAGI ge habi ne mua.”
JOS 18:9 E huriki a bakovi nga ri longoa pali a nitane Iosua, ri vano ri kasisi a maka tabeke lobo, ri here puru a maki ri matai na puhu tara. Ri nagi a tabekena malala i polorua, ri here puru a maka rana tanga ri tabuli pololilo ne ria. Muri ri hamule mai e Iosua na mada o Silo.
JOS 18:10 E Iosua i rehi na rihiva na satu na tanga e Silo, ge lohoka vona i vai a tabekena malala ge habi na kabu takutaku. Muri i verua a malala i habia ne ria.
JOS 18:11 A Kabu ne Bensamin i bole a malala na kurukuruna kabu ne Iuda a kabu ne Iosep.
JOS 18:12 Na tabeke mule sike a tabekena malala ne ria, a nagi i tubu na naru e Iordan i sike mai a kupona na tabeke mule sike na tanga e Ieriko. A nagi i kaogo vonga i lakea mai a tabeke na nirolona haro i lokovonga liu na tabeke i ngeki ne Bet-Aven.
JOS 18:13 Muri a nagi i lakea mai a tabeke mule puru na kupona na tanga e Lus (re Betel), i puru mai a tanga e Atarot-Adar, i pesi na mapana lolo tabukoi na tanga e Bet-Horon.
JOS 18:14 A nagi i kaogo vonga i lakea mai a tabeke tara na nirolona haro na lolo na tabeke ne Bet-Horon. A nagi i puru lakea i vano i bele na tanga e Kiriat-Bal (re Kiriat-Iearim). Ra tanga iea ne vona e huriki a Iuda na tabeke na nirolona haro.
JOS 18:15 A nagi na tabeke mule puru i tubu tabukoi o Kiriat-Iearim, i lakea mai a nirolona haro i bele na lomu e Neptoa.
JOS 18:16 A nagi i ramai puru a vahana lolo na tabeke mule sike na maloku ne Repaim, na hini i tubu vona a maloku ne Hinom. I tubu tabu vonga i puru lakea, i padi­kudua a maloku ne Hinom, i lakea mai a rihuhu na tabeke mule puru na tanga ne huriki a Iebus. Muri i lokovonga mai a lomu ne En-Rogel.
JOS 18:17 A nagi i sike lakea na lomu ne huriki a En-Semes i lakea mai a tanga e Gelilot. A viri i pesi vonga bara i masia a bala i sike mai a lolo na tanga e Adumim. A nagi i puru mai a kedo dagi ne Bohan, ra kedo iea ni vunu ramai e tune Reuben bakovi.
JOS 18:18 A nagi i ramai a rihuhu i sike na lolo ne Bet-Araba, muri i lakea mai e Araba.
JOS 18:19 I malaparu vonga tabu i sike lakea na kupona ne huriki a Bet-Hogla, i vano i bele na Dari Mate na ngutuna a naru e Iordan. Ra nagi iea, a nagi na malala ne Bensamin na tabeke mule puru.
JOS 18:20 A nagi na tabeke na nirikena haro i ramai a naru e Iordan. Ra nagi nga, a nagi na tabekena malala na kabu e Bensamin.
JOS 18:21 A maka tanga dagi i ravulu a polona i rua, turana maka tanga kiroko ri pesi tabukoi ne ria, ne vona a kabu ne Bensamin. A rana maka tanga ra nga: e Ieriko, e Bet-Hogla, e Emek-Kesis, e Bet-Araba, e Semaraim, e Betel, e Avim, e Para, e Opra, e Kepar-Amoni, e Opni, e Geba.
JOS 18:25 I tahoka tabu ranga tanga dagi i ravulu a polona i va, turana a maka tanga kiroko ri pesi tabukoi ne ria ne vona a kabu ne Bensamin. A rana maka tanga ra nga: e Gibeon, e Rama, e Berot, e Mispa, e Kepira, e Mosa, e Rekem, e Irpel, e Tarala, e Sela, e Haelep, a tanga ne huriki a Iebus re Ierusalem, e Gibea, e Kiriat-Iearim.
JOS 19:1 A ruana rihiva na satu na malala i boru langa na kabu ne Simion. Ra malala iea i tabuli na kurukuruna malala ne huriki a Iuda. A maka tanga a kabu ne Simion i bole ra nga: e Bersiba, e Molada, e Hasar-Sual, e Bala, e Esem, e Eltolad, e Betul, e Horma, e Siklak, e Bet-Markabot, e Hasar-Susa, e Bet-Lebaot, e Saruhen. Ri bole a maka tanga i ravulu a polona i tolu, turana a maka tanga ri pesi tabukoi ne ria.
JOS 19:7 Ri bole tabu a tanga e Ain, e Rimon, e Eter, e Asan, turana a maka tanga ri pesi tabukoi ne ria.
JOS 19:8 E huriki na kabu ne Simion ri bole a maka tanga dagi, turana a maka tanga kiroko ri pesi tabukoi ne ria, i vano i harena na tanga e Balat-Ber re Rama, na tabeke mule puru ne Negev.
JOS 19:9 A malala ne huriki a kabu ne Simion i tabuli na kurukuruna malala ne huriki a Iuda. A malala ni habi ne huriki a Iuda i dagi hateka, lakea e huriki na kabu ne Simion ri bole ranga tabekena.
JOS 19:10 A toluna rihiva na satu na malala i boru langa na kabu ne Sebulun. A nagi na malala ri bolea i harena na tanga e Sarid.
JOS 19:11 A nagi i lakea na tabeke na nirolona haro, i harena na tanga e Mareal i lokovonga tabukoi na tanga e Dabeset, i lokovonga na naru kiroko na nirikena haro na tanga e Iokne-Am.
JOS 19:12 Na tabeke mule lokovonga na tanga e Sarid, a nagi i lakea mai a harena a tanga e Kislot-Tabor na tabeke na nirikena haro, i vano i harena na tanga e Daberat, i sike lakea na tanga e Iapia.
JOS 19:13 A nagi i lokovonga liu na tabeke na nirikena haro i bele na tanga e Gat-Heper e Et-Kasin, i kaogo vonga i lakea na tabeke e Nea, na dala lakea na tanga e Rimon.
JOS 19:14 Na tabeke mule sike a nagi i kaogo lakea na tabeke na tanga e Hanaton, i vano i bele na maloku ne Ipta-El.
JOS 19:15 A maka tanga i bole e huriki a Israel ra nga: e Katat, e Nahala, e Simron, e Idala, e Betlehem. A maka tanga dagi e huriki na kabu ne Sebulun ri bole i ravulu a polona i rua, turana a maka tanga kiroko tabukoi ne ria.
JOS 19:17 A vana rihiva na satu i boru langa na kabu ne Isikar.
JOS 19:18 A tanga i bole a kabu ne Isikar ra nga: e Iesril, e Kesulot, e Sunem,
JOS 19:19 e Haparaim, e Sion, e Anaharat,
JOS 19:20 e Rabit, e Kision, e Ebes,
JOS 19:21 e Remet, e En-Ganim, e En-Hada, e Bet-Pases.
JOS 19:22 A nagi na malala i bolea a kabu ne Isikar i vano i bele na lolo e Tabor na tanga e Sahasuma e Bet-Semes, i vano i harena na naru e Iordan. E huriki a Isikar ri bole a tanga dagi i ravulu a polona i polotara, turana a maka tanga kiroko ri pesi tabukoi ne ria.
JOS 19:24 A limana rihiva na satu i boru langa na kabu ne Aser.
JOS 19:25 A maka rana tanga i bole e huriki a Aser ra nga: e Helkat, e Hali, e Beten, e Aksap,
JOS 19:26 e Alamelek, e Amad, e Misal. Na tabeke na nirolona haro a nagi na malala na kabu ne Aser i bele tabukoi na tanga e Karmel e Sihor-Libnat.
JOS 19:27 A nagi i kaogo lakea na tabeke na nirikena haro i bele na tanga e Bet-Dagon, i lokovonga tabukoi na malala na kabu ne Sebulun na maloku ne Ipta-El, i sike lakea na tanga e Bet-Emek e Neiel. A nagi i sike lokovonga na tanga e Kabul,
JOS 19:28 e Ebron, e Rehob, e Hamon, e Kana i sike lokovonga liu na tanga e Sidon.
JOS 19:29 A nagi i kaogo lakea na tanga e Rama i bele o Tair, ra tanga iea ni tura halui. A nagi i kaogo lakea na tanga e Hosa i vano i harena na Dari na Kurukuruna Malala. E huriki a Aser ri bole tabu a tanga e Mehebel, e Aksib,
JOS 19:30 e Uma, e Apek, e Rehob. E huriki a Aser ri bole a tanga dagi i ravulu rua a polona i rua, turana a maka tanga kiroko ri pesi tabukoi ne ria.
JOS 19:32 A polotarana rihiva na satu i boru langa na kabu ne Naptali.
JOS 19:33 A nagi na malala ne ria i pe mule a tanga e Helep i lakea mai a kai a ok i pesi na tanga e Sananim, i lakea na tanga e Adami-Nekep e Iapnel, muri i lakea na tanga e Lakum i vano i harena na naru e Iordan.
JOS 19:34 A nagi i kaogo i lakea na tabeke na nirolona haro na tanga e Asnot-Tabor e Hukok. A malala na kabu e Sebulun i tabuli na tabeke mule puru na malala na kabu e Naptali, a malala na kabu e Aser i tabuli na tabeke na nirolona haro, a tanga e Iuda na naru e Iordan i pesi na nirikena haro.
JOS 19:35 A maka tanga ni tura halui na nure i tora hateka ra nga: e Sidim, e Ser, e Hamat, e Rakat, e Kineret,
JOS 19:36 e Adama, e Rama, e Hasor,
JOS 19:37 e Kedes, e Edrei, e En-Hasor,
JOS 19:38 e Iron, e Mikdal-El, e Horem, e Bet-Anat, e Bet-Semes. E huriki a Naptali ri bole a maka tanga dagi i ravulu a polona i polova, turana a maka tanga kiroko ri pesi tabukoi ne ria.
JOS 19:40 A poloruana rihiva na satu i boru langa na kabu ne Dan.
JOS 19:41 A maka tanga ri bole ra nga: e Sora, e Estaol, e Ir-Semes,
JOS 19:42 e Salabin, e Aialon, e Itla,
JOS 19:43 e Elon, e Timna, e Ekron,
JOS 19:44 e Elteke, e Gibeton, e Balat,
JOS 19:45 e Iehud, e Bene-Berak, e Gat-Rimon,
JOS 19:46 e Me-Iarkon, e Rakon. A maka tanga nga ri pesi tabukoi na tanga e Iopa.
JOS 19:47 Muri e huriki a tahotanga ri rata hale e huriki a Dan, ri lili tala ria vona a malala iea. Lakea e huriki a Dan ri vano ri bele o Lesem ri vaubi turane huriki a tahotanga vonga. Ri bolea a tanga ne ria, ri rabalaki lobo e huriki a tahona tanga. Muri e huriki a Dan, ri bolea a malala ne ria liu. Ri puloa a rana e Lesem ri vunua e Dan, a rana a gare ne ria.
JOS 19:48 Ra maka tanga dagi turana a maka tanga kiroko ri pesi na tabekena malala iea, i bole e huriki a hamone Dan.
JOS 19:49 Na tahuna e huriki a Israel ri vaveru lobo a malala, muri ri habia ne Iosua e tune Nun tara tabekena malala ge ne vona.
JOS 19:50 E Iosua i nana e huriki a bakovi ri gi habia vona a tanga e Timnat-Sera na kupona na tabeke ne huriki a Epraim. Ri habia vona i manga a ngava e BAKOVI DAGI i vakuku. Lakea e Iosua i rata kamumu tabua a tanga iea, i made vona.
JOS 19:51 E huriki a Israel ri vapopo na matana Kape na Vaponga ne BAKOVI DAGI o Silo. Ri dava e Eleasar a prister, e Iosua turane huriki a matakari na kabu ri gi veru a malala na tabeke na nirolona haro ne Iordan. Ngane ri vakalobo ni veru a maka malala.
JOS 20:1 Muri e BAKOVI DAGI i takia e Iosua,
JOS 20:2 “O taki e huriki a Israel o ta maea, ‘Mu vulaki ranga tanga ne huriki a bakovi ri gi vano ri gi kapiloho vona, ge manga a ngava a taki e Moses ge taki mua vona.
JOS 20:3 Na tahuna a bakovi tara i rabalaki rurua tara bakovi, ra bakovi iea ge ha lakea vona tara tanga nga ge kapiloho vona, ne vona ni korimule ia. A tahona bakovi i mate bara i varoru ni dili vona a tanga iea, ge koli ge rabalakia a bakovi iea.
JOS 20:4 “‘Na tahuna a bakovi tara i ha, i bele vona a tanga iea, ge lakea na hini ni kado a maregoa vona na dilidala na tanga, ge vakalongo e huriki a gare na maki i ratea. Muri e huriki a gare ri gi takia ge dili na tanga, ge made turane ria.
JOS 20:5 A bakovi i ngaru ni koli a bakovi i mate i bele vona a tanga iea, e huriki a gare i uka ma ri gi longo ri gi habia vona a bakovi iea, a vuhuna i uka ma i ngaru ni rabalakia a bakovi, i rabalaki rurua. I mavonga e huriki a tahotanga bara ri koria a bakovi iea.
JOS 20:6 A bakovi i ha ge made vona a tanga iea, ge harena ne huriki ri gi pelekadoa a maregoa vona na matane huriki a tahotanga. Na tahuna ni longo i uka maregoa, bara i made vona a tanga iea, ge harena na prister dagi i rata a leho vona a tahuna iea ge mate. Muri ge hamule mai a tanga vona.’”
JOS 20:7 Lakea ri ru herea a tanga e Kedes na tabeke ne Galili na kupona na malala ne huriki a Naptali, e Sekem i pesi na kupona na malala ne huriki a Epraim, e Kiriat-Araba re Hebron na kupona na malala ne huriki a Iuda.
JOS 20:8 Tabukoi o Iordan na kupona na tabeke na nirikena haro ne Ieriko, na tabeke i ngeki, ni ru here a tanga e Beser na malala ne huriki a Reuben, a tanga e Ramot na robo e Gilead na malala ne huriki a kabu ne Gad, a tanga e Golan na robo e Basan na malala na kabu ne Manase.
JOS 20:9 Ra maka tanga nga ni ru here ne vona e huriki a Israel turane huriki basi ri gi kapiloho vona ri gi korimule ria. I mavonga na tahuna a bakovi tara i rabalaki rurua tara bakovi, ge ha lakea vona tara tanga nga. A bakovi i nunu muri vona ge koli, i uka ma ge rabalakia ra bakovi iea, bara ni pelekado taro a maregoa vona.
JOS 21:1 E huriki a matakari na kabu ne Levi ri vano ri matai e Eleasar a prister, e Iosua e tune Nun bakovi, turana e huriki a matakari na maka kabu ne Israel.
JOS 21:2 Ri tagui ria na tanga e Silo na malala ne huriki a Kenan, ri taki ria, “E BAKOVI DAGI i vakukua e Moses, ta mi gi bole ranga tanga mi gi made vona, ge tahoka a maka varili kamumu ge kani a maka bulmakau ne mia.”
JOS 21:3 Lakea e huriki a Israel ri ramaia a nitane BAKOVI DAGI, ri habi a maka tanga, a malala na kabu ne Levi.
JOS 21:4 A maka kabu ri rehi na rihiva na satu, ri bole a malala ne ria. E huriki a Levi, ra hamone Aron a prister, na kabu ne Kohat, ri bole muga ne ria. Ni habi ne ria a tanga i ravulu a polona i tolu, pololilo na malala na kabu ne Iuda, ne Simion, ne Bensamin.
JOS 21:5 E huriki a Kohat ranga ri bole a tanga i ravulu na malala na kabu ne Epraim, ne Dan, na kalavana kabu ne Manase.
JOS 21:6 A kabu ne Gerson i bole a tanga i ravulu a polona i tolu i tabuli pololilo na malala na kabu ne Isikar, ne Aser, ne Naptali, a kalavana kabu ne Manase ri made na robo e Basan.
JOS 21:7 A kabu ne Merari ri bole a tanga i ravulu a polona i rua pololilo na malala na kabu ne Reuben, ne Gad, ne Sebulun.
JOS 21:8 E huriki a Israel ri ramaia a ngava ne BAKOVI DAGI i habia ne Moses, ri rehi na satu, ri vulaki a maka tanga ri habi na kabu ne Levi. Ra tanga nga ri tahoka a tabekena malala i tabuli tabukoi ne ria, ne vona ni vakani a bulmakau a sipsip.
JOS 21:9 A maka tanga ri tabuli na malala na kabu ne Iuda ne Simion,
JOS 21:10 e huriki a Kohat, a hamone Aron, ri bole pali. E huriki a Israel ri rehi na satu ri vulaki muga a tanga nga, ri habi ne huriki a Kohat.
JOS 21:11 Ri habia ne ria e Kiriat-Araba re Hebron. E Arba e tamane Anak. A tanga e Hebron i pesi na kupona malala na kabu ne Iuda. Ri habia ne huriki a hamone Aron ra tanga iea, turana a malala i tabuli haluia, ne vona ni vakalaho a maka bulmakau a sipsip ne ria vona.
JOS 21:12 Pali a malala ni ratana hania turana a maka tanga kiroko ri tabukoi na tanga, ni habi pali ne Keleb, e tune Iepune, ne vona a kabu vona.
JOS 21:13 Ri habia ne huriki a hamone Aron a tanga e Hebron, (a tanga i kapiloho vona a bakovi i rabalaki a viri). Ri habi tabu ne ria e Lipna,
JOS 21:14 e Iatir, e Estemoa,
JOS 21:15 e Holon, e Debir,
JOS 21:16 e Ain, e Iuta, e Bet-Semes. Ra tanga nga ri pesi na malala na kabu ne Iuda, ne Simion. Ri tahoka a maka tabekena malala ri tabuli tabukoi ne ria, ne vona ni vakalaho a maka bulmakau a sipsip. Ri bole a tanga i polova na kabu ne Iuda, ne Simion.
JOS 21:17 A kabu ne Bensamin i habi a tanga ne ria: e Gibeon, e Geba,
JOS 21:18 e Anatot, e Almon. Ra tanga i va nga, ri tahoka a maka tabekena malala ri tabuli tabukoi ne ria, ne vona ni vakalaho a bulmakau a sipsip.
JOS 21:19 E huriki a hamone Aron, re huriki a prister ri bole a tanga i ravulu a polona i tolu. Ra tanga nga, ri tahoka a maka tabekena malala ri tabuli tabukoi ne ria ne vona ni vakalaho a maka bulmakau a sipsip.
JOS 21:20 E huriki a Kohat ranga na kabu ne Levi, ri bole a tanga, a malala na kabu ne Epraim.
JOS 21:21 Ri habi a tanga ne ria: e Sekem (a tanga i kapiloho vona a bakovi i rabalaki a viri) i pesi na kupona malala na kabu ne Epraim, ne Geser,
JOS 21:22 ne Kipsaim, ne Bet-Horon. Ra tanga i va nga, ri tahoka a maka tabekena malala ne vona ni vakalaho a maka bulmakau a sipsip.
JOS 21:23 A kabu ne Dan i habi ne huriki a Kohan a tanga ne ria: e Elteke, e Gibeton,
JOS 21:24 e Aialon, e Gat-Rimon. Ra tanga i va nga, ri tahoka a maka tabekena malala ri tabuli tabukoi ne ria, ne vona ni vakani a maka bulmakau a sipsip.
JOS 21:25 Ri habi ne huriki a kalavana kabu ne Manase a tanga i rua: e Tanak, e Gat-Rimon. Ra tanga nga, ru tahoka a tabekena malala, i tabuli tabukoi ne rua, ne vona ni vakalaho a bulmakau a sipsip.
JOS 21:26 E huriki a Kohat ri bole a tanga i ravulu. Ra tanga nga ri tahoka a tabekena malala i tabuli tabukoi ne ria, ne vona ni vakalaho a maka bulmakau a sipsip.
JOS 21:27 A hamone Levi ranga, re huriki a Gerson. A kabu ne Manase i habi ne ria a tanga i rua: e Golan (a tanga i ha, i kapiloho vona a bakovi i rabalaki a viri) na tabeke e Basan, e Bestera. Ra tanga nga, ru tahoka a tabekena malala i tabuli tabukoi ne rua ne vona ni vakalaho a bulmakau a sipsip.
JOS 21:28 A kabu ne Isikar i habi ne huriki a Gerson a tanga nga: e Kision, e Daberat,
JOS 21:29 e Iarmut, e En-Ganim. Ra tanga i va nga, ri tahoka a tabekena malala ri tabuli tabukoi ne ria, ne vona ni vakalaho a maka bulmakau a sipsip.
JOS 21:30 A kabu ne Aser i habi ne huriki a Gerson a tanga: e Misal, e Abdon,
JOS 21:31 e Helkat, e Rehob. Ra tanga i va nga, ri tahoka a maka tabekena malala ri tabuli tabukoi ne ria, ne vona ni vakalaho a maka bulmakau a sipsip.
JOS 21:32 A kabu ne Naptali i habi ne huriki a Gerson a tanga i tolu: e Kedes (a tanga i ha, i kapiloho vona a bakovi i rabalaki a viri) i pesi na tabeke ne Galili, e Hamot-Dor, e Kartan. Ra tanga nga, to tahoka a maka tabekena malala i tabuli tabukoi ne tou, ne vona ni vakalaho a maka bulmakau a sipsip.
JOS 21:33 E huriki a Gerson ri bole a tanga i ravulu a polona i tolu. Ra tanga nga, ri tahoka a maka tabekena malala ri tabuli tabukoi ne ria, ne vona ni vakalaho a bulmakau a sipsip.
JOS 21:34 E huriki a Merari, ria ranga a hamone Levi. A kabu ne Sebulun i habi ne ria a tanga nga: e Iokneam, e Karta,
JOS 21:35 e Dimna, e Nahala. Ra tanga i va nga, ri tahoka a maka tabekena malala ri tabuli tabukoi ne ria, ne vona ni vakalaho a bulmakau a sipsip.
JOS 21:36 A kabu ne Reuben ri habi ne huriki a Merari a tanga nga: e Beser, e Iahas,
JOS 21:37 e Kedemot, e Mepat. Ra tanga i va nga, ri tahoka a maka tabekena malala ri tabuli tabukoi ne ria, ne vona ni vakalaho a maka bulmakau a sipsip.
JOS 21:38 A kabu ne Gad i habi ne huriki a Merari a tanga nga: e Ramot (a tanga i ha, i kapiloho vona a bakovi i rabalaki a viri) na tabeke ne Gilead, e Mahanaim,
JOS 21:39 e Hesbon, e Iaser. Ra tanga i va nga, ri tahoka a maka tabekena malala ri tabuli tabukoi ne ria, ne vona ni vakalaho a maka bulmakau a sipsip.
JOS 21:40 E huriki a Merari, ria a hamone Levi, ri bole a tanga i ravulu a polona i rua.
JOS 21:41 E huriki a Israel, ri habi a tanga i ravulu va a polona i polotolu na kabu ne Levi.
JOS 21:42 A maka tanga nga, ri tahoka a maka tabekena malala ri tabuli tabukoi ne ria ne vona ni vakalaho a maka bulmakau a sipsip ne ria vona.
JOS 21:43 E BAKOVI DAGI i habia ne huriki a Israel a malala iea, i ramaia a ngava i ta muholi vona ne huriki a gare ne ria hosi. Lakea ri bolea a malala ne ria liu.
JOS 21:44 E BAKOVI DAGI i habi a nivalemu ne ria, i manga a ngava i ta muholi vona ne huriki a gare ne ria. I tuhori ria i ratapile e huriki a pile, i uka tara pile ge rangi ria.
JOS 21:45 E BAKOVI DAGI i ta muholi ge rata a maki kamumu ne Israel, i ramai lobo a nita muholi vona.
JOS 22:1 Ri vaveru lobo a maka tabekena malala, lakea e Iosua i gale palupu a kabu ne Reuben, a kabu ne Gad, a kalavana a kabu ne Manase,
JOS 22:2 i taki ria, i ta maea, “Mu rata lobo pali a maki e Moses a vora ne BAKOVI DAGI i vakuku mua vona mu gu rata. Mu ramai lobo a maka nitagu.
JOS 22:3 Na parava lobo mu tuhori e huriki a turane mua. I uka tara parava mu gu ha taro ria. Mu ramai kamumu a maka nitane BAKOVI DAGI a Vure ne hita.
JOS 22:4 Ngane, e BAKOVI DAGI a Vure ne hita i habi a nivalemu ne huriki a turane mua, i manga hosi i ta muholi ne ria. I mavonga mu hamule mai a tanga ne mua, na tabeke ne Iordan, hosi e Moses a vora ne BAKOVI DAGI i habi ne mua.
JOS 22:5 Mu mata kamumu mu ramai a nivakuku, a vinara ne Moses a vora ne BAKOVI DAGI i habi ne mua. Mu ngarua e BAKOVI DAGI, a Vure ne mua. Mu ramai a naro lobo vona, mu longototo a vinara vona, mu pesi tora turana, mu rata a leho vona na hatene mua, na nitora lobo ne mua.”
JOS 22:6 Lakea e Iosua i nanea e BAKOVI DAGI ge gamai ria, muri i rudu mule ria na tanga ne ria.
JOS 22:7 E Moses i habi na kalavana kabu ne Manase a malala na tabeke ne Basan, pali e Iosua i habi tabu na kalavana kabu ne Manase, turana a kabu ranga ne Israel, a malala na tabeke na nirolona haro ne Iordan. Na tahuna e Iosua i rudu e huriki nga ri hamule na tanga ne ria na tabeke ne Iordan tara, i nana e BAKOVI DAGI ge rata kamumu ria.
JOS 22:8 Lakea i ta maea, “Mu tahoka a maka bulmakau, a silva, a gol, a bras, a aen, a maka varakia mu radi ne huriki a pile. Mu hamule na tanga mua, mu habi ne huriki a viri mua.”
JOS 22:9 Lakea e huriki a bakovi na kabu ne Reuben, ne Gad, a kalavana kabu ne Manase ri laho hamule mai a tanga ne ria. Ri pe mule e huriki a Israel ranga na tanga e Silo o Kenan, ri hamule lakea na tabeke ne Gilead, na malala ne ria. Ri bolea a malala iea, i manga a ngava e BAKOVI DAGI i taki e Moses vona.
JOS 22:10 Re huriki nga, i uka ma ri pe mulea ma a malala e Kenan, ri vano ri bele na malala tabukoi na dahana naru e Iordan, ri vakapesia vonga a dede-kedo dagi tabukoi na naru.
JOS 22:11 I ranga Israel ri vano ri taki e huriki a turane ria, ri ta maea, “A kabu ne Reuben, ne Gad, a kalavana kabu ne Manase ri ratea a dede-kedo na dahana naru e Iordan, na tabeke ne hita.”
JOS 22:12 Ri longoa a ngava iea, lakea ri vano ri vapopo na tanga e Silo, ri kisi puru a maki na vabinga, ri gi vaubi turana a kabu nga i tolu.
JOS 22:13 E huriki a Israel ri rudua e Pinias e tune Eleasar a prister, i lakea na kabu ne Reuben e Gad, a kalavana a kabu ne Manase na tanga e Gilead.
JOS 22:14 A matakari i ravulu ri vano turana. Ra matakari nga ne Israel, ri matakaria a kabu takutaku ne ria.
JOS 22:15 Ri vano ri bele o Gilead ri taki maea e huriki a kabu ne Reuben, ne Gad, a kalavana kabu ne Manase,
JOS 22:16 “E huriki a bakovi a ngatavine ne BAKOVI DAGI, ri nana maea, ‘I navai mu ngalahere na Vure ne hita a Israel? Mu longotaro pali a nitane BAKOVI DAGI, mu vakapesia a dede-kedo ne mua. Ngane i uka ma mu ramai tabu e BAKOVI DAGI.
JOS 22:17 Hosi ri rata a naro hale na tanga e Peor, lakea e BAKOVI DAGI i rudu vilia a gilanga dagi i ratapile e huriki a tara vona. Si bole a nimadihi vona ra naro hale iea i valai i harena mona. Mu luhoi ra naro hale iea i uka ma i kara hita, lakea mu ngaru ni rata tabua tara?
JOS 22:18 I navai ngane mu marikoi ni ramai e BAKOVI DAGI, mu ngalahere vona? “‘Mua bara mu longotaro a nitana ngane, kuduvi bara i tahate hita lobo a kabu ne Israel.
JOS 22:19 Mu luhoi a malala ne mua i muto na matane BAKOVI DAGI, i kamumu mu pe a malala ne mua, mu valai mu bole ranga malala ne mia, ra malala ne BAKOVI DAGI i pesi vona a mailo vona. A dede ne BAKOVI DAGI, a Vure ne hita i tabuli pali. I navai mu longotaro a nitane BAKOVI DAGI, mu ha taro mia mu vakapesia a dede-kedo ne mua?
JOS 22:20 Naha ni longokaburungi a narone Akan, e tune Sera. E BAKOVI DAGI i ta kari vona a maka maki na tanga e Ieriko, pali e Akan i longotaro a nitana, i bole a maka maki, muri e huriki a Israel ri bole a maregoa na naro hale vona. A naro hale ne Akan, i uka ma i madoko vona kikeri. A naro hale vona i madoko ne huriki lobo ri bole a vuranga vona.’”
JOS 22:21 Lakea a kabu ne Reuben, ne Gad, a kalavana kabu ne Manase ri koli e huriki a matakari na kabu ne Israel, ri ta maea,
JOS 22:22 “E BAKOVI DAGI i tahoka a nitora dagi, ia kikeri ia e BAKOVI DAGI. I lohoka vona i navai si ratea a maki iea. Mua ranga mi ngaru mu gu lohoka vona. Mia bara mi longotaro a nitane BAKOVI DAGI, i uka ma mi ramai a vinara vona, mu rabalaki mia.
JOS 22:23 Mia bara mi longotaro a nitane BAKOVI DAGI, mi vakapesi a dede-kedo ne mia ne vona ni ngalahere vona, ne vona ni habi a nihabi gutu-vuro, a nihabi na vit, a nihabi na nivalemu, e BAKOVI DAGI bara i habi a vuranga ne mia.
JOS 22:24 “Pali mia mi vakapesia a dede-kedo iea, a vuhuna mi mangenge, muri ma e huriki a hamone mua, ma ri gi taki maea e huriki a hamone mia, ‘I navai mu kavurikea e BAKOVI DAGI a Vure ne mia e huriki a Israel?
JOS 22:25 E BAKOVI DAGI i ru a naru e Iordan ge a nagi ne hita, mua a kabu ne Reuben, ne Gad, a kalavana kabu ne Manase i uka ma mua a tara ne BAKOVI DAGI.’ Mi mangenge vona e huriki a hamone mua ma ri gi hatekakari e huriki a hamone mia i uka ma ri gi kavurikea e BAKOVI DAGI.
JOS 22:26 “I mavonga mi vakapesia a dede-kedo iea, i uka ma ne vona ni rata a maka nihabi legelege.
JOS 22:27 Mi vakapesia ge a kilakila na kabu ne mia, ne vona ni vakasiri e huriki a hamone hita muri ma, mia ranga mi kavurikea e BAKOVI DAGI na mailo vona. Mia ranga mi rata a nihabi gutu-vuro, a nihabi na nivalemu, a maka nihabi ranga. “Ma ge muri ma e huriki a hamone mua ri gi biu e huriki a hamone mia, ri gi ta maea, ‘Mua, i uka ma mua a tara ne BAKOVI DAGI.’
JOS 22:28 Mi luhoi maea, ma mu gu ratea ne mia a nita iea o mu gu ratea ne huriki a hamone mia, bara mi ta maea, ‘Mu masia, a dede-kedo iea e huriki a gare ne mia ri ratea i manga kunana a dede ne BAKOVI DAGI. Pali i uka ma a dede-kedo ne vona ni rata a nihabi ni gutu-vuro, ni rata a maka nihabi ranga. A kilakila kunana ne huriki a tara ne mia a tara ne mua.’
JOS 22:29 Mi vakapesia a dede-kedo iea i uka ma ne vona ni rata a nihabi gutu-vuro, a nihabi ni gutu a vit, a maka nihabi ranga. Mi marikoi hateka ni rata mavonga. Mia bara mi rata mavonga bara mi longotaro a nitane BAKOVI DAGI mi ngalahere vona. Mia i uka ma mi luhoi ni kuloi a dede ne BAKOVI DAGI, a Vure ne hita, ra dede iea i pesi na matana mailo vona.”
JOS 22:30 E Pinias a prister turane huriki a gare na kabu takutaku ne Israel, ri longoa a nitana kabu ne Reuben, ne Gad, a kalavana kabu ne Manase ri vivi.
JOS 22:31 Lakea e Pinias e tune Eleasar a prister i taki maea ria “Ngane si lohoka vona e BAKOVI DAGI i made turane hita, a vuhuna i uka ma mu ngalahere vona. I mavonga mu korimule hita a Israel na rongova ne BAKOVI DAGI.”
JOS 22:32 Muri e Pinias, e huriki a matakari ri pe ria na tabeke ne Gilead ri hamule lakea o Kenan, ri vakalongo e huriki a Israel na nitana kabu ne Reuben, ne Gad, a kalavana a kabu ne Manase.
JOS 22:33 E huriki a Israel ri vivi vona a nitane ria. Ri kavurikea a rana Vure, i uka ma ri luhoi tabu ni vano ni vaubi turane ria, ri gi ratapile a tabekena malala ri made vona.
JOS 22:34 Lakea a kabu ne Reuben ne Gad ri vunua a dede-kedo iea e “Ta Kavakava,” a vuhuna ri ta maea, “A kilakila iea ne vona ni vakalongo hita lobo, e BAKOVI DAGI kikeri ia a Vure.”
JOS 23:1 Na maka pida ri polo pali, e BAKOVI DAGI i habi a nimade na nivalemu ne huriki a Israel, i uka ma ri vaubi ne huriki a pile ri made viliha vonga. Ngane e Iosua i gare.
JOS 23:2 Lakea i gale palupu e huriki a Israel turana e huriki a gare, a matakari, a mari ni pelekado a maregoa, a bolekori, i taki ria, “Ngane a gare liu pali.
JOS 23:3 Mu matai pali a maki e BAKOVI DAGI, a Vure ne mua i rata virihi na maka tanga ranga, i tuhori mua na vabinga i vaubi polo ne mua.
JOS 23:4 Ngane mu longo kamumu. A malala ne huriki ranga i uka ma mu rangi ma, a pasivunu pali ne mua mu gu bole, i manga a naro a rata na malala ne huriki lobo a rangi ria na vabinga. A nagi na malala ne mua i tubu na naru e Iordan na tabeke na nirikena haro, i vano i harena na Dari na Kurukuruna Malala na tabeke na nirolona haro.
JOS 23:5 E BAKOVI DAGI a Vure ne hita ge lili tala e huriki a pile, ge rata ria ri gi ha ne mua, bara mu bole a malala ne ria i manga a ngava i ta muholi vona.
JOS 23:6 “I mavonga, mu matadoko kamumu, mu ramai a ngava lobo na puhu na vinara ne Moses. Naha ni longotaroa tara nitana.
JOS 23:7 Naha ni laho turana e huriki a bakovi a ngatavine o Kenan, ra ri tababana ni made turane mua, naha ni gale a rana a maka vure ne ria. Na tahuna mu kaba, naha ni kaba vona a maka rana vure ne ria. Naha ni turume mu gu kavurike ria.
JOS 23:8 Mu madoko turane BAKOVI DAGI a Vure ne mua, mu ramaia, i manga a hini mu rata i valai i harena mona.
JOS 23:9 “E BAKOVI DAGI i lili tala pali a maka kabu dagi ri gao hateka, i uka tara ne ria ge pesi tora ge gege mua.
JOS 23:10 A bakovi tara ne mua i kara ni vakamangenge a bakovi i ala rangale (1,000) ne ria, bara ri ha, a vuhuna e BAKOVI DAGI a Vure ne hita i tuhori mua na vabinga i vaubi polo ne mua, i manga a hini i ta muholi vona hosi ge rata.
JOS 23:11 “Ngane mu matadoko vona a narone mua. Mu ngaru hateka e BAKOVI DAGI a Vure ne hita.
JOS 23:12 Pali mua bara mu ngalahere ne BAKOVI DAGI, mu madoko turane huriki a bakovi a ngatavine ri made muga koea ri tababana turane mua, mu parangi ne ria,
JOS 23:13 mu lohoka pali e BAKOVI DAGI a Vure ne mua i uka ma ge lili tala e huriki nga na matane mua. Bara ria a pile muholi ne mua, ri manga a hoa bara mu kona vona. Bara ri habi a ni madihi ne mua, i manga a bakovi ni bole a lebo ni hotu na bitona, a barakau i padipupu a matana. Ra maregoa iea bara i tabuli mavonga, i harena na tahuna mu mate vona a malala kamumu iea, e BAKOVI DAGI a Vure ne hita i habia pali ne mua.
JOS 23:14 “I tabukoi ngane bara pe mua. Mu lohoka pali na hatene mua e BAKOVI DAGI a Vure ne hita i habi ne mua a maka maki kamumu, i ta muholi vona ge habi ne mua. A maki lobo i ta muholi vona ge rata, ri bele pali, i uka ma i rata kalevea tara.
JOS 23:15 A maka nita muholi kamumu e BAKOVI DAGI a Vure ne hita i rata i bele muholi, i mavonga kunana i ta muholi na maki hale ge valai ne mua ge ratapile mua na malala kamumu i habia ne mua.
JOS 23:16 A maki iea bara i bele, na tahuna i uka ma mu ramai a ngava dagi ne BAKOVI DAGI, a Vure ne mua, i vakuku mua mu gu ramai. Na tahuna mu ramai mu kavurike a vure ranga, e BAKOVI DAGI bara i tahate hateka mua. Muri i uka tara ne mua ge made vona a malala kamumu i habia ne mua. Mua lobo bara mu mate.”
JOS 24:1 E Iosua i gale palupu e huriki a kabu lobo ne Israel ri vapopo na tanga e Sekem. Na tahuna ri bele vonga i gale e huriki a gare, a matakari, a mari ni pelekado a maregoa, a bolekori, ri valai ri pesi na matana Vure.
JOS 24:2 Lakea e Iosua i taki e huriki i ta maea, “E BAKOVI DAGI a Vure ne hita a Israel i ta maea, ‘Hosi hateka e huriki a gare ne mua ri made na tabeke mule lokovonga na naru e Iupretis, ri kavurike a maka vure ranga. E Tera e tamane Abraham, turane Nahor ru made vonga ru kavurike a vure ranga.
JOS 24:3 Muri a bolea e Abraham a gare ne mua, na robo i tabuli mule lokovonga na naru e Iupretis, a taparaki vilia a vakasiri loboa vona a malala e Kenan. A habi vona e huriki a hamona ri ala kupo. A habia vona e tuna i taku kunana e Isak.
JOS 24:4 A habi ne Isak e tuna ala rua e Iakop e Esau. A habia ne Esau a robo e Idom, a tabeke na lolo, pali a gare ne mua e Iakop i puru lakea o Egipto.
JOS 24:5 Muri a rudu e Moses e Aron ru tuhori e huriki a gare ne mua, a vuhuna a ratapile hatekea a robo e Egipto na maka vuranga. Pali iau a bole tala mua vonga.
JOS 24:6 “‘Na tahuna a tuli tala o Egipto e huriki a gare ne mua, a tuli lakea ria na Dari Vururu. Lakea e huriki a Egipto ri bole a maka karis a hos, ri nunu muri mai ria i harena na Dari Vururu.
JOS 24:7 Re huriki a gare ne mua ri mangenge, ri gale dagi hateka valai nau e BAKOVI DAGI, ga tuhori ria. Lakea a ratea a uvo i bele na kurukurune huriki a Egipto, a gare ne mua. A ratea a dari i rere tagu e huriki a Egipto. Mu lohoka vona a maka maki a rata virihi e huriki a Egipto vona. Muri mu made tabaka na tabeke i ngeki.
JOS 24:8 “‘Muri a taparaki lakea mua na malala ne huriki a Amor, na tabeke na nirikena haro na naru e Iordan, lakea e huriki a Amor ri vaubi ne mua. A tuhori mua, mu rangi ria na vabinga. Mu bolea a malala ne ria, a vuhuna a muga, a ratapile ria.
JOS 24:9 Muri e Balak e tune Sipor bakovi, a hariki o Moab, i vaubi ne mua. I talo rike a ngava lakea ne Balam e tune Beor, i takia ge ruduraha mua.
JOS 24:10 Pali iau e BAKOVI DAGI, a marikoi ni longo a maka niruduraha ne Balam. Lakea a ratea i vakalongo a maka maki kamumu ge bele ne mua, a korimule mua na limane Balak.
JOS 24:11 “‘Mu laho polo a naru e Iordan mu bele vona a tanga e Ieriko, lakea e huriki a bakovi o Ieriko ri vaubi ne mua. E huriki a Amor, a Peres, a Kenan, a Hiti, a Girgas, a Hivi, a Iebus, ri vaubi ne mua, pali iau a tuhori mua, mu rangi ria.
JOS 24:12 A rudu maka vuvu ri muga mua ri rata e huriki a pile ri mangenge hateka ne mua, i manga a hariki ala rua o Amor ri ha ne mua. I uka ma mu lili tala rua na nitora ne mua, na bainat na kiniperi ne mua.
JOS 24:13 A habia ne mua a malala, i uka ma mu leho vona. A habi ne mua a maka tanga i uka ma mu rata. Ngane mu made vona a maka tanga nga, mu kani a maka kanena kai a vain a oliv. Ra maka kai nga i uka ma mu varo na limane mua.’”
JOS 24:14 E Iosua i vakalongo lobo a nitane BAKOVI DAGI, i ta tabu i ta maea, “Ngane mu longo. Mu togoa e BAKOVI DAGI, mu ramaia mu rata vakaroro a leho vona na hatene mua. Mu lohopile vona a maka vure ranga e huriki a gare ne mua ri kavurike ria na tabeke ne Mesapotamia ne Egipto. Mu ramai kunanea e BAKOVI DAGI.
JOS 24:15 Mua, i uka ma mu ngaru ni ramai e BAKOVI DAGI, mu luhoi kamumu. E rei ngane mu gu ramaia? Mu gu kavurike a maka vure ranga ne huriki a gare ne mua o Mesapotamia? O mu gu kavurike a maka vure ranga ne huriki a Amor, ra mu made na malala ne ria ngane? Pali iau, turana a kabu nau, mete ge ramaia mete ge kavurike kunanea e BAKOVI DAGI.”
JOS 24:16 Lakea e huriki ri koli ri ta maea, “Mi koi hateka ni kavurike a vure ranga, mi gi kavurike kunanea e BAKOVI DAGI.
JOS 24:17 Ia kunana e BAKOVI DAGI a Vure ne mia, i bole mule mia turane huriki a gare ne mia na tahuna mi leho manga a vorakato o Egipto. Mi matai pali a maka nivakasiri dagi i rata. Na tahuna si laho polo vona a malala na kabu ranga, na tahuna si lakea na tabeke ranga e BAKOVI DAGI i matakari hita si laho kamumu.
JOS 24:18 Na tahuna si laho valai, e BAKOVI DAGI i vakatubu ni lili tala e huriki a Amor ra ri made muga koea. I mavonga, mia ranga mi gi kavurikea e BAKOVI DAGI. Ia kikeri a Vure ne mia.”
JOS 24:19 E Iosua i ratea ne ria a nita iea, “Pali iau a luhoi mua, i uka ma mu kara ni ramaia e BAKOVI DAGI. Re BAKOVI DAGI a narona i kamumu i malamala, i marikoi ne mua mu gu kavurike a vure ranga, bara mu rata mavonga i uka ma ge puga vuroki a nitagege, a naro hale ne mua.
JOS 24:20 Mua mu pea e BAKOVI DAGI mu kavurike a vure ranga bara i ngalahere i habi a vuranga ne mua. I muholi e BAKOVI DAGI i rata kamumu mua, pali na tahuna mu ngalahere vona, bara i ratapile mua.”
JOS 24:21 Pali e huriki ri takia e Iosua ri ta maea, “I uka liu, mi gi ramai kunanea e BAKOVI DAGI.”
JOS 24:22 Lakea e Iosua i taki ria, “Mua kunana mu puka tala a ngava pali, mu ta muholi mu gu ramai kunanea e BAKOVI DAGI.” Lakea ri ta maea, “I muholi, mi ratea na ngavane mia a nita iea.”
JOS 24:23 E Iosua i ta tabu i ta maea, “I kamumu a ngava mu ratea. Ngane mu vuroki tala a maka vure na kabu ranga ri tabuli turane mua. Mu pulo a narone mua, mu lakea tabukoi ne BAKOVI DAGI a Vure ne hita a Israel.”
JOS 24:24 Lakea e huriki a bakovi a ngatavine ri takia e Iosua ri ta maea, “Mi ngaru kunana mi gi kavurikea e BAKOVI DAGI a Vure ne hita, mi gi ramai a maka vinara vona.”
JOS 24:25 Na parava iea kunana na tanga e Sekem, e Iosua i ratea tara ngava dagi turane huriki, i habi a maka vinara ne ria, i taki ria ri gi ramai.
JOS 24:26 E Iosua i here dili a nita nga na puhu i tabuli vona a maka vinara ne BAKOVI DAGI. Muri i bolea tara kedo i vakapesia na taruna a kai a ok, tabukoi na mailo ne BAKOVI DAGI.
JOS 24:27 Lakea e Iosua i taki e huriki i ta maea, “Na tahuna si masia a kedo iea, bara si luhoi mulea a ngava dagi si ratea. A kedo iea i longo pali a nita lobo e BAKOVI DAGI i taki. Bara i tabuli manga a kilakila ne vona ni bole mule a niluhoi ne mua, i uka ma mu gu longotaro a nitane BAKOVI DAGI ne hita.”
JOS 24:28 Muri e Iosua i tono e huriki ri vano, ri hamule lakea na malala takutaku ne ria.
JOS 24:29 Muri e Iosua, e tune Nun, a vora ne BAKOVI DAGI i mate na tahuna i tahoka a pida i ravulu mule na murina balaka taku a polona i ravulu (110).
JOS 24:30 Ri tanua na malala vona na tanga e Timnat-Sera. Ra tanga iea i pesi na kupona na malala ne huriki a Epraim na tabeke mule sike na lolo e Gas.
JOS 24:31 Na tahuna i Iosua i tababana ni mahuri, e huriki a Israel ri ramaia e BAKOVI DAGI. Ri rata mavonga i harena na tahuna e huriki a matakari ri matai a maka maki e BAKOVI DAGI i rata ne huriki a Israel, ria ranga ri mate.
JOS 24:32 Na tahuna e huriki a Israel ri pea e Egipto, ri kaloho a tuhane Iosep ri tanu o Sekem, na tabekena malala hosi e Iakop i konea na moni silva i ravulu mule ma murina balaka taku (100) ne huriki e tune Hamor re tamane Sekem. Ra malala iea ngane, a malala ne huriki a hamone Iosep.
JOS 24:33 E Eleasar, e tune Aron, ia tara i mate, ni tanu o Gibea, ra tanga ni habi ne Pinias, e tune Eleasar. Ra tanga iea i pesi na kupona na malala ne Epraim.
RUT 1:1 Na tahuna e huriki a mari ni pelekado a ngava ri matakari e Israel, a pago i bele. Lakea a bakovi tara na tanga e Betlehem o Iuda i mariu lakea na malala ne huriki a Moab, turana e girihina, e tuna bakovi ala rua.
RUT 1:2 A bakovi iea a rana e Elimelek. A rane girihina e Naomi. A rane tune rua e Malon, e Kilion. Re huriki nga, a kabu ne Epreti, na tanga e Betlehem o Iuda. Na tahuna ri bele o Moab, ri made vonga.
RUT 1:3 Pali e Elimelek i mate vonga, lakea e girihina e Naomi i made kikeri turana e tuna rua.
RUT 1:4 Muri e tuna rua ru parangi a ngatavine o Moab. A rane girihine rua e Orpa, e Rut. Ri made palupu na pida i ravulu.
RUT 1:5 Muri i mate tabu e Malon rua e Kilion. Ngane e Naomi i uka e girihina, i uka e tuna, i made kikeri.
RUT 1:6 Na tahuna i tababana ni made o Moab, e Naomi i longo a velengane huriki a kabu vona, e BAKOVI DAGI i rata kamumu ria i habi a kinani ne ria. Lakea ia, turane kana ala rua, to ngaru ni hamule lakea na tanga ne Naomi.
RUT 1:7 Lakea i vano turana e kana ala rua, to laho hamule lakea o Iuda.
RUT 1:8 Pali na bokona dala e Naomi i ta rike, i ta maea, “Muru hamule mai e kinane marua. A ngaru e BAKOVI DAGI ge rata kamumu marua, a vuhuna muru rata kamumu iau, muru rata kamumu e girihine marua ra ru mate pali.
RUT 1:9 E BAKOVI DAGI ge habi tabu a bakovi ne marua, bara muru tahoka a nimalo kamumu turana e girihine marua na tanga ne rua.” Muri i nguru rua, lakea ru haloho dagi.
RUT 1:10 Ru takia ru ta maea, “Maria miri gi hamule turamu, miri gi made turana e huriki na kabu vomu.”
RUT 1:11 Pali e Naomi i uka ma i longo ne rua, lakea i taki rua i ta maea, “Muru hamule lakea na tanga marua. I navai muru gu valai turagu? Iau i uka ma ga poda tabu a koma bakovi muru gu parangi ne rua.
RUT 1:12 Muru hamule. Iau a gare hateka, i uka ma ga parangi tabu. Pali iau ngane ga parangi tabu, ga poda tabu a koma bakovi,
RUT 1:13 muru gu dava navai rua ru gu dagi, muru gu parangi ne rua? Kagu rua, ge a ra? A dodo marua, pali iau bara matasia liu, a vuhuna e BAKOVI DAGI i rata hale hateka iau.”
RUT 1:14 Muri ru tangi tabu, lakea e Orpa i tarulu purua e kana, i hamule. Pali e Rut i ege hateka ne Naomi.
RUT 1:15 Muri e Naomi i ta maea, “E mahu­rumu i hamule mai a kabu vona, a maka vure vona. O hamule turana.”
RUT 1:16 Pali e Rut i ta maea, “Naha ni tono iau ga hamule, ga ngalahere vomu. A hini o lakea vona, bara lakea vona. A hini o made vona, bara made vona. A kabu vomu, ga kabu nau. A Vure vomu, ga Vure nau.
RUT 1:17 Iau ga mate na tanga o mate vona, ni gi tanu iau vonga. Iau a ta muholi vomu, i uka ma ga pe ioe, ge harena na matenga ge kalipida tarua. Iau bara pe ioe, a ngaru e BAKOVI DAGI ge ratapile iau.”
RUT 1:18 Na tahuna e Naomi i masia i ta hinituhana, i uka ma i taki tabua ge hamule mai a viri vona.
RUT 1:19 Lakea ru vano, ru bele o Betlehem. Na tahuna ru bele, e huriki lobo ri turutu ni matai rua. Lakea e huriki a ngatavine ri vanana, “E rei a viri iea? E Naomi muholi?”
RUT 1:20 Pali e Naomi i ta maea, “Naha ni gale iau e Naomi. Mu gale iau ge iau e Mara, a vuhuna A Vure Tuhaka i ratea a nimade nau i hale hateka.
RUT 1:21 Hosi, na tahuna a malaga koea a lakea o Moab, a tahoka a maki lobo. Pali na tahuna e BAKOVI DAGI i tuli hamule valai iau koea, a uka liu tara maki. Naha ni gale iau e Naomi. A Vure Tuhaka i rata hale iau.”
RUT 1:22 A ngava iea a nuverei ne Naomi rua e kana e Rut, ra ngatavine o Moab. Ru pea e Moab, ru hamule o Betlehem. Na tahuna iea e huriki ri vakatubu ni mirio a hania na barli.
RUT 2:1 A bakovi tara vonga na kabu ne Elimelek, e girihine Naomi. Ia a bakovi dagi, a bakovi na mahala. A rana bakovi iea e Boas.
RUT 2:2 Na parava tara e Rut, ra ngatavine o Moab, i takia e Naomi, i ta maea, “Ga matakanea tara hania na bakovi tara ge dodo iau, ga poi a masigona barli vona.” Lakea e Naomi i koli, i ta maea, “O kagu, o vano.”
RUT 2:3 Lakea i pagitala, i muri ne huriki a vora ri mirio na hania, i poi a masigona barli. Pali muga i uka ma i lohoka vona a hania i leho vona, ga hania ne Boas, a bakovi na kabu ne Elimelek.
RUT 2:4 I uka ma i tabaka, e Boas i hamule o Betlehem, i tagui e huriki ri mirio, i ta maea, “E BAKOVI DAGI ge made turane mua!” Lakea ri koli, ri ta maea, “E BAKOVI DAGI ge gamai ioe!”
RUT 2:5 Muri e Boas i nanea a bakovi i mata­kari e huriki ri mirio, i ta maea, “E rei a ngatavine karaba iea?”
RUT 2:6 Lakea i koli, i ta maea, “Ia a ngatavine o Moab, i hamule valai turane Naomi.
RUT 2:7 I taki iau ga longo vona ge muri ne huriki ri mirio, ge poi a masigona barli. I vakatubu ni leho na hatelanga i valai i harena ngane. I leho hateka, pali ngane i malo popote na kape.”
RUT 2:8 Lakea e Boas i vano i ta turane Rut. I takia i ta maea, “Tugu, o longo. Naha ni lakea na hania na bakovi tara. Naha ni ha taroa a hania nau. O leho turana e huriki a vora ngatavine nau.
RUT 2:9 O matai kamumu a hini ri mirio vona, o vano o leho turane ria. Iau a taki pali e huriki a bakovi, nahea ri gi kinikoi ioe. Na tahuna o marohu, o vano o ninu a naru na buroi i kiru puru e huriki a bakovi.”
RUT 2:10 Na tahuna e Rut i longoa a ngavane Boas, i lolu puru na malala, i ta maea, “I navai o rata kamumu iau? Iau i uka ma a ngatavine koea. Iau a mosi.”
RUT 2:11 Lakea e Boas i koli, i ta maea, “A longo pali a nuverei vomu. O rata kamumu hateka e kamu e Naomi, muri ne girihimu i mate. O pe e tamamu, e kinamu, a malala vomu o valai koea turane Naomi. Ngane o made turane huriki i uka ma o lohoka ne ria muga.
RUT 2:12 E BAKOVI DAGI ge rata kamumu ioe, a vuhuna o rata a rabu kamumu. E BAKOVI DAGI, a Vure ne Israel, ra viri o valai vona go taru na karapana, ge koli kamumu a rabu o ratea.”
RUT 2:13 E Rut i koli, i ta maea, “Bakovi dagi, a naro o rata kamumu iau vona i kamumu hateka. O luke kamumu iau, o taki a ngava kamumu nau. Pali na matane huriki, iau i uka ma iau a vora ngatavine vomu.”
RUT 2:14 Na kuru haro e Boas i galea e Rut, “O valai, o lutu a bret na sos, o kani.” Lakea i made turane huriki ri mirio, e Boas i habi vona a barli ni gutu. I kani, i maru, i tabuli ranga.
RUT 2:15 Na tahuna e Rut i pesi rike, ta ge leho tabu, e Boas i taki e huriki a bakovi, i ta maea, “Naha ni vakamaruhua na tahuna i poi a masigo tabukoi na galesi na barli.
RUT 2:16 Mu puri puru tabu ranga masigo na barli na horena, ge poi. Naha ni tahatea.”
RUT 2:17 Lakea e Rut i poi a maka masigona barli na hania iea, i harena na malunga. Lakea i ubi vila a vinina barli i poi kadolu. I ubi vila lobo, i masia a nimavana i manga 10 kilo.
RUT 2:18 Muri i kube lakea na tanga a barli i poi kadolu, i vakasiri ne kana. A kinani i kani kaleva na kuru haro ranga i kube lakea vona, i habi vona.
RUT 2:19 Lakea e kana i nanea, “O poi a masigo vai mona? O leho vai? Ni gi gamai a viri i matakari kamumu ioe!” Lakea e Rut i kolia e kana, i ta maea, “A bakovi a leho turana mona a rana e Boas.”
RUT 2:20 Lakea e Naomi i takia e kana, i ta maea, “E BAKOVI DAGI ge gamai ia. E BAKOVI DAGI i uka ma i vakatoku a naro kamumu vona ne tarua tu mahuri, na kabu tarua to mate pali! Ra bakovi iea a kabu ne tarua! Na narone mia koea, bara i korimule tarua!”
RUT 2:21 Lakea e Rut, ra ngatavine o Moab, i ta maea, “E Boas i taki iau ga made turana e huriki a vora vona, ge harena na tahuna a leho na nimirio ge lobo.”
RUT 2:22 Lakea e Naomi i takia e Rut, i ta maea, “O kagu, kamumu hateka. O made turana e huriki a vora ngatavine vona. Naha ni lakea na hania tara, ma go bole a maregoa.”
RUT 2:23 Lakea e Rut i leho tabukoi ne huriki a vora ngatavine ne Boas, i poi a masigona barli, i vano i harena na tahuna a nimirio i lobo. Na rodo bara i hamule, i mahita turana e kana.
RUT 3:1 Na parava tara, e Naomi i takia e kana, “O kagu, ga matakanea tara bakovi go parangi vona, go made na tanga vona, ge matakari kamumu ioe.
RUT 3:2 E Boas, ra viri o leho turane huriki a vora ngatavine vona, ia a kabu ne tarua. Barama na rodo bara i vila a vinina barli na tabeke ni ubi vila a vinina barli vona.
RUT 3:3 O hilolo, o biri ioe na nibiri mangisipa, o vakabagetu ioe. Muri o lakea na tabeke ni ubi vila a vinina barli vona. Nahea ge matai ioe. O pesi kapiloho, o davea ge kani, ge ninu taro.
RUT 3:4 Na tahuna i mahita, o matai kamumu a hini i mahita vona. Muri o vano, o ave rikea a kala na vahana, o mahita puru vonga, bara i taki ioe a ra go ratea.”
RUT 3:5 Lakea e Rut i koli, i ta maea, “A maka ngava o taki lobo ga ramai.”
RUT 3:6 Lakea i vano, i puru lakea na tabeke ni ubi vila a vinina barli, i muri mai a ngavane kana.
RUT 3:7 E Boas i kani, i ninu, i milamila a kaina, lakea i vano i mahita na harena barli ni ru kadolu. Muri e Rut i laho sibanga lokovonga, i ave rikea a kala na vahane Boas, i mahita puru.
RUT 3:8 Na kururodo, e Boas i turutu rike i hadongo, lakea i masia a ngatavine i mahita tabukoi na vahana.
RUT 3:9 Lakea i nanea, “Ioe e rei, ke?” Lakea e Rut i koli, i ta maea, “Iau a vora vomu, e Rut. O kavitagu iau na harena kala vomu, a vuhuna ioe a viri nau bara o korimule iau.”
RUT 3:10 Lakea e Boas i koli, i ta maea, “Tugu, e BAKOVI DAGI ge gamai ioe. A rabu kamumu o vakasiri a kabu ne tarua ngane, i kamumu hateka na rabu o vaka­siri muga, i uka ma o ngaru e huriki a riau, ri uka mahala o ri tahoka a mahala.
RUT 3:11 Ngane, o tugu, naha ni mangenge. Iau ga muri mai a ningaru vomu. E huriki lobo na tanga koea ri lohoka vomu, ioe a ngatavine maratarata.
RUT 3:12 I muholi, iau a kabu marua, pali i tahoka tara bakovi i tabukoi hateka ne marua bara i korimule marua.
RUT 3:13 O mahita koea na rodo iea. Na hatelanga ga nanea a bakovi iea. Ia ge ngaru ni korimule marua, bara i ratea. Pali ia ge koi, muholi hateka, na rane BAKOVI DAGI i mahuri, iau bara korimule marua. O mahita koea, ge harena na hatelanga.”
RUT 3:14 Lakea i mahita tabukoi na vahana. Na hatelanga pokopoko i vano, ma ge matakilalea e huriki. I rata mavonga, a vuhuna e Boas i takia i koi e huriki ri gi masia a ngatavine i valai na tabeke ni ubi vila a vinina barli.
RUT 3:15 Na tahuna ta ge vano, e Boas i takia ge habia tara kala vona ge vulalea. Na tahuna i vulalea, e Boas i guru puru vona a barli, a nimavana i 20 kilo, i vakakubea vona, i vano. Muri i hamule lakea na tanga dagi.
RUT 3:16 Muri e Rut i hamule ne kana, lakea e kana i nanea, “O kagu, i navai?” Lakea e Rut i tuverei polo ne kana a maki lobo e Boas i rata vona.
RUT 3:17 I ta maea, “E Boas i habi nau a barli, a nimavana i 20 kilo! I taki i koi ga laho lame mule mai ioe.”
RUT 3:18 Muri e Naomi i ta maea, “O kagu, o hatenono ge bele navai vona a ngava. E Boas i uka ma ge malo ge harena na ngava ni gi vakalobo mona.”
RUT 4:1 Ngane e Boas i lakea na dilidala na tanga dagi, i made vonga. I uka ma i tabaka, a bakovi na nikorimule, ra viri e Boas i vakalongo e Rut vona, i valai. Lakea e Boas i galea, “O turagu, o valai taro o made puru, a tahoka a ngava vomu.” Lakea i valai i made turane Boas.
RUT 4:2 Lakea e Boas i bole a gare ala ravulu na tanga dagi, i taki ria ri gi longo a ngava ne rua. Lakea ri valai, ri vapopo.
RUT 4:3 Muri i takia a bakovi na nikorimule, i ta maea, “E Naomi i hamule o Moab, i ngaru ge habia, ni gi kona a tabekena malala ne Elimelek, ra turane tarua.
RUT 4:4 A luhoi i kamumu ga vakalongo ioe vona, go konamulea na matane huriki, na matane huriki a gare na viri nau. Ioe o ngaru ni konamulea a malala iea, o konea. Pali ioe o koi, o vakalongo iau ngane, ga lohoka. Ioe kunana a viri bara o muga o konamulea ra malala iea. Pali ioe bara o koi, iau a muri vomu na kabu ne tarua bara konamulea a malala iea.” Lakea a bakovi iea i ta maea, “Iau ga konamulea.”
RUT 4:5 Muri e Boas i ta maea, “Na parava o konamulea a malala ne Naomi, bara o bolea e Rut, ra ngatavine o Moab a havuri na bakovi i mate. I mavonga, ra malala iea bara i tabuli na rana kabu na bakovi i mate pali.”
RUT 4:6 Lakea a bakovi na nikorimule i ta maea, “A koi, a malala nau ma ge bole tabu e huriki e tuna. Ioe o konamulea a malala vona, iau a marikoi liu.”
RUT 4:7 Hosi ne Israel na tahuna ni valongo mai a ngava na nivakoli a maki, na nihabi polo a maki, a bakovi tara bara i habia a vahapolo vona na bakovi tara. I manga ri vakalobo a ngava.
RUT 4:8 Lakea a bakovi iea i takia e Boas, i ta maea, “O konamulea.” Muri a bakovi iea i kali talea a vahapolo vona i habia ne Boas.
RUT 4:9 Muri e Boas i vakalongo e huriki a gare, e huriki ri vapesihi vonga, i ta maea, “Mona, na matane mua lobo, a konamulea ne Naomi a malala ne Elimelek, ne tuna ala rua e Kilion, e Malon.
RUT 4:10 A kona tabua e Rut, ra ngatavine o Moab, a havuri ne Malon, ge girihigu. A rata mavonga a malala iea ge tabuli na rane Malon, ra bakovi i mate pali, lakea a rana i uka ma ge lobo na kabu vona na tanga vona. Mona mua lobo mu longoa.”
RUT 4:11 Muri e huriki a gare turane huriki ri vapesihi na mada, ri ta maea, “Mia lobo mi longoa. E BAKOVI DAGI ge rata kamumua ra ngatavine i valai na ruma vomu, ge manga e Resel, e Lea, ra ru hudotalea a kabu ne Israel. Pali ioe, ge ioe a bakovi dagi na kabu ne Eprata, a ramu ni gi vakarere o Betlehem.
RUT 4:12 Mi ngaru a hamone marua e BAKOVI DAGI i habi marua vona a ngatavine karaba iea, ge manga a hamone Peres, re tune Iuda rua e Tamar.”
RUT 4:13 Muri e Boas i parangi vona e Rut, i mahita turana, lakea e BAKOVI DAGI i rata kamumua i singou, i podea a koma bakovi.
RUT 4:14 Lakea e huriki a ngatavine na tanga ri takia e Naomi, “Si gi kavurikea e BAKOVI DAGI, a vuhuna i habia vomu a viri ge matakari ioe. A rana ge bele dagi o Israel!
RUT 4:15 Ra viri iea ge vakatora a nigau vomu, bara i matakari ioe na tahuna o gare. E kamu, ra i ngaru hateka ioe, i poda a koma ne girihina. A nikori ne kamu i dagi hateka vona a nikori bara o bole na tahuna o tahoka e tumu a bakovi ala polorua.”
RUT 4:16 Muri e Naomi i bokea e tune Rut, i matakaria i manga e tuna.
RUT 4:17 E huriki a ngatavine na tanga ri ta maea, “E Naomi i tahoka ngane e tuna a bakovi.” Lakea ri vunua e Obed. Ia e tamane Iesi. E Iesi ia e tamane Davit.
RUT 4:18 Iea a nuverei na kabu ne Peres: e Peres e tamane Hesron,
RUT 4:19 e Hesron e tamane Ram, e Ram e tamane Aminadab,
RUT 4:20 e Aminadab e tamane Nason, e Nason e tamane Salmon,
RUT 4:21 e Salmon e tamane Boas, e Boas e tamane Obed,
RUT 4:22 e Obed e tamane Iesi, e Iesi e tamane Davit.
JON 1:1 Na parava tara, a ngavane BAKOVI DAGI i bele ne Iona, e tune Amatai, i ta maea,
JON 1:2 O pesi rike, o sike lakea na tanga dagi hateka e Ninive, o tahate ria, a vuhuna a matai ria ri rata a naro hale vakaroro na matagu.
JON 1:3 Pali e Iona i pesi rike, ta ge ha ne BAKOVI DAGI ge lakea o Tarsis. I pori lakea o Iopa, i masia tara aga ta ge lakea vona a tanga iea. I habia a mapana aga, i rike vona, ta ge ha ne BAKOVI DAGI, ge lakea o Tarsis.
JON 1:4 Pali e BAKOVI DAGI i vakabelea a taiava, i ratea a dari i bolu, i kule laea a aga i popote ge mapua.
JON 1:5 E huriki a tahodari ri mangenge, lakea takutaku ne ria i vasileki lakea na vure vona. Muri ri vuroki a galesi ne ria i puru na dari, ge maraha a aga. Pali e Iona i puru na ngavana aga, i tabuli puru, i mahita mate.
JON 1:6 A matakari na aga i valai, i vangoa, i ta maea, O mahita navai ke? O pesi rike, o vasileki na vure vomu, o takia ge matai hita, ge vakakori hita, ma si gi vurua.
JON 1:7 Muri e huriki a tahodari ri vata, ri ta maea, Si gi voro a satu, si gi lohoka vona e rei a vuhuna a taiava iea i pori. R i voro a satu, i boru langa ne Iona.
JON 1:8 Muri ri nanea, O taki mia, e rei a vuhuna a maregoa iea i bele ne hita? A ra leho o ratea? O malaga vai? E rei a rana tanga vomu? E rei a rana kabu vomu?
JON 1:9 E Iona i koli, i ta maea, Iau a Hibru. A kavurikea e BAKOVI DAGI, a Vure na hunu, ra i rata rike a dari, a malala.
JON 1:10 A nikoli ne Iona i vakamangenge ria. Lakea, ri nanea, A ra o ratea? Ri lohoka vona i ha ne BAKOVI DAGI, a vuhuna i taki ria pali.
JON 1:11 A dari i bolu hateka, lakea ri nanea, A ra mi gi ratea vomu ge ratea a dari ge malilo?
JON 1:12 I koli i ta maea, Mu bole rike iau, mu voro puru iau na dari. Muri bara i puru a malilo, i ngapa. Iau a lohoka vona, a naro hale nau i vakabelea ra taiava.
JON 1:13 Pali e huriki a tahodari ri koi. Ri toni a bulune ria ni vore hamule na lavu. Ri toni, toni, ri pemo, a vuhuna a taiava i pori valai muga.
JON 1:14 Muri ri vasileki lakea ne BAKOVI DAGI ri ta maea, O BAKOVI DAGI. Nahea mi gi vurua vona a matenga na bakovi iea. Nahea go kau virihi mia vona a matenga na bakovi i uka rarenga. O BAKOVI DAGI, o rata na ningaru vomu a maki lobo.
JON 1:15 Muri e huriki a bakovi ri nugua e Iona, ri voro purua na dari, i pasipuru a taiava, i puru a malilo, i ngapa.
JON 1:16 Na tahuna e huriki ri masia a dari i malilo, ri mangenge hateka ne BAKOVI DAGI, ri habi a nihabi vona, ri ta muholi lakea vona.
JON 1:17 Pali e BAKOVI DAGI i rudua tara manu dagi, i todoa e Iona. E Iona i made pololilo na kavutuna manu na haro i tolu, na rodo i tolu.
JON 2:1 Na tahuna e Iona i made pololilo na kavutuna manu, i vasileki ne BAKOVI DAGI, a Vure vona,
JON 2:2 i ta maea, Na naro hale nau, a popote ga mate, lakea a gale ioe, e BAKOVI DAGI, o koli mulea a ninana nau. O longoa a nitangi nau pololilo liu na lovo ne huriki ri mate.
JON 2:3 O voro puru iau na utu, pololilo na dari. A dari i kavitagu iau, a bokona dari i rere tagu iau.
JON 2:4 Muri a ta maea, Ioe o ngalahere nau, pali muri ma bara matai tabu a roho ni taba vomu.
JON 2:5 A dari i kavitagu iau a popote ga mate. A utu i tabuli halui iau, a kadola i rako halui a gigu.
JON 2:6 Polotano na vuhuna lolo, a pasiri puru, a puru polotano liu na utu, a luhoi ta ga made vakaroro na bavi. Pali ioe o korimule iau na lovo, ioe e BAKOVI DAGI, a Vure nau.
JON 2:7 Na tahuna i vurea a matagu, a longo visi tabu ioe, e BAKOVI DAGI. A nivasileki nau i bele vomu na roho ni taba vomu.
JON 2:8 E huriki ri togo a maka vure tavula ne ria, ri ngalahere na naro kamumu vomu o ngaru ni vakasiri ria vona.
JON 2:9 Pali iau ga habi a nihabi vomu, bara kavurike ioe na linge. Ra maki a ta muholi vomu vona, bara rata kamumua. A nikorimule nau i valai ne BAKOVI DAGI!
JON 2:10 Muri e BAKOVI DAGI i vakukua a manu, i lua talea na bike e Iona.
JON 3:1 Muri a nitane BAKOVI DAGI i bele tabu ne Iona, i ta maea,
JON 3:2 O pesi rike, o sike lakea na tanga dagi hateka e Ninive, o vakalongo ria vona a ngava a habi vomu.
JON 3:3 E Iona i longo mai a nitane BAKOVI DAGI, i vano, i lakea o Ninive. E Ninive a tanga dagi hateka, na parava i tolu bara o polo haluia.
JON 3:4 Na mugana parava e Iona i laho dili na tanga dagi, i ta maea, Ge lobo a parava ge ravulu va, e Ninive ni gi ratapile.
JON 3:5 E huriki o Ninive ri longoa a nitana Vure, ri taki ri gi peremu na kinani, ri gi rea na matutuna kala, i tubu ne huriki a kakaina tanga, i puru ne huriki a matasia.
JON 3:6 Na tahuna a ngava i bele na hariki ne Ninive, i pesi rike na gula-hariki vona, i kali vuroki a bagetua vona, i rea a matutuna kala, i made puru na habulo.
JON 3:7 Muri a hariki i habi a ngava i lakea ne huriki a Ninive, i ta maea, Iau a hariki turana e huriki a bolekori nau, mi vakuku mua vona a ngava dagi iea: E huriki a bakovi, a kanirau, a kabuna sipsip, a bulmakau, nahea ri gi kani ri gi ninu.
JON 3:8 E huriki a bakovi turana a kanirau ri gi rea na matutuna kala. E huriki lobo ri gi gale tuhaka a Vure, ri gi pulo a vilo hale ne ria, turana a rongova ne ria.
JON 3:9 E rei ge lohoka vona? A Vure, ma ge pulo a niluhoi na rongova dagi vona, ge dodo hita, i uka ma si gi vurua.
JON 3:10 Na tahuna a Vure i matai ria ri pulo a vilone ria na naro hale, lakea i dodo ria, i uka ma i ratapile ria ge manga a hini i taki muga.
JON 4:1 E Iona, i uka ma i ngarua a naro i ratea e BAKOVI DAGI, lakea i tahate.
JON 4:2 I vasileki ne BAKOVI DAGI, i ta maea, O BAKOVI DAGI, o longo iau. I uka ma a pea ma a robo nau, a lohoka vona pali i uka ma go ratapilea e Ninive. I mavonga, a toni ni ha lakea o Tarsis. A lohoka vomu, ioe a Vure na nidodo, na ningaru. O maradoi na nitahate, o ngaru hateka vakaroro e huriki. Ioe a Vure o kara ni pulo a niluhoi vomu na niratapile e huriki.
JON 4:3 Ngane, o BAKOVI DAGI, o rabalaki iau. I kamumu hateka ga mate, ge ra ni mahuri.
JON 4:4 Pali e BAKOVI DAGI i koli, i ta maea, Pali ioe, a rongova vomu i kamumu?
JON 4:5 E Iona i pagitala na tanga d a g i e Ninive, i made n a tabeke na nirikena haro. I haea vonga a kape kiroko, i taru vona, i davea a r a maki ge masia ge bele n a tanga dagi.
JON 4:6 Muri e BAKOVI DAGI a Vure i ratea tara mota i koru rike, ge habi a maniru na gine Iona, ge taru vona a harena haro. E Iona i vivi hateka vona a mota iea.
JON 4:7 Pali n a hatelanga pokopoko na parava muri, e BAKOVI DAGI i rudua tara mata kiroko i ratapilea a mota, i malai.
JON 4:8 Na tahuna a haro i rike, e BAKOVI DAGI i rudua a vilu dagi i pori valai na nirikena haro, lakea a haro i kani pilea a gine Iona, i ratea i vurea a matana, i ngaru ni mate. Lakea i takia a Vure, I kamumu hateka ga mate. Ge ra ni mahuri?
JON 4:9 Muri a Vure i takia e Iona, A mota i malai pali, o tahate ke. Ra rongova vomu, i kamumu? Lakea e Iona i koli, i ta maea, A rongova nau i kamumu. I madihi hateka a hategu, a popote ga mate.
JON 4:10 Pali e BAKOVI DAGI i t a maea, R a mota o luhoi hatekea, i uka ma o varoa. I uka ma o ratea ge koru. I gaga rike na rodo tara, i mate na rodo muri.
JON 4:11 Pali a tanga dagi e Ninive i tahoka e huriki ala 120,000 ri made vonga, i uka ma ri lohoka vona a naro kamumu, a naro hale. I tahoka tabu a bulmakau i kupo. O luhoi navai, i uka ma ga dodo e huriki na tanga dagi iea?
MAT 1:1 E huriki a vuhune Isu Kristo, a hamone Davit, a hamone Abraham.
MAT 1:2 E Abraham e tamane Isak. E Isak e tamane Iakop. E Iakop e tamane Iuda, turana e huriki e turana mai.
MAT 1:3 E Iuda e tamane Peres rua e Sera, e kinane rua e Tamar. E Peres e tamane Hesron. E Hesron e tamane Ram.
MAT 1:4 E Ram e tamane Aminadab. E Aminadab e tamane Nason. E Nason e tamane Salmon.
MAT 1:5 E Salmon e tamane Boas, e kinana e Rahap. E Boas e tamane Obed, e kinana e Rut. E Obed e tamane Iesi.
MAT 1:6 E Iesi e tamane Davit, a hariki. E Davit e tamane Solomon, e kinana e girihine Uria.
MAT 1:7 E Solomon e tamane Rehoboam. E Rehoboam e tamane Abisa. E Abisa e tamane Asa.
MAT 1:8 E Asa e tamane Iehosapat. E Iehosapat e tamane Ioram. E Ioram e tamane Usia.
MAT 1:9 E Usia e tamane Iotam. E Iotam e tamane Ahas. E Ahas e tamane Hesekia.
MAT 1:10 E Hesekia e tamane Manase. E Manase e tamane Amos. E Amos e tamane Iosaia.
MAT 1:11 E Iosaia e tamane Iekonaia turana e huriki e turana mai na tahuna e huriki a Babilon ri lakavu e huriki a Israel, ri turari ria lakea o Babilon.
MAT 1:12 Muri ne huriki a Israel ri made o Babilon: E Iekonaia e tamane Siltel. E Siltel e tamane Serubabel.
MAT 1:13 E Serubabel e tamane Abiud. E Abiud e tamane Eliakim. E Eliakim e tamane Asor.
MAT 1:14 E Asor e tamane Sadok. E Sadok e tamane Akim. E Akim e tamane Eliud.
MAT 1:15 E Eliud e tamane Eleasar. E Eleasar e tamane Matan. E Matan e tamane Iakop.
MAT 1:16 E Iakop e tamane Iosep, e girihine Maria, ra i podea e Isu, ra ni gale e Kristo.
MAT 1:17 E huriki e kabune Isu, i vakatubu ne Abraham i valai ne Davit, ri ala ravulu a polona i va. Ne Davit i valai na tahuna ri dili o Babilon, ri ala ravulu a polona i va. Pali ne Babilon i valai na tahuna e Kristoa ni poda, ri ala ravulu a polona i va.
MAT 1:18 A nipodane Isu Kristo i bele maea: E kinana, e Maria, ni habikari ne Iosep ge girihina. Pali i uka ma ru parangi ma, ni matakilaka vona i singou na Hanu Kiripiripi.
MAT 1:19 E girihina, e Iosep, a bakovi kiripiripi. I koi ni vakamaruhua na matane huriki, lakea i luhoi ni pile kapiloho kunanea.
MAT 1:20 I tabana ni luhoi ni rata mavonga, lakea a agelo ne Bakovi Dagi i bele vona na vurena, i ta maea, “Iosep, hamone Davit, naha ni mangenge ni bolena e Maria ge girihimu, a vuhuna a maki i bele vona, i valai na Hanu Kiripiripi.
MAT 1:21 Bara i podea a koma bakovi. O vunua ge Isu, a vuhuna bara i korimule e huriki a kabu vona na naro hale ne ria.”
MAT 1:22 A maki nga ri bele, ge bele muholi a ngavane Bakovi Dagi i taki e huriki a propet vona hosi, i ta maea,
MAT 1:23 “A sirula bara i singou tavula, i podea a koma bakovi, bara ni gale e Emanuel.” A pelegona a ngava e Emanuel i maea, “A Vure i made turane hita.”
MAT 1:24 Na tahuna e Iosep i hadongo, i muri mai a ngavana agelo ne Bakovi Dagi. I tulia e Maria ge girihina, ru lakea na tanga.
MAT 1:25 Pali i uka ma i mahita turana, i harena na tahuna e Maria i podea a koma bakovi vona. Lakea e Iosep i vunua a rana e Isu.
MAT 2:1 E Isu ni poda o Betlehem na tabeke ne Iudea na tahuna a Hariki e Herod i matakari vonga. Muri e huriki a bakovi na lohokanga na nilahona hada to malaga na tabeke na nirike na haro, to valai o Ierusalem.
MAT 2:2 To nana, “Avia a viri ni poda a hariki ne huriki a Iuda? Mete masia a hada vona na tabeke na nirike na haro, mete valai mete ge kavurikea.”
MAT 2:3 Na tahuna a Hariki e Herod i longoa a ngava iea, i lege a lohona. E huriki o Ierusalem ranga, i lege a lohone ria.
MAT 2:4 Lakea i gale palupu e huriki a prister dagi, a mari na vinara na lotu, i nana ria vona ni gi poda vai e Kristo.
MAT 2:5 Ri ta maea ria, “Bara ni poda na tanga e Betlehem, na tabeke ne Iudea, a vuhuna e huriki a propet hosi ri here maea:
MAT 2:6 ‘Ra ioe o Betlehem na tabeke ne Iudea i uka ma a tanga tavula o Iudea, a vuhuna bara i pagitala vomu a matakari, bara ia a matakari ne huriki a kabu nau, re huriki a Israel.’”
MAT 2:7 Muri e Herod i gale kapiloho e huriki a mosi nga, i nana tou vona a parava to matai a hada vona.
MAT 2:8 Muri i rudu tou, to go lakea o Betlehem, i ta maea, “Moto vano, moto matakana kamumua a koma iea. Na tahuna moto matavisia, moto taki iau. Iau tara a ngaru ni lokovonga, ga kavurikea.”
MAT 2:9 To longo lobo a ngavana hariki, to vano. Lakea a hada to masia na nirikena haro, i muga ne tou, i vano i koro polomeli na tanga i made vona a koma.
MAT 2:10 Na tahuna to masia a hada, to vivi hateka.
MAT 2:11 Na tahuna to bele na ruma, to masia a koma turana e kinana e Maria, lakea to turume puru, to kavurikea e Isu. To bole tala na tava ne tou a mahala, to vakaparua na gol, a buluka mangisipa ni gale a insens tara, a mir tara.
MAT 2:12 A Vure i ta pupukari ne tou na vurena, nahea to go hamule maia e Herod. Lakea to ramai a dala tara, to hamule lakea na robo ne tou.
MAT 2:13 To vano pali a bakovi dagi nga, lakea a agelo ne Bakovi Dagi i bele ne Iosep na vurena, i ta maea, “O pesi rike turana koma, e kinana, moto ha lakea o Egipto. Moto made vonga. Muri bara taki matou, moto hamule valai. E Herod i matakanea a koma iea, ta ge rabalakia.”
MAT 2:14 Lakea i pesi rike na rodo, i vango a koma rua e kinana, to ha lakea o Egipto.
MAT 2:15 To made vonga i harena na tahuna e Herod i mate. Lakea i bele muholi a ngava e Bakovi Dagi i taki hosi ne huriki a propet, i ta maea, “A gale talea o Egipto e tugu a bakovi.”
MAT 2:16 Na tahuna e huriki a mosi nga i uka ma ri hamule valai ne Herod, i madihi a hatena, a vuhuna i matakilaka vona ri tamia. I vakuku e huriki a nugumaheto ri gi rabalaki e huriki a koma bakovi o Betlehem, na tabeke tabukoi vonga, a pida ne ria i polotano na pida i rua. I lohoka vona a pida ne Isu bara i polotano na pida i rua, a vuhuna i longo a nitane huriki a bakovi na nirike na haro.
MAT 2:17 Ngane a ngava i bele muholi, ra ngava e Bakovi Dagi i taki hosi ne Ieremaia a propet, i ta maea,
MAT 2:18 “Ni longo na tanga e Rama e huriki ri haloho. E Resel i taringi e huriki e tuna. Pali i koi ni gi luke, a vuhuna e huriki e tuna ri mate lobo pali.”
MAT 2:19 Muri e Herod i mate, lakea a agelo ne Bakovi Dagi i bele ne Iosep o Egipto na vurena,
MAT 2:20 i ta maea, “E huriki ta ri gi rabalakia a koma ri mate pali. O pesi rike, o tuli a koma rua e kinana, moto hamule lakea na robo e Israel.”
MAT 2:21 Lakea i pesi rike, i tuli rua to hamule lakea o Israel.
MAT 2:22 Pali i mangenge ni lakea o Iudea, a vuhuna i longoa e Arkelaus i bole a murine tamana, e Herod, i matakari a tabeke ne Iudea. A agelo ne Bakovi Dagi i bele ne Iosep na vurena, i vakalongoa, i mavonga to lakea na tabeke ne Galili.
MAT 2:23 To vano to made o Nasaret. Ngane i bele muholi a ngava na propet i ta maea, “Bara ni gale ia a koma o Nasaret.”
MAT 3:1 Na tahuna iea, e Ioanes, a mari ni vahilolo, i tubu ni leho, i vara na tabeke i ngeki o Iudea.
MAT 3:2 I vara maea, “Mu pulo a vilone mua, a vuhuna a harikianga na hunu i tabukoi ge bele.”
MAT 3:3 Re Ioanes, a propet e Isaia i vakalongo muga vona, i ta maea, “A lohona viri i gale dagi na tabeke i ngeki, i ta maea, ‘Mu pelekadoa a dala ne Bakovi Dagi. Mu pelekadoa a dala ge laho vona ge kiripiripi.’”
MAT 3:4 A varakia ne Ioanes ni rata na vuna kamel. I rea tata ia na palabele ni rata na kulina meme. I kani a koa, a ame na robo.
MAT 3:5 E huriki lobo o Ierusalem, e huriki lobo na tabeke ne Iudea, e huriki lobo tabukoi na naru e Iordan ri lokovonga maia.
MAT 3:6 Ri taki tala a naro hale ne ria, lakea i vahilolo ria na naru e Iordan.
MAT 3:7 Pali na tahuna i matai e huriki a Pariseo, a Sadusi ri valai mai ia ge vahilolo ria, i taki ria, i ta maea, “Mua a tuna mata! E rei i taki mua mu gu ha vona a rongova ne Bakovi Dagi?
MAT 3:8 Mu rata a naro ge vakasiri mu pulo a narone mua.
MAT 3:9 Naha ni luhoi mua, ge mua a hamone Abraham, mu gu malamala pali. Naha ni luhoi mavonga, a vuhuna a Vure i kara ni pulo a kedo nga, ge ria e huriki a hamone Abraham. I vai a kanena narone mua? Mu rata taro a naro kamumu ge vakasiri mua mu pulo muholi a vilone mua.
MAT 3:10 A kira i tabuli tabukoi pali na vuhuna kai. A kai i uka kanena kamumu, bara ni tolo puru, ni rungani.
MAT 3:11 “Iau a vahilolo mua na naru a vuhuna mu pulo a vilone mua. Pali a bakovi tara bara i luve muri nau i tuhaka hateka nau. Iau i uka ma a bakovi kamumu ga bole polo a vahapolo vona. Na tahuna i valai, bara i vahilolo mua na Hanu Kiripiripi, a kanono.
MAT 3:12 Ngane i tabukoi bara i kalipida e huriki a bakovi kamumu, a bakovi hale, i manga a bakovi i leho na hania na vit i kalipida a vit, a luluna. Bara i bole e huriki a bakovi kamumu, i ru ria na tanga kamumu, i manga a bakovi i leho na hania i ru kadolu a vit pololilo na roho na vit. Pali bara i bole e huriki a bakovi hale, i voro rike ria na kanono, i manga a bakovi i leho na hania na vit i bole a luluna vit, i voro rike na kanono. A kanono iea, i uka a nilobona.”
MAT 3:13 Muri e Isu i pea e Galili i lakea na naru e Iordan, e Ioanes ge vahiloloa.
MAT 3:14 Pali e Ioanes i hehe, i ta maea, “I navai ga vahilolo ioe? Ioe a viri bara o vahilolo iau.”
MAT 3:15 Pali e Isu i koli, “O rata kunanea, a vuhuna i kamumu tu gu rata lobo a maki e Bakovi Dagi i taki tu gu rata.” Lakea e Ioanes i longo, i vahiloloa.
MAT 3:16 E Ioanes i vahilolo loboa e Isu, lakea e Isu i malaviriri kunana i pea a naru. A hunu i mata ka, lakea i masia a Hanuna Vure i puru valai manga a balu, i toka langa vona.
MAT 3:17 Lakea a lohona viri i ta valai na hunu, i ta maea, “Iea e tugu a hategu. A vivi hateka vona.”
MAT 4:1 Na parava tara a Hanu Kiripiripi i rudua e Isu ge lakea na tabeke i ngeki, a hanitu ge tonia vonga.
MAT 4:2 E Isu i peremu a maki ni kani na parava i ravulu va, a rodo i ravulu va. Lakea i vitolo.
MAT 4:3 A bakovi ni toni e huriki i bele vona, i takia, “Ge ioe a tuna Vure, o taki a kedo nga ri gi mapulo ri gi manga a bret.”
MAT 4:4 E Isu i koli, “A ngava ni here puru na Hinere, i ta maea, ‘A bakovi i uka ma ge mahuri na maki ni kani kunana. A bakovi bara i mahuri na tahuna i longototo a ngava lobo na Vure.’”
MAT 4:5 Muri a hanitu i tulia e Isu, i vakapesi langea na mapana roho na Vure o Ierusalem,
MAT 4:6 i takia, “Ge ioe a Tuna Vure, o to raga, a vuhuna a ngava ni here puru na Hinere i maea, ‘A Vure bara i rudu e huriki a agelo vona, ri valai ri matakari ioe. Ri gi bole rike ioe na limane ria, ma ge padi a vahamu a kedo.’”
MAT 4:7 Lakea e Isu i koli mule, i ta maea, “Ni here puru tabu na Hinere, i ta maea, ‘Naha ni tonia e Bakovi Dagi, a Vure vomu.’”
MAT 4:8 Muri a hanitu i tuli tabua e Isu, ru lakea na mapana lolo dagi tara. I vakasiria vona a tanga lobo na malala, a bagetua ne ria.
MAT 4:9 Lakea a hanitu i takia, “Ioe bara o turume puru, o vasileki nau, bara habi vomu a maki lobo nga.”
MAT 4:10 Lakea e Isu i takia, “Satan, o ha nau! A ngava ni here puru na Hinere i maea, ‘O kavurikea e Bakovi Dagi, a Vure vomu, o ramai kunana ia.’”
MAT 4:11 Muri a hanitu i ha taroa. I valai ngane e huriki a agelo ri tuhoria.
MAT 4:12 Na tahuna e Isu i longoa a velengane Ioanes ni ru dili na bavi, i hamule lakea o Galili.
MAT 4:13 I malaga o Nasaret, i vano i made o Kapernaum, a tanga tabukoi na darilomu na malala ne huriki a kabu ne Sebulun e Naptali.
MAT 4:14 Ngane i bele muholi a ngava ni taki polo na propet, e Isaia, i ta maea,
MAT 4:15 “E huriki ri made na malala ne huriki a Sebulun, e huriki a Naptali, a dala i pori lakea na dari, na tabeke tara na naru e Iordan, a robo e Galili, ra i made vona e huriki i uka ma ria a Iuda,
MAT 4:16 e huriki ri made na uvo ri masia a nipara dagi; e huriki ri made na maniru na matenga, a nipara i parai ria.”
MAT 4:17 Ngane e Isu i vakatubu ni vara maea, “Mu pulo a vilone mua. A harikianga na hunu i tabukoi ge bele.”
MAT 4:18 Na parava tara, e Isu i lalaho na gagana Darilomu e Galili, i matai e maki tari rua, e Simon (a rana tara e Petrus), turana e tarina e Andreas. Ru ru a vuko, a vuhuna rua a tahodari.
MAT 4:19 Lakea e Isu i gale rua, i ta maea, “Muru valai, muru muri nau. Ga tovo marua ni tuli valai nau e huriki a bakovi, i manga a hini ngane muru lakavu a manu.”
MAT 4:20 Ru malaviriri kunana ru pea a vuko ne rua, ru muri maia.
MAT 4:21 I laho lokovonga, i matai tabu e maki tarina rua, e Iakop e Ioanes. Ru made na aga turane tamane rua, e Sebedi, to hono a vuko. Lakea e Isu i gale rua.
MAT 4:22 Ru malaviriri kunana ru pea e tamane rua na aga, ru ramaia e Isu.
MAT 4:23 Muri e Isu i lakea na maka tanga na tabeke ne Galili, i dili na maka roho na vaponga, i vara e huriki na Velenga Kamumu na harikianga na hunu. I vakamahuri e huriki lobo ri tahoka a gilanga.
MAT 4:24 A velengana ni longo na tanga lobo na tabeke ne Siria, lakea e huriki ri tuli valai ne Isu e huriki ri giloa na gilanga vilihaliha, e huriki ri tahoka a nimadihi dagi, e huriki i dili ne ria a hanitu, e huriki ri matemate, e huriki a beu. Ri tuli valai vona, i kori ria lobo.
MAT 4:25 E huriki lobo o Galili, o Dekapolis, o Ierusalem, o Iudea, na tabeke tara ne Iordan, ri muri vona.
MAT 5:1 Ngane e Isu i matai e huriki ri muri vona ri ala kupo, lakea i sike na gagana lolo, i made puru. E huriki a murimuri vona ri valai maia,
MAT 5:2 lakea i vakatubu ni tovo ria, i ta maea,
MAT 5:3 “E huriki ri ngaru hateka a Vure ge korimule ria, ri gi vivi, a vuhuna a Vure ge habi ne ria a harikianga na hunu.
MAT 5:4 “E huriki ri tangi ngane ri gi vivi, a vuhuna a Vure ge luke ria.
MAT 5:5 “E huriki ri vakakiroko mule ria ri gi vivi, a vuhuna a malala lobo bara ne ria.
MAT 5:6 “E huriki ri ngaru hateka ni ratena a maki lobo i kamumu na matana Vure ri gi vivi, a vuhuna a Vure ge kori kamumu ria.
MAT 5:7 “E huriki a bakovi ni dodo ri gi vivi, a vuhuna a Vure ge dodo ria.
MAT 5:8 “E huriki i malamala a hatene ria ri gi vivi, a vuhuna a Vure ge made turane ria.
MAT 5:9 “E huriki ri rata e huriki ri valemu, ri gi vivi, a vuhuna a Vure ge gale ria e huriki e tuna.
MAT 5:10 “E huriki ni vakamadihi vakaroro a vuhuna ri malamala, ri gi vivi, a vuhuna a Vure ge habi ne ria a harikianga na hunu.
MAT 5:11 “Na tahuna e huriki ri ratapile a rane mua, ri vakamadihi vakaroro mua, ri biu tavula mua a vuhuna mu ramai iau, mu vivi.
MAT 5:12 Mu vivi hateka, a vuhuna a Vure ge kona dagi hateka mua meli na hunu. E huriki a propet hosi, ria ranga, e huriki ri vakamadihi ria, a vuhuna ri ramai iau.
MAT 5:13 “Mua a sol na malala. Pali a sol, ge lobo a namina, ni gi bole mule tabu navai a namina? Bara ni vuroki, i laho langa vona e huriki, a vuhuna i uka lehona.
MAT 5:14 “Mua a nipara na malala. A tanga meli na kupona i uka ma ge kapiloho.
MAT 5:15 I uka ma si namia a lam, muri si gi kavitagua na ulo. Bara si ru polomeli na dede ge parai e huriki lobo na ruma.
MAT 5:16 I mavonga kunana a naro kamumu ne mua ge parai e huriki a bakovi a ngatavine, ri gi matai, ri gi kavurikea e Tamane mua na hunu.
MAT 5:17 “Naha ni luhoi ga valai ni vakalobo a vinara, a ngava ne huriki a propet. Iau a valai i uka ma ga vakalobo a vinara. A valai ga rata a ngavana vinara, a ngavane huriki a propet ri gi bele muholi.
MAT 5:18 A taki muholi mua, a hunu a malala bara ru lobo. Pali i uka tara hinere kiroko ni here pololilo na vinara ge lobo, bara i vano i harena na nilobona maki lobo.
MAT 5:19 E rei a viri i longotaroa tara ngava kiroko nau, i tovo e huriki ranga ri gi longotaroa, bara ni gale a bakovi tavula na harikianga na hunu. Pali e huriki ri muri mai, ri tovo a ngava lobo nau bara ni gale a bakovi dagi pololilo na harikianga na hunu.
MAT 5:20 A taki mua, a narone mua ge malamala na narone huriki a Pariseo, e huriki a mari na vinara na lotu. Ge uka, i uka ma mu gu dili na harikianga na hunu.
MAT 5:21 “Mu longo pali a vinara tara ne Moses i maea, ‘Naha ni rabalaki a viri. A Vure bara i pelekado e huriki ri rabalaki a viri.’
MAT 5:22 Pali iau a taki mua, e rei a viri i tahatea e turana, a Vure bara i pelekadoa. I muholi, e rei a viri i ratapilea a rane turana bara i pesi na kot ne huriki a Iuda. Pali e rei a viri i ta maea, ‘Ioe a manga,’ bara i puru na kanono na imperno.
MAT 5:23 “I mavonga, na tahuna o habi a nihabi vomu na dede, pali o longovisia e turamu tara i tahoka a ngava vomu,
MAT 5:24 o pe taro vonga na dede a nihabi vomu. O hamule maia e turamu, muru pelekado taro a ngava. Muri o valai o habi a nihabi vomu.
MAT 5:25 “Na tahuna a viri i padi virihi ioe na ngava, o toni ni pelekado malaviriri a ngava, na tahuna muru tabana ni laho lakea na kot. Bara i uka, bara i turari ioe lakea na mari ni pelekado. A mari ni pelekado bara i habi ioe na limana tagari, bara ri ru dili ioe na bavi.
MAT 5:26 A taki muholi ioe, i uka ma go pagitala, ge harena na tahuna o koli mule lobo a maki vona.”
MAT 5:27 “Mu lohoka vona a vinara i ta maea, ‘Naha ni mole.’
MAT 5:28 Pali iau a taki mua, e rei a viri i ngutu kunana na matana a ngatavine, i rata pali a vilo na molenga na hatena.
MAT 5:29 A matamu tara ge rata ioe go rata a rabu hale, o sigi talea, o vurokia. I kamumu a tabeke tara na kakaimu ge velu, pali a kakaimu lobo i uka ma ni gi voro puru na imperno.
MAT 5:30 A limamu tara ge vakaboru ioe na rabu hale, o palakudua o vurokia. I kamumu a tabeke tara na kakaimu ge velu, pali a kakaimu lobo i uka ma ni gi voro puru na imperno.
MAT 5:31 “A vinara tara ne Moses mu longoa i maea, ‘E rei a viri i ngaru ni pilea e girihina ge habia vona a raukea na nivapile.’
MAT 5:32 Pali iau a taki mua, e rei a bakovi i pile tavulea e girihina, re girihina i uka ma i mole, i ratea ge ratea a naro na molenga. Pali e rei a bakovi i parangi a ngatavine ni pile, a bakovi iea tara i mole.
MAT 5:33 “A ngava tara na vinara mu longoa i maea, ‘Na tahuna o kaba, naha ni pulo tabu a ngavamu. O ramai lobo a ngava o kaba vona ne Bakovi Dagi.’
MAT 5:34 “Pali iau a taki mua, naha ni kaba. Naha ni kurahia a Hunu, a vuhuna a hunu a gula hariki na Vure.
MAT 5:35 Naha ni kurahia a malala, a vuhuna ia a maki a Vure i ru langa a vahana vona. Naha ni kurahia e Ierusalem, a vuhuna ia a vuhutanga na Hariki Dagi.
MAT 5:36 Naha ni kurahia a gimu, a vuhuna o keri go ratea tara vumu ge kato o ge kea.
MAT 5:37 A ngava o taki kunana ge ‘emi,’ e ‘uka.’ A ngava ranga bara o taki, i valai kunana na hanitu.
MAT 5:38 “Mu longoa tara vinara ne Moses i maea, ‘A viri i biputua a ngimu, o koli, o biputua a ngina. A viri ge sigi talea a matamu, o koli, o sigi talea a matana.’
MAT 5:39 Pali iau a taki mua, naha ni gegea a bakovi hale. A viri tara ge ubi a garemu, o tabalahehe, ge ubi ioe na garemu tara.
MAT 5:40 A viri tara ge vakapesi ioe na kot ge bolea a padirodo vomu, o habia vona tabu a varakia vomu.
MAT 5:41 A nugumaheto ge vakuku ioe go laho turana na marava i taku, go kaloho polo a maki vona, o laho turana na marava ge rua.
MAT 5:42 O habi na viri i nongi a maki vomu. Naha ni vakatoku na viri i ngaru ni bole taro vomu ranga maki.
MAT 5:43 “Mu longo pali a ngava i maea, ‘Mu ngaru e huriki e turane mua, mu marikoi e huriki a pile ne mua.’
MAT 5:44 Pali iau a taki mua, mu ngaru e huriki a pile ne mua, mu vasileki ne huriki ri vakamadihi vakaroro mua.
MAT 5:45 Bara mu rata mavonga, bara ni gale mua e huriki e tune Tamane mua meli na hunu, a vuhuna i ratea a haro i para langa ne huriki lobo: e huriki a bakovi malamala, e huriki a bakovi hale. I habi a vala ne huriki lobo: e huriki a bakovi malamala, e huriki a bakovi hale.
MAT 5:46 Mua bara mu ngaru kunana e huriki ri ngaru mua, a ra maki kamumu mu gu bolea? E huriki a bakovi ni bole a takis, ria ranga ri ngaru kunana e huriki ri ngaru ria.
MAT 5:47 Pali mua, mu gu tagui kunana e huriki e turane mua, a narone mua ge rangi navai a narone huriki ranga? E huriki na uvo, ria ranga ri rata mavonga.
MAT 5:48 Mu laho malamala liu, a vuhuna e Tamane mua meli na hunu i malamala liu.”
MAT 6:1 Muri e Isu i ta maea, “Na tahuna mu rata a naro kamumu, naha ni vakasiri. Mu rata kapiloho. Bara mu vakasiri, i uka ma mu gu bole a mapane mua ne Tamane mua na hunu.
MAT 6:2 Na tahuna mu habi a maki na matasia, naha ni rudu mugea a viri ge vaki a tavure ge vakalongo e huriki. E huriki a tabele rua ri rata mavonga pololilo na roho na vaponga, polovavo na dala. Ri ngaru e huriki ri gi kavurike ria. A taki muholi mua, ri bole lobo pali a mapane ria.
MAT 6:3 Pali mua, na tahuna mu habi a maki na matasia, mu ratea i uka ma ge lohoka vona e huriki a turane mua.
MAT 6:4 Mu habi kapiloho ne huriki a matasia. Muri e Tamane mua, ra i matai a maki ni rata kapiloho, bara i kona mua.
MAT 6:5 “Na tahuna mu vasileki, naha ni rata manga e huriki a tabele rua. Na tahuna ri vasileki, ri pesi pololilo na roho na vaponga, o na harena dala, ri ngaru ni gi matai. A taki muholi mua, a mapane ria ri bole loboa pali.
MAT 6:6 Na tahuna o vasileki, o dili na ruma, o tukaria a logo, o vasileki ne Tamamu, ra i made kapiloho. Muri e Tamamu, ra i matai a maki lobo ni rata kapiloho, bara i kona ioe.
MAT 6:7 Na tahuna mu vasileki, naha ni ta tavulavula manga e huriki a bakovi i uka ma ria a Iuda ri rata. Ri pahaluhoi ta a Vure ge longo ria na tahuna ri rata a ngava i kupo.
MAT 6:8 Naha ni ramai a narone ria, a vuhuna e Tamane mua i lohoka vona a maki mu ngaru. Na tahuna i uka ma mu takia ma, i lohoka vona pali.
MAT 6:9 I mavonga, mu vasileki maea: ‘Tamane mia meli na hunu, mi ngaru e huriki ri gi togoa a ramu,
MAT 6:10 a harikianga vomu ge valai. A ningaru vomu ni gi ramai koea na malala, i manga a hini ni rata meli na hunu.
MAT 6:11 O habi a maki ni kani ne mia ge karea a parava mona.
MAT 6:12 O puga vuroki a naro hale ne mia, i manga a hini mi puga a naro hale ne huriki ri rata hale mia.
MAT 6:13 Naha ni tuli mia mi gi dili na nitoni. O korimule mia na bakovi hale.’
MAT 6:14 “Na tahuna mu lohopile a naro hale ni rata virihi mua vona, e Tamane mua na hunu tara bara i puga vuroki a naro hale ne mua.
MAT 6:15 Pali mua i uka ma mu gu lohopile a naro hale ne huriki, e Tamane mua tara i uka ma ge puga vuroki a naro hale ne mua.
MAT 6:16 “Na tahuna mu peremu, nahea mu gu mata vitoloka i manga e huriki a tabele rua ri rata. Ri rata ria i malulu a matane ria ri gi vakasiri e huriki ta ri pile a kinani. A taki muholi mua, a mapane ria ri bole loboa pali.
MAT 6:17 Pali mua, na tahuna mu peremu mu vahilolo a matane mua, mu biri a gine mua na nibiri,
MAT 6:18 i uka ma ni gi matakilaka vona mu peremu. E Tamane mua, ra i made kapiloho, i matai a maki mu rata kapiloho, bara i kona mua.
MAT 6:19 “Naha ni ru kadolu a mahala na malala. Koea na malala a madume, a dedu bara ri ratapile a mahala ne mua, a bakovi na panahoa bara i dili i panaho.
MAT 6:20 Mu ru kadolu a mahala na hunu. Meli na hunu, i uka madume a dedu ri gi ratapile a maki. I uka a bakovi na panahoa ge dili ge panaho.
MAT 6:21 A hatemu bara i lakea mai kunana a tabeke o ru a mahala vomu vona.
MAT 6:22 “A matana viri i manga a nipara na kakaina. Na tahuna a matamu i kamumu, a nipara i kori a kakaimu lobo.
MAT 6:23 Pali na tahuna a matamu i hale, a kakaimu lobo bara i made na uvo. Pali a matamu i uka ma ge habi tabu a nipara vomu, bara o made na uvo dagi.
MAT 6:24 “I uka tara viri ge vora na bakovi ala rua, a vuhuna bara i koi vona tara, i ngarua tara. Bara i habi a hatena na bakovi tara, i biu a bakovi tara. I uka tara viri ge vora varago na Vure, a moni.
MAT 6:25 “I mavonga a taki mua naha ni luhoi lege lae vona a nimade ne mua, a maki mu gu kani, a maki mu gu ninu. Naha ni luhoi lege lae vona a kakaine mua, a ra maki mu gu rodo. A maki dagi a nimahuri, a maki kiroko a maki ni kani. A maki dagi hateka a kakaina viri, a maki kiroko a varakia.
MAT 6:26 Mu matai a maka kadirovo, i uka ma ri varo a maki ni kani, i uka ma ri mirio kilala. Ri uka roho ni ru kadolu a maki ni kani. Pali e Tamane mua na hunu i vakani ria. Mua ranga, bara i vakani mua, a vuhuna a Vure i ngaru hateka mua na maka kadirovo.
MAT 6:27 A naro ni luhoi lege, i uka ma ge kori ioe go mahuri malaku.
MAT 6:28 “Pali i navai mu luhoi lege lae na maki mu gu rodo? Mu matai a maka hurumade. I uka ma ri leho kilala, i uka ma ri rahi kilala a varakia.
MAT 6:29 Pali a taki mua, a hurumade nga ri bagetu keke hateka, ri kamumu hateka na bagetua ne Solomon, ra hosi i bagetu kamumu hateka.
MAT 6:30 A Vure i vakabagetu a maka hurumade ri tabuli popote kunana, muri ri mate. Pali mua ranga, a Vure bara i vakabagetu mua. A bagetua ne mua bara i kamumu hateka na bagetua na hurumade. Ra mua, i uka ma mu luhoi tora hatekea a Vure.
MAT 6:31 I mavonga, naha ni loho lege lae mu gu ta maea, ‘A ra mi gi kania?’ o ‘A ra mi gi nua?’ o ‘A ra mi gi rodoa?’
MAT 6:32 E huriki i uka ma ria a Iuda ri nunu muri mai a maka maki nga. Pali e Tamane mua meli na hunu i lohoka vona mu ngaru a maki nga.
MAT 6:33 Naha ni luhoi a maki nga. Mu luhoi taro a harikianga vona, muri a maki nga ranga bara ni habi.
MAT 6:34 I mavonga, naha ni luhoi lege lae na a ra maki ge bele kuduvi. A parava kuduvi bara i tahoka a maregoa vona. Mu luhoi kunana a parava mona.”
MAT 7:1 “Naha ni pelekado a viri, lakea e Bakovi Dagi i uka ma ge pelekado mua.
MAT 7:2 Bara i pelekado mua ge manga a hini mu pelekado e huriki ranga. A naro mu rata virihi e huriki ranga, a Vure tara bara i rata virihi mua vona.
MAT 7:3 I navai o masia a muku na matane turamu, pali o mata kepa vona a bokona kai i koro na matamu ke?
MAT 7:4 Go taki navia e turamu, ‘Ga kuri tala a muku na matamu,’ pali a matamu i vona a bokona kai dagi?
MAT 7:5 Ioe a bakovi na taminga! O bole tala taro a bokona kai na matamu, muri bara o matai kamumu, o kuri tala a muku na matane turamu.
MAT 7:6 “Naha ni habi na ligo a maki na Vure, bara i kara mate ioe. Naha ni vuroki lakea na boro a kepe ne mua, bara i paha loi.
MAT 7:7 “Mu nana a maki mu ngaru, lakea a Vure bara i habi ne mua. Mu matakana a maki mu ngaru, lakea a Vure bara i kori mua mu gu bole. Mu tutulidi, a Vure bara i talea a logo, bara mu dili.
MAT 7:8 Mu rata mavonga, a vuhuna e huriki ri nana a maki, bara ri bole visi. E huriki ri matakana a maki, bara ri matavisi. E huriki ri tutulidi, bara ri dili visi.
MAT 7:9 “E rei ne mua, ge ngaru a bret e tuna, ge habi a kedo vona?
MAT 7:10 O ge ngaru a manu e tuna, ge habi a mata vona?
MAT 7:11 Mua e huriki a bakovi hale, pali mu matakari kamumu e huriki e tune mua. E Tamane mua meli na hunu i kamumu liu. Pali i navai mu luhoia i uka ma ge habi a maki kamumu ne huriki ri nanea?
MAT 7:12 I mavonga, a ra naro mu ngaru e huriki ri gi rata virihi mua vona, mua ranga mu rata. A ngava iea kunana ia a vuhuna a vinara ne Moses, a nitane huriki a propet.
MAT 7:13 “Mu dili na logo bala holo, a vuhuna a dala na vuranga i bola, a logo vona i ngavaka.
MAT 7:14 Pali a dala na nimahuri vakaroro i kiroko, a logo vona i bala holo. E huriki ala popote kunana bara ri matavisia.
MAT 7:15 “Mu matadoko vona e huriki a nitamina propet. Ri tamilalu ni rata a rabu kamumu, pali ri ngaru ni ratapile mua. Ri manga a kaugara i tamilalu ni made madoru, ge lakavu a sipsip.
MAT 7:16 Mu matai a rabune ria, bara mu matakilala ria. I uka ma si pasi a vuana vao na barakau. I uka ma si gi pasi a kanena kulu na ngatavinekou.
MAT 7:17 A kai kamumu i uka ma ge vakabele a kanena ge hale. Bara i vakabele kunana a kanena i kamumu. A kai hale i uka ma ge vakabele a kanena ge kamumu. Bara i vakabele kunana a kanena i hale.
MAT 7:19 A kai lobo i uka ma ri vakabele a kanena i kamumu, bara ni tolo vuroki, ni voro rike na kanono.
MAT 7:20 I mavonga kunana, mu matai a rabune huriki a nitamina propet, bara mu matakilala ria.
MAT 7:21 Naha ni luhoi e huriki lobo ri gale iau e ‘Bakovi Dagi, Bakovi Dagi’ ri gi dili na harikianga na hunu. E huriki bara ri dili, re huriki ri ramai a ningaru ne Tata na hunu.
MAT 7:22 Na nilobona parava e huriki ala kupo bara ri taki iau, ri ta maea, ‘Bakovi Dagi, Bakovi Dagi, mi rata na ramu a nita propet. Mi lili tala e huriki a hanitu na ramu. Mi rata a maka nivakasiri i kupo.’
MAT 7:23 Pali iau ga ta kavakava ne ria, ga ta maea, ‘I uka ma lohoka ne mua. Mu malele ha nau, mua e huriki a mari ni putu puru a vinara.’
MAT 7:24 “E huriki ri longo a nitagu, ri longototo, ri manga a bakovi i tahoka a niluhoi kamumu, i hae a roho vona langa na kedo.
MAT 7:25 Muri a vala i boru, i tua a meka. A vilu i pori, i pulua a roho. Pali i uka ma i mapuka, a vuhuna a butuna i pesi langa na kedo.
MAT 7:26 “Pali a viri i longo a ngavagu, pali i longotaro, i manga a bakovi i uka niluhoi kamumu. I hae langa na hire a roho vona.
MAT 7:27 Muri i boru a vala, i tua a meka. A vilu i pori, i pulua a ruma, lakea i mapuka, i tangi pahumu puru.”
MAT 7:28 E Isu i ta lobo, lakea e huriki ri turutu vona a nivara vona,
MAT 7:29 a vuhuna i uka ma i vara manga e huriki a mari na vinara na lotu. I vara manga a bakovi i tahoka a nitora.
MAT 8:1 Na tahuna e Isu i raga na lolo, a bakovi ala kupo hateka ri muri vona.
MAT 8:2 A bakovi tara i ratapilea a patala i valai, i turume puru na matane Isu, i ta maea, “Bakovi Dagi, ioe bara o ngaru, o vakamatapado iau.”
MAT 8:3 Lakea e Isu i toto talea a limana, i padoia, i ta maea, “Iau a ngaru. O mata­pado.” I malaviriri kunana i malaharuri vona a patala.
MAT 8:4 Muri e Isu i takia, “Naha ni takia tara viri. O vano o vakasiri ioe na prister. Muri o habi a nihabi vomu, i manga a hini e Moses i taki hosi. Lakea e huriki ri gi matakilaka vona ioe ni vakamatapado pali.”
MAT 8:5 Na tahuna e Isu i dili o Kapernaum, a ubu na tara na nugumaheto i valai vona, i takia ge koria,
MAT 8:6 i ta maea, “Bakovi Dagi, a vora nau a pea na tanga. I mate a limana a vahana, i bole a nimadihi dagi.”
MAT 8:7 Lakea e Isu i takia, “Ga lokovonga, ga vakamahuria.”
MAT 8:8 Pali a ubu i koli i ta maea, “Bakovi Dagi. I uka ma iau a bakovi kamumu go valai na ruma nau. O ta kunana, bara i mahuri a vora nau.
MAT 8:9 A ta maea, a vuhuna iau a longototo e huriki a bakovi dagi nau. E huriki a nugumaheto a matakari ria, ria ranga ri longototo iau. Bara takia a viri tara ge vano, bara i vano kunana. O a takia ge valai, bara i valai kunana. A takia a vora nau ‘o ratea a maki iea,’ bara i rata kunanea.”
MAT 8:10 Na tahuna e Isu i longoa a ngavana bakovi iea, i turutu. Lakea i taki e huriki ri muri vona, i ta maea, “A taki muholi mua, i uka ma a masia ma tara bakovi o Israel ge luhoi torea a Vure ge manga a bakovi iea.
MAT 8:11 A taki mua, e huriki ala kupo i uka ma ria a Iuda bara ri valai na tabeke lobo na malala, bara ri made turane Abraham, e Isak, e Iakop na habu na harikianga na hunu.
MAT 8:12 Pali e huriki a Iuda, ra ri made muga na harikianga bara ni tono tala na uvo. Bara ri tangi, i vaheri mavonga a ngine ria a vuhuna i madihi a hatene ria.”
MAT 8:13 Muri i takia a ubu, i ta maea, “O hamule! Bara i bele manga a hini o luhoi tora ge bele.” Na kilala iea kunana, a vora vona i tavaga.
MAT 8:14 Muri e Isu i lakea na ruma ne Petrus. Na tahuna i bele, i masia e lahuane Petrus, a ngatavine, i mahita na kiri, i rongo a kulina.
MAT 8:15 Lakea i padoia a limana ngatavine, i lobo a gilanga vona. Lakea a ngatavine iea i pesi rike, i vakatubu ni gutu a maki ni kani ne Isu.
MAT 8:16 Na malunga ni tuli valai vona e huriki i dili ne ria a hanitu. I taki e huriki a hanitu ri gi ha, lakea ri ha. I vaka­mahuri e huriki ri giloa.
MAT 8:17 Na naro iea kunana i bele muholi a nita i herea a propet e Isaia hosi, i ta maea, “I korimule hita na gilanga, i vakamahuri hita.”
MAT 8:18 Na tahuna e Isu i matai e huriki ala kupo ri pesi haluia, i taki e huriki a muri­muri vona ri gi rike na aga, ri gi polo lakea na tabeke tara na darilomu.
MAT 8:19 Muri tara mari na vinara na lotu i valai vona i ta maea, “Mari ni tovo. I vai a hini go lakea vona, ga muri mai ioe kunana.”
MAT 8:20 Lakea e Isu i koli i ta maea, “A kaugara i tahoka a dupina i mahita vona. A kadi­rovo i tahoka a nuna i mahita vona. Pali a Tuna Bakovi i uka ruma ge mahita vona.”
MAT 8:21 Muri a murimuri tara i takia, “Bakovi Dagi, ga vano taro, ga tanua e tata.”
MAT 8:22 Pali e Isu i koli maea, “E huriki ri made na uvo ri manga e huriki a viri ri mate pali. O taparaki ria ri gi tanu e huriki a viri ne ria. Pali ioe, o muri mai iau.”
MAT 8:23 Muri e Isu i rike na aga turana e huriki a murimuri vona.
MAT 8:24 I bele vaka­turutu ne ria vavo na dari a vala, a vilu dagi. I bolu hateka a dari, i dili na aga. Pali e Isu i mahita.
MAT 8:25 E huriki a murimuri vona ri vangoa, ri ta maea, “Bakovi Dagi, o korimule hita, ma ga si gi pasiri!”
MAT 8:26 E Isu i koli, i ta maea, “I navai mu mangenge? I uka ma mu luhoi tora hateka.” Muri i pesi rike i tahate a vilu a dari, ru pasi valo puru, a dari i malilo liu.
MAT 8:27 Ri turutu, ri vanana, “Ia a bakovi navai? A vilu a dari ru longototoa.”
MAT 8:28 Ngane e Isu i bele na tabeke tara na Darilomu e Galili, na robo ne huriki a Gadare. Na tahuna i bele, i pugai a bakovi ala rua, ru pagitala na murine huriki ri mate. A bakovi nga, i dili ne rua a hanitu. E huriki ri mangenge ni polo vonga, a vuhuna ru rata tuhare hateka.
MAT 8:29 Lakea ru gale dagi, ru nanea, “Tuna Vure, a ra go ratea ne mia? A parava a Vure ge pelekado mia i tabana. Pali i navai o valai malaviriri go vakamadihi mia?”
MAT 8:30 A kabuna boro i kani tabukoi.
MAT 8:31 Lakea e huriki a hanitu ri nana torea e Isu, ri ta maea, “Ioe go lili tala mia, o rudu mia mi gi dili na kabuna boro nga.”
MAT 8:32 Lakea e Isu i ta maea, “Mu vano!” Lakea e huriki a hanitu ri pagitala ne rua, ri dili na kabuna boro. Lakea a maka boro ri nunu puru mai a gali, ri to na darilomu, ri pasiri.
MAT 8:33 E huriki a matakari na boro ri ha. Ri nunu lakea na tanga, ri vakalongo e huriki vonga a maki i bele na bakovi ala rua nga, ra i pagitala ne rua a hanitu.
MAT 8:34 Muri e huriki na tanga dagi ri pagitala ri gi masia e Isu. Na tahuna ri masia, ri tonoa ge pe a tabeke ne ria, ge vano.
MAT 9:1 Muri e Isu i rike na aga, i pasi polo na darilomu, i bele na tanga vona.
MAT 9:2 Na tahuna i made vonga, e huriki a bakovi ranga ri kaloho vilia vona a bakovi i mate a vahana, i mahita na moke. Na tahuna i matai ria ri luhoi tora ia, i takia a vaha mate, “O tugu. Naha ni luhoi lege. A puga vuroki a naro hale vomu.”
MAT 9:3 Lakea e huriki a mari na vinara na lotu ri luhoi maea, “Ra bakovi iea, i hale hateka, i pahaluhoi ta ia a Vure.”
MAT 9:4 E Isu i lohoka na niluhoi ne ria, lakea i ta maea, “I navai mu luhoi hale?
MAT 9:5 I vai a ngava kavakava ga takia? Ga ta maea, ‘A puga vuroki a naro hale vomu,’ o ga ta maea, ‘O pesi rike o laho?’
MAT 9:6 Pali ngane ga vakasiri mua, a Tuna Bakovi i tahoka a nitora koea na malala ni puga vuroki a naro hale.” Muri i takia a vaha mate, i ta maea, “O pesi rike, o bolea a moke vomu, o lakea na tanga.”
MAT 9:7 Lakea i pesi rike, i lakea na tanga.
MAT 9:8 Na tahuna e huriki ri masia a naro iea, ria lobo ri mangenge, lakea ri kavurikea a Vure, ra viri i habi a nitora.
MAT 9:9 Muri e Isu i malaga, i laho lokovonga. I masia a bakovi tara, a rana e Mateo, i mamade na roho na takis. Lakea e Isu i takia, “O muri nau.” Lakea e Mateo i pesi rike, i muri maia.
MAT 9:10 Muri e Isu i vano, i kani na ruma ne Mateo. E huriki a bakovi ni bole a takis, e huriki a bakovi hale, ri valai, ri kani turane Isu, e huriki a murimuri vona.
MAT 9:11 Na tahuna e huriki a Pariseo ri masia, ri nana e huriki a murimuri vona, ri ta maea, “I navai a mari ni tovo ne mua i kani turana e huriki a bakovi ni bole a takis, e huriki a bakovi hale?”
MAT 9:12 Na tahuna e Isu i longoa a ninana iea, i ta maea, “E huriki i uka ma ri giloa i uka ma ri gi matai a dokta. E huriki ri giloa kunana bara ri masia.
MAT 9:13 Mu vano mu luhoi kado taroa a nitana Vure iea: ‘I uka ma a ngaru a nihabi. A ngaru a rabu ni dodo.’ Iau a valai i uka ma ga gale mua e huriki mu luhoi ta mu malamala mu gu pulo a vilone mua. A valai ga gale e huriki ri naro hale ri gi pulo a vilone ria.”
MAT 9:14 Muri e huriki a murimuri ne Ioanes ri valai, ri nanea e Isu, “I navai mia turana e huriki a Pariseo mi peremu, pali e huriki a murimuri vomu i uka ma ri peremu?”
MAT 9:15 E Isu i koli, i ta maea, “Ri gi tangi navai e huriki ri valai na habu na parangia? Pali na tahuna a bakovi i parangi karaba ni tuli tala ne ria, bara ri peremu.
MAT 9:16 “I uka ma si gi bolea a mavidana lavalava karaba si gi rahi karia a hini i marape na matutu na varakia. Bara si rata mavonga, na tahuna si loi a varakia, a mavidana lavalava karaba bara i hoho, i turapea a matutuna varakia, muri bara i ratea a hini mavida i ngavaka.
MAT 9:17 I uka ma si gi guru dili a vain karaba na matutuna buroi ni rata na kulina meme. Bara si rata mavonga, bara i mapoda a kulina meme, i maguru tala a vain. A vain karaba bara ni guru dili na buroi karaba, lakea a vain, a buroi bara ru kamumu varago.”
MAT 9:18 I uka ma i vakalobo ma a nitana, i valai tara matakari na roho na vaponga, i turume puru na ngalane Isu i togoa, i ta maea, “E tugu a ngatavine i mate ngane kunana. O valai o padoia, ge mahuri mule.”
MAT 9:19 Lakea e Isu i pesi rike i vano turana. E huriki a murimuri vona, ria ranga ri lokovonga.
MAT 9:20 Na tahuna ri lalaho lokovonga, a ngatavine tara, i pori vona a dara na pida i ravulu a polona i rua, i laho valai muri ne Isu, i padoi a ngutuna varakia vona.
MAT 9:21 I rata mavonga, a vuhuna i luhoi maea, “Iau ga padoi kunanea a varakia vona, bara tavaga.”
MAT 9:22 Ngane e Isu i matagege, i masia, i ta maea, “Naha ni luhoi lege. O tavaga a vuhuna o luhoi tora iau.” Malaviriri kunana, i lobo a gilanga vona.
MAT 9:23 Na tahuna e Isu i bele na ruma na mata­kari, i matai e huriki ri haloho,
MAT 9:24 lakea i taki ria, “Mu ha. A koma i uka ma i mate. I mahita kunana.” Lakea ri nongo vakia.
MAT 9:25 Ni tono tala lobo e huriki, muri i dili, i nugua a limana a koma ngatavine, lakea i mahuri mule.
MAT 9:26 A velengana ni longo na tanga lobo na tabeke iea.
MAT 9:27 E Isu i malaga tabu, i laho lokovonga. Lakea a bakovi ala rua ru kepa, ru muri vona ru gale tala, ru ta maea, “O hamone Davit, o dodo maria.”
MAT 9:28 Na tahuna i dili na ruma, a kepa nga ru valai vona, lakea i nana rua, “Muru luhoi iau a kara ni vakamatapara marua?” Lakea ru koli, “Bakovi Dagi, i muholi.”
MAT 9:29 Muri i padoi a matane rua i ta maea, “Ge bele manga a hini muru luhoi ge bele.”
MAT 9:30 Lakea ru mata para. E Isu i taki tora rua, i ta maea, “Naha ni vakalongoa tara viri na maki i bele ne marua.”
MAT 9:31 Pali ru vano, ru vakalongo lae na tabeke iea a maki i bele ne rua.
MAT 9:32 Na tahuna ru vano, a bakovi i dili vona a hanitu, i ngavarubu, ni tuli valai ne Isu.
MAT 9:33 Lakea e Isu i lili talea a hanitu. Muri a bakovi iea i vakatubu ni ta. E huriki ri made turane Isu ri turutu, ri ta maea, “I uka tara maki maea ge bele hosi o Israel!”
MAT 9:34 Pali e huriki a Pariseo ri ta maea, “I lili tala e huriki a hanitu na nitora na hariki na hanitu.”
MAT 9:35 E Isu i lakea na tanga dagi, a tanga kiroko lobo, i tovo e huriki pololilo na roho na vaponga. I vara e huriki na Velenga Kamumu na harikianga na Vure. I vakamahuri e huriki lobo ri giloa.
MAT 9:36 Na tahuna i matai e huriki, i dodo ria, a vuhuna a niluhoi ne ria i varoru, ri uka nitora. Ri manga a maka sipsip ri uka matakari.
MAT 9:37 Muri i taki e huriki a muri­muri vona, “A maki ni kani na hania i kupo hateka, pali e huriki a bakovi ni mirio i uka ma ri ala kupo hateka.
MAT 9:38 Lakea mu nanea a tahona hania ge rudu valai tabu ranga bakovi ri gi mirio.”
MAT 10:1 Muri e Isu i gale palupu e huriki a murimuri vona ala ravulu a polona i rua, i habi a nitora ne ria ni lili vuroki a hanitu, ni vakamahuri e huriki ri giloa.
MAT 10:2 A rana e huriki a apostolo ala ravulu a polona i rua ra nga: e Simon (a rana tara e Petrus), e tarina e Andreas. E Iakop e Ioanes, rua e tune Sebedi.
MAT 10:3 E Pilip rua e Bartolemeus. E Tomas rua e Mateo (a bakovi ni bole a takis). E Iakop e tune Alpius, e Tadeus.
MAT 10:4 E Simon a hamone Silot, e Iudas Iskariot, ra viri i habi e Isu na limane huriki a bakovi hale.
MAT 10:5 E Isu i rudu tala a apostolo nga ala ravulu a polona i rua, i taki tora ria, i ta maea, “Naha ni lakea mai e huriki i uka ma ria a Iuda. Naha ni dili na tanga ne huriki a Samaria.
MAT 10:6 Mu lakea mai kunana e huriki a kabu ne Israel. Ri manga a kabuna sipsip ri velu na robo.
MAT 10:7 Mu vara maea, ‘A harikianga na hunu i valai tabukoi pali.’
MAT 10:8 Mu vakatavaga e huriki ri giloa, mu vakamahuri mule e huriki ri mate, mu vakamatapado e huriki ri tahoka a patala, mu lili tala e huriki a hanitu. A habi tavula a nitora ne mua, lakea mua ranga, mu kori tavula e huriki.
MAT 10:9 Na tahuna mu vano, naha ni bole a gol, a silva, a moni.
MAT 10:10 Naha ni bole a hole. Naha ni bole a varakia ge rua. O bole ge taku kunana. Naha ni bole a vahapolo, a kodo. Mu laho pa, a vuhuna a vora bara ni vakani.
MAT 10:11 “E rei a tanga dagi o a tanga kiroko mu dili vona, mu matakanea tara bakovi kamumu. Mu made turana bakovi iea kunana, i vano i harena na tahuna mu pea a tanga iea.
MAT 10:12 Na tahuna mu bele na ruma, mu tagui e huriki vonga.
MAT 10:13 A tahona ruma ge rata kamumu mua, mu nanea a Vure ge rata kamumua. Pali a tahona ruma i uka ma ge rata kamumu mua, a Vure i uka ma ge rata kamumua.
MAT 10:14 E rei a tanga i uka ma i tagui mua, i uka ma ri longo a ngavane mua, mu pe a tanga iea, mu biua, mu kurudu pasi a habulo na vahane mua, a vuhuna ri biu mua.
MAT 10:15 A taki mua, na tahuna a Vure i pelekado e huriki, a nimadihi bara i bolea e huriki na tanga iea bara i dagi hateka na nimadihi i bolea e huriki na tanga e Sodoma, e Gomora.
MAT 10:16 “A rudu tala mua manga a tuna sipsip ri laho na kurukuruna kabu na kaugara. I mavonga, mu mamata, mu made madoru manga a balu.
MAT 10:17 Mu matadoko ne huriki a bakovi. Bara ri vakapesi mua na ngava. Bara ri hotu mua pololilo na maka roho na vaponga.
MAT 10:18 Bara ri turari mua mu pesi na matane huriki a matakari, a hariki a vuhuna mu ramai iau. I mavonga e huriki nga, turana e huriki i uka ma ria a Iuda, bara mu vakalongo ria vona a maki mu matai iau a rata, a ngava a taki.
MAT 10:19 Na tahuna ri lakavu mua, naha ni loho lege lae na maki mu gu taki o mu gu ta navai. A Vure bara i habi ne mua a ngava bara mu taki na tahuna iea,
MAT 10:20 a vuhuna a ngava mu gu taki, i uka ma ga ngavane mua. A Hanune Tamane mua bara i ta polo ne mua.
MAT 10:21 “E maki tari rua, a viri tara bara i habi e turana na limane huriki a pile, ri gi rabalakia. A bakovi bara i lohopilea e tuna. E huriki a koma bara ri lohopile e tamane ria, e kinane ria, bara ri rudu ni gi rabalaki.
MAT 10:22 E huriki a bakovi a ngatavine bara ri marikoi ne mua, a vuhuna mu ramai iau. Pali e rei a viri i pesi tora mavonga ni ramai iau, a Vure bara i korimulea.
MAT 10:23 Na tahuna a tanga tara i vakamadihi mua, mu ha taroa, mu lakea na tanga tara. A taki muholi mua, i uka ma mu gu paha lobo ma a tanga o Israel, a Tuna Bakovi bara i valai pali.
MAT 10:24 “A murimuri i uka ma ge rangia a viri i tovoa. A ra maki i bele vona a mari ni tovo, bara i bele na murimuri vona. A vora tara, i uka ma i rangia a matakari vona. A ra maki i bele na matakari, bara i bele na vora vona. I mavonga, na tahuna e huriki ri taki iau, a tahona ruma, ta iau e Belsabub, mua ranga, bara ri taki mua a kabu nau, ta mua e Belsabub.
MAT 10:26 “Naha ni mangenge ne ria. A maki lobo ni rata kapiloho bara i bele kavakava. A maki lobo ni ruhulolo bara ni taki tala.
MAT 10:27 A ngava a taki mua na uvo, mu vakalongo na hini palala. A ngava ni reme mua vona, mu pesi na mapana roho mu vakalongo e huriki vona.
MAT 10:28 Naha ni mangenge ne huriki a bakovi. Ria bara ri rabalaki kunana a kakaine mua. Pali a hanune mua, ri keri ni rabalakia. A viri bara mu mangenge vona, a Vure, a vuhuna i kara ia ge ratapile a kakaine mua, a hanune mua na imperno.
MAT 10:29 A tuna sisiu i rua bara ni habi ni gi kona na 10 toea kunana. Pali ri mate na tahuna e Tamane mua i taki ri gi mate vona.
MAT 10:30 Mua ranga, i gi lobo pali a lilina vune mua.
MAT 10:31 Naha ni mangenge. A Vure i ngaru hateka mua na maka sisiu i kupo.
MAT 10:32 “I mavonga, e rei a viri i taki e huriki a bakovi ne ia a murimuri nau, iau tara bara taki tala na matane Tata, ne ia a murimuri nau.
MAT 10:33 Pali e rei a viri i lavuni nau na matane huriki a bakovi, iau tara bara lavuni vona na matane Tata na hunu.
MAT 10:34 “Naha ni luhoi a valai ga rata e huriki ri gi valemu. Iau a valai i uka ma ga habi a nivalemu. A valai ga rata e huriki ri gi vaubi.
MAT 10:35 A valai ga rata: ‘A bakovi ge gimana e tamana. A ngatavine ge gimana e kinana. A ngatavine ge gimana e kana ngatavine.
MAT 10:36 E huriki a kabu kabu bara ri vagima.’
MAT 10:37 “E rei a viri i ngaru e tamana e kinana, a ningaru vona i dagi hateka na hini i ngaru iau, i uka ma i kara ia ge ia a murimuri nau. A viri i ngaru hatekea e tuna, a ningaru vona i dagi hateka na hini i ngaru iau, i uka ma i kara ia ge ia a murimuri nau.
MAT 10:38 Pali e rei a viri i uka ma i kalohoa a kai tavalavala vona, i uka ma i ramai iau, i keri ge ia a murimuri nau.
MAT 10:39 E rei a viri i ha taro iau, ne vona ni korimule a kulina, bara i velu. Pali e rei a viri i mate a vuhuna i ramai iau, bara i bole a nimahuri vakaroro.
MAT 10:40 “E rei a viri i tagui mua, i tagui iau. E rei a viri i tagui iau, i taguia a viri i rudu iau a valai.
MAT 10:41 E rei a viri i taguia a propet, a vuhuna ia a propet, a Vure bara i habia vona a mapana propet. E rei a viri i taguia a bakovi malamala, a vuhuna ia a bakovi malamala, a Vure bara i habia vona a mapana bakovi malamala.
MAT 10:42 E rei a viri i vakaninu na naru piu e huriki a murimuri tavula nau, a taki muholi mua, a Vure bara i rata kamumua.”
MAT 11:1 I vara lobo e huriki a murimuri vona ala ravulu a polona i rua, muri i malaga, i laho lae na maka tanga na tabeke ne Galili, i totovo e huriki.
MAT 11:2 Na tahuna e Ioanes, a mari ni vahilolo, i made na bavi, i longo a velengana maka maki e Kristo i rata, lakea i rudu e huriki a murimuri vona
MAT 11:3 ri gi nanea, “Ra ioe, ioe kunana a viri a Vure i taki ge rudu vilia, o mi gi davea a viri tara?”
MAT 11:4 E Isu i koli, i ta maea, “Mu hamule, mu vakalongoa e Ioanes vona a maki mu longo, a maki mu matai.
MAT 11:5 E huriki a kepa ri matapara, e huriki a beu ri laho tabu, e huriki ri tahoka a patala ri matapado, e huriki ri vou ri longo mule tabu, e huriki ri mate ri mahuri mule tabu, a Velenga Kamumu ni vakalongo ne huriki a matasia.
MAT 11:6 E huriki ri matai a maki a rata, pali i uka ma ri koi nau, a Vure bara i rata kamumu ria.”
MAT 11:7 Na tahuna e huriki a murimuri ne Ioanes ri vano, e Isu i vakatubu ni taki e huriki ne Ioanes, i ta maea, “Ra viri mu dili maia na tabeke i ngeki, i uka ma ia a bakovi ni ta viliha lae, ge manga a pagana viro i bole lelea a vilu.
MAT 11:8 I uka ma i bagetu na varakia kabakaba. E huriki ri bagetu na varakia kabakaba ri tahoka a mahala i kupo, ri made na ruma hariki.
MAT 11:9 A viri mu vano mu gu masia, a propet. A taki muholi mua, e Ioanes i uka ma ia a propet tavula kunana.
MAT 11:10 Hosi ni vakalongo muga vona na hinere, i ta maea, ‘Ga rudua a vinuru nau ge muga vomu, ge pelekadoa a dalamu.’
MAT 11:11 “A taki muholi mua, i uka tara viri i bele koea na malala ge rangia e Ioanes a mari ni vahilolo. Pali a viri i manga a bakovi tavula pololilo na harikianga na hunu i rangia e Ioanes.
MAT 11:12 Na tahuna e Ioanes, a mari ni vahilolo, i vakatubu a leho vona, i valai i harena mona, a harikianga na hunu i koru malaviriri na nitora na Vure. E huriki a bakovi ni rata tuhare ri vaubi maia.
MAT 11:13 A nitane huriki a propet, a nitana vinara ri vakalongo muga pali, i valai i harena na tahuna e Ioanes i bele.
MAT 11:14 Re Ioanes, ia a propet a Vure i takia ge vakaru vilia, re Elaisa. Mu longo mai, o i uka?
MAT 11:15 E rei a viri i ngaru ni longokilalea a ngavagu, ge longo kamumu, ge luhoi kado.”
MAT 11:16 Muri e Isu i ta maea, “E huriki na tahuna mona ri manga e huriki a koma ri made na maket. E huriki a koma ranga ri gale, ri ta maea,
MAT 11:17 ‘Mi sigi a kude, pali mu koi ni raulo. Mi dua, pali mu koi ni tangi.’
MAT 11:18 “A ta maea, a vuhuna ri masia e Ioanes i uka ma i kani, i uka ma i ninu, lakea ri ta maea, ‘I dili vona a hanitu.’
MAT 11:19 Pali na tahuna ri masia a Tuna Bakovi i kani, i ninu, ri ta maea, ‘Ia a bakovi ni kani hateka, ni ninu hateka. I turana e huriki a bakovi ni bole a takis, e huriki a mari ni rata a naro hale.’ Pali e huriki ri ramai a niluhoi kamumu na Vure, ri vakasiri manga a niluhoi kamumu vona i muholi.”
MAT 11:20 Muri e Isu i tahate e huriki na tanga ranga. I tahate ria, a vuhuna ri matai a nivakasiri i kupo ne Isu, pali i uka ma ri pulo a vilone ria.
MAT 11:21 Lakea i ta maea, “Mua e huriki a bakovi a ngatavine o Korasin, o Betsaida, a Vure bara i ratapile mua! A maka nivakasiri a rata na tanga ne mua, bara ni rata hosi o Tair, o Sidon, bara ri pulo malaviriri a vilone ria, ri rodo a mohu, ri voro tapa mule ne ria a habulo.
MAT 11:22 A taki mua, na parava a Vure ge pelekado e huriki vona, a nimadihi mu gu bolea bara i dagi hateka na nimadihi bara ri bolea e huriki na tanga e Tair e Sidon.
MAT 11:23 Mua e huriki a bakovi a ngatavine o Kapernaum, naha ni luhoi a Vure ge bole rike mua na hunu. I uka liu! Bara i voro puru mua na tanga ne huriki ri mate pali. A maka nivakasiri a rata na tanga ne mua, bara ni rata hosi o Sodoma, a tanga iea bara i tabana mona.
MAT 11:24 A taki mua, na parava a Vure ge pelekado e huriki vona, a nimadihi mu gu bole bara i dagi hateka na nimadihi bara ri bole e huriki na tanga e Sodoma.”
MAT 11:25 Muri e Isu i ta maea, “O Tata, ioe a Bakovi Dagi na hunu a malala. A kavurike ioe, a vuhuna o vakasiri a nitamu ne huriki a bakovi tavula, pali o ruhuloloa a nitamu ne huriki ri luhoi ta ri lohoka hateka.
MAT 11:26 I muholi, o Tata, o rata mavonga a vuhuna i kamumu na matamu.
MAT 11:27 “E Tata i ru na limagu a maki lobo. I uka tara viri ge lohoka nau, ra iau e Tuna. E Tata kunana i lohoka nau. E Tata tara i uka tara viri ge lohoka vona. Iau e Tuna kunana a lohoka vona. Na tahuna iau a vulaki e huriki ranga, bara vakasiria e Tata ne ria.
MAT 11:28 “E rei a viri i tahoka a nimava i kupo, o valai nau, ga habi a nimalo vomu.
MAT 11:29 Tu gu kalohoa a binole nau, a vuhuna a binole nau i uka ma i mava. O longo ga tovo ioe, a vuhuna iau a bakovi madoru, i uka ma a bakovi ni bibi rike mule iau. Ga habi a nimalo na hanumu.”
MAT 12:1 Muri e Isu i lalaho na hania na vit na Parava Nimalo. E huriki a murimuri vona ri vitolo, lakea ri vakatubu ni pasi ranga vit, ri kani.
MAT 12:2 Na tahuna e huriki a Pariseo ri masia, ri takia e Isu, “O mata lakea! E huriki a murimuri vomu ri rata a maki a vinara i ta pupukari vona na Parava Nimalo.”
MAT 12:3 E Isu i koli, i ta maea, “Ra mua, i uka ma mu gi a naro i ratea hosi e Davit? Na parava tara e Davit turana tara vona ri vitolo.
MAT 12:4 Lakea e Davit i dili na roho na Vure, i bole a bret, i kani, i habi ne huriki a turana, ria ranga ri kani. A bret iea a nihabi na Vure. A vinara i taki e huriki a prister kunana ri gi kani.
MAT 12:5 I uka ma mu gi na nitana vinara? E huriki a prister ri leho na roho na Vure, ri leho na Parava Nimalo, pali ri uka ngava vona.
MAT 12:6 A taki mua, a viri i rangi a roho na Vure i made koea ngane.
MAT 12:7 A nitana Vure i ta maea, ‘I uka ma a ngaru a nihabi. A ngaru a rabu ni vadodo.’ Mua bara mu longokilalea a ngava iea, i uka ma mu gu padi virihi e huriki a bakovi mala­mala.
MAT 12:8 A Tuna Bakovi, ia a Bakovi Dagi na Parava Nimalo.”
MAT 12:9 I pe a hini nga, i lokovonga i dili na roho na vaponga.
MAT 12:10 A bakovi tara i made vonga, i malai a limana. Ri matakana a ngava ri gi padi virihia e Isu vona, lakea ri nanea, “I ta navai a vinara, ni gi vakamahuri a viri na Parava Nimalo, o i uka?”
MAT 12:11 Lakea e Isu i koli, i ta maea, “A sipsip vomu ge boru puru na lovo na Parava Nimalo, bara o lalu talea.
MAT 12:12 Pali na matana Vure, a bakovi i kamumu hateka na sipsip! I mavonga, i kamumu si gi kori a viri na Parava Nimalo.”
MAT 12:13 Muri i takia a bakovi, “O toto talea a limamu.” Lakea i toto talea a limana i tavaga liu, i manga a limana tara.
MAT 12:14 Pali e huriki a Pariseo ri pagitala, ri vapopo, ri matakanea a dala ri gi rabalakia e Isu vona.
MAT 12:15 E Isu i lohoka vona a ningaru ne huriki a Pariseo, lakea i pea a tanga iea. E huriki ala kupo ri muri vona. I vakamahuri e huriki lobo ri giloa.
MAT 12:16 Pali i taki tora ria nahea ri gi vakalongo e huriki, ne ia e rei muholi.
MAT 12:17 I rata mavonga, ge bele muholi a ngava a Vure i ta polo na propet e Isaia, i maea:
MAT 12:18 “Mu masia a vora nau, a vulakia. Ia a hategu, a vivi hateka vona. Bara vakatorea na Hanugu, ge vakalongo e huriki i uka ma ria a Iuda, na dala ga korimule ria vona.
MAT 12:19 I uka ma ge hehe a viri, i uka ma ge tahate. A lohona i uka ma ni gi longo na kuru tanga.
MAT 12:20 A tabuka i maroro, i popote ge maputu, i uka ma ge raputua. A lam i keri ni para, i poko kunana, i uka ma ge tutu matea. Bara i leho i vano i harena na tahuna e huriki ri matakilaka vona a dala ge korimule e huriki vona.
MAT 12:21 E huriki lobo na malala bara ri pasimata vona, ge korimule ria.”
MAT 12:22 Muri ni tuli valai vona a bakovi tara i dili vona a hanitu, i kepa, i ngavarubu. Lakea e Isu i vakamahuria, i ta, i mata para.
MAT 12:23 E huriki ri masia, ri turutu, ri vanana maea, “Ra bakovi iea, a viri si davea, a hamone Davit?”
MAT 12:24 Pali na tahuna e huriki a Pariseo ri longo a ngavane huriki, ri ta maea, “Ra bakovi iea, i lili tala a hanitu na nitora ne Belsabub, a hariki ne huriki a hanitu.”
MAT 12:25 E Isu i lohoka na niluhoi ne ria, lakea i ta maea, “E huriki na harikianga tara, ri vaubi mule ne ria, bara ri vapida, i lobo tavula a harikianga iea. E rei a tanga, o e rei a kabu ri vaubi mule, bara ri vapida, i lobo tavula a tanga, o a kabu iea.
MAT 12:26 I mavonga kunana, e Satan bara i lili tala mule ia, a harikianga vona bara i lobo tavula.
MAT 12:27 Mu taki iau ta a lili tala a hanitu na nitora ne Belsabub. Pali e huriki a murimuri ne mua, a ni tora ne e rei ri lili tala a hanitu? Ngane e huriki a murimuri ne mua bara ri vakasiri mua mu varoru.
MAT 12:28 Pali iau a lili tala e huriki a hanitu na nitora na Hanuna Vure. I vakasiri manga a harikianga na Vure i bele pali ne mua.
MAT 12:29 “E rei ge dili tavula na roho na bakovi hateka, ge panaho a mahala vona? Bara i kolo tata taroa a bakovi hateka, muri bara i panaho na ningaru vona.
MAT 12:30 A viri i uka ma i leho turagu, i ratapilea a leho nau. A viri i uka ma i leho turagu ni tuli e huriki ri gi valai na Vure, i lili e huriki i uka ma ri gi valai na Vure.
MAT 12:31 A taki mua, a Vure bara i puga vuroki a naro hale na viri i rata virihia e turana, a naro hale na viri i ta hale na Vure. Pali a viri i ta hale na Hanu Kiripiripi, a Vure i uka ma ge puga a naro hale vona.
MAT 12:32 E rei a viri i ta hale na Tuna Bakovi, a Vure bara i puga vuroki a naro hale vona. Pali e rei a viri i ta hale na Hanu Kiripiripi, a Vure i uka ma ge puga vuroki a naro hale vona ngane, i uka ma ge puga vuroki muri ma.
MAT 12:33 “A kai kamumu, a kanena i kamumu. A kai hale, a kanena i hale. A kai si matakilalea na kanena kunana.
MAT 12:34 Mua e huriki a tuna mata. A narone mua i hale, lakea a ngavane mua, ria ranga ri hale. A ngava si taki i valai pololilo na hatene hita.
MAT 12:35 A bakovi kamumu i taki a ngava kamumu, a vuhuna a hatena i kamumu. A bakovi hale i taki a ngava hale, a vuhuna a hatena i hale.
MAT 12:36 A taki mua, na parava a Vure ge pelekado e huriki vona, bara i nana e huriki a bakovi a ngatavine na ngava hale lobo ri rata, lakea bara ri koli.
MAT 12:37 A ngavamu ge kamumu, a Vure bara i taki ioe a bakovi malamala. A ngavamu ge hale, a Vure bara i taki ioe a bakovi hale.”
MAT 12:38 Muri e huriki a Pariseo, a mari na vinara na lotu ri nanea, “Mari ni tovo, mi ngaru ni masia a nivakasiri go ratea.”
MAT 12:39 Pali e Isu i koli, “E huriki na tahuna mona, ri hale hateka, ri ha taroa a Vure i manga a ngatavine i ha taroa e kakaina, i mole lae. Ri ngaru ni matai a nivakasiri! Pali i uka ma mu gu masia tara nivakasiri. A nivakasiri i taku kunana bara mu masia, a ni vakasiri ne Iona a propet.
MAT 12:40 E Iona i made pololilo na kavutuna manu dagi na parava i tolu, a rodo i tolu. I mavonga kunana, a Tuna Bakovi bara i tabuli pololilo na bobona malala na parava i tolu, a rodo i tolu.
MAT 12:41 Hosi e huriki a bakovi a ngatavine o Ninive ri longoa a vinara ne Iona, ri pulo a vilone ria. Pali iau a dagi hateka ne Iona, a vara mua, pali i uka ma mu pulo a vilone mua. I mavonga, muri ma na tahuna a Vure ge pelekado e huriki, e huriki a Ninive bara ri pesi rike, ri taki mua mu velu pali.
MAT 12:42 Hosi a hariki ngatavine o Siba i havai valai ge longo a niluhoi kamumu ne Solomon. Iau a dagi hateka ne Solomon, pali mua i uka ma mu longototo a niluhoi kamumu nau. Lakea muri ma na tahuna a Vure ge pelekado e huriki, a hariki ngatavine iea bara i pesi rike, i taki mua mu velu pali.
MAT 12:43 “Na tahuna a hanitu i pagitala na bakovi, bara i lakea na tabeke i ngeki, i matakana a tabeke ge malo vona. Pali na tahuna i uka ma i matavisia a tabeke tara ge malo vona,
MAT 12:44 bara i ta maea, ‘Ga hamule lakea na ruma a pea.’ Na tahuna i bele, i masia a ruma ni kovo tala, ni rata kamumu.
MAT 12:45 Muri i vano i tuli valai a hanitu ala polorua ri hale hateka, lakea ri dili, ri made vona. Muga, a nimadena bakovi i hale. Pali ngane a nimadena i hale liu. Bara i bele mavonga ne mua e huriki a bakovi hale.”
MAT 12:46 E Isu i tabana ni ta turane huriki, e kinana e tarina mai ri pesi polovavo, ri ngaru ni ta turana.
MAT 12:47 Lakea a viri tara i vakalongoa, “E kinamu e tarimu mai ri pesi polovavo, ri ngaru ni ta turamu.”
MAT 12:48 E Isu i koli, “E rei e nana, e rei e tarigu mai?”
MAT 12:49 I vakasiri lakea ne huriki a murimuri vona, i ta maea, “E huriki nga e nana e tarigu mai.
MAT 12:50 A viri i muri mai a ningaru ne Tata na hunu, ia e turagu, e kurabagu, e nana.”
MAT 13:1 Na parava iea kunana e Isu i pagitala na ruma, i vano i made na dahana darilomu.
MAT 13:2 E huriki ala kupo hateka ri valai, ri pesi haluia, lakea i rike na aga, i pasi polovavo popote. Pali e huriki lobo ri made na lavu.
MAT 13:3 Muri e Isu i taki ria na nita vakakika i kupo. I ta maea, “A bakovi ni leho na hania i varo a vutuna vit.
MAT 13:4 Na tahuna i voro lae a vutuna vit, a vutuna ranga ri boru puru na dala, lakea a maka kadirovo ri kani poi.
MAT 13:5 “A vutuna vit ranga ri boru langa na tabeke i kedokedo, na tabeke i uka ma i tahoka hateka a malala. Ri koru malaviriri, a vuhuna a malala i tabuli polomeli kunana.
MAT 13:6 Pali na tahuna a haro i rike, i hu ria, ri malai, a vuhuna i uka ma i puru hateka a kana ria.
MAT 13:7 “A vutuna vit ranga ri boru na tabeke i vona a barakau. A vit i vua, pali a barakau i kae lobi ria.
MAT 13:8 “Pali a vutuna vit ranga ri boru langa na malala kamumu, ri lua, ri vakabele a kanene ria i 100 ranga, i 60 ranga, i 30 ranga.
MAT 13:9 E rei a viri i ngaru ni longokilalea a ngavagu, ge longo kamumu, ge luhoi kado.”
MAT 13:10 Muri e huriki a murimuri ri valai vona, ri nanea, “I navai o ta vakakika kunana ne huriki?”
MAT 13:11 E Isu i koli, i ta maea, “A Vure i habi a lohokanga ne mua, mu gu lohoka vona a maki kapiloho na harikianga na Vure. Pali i uka ma i habi a lohokanga ne ria.
MAT 13:12 E rei a viri i tahoka a maki pali, bara ni habi tabu ranga ge tahoka ge kupo. Pali e rei a viri i uka ma i tahoka a maki, bara ni bole vuroki vona a maki popote i tahoka.
MAT 13:13 A ta vakakika ne ria a vuhuna, ‘Ri matai, pali i uka ma ri matakilala. Ri longo, pali i uka ma ri longokilala.’
MAT 13:14 “Re huriki nga, ri ratea i bele muholi a nitane Isaia a propet i maea, ‘Bara mu longo balaka kupo, pali i uka ma mu gu longokilala. Bara mu matai balaka kupo, pali i uka ma mu matakilala.
MAT 13:15 Ri putungingi. Ri siki kari a talingane ria. Ri mata kopu. Bara i uka, bara ri matakilala a maki ri matai, ri longokilala a ngava ri longo, bara i padi a hatene ria, ri pulo a vilone ria, lakea iau bara vakamahuri ria.’
MAT 13:16 Pali a Vure i rata kamumu mua, mu matakilala a maki a rata, mu longokilala a ngavagu.
MAT 13:17 A taki muholi mua, e huriki a propet, a bakovi malamala hosi ri ngaru hateka ni matai a maki mu matai ngane, pali i uka ma ri matai. Ri ngaru ni longo a maki mu longo ngane, pali i uka ma ri longo.
MAT 13:18 “Ngane mu longo ga tuvevea a pele­gona nivakakika na viri i varo a vutuna vit.
MAT 13:19 A vutuna vit i boru na dala i manga e huriki ri longoa a ngava na harikianga, pali i uka ma ri longokilalea. E Satan i valai, i bole vuroki a ngava ni ru na hatene ria.
MAT 13:20 “A vutuna vit i boru langa na hini kedokedo i manga a bakovi i longo a ngava, lakea i luhoi tora malaviriri kunanea, i vivi vona.
MAT 13:21 Pali i uka ma i pesi tora tabaka, a vuhuna i uka kana. Na tahuna a maregoa i bele, o na tahuna e huriki ri vakamadihi vakaroroa a vuhuna i ramai a nitagu, i malaviriri kunana i pea.
MAT 13:22 “A vutuna vit i boru langa na barakau i manga a bakovi i longoa a ngava, pali i luhoi hateka a nimadena. A ningaru dagi vona ni bole a mahala i kupo i tamia. A niluhoi nga ru kavitagua a ngava muholi, i uka ma i vakabele a kanena.
MAT 13:23 “Pali a vutuna vit i boru na malala kamumu i manga a bakovi i longoa a ngava, i longokilalea. I vakabele a kanena vit i kupo hateka na vit ni varo muga. I ranga ri vakabele i ravulu tolu (30). I ranga ri vakabele i ravulu polotara (60). I ranga ri vakabele i ravulu mule ma a murina balaka taku (100).”
MAT 13:24 E Isu i taki tabua tara nita vakakika, “A harikianga na hunu i manga a bakovi i varo a vutuna vit na hania.
MAT 13:25 Na rodo, na tahuna e huriki ri mahita, i valai a pile vona, i varo dili turana vit a kukuni. Muri i vano ia.
MAT 13:26 A vit i koru rike, i pura. A kukuni ranga ri rike.
MAT 13:27 “Muri e huriki a voravora na bakovi iea ri valai, ri takia, ‘Bakovi dagi, mi luhoi ta o varo kunana a vit na hania. Pali ri valai vai a kukuni nga?’
MAT 13:28 “Lakea a tahona hania i ta maea, ‘I varo a pile nau.’ Lakea e huriki a voravora ri takia, ‘Pali mi gi vano mi gi pasi vuroki.’
MAT 13:29 “Pali i koli, i ta maea, ‘I uka. Na tahuna mu pasi vuroki a kukuni, bara mu pasi ruru turana vit.
MAT 13:30 Mu dava. Muri ma na tahuna e huriki ri gi mirio, bara taki ria ri gi pasi vuroki muga a kukuni, ri gi kolo palupu, ri gi rungani. Muri bara ri mirio a vit, ri bole lakea na roho na vit.’”
MAT 13:31 E Isu i taki tabua tara nivakakika, i ta maea “A harikianga na hunu i manga a vutuna mastad, ni varo na hania.
MAT 13:32 A vutuna mastad i kaka kiroko liu na maki lobo ni varo na hania. Pali na tahuna i koru rike i langui a maki lobo ni varo na hania. I manga tabu a kai. A maka kadirovo ri hae a nune ria na rahana.”
MAT 13:33 Muri e Isu i taki tabua tara nivaka­kika, i ta maea, “A harikianga na hunu i manga a is i bolea a ngatavine i pulo turana kabukuna plaoa, muri i pugaga i dagi.”
MAT 13:34 E Isu i uka ma i ta kavakava ne huriki. I taki ria na nita vakakika kunana.
MAT 13:35 I rata mavonga ge bele muholi a nita hosi ne huriki a propet, i ta maea, “Na tahuna a ta turane ria, ga ta vakakika. Ga vakalongo ria na ngava ni ruhulolo hosi na nidoko na malala.”
MAT 13:36 Muri e Isu i pe e huriki, i dili na ruma. E huriki a murimuri vona ri valai vona ri takia, “O tuveve poloa ne mia a nivakakika na kukuni na hania.”
MAT 13:37 Lakea e Isu i koli, i ta maea, “A Tuna Bakovi a viri i varo a vutuna vit.
MAT 13:38 A hania i manga a tanga lobo na malala. A vutuna vit i manga e huriki a bakovi a ngatavine a Vure i matakari ria. A kukuni i manga e huriki a bakovi a ngatavine e Satan i matakari ria.
MAT 13:39 A pile, ra i varo a kukuni, i manga e Satan. A parava na nimirio i manga a nilobona parava. E huriki ri mirio ri manga e huriki a agelo.
MAT 13:40 A kukuni ni pasi vuroki, ni rungani, bara ni rata mavonga e huriki a bakovi hale na nilobona parava.
MAT 13:41 A Tuna Bakovi bara i rudu e huriki a agelo vona ri kope tala na harikianga vona e huriki a bakovi ri longotaro a vinara nau, a maki lobo i rata e huriki ri rata a naro hale.
MAT 13:42 Bara ri voro rike ria na kanono dagi, lakea bara ri tangi, i madihi a hatene ria, ri karatata mavonga a ngine ria.
MAT 13:43 E huriki a bakovi malamala bara ri para manga a haro pololilo na harikianga ne Tamane ria. E rei a viri i ngaru ni longokilalea a ngavagu, ge longo kamumu, ge luhoi kado.
MAT 13:44 “A harikianga na hunu i manga a tava ni tanu na malala. A bakovi tara i keli a malala, i matavisia a tava. Muri i ru mule tabua. I vivi hateka, lakea i vano i habi a maki lobo vona ni gi kona. I bole a moni, i konea a tabekena malala iea, ge ne vona a tava ni tanu vonga.
MAT 13:45 “A harikianga na hunu i manga a bakovi tara i matakana a mahala kamumu.
MAT 13:46 Na tahuna i matavisia a viri kamumu hateka, i vano i habi a maki lobo vona ni gi kona, muri i konea a mahala.
MAT 13:47 “A harikianga na hunu i manga a vuko ni ru na darilomu, i koro vona a manu legelege.
MAT 13:48 Na tahuna a vuko i vonu, e huriki a tahodari ri valai, ri lalu rikea na lavu. Muri ri made puru ri tahoni dili na kulopi a manu kamumu, ri vuroki a manu hale.
MAT 13:49 Na nilobona parava bara i mavonga kunana. E huriki a agelo ri gi valai, ri gi kalipida e huriki a bakovi malamala, e huriki a bakovi hale.
MAT 13:50 Bara ri voro rike na kanono dagi e huriki a bakovi hale, lakea bara ri tangi, i madihi a hatene ria, ri karatata mavonga a ngine ria.”
MAT 13:51 Lakea e Isu i nana ria, “Ra ngava a taki. Mu longokilala o i uka?” Ri ta maea ria, “Mi longokilala.”
MAT 13:52 Lakea e Isu i taki ria i ta maea, “I mavonga, e huriki a mari na vinara na lotu ri tovo vona a harikianga na hunu, ri manga a tahona ruma i bole tala na tava vona a mahala karaba, a mahala hosi.”
MAT 13:53 Na tahuna i taki lobo a nita vakakika nga, i laho lokovonga.
MAT 13:54 I bele na tanga vona, i dili na roho na vaponga, i vakatubu ni vara e huriki. E huriki vonga ri turutu vona, ri vanana, “Ra bakovi iea, i bolea vai a lohokanga? I bole vai a nitora ni rata a nivakasiri?
MAT 13:55 Si lohoka vona a koma iea. E tamana a bakovi ni hae a ruma kunana. E kinana e Maria. E huriki e tarina mai e Iakop, e Iosep, e Simon, e Iuda.
MAT 13:56 E huriki e kurabana, ria ranga ri made koea turane hita. Pali i bole vai a lohokanga, a nitora nga?”
MAT 13:57 Lakea ri marikoi vona. Muri e Isu i taki ria, “A propet ni togo na tanga lobo. Pali e huriki a bakovi a ngatavine na tanga vona i uka ma ri togoa.”
MAT 13:58 Lakea i uka ma i rata a nivakasiri i kupo vonga, a vuhuna i uka ma ri luhoi torea.
MAT 14:1 Na tahuna iea a hariki e Herod i longo a velengane Isu,
MAT 14:2 lakea i taki e huriki a vora vona i ta maea, “Ra bakovi iea, e Ioanes a mari ni vahilolo, i pesi rike mule na matenga! I mavonga i tahoka a nitora ni rata a nivakasiri.”
MAT 14:3 I ta mavonga, a vuhuna i rabalakia hosi e Ioanes. A nimatene Ioanes i bele maea: e Ioanes i tahatea e Herod na hini i parangi tabu e Herodias, e girihine tukana, e Pilip. I takia, i ta maea, “A vinara i ta pupukari vona go parangi vona e girihine turamu.” I mavonga, e Herod i ngaru ni rabalakia e Ioanes, pali i mangenge e huriki, a vuhuna ri luhoia e Ioanes a propet. Lakea i rudu vakuku e huriki a nugumaheto, ri lakavu kunanea e Ioanes, ri kolo tatea, ri ru dilia na bavi.
MAT 14:6 Na parava e Herod ni poda vona, i ratea a habu dagi. E tune Herodias a ngatavine i raulo. Na tahuna e Herod i masia, i vivi hateka,
MAT 14:7 lakea i kaba i ta muholi vona ge habia vona a ra maki i ngarua.
MAT 14:8 E kinana koma i voro dili a ngava vona, ge ta maea, “A ngaru go rabalakia e Ioanes a mari ni vahilolo, o ru na sika a mapana, o habia nau.”
MAT 14:9 Na tahuna a hariki i longoa, i dodo. Pali i vakuku ni gi rabalaki e Ioanes, ri gi bole vilia a gina, a vuhuna i kaba pali na matane huriki ri valai na habu.
MAT 14:10 Lakea ri palakudua a lohone Ioanes pololilo na bavi.
MAT 14:11 Ri rua na sika a gina, ri bole lakea na sirula. A sirula i bolea, i habia ne kinana.
MAT 14:12 Muri e huriki a murimuri ne Ioanes ri bolea a podana, ri tanua. Muri ri vano ri vakalongoa e Isu.
MAT 14:13 Na tahuna e Isu i longoa a velengane Ioanes i mate, i malaga, i rike na aga ta ge lakea na tabeke i ngeki. Pali na tahuna e huriki ri longoa a hini i vano, ri malaga na tanga lobo, ri laho pololilo ri gi buloa.
MAT 14:14 Na tahuna e Isu i bele, i matai ria, i dodo ria, i vakamahuri e huriki ri giloa.
MAT 14:15 I malunga liu ngane, lakea e huriki a murimuri vona ri takia, ri ta maea, “I malunga liu pali. A tabeke si made vona i ngeki. O rudu e huriki ri gi hamule lakea na tanga, ri gi kona a maki ni kani.”
MAT 14:16 Pali e Isu i koli, i ta maea, “Nahea ri gi hamule. Mu vakani ria.”
MAT 14:17 Ri koli, ri ta maea, “Mi tahoka kunana a bret i lima, a manu i rua.
MAT 14:18 Lakea e Isu i ta maea, “Mu bole valai nau.”
MAT 14:19 Muri i taki e huriki ri gi made puru na varili. I bole a bret i lima, a manu i rua, i mata rike na hunu i kavurikea a Vure. Muri i kevea a bret, i habi ne huriki a murimuri vona ri veru ne huriki.
MAT 14:20 E huriki lobo ri kani, ri maru. Muri e huriki a murimuri vona ri tahoni dili na kulopi i ravulu a polona i rua a kalavana maki ni kani ri kani kaleva.
MAT 14:21 E huriki a bakovi ri kani ri ala rangale lima (5,000). Pali e huriki a ngatavine, a koma i uka ma ni gi.
MAT 14:22 Muri e Isu i rudu e huriki a murimuri vona ri gi rike na aga, ri gi muga lakea na tabeke tara na darilomu. Pali i made mule ia, ge ru polo kamumu e huriki.
MAT 14:23 E huriki lobo ri vano pali, lakea i sike kikeri na lolo i vasileki. I rodo ngane a hini, i tabana ni made kikeri vonga.
MAT 14:24 Pali e huriki a murimuri ri rike pali na aga, ri pasi tala basi pali. A vilu i pori valai muga, ru vahori a aga.
MAT 14:25 Na malabeonga ngane, e Isu i laho langa na dari, i laho pori mai ria.
MAT 14:26 Na tahuna e huriki a murimuri ri masia i laho langa na darilomu ri mangenge, ri haloho, a vuhuna ri pahadakia ta a hanitu.
MAT 14:27 Pali e Isu i malaviriri kunana i taki ria, “Naha ni mangenge, mu tuhaka! Iau kunana.”
MAT 14:28 Lakea e Petrus i ta maea, “Bakovi Dagi, ge ioe muholi, o taki iau ga laho langa na dari, ga laho lakene mai ioe.”
MAT 14:29 Lakea e Isu i koli, i ta maea, “O valai.” E Petrus i page raga na aga, i laho langa na dari, i lakea mai e Isu.
MAT 14:30 Pali na tahuna i masia a vilu i pori hateka, i mangenge, i vakatubu ni pasiri. Lakea i gale tala, i ta maea, “Bakovi Dagi, o korimule iau!”
MAT 14:31 Lakea e Isu i malaviriri kunana i nugua, i takia, “A niluhoi vomu i kiroko hateka. I navai o lohorua?”
MAT 14:32 Na tahuna ru rike na aga, i pasi puru a vilu.
MAT 14:33 Lakea e huriki ri made na aga ri kavurikea, ri ta maea, “Muholi hateka, ioe a Tuna Vure.”
MAT 14:34 Ri polo kudua a darilomu, ri bele o Genesaret.
MAT 14:35 E huriki a bakovi vonga ri mata­kilalea e Isu, lakea ri vakaru a ngava ne huriki na tabeke iea, ri bole valai ne Isu e huriki ri giloa.
MAT 14:36 Ri nana tora ia ri gi padoi kunanea a harena varakia vona. E huriki lobo ri padoia, ri tavaga.
MAT 15:1 Na parava tara e huriki a Pariseo, a mari na vinara na lotu ri pea e Ierusalem ri valai ri gi masia e Isu. Ri nanea,
MAT 15:2 “E huriki a murimuri vomu, i navai ri longotaro a vilo ne huriki a gare hosi? I uka ma ri loi taro a limane ria muga ni kani!”
MAT 15:3 E Isu i koli, i ta maea, “Pali mua, i navai mu longotaro a vinara na Vure mu gu muri mai a vilo hosi?
MAT 15:4 A Vure i vakuku maea, ‘Mu togo e kinane mua e tamane mua.’ I ta maea tabu, ‘E rei a viri i harogi e tamana e kinana, ni gi rabalaki.’
MAT 15:5 “Pali mua mu taki ta a viri ge takia e tamana e kinana, ge ta maea, ‘A kinori ta ga habi marua vona, a habi pali na Vure.’ Mu takia i kamumu nahea ge togo e tamana e kinana.’
MAT 15:6 Na naro iea, mu longotaroa a nitana Vure, mu gu ramai kunana a narone mua.
MAT 15:7 Mua e huriki a tabele rua! E Isaia i ta muholi na tahuna i taki virihi mua na nita propet i ta maea,
MAT 15:8 “‘Re huriki nga, ri taki ta ri togo iau, pali i uka ma ri ngaru muholi iau.
MAT 15:9 Ri kavurike tavula iau; ri tovo e huriki na vinara tavula na bakovi, ri takia ta a vinara na Vure.’”
MAT 15:10 Muri e Isu i gale valai e huriki, i ta maea, “Mu talangaki valai, mu longokilalea a nitagu.
MAT 15:11 A maki i dili na ngavana bakovi i uka ma i ratea ge katoki na matana Vure. A maki i ratea i katoki na matana Vure, a maki i pagitala na ngavana.”
MAT 15:12 Muri e huriki a murimuri vona ri vakalongoa, ri ta maea, “E huriki a Pariseo ri longoa a nitamu, i madihi a hatene ria vona.”
MAT 15:13 Pali e Isu i koli mule, i ta maea, “A maki lobo e Tata na Hunu i uka ma i varo, bara ni lipu tala.
MAT 15:14 Naha ria. Ri ngaru ni vakasiri a dala ne huriki, pali ri manga a kepa. Pali a kepa, bara i toni ni tulia a kepa, rua varago bara ru boru puru na lovo.”
MAT 15:15 Muri e Petrus i ta maea, “O tuveve poloa ne mia a pelegona nivakakika.”
MAT 15:16 Lakea e Isu i taki ria, “Ra mua, i uka ma mu longokilala ma a nitagu?
MAT 15:17 I kavakava. A maki i dili na ngavamu bara i puru na kavutumu, muri i pagitala na kakaimu.
MAT 15:18 Pali a ngava i pagitala na ngavana viri i valai na hatena, i ratea i katoki.
MAT 15:19 A maki hale nga ri pagitala na hatena bakovi: a niluhoi hale, a naro ni rabalaki a viri, a molenga, a panahoa, a marapusianga, a nipadimomo.
MAT 15:20 A naro nga ri rata a bakovi i katoki na matana Vure. Pali a viri i uka ma i loi a limana muga ni kani, i uka ma i ratea ge katoki.”
MAT 15:21 Muri e Isu i pea a tanga iea, i lakea na tabeke ne Tair, e Sidon.
MAT 15:22 A ngatavine o Kenan tara i made vonga. I valai ne Isu, i ta dagi, i ta maea, “Bakovi Dagi, hamone Davit, o dodo iau! E tugu a ngatavine i dili vona a hanitu, i ratapilea.”
MAT 15:23 Pali e Isu i uka ma i taratotoa. Muri e huriki a murimuri vona ri taki torea, ri ta maea, “O tonoa a ngatavine iea ge vano. I gale vilihui ne teu.”
MAT 15:24 Pali e Isu i koli, i ta maea, “A Vure i rudu valai iau ga kori kunana a kabu ne Israel, ri manga a maka sipsip ri velu.”
MAT 15:25 Pali a ngatavine i turume puru na ngalana, i ta maea, “Bakovi Dagi o tuhori iau!”
MAT 15:26 E Isu i koli, i ta maea, “I uka ma i kamumu ni gi bole a maki ni kani ne huriki a koma, ni gi voro lakea na ligo.”
MAT 15:27 A ngatavine i koli, i ta maea, “Bakovi Dagi, o ta muholi. Pali a ligo ranga ri kani poi a momona maki ni kani.”
MAT 15:28 Lakea e Isu i koli, i ta maea, “Ngata­vine, o luhoi tora hateka iau! Ge bele manga a hini o ngarua ge bele.” I mavonga, e tuna ngatavine i tavaga mala­viriri kunana.
MAT 15:29 Muri e Isu i malaga vonga, i laho na dahana Darilomu e Galili. Muri i sike na dahana lolo, i made puru.
MAT 15:30 E huriki ala kupo ri valai vona, ri tuli valai vona e huriki a vaha hale, e huriki a kepa, e huriki a beu, e huriki a ngavarubu, turana e huriki ranga. Ri taparaki ria na ngalane Isu. Lakea i vakamahuri ria lobo.
MAT 15:31 E huriki lobo ri turutu na tahuna ri matai e huriki a ngavarubu ri ta, e huriki a beu ri tavaga, e huriki a vaha hale ri laho tabu, e huriki a kepa ri matapara. Lakea ria lobo ri kavurikea a Vure ne Israel.
MAT 15:32 Muri e Isu i gale palupu e huriki a murimuri vona, i ta maea, “Iau a dodo e huriki nga. Ri made turagu na parava i tolu pali. I uka ma ri kani. Pali ngane a koi ni rudu hamule ria, ma ge vurea a matane ria na dala, a vuhuna ri vitolo.”
MAT 15:33 E huriki a murimuri ri koli, ri ta maea, “Pali si gi bole vai a bret koea na tabeke i ngeki, ge kara e huriki nga? Ri ala kupo hateka.”
MAT 15:34 Lakea e Isu i nana ria, “I riva bret mu tahoka?” Ri koli, ri ta maea, “Mi tahoka a bret i polorua, a manu kiroko ranga.”
MAT 15:35 Lakea i taki e huriki ri gi made puru na malala.
MAT 15:36 Muri i bole a bret i polorua, a manu kiroko ranga, i kavurikea a Vure. I keve, i habi ne huriki a murimuri ri gi veru ne huriki.
MAT 15:37 E huriki lobo ri kani, ri maru. Muri ri tahoni na kulopi i polorua a kalavana maki ni kani.
MAT 15:38 E huriki a bakovi ri kani ri ala rangale va (4,000). A ngatavine, a koma i uka ma ni gi.
MAT 15:39 Muri e Isu i rudu e huriki ri gi hamule lakea na tanga ne ria. I rike na aga ia, i lakea na tabeke ne Magadan.
MAT 16:1 Na parava tara e huriki a Pariseo a Sadusi ri valai ri gi tonia e Isu. Ri takia ge ratea tara nivakasiri, ri gi matakilaka vona i valai na Vure.
MAT 16:2 Pali i koli, i ta maea, “Na malunga, na tahuna mu masia a hunu i vururu, mu lohoka vona bara i kara kuduvi a haro.
MAT 16:3 Pali na hatelanga, na tahuna a hunu i vururu, i hupi, mu lohoka vona bara i boru a vala. Mu matakilalea a hini, ge boru a vala, o ge kara a haro. Pali a maka maki iau a rata, i uka ma mu matakilala.
MAT 16:4 E huriki na tahuna mona, ri hale hateka, ri ha taroa a Vure i manga a ngatavine i ha taroa e kakaina, i mole lae. Ri ngaru ni matai a nivakasiri! Pali i uka ma ri gi masia tara nivakasiri. A nivakasiri i taku kunana bara ri masia, a nivakasiri ne Iona a propet.” Muri e Isu i pe ria i vano.
MAT 16:5 Na tahuna ri page poloa pali a dari­lomu, e huriki a murimuri ri longo kaburungi ni bole a bret.
MAT 16:6 E Isu i taki ria, i ta maea, “Mu matadoko vona a is ne huriki a Pariseo, a is ne huriki a Sadusi.”
MAT 16:7 Lakea ri vakatubu ni vata, ri ta maea, “I ta maea a vuhuna i uka ma si bole valai a bret.”
MAT 16:8 E Isu i lohoka vona a niluhoi ne ria, lakea i taki ria, i ta maea, “I uka ma mu luhoi tora hateka. I navai mu vata vona a bret i uka ma mu bole?
MAT 16:9 I uka ma mu mata­kilala iau ma. Mu luhoi mule a bret i lima a vakani e huriki ala rangale lima (5,000) vona. I riva a kulopi mu tahoni a kalavana maki ni kani vona?
MAT 16:10 Pali a bret i polorua a vakani e huriki ala rangale va (4,000) vona. I riva a kulopi mu tahoni a kalavana maki ni kani vona?
MAT 16:11 Pali i navai ngane mu pahaluhoi ta a taki a bret? Mu mata here vona a is ne huriki a Pariseo, a is ne huriki a Sadusi.”
MAT 16:12 Muri ri longokilalea a ngavane Isu, i uka ma i taki ria na is ni rata a bret vona. I taki ria ri gi mata here vona a nitovo ne huriki a Pariseo, a Sadusi.
MAT 16:13 Muri e Isu i luve na tabeke ne Sisaria Pilipi. I nana e huriki a murimuri vona, i ta maea, “E huriki ri luhoia a Tuna Bakovi ge ia e rei muholi?”
MAT 16:14 Ri koli ri ta maea, “E huriki ranga ri taki ioe ta ioe e Ioanes a mari ni vahilolo. E huriki ranga ri taki ioe ta ioe e Elaisa. Pali e huriki ranga ri taki ioe ta ioe e Ieremaia, o a propet hosi tara.”
MAT 16:15 Lakea i nana ria, “Pali mua? Mu luhoi iau ge iau e rei muholi?”
MAT 16:16 E Simon Petrus i koli, i ta maea, “Ioe e Kristo, a Tuna Vure Mahuri.”
MAT 16:17 Lakea e Isu i takia, “Simon, tune Iona, a Vure i rata kamumu ioe. I uka tara bakovi ge vakasiria vomu. E Tata na hunu kunana a viri i vakasiria vomu.
MAT 16:18 A taki ioe, ioe e Petrus. Ga vakapesi langa na kedo iea a tara nau. A nitora na matenga i uka ma ge ratapilea.
MAT 16:19 Ga habia vomu a nitala na harikianga na hunu. A ra maki o koloa koea na malala, a Vure tara bara i koloa meli na hunu. A ra maki o puga koea na malala, a Vure tara bara i puga meli na hunu.”
MAT 16:20 Muri i ta pupukari e huriki a murimuri, nahea ri gi vakalongoa tara viri ne ia e Kristo.
MAT 16:21 Na parava iea e Isu i vakatubu ni vaka­longo e huriki a murimuri vona, ne ia ge sike o Ierusalem, ge bole a nimadihi i kupo na limane huriki a gare na lotu, a prister dagi, a mari na vinara na lotu. Muri bara ri rabalakia. Pali muri na parava i tolu, bara i mahuri mule.
MAT 16:22 Pali e Petrus i tuli lakea na gaga, i vaka­tubu ni tahatea, i ta maea, “Bakovi Dagi, i uka! A naro iea nahea ge bele vomu!”
MAT 16:23 Pali e Isu i mata lakea ne Petrus, i takia, “Satan, o hamule mai a bitogu! Ioe o pesi karia a dalagu. I uka ma o luhoi a maki na Vure. O luhoi kunana a maki na bakovi.”
MAT 16:24 Muri e Isu i taki e huriki a muri­muri vona, i ta maea, “E rei a viri i ngaru ni muri nau, ge lohopile a ningaru vona, ge kalohoa a kai tavalavala vona, ge ramai iau.
MAT 16:25 E rei a viri i lavuni nau, ne vona ni korimule a kulina, bara i velu. Pali e rei a viri i mate a vuhuna i ramai iau, bara i bole a nimahuri vakaroro.
MAT 16:26 Ge a ra a viri ge tahoka a mahala lobo na malala, pali ge velu a hanuna? A mahala lobo nga, i uka ma ge korimulea.
MAT 16:27 A Tuna Bakovi bara i valai na bagetuanga ne Tamana turana e huriki a agelo vona, ge habi a mapa ne huriki takutaku, ge muri mai a narone ria.
MAT 16:28 A taki muholi mua, i ranga ne mua, ra mu pepesi koea, i uka ma mu gu mate ma, bara mu masia a Tuna Bakovi i luve na harikianga vona.”
MAT 17:1 Muri na parava i polotara e Isu i tuli kunana e Petrus, e Iakop, e Ioanes e tarine Iakop, to sike na lolo dagi.
MAT 17:2 Na tahuna to made meli, e Isu i mareli na matane tou. A matana i para manga a haro, a varakia vona i kea manga a nipara.
MAT 17:3 E Moses, e Elaisa ru bele vakaturutu, ru ta turane Isu.
MAT 17:4 Lakea e Petrus i takia e Isu, i ta maea, “Bakovi Dagi, i kamumu hateka mete valai koea. Ioe bara o ngaru, ga hae a kape ge tolu. Ne vomu tara, ne Moses tara, ne Elaisa tara.”
MAT 17:5 Na tahuna i tabana ni ta, a bubu pangapanga i kavitagu tou. A lohona viri i ta valai na bubu, i ta maea, “A Bakovi iea e Tugu, a hategu. A vivi hateka vona. Moto longo mai a nitana.”
MAT 17:6 Na tahuna to longoa a ngava iea, to mangenge, to boru ngala barara puru to kavitagu a matane tou.
MAT 17:7 Pali e Isu i padoi tou i ta maea, “Moto pesi rike. Naha ni mangenge.”
MAT 17:8 Na tahuna to mata rike, i uka ma to masia tara viri. E Isu kunana i pepesi vonga.
MAT 17:9 Na tahuna to laho raga na lolo, e Isu i vakuku tou, i ta maea, “Naha ni vakalongoa tara viri vona a maki moto matai, ge vano ge harena na tahuna a Tuna Bakovi ge pesi rike mule na matenga.”
MAT 17:10 Lakea a murimuri nga to nanea, “I navai e huriki a mari na vinara ri takia e Elaisa ge valai muga?”
MAT 17:11 E Isu i koli i ta maea, “I muholi, a vinara i takia e Elaisa ge valai muga, ge rata karaba a maki lobo.
MAT 17:12 A taki matou, e Elaisa i valai pali. Pali i uka ma ri matakilalea. Ri rata virihi ia vona a maki lobo ri ngaru ni ratana. I mavonga kunana, a Tuna Bakovi tara bara i bole a nimadihi na limane ria.”
MAT 17:13 Muri to longokilalea a ngava i takia, i taki virihia e Ioanes, a mari ni vahilolo.
MAT 17:14 E huriki ala kupo ri davea e Isu. Na tahuna i luve, a bakovi tara i valai, i turume puru na ngalane Isu,
MAT 17:15 i ta maea, “Bakovi Dagi, o dodoa e tugu a bakovi! I bole a nimadihi dagi. Na parava vakaroro i turutu, i boru puru. I boru langa na kanono, i boru puru na naru.
MAT 17:16 A bole lakea ne huriki a murimuri vomu, pali ri keri ni koria.”
MAT 17:17 E Isu i koli, i ta maea, “Na tahuna mona, i uka tara viri ge luhoi torea a Vure. A narone mua i hale hateka. Ge navai? Ga hatenono mavonga ni dava mua, mu gu luhoi tora iau?” Muri i takia a bakovi iea, i ta maea, “O tuli vilia e tumu.”
MAT 17:18 Muri e Isu i tahatea a hanitu. I malaviriri kunana, a hanitu i ha tala vona, i tavaga liu.
MAT 17:19 Muri e huriki a murimuri ri valai kapiloho ne Isu ri nanea, “I navai mi keri ni lili talea a hanitu iea?”
MAT 17:20 I koli, i ta maea, “A vuhuna i uka ma mu luhoi tora hateka a Vure. A taki muholi mua, bara mu tahoka a niluhoi kiroko manga a vutuna mastad, bara mu takia a lolo iea ge vano ge pesi na hini ranga, bara i longototo. I uka tara maki mu gu keria.”
MAT 17:21 Na tahuna e huriki a murimuri ri vapopo o Galili e Isu i taki ria, i ta maea, “A Tuna Bakovi i tabukoi bara ni habi na limane huriki a bakovi,
MAT 17:23 ri gi rabalakia. Muri na parava i tolu, bara i mahuri mule.” Na tahuna ri longoa a ngava iea, ri dodo hateka.
MAT 17:24 Na tahuna ri bele o Kapernaum, e huriki a bakovi ni bole a 50 toea takis na roho na Vure ri valai ne Petrus, ri nanea, “Ra mari ni tovo ne mua, i kona kilala a takis na roho na Vure, o i uka?”
MAT 17:25 E Petrus i koli, i ta maea, “I kona.” Muri e Petrus i lakea na ruma. E Isu i ta muga, i nanea, “Simon o luhoi navai? A hariki ge bole ne rei a takis? Ge bole ne huriki e tuna, o ne huriki ranga?”
MAT 17:26 Lakea e Petrus i koli i ta maea, “E huriki ranga bara ri kona.” Lakea e Isu i takia, “I mavonga e huriki e tuna i uka ma ri kona a takis.
MAT 17:27 Pali nahea ri gi maruhu e huriki nga. O vano, o lalu a manu na darilomu. A manu o lalu mugea, o pidea a ngavana, o bole talea a kina ge taku. Muri o vano, o kona a takis ne tarua.
MAT 18:1 Muri e huriki a murimuri ri valai ne Isu, ri nanea, “E rei ge dagi hateka na harikianga na hunu?”
MAT 18:2 Lakea i gale valai vona tara koma kiroko, i vakapesia na kurukurune ria,
MAT 18:3 i ta maea, “A taki muholi mua, e rei a viri i koi ni pulo a vilona, ge bele manga a koma kiroko iea, i uka ma ge dili na harikianga na hunu.
MAT 18:4 E rei a viri i vakakiroko ia ge manga a koma kiroko iea, bara ia a viri dagi na harikianga na hunu.
MAT 18:5 E rei a viri i tagui a koma kiroko maea na ragu, i tagui iau.
MAT 18:6 Pali e rei a viri i ratea a koma kiroko maea, ra i luhoi tora iau, ge dili na naro hale, bara i kamumu hateka ni gi topi na lohona a kedo dagi, ni gi voro puru na utu, ge pasiri.
MAT 18:7 “A Vure bara i pelekado e huriki ri vakaboru e huriki na naro hale. I muholi, a nitoni bara i bele. Pali a Vure ge pelekado a viri i vakaboru e huriki.
MAT 18:8 A limamu o a vahamu ge rata ioe go rata a rabu hale, o palakudua, o vurokia. Ma ni gi voro puru ioe na kanono i nono vakaroro turana vahamu i rua, a limamu i rua. I kamumu bara o tahoka a limamu, a vahamu i taku kunana, o bole a nimahuri vakaroro.
MAT 18:9 Pali a matamu ge rata ioe go rata a naro hale, o sigi talea, o vurokia, ma ni gi voro puru ioe na kanono na imperno turana matamu i rua. I kamumu go tahoka a matamu i taku kunana, o bole a nimahuri vakaroro.
MAT 18:10 “Naha ni biua tara viri ne huriki a koma kiroko nga, a vuhuna iau a taki mua, e huriki a agelo ne ria ri pesi vakaroro na matane Tata na hunu.
MAT 18:11 (-)
MAT 18:12 “Mu luhoi navai? A ra ge ratea a bakovi i tahoka a sipsip i ravulu mule ma a murina balaka taku (100), pali a sipsip tara i laho tala, i velu? Bara i pe puru na kupona a sipsip i 99, bara i vano ia, i matakanea a viri i velu.
MAT 18:13 A taki muholi mua, na tahuna i matavisia bara i vivi hateka vona. A nivivi vona bara i dagi hateka na maka sipsip i 99 i uka ma ri laho tala.
MAT 18:14 I mavonga kunana, e Tamane mua na hunu i uka ma i ngaru ge velu a viri tara ne huriki a viri kiroko nga.
MAT 18:15 E turamu tara ge rata hale ioe, o vano o taki kapilohoa. Ia ge longo, o korimulea pali e turamu.
MAT 18:16 Ia i uka ma ge longo, o tuli tabua tara bakovi, o a bakovi ala rua, moto vano moto takia. I mavonga, ‘a ngava ni padi virihi a viri vona, a bakovi ala rua o ala tolu to go lohoka vona.’
MAT 18:17 Ia i tabana i uka ma ge longo, mu taki talea ne huriki a tara na Vure. Ia i tabana i uka ma ge longo, mu mata taroa ge manga a bakovi i uka ma ia a Iuda, o a bakovi ni bole a takis.
MAT 18:18 “A taki muholi mua, a ra maki mu koloa koea na malala, bara ni kolo meli na hunu. A ra maki mu puga koea na malala, bara ni puga meli na hunu.
MAT 18:19 “A taki tabu mua, e rei ne mua ala rua koea na malala ru valongo mai a ngava, ru vasileki, e Tata na hunu bara i longo mai rua.
MAT 18:20 I mavonga, a vuhuna na tahuna a viri ala rua o ala tolu to vapopo na ragu, iau a made vonga turane tou.”
MAT 18:21 Muri e Petrus i valai ne Isu, i nanea, “Bakovi Dagi, e turagu ge rata hale iau balaka kupo, ga puga vuroki balaka riva a naro hale vona? Ga puga balaka polorua?”
MAT 18:22 E Isu i koli i ta maea, “I uka ma ge balaka polorua kunana. O puga vuroki a naro hale vona balaka ravulu polorua a polona i polorua (77).
MAT 18:23 “I maea, a harikianga na hunu i manga a hariki i ngaru e huriki a vora vona ri gi koli a moni ri bole.
MAT 18:24 A bakovi i pelekado mugea, a kedo bara i koli a talent i rangale ravulu (10,000).
MAT 18:25 Pali a bakovi iea i keri ni koli a moni vona, lakea a hariki i taki ni gi habi ni kona a bakovi iea, turana e girihina, e huriki e tuna, a maki lobo vona, ni gi koli a makoli vona.
MAT 18:26 “A vora i tabuli puru na ngalana hariki, i nana tora ia, i ta maea, ‘O dodo iau, o hatenono. Bara koli lobo a moni vomu.’
MAT 18:27 Lakea a bakovi dagi i dodoa a vora vona, i takia nahea ge koli a makoli vona.
MAT 18:28 “Pali a vora iea, na tahuna i pagitala, i masia a vora turana, hosi i habi a moni vona, a denari i ravulu mule ma murina balaka taku (100). I lakavua, i roboa a lohona, i takia, i ta maea, ‘O koli ngane a kedo a habi vomu!’
MAT 18:29 “A vora turana i tabuli puru na ngalana, i nana tora ia, i ta maea, ‘O dodo iau, o hatenono. Bara koli mule a makoli vomu.’
MAT 18:30 “Pali i uka ma i longo maia. I vano, i taki e huriki a tagari ri gi ru dilia na bavi, ge made vonga ge harena na tahuna i koli mule lobo a makoli vona.
MAT 18:31 Na tahuna e huriki a vora ranga ri masia, ri dodo. Ri vano, ri vakalongoa a hariki.
MAT 18:32 “Muri a hariki i gale vilia a vora iea, i takia, ‘Ioe a vora hale! Ioe o nana tora iau, a puga vuroki a makoli lobo vomu.
MAT 18:33 Iau a dodo ioe, pali i uka ma o dodoa a vora turamu.’
MAT 18:34 I madihi a hatena hariki, i habia na limane huriki a tagari ri gi habi a nimadihi dagi vona, ge harena na tahuna i koli mule lobo a makoli vona.
MAT 18:35 “I mavonga kunana, e Tata na hunu bara i rata maea e huriki i uka ma ri lohopile muholi a naro hale na turane ria.”
MAT 19:1 E Isu i taki lobo a ngava nga, muri i malaga o Galili, i lakea na robo e Iudea, na tabeke tara na naru e Iordan.
MAT 19:2 E huriki ala kupo ri muri vona, lakea i vakamahuri ria lobo.
MAT 19:3 E huriki a Pariseo ranga ri valai vona, ri gi tonia. Ri nanea, “A vinara i ta navai? A bakovi ge pilea e girihina na ningaru vona?”
MAT 19:4 E Isu i koli, i ta maea, “Ra mua, i uka ma mu gi a nitana Vure? Ni here maea, na mugana maki lobo a Vure, a viri i ratarike a maki lobo, ‘i ratarike varago a bakovi a ngatavine.’
MAT 19:5 Lakea a Vure i ta maea, ‘I mavonga, a bakovi bara i pe e tamana e kinana, i madoko turane girihina, a kakaine rua ge taku kunana.’
MAT 19:6 Ngane i uka ma ru ala rua, ru ala taku kunana. I mavonga, nahea tara viri ge kalipida rua, a vuhuna a Vure i vakamade palupu rua.”
MAT 19:7 Muri ri nanea e Isu, “Pali e Moses, i navai i habi a vinara hosi i taki a bakovi bara i habia ne girihina a raukea na nivapile, muri bara i tonoa ge vano?”
MAT 19:8 Lakea e Isu i koli, i ta maea, “Na mugana maki lobo i uka ma i mavonga. Pali e Moses i longo ne mua mu gu rata mavonga, a vuhuna mu kulirua hateka.
MAT 19:9 A taki muholi mua, a ngatavine i uka ma i mole, pali a bakovi i pilea, i parangi tabu a ngatavine tara, ra bakovi iea i mole.”
MAT 19:10 Muri e huriki a murimuri ri takia, “A ngava iea ge muholi, i kamumu hateka na viri i uka ma ge parangi.”
MAT 19:11 E Isu i koli, i ta maea, “I uka ma e huriki lobo ri gi longokilalea a ngava iea. E huriki ri gi longo maia, re huriki a Vure i kori ria ri gi longo maia.
MAT 19:12 A ta maea a vuhuna e huriki a bakovi ranga, i hopa a dolene ria, lakea i uka ma ri parangi. Pali e huriki a bakovi ranga, ni pala vuroki a dolene ria lakea i uka ma ri parangi. E huriki a bakovi ranga ri koi ni parangi, a vuhuna ri ngaru ni rata a leho na harikianga na hunu. Pali e rei a viri i kara ge longo mai a ngava iea, ge longo maia.”
MAT 19:13 Muri ni tuli lakea ne Isu e huriki a koma kiroko, ge ru langa a limana ne ria, ge vasileki langa ne ria. Pali e huriki a murimuri ri tahate e huriki ri tuli valai e huriki a koma.
MAT 19:14 Lakea e Isu i taki ria, i ta maea, “Naha ni hatekakari e huriki a koma. Mu taparaki ria ri gi valai nau, a vuhuna a harikianga na hunu ne vone ria e huriki a hulu nga.”
MAT 19:15 I ru langa ne huriki a koma a limana, i vakabagetu ria. Muri i malaga, i vano.
MAT 19:16 Muri a bakovi tara i valai ne Isu, i nanea, “Mari ni tovo, a ra maki kamumu ga ratea ga bole a nimahuri vakaroro?”
MAT 19:17 E Isu i koli, i ta maea, “I navai o nana iau na a ra maki i kamumu? A viri i kamumu i ala taku kunana. Ioe bara o ngaru ni bole a nimahuri vakaroro, o muri mai a vinara na Vure i ravulu.”
MAT 19:18 Muri a bakovi i nana maea, “E rei a vinara ga ramaia?” E Isu i koli, i ta maea, “Naha ni raba­laki a viri. Naha ni mole. Naha ni panaho. Naha ni tatami.
MAT 19:19 O togo e tamamu e kinamu. O ngaru e huriki lobo i manga a hini o ngaru mule ioe.”
MAT 19:20 A riau i koli, i ta maea, “A muri mai lobo a vinara nga. A ra maki tabu ga ratea?”
MAT 19:21 E Isu i koli, i ta maea, “Ioe bara o ngaru ni malamala na matana Vure, o vano o habi a maki lobo vomu ni gi kona. O bole a mapana o habi ne huriki a matasia, bara o tahoka a mahala na hunu. Muri o valai o muri nau.”
MAT 19:22 Na tahuna a riau i longoa a ngava iea, i dodo hateka, a vuhuna i tahoka hateka a mahala. I pesi rike kunana, i vano.
MAT 19:23 Muri e Isu i taki e huriki a murimuri vona, i ta maea, “A taki muholi mua, a bakovi na mahala, i gutu hateka vona ni dili na harikianga na hunu.
MAT 19:24 A taki tabu mua, a kamel i keri ni dili na dupi na kavato. I mavonga kunana, a bakovi na mahala i uka ma ge dili na harikianga na Vure.”
MAT 19:25 Na tahuna e huriki a murimuri ri longoa a ngava iea, ri turutu, ri nana, “Pali e rei ngane ge bole a nimahuri vakaroro?”
MAT 19:26 Lakea e Isu i mata lakea ne ria, i ta maea, “A maki iea, e huriki a bakovi ri keria. Pali a Vure, i uka tara maki ge keria.”
MAT 19:27 E Petrus i koli mule, i nanea, “Mia mi pe a maki lobo ne mia, mi muri vomu! I mavonga, a ra maki mi gi bolea?”
MAT 19:28 E Isu i koli, i ta maea, “A taki muholi mua, muri ma na malala karaba, a Tuna Bakovi bara i made na nibagetu na gula hariki vona. Mua ranga e huriki mu muri nau, bara mu made na gula hariki i ravulu a polona i rua, bara mu pelekado a kabu ne Israel i ravulu a polona i rua.
MAT 19:29 E rei a viri i luhoi tora iau, lakea i pe a ruma vona, i pe e huriki e turana, e kurabana, e tamana, e tuna, a hania vona, iau bara koli, bara ri bole balaka kupo tabu a maki nga, turana nimahuri vakaroro.
MAT 19:30 I kupo e huriki ri muga ngane, bara ria a iku. Pali i kupo e huriki ri iku ngane, bara ri muga.
MAT 20:1 “A harikianga na hunu i manga a tahona malala i vuho tala ge matakana e huriki a vora ri gi leho na hania na vain vona.
MAT 20:2 I taki ria ge kona ria na denarius i taku. Ri longo, lakea i rudu ria ri gi leho na hania na vain.
MAT 20:3 “Muri na kilala i polova na hatelanga i vano tabu, ge matakana e huriki a vora. I matai e huriki a bakovi ri pesi tavula na mada,
MAT 20:4 lakea i taki ria, i ta maea, ‘Mua ranga mu valai, mu leho na hania na vain nau. Bara kona kamumu mua.’
MAT 20:5 Lakea ri vano, ri leho. “I rata mavonga tabu na kuru haro. I vano tabu na kilala i tolu na malunga.
MAT 20:6 Na malunga, na kilala i lima, i vano tabu. I matai e huriki ranga ri pesi tavula, lakea i nana ria, ‘I navai mu pesi tavula mavonga koea na parava iea?’
MAT 20:7 “Ri koli, ri ta maea, ‘I uka tara viri ge taki mia mi gi leho vona.’ “Lakea i taki ria, ‘Pali. Mua ranga mu valai mu leho na hania na vain nau.’
MAT 20:8 “Na malunga liu ngane, i takia a matakari na vora, i ta maea, ‘O gale palupu e huriki a vora, o kona ria. O vakatubu ne huriki ri bele muri.’
MAT 20:9 “E huriki a vora ni bole na malunga ri valai muga ri bole a mapane ria. Ni habi ne ria takutaku a denarius i taku.
MAT 20:10 Muri e huriki ri leho muga ri valai, ni gi kona ria. Ri pahadaki ta ri gi bole a moni dagi, pali ria ranga, ri bole takutaku a denarius i taku kunana.
MAT 20:11 Na tahuna ri bole a mapane ria, ri vakatubu ni deke,
MAT 20:12 ri ta maea, ‘Re huriki nga o bole na malunga liu, ri leho kunana na kilala i taku, lakea ke o kona ria i manga o kona mia. Pali mia, mi leho tabaka, i kani mia a haro.’
MAT 20:13 “Lakea i koli i takia a viri tara ne ria, i ta maea, ‘Turagu, iau i uka ma rata hale ioe. Muga o longo vona a denarius a taki ioe ga kona ioe vona.
MAT 20:14 O bolea a mapamu, o vano. A ningaru nau kunana a kona mua na mapa i taku.
MAT 20:15 Ra moni nga, a moni nau. I navai, go taki iau a ra ga ratea vona? I navai ke? I madihi a hatemu a vuhuna iau a hatebalala?’
MAT 20:16 “I mavonga kunana, e huriki ri muri bara ri muga. E huriki ri muga bara ri muri.”
MAT 20:17 E Isu i lalaho sike o Ierusalem. I tuli lakea na gaga e huriki a murimuri vona ala ravulu a polona i rua, i taki ria, i ta maea,
MAT 20:18 “Ngane si gi sike o Ierusalem. A Tuna Bakovi bara ni habi na limane huriki a prister dagi, a mari na vinara. Bara ri taki ni gi rabalaki ia.
MAT 20:19 Muri bara ri habia na limane huriki i uka ma ria a Iuda, ri gi padikedea, ri gi hotua, ri gi paditatea na kai tavalavala. Muri na parava i tolu, a Vure ge vakamahuri mulea.”
MAT 20:20 Muri e girihine Sebedi, i tuli valai ne Isu e tuna rua. I pasike puru na ngalane Isu, i nanea ge ratea vona tara maki.
MAT 20:21 Lakea e Isu i nanea, “A ra o ngarua?” I koli, i ta maea, “A ngaru e tugu nga ru gu made turamu na harikianga vomu. Ge made na kanemu tara, na maurimu tara.”
MAT 20:22 E Isu i koli, i ta maea, “I uka ma moto lohoka vona a maki moto nana vona. A nimadihi i tabukoi ga bolea, i kara marua muru gu kalohoa, o i uka?” Ru koli e maki tari rua, ru ta maea, “I kara maria.”
MAT 20:23 Lakea e Isu i taki rua i ta maea, “I muholi hateka muru gu kalohoa a nimadihi manga iau. Pali e rei ge made na kanegu, a maurigu, i uka ma a maki nau ga habi. A gula nga e Tata i rata puru na viri i vulaki pali.”
MAT 20:24 Na tahuna e huriki a murimuri ala ravulu ri longoa, i madihi a hatene ria.
MAT 20:25 Pali e Isu i gale palupu ria, i taki ria, “Mu lohoka vona e huriki i uka ma ria a Iuda, a hariki ne ria ri matakari hateka ria. E huriki a bakovi dagi ne ria ri rata polo mugamuga.
MAT 20:26 Pali mua, i uka ma mu gu rata mavonga. E rei a viri i ngaru ge ia a viri dagi ne mua, ge leho manga a vora ne mua.
MAT 20:27 E rei a viri i ngaru ni muga ne mua ge ia a vora ne mua,
MAT 20:28 ge manga a Tuna Bakovi. Ra Tuna Bakovi, i valai i uka ma ge vakavora e huriki. I valai ge ia a vora ne huriki, ge mate, ge kona­mule e huriki ala kupo.”
MAT 20:29 Na tahuna e Isu, e huriki a murimuri vona ri pea e Ieriko, e huriki ri ala kupo ri muri vona.
MAT 20:30 A kepa ala rua ru mamade na dahana dala. Na tahuna ru longoa e Isu i laho polo, ru gale tala, ru ta maea, “O Bakovi Dagi, hamone Davit, o dodo maria!”
MAT 20:31 Pali e huriki ri tahate rua, ri taki rua ru gu vulai. Pali ru gale hinituhana tabu, ru ta maea, “O Tune Davit, Bakovi Dagi, o dodo maria!”
MAT 20:32 Lakea e Isu i pesi tata, i gale valai rua, i ta maea, “A ra muru ngarua?”
MAT 20:33 Ru koli, ru ta maea, “Bakovi Dagi, miri ngaru go vakamatapara maria!”
MAT 20:34 E Isu i dodo rua, i nugu a matane rua. Malaviriri kunana ru matapara, ru muri vona.
MAT 21:1 Ri bele tabukoi o Ierusalem ngane, na tanga tara ni gale e Betpage, na dahana lolo e Oliva. Lakea e Isu i rudu a murimuri vona ala rua,
MAT 21:2 i taki rua, “Muru muga lakea na tanga na ngalane marua. Na tahuna muru bele, bara muru masia a donki ni kolotata turana tuna. Muru puga rua, muru lalu valai nau.
MAT 21:3 A viri tara ge nana marua, muru takia e Bakovi Dagi i tahoka a leho ne rua, lakea bara i vakaru valai malaviriri kunana.”
MAT 21:4 A maki iea i bele, ge bele muholi a ngavana propet hosi, i ta maea,
MAT 21:5 “Mu vakalongo e huriki ri made o Sion, mu ta maea, ‘Mu masia! A hariki ne mua i valai ngane. A bakovi madoru. I rike na donki, i rike na tuna donki.’”
MAT 21:6 Lakea ru vano, ru ramai a ngavane Isu.
MAT 21:7 Ru lalu valai a donki turana tuna. Ru vulala langa na bitone rua a varakia ne rua, lakea e Isu i made langa.
MAT 21:8 E huriki ala kupo ri vulala na dala a varakia ne ria. E huriki ranga ri paku a rahana kai ri vahata na dala.
MAT 21:9 E huriki ri muga, e huriki ri muri ri vivi vona, ri magulu taku, ri ta maea, “Si gi kavurikea a hamone Davit! A Vure ge vakabagetua a viri i valai na rane Bakovi Dagi! Si gi kavurikea a Vure Meli Liu!”
MAT 21:10 Na tahuna ri dili o Ierusalem, e huriki lobo na tanga iea ri talulu maia, ri vanana, “E rei a bakovi iea?”
MAT 21:11 Lakea e huriki ri laho turana ri koli, ri ta maea, “Ra bakovi iea e Isu, a propet i valai o Nasaret, na tabeke ne Galili.”
MAT 21:12 Ngane e Isu i dili na roho na Vure o Ierusalem, i lili tala e huriki ri vakona, ri vahabi a maki. I pulo ngalatudu a dede ne huriki ri vangoli a moni, e huriki ri vahabi a balu.
MAT 21:13 I taki ria, i ta maea, “A ngava ni here puru i ta maea, ‘A roho nau bara ni gale a roho na nivasileki,’ pali mua mu ratea a hini ri haniu vona e huriki a panaho.”
MAT 21:14 Muri e huriki a kepa, a vaha hale ri vali vona pololilo na roho na Vure, i vakamahuri ria lobo.
MAT 21:15 Pali e huriki a prister dagi, a mari na vinara na lotu, i madihi a hatene ria na tahuna ri matai a maka maki ni turutu vona e Isu i rata, ri longo e huriki a koma pololilo na roho na Vure ri gale tala, ri ta maea, “Si gi kavurikea a hamone Davit!”
MAT 21:16 Lakea ri nanea e Isu, “A ngava i taki e huriki a koma kiroko, o longo?” I koli i ta maea, “A longo. Pali mua, a ngava ni here hosi na Hinere, mu longoa o i uka? Ni here maea: ‘E huriki a koma kiroko, a koma ri ruru, o rata ria ri kavurike ioe.’”
MAT 21:17 Muri i pe ria, i lakea o Betani, i mahita vonga.
MAT 21:18 Na hatelanga e Isu i laho hamule o Ierusalem. I vitolo.
MAT 21:19 I masia a kai a pik na dahana dala. I lokovonga maia, pali i uka kanena. A pagana kunana. Lakea i takia a kai, i ta maea, “I uka ma go vua tabu!” Malaviriri kunana, a kai i malai.
MAT 21:20 Na tahuna e huriki a murimuri ri masia, ri turutu, ri nana, “Ra kai a pik iea, i malai malaviriri navai?”
MAT 21:21 E Isu i koli, i ta maea, “I muholi hateka, e rei a viri i luhoi tora, i uka ma i loho ruarua, ia tara bara i takia a kai ge malai. A maki kiroko nga. Bara i rata tabu a maka maki dagi. Bara i takia a lolo iea, ‘O malaga rike, o to na utu.’ bara i longototo.
MAT 21:22 Mua bara mu luhoi tora, bara ni habi ne mua a maki mu vasileki vona.”
MAT 21:23 Muri e Isu i dili na roho na Vure, i vara e huriki. E huriki a prister dagi, a bakovi dagi ri valai vona, ri nanea, “O bole vai a nitora o rata a maki nga? E rei i taki ioe go rata a maki nga?”
MAT 21:24 E Isu i koli, i ta maea, “Ga nana taro mua. Mua bara mu koli visia a ninana iea, bara taki mua vona e rei a viri i habi nau a nitora ni rata a maki nga.
MAT 21:25 A ninana nau i maea, ra hilova ne Ioanes, i valai na Vure, o i valai na bakovi tavula kunana?” Ri vata, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’
MAT 21:26 Pali bara si takia i valai na bakovi kunana, bara si mangenge ne huriki, a vuhuna ri luhoia e Ioanes a propet.”
MAT 21:27 Lakea ri ta maea, “I uka ma mi lohoka vona.” Muri e Isu i ta maea, “Iau tara, i uka ma ga taki mua vona e rei a viri i habia nau a nitora ni rata a maki nga.”
MAT 21:28 Muri e Isu i taki e huriki a prister dagi, e huriki a bakovi dagi nga, i ta maea, “Mu luhoi navai? A bakovi tara i tahoka e tuna bakovi ala rua. I takia a tabua i ta maea, ‘Tugu, mona o vano o leho na hania na vain.’
MAT 21:29 “A tabua i koli, i ta maea, ‘A koi.’ Pali muri i dodo, i pulo a niluhoi vona, i vano, i leho.
MAT 21:30 “Muri e tamane rua i takia a pahamuri tabua ge leho na hania. A koma i koli, i ta maea, ‘Bakovi dagi, bara vano.’ Pali i uka ma i vano ge leho.
MAT 21:31 “E rei ne rua i muri mai a ngavane tamane rua?” Ri koli, ri ta maea, “A tabua.” Lakea e Isu i taki ria, “A taki muholi mua, e huriki a bakovi ni bole a takis, e huriki a ngoi bara ri dili muga ne mua na harikianga na Vure.
MAT 21:32 A ta maea, a vuhuna e Ioanes i valai i vakasiri mua vona a naro malamala, pali i uka ma mu longo maia. Pali e huriki a bakovi ni bole a takis, e huriki a ngoi ri longo maia. Pali mua, na tahuna mu matai e huriki nga ri longo maia, i uka ma mu pulo a vilone mua mu gu longo maia.”
MAT 21:33 “Mu longo tabu tara nivakakika: A tahona malala tara i varoa a hania na vain vona. I tura haluia na nure. I kelia a lovo, i kisia a tabeke ni paha bebe a vain vona. I haea a roho tagari. Muri i habia a hania ne huriki a bakovi ranga ri gi leho taro vona, i vano i havai na robo basi ia.
MAT 21:34 I tabukoi ngane a keva ni mirio a vain, lakea i rudu e huriki a vora vona, ri gi bole ne huriki a mari ni leho a kanena vain.
MAT 21:35 “Pali ri lakavu e huriki a vora vona. Ri ubia tara, ri rabalakia tara, ri padimatea na kedo tara.
MAT 21:36 Muri i rudu tabu e huriki a vora ranga, ri ala kupo popote ne huriki muga. Pali e huriki a bakovi na leho ri ratapile tabu ria.
MAT 21:37 Ngane a tahona malala i rudua e tuna. I luhoi maea, ‘Bara ri togoa e tugu.’
MAT 21:38 “Pali na tahuna ri masia e tuna, ri vata, ri ta maea, ‘A bakovi iea bara i bole a murine tamana. Si gi rabalakia, si gi bolea a hania na vain na tahuna e tamana i mate.’
MAT 21:39 Lakea ri lakavua, ri voro talea na hania na vain, ri bimatea.
MAT 21:40 “Mu luhoi navai? A tahona hania na vain, ge rata navai e huriki a bakovi na leho nga na tahuna i hamule valai?”
MAT 21:41 Ri koli ri ta maea, “Bara i rabalaki e huriki a bakovi hale nga. Muri bara i habia ne huriki a bakovi na leho ranga a hania na vain vona. Pali na tahuna na nimirio, bara ri habi mule na tahona malala ranga kanena vain.”
MAT 21:42 Lakea e Isu i taki ria, i ta maea, “A ngava ni here puru na Hinere, i maea, ‘Ra kedo e huriki a mari ni hae a ruma ri marikoi vona, ngane i bele a vuhu kedo ni hae a ruma vona. A rabu iea, e Bakovi Dagi i ratea, i mata kamumu hateka na matane hita.’ “Ra mua, mu longo pali a ngava iea, o i uka?
MAT 21:43 I mavonga a taki mua, a harikianga na Vure bara ni bole hamule ne mua, bara ni habi ne huriki ri rata a maki a Vure i ngaru na harikianga vona.
MAT 21:44 E rei a viri i boru langa na kedo iea bara i bole a vuranga. Na tahuna a kedo iea ge boru tahoa a viri, bara i ubi momoa.”
MAT 21:45 Na tahuna e huriki a prister dagi, e huriki a Pariseo ri longoa a nivakakika iea, i padi ria a mana vona e Isu i taki virihi ria.
MAT 21:46 Lakea ri matakana a dala ri gi lakavua. Pali ri mangenge a vuhuna e huriki ri takia e Isu a propet.
MAT 22:1 E Isu i taki tabu ria vona tara nivakakika, i ta maea,
MAT 22:2 “A harikianga na hunu i manga a hariki i rata a habu na parangia ne tuna a bakovi.
MAT 22:3 I taki puru e huriki ri gi valai na habu, lakea i rudu e huriki a vora vona, ri gi tuli valai ria. Pali e huriki a bakovi nga ri koi ni valai.
MAT 22:4 “Muri a hariki i rudu tabu e huriki a vora ranga, i ta maea, ‘Mu vano, mu taki e huriki a taki puru ria, ri gi valai. Mu taki ria a bulmakau, a tuna bulmakau gavutuvutu ni poka pali. A rata puru lobo pali a maki ni kani. Mu taki ria ri gi valai na habu na parangia, mi gi kani.’
MAT 22:5 “Pali i uka ma ri taratoto. Ri laho viliha. A viri tara i lakea na hania. A viri tara i vano ge rata a leho vona.
MAT 22:6 Pali e huriki ranga ri lakavu e huriki a vora na hariki, ri rata hale ria, ri rabalaki ria.
MAT 22:7 I mavonga, i madihi a hatena hariki, lakea i rudu e huriki a tara na nugu­maheto vona ri rabalaki e huriki a bakovi hale nga, ri rungani a tanga ne ria.
MAT 22:8 “Muri i taki e huriki a vora vona, i ta maea, ‘A habu na parangia ni rata puru. Pali e huriki a taki puru ria ri gi valai, i uka ma ria a viri kamumu ri gi valai.
MAT 22:9 I mavonga, mu laho lakea na maka dala dagi. Mu taki e huriki mu matai vonga ri gi valai.’
MAT 22:10 Lakea e huriki a vora nga ri lakea na maka dala, ri tuli e huriki vonga. Ri tuli e huriki a bakovi hale, ri tuli e huriki a bakovi kamumu. Ria lobo ri valai na habu, i vonu a roho.
MAT 22:11 “Pali na tahuna a hariki i valai ge matai e huriki ri bele, i masia a bakovi tara, i uka ma i rodo a varakia na habu.
MAT 22:12 Lakea i nanea, ‘Turagu, o uka a varakia na habu. O dili navai?’ Pali a bakovi iea i ngapa.
MAT 22:13 Lakea a hariki i taki e huriki a bolekori vona, i ta maea, ‘Mu kolotata a limana, a vahana, mu voro talea na uvo, na tabeke a Vure i uka ma i made vona. E huriki na tabeke iea ri tangi, i vaheri mavonga a ngine ria, a vuhuna i madihi a hatene ria.’
MAT 22:14 A ta maea, a vuhuna ni gale e huriki ala kupo, pali e huriki ni vulaki i uka ma ri ala kupo.”
MAT 22:15 Muri e huriki a Pariseo ri vano, ri matakana a dala ri gi tamia e Isu, ge taki ranga ngava ri gi padi virihia vona.
MAT 22:16 Ri rudu e huriki a murimuri ne ria, turana e huriki a tara ne Herod. Ri lakea vona ri ta maea, “Mari ni tovo, mi lohoka vomu, ioe a bakovi ni ta muholi, o vara muholi na narona Vure. I uka ma o mangenge vona tara viri, a vuhuna e huriki lobo ri palupulupu na matamu.
MAT 22:17 I mavonga, o taki mia, a vinara i taki si gi habi a takis ne Kaiser, o i uka? O luhoi navai?”
MAT 22:18 Pali e Isu i lohoka vona a niluhoi hale ne ria, lakea i taki ria, “Mua e huriki a tabele rua, i navai mu ngaru ni toni iau?
MAT 22:19 Mu vakasiria nau tara moni ni kona a takis vona.” Ri habia vona a moni tara ni gale a denarius.
MAT 22:20 Muri i nana ria, “A hanune rei, a rane rei i tabuli vona?”
MAT 22:21 Ri koli, ri ta maea, “A hanune Kaiser, a rane Kaiser i tabuli vona.” Lakea e Isu i taki ria, “Mu habi ne Kaiser a maki ne Kaiser, mu habi na Vure a maki na Vure.”
MAT 22:22 Na tahuna ri longoa a ngavana ri turutu. Muri ri pea, ri vano.
MAT 22:23 Na parava iea kunana e huriki a Sadusi ri valai ne Isu. Re huriki a Sadusi, ri taki ta i uka tara viri ge mahuri mule na matenga. Ri valai ne Isu, ri nanea,
MAT 22:24 “Mari ni tovo, e Moses i here puru i takia a bakovi i mate, i pe purua e girihina, pali i uka e tune rua, e tarina bara i parangi tabu a havuri vona, ge vakabelea a hamona.
MAT 22:25 I tahoka e maki tarina mai ala polorua, ri made hosi turane mia. A tabua i parangi, muri i mate. Pali i uka ma i vakabele e tuna. Lakea a pahamuri tabua i parangi vona a havuri na tabua.
MAT 22:26 A ngatavine i uka ma i poda ma, i mate a pahamuri tabua. Pali re maki tari mai lobo ri parangi vona a ngatavine iea. Ria lobo ri mate. I uka tara viri ge vakabele a koma.
MAT 22:27 Ri mate lobo e huriki a bakovi, muri a ngatavine i mate.
MAT 22:28 O luhoi navai? Muri ma, na tahuna e huriki ri pesi rike mule na ni mate, ra ngatavine iea ge girihine rei muholi? Ria lobo ri parangi vona.”
MAT 22:29 Pali e Isu i koli mule, i ta maea, “I uka ma mu lohoka vona a Hinere. I uka ma mu lohoka na nitora na Vure. I mavonga mu varoru.
MAT 22:30 Muri ma, na tahuna e huriki ri gi mahuri mule na matenga, i uka ma ri gi vaparangi. Bara ri made manga e huriki a agelo na hunu.
MAT 22:31 Ra ngava na ni mahurimule na matenga, a nitana Vure i vakalongo mua maea,
MAT 22:32 ‘Iau a Vure ne Abraham, ne Isak, ne Iakop.’ A Vure i uka ma ia a Vure ne huriki ri mate, ia a Vure ne huriki ri mahuri.”
MAT 22:33 Na tahuna e huriki ri longoa a ngavana, ri turutu vona a nitovo vona.
MAT 22:34 E huriki a Pariseo ri longoa e Isu i vakangapa e huriki a Sadusi, lakea ri vapopo, ria lobo ri lakea ne Isu.
MAT 22:35 A Pariseo tara, a mari na vinara na lotu, i tonia e Isu na ngava, i nanea maea,
MAT 22:36 “Mari ni tovo, e rei a vinara i dagi hateka na vinara lobo?”
MAT 22:37 E Isu i koli, i ta maea, “O ngarua e Bakovi Dagi a Vure vomu na hatemu lobo, na hanumu lobo, na niluhoi vomu lobo.
MAT 22:38 A vinara iea i muga, i dagi na vinara lobo.
MAT 22:39 A vinara i muri vona, i manga tabu a viri muga, i maea: O ngarua e turamu i manga a hini o ngaru mule ioe.
MAT 22:40 A vinara i rua nga a vuhuna a vinara lobo ne Moses, a hinere lobo ne huriki a propet.”
MAT 22:41 E huriki a Pariseo ri tabana ni pesi palupu, lakea e Isu i nana ria,
MAT 22:42 “Mu luhoi navia e Kristo? Ia a hamone rei?” Ri koli, ri ta maea, “E Kristo a hamone Davit.”
MAT 22:43 Lakea e Isu i nana ria, “Pali e Davit, i navai i takia e Kristo a Bakovi Dagi vona? Na tahuna a Hanu Kiripiripi i dili ne Davit, i ta maea,
MAT 22:44 ‘E Bakovi Dagi i takia a Bakovi Dagi nau, i ta maea, “O made na limagu a kanegu, ge harena na tahuna ga ratapile e huriki a pile vomu.” ’
MAT 22:45 “E Davit i galea e Kristo e ‘Bakovi Dagi,’ pali i navai tabu ge ia a hamona?”
MAT 22:46 E huriki a Pariseo ri keri ni kolia a ninana ne Isu. I vakatubu na parava iea ri mangenge ni nana rovi tabua e Isu.
MAT 23:1 Muri e Isu i taki e huriki a muri­muri vona, turana e huriki ri vapesihi vonga, i ta maea,
MAT 23:2 “E huriki a mari na vinara na lotu, e huriki a Pariseo ri made na murine Moses ri vara mua na vinara.
MAT 23:3 Mu longototo a vinara ne ria. Pali naha ni muri mai a vilone ria, a vuhuna i uka ma ri muri mai a ngava ri vara vona.
MAT 23:4 Ri habi a vinara ne huriki i gutu ni ramai, i manga a viri i rotu a maka galesi dagi, i vakakaloho e huriki a bakovi vona. Pali ria ri koi hateka ni tuhori popote e huriki.
MAT 23:5 “A maki lobo ri rata, ri vakaholi kunana, e huriki ri gi matai. Ri tama na dumene ria a maka puhu na nitana hinere, ri bole na limane ria ranga. Ri rata a varakia na nivasileki ne ria i ola, i bola.
MAT 23:6 Ri ngaru ni made mugamuga na gula kamumu na habu, na gula kamumu na roho na vaponga.
MAT 23:7 Ri ngaru hateka e huriki ri gi togo ria, ri gi tagui ria na mada. Ri ngaru hateka e huriki ri gi gale ria ‘a mari ni tovo.’
MAT 23:8 “Pali mua, nahea tara viri ge gale mua ‘a mari ni tovo,’ a vuhuna a mari ni tovo ne mua i taku kunana. Pali mua e maki turana mai.
MAT 23:9 Nahea mu gu galea tara viri na malala ge tamane mua, a vuhuna e Tamane mua i taku kunana, ra i made na hunu.
MAT 23:10 Nahea tara viri ge gale mua ‘a bakovi dagi,’ a vuhuna a Bakovi Dagi ne mua i taku kunana, re Kristo.
MAT 23:11 A viri i muga ne mua ge ia a vora ne mua lobo.
MAT 23:12 E rei a viri i bibi rike mulea, a Vure bara i vakakiroko ia. Pali e rei a viri i vakakiroko mule ia, a Vure bara i kavurikea.
MAT 23:13 “Mua e huriki a Pariseo, a mari na vinara na lotu mu tabele rua hateka! A Vure bara i ratapile mua! Mu tukari a logo na harikianga na hunu, i uka tara viri ge dili. Mu koi ni dili vona, pali mu hatekakari e huriki ranga ri ngaru ni dili.
MAT 23:15 “Mua e huriki a Pariseo, a mari na vinara na lotu, mu tabele rua hateka! A Vure bara i ratapile mua! Mu laho lae basi, mu page poloa a dari mu gu tuli a viri ge ramai mua. Pali na tahuna i ramai mua, a rabu hale vona i rangi a rabu hale ne mua, lakea bara i puru turane mua na imperno.
MAT 23:16 “Mu ngaru ni vakasiri e huriki na dala, pali mu kepa. A Vure bara i ratapile mua! A ngava mu takia i maea, ‘E rei a viri i ta muholi, i kaba, i kurahia a roho na Vure, a maki tavula. Pali a viri i ta muholi, i kaba, i kurahia a gol i tabuli na roho na Vure, ge ramai a ngava i takia.’
MAT 23:17 Mu kepa, mu manga! I vai a maki i dagi? A gol tavula, o a roho na Vure ra i ratea a gol i tabuli herehere, ge ne vona a leho na Vure?
MAT 23:18 “Pali a ngava tara mu takia i maea, ‘A viri i kaba na dede, a maki tavula. Pali a viri i kaba na nihabi, ge ramai a ngava i takia.’
MAT 23:19 Mu kepa! I vai a maki dagi: a nihabi, o a dede ra i ratea a nihabi i vaperesi, ge ne vona a leho na Vure?
MAT 23:20 I mavonga kunana, a viri i kaba na dede, i kaba vona turana maki i tabuli langa vona.
MAT 23:21 A viri i kaba na roho na Vure, i kaba vona turana viri i made pololilo vona.
MAT 23:22 A viri i kaba na hunu, i kaba na gula hariki na Vure, i kaba na viri i made langa vona.
MAT 23:23 “Mua e huriki a Pariseo, a mari na vinara na lotu, mu tabele rua hateka! A Vure ge ratapile mua! A maki lobo ne mua mu ru na naguna i ravulu, lakea mu bole talea a naguna i taku mu habia na Vure. A maka maki tavula ranga, manga a kobo mu rata mavonga. Pali mu mata taro a maka ngava dagi na vinara. Mu mata taro a naro ni rata virihi e huriki lobo ge ramai a vilone ria. Mu mata taro a naro na nidodo, a naro ni luhoi torea a Vure. I kamumu mu gu ramai a vinara kiroko. Pali naha ni longokaburungi tabu a maka vinara dagi.
MAT 23:24 Mu ngaru ni vakasiri e huriki na dala, pali mu kepa mua! Mu ramai a maka vinara tavulavula, pali mu mata kepa vona a maka vinara dagi. Mu rata mavonga, mu manga a bakovi i bole talea na kikei na naru vona a lango, pali i mata kepa vona a kamel, i todoa.
MAT 23:25 “Mua e huriki a Pariseo, a mari na vinara na lotu, mu tabele rua hateka. A Vure ge ratapile mua! Mu ramai a vinara ni loi a tabeke polovavo na kap, a tavila. Pali a maki mu ru dili na kap, a tavila, mu bole na naro ni panaho, na naro ni raha.
MAT 23:26 Mu kepa! Mu pelekado taro a hatene mua. Muri a narone mua bara i malamala.
MAT 23:27 “Mua e huriki a Pariseo, a mari na vinara na lotu, mu tabele rua hateka! A Vure ge ratapile mua! Mu manga a lovo ne huriki ri mate, ni kalu keakea. I mata kamumu a hini polovavo, pali a hini pololilo i vona a tuha, a berana huriki ri mate.
MAT 23:28 I mavonga kunana e huriki ri matai mua, ri luhoi mua ta mu malamala. Pali a hini pololilo ne mua i vona a naro na tabele rua, a naro na ni longotaro a vinara na Vure.
MAT 23:29 “Mua e huriki a Pariseo, a mari na vinara na lotu, mu tabele rua hateka! A Vure ge ratapile mua, a vuhuna mu hae a murina tuhana e huriki a propet, e huriki a bakovi malamala hosi, mu vakabagetu.
MAT 23:30 Mu rata mavonga, a vuhuna mu luhoi maea, ‘Mia bara mi made hosi na tahuna e huriki a gare ne hita ri made na malala, i uka ma mi gi kori ria, mi gi rabalaki e huriki a propet nga.’
MAT 23:31 I mavonga mu vakasiri mua, mua a hamone huriki ri rabalaki e huriki a propet.
MAT 23:32 Pali ngane mu vakalobo a leho e huriki e tubune mua ri doko hosi.
MAT 23:33 “Mua e huriki a mata! Mua e huriki a mata hale! A Vure ge rudu mua mu gu lakea na imperno, bara mu keri ni ha taroa.
MAT 23:34 I mavonga, ga rudu lakea ne mua e huriki a propet, e huriki a bakovi na lohokanga, e huriki a mari na vinara na lotu. Bara mu rabalaki ranga, mu paditata na kai tavalavala ranga. Bara mu lagu pololilo na roho na vaponga ranga, pali e huriki ranga bara mu lili lae ria na maka tanga.
MAT 23:35 Na naro iea kunana bara mu rare na matenga ne huriki a bakovi malamala ni rabalaki, i vakatubu na bakovi malamala e Abel, i valai i harena ne Sakarias, e tune Berekia, ra mu rabalakia na roho na Vure, na kurukuruna tabeke ni gamai, a dede.
MAT 23:36 A taki muholi mua, mua e huriki na tahuna mona bara mu bole a nimadihi, a vuhuna e huriki a bakovi nga ni rabalaki.
MAT 23:37 “Ierusalem, Ierusalem! Mu rabalaki e huriki a propet, mu rabalaki na kedo e huriki a rudu valai ne mua. Balaka kupo a ngaru ni kalipopo palupu mua, i manga a kinana kureko i kavitagu a maka tuna na karapana, ga matakari mua. Pali mu koi mua.
MAT 23:38 A Vure i pea pali a roho ne mua.
MAT 23:39 Ngane a taki mua, i uka ma mu gu matai tabu iau ge harena na parava mu gu ta maea, ‘Si gi kavurikea a viri i valai na rane Bakovi Dagi.’”
MAT 24:1 E Isu i pe a roho na Vure, i laho lokovonga. E huriki a murimuri vona ri valai ri vakasiria vona a maka roho na tabeke na roho na Vure.
MAT 24:2 Lakea e Isu i koli, i ta maea, “Ra maka roho nga, a taki muholi mua, i uka tara kedo ge tabuli langa vona a kedo tara. A kedo lobo bara ni ubi puka puru.”
MAT 24:3 Na tahuna e Isu i mamade na lolo e Oliva, e huriki a murimuri vona ri valai kapiloho vona, ri nanea, “Ra maki nga, garika ri gi bele? Ge mata navai a kilakila muga ne ioe go bele, muga na nilobona parava?”
MAT 24:4 E Isu i koli, i ta maea, “Mu mamata, nahea tara viri ge tami mua.
MAT 24:5 E huriki ala kupo bara ri valai na ragu, bara ri tami e huriki, ri ta maea, ‘Iau e Kristo.’ Lakea bara ri tami e huriki ala kupo.
MAT 24:6 Bara mu longo a ngava na vabinga, a nita viliha na vabinga. Pali naha ni turutu. A maki nga bara ri bele, pali a nilobona parava i tabana.
MAT 24:7 E huriki a kabu na robo tara bara ri vaubi turana kabu na robo tara. E huriki a tara na hariki tara bara ri vaubi turana tara na hariki tara. A pago, a vuruke bara ri bele na tabeke legelege.
MAT 24:8 Ra maki nga bara ri bele muga, i manga a nimadihi na ngatavine i pahea a koma.
MAT 24:9 “Muri bara ni lakavu mua, ni vakamadihi mua, ni rabalaki mua. E huriki na tanga lobo bara ri marikoi ne mua, a vuhuna mu ramai iau.
MAT 24:10 Muri e huriki ala kupo bara ri lohopile iau, ri vatepu, ri vahabi ria na limana pile.
MAT 24:11 E huriki a nitamina propet ala kupo bara ri bele, ri tami e huriki.
MAT 24:12 E huriki ala kupo bara ri lobo ni vangaru, a vuhuna e huriki ala kupo bara ri longotaro a vinara.
MAT 24:13 Pali e rei i pesi tora ge harena na parava i mate vona, a Vure bara i korimulea.
MAT 24:14 A Velenga Kamumu na harikianga bara ni vakalongo taro na tanga lobo na malala. Muri bara i bele a nilobona parava.
MAT 24:15 “I mavonga, na tahuna mu masia a bakovi i muma hateka i ratapile a maki, ra viri i takia hosi e Daniel a propet, ge pesi pololilo na roho na Vure. E rei a viri i gia a nita iea ge longokilala.
MAT 24:16 Na tahuna mu masia a maki iea ge bele, mu ha. E huriki ri made o Iudea ri gi ha sike na lolo.
MAT 24:17 E rei a viri i pesi polomeli na mapana roho vona, nahea ge dili na ruma ge bole a maki vona. Ge ha pa kunana.
MAT 24:18 E rei a viri i leho na hania, nahea ge hamule na tanga ge bole a varakia vona. Ge ha pa kunana.
MAT 24:19 E huriki a ngatavine ri singou, e huriki a ngatavine ri vakaruru a koma kiroko, bara ri marego hateka na parava iea!
MAT 24:20 Mu vasileki nahea ge bele a maki iea na tahuna na malangia o na Parava Nimalo.
MAT 24:21 Na parava iea a nimadihi dagi hateka bara i bele. A nimadihi dagi maea i uka ma i bele hosi, i vakatubu na ni doko na malala, i valai i harena mona. Pali a nimadihi dagi maea i uka ma ge bele tabu muri ma.
MAT 24:22 Bara a Vure i uka ma ge vakakapo a parava nga, e huriki lobo bara ri mate. Pali a Vure bara i vakakapo ria, ge korimule e huriki a bakovi a ngatavine i vulaki ria.
MAT 24:23 I mavonga, nahea mu gu longo mai e huriki a bakovi ri ta maea, ‘Mata valai! E Kristo ia koea,’ o ‘Mata lakea! E Kristo ia lake!’ Naha ni longo mai ria,
MAT 24:24 a vuhuna e huriki a nitamine kristo, a nitamina propet bara ri bele, ri rata a maka nivakasiri dagi, a maki dagi ni turutu vona, ri ngaru ni tami e huriki. Bara i kara ria, bara ri tami tabu e huriki a bakovi a ngatavine a Vure i vulaki ria.
MAT 24:25 Mu longo kamumu. Iau a vakalongo muga mua pali.
MAT 24:26 I mavonga, na tahuna ri taki mua, ‘Oi! Ia lilo na robo!’ naha ni dili mai ia. O a viri tara ge ta maea, ‘Oi! I made kapiloho lilo!’ naha ni longo mai ia.
MAT 24:27 Na tahuna a Tuna Bakovi ge valai, bara i luve kavakava manga a vila. A vila i maravila na nirike na haro, i para lobo vona a hini i lakea na nirolona haro.
MAT 24:28 Na hini i tabuli vona a podana viri, a maka pangopangokaba bara ri vapopo.
MAT 24:29 “A nimadihi dagi i lobo, malaviriri kunana a haro bara i maparavunu, a keva tara i uka ma ge para. A maka hada bara ri mapasi, a maka nitora na hunu bara ni polu.
MAT 24:30 Muri a kilakila na Tuna Bakovi bara i bele na hunu. E huriki a kabu lobo na malala bara ri tangi. Muri bara ri masia a Tuna Bakovi i pesi langa na bubu, i puru valai na hunu turana nitora, a nipara dagi.
MAT 24:31 Muri a tavure bara i tangi dagi na tahuna i rudu e huriki a agelo vona ri gi bole sike palupu na tabeke lobo na malala e huriki a bakovi a ngatavine i vulaki ria. Bara ri bole ria na tabeke lobo, i vakatubu na tabeke tara na malala, i vano i lakea na tabekena tara.
MAT 24:32 “Mu bole a lohokanga vona a kai a balele. Na tahuna i tahoka a totona a rahana, i lubu a pagana, bara mu pasi­mata vona a tahuna na haro i tabukoi.
MAT 24:33 I mavonga kunana na tahuna mu matai a maki nga ri bele, bara mu lohoka vona a Tuna Bakovi i valai tabukoi hateka pali.
MAT 24:34 A taki muholi mua, e huriki a bakovi a ngatavine na tahuna iea i uka ma ri gi mate ma, bara i bele taro a maka maki nga.
MAT 24:35 A hunu a malala bara ru lobo, pali a nitagu bara i tabuli vakaroro.
MAT 24:36 “I uka tara viri ge lohoka vona a parava, a kilala ge bele vona a maki nga. E huriki a agelo na hunu i uka ma ri lohoka vona a parava iea. A Tuna Vure tara i uka ma i lohoka vona. E Tamana kunana i lohoka vona a parava iea.
MAT 24:37 A niluve na Tuna Bakovi bara i manga kunana a niluve na marungulolo hosi na tahuna e Noa i made na malala.
MAT 24:38 Muga na marungulolo e huriki ri kani, ri ninu, ri vaparangi, i vano i harena na tahuna e Noa i dili na agarungu.
MAT 24:39 Ri made manga manga kunana, muri a marungulolo i bele vakaturutu, ria lobo ri mate. Bara i mavonga kunana na tahuna a Tuna Bakovi i valai.
MAT 24:40 Na parava iea, a bakovi ala rua bara ru leho na hania. A viri tara bara ni bole. A viri tara bara i made mule.
MAT 24:41 A ngatavine ala rua bara ru ubi momo a vit, ru gu rata a bret vona. A viri tara bara ni bole. A viri tara bara i made mule.
MAT 24:42 I mavonga mu mamata, a vuhuna i uka ma mu lohoka vona a parava ge valai vona e Bakovi Dagi.
MAT 24:43 Mu luhoia a ngava iea: A tahona ruma bara i lohoka vona a ra kilala ge valai vona a bakovi ni panaho, bara i matapara mavonga, i uka tara viri ge pukea a ruma vona.
MAT 24:44 I mavonga kunana mu matapara, a vuhuna a Tuna Bakovi bara i valai vakaturutu. Bara i valai na tahuna i uka ma mu luhoi ge valai vona.
MAT 24:45 “E rei ngane ge ia a voravora ge moro, ge rata kamumu a leho lobo a bakovi dagi vona i takia ge rata? A bakovi dagi vona bara i takia ge matakari e huriki a vora ranga, ge habi ne ria a maki ni kani na parava vakaroro.
MAT 24:46 Muri, na tahuna a bakovi dagi i hamule valai, i masia a bolekori iea i rata kamumu a leho vona, bara i rata kamumu hatekea.
MAT 24:47 A taki muholi mua, bara i ru ia ge matakari a mahala lobo vona.
MAT 24:48 Pali a vora iea bara ia a bakovi hale, bara i taki mulea, i ta maea, ‘A bakovi dagi nau i uka ma ge valai malaviriri.’
MAT 24:49 Lakea i vakatubu ni ubi e huriki a vora turana, i kani i ninu turana e huriki a bakovi ni ninu.
MAT 24:50 Ra bakovi dagi vona, bara i valai vakaturutu na parava a vora i pahaluhoi ta i uka ma ge valai vona. Bara i luve na kilala a vora i pahadaki ta i uka ma ge luve vona.
MAT 24:51 Lakea a bakovi dagi bara i tolo pilea ra vora iea. Muri bara i ru turane huriki a tabele rua. Ra tanga iea, e huriki bara ri tangi, i vaheri mavonga a ngine ria, a vuhuna i madihi a hatene ria.
MAT 25:1 “Na tahuna iea a harikianga na hunu bara i manga a sirula ala ravulu ri bole a lam ne ria, ri vano ri gi tagui a bakovi i parangi karaba.
MAT 25:2 A sirula ala lima ri manga manga, pali a sirula ala lima ri lohoka.
MAT 25:3 E huriki a sirula manga manga ri bole a lam, pali i uka ma ri bole a karasin.
MAT 25:4 E huriki a sirula ri lohoka ri guru na ulo a lingena karasin, ri bole turana lam ne ria.
MAT 25:5 A bakovi i parangi karaba i uka ma i valai malaviriri, lakea e huriki a sirula ri matatulu, ri mahita.
MAT 25:6 Na kuru rodo ngane, a bakovi tara i gale tala, i ta maea, ‘A bakovi i parangi karaba i valai ngane! Mu valai mu tagui ia!’
MAT 25:7 “Lakea ri hadongo, ri kisi a lam ne ria.
MAT 25:8 E huriki a sirula manga manga ri nongi a karasin ne huriki a sirula lohoka, ri ta maea, ‘Mu habi ne mia ranga karasin. I para hoho a lam ne mia.’
MAT 25:9 “Pali ri koli ria, ri ta maea, ‘I uka. A karasin i uka ma i kara hita lobo. Mu vano mu lakea ne huriki ri habi a karasin, mu kona ranga ge ne mua.’
MAT 25:10 “Na tahuna ri vano ri gi kona a karasin, a bakovi i parangi i bele. Lakea e huriki a sirula, ra ri tahoka a karasin a lam ne ria, ri dili turana na habu na parangia. Muri a logo ni tukari.
MAT 25:11 “Muri e huriki a sirula manga manga ri hamule valai, ri ta maea, ‘Bakovi dagi! Bakovi dagi! O talea a logo!’
MAT 25:12 “Pali a bakovi dagi i koli, i ta maea, ‘Muholi hateka, i uka ma a lohoka ne mua.’
MAT 25:13 “I mavonga, mu mamata, a vuhuna i uka ma mu lohoka vona a parava o a kilala e Bakovi Dagi ge valai vona.
MAT 25:14 “Mu mamata, a vuhuna na tahuna a Tuna Bakovi ge hamule valai, bara i manga a bakovi tara i havai. I gale palupu e huriki a vora vona, i vakasiri tou vona a mahala vona to go matakari.
MAT 25:15 I vaveru ne tou a moni, i muri mai a lohokanga ne tou. I habi na vora tara moni gol i 5,000. I habi na vora tara moni gol i 2,000. I habi na viri tara moni gol i 1,000. Muri i vano, i havai.
MAT 25:16 A viri i bole a moni gol i 5,000 i vano, i rata a leho vona, i vakabele tabu a moni gol i 5,000.
MAT 25:17 A viri i bole a moni gol i 2,000 i vano, i rata a leho vona, i vakabele tabu a moni gol i 2,000.
MAT 25:18 Pali a viri i bole a moni gol i 1,000 i keli a malala, i tanu vonga a moni na bakovi dagi vona.
MAT 25:19 “I tabaka ngane, a bakovi dagi i hamule valai, i pelekado turane tou a moni i habi ne tou muga.
MAT 25:20 A vora i habi a moni gol i 5,000 vona i bole valai tabu a moni i 5,000, i ta maea, ‘Bakovi dagi. Ra moni i 5,000 o habi nau, ngane a vakabele tabu a moni i 5,000.’
MAT 25:21 “Lakea a bakovi dagi i koli, i ta maea, ‘Kamumu hateka. Ioe a vora kamumu. O rata kamumu vakaroro a leho lobo a habi vomu! Ngane go matakari a maki ge kupo, a vuhuna o matakari kamumu a leho kiroko iea. O valai o vivi turagu!’
MAT 25:22 “A vora i bole a moni i 2,000, ia tara i valai, i ta maea, ‘Bakovi dagi, ra moni i 2,000 o habi nau, a vakabele tabu a moni i 2,000.’
MAT 25:23 “Lakea a bakovi dagi i koli, i ta maea, ‘Kamumu hateka. Ioe a vora kamumu. O rata kamumu vakaroro a leho lobo a habi vomu! Ngane go matakari a maki ge kupo, a vuhuna o matakari kamumu a leho kiroko iea. O valai o vivi turagu!’
MAT 25:24 “Muri a vora i bole a moni i 1,000 i valai, i ta maea, ‘Bakovi dagi, a lohoka vomu ioe a bakovi hateka. O mirio na hania i varo e huriki ranga.
MAT 25:25 Lakea a mangenge, a kelia a malala, a tanu vonga a moni vomu i 1,000. O mata valai, a moni vomu nga.’
MAT 25:26 “A bakovi dagi i koli, i ta maea, ‘Ioe a vora hale, ioe a malai! O lohoka vona iau a mirio na hania i varoa e huriki ranga.
MAT 25:27 Pali i navai i uka ma o ru dili na roho na tava a moni nau? Na tahuna a hamule valai, bara bole mule turana a moni ranga ni ru langa tabu vona.
MAT 25:28 “Muri a bakovi dagi i ta maea, ‘Mu bole mulea vona a moni i 1,000, mu habi na viri i tahoka a moni i 10,000.
MAT 25:29 Mu rata mavonga, a vuhuna a viri i tahoka a maki pali bara ni habi tabu ranga, ge tahoka a maki i kupo. Pali e rei a viri i uka ma i tahoka a maki, a maki popote vona i tahoka pali bara ni bole hamule vona.
MAT 25:30 Mu bolea a vora hale iea, mu voro talea na uvo. Ra hini nga, e huriki ri gi haloho, i vaheri mavonga a ngine ria, a vuhuna i madihi a hatene ria.’
MAT 25:31 Muri e Isu i ta maea, “Na tahuna a Tuna Bakovi ge luve turana nipara dagi, ge valai turana e huriki a agelo vona, bara i made na gula hariki vona.
MAT 25:32 E huriki na tanga lobo bara ri pesi na matana. Bara i vakalipida e huriki na tara i rua, i manga a matakari na sipsip i vakalipida a maka sipsip, a meme.
MAT 25:33 Bara i ru na limana a kanena e huriki a sipsip. Bara i ru na limana a maurina e huriki a meme.
MAT 25:34 Muri a Hariki bara i taki e huriki ri pesi na limana a kanena, ‘Mu valai, mua e huriki e Tata i vakabagetu mua. Mu bolea a harikianga, ra ni rata puru ne mua na tahuna i ratarike a hunu a malala.
MAT 25:35 Mu bolea a harikianga, a vuhuna hosi na tahuna a vitolo mu habi a maki ni kani nau. Na tahuna a marohu mu habi a naru nau. Na tahuna iau a mosi mu tagui iau.
MAT 25:36 Na tahuna a uka maki ni rodo, mu habi a varakia nau. Na tahuna a giloa mu matakari iau. Na tahuna a dili na bavi mu valai mu gosi iau.’
MAT 25:37 “Muri e huriki a bakovi a ngatavine malamala bara ri nanea, ‘Bakovi Dagi, garika mi matai ioe o vitolo mi vakani ioe? Garika o marohu mi habi a naru vomu?
MAT 25:38 Garika mi matai ioe o made manga mosi mi tagui ioe? Garika mi matai ioe o uka a varakia, mi habi a varakia vomu?
MAT 25:39 Garika mi matai ioe o giloa, o dili na bavi mi vano mi gosi ioe?’
MAT 25:40 “A Hariki bara i koli, i ta maea, ‘A taki muholi mua, a ra maki mu rata virihi e huriki a turagu matasia vona, mu rata virihi iau.’
MAT 25:41 “Muri bara i taki e huriki ri pesi na limana a maurina, i ta maea, ‘Mu ha nau. A Vure i ruduraha mua. Mu vano, mu puru na kanono i nono vakaroro. Ra kanono iea, ni tunu puru ge puru vona e Satan turana e huriki a agelo vona, re huriki a hanitu.
MAT 25:42 Hosi na tahuna a vitolo i uka ma mu vakani iau. Na tahuna a marohu i uka ma mu habi a naru nau.
MAT 25:43 Na tahuna iau a mosi, i uka ma mu tagui iau. Na tahuna a uka varakia i uka ma mu habi a varakia nau, ga rodo. Na tahuna a giloa, a dili na bavi i uka ma mu gosi iau.’
MAT 25:44 “Muri ria ranga bara ri nanea, ‘Bakovi Dagi, garika mi matai ioe o vitolo, o marohu, o uka murina ni mahita, o uka varakia, o giloa o dili na bavi, lakea i uka ma mi kori ioe?’
MAT 25:45 “E Bakovi Dagi bara i koli, i ta maea, ‘A taki muholi mua, a maki i uka ma mu rata virihi e huriki a turagu matasia vona, i uka mu rata virihi iau vona.’
MAT 25:46 “Muri bara ri vano, ri bole a nimadhi vakaroro. Pali e huriki ri malamala bara ri bole a nimahuri vakaroro.”
MAT 26:1 E Isu i taki lobo a ngava nga, muri i taki e huriki a murimuri vona, i ta maea,
MAT 26:2 “Mu lohoka vona a Habu na Nipagepolo bara i bele muri na parava i rua. Na parava iea a Tuna Bakovi bara ni habi na limane huriki a pile. Muri bara ri paditatea na kai tavalavala.”
MAT 26:3 Na tahuna iea e huriki a prister dagi, e huriki a gare ri vapopo na roho dagi na prister dagi tara, a rana e Kaipas.
MAT 26:4 Ri varodo a ngava ri gi lakavu kapilohoa e Isu, ri gi rabalakia.
MAT 26:5 Lakea ri ta maea, “Nahea si gi ratea na habu ra naro iea, ma ge vaubi e huriki.”
MAT 26:6 E Isu i made o Betani, na ruma e Simon, ra bakovi hosi i ratapilea a patala.
MAT 26:7 E Isu i made na dede, lakea a ngatavine tara i valai vona, i bolea a ulo ni rata na kedo a alabasta. A ulo i vona a nibiri mangisipa ni kona na moni dagi. I guru langea na gine Isu.
MAT 26:8 Na tahuna e huriki a murimuri ri masia a ngatavine i rata mavonga, ri kanikaha, ri ta maea, “I navai i guru tavulea a mangisipa iea?
MAT 26:9 Ra mangisipa iea, bara ni habi na viri tara, bara i konea na moni dagi, lakea a moni bara ni habi ne huriki a matasia.”
MAT 26:10 Pali e Isu i lohoka vona a nitane ria, lakea i taki ria, “I navai mu padimomoa a ngatavine iea? A naro i ratea nau i kamumu hateka.
MAT 26:11 E huriki a matasia bara ri made vakaroro turane mua. Pali iau i uka ma ga made vakaroro turane mua.
MAT 26:12 Na tahuna i guru a mangisipa langa na gigu, i kisi puru iau, bara ni tanu.
MAT 26:13 A taki muholi mua, na tanga lobo na malala ni vara vona a Velenga Kamumu muri ma, a naro i ratea a ngatavine iea bara ni vakalongo, e huriki ri gi luhoi mule ia.”
MAT 26:14 Muri e Iudas Iskariot, ra turane huriki a murimuri ala ravulu a polona i rua, i lakea ne huriki a prister dagi,
MAT 26:15 i ta maea, “Iau ga habia na limane mua e Isu, pali a ra maki mu gu habia nau?” Lakea ri konea na moni silva i ravulu tolu (30).
MAT 26:16 I vakatubu vonga e Iudas i virokanea a dala ge habia e Isu na limane huriki a pile.
MAT 26:17 Na mugana parava na Habu na Bret i uka Is, e huriki a murimuri ri valai ne Isu, ri nanea, “I vai a hini o ngaru mi gi rata puru a maki ni kani vomu, go luhoi mulea a Habu na Nipagepolo?”
MAT 26:18 E Isu i koli, i ta maea, “Mu dili na tanga dagi, mu masia a bakovi tara. Mu takia, ‘A mari ni tovo i ta maea, a parava nau i valai tabukoi. Ga ratea a Habu na Nipagepolo na ruma vomu turana e huriki a murimuri nau.’”
MAT 26:19 Lakea e huriki a murimuri ri muri mai a ngavane Isu, ri vano ri rata puru a maki ni kani na Habu na Nipagepolo.
MAT 26:20 Na rodo i made na dede turana e huriki a murimuri ala ravulu a polona i rua, ri kani.
MAT 26:21 Na tahuna ri kakani, e Isu i taki ria, “A taki muholi mua, a viri tara ne mua bara i habi iau na limane huriki a pile.”
MAT 26:22 Ri longoa a ngava iea, ri dodo. Lakea ria takutaku ri nanea, “Bakovi Dagi, ma ge iau?”
MAT 26:23 E Isu i koli, i ta maea, “Ra viri i lutu puru a bret na kap nau, bara i habi iau ne huriki a pile.
MAT 26:24 A Tuna Bakovi bara i mate, i manga a nita ni here puru hosi. Pali ra bakovi i habia na limane huriki a pile, a Vure bara i ratapilea! Bara i kamumu hateka e kinana i uka ma ge podea hosi.”
MAT 26:25 Muri e Iudas, ra viri bara i habia e Isu ne huriki a pile, i ta maea, “Mari ni tovo, ma ge iau?” E Isu i koli i ta maea, “I manga a hini o taki.”
MAT 26:26 Na tahuna ri kakani, e Isu i bolea a bret, i kavurikea a Vure, i kevea, i habi ne huriki a murimuri, i ta maea, “A bret iea a bobogu. Mu bolea, mu kania.”
MAT 26:27 Muri i bole rikea a kap na vain, i kavurikea a Vure. I habia ne ria, i ta maea, “Mua lobo mu ninu vona,
MAT 26:28 a vuhuna a vain iea a daragu, ge pori nau ne vona ni vakatorea a ngava muholi a Vure i rata karaba turane huriki. Ge pori ne vona ni puga vuroki a naro hale ne huriki ala kupo.
MAT 26:29 A taki mua, iau i uka ma ga ninu tabu a vain, bara i vano i harena na parava a ninu a vain karaba turane mua na harikianga ne Tata.”
MAT 26:30 Ri kalolo lobo a linge vasileki, muri ri lakea na lolo e Oliva.
MAT 26:31 Na tahuna ri bele vonga, e Isu i taki e huriki a murimuri vona, i ta maea, “A maki ge bele nau na rodo iea bara i rata mua lobo mu ha taro iau, a vuhuna a ngava ni here puru na Hinere i ta maea, ‘Ga rabalakia a matakari na sipsip, bara ri ha viliha a maka sipsip.’
MAT 26:32 “Pali na tahuna ga mahuri mule, bara muga lakea o Galili.”
MAT 26:33 Lakea e Petrus i koli, i ta maea, “E huriki lobo bara ri matai a maki i bele vomu, bara ri ha. Pali iau i uka ma ga ha.”
MAT 26:34 E Isu i koli, i ta maea, “A taki muholi ioe, na rodo iea kunana, muga na kureko ge tangi, bara o nana rovi iau balaka tolu.”
MAT 26:35 E Petrus i koli, i ta maea, “Iau i uka ma ga nana rovi ioe. Bara mate turamu!” E huriki a murimuri lobo, ria ranga ri ta mavonga.
MAT 26:36 E Isu i tuli e huriki a murimuri vona, ri lakea na tabeke ni gale e Getsemani. Na tahuna ri bele, i taki ria, “Mu made koea mu dava iau. Ga lakea taro, ga vasileki.”
MAT 26:37 I tuli kunana e Petrus, e tune Sebedi ala rua. E Isu i vakatubu ni dodo, ni luhoi lege,
MAT 26:38 lakea i taki tou, “Iau a dodo hateka, a nidodo i popote ge rata iau ga mate. Moto made koea, moto matapara, moto mamata turagu.”
MAT 26:39 I laho lokovonga popote i tabuli ngala­tudu, i vasileki, “O Tata, ioe bara o ngaru, o bole vurokia nau a nimadihi dagi iea ta ge valai. Pali naha ni ramai a ningaru nau. O ramai kunana a ningaru vomu.”
MAT 26:40 Muri i hamule mai a murimuri vona, i matai tou to mahita, lakea i nanea e Petrus, “Ra matou, moto keri ni matapara turagu na kilala i taku kunana?
MAT 26:41 Moto mamata, moto vasileki, ma moto go dili na nitoni. A hatene matou i ngaru ni ratea, pali a kakaine matou i uka ma i gao.”
MAT 26:42 Lakea i vano i vasileki tabu, i ta maea, “O Tata, ra nimadihi iea, o masia i uka ma ge polo tavula, bara kalohoa. A ningaru vomu.”
MAT 26:43 Muri i hamule mai tou, i matai tou to mahita tabu, a vuhuna to matatulu.
MAT 26:44 I mavonga i pe kunana tou, i vano i vasileki tabu, i manga a nivasileki vona muga.
MAT 26:45 Muri i hamule lakea na murimuri vona, i taki tou, “Ra matou, moto tabana ni mahita, ni malo? Moto longo valai! A kilala i valai tabukoi pali. A Tuna Bakovi bara ni habi na limane huriki a bakovi hale.
MAT 26:46 Moto pesi rike te ge vano! A viri ge habi iau na limana pile i valai ngane!”
MAT 26:47 E Isu i tabana ni ta, e Iudas, ra turana murimuri i ala ravulu a polona i rua, i bele. E huriki a prister dagi, e huriki a gare ne Israel ri rudu turane Iudas a bakovi ala kupo. Ria lobo ri nugu a lebo, a bainat.
MAT 26:48 Ra bakovi hale iea, ta ge habia e Isu na limane huriki a pile i taki puru ri gi matakilala navia e Isu, i ta maea, “A viri mu masia ga ngurua, ra bakovi iea kunana. Mu lakavua.”
MAT 26:49 I mavonga, i malaviriri kunana e Iudas i lakea ne Isu, i ta maea, “Mari ni tovo, a rodo!” Muri i ngurua.
MAT 26:50 E Isu i koli i ta maea, “Turagu, o ratea a maki o valai vona.” Lakea e huriki a bakovi ri lakavua.
MAT 26:51 Ngane a bakovi tara i laho turane Isu i lalu talea a bainat vona, i voro, i palakudua a talingana vora na prister dagi.
MAT 26:52 Lakea e Isu i takia, “O ru mulea na murina a bainat vomu, a vuhuna e rei a viri i vaubi na bainat bara i vurua na bainat.
MAT 26:53 Iau bara ngaru, bara takia e Tata, bara i rudu valai a tara bulolo ne huriki a agelo, ri gi kori iau.
MAT 26:54 Pali i uka ma ga rata mavonga, a vuhuna bara rata mavonga, ge bele muholi navai a ngava ni here puru na Hinere?”
MAT 26:55 Na tahuna iea kunana, i taki e huriki ri vapesihi vonga, i ta maea, “Mu rata manga iau a panaho, mu nugu a lebo a bainat, mu valai ni lakavu iau. Na parava lobo a made na roho na Vure, a vara vonga. Pali i uka ma mu lakavu iau.
MAT 26:56 Pali a maka naro nga ri bele ge bele muholi a ngava i here puru e huriki a propet.” E Isu i ta lobo, muri e huriki a murimuri ri ha taroa.
MAT 26:57 E huriki ri lakavua e Isu ri turaria lakea ne Kaipas, a prister dagi. E huriki a mari na vinara na lotu, e huriki a gare ne huriki a Israel ri vapopo pali vonga.
MAT 26:58 E Petrus i muri gosi basi popote vona, i lakea liu na mataruma na prister dagi. I dili pololilo, i made puru turane huriki a tagari, ge masia ri gi rata navia.
MAT 26:59 E huriki a prister dagi turane huriki a tara na kot ne huriki a Iuda ri matakana a nitamina ngava ri gi padi virihia e Isu vona, ri gi rabalakia.
MAT 26:60 E huriki ala kupo ri valai ri rata a nitamina ngava, pali i uka ma ri matavisia tara ngava ge kamumu. Muri a bakovi ala rua ru valai,
MAT 26:61 ru pukatala a ngava, ru ta maea, “Ra bakovi iea i ta maea, ‘I kara iau ga pukea a roho na Vure, muri ga hae mulea na parava i tolu kunana.’”
MAT 26:62 Lakea a prister dagi i pesi rike, i ta maea, “I navai i uka ma o taratoto? O luhoi navai vona a ngava ni padi virihi ioe vona?”
MAT 26:63 Pali e Isu i vulai mavonga. Lakea a prister dagi i nanea, “A taki ioe na rana Vure Mahuri, o vakalongo mia ngane, ioe e Kristo, a Tuna Vure?”
MAT 26:64 E Isu i koli, i ta maea, “A ngava mu takia pali. Pali ngane ga vakalongo mua lobo, i vakatubu ngane mu gu masia a Tuna Bakovi i made na limana kanena na Viri i Tuhaka. Bara mu masia i pesi langa na bubu na hunu, i puru valai.”
MAT 26:65 Na tahuna a prister dagi i longoa a ngavane Isu, i rapea a varakia vona, i ta maea, “Ra bakovi iea i ngaru ni bolea a murina Vure! E rei a viri si gi longo tabua? Mu longoa pali na ngavana, i ngaru ni bolea a murina Vure.
MAT 26:66 Mu luhoi navai?” Ri koli, ri ta maea, “Ge mate.”
MAT 26:67 Muri ri kalupe tahoa a matana, ri ubia. E huriki ranga ri tamarea a tulina,
MAT 26:68 ri ta maea, “Kristo, o ta propet ne mia ngane, e rei a viri i ubi ioe?”
MAT 26:69 E Petrus i made polovavo na mata­ruma. A vora ngatavine tara i valai maia, i takia, “Ioe tara o turane Isu, ra bakovi o Galili.”
MAT 26:70 Pali i lavuni na matane ria lobo, i ta maea, “Iau i uka ma lohoka vona a ngava o takikia.”
MAT 26:71 Muri e Petrus i vuru tala na logo, lakea a vora ngatavine tara i masia, i taki e huriki ri mamade vonga, “Ra bakovi iea i laho turane Isu, ra bakovi o Nasaret.”
MAT 26:72 I lavuni tabu, i kaba, i ta maea, “Iau i uka ma lohoka vona a bakovi iea!”
MAT 26:73 I uka ma i tabaka hateka, e huriki ri pepesi vonga ri takia e Petrus, ri ta maea, “Muholi hateka, ioe a turane ria. Mi longokilalea a tabelemu.”
MAT 26:74 Pali ngane e Petrus i taba rike na maki hale tara ge ratapilea, i kaba, i ta maea, “Iau i uka ma lohoka vona a bakovi iea!” Malaviriri kunana a kureko i tangi.
MAT 26:75 Lakea e Petrus i longovisi a ngava e Isu i takia vona, “Muga na kureko ge tangi barama, bara o nana rovi iau balaka tolu.” Muri i pagitala i kilu, i upu rike a nangi, i tangi.
MAT 27:1 Na hatelanga pokopoko e huriki a prister dagi, e huriki a gare ri valongo mai a ngava ri gi rabalakia e Isu.
MAT 27:2 Muri ri kolotatea, ri turaria lakea ne Pilato, ra bakovi i matakari a tabeke iea.
MAT 27:3 Na tahuna e Iudas, ra viri i habia e Isu na limane huriki a pile, i masia ri gi rabalakia e Isu, i kilu vona a naro i ratea, lakea i habi mule ne huriki a prister dagi, a gare, a silva i ravulu tolu.
MAT 27:4 I taki ria, “A rata a naro hale. Ra viri a habia ne mua, a bakovi malamala.” Pali ri koli, ri ta maea, “A maki vomu.”
MAT 27:5 Lakea i voro dili na roho na Vure a moni, muri i vano ia i vakatavore mule ia, i tomo.
MAT 27:6 E huriki a prister dagi ri poi mule a moni, ri ta maea, “Ra moni iea, a mapana bakovi ni rabalaki. A vinara i taki i uka ma ge dili na tava na roho na Vure.”
MAT 27:7 Lakea ri valongo mai a ngava, ri bole a moni iea, ri konea a malala na mari ni ratana ulo, ge a murina ni tanu a podane huriki a mosi ri mate.
MAT 27:8 I mavonga ni gale liu a malala iea, “A Malala na Dara.”
MAT 27:9 Ngane a nita hosi na propet e Ieremaia i bele muholi. Ra ngava iea i maea, “Ri bole a moni silva i ravulu tolu, ra mapana nimate na viri e huriki e tune Israel ri ngarua ge mate.
MAT 27:10 Ri bolea a moni iea, ri konea a malala na mari ni rata a ulo, i manga a hini e Bakovi Dagi i taki iau vona.”
MAT 27:11 E Isu i pesi na matane Pilato, lakea a matakari i nanea, “Ra ioe, i muholi ioe a hariki ne huriki a Iuda?” E Isu i koli i ta maea, “A ngava o takia pali.”
MAT 27:12 Na tahuna e huriki a prister dagi, e huriki a gare ri padi virihia na ngava, i uka ma i taratoto.
MAT 27:13 Muri e Pilato i nanea, “Ra maka ngava ni padi virihi ioe vona, o longo?”
MAT 27:14 Pali e Isu i uka ma i taratoto. Lakea e Pilato i turutu hateka vona.
MAT 27:15 Na pida lobo na parava na habu, a matakari bara i nana e huriki ne rei a bakovi ge vakapagetala tavulea na bavi.
MAT 27:16 Na tahuna iea i tahoka tara bakovi hale i made na bavi, a rana e Barabas. E huriki lobo ri lohoka vona.
MAT 27:17 Na tahuna e huriki ri vapopo na ruma ne Pilato, i nana ria, “E rei a viri mu ngarua ga vakapagetalea na bavi? E Barabas, o e Isu, ra bakovi ni gale e Kristo?”
MAT 27:18 E Pilato i nana ria, a vuhuna i lohoka vona ri turari vilia vona a vuhuna i madihi a hatene ria vona a hini e Isu i rangi ria.
MAT 27:19 Pali e Pilato tara i mangenge, a vuhuna na tahuna e Isu i pesi na matana, e girihina i talo rike a ngava vona, i ta maea, “Naha ni ratea tara maki na bakovi malamala iea, a vuhuna a bole a nima­dihi dagi mona na tahuna a masia baroko na vuregu.”
MAT 27:20 Pali e huriki a prister dagi, a gare ri voro dili a ngava ne huriki ri gi ta hinituhana vona e Barabas ge pagitala, pali e Isu ni gi rabalaki.
MAT 27:21 Lakea a matakari i nana ria, “E rei ne rua ga vakapagetalea na bavi? E Barabas o e Isu?” Ri koli ria ri ta maea, “E Barabas.”
MAT 27:22 E Pilato i nana tabu, “Pali ga rata navia ngane e Isu, ra ni gale e Kristo?” Ria lobo ri koli, ri ta maea, “Ni gi paditata na kai tavalavala!”
MAT 27:23 E Pilato i nana ria, “I navai ge mavonga? A ra rabu hale i ratea?” Pali ri gale dagi hateka, ri ta maea, “Ni gi paditata na kai tavalavala!”
MAT 27:24 E Pilato i matakilala ngane i uka ma ri gi longoa, a vuhuna e huriki ri gao hateka, ri vakatubu ni roro. Lakea i bolea a naru, i vahilolo a limana na matane huriki, i ta maea, “Iau a uka rarenga vona a nimatena bakovi iea. Mu rata virihia vona a maki mu ngarua vona!”
MAT 27:25 E huriki lobo ri koli mule, ri ta maea, “Pali. Mia mi gi tahoka a rarenga vona. E huriki a hamone mia, ria ranga ri gi tahoka a rarenga vona!”
MAT 27:26 Muri i vakapagetalea e Barabas, i taki e huriki a nugumaheto ri gi lagua e Isu, ri gi paditatea na kai tavalavala.
MAT 27:27 Muri e huriki a nugumaheto ne Pilato ri turaria e Isu i lakea na roho ne ria, lakea a tara lobo na nugumaheto ri vapopo na ngalana.
MAT 27:28 Ri kali tala a varakia vona ri vakarodoa vona a varakia kuakua.
MAT 27:29 Ri padiviri a barakau i manga a tama hariki, ri vakakubea na gina. Ri vakabolea vona a kodo hariki, ri turume puru na ngalana, ri padikedea ri ta maea, “Ge made vakaroro a hariki ne huriki a Iuda!”
MAT 27:30 Ri kalupe tahoa, ri bole mulea a kodo, ri ubi balaka kupo a gina.
MAT 27:31 Ri padikedea, muri ri kali talea a varakia, ra ri vakarodoa vona. Muri ri vakarodo tabu vona a varakia vona. Muri ri turari talea ni gi paditata na kai tavalavala.
MAT 27:32 Na tahuna ri pagitala, ri vakorokoro a bakovi o Sirene, a rana e Simon. Ri vakukua ge kaloho poloa a kai tavalavala ne Isu.
MAT 27:33 Ri bele na tabeke ni gale e Golgota. A rana tanga iea, ni vunu muri mai a tuhana gina bakovi.
MAT 27:34 Na tahuna ri bele vonga ri habi vona a vain ni pulo turana maki vagole ni gale a “gal” ge ninu. Pali na tahuna i dame kilangana, i marikoi vona.
MAT 27:35 Ri paditata loboa, muri ri varangi vona tara rihiva na satu, pali e rei a viri ge mulangi bara i bole a varakia vona.
MAT 27:36 Muri ri made puru tabukoi vona, ri tagaria.
MAT 27:37 Ni here polomeli na gina a ngava ri padi virihia vona. A ngava iea i maea, “Ra bakovi iea, e Isu, a hariki ne huriki a Iuda.”
MAT 27:38 A bakovi ru panaho ru rabalaki a viri, rua ranga ni paditata tabukoi ne Isu. I tavore na kanena tara, na maurina tara.
MAT 27:39 E huriki ri laho polo ri mapakulu, ri harogi pilea,
MAT 27:40 ri ta maea, “O taki ioe ta go pukea a roho na Vure, muri go hae rikea na parava i tolu. Ngane o korimule ioe ke! Ge ioe a Tuna Vure muholi, o puru valai na kai tavalavala!”
MAT 27:41 E huriki a prister dagi, a mari na vinara na lotu, a gare, ria ranga ri padi­kedea,
MAT 27:42 ri ta maea, “I korimule e huriki ranga, pali i keri ni korimule ia! Ia a hariki ne Israel! Ge puru valai na kai tavalavala, bara si luhoi tora ia.
MAT 27:43 I luhoi tora hateka a Vure. Pali ngane a Vure ge ngarua a bakovi iea, bara i korimulea, a vuhuna i ta maea, ‘Iau a Tuna Vure.’”
MAT 27:44 Ra bakovi ala rua ni paditata turana, rua ranga, ru harogi pilea e Isu.
MAT 27:45 Ngane a uvo i kavitagua a malala, i vakatubu na kuru haro, i vano i lobo na kilala i tolu na malunga.
MAT 27:46 I tabukoi na kilala i tolu ngane, e Isu i haloho dagi, i ta maea, “Eloi. Eloi, lama sabaktani?” A pelegona a ngava iea i maea, “Vure nau, Vure nau, i navai o lohopile iau?”
MAT 27:47 E huriki ri pesi tabukoi vonga ri longoa ri ta maea, “I galea e Elaisa.”
MAT 27:48 Malaviriri kunana a viri tara ne ria i nunu, i bolea tara maki, i lutua na vain, muri i koloa na kai, i toto rikea ne Isu, ge duvia.
MAT 27:49 Pali e huriki ranga ri ta maea, “O dava. Si gi masia e Elaisa ge valai ge korimulea, o ge uka.”
MAT 27:50 E Isu i haloho tala dagi tabu. Muri a hanuna i pea, i mate.
MAT 27:51 Malaviriri kunana a lava­lava dagi na roho na Vure i mavida valai meli i puru tano, i bale rua. A vuruke i pori, i makeve a maka kedo dagi.
MAT 27:52 A maka lovo ne huriki ri mate ri matuba. Muri, na tahuna e Isu i mahuri mule na matenga, e huriki a bakovi mala­mala ri mate pali, ngane ri mahu­ri mule, ri pagi­tala na lovo, ri dili na tanga na Vure, re Ierusalem, ri bele ne huriki.
MAT 27:54 Na tahuna a ubu turana e huriki ri tagaria e Isu ri hatakia a vuruke, ri matai a maka maki i bele, ri mangenge, i vakulu a tagane ria, ri ta maea, “Muholi hateka, ra bakovi iea a Tuna Vure!”
MAT 27:55 E huriki a ngatavine ala kupo, ria ranga ri pesi basi popote ri matanono. Re huriki a ngatavine, i muga ri laho turane Isu, ri tuhoria na tahuna i pea e Galili.
MAT 27:56 A ngatavine ranga ne ria, a rane tou ra nga: e Maria Magdala, e Maria e kinane Iakop rua e Iosep, e kinane tune Sebedi ala rua.
MAT 27:57 I rodo ngane a hini, i valai a bakovi na mahala o Arimatea, a rana e Iosep. Ia tara a murimuri ne Isu.
MAT 27:58 I lakea ne Pilato i takia vona a podane Isu, ge bolea. Lakea e Pilato i longo maia, i taki e huriki a nugumaheto ri gi habia vona a podana.
MAT 27:59 E Iosep i bolea a podane Isu i sivua na lavalava keakea karaba,
MAT 27:60 lakea i bolea, i rua na babe i keli purua na kedo dagi ge ne vona. Muri i kulea a kedo dagi, i ru karia a matana, i vano ia.
MAT 27:61 E Maria Magdala turana e Maria tara ru made vonga, ru matanonoa a babe.
MAT 27:62 Na parava muri, na Parava Nimalo, e huriki a prister dagi, e huriki a Pariseo ri vapopo turane Pilato,
MAT 27:63 ri ta maea, “Bakovi dagi, ra bakovi na taminga iea, mi longoa na tahuna i tabana na ni mahuri, i ta maea, ‘Muri na parava i tolu bara mahuri mule na matenga.’
MAT 27:64 I mavonga, mi ngaru go vakuku ni gi tagari a babe ge vano ge harena na toluna parava. Mi mangenge, ma ge valai e huriki a murimuri vona, ri gi pana­hoa a podana. Muri bara ri taki e huriki ta i mahuri mule na nimate. Lakea ra ngava taminga karaba bara i hale hateka na ngava taminga muga.”
MAT 27:65 Lakea e Pilato i ta maea, “A ru na limane mua a tara na nugumaheto. Mu vano mu taki e huriki a tagari ri gi tagaria a babe, ge ramai a niluhoi ne mua.”
MAT 27:66 Lakea ri vano ri tukaria a babe, ri ru a kilakila na kedo ni gi matakilaka vona, ni kule tala, o i uka. Muri ri taki e huriki a tagari ri gi tagaria a babe.
MAT 28:1 A Parava Nimalo i lobo. Na hate­langa pokopoko na mugana parava na vik, e Maria Magdala rua e Maria tara ru vano ru gu gosia a babe.
MAT 28:2 I pori vakaturutu a vuruke, a vuhuna a agelo ne Bakovi Dagi i puru valai na hunu, i kule vurokia a kedo dagi ni tukari a matana babe vona. Muri i made langa vona.
MAT 28:3 A agelo i parahidi manga a vila. A varakia vona i kea manga a havu.
MAT 28:4 E huriki a tagari ri mangenge hateka, i vakulu a tagane ria, i vurea a matane ria, ri mate.
MAT 28:5 Pali a agelo i taki rua, i ta maea, “Naha ni mangenge. A lohoka marua, muru matakanea e Isu, ra ni paditata na kai tavalavala.
MAT 28:6 I uka ma ia koea, a vuhuna i mahuri mule pali, i manga a hini i taki muga. Muru valai muru masia a murina i tabuli muga vona a podana.
MAT 28:7 Muri muru vano malaviriri, muru vaka­longo e huriki a murimuri vona, muru ta maea, ‘E Isu i mahuri mule pali na nimate. I muga lakea o Galili. Mu vano, mu masia vonga.’ Ngane a vakalongo pali marua.”
MAT 28:8 Ra ngatavine nga ru mangenge, pali ru vivi hateka. Ru pea a babe, ru nunu hamule lakea ne huriki a murimuri, ru vaka­longo ria.
MAT 28:9 Ru tabana ni nunu na dala, e Isu i luve vakaturutu ne rua, i ta maea, “Hate­langa.” Lakea ru valai vona, ru nugu­tata a vahana, ru kavu­rikea.
MAT 28:10 Muri e Isu i taki rua, i ta maea, “Naha ni mangenge. Muru vano muru vakalongo e huriki a turagu ri gi lakea o Galili, ri gi matai iau vonga.”
MAT 28:11 Ru tabana ni lalaho lokovonga, lakea e huriki a tagari ranga ri lakea o Ierusalem, ri vakalongo e huriki a prister dagi vona a maki i bele.
MAT 28:12 Lakea e huriki a prister dagi ri vapopo turana e huriki a gare, ri vata vona a maki ri gi ratea. Muri ri habi ne huriki a nugumaheto a moni dagi,
MAT 28:13 ri ta maea, “Mu taki e huriki, mu ta maea, ‘E huriki a murimuri vona ri vali na rodo ri panahoa a podana na tahuna mi mahita.’
MAT 28:14 Ra ngava iea, ge longoa e Pilato, naha ni loho lege. Bara mi vano, mi vakalongo kamumua, bara mu uka ngava.”
MAT 28:15 Lakea e huriki a nuguma­heto ri bole a moni, ri muri mai a ngava ni taki ria vona. Ra ngava taminga iea, i nunu viliha lae ne huriki a Iuda, i valai i harena mona.
MAT 28:16 Muri e huriki a murimuri ala ravulu a polona i taku ri lakea o Galili. Ri bele vona a lolo e Isu i taki ria ri gi luve vona.
MAT 28:17 Na tahuna ri masia e Isu, ri kavurikea. Pali e huriki ranga ne ria ri loho rua.
MAT 28:18 Muri e Isu i valai mai ria, i ta maea, “A Vure i habi nau a nitora lobo na hunu a malala.
MAT 28:19 I mavonga mu vano, mu lakea na tanga lobo na malala. Mu vahilolo e huriki na rane Tata, ne Tuna, na Hanu Kiripiripi. Mu tovo ria ri gi ramai a ngava lobo a habi ne mua. I mavonga bara mu rata ria ge ria e huriki a murimuri nau. Mu longo. Iau ga made vakaroro turane mua, ge vano ge harena na nilobona malala.”
MAR 1:1 Iea a vuhuna a Velenga Kamumu ne Isu Kristo, a Tuna Vure.
MAR 1:2 E Isaia a propet i here puru hosi, i ta maea, “Mu longo! Iau ga rudua a vinuru nau ge muga vomu, ge pelekadoa a dalamu.
MAR 1:3 A lohona viri i gale dagi na tabeke i ngeki i ta maea, ‘Mu pelekadoa a dala ne Bakovi Dagi. Mu pelekadoa a dala ge laho vona ge kiripiripi.’”
MAR 1:4 I mavonga, e Ioanes, a mari ni vahilolo, i luve na tabeke i ngeki. I vara e huriki ri gi pulo a vilone ria, muri ni gi vahilolo, lakea a Vure ge puga vuroki a vilo hale ne ria.
MAR 1:5 E huriki lobo na tabeke ne Iudea, e huriki lobo o Ierusalem, ri lakea ne Ioanes, ri taki tala a vilo hale ne ria. Lakea e Ioanes i vahilolo ria na naru e Iordan.
MAR 1:6 A padirodo ne Ioanes ni rata na vuna kamel. I rea na palabele ni rata na kulina me. I kani a koa, a ame na robo.
MAR 1:7 E Ioanes i vara maea, “A bakovi tara ge muri valai nau, i tuhaka hateka nau. Iau i uka ma a bakovi kamumu, ga pasike puru, ga puga vuroki a mota na vahapolo vona.
MAR 1:8 Iau a vahilolo mua na naru. Pali ia bara i vahilolo mua na Hanu Kiripiripi.”
MAR 1:9 Na parava tara, e Isu i malaga na tanga e Nasaret, na tabeke ne Galili, i lakea na naru e Iordan. Na tahuna i bele vonga, e Ioanes i vahiloloa.
MAR 1:10 Na tahuna e Isu i taratavaga rike na naru, i mata rike. Malaviriri kunana i masia a hunu i mata ka. A Hanuna Vure i puru valai vona, i manga balu.
MAR 1:11 A lohona viri i ta valai meli na hunu, i ta maea, “Ioe e Tugu a hategu. A vivi hateka vomu.”
MAR 1:12 Malaviriri kunana a Hanuna Vure i rudua e Isu i lakea na tabeke i ngeki.
MAR 1:13 I made vonga na parava i ravulu va, lakea e Satan i tonia. E Isu i made turana maka maki mahuri na robo, pali e huriki a agelo ri tuhoria.
MAR 1:14 Muri ne Ioanes ni ru dili na bavi, e Isu i hamule lakea na tabeke ne Galili, i vara vonga na Velenga Kamumu na Vure.
MAR 1:15 I ta rike, i ta maea, “Ra parava a Vure i takia hosi, i bele pali. A harikianga na Vure i popote ge bele. Mu pulo a vilone mua, mu luhoi tora a Velenga Kamumu!”
MAR 1:16 Na parava tara, e Isu i lalaho na gagana Darilomu e Galili, i matai e Simon rua e tarina e Andreas, ru ru a vuko, a vuhuna rua a tahodari.
MAR 1:17 Lakea e Isu i taki rua, “Muru valai, muru muri nau. Ga tovo marua ni tuli valai nau e huriki a bakovi, i manga a hini ngane muru lakavu a manu.”
MAR 1:18 Malaviriri kunana, ru pe purua a vuko ne rua, ru ramaia e Isu.
MAR 1:19 I uka ma to laho basi hateka ma, lakea e Isu i matai e tune Sebedi ala rua, e Iakop e Ioanes. Ru made na aga, ru honoa a vuko ne rua i marape.
MAR 1:20 Malaviriri kunana i gale rua. Ru ha taroa e tamane rua, e Sebedi, i made na aga turana bolekori ne tou, ru vano, ru ramaia e Isu.
MAR 1:21 Muri ri lakea na tanga e Kapernaum. A Parava Nimalo i bele ngane, lakea e Isu i dili malaviriri na roho na vaponga, i vakatubu ni vara.
MAR 1:22 E huriki ri turutu na vinara vona, a vuhuna i uka ma i vara manga e huriki a mari na vinara. I vara manga a bakovi i tahoka a nitora.
MAR 1:23 A bakovi tara pololilo na roho na vaponga i dili vona a hanitu. Lakea a bakovi iea i malaviriri kunana i gale maea,
MAR 1:24 “Isu, ioe a bakovi o Nasaret, o valai go rata navai mia? O valai ni ratapile mia? Iau a lohoka vomu. Ioe a Viri Malamala na Vure.”
MAR 1:25 Pali e Isu i tahatea a hanitu, i ta maea, “O vulai. O pagitala vona a bakovi iea!”
MAR 1:26 Lakea a hanitu i pulua a bakovi iea, muri i haloho i ha tala vona.
MAR 1:27 E huriki lobo ri turutu hateka, ri vanana lae, “A ra maki iea i bele? A ngava karaba! Ra bakovi iea, i vara, i ta manga a bakovi i tahoka a nitora. Na tahuna i tono talea a hanitu, a hanitu i longototo kunanea!”
MAR 1:28 A nuverei na maki e Isu i rata i malaviriri kunana ni longo na tanga kiroko lobo na tabeke ne Galili.
MAR 1:29 Malaviriri kunana, e Isu i pagitala na roho na vaponga, i laho turane Iakop e Ioanes, to lakea na ruma ne Simon rua e Andreas.
MAR 1:30 E lahuane Simon i giloa, i rongo a kulina, i mahita na kiri. Lakea ni vakalongo e Isu vona.
MAR 1:31 I mavonga e Isu i lokovonga maia, i nugua a limana, i tulipesia. Lakea i lobo a gilanga vona, i vakatubu ni gutu a maki ni kani ne ria.
MAR 1:32 Na tahuna a haro i rolo pali, ni tuli valai vona e huriki ri giloa turana e huriki i dili ne ria a hanitu.
MAR 1:33 E huriki lobo na tanga ri vapopo na mataruma,
MAR 1:34 lakea e Isu i vakamahuri e huriki ri tahoka a maka gilanga legelege. I lili tala e huriki a hanitu i kupo, i ta tora ne ria nahea ri gi ta, a vuhuna ri lohoka vona.
MAR 1:35 Na hatelanga pokopoko, e Isu i vuho lakea na tabeke i ngeki, i vasileki vonga.
MAR 1:36 Muri e Simon, e huriki a turana ri matakanea.
MAR 1:37 Ri matavisia ngane, ri takia, ri ta maea, “E huriki lobo ri matakana ioe.”
MAR 1:38 Pali e Isu i koli, i ta maea, “Si gi lakea na maka tanga tabukoi nga, ga vara taro vonga. Ra leho iea kunana a valai vona.”
MAR 1:39 Lakea i laho lobo vona a tabeke ne Galili, i vara na maka roho na vaponga, i lili tala e huriki a hanitu.
MAR 1:40 A bakovi i vona a patala i lakea ne Isu, i nana tora ia, i turume puru, i ta maea, “Ioe bara o ngaru, o vakamatapado iau.”
MAR 1:41 Lakea e Isu i dodo hatekea, i toto talea a limana, i padoia, i ta maea, “Iau a ngaru go matapado. O matapado!”
MAR 1:42 I malaviriri kunana i malaharuri vona a patala, i matapado.
MAR 1:43 E Isu i rudua ge vano malaviriri, lakea i taki tora ia i ta maea,
MAR 1:44 “Naha ni vakalongoa tara viri. Pali o vano, o vakasiri ioe na prister. Muri o habi a nihabi e Moses i taki hosi, ge ne vona a nivakamatapado, ri gi matakilaka vona ioe ni vakamatapado pali.”
MAR 1:45 Pali a bakovi iea i vano ngane, i vakalongo lae e huriki, i nunu viliha lae a velengana. Ngane e Isu i keri ni laho kavakava ge dili na tanga dagi. I made polovavo kunana na tabeke i ngeki. Pali e huriki na tanga lobo ri lakea maia, ri masia vonga.
MAR 2:1 Muri na parava ranga, e Isu i lakea tabu o Kapernaum. E huriki a bakovi a ngatavine ri longoa e Isu i dili pali na ruma, lakea ri dili maia.
MAR 2:2 A ruma i vonu liu. A hini polovavo ranga, ri vapesihi vona e huriki. Lakea e Isu i vara ria na nitana Vure.
MAR 2:3 Na tahuna e Isu i vavara, a bakovi ala va ri kaloho vilia vona a bakovi i beu.
MAR 2:4 Pali ri keri ni kalohoa lakea ne Isu, a vuhuna i kupo hateka e huriki ri vapesihi. Lakea ri pukea a mapana ruma polomeli. Ri puka loboa, muri ri vakatavore purua a bakovi i mahita na kiri.
MAR 2:5 Na tahuna e Isu i matai ria ri luhoi tora hateka ia, i takia a beu, “O tugu, a puga vuroki a naro hale vomu.”
MAR 2:6 Pali e huriki a mari na vinara ri made vonga, ri luhoi maea,
MAR 2:7 “I navai a bakovi iea i ta maea? I ngaru ni bole a murina Vure! I uka tara viri ge puga a naro hale, a Vure kikeri kunana.”
MAR 2:8 E Isu, i malaviriri kunana i lohoka vona a ngava ri luhoi hateka na hatene ria, lakea i taki ria, “I navai mu luhoi mavonga?
MAR 2:9 I vai a ngava kavakava ga taki a beu vona, ‘Iau a puga a naro hale vomu.’ O ga ta maea, ‘O pesi rike, o kaloho a kiri vomu, o laho.’
MAR 2:10 Pali ngane ga vakasiri mua vona a Tuna Bakovi i tahoka a nitora koea na malala ni puga a naro hale.” Ngane i mata lakea na beu, i takia,
MAR 2:11 “A taki ioe, o pesi rike, o kalohoa a kiri vomu, o lakea na ruma vomu.”
MAR 2:12 Lakea i pesi rike, i malaviriri kunana i kaloho a kiri vona, i laho tala. E huriki lobo ri masia, ri turutu, ri kavurikea a Vure, ri ta maea, “I uka ma mi masia hosi tara maki ge maea!”
MAR 2:13 Muri e Isu i pagitala, i hamule lakea na Darilomu e Galili. E huriki ala kupo ri lakea vona, lakea i vara ria.
MAR 2:14 Na tahuna i laho lokovonga i masia e Levi, e tune Alpius, i mamade na roho ni bole a takis. Lakea e Isu i takia, “O muri nau.” Lakea e Levi i pesi rike, i muri maia.
MAR 2:15 Muri e Isu i vano, i kani na ruma ne Levi. E huriki a bakovi ni bole a takis, e huriki a bakovi hale, ri kani turane Isu, e huriki a murimuri vona, a vuhuna e huriki ri muri vona ri ala kupo.
MAR 2:16 Na tahuna e huriki a mari na vinara ne huriki a Pariseo ri masia e Isu i kani turana e huriki a bakovi hale, e huriki a bakovi ni bole a takis, ri nana e huriki a murimuri vona, “I navai i kani turana e huriki a bakovi ni bole a takis, e huriki a bakovi hale?”
MAR 2:17 Na tahuna e Isu i longoa a ninana iea, i taki ria, “E huriki i uka ma ri giloa, i uka ma ri gi lakea na dokta. E huriki ri giloa kunana bara ri masia. A valai i uka ma ga gale mua e huriki mu luhoi ta mu naro kamumu mu gu pulo a vilone mua. A valai ga gale e huriki ri naro hale ri gi pulo a vilone ria.”
MAR 2:18 E huriki a murimuri ne Ioanes, e huriki a Pariseo na parava ranga ri peremu ni kani. Lakea e huriki ranga ri valai, ri nanea e Isu, “I navai e huriki a murimuri ne Ioanes, a murimuri ne huriki a Pariseo ri peremu, pali e huriki a murimuri vomu i uka ma ri peremu?”
MAR 2:19 E Isu i koli i ta maea, “E huriki ri lakea na habu na bakovi i parangi karaba i uka ma ri gi peremu, a vuhuna a bakovi i parangi karaba i tabana turane ria.
MAR 2:20 Muri ma a bakovi i parangi karaba bara ni tuli tala ne ria, bara ri peremu.
MAR 2:21 “I uka tara viri ge bolea a mavidana lavalava karaba ge rahi karia turana hini marape na matutu na varakia. Bara i rata mavonga, na tahuna i loi a varakia vona, a mavidana lavalava karaba bara i hoho, i turapea a matutuna varakia, muri bara i ratea a hini mavida i ngavaka.
MAR 2:22 Pali i uka tara viri ge guru dili a vain karaba na matutuna buroi ni rata na kulina me. Bara i rata mavonga, bara i mapoda a matutuna buroi. Pali a vain a buroi bara ru lobo tavula varago. A viri i lohoka bara i guru dili a vain karaba na buroi karaba.”
MAR 2:23 Na Parava Nimalo tara, e Isu i laho padikudu na hania na vit. E huriki a murimuri vona ri laho turana, ri vakatubu ni pasi a vutuna vit, a vuhuna ri vitolo.
MAR 2:24 Lakea e huriki a Pariseo ri nanea, “Mata lakea! I navai e huriki a murimuri vomu ri ratea a maki ni hatekakari na Parava Nimalo?”
MAR 2:25 E Isu i koli, i ta maea, “Ra mua, i uka ma mu gia na hinere a naro e Davit i ratea hosi, na tahuna i turana e huriki a tara vona ri vitolo?
MAR 2:26 Na tahuna iea, e Abiatar ia a prister dagi. Lakea e Davit i dili na roho na Vure, i kani a bret. A bret iea, a nihabi na Vure. A vinara i taki e huriki a prister kunana ri gi kani. Pali e Davit i bole ranga, i habi ne huriki a tara vona, ri kani.”
MAR 2:27 Lakea e Isu i taki ria, “I uka ma ni rata a bakovi ne vona a Parava Nimalo. A Parava Nimalo ni rata ne vona a bakovi.
MAR 2:28 I mavonga kunana, a Tuna Bakovi ia a Bakovi Dagi na maki lobo. A Parava Nimalo tara, ia a Bakovi Dagi vona.”
MAR 3:1 Na parava tara, e Isu i dili na roho na vaponga. I masia vonga a bakovi i mate a limana.
MAR 3:2 E huriki ranga ri ngaru ni matakana a ngava ri gi padi virihi e Isu vona, lakea ri matanonoa, a ra ge ratea? Ge vakamahuri a bakovi iea na Parava Nimalo, o ge uka?
MAR 3:3 Ngane e Isu i takia a bakovi i mate a limana, “O pesi rike na matane huriki lobo.”
MAR 3:4 Muri i nana ria, “A vinara i ta navai vona a naro si gi ratea na Parava Nimalo? Ni gi rata a naro kamumu, o ni gi rata a naro hale? Ni gi kori a viri, o ni gi rabalaki a viri?” Pali ri mangulu tete ria.
MAR 3:5 Lakea e Isu i madihi a hatena, i mata lae ne ria. I dodo, a vuhuna ri gigi tora hateka. I takia a bakovi, i ta maea, “O toto talea a limamu.” A bakovi i toto talea a limana, lakea a limana i tavaga mule.
MAR 3:6 Malaviriri kunana e huriki a Pariseo ri pagitala, ri vakatubu ni vata turana e huriki a tara ne Herod na dala ri gi rabalaki e Isu vona.
MAR 3:7 E Isu i pe a tabeke iea turana e huriki a murimuri vona, ri lakea na darilomu. E huriki ala kupo hateka ri muri vona. E huriki na tabeke ne Galili, e huriki na tabeke ne Iudea,
MAR 3:8 e huriki o Ierusalem, e huriki na tabeke ne Idumea, e huriki na tabeke tara na naru e Iordan, e huriki na maka tanga ri pesi halui e Tair, e Sidon. Ria lobo ri longo a maka maki i rata e Isu, ri valai maia.
MAR 3:9 E huriki ri ala kupo hateka, lakea e Isu i taki e huriki a murimuri vona ri gi kanu vilia vona a aga, ge pesi langa vona, ma ge bole tugua e huriki.
MAR 3:10 E huriki ri tahoka a gilanga ri boletugu, ri gi padoia e Isu, a vuhuna e Isu i vakamahuri muga pali e huriki ala kupo.
MAR 3:11 Na tahuna e huriki i dili ne ria a hanitu ri masia, ri tabuli puru na ngalana, lakea e huriki a hanitu ri gale tala, ri ta maea, “Ioe a Tuna Vure.”
MAR 3:12 Pali e Isu i taki e huriki a hanitu nahea ri gi taki tala ne huriki, ia e rei muholi.
MAR 3:13 E Isu i sike na gagana lolo, i gale valai vona e huriki i ngaru, lakea ri valai vona.
MAR 3:14 I vulaki a viri ala ravulu a polona i rua ri gi turana, i gale ria a apostolo. Muri ge rudu tala ria, ri gi vara,
MAR 3:15 ri gi tahoka a nitora ni lili tala a hanitu.
MAR 3:16 A viri ala ravulu a polona i rua, i vulaki, a rane ria ra nga: e Simon (e Isu i vunua e Petrus),
MAR 3:17 e Iakop e Ioanes rua e tune Sebedi (e Isu i vunu kalale rua e Boanerges, ra i maia: e maki tarina rua a vilone rua i manga a hini maravila, a hini i kururu),
MAR 3:18 e Andreas, e Pilip, e Bartolemeus, e Mateo, e Tomas, e Iakop tune Alpius, e Tadeus, e Simon a tara ne huriki a Silot,
MAR 3:19 e Iudas Iskariot, ra viri i habi na limana pile e Isu.
MAR 3:20 Muri e Isu i dili na ruma, pali e huriki ri vapopo tabu mai ia, lakea e Isu turana e huriki a murimuri vona ri keri ni kani.
MAR 3:21 E huriki a kabu ne Isu ri longo, lakea ri vano ri gi tuli mulea, a vuhuna ri takia ta i manga.
MAR 3:22 E huriki a mari na vinara ri valai o Ierusalem, ri ta maea, “I dili vona e Belsabub. I lili tala e huriki a hanitu na nitora na hariki ne huriki a hanitu.”
MAR 3:23 Lakea e Isu i gale ria, i taki ria vona a nita vakakika, “E Satan ge lili tala mule navai ia?
MAR 3:24 Bara a tanga tara i vapida ni pesi palupu, a tanga iea i uka ma ge pesi tora.
MAR 3:25 A kabu tara bara i vapida ni pesi palupu, a kabu iea i uka ma ge pesi tora.
MAR 3:26 Pali e Satan i uka ma ge ngaru mulea, ge vakalipida, i uka ma ge pesi tora. A nilobona i valai pali.
MAR 3:27 I muholi hateka, i uka tara viri ge dili tavula na ruma na bakovi hateka tara, ge bole tavula a maka mahala vona. A naro bara i rata mugea, bara i kolotata taroa a bakovi hateka, muri bara i panaho na ruma vona.
MAR 3:28 A taki muholi mua, a maka naro hale, a maka harogianga dagi i rata e huriki a bakovi bara ni puga.
MAR 3:29 Pali e rei i harogia a Hanu Kiripiripi, i uka ma ni gi puga a naro hale vona. A naro hale vona bara i tabuli vakaroro.”
MAR 3:30 E Isu i takia a nita iea, a vuhuna ri taki ia ta i dili vona a hanitu.
MAR 3:31 Muri e kinana, e huriki e tarina ri bele, ri pesi polovavo na ruma, ri rudua tara viri ge dili, ge galea.
MAR 3:32 Lakea e huriki ri made halui e Isu ri takia, “Oe! E kinamu, e tarimu mai, ri pesi polovavo, ri ngaru ni matai ioe.”
MAR 3:33 Lakea e Isu i nana mule ria, “E rei e nana? E rei e huriki e tarigu?”
MAR 3:34 I mata lakea ne huriki ri made halui ia, i taki ria, “E huriki ri made koea, ri manga e nana e turagu.
MAR 3:35 E rei a viri i muri mai a ningaru na Vure i manga e turagu, e kurabagu, e nana.”
MAR 4:1 E Isu i vara tabu na dahana darilomu, i manga a hini muga. E huriki ri made halui ia ri ala kupo hateka, lakea e Isu i rike na aga, i pasi polovavo popote. Pali e huriki ri made pololilo na lavu.
MAR 4:2 I vara ria na maka ngava i kupo, na nita vakakika, i ta maea,
MAR 4:3 “Mu longo valai! A bakovi ni leho na hania i varo a vutuna vit.
MAR 4:4 Na tahuna i voro lae a vutuna vit, ranga ri boru puru ramai a dala, lakea a maka kadirovo ri valai, ri kani lobo.
MAR 4:5 “A maka vutuna vit ranga ri boru langa na hini kedokedo, na hini i uka ma i tahoka hateka a malala. Lakea ri koru rike malaviriri, a vuhuna a malala i tabuli polomeli kunana.
MAR 4:6 Pali na tahuna a haro i rike, i kani ria, ri malai, a vuhuna a kane ria i uka ma ri puru hateka.
MAR 4:7 “A vutuna vit ranga ri boru puru na hini i vona a barakau. Muri a barakau i koru rike, i kae ria, ri keri ni vua.
MAR 4:8 “Pali a vutuna ranga ri boru langa na malala kamumu. Ri gaga, ri koru rike, ri vakabele a kanena i kupo. Ri vakabele i ravulu tolu ranga, i ravulu polotara ranga, pali ranga ri vakabele i ravulu mule ma a murina balaka taku (100).”
MAR 4:9 Muri e Isu i ta maea, “E rei a viri i ngaru ni longokilalea a ngavagu, ge longo kamumu, ge luhoi kado.”
MAR 4:10 E huriki lobo ri vano pali, lakea a murimuri vona ala ravulu a polona i rua, turana e huriki ranga, ri nanea ge tuveve poloa ne ria a nita vakakika.
MAR 4:11 Lakea i ta maea, “A nita kapiloho na harikianga na Vure ni vakasiri pali ne mua. Pali e huriki ri made polovavo, a ngava lobo ni ta vakakika ne ria.
MAR 4:12 Ni ta vakakika ne ria, ‘ri gi matai, pali i uka ma ri gi matakilala. Ri gi longo, pali i uka ma ri gi longokilala. Ma ri gi pulo a vilone ria, ga puga vuroki a naro hale ne ria.’”
MAR 4:13 Muri e Isu i nana ria, “Mua i uka ma mu longokilalea a nita vakakika iea? Pali mu gu longokilala navai a maka nita vakakika ranga?
MAR 4:14 “A bakovi i varo a vutuna vit i manga a viri i habi a ngava.
MAR 4:15 E huriki a bakovi ranga, ri manga a dala, a vutuna vit ni voro langa vona. Na tahuna ri longo a nita, e Satan i valai malaviriri, i bole tala ra ngava ni varo.
MAR 4:16 “E huriki ranga ri manga a hini kedokedo, a vutuna vit ni voro langa vona. Ri longo a nita, ri malaviriri kunana ri bolea, ri vivi vona. Pali i uka ma ri pesi tora,
MAR 4:17 a vuhuna a kane ria i uka ma i puru hateka. Na tahuna a maregoa i bele, o e huriki ri vakamadihi ria a vuhuna ri ramaia a nita iea, ri ha malaviriri kunana.
MAR 4:18 “Pali e huriki ranga ri manga a hini i vona a barakau, a vutuna vit ni voro langa vona. Ri longoa a ngava,
MAR 4:19 pali a niluhoi legelege na nimade na malala, a nimasigoro na mahala, a ningaru na maki ranga ri valai ri kavitagu a ngava ni varo, lakea i uka ma ri vua.
MAR 4:20 “E huriki ranga ri manga a malala kamumu, a vutuna vit ni voro langa vona. Ri longoa a ngava, ri bolea, ri vakabele a vutuna i ravulu tolu ranga, i ravulu polotara ranga, pali ranga i ravulu mule ma a murina balaka taku (100). Ri bele kupo hateka na vutuna ni varo muga.”
MAR 4:21 E Isu i taki ria, “A lam i uka ma si namia, muri si gi ru kapilohoa. Bara si ru langea na dede.
MAR 4:22 A maki ni ruhulolo bara i bele kavakava. A maki ni ta ruhulolo vona, bara ni ta pukatala vona.
MAR 4:23 E rei a viri i ngaru ni longokilalea a ngavagu, ge longo kamumu, ge luhoi kado.”
MAR 4:24 I taki tabu ria, i ta maea, “Mu luhoi kado kamumu a ngava mu longo. A naro mu rata virihi e huriki ranga, a Vure tara bara i rata virihi mua vona, lakea bara ni habi tabu ranga.
MAR 4:25 E rei a viri i tahoka a maki pali, bara ni habi tabu vona ranga. Pali e rei a viri i uka ma i tahoka a maki, bara ni bole mule vona a maki popote i tahoka pali.”
MAR 4:26 E Isu i ta maea tabu, “A harikianga na Vure i manga a bakovi i voro lae a vutuna vit na malala.
MAR 4:27 I voro lobo a vutuna vit, i vano i made kunana. A maka vutuna vit ri gaga, ri koru rike, pali a bakovi i uka ma i lohoka vona ri koru rike navai.
MAR 4:28 A malala kunana i ratea a vutuna i gaga. Muri a pagana i lubu, i koru rike, lakea a vuana i lua tala na mapana vit.
MAR 4:29 Pali na tahuna a kanena i moro ngane, a bakovi iea i valai malaviriri, i vali a vit, i ru kadolu, a vuhuna a parava ni mirio i valai pali.”
MAR 4:30 E Isu i ta maea tabu, “Ga ta navai tabu vona a harikianga na Vure? E rei a nivakakika ga tonia vona?
MAR 4:31 I manga a vutuna mastad, ra i vutu kiroko liu ni varo na malala.
MAR 4:32 Pali na tahuna ni varo, i koru rike, i langui lobo a maki ni varo na hania. A rahana i buroro, lakea a maka kadirovo bara ri hae a nune ria vona.”
MAR 4:33 Na tahuna e Isu i vara e huriki, bara i rata bala a nita vakakika, i muri mai a lohokanga ne ria.
MAR 4:34 I uka ma i ta kavakava, i ta vakakika kunana. Pali na tahuna i made turana e huriki a murimuri vona kunana, bara i tuveve polo ne ria a ngava lobo.
MAR 4:35 Na parava iea, i malunga pali a hini, lakea e Isu i taki e huriki a murimuri vona, “Si gi vore lakea na tabeke tara na darilomu.”
MAR 4:36 Lakea ri rike turana e Isu na aga i made muga vona, ri vano. I ranga e huriki ri rike na aga ne ria, ri vano turane ria.
MAR 4:37 Muri a vilu dagi i bele, i rere tagua a aga, i ratea i popote ge mabubu.
MAR 4:38 E Isu i mahita langa na moke na kuli na aga, lakea e huriki a murimuri ri vangoa, ri takia, “Mari ni tovo, i uka ma o luhoi lege? Bara si pasiri!”
MAR 4:39 Lakea i pesi rike, i tahatea a vilu, i takia a bokona dari, “O pasi puru! Naha ni kuluko!” Muri i pasi puru a vilu, i puru a malilo i ngapa.
MAR 4:40 Muri i nana e huriki a murimuri vona, “I navai mu mangenge? Ra mua, i uka ma mu luhoi tora ma?”
MAR 4:41 Ri mangenge hateka, lakea ri vanana lae, “E rei a viri iea? A vilu, a dari ru longototoa!”
MAR 5:1 Muri, ri vore kudua a darilomu, ri bele na tabeke ne huriki a Gerasa.
MAR 5:2 E Isu i raga na aga, malaviriri kunana a bakovi tara i dili vona a hanitu i pagitala na murine huriki ri mate, i valai ge tagui e Isu.
MAR 5:3 Ra bakovi iea i mahita na murine huriki ri mate. I uka tara viri ge tuhaka ge kolotata tabu ia. A sen tara, i uka ma i karea.
MAR 5:4 Balaka kupo ni kolotata a limana a vahana, pali i rakudu a sen na limana, i rakudu a aen na vahana. I uka tara viri ge kinigao ge lakavua.
MAR 5:5 Na rodo a haro vakaroro, i laho lae na murine huriki ri mate, na maka lolo, i haloho lae, i pala mule a kulina na kedo.
MAR 5:6 Ra bakovi iea, na tahuna i mata basi, i masia e Isu, i nunu maia, i turume puru na ngalana, i kavurikea.
MAR 5:7 A hanitu pololilo vona i gale dagi, i ta maea, “Isu, Tuna Vure Meli Liu. Go rata navai iau? Iau a nana ioe na matana Vure, naha ni ratapile iau.”
MAR 5:8 I gale dagi mavonga, a vuhuna e Isu i taki mugea i ta maea, “O pagitala vona a bakovi iea, ioe a hanitu kato.”
MAR 5:9 Lakea e Isu i nanea, “E rei a ramu?” A bakovi i koli i ta maea, “A ragu e Tara, a vuhuna mi ala kupo.”
MAR 5:10 Lakea e huriki a hanitu ri taki torea e Isu, nahea ge lili tala ria na tabeke iea.
MAR 5:11 A kabuna boro ri kakani tabukoi na dahana lolo.
MAR 5:12 Lakea e huriki a hanitu ri taki torea e Isu, ri ta maea, “O rudu mia lakea na kabuna boro, mi gi dili ne ria.”
MAR 5:13 E Isu i longo a ninana ne ria, lakea e huriki a hanitu ri pagitala vona a bakovi iea, ri dili na maka boro. Lakea a kabuna boro ri nunu puru na gali, ri page puru na darilomu, ri pasiri. A maka boro ri 2,000.
MAR 5:14 E huriki a matakari na boro ri ha, ri vakalongo lae e huriki na tanga, e huriki na robo viliha vonga. Lakea e huriki ri lokovonga ri gi matai a maki i bele.
MAR 5:15 Na tahuna ri bele ne Isu, ri masia ra bakovi i dili muga vona a tara na hanitu. Ri masia i made, i rodo a varakia, i kamumu a niluhoi vona, lakea ri mangenge.
MAR 5:16 E huriki ri matai, ri vakalongo e huriki ranga na maki i bele na bakovi ra i dili muga vona a hanitu, a maki i bele na kabuna boro.
MAR 5:17 Muri ri taki torea e Isu ge pe a tabeke ne ria, ge lakea na tanga tara.
MAR 5:18 Na tahuna e Isu i pesi, ta ge rike na aga, lakea ra bakovi i dili muga vona a hanitu, i takia e Isu i ngaru ni laho turana.
MAR 5:19 Pali e Isu i takia i ta maea, “I uka. O lakea na tanga vomu, o vakalongo a kabu vomu vona a maki dagi e Bakovi Dagi i rata virihi ioe vona. O vakalongo ria na hini i dodo ioe.”
MAR 5:20 Lakea a bakovi iea i vano, i vakatubu ni vakalongo o Dekapolis a maka maki i rata vona e Isu. Lakea e huriki lobo ri longoa a nuverei vona ri turutu.
MAR 5:21 E Isu i vorekudu tabua a darilomu, i lakea na tabekena tara. Lakea e huriki ala kupo ri valai, ri pesi halui ia na dahana darilomu.
MAR 5:22 I bele vona tara matakari na roho na vaponga, a rana e Ierus. Na tahuna i masia e Isu, i lokovonga maia, i turume puru tabukoi na vahana.
MAR 5:23 Lakea i taki tora ia, i ta maea, “E tugu ngatavine i popote ge mate. A ngaru muholi ioe go valai, go ru langa a limamu vona, ge tavaga.”
MAR 5:24 Lakea e Isu i lokovonga turana. E huriki ala kupo ri muri vona, ri vakopekope halui ia.
MAR 5:25 A ngatavine tara, i pori vona a dara na pida i ravulu a polona i rua, i turane ria.
MAR 5:26 Ra ngatavine iea i matai pali e huriki a dokta, pali i bole a nimadihi dagi ne ria, i vakalobo liu pali a moni vona. Pali i uka ma i tavaga. I bele dagi vona a gilanga.
MAR 5:27 Na tahuna a ngatavine i longoa e Isu i bele vonga, i vano, i pesi turana e huriki, i laho valai muri, i padoi a varakia ne Isu,
MAR 5:28 a vuhuna i luhoi maea, “Iau ga padoi kunanea a varakia vona, bara tavaga.”
MAR 5:29 Na tahuna i padoi a varakia ne Isu, i malaviriri kunana i lobo ni tua a darana, i hataki a kakaina i lobo vona a gilanga.
MAR 5:30 E Isu i malaviriri kunana i hataki kilalea a nitora i pagitala vona. I ngalakapulo lakea ne huriki, i nana, “E rei i padoi a varakia nau?”
MAR 5:31 E huriki a murimuri vona ri ta maea, “O matai e huriki ala kupo ri vapopo halui ioe. Pali i navai o nana, ‘E rei i padoi a varakia nau?’”
MAR 5:32 Pali e Isu i tabana ni matakanea a viri i padoi a varakia vona.
MAR 5:33 Lakea a ngatavine i lakea ne Isu, i turume puru na ngalana, a vuhuna i lohoka vona i mahuri pali. I mangenge hateka, lakea i ta muholi, i vakalongoa vona a maki i ratea.
MAR 5:34 Lakea e Isu i takia a ngatavine, “O tugu, ioe o mahuri a vuhuna o luhoi tora iau. O vano na nivalemu, a gilanga vomu i lobo.”
MAR 5:35 E Isu i tabana ni ta, ri bele ranga bakovi. Ri valai na ruma ne Ierus, ra matakari na roho na vaponga, lakea ri ta maea, “Naha ni vakapae tabua a mari ni tovo. E tumu i mate pali.”
MAR 5:36 Pali e Isu i uka ma i longo mai a hini ri taki, lakea i takia e Ierus, i ta maea, “Naha ni mangenge. O luhoi tora iau.”
MAR 5:37 I taki e huriki lobo ri gi made vonga. E huriki ri muri vona kunana e Petrus, e Iakop, e Ioanes e turane Iakop.
MAR 5:38 Na tahuna ri bele na ruma na matakari na roho na vaponga, i matai e huriki ri tangi, ri haloho dagi.
MAR 5:39 I dili na ruma, i taki ria, “I navai mu tangi, mu haloho dagi? A sirula i uka ma i mate. I mahita kunana.”
MAR 5:40 Lakea ri nongo vakia. Pali i tono tala ria. I dili turana e tamana koma, e kinana koma, a murimuri vona ala tolu, ri lakea na hini i tabuli vona a podana sirula.
MAR 5:41 Lakea e Isu i nugua a limana, i ta maea, “Talita koum.” I maea, “Sirula, a taki ioe o pesi rike.”
MAR 5:42 I malaviriri kunana, a sirula i pesi rike, i laho. A pida vona i ravulu a polona i rua. Na tahuna ri masia, ri turutu hateka.
MAR 5:43 I taki tora ria, nahea ri gi vakalongoa tara viri. Lakea i taki ria ri gi habi vona ranga maki ge kani.
MAR 6:1 E Isu i pea a tanga iea, i vano turana e huriki a murimuri vona, ri lakea na tanga vona.
MAR 6:2 Na Parava Nimalo e Isu i vakatubu ni vara pololilo na roho na vaponga. Na tahuna e huriki ri longoa ri turutu vona, ri nana, “Ra bakovi iea, i bole vai a naro nga? E rei i habia vona a lohokanga, a nitora ni rata a nivakasiri?
MAR 6:3 Ia a mari ni hae a roho kunana. Pali e kinana, e Maria, e tarina e Iakop, e Ioses, e Iuda, e Simon. Pali e huriki e kurabana ri made turane hita.” Lakea i madihi a hatene ria vona.
MAR 6:4 Pali e Isu i taki ria, i ta maea, “A propet ni togo na tanga lobo. Pali e huriki a bakovi a ngatavine na tanga vona i uka ma ri togoa.”
MAR 6:5 E Isu i keri ni rata vonga ranga nivakasiri. I ru langa kunana a limana ne huriki ranga ri giloa, i vakatavaga ria.
MAR 6:6 I turutu vona a hini i uka ma ri luhoi tora ia. Muri i vano, i laho lae, i vara na maka tanga takutaku.
MAR 6:7 Muri e Isu i gale valai vona e huriki a murimuri vona ala ravulu a polona i rua, i rudu tala ria ruarua, i habi a nitora ne ria ni lili tala a hanitu.
MAR 6:8 I taki ria nahea ri gi bole a maki na tahuna ri laho. I uka ma ri gi bole a maki ni kani, a hole, a moni. A maki ri gi bole kunana, a kodo ni laho.
MAR 6:9 I taki ria ri gi rodo a vahapolo, pali i uka ma ri gi bole a varakia.
MAR 6:10 Muri i ta maea, “Na tahuna mu lakea na ruma tara, mu made vonga ge harena na tahuna mu pe a tanga iea.
MAR 6:11 A tanga tara i uka ma ri tagui mua, i uka ma ri longo mai mua, mu kurudu pasi a habulo na vahane mua, mu vano. Mu rata mavonga, bara i vakasiri ria ri tahoka a ngava.”
MAR 6:12 Lakea ri vano, ri vara e huriki ri gi pulo a vilone ria.
MAR 6:13 Ri lili tala e huriki a hanitu, ri biri na nibiri e huriki ri giloa, ri vakamahuri ria.
MAR 6:14 E Herod a hariki i longo a maka maki e Isu i rata, a vuhuna a rane Isu ni lohoka vona pali na tanga lobo. E huriki ranga ri ta maea, “Ra viri iea e Ioanes, a mari ni vahilolo, a Vure i vakamahuri mulea na matenga, lakea i tahoka a nitora ni rata a nivakasiri.”
MAR 6:15 Pali e huriki ranga ri taki ta ia e Elaisa. E huriki ranga ri taki ta ia a propet tara, i manga e huriki a propet hosi.
MAR 6:16 Pali e Herod, na tahuna i longo a ngava nga, i ta maea, “Iau a palakudua hosi a lohone Ioanes, pali ngane i mahuri mule tabu na matenga!” I ta mavonga, a vuhuna
MAR 6:17 hosi e Herod i parangi vona e Herodias, e girihine tarina e Pilip. Pali e Ioanes i takia e Herod, i ta maea, “I uka ma a vilo na vinara go parangi tabu e girihine tarimu.” E Herodias, i madihi a hatena vona e Ioanes, lakea i ngaru ni rabalakia. Pali i uka dalana, a vuhuna e Herod i mangenge ne Ioanes, i matakaria. I lohoka vona ia a bakovi kamumu, i kiripiripi a vilona. E Herod i vivi ni longoa a vinara ne Ioanes. Pali na parava ranga bara i loho lege vona a vinara ne Ioanes. Muri i rudu vakuku, ni gi lakavu e Ioanes, ni gi kolotata, ni gi ru dili na bavi.
MAR 6:21 Muri e Herodias i maragisi vona a maki i ngarua. Na parava ni poda vona e Herod, e Herod i ratea a habu, i gale palupu e huriki a bolekori vona, a ubu na tara vona, a bakovi dagi o Galili, ri gi valai na habu.
MAR 6:22 E tune Herodias a ngatavine i dili, i raulo, i rata e Herod turana e huriki ri valai na habu vona ri vivi. Lakea a hariki i takia a koma ngatavine, “A ra maki o ngarua bara habia vomu.”
MAR 6:23 Muri i kaba i ta maea, “A ra maki o nana vona, bara habia vomu. A tabeke na harikianga nau tara bara habia.”
MAR 6:24 A koma ngatavine i pagitala i nanea e kinana, “A ra maki ga nana vona?” E kinana i koli, i ta maea, “O nana vona a gine Ioanes, a Mari ni Vahilolo.”
MAR 6:25 A koma ngatavine i malaviriri kunana, i laho hari dili mai a hariki, i ta maea, “A ngaru go palakudua a lohone Ioanes a mari ni vahilolo. Muri o habia nau a gina.”
MAR 6:26 A hariki i lege a lohona, pali i uka ma i ngaru ni ta pupukari vona, a vuhuna i kaba na matane huriki ri bele na habu.
MAR 6:27 Lakea i malaviriri kunana i rudua a nugumaheto ge palakudua a lohone Ioanes, ge bole vilia a gina. A bakovi i vano, i palakudu pololilo na bavi a lohone Ioanes.
MAR 6:28 I ru langea na sika, i bole vilia na hariki. Lakea a hariki i habia na koma ngatavine. Muri a koma ngatavine i vano i habia ne kinana.
MAR 6:29 E huriki a murimuri ne Ioanes ri longoa a velengana, ri vano, ri bolea a podana, ri tanua. Pali ngane, e Herod i pahaluhoia e Isu ta ia e Ioanes i mahuri mule na matenga.
MAR 6:30 E huriki a apostolo ne Isu ri vapopo turane Isu, ri vakalongoa vona a maka maki ri rata, ri tovo e huriki vona.
MAR 6:31 E huriki ala kupo ri laho viri varola, ri pahakari ria ni kani, lakea e Isu i taki e huriki a apostolo vona, “Mu valai turagu, si gi lakea na hini i ngeki, si gi malo taro vonga.”
MAR 6:32 Lakea ri rike na aga, ri vore lakea na tabeke i ngeki, ta ri gi made kikeri vonga.
MAR 6:33 Pali na tahuna ri vano, e huriki ala kupo ri matai ria, ri matakilala ria, lakea e huriki na tanga lobo ri nunu pololilo, ri bele muga vonga.
MAR 6:34 Na tahuna e Isu i bele, i matai ria, i dodo ria, a vuhuna ri manga a sipsip, i uka matakari ne ria. Lakea i vakatubu ni tovo ria na maki i kupo.
MAR 6:35 I tabalahehe pali a haro, lakea e huriki a murimuri vona ri takia, ri ta maea, “Ra hini nga a tabeke i ngeki, i tabalahehe pali a haro.
MAR 6:36 O rudu e huriki, ri gi lakea na robo viliha nga, na maka tanga, ri gi kona a maki ni kani.”
MAR 6:37 E Isu i koli, i ta maea, “Mu vakani ria!” Ri ta maea ria, “A moni ni kona a maki ni kani ne ria vona bara i vatovotovo turana mapana viri i leho na keva i polotolu! Pali i uka ma i kamumu si gi kona a maki ni kani ne ria.”
MAR 6:38 Lakea i nana ria, “I riva a bret mu tahoka? Mu vano mu matai.” Ri matai pali, ri hamule, ri vakalongoa e Isu ri ta maea, “A bret i lima, a manu i rua.”
MAR 6:39 Lakea e Isu i vakuku e huriki ri gi made vapopo na varili gomagoma.
MAR 6:40 Ri made vapopo na tara ala ravulu mule ma a murina balaka taku (100) ranga, na tara ala ravulu lima (50) ranga.
MAR 6:41 I bole a bret i lima, a manu i rua, i mata rike na hunu, i kavurikea a Vure. Muri i keve a bret, i habi ne huriki a murimuri vona, ri veru ne huriki. A manu i rua ranga i putu, i veru ne huriki.
MAR 6:42 E huriki lobo ri kani, ri maru.
MAR 6:43 E huriki a murimuri vona ri tahoni na kulopi i ravulu a polona i rua, a kalavana bret a manu ri kani kaleva.
MAR 6:44 E huriki a bakovi lobo ri kani ri ala 5,000.
MAR 6:45 Malaviriri kunana e Isu i rudu e huriki a murimuri vona, ri gi rike na aga, ri gi muga lakea o Betsaida, na tabeke tara na darilomu. Pali i made mule ia, ge rupolo kamumu e huriki.
MAR 6:46 I rupolo lobo e huriki, lakea i sike na gagana lolo, i vasileki.
MAR 6:47 I rodo ngane a hini, e huriki a murimuri ne Isu ri vore na kurukuruna darilomu. Pali e Isu i tabana na lolo.
MAR 6:48 I matai e huriki a murimuri vona ri vanugu a vore, a vuhuna a vilu i pori valai muga. Na malabeonga e Isu i pori mai ria, i laho langa na dari. I popote kunana ge rede ria,
MAR 6:49 pali na tahuna ri masia i laho langa na dari, ri pahaluhoi ta ia a hanitu. Lakea ri haloho,
MAR 6:50 a vuhuna ria lobo ri masia, ri mangenge. I malaviriri kunana i ta maea, “Mu tuhaka! Iau kunana. Naha ni mangenge.”
MAR 6:51 Muri e Isu i rike na aga, lakea a vilu i pasi puru. Ri turutu hateka,
MAR 6:52 a vuhuna i uka ma ri matakilaka vona a nivakasiri e Isu i ratea na bret. I tabana ni uvo a gine ria.
MAR 6:53 Ri vore kudu, ri bele o Genesaret, ri hori vonga.
MAR 6:54 Na tahuna ri raga na aga, e huriki lobo ri matakilalea e Isu.
MAR 6:55 Ri nunu lae na tabeke vonga, ri vakalongo e huriki. Na tahuna e huriki ri longo, ri kaloho na dede e huriki ri giloa, ri bole lakea vona.
MAR 6:56 Na tanga lobo e Isu i bele vona, na tanga kiroko, na tanga dagi, polovavo na tanga, bara ri taparaki na mada e huriki ri giloa. Ri taki tora ia ri gi padoi kunanea a harena varakia vona. Pali e huriki lobo ri padoi ia, ri tavaga.
MAR 7:1 E huriki a Pariseo turana e huriki a mari na vinara o Ierusalem, ri vano, ri vapopo turane Isu.
MAR 7:2 Ri matai e huriki a murimuri vona ri kani, i uka ma ri vahilolo taro a limane ria.
MAR 7:3 (E huriki a Pariseo, e huriki a Iuda, ri muri mai a vilo hosi ne huriki e tubune ria, ri loi taro a limane ria, muri ri kani.
MAR 7:4 Na tahuna ri hamule na maket, bara ri loi taro a limane ria, muri ri kani. A vilo ranga ne tubune ria ri muri mai, ra ni vahilolo a kikei, a tavila, a ulo).
MAR 7:5 Lakea e huriki a Pariseo turana e huriki a mari na vinara, ri nanea e Isu, “Re huriki a murimuri vomu, i navai i uka ma ri muri mai a narone huriki e tubune hita hosi, i uka ma ri loi a limane ria muga ni kani?”
MAR 7:6 Lakea e Isu i koli ria, i ta maea, “Mua e huriki a ngava naru. I muholi a nitane Isaia a propet na tahuna i taki mua hosi, i here puru maea, ‘Re huriki nga, ri taki ta ri togo iau, pali i uka ma ri ngaru muholi iau na hatene ria.
MAR 7:7 Ri kavurike tavula iau. Ri tovo e huriki na vinara tavula na bakovi, ri takia ta a vinara na Vure.’”
MAR 7:8 Muri e Isu i ta maea tabu, “Mu longotaroa a vinara na Vure, mu ramai a maka vilone huriki e tubune mua.
MAR 7:9 Mu moro hateka ni marikoi na vinara na Vure, mu gu muri mai kunana a vilo hosi!
MAR 7:10 E Moses hosi i here maea, ‘Mu togo e kinane mua, e tamane mua.’ I here maea tabu, ‘E rei a viri i harogi e tamana e kinana ni gi rabalaki.’
MAR 7:11 “Pali mu taki a bakovi ge taki e tamana e kinana, ge ta maea, ‘A maki ta ga habi marua, a ru here pali ge ne vona a Vure.’
MAR 7:12 Lakea mu hehea nahea ge kori e tamana rua e kinana.
MAR 7:13 Na naro iea kunana, a vilo hosi ne mua, ra mu tovo polo ne huriki, i ratea a nitana Vure a maki tavula. I kupo a maka maki mu rata mavonga.”
MAR 7:14 E Isu i gale valai tabu e huriki, i taki ria, “Mua lobo, mu talangaki valai, mu longokilalea a nitagu.
MAR 7:15 I uka tara maki ge dili na viri ge ratea ge katoki na matana Vure. A maki i rata a viri ge katoki, a maki i pagitala valai na hatena.”
MAR 7:17 I pe e huriki, i dili na ruma, lakea e huriki a murimuri vona ri ramaia, ri nanea vona a nivakakika iea.
MAR 7:18 Lakea e Isu i taki ria, “Ra mua, i uka ma mu longokilala ma? Ra maki ni kani i uka ma i ratea a viri ge katoki na matana Vure,
MAR 7:19 a vuhuna i uka ma i dili na hatena, i dili kunana na kavutuna, muri i pagitala na kakaina.” Na ngava iea kunana, e Isu i vakalongo e huriki vona a maki ni kani lobo i kamumu ni kani.
MAR 7:20 I ta lokovonga liu, i ta maea, “A maki i pagitala na bakovi, i manga a maki i taki, a maki i rata, i ratea i katoki na matana Vure.
MAR 7:21 A maki i pagitala na hatena viri, a niluhoi hale, a molenga, a panahoa, a nivarabalaki, a molenga na parangia,
MAR 7:22 a ningutu na maki na viri tara, a nitepu ne huriki lobo, a pusinga, a molenga viliha manga a ligo, a nimasigoro na maki na viri, a nipadimomo, a nigigi tora, a nivarata manga manga tavula.
MAR 7:23 A maka naro hale nga ri pagitala na hatena viri, ri ratea i katoki na matana Vure.”
MAR 7:24 Muri e Isu i malaga, i lakea na tabeke ne Tair rua e Sidon. I dili na ruma tara. I koi vona tara viri ge lohoka vona, pali ia, i uka hini ge kapiloho vona.
MAR 7:25 A ngatavine tara, e tuna ngatavine i dili vona a hanitu, i longo ta e Isu i bele. Lakea i valai malaviriri, i turume tabukoi ne Isu.
MAR 7:26 Ra ngatavine iea, i uka ma a Iuda. Ni poda o Siroponesia. I nana torea e Isu ge lili vurokia a hanitu i dili ne tuna.
MAR 7:27 Lakea e Isu i takia, “E huriki a koma ri gi kani taro. I uka ma i kamumu ni gi bole a maki ni kani ne huriki a koma, ni gi voro lakea na ligo.”
MAR 7:28 Pali a ngatavine i koli, i ta maea, “Bakovi Dagi o ta muholi. Pali a ligo ranga ri kani poi a momona maki i boru puru na dede ne huriki a koma.”
MAR 7:29 Muri e Isu i takia a ngatavine, “O koli kamumu. Pali o hamule. A hanitu i pea pali e tumu.”
MAR 7:30 I hamule na tanga, i masia e tuna ngatavine i mahita na kiri, i pagitala pali vona a hanitu.
MAR 7:31 E Isu i malaga na tabeke ne Tair, i laho polo ne Sidon, i lokovonga liu na tabeke ne Dekapolis, i pagitala na Darilomu e Galili.
MAR 7:32 Na tahuna e Isu i bele vonga, ni tuli valai vona a bakovi i vou, i ngavarubu. Ri taki torea e Isu ge ru langa a limana vona, ge vakamahuria.
MAR 7:33 Lakea e Isu i tuli here lakea na gaga basi ne huriki, i ru dili a kukulimana na tulina bakovi. Muri i kalupe taho a kukulimana i nugua a tabelena bakovi.
MAR 7:34 I mata rike na hunu, i taravango i ta maea, “Epata!” I manga i maea, “Ge mapaga.”
MAR 7:35 I uka ma i tabaka, i kamumu a tulina, i longo a hini, i vakatubu ni ta kavakava.
MAR 7:36 Lakea e Isu i taki tora ria, nahea ri gi vakalongoa tara viri. I taki tora ria nahea ri gi vakalongo lae. Pali ri vano ria, ri vakalongo lae.
MAR 7:37 Ri turutu hateka, lakea ri ta maea, “A maki lobo i rata kamumu. I rata e huriki ri vou ri longo, i rata e huriki ri ngavarubu ri ta.”
MAR 8:1 Na tahuna iea e huriki ala kupo ri vapopo tabu. Ri uka a maki ni kani, lakea e Isu i gale e huriki a murimuri vona, i taki ria,
MAR 8:2 “Iau a dodo e huriki nga. Ri made turagu na parava i tolu pali. I uka ma ri kani.
MAR 8:3 Pali ngane a koi ni rudu hamule ria, ma ga ri gi vitolo, ge vurea a matane ria na dala. E huriki ranga ri valai basi hateka.”
MAR 8:4 E huriki a murimuri vona ri koli ri ta maea, “Pali si gi bole vai na tabeke i ngeki koea a maki ni kani si gi vakani e huriki nga vona?”
MAR 8:5 Lakea e Isu i nana ria, “I riva a bret mu tahoka?” Ri ta maea ria, “Mi tahoka a bret i polorua.”
MAR 8:6 Lakea i taki e huriki ri gi made puru na malala. I bole a bret i polorua nga, i kavurikea a Vure. Muri i keve, i habi ne huriki a murimuri vona, ri gi veru tala ne huriki.
MAR 8:7 A manu kiroko ranga ri tahoka. Ngi ranga i bole, i kavurikea a Vure, muri i taki e huriki a murimuri ri gi veru tala.
MAR 8:8 Ri kani, ri maru. Muri ri tahoni dili na kulopi i polorua a kalavana maki ni kani, ri vonu.
MAR 8:9 E huriki ri kani ri ala rangale va (4,000). Ri kani lobo muri i rupolo ria.
MAR 8:10 Malaviriri kunana i rike na aga turana e huriki a murimuri vona, ri lakea na tabeke ne Dalmanuta.
MAR 8:11 Na tahuna ri bele o Dalmanuta, e huriki a Pariseo ri valai, ri vakatubu ni hehea e Isu. Ri tonia, ri nanea ge rata a nivakasiri ge vakasiria a nitora vona i valai na Vure.
MAR 8:12 E Isu i kide tala, i ta maea, “I navai e huriki na tahuna mona ri nana ni matai a nivakasiri? A taki muholi mua, bara i uka tara nivakasiri ri gi masia.”
MAR 8:13 Muri i pe ria, i rike na aga, i lakea na tabeke tara na darilomu.
MAR 8:14 E huriki a murimuri ri longo kaburungi ni bolena bret. Ri tahoka kunana a bret i taku na aga.
MAR 8:15 E Isu i taki tora ria, “Mu lelerau, mu matadoko vona a is ne huriki a Pariseo, a is ne Herod.”
MAR 8:16 Lakea ri vakatubu ni vata vona a hini ri uka bret.
MAR 8:17 E Isu i lohoka vona a maki ri vata vona, lakea i nana ria, “I navai mu vata vona a bret i uka ma mu bole? Mua, i uka ma mu matakilala iau, i uka ma mu longokilala a ngava. I navai i uvo a gine mua?
MAR 8:18 Mua mu tahoka a matane mua, pali i uka ma mu matai. Mu tahoka a tuline mua, pali i uka ma mu longokilala. Pali mua, i uka ma mu luhoi mule a maki a rata?
MAR 8:19 Na tahuna a keve a bret i lima, a vakani e huriki ala 5,000, i riva a kulopi mu tahoni dili vona a kalavana maki ni kani?” Ri koli ri ta maea, “A kulopi i ravulu a polona i rua.”
MAR 8:20 “Na tahuna a keve a bret i polorua a vakani e huriki ala 4,000, pali i riva a kulopi mu tahoni dili vona a kalavana maki ni kani?” Ri koli ri ta maea, “I polo rua.”
MAR 8:21 Lakea e Isu i nana ria, “Pali i navai i uka ma mu matakilaka vona a maka maki a rata?”
MAR 8:22 Ri bele o Betsaida, lakea e huriki ranga ri tuli vilia ne Isu a bakovi i kepa, ri taki torea e Isu ge padoi ia.
MAR 8:23 Lakea e Isu e tuli talea na tanga a kepa. I kalupe tahoa a matana, i ru langa a limana vona, muri i nanea, “O matai a maki o i uka?”
MAR 8:24 A bakovi i mata lae, i ta maea, “A matai e huriki a bakovi, ri manga a kai ri laho lae.”
MAR 8:25 Lakea e Isu i padoi tabu a matana bakovi. Muri a matana i matapara, i matakilala lobo a maka maki.
MAR 8:26 Muri e Isu i rudua ge hamule lakea na ruma vona, i takia, “Naha ni dili na tanga.”
MAR 8:27 E Isu turana e huriki a murimuri vona ri lakea na maka tanga kiroko tabukoi na tanga dagi e Sisaria Pilipi. Na tahuna ri lalaho lokovonga, e Isu i nana ria, “E huriki ri luhoi iau ge iau e rei?”
MAR 8:28 Ri ta maea ria, “E huriki ranga ri taki ioe, ta ioe e Ioanes a mari ni vahilolo. I ranga ri taki ioe, ta ioe e Elaisa. Pali e huriki ranga tabu ri taki ioe, ta ioe a propet hosi tara.”
MAR 8:29 Lakea e Isu i nanea e Petrus, “Pali ioe, o luhoi iau ge iau e rei?” E Petrus i koli, i ta maea, “Ioe e Kristo.”
MAR 8:30 Pali e Isu i taki tora ria nahea ri gi vakalongoa tara viri.
MAR 8:31 Muri e Isu i vakatubu ni vara ria na Tuna Bakovi bara i bole a nimadihi i kupo. E huriki a gare, a prister dagi, a mari na vinara bara ri marikoi vona. Muri bara ri rabalakia. Pali muri na parava i tolu, bara i pesi rike mule na matenga.
MAR 8:32 I vara kavakava kunana vona ra ngava iea. Pali e Petrus i tulia lakea na gaga, i vakatubu ni tahatea.
MAR 8:33 E Isu i ngalahere ne Petrus, i mata lakea ne huriki a murimuri vona, i tahatea e Petrus, i ta maea, “Satan, o hamule mae a bitogu! I uka ma o luhoi a maki na Vure. O luhoi kunana a maki na bakovi.”
MAR 8:34 Muri i gale valai vona e huriki ri turana, turana e huriki a murimuri vona, i taki ria, “E rei a viri i ngaru ni muri nau, ge lohopile a ningaru vona, ge kalohoa a kai tavalavala vona, ge ramai iau.
MAR 8:35 E rei a viri i ha taro iau, ne vona ni korimule a kulina, bara ri velu. Pali e rei a viri i mate a vuhuna i ramai iau, i vara a Velenga Kamumu, bara i bole a nimahuri vakaroro.
MAR 8:36 A ra i kamumu vona a bakovi ge bole lobo a maka maki na malala, pali ge mate ia?
MAR 8:37 Pali a bakovi, a ra ge habia ge ngulia vona a nimahuri?
MAR 8:38 Koea na malala ri rata hateka a molenga, a naro hale. Pali e rei a viri i maruhu nau, i maruhu na ngava nau ngane, a Tuna Bakovi bara i maruhu vona muri ma, na tahuna i valai na nipara ne Tamana, turana e huriki a agelo vona.”
MAR 9:1 Muri i taki ria i ta maea, “A taki muholi mua, i ranga ne mua mu pesi koea ngane, i uka ma mu gu mate ma, bara mu masia a harikianga na Vure ge valai turana nitora.”
MAR 9:2 Muri na parava i polotara e Isu i tuli kunana e Petrus, e Iakop, e Ioanes, to sike na lolo dagi. Na tahuna to made vonga, e Isu i mareli na matane tou.
MAR 9:3 A varakia vona i para hateka, i kea hateka. I uka tara viri na malala ge ratea tara varakia ge kea maea.
MAR 9:4 Muri e Elaisa e Moses ru bele vakaturutu, ru ta turane Isu.
MAR 9:5 Lakea e Petrus i takia e Isu, “Mari ni tovo, i kamumu hateka te valai koea. Mete ge hae a kape ge tolu, ne vomu tara, ne Moses tara, ne Elaisa tara.”
MAR 9:6 E Petrus i ta tavulavula, a vuhuna to mangenge hateka.
MAR 9:7 Muri a bubu i valai i kavitagu tou. To longoa a ngava i pagitala na bubu i ta maea, “Ra bakovi iea e tugu, a hategu. Moto longo maia a nitana.”
MAR 9:8 Na tahuna to mata viliha lae, to turutu, i uka ma to matai ranga a viri. E Isu kunana i pepesi vonga.
MAR 9:9 Na tahuna to laho puru, e Isu i taki tora tou nahea to go vakalongoa tara viri, to go mangulu mavonga ge harena na tahuna a Tuna Bakovi ge pesi rike mule na matenga.
MAR 9:10 To ruhuloloa ne tou a ngava, lakea to vanana vona ra ngava ge “pesi rike mule na matenga,” i navai tavulai.
MAR 9:11 Muri to nanea, “I navai e huriki a mari na vinara ri takia e Elaisa ta ge valai muga?”
MAR 9:12 E Isu i koli i ta maea, “I muholi, i takia e Elaisa ge valai muga, ge rata karaba a maki lobo. Pali ge navai ra nita ni here puru muga i taki a Tuna Bakovi bara i bole a nimadihi hateka, e huriki lobo ri gi marikoi vona?
MAR 9:13 A taki mua, e Elaisa i valai pali. Ri rata virihia vona a maki lobo ri ngaru ri gi rata virihia vona, i muri mai a ngava ni here puru hosi.”
MAR 9:14 Na tahuna e Isu, e Petrus, e Iakop, e Ioanes to bele taho e huriki a murimuri ranga, to matai e huriki ala kupo ri vapopo halui ria. E huriki a mari na vinara ri vahehe turana e huriki a murimuri.
MAR 9:15 Na tahuna e huriki ri vapesihi ri masia e Isu i bele, ri vivi vona, lakea ri nunu lokovonga, ri gi taguia.
MAR 9:16 Lakea e Isu i nana ria, “A ra mu vahehe vona?”
MAR 9:17 A bakovi tara i koli i ta maea, “Mari ni tovo, a tuli vilia vomu e tugu a bakovi. I dili vona a hanitu i ratea i ngavarubu.
MAR 9:18 Na parava ranga a hanitu i ratea i boru puru na malala. I bubu vona a vere a ngavana, i vaheri a ngina, i katoro ia. Iau a taki e huriki a murimuri vomu ta ri gi lili talea a hanitu, pali ri keri.”
MAR 9:19 Lakea e Isu i koli, i ta maea, “Mua e huriki na tahuna mona, i uka ma mu luhoi torea a Vure. Ge navai? Ga hatenono mavonga ni dava mua, mu gu luhoi tora iau?” Muri i takia a bakovi iea, i ta maea, “O tuli vilia e tumu.”
MAR 9:20 Lakea ri tuli vilia vona. Na tahuna a hanitu i masia e Isu, i malaviriri kunana i ratea a riau i tangitoru. I boru puru na malala, i tohi lae, i bubu vona a vere a ngavana.
MAR 9:21 Lakea e Isu i nanea e tamana koma, “Garika i tubu vona a gilanga iea?” E tamana i koli i ta maea, “I tubu na tahuna i kiroko vona.
MAR 9:22 I balaka kupo a hanitu i voro rikea na kanono, i voro purua na naru ta ge rabalakia. Pali ioe bara o kara ni ratea tara maki, o dodo maria o kori maria.”
MAR 9:23 Lakea e Isu i ta maea, “I navai o ta maea, ‘Pali ioe bara o kara?’ A maki lobo a maki tavula na viri i luhoi tora iau.”
MAR 9:24 E tamana i malaviriri kunana i koli, i ta maea, “A luhoi tora ioe, pali o tuhori iau na tahuna i uka ma a luhoi tora ioe!”
MAR 9:25 Na tahuna e Isu i matai e huriki ri nunu valai tabukoi ne ria, i tahatea a hanitu i ta maea, “Ioe a hanitu voupatuli, a ngavarubu, a taki tora ioe, o pagitala vona, naha ni dili tabu vona.”
MAR 9:26 Lakea a hanitu i haloho, i ratea a koma i tangi torutoru, muri i pagitala vona. A koma ngane i mata manga i mate, lakea e huriki ri ta maea, “I mate pali.”
MAR 9:27 Pali e Isu i lokovonga, i nugua a limana i tuli pesia.
MAR 9:28 Na tahuna e Isu i dili na ruma, e huriki a murimuri vona ri nana kapiloho ia, “I navai mi keri ni lili talea a hanitu iea?”
MAR 9:29 E Isu i koli, “A hanitu maea, i uka ma ge pagitala tavula. Mu vasileki, mu peremu taro, muri bara i pagitala.”
MAR 9:30 Muri ri pe a hini ngi, ri laho polo vona e Galili. E Isu i uka ma i ngaru e huriki ri gi lohoka vona a hini ri made vona,
MAR 9:31 a vuhuna i tovo e huriki a murimuri vona. I taki ria, i ta maea, “A Tuna Bakovi bara ni habi na limane huriki a bakovi, ri gi rabalakia. Muri na parava i tolu bara i pesi rike mule na nimate.”
MAR 9:32 I uka ma ri longokilalea a pelegona ngava, pali ri mangenge ni nanea e Isu.
MAR 9:33 Ri lakea na tanga e Kapernaum. Na tahuna ri made na ruma tara, lakea e Isu i nana e huriki a murimuri vona, “A ra maki mu vata vona na dala?”
MAR 9:34 Pali ri mangaulu kunana, a vuhuna ri vanana vona na dala, ne rei ne ria i dagi hateka.
MAR 9:35 Lakea e Isu i made puru i gale lokovonga vona e huriki a murimuri ala ravulu a polona i rua, i taki ria, “E rei i ngaru ni muga, ge ia a iku, a vora ne huriki lobo.”
MAR 9:36 Muri i vakapesia na kurukurune ria a koma kiroko. I boko rikea, i taki ria,
MAR 9:37 “E rei a viri i tagui a koma kiroko maea na ragu, i tagui iau. E rei a viri i tagui iau, i taguia ra viri i rudu iau a valai.”
MAR 9:38 Muri e Ioanes i ta maea, “Mari ni tovo, mi masia tara bakovi i lili tala a hanitu na ramu, lakea mi takia nahea ge rata tabua a naro iea, a vuhuna i uka ma ia e turane hita.”
MAR 9:39 Pali e Isu i taki ria i ta maea, “Naha ni hatekakaria. I uka tara viri i rata a nivakasiri na ragu muri ge pagepolo ge ta hale nau.
MAR 9:40 A viri i uka ma i rata hale hita, ia e turane hita.
MAR 9:41 A taki muholi mua, e rei a viri i habi a naru ne mua na ragu a vuhuna mua a tara ne Kristo, muholi hateka bara i bole a mapana.
MAR 9:42 “Pali e rei a viri ge ratea a koma kiroko maea, ra i luhoi tora iau, ge dili na naro hale, bara i kamumu hateka ni gi topi na lohona a kedo dagi, ni gi voro puru na utu, ge pasiri.
MAR 9:43 A limamu tara ge rata ioe go rata a rabu hale, o palakudua o vurokia, ma go puru na kanono i uka ma i mate kilala turana limamu i rua. I kamumu bara o tahoka a limamu i taku kunana, o bole a nimahuri vakaroro.
MAR 9:45 A vahamu ge rata ioe go rata a rabu hale, o palakudua, o vurokia, ma ni gi voro puru ioe na kanono turana vahamu i rua. I kamumu bara o tahoka a vahamu i taku kunana, o bole a nimahuri vakaroro.
MAR 9:47 Pali a matamu tara ge rata ioe go rata a rabu hale, o sigi talea, ma ni gi voro puru ioe na kanono turana matamu i rua. I kamumu bara o tahoka a matamu i taku kunana, o dili na harikianga na Vure.
MAR 9:48 Ra tanga na kanono iea, ‘a maka mata kiroko ri pidi lae na kakaine huriki, i uka ma ri mate kilala. Pali a kanono tara i uka ma ge mate.’
MAR 9:49 “E huriki a prister ri ru a sol na maka nihabi, ne vona ni rata a nihabi ge malamala na matana Vure. I mavonga kunana, a kanono ge bele ne huriki lobo.
MAR 9:50 “A sol a maki kamumu. Pali ge lobo a namina, mu gu rata navia ge tahoka a namina tabu? Mu nami manga a sol, mu vakabele a nivalemu ne huriki ri luhoi tora iau.”
MAR 10:1 Muri e Isu i pea a tanga iea, i tulu poloa a naru e Iordan, i lakea na robo e Iudea. I mavonga tabu e huriki lobo ri lakea vona, i vara ria, i manga a hini i rata vakaroro.
MAR 10:2 E huriki a Pariseo ranga ri valai ri gi tonia. Ri nanea, “A vinara i ta navai? A bakovi ge pilea e girihina, o i uka?”
MAR 10:3 E Isu i koli, i nana raia, “Pali e Moses hosi i taki navai mua?”
MAR 10:4 Ri ta maea ria, “Hosi e Moses i longo ne huriki e tubune mia, i taki a bakovi bara i habia ne girihina a raukea na nivapile, muri bara i tonoa ge vano.”
MAR 10:5 I koli ria, i ta maea, “E Moses i rata mavonga a vuhuna mu gigi tora hateka, lakea i here purua ra vinara iea.
MAR 10:6 Pali na tahuna a Vure i ratarike a maki lobo, ‘I ratarike varago a bakovi a ngatavine.’
MAR 10:7 ‘I mavonga, a bakovi bara i pe e tamana e kinana, i madoko turane girihina,
MAR 10:8 a kakaine rua ge taku kunana.’ “Ngane i uka ma ru ala rua, ru ala taku kunana.
MAR 10:9 I mavonga kunana, ra maki a Vure i varomu palupu, i uka tara viri ge pugea.”
MAR 10:10 Na tahuna ri made tabu na ruma, e huriki a murimuri ri nanea e Isu vona ra ngava i takia.
MAR 10:11 I koli i ta maea, “A bakovi i pilea e girihina, i parangi tabu a ngatavine tara, ra bakovi iea i mole, i rata halea e girihina.
MAR 10:12 A ngatavine bara i pilea e girihina, i parangi na bakovi tara, ra ngatavine iea i mole.”
MAR 10:13 Ni tuli lakea ne Isu e huriki a koma kiroko, ge ru langa a limana ne ria. Pali e huriki a murimuri ri tahate ria.
MAR 10:14 Na tahuna e Isu i matai a naro ri rata, i madihi a hatena, i taki ria, “Naha ni hatekakari e huriki a koma. Mu taparaki ria ri gi valai nau, a vuhuna a harikianga na hunu ne vone ria e huriki a hulu nga.
MAR 10:15 A taki muholi mua, e rei a viri i uka ma i ngaru a Harikianga na Vure ge manga e huriki a koma nga, i uka ma ge dili vona.”
MAR 10:16 Muri i boko rike e huriki a koma, i ru langa a limana ne ria, i gamai ria.
MAR 10:17 Na tahuna e Isu i pesi rike i vakatubu ni laho, a bakovi tara i nunu lakea vona, i turume puru na ngalana. I nanea e Isu i ta maea, “Mari ni tovo, o kamumu hateka. A ra maki ga ratea ga bole a nimahuri vakaroro?”
MAR 10:18 Lakea e Isu i ta maea, “I navai o taki iau a kamumu? I uka tara viri ge kamumu. A Vure kikeri kunana a viri i kamumu.
MAR 10:19 O lohoka vona a vinara nga, ‘Naha ni rabalaki a viri, naha ni mole, naha ni panaho, naha ni padi virihi tavula a viri na ngava, naha ni marikau, o togo e tamamu e kinamu.’”
MAR 10:20 Lakea i vakalongoa e Isu i ta maea, “Mari ni tovo, na tahuna a kiroko vona i valai i harena mona, a muri mai lobo a vinara nga.”
MAR 10:21 E Isu i matanonoa, i ngaru hatekea, lakea i takia, “A maki tara i uka ma o ratea ma. O vano o habi a maki lobo vomu ni gi kona. O bole a mapana o habi ne huriki a matasia, bara o tahoka a mahala na hunu. Muri o valai o muri nau.”
MAR 10:22 Na tahuna i longoa a ngava iea, i mata kumamu. I pesi rike i vano, i dodo hateka, a vuhuna i tahoka hateka a mahala.
MAR 10:23 Lakea e Isu i matanono e huriki a murimuri vona, i taki ria, “I madihi hateka ne huriki a bakovi na mahala ri gi dili na harikianga na Vure!”
MAR 10:24 E huriki a murimuri ri turutu vona a ngava iea. Pali e Isu i ta tabu, i ta maea, “Mua e huriki e tugu, i madihi hateka ne huriki a bakovi na mahala ri gi dili na harikianga na Vure!
MAR 10:25 A kamel i keri ni dili na dupi na kavato. I mavonga kunana, a bakovi na mahala i uka ma ge dili na harikianga na Vure.”
MAR 10:26 Ri turutu hateka, lakea ri vanana mule ne ria, “Pali e rei ngane ge bole a nimahuri vakaroro?”
MAR 10:27 E Isu i matanono ria, i taki ria, “A bakovi kunana i keri. Pali a Vure i uka ma ge keri. A maki lobo a maki tavula na Vure.”
MAR 10:28 Lakea e Petrus i ta maea, “Mia mi pe lobo a maka maki ne mia, mi muri mai ioe!”
MAR 10:29 E Isu i koli, i ta maea, “A taki muholi mua, e huriki lobo ri luhoi tora iau, ri longo mai a Velenga Kamumu nau, lakea ri pe a tanga ne ria, e turane ria, e kurabane ria, e kinane ria, e tamane ria, e tune ria, a hania ne ria
MAR 10:30 bara ri bole balaka kupo tabu koea na malala. Bara ri bole a maka tanga i kupo, e turane ria i kupo, e kurabane ria i kupo, e kinane ria i kupo, e tune ria i kupo, a hania ne ria i kupo. A maka nimadihi ranga bara ri bole i kupo. Pali na tahuna muri ma, bara ri bole a nimahuri vakaroro.
MAR 10:31 I kupo e huriki ri muga ngane, bara ria a iku. Pali i kupo e huriki ri iku ngane, bara ri muga.”
MAR 10:32 E Isu i muga ria, ri laho sike o Ierusalem. E huriki a murimuri vona ri turutu, pali e huriki ri muri ne ria, ri mangenge. Lakea e Isu i tuli tabu lakea na gaga e huriki a murimuri vona ala ravulu a polona i rua, i taki ria vona a maki ge bele vona.
MAR 10:33 I taki ria i ta maea, “Mu longo. Ngane si gi sike o Ierusalem. A Tuna Bakovi bara ni habi na limane huriki a prister dagi, a mari na vinara. Bara ri taki ia ni gi rabalaki, muri bara ni habi lakea ne huriki a bakovi i uka ma ria a Iuda.
MAR 10:34 Bara ri padikedea, ri kalupe tahoa, ri lagua, ri rabalakia. Muri na parava i tolu, bara i mahuri mule.”
MAR 10:35 Muri e tune Sebedi ala rua, e Iakop e Ioanes, ru lakea ne Isu, ru ta maea, “Mari ni tovo, o habi ne maria a maki miri ngaru.”
MAR 10:36 Lakea e Isu i nana rua, “A ra muru ngarua?”
MAR 10:37 Ru koli, ru ta maea, “Na tahuna o hamule valai tabu na bagetuanga, miri ngaru ge made na kanemu tara, na maurimu tara.”
MAR 10:38 Lakea e Isu i ta maea, “I uka ma muru lohoka vona a ngava muru takia. Ra marua, muru kara ni bolena a nimadihi a tabukoi ga bolea? Muru kara ni mate manga iau a tabukoi ga mate?”
MAR 10:39 Ru ta maea, “Miri kara.” Lakea e Isu i taki rua i ta maea, “Muholi muru gu bole a nimadihi turagu. Muru gu mate manga iau.
MAR 10:40 Pali ni made na kanegu tara, na maurigu tara, i uka ma a maki nau ga habi. A Vure i kisi puru ra tabeke nga, i tahoka a tahona bara ru made vona.”
MAR 10:41 Na tahuna e huriki a murimuri ala ravulu ri longo a ngava ru taki, i madihi a hatene ria.
MAR 10:42 Lakea e Isu i gale palupu ria i taki ria, “Mu lohoka vona e huriki a matakari ne huriki i uka ma ria a Iuda, ri bibi rike mule ria. E huriki a bakovi tora ne ria ri matakari hateka ria.
MAR 10:43 Pali mua, i uka ma mu gu rata mavonga. E rei ne mua i ngaru ge ia a viri dagi, ge ia a vora ne mua.
MAR 10:44 E rei ne mua i ngaru ni muga, ge ia a vora ne huriki lobo.
MAR 10:45 I mavonga a vuhuna a Tuna Bakovi i uka ma i valai ni gi vora vona. I valai ge ia a vora, ge mate, ge korimule huriki ala kupo.”
MAR 10:46 Muri ri bele o Ieriko. E Isu turane huriki a murimuri vona, turana e huriki ala kupo, ta ri gi pe a tanga dagi. A bakovi i kepa, a rana e Bartimeus (i manga “e tune Timeus”) i mamade na dahana dala, i nonongi a maki.
MAR 10:47 Na tahuna a bakovi iea i longoa e Isu o Nasaret i polo, i vakatubu ni gale dagi, i ta maea, “Isu, Tune Davit, o dodo iau!”
MAR 10:48 E huriki ala kupo ri tahatea, ri takia ge vulai, pali i gale dagi hateka, i ta maea, “O Tune Davit, o dodo iau!”
MAR 10:49 Lakea e Isu i pesi tata, i ta maea, “Mu tuli vilia.” Ri takia a kepa, ri ta maea, “O vivi! O pesi rike! E Isu i gale ioe.”
MAR 10:50 I puri purua a kala i kavitagu a bitona vona, i pesi rike, i lakea ne Isu.
MAR 10:51 Lakea e Isu i nanea, “A ra o ngarua ga ratea?” A kepa i ta maea, “Mari ni tovo, a ngaru ni matapara.”
MAR 10:52 Lakea e Isu i ta maea, “O vano, o matapara a vuhuna o luhoi tora iau.” I malaviriri kunana i matapara, i ramaia e Isu.
MAR 11:1 E Isu turana e huriki a murimuri vona, ri valai tabukoi o Ierusalem. Ri bele na tanga e Betpage, e Betani, na dahana lolo e Oliva. Lakea e Isu i rudu a murimuri vona ala rua,
MAR 11:2 i taki rua i ta maea, “Muru muga lakea na tanga na ngalane marua. Na tahuna muru dili na tanga, bara muru masia a donki karaba ni topi, i uka tara viri ge rike vona ma. Muru pugea, muru lalu vilia.
MAR 11:3 A viri tara ge nana, ‘I navai muru pugea a donki iea?’ Muru takia, ‘A Bakovi Dagi i tahoka a leho vona. I uka ma ge tabaka, bara i taparaki mulea.’”
MAR 11:4 Lakea ru vano, ru masia a donki karaba ni kolotata na dahana mataruma tabukoi na dala. Na tahuna ru pugea,
MAR 11:5 e huriki a bakovi ranga ri pesi vonga, ri nana rua, “A ra muru ratea? I navai muru pugea a donki karaba?”
MAR 11:6 Lakea ru koli manga a ngava e Isu i taki rua vona. Ri longo ne rua, ru vano.
MAR 11:7 Ru lalua a tuna donki lakea ne Isu. Ru vulala rike vona a nirodo ne rua, lakea e Isu i made langa vona.
MAR 11:8 E huriki ala kupo ri vulala puru na dala a nirodo ne ria, pali ranga ri putu a pagana rou na hania, ri vahata.
MAR 11:9 E huriki ri muga, e huriki ri muri, ri lahihi rike, ri ta maea, “Si gi kavurikea a Vure! Ni gi kavurike a viri i valai na rane Bakovi Dagi.
MAR 11:10 Ni gi kavurike a harikia ne tamane hita, e Davit, i valai ngane. Si gi kavurikea a Vure Meli Liu!”
MAR 11:11 E Isu i bele o Ierusalem, muri i lakea na roho na Vure. I laho vonga, i matai a maki lobo. Muri i tuli a murimuri vona ala ravulu a polona i rua, ri lakea o Betani a vuhuna i malunga liu pali a hini.
MAR 11:12 Na parava muri ri pea e Betani, ri vano. E Isu i vitolo,
MAR 11:13 lakea i mata muga, i masia a kai a pik i buroro a pagana. Lakea i vano ge masia, i vona a kanena, o i uka. I bele vona, i masia i uka kanena. A pagana kunana, a vuhuna i uka ma a tahuna na kai a pik ge vua vona.
MAR 11:14 Lakea i takia a kai, i ta maea, “I uka tara viri ge kani tabu a vuamu.” E huriki a murimuri vona ri longoa ra ngava i takia.
MAR 11:15 Na tahuna ri bele o Ierusalem, e Isu i dili na tabeke na roho na Vure, i lili tala e huriki ri vakona, ri vahabi a maki. I pulo a dede ne huriki ri vangoli a moni, a gula ne huriki ri vahabi a balu.
MAR 11:16 I ta pupukari ria vona, nahea ri gi kaloho a popou, ri gi dili na tabeke na roho na Vure.
MAR 11:17 Lakea i vara ria, i ta maea, “A ngava ni here puru na Hinere i ta maea, ‘A roho nau ne vona e huriki a bakovi na tanga lobo ri gi vasileki vona.’ Pali mua mu ratea i manga a hini i haniu vona e huriki a panaho.”
MAR 11:18 E huriki a prister dagi, a mari na vinara, ri longoa, ri vakatubu ni matakanea a dala ri gi rabalaki ia vona. Ri mangenge vona, a vuhuna e huriki lobo ri turutu na vinara vona.
MAR 11:19 Na malunga ri pea a tanga dagi.
MAR 11:20 Na hatelanga ri laho lokovonga, ri masia a kai a pik iea i malai liu, i tubu na kana, i rike liu na pagana.
MAR 11:21 E Petrus i longovisia, lakea i takia e Isu, “Mari ni tovo! Mata lakea! Ra kai a pik o rudurahea, i malai pali!”
MAR 11:22 Isu i koli, i ta maea, “Mu luhoi torea a Vure.
MAR 11:23 A taki muholi mua, a viri tara bara i takia a lolo iea, ‘O malaga rike, o to na utu.’ pali i uka ma i loho rua, i luhoi torea a maki i taki ge bele, bara i bele.
MAR 11:24 I mavonga, a taki muholi mua, na tahuna mu vasileki, a ra maki mu nana vona, mu luhoi tora manga mu bole pali, bara mu bole.
MAR 11:25 Na tahuna mu vasileki, mu longovisi ranga naro hale ni rata virihi mua vona, mu lohopile, lakea e Tamane mua na hunu tara bara i puga a naro hale ne mua.
MAR 11:26 Pali mua, i uka ma mu gu lohopile a naro hale na viri, e Tamane mua, ra i made na hunu, ia tara i uka ma ge puga a naro hale ne mua.”
MAR 11:27 E Isu turana e huriki a murimuri vona ri luve tabu o Ierusalem. Na tahuna e Isu i lalaho na roho na Vure, e huriki a prister dagi, a mari na vinara, turana e huriki a gare, ri masia, ri valai vona,
MAR 11:28 ri nanea, “O bole vai a nitora o rata a maki nga? E rei i taki ioe go rata a maki nga?”
MAR 11:29 E Isu i koli, i ta maea, “Ga nana taro mua. Mua bara mu kolivisia a ninana iea, bara taki mua vona e rei a viri i habia nau a nitora, a rata a maki nga.
MAR 11:30 A ninana nau i maea, ra hilova ne Ioanes, i valai na Vure, o i valai na bakovi tavula kunana? Mu vakalongo iau ngane!”
MAR 11:31 Ri vata, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’
MAR 11:32 Pali bara si takia a leho vona i valai na bakovi kunana, ra ngava iea tara i uka ma i kamumu.” Ri ta maea a vuhuna ri mangenge ne huriki. E huriki lobo ri luhoia e Ioanes, ta ia a propet.
MAR 11:33 Lakea ri koli, ri ta maea, “I uka ma mi lohoka vona.” Lakea e Isu i ta maea, “Pali iau tara, i uka ma ga taki mua vona e rei a viri i habia nau a nitora ni rata a maki nga.”
MAR 12:1 Muri i vakatubu ni taki ria na nita vakakika, i ta maea, “A bakovi tara i varo a vain na hania vona. I tura haluia na nure. I kelia a malala, i kisia ge a hini ni paha bebe a vain vona. I haea a dede langalanga ne vona ni matakari a hania. Muri i habi lakea ne huriki a mari na leho, ri gi leho taro vona. I vano ia, i havai na robo basi.
MAR 12:2 I tabukoi ngane a keva ni mirio a vain, lakea i rudua a vora vona, ge lakea ne huriki a mari ni leho ge bole ranga kanena vain.
MAR 12:3 Pali ri ubia a vora, ri tono mulea, i laho a vahana a limana i hamule.
MAR 12:4 Muri i rudu tabua tara vora. Na tahuna i bele ne ria, ri bikevea a gina, ri harogia.
MAR 12:5 I rudu tabua tara vora. Na tahuna i bele ne ria, ri rabalakia. Muri i rudu lokovonga e huriki a vora ala kupo. Lakea ri ubi ranga, ri bimate ranga.
MAR 12:6 Pali a bakovi ala taku kunana i tabana, e tuna a hatena. I rudua ngane, a vuhuna i luhoi maea, ‘Bara ri togoa e tugu!’
MAR 12:7 “Pali e huriki a mari na leho ri varodo a ngava, ri ta maea, ‘Ra bakovi iea bara i bole a murine tamana. Si rabalakia, si gi bolea a hania na vain na tahuna e tamana i mate.’
MAR 12:8 Lakea ri lakavua, ri bimatea, ri voro talea a podana na hania na vain.
MAR 12:9 “Pali a ra ge ratea muri ma ra a tahona hania na vain? Bara i vano, i rabalaki e huriki a mari na leho, i habia ne huriki ranga a hania na vain.
MAR 12:10 Pali i uka ma mu gi hosi ra ngava i tabuli na Hinere? I ta maea, ‘Ra kedo e huriki a mari ni hae a ruma ri marikoi vona, ngane i bele a vuhu kedo ni hae a ruma vona.
MAR 12:11 E Bakovi Dagi i ratea a maki iea i bele, i kamumu hateka na matane hita.’”
MAR 12:12 Muri ri matakanea a dala ri gi lakavu e Isu vona, a vuhuna i padi ria a mana vona a nivakakika i ratea. Pali ri mangenge ne huriki, lakea ri pe purua, ri vano.
MAR 12:13 Muri ni rudu ranga Pariseo turana ranga bakovi na tara ne Herod, ri gi lakea ne Isu ri gi ratea ge taki ranga ngava, ri gi padi virihi ia vona.
MAR 12:14 Na tahuna ri luve, ri nanea, “Mari ni tovo, mi lohoka vomu, ioe a bakovi ni ta muholi, i uka ma o mangenge vona tara bakovi. O rata a naro i palupulupu vona e huriki a bakovi lobo. O vara kunana na naro na Vure i muri mai a ngava muholi. A vinara i taki si gi habi a takis ne Kaiser, o i uka?
MAR 12:15 Si gi habi o ge uka?” Pali e Isu i lohoka vona a taminga ne ria, lakea i nana ria, “I navai mu ngaru ni toha iau? Mu bole vilia nau tara moni ga masia.”
MAR 12:16 Ri bole vilia vona a moni, lakea i nana ria, “A hanune rei, a rane rei i tabuli vona?” Ri koli, ri ta maea, “A hanune Kaiser, a rane Kaiser i tabuli vona.”
MAR 12:17 Muri e Isu i taki ria i ta maea, “Mu habi ne Kaiser a maki ne Kaiser. Mu habi na Vure a maki na Vure.” Na tahuna ri longoa a ngavana, ri ngapa.
MAR 12:18 Muri e huriki a Sadusi ri lakea vona. Re huriki nga ri taki ta a viri i mate i uka ma ge pesi rike mule tabu.
MAR 12:19 Lakea ri nanea, “Mari ni tovo, e Moses i here puru i taki a bakovi i mate, i pe purua e girihina, pali i uka e tune rua, e tarina bara i parangi tabu a havuri vona, ge vakabelea a hamona.
MAR 12:20 I tahoka e maki tarina mai ala polorua. A tabua i parangi, muri i mate. Pali i uka ma i vakabele e tuna.
MAR 12:21 A pahamuri tabua i parangi a havuri vona, muri ia tara i mate, pali i uka tabu e tuna. A tolune ria tara i mavonga.
MAR 12:22 I muholi ngi, ria lobo i uka ma ri vakabele a koma vona. Ri mate lobo, muri a ngatavine i mate.
MAR 12:23 Muri ma, na tahuna e huriki ri pesi rike mule na nimate, ra ngatavine iea ge girihine rei muholi? Ria lobo ri parangi vona.”
MAR 12:24 E Isu i koli, i ta maea, “A niluhoi ne mua i varoru, a vuhuna i uka ma mu lohoka vona a Hinere, a nitora na Vure.
MAR 12:25 Muri ma, na tahuna e huriki ri gi mahuri mule na matenga, i uka ma ri gi vaparangi. Bara ri made manga e huriki a agelo na hunu.
MAR 12:26 Pali a nitane huriki ri mate pali, ri gi pesi rike tabu, naha ni nana rovi vona. Na hinere ne Moses, a nitana kai kiroko i nono, a Vure i takia e Moses i ta maea, ‘Iau a Vure ne Abraham, ne Isak, ne Iakop.’
MAR 12:27 I uka ma ia a Vure ne huriki ri mate. Ia a Vure ne huriki ri mahuri. A niluhoi mua i varoru hateka!”
MAR 12:28 A bakovi tara, a mari na vinara i valai, i longo e huriki a Sadusi ri varata na ngava turane Isu. I longoa e Isu i koli kamumu a maka ninana, lakea i nanea, “Na maka vinara lobo, e rei a vinara i dagi hateka?”
MAR 12:29 E Isu i koli, i ta maea, “A ngava dagi hateka ra iea, ‘Mua e huriki a Israel mu longo! E Bakovi Dagi a Vure ne hita, ia kunana e Bakovi Dagi.
MAR 12:30 O ngarua e Bakovi Dagi a Vure vomu na hatemu lobo, na hanumu lobo, na niluhoi vomu lobo. O ngaru hatekea na nitora lobo vomu.’
MAR 12:31 A ruana i maea, ‘O ngarua e turamu i manga a hini o ngaru mule ioe.’ I uka tara vinara ge dagi vona a vinara nga.”
MAR 12:32 A bakovi i koli, i ta maea, “Mari ni tovo, o ta muholi. I muholi a ngava o taki, a Vure i taku kunana, i uka viri tara tabu.
MAR 12:33 Si gi ngarua na hatene hita lobo, na niluhoi ne hita lobo, na nitora ne hita lobo. Si gi ngaru e huriki lobo i manga a hini si ngaru mule hita. Ra vinara nga i dagi hateka na maka nihabi gutu vuro, turana maka nihabi ranga.”
MAR 12:34 E Isu i longoa a bakovi iea i koli malamala, lakea i takia, “I uka ma o basi na harikianga na Vure.” I vakatubu vonga, e huriki ri mangenge ni nanea.
MAR 12:35 Na tahuna e Isu i vavara na tabeke na roho na Vure, i nana e huriki, “I navai e huriki a mari na vinara ri takia e Kristo e tune Davit?
MAR 12:36 A Hanu Kiripiripi i habi a niluhoi ne Davit, i ta maea, ‘A Bakovi Dagi i takia a Bakovi Dagi nau, “O made na limagu a kanegu, ge harena na tahuna ga ratapile e huriki a pile vomu.” ’
MAR 12:37 “E Davit i galea ra bakovi iea a Bakovi Dagi vona. Pali i navai tabu ge ia e tune Davit?” Na tahuna e huriki ri longo a maka nitane Isu, ri vivi vona.
MAR 12:38 Na tahuna e Isu i vara ria, i taki ria, i ta maea, “Mu matadoko ne huriki a mari na vinara. Ri ngaru ni rodo a varakia olaola, ri gi laho lae. Ri ngaru e huriki ri gi tagui ria na mada ni vahabi ni vakona maki.
MAR 12:39 Ri ngaru ni made muga na roho na vaponga. Ri ngaru ni made na gula kamumu na habu.
MAR 12:40 Ri tami e huriki a havuri ri panaho a malala ne ria. Muri ri rata a nivasileki i ola, ri gi mata kamumu na matane huriki. Muri ma, na parava na nipelekado a ngava, bara ri bole a nimadihi ge dagi hateka.
MAR 12:41 E Isu i vano i made tabukoi na hini ni ru a nihabi vona, i matanono e huriki ri ru dili a moni ne ria na tava na roho na Vure. E huriki a bakovi na mahala ala kupo ri habi dili a moni dagi.
MAR 12:42 I valai ngane a havuri matasia, i ru dili a moni kiroko i rua, i manga a toea i rua kunana.
MAR 12:43 Lakea e Isu i gale valai vona e huriki a murimuri vona, i taki ria, “A taki muholi mua, ra havuri matasia iea i ru dili a moni dagi na tava, i rangi lobo e huriki ranga.
MAR 12:44 E huriki lobo ri habi dili a moni ri uka leho vona. Pali ra ngatavine iea, a matasia, i habi dili lobo a maka moni vona i tahoka.
MAR 13:1 Na tahuna e Isu i laho tala na roho na Vure, tara murimuri vona i takia, “Mari ni tovo, o matai a maka ruma kamumu nga! O matai a maka kedo dagi ni hae ria vona!”
MAR 13:2 E Isu i koli, i ta maea, “A maka roho dagi nga o matai, i uka tara kedo ge tabuli langa vona tara kedo tara. A kedo lobo bara ni ubipuka puru.”
MAR 13:3 Na tahuna e Isu i made na lolo e Oliva i pesi na tabeke tara, i mata lakea na roho na Vure. Lakea e Petrus, e Iakop, e Ioanes, e Andreas to nana kapilohoa,
MAR 13:4 “O taki mateu, garika ge bele a maki nga? Pali ge mata navai a kilakila na hini tabukoi ge bele a maki nga?”
MAR 13:5 E Isu i koli, i ta maea, “Mu mamata, ma ge tami mua e huriki.
MAR 13:6 E huriki ala kupo bara ri valai na ragu ri gi taki ria ta ria e Kristo, lakea bara ri tami e huriki ala kupo.
MAR 13:7 Na tahuna mu longo a ngava na vabinga, a velengana vabinga, naha ni turutu. A maka maki nga bara ri bele taro, pali a nilobona malala i tabana.
MAR 13:8 E huriki na robo tara bara ri vaubi turana e huriki na robo tara. A kabu na hariki tara bara i vaubi turana kabu na hariki tara. A maka vuruke, a pago bara i bele na tanga legelege. Ra maki nga bara ri bele muga, i manga a nimadihi na ngatavine i pahea a koma.
MAR 13:9 “Mu tagari mua. Bara ni ru mua na limane huriki a bakovi ni pelekado a ngava, bara ni lagu mua pololilo na roho na vaponga. Bara ri vakapesi mua na matane huriki a matakari, a hariki, a vuhuna mu ramai iau. Na naro iea kunana bara mu vakalongo ria na Velenga Kamumu.
MAR 13:10 A Velenga Kamumu bara ni vakalongo taro na tanga lobo.
MAR 13:11 Na tahuna ni lakavu mua, ni bole mua lakea na murina ngava, naha ni loho pae vona a ngava mu gu taki. Mu taki kunana a ngava a Hanu Kiripiripi ge habi ne mua, a vuhuna i uka ma ge mua ra mu gu ta. A Hanu Kiripiripi ra viri bara i ta polo ne mua.
MAR 13:12 “A bakovi bara i lohopile vona e turana, bara i taki e huriki ri gi bimatea. A bakovi bara i lohopile e tuna, bara i taki e huriki ri gi rabalakia. E huriki a koma bara ri marikoi e tamane ria, ri taki e huriki ri gi bimate ria.
MAR 13:13 E huriki lobo bara ri marikoi mua a vuhuna mu ramai iau. Pali e rei i pesi tora ge harena na parava i mate vona, a Vure bara i korimulea.
MAR 13:14 “Na tahuna mu masia a bakovi muma hateka i ratapile a maki, i pesi na hini i uka ma a murina, pololilo na roho na Vure (A viri i gia a ngava iea ge longokilalea), e huriki ri made o Iudea ri gi ha lakea na lolo.
MAR 13:15 Pali a viri i pesi polovavo na ruma vona, i uka ma ge dili na ruma ge bole ranga maki.
MAR 13:16 A viri i leho na hania, i uka ma ge hamule na tanga ge bole a varakia vona.
MAR 13:17 E huriki a ngatavine ri singou, e huriki a ngatavine ri vakaruru, bara ri marego hateka na parava iea!
MAR 13:18 Mu vasileki a maki nga i uka ma ri gi bele na tahuna na malangia,
MAR 13:19 a vuhuna a maka parava nga bara ri hale liu na parava lobo. Hosi, na tahuna a Vure i ratarike a malala, i valai i harena mona, i uka tara parava ge hale maea. Pali muri ma, i uka ma ge hale maea tabu.
MAR 13:20 Bara a Bakovi Dagi i uka ma ge vakakapo a parava nga, e huriki lobo bara ri mate. Pali bara i vakakapo ria, ge korimule e huriki a bakovi a ngatavine i vulaki ria.
MAR 13:21 I mavonga, nahea mu gu longo mai e huriki a bakovi ri ta maea, ‘Mata valai! E Kristo ia koea,’ o ‘Mata lakea! E Kristo ia lake!’ Naha ni longo mai ria,
MAR 13:22 a vuhuna e huriki a nitamina kristo, a nitamina propet bara ri pesi rike, ri rata a maka nivakasiri dagi, a maki dagi ni turutu vona, ri ngaru ni tami e huriki. Bara i kara ria, bara ri tami tabu e huriki a bakovi a ngatavine a Vure i vulaki ria.
MAR 13:23 Ngane mu mamata! A taki muga mua vona pali a maka maki ge bele muri ma.
MAR 13:24 “Muri na maka nimadihi nga ri gi bele: ‘A haro bara i paravunu, a keva tara i uka ma ge para.
MAR 13:25 A maka hada bara ri mapasi tala na hunu, a maka nitora ri tabuli na hunu bara ni polu.’
MAR 13:26 “Na tahuna iea e huriki lobo bara ri masia a Tuna Bakovi ge valai na bubu turana nitora dagi, a nipara.
MAR 13:27 Muri bara i rudu e huriki a agelo vona, ri gi vakalipopo e huriki a viri i vulaki pali na tabeke lobo na malala a hunu.
MAR 13:28 “Mu bole a lohokanga vona a kai a balele. Na tahuna i tahoka a totona a rahana, i lubu a pagana, bara mu pasimata vona a tahuna haro i tabukoi.
MAR 13:29 I mavonga kunana na tahuna mu matai a maki nga ri bele, bara mu lohoka vona a Tuna Bakovi i valai tabukoi liu pali.
MAR 13:30 A taki muholi mua, e huriki a bakovi a ngatavine na tahuna iea i uka ma ri gi mate ma, a maka maki nga ri gi bele taro.
MAR 13:31 A hunu a malala bara ru lobo, pali a nitagu i uka ma ge lobo.
MAR 13:32 “I uka tara viri ge lohoka vona a parava, a kilala ge bele vona a maki nga. E huriki a agelo na hunu ranga i uka ma ri lohoka vona a parava iea. A Tuna Vure tara i uka ma i lohoka vona. E Tamana kunana i lohoka vona a parava iea.
MAR 13:33 Mu matadoko! Mu mamata! I uka ma mu lohoka vona a parava ge bele vona a maki nga.
MAR 13:34 I manga a bakovi i laho basi. I pea a ruma vona i taki e huriki a vora vona ri gi matakaria. I vaveru ne ria a maka leho. I takia a bakovi i matakaria a mataruma ge mamata.
MAR 13:35 Pali mua ranga mu mamata, a vuhuna i uka ma mu lohoka vona a kilala bara i hamule vona a tahona ruma. Ge hamule na malunga, o na kuru rodo, o na malabeonga, o na hatelanga pokopoko.
MAR 13:36 Ma ge valai vakaturutu, ge matai mua mu gu mahita.
MAR 13:37 Ra maki a taki mua vona, a taki e huriki lobo vona. Mu mamata!”
MAR 14:1 A parava i rua muga na Habu na Nipagepolo, turana Habu na Bret i Uka Is, e huriki a prister dagi turana e huriki a mari na vinara ri matakana a dala ri gi tami e huriki, ri gi lakavua e Isu, ri gi rabalakia.
MAR 14:2 Lakea ri ta maea, “Nahea si gi rabalakia na parava na habu, ma ge vaubi e huriki.”
MAR 14:3 Na tahuna e Isu i made na tanga e Betani, i kani na ruma ne Simon, hosi i tahoka a patala. Na tahuna i kakani, a ngatavine tara i valai maia, i bolea a ulo ni rata na kedo a alabasta. A ulo iea i vona a nibiri manginoro. Ra nibiri iea i dagi hateka a mapana, a vuhuna ni rata na vutuna kai a nard. Lakea a ngatavine i bipodea a ulo, i guru puru na gine Isu a nibiri.
MAR 14:4 Pali e huriki ri made vonga ri kaha, ri vanana mule ne ria, “I navai a ngatavine iea i guru tavulea a nibiri manginoro?
MAR 14:5 Ra nibiri iea bara ni habi ni kona. A mapana i manga a mapana viri i leho na pida i taku. Muri bara ni bole a moni ni habi lakea ne huriki a matasia.” Lakea ri tahatea a ngatavine.
MAR 14:6 Pali e Isu i taki ria i ta maea, “Mu ha vona. I navai mu ngere maia? A maki i ratea nau i kamumu hateka.
MAR 14:7 E huriki a matasia bara ri made turane mua na parava vakaroro, bara mu kori ria na parava mu ngaru. Pali iau i uka ma ga made turane mua na parava vakaroro.
MAR 14:8 A ngatavine iea i ratea a maki i kara ni ratea. I guru puru a nibiri na kakaigu ne vona ni rata kamumu iau muga na nimategu.
MAR 14:9 A taki muholi mua, na tahuna a Velenga Kamumu ni vakalongo lae, e huriki na tanga lobo na malala bara ri longoa a nuverei na ngatavine iea.”
MAR 14:10 Muri e Iudas Iskariot, a turane huriki a muri­muri ala ravulu a polona i rua, i lakea ne huriki a prister dagi ge habi na limane ria e Isu.
MAR 14:11 Ri vivi ni longoa a ngava iea, lakea ri ta muholi vona ri gi habi vona ranga moni. Lakea e Iudas i davea a parava kamumu ge habia ne ria e Isu.
MAR 14:12 Ngane a mugana parava na Habu na Bret i Uka Is i bele. Na parava iea, ni lave tara tuna sipsip ge a nihabi ne vona ni luhoi mule a parava Nipagepolo. Lakea e huriki a murimuri ne Isu ri nanea, “I vai a hini o ngaru mi gi rata puru a maki ni kani vomu, go luhoi mulea a Habu na Nipagepolo?”
MAR 14:13 Lakea i rudu a murimuri vona ala rua, i taki rua, “Muru dili na tanga dagi. A bakovi i kaloho a ulo na naru ge tagui marua, muru muri vona.
MAR 14:14 Lakea muru takia a tahona roho i dili vona a vora, muru ta maea, ‘A mari ni tovo i nana vona a tabeke na mosi ge kani turana e huriki a murimuri vona na habu.’
MAR 14:15 Muri bara i vakasiri marua vona a tabekena ruma i ngavaka polomeli, i tahoka pali a gula ni made ni kado puru. Muru gutu puru vonga a maki ni kani ne hita.”
MAR 14:16 Lakea ru vano, ru dili na tanga dagi, ru matai a maka maki i manga a hini e Isu i taki rua vona. Muri ru gutu puru a maki ni kani na Habu na Nipagepolo.
MAR 14:17 Na rodo e Isu i bele turana e huriki a murimuri vona ala ravulu a polona i rua.
MAR 14:18 Na tahuna ri kakani, e Isu i taki ria, “A taki muholi mua, i tara ne mua i kani turagu ngane bara i habi iau na limane huriki a bakovi hale.”
MAR 14:19 Na tahuna ri longoa a ngava iea ri dodo, lakea ri ta takutaku, ri ta maea, “Ma ge iau?”
MAR 14:20 Pali e Isu i ta maea, “Ra bakovi iea, ia a turane mua e huriki ala ravulu a polona i rua, ra viri i lutu puru a bret turagu na tavila.
MAR 14:21 A Tuna Bakovi bara i mate, i manga a nita ni here puru hosi. Pali ra bakovi i habia na limane huriki a pile, a Vure bara i ratapilea! Bara i kamumu hateka e kinana i uka ma ge podea hosi!”
MAR 14:22 Na tahuna ri kakani, e Isu i bolea a bret, i kavurike a Vure vona, i kevea, i habi ne ria, i ta maea, “Ra bret iea a bobogu, mu bolea mu kania.”
MAR 14:23 Muri i bole rikea a kikei na vain, i kavurikea a Vure, i habia ne ria. Lakea ria lobo ri ninu vona.
MAR 14:24 Muri i taki ria i ta maea, “Ra vain iea a daragu, ge pori nau ne vona ni vakatorea a ngava muholi a Vure i rata karaba turane huriki. Ge pori ne vona ni korimule e huriki ala kupo.
MAR 14:25 A taki muholi mua, iau i uka ma ga ninu tabu a vain, bara i vano i harena na parava a ninu a vain karaba na harikianga na Vure.”
MAR 14:26 Ri kalolo lobo a linge vasileki, muri ri lakea na lolo e Oliva.
MAR 14:27 Lakea e Isu i taki e huriki a murimuri vona i ta maea, “Mua lobo bara mu ha taro iau. A ngava ni here puru na Hinere i ta maea, ‘Bara rabalakia a matakari na sipsip, bara ri ha viliha a maka sipsip.’
MAR 14:28 “Pali na tahuna ga mahuri mule, ga muga lakea o Galili.”
MAR 14:29 Lakea e Petrus i ta maea, “E huriki lobo bara ri ha, pali iau kunana i uka ma ga ha.”
MAR 14:30 E Isu i koli i ta maea, “Muholi hateka, na rodo a kureko i uka ma ge tangi balaka rua ma, bara o nana rovi iau balaka tolu ke.”
MAR 14:31 Pali e Petrus i ta puhaki hateka i ta maea, “Iau i uka ma ga nana rovi ioe. Bara mate turamu.” E huriki a murimuri lobo ri taki kunanea a ngava i taku.
MAR 14:32 Muri ri lakea o Getsemani, lakea e Isu i taki e huriki a murimuri vona i ta maea, “Mu dava iau koea, ga vano taro ga vasileki.”
MAR 14:33 I tuli kunana e Petrus, e Iakop, e Ioanes to vano turana. I lege a lohona i mava a kakaina.
MAR 14:34 Lakea i taki tou, “Iau a dodo hateka, a nidodo i popote ge rata iau ga mate. Moto made koea, moto matapara, moto mamata.”
MAR 14:35 E Isu i laho lokovonga popote, i tabuli ngala puru na malala i vasileki ni gi bole vuroki vona a nimadihi ta ge bolea.
MAR 14:36 I vasileki maea, “Aba, Tata! A maki lobo a maki tavula vomu. O bole vurokia nau a nimadihi iea. Pali a ningaru vomu, i uka ma ga ningaru nau.”
MAR 14:37 Muri i hamule lakea na murimuri vona i matai tou to mahita, lakea i vangoa e Petrus, i ta maea, “O Simon, i navai o mahita? O koi ni matapara?
MAR 14:38 Moto mamata, moto vasileki, ma moto go dili na nitoni. A hatene matou i ngaru ni ratea, pali a kakaine matou i uka ma i gao.”
MAR 14:39 E Isu i vano tabu i vasileki manga a hini muga.
MAR 14:40 Na tahuna i hamule, i matai tabu tou to mahita, a vuhuna to matatulu hateka. Na tahuna i vango tou, to ngapa.
MAR 14:41 I hamule mai tou balaka tolu, lakea i taki tou, “Ra matou, moto tabana ni mahita, ni malo? I lobo! A kilala i valai pali. A Tuna Bakovi bara ni habi na limane huriki a bakovi hale.
MAR 14:42 Moto pesi rike si gi vano! Mata lakea! A viri ge habi iau na limane huriki a pile i valai ngane.”
MAR 14:43 E Isu i tabana ni ta, lakea e Iudas, ra turane huriki ala ravulu a polona i rua, i bele malaviriri. E huriki a prister dagi, a mari na vinara, a bakovi dagi ri rudu e huriki a bakovi, ri bole a bainat a lebo, ri vano turane Iudas.
MAR 14:44 A bakovi ta ge habi e Isu na limane huriki a pile i ta turane ria, i ta maea, “A bakovi ga ngurua, ia kunana. Mu lakavua, mu tagaria, mu turari lokovongea.”
MAR 14:45 E Iudas, i malaviriri kunana i lakea ne Isu i takia, “Mari ni tovo!” Muri i ngurua.
MAR 14:46 Lakea e huriki ri lakavua.
MAR 14:47 Pali a bakovi tara i pesi tabukoi i lalu talea a bainat vona i palakudua a talingana vora na prister dagi.
MAR 14:48 Lakea e Isu i ta maea, “Ra mua, i navai mu valai turana bainat a lebo, mu gu lakavu iau? Mu rata manga iau a bakovi hale.
MAR 14:49 Na parava lobo a turane mua, a tovo pololilo na roho na Vure, pali i uka ma mu lakavu iau. Pali ngane a ngava ni here puru na Hinere ge bele muholi.”
MAR 14:50 Muri e huriki a murimuri vona ri ha taroa.
MAR 14:51 Tara riau i rea na lavalava keakea kunana i muri gosi ne Isu. Na tahuna ri lakavua,
MAR 14:52 i marisi a lavalava vona, i ha bobo ia.
MAR 14:53 E huriki a bakovi ri lakavua e Isu ri turaria lakea na ruma na prister dagi tara. E huriki a prister dagi, e huriki a gare, e huriki a mari na vinara ri vapopo vonga.
MAR 14:54 E Petrus i muri kavula basi popote vona, i lakea na mataruma na prister dagi. Na tahuna i bele vonga, i made turana e huriki a tagari, i hua a kanono.
MAR 14:55 E huriki a prister dagi turane huriki a bakovi dagi o Iuda ri toni ni matakana a ngava ri gi rabalaki e Isu vona, pali i uka ma ri matavisia tara ngava.
MAR 14:56 E huriki ranga ri valai ri tatami na ngava. Pali a ngava ne ria i vaperesi viliha.
MAR 14:57 Muri i ranga bakovi ri padi virihia na ngava ri ta maea,
MAR 14:58 “Mi longoa a bakovi iea i takia ta ge pukea a roho na Vure, ri haea e huriki a bakovi. Muri, ge lobo a parava i tolu, ge hae mule tabua, i uka ma ni gi hae na limana bakovi.”
MAR 14:59 Pali a ngava ne ria ranga i vaperesi.
MAR 14:60 Muri a prister dagi i pesi rike na matane huriki, i nanea e Isu, “I navai i uka ma o taratoto? O luhoi navai vona a ngava ni padi virihi ioe vona?”
MAR 14:61 Pali e Isu i uka ma i koli. I uka ma i takia tara ngava. Lakea a prister dagi tara i nana tabua, “I muholi ioe e Kristo, ioe a Tuna Vure, ra Vure si kavurikea?”
MAR 14:62 Lakea e Isu i koli, i ta maea, “Iau kunana. Muri bara mu masia a Tuna Bakovi, i made na limana kanena Viri i Tuhaka, ge valai turana bubu na hunu.”
MAR 14:63 Na tahuna a prister dagi i longoa a ngava iea, i rapea a varakia vona, i ta maea, “I navai si gi ngaru tabua tara viri ge habi a ngava?
MAR 14:64 Mua lobo mu longoa a bakovi iea i harogia a Vure. Mu luhoi navai?” E huriki lobo ri takia e Isu a bakovi hale, ngane ge mate.
MAR 14:65 Muri i ranga e huriki ri kalupe tahoa. Lakea ri kavitagua a matana, ri ubia na limane ria, ri takia ri ta maea, “O vakasiri ioe ngane ge ioe a propet! E rei i ubi ioe?” Muri e huriki a tagari ri tuli talea ri ubia.
MAR 14:66 Na tahuna e Petrus i made na mataruma, a vora ngatavine na prister dagi i laho polo.
MAR 14:67 Na tahuna i masia e Petrus i hua a kanono, i laho lokovonga tabukoi i matai kamumua, lakea i takia, “Ioe tara, o turana ra bakovi o Nasaret, re Isu.”
MAR 14:68 Pali i lavuni, i ta maea, “Iau i uka ma a longokilalea a ngava o takia.” Muri e Petrus i pe a hini nga i pori na mataruma, lakea a kureko i tangi.
MAR 14:69 Muri, a vora ngatavine i matai tabua, lakea i taki tabu e huriki ri pepesi tabukoi, i ta maea, “Ra bakovi iea, a turane ria.”
MAR 14:70 Pali e Petrus i lavuni tabu. I uka ma i tabaka, e huriki ri pesi tabukoi vonga ri takia, ri ta maea, “Muholi hateka ioe tara a turane ria, a vuhuna ioe a bakovi o Galili.”
MAR 14:71 I rudu raha mulea, i harogi, i ta maea, “Muholi hateka, iau i uka ma lohoka vona ra bakovi mu takia.”
MAR 14:72 I malaviriri kunana a kureko i tangi tabu, lakea e Petrus i longovisia ngane a ngava i takia vona e Isu: “A kureko i uka ma ge tangi balaka rua ma, bara o nana rovi iau balaka tolu.” Muri i upu rike a nangi i tangi.
MAR 15:1 Na hatelanga pokopoko e huriki a prister dagi turane huriki a bakovi dagi, a mari na vinara, a tara na Sanderin, ri vata vona a maki ri gi ratea ne Isu. Muri ri kolo tatea, ri vano ri habia ne Pilato.
MAR 15:2 Lakea e Pilato i nanea, “Ra ioe, i muholi ioe a hariki ne huriki a Iuda?” E Isu i koli i ta maea, “A ngava o takia pali.”
MAR 15:3 Muri e huriki a prister dagi ri padi virihia na ngava i kupo.
MAR 15:4 Lakea e Pilato i nana tabua, “O longo e huriki ri padi virihi ioe na ngava i kupo. I navai i uka ma o taratoto a ngava?”
MAR 15:5 Pali i manga a hini muga, e Isu i uka ma i taratoto, lakea e Pilato i turutu.
MAR 15:6 Na parava na Habu na Nipagepolo na pida lobo, ri muri mai a vilo hosi, bara ri bole talea na bavi a bakovi hale tara i ngarua e huriki.
MAR 15:7 Na tahuna iea, a bakovi a rana e Barabas i made na bavi turane huriki ri putu puru a vinara. Ia a bakovi ni vaubi, ni rabalaki e huriki.
MAR 15:8 Lakea e huriki ri lakea ne Pilato ri nanea ge bole talea na bavi tara bakovi hale, ge muri mai a vilo ni rata vakaroro.
MAR 15:9 Lakea e Pilato i nana ria, “Mu ngaru iau ga bole talea a hariki ne huriki a Iuda, ge vano?”
MAR 15:10 I nana mavonga a vuhuna i mata­kilaka vona e huriki a prister dagi i madihi a hatene ria ne Isu, lakea ri bole lakea vona.
MAR 15:11 Pali e huriki a prister dagi ri piurike e huriki ri gi ngarua e Barabas ni gi bole tala na bavi, pali e Isu ge nahea.
MAR 15:12 Lakea e Pilato i nana ria, “Pali ga rata navai ngane a viri mu takia ta ia a hariki ne huriki a Iuda?”
MAR 15:13 Ri magulu ri ta maea, “O paditatea na kai tavalavala!”
MAR 15:14 Lakea e Pilato i nana ria, “I navai ge mavonga? A ra naro hale i ratea?” Ri magulu rike hateka tabu ri ta maea, “O paditatea na kai tavalavala!”
MAR 15:15 E Pilato i ngaru ni ramai a ningaru ne huriki, lakea i bole talea na bavi e Barabas. Pali e Isu ni lagu, muri ni habi lakea ne huriki a nugumaheto, ri gi paditatea na kai tavalavala.
MAR 15:16 E huriki a nugumaheto ri tulia e Isu i lakea na roho ne Pilato, ra ni gale a Praetorium, lakea ri gale palupu e huriki a tara na nugumaheto.
MAR 15:17 Ri vakarodoa na varakia kuakua, muri ri vakatamea na tama ni rata na barakau.
MAR 15:18 Muri ri vaka­tubu ni padikedea ri ta maea, “Ge made vakaroro a hariki ne huriki a Iuda!”
MAR 15:19 Ri ubia a gina na lebo balaka kupo. Ri kalupe tahoa, ri turume puru na ngalana, ri kavurikea.
MAR 15:20 Ri padikede loboa, muri ri kali talea a varakia kuakua, ri vaka­rodo mulea vona a varakia vona. Muri ri turari talea ri gi paditatea na kai tavalavala.
MAR 15:21 A bakovi tara na tanga e Sirene a rana e Simon; e tamane Aleksander e Rupus, i valai polovavo na tanga dagi. Ta ge laho polo ne ria, ge dili na tanga, pali ri vakukua ge kaloho poloa a kai tavalavala.
MAR 15:22 Ri turaria e Isu i lakea na tanga e Golgota. A rana tanga iea, ni vunu muri mai a tuhana gina bakovi.
MAR 15:23 Muri ta ri gi habia vona a vain ni pulo turana naru ni gale a mert, pali e Isu i marikoi ni ninu.
MAR 15:24 Muri e huriki a nugumaheto ri paditatea na kai tavalavala. E huriki a nugumaheto ri vaveru vona a varakia vona. Ri rehi, ri varangi vona tara rihiva, pali e rei a viri i mulangi, bara i bolea tara varakia vona.
MAR 15:25 Na kilala i polova na hatelanga ri paditatea e Isu.
MAR 15:26 A kilakilana ni here ni gi matai, a ra vuhuna i mate, i ta maea, “A Hariki Ne Huriki A Iuda.”
MAR 15:27 A bakovi ru panaho ru rabalaki a viri, rua ranga ni paditata. I tavore na limana kanena tara, na maurina tara.
MAR 15:29 E huriki ri laho polo ri mapakulu, ri harogia e Isu ri ta maea, “Ra ioe o taki ta go pukea a roho na Vure, muri go hae tabua na parava ge tolu.
MAR 15:30 O vakakori ioe na kai tavalavala, o puru valai!”
MAR 15:31 E huriki a prister dagi, e huriki a mari na vinara ria ranga ri padikedea, ri ta maea, “I korimule e huriki ranga, pali i keri ni korimule ia!
MAR 15:32 Ra viri ta ge korimule e huriki, a hariki ne Israel, ge pea a kai tavalavala ge puru valai, pali bara si masia si luhoi tora ia.” Ra bakovi ni paditata rua turane Isu, rua ranga ru harogia.
MAR 15:33 Na kuru haro a uvo i puru, i kavitagu a tabeke lobo, i vano i harena na kilala i tolu.
MAR 15:34 Na kilala i tolu na malunga, e Isu i gale dagi i ta maea “Eloi, Eloi, lama sabaktani?” Ra i maea, “Vure nau, Vure nau, i navai o lohopile iau?”
MAR 15:35 E huriki ri pepesi tabukoi ri longoa, ri ta maea, “Mu longo lakea, i galea e Elaisa.”
MAR 15:36 Lakea a bakovi tara i nunu, i bolea a niduvi, i lutu puru na ulo na vain, i kolotatea na kai, i toto rikea, i habia ne Isu ge damea. Lakea i ta maea, “Naha ni ngere. Si gi masia e Elaisa ge valai ge bole puru vilia, o ge uka.”
MAR 15:37 Muri e Isu i gale dagi, i mate.
MAR 15:38 Na tahuna iea, a lavalava dagi na roho na Vure i mavida valai meli i puru, i bale rua.
MAR 15:39 Na tahuna e Isu i mate, a ubu na tara na nugumaheto i pesi tabukoi. Na tahuna i longoa e Isu, i masia a nimatena, lakea i ta maea, “Muholi hateka, ra bakovi iea a Tuna Vure!”
MAR 15:40 E Maria Magdala, e Maria kinane Iakop kiroko rua e Ioses, e Salome, to pesi basi popote turana ngatavine ranga, ri matanono.
MAR 15:41 Hosi, ri ramaia e Isu o Galili, ri tuhoria, ri valai turana o Ierusalem. Ria ranga ri pesi, ri matanono.
MAR 15:42 A parava muga na Parava Nimalo, a parava ni gutu puru a maka maki ni kani. I malunga ngane a hini.
MAR 15:43 A bakovi tara, e Iosep o Arimatea, a tara na Sanderin, e huriki ri togoa. I hatenono vona a harikianga na Vure ge valai. I kinigao, i lakea ne Pilato i nanea vona a podane Isu.
MAR 15:44 E Pilato i turutu ni longo e Isu i mate pali. Lakea i gale vilia vona a ubu ne huriki a nugumaheto ge nanea vona e Isu i mate muholi o i uka.
MAR 15:45 Na tahuna e Pilato i longo na ubu i takia e Isu i mate muholi, lakea i takia e Iosep ge bolea a podana.
MAR 15:46 Lakea e Iosep i konea a lavalava keakea, i parua a podane Isu na kai tavalavala, i bunua na lavalava. Muri i rua a podana na babe ni keli tala na kedo, i kule karia a ngavana babe na kedo dagi.
MAR 15:47 E Maria Magdala, e Maria kinane Ioses, ru masia a babe ni ru a podane Isu vona.
MAR 16:1 I lobo pali a Parava Nimalo lakea e Maria Magdala, e Maria kinane Iakop, e Salome to kona a mangisipa to go biri a kuline Isu vona.
MAR 16:2 Na hatelanga, na mugana parava na vik, to laho lakea na babe.
MAR 16:3 Lakea to vanana, “E rei ge kule talea ne teu a kedo ni kule kari a ngavana babe vona?”
MAR 16:4 Na tahuna to bele, to masia a kedo ni kule vuroki pali. Ra kedo iea i dagi hateka.
MAR 16:5 Na tahuna to dili na babe to masia a riau i rodo a varakia keakea i made na tabeke na limana kanene tou, lakea to turutu.
MAR 16:6 A bakovi iea i ta rike, i ta maea, “Naha ni mangenge. Iau a lohoka vona moto matakanea e Isu o Nasaret, ra ni paditata na kai tavalavala. I mahuri mule pali na matenga. I uka a hini koea. Moto masia a murina ni vakatabuli vona rira.
MAR 16:7 Ngane moto vano, moto vakalongo e huriki a murimuri vona turana e Petrus, moto ta maea, ‘E Isu i muga lakea o Galili. Mu vano mu masia vonga, i manga a ngava i taki muga mua vona.’”
MAR 16:8 To turutu, i vakulu a tagane tou na mangea. Lakea to ha taroa a babe, to nunu hamule. Pali i uka ma to vakalongoa tara viri, a vuhuna to mangenge hateka.
MAR 16:9 E Isu i mahuri mule na matenga na hatelanga na mugana parava na vik. I bele taro ne Maria Magdala, ra ngatavine e Isu i lili tala vona hosi a hanitu i polorua.
MAR 16:10 Muri e Maria Magdala i vano ge vakalongo e huriki a murimuri ra ri rakoli vona ri tatangi.
MAR 16:11 Na tahuna e Maria i vakalongo ria vona i masia e Isu i mahuri mule, ri luhoi ia ta i tatami.
MAR 16:12 Muri e Isu i bele tabu na murimuri vona ala rua na tahuna ru lalaho na dala, ta ru gu lakea na tanga tara. Pali i uka ma i mata manga ia muga.
MAR 16:13 Lakea ru hamule, ru vakalongo e huriki a murimuri ranga. Pali ria ranga ri luhoi ta a ngava taminga kunana.
MAR 16:14 Muri e Isu i bele taho e huriki a murimuri vona ala ravulu a polona i taku na tahuna ri kani. I tahate ria, a vuhuna i uka ma ri luhoi tora, ri gigi tora hateka, i uka ma ri luhoi e huriki ri masia na tahuna i mahuri mule pali.
MAR 16:15 Muri i taki ria, “Mu lakea na tanga lobo na malala, mu vakalongo e huriki lobo na Velenga Kamumu.
MAR 16:16 E rei a viri i luhoi tora iau, ni gi vahilolo, a Vure bara i korimulea. Pali e rei a viri i koi ni luhoi tora iau, bara i velu.
MAR 16:17 E huriki ri luhoi tora iau bara i bele ne ria a naro nga: Bara ri lili tala e huriki a hanitu na ragu. Bara ri ta na ngava karaba.
MAR 16:18 Bara ri nugu a mata na limane ria, ri ninu a naru hale i uka ma ge vakahale ria. Bara ri ru a limane ria ne huriki ri giloa, bara ri tavaga.”
MAR 16:19 E Isu a Bakovi Dagi i vara lobo e huriki a murimuri vona. Muri ni bole sike na hunu i made turana a Vure, na limana a kanena.
MAR 16:20 Muri e huriki a muri­muri ri vano, ri lakea na tabeke lobo na malala, ri vara e huriki na Velenga Kamumu. E Bakovi Dagi i tuhori ria i vaka­tora a ngava vona na maka nivakasiri.
LUK 1:1 O bakovi dagi Tiopilus, o lohoka vona pali, i kupo e huriki ri toni pali ni here puru a nuverei na maka maki e Isu Kristo i rata na matane mia. Ri here puru a ngavane huriki ri matai na matane ria a maka maki nga, i vakatubu na tahuna e Isu i tubu ni leho. Re huriki nga, ngane ri rata a leho ni vakalongo a nitana Vure. Lakea a luhoi bara i kamumu ga here puru kamumu a nuverei ne Isu, go gia, a vuhuna i paru hosi a vakatubu ni bole kamumu a ngava iea ne huriki ri masia e Isu.
LUK 1:4 A ngaru go gia, go lohoka vona i muholi a ngava o longo pali.
LUK 1:5 Na tahuna a hariki e Herod i matakari o Iudea, a prister tara i made vonga, a rana e Sakarias. Ia a prister na tara ne Abisa. E girihina, e Elisabet, ia tara a hamone Aron.
LUK 1:6 Rua varago ru malamala na matana Vure, ru muri mai lobo a vinara ne Bakovi Dagi.
LUK 1:7 Ru bala e tune rua, a vuhuna e Elisabet i lame, ru gare hateka.
LUK 1:8 Na parava tara e Sakarias i leho pololilo na roho na Vure, a vuhuna a tara vona ri rata a leho na prister na tahuna iea.
LUK 1:9 Ri muri mai a vilo hosi ne huriki a prister, ri varangi na rihiva na satu. Lakea e Sakarias i rangi e huriki ranga, ni vulaki, i dili na roho na Vure ge namia a havu mangisipa.
LUK 1:10 Na tahuna ni nami a havu mangisipa, i kupo e huriki ri vapopo polovavo, ri vasileki.
LUK 1:11 A agelo ne Bakovi Dagi i bele vona, tabukoi na dede na nihabi na havu mangisipa.
LUK 1:12 Na tahuna e Sakarias i masia, i turutu i mangenge.
LUK 1:13 Pali a agelo i takia, i ta maea, “Sakarias, naha ni mangenge. A Vure i longo pali a nivasileki vomu. E girihimu, e Elisabet, bara i podea vomu a koma bakovi. Na tahuna ni poda, o vunua ge Ioanes.
LUK 1:14 Bara o vivi, o pitei vona. I kupo e huriki bara ri vivi vona,
LUK 1:15 a vuhuna bara i dagi a rana na matane Bakovi Dagi. Nahea ge ninu a vain, a naru vagole. Na tahuna i tabana na tamudine kinana, a Hanu Kiripiripi bara i made turana.
LUK 1:16 E Ioanes bara i rata e huriki a Israel ri hamule mai e Bakovi Dagi, a Vure ne ria.
LUK 1:17 Bara i rata a leho vona na nitora na Vure, i manga e Elaisa hosi. Bara i laho muga ne Bakovi Dagi, ge rata e huriki a bakovi ri gi ngaru e tune ria, ge rata e huriki ri longotaro a Vure ri gi bole a niluhoi ne huriki a bakovi kamumu. I mavonga, e Ioanes bara i pelekado e huriki a bakovi a ngatavine muga ne Bakovi Dagi ge bele ne ria.”
LUK 1:18 Pali e Sakarias i nanea a agelo, “Ga lohoka navai vona a ngavamu ge muholi? Maria e girihigu miri gare hateka.”
LUK 1:19 A agelo i koli i ta maea, “Iau e Gabriel, ra iau a pesi na matana Vure. I rudu valai iau ga vakalongo ioe vona a ngava kamumu iea.
LUK 1:20 Ngane bara o ngava­rubu, ge harena na tahuna ge bele lobo a ngava a taki ioe vona, a vuhuna o lohogorigori vona a ngavagu. A ngava lobo a taki ioe vona bara i bele muholi na parava vona.”
LUK 1:21 E huriki polovavo ri dava mavongea e Sakarias, ri luhoi viliha lae, i navai i maradoi hateka pololilo na roho na Vure?
LUK 1:22 Na tahuna i pagitala i keri ni ta, i vakasiri lae kunana a limana, lakea ri matakilaka vona, e Sakarias i masia a maki tara pololilo na roho na Vure.
LUK 1:23 Na tahuna a parava ni leho vona i lobo, i hamule lakea na tanga vona.
LUK 1:24 Muri e girihina, e Elisabet, i singou, lakea i made kapiloho kunana na keva i lima, i kavurikea a Vure, i ta maea,
LUK 1:25 “Ngane e Bakovi Dagi i rata a rabu kamumu nau, i kori iau ga tahoka e tugu. I puga vuroki a nimaruhu nau na matane huriki a bakovi a ngatavine.”
LUK 1:26 Na tahuna e Elisabet i singou na keva i lima pali, a Vure i rudua e Gabriel, a agelo vona, ge lakea o Nasaret, na tabeke ne Galili.
LUK 1:27 A Vure i rudua, ge bele na sirula ni habikari na bakovi tara, a rana e Iosep, a hamone Davit. A sirula iea, a rana e Maria.
LUK 1:28 Lakea e Gabriel i vano, i bele ne Maria, i taguia, i ta maea, “A hatelanga kamumu vomu. E Bakovi Dagi i made turamu, i ngaru ioe!”
LUK 1:29 Pali e Maria i luhoi lege vona a ngava iea, i navai tavulai?
LUK 1:30 Lakea a agelo i takia, “Maria, naha ni mangenge. A Vure i ngaru ni rata kamumu ioe.
LUK 1:31 O longo valai. Ngane bara o singou, o podea a koma bakovi. O vunua ge Isu.
LUK 1:32 A rana bara i dagi, bara ni gale a Tuna Vure Meli Liu. A Vure, e Bakovi Dagi, bara i ratea ge matakari a harikianga ne tubuna e Davit.
LUK 1:33 Bara ia a hariki na kabu ne Iakop na parava vakaroro. A nimatakari vona i uka ma ge lobo.”
LUK 1:34 Lakea e Maria i nanea a agelo, “Pali iau a uka e girihigu. Ge bele navai nau a koma?”
LUK 1:35 A agelo i koli mule, i ta maea, “A Hanu Kiripiripi bara i valai vomu, a nitora na Vure Meli Liu bara i kavitagu ioe. Lakea a koma bara o podea ni gi gale a bakovi kiripiripi, bara ni gale a Tuna Vure.
LUK 1:36 O longo valai, e balomu e Elisabet i gare liu, pali ngane i singou, bara i podea a koma bakovi. Muga ni taki ta i lame. Pali ngane i singou na keva i polotara pali,
LUK 1:37 a vuhuna a Vure i uka ma i keri ni ratana tara maki.”
LUK 1:38 E Maria i koli, i ta maea, “Iau a vora ne Bakovi Dagi kunana. Ge rata virihi iau vona ge manga a hini o taki pali.” Muri a agelo i pea e Maria, i vano.
LUK 1:39 Muri e Maria i vano, i laho hari sike na tanga tara na lolo na tabeke ne Iudea.
LUK 1:40 I lokovonga, i dili na ruma ne Sakarias ge gosia e Elisabet.
LUK 1:41 Na tahuna e Maria i taguia e Elisabet, a koma pololilo na tamudine Elisabet i kiriko. A Hanu Kiripiripi i dili ne Elisabet,
LUK 1:42 lakea i gale dagi i ta maea, “A Vure i rata kamumu hateka ioe ne huriki a ngata­vine lobo. A Vure i rata kamumu hatekea e tumu bara o podea.
LUK 1:43 Iau e rei o valai nau, ioe e kinane Bakovi Dagi nau?
LUK 1:44 Na tahuna a longo a nitagui vomu, e tugu na tamudigu i vivi, i kiriko.
LUK 1:45 A Vure ge rata kamumu ioe, a vuhuna o luhoi a ngava e Bakovi Dagi i taki ioe vona ge bele!”
LUK 1:46 Lakea e Maria i ta maea, “A hategu i kavurikea e Bakovi Dagi.
LUK 1:47 A vivi hateka na Vure nau, ra viri i korimule iau,
LUK 1:48 a vuhuna i uka ma i lohopile iau, a ngatavine tavula, a vora vona. I vakatubu ngane, i lokovonga na nilobona malala, e huriki lobo bara ri taki iau, na Vure i rata kamumu hateka iau,
LUK 1:49 a vuhuna a Vure Tuhaka Hateka i rata a naro kamumu hateka nau. A rana i kiripiripi.
LUK 1:50 A Vure i dodo e huriki ri longototoa. Bara i dodo ria, e tune ria, e tubune ria.
LUK 1:51 A Vure i gao hateka. I lili tala e huriki ri tagege.
LUK 1:52 I ratapile e huriki a bakovi dagi, i kavurike e huriki a bakovi tavula.
LUK 1:53 I habi a maki ni kani i kupo ne huriki ri vitolo, pali i tono tala e huriki a bakovi na mahala, ri vano tavula.
LUK 1:54 I tuhori e huriki a Israel. I uka ma i longokaburungia a ngava muholi i ratea hosi, i taki ge dodo ria.
LUK 1:55 Hosi i ta muholi vona ne Abraham, i takia ge tuhori ia, ge tuhori e huriki a hamona na parava vakaroro.”
LUK 1:56 E Maria i made turane Elisabet na keva i tolu. Muri i hamule lakea na tanga vona.
LUK 1:57 Na tahuna e Elisabet i pahea a koma, i podea a koma bakovi.
LUK 1:58 E huriki ri made na tanga vona, e huriki a kabukabu vona ri longoa e Bakovi Dagi i dodoa e Elisabet, lakea ri vivi turana.
LUK 1:59 Na parava i polotolu muri na koma ni poda, ri valai ni pala a kulina koma, ni gi vunu ge rane tamana, e Sakarias.
LUK 1:60 Pali e Elisabet i ta rike, i ta maea, “I uka. Ni gi vunu ge Ioanes.”
LUK 1:61 Pali e huriki ri ta maea, “I uka tara viri na kabu marua ni gale mavonga.”
LUK 1:62 Muri ri tolokavea e tamana, ri nanea ge vunua ge e rei a rana.
LUK 1:63 Lakea i taki ria ri gi bole vilia vona a maki ni here, lakea i here maea, “A rana e Ioanes.” Lakea ri turutu.
LUK 1:64 I malaviriri kunana i mapaga a tabelena, i vakatubu ni kavurikea a Vure.
LUK 1:65 E huriki a tanga turana ri masia a naro iea i bele, ri mangenge. A velengana maki iea i nunu lae, ni longo na maka tanga na lolo na tabeke ne Iudea.
LUK 1:66 E huriki lobo ri longoa a maki iea i bele, ri loho lege lae, ri vanana maea, “Ra koma iea, ge ia a bakovi navai ma?” Ri ta maea, a vuhuna ri lohoka vona a nitora ne Bakovi Dagi i tabuli vona.
LUK 1:67 Muri, a Hanu Kiripiripi i dili ne Sakarias, i ta polo vona, i ta maea,
LUK 1:68 “A kavurikea e Bakovi Dagi, a Vure ne Israel, a vuhuna i valai, i vakamatukapaga e huriki a ngate vona.
LUK 1:69 I vakapesi a bakovi tuhaka na kabu na vora vona, e Davit, ge korimule hita
LUK 1:70 na limane huriki a pile ne hita, ge korimule hita na limane huriki ri tepu hita, ge manga a hini i ta muholi, i vakalongo hosi ne huriki a propet vona.
LUK 1:72 I taki e huriki a gare ne hita ge dodo ria, i uka ma ge longo kaburungi a ngava dagi i rata turane ria hosi.
LUK 1:73 Ra ngava dagi i ta muholi vona hosi na gare ne hita, e Abraham, i takia
LUK 1:74 ge korimule hita na limane huriki a pile. Muri bara si made na nivalemu, si ratea a leho vona
LUK 1:75 na naro kamumu, na naro kiripiripi na parava lobo si made koea na malala.
LUK 1:76 Ioe, o tugu, bara ni gale ioe a propet na Vure Meli Liu, a vuhuna bara o laho muga ne Bakovi Dagi, o pelekado purua a dalana.
LUK 1:77 Bara o vakalongo e huriki a ngate vona, na Vure ge korimule ria na tahuna i puga vuroki a naro hale ne ria.
LUK 1:78 Ge puga vuroki a naro hale ne ria, a vuhuna i ngaru ria na hatena, i dodo ria. Ngane a viri i korimule hita bara i valai i manga a haro i para valai na hunu.
LUK 1:79 Bara i vakapalala e huriki ri made na uvo, e huriki ri made na maniru na matenga. Bara i vakasiri hita na dala bara si laho vona, bara si tahoka a nivalemu.”
LUK 1:80 E Ioanes i koru rike. A narona i kamumu hateka. Muri i vano i made na hini ngeki, i harena na tahuna i bele kavakava i vara e huriki a Israel.
LUK 2:1 Na tahuna iea e Kaiser Augustus i vakuku e huriki ri gi hamule mai a vuhutanga ne ria, ri gi here puru a rane ria. I mavonga ni gi gi palupu e huriki a bakovi a ngatavine na tabeke lobo i matakari e Rom. A rabu ni gi palupu e huriki lobo i uka ma ni rata hosi. Ni rata karaba ngane na tahuna e Kuirinus i matakari o Siria.
LUK 2:4 E Iosep tara i pea e Nasaret na tabeke ne Galili, i hamule o Iudea, na tanga ni gale e Betlehem, a vuhutanga ne Davit, a vuhuna ia a hamone Davit.
LUK 2:5 I hamule lokovonga turane Maria, ru gu here puru a rane rua, a vuhuna e Maria ni habikari vona. E Maria i singou,
LUK 2:6 lakea na tahuna ru bele vonga, i pahea a koma,
LUK 2:7 lakea i podea a koma a tabua, a bakovi. I bunua na lavalava, i vakamahita purua na murina maki ni kani na sipsip, a vuhuna a roho na mosi i vonu pali.
LUK 2:8 Na rodo iea, e huriki a bakovi ri made polovavo na tanga, ri matakari a kabu na sipsip.
LUK 2:9 I bele vakaturutu ne ria ngane a agelo ne Bakovi Dagi, lakea a nipara na Vure i parai ria. Ri mangenge, i vakulu a tagane ria.
LUK 2:10 Pali a agelo i taki ria, i ta maea, “Naha ni mangenge. A bele ga vakalongo mua vona a Velenga Kamumu. A Velenga Kamumu iea ge rata e huriki a bakovi a ngatavine ri gi vivi hateka,
LUK 2:11 a vuhuna mona na vuhutanga ne Davit, a viri ge korimule mua ni poda. Ia e Kristo e Bakovi Dagi.
LUK 2:12 A kilakilana i maea: Bara mu masia a koma bakovi ni bunu na kala, ni vakamahita na murina maki ni kani na sipsip.”
LUK 2:13 E huriki a tara bulolo na agelo ri bele vakaturutu, ri kavurikea a Vure, ri ta maea,
LUK 2:14 “Si gi kavurikea a Vure Meli Liu. Ge habi a nivalemu ne huriki a bakovi a ngatavine i vivi ne ria koea na malala.”
LUK 2:15 Na tahuna e huriki a agelo ri pe ria, ri hamule sike na hunu, e huriki a matakari na sipsip ri vata, ri ta maea, “Si lakea o Betlehem, si gi masia a maki i bele vonga, ra maki i vakalongo hita vona e Bakovi Dagi.”
LUK 2:16 Lakea ri nunu lakea o Betlehem, ri matai e Iosep, e Maria, turana koma ni vakamahita na murina maki ni kani na sipsip.
LUK 2:17 Na tahuna ri masia a koma ri vakalongo a ngavana agelo i taki ria vona.
LUK 2:18 E huriki ri longoa a ngavane huriki a matakari na sipsip ri turutu vona.
LUK 2:19 Pali e Maria i luhoi kado a ngava nga, i ru na hatena.
LUK 2:20 E huriki a matakari na sipsip ri hamule lakea na sipsip ne ria, ri kavurikea a Vure vona a maka maki ri longo, ri matai, a vuhuna i bele manga kunana a hini a agelo i taki ria vona.
LUK 2:21 Na tahuna a koma i tahoka a parava i polotolu, ni pala a kulina, ni vunu e Isu, i muri mai a ngavana agelo i taki e Maria vona, muga ne Maria i singou.
LUK 2:22 Ru rata pali a leho ge rata rua ru gu malamala na matane Bakovi Dagi, i muri mai a vinara ne Moses. Muri ru bolea e Isu, to lakea o Ierusalem ru gu habia ne Bakovi Dagi.
LUK 2:23 Ru rata mavonga, a vuhuna a vinara ne Bakovi Dagi ni here puru i maea, “E huriki a koma bakovi, a tabua, ni gi habi ne Bakovi Dagi.”
LUK 2:24 E Maria e Iosep ru habi a nihabi i muri mai a vinara ne Bakovi Dagi ni here puru, i maea, “A balu ge rua, o a tuna balu ge rua.”
LUK 2:25 Na tahuna iea, a bakovi tara i made o Ierusalem, a rana e Simion. Ia a bakovi malamala, a bakovi ni vasileki. E Simion i dava, i pasimata na Vure ge luke e huriki a Israel. A Hanu Kiripiripi i made turane Simion.
LUK 2:26 A Hanu Kiripiripi i vakalongoa pali e Simion i uka ma ge mate, ge matai taroa e Kristo a Bakovi Dagi.
LUK 2:27 A Hanu Kiripiripi i tulia e Simion i lakea na tabeke na roho na Vure. Na tahuna e tamana e kinana e Isu ru boko dilia, ru gu vakasiria na Vure i muri mai a vinara,
LUK 2:28 e Simion i masia, i bokea, i kavurikea a Vure i ta maea,
LUK 2:29 “Bakovi Dagi, iau a vora vomu. Ngane o taparaki iau ga mate na nivalemu, a vuhuna a maki o ta muholi nau vona ge bele, i bele pali.
LUK 2:30 Ngane a masia pali na matagu a viri o rudu vilia ge korimule mia.
LUK 2:31 O vakabelea na matane huriki a bakovi a ngatavine na malala.
LUK 2:32 Ia i manga a nipara, ge vaka­palala a gine huriki i uka ma ria a Iuda. Ge rata e huriki a ngate vomu, re Israel, ri gi tahoka a rane ria.”
LUK 2:33 E tamana e kinana ru turutu vona a ngava e Simion i taki virihi e Isu vona.
LUK 2:34 Muri e Simion i taki tou a Vure ge rata kamumu tou, lakea i takia e Maria, i ta maea, “O longo valai. A Vure i vulakia a koma iea ge rata e huriki a Israel ala kupo ri gi boru, pali ge korimule e huriki ala kupo. Bara ia a kilakila na Vure, lakea i kupo e huriki bara ri biu ia.
LUK 2:35 Ra i mavonga a niluhoi kapiloho ne huriki bara i bele kavakava. Pali ioe bara o dodo hateka, bara o hatakia a hatemu, i manga ni padi na bainat.”
LUK 2:36 A propet ngatavine tara i made vonga, a rana e Ana, e Tune Panuel, a kabu ne Aser. I gare hateka. Hosi i parangi i made turana e girihina na pida i polorua.
LUK 2:37 Muri e girihina i mate, lakea i uka ma i parangi tabu. Ngane i tahoka a pida i ravulu polotolu a polona i va. I made kunana na roho na Vure, i peremu, i vasileki, i kavurikea a Vure na haro, a rodo.
LUK 2:38 Na tahuna e Simion i tabana ni ta turane tou, e Ana i valai mai ria, i kavurikea a Vure. Muri i vakalongo e huriki na koma iea, re huriki a bakovi a ngatavine ri pasimata na Vure ge korimule e Ierusalem.
LUK 2:39 Na tahuna e Iosep e Maria ru rata lobo a naro na vinara ne Bakovi Dagi i taki, to hamule lakea o Galili, na tanga ne tou, e Nasaret.
LUK 2:40 A koma i koru rike vonga, i paki. I bole a lohokanga kamumu, a Vure i rata kamumua.
LUK 2:41 Na pida vakaroro, e tamana e kinana e Isu ru sike o Ierusalem na Habu na Nipagepolo.
LUK 2:42 Lakea na tahuna e Isu i tahoka a pida i ravulu a polona i rua, ru muri mai a vilone rua, ru lakea na habu, ru tulia e Isu ge tou.
LUK 2:43 Na tahuna a habu i lobo, e tamana e kinana ru vano, ru hamule na tanga, pali e Isu i made mule vonga o Ierusalem. E tamana e kinana i uka ma ru lohoka vona i made mule vonga.
LUK 2:44 Ru pahaluhoi ta i laho turane huriki ranga, lakea ru laho kikeri na parava i taku. Muri ru nana kanea ne huriki a kabukabu ne rua, e huriki a turane rua, ra ri hamule palupu.
LUK 2:45 I uka ma ru matavisia, lakea ru hamule sike tabu o Ierusalem ru gu matakanea vonga.
LUK 2:46 I lobo a parava i tolu, ru matavisia na tabeke na roho na Vure. I made turana e huriki a mari ni tovo, i longo a nitane ria, i nana ria na ngava.
LUK 2:47 E huriki lobo ri longoa a ngavana ri turutu vona a lohokanga vona, a maka ngava i koli ne ria.
LUK 2:48 Na tahuna e tamana e kinana ru masia, ru turutu. Lakea e kinana i nanea, “O tugu. I navai o rata mavonga maria? Miri loho lege lae vomu na ni matakana ioe.”
LUK 2:49 Lakea e Isu i koli i ta maea, “I navai muru matakana iau? I uka ma muru lohoka vona iau ga made na roho ne tata?”
LUK 2:50 Pali i uka ma ru longokilalea a ngava i taki virihi rua vona.
LUK 2:51 Pali e kinana i ru na hatena a ngava lobo i taki. Muri i vano turane rua to puru o Nasaret. I longototo kunana a ngavane rua.
LUK 2:52 E Isu i koru rike. A lohokanga vona i bele dagi. A Vure i vivi vona. E huriki a bakovi a ngatavine, ria ranga ri ngarua.
LUK 3:1 E Kaiser Tiberius i matakari pali na pida i ravulu a polona i lima (15), e Ponsius Pilato i matakari o Iudea. E Herod i matakari o Galili, e turana e Pilip i matakari o Iturea o Trakonitis. E Lisanias i matakari o Abilene.
LUK 3:2 E Anas e Kaipas rua a prister dagi. Na tahuna iea a nitana Vure i valai ne Ioanes, e tune Sakarias, na tahuna i made na tabeke i ngeki.
LUK 3:3 Lakea e Ioanes i laho lae na maka tanga tabukoi na naru e Iordan, i vara e huriki ri gi pulo a vilone ria, ni gi vahilolo, lakea a Vure ge puga vuroki a vilo hale ne ria.
LUK 3:4 Hosi, e Isaia a propet i vakalongo muga ne Ioanes, i here maea: “A lohona viri i gale dagi na tabeke i ngeki i ta maea, ‘Mu pelekadoa a dala ne Bakovi Dagi. Mu pelekadoa a dala ge laho vona ge kiripiripi.
LUK 3:5 Mu kelitagu a maka maloku. Mu keli tarida a maka lolo, a maka kupona. Mu kado a maka dala marogorogo, ri gi kiripiripi. Mu kavitagu a hini i golugolu, ge bila.
LUK 3:6 Muri e huriki lobo bara ri masia a naro a Vure ge korimule hita vona.’”
LUK 3:7 I kupo e huriki ri valai ge vahilolo ria e Ioanes, lakea i taki ria, “Mua a tuna mata! E rei i taki mua mu gu ha vona a rongova ne Bakovi Dagi?
LUK 3:8 Naha ni luhoi mua, ge mua a hamone Abraham, mu gu malamala pali. Naha ni luhoi mavonga, a vuhuna a Vure i kara ni pulo a kedo nga, ge ria e huriki a hamone Abraham. I vai a kanena narone mua? Mu rata taro a naro kamumu ge vakasiri mua mu pulo muholi a vilone mua.
LUK 3:9 A kira i tabuli tabukoi pali na vuhuna kai. A kai i uka kanena kamumu, bara ni tolo puru, ni rungani.”
LUK 3:10 Lakea e huriki ri nanea, “Mi gi pulo navai a vilone mia?”
LUK 3:11 E Ioanes i koli, i ta maea, “A viri i tahoka a varakia i rua, ge habia tara na viri i bala a varakia. A viri i tahoka a maki ni kani, ge habi ranga na viri i uka maki ni kani.”
LUK 3:12 I ranga e huriki a mari ni bole a takis ri valai ge vahilolo ria e Ioanes, lakea ri nanea, “Mari ni tovo, pali mia? Mi gi pulo navai a vilone mia?”
LUK 3:13 Lakea e Ioanes i taki ria, i ta maea, “Mu bole kunana a takis ni taki mua vona mu gu bole, pali naha ni bole tavula tabu ranga.”
LUK 3:14 Muri e huriki a nugumaheto ri nanea, “Pali mia? Mi gi pulo navai a vilone mia?” Lakea i taki ria i ta maea, “Naha ni vakamangenge e huriki ri gi habi a moni ne mua. Naha ni padi virihi tavula e huriki na ngava, ri gi kona mua. Mu maru vona a moni ni kona mua vona.”
LUK 3:15 E huriki ri pasimata ne Kristo ge valai. Ri luhoi e Ioanes, ma ge ia kunana a viri a Vure i rudu vilia ge korimule e huriki.
LUK 3:16 Lakea e Ioanes i koli, i ta maea, “Iau a vahilolo mua na naru. Pali a viri tara i tabukoi ge valai, i tuhaka hateka nau. Iau i uka ma a bakovi kamumu ga puga vuroki a mota na vahapolo vona. Na tahuna i valai, bara i vahilolo mua na Hanu Kiripiripi, a kanono.
LUK 3:17 Ngane i tabukoi bara i kalipida e huriki a bakovi kamumu, a bakovi hale, i manga a bakovi i leho na hania na vit i kalipida a vit, a luluna. Bara i bole e huriki a bakovi kamumu, ge ru ria na tanga kamumu, i manga a bakovi i leho na hania i ru kadolu a vit pololilo na roho na vit. Pali bara i bole e huriki a bakovi hale, i voro puru ria na kanono, i manga a bakovi i leho na hania na vit i bole a lulu, i voro rike na kanono. Ra kanono iea, i uka nilobona.”
LUK 3:18 E Ioanes i vara na ngava i kupo na Velenga Kamumu, i taki tora e huriki a bakovi a ngatavine ri gi pulo a vilone ria.
LUK 3:19 Pali i tahatea a hariki e Herod na hini i parangi tabu e Herodias, e girihine tarina. I tahate tabua na maka naro hale ranga i rata.
LUK 3:20 Lakea e Herod i ratea a naro i hale hateka na maka naro hale muga. I lakavua e Ioanes, i ru dilia na bavi.
LUK 3:21 Muga ne Ioanes ni ru dili na bavi, na tahuna i vahilolo e huriki ala kupo, e Isu tara ni vahilolo. Na tahuna e Isu i vasileki, a hunu i mata ka,
LUK 3:22 lakea a Hanu Kiripiripi i puru valai i manga a balu, i toka langa vona. Muri a lohona viri i ta valai meli na hunu, i ta maea, “Ioe e Tugu, a hategu. A vivi hateka vomu.”
LUK 3:23 E Isu i vakatubu a leho vona na tahuna i tahoka a pida i ravulu tolu. E huriki ri luhoi ia ta ia e tune Iosep. E Iosep ia e tune Heli.
LUK 3:24 E Heli e tune Matat. E Matat e tune Levi. E Levi e tune Melki. E Melki e tune Ianai. E Ianai e tune Iosep.
LUK 3:25 E Iosep e tune Matias. E Matias e tune Amos. E Amos e tune Nahum. E Nahum e tune Esli. E Esli e tune Nagai.
LUK 3:26 E Nagai e tune Mat. E Mat e tune Matias. E Matias e tune Semein. E Semein e tune Iosek. E Iosek e tune Ioda.
LUK 3:27 E Ioda e tune Ioanan. E Ioanan e tune Resa. E Resa e tune Serubabel. E Serubabel e tune Siltel. E Siltel e tune Neri.
LUK 3:28 E Neri e tune Melki. E Melki e tune Adi. E Adi e tune Kosam. E Kosam e tune Elmadam. E Elmadam e tune Er.
LUK 3:29 E Er e tune Iosua. E Iosua e tune Elieser. E Elieser e tune Iorim. E Iorim e tune Matat. E Matat e tune Levi.
LUK 3:30 E Levi e tune Simion. E Simion e tune Iuda. E Iuda e tune Iosep. E Iosep e tune Ionam. E Ionam e tune Eliakim.
LUK 3:31 E Eliakim e tune Melea. E Melea e tune Mena. E Mena e tune Matata. E Matata e tune Natan. E Natan e tune Davit.
LUK 3:32 E Davit e tune Iesi. E Iesi e tune Obed. E Obed e tune Boas. E Boas e tune Salmon. E Salmon e tune Nason.
LUK 3:33 E Nason e tune Aminadab. E Aminadab e tune Admin, e Admin e tune Arni. E Arni e tune Hesron. E Hesron e tune Peres. E Peres e tune Iuda.
LUK 3:34 E Iuda e tune Iakop. E Iakop e tune Isak. E Isak e tune Abraham. E Abraham e tune Tera. E Tera e tune Nahor.
LUK 3:35 E Nahor e tune Serug. E Serug e tune Reu. E Reu e tune Peleg. E Peleg e tune Eber. E Eber e tune Sela.
LUK 3:36 E Sela e tune Kainan. E Kainan e tune Arpaksad. E Arpaksad e tune Sem. E Sem e tune Noa. E Noa e tune Lamek.
LUK 3:37 E Lamek e tune Metusela. E Metusela e tune Enok. E Enok e tune Iared. E Iared e tune Mahalalel. E Mahalalel e tune Kainan.
LUK 3:38 E Kainan e tune Enos. E Enos e tune Set. E Set e tune Adam. E Adam e tuna Vure.
LUK 4:1 Muri ne Ioanes i vahiloloa e Isu, e Isu i pe a naru e Iordan, a Hanu Kiripiripi i laho tora turana, i tuli laea na tabeke i ngeki.
LUK 4:2 A hanitu i tonia vonga na parava i ravulu va. Na tahuna iea, e Isu i peremu a maki ni kani, lakea i vitolo.
LUK 4:3 Lakea a hanitu i takia, i ta maea, “Ge ioe a Tuna Vure, o takia a kedo iea ge mapulo ge manga a bret.”
LUK 4:4 Pali e Isu i koli, i ta maea, “A ngava ni here puru na Hinere i maea: ‘A bakovi i uka ma ge mahuri na maki ni kani kunana.’”
LUK 4:5 Muri a hanitu i tulia ru sike na lolo. I vakasiri malaviriri ia vona a maka tanga lobo na malala.
LUK 4:6 Lakea a hanitu i takia e Isu, i ta maea, “Bara habi lobo vomu a maka tanga nga turana bagetua ne ria, a vuhuna a maka tanga nga ni habi lobo nau, lakea iau bara habi na viri a ngarua.
LUK 4:7 Ioe bara o vasileki nau, bara habi vomu a maka tanga nga.”
LUK 4:8 Pali e Isu i koli, i ta maea, “A ngava ni here puru na Hinere i maea, ‘O kavurikea e Bakovi Dagi, a Vure vomu, o ramai kunana ia.’”
LUK 4:9 Muri a hanitu i tuli tabua e Isu, i vakapesi langea na mapana roho na Vure o Ierusalem, i takia, “Ge ioe a Tuna Vure, o to raga koea,
LUK 4:10 a vuhuna a ngava ni here puru na Hinere i maea, ‘A Vure bara i rudu e huriki a agelo vona, ri valai ri matakari ioe, ri tagari ioe.
LUK 4:11 Ri gi bole rike ioe na limane ria, ma ge padi a vahamu a kedo.’”
LUK 4:12 Pali e Isu i koli, i ta maea, “A ngava ni here puru na Hinere i maea, ‘Naha ni tonia e Bakovi Dagi, a Vure vomu.’”
LUK 4:13 Na tahuna a hanitu i toni loboa e Isu na nitoni legelege lae, muri i vano, ge dava, ge toni tabua muri ma.
LUK 4:14 Muri e Isu i hamule lakea o Galili turana nitora na Hanu Kiripiripi. I rere lae a velengana.
LUK 4:15 I vara ria pololilo na maka roho na vaponga, lakea e huriki ri longoa, ri kavurikea.
LUK 4:16 Muri i lakea o Nasaret, na tanga i koru rike vona. Na Parava Nimalo, i lakea na roho na vaponga, i manga a naro i rata vakaroro. I pesi rike i gi.
LUK 4:17 Lakea ni habi vona a puhu na hinere ne Isaia a propet. I vevea, i puruvisia a tabekena tara, i gia, i ta maea,
LUK 4:18 “A Hanune Bakovi Dagi i made turagu, a vuhuna i vulaki iau ga vakalongo a Velenga Kamumu ne huriki a matasia. I rudu iau ga vakalongo e huriki ni ru dili na bavi, ne ria ri gi matukapaga. I rudu iau ga vakamatapara e huriki a kepa. I rudu iau ga rata e huriki ni rata hale, ri gi matukapaga.
LUK 4:19 I rudu iau ga pukatala a ngava ne huriki vona a parava i bele pali, ne Bakovi Dagi ge korimule e huriki a ngate vona.”
LUK 4:20 E Isu i gi lobo pali, muri i pilua a puhu na hinere, i habi mulea na vora, i made puru. E huriki lobo na roho na vaponga ri vido vona na tahuna i taki ria.
LUK 4:21 I ta maea, “A tabekena Hinere nga i bele muholi mona, na tahuna mu longo iau a gia.”
LUK 4:22 E huriki lobo ri kavurikea, ri turutu vona a maka ngava kamumu i taki. Ri vanana, “Ra bakovi iea, e tune Iosep kunana?”
LUK 4:23 Lakea e Isu i taki ria i ta maea, “Muholi hateka, muri ma bara mu takia nau tara ngava hosi i nangi maea: ‘Ioe a bakovi ni korimule e huriki, o korimule ioe ke!’ Muri bara mu ta maea, ‘Mi longo ioe o rata a maka nivakasiri o Kapernaum. Pali ngane o rata koea na tanga vomu a maka maki nga.’
LUK 4:24 “A taki muholi mua, a propet, e huriki a bakovi a ngatavine na tanga vona i uka ma ri matakilalea.
LUK 4:25 I muholi, hosi na tahuna e Elaisa i laho na malala, i kupo e huriki a havuri ri made o Israel. A vala i uka ma i boru na pida i tolu a keva i polotara, lakea a pago i bele, i ratapilea a tanga.
LUK 4:26 Pali a Vure i uka ma i rudua e Elaisa ge lakea mai e huriki a havuri o Israel. I lakea kunana ne Sarepat, a havuri na tanga e Sidon. Ra havuri iea i uka ma ia a Iuda.
LUK 4:27 I mavonga, i kupo e huriki a bakovi a ngatavine o Israel ri tahoka a gilanga a patala hosi na tahuna e Elisa, a propet, i laho koea na malala. Pali e Elisa i uka ma i vakamatapado ria. I vakamatapado kunanea e Naman a bakovi o Siria. Re Naman, i uka ma ia a Iuda.”
LUK 4:28 Na tahuna e huriki pololilo na roho na vaponga ri longoa a ngavane Isu, i madihi a hatene ria.
LUK 4:29 Ri pesi rike, ri tono talea na tanga. Ra tanga ne ria i pesi langa na kupona. Ri bole lakea na dahana kupona ta ri gi kope ragea na gali.
LUK 4:30 Pali e Isu i laho polopolo na kurukurune ria, i vano.
LUK 4:31 Muri e Isu i puru o Kapernaum, a tanga tara na tabeke ne Galili. Na maka Parava Nimalo i vano i vara e huriki.
LUK 4:32 Ri turutu vona a vinara vona, a vuhuna a ngavana i tahoka a nitora.
LUK 4:33 Na tahuna i vavara, a bakovi tara i dili vona a hanitu, i made vonga pololilo na roho na vaponga. A bakovi iea i mangenge, i gale dagi, i ta maea,
LUK 4:34 “Isu o Nasaret, a ra o ngarua ne mia? I navai, o valai go ratapile mia? A lohoka vomu ioe e rei muholi. Ioe a Bakovi Malamala na Vure.”
LUK 4:35 Lakea e Isu i taki tora ia i ta maea, “Naha ni ta! O pagitala vona.” Muri a hanitu i voro purua a bakovi iea na matane huriki a bakovi a ngatavine, lakea i pagitala vona, i uka ma i ratapilea.
LUK 4:36 E huriki a bakovi a ngatavine ri turutu, ri vanana, ri ta maea, “A ngava navai a ngavana bakovi iea? I tahoka a rana, i tahoka a nitora. I taki kunana e huriki a hanitu, ri longototo kunana, ri pagitala!”
LUK 4:37 A velengana maki i ratea ni vakalongo lae na tanga lobo na tabeke nga.
LUK 4:38 E Isu i pea a roho na vaponga i lakea na ruma ne Simon. E lahuane Simon ngatavine i giloa, i rongo hateka a kulina, lakea ri nanea e Isu ge koria.
LUK 4:39 I valai tabukoi na dahana ngatavine, i takia a gilanga ge malaharuri vona. Muri i pesi rike a ngatavine, i vakatubu ni gutu a maki ni kani ne ria.
LUK 4:40 Na malunga liu ni tuli valai ne Isu e huriki ri tahoka a gilanga legelege, lakea i ru langa ne ria lobo a limana, i vakamahuri ria lobo.
LUK 4:41 I lili tala e huriki a hanitu ne huriki ala kupo. Na tahuna ri ha tala, ri gale dagi, ri ta maea, “Ioe a Tuna Vure.” Pali e Isu i tahate ria, nahea ri gi ta, a vuhuna ri lohoka vona ia e Kristo.
LUK 4:42 Na hatelanga e Isu i pea a tanga, i lakea na robo i ngeki. Pali e huriki a bakovi a ngatavine na tanga iea ri valai maia, ta ri gi toni ni takia nahea ge pe ria.
LUK 4:43 Pali i taki ria i ta maea, “Iau ga vara taro na Velenga Kamumu na harikianga na Vure na maka tanga ranga, a vuhuna a Vure i rudu iau a valai ga rata mavonga.”
LUK 4:44 Lakea i laho lae o Iudea, i vara pololilo na maka roho na vaponga na tanga takutaku.
LUK 5:1 Na parava tara e Isu i pesi na dahana Darilomu e Genesaret, i vara e huriki. Pali i kupo hateka e huriki ri bole tugua ri gi longo a nitana Vure.
LUK 5:2 E Isu i matai a aga i rua ni kaka rike na lavu. A tahona aga nga ri vano, ri loi pasi a vuko ne ria.
LUK 5:3 Lakea e Isu i rike na aga tara, a aga ne Simon, i takia e Simon ge tugu talea, ge pasi polovavo popote. Muri i made puru na aga i vara e huriki.
LUK 5:4 Na tahuna i vara lobo, i takia e Simon, i ta maea, “O vore pori na hini i utu, o ru purua a vuko vomu, o lakavu a manu.”
LUK 5:5 E Simon i koli, i ta maea, “Bakovi Dagi, mi ru a vuko na rodo i vano i palala a hini, pali mi ngopu. Pali ga ru tabua a vuko, a vuhuna o taki iau ga rua.”
LUK 5:6 Lakea e huriki a tahodari ri ru tabua a vuko. I uka ma i tabaka, ri koro a maka manu i kupo hateka, lakea a vuko i popote ge marape.
LUK 5:7 Lakea ri gale e huriki a turane ria na aga tara ri gi valai ri gi kori ria. Ri lakavu rike a maka manu, ri vakavonu a aga nga, i popote ru gu mabubu.
LUK 5:8 Na tahuna e Simon Petrus i masia a maki i bele maea, i turume puru tabukoi na vahane Isu i ta maea, “Bakovi Dagi, o ha nau. Iau a bakovi hale!”
LUK 5:9 I ta mavonga, a vuhuna i turutu vona a maka manu ri lakavu i kupo gala hateka.
LUK 5:10 E Iakop, e Ioanes, re tune Sebedi, rua a tahodari turane Simon. Rua ranga ru turutu. Muri e Isu i takia e Simon i ta maea, “Naha ni mangenge. Muga o lakavu a manu, pali ngane bara o tuli e huriki a bakovi ri gi valai nau.”
LUK 5:11 Lakea ru kaka rike na lavu a aga, ru taparaki vonga a maka maki lobo ne rua, ru muri maia e Isu.
LUK 5:12 Na parava tara e Isu i made na tanga tara. A bakovi tara, i ratapilea a patala, i valai maia. Na tahuna i masia e Isu, i tabuli barara puru na malala i nanea e Isu i ta maea, “Bakovi Dagi, ioe bara o ngaru, o vakamatapado iau.”
LUK 5:13 Lakea e Isu i toto talea a limana, i padoia, i ta maea, “Iau a ngaru go matapado. O matapado.” I malaviriri kunana i malaharuri vona a patala.
LUK 5:14 Lakea e Isu i taki tora ia, i ta maea, “Naha ni vakalongoa tara viri. Pali o vano, o vakasiri ioe na prister, o habi a nihabi na viri ni vakamatapado, ge manga a hini e Moses i here puru hosi. O rata mavonga, e huriki ri gi matakilaka vona ioe ni vakamatapado pali.”
LUK 5:15 Pali a velengane Isu ni longo na tanga lobo. Lakea i kupo e huriki ri valai ne Isu, ri gi longoa a nitana, ri ngarua ge vakamahuri ria.
LUK 5:16 Pali na parava i kupo i ha taro ria, i lakea na robo i ngeki, i vasileki vonga.
LUK 5:17 Na parava tara e Isu i vara e huriki. E huriki a Pariseo, a mari na vinara, ria ranga ri made vonga. Ri valai na tanga lobo na tabeke ne Galili, ne Iudea, ne Ierusalem. A Vure i habi a nitora na Bakovi Dagi, ge vakamahuri e huriki na gilanga.
LUK 5:18 I uka ma i tabaka e huriki a bakovi ranga ri kaloho vilia a bakovi i beu i mahita na moke. Ta ga ri gi bole dilia na roho, ri gi ru tabukoi ia na matane Isu.
LUK 5:19 Pali ri keri ni bole dilia, a vuhuna i ala kupo hateka e huriki ri vapesihi lae, ri longoa e Isu i vara. Lakea ri bole rikea na mapana ruma, ri pukea a mapana ruma, ri vakatavore purua turana moke vona, i puru na kurukurune huriki tabukoi na ngalane Isu.
LUK 5:20 Na tahuna e Isu i matai ria ri luhoi torea, i takia a bakovi i beu, i ta maea, “Turagu, a puga vuroki a naro hale vomu.”
LUK 5:21 Lakea e huriki a Pariseo, a mari na vinara ri vanana, “E rei ra bakovi iea, ra i ngaru ni bole a murina Vure? I uka tara bakovi tavula ge puga a naro hale, a Vure kikeri kunana.”
LUK 5:22 E Isu i lohoka vona a niluhoi ne ria, lakea i nana ria, “I navai mu luhoi mavonga?
LUK 5:23 I vai a ngava i kavakava ga takia? Ga taki, ‘A puga vuroki a naro hale vomu,’ o ga ta maea, ‘O pesi rike o laho?’
LUK 5:24 A ngaru mu gu matakilaka vona a Tuna Bakovi i tahoka a nitora koea na malala ge puga vuroki a naro hale.” Lakea i takia a beu i ta maea, “A taki ioe, o pesi rike, o bolea a moke vomu, o hamule na ruma vomu.”
LUK 5:25 I malaviriri kunana i pesi rike na matane ria, i bolea a moke vona. I laho lakea na ruma vona, i kavurikea a Vure.
LUK 5:26 E huriki lobo ri ngapa, ri kavurikea a Vure. Ri turutu vona a maki ri masia, lakea ri ta maea, “Mona si masia a maki ni turutu vona.”
LUK 5:27 Muri e Isu i pagitala, i masia a bakovi ni bole a takis, a rana e Levi. I mamade na roho na takis. Lakea e Isu i takia, “O muri nau.”
LUK 5:28 Lakea e Levi i pesi rike, i pe puru a maki lobo vona, i muri maia.
LUK 5:29 Muri e Levi i rata a habu dagi ne Isu na ruma vona. E huriki a bakovi ni bole a takis turana e huriki a bakovi ranga ri kani turane rua.
LUK 5:30 Pali e huriki a Pariseo, e huriki a mari na vinara ri ta puhaki lakea ne huriki a murimuri vona, ri ta maea, “I navai mu kani mu ninu turana e huriki a bakovi ni bole a takis, e huriki a bakovi hale?”
LUK 5:31 E Isu i koli i ta maea, “E huriki i uka ma ri giloa i uka ma ri gi matai a dokta. E huriki ri giloa kunana bara ri masia.
LUK 5:32 Iau a valai i uka ma ga gale mua e huriki mu luhoi ta mu naro kamumu mu gu pulo a vilone mua. A valai ga gale e huriki ri naro hale ri gi pulo a vilo ne ria.”
LUK 5:33 Muri ri takia, ri ta maea, “E huriki a murimuri ne Ioanes ri peremu. E huriki a murimuri ne huriki a Pariseo ria ranga ri peremu, ri vasileki. Pali e huriki a murimuri vomu ri kani, ri ninu kunana.”
LUK 5:34 E Isu i koli i ta maea, “E huriki ri made turana bakovi i parangi karaba i uka ma ri gi peremu. Bara ri kani turana.
LUK 5:35 Pali na tahuna a bakovi i parangi karaba ni tuli tala ne ria, bara ri peremu.”
LUK 5:36 Muri e Isu i takia ne ria tara nita vakakika, i ta maea, “I uka tara viri ge vida talea na varakia karaba a mavidana, ge rahi kari a hini marape na matutuna varakia. Bara i rata mavonga, bara i ratapilea a varakia karaba, lakea a tabekena varakia karaba i uka ma ge karea a matutuna varakia.
LUK 5:37 I mavonga tabu, i uka tara viri ge guru dili a vain karaba na matutuna buroi. Bara i rata mavonga bara i mapoda a buroi, lakea a vain bara i maguru tala.
LUK 5:38 I mavonga kunana a vain karaba bara ni guru dili na buroi karaba.
LUK 5:39 Pali i uka tara viri ge ninu muga a vain hosi muri ge ngaru a vain karaba tabu, a vuhuna bara i ta maea, ‘a vain hosi i nami kamumu hateka.’”
LUK 6:1 Na Parava Nimalo tara, e Isu i laho padikudu na hania na vit, lakea e huriki a murimuri ri vakatubu ni kinipasi a kanena vit, ri loi vuroki a kulina, ri kani a vutuna.
LUK 6:2 Lakea e huriki a Pariseo ri nana ria, “I navai mu rata a maki ni ta pupukari vona na Parava Nimalo!”
LUK 6:3 E Isu i koli i ta maea, “Ra mua, i uka ma mu gia a naro i ratea e Davit na tahuna i turana e huriki a tara vona ri vitolo?
LUK 6:4 E Davit i dili na roho na Vure, i bole a bret, i kani. Ra bret iea a nihabi na Vure. A vinara i taki e huriki a prister kunana ri gi kani. Pali i bole ranga i kani. I bole ranga i habi ne huriki a tara vona, ria ranga ri kani.”
LUK 6:5 Muri e Isu i taki ria i ta maea, “A Tuna Bakovi ia a Bakovi Dagi na Parava Nimalo.”
LUK 6:6 Na Parava Nimalo tara, e Isu i dili na roho na vaponga i tovo e huriki. A bakovi tara i made vonga i mate a limana kanena.
LUK 6:7 E huriki a Pariseo, a mari na vinara, ri matakana a naro ri gi padi virihi e Isu vona. Lakea ri muri marogo lae vona ri gi matakaria, ma ge vakamahuri a viri tara na Parava Nimalo.
LUK 6:8 Pali e Isu i lohoka vona a niluhoi ne ria, lakea i takia a bakovi i mate a limana, i ta maea, “O pesi rike koea na kurukurune huriki.” Lakea i pesi rike na matane ria.
LUK 6:9 Muri e Isu i taki ria i ta maea, “Ngane ga nana mua, a vinara i ta navai vona a naro si gi ratea na Parava Nimalo? Si gi rata a naro kamumu o si gi rata a naro hale? Si gi vakamahuri a viri, o si gi ratapile a viri?”
LUK 6:10 E Isu i mata lae ne ria, muri i takia a bakovi, i ta maea, “O toto talea a limamu.” Lakea i toto talea a limana, i tavaga mule.
LUK 6:11 E huriki a Pariseo i madihi a hatene ria, lakea ri varodo a ngava na a ra naro ri gi rata virihi ia vona.
LUK 6:12 Na parava tara e Isu i sike na lolo ge vasileki, lakea i vasileki mavonga na Vure na rodo.
LUK 6:13 Na tahuna a haro i rike, i gale valai vona e huriki a murimuri vona. I vulaki a bakovi ala ravulu a polona i rua, i gale ria a apostolo. E huriki a apostolo ne Isu ra nga:
LUK 6:14 e Simon re Isu i vunua e Petrus, e tarina e Andreas, e Iakop, e Ioanes, e Pilip, e Bartolemeus,
LUK 6:15 e Mateo, e Tomas, e Iakop tune Alpius, e Simon na kabu ne Silot,
LUK 6:16 e Iudas e tune Iakop, e Iudas Iskariot, ra viri i habi e Isu ne huriki a pile.
LUK 6:17 Muri e Isu i tuli e huriki a apostolo vona, ri raga puru na lolo, ri vano, ri pesi na bila. E huriki a murimuri vona ala kupo ri made vonga pali, turana e huriki ri valai na tabeke ne Iudea, ne Ierusalem, na tabeke ne Tair e Sidon, ra ru pesi na dahana dari.
LUK 6:18 E huriki nga ri valai ri gi longo a vinara ne Isu, ri ngarua ge vakamahuri ria na gilanga ne ria. E huriki i dili ne ria a hanitu, e Isu i korimule ria.
LUK 6:19 E huriki lobo ri toni ni padoi ia, a vuhuna a nitora na Vure i tabuli vona, i vakamahuri ria lobo.
LUK 6:20 E Isu i mata lakea ne huriki a murimuri vona, i ta maea, “Mua o huriki a matasia mu vivi, a vuhuna a Vure bara i habi ne mua a harikianga vona.
LUK 6:21 Mua o huriki mu vitolo ngane mu vivi, a vuhuna muri ma bara mu maru. Mua o huriki mu tatangi ngane mu vivi, a vuhuna muri ma bara mu nongo mu pitei.
LUK 6:22 E huriki bara ri tepu mua, ri lohopile mua, ri harogi mua, ri taki mua ta mu hale a vuhuna mu muri mai a Tuna Bakovi. Pali mu vivi!
LUK 6:23 Hosi e huriki e tubune ria ri rata mavonga e huriki a propet. Lakea na tahuna ri rata mavonga mua, mu vivi hateka, mu pitei, a vuhuna a Vure bara i kona dagi mua meli na hunu.
LUK 6:24 Pali mua o huriki a viri na mahala ngane, a Vure bara i ratapile mua, a vuhuna mu bole pali a nimade kamumu ne mua.
LUK 6:25 Mua o huriki mu kani marumaru ngane, a Vure bara i ratapile mua. Muri ma bara mu vitolo. Mua o huriki mu nongo ngane, a Vure bara i ratapile mua. Muri ma bara mu haloho mu tangi.
LUK 6:26 Mua o huriki ni kavurike bala ngane, a Vure bara i ratapile mua. Hosi e huriki e tubune ria ri rata mavonga e huriki a nitamina propet.
LUK 6:27 “Pali mua e huriki mu longo a ngavagu, a taki mua, mu ngaru e huriki a pile ne mua, mu rata kamumu e huriki ri tepu mua.
LUK 6:28 Mu rata kamumu e huriki ri harogi mua. Mu vasileki ne huriki ri rata hale mua.
LUK 6:29 A viri tara ge ubi ioe na garemu, o tabalahehe ge ubi tabu ioe na garemu tara. A viri tara ge bole a varakia vomu, naha ni vakatokua, o habi tabua vona a padirodo vomu tara.
LUK 6:30 O habi ne huriki ri nongi a maki vomu. A viri ge bolea vomu tara maki, naha ni takia ge habi mulea.
LUK 6:31 Ra naro mu ngaru e huriki ri gi rata virihi mua vona, mua ranga mu rata.
LUK 6:32 “Mua bara mu ngaru kunana e huriki ri ngaru mua, e rei ge kavurike mua? E huriki a bakovi hale, ria ranga ri ngaru e huriki ri ngaru ria.
LUK 6:33 Mua bara mu rata kamumu kunana e huriki ri rata kamumu mua, e rei ge kavurike mua? E huriki a bakovi hale, ria ranga ri rata mavonga.
LUK 6:34 Mua bara mu habi a maki, muri mu ngaru ni gi koli, e rei ge kavurike mua? E huriki a bakovi hale, ria ranga ri habi a maki ne huriki a bakovi hale, ri ngaru ni gi koli.
LUK 6:35 Pali a ngaru mua mu gu ngaru e huriki a pile ne mua, mu rata kamumu ria. Na tahuna mu habi ne ria a maki, naha ni taki ria ri gi habi mule. Mu rata mavonga, a mapane mua bara i dagi hateka, bara mua e huriki e tuna Vure Meli Liu, a vuhuna i rata kamumu e huriki ri bole lupu a maki, e huriki ri naro hale.
LUK 6:36 Mu dodo e huriki, i manga a Vure, e Tamane mua, i dodo e huriki.
LUK 6:37 “Naha ni pelekado a viri, lakea a Vure i uka ma ge pelekado mua. Naha ni taki e huriki ranga ri hale, lakea a Vure i uka ma ge taki mua mu hale. Mu lohopile a naro hale ne huriki, a Vure tara bara i lohopile a naro hale ne mua.
LUK 6:38 Mu ramai a naro hatebalala, lakea a Vure tara bara i hatebalala, i habi a maki ne mua. Na tahuna a Vure i habi a maki, bara i habi ge kupo, i guru tala, i padi lulu puru, i tahoni tabu bara i maguru tala tavula ranga. A naro o rata virihi e turamu, a Vure tara bara i rata virihi ioe vona.”
LUK 6:39 Muri e Isu i taki ria vona a nita vakakika, i ta maea “A bakovi i kepa i uka ma ge tulia a bakovi i kepa. Bara i toni ni tulia, rua varago bara ru boru puru na lovo.
LUK 6:40 A lohokanga na koma ni tovo i uka ma ge rangi a lohokanga na viri i tovo ia. Pali na tahuna i tovo loboa a koma, a koma bara i lohoka manga a viri i tovoa.
LUK 6:41 “I navai o masia a muku na matane turamu, pali o mata kepa vona a bokona kai i koro na matamu ke?
LUK 6:42 Go taki navia e turamu, ‘Turagu, ga kuri tala a muku na matamu.’ Pali ioe i uka ma o matakilaka vona a bokona kai dagi i tabuli na matamu! Ioe a bakovi na taminga! O bole tala taro a bokona kai na matamu, muri bara o matai kamumu, o kuri tala a muku na matane turamu.
LUK 6:43 “A kai kamumu i uka ma i vakabele kilala a kanena ge hale. A kai hale i uka ma i vakabele kilala a kanena ge kamumu.
LUK 6:44 A kai si matakilalea na vuana. I uka ma si pasi a vuana pik na mota barakau. I uka ma si gi pasi a kanena vain na mota padipadi.
LUK 6:45 A bakovi kamumu i vakasiri a hatena i kamumu na naro kamumu i rata. Pali a bakovi hale i vakasiri a hatena i hale na naro hale i rata. A nitana bakovi i vakasiri e huriki, ia a bakovi navai.
LUK 6:46 I navai mu gale iau e, ‘Bakovi Dagi, Bakovi Dagi,’ pali i uka ma mu muri mai a nitagu?
LUK 6:47 Ga vakalongo mua vona a naro na viri i valai nau, i longo a nitagu, i longototo.
LUK 6:48 A narona i manga a bakovi i hae a roho. I keli puru i vakapesi langa na kedo a vuhuna butu. Na tahuna i tua a meka i pulua a ruma i uka ma i vakulu, a vuhuna i hae kamumua.
LUK 6:49 Pali a viri i longoa a nitagu, pali i longotaro, i manga a bakovi i hae a roho, i uka ma i puru hateka a butu. Na tahuna i tua a meka i ratapilea a ruma, i mapuka puru, i lobo.”
LUK 7:1 E Isu i vara lobo e huriki, muri i dili o Kapernaum.
LUK 7:2 Na tanga iea, i made vona a ubu na tara na nugumaheto. A vora na ubu iea i giloa, i popote ge mate. A ubu i ngaru hatekea a vora vona.
LUK 7:3 Na tahuna i longoa e Isu i bele vonga, i rudu e huriki a bakovi dagi na Iuda, ri gi takia e Isu ge valai ge korimulea a vora vona.
LUK 7:4 Na tahuna ri bele ne Isu ri nana torea, ri ta maea, “A ubu na tara iea, a bakovi kamumu hateka. I ngaru hateka hita e huriki a Iuda. I haea koea ne mia tara roho na vaponga. I kamumu go koria.”
LUK 7:6 Lakea e Isu i vano turane ria. I popote ri gi bele na ruma, lakea a ubu i rudu e huriki a turana ri gi takia e Isu, ri gi ta maea, “Bakovi Dagi, ma ga vakapae ioe. Iau i uka ma a bakovi kamumu go valai na ruma nau.
LUK 7:7 Lakea iau, i uka ma a luhoi ge iau a bakovi kamumu ga valai mai ioe. O taki kunanea a ngava, ge mahuri a vora nau.
LUK 7:8 A lohoka vona bara i bele, a vuhuna iau a longototo e huriki a bakovi dagi nau. E huriki a nugumaheto a matakari ria, ria ranga ri longototo iau. Bara takia a viri tara ge vano, bara i vano kunana. Bara takia ge valai, bara i valai kunana. Bara takia a vora nau ‘o ratea a maki iea,’ bara i rata kunanea.”
LUK 7:9 Na tahuna e Isu i longoa a ngava iea i turutu, i matagege lakea ne huriki ri muri vona, i taki ria, “A taki mua, i uka ma a pugaia ma tara bakovi o Israel ge luhoi tora hatekea a Vure ge manga a bakovi iea.”
LUK 7:10 Muri e huriki a vinuru ri hamule lakea na ruma. Na tahuna ri bele, ri masia a vora i tavaga pali.
LUK 7:11 Muri e Isu i lakea na tanga dagi e Nain. E huriki a murimuri, e huriki a bakovi a ngatavine ala kupo ranga ri laho turana.
LUK 7:12 Na tahuna ri luve tabukoi na poridala na tanga, ni kaloho tala a podana bakovi i mate, a madiva na havuri, ni gi tanu. I kupo e huriki na tanga dagi ri laho turana havuri iea.
LUK 7:13 Na tahuna e Bakovi Dagi i masia a havuri, i dodoa, lakea i takia, “Naha ni tangi.”
LUK 7:14 I laho lokovonga i nugua a moke, ra i tabuli vona a podana riau, lakea e huriki ri kalohoa ri pesi tata. Muri e Isu i ta maea, “Riau, ngane a taki ioe, o pesi rike!”
LUK 7:15 Lakea a riau i made rike, i vakatubu ni ta. Muri e Isu i tulia, i habi mulea ne kinana.
LUK 7:16 E huriki lobo ri mangenge, ri kavurikea a Vure. Lakea ri ta maea, “A propet dagi i bele na kurukurune hita. A Vure i valai pali ge tuhori e huriki a ngate vona.”
LUK 7:17 A velengane Isu ni longo na tabeke lobo ne Iudea, na robo tabukoi vonga.
LUK 7:18 E huriki a murimuri ne Ioanes ri vakalongoa vona a maki lobo e Isu i rata.
LUK 7:19 Lakea e Ioanes i rudu a vinuru vona ala rua ru gu masia e Bakovi Dagi, ru gu nanea, “Ioe kunana a viri a Vure i taki ge rudu vilia, o mi gi davea a viri tara?”
LUK 7:20 Lakea ru vano. Na tahuna ru bele, e Isu i vakamahuri e huriki ri giloa, e huriki i dili ne ria a hanitu, i vakamatapara e huriki a kepa. Ru nanea, “E Ioanes a mari ni vahilolo i rudu maria miri gi nana ioe. Ioe kunana a viri a Vure i takia ge rudu vilia, o mi gi davea a viri tara?”
LUK 7:22 Lakea e Isu i koli, i ta maea, “Muru hamule, muru vakalongo e Ioanes vona a maki muru matai muru longo: E huriki a kepa ri matapara, e huriki a beu ri laho tabu, e huriki ri tahoka a patala ri matapado, e huriki ri vou ri longo mule tabu, e huriki ri mate ri mahuri mule tabu, a Velenga Kamumu ni vakalongo ne huriki a matasia.
LUK 7:23 E huriki ri matai a maki a rata, pali i uka ma ri koi nau, a Vure bara i rata kamumu ria.”
LUK 7:24 E Isu i ta lobo, lakea a vinuru ne Ioanes ru vano. Muri e Isu i vakalongo e huriki vonga, i ta maea, “Ra viri mu dili maia na tabeke i ngeki, i uka ma ia a bakovi ni ta viliha lae, ge manga a pagana viru i bole lelea a vilu.
LUK 7:25 I uka ma i bagetu na varakia kabakaba. E huriki ri bagetu na varakia kabakaba ri tahoka a mahala i kupo, ri made na ruma hariki.
LUK 7:26 A viri mu vano mu gu masia a propet. A taki muholi mua, e Ioanes i uka ma ia a propet tavula kunana.
LUK 7:27 Hosi ni vakalongo muga vona na hinere. A hinere i ta maea, ‘Ga rudua a vinuru nau ge muga vomu, ge pelekadoa a dalamu.’
LUK 7:28 “A taki mua, i uka tara viri koea na malala ge polomeli ne Ioanes. Pali a viri i manga a bakovi tavula pololilo na harikianga na Vure, i polomeli ne Ioanes.”
LUK 7:29 Na tahuna e huriki ri longoa a nitane Isu, e huriki a bakovi a ngatavine, turana e huriki a bakovi ni bole a takis, ri ta maea, “I muholi, a Vure i ngarua e Ioanes ge vahilolo mia.” Ri ta mavonga, a vuhuna e Ioanes i vahilolo ria pali.
LUK 7:30 Pali e huriki a Pariseo, e huriki a mari na vinara, i uka ma ri ramai a ningaru na Vure, ri koi e Ioanes ge vahilolo ria.
LUK 7:31 Muri e Isu i ta maea, “Ga toni virihi ma a ra e huriki na tahuna mona? Ri gi manga a ra?
LUK 7:32 Ri manga e huriki a koma ri made na mada ni vahabi ni vangoli a maki. Ri gale e huriki a koma ranga ri ta maea, ‘Mi vaki a piloli, pali i uka ma mu raulo. Mi kalolo a linge na matenga, pali i uka ma mu tangi.’
LUK 7:33 “A ta maea a vuhuna e Ioanes a mari ni vahilolo, i valai i uka ma i kani a bret, i uka ma i ninu a vain, lakea mu takia ta i dili vona a hanitu.
LUK 7:34 Pali a Tuna Bakovi i valai i kani i ninu, lakea mu ta maea, ‘Ia a bakovi ni kani ni ninu hateka, i turana bala e huriki a bakovi ni bole a takis, e huriki a bakovi hale.’
LUK 7:35 Pali e huriki ri ramai a niluhoi kamumu na Vure, ri vakasiri manga a niluhoi kamumu vona i muholi.”
LUK 7:36 A Pariseo tara i takia e Isu ge kani turana. Lakea e Isu i lokovonga i made na dede.
LUK 7:37 A ngatavine tara i made na tanga iea, a ngoi. Na tahuna i longoa e Isu i kani turana Pariseo, i vano i konea a ulo ni rata na kedo a alabasta, i vona a nibiri mangisipa.
LUK 7:38 I lakea na ruma na Pariseo, i pasike puru muri tabukoi na vahane Isu i vakatubu ni tangi. I vahilolo a vahane Isu na luhana. Muri i ravu a vahane Isu na vuna, i nguru a vahana, i guru langa na vahana a mangisipa.
LUK 7:39 Na tahuna a Pariseo iea i masia a ngoi i rata maea, i luhoi maea, “Ra bakovi iea, ge ia a propet bara i lohoka vona ra ngatavine i nugua, a ngatavine navai. Ra ngatavine iea a ngatavine hale.”
LUK 7:40 Lakea e Isu i takia, i ta maea, “Simon, a tahoka a ngava ta ga taki ioe vona.” Lakea e Simon i koli i ta maea, “Mari ni tovo, mo vakalongo iau vona.”
LUK 7:41 Lakea e Isu i ta maea, “A bakovi ala rua ru bole a moni na bakovi i matakari a tava. A bakovi tara i bole a kedo silva i 500. A viri tara i bole a kedo silva i 50.
LUK 7:42 Rua varago ru uka a moni ru gu koli, lakea i taki rua nahea ru gu koli. E rei ne rua ge ngaru hatekea a matakari na tava?”
LUK 7:43 E Simon i koli i ta maea, “Iau a luhoia ra bakovi i kupo a moni i bole, lakea a matakari na tava i takia nahea ge koli.” Lakea e Isu i takia e Simon, i ta maea, “A nitamu i muholi.”
LUK 7:44 Muri i mata lakea na ngatavine i takia e Simon, “Ra ngatavine iea o masia? Iau a valai na ruma vomu, pali ioe o uka ma o habi nau a naru ga vahilolo a vahagu. Pali a ngatavine iea, i vahilolo a vahagu na luhana, i ravu a vahagu na vuna.
LUK 7:45 Ioe o uka ma o tagui iau, pali ra ngatavine iea i nguru mavonga a vahagu na tahuna i dili koea.
LUK 7:46 Ioe o uka ma o biri a gigu na nibiri, pali a ngatavine iea, i guru langa na vahagu a mangisipa.
LUK 7:47 Pali ngane ga taki ioe, a naro hale vona i kupo, pali iau a puga vuroki, i mavonga i ngaru hateka iau. A viri ni puga vuroki a naro hale kiroko vona, a ningaru vona i kiroko kunana.”
LUK 7:48 Muri e Isu i takia a ngatavine i ta maea, “Iau a puga vuroki a naro hale vomu.”
LUK 7:49 E huriki ri bele palupu na nikani ri vata, ri ta maea, “Ra bakovi iea, ia e rei muholi i puga vuroki a naro hale?”
LUK 7:50 Lakea e Isu i takia a ngatavine i ta maea, “A puga vuroki a naro hale vomu a vuhuna o luhoi tora iau. O vano na nivalemu.”
LUK 8:1 Muri e Isu i laho lae na maka tanga dagi, a tanga kiroko, i vakalongo a Velenga Kamumu na harikianga na Vure. E huriki a apostolo vona ala ravulu a polona i rua ri laho turana.
LUK 8:2 E huriki a ngatavine e Isu i korimule ria na hanitu, na gilanga, ria ranga ri laho turana: e Maria, a rana tara e Magdala, ra ni lili tala a hanitu i polorua vona,
LUK 8:3 e Ioana e girihine Kusa, re Kusa i matakari a ruma ne Herod, e Susana, turana e huriki a ngatavine ranga. E huriki a ngatavine nga ri habi bala a maki ne ria ni tuhoria e Isu.
LUK 8:4 E huriki na tanga lobo ri valai mai ia, ri vapopo. Lakea i taki ria na nita vakakika, i ta maea,
LUK 8:5 “A bakovi ni leho na hania i vano, i varo a vutuna vit. Na tahuna i voro lae a vutuna vit, i ranga ri boru puru na dala, lakea ni laho langa ne ria, i ranga i kani poi a kadirovo.
LUK 8:6 I ranga ri boru puru na kedo. Na tahuna ri koru rike ri malai, a vuhuna a malala i kere.
LUK 8:7 A vutuna vit ranga ri boru puru na hini i rako vona barakau, lakea a barakau i rako taho.
LUK 8:8 Pali i ranga a vutuna vit ri boru langa na malala kamumu. Ri koru rike, ri vua, ri vakabele a kanene ria i ravulu mule ma murina i balaka taku (100).” E Isu i tuverei lobo, lakea i gale tala, i ta maea, “E rei a viri i ngaru ni longokilalea a ngavagu, ge longo kamumu, ge luhoi kado.”
LUK 8:9 Lakea e huriki a murimuri vona ri nanea ge tuveve polo a pelegona nita vaka­kika.
LUK 8:10 E Isu i koli i ta maea, “A Vure i habi a lohokanga ne mua, mu gu lohoka vona a maki kapiloho na harikianga na Vure. Pali e huriki ranga, a ta vakakika ne ria, nahea ri gi longokilala, ge manga a ngava ni here puru hosi na Hinere, i ta maea, ‘Ri matai, pali i uka ma ri matakilala. Ri longo, pali i uka ma ri longokilala.’
LUK 8:11 “A pelegona a nivakakika i maea: A vutuna vit i manga a nitana Vure.
LUK 8:12 A vutuna ri boru puru na dala ri manga e huriki ri longo a ngava. Muri i valai a hanitu i panaho tala a ngava na hatene ria, i uka ma ri gi luhoi tora, i uka ma ri gi bole a nimahuri vakaroro.
LUK 8:13 “A maka vutuna vit ri boru langa na kedo ri manga e huriki ri longo a nitana Vure, ri vivi ni luhoi torea, pali i uka ma ri ngarua ge dili na hatene ria. Ri ramai na parava popote kunana, pali a parava na nitoni i bele, ri boru.
LUK 8:14 “A maka vutuna vit ri boru langa na hini i rako vona a barakau, ri manga e huriki ri longo a ngava, pali ri muri mai a ningaru ne ria kunana. Ri loho lege lae na nimade ne ria, na mahala, na bagetua, lakea i putukari ria ni vakabele a kanene ria.
LUK 8:15 “A maka vutuna vit ri boru langa na malala kamumu ri manga e huriki a bakovi kamumu, a bakovi ni ta muholi. Ri longo a nitana Vure, ri ru na hatene ria, ri lohotata vona. Na tahuna ri lohotata na ngava, ri hatenono, bara ri vakabele a kanene ria i kupo.
LUK 8:16 “I uka ma si namia a lam muri si gi kavi­tagua. A lam bara si vakatavorea, lakea e rei a viri i valai bara i masia a hini palala.
LUK 8:17 A rabu lobo ni rata kapi­loho bara ni vakalongo lae muri ma. A maki ni ruhulolo, bara i bele kavakava.
LUK 8:18 E rei a viri i longokilala a ngava bara ni habi tabu ranga. A viri i uka ma i longokilala a ngava, pali ra ngava i luhoi ta i longokilala, bara ni bole hamule vona. I mavonga, mu luhoi kamumu a ngava mu longo.”
LUK 8:19 Na parava tara e kinana e turana mai ri valai ri gi masia e Isu, pali ri keri ni dili, a vuhuna ri ala kupo e huriki ri made, ri longoa e Isu i vara.
LUK 8:20 Lakea a bakovi tara i vakalongoa e Isu, i ta maea, “E kinamu, e tarimu mai to pesi polovavo, to ngaru ni matai ioe.”
LUK 8:21 E Isu i koli i ta maea, “E nana, e turagu mai re huriki ri longo a nitana Vure, ri muri mai a ngavana.”
LUK 8:22 Na parava tara e Isu i tura e huriki a murimuri i ta maea, “Si vano si gi lakea na tabeke tara na darilomu.” Lakea ri rike na aga ri vano.
LUK 8:23 Na tahuna ri vore lokovonga, e Isu i mahita. I pori ngane a taiava i toko dili na aga, a dari i ratea a aga i popote ge mabubu.
LUK 8:24 E huriki a murimuri ri vangoa e Isu ri ta maea, “Bakovi Dagi, Bakovi Dagi, i popote bara i mabubu a aga. Bara si pasiri!” Lakea e Isu i pesi rike i tahate a vilu a naru, naha ru gu pori. Lakea i pasi puru a taiava, i malilo a dari.
LUK 8:25 E Isu i nana e huriki a murimuri vona i ta maea, “I vai a niluhoi ne mua?” E huriki a murimuri ri mangenge ri ngapa, lakea ri vanana, “E rei a viri iea? I vakuku a vilu a dari, ru longototoa!”
LUK 8:26 Ri bele na tabeke ne Gerasa, na tabeke tara na Darilomu e Galili.
LUK 8:27 Na tahuna e Isu i page raga na aga, i masia a bakovi tara, i dili vona a hanitu. A bakovi iea a bakovi na tanga e Gerasa. E huriki na tanga bara ri kolo a vahana a limana na sen. I balaka kupo pali i ratea a hanitu, i rakudu gareka a sen, lakea a hanitu i lili talea na tanga ge made na robo i ngeki. I tabaka pali i uka ma i rodo a varakia, i uka ma i mahita na ruma. I mahita kunana na murine huriki ri mate. Lakea na tahuna e Isu i masia, i takia a hanitu ge pagitala vona a bakovi iea. Ngane a bakovi iea i mahita puru na vahane Isu, i gale tala dagi, i ta maea, “Isu, Tuna Vure Meli Liu, go rata navai iau? A nana tora ioe, naha ni ratapile iau!”
LUK 8:30 Lakea e Isu i nanea, “E rei a ramu?” I koli, i ta maea, “A ragu e Tara,” a vuhuna i kupo e huriki a hanitu ri dili vona.
LUK 8:31 E huriki a hanitu ri nana torea e Isu nahea ge tono ria ri gi lakea na lovo i marangeo.
LUK 8:32 A kabuna boro ri kakani na dahana kupona. E huriki a hanitu ri nana torea e Isu ge tono ria lakea na kabuna boro. Lakea e Isu i longo.
LUK 8:33 E huriki a hanitu ri pagitala na bakovi, ri vano ri dili na maka boro. Muri a kabuna boro ri nunu raga na gali, ri to na darilomu, ri pasiri.
LUK 8:34 Na tahuna e huriki a matakari na boro ri masia, ri ha, ri vakalongo e huriki na tanga, na robo tabukoi vonga.
LUK 8:35 Lakea e huriki ri vano ri gi masia ra maki i bele. Na tahuna ri bele ne Isu, ri masia ra bakovi i pagitala vona e huriki a hanitu, i made tabukoi na vahane Isu. I lobo vona pali a nimanga, i rea mule a varakia vona. Na tahuna ri masia, ri mangenge.
LUK 8:36 Ngane e huriki ri masia a naro iea i ratea e Isu, ri vakalongo e huriki ri bele taho ria vonga, ri taki ria ne Isu i korimule navia a bakovi iea ne huriki a hanitu.
LUK 8:37 Lakea e huriki a bakovi a ngatavine na robo e Gerasa ri takia e Isu ge vano, a vuhuna ri mangenge hateka. A bakovi i pagitala vona e huriki a hanitu i ngaru ni laho turane Isu. Pali e Isu i tono mulea, i ta maea, “O hamule lakea na tanga vomu, o vakalongo e huriki vonga na maki kamumu hateka a Vure i rata virihi ioe vona.” Lakea e Isu i rike na aga, i vano. A bakovi iea i hamule lakea na tanga vona, i vakalongo e huriki vonga ne Isu i kori hatekea, i lili tala e huriki a hanitu vona.
LUK 8:40 E Isu i hamule tabu lakea na tabeke tara na darilomu, lakea e huriki ri taguia, a vuhuna ri pasimata vona.
LUK 8:41 Muri i valai tara bakovi, a rane Ierus. Ia a matakari na roho na vaponga. I tabuli puru tabukoi na vahane Isu, i takia ge valai na ruma vona.
LUK 8:42 I ngarua ge valai, a vuhuna i popote ge mate e tuna a madiva, a koma ngatavine. Ra koma iea, a pida vona i ravulu a polona i rua. Na tahuna e Isu i laho lokovonga, e huriki ri tango kapia.
LUK 8:43 A ngatavine tara i laho turane ria i pori vona a dara na pida i ravulu a polona i rua. E huriki a dokta ri keri ni koria.
LUK 8:44 I laho valai muri ne Isu, i padoia a ngutuna varakia vona. I malaviriri kunana i lobo ni pori a darana.
LUK 8:45 Lakea e Isu i nana maea, “E rei i padoi iau?” Ri lavuni e huriki, lakea e Petrus i ta maea, “Bakovi Dagi, e huriki ri pesi vatutu hateka ri tango kapi ioe.”
LUK 8:46 Lakea e Isu i ta maea, “I tahoka tara viri i padoi iau. A lohoka vona, a vuhuna a hatakia a nitora nau i vakatavaga ia pali.”
LUK 8:47 A ngatavine i lohoka ngane i uka ma ge kapiloho tabu, lakea i laho vakulukulu valai, i tabuli puru tabukoi na vahane Isu. Na matane huriki lobo, i vakalongo i navai i padoia e Isu, lakea i vakalongo tabu vona a dara i lobo liu ni pori vona.
LUK 8:48 Muri e Isu i takia a ngatavine, “O tugu, ioe o mahuri a vuhuna o luhoi tora iau. O vano na nivalemu.”
LUK 8:49 E Isu i tabana ni ta, a vinuru tara i bele, i valai na ruma e Iairus, a matakari na roho na vaponga, i ta maea, “E tumu i mate pali. Naha ni vakapae tabua a mari ni tovo.”
LUK 8:50 E Isu i longoa a ngava iea, lakea i takia e Iairus, i ta maea, “Naha ni mangenge. O luhoi tora iau. E tumu bara i mahuri tabu.”
LUK 8:51 Na tahuna e Isu i bele na ruma ne Iairus, i koi ne huriki lobo ri gi dili na ruma. I tuli kunana e Petrus, e Ioanes, e Iakop, turana e kinana e tamana sirula i mate.
LUK 8:52 E huriki ri made muga vonga ri dua, ri taringia. Pali e Isu i taki ria i ta maea, “Naha ni tangi. A sirula i uka ma i mate, i mahita kunana.”
LUK 8:53 Lakea ri nongo vakia e Isu, a vuhuna ri lohoka vona a sirula i mate muholi pali.
LUK 8:54 Pali e Isu i nugua a limana sirula, i ta maea, “Sirula, o pesi rike!”
LUK 8:55 Lakea a hanuna i hamule maia. I malaviriri kunana i pesi rike. Muri e Isu i taki ria ri gi vakania.
LUK 8:56 E tamana e kinana i ubi rua a ngapa, pali e Isu i taki tora rua, nahea ru gu vakalongoa tara viri vona a maki i bele.
LUK 9:1 Muri e Isu i gale palupu e huriki a apostolo vona ala ravulu a polona i rua, i habi a leho ne ria, a nitora ri gi lili tala a hanitu, ri gi vakatavaga e huriki ri giloa.
LUK 9:2 I rudu tala ria, ri gi vara vona a harikianga na Vure, ri gi vakamahuri e huriki ri giloa.
LUK 9:3 I taki ria, i ta maea, “Naha ni bolea tara maki na tahuna mu havai. Naha ni bole a kodo. Naha ni bole a hole. Naha ni bole a maki ni kani. Naha ni bole a moni. Naha ni bole a varakia ge rua.
LUK 9:4 E rei a tanga mu dili vona, mu made na ruma ge taku kunana.
LUK 9:5 E rei a tanga i uka ma i tagui mua, mu kurudu pasi a habulo na vahane mua, mu ha taroa, bara i vakasiri ria ri tahoka a ngava.”
LUK 9:6 Lakea e huriki a apostolo ne Isu ri vano, ri laho lae na maka tanga, ri vara na Velenga Kamumu, ri vakamahuri e huriki ri giloa.
LUK 9:7 E Herod, a hariki, i longo a maka maki i rata e Isu. I luhoi lege lae a vuhuna e huriki ranga ri takia e Isu ta ia e Ioanes i mahuri mule na nimate.
LUK 9:8 E huriki ranga ri takia e Isu ta ia e Elaisa i bele tabu. E huriki ranga tabu ri takia e Isu ta ia a propet hosi tara i mahuri mule.
LUK 9:9 Pali e Herod i ta maea, “Iau a palakudua hosi a lohone Ioanes. Pali e rei ra viri iea a longoa i rata a maka maki nga?” Lakea i ngaru ni masia e Isu.
LUK 9:10 Na tahuna e huriki a apostolo ne Isu ri hamule pali, ri vakalongo e Isu vona a maka maki ri rata. Muri e Isu i tuli ria, ri vano, ri lakea na tanga dagi tara ni gale e Betsaida.
LUK 9:11 Pali e huriki ri longoa a hini e Isu i lakea vona, lakea ri muri mai ia. Na tahuna ri bele, e Isu i tagui ria, i vara ria na harikianga na Vure, i vakatavaga e huriki ri giloa.
LUK 9:12 Na malunga liu, e huriki a apostolo vona ala ravulu a polona i rua ri takia e Isu, ri ta maea, “A hini si made vona i ngeki. O taki e huriki ri gi vano, ri gi lakea na maka tanga tabukoi, ri gi matakana a maki ni kani, a murina ni mahita.”
LUK 9:13 Pali e Isu i koli, i ta maea, “Mu vakani ria.” Pali ri ta maea, “Mi tahoka kunana a bret i lima, a manu i rua. Ioe bara o ngaru mi gi habi a maki ne ria ri gi kani, bara si kona taro a maki bara i kara ria.”
LUK 9:14 E huriki a bakovi ri made vonga ri ala rangale lima (5,000). Lakea e Isu i taki e huriki a murimuri vona, i ta maea, “Mu vakamade kabuna ria ravulu lima, ravulu lima.”
LUK 9:15 Lakea ri rata manga a hini e Isu i taki, ri vakamade kabuna ria.
LUK 9:16 Muri e Isu i bole rike a bret i lima, a manu i rua. I mata rike na hunu, i kavurikea a Vure. Muri i keve a bret, i putu a manu, i habi ne huriki a murimuri vona ri gi veru.
LUK 9:17 E huriki lobo ri kani, ri maru. Muri ri tahoni na kulopi i ravulu a polona i rua a kalavana maki ni kani.
LUK 9:18 Na parava tara e Isu i vasileki kikeri. E huriki a murimuri vona ri valai, lakea e Isu i nana ria i ta maea, “Re huriki, ri luhoi iau, ge iau e rei?”
LUK 9:19 Ri koli ri ta maea, “E huriki ranga ri taki ioe, ta ioe e Ioanes, a mari ni vahilolo. Pali e huriki ranga ri taki ioe, ta ioe e Elaisa. Pali e huriki ranga ri taki ioe, ta ioe a propet hosi tara i mahuri mule tabu.”
LUK 9:20 Lakea e Isu i nana ria, “Pali mua, mu luhoi iau, ge iau e rei?” Lakea e Petrus i koli i ta maea, “Ioe e Kristo. A Vure i rudu ioe o valai.”
LUK 9:21 Lakea e Isu i taki tora ria, nahea ri gi vakalongoa tara viri, i ta maea,
LUK 9:22 “A Tuna Bakovi bara i bole a nimadihi i kupo. E huriki a gare, a prister dagi, a mari na vinara bara ri marikoi vona, ri rabalakia. Muri na parava i tolu bara i pesi rike mule na matenga.”
LUK 9:23 Muri i taki ria lobo, i ta maea, “E rei a viri i ngaru ni muri nau, ge lohopile a ningaru vona, ge kalohoa na parava vakaroro a kai tavalavala vona, ge ramai iau.
LUK 9:24 E huriki ri hataro iau, ne vona ni korimule a kuline ria, bara ri velu. Pali e huriki ri mate a vuhuna ri ramai iau, bara ri bole a nimahuri vakaroro.
LUK 9:25 Ge ra a viri i tahoka a mahala lobo na malala, pali ge velu ia?
LUK 9:26 E rei a viri i maruhu nau, i maruhu na ngava nau, iau, a Tuna Bakovi, bara maruhu vona na tahuna a valai na bagetuanga nau, a bagetuanga ne Tata, a bagetua ne huriki a agelo kamumu.
LUK 9:27 A taki muholi mua, i ranga ne mua, ra mu pepesi koea, i uka ma mu gu mate ma, bara mu matai a harikianga na Vure.”
LUK 9:28 Na parava i polotolu muri ne Isu i taki ra ngava nga, i tuli e Petrus, e Ioanes, e Iakop, to sike na lolo ge vasileki.
LUK 9:29 Na tahuna e Isu i vasileki, a matana i mapulo, i mata tebi. A varakia vona i parahidi manga a vila i maravila.
LUK 9:30 A bakovi ala rua, e Moses e Elaisa, ru bele vakaturutu turana bagetuanga na hunu, ru ta turana e Isu. To vata vona e Isu ge mate o Ierusalem.
LUK 9:32 E Petrus turana e vikirua to mahita mate, pali na tahuna to hadongo, to masia a nipara ne Isu turana bakovi nga ru pepesi turana.
LUK 9:33 Na tahuna e Moses e Elisa ta ru gu pe purua e Isu, lakea e Petrus i takia e Isu i ta maea, “Bakovi Dagi, i kamumu hateka mete valai. Mete ge hae a kape ge tolu: ne vomu tara, ne Moses tara, ne Elaisa tara.” E Petrus i ta tavulavula kunana.
LUK 9:34 Na tahuna e Petrus i ta ta, a havu i puru i kavitagu tou, lakea to mangenge.
LUK 9:35 A lohona viri tara i gale tala na bubu, i ta maea, “Ia e Tugu, a vulakia pali. Mu longo mai a ngavana.”
LUK 9:36 Na tahuna i ta lobo pali, to masia e Isu kikeri i pepesi vonga. Muri e Petrus, e Ioanes, e Iakop i uka ma to vakalongo lae vona a maki to matai. To mangulukari kunana.
LUK 9:37 Na parava muri ri raga puru na lolo. Na tahuna ri puru pali na lolo, ri matai e huriki ala kupo ri davea e Isu.
LUK 9:38 A bakovi tara i pesi turane ria i gale tala, i ta maea, “Mari ni tovo, a ngaru ioe go koria e tugu a bakovi, a madiva.
LUK 9:39 Na parava ranga, a hanitu i dili vona, i ratea i haloho vakaturutu, i tangi torutoru, i bubu vona a vere a ngavana. Muri, na tahuna e tugu i malulu liu a tuhana, a hanitu bara i ha taroa.
LUK 9:40 A nana tora pali e huriki a murimuri vomu ta ri gi korimulea, pali ri keri.”
LUK 9:41 Lakea e Isu i ta maea, “Mua o huriki na tahuna mona, i uka ma mu luhoi torea a Vure. A narone mua i hale hateka. Ge navai? Ga hatenono mavonga ni dava mua, mu gu luhoi tora iau?” Muri i takia a bakovi iea, i ta maea, “O tuli vilia e tumu.”
LUK 9:42 Na tahuna a koma i laho valai ne Isu, a hanitu i voro purua na malala, i ratea i tangi torutoru. Lakea e Isu i tahatea a hanitu, i korimulea a riau, muri i habi mulea ne tamana.
LUK 9:43 E huriki lobo ri ngapa vona a nitora dagi na Vure. Na tahuna e huriki ri vata lae vona a maki e Isu i ratea, lakea i taki e huriki a murimuri vona i ta maea,
LUK 9:44 “Mu longo kamumu a maki ga taki mua vona. A Tuna Bakovi i tabukoi bara ni habi na limane huriki a bakovi.”
LUK 9:45 Pali e huriki a murimuri i uka ma ri longokilalea a pelegona ngavana, a vuhuna ni ruhulolo ne ria. Ri mangenge ni nanea ge taki talea ne ria a pelegona.
LUK 9:46 Ngane e huriki a murimuri ri vaka­tubu ni vahehe lae ne rei ne ria i dagi hateka.
LUK 9:47 E Isu i lohoka vona a niluhoi ne ria, i tulia a koma tara, i vakapesia tabukoi vona.
LUK 9:48 Muri i taki ria, i ta maea, “E rei a viri i taguia a koma kiroko maea na ragu, i tagui iau. E rei a viri i tagui iau, i taguia ra viri i rudu iau a valai. E rei a viri a bakovi tavula ne mua lobo, ia kunana a viri bara i muga ne mua.”
LUK 9:49 E Ioanes i ta rike i ta maea, “Bakovi Dagi, mi masia tara bakovi i lili tala a hanitu na ramu, lakea mi tahatea, a vuhuna i uka ma ia a tara ne hita.”
LUK 9:50 E Isu i koli i ta maea, “Naha ni ta pupukari vona. E huriki i uka ma ri tepu mua, ria a turane mua.”
LUK 9:51 I tabukoi ngane e Isu ge sike na hunu, lakea i luhoi tora ni vakatubu ni havai lakea o Ierusalem.
LUK 9:52 I rudu muga a vinuru vona ri gi lakea na tanga tara na tabeke ne Samaria, ri gi pelekado a dalana, ge made popote vonga.
LUK 9:53 Pali e huriki vonga i uka ma ri garinga mai ia, a vuhuna i laho lakea o Ierusalem.
LUK 9:54 Na tahuna e Iakop e Ioanes ru masia a naro ne ria, ru takia e Isu, ru ta maea, “Bakovi Dagi, miri gi rudu raha ria, ge puru valai na hunu a kanono, ge gutuparina e huriki nga.”
LUK 9:55 Pali e Isu i tahate rua.
LUK 9:56 Muri ri laho polopolo lokovonga, ri made na tanga tara.
LUK 9:57 Na tahuna ri laho na dala, a bakovi tara i takia e Isu, i ta maea, “I vai a hini go lakea vona, ga muri mai ioe kunana.”
LUK 9:58 Lakea e Isu i koli i ta maea, “A kaugara i tahoka a dupina i mahita vona. A kadirovo i tahoka a nuna i mahita vona. Pali a Tuna Bakovi i uka ruma ge mahita vona.”
LUK 9:59 E Isu i taki tabua tara bakovi i ta maea, “O muri nau.” Pali a bakovi iea i koli, i ta maea, “Bakovi Dagi, ga vano taro ga tanua e tata.”
LUK 9:60 Lakea e Isu i takia, i ta maea, “E huriki ri made na uvo ri manga e huriki a viri ri mate pali. O taparaki ria ri gi tanu e huriki a viri ne ria. Pali ioe, o vano o vakalongo e huriki na harikianga na Vure.”
LUK 9:61 A bakovi tara i valai tabu ne Isu i ta maea, “Bakovi Dagi, iau a ngaru ni muri vomu. Pali ga vano taro ga tarulu puru a kabu nau.”
LUK 9:62 Lakea e Isu i koli, i ta maea, “A bakovi i vakatubu ni leho na hania, pali i leho matagege, i uka ma i kara ge leho na harikianga na Vure.”
LUK 10:1 Muri e Bakovi Dagi i vulaki tabu a bakovi ala ravulu polorua a polona i rua, i rudu tala ria ruarua, ri gi muga lakea na maka tanga e Isu i ngaru ge made ne ria.
LUK 10:2 I taki ria, i ta maea, “A maki ni kani na hania i kupo hateka, pali e huriki a bakovi ni mirio i uka ma ri ala kupo hateka. Lakea mu nanea a tahona hania ge rudu valai tabu ranga bakovi ri gi mirio.
LUK 10:3 Mu vano ngane! A rudu tala mua manga a tuna sipsip ri laho na kurukuruna kabu na kaugara.
LUK 10:4 Naha ni bole a hole. Naha ni rodo a vahapolo. Naha ni vakapae ni ta turana viri na dala.
LUK 10:5 “Na tahuna mu dili na ruma na viri, mu takia, ‘O made na nivalemu.’
LUK 10:6 A bakovi na nivalemu ge made vonga, a nivalemu bara i rike vona. Pali a bakovi i made vonga i uka ma ga bakovi na nivalemu, a nivalemu bara i hamule mai mua.
LUK 10:7 Mu mahita na ruma i taku kunana. Mu made na ruma iea, mu kani mu ninu a maki ni habi ne mua, a vuhuna a vora na leho i tahoka a mapana.
LUK 10:8 “Na tahuna mu dili na tanga tara, lakea e huriki ri gi tagui mua, mu kani a maki ri habi ne mua.
LUK 10:9 Mu kori e huriki vonga ri giloa, mu taki ria, mu ta maea, ‘A harikianga na Vure i bele tabukoi pali ne mua.’
LUK 10:10 Pali na tahuna mu dili na tanga dagi tara, i uka ma ri tagui mua, mu pesi na matane ria, mu ta maea,
LUK 10:11 ‘Miri puraki vuroki a habulo na tanga ne mua i madoko na vahane maria, a vuhuna mu rata hale maria. Pali ngane mu luhoi kamumu: A harikianga na Vure i bele tabukoi pali.’
LUK 10:12 A taki mua, na nilobona parava a nimadihi bara i bole e huriki na tanga iea bara i dagi hateka na nimadihi i bolea e huriki na tanga e Sodoma.”
LUK 10:13 Muri e Isu i ta maea, “Mua o huriki a bakovi a ngatavine o Korasin, o Betsaida, a Vure bara i ratapile mua! A maka nivakasiri a rata na tanga ne mua, bara ni rata hosi o Tair, o Sidon, bara ri pulo malaviriri a vilone ria, ri rodo a mohu, ri voro tapa mule ne ria a habulo.
LUK 10:14 “Na parava a Vure ge pelekado e huriki vona, a nimadihi bara mu bolea bara i dagi hateka na nimadihi bara ri bole e huriki na tanga e Tair e Sidon.
LUK 10:15 Mua o huriki a bakovi a ngatavine o Kapernaum, mu luhoi a Vure ge bole rike mua na hunu? I uka liu! Bara i voro puru mua na tanga ne huriki ri mate pali.
LUK 10:16 “E rei a viri i longo mai mua, i longo mai iau. E rei a viri i marikoi mua, i marikoi iau. E rei a viri i marikoi iau, i marikoi vona ra viri i rudu iau a valai.”
LUK 10:17 Na tahuna e huriki ala ravulu polo rua a polona i rua ri hamule, ri vivi hateka, ri ta maea, “Bakovi Dagi, mi kurahia a ramu, lakea e huriki a hanitu ri longototo mia.”
LUK 10:18 E Isu i koli i ta maea, “A masia e Satan i boru valai na hunu, i manga a vila.
LUK 10:19 A habia pali ne mua a nitora mu gu pahamomo a mata, a kira, mu gu rangi a nitora na pile ne hita, e Satan. I uka tara maki ge ratapile mua.
LUK 10:20 Pali naha ni vivi vona e huriki a hanitu ri longototo mua. A maki mu vivi vona, a rane mua ni here puru pali na hunu.”
LUK 10:21 Muri a Hanu Kiripiripi i ratea e Isu i vivi, lakea i ta maea, “O Tata, ioe a Bakovi Dagi na hunu a malala. A kavurike ioe, a vuhuna o vakasiri a nitamu ne huriki a bakovi tavula, pali o ruhuloloa ne huriki ri luhoi ta ri lohoka hateka. I muholi, o Tata, o muri mai a ningaru vomu o rata mavonga.”
LUK 10:22 Muri e Isu i ta maea, “E Tata i ru na limagu a maki lobo. I uka tara viri ge lohoka vona e Tuna. E Tata kunana i lohoka vona. E Tata tara i uka tara viri ge lohoka vona. E Tuna kunana i lohoka vona. Na tahuna e Tuna bara i vulaki e huriki ranga, ria ranga bara ri lohoka ne Tata.”
LUK 10:23 Muri, e Isu kunana i made turana e huriki a murimuri, lakea i taki ria, i ta maea, “I kamumu hateka mu matai a maka maki nga. Mu vivi,
LUK 10:24 a vuhuna e huriki a propet a hariki hosi ri ngaru hateka ni matai a maki mu matai ngane, pali i uka ma ri matai. Ri ngaru ni longo a maki mu longo ngane, pali i uka ma ri longo.”
LUK 10:25 Na parava tara a mari na vinara tara i pesi rike, i tonia e Isu, i nana maea, “Mari ni tovo, a ra maki ga ratea ga bole a nimahuri vakaroro?”
LUK 10:26 Pali e Isu i koli i nana tabua, “Ra ngava ni here puru na vinara, i ta navai?”
LUK 10:27 A mari na vinara i koli i ta maea, “A vinara i maea, ‘O ngarua e Bakovi Dagi a Vure vomu. O ngarua na hatemu lobo, na hanumu lobo, na nitora vomu lobo, na niluhoi vomu lobo. O ngarua e turamu i manga a hini o ngaru mule ioe.’”
LUK 10:28 E Isu i koli i ta maea, “O koli kamumu hateka. O rata mavonga bara o bole a nimahuri vakaroro.”
LUK 10:29 Pali a mari na vinara i ngaru ni vakasiri e huriki a ninana vona i kamumu, lakea i nana tabua, “E rei e turagu?”
LUK 10:30 Lakea e Isu i koli i ta maea, “A bakovi tara i pea e Ierusalem i laho puru o Ieriko. Pali e huriki a panaho ri lakavua na dala, ri kali vuroki a varakia vona, ri panaho a maki lobo vona, ri ubi pilea, ri taparakia vonga ge mate, ri vano ria.
LUK 10:31 A prister tara i laho muri valai. Na tahuna i masia a bakovi iea i tabuli mavonga na dala, i laho polo lele vona, i vano.
LUK 10:32 Muri, a bakovi tara na kabu ne Levi i valai i masia a bakovi iea i tabuli mavonga na dala, lakea ia tara i laho polo lele vona, i vano.
LUK 10:33 Pali muri a bakovi tara o Samaria i laho puru valai. Na tahuna i bele vona a hini i tabuli vona a bakovi, i masia, i dodoa.
LUK 10:34 I guru puru na harena lebo vona a nibiri, a vain. I kae karia a harena lebo. Muri i vakamadea na donki vona, i bole lakea na roho na mosi, i matakaria vonga.
LUK 10:35 Na parava muri i bole tala a moni a silva i rua, i habi na tahona roho na mosi. Muri i takia, i ta maea, ‘O matakari kamumua koea. Muri ga hamule valai tabu, ga koli mule ranga maki o matakaria vona.’
LUK 10:36 “E rei ne tou o luhoia ge ia e turana bakovi iea, ra ri ratapilea e huriki a panaho?”
LUK 10:37 A mari na vinara i koli i ta maea, “E turana, ra viri i dodoa.” Lakea e Isu i takia, “O vano, o rata mavonga.”
LUK 10:38 Na tahuna e Isu turana e huriki a murimuri vona ri lalaho sike o Ierusalem, ri bele vona tara tanga. Lakea a ngatavine tara, a rane Marta, i taguia e Isu, i takia ge kani taro na ruma vona.
LUK 10:39 E Marta i tahoka e tarina, a rana e Maria. E Maria i made puru tabukoi na vahane Bakovi Dagi, i longo a ngavana.
LUK 10:40 Pali e Marta i luhoi hateka a maka leho vona, lakea i valai ne Isu i ta maea, “Bakovi Dagi, o masia e tarigu. I uka ma i tuhori iau na leho. O takia ge tuhori iau!”
LUK 10:41 Pali e Bakovi Dagi i koli, i ta maea, “Marta, Marta. Ioe o luhoi hateka a maki i kupo.
LUK 10:42 A maki i taku kunana a maki muholi go luhoia. E Maria i vulakia pali a maki kamumu hateka. I uka ma ga vakatokua.”
LUK 11:1 Na tanga tara e Isu i vasileki. Na tahuna i vasileki lobo, lakea a murimuri vona tara i takia, “Bakovi Dagi, o tovo mia na nivasileki, i manga e Ioanes i tovo e huriki a murimuri vona.”
LUK 11:2 Lakea e Isu i koli i ta maea, “Na tahuna mu vasileki mu ta maea, ‘Tamane mia, mi ngaru e huriki ri gi togoa a ramu, a harikianga vomu ge valai.
LUK 11:3 O habi a maki ni kani ne mia na parava vakaroro.
LUK 11:4 O puga vuroki a naro hale ne mia, a vuhuna mia ranga mi puga vuroki a naro hale ne huriki lobo ri rata hale mia vona. Naha ni tuli mia mi gi dili na nitoni.’”
LUK 11:5 Muri e Isu i tuverei, i ta maea, “A bakovi tara i mahita. Na kuru rodo, i valai ngane e turana, i ta maea, ‘Turagu, o habi taro nau a bret ge tolu.
LUK 11:6 A mosi nau i bele ngane kunana, pali a bala a kinani ga vakania vona.’
LUK 11:7 “Lakea a viri i mahita i kaha, i ta maea, ‘Naha ni vakapae ke. A tukaria pali a logo. E huriki e tugu ri mahita turagu pali. O vano. I uka ma ga pesi rike ga habia vomu tara maki.’”
LUK 11:8 Muri e Isu i taki ria, i ta maea, “A taki mua, ra bakovi i mahita, i uka ma ge koria ra turana i ngaru hatekea. Pali na tahuna e turana i nana hinituhana, bara i pesi rike i habi a maki ni kani vona, bara i vakalobo a ningaru vona.
LUK 11:9 A taki muholi mua, mu nana a maki mu ngaru, lakea a Vure bara i habi ne mua. Mu matakana a maki mu ngaru, lakea a Vure bara i kori mua mu bole. Mu tutulidi, a Vure bara i talea a hinebi, bara mu dili.
LUK 11:10 Mu rata mavonga, a vuhuna e huriki ri nana a maki, bara ri bole visi. E huriki ri matakana a maki, bara ri matavisi. E huriki ri tutulidi, bara ri dili visi.”
LUK 11:11 Muri e Isu i ta maea tabu, “E rei ne mua, ge nana a manu ge kani e tuna, ge habi a mata vona?
LUK 11:12 Pali e tuna ge ngarua a kio ge kani, ge habia vona a baneko?
LUK 11:13 Mua e huriki a bakovi hale, pali mu matakari kamumu e huriki e tune mua. E Tamane hita meli na hunu i kamumu hateka. Pali i navai mu luhoia i uka ma ge habi a Hanu Kiripiripi ne huriki ri nanea?”
LUK 11:14 Na parava tara e Isu i lili talea a hanitu i dili na bakovi, i ratea i keri ni ta. Na tahuna a hanitu i ha tala, a bakovi ngane i ta, lakea e huriki ri masia ri ngapa.
LUK 11:15 Pali e huriki ranga ri ta maea, “I lili tala a hanitu na nitora ne Belsabub, a hariki ne huriki a hanitu.”
LUK 11:16 E huriki ranga ri ngaru ni tonia, ri taki tora ia ge rata a nivakasiri, ge vakasiria a nitora vona i valai na Vure.
LUK 11:17 Pali i lohoka na niluhoi ne ria, i ta maea, “A tanga dagi, e huriki a bakovi a ngatavine ri vaubi pololilo vona, bara i lobo tavula. E rei a kabu i uka ma ri pesi taku, ri vaubi mule ne ria, bara i lobo tavula a kabu iea.
LUK 11:18 Ra mua, mu taki iau ta a lili tala e huriki a hanitu na nitora ne Belsabub. Pali e Satan bara i lili tala mulea, a harikianga vona bara i lobo tavula.
LUK 11:19 Mu taki iau ta a lili tala a hanitu na nitora ne Belsabub. Pali e huriki a murimuri ne mua, a nitora ne rei ri lili tala a hanitu? Ngane e huriki a murimuri ne mua bara ri vakasiri mua mu varoru.
LUK 11:20 Pali iau a lili tala e huriki a hanitu na nitora na Vure. I vakasiri manga a harikianga na Vure i bele pali ne mua.
LUK 11:21 “Na tahuna a bakovi hateka tara i bole a lebo na vaubinga i tagaria a roho vona, a mahala vona bara i tabuli kamumu kunana.
LUK 11:22 Pali na tahuna a viri tara i gao hateka vona i vaubi turana, i ratapilea, bara i radi a maki na vaubinga vona ra i tagaria, i bole a mahala vona, i veru lae.
LUK 11:23 “A viri i uka ma i turagu, i marikoi iau. A viri i uka ma i leho turagu ni tuli e huriki ri gi valai na Vure, i vakaha e huriki na Vure.”
LUK 11:24 E Isu i ta maea tabu, “Na tahuna a hanitu i pagitala na bakovi, i lakea na hini ngeki, i matakana a hini ge malo vona. Pali na tahuna i uka ma i matavisia tara hini ge malo vona, bara i ta maea, ‘Ga hamule lakea na ruma a pea.’
LUK 11:25 Na tahuna i bele, i masia a ruma ni kovo tala, ni rata kamumu.
LUK 11:26 Lakea i vano i tuli valai a hanitu ala polorua ri hale hateka, lakea ri dili ri made vona. Muga, a nimadena bakovi i hale. Pali ngane a nimadena i hale liu.”
LUK 11:27 Na tahuna e Isu i ta ta na ngava nga, a ngatavine tara vonga na vaponga i gale tala i ta maea, “Ge vivi ra ngatavine i poda ioe i vakaruru ioe.”
LUK 11:28 Pali e Isu i koli i ta maea, “I uka. E huriki ri gi vivi, re huriki ri longo a nitana Vure, ri muri mai a ngavana.”
LUK 11:29 Ngane i kupo hateka e huriki ri vapesihi ri longoa e Isu i ta ta. Lakea e Isu i taki ria i ta maea, “E huriki na tahuna mona ri hale. Ri nana ta ri gi matai a nivakasiri. Pali i uka ma ri gi masia tara nivakasiri. A nivakasiri i taku kunana bara ri masia, a nivakasiri ne Iona.
LUK 11:30 Iau, a Tuna Bakovi, iau a nivakasiri ne huriki a bakovi a ngatavine na tahuna mona, i manga e Iona hosi ia a nivakasiri ne huriki a bakovi a ngatavine o Ninive.
LUK 11:31 Hosi a hariki ngatavine o Siba i havai valai ge longo a lohokanga ne Solomon. Iau a dagi hateka ne Solomon, pali mua i uka ma mu longototoa a lohokanga nau. Lakea muri ma na tahuna a Vure ge pelekado e huriki, a hariki ngatavine iea bara i pesi rike, i taki mua, ‘A Vure ge pelekado mua.’
LUK 11:32 Hosi e huriki a bakovi a ngatavine o Ninive ri pulo a vilone ria na tahuna e Iona i vara ria. Pali iau a dagi hateka ne Iona, a vara mua, pali mua i uka ma mu pulo a vilone mua. Muri ma na tahuna a Vure ge pelekado e huriki, e huriki a Ninive bara ri pesi rike, ri taki mua, ‘A Vure ge pelekado mua.’
LUK 11:33 “I uka tara viri ge namia a lam, muri ge kavitagua na ulo. A lam ni vakatavore, lakea e huriki ri dili na ruma bara ri masia a hini palala.
LUK 11:34 A matamu a nipara na kakaimu. Na tahuna a matamu i kamumu, a nipara i kori a kakaimu lobo. Na tahuna a matamu i hale, a kakaimu lobo i tabuli na uvo.
LUK 11:35 I mavonga kunana mu matakari kamumu a nipara pololilo ne mua i uka ma ge uvo.
LUK 11:36 Bara a kakaine mua i vonu vona a nipalala, pali i uka hini ge uvo vona, ngane bara mu palala manga a nipara i para langa ne mua.”
LUK 11:37 Na tahuna e Isu i vara lobo, a Pariseo tara i takia ge kani turana. Lakea i vano, i dili na ruma, i made puru.
LUK 11:38 A Pariseo i turutu vona e Isu i uka ma i vahilolo a limana muga na nikani.
LUK 11:39 Pali e Bakovi Dagi i takia, i ta maea, “Mua o huriki a Pariseo mu paki ni ramai a maka vinara na kinani, na nininu, mu luhoi ta i rata mua mu malamala na matana Vure. Pali a hatene mua i katoki, mu kau a maki, mu rata a naro hale.
LUK 11:40 Mu manga! A Vure i rata varago a hini polovavo, a hini pololilo.
LUK 11:41 Pali bara mu kori e huriki a matasia na hatene mua, bara mu kabakaba na matana Vure.
LUK 11:42 “Mua o huriki a Pariseo, a Vure bara i ratapile mua, a vuhuna i uka ma mu rata a naro kamumu ne huriki a bakovi, i uka ma mu ngaru a Vure na hatene mua. Mu paki kunana ni veru na naguna i ravulu a maka maki kiroko vilihaliha, mu habi a naguna i taku i lakea na Vure. Bara mu ngaru ni habi a maki lakea na Vure, naha ni lohopile a vinara nga: mu vangaru, mu ngarua a Vure na hatene mua.
LUK 11:43 “Mua o huriki a Pariseo, a Vure ge pele­kado mua, a vuhuna mu ngaru ni made mugamuga na gula dagi na roho na vaponga, mu ngaru e huriki ri gi tagui mua na tahuna ri matai mua na mada.
LUK 11:44 “A Vure bara i ratapile mua, a vuhuna mu manga a lovo na viri i mate, i uka ma ni ru a kilakilana. E huriki ri laho langa, i uka ma ri lohoka vona.”
LUK 11:45 A mari na vinara tara i koli a nitane Isu i ta maea, “Mari ni tovo, na tahuna o taki e huriki a Pariseo na ngava nga, o vakahale mia ranga.”
LUK 11:46 Lakea e Isu i koli i ta maea, “Pali mua ranga, a Vure bara i ratapile mua, a vuhuna mu rata a maka vinara i madihi hateka ni ramai, mu taki e huriki ri gi ramai, pali i uka ma mu tuhori popote ria.
LUK 11:47 “A Vure bara i ratapile mua, a vuhuna mu vakabagetu a lovo ne huriki a propet. Re huriki a propet e huriki e tubune mua ri rabalaki ria.
LUK 11:48 I mavonga mu vakasiri manga mu do rike a narone huriki e tubune mua, ri rabalaki e huriki a propet. Ria ri rabalaki, mua mu vakabagetu a lovo ne ria.
LUK 11:49 I mavonga, a lohokanga na Vure i ta maea, ‘Iau ga rudu lakea ne ria e huriki a propet, a apostolo, lakea bara ri rata tuhare ranga, ri rabalaki ranga.’
LUK 11:50 I mavonga kunana, mua bara mu bole a vuranga na matenga ne huriki a propet lobo, i vakatubu na nitubu na malala.
LUK 11:51 Bara mu bole a vuranga na matenga ne huriki a propet, i vakatubu ne Abel i vano i harena ne Sakarias, ra viri i mate na kurukuruna dede, a tabeke ni gamai na roho na Vure. Iau a taki mua, a nimatene huriki a propet lobo, bara mu bole a vuranga ne ria.
LUK 11:52 “Mua o huriki a mari na vinara, a Vure bara i ratapile mua a vuhuna mu vakatoku ne huriki a lohokanga na Vure. Mua i uka ma mu ramai a nitana Vure, pali mu pupukari tabu e huriki ranga ri ngaru ni ramai.”
LUK 11:53 Na tahuna e Isu i pagitala na ruma, e huriki a Pariseo turana mari na vinara, ri vakatubu ni biu pilea. Ri rata a maka ninana viliha,
LUK 11:54 ri ngaru ni tamia, ge ratea tara ngava ri gi padi virihia vona.
LUK 12:1 Na parava tara, e huriki a bakovi ala kupo ri vapopo turane Isu. Ri vaboletugu lae, a vuhuna ri ala kupo hateka. Lakea e Isu i vara muga e huriki a murimuri vona i ta maea, “Mu matadoko vona a is ne huriki a Pariseo, ra naro ni tabelebako.
LUK 12:2 A maki lobo ni ruhulolo bara ni vakasiri. A maki lobo ni kavitagu bara ni taki tala.
LUK 12:3 I mavonga kunana, a maki mu taki na uvo bara ni longo na hini palala. A ngava mu reme a viri vona pololilo na ruma bara ni vakalongo dagi na mada.
LUK 12:4 “Mua o huriki a turagu, a taki mua, naha ni mangenge ne huriki ri ngaru ni rabalaki a kakaine mua. Bara ri rabalaki a kakaine mua, pali a hanune mua, i uka ma ri gi rabalakia.
LUK 12:5 Ga vakalongo mua vona e rei a viri mu gu mangenge vona. Mu mangenge vona a viri i tahoka a nitora ni rabalaki mua, i tahoka a nitora ni voro puru a hanune mua na kanono. Muholi hateka, a taki mua, ia a viri bara mu mangenge vona.
LUK 12:6 “A sisiu i rua bara ni habi ni gi kona na 10 toea kunana, pali a Vure i uka ma i lohopilea tara.
LUK 12:7 Mua ranga, i gi lobo pali a lilina vune mua. I mavonga, naha ni mangenge. A Vure i ngaru hateka mua na kadirovo. A Vure i matakari a maka kadirovo. Mua ranga, a Vure bara i matakari mua.
LUK 12:8 “A taki muholi mua, e rei a viri i taki e huriki a bakovi ne ia a murimuri nau, iau, a Tuna Bakovi bara vakalongo e huriki a agelo na Vure ne ia a murimuri nau.
LUK 12:9 Pali e rei a viri i lavuni nau na matane huriki a bakovi, iau tara bara ta lavuni vona na matane huriki a agelo na Vure.
LUK 12:10 E rei a viri i ta hale na Tuna Bakovi, bara ni puga vuroki a naro hale vona. Pali e rei a viri i ta hale na Hanu Kiripiripi, a naro hale vona i uka ma ni gi puga vuroki.
LUK 12:11 Na tahuna ni turari mua lakea na roho na vaponga, mu gu pesi na matane huriki a bakovi dagi, naha ni loholege lae mu gu kori navai mua.
LUK 12:12 A Hanu Kiripiripi bara i taki mua vona a ra ngava mu gu taki na tahuna iea.”
LUK 12:13 A viri tara ne huriki vonga i takia e Isu, i ta maea, “Mari ni tovo, o takia e turagu ge vaveru ne maria a mahala i pe puru e tamane maria na tahuna i mate.”
LUK 12:14 E Isu i koli i ta maea, “Bakovi, e rei i ru iau ga pelekado o ga kori marua vona a mahala i pe puru e tamane marua?”
LUK 12:15 Muri i taki e huriki, i ta maea, “Mu matadoko! Naha ni ngaru ioe go tahoka a mahala ge kupo. A bakovi bara i tahoka a mahala i kupo, ra mahala vona i uka ma ge habi a nimahuri vona.”
LUK 12:16 Muri i takia ne ria a nita vakakika iea, “A bakovi na mahala tara i tahoka a hania i vakabele a maki ni kani i kupo hateka.
LUK 12:17 I taki mulea, i ta maea, ‘A ra ga ratea ngane? A uka a roho dagi ga ru kadolu a maki ni kani vona.’
LUK 12:18 “Muri i ta maea, ‘Ngane ga rata maea. Ga puka puru a maka roho ni ru kadolu a maki ni kani, ga hae rike tabu ria ri gi dagi. Muri bara ru kadolu a vit, a mahala nau.
LUK 12:19 Muri bara taki mule iau, a ta maea, “A tahoka a mahala i kupo, a ru kadolu na pida i kupo pali. Ngane ga made kunana, ga kani, ga ninu, ga pitei.” ’
LUK 12:20 “Pali a Vure i takia i ta maea, ‘Ioe a manga! Na rodo iea bara o mate. Pali e rei ge bole polo a maka maki o rata puru?’
LUK 12:21 “E huriki a bakovi na mahala, ri mavonga. Ri ru kadolu a mahala i kupo, pali na matana Vure, ria a matasia.”
LUK 12:22 Muri e Isu i taki e huriki a murimuri vona i ta maea, “I mavonga a taki mua naha ni luhoi lege lae vona a nimade ne mua, a maki mu gu kani. Naha ni luhoi lege lae vona a kakaine mua, na a ra maki mu gu rodo.
LUK 12:23 A maki dagi a nimahuri, a maki kiroko a maki ni kani. A maki dagi hateka a kakaina viri, a maki kiroko a varakia.
LUK 12:24 Mu matai a maka kadirovo, i uka ma ri varo a maki ni kani, i uka ma ri mirio kilala. Ri uka roho ni ru kadolu a maki ni kani. Pali a Vure i vakani ria. Mua ranga, bara i vakani mua, a vuhuna a Vure i ngaru hateka mua na maka kadirovo.
LUK 12:25 A naro ni luhoi lege, i uka ma ge kori ioe go mahuri malaku.
LUK 12:26 Ioe o uka a nitora ni ratana a maki kiroko maea, pali naha ni loholege lae vona a maka maki ranga.
LUK 12:27 Mu matai a maka hurumade. I uka ma ri leho kilala, i uka ma ri rahi kilala a varakia. Pali a taki mua, a hurumade nga ri bagetu keke hateka, ri kamumu hateka na bagetua ne Solomon, ra hosi i bagetu kamumu hateka.
LUK 12:28 A Vure i vakabagetu a maka hurumade ri tabuli popote kunana, muri ri mate. Pali mua ranga, a Vure bara i vakabagetu mua. A bagetua ne mua bara i kamumu hateka na bagetua na hurumade. Ra mua, i uka ma mu luhoi tora hatekea a Vure.
LUK 12:29 Naha ni luhoi hateka a maki mu gu kani, mu gu ninu. Naha ni luhoi legelege.
LUK 12:30 E huriki a bakovi a ngatavine na uvo ri luhoi hateka a maki nga. E Tamane mua i lohoka vona mu ngaru a maki nga.
LUK 12:31 Mu luhoi kunanea a harikianga na Vure, lakea a maki nga ranga bara ni habi.
LUK 12:32 “Mua o huriki a kabu kiroko na sipsip nau, naha ni mangenge, a vuhuna e Tamane mua i vivi ni habi ne mua a harikianga vona.
LUK 12:33 Mu habi a maka mahala ne mua ne huriki a matasia, lakea bara mu tahoka a mahala meli na hunu. A mahala meli i uka ma ge matutu, i uka ma ge lobo, i uka ma ni gi panaho, i uka ma ge kani a kuruve.
LUK 12:34 A hatene mua bara i lakea mai kunana a tabeke mu ru a mahala ne mua vona.
LUK 12:35 “Mu bagetu, mu nami puru a lam.
LUK 12:36 Mu dava manga e huriki a vora ri pasimata na matakari ne ria ge hamule valai na habu na parangia. Ri davea ge hamule valai, bara ri talea a logo na ruma, ge dili a matakari ne ria.
LUK 12:37 Na tahuna i hamule valai, bara i rata kamumu e huriki a vora vona i uka ma ri mahita. A taki muholi mua, ra bakovi dagi iea bara i bagetu i taki ria ri made na dede, i vakani ria.
LUK 12:38 Bara a matakari ne ria i hamule valai na kuru rodo, o na hatelanga pokopoko, i matai e huriki a vora vona ri tabana ni matapara, ri pasimata vona, bara i rata kamumu hateka ria.
LUK 12:39 Mu luhoia a ngava iea: A tahona ruma bara i lohoka vona a kilala ge valai vona a bakovi ni panaho, bara i matapara mavonga, i uka tara viri ge pukea a ruma vona.
LUK 12:40 I mavonga, mu pasimata vona a Tuna Bakovi, a vuhuna bara i valai na tahuna i uka ma mu luhoi ge valai vona.”
LUK 12:41 Lakea e Petrus i nanea, “Bakovi Dagi, ra nivakakika iea o vakakika mia kunana vona, o e huriki lobo ranga, o vakakika ria vona?”
LUK 12:42 E Bakovi Dagi i koli, i ta maea, “A bolekori i rata lobo a leho a bakovi dagi vona i habia, a bakovi dagi vona bara i ratea ge matakari e huriki a vora. Bara i takia ge veru a maki ni kani ne ria na tahuna i lakea na tanga tara.
LUK 12:43 Muri, na tahuna a bakovi dagi i hamule valai, i masia a bolekori iea i rata kamumu a leho vona, bara i rata kamumu hatekea.
LUK 12:44 A taki muholi mua, bara i ru ia ge matakari a mahala lobo vona.
LUK 12:45 Pali a bolekori bara i taki mulea i ta maea, ‘A viri dagi nau i uka ma ge valai malaviriri.’ Lakea i vakatubu ni ubi a vora bakovi a vora ngatavine, i kani i ninu, i manga manga viliha lae.
LUK 12:46 Ra bakovi dagi vona, bara i valai vakaturutu na parava a vora i pahaluhoi ta i uka ma ge valai vona. Bara i luve na kilala a vora i pahadaki ta i uka ma ge luve vona. Lakea a bakovi dagi bara i tolo pilea a vora iea. Muri bara i ru turane huriki i uka ma ri luhoi torea a Vure.
LUK 12:47 “A bolekori i lohoka vona a ningaru na bakovi dagi vona, pali i uka ma i toni ni rata, bara ni ubi balaka kupo.
LUK 12:48 Pali a bolekori i uka ma i lohoka vona a ningaru na viri dagi vona, lakea i rata ruru a maki, bara ni ubi popote kunana. A viri a Vure i habi a leho i kupo vona i uka ma ge made tavula. A Vure i ngarua ge vakabele a kanena i kupo.
LUK 12:49 “A valai ga rungania a malala. A dodo vona a hini i uka ma ni rungani ma.
LUK 12:50 Iau ga bole a nimadihi dagi. A luhoi legelege hateka, a ngarua a parava iea ge valai malaviriri, ge lobo.
LUK 12:51 Naha ni luhoi a valai ga habi a nivalemu na malala. I uka liu. A valai ga vakalipida e huriki.
LUK 12:52 I vakatubu mona, a viri ala lima na kabu i taku bara to vagima. A viri ala tolu bara to vagima turana viri ala rua. A viri ala rua bara ru vagima turana viri ala tolu.
LUK 12:53 Lakea bara to vapida. A bakovi bara i gimana e tamana. A ngatavine bara i gimana e kinana. A ngatavine bara i gimana e kana.”
LUK 12:54 Muri e Isu i taki e huriki ri vapopo i ta maea, “Na tahuna mu masia a bubu i rike na nirolona haro, mu lohoka vona bara i boru a vala.
LUK 12:55 Na tahuna i pori valai tano a vilu, mu lohoka vona bara i kara a haro.
LUK 12:56 Mua o huriki a bakovi na taminga! Mu matakilaka vona ge boru a vala, o ge kara a haro. Pali a maki a rata, mu keri ni matakilala.
LUK 12:57 “I navai i uka ma mu matakilaka vona a ra maki kamumu?
LUK 12:58 Na tahuna o laho turana viri i padi virihi ioe na ngava, muru gu lakea na mari ni pelekado a ngava, o toni ni pelekado a ngava turana malaviriri. Bara i uka, a gimamu bara i turari ioe lakea na mari ni pelekado. A mari ni pelekado bara i habi ioe na limana tagari, bara i ru dili ioe na bavi.
LUK 12:59 A taki muholi ioe, i uka ma go pagitala, ge harena na tahuna o koli mule lobo a maki vona.”
LUK 13:1 A bakovi ranga ri laho turane Isu ri vakalongoa vona tara maki. E Pilato i rabalaki ranga bakovi o Galili na tahuna ri habi a nihabi na Vure.
LUK 13:2 E Isu i koli i ta maea, “Naha ni luhoi e huriki nga, ra ri mate, ri hale hateka ne huriki a bakovi a ngatavine ranga o Galili a vuhuna ri bole a vuranga iea.
LUK 13:3 Pali mua ranga, i uka ma mu gu pulo a vilone mua, bara mu vurua.”
LUK 13:4 E Isu i tuverei tabu, i ta maea, “Re huriki a bakovi a ngatavine ala ravulu a polona i polotolu, ri mate na tahuna a roho dagi o Silom i mapuka taho ria. Naha ni luhoi e huriki nga ri hale hateka ne huriki ranga ri made vonga o Ierusalem.
LUK 13:5 Pali mua ranga, i uka ma mu gu pulo a vilone mua, mua ranga bara mu vurua.”
LUK 13:6 Muri i takia ne ria a nita vakakika iea: “A bakovi tara i varo a kai a pik na hania na vain vona. I lokovonga bala, i leia, ta ge pasi a kanena kai iea, pali i uka kanena.
LUK 13:7 Lakea i takia a vora i matakari a hania na vain vona, i ta maea, ‘Na pida i tolu a valai ta ga pasia a pik, pali i uka ma matavisia tara kanena. I navai ge pesi tavula na malala kamumu iea? O tolo vurokia ngane!’
LUK 13:8 “Lakea a vora i koli i ta maea, ‘Bakovi Dagi, ge pesi taro na pida ge taku. Ga kado haluia, ga mugo rikea a malala vakuloi vona.
LUK 13:9 Ge vua, bara i kamumu hateka! I uka ma ge vua, bara tolo vurokia.’”
LUK 13:10 Na Parava Nimalo e Isu i vara na roho na vaponga tara.
LUK 13:11 A ngatavine tara vonga i ratapilea a hanitu na pida i ravulu a polona i polotolu, i keri ni laho kamumu. I poku a bitona, i keri ni pesi tavaga rike.
LUK 13:12 Na tahuna e Isu i masia, i gale lokomugea vona, i takia, “Ngatavine, ngane i lobo a gilanga vomu.”
LUK 13:13 Muri i padoia. I malaviriri kunana i tavaga rike, i vakatubu ni kavurikea a Vure.
LUK 13:14 Pali a matakari na roho na vaponga i madihi a hatena, a vuhuna e Isu i koria a ngatavine na Parava Nimalo. Lakea i taki e huriki i ta maea, “A parava i polotara a parava na leho. Mu valai koea ni gi kori mua na gilanga na parava nga. Pali na Parava Nimalo mu made kunana.”
LUK 13:15 Lakea e Bakovi Dagi i koli i ta maea, “Mua o huriki a bakovi na taminga! Ra mua, na Parava Nimalo mu puga vuroki kilala a mota ni kolotata a bulmakau vona, muri mu vakaninu.
LUK 13:16 Ra ngatavine iea, ia a hamone Abraham. I ratapilea e Satan na pida i ravulu a polona i polotolu. Pali ge navai, i uka ma ni gi kori na Parava Nimalo?”
LUK 13:17 Na tahuna i taki loboa a ngava iea, e huriki a gimana ri rare. Pali e huriki lobo ri vivi vona a maka maki kamumu hateka e Isu i rata.
LUK 13:18 Muri e Isu i taki e huriki, “A hari­kianga na Vure i manga a ra? Ga toni virihi a ra maki vona?
LUK 13:19 I manga a vutuna a mastad i varoa a bakovi na hania vona. I koru rike dagi, i manga a kai. A maka kadirovo ri bebe valai, ri hae a nune ria na rahana.”
LUK 13:20 Muri i nana tabu, “Ga toni virihi a ra maki tabu vona a harikianga na Vure?
LUK 13:21 I manga a is i bolea a ngatavine, i pulo turana kabukuna plaoa, muri i pugaga.”
LUK 13:22 E Isu i tabana ni laho sike o Ierusalem, i laho dili na maka tanga, i vara e huriki.
LUK 13:23 A bakovi tara i nanea, “Go korimule e huriki a bakovi a ngatavine ala riva? Ri gi ala popote kunana?” E Isu i koli, i ta maea,
LUK 13:24 “Mu toni a bulune mua ni dili vona a logo bala holoholo. A taki muholi mua, i kupo e huriki ri gi toni ni dili, pali bara ri keri.
LUK 13:25 Na tahuna a tahona roho i pesi rike, i tukaria a logo, bara mu pesi rare polovavo mu gale gale, bara mu ta maea, ‘Bakovi Dagi, mi gi dili.’ “Pali ia bara i koli i ta maea, ‘Iau i uka ma lohoka ne mua, mua a viri vai?’
LUK 13:26 “Muri bara mu ta maea, ‘Hosi o vara na mada na tanga ne mia, mi kani, mi ninu turamu.’
LUK 13:27 “Pali ia bara i koli tabu, i ta maea, ‘Iau i uka ma lohoka ne mua, mu a viri vai? Mu malele ha nau, mua e huriki a mari ni rata a naro hale!’
LUK 13:28 “Muri ma bara mu matai e Abraham, e Isak, e Iakop turana e huriki a propet lobo ri dili na harikianga na Vure. Pali mua bara ni lili tala, lakea bara mu tangi, i madihi a hatene mua, mu kara tata mavonga a ngine mua.
LUK 13:29 E huriki bara ri valai na tanga lobo na malala, ri gi made na murine ria na habu dagi na harikianga na Vure.
LUK 13:30 Muholi hateka, e huriki ranga ri muri ngane bara ri muga. E huriki ranga ri muga ngane bara ri muri.”
LUK 13:31 Na parava iea kunana, e huriki a Pariseo ranga ri valai ne Isu ri takia ri ta maea, “O ha taroa a tanga iea o lakea na hini ranga, a vuhuna e Herod i ngaru ni rabalaki ioe.”
LUK 13:32 E Isu i koli i ta maea, “Mu vano mu takia a huluvonga iea, ‘Ga lili tala taro a maka hanitu, ga korimule e huriki ri giloa na parava i rua. Na toluna parava bara vakaloboa a leho nau.’
LUK 13:33 Pali ngane, kuduvi, girira bara laho lokovonga o Ieru­salem, a vuhuna a propet i uka ma ge mate na tanga tara. A propet bara i mate kunana o Ierusalem!”
LUK 13:34 Muri e Isu i ta maea, “Ierusalem, Ieru­salem! Mu rabalaki e huriki a propet, mu padimate na kedo e huriki a rudu valai ne mua. Balaka kupo a ngaru ni kali­popo palupu mua, i manga a kinana kureko i kavi­tagu a maka tuna na kara­pana, ga mata­kari mua. Pali mu koi mua.
LUK 13:35 A Vure i pea pali a roho ne mua. Ngane a taki mua, i uka ma mu gu matai tabu iau ge harena na parava mu gu ta maea, ‘Si gi kavurikea a viri i valai na rane Bakovi Dagi.’”
LUK 14:1 Na Parava Nimalo tara, e Isu i vano i kani na ruma na bakovi dagi tara ne huriki a Pariseo. Ri mata­nonoa, ri mata kana a naro ranga ge rata ruru.
LUK 14:2 A bakovi tara i vaki a kulina i made tabukoi na ngalana.
LUK 14:3 Lakea e Isu i nana e huriki a Pariseo, a mari na vinara i ta maea, “A vinara i ta navai? Si gi kori a viri na Parava Nimalo, o i uka?”
LUK 14:4 Pali ri mangulu tete ria. Lakea i vakatavagea a bakovi iea, i rudua i vano.
LUK 14:5 Muri i nana ria i ta maea, “E rei ne mua, e tuna ge boru puru na lovo na Parava Nimalo i uka ma ge koria? Pali e rei ne mua, a bulmakau vona ge koro na lovo na Parava Nimalo, i uka ma ge koria?”
LUK 14:6 Pali ri uka ngava.
LUK 14:7 Na tahuna i matai e huriki ri valai ri gi kani ri made mugamuga na gula kamumu, i takia ne ria tara nivakakika,
LUK 14:8 “Na tahuna i taki ioe a viri tara go lakea na habu na parangia vona, naha ni made mugamuga na gula kamumu. Ma ge valai tara bakovi dagi hateka vomu.
LUK 14:9 Lakea a tahona habu, ra i taki marua muru valai, bara i taki ioe i ta maea, ‘O turagu o habia na bakovi iea a gula vomu.’ Muri bara o maruhu, o vano o made na gula tavula.
LUK 14:10 Naha ni rata mavonga. Pali na tahuna ni taki ioe go lakea na habu tara, o vano o made na gula tavula. Na tahuna a tahona habu i matai ioe o made na gula tavula, bara i taki ioe, i ta maea, ‘Turagu, o valai, o made na gula kamumu.’ Muri e huriki vonga bara ri masia, ri togo ioe.
LUK 14:11 O rata mavonga, a vuhuna a viri i rata polo mugamuga, a Vure bara i vakamaruhua, pali a viri i vakakiroko ia, a Vure bara i kavurikea.”
LUK 14:12 Muri e Isu i takia a tahona ruma, i ta maea, “Na tahuna o rata a habu, naha ni gale e huriki a turamu, a kabu vomu, a bakovi na mahala. Bara o rata mavonga bara ri koli ri gale ioe o lakea na habu ne ria.
LUK 14:13 Na tahuna o rata a habu o gale valai e huriki a matasia, a beu, a vahahale, a kepa.
LUK 14:14 Re huriki a bakovi maea bara ri keri ni koli a limamu. Ra i mavonga bara o vivi, a vuhuna a limamu bara ni koli na tahuna e huriki a bakovi kamumu bara ri pesi rike mule na nimate.”
LUK 14:15 A bakovi tara i made vonga i longoa a ngavane Isu, lakea i ta maea, “E huriki ri kani na habu na harikianga na Vure ri gi vivi.”
LUK 14:16 E Isu i koli i ta maea, “A bakovi tara i kurabe puru na habu dagi vona, lakea i taki e huriki ri gi valai na habu vona.
LUK 14:17 I bele ngane a parava na habu, lakea i rudu talea a vora vona, ge taki e huriki, ge ta maea, ‘Mu valai ngane, a maki lobo ni pelekado puru pali.’
LUK 14:18 “Pali ria lobo ri ta marogo lae ri koi ni valai. A viri tara i ta maea, ‘A kona karabea ngane tara hania. Ga vano taro ga masia. I uka ma ga lakene.’
LUK 14:19 “A bakovi tara i ta maea, ‘A kona karaba ngane a bulmakau i lima. Ga vano taro ga toni ni vakaleho ria. I uka ma ga lakene.’
LUK 14:20 “Pali a viri tara i ta maea tabu, ‘Iau a parangi karaba. A uka ma ga lakene.’
LUK 14:21 “Muri a vora i hamule, i vakalongo a tahona habu vona a ngava ne ria. A tahona habu i madihi a hatena, i takia a vora vona i ta maea, ‘O pagitala malaviriri lakea na maka dala dagi, a dala kiroko, o tuli valai e huriki a matasia, a beu, a kepa, a vahahale.’
LUK 14:22 “A vora i longo mai a nitana tahona habu, muri i ta maea, ‘Bakovi dagi, ra ngava o taki a rata, pali a ruma i uka ma i vonu ma.’
LUK 14:23 “Lakea a tahona habu i takia a vora vona i ta maea, ‘O pea a tanga dagi, o ramai a maka dala dagi, a dala kiroko viliha polovavo na tanga, o taki e huriki lobo ri gi valai na habu nau. A ngarua a ruma nau ge vonu.
LUK 14:24 A taki muholi mua, re huriki a bakovi a gale muga ria, i uka ma ri gi kani turagu na habu nau.’”
LUK 14:25 Muri, e huriki ala kupo ri laho turane Isu, lakea i ngalakapulo, i taki ria i ta maea,
LUK 14:26 “E rei a viri i ngaru ni ramai iau, ge lohopile e tamana, e kinana, e girihina, e tuna, e turana mai, ge lohopile a nimade vona, lakea bara i kara ni ramai iau.
LUK 14:27 E rei a viri i uka ma i kalohoa a kai tavalavala vona, i uka ma i ramai iau, i keri ge ia a murimuri nau.
LUK 14:28 “I mavonga kunana, e rei a viri i ngaru ni hae a ruma karaba bara i luhoi kado taro, i tahoka a moni ge haea vona, o i uka. Ma ge vakatubu ni haea, ma ge lobo a moni vona.
LUK 14:29 Lakea e huriki bara ri nongo vakia na tahuna ri masia a ruma vona i uka ma i hae loboa.
LUK 14:30 Bara ri ta maea, ‘Masia a bakovi iea, i vakatubu ni hae a ruma karaba iea, pali i keri ni vakaloboa.’
LUK 14:31 “E rei a hariki i ngaru ni vaubi turana tanga tara bara i luhoi kado taro, a tara na nugumaheto vona ala 10,000 ri kara ni rangi a tara na nugumaheto ala 20,000 na hariki tara?
LUK 14:32 Bara i luhoi i uka ma ri gi mulangi, bara i rudu lokovonga malaviriri e huriki a vinuru vona muga ne huriki a pile vona bara ri valai, bara i nanea a hariki iea, i ta maea, ‘A koi tu gu vaubi. A ra o ngarua ga ratea tu gu made na nivalemu?’
LUK 14:33 Mua ranga, mu luhoi kado taro. E rei a viri i uka ma i lohopile a maki lobo vona, i uka ma i kara ge ia a murimuri nau.
LUK 14:34 “A sol a maki kamumu. Pali ge lobo a namina, ni gi bole mule tabu navai a namina?
LUK 14:35 A sol i lobo a namina, i uka lehona. I uka ma ni gi ru na hania ge rike kamumu vona maki. I uka ma ni gi ru turana tahena bulmakau ge vona a malala vakuloi. Bara ni bole, ni vuroki tala tavula kunana. “E rei a viri i ngaru ni longokilalea a ngavagu, ge longo kamumu, ge luhoi kado.”
LUK 15:1 Na parava tara, e huriki a bakovi ni bole a takis, e huriki a bakovi hale ri vaboletugu mai e Isu, ri gi longo a nitana.
LUK 15:2 Lakea e huriki a Pariseo, a mari na vinara ri ta barangungu, ri ta maea, “Ra bakovi iea i tagui e huriki a bakovi hale, i kani turane ria.”
LUK 15:3 Lakea e Isu i koli, i taki ria na nita vakakika iea,
LUK 15:4 “E rei a bakovi i tahoka a sipsip i 100, pali i velu tara, bara i pe puru na robo a maka sipsip i 99, i vano i matakanea a sipsip ra i velu. Bara i matakanea, matakanea, i matavisia.
LUK 15:5 Na tahuna i matavisia, bara i vivi vona i vakoa,
LUK 15:6 i lakea na tanga. Muri bara i gale palupu e huriki a turana, i taki ria, ‘Mu vivi turagu a vuhuna a matavisia pali a sipsip nau i velu.’
LUK 15:7 A Vure tara, na tahuna a bakovi hale i pulo a vilona, i vivi hateka. I vivi ne huriki ala 99 ri kamumu pali, ri pulo pali a vilone ria. Pali i vivi hateka na bakovi hale ala taku i pulo a vilona.”
LUK 15:8 E Isu i taki tabua tara nivakakika i ta maea, “A ngatavine tara i tahoka moni silva vona i ravulu, lakea i velu tara. A ra mu luhoia ge ratea? Bara i namia a lam, i kovo kadoa a ruma, i matakana lae, muri bara i matavisia.
LUK 15:9 Na tahuna i matavisia bara i gale palupu e huriki a turana, e huriki ri made tabukoi vona, i taki ria, i ta maea, ‘Mu vivi turagu, a vuhuna a matavisia pali a moni nau i velu.’
LUK 15:10 I mavonga kunana, a Vure turana e huriki a agelo bara ri vivi hateka, na tahuna ri masia a bakovi hale tara i pulo a vilona.”
LUK 15:11 E Isu i ta lokovonga liu, i ta maea, “A bakovi tara i tahoka e tuna bakovi ala rua.
LUK 15:12 A viri kiroko i takia e tamana i ta maea, ‘O habi nau ngane a mahala nau.’ Lakea e tamane rua i vaveru rua vona mahala vona.
LUK 15:13 “I uka ma i tabaka, a viri kiroko i bole lobo a maki vona i vano, i havai maia a robo basi tara. I bele vona a robo iea, i vakalobo a mahala vona na naro hale.
LUK 15:14 I vuroki lobo a mahala vona. I bele ngane na robo iea a pago. I matasia, i vitolo mavonga.
LUK 15:15 Lakea i vano i bole a leho vonga na tahona malala tara. A bakovi iea i rudua ge matakari a nure na boro.
LUK 15:16 I vitolo hateka, i ngaru ni kani a maki ni kani na boro, pali i uka tara viri ge habi a maki ni kani vona.
LUK 15:17 “I bele vona ngane a niluhoi kamumu, lakea i ta maea, ‘E huriki a vora ne tata ri tahoka a maki ni kani i kupo, pali iau a mate mavonga koea na vitoloa!
LUK 15:18 Ga vano ga hamule mai e tata, ga takia ga ta maea, “Iau a rata virihi a naro hale na Vure, a rata a naro hale virihi mai ioe.
LUK 15:19 I uka ma a bakovi kamumu go gale iau ge iau e tumu. O rata iau, ge iau a vora vomu kunana.’”
LUK 15:20 Lakea i pesi rike i hamule lakea ne tamana. Na tahuna i tabana ni laho basi, e tamana i masia, i dodoa. I nunu halala ia, i lakavua, i ngurua.
LUK 15:21 “Lakea i takia e tamana i ta maea, ‘Tata, iau a rata a naro hale virihia a Vure. A rata a naro hale virihi ioe. I uka ma a bakovi kamumu go gale iau ge iau e tumu.’
LUK 15:22 “Pali e tamana i taki e huriki a vora vona i ta maea, ‘Mu nunu, mu bole valai a varakia kamumu, mu vakarodoa vona. Mu bolea a paga, mu rodo dilia na kukulimana. Mu bole a vahapolo, mu vakarodoa.
LUK 15:23 Mu lavea a tuna bulmakau i gavutuvutu, mu rabalakia. Si gi rata habu, si gi vivi,
LUK 15:24 a vuhuna re tugu iea i mate, ngane i mahuri mule. I velu, pali ngane ni matavisi.’ Lakea ri rata a habu, ri pitei.
LUK 15:25 “A tabua i tabana ni leho na hania. Na tahuna i hamule valai tabukoi na ruma, i longo e huriki ri kalolo, ri raulo.
LUK 15:26 Lakea i nanea a vora tara, i ta maea, ‘I navai, a ra ri ratea e huriki nga?’
LUK 15:27 “A vora i koli i ta maea, ‘E tarimu i hamule pali, lakea e tamamu i rabalakia a tuna bulmakau gavutuvutu, a vuhuna i vivi vona e tarimu i hamule valai, i made kamumu tabu koea.’
LUK 15:28 “Pali a tabua i madihi a hatena, i koi ni dili. Lakea e tamana i pagitala i lukea, i takia ge dili.
LUK 15:29 Pali i takia e tamana i ta maea, ‘Mata valai! Na pida i kupo pali a vora mavonga vomu. I uka ma a longotaroa tara nitamu. Pali o uka ma o ratea nau tara habu ga kani turana e huriki a turagu.
LUK 15:30 Pali re tumu iea, i vuroki tavula ne huriki a ngoi a mahala vomu. Ngane i hamule valai o rabalakia vona a tuna bulmakau gavutuvutu, o rata habu vona!’
LUK 15:31 “Lakea e tamana i ta maea, ‘O tugu, ioe o made turagu na parava vakaroro. A maki lobo nau, a maki vomu.
LUK 15:32 Pali ngane si gi rata a habu si gi vivi, a vuhuna e tarimu i mate, i mahuri mule tabu. Muga i velu, ngane ni matavisi.’”
LUK 16:1 E Isu i taki e huriki a murimuri vona i ta maea, “A bakovi na mahala tara i tahoka a bolekori i matakari a mahala vona. Pali e huriki ranga ri takia ra bolekori i rata marogo a mahala vona.
LUK 16:2 Lakea i gale vilia a bolekori i nanea, ‘A ra maki a longoa ta o ratea? O vakalongo iau ngane, o matakari navai a mahala nau, a vuhuna bara o lobo na leho.’
LUK 16:3 “A bolekori i luhoi lege lae, lakea i luhoi maea, ‘A bakovi a leho vona bara i vakalobo iau ngane na leho. A ra ga ratea ngane? A uka a nitora ga leho ga keli a malala. A maruhu ni nongi a maki na viri tara.
LUK 16:4 A luhoi ngane a maki ga ratea na tahuna ga lobo na leho. Bara ratea tara naro, lakea e huriki a bakovi bara ri vivi ni matakari iau na ruma ne ria.’
LUK 16:5 “Lakea a bolekori i gale takutaku e huriki ri bole a kinori na bakovi dagi vona. Lakea i nanea a viri i muga, ‘I riva a kinori vomu o bole na bakovi dagi nau?’
LUK 16:6 “I ta maea ia, ‘Iau a bole a namona oliv, a nimavana i 800 galen.’ “Lakea a bolekori i takia, ‘O bolea a raukea o made puru malaviriri, o here puru a kalavana ge 400 galen kunana. Muri o koli.’
LUK 16:7 “Muri i nanea a viri tara, ‘Pali ioe i riva vomu a kinori?’ “I ta maea ia, ‘Iau a bole a kulopi na vit i 100.’ “Lakea i takia, ‘O bolea a raukea, o here puru a kalavana ge 80 kunana. Muri o koli.’
LUK 16:8 “A bakovi dagi i kavurikea a naro hale na bolekori vona, a vuhuna i matakari mule kamumu hateka ia. E huriki a bakovi na uvo ri lohoka hateka ne huriki a bakovi na nipara na ni matakari mule ria.
LUK 16:9 I mavonga, a taki mua, mu hatebalala, mu habi lae a mahala ne mua, lakea e huriki bara ri ngaru a vilone mua. Muri, na tahuna i lobo a mahala, bara mu tahoka a tanga meli na hunu mu gu made vona vakaroro.
LUK 16:10 “E rei a viri i matakari kamumu a maki kiroko, bara i matakari kamumu a maki dagi. E rei a viri i tatami na maki kiroko, bara i tatami na maki dagi.
LUK 16:11 I mavonga kunana, mua i uka ma mu matakari kamumu a mahala na malala, i uka tara viri ge luhoi mua mu gu matakari kamumu a mahala muholi.
LUK 16:12 Pali mua i uka ma mu matakari kamumu a mahala na viri tara, i uka tara viri ge habi a mahala mua mu gu matakari.
LUK 16:13 “A vora i uka ma ge vora na bakovi ala rua, a vuhuna bara i koi vona tara, i ngarua tara. Bara i habi a hatena na bakovi tara, i biu a bakovi tara. I uka tara viri ge vora varago na Vure, a moni.”
LUK 16:14 E huriki a Pariseo ri longo a ngavane Isu, ri padikedea e Isu, a vuhuna ri ngaru hateka a moni.
LUK 16:15 Lakea e Isu i taki ria, i ta maea, “Mua kunana ra mu ngaru e huriki ri gi matai mua, ri gi luhoi ta mua a bakovi kamumu. Pali a Vure i lohoka ne mua, a vuhuna a maki e huriki a bakovi a ngatavine ri luhoi ta a maki kamumu hateka, a Vure i marikoi hateka vona.
LUK 16:16 “Hosi si ramai a vinara, a hinere ne huriki a propet. Pali na tahuna e Ioanes i valai, i vakatubu vonga, a Velenga Kamumu na harikianga na Vure ni vakalongo lae. E huriki lobo ri varede ni dili.
LUK 16:17 A hunu a malala bara ru lobo. Pali i uka tara vinara na Vure ge velu.
LUK 16:18 “E rei a bakovi i pilea e girihina, i parangi tabu a ngatavine tara, ra bakovi iea i mole. E rei a bakovi i parangi a ngatavine i pilea e girihina, ia tara i mole.
LUK 16:19 “A bakovi tara, a bakovi na mahala, i bagetu vakaroro na varakia kamumu. I vivi ni kani na parava vakaroro a kinani kamumu.
LUK 16:20 Polovavo na ruma vona, a matasia tara, a rane Lasarus, i mahita mavonga na logona nure. I tuvu lobo vona a ngarava a kulina.
LUK 16:21 A maka ligo ri valai bala, ri dame a ngarava vona. I ngaru ni kani a momona kinani i boru puru polotano na dede na bakovi na mahala. Pali a bakovi na mahala i uka ma i dodoa ranga.
LUK 16:22 “Na parava tara a matasia iea i mate. E huriki a agelo ri valai, ri bole sikea, ri taparakia ge made turane Abraham. Muri a bakovi na mahala i mate, ni tanu.
LUK 16:23 I made na kanono, i bole a nimadihi dagi. I mata sike, i masia e Abraham i made basi hateka. E Lasarus i made turana.
LUK 16:24 Lakea i gale tala, i ta maea, ‘O tata Abraham, o dodo iau, o rudu vilia e Lasarus ge lutu a kukulimana na naru, ge vakamalupea a tabelegu, a vuhuna a bole hateka a nimadihi koea na kanono.’
LUK 16:25 “Pali e Abraham i koli, i ta maea, ‘O tugu, o luhoi mule na tahuna o mahuri vona. A maka maki kamumu i bele vomu. Pali a maka maki hale kunana i bele ne Lasarus. Pali ngane ia i made kamumu ieni, o bole a nimadihi iene ke.
LUK 16:26 Pali a maki tara tabu. Na kurukurune tarua i tahoka a golu dagi ni ru. Mia koea bara mi ngaru ni lakene, bara mi keri. Mua iene ranga, bara mu ngaru ni valai, bara mu keri.’
LUK 16:27 “Muri i koli i ta maea, ‘Pali o tata, o rudua e Lasarus ge hamule lakea na ruma ne tata,
LUK 16:28 ge matai e turagu ala lima vonga. Ge taki tora tou nahea to go muri mai iau vona ra tanga na nimadihi.’
LUK 16:29 “Pali e Abraham i koli, i ta maea, ‘A vinara ne Moses a hinere ne huriki a propet i tabuli pali. A ngaru to go ramai.’
LUK 16:30 “Pali i koli ia, i ta maea, ‘I uka, o tata Abraham. A viri tara i mate pali bara i hamule mai tou, bara to pulo a vilone tou.’
LUK 16:31 “E Abraham i koli, i ta maea, ‘Ri koi ni longo mai e Moses, e huriki a propet, lakea i uka ma ri gi longo mai a viri ge mahuri mule na nimate.’”
LUK 17:1 Muri e Isu i taki e huriki a muri­muri vona, i ta maea, “A maka nitoni na rabu hale bara ri bele. Pali a Vure bara i ratapile e huriki ri vaka­boru a viri.
LUK 17:2 E rei a viri i vakaboru e huriki, bara i kamumu vona ni gi topi na lohona a kedo dagi, ni gi voro purua na utu, nahea ge vakaboru e huriki a bakovi tavula nga.
LUK 17:3 I mavonga, mu matadoko! “Ioe bara o masia e turamu ge rata a naro hale mai ioe, o tahatea. Ia ge pulo a vilona, o lohopile a maki hale i rata virihi ioe vona.
LUK 17:4 Ia ge rata hale ioe balaka polorua na parava i taku, pali ge hamule valai vomu balaka polorua, ge taki tala, o lohopile a naro hale vona.”
LUK 17:5 Muri e huriki a apostolo ri takia e Bakovi Dagi, ri ta maea, “O vakatora a niluhoi ne mia!”
LUK 17:6 Pali e Bakovi Dagi i koli i ta maea, “Mua bara mu tahoka a niluhoi kiroko i manga a vutuna mastad, bara mu takia a kai iea ge malipu rike, ge vano ge pesi na dari, lakea bara i longototo.
LUK 17:7 “E rei tara ne mua i tahoka a vora i varo a maki na hania, o a vora i matakari a sipsip, pali na tahuna i hamule valai na ruma ge takia, ge ta maea, ‘O valai malaviriri, o made turagu tu gu kani.’
LUK 17:8 “I uka. A hini bara o takia vona, bara o ta maea, ‘O hilolo, o gutu a maki ni kani nau, o bole valai, ga kani, ga ninu taro iau. Muri bara o kani o ninu ke.’
LUK 17:9 Na tahuna a vora i muri mai a ngavana bakovi dagi vona, i uka ma ni gi kavurike.
LUK 17:10 Pali mua ranga, na tahuna mu rata lobo a leho ni taki mua vona mu gu rata, a ngaru mu gu ta maea kunana, ‘Mia a vora kunana. I uka ma ni gi kavurike mia, a vuhuna mi rata kunana a leho ni habi ne mia mi gi ratea.’”
LUK 17:11 E Isu i tabana ni laho sike o Ierusalem. I laho polo na nagi ne Samaria e Galili.
LUK 17:12 Na tahuna i laho dili na tanga tara, i matai a bakovi ala ravulu. Re huriki a bakovi nga, ri pesi basi, a vuhuna i tuvu ne ria a patala.
LUK 17:13 Ri gale dagi ri ta maea, “Isu, ioe a Bakovi Dagi. O dodo mia!”
LUK 17:14 Na tahuna i matai ria, i ta maea, “Mu vano mu vakasiri mua ne huriki a prister.” Na tahuna ri laho lokovonga i malaharuri ne ria a patala.
LUK 17:15 A viri tara ne ria i masia i malaharuri vona patala, lakea i hamule i gale dagi i kavurikea a Vure.
LUK 17:16 I tabuli puru tabukoi na vahane Isu, i kavurikea. Ra viri iea a bakovi o Samaria.
LUK 17:17 Lakea e Isu i nanea, “A viri ala ravulu ri matapado. Pali a vai a viri ala polova?
LUK 17:18 I navai ri koi ni hamule ri gi kavurikea a Vure? Ra mosi iea kunana i hamule valai, i kavurikea a Vure.”
LUK 17:19 Muri e Isu i takia a bakovi iea, i ta maea, “O pesi rike, o vano. I matapado a kulimu, a vuhuna o luhoi tora iau.”
LUK 17:20 Muri e huriki a Pariseo ri nanea e Isu na harikianga na Vure, garika ge valai. Lakea e Isu i koli, i ta maea, “Na tahuna a harikianga na Vure ge valai, i uka ma ge valai turana nivakasiri mu gu matai na matane mua.
LUK 17:21 I uka tara viri ge taki i bele pali koea o i bele pali lake, a vuhuna a harikianga na Vure i bele pali ne mua.”
LUK 17:22 Muri i taki e huriki a murimuri vona i ta maea, “Muri a parava bara i valai, bara mu ngaru hateka ni masia a Tuna Bakovi ge hamule valai. Bara mu ngaru ni matai popotea, pali i uka ma mu gu masia.
LUK 17:23 E huriki a bakovi bara ri taki mua, ri ta maea, ‘Mu mata lakea, i made lake,’ o ‘Mu mata valai, i made koea.’ Naha ni vano. Naha ni nunu muri mai ria.
LUK 17:24 Na tahuna a vila i maravila na hunu, i vakapalala a hunu lobo, mu masia. I mavonga kunana na tahuna a Tuna Bakovi i hamule valai, bara mu matakilalea.
LUK 17:25 Pali muga e huriki lobo mona bara ri tepua, bara i bole a nimadihi i kupo.
LUK 17:26 “A parava na Tuna Bakovi ge manga kunana a parava ne Noa.
LUK 17:27 Hosi, na tahuna e Noa i hae a agarungu vona, e huriki ri kani, ri ninu, ri vaparangi, i vano i harena na tahuna e Noa i rike na agarungu. I valai a marungu lolo i ratapile ria lobo.
LUK 17:28 “I mavonga kunana hosi ne Lot. E huriki ri kani, ri ninu, ri vakona, ri vahabi a maki, ri varo a maki, ri hae a ruma.
LUK 17:29 Pali na tahuna e Lot i ha taroa e Sodoma, i boru valai meli na hunu a kanono a bega i ratapile ria lobo.
LUK 17:30 “Bara i mavonga kunana na tahuna a Tuna Bakovi ge hamule valai.
LUK 17:31 Na parava iea, a viri tara i pesi na mapana ruma, nahea ge hamule puru tabu ge dili na ruma ge bole a maki vona. Ge ha kunana. I mavonga kunana a viri i leho na hania, nahea ge hamule lakea na ruma ge bole a maki vona.
LUK 17:32 Mu luhoia e girihine Lot!
LUK 17:33 A viri i ngaru ni korimule a kakaina bara i mate. Pali a viri i habi a kakaina bara i mahuri vakaroro.
LUK 17:34 “A taki mua, na rodo iea, a viri ala rua ru mahita na kiri taku; bara ni bole tara, ni pe mule tara.
LUK 17:35 A ngatavine ala rua ru rata a maki ni kani. Bara ni bole tara, ni pe mule tara.
LUK 17:36 A bakovi ala rua ru leho na hania. Bara ni bole tara, ni pe mule tara.”
LUK 17:37 E huriki a murimuri vona ri longoa, lakea ri nanea, “Bakovi Dagi, ra maka maki nga, ge bele vai?” E Isu i koli i ta maea, “Na hini i tabuli vona a podana viri, a maka pango­pango­kaba bara ri vapopo.”
LUK 18:1 Muri e Isu i taki e huriki a murimuri vona na nita vakakika tara, a vuhuna i ngaru ri gi vasileki vakaroro, ri gi hatenono.
LUK 18:2 Lakea i ta maea, “Na tanga tara a mari ni pelekado i made vonga. I uka ma i mangenge na Vure, i uka ma i togo e huriki a bakovi.
LUK 18:3 Na tanga iea, i tahoka a havuri i valai bala vona i nanea, ‘O tuhori iau ne huriki a pile nau.’
LUK 18:4 “I muga, a mari ni pelekado i longotaroa. Pali muri i taki mulea, i ta maea, ‘Iau i uka ma mangenge na Vure, i uka ma a togo e huriki a bakovi.
LUK 18:5 Pali iau ga koria a ngatavine iea, a vuhuna i valai bala i vakapae iau! Iau i uka ma ga koria, bara i valai bala, i vakamalulu a tuhagu.’”
LUK 18:6 Lakea e Bakovi Dagi i ta maea, “Mu luhoi kamumu a naro i ratea a bakovi hale iea. I uka ma i kori malaviriri a havuri iea.
LUK 18:7 Pali a Vure, i muholi hateka bara i kori e huriki i vulaki ria, re huriki ri galea vakaroro, na hatelanga, na malunga, na rodo.
LUK 18:8 A taki muholi mua, bara i kori malaviriri ria. Pali na tahuna a Tuna Bakovi ge hamule valai na malala, ge matai ranga e huriki ri luhoi tora ia, o ge uka?”
LUK 18:9 E huriki ranga ri luhoi ta ria a viri kamumu, lakea ri biu e huriki ranga. Lakea e Isu i takia ne ria a nita vakakika iea,
LUK 18:10 “A bakovi ala rua ru sike na roho na Vure, ru gu vasileki. A Pariseo rua a bakovi ni bole a takis.
LUK 18:11 A Pariseo i pesi rike i vasileki mule vona, i ta maea, ‘Vure nau, a kavurike ioe a vuhuna iau i uka ma a manga e huriki a bakovi ranga ri rabalaki a viri, ri panaho a maki. Iau i uka ma a manga e huriki ri rata a naro hale, ri mole. Iau i uka ma a manga a bakovi iea, ra bakovi ni bole a takis.
LUK 18:12 Iau a peremu balaka rua na vik i taku. A maki lobo nau a ru na naguna i ravulu, a habia vomu a tabekena i taku.’
LUK 18:13 “Pali a bakovi ni bole a takis i pesi basi, i uka ma i mata sike na hunu. I dodo hateka vona a hini ia a bakovi hale. I maruhu hateka, i ta maea, ‘Vure nau, o dodo iau a bakovi hale.’
LUK 18:14 “A taki mua, a Vure i puga vuroki a naro hale na bakovi ni bole a takis, pali a Pariseo iea, i uka ma i puga vuroki a naro hale vona, a vuhuna e rei a viri i bibi rike mule ia, a Vure bara i vakakirokoa. Pali e rei a viri i vakakiroko mule ia, a Vure bara i kavurikea.”
LUK 18:15 E huriki ri boko valai ne Isu e huriki a koma kiroko, ge padoi ria. Pali na tahuna e huriki a murimuri ri matai, ri tahate ria.
LUK 18:16 Pali e Isu i taki e huriki ri gi boko valai vona e huriki a koma nga, lakea i ta maea, “Naha ni hatekakari e huriki a koma. Mu taparaki ria ri gi valai nau, a vuhuna a harikianga na hunu ne vone ria e huriki a hulu nga.
LUK 18:17 A taki muholi mua, e rei a viri i uka ma i ngaru a Harikianga na Vure ge manga e huriki a koma nga, i uka ma ge dili vona.”
LUK 18:18 Muri, a bakovi dagi tara i nanea e Isu i ta maea, “Mari ni tovo, o kamumu hateka. A ra maki ga ratea ga bole a nimahuri vakaroro?”
LUK 18:19 Lakea e Isu i koli, i ta maea, “I navai o taki iau a kamumu? I uka tara viri ge kamumu. A Vure kikeri kunana a viri i kamumu.
LUK 18:20 O lohoka vona a vinara nga: naha ni mole, naha ni rabalaki a viri, naha ni panaho, naha ni padi virihi tavula a viri na ngava. O togo e tamamu e kinamu.”
LUK 18:21 Lakea i ta maea, “A vinara lobo nga a muri mai, a vakatubu na tahuna a kiroko vona.”
LUK 18:22 Na tahuna e Isu i longoa, i takia, “A maki tara i uka ma o ratea ma. O vano o habi a maki lobo vomu ni gi kona. O bole a mapana o habi ne huriki a matasia, bara o tahoka a mahala na hunu. Muri o valai o muri nau.”
LUK 18:23 Na tahuna i longoa a ngava iea, i dodo hateka, a vuhuna i tahoka a mahala i kupo.
LUK 18:24 Lakea e Isu i mata lakea vona i ta maea, “I madihi hateka na bakovi na mahala ge dili na harikianga na Vure!
LUK 18:25 Muholi hateka a kamel i keri ni dili na dupi na kavato. I mavonga kunana, a bakovi na mahala i uka ma ge dili na harikianga na Vure.”
LUK 18:26 E huriki ri longoa a ngava iea ri turutu, ri nana, “Pali e rei ngane ge bole a nimahuri vakaroro?”
LUK 18:27 Pali e Isu i koli, i ta maea, “A maki i keri e huriki a bakovi, a Vure i kara ge rata.”
LUK 18:28 Lakea e Petrus i ta rike, i ta maea, “Pali mia, mi pe pali a tanga ne mia, mi muri vomu!”
LUK 18:29 E Isu i koli i ta maea, “A taki muholi mua, e rei a viri i lohopile a tanga vona, e girihina, e turana, e tamana, e kinana, e huriki e tuna, ge longototo a Vure,
LUK 18:30 bara i bole tabu i kupo hateka koea na malala. Muri ma meli na hunu bara i mahuri vakaroro.”
LUK 18:31 E Isu i tuli lakea na gaga a murimuri vona ala ravulu a polona i rua, i taki ria, i ta maea, “Ngane si gi sike o Ierusalem, lakea a ngava lobo e huriki a propet ri here puru virihi mai a Tuna Bakovi bara i bele muholi.
LUK 18:32 Bara ni habi ia na limane huriki a bakovi i uka ma ria a Iuda. Bara ri padikedea, ri rata halea, ri kalupe tahoa,
LUK 18:33 ri hotua, muri bara ri rabalakia. Muri na parava i tolu, bara i pesi rike mule na matenga.”
LUK 18:34 Pali e huriki a murimuri i uka ma ri longokilalea a ngavane Isu. A pelegona ngava ni ruhulolo ne ria, i uka ma ri longokilalea.
LUK 18:35 E Isu i bele tabukoi o Ieriko. A bakovi tara, a kepa, i mamade na dahana dala, i nonongi a maki ne huriki.
LUK 18:36 Na tahuna i longo e huriki ala kupo ri laho polo, i nana ria vona a ra maki i bele.
LUK 18:37 Lakea e huriki ri takia ri ta maea, “E Isu o Nasaret i laho polo ngane.”
LUK 18:38 Lakea i gale tala, i ta maea, “Isu, Tune Davit, o dodo iau!”
LUK 18:39 E huriki ri laho muga ri tahatea, ri takia ge vulai. Pali i gale hateka tabu, i ta maea, “O Tune Davit, o dodo iau!”
LUK 18:40 Lakea e Isu i pesi tata, i taki e huriki ri gi tuli vilia vona a bakovi iea. Na tahuna i valai tabukoi, e Isu i nanea,
LUK 18:41 “A ra o ngarua ga ratea?” I koli i ta maea, “Bakovi Dagi, a ngaru ni matapara.”
LUK 18:42 Lakea e Isu i takia, “O matapara. O tavaga ngane, a vuhuna o luhoi tora iau.”
LUK 18:43 I malaviriri kunana i matapara, i muri ne Isu i kavurikea a Vure. Na tahuna e huriki a bakovi a ngatavine ri masia a kepa iea i matapara, ria ranga ri kavurikea a Vure.
LUK 19:1 E Isu i dili na tanga e Ieriko, ta ge laho polo.
LUK 19:2 A bakovi tara i made vona a tanga iea, a rana e Sakeus, a bakovi i muga ne huriki a bakovi ni bole a takis. Ia a bakovi na mahala.
LUK 19:3 I ngaru ni masia e Isu, pali i keri ni masia a vuhuna i kapo, i kupo hateka e huriki ri vapesihi halui e Isu.
LUK 19:4 Lakea e Sakeus i nunu muga na dala, i rike na kai a pik, ge made langa, ge matai kamumua e Isu na tahuna i laho polo.
LUK 19:5 Na tahuna e Isu i bele vona a hini nga, i mata rike, i masia e Sakeus, lakea i takia, “Sakeus, o puru valai malaviriri! Mona ga made turamu na ruma vomu.”
LUK 19:6 Lakea e Sakeus i puru malaviriri, i vivi hateka ni taguia e Isu.
LUK 19:7 E huriki ri masia ri ta barangungu, ri ta maea, “Re Isu, i navai i vano i made turana bakovi hale iea?”
LUK 19:8 Na tahuna ri made na ruma, e Sakeus i pesi rike, i takia e Bakovi Dagi, i ta maea, “Ga veru na naguna ge rua a maki lobo nau. A tabekena tara ga habi ne huriki a matasia. E huriki a tami ria hosi, a panaho a maki ne ria, ga koli balaka va tabu.”
LUK 19:9 Lakea e Isu i takia i ta maea, “Mona a Vure i korimule e huriki na ruma iea, a vuhuna ra bakovi iea, ia tara a hamone Abraham.
LUK 19:10 A Tuna Bakovi i valai ge matakana e huriki ri velu, ge korimule ria.”
LUK 19:11 E huriki ri talangaki a ngava i taki, lakea e Isu i taki tabua ne ria tara nita vaka­kika, a vuhuna i valai tabukoi pali o Ierusalem, e huriki ri luhoi ta a harikianga na Vure i popote ge valai.
LUK 19:12 Lakea e Isu i taki ria i ta maea, “A bakovi dagi tara ta ge havai lakea na tanga basi, ni gi rata ge ia a hariki, muri ge hamule valai, ge matakari a harikianga.
LUK 19:13 Lakea i gale valai a vora vona ala ravulu, i habi ne ria takutaku a moni dagi. Lakea i taki ria i ta maea, ‘Mu rata a leho vona a moni nga ge harena na tahuna ga hamule valai vona.’ Muri i vano.
LUK 19:14 “Pali e huriki na tanga vona ri marikoi vona. Lakea ri rudu muri vona e huriki a vinuru, ri gi ta maea, ‘Mi marikoi vona a bakovi iea. Nahea ge ia a hariki ne mia.’
LUK 19:15 “Pali na tahuna i bele vona a tanga basi iea, ni rata ia a hariki. Na tahuna i hamule na tanga vona, i ta maea, ‘Mu gale valai nau e huriki a vora a habi a moni ne ria, ri gi vakasiri iau vona i riva tabu ri vakabele.’
LUK 19:16 “I valai muga a vora tara, i ta maea, ‘Bakovi dagi, iau a leho vona a moni vomu, a vakabele tabu a moni vomu i ravulu.’
LUK 19:17 “Lakea a hariki i takia a vora i ta maea, ‘Kamumu hateka! Ioe a vora kamumu. Ngane o matakari a tanga dagi ge ravulu, a vuhuna o rata kamumu a leho kiroko.’
LUK 19:18 “Muri i valai tabu tara vora, i ta maea, ‘Bakovi dagi, a leho vona a moni vomu, a vakabele tabu a moni vomu i lima.’
LUK 19:19 “Lakea a hariki i takia a vora i ta maea, ‘Ioe ngane o matakari a tanga dagi ge lima.’
LUK 19:20 “Muri i valai tabu tara vora, i takia a hariki, i ta maea, ‘Bakovi dagi, a moni vomu o habi nau, a sivu na marapena kala a ruhulolo.
LUK 19:21 A rata mavonga, a vuhuna a mangenge vomu, ioe a bakovi hateka. A mahala i vakabele e huriki, o bole. A maki ni kani i varo e huriki, o bole.’
LUK 19:22 “Muri a hariki i takia a vora, i ta maea, ‘Ioe a bakovi hale! Na ngavamu kunana ga vakasiri e huriki ne ioe o rata hale. Ioe o lohoka nau, iau a bakovi hateka, a bole tavula a mahala ne huriki, a bole tavula a maki ni kani ne huriki.
LUK 19:23 Pali i navai o uka ma o ru dili na tava a moni nau? Na tahuna a hamule valai, bara bole mule turana ranga moni o vakabele tabu.’
LUK 19:24 “Lakea a hariki i taki e huriki ri pesi tabukoi i ta maea, ‘Mu bole mule vona a moni a habi vona rira, mu habia na viri i vakabele tabu a moni i ravulu.’
LUK 19:25 “Ri takia ri ta maea, ‘Bakovi dagi, a vora iea i tahoka pali a moni i ravulu.’
LUK 19:26 “Pali a hariki i ta maea, ‘E huriki ri tahoka pali a maki bara ni habi tabu ranga. Pali e huriki ri uka a maki bara ni bole mule lobo a maki popote ri tahoka.
LUK 19:27 Pali ngane i vai e huriki a gimagu ri koi nau ge iau a hariki ne ria? Mu bole valai ria mu rabalaki ria na matagu.’”
LUK 19:28 E Isu i taki loboa a nita vakakika iea, muri i laho lokovonga o Ierusalem.
LUK 19:29 Na tahuna i valai tabukoi na tanga e Betpage e Betani, na dahana lolo e Oliva, i rudu muga a murimuri vona ala rua,
LUK 19:30 i ta maea, “Muru muga lakea na tanga kiroko lake. Na tahuna muru dili vona, bara muru masia a tuna donki ni kolotata vonga. A tuna donki iea, i uka tara viri ge rike vona ma. Muru pugea, muru bole vilia.
LUK 19:31 A viri tara ge nana marua, ge ta maea, ‘I navai muru pugea a donki iea?’ Muru takia muru ta maea, ‘E Bakovi Dagi i tahoka a leho vona.’”
LUK 19:32 A murimuri nga ru vano ru dili na tanga, ru masia a tuna donki i manga a hini i takia ne rua e Isu.
LUK 19:33 Na tahuna ru pugea, i pagitala a tahona, i nana rua i ta maea, “I navai muru pugea a tuna donki iea?”
LUK 19:34 Lakea a murimuri nga ru koli, ru ta maea, “E Bakovi Dagi i tahoka a leho vona.”
LUK 19:35 Muri ru lalua a tuna donki lakea ne Isu, ru vulala na bitona a varakia ne rua, ru vakarikea vona e Isu.
LUK 19:36 Lakea e huriki ri vulala puru na dala muga na donki a varakia ne ria, i laho langa vona a donki.
LUK 19:37 I valai tabukoi ngane o Ierusalem, na tabeke na dala i raga valai na lolo e Oliva. Ngane e huriki a murimuri lobo ri gale dagi, ri kavurikea a Vure vona a maka nivakasiri ri matai, ri ta maea,
LUK 19:38 “A Vure ge rata kamumu a hariki i valai na rane Bakovi Dagi! Ngane e huriki a bakovi a ngatavine ri gi made na nivalemu turana Vure. Si gi kavurikea a rana Vure Meli Liu!”
LUK 19:39 Lakea e huriki a Pariseo ranga, ra ri laho turane huriki, ri takia e Isu ri ta maea, “Mari ni tovo, o taki e huriki a murimuri vomu nahea ri gi taki a ngava nga.”
LUK 19:40 Lakea e Isu i koli, i ta maea, “A taki mua, ria bara ri ngavarubu, a maka kedo bara ri gale tala.”
LUK 19:41 Na tahuna e Isu i bele tabukoi o Ierusalem, i masia a tanga, i taringia,
LUK 19:42 i ta maea, “Mua o huriki a bakovi o Ierusalem, bara mu lohoka nau, bara mu made na nivalemu. Pali i uka ma mu matakilala iau.
LUK 19:43 Lakea a parava bara i valai, e huriki a pile ne mua bara ri pesi halui mua, ri gi keli kadolu rike a malala na nure, lakea e huriki a pile bara ri page poloa a nure, ri dili na tanga, ri bolea.
LUK 19:44 Bara ri ratapile a tanga turana e huriki ri made pololilo vona. I uka tara kedo ge tabuli langa vona tara kedo tara. Bara i bele a maki nga, a vuhuna i uka ma mu matakilaka vona a parava i valai vona a Vure ge korimule mua.”
LUK 19:45 Muri e Isu i dili na roho na Vure, i vaka­tubu ni lili tala e huriki ri vakona ri vahabi a maki pololilo.
LUK 19:46 I taki ria, i ta maea, “A ngava ni here puru na Hinere i ta maea, ‘A roho nau, a roho na ni vasileki.’ Pali mua mu ratea i manga a hini ri haniu vona e huriki a panaho.”
LUK 19:47 Muri e Isu i vara na roho na Vure na parava lobo. Lakea e huriki a prister dagi, a mari na vinara, a bakovi dagi, ri matakana a dala ri gi rabalakia e Isu vona.
LUK 19:48 Pali i uka ma ri matavisia tara dala, a vuhuna e huriki lobo ri ngaru hateka a ngavana.
LUK 20:1 Na parava tara, na tahuna e Isu i tovo e huriki na Velenga Kamumu pololilo na roho na Vure, e huriki a prister dagi, a mari na vinara, e huriki a bakovi dagi ri valai ne Isu.
LUK 20:2 Lakea ri nanea, “O vakalongo mia, o bole vai a nitora o rata a maki nga? E rei i taki ioe go rata a maki nga?”
LUK 20:3 E Isu i koli i ta maea, “Ga nana taro mua vona tara ninana. Mu vakalongo iau,
LUK 20:4 ra hilova ne Ioanes, i valai na Vure, o i valai na bakovi tavula kunana?”
LUK 20:5 Ri vahehe, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’
LUK 20:6 Pali hita bara si taki a hilova ne Ioanes a niluhoi na bakovi kunana, e huriki bara ri padimate hita na kedo, a vuhuna ri luhoia e Ioanes a propet.”
LUK 20:7 Lakea ri koli mule ri takia, ta i uka ma ri lohoka vona a hilova ne Ioanes i valai ne rei.
LUK 20:8 Lakea e Isu i ta rike, i ta maea, “Pali iau tara, i uka ma ga vakalongo mua vona e rei i habi a nitora nau ni rata a maki nga.”
LUK 20:9 Muri e Isu i taki ria vona tara nita vakakika tabu, i ta maea, “A bakovi tara i varoa a hania na vain, i habia ne huriki a bakovi ranga ri gi leho taro vona. Muri i vano i havai, i made tabaka na robo tara.
LUK 20:10 I tabukoi ngane a keva ni mirio a vain, lakea i rudua a vora vona i lakea ne huriki a bakovi ni leho ge bole ranga kanena vain. Pali ri ubia a vora, ri tono mulea i laho a vahana a limana i hamule.
LUK 20:11 Muri i rudu tabua tara vora. Pali ri ubi tabua, ri rata halea, ri tono mulea i laho a limana a vahana i hamule.
LUK 20:12 A tahona hania i rudu tabua tara vora. I mavonga ia, ri ubi pilea, ri voro talea.
LUK 20:13 “Lakea a tahona hania na vain i nana mulea i ta maea, ‘A ra ga ratea ngane? Ga rudua e tugu a bakovi a hategu. Bara ri togo ia.’
LUK 20:14 “Pali na tahuna e huriki a bakovi ni leho ri masia e tuna, ri vata, ri ta maea, ‘A bakovi iea bara i bole a murine tamana. Si rabalakia, si bolea a hania na vain na tahuna e tamana i mate.’
LUK 20:15 Lakea ri vuroki talea e tuna, ri rabalakia. “Mu luhoi navia a tahona hania, ge rata navai ria ngane?
LUK 20:16 Bara i valai, i rabalaki e huriki a bakovi nga, i bole mulea a hania na vain, i habi polo tabua ne huriki a bakovi ranga.” Na tahuna ri longoa a nivakakika iea ri ta maea, “A Vure, nahea ge rata mavonga!”
LUK 20:17 Lakea e Isu i matanono ria i ta maea, “Pali a ngava ni here puru na Hinere i ta maea, ‘Ra kedo e huriki a mari ni hae a ruma ri marikoi vona, ngane i bele a vuhu kedo ni hae a ruma vona.’
LUK 20:18 “E huriki ri boru langa na kedo iea bara ri bole a vuranga. Na tahuna a kedo iea bara i boru, i tahoa tara bakovi, bara i ubi momoa.”
LUK 20:19 Ngane e huriki a mari na vinara turana e huriki a prister dagi i padi ria a mana vona e Isu i taki virihi ria, lakea ri ngaru ni lakavu malaviriria. Pali ri mangenge ne huriki a bakovi a ngatavine.
LUK 20:20 Lakea ri rudu e huriki ranga ri gi tamilalu ni muri ne Isu, ri gi kasisi, ri gi matanonoa ge rata ranga ngava hale, bara ri taki tala ne Pilato.
LUK 20:21 E huriki a kasisi nga ri nanea, “Mari ni tovo, mi lohoka vomu, ioe o ta muholi, o vara e huriki na maki muholi. O rata a naro i palupulupu ne huriki lobo. O vara kunana na naro na Vure i muri mai a ngava muholi.
LUK 20:22 A vinara i taki si gi habi a takis ne Kaiser, o i uka?”
LUK 20:23 Pali e Isu i lohoka vona a taminga ne ria, lakea i taki ria i ta maea,
LUK 20:24 “Mu vakasiria nau tara moni. A hanune rei, a rane rei i tabuli vona?” Ri ta maea ria, “A hanune Kaiser, a rane Kaiser i tabuli vona.”
LUK 20:25 Lakea e Isu i taki ria i ta maea, “Mu habi ne Kaiser a maki ne Kaiser. Mu habi na Vure a maki na Vure.”
LUK 20:26 Ri keri ni padi virihia na ngava vona na matane huriki a bakovi a ngatavine. Ri ngapa ri vulai kunana.
LUK 20:27 Muri e huriki a Sadusi ri valai ne Isu. Re huriki nga ri taki ta a viri i mate i uka ma ge pesi rike mule tabu.
LUK 20:28 Ri nanea, “Mari ni tovo, e Moses i here puru i taki a bakovi i mate, i pe purua e girihina, pali i uka e tune rua, e tarina bara i parangi tabu a havuri vona, ge vakabelea a hamona.
LUK 20:29 I tahoka e tarina mai ala polorua. A tabua i parangi, muri i mate. Pali i uka ma i vakabele e tuna.
LUK 20:30 A pahamuri tabua i parangi tabu vona a havuri vona. Muri ia tara i mate, i uka tabu e tuna.
LUK 20:31 A tolune ria i parangi tabu vona, pali ia tara i mate. Re maki tarina mai lobo nga to parangi lobo vona. Muri to mate, i uka ma to vakabele e tune tou.
LUK 20:32 Muri i mate a ngatavine.
LUK 20:33 Muri ma, na tahuna e huriki ri pesi rike mule na ni mate, ra ngatavine iea ge girihine rei muholi? Tou lobo to parangi vona.”
LUK 20:34 Lakea e Isu i koli, i ta maea, “Koea na malala e huriki ri parangi.
LUK 20:35 Pali muri ma, e huriki a bakovi a ngatavine a Vure ge taki ria ri kamumu, ri gi mahuri mule na nimate, i uka ma ri gi vaparangi,
LUK 20:36 a vuhuna ri manga a agelo, i uka ma ri gi mate tabu. Ria e huriki e tuna Vure, a vuhuna ri mahuri mule na nimate.
LUK 20:37 E Moses tara i vakasiri hita vona e huriki ri mate, bara ri mahuri mule tabu. Na tahuna i here puru a nuverei na kai kiroko i nono, i takia e Bakovi Dagi ia ‘A Vure ne Abraham, a Vure ne Isak, a Vure ne Iakop.’
LUK 20:38 I uka ma ia a Vure ne huriki ri mate. Ia a Vure ne huriki ri mahuri, a vuhuna e huriki lobo ri mahuri na matana.”
LUK 20:39 Lakea e huriki a mari na vinara ri ta maea, “Mari ni tovo, a nikoli vomu i kamumu.”
LUK 20:40 Muri ri mangenge ni nana tabua.
LUK 20:41 Muri e Isu i nana ria i ta maea, “I navai ni taki e Kristo ia e Tune Davit?
LUK 20:42 Na maka Linge, e Davit i here maea, ‘E Bakovi Dagi i takia e Bakovi Dagi nau, “O made na limagu a kanegu,
LUK 20:43 ge harena na tahuna ga ratapile e huriki a pile vomu, ri gi vora tavula vomu.” ’
LUK 20:44 “E Davit i galea a viri iea a Bakovi Dagi vona. Pali i navai tabu ge ia e tune Davit?”
LUK 20:45 Muri i taki e huriki a murimuri vona na matane huriki lobo, i ta maea,
LUK 20:46 “Mu matadoko na narone huriki a mari na vinara. Ri vakaholi, ri ngaru ri gi bagetu keke. Ri ngaru e huriki ri gi tagui kamumu ria na mada. Ri ngaru ni made mugamuga na roho na vaponga, ri ngaru ni made mugamuga na habu.
LUK 20:47 Ri rata a nivasileki olaola, e huriki ri gi luhoi ta ria a bakovi kamumu hateka, pali ri panaho a ruma, a malala ne huriki a havuri. Re huriki nga, a Vure bara i habi a nimadihi dagi ne ria na tahuna i pelekado a narone ria.”
LUK 21:1 E Isu i mata lakea, i matai e huriki a bakovi na mahala ri habi a nihabi pololilo na roho na Vure.
LUK 21:2 Muri i masia a havuri matasia i ru puru a toea i rua.
LUK 21:3 Na tahuna i masia, i ta maea, “A taki muholi mua, a havuri matasia iea i habi dagi hateka ne huriki a bakovi na mahala nga.
LUK 21:4 E huriki a bakovi na mahala ri habi kunana a maki ri uka leho vona. Pali ra ngatavine matasia iea i habi lobo a maki i tahoka.”
LUK 21:5 E huriki a murimuri ranga ri masia a roho na Vure, ri bibi rikea na hini ni vakabagetu kamumu na kedo kamumu, na mahala e huriki ri habi na Vure. Pali e Isu i taki ria i ta maea,
LUK 21:6 “Ra maki nga mu matai, ra roho na Vure, i uka tara kedo ge tabuli langa vona tara kedo tara. A kedo lobo bara ni ubi puka puru.”
LUK 21:7 Muri ri nanea e Isu ri ta maea, “Mari ni tovo, garika ge bele a maki nga? Ge mata navai a kilakila vona, si gi matakilaka vona a maki nga ge bele?”
LUK 21:8 E Isu i koli i ta maea, “Mu matadoko vona e huriki ri gi tami mua. A bakovi ala kupo bara ri valai na ragu, ri tatami maea, ‘Iau e Kristo,’ o bara ri ta maea, ‘A parava i valai pali!’ Naha ni longo mai ria.
LUK 21:9 Na tahuna mu longo a velengana vaubinga dagi, naha ni mangenge, a vuhuna a maki nga bara ri bele taro. Pali a nilobona parava i tabana.”
LUK 21:10 Muri i taki ria i ta maea, “A tanga ranga bara ri vaubi turana tanga ranga. E huriki a tara na hariki ranga bara ri vaubi turana tara na hariki ranga.
LUK 21:11 A maka vuruke dagi, a gilanga dagi, a pago dagi bara ri bele. A maka nivakasiri dagi bara ri bele na hunu, ri vaka­mangenge e huriki.
LUK 21:12 “Pali muga, bara ni lakavu mua ni ratapile mua a vuhuna mu muri mai iau. Bara ni pelekado mua na roho na vaponga, ni ru dili mua na bavi. Bara ni lakavu mua, ni vakapesi mua na matane huriki a hariki a matakari, a vuhuna mu ramai iau.
LUK 21:13 Na tahuna mu pesi na matana e huriki a hariki, bara mu vakalongo ria ne nau.
LUK 21:14 Naha ni lohopae vona a ngava bara mu taki ria vona,
LUK 21:15 a vuhuna iau ga habi a lohokanga ne mua, bara mu taki kamumu ria, lakea e huriki a pile ne mua bara ri keri ni gege, bara ri keri ni pulo a ngavane mua.
LUK 21:16 E huriki e tamane mua, e kinane mua, e tukane mua, e tarine mua, a kabune mua, a turane mua bara ri habi mua na limane huriki a pile ne mua. Bara ri rabalaki ranga ne mua.
LUK 21:17 E huriki lobo bara ri marikoi ne mua a vuhuna mu muri nau.
LUK 21:18 Pali i uka tara vune mua ge velu.
LUK 21:19 Mu pesi tata na niluhoi ne mua, bara mu bole a nimahuri.
LUK 21:20 “Na tahuna mu matai e huriki a tara na nugumaheto ri pesi halui e Ierusalem, ngane bara mu lohoka vona a tanga i popote bara ni ratapile.
LUK 21:21 Na parava iea e huriki ri made o Iudea ri gi ha, ri gi kapiloho na lolo. E huriki ri made o Ierusalem ri gi ha tala. E huriki ri made polovavo na tanga, nahea ri gi dili,
LUK 21:22 a vuhuna i bele muholi ngane a ngava ne huriki a propet hosi, ri here puru na hinere, a Vure ge koli a maka rabu hale.
LUK 21:23 E huriki a ngatavine ri singou, e huriki a ngatavine ri vakaruru, bara ri marego hateka na parava iea! A nimadihi dagi bara i bele o Israel. A Vure ge tahate e huriki a bakovi a ngatavine na tahuna iea.
LUK 21:24 E huriki a pile bara ri valai ri rabalaki ria. E huriki i uka ma ri mate, bara ni bole basi, ri made viliha na tanga lobo na malala. E huriki a bakovi i uka ma ria a Iuda bara ri ratapilea e Ierusalem, ge harena na tahuna a parava ne ria i lobo.
LUK 21:25 “Na tahuna iea, a maka nivakasiri bara ri bele na haro, na keva, na hada. Koea na malala e huriki bara ri mangenge ri vuru viliha lae na tahuna ri longo a nangina bokona dari i rere hateka.
LUK 21:26 E huriki a bakovi bara ri mangenge hateka, bara i vurea a matane ria. Bara ri loho lege lae na a ra maki ge bele na malala, a vuhuna a maka nitora polomeli na hunu bara ni polu.
LUK 21:27 Ngane ri gi masia a Tuna Bakovi i valai na bubu, i valai turana nitora a nipara dagi.
LUK 21:28 Na tahuna a maka maki nga ri vakatubu ni bele, mu pesi rike, mu mata rike, a vuhuna a parava a Vure ge korimule mua i tabukoi pali!”
LUK 21:29 Muri e Isu i takia ne ria a nita vaka­kika iea, “Mu masia a kai a balele turana maka kai ranga.
LUK 21:30 Na tahuna i tahoka a totona a rahana, i lubu a pagana, bara mu pasimata vona a tahuna na haro i tabu­koi.
LUK 21:31 I mavonga kunana na tahuna mu matai a maki nga ri bebele, ngane bara mu lohoka vona a harikianga na Vure i tabukoi.
LUK 21:32 “A taki muholi mua, e huriki a bakovi a ngatavine na tahuna iea i uka ma ri gi mate ma, a maka maki nga ri gi bele taro.
LUK 21:33 A malala a hunu bara ru lobo, pali a nitagu i uka ma ge lobo.
LUK 21:34 “Mu matadoko, nahea mu gu luhoi lege­lege na nimade koea na malala. Nahea mu gu ninu mu gu manga manga, mu gu rata a maka naro hale, ma ge vaka­pae mua a maka rabu nga. Bara mu turutu na tahuna a parava iea i bele vakaturutu, i lakavu mua i manga a hoa i lakavua a kadirovo.
LUK 21:35 A parava iea ge bele ne huriki lobo ri made na malala.
LUK 21:36 Mu matadoko na parava vakaroro. Mu vasileki bara mu tahoka a nitora ni pologege vona a rabu hale nga, ra ri gi bele, bara mu pesi na matana Tuna Bakovi.”
LUK 21:37 Na parava lobo e Isu i vara e huriki na roho na Vure. Na rodo bara i pe a tanga, i pagitala i vano i mahita na lolo e Oliva.
LUK 21:38 Na hatelanga tabu, e huriki lobo bara ri vuho lakea na roho na Vure, ri gi longoa e Isu i vara vonga.
LUK 22:1 I valai tabukoi ngane a Habu na Bret i Ua Is. A rana tara a Habu na Nipagepolo.
LUK 22:2 E huriki a prister dagi a mari na vinara ri matakana a dala ri gi rabalaki kapilohoa e Isu, a vuhuna ri mangenge ne huriki a bakovi a ngatavine.
LUK 22:3 Lakea e Satan i dili ne Iudas Iskariot, a turane huriki a murimuri ala ravulu a polona i rua.
LUK 22:4 E Iudas i vano, i ta turana e huriki a prister dagi, a nugumaheto ri tagari a roho na Vure. I ta turane ria na dala ge habia na limane ria e Isu.
LUK 22:5 E huriki nga ri vivi, lakea ri takia e Iudas ri gi habi a moni vona.
LUK 22:6 E Iudas i longo vona a ngava ne ria, lakea i matakanea tara dala kamumu ge maragisia. I davea a parava nahea e huriki ala kupo ri gi made turane Isu.
LUK 22:7 A Habu na Bret i Uka Is i bele ngane. Na parava iea a tuna sipsip bara ni rabalaki ne vona a nihabi na Habu na Nipagepolo.
LUK 22:8 Lakea e Isu i taki e Petrus e Ioanes i ta maea, “Muru muga, muru rata puru a kinani ne hita na Habu na Nipagepolo.”
LUK 22:9 Lakea ru nana, “I vai a hini o ngaru miri gi rata puru a maki vona?”
LUK 22:10 E Isu i koli, i ta maea, “Na tahuna muru dili na tanga, a bakovi i kaloho a ulo na naru bara i pugai marua. Muru ramaia, muru dili na ruma i dili vona.
LUK 22:11 Muru takia a tahona ruma, muru ta maea, ‘A mari ni tovo i nana vona a tabeke na mosi ge kani turana e huriki a murimuri vona na habu.’
LUK 22:12 Muri bara i vakasiri marua vona a tabekena ruma i ngavaka polomeli, i tahoka pali a gula ni made ni kado puru. Muru gutu puru vonga a maki ni kani ne hita.”
LUK 22:13 Muri ru vano, ru matai a maki lobo i manga a hini i taki muga e Isu. Lakea ru rata puru vonga a kinani na Habu na Nipagepolo.
LUK 22:14 Ngane ta ri gi kani, lakea e Isu turane huriki a apostolo vona ri vano, ri made haluia a dede.
LUK 22:15 Lakea i taki ria i ta maea, “A pasimata ni kani turane mua vona a kinani na Habu na Nipagepolo, muga ne iau ga bole a nimadihi.
LUK 22:16 A taki mua, i uka ma ga kani tabu vona a habu iea. Muri ma, na tahuna a pelegona habu iea ge bele muholi na harikianga na Vure, bara kani tabu vona.”
LUK 22:17 Muri e Isu i bole a kikei na vain, i kavurikea a Vure, i ta maea, “Mu bolea a kikei na vain iea mu vaveru,
LUK 22:18 a vuhuna a taki mua, i uka ma ga ninu tabu vona a kanena vain iea ge harena na tahuna a harikianga na Vure ge valai.”
LUK 22:19 Muri e Isu i bole rikea a bret, i kavu­rikea a Vure, i kevea, i veru ne huriki a apostolo vona, ri gi kani, i ta maea, “Ra bret iea a bobogu, a habia ge korimule mua. Mu rata mavonga vakaroro, mu luhoi mule iau.”
LUK 22:20 Na tahuna ri kani lobo, e Isu i bole rikea a kikei na vain, i ta maea, “A vain iea a kilakila na ngava dagi karaba a Vure ge rata turana e huriki. A ngava dagi karaba iea ga vakatorea na daragu, ra daragu ge pori, ge korimule mua.
LUK 22:21 “Pali tara ne mua i made turagu koea na dede bara i habi iau na limane huriki a pile,
LUK 22:22 a vuhuna bara i bele nau, iau a Tuna Bakovi, ge manga a hini ni here puru hosi. Pali a Vure bara i ratapilea ra viri ge habi iau na limane huriki a pile.”
LUK 22:23 Lakea ri vanana vona e rei ne ria ge ratea ra rabu iea.
LUK 22:24 Muri ri vahehe lae ne e rei ne ria ge muga ne ria lobo.
LUK 22:25 Lakea e Isu i taki ria i ta maea, “E huriki a bakovi i uka ma ria a Iuda, a hariki ne ria a bakovi hateka, ri taki ta ri kori e huriki.
LUK 22:26 Pali mua, naha ni rata mavonga. E rei a viri i ngaru ni muga ne mua ge manga a viri kiroko ne mua. A viri i ngaru ni matakari ge manga a vora ne mua.
LUK 22:27 E rei a viri i dagi? A viri i mamade na dede o a vora i habi a maki ni kani vona? A viri i mamade na dede i dagi. Pali iau a valai, a made turane mua ge iau a vora ne mua.
LUK 22:28 “Mua kunana e huriki mu made turagu, i uka ma mu ha taro iau na tahuna a tahoka a nitoni.
LUK 22:29 Lakea a habia ne mua a harikianga, i manga e Tata i habia nau a harikianga.
LUK 22:30 Muri bara mu kani mu ninu turagu na harikianga nau, bara mu made na gula-hariki mu pelekado e huriki a kabu ne Israel ala ravulu a polona i rua.”
LUK 22:31 Lakea e Isu i ta maea, “Simon, Simon, o longo! E Satan i nana tora a Vure pali ge toni tora mua.
LUK 22:32 Pali iau a vasileki pali vomu nahea go lohopile iau. Muri, na tahuna o hamule valai tabu nau, o tuhori e huriki a turamu ri gi pesi tora tabu.”
LUK 22:33 Lakea e Petrus i takia, “Bakovi Dagi, iau bara dili turamu na bavi, bara mate turamu!”
LUK 22:34 Lakea e Isu i takia, “Petrus, muga na kureko ge tangi barama, bara o nana rovi iau balaka tolu.”
LUK 22:35 Muri e Isu i nana e huriki a apostolo i ta maea, “Na tahuna a rudu tala mua, i uka ma mu laho turana holekopa, a kulopi, a vahapolo, pali mu bala ranga maki, o i uka?” Ri koli ria ri ta maea, “I uka.”
LUK 22:36 Lakea e Isu i taki ria i ta maea, “Pali ngane, e rei a viri i tahoka a holekopa, a kulopi, ge bole. E rei a viri i uka bainat, ge habi a varakia vona, ni gi kona, ge vano ge kona a bainat,
LUK 22:37 a vuhuna a ngava ni here puru na Hinere i ta maea, ‘Ri taki ia, ta ia a turana e huriki a bakovi hale.’ A maki lobo ni here virihi mai iau vona bara i bele muholi.”
LUK 22:38 Lakea e huriki a murimuri vona ri ta maea, “Bakovi Dagi, mi tahoka a bainat i rua.” Lakea i taki ria, “Pali kamumu.”
LUK 22:39 E Isu i pe a tanga, i sike na lolo e Oliva, i manga a hini i rata vakaroro. E huriki a murimuri vona ri vano turana.
LUK 22:40 Na tahuna ri bele vona a hini nga, i taki ria, i ta maea, “Mu vasileki nahea mu gu dili na nitoni.”
LUK 22:41 Muri i pe ria, i laho tala popote, i turume puru, i vasileki maea,
LUK 22:42 “Tata, ioe bara o ngaru, o korimule iau vona a nimadihi dagi ta ga bolea. Pali naha ni muri mai a ningaru nau. O muri mai a ningaru vomu.”
LUK 22:43 Muri a agelo tara i bele valai na hunu, i tuhoria.
LUK 22:44 E Isu i hataki a nimadihi dagi, lakea i vasileki tora. A mavidia i pori na kulina i manga a dara, i sisi puru na malala.
LUK 22:45 Na tahuna i vasileki lobo, i hamule mai a murimuri vona, i matai ria ri mahita, a vuhuna i malulu a tuhane ria ni dodo hateka.
LUK 22:46 Lakea e Isu i taki ria, i ta maea, “I navai mu mahita? Mu hadongo, mu vasileki nahea mu gu boru na nitoni.”
LUK 22:47 Na tahuna e Isu i tabana ni ta, e huriki a tara bulolo ri laho valai. E Iudas, ra turana e huriki a apostolo ala ravulu a polona i rua, i muga ne ria, i vakasiri a dala ne ria. I valai tabukoi ne Isu ta ge ngurua.
LUK 22:48 Pali e Isu i takia, i ta maea, “Iudas, i navai o ngurua a Tuna Bakovi go habia na limane huriki a pile?”
LUK 22:49 Na tahuna e huriki ri pesi haluia ri masia a maki ta ge bele, ri ta maea, “Bakovi Dagi, o ngaru mete ge rabalaki ria na bainat?”
LUK 22:50 Muri a viri tara ne ria i palakudua a talingana vora na prister dagi, ra talingana na kanena.
LUK 22:51 Pali e Isu i ta maea, “Naha ni ratea a naro iea!” Muri i padoi a talingana bakovi, i kamumu mule tabu.
LUK 22:52 Muri e Isu i taki e huriki a prister dagi, a nugumaheto ri tagari na roho na Vure, a gare ra ri valai ri gi lakavua, i ta maea, “Mua mu rata manga iau a bakovi hale mu valai turana bainat, a lebo.
LUK 22:53 A made turane mua na parava lobo na roho na Vure, pali i uka ma mu lakavu iau. Pali ngane a parava ne mua, a parava na nitora na uvo.
LUK 22:54 Ri lakavu loboa e Isu, muri ri turari lakea na ruma na prister dagi. Pali e Petrus i muri gosi basi popote vona.
LUK 22:55 Ri tunu lobo a kanono na matana ruma, lakea ri made puru. E Petrus tara i made turane ria.
LUK 22:56 A vora ngatavine tara i valai i masia e Petrus i hua a kanono. I matanonoa, i ta maea, “Ra bakovi iea, ia tara i turane Isu.”
LUK 22:57 Pali e Petrus i lavuni i ta maea, “Ngatavine, iau i uka ma lohoka vona a bakovi iea.”
LUK 22:58 I uka ma i tabaka, a bakovi tara i masia e Petrus, lakea i ta maea, “Ioe tara o turane ria.” Pali e Petrus i lavuni tabu, i ta maea, “Bakovi, iau i uka ma a turane ria!”
LUK 22:59 Muri i polo a kilala i taku, i valai tabu tara viri, i ta kinigao ma ia i ta maea, “Muholi hateka ra bakovi iea i turana, a vuhuna ia a bakovi o Galili.”
LUK 22:60 Pali e Petrus i lavuni tabu, i ta maea, “Bakovi, iau i uka ma lohoka vona a maki o takikia!” E Petrus i uka ma i vakalobo ni ta ma, a kureko i tangi.
LUK 22:61 E Bakovi Dagi i matagege, i mata nonoa e Petrus. Lakea e Petrus i longovisia a ngava i takia e Bakovi Dagi baroko, i ta maea, “Muga na kureko ge tangi barama, bara o nana rovi iau balaka tolu.”
LUK 22:62 Muri e Petrus i ha tala, i tangi hateka.
LUK 22:63 E huriki a bakovi ri tagaria e Isu ri vakatubu ni padikedea, ri ubia.
LUK 22:64 Ri kavitagu a matana, lakea ri takia, “O vakasiri ioe ngane ge ioe a propet, o taki mia vona e rei a viri i ubi ioe.”
LUK 22:65 Muri ri harogia na maka ngava hale.
LUK 22:66 I palala ngane a hini, lakea e huriki a gare, re huriki a prister dagi, a mari na vinara, ri valai, ri vapopo. Ri turaria e Isu lakea na murine ria ri vapopo vona. Na tahuna ri bele vonga, ri takia,
LUK 22:67 “Ge ioe a viri ni gale e Kristo, ra viri ge korimule e huriki, o vakalongo mia ngane.” E Isu i koli ria, i ta maea, “Bara vakalongo mua, i uka ma mu gu longo mai iau.
LUK 22:68 Pali mua ranga, bara nana mua, i uka ma mu gu taratoto.
LUK 22:69 Pali popote ngane a Tuna Bakovi ge made na limana kanena Vure Tuhaka.”
LUK 22:70 Ria lobo ri nanea, “Ra i mavonga, ioe a Tuna Vure?” Lakea e Isu i taki ria, “A ngava mu takia pali. Iau kunana.”
LUK 22:71 Muri ri ta maea, “E rei si gi dava tabua si gi bole a ngava vona? A ngava si longoa pali vona.”
LUK 23:1 Muri ria lobo ri pesi rike, ri tulia e Isu ge lakea ne Pilato.
LUK 23:2 Na tahuna ri bele, ri vakatubu ni padi virihia na ngava, ri ta maea, “Mi masia a bakovi iea i tami hita e huriki a Iuda, i taki hita nahea si gi habi a takis ne Kaiser. I taki ta ia a hariki, ta ia e Kristo, ra viri a Vure i vulakia.”
LUK 23:3 Lakea e Pilato i nanea e Isu, i ta maea, “Ra ioe, ioe a hariki ne huriki a Iuda?” E Isu i koli i ta maea, “A ngava o takia pali.”
LUK 23:4 Lakea e Pilato i taki e huriki a prister dagi, a bakovi a ngatavine i ta maea, “Iau i uka ma a matavisia vona tara rabu hale ge ratea.”
LUK 23:5 Pali ri hinituhana, ri ta maea, “Ra bakovi iea i laho viliha na tabeke ne Iudea, i vakarike a hatene huriki, ri rata tuhare, i vakatubu o Galili, i valai liu koea.”
LUK 23:6 Na tahuna e Pilato i longoa a ngava iea, i nana ria ne Isu a bakovi o Galili, o i uka.
LUK 23:7 Ri vakalongoa ne Isu a bakovi o Galili, lakea i rudua e Isu ge masia e Herod, a vuhuna e Herod i matakari a tabeke ne Galili. Na tahuna iea e Herod i made vonga o Ierusalem.
LUK 23:8 Na tahuna e Herod i masia e Isu, i vivi hateka, a vuhuna i longoa pali a nuverei ne Isu, i pasimata ni masia, ge rata a nivakasiri.
LUK 23:9 Lakea e Herod i nanea e Isu na ninana i kupo, pali e Isu i uka ma i kolia tara ngava.
LUK 23:10 E huriki a prister dagi, a mari na vinara ra ri pepesi vonga, ri ta hinituhana ni padi virihi tavulea na ngava.
LUK 23:11 E Herod turana e huriki a nugumaheto ri padikede loboa e Isu, muri ri vakarodoa na varakia na hariki, ri rudu mulea ne Pilato.
LUK 23:12 Muga e Pilato e Herod ru vagima. Pali na parava iea ru vamule mai.
LUK 23:13 Muri e Pilato i gale palupu e huriki a prister dagi, a matakari, e huriki a bakovi a ngatavine.
LUK 23:14 Lakea i taki ria i ta maea, “Ra bakovi iea, mu turari vilia nau, mu takia ta i tami e huriki. Pali iau a nanea na matane mua lobo, i uka ma a matai ranga naro hale ge manga a hini mu taki.
LUK 23:15 E Herod tara i uka ma i masia vona tara naro hale, lakea i rudu mule vilia ne hita. Mu longo! Ra bakovi iea i uka ma i ratea tara maki ge hale ge mate vona.
LUK 23:16 Pali ngane ga lagu kunanea, muri ga tonoa ge vano.”
LUK 23:17 Pali e huriki lobo ri gale dagi ri ta maea, “Ge mate a bakovi iea! E Barabas a viri ge pagitala!” Ri ta maea, a vuhuna na pida lobo na Habu na Nipagepolo e Pilato bara i bole talea na bavi a bakovi tara, ge vano.
LUK 23:19 E Barabas ni ru dili na bavi, a vuhuna i vakatubu a vaubinga turana e huriki a Rom, i rabalaki a viri.
LUK 23:20 E Pilato i taki tabu e huriki vona e Isu ge pagitala.
LUK 23:21 Pali ri gale dagi tabu ri ta maea, “O paditatea na kai tavalavala! O paditatea na kai tavalavala!”
LUK 23:22 Balaka tolu ngane i taki ria nahea ge mate, i ta maea, “I navai ge mate? A ra naro hale i ratea? Iau i uka ma masia vona tara maki ge hale ge ratea ge mate vona. Pali ngane ga lagu kunanea, muri ge vano.”
LUK 23:23 Pali ri gale hinituhana vona e Isu ni gi paditata malaviriri. Ri gale dagi hateka,
LUK 23:24 lakea e Pilato i longo mai ria.
LUK 23:25 I vakapagetalea e Barabas ra ni ru dili na bavi na hini i vaubi i rabalaki a viri, pali i ramai a ningaru ne ria, i rudua e Isu ni gi rabalaki.
LUK 23:26 Na tahuna e huriki a nugumaheto ri turari lokovongea e Isu, ri masia e Simon, a bakovi o Sirene, i valai basi ge dili na tanga. Lakea ri vakukua ge kalohoa a kai tavalavala ne Isu, ge laho muri vona.
LUK 23:27 E huriki ala kupo hateka ri laho muri ne Isu. E huriki a ngatavine ranga, ri dua muri vona.
LUK 23:28 Pali e Isu i matagege, i taki ria, i ta maea, “Mua o huriki a ngatavine o Ierusalem, naha ni taringi iau. Mu taringi mule mua, mu taringi e tune mua,
LUK 23:29 a vuhuna a parava popote ge valai e huriki ri gi ta maea, ‘Ri gi vivi e huriki a ngatavine ri lame, i uka ma ri vakaruru a koma.’
LUK 23:30 Muri e huriki bara ri taki a maka lolo a kupona ge kavitagu ria.
LUK 23:31 E huriki ri rata mavonga na kai gareka, bara ri rata hale hatekea a kai munae.”
LUK 23:32 A bakovi hale ala rua ranga ni turari turane Isu ni gi rabalaki.
LUK 23:33 Na tahuna ri bele na tanga ni gale e Tuha-Gigi, e huriki a nugumaheto ri paditatea e Isu vonga na kai tavalavala. A bakovi hale ala rua, rua ranga ni paditata na kai tavalavala. I tavore na kanena tara, i tavore na maurina tara.
LUK 23:34 Muri e Isu i ta maea, “Tata, o puga a naro hale ne ria, a vuhuna i uka ma ri lohoka vona a maki ri rata.” E huriki a nugumaheto ri rehi vona tara rihiva. A viri bara i mulangi bara i bole a varakia ne Isu.
LUK 23:35 E huriki a bakovi a ngatavine ri pesi, ri matanono. E huriki a matakari ri padikedea e Isu, ri ta maea, “I korimule e huriki ranga. Pali ge ia e Kristo, a Viri a Vure i Vulakia, ge korimulea.”
LUK 23:36 E huriki a nugumaheto, ria ranga ri padikedea, ri valai ne Isu, ri habi vona a vain vagole ge ninu.
LUK 23:37 Lakea ri ta maea, “Ge ioe a hariki ne huriki a Iuda o korimule ioe.”
LUK 23:38 Ni here polo meli na kai tavalavala a ngava nga: “Ra Viri Iea A Hariki Ne Huriki A Iuda.”
LUK 23:39 A bakovi hale tara i tavore na kai tavalavala i ta hale ne Isu, i ta maea, “Ge ioe e Kristo, o vakakori ioe, muri o kori maria.”
LUK 23:40 Pali a bakovi hale tara i tahatea, i ta maea, “I navai o uka ma o mangenge na Vure? Ioe tara o bole a nimadihi manga ia.
LUK 23:41 Pali tarua ni vakamadihi na naro hale tu rata. Pali ra bakovi iea i uka ma i ratea tara naro hale.”
LUK 23:42 Muri i takia e Isu, i ta maea, “Isu, na tahuna o lakea na harikianga vomu, o luhoi iau.”
LUK 23:43 E Isu i koli i ta maea, “A taki muholi ioe, mona bara o made turagu na paradiso.”
LUK 23:44 Na kuru haro a uvo i kavitagua a malala, i vano i harena na kilala i tolu na malunga,
LUK 23:45 a vuhuna a haro i uka ma i para. A lavalava dagi na roho na Vure i mavida i bale rua.
LUK 23:46 Muri e Isu i ta dagi, i ta maea, “O Tata a habia na limamu a hanugu.” Muri i mate.
LUK 23:47 Na tahuna a ubu na tara na nugu­maheto i masia a maki i bele, i kavurikea a Vure, i ta maea, “Muholi hateka, a bakovi iea i uka ma i ratea tara naro hale!”
LUK 23:48 Na tahuna e huriki ri vapopo ri matanono, ri matai a maki i bele, ri dodo hateka, ri hamule lakea na tanga.
LUK 23:49 E huriki a turane Isu, e huriki a ngatavine ra ri valai o Galili turana, ri pesi basi popote ri matai a maki lobo nga.
LUK 23:50 A Iuda tara, a rane Iosep, a tanga vona ni gale e Arimatea. Ia a tara ni kado a ngava. Ia a bakovi kamumu, a bakovi kiripiripi.
LUK 23:51 I pasimata ni matai a harikianga na Vure. I uka ma i ngaru a vilo ne huriki i leho turane ria, ri rabalakia e Isu.
LUK 23:52 E Iosep i lakea ne Pilato i takia vona a podane Isu, ge tanua.
LUK 23:53 E Pilato i longo, lakea i vano, i paru talea na kai tavalavala, i bunua na lavalava, i rua na babe ni keli na dahana kedo. Ra babe iea i uka ma ni tanu a viri vona ma.
LUK 23:54 Ra parava iea a parava ni kisi puru a maki na Parava Nimalo. I popote ngane bara i tubu a Parava Nimalo.
LUK 23:55 E huriki a ngatavine, ra ri valai o Galili turane Isu, ri muri ne Iosep ri masia a babe, ri masia ni vakatabuli navai a podane Isu.
LUK 23:56 Muri ri vano ri gi rata puru a nibiri, a mangisipa. Pali ri malo taro na Parava Nimalo, ri muri mai a vinara ne Moses.
LUK 24:1 Na hatelanga pokopoko na mugana parava na vik, e huriki a ngatavine ri bole a mangisipa ri rata puru, ri bole lakea na babe.
LUK 24:2 Na tahuna ri bele, ri masia a kedo ni kule vuroki na matana babe.
LUK 24:3 Na tahuna ri dili pololilo i uka ma ri masia a podane Isu, e Bakovi Dagi.
LUK 24:4 Ri luhoi viliha lae. A bakovi ala rua ru rodo a varakia i para hidihidi ru bele vakaturutu, ru pesi tabukoi ne ria.
LUK 24:5 E huriki a ngatavine ri mangenge ri lolu puru na malala. Lakea a bakovi nga ru taki ria, ru ta maea, “I navai mu matakana a bakovi mahuri na tanga ne huriki ri mate?
LUK 24:6 I uka ma ia koea. I pesi rike pali na matenga. Mu luhoia a ngava i taki mua vona o Galili?
LUK 24:7 I taki mua, i ta maea, ‘A Tuna Bakovi bara ni habi ne huriki a bakovi hale, ri paditatea na kai tavalavala. Muri, na toluna parava, bara i pesi rike mule na matenga.’”
LUK 24:8 Muri ri longovisi a ngavane Isu,
LUK 24:9 ri pe a babe, ri vano, ri vakalongo e huriki a apostolo ala ravulu a polona i taku turana e huriki a murimuri ranga.
LUK 24:10 Ra ngatavine nga e Maria Magdala, e Ioana, e Maria kinane Iakop, e huriki a ngatavine ranga. Ria kunana ri vano, ri vakalongo e huriki a apostolo vona a maki i bele na babe.
LUK 24:11 Pali e huriki a apostolo ri luhoi ta ngava tavula kunana, i uka ma ri luhoi ge muholi.
LUK 24:12 Pali e Petrus i pesi rike, i nunu lakea na babe. I tuku dili, i masia a lavalava ni bunu a podane Isu vona. I matai lobo, i hamule na tanga, i luhoi hatekea ra maki i bele.
LUK 24:13 Na parava iea kunana, a murimuri ala rua ru laho lakea na tanga e Emaus. Ra tanga iea i basi popote ne Ierusalem, a maravana a kilomita i ravulu a polona i taku.
LUK 24:14 Na tahuna ru lalaho ru tuverei na maka maki i bele.
LUK 24:15 Na tahuna ru vatuverei, ru vanana vona a maki i bele, e Isu i valai tabukoi ne rua i laho turane rua,
LUK 24:16 pali i uka ma ru matakilalea.
LUK 24:17 Muri e Isu i nana rua, “A ra muru vatuverei vona na dala?” Lakea a murimuri nga ru pesi tata ru mata tangitangi.
LUK 24:18 A viri tara ne rua, a rana e Kleopas, i koli i ta maea, “Ioe kunana a mosi ne Ierusalem, o uka ma o lohoka vona a maki i bele vonga?”
LUK 24:19 E Isu i koli i ta maea, “A ra maki?” Lakea ru ta maea, “A maki i bele ne Isu o Nasaret. Ia a propet i tahoka a nitora dagi na nitana, a nitora dagi na ni rata a nivakasiri na matana Vure, na matane huriki a bakovi, a ngatavine.
LUK 24:20 E huriki a matakari, a prister dagi ne mia ri habia na limane huriki a Rom, ri gi paditatea na kai tavalavala.
LUK 24:21 Pali mia mi luhoi ia ta ge korimule e huriki a Israel. Pali ngane a toluna parava.
LUK 24:22 Mona e huriki a ngatavine ri vakaturutu mia vona tara ngava. Baroko na hatelanga ri lakea na babe,
LUK 24:23 pali i uka ma ri masia vonga a podane Isu. Ri hamule ri vakalongo mia ta ri matai a agelo ala rua, ru taki ria ne Isu i mahuri mule!
LUK 24:24 Muri e huriki ranga ne mia ri lakea na babe. Ri matai a maki i manga a ngava i taki e huriki a ngatavine, pali i uka ma ri masia e Isu.”
LUK 24:25 Muri e Isu i taki rua i ta maea, “Muru manga, muru maradoi hateka ni luhoi a ngava lobo i taki e huriki a propet.
LUK 24:26 E huriki a propet ri takia e Kristo ge bole a nimadihi taro, muri ge bole a bagetuanga vona.”
LUK 24:27 Muri i vakatubu ne Moses i valai ne huriki a propet lobo, i tuveve polo ne rua a maki lobo ni here puru mai ia na Hinere.
LUK 24:28 To valai tabukoi na tanga dagi e Emaus, lakea e Isu i rata manga ge laho polo­polo.
LUK 24:29 Lakea ru takia, ru ta maea, “O made turane maria, i malunga pali a hini, i popote ge rodo.” Lakea i vano i made turane rua.
LUK 24:30 Na tahuna to made halui a dede ta to go kani, lakea e Isu i bolea a bret, i vasileki langa vona, i kevea i habia ne rua.
LUK 24:31 Ngane i malaharere a matane rua, ru matakilalea e Isu. Na tahuna ru matakilalea, i malaviriri kunana i marakavelu.
LUK 24:32 Lakea ru vanana, ru ta maea, “Muholi hateka, i rikerike a hatene tarua, na tahuna te lalaho na dala, i ta turane tarua, i tuveve puru ne tarua a ngava lobo na Hinere.”
LUK 24:33 Ru malaga malaviriri, ru hamule lakea o Ierusalem. Ru luve taho vonga e huriki a apostolo ala ravulu a polona i taku turane huriki ranga, ri vapopo vonga.
LUK 24:34 Lakea ri vakalongo rua, “Muholi hateka! E Bakovi Dagi i pesi rike mule na nimate, i vakasiria ne Simon.”
LUK 24:35 Muri ru vakalongo ria vona a maki i bele ne rua na dala, ru matakilalea e Isu na tahuna i keve a bret.
LUK 24:36 Ru tabana ni tuverei, lakea e Isu i bele ne ria, i pesi na kurukurune ria, i ta maea, “A nivalemu ge turane mua.”
LUK 24:37 Ri turutu, ri mangenge, ri luhoi ta ia a hanitu.
LUK 24:38 Lakea e Isu i taki ria i ta maea, “I navai mu turutu? I navai mu luhoi viliha lae?
LUK 24:39 Mu matai a limagu a vahagu. Iau kunana! Mu nugu kilangagu. A hanitu i uka bobona a tuhana ge manga nau.”
LUK 24:40 E Isu i taki lobo a ngava nga, lakea i vakasiri ria vona a limana, a vahana.
LUK 24:41 Ri tabana ma ri luhoi kamumu, a vuhuna ri turutu ri vivi vona, lakea i taki ria, “Mu tahoka a maki ni kani koea?”
LUK 24:42 Lakea ri habi vona a manu ni langani.
LUK 24:43 E Isu i kani na matane ria a manu.
LUK 24:44 Lakea i taki ria, i ta maea, “Mu luhoi kado na tahuna a turane mua rira? A taki a maki ni here puru virihi mai iau bara i bele. Ra ngava lobo ni here puru na vinara ne Moses, na Hinere ne huriki a propet, na Linge.”
LUK 24:45 Muri e Isu i vakapalala a gine ria, ri gi lohoka na ngava ni here puru na Hinere.
LUK 24:46 Lakea e Isu i taki ria i ta maea, “A ngava ni here puru i taki e Kristo ge bole a nimadihi taro, muri na parava i tolu ge pesi rike mule na matenga.
LUK 24:47 Mu vakatubu o Ierusalem, mu vara na tanga lobo na malala a ngava ne huriki ri gi pulo a vilone ria, lakea a Vure ge puga vuroki a naro hale ne ria.
LUK 24:48 Mua kunana mu matai a maka maki nga.
LUK 24:49 Iau ga rudu vilia a Hanu Kiripiripi ra i taki mua vona hosi e Tata. Mu dava iea o Ierusalem, ge harena na tahuna mu bole a nitora na Vure.”
LUK 24:50 Muri i tuli ria lakea o Betani. Na tahuna ri bele vonga, i toto rike a limana i vakabagetu ria.Jesus
LUK 24:51 Na tahuna i vakabagetu ria lobo, ni bole sike na hunu, i pe ria.
LUK 24:52 Ri kavurikea. Muri ri hamule lakea o Ierusalem ri pitei na dala.
LUK 24:53 Na parava vakaroro ri made na roho na Vure, ri kavurikea.
JOH 1:1 Hosi na nidoko na hunu a malala, a Nita i made pali. A Nita i made turana Vure. A Nita ia a Vure.
JOH 1:2 Hosi na nidoko na hunu a malala, i made pali turana Vure.
JOH 1:3 Na limana Nita iea kunana, a Vure i ratarike a maki lobo. I uka tara maki ge bele na dala ranga, a maki lobo i bele kunana na limana.
JOH 1:4 Ia a vuhuna a nimahuri. A nimahuri iea i vakapalala e huriki a bakovi a ngatavine.
JOH 1:5 A nipara iea i para na hini uvo, a uvo i uka ma i kavitagua.
JOH 1:6 A Vure i rudu vilia tara bakovi, a rana e Ioanes.
JOH 1:7 I valai ge vakalongo e huriki vona a nipara iea, ri gi luhoi torea.
JOH 1:8 Pali e Ioanes i uka ma ia a nipara iea. I valai kunana ge vakalongo e huriki na nipara iea.
JOH 1:9 A nipara muholi, ra i vakapalala e huriki lobo, ta ge valai na malala.
JOH 1:10 A nipara iea, na limana Vure i ratarike a malala. Pali na tahuna i luve na malala, e huriki na malala i uka ma ri matakilalea.
JOH 1:11 I luve ne huriki a viri vona, pali i uka ma ri taguia.
JOH 1:12 Pali e huriki ri taguia, ri luhoi tora ia, i rata ria ge ria e huriki a tuna Vure.
JOH 1:13 E huriki nga ria a tuna Vure, i uka ma i ramai a darane kinane ria o ne tamane ria, o na ningaru na kakaina viri, o na ningaru na bakovi. A Vure kunana i rata ria ge ria e huriki e tuna.
JOH 1:14 A Nita i bele manga a bakovi, i made turane hita. Mi masia a bagetuanga vona, a bagetuanga ne Tuna a Madiva, ra viri i valai ne Tamana. Ia a mari ni dodo, a mari ni ta muholi.
JOH 1:15 E Ioanes i vakalongo e huriki, i gale tala, i ta maea, “Ia ra bakovi a taki muga mua vona ge muri valai nau, i dagi hateka nau, a vuhuna i made hosi na tahuna iau i uka ma ni poda ma.”
JOH 1:16 A naro kamumu vona i dagi hateka. Balaka kupo i rata kamumu hita.
JOH 1:17 A Vure i habi polo ne Moses a vinara, i habi ne hita. Pali a naro kamumu, a nita muholi, a Vure i habi polo ne Isu Kristo, i habi ne hita.
JOH 1:18 I uka tara viri ge masia a Vure. Pali a Vure Kikeri, ra i made tabukoi ne Tamana, ia kunana i vakasiri a Vure ne hita.
JOH 1:19 Iea ngane a ngavane Ioanes i ratea na tahuna e huriki a Iuda o Ierusalem ri rudu e huriki a prister, e huriki a Levi, ri gi nanea e Ioanes ia e rei muholi.
JOH 1:20 Lakea e Ioanes i uka ma i ruhuloloa tara ngava. I ta kavakava ne ria, i ta maea, “Iau, i uka ma iau e Kristo.”
JOH 1:21 Lakea ri nanea, “Pali ioe e rei ke? Ioe e Elaisa?” I lavuni, i ta maea, “I uka.” Lakea ri nana tabua, “Pali ioe e rei? Ioe ra propet ta ge valai?” I koli, i ta maea, “I uka.”
JOH 1:22 Lakea ri nana tabua, “Pali ioe e rei muholi? O vakalongo mia mi gi hamule, mi gi vakalongo e huriki ri rudu mia. O taki ioe, ge ioe e rei muholi?”
JOH 1:23 Lakea e Ioanes i koli, i ta maea, “Iau a lohona viri i gale dagi na robo, a ta maea, ‘Mu kado a dala ne Bakovi Dagi,’ i manga a ngava e Isaia, a propet, i taki hosi.”
JOH 1:24 E huriki ranga, e huriki a vinuru ne huriki a Pariseo,
JOH 1:25 ri nanea, “O taki ioe, ta i uka ma ioe e Kristo, i uka ma ioe e Elaisa, i uka ma ioe a propet tara. Pali i navai o vahilolo e huriki?”
JOH 1:26 Lakea e Ioanes i koli, “Iau a vahilolo e huriki na naru. Pali a viri tara i pesi turane mua, i uka ma mu lohoka vona.
JOH 1:27 A bakovi iea bara i muri valai nau. Iau i uka ma a bakovi kamumu, ga puga vuroki a mota na vahapolo vona.”
JOH 1:28 A maka naro nga ri bele o Betani, na gagana naru e Iordan, na tabeke e Ioanes i vahilolo e huriki vona.
JOH 1:29 Na parava muri e Ioanes i masia e Isu i laho valai vona. Lakea i taki e huriki, i ta maea, “Mu mata lakea, mu masia a Tuna Sipsip na Vure, ra viri i puga vuroki a naro hale ne huriki na malala!
JOH 1:30 Ra bakovi iea kunana a vakalongo mua muga vona, a ta maea, ‘Ra viri bara i muri nau, i dagi hateka nau, a vuhuna i made muga hosi na tahuna iau i uka ma ni poda ma.’
JOH 1:31 I muga, iau i uka ma lohoka vona ia e rei muholi. Pali iau a valai, a vahilolo e huriki ne vona ni vakasiri kavakava ne huriki a Israel vona a bakovi iea.”
JOH 1:32 Muri e Ioanes i vakalongo ria, i ta maea, “A masia a Hanu Kiripiripi i puru valai na hunu i manga a balu, i toka langa vona.
JOH 1:33 I muga, iau i uka ma a lohoka ge ia a bakovi iea. Pali a viri i rudu iau a valai ga vahilolo e huriki na naru, i taki iau, i ta maea, ‘Ra bakovi o masia a Hanugu ge puru valai na hunu i manga a balu ge toka langa vona, ra bakovi iea kunana bara i vahilolo e huriki na Hanu Kiripiripi.’
JOH 1:34 Iau a masia, lakea a vakalongo mua vona ngane, ra bakovi iea a Tuna Vure.”
JOH 1:35 Na parava muri e Ioanes i pesi tabu vonga turana murimuri vona ala rua.
JOH 1:36 Na tahuna e Ioanes i masia e Isu i laho polo, i ta maea, “Muru mata lakea! A Tuna Sipsip na Vure!”
JOH 1:37 Ru longoa, ru muri maia e Isu.
JOH 1:38 E Isu i matagege i matai rua ru muri vona, lakea i nana rua, “A ra muru ngarua?” Lakea ru nanea, “Rabi, o made vai?”
JOH 1:39 E Isu I koli, i ta maea, “Muru valai, muru masia a hini a made vona.” Lakea ru vano ru masia a hini e Isu i made vona. Ru made turana, a vuhuna i malunga pali a hini.
JOH 1:40 I tara ne rua e Andreas, e tarine Simon Petrus, ra viri i longoa a ngavane Ioanes, lakea i muri ne Isu.
JOH 1:41 E Andreas i malaviriri kunana i vano, i matavisia e tukana, i vakalongoa, i ta maea, “Miri matavisia e Mesaia” (re Kristo).
JOH 1:42 Muri e Andreas i tulia e Simon, ru lakea ne Isu. Na tahuna e Isu i masia, i ta maea, “Ioe e Simon, e tune Ioanes. Ngane a vunu ioe ge ioe e Sipas” (e Sipas na nita Grik i manga e Petrus).
JOH 1:43 Na parava muri e Isu i ngaru ni lakea o Galili. I pakaraua e Pilip, lakea i turea, i ta maea, “O valai o muri mai iau.”
JOH 1:44 E Pilip, e Andreas, e Petrus, tou lobo a bakovi na tanga e Betsaida.
JOH 1:45 Muri e Pilip i vano ge gosia e Nataniel. Na tahuna i matavisia, i ta maea, “Mete mata­visia ra viri e Moses turana e huriki a propet ri here vona hosi. Ia e Isu, e tune Iosep o Nasaret!”
JOH 1:46 Lakea e Nataniel i nana, “A ra maki kamumu ge bele na tanga e Nasaret?” E Pilip i koli, i ta maea, “O valai o masia.”
JOH 1:47 Na tahuna e Isu i masia e Nataniel i laho valai vona, lakea i takia, “Muholi, ra bakovi iea a koma o Israel. I uka ma ia a bakovi ni tatami.”
JOH 1:48 Lakea e Nataniel i nanea, “O lohoka navai nau?” E Isu i koli, i ta maea, “A matai ioe na tahuna o made na taruna kai a pik, muga ne Pilip i tura valai ioe koea.”
JOH 1:49 Muri e Nataniel i ta maea, “Mari ni tovo, ioe a Tuna Vure, ioe a hariki ne Israel.”
JOH 1:50 E Isu i takia, “O luhoi tora iau a vuhuna a taki ioe a matai ioe o made na taruna kai a pik. Pali a maka maki dagi hateka bara o matai ma.”
JOH 1:51 Muri i voro­polo, i ta maea, “A taki muholi mua, bara mu masia a hunu i mata ka, mu matai e huriki a agelo na Vure ri rike puru na Tuna Bakovi.”
JOH 2:1 Muri na parava i rua, a habu na parangia ni rata o Kana na tabeke ne Galili. E kinane Isu i lokovonga ge masia a habu.
JOH 2:2 E Isu turane huriki a murimuri vona, ria ranga ni taki ri gi lakea na habu iea.
JOH 2:3 Na tahuna a vain i lobo, lakea e kinana i takia e Isu, i ta maea, “A vain ne huriki nga i lobo.”
JOH 2:4 Pali e Isu i koli, i ta maea, “Naha ni vakuku iau. A parava nau i tabana.”
JOH 2:5 Lakea e kinana i taki e huriki a vora, i ta maea, “A ra ngava ge taki mua vona mu muri mai kunana.”
JOH 2:6 A ruma iea i tahoka a ulo na naru i polo­tara. A ulo nga ne vona e huriki a Iuda bara ri rata a leho ni hilolo, ri gi mala­mala na matana Vure. Ra ulo nga, ni rata na kedo. A lita i 100 bara ni guru dili vona a ulo i taku.
JOH 2:7 Lakea e Isu i taki e huriki a vora, i ta maea, “Mu kiru a maka ulo.” Lakea ri kiru a maka ulo, ri vonu.
JOH 2:8 Muri e Isu i taki ria, i ta maea, “Mu vidiru tala ranga, mu bole lakea na vora i matakari e huriki a vora na habu.” Lakea ri muri mai a ngava i taki,
JOH 2:9 ri vidiru tala a lingena popote, ri bole lakea na matakari. A matakari ne huriki a vora i dame kilangana ra naru ni pulo lakea na vain. I uka ma i lohoka vona i valai vai a vain iea, pali e huriki a vora ri lohoka vona a hini ri kiru a naru vona. Muri a matakari ne huriki a vora i galea a bakovi i parangi karaba,
JOH 2:10 i ta maea, “E huriki ri rata a habu, bara ri habi taro a vain kamumu hateka. Muri, na tahuna e huriki ri ninu hateka pali, bara ni habi a vain i uka ma i nami kamumu hateka. Pali ioe, i uka ma o rata mavonga. Ioe o habi muga a vain i uka ma i nami kamumu. Pali ngane kunana o habi tala a vain i nami kamumu hateka.”
JOH 2:11 Ra nivakasiri iea e Isu i ratea na tanga e Kana, o Galili. Ia a mugana niva­kasiri ne Isu, i vakasiri a bagetua vona, lakea e huriki a murimuri ri luhoi tora ia.
JOH 2:12 Muri na habu, e Isu i puru o Kaper­naum turana e kinana, e tarina mai, e huriki a murimuri vona. Ri made vonga na parava ranga.
JOH 2:13 Na tahuna a Habu na Nipagepolo ne huriki a Iuda i tabukoi, lakea e Isu i sike o Ierusalem.
JOH 2:14 Na tahuna i bele na roho na Vure, i matai e huriki a bakovi ri vahabi ri vakona a bulmakau, a sipsip, a balu. E huriki a bakovi ranga ri made na dede ri vangoli a moni.
JOH 2:15 Lakea e Isu i bole rikea a mota, i ratea lebo vona, i lili tala e huriki na roho na Vure. I hotu a maka sipsip a bulmakau, i lili tala ria. Muri i guru viliha a moni ne huriki ri vangoli a moni, i pulo ngalatudu a maka dede ne ria.
JOH 2:16 Muri i taki e huriki ri vahabi a balu, i ta maea, “Mu bole ha koea a maka balu ne mua! Naha ni ratea a roho ne Tata ge manga a roho na ni vahabi ni vakona a maki!”
JOH 2:17 Na tahuna e huriki a murimuri ne Isu ri longoa a ngavana, ri longovisi a ngava ni here puru hosi na Hinere i ta maea, “A luhoi hatekea a roho vomu, i rata­pile iau.”
JOH 2:18 Muri e huriki a Iuda ri nanea, “A ra nivakasiri go vakasiri mia vona, o tahoka a nitora ni rata a maka naro nga?”
JOH 2:19 Lakea e Isu i taki ria, i ta maea, “Mu pukea a roho na Vure iea, pali na parava i tolu bara vakapesi mulea.”
JOH 2:20 E huriki a Iuda ri koli, ri ta maea, “A roho na Vure iea, ni hae na pida i ravulu va a polona i polotara. Pali ioe o taki ta go hae tabua na parava ge tolu kunana?”
JOH 2:21 Pali e Isu i uka ma i taki a roho ni rata na kedo. A roho na Vure e Isu i takia, i ta vakakika vona a kakaina.
JOH 2:22 Muri, na tahuna e Isu i pesi rike mule na matenga lakea e huriki a murimuri vona ri longovisia ra ngava iea. Lakea ri luhoi tora a Hinere turana maka ngava e Isu i taki.
JOH 2:23 Na tahuna e Isu i made o Ierusalem na Habu na Nipagepolo, e huriki ri matai a maka nivakasiri i rata, lakea ri luhoi torea a rana.
JOH 2:24 Pali e Isu i uka ma i luhoi tora ria, a vuhuna i lohoka vona a vilo ne huriki a bakovi lobo.
JOH 2:25 I uka ma i ngaru a bakovi tara ge vakalongoa vona a naro na bakovi, a vuhuna i lohoka vona pali a niluhoi ne huriki a bakovi lobo.
JOH 3:1 E Nikodemus ia a Pariseo, a mata­kari ne huriki a Iuda.
JOH 3:2 I luve ne Isu na rodo, i ta maea, “Mari ni tovo, mi lohoka vona a Vure i rudu valai ioe, go tovo e huriki. A bakovi ra Vure i laho turana kunana, bara i rata a maka nivakasiri, i manga a hini ioe o rata.”
JOH 3:3 E Isu i koli, i ta maea, “A taki muholi ioe, a viri i uka ma ni poda tabu, i uka ma ge dili na harikianga na Vure.”
JOH 3:4 Lakea e Nikodemus i nanea, “Ni gi poda navai tabu a bakovi i gare pali? Ge dili navai tabu na tamudine kinana ni gi poda tabu?”
JOH 3:5 E Isu i koli, i ta maea, “A taki muholi ioe, i uka tara viri ge dili tavula na harikianga na Vure. A viri i ngaru ni dili na harikianga na Vure bara ni poda taro na naru, na Hanu Kiripiripi.
JOH 3:6 E kinane hita i poda hita, si tahoka a nimahuri. Pali a Hanuna Vure kunana i habi a nimahuri na hanune hita.
JOH 3:7 Naha ni turutu vona a ngava a takia, ‘E huriki ri ngaru ni dili na harikianga na Vure, bara ni poda tabu.’
JOH 3:8 A vilu i pori viliha na ningaru vona. Si longoa a nangina, pali i uka ma si lohoka vona i ngalu valai vai o ge ngalu lokovai. E huriki a bakovi a ngatavine a Hanuna Vure i habi a nimahuri karaba ne ria, ri mavonga kunana. Si matakilaka vona a Hanuna Vure i habi a nimahuri karaba ne ria, pali i uka ma si lohoka vona i rata navia.”
JOH 3:9 E Nikodemus i nanea, i ta maea, “I navai ge mavonga?”
JOH 3:10 E Isu i koli, i ta maea, “Ioe a mari ni tovo ne Israel, pali i uka ma o longo­kilala a ngava a taki?
JOH 3:11 Iau a ta muholi, mi ta vona a maki mi lohoka vona, mi vakalongo vona a maki mi matai, pali i uka ma mu longo mai a ngava mi taki mua vona.
JOH 3:12 A taki mua na maka maki na malala, pali i uka ma mu luhoi tora. Pali mu gu luhoi navai a ngava na maki na hunu ga taki mua vona?
JOH 3:13 I uka tara viri ge lakea ma na hunu, a Tuna Bakovi kunana a viri i valai na hunu.
JOH 3:14 Hosi na robo i ngeki, e Moses i vakatavorea na kai a mata ni rata na aen, pali i mavonga kunana a Tuna Bakovi bara ni vakatavore na kai.
JOH 3:15 Lakea e rei a viri i luhoi tora ia bara i bole a nimahuri vakaroro.
JOH 3:16 “I mavonga a vuhuna a Vure i ngaru hateka e huriki na malala, lakea i rudua e Tuna a bakovi a madiva ge mate, lakea e rei a viri i luhoi tora ia i uka ma ge velu, bara i bole a nimahuri vakaroro.
JOH 3:17 “A Vure i rudua e Tuna a bakovi i valai na malala, i uka ma ge pelekado e huriki. I rudu vilia ge korimule e huriki na limana.
JOH 3:18 E huriki ri luhoi tora ia, a Vure i uka ngava ne ria. Pali e huriki i uka ma ri luhoi tora ia, a Vure i tahoka a ngava ne ria, a vuhuna i uka ma ri luhoi torea a Tuna Vure a madiva.
JOH 3:19 A Vure i pelekado e huriki maea: A nipara i bele pali na malala, pali e huriki a bakovi a ngatavine ri ngaru hatekea a uvo, ri marikoi a nipara, a vuhuna a narone ria i hale.
JOH 3:20 E huriki ri rata a naro hale ri marikoi a nipara, i uka ma ri gi valai na hini palala, a vuhuna ri mangenge, ma ge bele kavakava a narone ria.
JOH 3:21 Pali e huriki ri muri mai a ngava muholi, ri valai mai a nipara, ni gi matakilaka vona, a maki ri rata, ri rata a vuhuna ri rihi a Vure.”
JOH 3:22 Muri e Isu i lakea na tabeke i ngeki ne Iudea turane huriki a murimuri vona, i made turane ria vonga, i vahilolo e huriki.
JOH 3:23 E Ioanes tara i vahilolo e huriki o Aenon, tabukoi na tanga e Salim, a vuhuna i tahoka a naru a hini ngi, lakea e huriki ri valai vakaroro vonga ni gi vahilolo.
JOH 3:24 Ra hini nga i muga ne Ioanes ni ru dili na bavi.
JOH 3:25 Na tahuna iea e huriki a murimuri ne Ioanes ri vahehe turana Iuda tara, na vinara na nivahilolo na viri, ge malamala na matana Vure.
JOH 3:26 Ri lakea ne Ioanes ri takia ri ta maea, “Mari ni tovo, ra bakovi i turamu rira na gagana naru e Iordan, ra viri o vakalongo e huriki vona. Ngane i vahilolo e huriki, pali ngane e huriki lobo ri lokovonga vona.”
JOH 3:27 Lakea e Ioanes i koli, i ta maea, “A bakovi bara i bole kunana a maki a Vure i habi vona.
JOH 3:28 Mu longo pali na tuline mua na tahuna a ta maea, ‘Iau i uka ma iau e Kristo. Pali a Vure i rudu iau ga muga valai.’
JOH 3:29 A bakovi tara ge parangi a ngatavine, a ngatavine iea ne vona kunana. A turana bakovi iea bara i davea, i talangakia. Na tahuna i longoa, bara i vivi. Iau ngane, a vivi mavonga liu.
JOH 3:30 A rana ngane bara i rike. Pali a ragu ngane, bara i makali puru.
JOH 3:31 “A viri i valai meli i dagi hateka ne huriki lobo. Pali a viri na malala, a viri na malala kunana, i ta manga a viri na malala kunana. A viri i valai na hunu i dagi hateka ne huriki lobo.
JOH 3:32 I vakalongo a maka maki i matai, a maki i longo, pali i uka tara viri ge longo mai a ngavana.
JOH 3:33 Pali e rei a viri i longo mai a ngavana, i vakasiri manga a Vure i ta muholi.
JOH 3:34 A viri a Vure i rudua i valai i vakalongo e huriki na nitana Vure, a vuhuna a Vure i habi vona a Hanuna, i uka harena.
JOH 3:35 E Tamana i ngaru hatekea na hatena e Tuna, lakea i ru a maki lobo na limana.
JOH 3:36 E huriki ri luhoi torea e Tuna bara ri bole a nimahuri vakaroro. Pali e huriki ri marikoi e Tuna, i uka ma ri gi bole a nimahuri, a vuhuna a rongova na Vure i tabuli ne ria.”
JOH 4:1 E Isu i vahilolo e huriki ala kupo. I kupo hateka e huriki ri murimuri vona, ri rangi e huriki a murimuri ne Ioanes. Pali e Isu i uka ma ia a viri i vahilolo ria. E huriki a murimuri vona ri vahilolo ria. Na tahuna e Isu i lohoka vona e huriki a Pariseo ri matai e huriki ala kupo ri ramaia, lakea i pe a tanga e Iudea, i hamule tabu o Galili turana e huriki a murimuri vona.
JOH 4:4 A dala ri ramaia i polo o Samaria.
JOH 4:5 Na kuru haro ri bele na tanga tara o Samaria ni gale e Sikar, tabukoi na malala e Iakop i habia hosi ne tuna e Iosep.
JOH 4:6 A lomu tara e Iakop i kelia hosi i tabuli vonga. E Isu i malulu a tuhana, lakea i made puru na dahana lomu. Pali e huriki a murimuri vona ri lakea na tanga dagi ri gi kona a maki ni kani ne ria. Muri a ngatavine tara o Samaria i valai ta ge kiru a naru, lakea e Isu i nongi a naru vona, i ta maea, “O habi nau ranga naru ga ninu.”
JOH 4:9 Lakea a ngatavine o Samaria i takia e Isu, i ta maea, “I navai o nongi a naru nau? Ioe a bakovi o Iuda pali iau a ngatavine o Samaria.” (E huriki a Iuda ri vatepu e huriki a Samaria.)
JOH 4:10 Lakea e Isu i koli a ngavana, i ta maea, “Ioe bara o lohoka na maki a Vure i habi tavula, bara o lohoka vona a viri i nongi a naru vomu, bara o takia ge habia vomu a naru na nimahuri.”
JOH 4:11 Lakea a ngatavine i koli, i ta maea, “Bakovi Dagi, a lovo i puru hateka, o uka a vidiru ni kiru a naru vona. Go bole vai a naru na nimahuri?
JOH 4:12 O luhoi o dagi hateka na gare ne mia e Iakop? Hosi i kelia a lomu iea, i ninu a naru vona. E huriki e tuna, ria ranga ri ninu vona. A kabuna bulmakau, a sipsip vona, ria ranga ri ninu vona.”
JOH 4:13 Lakea e Isu i koli, i ta maea, “E huriki ri ninua a naru iea bara ri marohu tabu.
JOH 4:14 Pali e huriki ri ninua a naru iau a habi, i uka ma ri gi marohu tabu. Muholi hateka a naru iau a habi bara i bele manga a narubele i tua pololilo ne ria, i habi a nimahuri vaka­roro ne ria.”
JOH 4:15 Lakea a ngatavine i takia, i ta maea, “Bakovi Dagi, o habia nau a naru iea, i uka ma ga marohu tabu, i uka ma ga valai, ga kiru tabu.”
JOH 4:16 Lakea e Isu i takia, i ta maea, “O vano o tuli vilia e girihimu.”
JOH 4:17 A ngatavine i koli, i ta maea, “A uka e girihigu.” Lakea e Isu i takia, i ta maea, “O ta muholi, o uka e girihimu.
JOH 4:18 Pali i muholi a hini o tahoka e girihimu i lima, pali ra bakovi o made turana ngane i uka ma ia e girihimu. Ra ngava o taki ngane kunana i muholi hateka.”
JOH 4:19 Lakea a ngatavine i koli, i ta maea, “Bakovi Dagi, a lohoka vomu ngane, ioe a propet.
JOH 4:20 E huriki e tamane mia ri kavurikea a Vure na lolo iea. Pali mua e huriki a Iuda mu taki ta a tanga ni kavurikea a Vure vona, e Ierusalem kunana.”
JOH 4:21 Lakea e Isu i vakalongoa, i ta maea, “Ngatavine, o longo. A parava bara i valai, i uka ma mu gu kavurikea e Tata na lolo iea o na tanga dagi e Ierusalem.
JOH 4:22 Mua o huriki a Samaria mu kavurikea a viri i uka ma mu lohoka vona. Mia mi kavurikea a viri mi lohoka vona, a vuhuna a dala a Vure i korimule e huriki vona, i vakasiri polo ne mia e huriki a Iuda.
JOH 4:23 Pali a parava bara i valai, i valai pali, e huriki ri kavurike muholi e Tata, ri gi kavurikea muholi na hatene ria, a vuhuna e Tata i ngaru hateka e huriki a bakovi maea ri gi kavurikea.
JOH 4:24 A Vure ia a hanu. E huriki ri ngaru ni kavurikea, ri gi kavurikea na hatene ria, na naro muholi.”
JOH 4:25 Lakea a ngatavine i ta maea, “A lohoka vona a Mesaia (a viri ni gale e Kristo) bara i valai. Na tahuna i valai bara i tuveve polo ne hita a maki lobo.”
JOH 4:26 Muri e Isu i vakalongoa, “Iau kunana ra viri a ta turamu ngane.”
JOH 4:27 E Isu i ta lobo, lakea e huriki a muri­muri ri hamule, ri turutu vona e Isu i ta turana ngatavine. Pali i uka tara ne ria ge nanea, “A ra o ngarua?” o “I navai o ta turana ngatavine iea?”
JOH 4:28 Ngane a ngatavine i ru purua a ulo na naru, i hamule lakea na tanga, i vakalongo e huriki, i ta maea,
JOH 4:29 “Mu valai, mu masia a bakovi i vakalongo iau vona a vilo lobo a rata hosi. Ra bakovi iea, ma ge ia e Kristo.”
JOH 4:30 E huriki a bakovi a ngatavine ri malaga, ri lakea na lomu ri gi masia.
JOH 4:31 I uka ma ri bele ma, e huriki a murimuri vona ri ta maea, “Mari ni tovo, o kani.”
JOH 4:32 Pali e Isu i koli, i ta maea, “A tahoka a maki ni kani i uka ma mu lohoka vona.”
JOH 4:33 Muri ri vata, ri ta maea, “Ma ge tahoka pali tara viri ge habi a maki ni kani vona.”
JOH 4:34 Pali e Isu i taki ria, i ta maea, “A Vure i rudu iau a valai. A ngaru ni muri mai a ningaru vona, a ngaru ni vakalobo a maka leho vona. A rabu iea i manga a maki ni kani nau.”
JOH 4:35 E Isu i ta maea tabu, “E huriki ri ta maea, ‘I tahoka a keva i va i tabana, bara si mirio.’ Pali iau a taki mua, mu matapara mu matai a maka hania! Ri moro pali ni gi mirio.
JOH 4:36 Ngane a bakovi ni mirio i bole pali a mapana, i vakatubu pali ni mirio a maki ni kani na nimahuri vakaroro. Lakea a bakovi ni mirio, a bakovi ni varo, bara ru pitei varago.
JOH 4:37 Ra bokona ngava, ‘I varo tara, i mirio tara,’ i muholi hateka.
JOH 4:38 A rudu mua mu gu mirio vona a hania i uka ma mu varoa, i uka ma mu matakaria. I ranga e huriki ri leho hateka vona, pali mua mu mirio a kanena leho ne ria.”
JOH 4:39 E huriki a Samaria ala kupo na tanga iea ri luhoi torea e Isu, a vuhuna a ngatavine i taki ria, i ta maea, “I vakalongo iau vona a vilo lobo a rata hosi.”
JOH 4:40 Lakea na tahuna e huriki a Samaria ri valai vona, ri takia ge made taro turane ria. Lakea i made turane ria na parava i rua.
JOH 4:41 E huriki ala kupo tabu ri luhoi torea na tahuna ri longo a ngavana.
JOH 4:42 Muri ri takia a ngatavine, ri ta maea, “I muga mi luhoi torea e Isu, a vuhuna o taki mia. Pali ngane mi luhoi torea a vuhuna mi longo a ngavana na tuline mia. Ngane mi lohoka vona i muholi hateka, a bakovi iea a bakovi ge korimule e huriki na malala.”
JOH 4:43 E Isu i made turane ria na parava i rua, muri i malaga, i lakea o Galili,
JOH 4:44 a vuhuna e Isu i vakalongo e huriki pali na propet, i uka ma ni togo na tanga vona.
JOH 4:45 I mavonga, na tahuna i bele o Galili, e huriki vonga ri taguia, a vuhuna ri matai pali a maki lobo i rata o Ierusalem na Habu na Nipagepolo, a vuhuna ria ranga ri lokovonga.
JOH 4:46 Muri i vano i gosi tabua a tanga e Kana na tabeke ne Galili, ra tanga rira i pulo a naru i lakea na vain vona. Na parava tara, a bolekori na hariki i made o Kapernaum, i giloa e tuna, i popote ge mate. I longoa e Isu i malaga o Iudea, i bele pali o Kana. Lakea i laho lokovonga, i taki torea e Isu ge vakamahuria e tuna.
JOH 4:48 Lakea e Isu i takia, i ta maea, “Mua, i uka ma mu gu matai a nivakasiri, a maki ni turutu, i uka ma mu gu luhoi tora iau.”
JOH 4:49 A bolekori na hariki i ta rike, i ta maea, “Bakovi Dagi, tu vano, ma ge mate e tugu.”
JOH 4:50 E Isu i koli, i ta maea, “O hamule. E tumu i mahuri.” Lakea a bakovi iea i luhoi torea e Isu, i hamule.
JOH 4:51 I tabana ni lalaho na dala, i laho halala ia e huriki a vora vona, ri vakalongoa vona a velengane tuna i mahuri pali.
JOH 4:52 I nana ria na a ra kilala i mahuri vona, lakea ri vakalongoa, ri ta maea, “A gilanga i pasipuru vona ravi na haro, na kilala i taku.”
JOH 4:53 Lakea a bakovi i luhoi kadoa, ra kilala iea kunana e Isu i takia, i ta maea, “E tumu i mahuri.” Lakea a bakovi iea turana e huriki a kabu vona ri luhoi torea e Isu.
JOH 4:54 Ra nivakasiri iea, a ruana nivakasiri e Isu i ratea muri na tahuna i pea a tanga e Iudea i valai o Galili.
JOH 5:1 Muri e Isu i sike o Ierusalem na habu tara ne huriki a Iuda.
JOH 5:2 Na tanga e Ierusalem i tahoka tara lomu, i tabukoi na poridala ni gale A Poridala Na Sipsip. A lomu iea ni gale na nita Aram e Betesda. A talele i lima ri pesi haluia a lomu.
JOH 5:3 E huriki a kepa, a vaha hale, a beu, ri made vonga.
JOH 5:4 Ri davea a naru ge bolu, a vuhuna a agelo ne Bakovi Dagi bara i puru valai, i labea a naru. A viri bara i puru muga na naru na tahuna i longoa a nilaba, a gilanga vona bara i lobo.
JOH 5:5 A bakovi tara i made vonga, i giloa na pida i ravulu tolu a polona i polotolu.
JOH 5:6 E Isu i masia i mamade vonga. Na tahuna i longoa a bakovi iea i giloa na pida i kupo pali, i nanea, “O ngaru ni mahuri?”
JOH 5:7 Lakea a bakovi i koli, i ta maea, “Bakovi dagi, i uka tara viri ge tuhori iau ge ru puru iau na naru na tahuna ni laba. Na tahuna a toni ni puru na naru a viri tara bara i puru muga nau.”
JOH 5:8 Muri e Isu i takia, i ta maea, “O pesi rike! O bole rike a moke vomu, o laho.”
JOH 5:9 I malaviriri kunana i lobo liu a gilanga vona. I bole rike a moke vona i laho. A parava iea, a Parava Nimalo.
JOH 5:10 Lakea na tahuna e huriki a Iuda ri masia i kalohoa a moke vona, ri takia, “A Parava Nimalo mona. A vinara i taki naha ni kaloho a moke vomu na parava iea.”
JOH 5:11 Lakea i koli, i ta maea, “Ra bakovi i vakamahuri iau, i taki iau ga bole rike a moke nau, ga laho.”
JOH 5:12 Lakea ri nanea, “E rei a bakovi i taki ioe go bole rike a moke vomu, go laho?”
JOH 5:13 Pali i uka ma i lohoka vona e rei a viri i vakamahuria, a vuhuna na tahuna e Isu i vakamahuria pali, i laho dili na kurukurune huriki, i vano.
JOH 5:14 Muri e Isu i matavisia na roho na Vure, i takia, “O longo valai, ngane o mahuri pali. Naha ni rata tabu a naro hale, ma ge bele tabu vomu a vuranga dagi hateka.”
JOH 5:15 Muri a bakovi iea i pea a roho na Vure, i vano i vakalongo e huriki a Iuda ne Isu i vakamahuri ia.
JOH 5:16 Lakea e huriki a Iuda ri tahatea e Isu a vuhuna i rata a maki nga na Parava Nimalo.
JOH 5:17 Pali e Isu i koli, i ta maea, “E Tata i leho vakaroro i valai i harena mona. Iau tara a leho.”
JOH 5:18 Na ngava iea kunana e huriki a Iuda ri rura hateka ni matakana a dala ri gi rabalakia e Isu. I uka ma ri ngaru ni rabalakia na hini i longotaro a vinara na Parava Nimalo kunana. Ri ngaru ni rabalakia na hini i galea a Vure e Tamana, i rata ia i palupulupu turana Vure.
JOH 5:19 Lakea e Isu i koli mule ria, i ta maea, “A taki muholi mua, iau, a Tuna Vure, i uka ma ga rata kikeri a maki. Iau a rata kunana a maki a matai e Tata i rata, a vuhuna a maki e Tata i rata, iau tara a rata,
JOH 5:20 a vuhuna e Tata i ngaru iau, iau e Tuna. I vakasiri iau vona a maki lobo i rata. I muholi, muri e Tata bara i vakasiri iau na maka maki i dagi na maka nivakasiri a rata pali, lakea bara mu ngapa.
JOH 5:21 I manga kunana e Tata i vakamahuri mule e huriki ri mate. Iau tara a habi a nimahuri ne huriki na ningaru nau kunana.
JOH 5:22 E Tata i uka ma i pelekado e huriki. I habi nau a leho ni pelekado e huriki.
JOH 5:23 Lakea, e huriki lobo ri gi togo iau i manga a hini ri togoa e Tata. A viri i uka ma i togo iau, i uka ma i togoa e Tata, ra i rudu iau a valai.
JOH 5:24 “A taki muholi mua, e huriki ri longo mai a ngavagu, ri luhoi tora a viri i rudu iau a valai, bara ri bole a nimahuri vakaroro. A Vure i uka ma ge pelekado ria, a vuhuna ri pea pali a matenga, ri bole a nimahuri.
JOH 5:25 A taki muholi mua, a parava bara i valai, ngane i valai pali, e huriki ri mate ri gi longoa a lohona Tuna Vure. Lakea e huriki ri longoa, bara ri mahuri.
JOH 5:26 E Tata ia a vuhuna nimahuri, lakea i ratea e Tuna tara, ia a vuhuna nimahuri.
JOH 5:27 E Tata i habi a nitora nau ga pelekado e huriki, a vuhuna iau a Tuna Bakovi.
JOH 5:28 Naha ni turutu vona a ngava nau, a vuhuna a parava ge valai na tahuna e huriki ri mate pali ri gi longoa a lohogu,
JOH 5:29 ri gi pesi rike mule na matenga. E huriki ri rata a naro kamumu bara ri mahuri mule, ri bole a nimahuri. Pali e huriki ri rata a naro hale bara ri mahuri mule, ri bole a mapana naro hale ne ria.
JOH 5:30 “Iau a keri ni rata kikeri a maki. A pele­kado a viri, i muri mai kunana a ngava a longo ne Tata. A rabugu ni pele­kado i malamala a vuhuna i uka ma a muri mai a ningaru nau. A muri mai kunana a ningaru ne Tata, ra i rudu iau a valai.
JOH 5:31 “Iau kikeri bara ta ne nau, a ngavagu bara i maraha.
JOH 5:32 A viri tara i taki e huriki ne nau. Pali a ngava i taki a lohoka vona i muholi.
JOH 5:33 Hosi mu rudu e huriki ri lakea ne Ioanes, ri nanea nau. Lakea e Ioanes i vakalongo mua vona a ngava muholi.
JOH 5:34 Iau i uka ma a ngarua tara ngavana bakovi tara ge vakatorea a ngavagu. Pali a vakalohoka tabu mua na ngavane Ioanes, a Vure ge korimule mua.
JOH 5:35 E Ioanes ia a nipara i vakapalala a hini, lakea mu ngaru ni vivi vona a nipara vona na parava popote kunana.
JOH 5:36 “Pali iau a tahoka a ngava i kaneka hateka na ngavane Ioanes. A leho e Tata i habia nau ga vakaloboa, ngane a rata. Ra leho iea, i vakasiri e Tata i rudu iau a valai.
JOH 5:37 Pali e Tata ra i rudu iau a valai, ia tara i ta muholi ne huriki ne nau pali. I uka tara viri ne mua ge longo a lohona o ge matai a matana.
JOH 5:38 A nitana, tara, i uka ma mu longo maia, a vuhuna i uka ma mu luhoi tora a viri a Vure i rudua i valai.
JOH 5:39 Mu gi vakaroro a Hinere, a vuhuna mu luhoi ta ge habi a nimahuri vakaroro ne mua. A maka ngava na Hinere i vakalongo mua ne nau,
JOH 5:40 pali mu koi ni valai nau mu gu bole a nimahuri.
JOH 5:41 “Iau i uka ma a ngaru e huriki a bakovi ri gi kavurike iau.
JOH 5:42 Pali iau a lohoka ne mua, i uka ma mu ngarua a Vure na hatene mua.
JOH 5:43 A valai na rane Tata, pali i uka ma mu tagui iau. Pali i ranga e huriki ri valai na rane ria kunana, mu tagui ria.
JOH 5:44 Pali mu gu luhoi tora navai iau? Mu ngaru hateka e huriki a bakovi ri gi kavurike mua. Pali i uka ma mu ngarua a Vure ge kavurike mua, ra Vure i taku kunana.
JOH 5:45 “Pali naha ni luhoi ga padi virihi mua na ngava na matane Tata. A viri bara i padi virihi mua na ngava e Moses, ra viri mu luhoi ia ta ge kori mua.
JOH 5:46 I uka ma mu longo mai e Moses. Mua bara mu longo mai e Moses, bara mu longo mai iau, a vuhuna a ngava i here puru hosi i taki virihi iau vona.
JOH 5:47 Pali mu gu longo mai navai ngane a ngava a taki, a vuhuna i uka ma mu longo mai a ngava e Moses i here puru hosi.”
JOH 6:1 Muri e Isu i malaga, i lakea na tabeke tara na Darilomu e Galili, a rana tara e Tiberius.
JOH 6:2 E huriki ri ala kupo ri muri vona a vuhuna ri masia i vaka­mahuri e huriki ri giloa.
JOH 6:3 Muri e Isu i sike na gagana lolo, i made vonga turana e huriki a murimuri vona.
JOH 6:4 A Habu na Nipagepolo ne huriki a Iuda i tabukoi.
JOH 6:5 Na tahuna e Isu i matai e huriki ala kupo ri marali valai vona, i takia e Pilip, “I vai a hini si gi kona a bret vona ge kani e huriki nga?”
JOH 6:6 I lohoka pali na maki ge ratea, pali i nana kunanea e Pilip, ge tonia.
JOH 6:7 Lakea e Pilip i koli, i ta maea, “A moni ni kona a bakovi i leho na keva i polo tolu i uka ma ge kara si gi kona a bret, si gi vakani e huriki nga!”
JOH 6:8 Lakea a murimuri tara, a rana e Andreas, e tarine Simon Petrus, i ta rike, i ta maea,
JOH 6:9 “A koma bakovi tara koea i tahoka a bret i lima turana manu kiroko i rua, pali i uka ma i kara e huriki ala kupo hateka.”
JOH 6:10 Lakea e Isu i ta maea, “Mu vakamade e huriki.” Ra hini nga i vona a varili, lakea e huriki ri made puru. E huriki a bakovi ri ala rangale lima (5,000).
JOH 6:11 Muri e Isu i bole a bret, i kavurikea a Vure. Muri i veru ne huriki ri made vonga, lakea ri bole na ningaru ne ria. A manu ranga, i rata mavonga.
JOH 6:12 Ri kani, ri maru, lakea e Isu i taki e huriki a murimuri vona, “Mu ru kadolu a maka kalavana maki ni kani. Naha ni vuroki tavula ranga kalavana.”
JOH 6:13 Lakea ri ru kadolu a maka kalavana bret i lima, ri tahoni na kulopi i ravulu a polona i rua.
JOH 6:14 Na tahuna e huriki ri matakilalea a nivakasiri e Isu i ratea, ri ta maea, “Muholi hateka, ra bakovi iea a propet ni taki ge valai na malala.”
JOH 6:15 Pali e Isu i lohoka ne ria ta ri gi taki tuharea ge ia a hariki ne ria. Lakea i maparu tala, i sike tabu na lolo, i made kikeri vonga.
JOH 6:16 Na malunga liu e huriki a murimuri ri pori na darilomu,
JOH 6:17 ri rike na posi, ta ri gi hamule lakea o Kapernaum. Ngane i rodo a hini, pali e Isu i uka ma i luve taho ria ma.
JOH 6:18 A vilu dagi i pori, i ratea a dari i tarebo.
JOH 6:19 Na tahuna ri vore tala pali na kilomita i lima, ri masia e Isu i lalaho langa na dari i valai mai ria na posi, lakea ri mangenge hateka i vakulu a tagane ria.
JOH 6:20 Pali e Isu i taki ria, i ta maea, “Iau kunana. Naha ni mangenge.”
JOH 6:21 Muri ri vivi vona, ri vakarikea na posi. Ri turutu kunana ri bele pali na lavu na hini ri lakea mai.
JOH 6:22 Na hatelanga e huriki ri tabana na tabeke tara na darilomu ri lohoka vona a posi i taku kunana i pasi vonga ravi, pali e Isu i uka ma i rike turane huriki a murimuri vona na tahuna ri vano.
JOH 6:23 Muri a posi ranga na tanga e Tiberius ri dili tabukoi na hini e Bakovi Dagi i kavurike a Vure vona a bret, i vakani e huriki vona ravi.
JOH 6:24 Ngane ri matakilaka vona e Isu turane huriki a murimuri vona i uka ma ri made tabu vonga. Lakea ri rike na maka aga o Tiberius, ri lakea o Kapernaum ri gi matakanea e Isu.
JOH 6:25 Na tahuna ri bele o Kapernaum ri matavisia e Isu, ri nanea, “Mari ni tovo, garika o bele koea?”
JOH 6:26 E Isu i koli, i ta maea, “A taki muholi mua, i uka ma mu ngaru iau na hini a rata a nivakasiri. Mu ngaru iau a vuhuna a habi tavula a bret ne mua, mu kani, mu maru.
JOH 6:27 Naha ni leho ni bole a maki ni kani na malala. Bara i bera. Mu leho ni bole a maki ni kani na hunu, ra i tabuli vakaroro, i habi a nimahuri vakaroro. Iau, a Tuna Bakovi, ga habia mua a maki ni kani na hunu, a vuhuna a Vure e Tata i ru a kilakila nau. Ra kilakila iea, i vakasiri manga i vivi nau.”
JOH 6:28 Muri ri nanea, “A ra leho a Vure i ngaru mia mi gi ratea?”
JOH 6:29 E Isu i koli, i ta maea, “A leho na Vure i maea, mu luhoi torea a viri a Vure i rudua i valai.”
JOH 6:30 Ri longoa a ngava iea, lakea ri nana tabua, “A ra nivakasiri go ratea, mi gi masia, muri mi gi luhoi torea a viri a Vure i rudua i valai? A ra go ratea?
JOH 6:31 Hosi, e huriki e tubune mia ri kani a mana na tahuna ri laho viliha na tabeke i ngeki, i manga a ngava ni here puru hosi i ta maea, ‘I habia ne ria a bret na hunu ri gi kania.’”
JOH 6:32 Muri e Isu i taki ria, i ta maea, “A taki muholi mua, e Moses i uka ma a viri i habia ne mua ra bret na hunu, e Tata kunana a viri i habi ne mua a bret muholi na hunu,
JOH 6:33 a vuhuna a bret na Vure, ra viri i pe a hunu i puru valai, i habi a nimahuri ne huriki na malala.”
JOH 6:34 Lakea ri ta maea, “Bakovi dagi, o habi vakaroroa ne mia ra bret iea.”
JOH 6:35 Muri e Isu i vakalongo ria, i ta maea, “Iau a Bret na nimahuri. E huriki ri valai nau i uka ma ri gi vitolo tabu. E huriki ri luhoi tora iau i uka ma ri gi marohu tabu.
JOH 6:36 I manga a hini a taki muga mua vona, mu matai iau, pali i uka ma mu luhoi tora iau ma.
JOH 6:37 E huriki a bakovi a ngatavine e Tata i habi nau, bara ri valai nau. E huriki ri valai nau, i uka ma ga tono mule ria,
JOH 6:38 a vuhuna iau a pe a hunu a puru valai. Iau i uka ma a muri mai a ningaru nau. A muri mai a ningaru na viri i rudu iau a valai.
JOH 6:39 A ningaru vona i maea: e huriki a bakovi a ngatavine a Vure i habi nau, i uka tara viri ne ria ge velu. Ga vakamahuri mule ria lobo na nilobona parava,
JOH 6:40 a vuhuna e Tata i ngaru e huriki lobo ri matai iau, e Tuna, lakea ri luhoi tora iau, ri gi bole a nimahuri vakaroro. Muri na nilobona parava, bara vakamahuri mule ria na matenga.”
JOH 6:41 Lakea e huriki a Iuda ri ta bara­ngungu, a vuhuna e Isu i ta maea, “Iau a bret a valai na hunu.”
JOH 6:42 Pali ri ta maea, “Ra bakovi iea, i luhoi ge ia e rei? Ra bakovi iea e Isu, e tune Iosep. Si lohoka ne tamana rua e kinana. Pali i navai i takia ta i valai na hunu?”
JOH 6:43 E Isu i koli, i ta maea, “Naha ni vata barangungu.
JOH 6:44 I uka tara viri ge valai nau na ningaru vona kunana. E Tata i rudu iau a valai, lakea bara i tuli e huriki i ngaru, ri gi valai mai iau. Muri na nilobona parava bara vakamahuri mule ria.
JOH 6:45 Hosi e huriki a propet ri here puru a ngava i maea, ‘A Vure bara i tovo e huriki lobo.’ E rei a viri i longo maia e Tata, i bole a lohokanga vona, bara i valai nau.
JOH 6:46 I uka tara viri ge masia e Tata. A viri i valai na Vure, ia kunana i masia e Tata.
JOH 6:47 A taki muholi mua, a viri i luhoi tora ia bara i bole a nimahuri vakaroro.
JOH 6:48 Iau a bret na nimahuri.
JOH 6:49 E huriki e tubune mua ri kani a mana na tahuna ri laho viliha na robo i ngeki. Pali ri mate pali.
JOH 6:50 Pali i tahoka a bret i valai na hunu. E huriki ri kani a bret iea i uka ma ri gi mate.
JOH 6:51 Iau a bret na nimahuri a valai na hunu. E huriki ri kania a bret iea bara ri mahuri vakaroro. Ra bret iea a bobogu, ga habia ne huriki na malala ri gi bole a nimahuri.”
JOH 6:52 Muri e huriki a Iuda ri vahehe, ri ta maea, “Ra bakovi iea ge habi navia ne hita a bobona si gi kania?”
JOH 6:53 Lakea e Isu i taki ria, i ta maea, “A taki muholi mua, e rei a viri i uka ma i kani a bobona Tuna Bakovi, i uka ma i ninu a darana, i uka ma ge bole a nimahuri.
JOH 6:54 A viri i kani a bobogu, i ninu a daragu bara i bole a nimahuri vakaroro, muri na nilobona parava bara vakamahuri mulea na matenga.
JOH 6:55 A bobogu a kinani muholi, a daragu a naru muholi.
JOH 6:56 E huriki ri kani a bobogu ri ninu a daragu, bara ri made turagu. Iau tara bara made turane ria.
JOH 6:57 E Tata ia a Vure mahuri, i rudu iau a valai. Iau a bole a nimahuri na nitora ne Tata. I mavonga kunana a viri bara i kani iau, bara i mahuri na nitora nau.
JOH 6:58 Iau kunana ra bret a valai na hunu. E huriki e tubune mua ri kani a mana, ri mate pali. Pali e rei a viri i kania a bret iea i uka ma ge mate, bara i mahuri vakaroro.”
JOH 6:59 E Isu i taki a ngava nga na tahuna i vara na roho na vaponga o Kapernaum.
JOH 6:60 Na tahuna e huriki a murimuri vona ri longo a ngavana, i kupo ne ria ri ta maea, “Ra ngava iea i mava hateka. E rei a viri ge longoa?”
JOH 6:61 E Isu i lohoka vona e huriki a murimuri vona ri ta kutukutu, lakea i nana ria, “Ra ngava a takia, mu marikoi vona?
JOH 6:62 Pali mu gu luhoi navai na tahuna mu gu masia a Tuna Bakovi ge sike tabu na murina i made muga vona?
JOH 6:63 A Hanuna Vure i habi a nimahuri, pali a bakovi i keri. A ngava a taki mua vona i vakasiri mua a Hanuna Vure, ra viri i habi a nimahuri.
JOH 6:64 Pali i ranga ne mua i uka ma mu luhoi tora.” E Isu i ta mavonga, a vuhuna i lohoka vona muga e huriki i uka ma ri luhoi torea, i lohoka vona e rei a viri ge habia na limane huriki a pile vona.
JOH 6:65 Lakea i ta tabu, i ta maea, “I ranga ne mua i uka ma mu luhoi tora iau. Lakea a taki mua pali, i uka tara viri ge valai tavula nau. E huriki e Tata i tuli ria ri valai nau, ria kunana bara ri valai nau.”
JOH 6:66 Na tahuna ri longoa a ngava iea, i kupo e huriki a murimuri vona ri ha taroa, i uka ma ri ramai tabua.
JOH 6:67 Muri i nana e huriki a murimuri vona ala ravulu a polona i rua, i ta maea, “Mua ranga mu gu hataro iau?”
JOH 6:68 Lakea e Simon Petrus i koli, i ta maea, “Bakovi Dagi e rei tabu mi gi ramaia? Ioe kikeri o tahoka a ngava na nimahuri vakaroro.
JOH 6:69 Mi luhoi tora ioe, mi lohoka vomu, ioe kunana a Viri Malamala na Vure.”
JOH 6:70 Muri e Isu i koli, i ta maea, “Iau a viri a vulaki mua e huriki ala ravulu a polona i rua. Pali tara ne mua i manga a hanitu!”
JOH 6:71 A viri i ta kanea e Iudas e tune Simon Iskariot. E Iudas ia a turane huriki ala ravulu a polona i rua, pali muri bara i habi e Isu na limane huriki a bakovi hale.
JOH 7:1 Muri e Isu i laho lae pololilo na tabeke ne Galili. I koi ni lakea tabu na tabeke ne Iudea, a vuhuna e huriki a Iuda ri ngaru ni rabalakia.
JOH 7:2 Pali na tahuna a habu tara ne huriki a Iuda i tabukoi, a Habu na Kape,
JOH 7:3 e huriki e tarina ri takia, ri ta maea, “O lakea taro o Iudea, e huriki a murimuri vomu ri gi matai a maka nivakasiri o rata.
JOH 7:4 A viri i ngaru e huriki ri gi lohoka vona i uka ma ge rata kapiloho a maki. O vano, o vakasiri ioe ne huriki lobo, a vuhuna ioe o rata a maka naro nga.”
JOH 7:5 E huriki e tarina ri ta maea, a vuhuna i uka ma ri luhoi torea.
JOH 7:6 Lakea e Isu i taki ria, i ta maea, “A parava nau i uka ma i valai ma. Pali mua, a parava lobo i kamumu.
JOH 7:7 E huriki a bakovi a ngatavine na malala ri ngaru mua, pali ri marikoi iau a vuhuna a taki tala a rabu hale ne ria.
JOH 7:8 Mu vano mu lakea na habu. Iau i uka ma ga vano ma, a vuhuna a parava nau i uka ma i valai ma.”
JOH 7:9 Lakea i made vonga o Galili.
JOH 7:10 Pali na tahuna e huriki e tarina ri vano pali, i muri kikeri ia, i uka tara viri ge masia.
JOH 7:11 E huriki a Iuda ri davea e Isu na habu, ri virokanea, ri vanana lae vona i lokovai.
JOH 7:12 E huriki ri vareme na ngava, i viliha lae a nitane ria. I ranga ne ria ri ta maea, “E Isu ia a bakovi kamumu.” I ranga e huriki ri koli ri ta maea, “I uka, e Isu i tami e huriki.”
JOH 7:13 Pali i uka tara viri ge pukatala a ngava ne huriki, a vuhuna ri mangenge ne huriki a Iuda.
JOH 7:14 A habu i popote ge lobo, lakea e Isu i sike na roho na Vure, i vakatubu ni vara.
JOH 7:15 A nivara ne Isu i rata e huriki a Iuda ri ngapa, lakea ri vanana, “Ra bakovi iea, i bole vai a lohokanga? I uka tara viri ge tovoa.”
JOH 7:16 Lakea e Isu i koli ria, i ta maea, “A vinara nau i uka ma ne nau. I valai na viri i rudu iau a valai.
JOH 7:17 E huriki ri ngaru ni muri mai a ningaru na Vure bara ri mata­kilaka vona a vinara nau i valai na Vure, i uka ma a ngavagu kunana.
JOH 7:18 A viri i ta na ngavana kunana i ngaru ni vakadagi a rana. Pali a viri i leho ni vakadagi a rana a viri i rudua i valai, i uka ma ge tatami, ia a bakovi ni ta muholi.
JOH 7:19 Hosi e Moses i habi a vinara ne mua. Pali i uka ma mu longototo a vinara. Pali i navai a hini mu ngaru ni rabalaki iau?”
JOH 7:20 E huriki ri koli, ri ta maea, “A hanitu i dili vomu! E rei a viri ge rabalaki ioe?”
JOH 7:21 Lakea e Isu i taki ria, “A ratea a nivakasiri i taku kunana, lakea mua lobo mu turutu vona.
JOH 7:22 Pali e Moses i habia ne mua a vinara ni pala a kulina bakovi, lakea mu pala a kulina koma na Parava Nimalo. I muholi ngi, a vinara iea i uka ma i valai ne Moses, i valai ne huriki a gare hosi.
JOH 7:23 Mu pala a kulina koma na Parava Nimalo ne vona ni muri mai a vinara ne Moses. Pali i navai mu tahate vona a hini iau a vakamahuri a kakaina bakovi na Parava Nimalo?
JOH 7:24 Naha ni pelekado a maki na matane mua kunana. Mu pelekado kamumu a maki.”
JOH 7:25 Muri i ranga e huriki o Ierusalem ri vakatubu ni vanana maea, “Ra bakovi iea, ia kunana ni matakana ta ga ni gi rabalaki?
JOH 7:26 Pali ngane i vara na matane huriki, e huriki a matakari i uka ma ri tahatea. I mata manga ri matakilalea e Isu ia e Kristo.
JOH 7:27 Si lohoka vona a tanga vona, pali na tahuna e Kristo bara i valai, i uka tara viri ge lohoka vona a hini i valai vona.”
JOH 7:28 Muri, e Isu i tabana ni vara pololilo na roho na Vure, i ta rike, i ta maea, “I muholi ngi, mu lohoka nau, mu lohoka vona a tanga a valai vona. Iau i uka ma valai koea na ni ngaru nau. E Tata i rudu iau a valai. Ia a bakovi ni ta muholi. Mua i uka ma mu lohoka vona.
JOH 7:29 Pali iau a lohoka vona, a vuhuna iau a made turana, i rudu iau a valai.”
JOH 7:30 Na tahuna ri longoa a ngava iea, ri toni ni lakavua, pali i uka tara viri ge nugutatea, a vuhuna a parava vona i uka ma i valai ma.
JOH 7:31 Pali i ranga e huriki ri luhoi tora ia, ri ta maea, “Ra bakovi iea e Kristo. I rata a nivakasiri i kupo hateka.”
JOH 7:32 E huriki a Pariseo ri longo e huriki ri vareme vona a maka ngava e Isu i taki. Muri ri rudu e huriki a prister dagi, e huriki a Pariseo, e huriki a tagari na roho na Vure ri gi lakavua e Isu.
JOH 7:33 Lakea e Isu i ta maea, “Iau ga made turane mua popote kunana, muri bara hamule lakea na viri i rudu iau a valai.
JOH 7:34 Bara mu matakana iau, pali i uka ma mu gu matavisi iau. A hini ga made vona, bara mu keri ni valai vona.”
JOH 7:35 Lakea e huriki a Iuda ri vanana, ri ta maea, “Ra bakovi iea i ngaru ni lokovai i uka ma si gi masia? Ge lakea mai e huriki ne hita ri made viliha iea o Gris, ge vara ria vonga?
JOH 7:36 Pali na tahuna i ta maea, ‘Bara mu matakana iau, pali i uka ma mu gu matavisi iau,’ i navai a pelegona ngava iea? Pali a nita tara vona i ta maea, ‘A hini a made vona, bara mu keri ni valai vona’, i navai a pelegona?”
JOH 7:37 A nilobona parava na habu, a parava dagi hateka. Lakea na parava iea, e Isu i pesi i gale dagi, i ta maea, “E rei a viri i marohu, ge valai nau, ge ninu.
JOH 7:38 E rei a viri i luhoi tora iau, a naru na nimahuri bara i tua pololilo vona, i manga a hini ni here puru na Hinere.”
JOH 7:39 E Isu i taki e huriki ri luhoi tora ia bara ri bole a nitora na Hanu Kiripiripi. Na tahuna iea a Vure i uka ma i rudua ma a Hanuna, a vuhuna e Isu i uka ma ni vakabagetu ma.
JOH 7:40 I ranga e huriki ri longoa a nitana ri ta maea, “Muholi hateka ra bakovi iea a propet.”
JOH 7:41 Pali i ranga e huriki ri ta maea, “A bakovi iea e Kristo.” Pali i ranga e huriki ri nana rovi tabu ri ta maea, “Re Kristo, ge valai navai o Galili?
JOH 7:42 A Hinere i taki e Kristo ge valai na kabu ne Davit, na tanga ne Davit, e Betlehem.”
JOH 7:43 Pali e huriki ri tahoka a niluhoi takutaku ne ria ne Isu, i vaperesi lae a niluhoi ne ria.
JOH 7:44 I ranga e huriki ri ngaru ni lakavua, pali i uka ma ri ratea.
JOH 7:45 Muri e huriki a tagari na roho na Vure ri hamule. Lakea e huriki a prister dagi, a Pariseo ri nana ria, “I navai i uka ma mu turari vilia?”
JOH 7:46 Lakea e huriki a tagari ri vakalongo, ri ta maea, “I uka tara viri ge ta manga a bakovi iea.”
JOH 7:47 E huriki a Pariseo ri ta puhaki, ri ta maea, “Mua ranga, a bakovi iea i tami mua.
JOH 7:48 Mu matai mia e huriki a Pariseo, e huriki a matakari. E rei tara ne mia ge luhoi tora ia?
JOH 7:49 I uka liu! Pali re huriki a manga nga, ri luhoi torea, i uka ma ri lohoka na vinara. A Vure ge ratapile ria.”
JOH 7:50 E Nikodemus, a turane ria, hosi i vano i masia e Isu, i taki ria, i ta maea,
JOH 7:51 “A vinara ne hita i taki bara si longoa a bakovi ge ta taro, si gi matakilaka vona a narona, muri ni gi pelekado.”
JOH 7:52 Pali ri ratapilea na ngava, ri ta maea, “Ioe tara a bakovi o Galili. O gi kamumua a Nita na Vure, bara o masia i uka tara propet ge valai o Galili.”
JOH 7:53 Muri ri hamule mai a tanga takutaku ne ria.
JOH 8:1 Pali e Isu i lakea na lolo e Oliva.
JOH 8:2 Na parava muri na hatelanga poko­poko i lakea tabu na roho na Vure. E huriki a bakovi a ngatavine ri valai maia, ri made haluia, lakea i made puru i vara ria.
JOH 8:3 E huriki a mari na vinara, a Pariseo ri tuli vilia tara ngatavine i parangi, ni matavisi i rata a rabu na molenga. Lakea ri vakapesia na matane huriki.
JOH 8:4 Ri takia e Isu ri ta maea, “Mari ni tovo, ra ngatavine iea, mi masia i rata a rabu na molenga.
JOH 8:5 Na vinara ne Moses ra ngatavine maea bara ni padimate na kedo. Pali o ta navai ke?”
JOH 8:6 Ri nana maea a vuhuna ri ngarua ge ratea tara ngava ri gi padi virihi ia vona. Pali e Isu i pasike puru, i vakatubu ni here na malala na kukulimana.
JOH 8:7 Ri nana vilihui, lakea i pesi rike i taki ria, i ta maea, “E rei tara ne mua i uka ma i rata kilala a rabu hale, ge padi mugea a ngatavine iea.”
JOH 8:8 Muri i pasike puru tabu i here na malala.
JOH 8:9 Ri longoa a ngava iea, lakea ri malaga gosi­gosi tala, ri vano. E huriki a gare ri vano muga. Ri vano lobo ria, e Isu kikeri i made turana ngatavine iea.
JOH 8:10 Muri e Isu i pesi rike i nanea, “Ngatavine, a vai ria? E rei tara ne ria ge taki ioe go mate?”
JOH 8:11 A ngatavine i koli, i ta maea, “Bakovi Dagi, i uka.” Lakea e Isu i ta maea, “Pali iau tara, i uka ma ga taki ioe go mate. O vano ngane, o lobo ni rata a naro hale.”
JOH 8:12 Na tahuna e Isu i vara tabu, i ta maea, “Iau a nipara na malala. E rei a viri i muri nau, i uka ma ge laho tabu na uvo, bara i tahoka a nipara i habi a nimahuri.”
JOH 8:13 E huriki a Pariseo ri hehe, ri ta maea, “Masia ngane, ioe kikeri o ta ne vomu, pali i uka tara viri ge kori ioe na ngavamu ge muholi.”
JOH 8:14 E Isu i koli, i ta maea, “Bara iau kikeri a ta, pali i uka tara viri ge kori iau na ngavagu, a nitagu i muholi, a vuhuna a lohoka vona a hini a valai vona, a hini ga lakea vona. Pali mua, i uka ma mu lohoka vona a hini a valai vona, a hini ga lakea vona.
JOH 8:15 Mu pelekado e huriki na rabu na malala kunana, pali iau i uka ma pelekadoa tara viri.
JOH 8:16 Pali iau bara pelekado a viri, a nipelekado nau bara i muholi, a vuhuna i uka ma iau kikeri. A pesi turane Tata, ra viri i rudu iau a valai.
JOH 8:17 Na vinara ne mua ni here puru i ta maea, a bakovi ala rua ru gu taki tala a ngava, a ngava iea i muholi.
JOH 8:18 Iau a taki tala mule a ngava nau ne mua, pali a viri i tuhori iau na ngava e Tata, ra viri i rudu iau a valai.”
JOH 8:19 Muri ri nanea, “I vai e tamamu?” E Isu i koli, i ta maea, “I uka ma mu lohoka nau o ne Tata. Mua bara mu lohoka nau, e Tata tara bara mu lohoka vona.”
JOH 8:20 I taki e huriki na ngava nga na tahuna i vara na tabeke na roho na Vure, tabukoi na hini ni ru a nihabi vona. Pali i uka tara viri ge lakavua, a vuhuna a parava vona i uka ma i valai ma.
JOH 8:21 E Isu i taki tabu ria, i ta maea, “Iau popote ga vano, lakea bara mu matakana iau. A naro hale ne mua bara i tabuli, mu mate turana. A hini ga lakea vona, bara mu keri ni valai vona.”
JOH 8:22 Lakea e huriki a Iuda ri vanana, ri ta maea, “Ra bakovi iea, i taki a hini ge lakea vona bara si keri ni bele vona, ma ge tomo.”
JOH 8:23 Pali e Isu i ta lokovonga liu, i ta maea, “Mua e huriki a bakovi na malala kunana. Pali iau a bakovi na hunu. Iau i uka ma a bakovi na malala.
JOH 8:24 A taki mua pali, bara mu mate turana naro hale ne mua. Pali mua i uka mu gu luhoi ge iau ra iau kunana, muholi hateka bara mu mate turana naro hale ne mua.”
JOH 8:25 Ri nanea, “Pali ioe e rei ke?” E Isu i koli, i ta maea, “Iau ra viri a taki mua vona pali.
JOH 8:26 Iau a tahoka a ngava i kupo na tahuna bara pelekado mua. Pali a viri i rudu iau a valai i ta muholi hateka. A ngava a longo vona, a taki polo ne huriki lobo.”
JOH 8:27 A viri i taki ria vona e Tamana, pali i uka ma ri longokilala a hini i taki.
JOH 8:28 Lakea e Isu i ta maea, “Na tahuna mu bole rikea a Tuna Bakovi, bara mu matakilaka vona iau kunana ra viri a takikia. Bara mu matakilala iau i uka ma a ratea tara maki na ningaru nau kunana. A taki polo kunana a maki e Tata i tovo iau vona.
JOH 8:29 A viri i rudu iau a valai i made turagu, i uka ma i pe iau, a vuhuna a rata vakaroro a maki ge vivi vona.”
JOH 8:30 Na tahuna e huriki ri longo a ngava i taki, i kupo ri luhoi torea.
JOH 8:31 E Isu i taki e huriki a Iuda ri luhoi torea, i ta maea, “Na tahuna mu longo­­toto a vinara nau, bara i mua a murimuri muholi nau.
JOH 8:32 Lakea bara mu lohoka vona a ngava muholi. Muri a ngava muholi bara i rata mua, mu matuka­paga.”
JOH 8:33 Ri koli ri ta maea, “Mia e huriki a hamone Abraham. Pali paru hosi i valai mona, i uka ma mia a vorakato na viri tara. Pali i navai a hini o taki mavonga mia, ta mi gi matukapaga?”
JOH 8:34 E Isu i koli, i ta maea, “A taki muholi mua, a viri i rata a naro hale ia a vora­kato na naro hale, i made polotano na tuhakanga na rabu hale.
JOH 8:35 A vorakato, i uka murina na kabu na matakari vona. Pali a tuna bakovi i tahoka a murina na kabu vona. A murina i tabuli vakaroro.
JOH 8:36 I mavonga kunana, a Tuna Bakovi ge rata mua mu matukapaga, bara mu matukapaga muholi.
JOH 8:37 A lohoka vona ngi, mua a hamone Abraham. Pali ngane mu ngaru ni rabalaki iau, a vuhuna a nitagu i uka ma i dili na hatene mua.
JOH 8:38 A taki mua vona a maka maki e Tata i vakasiri iau vona, pali mua ranga mu rata a maka maki mu longo ne tamane mua.”
JOH 8:39 Ri koli ri ta maea, “E Abraham e tamane mia.” Lakea e Isu i taki ria, i ta maea, “E Abraham ge tamane mua, bara mu rata a maki e Abraham i rata.
JOH 8:40 A taki mua vona a ngava muholi a longo na Vure, pali ngane mu ngaru ni rabalaki iau. A vilo mavonga i uka ma a vilone Abraham.
JOH 8:41 A vilo mavonga a vilone tamane mua.” E huriki a Pariseo i madihi a hatene ria ri ta maea, “I uka ma mia a tuna ngoi. E Tamane mia kunana a Vure.”
JOH 8:42 Lakea e Isu i taki ria, “A Vure i uka ma e Tamane mua. Ge ia e Tamane mua, bara mu ngaru iau, a vuhuna iau a valai na Vure, a bele koea. Iau i uka ma valai na ningaru nau. A Vure i rudu iau a valai.
JOH 8:43 I navai i uka ma mu longokilala a hini a taki? I uka ma mu longokilala, a vuhuna mu koi ni longo a ngavagu.
JOH 8:44 Mua e huriki e tune Satan, lakea mu ngaru ni muri mai a ningaru vona. Muga na hunu a malala ni ratarike, ia a bakovi ni rabalaki a viri, i koi ni muri mai a ngava muholi, a vuhuna i uka tara ngava muholi ge takia. Na tahuna i tami a viri, i ta na tabelena, a vuhuna ia a marapusi, a tamana marapusianga.
JOH 8:45 Pali i uka ma mu luhoi tora iau, a vuhuna iau a ta muholi!
JOH 8:46 E rei tara ne mua ge vakasiri, iau a rata a naro hale? Iau a ta muholi, pali i navai i uka ma mu luhoi tora iau?
JOH 8:47 E huriki a tuna Vure ri longototo a ngava a Vure i taki. Pali mua i uka ma mu longototo a Vure, a vuhuna i uka ma mua e huriki e tuna.”
JOH 8:48 E huriki a Iuda ri koli a nita ne Isu ri ta maea, “I muholi ioe a bakovi o Samaria, i dili vomu a hanitu.”
JOH 8:49 E Isu i koli, i ta maea, “Iau, i uka ma i dili nau a hanitu. Iau a togoa e Tata, pali mua i uka ma mu togo iau.
JOH 8:50 Iau i uka ma a ngaru e huriki ri gi kavurike iau. Pali a Vure ia a mari ni pelekado a narone huriki. I ngaru e huriki ri gi kavurike iau.
JOH 8:51 A taki muholi mua, e rei a viri i muri mai a ngavagu, i uka ma ge mate.”
JOH 8:52 Na tahuna e huriki a Iuda ri longoa a ngavana ri kaha, ri ta maea, “Ngane mi lohoka vomu i dili vomu a hanitu! E Abraham i mate, e huriki a propet ri mate, pali ioe o taki ta a viri ge muri mai a ngavamu, i uka ma ge mate!
JOH 8:53 Ra ioe, o dagi hateka ne tamane mia e Abraham? E Abraham i mate, e huriki a propet ri mate. Pali ioe o luhoi ge ioe e rei ke?”
JOH 8:54 E Isu i koli, i ta maea, “Iau bara kavu­rike mule iau, a nikavurike nau a maki tavula. E Tata ra mu takia ta ia a Vure ne mua, ia ra viri i kavurike iau.
JOH 8:55 Iau a lohoka vona, pali mua i uka ma mu lohoka vona. Iau bara taki i uka ma a lohoka vona, bara marapusi manga mua, pali iau a lohoka vona, a longo­totoa a nitana.
JOH 8:56 E tamane mua e Abraham i pasimata ni matai a parava nau. Pali ngane i masia pali a parava iea, i vivi hateka.”
JOH 8:57 E huriki a Iuda ri hehe, ri ta maea, “A pida vomu i uka ma i ravulu lima ma, pali o taki ioe ta o masia pali e Abraham.”
JOH 8:58 E Isu i koli, i ta maea, “A taki muholi mua, muga ne Abraham ni poda, iau kunana ra iau!”
JOH 8:59 Na tahuna i ratea a ngava iea, lakea e huriki a Iuda i madihi a hatene ria, a vuhuna i taki ta ia a Vure. Lakea ri bole rike a kedo ta ri gi padi­matea. Pali e Isu i kapiloho ne ria, i laho tala na tabeke tara na roho na Vure i vano.
JOH 9:1 Na tahuna e Isu i laho lokovonga i masia a bakovi i kepa. A bakovi iea, na tahuna ni poda, i kepa liu.
JOH 9:2 Lakea e huriki a murimuri ri nanea, “Mari ni tovo, a naro hale ne rei i ratea a bakovi iea i kepa? A naro hale vona o a naro hale ne tamana e kinana?”
JOH 9:3 E Isu i koli, i ta maea, “A naro hale vona i uka ma i rata ia ge kepa. A naro hale ne tamana e kinana ranga, i uka ma i ratea ge kepa. I kepa a vuhuna a Vure i ngaru a leho vona ge bele kavakava.
JOH 9:4 Ngane si gi rata a leho na viri i rudu iau a valai, a vuhuna i tabana ni palala a hini. Pali i uka ma ge tabaka, bara i rodo a hini, lakea i uka tara viri ge leho.
JOH 9:5 Na tahuna a tabana ni made na malala, iau a nipara ne huriki a bakovi a ngatavine.”
JOH 9:6 E Isu i taki lobo a ngava nga, i kalupea a malala, i ratea i beta manga kota. Muri i bolea a malala, i ravua na matana bakovi.
JOH 9:7 Lakea i takia, “O vano o vahilolo a matamu na lomu e Silom.” Lakea a bakovi iea i vano i vahilolo a matana, lakea i matapara. Muri i hamule lakea na tanga vona.
JOH 9:8 E huriki a bakovi a ngatavine na tanga vona, e huriki ri lohoka vona ri vanana, ri ta maea, “Ra bakovi iea, ia kunana a viri i made lake, i nonongi a maki ne huriki?”
JOH 9:9 I ranga e huriki ri taki ta ia kunana, pali i ranga e huriki ri lavuni ri ta maea, “I uka, a bakovi i mata manga ia.” Pali ra bakovi iea i ta tora hateka, i ta maea, “Iau kunana!”
JOH 9:10 Lakea e huriki ri nanea, “Ni vakamatapara navai a matamu?”
JOH 9:11 A bakovi i koli, i ta maea, “A bakovi, a rane Isu, i kalupe tahoa a malala i ratea i beta, i ravua na matagu. Muri i rudu iau a vano a hilolo na lomu e Silom. A hilolo lobo, i malaharere a matagu, a matapara.”
JOH 9:12 Lakea ri nanea, “Pali avia ngane ra bakovi iea?” A bakovi i koli, i ta maea, “Ai, i uka ma lohoka vona.”
JOH 9:13 Muri e huriki ri tuli lakea ne huriki a Pariseo a bakovi i kepa muga.
JOH 9:14 A Parava Nimalo, ra parava e Isu i kalupe tahoa a malala, i vakamataparea a kepa.
JOH 9:15 Lakea e huriki a Pariseo ri nanea vona a matana i malaharere navai. Lakea i taki ria, i ta maea, “I ru a kokota na matagu, muri a hilolo, a matapara.”
JOH 9:16 Lakea e huriki a Pariseo ranga ri ta maea, “Ra bakovi i vakamataparea a bakovi iea, i uka ma i valai na Vure, a vuhuna i leho na Parava Nimalo.” Pali i ranga e huriki ri nana maea, “A bakovi hale ge rata navai a nivakasiri?” Lakea ri vahehe lae na ngava.
JOH 9:17 Muri ri nana tabua ra bakovi i kepa muga, ri ta maea, “Ioe kunana ra viri i vaka­matapara ioe. O luhoi navia ra bakovi iea?” Lakea a bakovi i koli, i ta maea, “Ia a propet.”
JOH 9:18 E huriki a Iuda i uka ma ri luhoi tora a nita na bakovi iea, ra i takia ta i kepa muga, muri e Isu i vakamataparea. Lakea ri rudu mai a ngava ne kinana e tamana, ru gu valai taro ne ria.
JOH 9:19 Na tahuna ru bele, e huriki a Pariseo ri nana rua, “Ra bakovi iea e tune marua? Ra bakovi iea kunana muru takia ta ni poda tala i kepa liu? Pali i navai ngane i matapara?”
JOH 9:20 Ru koli, ru ta maea, “Miri lohoka vona ia e tune maria, ni poda i kepa liu.
JOH 9:21 Pali a hini i matapara ngane, e rei i vaka­matapara ia, i uka ma miri lohoka vona. Mu nanea, ge koli a ninana ne mua. I uka ma ia a koma kiroko. Bara i koli a ninana ne mua.”
JOH 9:22 E tamana e kinana ru ta mavonga a vuhuna ru mangenge ne huriki a Iuda. Ru mangenge a vuhuna ri kado puru a ngavana viri ge taki e Isu ge ia e Kristo, bara ri tono talea liu na roho na vaponga.
JOH 9:23 Ru mangenge mavonga e tamana e kinana, lakea ru ta maea, “I uka ma ia a koma kiroko. Mu nanea.”
JOH 9:24 Ri gale vilia tabua a bakovi i kepa muga, ri takia, “O kavurikea a Vure. Mi lohoka vona a bakovi iea a bakovi hale.”
JOH 9:25 A bakovi i kepa muga i koli, i ta maea, “Iau i uka ma lohoka vona, ia a bakovi kamumu o ia a bakovi hale. A maki i taku a lohoka vona. Muga iau a kepa, pali ngane a matapara!”
JOH 9:26 Muri ri nanea, “A ra i ratea vomu? I vaka­matapara navai ioe?”
JOH 9:27 A bakovi i koli, i ta maea, “A taki mua pali, i uka ma mu longo mai a hini a taki. I navai mu ngaru ni longo tabu a ngava a taki muga pali? Mua ranga mu ngaru ge mua a murimuri vona?”
JOH 9:28 Lakea ri harogi pilea, ri ta maea, “Ioe a murimuri vona! Mia a murimuri ne Moses!
JOH 9:29 Mi lohoka vona a Vure i ta turane Moses, pali ra bakovi iea i uka ma mi lohoka vona i valai vai.”
JOH 9:30 A bakovi i koli, i ta maea, “I nangi tebi liu a nitane mua! I uka ma mu lohoka vona a hini i valai vona a bakovi iea, pali ia kunana i vakamatapara iau.
JOH 9:31 Si lohoka vona a Vure i uka ma i longo mai e huriki a bakovi hale. I longo mai kunana e huriki ri kavurike ia, ri ramai a ningaru vona.
JOH 9:32 I uka ma ni matai hosi tara viri ge vakamatapara a bakovi i kepa na tahuna ni poda tala.
JOH 9:33 Pali ra bakovi iea, a Vure i uka ma i rudua ge valai, i uka ma ge ratea tara maki mavonga.”
JOH 9:34 Lakea ri koli mule ri ta maea, “I navai o vara kolikoli mia? A naro hale i madoko vomu na tahuna ni poda tala.” Muri ri tono talea ge vano liu.
JOH 9:35 E Isu I longoa a bakovi iea ni tono tala liu, lakea i vano i masia, i takia, “Ioe o luhoi tora a Tuna Bakovi?”
JOH 9:36 A bakovi iea i koli, i ta maea, “Bakovi Dagi, e rei a bakovi iea? O vakasiri iau vona ga luhoi tora ia.”
JOH 9:37 Lakea e Isu i ta maea, “Ra bakovi iea o masia pali, ngane i ta turamu.”
JOH 9:38 Muri a bakovi i kavurikea e Isu, i ta maea, “Bakovi Dagi, a luhoi tora ioe.”
JOH 9:39 Lakea e Isu i ta maea, “A puru valai na malala ga pelekado e huriki. E huriki a kepa ri gi matapara, e huriki ri matapara ri gi kepa.”
JOH 9:40 E huriki a Pariseo ranga ri laho turana ri longoa a nitana, ri nanea, “I navai? O luhoi mia ranga mi kepa?”
JOH 9:41 E Isu i koli, i ta maea, “I uka ma mu kepa. Bara mu kepa, i uka ma mu gu tahoka a ngava na naro hale ne mua. Pali ngane mu taki ta mu matapara, mu tahoka a ngava.
JOH 10:1 “A taki muholi mua, a bakovi i uka ma i dili na logo na nure na sipsip, pali i page rike na nure na hini ranga, i dili, ra bakovi iea a panaho, a mari­kau.
JOH 10:2 Pali a tahona sipsip i dili kamumu na logo.
JOH 10:3 A tagari i tala purua a logo, lakea a tahona sipsip i dili, i gale a rana maka sipsip, ri longo mai ia. I gale ria na rane ria takutaku, muri i me tala ria.
JOH 10:4 Na tahuna i me tala lobo a maka sipsip vona, i muga ria. A maka sipsip ri muri maia, a vuhuna ri longo­kilalea a lohona.
JOH 10:5 A maka sipsip i uka ma ri gi muri mai a viri i uka ma ri burongi kilalea. I muholi ngi bara ri ha na tahuna i gale ria, a vuhuna i uka ma ri longokilalea a lohona.”
JOH 10:6 E Isu i ta vaka­kika ne ria, pali ria i uka ma ri longo­kilala a ngava i taki ne ria.
JOH 10:7 Lakea e Isu i taki tabu ria, i ta maea, “A taki muholi mua, iau a logo na nure na sipsip.
JOH 10:8 E huriki ri valai muga nau, ria a panaho, a marikau. Pali e huriki a sipsip i uka ma ri longo mai ria.
JOH 10:9 Iau a logo. E huriki ri dili valai nau bara ri mahuri. Bara ri dili pori na ningaru ne ria. Bara ri matavisi a maki ni kani.
JOH 10:10 A bakovi ni panaho i valai kunana ni panaho, ni ratapile, ni rabalaki a maka sipsip. Pali iau a valai ga habi a nimahuri. Ra nimahuri iea, i uka harena.
JOH 10:11 “Iau a matakari kamumu na sipsip. A matakari kamumu bara i mate ni mata­kari a maka sipsip vona.
JOH 10:12 A viri i leho ni gi kona i uka ma ia a tahona sipsip. Na tahuna i masia a kaugara i valai, bara i pe mule a maka sipsip, i ha ia. Muri a kaugara bara i valai, i lili viliha a kabuna sipsip.
JOH 10:13 Ra bakovi ni kona i ha, a vuhuna ia a bakovi i leho kunana ge bole a moni. I uka ma i luhoi a maka sipsip.
JOH 10:14 “Iau a matakari kamumu na sipsip, a maka sipsip nau ri lohoka nau. Iau tara a lohoka ne ria.
JOH 10:15 I manga a hini a lohoka ne Tata, e Tata tara i lohoka nau. Iau ga mate ni korimule a maka sipsip nau.
JOH 10:16 Iau a tahoka tabu ranga sipsip i uka ma ri dili ma na nure. Ria ranga ga bole dili ria na nure, ri gi longokilalea a lohogu, ge taku kunana a kabuna sipsip. A matakari ne ria tara ge taku kunana.
JOH 10:17 E Tata i ngaru iau, a vuhuna ga mate na murine huriki a sipsip. Muri ga mahuri mule tabu.
JOH 10:18 I uka tara viri ge vakamate iau. Iau kunana ga mate na ningaru nau. Iau a tahoka a nitora ni mate. Iau a tahoka a nitora ni pesi rike mule na matenga. E Tata i taki iau ga rata mavonga.”
JOH 10:19 Pali na ngava iea kunana e huriki a Iuda ri vagege lae tabu.
JOH 10:20 E huriki ala kupo ri ta maea, “I manga. I dili vona a hanitu. I navai si gi longo maia?”
JOH 10:21 Pali i ranga e huriki ri ta maea, “A nitana i uka ma i manga a nitana bakovi i dili vona a hanitu. Pali a hanitu, i kara ge vakamatapara a kepa?”
JOH 10:22 Na tahuna na malangia, ni rata a Habu na Nigamai o Ierusalem.
JOH 10:23 E Isu i lokovonga i laho pololilo na roho na Vure na tabeke ni gale a talele ne Solomon.
JOH 10:24 Lakea e huriki a Iuda ri vapopo haluia, ri nanea, “Ra mia, mi dava paru hosi. Garika go vakalongo mia ne vomu, ge ioe e rei muholi? Pali ioe ge ioe e Kristo, o ta kavakava ne mia ngane.”
JOH 10:25 E Isu i koli, i ta maea, “A taki mua pali. Pali i uka ma mu longo mai a ngavagu. A maka nivakasiri a rata na rane Tata ri vakasiri iau e rei.
JOH 10:26 Pali i uka ma mu luhoi tora iau, a vuhuna i uka ma mua a sipsip nau.
JOH 10:27 A sipsip nau ri longo­kilala a lohogu. Iau a lohoka ne ria, ri muri nau.
JOH 10:28 A habi ne ria a nima­huri vakaroro, i uka ma ri gi mate. I uka tara viri ge kini paru ria na limagu.
JOH 10:29 E Tata, ra i habi ria nau, i dagi hateka ne huriki lobo. I uka tara viri ge bole tala ria na limane Tata.
JOH 10:30 Maria e Tata miri palupulupu.”
JOH 10:31 Muri e huriki a Iuda ri bole rike tabu a maka kedo, ta ri gi padimatea.
JOH 10:32 Pali e Isu i taki ria, “A vakasiri mua vona pali a nivakasiri dagi i kupo ri valai ne Tata. Pali e rei a maka nivakasiri mu gu padi­mate iau vona?”
JOH 10:33 E huriki a Iuda ri koli, ri ta maea, “I uka ma mi gi padi ioe na kedo vona a maka nivakasiri ngi. Mi gi padi ioe a vuhuna o ta hale hateka na Vure. O taki ioe ta ioe a Vure. Pali ioe a bakovi tavula kunana.”
JOH 10:34 E Isu i koli, i ta maea, “A ngava ni here na vinara ne mua, a Vure i ta maea, ‘Mua e huriki a vure.’
JOH 10:35 Si lohoka vona, a ngava i taki a hinere, i uka ma i mapulo lae, i tabuli vakaroro. Re huriki a bakovi a Vure i habi a ngava vona ne ria, i taki ria, ta ria e huriki a vure.
JOH 10:36 Pali iau, e Tata i vulaki iau, i rudu iau a valai koea na malala. Pali i navai mu taki iau, ta a ta hale hateka na Vure na tahuna a taki iau, iau a Tuna Vure?
JOH 10:37 Bara iau i uka ma a rata a leho ne Tata, naha ni longo mai iau.
JOH 10:38 Pali bara iau a rata a leho ne Tata, pali mu koi ni luhoi iau, a ngaru mu gu luhoi a maka niva­kasiri a rata. Muri bara mu matakilalea e Tata i made turagu, iau a made turane Tata.”
JOH 10:39 I mavonga ri toni tabu ni lakavua, pali i uka ma ri lakavu visia.
JOH 10:40 Muri e Isu i hamule, i tulu poloa a naru e Iordan, i made na tabeke e Ioanes i vahilolo e huriki vona muga.
JOH 10:41 E huriki ri ala kupo ri valai vona ri ta maea, “E Ioanes i uka ma i rata ranga a nivakasiri, pali a ngava i taki virihi a bakovi iea vona i muholi.”
JOH 10:42 Na tahuna e Isu i made na tanga iea, i kupo e huriki ri luhoi torea.
JOH 11:1 Na parava tara a bakovi o Betani, a rana e Lasarus, i giloa. E kura­bana e Maria e Marta, rua ranga ru made vonga o Betani.
JOH 11:2 Re Maria, ia kunana ra viri i biri a mangisipa na vahane Bakovi Dagi, muri i ravua na vuna. E kurabana, e Lasarus, i giloa.
JOH 11:3 Ra ngatavine nga ru talo rike a ngava ne Isu, ru ta maea, “Bakovi Dagi, ra viri o ngaru hatekea, ngane i giloa.”
JOH 11:4 Na tahuna i longoa a velengana, i ta maea, “Ra gilanga iea i uka ma ge mate vona. A leho na gilanga iea, ge vakasiri a nitora na Vure, lakea e huriki ri gi kavurikea. Muri e huriki ri gi kavurike iau, a Tuna Vure.”
JOH 11:5 E Isu i ngaru hateka na hatena e Marta, e Maria, e Lasarus.
JOH 11:6 Pali na tahuna i longo a velengane Lasarus i giloa, i uka ma i vano maia. I made tabu vonga na parava i rua.
JOH 11:7 Muri i taki e huriki a murimuri vona, i ta maea, “Si hamule lakea na tabeke ne Iudea.”
JOH 11:8 Lakea e huriki a murimuri vona ri takia, “Mari ni tovo, rira kunana e huriki a Iuda ri toni ni padimate ioe na kedo, pali ngane o ngaru ni hamule lokovonga tabu?”
JOH 11:9 E Isu i koli, i ta maea, “Na parava lobo a haro i rike na hatelanga, i rolo na malunga. A viri i laho na hini palala i uka ma ge boru, a vuhuna a nipara na malala i vakapalala a dala vona.
JOH 11:10 Pali na tahuna i laho na rodo bara i boru, a vuhuna i uka nipara.”
JOH 11:11 E Isu i taki lobo a ngava nga lakea i taki ria tabu, i ta maea, “E turane hita e Lasa­rus i mahita. Pali ngane ga loko­vonga ga vangoa.”
JOH 11:12 E huriki a murimuri vona ri koli ri ta maea, “Bakovi Dagi, i kamumu i mahita. A gilanga vona bara i lobo.”
JOH 11:13 E Isu i ta vaka­kika vona e Lasarus i mate. Pali e huriki a murimuri vona ri luhoi ta i mahita kunana.
JOH 11:14 Muri i ta kavakava, i ta maea, “E Lasarus i mate.
JOH 11:15 Iau a luhoi mua, lakea i uka ma a vano ga made turana. A rata mavonga, mu gu luhoi tora iau. Pali ngane si gi lokovonga vona.”
JOH 11:16 Muri e Tomas, a rana tara e Didimas, i taki e huriki a murimuri, i ta maea, “Hita ranga, si lokovonga si mate turana.”
JOH 11:17 Na tahuna e Isu i bele, ni vakalongo vona a podane Lasarus i tabuli pali na babe na parava i va.
JOH 11:18 A tanga e Betani i tabukoi o Ierusalem. A maravana a kilo­mita i tolu,
JOH 11:19 lakea i kupo e huriki a Iuda ri bele mai e Maria e Marta ri gi luke rua, a vuhuna i mate pali e kura­bane rua.
JOH 11:20 Na tahuna e Marta i longoa e Isu i valai, i pagitala na ruma ge taguia e Isu. Pali e Maria i made kunana.
JOH 11:21 Na tahuna e Marta i masia e Isu, i takia, i ta maea, “Bakovi Dagi, ioe bara o made koea, e kurabagu i uka ma ge mate.
JOH 11:22 Pali a lohoka vona a Vure bara i rata a maki o takia vona.”
JOH 11:23 Lakea e Isu i takia, “E kurabamu bara i mahuri mule tabu.”
JOH 11:24 E Marta i koli, i ta maea, “A lohoka vona bara i mahuri mule tabu na nilobona parava, na tahuna a Vure ge vakamahuri mule e huriki.”
JOH 11:25 Lakea e Isu i takia, “Iau a viri a vaka­mahuri mule e huriki, a habi a nima­huri ne huriki. A viri i luhoi tora iau i mate, bara i mahuri tabu.
JOH 11:26 Na tahuna e huriki ri mahuri ri luhoi tora iau, i uka ma ri gi mate. Ra ngava nga, o luhoi tora, o i uka?”
JOH 11:27 E Marta i koli, i ta maea, “Bakovi Dagi, a longo a ngava ngi. A luhoi ioe e Kristo, a Tuna Vure ni taki ta ge valai na malala.”
JOH 11:28 E Marta i taki loboa a ngava iea i hamule. I tulia e tarina e Maria, ru pesi tala, i takia, “A mari ni tovo i valai pali, i nana vomu.”
JOH 11:29 Na tahuna e Maria i longoa, i malaviriri kunana i pesi rike, i lakea mai e Isu.
JOH 11:30 E Isu i uka ma i bele ma na tanga. I tabana i made na hini i taguia e Marta vona.
JOH 11:31 Na tahuna e huriki a Iuda ra ri lukea e Maria pololilo na ruma, ri masia i pesi rike hari hari, i pagitala, ri muri maia. Ri luhoi ta ge lakea na hini ni vakatabuli a podane kurabana, ge tangi vonga.
JOH 11:32 Na tahuna e Maria i bele vona a hini i made vona e Isu, i lolu puru tabukoi na vahana i takia, “Bakovi Dagi, ioe bara o made koea, e kurabagu i uka ma ge mate.”
JOH 11:33 Na tahuna e Isu i matai e Marta, e huriki a Iuda, ri valai turana ri tangi, i dodo ria, i rakudu a hatena a hini ri tangi hateka.
JOH 11:34 Lakea e Isu i nana ria, “I vai a hini mu vakatabuli a podana vona?” Ri koli ri ta maea, “Bakovi Dagi, o valai o masia.”
JOH 11:35 Lakea e Isu i tangi.
JOH 11:36 Na tahuna e huriki a Iuda ri masia i tangi, ri ta maea, “Masia, i ngaru hatekea ra bakovi iea!”
JOH 11:37 Pali i ranga e huriki ri ta maea, “I vaka­matapara a viri i kepa, pali i navai i uka ma i koria ra bakovi iea, nahea ge mate?”
JOH 11:38 E Isu i dodo ria, i rakudu a hatena na hini ri tangi hateka. I vano i bele na lovo. Ra lovo iea a babe, ni tukari na kedo a matana.
JOH 11:39 E Isu i taki ria, i ta maea, “Mu kule talea a kedo.” Pali e Marta, re kurabana i mate, i takia, i ta maea, “Bakovi Dagi, i mavuru pali, a vuhuna i tabuli na parava i va pali.”
JOH 11:40 Lakea e Isu i takia, “Iau a taki ioe pali. Ioe bara o luhoi tora, bara o masia a nitora na Vure.”
JOH 11:41 Muri ri kule talea a kedo. Lakea e Isu i mata rike na hunu, i ta maea, “Tata, a kavurike ioe a vuhuna o longo iau pali.
JOH 11:42 A lohoka vomu na parava vakaroro o longo iau. Pali ngane a taki ioe na ngava nga, ge longo e huriki ri pesi tabukoi koea, ri gi luhoi ioe kunana o rudu iau a valai.”
JOH 11:43 E Isu i taki lobo a ngava nga, lakea i gale tala dagi, i ta maea, “O Lasarus, o pesirike, o pori valai!”
JOH 11:44 Lakea a bakovi mate i pesi rike i pori valai. A kakaina, a gina, i tabana ni kae na lavalava. Lakea e Isu i taki ria, i ta maea, “Mu vuka tala a lavalava ni bunu ia vona, ge vano.”
JOH 11:45 I kupo e huriki a Iuda ri valai ni lukea e Maria. Na tahuna ri masia a maki i ratea e Isu, ri luhoi tora ia ngane.
JOH 11:46 Pali i ranga e huriki ri lakea ne huriki a Pariseo ri vakalongo ria vona a maki i ratea.
JOH 11:47 Muri e huriki a prister dagi, e huriki a Pariseo ri gale palupu e huriki a tara na vaponga, ri vanana, ri ta maea, “A ra si gi ratea ngane? Ra bakovi iea, i rata a maka nivakasiri i kupo.
JOH 11:48 Hita bara si mata taroa ge rata liuliu lokovonga, e huriki lobo bara ri luhoi tora ia. Muri e huriki a Rom bara ri valai, ri ratapilea a roho na Vure, ri tahona polo vona a tanga ne hita.”
JOH 11:49 Pali a viri tara ne ria, a rana e Kaipas, a prister i muga ne huriki a prister lobo na pida iea, i ta rike, i ta maea, “Mua i uka ma mu lohoka vona tara maki!
JOH 11:50 I uka ma mu lohoka vona? I uka ma ge huriki lobo ri gi mate. I kamumu hateka a bakovi ala taku kunana ge mate na murine huriki lobo.”
JOH 11:51 Lakea i vakatubu na parava iea, ri varodo a ngava ri gi rabalakia e Isu. E Kaipas i uka ma i takia na niluhoi vona ra ngava iea. I takia, a vuhuna ia a prister i muga ne huriki a prister lobo na pida iea, pali i taki muga ne Isu ge mate na murine huriki a Iuda. Pali i uka ma e huriki a Iuda kunana, ge mate ge vakalipopo e huriki a tuna Vure ra ri made viliha na maka tanga lobo, ri gi made palupu ge ria a kabu i taku.
JOH 11:54 Lakea e Isu i uka ma i laho kavakava tabu na matane huriki a Iuda. I lakea na tanga e Epraim, tabukoi na robo, i made vonga turane huriki a murimuri vona.
JOH 11:55 Na tahuna a habu ne huriki a Iuda i tabukoi, a Habu na Nipagepolo, e huriki ala kupo na tanga viliha vonga ri sike o Ierusalem, ri gi rata a leho ni rata ria ri gi malamala na matana Vure muga na Habu na Nipagepolo.
JOH 11:56 Ri matakana mavongea e Isu. Na tahuna ri pesi pololilo na tabeke na roho na Vure ri vanana, “Mu luhoi navai? A bakovi iea ge valai na habu o ge uka?”
JOH 11:57 Pali e huriki a prister dagi, a Pariseo ri vakuku e huriki ne e rei a viri ge matavisia e Isu, ge vakalongo malaviriri ria, ri gi lakavua.
JOH 12:1 A parava i polotara muga na Habu na Nipagepolo, e Isu i luve o Betani, ra tanga ne Lasarus, a bakovi i vakamahuri mulea na matenga.
JOH 12:2 Lakea e huriki vonga ri taguia e Isu, ri rata a habu vona. E Marta i veru a maki ni kani, pali e Lasarus i made turane huriki na dede ri kani turane Isu.
JOH 12:3 Lakea e Maria i bolea a kalavana lita na mangisipa, ni rata na vutuna kai a nard, a mapana i dagi hateka. I guru langa na vahane Isu, muri i ravu na vuna. Lakea a mangina mangisipa i huli hateka pololilo na ruma.
JOH 12:4 Pali e Iudas Iskariot, a turane huriki a murimuri, ra bakovi ta ge habi e Isu na limana pile, i koi, i ta maea,
JOH 12:5 “A mangisipa iea i dagi hateka a mapana. A mapana i manga a mapana bakovi i leho na pida i taku. I navai i uka ma o bolea a mapana mangisipa iea, go habia ne huriki a matasia?”
JOH 12:6 E Iudas i takia ra ngava iea a vuhuna ia a panaho. I uka ma i luhoi e huriki a matasia. A leho vona ni matakari a tava, bara i panaho mule ranga moni.
JOH 12:7 E Isu i koli, i ta maea, “Naha ni takia. I kamumu hateka a hini i rata purua a mangisipa, ge davea ra parava bara ni tanu iau vona.
JOH 12:8 E huriki a matasia bara ri made turane mua vakaroro, pali iau i uka ma ga made turane mua vakaroro.”
JOH 12:9 E huriki a Iuda ri longoa e Isu i made vonga, lakea ri valai maia. Pali i uka ma ri valai ri gi matai e Isu kunana. A viri ri ngaru ni masia e Lasarus, ra bakovi e Isu i vakamahuri mulea na matenga.
JOH 12:10 Lakea e huriki a prister dagi ri varodo tabu a ngava ne Lasarus, ia tara ri gi rabalakia,
JOH 12:11 a vuhuna e huriki a Iuda ri longoa a velengana, lakea ri luhoi torea e Isu.
JOH 12:12 Na parava muri e huriki ri valai na habu ri longoa e Isu ge lakea o Ierusalem.
JOH 12:13 Lakea ri bole a maka pagana rou, ri vano ri gi taguia e Isu, ri gale maea, “Si gi kavurikea a Vure! A Vure ge vakabagetua a viri i valai na rane Bakovi Dagi! Ni gi vakabagetu a hariki ne Israel!”
JOH 12:14 E Isu i matavisia tara tuna donki, i made langa vona. I ramai kunana a ngava ni here puru hosi na Hinere i ta maea,
JOH 12:15 “Mua o huriki a bakovi o Sion naha ni mangenge. Mu masia a hariki ne mua i valai ngane, i rike na tuna donki.”
JOH 12:16 Muga e huriki a murimuri i uka ma ri matakilala a maka maki nga. Pali muri, na tahuna e Isu i mahuri mule na matenga, a Vure i vakabagetua, ri matakilaka vona ngane a ngava ri taki ne Isu, a maki ri ratea ne Isu, ni here puru hosi virihi mai ia.
JOH 12:17 E huriki ri turana na tahuna i gale tala e Lasarus na lovo, i vakamahuri mulea na matenga, i uka ma ri malo ni vakalongo lae e huriki vona a maki ri masia.
JOH 12:18 E huriki ala kupo ri longoa i rata a nivakasiri iea, ri lokovonga ri tagui ia.
JOH 12:19 Lakea e huriki a Pariseo ri vata, ri ta maea, “Mu masia, ngane bara i uka tara maki si gi ratea. I mata manga e huriki lobo ri muri vona ngane!”
JOH 12:20 E huriki a bakovi na tanga e Gris ranga ri turana e huriki ri sike na habu ne vona ni kavurikea a Vure.
JOH 12:21 Ri valai ne Pilip, ra bakovi o Betsaida na tabeke ne Galili, ri takia, “Bakovi dagi, mi ngaru ni matai e Isu.”
JOH 12:22 Lakea e Pilip i vano i takia e Andreas. Muri ru vano ru vakalongoa e Isu.
JOH 12:23 E Isu i koli, i ta maea, “Ngane i tabukoi a Vure ge vakabagetu iau, a Tuna Bakovi.
JOH 12:24 A taki muholi mua, na tahuna a bakovi i varo a vutuna vit, i mate a vutuna vit, i gaga, i koru rike, i vakabele a kanena i kupo. Pali a vutuna vit i uka ma ni gi varo, i uka ma ge vakabele tabu a kanena.
JOH 12:25 E rei a viri i ngaru hateka a nimadena, bara i mate. Pali e rei a viri i marikoi a nimadena koea na malala, bara i mahuri vakaroro muri ma.
JOH 12:26 E huriki ri ngaru ge ria a vora nau, ri gi muri nau. Lakea bara ri made turagu na hini ga made vona. E Tata bara i kavurike e huriki ri rata a leho nau.”
JOH 12:27 E Isu i ta rike tabu, i ta maea, “Ngane i mava a hategu, pali ga ta navai? Ga ta maea, ‘O Tata, o korimule iau na nimadihi iea?’ Pali i uka ma ga ta mavonga a vuhuna iau a valai ga bolea a nimadihi iea.
JOH 12:28 O Tata, ge bagetu a ramu.” Muri a lohona viri tara i ta valai na hunu i ta maea, “Iau, a ragu ni vakabagetu pali. Pali ga ratea ge bagetu tabu.”
JOH 12:29 E huriki vonga ri longoa ri taki ta a hini i kururu. Pali i ranga e huriki ri taki ta a agelo i ta turana.
JOH 12:30 Lakea e Isu i taki ria, i ta maea, “Ra lohona viri mu longoa, i uka ma ne vona ni tuhori iau. A ngava nga ne vona ni tuhori mua.
JOH 12:31 Ngane a Vure ge pelekado e huriki, ge lili talea a matakari na malala.
JOH 12:32 Pali iau, na tahuna ni gi bole rike iau, ga tuli valai nau e huriki lobo.”
JOH 12:33 I taki a ngava nga, ta ge vakalongo a naro ge mate vona.
JOH 12:34 Lakea ri ta rike, ri ta maea, “Mi gia na vinara, e Kristo bara i valai ge made vakaroro. Pali i navai o ta maea ke, ‘A Tuna Bakovi ni gi bole rike?’ E rei ra Tuna Bakovi iea?”
JOH 12:35 Muri e Isu i taki ria, i ta maea, “Mua bara mu tahoka a nipara na parava popote kunana. Mu laho na tahuna mu tahoka a nipara, ma ge puru a uvo. A bakovi i laho na uvo i uka ma i lohoka vona a hini ge lakea vona.
JOH 12:36 Ngane mu tahoka a nipara. Mu luhoi tora a nipara na tahuna i tabuli, ge mua e huriki a tuna nipara.” Na tahuna i vakaloboa a nitana, i pe ria i kapiloho ne ria.
JOH 12:37 E huriki a Iuda ri matai a maka nivakasiri e Isu i rata, pali i uka ma ri luhoi torea,
JOH 12:38 ge bele muholi a nitana propet e Isaia i here puru hosi, i ta maea, “Bakovi Dagi e rei i longo mai a ngava mi taki ria vona? E Bakovi Dagi i vakasiri ne rei a nitora vona?”
JOH 12:39 Lakea ri keri ni luhoi torea, a vuhuna e Isaia a propet i here tabu, i ta maea,
JOH 12:40 “I vakakepa a matane ria, I vakamalupa a hatene ria, i uka ma ri gi matakilaka na maki, i uka ma ge palala a gine ria, i uka ma ri gi pulo a vilone ria, lakea i uka ma ga vakamahuri ria.”
JOH 12:41 E Isaia i ratea a ngava iea, a vuhuna i masia a bagetuanga ne Isu, lakea i vakalongo e huriki vona.
JOH 12:42 Pali na tahuna iea kunana e huriki ala kupo ri luhoi torea e Isu. I ranga a matakari, ria ranga ri luhoi torea e Isu. Pali ri mangenge ne huriki a Pariseo, lakea i uka ma ri vakalongo a niluhoi ne ria, a vuhuna ri mangenge, ma ni gi tono tala liu ria na roho na vaponga.
JOH 12:43 Ri ngarua a Vure ge kavurike ria, pali ri ngaru hateka e huriki a bakovi ri gi kavurike ria.
JOH 12:44 Muri e Isu i gale dagi, i ta maea, “Na tahuna a viri i luhoi tora iau, i uka ma i luhoi tora iau kunana, i luhoi torea a viri i rudu iau a valai.
JOH 12:45 Na tahuna i matai iau, i masia ra viri i rudu iau a valai.
JOH 12:46 A puru valai na malala a manga a nipara. E rei a viri i luhoi tora iau i uka ma ge made na uvo.
JOH 12:47 “A bakovi i longoa a ngavagu, pali i uka ma i muri maia, iau i uka ma ga pelekadoa. A vuhuna a valai, i uka ma ga pelekado e huriki. A valai ga korimule e huriki na malala.
JOH 12:48 I tahoka a mari ni pelekado ge pelekado e huriki ri marikoi iau, i uka ma ri ngaru a nitagu. Ra nitagu kunana bara i pelekado ria na nilobona malala,
JOH 12:49 a vuhuna iau i uka ma a taki a ngava na niluhoi nau kunana. E Tata i rudu iau a valai, i habi nau a vinara, a ngava ga rata navai, ga taki navai.
JOH 12:50 A lohoka vona a vinara ne Tata i vakasiri a nimahuri vakaroro. I mavonga kunana a ngava a taki, ra ngava iea kunana i vakuku iau vona e Tata, ga vakalongo mua vona.”
JOH 13:1 Kuduvi a Habu na Nipagepolo ge vakatubu. E Isu i lohoka vona a parava i valai pali ge pe a malala, ge hamule sike ne Tamana. I ngaru hateka e huriki a viri vona ri made na malala, ngane ta ge vakasiri muholi ria i ngaru hateka ria.
JOH 13:2 Na malunga ngane ri kakani. E Satan i habi pali a niluhoi ne Iudas Iskariot, e tune Simon, ge habi e Isu na limane huriki a pile.
JOH 13:3 E Isu i lohoka vona e Tamana i ru a maki lobo na limana. I lohoka vona ia i valai na Vure, pali ngane ta ge hamule lakea tabu na Vure.
JOH 13:4 Lakea i pesi rike, i kali talea a varakia vona, i bolea a lavalava na nihilolo, i rea halui a kipona.
JOH 13:5 Muri i guru puru na tavila a naru, i vakatubu ni vahilolo a vahane huriki a murimuri vona. Muri i ravu ria na lavalava i rea vona.
JOH 13:6 Na tahuna e Isu ta ge vahilolo a vahane Simon Petrus, lakea e Petrus i nanea, “Bakovi Dagi, go vahilolo a vahagu?”
JOH 13:7 E Isu i koli, i ta maea, “I uka ma o lohoka vona a maki a ratea. Muri bara o lohoka vona.”
JOH 13:8 Pali e Petrus i hehe, i ta maea, “Naha ni vahilolo a vahagu.” Pali e Isu i koli, i ta maea, “Iau i uka ma ga vahilolo a vahamu, i uka ma go made turagu.”
JOH 13:9 Lakea e Simon Petrus i koli, “Pali o Bakovi Dagi, i uka ma ga a vahagu kunana, a limagu, a gigu ranga o vahilolo.”
JOH 13:10 Lakea e Isu i koli, i ta maea, “A bakovi i hilolo pali i uka ma ge hilolo tabu. Bara ni vahilolo kunana a vahana, a vuhuna a kakaina lobo i matapado pali. Mua mu matapado, pali i uka ma i mua lobo.”
JOH 13:11 E Isu i ta maea, a vuhuna i lohoka vona a viri bara i habi ia na limane huriki a bakovi hale, ra i mavonga i taki i uka ma e huriki lobo ri matapado.
JOH 13:12 Na tahuna i vahilolo lobo a vahane ria, i rodo mulea a varakia vona, i hamule mai a murina. Lakea e Isu i nana ria, i ta maea, “A naro a ratea ne mua, mu matakilalea, o i uka?
JOH 13:13 I kamumu mu gale iau ‘E Bakovi Dagi’, ‘A mari ni tovo’ a vuhuna i muholi a ngava ngi.
JOH 13:14 Iau a Bakovi Dagi ne mua, a mari ni tovo ne mua, a vahilolo pali a vahane mua. Mua ranga, ngane a ngaru mu gu made palupu, mu vahilolo a vahane mua.
JOH 13:15 A vakasiri mua pali, mu rata manga a hini a rata ne mua.
JOH 13:16 A taki muholi mua, a vora i uka ma ge muga na matakari vona. A vinuru tara i uka ma ge matakari a viri i rudua.
JOH 13:17 Ngane mu lohoka vona a ngava nga. Mua bara mu longo mai, bara mu vivi.
JOH 13:18 “Iau i uka ma a taki mua lobo. A lohoka vona e huriki a bakovi a vulaki. Pali a maki ta ge bele, ge bele muholi a Hinere, i ta maea, ‘A viri miri vakani a bret, ia kunana a viri bara i rata hale iau.’
JOH 13:19 “A taki mua vona muga, lakea na tahuna ge bele a maki iea, bara mu luhoi tora iau, ‘Iau kunana, ra Iau.’
JOH 13:20 A taki muholi mua, e rei a viri i tagui e huriki a rudu, i manga i tagui iau. E rei a viri i tagui iau, i manga i tagui a viri i rudu iau a valai.”
JOH 13:21 Na tahuna e Isu i taki lobo a ngava nga, i lege a lohona, lakea i vakalongo ria, i ta maea, “A taki muholi mua, a viri tara ne mua bara i habi iau na limane huriki a pile.”
JOH 13:22 Lakea e huriki a murimuri ri vamatanono. Ri ngapa vona a ngava iea, e rei muholi a viri i takia?
JOH 13:23 A viri tara ne ria, ra murimuri e Isu i ngaru hatekea, i made tabukoi vona.
JOH 13:24 Lakea e Simon Petrus i longo rike lokovonga, i takia, “O nanea. E rei muholi a viri i takia?”
JOH 13:25 Lakea i doga rike ne Isu, i nanea, “Bakovi Dagi, e rei ge rata mavonga?”
JOH 13:26 Lakea e Isu i koli, i ta maea, “Ra viri ga lutua a bret, ga habia vona. Ia kunana.” Muri i lutua a bret i habia ne Iudas Iskariot, e tune Simon.
JOH 13:27 Na tahuna e Iudas i bolea a bret, lakea e Satan i dili vona. Lakea e Isu i takia, “A ra maki ta go ratea, o vano o rata malaviriria.”
JOH 13:28 Pali e huriki ri kakani i uka ma ri lohoka vona a ngava e Isu i taki virihia e Iudas vona.
JOH 13:29 I ranga e huriki ri luhoi e Isu i takia e Iudas ge kona a maki na habu, o ge habi a maki ranga ne huriki a matasia, a vuhuna i matakari a tava ne ria.
JOH 13:30 E Iudas i bolea a bret e Isu i habia vona, lakea i malaviriri kunana i pagitala. I hapu ngane a rodo.
JOH 13:31 Na tahuna e Iudas i vano pali, e Isu i ta maea, “Ngane a Tuna Bakovi i bole a bagetuanga vona, lakea mu masia vona a bagetuanga na Vure.
JOH 13:32 Na tahuna mu masia ne Isu a bagetuanga na Vure, ra bagetuanga iea kunana i vakasiria ne Tuna. Lakea a Vure bara i malaviriri kunana i vakabagetua.
JOH 13:33 “Mua mu manga e huriki e tugu, iau i uka ma ga made tabaka turane mua. Bara mu matakana iau. Pali i manga a ngava a taki ne huriki a Iuda, ngane a taki mua vona tabu. A hini ga lakea vona, bara mu keri ni lakea vona.
JOH 13:34 “A vinara karaba a habi ne mua i maea, mu vangaru, i manga iau a ngaru mua.
JOH 13:35 Mua bara mu rata mavonga, e huriki lobo bara ri matakilala mua, mua e huriki a murimuri nau.”
JOH 13:36 Lakea e Simon Petrus i nanea, “Bakovi Dagi, go lokovai?” E Isu i koli, i ta maea, “A hini ga lakea vona, ngane bara o keri ni valai vona. Pali muri ma bara o muri valai.”
JOH 13:37 E Petrus i nana tabu, “Bakovi Dagi, i navai ga keri ni muri mai ioe ngane? Bara pesi turamu, a mate turamu.”
JOH 13:38 Muri e Isu i koli, i ta maea, “Ioe go mate muholi nau? A taki muholi ioe, muga na kureko ge tangi, bara o nana rovi iau balaka tolu!”
JOH 14:1 “Naha ni loholege lae na hatene mua. Mu luhoi torea a Vure, mu luhoi tora iau.
JOH 14:2 A roho ne Tata i ngavaka. Iau ga muga ga pelekado puru a murine mua. Bara i uka, i uka ma ga takia mua vona a ngava iea.
JOH 14:3 Iau ga muga, ga pelekado puru a murine mua. Muri bara hamule valai tabu, a tuli mua, si gi made palupu.
JOH 14:4 Mu lohoka vona pali a dala na tanga ga lakea vona.”
JOH 14:5 Lakea e Tomas i nanea e Isu, “Bakovi Dagi, i uka ma mi lohoka vona a hini go lakea vona. Mi gi lohoka navai na dala?”
JOH 14:6 E Isu i koli, i ta maea, “Iau a dala, iau a nita muholi, iau a nimahuri. E huriki ri ngaru ni lakea ne Tata ri gi valai taro nau.
JOH 14:7 Mua bara mu lohoka muholi nau, e Tata tara bara mu lohoka vona. Ngane mu vakatubu ni lohoka vona, a vuhuna mu masia pali.”
JOH 14:8 Lakea e Pilip i ta maea, “Bakovi Dagi, o vakasiri mia vona e Tamamu, lakea i uka ma mi gi nana tabu.”
JOH 14:9 E Isu i koli, i ta maea, “Pilip, iau a made tabaka pali turane mua, pali i navai i uka ma o lohoka nau? E huriki ri matai iau, ri masia e Tata. I navai a hini o ta maea, ‘O vakasiri mia vona e Tamamu.’
JOH 14:10 Ra ioe, o luhoi iau na tahuna a taki maria e Tata miri manga a viri ala taku, o i uka? A ngava a taki mua vona i uka ma a ngavagu. A ngavane Tata. E Tata i made turagu, i rata a leho vona.
JOH 14:11 Mu luhoi iau na tahuna a taki maria e Tata, miri manga a viri ala taku. Pali mua bara mu koi ni luhoi iau, a ngaru mu gu matai a maka nivakasiri a rata, lakea mu gu luhoi tora iau.
JOH 14:12 A taki muholi mua, e huriki ri luhoi tora iau bara ri rata a maka maki iau a rata. Bara ri rata a maki dagi hateka na maki a rata pali, a vuhuna iau bara hamule lakea ne Tata.
JOH 14:13 A ra maki mu nana iau vona na ragu, bara rata. Na naro iea kunana, iau a Tuna Vure, ga ratea a rane Tata ge bele dagi.
JOH 14:14 A ra maki mu nana iau vona na ragu, bara rata.
JOH 14:15 Mua bara mu ngaru iau, bara mu muri mai a ngavagu.
JOH 14:16 “Ga takia e Tata ge rudu vilia ne mua a viri tara ge tuhori mua, ge made turane mua na parava vakaroro.
JOH 14:17 Ra viri ge tuhori mua, a Hanu na Nita Muholi. E huriki na malala ri keri ni bolea, a vuhuna i uka ma ri masia, i uka ma ri lohoka vona. Pali mua mu lohoka vona, a vuhuna i made turane mua. Muri ge made pololilo ne mua.
JOH 14:18 “Iau i uka ma ga pe mua mu gu manga a duku. Bara hamule valai ne mua.
JOH 14:19 I uka ma ge tabaka, e huriki na malala i uka ma ri gi matai iau, pali mua bara mu matai iau tabu. Mua bara mu mahuri mule a vuhuna iau a mahuri.
JOH 14:20 Na parava iea bara mu lohoka vona e Tata i made turagu, mua mu made turagu, iau a made turane mua.
JOH 14:21 E rei a viri i longo mai a nitagu, i ramai, ia a viri i ngaru iau. A viri i ngaru iau, e Tata tara i ngarua, iau tara a ngarua, bara vakasiri iau vona.”
JOH 14:22 Muri e Iudas (i uka ma e Iudas Iskariot) i nanea, “Bakovi Dagi, i navai go vakasiri ioe ne mia, pali o koi ni vakasiri ioe ne huriki na malala?”
JOH 14:23 E Isu i koli, i ta maea, “E rei a viri i ngaru iau, bara i longo mai a ngavagu. E Tata bara i ngarua, lakea bara miri bele vona, miri made turana.
JOH 14:24 A viri i uka ma i ngaru iau, i uka ma i longo mai a ngavagu. Ra ngava mu longo i uka ma a ngavagu. A ngavane Tata, ra i rudu iau a valai.
JOH 14:25 “A ngava nga a taki na tahuna a tabana ni made turane mua.
JOH 14:26 Pali na tahuna e Tata ge rudu vilia na ragu a viri ge tuhori mua, ra Hanu Kiripiripi, bara i tovo mua vona a maki lobo, ge rata mua, mu longovisi tabu a maka maki a taki mua vona pali.
JOH 14:27 Iau a habi a nivalemu ne mua. A nivalemu nau a habi ne mua. I uka ma a habi a nivalemu ne mua ge manga e huriki na malala ri habi. Naha ni loho lege lae, naha ni mangenge.
JOH 14:28 “Mu longo pali iau a ta maea, ‘Iau ga vano, muri ga hamule valai tabu.’ Mua bara mu ngaru iau, bara mu vivi vona a hini iau ga hamule lakea ne Tata, a vuhuna i dagi hateka nau.
JOH 14:29 A taki muga mua vona ngane a maka ngava nga, muri bara ri bele. I mavonga kunana na tahuna a maka maki nga ri bele, bara mu luhoi tora iau.
JOH 14:30 I uka ma ga ta vilihui lokovonga, a vuhuna a matakari na malala ta ge valai ngane. Pali i uka nitora ge ratea nau.
JOH 14:31 Pali iau a muri mai a ngavane Tata i taki iau ga ratea, lakea e huriki lobo ri gi matakilala iau a ngaru hatekea e Tata. Mu valai ngane, si vano.”
JOH 15:1 “Iau kunana a manga a kai a vain muholi. E Tata i manga a mari ni leho na hania na vain.
JOH 15:2 I paku vuroki a maka rahagu ri uka a kanene ria. Pali a rahagu ranga ri tahoka kanena, bara i kisi kamumu ria, ri vua hateka.
JOH 15:3 Mua mu kabakaba pali na matana Vure, a vuhuna mu longo mai a ngava a taki mua vona.
JOH 15:4 Mu rihi iau i manga iau a rihi mua. A rahana vain i tuvu tala na bokona kai, a vain bara i tahoka a kanena. Pali a rahana vain ni tolo tala na bokona kai a vain, i uka ma ge tahoka a kanena. Mua ranga, na tahuna i uka ma mu rihi iau, bara i uka kanene mua.
JOH 15:5 “Iau kunana a bokona kai a vain, pali mua a rahana. E huriki ri rihi iau, iau tara a rihi ria, ria kunana ri gi vakabele a kanene ria ge kupo. E huriki i uka ma ri rihi iau, bara ri keri ni rata a maki.
JOH 15:6 Na tahuna a viri i uka ma i rihi iau, i manga a rahana kai ni tolo vuroki ge malai. Muri bara ni voro rike na kanono, ri nono.
JOH 15:7 Na tahuna mu rihi iau, mu muri mai a ngavagu, bara mu nanea e Tata na ningaru ne mua, bara i longo.
JOH 15:8 Na tahuna mu vakabele a kanene mua i kupo mu vakasiri mua, mua e huriki a murimuri nau, lakea mu ratea a rane Tata i dagi na malala.
JOH 15:9 “Iau a ngaru mua i manga e Tata i ngaru iau. Ngane a ngaru hateka mua mu gu rihi iau, ga ngaru mua.
JOH 15:10 Mua bara mu longototo a ngavagu, bara ngaru mua, i manga kunana a longototo a ngavane Tata, lakea i ngaru iau.
JOH 15:11 A taki mua vona a ngava iea, mu gu vivi manga iau a vivi, bara mu vivi liu.
JOH 15:12 A vinara nau i maea: Mu vangaru i manga iau a ngaru mua.
JOH 15:13 A viri i ngaru hateka e huriki a turana, lakea i mate na murine ria, a ningaru vona i dagi hateka.
JOH 15:14 Mua bara mu muri mai a vinara nau, bara mua e huriki a turagu.
JOH 15:15 Ngane i uka ma ga gale mua tabu ge mua a vora, a vuhuna a vora i uka ma i lohoka vona a leho i rata a bakovi dagi vona. Ngane ga gale mua, mua e huriki a turagu, a vuhuna a maki lobo e Tata i vakasiri iau vona a tovo polo lobo ne mua pali.
JOH 15:16 Mua i uka ma mu vulaki iau. Iau a vulaki mua. A vulaki mua mu gu vano, mu gu vakabele a kanene mua ge tabuli vakaroro. Mua bara mu rata mavonga, e Tata bara i habi ne mua a ra maki mu nanea vona na ragu.
JOH 15:17 A vinara nau i maea: Mu vangaru!
JOH 15:18 “Na tahuna e huriki na malala ri marikoi ne mua, mu luhoi kamumu. Re huriki nga ri marikoi nau muga.
JOH 15:19 Bara i mua a bakovi na malala, e huriki a bakovi na malala bara ri ngaru mua, a vuhuna mua a tara ne ria. Pali mua, i uka ma mua a bakovi na malala. A vulaki tala mua ne huriki a bakovi na malala lakea ri marikoi ne mua.
JOH 15:20 Mu luhoi mulea a ngava a taki mua vona, ‘A vora i uka ma i muga na matakari vona.’ E huriki ri rata hale iau, bara ri rata hale mua. E huriki ri longo mai a vinara nau, bara ri longo mai a vinara ne mua.
JOH 15:21 Ri rata mavonga mua, a vuhuna ri marikoi nau. Ri marikoi nau a vuhuna i uka ma ri lohoka vona a viri i rudu iau a valai.
JOH 15:22 Ngane ri tahoka a ngava a vuhuna iau a valai a pukatala a naro hale ne ria. Ngane ri uka a dala ri gi ruhulolo a naro hale ne ria.
JOH 15:23 A viri i marikoi iau, i marikoi ne Tata.
JOH 15:24 Iau a made turane ria, a rata a maka maki nga i uka tara viri ge rata ma. Iau i uka ma ga rata a maka leho nga, bara ri uka rarenga vona a naro hale ne ria. Pali ngane ri matai a maka nivakasiri nga, ri tabana ni marikoi maria e Tata.
JOH 15:25 Ri rata mavonga, ge bele muholi a ngava ni here puru hosi na Vinara i ta maea, ‘I uka a vuhuna a hini ri marikoi tavula nau.’
JOH 15:26 “Na tahuna a viri ge tuhori mua ge valai, ra Hanu na Nita Muholi, bara i vaka­longo e huriki nau. Ra viri iea, ga rudu vilia ne mua, bara i valai ne Tata.
JOH 15:27 Mua ranga bara mu vakalongo e huriki ne nau, a vuhuna mu made turagu na tahuna a vakatubu a leho, i valai i harena mona.
JOH 16:1 “A ngava nga a taki muga mua vona, muri i uka ma mu gu vuru viliha lae.
JOH 16:2 E huriki bara ri tono tala mua na roho na vaponga. I muholi ngi, i uka ma ge tabaka e huriki bara ri rabalaki mua, bara ri luhoi ta ri rata a leho na Vure.
JOH 16:3 Bara ri rata mavonga a vuhuna i uka ma ri lohoka ne maria e Tata.
JOH 16:4 A vakalongo mua vona muga, lakea na tahuna a parava iea i valai, bara mu luhoi mule a ngava a vakalongo muga vona. Muga i uka ma a vakalongo mua vona, a vuhuna a tabana ni made turane mua.
JOH 16:5 “Ngane bara hamule lakea vona ra viri i rudu iau a valai, pali i uka tara ne mua ge nana iau ge ta maea, ‘Go lokovai?’
JOH 16:6 Ngane mu dodo hateka a vuhuna a taki mua vona a ngava nga.
JOH 16:7 Pali a taki muholi mua, ga pe mua a vuhuna a ngaru ni kori mua. Iau ga vano taro, muri a viri ge tuhori mua bara i valai. Na tahuna a vano, ga rudu vilia.
JOH 16:8 Na tahuna i valai, bara i vakasiri e huriki, ri matakilala a rabu hale ne ria, ri matakilala iau a malamala hateka, ri matakilaka vona e Tata ge pelekado e huriki.
JOH 16:9 Ge vakasiri ria na naro hale ne ria, a vuhuna i uka ma ri luhoi tora iau.
JOH 16:10 Ge vakasiri ria vona iau a malamala, a vuhuna ga sike lakea ne Tata, i uka ma mu gu matai iau tabu.
JOH 16:11 Ge vakasiri ria ne Tata ge pelekado e huriki, a vuhuna i pelekadoa pali a matakari na malala, i matarida a nitora vona.
JOH 16:12 “A maka ngava a ngaru ni taki mua vona i kupo, pali ngane i uka ma ga taki lobo mua vona, ma ga vakavaroru mua vona a maka ngava nga.
JOH 16:13 Pali na tahuna a Hanu na Nita Muholi ge valai, bara i vakasiri mua na maka nita muholi lobo. I uka ma ge rata a ngava vona. A ngava i longoa ra ngava iea kunana bara i taki mua vona. Bara i taki mua vona a maki ge bele muri ma.
JOH 16:14 Ge vara polo a vinara nau mu gu longo, lakea bara i ratea a ragu i dagi.
JOH 16:15 A maki lobo ne Tata a maki nau. I mavonga a taki mua, a Hanuna bara i bole a ngava nau i vakalongo mua vona.
JOH 16:16 “I uka ma ge tabaka, i uka ma mu gu matai iau. Pali i uka ma ge tabaka tabu, bara mu matai iau.”
JOH 16:17 I ranga e huriki a murimuri ri vanana, ri ta maea, “I navai a hini i ta maea, ‘I uka ma ge tabaka, i uka ma mu gu matai iau. Pali i uka ma ge tabaka tabu, bara mu matai iau.’ Pali i navai i ta maea tabu, ‘A vuhuna bara lakea ne Tata’?”
JOH 16:18 Ri vanana mavonga ri ta maea, “I navai a hini i ta maea, ‘I uka ma ge tabaka?’ I uka ma mi longokilala a hini i taki.”
JOH 16:19 E Isu i lohoka vona a hini ri ngaru ni nanea, lakea i taki ria, “Mua mu vanana vona a bokona a ngava a taki, ‘I uka ma ge tabaka, i uka ma mu gu matai iau. Pali i uka ma ge tabaka tabu, bara mu matai iau.’
JOH 16:20 A taki muholi mua, mua bara mu tangi, mu dedo na tahuna e huriki a bakovi a ngatavine na malala ri pitei. Bara mu loho lege lae, pali a niloholege ne mua bara i mapulo, i bele a nivivi.
JOH 16:21 A ngatavine i pahea a koma i bole a nimadihi, a vuhuna a parava vona i valai pali. Pali na tahuna i poda loboa a koma i longo kaburungia a nimadihi, a vuhuna i vivi vona e tuna i bele pali.
JOH 16:22 Mua ranga: Ngane a tahuna nidodo. Pali muri ma bara matai tabu mua, bara mu vivi. I uka tara viri ge bole vurokia a nivivi ne mua.
JOH 16:23 Na parava iea i uka ma mu gu nana iau vona tara maki. A taki muholi mua, a ra maki mu nana e Tata vona na ragu, bara i habi ne mua.
JOH 16:24 I valai i harena mona, i uka ma mu nana vona ma na ragu tara maki. Mu nana, bara mu bole, lakea bara mu vivi hateka.
JOH 16:25 “A rata a maka ngava nga na nita vaka­kika, pali muri ma i uka ma ga ta vaka­kika tabu, ga vakalongo kavakava mua ne Tata.
JOH 16:26 Na parava iea bara mu nanea a Vure na ragu na maki mu ngaru. Iau i uka ma a taki ga nanea e Tata na maki mu ngaru.
JOH 16:27 E Tata i ngaru mua a vuhuna mu ngaru iau, mu longo mai iau na tahuna a taki mua a valai na Vure.
JOH 16:28 I muga a pea e Tata a puru valai na malala, pali ngane bara pe a malala, a hamule lakea ne Tata.”
JOH 16:29 Lakea e huriki a murimuri ri ta rike ri ta maea, “Ngane o ta kavakava, o uka ma o ta vakakika.
JOH 16:30 Ngane mi matakilala ioe o lohoka vona a maki lobo. Ioe o uka a ningaru vona a ninana ne mia, a vuhuna o lohoka vona pali a ninana ne mia. Ra ngava vomu i rata mia mi luhoi tora ioe o valai na Vure.”
JOH 16:31 E Isu i koli a nita ne ria, i ta maea, “Ngane kunana mu luhoi iau!
JOH 16:32 Pali a parava bara i valai, i valai pali, bara mu ha vapida, mu ha lakea na tanga takutaku ne mua. Bara mu ha taro iau, a made kikeri. Pali i uka ma iau kikeri. E Tata tara i made turagu.
JOH 16:33 “A taki mua vona a maka ngava nga, lakea na tahuna mu made turagu, bara mu tahoka a nivalemu. Na tahuna mu made na malala bara mu bole a nimadihi. Pali mu tuhaka! A rangi pali a nitora na malala.”
JOH 17:1 E Isu i taki lobo a ngava nga, lakea i mata rike na hunu, i vasileki maea, “Tata, a parava i valai pali. O kavurike iau, e Tumu, lakea iau ga kavurike ioe,
JOH 17:2 a vuhuna o habia pali nau a nitora ga matakari e huriki lobo, ga habi a nimahuri vakaroro ne huriki o habi nau pali.
JOH 17:3 A nimahuri vakaroro i maea: ri gi lohoka vomu, ioe kikeri a Vure muholi. Ri gi lohoka tabu nau, iau e Isu Kristo, o rudu iau a valai.
JOH 17:4 Iau a rata lobo a leho o habi nau ga rata, lakea e huriki a bakovi a ngatavine ri matakilala ioe, ioe o dagi hateka.
JOH 17:5 O Tata, ngane o vakabagetu tabu iau na matamu na bagetuanga ne tarua tu tahoka muga na malala ni ratarike.
JOH 17:6 “E huriki a murimuri, muga o bole tala ria ne huriki a bakovi na malala, o habi ria nau. A vakasiri ioe pali ne ria. Re huriki nga a viri vomu; o habi ria nau, lakea ri longototo a ngavamu.
JOH 17:7 Ngane ri lohoka vona, a maki lobo o habi nau i valai muholi vomu,
JOH 17:8 a vuhuna a ngava lobo o habi nau, a habi ne ria pali, lakea ri longo mai. Ngane ri lohoka muholi ne vomu o rudu iau a valai.
JOH 17:9 I uka ma a vasileki ne huriki na malala. A vasileki ne huriki a bakovi vomu ra o habi nau, a vuhuna ria e huriki a bakovi vomu.
JOH 17:10 E huriki a viri nau, a viri vomu. E huriki a viri vomu, a viri nau. Ri vakasiri e huriki na ragu i dagi.
JOH 17:11 Iau i uka ma ga made tabaka koea na malala. Iau ga lakene, ga made turamu. Pali ria bara ri tabana ni made na malala. O Tata, ioe o Kiripiripi, o matakari ria na nitora na ramu, ra ramu o habia nau. Lakea ri gi pesi taku, i manga tarua tu ala taku kunana.
JOH 17:12 Na tahuna a made turane ria, a matakari ria na nitora na ramu. I uka tara viri ge velu. A viri i ala taku kunana i velu, ra viri bara i bole a vuranga, lakea ra ngava ni here puru hosi na Hinere ge bele muholi.
JOH 17:13 “Iau a popote ga sike lakene vomu. A taki a maka ngava nga na tahuna a tabana ni made koea na malala, a vuhuna a ngaru ria ri gi vivi hateka na nipitei nau.
JOH 17:14 A habi ne ria a ngava vomu, lakea e huriki a bakovi a ngatavine na malala ri marikoi ne ria, a vuhuna i uka ma ria a viri na malala, i manga iau tara i uka ma iau a viri na malala.
JOH 17:15 I uka ma a taki ioe go bole tala ria na malala. A ngaru go matakari ria na bakovi hale.
JOH 17:16 Ria i uka ma ria a bakovi na malala, i manga iau tara i uka ma iau a bakovi na malala.
JOH 17:17 O ru herehere ria na ngava muholi. A ngavamu i muholi.
JOH 17:18 Ngane a rudu ria ri gi lakea na tanga lobo na malala, i manga a hini muga o rudu iau a puru valai.
JOH 17:19 Iau a luhoi ria, lakea a habi a hategu ne vomu, lakea ria ranga ri gi habi a hatene ria ne vomu.
JOH 17:20 “Iau i uka ma a vasileki ne ria kunana. A vasileki tabu ne huriki ri gi luhoi tora iau na tahuna e huriki a muri­muri nau ri vakalongo ria ne nau.
JOH 17:21 Lakea a ngaru ria lobo ri gi pesi taku. O Tata, a ngaru ri gi rihi tarua i manga tu varihi. Na tahuna ri made turane tarua, e huriki na malala ri gi matakilala ioe kunana o rudu iau a valai.
JOH 17:22 A habia a nibagetu ne ria, ra o habia nau, ri gi pesi taku i manga tarua tu ala taku kunana.
JOH 17:23 A ngaru iau ga made turane ria, ioe go made turagu. A ngaru ri gi pesi taku muholi, lakea e huriki a bakovi a ngatavine na malala ri gi matakilala ioe, o rudu iau a valai, ri gi matakilaka vona ioe o ngaru hateka e huriki a muri­muri nau i manga ioe o ngaru iau.
JOH 17:24 “Tata, a ngaru e huriki ra o habi nau ri gi made turagu na tanga ga made vona, ri gi masia a nibagetu nau, ra bagetuanga o habia nau, a vuhuna o ngaru iau muga na malala ni ratarike.
JOH 17:25 “Tata, ioe o malamala, e huriki a bakovi a ngatavine na malala i uka ma ri lohoka vomu, pali iau a lohoka vomu. E huriki a tara nau ri lohoka vona ioe o rudu iau a valai.
JOH 17:26 A vakasiri ria ne vomu, ioe a bakovi navai. Muri bara vakasiri tabu ioe ne ria, lakea ioe bara o ngaru ria i manga a hini o ngaru iau, lakea iau bara made turane ria.”
JOH 18:1 Na tahuna e Isu i vasileki lobo, i vano turane huriki a murimuri, ri padikudu na Maloku ne Kidron. Na tabeke mule lokovonga i tahoka a hania na oliv, lakea ri lokovonga.
JOH 18:2 E Iudas, ra bakovi i habi e Isu na limane huriki a pile, i lohoka vona a hania iea, a vuhuna i balaka kupo e Isu i vapopo vonga turane huriki a murimuri vona.
JOH 18:3 Lakea e Iudas i tuli e huriki a tara na nugumaheto turana e huriki a bolekori na prister dagi, a Pariseo, ri lakea vona a hania iea. Ri bole a bombom, a lam, a lebo na vabinga.
JOH 18:4 E Isu i lohoka vona a maki ta ge bele vona, lakea i pagitala i nana ria, “E rei a viri mu virokanea?”
JOH 18:5 Ri koli, ri ta maea, “E Isu o Nasaret.” E Isu i ta rike, i ta maea, “Iau kunana.” (E Iudas, ra bakovi i lohopile e Isu, i pesi turane ria vonga.)
JOH 18:6 Na tahuna e Isu i ta maea, “Iau kunana,” ri karuku hamule, ri boru puru.
JOH 18:7 Lakea e Isu i nana tabu, “E rei a viri mu virokanea?” Ri ta maea ria, “E Isu o Nasaret.”
JOH 18:8 E Isu i koli, i ta maea, “A taki mua pali, iau kunana. Mua mu ngaru ni bole iau, mu taparaki e huriki a bakovi nga ri gi vano.”
JOH 18:9 I ta maea, ge bele muholi a ngava i taki muga, i ta maea, “E huriki a bakovi o habi nau, i uka tara viri ge velu.”
JOH 18:10 Muri e Simon Petrus i lalu talea a bainat vona, i palakudua a talingana vora na prister i muga ne huriki a prister, ra talingana a kanena. (A rana vora iea e Malkus.)
JOH 18:11 Lakea e Isu i takia e Petrus, i ta maea, “O ru mulea a bainat vomu! O luhoi navai, i uka ma ga bole a nimadihi e Tata ge habia nau?”
JOH 18:12 Muri e huriki a nugumaheto turana ubu ne ria, e huriki a bolekori ne huriki a Iuda ri lakavua e Isu. Ri kolotatea,
JOH 18:13 ri turari lakea ne Anas, e lahuane Kaipas, ra prister i muga ne huriki a prister lobo na pida iea.
JOH 18:14 E Kaipas ra viri i vaka­lohoka muga e huriki a Iuda i taki ria bara i kamumu hateka a bakovi ala taku kunana ge mate, ge bole a murine huriki lobo.
JOH 18:15 E Simon Petrus, turana murimuri tara, ru muri ne Isu. A prister i muga ne huriki a prister lobo i lohoka vona a muri­muri iea, lakea i dili turane Isu na mata­ruma na prister iea.
JOH 18:16 Pali e Petrus i dava polovavo, tabukoi na logo. Ra muri­muri i lohoka vona a prister i muga ne huriki a prister lobo, i hamule pori, i ta turana ngatavine i matakari a logo. Muri i tuli dilia e Petrus.
JOH 18:17 Lakea a vora ngatavine i matakari a logo i nanea e Petrus, i ta maea, “Ioe tara, ioe a murimuri vona?” Pali e Petrus i lavuni, i ta maea, “I uka.”
JOH 18:18 I piu hateka a hini, lakea e huriki a vora, a bolekori ri tunua a kanono, ri pesi haluia, ri hua. E Petrus tara i pesi turane ria, i hua a kanono.
JOH 18:19 Lakea a prister i muga ne huriki a prister lobo i nanea e Isu ne huriki a murimuri vona, na maka ngava i tovo e huriki vona.
JOH 18:20 E Isu i koli, i ta maea, “Na tahuna a habi a ngava, a pesi kavakava kunana. A tovo bala pololilo na maka roho na vaponga, pololilo na roho na Vure, e huriki a Iuda ri vapopo bala vonga. I uka ma a made kapiloho a tovo e huriki.
JOH 18:21 I navai mu nana iau? Mu nana e huriki ri longo iau. Muholi hateka, ri lohoka vona a maka ngava a taki.”
JOH 18:22 Na tahuna e Isu i taki a ngava nga, a bolekori tara na prister i muga ne huriki a prister lobo i tahatea, i ubia na dumematana, i ta maea, “Naha ni koli mavonga a ngavana prister dagi.”
JOH 18:23 E Isu i koli, i ta maea, “Iau bara taki a ngava i hale mu puka talea ngane. Pali iau bara taki a ngava i muholi, i navai o ubi iau?”
JOH 18:24 Muri e Anas i rudua ge lakea na prister i muga ne huriki a prister lobo, a rana e Kaipas. A limane Isu i tabana ni kolotata.
JOH 18:25 Na tahuna e Simon Petrus I pepesi i hua a kanono lakea ni nana, “Ioe tara a murimuri na bakovi iea?” Pali e Petrus i lavuni, i ta maea, “I uka.”
JOH 18:26 Lakea a vora na prister i muga ne huriki a prister lobo, a kabu na bakovi i palakudua e Petrus a talingana, i gege, i ta maea, “Ioe tara, a matai ioe o turana na hania.”
JOH 18:27 Pali manga a hini muga e Petrus i lavuni tabu. I malaviriri kunana a kureko i vakatubu ni tangi.
JOH 18:28 Muri e huriki a Iuda ri tuli talea e Isu na ruma ne Kaipas, ri tulia i lakea na ruma dagi na bakovi o Rom ra i matakari vonga. I hatelanga pali a hini, lakea e huriki a Iuda i uka ma ri dili na ruma dagi, a vuhuna ri koi ri gi katoki na matana Vure, bara ri keri ni kani a kinani na Habu na Nipagepolo.
JOH 18:29 Lakea e Pilato i pori mai ria, i nana, “A ra ngava mu padi virihia vona a bakovi iea?”
JOH 18:30 Ri koli ri ta maea, “Ra bakovi iea, ge ia a bakovi kamumu, i uka ma mi gi tuli vilia vomu.”
JOH 18:31 Lakea e Pilato i koli, i ta maea, “Mu vano mu pelekadoa na vinara ne mua.” Pali e huriki a Iuda ri marikoi, ri ta maea, “I uka. A vinara ne mua e huriki a Rom, i taki i uka ma mi gi rabalaki a viri.”
JOH 18:32 Ri ta maea, ge bele muholi a ngavane Isu i ratea muga na tahuna i ta muga vona ge mate navai.
JOH 18:33 E Pilato i hamule dili tabu na ruma dagi vona, lakea i galea e Isu, i nanea, “Ra ioe, i muholi ioe a hariki ne huriki a Iuda?”
JOH 18:34 Lakea, e Isu i nanea e Pilato, “Ra ngava o nana vona, i valai na niluhoi vomu, o i tahoka tara viri i taki ioe vona?”
JOH 18:35 E Pilato i koli, i ta maea, “Ioe, o luhoi ge iau a Iuda? E huriki a viri vomu, e huriki a prister dagi ri tuli valai ioe koea. A ra naro hale o ratea?”
JOH 18:36 E Isu i ta rike, i ta maea, “A hariki­anga nau i uka ma a maki na malala. Pali a harikianga nau ga maki na malala, e huriki a vora nau bara ri gege, ri vaubi, e huriki a Iuda i uka ma ri gi lakavu iau. Pali a harikianga nau i uka ma a maki na malala.”
JOH 18:37 Lakea e Pilato i ta maea, “I mavonga, ioe a hariki, e?” E Isu i koli, i ta maea, “O ta muholi na tahuna o gale iau a hariki. I muholi ngi, iau ni poda ga ratea a leho iea. A puru valai na malala ga vakalongo a ngava muholi. E huriki ri ngaru a ngava muholi, bara ri longo mai iau.”
JOH 18:38 Lakea e Pilato i nanea, “I navai a ngava muholi?” Muri e Pilato i pagitala mai e huriki a Iuda, i ta maea, “Iau i uka ma a matavisia vona tara rabu hale ge ratea a bakovi iea.
JOH 18:39 Pali si gi muri mai a naro ne mua hosi, na tahuna iea na Habu na Nipagepolo bara si bole talea na bavi tara bakovi hale. Pali mua mu ngaru ga bole talea a ‘hariki ne huriki a Iuda’?”
JOH 18:40 Ri gale dagi ri ta maea, “I uka, ge nahea ia! O habia ne mia e Barabas!”
JOH 19:1 Muri e Pilato i taki e huriki a nugumaheto ri gi lagua e Isu.
JOH 19:2 Ri lagu loboa, muri ri kou a barakau i manga a tama, ri vakakubea vona. Ri vakarodoa vona a varakia kuakua, ge mata manga a hariki.
JOH 19:3 Muri ri padikedea, ri ta maea, “Haro hariki ne huriki a Iuda!” Muri ri rabalea a dumematana.
JOH 19:4 E Pilato i pagitala tabu, i taki e huriki a Iuda, “Mu mata valai, a habia mua a bakovi iea! Ngane ga vakalongo mua, i uka tara maki hale ge ratea.”
JOH 19:5 Na tahuna e Isu i pagitala i kubea a tama ni rata na barakau, i rodoa a varakia kuakua, lakea e Pilato i taki ria, “Mu masia a bakovi iea!”
JOH 19:6 Na tahuna e huriki a prister dagi, turane huriki a bolekori, ri masia e Isu, ri gale tala ri ta maea, “O paditatea na kai tavalavala! O paditatea na kai tavalavala!” Pali e Pilato i koli, i ta maea, “Mu bolea, mu paditatea na kai tavalavala! Pali iau i uka ma a puruvisia vona tara maki hale ge ratea ge vurua vona.”
JOH 19:7 Pali e huriki a Iuda ri ta hinituhana, ri ta maea, “Mi tahoka tara vinara. A vinara iea i taki ra bakovi iea ge mate, a vuhuna i takia ta ia a Tuna Vure.”
JOH 19:8 Na tahuna e Pilato i longoa a ngava iea i mangenge hateka,
JOH 19:9 lakea i hamule dili na ruma, i nanea e Isu, “I vai a hini o valai vona?” Pali e Isu i uka ma i koli.
JOH 19:10 Lakea e Pilato i ta maea, “I navai o longo vulai? Ioe o uka ma o lohoka nau? Iau a tahoka a nitora ni kori ioe bara o pagitala, o ni paditata ioe na kai tavalavala na ningaru nau.”
JOH 19:11 E Isu i koli, i ta maea, “A Vure a viri i habi a nitora vomu. Ia i uka ma ge habia vomu a nitora iea, i uka ma go tahoka a nitora ni rabalaki iau. Pali a viri i habi iau na limamu, a naro hale vona i dagi hateka na naro hale vomu.”
JOH 19:12 Na tahuna e Pilato i longoa a ngava iea i toni ni taparakia e Isu ge vano. Pali e huriki a Iuda ri gale dagi, ri ta maea, “Ioe bara o taparakia a bakovi iea ge vano, i uka ma ioe a turane Kaiser tabu. A viri i takia ta ia a hariki, ia a pile ne Kaiser.”
JOH 19:13 Na tahuna e Pilato i longoa a ngava iea, i tuli talea e Isu, i made puru na gula na mari na nipelekado na tabeke tara ni gale e Kedo Kei, na nita Aram ni gale e Gabata.
JOH 19:14 Ra parava iea a parava ni kisi puru a maki ni kani na Habu na Nipagepolo. Ngane a kuru haro. Lakea e Pilato i taki e huriki a Iuda, i ta maea, “Mu masia a hariki ne mua.”
JOH 19:15 Pali ri gale tala ria, ri ta maea, “O raba­lakia! O rabalakia! O paditatea na kai tavalavala!” Lakea e Pilato i nana ria, “Mu ngaru ga paditatea na kai tavalavala a hariki ne mua?” E huriki a prister dagi ri koli mule, ri ta maea, “Mi uka a hariki. A hariki ne mia e Kaiser kunana, ra hariki o Rom.”
JOH 19:16 Ngane e Pilato i longo, i habia ne ria e Isu, ri gi paditatea na kai tavalavala. E huriki a nugumaheto ri tuli poloa e Isu.
JOH 19:17 E Isu i kalohoa a kai tavalavala vona, i lakea mai a Tanga na Tuhana Gigi, na nita Aram ni gale e Golgota.
JOH 19:18 Na tahuna ri bele vonga ri paditatea na kai tavalavala turana bakovi ala rua. A bakovi tara i tavore na maurine Isu. A bakovi tara i tavore na kanena.
JOH 19:19 Muri e Pilato i herea a nita vaka­lohoka, i habia na bakovi tara, i topia na kai tavalavala. A nita ni here i maea, “E Isu o Nasaret, a Hariki ne Huriki a Iuda.”
JOH 19:20 E huriki a Iuda ri ala kupo ri gia a nita vaka­lohoka iea, a vuhuna a tanga ni paditata e Isu vona i tabukoi o Ieru­salem. A nita vakalohoka ni here na nita Aram, na nita Latin, na nita Grik.
JOH 19:21 E huriki a prister dagi ne huriki a Iuda ri koi, ri takia e Pilato ri ta maea, “Naha ni here mavongea, ‘A hariki ne huriki a Iuda.’ O here maea, ‘I taki ta ia a hariki ne huriki a Iuda.’”
JOH 19:22 Pali e Pilato i koli, i ta maea, “A ngava a here pali, i uka ma ga puloa.”
JOH 19:23 Na tahuna e huriki a nugumaheto ri paditata loboa e Isu, ri bole a varakia vona, ri vaveru na tabekena i va. Pali a padirodo vona pololilo ni rahi bolabola,
JOH 19:24 lakea ri ta maea, “Nahea si gi rapea. Si varangi vona na rihiva na satu. A viri ge maragisi, bara i bolea.” Na tahuna ri ta maea, a ngava ni here puru hosi na Hinere i bele muholi. A ngava iea i maea, “Ri vaveru vona a varakia nau. Ri varangi vona a padirodo nau na rihiva na satu.” Lakea e huriki a nugumaheto ri rata mavonga kunana.
JOH 19:25 E Maria kinane Isu, e tarine kinana, e Maria girihine Klopas, e Maria Magdala to pesi tabukoi na kai tavalavala ne Isu, to matanono.
JOH 19:26 Na tahuna e Isu i matai e kinana turana murimuri i ngaru hatekea ru pesi tabukoi, lakea i takia e kinana, “Nana, ra bakovi iea e tumu.”
JOH 19:27 Muri i takia a murimuri, i ta maea, “Ra ngatavine iea e kinamu.” I vakatubu na parava iea ngane, a murimuri iea i matakaria e Maria.
JOH 19:28 Ngane e Isu i lohoka vona a leho vona i lobo pali, lakea i ta maea, “Iau a marohu.” I ta maea ge bele muholi a ngava ni here puru hosi na Hinere.
JOH 19:29 A ulo i vona a vain vagole i tabuli tabukoi, lakea e huriki a nugumaheto ri bolea a niduvi, ri lutua na vain nami hurari, ri kolotatea na rahana kai a hisop, ri toto rikea, ri vakadame e Isu vona.
JOH 19:30 E Isu i dame loboa a vain, lakea i ta maea, “I lobo.” I taki loboa a ngava iea, i marave puru a lohona, i mate.
JOH 19:31 Muri e huriki a Iuda ri nanea e Pilato ri gi ubi putu a vahane Isu turana bakovi ala rua nga, ni gi paru tala tou na kai tavalavala. Ri nana mavongea a vuhuna kuduvi a Parava Nimalo. Ra Parava Nimalo iea a parava dagi hateka, lakea e huriki a Iuda ri koi vona a podane tou ge tavore na kai tavalavala.
JOH 19:32 Lakea e huriki a nugumaheto ri vano ri ubi putu a vahana bakovi ala rua, ra ni paditata turane Isu.
JOH 19:33 Pali na tahuna ri bele ne Isu, ri masia i mate pali, lakea i uka ma ri ubi putu a vahana.
JOH 19:34 Pali a nugumaheto tara i padia na maheto a kamagane Isu, i maguru tala malaviriri a dara a naru.
JOH 19:35 Ra bakovi i matai a dara a naru i maguru tala, i vakalongo e huriki. A ngavana i muholi. I lohoka vona a hini i taki i muholi, i vakalongo mua, lakea mua ranga mu gu luhoi tora.
JOH 19:36 Ra maka naro nga i bele ge ramai a ngava ni here puru na Hinere i ta maea, “I uka tara tuhana ge maputu.”
JOH 19:37 A ngava tara ni here puru na Hinere i ta maea, “Ri gi matanonoa a viri ni padi.”
JOH 19:38 Muri e Iosep o Arimatea i vano i nanea e Pilato ge bolea a podane Isu. E Iosep a murimuri ne Isu, pali i uka ma i vakasiri kava­kava ia, a vuhuna i mangenge ne huriki a Iuda. E Pilato i longo vona ge bolea a podane Isu, lakea e Iosep i vano i bolea.
JOH 19:39 E Nikodemus, ra bakovi i valai ne Isu na rodo, ia tara i turana. E Nikodemus i bole vilia a mangisipa ni vuli na totona kai a mir, a kai a aloe, a nimavana i 30 kilo.
JOH 19:40 Ru vano, ru bole purua a podane Isu, ru biria na mangisipa, ru bolea a lavalava karaba, ru bunua a podana. Ru muri mai a naro hosi ne huriki a Iuda na viri i mate.
JOH 19:41 Na tabeke ni paditata e Isu vona na kai tavalavala, i tahoka tara hania. Pololilo na hania iea i tahoka tara babe ni keli puru karaba. I uka ma ni tanu a viri vona ma.
JOH 19:42 Ru vakatabulia vonga a podane Isu, a vuhuna i popote ge rolo a haro, pali a parava iea, a parava ni kisi puru a maki ni kani na Habu na Nipagepolo, ra habu ne huriki a Iuda.
JOH 20:1 Na hatelanga pokopoko na mugana parava na vik, i tabana ni rodo a hini, e Maria Magdala i lakea na babe turana ranga ngatavine, ri masia a kedo ni kule tala na matana babe.
JOH 20:2 Lakea i nunu hamule i vakalongo e Simon Petrus turana murimuri tara, ra i ngaru hatekea e Isu. Lakea i taki rua, i ta maea, “Ni bole tala pali na babe a podane Bakovi Dagi, pali ngane i uka ma mete lohoka vona ni ru vai!”
JOH 20:3 Lakea e Petrus turana murimuri iea ru nunu lakea na babe.
JOH 20:4 A murimuri tara i redea e Petrus, i bele muga na babe.
JOH 20:5 I tuku dili i matai a maka lavalava i tabuli, ra ni bunu e Isu vona. Pali i uka ma i dili.
JOH 20:6 Muri e Simon Petrus, ra i nunu muri vona, i bele, i dili liu na babe, i matai a lavalava i tabuli vonga,
JOH 20:7 turana lavalava ni bunu a gina vona. Ra lavalava ni bunu a gine Isu vona ni pilu kamumu, ni ru here.
JOH 20:8 Muri a murimuri, ra i bele muga, i dili. I matai a maki nga, lakea i luhoi tora.
JOH 20:9 Pali i uka ma i matakilaka vona ma a ngava ni here puru na Hinere i taki e Isu ge mahuri mule na matenga.
JOH 20:10 Muri ru hamule lakea na tanga ne rua.
JOH 20:11 Pali e Maria i pesi polovavo na babe i tangi. Na tahuna i tangi, i tuku dili na babe.
JOH 20:12 I matai a agelo ala rua, ru rodo a varakia keakea, ru made vona a hini ni ru a podane Isu vona. I made na murina gina tara, i made na murina vahana tara.
JOH 20:13 Lakea ru nanea, “Ngatavine, i navai o tangi?” Lakea i koli, i ta maea, “I ranga e huriki ri bolea a podane Bakovi Dagi nau, pali i uka ma a lohoka vona i vai a hini ri rua vona.”
JOH 20:14 I ta lobo, lakea i ngala kapulo i masia e Isu i pesi, pali i uka ma i matakilalea.
JOH 20:15 Lakea e Isu i nanea, “Ngatavine, i navai o tangi? E rei a viri o mata­kanea?” A ngatavine i luhoi ta ia a matakari na hania, lakea i takia, “Bakovi, ge ioe a viri o bolea, o taki iau vona a hini o rua vona, ga vano ga bolea.”
JOH 20:16 Lakea e Isu i galea a rana, i ta maea, “Maria.” Lakea e Maria i matanonoa, i gale tala na nita Aram, i ta maea, “Raboni!” I manga a “Mari ni tovo.”
JOH 20:17 Lakea e Isu i takia, i ta maea, “Naha ni nugu iau, a vuhuna i uka ma a hamule lakea ma ne Tata. Pali ngane o hamule lakea ne huriki a turagu, o taki ria, ‘Iau ga hamule lakea ne Tata ne Tamane mua, na Vure nau a Vure ne mua.’”
JOH 20:18 Lakea e Maria Magdala i hamule lakea ne huriki a murimuri i vakalongo ria, i ta maea, “Iau a masia a Bakovi Dagi.” Muri i vakalongo ria vona a ngava e Isu i taki ia vona.
JOH 20:19 Na malunga na parava iea, a mugana parava na vik, e huriki a murimuri ri made vapopo pololilo, ri tukari a logo a vuhuna ri mangenge ne huriki a Iuda. E Isu i bele, i pesi na kurukurune ria, i ta maea, “Mu made na nivalemu!”
JOH 20:20 I taki lobo a ngava nga, lakea i vakasiri ria vona a limana i rua, a kamagana. Na tahuna ri masia e Bakovi Dagi, ri pitei hateka vona.
JOH 20:21 Lakea e Isu i taki tabu ria, i ta maea, “Mu made na nivalemu. Iau a rudu mua i manga e Tata i rudu iau.”
JOH 20:22 I ta mavonga lobo, lakea i bango taho ria, i ta maea, “Mu bolea a Hanu Kiripiripi.
JOH 20:23 Na tahuna mu puga vuroki a naro hale ne huriki, a naro hale ne ria ni puga. Pali na tahuna i uka ma mu puga a naro hale ne ria, a naro hale ne ria i uka ma ni gi puga.”
JOH 20:24 Na tahuna e Isu i bele taho e huriki a murimuri, a turane ria tara i uka ma ia vonga. Ra bakovi iea e Tomas, a rana tara e Boge.
JOH 20:25 E huriki a murimuri ranga ri takia, ri ta maea, “Mi masia pali e Bakovi Dagi!” Lakea e Tomas i taki ria, i ta maea, “Iau bara matai a harena nil na limana, bara nugu a harena nil na kukulimagu, bara ru dili a limagu na kamagana, bara luhoia a ngavane mua i muholi.”
JOH 20:26 A parava i polorua i lobo, e huriki a murimuri ri vapopo tabu na ruma. E Tomas i turane ria ngane. A maka logo ni tukari lobo, pali e Isu i valai, i pesi na kurukurune ria, i ta maea, “Mu made na nivalemu!”
JOH 20:27 Muri i takia e Tomas, i ta maea, “O matai a limagu, o rua koea a kuku limamu. O toto vilia a limamu, o ru dilia na harena maheto na kamagagu. Naha ni loho rua, o luhoi tora.”
JOH 20:28 Lakea e Tomas i koli, i ta maea, “Bakovi Dagi nau, Vure nau!”
JOH 20:29 Muri e Isu i takia, i ta maea, “Ngane o luhoi tora iau, a vuhuna o matai iau. Pali e huriki i uka ma ri matai iau, pali ri luhoi tora iau, a nipitei ne ria bara i dagi hateka.”
JOH 20:30 E Isu i rata a maka nivakasiri i kupo tabu na matane huriki a murimuri, pali i uka ma ni here puru na raukea iea.
JOH 20:31 Pali a here puru a maka ngava nga, mu gu luhoi torea e Isu ia e Kristo, a Tuna Vure. Lakea na tahuna mu luhoi torea, bara mu bole a nimahuri vakaroro na rana.
JOH 21:1 Muri e Isu i luve tabu ne huriki a murimuri vona na dahana darilomu e Tiberius. A niluve vona i maea.
JOH 21:2 I ranga e huriki a murimuri ri made palupu: e Simon Petrus, e Tomas a rana tara e Didimas, e Nataniel na tanga e Kana o Galili, e tune Sebedi ala rua, turana murimuri ala rua tabu.
JOH 21:3 Lakea e Simon Petrus i ta rike, i ta maea, “Iau ga ru a vuko.” Ri ta maea ria, “Te vano.” Lakea to rike na posi to vano. Pali na rodo iea ri ngopu.
JOH 21:4 Na hatelanga pokopoko e Isu i pesi lilo na roa, pali na tahuna e huriki a muri­muri to masia, i uka ma to mata­kilalea.
JOH 21:5 I gale tala, i ta maea, “O turagu mai, moto lakavu visi a manu o i uka?” To koli, to ta maea, “I uka.”
JOH 21:6 Lakea i taki tou, “Mu ru puru tabua a vuko na tabeke na kanena posi, bara moto lakavu visi a manu.” To ru puru tabua a vuko. Na tahuna to vakatubu ni lalu rikea, to keri, a vuhuna i kupo hateka a manu to koro.
JOH 21:7 Muri a murimuri, ra i ngaru hatekea e Isu, i takia e Petrus, i ta maea, “Ra bakovi iea e Bakovi Dagi!” Na tahuna e Simon Petrus i longoa, i malaviriri kunana i rea vona a lavalava vona, a vuhuna i kali purua, lakea i to puru na dari i huru dili na roa.
JOH 21:8 Pali e huriki a muri­muri ranga to vore muri, to lalua a vuko i vonu vona manu. A roa i uka ma i basi. I 100 mita kunana.
JOH 21:9 Na tahuna to dili, to masia a kanono i kara puru pali, i tabuli langa vona a manu, a bret ne Isu.
JOH 21:10 Lakea e Isu i taki tou, “Moto bole valai ranga manu moto lakavu.”
JOH 21:11 Lakea e Simon Petrus i rike na posi, i lalu dilia na lavu a vuko. I vona a maka manu dagi i 153! To luhoi ta ge marape a vuko, pali a vuko i uka ma i marape.
JOH 21:12 Lakea e Isu i taki tou, “Moto valai moto kani.” To mangenge ni nanea, “Ioe e rei?” To lohoka vona ia e Bakovi Dagi.
JOH 21:13 E Isu i veru a bret ne tou. Muri i veru tabu a manu.
JOH 21:14 Ngane i balaka tolu e Isu i bele ne huriki a murimuri vona, muri na tahuna i mahuri mule na matenga.
JOH 21:15 Na tahuna to kani lobo, lakea e Isu i nanea e Simon Petrus, “Simon tune Ioanes, re huriki nga ri ngaru iau. Pali ioe o ngaru hateka iau?” I koli, i ta maea, “Bakovi Dagi, muholi hateka, o lohoka vona iau a ngaru ioe.” Lakea e Isu i takia, “O vakani a maka tuna sipsip nau.”
JOH 21:16 Muri e Isu i nana tabua, “Simon tune Ioanes, ioe o ngaru muholi iau?” I koli, i ta maea, “Bakovi Dagi, i muholi, o lohoka vona iau a ngaru ioe.” Lakea e Isu i taki tabua, “O matakari a maka sipsip nau.”
JOH 21:17 I balaka tolu ngane e Isu i nanea, “Simon tune Ioanes, ioe o ngaru iau?” Lakea e Petrus i kide tala, a vuhuna e Isu i nana balaka tolu, “Ioe o ngaru iau? Lakea e Petrus i takia e Isu, i ta maea, “Bakovi Dagi, o lohoka vona a maki lobo, o lohoka nau a ngaru ioe.” Lakea e Isu i takia, “O vakani a maka sipsip nau.”
JOH 21:18 A taki muholi ioe, na tahuna o riau vona, o vakabagetu mule ioe, o laho lakea vona a hini o ngaru ni lakea vona.” Pali na tahuna o gare, bara o toto rike a limamu, bara ni vakabagetu puru, ni tuli lakea na hini i uka ma o ngaru ni lakea vona.”
JOH 21:19 E Isu i takia a ngava iea ge vakalongo e Petrus ge mate navai, ge habi a rana dagi na Vure vona. Muri i takia, “O muri nau.”
JOH 21:20 Muri e Petrus i matagege, i masia a murimuri i ngaru hatekea e Isu i muri ne rua. (Ra bakovi iea, ra viri i doga rike ne Isu na vaponga na malunga rira, i nanea e Isu na viri ge habia na limane huriki a bakovi hale.)
JOH 21:21 Na tahuna e Petrus i masia a bakovi iea, i nanea e Isu, “Bakovi Dagi, pali a bakovi iea ge mate navai?”
JOH 21:22 E Isu i koli, i ta maea, “Iau bara ngaru ia ge mahuri, ge harena na tahuna ga hamule valai vona, i uka ma a maki vomu. O muri nau kunana.”
JOH 21:23 Lakea e huriki a murimuri ri vaka­longo lae pololilo ne ria a nita na bakovi iea i uka ma ge mate. Pali e Isu i uka ma i takia i uka ma ge mate. A ngava i taki kunanea i maea, “Iau bara ngaru ia ge mahuri ge harena na tahuna ga hamule valai vona, i uka ma a maki vomu.”
JOH 21:24 Ra murimuri iea kunana i vakalongo a maka ngava, muri i here puru. Si lohoka vona a maka ngava i vakalongo i muholi.
JOH 21:25 A maka maki e Isu i rata i kupo hateka. Ra maka maki nga bara ni here puru lobo na puhu na raukea, a luhoi kilala a malala ne hita bara i uka hini ge kara si gi ru a maka puhu na raukea vona, bara ri kupo hateka.
ACT 1:1 O Tiopilus, bakovi dagi. A puhu na raukea nau a here mugea, a tuverei a maka maki e Isu i vakatubu ni rata, ni tovo e huriki,
ACT 1:2 i vano i harena na tahuna e Isu ni bole sike na hunu. Muga ne ia ni bole sike na hunu, na nitora na Hanu Kiripiripi i vakalongo e huriki a apostolo vona, i vulaki pali ria na leho ri gi ratea.
ACT 1:3 Muri ne Isu i mate, i luve ne ria, i vakasiri kavakava ria, ne ia i mahuri mule pali. Na parava i ravulu va, i bele balaka kupo ne ria, i tovo ria na harikianga na Vure.
ACT 1:4 Na parava tara, na tahuna i kani turane ria, i vakuku ria, i ta maea, “Naha ni pea e Ierusalem. Mu davea a Viri e Tata i ta muholi vona muga ge rudu lakene ne mua, ra a vakalongo mua vona pali.
ACT 1:5 E Ioanes i vahilolo mua na naru, pali girira bara ni vahilolo mua na Hanu Kiripiripi.”
ACT 1:6 Na parava tara ri vapopo, lakea e huriki a apostolo ri nanea, “Bakovi Dagi, ngane go ratea e Israel ge matakari tabu e huriki a robo ranga?”
ACT 1:7 E Isu i koli, i ta maea, “E Tata i ru pali a parava ge bele a maki nga. Ia kikeri i tahoka a nitora ni ru a parava iea. I uka ma a maki mua mu gu lohoka vona.
ACT 1:8 Pali na tahuna a Hanu Kiripiripi i valai ne mua, bara mu bole a nitora ni vakalongo a velenga nau o Ierusalem, o Iudea, o Samaria, na tabeke lobo na malala.”
ACT 1:9 Muri e Isu ni bole sike na hunu na matane ria. I sike lakea, i kavitagua a bubu, i uka ma ri matai tabua.
ACT 1:10 Na tahuna ri tababana ni mata rike, a bakovi ala rua ru rodo a varakia keakea, ru bele vakaturutu. Ru pesi turane ria,
ACT 1:11 ru ta maea, “Mua o huriki a bakovi o Galili, i navai mu pesi mu mata rike na hunu? E Isu, ra ni bole tala ne mua, ni bole sike na hunu, bara i hamule valai i manga a hini mu masia i sike na hunu.”
ACT 1:12 Muri ri pea a lolo e Oliva, ri hamule lakea o Ierusalem. A lolo e Oliva i tabukoi o Ierusalem, a maravana a kilomita i taku.
ACT 1:13 Na tahuna ri bele o Ierusalem, ri lakea na ruma ri made vona, ri rike polomeli. E huriki ri bele vonga ra nga: e Petrus, e Ioanes, e Iakop e Andreas; e Pilip rua e Tomas; e Bartolemeus rua e Mateo; e Iakop tune Alpius, e Simon a tara ne huriki a Silot; e Iudas tune Iakop.
ACT 1:14 Ri tahoka a niluhoi i taku. Ri vapopo vakaroro ri vasileki. E huriki a ngatavine, e Maria e kinane Isu, e huriki e tarine Isu, ria ranga ri bele, ri vasileki turane ria.
ACT 1:15 Na tahuna iea e huriki ri luhoi torea e Isu ri ala 120. Ngane e Petrus i pesi rike na matane ria, i ta maea,
ACT 1:16 “Mua o huriki a turagu, i bele muholi pali a ngava ni here puru hosi na hinere. A ngava iea a Hanu Kiripiripi i ta polo ne Davit, i vakalongo muga ne Iudas, ra bakovi i vakasiri a dala ne huriki a bakovi ri lakavua e Isu.
ACT 1:17 Re Iudas, a turane hita hosi, ni vulaki ge leho turane hita.”
ACT 1:18 Rira, na tahuna e Iudas i bole a moni na naro hale vona, i konea a hania. I vonga i boru mapasiri, i mapoda a kavutuna, i mahali tala a tamudina.
ACT 1:19 E huriki lobo o Ierusalem ri longoa a velengana, lakea ri galea na nitane ria a hania iea, e Akeldama. I manga ‘a hania na dara’.
ACT 1:20 Muri e Petrus i ta maea, “I bele mavonga, a vuhuna a ngava ni here puru hosi na puhu na Linge i maea, ‘Ge ngeki a ruma vona, i uka tara viri ge made vona.’ Ni here puru tabu i ta maea, ‘A viri tara ge bole a murina.’
ACT 1:21 I mavonga, i kamumu hateka si gi vulakia tara bakovi, ra i turane hita na parava vakaroro na tahuna e Isu i laho turane hita,
ACT 1:22 i vakatubu na tahuna e Ioanes i vahiloloa, i valai i harena na tahuna e Isu ni bole sike na hunu. Si gi vulakia tara bakovi i matai a maka naro nga i bele, ge turane hita, ge vakalongo a ngava ne Isu i mahuri mule na matenga.”
ACT 1:23 Lakea ri vakapesi a bakovi ala rua: e Iosep Barsabas, a rana tara e Iustus, turane Matias.
ACT 1:24 Muri ri vasileki, “Bakovi Dagi, o lohoka vona a hatene huriki lobo. O vakasiri mia vona e rei ne rua o ngarua,
ACT 1:25 ge ratea a leho na apostolo, ge bole a muri ne Iudas, ra viri i pe a leho vona, i bole a mapana.”
ACT 1:26 Muri ri voro a satu, lakea e Matias i mulangi. Ri bole dilia ge leho turane huriki a apostolo ala ravulu a polona i taku.
ACT 2:1 A habu na Pentekos i bele, lakea e huriki ri luhoi torea e Isu ri vapopo na ruma tara.
ACT 2:2 Ri longo vakaturutu a nangina maki i nangi manga a vilu dagi i valai na hunu, i ngalu dili na ruma ri vapopo vona.
ACT 2:3 Ri matai a maka maki i manga a tabelena kanono, ri vakalipida, i tabuli langa na gine ria takutaku.
ACT 2:4 A Hanu Kiripiripi i dili ne ria lobo, lakea i rata ria ri vakatubu ni ta na maka nita ne huriki basi.
ACT 2:5 Na tahuna iea e huriki a Iuda na tanga lobo na malala ri valai, ri made o Ierusalem.
ACT 2:6 Na tahuna ri longoa a maki iea, ri maguru valai. Ri turutu a vuhuna ri longo na tabelene ria takutaku a ngava i taki e huriki nga.
ACT 2:7 Ri ngapa, ri vanana, “Re huriki nga, a bakovi o Galili.
ACT 2:8 Pali i navai ri ta, si longokilala na nita ne hita takutaku a ngava ri taki?
ACT 2:9 I uka ma si valai na tanga i taku kunana. Si valai o Partia, o Midia, o Elam, o Mesapotamia, o Iudea, o Kapadosia, o Pontus, o Asia,
ACT 2:10 o Prigia, o Pampilia, o Egipto, na tabeke ne Libia ra tabeke i matakaria e huriki na tanga e Sirene. I ranga ri valai o Rom.
ACT 2:11 E huriki ranga a Iuda. E huriki ranga i uka ma ria a Iuda, pali ngane ri ramai a vinara ne huriki a Iuda. E huriki ranga ri valai na robo e Krit, e Arabia. Pali hita lobo si longo ria na nitane hita takutaku, ri vakalongo a maka maki dagi hateka a Vure i rata!”
ACT 2:12 Ri turutu, ri luhoi viliha lae, ri vanana, “A ra pelegona maki iea?”
ACT 2:13 Pali e huriki ranga ri padikede ria, ri ta maea, “Ri ninu hateka a vain karaba, ri manga.”
ACT 2:14 Pali e Petrus, i pesi turane huriki a apostolo ala ravulu a polona i taku, i gale tala, i ta maea, “Mua o huriki a bakovi o Iudea, turane huriki mu made koea o Ierusalem, mu longo kamumu a ngava ga taki.
ACT 2:15 Mu luhoi ta mi ninu. I uka ma mi ninu. Ngane a kilala i polova na hatelanga kunana.
ACT 2:16 A maki mu matai, a maki e Jol a propet i taki hosi, i ta maea,
ACT 2:17 ‘A Vure i ta maea, na nilobona parava ga habi ne huriki lobo a Hanugu. E huriki e tune mua a bakovi a ngatavine bara ri ta propet. E huriki a riau bara ri matai a maki na vurene ria. E huriki a gare bara ri vurena.
ACT 2:18 E huriki a vora bakovi a vora ngatavine nau, ria ranga ga habi ne ria a Hanugu, bara ri ta propet.
ACT 2:19 Ga rata a maki ni turutu vona meli na hunu, ga rata a nivakasiri koea na malala: a dara, a kanono, a pokona kanono.
ACT 2:20 A haro bara i paravunu, a keva bara i para vururu, manga a dara muga na parava ne Bakovi Dagi ge valai. A parava iea i dagi hateka.
ACT 2:21 Lakea a Vure bara i korimule e huriki ri gale lakea ne Bakovi Dagi.’
ACT 2:22 “Mua o huriki a bakovi o Israel, mu longo valai. E Isu o Nasaret, a Vure i rata na limana a maka nivakasiri dagi i kupo na matane mua, i vakasiri mua ne Isu i uka ma i tatami. Mu lohoka vona.
ACT 2:23 Re Isu, ni habi na limane mua, a Vure i lohoka vona muga, i ramai a ningaru vona. Mu paditatea na kai tavalavala na limane huriki a bakovi hale, i mate.
ACT 2:24 A Vure i vakamahuria na matenga, i vakatavagea na nimadihi na matenga, a vuhuna a matenga i keri ni nugutatea,
ACT 2:25 a vuhuna hosi e Davit i ta propet vona, i ta maea, ‘A matai vakaroroa e Bakovi Dagi i laho turagu, a vuhuna i pesi na kanegu, i uka tara viri ge vakamangenge iau.
ACT 2:26 I mavonga a hategu i vivi, a tabelegu i ratea a ngava nivivi. Iau a pasimata ne vomu a Vure nau,
ACT 2:27 a vuhuna i uka ma go lohopile iau, ga tabuli na kanono. I uka ma go mata taroa a Viri Malamala vomu, ge mavuru.
ACT 2:28 O vakasiria nau pali a dala na nimahuri. Ga vivi hateka, a vuhuna o made turagu vakaroro.’
ACT 2:29 “Mua o huriki a turagu, a taki muholi mua, a gare ne hita e Davit i mate, ni tanu. A lovona i tabuli koea mona.
ACT 2:30 E Davit i lohoka vona a ngava a Vure i ta muholi vona na viri tara, a hamona, bara i made na gula hariki vona. E Davit ia a propet, i matai muga a maki ta ge valai, lakea i rata a nita propet ne Kristo ge mahuri mule na matenga, i uka ma ge mate liu, a podana i uka ma ge mavuru.
ACT 2:32 “Re Isu, a Vure i vakamahuri mulea na matenga. Mia lobo mi masia.
ACT 2:33 A Vure i bole rikea a rane Isu, i vakamadea na limana a kanena. E Tamana i habia vona pali a Hanu Kiripiripi i manga a hini i ta muholi muga ge ratea. Ngane i rudua i valai ne mia, i vakabele a maki mu matai mu longo ngane.
ACT 2:34 Re Davit, i uka ma ia ra viri i sike na hunu. Pali i ta muga, i ta maea, ‘E Bakovi Dagi i takia e Bakovi Dagi nau: “O made na limagu a kanegu,
ACT 2:35 ge harena na tahuna ga ratapile e huriki a pile vomu.” ’
ACT 2:36 “Ngane a ngaru mu gu lohoka vona, mua e huriki a Israel. A Vure i ratea e Isu, ge ia a Bakovi Dagi, ge ia e Kristo, re Isu mu paditatea na kai tavalavala.”
ACT 2:37 Na tahuna e huriki ri longoa a ngavane Petrus, i padi a hatene ria, lakea ri nana e Petrus turana e huriki a apostolo ranga, ri ta maea, “Mua o huriki a turane mia, a ra mi gi ratea ngane?”
ACT 2:38 E Petrus i koli, i ta maea, “Mua lobo, mu pulo a vilone mua, ni gi vahilolo na rane Kristo, lakea a Vure bara i puga vuroki a naro hale ne mua. Muri bara i habi ne mua a Hanu Kiripiripi.
ACT 2:39 Hosi a Vure i ta muholi vona ge habi a Hanu Kiripiripi ne mua, e huriki a hamone mua, turane huriki ri made basi, re huriki a Bakovi Dagi, a Vure ne hita bara i gale ria ri gi valai vona.”
ACT 2:40 E Petrus i taki tabu ranga ngava, i vakalongo ria ne Kristo. I taki tora ria, i ta maea, “Mu korimule mua, mu lele rau vona a rongova na Vure, ge pelekado e huriki a bakovi hale na tahuna mona.”
ACT 2:41 E huriki ala kupo ri ngarua a nitane Petrus, lakea ni vahilolo. Na parava iea kunana e huriki ala 3,000 ri dili turane ria.
ACT 2:42 Na parava lobo e huriki a tara ne Kristo ri vapopo, ri habi a hatene ria ni vasileki, ni kani palupu, ni longo a nitovo ne huriki a apostolo.
ACT 2:43 A Vure i rata a nivakasiri i kupo na limane huriki a apostolo, i rata e huriki ri togoa a Vure.
ACT 2:44 E huriki a bakovi a ngatavine ri ramai e Isu ri made palupu, ri vaveru a maki lobo ne ria.
ACT 2:45 Ri habi a maka mahala ne ria ni kona. E rei a viri ne ria i bala a moni, ri habi vona a moni i ngarua.
ACT 2:46 Na parava lobo ri vapopo na roho na Vure, ri kani palupu na ruma ne ria. Ri vivi na maki ni kani a Vure i habi ne ria, ri vaveru.
ACT 2:47 Ri kavurikea a Vure. E huriki a bakovi a ngatavine polovavo ri ngaru ria. Na parava lobo e Bakovi Dagi i korimule tabu e huriki a bakovi a ngatavine ranga. Lakea ri dili turana e huriki na tara na Vure.
ACT 3:1 Na parava vakaroro a bakovi tara i beu ni kaloho sike na roho na Vure, na poridala na tanga tara ni gale a “Poridala Mata Kamumu”. I made vonga, i nonongi a moni ne huriki ri valai vonga. A bakovi iea i beu na tahuna ni poda vona. Na parava tara, e Petrus e Ioanes ru laho sike na roho na Vure na kilala i tolu na malunga, a kilala ne huriki ri vasileki vona.
ACT 3:3 Na tahuna i matai e Petrus e Ioanes ta ru gu dili, i nongi rua na moni.
ACT 3:4 Ru matanonoa, lakea e Petrus i takia, i ta maea, “O mata valai ne maria!”
ACT 3:5 Lakea a bakovi i matanono rua, i luhoi ta ru gu habi a moni vona.
ACT 3:6 Pali e Petrus i takia, i ta maea, “Iau a uka silva, a uka gol, pali ngane ga habia vomu a maki a tahoka. Na rane Isu Kristo o Nasaret o pesi rike, o laho.”
ACT 3:7 Lakea i nugua na limana kanena, i tuli pesia. I malaviriri kunana i vaga a vahana.
ACT 3:8 A bakovi i beu i page rike, i vakatubu ni laho. I dili turane rua na roho na Vure, i laho, i page page, i kavurikea a Vure.
ACT 3:9 Na tahuna e huriki ri masia i laho i kavurikea a Vure,
ACT 3:10 ri matakilalea, a bakovi iea kunana i nongi bala a maki na poridala na roho na Vure ni gale a “Poridala Mata Kamumu.” Lakea ri ngapa, ri turutu vona a maki i bele vona.
ACT 3:11 Na tahuna a matasia iea i roe na limane Petrus e Ioanes, e huriki lobo ri turutu, ri nunu mai tou na talele tara na tabeke na roho na Vure, ni gale a “Talele ne Solomon.”
ACT 3:12 Na tahuna e Petrus i matai ria, i ta maea, “Mua o huriki a bakovi o Israel, i navai mu turutu? I navai mu matanono maria? Naha ni luhoi miri koria na nitora ne maria, o na hini maria a bakovi kamumu.
ACT 3:13 A Vure ne Abraham, ne Isak, ne Iakop, ne huriki a gare ne hita i vakabagetua a Vora vona, e Isu, a viri mu habia ne huriki a bakovi hale. E Pilato i ngaru ni vakaha ia, pali mua mu koi.
ACT 3:14 E Isu i longo mai lobo a ningaru na Vure, ia a bakovi malamala hateka. Pali mua mu marikoi vona, mu takia e Pilato ge vakapagetalea a bakovi ni rabalaki a viri.
ACT 3:15 E Isu ia a vuhuna nimahuri, pali mua mu rabalakia. Pali a Vure i vakamahuri mulea na matenga. Mia lobo mi masia.
ACT 3:16 Mu lohoka vona a bakovi iea. Ngane mu masia i tavaga. A rane Isu i koria. Maria miri luhoi torea e Isu, lakea a bakovi iea i tavaga liu na matane mua lobo.
ACT 3:17 “Ngane mua e huriki a turagu, a lohoka vona a narone mua turane huriki a matakari ne mua mu rata, a vuhuna i uka ma mu lohoka.
ACT 3:18 Pali na limane mua a Vure i ratea i bele muholi a ngava i habi polo hosi ne huriki a propet, re Kristo ge bole a nimadihi, ge mate.
ACT 3:19 I mavonga, mu pulo a vilone mua, mu lakea mai a Vure, lakea bara i ravunu vuroki a naro hale ne mua. Mu rata mavonga, e Bakovi Dagi bara i habi a nimalo ne mua,
ACT 3:20 bara i rudu valai tabua e Kristo, a Viri i vulakia ge korimule mua, re Isu.
ACT 3:21 Ngane i made na hunu, i davea a parava a Vure i vulakia ge rata karaba tabu a maki lobo. I ta polo ne huriki a propet hosi, i ta muholi ge rata mavonga.
ACT 3:22 Hosi e Moses i ta maea, ‘E Bakovi Dagi, a Vure ne mua, muri ma ge rudu vilia ne mua a propet, ge manga iau. A propet iea, a Vure bara i vulaki talea ne mua. Mu longo mai a ngava lobo i taki mua vona.
ACT 3:23 E rei a viri i uka ma i longo mai a ngavana, bara ni rabalaki.’
ACT 3:24 “I muholi hateka, e huriki a propet, i vakatubu ne Samuel i valai, ria lobo ri taki mugea a ngava na maki i bele na tahuna mona.
ACT 3:25 Ra mua, mua a hamone huriki a propet. A Vure i rata a ngava dagi turane Abraham, e huriki a gare hosi ne mua, i ta maea, ‘Na hamomu kunana, ga gamai e huriki lobo na malala.’
ACT 3:26 “A Vure i vulakia a vora vona, i rudua ge valai taro ne mua, ge rata kamumu mua na tahuna i rata mua lobo mu pulo a vilone mua, mu ha taro a vilo hale.”
ACT 4:1 E huriki a prister, a ubu ne huriki a tagari na roho na Vure, e huriki a Sadusi ri valai mai e Petrus e Ioanes na tahuna ru tabana ni vara e huriki.
ACT 4:2 I madihi a hatene ria, a vuhuna ru vara e huriki, ru taki ria ne Isu i pesi rike mule na nimate, lakea i vakasiri manga e huriki lobo bara ri pesi rike mule na nimate.
ACT 4:3 I mavonga, ri lakavu e Petrus e Ioanes. Ri ru dili rua taro na bavi, a vuhuna i malunga liu pali.
ACT 4:4 Pali e huriki ala kupo ri longo a ngava ne rua, ri luhoi torea a Vure. I mavonga, e huriki a bakovi ri luhoi torea e Kristo ri ala 5,000 ngane.
ACT 4:5 Na parava muri e huriki a matakari, e huriki a gare, e huriki a mari na vinara ri vapopo o Ierusalem,
ACT 4:6 turane Anas a prister dagi, e Kaipas, e Ioanes, e Aleksander turana e huriki a kabu na prister dagi.
ACT 4:7 Ri vakapesi na matane ria e Petrus e Ioanes, ri nana rua, “Na nitora ne rei, na rane rei muru rata a maka naro nga?”
ACT 4:8 Ngane a Hanu Kiripiripi i vakatorea e Petrus, i ta maea, “Mua o huriki a matakari, e huriki a gare o Israel!
ACT 4:9 Ra mua, mu nana maria na naro kamumu miri rata virihia na beu, i tavaga navai?
ACT 4:10 A ngaru mu gu lohoka vona, mua turana e huriki a Israel: A bakovi iea i tavaga, i pesi na matane mua na rana, na nitora ne Isu Kristo o Nasaret ra viri mu paditatea, lakea a Vure i vakamahuri mulea na matenga.
ACT 4:11 E Isu ia ‘a kedo mua e huriki a mari ni hae a ruma, mu koi vona, ngane ia a vuhu butu na ruma.’
ACT 4:12 “I uka tabu tara rana bakovi ge korimule hita, a vuhuna a Vure i rudua a viri ala taku kunana ge korimule hita, re Isu.”
ACT 4:13 E huriki a matakari na Iuda ri turutu na tahuna ri matai e Petrus, e Ioanes i uka ma ru mangenge ni ta. Ri turutu a vuhuna ri matakilaka vona rua a bakovi tavula, i uka ma ni tovo. Pali ri matakilala rua, ru laho turane Isu muga.
ACT 4:14 Pali ri gi ta navai? Ri masia a bakovi iea i tavaga, i pesi turane rua.
ACT 4:15 I mavonga, ri turari tala tou na vaponga, ri vata,
ACT 4:16 ri ta maea, “Si gi rata navai a bakovi nga? E huriki lobo o Ierusalem ri lohoka ne rua ru rata a nivakasiri dagi. Bara si keri ni lavuni.
ACT 4:17 Pali si gi ta pupukari ne rua, nahea ru gu vakalongo tabu e huriki ne Isu, ma ge rere lae a velengana.”
ACT 4:18 Lakea ri gale dili tabu e Petrus e Ioanes, ri ta puhaki ne rua nahea ru gu ta tabu, o ru gu vara e huriki ne Isu.
ACT 4:19 Pali e Petrus, e Ioanes ru koli mule, ru ta maea, “Mu luhoi navai? A Vure ge ngaru miri gi longototo mua, o miri gi longototo ia?
ACT 4:20 I uka tara maki ge rata maria miri gi longo vulai. Miri vakalongo kunana a maki miri matai, a maki miri longo.”
ACT 4:21 Muri e huriki a matakari na Iuda ri ta pupukari tabu ne huriki a apostolo nga nahea ru gu vara tabu, muri ri vakapagitala rua. I uka ma ri matavisia tara dala ri gi vakamadihi rua vona, a vuhuna e huriki lobo ri kavurikea a Vure vona a maki i bele.
ACT 4:22 A bakovi ni korimule, a pida vona i ravulu va, i tahoka a polona.
ACT 4:23 Muri e Petrus, e Ioanes ru vano, ru hamule mai e huriki a turane rua, ru vakalongo ria vona a ngava i taki rua vona e huriki a prister dagi, e huriki a gare.
ACT 4:24 Na tahuna ri longo loboa a ngavane rua, ri ta rike, ri vasileki palupu na Vure, “Bakovi Dagi, ioe o ratarike a hunu, a malala, a dari turana maka maki i tabuli ne tou.
ACT 4:25 O ta polo na Hanu Kiripiripi na ngavane Davit, o ta maea, ‘Re huriki i uka ma ria a Iuda, i navai i madihi a hatene ria? Ri manga. Ri matakana a dala ni ratapile iau, pali ri keri.
ACT 4:26 E huriki a hariki na malala ri pesi rike na ni vaubi, e huriki a matakari ri vapopo ri gi vaubi turane Bakovi Dagi, ri gi vaubi turana Viri a Vure i Vulakia.’
ACT 4:27 A ngava nga ri bele muholi na tahuna e Ponsius Pilato e Herod ru vapopo koea na tanga iea turane huriki a Israel, e huriki i uka ma ria a Iuda. Ri vapopo, ri matakana a dala ri gi ratapilea a vora vomu, re Isu, a viri o vulakia.
ACT 4:28 A maki ri ratea ne Isu, na nitora vomu, na ningaru vomu, o taki muga vona ge bele.
ACT 4:29 Bakovi Dagi, ngane o luhoi a hini ri ta vakamangenge mia vona. O kori mia, e huriki a vora vomu, nahea mi gi mangenge ni vakalongo pagapaga a nitamu ne huriki.
ACT 4:30 O vakasiri a nitora vomu, o vakamahuri e huriki, o rata a maka nivakasiri dagi na nitora ne Isu Kristo, a vora malamala vomu.”
ACT 4:31 Na tahuna ri vasileki lobo, a ruma ri vapopo vona i vuruke. A Hanu Kiripiripi i vakatora ria, ri ta pagapaga na nitana Vure, i uka ma ri mangenge.
ACT 4:32 E huriki a murimuri, a niluhoi ne ria i taku kunana. A mahala na viri, i uka ma i taki ge ne vona kunana. Ria lobo ri vaveru a mahala lobo ne ria.
ACT 4:33 A Vure i habi a nitora dagi ne huriki a apostolo, ri vakalongo e huriki ne Isu a Bakovi Dagi i pesi rike mule na matenga. A Vure i rata kamumu hateka ria lobo.
ACT 4:34 I uka tara ne ria ge bala vona tara maki, a vuhuna e huriki ri tahoka a malala, a ruma, bara ri habi ni kona, ri bole a moni,
ACT 4:35 ri habi ne huriki a apostolo. Muri e huriki a apostolo bara ri habi tala ne huriki ri bala a maki.
ACT 4:36 E Iosep, a hamone Levi na tanga e Saiprus, a rana ri galea vona e huriki a apostolo, e Barnabas. Ra ngava e Barnabas a pelegona i maea, ‘a mari ni vakatora a niluhoi ne huriki.’
ACT 4:37 I mavonga i habia a hania vona ni kona. I bole a moni, i habi ne huriki a apostolo.
ACT 5:1 A bakovi tara, a rana e Ananias, e girihina e Sapira, ia tara i habia a tabekena malala vona ni kona.
ACT 5:2 I bole mule ranga mapana malala, i habi ranga tabekena ne huriki a apostolo. E girihina i lohoka vona a naro i ratea. Na tahuna i vano ge habi a moni ne huriki a apostolo, e Petrus i takia, i ta maea, “Ananias, i navai e Satan i dili vomu, o tamia a Hanu Kiripiripi, o bole mule ranga moni ni kona a malala vona?
ACT 5:4 Muga a malala ne vomu. Muri na malala ni kona, a moni o bole, a moni vomu. Bara o rata a maki na ningaru vomu. Pali i navai o luhoi ni ratena a naro iea? I uka ma o tamia tara bakovi. A viri o tamia a Vure.”
ACT 5:5 Na tahuna e Ananias i longoa a ngava iea, i boru puru, i mate. E huriki ri longoa a naro iea, ri mangenge hateka.
ACT 5:6 Muri e huriki a riau ri valai, ri bunua a podana, ri kaloho talea, ri tanua.
ACT 5:7 Muri na kilala i tolu e Sapira i dili valai. I uka ma i lohoka vona e girihina i mate.
ACT 5:8 Lakea e Petrus i nanea, “O vakalongo iau ngane, ra moni nga, a mapana malala marua ni kona?” E Sapira i koli i ta maea, “E, ra ngi kunana a mapana malala.”
ACT 5:9 Lakea e Petrus i takia i ta maea, “Pali i navai muru valongo mai a ngava ni tonia a Hanune Bakovi Dagi? Mata lakea! E huriki a riau ri tanua pali e girihimu, ri laho valai. Ioe tara, bara ri kaloho tala a podamu.”
ACT 5:10 Malaviriri kunana e Sapira i boru puru tabukoi na vahane Petrus, i mate. Na tahuna e huriki a riau ri dili, ri masia i mate pali, ri kaloho talea, ri tanu tabukoi ia ne girihina.
ACT 5:11 E huriki a tara ne Kristo, turana e huriki lobo ri longoa a maki i bele, ri mangenge.
ACT 5:12 E huriki a apostolo ri rata a nivakasiri i kupo na matane huriki. E huriki a tara na Vure ri vapopo vakaroro na Talele ne Solomon.
ACT 5:13 E huriki lobo ri ngaru ria, pali i uka ma ri dili turane ria, a vuhuna ri mangenge.
ACT 5:14 Ngane e huriki ala kupo hateka ri luhoi torea e Bakovi Dagi, ri dili turane ria.
ACT 5:15 E huriki ri lohoka vona a maka nivakasiri e huriki a apostolo ri rata, lakea ri kaloho valai e huriki ri giloa, ri vakamahita ria na kiri ne ria, a moke ne ria na hare dala. Na tahuna e Petrus i laho polo, ri ngarua a maniruna ge tarui ria.
ACT 5:16 E huriki lobo na maka tanga kiroko tabukoi o Ierusalem ri kaloho valai ne huriki a apostolo e huriki ri giloa, e huriki i dili ne ria a hanitu, lakea ni vakamahuri lobo ria.
ACT 5:17 Pali a prister dagi, turane huriki a tara vona re huriki a Sadusi, i madihi a hatene ria.
ACT 5:18 Ri lakavu e huriki a apostolo, ri ru dili ria na bavi.
ACT 5:19 Pali na rodo a agelo ne Bakovi Dagi i talea a logo na bavi, i tuli tala ria. Lakea i taki ria,
ACT 5:20 “Mu vano, mu pesi na roho na Vure, mu vakalongo e huriki na ngava lobo na nimahuri karaba.”
ACT 5:21 Na tahuna i mavida a more, ri dili na roho na Vure, ri vakatubu ni tovo e huriki. Na tahuna a prister dagi turane huriki a tara vona ri bele, ri gale palupu e huriki a tara na Sanderin ra tara na vaponga ne huriki a Israel. Muri ri rudu e huriki a bolekori, ri lakea na bavi, ri gi tuli valai ne ria e huriki a apostolo ne Kristo.
ACT 5:22 Na tahuna e huriki a tagari ri bele na bavi ta ri gi turari e huriki a apostolo, i uka ma ri matai ria vonga. Lakea ri hamule, ri vakalongo maea:
ACT 5:23 “Mi masia a logo na bavi ni tukari kamumu. E huriki a tagari ri pesi polovavo. Pali na tahuna mi talea a logo, i uka ma mi masia tara bakovi ge made pololilo.”
ACT 5:24 Na tahuna a ubu na tagari na roho na Vure, turane huriki a prister dagi ri longoa ngava iea, ri loho lege, e huriki a apostolo ri lokovai? Ri nana rovi lae a ra maki ge bele ngane.
ACT 5:25 Muri a bakovi tara i valai, i ta maea, “Longo valai! Re huriki a bakovi mu ru dili na bavi, ngane ri pepesi na roho na Vure, ri tovo e huriki vonga.”
ACT 5:26 Muri a ubu i vano turane huriki a tagari vona, ri tuli mule e huriki a apostolo. I uka ma ri turari ria, a vuhuna ri mangenge ne huriki, ma ri gi padimate ria na kedo.
ACT 5:27 Ri tuli valai e huriki a apostolo, ri vakapesi ria na matane huriki a tara na vaponga na Sanderin. Lakea a prister dagi i nana ria,
ACT 5:28 i ta maea, “Mi vakuku pali mua, nahea mu gu tovo e huriki vona a rana bakovi iea. Pali mu valai, mu tovo e huriki lobo koea o Ierusalem. Pali a maki tara mu ratea, mu ngaru ni vakarare mia vona a nimatena bakovi iea.”
ACT 5:29 Pali e Petrus turane huriki a apostolo, ri koli, ri ta maea, “Mi gi longototo kunanea a Vure. I uka ma mi gi longototo e huriki a bakovi!
ACT 5:30 Mu paditatea e Isu na kai tavalavala, i mate. Pali a Vure ne huriki a gare ne hita i vakamahuri mulea na matenga.
ACT 5:31 A Vure i bibi rikea a rana e Isu, i vakamadea na limana kanena, ge muga ne hita, ge korimule hita, ge rata e huriki a Israel ri gi pulo a vilone ria, ge puga a naro hale ne ria.
ACT 5:32 Mia mi masia. A Hanu Kiripiripi tara i masia. A Vure i habi a Hanu Kiripiripi ne huriki ri longototo a nitana.”
ACT 5:33 Na tahuna ri longoa a ngava iea, i madihi a hatene ria, ri ngaru ni rabalaki e huriki a apostolo.
ACT 5:34 Pali a Pariseo tara, e huriki lobo ri togoa, a rana e Gamaliel. Ia a mari ni tovo a vinara. I pesi rike, i taki ni gi tono tala taro e huriki a apostolo.
ACT 5:35 Muri i taki e huriki a tara na vaponga, i ta maea, “Mua o huriki a bakovi o Israel, mu luhoi kamumu a naro mu ngaru ni rata virihi ne huriki a bakovi nga.
ACT 5:36 I uka ma i hosi hateka e Teudas i bele, i takia ta ia a bakovi dagi, lakea e huriki ala 400 ri muri vona. Muri ni rabalaki, lakea e huriki a murimuri vona ri ha vapida, i lobo tavula a tara vona.
ACT 5:37 Muri na tahuna ni here a rane huriki lobo, e Iudas a bakovi o Galili, i bele. I tuli e huriki a bakovi, ri vakabele a vabinga ri ngaru ni lili e huriki ri matakari ria. Ia tara ni rabalaki, ri vapida rere e huriki a murimuri vona.
ACT 5:38 I mavonga, e huriki nga, naha ni padoi ria! Mu mata taro ria ri gi vano! A leho ne ria, ge valai na bakovi kunana, bara i lobo tavula.
ACT 5:39 Pali a leho ne ria, ge valai na Vure, bara mu keri ni vakalobo ria, pali mua bara ni matakilaka mua mu hehea a Vure.” Na tahuna ri longoa a ngavana bakovi iea, ri ngarua, ri longo maia.
ACT 5:40 Muri ri gale dili tabu e huriki a apostolo, ri hotu ria. Ri pupukari ria nahea ri gi ta tabu vona a rane Isu. Muri ri tono tala ria ri vano.
ACT 5:41 E huriki a apostolo ri pe a vaponga, ri vano. Ri vivi vona a hini a Vure i matai ria, i kara ria ni bole a maregoa na rane Kristo.
ACT 5:42 Na parava lobo ri tovo e huriki na roho na Vure, na ruma takutaku. Ri tovo, ri vara e huriki, ne Isu a viri a Vure i vulakia.
ACT 6:1 Na tahuna iea e huriki a murimuri ri bele kupo. Na parava lobo bara ri habi a maki ni kani ne huriki a havuri. Pali e huriki a Iuda ri lohoka na nita Grik ri deke mai e huriki a Iuda ri lohoka na nita Hibru, a vuhuna e huriki a havuri ne ria i uka ma ni kori.
ACT 6:2 Lakea e huriki a apostolo ala ravulu a polona i rua, ri gale palupu e huriki a murimuri lobo, ri ta maea, “I uka ma i kamumu mi gi pe a leho ni vara na nitana Vure, mi gi veru a maki ni kani.
ACT 6:3 I mavonga, mua e huriki a turagu, mu vulaki a bakovi ala polorua, mi gi habi a leho iea ne ria. E huriki a bakovi nga ri gi tahoka a lohokanga, a Hanuna Vure ge laho tora turane ria, ri gi naro kamumu, e huriki lobo ri gi togo ria.
ACT 6:4 Pali mia, mi gi habi a hatene mia ni vasileki, ni tovo ne huriki na nita na Vure.”
ACT 6:5 A ngava iea i nangi kamumu ne huriki. Lakea ri vulakia e Stepan, a bakovi i luhoi tora hateka a Vure, a Hanuna Vure i laho tora turana. Ri vulaki e Stepan, turana e Pilip, e Prokorus, e Nikanor, e Timon, e Paramenas, e Nikolas a bakovi o Antiok i dili na lotu ne huriki a Iuda.
ACT 6:6 Ri vakapesi ria na ngalane huriki a apostolo, lakea e huriki a apostolo ri vasileki, ri ru langa a limane ria ne ria.
ACT 6:7 A nitana Vure ni vakarere na tanga lobo. E huriki a murimuri ri bele kupo hateka o Ierusalem. E huriki a prister ala kupo ranga, ri longototo a nitana Vure, ri luhoi tora.
ACT 6:8 A Vure i rata kamumua e Stepan, i habi a nitora vona. I rata na matane huriki a maka nivakasiri dagi, a maki niturutu vona.
ACT 6:9 Pali e huriki a Iuda ranga ri pesi rike, ri vahehe turane Stepan. Re huriki na roho na vaponga, i muga ria a vorakato, pali ngane ri matukapaga. Ri valai o Sirene o Aleksandria, o Silisia o Asia.
ACT 6:10 Ri vahehe turane Stepan, pali ri keri ni gegea, a vuhuna a Hanu Kiripiripi i habi a lohokanga dagi ne Stepan.
ACT 6:11 Muri ri kona kapiloho ranga bakovi, ri taki ria ri gi ta maea, “Mi longoa e Stepan i biu e Moses, a Vure.”
ACT 6:12 Lakea ri piu rike e huriki a bakovi, e huriki a gare, e huriki a mari na vinara, ri lakavua e Stepan, ri turaria lakea ne huriki a Sanderin.
ACT 6:13 Muri e huriki a bakovi ranga ri tami virihia na ngava, ri ta maea, “A bakovi iea, i uka ma i ulu na ni ta hale na roho na Vure, na vinara ne Moses.
ACT 6:14 Mi longoa i takia e Isu o Nasaret ta ge pukea a roho na Vure, ge pulo a maka vinara ne Moses i habi ne hita.”
ACT 6:15 E huriki lobo ri made na Vaponga, ri matanono tamoroa a matane Stepan. Ri masia a matana i manga a matana agelo.
ACT 7:1 Muri a prister dagi i nanea e Stepan, “A ngava ni padi virihi ioe vona, i muholi?”
ACT 7:2 Lakea e Stepan i koli i ta maea, “Mua o huriki a turagu mai, e tata mai, mu longo valai nau! A Vure na nipara dagi i luve na gare ne hita, e Abraham, na tahuna i made o Mesapotamia. I uka ma i made ma o Haran.
ACT 7:3 A Vure i luve vona, i ta maea, ‘O pea a robo vomu, e huriki a viri vomu, o vano o lakea na robo ga vakasiri ioe vona.’
ACT 7:4 “I mavonga, e Abraham i pea a robo ne huriki a Kaldia, i vano i made o Haran. Muri ne tamane Abraham i mate, a Vure i tuli talea o Haran, i tuli vilia koea na malala iea, ra mu made vona ngane.
ACT 7:5 Pali a Vure i uka ma i habia ne Abraham tara tabekena malala ge ne vona. Na tahuna iea, e Abraham i uka e tuna. Pali a Vure i ta muholi vona ge habia vona, turana e huriki a hamona a malala iea.
ACT 7:6 A Vure i taki tabua ne huriki a hamona bara ria a mosi na robo ne huriki ranga. E huriki nga bara ri vakavora e huriki a hamone Abraham, bara ri vakamadihi ria na pida i 400.
ACT 7:7 Pali a Vure i ta maea, ‘Iau ga vakamadihi e huriki a kabu ri vakavora e huriki a hamomu. Muri ri gi pagitala vona a robo iea, ri gi valai, ri gi kavurike iau koea na malala iea.’
ACT 7:8 Muri i habia ne Abraham a ngava dagi na ni pala a kulina viri. E Abraham i vakabelea ngane e Isak, lakea i palea a kulina muri na parava i polotolu. E Isak i vakabelea e Iakop. E Iakop i vakabele e huriki a gare ne hita ala ravulu a polona i rua.
ACT 7:9 “E huriki a gare ne hita nga ri tepua e tarine ria, e Iosep, lakea ri habia ne huriki a Egipto, ri konea ge ia a vora ne ria. Pali a Vure i made turana,
ACT 7:10 i korimulea na nimadihi lobo i bele vona. I habia ne Iosep a lohokanga dagi, i ratea e Parao, a hariki o Egipto, i matakilaka vona. Muri a hariki i ru ia ge matakaria a tanga e Egipto turana maki lobo vona.
ACT 7:11 “Muri a pago i bele, i ratapile e huriki a Egipto, e huriki a Kenan, ri vitolo. E huriki a gare ne hita ranga ri bala a maki ni kani.
ACT 7:12 Na tahuna e Iakop i longo i tahoka a vit o Egipto, i rudu e huriki a gare ne hita, ri lokovonga, ri bole a maki ni kani, ri hamule.
ACT 7:13 Na tahuna ri lokovonga tabu e Iosep i vakasiri ia ne huriki a turana mai, ia e rei muholi. Ngane e Parao i lohoka vona e huriki a kabukabu ne Iosep.
ACT 7:14 Muri e Iosep i talo rike a ngava ne tamana e Iakop, turana e huriki a kabukabu vona ala ravulu polorua a polona i lima, ri gi valai vona.
ACT 7:15 Lakea e Iakop i puru o Egipto, i mate vonga. E huriki e tuna, re huriki a gare ne hita, ria ranga ri mate vonga.
ACT 7:16 Lakea a podane ria ni kaloho mule valai o Sekem, ni ru na babe na malala dagi e Abraham i konea ne huriki e tune Hamor.
ACT 7:17 “A parava a Vure i ta muholi vona ne Abraham ta ge bele, ngane i valai tabukoi. E huriki a viri ne hita vonga o Egipto ri bele kupo hateka.
ACT 7:18 Muri a hariki tara i matakari na robo e Egipto, i uka ma i lohoka ne Iosep.
ACT 7:19 A hariki iea, i tami e huriki a viri ne hita, i rata hale ria. I vakuku ria ri gi vuroki na naru e huriki a koma karaba, ri gi mate.
ACT 7:20 “Na tahuna iea, e Moses ni poda. I mata kamumu hateka na matana Vure. Na keva i tolu e tamana e kinana ru matakaria.
ACT 7:21 Muri ru ru polovavoa, lakea e tune Parao a ngatavine i bolea, i paua ge tuna.
ACT 7:22 E Moses ni tovo kamumu na lohokanga lobo ne Egipto. I moro hateka na nita, na leho vona.
ACT 7:23 “Na tahuna e Moses i tahoka a pida i ravulu va, i vano i gosi e huriki a kabu vona, a Israel.
ACT 7:24 I masia tara ne ria i ubia a bakovi o Egipto, lakea i koria a bakovi iea, i rabalakia a bakovi o Egipto.
ACT 7:25 E Moses i pahaluhoi ta e huriki a viri vona bara ri matakilaka vona a Vure i rudua ge korimule ria, pali i uka ma ri matakilaka vona.
ACT 7:26 Na parava muri e Moses i bele tabu ne ria. I matai a bakovi o Israel ala rua ru vaubi. Lakea i nugu kari rua, i ta maea, ‘Muru longo valai, ra marua, marua a kabu i taku, i navai muru ngaru ni varabalaki?’
ACT 7:27 “Lakea a viri i rata tuharea e turana i kope lakea na gaga e Moses, i koli, i ta maea, ‘E rei i ru ioe go matakari, go pelekado mia?
ACT 7:28 I navai, o ngaru ni ubi mate iau ge manga a hini o ubi mate a bakovi o Egipto ravi?’
ACT 7:29 Na tahuna e Moses i longoa a ngava iea, i ha lakea o Midian i made manga mosi vonga. Muri i parangi, i tahoka e tuna bakovi ala rua.
ACT 7:30 “Muri na pida i ravulu va, a agelo i bele ne Moses na malala golea, tabukoi na lolo e Sinai. A agelo iea i made pololilo na hubena kanono i hube langa na kai kiroko tara.
ACT 7:31 Na tahuna e Moses i masia a hubena kanono, i turutu vona. Na tahuna i lokovonga tabukoi vona, ge matai kamumua, i longoa a lohone Bakovi Dagi i ta maea,
ACT 7:32 ‘Iau a Vure ne huriki a gare vomu, a Vure ne Abraham, ne Isak, ne Iakop.’ E Moses i mangenge, i vakulu a tagana, i mangenge ni mata rike.
ACT 7:33 “Muri e Bakovi Dagi i takia, ‘O kali tala a vahapolo vomu, a vuhuna iau a made koea na malala o pesi vona.
ACT 7:34 Muholi hateka iau a masia a nimadihi i bole e huriki a ngate nau ri made o Egipto. A longoa a nidedo ne ria. Ngane a puru valai ga korimule ria. Ngane o valai, ga rudu hamule ioe lakea o Egipto.’
ACT 7:35 “Muga e huriki a Israel ri koi vona e Moses, ri ta maea, ‘E rei i ru ioe go matakari, go pelekado mia?’ Pali e Moses kunana a viri a Vure i rudua ge matakari, ge korimule e huriki a Israel. A Vure i vulakia e Moses na tahuna a agelo i bele vona na hubena kanono na kai kiroko.
ACT 7:36 E Moses i tuli tala ria o Egipto, i rata a maka maki ni turutu vona, a nivakasiri i kupo na robo e Egipto, na Dari Vururu, na malala golea na pida i ravulu va.
ACT 7:37 Ia kunana ra viri i taki e huriki a Israel, i ta maea, ‘A Vure bara i vulakia tara ne mua, ge ia a propet manga iau.’
ACT 7:38 Ia kunana a viri i made turana e huriki a kabu ne Israel na malala i ngeki. Ia kunana a agelo i ta turana, i habi vona a ngava na nimahuri meli na lolo e Sinai, lakea i habi poloa ne hita.
ACT 7:39 “Pali e huriki a gare ne hita ri marikoi ni longo mai ia. Ri lohopilea, ri ngaru ni hamule lakea o Egipto.
ACT 7:40 Ri takia e Aron, ‘O rata ranga vure ne hita ri gi muga ne hita. I uka ma si lohoka vona e Moses, ra viri i tuli tala hita o Egipto, i loko vai!’
ACT 7:41 Muri ri pipia tara hanuna tuna bulmakau ga vure ne ria. Ri bole valai vona a maka nihabi, ri ratea a habu dagi, ri kavurikea a maki ri ratea na limane ria.
ACT 7:42 Pali a Vure i mata here ne ria, i mata taro ria, ri gi kavurike a maka hada, a keva, a haro. I mavonga, i bele muholi a nita ni here puru hosi na puhu na raukea ne huriki a propet: ‘Mua o huriki a Israel! Na tahuna mu made na malala i ngeki na pida i ravulu va, mu rabalaki a maka sipsip a bulmakau, mu rata a nihabi. Pali i uka ma mu habi nau.
ACT 7:43 Mu habi na vure e Molok. Mu habi tabu na hanuna hada na vure ne mua e Repan. A vure nga mu rata na limane mua, ta mu gu kavurike rua. Ngane mu rata mavonga, bara tono tala mua vona a malala ne mua. Bara mu vano, mu made manga mosi na malala mule lokovonga ne Babilon.’
ACT 7:44 “E huriki a gare ne hita ri tahoka a Kape na Ngava Dagi na tahuna ri laho lae na tabeke i ngeki. A kape iea, ri haea muri mai a nitana Vure i taki polo ne Moses.
ACT 7:45 Muri e huriki e tune ria ri bole vilia na tahuna e Iosua i muga ne ria, ri bole polo a malala ne huriki a kabu ranga. E huriki a kabu nga, a Vure i lili tala ria. Ri vakapesia koea a kape, i valai i harena na tahuna e Davit a hariki i matakari o Israel.
ACT 7:46 E Davit, a Vure i ngarua. Lakea i takia a Vure i ngaru ni gi hae a roho na Vure ne Iakop.
ACT 7:47 Pali a roho iea, e Davit i uka ma i haea. E tuna, e Solomon a viri i haea.
ACT 7:48 “Pali a Vure Meli Liu i uka ma i made na roho ni hae. I manga a ngava a propet tara i takia hosi,
ACT 7:49 ‘E Bakovi Dagi i ta maea, “A hunu a gula-hariki nau, A malala a murina vahagu. I uka tara roho mu gu haea ge kamumu ga made vona. Ra iau, a ngaru a hini ga malo vona?
ACT 7:50 Iau a ratarike a maki lobo nga.” ’”
ACT 7:51 Lakea e Stepan i ta maea, “Mu putu ngingi! A hatene mua, a talingane mua i robo manga e huriki i uka ma ri lohoka na Vure! Mu manga e huriki a gare ne mua hosi, mu gegea a Hanu Kiripiripi!
ACT 7:52 E huriki a gare ne mua ri vakamadihi lobo e huriki a propet hosi. Ri rabalaki e huriki a propet ri ta muga vona a Bakovi Malamala ta ge valai. I valai pali, pali mua mu habia na limane huriki a pile vona, mu rabalakia.
ACT 7:53 Ra mua, e huriki a agelo ri habi ne mua a vinara na Vure, pali i uka ma mu ramaia. Mua kunana mu rabalakia.”
ACT 7:54 Na tahuna ri longo a ngavane Stepan, i madihi a hatene ria, ri karatata a ngine ria.
ACT 7:55 Pali e Stepan, a Hanu Kiripiripi i vakatorea, i mata rike na hunu i masia a bagetuanga na Vure. I masia e Isu i pesi tabukoi na Vure, na limana a kanena.
ACT 7:56 Lakea i ta maea, “Mu mata sike! A masia a Hunu i mata ka! A Tuna Bakovi i pesi tabukoi na Vure, na limana a kanena.”
ACT 7:57 Na tahuna ri longoa a ngavane Stepan, ri magulu rike taku ri nugu kari a talingane ria, ri nunu lokovonga vona,
ACT 7:58 ri turari talea na tanga dagi, ri padimatea na kedo. E huriki ri padi virihia na ngava ri kali tala a maka varakia ne ria, ri ru na vahana riau tara ni gale e Saulus, ge matakari.
ACT 7:59 Na tahuna ri padia na kedo e Stepan, i vasileki, i ta maea, “Isu a Bakovi Dagi, o bolea a hanugu.”
ACT 7:60 Muri i turume puru i gale dagi hateka, “Bakovi Dagi, naha ni luhoi a naro hale ne ria.” Muri i mate.
ACT 8:1 Na matane Saulus, a naro ri rata virihia e Stepan vona i kamumu hateka. Na parava iea kunana ri vakatubu ni vakamadihi e huriki a tara ne Kristo o Ierusalem, lakea ri ha vapida lae, ri vano ri made na tabeke ne Iudea, a tabeke ne Samaria. Pali e huriki a apostolo i uka ma ri vano.
ACT 8:2 E huriki a bakovi kamumu ranga ri bolea a podane Stepan, ri taringia, muri ri tanua.
ACT 8:3 Pali e Saulus i ratapile mavonga e huriki a tara ne Kristo. I dili na ruma ne ria, i turari tala e huriki a bakovi a ngatavine, i ru dili ria na bavi.
ACT 8:4 E huriki ri ha vapida lae, ri vara a Velenga Kamumu ne huriki na maka tanga ri lakea vona.
ACT 8:5 E Pilip i puru na tanga dagi e Samaria, i vakalongo e huriki vonga ne Kristo.
ACT 8:6 Na tahuna e huriki ri longoa e Pilip i vara, ri matai a maka nivakasiri i rata, ria lobo ri longo kamumu a ngava i taki.
ACT 8:7 I vakatavaga e huriki a beu, a vaha hale. I lili tala e huriki a hanitu ne huriki, lakea e huriki a hanitu ri kulugou, ri ha tala.
ACT 8:8 Ngane e huriki lobo na tanga iea ri vivi.
ACT 8:9 A bakovi tara i made na tanga dagi iea, a rana e Simon. Muga ne Pilip i lokovonga, e Simon i vakaholi e huriki a Samaria na malulu vona. I bibi rike mulea ta ia a bakovi dagi.
ACT 8:10 E huriki lobo ri longo maia, e huriki a bakovi tavula, e huriki a kakaina tanga, ri ta maea, “A bakovi iea i tahoka a nitora na vure ni gale e ‘Dagi.’”
ACT 8:11 Ri longo maia, a vuhuna i tabaka ngane i vakaholi ria na malulu vona.
ACT 8:12 Pali na tahuna e Pilip i vara ria, ri luhoi torea a Velenga Kamumu na harikianga na Vure, ri luhoi torea a rane Isu Kristo, lakea e huriki a bakovi a ngatavine ni vahilolo.
ACT 8:13 E Simon tara i luhoi tora, lakea ni vahilolo. Muri i laho turane Pilip, i turutu vona a maka nivakasiri dagi e Pilip i rata.
ACT 8:14 Na tahuna e huriki a apostolo o Ierusalem ri longo e huriki a Samaria ri bole a nitana Vure, ri rudu e Petrus e Ioanes ru lakea ne ria.
ACT 8:15 Na tahuna ru bele, ru vasileki ne ria, ri gi bole a Hanu Kiripiripi,
ACT 8:16 a vuhuna i uka ma i bele ne ria ma. Ni vahilolo ria kunana na rane Isu Kristo a Bakovi Dagi.
ACT 8:17 Muri ru ru langa ne ria a limane rua, ri bole a Hanu Kiripiripi.
ACT 8:18 Na tahuna e Simon i matai e Petrus e Ioanes ru ru langa a limane rua ne huriki, lakea ri bole a Hanu Kiripiripi, i ngaru ni habi a moni ne rua,
ACT 8:19 i ta maea, “Muru habia nau a nitora iea, e rei a viri ga ru langa a limagu vona bara i bole a Hanu Kiripiripi.”
ACT 8:20 Pali e Petrus i koli i ta maea, “A moni vomu ge velu. Ioe tara bara o velu, a vuhuna o luhoi ta go konea a nitora na Vure!
ACT 8:21 Ioe o uka ma go dili vona a leho miri ratea, a vuhuna a naromu i hale na matana Vure.
ACT 8:22 O pulo a vilomu, o ha vona a naro hale iea. O vasileki ne Bakovi Dagi ge pugea a naro hale o ngaru ni ratea. Ia ge ngaru, bara i pugea a naro hale vomu.
ACT 8:23 A matakilala ioe, o ngutu hateka ni bole a nitora iea. Ioe a vora tavula na naro hale.”
ACT 8:24 E Simon i koli, i ta maea, “O vasileki nau ne Bakovi Dagi, nahea ge bele nau a maki o taki.”
ACT 8:25 E Petrus e Ioanes ru vakalongo e huriki ne Bakovi Dagi, ru tovo ria na ngavana. Muri ru hamule lakea o Ierusalem. Na tahuna ru laho hamule, ru vara e huriki na maka tanga o Samaria na Velenga Kamumu.
ACT 8:26 Ngane a agelo ne Bakovi Dagi i takia e Pilip, i ta maea, “O pesi rike, o vano, o laho na dala i pagitala o Ierusalem i puru lakea na nuli tanga e Gasa.”
ACT 8:27 Lakea i malaga, i laho. Na bokodala i taguia a bakovi o Itiopia. A bakovi iea a ori, ni pala a dolena. A leho vona ni matakari a tava na hariki ngatavine e Kandasi na robo e Itiopia. I sike pali o Ierusalem, i vasileki.
ACT 8:28 Ngane i hamule lakea na tanga vona. I made langa na karis, i gia a puhu na raukea ne Isaia a propet.
ACT 8:29 Lakea a Hanu Kiripiripi i takia e Pilip, “O lakea tabukoi na karis.”
ACT 8:30 Lakea e Pilip i nunu lakea na karis, i longoa a bakovi i gia a puhu na hinere ne Isaia a propet. Lakea e Pilip i nanea, “Ra ngava o gia, o longokilalea?”
ACT 8:31 Lakea a ori i koli, i ta maea, “Ga longokilala navia? A viri ge tuveve poloa nau, bara lohoka vona.” Lakea a ori i takia e Pilip ge rike maia, ge made turana.
ACT 8:32 A tabekena Hinere i gia a ori iea, i maea, “Ni lalu manga a sipsip ni gi padimate. I vulai, i malou manga a tuna sipsip ni pala a vuna, i uka ma i takia tara ngava.
ACT 8:33 Na tahuna ri biu pilea, i uka ma ri pelekado kamumua. I uka a hamona a vuhuna i uka ma i made tabu na malala.”
ACT 8:34 Lakea a ori i nanea e Pilip, “O vakalongo iau ngane vona a propet iea. I taki mulea, o i taki a viri tara?”
ACT 8:35 Lakea e Pilip i vakalongoa a ori na Velenga Kamumu ne Isu, i vakatubu na ngava iea.
ACT 8:36 Na tahuna ru nunu puru na dala, ru bele vona tara naru. Lakea a ori i ta maea, “Mata lakea, a naru. A ngaru go vahilolo iau.”
ACT 8:38 Lakea i vakukua a bakovi i vakanunua a karis, ge hori taro. Muri e Pilip, a ori ru puru na naru, lakea e Pilip i vahiloloa.
ACT 8:39 Na tahuna ru pagitala na naru, a Hanune Bakovi Dagi i bolea e Pilip, i vano. A ori i uka ma i matai tabua, pali i vivi hateka, i ramai a dalana, i vano.
ACT 8:40 Pali e Pilip i bele na tanga dagi e Asotus. I laho lakea o Sisaria, i vara a Velenga Kamumu na maka tanga na dala.
ACT 9:1 Na tahuna iea e Saulus i tababana ni ta tora hateka ge ratapile, ge rabalaki e huriki a murimuri ne Bakovi Dagi. I lakea na prister dagi,
ACT 9:2 i takia ge herea tara raukea ge bole lakea na maka roho na vaponga na tanga dagi e Damaskus. A raukea bara i vakalongo ria ne Saulus ge lokovonga, ge matavisi ranga bakovi a ngatavine ri ramai a Dala ne Bakovi Dagi, bara i lakavu ria, i turari mule valai o Ierusalem.
ACT 9:3 Na tahuna i popote ge bele o Damaskus, a nipara dagi na hunu i kinipageri vakaturutu halui ia.
ACT 9:4 E Saulus i boru puru na malala, i longoa a lohona viri i ta maea, “Saulus, Saulus, i navai o vakamadihi iau?”
ACT 9:5 Lakea e Saulus i nana, “Bakovi dagi, e rei ioe?” A lohona viri i koli, i ta maea, “Iau e Isu, ra viri o vakamadihia.
ACT 9:6 Pali ngane o pesi rike, o dili na tanga dagi. Ga taki ioe na maki go ratea.”
ACT 9:7 E huriki a bakovi ri laho turane Saulus ri pesi tata mavonga, ri ngapa. Ri longoa a lohona viri, pali i uka ma ri masia tara viri.
ACT 9:8 E Saulus i pesi rike, i mata para, pali i kepa. Ni tuli na limana, i dili na tanga dagi e Damaskus.
ACT 9:9 Na parava i tolu i kepa. I uka ma i kani, i uka ma i ninu.
ACT 9:10 Na tanga dagi e Damaskus i made vonga tara murimuri, a rana e Ananias. E Bakovi Dagi i bele vona na vurena, i galea, “Ananias!” I koli, i ta maea, “Bakovi Dagi, iau ieni.”
ACT 9:11 Lakea e Bakovi Dagi i takia, “O pesi rike, o laho lakea na ruma e Iudas, na dala ni gale e Kiripi, o nana kanea vonga tara bakovi o Tarsus, a rana e Saulus. Ngane i vasileki vonga.
ACT 9:12 I vurena, i masia a bakovi, a rana e Ananias, i valai, i ru langa a limana vona ge vakamatapara ia.”
ACT 9:13 Pali e Ananias i koli i ta maea, “Bakovi Dagi, iau a longo e huriki ri takia a bakovi iea, ta i ratapile e huriki a tara vomu o Ierusalem.
ACT 9:14 Ngane e huriki a prister dagi ri rudu vilia ge lakavu e huriki ri gale a ramu.”
ACT 9:15 Pali e Bakovi Dagi i takia, “O vano! A bakovi iea, a ngarua ge lakea ne huriki a bakovi a ngatavine i uka ma ria a Iuda, e huriki a hariki, e huriki a Israel, ge vakalongo ria nau.
ACT 9:16 Ga vakasiria na maka maki bara i bole a nimadihi vona na tahuna i ramai iau.”
ACT 9:17 I mavonga, e Ananias i vano, i bele na ruma. I dili, i ru langa a limana ne Saulus, i ta maea, “O turagu o Saulus, e Isu a Bakovi Dagi, a viri i bele vomu na dala na tahuna o laho valai koea, i rudu iau a valai vomu, go matapara tabu, ge dili vomu a Hanu Kiripiripi.”
ACT 9:18 I malaviriri kunana, a maki manga a honana manu i boru tala na matane Saulus, i matapara tabu. Lakea i pesi rike, ni vahilolo.
ACT 9:19 Muri i kani i vaga a tuhana. E Saulus i made turane huriki a murimuri o Damaskus na parava ranga,
ACT 9:20 i lakea malaviriri na maka roho na vaponga, i vakalongo e huriki maea, “E Isu ia a Tuna Vure.”
ACT 9:21 E huriki ri longoa a nitana ri turutu, ri vanana, “Ra bakovi iea, i navai i ta mavonga? Ia kunana a viri i rabalaki e huriki ri luhoi torea e Isu o Ierusalem. Pali ngane i valai koea ta ge lakavu ria, ge turari mule ria ri gi pesi na matane huriki a prister dagi o Ierusalem.”
ACT 9:22 A vinara ne Saulus i bele tora hateka. I vakasiri e huriki a Iuda ri made o Damaskus ne Isu ia e Kristo, lakea ri ngapa.
ACT 9:23 Muri na parava i kupo, e huriki a Iuda ri varodo a ngava ri gi rabalakia e Saulus.
ACT 9:24 Pali e Saulus i longoa a naro ta ri gi ratea vona. A rodo a haro ri tagari mavongea a poridala na tanga dagi, ta ri gi rabalakia e Saulus.
ACT 9:25 Pali na rodo tara e huriki a murimuri vona ri tuli rikea na nure dagi, ra i tura halui a tanga dagi. Ri vakamadea na kulopi, ri vakatavore purua na nimatatala, i vano.
ACT 9:26 Na tahuna i luve o Ierusalem i ngaru ni dili turane huriki a murimuri. Pali ri mangenge vona, a vuhuna i uka ma ri luhoi ge ia a murimuri muholi.
ACT 9:27 Pali e Barnabas i tuhori ia, i tulia lakea ne huriki a apostolo, i vakalongo kamumu ria vona e Saulus i bele vona e Bakovi Dagi na dala, lakea e Bakovi Dagi i habi a ngava vona. I vakalongo tabu ria vona e Saulus i vara pagapaga na rane Isu o Damaskus.
ACT 9:28 Lakea i made turane ria o Ierusalem, i laho lae turane ria, i uka ma i mangenge. I vara pagapaga na rane Bakovi Dagi.
ACT 9:29 I ta turana, i vagege turane huriki a Iuda ri lohoka na nita Grik. Pali ri toni ni rabalakia.
ACT 9:30 Na tahuna e huriki a tara ne Kristo ri longoa ta ni gi rabalaki, ri tulia lakea o Sisaria taro, muri ri rudua ge lakea o Tarsus.
ACT 9:31 Muri e huriki a tara ne Kristo na maka tabeke ne Iudea, ne Galili, ne Samaria ri made na nivalemu. Ri muri mai a vilone Bakovi Dagi, lakea a Hanu Kiripiripi i vakatora ria, i rata ria ri bele ala kupo hateka.
ACT 9:32 E Petrus i laho lae na tabeke lobo, i gosi e huriki a tara ne Kristo. Na parava tara i vano i gosi e huriki a tara na Vure ri made o Lida.
ACT 9:33 Na tahuna i bele vonga i masia a bakovi tara, a rana e Anias. I beu i mahita kunana na kiri na pida i polotolu.
ACT 9:34 Lakea e Petrus i takia, “Anias, e Isu Kristo i vakatavaga ioe. O pesi rike, o pilu a moke vomu.” I malaviriri kunana e Anias i pesi rike.
ACT 9:35 E huriki ri made o Lida, o Saron ri masia i tavaga, lakea ri pulo a vilone ria, ri ramai e Bakovi Dagi.
ACT 9:36 Na tanga e Iopa a ngatavine tara i made vonga a rana e Tabita. A rana na nita Grik e Dorkas. Na parava vakaroro i muri mai a vilo kamumu, i kori e huriki a matasia.
ACT 9:37 I ratea a gilanga dagi, i mate. A podana ni vahilolo, ni ru na tabekena ruma polomeli.
ACT 9:38 A tanga e Lida i tabukoi o Iopa. Lakea na tahuna e huriki a murimuri ri longoa e Petrus i made o Lida, ri rudu a bakovi ala rua ru lokovonga, ru takia, ru ta maea, “O valai malaviriri.”
ACT 9:39 Lakea e Petrus i pesi rike, i vano turane rua. Na tahuna i bele, ri tuli sikea na ruma langalanga. E huriki a havuri ri pesi halui ia, ri tangi, ri vakasiria vona a maka varakia e Dorkas i rata na tahuna i tabana ni mahuri.
ACT 9:40 Pali e Petrus i tono tala ria na ruma. Muri i turume puru, i vasileki. I mata lakea na podana ngatavine, i ta maea, “Tabita, o pesi rike!” Lakea i matapara. Na tahuna i masia e Petrus, i made rike.
ACT 9:41 Muri e Petrus i nugua na limana, i tuli pesia. I gale palupu e huriki a tara na Vure, e huriki a havuri, i vakasiria ne ria e Tabita i mahuri mule na matenga.
ACT 9:42 A velengana ni longo lobo na tanga dagi e Iopa, lakea e huriki ala kupo ri luhoi torea e Bakovi Dagi.
ACT 9:43 Muri e Petrus i made vonga o Iopa na parava i kupo. I made turana bakovi a rana e Simon. A bakovi iea, a mari ni rata a maki na kulina bulmakau.
ACT 10:1 A bakovi tara i made na tanga dagi e Sisaria, a rana e Kornelius. Ia a ubu na nugumaheto ala 100 ne Rom. E Kornelius a turane huriki a nugumaheto ni gale a tara na Itali.
ACT 10:2 E Kornelius turane huriki a kabu vona ri togoa a Vure. I hatebalala, i kori vakaroro e huriki a matasia, i vasileki na Vure na parava vakaroro.
ACT 10:3 Na parava tara, na kilala i tolu na malunga, i masia na vurena a agelo na Vure i bele vona, i galea, “Kornelius!”
ACT 10:4 Lakea e Kornelius i mangenge hateka, i matanono tamoroa, i nanea, “Bakovi Dagi, i navai?” A agelo i koli, i ta maea, “A Vure i longo a nivasileki vomu, i matai a hini o kori e huriki a matasia, i vivi vomu.
ACT 10:5 O rudu ranga bakovi ri gi lakea na tanga e Iopa, ri gi tuli vilia a bakovi tara, a rana e Simon, ra ni gale e Petrus.
ACT 10:6 Ia a mosi ne Simon, a mari ni rata a maki na kulina bulmakau. A roho vona i pesi tabukoi na dari.”
ACT 10:7 Na tahuna a agelo i vano pali, e Kornelius i gale a vora vona ala rua turana nugumaheto. A nugumaheto iea, i made tabukoi ne Kornelius vakaroro, i matakaria. I luhoi torea a Vure.
ACT 10:8 E Kornelius i taki tou vona a maki i bele vona. Muri i rudu tou, to lakea na tanga e Iopa.
ACT 10:9 Na parava muri, na kuru haro, to ngalai lokovonga e Iopa. Na tahuna iea, e Petrus i rike na mapana ruma ge vasileki.
ACT 10:10 I vitolo, i ngaru ni kani. Na tahuna e huriki ri tarangai a maki ni kani vona, i vurena.
ACT 10:11 I masia a hunu i mata ka, i masia a maki tara i manga a lavalava dagi ni vakatavore puru. A maki tara i nugutata a harena i va, ni vakatavore puru na malala.
ACT 10:12 A lavalava iea i vonu vona a maka livoa, a tabele bako, a kadirovo.
ACT 10:13 Muri a lohona viri i ta maea, “Petrus, o pesi rike, o rabalaki, o kani a maki nga!”
ACT 10:14 Pali e Petrus i koli, i ta maea, “Bakovi Dagi, i uka liu! Iau i uka ma kani kilala a maki muto.”
ACT 10:15 A lohona viri i ta tabu, i ta maea, “A ra maki a Vure i ratea i bele kabakaba, naha ni takia ta i katoki.”
ACT 10:16 A maki iea i bele balaka tolu. Muri ni lalu rike malaviriri na hunu.
ACT 10:17 E Petrus i loho viliha vona ra maki i masia na vurena, i navai a pelegona. Na tahuna i tabana ni luhoi viliha, a bakovi ala tolu, re Kornelius i rudu, to mata visi pali a ruma e Simon, to pesi na poridala.
ACT 10:18 To gale, to nana, “I tahoka tara mosi i made koea, a rana e Simon Petrus?”
ACT 10:19 E Petrus i tabana ni luhoi kadoa a maki i masia na vurena, lakea a Hanu Kiripiripi i takia, “Simon, a bakovi ala tolu to matakana ioe.
ACT 10:20 O pesi rike o puru mai tou. Naha ni koi, o vano turane tou, a vuhuna iau kunana a rudu tou to valai.”
ACT 10:21 Muri e Petrus i puru i taki a bakovi nga, “Iau kunana a bakovi moto matakanea. I navai moto valai?”
ACT 10:22 Lakea to koli, to ta maea, “E Kornelius, a ubu na tara na nugumaheto ala 100, i rudu mateu mete valai. Ia a bakovi malamala, i togoa a Vure. E huriki a Iuda lobo ri ngarua. A agelo na Vure i takia ge taki ioe, go lakea na ruma vona, ge longo ranga ngava go taki.”
ACT 10:23 Muri e Petrus i taki tou to go dili na ruma, i matakari tou vona a rodo iea. Na parava muri i vano turane tou. E huriki a murimuri ranga na tanga e Iopa, ria ranga ri vano.
ACT 10:24 Na parava muri ri bele o Sisaria. E Kornelius i pasimata ne ria, i gale palupu pali e huriki a kabukabu, e huriki a turana, ri vapopo.
ACT 10:25 Na tahuna e Petrus i dili na ruma, e Kornelius i turume puru, i kavurikea.
ACT 10:26 Pali e Petrus i tuli pesia, i ta maea, “O pesi rike. Iau tara a bakovi tavula kunana.”
ACT 10:27 E Petrus i ta turana e Kornelius na tahuna ru laho dili, lakea i matai e huriki ala kupo ri vapopo.
ACT 10:28 Lakea i taki ria, “Mu lohoka vona a vinara ne mia e huriki a Iuda. I uka ma mi gi laho turane huriki i uka ma ria a Iuda, o mi gi gosi ria. Pali a Vure i taki pali iau nahea ga galea tara viri ge a bakovi tavula, o ge muto.
ACT 10:29 I mavonga, na tahuna mu gale iau, i uka ma a takia tara ngava. A valai kunana. Pali ngane ga nana mua, i navai mu talo rike a ngava nau?”
ACT 10:30 E Kornelius i koli, i ta maea, “A maki tara i bele nau rira. Ngane a parava i va i polo pali. A vasileki na tahuna maea, na kilala i tolu na malunga. I bele vakaturutu nau tara bakovi, i pesi na ngalagu, a varakia vona i kea hateka.
ACT 10:31 I taki iau, i ta maea, ‘Kornelius, a Vure i longo pali a nivasileki vomu, i matai a hini o kori e huriki a matasia vona.
ACT 10:32 I mavonga, o talo rike a ngava ne Simon, a rana tara e Petrus, ge valai. Ngane ia a mosi ne Simon o Iopa, a mari ni rata a maki na kulina bulmakau, i made tabukoi na dari.’
ACT 10:33 I mavonga a talo rike malaviriri a ngava vomu, go valai. I kamumu hateka o valai pali. Ngane mi made koea na matana Vure, mi gi longo a ngava e Bakovi Dagi i taki vomu go taki polo ne mia.”
ACT 10:34 Muri e Petrus i ta rike, i ta maea, “Iau ngane a matakilaka vona, a Vure i rata a naro i palupulupu ne huriki a kabu lobo: e huriki a Iuda, e huriki i uka ma ria a Iuda.
ACT 10:35 Na tanga lobo, e rei a viri i togoa a Vure, i rata a naro kamumu, a Vure bara i ngarua.
ACT 10:36 Mu lohoka vona a ngava a Vure i taki mia e huriki a Israel vona, i vakalongo a Velenga Kamumu ne huriki bara ri made na nivalemu turana Vure na tahuna ri luhoi torea e Isu Kristo, a Bakovi Dagi ne huriki lobo.
ACT 10:37 Mu lohoka vona a maka maki i bele na tabeke ne Iudea, i vakatubu o Galili muri ne Ioanes i taki e huriki ge vahilolo ria.
ACT 10:38 Mu lohoka vona, a Vure i vulakia e Isu o Nasaret, i habi vona a Hanu Kiripiripi, a nitora. E Isu i laho na tabeke lobo, a Vure i made turana, i rata a naro kamumu, i korimule e huriki a bakovi i ratapile ria a hanitu.
ACT 10:39 “Mi matai a maki lobo i rata na robo ne huriki a Iuda, a maki i rata o Ierusalem. Muri ri paditatea na kai tavalavala, i mate.
ACT 10:40 Pali na parava i tolu muri ne Isu i mate, a Vure i vakamahuri mulea na matenga, i rudua i bele ne huriki.
ACT 10:41 Pali i uka ma i bele ne huriki lobo. I bele kunana ne mia e huriki a Vure i vulaki mia mi gi matai, mi gi vakalongo e huriki. Re mia e huriki mi kani, mi ninu turana na tahuna i mahuri mule.
ACT 10:42 I vakuku mia mi gi vara e huriki, mi gi vakalongo kamumu ria maea, ‘A Vure i vulakia e Isu ge pelekado e huriki ri mahuri, e huriki ri mate pali.’
ACT 10:43 E huriki a propet ri vakalongo muga vona pali. Ri vakalongo ne e rei a viri i luhoi tora ia, a Vure bara i puga a naro hale vona na rane Isu.”
ACT 10:44 Na tahuna e Petrus i tabana ni ta, a Hanu Kiripiripi i dili malaviriri ne huriki vonga ri longo a ngavana.
ACT 10:45 E huriki a murimuri ri valai turane Petrus, e huriki ni pala pali a kuline ria, ri turutu vona a Vure i habi a Hanu Kiripiripi ne huriki a kabu i uka ma ria a Iuda.
ACT 10:46 Ri lohoka vona a Vure i habi a Hanu Kiripiripi ne ria, a vuhuna ri longo ria ri ta na nita tebi, ri kavurikea a Vure. Muri e Petrus i ta maea,
ACT 10:47 “E huriki nga ri bole a Hanu Kiripiripi i manga hita muga. Pali e rei ngane ge ta kari hita, nahea si gi vahilolo ria?”
ACT 10:48 Lakea i taki ria ni gi vahilolo ria na rane Isu Kristo. Muri ri takia e Petrus ge made turane ria na parava ranga.
ACT 11:1 Ngane e huriki a apostolo, turane huriki ri luhoi torea e Kristo na robo e Iudea, ri longo e huriki i uka ma ria a Iuda ri luhoi torea a nitana Vure.
ACT 11:2 Lakea na tahuna e Petrus i luve o Ierusalem, e huriki ri ramai a naro ni pala a kuli, ri tahatea,
ACT 11:3 ri ta maea, “I navai o lakea na ruma ne huriki i uka ma ria a Iuda, i uka ma ni pala a kuline ria, o kani turane ria?”
ACT 11:4 Lakea e Petrus i tuveve polo ne ria a maki lobo i bele vona, i ta maea,
ACT 11:5 “Na parava tara a vasileki na tanga dagi e Iopa, lakea a vurena. A masia tara maki i manga a lavalava bolabola ni nugu na tabekena i va, ni vakatavore na hunu, i puru valai na hini a made vona.
ACT 11:6 A matanonoa, a matai pololilo a maka maki a vinara i taki i uka ma si gi kani: a maka maki mahuri na robo, a maki ni matakari, a maka mata, a maka kadirovo.
ACT 11:7 Muri a longoa a lohona viri i taki iau, i ta maea, ‘Petrus, o pesi rike, o rabalaki, o kani.’
ACT 11:8 “Lakea a koli, a ta maea, ‘Bakovi Dagi, i uka liu! Iau, i uka ma i dili ma na ngavagu tara maki katoki.’
ACT 11:9 “Lakea a lohona viri i ta valai tabu na hunu, i ta maea, ‘A ra maki a Vure i ratea i kabakaba, naha ni takia ta i muto.’
ACT 11:10 A maki iea i bele balaka tolu. Muri ni lalu rike tabu na hunu a lavalava bolabola.
ACT 11:11 “I uka ma i tabaka a bakovi ala tolu to bele. A bakovi nga, ni rudu o Sisaria to go matai iau.
ACT 11:12 A Hanu Kiripiripi i taki iau nahea ga loho vagorigori, ga vano kunana turane tou. A murimuri ala polotara nga, ria ranga ri vano turagu, mi dili na ruma na bakovi iea.
ACT 11:13 I vakalongo mia vona a agelo na Vure i bele vona na ruma, i takia, ‘O rudu ranga viri ri gi lakea o Iopa, ri gi matakanea e Simon, a rana tara e Petrus, ri gi takia ge valai.
ACT 11:14 Bara i takia vomu tara ngava ge korimule ioe turana kabu vomu.’
ACT 11:15 “Na tahuna a vakatubu ni ta, a Hanu Kiripiripi i dili ne ria. I manga a hini i dili ne hita muga.
ACT 11:16 Muri a longovisia a ngavane Bakovi Dagi i takia, ‘E Ioanes i vahilolo e huriki na naru, pali iau bara vahilolo mua na Hanu Kiripiripi.’
ACT 11:17 Hosi si luhoi torea e Isu Kristo a Bakovi Dagi, lakea a Vure i habi a Hanu Kiripiripi ne hita. Pali ria ngane ri luhoi torea e Isu, a Vure i habia a Hanu Kiripiripi ne ria. Pali iau e rei iau, ga hatekakaria a Vure nahea ge habi a Hanu Kiripiripi ne ria?”
ACT 11:18 Na tahuna ri longoa a nitana, ri uka ngava, lakea ri kavurikea a Vure, ri ta maea, “Ngane si lohoka vona e huriki a bakovi i uka ma ria a Iuda, ria ranga a Vure i ngaru ria ri gi pulo a vilone ria, ri gi bole a nimahuri vakaroro.”
ACT 11:19 Na tahuna e Stepan ni rabalaki, ni rata hale e huriki ri luhoi torea e Isu. Lakea ri ha viliha, ri lakea o Ponesia, o Saiprus, o Antiok. Na tahuna ri made na tanga nga ri vakalongo a Velenga Kamumu ne huriki a Iuda kunana.
ACT 11:20 Pali e huriki a bakovi ranga, a bakovi o Saiprus, a bakovi o Sirene, ri luve o Antiok, ri vakatubu ni vakalongo a Velenga Kamumu ne Isu Kristo ne huriki na tanga iea, i uka ma ria a Iuda.
ACT 11:21 A nitora ne Bakovi Dagi i tabuli ne ria, lakea e huriki ala kupo ri luhoi torea e Bakovi Dagi, ri pulo a vilone ria.
ACT 11:22 A velengane ria i bele ne huriki a tara ne Kristo o Ierusalem, lakea ri rudua e Barnabas i lakea o Antiok.
ACT 11:23 Na tahuna i bele, i vivi, a vuhuna i matai a Vure i rata kamumu ria. I vara ria ri gi habi a hatene ria ni ramai e Bakovi Dagi, ri gi pesi tora.
ACT 11:24 I rata mavonga a vuhuna ia a bakovi kamumu, i luhoi tora hatekea a Vure, a Hanu Kiripiripi i leho tora turana. I kori e huriki ala kupo vonga ri dili na tara ne Bakovi Dagi.
ACT 11:25 Muri e Barnabas i lakea o Tarsus ge matakanea e Saulus.
ACT 11:26 Na tahuna i matavisia i turea, ru lakea o Antiok. Ru made vonga na pida i taku, ru tovo e huriki ala kupo. I vonga o Antiok e huriki a murimuri ni gale visi ria a Kristian.
ACT 11:27 Na tahuna iea, a propet ranga ri pe e Ierusalem, ri puru valai o Antiok.
ACT 11:28 A turane ria tara, a rana e Agabus, i dili vona a Hanu Kiripiripi, i pesi rike, i ta propet vona a pago dagi ta ge bele na tabeke lobo e Rom i matakari. A pago iea i bele na tahuna a hariki e Klaudius i matakari o Rom.
ACT 11:29 E huriki a murimuri ri longoa a ngava ne Agabus, lakea ri varodo a ngava ri gi ru palupu a moni, na ningaru ne ria takutaku, ri gi vakaru a kinori lakea ne huriki a kabu o Iudea.
ACT 11:30 Ri rata mavonga, lakea ri rudu e Barnabas e Saulus ru bole a moni, ru vano ru habi ne huriki a bakovi dagi na lotu o Iudea.
ACT 12:1 Na tahuna iea a hariki e Herod i vakatubu ni ratapile e huriki a tara ne Kristo.
ACT 12:2 I rabalakia na bainat e Iakop, e tukane Ioanes.
ACT 12:3 Na tahuna i matai e huriki a Iuda ri vivi vona a naro i ratea, i lakavua e Petrus. I ratea a naro iea na Habu na Bret i Uka Is.
ACT 12:4 I ru dilia na bavi, i ru ia na limana nugumaheto ala ravulu a polona i polotara, ri gi tagaria. E Herod i ngaru ni dava ge lobo taro a habu na Nipagepolo, muri ge vakapesia na matane huriki, ni gi pelekado.
ACT 12:5 E Petrus i made na bavi, pali e huriki a tara ne Kristo ri vasileki na Vure na parava lobo, ge koria.
ACT 12:6 Na rodo muga na parava e Herod ta ge bole talea e Petrus ni gi pelekado, e Petrus i mahita na koropalana a nugumaheto ala rua. Ri kolotatea na sen i rua. E huriki a nugumaheto ranga ri tagari na logo na bavi.
ACT 12:7 A agelo ne Bakovi Dagi i bele vakaturutu tabukoi ne Petrus, a nipara dagi i parai a bavi. A agelo i ubia na kamagane Petrus, i vangoa, i ta maea, “O pesi rike malaviriri.” Lakea a sen i maparu tala na limane Petrus.
ACT 12:8 Muri a agelo i takia, i ta maea, “O rodo a varakia, a vahapolo vomu.” Lakea e Petrus i rata mavonga. Muri a agelo i takia, i ta maea, “O kavitagu ioe vona varakia ola vomu, o muri nau.”
ACT 12:9 Lakea e Petrus i muri vona, ru pagitala na bavi. Pali i uka ma i lohoka vona ge muholi a maki i ratea a agelo. I pahaluhoi ta i vurena kunana.
ACT 12:10 Ru vano, ru laho polo vona a tagari. Muri ru laho polo vona tabu a tagari tara. Muri ru bele na poridala ni rata na aen i pagitala lakea na tanga dagi. A logo na poridala i mata ka tavula muga, lakea ru pagitala. Na tahuna ru laho basi popote pali na dala, a agelo i marakavelu vona.
ACT 12:11 Na tahuna e Petrus i matakilaka vona a maki i bele vona, i ta maea, “Ngane a lohoka vona e Bakovi Dagi i rudua a agelo vona i valai, i korimule iau na limane Herod, i korimule iau na maka naro e huriki a Iuda ri luhoi ta ri gi rata virihi iau vona.”
ACT 12:12 Lakea na tahuna i matakilaka vona a hini i uka ma i vurena, i vano maia a ruma ne Maria, e kinane Ioanes, a rana tara e Markus, ta ge matai e huriki ri vapopo, ri vasileki vonga.
ACT 12:13 Na tahuna i bele na ruma, i tutulidi. A vora ngatavine i valai, a rana e Roda, ta ge matai a viri i tutulidi.
ACT 12:14 Na tahuna i longokilalea a lohone Petrus, i vivi hateka, i longokaburungi ni talea a logo. I nunu hamule, i vakalongo e huriki, i ta maea, “E Petrus i pesi polovavo!”
ACT 12:15 Pali ri takia, ri ta maea, “Ioe a manga!” Pali i ta kinigao mai ria ta e Petrus muholi. Pali ria ri taki ia, ri ta maea, “Ma ga agelo vona.”
ACT 12:16 Pali e Petrus i tutulidi mavonga polovavo. Na tahuna ri talea a logo, ri turutu vona.
ACT 12:17 Pali e Petrus i totokari ria na limana, nahea ri gi ta. Muri i vakalongo ria vona e Bakovi Dagi i tuli tala navia na bavi. Muri i taki ria, i ta maea, “Mu vakalongo e Iakop turana e huriki ranga ri luhoi torea e Kristo, mu vakalongo ria na maki i bele nau. Muri i pe ria, i lakea na tabeke tara.
ACT 12:18 Na hatelanga e huriki a tagari ri turutu, ri luhoi legelege hateka vona e Petrus i uka ma ia vonga.
ACT 12:19 Muri e Herod i longoa e Petrus i ha na bavi, lakea i taki e huriki ri gi matakanea, pali i uka ma ri matavisia. Lakea i nana kado e huriki a tagari, pali ri keri ni ta, lakea i vakuku ni gi rabalaki. Muri e Herod i pea e Iudea, i lakea o Sisaria ta ge made popote vonga.
ACT 12:20 E Herod i madihi a hatena vona e huriki na tanga e Tair e Sidon. Lakea e huriki nga ri vadili vapopo, ri puru, ri gi masia. Na tahuna ri bele vonga, ri ta taro turana e Blastus, a bolekori tara ne Herod, ri takia ge pesi turane ria. Muri ri lakea ne Herod, ri takia ri ngaru ni made turana na nivalemu, a vuhuna a maki ni kani lobo ne ria, ri bole na robo i matakari e Herod.
ACT 12:21 Na parava ni ru ri gi ta turana, e Herod i bagetu na varakia na hariki, i made na gula hariki vona, i habi a ngava ne huriki.
ACT 12:22 Lakea e huriki ri gale tala, ri ta maea, “Ra bakovi dagi i ta ta, i uka ma a bakovi tavula. Ia a vure!”
ACT 12:23 Malaviriri kunana a agelo ne Bakovi Dagi i rabalakia, a vuhuna i uka ma i kavurikea a Vure. I rike vona a gilanga dagi, i kania a maka mata kiroko, i mate.
ACT 12:24 Pali na parava lobo e huriki ala kupo ri longo a nitana Vure, ri luhoi torea.
ACT 12:25 Na tahuna iea e Barnabas e Saulus ru vakalobo a leho ne rua o Ierusalem, ru turea e Ioanes, a rana tara e Markus, to hamule sike o Antiok.
ACT 13:1 I tahoka e huriki a tara ne Kristo ri made o Antiok. A bakovi ala lima ne ria a propet, a mari ni tovo. A rane ria ra nga: E Barnabas, e Simion a rana kalale vona e Kuli Kato, e Lusius o Sirene, e Manaen re turane Herod a hariki, e Saulus.
ACT 13:2 Na parava tara e huriki nga ri kavurikea a Bakovi Dagi, ri peremu, lakea a Hanu Kiripiripi i taki ria, i ta maea, “Mu vulaki e Barnabas e Saulus ru gu rata a leho a gale rua ru gu rata.”
ACT 13:3 Muri ri vasileki, ri peremu, ri ru langa a limane ria ne rua, ri rudu rua ru vano.
ACT 13:4 E Barnabas e Saulus, a Hanu Kiripiripi i rudu tala rua, ru puru o Salamis. E Ioanes-Markus tara, i tou, ge tuhori rua. To rike na aga vonga o Selusia, to lakea na bodu e Saiprus. Na tahuna to bele na tanga dagi e Salamis to vakalongo a nitana Vure pololilo na maka roho na vaponga ne huriki a Iuda vonga.
ACT 13:6 To laho vona a tabeke lobo na bodu, to bele na tanga e Papos. Ru taguia vonga a bakovi o Iuda tara, a rana e Bar-Isu, a bakovi na malulu, a nitamina propet.
ACT 13:7 A bakovi iea i made turana matakari tara na tanga, a rana e Sergius Paulus, a bakovi na lohokanga. I talo rike a ngava ne Barnabas e Saulus ru gu lakea vona, ru gu vakalongoa vona a nitana Vure.
ACT 13:8 Pali ra bakovi na malulu, a rana na nita Grik e Elimas, i koi ne rua. I koi vona a matakari ge luhoi torea a Vure.
ACT 13:9 Pali e Saulus, a rana tara e Paulus, i dili vona a Hanu Kiripiripi, i matanonoa e Elimas i takia,
ACT 13:10 “Ioe a tuna hanitu! Ioe a pile na maka maki kamumu! O tatami bala, o rata bala a naro hale! Garika go lobo ni rata marogo a dala kiripiripi ne Bakovi Dagi?
ACT 13:11 Ngane a limane Bakovi Dagi ge padoi ioe, go kepa. O uka ma go matai a haro na parava ranga.” Malaviriri kunana a bakovi iea i kepa, i bakai viliha na viri ge tulia na limana, ge vakasiria na dala.
ACT 13:12 Na tahuna a matakari i masia a naro iea i bele, i luhoi torea a Vure, a vuhuna i turutu vona a vinara ne Bakovi Dagi.
ACT 13:13 Muri e Paulus, e Barnabas, e Ioanes to rike na aga o Papos, to lakea o Perga na tabeke ne Pampilia. Na tahuna ri bele vonga e Ioanes-Markus i pe rua, i hamule lakea o Ierusalem.
ACT 13:14 Pali e Paulus e Barnabas ru pea e Perga ru valai, ru bele na tanga dagi e Antiok na tabeke ne Pisidia. Na parava ni malo ru dili na roho na vaponga, ru made puru.
ACT 13:15 Ni gi lobo a vinara e Moses, a hinere ne huriki a propet, lakea e huriki a bakovi dagi na roho na vaponga ri nana e Paulus e Barnabas, ri ta maea, “Marua a turane mia, muru tahoka a ngava ni vakatora a hatene huriki, muru takia ngane.”
ACT 13:16 Lakea e Paulus i pesi rike i toto rike a limana ri gi longo, lakea i ta maea, “Mua o huriki a bakovi o Israel, mua e huriki i uka ma mua a Iuda, pali mu togoa a Vure, mu longo valai nau!
ACT 13:17 A Vure ne hita e huriki a Israel i vulaki e huriki a gare ne hita, i rata ria ri bele kupo hateka na tahuna ri made o Egipto. Muri i bole tala ria o Egipto na nitora dagi vona.
ACT 13:18 I hatenono na naro hale ne ria na tahuna ri laho lae na malala i ngeki na pida i ravulu va.
ACT 13:19 Muri i vakalobo a kabu dagi i polorua o Kenan, i bole a malala ne ria i habi polo ne huriki a Israel, ga malala ne ria liu.
ACT 13:20 A maka maki nga ri bele pololilo na pida i 450. “Muri i habi ne huriki a Israel e huriki a mari ni pelekado a ngava ri matakari ria, i harena na tahuna ne Samuel a propet.
ACT 13:21 Muri ri ngarua a hariki ge matakari ria, lakea a Vure i habia ne ria e Saulus e tune Kis, a hamone Bensamin. I matakari ria na pida i ravulu va.
ACT 13:22 Muri a Vure i vakaloboa e Saulus, i ratea e Davit ge ia a hariki ne ria. A Vure i vakalongo e huriki ne Davit, i ta maea, ‘Iau a matakilalea e Davit, re tune Iesi, ia a bakovi kamumu, a vivi vona. Bara i rata lobo a maki a ngaru ge rata.’
ACT 13:23 “A Vure i ramaia a ngava i takia hosi, i vulakia na hamone Davit a bakovi ge korimule hita, i rudua i bele ne huriki a Israel. A bakovi iea e Isu.
ACT 13:24 Muga ne Isu i valai, e Ioanes a mari ni vahilolo i vara e huriki a Israel ri gi pulo a vilone ria, ni gi vahilolo.
ACT 13:25 Na tahuna e Ioanes i popote ge vakalobo a leho vona, i ta maea, ‘Mu luhoi iau ge iau e rei muholi? Iau i uka ma a bakovi mu davea. A bakovi iea bara i muri valai. Pali iau i uka ma a bakovi kamumu ga puga vuroki a mota na vahapolo vona.’
ACT 13:26 “Mua o huriki a turagu, mua e huriki a hamone Abraham, mua e huriki i uka ma mua a Iuda pali mu togoa a Vure, mu longo kamumu. Ra ngava na Vure ge korimule e huriki, a Vure i vakaru vilia ne hita.
ACT 13:27 E huriki o Ierusalem turane huriki a matakari ne ria, i uka ma ri matakilalea a bakovi iea. I uka ma ri longokilala a ngava ne huriki a propet, ra ni gi tala na Parava Nimalo lobo. I mavonga, na tahuna ri takia e Isu ge mate, ri rata a ngavane huriki a propet hosi i bele muholi.
ACT 13:28 I uka ma ri masia e Isu ge ratea tara naro hale ge mate vona. Pali ri takia e Pilato ge rabalakia.
ACT 13:29 Ri rata virihia a naro lobo, ra ni here puru hosi vona. Muri ri paru talea na kai tavalavala, ri vakatabuli a podana na babe.
ACT 13:30 Pali a Vure i vakamahuri mulea na matenga.
ACT 13:31 Muri i bele balaka kupo ne ria e huriki ri laho muga turana, ra ri malaga o Galili, ri laho sike lakea o Ierusalem turana. Pali ngane ri vakalongo e huriki a Israel ne Isu.
ACT 13:32 “Mi vakalongo mua vona a Velenga Kamumu, ra ngava a Vure i ta muholi vona hosi ne huriki a gare ne hita,
ACT 13:33 ngane i bele muholi na matane hita e huriki a hamone ria. I bele muholi na tahuna i vakamahuri mulea na matenga e Isu. A ngava iea ni here na ruana sapta na Linge, i ta maea, ‘Ioe e Tugu. Mona a vakasiri e huriki ne iau e Tamamu.’
ACT 13:34 A Vure i vakamahuri mulea na matenga, i uka ma i bera. I manga a ngava ni here puru hosi, i maea, ‘Ga rata kamumu mua, ga vakabagetu mua, i manga a ngava a ta muholi ne Davit a hariki.’
ACT 13:35 A nita tara na Hinere i ta maea, ‘I uka ma go matataroa a bakovi o vulakia ge rata a leho vomu ge mavuru na lovo.’
ACT 13:36 Hosi, na tahuna e Davit i made na malala, i rata lobo a leho a Vure i habi vona. Muri i mate, ni tanu turana e huriki a viri vona. Muri a podana i bera.
ACT 13:37 Pali a viri a Vure i vakamahuri mulea na matenga i uka ma i bera.
ACT 13:38 “Mua o huriki a turagu, a ngaru mu gu lohoka vona, miri vakalongo mua vona a Vure bara i puga vuroki a naro hale ne mua na tahuna mu luhoi torea e Isu.
ACT 13:39 A vinara ne Moses i uka ma i puga vuroki a naro hale legelege ne mua, ge rata mua mu malamala na matana Vure. Pali e rei a viri i luhoi torea e Isu, bara i puga vuroki a naro hale lobo vona, i ratea i malamala na matana Vure.
ACT 13:40 Mu matadoko, ma ge bele muholi ne mua a ngava hosi ne huriki a propet, i maea,
ACT 13:41 ‘Mua o huriki a bakovi ni nongo vaki! Bara mu turutu, muri mu mate, a vuhuna Iau ga ratea tara maki ge bele ne mua. Bara a viri i taki mua vona a maka maki ga ratea, i uka ma mu gu longo maia.’”
ACT 13:42 Na tahuna e Paulus i taki lobo a ngava nga, ru pesi rike e Barnabas, ta ru gu vano, lakea e huriki ri nana tora rua ru gu hamule valai tabu girira na Parava Nimalo tara, ru gu vara tabu vona a ngava iea.
ACT 13:43 I lobo ngane a vaponga, e huriki ri vapida. Muri e huriki ranga ri ramai rua, e huriki a Iuda turana e huriki i uka ma ria a Iuda, ra ri dili na lotu na Iuda ri muri ne rua. Lakea ru ta turane ria, ru vakatora a niluhoi ne ria, ri gi pesi tora ni luhoi torea a Vure ge rata kamumu ria.
ACT 13:44 Na Parava Nimalo muri, e huriki lobo na tanga dagi ri vapopo ni longo a nitane Bakovi Dagi.
ACT 13:45 Na tahuna e huriki a Iuda ri matai e huriki ala kupo ri bele, i madihi a hatene ria, ri hehea, ri harogia e Paulus vona a ngava i taki.
ACT 13:46 Lakea e Paulus e Barnabas ru koli paga paga kunana, i uka ma ru mangenge, ru ta maea, “A Vure i ngaru maria miri gi vakalongo muga ne mua a nitana. Pali mu marikoi vona a nita iea. Mu vakasiri mua, i uka ma mua a viri kamumu ni bole a nimahuri vakaroro. Ngane miri gi matataro mua, miri gi lakea ne huriki i uka ma ria a Iuda.
ACT 13:47 Miri gi rata mavonga, a vuhuna e Bakovi Dagi i vakuku maria maea, ‘Iau a rata ioe, ioe a nipara ne huriki i uka ma ria a Iuda, go vakasiri a dala na nimahuri vakaroro ne huriki lobo na malala.’”
ACT 13:48 Na tahuna e huriki i uka ma ria a Iuda ri longoa a ngava ne Paulus, ri vivi, ri togoa a nitane Bakovi Dagi. Lakea e huriki i vulaki ria a Vure, ri gi bole a nimahuri vakaroro, e huriki nga ngane ri luhoi tora.
ACT 13:49 A nitane Bakovi Dagi i rere na tabeke lobo vonga.
ACT 13:50 Pali e huriki a Iuda ri piurike e huriki a bakovi dagi na tanga dagi turana e huriki a ngatavine dagi i uka ma ria a Iuda, pali ri togoa a Vure. Ri piu rike ria, ri vakamadihi e Paulus e Barnabas, ri lili tala rua na tabeke vonga.
ACT 13:51 Lakea ru kurudu pasi na vahane rua a habulo ru gu vakasiri ria a Vure ge pelekado ria. Muri ru vano, ru lakea o Ikonium.
ACT 13:52 Pali e huriki a murimuri ri vivi hateka, a Hanu Kiripiripi i tuhori ria.
ACT 14:1 Na tanga e Ikonium e Paulus e Barnabas ru dili na roho na vaponga, i manga a rabune rua ru rata vakaroro. A nivara ne rua i kavakava hateka, lakea e huriki a Iuda ala kupo ri luhoi torea e Kristo. E huriki a bakovi a ngatavine ala kupo i uka ma ria a Iuda, ria ranga ri luhoi tora.
ACT 14:2 Pali e huriki a Iuda ranga ri koi ni luhoi e Isu, ri piurike e huriki i uka ma ria a Iuda ri gi tepu e huriki ri luhoia e Kristo.
ACT 14:3 I mavonga e Paulus e Barnabas ru made na parava i kupo vonga. I uka ma ru mangenge. Ru vara pagapaga ne Bakovi Dagi. Na tahuna ru vara, e Bakovi Dagi i vakasiri e huriki vona a ngava ru taki na naro kamumu vona i muholi hateka, i habi a nitora ne rua ru rata a maka nivakasiri.
ACT 14:4 E huriki vonga na tanga dagi ri vapida na niluhoi. E huriki ranga ri taga ne huriki a Iuda. Pali e huriki ranga, ri taga ne vikirua, a apostolo.
ACT 14:5 Lakea e huriki a Iuda, e huriki i uka ma ria a Iuda, turana e huriki a kakaina tanga ri varodo a ngava ri gi ratapile rua, ri gi padi rua na kedo.
ACT 14:6 Pali ru lohoka vona a naro ta ri gi rata virihi ru vona, lakea ru ha lakea na tabeke ne Likonia na tanga dagi e Listra e Derbe, na maka tanga ri pesi tabukoi ne rua.
ACT 14:7 Na tahuna ru bele vonga, ru vara na Velenga Kamumu.
ACT 14:8 A bakovi tara i made o Listra, a vaha hale. A vahana i hale na tahuna ni poda ia vona, lakea i uka ma i laho kilala.
ACT 14:9 A bakovi iea i made vonga i talangakia e Paulus i vara. Lakea e Paulus i mata tamoro lokovonga vona, i masia i luhoi torea e Isu ge vakamahuria,
ACT 14:10 lakea i gale tala i ta maea, “O pesi rike.” I malaviriri kunana i pesi rike, i vakatubu ni laho.
ACT 14:11 Na tahuna ri masia a maki e Paulus i ratea, ri gale tala na nita Likonia, ri ta maea, “A bakovi nga, a vure ru vulo manga bakovi, ru puru valai ne hita!”
ACT 14:12 E Barnabas ri galea e Seus, e Paulus ri galea e Hermes, a vuhuna ia a viri i habi a ngava.
ACT 14:13 A roho na vure e Seus i pesi tabukoi, polovavo na tanga dagi. Lakea a prister ne Seus i bole valai na poridala na tanga dagi a maka bulmakau, a hurumade ni basi. Ge a nihabi na apostolo nga.
ACT 14:14 Pali na tahuna a apostolo e Barnabas e Paulus ru longo vona a maki ri ngaru ni ratea, ru rape a varakia ne rua, ru nunu lakea ne ria, ru gale tala, ru ta maea,
ACT 14:15 “I navai mu rata mavonga? Maria a bakovi tavula kunana manga mua! Miri valai koea miri ngaru ni vakalongo mua vona a Velenga Kamumu, mu gu ha taro a maka maki tavula nga, mu gu ramai a Vure mahuri, a viri i ratarike a hunu, a malala, a dari, turana maki lobo i tabuli ne tou.
ACT 14:16 Hosi i matataro e huriki i uka ma ria a Iuda ri ramai kunana a ningaru ne ria.
ACT 14:17 Pali i uka ma i kapiloho liu, ge uka a viri ge lohoka vona. I vakasiri vakaroro a ningaru vona ne mua: I vakaboru vilia na hunu a vala, i rata a maka maki ni kani kamumu ri koru rike, ri ramai a parava ne ria. I habi a maki ni kani i kupo ne mua, i rata mua mu vivi.”
ACT 14:18 Ru rata a ngava nga, pali e huriki ri tabana ri ngaru ni habi a nihabi ne rua.
ACT 14:19 Pali e huriki a bakovi ranga o Iuda ri valai o Antiok o Ikonium, ri piurike e huriki, ri padia e Paulus na kedo. Ri pahaluhoia ta i mate, lakea ri lalu talea na tanga dagi.
ACT 14:20 Pali na tahuna e huriki a murimuri ri pesi haluia, i pesi rike, i dili tabu na tanga dagi. Na parava muri i vano turane Barnabas, ru lakea o Derbe.
ACT 14:21 E Paulus e Barnabas ru vara na Velenga Kamumu na tanga e Derbe, lakea e huriki ala kupo ri luhoi torea e Kristo. Muri ru hamule lakea na tanga e Listra, e Ikonium, e Antiok,
ACT 14:22 ru vakatora a niluhoi ne huriki a murimuri vonga ri gi pesi tora na niluhoi torea e Kristo, ru ta maea, “Bara si bole a nimadihi i kupo muga ni dili na harikianga na Vure.”
ACT 14:23 Na tanga takutaku na tabeke ne huriki ri luhoia e Isu, ru vulaki ranga bakovi ge ria a matakari na lotu. Ru peremu na ni kani, ru vasileki, ru habi ria na limane Bakovi Dagi, ra viri ri luhoi torea.
ACT 14:24 Ru laho poloa pali a robo e Pisidia, muri ru bele na tanga e Pampilia.
ACT 14:25 Ru vara na Velenga Kamumu na tanga e Perga, muri ru puru lakea na tanga e Atalia.
ACT 14:26 Muri ru rike na aga vonga, ru hamule lakea na tanga e Antiok, ra tanga muga e huriki a kabu ne Kristo vonga ri habi rua na naro kamumu na Vure ru gu ratea a leho. Ngane ru vakaloboa pali.
ACT 14:27 Na tahuna ru bele o Antiok ru gale palupu e huriki a tara ne Kristo, ru vakalongo ria vona a maka maki a Vure i rata na limane rua. Ru vakalongo ria vona a Vure i vakasiri a dala ne huriki i uka ma ria a Iuda, ri gi luhoi torea e Kristo.
ACT 14:28 Muri ru made tabaka vonga o Antiok turana e huriki a murimuri.
ACT 15:1 E huriki a bakovi ranga ri malaga o Iudea ri valai o Antiok, ri vakatubu ni vara e huriki ri luhoi e Kristo, ri ta maea, “Mua bara mu longotaro a vinara ne Moses, a kuline mua i uka ma ni gi pala, i uka ma mu gu bole a nimahuri vakaroro.”
ACT 15:2 E Paulus e Barnabas ru koke vona a ngava iea, lakea ru vahehe turane ria. Lakea ri vulaki e Paulus e Barnabas, turana e huriki a bakovi ranga, ri gi sike o Ierusalem, ri gi matai e huriki a apostolo, e huriki a gare na lotu vona a ngava iea.
ACT 15:3 E huriki a tara ne Kristo vonga ri rudu ria ri vano. Na tahuna ri laho polo na tanga e Ponesia, e Samaria, ri vakalongo ria vona e huriki a viri i uka ma ria a Iuda ri pulo a vilone ria, ri muri na Vure. A velenga iea i rata e huriki a kabukabu ri vivi.
ACT 15:4 Na tahuna ri bele o Ierusalem, e huriki a tara ne Kristo vonga, e huriki a apostolo, e huriki a gare na lotu ri tagui ria. Muri e Paulus, e Barnabas ru vakalongo ria vona a maki lobo a Vure i rata na limane ria.
ACT 15:5 Pali e huriki a tara ne Kristo ranga, ri dili na tara ne huriki a Pariseo, ri pesi rike, ri ta maea, “E huriki a viri i uka ma ria a Iuda ri luhoi torea e Kristo, si gi taki ria ni gi pala a kuline ria, si gi vakuku ria ri gi ramai a vinara ne Moses.”
ACT 15:6 Lakea e huriki a apostolo, e huriki a gare na lotu ri vapopo, ri luhoi kado a ngava iea.
ACT 15:7 Ri vagege vona, muri e Petrus i pesi rike, i ta maea, “Mua o huriki a turagu, mu lohoka vona hosi a Vure i vulaki tala iau ne mua, ga vara na Velenga Kamumu ne huriki i uka ma ria a Iuda, ri gi longoa, ri gi luhoi torea.
ACT 15:8 A Vure i lohoka na niluhoi ne huriki a bakovi lobo. I vakasiri ria i vulaki ria na tahuna i habi a Hanu Kiripiripi ne ria, i manga a hini i rata ne hita.
ACT 15:9 Na matana Vure e huriki i uka ma ria a Iuda ri manga kunana hita. Na tahuna ri luhoi torea e Kristo, a Vure i puga vuroki a naro hale ne ria, i rata ria ri kabakaba, i manga a hini i rata ne hita.
ACT 15:10 Pali i navai ngane mu ngaru ni tonia a Vure? I navai mu ngaru ni habi a nimava iea ne huriki nga, ri luhoi torea e Kristo? A nimava iea, hita si keri ni kalohoa. E huriki a gare ne hita hosi, ria ranga ri keri ni kalohoa.
ACT 15:11 Nahea ge mavonga! Si lohoka vona a naro kamumu kunana ne Bakovi Dagi e Isu bara i korimule hita. Ria ranga.”
ACT 15:12 E huriki na vaponga ri mangulu tete, ri longo e Barnabas e Paulus ru vakalongo ria vona a maka nivakasiri a Vure i rata na limane rua na matane huriki i uka ma ria a Iuda.
ACT 15:13 Na tahuna ru ta lobo, e Iakop i ta rike, i ta maea, “Mua o huriki a turagu, mu longo valai!
ACT 15:14 Ngane kunana e Simon Petrus i tuveve poloa ne hita a Vure i luve navai ne huriki a kabu i uka ma ria a Iuda, ge bole tala ne ria a kabu vona ri gi muri maia.
ACT 15:15 E huriki a propet hosi ri ta muga vona ge bele mavonga, ri here puru,
ACT 15:16 ‘E Bakovi Dagi i ta maea, “Muri, ga hamule valai, ga hae tabua a kape ne Davit, ra kape i mapuka pali. A maka mahalana roho ri matutu, Ga kuloi ga vakapesi tabua a roho.
ACT 15:17 Muri e huriki lobo bara ri valai nau, iau e Bakovi Dagi. E huriki a kabu i uka ma ria a Iuda, pali a vulaki ria ge ria a viri nau, ria ranga ri gi valai nau.” A ngava iea, a ngavane Bakovi Dagi.
ACT 15:18 Hosi liu i taki muga a maki nga ge bele.’”
ACT 15:19 E Iakobus i ta lokovonga, i ta maea, “Na niluhoi nau, nahea si gi habi a maregoa ne huriki a kabu i uka ma ria a Iuda, ri pulo a vilone ria, ri muri na Vure.
ACT 15:20 Ngane si gi here lakea ne ria, si gi taki ria nahea ri gi kani a maki ni kani ni habi na nitamina vure, nahea ri gi rata a molenga, nahea ri gi kani a kania ni hori a lohona i mate, nahea ri gi ninu a dara.
ACT 15:21 Si gi rata mavonga, a vuhuna i paru hosi a vinara ne Moses ni vara na tanga lobo, ni gi balaka kupo na maka roho na vaponga na Parava Nimalo.”
ACT 15:22 Muri e huriki a apostolo, e huriki a bakovi dagi, turana e huriki a tara ne Kristo lobo ri vulaki ranga bakovi ne ria, ri gi rudu lakea o Antiok turane Paulus e Barnabas. Ri vulaki e Iudas a rana tara e Barsabas, e Sailas. A bakovi nga e huriki a kabukabu ri togo hateka rua.
ACT 15:23 Ri habi ne tou a raukea iea: “Mia e huriki a apostolo, a gare, mia a turane mua, mi herea a raukea iea, i lakea ne mua e huriki i uka ma mua a Iuda, mu luhoi torea e Isu, mu made o Antiok, o Siria, o Silisia. A haro kamumu ne mua lobo.
ACT 15:24 Mi longo ranga e huriki ri pe mia koea, ri lakene, ri vakaviliha a niluhoi ne mua na maka ngava ri taki. Re huriki nga i uka ma mi lohoka ne ria.
ACT 15:25 Mia lobo koea mi valongo mai a ngava, mi vulaki ranga bakovi ri gi lakene mai mua turane Barnabas e Paulus. Mi ngaru hateka rua.
ACT 15:26 I mavonga mi rudu e Iudas e Sailas ru gu lakene mua, ru gu vakatora na ngavane rua a nita mi here puru. Re vikirua, i popote ru gu mate, a vuhuna ru ramai e Isu Kristo, a Bakovi Dagi ne hita.
ACT 15:28 A Hanu Kiripiripi i masia i kamumu, mia ranga mi masia i kamumu nahea mi gi vakapae mua. Mu muri mai kunanea a ngava iea:
ACT 15:29 Naha ni kani a maki ni kani ni habi na nitamina vure. Naha ni kani, naha ni ninu a dara. Naha ni kani a kania ni hori a lohona i mate. Naha ni mole. Mu lele rau vona maka naro hale nga, bara mu made kamumu kunana. A ngava ne mia i pali.”
ACT 15:30 Ni here lobo a raukea iea, lakea ri rudu e huriki nga ri gi lakea o Antiok. Na tahuna ri bele vonga ri gale palupu e huriki a tara ne Kristo, ri habia ne ria a raukea.
ACT 15:31 Na tahuna ri gia, ri vivi vona a maka ngava kamumu i vakatora a niluhoi ne ria.
ACT 15:32 E Iudas e Sailas, rua a propet. Ru vakatora a niluhoi ne ria na ngava.
ACT 15:33 Ru made na parava ranga vonga, muri e huriki a kabukabu ri talo mule rua na nivalemu, ta ru gu hamule puru o Ierusalem ne huriki ri rudu valai rua.
ACT 15:35 Pali e Paulus e Barnabas ru made mule vonga o Antiok. Ru tovo, ru vara e huriki na ngava ne Bakovi Dagi. I uka ma i rua kunana ru tovo. I tahoka e huriki a bakovi ranga ri totovo.
ACT 15:36 Muri na parava ranga, e Paulus i takia e Barnabas, “Tu gu hamule tabu na maka tanga tu vara muga a nita ne Bakovi Dagi vona, tu gu kasisi e huriki, ri made navai.”
ACT 15:37 E Barnabas i ngarua e Ioanes-Markus ge tou,
ACT 15:38 pali e Paulus i koi vona, a vuhuna i ha taro rua o Pampilia, i uka ma i leho turane rua.
ACT 15:39 Ru vahehe hateka, lakea ru vapida. E Barnabas i tulia e Markus, ru rike na aga, ru lakea na bodu e Saiprus.
ACT 15:40 Pali e Paulus i vulakia e Sailas ru gu laho palupu. E huriki a kabukabu ri habi rua na limane Bakovi Dagi ge rata kamumu rua, ru vano.
ACT 15:41 Ru vano ru laho lae na robo e Siria, e Silisia, ru vakatora a niluhoi ne huriki a tara ne Kristo ri made vonga.
ACT 16:1 E Paulus i havai lakea o Derbe, muri i lakea o Listra, a tanga i made vona a murimuri tara, a rane Timoti. E kinane Timoti a ngatavine o Iuda i luhoi torea e Kristo, pali e tamana a bakovi o Gris.
ACT 16:2 E huriki a kabukabu o Listra, o Ikonium ri kavurikea e Timoti.
ACT 16:3 E Paulus i ngarua e Timoti ge laho turana, lakea i palea a kulina, a vuhuna e huriki a Iuda ri made vonga ri lohoka vona e tamana a bakovi o Gris.
ACT 16:4 Na tahuna to laho lae na maka tanga, to vakalongo e huriki a tara ne Kristo vona a maka vinara i rata e huriki a apostolo, a bakovi dagi o Ierusalem ne ria ri gi muri mai.
ACT 16:5 Na naro iea kunana, ni vakatora a niluhoi ne huriki a tara ne Kristo, e huriki ala kupo ri luhoi tora, ri dili na tara ne Kristo na parava lobo.
ACT 16:6 E Paulus i laho turane rua, to laho lae na tabeke ne Prigia ne Galesia, a vuhuna a Hanu Kiripiripi i ta kari tou nahea to go vara na ngava na tabeke ne Asia.
ACT 16:7 Na tahuna to bele na nagi ne Misia to toni ni dili na tabeke ne Bitinia, pali a Hanune Isu i taki tou nahea to go lokovonga.
ACT 16:8 I mavonga, to laho polopolo vona e Misia, to vano to bele o Troas.
ACT 16:9 Na rodo iea e Paulus i mahita, i vurena vona a bakovi tara o Masedonia i pesi, i galea, i ta maea, “O valai koea o Masedonia, o kori mia!”
ACT 16:10 Muri ne Paulus i vurena, mete kisi puru a maka maki mateu, mete dava ni lakea o Masedonia, a vuhuna mete luhoi a Vure i gale mateu, mete ge vara e huriki vonga na Velenga Kamumu.
ACT 16:11 Mete rike na aga o Troas, mete vore kudu a dari, mete bele o Samotres. Na parava muri mete vore lakea o Neapolis.
ACT 16:12 Muri mete laho lakea o Pilipai, a tanga dagi e huriki a Rom ri hae na tabeke ne Masedonia. Mete made vonga na parava ranga.
ACT 16:13 Na Parava Nimalo mete pagitala na tanga dagi mete lakea na gagana naru. Mete luhoi ta i tahoka a tabeke ni vasileki vonga. Mete matai e huriki a ngatavine ri made vonga, lakea mete made puru mete ta turane ria.
ACT 16:14 A ngatavine tara, a rana e Lidia, i made turane ria, i longo a nitane mateu. A tanga vona e Tiatira, a leho vona ni habi a lavalava kuakua ni kona. Ia a ngatavine ni kavurike a Vure, lakea a Bakovi Dagi i vakalohoka ia ge longokilala a ngava e Paulus i taki.
ACT 16:15 Lakea ni vahilolo, turane huriki a kabu vona. Muri i taki mateu i ta maea, “Moto luhoi ge iau a murimuri muholi ne Bakovi Dagi, moto valai moto made na ruma nau.” Lakea mete longo, mete made turana.
ACT 16:16 Na parava tara, na tahuna mete laho lakea na tabeke ni vasileki, mete masia a vora ngatavine tara i dili vona a hanitu, i ratea i ta muga na maka maki i uka ma i bele ma. E huriki a bakovi ri matakaria ri bole a moni dagi vona a maka ngava i taki.
ACT 16:17 A ngatavine iea i muri ne mateu e Paulus, i gale tala, i ta maea, “Ra bakovi nga, a vora na Vure Meli Liu! To vakalongo mua vona a dala a Vure ge korimule mua vona!”
ACT 16:18 I rata mavonga na parava i kupo a ngava iea, lakea e Paulus i madihi a hatena, i ngalakapulo, i takia a hanitu, “Na rane Isu Kristo, a taki ioe, o pagitala vona a ngatavine iea!” Malaviriri kunana i ha tala a hanitu.
ACT 16:19 Na tahuna e huriki a tahona vora ngatavine ri masia a dala ne ria ni bole a moni i lobo, ri lakavu e Paulus e Sailas, ri turaria rua lakea na mada, ru gu pesi na matane huriki a matakari.
ACT 16:20 Ri turari rua na matane huriki a mari ni pelekado, ri ta maea, “A bakovi nga a Iuda, ru piurike e huriki na tanga dagi ne hita.
ACT 16:21 Ru tovo e huriki vona a naro i uka ma i ramai a vinara ne hita e huriki a Rom.”
ACT 16:22 Lakea e huriki ri vapesihi vonga ri vadili vapopo, ri padi virihi rua na ngava. Lakea e huriki a mari ni pelekado a ngava ri vakuku ni gi kali tala a varakia ne Paulus e Sailas, ni gi lagu.
ACT 16:23 Ri lagu hale rua, muri ri voro dili rua na bavi. Lakea ri takia a tagari ge tagari kamumu rua.
ACT 16:24 Na tahuna a tagari i longo a ngava iea i turari rua, i ru dili rua na bavi pololilo liu, i kolotata a vahane rua na kai i mava.
ACT 16:25 Na kuru rodo e huriki pololilo na bavi ri longo e Paulus e Sailas ru vasileki na Vure, ru kalolo a linge vasileki.
ACT 16:26 I bele vakaturutu ngane a vuruke dagi, i polu a butuna bavi. Na tahuna iea kunana a logo na bavi i mata ka, a maka sen ri maparu ne huriki a bakovi pololilo na bavi.
ACT 16:27 A tagari i hadongo, i matai a maka logo ri mata ka, i luhoi ta ri ha pali e huriki, lakea i bolea a bainat ta ge koto mulea.
ACT 16:28 Pali e Paulus i gale tala, i ta maea, “Naha ni tomo! Mia lobo mi tabana koea.”
ACT 16:29 Lakea a tagari i gale na nipara, i nunu dili, i vakulu a tagana, i turume na ngalane Paulus e Sailas.
ACT 16:30 Muri i tuli tala rua, i nana, “Marua a bakovi dagi nau, a ra maki ga ratea ga bole a nimahuri vakaroro?”
ACT 16:31 Ru koli, ru ta maea, “O luhoi torea e Isu a Bakovi Dagi, lakea a Vure bara i korimule ioe turana e huriki a viri vomu.”
ACT 16:32 Muri ru takia na nitane Bakovi Dagi turane huriki na ruma vona.
ACT 16:33 Na tahuna iea kunana na rodo, a tagari i vahilolo a harena lebo ne rua. Muri a tagari ni vahilolo turane huriki a kabukabu vona.
ACT 16:34 I tuli rua lakea na ruma vona, i vakani rua. I vivi hateka turana e huriki a kabu vona, a vuhuna ngane ri luhoi torea a Vure.
ACT 16:35 I palala a hini, lakea a mari na nipelekado i rudu e huriki a tagari ri gi ta maea, “O bole tala na bavi e vikirua nga.”
ACT 16:36 Lakea a tagari na bavi i takia e Paulus, “A mari ni pelekado i taki muru gu pagitala. Ngane muru malaga, muru vano na nivalemu.”
ACT 16:37 Pali e Paulus i taki e huriki a tagari ri valai, i ta maea, “E huriki a mari ni pelekado a ngava i uka ma ri pelekado maria, pali ri lagu tavula maria na matane huriki lobo, muri ri ru dili maria na bavi. Pali maria a tahotanga ne Rom. A vinara i taki i uka ma ni gi lagu tavula a tahotanga ne Rom. Pali ngane ri ngaru miri gi vano kapiloho? I uka ma ge mavonga! O taki ria ri gi valai ri gi tuli tala maria.”
ACT 16:38 Lakea e huriki a tagari ri vano, ri vakalongo e huriki a mari ni pelekado. Na tahuna ri lohoka ne Paulus e Sailas rua a tahotanga ne Rom, ri mangenge.
ACT 16:39 Lakea ri lokovonga, ri ta dodo ne rua, ri tuli tala rua, ri taki rua ru gu pe a tanga ne ria.
ACT 16:40 Muri e Paulus e Sailas ru lakea na ruma e Lidia, ru vapopo turane huriki a kabukabu, ru vakatora a niluhoi ne ria, muri ru vano.
ACT 17:1 E Paulus e Sailas ru laho polopolo vona a tanga e Ampipolis e Apolonia ru vano ru bele na tanga e Tesalonika. A tanga iea i tahoka a roho na vaponga ne huriki a Iuda.
ACT 17:2 Lakea e Paulus i dili vona, i manga a naro i rata vakaroro. Na parava Nimalo i tolu, i tuveve polo kamumu ne ria a nitana Hinere,
ACT 17:3 i tuveve polo ne ria, i vakasiri poloa ne ria na Hinere i taki mugea e Kristo bara i bole a nimadihi, i mate, i mahuri mule tabu. Lakea i ta maea, “E Isu a vakalongo mua vona, ia e Kristo.”
ACT 17:4 I ranga ne ria ri longo mai, ri muri ne Paulus e Sailas. E huriki a bakovi a ngatavine o Gris ala kupo ri kavurikea a Vure, turane huriki a ngatavine dagi ala kupo, ria ranga ri longo mai.
ACT 17:5 Pali e huriki a Iuda, i madihi a hatene ria. Ri gale palupu e huriki a bakovi hale ni rata tuhare, ri piu rike e huriki na tanga dagi i madihi a hatene ria. Ri nunu lakea na ruma e Iason ri matakana vonga e Paulus e Sailas ta ri gi turari rua lakea ne huriki.
ACT 17:6 Pali i uka ma ri matavisi rua, lakea ri turari tala e Iason turane huriki a kabukabu ranga, ri vakapesi ria na matane huriki a kakaina tanga. Ri gale tala, ri ta maea, “E huriki a bakovi nga, ri laho viliha na tanga lobo na malala ri vakamade hale e huriki, ngane ri valai koea.
ACT 17:7 E Iason i matakari ria na ruma vona. Ria lobo ri putu puru a vinara ne Kaiser, ri taki ta i tahoka tabu tara hariki, a rana e Isu.”
ACT 17:8 Na tahuna e huriki a tahotanga, e huriki a kakaina tanga ri longoa a ngava iea, ri turutu, ri roro viliha.
ACT 17:9 Muri e huriki a kakaina tanga ri bole a moni dagi ne Iason turana e huriki ri pesi turana, muri ri taki ria ri gi vano.
ACT 17:10 Na rodo iea kunana e huriki a kabukabu ri rudu e Paulus e Sailas ru lakea o Berea. Na tahuna ru bele vonga ru lakea na roho na vaponga ne huriki a Iuda.
ACT 17:11 E huriki a Iuda vonga i uka ma ri tagege manga e huriki a Iuda o Tesalonika. Ri vivi ni longo kamumu a ngavane Paulus. Na parava lobo ri matai kado a ngava na Hinere, ri kasisi kamumua, a ngava e Paulus i taki, i muholi manga a hini i taki, o i uka.
ACT 17:12 Lakea i kupo ne ria ri luhoi torea e Kristo. E huriki a bakovi a ngatavine dagi na robo e Gris ranga ri luhoi torea.
ACT 17:13 Pali na tahuna e huriki a Iuda o Tesalonika ri longoa e Paulus i vara na nitana Vure o Berea, ri sike lokovonga, ri piurike e huriki.
ACT 17:14 I mavonga e huriki a kabukabu ri vakaha malaviriria e Paulus, ge pori, ge rike na aga, ge lakea o Atens. Pali e Sailas e Timoti ru made mule vonga o Berea.
ACT 17:15 E huriki a bakovi ranga ri taparakia e Paulus o Atens, ri hamule. Na tahuna ta ri gi hamule, e Paulus i talo rike a ngava, ri gi taki e Sailas e Timoti ru gu valai malaviriri vona.
ACT 17:16 Na tahuna e Paulus i dadava e Sailas e Timoti o Atens, i masia a tanga iea, i kupo a maka nitamina vure, lakea i tahate.
ACT 17:17 Lakea i dili na roho na vaponga i ta turane huriki a Iuda, e huriki a Grik ri togoa a Vure. Na parava vakaroro i lakea na tabeke na nivahabi na nivakona a maki, i ta turane huriki ri bele vonga.
ACT 17:18 E huriki a mari ni tovo na lohokanga ni gale e huriki a Epikuria, e huriki a Stoik, ria ranga ri longoa e Paulus. E huriki ranga ri ta maea, “A bakovi iea i ta tavulavula. I uka ma mi longokilalea a ngavana.” E huriki ranga ri ta maea, “I vakalongo kunana na maka vure ne huriki basi.” Ri ta mavonga, a vuhuna e Paulus i vara na Velenga Kamumu ne Isu, na naro na nimahuri mule na matenga.
ACT 17:19 Muri ri tulia e Paulus, ri lakea ne huriki ri vapopo na lolo e Areopagus, ri takia, “Mi ngaru ni lohoka vona a ngava karaba o vakalongo e huriki vona.
ACT 17:20 A ngavamu mi longoa i rika na tuline mia, mi ngaru ni longoa a pelegona ngava, i navai.”
ACT 17:21 E huriki lobo vonga o Atens turana e huriki basi ri made vonga, i uka ma ri ratea tara leho. Na parava vakaroro ri ngaru ni longo a ngava karaba, ri gi vata vona.
ACT 17:22 E Paulus i pesi rike na matane huriki ri vapopo o Areopagus, i ta maea, “Mua o huriki a bakovi o Atens! A matai a narone mua, mua a bakovi na lotu.
ACT 17:23 Na tahuna a laho halui a tanga dagi ne mua, a matai kamumu a maka maki mu vasileki vona. A masia tara dede ni here vona tara nita i ta maea, ‘A dede iea ne vona a vure i uka ma mi lohoka vona.’ A viri mu vasileki vona, i uka ma mu lohoka vona, ngane ga vakalongo mua vona.
ACT 17:24 “A Vure, ra i ratarike a malala turana maki lobo ri tabuli vona, ia a Bakovi Dagi na hunu a malala. I uka ma i made na roho ni hae na limana bakovi.
ACT 17:25 I uka ma i bala vona tara maki, si gi rata na limane hita ranga maki, si gi habi vona. Ia kunana i habi a nimahuri, a bangona turana maki lobo ne huriki.
ACT 17:26 A Vure i ratarike mugea a bakovi ala taku, muri a bakovi iea i vakabele e huriki a kabu lobo. A Vure i vakamade ria na tabeke lobo na malala. I ru a maka parava ri gi made koea na malala, i ru a tabekena malala ri gi made vona.
ACT 17:27 I rata mavonga, si gi matakanea. I ngaru hita si gi matakanea, si gi matavisia. I uka ma i made basi ne hita,
ACT 17:28 a vuhuna a bakovi tara i ta maea, ‘Si made koea, si mahuri a vuhuna i ratarike hita.’ E huriki a bakovi ranga ne mua ri ta maea, ‘I muholi hateka, hita e huriki e tuna.’
ACT 17:29 Hita e huriki a tuna Vure, i mavonga nahea si gi luhoia a Vure ge manga a vure ni rata na gol, a silva, a kedo. A Vure, i uka ma ia a maki a bakovi tara i luhoia, muri i ratea.
ACT 17:30 Hosi a Vure i matataro e huriki i uka ma ri lohoka. Pali ngane i vakuku e huriki lobo na tanga lobo ri gi pulo a vilone ria,
ACT 17:31 a vuhuna i ru pali a parava bara i pelekado e huriki lobo na malala na naro kamumu vona. Bara i pelekado hita na limana bakovi tara i vulakia pali. A Vure i vakasiria ne hita pali vona a bakovi iea, ra viri i mate lakea a Vure i vakamahuri mulea.”
ACT 17:32 Na tahuna ri longoa a ngava na nimahuri mule na matenga, e huriki ranga ri padikedea e Paulus. Pali e huriki ranga ri ta maea, “A ngava iea, mi ngaru ni longo tabua vomu muri ma.”
ACT 17:33 Muri e Paulus i pe ria i vano.
ACT 17:34 Pali e huriki a bakovi ranga ri luhoi torea e Kristo, ri muri vona. I tara ne ria e Dionisius, a bakovi o Areopagus. A ngatavine tara, a rana e Damaris, ia tara i luhoi torea e Kristo, turana e huriki ranga.
ACT 18:1 Muri e Paulus i malaga o Atens, i lakea o Korin.
ACT 18:2 Na tahuna i bele vonga i matavisia e Akuila, a bakovi o Iuda, ni poda na tabeke ne Pontus. I valai karaba o Itali turana e girihina, e Prisila, a vuhuna e Kaiser Klaudius i tono tala o Rom e huriki a Iuda. E Paulus i vano ge matai rua.
ACT 18:3 I made turane rua, to leho palupu, a vuhuna ia a bakovi ni hae a kape, i manga rua.
ACT 18:4 Na parava Nimalo lobo i lakea na roho na vaponga, i vata turane huriki a Iuda, e huriki a Grik. I ngaru ge rata ria ri gi luhoi torea e Isu.
ACT 18:5 Ngane e Sailas e Timoti ru pea pali e Masedonia. Na tahuna ru luve ne Paulus, e Paulus i vara kunana, i vakalongo e huriki a Iuda ne Isu ia e Kristo.
ACT 18:6 Pali e huriki a Iuda ri hehea, ri harogia e Paulus. Lakea i madihi a hatena, i kurudu pasi a habulo na varakia vona, i taki ria, “Mua bara mu velu, naha ni padi virihi iau na ngava! A maki mua. Ngane ga vakalongo a Velenga Kamumu ne huriki i uka ma ria a Iuda.”
ACT 18:7 E Paulus i pe a roho na vaponga, i vano i made na ruma ne Titus Iustus, a bakovi ni kavurikea a Vure. A ruma vona i pesi tabukoi na roho na vaponga.
ACT 18:8 E Krispus, a matakari na roho na vaponga turane huriki lobo na ruma vona ri luhoi torea e Kristo. E huriki a bakovi ala kupo o Korin ri longo a ngavane Paulus, ri luhoi torea e Kristo, ni vahilolo.
ACT 18:9 Na rodo tara, e Bakovi Dagi i ta turane Paulus na vurena, i ta maea, “Naha ni mangenge, naha ni vulai. O vakalongo mavonga e huriki ne nau,
ACT 18:10 a vuhuna iau a laho turamu, i uka tara viri ge habi a vuranga vomu. E huriki ala kupo koea, ria a viri nau.”
ACT 18:11 Lakea e Paulus i made turane ria na pida i taku, a keva i polotara, i vara ria na nitana Vure.
ACT 18:12 Na tahuna e Galio a matakari na tabeke ne Akaia, e huriki a Iuda ri vadili vapopo, ri lakavua e Paulus, ri turaria lakea na muri na nivapelekado.
ACT 18:13 Lakea ri ta maea, “A bakovi iea i tovo e huriki ri gi kavurikea a Vure na naro tebi, i uka ma i ramai a vinara.”
ACT 18:14 Pali na tahuna e Paulus ta ge koli a nitane ria, e Galio i taki e huriki a Iuda, i ta maea, “Mua o huriki a Iuda, a bakovi iea ge putu puru ranga vinara, o ge rabalakia tara viri, bara longo mai mua.
ACT 18:15 Pali mu padi virihia na rana vure, na ngava i rata. Mu padi virihia i uka ma i ramai a vinara ne mua. I mavonga mu pelekadoa. Iau i uka ma ga pelekadoa.”
ACT 18:16 Lakea i lili tala ria na muri na nivapelekado.
ACT 18:17 Muri e huriki a Korin ri lakavua e Sostenes, a matakari na roho na vaponga, ri ubia na matana roho na nivapelekado. Pali e Galio i matataro ria ri gi ratea.
ACT 18:18 E Paulus i made vonga o Korin na parava ranga. Muri i pe e huriki a kabukabu vonga, i lakea o Senkria turana e Prisila, e Akuila. I ali vuroki vonga a vuna, a vuhuna i rata pali a maki tara i ta muholi vona na Vure ge ratea. Muri to rike na aga, to lakea na tabeke ne Siria.
ACT 18:19 Na tahuna to bele o Epesus, to vapida. E Paulus kikeri i vano, i dili na roho na vaponga, i ta turane huriki a Iuda.
ACT 18:20 Na tahuna ri takia e Paulus ge made turane ria na parava ranga, i koi.
ACT 18:21 Pali na tahuna i pe ria, i ta muholi ne ria, i ta maea, “A Vure ge ngaru iau ga hamule valai tabu, bara hamule valai.” Muri i rike na aga, i pea e Epesus.
ACT 18:22 Na tahuna i bele o Sisaria i sike o Ierusalem, i tagui e huriki a tara ne Kristo ri made vonga. Muri i lakea o Antiok.
ACT 18:23 I made o Antiok na parava ranga, muri i malaga, i laho lae na maka tanga na tabeke ne Galesia e Prigia, i vakatora a niluhoi ne huriki a murimuri na tanga takutaku.
ACT 18:24 A Iuda tara, ni poda o Aleksandria, a rana e Apolos i valai i made o Epesus. I moro ni ta. I lohoka hateka na Nita na Vure.
ACT 18:25 Ni tovo ia pali na dala ne Bakovi Dagi. I habi a hatena ni tovo e huriki, i vakalongo kavakava na maka maki e Isu i rata. Pali i lohoka vona a nivahilolo ne Ioanes kunana.
ACT 18:26 I vakatubu ni vara pagapaga na roho na vaponga. I uka ma i mangenge. Pali na tahuna e Prisila e Akuila ru longoa, ru tuveve polo kamumua vona a dala na Vure.
ACT 18:27 Muri e Apolos i ngaru ni lakea o Akaia, lakea e huriki a kabukabu o Epesus ri tuhoria, ri herea a raukea i lakea ne huriki a murimuri o Akaia, ri taki ria ri gi taguia na tahuna i bele. Na tahuna i bele vonga, i tuhori kamumu e huriki a Vure i rata kamumu ria, ri luhoi torea,
ACT 18:28 a vuhuna i vahehe tora turane huriki a Iuda, i vakasiri ria na Hinere, e Isu ia e Kristo.
ACT 19:1 Na tahuna e Apolos i made vonga o Korin, e Paulus i laho pololilo, i vano, i bele o Epesus. Na tahuna i bele vonga i matavisi e huriki a murimuri ranga.
ACT 19:2 Lakea i nana ria, “Na tahuna mu luhoi torea e Kristo, mu bole a Hanu Kiripiripi, o i uka?” Ri koli ria ri ta maea, “I uka ma mi lohoka vona a Hanu Kiripiripi.”
ACT 19:3 Lakea e Paulus i nana tabu, “Pali a hilova navai mu bolea?” Ri koli, ri ta maea, “A hilova e Ioanes i tovo mia vona.”
ACT 19:4 Lakea e Paulus i ta maea, “E Ioanes i vahilolo e huriki, ri gi pulo a vilone ria. I taki ria ri gi luhoi torea a viri ta ge valai muri vona, re Isu.”
ACT 19:5 Na tahuna ri longoa a ngava iea, ni vahilolo ria na rana e Isu a Bakovi Dagi.
ACT 19:6 Muri e Paulus i ru langa a limana ne ria, lakea a Hanu Kiripiripi i puru ne ria, ri ta na tabele tebi, ri ta propet.
ACT 19:7 Re huriki a bakovi nga ri ala ravulu a polona i rua.
ACT 19:8 Muri e Paulus i dili na roho na vaponga, i ta pagapaga vonga na Velenga Kamumu na keva i tolu. I ta turane ria, i vakalongo ria vona na harikianga na Vure.
ACT 19:9 Pali i ranga ne ria ri putu ngingi, ri tabana i uka ma ri luhoi tora, ri ta hale na dala ne Isu na matane huriki. Lakea e Paulus i hataro ria, i tuli e huriki a murimuri, i vano i vara na parava lobo na roho na nitovo ne Tiranus.
ACT 19:10 E Paulus i made vonga na pida i rua, i vara ria vonga, lakea e huriki lobo na tabeke ne Asia ri longoa a nitana Bakovi Dagi. E huriki a Iuda, e huriki a Grik.
ACT 19:11 A Vure i rata maka nivakasiri dagi na limane Paulus.
ACT 19:12 A nitora na Vure i dagi hateka vona, e huriki bara ri bole a lavalava kiroko, a varakia e Paulus i padoi, bara ri ru langa ne huriki ri giloa, lakea bara ri tavaga, e huriki a hanitu ri ha tala ne ria.
ACT 19:13 Muri e huriki a Iuda ranga, a leho ne ria ni laho viliha ni lili tala e huriki a hanitu, ri masia a nitora na rane Isu a Bakovi Dagi. Lakea ri ngaru ni leho vona a rane Isu, ri taki e huriki a hanitu, ri ta maea, “A taki ioe na rana e Isu Kristo, ra viri i vara vona e Paulus, o ha tala!”
ACT 19:14 E huriki e tune Skeva ala polorua ri ratea a naro iea. E Skeva ia a prister dagi ne huriki a Iuda.
ACT 19:15 Na parava tara ri ratea a ngava iea, lakea a hanitu tara i koli, i ta maea, “A lohoka vona e Isu. A lohoka vona e Paulus. Pali mua, mua e rei?”
ACT 19:16 Muri a bakovi i dili vona hanitu i vuli puru ria, i ratapile ria. I mavuka a varakia ne ria, ri vadarivu, ri ha tala na roho.
ACT 19:17 E huriki a Iuda, e huriki a Grik o Epesus ri longoa a maki i bele, lakea ri mangenge, ri kavurikea a rane Isu, a Bakovi Dagi.
ACT 19:18 E huriki ri luhoi torea e Kristo, e huriki ala kupo ri taki tala a naro hale ne ria na matane huriki.
ACT 19:19 E huriki ranga ne ria, a bakovi na muto, ri bole valai a maka puhu ne ria, ri rungani na matane huriki lobo. A mapana maka puhu ri rungani, a kedo silva i 50,000.
ACT 19:20 I mavonga, a nitane Bakovi Dagi i rere, e huriki ala kupo ri longoa, ri longo maia.
ACT 19:21 Muri e Paulus i ngaru ni laho lakea o Masedonia, o Akaia muri ge lakea o Ierusalem. Lakea i ta maea, “Ga lakea taro o Ierusalem, muri a Vure i ngaru iau ga lakea o Rom.”
ACT 19:22 I rudu taro a bolekori vona, e Timoti e Erastus, ru gu muga lakea o Masedonia. Pali i made mule taro vonga na tabeke ne Asia ia.
ACT 19:23 Na tahuna iea e huriki a bakovi ranga ri marikoi vona a dala ne Bakovi Dagi, lakea ri piurike a hatene huriki.
ACT 19:24 A bakovi tara, a rana e Demitrius, a mari ni rata a maki na silva. Ia a bakovi ni rata na silva a goroto kiroko na vure ngatavine e Artemis. I habi a leho dagi ne huriki a mari turana, ri bole a moni dagi ni rata a maka goroto nga.
ACT 19:25 I gale palupu e huriki nga, turana e huriki ranga ri rata a leho maea, lakea i taki ria, “Mua o huriki a turagu, mu lohoka vona si vakabele a moni dagi vona a leho si ratea.
ACT 19:26 Pali ngane mu longo, mu matai a naro e Paulus i rata. I taki e huriki, lakea ri pulo a narone ria. I taki e huriki a vure ni rata na limana bakovi, i uka ma ria a vure muholi. I uka ma i rata koea o Epesus kunana. I rata na tanga lobo o Asia.
ACT 19:27 I mavonga, i mata manga e huriki bara ri biu a leho ne hita, bara ri biu tabu a roho ni vasileki na vure dagi ne hita, a vure ngatavine e Artemis, bara ri luhoia ta a maki tavula. Lakea ra vure ngatavine, e huriki lobo o Asia, e huriki lobo na malala ri kavurikea, i uka ma ge dagi tabu a rana.”
ACT 19:28 Na tahuna ri longoa a ngava iea, i madihi a hatene ria, ri vakatubu ni gale tala dagi, ri ta maea, “E Artemis, a vure ngatavine ne Epesus, i dagi hateka!”
ACT 19:29 Lakea e huriki lobo na tanga dagi, i varoru a niluhoi ne ria, ri roro lae. Ri turari e Gaius, e Aristakus, ra bakovi o Masedonia ala rua ru laho turane Paulus. Ria lobo ri nunu lakea na roho na vaponga ne huriki a Grik.
ACT 19:30 E Paulus i ngaru ni dili ge ta turane ria, pali e huriki a murimuri ri hatekakaria.
ACT 19:31 E huriki a matakari ranga ne Asia ri ngarua e Paulus. Ria ranga ri rudu a ngava vona, ri takia nahea ge dili na roho na vaponga.
ACT 19:32 E huriki pololilo na roho na vaponga ri varoru. E huriki ranga ri kulugou na maki tara. E huriki ranga ri kulugou na maki ranga, a vuhuna ria lobo i uka ma ri lohoka vona i navai ri lokovonga.
ACT 19:33 E huriki a Iuda ri tugua e Aleksander i lokomuga, lakea e huriki ranga vonga ri takia ge ta. Lakea e Aleksander i tolokave ria ri gi longo valai ri gi longo a ngava ge taki.
ACT 19:34 Pali ri matakilaka vona ia a Iuda, lakea ri gale dagi tabaka, i manga na kilala i rua, ri ta maea, “E Artemis ne Epesus i dagi hateka!”
ACT 19:35 Muri a sekreteri ne Epesus i taki e huriki ri gi vulai, lakea i ta maea, “Mua o huriki a bakovi o Epesus. Mu lohoka vona e Epesus i matakari a roho na vure ngatavine e Artemis turana kedo i boru valai na hunu, ra kedo si kavurikea.
ACT 19:36 A ngava iea i muholi. I uka tara viri ge gegea. I mavonga mu vulai, naha ni rata viliha.
ACT 19:37 Re huriki a bakovi mu turari valai koea, i uka ma ru takia tara ngava ge hale na vure ngatavine. I uka ma ru panahoa tara maki na roho ni vasileki vona.
ACT 19:38 Pali e Demitrius, e huriki e turana, bara ri tahoka a ngava, ri gi lakea na murina ni vapelekado, e huriki a mari ni pelekado a ngava ri gi longo a ngava ne ria.
ACT 19:39 Pali mua, bara mu tahoka tara ngava mu gu pelekadoa, mu taki tala na vaponga ne huriki na tanga dagi ri gi pelekadoa.
ACT 19:40 A ta mavonga, a vuhuna e huriki a matakari o Rom bara ri masia a rongova i bele mona, bara ri luhoi hita ta si vaubi. Ra rongova mona i uka vuhuna. Bara si keri ni tuveve a pelegona.”
ACT 19:41 I taki lobo a ngava nga, muri i tono tala ria, ri vano.
ACT 20:1 Na tahuna a rongova i lobo, e Paulus i rudu a ngava lakea ne huriki a murimuri ri gi valai vona. I vakatora ria na ngava, muri i tarulu puru ria, i vano i lakea na tabeke ne Masedonia.
ACT 20:2 I laho polo vona a robo iea, i vakatora e huriki na ngava. Muri i bele na tabeke ne Gris,
ACT 20:3 i made vonga na keva i tolu. Muri, na tahuna ta ge rike na aga, ge lakea o Siria, i longo e huriki a Iuda ranga ri gi rabalakia na dala, lakea i puru na aga, i laho polo tabu na robo e Masedonia, i vano i bele o Siria.
ACT 20:4 E huriki a bakovi ri vano turana ra nga: e Sopater, e tune Pirus na tanga dagi e Berea; e Aristakus rua e Sekundus na tanga dagi e Tesalonika; e Gaius na tanga e Derbe; e Tikikus rua e Tropimus na robo e Asia; e Timoti.
ACT 20:5 Re huriki a bakovi nga ri muga, ri dava mateu na tanga e Troas.
ACT 20:6 Pali mateu, mete rata taro a habu na Bret i Uka Is. Muri mete rike na aga vonga na tanga e Pilipai mete vano. I lobo a parava i lima mete pakarau ria o Troas, lakea mi made vonga na parava i polorua.
ACT 20:7 Na mugana parava na vik mi vapopo, mi kani palupu a bret. Muri e Paulus i vara e huriki. I ta polopolo, i harena na kuru rodo, a vuhuna kuduvi bara i pe ria.
ACT 20:8 A ruma iea, a ruma dagi. A tabekena i tolu. A tabekena tara i polotano, a tabekena tara i polomeli. A tabekena tara i polomeli liu. Mia lobo mi vapopo na tabeke polomeli liu, i kupo a maka lam ri para.
ACT 20:9 E Paulus i ta lokovonga liu, lakea a riau tara, a rana e Iutikus, i marore. I made langa langa na matatala, lakea na tahuna i marore, i boru tala, i boru puru na malala. Ri puru mai ia, ri pulo lae ia, pali ri masia i mate pali.
ACT 20:10 Pali e Paulus i puru lakea, i pasike puru maia, i nugua, i ta maea, “Naha ni luhoi lege, i uka ma i mate.” A riau iea i mahuri mule ngane,
ACT 20:11 muri e Paulus, e huriki nga ri hamule sike tabu. I kevea a bret, ri kani. Muri i ta tabu, i harena na hini malaharere, muri i vano.
ACT 20:12 A riau iea i mahuri, ri tulia i lakea na tanga. A niluhoi ne ria i kamumu hateka.
ACT 20:13 Mi rike na aga, mi muga lakea o Asos, mi gi davea vonga e Paulus, a vuhuna i ngaru ni laho na dala. E Paulus i taki ge rike na aga turane mia o Asos.
ACT 20:14 Na tahuna i pakarau mia vonga, mi vakarikea na aga, mi lakea o Mitilini.
ACT 20:15 Muri mi malaga vonga, mi vore na parava i taku, mi bele tabukoi na bodu e Kios. Na parava muri tabu mi bele o Samos. Na parava muri tabu mi bele o Miletus.
ACT 20:16 I uka ma mi dili o Epesus, a vuhuna e Paulus i uka ma i ngaru ni made o Asia. I ngaru ni bele malaviriri o Ierusalem muga na parava na Pentekos.
ACT 20:17 Na tahuna mi bele o Miletus, e Paulus i talo rike a ngava ne huriki a gare na tara ne Kristo o Epesus ri gi valai, ri gi masia.
ACT 20:18 Na tahuna ri bele, i taki ria, i ta maea, “Mu lohoka vona a vilogu na tahuna a made turane mua, i vakatubu na tahuna a bele karaba na tabeke ne Asia.
ACT 20:19 E huriki a Iuda ri ngaru ni rata hale iau. Ri rata iau a dodo, a tangi balaka kupo. Pali i uka ma a vakadagia a ragu. A leho kunana ne Bakovi Dagi.
ACT 20:20 Mu lohoka vona i uka ma a mangenge. A vara pagapaga kunana mua, i uka ma ruhuloloa tara ngava ge tuhori mua. A vara mua na matane huriki lobo, a vara mua na ruma takutaku ne mua.
ACT 20:21 A taki tora e huriki a Iuda, e huriki a Grik, ri gi pulo a vilone ria, ri gi ramaia a Vure, ri gi luhoi torea a Bakovi Dagi ne hita, e Isu Kristo.
ACT 20:22 “Pali ngane a Hanu Kiripiripi i taki tora iau ga lakea o Ierusalem. I uka ma a lohoka vona a ra maki ge bele nau vonga.
ACT 20:23 A lohoka kunana na tanga lobo a lakea vona a Hanu Kiripiripi i taki iau vona ga bole a nimadihi, ga dili na bavi.
ACT 20:24 Iau i uka ma a luhoia a nimadegu ga maki dagi. A ngaru kunana ga vakalobo kamumu taroa a leho e Isu a Bakovi Dagi i habia nau ga ratea: Ga vakalongo ne huriki a Velenga Kamumu na naro kamumu na Vure.
ACT 20:25 A laho turane mua, a vara mua na harikianga na Vure. Pali ngane i uka ma mu gu matai tabu iau.
ACT 20:26 Ngane a taki muholi mua na parava mona: e rei tara ne mua ge velu, iau a uka ngava vona,
ACT 20:27 a vuhuna a taki lobo mua vona pali a ngava lobo a Vure i ngaru mu gu lohoka vona.
ACT 20:28 Mu matakari kamumu mua turane huriki a kabukabu. A Hanu Kiripiripi i habi ria na limane mua, ge mua a matakari ne ria. Mu leho manga a matakari na tara na Vure, a Vure i konamule ria pali na darane Tuna.
ACT 20:29 Iau a lohoka vona, muri ne iau ga vano, e huriki a bakovi hale bara ri valai ne mua, ri tami mua, bara ri toni ni ratapile a niluhoi ne mua, i manga a kaugara i ratapile a kabuna sipsip.
ACT 20:30 I ranga ne mua bara ri pesi rike, bara ri pulo a nita muholi, ri tovo e huriki na ngava taminga. Ri ngaru e huriki a murimuri ri gi ramai ria kunana.
ACT 20:31 I mavonga, mu mata doko! Naha ni longo kaburungi vona a maki a rata. A vara mua na pida i tolu. A vara mua na haro, na rodo. Na tahuna a tovo mua i masiri pasi na matagu a luha.
ACT 20:32 “Ngane a habi mua na limana Vure. A ngaru mu gu luhoi vakaroro a ngava na naro kamumu na Vure. A naro kamumu iea bara i vakatora mua, i habi mua a maki lobo a Vure i ta muholi vona ge habi ne huriki a tara vona.
ACT 20:33 Na tahuna iau a made turane mua, i uka ma a ngutu vona a silva ne mua, a gol, a varakia ne mua.
ACT 20:34 Mu lohoka vona iau a leho, a matakari mule iau turane huriki ri laho turagu.
ACT 20:35 A vakasiri mua na narogu, si gi leho, si gi kori e huriki a matasia. Si gi luhoi vakaroro a nitane Isu a Bakovi Dagi, i ta maea, ‘A nivivi na viri i habi a maki, i rangi a nivivi na viri i bole a maki.’”
ACT 20:36 E Paulus i taki loboa ngava nga, i turume puru turane ria, ri vasileki.
ACT 20:37 Muri ri vataringi, ri vatuba a lima, ri vanguru.
ACT 20:38 Ri dodo hateka, a vuhuna e Paulus i taki ria i uka ma ge matai tabu ria. Muri ri taparakia na aga, i vano.
ACT 21:1 Mete tarulu puru ria, mete rike na aga, mete pori lakea na bodu e Kos. Na parava muri mete pori na bodu e Rodes, muri mete lakea na tanga dagi e Patara.
ACT 21:2 Na tahuna mete bele vonga mete masia tara aga ta ge lakea o Ponesia, lakea mete rike polo vona, mete vano.
ACT 21:3 Mete nunu polo na bodu e Saiprus, mete masia na maurine mateu, mete nunu lakea o Siria. Mete dili o Tair, mete vakaraga vonga a maka galesi.
ACT 21:4 Mete pugai vonga e huriki a kabukabu, lakea mete made turane ria na parava i polorua. A Hanu Kiripiripi i taki ria, ri gi takia e Paulus nahea ge lakea o Ierusalem.
ACT 21:5 Muri na parava i polorua i lobo mete vano. E huriki a bakovi turane girihine ria, e tune ria, ri taparaki mateu polo vavo na tanga dagi. Mi bele na lavu, mi turume puru mi vasileki.
ACT 21:6 Muri mete tarulu mule ria, mete rike na aga, mete vano. Ri hamule vonga e huriki.
ACT 21:7 Mete pasi tala vonga o Tair, mete lakea o Tolomis. Mete tagui vonga e huriki a kabukabu, mete mahita vonga.
ACT 21:8 Na parava muri mete malaga, mete lakea na tanga dagi e Sisaria. Na tahuna mete bele vonga, mete lakea na ruma ne Pilip, a bakovi ni vara na Velenga Kamumu. Ia a turana bakovi ala polorua ni vulaki o Ierusalem, ge ria a bolekori.
ACT 21:9 I tahoka e tuna a sirula ala va, ri rata a nita propet.
ACT 21:10 Na tahuna mete made vonga na parava i kupo, a propet tara i bele taho mateu, i valai o Iudea. A rana e Agabus.
ACT 21:11 I valai mai mateu, i bolea a palabele ne Paulus, i kolo tata mule a vahana a limana. Lakea i ta maea, “A Hanu Kiripiripi i ta maea, ‘E huriki a Iuda ri made o Ierusalem bara ri kolotatea a tahona palabele iea. Muri bara ri habia na limane huriki i uka ma ria a Iuda.’”
ACT 21:12 Na tahuna mete longoa a ngava iea, mateu turane huriki vonga mi taki torea e Paulus nahea ge lakea o Ierusalem.
ACT 21:13 Pali e Paulus i ta maea, “I navai mu tatangi mu rata iau a dodo? Iau a dava kunana ni dili na bavi, ga mate o Ierusalem na rane Isu a Bakovi Dagi!”
ACT 21:14 Mete masia e Paulus i uka ma ge longo a ningaru ne mateu, lakea i uka ma mete toni tabu ni pulo a niluhoi vona, lakea mete ta maea, “A maki e Bakovi Dagi i ngaru ge bele, bara i bele.”
ACT 21:15 Mete made lobo vonga, mete kisi puru a maki mateu, mete lakea o Ierusalem.
ACT 21:16 I ranga kabukabu vonga ne Sisaria ri laho turane mateu. Ri taparaki mateu na ruma ne Nason, a bakovi o Saiprus, mete ge made turana. I muga pali e Nason i luhoi torea e Kristo.
ACT 21:17 Na tahuna mete bele o Ierusalem e huriki a murimuri ri vivi hateka ni tagui mateu.
ACT 21:18 Na parava muri, mateu e Paulus mete vano, mete masia e Iakop. E huriki a gare na lotu ranga, ri made vonga.
ACT 21:19 E Paulus i tagui ria, muri i vakalongo ria vona a maka maki i rata a Vure na limana ne huriki i uka ma ria a Iuda.
ACT 21:20 Na tahuna ri longo a ngavane Paulus, ri kavurikea a Vure. Muri ri takia e Paulus, ri ta maea, “Paulus ioe a turane mia. E huriki a Iuda ala kupo hateka ri luhoi torea e Isu ngane. Re huriki nga ri tora hateka na ni muri mai a vinara ne Moses.
ACT 21:21 Ri longo ta ioe o tovo e huriki a Iuda ri made basi na tanga ne huriki i uka ma ria a Iuda, ta ri gi lohopile a vinara ne Moses, ta o taki ria nahea ri gi pala a kulina tune ria, nahea ri gi muri mai a naro hosi ne huriki a Iuda.
ACT 21:22 Ngane bara ri longo ioe o bele koea. Pali a ra si gi ratea ngane?
ACT 21:23 Ngane mi gi taki ioe vona a naro go ratea. A bakovi ala va koea ri ta muholi lakea na Vure.
ACT 21:24 O vano o dili turane ria na naro ni vakamatapado a viri. O kona a maka nihabi ne ria, lakea bara ri ali vuroki a ivu na gine ria. Bara o rata mavonga, bara i vakasiri ria vona a ngava ri longoa ta o ratea, i uka ma a ngava muholi. Bara ri lohoka vomu ioe tara o muri mai kunana a vinara ne Moses.
ACT 21:25 Pali e huriki i uka ma ria a Iuda, mi here lakea pali ne ria, naha ri gi kani a kania ni habi na nitamina vure. Naha ri gi kani a kania i vona darana o a kania ni hori a lohona. Naha ri gi rata a naro na molenga.”
ACT 21:26 Na parava muri e Paulus i tuli e huriki a bakovi nga, ri rata a vilo na ni vakamatapado. Muri ri lakea na roho na Vure, ri vakalongo e huriki a prister na parava ge lobo vona a naro iea, lakea ni gi rata a nihabi ne ria takutaku.
ACT 21:27 Na tahuna i tabukoi ge lobo a parava i polorua nga, e huriki a Iuda ranga o Asia ri masia e Paulus pololilo na roho na Vure. Ri piurike e huriki, ri lakavua e Paulus.
ACT 21:28 Lakea ri gale tala ri ta maea, “Mua o huriki a Israel, mu kori mia! A bakovi iea i lakea na tanga lobo, i vara e huriki ri gi tepu e huriki a kabune hita, a vinara ne Moses, a roho na Vure. Ngane i bole dili na roho na Vure e huriki a Grik, ri kinimutoa!”
ACT 21:29 Muga e huriki a Iuda ri masia e Tropimus a bakovi o Epesus i laho turana e Paulus na tanga dagi. Ri pahaluhoia ta e Paulus ngane i bole dilia na roho na Vure.
ACT 21:30 E huriki lobo na tanga dagi ri roro, ri nunu palupu. Ri lakavua e Paulus, ri turari talea na roho na Vure, ri malaviriri kunana ri tukaria a logo na roho na Vure.
ACT 21:31 Na tahuna ta ri gi rabalakia, a ubu na tara na nugumaheto ne huriki a Rom i longoa a rongova i bele o Ierusalem.
ACT 21:32 I malaviriri kunana i bole ranga nugumaheto, ri nunu lokovonga. Na tahuna e huriki ri matai a ubu turana e huriki a nugumaheto, ri lobo ni ubina e Paulus.
ACT 21:33 Muri a ubu i lakea maia e Paulus, i tangotatea. I taki e huriki a nugumaheto ri gi kolotatea e Paulus na sen i rua. Muri i nana, “E rei a bakovi iea? A ra naro hale i ratea?”
ACT 21:34 Lakea e huriki ri gale tala, ri taki a maka ngava viliha. Pali a ubu na tara i keri ni lohoka vona a rongova iea a vuhuna e huriki ri roro, ri gale viliha. Lakea i taki e huriki a nugumaheto ri gi turari lakea na roho ne ria e Paulus.
ACT 21:35 Na tahuna e Paulus ta ge laho rike na nirike, e huriki a nugumaheto ri bole rikea, ri kaloho langa ia, a vuhuna e huriki a bakovi ri ngaru ni rabalakia.
ACT 21:36 E huriki a tara na ni rata tuhare ri muri ne huriki a nugumaheto ri gale maea, “Mu rabalakia!”
ACT 21:37 Na tahuna e huriki a nugumaheto ta ri gi bole dilia na roho ne ria, i takia a ubu na nita Grik, i ta maea, “Iau a ngaru ni ta turamu.” Lakea a ubu i nana mulea, i ta maea, “Ioe, o lohoka na nita Grik?
ACT 21:38 A luhoi ta ioe a bakovi o Egipto, ra i rata a rongova rira ne huriki a matakari, muri i tuli lakea na tabeke i ngeki e huriki a tara ni varata tuhare ala rangale va (4,000).”
ACT 21:39 Lakea e Paulus i lavuni i ta maea, “Iau a Iuda. A valai na tanga e Tarsus na tabeke ne Silisia. Iau a tahotanga na tanga i dagi hateka a rana. A ngaru hateka ni ta turane huriki.”
ACT 21:40 A ubu i longo vona ge ta, lakea i pesi na nirike, i tolokave e huriki ri gi vulai. Na tahuna ri vulai i taki ria na nita Hibru, i ta maea,
ACT 22:1 “Mua o huriki a tata mai, a turagu mai, mu longo valai, iau a hehe vona a naro mu rata virihi iau vona.”
ACT 22:2 Na tahuna ri longoa i ta na nita Hibru ri vulai liu. Lakea e Paulus i ta maea,
ACT 22:3 “Iau a Iuda. Ni poda iau na tanga e Tarsus, na robo e Silisia. A koru rike koea na tanga dagi. E Gamaliel i tovo iau na vinara ne huriki a gare ne hita. A habi a hategu ni rata e leho na Vure, i manga mua.
ACT 22:4 Iau hosi a ratapile e huriki ri muri mai a dala ne Isu. I ranga ne ria ni rabalaki. A lakavu e huriki a bakovi a ngatavine, a voro dili ria na bavi.
ACT 22:5 Mu nanea ra prister dagi turana e huriki a gare ne huriki a Iuda, bara ri vakalongo mua. Ri habia nau a raukea ga habia ne huriki a kabu kabu na Iuda o Damaskus. A lokovonga ta ga lakavu e huriki a tara ne Kristo, ga turari valai ria o Ierusalem, ni gi vakamadihi.
ACT 22:6 “A rike na hos, a nunu sike o Damaskus. Na kuru haro, tabukoi ga bele, lakea a nipara dagi i para valai na hunu, i parai iau.
ACT 22:7 A boru puru, a longoa a lohona viri i ta valai nau, i ta maea, ‘Saulus, Saulus! I navai o vakamadihi iau?’
ACT 22:8 “Lakea a nana, ‘Bakovi Dagi, ioe e rei?’ “I koli, i ta maea, ‘Iau e Isu o Nasaret, ra o vakamadihi iau.’
ACT 22:9 E huriki ri laho turagu ri masia a nipara, pali i uka ma ri longokilalea a lohona viri miri vata.
ACT 22:10 “Muri a nana tabua, ‘Bakovi Dagi, a ra ga ratea?’ “E Bakovi Dagi i koli i ta maea, ‘O pesi rike o lakea o Damaskus. I vonga bara ni taki ioe vona a maki a ngaru go ratea.’
ACT 22:11 A kepa, a vuhuna a nipara i para dagi hateka, lakea e huriki a turagu ri nugua a limagu, ri tuli sike iau o Damaskus.
ACT 22:12 “A bakovi tara i made vonga, a rana e Ananias, i valai ge matai iau. A bakovi iea, a bakovi ni kavurikea a Vure, ni ramai a vinara ne Moses. E huriki a Iuda ri made vonga ri togoa.
ACT 22:13 I valai, i pesi na dahagu, i ta maea, ‘O turagu, o Saulus o matapara!’ Na tahuna iea kunana a matapara tabu.
ACT 22:14 “Muri i taki iau, i ta maea, ‘A Vure ne huriki a gare ne hita i vulaki ioe go lohoka vona a ningaru vona, go masia a Viri Malamala, go longo a nitana.
ACT 22:15 I ngaru mavonga, a vuhuna ioe go vakalongo e huriki lobo na maki o matai, o longo.
ACT 22:16 Pali ngane a ra o davea? O pesi rike, o luhoi torea a rana, ni gi vahilolo vuroki a naro hale vomu.’
ACT 22:17 “Muri, na tahuna a hamule lakea o Ierusalem, a vasileki na roho na Vure, a masia na vuregu tara maki.
ACT 22:18 A masia e Bakovi Dagi i ta turagu, i ta maea, ‘O malaviriri! Ngane kunana o pea e Ierusalem o vano, a vuhuna e huriki koea ri marikoi ni longo ioe go vakalongo a nitagu koea.’
ACT 22:19 “Lakea a koli, a ta maea, ‘Bakovi Dagi, e huriki a bakovi nga ri lohoka vona iau a laho pagepolo vano na maka roho na vaponga, a lakavu, a ru dili na bavi, a ubi e huriki ri luhoi tora ioe.
ACT 22:20 Ri lohoka vona a do rike e huriki na tahuna ri rabalakia a vora vomu e Stepan, a matakari a maka varakia ne huriki ri padimatea na kedo.’
ACT 22:21 “Muri e Bakovi Dagi i taki iau i ta maea, ‘O vano ngane, ga rudu basi ioe, go lakea ne huriki a viri i uka ma ria a Iuda.’”
ACT 22:22 I muga e huriki a Iuda nga ri made madoru, ri longo a ngavane Paulus. Pali na tahuna i taki a Vure i rudua ge lakea ne huriki i uka ma ria a Iuda, ri magulu rike lobo, ri ta maea, “Mu rabalakia! A bakovi iea i uka ma i kara ge made na malala!”
ACT 22:23 Ri magulu taku, ri kali tala a varakia ne ria, ri voro lae, ri voro rike viliha a habulo.
ACT 22:24 Lakea a ubu i taki e huriki a nugumaheto ri gi turaria e Paulus ge lakea na roho ne ria. I taki ria ri gi lagua, ri gi nanea vona e huriki, i navai i madihi a hatene ria, ri ta hateka maia.
ACT 22:25 Pali e Paulus, na tahuna ri kolotatea ta ri gi lagua, i nanea a nugumaheto tara, i ta maea, “Iau a tahotanga ne Rom. I uka ma mu pelekado iau ma. Ra hini mu gu lagu iau vona, a vinara ne mua i ta navai?”
ACT 22:26 Na tahuna a nugumaheto i longoa a nitana, i lakea na ubu, i vakalongoa. Lakea i nana, “A ra go ratea ngane? A bakovi iea, ia a tahotanga o Rom.”
ACT 22:27 Lakea a ubu i lakea ne Paulus, i nanea, “O vakalongo iau ngane, i muholi ioe a tahotanga o Rom?” E Paulus i koli i ta maea, “I muholi, iau a tahotanga.”
ACT 22:28 Lakea a matakari ne huriki a nugumaheto i ta maea, “Iau a voro a moni dagi ri longo nau, a made manga a tahotanga ngane.” E Paulus i koli, i ta maea, “Pali iau, na tahuna e nana i poda iau, iau a tahotanga.”
ACT 22:29 Na tahuna e Paulus i ta mavonga e huriki a bakovi ta ri gi lagua, ri karuku hamule. A ubu tara i mangenge, a vuhuna i kolotatea na sen e Paulus, re Paulus, a tahotanga o Rom.
ACT 22:30 Na parava muri a ubu i ngaru ni lohoka vona a vuhuna a rongova, i navai e huriki a Iuda ri padi virihi e Paulus na ngava. Lakea i gale palupu e huriki a prister dagi, a tara na vaponga ne huriki a Iuda ri gi vapopo. Muri i puga vuroki a sen ni kolotata e Paulus vona, i turari talea, i vakapesia na matane huriki ri vapopo.
ACT 23:1 E Paulus i matanono e huriki a tara na vaponga ne huriki a Iuda, i ta maea, “Mua o huriki a turagu! A nimadegu na matana Vure, i valai i harena mona, iau a hatakia i kamumu.”
ACT 23:2 A prister dagi e Ananias i longoa a ngava iea, i taki e huriki a bakovi ri pesi tabukoi vona ri gi ubi pupua a ngavana.
ACT 23:3 Lakea e Paulus i takia e Ananias, i ta maea, “A Vure tara bara i ubi pupua a ngavamu! Ioe a bakovi na taminga. Ngane o muri mai a vinara ne Moses, o made vonga o pelekado iau. Pali ioe i uka ma o muri mai a vinara, a vuhuna o vakuku e huriki ri ubi iau!”
ACT 23:4 Lakea e huriki ri pesi tabukoi ne Paulus ri tahatea, ri ta maea, “Naha ni ta puhaki vona a prister dagi na Vure!”
ACT 23:5 E Paulus i koli, i ta maea, “Mua o huriki a turagu, iau i uka ma lohoka vona a bakovi iea ge ia a prister dagi. A ngava ni here puru na Hinere i ta maea, ‘Naha ni rata a ngava hale na matakari ne huriki.’”
ACT 23:6 E Paulus i matakilaka vona e huriki a Sadusi, e huriki a Pariseo ri bele na vaponga, lakea i ta dagi, i ta maea, “Mua o huriki a turagu, iau a Pariseo, e tata tara, ia a Pariseo. Iau a pesi koea na murina ni vapelekado a vuhuna a pasimata vona e huriki ri mate bara ri pesi rike mule na matenga.”
ACT 23:7 Na tahuna e Paulus i takia a ngava iea, ri vapida na tara i rua, ri vagege. E huriki a Pariseo ri vagege turana e huriki a Sadusi.
ACT 23:8 I bele maea, a vuhuna e huriki a Sadusi ri taki e huriki ri mate ta i uka ma ri gi pesi rike mule na matenga. Ri taki tabu ta i uka agelo, i uka hanitu. Pali e huriki a Pariseo ri taki e huriki ri mate bara ri pesi rike mule na matenga, ri taki i tahoka e huriki a agelo, a hanitu.
ACT 23:9 I mavonga ri vahehe dagi hateka. Muri e huriki a mari na vinara na tara ne huriki a Pariseo ri hehe, ri ta maea, “A bakovi iea i uka ma i ratea tara maregoa. Ma ge ta polo vona tara agelo, o a gisi.”
ACT 23:10 A rongova i bele dagi, i popote ge vakabele a vabinga. A matakari ne huriki a nugumaheto i mangenge ne huriki a Iuda, ma ga ri gi rape kesia e Paulus. Lakea i taki e huriki a nugumaheto ri gi puru, ri gi vakaha talea, ri gi ru ia na roho ne ria.
ACT 23:11 Na rodo iea e Bakovi Dagi i pesi tabukoi ne Paulus, i ta maea, “Naha ni mangenge! Bara o vano o vakalongo a ngavagu ne huriki o Rom, i manga a hini o rata pali koea o Ierusalem.”
ACT 23:12 Na hatelanga, a Iuda ala ravulu va i tahoka a polona ri varodo a ngava ri gi rabalakia e Paulus. Ri kaba nahea ri gi kani o ninu, ge harena na tahuna ri gi rabalakia e Paulus.
ACT 23:14 Ri lakea ne huriki a prister dagi, a gare, ri ta maea, “Mia lobo nga mi kaba pali nahea mi gi kani, ge harena na tahuna mi gi rabalakia e Paulus.
ACT 23:15 Ngane mi ngaru mua mu gu rudu a ngava na ubu ne huriki a nugumaheto, ge turari vilia e Paulus. Bara i luhoi ngane mu gu nana tabua na maka ninana. Ia i uka ma ge valai tabukoi ma, bara mi rabalakia.”
ACT 23:16 Na tahuna e hane Paulus i longoa a ngava iea, i nunu lakea na tabeke ne huriki a nugumaheto, i vakalongoa e Paulus.
ACT 23:17 Muri e Paulus i gale vilia a nugumaheto, i takia, i ta maea, “O tulia a riau iea ge lakea taro na ubu vomu. I tahoka a ngava ge takia vona.”
ACT 23:18 Lakea a nugumaheto i tungaria a riau, ru lakea na ubu, i ta maea, “A vorakato e Paulus i gale iau, a lakea vona. I taki iau ga tuli vilia vomu a riau iea, a vuhuna i tahoka tara ngava ge taki ioe vona.”
ACT 23:19 Lakea a matakari i tulia na limana a riau iea, ru pesi gaviri. Muri i nanea, “A ra ngava go vakalongo iau vona?”
ACT 23:20 Lakea i takia, “E huriki a Iuda ri valongo mai a ngava pali, ta ri gi nana ioe go turari lakea ne huriki a tara na vaponga kuduvi e Paulus. Ri tami rabu mavonga go luhoi ga ngava muholi i valai ne ria ri gi nana tabua e Paulus.
ACT 23:21 Naha ni longo mai ria! E huriki a bakovi ala ravulu va i tahoka a polona, ri kapiloho, ta ri gi rabalakia e Paulus. Ria lobo ri kaba pali nahea ri gi kani, o ri gi ninu, ge harena na tahuna ri gi rabalakia. Ngane ri dava ioe ta go longo vona a ninana ne ria.”
ACT 23:22 A matakari i rudu mulea a riau, i ta maea, “Naha ni takia tara viri ne vomu o vakalongo pali iau vona a ngava iea.”
ACT 23:23 Muri i gale a nugumaheto ala rua, i taki rua, “A ngaru ranga nugumaheto ri gi lakea o Sisaria. O bole a nugumaheto ge ala 200, a bakovi ni rike na hos ge ala 70, a bakovi ri gi bole a maheto ge ala 200. Ri gi kisi puru a maki ne ria. Barama na kilala i polova ri gi vano.
ACT 23:24 Muru bole ranga hos ge ne vona e Paulus, mu tungaria ge laho kamumu, ge bele ne Peliks a matakari na tanga.”
ACT 23:25 A ubu ne huriki a nugumaheto i herea a raukea i ta maea,
ACT 23:26 “Iau e Klaudius Lisias, “A raukea ge lakea ne Peliks a matakari: “A haro vomu.
ACT 23:27 “A bakovi iea e huriki a Iuda ri lakavua, ri ngaru ni rabalakia. Ni vakalongo iau vona ia a tahotanga ne Rom, lakea a bole e huriki a nugumaheto, mi vano mi korimulea.
ACT 23:28 A ngaru ni lohoka vona a ngava e huriki a Iuda ri padi virihi ia vona, lakea a bole purua ne huriki a tara na vaponga ne ria.
ACT 23:29 Ri takia e Paulus ta i hehe hateka na vinara ne ria. Pali i uka tara naro ge ratea ge hale ni gi ru dilia na bavi, o ni gi rabalaki ia vona.
ACT 23:30 Ngane ni vakalongo iau ne huriki a Iuda ri varodo a ngava ri gi rabalakia. Lakea a vakaha lakenea vomu malaviriri kunana. E huriki ri padi virihia na ngava, ria ranga a taki ria ri gi puru lakene, ri gi tuveve poloa vomu vona a ngava ri padi virihia vona.”
ACT 23:31 Na rodo iea kunana e huriki a nugumaheto ri muri mai a ngava ni taki ria vona, ri turaria e Paulus, ri taparakia na tanga dagi e Antipatris.
ACT 23:32 Na parava muri e huriki a bakovi ni rike na hos kunana ri vano turana, ri lakea o Sisaria. Pali e huriki a nugumaheto ranga, ri hamule.
ACT 23:33 Na tahuna ri bele o Sisaria ri habia a raukea na matakari, ri taparakia e Paulus na limana.
ACT 23:34 A matakari i gia a raukea, i nanea e Paulus, “I vai a tabeke o valai vona?” Na tahuna i longoa i valai na tabeke ne Silisia,
ACT 23:35 i takia, “Na tahuna e huriki ri padi virihi ioe ri gi bele, bara pelekadoa a ngava vomu.” Muri i taki e huriki a nugumaheto ri gi tagaria na ruma-hariki ne Herod.
ACT 24:1 Muri na parava i lima e Ananias, a prister dagi, turana e huriki a bakovi dagi, e Tertulus a mari na vinara, ri puru valai o Sisiria. Ri valai ri gi padi virihia e Paulus na matana matakari.
ACT 24:2 Ni gale dili na vaponga e Paulus, lakea e Tertulus i ta rike, i ta maea, “Peliks, ioe a bakovi dagi! Ioe a bakovi na lohokanga, o matakari kamumu mia mi made na nivalemu na parava i kupo, o rata kamumu a maki ri hale na robo ne mia.
ACT 24:3 Na tabeke lobo mi vivi vona a leho o ratea, mi kavurike ioe vona.
ACT 24:4 Pali a koi ni vakapae ioe, lakea a ngaru ioe go pasivalo kamumu, go longoa a nitane mia.”
ACT 24:5 Muri i padi virihia na ngava e Paulus, i ta maea, “A bakovi iea, i vakapae hateka. I piurike e huriki a Iuda na tanga lobo. I muga ne huriki ni gale a tara ne Nasaret.
ACT 24:6 I toni ni vakamutoa a roho na Vure, pali mi lakavua. O nana kamumua ra bakovi iea, bara o matai a maka maki mi padi virihi ia vona i muholi.”
ACT 24:9 Muri e huriki a Iuda ri taga taku, ri takia ra ngava i takia e Tertulus, ta a ngava muholi.
ACT 24:10 A matakari i tolokavea e Paulus, i takia ge ta. Lakea e Paulus i ta maea, “Iau a lohoka vomu, na pida i kupo o matakaria a robo iea. Ngane a vivi ni koli a maka ngava nga.
ACT 24:11 O nana e huriki, bara ri vakalongo ioe vona iau a lakea na roho na Vure o Ierusalem a vasileki vonga rira. A parava i ravulu a polona i rua i lakea pali.
ACT 24:12 I uka tara viri ge matai iau ga hehe turana bakovi tara, o ga piu rike e huriki na roho na Vure, o na tanga dagi, o na roho na vaponga.
ACT 24:13 Ra ngava ri padi virihi iau vona i uka ma i muholi. I uka tara dala ri gi vakasiria vona, ge muholi ra maregoa ri padi virihi iau vona.
ACT 24:14 A ngava muholi i maea: iau a kavurikea a Vure ne huriki a gare ne mia, a ramaia a dala ne Isu. E huriki a Iuda ri takia ra dala ne Isu, ta i uka ma a dala muholi. Pali iau a luhoi tora a maki lobo ni tovo na vinara ne Moses, ni here puru na puhu na raukea ne huriki a propet.
ACT 24:15 Iau, i manga e huriki ri padi virihi iau, a pasimata na Vure ge vakamahuri mule na matenga e huriki ri mate pali, re huriki ri kamumu e huriki ri hale.
ACT 24:16 Lakea a toni a bulugu ga laho kamumu na matana Vure, na matane huriki a bakovi a ngatavine, ga hataki kamumu vona a leho nau.
ACT 24:17 “Iau a made basi na pida i kupo. Muri a lakea o Ierusalem, a bole a moni ga habi ne huriki a matasia vonga, ga habi a nihabi.
ACT 24:18 Na tahuna a rata a maka leho nga, ri matavisi iau vonga na roho na Vure, a rata pali a leho na ni vakamatapado iau na matana Vure. I uka ma ri matai iau ga piurike e huriki. Pali ranga a Iuda ri valai o Asia.
ACT 24:19 Ria bara ri tahoka a ngava, bara i kamumu ri gi valai koea, ri gi taki tala.
ACT 24:20 Ge uka, o nana re huriki a Iuda ra ri pesi koea ngane, ri gi vakalongo ioe vona a ra maregoa a ratea na tahuna a pesi na matane huriki na vaponga o Ierusalem.
ACT 24:21 Iau a luhoi maea, a ngava i taku kunana a ratea na tahuna a made turane ria. A gale dagi, a ta maea, ‘Iau a pesi na matane mua ngane, a vuhuna a luhoi e huriki ri mate pali bara ri mahuri mule na matenga.’”
ACT 24:22 E Peliks i lohoka vona a niluhoi ne huriki ri muri mai a dala ne Isu. Lakea i taki e huriki a Iuda, i ta maea, “Si gi davea a ubu, e Lisias, ge bele taro. Muri bara pelekadoa a ngavane mua.”
ACT 24:23 E Peliks i takia a ubu ge ru dilia na bavi e Paulus, pali nahea ge tagari hatekea. I taki e huriki e turane Paulus ri gi tuhoria.
ACT 24:24 Muri na parava ranga e Peliks i valai turana e girihina, e Drusila, a ngatavine o Iuda. I rudu a ngava ni gi turari valai vona e Paulus, ge longo vona ranga ngava na niluhoi ne Isu Kristo.
ACT 24:25 E Peliks i mangenge na tahuna i longoa e Paulus i vara na naro malamala, na viri ge matakari kamumu a vilona, na Vure ge pelekado hita muri ma. Lakea i ta maea, “Ge lobo ngane a ngava ngi! O vano ke! Muri ma ga malopi, bara talo rike a ngava vomu o valai tabu.”
ACT 24:26 I ngarua e Paulus ge habi kapiloho a moni vona ge vokoa ge vakapagitala ia na bavi. Na parava vakaroro e Peliks bara i talo rike a ngava ne Paulus ge valai vona ge ta turana.
ACT 24:27 I lobo a pida i rua, e Porsius Pestus i kuloi e Peliks, i matakari. E Peliks i ngaru e huriki a Iuda ri gi luhoi ia ge ia a bakovi kamumu, lakea i uka ma i vakapagetalea na bavi e Paulus.
ACT 25:1 E Pestus i bele o Sisaria i made na parava i tolu, muri i vano i lakea o Ierusalem.
ACT 25:2 E huriki a prister dagi, a gare ne huriki a Iuda ri valai vona ri padi virihi e Paulus na ngava. Ri nana e Pestus
ACT 25:3 ge longo mai ria ge turari lakea o Ierusalem e Paulus, a vuhuna ri varodo a ngava pali ta ri gi kapia e Paulus, ri gi rabalakia.
ACT 25:4 E Pestus i koli i ta maea, “E Paulus ni ru dili na bavi o Sisaria, pali iau ngane a tabukoi ni hamule lokovonga.
ACT 25:5 Ge valai turagu e huriki a matakari ne mua, mi gi lakea o Sisaria. Pali a bakovi iea ge tahoka a naro hale, bara ri padi virihia vonga.”
ACT 25:6 E Pestus i made turane ria na parava i polotolu o i ravulu, muri i hamule lakea o Sisaria. Na parava muri i made na gula ni vapelekado, lakea i taki ria, ri turari vilia vona e Paulus.
ACT 25:7 Na tahuna e Paulus i bele, e huriki a Iuda ri valai o Ierusalem ri pesi haluia, ri padi virihia na maka ngava dagi i uka vuhuna.
ACT 25:8 Pali e Paulus i taga vona i ta maea, “Iau i uka ma a ratea tara naro ge hale na vinara ne huriki a Iuda, o na roho na Vure, o ne Kaiser.”
ACT 25:9 Pali e Pestus i ngaru ge rata kamumu e huriki a Iuda, lakea i nanea e Paulus, “Ioe o ngaru ni lakea o Ierusalem, ga longoa vonga a maka ngava ni padi virihi ioe vona?”
ACT 25:10 E Paulus i koli i ta maea, “Ngane a pesi na matana mari ni pelekado ne Kaiser tara. Koea ia a tabeke bara ni pelekado iau vona. Iau i uka ma a rata a naro hale ne huriki a Iuda, ioe tara o lohoka vona.
ACT 25:11 Iau bara longotaro a vinara, a ratea tara naro i hale hateka, bara mate vona, i uka ma ga ha vona. Pali ra ngava ni padi virihi iau vona, bara a ngava taminga, i uka tara viri ge habi iau na limane ria. Iau a ngarua e Kaiser ge longoa a ngavagu.”
ACT 25:12 Muri e Pestus i ta lobo turane huriki a bolekori vona, i koli, i ta maea, “Ioe o ngaru e Kaiser ge longo a ngava vomu, ngane bara o lakea ne Kaiser.”
ACT 25:13 Muri na parava ranga, e Agripa a hariki, turana e kurabana e Bernaisi ru valai o Sisaria ru gu gosia e Pestus.
ACT 25:14 Ru made na parava ranga, lakea e Pestus i vakalongo e Agripa vona e Paulus, i ta maea, “I tahoka tara bakovi e Peliks i pe purua na bavi.
ACT 25:15 Na tahuna a lakea o Ierusalem, e huriki a prister dagi, a gare ne huriki a Iuda ri padi virihia na maka maregoa i kupo, lakea ri nana iau ri ngarua ge vurua ra bakovi iea.
ACT 25:16 “Lakea a koli, a ta maea, ‘Na tahuna a bakovi tara ni padi virihi na maregoa, a vilone huriki a Rom i ta maea, nahea ni gi vakamadihi tavula a viri. A viri i tahoka a maregoa bara i pesi taro na matana viri i padi virihia na maregoa, ge tagaria na maregoa ni padi virihi ia vona.’
ACT 25:17 Na tahuna e huriki a Iuda nga ri valai koea na murina ni vapelekado, iau i uka ma dava. Na parava muri a made na gula na mari ni vapelekado, a talo rike a ngava ni tuli valai nau e Paulus.
ACT 25:18 E huriki a Iuda ri pesi rike, ri padi virihia na ngava. Pali a ngava ri padi virihia vona i uka ma i hale hateka ge manga a ngava a luhoi ta ri gi padi virihia vona.
ACT 25:19 A ngava ri padi virihia vona i dili na nita na lotu, a nita na bakovi tara i mate, a rana e Isu. E Paulus i takia ta i mahuri mule a bakovi iea.
ACT 25:20 Pali iau a ngaru ni matakanea a vuhuna a maregoa iea, pali a varoru. Lakea a nanea, ma ge ngaru ni lakea o Ierusalem ni gi longo vonga a ngava ni padi virihi ia vona.
ACT 25:21 Pali i marikoi ia, i ngaru ni matai e Kaiser ge longoa a ngava vona. Lakea a takia ni gi matakari taro ia na bavi, muri ga rudu lakea ne Kaiser.”
ACT 25:22 Muri e Agripa i takia e Pestus, “Iau tara a ngaru ni longoa a ngava vona.” E Pestus i koli i ta maea, “Kuduvi bara o longoa a ngava vona.”
ACT 25:23 Na parava muri e Agripa, e Bernaisi ru bagetu kamumu, ru dili na roho na vaponga turana e huriki a matakari na nugumaheto, a bakovi dagi na tanga dagi. E Pestus i rudu a ngava, ni turari lakea vona e Paulus.
ACT 25:24 Lakea e Pestus i ta maea, “Hariki Agripa, turana e huriki ri made turane hita mona koea, mu masia a bakovi iea. E huriki a Iuda ra ri made koea, e huriki a Iuda ri made o Ierusalem, ri valai nau, ri padi virihia na ngava. Ri gale dagi, ri ngarua ge mate.
ACT 25:25 Pali iau i uka ma a matavisia vona tara maki ge hale ge ratea ge mate vona. Ngane bara rudua ge lakea ne Kaiser, a vuhuna i ta tora hateka ge pesi na matane Kaiser.
ACT 25:26 Pali iau a varoru vona a ra ngava ga here puru ga vakalongo e Kaiser vona. Lakea a vakapesia koea na matane mua, na matane Agripa a hariki. Si gi nana tabua, muri ga here puru a ngava i taki.
ACT 25:27 Iau a luhoi i uka ma i kamumu a vorakato ni gi rudu lakea ne Kaiser, pali i uka ma ni gi vakaru lokovonga turana nitana naro hale vona.”
ACT 26:1 Ngane e Agripa i takia e Paulus, “Ngane o ta, o koli a ngava ne huriki ri padi virihi ioe.” Lakea e Paulus i tolokave ria, i ta maea,
ACT 26:2 “Hariki Agripa, mona a ngaru ni koli a maka ngavane huriki a Iuda ri padi virihi iau vona. I kamumu hateka a pesi na matamu,
ACT 26:3 a vuhuna ioe o lohoka kamumu vona a narone huriki a Iuda, turana maka ngava mi vahehe bala vona. Iau a nana ioe go hatenono go longo kamumu a ngava nau.
ACT 26:4 “E huriki a Iuda ri lohoka vona a nimadegu i vakatubu na tahuna a kiroko vona. Ri lohoka vona iau a made turane huriki a kabu nau, muri a lakea o Ierusalem.
ACT 26:5 I tabaka ngane ri lohoka nau. Ria bara ri malopi, bara ri vakalongo ioe vona a narogu, i vakatubu na tahuna a dili na tara ne huriki a Pariseo. E huriki a Pariseo, mi rangi e huriki a tara ranga, mi muri mai kamumu a naro na lotu ne huriki a Iuda.
ACT 26:6 Ngane a pesi koea go pelekado iau, a vuhuna a luhoi a ngava muholi na Vure i taki e huriki e tubune hita vona hosi i muholi.
ACT 26:7 A ngava muholi iea, e huriki a kabu ne mia, ala ravulu a polona i rua, ri ngaru ni bolena na tahuna ri kavurikea a Vure na haro a rodo. O Hariki Agripa, na niluhoi iea kunana e huriki a Iuda ri padi virihi iau na ngava!
ACT 26:8 I navai mu pahadaki ta a Vure i keri ni vakamahuri mule e huriki na matenga?
ACT 26:9 “I muga, iau tara a luhoi i kamumu ga ratapilea a rane Isu, ra bakovi o Nasaret.
ACT 26:10 A rata mavonga o Ierusalem. A bole a nitora ne huriki a prister dagi, a ru dili na bavi e huriki a tara ne Kristo. Muri, na tahuna ni taki ni gi rabalaki ria, iau tara longo ne ria ni gi rabalaki.
ACT 26:11 A vakamadihi vakaroro ria pololilo na maka roho na vaponga, a toni ni rata ria ri gi lohopile a niluhoi ne ria. I madihi a hategu ne ria, a matakana ria na maka tanga basi, a vakamadihi ria vonga.
ACT 26:12 “Na leho iea kunana e huriki a prister dagi ri rudu iau a sike o Damaskus.
ACT 26:13 Na kuru haro na tahuna a laho na dala, a masia a nipara i para valai na hunu. A nipara iea i para dagi hateka na haro, i para halui iau turana e huriki a bakovi ri laho turagu.
ACT 26:14 Mia lobo mi boru puru na malala, lakea a longoa a lohona bakovi i ta na nita Hibru i ta maea, ‘Saulus, Saulus! I navai o vakamadihi iau? Ioe o vakamadihi mule ioe na naromu.’
ACT 26:15 “Muri a nana, ‘Bakovi Dagi ioe e rei?’ “Lakea e Bakovi Dagi i koli i ta maea, ‘Iau e Isu, ra viri o vakamadihia.
ACT 26:16 Pali ngane o pesi rike, a vuhuna iau a bele vomu ga ru ioe ge ioe a vora nau, go vakalongo e huriki vona a maki o matai nau mona, a maki bara vakasiri ioe vona ma.
ACT 26:17 Iau ga korimule ioe ne huriki a viri vomu. Ga korimule ioe ne huriki i uka ma ria a Iuda, re huriki ga rudu ioe ne ria,
ACT 26:18 go vakapalala a matane ria, ri gi pe a uvo, ri gi valai na hini i palala, ri gi ha vona a nitora ne Satan, ri gi valai na Vure, i mavonga a Vure bara i puga vuroki a naro hale ne ria, ri gi bole a murine ria turana e huriki ri luhoi a Vure ni vulaki pali.’
ACT 26:19 “I mavonga, o Hariki Agripa, iau i uka ma longotaroa a nivakasiri i valai na hunu.
ACT 26:20 A vakatubu ni vakalongo e huriki ri gi pulo a vilone ria, ri gi ramai a Vure, ri gi rata a naro ge vakasiri ria ri mapulo muholi pali. A vakalongo muga e huriki o Damaskus e huriki o Ierusalem. Muri a lakea na tanga lobo na tabeke ne Iudea, muri a lakea ne huriki i uka ma ria a Iuda, a vakalongo ria.
ACT 26:21 Lakea e huriki a Iuda ri lakavu iau na roho na Vure, ri ngaru ni rabalaki iau, a vuhuna a rata mavonga.
ACT 26:22 Pali a Vure i tuhori iau vakaroro. Ngane a pesi koea, a vakalongo e huriki a matasia, e huriki a bakovi dagi. A vakalongo kunana a ngava ne Moses, e huriki a propet ri takia ge bele.
ACT 26:23 A ngava ri takia i maea, ‘E Kristo ge bole a nimadihi, ge mate. Ia bara i muga ne huriki lobo, i pesi rike mule na matenga. Muri ge vakalongo ne huriki a Iuda, ne huriki i uka ma ria a Iuda a nitana nipara.’”
ACT 26:24 Na tahuna e Paulus i vakalongo a maka ngava nga, lakea e Pestus i ta puhaki ma ia, i ta maea, “Paulus, ioe o ta manga manga! A lohokanga vomu i rata ioe o manga!”
ACT 26:25 Pali e Paulus i koli, i ta maea, “O Pestus, iau i uka ma a manga! A maka ngava a taki i malamala, i muholi.
ACT 26:26 Hariki Agripa! Ioe o lohoka vona pali a maka ngava nga, lakea a ta pagapaga i uka ma mangenge. O lohoka vona a maka maki nga, i uka ma i tabuli kapiloho na matamu o na talingamu. O lohoka pali ne ria, a vuhuna a maka maki nga i uka ma ni rata kapiloho.
ACT 26:27 Hariki Agripa, o luhoi tora a ngavane huriki a propet? Iau a lohoka vomu, o luhoi ria!”
ACT 26:28 Lakea e Agripa i takia e Paulus, “O luhoi go pulo malaviriri a niluhoi nau, ge iau a Kristian?”
ACT 26:29 E Paulus i koli i ta maea, “Ge malaviriri, o ge maradoi, a vasileki na Vure, mua lobo mu longo a nitagu mona mu gu manga iau. Pali a sen kunana i uka ma ge kolotata a limane mua!”
ACT 26:30 Muri e Agripa a hariki i pesi rike. A matakari, e Bernaisi turane huriki ranga ri pesi rike,
ACT 26:31 ri pagitala. Lakea ri vata, ri ta maea, “A bakovi iea, i uka ma i ratea tara maki ge mate vona, o ge dili na bavi vona.”
ACT 26:32 Lakea e Agripa i takia e Pestus, i ta maea, “A bakovi iea, i uka ma ge ngaru ni masia e Kaiser, bara o vakapagetalea na bavi.”
ACT 27:1 Na tahuna ri valongo mai a ngava pali ne mateu mete ge lakea o Itali, ri habi e Paulus turane huriki a vorakato ranga, ri habi na limane Iulius, a ubu na tara na vabinga ni gale a ‘Tara na Vabinga ne Kaiser Augustus.’
ACT 27:2 Mete rike na aga tara i valai na tanga e Adramitium. A aga iea i vakarike a maka tulua ge taparaki na maka roa na tabeke ne Asia. E Aristakus, a bakovi o Tesalonika na tabeke ne Masedonia, i valai turane mateu.
ACT 27:3 Na parava muri mete bele o Sidon. E Iulius i rata kamumua e Paulus, i takia ge vano ge matai ranga turana, ri gi matakaria.
ACT 27:4 Muri mete pasi tala vonga o Sidon, mete nunu tabukoi na dahana bodu e Saiprus, a vuhuna a vilu i pori valai na ngalane mateu.
ACT 27:5 Mete padikudua a dari na tabeke ne Silisia e Pampilia, mete bele na tanga dagi e Maira na tabeke ne Lisia.
ACT 27:6 Na tahuna mete bele vonga, a ubu i masia a aga o Aleksandria ge lakea o Itali, lakea mete rike vona.
ACT 27:7 Mete pasi tala vonga, mete nunu makanukanu na parava ranga, a vuhuna mete vahori a vilu. Muri mete bele tabukoi na tanga e Snidus. A vilu i pori valai muga, mete keri ni nunu lokovonga vona a bala iea. Lakea mete palelea a mapana aga, mete nunu na tabeke i malilo na bodu e Krit, tabukoi na ruperena e Salmone, lakea mete lokovonga liu na tabeke tara na bodu.
ACT 27:8 Mete nunu tabukoi na dahana bodu, mete vahori a vilu, muri mete bele vona a tanga ni gale ‘Roa Kamumu,’ i tabukoi na tanga dagi e Lasea.
ACT 27:9 Mete maradoi hateka. Lakea mete hori vonga na parava ranga, mete davea a vilu ge pasipuru. Pali i uka ma i pasipuru. I tabukoi ngane a tahuna hale, i polo ne mateu vonga a Parava Niperemu. Lakea e Paulus i habia ne ria a niluhoi,
ACT 27:10 i ta maea, “A masia a nihavai ne hita bara i vakabele a vuranga. Bara i mabubu a aga, i velu a maka tulua, i pasiri e huriki.”
ACT 27:11 Pali a ubu i uka ma i longo maia e Paulus. I ramai kunana a ngavana matakari ne huriki a nuguvore, a tahona aga.
ACT 27:12 A roa iea i uka ma i kamumu na tahuna na malangia, lakea e huriki lobo ri ngaru ni havai maia e Peniks, a roa na bodu e Krit, ra i ngalai a nirolona haro. Ria bara ri malaviriri, bara ri kapiloho vonga na tahuna na malangia.
ACT 27:13 Na tahuna a vilu i ngalu valai tano, e huriki a nuguvore ri luhoi ta i malilo, lakea ri lalu rikea a niroka, ri nunu tabukoi na lavu ne Krit.
ACT 27:14 Pali i uka ma i tabaka, a vilu dagi i pori valai meli na kurukuruna bodu. A vilu dagi iea ni gale a “taiava.”
ACT 27:15 A taiava i pulo laea a aga i keri ni nunu. I nunu tamoro lokovonga kunana, i ramai a vilu.
ACT 27:16 I naviri mia a bodu kiroko e Kauda na tahuna mi pasi lokovonga. Mi vakeri ni lalu rikea na aga a posi.
ACT 27:17 Muri mi lalu rike visia. Muri mi kolotatea a aga. Ri mangenge ma ri gi heri na hini vorobike tabukoi na lavu ne Siritis, lakea ri lalu purua a sel, a vilu i vakanunu kunanea a aga.
ACT 27:18 Na parava muri a taiava i pori hateka tabu, lakea ri vuroki tala a maka tulua.
ACT 27:19 Na toluna parava ri vuroki tala a maka mahalana aga.
ACT 27:20 Na parava i kupo i uka ma mi matai a haro a hada, a vuhuna i ratapile mia a taiava. Ngane mi luhoi a legea ne mia, bara mi vurua.
ACT 27:21 Na parava i kupo e huriki a bakovi i uka ma ri kani, lakea e Paulus i pesi rike na matane ria, i ta maea, “I muga mua bara mu longo mai iau, i uka ma si gi ha taroa e Krit, bara si made kamumu kunana.
ACT 27:22 Pali ngane a taki tora mua, mu hatenono! I uka tara ne mua ge vurua. A aga kunana bara i mapua.
ACT 27:23 Baroko na rodo a agelo na Vure i bele nau, ra Vure a kavurikea, iau a viri vona.
ACT 27:24 A agelo i ta maea, ‘Paulus naha ni mangenge. Bara o pesi na matane Kaiser, ge pelekado ioe. Na nidodo na Vure kunana e huriki ri havai turamu i uka ma ri gi vurua.’
ACT 27:25 I mavonga mu kinigao, a vuhuna iau a luhoi a nitana Vure i vakalongo iau a agelo vona baroko, bara i bele muholi.
ACT 27:26 Pali hita, bara si koro na dahana bodu tara.”
ACT 27:27 Na rodo i ravulu a polona i va i ratapile mavonga mia a vilu na maravana dari e Adriatik. Na kuru rodo e huriki a nuguvore ri luhoi ta mi tabukoi ni nunu dili na robo.
ACT 27:28 Lakea ri topia na ngutuna mota a maki mava, ri voro purua, ri masia a maravana i puru na utu, a mita i ravulu va. Muri ri rata tabua, ri masia a maravana i puru na utu, a mita i ravulu tolu kunana.
ACT 27:29 Ri mangenge ma ge bimomoa na rakaru a aga, lakea ri voro puru muri na kuli a niroka i va, ri hatenono ri dava a hini ge malaharere.
ACT 27:30 Muri e huriki a nuguvore ri ngaru ni ha. Ri vakatavore purua na dari a posi, ri tamilalu ni voro puru a niroka na mapana aga.
ACT 27:31 Pali e Paulus i takia a ubu turana e huriki a nugumaheto vona, “Re huriki a nuguvore nga bara ri ha, bara mu vurua.”
ACT 27:32 Lakea e huriki a nugumaheto ri palakudu a mota ni kolotata a posi vona, i pasi tala a posi.
ACT 27:33 Muga na hini ge malaharere, e Paulus i vakuku ria ri gi kani ranga maki ni kani, i ta maea, “Na parava i ravulu a polona i va, na tahuna mu dava a taiava ge pasipuru i uka ma mu kani.
ACT 27:34 Ngane a taki mua, mu kani ranga maki ni kani, bara mu gao. Ra mua takutaku i uka ma ge velu tara lilina vune mua.”
ACT 27:35 I taki loboa a ngava iea, i bole ranga bret, i kavurikea a Vure na matane ria, i keve, i vakatubu ni kani.
ACT 27:36 A niluhoi ne ria i kamumu ngane, lakea ri kani.
ACT 27:37 E huriki lobo ri rike na aga ri ala 276.
ACT 27:38 Ri maru ngane, ri vuroki tala na dari a maka galesi na vit, ge maraha a aga.
ACT 27:39 E huriki a nuguvore ri mata rovia a robo na tahuna i palala a hini, pali ri masia a maloku i vona a lavu, lakea ri ngaru ni vakanunu rikea vonga a aga.
ACT 27:40 Ri palakudu puru na utu a maka niroka, ri puga vuroki a mota ni kolotata a ginelu na aga. Muri ri turari rikea a sel na mapa, ta ri gi nunu dili na lavu.
ACT 27:41 Pali na tahuna ri nunu lokovonga a aga i heri na hini i vorobike. A mapana aga i koro, i keri ni nunu, lakea a bokona dari i rere tagua a kulina aga, i vakatubu ni mapua.
ACT 27:42 E huriki a nugumaheto ri luhoi ni rabalaki e huriki a vorakato, ma ri gi ha.
ACT 27:43 Pali a ubu ne ria i koi ni masia e Paulus ge mate, lakea i hatekakari ria vona a rabu ta ri gi ratea. Lakea i vakuku e huriki ri huru kilala ri gi to tala muga, ri gi huru dili na lavu.
ACT 27:44 E huriki ranga ri gi tabuli langa na maka mavilana aga, ri gi huru dili. Na naro iea kunana e huriki lobo ri mahuri.
ACT 28:1 Na tahuna mi huru dili pali na lavu, ni vakalongo mia vona a bodu iea ni gale e Malta.
ACT 28:2 E huriki a tahotanga ri rata kamumu hateka mia. Ri tagui mia, ri tunua a kanono mi hua, a vuhuna i vakatubu ni boru a vala, mi malangangi.
ACT 28:3 E Paulus i popoa a galesi na kai, i tagu rike na kanono. A mata i hataki a harena kanono, i ha tala, i kara tatea a limana.
ACT 28:4 E huriki a tahotanga ri masia a mata i tavore na limane Paulus, lakea ri vata, ri ta maea, “A bakovi iea, a bakovi ni rabalaki a viri! I uka ma i vurua na dari, pali a vure ne hita, a rana e ‘Nipelekado’, i koi ia ge mahuri.”
ACT 28:5 Pali e Paulus i puraki vurokia na limana a mata, i voro rikea na kanono, i uka ma i vurea a matana.
ACT 28:6 E huriki a taho tanga ri davea e Paulus ge vaki a limana, o ge boru puru ge mate. Ri dava, dava i uka ma ri masia tara maki ge bele vona, lakea ri palelea a ngavane ria, ri takia ta ia a vure.
ACT 28:7 A bakovi dagi tara na bodu, a rana e Publius, i tahoka a malala vona tabukoi na hini mi huru dili vona. I tagui mia, lakea mi made turana na parava i tolu.
ACT 28:8 E tamana i giloa i mahita na kiri, a vuhuna i rongo a kaina, i koko pereo. Lakea e Paulus i gosia, i vasileki, i ru langa a limana vona, i vakamahuria.
ACT 28:9 Muri e huriki lobo na bodu ri tuli valai ne Paulus e huriki ri giloa, i vakamahuri ria.
ACT 28:10 Ri habi tavula a maka maki ne mia. Muri, na tahuna ta mi gi malaga, e huriki a tahotanga ri togo mia, ri habi tavula ne mia a maka mahala, ri vakarike a maka maki ni kani mi gi kani laho na marava.
ACT 28:11 Muri na keva i tolu mi rike na aga ne huriki a Aleksandria, a rana e “Vure Boge”, e Kastor e Poluks. A aga iea i kapiloho vonga na bodu na tahuna na malangia.
ACT 28:12 Mi nunu lakea na tanga dagi e Sirakius, mi dili vonga, mi made na parava i tolu.
ACT 28:13 Mi malaga vonga, mi vano mi bele na tanga dagi e Regium. Na parava muri a vilu i vakatubu ni pori valai tano. Muri na parava i taku mi bele ne Puteoli.
ACT 28:14 Mi matavisi vonga ranga kabukabu, ri taki mia mi made turane ria na parava i polorua. Muri mi lakea o Rom.
ACT 28:15 Na tahuna e huriki a kabukabu o Rom, ri longo a velenga ne mia, ri malaga rike taku, ri valai ri gi tagui mia. E huriki ranga ri malaga na Mada ne Apius na tanga ni gale ‘A Roho i Tolu na Mosi,’ ri valai. Na tahuna e Paulus i matai ria, i vivi hateka, i kavurikea a Vure.
ACT 28:16 Na tahuna mi bele o Rom, ni taki e Paulus ge made kikeri turana tagari ge tagaria.
ACT 28:17 Muri na parava i tolu e Paulus i gale palupu e huriki a matakari ne huriki a Iuda vonga. Na tahuna ri vapopo, e Paulus i taki ria, i ta maea, “Mua o huriki a turagu, iau i uka ma ratea tara naro ge hale ne huriki ne hita. I uka ma a longotaroa tara vilo hosi ne huriki e tubune hita. Pali iau ni lakavu tavula o Ierusalem, ri habi iau ne huriki a Rom.
ACT 28:18 Ri nana lobo iau, i uka ma ri masia tara naro hale ga ratea ga mate vona, lakea ri ngaru ni vakapagitala iau.
ACT 28:19 Pali e huriki a Iuda ri koi, lakea iau a taki a ngaru ni pesi na matane Kaiser. Pali iau a uka ngava ga padi virihi e huriki a viri nau vona.
ACT 28:20 Na naro iea kunana a nana ta ga matai mua ga ta turane mua. Iau ni kolotata maea na sen, a vuhuna a muri ne Kristo, ra viri e huriki a Israel ri pasimata vona ge valai.”
ACT 28:21 Muri e huriki a Iuda ri koli, ri ta maea, “Mia, i uka ma mi bolea o Iudea tara raukea ge vakalongo mia ne vomu. I uka tara Iuda ge valai vonga ge vakalongo mia vona tara maki, o ge padi virihi ioe vona tara ngava.
ACT 28:22 Ngane mi ngaru ni longo a ngava go taki, a vuhuna e huriki na tanga lobo ri padimomoa ra lotu karaba vomu.”
ACT 28:23 Muri ri rua tara parava ri gi vapopo turane Paulus vona. I bele a parava iea, lakea e huriki ala kupo hateka ri valai maia a ruma i made vona. I vara ria vona a parava iea, i vakatubu na hatelanga, i vano i harena na haro i puru. I toni ni rata ria ri gi luhoi torea e Isu, lakea i vakasiri ria na vinara ne Moses, na Hinere ne huriki a propet, i vakalongo ria vona a harikianga na Vure.
ACT 28:24 I ranga e huriki ri luhoi a ngava ne Paulus, pali i ranga e huriki ri longotaroa.
ACT 28:25 Ri vahehe lae, lakea e Paulus i ta maea, “A Hanu Kiripiripi i ta muholi lakea ne huriki e tubune mua, i vakalongo polo ne Isaia a propet i ta maea,
ACT 28:26 ‘O lakea ne huriki nga, o ta maea, “Bara mu longo mu longo, pali i uka ma mu gu longokilala. Bara mu matai, pali i uka ma mu gu matakilala.
ACT 28:27 E huriki nga ri gigi tora. A talingane ria i robo, ri mata kopu. Ma ri gi matai, ri longo, bara ri matakilaka nau ri pulo a vilone ria, ri valai nau bara vakamahuri ria.’
ACT 28:28 “I mavonga a ngaru mua mu gu lohoka vona, a velenga na nimahuri vakaroro na Vure ni vakaru lakea ne huriki i uka ma ria a Iuda. Ria bara ri longo mai!”
ACT 28:29 Muri ne Paulus i takia a ngava iea, e huriki a Iuda ri vahehe, ri vapida.
ACT 28:30 E Paulus i made na pida i rua na ruma, i konea na keva takutaku. I tagui e huriki ri ngaru ni lokovonga vona, ri gi masia.
ACT 28:31 I vara ria na harikianga na Vure, i tovo ria ne Isu Kristo a Bakovi Dagi. I ta pagapaga, i uka ma i mangenge vona tara viri, i uka tara viri ge ta pupukari ia.
ROM 1:1 Iau e Paulus, a vora ne Isu Kristo. A Vure i vulaki iau ge iau a apostolo vona, i ru iau ga vakalongo a Velenga Kamumu vona.
ROM 1:2 Hosi i ta muholi ne huriki a propet vona, ge bele kavakava a Velenga Kamumu iea. Lakea e huriki a propet ri here puru na Hinere na Vure.
ROM 1:3 Ra Velenga Kamumu na Tuna Vure. I bele manga a bakovi, i valai na kabune Davit.
ROM 1:4 A Hanu Kiripiripi i vakasiri kavakava ne hita, e Isu Kristo, a Bakovi Dagi ne hita ia a Tuna Vure a vuhuna i vakamahuri mulea na matenga.
ROM 1:5 Iau i uka ma a bakovi kamumu, pali e Kristo i rata kamumu iau, i vulaki iau, ge iau a apostolo. I rata mavonga, ga vakalongo a Velenga Kamumu ne huriki i uka ma ria a Iuda, ri gi togoa e Kristo, ri gi longototoa.
ROM 1:6 Mua ranga, a Vure i gale mua, ge mua e huriki a tara ne Isu Kristo.
ROM 1:7 A herea a raukea iea i lakene mua e huriki a bakovi a ngatavine o Rom. A Vure i ngaru hateka mua, i gale mua ge mua a tara vona. A Vure e Tamane hita turana e Isu Kristo, a Bakovi Dagi ne hita, ru gu rata kamumu mua, ru gu habi a nivalemu ne mua.
ROM 1:8 A ngaru ni taki taro mua, na tahuna a luhoi mua, a kavurikea a Vure nau na rane Isu Kristo, a vuhuna na tanga lobo ri tuverei vona a hini mu luhoi torea e Kristo.
ROM 1:9 Iau a luhoi vakaroro mua, a vasileki. A Vure i lohoka vona a ta muholi, ra Vure, a viri a habi a hategu ni vora vona, a vakalongo e huriki na Velenga Kamumu ne Tuna.
ROM 1:10 A vasileki vakaroro ne mua, a nanea a Vure, ia ge ngaru, ge ratea a dalagu ga lakene mua.
ROM 1:11 A ngaru hateka ni matai mua a vuhuna a ngaru ni habi tavula ne mua ranga maki ri valai na Hanuna Vure.
ROM 1:12 A ngaru hateka ni matai mua, si gi vatuhori. Mu gu vakatora a niluhoi nau na naro mu luhoi torea e Kristo vona. Iau tara ga vakatora a niluhoi ne mua na naro iau a luhoi torea e Kristo vona.
ROM 1:13 Mua e huriki a turagu, a ngaru mu gu lohoka vona, i balaka kupo ta ga lakene mua, pali a dalagu ni putukari. A ngaru ni lakene mua, ga rata e huriki ranga ri gi luhoi torea e Kristo, i manga a hini a rata na tanga ranga ne huriki i uka ma ria a Iuda.
ROM 1:14 A Vure i habi a leho nau, ga vakalongo a Velenga Kamumu ne huriki lobo; re huriki a Grik, e huriki i uka ma ria a Grik, e huriki a bakovi na lohokanga, e huriki a bakovi i uka ma ri lohoka hateka.
ROM 1:15 I mavonga i rike rike a hategu ni vakalongo ne mua ranga a Velenga Kamumu, mua e huriki o Rom.
ROM 1:16 I mavonga, i uka ma a maruhu ni vakalongo ne huriki a Velenga Kamumu, a vuhuna ia a nitora na Vure ni korimule e huriki lobo ri luhoi tora ia, e huriki a Iuda taro, muri e huriki i uka ma ria a Iuda.
ROM 1:17 A Velenga Kamumu i vakalongo hita vona, a naro a Vure i ravunu vuroki a naro hale ne huriki ri luhoi torea e Kristo. I manga a ngava ni here hosi na Hinere, i maea, “Ga ravunu vuroki a naro hale ne huriki ri luhoi tora iau, ri gi mahuri vakaroro.”
ROM 1:18 A Vure meli na hunu, i vakasiri a rongova vona ne huriki lobo ri ngalahere vona, e huriki ri rata a naro hale. Re huriki nga, a naro hale ne ria i rata e huriki ranga i uka ma ri luhoi torea a nita muholi.
ROM 1:19 I madihi a hatena, a vuhuna i kavakava a Vure, ia a Vure navai. I vakasiri pali ne ria a narona.
ROM 1:20 I muholi, i uka ma si masia a Vure na matane hita. Pali i vakatubu na tahuna a Vure i ratarike a maki lobo, si matai a maki i ratarike, si matakilaka vona ia a Vure, i tahoka a nitora dagi i tabuli vakaroro. I mavonga i uka tara viri ge ta maea, “Iau i uka ma a lohoka na Vure.”
ROM 1:21 Ri lohoka na Vure, pali i uka ma ri togoa manga ge ia a Vure Muholi. I uka ma ri kavurikea na naro kamumu vona. A niluhoi ne ria i bele manga manga, lakea ri keri ni lohoka vona a maki na Vure.
ROM 1:22 Ri taki ta ri lohoka hateka, pali ri bele manga a manga.
ROM 1:23 Ri koi ni kavurikea a Vure, ra i made vakaroro. Ri rata a hanune huriki a bakovi, ra bara ri mate, a hanuna kadirovo, a maka maki mahuri na robo, a maka maki manga a mata, a tabelebako, ri kavurike ria.
ROM 1:24 I mavonga a Vure i lohopile ria, ri gi ramai a ningaru hale na kakaine ria, lakea ri vakamuto a kakaine ria na maka naro katoki ni mole lae.
ROM 1:25 A Vure i rata mavonga a vuhuna ri pe pali a nita muholi vona, ri ramai a ngava taminga. Ri kavurike kunana a maka maki ri ratarike. I uka ma ri kavurikea a Viri i ratarike a maki lobo, ra viri si gi kavurike vakaroroa. I muholi.
ROM 1:26 Ri lohopilea a Vure, lakea a Vure tara i lohopile ria, ri gi muri mai a ningaru hale na kakaine ria, a naro ni maruhu vona. E huriki a ngatavine ne ria i uka ma ri muri mai a vilo na parangia. Ri vatari e huriki a ngatavine.
ROM 1:27 E huriki a bakovi ranga, i uka ma ri muri mai a vilo kamumu na parangia. Ri muri mai a ningaru dagi na kakaine ria, ri vatari e huriki a bakovi. E huriki a bakovi nga ri uka a nimaruhu, i mavonga ri bole a mapane ria pololilo na kakaine ria i hale.
ROM 1:28 Ri marikoi ni luhoia a Vure, lakea i lohopile ria, ri gi vora vona a maka niluhoi hale ne ria. I mavonga, ri vakatubu ni rata a maka naro hale, ra i ta pupukari vona a Vure.
ROM 1:29 Ri rata vakaroro a naro hale legelege. Ri hale. Ri ngutu vakaroro na maki na viri tara. Ri rata tuhare vakaroro. Ri vamasigoro vakaroro. Ri ngaru bala ni rabalaki a viri. I uka ma ri made na nivalemu ranga. Ri tami bala e huriki. Ri padi virihi tavula e huriki na ngava. Ri vapadimomo vakaroro.
ROM 1:30 Ri vakahale tavula a rane huriki. Ri marikoi na Vure. Ri ratapile e huriki na ngava. Ri bibi rike mule ria. Ri vakabele a naro hale karaba. Ri longotaro a ngavane tamane kinane ria.
ROM 1:31 Ri manga. I uka ma ri muri mai a ngava ri ta muholi ta ri gi ratea. Ri marikoi e huriki a kabukabu ne ria. Ri uka naro na nidodo.
ROM 1:32 Ri lohoka vona a Vure i ta muholi vona ge rabalaki e huriki a bakovi maea. Pali ri tabana ni rata vakaroro a maka naro hale nga. Pali ri kavurike tabu e huriki ranga ri rata vakaroro a naro hale nga.
ROM 2:1 I uka ma i kamumu o pelekado a narone huriki ranga, a vuhuna na tahuna o pelekado ria, o pelekado mule ioe. Ioe tara o rata a maka naro hale manga ria.
ROM 2:2 Si lohoka vona a vilona Vure i malamala kunana na tahuna i pelekado e huriki ri rata a naro hale nga.
ROM 2:3 I mavonga, naha ni luhoi a Vure i uka ma ge pelekado ioe, a vuhuna ioe tara o rata a naro hale manga ria.
ROM 2:4 Naha ni luhoi i kamumu go tabana ni rata a naro hale, a vuhuna a Vure a mari ni rata kamumu hateka e huriki, a mari ni hatenono hateka. Naha ni luhoi mavonga. A Vure i rata kamumu ioe, a vuhuna i ngaru go pulo a vilomu.
ROM 2:5 A Vure bara i vakamadihi hateka ioe, a vuhuna o putu ngingi, i uka ma o pulo a vilomu. Bara i habi a nimadihi vomu muri ma na tahuna a rongova vona ge bele kavakava, ge pelekado e huriki lobo na naro i taku kunana.
ROM 2:6 A Vure ge habi a mapa ne huriki lobo, i muri mai a narone ria.
ROM 2:7 E huriki ri ramai a naro kamumu, ri toni a bulune ria ni ratea a Vure ge vivi hateka ne ria, ri toni a bulune ria ni bole a nimahuri vakaroro, a Vure ge habi a nimahuri vakaroro ne ria.
ROM 2:8 Pali e huriki ri luhoi mule ria kunana, ri marikoi ni longototoa a ngava muholi, ri longototo kunana ni rata a naro hale, a rongova na Vure bara i vakamadihi hateka ria.
ROM 2:9 Bara i habi a nimadihi dagi ne huriki ri rata vakaroro a rabu hale, bara ri loho gori lae. Bara i bele taro ne huriki a Iuda, muri bara i bele ne huriki i uka ma ria a Iuda.
ROM 2:10 Pali bara i vakabagetu, i kavurike, i habi a nivalemu ne huriki ri rata vakaroro a naro kamumu. Ne huriki a Iuda taro, muri ne huriki i uka ma ria a Iuda.
ROM 2:11 Ge rata mavonga, a vuhuna e huriki a Iuda, e huriki i uka ma ria a Iuda, a Vure ge pelekado e huriki lobo na naro i taku kunana.
ROM 2:12 E huriki i uka ma ria a Iuda, i uka ma ri lohoka na maka Vinara a Vure i habi ne Moses. Pali na tahuna ri rata a naro hale, bara ri vurua, pali a Vinara i uka ma ge pelekado ria. E huriki a Iuda ri lohoka na Vinara a Vure i habi ne Moses. Na tahuna ri rata a naro hale, ria ranga bara ri vurua, a vuhuna a Vure bara i pelekado ria na Vinara ne Moses.
ROM 2:13 I kamumu a Vure i rata mavonga, a vuhuna a viri i malamala na matana Vure i uka ma ia a viri i lohoka kunana na Vinara na Vure. A viri i malamala na matana Vure a viri i longototo vakaroro a Vinara lobo a Vure i habi ne Moses.
ROM 2:14 E huriki i uka ma ria a Iuda, i uka ma ri lohoka na Vinara. Pali na tahuna ri ramai a vilo kamumu na Vinara, i vakasiri manga a Vinara iea i tabuli pololilo na niluhoi ne ria pali.
ROM 2:15 Ri vakasiri ri lohoka na hatene ria a ngava na Vinara. A lohokanga ne ria na naro kamumu, a naro hale, i vakalongo ria maea, “a naro iea i hale” o “a naro iea i kamumu.”
ROM 2:16 Bara i bele mavonga na tahuna a Vure i habia ne Isu Kristo a leho ni pelekado a niluhoi kapiloho, a naro kapiloho ne huriki lobo. A ngava iea, a vakalongo ne huriki na tahuna a vakalongo ria na Velenga Kamumu.
ROM 2:17 Ngane ga taki mua e huriki a Iuda. Mu bibi rike mule mua, mu ta maea, “Iau a Iuda.” Mu taki ta a Vure ge korimule mua a vuhuna mu lohoka vona a Vinara a Vure i habi ne Moses. Mu bibi rike mule mua, ta i mua a ngate na Vure.
ROM 2:18 Mu lohoka vona a ningaru na Vure, a naro kamumu mu gu ramaia, a vuhuna ni tovo mua na vinara.
ROM 2:19 Mu luhoi ta mu gu vakasiri a dala na Vure ne huriki i uka ma ria a Iuda, i manga a viri i vakasiri a dala na kepa. Mu pahaluhoi ta mua a nipara ne huriki ri made na uvo.
ROM 2:20 Mu lohoka na ngava muholi ni here puru, ra Vinara, lakea mu pahaluhoi ta mua a mari ni tovo, mu gu tovo e huriki i uka ma ria a Iuda. Mu ngaru ni tovo ria, a vuhuna mu luhoi ta ri manga e huriki a koma kiroko, e huriki a manga.
ROM 2:21 Mu paki ni tovo e huriki ranga, pali mu koi ni tovo mule mua. Mu vara e huriki nahea ri gi panaho, pali mua a panaho.
ROM 2:22 Mu vara e huriki nahea ri gi mole, pali mua mu mole. I mata marango. Mu marikoi vona a maka nitamina vure, pali i navai mu panaho a maki na roho na vure ne ria?
ROM 2:23 Mu bibi rike mule mua, mu ta maea, “Mi lohoka na Vinara na Vure.” Pali i mata hale na tahuna mu longotaro a vinara vona. Mu rata mavonga, mu biua a Vure.
ROM 2:24 I manga a ngava ni here puru na Hinere, “E huriki i uka ma ria a Iuda ri matai a narone mua, lakea ri biua a Vure.”
ROM 2:25 A bakovi ni pala a kulina, lakea i ramai lobo a Vinara na Vure, a hini ni pala a kulina vona bara i koria. Pali a bakovi ni pala a kulina, pali i longotaro a Vinara na Vure, i manga tabu a bakovi i uka ma ni pala a kulina.
ROM 2:26 I mavonga, e rei a viri i uka ma a Iuda, i uka ma ni pala a kulina, pali i longototo a Vinara lobo na Vure, a Vure bara i gale ia a viri vona, i manga ni pala a kulina pali.
ROM 2:27 Lakea e huriki i uka ma ni pala a kuline ria, pali ri ramai a Vinara na Vure, bara ri pelekado mua, bara ri taki mua mu rare, ra mua e huriki ni pala a kuline mua, mu lohoka na Vinara na Vure, pali mu longotaro.
ROM 2:28 A Iuda muholi i uka ma a viri ni pala a kulina kunana. A naro ni pala a kuli i uka ma ge ratea a Vure ge ngaru a viri.
ROM 2:29 A Vinara ne Moses i uka ma ge pulo a hatena viri. A Vure i ngaru a viri na tahuna a Hanu Kiripiripi i pulo a hatena viri. A viri maea, a Iuda muholi. A bakovi maea, i uka ma i ngaru e huriki a bakovi ri gi kavurikea. I ngaru a Vure kunana ge kavurikea.
ROM 3:1 Pali a viri tara bara i nana maea, ‘Ra naro ni pala a kuli, i uka ma i ratea a Vure ge ngaru a viri. Pali a ra maki i kamumu vona ni gi gale hita e huriki a Iuda?’
ROM 3:2 Iau bara koli maea, ‘Ra hini hita a Iuda vona, i tahoka a maki kamumu vona i kupo. A maki tara i kamumu vona, a Vure i habi ne huriki a gare ne hita a Hinere vona.’
ROM 3:3 I muholi, e huriki a gare ne hita hosi, e huriki ranga i uka ma ri longo mai a nitana Vure. I mavonga, ge navai? A Vure tara, i uka ma ge ramai a nitana?
ROM 3:4 Bara i ramai a nitana! E huriki lobo bara ri tatami, pali a Vure kikeri a Viri ni ta muholi. I manga a ngava ni here hosi, i maea, “E huriki lobo ri gi matakilaka vona i muholi a ngava o padi virihi e huriki vona. Pali e huriki ri padi virihi ioe na ngava, ri gi velu.”
ROM 3:5 Hita e huriki a bakovi hale, pali a naro hale ne hita i vakasiri kavakava a Vure i malamala. Pali si gi ta navai? Si gi taki a Vure i uka ma i ramai a naro kamumu na tahuna i habi a nimadihi ne hita na naro hale ne hita? Ngane a ta manga a bakovi tavula kunana.
ROM 3:6 Nahea si gi ta maea! Ge mavonga, ge pelekado navai e huriki lobo na malala?
ROM 3:7 Pali a viri tara bara i koke, i ta maea, “Na tahuna iau a tatami, e huriki ri matakilalea a Vure a Viri ni ta muholi, lakea ri kavurikea. I mavonga, a Vure, i navai ge taki iau a bakovi hale?
ROM 3:8 O Paulus, a ngavamu ge muholi, i kamumu si gi rata a naro hale, lakea e huriki bara ri kavurikea a Vure!” E huriki ranga ri ratea a ngava hale iea, ri padi virihi tavula iau, ta a ratea a ngava iea. I kamumu a Vure ge habi a nimadihi ne ria vona a naro hale iea ri ratea.
ROM 3:9 Pali hita e huriki a Iuda, si rangi e huriki ranga, o i uka? I uka liu! A ngava si ratea pali i maea, e huriki a Iuda ri manga kunana e huriki i uka ma ria a Iuda. Hita lobo si rata pali a naro hale, lakea a Vure ge pelekado hita.
ROM 3:10 A ngava ni here puru na Hinere i ta maea, “I uka tara viri i malamala na matana Vure. I uka liu.
ROM 3:11 I uka tara viri ge longokilalea a Nitana Vure. I uka tara viri ge toni ni laho turana Vure.
ROM 3:12 E huriki lobo ri ngalahere na Vure. Ria lobo a bakovi tavula na matana. I uka tara viri ge rata a naro kamumu. I uka liu.”
ROM 3:13 “Na ngavane ria, ri bimate e huriki. A tabelene ria, ri tatami kunana.” “A nitane ria i ratapile e huriki, i manga a mata hale i kara mate a viri.”
ROM 3:14 “Ri ruduraha, ri biu kato vakaroro e huriki.”
ROM 3:15 “Ri kapi kunana ri gi rabalaki a viri.
ROM 3:16 Na tabeke lobo ri lakea vona ri ratapile, ri vakamadihi e huriki.
ROM 3:17 Ri keri ni made na nivalemu.”
ROM 3:18 “I uka ma ri mangenge na Vure.”
ROM 3:19 Si lohoka vona, a Vinara ne Moses ni here virihi mae e huriki a Iuda, re huriki a vinara i matakari ria. I mavonga, e huriki lobo na malala bara ri keri ni koli a ngava. E huriki lobo bara ri tahoka a ngava na matana Vure; e huriki a Iuda, e huriki i uka ma ria a Iuda.
ROM 3:20 I uka tara viri ge ramai a vinara lobo, lakea a Vure ge takia, ta ia a bakovi malamala. A leho na vinara, i rata hita si gi matakilaka vona a naro hale ne hita.
ROM 3:21 Ngane i bele kavakava a dala a Vure i ravunu vuroki a naro hale ne hita. I uka ma i bele na ni longototo a Vinara. I bele na dala tara. A dala iea, a Vure i vakalongo muga vona hosi na Hinere i maea,
ROM 3:22 a Vure ge ravunu vuroki a naro hale ne huriki lobo ri luhoi torea e Isu Kristo, a vuhuna e huriki lobo ri palupulupu na matana; e huriki a Iuda, e huriki i uka ma ria a Iuda.
ROM 3:23 Hita lobo si rata pali a naro hale, si marava basi na bagetuanga na Vure.
ROM 3:24 Pali a Vure i rata kamumu hita, i taki hita si malamala. I uka ma si ratea tara maki a Vure ge vivi ne hita, ge konamule hita. I rata tavula kunana. E Isu Kristo i ratea a dala iea na nimatena.
ROM 3:25 A Vure i rudua ge mate, ge bole a murine hita, ge vakalobo a rongova na Vure, lakea a Vure ge puga vuroki a naro hale ne huriki ri luhoi tora ia. I rata mavonga si gi matakilaka vona a narona i malamala, a vuhuna hosi i hatenono ne huriki a bakovi hale, i uka ma i habi a nimadihi malaviriri ne ria.
ROM 3:26 I rata mavonga, na tahuna mona si gi matakilaka vona, ia i malamala. A Vure i rata e huriki lobo ri luhoi torea e Isu ri gi malamala.
ROM 3:27 I mavonga, i uka tara viri ge bibi rike mulea, a vuhuna si lohoka vona i uka tara viri ge longototo lobo a Vinara, lakea a Vure ge ravunu vuroki a naro hale vona. A Vure i ravunu vuroki a naro hale ne huriki ri luhoi torea e Isu.
ROM 3:29 A Vure i uka ma a Vure ne huriki a Iuda kunana. E huriki i uka ma ria a Iuda, ria ranga, ia a Vure ne ria,
ROM 3:30 a vuhuna a Vure i taku kunana. Ge ravunu vuroki a naro hale ne huriki a Iuda ri luhoi torea e Kristo. I mavonga, ge ravunu vuroki a naro hale ne huriki i uka ma ria a Iuda na tahuna ri luhoi torea e Kristo.
ROM 3:31 I mavonga, i uka ma i ratea a Vinara ne Moses ge uka leho na tahuna a Vure i ravunu vuroki a naro hale na viri i luhoi torea e Kristo. Na tahuna si luhoi torea e Kristo, si vakatora a Vinara ne Moses.
ROM 4:1 A bakovi e Abraham, ia a vuhune mia e huriki a Iuda. A ra maki si gi tovo vona a naro ni bele malamala na matana Vure?
ROM 4:2 E Abraham, bara i rata a naro kamumu, lakea a Vure i ravunu vuroki a naro hale vona, bara i kara ia ge bibi rike mulea. Pali i uka ma ge bibi rike mulea na matana Vure.
ROM 4:3 A Hinere i ta navai? I ta maea, “E Abraham i luhoi torea a Vure, lakea a Vure i galea a bakovi malamala.”
ROM 4:4 A bakovi i leho i bole a mapana. A mapana i uka ma ni vakaparu ia vona. A mapana ni habi vona na tahuna i leho.
ROM 4:5 Pali i uka tara maki si gi ratea, a Vure ge vivi ne hita. Pali a Vure bara i gale hita si malamala na tahuna si luhoi tora ia, ra Vure, a Viri i rata e huriki a bakovi hale ri malamala na matana. Ngane a Vure i kori e huriki maea, i gale ria ri malamala, i uka ma a mapane ria. A Vure i kori tavula kunana ria.
ROM 4:6 I manga e Davit hosi i here a ngava, a Vure ge taki ri malamala e huriki i uka ma ri luhoi tora a maki ri rata, pali ri luhoi torea a Vure. E huriki nga ri gi vivi. A ngava iea i maea,
ROM 4:7 “Ri gi vivi e huriki a Vure i puga vuroki a naro hale ne ria, ri putu puru a vinara, re huriki a Vure i longo kaburungi a naro hale ne ria.
ROM 4:8 Ri gi vivi e huriki a Bakovi Dagi i ravunu vuroki a naro hale ne ria.”
ROM 4:9 A Vure, i uka ma i korimule mia kunana e huriki a Iuda, mi gi vivi vona. Mua e huriki i uka ma mua a Iuda, mua ranga mu vivi, a vuhuna mua ranga, a Vure i korimule mua! Ni here puru na Hinere, ta e Abraham i luhoi torea a Vure, lakea a Vure i takia a bakovi malamala.
ROM 4:10 I muga ne Abraham ni pala a kulina, a Vure i takia e Abraham a bakovi malamala. I uka ma i muri, i muga.
ROM 4:11 Muri, a Vure i takia e Abraham ni gi pala a kulina, ga kilakilana, ge vakasiri ne huriki, i muga, na tahuna e Abraham i luhoi torea a Vure, na tahuna iea i galea a bakovi malamala. A Vure i rata mavonga, ge ratea e Abraham ge ia a vuhuna e huriki i uka ma ni pala a kuline ria, pali ri luhoi torea a Vure, lakea a Vure i taki ria, ri malamala.
ROM 4:12 I ngaru tabua e Abraham ge ia a vuhuna e huriki ni pala a kuline ria, ri luhoi torea a Vure, i manga a gare ne hita e Abraham i luhoi torea a Vure muga na tahuna i uka ma ni pala ma a kulina.
ROM 4:13 Hosi, a Vure i ta muholi ne Abraham turana e huriki a hamona ri gi bele muri ma. I ta muholi ri gi bole a malala lobo, ge ne ria. E Abraham i uka ma i ramai a Vinara lobo na Vure, lakea a Vure i ta muholi vona. E Abraham i luhoi torea a Vure, lakea a Vure i ta muholi vona.
ROM 4:14 A Vure bara i taki e huriki ri ramai lobo a vinara, ta ri gi bole a maki i ta muholi vona hosi, ngane a naro ni luhoi torea a Vure bara i uka kanena. I uka tara viri ge bole a maki i ta muholi vona hosi.
ROM 4:15 A vinara i vakabele a rongova na Vure, a vuhuna e huriki ri longotaro a vinara vona. Pali na tahuna i uka vinara, i uka tara viri ge putu puru a ngava.
ROM 4:16 I mavonga, e huriki ri bole a maki a Vure i ta muholi vona na tahuna ri luhoi tora ia. I bele mavonga, a Vure ge habi tavula ne huriki a maki i ta muholi vona. I mavonga e huriki e tune Abraham bara ri bolea. I uka ma a maki ne huriki a Iuda ri ramai a vinara kunana ri gi bole. A maki bara i bole e huriki lobo ri luhoi torea a Vure i manga e Abraham, a gare ne hita lobo.
ROM 4:17 A ngava ni here puru hosi na Hinere i maea, “A ru ioe, ge ioe a vuhuna e huriki a kabu ala kupo.” A ngava iea i muholi na matana Vure, a Vure e Abraham i luhoi tora ia, ra Vure i vakamahuri mule e huriki ri mate pali, i vakabele a maki i uka ma i tabuli ma.
ROM 4:18 E Abraham, e girihina ru gare hateka, ru uka dala ni vakabele a koma. Pali e Abraham i luhoi torea a Vure, i pasimata ge tahoka e tuna, ge tahoka a hamona ge kupo, a vuhuna a Vure i takia, i ta maea, “A hamomu ri gi ala kupo hateka, bara ni keri ni gi, i manga a maka hada na hunu.”
ROM 4:19 I gare liu. A pida vona i 100. I manga a kakaina i mate pali. Pali i uka ma i loho rua. E Sara i lame, pali e Abraham i uka ma i loho rua.
ROM 4:20 I uka tara maki i bele ge ratea e Abraham ge loho rua. I luhoi tora hateka a nita muholi a Vure i takia vona, i kavurikea a Vure na maki ta ge ratea.
ROM 4:21 I lohoka vona a Vure, i kara ni rata a maki i ta muholi vona ge ratea.
ROM 4:22 Na naro iea kunana ni here hosi na Hinere, i ta maea, “E Abraham i luhoi torea a nitana Vure, lakea a Vure i galea a bakovi malamala.”
ROM 4:23 Pali a ngava, “a Vure i ravunu vuroki a naro hale vona,” i uka ma a ngava ne Abraham kunana.
ROM 4:24 A ngava iea ne hita ranga, re hita a Vure i ravunu vuroki a naro hale ne hita a vuhuna si luhoi tora ia, ra Vure i vakamahuri mule na matenga a Bakovi Dagi ne hita, e Isu.
ROM 4:25 E Isu ni habi na limane huriki a bakovi hale, ri paditatea na kai tavalavala, ge puga vuroki a naro hale ne hita. A Vure i vakamahuri mulea na matenga ge kado purua a dala na Vure ge puga vuroki a naro hale ne hita.
ROM 5:1 Ngane si made na nivalemu turana Vure na dala e Isu Kristo i kado purua ne hita, a vuhuna a Vure i taki hita si malamala na tahuna si luhoi torea a Bakovi Dagi e Isu Kristo.
ROM 5:2 I korimule hita, si luhoi tora ia, lakea a Vure i rata kamumu hita vakaroro. Si vivi, si pasimata ni matai a bagetuanga na Vure.
ROM 5:3 Si vivi tabu na tahuna e huriki ri vakamadihi hita a vuhuna si luhoi torea e Kristo. Si vivi, a vuhuna si lohoka vona na tahuna si bole a nimadihi, si tovo ni hatenono na nimadihi.
ROM 5:4 Na tahuna si hatenono, a Vure i vivi ne hita. Na tahuna a Vure i vivi ne hita, bara si pasimata ni masia.
ROM 5:5 Na tahuna si pasimata na Vure, i uka ma si gi pasimata tavula, a vuhuna a Vure i habi ne hita a Hanu Kiripiripi. Ra Viri i vakasiri hita na Vure i ngaru hateka hita.
ROM 5:6 Na tahuna si keri ni korimule hita, e Kristo i mate na parava a Vure i vulakia ge mate vona, ge korimule hita e huriki a bakovi hale.
ROM 5:7 I uka tara viri koea na malala ge ngaru ni mate ni korimulea e turana. Pali a bakovi takutaku kunana bara i ngaru ni mate ne vona ni korimule a bakovi kamumu.
ROM 5:8 Pali a Vure i vakasiri i ngaru hateka hita. Na tahuna si tabana ni muri mai a naro hale, e Kristo i mate ni korimule hita.
ROM 5:9 I mavonga i muholi hateka e Kristo ge korimule hita na rongova na Vure, a vuhuna a darana i rata hita si malamala na matana Vure.
ROM 5:10 Na tahuna hita a pile na Vure, i ratea a dala ne hita si gi made turana na nivalemu. I ratea a dala iea na matenga ne Tuna. Ngane i muholi hateka, e Tuna i korimule hita na rongova na Vure, a vuhuna i mahuri mule.
ROM 5:11 Tara maki tabu: si vivi vona a maka maki a Vure i rata ne hita, a vuhuna e Isu Kristo a Bakovi Dagi i mate na murine hita, si gi made na nivalemu turana Vure.
ROM 5:12 A bakovi ala taku kunana, re Adam, i vakabele na malala a naro hale. A naro hale i vakabele a matenga. I mavonga a matenga i bele ne huriki a bakovi a ngatavine na malala, a vuhuna hita lobo si rata a naro hale.
ROM 5:13 I muholi, a naro hale i tabuli muga pali, muga na Vinara ni habi. Pali a Vure i uka ma i here puru a naro hale ne huriki i uka ma ri lohoka na Vinara vona.
ROM 5:14 Pali si lohoka vona, e huriki lobo ri rata a naro hale, ri mate, i tubu ne Adam, i valai ne Moses. E huriki, a naro hale ne ria i tebi na naro hale ne Adam, ria ranga ri mate. E Adam i manga a hanuna viri ta ge valai muri ma.
ROM 5:15 Pali i uka ma ru palupu, a vuhuna a hini a Vure i ravunu vuroki tavula a naro hale ne hita i uka ma i manga a hini e Adam i ratea a naro hale, i vakabele a matenga. I muholi, e Adam i ratea a naro hale, lakea e huriki lobo ri mate. Pali i muholi hateka, a bakovi e Isu Kristo i rata kamumu hita, i mate na murine hita, lakea a Vure i rata kamumu, i korimule tavula e huriki ala kupo.
ROM 5:16 Ra hini a Vure i ravunu vuroki tavula a naro hale ne huriki, i uka ma i manga a kanena naro hale ne Adam, a vuhuna e Adam i ratea a naro hale, lakea a Vure i pelekado hita, i taki hita lobo si hale, si gi vurua. Pali a hini a Vure i ravunu vuroki tavula a naro hale ne huriki ri tahoka a naro hale i kupo, a kanena, i gale hita si malamala.
ROM 5:17 I muholi, a bakovi ala taku, re Adam, i longotaroa a Vure, lakea a matenga i bele ne huriki lobo, i matakari tora hita. Pali i muholi hateka, e huriki a Vure i rata kamumu hateka ria, i habi tavula ne ria a nimahuri vakaroro, i rata ria ri malamala. Muri ma, ri gi matakari turana bakovi ala taku, re Isu Kristo.
ROM 5:18 Na naro iea kunana, e Adam i longotaroa a Vure, lakea a rongova na Vure i bele ne huriki lobo. I mavonga kunana, e Isu Kristo i longototoa a Vure, lakea a Vure, i kara ia ge ravunu a naro hale ne huriki, ge habi ne ria a nimahuri vakaroro.
ROM 5:19 A bakovi tara i longotaroa a Vure, lakea e huriki ala kupo ri hale na matana Vure. I mavonga kunana, a bakovi tara i longototoa a Vure, lakea a Vure i ravunu vuroki a naro hale ne huriki ala kupo, i gale ria ri malamala.
ROM 5:20 A Vinara ne Moses i rata e huriki ri matakilaka vona a naro hale ne ria, ri rata virihi a Vure. Na tahuna ri matakilaka vona a narone ria i hale hateka, a Vure i rata kamumu hateka e huriki.
ROM 5:21 I rata mavonga, a vuhuna a naro hale i matakari hita. A nitora na naro hale, a matenga. Na naro iea kunana, ngane a naro kamumu na Vure ge matakari hita. A nitora vona ni matakari hita, ra naro a Vure i gale hita si malamala na matana, si bole a nimahuri vakaroro na tahuna si luhoi torea e Isu Kristo, a Bakovi Dagi ne hita.
ROM 6:1 A ra si gi takia ngane? Si gi rata mavonga a naro hale, ge bele dagi a naro kamumu na Vure?
ROM 6:2 I uka liu. I manga si mate pali. I uka ma si gi rata tabu a naro hale.
ROM 6:3 Mu lohoka vona pali; na tahuna ni vahilolo hita, si rihi e Isu Kristo. Na naro iea kunana, i manga si mate turana.
ROM 6:4 Na tahuna ni vahilolo hita, i manga si mate turana, ni tanu hita. A nibagetu ne Tamane Hita i vakamahuri mulea e Kristo. I mavonga kunana, bara i rata hita si gi laho na nimahuri karaba.
ROM 6:5 Si rihi e Kristo, i manga si mate turana. I mavonga, bara si mahuri mule manga ia.
ROM 6:6 Si lohoka vona, na tahuna i mate, hita ranga, a vilo hale hosi ne hita i mate. Ngane a ningaru hale na kakaine hita i uka nitora. I uka ma ge hita a vorakato tabu na naro hale.
ROM 6:7 I mavonga, a vuhuna e huriki ri mate pali, ri matukapaga na ningaru hale.
ROM 6:8 Si lohoka vona bara si mahuri turane Kristo, a vuhuna si mate pali turana.
ROM 6:9 Si lohoka vona e Kristo i mate, i pesi rike mule na matenga. Ngane i uka ma ge mate tabu. A matenga i uka ma i matakari tabua.
ROM 6:10 I mate balaka taku kunana, ge kori e huriki a bakovi a ngatavine ri rata a naro hale. I uka ma ge mate tabu. Ngane i mahuri, i rata vakaroro a leho na Vure.
ROM 6:11 I mavonga mua ranga, mu rata manga mu mate pali, mu keri ni ramai a ningaru hale ne mua. Mu rata manga a Vure i habi a nimahuri karaba ne mua, a vuhuna mu rihi e Isu Kristo. Mu rata vakaroro a leho na Vure.
ROM 6:12 Nahea a naro hale ge matakari a kakaine mua, a vuhuna a kakaine mua bara i mate, pali a hanune mua bara i tabuli vakaroro.
ROM 6:13 Nahea mu gu habi a tabekena kakaine mua ni rata a naro hale. Mu habi mua na limana Vure, ge rata a leho kamumu polo ne mua, a vuhuna a Vure i vakamahuri mule mua pali na matenga.
ROM 6:14 Nahea a naro hale ge vakavora mua, a vuhuna i uka ma mu ramai a Vinara ne Moses, lakea a Vure ge korimule mua. A Vure, na naro kamumu vona kunana, i korimule mua.
ROM 6:15 Ngane i uka ma si longototo a Vinara si gi bole a nimahuri vakaroro. Si roe vona a nidodo, a naro kamumu na Vure, ge ravunu vuroki a naro hale ne hita. Pali ge navai ngane? Si gi tabana ni rata vakaroro a naro hale, o i uka? I uka liu!
ROM 6:16 Mu luhoi kado. E rei a viri i habi mule ia na limana viri, ge vora vona, ge longototoa, ia ngane a vorakato. Hita bara si vora vora na naro hale, o bara si vorakato na Vure, si longototoa. A viri i vora na naro hale, bara i vurua. A viri i vora na Vure, a Vure bara i ravunu vuroki a naro hale vona.
ROM 6:17 Pali iau a kavurikea a Vure, a vuhuna muga mu vora na naro hale, pali ngane mu longototo a nitovo, ra ni tovo mua vona.
ROM 6:18 Ngane mu matukapaga na naro hale, mua a vora na naro kamumu.
ROM 6:19 A ta vakakika na vorakato, a vuhuna a niluhoi ne mua i manga a niluhoi na viri na malala. I uka ma mu longokilala a nitana maki na Vure. Hosi mu habi a maka tabekena kakaine mua ni rata a naro na molenga, a naro hale legelege. Ngane a ngaru mu gu habi a maka tabekena kakaine mua, mu gu vora na naro kamumu, lakea bara mu malamala na matana Vure.
ROM 6:20 Hosi, na tahuna mu vora na naro hale, i uka ma mu luhoi lege ni rata a naro kamumu.
ROM 6:21 Ngane mu maruhu vona a maka rabu hale ne mua hosi. Pali a ra kanena maka naro hale nga? A kanene ria a matenga.
ROM 6:22 Pali ngane mu matukapaga na naro hale, mu vora na Vure. A kanena naro iea, bara mua a ngate muholi na Vure, bara mu bole a nimahuri vakaroro.
ROM 6:23 A mapana naro hale a matenga. Pali a nimahuri vakaroro, a Vure i habi tavula ne hita, a vuhuna si rihi e Isu Kristo, a Bakovi Dagi ne hita.
ROM 7:1 Mua e huriki a turagu, mu lohoka vona a vinara. A vinara i matakari a viri na tahuna i mahuri kunana. Pali na tahuna i mate pali, a vinara i uka tabu a nitora.
ROM 7:2 I manga i maea, a ngatavine i parangi, a vinara i taki ge made kunana turane girihina. Pali na tahuna e girihina i mate, bara i matukapaga na vinara na parangia, i parangi tabu.
ROM 7:3 A ngatavine ge parangi tabu, pali e girihina i uka ma i mate ma, bara ni gale a ngoi. Pali e girihina i mate pali, lakea i parangi tabu, i uka ma ni gi gale ge ia a ngoi, a vuhuna i matukapaga na vinara na parangia.
ROM 7:4 I mavonga kunana o huriki a turagu, mua ranga mu mate turane Kristo, lakea a vinara i uka ma i matakari tabu mua. Ngane a viri tara i matakari mua, ra Viri i pesi rike mule na matenga. Ngane si gi rata kunana a leho na Vure.
ROM 7:5 Hosi si ramai kunana a ningaru hale na kakaine hita. A vinara i vakarike a hatene hita ni rata a naro hale. A naro hale nga ri vakabele ne hita a matenga.
ROM 7:6 Pali ngane si matukapaga na vinara, i manga a vorakato i mate, i matukapaga na hini ia a vorakato vona. Ngane a Vinara ne Moses i uka ma i matakari tabu hita. A Hanuna Vure i habi a nimahuri karaba ne hita, i matakari hita.
ROM 7:7 A ra si gi takia ngane? A Vinara na Vure i hale? I uka liu! Iau i uka ma ga lohoka na vinara, i uka ma ga lohoka vona a ra naro i kamumu, a ra naro i hale. A vinara tara i ta maea, “Naha ni ngutu na maki na viri tara.” Pali iau i uka ma ga lohoka vona a ngava iea, ra naro ni ngutu, i uka ma ga lohoka vona ge hale.
ROM 7:8 A ningaru hale nau i rata iau a ngutu na maki i kupo legelege, a vuhuna a vinara i hatekakari iau nahea ga ngutu na maki na viri tara. Pali a ningaru ne hita ni rata a naro hale i uka ma i tora hateka na tahuna i uka vinara.
ROM 7:9 Hosi i uka ma a lohoka na vinara, i uka ma a luhoi legelege. Pali na tahuna a lohoka na Vinara na Vure, a matakilaka vona a naro hale nau, ngane a lohoka vona, a marava basi na Vure.
ROM 7:10 A luhoi ta a vinara ge habi nau a nimahuri vakaroro na tahuna a longototo lobo ria. Pali i uka ma i mavonga. I rata iau a marava basi na Vure, a vuhuna a keri ni longototo lobo a vinara.
ROM 7:11 A naro hale i tami iau, ta ga ramai lobo a Vinara na Vure, ga bole a nimahuri vakaroro. Pali iau a keri, lakea i rata iau a marava basi na Vure.
ROM 7:12 I mavonga, a vinara i malamala. A Vinara na Vure i ravulu ri malamala, ri uka a hini hale ne ria, ri kamumu kunana.
ROM 7:13 I navai? A Vinara kamumu na Vure i rata iau a mate? I uka liu. A naro hale i ratea a vinara kamumu i vakabele a matenga na kakaigu. I bele mavonga, a vinara ge vakasiri kavakava ne hita vona a naro hale i hale hateka.
ROM 7:14 Si lohoka vona a Vinara i valai na Vure. Pali iau a bakovi na malala, a manga a vorakato na ningaru hale na kakaigu.
ROM 7:15 Ra iau, i navai a rata mavonga? A naro a koi ni ratea, a ratea. Pali a naro a ngaru ni ratea, i uka ma a ratea.
ROM 7:16 Na tahuna a rata a maki hale a koi ni rata, a matakilaka vona a vinara a maki kamumu.
ROM 7:17 I mavonga i uka ma a ningaru nau a rata a naro hale. A rata a vuhuna ra ningaru hale pololilo na kakaigu i tora hateka.
ROM 7:18 A lohoka vona, i uka tara maki kamumu vona a ningaru hale na kakaigu. A ngaru ni rata a naro kamumu, pali iau a keri.
ROM 7:19 A naro kamumu ta ga ratea, i uka ma a ratea. Pali a naro hale a koi ni rata, a rata bala.
ROM 7:20 Na tahuna a rata a maki a koi ni ratana, i uka ma a rata a vuhuna a ngaru ni rata. A rata a vuhuna a ningaru hale na kakaigu i rata iau.
ROM 7:21 Ngane a matakilaka vona a naro iea: na tahuna a ngaru ni rata a naro kamumu, a naro hale i lapi iau pali.
ROM 7:22 A hategu i vivi vona a Vinara na Vure.
ROM 7:23 Pali iau a masia a vilo tara i leho na kakaigu, i rata vabinga na vilo kamumu a ngaru. A vilo tara i leho na kakaigu, ra vilo na naro hale, i rata iau ge iau a vorakato.
ROM 7:24 A matasia polo iau! E rei ge vakamatukapaga iau na ningaru hale na kakaigu, ra ri vakabele a matenga?
ROM 7:25 Iau a kavurikea a Vure, a vuhuna e Isu Kristo, a Bakovi Dagi ne hita, i vakamatukapaga hita na ningaru hale na kakaine hita. I mavonga, si muri maia a Vure na niluhoi ne hita. Pali a kakaine hita i muri mai a vilo na ningaru hale na kakaine hita.
ROM 8:1 I mavonga, a Vure i uka ma ge habi a nimadihi ne huriki ri rihi e Isu Kristo.
ROM 8:2 Si rihi e Isu Kristo, lakea a nitora na Hanuna Vure, ra i habi a nimahuri, i vakamatukapaga hita na nitora na naro hale, ra i vakabele a matenga.
ROM 8:3 A Vinara ne Moses i keri ni korimule hita, a vuhuna a ningaru hale na kakaine hita i rata a vinara i uka nitora ni korimule hita. Lakea a Vure i ratea a leho, ra leho a vinara i keri ni rata. I rudua e Tuna, ge bele manga a bakovi na malala, ge vakalobo a naro hale. Na kakaine Isu ngane, a Vure i ratapile a nitora na naro hale pololilo na kakaine hita.
ROM 8:4 A Vure i rata mavonga, ge rata hita si gi malamala na matana Vure, i manga a hini a vinara i taki hita si gi malamala. Re hita e huriki i uka ma si ramai a ningaru na kakaine hita, si ramai a ningaru na Hanuna Vure.
ROM 8:5 E huriki ri muri mai a ningaru hale na kakaine ria, ri luhoi kunana a vilo hale i ngaru a kakaine ria. Pali e huriki ri muri mai a ningaru na Hanuna Vure, ri luhoi kunana a ningaru na Hanuna Vure.
ROM 8:6 E huriki ri luhoi kunana a ningaru hale na kakaine ria bara ri vurua. Pali e huriki ri luhoi kunana a ningaru na Hanuna Vure bara ri bole a nimahuri vakaroro, ri made na nivalemu.
ROM 8:7 A ta maea, a vuhuna e huriki ri luhoi kunana a ningaru hale na kakaine ria, ri marikoi a Vure, a vuhuna i uka ma ri longototo a vinara vona. Ri keri ni longototo.
ROM 8:8 E huriki ri ramai kunana a ningaru hale na kakaine ria, a Vure i uka ma i vivi ne ria.
ROM 8:9 Pali hita, i uka ma si ramai a ningaru hale na kakaine hita. Si ramai a ningaru na Hanuna Vure. I muholi, a Hanuna Vure i made pololilo ne hita. E rei a viri, a Hanune Kristo i uka ma i made pololilo vona, i uka ma ia a tara ne Kristo.
ROM 8:10 Si rata pali a naro hale. I mavonga, a kakaine hita bara i mate. Pali a hanune hita bara i mahuri vakaroro, a vuhuna e Kristo i made pololilo ne hita, i rata hita si malamala na matana Vure.
ROM 8:11 A Hanuna Vure i vakamahuri mulea e Isu Kristo. Hita ranga, na tahuna a Hanuna Vure i made pololilo ne hita, a Vure bara i vakamahuri mule hita na matenga. A Hanuna Vure, ra i made pololilo ne hita, ge ratea a naro iea.
ROM 8:12 I mavonga, o huriki a turagu, nahea si gi muri mai a ningaru hale na kakaine hita.
ROM 8:13 E huriki ri muri mai a ningaru hale na kakaine ria bara ri mate. Pali e huriki ri lobo ni ramai a ningaru hale na kakaine ria na nitora na Hanu Kiripiripi, bara ri bole a nimahuri vakaroro.
ROM 8:14 E huriki ri muri mai a Hanuna Vure, ria kunana a tuna Vure.
ROM 8:15 A ta mavonga, a vuhuna a Hanuna Vure i uka ma i rata hita si gi vora tabu na naro hale, si gi mangenge. I rata hita, re hita e huriki a tuna Vure, si gi gale maea, “Tata! O tata!”
ROM 8:16 A Hanuna Vure i vakasiri, si ta muholi na tahuna si taki hita, hita e huriki a tuna Vure.
ROM 8:17 Ngane hita e huriki a tuna Vure. I mavonga, bara si bole turane Kristo a bagetua a Vure i ru puru ne huriki e tuna. Ngane si bole a nimadihi turane Kristo, i mavonga muri ma bara si bole a bagetua turane Kristo.
ROM 8:18 I muholi hateka, a maka nimadihi si hataki ngane a maki tavula, a vuhuna a bagetua bara si bole muri ma, i dagi hateka.
ROM 8:19 A maki lobo a Vure i ratarike ri dava, ri pasimata vona a parava a Vure ge vakasiri kavakava, ne rei e huriki e tuna muholi.
ROM 8:20 A vuhuna a maki lobo a Vure i ratarike na limana, ri bele hale hateka. I uka ma ri bele hale na ningaru ne ria. I bele mavonga na ningaru na Vure. Pali muri ma a Vure bara i rata kamumu hateka a maki nga. I mavonga ri pasimata vona.
ROM 8:21 Muri ma a maki nga ri gi matukapaga na naro ni matutu, ri gi bole a bagetua turana e huriki a tuna Vure.
ROM 8:22 Si lohoka vona a maki lobo a Vure i ratarike ri tabana ni bole a nimadihi, ri dedo i manga a ngatavine i pahea a koma, i valai i harena mona.
ROM 8:23 A Vure i habi ne hita a Hanu Kiripiripi, i vakasiri a Vure i korimule hita. I mavonga, hita ranga, si dedo a vuhuna si dava, si pasimata vona a parava a Vure ge pau hita, ge habi ne hita a kakaine hita karaba.
ROM 8:24 Na tahuna a Vure i korimule hita, si vakatubu ni pasimata vona. A maki i bele pali, i uka ma si gi pasimata vona.
ROM 8:25 Pali a maki i uka ma i bele ma, bara si pasimata vona, si hatenono.
ROM 8:26 A Hanu Kiripiripi tara, i tuhori hita, a vuhuna i uka ma si kinigao. I uka ma si lohoka vona si gi vasileki navai, lakea a Hanu Kiripiripi kunana i vasileki na murine hita. Na tahuna i vasileki, i dedo, a pelegona si keri ni tuvevea na nitana bakovi na malala.
ROM 8:27 A Vure i lohoka na hatene hita, i lohoka na ningaru na Hanu Kiripiripi, a vuhuna a Hanu Kiripiripi i vasileki ne huriki a tara na Vure, i ramai a ningaru na Vure.
ROM 8:28 Si lohoka vona, a Vure i rata a maki lobo ri leho palupu, ge rata kamumu e huriki ri ngaru hateka ia, re huriki a Vure i gale ria, ri gi ratea a leho vona.
ROM 8:29 I paru hosi, a Vure i lohoka pali ne huriki ta ri gi luhoi tora ia. I lohoka muga ne ria, i taki muga ri gi bole a narone Tuna, ge ia a tabua ne huriki e tarina, re hita e huriki a tuna Vure.
ROM 8:30 E huriki a Vure i taki muga ri gi bole a narone Tuna, i gale ria. E huriki a Vure i gale ria, i taki ria ri malamala na matana Vure. E huriki i taki ria ri malamala na matana Vure, i vakabagetu ria.
ROM 8:31 Si lohoka vona, a Vure i pesi turane hita. I mavonga, e rei ge gege hita?
ROM 8:32 A Vure i uka ma i vakatokua e Tuna. I rudua i valai ge mate, ge korimule hita. I mavonga bara i rata kamumu hita, i habi ne hita a maki kamumu lobo.
ROM 8:33 E huriki a bakovi a ngatavine a Vure i vulaki ria, i uka tara viri ge padi virihi ria na ngava, lakea a Vure ge longo. I mavonga a vuhuna a Vure kunana a viri i ravunu vuroki a naro hale ne huriki a viri vona.
ROM 8:34 I uka tara viri ge taki hita si gi bole a nimadihi na naro hale ne hita, a vuhuna e Isu Kristo i mate. I uka ma i mate kunana. I pesi rike tabu na matenga. Ngane i made na limana a kanena na Vure, i takia a Vure ge tuhori hita.
ROM 8:35 I uka tara maki ge ratea e Kristo ge lohopile hita. Na tahuna a maregoa, a nimava, a pago, a vuranga, a matenga, o na tahuna e huriki ri vakamadihi hita, o si bala a varakia, e Kristo i tabana ni ngaru hita.
ROM 8:36 A ngava ni here puru hosi na Hinere i maea, “Ri ubi mate vakaroro hita a vuhuna si ramai ioe. Ri luhoi hita, ta a maki ni rabalaki, i manga a sipsip.”
ROM 8:37 A maki hale nga bara ri bele, pali e Kristo i ngaru hateka hita, i rata hita si mulangi.
ROM 8:38 A Vure i ngaru hateka hita. I uka tara maki ge ratea a Vure ge lohopile hita, a vuhuna e Isu Kristo a Bakovi Dagi ne hita i korimule hita. A matenga, e huriki a agelo, e huriki a matakari, a maki mona, a maki ge bele muri ma, a maki i tahoka a nitora, a maki meli na hunu, a maki polotano, i uka tara maki ge ratea a Vure ge lohopile hita.
ROM 9:1 Iau a dodo hateka e huriki a turagu, re huriki a Israel. A dodo hateka ria, a loho lege lae. I uka ma a tatami, a ta muholi a vuhuna iau a rihi e Kristo. A hategu i vakasiri a ta muholi, a vuhuna a Hanuna Vure i matakaria a hategu.
ROM 9:3 A ngaru hateka ni kori e huriki a turagu a Iuda, re huriki a kabu nau. I mavonga kunana e Kristo ge ngaru ni muri mai a ningaru nau, ga vasileki vona, ge tono tala iau na kabu vona, ri gi bole a murigu e huriki a Israel.
ROM 9:4 Re huriki a Israel, e huriki a tuna Vure. A Vure i vakasiri ne ria a bagetuanga vona. I rata turane ria a ngava dagi. I habi ne ria a vinara vona. I vakasiri ne ria ri gi lotu navai vona. I ta muholi ne ria na ngava i kupo.
ROM 9:5 A Vure i vulaki e huriki a gare ne ria hosi, ge ria a vuhuna a kabu ne Israel. E Kristo i bele manga a bakovi na kabu ne ria, re Kristo ia a Vure, i matakari a maki lobo, ge bole a bagetuanga na parava vakaroro. I muholi.
ROM 9:6 I uka ma a taki a Vure ge tatami, i uka ma ge ramai a ngavana, a vuhuna e huriki a hamone Israel ranga i uka ma ria a hamona muholi.
ROM 9:7 E Abraham, tara. Ranga ne huriki a hamona i uka ma ni gi gale ria a hamone Abraham, a vuhuna a Vure i takia e Abraham, i ta maea, “E huriki e tune Isak kunana bara ni gale e huriki a hamomu.”
ROM 9:8 A pelegona i maea: E huriki a hamone Abraham ri bele a vuhuna a Vure i ta muholi ne Abraham ri gi bele, ria a hamona muholi. Pali e huriki a hamona ranga, re Abraham i vakabele na ningaru vona, i uka ma ria a hamona muholi.
ROM 9:9 I mavonga, a vuhuna a Vure i ta muholi ne Abraham, i ta maea, “Iau ga hamule valai tabu na tahuna maea na pida muri, e Sara bara i tahoka pali e tuna a bakovi.” Muri e Isak ni poda.
ROM 9:10 E Rebeka tara, i poda e huriki e tune Isak, ra vuhune mia.
ROM 9:11 A boge ne Rebeka, i uka ma ni poda rua ma. I uka ma ru rata ma a naro kamumu, o a naro hale. Lakea a Vure i takia e Rebeka, i ta maea, “A tabua bara ia a vora ne tarina.” I ratea a ngava iea, ge vakasiri hita vona, i uka ma i matai a rabuna bakovi, lakea i vulakia. I vulaki a viri na ningaru vona.
ROM 9:13 I ramai a ngava ni here puru na Hinere, i ta maea, “A ngarua e Iakop, pali a marikoi vona e Esau.”
ROM 9:14 Pali si gi ta navai? A Vure i rata a naro hale? I uka!
ROM 9:15 A Vure i takia e Moses, i ta maea, “A dodo e huriki a ngaru ni dodo ria, na ningaru nau.”
ROM 9:16 Lakea a Vure i vulaki e huriki, i uka ma i ramai a ningaru na bakovi, i uka ma i ramai a nirura na bakovi. I vulaki e huriki na ningaru vona, a vuhuna ia a mari ni dodo.
ROM 9:17 A Vure i takia e Parao hosi, ni here puru na Hinere, i maea, “A ru ioe ge ioe a hariki, a vuhuna a ngaru ni vakasiri e huriki na nitora nau, e huriki lobo na malala ri gi longo a maki ga rata.”
ROM 9:18 I mavonga, a Vure i dodo e huriki i ngaru ni dodo ria, i vakaputungingi e huriki i ngaru ni vakaputungingi ria, i manga i ratea ne Parao.
ROM 9:19 Pali a viri tara, ma ge ta maea, “Ra Vure, hita lobo si ramai kunanea a ningaru vona. Si keri ni longotaro a ningaru na Vure. Ra i mavonga, i navai ge pelekado hita?”
ROM 9:20 Pali iau bara koli, ioe e rei ke, go gegea a Vure? A Vure i ratarike ioe. A maki ni pipi i uka ma ge takia a viri i ratea, ‘I navai o rata mavonga iau?’
ROM 9:21 A mari ni pipi a ulo i pipi na ningaru vona a ulo. Bara i bole a taka, i pipi na ningaru vona a ulo i rua. A ulo tara ni tahoni a maki kamumu vona. A ulo tara ni tahoni a maki katoki vona.
ROM 9:22 A Vure i ngaru ni vakasiri kavakava a rongova vona, a nitora vona, pali i hatenono. I uka ma i ratapile malaviriri e huriki a bakovi hale, re huriki i vulaki puru ria hosi, ge ratapile ria.
ROM 9:23 I rata mavonga, ge vakasiri a nidodo dagi vona ne huriki i vulaki puru ria hosi, ri gi made turana na bagetua dagi na hunu,
ROM 9:24 re hita e huriki a Vure i gale hita, si gi ramaia. I gale tala hita ne huriki a Iuda, ne huriki i uka ma ria a Iuda. Si valai na kabu lobo.
ROM 9:25 Hosi e Hosea i here maea, “E huriki i uka ma ria a ngate nau, ngane ga gale ria e huriki a ngate nau. A viri muga a marikoi vona, ngane ga galea a hategu.”
ROM 9:26 “Na tanga a taki muga ria, ‘I uka ma mua a ngate nau,’ Ngane ga taki ria, ria e huriki a tuna Vure Mahuri.”
ROM 9:27 E Isaia hosi, i taki virihi e Israel, i ta maea, “I muholi e huriki a Israel ri ala kupo hateka, i manga a hire na lavu. Pali ga korimule e huriki ala popote kunana,
ROM 9:28 a vuhuna e Bakovi Dagi ge habi a nimadihi ne huriki lobo na malala. Ge ratea malaviriri.”
ROM 9:29 A maki nga i bele manga a ngava e Isaia i ta propet vona hosi, i ta maea, “E Bakovi Dagi i matakari a maki lobo. I uka ma ge habi ne hita a hamone hita, bara si vurua manga e huriki o Sodoma. Bara si marakavelu manga e huriki o Gomora.”
ROM 9:30 Ngane e huriki i uka ma ria a Iuda, i uka ma ri toni ni laho malamala na matana Vure. Pali a Vure i rata ria ri malamala, a vuhuna ri luhoi tora ia.
ROM 9:31 Pali a Vure i uka ma i rata e huriki a Israel ri malamala, a vuhuna i uka ma ri luhoi tora ia. Ri toni ni ramai a vinara, ri gi rata ria ri gi malamala, lakea ri sibo vona a kedo i rata ria ri boru.
ROM 9:33 A ngava ni here puru na Hinere i ta maea, “Ga rua o Sion a kedo ge sibo vona e huriki, a kedo dagi ge rata ria ri gi boru. E huriki ri luhoi tora ia i uka ma ri gi maruhu.”
ROM 10:1 Mua e huriki a turagu, a maki a ngaru hatekea, a vasileki vakaroro na Vure, ge korimule e huriki a Iuda.
ROM 10:2 A matakilaka vona, ri toni hateka ni muri maia a Vure. Pali i uka ma ri lohoka vona a dala ri gi ramaia.
ROM 10:3 I uka ma ri lohoka vona a Vure i rata navai hita si gi malamala na matana, lakea i uka ma ri luhoi torea a Vure. Ri toni ni ramai a vinara ri gi malamala na matana Vure.
ROM 10:4 Ngane, e huriki ri luhoi torea e Kristo ri malamala na matana Vure. I uka tara viri ge ramai lobo a vinara, lakea ge malamala na matana Vure.
ROM 10:5 A ta mavonga, a vuhuna e Moses i here hosi, e rei a viri i ramai lobo a vinara, a Vure bara i takia a bakovi malamala, i habi a nimahuri vakaroro vona.
ROM 10:6 Pali e Moses i here tabu na naro ni luhoi torea a Vure, si gi malamala, i here maea, “Naha ni luhoi maea, ‘E rei ge sike na hunu?’” I manga i maea, e rei ge sike, ge tuli purua e Kristo?
ROM 10:7 “Naha ni luhoi tabu maea, ‘E rei a viri ge puru na lovo i marangeo?’” (I manga i maea, e rei a viri ge puru ge bole rike vilia e Kristo na tanga ne huriki ri mate pali?)
ROM 10:8 Pali e Moses i ta maea tabu, “A nitana Vure i tabuli tabukoi vomu. I tabuli na ngavamu, i tabuli na hatemu.” A nita iea, a nitana ngava si gi luhoi torea e Kristo. Si taki tala vakaroro a ngava iea.
ROM 10:9 I mavonga, na ngavamu o taki tala ne Isu ia a Bakovi Dagi vomu. Na hatemu, o luhoi torea a Vure i vakamahuri mulea na matenga, lakea a Vure bara i korimule ioe.
ROM 10:10 E huriki ri luhoi torea e Isu na hatene ria, a Vure bara i taki ria ri malamala. E huriki ri ta tala na ngavane ria, ne Isu ia a Bakovi Dagi, a Vure bara i korimule ria.
ROM 10:11 Ni here na Hinere, i maea, “E huriki ri luhoi tora ia, i uka ma ri gi maruhu.”
ROM 10:12 E huriki a Iuda, e huriki i uka ma ria a Iuda, ri palupulupu kunana. E Bakovi Dagi, a Bakovi Dagi ne huriki lobo. I hate balala, i kori kamumu e huriki ri gale lakea vona.
ROM 10:13 Ni here, i maea, “E Bakovi Dagi ge korimule e huriki lobo ri gale lakea vona.”
ROM 10:14 Pali, ri gi gale navai a viri i uka ma ri luhoi tora ia ma? Pali ri gi luhoi tora navia a viri i uka ma ri longo ma a rana? Pali ri gi longo navai, i uka viri ge tovo ria?
ROM 10:15 Pali a Vure i uka ma ge rudu ria, ri gi vano, ri gi vara navai? A ngava ni here puru na Hinere i ta maea, “I namika hateka na tahuna a viri i bele i vara na Velenga Kamumu!”
ROM 10:16 Pali e huriki a Israel ala kupo i uka ma ri longototo a Velenga Kamumu. E Isaia a propet i ta maea hosi, “Bakovi Dagi, i uka tara viri ge longo mai a ngava mi vakalongo ria vona.”
ROM 10:17 I mavonga, e huriki ri luhoi torea a Vure na tahuna ri longoa a viri i vara na Velenga Kamumu ne Kristo.
ROM 10:18 Pali ga nana, ri longoa pali, o i uka? I muholi ri longoa. A Hinere i ta maea, “A Velenga Kamumu ni longo na tabeke lobo na malala; a nitane ria i lakea na tanga lobo.”
ROM 10:19 Re huriki a Israel, ri longokilalea a Velenga Kamumu, o i uka? Ri longokilalea, a vuhuna e Moses i here puru hosi, i ta maea, “Ga rata mua mu gu masigoro ne huriki i uka ma ria a Iuda, i uka ma ria a kabu muholi. Ga rata mua mu gu tahate vona a kabu mu pahaluhoi ta ri manga manga.”
ROM 10:20 Muri e Isaia i ta kavakava, i ta maea, “E huriki i uka ma ria a Iuda i uka ma ri viro iau, pali ri pugai iau pali. I uka ma ri gale iau, pali a bele kavakava ne ria.”
ROM 10:21 Muri e Isaia i taki virihi e huriki a Israel, i here maea, “Na parava vakaroro a pesi a dava ni bole mule ria, pali ri longotaro a ngava, ri gigi tora.”
ROM 11:1 I navai? A Vure i marikoi pali ne huriki a tara vona, e huriki a Israel? I uka liu! Iau a Israel, a hamone Abraham, na kabu ne Bensamin. I uka ma i marikoi nau.
ROM 11:2 A Vure i vulaki hosi e huriki a Israel. I uka ma i marikoi ne ria. Mu lohoka vona a nuverei ne Elaisa, ni here hosi na Hinere. I vasileki na Vure, i deke ne huriki a Israel, i ta maea,
ROM 11:3 “Bakovi Dagi, ri ratapile pali a maka dede vomu. Ri rabalaki lobo e huriki a propet vomu. Iau kikeri a tabana, pali ri matakana iau, ri gi rabalaki iau.”
ROM 11:4 Pali a Vure i koli, i ta maea, “I uka ma ioe kikeri. A bakovi ala rangale polorua (7,000) ri tabana, ri muri mai iau. I uka ma ri turume puru na vure e Bal.”
ROM 11:5 I mavonga kunana mona. A tara kiroko ne mia i tabana, a Vure i vulaki mia na naro kamumu vona.
ROM 11:6 A Vure i vulaki e huriki, i uka ma i muri mai a vilone ria. I vulaki ria, a vuhuna i ngaru ni rata kamumu ria. Bara i vulaki ria i ramai a vilone ria, ngane i uka ma ge vakasiri a naro kamumu vona.
ROM 11:7 I mavonga, e huriki a Israel i uka ma ri bole visi a maki ri matakanea. E huriki a Vure i vulaki ria, ri bolea, pali e huriki ranga, a Vure i rata ria ri mata kepa.
ROM 11:8 I manga a ngava ni here puru na Hinere i ta maea, “A Vure i vakauvo a niluhoi ne ria. I rata ria ri kepa, ri vou, i valai i harena mona.”
ROM 11:9 E Davit tara, i takia a ngava iea, i ta maea, “Na tahuna ri vapopo na habu ge bele ne ria a vuranga tara; i manga a hoa i puru vona a livoa, a kedo ni gi sibo vona, ge koli a rabu hale ne ria.
ROM 11:10 Ge uvo a gine ria, i uka ma ri gi longokilala a maki na Vure. Ge modo a bitone ria, i manga e huriki a vorakato. Ri gi made mavonga kunana na parava vakaroro.”
ROM 11:11 E huriki a Iuda ri sibo, pali i uka ma ri boru liu. A Vure i uka ma ge mata taro liu ria. Ri rata a naro hale, ngane a Vure i matai e huriki a kabu ranga, i uka ma ria a Iuda. I korimule ria ngane, lakea e huriki a Iuda ri gi masigoro ne ria.
ROM 11:12 E huriki a Israel ri ngalahere na Vure, i mavonga i kamumu a Vure ge rata kamumu hateka e huriki i uka ma ria a Iuda. I mavonga, muri ma, na tahuna e huriki a Iuda lobo ri hamule maia a Vure, bara i kamumu hateka.
ROM 11:13 Ngane a taki mua, ra mua i uka ma mua a Iuda. Iau a apostolo ne mua. A vivi hateka vona a leho a Vure i habia nau, i rudu iau ga vakalongo mua vona a Velenga Kamumu.
ROM 11:14 Bara i rata e huriki ranga na kabu nau ri gi ngutu vona a naro kamumu a Vure i ratea ne mua, bara i korimule ranga ne ria.
ROM 11:15 Ngane a Vure i vakasiri a dala ge korimule e huriki i uka ma ria a Iuda, a vuhuna i lohopile e huriki a Iuda. Pali muri ma, na tahuna a Vure ge korimule e huriki a Iuda, bara i manga i vakamahuri mule ria na matenga.
ROM 11:16 I manga a bret, a vit i moro muga, lakea ni habi lakea na Vure. A tabekena ni habi na Vure, ne vona a Vure. A bret lobo, ia tara ne vona a Vure. I manga a kai. Na tahuna a kana kai ni habi na Vure, a rahana ranga, ne vona a Vure.
ROM 11:17 E huriki a Israel ri manga a kai a oliv ni varo. Mua e huriki a kabu ranga, mu manga a kai a oliv i rike tavula na robo. A Vure i puri vuroki na kai ne huriki a Israel a rahana ranga. I bole mua, i vakamadoko mua na vuhuna. Ngane i tua polo ne mua a totona kai ni varo, re huriki a Iuda.
ROM 11:18 Pali mua, nahea mu gu bibi rike mule mua, mu gu taki ta mu kamumu hateka na maka rahana kai ni puri tala. Mu luhoi kamumu taro. A rahana kai i uka ma i bole doga a kana kai. A kana kai i bole doga a rahana.
ROM 11:19 Ma mu gu ta maea, “A Vure i puri tala a maka rahana kai ge vakamadoko mia na murine ria.”
ROM 11:20 I muholi ngi. A Vure i puri tala ria a vuhuna i uka ma ri luhoi torea e Kristo. Pali mua mu madoko mavonga na kai a vuhuna mu luhoi torea e Kristo. I mavonga, naha ni tero. Mu mangenge.
ROM 11:21 Mu luhoi kamumu. A maka rahana oliv muholi i uka ma ri luhoi tora ia, lakea a Vure i puri vuroki ria. Mua ranga, bara mu longotaroa, bara i puri vuroki mua.
ROM 11:22 Ngane mu matakilaka vona a narona Vure. I habi a nimadihi ne huriki ri lohopilea. I rata kamumu hateka mua e huriki mu luhoi tora ia. Pali mua bara mu lobo ni luhoi torea a naro kamumu vona, mua ranga, bara i puri vuroki mua.
ROM 11:23 Pali ria ranga, bara ri pulo a vilone ria, ri luhoi torea e Kristo, a Vure i tahoka a nitora ni hudo mule ria na murine ria.
ROM 11:24 A kai a oliv i rike tavula na robo, i uka ma i ramai a vilo ni gi vakamadoko a rahana na bokona kai a oliv ni varo. Pali a Vure i rata mavonga na tahuna i vulaki tala mua, i bole dili mua na kabu ne huriki a Israel. I mavonga, a maki tavula a Vure ge bole mule e huriki a Israel, ge bole dili tabu ria na kabu ne ria. Mua o huriki a kabu ranga mu manga a rahana kai ni puri tala na kai a oliv i rike na robo, ni hudo tala na kai a oliv ni varo. Pali e huriki a Iuda ri manga a rahana kai i toto tala na kai a oliv ni varo. Muholi ngi bara i kara ni hudo mule tabu ria na murine ria.
ROM 11:25 Mua e huriki a turagu, a ngaru mu gu longokilala a ngava a Vure i vakalongo kavakava, nahea mu gu pahaluhoi ta mu rangi e huriki a Israel. Muga a ngava iea i kapiloho, pali ngane i bele kavakava, i maea: a Vure i rata e huriki a Israel ri gigi tora. Bara ri gigi tora mavonga i vano i harena na tahuna e huriki lobo a Vure i vulaki ria, i uka ma ria a Iuda, ri gi valai vona.
ROM 11:26 Muri a Vure ge korimule e huriki a Israel lobo, i manga a ngava ni here hosi, i ta maea, “A Viri ge korimule e huriki, bara i valai o Sion; bara i vakalobo a maka naro hale na kabu ne Iakop.
ROM 11:27 Na parava iea a ngava dagi a rata hosi turane ria bara i bele muholi, ga ravunu vuroki a naro hale ne ria.”
ROM 11:28 E huriki a Iuda ri marikoi ni longoa a Velenga Kamumu, lakea ria a pile na Vure. I mavonga a Velenga Kamumu i bele ne mua e huriki i uka ma mua a Iuda. Pali a Vure i vulaki ria hosi, i mavonga i ngaru ria, a vuhuna i rata hosi a ngava dagi turane huriki a gare ne ria.
ROM 11:29 Na tahuna a Vure i gale a viri, i rata kamumu a viri, a Vure i uka ma ge pulo a niluhoi vona.
ROM 11:30 Hosi mu longotaroa a Vure. Pali ngane a Vure i dodo mua a vuhuna e huriki a Israel ri longotaroa.
ROM 11:31 Ngane ri longotaroa a Vure, i mavonga a nidodo na Vure i bele ne mua. Pali na tahuna ri pulo a vilone ria, bara i dodo ria.
ROM 11:32 A Vure i rata e huriki lobo a viri ni longotaro a ngavana. I rata mavonga, a vuhuna i ngaru ni vakasiri a nidodo vona ne huriki lobo.
ROM 11:33 I muholi hateka! A naro kamumu na Vure, a niluhoi vona, a lohokanga vona, i uka harena! I uka tara viri ge tuveve polo vona a narona Vure, a hini i pelekado e huriki vona.
ROM 11:34 A ta maea, a vuhuna ni here maea, “I uka tara viri ge lohoka vona a niluhoi ne Bakovi Dagi, I uka tara viri ge takia a Vure a ra ge ratea.”
ROM 11:35 “I uka tara viri ge habi a maki na Vure, a Vure ge kolia.”
ROM 11:36 A Vure kunana a viri i ratarike a maki lobo. Ia kunana i nugu a maki lobo na limana, ri tabuli kamumu. A maki lobo ne vona kunana. Si gi kavurikea a rana na parava vakaroro. I muholi.
ROM 12:1 I mavonga, mua e huriki a turagu, a ngaru mu gu habi mule mua na Vure, ge manga a nihabi mahuri, a vuhuna a Vure i dodo hateka mua. Mu habi mule mua na Vure ge manga a nihabi malamala a Vure ge vivi vona. I kamumu mu gu rata mavonga, a vuhuna a Vure i kori hateka mua.
ROM 12:2 Nahea mu gu laho manga a bakovi na malala. Mu takia a Vure ge pulo a niluhoi ne mua, mu gu lohoka vona a ningaru na Vure, lakea bara mu matakilaka vona a ningaru na Vure, a ra maki i kamumu, a ra maki i ngaru mu gu ratea.
ROM 12:3 A Vure i rata kamumu iau, i rata iau a apostolo vona. I mavonga, a taki mua, nahea tara viri ge luhoi ta ia a bakovi dagi hateka. Mua lobo mu pelekado mule mua, mua a bakovi navai, i ramai a hini a Vure i habi ne mua takutaku a hini mu gu luhoi tora navia e Kristo.
ROM 12:4 A kakaine hita i tahoka a tabekena i kupo. A maka tabekena kakaine hita takutaku ri tahoka a leho legelege ne ria.
ROM 12:5 I mavonga kunana a tara ne Kristo. Hita a tara ne Kristo, si ala kupo, pali si vatuhori.
ROM 12:6 A Vure i rata kamumu hita, i habi ne hita takutaku a leho legelege. A ra leho i habi ne hita takutaku, si gi rata. A viri a Vure i habi a ngava vona, ge taki polo ne huriki ranga, ge muri mai a hini i luhoi torea a Vure, i dagi o i kiroko.
ROM 12:7 E huriki a mari ni tuhori, ri gi tuhori e huriki. E huriki a mari ni tovo e huriki na Vure, ri gi tovo e huriki.
ROM 12:8 E huriki a mari ni vara, ri gi vara e huriki. E huriki a mari ni habi, ri gi hatebalala. E huriki a mari ni muga ne huriki, ri gi habi a hatene ria na leho iea. E huriki a mari ni dodo, ri gi vivi ni kori e huriki.
ROM 12:9 Mu ngaru e huriki, naha ni tamilalu ni ngaru ria. Mu marikoi a naro hale. Mu rata vakaroro a naro kamumu.
ROM 12:10 Mu vangaru ge manga a kabu i taku ri vangaru. Mu varangi ni vatogo.
ROM 12:11 Naha ni made tavula. Mu habi a hatene mua ni ratea a leho ne Bakovi Dagi.
ROM 12:12 Mu vivi, a vuhuna mu pasimata ne Kristo. Mu hatenono na tahuna mu bole a maregoa. Mu vasileki vakaroro.
ROM 12:13 E huriki a tara na Vure ri bala vona tara maki, mu tuhori ria. E huriki a mosi ri gi bele taho mua, mu matakari ria.
ROM 12:14 Naha ni ruduraha e huriki ri vakamadihi mua. Mu vakabagetu ria.
ROM 12:15 Mu vivi turana e huriki ri vivi, mu tangi dodo turana e huriki ri tangi dodo.
ROM 12:16 Mu made na nivalemu. Naha ni rata polo muga muga, mu made kamumu turana e huriki a bakovi tavula. Naha ni bibi rike mule mua.
ROM 12:17 Naha ni koli a naro hale. Mu rata a naro i kamumu na matane huriki lobo.
ROM 12:18 Mu toni a bulune mua ni made na nivalemu turana e huriki lobo.
ROM 12:19 Mua e huriki a hategu, naha ni koli a naro hale. Mu davea a rongova na Vure ge koli, a vuhuna a ngava ni here puru na Hinere, i ta maea, “E Bakovi Dagi i ta maea, ‘A nikoli, a leho nau kunana. Iau kikeri a viri bara koli a vilo hale ne huriki ri rata virihi mua vona.’”
ROM 12:20 Naha ni koli. Mu rata manga a hini ni here puru na Hinere, i maea, “Na tahuna a pile vomu i vitolo, o vakania. Na tahuna i marohu, o habi a naru vona. O rata mavonga, bara i maruhu.”
ROM 12:21 Nahea a naro hale na pile vomu ge rangi ioe, go koli. O rangi a naro hale vona na naro kamumu vomu.
ROM 13:1 Si gi longototo e huriki a mata­kari na tanga, a vuhuna a Vure kunana a viri i habi a leho ne ria. Ia kunana a viri i ru e huriki a bakovi ri gi matakari hita.
ROM 13:2 I mavonga, e huriki ri longotaro a ngavane huriki a matakari na tanga, ri longotaro a viri a Vure i habi a leho ni matakari, lakea bara ni vakamadihi ria.
ROM 13:3 A Vure i ru e huriki a matakari, i uka ma ri gi vakamangenge e huriki a bakovi kamumu. I ru ria ri gi vakamangenge e huriki a bakovi hale. E rei a viri i koi ni mangenge ne huriki a matakari, ge ramai kunana a naro kamumu. Bara mu rata mavonga, bara ri kavurike mua,
ROM 13:4 a vuhuna e huriki a matakari ri ratea a leho na Vure, a nimadene mua ge kamumu. Pali e huriki ri rata hale, ri gi mangenge, a vuhuna e huriki a matakari ri tahoka a nitora ni vakamadihi e huriki a bakovi hale. A Vure ge vakamadihi e huriki a bakovi hale na limane huriki a matakari, a vuhuna ria a matakari.
ROM 13:5 I mavonga, mu longototo ria, a vuhuna mu lohoka vona i kamumu mu gu rata mavonga. Ge uka, a rongova na Vure bara i habi a nimadihi ne mua.
ROM 13:6 Ra i mavonga si kona a takis. E huriki a matakari ri leho vakaroro, ri ratea a leho a Vure i habi ne ria.
ROM 13:7 Mu habi ne ria a maki ni taki mu gu habi ne ria. Mu habi a takis ne huriki ni taki ni gi habi a takis ne ria. Mu togo e huriki ni taki ni gi togo ria.
ROM 13:8 Naha ni bole lupu a maki. Pali a maki mu gu ratea, mu gu vangaru vakaroro. A viri i ngarua e turana, i ramai lobo a Vinara na Vure.
ROM 13:9 Ranga Vinara na Vure, ri ta maea, “Naha ni mole. Naha ni rabalaki a viri. Naha ni panaho. Naha ni ngutu na maki ne turamu.” A vinara nga, turana maka vinara ranga, i manga a vinara i taku kunana, ra i maea, “O ngarua e turamu i manga o ngaru mule ioe.”
ROM 13:10 Na tahuna o ngarua e turamu, i uka ma go rata halea. I mavonga, a viri i ngaru e huriki, i ramai a Vinara na Vure.
ROM 13:11 Mu rata mavonga, a vuhuna mu lohoka vona a parava mona. A parava i valai pali ni leho tora, a vuhuna a parava i popote ge valai, e Kristo ge hamule valai, ge korimule hita. I muga, na tahuna si luhoi tora karabea e Kristo, a parava iea i tabukoi. Pali ngane i tabukoi hateka.
ROM 13:12 A rodo i popote ge palala. I mavonga, si gi lobo ni rata a naro na uvo, si gi rata a naro kamumu i manga e huriki ri made na hini i palala.
ROM 13:13 Si gi laho kamumu na hini palala. Naha ni mole. Naha ni ninu a naru vagole, go manga. Naha ni vahehe. Naha ni hate madihi ne huriki ri tahoka a maki.
ROM 13:14 Naha ni longototo a ningaru hale na kakaine mua. Mu rihi e Isu Kristo, a Bakovi Dagi ne hita.
ROM 14:1 E huriki ranga, a niluhoi ne ria i uka ma i tora hateka. Mu bole dili ria, pali naha ni vahehe vona a maka niluhoi na bakovi.
ROM 14:2 Ranga bakovi ri luhoi i kamumu ni kani a maki lobo. Pali ranga bakovi, a niluhoi ne ria i uka ma i tora hateka, ri ngaru ni kani kunana a kobo.
ROM 14:3 A viri i kani lobo a kania, nahea ge biu a viri i kani kunana a kobo. Pali a viri i kani kunana a kobo, nahea ge taki i hale a viri i kani a maki lobo, a vuhuna a Vure i bole dilia pali.
ROM 14:4 Naha ni pelekadoa a vora na bakovi tara. A matakari vona kunana ge masia a leho vona i kamumu o i hale. A vora ne Bakovi Dagi bara i leho kamumu, a vuhuna e Bakovi Dagi i tuhori ia ge leho kamumu.
ROM 14:5 E huriki ranga ri luhoia a parava tara parava ni lotu. Pali e huriki ranga ri luhoi a parava lobo ri palupulupu. Hita takutaku si gi luhoi kamumu i vai a niluhoi i muholi si gi ramaia.
ROM 14:6 E huriki ri luhoia a parava tara a parava ni kavurikea a Vure, ri rata mavonga a vuhuna ri ngaru ni togoa e Bakovi Dagi. E huriki ri kani a maki ni kani lobo ri rata mavonga, ri togoa e Bakovi Dagi, a vuhuna ri kavurikea a Vure vona. E huriki ranga ri marikoi ni kani ranga maki, ri rata mavonga ni togoa e Bakovi Dagi, ri kavurikea a Vure.
ROM 14:7 I uka ma si mahuri o si mate na ningaru ne hita.
ROM 14:8 Na tahuna si mahuri, hita ne vona e Bakovi Dagi. O, si mate, hita ne vona e Bakovi Dagi. I mavonga, na tahuna si mahuri, o si mate, hita ne vona e Bakovi Dagi kunana, si ngaru ni ramaia, ge vivi ne hita.
ROM 14:9 E Kristo i mate, i mahuri mule na matenga, ge ia a Bakovi Dagi ne huriki ri mate, ne huriki ri mahuri.
ROM 14:10 Naha ni pelekado, naha ni biu e turamu, a vuhuna hita lobo bara si pesi takutaku na matana Vure, ge pelekado hita.
ROM 14:11 A ngava ni here puru na Hinere i ta maea, “A Bakovi Dagi i ta maea, ‘I muholi hateka, e huriki lobo ri gi turume puru na ngalagu. E huriki lobo ri gi taki tala maea iau a Vure.”
ROM 14:12 I mavonga, hita lobo bara si taki tala na matana Vure a naro lobo si rata.
ROM 14:13 I mavonga, naha ni vapelekado tabu. A viri i luhoi torea a Vure, naha ni torodoa ge boru na naro hale.
ROM 14:14 I uka tara maki ni kani ge hale na matana Vure. A maki ni kani lobo i kamumu ni kani. Iau a lohoka vona i muholi hateka, a vuhuna a ramai e Isu a Bakovi Dagi. Pali a viri i luhoi a maki ni kani tara i hale ni kani, pali, a maki ni kani iea i hale vona.
ROM 14:15 E turamu tara ge luhoia a maki ni kani tara i hale, pali i matai ioe o kania, muri ia tara i kania, ngane o ratea i boru. E Kristo i mate vona, ge korimulea, pali o valai, ke, o ratea ge lohopilea e Kristo. O rata mavonga, i uka ma o laho tabu na naro na nivangaru.
ROM 14:16 I mavonga, nahea tara maki o takia ta i kamumu ge rata e huriki ri gi biu ioe.
ROM 14:17 A pelegona a harikianga na Vure, i uka ma a vinara na maki ni kani, a maki ni ninu. A pelegona a harikianga na Vure i maea, si gi laho malamala, si gi made na nivalemu, si gi vivi na nivivi na Hanu Kiripiripi.
ROM 14:18 E huriki ri muri mai e Kristo na naro nga, a Vure bara i vivi ne ria, e huriki a bakovi a ngatavine bara ri vivi ne ria.
ROM 14:19 I mavonga, si gi toni a bulune hita ni made na nivalemu. Si gi vatuhori ni laho na naro na Vure.
ROM 14:20 Naha ni ratapilea a leho na Vure na hini o ngaru a maki ni kani ranga. I muholi, a maki ni kani lobo i kamumu ni kani. Pali a viri i ratea e turana ge boru vona a maki ni kani i ngarua, i rata a naro hale.
ROM 14:21 I kamumu go peremu vona a bobona maki, go peremu vona a vain, o go lohopile a naro tara, ra i ratea e turamu tara i boru.
ROM 14:22 Ioe o luhoi navai vona a maki nga, a maki marua a Vure. Naha ni taki tala lae. E huriki i uka ma ri rare vona a maki ri taki ta i kamumu, bara ri vivi.
ROM 14:23 Pali e huriki ri kani a maki ri luhoi ta i hale, a Vure bara i habi a nimadihi ne ria, a vuhuna a maki ri luhoi ta i hale, ri kani kunana. A ra maki si luhoia i hale, pali si ratea, si rata a naro hale.
ROM 15:1 Si lohoka vona a maki nga, a Vure i uka ma ge pelekado hita vona. Pali si gi hatenono ne huriki ri mangenge ni kani, o ni rata a maki nga. Nahea si gi rihate ne ria. Nahea si gi ramai kunana a ningaru ne hita.
ROM 15:2 Si gi rata kamumu ria, ri gi vivi. Si gi tuhori ria ri gi laho kamumu turana Vure.
ROM 15:3 E Kristo tara i uka ma i rata kunana a maki ge vivi vona. A maki i ratea i muri mai a ngava ni here puru hosi, i maea, “Na tahuna e huriki ri ratapile ioe na ngava, i manga iau tara, ri ratapile iau.”
ROM 15:4 A ngava lobo ni here puru hosi, ni here ge tovo hita, si gi hatenono. Ri vakatora a niluhoi ne hita si gi pasimata na Vure ge rata a maki lobo i taki tora hita vona.
ROM 15:5 A Vure ia a vuhuna a naro ni hatenono, a naro ni vakatora a niluhoi na viri. Ge rata mua mu gu made na nivalemu, i ramai a vilone Isu Kristo.
ROM 15:6 Muri bara mu pesi palupu ni kavurikea a Vure ne Isu Kristo, re Tamane Bakovi Dagi ne hita.
ROM 15:7 I mavonga, mu vangaru i manga e Kristo i ngaru mua, lakea e huriki ri gi kavurikea a Vure na tahuna ri matai mua mu rata mavonga.
ROM 15:8 E Kristo i valai ni kori mia e huriki a Iuda, ge vakasiri a Vure i ta muholi na tahuna i rata a ngava dagi turana e huriki a gare ne mia hosi.
ROM 15:9 E Kristo i valai, ge rata mua e huriki i uka ma mua a Iuda mu gu kavurikea a Vure vona a nidodo vona. I manga a ngava ni here hosi, i ta maea, “Ga kavurike ioe na matane huriki i uka ma ria a Iuda. Ga kalolo, ga kavurikea a ramu.”
ROM 15:10 A Hinere tara tabu i ta maea, “Mua e huriki i uka ma mua a Iuda, mu vivi turana e huriki a Iuda.”
ROM 15:11 I ta maea tabu, “Mua e huriki i uka ma mua a Iuda, mu kavurikea e Bakovi Dagi. E huriki lobo ri gi kalolo, ri gi kavurikea.”
ROM 15:12 E Isaia a propet i here puru hosi, i ta maea, “A hamone Iesi bara i valai, ge vakatubu ni matakari e huriki i uka ma ria a Iuda. Bara ri pasimata vona ge korimule ria.”
ROM 15:13 A Vure a viri i rata mua mu pasimata vona ge rata a maki lobo i taki ge rata. Ge habi ne mua a nivivi, a nivalemu na tahuna mu luhoi tora ia. I mavonga, a Hanu Kiripiripi ge rata mua mu gu pasimata hateka.
ROM 15:14 Mua e huriki a turagu, a lohoka vona mu rata vakaroro a naro kamumu. Mu lohoka kamumu vona a nitana Vure, i kara mua mu gu vatovo vona.
ROM 15:15 Pali a ngava ranga a here lakea ne mua, a here kavakava, ga vakalohoka tabu mua, a vuhuna a Vure i rata kamumu iau,
ROM 15:16 i rata iau ge iau a vora ne Isu Kristo. I rata iau a manga a prister ne huriki i uka ma ria a Iuda, a vakalongo ria vona a Velenga Kamumu na Vure. I mavonga e huriki i uka ma ria a Iuda bara ri manga a nihabi, a Hanu Kiripiripi i habi liu lakea na Vure, a Vure ge vivi.
ROM 15:17 I mavonga, a vivi vona a leho na Vure a ratea, a vuhuna e Isu Kristo i korimule iau.
ROM 15:18 I uka ma ga ta na maka maki tavula. Ga ta kavakava kunana na leho e Kristo i habi a nitora nau ni rata. A leho nau, a vakalongo, a vakasiri a nitana Vure ne huriki i uka ma ria a Iuda, ri gi longototo.
ROM 15:19 A Hanu Kiripiripi i habi nau a nitora ni rata a nivakasiri, lakea i vakatubu o Ierusalem, i vano liu o Ilirikum, a vakalobo a leho nau ni vakalongo a Velenga Kamumu ne Kristo.
ROM 15:20 A ngaru hateka ni vakalongo a Velenga Kamumu ne Kristo na maka tanga i uka ma ri longo ma, a vuhuna a koi ni leho langa tabu na leho na viri i vakatubu mugea pali.
ROM 15:21 I manga a ngava ni here puru na Hinere, i ta maea, “E huriki i uka ma ri longo ma, bara ri longokilala, E huriki i uka ma ni vakalongo ma, bara ri longokilala.”
ROM 15:22 Ra i mavonga, balaka kupo ta ga lakea ne mua, pali a dala nau ni putukari.
ROM 15:23 Na pida i kupo a ngaru ni matai mua. Pali ngane, a tanga lobo na tabeke nga ri longo pali a Velenga Kamumu,
ROM 15:24 lakea ngane ga lakea o Spein. A pasimata ni matai mua na tahuna a polo na tanga ne mua. A ngaru ni made turane mua popote, muri mu tuhori iau na nilaho nau, ga vano.
ROM 15:25 Pali ngane ga sike taro o Ierusalem, ga taparaki a moni ne huriki a tara ne Kristo vonga,
ROM 15:26 a vuhuna e huriki a tara ne Kristo na tabeke ne Masedonia, e Akaia, ri habi a moni ni tuhori e huriki a tara ne Kristo ranga o Ierusalem ri matasia.
ROM 15:27 Ri vivi ni kori ria. I manga a makoli ne ria, a vuhuna e huriki i uka ma ria a Iuda ri longo a Velenga Kamumu, ra i valai ne huriki a Iuda. I mavonga i kamumu ri gi koli, ri gi kori na moni e huriki a Iuda matasia.
ROM 15:28 Ga taparaki taro a moni nga, muri ga malaga o Ierusalem, ga lakene, ga matai mua. Muri bara lakea o Spein.
ROM 15:29 A lohoka vona, na tahuna a made turane mua, e Kristo bara i vakabagetu hita.
ROM 15:30 Mua e huriki a turagu, hita a tara ne Isu Kristo a Bakovi Dagi. A Hanuna Vure i rata hita si vangaru. A ngaru hateka si gi rura ni vasileki na Vure, ge tuhori iau.
ROM 15:31 Mu vasileki na Vure ge korimule iau na limane huriki a Iuda o Iudea i uka ma ri luhoi torea e Kristo. Mu vasileki vona e huriki a tara ne Kristo o Ierusalem ri gi vivi vona a moni ga habi ne ria.
ROM 15:32 Mu vasileki maea, a Vure ge ngaru, bara luve ne mua. Bara luve turana nivivi, mu gu vakatora tabu a niluhoi nau.
ROM 15:33 A Vure, ra viri i habi a nivalemu ne hita, ge made turane mua.
ROM 16:1 E kurabane hita tara, a rana e Pibi, i popote bara i bele ne mua. Ia a ngatavine kamumu, a vora na lotu o Senkria.
ROM 16:2 A ngaru mu gu taguia na rane Bakovi Dagi, na narone huriki a tara na Vure. A ra maki i ngarua, mu kori kunanea, a vuhuna i tuhori pali e huriki ala kupo. Iau tara, i kori iau.
ROM 16:3 A haro kamumu ne Akuila rua e girihina e Prisila. Ru leho turagu na leho ne Isu Kristo.
ROM 16:4 I popote ru gu mate ni korimule iau. I uka ma iau kunana a kavurike rua. E huriki a tara ne Kristo i uka ma ria a Iuda, ria ranga ri kavurike rua.
ROM 16:5 A haro kamumu ne huriki a tara ne Kristo ri vapopo na ruma ne rua. A haro kamumu ne Epainetus. A ngaru hatekea. Ia a viri i luhoi torea e Kristo muga ne huriki lobo o Asia.
ROM 16:6 A haro kamumu ne Maria, i rata a leho dagi ni kori mua.
ROM 16:7 A haro kamumu ne Andronikus, e Iunias. Rua a kabu nau. Hosi mete dili palupu na bavi. E huriki a apostolo ri lohoka kamumu ne rua. Ru luhoi torea e Kristo muga ne nau.
ROM 16:8 A haro kamumu ne Ampliatus. A ngaru hatekea, a vuhuna miri luhoi torea e Bakovi Dagi.
ROM 16:9 A haro kamumu ne Urbanus, i leho turane mia na leho ne Kristo. Mu habi a haro kamumu nau vona e Stakis, a ngaru hatekea.
ROM 16:10 Mu habi a haro kamumu ne Apeles. A Vure i vivi vona, a vuhuna i dili na nimadihi, i uka ma i lohopilea a Vure. A haro kamumu ne huriki a kabu ne Aristobulus.
ROM 16:11 Mu habi a haro kamumu ne Herodion, a kabu nau. A haro kamumu ne huriki a kabu ne Narsisus, ra ri laho turane Bakovi Dagi.
ROM 16:12 Mu habi a haro kamumu ne Tripena turana e Triposa. Ru leho hateka ni rata a leho ne Bakovi Dagi. A haro kamumu ne Persis. A ngaru hatekea. I leho hateka na leho ne Bakovi Dagi.
ROM 16:13 A haro kamumu ne Rupus, a bakovi kamumu hateka ni muri ne Bakovi Dagi. A haro ne kinana. I manga e nana muholi.
ROM 16:14 A haro kamumu ne Asinkritus, e Plegon, e Hermes, e Patrobas, e Hermas; e huriki a viri ranga ri made turane ria.
ROM 16:15 A haro kamumu ne Pilogus, e Iulia, e Nereus rua e kurabana, e Olimpas, turana e huriki a tara ne Kristo ri made turane ria.
ROM 16:16 Mu vangaru, mu vatagui na naro kamumu. E huriki a tara ne Kristo koea ri talo rike a haro kamumu ne mua lobo.
ROM 16:17 Mua e huriki a turagu, mu matadoko vona e huriki ri rata mua mu vagege. Mu mata­doko vona e huriki ri tovo a ngava taminga, ri rata e huriki ri ngalahere na Vure. A ngava ri tovo vona i vaperesi na ngava ni tovo mua vona muga. Mu malele ha ne ria.
ROM 16:18 E huriki nga i uka ma ri rata a leho ne Kristo a Bakovi Dagi ne hita. Ri ngaru ni ramai a ningaru ne ria kunana. Ri voko e huriki na ngava, ri tami e huriki a muri golu.
ROM 16:19 E huriki lobo ri lohoka pali ne mua, mu longototoa a Vure. I mavonga a vivi ne mua. Pali a ngaru mu gu lohoka vona a ra maki i kamumu, mu gu lele rau vona a maki hale.
ROM 16:20 A Vure a viri i habi a nivalemu. I uka ma ge tabaka, bara i pahamomoa e Satan polotano na vahane mua. A Bakovi Dagi ne hita, e Isu Kristo, ge rata kamumu mua.
ROM 16:21 E Timoti, a bakovi i leho turagu, i talo rike a haro kamumu ne mua lobo. E huriki a kabu nau, e Lusius, e Iason, e Sosipater, ria ranga ri talo rike a haro kamumu ne mua.
ROM 16:22 Iau e Tertus a here polo ne Paulus, a raukea iea. A talo rike a haro kamumu ne mua na rane Bakovi Dagi.
ROM 16:23 E Gaius i talo rike a haro kamumu ne mua. I matakari kamumu iau, turana e huriki ri leho na lotu, na ruma vona. E Erastus, a bakovi ni matakari a tava na tanga dagi, rua e turane hita e Kuartus, ru talo rike a haro kamumu ne mua.
ROM 16:25 A Vure i tahoka a nitora ni vakatora a niluhoi ne mua, i manga a Velenga Kamumu a taki mua vona na tahuna a vara mua ne Isu Kristo. Na pida i kupo hateka a Velenga Kamumu iea i tabuli kapiloho.
ROM 16:26 Pali ngane i bele kavakava. A ngava ne huriki a propet hosi ni taki tala ngane, e huriki na tanga lobo ri longo a Velenga Kamumu, a vuhuna a Vure ra i mahuri vakaroro i taki ge bele mavonga, e huriki ri gi luhoi tora ia, ri gi longototoa.
ROM 16:27 A Vure i taku kunana, i tahoka a lohokanga lobo. E Isu Kristo ge rata hita si gi kavurikea vakaroro. I muholi.
1CO 1:1 Iau e Paulus. Na ningaru na Vure, i gale iau, ge iau a apostolo ne Isu Kristo. Maria e Sostenes, a turane hita, miri herea a raukea iea.
1CO 1:2 Miri here lakene mua e huriki a tara ne Kristo o Korin. E Isu Kristo i ru here here mua, ge mua ne vona a Vure kunana. I gale mua, ge mua e huriki a tara vona, turana e huriki na tanga lobo ri kavurikea a Bakovi Dagi, e Isu Kristo. Ia a Bakovi Dagi ne ria, a Bakovi Dagi ne hita.
1CO 1:3 A Vure, e Tamane hita, rua e Isu Kristo, a Bakovi Dagi ne hita, ru gu rata kamumu mua, ru gu habi a nivalemu ne mua.
1CO 1:4 A luhoi mua na parava vakaroro, a kavurike a Vure vona a naro i rata kamumu mua vona a vuhuna mu rihi e Isu Kristo.
1CO 1:5 I rata kamumu mua, i hatebalala, i vakabagetu mua na maki lobo, na lohokanga dagi, na naro ni ta kamumu.
1CO 1:6 Ra i maea, i vakasiri i muholi a ngava ne Kristo a vakalongo mua vona.
1CO 1:7 Ngane mu davea a Bakovi Dagi ne hita, e Isu Kristo, ge hamule valai, i uka ma mu bala vona tara bagetua na Vure.
1CO 1:8 Ge tuhori mua, ge vano ge harena na nilobona parava, mu gu malamala na tahuna a Bakovi Dagi ne hita, e Isu Kristo ge hamule valai.
1CO 1:9 A Vure i rata a maki lobo i taki ge rata. I gale mua mu gu rihi e Tuna, re Bakovi Dagi ne hita, e Isu Kristo.
1CO 1:10 Mua e huriki a turagu, a taki tora mua na rane Isu Kristo, a Bakovi Dagi ne hita, a ta maea, “Mu hate taku. Naha ni vapida lae, naha ni vakabele a tara ge kupo. Mu pesi palupu na niluhoi i taku, na ngava i taku.”
1CO 1:11 Mua e huriki a turagu, a kabu ne Kloe ri vakalongo iau vona mu vahehe.
1CO 1:12 Ri taki ta i ranga ne mua mu ta maea, “Iau a muri ne Paulus.” I ranga mu ta maea, “Iau a muri ne Apolos.” I ranga mu ta maea, “Iau a muri ne Sipas.” I ranga mu ta maea, “Iau a muri ne Kristo.”
1CO 1:13 Re Kristo, ni vaveru na maka tabekena? Ra iau, e Paulus, a mate na kai tavalavala na murine mua? Ni vahilolo mua na ragu?
1CO 1:14 A kavurikea a Vure vona iau i uka ma a vahiloloa tara viri ne mua. A vahilolo kunana e Krispus, e Gaius,
1CO 1:15 ma mu gu taki ta ni vahilolo mua na ragu.
1CO 1:16 A kabu ne Stepanas, ria ranga a vahilolo ria. Pali a luhoi i uka tabu tara viri ga vahiloloa.
1CO 1:17 E Kristo i rudu iau, i uka ma ga vahilolo e huriki. I rudu iau ga vara e huriki na Velenga Kamumu. I uka ma i ngaru ga voko e huriki na ngava na lohokanga dagi na malala. Ma ga rata mavonga, ge uka a nitora a kai tavalavala ne Kristo.
1CO 1:18 Ne huriki ri laho na dala na matenga, a nitovo na kai tavalavala i manga a ngava tavula. Pali ne hita, e huriki a Vure i korimule hita, a nitovo na kai tavalavala, ia a nitora na Vure.
1CO 1:19 A hinere hosi i ta maea, “Ga ratapile a lohokanga ne huriki a bakovi na lohokanga. Ga vakavaroru a niluhoi ne huriki ri luhoi ta ri lohoka hateka.”
1CO 1:20 I mavonga, a vai e huriki a bakovi na lohokanga? A vai e huriki a mari na vinara? A vai e huriki ri moro hateka na nita? A Vure i vakasiri kavakava, a lohokanga na malala i manga manga.
1CO 1:21 A Vure i tahoka a niluhoi kamumu hateka. I rata maea, e huriki i uka ma ri gi lohoka na Vure na tahuna ri ramai a lohokanga na malala. Pali i vivi ni korimule e huriki ri luhoi torea a ngava ni vara ria vona, ra ngava e huriki ri luhoi ta a ngava tavula.
1CO 1:22 E huriki a Iuda ri ngaru ni matai a nivakasiri. E huriki a Grik ri ngaru a lohokanga legelege.
1CO 1:23 Pali a ngava mi vara e huriki vona, mi taki ria ne Kristo ni paditata na kai tavalavala. A ngava iea i rata e huriki a Iuda ri boru, pali e huriki a Grik ri luhoi ta a ngava manga manga.
1CO 1:24 Pali e huriki a Iuda, e huriki a Grik a Vure i gale ria, ri masia e Kristo ia a nitora, a lohokanga na Vure.
1CO 1:25 A niluhoi na Vure si luhoi ta i manga, i moro hateka na niluhoi moro moro ne huriki a bakovi. E huriki na malala ri luhoi ta a Vure i uka nitora vona. Pali a nitora na Vure i rangi a nitora lobo ne huriki a bakovi hateka.
1CO 1:26 Mua e huriki a turagu, mu luhoi mule a tahuna a Vure i gale mua. I kupo ne mua i uka ma mu tahoka a lohokanga na matane huriki na malala. I kupo ne mua i uka rane mua. I kupo ne mua i uka ma mu valai na kabu na hariki.
1CO 1:27 Pali a Vure i vulaki e huriki ri manga na matane huriki na malala, ge vakamaruhu e huriki na malala ri luhoi ta ri tahoka a lohokanga dagi. I vulaki e huriki a bakovi tavula na matane huriki na malala, ge vakamaruhu e huriki a bakovi dagi na malala.
1CO 1:28 A Vure i vulaki e huriki a matasia, re huriki na malala ri biu ria. I vulaki e huriki a bakovi tavula na matane huriki na malala, ge ratapile e huriki na malala ri luhoi ta ri dagi hateka.
1CO 1:29 A Vure i rata mavonga, ge i uka tara viri ge bibi rike mule a rana na matana Vure.
1CO 1:30 Ia kunana a Viri i rata mua mu rihi e Isu Kristo. Na naro iea, e Kristo i habi a niluhoi kamumu lobo ne hita. Na limane Kristo kunana, a Vure i konamule hita, i rata hita si malamala, i kali here here hita, ge hita ne vona kunana.
1CO 1:31 I mavonga, i uka ma si gi bibi rike mule a rane hita. Ni here hosi, i maea, “A viri i ngaru ni bibi, ge bibi rike kunanea a Bakovi Dagi.”
1CO 2:1 Mua e huriki a turagu, hosi na tahuna a bele ne mua, a vara mua na nitana Vure, i uka ma a vakaholi, ga vara mua na maka ngava na lohokanga dagi.
1CO 2:2 Na tahuna a made turane mua, a koi ni tovo mua na ngava legelege. A ngaru ni tovo kunana mua na ngava ne Isu Kristo, i mate na kai tavalavala.
1CO 2:3 Na tahuna a made turane mua, a uka a kinigaonga. A mangenge, i vakulu a tagagu.
1CO 2:4 A nitagu, a ngavagu i uka ma a ngava moro moro ga lalu mua vona. Pali na tahuna a vara mua, a nitora na Hanuna Vure i vakasiri i muholi a nitagu.
1CO 2:5 I bele mavonga, i uka ma mu gu luhoi tora na na lohokanga na malala. Mu gu luhoi tora na nitora na Vure.
1CO 2:6 Pali e huriki ri koru rike pali ni luhoi torea e Kristo, iau a vara ria na lohokanga. Pali a lohokanga a vara ria vona i uka ma a lohokanga na malala, i uka ma a lohokanga ne huriki a bakovi dagi na malala, re huriki ri gi mate.
1CO 2:7 A lohokanga a vara ria vona, a lohokanga kapiloho na Vure. A lohokanga iea, a Vure i luhoi purua muga na maki lobo ni ratarike, ge vakabagetu hita vona.
1CO 2:8 E huriki a matakari na malala, i uka tara viri ge matakilaka vona a ngava iea. Bara ri matakilaka vona, i uka ma ri gi paditatea na kai tavalavala e Bakovi Dagi, ra i bagetu hateka.
1CO 2:9 Ni here hosi maea, “I uka tara viri ge matai, i uka tara viri ge longo, i uka tara viri ge longo visi na hatena a maka bagetua kamumu a Vure i kado puru, ge habi ne huriki ri ngaru hatekea.”
1CO 2:10 Pali ngane a bagetua kamumu nga, a Vure i vakasiri ne hita na limana Hanuna, a vuhuna a Hanuna Vure i matai kado kamumu a maki lobo. I mavonga kunana, a niluhoi kapiloho na Vure, a Hanuna i lohoka kamumu vona.
1CO 2:11 uka tara viri ge lohoka vona a niluhoi na viri tara. A hanuna bakovi iea, ra i made pololilo vona kunana, i lohoka vona. I mavonga kunana a niluhoi na Vure. A Hanuna Vure kunana i lohoka na niluhoi na Vure.
1CO 2:12 A Vure i habi ne hita a Hanuna. I mavonga, i uka ma si luhoi manga e huriki na malala ri luhoi. Na naro iea, si matakilala a maka maki a Vure i habi tavula ne hita.
1CO 2:13 Si vakalongo e huriki vona a maki nga a Vure i habi tavula ne hita. Si vakalongo, i uka ma si ta na ngava na lohokanga na malala. Si ta na ngava i habi ne hita a Hanuna Vure. Si tuveve polo ne huriki a tara na Vure a pelegona ngava na Vure.
1CO 2:14 E huriki a bakovi i uka ma i tabuli ne ria a Hanuna Vure i uka ma ri luhoi tora a nitovo na Hanuna Vure. A nitovo nga, ri luhoi ta a ngava manga manga. I uka ma ri longokilala, a vuhuna a ngava nga, bara i longokilala kunana e huriki a Hanu Kiripiripi i tabuli pololilo ne ria.
1CO 2:15 A viri i tahoka a Hanu Kiripiripi bara i luhoi kado a maki lobo. Pali i uka tara viri ge kara ni pelekado a narona.
1CO 2:16 I manga a ngava ni here hosi, i maea, “E rei ge lohoka na niluhoi na Bakovi Dagi, ge tovoa?” Pali hita, si lohoka vona a niluhoi ne Kristo.
1CO 3:1 Mua e huriki a turagu, hosi a made turane mua, mu ramai e Kristo. Pali na tahuna a tovo mua, i uka ma a tovo mua manga mu kinigao na Hanu Kiripiripi. A tovo mua manga e huriki ri ramai a niluhoi na malala, e huriki a koma kiroko na narone Kristo.
1CO 3:2 A tovo mua, i manga a vakaruru mua, i uka ma a habi a maki tora ne mua, a vuhuna i uka ma mu paki ma. Ngane ranga, i uka ma mu paki,
1CO 3:3 a vuhuna mu tabana ni muri mai a naro na malala. Mu hate madihi, mu vagege. I vakasiri manga mu ngaru kunana a naro na malala.
1CO 3:4 Na tahuna a viri i taki ta i muri ne Paulus, o a viri tara i taki ta i muri ne Apolos, mu ramai kunana a naro na malala.
1CO 3:5 E Apolos, ia e rei muholi? Pali iau, e Paulus, iau e rei muholi? Maria a vora kunana, e Bakovi Dagi i rudu maria miri gi vakalongo ne mua a Velenga Kamumu, lakea mu luhoi tora ia.
1CO 3:6 I manga iau a varo, e Apolos i kisi, pali a Vure kunana i ratea a hania i gaga, i koru rike.
1CO 3:7 A viri i varo, a viri i kisi a hania, rua varago a bakovi tavula. Pali a Vure kunana a viri muholi, i rata a maka maki ri gaga, ri koru rike.
1CO 3:8 A viri i varo, a viri i kisi a hania, ru palupulupu kunana. Rua varago bara ru bole a mapane rua, i muri mai a leho ne rua.
1CO 3:9 Maria varago a vora na Vure, miri leho palupu. Mua a hania na Vure. Mu manga a roho na Vure.
1CO 3:10 A Vure i rata kamumu, i rata iau a bele manga a mari ni hae a ruma. A ru puru a vuhu kedo, ni gi vakapesi a ruma vona. Pali a viri tara i valai, i hae rike vona a ruma. Hita takutaku si gi luhoi kamumu, si gi hae kamumua a roho.
1CO 3:11 I uka tara vuhu kedo tabu si gi ru purua. A vuhu kedo i taku kunana, ni ru puru pali, re Isu Kristo.
1CO 3:12 Pali e huriki ri hae langa a ruma na vuhu kedo iea, ri gi hae na gol ranga, o na silva ranga, o na kedo mata kamumu ranga, o na kai ranga, o na gavana rabia ranga, o na rehi ranga.
1CO 3:13 Muri a leho ne huriki lobo bara i bele kavakava na nilobona parava. Bara i bele kavakava na tahuna a kanono i tonia, ni gi matai a leho ne hita takutaku ni rata kamumu, o i uka.
1CO 3:14 A leho na viri i rata langea na vuhu kedo iea i uka ma ge nono, bara i bole a mapana vona.
1CO 3:15 Pali a leho na viri ge nono, a leho vona bara i velu. I muholi, a bakovi bara ni korimule, pali bara i manga a viri ni korimule na ruma vona i nono.
1CO 3:16 Ra mua, i uka ma mu lohoka vona? Mua a roho na Vure. A Hanu Kiripiripi i made na kurukurune mua.
1CO 3:17 A Vure bara i ratapile e huriki ri ratapile a roho vona, a vuhuna a roho na Vure ne vona kunana. Pali mua a roho vona.
1CO 3:18 Naha ni tami mule mua. E rei a viri i luhoi ta i tahoka a lohokanga na malala i dagi hateka, iau a ngarua ge taparakia, ge mata mangamanga na matane huriki na malala. Muri bara i tahoka a lohokanga muholi.
1CO 3:19 A lohokanga na malala, a niluhoi tavula na matana Vure, a vuhuna ni here maea, “E huriki ri luhoi ta ri lohoka hateka, a Vure bara i rata ria, a lohokanga ne ria bara i ratapile ria.”
1CO 3:20 A ngava tara ni here, i maea, “E huriki ranga ri luhoi ta ri lohoka hateka, pali a Bakovi Dagi i lohoka vona, a niluhoi ne ria a maki tavula kunana.”
1CO 3:21 I mavonga, naha ni bibi rike e huriki a bakovi. A maki lobo ni habi ne mua, ne vona ni kori mua.
1CO 3:22 Ra iau, e Paulus, e Apolos, e Sipas, a malala, a nimahuri, a matenga, a hini mona, a hini muri ma, a maki lobo ne mua.
1CO 3:23 Pali mua ne vona e Kristo, e Kristo ne vona a Vure.
1CO 4:1 I mavonga a ngaru mu gu matai maria, maria a vora ne Kristo ni vakalongo e huriki na nitana Vure, ra hosi i kapiloho, pali ngane ni pukatala.
1CO 4:2 Pali e huriki a vora, ri gi muri mai kamumu a ngava lobo na bakovi dagi ne ria.
1CO 4:3 Pali ne nau, a maki tavula na matagu mu gu pelekado a leho nau, o e huriki na malala ri gi pelekado iau. Iau tara, i uka ma a pelekado mule a narogu.
1CO 4:4 A luhoi kado pali a narogu, i uka ma a masia tara maki ga rare vona. Pali a naro iea i uka ma i rata iau ga malamala. E Bakovi Dagi kikeri ge pelekado a narogu.
1CO 4:5 I mavonga, naha ni pelekado muga a naro na viri, muga ne Bakovi Dagi ge valai. Ge valai, ge vakasiri kavakava a naro hale e huriki ri rata kapiloho. Ge vakasiri kavakava a niluhoi kapiloho ne huriki, i navai ri rata a maki ri rata? Muri a Vure ge kavurike hita takutaku.
1CO 4:6 Mua e huriki a turagu, a ngaru ni kori mua, lakea a kurahi a ragu, a rane Apolos. A ngaru ni kori mua, mu gu lohoka vona a ngava iea, “Naha ni page poloa a nitana Vure.” Bara mu lohoka vona a ngava iea, i uka ma mu gu tagege, mu gu bibi rike ranga, mu gu biu ranga.
1CO 4:7 Mu rangi navai e huriki ranga? A ra maki kamumu mu tahoka, pali a Vure i uka ma i habia ne mua? A maki kamumu lobo mu tahoka, a Vure i habi mua, pali i navai mu bibi rike mule mua i manga mua kunana mu vakabele a maki nga?
1CO 4:8 Ra mua, mu pahadaki ta mu tahoka pali a maki lobo, mu maru! Mu pahadaki ta mu tahoka pali a mahala lobo! Mu pahadaki ta mua a hariki, pali i uka ma miri kori mua, mu bele pali manga a hariki! A ngaru ge mua a hariki. Pali maria ranga, bara maria a matakari turane mua!
1CO 4:9 Pali iau a luhoi maea, a Vure i ru mia e huriki a apostolo, mi muri liu. Mi manga e huriki a bakovi ni taki ni gi rabalaki na matane huriki lobo. E huriki lobo ri matanono mia: e huriki a bakovi, e huriki a agelo.
1CO 4:10 Pali i navai? Mia mi manga hateka a vuhuna mi rata a leho ne Kristo, pali mua mu moro hateka a vuhuna mu rihi e Kristo, e? Mia mi uka a nitora, pali mua mu kinigao hateka, e? Mua ni togo, pali e huriki ri biu mia, e?
1CO 4:11 I hosi, i valai i harena mona, mi vitolo, mi marohu, i marape a varakia ne mia, ni ubi mia, mi uka ruma mi gi made vona,
1CO 4:12 mi leho hateka na limane mia. Na tahuna e huriki ri biu mia, mi vakabagetu ria. Na tahuna e huriki ri habi a nimadihi ne mia, mi kaloho, mi hatenono kunana.
1CO 4:13 Na tahuna ri harogi pile mia, mi taki kamumu ria. Na matane huriki mi bele manga a ragumera na malala i vuroki e huriki, a maki i bera, i mavuru.
1CO 4:14 A herea a raukea iea, i uka ma ga vakamaruhu mua. A herea, ga vara mua, i manga a bakovi i varea e tuna, ra i ngaru hatekea.
1CO 4:15 Ri ala kupo hateka e huriki ri tovo mua ne Kristo, pali e tamane mua i taku kunana. Hosi iau a bele manga e tamane mua na tahuna a vakalongo mua vona a Velenga Kamumu ne Isu Kristo.
1CO 4:16 I mavonga, a ngaru hateka mu gu ramai a vilogu.
1CO 4:17 A ngaru mavonga, lakea a rudua e Timoti. I manga e tugu a hategu pololilo ne Bakovi Dagi. I kori vakaroro iau na leho. A rudua ge made turane mua, ge vakalohoka tabu mua vona a narogu a ramai e Isu Kristo vona. Ra naro nga a tovo e huriki a tara ne Kristo na tanga lobo a lakea vona.
1CO 4:18 E huriki ranga ne mua ri luhoi iau ta i uka ma ga hamule lakene tabu, lakea ri tagege hateka.
1CO 4:19 Pali e Bakovi Dagi ge ngaru, iau popote ga hamule lakene. Muri ga matai e huriki nga, ri tahoka a nitora, o ri ta tavulavula kunana.
1CO 4:20 A harikianga na Vure i uka ma a ngava tavulavula. A harikianga na Vure a nitora.
1CO 4:21 Pali mu ngarua ge navai? Mu ngaru ga bole a lebo, ga lakene, o mu ngaru ga lakene ga rata kamumu mua, ga made madoru turane mua?
1CO 5:1 Ni vakalongo iau vona ta a viri tara ne mua i mole. A molenga vona i hale hateka, a bakovi tara i radi poloa e girihine tamana. A naro iea i hale hateka, e huriki ri made na uvo ranga ri marikoi vona.
1CO 5:2 I bele ne mua a naro iea, pali mua mu bibi rike mule mua! I kamumu mu gu tangi. Ra viri iea, i ratea a naro iea, mu tono talea, nahea ge made turane mua.
1CO 5:3 I muholi a made basi ne mua, pali a niluhoi nau i tabuli turane mua. A pelekado pali a narona bakovi iea, i manga a hini a made turane mua, a taki i rata a naro hale.
1CO 5:4 Mu vapopo na rane Isu a Bakovi Dagi, mu rata manga iau a made turane mua. A nitora ne Isu a Bakovi Dagi ge made turane mua.
1CO 5:5 Lakea mu habia na limane Satan a bakovi iea, ge ratapile a kakaina. Mu rata mavonga, bara mu korimule a hanuna, i uka ma ge vurua na parava e Bakovi Dagi ge hamule valai vona.
1CO 5:6 Ra hini mu bibi rike mule a rane mua, i uka ma i kamumu. Mu lohoka vona, a is popote kunana bara i rata a bret lobo i vava.
1CO 5:7 Mu vuroki tala a is hosi, mu gu bele manga a bret karaba. I muholi mu manga a bret i uka is vona, a vuhuna a nihabi ne hita, e Kristo, a tuna sipsip na Habu na Nipagepolo, ni rabalaki, ni habi pali.
1CO 5:8 I mavonga, si gi ratea a habu iea, nahea si gi kani a bret hosi i vona a is, ra naro hale. Si gi ratea a habu iea na bret i uka is vona, ra naro malamala, na nita muholi.
1CO 5:9 Na raukea a here mugea, a taki mua nahea mu gu laho turana e huriki ri rata a naro na molenga.
1CO 5:10 A here maea, i uka ma a taki e huriki a bakovi na malala ri rata a naro na molenga, e huriki ri muma, e huriki a panaho, e huriki ri kavurike a vure ranga. Iau bara ta maea, bara mu keri ni made koea na malala.
1CO 5:11 Pali ngane a here, a taki mua nahea mu gu laho turana e huriki ri taki ta ria a turane mua, pali ri rata a naro na molenga, ri muma, ri kavurike a vure ranga, ri padi a kidune huriki, ri ninu a naru vagole lakea ri manga, ri panaho. E huriki a bakovi maea, naha ni ta turane ria, naha ni kani turane ria.
1CO 5:12 Iau ga pelekado navai a narone huriki i uka ma ri dili na tara ne Kristo? Pali e huriki ri dili na tara ne Kristo, mu pelekado a narone ria.
1CO 5:13 A Vure bara i pelekado e huriki polovavo. Pali a nitana Vure i ta maea, “Mu lili vuroki e huriki a bakovi hale, i uka ma ri gi made turane mua.”
1CO 6:1 A viri tara ne mua ge tahoka a ngava ne turana tara, i navai ge polo taro e huriki a tara ne Kristo, ge vano, ge vakapesia na matane huriki a bakovi na uvo?
1CO 6:2 I navai? I uka ma mu lohoka vona? E huriki a tara ne Kristo ri gi pelekado a narone huriki na malala muri ma. Ge mavonga, i navai mu keri ni vapelekado a ngava kiroko ne mua?
1CO 6:3 I uka ma mu lohoka vona? Muri ma si gi pelekado a narone huriki a agelo. I mavonga, i kamumu si gi vapelekado a ngava ne hita koea na malala.
1CO 6:4 Pali na tahuna mu tahoka a ngava, i navai mu vakapesi a bakovi, i uka rana na tara ne Kristo, ge pelekado a ngava ne mua?
1CO 6:5 A ta maea, ga vakamaruhu mua. I navai? I uka tara viri ne mua ge tahoka a niluhoi kamumu, ge longo, ge pelekado a ngava i bele na koropalane mua?
1CO 6:6 Pali mua mu vakapesi e turane mua na matane huriki i uka ma ri luhoi torea e Kristo.
1CO 6:7 Ra hini mu vagege, mu vakapesi mua na matana bakovi ni pelekado a ngava, i vakasiri manga mu velu pali na vilo ni muri mai e Kristo. A viri tara ge rata hale mua, mu kaloho kunana. A viri tara ge tami mua, ge radi a maki ne mua, mu kaloho kunana.
1CO 6:8 Pali i uka ma mu rata mavonga. Mua kunana a viri mu rata hale, mu tami e turane mua, mu radi a maki ne ria!
1CO 6:9 I navai? I uka ma mu lohoka vona? E huriki ri rata a naro hale i uka ma ri gi dili na harikianga na Vure. Naha ni tami mule mua. E huriki ri mole, e huriki ri kavurike a vure ranga, e huriki ri tuli e girihina viri tara, e huriki a bakovi ri radi a bakovi,
1CO 6:10 e huriki a panaho, e huriki ri muma, e huriki ri ninu a naru vagole ri manga, e huriki ri ta padimomo, e huriki ri radi a maki na viri tara, re huriki a bakovi a ngatavine maea i uka ma ri gi dili na harikianga na Vure.
1CO 6:11 Ranga ne mua, hosi mua a viri maea. Pali a rane Isu Kristo a Bakovi Dagi, a Hanuna Vure ne hita ru vahilolo mua, ru rata mua mu malamala, ru rata mua mu uka ngava na matana Vure.
1CO 6:12 Ranga ne mua mu ta maea, “I uka tara naro ni gi pupukari iau ga rata.” Pali iau a ta maea, a naro ranga i uka ma ri gi kori iau. Mu ta maea, “I uka tara naro ni gi hatekakari iau ga rata.” Pali iau i uka ma ga matataro tara naro ge vakavora iau.
1CO 6:13 Mu ta maea, “A maki ni kani ne vona ni vakavonu a kavutu. A kavutu ne vona ni tahoni a maki ni kani.” I muholi, pali muri ma a Vure ge vakalobo varago a maki ni kani, a kakaine hita. A kakaine hita i uka ma ne vona ni mole. A kakaine hita ne vona e Bakovi Dagi. E Bakovi Dagi ne vona a kakaine hita.
1CO 6:14 A Vure, na nitora vona, i vakamahuri mule na matenga e Bakovi Dagi. I mavonga, hita ranga, bara i vakamahuri mule a kakaine hita.
1CO 6:15 Mu luhoia. A kakaine mua takutaku ri manga a tabekena kakaine Kristo. I mavonga, i kamumu ni gi rata a tabekena kakaine Kristo ge madoko na kakaina ngoi? I uka liu!
1CO 6:16 Mu luhoia. A bakovi i mahita turana ngoi, a kakaine rua i bele taku kunana, a vuhuna ni here na Hinere maea, “A kakaine rua ge taku.”
1CO 6:17 Pali a viri i rihi e Bakovi Dagi, a hanune rua ru madoko.
1CO 6:18 Mu malele ha vona a naro na molenga. A naro hale lobo ni rata polovavo na kakaina viri. Pali a viri i mole i rata hale virihi mule a kakaina.
1CO 6:19 A kakaine mua a roho na Hanu Kiripiripi, ra i valai na Vure, i made pololilo ne mua. Ngane a Vure a tahone mua, i uka ma mua a tahone mua,
1CO 6:20 a vuhuna i kona pali mua na mapa dagi. I mavonga, a maki lobo mu rata na kakaine mua ge rata e huriki ri gi kavurikea a Vure.
1CO 7:1 Ngane ga koli a ngavane mua mu here puru na raukea. A bakovi, i kamumu i uka ma ge mahita turana ngatavine.
1CO 7:2 Pali a vuhuna a naro na molenga i bele dagi hateka, i kamumu a bakovi takutaku ge tahoka e girihina, a ngatavine takutaku ge tahoka e girihina.
1CO 7:3 A kakaina bakovi ne vona e girihina, i uka ma ge vakatokua. I mavonga kunana, a kakaina ngatavine ne vona e girihina. I uka ma ge vakatokua.
1CO 7:4 A ngatavine i uka ma i matakari mulea a kakaina. E girihina i matakaria. I mavonga kunana, a bakovi i uka ma i matakari mulea a kakaina. E girihina i matakaria.
1CO 7:5 A mata girihina rua i uka ma ru gu valohopile. Pali bara ru ngaru ni varodo a ngava, ru gu malo popote taro, ru gu vasileki, i uka ngava. Pali muri, ru gu made palupu tabu, ma ge toni rua e Satan, a vuhuna ru keri ni pahadanu a ningaru hale na kakaine rua.
1CO 7:6 I uka ma a vakuku mua. A ta kunana, a naro iea, mu ngaru ni ramaia, mu ramaia.
1CO 7:7 I kamumu e huriki lobo ri gi manga iau. Pali a Vure i vakabagetu hita takutaku na ningaru si gi ramaia.
1CO 7:8 Mua e huriki a bakovi i uka ma mu parangi, turana mua e huriki a havuri, a ta maea, i kamumu mu gu made manga ori, manga iau.
1CO 7:9 Pali a viri i keri ni pahadanu a ningaru na kakaina, i kamumu ge parangi, ma ge ratapilea a ningaru dagi na kakaina.
1CO 7:10 Mua e huriki mu parangi pali, a vakuku mua (i uka ma i iau, e Bakovi Dagi i vakuku mua): mua e huriki a ngatavine, naha ni ha taroa e girihine mua.
1CO 7:11 (Pali a ngatavine ge ha taroa e girihina, nahea ge parangi tabu. O i kamumu ge hamule mai e girihina). Pali mua e huriki a bakovi, naha ni pile e girihine mua.
1CO 7:12 Pali e huriki ranga ri parangi pali, a ta maea (i uka ma e Bakovi Dagi, iau a ta maea): e rei a bakovi, a turane teu, e girihina i uka ma i luhoi torea e Kristo, pali ra ngatavine iea i vivi kunana ni made turana, nahea ge pilea.
1CO 7:13 I mavonga kunana, a ngatavine tara, e girihina i uka ma i luhoi torea e Kristo, pali a bakovi iea i vivi kunana ni made turana, nahea ge pilea.
1CO 7:14 A bakovi i uka ma i luhoi torea e Kristo, pali e girihina i luhoi torea e Kristo, ngane a bakovi iea, a Vure i matakaria. E huriki e tuna ranga, a Vure i matakari ria. A ngatavine i uka ma i luhoi torea e Kristo, pali e girihina i luhoi torea, ngane a ngatavine iea a Vure i matakaria. E huriki e tune rua, ranga a Vure i matakari ria, i uka ma i biu ria.
1CO 7:15 Pali a bakovi o a ngatavine, ra i uka ma i luhoi torea e Kristo, i ngaru ni ha taroa e girihina, naha ni ta karia. Ge vano. Ge bele maea a hini, a viri i luhoi torea e Kristo i matukapaga ne girihina, a vuhuna a Vure i gale mua mu gu made na nivalemu.
1CO 7:16 Mua e huriki a ngatavine, ma ge matai a naromu e girihimu, ge pulo a vilona. Pali mua e huriki a bakovi, ma ge matai a naromu e girihimu, ge pulo a vilona.
1CO 7:17 A ra nimade e Bakovi Dagi i habi ne hita takutaku, si gi ramai kunana. A ra nimade a Vure i gale hita takutaku vona, si gi laho vona. A vinara iea, a vakuku mua e huriki a tara ne Kristo vona.
1CO 7:18 E huriki a Vure i gale ria, ni pala pali a kuline ria, naha ri gi pulo a kuline ria ni pala. E huriki, a Vure i gale ria, pali i uka ma ni pala ma a kuline ria, nahea ni gi pala a kuline ria.
1CO 7:19 A viri ni pala a kulina, o i uka ma ni pala a kulina, a maki tavula. A maki dagi, a viri ge longototo a vinara na Vure.
1CO 7:20 Si made navai na tahuna a Vure i gale hita, si gi made kunana vona ra nimade iea.
1CO 7:21 A Vure i gale ioe na tahuna ioe a vorakato? Naha ni loho lege. Pali ge tahoka tara dala go matukapaga vona, o ratea, go matukapaga.
1CO 7:22 A viri a Vure i galea na tahuna ia a vorakato vona, ngane i rihi e Bakovi Dagi, i matukapaga pali na matane Bakovi Dagi. Pali a viri i uka ma a vorakato na tahuna e Bakovi Dagi i galea, ngane ia a vora ne Kristo.
1CO 7:23 A Vure i kona mua na mapa dagi, i mavonga, nahea mu gu bele manga a vorakato ne huriki a bakovi.
1CO 7:24 I mavonga, mua e huriki a turagu, mu made navai na tahuna a Vure i gale mua, mu made mavonga kunana turana Vure.
1CO 7:25 Ngane ga here a ngava ne huriki i uka ma ri parangi ma. E Bakovi Dagi i uka ma i habi nau ranga vinara. Iau kunana a habi ne mua a niluhoi kamumu nau, a vuhuna e Bakovi Dagi i dodo iau, i rata iau, iau a bakovi ni ta muholi.
1CO 7:26 A parava mona, a tahuna na nimava, lakea iau a luhoi i kamumu e huriki i uka ma ri parangi ma, ri gi made mavonga kunana.
1CO 7:27 O parangi pali? Naha ni ha taroa e girihimu. Pali ioe i uka ma o parangi ma, naha ni matakana a viri go parangi vona.
1CO 7:28 Pali ioe o ngaru ni parangi, i uka maki. I uka ma o rata hale. A ngatavine i uka ma i parangi ma, lakea i parangi, i uka maki. I uka ma i rata hale. Pali e huriki ri parangi, bara i bele ne ria a maregoa na malala. A koi mu gu dili na maregoa, lakea a taki mua nahea mu gu parangi.
1CO 7:29 Mua e huriki a turagu, a pelegona ngava nau i maea: a parava i uka ma i kupo ngane. I vakatubu ngane, e huriki ri parangi, nahea ri gi luhoi hateka a naro na parangia.
1CO 7:30 E huriki ri tangi, nahea ri gi tangi hateka. E huriki ri vivi, nahea ri gi luhoi kunana a nivivi ne ria. E huriki ri kona a maki, nahea ri gi luhoi hateka a maki nga.
1CO 7:31 E huriki ri leho na maki na malala, ri gi made manga a leho iea i uka ma i dagi hateka na matane ria, a vuhuna a malala, ra si masia mona, i popote ge lobo.
1CO 7:32 A ngaru ge uka tara maki mu gu loho lege vona. A bakovi i uka ma i parangi ma bara i luhoi hateka a leho ne Bakovi Dagi, a ra ge ratea, ge vivi vona e Bakovi Dagi.
1CO 7:33 Pali a bakovi i parangi pali, bara i loho lege vona a maka maki na malala, a ra ge ratea, ge vivi vona e girihina,
1CO 7:34 lakea bara i loho rua. A ngatavine i uka ma i parangi ma, bara i luhoi kunanea a leho ne Bakovi Dagi. I ngarua a kakaina, a hanuna ge ne vona a Vure kunana. Pali a ngatavine i parangi pali, bara i loho lege vona a maka maki na malala, a ra ge ratea ge vivi vona e girihina.
1CO 7:35 A ta maea, i uka ma ga ta pupukari mua. A ta maea, ga kori mua, mu gu ramai a naro kamumu, mu gu habi vakaroro a hatene mua ne Bakovi Dagi.
1CO 7:36 E rei a bakovi i luhoi ta i uka ma i rata kamumu hatekea a ngatavine ni habikari vona, a ningaru vona i kinigao hateka, lakea i masia bara i kamumu ru gu parangi, i uka maki. Ge ramai a ningaru vona, ru gu parangi. I uka ma ru rata hale.
1CO 7:37 Pali a bakovi iea ge pesi tora na niluhoi na hatena, i uka ma i ngaru ni parangi a vuhuna i matakari kamumu a ningaru na kakaina, i luhoi kado pali i uka ma ge parangi, ra bakovi iea i rata kamumu.
1CO 7:38 I mavonga, a bakovi iea ge parangi vona a viri ni habikari vona, i rata kamumu. Pali i uka ma ge parangi, bara i rata kamumu hateka.
1CO 7:39 A ngatavine ge made kunana turana e girihina, ge vano ge harena na tahuna i mate. Pali e girihina ge mate, ngane bara i parangi tabu na ningaru vona. Pali ge parangi vona a bakovi i luhoi torea e Bakovi Dagi.
1CO 7:40 Pali iau a luhoi, i uka ma ge parangi tabu, bara i vivi. A luhoi a Hanuna Vure i made turagu, lakea a ta maea.
1CO 8:1 Ngane ga taki mua vona a kania ni habi na vure ranga. Si lohoka vona a ngava iea, “Hita lobo si tahoka a lohokanga.” Pali a “lohokanga” iea i vakabele a tagenga. Pali a naro na nivangaru i vakatora hita.
1CO 8:2 E rei a viri i pahaluhoi ta i lohoka pali, i uka ma i lohoka kamumu ma.
1CO 8:3 Pali e rei a viri i ngarua a Vure, a Vure i matakilalea a bakovi iea.
1CO 8:4 I mavonga, a naro ni kani a kania ni habi na vure ranga, si lohoka vona a ngava iea, “A maka vure ranga, i uka ma ri muholi.” A ngava tara i maea, “A Vure i taku kunana.”
1CO 8:5 I muholi, i tahoka a maki i kupo na hunu, na malala, e huriki ranga ri taki ta a vure. A maki ni gale a vure, a bakovi dagi, ri kupo.
1CO 8:6 Pali ne hita, a Vure i taku kunana, re Tamane hita, ra i ratarike a maki lobo. Hita a ngate vona. A Bakovi Dagi i taku kunana, re Isu Kristo. Na limana kunana, a Vure i ratarike a maki lobo. I habi ne hita a nimahuri karaba.
1CO 8:7 Pali e huriki ranga i uka ma ri lohoka vona a ngava nga. Hosi ri kavurike a maka vure tebi. Ri luhoi ta a vure muholi, lakea ngane na tahuna ri kani a kania ni habi lakea na vure nga, ri hataki hale, ri hataki ri katoki, a vuhuna ri loho lege, ri gi kani o i uka?
1CO 8:8 Pali a maki si kani, o i uka ma si kani, i uka ma ge rata hita si gi malamala na matana Vure. I uka ma si kani, i uka ma ge rata hita si gi hale. O si kani, i uka ma ge rata hita si gi kamumu.
1CO 8:9 Pali mu matadoko. A maki o lohoka vona i uka ma i hale go ratea, ma ge rata e huriki i uka ma ri luhoi tora hateka ri gi boru.
1CO 8:10 Ma ge matai ioe, ra ioe o tahoka a lohokanga, o kani na roho na vure tara. Bara o vakarike a hatena bakovi iea, ra i uka ma i tora a niluhoi vona, bara i kani a kania ni habi na vure tara.
1CO 8:11 I mavonga, a lohokanga vomu i ratapilea a bakovi iea, ra i uka ma i tora a niluhoi vona. Pali ia a turamu. E Kristo i mate vona.
1CO 8:12 Na naro iea, mu rata a naro hale ne huriki e turamu, mu vakavaroru a niluhoi ne ria, a vuhuna i uka ma ri tora. Ngane mu rata a naro hale ne Kristo.
1CO 8:13 I mavonga, a ra maki a kani ge ratea a turagu ge boru, bara pilea, i uka ma ge boru a turagu.
1CO 9:1 Iau i uka ma a vorakato. Iau a apostolo. Iau a masia na matagu e Isu, a Bakovi Dagi ne hita. Mua a kanena leho nau a rata ne Bakovi Dagi.
1CO 9:2 E huriki ranga ri gi koi ni taki iau, ge iau a apostolo. I uka maki, a vuhuna i muholi hateka, iau a apostolo ne mua. A Vure i vakasiri manga iau a apostolo ne Bakovi Dagi, a vuhuna mu luhoi tora ia.
1CO 9:3 E huriki ranga ri gi ngaru ni nana iau, iau bara koli maea:
1CO 9:4 Bara mi ngaru, bara mi bole ne huriki a tara ne Kristo a maki ni kani, a naru.
1CO 9:5 E huriki a apostolo ranga, e huriki e tarine Bakovi Dagi, turana e Sipas, ria lobo ri laho turana e girihine ria, ra ri luhoi torea e Kristo. Maria ranga, bara miri ngaru, bara miri laho turana e girihine maria.
1CO 9:6 O mu ngaru maria e Barnabas kunana miri gi leho na limane maria, miri gi kani, miri gi ninu?
1CO 9:7 E rei a nugumaheto ge kona a maki ni kani vona? E rei ge varo a hania, pali i uka ma ge kani vona? E rei ge matakari a sipsip, pali i uka ma ge ninu a namona ruruna sipsip vona?
1CO 9:8 Ra ngava nga, i uka ma a niluhoi na bakovi. Ni here na Vinara.
1CO 9:9 A Vinara ne Moses, ni here maea, “A bulmakau i leho ni pahavila a vinina vit, naha ni kolo pupua a ngavana, ge keri ni kani.” Pali a Vure, i uka ma i loho lege vona a bulmakau.
1CO 9:10 A ngava iea ni here virihi hita. Ni here ni kori hita, a vuhuna a bakovi i varo, a bakovi i mirio, bara ru pasimata varago ni kani a maki na hania.
1CO 9:11 Maria miri varo a maki na Vure na kurukurune mua. Lakea bara miri ngaru, bara miri bole a maki na malala ne mua.
1CO 9:12 E huriki ranga ri bole vakaroro a maki ne mua, pali maria, i kamumu hateka miri gi bole. Pali i uka ma ge mavonga. I uka ma miri ngaru ni bole a maki ne mua. Miri hatenono kunana na maregoa, ma miri gi putukari a dala ne huriki ranga, i uka ma ri gi luhoi torea a Velenga Kamumu ne Kristo.
1CO 9:13 Mu luhoia, e huriki ri leho na Roho na Vure, ri kani na maki ni kani na Roho. E huriki ri leho ni habi a nihabi na dede, ri kani vona a nihabi.
1CO 9:14 I mavonga kunana, e Bakovi Dagi i vakuku, ni gi habi ne huriki ri vakalongo a Velenga Kamumu.
1CO 9:15 I kamumu ga bole ne mua, pali iau i uka ma a bole. A here a ngava nga, i uka ma ga bole a maki ne mua. A vivi a vuhuna i uka ma a bole a maki ne mua. Lakea a koi mu gu habia nau tara maki. Bara mu habia nau tara maki, bara mu bole vuroki nau a maki a vivi vona. Bara mate taro.
1CO 9:16 I uka ma ga bibi rike mule a ragu na tahuna a vara e huriki na Velenga Kamumu, a vuhuna a Vure i vakuku iau ga vara. Iau i uka ma ga vara, a Vure bara i ratapile iau.
1CO 9:17 Iau bara vara na ningaru nau, bara bole a mapagu. Pali iau bara vara i uka ma na ningaru nau, bara vara, a vuhuna a Vure i habia nau a leho iea ga ratea.
1CO 9:18 I mavonga, a ra mapagu ga bolea? Pali a mapagu i maea: ga vakalongo tavula e huriki vona a Velenga Kamumu, i uka ma ri gi kona iau, i manga a vinara i taki ri gi kona iau.
1CO 9:19 Iau i uka ma a vora na viri tara. Pali a vakakiroko iau, a bele manga a vora ne huriki lobo. A rata mavonga, ga bole dili e huriki ala kupo.
1CO 9:20 Na tahuna a made turane huriki a Iuda, a made manga a Iuda, ga bole dili e huriki a Iuda ala kupo. Na tahuna a made turane huriki ri nugu tata a vinara, a made manga ria, ga bole dili e huriki ri muri mai a vinara. Pali a vinara i uka ma i matakari iau.
1CO 9:21 Na tahuna a made turane huriki i uka ma ri lohoka na vinara, a made manga ria, ga bole dili e huriki nga. Pali i uka ma a longotaro a vinara na Vure. A muri mai a vinara ne Kristo.
1CO 9:22 Na tahuna a made turane huriki i uka ma i tora hateka a niluhoi ne ria, a rata kunana a rabu ri luhoi ta i kamumu, ga bole dili ria. A made turana e huriki a bakovi navai, a bele manga ria, ga bole dili e huriki ranga na dala lobo.
1CO 9:23 A maki lobo nga a rata ne vona ni vakalongo a Velenga Kamumu, lakea iau tara ga bole a bagetua na Velenga Kamumu turane ria.
1CO 9:24 Mu luhoia, e huriki ri varangi ni nunu, ria lobo ri rura ni mulangi. Pali a viri ala taku kunana bara i mulangi. I mavonga, mu nunu hateka, mu gu mulangi.
1CO 9:25 E huriki a bakovi na rihiva ri tovo mule a kakaine ria. Ri rata mavonga, ri gi mulangi, ri gi bole a mapane ria. A mapa ri bolea bara i ropo muri ma. Pali a mapane hita bara i tabuli vakaroro.
1CO 9:26 I mavonga, iau i uka ma a nunu tavulavula. A manga a viri i vadaki, i uka ma a voro tavula a limagu.
1CO 9:27 Na tahuna a vara e huriki, a tovo mulea a kakaigu, a ratea i muri mai a ningaru nau, ma ni gi matai iau, i uka ma ga mulangi.
1CO 10:1 Mua e huriki a turagu, a ngaru mu gu lohoka vona, e huriki a gare ne hita hosi, a bubu i matakari ria lobo na tabeke i ngeki. Ria lobo ri laho polo na dari.
1CO 10:2 A bubu i matakari ria, ri laho polo na Dari Vururu turane Moses. A naro nga ru rata e huriki nga, ria a tara ne Moses, i manga mona a viri ni vahilolo, i dili na tara ne Kristo.
1CO 10:3 Ria lobo ri kani vona a maki ni kani i valai na Vure.
1CO 10:4 Ri ninu vona a naru i valai na Vure, a vuhuna ri ninu vona a naru na kedo i valai na Vure, ra i muri mai ria. A kedo iea, re Kristo.
1CO 10:5 A maki nga ri bele ne ria, pali i kupo ne ria, a Vure i uka ma i vivi ne ria, lakea i ratapile ria na tabeke i ngeki.
1CO 10:6 A maki nga ri bele, ge a nivakasiri ne hita, i uka ma si gi ngaru a naro hale manga ria.
1CO 10:7 Nahea mu gu kavurike a vure ranga, manga e huriki nga ri rata. Ni here na Hinere i maea, “Ri made puru, ri kani, ri ninu. Muri ri pesi rike, ri rehi turane huriki a ngatavine.”
1CO 10:8 Nahea si gi rata a naro na molenga, i manga ranga ne ria ri rata. Ri rata mavonga, e huriki ala 23,000 ri mate na parava i taku kunana.
1CO 10:9 Nahea si gi tonia e Kristo, i manga e huriki ranga ne ria ri rata. Ri rata mavonga, a maka mata ri kani mate ria.
1CO 10:10 Naha ni deke na Vure, i manga e huriki ranga ne ria ri rata. Ri rata mavonga, lakea a agelo na matenga i rabalaki ria.
1CO 10:11 A vuranga nga ri bele, ge vakasiri e huriki nga i uka ma ri gi rata a naro hale. Ni here puru na hinere, ge tovo hita, ra si made pali na nilobona parava.
1CO 10:12 I mavonga, e rei a viri i luhoi ta i pesi tora, ge matadoko, ma ge boru.
1CO 10:13 A nitoni lobo i bele ne mua, i manga kunana a nitoni i bele ne huriki lobo. A Vure i rata a maki lobo i taki ge rata, i mavonga, na tahuna a nitoni i bele ne mua, bara i matakari mua, a nitoni i uka ma ge rangi a kinigaonga ne mua. Bara i ratea tara dala mu gu malele ha vona a nitoni, i uka ma mu gu boru.
1CO 10:14 I mavonga, mua e huriki a turagu, mu malele ha vona a naro ni kavurike a vure ranga.
1CO 10:15 Mu tahoka a niluhoi kamumu, lakea a taki mua. Mu luhoi kado a ngava a taki.
1CO 10:16 A kikei si ninu vona na komunio, si vaveru vona a darane Kristo. Na tahuna si kevea a bret, si vaveru vona a kakaine Kristo.
1CO 10:17 A bret i taku kunana. I mavonga, hita lobo si vakalipopo, hita a tara i taku kunana, a vuhuna si vaveru vona a bret i taku kunana.
1CO 10:18 Mu luhoi e huriki a Israel. Ri manga a kabu i taku kunana, ri kani vona a nihabi ni habi na dede, ri vaveru vona a nihabi.
1CO 10:19 I uka ma a taki a vure ranga a maki muholi. I uka ma a taki a kania ni habi ne ria a maki muholi.
1CO 10:20 Pali a nihabi ne huriki ri made na uvo, i uka ma ri habi na Vure. Ri habi na hanitu. A koi mu gu vaveru turana hanitu.
1CO 10:21 Mu keri ni ninu varago a kikei ne Bakovi Dagi, a kikei na hanitu. Mu keri ni kani varago na dede ne Bakovi Dagi, a dede na hanitu.
1CO 10:22 I navai? Si kinigao hateka ne Bakovi Dagi? Si gi vakarike a hatena ge bage ne hita?
1CO 10:23 Mua ranga mu ta maea, “I uka tara naro ni gi pupukari iau ga rata.” Pali iau a taki, a naro ranga i uka ma ri gi kori iau. Mu ta maea, “I uka tara naro ni gi pupukari iau ga rata.” Pali iau a taki, a maki ranga i uka ma ge vakatora hita.
1CO 10:24 Naha ni luhoi ni tuhori mule ioe kunana. O luhoi e huriki ranga, o tuhori ria.
1CO 10:25 A ra kania mu kona na maket, nahea mu gu nana ria, ri bole vai, ni habi na nitamina vure o i uka. Mu kani kunana,
1CO 10:26 a vuhuna ni here maea, “A malala, a maki lobo i tabuli vona, ne vona e Bakovi Dagi.”
1CO 10:27 A bakovi tara i uka ma i luhoi torea e Kristo, ge taki ioe go kani na ruma vona, pali o ngaru ni vano, o vano. A ra maki i habi vomu, o kani kunana. Naha ni nanea i bole vai.
1CO 10:28 Pali ni gi taki ioe maea, “A kania nga ni habi manga a nihabi na vure.” Pali, naha ni kani, ma ge hale a niluhoi na viri i vakalongo ioe vona a kania nga.
1CO 10:29 A ta maea, i uka ma go kori a niluhoi vomu. A ta maea, go kori a niluhoi na viri i taki ioe vona a kania nga i valai na roho na vure tebi. A viri tara bara i ta maea, “I navai a ningaru nau ni gi pupukari na niluhoi na bakovi tara?
1CO 10:30 Iau a kani, a kavurikea a Vure vona a kania iea, pali ri gi ta hale navai nau vona a maki a kavurikea a Vure vona pali?”
1CO 10:31 I mavonga, a ra maki mu ninu, a ra maki mu kani, a ra maki mu ratea, mu ratea, e huriki ri gi togoa a Vure.
1CO 10:32 Na matane huriki a Iuda, e huriki a Grik, e huriki a tara na Vure, naha ni ratea tara maki ge rata ria ri gi boru.
1CO 10:33 Iau tara, a toni ni rata a maki e huriki lobo ri gi vivi vona. I uka ma a tuhori mule iau. A maki lobo a rata, ga tuhori e huriki ala kupo, a Vure ge korimule ria.
1CO 11:1 Mu muri mai a vilogu, i manga a hini iau a muri mai a vilone Kristo.
1CO 11:2 A ngaru ni kavurike mua, a vuhuna mu longototo iau, a ngava lobo a taki mua vona, ra ngava a vara mua vona hosi.
1CO 11:3 Pali a ngava tara a ngaru mu gu lohoka vona. E Kristo i muga ne huriki a bakovi. E huriki a bakovi ri muga ne huriki e girihine ria. A Vure i muga ne Kristo.
1CO 11:4 A bakovi ge vasileki, o ge rata a nita propet, i uka ma ge kavitagua a gina. Bara i kavitagua a gina, bara i vakamaruhu a viri i muga vona, re Kristo.
1CO 11:5 Pali a ngatavine ge vasileki, o ge rata a nita propet, ge kavitagua a gina. Bara i uka ma ge kavitagua a gina, bara i vakamaruhua a viri i muga vona, re girihina. I manga kunana ge ali vuroki a vuna, bara i maruhu e girihina.
1CO 11:6 A ngatavine ge koi ni kavitagua a gina, pali, ge ali vuroki a vuna! Pali bara i rata mavonga, bara i maruhu. I mavonga, i kamumu ge kavitagua a gina na tahuna i vasileki.
1CO 11:7 A bakovi i uka ma ge kavitagua a gina na tahuna i vasileki, a vuhuna a bakovi i manga a hanuna Vure, a bagetuanga na Vure. Pali a ngatavine a bagetua ne girihina,
1CO 11:8 a vuhuna a Vure i uka ma i ratarikea a bakovi na karona ngatavine. A Vure i ratarikea a ngatavine na karona bakovi.
1CO 11:9 A Vure i uka ma i luhoia a ngatavine, i ratarikea a bakovi ge tuhoria. I luhoia a bakovi, lakea i ratarikea a ngatavine ge tuhoria.
1CO 11:10 I mavonga, a ngatavine ge kavitagua a gina na tahuna i vasileki, ge manga a kilakila, ge vakasiri manga a bakovi i muga vona, a vuhuna e huriki a agelo ri matanono hita.
1CO 11:11 Pali hita e huriki a tara ne Bakovi Dagi, a ngatavine i uka ma i made kikeri. A bakovi i tuhoria. A bakovi tara, i uka ma i made kikeri. A ngatavine i tuhoria.
1CO 11:12 Muga, a Vure i ratarike a ngatavine na karona bakovi. Pali ngane e huriki a bakovi, i poda ria a ngatavine. Pali a maki lobo i valai na Vure.
1CO 11:13 Mu luhoi kadoa a ninana iea: a ngatavine ge vasileki na Vure, i kamumu i uka ma ge kavitagua a gina?
1CO 11:14 I kavakava hateka, a maki ni maruhu vona a bakovi i ola a vuna.
1CO 11:15 Pali a ngatavine, i ola a vuna, i mata kamumu hateka, a vuhuna a vuna ni habi na ngatavine, ge kavitagua a gina.
1CO 11:16 Pali e rei a viri i ngaru ni gege vona a ngava nga, mi uka tabu tara naro mi gi tovo. A tara na Vure na tanga lobo ri ramai a ngava nga.
1CO 11:17 Pali ngane a tahoka ranga ngava, i uka ma ga kavurike mua vona. Na tahuna mu vapopo, i uka ma mu rata kamumu. Mu rata hale.
1CO 11:18 Na tahuna mua e huriki a tara ne Kristo mu vapopo, a longo ta mu vapida lae. A luhoi ge muholi popote a ngava iea.
1CO 11:19 I uka ma i kamumu. Pali i muholi bara i tahoka e huriki ri vapida lae, ge vakasiri e rei ne mua i luhoi muholia e Kristo.
1CO 11:20 Na tahuna mu vapopo, mu kani, i uka ma i manga mu kani a kania ne Bakovi Dagi,
1CO 11:21 a vuhuna mua takutaku mu kani kunana. E huriki ranga i uka ma ri bole kupo, ri vitolo. E huriki ranga ri ninu hateka, ri manga.
1CO 11:22 Mu manga! Mu uka ruma mu gu kani vona, mu gu ninu vona? I mata manga mu biu a tara na Vure, mu vakamaruhu e huriki ri bala a maki. Ga taki navai mua? Ga kavurike mua? I uka liu!
1CO 11:23 E Bakovi Dagi i tovo iau, ngane ga tovo mua. Na rodo, ta ni gi habi na limane huriki a pile e Isu a Bakovi Dagi, i bole rike a bret,
1CO 11:24 i kavurikea a Vure vona, i kevea, i ta maea, “Ra bret iea a bobogu, a habia ge korimule mua. Mu rata mavonga vakaroro, mu luhoi mule iau.”
1CO 11:25 Ri kani lobo, i bole rikea a kikei na vain, i kavurikea a Vure vona, i ta maea, “A kikei iea i vakasiri a ngava dagi karaba, a vakatorea na daragu. Na tahuna mu ninua, mu luhoi mule iau.”
1CO 11:26 Na tahuna mu kania a bret, mu ninu a vain, mu vakalongo e huriki vona a matenga ne Bakovi Dagi, ge vano, ge harena na tahuna ge hamule valai.
1CO 11:27 I mavonga, e rei a viri i kani a bret, i ninu a kikei na vain ne Bakovi Dagi na naro i uka ma i togoa e Bakovi Dagi vona, i manga i luhoi a maki tavula a kakaina, a darane Bakovi Dagi, i tahoka a ngava.
1CO 11:28 I mavonga, i kamumu mu gu luhoi kado mule a narone mua taro. Muri mu kani a bret, mu ninu na kikei.
1CO 11:29 E rei a viri i uka ma i luhoi kado mule a narona, pali i kani, i ninu, a Vure bara i vakamadihia.
1CO 11:30 Na naro iea kunana, i kupo ne mua mu giloa, mu uka a nitora, pali e huriki ranga ri mate pali.
1CO 11:31 Hita bara si pelekado mule hita, a Vure i uka ma ge vakamadihi hita.
1CO 11:32 Pali na tahuna e Bakovi Dagi i vakamadihi hita, i tovo hita, i uka ma si gi velu turane huriki na malala.
1CO 11:33 Mua e huriki a turagu, na tahuna mu vapopo mu gu kani, mu vadava.
1CO 11:34 A viri i vitolo, ge kani taro na ruma, lakea na tahuna mu vapopo ni kani palupu, a Vure i uka ma ge vakamadihi mua. A ngava ranga ga habi ne mua muri ma na tahuna a bele iene.
1CO 12:1 Mua e huriki a turagu, a ngaru mu gu lohoka vona a maka nitora legelege a Hanu Kiripiripi i habi tavula ne hita.
1CO 12:2 Hosi, na tahuna mu made na uvo, ni tami mua na dala ranga, mu kavurike a hanuna vure ranga, ra ri keri ni ta.
1CO 12:3 I mavonga, a ngaru mu gu palala vona tara maki. E rei a viri i ta maea, “A rudurahea e Isu!”, a Hanuna Vure i uka ma i made turana bakovi iea. A Hanu Kiripiripi i uka ma ge made turana viri, bara i keri ni ta maea, “E Isu ia e Bakovi Dagi!”
1CO 12:4 A nitora a Hanu Kiripiripi i habi tavula ne hita, ri kupo, ri legelege, pali a Hanu Kiripiripi i taku kunana.
1CO 12:5 A leho e Bakovi Dagi i habi ne hita takutaku ri legelege, pali e Bakovi Dagi i taku kunana.
1CO 12:6 A naro kamumu si gi rata ri kupo, ri legelege, pali a Vure i taku kunana, i habi a nitora ne hita si gi rata.
1CO 12:7 A Hanu Kiripiripi i vakasiri a nitora vona ne hita takutaku, si gi vakori.
1CO 12:8 A Hanu Kiripiripi i habi na viri tara a ngava na niluhoi kamumu. Pali na viri tara i habi a ngava na lohokanga.
1CO 12:9 I habi na viri tara ge luhoi torea a Vure. Pali i habi na viri tara a nitora ni vakamahuri e huriki ri giloa.
1CO 12:10 A Hanu Kiripiripi i habi na viri tara a nitora ni rata a nivakasiri. I habi na viri tara a nita propet. I habi na viri tara a nitora ni matakilaka vona a maki na Vure, a maki na hanitu. Na viri tara i habi ge ta na tabele tebi legelege. Na viri tara i habi ge tuveve polo a pelegona tabele tebi.
1CO 12:11 A maki lobo nga, a Hanu Kiripiripi i taku kunana i rata, i habi ne huriki takutaku na ningaru vona.
1CO 12:12 A kakaine hita i tahoka a tabekena i kupo. A tabekena i kupo hateka, pali ri vakabele a kakaina i taku kunana. Na naro iea kunana, a kakaine Kristo tara.
1CO 12:13 E huriki ranga a Iuda, e huriki ranga a Grik, e huriki ranga a vorakato, e huriki ranga i uka ma ria a vora, hita lobo, a Hanu Kiripiripi i vahilolo hita, si bele manga a kakaine Kristo i taku kunana. Hita lobo si vaveru vona a Hanu Kiripiripi i taku kunana.
1CO 12:14 A kakaina viri, i kupo a tabekena. I uka ma i taku kunana.
1CO 12:15 A vaha ge ta maea, “Iau i uka ma a lima, lakea iau i uka ma a tabekena kakaina viri.” A ngava iea i uka ma ge ratea ge muholi. Ia a tabekena kakaina viri.
1CO 12:16 Pali a tulina ge ta maea, “Iau i uka ma a matana, lakea iau i uka ma a tabekena kakaina viri.” A ngava iea i uka ma ge ratea ge muholi. Ia a tabekena kakaina viri.
1CO 12:17 A kakaimu lobo ga matana kunana, go longo navai? Pali a kakaimu lobo ga tulina kunana, go burongi navai?
1CO 12:18 Pali a kakaine hita i uka ma i mavonga. A Vure i rata a kakaine hita, i ru na tabekene ria takutaku a tabekena kakaine hita, na ningaru vona.
1CO 12:19 A kakaina viri ge tahoka a tabekena i taku kunana, i uka ma ge manga a kakaina viri.
1CO 12:20 A kakaine hita i tahoka a tabekena i kupo, pali a tabekena nga ri vakabele a kakaine hita i taku kunana.
1CO 12:21 A matana viri i uka ma ge takia a limana ge uka leho. A gina viri i uka ma ge takia a vahana ge uka leho.
1CO 12:22 Pali a maka tabekena kakaine hita ri mata manga i uka ma ri tora, ri tahoka a leho dagi.
1CO 12:23 A maka tabekena kakaine hita si maruhu vona, si vakabagetu, si kavitagu. A maka tabekena kakaine hita i uka ma ni gi matai, si kavitagu kamumu.
1CO 12:24 Pali a maka tabekena kakaine hita i uka ma si maruhu vona, i uka ma si gi kavitagu. A Vure i ru na tabekene ria takutaku, a tabekena kakaine hita, i rata a maka tabeke si maruhu vona, si matakari kamumu.
1CO 12:25 Lakea a kakaine hita ge taku kunana, i uka ma ge vakalipida. A maka tabekena kakaine hita lobo ri vamatakari.
1CO 12:26 A tabekena tara ge bole a nimadihi, a tabekena lobo bara ri hatakia. A tabekena tara ni gi vakabagetu, a tabekena lobo bara ri vivi.
1CO 12:27 Na naro iea kunana, mua takutaku a tabekena kakaine Kristo.
1CO 12:28 A Vure i ru e huriki ri gi leho pololilo na tara ne Kristo. I ru taro e huriki a apostolo, muri i ru e huriki a propet, muri ru e huriki a mari ni tovo, muri i ru e huriki ri rata a nivakasiri, muri e huriki ri vakamahuri e huriki, e huriki ri moro ni kori, e huriki ri moro ni matakari a leho, e huriki ri ta na tabele tebi legelege.
1CO 12:29 I uka ma ge mua lobo a apostolo. I uka ma ge mua lobo a propet. I uka ma ge mua lobo a mari ni tovo. I uka ma ge mua lobo mu gu rata a nivakasiri.
1CO 12:30 I uka ma ge mua lobo mu gu vakamahuri a viri. I uka ma ge mua lobo mu gu ta na tabele tebi. I uka ma ge mua lobo mu gu tuveve polo a tabele tebi.
1CO 12:31 A ngaru mua lobo mu gu ngaru ni bole a nitora na Hanu Kiripiripi ni rata a leho ge tuhori hateka e huriki. Pali ngane ga vakalongo mua vona a naro i kamumu hateka.
1CO 13:1 Iau bara ta na tabele tebi ne huriki a bakovi, ne huriki a agelo, pali i uka ma a ngaru e huriki, a ta tavulavula manga a tavure i ngere tavula, o manga a garamo i tangi bitutu lae.
1CO 13:2 Iau bara ta na nita propet, a lohoka na lohokanga kapiloho lobo, a luhoi tora hateka, lakea a maka lolo ri gi malaga na murine ria, pali iau i uka ma a ngaru e huriki, iau a maki tavula.
1CO 13:3 Iau bara habi lobo a mahala nau, o ri gi gutu iau na kanono, pali iau i uka ma a ngaru e huriki, a naro nga i uka ma ru gu kori iau.
1CO 13:4 A viri i ngaru e huriki, bara i hatenono ne huriki. Bara i rata kamumu e huriki. I uka ma ge masigoro na viri. I uka ma ge bibi rike mule ia. I uka ma ge tagege.
1CO 13:5 A viri i ngaru e huriki i uka ma ge mata polopolo na viri. I uka ma ge luhoi mule ia kunana. Bara i made madoru kunana. Bara i longo kaburungi malaviriri na tahuna a viri i rata halea.
1CO 13:6 A viri i ngaru e huriki, i uka ma ge vivi na naro hale. Bara i vivi na ngava muholi.
1CO 13:7 A viri i ngaru e huriki bara i kaloho a nimava, i luhoi tora vakaroroa a Vure, i pasimata vakaroro na Vure, i pesi tata na tahuna a maregoa i bele.
1CO 13:8 A nita propet bara i lobo. A naro ni ta na tabele tebi bara i lobo. A lohokanga na maki kapiloho bara i lobo. Pali a naro na nivangaru i uka ma ge lobo.
1CO 13:9 Ngane si lohoka popote kunana, si ta propet popote kunana.
1CO 13:10 Pali na tahuna a maki maraviluna i bele, a kalavana maki bara i lobo.
1CO 13:11 Hosi iau a koma kiroko, a ta manga a koma kiroko, a naro manga a koma kiroko, a luhoi manga a koma kiroko. Pali na tahuna a koru rike, a voro taparaki a naro na koma.
1CO 13:12 Ngane i uka ma si matai kavakavea a Vure. Si matai popote kunanea, i manga si masia na tuku. Pali muri ma bara si masia a matana, bara si lohoka kamumu vona, i manga a hini i lohoka kamumu pali ne hita.
1CO 13:13 Ngane a maki i tolu i tabuli, ra a naro ni luhoi tora, a naro ni pasimata, a naro ni vangaru. Pali a viri dagi hateka, a naro na nivangaru.
1CO 14:1 Mu muri mai a naro ni vangaru. Mu ngaru hateka ni bole na Hanu Kiripiripi a nitora ni rata a leho legelege. A nitora mu gu ngaru hatekea, mu gu ta propet,
1CO 14:2 a vuhuna a viri i ta na tabele tebi i uka ma i ta mai e huriki a bakovi, ri gi longokilalea a ngavana. I ta maia a Vure. I ta na nita kapiloho na nitora na Hanu Kiripiripi.
1CO 14:3 Pali a bakovi i ta propet, i ta mai e huriki a bakovi, ge vakatora ria, ge luke ria, ge kori ria.
1CO 14:4 A bakovi i ta na tabele tebi i vakatora mule ia kunana. Pali a viri i ta propet i vakatorea a tara ne Kristo.
1CO 14:5 A ngaru mu gu ta na tabele tebi, pali a ngaru hateka mu gu ta propet. A viri i ta propet i rangi a viri i ta na tabele tebi. O ge tuveve polo a ngavana viri i ta na tabele tebi, ngane bara i kamumu manga a viri i ta propet, i vakatorea a tara ne Kristo.
1CO 14:6 Mua e huriki a turagu, iau bara valai ne mua, ga ta na tabele tebi, ge kori navai mua? Pali bara vakalongo mua vona a ngava i vakasiri iau vona a Vure, o a lohokanga na Vure, o a nita propet, o ga tovo mua, bara kori mua.
1CO 14:7 I manga kunana a maki i uka nimahuri, manga a piloli, o a gita. A viri i sigi rua, pali i uka ma ge ramai kamumu a linge, i sigi tavula, e huriki ri gi longokilala navai a linge?
1CO 14:8 Na tahuna e huriki ri nunu lakea na vabinga, a viri tara bara i vaki a tavure. Pali i uka ma ge vaki kamumu, e huriki a nugumaheto ri gi lohoka navai ri gi vano ri gi vaubi?
1CO 14:9 Mua ranga. Bara mu ta na tabele tebi, e rei ge longokilala? Bara mu ta tavula kunana.
1CO 14:10 I kupo a nita koea na malala. Ria lobo ri tahoka a pelegona.
1CO 14:11 Pali iau i uka ma ga longokilalea a nitane ria, iau ngane a mosi na matana viri i ta. Ia tara, a mosi na matagu.
1CO 14:12 A matai mua mu ngaru hatekea ni bole a Hanu Kiripiripi, a nitora ni rata a leho legelege. I mavonga, a ngaru mu gu ngaru hateka a maki ge vakatorea a tara ne Kristo.
1CO 14:13 I mavonga, a viri i ta kilala na tabele tebi ge vasileki, a Vure ge ratea ge tuveve poloa a pelegona.
1CO 14:14 A ta maea, a vuhuna iau bara vasileki na tabele tebi, a hanugu i vasileki, pali a niluhoi nau i tabuli tavula.
1CO 14:15 Pali a ra ga ratea ngane? A hanugu bara i vasileki, pali a niluhoi nau tara bara i vasileki. A hanugu bara i kalolo, pali a niluhoi nau tara bara i kalolo.
1CO 14:16 Ioe bara o vasileki kunana na hanumu, a viri i uka ma i lohoka bara i keri ni ta maea, “I muholi”, a vuhuna i uka ma i longokilalea a nitamu.
1CO 14:17 O rata mavonga, i muholi ioe o kavurikea a Vure, pali e huriki ranga, i uka ma o vakatora ria.
1CO 14:18 A kavurikea a Vure vona a rangi mua na rabuna ni ta na tabele tebi.
1CO 14:19 Pali ge kori navai e huriki na vaponga na tahuna a ta na tabele tebi? Bara ta kavakava na ngava, a tovo mua, bara i kamumu hateka.
1CO 14:20 Mua e huriki a turagu, na maka maki nga, naha ni luhoi manga a koma kiroko. A narone mua, ni malele ha na naro hale, mu gu manga a koma kiroko. Pali a niluhoi ne mua ge manga a bakovi dagi.
1CO 14:21 A ngava ni here puru na Vinara, i maea, “E Bakovi Dagi i ta maea, ‘Ga taki e huriki nga na nitane huriki basi, na nita i uka ma ri longokilalea. A rata mavonga, pali i uka ma ri gi longo mai iau.’”
1CO 14:22 I vakasiri manga a naro ni ta na tabele tebi a nivakasiri, i uka ma ne vona e huriki ri luhoi tora. Ne vona e huriki i uka ma ri luhoi tora. Pali a naro ni ta propet a nivakasiri ne vona e huriki ri luhoi tora. I uka ma ne vona e huriki i uka ma ri luhoi tora.
1CO 14:23 Pali na tahuna e huriki a tara ne Kristo ri vapopo, lakea ria lobo ri ta na tabele tebi, pali a viri polovavo, o a viri i uka ma i luhoi torea e Kristo i dili, bara i luhoi ta ri manga.
1CO 14:24 Pali e huriki lobo ri gi rata a nita propet, lakea a viri polovavo, o a viri i uka ma i luhoi torea e Kristo i dili, bara i longo a nita propet ne huriki, bara i padia a hatena.
1CO 14:25 A niluhoi hale kapiloho vona bara ni taki tala, lakea bara i turume puru, i kavurikea a Vure, i taki tala na Vure i made muholi turane mua.
1CO 14:26 I mavonga, mua e huriki a turagu, a ra mu gu ratea? Na tahuna mu vapopo, mua takutaku mu gu tahoka a linge, o mu gu tovo na ngava, o mu gu vakalongo a nitana Vure, o mu gu ta na tabele tebi, o tuveve polo a pelegona ngava tebi. A maki lobo mu ratea, mu ratea ge vakatora e huriki.
1CO 14:27 E huriki ri ngaru ni ta na tabele tebi, ge ala rua o ala tolu kunana. Ge ta muga a viri tara, muri a viri tara ge ta. Muri a viri tara ge tuveve polo a ngavane tou.
1CO 14:28 Pali ge uka tara viri ge tuveve polo a ngava, naha ni ta na tabele tebi. O mangaulu kunana. O taki mule ioe, o taki kunanea a Vure.
1CO 14:29 A bakovi ala rua o ala tolu to go ta propet. E huriki ranga ri gi luhoi kado a ngavane tou.
1CO 14:30 Na tahuna a viri tara i ta propet, lakea a viri tara i bole ranga ngava na Vure, a bakovi muga ge mangaulu, ge ta taro a viri tara.
1CO 14:31 Na naro iea mua lobo bara mu ta propet takutaku. Mua lobo bara mu tovo. Mua lobo bara ni vakatora.
1CO 14:32 A viri i ta propet i matakari a nitora iea.
1CO 14:33 A Vure i uka ma i ngaru a lotu ge vakae viliha. I ngarua ge nunu kamumu na nivalemu. I ramai a naro na tara ne Kristo na tanga lobo,
1CO 14:34 e huriki a ngatavine, i uka ma ri gi ta na vaponga. Nahea ri gi ta. Ri gi made polotano ne huriki a bakovi. A Vinara tara, i ta mavonga.
1CO 14:35 Ge tahoka tara maki ri gi ngaru ni nana vona, ri gi nana e girihine ria na ruma. A maki ni maruhu vona a ngatavine ge ta na vaponga na tara ne Kristo.
1CO 14:36 I navai? Mua kunana mu vakabelea a nitana Vure? A nitana Vure i bele kunana ne mua?
1CO 14:37 E rei a viri ne mua i luhoi ta ia a propet, o ia a bakovi na Vure, ge taki tala ne mua, na ngava a herea, i valai ne Bakovi Dagi.
1CO 14:38 E rei a viri i uka ma i longokilalea a ngava a herea, mua ranga, naha ni matakilalea a bakovi iea.
1CO 14:39 I mavonga, mua e huriki a turagu, a ngaru mu gu ngaru hateka ni ta propet. Naha ni ta pupukari e huriki ri gi ta na tabele tebi.
1CO 14:40 Pali a maki lobo ni gi rata na naro kamumu, ge ramai kamumu a naro.
1CO 15:1 Mua e huriki a turagu, ngane a ngaru ni vakalohoka tabu mua vona a Velenga Kamumu a vara mua vona hosi. Na tahuna mu longoa, mu luhoi torea, ngane mu pesi tora vona.
1CO 15:2 A Velenga Kamumu iea ge korimule mua. Pali mu gu luhoi tora mavonga a ngava a vara mua vona hosi. Ge uka, bara mu luhoi tora tavula.
1CO 15:3 A ngava dagi e Kristo i vakalongo iau vona, iau tara a vakalongo mua vona, ra i maea: E Kristo i mate, ge bole a mapana naro hale ne hita, i muri mai a ngava ni here puru hosi na Hinere.
1CO 15:4 I mate, ni tanu. Muri na parava i tolu i mahuri mule, i muri mai a ngava ni here puru hosi na Hinere.
1CO 15:5 Muri i bele ne Sipas. Muri i bele ne huriki a murimuri ala 12.
1CO 15:6 Muri i bele ne huriki a turane hita ala 500, i tahoka a polona. I kupo ne ria ri tabana. Pali ranga ne ria ri mate pali.
1CO 15:7 Muri i bele ne Iakop. Muri i bele ne huriki a apostolo.
1CO 15:8 Muri liu i bele nau. I manga iau a viri ni poda muri liu.
1CO 15:9 Iau a apostolo, a muri liu ne huriki a apostolo ranga. I uka ma a bakovi kamumu ni gi gale iau ge iau a apostolo, a vuhuna hosi a vakamadihi a tara na Vure.
1CO 15:10 Pali a Vure i rata kamumu iau, i rata iau a bele manga iau ngane. A Vure i rata kamumu iau, i uka ma i rata tavula, a vuhuna a leho tora hateka ne huriki a apostolo ranga. Pali i uka ma iau a leho tora hateka. A Vure i rata kamumu iau, lakea a leho tora hateka.
1CO 15:11 Iau a vara mua, o ria ri vara mua, i uka maki. Mi vakalongo ne mua a Velenga Kamumu iea. Ia a Velenga Kamumu mu luhoi torea.
1CO 15:12 Mi taki tala ne huriki vona, e Kristo i mahuri mule na matenga. Pali i navai ranga ne mua mu taki ta i uka ma si gi mahuri mule na matenga?
1CO 15:13 Ge muholi a ngava nga, e Kristo tara i uka ma i mahuri mule.
1CO 15:14 Pali ge muholi e Kristo i uka ma i mahuri mule, mi tovo tavula e huriki. Mua ranga, mu luhoi tora tavula.
1CO 15:15 I uka ma ge ngi kunana, pali ge muholi e Kristo i uka ma i mahuri mule, mia ngane mi tami mua na Vure, a vuhuna mi taki tala ne huriki, a Vure i vakamahuria e Kristo. Pali ge muholi i uka tara viri ge mahuri mule, e Kristo tara, a Vure i uka ma i vakamahuri mulea.
1CO 15:16 Ge muholi i uka tara viri ge mahuri mule, e Kristo tara i uka ma i mahuri mule.
1CO 15:17 Pali ge muholi e Kristo i uka ma i mahuri mule, mu luhoi tora tavula, a naro hale ne mua i tabana.
1CO 15:18 Lakea e huriki ri luhoi torea e Kristo ri mate pali, ri puru pali na kanono.
1CO 15:19 Hita bara si luhoi torea e Kristo ge kori hita koea na malala kunana, bara si matasia liu ne huriki lobo na malala.
1CO 15:20 Pali i muholi hateka. E Kristo i mahuri mule na matenga. I mahuri mule muga ne huriki lobo ri mate pali. I vakasiri manga i muholi hateka, hita ranga, si gi mahuri mule muri ma.
1CO 15:21 A matenga i bele na bakovi tara. I mavonga kunana, a nimahuri mule na matenga i valai na bakovi tara.
1CO 15:22 E Adam ra viri i vakabelea a matenga, lakea hita lobo si mate. Pali e Kristo a viri i rata hita lobo si gi mahuri mule.
1CO 15:23 Bara i ramai a hini a Vure i luhoi purua. E Kristo i mahuri mule muga. Muri ma, na tahuna ge hamule valai, e huriki a ngate ne Kristo bara ri mahuri mule.
1CO 15:24 Muri a nilobona parava bara i bele. Na tahuna iea e Kristo bara i vakalobo e huriki a matakari, a maka nitora, i habi na limane Tamana a harikianga na Vure,
1CO 15:25 a vuhuna e Kristo bara i matakari taro, ge vano ge harena na tahuna i ratapile e huriki a pile vona.
1CO 15:26 A ikuna pile ge ratapilea, a matenga,
1CO 15:27 a vuhuna a ngava ni here maea, “A Vure i ru na limana a maki lobo, ge matakari.” Pali a ngava, “A Vure ge ru na limana a maki lobo,” i kavakava a Vure i uka ma ge tabuli na limane Kristo.
1CO 15:28 Na tahuna a maki lobo ge tabuli polotano ne Kristo, muri e Tuna ge ru mule ia na limana Vure, ra viri i habi na limane Tuna a maki lobo. Na naro iea, a Vure ge matakari a maki lobo.
1CO 15:29 Ge muholi i uka tara viri ge mahuri mule na matenga, i navai e huriki ri bole a hilova na murine huriki ri mate pali?
1CO 15:30 Pali mia? Na parava vakaroro mi laho na dala na vuranga, mi gi vakalongo e huriki vona e Kristo.
1CO 15:31 Mua e huriki a turagu, hita lobo si rihi e Isu Kristo a Bakovi Dagi ne hita. A vivi ne mua, a ta maea, “Na parava vakaroro e huriki ri ngaru ni rabalaki iau.”
1CO 15:32 Hosi a vaubi na maka livoa o Epesus. I uka ma a luhoi a maki na malala, a rata mavonga. Iau bara luhoi kunana a maki na malala, i uka ma ga vaubi. Ge muholi i uka tara viri ge mahuri mule na matenga, bara i manga e huriki ranga ri taki, “Si gi kani, si gi ninu, a vuhuna kuduvi bara si mate.”
1CO 15:33 Naha ni tami mule mua. “A bakovi kamumu bara i laho turana bakovi hale, a narona bakovi kamumu bara i mapulo, i hale.”
1CO 15:34 Mu bole mule a niluhoi kamumu ne mua, mu lobo ni rata a naro hale. I tahoka e huriki ranga i uka ma ri lohoka na Vure. A ta maea, mu gu maruhu.
1CO 15:35 E huriki ranga ri nana maea, “Re huriki ri mate pali, ri gi mahuri mule navai? Ge mata navai a kakaine ria na tahuna ri mahuri mule?”
1CO 15:36 E huriki ri nana maea, ri manga! A maki si varo, bara i mate taro, muri bara i rike.
1CO 15:37 Pali a maki si varo i uka ma i mata manga a hamona ge rike muri ma. Ia a vutu kunana, a vutuna vit o a maki tara.
1CO 15:38 Pali a Vure i rata a vutuna maki takutaku ge tahoka a gamona i mata tebi, na ningaru vona.
1CO 15:39 A bobona bakovi i tebi na bobona boro. A bobona kadirovo i tebi. A bobona manu i tebi. I kupo, i legelege a bobona maki.
1CO 15:40 A maki na hunu, i tebi a kakaina. A maki na malala, i tebi a kakaina. A nipara na maki na hunu i tebi na nipara na maki na malala.
1CO 15:41 A nipara na haro i tebi na nipara na keva. A nipara na hada i tebi. A hada takutaku, i tebi a nipara ne ria.
1CO 15:42 I mavonga kunana a naro ni mahuri mule. A podane hita ni tanu bara i bera. Pali a kakaina viri i mahuri mule i uka ma ge bera.
1CO 15:43 A kakaine hita i mate ni tanu, a maki tavula. A kakaine hita i mahuri mule, i bagetu hateka. A kakaine hita i mate, ni tanu, i uka ma i tora. Pali a kakaine hita i mahuri mule, i tora hateka.
1CO 15:44 A kakaina viri si tanua, a maki na malala. Pali a kakaina viri i mahuri mule, a maki na hunu. I tahoka a kakaine hita na malala. I tahoka a kakaine hita muri ma na hunu.
1CO 15:45 Ni here puru hosi, i maea, “A bakovi muga, re Adam, ni ratarike, i bele a bakovi mahuri.” Pali e Adam muri, re Kristo, ia a hanu ni habi a nimahuri ne huriki.
1CO 15:46 A maki na malala i bele muga. Muri a maki na hunu i bole a murina.
1CO 15:47 A bakovi muga, a bakovi na malala, ni ratarike na habulo. Pali a bakovi i muri, a bakovi na hunu.
1CO 15:48 E huriki a bakovi na malala ri manga ra bakovi ni rata na habulo. Pali e huriki a tara ne Kristo ri manga ra bakovi i valai na hunu.
1CO 15:49 Ngane si manga a bakovi ni rata na habulo. Pali muri ma bara si bele manga ra bakovi i valai na hunu.
1CO 15:50 Mua e huriki a turagu, a taki mua, a kakaine hita na malala, i uka ma ge dili na harikianga na Vure. A kakaine hita, ra i mate kilala, i uka ma ge dili na harikianga na Vure, ra i tabuli vakaroro.
1CO 15:51 Mu longo! Ga vakalongo mua vona a ngava kapiloho. I uka ma ge huriki lobo ri gi mate. Pali hita lobo bara si mareli
1CO 15:52 malaviriri kunana, i manga a matana viri i marakumisi. Bara i bele na tahuna ni vaki a ikuna tavure. Bara ni vaki a tavure, lakea e huriki ri mate pali bara ri mahuri mule. Lakea hita e huriki si tabana ni mahuri, bara si mareli, si bole a kakaine hita i uka ma i mate kilala.
1CO 15:53 A kakaine hita i mate kilala bara i mareli, a kakaine hita karaba i uka ma ge mate.
1CO 15:54 Na tahuna i bele mavonga, a ngava ni here hosi bara i bele muholi, ra i maea, “A Vure i mulangi, i vakaloboa a matenga.”
1CO 15:55 “O matenga, i vai a tuhamu go ratapile e huriki? I vai a maheto vomu, go padimate e huriki vona?”
1CO 15:56 A maheto na matenga, a naro hale. A vinara i habi a nitora na naro hale.
1CO 15:57 Pali si gi kavurikea a Vure. I rata hita si mulangi turane Isu Kristo, a Bakovi Dagi ne hita.
1CO 15:58 I mavonga, o huriki a turagu, ra a ngaru hateka, mu pesi tora, mu paha taga. Mu habi vakaroro a hatene mua na leho ne Bakovi Dagi, a vuhuna mu lohoka vona, a leho mu ratea ne Bakovi Dagi, i uka ma ge velu tavula.
1CO 16:1 Ngane ga taki tabu mua vona a naro na ni ru kadolu a moni ni kori e huriki a tara ne Kristo o Ierusalem. Mu rata manga a hini a taki e huriki a tara ne Kristo o Galesia.
1CO 16:2 Na Sande lobo, mua takutaku mu ru kadolu ranga moni mu bole na parava takutaku. Mu rata mavonga, na tahuna a lakene i uka ma mu gu papahari ni matakana a moni ni vakaru lakea ne ria.
1CO 16:3 Na tahuna a bele iene, mu vulaki ranga bakovi, ga rudu ria, ri gi taparakia o Ierusalem a kinori ne mua. Ga herea a raukea to go vakasiri o Ierusalem, ri gi matakilala tou, tou a bakovi kamumu.
1CO 16:4 Pali iau ga masia ge kamumu ga vano, bara to laho turagu.
1CO 16:5 Iau bara lakea taro na tabeke ne Masedonia, ga laho taro vonga. Muri bara lakene, bara gosi mua.
1CO 16:6 A ngaru ni made tabaka turane mua. Bara made turane mua na tahuna na malangia. Muri, ga pe mua, ga lokovai, bara mu kori iau na nilaho nau.
1CO 16:7 Iau bara lakene ngane, i uka ma ge kamumu, a vuhuna bara laho polopolo kunana. E Bakovi Dagi ge ngaru, a ngaru ga made tabaka turane mua.
1CO 16:8 Pali ngane ga made taro o Epesus, ge lobo taro a habu na Pentekos,
1CO 16:9 a vuhuna a Vure i kado puru pali a dalagu ga rata a leho dagi vona, ga vakabele a kanena dagi. Ri ala kupo hateka ri gege iau koea.
1CO 16:10 Na tahuna e Timoti i bele iene, mu rata kamumua, i uka ma ge mangenge. I rata a leho ne Bakovi Dagi manga iau.
1CO 16:11 Nahea tara viri ge biu ia. Mu tuhoria na tahuna i ngaru ni hamule valai nau, ge pe mua na nivalemu. A pasimata vona e Timoti ge hamule valai turana e huriki e turane hita.
1CO 16:12 E Apolos, e turane hita, a taki torea ge vano turana e huriki a turane hita, ri gi matai mua. Pali i uka ma i ngaru. Muri ma, ia ge malopi, bara i lakene, ge matai mua.
1CO 16:13 Mu matadoko. Mu pesi tata na niluhoi tora. Naha ni mangenge, mu kinigao.
1CO 16:14 A maki lobo mu rata, mu rata na naro na nivangaru.
1CO 16:15 Mu lohoka vona a kabu ne Stepanas. Ri pulo a narone ria muga ne huriki lobo na tabeke ne Akaia. Ri habi a hatene ria ni tuhori e huriki a tara ne Kristo. Mua e huriki a turagu, a ngaru mu gu
1CO 16:16 longototo e huriki a bakovi maea, turana e huriki ri rata a leho ne Bakovi Dagi.
1CO 16:17 A vivi vona e Stepanas, e Portunatus, e Akaikus to valai koea, to matai iau. To valai na murine mua,
1CO 16:18 to vakakamumu a hategu. Mua ranga, to vakakamumu a hatene mua. Mu togo e huriki a bakovi maea.
1CO 16:19 E huriki a tara ne Kristo na tanga lobo na tabeke ne Asia ri talo rike a haro ne mua. E Akuila rua e Prisila, e huriki a tara ne Kristo ri vapopo na ruma ne rua, ri talo rike na rane Bakovi Dagi a haro kamumu ne mua.
1CO 16:20 E huriki e turane hita ri talo mua. Mu vatagui na naro kamumu.
1CO 16:21 Iau, e Paulus, a herea na limagu a nitalo nau i lakene mua.
1CO 16:22 E rei a viri i uka ma i ngarua e Bakovi Dagi, a Vure ge rudurahea. O valai, Bakovi Dagi ne mia!
1CO 16:23 E Isu, a Bakovi Dagi, ge rata kamumu mua.
1CO 16:24 A ngaru hateka mua, ra mu rihi e Isu Kristo. I muholi.
2CO 1:1 Iau, e Paulus, a apostolo ne Isu Kristo, na ningaru na Vure. Maria e Timoti, a turane hita, miri herea a raukea iea. I lakea ne mua e huriki a tara na Vure mu made o Korin, turana e huriki a tara na Vure ri made na tabeke lobo ne Akaia.
2CO 1:2 A Vure, e tamane hita, turana e Bakovi Dagi e Isu Kristo, ru gu rata kamumu mua, ru gu habi a nivalemu ne mua.
2CO 1:3 Si gi kavurikea a Vure, e Tamane Bakovi Dagi ne hita, e Isu Kristo, e Tamane hita i dodo hita, a Vure i luke hita.
2CO 1:4 I luke maria na tahuna miri bole a maregoa, lakea maria ranga, bara miri luke e huriki ranga ri bole a maregoa na naro a Vure i luke maria vona.
2CO 1:5 Miri bole a nimadihi i kupo a vuhuna miri rihi e Kristo. I mavonga, e Kristo bara i luke hateka maria.
2CO 1:6 Na tahuna miri bole a maregoa, bara i kori mua, ni gi luke mua, ni gi korimule mua. Na tahuna a Vure i luke maria, bara i kori mua, ni gi luke mua. Mua ranga mu hatakia na tahuna mu hatenono, mu kaloho a nimadihi, ra maka nimadihi miri bole pali.
2CO 1:7 Miri lohoka muholi vona, a Vure ge luke mua i manga a hini i luke maria, a vuhuna mu bole a nimadihi i manga maria miri bole a nimadihi.
2CO 1:8 Mua o huriki a turagu, a ngaru mu gu lohoka vona a nimadihi a bolea o Asia. A nimadihi a bolea i dagi hateka, a keri ni kalohoa, lakea a luhoi ta ga mate.
2CO 1:9 I muholi, a luhoi ta ga mate. I bele mavonga, i uka ma ga luhoi tora mule iau. Ga luhoi torea a Vure, ra Vure i vakamahuri mule na matenga e huriki ri mate pali.
2CO 1:10 I korimule iau vona a maregoa dagi iea. Muri ma, tabu, bara i korimule iau. A luhoi torea, ge korimule iau vakaroro.
2CO 1:11 Mua ranga, mu kori iau, mu vasileki. Bara mu rata mavonga, e huriki ala kupo bara ri kavurikea a Vure na hini i longo a nivasileki ne huriki ala kupo, i vakabagetu iau.
2CO 1:12 A vivi vona a hini a hategu i uka ma i hataki hale vona tara maki a ratea. A nimadegu, a Vure i rata iau a made malamala. A maki lobo a rata, i uka ma a tami e huriki. I uka ma a luhoi tora a lohokanga na bakovi. A luhoi torea a naro kamumu na Vure. A naro nga a rata na matane huriki na malala. A rata hateka na matane mua.
2CO 1:13 A ngava a here mu gi, mu longokilala kunana. A ngaru mu gu longokilala liu,
2CO 1:14 i manga a hini mu longokilala popote pali. Muri ma na tahuna a Bakovi Dagi e Isu ge hamule valai, bara mu vivi nau, ge manga a hini iau a vivi ne mua.
2CO 1:15 A lohoka vona, lakea ta ga lakene taro ne mua, ga matai mua balaka rua.
2CO 1:16 Ta ga lakene ne mua muga ni lakea o Masedonia. Muri ta ga made tabu turane mua na tahuna a hamule valai o Masedonia, mu gu kori iau, ga hamule lakea o Iudea.
2CO 1:17 Ra mua, mu luhoi iau ta iau a viri ni pulo tavula a nitagu a ta maea? Mu luhoi iau, ta a ramai a naro na malala a rata puru a dalagu, a ta rua, a ta maea, “Ga lakene, i uka ma ga lakene?”
2CO 1:18 A Vure i ramai vakaroro a ngava i taki. Iau tara, na tahuna a taki ga rata a maki, i uka ma ga pulo tavula a ngavagu.
2CO 1:19 E Isu Kristo, a Tuna Vure, ra viri mateu e Sailas, e Timoti mete vakalongo mua vona, i uka ma i pulo lae a ngavana. E Isu i ramai vakaroro a ngava i taki.
2CO 1:20 A maki lobo a Vure i ta muholi vona ri bele muholi ne Isu. I mavonga si gi kavurike poloa ne Isu a Vure, si taki i muholi si kavurikea.
2CO 1:21 A Vure kunana a viri i rata hita si pesi tora ni rihi e Kristo. I vulaki hita,
2CO 1:22 i rua a kilakila ne hita, i vakasiri hita ne vona. I habi ne hita a Hanuna, ge made na hatene hita, i vakasiri manga i muholi hateka ge konamule hita.
2CO 1:23 A Vure i lohoka nau, iau a ta muholi na matana. I uka ma a lakene tabu o Korin, a vuhuna a koi ni vakamadihi mua.
2CO 1:24 I uka ma mete rata polo muga muga mete ge taki mua mu gu luhoi navai. Mete leho palupu turane mua, mu gu vivi, mu gu pesi tora na niluhoi tora.
2CO 2:1 I mavonga, a koi ni gosi tabu mua, ga vakamadihi tabu mua.
2CO 2:2 Iau bara vakamadihi mua, mu gu vakapitei navai iau? A vakamadihi pali mua.
2CO 2:3 Pali a ngava a here muga, a here mu gu pulo a vilone mua i uka ma mu gu habi a nimadihi nau. Mua kunana a viri bara mu vakapitei iau. Pali mua bara mu ramai a ngava a here na raukea iea, bara mu vivi, lakea iau tara bara vivi.
2CO 2:4 Na tahuna a herea a raukea muga, i lege hateka a lohogu, a tangi. Iau a here lakene, i uka ma a ngaru ni vakamadihi mua. A here lakene, mu gu lohoka vona, iau a ngaru hateka mua.
2CO 2:5 Ra bakovi i ratea a maregoa iea, i uka ma i vakamarego iau kunana. Mua ranga, i vakamarego mua. Pali a koi ni rata hateka a ngava vona.
2CO 2:6 A nimadihi mua ala kupo mu habia vona a bakovi iea, i kara ia pali.
2CO 2:7 Ngane mu longo kaburungi a naro hale vona, mu lukea, ma ge dodo hateka, ge rihate.
2CO 2:8 Na naro iea kunana, a ngaru hateka mu gu vakasiri tabu ia, mu ngaru hateka ia.
2CO 2:9 I muga a here lakene mua, a ngaru ni toni mua, mu gu longototo a ngavagu lobo, o ge uka.
2CO 2:10 E rei a viri mu lohopile a maregoa vona, iau tara a lohopile. Ge muholi ge tahoka a maregoa i rata virihi iau vona, na rane Kristo, a lohopile a naro hale vona, a vuhuna a ngaru mua.
2CO 2:11 A rata mavonga, e Satan i uka ma ge tami hita. I uka ma si manga vona a narona.
2CO 2:12 Na tahuna a bele o Troas ta ga vakalongo e huriki vonga na Velenga Kamumu ne Kristo, a masia e Bakovi Dagi i ratea pali a dalagu, ga ratea a leho vona.
2CO 2:13 Pali i uka ma a hataki kamumu, a vuhuna i uka ma a matavisia vonga a turagu, e Titus. Lakea a pe e huriki a Troas, a valai koea o Masedonia.
2CO 2:14 Pali iau a kavurike hatekea a Vure. Mi rihi e Kristo, a Vure i tuli mia na matane huriki lobo, mi manga a vora­kato vona i lakavu na vabinga. I rudu tala mia, mi vakalongo lae a Velenga Kamumu, i manga a pokona havu mangisipa i huli lae.
2CO 2:15 Si manga a havu mangisipa e Kristo i habi lakea na Vure. A mangine hita i huli lae ne huriki a Vure i korimule ria, i huli lae ne huriki ri velu.
2CO 2:16 Na tahuna e huriki a Vure i korimule ria ri burongi, i manginoro, a vuhuna i vakasiri ria ri gi mahuri vakaroro. Pali na tahuna e huriki ri velu ri burongi, i mavuru, a vuhuna i vakasiri ria bara ri vurua. E rei i kara ni ratea a leho iea?
2CO 2:17 E huriki ranga ri vara e huriki na nitana Vure, ri ngaru ri gi bole a moni vona. Pali i uka ma a rata mavonga. A Vure i rudu iau, lakea a vara e huriki na naro muholi na matana Vure, manga a vora ne Kristo.
2CO 3:1 Ra mua, mu luhoi a bibi rike mule a ragu? Mu luhoi ga manga e huriki a mari ni tovo ranga, ga ngarua tara bakovi ge here tara raukea, ge bibi rike iau, mu gu ngaru iau? Mu luhoi ga ngaru mua mu gu herea tara raukea maea? I uka liu!
2CO 3:2 Mua kunana, mu manga a raukea i bibi rike iau, ni here na hategu. E huriki ri masia, ri gia.
2CO 3:3 Mu vakasiri mua, mu manga a raukea e Kristo i herea, i vakaru poloa nau. I uka ma i herea na limana, i herea na Hanuna Vure i mahuri vakaroro. I uka ma i herea na kedo. I herea na hatene mua.
2CO 3:4 A ngava iea a lohoka vona i muholi, a vuhuna a luhoi torea a Vure ge kori iau polo ne Kristo.
2CO 3:5 Iau i uka ma a kara ga rata kikeri a leho iea. Iau i uka ma ga taki a kara ni ratea tara maki na matana Vure. A Vure kunana i habi a nitora nau ga rata a leho vona.
2CO 3:6 A Vure kunana i habi a nitora nau, ga vakalongo e huriki na ngava dagi karaba. A ngava dagi karaba iea i uka ma i ramai a vinara. I ramai a Hanuna Vure, a vuhuna a vinara i vakabele a matenga, pali a Hanuna Vure i habi a nimahuri vakaroro.
2CO 3:7 A Vure i here na kedo a vinara, i habi ne Moses. Ra vinara iea i vakabele a matenga. A matane Moses i para na bagetua na Vure. Lakea e huriki a Israel ri keri ni matanonoa a matane Moses, a vuhuna a nipara na matana i para dagi hateka. Pali a nipara iea, muri i maravunu.
2CO 3:8 Pali a bagetuanga na leho na Hanuna Vure i kamumu hateka na bagetua na leho na vinara.
2CO 3:9 A vinara, ra i taki e huriki lobo ri gi mate, i tahoka a bagetua vona. Pali a leho ne Kristo, ra i rata hita si malamala, a bagetuanga vona i kamumu hateka.
2CO 3:10 Ngane a vinara a Vure i habia ne Moses i uka bagetua vona, a vuhuna a leho na Hanuna Vure i tahoka a bagetuanga i dagi hateka.
2CO 3:11 A vinara a Vure i habia ne Moses, i tahoka a bagetua, pali i tabuli popote kunana, i lobo. Pali a leho na Hanuna Vure i tahoka a bagetuanga i dagi hateka, bara i tabuli vakaroro.
2CO 3:12 A ta kavakava kunana ne huriki. I uka ma a mangenge, a vuhuna a lohoka vona a ngava iea i muholi.
2CO 3:13 I uka ma a manga e Moses. E Moses i marikoi e huriki a Israel ri gi matanonoa a nipara na matana na tahuna i hoho puru. I maruhu, lakea i kavitagua a matana na lavalava.
2CO 3:14 Pali e huriki a Israel ri gigi tora. A gine ria i uvo na tahuna ri gi a ngava dagi hosi, i valai i harena mona. I manga a lavalava iea, e Moses i kavitagu a matana vona, i kavitagu a niluhoi ne ria. E Kristo kunana i kara ni vuka tala a maki i kavitagu a niluhoi ne ria, ri gi longokilala a ngava.
2CO 3:15 I muholi, na tahuna ri gi a hinere ne Moses, i manga a lavalava iea i tabana i kavitagu mavonga a niluhoi ne ria.
2CO 3:16 Pali na tahuna e huriki ri luhoi torea e Bakovi Dagi, i manga a lavalava i kavitagu muga a niluhoi ne ria, ni vuka tala.
2CO 3:17 E Bakovi Dagi a ta vona, ra Hanu Kiripiripi. E huriki ri tahoka a Hanune Bakovi Dagi ri matukapaga na vinara hosi.
2CO 3:18 Lakea hita lobo si matanonoa a bagetuanga ne Bakovi Dagi, a matane hita i uka ma ni kavitagu. I leho ni rata hita si gi manga ia, i rata maea, muri ma bara si manga muholi ia. A naro iea i valai na Hanune Bakovi Dagi.
2CO 4:1 Lakea i uka ma ge tohai a kuligu ni tovo e huriki na nitana Vure, a vuhuna a Vure i dodo iau, i habia nau a leho iea.
2CO 4:2 Pali a marikoi hateka a naro hale kapiloho a naro ni maruhu. A marikoi ni tami e huriki. A marikoi ni palele a nita na Vure. A ta kavakava kunana na ngava muholi, e huriki ri gi matakilala na hatene ria, iau a bakovi navai na matana Vure.
2CO 4:3 E huriki ranga ri taki ta a Velenga Kamumu nau i uka ma i kavakava. A hini i uka ma i kavakava ne ria, a vuhuna ri velu, bara ri puru na kanono.
2CO 4:4 A vure na malala i vakauvo a niluhoi ne huriki i uka ma ri luhoi torea e Kristo, i uka ma ri gi matai a nipara na Velenga Kamumu na bagetuanga ne Kristo, re Kristo ia a Vure.
2CO 4:5 Iau a vara e huriki, i uka ma a bibi rike mule a ragu. A tovo e huriki vona e Isu Kristo a Bakovi Dagi, pali iau a vora ne mua na ningaru ne Isu.
2CO 4:6 A Vure, ra viri i ta maea, “Ge palala,” ia kunana a Vure i vakapalala a gine hita, si gi lohoka vona a bagetuanga na Vure, ra i para na matane Isu Kristo.
2CO 4:7 A mahala nga i tabuli pololilo nau, ra iau a maki tavula manga a ulo. I vakasiri manga a uka nitora. A nitora lobo na Vure.
2CO 4:8 Iau ni vakamadihi na naro i kupo, pali i uka ma a vurua. A loho lege, pali i uka ma a rihate.
2CO 4:9 E huriki ri habi a nimadihi nau, pali a Vure i uka ma i lohopile iau. E huriki ri lagu iau, pali i uka ma a mate.
2CO 4:10 Na parava vakaroro e huriki ri ngaru ni rabalaki iau, i manga hosi ri ratea ne Isu. Na naro iea, i bele kavakava ne huriki, ne Isu i mahuri mule pali na matenga.
2CO 4:11 Na tahuna a made na malala, i tahoka e huriki ri ngaru ni rabalaki iau a vuhuna a ramaia e Isu. Na naro iea, e huriki bara ri matakilaka vona e Isu i mahuri mule pali na matenga.
2CO 4:12 I mavonga, na parava vakaroro a popote ga mate, lakea mua mu gu bole a nimahuri vakaroro.
2CO 4:13 Iau a luhoi torea a Vure, i manga a viri i herea na hinere, i ta maea, “A luhoi tora ioe, lakea a taki tala.” Iau tara a luhoi torea a Vure, lakea a taki tala.
2CO 4:14 A lohoka vona a Vure i vakamahuri mulea e Isu a Bakovi Dagi. I mavonga, bara i vakamahuri mule hita turane Isu, ge bole hita, si gi made turana.
2CO 4:15 A kaloho a maregoa nga ne vona ni tuhori mua, lakea a naro kamumu na Vure ge bele ne huriki ala kupo, ge vano vano, bara e huriki ala kupo ri kavurikea a Vure, ri vakabagetua.
2CO 4:16 I mavonga, i uka ma ge tohai a kuligu. A maka maregoa ri rata a kakaigu i viru, i malulu. Pali a Vure i vakatora a hategu na parava vakaroro.
2CO 4:17 A maka maregoa a bole na parava i popote ngane, i uka ma a maki dagi hateka, a vuhuna i rata puru nau a bagetuanga i dagi hateka, ge tabuli vakaroro. A bagetua nga ri rangi hateka a maka maregoa a bole ngane.
2CO 4:18 Ngane i uka ma a roe na maki a matai. A roe na maki si keri ni matai, a vuhuna a maki si matai ngane i uka ma ge tabuli vakaroro. Pali a maki si keri ni matai ngane bara ri tabuli vakaroro.
2CO 5:1 A kakaine hita i manga a kape kunana, i uka ma ge tabuli tabaka. Na tahuna si mate, a Vure bara i habi a kakaine hita karaba, ge tabuli vakaroro meli na hunu.
2CO 5:2 Na tahuna si made na kakaine hita na malala, si bole a nimadihi si dedo, si pasimata ni bole a kakaine hita na hunu.
2CO 5:3 Na tahuna si bole a kakaine hita karaba, i uka ma si gi manga a hanu kunana.
2CO 5:4 Na tahuna si tabana na kakaine hita, ra i manga a kape, si bole a nimadihi, si dedo. I uka ma i manga si ngaru ni mate, si gi pe a kakaine hita. Pali si ngaru ni bole a kakaine hita karaba meli na hunu. A kakaine hita karaba, ra ge mahuri vakaroro, bara i kuloi a kakaine hita ra bara i mate.
2CO 5:5 A Vure kunana a viri i pelekado puru hita, ge bele ne hita a naro iea. I habi ne hita a Hanuna, ge a kilakila na hini a Vure i ta muholi ge habi ne hita a kakaine hita karaba.
2CO 5:6 I mavonga, i uka ma a mangenge vona tara maki. A lohoka vona na tahuna a tabana ni made na kakaigu, a made basi ne Bakovi Dagi.
2CO 5:7 I uka ma a masia e Bakovi Dagi a ramaia. A ramaia, a vuhuna a luhoi torea.
2CO 5:8 I uka ma a mangenge vona tara maki, a vuhuna i kamumu ga mate, ga pe a kakaigu, ga made turane Bakovi Dagi.
2CO 5:9 Iau ga made koea na malala, o iau ga made na hunu turane Bakovi Dagi, a ningaru dagi nau, ga vakavivia,
2CO 5:10 a vuhuna hita lobo bara si pesi na matane Kristo, ge pelekado hita. Muri bara si bole a mapane hita takutaku na narone hita koea na malala. E huriki ri rata a naro kamumu bara ri bole a mapane ria. E huriki ri rata a naro hale, ria ranga bara ri bole a mapane ria.
2CO 5:11 I mavonga, a ta tora hateka vakaroro ne huriki ranga ri gi luhoi torea e Kristo, a vuhuna a mangenge ne Bakovi Dagi. A Vure i lohoka vona, iau a bakovi navai. A luhoi mua ranga mu lohoka nau na hatene mua.
2CO 5:12 A ngava iea, i uka ma a bibi rike mule a ragu, mu gu ngaru iau. A taki, mu gu vivi nau, mu gu kara ni koli a ngava ne huriki ri bibi rike mule a rane ria. E huriki ri bibi rike mule ria na hini a leho ne ria i mata kamumu hateka, pali a hatene ria i uka ma i malamala.
2CO 5:13 E huriki ranga ri taki iau, ta a manga. I uka maki, a vuhuna a maki lobo a rata ne vona ni ramai a ningaru na Vure. O ri taki a niluhoi nau i kamumu, mu lohoka vona, iau a leho ni kori mua.
2CO 5:14 E Kristo i ngaru hateka hita. A ningaru vona i matakari iau. A matakilaka vona e Kristo i mate na murine hita lobo. I mavonga, hita lobo, i manga si mate pali.
2CO 5:15 I mate na murine hita lobo. I mavonga a maki lobo si gi rata, i uka ma si gi ramai a ningaru ne hita. A maki lobo si gi rata, si gi ramai a ningaru na viri i mate na murine hita, muri ni vakamahuri mule na matenga.
2CO 5:16 I mavonga, i uka ma ga luhoi kado tabu e huriki na niluhoi na malala. Hosi a luhoi kadoa e Kristo na niluhoi na malala. Pali ngane i uka ma a luhoi mavonga tabu.
2CO 5:17 Na tahuna a viri i rihi e Kristo, a Vure i ratarike karabea, i manga a viri karaba. A rabu hosi vona i lobo. Ngane i ramai a rabu karaba.
2CO 5:18 A Vure kunana a viri i rata a maki nga. A Vure, na leho ne Kristo, i rata hita i uka ma hita a pile tabu na Vure. Hita a taho vona. I habi a leho ne hita, si gi rata e huriki ranga, ge ria a taho na Vure.
2CO 5:19 Ra i maea, na leho ne Kristo, a Vure i uka ma i luhoi tabu a naro hale ne hita. I rata hita i uka ma hita a pile tabu. Si made turana na nivalemu ngane. I habi a leho nau, ga rata e huriki ranga ri gi made turana Vure na nivalemu.
2CO 5:20 Na naro iea, iau a vinuru ne Kristo. A vakalongo polo ne huriki a ngavana Vure i nana tora e huriki ri gi pulo a vilone ria. I mavonga, a nana tora mua na rane Kristo, mu lobo ni pilea a Vure, mu made turana na nivalemu.
2CO 5:21 A Viri i uka liu a naro hale, a Vure i ratea i bole a mapana naro hale ne hita, ne vona ni korimule hita. Lakea e rei a viri i rihi ia, bara i malamala na matana Vure.
2CO 6:1 Iau a leho turana Vure, lakea a taki tora mua, naha ni ngalahere a naro kamumu a Vure i rata virihi hita vona.
2CO 6:2 A nitana Vure i ta maea, “Na parava a vulakia, a longo ioe. Na tahuna a parava i bele ta ga korimule ioe, a kori ioe.” Mu longo valai! A parava a Vure i vulakia i bele pali. Mona a parava a Vure ge korimule e huriki vona.
2CO 6:3 Iau i uka ma a ratea tara maki ge rata e huriki ri gi sibo. I uka tara maki ni gi matai na leho nau ga rata halea.
2CO 6:4 A maki lobo a rata i vakasiri manga iau a vora na Vure. A hatenono na tahuna a bole a nimadihi, a maregoa, a vuranga,
2CO 6:5 e huriki ri hotu iau, ri ru dili iau na bavi, e huriki ri vapopo, ri vakamadihi iau. A leho hateka. I uka ma a mahita. A vitolo.
2CO 6:6 A vakasiri manga iau a vora na Vure na tahuna a made malamala. A tahoka a lohokanga. A hatenono ne huriki. A rata kamumu e huriki. A Hanu Kiripiripi i made turagu. A ngaru muholi e huriki.
2CO 6:7 A vakasiri manga iau a vora na Vure a vuhuna a ta muholi vakaroro. A nitora na Vure i tabuli nau. A naro malamala nau i manga a bainat a galeu nau.
2CO 6:8 A vakasiri manga iau a vora na Vure na tahuna e huriki ri togo iau, na tahuna e huriki ri biu iau, na tahuna e huriki ri harogi iau, na tahuna e huriki ri kavurike iau. Ri rata manga iau a nitamina vora na Vure, pali iau a vora muholi na Vure.
2CO 6:9 E huriki ri rata manga i uka tara viri ge lohoka nau. Pali e huriki lobo ri lohoka nau. Ri rata manga a mate, pali iau a mahuri. Iau ni vakamadihi, pali i uka ma a mate.
2CO 6:10 A made dukuduku, pali a vivi vakaroro. A made manga a matasia, pali a rata e huriki ala kupo ri tahoka a mahala. A made manga a uka liu a maki, pali a maki lobo ne nau.
2CO 6:11 Iau a here kavakava lakene mua e huriki a Korin, a ngaru hateka mua.
2CO 6:12 A ngaru hateka mua na hategu, pali mua i uka ma mu ngaru hateka iau.
2CO 6:13 A ngaru mu gu ngaru iau i manga iau a ngaru mua. A ta maea, i manga a vara e huriki a koma.
2CO 6:14 Naha ni rihi e huriki i uka ma ri luhoi torea e Kristo, a vuhuna e huriki ri malamala ri vaperesi ne huriki ri putu puru a vinara. A ra maki kamumu ge bele na tahuna e huriki ri laho na nipara na Vure, ri gi laho turane huriki ri laho na uvo?
2CO 6:15 Re Kristo, ge valongo mai navai a ngava turane Satan? A viri i luhoi torea e Kristo, ge vaveru navai turana viri i uka ma i luhoi torea e Kristo?
2CO 6:16 Ni gi ru dili navai a nitamina vure na Roho na Vure? Pali hita a roho na Vure Mahuri. I manga a ngava a Vure i takia hosi, i maea, “Iau ga made turane ria, ga laho turane ria. Ge iau a Vure ne ria, ge ria e huriki a ngate nau.
2CO 6:17 E Bakovi Dagi ta maea, ‘Mu malele ha ne huriki i uka ma ria a ngate nau, naha ni laho turane ria. Naha ni dili na maka naro katoki ne ria, lakea bara bole dili mua,
2CO 6:18 ge iau e tamane mua, ge mua e huriki e tugu a bakovi a ngatavine. Iau e Bakovi Dagi Tuhaka Hateka a ta maea.’”
2CO 7:1 Mua o huriki a hategu, a ngava nga a Vure i ta muholi ne hita. I mavonga, si gi lohopile a maka rabu hale ri vakakatoki a kakaine hita, a hanune hita. Si gi mangenge na Vure, si gi bele malamala.
2CO 7:2 Mu ngaru iau na hatene mua. I uka ma a rata halea tara viri. I uka ma a vakahalea tara viri. I uka ma a tamia tara viri ga bole a moni vona.
2CO 7:3 A ngava iea a takia, i uka ma a padi virihi mua. A taki pali mua, mua a hategu. Bara si made palupu, bara si mate palupu.
2CO 7:4 A ta kavakava ne mua, i uka ma a mangenge. A vivi hateka ne mua. Na tahuna a luhoi mule mua, a niluhoi iea i luke iau. Na tahuna a bole a maregoa, a vivi hateka a vuhuna a luhoi mua.
2CO 7:5 Na tahuna a bele na tabeke ne Masedonia, i uka ma a malo ranga. Na tanga lobo a lakea vona e huriki ri rata tuhare iau. Pali iau tara, a loho pae pae.
2CO 7:6 Pali a Vure i vakatora vakaroro a niluhoi ne huriki, i vakatorea a niluhoi nau na tahuna e Titus i bele.
2CO 7:7 E Titus tara i vakalongo iau ne mua, i taki iau vona a hini mu vakatorea a niluhoi vona. Na tahuna i ta mavonga, i vakatora tabua a niluhoi nau. I taki iau ne mua ta mu pasimata ni matai iau, mu kilu vona a maka maregoa mu vakabele. E Titus i vakalongo iau ne mua, mu ngaru hateka ni ramai a nitagu. Na tahuna i vakalongo iau vona a maka ngava nga, iau a vivi hateka.
2CO 7:8 A raukea muga a here lakene mua i rata mua mu dodo, pali i uka ma a kilu vona a raukea a herea. I muholi a kilu popote muga. Pali a matakilaka vona na tahuna mu gia a raukea iea, mu dodo na parava popote kunana.
2CO 7:9 Ngane a vivi. I uka ma a vivi vona a hini mu dodo. A vivi a vuhuna a nidodo i rata mua mu pulo a vilone mua. A nidodo ne mua i valai na Vure, lakea i uka ma a vakamarego mua.
2CO 7:10 Na tahuna a viri i dodo na rabu hale vona ge manga a hini a Vure i ngarua ge rata, bara i pulo a vilona, i bole a nimahuri vakaroro. I uka ma ge kilu vona. Pali a viri i dodo na nidodo na malala, i uka ma ge pulo a vilona, i uka ma ge bole a nimahuri vakaroro. Bara i mate.
2CO 7:11 Mu dodo na nidodo i valai na Vure, lakea i rata mua mu ngaru hateka ni vakasiri manga i uka ma mu tahoka a ngava vona a nimava iea. Mu tahate kamumu vona a maregoa i vakabele a bakovi iea. Mu mangenge hateka na maki i ratea. Mu ngaru hateka ni matai iau. Mu vakamadihi kamumua ra viri i vakabelea a maregoa iea. A maki lobo mu rata, mu vakasiri manga mu uka ngava vona a maki iea.
2CO 7:12 Ra raukea a here mugea, a herea i uka ma ga pelekado a viri i rata a naro hale, o ga kori a viri ni rata virihi na naro hale vona. A here lakene mu gu matakilaka vona na matana Vure manga mu togo iau.
2CO 7:13 Na naro iea mu vakatorea a niluhoi nau. Mu vakatorea a niluhoi ne Titus, lakea na tahuna i valai koea, a masia i vivi hateka, lakea iau tara a vivi.
2CO 7:14 Hosi a vakalongoa e Titus a bibi rike hateka mua. Muri i vano i made turane mua, i uka ma a maruhu. A ngava a takia i muholi, i manga a ngava lobo a taki mua vona i muholi kunana.
2CO 7:15 Ngane e Titus i ngaru hateka tabu mua, a vuhuna i luhoi mule a hini mu longototo ia, mu taguia, mu togoa.
2CO 7:16 Ngane a vivi hateka, a vuhuna a lohoka hateka ne mua, mu rata a maki lobo a Vure i ngaru.
2CO 8:1 Mua o huriki a turagu, ngane a ngaru ni taki mua, a Vure i rata kamumu e huriki a tara vona o Masedonia.
2CO 8:2 Ri dili na nitoni dagi na maregoa dagi ri bolea, pali ri vivi hateka, ri hate balala. I muholi ri matasia, ri bala a moni, pali a kinori ne ria i dagi hateka.
2CO 8:3 Iau a ta muholi, i uka ma ri habi a moni ri kara ri gi habi. Na ningaru ne ria kunana, ri habi i kupo!
2CO 8:4 Ri taki tora iau i uka ma ga pupukari ria. Ri ngaru hateka ni tuhori e huriki a tara na Vure o Iudea.
2CO 8:5 A luhoi ri gi habi popote, pali ri habi i kupo. Muga ri habi mule ria ne Bakovi Dagi. Muri ri habi ria nau, i ramai a ningaru na Vure.
2CO 8:6 I mavonga a taki torea e Titus, ra i vakatubu turane mua, ge tuhori mua mu gu vakalobo a leho na nidodo iea.
2CO 8:7 Mu moro hateka na maki lobo mu rata. Mu moro ni luhoi tora. Mu moro ni ta. Mu moro na lohokanga. Mu moro ni vakasiri iau vona a ningaru dagi ne mua. I mavonga, mu vakasiri iau vona mu moro tabu na leho iea na nidodo.
2CO 8:8 A ta maea, i uka ma a vakuku mua. A vakalongo mua vona a ningaru dagi ne huriki ranga, ri ngaru ni kori, mu gu longoa, mu gu vakasiri mua ranga, i muholi a ningaru ne mua.
2CO 8:9 Mu lohoka vona a naro kamumu ne Isu Kristo a Bakovi Dagi ne hita. Muga ia a bakovi na mahala, i tahoka a maki lobo. Pali i luhoi mua, i taparaki a maki lobo nga, i bele manga a matasia. I rata mavonga, mu gu bele manga a bakovi na mahala, a mahala lobo na Vure ge ne vone mua.
2CO 8:10 Iau a luhoi maea. I kamumu mu gu vakalobo a maki mu tubu na pida i lakea pali. Na tahuna iea, mua kunana mu ngaru muga ne huriki lobo ni habi a kinori. Mua kunana mu tubu muga ne huriki lobo ni ru kadolu a moni.
2CO 8:11 Ngane mu vakalobo a maki mu tubu pali ni ratena. Ra hini muga mu ngaru hateka ni habi a kinori, ngane a moni mu gu habi ge karea a ningaru muga ne mua. A nihabi ne mua ge ramai a ra maki mu tahoka.
2CO 8:12 Mua bara mu ngaru hateka ni habi a maki na Vure, mu habi ge ramai a ra maki mu tahoka, lakea a Vure bara i vivi vona a maki mu habi. A Vure i uka ma i ngaru mu gu habi a maki i uka ma mu tahoka. Mu habi kunana a maki mu tahoka.
2CO 8:13 Na tahuna mu tuhori e huriki e turane mua, mu habi tavula a maki ne ria, i uka ma a ngaru mua mu gu bala a maki. A ngaru mua lobo mu gu palupulupu.
2CO 8:14 Ngane mu tahoka a mahala i kupo. I kara mua mu gu kori e huriki ri bala a maki. Muri ma, na tahuna mu bala a maki, pali ria ri tahoka a mahala i kupo, bara ri kori mua. Na naro iea, e huriki lobo bara ri palupu.
2CO 8:15 I manga a ngava ni here puru hosi na hinere, i ta maea, “E huriki ri poi i kupo, ri kani, pali i uka kalavana maki ge tabuli mule. E huriki ri poi i popote kunana, ri kani, ri maru.”
2CO 8:16 Iau a kavurikea a Vure, a vuhuna i ratea e Titus i ngaru hateka mua, i manga iau a ngaru hateka mua.
2CO 8:17 Na tahuna a takia e Titus ge lakene, i vivi vona a ngavagu. Ia tara i ngaru hateka ni lakene.
2CO 8:18 Ga rudua a turane hita tara ge tungaria e Titus. A bakovi iea i kamumu hateka ni taki tala a Velenga Kamumu, lakea e huriki a tara na Vure koea ri kavurikea.
2CO 8:19 A bakovi iea kunana, e huriki a tara na Vure koea ri vulakia ge laho turagu, miri gi taparakia a moni o Iudea ne vona ni kori ria. A leho iea, i vakadagi a rane Bakovi Dagi, i vakasiri e huriki a ngaru hateka ni kori.
2CO 8:20 Mete ge laho palupu, nahea tara viri ge padi virihi tavula iau, ta a vakavaroru a moni ne huriki ri hate balala, ri habi.
2CO 8:21 A ngaru ni rata a naro kamumu na matane Bakovi Dagi, na matane huriki a bakovi a ngatavine.
2CO 8:22 A bakovi tara tabu, e turane hita, ga rudua ge tungaria e Titus. A bakovi iea i vakasiri pali a ningaru dagi vona ni ratea a leho ne Bakovi Dagi. I lohoka vona mu ngaru hateka ni kori e huriki, lakea ia tara i ngaru hateka ni lakene.
2CO 8:23 E Titus, a vulakia ge lakene, a vuhuna i tungari vakaroro iau, miri kori mua. A bakovi ala rua nga, ra ru gu tungaria e Titus, rua a vinuru ne huriki a tara na Vure koea. A narone rua i kamumu, lakea e huriki koea ri kavurikea e Kristo ne rua.
2CO 8:24 A ngaru mu gu vakasiri tou a narone mua na nivangaru, lakea e huriki a tara na Vure ri gi matakilaka vona i navai a bibi rike a rane mua.
2CO 9:1 I uka a vuhuna ga taki mua mu gu kori e huriki a tara na Vure o Iudea,
2CO 9:2 a vuhuna a lohoka vona mu ngaru hateka ni kori ria. Iau a bibi rike a rane mua pali ne huriki a tara na Vure o Masedonia. A vakalongo ria ne mua e huriki a Akaia, mu vakatubu na pida i lakea pali ni ru palupu a moni. Na tahuna ri longo mua mu ngaru hateka ni habi a moni, ria ranga ri ngaru hateka ni habi a moni.
2CO 9:3 Pali ngane ga rudu lakene mua a bakovi ala tolu nga, to go tuhori mua ni ru palupu a moni. Muri e huriki lobo ri gi matakilaka vona a ngava a bibi rike a rane mua vona i muholi.
2CO 9:4 Muri, e huriki a Masedonia, ma ri gi lakene turagu ri gi matai mua i uka ma mu ru palupu ma a moni. Bara maruhu. Mua ranga bara mu maruhu hateka, a vuhuna mu taki pali ta mu gu habi.
2CO 9:5 A koi mu gu maruhu, lakea a taki a bakovi ala tolu nga, to go muga lakene, to go kori mua ni ru palupu a moni, ra mu ta muholi vona muga mu gu habi. Lakea ra moni nga, a kinori ne mua, i uka ma mu gu habi tuhare. Bara mu habi na hatene mua.
2CO 9:6 Mu luhoi kamumu a ngava nga: a viri i varo a uve popote bara i mirio a mavo popote kunana. Pali a viri i varo a uve i kupo bara i mirio a mavo i kupo.
2CO 9:7 Mua takutaku mu luhoi kamumu i riva moni mu gu habi. A viri i koi ni habi, nahea ge habi a moni. Naha ni habi tuhare, a vuhuna a Vure i ngaru e huriki ri habi na hatene ria.
2CO 9:8 Muri a Vure bara i hate balala, i vakatahoka mua vakaroro a maki mu ngaru. Bara mu tahoka hateka a maki, lakea bara mu kara ni tuhori e huriki ranga.
2CO 9:9 I manga a ngava ni here hosi na Hinere, i maea, “I hate balala, i kori e huriki a matasia. A Vure ge luhoi vakaroro a naro kamumu vona.”
2CO 9:10 A Vure ra viri i habi a vutuna maki ni varo, i vakabele a maki ni kani ne huriki, ia kunana bara i vakabele a vutune mua ge kupo, ge rata a naro malamala ne mua ge tahoka a kanena i kupo.
2CO 9:11 I muholi, a Vure ge gamai mua na naro lobo, mu gu kara ni hate balala vakaroro. Na tahuna mete taparaki ne huriki a matasia a moni ne mua, bara ri kavurikea a Vure.
2CO 9:12 Na tahuna mu kori mavonga e huriki ranga, a kanena bara i rua. E huriki a tara na Vure bara ri bole a maki ri uka vona. E huriki ala kupo bara ri kavurikea a Vure.
2CO 9:13 Na tahuna mu kori e huriki maea, bara ri vakabagetua a Vure. A naro hate balala ne mua, mu kori e huriki nga, mu kori e huriki a tara na Vure lobo, bara i vakasiri manga mu longototo a Velenga Kamumu ne Kristo.
2CO 9:14 Muri, bara ri ngaru hateka mua, ri vasileki ne mua, a vuhuna bara ri luhoi mule a hini a Vure i rata a naro kamumu hateka ne mua.
2CO 9:15 Si gi kavurikea a Vure vona a maki i habi tavula ne hita. I kamumu hateka, si keri ni tuveve polo na ngava!
2CO 10:1 Iau e Paulus, ngane a ngaru hateka mu gu longo iau. Iau a bakovi madoru, i manga e Kristo ia a bakovi madoru. I ranga ne mua ri pahaluhoi ta iau a mangenge ni ta puhaki mai mua na tahuna a made turane mua, pali na tahuna a made basi, a here a raukea, a ratapile mua na ngava.
2CO 10:2 Pali a taki tora mua, mu pulo a vilone mua. Bara mu rata mavonga, na tahuna a bele lake i uka ma ga ta puhaki mai e huriki ri pahaluhoi ta a ramai a naro na malala.
2CO 10:3 I muholi, iau a bakovi. Pali i uka ma a vaubi na naro na malala.
2CO 10:4 A lebo a bole, i uka ma a lebo na vabinga na malala. A lebo a bole a lebo tora na Vure. I tahoka a nitora ni ratapile a niluhoi na malala, ra niluhoi e huriki a pile ri taga vona. I tahoka a nitora ni ratapile a nitamina ngava ri gege hita vona.
2CO 10:5 A ratapile a niluhoi tagege lobo i rata e huriki i uka ma ri luhoi torea a Vure. A nugutata a niluhoi gigi tora ne ria, ri gi longototo a ngavane Kristo.
2CO 10:6 Muri, na tahuna mu longototo pali a ngavane Kristo, bara vakamadihi e huriki ri tabana ni longotaro.
2CO 10:7 Mu luhoi kado kamumu a maki mu matai. E rei a viri i taki ia, ta ia a viri ne Kristo, ge matakilaka vona, iau tara a viri ne Kristo.
2CO 10:8 Ma mu gu luhoi iau, ta a bibi rike mule hateka a ragu vona a nitora e Bakovi Dagi i habia nau, ga matakari mua. A nitora iea, i habia nau, i uka ma ga ratapile mua. I habia nau ga do rike mua. I mavonga, i uka ma a maruhu vona.
2CO 10:9 A here lakene mua, i uka ma ga vakamangenge mua.
2CO 10:10 E huriki ranga ri ta maea, “Na tahuna e Paulus i here, i ta puhaki hateka. Pali na tahuna i made turane hita, ia a malele piu, a ngavana i uka lehona.”
2CO 10:11 E huriki ri ta mavonga, a ngaru ri gi lohoka vona, i muholi, na tahuna a here lakene mua, a ta puhaki. Pali na tahuna a lakene, bara ta puhaki ne mua.
2CO 10:12 Pali a keri ni taki iau ga kamumu i manga e huriki a bakovi ranga iene. Ri ta paki paki hateka. Ri bibi rike mule a rane ria, ri taki ta ri kamumu hateka. Na tahuna ri pelekado mule ria, ri matai kunana e huriki e turane ria, ri rangi ria o i uka. Ri manga manga!
2CO 10:13 A Vure i habi nau a leho. I uka ma ga bibi rike mule iau vona tara maki i tabuli polovavo na leho a Vure i habia nau. Ga vivi vona kunana a maka maki pololilo na leho a Vure i habia nau. Mua mu tabuli pololilo na leho iea.
2CO 10:14 I mavonga, na tahuna a vara mua, i uka ma a page poloa a leho a Vure i habia nau. Iau kunana a viri a vara muga mua. Iau a viri a bele muga na tabeke ne mua, a vakalongo mua na Velenga Kamumu ne Kristo.
2CO 10:15 Iau i uka ma a bibi rike mule iau na leho na viri tara i ratea. A ngaru a niluhoi ne mua ne Kristo ge bele dagi, lakea a leho nau iene bara i bele dagi.
2CO 10:16 Muri bara lakea na maka tabeke mule lokovonga, ga vakalongo a Velenga Kamumu ne ria. A koi ni bibi rike tavula iau na leho na viri tara i ratea.
2CO 10:17 A hinere i ta maea, “A viri i ngaru ni bibi na maki tara, ge bibi vona a maki e Bakovi Dagi i rata.”
2CO 10:18 A viri i bibi rike mule a rana, nahea. Pali a viri e Bakovi Dagi i bibi rikea, ia a viri a Vure i ngarua.
2CO 11:1 Mu hatenono taro. Ga ta manga manga popote. Mu hatenono taro.
2CO 11:2 Iau a bage ne mua i manga a Vure i bage ne mua. Mu manga a sirula a habikaria na bakovi ala taku kunana, re Kristo.
2CO 11:3 Pali a mangenge, ma ni gi tami mua, mu gu lobo ni luhoia e Kristo na naro malamala, na naro muholi, i manga hosi a mata i tamia e Eva.
2CO 11:4 E huriki ranga ri bele ne mua, ri vara mua ne Isu, i tebi na ngava a vara mua vona, o ri vara mua na Hanuna Vure, i tebi na ngava a vara mua vona, o ri vara mua, i tebi na Velenga Kamumu mu luhoi tora mugea. Pali i navai mu vivi ni longo mai kunana?
2CO 11:5 Re huriki nga, ri tovo mua na maka ngava taminga, ri taki ria, ta ria a apostolo kamumu hateka. Pali iau a lohoka vona, i uka ma ri rangi iau.
2CO 11:6 I muholi i uka ma a voro kamumu hateka a ngava. Pali i uka ma a bala a lohokanga. A vakasiri mavonga ne mua pali na naro legelege na parava vakaroro.
2CO 11:7 Iau a tovo mua na Velenga Kamumu na Vure, lakea a vakakiroko iau, i uka ma a taki mua mu gu kona iau. Pali mu luhoi navai? A rata a rabu hale?
2CO 11:8 Na tahuna a tovo mua, e huriki a tara na Vure na tanga ranga ri kori iau na moni. Iau i uka ma a kori ria ri gi kona iau. I manga a bole tavula a moni ne ria, a lakene, a leho tavula turane mua.
2CO 11:9 Na tahuna a made turane mua, lakea a bala a maki, i uka ma a bole ne mua ranga maki. I uka ma a vakapae mua, a vuhuna e huriki a turane hita o Masedonia ri valai ri habi a maki nau. Hosi i uka ma a vakapae mua. Muri ma ranga, i uka ma ga vakapae mua.
2CO 11:10 Iau a vivi vona a hini i uka ma a vakapae mua na tahuna a made turane mua. A ngava muholi ne Kristo i tabuli na hategu, lakea a taki muholi mua: I uka tara viri na tabeke ne Akaia ge hatekakari iau vona a ngava nga.
2CO 11:11 I navai a rata mavonga? A rata mavonga a vuhuna a ngaru hateka mua. A Vure i lohoka vona iau a ngaru hateka mua.
2CO 11:12 I muga i uka ma a bole a moni ne mua, muri ma ranga i uka ma ga bole a moni ne mua. A rata mavonga, e huriki ri taki ta ria a apostolo kamumu hateka, i uka ma ri gi taki ri manga iau.
2CO 11:13 E huriki a bakovi nga, a nitamina apostolo. Ri tami e huriki na leho ne ria, ri tamilalu ta ria a apostolo ne Kristo.
2CO 11:14 I uka ma a turutu ne ria, a vuhuna e Satan tara i tamilalu, ta ia a agelo na nipara.
2CO 11:15 Lakea i uka ma si gi turutu vona na tahuna e huriki a vora ne Satan ri tamilalu, ta ria a vora malamala na Vure. Muri ma bara ri bole a mapana rabu hale ne ria.
2CO 11:16 A taki tabu mua, naha ni luhoi ga ta manga manga. Pali mua mu gu luhoi ta iau a manga, pali, mu longo kunana a nitagu. Ga bibi taro.
2CO 11:17 Ra naro ni bibi rike mule iau, i uka ma a narone Bakovi Dagi. A narona manga.
2CO 11:18 Pali e huriki ranga ri leho turane mua ri bibi rike mule ria vona a leho na malala ri ratea. I mavonga, iau tara ga bibi rike mule iau.
2CO 11:19 Mu pahaluhoi ta mu moro hateka, pali mu vivi hateka ni longo mai a ngava ne huriki a manga.
2CO 11:20 I navai mu ngaru e huriki ri vakavora mua, ri bole tavula a maki ne mua, ri vakaholi mua, ri rata polo muga muga ne mua, ri ta hale mua?
2CO 11:21 Iau i uka ma a rata a maka rabu nga. Mu luhoi navai, ga maruhu a vuhuna i uka ma a kinigao ni rata a rabu hale nga? Iau ga bibi rike mule iau, a vuhuna e huriki a nitamina apostolo nga ri rata mavonga. Ngane a ta manga a manga.
2CO 11:22 Ri taki ria, ta ria a Hibru. Iau tara, iau a Hibru. Ri taki ria, ta ria a koma o Israel. Iau tara, iau a koma o Israel. Ri taki ria, ta ria a hamone Abraham. Iau tara, iau a hamone Abraham.
2CO 11:23 Ri taki ria ta ria a vora ne Kristo. Iau a rata hateka a leho ne Kristo! Masia, ngane a ta manga manga! Ri leho popote, pali iau a leho hateka. Ria, i uka ma ri dili na bavi, pali iau ni ru dili na bavi balaka kupo. Iau ni lagu hale balaka i kupo hateka, a keri ni gi. Iau popote ga mate balaka kupo.
2CO 11:24 Balaka lima e huriki a Iuda ri lakavu iau, ri lagu iau na lebo balaka ravulu tolu a polona i polova (39).
2CO 11:25 Balaka tolu e huriki a Rom ri lakavu iau, ri lagu iau na kai. E huriki a Iuda ri padi iau na kedo, ta ri gi padimate iau. Balaka tolu a sip a rike vona i mabubu. Na parava tara a sip i mabubu, a pasi na utu na parava i taku, a rodo i taku.
2CO 11:26 Balaka kupo a havai, i bole butubutu iau a vuranga. Na tahuna ranga a bole butu a vuranga na tahuna a tulu polo a naru. Na tahuna ranga a bole butu a vuranga na bakovi ni panaho. Na tahuna ranga a bole butu a vuranga ne huriki a viri nau a Israel. Na tahuna ranga a bole butu a vuranga ne huriki i uka ma ria a Israel. A bole butu a vuranga na maka tanga a bele ne ria. A bole butu a vuranga na robo i ngeki. A bole butu a vuranga na dari. A bole butu a vuranga ne huriki ri tatami ni ramai e Kristo.
2CO 11:27 A leho hateka, na parava ranga i uka ma a mahita kamumu. Na parava ranga a vitolo, a marohu, a malangangi a vuhuna a uka maki ni kavitagu iau vona.
2CO 11:28 I uka ma a maki nga kunana a bole a maregoa ne ria. Pali na parava vakaroro a loho lege ne huriki a tara na Vure na maka tanga a tovo ria pali na Velenga Kamumu.
2CO 11:29 Na tahuna a longoa a turagu tara i uka ma i pesi tora ni luhoi e Kristo, a dodoa. Na tahuna a longoa a bakovi tara i tulia a turagu tara ge rata a naro hale, i madihi hateka a hategu.
2CO 11:30 E huriki a nitamina apostolo nga ri bibi rike mule ria, lakea iau tara ga bibi rike iau. Pali i uka ma ga bibi rike iau na maki kamumu a rata. Ga bibi rike iau na hini a uka a nitora.
2CO 11:31 A Vure, e Tamane Bakovi Dagi ne hita, e Isu, ra ni gi kavurike ia vakaroro, i lohoka nau, i uka ma a tami mua.
2CO 11:32 Na tahuna a lakea o Damaskus a matakari i leho ne Aretas a hariki, i ngaru ni lakavu iau. Lakea i rudu e huriki a tagari ri gi lakavu iau na poridala na tanga.
2CO 11:33 Pali e huriki a turagu vonga ri vakatavore puru iau na gagana nure dagi na tanga, lakea a ha.
2CO 12:1 Ra hini a bibi rike mule iau bara i uka kanena, pali ga ta lokovonga. Ga vakalongo mua vona a vuregu, a maki e Bakovi Dagi i vakasiri a viri vona.
2CO 12:2 A lohoka vona tara bakovi i rihi e Kristo. Na pida i ravulu a polona i va (14) i lokovonga pali, a Vure i bole sikea na hunu. Na tahuna i sike lakea, i uka ma a lohoka vona, ia muholi, o i vurena kunana. A Vure i lohoka vona.
2CO 12:3 Ra bakovi iea, ia muholi i sike na paradiso, o i vurena kunana, i uka ma a lohoka vona, a Vure i lohoka. Pali iau a lohoka vona
2CO 12:4 ni bole sike na hunu. I longo a maka maki, a ngavane hita i keri ni tuveve. A Vure tara i takia nahea ge tuveve polo.
2CO 12:5 A maki iea i bele, i kamumu ga bibi vona, pali i uka ma ga ratea. A maki bara bibi rike mule iau vona kunana, a hini iau a uka nitora.
2CO 12:6 Pali iau bara bibi rike mule iau, i uka ma ga manga, a vuhuna a ngavagu bara a ngava muholi. Pali i uka ma ga bibi rike mule iau, a vuhuna a koi e huriki ri gi pelekado iau na vuregu. A ngaru ri gi pelekado iau na maki a taki, na maki a rata.
2CO 12:7 Ni habi nau a maregoa, i uka ma ga gigi tora vona a maki a Vure i vakasiri nau. A vinuru ne Satan i rata iau, i uka ma ga gigi tora.
2CO 12:8 Balaka tolu a nana torea e Bakovi Dagi ge bole vurokia a maregoa iea,
2CO 12:9 pali i koli, i ta maea, “I uka. A naro kamumu nau ge kara ioe, a vuhuna na tahuna o uka a nitora, a nitora nau pololilo vomu i bele kavakava.” I mavonga, ngane a vivi ni bibi rike mule iau vona a hini a uka nitora, lakea a nitora ne Kristo ge tabuli pololilo nau.
2CO 12:10 I mavonga a vivi kunana na tahuna a uka a nitora, e huriki ri harogi iau, a bole a maregoa, e huriki ri vakamadihi iau, a bole a nimadihi na rane Kristo. A vivi kunana, a vuhuna na tahuna a uka a nitora, a Vure i kori iau na nitora vona.
2CO 12:11 Iau a ta manga a manga, pali mua kunana mu rata iau a ta manga a manga, a vuhuna i uka ma mu ta kamumu mai iau. Mua bara mu ta kamumu mai iau, a vuhuna re huriki mu taki ta ria a apostolo kamumu hateka, i uka ma ri rangi iau, ra iau a bakovi tavula.
2CO 12:12 Na tahuna a made turane mua, a hatenono ne mua, a vakasiri ne mua, ne iau a apostolo muholi. A rata a maka niva­kasiri, a maki ni turutu vona, a vaka­siri a nitora dagi.
2CO 12:13 I navai? Mu luhoi a rata kamumu e huriki a tara na Vure na tanga ranga, pali mua i uka ma a rata kamumu mua? I navai a hini mavonga? A bole a moni ne ria, pali i uka ma a bole a moni ne mua. Mu puga vuroki a naro hale nau!
2CO 12:14 A made turane mua balaka rua pali. Ngane ga lakene tabu, ga made turane mua. I uka ma ga vakapae mua, ga nongi a moni. I uka ma a ngaru a moni ne mua. A ngaru mua. A koma i uka ma ge matakaria e tamana. E tamana bara i matakaria a koma.
2CO 12:15 Iau a vivi ni habi lobo ne mua a maki nau, ga kori a hanune mua. A vivi kunana ni kori mua na nitora lobo nau. Iau a ngaru hateka mua, pali mua i uka ma mu ngaru hateka iau.
2CO 12:16 Mu lohoka vona i uka ma a vakapae mua, ga bole a moni ne mua. Pali mu taki ta a tami mua, a bole a moni ne mua.
2CO 12:17 Na tahuna a rudu lakene e huriki a turagu, i uka ma ri bole a maki ne mua.
2CO 12:18 Na tahuna a rudu lakenea e Titus, a rudu tabua e turane hita tara i tungaria. Pali e Titus, i uka ma i bole a moni ne mua, a vuhuna a niluhoi, a narone maria e Titus i taku kunana.
2CO 12:19 Mu luhoi navai, iau a herea a raukea iea ne vona ni tagari iau? I uka. Iau a rihi e Kristo, a herea a raukea iea na matana Vure ga vakatora a niluhoi ne mua. A maki lobo a rata ne vona ni vakatora mua kunana, mua e huriki a turagu.
2CO 12:20 Iau ga lakene, pali a mangenge, ma ga matai mua mu gu naro tebi na naro a ngaru ta mu gu rata. Lakea mua ranga, bara mu matai iau i mapulo a narogu. A mangenge ga matai mua mu gu vahehe, mu gu vamasigoro, mu gu vatahate, mu gu vapida lae, mu gu vapadimomo, mu gu ta tavulavula, mu gu putu ngingi, mu gu rata viliha.
2CO 12:21 A mangenge vona a Vure nau, ma ge vakakiroko iau na matane mua, bara tangi hateka a vuhuna e huriki ri rata a rabu hale muga, i uka ma ri pulo ma a vilone ria. Re huriki ri rata a naro na molenga.
2CO 13:1 Iau a vano a made turane mua balaka rua pali. Ngane bara lakene tabu. I manga a ngava ni here na hinere i ta maea, “A viri ge ala rua, o ge ala tolu to go matai a viri i rata a naro hale, to go taki tala na murina na nivapelekado.”
2CO 13:2 Hosi, na tahuna a made turane mua, a vakalongo mua pali. Ngane a made basi, a vakalongo tabu mua. Na tahuna ga lakene, i uka ma ga dodoa tara viri. Bara vakamadihi e huriki ri rata a rabu hale,
2CO 13:3 a vuhuna mu ngaru hateka iau ga vakasiri mua ne Kristo i ngavapolo nau na maka ngava a taki mua vona. E Kristo i uka ma i kori kiroko mua. I kori dagi mua.
2CO 13:4 Na tahuna e Kristo ni paditata na kai tavalavala, e huriki ri luhoi ta ia i uka nitora. Pali a nitora dagi na Vure i vakamahuri mule ia. I mavonga, iau a uka nitora, pali iau a mahuri na nitora dagi na Vure, i kori iau ga tuhori mua.
2CO 13:5 Mu luhoi kado a nimadene mua, mu luhoi tora muholi, o i uka? Bara mu luhoi tora muholi, e Isu Kristo bara i made pololilo ne mua. O ge uka, i uka ma i made pololilo ne mua.
2CO 13:6 Iau a lohoka vona, na tahuna mu luhoi kado a maki lobo a taki, a maki lobo a rata, bara mu matakilaka vona iau a apostolo muholi ne Kristo.
2CO 13:7 A vasileki na Vure, nahea mu gu rata a naro hale. A vasileki mavonga, i uka ma ne vona e huriki ri gi matai iau a apostolo muholi. A vasileki mavonga, mu gu ramai a naro kamumu. I uka maki vona e huriki ri gi luhoi ta iau a nitamina apostolo.
2CO 13:8 I uka ma ga rata tara maki ge vakahale a ngava muholi na Vure. Ga rata kunana a maki ge ramai a ngava muholi na Vure.
2CO 13:9 Iau a vivi kunana na tahuna iau a uka nitora, pali mua mu kinigao. A vasileki hateka mu gu bele moro na niluhoi tora.
2CO 13:10 I mavonga a here lakene mua na tahuna a made basi ne mua. A ngaru na tahuna a luve ne mua, i uka ma ga ta puhaki mai mua na nitora e Bakovi Dagi i habia nau. A nitora iea i habia nau, i uka ma ga ratapile mua. I habia nau ga tuhori mua.
2CO 13:11 Mua o huriki a turagu, a ngava nau i lobo. Mu vivi. Mu hamule mai a naro kamumu. Mu valuke. Mu pesi taku, na niluhoi ge taku. Mu made palupu na nivalemu. Na tahuna mu rata a naro nga, a Vure na naro na nivangaru, na naro na nivalemu, bara i made turane mua.
2CO 13:12 Mu vangaru, mu vatuba a lima.
2CO 13:13 E huriki a tara na Vure koea o Masedonia ri talo mua.
2CO 13:14 E Isu Kristo a Bakovi Dagi ge rata a naro kamumu ne mua. A Vure ge vaka­siri a ningaru dagi vona ne mua. A Hanuna Vure ge made turane mua lobo.
GAL 1:1 Iau e Paulus a herea ra raukea iea. Iau a apostolo. I uka tara bakovi ge vulaki iau. E huriki i uka ma ri rudu iau ge iau a apostolo. E Isu Kristo, turana Vure, e Tamana, ra viri i vakamahuri mulea na matenga, rua kunana ru vulaki iau, ru rudu iau ge iau a apostolo.
GAL 1:2 E huriki a turane hita ri made koea, ri pesi turagu, mi vakarua ra raukea iea i lakene ne mua e huriki a tara ne Kristo mu made na tabeke ne Galesia.
GAL 1:3 A Vure, e Tamane hita, turane Isu Kristo, a Bakovi Dagi, ru gu rata kamumu mua, ru gu habi a nivalemu ne mua.
GAL 1:4 E Kristo i muri mai a ningaru na Vure, re Tamane hita, i habi mule ia na Vure, i manga a nihabi na naro hale ne hita, ne vona ni korimule hita na naro hale na malala iea.
GAL 1:5 A Vure ge bole vakaroro a bagetuanga. I muholi.
GAL 1:6 A turutu ne mua, a vuhuna mu lohopile malaviriri a Viri i gale mua na nidodo ne Kristo, mu nunu muri mai a ngava tebi.
GAL 1:7 Pali i muholi hateka, i uka tabu tara Velenga Kamumu. Pali e huriki ranga ri vakamarego mua, ri ngaru ni vakavaroru a Velenga Kamumu ne Kristo.
GAL 1:8 Pali mia, o a agelo tara na hunu ge vara mua na Velenga Kamumu ge tebi na Velenga Kamumu mi vara mua vona muga, a Vure ge rudurahea.
GAL 1:9 Ra ngava nga, mi takia pali hosi, ngane ga taki tabua, i maea, e rei a viri i vara mua na Velenga Kamumu i tebi na Velenga Kamumu mu bolea pali, a Vure ge rudurahea.
GAL 1:10 Pali mu luhoi navai, ra ngava a rata, a rata e huriki ri gi vivi nau, o a rata a Vure ge vivi nau? Mu luhoi navai? A toni ni rata e huriki a bakovi ri gi vivi nau? I uka. Iau bara rata mavonga, i uka ma ge iau a vora ne Kristo.
GAL 1:11 Mua e huriki a turagu, a ngaru mu gu lohoka vona, a Velenga Kamumu a vara e huriki vona i uka ma a ngavana bakovi kunana.
GAL 1:12 Iau i uka ma a bolea na bakovi. I uka tara viri ge tovo iau vona. E Isu Kristo i vakasiri iau vona a Velenga Kamumu.
GAL 1:13 Mu longo pali a maka maki a rata hosi, na tahuna a muri mai a lotu ne huriki a Iuda. Iau a vakamadihi hateka e huriki a tara ne Kristo, a toni ni vakalobo ria.
GAL 1:14 A leho tora hateka ni muri mai a rabune huriki a gare nau hosi. Na naro iea kunana, a rangi a narone huriki a Iuda, mia a hisi i taku, na naro na lotu ne huriki a Iuda.
GAL 1:15 Na tahuna e nana i uka ma i poda iau ma, a Vure i vulaki iau pali. Na naro kamumu vona i gale iau. Na parava i vulakia,
GAL 1:16 i vakasiria nau e Tuna, ne vona ni rata iau ga tovo e huriki vona, re huriki i uka ma ria a Iuda. Na tahuna i vakasiria nau e Tuna, i uka ma a vano ga nanea tara bakovi.
GAL 1:17 Iau i uka ma a lakea o Ierusalem ga matai e huriki ri bele manga a apostolo muga ne nau. Iau a lakea o Arabia, muri a hamule sike o Damaskus.
GAL 1:18 Muri na pida i tolu a lakea o Ierusalem, a ta turane Sipas. A made turana na parava i ravulu a polona i lima.
GAL 1:19 I uka ma a matai e huriki a apostolo ranga. A viri a matai kunanea e Iakop, e tarine Bakovi Dagi.
GAL 1:20 Ra ngava a vakalongo mua vona ngane, i uka ma a tatami. A ta muholi hateka na matana Vure.
GAL 1:21 Muri a lakea na tabeke ne Siria e Silisia.
GAL 1:22 Na tahuna iea, e huriki a tara ne Kristo na tabeke ne Iudea i uka ma ri matai iau ma na matane ria.
GAL 1:23 Ri longo kunanea a velengagu, ri ta maea, “Ra bakovi iea, hosi i vakamadihi hita, pali ngane i vara e huriki vona ra ngava i toni ni ratapilea hosi.”
GAL 1:24 I mavonga ri kavurikea a Vure vona a maki i bele nau.
GAL 2:1 Muri na pida i ravulu a polona i va, a sike tabu o Ierusalem. A sike turane Barnabas. E Titus tara, a tulia.
GAL 2:2 A sike lakea, a vuhuna a Vure i vakasiri iau ga sike. Na tahuna a bele, a made kikeri turana e huriki ri mata dagi. A vakalongo ria vona a Velenga Kamumu a taki tala ne huriki i uka ma ria a Iuda. A rata mavonga, a vuhuna a leho a rata ngane turana leho a rata muga pali, ma ge velu tavula.
GAL 2:3 E Titus tara, ra i laho turagu, ia a bakovi o Gris. Pali i uka ma ri tugua ni gi pala a kulina.
GAL 2:4 Pali e huriki ranga ni tuli dili kapiloho, ri tamilalu ta ria e huriki a turane hita. Ria a kasisi, ri dili kapiloho ne vona ni kasisi a hini e Isu Kristo i rata hita si matukapaga na Vinara. Ri ngaru ni rata hita si gi vora tabu na vinara.
GAL 2:5 Pali i uka ma mi longo mai ria, i uka liu, a vuhuna mi ngaru a ngava muholi na Velenga Kamumu i uka ma ge mapulo, pali mu gu ramai muholi vakaroro.
GAL 2:6 Lakea e huriki ri mata dagi. Ra hini ria a bakovi dagi o i uka, i uka ma a luhoi hatekea. A Vure i pelekado e huriki lobo na naro i taku kunana. A taki maea, re huriki ri mata dagi i uka ma ri hudo tala ranga ngava na Velenga Kamumu nau.
GAL 2:7 Ri matakilaka vona a leho ni habi nau, ga vakalongo a Velenga Kamumu ne huriki i uka ma ria a Iuda, i manga e Petrus i vakalongo e huriki a Iuda.
GAL 2:8 A vuhuna a Vure i habi a nitora ne Petrus ge rata a leho na apostolo turana e huriki a Iuda, ia kunana a viri i habi a nitora nau ga rata a leho ne huriki i uka ma ria a Iuda.
GAL 2:9 I mavonga, na tahuna e Iakop, e Sipas, re Petrus, e Ioanes, ra to manga a butu na lotu, to matakilaka vona a Vure i habi a leho nau, to tuba a limane maria e Barnabas, to rudu lakea maria ne huriki i uka ma ria a Iuda. Pali tou to go leho turana e huriki a Iuda.
GAL 2:10 A ngava i taku kunana to taki maria vona. To taki maria, miri gi tuhori e huriki a matasia. Pali a leho iea, a ngaru hateka muga ni ratea.
GAL 2:11 Pali muri e Petrus i valai o Antiok. Iau a tahatea a vuhuna i rata a naro hale.
GAL 2:12 I muga i kani turana e huriki i uka ma ria a Iuda. Pali na tahuna e huriki a bakovi ri valai ne Iakop, i lobo ni kani turana e huriki i uka ma ria a Iuda, i made here here ne ria, a vuhuna i mangenge ne huriki a tara ni pala a kuli.
GAL 2:13 E Petrus i rata mavonga, lakea e huriki a Iuda ranga, ria ranga ri muri mai a vilo na taminga iea. Muri e Barnabas tara, i varoru, i ramai a vilo na taminga ne ria.
GAL 2:14 Iau a matai a vilone ria, i uka ma ri ramai a vilo muholi na Velenga Kamumu, lakea a takia e Petrus na matane ria lobo, a ta maea, “Ioe a Iuda, pali i uka ma o made manga a Iuda. O made manga a viri i uka ma ia a Iuda. I mavonga, i navai go tugu tuhare e huriki a bakovi i uka ma ria a Iuda, ri gi made manga a Iuda?”
GAL 2:15 Mia ni poda, mia a Iuda. I uka ma mi manga e huriki a bakovi hale, ra i uka ma ria a Iuda.
GAL 2:16 Pali ngane mi lohoka vona i uka tara viri ge ramai lobo a vinara na Vure, lakea a Vure ge galea a bakovi kamumu. A viri a Vure i galea a bakovi kamumu, ra viri i luhoi torea e Isu Kristo. I mavonga, mia ranga, mi luhoi torea e Isu Kristo, lakea a Vure i gale mia a bakovi kamumu. I uka ma mi gi ramai a vinara na Vure, lakea a Vure ge gale mia a bakovi kamumu, a vuhuna si keri ni ramai a vinara lobo vona, ge gale hita a bakovi kamumu.
GAL 2:17 Pali na tahuna mi ngarua a Vure ge gale hita a bakovi kamumu, lakea si luhoi torea e Kristo, pali muri si matakilaka vona hita a bakovi hale, si gi ta navai? E Kristo ia a vora na naro hale? I uka liu!
GAL 2:18 Iau bara hae rike tabu a maki a puka pali, a vakasiri manga iau a viri ni putu puru a vinara.
GAL 2:19 A vinara i rata iau a mate pali, a matukapaga na nitora vona. I bele mavonga, ga muri mai kunanea a Vure. I manga iau ni paditata na kai tavalavala turane Kristo.
GAL 2:20 Ngane iau i uka ma a viri a mahuri, pali e Kristo i mahuri pololilo nau. A maki lobo a rata koea na malala, a rata a vuhuna a luhoi torea a Tuna Vure, ra i ngaru hateka iau, i mate na murigu.
GAL 2:21 Ra hini a Vure i rata kamumu hita, i gale hita si malamala na matana, iau i uka ma ga marikoi vona, a vuhuna ge muholi a viri ge ramai a vinara, lakea a Vure ge galea a bakovi malamala, a nimatene Kristo ngane bara i uka lehona.
GAL 3:1 Mua e huriki a bakovi a ngatavine o Galesia, mu manga! E rei i tami mua? I navai? Mu longo kaburungi pali a hini a vakalongo kavakava ne mua na matane huriki lobo, ne Isu Kristo i mate na kai tavalavala na murine mua?
GAL 3:2 A ngaru ni nana mua vona a ninana i taku kunana. Ra Hanu Kiripiripi, mu bole navia? Mu bolea na tahuna mu ramai a vinara, o mu bolea na tahuna mu longo a Velenga Kamumu, mu luhoi torea?
GAL 3:3 Mu manga a manga! A nilaho ne mua turane Kristo, mu vakatubua na nitora na Hanu Kiripiripi. Pali i navai? Ngane mu ngaru ni laho na nitora na kakaine mua?
GAL 3:4 Ra maka maregoa ri bele ne mua na tahuna mu luhoi torea e Kristo, ma mu gu kaloho tavula.
GAL 3:5 Ra Viri i habi ne mua a Hanu Kiripiripi, i rata na kurukurune mua a nivakasiri. I navai i rata mavonga? I rata a vuhuna mu ramai a vinara vona, o i rata mavonga a vuhuna mu longoa a Velenga Kamumu, mu luhoi torea?
GAL 3:6 Mu luhoia e Abraham. Ni here virihi e Abraham, i maea, “i luhoi torea a Vure, lakea a Vure i galea a bakovi malamala.”
GAL 3:7 I mavonga, a ngaru mu gu lohoka vona, e huriki ri luhoi torea a Vure, ria kunana e huriki a hamone Abraham muholi.
GAL 3:8 Hosi a Hinere i vakalongo muga a naro a Vure ta ge gale malamala e huriki i uka ma ria a Iuda, na tahuna ri luhoi torea. A Hinere i vakalongo muga a ngava nga hosi na tahuna a Vure i takia ne Abraham a Velenga Kamumu, na tahuna i ta maea, “Ne vomu kunana, ga gamai e huriki a bakovi lobo na malala.”
GAL 3:9 Na naro iea kunana, e huriki ri luhoi torea e Kristo, a Vure ge vakabagetu ria turane Abraham, ra bakovi ni luhoi torea a Vure.
GAL 3:10 A ta maea, a vuhuna e huriki ri toni ni muri mai a vinara lakea a Vure ge gale ria ri malamala, e huriki nga ni ruduraha, a vuhuna a ngava ni here hosi i maea, “E huriki i uka ma ri ramai lobo a ngava ni here na Vinara, ni gi ruduraha.”
GAL 3:11 Ngane i kavakava hateka, i uka tara viri ge ramai lobo a vinara, lakea a Vure ge galea a bakovi malamala, a vuhuna ni here hosi i maea, “E huriki a bakovi malamala ri gi bole a nimahuri vakaroro na tahuna ri luhoi torea a Vure.”
GAL 3:12 Pali a naro ni ramai a vinara i uka ma i ramai a naro ni luhoi torea a Vure, a vuhuna a ngava ni here hosi i maea, “E rei a viri i ramai a maka vinara lobo bara i mahuri.”
GAL 3:13 A Vure ge ratapile vakaroro e huriki lobo i uka ma ri ramai a maka vinara lobo. Pali e Kristo i konamule hita na tahuna i bole a vuranga iea na murine hita, a vuhuna ni here hosi i maea, “E huriki ni paditata na kai, ni ruduraha.”
GAL 3:14 I rata mavonga, lakea a ngava a Vure i vakabagetua e Abraham vona ge bele ne huriki i uka ma ria a Iuda, si gi bole a Hanu Kiripiripi, re Isu i ta muholi ge habi ne hita, na tahuna si luhoi tora ia.
GAL 3:15 Mua e huriki a turagu, ga ta vakakika vona a naro na malala. Na tahuna e huriki a bakovi ri valongo pali a ngava, i uka tara viri ge hudo tala tabu a ngava, o ge ravunu vuroki a ngava vona.
GAL 3:16 Hosi a Vure i habi a ngava ne Abraham rua a hamona, i ta muholi. A ngava ni here hosi i uka ma i ta maea, “ne huriki a hamomu,” i manga ri gi ala kupo. I taki a viri ala taku kunana, i ta maea, “na hamomu,” re Kristo.
GAL 3:17 A pelegona nitagu i maea, hosi a Vure i ta muholi ne Abraham. Muri na pida i 430 a vinara i bele. A vinara iea i uka ma i ravunu vurokia a ngava a Vure i ta muholi ne Abraham vona, ge ratea ge bele manga a ngava tavula.
GAL 3:18 Bara a maki a Vure i ta muholi hosi ne Abraham ge bole, pali ngane ge bole na tahuna i ramai a vinara kunana, ngane i uka ma ge ramai a nita muholi na Vure. Pali a Vure i habi a maki ne Abraham na tahuna i ta muholi vona.
GAL 3:19 Pali a vinara, a ra lehona? A Vure i habi a vinara, ge vakasiri kavakava a naro hale, ge vano ge harena na tahuna a hamone Abraham ge bele, ra viri a Vure i ta muholi vona. A Vure i habi a vinara iea ne huriki a agelo. E huriki a agelo nga ri habia ne Moses, ra bakovi i pesi na kurukuruna Vure, e huriki a Iuda. Lakea e Moses i habi a vinara iea ne huriki.
GAL 3:20 Pali na tahuna a Vure i ta muholi ne Abraham, i uka ma i taki polo a ngava na bakovi tara. Ia kikeri kunana i ta turane Abraham.
GAL 3:21 Pali si gi ta navai ngane? A vinara i hehea a ngava a Vure i ta muholi ne Abraham vona? I uka liu! A Vure bara i habi a vinara tebi, ra ge habi a nimahuri ne hita, ngane a dala ni bele malamala na matana Vure bara i bele na naro ni ramai a vinara, i uka ma ge ramai a naro ni luhoi tora.
GAL 3:22 Pali a Hinere i rata e huriki lobo, turana maki lobo, ni gi kolotata ria na nitora na naro hale, ne vona a Vure ge habi a maki i ta muholi vona, na tahuna e huriki ri luhoi torea e Isu Kristo.
GAL 3:23 Muga na naro ni luhoi torea a Vure i uka ma i bele ma, hita lobo, i manga si made na bavi, polotano na nitora na vinara. I tubu hosi, i valai, i harena na tahuna a naro ni luhoi torea a Vure i bele kavakava.
GAL 3:24 Na naro iea, a vinara i bele manga a matakari ne hita, ge tuli valai hita ne Kristo. I bele mavonga, a Vure ge gale hita si malamala na tahuna si luhoi torea e Kristo.
GAL 3:25 Pali ngane a naro ni luhoi torea e Kristo i bele, i mavonga a vinara i uka ma i matakari tabu hita,
GAL 3:26 a vuhuna ngane mu bele manga e huriki a tuna Vure, a vuhuna mu luhoi torea e Isu Kristo.
GAL 3:27 E rei a viri ne mua mu rihi e Kristo na naro ni vahilolo, i manga mu rodoa e Kristo, i manga a viri i rodo a varakia karaba.
GAL 3:28 Mua lobo mu rihi e Kristo, ngane mua lobo mu manga a viri ala taku. I uka tabu a Iuda, o a viri i uka ma a Iuda. I uka tabu a vorakato, o a viri i uka ma a vorakato. I uka tabu a bakovi o a ngatavine. Mu palupulupu.
GAL 3:29 Na tahuna mua a ngate ne Kristo, mua a hamone Abraham, mu gu bole a maka maki a Vure i ta muholi hosi ne Abraham ge bole.
GAL 4:1 I manga i maea: Na tahuna a tuna bakovi ia a koma kiroko, i manga kunana a vorakato. I muholi, a maki lobo ne tamana ne vona. Pali i tabana i manga a vora,
GAL 4:2 a vuhuna e huriki a matakari, e huriki a bolekori ri matakaria. Bara ri matakaria i vano i harena na parava e tamana i taki puru ge bole a maka maki vona.
GAL 4:3 Hita ranga. Hosi, na tahuna si manga a koma kiroko, si vora na maka hanitu, a nitora ranga na malala.
GAL 4:4 Pali na parava a Vure i vulaki purua i bele, i rudua e Tuna. A ngatavine i podea. I bele manga a bakovi, i muri mai a vinara lobo na Vure,
GAL 4:5 ne vona ni korimule hita e huriki a vorakato na vinara. I rata mavonga, a Vure ge pau hita, si gi bele manga e huriki e tuna.
GAL 4:6 Pali ngane mua e huriki a tuna Vure. I rudu vilia a Hanune Tuna ge made na hatene hita, i gale maea, “Tata! O Tata!”
GAL 4:7 Ngane mua, i uka ma mua a vorakato tabu. Ngane mua e huriki e tuna. I mavonga ngane mu gu bole a maka maki a Vure i ta muholi vona ge habi ne huriki e tuna.
GAL 4:8 Hosi i uka ma mu lohoka na Vure. Mu manga a vorakato ne huriki a nitamina vure.
GAL 4:9 Pali ngane mu lohoka pali na Vure, o ga ta maea, a Vure i lohoka ne mua. I mavonga, mu gu ngalahere navai, mu gu hamule tabu ne huriki a hanitu, a nitora ranga na malala? Ri uka a nitora, ri uka leho. I navai mu ngaru mu gu vorakato tabu ne ria?
GAL 4:10 Ngane mu longototo tabu a maka vinara na Parava Nimalo, na habu na keva takutaku, na tahuna takutaku, a pida takutaku!
GAL 4:11 A mangenge, ma ge velu tavula a leho dagi a ratea ne mua.
GAL 4:12 Mua e huriki a turagu, iau a matuka­paga na vinara. A nana tora mua mu gu manga iau. Hosi a made turane mua, i uka ma mu ramai a vinara. Iau tara i uka ma a ramai. Pali na tahuna iea, i uka ma mu rata hale iau.
GAL 4:13 Mu lohoka vona, hosi a made turane mua, a vara mua na Velenga Kamumu a vuhuna a giloa.
GAL 4:14 A gilanga nau i vakamarego mua, pali i uka ma mu biu iau, i uka ma mu marikoi nau. Mu tagui iau i manga iau a agelo na Vure. Mu tagui iau i manga iau e Isu Kristo.
GAL 4:15 Pali i tabuli vai ngane a nivivi mu hatakia hosi? Iau a ta muholi ne mua, bara i kara mua hosi, bara mu sigi tala a matane mua, bara mu habi nau.
GAL 4:16 I navai? Iau a pile ne mua a vuhuna a vakalongo ne mua a ngava muholi?
GAL 4:17 Re huriki a nitamina mari ni tovo nga, ri bibi rike mua. Pali i uka ma ri luhoi ni tuhori mua. Ri ngaru mu gu ngalahere nau, lakea mu gu bibi rike ria.
GAL 4:18 I kamumu mu gu habi a hatene mua na maki kamumu. Pali mu rata vaka­roro, na tahuna iau a made turane mua, na tahuna i uka ma a made turane mua.
GAL 4:19 Mua e huriki e tugu. Iau a bole a nimadihi tabu ne mua, i manga a nimadihi i bele na ngatavine i pahea a koma. Iau bara bole a nimadihi iea, ge vano, ge harena na tahuna mu gu bele manga liu e Kristo!
GAL 4:20 A ngaru hateka ni made turane mua ngane, ga ta madoru mai mua. A loho lege hateka ne mua.
GAL 4:21 Mua e huriki mu ngaru ni ramai a vinara, mu vakalongo iau, mu lohoka vona a vinara, i ta navai?
GAL 4:22 Ni here hosi, e Abraham i tahoka e tuna ala rua. E tuna tara i podea a vora ngatavine. E tuna tara i podea e girihine Abraham, ra i uka ma ia a vora.
GAL 4:23 E tune Abraham, ra i podea a vora ngatavine, i bele na naro ni vakabele a koma vona. Pali e tuna, ra i podea e girihina, ra i uka ma ia a vora, i bele a vuhuna a Vure i ta muholi ne Abraham ge bele.
GAL 4:24 A nuverei iea i muholi, pali i manga tabu a nita vakakika, ra i maea: A ngatavine ala rua nga, ru manga a ngava dagi i rua a Vure i rata hosi. A viri tara i rata na lolo e Sinai, i vakabele kunana e huriki a koma a vora. A rana e Hagar.
GAL 4:25 E Hagar i manga a lolo e Sinai na robo e Arabia. I manga a tanga dagi e Ierusalem na malala, a vuhuna ia a vora. E huriki e tuna, ria ranga a vora.
GAL 4:26 Pali e Ierusalem na hunu i uka ma ia a vora. Ia e kinane hita muholi,
GAL 4:27 a vuhuna ni here hosi i maea, “Ioe a ngatavine o lame, o keri ni vakabele a koma, o vivi! I uka ma o bole a nimadihi ni poda, o pesi rike o gale tala dagi, o vivi! E huriki a koma na ngatavine ra i pea pali e girihina ri kupo hateka ne huriki a koma na ngatavine i tahoka e girihina.”
GAL 4:28 Mua e huriki a turagu, mu manga e Isak. A Vure i ta muholi, lakea mu bele manga e huriki a tuna Vure.
GAL 4:29 Hosi e Ismael, ra koma ni vakabele na naro ni vakabele a koma vona, i habi a nimadihi ne Isak, ra koma ni poda na nitora na Hanuna Vure. I mona tara, e huriki a koma na malala ri vakamadihi mua, re huriki a Vure i ta muholi, lakea mu bele manga e huriki e tuna.
GAL 4:30 Pali a Hinere i ta navai? I ta maea, “O lili talea ra vora ngatavine turana e tuna. E tuna vora ngatavine i uka ma ru gu vaveru vona e tune Sara, ra i uka ma ia a vora, a mahala ne tamane rua.”
GAL 4:31 Mua e huriki a turagu, i uka ma hita e huriki a koma na vora ngatavine. Hita e huriki a koma na ngatavine i uka ma ia a vora.
GAL 5:1 E Kristo i rata hita si matukapaga pali na vinara, a vuhuna i ngaru si gi matukapaga. I mavonga, mu pesi tora. Nahea mu gu hamule tabu, ge mua a vorakato na vinara.
GAL 5:2 Mu longo kamumu. Iau e Paulus a taki mua, mua bara mu longototo ni gi pala a kuline mua, a leho e Kristo i ratea i uka ma ge kori mua.
GAL 5:3 A taki tala tabu ne huriki ri ngaru ni gi pala a kuline ria, a ta maea, e huriki ri rata mavonga, ri gi ramai a maka vinara lobo.
GAL 5:4 Mua e huriki mu ngaru ni ramai a vinara ne vona ni bele malamala, mu marava basi ne Kristo, mu pe pali a nidodo vona.
GAL 5:5 Pali mia, mi luhoi torea e Kristo na nitora na Hanu Kiripiripi, mi pasimata vona a hini a Vure ge gale mia a viri malamala.
GAL 5:6 A viri i rihi e Kristo, ra hini ni pala a kulina o i uka, a maki tavula. A maki dagi, ge luhoi torea e Kristo, ge tahoka a naro na nivangaru.
GAL 5:7 I muga mu luhoi tora kamumu a narone Kristo. Pali e rei a viri i putu tagu a dala ne mua, i uka ma mu ramai tabu a ngava muholi?
GAL 5:8 Ra niluhoi ne mua, i uka ma i valai na viri i gale mua.
GAL 5:9 A is popote kunana i rata a bret lobo i vava.
GAL 5:10 Iau a luhoi hatekea e Bakovi Dagi mu gu ramai a niluhoi nau, lakea e rei a viri i vakamarego mua, a Vure bara i pelekadoa.
GAL 5:11 Mua e huriki a turagu, iau i uka ma a tovo e huriki ni gi pala a kuline ria. Mu luhoi iau a rata mavonga, pali i navai e huriki ri vakamadihi iau? Iau bara tovo e huriki ni gi pala a kuline ria, ngane a nitovo na kai tavalavala i uka ma ge vakarike a hatene huriki.
GAL 5:12 Re huriki ri vakamarogo a niluhoi ne mua na ngava ni pala a kuli, i kamumu ri gi pala vuroki mule ria!
GAL 5:13 Mua e huriki a turagu, a Vure i gale mua mu gu matukapaga na vinara. Naha ni luhoi mu matukapaga ne vona ni ramai a ningaru hale na kakaine mua. Pali mu vangaru, mu vakori.
GAL 5:14 A maka vinara lobo bara o ramai na tahuna o ramai a ngava i taku kunana, ra i maea, “O ngarua e turamu i manga a hini o ngaru mule ioe.”
GAL 5:15 Naha ni vatahate, naha ni vagege, ma mu gu vakalobo tavula mua.
GAL 5:16 Pali iau a ta maea, mu laho turana Hanu Kiripiripi, lakea i uka ma mu gu ramai a ningaru hale na kakaine mua.
GAL 5:17 A maka ningaru hale na kakaine hita ri hehe a Hanu Kiripiripi. A ningaru na Hanu Kiripiripi tara, i hehe a maka ningaru hale na kakaine hita. Ri vahehe, ri kapi kari mua, i uka ma mu rata a maki mu ngaru ni rata.
GAL 5:18 Pali na tahuna a Hanu Kiripiripi i muga ne mua, a nitora na vinara i uka ma ge matakari mua.
GAL 5:19 Si matakilala a maka ningaru hale na kakaine hita, ra a naro ni mole,
GAL 5:20 a naro ni kavurike a vure taminga, a muto, a naro na ni vapile, a naro ni vabiu, a naro ni marikoi vona a viri i tahoka a maki, a naro ni hate madihi, a naro ni rata polo muga, a naro ni vapida lae, ni vapida ni rata a tara karaba,
GAL 5:21 a naro ni masigoro, a naro ni ninu a naru vagole, a naro ni vapopo ni ninu a naru vagole, turana maka naro hale maea. Hosi a taki mua mu gu matadoko vona a maka naro hale nga. Ngane a taki tabu mua, e huriki ri rata a maka naro hale nga, i uka ma ri gi dili na harikianga na Vure.
GAL 5:22 Pali a kanena Hanu Kiripiripi, a naro kamumu nga: a naro na nivangaru, a nivivi, a nivalemu, a naro ni hatenono, a naro ni rata kamumu e huriki, a naro ni hate balala, a naro ni ta muholi,
GAL 5:23 a naro ni made madoru, a naro ni pahadanu a ningaru hale na kakaimu. Ra maka naro kamumu nga, i uka tara vinara ge ta pupukari hita vona.
GAL 5:24 E huriki a ngate ne Isu Kristo ri paditata pali na kai tavalavala a ningaru hale na kakaine ria.
GAL 5:25 A Hanu Kiripiripi i habi ne hita a nimahuri karaba. I mavonga, si gi muri mai a ningaru na Hanu Kiripiripi.
GAL 5:26 Nahea si gi bibi rike mule a rane hita. Nahea si gi vakarike a hatena viri si gi vaubi turana. Nahea si gi masigoro a maki na viri tara.
GAL 6:1 Mua e huriki a turagu, na tahuna mu masia tara viri ne mua ge rata a naro hale, a ngaru e huriki ri kinigao na Hanu Kiripiripi ri gi lakea madoru vona, ri gi bole mulea. Pali ri gi matadoko, ma ni gi toni ria.
GAL 6:2 Mu vatuhori ni kaloho a nimava. Na naro iea kunana bara mu ramai a vinara ne Kristo.
GAL 6:3 Mu luhoi a ngava nga: e rei a viri i pahaluhoi ta ia a bakovi dagi, pali ia a bakovi tavula, a bakovi iea i tami mule ia.
GAL 6:4 Pali a ngaru mua takutaku mu gu pelekado a narone mua. Na naro iea bara mu vivi na leho ne mua takutaku, i uka ma mu gu loho lege na narone turamu,
GAL 6:5 a vuhuna hita takutaku bara si bole a mapana narone hita.
GAL 6:6 Si gi habi a maki kamumu ne huriki ri tovo hita na nitana Vure.
GAL 6:7 Naha ni tami mule mua. I uka tara viri ge tamia a Vure. A ra maki o varo na hania, ra maki ngi kunana bara o mirio.
GAL 6:8 E huriki ri muri mai a ningaru hale na kakaine ria, bara ri vakabele a matenga. Pali e huriki ri ramai a ningaru na Hanu Kiripiripi, a Hanu Kiripiripi bara i habi ne ria a nimahuri vakaroro.
GAL 6:9 Nahea ge malulu a tuhane hita ni rata a maka naro kamumu, a vuhuna bara si kinigao, bara si bole a mapane hita.
GAL 6:10 I mavonga, si gi rata kamumu e huriki lobo na tahuna si tahoka a gisi kamumu. Pali a maki dagi hateka, si gi tuhori e huriki ri luhoi torea a Vure.
GAL 6:11 Mu matai a hinere nau, a here na limagu, i dagi hateka.
GAL 6:12 Re huriki nga, ri ngaru ni tugu mua ni gi pala a kuline mua, a vuhuna ri ngaru e huriki a Iuda ranga ri gi vivi ne ria. Ri koi ni muri mai a ngava na kai tavalavala ne Kristo, a vuhuna ri koi e huriki ri gi vakamadihi ria.
GAL 6:13 Re huriki ni pala a kuline ria, i uka ma ri ramai a maka vinara lobo. Ri ngaru ni pala a kuline mua ri gi bibi rike mule a rane ria.
GAL 6:14 Pali iau i uka ma ga bibi rike mule a ragu. A maki a bibi rikea, a rane Isu Kristo a Bakovi Dagi ne hita, a vuhuna i mate na kai tavalavala. I rata mavonga, ngane i manga iau a mate, a vilo hale na malala i uka ma i matakari tabu iau.
GAL 6:15 Re huriki, ni pala a kuline ria, o i uka, a maki tavula. A maki i dagi hateka, ni bole a nimahuri karaba.
GAL 6:16 E huriki lobo ri muri mai a ngava iea, a Vure ge habi a nivalemu ne ria, ge dodo ria. E huriki nga, ria e huriki a Israel muholi na Vure.
GAL 6:17 I vakatubu ngane, nahea tara viri ge vakamarego iau, a vuhuna a harena lebo i tabuli na kuligu, a vuhuna a luhoi torea e Isu.
GAL 6:18 Mua e huriki a turagu, a Bakovi Dagi ne hita, e Isu Kristo ge rata kamumu a hanune mua. I muholi.
EPH 1:1 Iau e Paulus. A Vure i vulaki iau ge iau a apostolo ne Isu Kristo. A here lakea ne mua e huriki a tara ne Kristo o Epesus, ra mu pesi tora ni luhoi torea e Isu Kristo.
EPH 1:2 A Vure, e Tamane hita, turana e Isu Kristo a Bakovi Dagi, ru gu rata kamumu mua, ru gu habi a nivalemu ne mua.
EPH 1:3 Si kavurikea a Vure, e Tamane Isu Kristo, a Bakovi Dagi ne hita. I vakabagetu hita a vuhuna si rihi e Kristo. I vakabagetu hita na maki kamumu lobo ri valai na hunu, ri kori a hanune hita.
EPH 1:4 Muga na Vure i ratarike a malala, i vulaki hita si gi rihi e Kristo. I rata mavonga si gi malamala, si gi uka ngava na matana. I ngaru hateka hita,
EPH 1:5 lakea i taki muga hosi ge pau hita. I kara ia ge pau hita a vuhuna a leho e Isu Kristo i ratea. A Vure i ngaru ni rata mavonga, i vivi ni rata mavonga.
EPH 1:6 I ngaru si gi kavurikea vona a hini i rata kamumu hateka hita. A leho ne Tuna, ra i ngaru hatekea, i vakasiri manga a Vure i rata kamumu hateka hita.
EPH 1:7 Si rihi e Kristo, i kona hita na darana. Ngane a Vure i puga vuroki a naro hale ne hita. Na naro iea a Vure i vakasiri ne hita, na harikia vona, ia a mari ni rata kamumu hateka hita.
EPH 1:8 I hatebalala muholi, i rata kamumu hateka hita, a vuhuna i moro hateka, i tahoka a lohokanga dagi,
EPH 1:9 i mavonga, i ramai a ningaru vona, i vakasiri kavakava a niluhoi vona, ra muga i kapiloho, ra niluhoi vona ni rudu e Kristo ni korimule hita.
EPH 1:10 A niluhoi vona i maea, na tahuna a parava ge valai, bara i vakalipopo a maki lobo na hunu, a maki lobo na malala, ri gi tabuli polotano na matakari i taku kunana, re Kristo.
EPH 1:11 A Vure i vulaki hita, i rata hita si rihi e Kristo. I rata mavonga, a vuhuna hosi i luhoi purua a naro iea. I rata a maki lobo ri bele i manga a hini i ngaru ri gi bele.
EPH 1:12 I mavonga mia, re mia mi luhoi tora mugea e Kristo, mi rata e huriki ranga ri gi kavurikea a Vure, a vuhuna i bagetu hateka.
EPH 1:13 Mua ranga, mu longo a ngava muholi, a Velenga Kamumu, lakea i korimule mua. Mu luhoi torea e Kristo, mu rihi ia. Lakea a Vure i habi ne mua a Hanu Kiripiripi, ra i ta muholi hosi ge habia, i manga a kilakila i vakasiri manga mua e huriki a tara vona.
EPH 1:14 A Vure i habi ne hita a Hanu Kiripiripi, ngane si lohoka vona ge habi ne hita a maka maki kamumu i ta muholi ge habi ne hita. Si gi bole a maki nga muri ma, lakea e huriki ri gi kavurikea a Vure, a vuhuna i kamumu hateka.
EPH 1:15 I mavonga, iau tara, a longo ta mu luhoi torea e Isu a Bakovi Dagi, mu ngaru e huriki a tara na Vure.
EPH 1:16 I mavonga, i uka ma a malo ni kavurikea a Vure ne mua. A luhoi vakaroro mua na tahuna a vasileki.
EPH 1:17 A nanea e Tamana, ra viri i tahoka a bagetuanga, ra Vure ne Isu Kristo, a Bakovi Dagi ne hita, a nanea ge rata mua mu gu moro, ge habi ne mua a lohokanga, ge vakasiri ia ne mua, mu gu lohoka hateka tabu vona.
EPH 1:18 A nanea ge rata mua mu gu longokilalea a nitana, lakea mu gu lohoka vona a maka mahala kamumu i bagetu hateka, i ngaru ni habi ne mua, lakea mu gu pasimata ni bole a maki nga, a vuhuna i gale mua ge mua e huriki a ngate vona.
EPH 1:19 A vasileki vona, mu gu lohoka vona a nitora dagi vona. Ra nitora iea i rangi a maki lobo, i tuhori hita e huriki si luhoi torea. A nitora iea kunana
EPH 1:20 i vakamahuri mulea na matenga e Kristo, i vakamadea na limana a kanena meli na hunu.
EPH 1:21 E Kristo i made vonga, i matakari. A nitora vona i rangi liu a nitora na hanitu lobo, a matakari na malala lobo, a nitora lobo. A rana i dagi hateka na rane huriki lobo; a rane huriki ngane, e huriki muri ma.
EPH 1:22 A Vure i ratea i matakari a maki lobo. I ratea ge matakari a tara ne Kristo,
EPH 1:23 ra a kakaina. A tara ne Kristo ri bole a nimahuri ne Kristo, ra viri i habi a nimahuri na maki lobo na tabeke lobo.
EPH 2:1 Muga mu manga a viri i mate, a vuhuna mu longotaroa a Vure, mu rata a naro hale.
EPH 2:2 Mu rata muga a maka naro hale i manga e huriki a bakovi a ngatavine na malala. Mu longototoa a matakari ne huriki a hanitu meli na koropala. I tabana ni leho pololilo na hatene huriki ri longotaroa a Vure.
EPH 2:3 Muga hita ranga si ramai a naro hale manga ria, a rongova na Vure i rike ne hita. Si muri mai a ningaru hale, a niluhoi hale na kakaine hita.
EPH 2:4 Pali a Vure a mari ni dodo hateka, i ngaru hateka hita.
EPH 2:5 Na tahuna si tabana si manga a viri i mate, a vuhuna si longotaroa a Vure, a Vure i rata hita si rihi e Kristo, i vakamahuri hita. A Vure i korimule hita, a vuhuna i ngaru ni rata kamumu hita.
EPH 2:6 I vakamahuri mule hita turane Kristo, i vakamade hita turane Kristo, meli na hunu.
EPH 2:7 I rata mavonga ne vona ni vakasiri e huriki ri gi bele muri ma, na naro i rata kamumu hateka hita na tahuna i rata hita si rihi e Isu Kristo.
EPH 2:8 A Vure i rata kamumu mua, i korimule mua, a vuhuna mu luhoi torea. Ra hini mu luhoi torea, i uka ma i valai ne mua. A Vure i habia ne mua a niluhoi iea.
EPH 2:9 I korimule mua, i uka ma i ramai a naro kamumu mu ratea, i mavonga i uka tara viri ge bibi rike mule a rana.
EPH 2:10 A Vure, ngane i ratarike karaba hita, si gi rihi e Isu Kristo, si gi rata vakaroro a naro kamumu. Ra naro kamumu nga, a Vure i kisi puru hosi si gi rata.
EPH 2:11 I mavonga mua e huriki i uka ma mua a Iuda, re huriki ni pala a kuline ria ri gale mua e huriki i uka ma ni pala a kuli. Ri luhoi ta ria e huriki a tara na Vure a vuhuna ni pala a kuline ria. Pali a naro ni pala a kuli, a maki na kakaina viri kunana.
EPH 2:12 A ngaru mu gu longo visi tabu a hini, hosi i uka ma mu lohoka ne Kristo. I uka ma mu dili na tara ne huriki a Israel. I uka ma mu lohoka na ngava dagi a Vure i ta muholi ne huriki a Israel vona. Mu made na malala, i uka tara maki mu gu pasimata vona. I uka ma mu made turana Vure.
EPH 2:13 Muga mu marava basi na Vure. Pali ngane mu rihi e Isu Kristo, lakea a darana i kali valai mua, mu made tabukoi na Vure.
EPH 2:14 E Kristo kunana i rata hita si made na nivalemu. I muga si vatepu, re mia e huriki a Iuda, mua e huriki i uka ma mua a Iuda. A nivatepu iea i manga a nure, i vakalipida hita. Pali ngane a nimatena i puka puru a nure iea, i rata hita si bele manga a kabu i taku.
EPH 2:15 E Kristo i vakalobo a vinara ne huriki a Iuda, ge vakalipopo e huriki a Iuda, e huriki i uka ma ria a Iuda, ri gi rihi ia, ri gi manga a kabu i taku kunana. Na naro iea i rata hita si made na nivalemu,
EPH 2:16 si manga a kabu i taku, ne vona ni rata hita si gi made na nivalemu turana Vure na nimatena na kai tavalavala. I mavonga i vakalobo a nivatepu.
EPH 2:17 Muri e Kristo i valai, i vara a ngava na nivalemu ne mua e huriki mu marava basi na Vure, i vara a ngava na nivalemu ne mia, e huriki a Iuda, mi made tabukoi na Vure.
EPH 2:18 A vuhuna e Kristo i mate na kai tavalavala, ngane i kara hita lobo si gi bele na matane Tamana, na Hanuna.
EPH 2:19 Mua o huriki i uka ma mua a Iuda, ngane i uka ma mua e huriki a bakovi basi tabu. I uka ma mua a mosi tabu. Ngane mua a taho tanga turana e huriki a tara na Vure. Mu dili na kabu na Vure.
EPH 2:20 Mua mu manga a roho i haea a Vure. Mia e huriki a apostolo, e huriki a propet mi manga a butu na roho, i vonu a Vure. E Isu Kristo i manga a burena butu.
EPH 2:21 A maka kai lobo na roho i tabuli vona. Ni haea ra roho iea, ni hudo tala i dagi, i bele manga a roho ne Bakovi Dagi.
EPH 2:22 Mua ranga, a Hanuna Vure i vakalipopo mua ne vona ni hae a roho a Vure ge made vona.
EPH 3:1 A vuhuna a Vure i bole mua e huriki i uka ma mua a Iuda, ngane a vasileki ne mua, ra iau e Paulus, a vora ne Isu Kristo. A made na bavi a vuhuna a vakalongo ne mua e huriki i uka ma mua a Iuda, a ngava ne Isu Kristo.
EPH 3:2 Ae, a luhoi mu longo pali a leho a Vure i habia nau, ni vakalongo a naro kamumu vona ne mua i uka ma mua a Iuda.
EPH 3:3 Muga a here, a vakalongo popote na dala a Vure i vakasiria nau a niluhoi vona, ra i kapiloho muga.
EPH 3:4 Na tahuna mu gia a raukea iea, bara mu matakilaka vona iau a lohoka vona a niluhoi kapiloho na Vure i rata polo ne Kristo.
EPH 3:5 I uka ma ni vakasiri ne huriki hosi. Pali ngane ni vakasiri ne huriki a apostolo a propet na Vure, na nitora na Hanuna.
EPH 3:6 A niluhoi kapiloho iea i maea: e huriki i uka ma mua a Iuda, mua ranga mu gu bole a maka maki na Vure. Mua ranga mu dili na tara na Vure. Mua ranga mu gu bole a maki a Vure i ta muholi vona na tahuna mu longo a Velenga Kamumu, mu rihi e Isu Kristo.
EPH 3:7 A Vure, na naro kamumu vona, a nitora dagi vona, i habi nau a leho, ga taki tala a Velenga Kamumu iea.
EPH 3:8 I habia nau a leho iea, pali iau, ne huriki lobo na tara na Vure, iau a bakovi tavula liu. Pali i rata kamumu iau, i habi a leho nau ga vara e huriki i uka ma ria a Iuda, ga taki ria na maka mahala i kupo hateka ge ne ria na tahuna ri rihi e Kristo. A mahala nga ri dagi hateka, si keri ni matakilala.
EPH 3:9 I pasi iau ga vakapalala e huriki lobo na niluhoi i tabuli kapiloho paru hosi. A Vure, ra viri i ratarike a maki lobo, i ruhulolo hosi na nitubuna maki lobo.
EPH 3:10 I rata mavonga, a tara ne Kristo ge vakasiri ne huriki a matakari na hunu, e huriki a viri dagi na hunu, a lohokanga dagi legelege vona.
EPH 3:11 Iea a niluhoi na Vure paru hosi. I ratea i bele muholi ne Isu Kristo a Bakovi Dagi ne hita.
EPH 3:12 Ngane si rihi ia, si luhoi tora ia, lakea i kara hita si gi valai tabukoi na matana Vure, i uka ma si gi mangenge.
EPH 3:13 I mavonga, nahea mu gu loho lege lae vona iau a bole a maregoa. A maregoa a kalohoa, bara mu bole a bagetua vona.
EPH 3:14 Na tahuna a luhoi a maki nga, a turume puru na matane Tamane hita,
EPH 3:15 re huriki lobo na kabu meli na hunu, koea na malala ri bole a nimahuri vona.
EPH 3:16 A turume puru, a vasileki ge bole tala na mahala kamumu na bagetuanga vona, ge tuhori a hatene mua na nitora na Hanuna,
EPH 3:17 lakea e Kristo ge made pololilo ne mua a vuhuna mu luhoi torea. A vasileki mu gu pesi tora na naro na nivangaru,
EPH 3:18 lakea, ge manga e huriki a tara na Vure lobo, bara mu matakilaka vona e Kristo i ngaru hateka hita. I ngaru hateka hita, a ningaru vona i bola hateka, i ola hateka, i polomeli liu, i utu puru liu, i uka harena. A ningaru vona i dagi hateka, si keri ni lohoka lobo vona. Mu gu matakilaka vona, lakea mu gu bole a naro lobo na Vure.
EPH 3:20 A maki lobo si nana a Vure vona, a ra maki si luhoi ge ratea, a nitora vona, ra i leho pololilo ne hita, i kara ni rangi liu a ningaru, a niluhoi ne hita.
EPH 3:21 Ge bole a bagetua pololilo na tara vona. Ge bole a bagetuanga ne Isu Kristo na parava vakaroro! I muholi.
EPH 4:1 I mavonga, iau a nana mua, ra iau ni ru dili na bavi a vuhuna a rata a leho ne Bakovi Dagi. A nana tora mua mu gu laho na naro i karea a naro a Vure i gale mua mu gu laho vona.
EPH 4:2 Mu vakakiroko mua. Mu made madoru turana e huriki. Mu hatenono ne huriki, mu vangaru.
EPH 4:3 Mu toni a bulune mua ni pesi taku na Hanu Kiripiripi. Mu made na nivalemu, bara mu manga a viri ala taku kunana.
EPH 4:4 Hita e huriki a tara na Vure, si manga a kakaina viri i taku kunana. A Hanuna Vure i taku kunana, i manga kunana a Vure i gale mua mu gu pasimata vona a maki ge bele muri ma.
EPH 4:5 A Bakovi Dagi i taku kunana. A naro ni luhoi tora i taku kunana. A hilova i taku kunana.
EPH 4:6 A Vure i taku kunana, re Tamane hita lobo. I matakari e huriki a viri vona, i rata a leho ne huriki vona, i made turane ria.
EPH 4:7 Pali e Kristo i habi ne hita takutaku a leho si gi rata, i ramai a ningaru vona.
EPH 4:8 I mavonga ni here maea, “Na tahuna i sike meli, i turari e huriki i lakavu ria. I habi na tara vona a maka mahala.”
EPH 4:9 Na tahuna a Hinere i ta maea, “I sike meli,” i navai a pelegona? A pelegona i maea: I uka ma i sike kunana. I puru tabu na bobona malala.
EPH 4:10 A viri i puru valai, ia kunana a viri i sike meli liu, polomeli na hunu, ge made na tabeke lobo.
EPH 4:11 Ia kunana a viri i rata e huriki ranga, ge ria a apostolo, e huriki ranga ge ria a propet, e huriki ranga ri gi vakalongo a Velenga Kamumu, e huriki ranga ri gi matakari e huriki a tara na Vure, e huriki ranga ri gi tovo.
EPH 4:12 I rata mavonga, ri gi kisi e huriki a tara na Vure ni rata a leho, a kakaine Kristo ge bele tora.
EPH 4:13 Ge mavonga ge vano ge harena na tahuna hita lobo si pesi taku na niluhoi tora, si pesi taku na lohokanga na Tuna Vure, si gi moro manga a bakovi dagi, si gi bele manga liu e Kristo.
EPH 4:14 Muri i uka ma si gi vilikoma tabu. A maka nitovo karaba legelege i uka ma ri gi kule lae hita manga a aga, i kule laea a vilu, a bokona dari. Na tahuna e huriki ri ngaru ni tami hita na nita taminga ne ria, i nangi manga a ngava muholi, i uka ma si gi longo mai.
EPH 4:15 Pali si gi ta muholi ne huriki, a vuhuna si ngaru ria. Na tahuna si rata mavonga, bara si bele manga e Kristo na naro lobo, ra viri i muga ne hita lobo.
EPH 4:16 E Kristo i muga ne hita, i nugu tata lobo e huriki a tara vona, i manga kunana a ruana viri i nugu tata a maka tabekena lobo. A tabeke takutaku i rata a leho vona kunana, i ratea a kakaina viri i koru, i tora. I manga kunana e huriki lobo ri gi ngaru a turane ria, ri gi pesi taku, bara a kakaine ria i taku ne Kristo.
EPH 4:17 Na rane Bakovi Dagi, ngane ga taki mua, naha ni laho tabu manga e huriki a bakovi na uvo. A niluhoi ne ria i varoru.
EPH 4:18 I uvo a gine ria. Ri marava basi na nimahuri i valai na Vure, a vuhuna i uka ma ri lohoka. Ri putu ngingi.
EPH 4:19 Ri uka a nimaruhu. Ri habi lakea ria na naro na molenga, ri ngaru hateka ni rata a maka naro katoki.
EPH 4:20 A naro nga i uka ma ri ramai a nitovo ne Kristo!
EPH 4:21 A vuhuna mu longo pali a nuverei ne Isu, ni tovo mua vona a nita muholi i valai vona,
EPH 4:22 ngane mu vuroki a vilo hale hosi ne mua, a nilaho hosi ne mua, ra i mavuru na maka ningaru na taminga.
EPH 4:23 A Hanuna Vure ge habi a niluhoi karaba ne mua,
EPH 4:24 lakea mu bole a vilo karaba, ra vilo manga a vilona Vure, a vilo kiripiripi, i malamala muholi.
EPH 4:25 Mu ha taro pali a taminga. I mavonga, mua takutaku mu ta muholi ne huriki a turane mua, a vuhuna si manga a kakaina viri ala taku kunana.
EPH 4:26 Na tahuna i madihi a hatene mua, naha ni rata a naro hale. A rongova ne mua ge lobo muga na haro ge rolo.
EPH 4:27 Naha ni kado a dala na hanitu.
EPH 4:28 A panaho, nahea ge panaho tabu. Ge leho tora na limana, ge tahoka a maki ni habi ne huriki a matasia ranga.
EPH 4:29 Nahea a ngava hale ge pagitala na ngavane mua. A ngava mu gu taki kunana, a ngava kamumu ni tuhori, ni vakabagetu e huriki ri talangaki.
EPH 4:30 Naha ni ratea a Hanu Kiripiripi na Vure ge dodo, a vuhuna ia a kilakila ni ru ne mua, i vakasiri manga muri ma a Vure ge konamule mua.
EPH 4:31 Mu lobo liu ni vagima, ni hate madihi, ni ngava dagi lae, ni padi kidu. Ge lobo liu a rongova ne mua, mu lobo ni rata a naro hale lobo.
EPH 4:32 Mu valemu kamumu, mu vadodo, mu valongo kaburungi a naro hale, i manga kunana a Vure i puga vuroki a naro hale ne mua na leho e Kristo i ratea.
EPH 5:1 I mavonga, mu toni a naro na Vure, a vuhuna mua e huriki e tuna, i ngaru hateka mua.
EPH 5:2 Mu laho na naro na nivangaru, i manga e Kristo i ngaru hateka hita, i habi ia na Vure, i manga a nihabi manginoro.
EPH 5:3 Pali a naro na molenga, a naro katoki, a naro ni ngutu, ni ngaru hateka a maki, naha liu mu gu rata. A naro nga, i uka ma ge kara ni rata a tara na Vure.
EPH 5:4 Naha ni rata a naro ni maruhu vona, a ngava manga manga, o a nipadikede muma. A tara na Vure i uka ma ge rata a naro nga. Naha ni rata. Pali mu kavurikea a Vure.
EPH 5:5 I muholi hateka, e huriki ri mole, e huriki ri katoki na matana Vure, e huriki ri ngutu na maki na viri tara (e huriki maea ri kavurike a vure tebi), i uka ma ri gi dili na harikianga ne Kristo, a harikianga na Vure.
EPH 5:6 A naro nga ri rata a rongova na Vure i rike ne huriki ri longotaro ia. Nahea tara viri ge tami mua na ngava tavulavula.
EPH 5:7 I mavonga, naha ni laho manga e huriki ri rata a naro hale nga.
EPH 5:8 I muholi, hosi mua a bakovi na uvo manga ria. Pali ngane mu rihi e Bakovi Dagi, mua a nipara. Mu laho manga e huriki a bakovi na nipara.
EPH 5:9 A kanena nipara, a naro kamumu, a naro malamala, a nita muholi.
EPH 5:10 Mu toni ni matakilaka vona a ra naro i vivi vona e Bakovi Dagi.
EPH 5:11 Naha ni rata a maka naro hale e huriki a bakovi na uvo ri rata. Mu tahate e huriki ri rata. A naro nga ri uka lehone ria.
EPH 5:12 A maki ri rata kapiloho, iau bara taki tala, bara si maruhu.
EPH 5:13 Pali na tahuna a nipara i parai a maki tara, a maki iea i bele kavakava,
EPH 5:14 a vuhuna a nipara i rata a maki lobo i bele kavakava. Ni here hosi i maea, “Ioe a viri o mahita, o hadongo o pesi rike mule na matenga, lakea e Kristo bara i parai ioe.”
EPH 5:15 I mavonga mu matadoko. Naha ni laho manga e huriki a manga. Mu laho manga e huriki ri tahoka a lohokanga.
EPH 5:16 Mu leho kamumu, naha ni made tavula, a vuhuna a tahuna mona i hale hateka.
EPH 5:17 Naha ni rata tavula. Mu matakilaka vona a ningaru ne Bakovi Dagi, mu ramai.
EPH 5:18 Naha ni ninu hateka a naru vagole, mu gu manga, a vuhuna a naro iea bara i ratapile mua. Pali mu vonu na Hanuna Vure.
EPH 5:19 Mu vakalolo a maka linge na hinere, a linge vasileki, a linge na lotu. Mu kalolo na hatene mua ne Bakovi Dagi.
EPH 5:20 Na maki lobo, mu kavurike vakaroroa a Vure e Tamane hita na rane Bakovi Dagi, e Isu Kristo,
EPH 5:21 mu valongototo, a vuhuna mu mangenge ne Kristo.
EPH 5:22 Mua e huriki a ngatavine, mu longototo e girihine mua, i manga a hini mu longototoa e Bakovi Dagi.
EPH 5:23 A bakovi i muga ne girihina, i manga kunana e Kristo i muga na tara vona, ra kakaina. Ia kunana i korimule hita.
EPH 5:24 A tara na Vure i longototoa e Kristo. I mavonga kunana, e huriki a ngatavine ri gi longototo e girihine ria na maki lobo.
EPH 5:25 Mua e huriki a bakovi, mu ngaru hateka e girihine mua, i manga e Kristo i ngaru hateka a tara vona, i mate na murina,
EPH 5:26 ge ratea ge ne vona kunana. I vahiloloa na naru, na nitana Vure, i ratea i malamala.
EPH 5:27 I rata mavonga, ge masia a tara na Vure ge mata kamumu hateka, manga a ngatavine ni mareraku vona, ge lakea ne girihina. I uka ma ge katoki, i uka ma ge kuli malulu. Ge malamala, ge matapado.
EPH 5:28 Na naro iea kunana, e huriki a bakovi ri gi ngaru hateka e girihine ria, i manga ri ngaru mule ria. A viri i ngarua e girihina, i manga i ngaru mule ia.
EPH 5:29 I uka tara viri ge koi vona a kakaina. Hita lobo si matakari, si ngaru a kakaine hita. E Kristo tara i ngaru hatekea a tara vona,
EPH 5:30 a vuhuna si manga a maka tabekena kakaina.
EPH 5:31 Ni here maea na Hinere, “I mavonga, a bakovi bara i pe e tamana e kinana, i madoko turana e girihina, a kakaine rua ge taku.”
EPH 5:32 A ngava kapiloho iea i tahoka a lohokanga dagi i tabuli vona. Pali iau a ta maea: i ta kana mai e Kristo turana e huriki a tara vona.
EPH 5:33 I mavonga, ga taki tabu. Mua e huriki a bakovi mu ngaru e girihine mua i manga a hini mu ngaru mule mua. Mua e huriki a ngatavine mu togo e girihine mua.
EPH 6:1 Mua e huriki a koma, mu longototo e tamane mua e kinane mua, a vuhuna mu rihi e Bakovi Dagi. A naro iea i kamumu.
EPH 6:2 A Vinara i ta maea, “Mu togo e kinane mua e tamane mua.” Iea a vinara muga i tahoka a nita muholi vona, i ta maea,
EPH 6:3 “Bara mu rata mavonga, a maki lobo mu rata bara i bele kamumu, bara mu made tabaka na malala.”
EPH 6:4 Mua e huriki a tamana koma, naha ni rata e tune mua ri gi rihate. Pali mu tuhori ria na nitovo, na vinara ne Bakovi Dagi.
EPH 6:5 Mua e huriki a vora, mu togo, mu mangenge ne huriki a matakari ne mua koea na malala, mu longototo ria. Naha ni tamilalu. Mu longototo muholi ria i manga kunana mu longototoa e Kristo.
EPH 6:6 Naha ni longototo kunana na tahuna ri matai mua, ri gi vivi ne mua. Mu longototo ria manga mua a vora ne Kristo, mu rata na hatene mua a ningaru na Vure.
EPH 6:7 Na tahuna mu leho, mu vivi. Mu rata manga i uka ma mu kori kunana e huriki a bakovi, mu koria e Bakovi Dagi,
EPH 6:8 a vuhuna mu lohoka vona, ioe a vora, o i uka ma ioe a vora, a ra maki kamumu o ratea, e Bakovi Dagi bara i habia vomu a mapamu.
EPH 6:9 Mua e huriki a matakari na vora, mua ranga mu rata kamumu e huriki a vora ne mua. Naha ni ta vakamangenge ne ria, a vuhuna mu lohoka vona ra Viri i made na hunu ia a matakari ne ria, a matakari ne mua. I matakari e huriki lobo na naro i taku kunana.
EPH 6:10 I pali. Mu rihi e Bakovi Dagi, mu gu kinigao na nitora dagi vona.
EPH 6:11 Mu rodo lobo a maki na vabinga na Vure, mu gu paha taga, mu gu gege a maka taminga na hanitu.
EPH 6:12 I uka ma si vaubi ne huriki a bakovi. Si vaubi ne huriki a matakari, a nitora, e huriki a hanitu i uka ma si matai. Si vaubi na maka nitora dagi hale koea na malala hale, e huriki a hanitu meli na koropala.
EPH 6:13 I mavonga, mu bole rike lobo a maki na vabinga na Vure, lakea na tahuna a pile i valai i buroi mua, bara mu kara ni gegea. Muri, na tahuna i lobo a vabinga, bara mu tabana ni pesi tora.
EPH 6:14 I mavonga, mu kisi mua mu gu paha taga. Mu vakarea mua na nita muholi. Mu rodoa a naro malamala, i manga a padirodo ni rata na aen, ge tagari a ngalane mua.
EPH 6:15 Mu rodo a vahapolo, ra naro ni vakalongo a Velenga Kamumu na nivalemu.
EPH 6:16 Mu nugu vakaroro a galeu, ra naro ni luhoi torea e Kristo. Na galeu iea, bara mu tutu mate lobo a maheto na kanono a Viri Hale i voro mai mua.
EPH 6:17 Mu kube a hineva ni rata na aen, ra hini a Vure i korimule mua pali. Mu nugua a bainat na Hanuna Vure, ra nitana Vure.
EPH 6:18 Mu mamata, mu matapara, mu vasileki, mu nanea a Vure na parava vakaroro na nitora na Hanu Kiripiripi. Mu rata mavonga vakaroro, mu vasileki ne huriki a tara na Vure.
EPH 6:19 Iau tara, mu vasileki nau, a Vure ge habi nau a ngava na tahuna a ta, i uka ma ga mangenge, ga vakalongo kavakava a Velenga Kamumu, ra a Vure i vakalongo pali ne hita.
EPH 6:20 Iau a vinuru ni vakalongo kavakava a Velenga Kamumu. I mavonga iau ni ru dili na bavi. Mu vasileki nahea ga mangenge, ga taki tala kavakava a Velenga Kamumu, i manga a hini a Vure i ngaru iau ga rata.
EPH 6:21 E Tikikus bara i vakalongo mua vona iau a made navai, a ra a ratea. Ia i manga e turagu. A ngaru hatekea. I rata kamumu a leho lobo e Bakovi Dagi i habi vona.
EPH 6:22 Iau a rudu lakenea, ge vakalongo mua vona a nimadegu koea, ge vakatora a hatene mua.
EPH 6:23 A Vure e Tamane hita, e Isu Kristo a Bakovi Dagi, ru gu habi ne mua e huriki a turagu, a nivalemu, a naro ni luhoi tora ia, a naro ni vangaru.
EPH 6:24 A Vure ge rata kamumu vakaroro e huriki lobo ri ngarua a Bakovi Dagi ne hita, e Isu Kristo.
PHI 1:1 Iau e Paulus. A raukea iea i valai ne maria e Timoti, a vora ne Isu Kristo. A here lakea ne mua a tara ne Isu Kristo, e huriki a gare na lotu, e huriki a vora na lotu, mu made o Pilipai.
PHI 1:2 A Vure, e Tamane hita, e Isu Kristo a Bakovi Dagi, ru gu rata kamumu mua, ru gu habi a nivalemu ne mua.
PHI 1:3 Na tahuna a luhoi mua, a kavurikea a Vure.
PHI 1:4 Na tahuna a vasileki, a vivi hateka, a nanea a Vure ge tuhori mua,
PHI 1:5 a vuhuna mu kori iau ni vakalongo a Velenga Kamumu, i vakatubu na tahuna mu longo karabea, i valai i harena mona.
PHI 1:6 A lohoka vona, a Hanu Kiripiripi, ra i tubu ni rata a leho kamumu pololilo ne mua, bara i leho i vano i harena na tahuna i vakalobo a leho iea, na parava e Isu Kristo ge hamule valai vona.
PHI 1:7 I kamumu ga ngaru hateka mua, a vuhuna a ru mua na hategu. Iau a made na bavi, o a laho, a tagari a Velenga Kamumu, a vakasiri e huriki i muholi a Vure i rata kamumu iau, i manga a hini i rata kamumu mua.
PHI 1:8 A ngaru hateka mua na ningaru lobo ne Isu Kristo. A Vure i lohoka vona a ta muholi.
PHI 1:9 A vasileki ne mua, mu gu vangaru hateka tabu, a lohokanga ne mua ge bele dagi, a naro ni matakilaka vona a maki kamumu, a maki hale, ge bele dagi.
PHI 1:10 Muri bara mu ngaru kunana a maki kamumu hateka, bara mu malamala, mu uka tabu a ngava na parava e Kristo ge hamule valai.
PHI 1:11 Bara mu ramai kunana a maka naro malamala a vuhuna e Isu Kristo i leho pololilo ne mua, lakea e huriki bara ri kavurikea a Vure.
PHI 1:12 Mua e huriki a turagu, a ngaru mu gu lohoka vona, a hini iau ni ru dili na bavi i ratea a Velenga Kamumu i rere lae.
PHI 1:13 E huriki a tagari na ruma hariki, turana e huriki lobo koea ri lohoka vona iau ni ru dili na bavi a vuhuna a ramaia e Kristo.
PHI 1:14 Lakea i ranga e huriki a turane hita koea, e Bakovi Dagi i rata ria i uka ma ri mangenge ngane, ri taki tala kavakava a nitana Vure, a vuhuna iau ni ru dili na bavi.
PHI 1:15 I muholi ngi, e huriki ranga, ri gege iau, ri ngaru ni rangi iau, lakea ri vara e huriki ne Kristo. Pali e huriki ranga ri vara na niluhoi kamumu.
PHI 1:16 Ri vara a vuhuna ri ngaru iau, ri lohoka vona a Vure i habi a leho nau ni tagari a Velenga Kamumu.
PHI 1:17 Re huriki ri gege iau, ri vara e huriki ne Kristo, ri tamilalu kunana. Ri ngaru ni rangi iau, ri ngaru ni habi a maregoa nau pololilo na bavi.
PHI 1:18 I uka maki. Ri vara muholi, o ri tamilalu kunana, e Kristo ni taki tala ne huriki. Iau a vivi kunana. Bara vivi mavonga,
PHI 1:19 a vuhuna a lohoka vona a nivasileki ne mua turana nikori na Hanu ne Isu Kristo ge korimule iau.
PHI 1:20 A pasimata, a luhoi tora vona a hini i uka ma ga maruhu. Ga pesi tora, i uka ma ga mangenge, lakea a ra maki ge bele nau, ga mate, o ga mahuri, e huriki ri gi matai a narogu hosi, i valai i harena mona, ri gi togoa e Kristo.
PHI 1:21 Pali ne nau, a luhoi maea. Na tahuna a mahuri, bara rata a leho ne Kristo. Na tahuna a mate, bara made kamumu hateka.
PHI 1:22 Na tahuna a mahuri, bara rata a leho i kupo. Pali i vai a viri kamumu? Ga mahuri, o ga mate?
PHI 1:23 A hate varua. A ngaru ni vano, ga made turane Kristo, a vuhuna a naro iea i rangi a naro lobo.
PHI 1:24 Pali i kamumu tabu ga mahuri, ga tuhori mua.
PHI 1:25 A lohoka vona ngi, lakea a lohoka vona bara made taro turane mua, ga tuhori mua, mu gu koru rike na naro na ni luhoi tora, mu gu vivi.
PHI 1:26 I mavonga bara mu kavurikea e Isu Kristo a vuhuna bara bele tabu ne mua.
PHI 1:27 Pali a maki dagi hateka, mu gu laho na naro i karea a Velenga Kamumu ne Kristo. Muri ga bele ne mua, o i uka, bara longo ne mua, ta mu pesi tora na ningaru i taku, na niluhoi i taku, mu rura ni leho palupu ni tagari a Velenga Kamumu, ra si luhoi torea.
PHI 1:28 Naha ni mangenge ne huriki a pile ne mua. Na tahuna mu rata mavonga, bara i vakasiri kavakava ria, ria bara ri vurua, pali a Vure bara i korimule mua.
PHI 1:29 A naro a Vure i kisi puru ne mua, i ngaru mu gu luhoi torea e Kristo. Pali i uka ma ngi kunana. I ngaru tabu mu gu bole a nimadihi na rana,
PHI 1:30 i manga a nimadihi mu matai iau a bolea, pali ngane mu longo i tabana ma i lobo.
PHI 2:1 E Kristo i vakatora a hatene mua. A hini i ngaru hateka mua i vakatora a niluhoi ne mua. A Hanu Kiripiripi i rata mua mu made kamumu palupu. Mu vangaru, mu vakori.
PHI 2:2 I mavonga, mu rata iau ga vivi dagi. Mu pesi palupu na niluhoi i taku, mu vangaru, mu made na nivalemu, na niluhoi i taku kunana.
PHI 2:3 Naha ni luhoi mua kunana. Naha ni vakadagi a rane mua. Mu vakakiroko mua, mu rata manga e huriki lobo ri dagi ne mua.
PHI 2:4 Mua takutaku, naha ni luhoi ni korimule kunana mua. Mu vakori.
PHI 2:5 Pali a vilone mua ge manga a vilone Isu Kristo.
PHI 2:6 E Kristo ia a Vure, pali i uka ma i luhoi ni nugu tata a murina ni made manga a Vure.
PHI 2:7 I vakakiroko liu ia, i bele manga a vora. Ni poda ia, i bele manga a bakovi. Na tahuna i bele manga a bakovi,
PHI 2:8 i vakakiroko ia, i longototoa a Vure, i vano i harena na tahuna i mate na kai tavalavala.
PHI 2:9 I mavonga a Vure i vakadagi hateka ia. I vunua a rana, ra i rangi a rana e huriki lobo.
PHI 2:10 Ngane e huriki lobo bara ri turume puru na ngalane Isu, e huriki meli na hunu, e huriki na malala, e huriki polotano na malala.
PHI 2:11 E huriki lobo bara ri taki tala ne Isu Kristo ia a Bakovi Dagi. Na naro iea ri gi kavurikea a Vure, e Tamane hita.
PHI 2:12 I mavonga, mua e huriki a turagu, mu longototo, i manga a hini mu longototo vakaroro. Ngane i uka ma a made turane mua, a ngaru mu gu longototo hateka. Mu mangenge na Vure, mu togoa, mu rura ni vakatora a niluhoi ne mua, lakea a Vure ge korimule mua,
PHI 2:13 a vuhuna a Vure i leho pololilo ne mua, i habi a ningaru ne mua, a nitora ne mua ni rata a maki i vivi vona.
PHI 2:14 A maki lobo mu rata, naha ni deke, naha ni hehe,
PHI 2:15 lakea i uka tara viri ge padi virihi mua. Bara mu malamala kunana. Bara mua e huriki a tuna Vure, mu uka ngava na kurukuruna e huriki a bakovi ri putu ngingi na tahuna mona. Bara mu para manga a hada na kurukurune ria.
PHI 2:16 Mu nugu tata tora a ngava na nimahuri, lakea na parava e Kristo i valai vona, bara vivi ne mua, i uka ma a nunu tavula, i uka ma a leho tavula.
PHI 2:17 Iau bara vivi kunana ni bele turane mua manga a nihabi na vain, ni gi guru tala langa na nihabi ne mua, a leho ne mua, ra hini mu luhoi torea e Kristo, bara vivi turane mua.
PHI 2:18 Mua ranga, bara mu vivi turagu.
PHI 2:19 E Isu a Bakovi Dagi bara i ngaru, bara rudu lakenea ne mua e Timoti. Muri bara vivi na tahuna i hamule valai nau, i vakalongo iau ne mua.
PHI 2:20 I uka a turagu manga e Timoti. I luhoi hateka mua.
PHI 2:21 E huriki ranga koea i uka ma ri luhoi a maki ne Isu Kristo. Ri luhoi kunana a maki ne ria.
PHI 2:22 Pali mu lohoka vona e Timoti. I vakasiri pali a narona i kamumu hateka. I leho turagu ni vakalongo a Velenga Kamumu, i manga a koma i tuhoria e tamana.
PHI 2:23 Na tahuna a longo a ra maki ge bele nau, bara rudu lakenea malaviriri.
PHI 2:24 A luhoi torea e Bakovi Dagi ge tuhori iau, lakea tabukoi bara lakene ne mua.
PHI 2:25 Pali muga ga rudu mulea ne mua e Paproditus. I manga e turagu muholi. Miri leho palupu ni tagari a Velenga Kamumu. Ia a vinuru ne mua, mu rudu vilia ge tuhori iau.
PHI 2:26 I dodo hateka mua. I loho lege ne mua, a vuhuna mu longo ta i giloa.
PHI 2:27 I muholi hateka, i giloa, i tabukoi ge mate. Pali a Vure i dodoa. I uka ma i dodo kunana ia. Iau tara, i dodo iau, ma ge mate, ga dodo hatekea.
PHI 2:28 I mavonga a ngaru hateka ni rudu mulea, mu gu vivi ni matai tabu ia. Iau tara, i uka ma ga loho lege lae vona.
PHI 2:29 I mavonga, na tahuna i bele, mu vivi, mu taguia na narone Bakovi Dagi. Mu togo e huriki a bakovi maea,
PHI 2:30 a vuhuna i tabukoi ge mate na leho ne Kristo. I putu purua a gilanga vona, i kori polo iau na rane mua.
PHI 3:1 Mua e huriki a turagu, mu vivi ne Bakovi Dagi. A ngava iea i uka ma i vakapae iau ni here tabu lakene mua. Bara i kori mua.
PHI 3:2 Mu matadoko vona e huriki ri katoki hateka manga a ligo, e huriki a mari ni rata a naro hale, re huriki ri pala vuroki mule a kuline ria.
PHI 3:3 Pali hita kunana a Israel muholi, si kavurikea e Isu Kristo na nitora na Hanuna Vure, ra hita i uka ma si luhoi hateka a kakaine hita.
PHI 3:4 Pali iau a tahoka a vuhuna ni luhoi a kakaigu. E rei a viri i luhoi i tahoka a vuhuna ni luhoi a kakaina, iau a tahoka a vuhuna dagi.
PHI 3:5 Iau ni pala a kuligu na polotoluna parava muri ne iau ni poda. Iau a bakovi o Israel. A kabu nau, a kabu ne Bensamin. Iau a Hibru muholi. Na naro ni ramai a vinara, iau a Pariseo.
PHI 3:6 Na naro ni kinigao na leho na Vure, iau a vakamadihi hosi a tara ne Kristo. A pahaluhoi ta a malamala, a ramai lobo a vinara.
PHI 3:7 Hosi a pahaluhoi ta a maki nga a maki dagi hateka. Pali ngane a matai ria a maki tavula a vuhuna i dagi hateka a maki i ratea e Kristo.
PHI 3:8 Na tahuna a luhoia a hini a lohoka ne Isu Kristo, a Bakovi Dagi nau, a maki lobo ranga a maki tavula na matagu. A vuhuna a lohoka ne Kristo, a maki lobo nau a matai i manga a lulu kunana. A vuroki lobo, ga bolea e Kristo,
PHI 3:9 ga rihi ia. I mavonga i uka ma ga malamala a vuhuna a ramai lobo a vinara. A Vure i rata iau a malamala a vuhuna a luhoi torea e Kristo. A naro ni bele malamala na matana Vure i bele na tahuna si luhoi torea e Kristo.
PHI 3:10 A ngaru ni lohoka vona e Kristo. A ngaru ni lohoka vona a nitora i vakamahuri mulea na matenga. A ngaru ni bole a nimadihi i manga ia i bole, ga mate manga ia i mate.
PHI 3:11 Na naro iea, a ngarua a Vure ge vakamahuri mule iau na matenga.
PHI 3:12 I uka ma a taki a mulangi pali, o a moro liu pali. Pali a rura ni bele manga e Isu Kristo, a vuhuna i vulaki iau.
PHI 3:13 Mua e huriki a turagu, i uka ma a luhoi a bele pali manga e Kristo. Pali a maki a ratea i maea: i uka ma a luhoi tabu a maki muga. A toni a bulugu ni bole a maki muri.
PHI 3:14 A toni a bulugu, ga bole a mapagu meli na hunu, ra Vure i gale hita vona na tahuna si luhoi torea e Isu Kristo.
PHI 3:15 Hita e huriki si moro pali na niluhoi torea e Kristo si gi luhoi maea. E rei ne mua mu luhoi tebi, a Vure bara i vakalohoka mua.
PHI 3:16 Pali a ra lohokanga si bole pali, si gi nugu tatea.
PHI 3:17 Mua e huriki a turagu, mu rata manga iau. Mu matanono, mu toni e huriki ri laho manga a hini a vakasiri mua mu gu laho vona.
PHI 3:18 I kupo e huriki ri laho manga a pile na kai tavalavala ne Kristo. Balaka kupo a vakalongo mua ne ria. Ngane a vakalongo tabu mua, a tangi.
PHI 3:19 A vure ne ria, a ningaru hale na kakaine ria. A bagetua ne ria a maka naro ni maruhu ri rata. Ri luhoi kunana a maki na malala. Bara ri vurua.
PHI 3:20 Pali a tanga muholi ne hita, meli na hunu. Si davea e Bakovi Dagi, e Isu Kristo, ge valai vona, ge korimule hita.
PHI 3:21 Bara i rata a kakaine hita tavula i mapulo, bara i bele manga a kakaine Kristo, ra i bagetu hateka. Bara i rata mavonga na nitora vona, ra i rata a maki lobo i tabuli na limana.
PHI 4:1 I mavonga, mua e huriki a turagu, mu pesi tata mavonga turana e Bakovi Dagi. A ngaru hateka mua, a vivi ne mua. A ngaru hateka ni matai mua. Mu vakabagetu a leho nau.
PHI 4:2 O Eudia, o Sintike, a ngaru muru gu pesi palupu na niluhoi i taku, a vuhuna muru rihi e Bakovi Dagi.
PHI 4:3 Pali ioe Sisogos tara, o kori a ngatavine ala rua nga. Rua varago ru leho turagu ni vakalongo a Velenga Kamumu. Mete leho turana e Klemen, e huriki ranga, a rane ria ni here na buk na nimahuri.
PHI 4:4 Mu vivi vakaroro ne Bakovi Dagi. A taki tabu, mu vivi.
PHI 4:5 Mu ta madoru mai e huriki lobo. E Bakovi Dagi i tabukoi ge valai,
PHI 4:6 i mavonga naha ni loho pae vona tara maki. Pali mu vasileki na maki lobo. Mu takia a Vure a ra maki mu ngarua. Mu kavurike ia vona a maki lobo i rata pali.
PHI 4:7 Lakea a nivalemu na Vure, ge matakari a hatene mua, a niluhoi ne mua, a vuhuna mu rihi e Isu Kristo. A nivalemu iea i kamumu hateka, si keri ni lohoka lobo vona, i uka harena.
PHI 4:8 Mua e huriki a turagu, a maka naro i muholi, a maka naro ni togo, a maka naro malamala, a naro kiripiripi, a naro kamumu e huriki ri ngaru, a naro e huriki ri kavurikea, a maka maki i kamumu, a maka maki e huriki ri kavurike, mu luhoi tata a maki nga.
PHI 4:9 A maka naro a tovo mua vona, a ngava mu longo nau, a naro mu matai a rata, mu rata, lakea a Vure na nivalemu bara i made turane mua.
PHI 4:10 A kavurikea e Bakovi Dagi a vuhuna mu luhoi tabu iau. Hosi mu luhoi iau, pali mu uka dala ni kori iau.
PHI 4:11 I uka ma a bala tara maki, pali a tovo pali ni vivi kunana. Iau a tahoka a maki, o a bala a maki, a vivi kunana.
PHI 4:12 Iau a made navai, a bala a maki, o a tahoka a maki i kupo, a maru, o a vitolo, iau a lohoka ni made kamumu kunana.
PHI 4:13 E Kristo i vaka­tora iau, lakea a kara ni rata a maki lobo.
PHI 4:14 Pali i kamumu mu kori iau na tahuna a bole a maregoa.
PHI 4:15 Pali mua, a tara na Vure o Pilipai, mu lohoka vona, na tahuna a vara karaba ne mua a Velenga Kamumu, muri a pe a tabeke ne Masedonia, i uka tara na Vure ge tuhori iau na nilaho nau. Mua kunana mu tuhori iau.
PHI 4:16 Iau a made o Tesalonika, mu vakaru nau a kinori ne mua balaka rua.
PHI 4:17 I uka ma a ta maea mu gu vakaru tabu a kinori. A ta maea, a vuhuna a ngarua a Vure ge rata kamumu mua a vuhuna mu rata kamumu iau.
PHI 4:18 Pali ngane i uka ma a bala tara maki. A tahoka i kupo hateka, a vuhuna e Paproditus i habi polo nau a kinori mu vakaru valai turana. I manga a nihabi manginoro, a Vure i burongia, i vivi.
PHI 4:19 A vuhuna mu rihi e Isu Kristo, a Vure nau ge vakatahoka mua na maki lobo mu bala vona, ge ramai a mahala vona na hunu, i kupo hateka.
PHI 4:20 A Vure, e Tamane hita. Ne vona kunana a bagetuanga lobo vakaroro. I muholi.
PHI 4:21 A talo e huriki a tara na Vure ri rihi e Isu Kristo. E huriki a turane hita koea ri tagui mua.
PHI 4:22 E huriki a tara na Vure koea ri talo rike ne mua. E huriki ri leho polo­lilo na rumahariki ne Kaiser, ria ranga ri talo mua.
PHI 4:23 E Isu Kristo a Bakovi Dagi ge rata kamumu mua.
COL 1:1 Iau e Paulus. A Vure i vulaki iau ge iau a apostolo ne Isu Kristo. Maria e Timoti miri herea a raukea iea.
COL 1:2 A here lakene mua e huriki a tara na Vure o Kolosi. A Vure i ru herehere mua, mu madoko turane Kristo. A Vure, e tamane hita, ge rata a naro kamumu ne mua, ge habi a nivalemu ne mua.
COL 1:3 Maria e Timoti miri vasileki vakaroro ne mua, miri kavurikea a Vure, e Tamane Bakovi Dagi ne hita, e Isu Kristo,
COL 1:4 a vuhuna miri longo mua mu luhoi hatekea e Isu Kristo, mu ngaru e huriki a tara na Vure.
COL 1:5 Mu rata mavonga, a vuhuna mu pasimata na tahuna e Isu ge bole mua, mu gu made turana vakaroro na hunu. Mu vakatubu ni pasimata mavonga na tahuna mu longo a ngava muholi, a Velenga Kamumu.
COL 1:6 Ra Velenga Kamumu ne Isu Kristo ni tovo e huriki vona na tanga lobo na malala, lakea i rata ranga e huriki ri pulo a vilone ria. I manga kunana a naro i bele ne mua na tahuna mu longo muga a Velenga Kamumu, mu matakilalea a rabu muholi na nidodo na Vure.
COL 1:7 E Epapras a viri i tovo mua vona a Velenga Kamumu. Miri ngaru hatekea a bakovi iea. Ia tara a vora ne Kristo, i tuhori maria. I rata kamumu a leho lobo e Kristo i habi vona.
COL 1:8 I vakalongo maria vona mu longototoa a Hanuna Vure, mu ngaru e huriki lobo.
COL 1:9 Na tahuna miri longo a nuverei ne mua, miri vasileki vakaroro ne mua. Miri nana vakaroro a Vure ge rata mua, mu gu gao na maki na Vure, ge habi a lohokanga ne mua, mu gu lohoka na ningaru vona.
COL 1:10 Miri vasileki mavonga, a vuhuna miri ngaru mu gu laho na naro e Bakovi Dagi i ngaru mu gu laho vona, ge vivi ne mua, a leho kamumu ne mua ge tahoka a kanena, mu gu lohoka kamumu tabu na Vure.
COL 1:11 A Vure ge vakatora hateka mua na nitora dagi lobo vona, lakea i uka ma mu gu tuha malulu, mu gu hatenono,
COL 1:12 mu gu vivi ni kavurikea e Tamane hita, ra i rata mua mu kara ni bole a tabeke na maka maki i kisi puru pali meli na hunu, ne huriki a bakovi a ngatavine vona.
COL 1:13 A Vure i korimule hita na nitora ne Satan, i bole hita lakea na harikianga ne Tuna a hatena.
COL 1:14 Ia a viri i korimule hita, i puga vuroki a naro hale ne hita.
COL 1:15 A Vure, i uka tara viri ge masia. Pali e Tuna i manga kunana a Vure, i vakasiri hita na Vure. E Tuna a Tabua i dagi hateka na maki lobo ni ratarike,
COL 1:16 a vuhuna na limane Kristo kunana, a Vure i ratarike a maki lobo. I ratarike a maka maki na malala, a maka maki na hunu. I ratarike a maka maki si matai, a maka maki i uka ma si matai. I ratarike e huriki a hanitu, e huriki a agelo ri tahoka a nitora dagi turana maka maki ranga ri tahoka a nitora, ri matakari koea na malala. A Vure i rata na limane Kristo a maki lobo ge ne vone Kristo.
COL 1:17 Na tahuna a maka maki i uka ma ni ratarike ma, e Isu Kristo i made muga pali. Na nitora vona, a maki lobo i tabuli kamumu.
COL 1:18 E Kristo i muga ne huriki a tara na Vure. Ia a vuhuna maki lobo, ia a viri i muga i pesi rike mule na matenga, ge muga na maki lobo,
COL 1:19 a vuhuna a Vure i ngaru a rabuna lobo ge tabuli vona.
COL 1:20 Na nimatene Kristo na kai tavalavala, a Vure i rata a maki lobo koea na malala, meli na hunu, ri made kamumu tabu turana na nivalemu.
COL 1:21 Muga mu marava basi na Vure. Na niluhoi ne mua, mua a pile na Vure. A vilone mua i hale.
COL 1:22 Na nimatena, e Kristo i rata mua ngane mu made turana Vure na nivalemu. I rata mavonga a vuhuna i ngaru mu gu valai tabukoi na Vure, mu gu made malamala na matana, i uka ma ge pelekado mua.
COL 1:23 A maka ngava nga i muholi na tahuna mu nugutata, mu pesi tora na niluhoi ne mua, ma ge turari mua a maki tara bara mu vorotaparaki a maki si pasimata ni matai na Velenga Kamumu. Iau e Paulus a vora ni vakalongo a Velenga Kamumu iea, ra mu longoa pali, ni vakalongo lae ne huriki lobo na malala.
COL 1:24 Ngane a vivi, a vuhuna a bole a ni­madihi ga kori mua, ga tuhori mua e huriki a tara na Vure, mua a kakaine Kristo. A nimadihi a bole na kakaigu na rane Kristo, i uka ma ge lobo mala­viriri. Bara i tabana.
COL 1:25 A Vure i vulaki iau, ge iau a vora ni vakalongo a Velenga Kamumu ne mua, mu gu lohoka kamumu vona.
COL 1:26 Muga, a ngava iea i kapiloho ne huriki e tubune hita, pali ngane ni pukatala ne huriki a tara na Vure, ni vaka­lohoka ria vona.
COL 1:27 Na ningaru vona kunana, a Vure i puka talea a niluhoi kapiloho vona ne ria. I ngaru ri gi lohoka vona a niluhoi kapiloho. Ra niluhoi kapiloho vona i kamumu hateka, i habi a nipara dagi ne huriki i uka ma ria a Iuda. A niluhoi kapiloho i maea: a Vure i ngaru e Kristo ge made pololilo ne mua e huriki i uka ma mua a Iuda. Ngane mu malamala bara mu pasimata vona a Vure ge bole dili mua na hunu.
COL 1:28 Miri vakalongo mua vona a Velenga Kamumu ne Isu Kristo. Miri tovo e huriki na lohokanga lobo, miri taki ria ri gi muri mai a nitana Vure, a vuhuna miri ngaru e huriki lobo ri gi malamala, ri gi lakea na Vure. Na tahuna ri gi bele na Vure, miri ngaru ria ri gi bele manga e Kristo.
COL 1:29 Iau a leho hateka i valai i harena mona. Ra nitora na Vure i tabuli nau, a habi loboa na leho iea.
COL 2:1 Mua e huriki a Kolosi, turana e huriki a Laodisia, turana e huriki ranga i uka ma ri matai iau ma, a ngaru mu gu lohoka nau, a leho hateka ni tuhori mua.
COL 2:2 A leho hateka ni tuhori mua mu gu pesi tora palupu, mu gu vangaru. A leho hateka ni tuhori a niluhoi ne mua, mu gu lohoka vona a nita kapiloho na Vure. E Kristo kunana ia a vuhuna a nita kapiloho iea.
COL 2:3 A lohokanga lobo, a niluhoi kamumu lobo i tabuli ne Kristo.
COL 2:4 A here lakea ne mua a ngava iea, a vuhuna a marikoi tara viri ge tami mua na ngava taminga i nangi kamumu.
COL 2:5 Iau i uka ma made turane mua, pali a niluhoi nau i tabuli turane mua vakaroro. A vivi vona a hini mu pesi taku mu luhoi torea e Kristo.
COL 2:6 Lakea, i manga a hini mu bolea hosi e Isu Kristo ge ia a Bakovi Dagi ne mua, ngane a ngaru mu gu laho turana vakaroro.
COL 2:7 Mu laho turana maea: Mu madoko turane Kristo, mu koru rike na rabuna, mu pesi tora na niluhoi ne mua i manga kunana a ngava ni tovo muga mua vona, mu kavurike vakaroroa a Vure.
COL 2:8 Mu matadoko ne huriki, ma ri gi tami mua, ri gi kolotata mua na ngava tavula na niluhoi na malala. A niluhoi iea i uka ma i valai ne Kristo, i valai ne huriki a gare hosi, ne huriki a hanitu.
COL 2:9 Nahea ri gi tami mua, a vuhuna a naro lobo na Vure i tabuli pololilo na kakaine Kristo.
COL 2:10 Mu madoko pali turane Kristo, ra viri i rangi lobo a maka hanitu, a nitora koea na malala.
COL 2:11 Mu madoko turane Kristo, i puga vuroki a naro hale ne mua, i manga a rabu ni pala a kulina viri.
COL 2:12 Na tahuna ni vahilolo mua, i manga a Vure i tanu mua turane Kristo. Lakea mu pesi rike turane Kristo, a vuhuna mu luhoi tora a nitora na Vure, ra nitora na Vure i vakamahuri mulea e Kristo na matenga.
COL 2:13 Hosi mu marava basi na Vure, i manga mu mate pali, a vuhuna mu rata vakaroro a naro hale. Pali a Vure i vakamahuri mua, mu gu made na nimahuri karaba turane Kristo. A Vure i puga vuroki lobo a naro hale ne hita.
COL 2:14 A maka naro hale lobo si rata ni here puru, muri ma bara ni pelekado hita, si vurua ne ria, a vuhuna si longotaro a vinara. Pali a Vure i ravunu vuroki pali a ngava na maka naro hale ne hita ta ni gi pelekado hita vona. I ravunu vuroki lobo a maka ngava nga, i paditata na kai tavalavala turane Kristo na tahuna i mate.
COL 2:15 Muri i vakalobo a nitora ne huriki a hanitu, a taua ri matakari koea na malala. I vakasiri kavakava e Kristo i ratapile ria pali na tahuna i mate na kai tavalavala. I rangi ria, i rata ria ri manga a maki tavula na matane huriki.
COL 2:16 Lakea, nahea tara viri ge pelekado mua na maki mu kani, na maki mu ninu, na habu na lotu, na habu na keva karaba o na Parava Nimalo.
COL 2:17 Naha ni longo mai ria, a vuhuna a maka naro nga, a hanuna maki ta ge bele muri ma. Pali a ngava muholi, si longo ne Kristo.
COL 2:18 Naha ni vakahale mua mu gu longo mai a viri i tamilalu ni vakakiroko ia, ge taki mua mu gu kavurike e huriki a agelo. A bakovi maea i luhoi hateka a maki i vurena vona. I uka ma i luhoi a Vure. I bibi rike mule tavula ia na maka niluhoi viliha.
COL 2:19 A bakovi maea i uka ma i pesi tata turane Kristo. E Kristo i muga, i matakari e huriki a murimuri vona ri laho palupu. I manga kunana a gina bakovi, i habi a maki ni kani vona a maka tabeke lobo na kakaina, lakea ri leho, ri koru palupu na nitora na Vure.
COL 2:20 Mu mate pali turane Kristo, lakea e huriki a hanitu i uka ma ri gi matakari tabu mua. Pali i navai mu tabana ni muri mai a vinara na malala, a vilo hosi na malala i ta maea,
COL 2:21 “Naha ni nugua a maki iea! Naha ni kania a maki iea! Naha ni padoia a maki iea!”
COL 2:22 Ra maka vinara nga, i uka ma ri gi tabuli vakaroro, bara ri lobo, a vuhuna a ngava na malala kunana.
COL 2:23 Muholi, a maka vinara na malala nga ri mata manga a niluhoi kamumu. E huriki ri ramai a maka vinara nga ri tatami ni kavurike a Vure. Ri tatami ni vakakiroko ria, ri ngaru ni vakalobo a ningaru na naro hale na hatene ria, lakea ri ubi mule ria. Pali a maka naro nga, ri keri ni vaka­lobo a ningaru na rabu hale pololilo na hatene ria.
COL 3:1 A Vure i vakamahuri mua pali turane Kristo. I mavonga, mu luhoi kunana a maki na hunu. E Kristo i made vonga na limana kanena Vure.
COL 3:2 Naha ni luhoi a maki na malala, mu luhoi kunana a maki na hunu.
COL 3:3 Mu luhoi a maki na hunu, a vuhuna mu mate pali, mu kapiloho turane Kristo pololilo na Vure.
COL 3:4 E Kristo i rata hita si mahuri. Na tahuna ge valai tabu, bara mu pesi turana na bagetuanga vona.
COL 3:5 Lakea ngane, mu vakalobo liu a maka naro hale na malala i tabuli na hatene mua. Naha ni rata a rabu na molenga, naha ni gaodeko, naha ni ngutu na bakovi o a ngatavine tara. Naha ni ngutu na maki na viri tara. A viri i ngutu na maki na viri tara i manga kunana i kavurike a vure tebi.
COL 3:6 A naro hale nga kunana ri vakabele a rongova dagi na Vure.
COL 3:7 Hosi mu ramai a maka ningaru hale nga.
COL 3:8 Pali ngane naha ni rata tabu a maka naro hale nga: naha ni hinihate, naha ni mata robo, naha ni marikoi a viri, naha ni padimomo, naha ni harogi a viri,
COL 3:9 naha ni tami e huriki a turane mua. Naha ni rata tabu a maka vilo nga, a vuhuna mu pe pali a naro hosi,
COL 3:10 mu bole pali a vilo karaba. Ra vilo karaba a Vure i ratarikea, i rata karabea vakaroro, ge manga a vilona, lakea bara mu lohoka muholi na Vure.
COL 3:11 Na matana Vure e huriki a Iuda, e huriki i uka ma ria a Iuda, e huriki ni pala a kuline ria, e huriki i uka ma ni pala a kuline ria, e huriki a bakovi na robo, e huriki a vora, e huriki i uka ma ria a vora, ria lobo ri palupulupu na matana Vure. E Kristo ia a maki lobo, i made pololilo ne huriki ri luhoi torea.
COL 3:12 A Vure i vulaki mua pali, ge mua e huriki a tara vona, i ngaru hateka mua. Lakea ngane mu dodo e huriki ri tahoka a maregoa, mu tuhori ria. Naha ni kavurike mule mua, mu vakakiroko mua, mu made madoru turane huriki a turane mua. Mu hatenono, naha ni hinihate.
COL 3:13 Mu made kamumu turana e huriki lobo, mu lohopile a naro hale ri rata virihi mua vona. I manga kunana e Bakovi Dagi i puga vuroki a naro hale ne mua, mua ranga mu lohopile a naro hale ni rata virihi mua vona.
COL 3:14 Mu ngaru e huriki a turane mua. Ra naro ni vangaru i rangi a naro lobo, i rata e huriki ri vamade palupu.
COL 3:15 A nivalemu ne Kristo ge matakari a niluhoi ne mua, ge ratea a niluhoi ne mua ge kamumu, a vuhuna a Vure i vulaki mua mu gu made palupu na nivalemu i manga a kabu i taku. Mu kavurike vakaroroa a Vure.
COL 3:16 Mu bolea a nitane Kristo ge tabuli kamumu pololilo na hatene mua. Mua takutaku mu tovo mu habi a niluhoi kamumu ne huriki a turane mua. Mu kalolo a maka linge na lotu, a linge vasileki, mu kavurikea a Vure.
COL 3:17 A ra maki mu taki, a ra maki mu rata, mu rata na rane Isu a Bakovi Dagi, mu kavurikea a Vure e Tamane hita.
COL 3:18 Mua o huriki a ngatavine, mu longototo e girihine mua. A naro iea i malamala na matane Bakovi Dagi.
COL 3:19 Mua o huriki a bakovi, naha ni rata hale e girihine mua. Mu ngaru ria.
COL 3:20 Mua o huriki a koma mu longototo e tamane mua e kinane mua, a vuhuna e Bakovi Dagi i vivi vona a naro iea.
COL 3:21 Mua o huriki a tamana koma, naha ni tahate vakaroro e huriki e tune mua. Bara mu tahate vakaroro ria, bara i madihi a hatene ria, ri rihate.
COL 3:22 Mua o huriki a vora, mu longototo a ngavane huriki a bakovi dagi ne mua koea na malala. Naha ni leho kunana na tahuna ri pesi tabukoi ne mua. Naha ni leho ni gi bibi rike a rane mua. Mu leho kamumu a vuhuna mu ngaru ni togo a Vure.
COL 3:23 A ra leho mu rata, mu rata na hatene mua. Naha ni leho manga mu rata a leho na bakovi kunana. Mu leho manga mu rata a leho ne Bakovi Dagi,
COL 3:24 a vuhuna mu lohoka vona, muri ma e Kristo a Bakovi Dagi bara i kona kamumu mua. Bara mu bolea ra mapa i ta muholi vona ge habi ne huriki a tara vona. E Kristo kunana a viri mu vora vona.
COL 3:25 Mu longo kamumu. A viri i rata a naro hale, a Vure bara i vakamadihia na naro hale i ratea. A Vure i pelekado a narone huriki lobo na naro i taku kunana.
COL 4:1 Mua e huriki a tahona vora, mua ranga, mu rata a naro kamumu ne huriki a vora, a vuhuna mu lohoka vona, mua ranga mu tahoka a Tahone mua i made na hunu.
COL 4:2 Mu vasileki vakaroro, naha ni malo. Na tahuna mu vasileki, mu matadoko, mu kavurikea a Vure.
COL 4:3 Mu vasileki na Vure ge tuhori maria, ge kado a dala ne maria, miri gi vakalongo tabu a nita kapiloho ne Kristo. Ngane a made na bavi, a vuhuna a vakalongo e huriki na nita iea.
COL 4:4 Mu vasileki nau ga tovo kavakava e huriki vona ra ngava iea, i manga a hini a Vure i ngaru ga rata.
COL 4:5 Mu luhoi kamumu, mu rata a naro malamala ne huriki i uka ma ri luhoi torea e Isu Kristo. Na tahuna mu made turane ria, mu taki kunana a maki ne Kristo.
COL 4:6 Mu ta kamumu mai ria, mu tuveve kamumu ria vona a nita muholi. Na tahuna ri nana mua, mu koli kamumu a ninana ne ria.
COL 4:7 E Tikikus bara i vakalongo mua vona iau a made navai. A ngaru hatekea. I rata kamumu a leho lobo e Bakovi Dagi i habia vona, miri leho palupu ne Bakovi Dagi.
COL 4:8 A rudu lakenea, ge vakalongo mua vona a leho miri rata koea, ge vaka­tora a niluhoi ne mua.
COL 4:9 A bakovi na tanga ne mua, e Onesimus, ia tara a rudua ge turane Tikikus. E Onesimus i luhoi torea e Bakovi Dagi, miri ngaru hatekea. Rua varago ru gu vakalongo mua vona a maka maki i bele koea.
COL 4:10 E Aristakus i dili turagu na bavi koea, i talo rike a haro kamumu ne mua. E Markus, e tarine Barnabas, ia tara i talo rike ne mua. Hosi a vakalongo mua vona e Markus. Na tahuna ge bele iene, mu tagui ia.
COL 4:11 A bakovi ni gale e Isu, a rana kalale vona e Iustus, ia tara i talo rike a haro kamumu ne mua. Ra bakovi nga, tou kunana a bakovi o Israel, to leho turagu koea ni tovo e huriki na nitana Vure. To vakatora a niluhoi nau.
COL 4:12 E Epapras ia a bakovi na tanga ne mua, a vora ne Isu Kristo, ia tara i talo mua. I vasileki hateka vakaroro ne mua mu gu pesi tora na ningaru lobo na Vure, mu gu gao ni ramai a Vure, mu gu longo mai a ngavana Vure.
COL 4:13 Iau a taki mua, i leho hateka ni kori mua turane huriki ri made na vuhutanga e Laodisia, e Hirapolis.
COL 4:14 E Lukas, ra dokta si ngaru hatekea, turane Demas rua ranga ru talo rike a haro kamumu ne mua.
COL 4:15 A ngaru mu gu habi a nitalo nau ne huriki a tara na Vure o Laodisia. A haro kamumu na ngatavine e Nimpa, turana e huriki a tara ri vapopo na ruma vona.
COL 4:16 Na tahuna mu gi loboa a raukea iea, mu vakaru lakea ne huriki a tara o Laodisia, ria ranga ri gi gia. Pali ra raukea tara a vakaru lakea o Laodisia, ia tara mu bolea mu gia.
COL 4:17 Mu takia e Arkipus mu ta maea, “Ra leho o bolea ne Bakovi Dagi, o leho kamumu vona o vakaloboa.”
COL 4:18 Iau e Paulus a herea na limagu a ngava nitalo nga, a talo rike a haro kamumu ne mua lobo. Mu luhoi iau, a tabana na nimade na bavi. A Vure ge rata a naro kamumu ne mua.
1TH 1:1 Iau e Paulus, turane Sailas, e Timoti mete herea a raukea iea i lakene ne mua o Tesalonika, ra mua e huriki a tara na Vure, e Tamane hita, e Isu Kristo a Bakovi Dagi. A Vure ge rata kamumu mua, ge habi a nivalemu ne mua.
1TH 1:2 Na parava lobo mete luhoi mua, mete kavurikea a Vure, mete luhoi mua na tahuna mete vasileki.
1TH 1:3 Na tahuna mete vasileki na Vure, e Tamane hita, mete luhoi mulea a leho kamumu mu ratea a vuhuna mu luhoi torea a Vure, a leho kamumu mu ratea a vuhuna mu ngaru e huriki. Mete luhoi mule tabu a hini mu hatenono na tahuna mu bole a nimadihi, a vuhuna mu pasimata ne Isu Kristo a Bakovi Dagi ne hita ge hamule valai.
1TH 1:4 Mua e huriki a turagu, a Vure i ngaru hateka mua. Mete lohoka vona i vulaki mua.
1TH 1:5 Mete lohoka vona, a vuhuna a Velenga Kamumu mete vakalongo ne mua, i uka ma a ngava kunana. I bele turana nitora na Hanu Kiripiripi. Mu matai kavakava a hini mete luhoi hatekea a ngava iea, a vuhuna mu matai a rabune mateu na tahuna mete made turane mua. A rabu mete rata ne vona ni tuhori mua kunana.
1TH 1:6 Muri mu ramai a rabune mateu, a rabune Bakovi Dagi, a vuhuna mu bole a maregoa na tahuna mu luhoi torea a nitana Vure. Pali mu pitei na nipitei na Hanu Kiripiripi.
1TH 1:7 Lakea e huriki ri luhoi torea e Kristo o Masedonia, o Akaia, ri longo mua, mu rata a naro kamumu, lakea ri ngaru ni ramai.
1TH 1:8 I muholi, e huriki o Masedonia, e huriki o Akaia ri longo ne mua a nitane Bakovi Dagi, i manga si longoa a viri basi i pupu a tavure. I uka ma e huriki nga kunana ri longoa. E huriki na tanga i kupo ri longo a velengane mua mu luhoi torea a Vure, lakea i uka ma mete vakalongo tabu ria.
1TH 1:9 Ria kunana ri tuverei polo ne mateu na hini mu tagui kamumu mateu. Ri tuverei tabu ne mateu na hini mu ha taro pali a maka vure taminga, mu ramai a Vure muholi, ra Vure mahuri.
1TH 1:10 Ri tuverei tabu ne mateu na hini mu pasimata ne Tuna, e Isu, ge hamule valai na hunu, ra viri a Vure i vakamahuri mulea na matenga. Ia kunana i korimule hita na rongova na Vure ta ge valai.
1TH 2:1 Mua e huriki a turagu mu lohoka vona a leho mete rata na tahuna mete made turane mua, i uka ma i velu tavula.
1TH 2:2 Mu lohoka vona e huriki o Pilipai ri harogi mateu, mete bole a nimadihi. Muri, na tahuna mete lakea na tanga ne mua, e huriki ala kupo ri marikoi, ri toni ni lili mateu. Pali a Vure i rata mateu, i uka ma mete mangenge ni vakalongo ne mua a Velenga Kamumu.
1TH 2:3 I uka ma mete mangenge, a vuhuna a Velenga Kamumu, i uka ma a ngava taminga. I uka ma mete toni ni tami mua. I uka ma mete luhoi ni rata a rabu hale.
1TH 2:4 Mete vakalongo a Velenga Kamumu, a vuhuna a Vure i pelekado a hatene mateu, i matai i kamumu, lakea i habia ne mateu a leho ni vakalongo a Velenga Kamumu. I uka ma mete ngaru ni rata a bakovi ge vivi. Mete ngaru ni ratea a Vure ge vivi, ra viri i lohoka vona a niluhoi ne hita lobo.
1TH 2:5 Mu lohoka vona i uka ma mete tami mua na maka ngava kamumu ni bole dili mua. I uka ma mete tamilalu, mete ge bole kapiloho a moni ne mua. A Vure i lohoka vona, a ngava mete taki i muholi.
1TH 2:6 Na tahuna mete made vonga, i uka ma mete ngaru e huriki ri gi kavurike mateu. I uka ma mete ngaru mua mu gu kavurike mateu. Bara mete ngaru, bara mete vakuku mua, mu habi ne mateu a maki, a vuhuna mateu a apostolo ne Kristo.
1TH 2:7 Pali i uka ma mete rata mavonga. Mete made madoru turane mua, i manga a ngatavine i matakari e tuna kiroko.
1TH 2:8 Mete ngaru hateka mua, lakea i uka ma mete habi kunana ne mua a Velenga Kamumu na Vure, mete habi tabu a hatene mateu lakene ne mua, a vuhuna mete ngaru hateka mua.
1TH 2:9 Mua e huriki a turagu, i uka ma mu luhoi mule? Na tahuna mete made iene mete leho hateka. Mete leho hateka na haro a rodo, nahea mete ge habi a nimava ne mua na ni matakari mateu na tahuna mete vara mua na Velenga Kamumu.
1TH 2:10 Na tahuna mete made turane mua e huriki a tara na Vure iene, mete laho malamala turana Vure, mete rata a naro kamumu ne huriki lobo, i uka ma mete ratea tara naro hale. A Vure i lohoka vona. Mua ranga, mu lohoka vona.
1TH 2:11 Mu lohoka vona mete matakari kamumu mua takutaku, i manga a bakovi i matakari e huriki e tuna.
1TH 2:12 Mete vara mua, mete luke mua, mete vakuku mua mu gu laho kamumu, ge vivi ne mua a Vure, ra Vure i gale mua mu gu dili na harikia vona, mu gu vaveru vona a bagetuanga vona.
1TH 2:13 Na tahuna mu longoa ne mateu a nitana Vure, mu longo maia. Mu lohoka vona i uka ma a nitana bakovi. A nitana Vure. I leho pololilo na hatene mua e huriki mu luhoi torea e Kristo. Lakea mete kavurikea a Vure na parava vakaroro.
1TH 2:14 Mua e huriki a turagu, a maki i bele ne mua i manga kunana a maki i bele ne huriki a tara na Vure pololilo ne Isu Kristo o Iudea. A nimadihi mu bole na limane huriki a bakovi na tanga ne mua, i manga kunana a nimadihi e huriki o Iudea ri bole na limana e huriki a Iuda.
1TH 2:15 Re huriki a Iuda, ri rabalaki hosi e huriki a propet. Ri rabalakia e Isu a Bakovi Dagi. Muri ri lili tala mateu vonga. A Vure i uka ma i vivi ne ria. Ri gege e huriki lobo,
1TH 2:16 a vuhuna ri ngaru ni ta pupukari mateu nahea mete ge vakalongo a Velenga Kamumu ne mua e huriki i uka ma mua a Iuda. Ri koi mu gu bole a nimahuri vakaroro. Ra i mavonga, a naro hale ne huriki a Iuda nga ri vakalipopo ri kupo hateka. Ngane a Vure i madihi a hatena pali ne ria, i pelekado ria.
1TH 2:17 Mua e huriki a turagu, mete dodo hateka na tahuna ni tono tala mateu rira na tanga ne mua. I muholi ri tono tala mateu, pali mete luhoi bala mua. Mete pasimata ni matai tabu mua, lakea mete toni ni hamule ni matai mua tabu.
1TH 2:18 Mete ngaru ni lakene. Iau, e Paulus, a toni ni lakene balaka kupo. Pali e Satan i pututagu a dalane mateu.
1TH 2:19 Mete ngaru ni matai tabu mua, a vuhuna mete vivi ne matou. Mu rata mateu mete pasimata ni matai tabua e Isu Kristo a Bakovi Dagi ne hita. Na tahuna i hamule valai, bara si bibi rike a rane mua.
1TH 2:20 I muholi hateka, mete vivi ne mua, mete kavurike mua na matane huriki ranga.
1TH 3:1 Mete dodo hateka mua, lakea mete koi ni dava tabu. Mete luhoi i kamumu maria e Sailas miri gi made kikeri koea o Atens,
1TH 3:2 miri rudu lakenea ne mua e Timoti. Ia a turane hita, a vora na Vure ni vakalongo a Velenga Kamumu ne Kristo. Miri rudu lakenea ge vakatora a niluhoi ne mua,
1TH 3:3 ma ge vakaviliha a niluhoi ne mua a maregoa nga, ra mu dili vona ngane. Mu lohoka vona, a Vure i vulaki hita si gi bole a maregoa nga.
1TH 3:4 Mu lohoka vona, na tahuna mete made turane mua, mete vakalongo vakaroro mua ne huriki bara ri vakamadihi mua. Mu lohoka kamumu vona i bele pali manga a hini mete taki mua vona.
1TH 3:5 A lohoka vona muga bara ni vakamadihi mua, lakea a marikoi ni dava tabu. A rudua e Timoti i lakene ne mua, ge vakalongo iau vona mu tabana ni luhoi torea e Kristo, o i uka. A mangenge vona a bakovi ni toni, ma ge toni mua, muri bara i velu tavula a leho dagi ne mateu.
1TH 3:6 E Timoti i pe mua, ngane i luve pali koea, i vakalongo maria ne mua. I taki mu tabana ni luhoi torea a Vure, mu tabana ni vangaru. I taki iau mu luhoi maria na hatene mua na parava vakaroro, mu ngaru hateka ni matai maria, i manga kunana maria miri ngaru ni matai mua.
1TH 3:7 Mua e huriki a turagu, ngane mete bole a nimadihi, a maregoa. Pali a velengane mua, mu tabana ni luhoi torea a Vure, i luke mateu.
1TH 3:8 Mete lohoka vona ngane mu tabana ni pesi tora turane Bakovi Dagi, mete vivi tabu ngane.
1TH 3:9 Mete kavurike hatekea a Vure, a vuhuna mete vivi hateka ne mua.
1TH 3:10 Mete vasileki tora vakaroro na Vure ge longo mai a ningaru mateu, mete ge matai tabu mua, mete ge vakatora a niluhoi ne mua.
1TH 3:11 Mete ngarua a Vure, e Tamane hita, turana Bakovi Dagi ne hita e Isu, ru gu kado puru a dalane mateu, mete ge lakene.
1TH 3:12 A Bakovi Dagi ge rata mua mu gu vangaru hateka tabu, mu gu ngaru hateka tabu e huriki ranga, ge manga a hini mete ngaru hateka mua.
1TH 3:13 I mavonga, a Vure, e Tamane hita, i uka ma ge padi virihi mua vona tara ngava, bara mu malamala na matana, na tahuna a Bakovi Dagi ne hita, e Isu, ge hamule valai turana e huriki a viri malamala vona.
1TH 4:1 Mua e huriki a turagu, mete vara mua pali mu gu laho navai, a Vure ge vivi ne mua. I muholi, mu laho maea pali. Ngane mete nana tora mua, mete taki mua na rana Bakovi Dagi ne hita e Isu, mu gu ramai vakaroro tabu a maka naro nga.
1TH 4:2 Mu lohoka vona a vinara lobo mete taki mua vona na rane Isu a Bakovi Dagi.
1TH 4:3 A Vure i ngaru mua mu gu malamala na matana. I mavonga, mu lelerau vona a maka naro na molenga.
1TH 4:4 I ngaru mu gu pahadanu a ningaru na kakaine mua, mu gu ramai a naro malamala. I mavonga e huriki ri gi togo mua.
1TH 4:5 Nahea ge turari mua a ningaru na malala, mu gu rata a maka naro na molenga, i manga e huriki ri made na uvo ri rata. I uka ma ri lohoka na Vure.
1TH 4:6 I mavonga, nahea a bakovi ge tami e turana, ge rata halea, ge tulia e girihina. Mete taki mua pali, e huriki a bakovi ri ratea a naro hale iea e Bakovi Dagi bara i vakamadihi ria.
1TH 4:7 A Vure i gale hita i uka ma si gi ramai a naro hale. I gale hita si gi ramai a naro malamala.
1TH 4:8 I mavonga, a viri i longotaroa a ngava iea, i uka ma i longotaro a ngavana bakovi kunana. I longotaro a nitana Vure, ra Vure i habi a Hanu Kiripiripi ne mua.
1TH 4:9 A ngava ni vangaru e huriki a turane hita, i uka ma mete ge here puru, a vuhuna a Vure i tovo mua pali vona a naro na nivangaru.
1TH 4:10 I muholi ngi, mu ngaru hateka e huriki a tara ne Kristo o Masedonia. Ngane mete ngaru mua mu gu ngaru hateka tabu ria.
1TH 4:11 Mu leho tora ni made madoru, naha ni rahi dili ioe tavula na maki na viri tara. Naha ni made tavula. Mu leho, ge manga a hini mete taki muga mua vona.
1TH 4:12 Na tahuna mu rata mavonga, i uka ma mu gu taki e huriki ranga ri gi kori mua. E huriki i uka ma ri lohoka na Vure, bara ri togo mua.
1TH 4:13 Mua e huriki a turagu, mete koi mu gu loho lege vona e huriki ri mate pali. Naha ni dodo hateka ria, ge manga e huriki a bakovi a ngatavine ranga ri dodo ria. Re huriki nga, i uka ma ri pasimata vona a parava ne huriki ri mate ri gi mahuri mule na matenga.
1TH 4:14 Si lohoka vona e Isu i mate, i mahuri mule tabu. I mavonga, si lohoka vona na tahuna e Isu ge hamule valai, a Vure ge rata e huriki ri luhoi tora ia, ri mate pali, ri gi valai turana.
1TH 4:15 E Bakovi Dagi kunana a viri i taki, pali ngane mete tovo tabu mua vona, na tahuna ge hamule valai, hita e huriki si mahuri, si tabana koea na malala, i uka ma si gi sike muga ne huriki ri mate pali.
1TH 4:16 E Bakovi Dagi kunana ge puru valai na hunu ge gale tala dagi. A ubu na agelo vona bara i gale dagi, a tavure na Vure bara ni pupu. E huriki ri luhoi torea e Kristo, ri mate pali, bara ri mahuri mule muga.
1TH 4:17 Muri, bara ni bole rike hita lobo e huriki si tabana koea na malala. Bara si vapopo na hunu turana e huriki ri mate pali, turana e Bakovi Dagi. Bara si made turana na parava vakaroro.
1TH 4:18 Mu vakalongo e huriki a tara na Vure vona ra ngava iea, mu gu vakatora a niluhoi ne ria.
1TH 5:1 Mua e huriki a turagu, i uka ma mete ge taki mua vona a parava ge bele vona a maka maki nga,
1TH 5:2 a vuhuna mu lohoka vona pali a parava e Bakovi Dagi ge i hamule valai vona, bara i bele vakaturutu kunana, i manga a bakovi i panaho i bele vakaturutu na rodo.
1TH 5:3 Na tahuna e huriki ri taki ta ri made kamumu, ta ri made na nivalemu, i uka ma ge tabaka bara i bele vakaturutu ne ria a vuranga. Bara i bele vakaturutu i manga a nimadihi i bele vakaturutu na ngatavine i pahea a koma. Na tahuna a parava iea i bele, i uka tara viri ge lelea.
1TH 5:4 Pali mua e huriki a turagu, a parava iea i uka ma ge vakaturutu mua, ge manga a bakovi ni panaho i vakaturutu a tahona ruma. I uka ma ge vakaturutu mua, a vuhuna mua i uka ma mu made na uvo.
1TH 5:5 I uka ma si made na uvo na rodo. Mua e huriki a bakovi na haro, a hini palala.
1TH 5:6 I mavonga, nahea si gi mahita manga e huriki ranga. Si gi matapara, si gi matakari kamumu a nilaho ne hita.
1TH 5:7 Mu lohoka vona, e huriki ri mahita na rodo. E huriki a bakovi ni ninu a naru vagole, ri ninu na rodo.
1TH 5:8 Pali hita e huriki a tara na haro. I mavonga, si gi matakari kamumu a nilaho ne hita, si gi luhoi torea a Vure, si gi vangaru. Na tahuna si rata mavonga, i manga si nugu a galeu, i matakari a ngalane hita. Si gi pasimata na Vure ge korimule hita. Na tahuna si rata mavonga, i manga si kube a hineva ge tora, i matakari a gine hita.
1TH 5:9 A Vure i vulaki hita i uka ma ge tahate hita. I vulaki hita, ge korimule hita e Isu Kristo a Bakovi Dagi ne hita.
1TH 5:10 I mate ge kori hita, lakea hita e huriki si mahuri, turana e huriki ri mate pali si gi made turana.
1TH 5:11 I mavonga, mu vatuhori a niluhoi ne mua, mu vadorike, ge manga a hini mu rata ngane.
1TH 5:12 Mua e huriki a turagu, mu togo e huriki ri leho hateka ne mua, ri matakari mua na rane Bakovi Dagi, ri vara mua nahea mu gu rata a naro hale.
1TH 5:13 Mu luhoi a maka leho ri rata, mu togo hateka ria, mu ngaru hateka ria. Mu valemu.
1TH 5:14 Mua e huriki a turagu, mete ngaru mua mu gu taki tora e huriki ri laho tavula ri gi leho. Mu vakatora a niluhoi ne huriki ri mangenge. Mu tuhori e huriki ri uka a nitora. Mu hatenono vona e huriki lobo.
1TH 5:15 Na tahuna e huriki ri rata hale mua, naha ni koli. Na parava vakaroro mu rata a naro kamumu ne turane mua. E huriki polovavo ranga, mu rata a naro kamumu ne ria.
1TH 5:16 Mu vivi na parava vakaroro.
1TH 5:17 Mu vasileki vakaroro.
1TH 5:18 A ra maki ge bele ne mua, mu kavurike kunanea a Vure, a vuhuna a Vure i ngaru mua e huriki a tara ne Isu Kristo mu gu rata mavonga.
1TH 5:19 Naha ni hehe vona a leho na Hanu Kiripiripi.
1TH 5:20 Naha ni biu a ngavana viri i rata a nita propet.
1TH 5:21 Pali mu pelekado kamumu a ngava lobo ne ria. A ngava ge muholi, mu longo mai.
1TH 5:22 A ngava ge hale, mu malele ha vona.
1TH 5:23 A Vure a vuhuna a nivalemu. Ia a viri ge rata mua mu gu malamala liu na matana. Ge matakari a hanune mua, a niluhoi ne mua, a kakaine mua, lakea na tahuna e Isu Kristo a Bakovi Dagi ne hita ge hamule valai, bara i matai mua mu laho malamala.
1TH 5:24 A Vure, ra viri i gale mua, bara i rata a maki nga, a vuhuna i taki ge rata. I ramai vakaroro a nitana.
1TH 5:25 Mua e huriki a turagu, mu vasileki na Vure ge tuhori mateu.
1TH 5:26 Mu tagui e huriki iene ri luhoi torea a Vure.
1TH 5:27 A taki tora mua na matane Bakovi Dagi, mu gia ra raukea iea, ge longoa e huriki a tara na Vure.
1TH 5:28 E Isu Kristo a Bakovi Dagi ne hita ge rata kamumu mua.
2TH 1:1 Iau e Paulus, turane Sailas e Timoti mete herea ra raukea iea i lakene ne mua o Tesalonika, ra mua e huriki a tara na Vure, e Tamane hita, e Isu Kristo a Bakovi Dagi.
2TH 1:2 A Vure, e Tamane hita, turane Isu Kristo a Bakovi Dagi ne hita, ru gu rata kamumu mua, ru gu habi a nivalemu ne mua.
2TH 1:3 Mua e huriki a turagu, i kamumu mete ge luhoi mua, mete ge kavurike vaka­roroa a Vure, a vuhuna a niluhoi ne mua i bele tora hateka, a rabu ni vangaru i bebele dagi ne mua.
2TH 1:4 I mavonga, mete bibi rike a rane mua na matane huriki a tara na Vure na tanga lobo, a vuhuna mu pesi tora na niluhoi ne mua, mu hatenono na tahuna e huriki ri vakamadihi mua, mu bole a maregoa.
2TH 1:5 Na tahuna mu pesi tora mavonga, i vakasiri hita na Vure i pelekado kamumu e huriki. I mavonga, a Vure ge taki mua, mua a viri kamumu, mu gu made na harikia vona, ra ngane mu bole a nimadihi a vuhuna mu ngaru ni dili vona.
2TH 1:6 A Vure i pelekado kamumu e huriki. Muri ma, a Bakovi Dagi ne hita e Isu, turane huriki a agelo hateka na Vure ri gi pe a hunu, ri gi luve kavakava turana hubena kanono. Na tahuna iea, bara i koli a narone huriki ri habi a maregoa ne mua, bara i habi a maregoa ne ria. Bara i vakalobo a maka maregoa mu tahoka, ge habi a nimalo ne mua. Mateu ranga bara i habi a nimalo ne mateu.
2TH 1:8 E huriki i uka ma ri longototo a Velenga Kamumu ne Bakovi Dagi ne hita, e Isu, e huriki i uka ma ri lohoka na Vure, e Isu bara i vakamadihi ria.
2TH 1:9 Re huriki nga, e Isu ge vakamadihi ria, ge ratapile ria vakaroro. Bara ri made basi ne Bakovi Dagi, na bagetuanga na nitora vona.
2TH 1:10 Ra maki nga bara ri bele na tahuna i hamule valai. Na parava iea, e huriki a tara vona bara ri kavurikea, e huriki ri luhoi torea bara ri ngapa vona. Mua ranga bara mu vivi turane ria, a vuhuna mu luhoi tora a ngava mete vaka­longo mua vona.
2TH 1:11 I mavonga, mete vasileki vakaroro na Vure, ge tuhori mua mu gu laho manga a hini i ngaru mu gu laho vona. Mete vasileki vona ge habi a nitora ne mua, mu gu rata a maka naro kamumu mu luhoi ni ratana.
2TH 1:12 Mete vasileki mavonga, a vuhuna mete ngaru e huriki a bakovi a ngatavine ri gi matai a narone mua, ri gi kavurikea e Isu a Bakovi Dagi. E Isu tara ge kavurike mua. I mavonga, ri kavurikea e Isu, a vuhuna a Vure rua e Isu Kristo a Bakovi Dagi ru rata kamumu mua.
2TH 2:1 Mua e huriki a turagu, ngane mete ge vakalongo mua vona e Isu Kristo a Bakovi Dagi ge hamule valai, ge gale palupu hita. Mete taki tora mua,
2TH 2:2 nahea ge ruru a vurene mua vona a ngavana propet, a ngavane huriki ranga, a raukea ni taki ta mete herea, ri gi taki ta e Bakovi Dagi i hamule valai pali.
2TH 2:3 Naha ni longo mai ria, a vuhuna a parava iea i uka ma ge bele tavula. I muga, e huriki ala kupo bara ri tagege, ri longotaro a nitana Vure. Muri, a bakovi ni longotaro a Vure bara i bele kavakava, ra bakovi iea bara i vurua na kanono.
2TH 2:4 A bakovi iea bara i gegea a Vure, i gege e huriki a vure taminga lobo, ra maka maki e huriki a bakovi a ngatavine ri kavurike bala. Bara i taki e huriki ri gi kavurike ia kunana. Bara i made pololilo na roho na Vure, i taki e huriki ta ia a Vure.
2TH 2:5 Na tahuna a made turane mua, a taki mua vona pali a ngava nga. Mu tabana ni luhoi, o i uka?
2TH 2:6 A naro ni longotaro a vinara i leho kapiloho pali. Mu lohoka vona a maki i pesi karia a dalana bakovi hale. A bakovi hale iea bara i bele kavakava na parava a Vure i vulakia ge bele vona. Pali a viri i pesi karia a dalana bara i pesi kari mavonga ge harena na tahuna a Vure ge takia ge lobo.
2TH 2:8 Muri a bakovi ni longotaro a Vure bara i bele kavakava. Muri e Isu a Bakovi Dagi bara i valai na nipara dagi, bara i rabalakia na nipara dagi iea, ge mate. Bara i rabalakia na bangona a bakovi hale iea.
2TH 2:9 Na tahuna a bakovi ni longotaro a Vure i bele kavakava, bara i leho na nitora ne Satan. Bara i rata a maka nitamina nivakasiri legelege.
2TH 2:10 Bara i rata a naro hale i kupo ni tami e huriki ri laho na dala na vuranga. Re huriki nga bara ri vurua, a vuhuna ri marikoi a ngava muholi ge korimule ria.
2TH 2:11 I mavonga, a Vure i vakahale a niluhoi ne ria, ri gi longo mai a ngava taminga kunana.
2TH 2:12 I mavonga kunana a Vure ge pelekado e huriki lobo i uka ma ri luhoi torea a ngava muholi, ri ngaru a naro hale.
2TH 2:13 Mua e huriki a turagu, e Bakovi Dagi i ngaru hateka mua. Mete luhoi vakaroro mua, lakea i kamumu hateka mete ge kavurikea a Vure, a vuhuna a Vure i vulaki mua, ge korimule mua. I vulaki mua pali na tahuna i ratarike a hunu a malala. A dala i korimule mua vona i maea: Na nitora na Hanu Kiripiripi, i rata mua mu malamala na matana. Mu luhoi torea a ngava muholi.
2TH 2:14 A Vure i ngaru mu gu made na bagetua na nitora ne Isu Kristo a Bakovi Dagi ne hita, lakea i gale palupu mua pali na Velenga Kamumu, ra mi tovo mua vona.
2TH 2:15 I mavonga, mua e huriki a turagu, mu pesi tora. Mu muri mai a vinara mete tovo mua vona, turana vinara mete here puru na raukea.
2TH 2:16 E Isu Kristo a Bakovi Dagi ne hita, turana e Tamane hita, ra viri i ngaru hateka hita, i rata a naro kamumu ne hita, i luke vakaroro hita, si pasimata vona a maki kamumu ge habi ne hita muri ma,
2TH 2:17 ru gu vakatora a hatene mua, ru gu tuhori mua mu gu rata a naro kamumu, a ngava kamumu.
2TH 3:1 Mua e huriki a turagu, ngane ga vakalobo a ngava. Mu vasileki ne mateu, mete ge vakalongo a nitane Bakovi Dagi, ge bele malaviriri na tanga lobo, lakea e huriki ri longoa ri gi togoa ge manga a hini mu rata pali.
2TH 3:2 Mu vasileki na Vure ge kori mateu na limane huriki a bakovi hale, a vuhuna mu lohoka vona i uka ma e huriki lobo ri luhoi torea a Vure.
2TH 3:3 Pali e Bakovi Dagi i ramai vakaroro a nitana. Bara i vakatora mua, i tagari mua na bakovi hale, re Satan.
2TH 3:4 Mete lohoka vona, mu ramai lobo a ngava mete habi ne mua. Mete lohoka vona tabu, e Bakovi Dagi ge tuhori mua ni ramai lobo a ngava nga.
2TH 3:5 Mete ngarua e Bakovi Dagi ge habi a niluhoi ne mua, mu gu lohoka kamumu vona a Vure i ngaru hateka mua. Mete ngarua ge vakasiri mua ni hatenono na maregoa i manga e Kristo i hatenono.
2TH 3:6 Mua e huriki a turagu, mete vakuku mua na rane Isu Kristo a Bakovi Dagi ne hita: Mu malele ha vona e huriki a turane hita ranga ri laho tavula, i uka ma ri muri mai a vinara mete vara mua vona.
2TH 3:7 Mu lohoka vona mete ngaru mu gu ramai a naro mete rata. Na tahuna mete made turane mua, i uka ma mete made tavula.
2TH 3:8 I uka ma mete kani tavula a maki ni kani ne mua. A maki ni kani lobo mete kona. Mete leho hateka na haro a rodo, nahea mete ge habi a nimava ne mua.
2TH 3:9 Na tahuna mete ngaru a maki, bara mete nana mua. Pali mete koi ni rata mavonga, a vuhuna mete ngaru ni vakasiri mua na naro kamumu mu gu ramaia.
2TH 3:10 Mu lohoka vona na tahuna mete tabana ni made turane mua, mete taki tora mua, mete ta maea, “A bakovi i marikoi ni leho, nahea ge kani.”
2TH 3:11 Pali ngane mete longo ranga e huriki iene, ta ri rakoli tavula kunana, i uka ma ri leho. Ri rahi dili ria ni rata viliha kunana a maki na viri tara.
2TH 3:12 Mu vakuku ria na rane Isu Kristo a Bakovi Dagi, mu vakuku e huriki nga ri gi made tata, ri gi leho, ri gi matakari mule ria na maki ni kani.
2TH 3:13 Mua e huriki a turagu, naha ni tuha malulu ni rata a naro kamumu.
2TH 3:14 E rei a bakovi i uka ma i ramai a ngava mete here puru na raukea iea, mu vakalongo e huriki vona, ri gi malele ha vona, ge maruhu.
2TH 3:15 Pali naha ni lohopile ia. Mu varea manga mu vara e huriki a turane mua.
2TH 3:16 E Bakovi Dagi ia a vuhuna a nivalemu. Ge habi a nivalemu ne mua na parava vakaroro, ge habi a nivalemu ne mua na maki lobo, ge made turane mua.
2TH 3:17 Iau e Paulus a herea na limagu a nilobona raukea iea. A raukea lobo a here, a here puru vona a maka nita maea, ge a nivakasiri nau. A hinere nau i maea.
2TH 3:18 E Isu Kristo a Bakovi Dagi ne hita ge rata kamumu mua lobo.
1TI 1:1 Iau e Paulus, a apostolo ne Isu Kristo a vuhuna a Vure, ra viri i korimule hita, turane Isu Kristo, ra viri si pasimata vona, ru vakuku iau, ge iau a apostolo.
1TI 1:2 A here lakene vomu, o Timoti. Ioe o manga e tugu muholi, a vuhuna tu luhoi torea e Kristo. A Vure, e Tamane hita, turane Bakovi Dagi ne hita e Isu Kristo, ru gu rata kamumu ioe, ru gu dodo ioe, ru gu habi a nivalemu vomu.
1TI 1:3 Hosi a pe ioe iene o Epesus, a valai a made koea o Masedonia. Muga a pe ioe, a taki ioe vona tara ngava. Ngane a ngaru ni taki tabua vomu a ngava iea. O made iene, a vuhuna i tahoka ranga bakovi iene ri tovo e huriki na ngava taminga. O ta pupukari ne ria, nahea ri gi tovo tabu a ngava taminga nga.
1TI 1:4 O vakuku ria ri gi lohopile a maka nuverei tavula, a ngava na rane tubune ria hosi. A ngava nga, i uka ma ri tuhori e huriki ri gi luhoi torea a Vure, ri gi rata a leho vona. Ri vakabele kunana a rabu na nivagege.
1TI 1:5 Ria bara ri longototo ioe, bara ri luhoi muholia e Kristo, ri matakilaka vona a maki kamumu, a maki hale, a hatene ria ge malamala. Muri, bara ri ngaru e huriki.
1TI 1:6 Pali e huriki ranga ri pe pali a maka naro kamumu nga, ri varoru lae na maka ngava tavula.
1TI 1:7 Ri ngaru ni tovo e huriki na vinara na Vure, pali i uka ma ri lohoka vona ra ngava ri ta paki paki vona.
1TI 1:8 O lohoka vona a vinara a maki kamumu na tahuna si ramai a lehona.
1TI 1:9 O lohoka vona tabu a vinara ni here, i uka ma ne vona e huriki a bakovi kamumu. Ni here ge vakalohoka e huriki ri putu puru a vinara, e huriki ri tagege, e huriki ri ngalahere na Vure, e huriki ri rata a naro hale legelege, e huriki i katoki a hatene ria, e huriki ri lohopilea a Vure, e huriki ri rabalaki e tamane ria e kinane ria, e huriki ri rabalaki a viri.
1TI 1:10 A vinara ni here ni vakalohoka e huriki ri rata a molenga, e huriki ri rata a naro hale na bakovi turana, e huriki ri lakavu a bakovi a ngatavine ri habi ni kona, ri gi vora tavula, e huriki a bakovi na taminga, e huriki ri kaba tavula na nita muholi, e huriki ri rata a maka naro hale ranga i uka ma i ramai a ngava muholi na nitana Vure.
1TI 1:11 Ra ngava muholi i ramai kunana a Velenga Kamumu na Vure, ra Vure i made na nipara dagi, e huriki ri kavurikea. I ru na limagu ga vakalongo ne huriki.
1TI 1:12 A kavurikea a Bakovi Dagi ne hita e Isu Kristo, ra i habia nau a nitora ga ratea a leho iea. A kavurikea, a vuhuna i luhoi iau a kara ni rata lobo a leho i habi nau, i vulaki iau ga rata.
1TI 1:13 Muholi ngi, hosi a ta hale vona, a vakamadihi e huriki ri muri vona, a rata tuhare. Pali i dodo iau, a vuhuna a luhoi ta a rata kamumu, pali i uka ma a luhoi muholia a Vure.
1TI 1:14 A Bakovi Dagi ne hita e Isu Kristo i rata kamumu hateka iau, i tuhori iau ga luhoi torea, ga ngarua a Vure, ga ngaru e huriki.
1TI 1:15 A ngava i muholi hateka, e huriki ri gi longoa ri gi longo mai, i maea: e Isu Kristo i puru valai na malala ge korimule hita e huriki a bakovi hale. Iau kunana a viri a hale hateka.
1TI 1:16 Iau a bakovi hale hateka. Pali e Isu Kristo i dodo iau ge vakasiri a naro muholi vona ni hatenono na rabu hale ne huriki. Lakea e huriki ranga bara ri masia, ri luhoi torea, ri bole a nimahuri vakaroro.
1TI 1:17 Si gi togoa a Vure, si gi kavurikea na parava vakaroro, a vuhuna ia a Hariki Vakaroro. I uka ma ge mate. Si keri ni masia. Ia kunana a Vure Muholi. I muholi.
1TI 1:18 O tugu o Timoti, a vinara nga, a taki ioe vona, i ramai a nita propet ni taki virihi ioe vona hosi. A ngaru go luhoi mulea, lakea bara o pesi tora na ni luhoi torea a Vure, bara o rata kunana a naro o lohoka vona i kamumu. Lakea bara o vaubi kamumu. E huriki ranga ri lohopile pali a naro ri lohoka vona i kamumu, ri lobo ni luhoi torea a Vure. Ri rata mavonga, lakea ri ratapile a niluhoi ne ria. Ri manga a aga i mapua na rakaru.
1TI 1:20 E Himeneus, e Aleksander ru rata mavonga. Lakea a habi rua na limane Satan. Bara i tovo rua, nahea ru gu biu a Vure.
1TI 2:1 Lakea a maki dagi hateka a ngaru mu gu ratea i maea: Mu nana torea a Vure ge kori e huriki a bakovi a ngatavine, mu vasileki ne huriki, mu kavurikea a Vure na tahuna i kori e huriki.
1TI 2:2 E huriki a hariki, e huriki a bakovi dagi, ria ranga mu vasileki mavonga ne ria, ri gi matakari kamumu hita, si gi made madoru na nivalemu, si gi muri mai a Vure, si gi togo e huriki na maki lobo si rata.
1TI 2:3 Ra nivasileki maea i kamumu na matana Vure, ra viri i korimule hita.
1TI 2:4 I ngaru ni korimule e huriki lobo, ri gi lohoka vona a ngava muholi,
1TI 2:5 a vuhuna i uka tabu tara Vure. A Vure ia kikeri kunana. A bakovi ala taku kunana i rata e huriki ri gi made na nivalemu turana a Vure. Ra bakovi iea e Isu Kristo.
1TI 2:6 I mate na ningaru vona, ge konamule e huriki. Ra ngava nga, a Vure i ngaru si gi vakalongo e huriki vona ngane.
1TI 2:7 A Vure i vulaki iau ge iau a apostolo vona, ga vakalongo a ngava nga, ga tovo e huriki a kabu i uka ma ria a Iuda, ri gi luhoi torea e Kristo, ri gi lohoka vona a ngava muholi. Iau a ta muholi, i uka ma a tatami.
1TI 2:8 I mavonga, a ngaru e huriki a bakovi na Vure na tanga lobo ri gi vasileki vakaroro. Na tahuna ri toto rike a limane ria, ri gi luhoi mule a narone ria. Nahea ri gi hini hate, nahea ri gi vahehe.
1TI 2:9 E huriki a ngatavine, nahea ri gi rodo a maki ni rata e huriki a bakovi ri gi matanono ria. Ri gi rodo kunana a maki i kara a ngatavine. Nahea ri gi bagetu hateka. Nahea ri gi huraki a gogo, nahea ri gi rodo a maki ge rike hateka a mapana.
1TI 2:10 E huriki a ngatavine ri ngaru ni muri mai a nitana Vure, ri gi rata a naro kamumu. A naro kamumu, a bagetua ne ria.
1TI 2:11 Na tahuna e huriki a ngatavine ri longo a vinara, ri gi made madoru, ri gi longo kamumu a ngava, ri gi ramai kunana.
1TI 2:12 Nahea tara ngatavine ge muga, o ge tovo e huriki a bakovi. Na tahuna mu vapopo, e huriki a ngatavine ri gi vulai ri gi longo kunana a ngava,
1TI 2:13 a vuhuna a Vure i rata mugea e Adam, muri i ratea e Eva.
1TI 2:14 Pali e Satan i uka ma i tamia e Adam. I tamia e Eva, lakea e Eva i longotaroa a Vure.
1TI 2:15 Pali a leho ne huriki a ngatavine, ni poda a koma. Na tahuna ri pesi tora ni luhoi torea e Kristo, ri ngaru e huriki, ri laho malamala, ri muri mai a naro i kara ria, bara i korimule ria a Vure.
1TI 3:1 A ngava i muholi hateka, i maea: A viri i ngaru hateka ge ia a matakari na lotu, i ngaru a leho kamumu.
1TI 3:2 I mavonga, a viri ni ru ge ia a matakari, ge muri mai kunana a naro kamumu, bara ni keri ni padi virihia na naro hale. E girihina ge taku kunana. Nahea ge ramai a ningaru tavulavula vona. Nahea ge rata tavula a maki, ge ramai a niluhoi kamumu. E huriki ri gi togoa. Ge matakari kamumu e huriki ri valai na ruma vona. Ge lohoka ni tovo e huriki na nitana Vure.
1TI 3:3 Nahea ge ia a bakovi ni ninu. Nahea ge hinihatena ni rata a vabinga, ge made madoru. Nahea ge ia a bakovi ni vahehe. Nahea ge ngaru hateka a mahala.
1TI 3:4 Ge matakari kamumu e girihina e tuna mai. Ge tovo e huriki e tuna ri gi longototo a ngavana, ri gi togoa.
1TI 3:5 A bakovi i uka ma i matakari kamumu a kabu vona, ge matakari navai e huriki a tara na Vure?
1TI 3:6 A bakovi i pulo karaba a vilona, nahea ni gi ru ge ia a matakari. Ma ge bibi rike mule ia, muri bara i vurua vona a naro hale i rata, i manga hosi e Satan i vurua vona a naro hale vona.
1TI 3:7 A bakovi i ngaru ni matakari a tara ne Kristo, ge kamumu a narona, lakea e huriki i uka ma ri lohoka na Vure, ri gi togoa. Ia i uka ma ni gi togo, bara ni harogi pile, i puru na hoa ne Satan.
1TI 3:8 I mavonga kunana e huriki a vora na lotu. E huriki ri gi togo ria. Nahea ri gi ngava naru. Nahea ge vakavora ria a naru vagole. Nahea ri gi ngaru hateka a moni.
1TI 3:9 A niluhoi ne ria ge kamumu kunana ri gi muri mai a ngava muholi a Vure i vakasiri ne hita.
1TI 3:10 O toni taro a vilone ria. Na tahuna o matai ri leho kamumu, o ru ria ge ria a vora na lotu.
1TI 3:11 E huriki a ngatavine ranga, e huriki ri gi togo ria. Nahea ri gi padimomo. Nahea ri gi ninu a naru vagole, ri gi manga. Ri gi rata kamumu a leho lobo ni habi ne ria.
1TI 3:12 A vora na lotu ge tahoka e girihina i taku kunana, ge matakari kamumu e huriki e tuna.
1TI 3:13 E huriki a vora na lotu ri rata a leho kamumu bara ni togo, ni kavurike, bara ri pesi tora na niluhoi torea e Isu Kristo.
1TI 3:14 A ngaru ni lakene, ga matai ioe. Pali a herea a raukea iea, go gia, ma ga keri ni lakene malaviriri. O gia, lakea mua e huriki a tara na Vure bara mu lohoka vona a ra naro kamumu mu gu varata vona. Hita a roho na Vure mahuri. Si manga a butu a vola, si kalohoa na ngava muholi.
1TI 3:16 I muholi hateka, a ngava na naro na Vure i kamumu hateka. Ra ngava iea hosi i kapiloho, pali ngane ni taki tala pali ne hita. A ngava iea i maea: E Kristo ni poda, i bele manga a bakovi. A Hanu Kiripiripi i vakasiri a narona i kamumu. E huriki a agelo ri masia. A velengana ni vakalongo na tanga lobo na malala. E huriki ranga koea na malala ri luhoi torea. Ni bole sike na hunu, i bole a bagetuanga.
1TI 4:1 A Hanu Kiripiripi i ta kavakava i ta maea, muri ma, na nilobona parava ta ge valai, i ranga e huriki bara ri ha taroa a Vure. Lakea bara ri vakatubu ni muri mai a ngava taminga i valai ne huriki a hanitu.
1TI 4:2 A maka ngava taminga nga, e huriki a bakovi na taminga bara ri tamilalu ni tovo polo ne huriki, ta i muholi. A niluhoi ne ria i marogo kesi, i uka ma ri hatakia a naro hale ne ria.
1TI 4:3 Ri tovo e huriki nahea ri gi parangi, nahea ri gi kani a kania ranga. Pali a Vure i ratarike lobo a kania si gi kani. I ngaru hita e huriki si luhoi torea, si lohoka na ngava muholi, si gi kani si gi kavurikea.
1TI 4:4 A ta maea, a vuhuna si lohoka vona, a maki lobo a Vure i ratarike i kamumu. Nahea si gi taki ge hale. Si gi kavurikea a Vure, si gi bole.
1TI 4:5 Si gi rata mavonga, a vuhuna a nitana Vure turana nivasileki ne hita i rata a maki ni kani lobo i kamumu.
1TI 4:6 Ioe bara o taki e huriki a turane hita vona a maka ngava nga, bara ioe a vora kamumu ne Isu Kristo. Ioe bara o longo mai a nitana Vure, a ngava muholi, ra o ramai, bara o koru rike kamumu.
1TI 4:7 Naha ni longo mai a maka nuverei tavula na malala. O toni a bulumu, o koru rike na narona Vure.
1TI 4:8 O lohoka vona, a bakovi i rehi na rihiva i ngarua a kakaina ge gao. Bara i tovo mule a kakaina ge gao. Ra nitovo iea bara i tuhori popote a viri. Pali a viri i tovo mulea ge ramai a narona Vure, bara i tuhori mule hatekea. Bara i habi a maki kamumu vona ngane koea na malala, muri ma meli na hunu.
1TI 4:9 A ngava nga i muholi hateka, e huriki ri gi longoa ri gi longo maia.
1TI 4:10 Lakea si luhoi torea a Vure mahuri, ra viri i korimule e huriki, re huriki ri luhoi torea. I mavonga, si gi rura, si gi leho hateka.
1TI 4:11 A maka ngava nga, o vakuku e huriki, o tovo ria.
1TI 4:12 Na matane huriki a tara na Vure iene, o vakasiri ria a naro kamumu na ngavamu, na rabumu, na hini o ngaru hateka e huriki, na hini o luhoi torea a Vure, na hini i uka ma o rata kilala a naro hale. Ri gi matai ioe, ri gi ngaru ni ramai a naromu. Lakea i uka ma ri gi tepu ioe na hini ioe a riau.
1TI 4:13 O gi tala a Hinere ne huriki, ri gi longoa. O vara e huriki, o tovo e huriki. Muri ma bara valai.
1TI 4:14 Naha ni mata taroa a maki kamumu a Vure i habi tavulea vomu na tahuna e huriki a gare na lotu ri ru langa a limane ria vomu, ri habi a nita propet vomu.
1TI 4:15 O rata vakaroro a maki nga, o habi a hatemu ne ria, lakea e huriki lobo bara ri matai ioe o koru rike na naro na Vure.
1TI 4:16 O matakari kamumu a naromu. O matakari kamumu a ngava o tovo e huriki vona. Ioe bara o rata mavonga vakaroro, bara o korimule ioe turana e huriki ri longo a ngavamu.
1TI 5:1 Na tahuna a gare bakovi i varoru, naha ni tahatea. O ta kamumu maia, ge manga a hini o ta turana e tamamu. O rata kamumu e huriki a riau, ge manga a hini o rata kamumu e huriki a turamu.
1TI 5:2 O rata kamumu e huriki a gare ngatavine ge manga a hini o rata kamumu e kinamu. E huriki a sirula ranga o rata kamumu ria, ge manga a hini o rata kamumu e kurabamu.
1TI 5:3 O togo e huriki a havuri ngatavine ri uka e tune ria, e tubune ria. Ria a havuri muholi.
1TI 5:4 O taki e huriki e tuna, e huriki e tubuna havuri, ri gi matakari kamumu e kinane ria, e tubune ria. Ri gi vakasiri taro ri ramai a narona Vure, ri gi koli a naro kamumu ni rata virihi ria vona hosi. Ra naro iea, a Vure i ngarua.
1TI 5:5 A havuri muholi, ra viri i made kikeri, i luhoi torea a Vure, lakea i vasileki vakaroro, i nanea a Vure ge tuhori ia.
1TI 5:6 Pali a havuri i tero, i laho viliha lae, i manga i mate pali a hanuna, i laho a kakaona.
1TI 5:7 O vakuku maea e huriki a tara na Vure, lakea bara ri muri mai a naro malamala kunana, i uka tara viri ge kau ria na ngava.
1TI 5:8 A viri i uka ma i matakari a viri vona, ra kabu vona muholi, i pea pali a Vure. Ra bakovi maea, a narona i hale hateka ne huriki i uka ma ri luhoi torea a Vure.
1TI 5:9 A havuri, e girihina i taku kunana, i tahoka a pida i langui i ravulu polotara, o here purua a rana, ge bole a kinori.
1TI 5:10 O here kunana a rana e huriki a havuri ni matakilaka vona ri rata a naro kamumu, ri matakari kamumu e tune ria, ri matakari a mosi, ri vahilolo a vahane huriki a tara na Vure, ri tuhori e huriki ri marego, ri habi a hatene ria na maka naro kamumu ranga.
1TI 5:11 Pali naha ni here a rane huriki a havuri sirula, a vuhuna na tahuna ri hataki a kuline ria i milamila, bara ri lohopilea e Kristo, ri ngaru ni parangi tabu.
1TI 5:12 Re huriki nga, a Vure bara i pelekado ria, a vuhuna i uka ma ri muri mai a ngava ri ta muholi vona ta ri gi muri mai.
1TI 5:13 A naro tara ri ratea, ri rakoli tavula, ri laho polovano na maka ruma. Muri ri vakatubu ni padimomo, ri rahi dili ria na maki na viri tara, ri taki a maka ngava hale.
1TI 5:14 I mavonga, a ngaru e huriki a havuri sirula ri gi parangi, ri gi tahoka a koma, ri gi matakari a ruma ne ria. Bara ri rata mavonga, a pile ne hita bara i keri ni biu hita.
1TI 5:15 I ranga e huriki a havuri karaba ri ruru pali na dala muholi, ri muri mai e Satan.
1TI 5:16 E huriki a ngatavine ri luhoi torea e Kristo, ri gi matakari e huriki a havuri na kabune ria. I mavonga e huriki a tara na Vure i uka ma ri gi marego ni mata­kari ria. Bara ri matakari kunana e huriki a havuri ranga, ri uka liu a viri ge matakari ria.
1TI 5:17 A ngaru mu gu togo, mu gu kona kamumu e huriki a matakari na lotu ri leho kamumu, re huriki ri tovo e huriki na nitana Vure, e huriki ri habi a ngava.
1TI 5:18 Mu rata mavonga, a vuhuna a Hinere i ta maea, “Naha ni kolotatea a ngavana bulmakau ge keri ni kani na tahuna i leho, i paha pasi a kanena vit.” I ta maea tabu, “A vora ge bole a mapana leho vona.”
1TI 5:19 Naha ni talangaki a bakovi ala taku kunana ge padi virihi na ngava a matakari na lotu. Pali a bakovi ala rua o ala tolu to takia ra ngava iea, ngane o talangaki.
1TI 5:20 E rei a viri i rata bala a naro hale, o tahatea na matane huriki. Lakea e huriki ranga bara ri mangenge ni rata a naro hale.
1TI 5:21 Iau a vakuku ioe na matana Vure, e Isu Kristo, e huriki a agelo a Vure i vulaki ria, a taki ioe go ramai kamumu a maka ngava nga. A maka naro o rata ge palupulupu kunana ne huriki lobo.
1TI 5:22 Naha ni ru langa a limamu malaviriri na viri, ge ratea a leho na Vure. Naha ni dili na naro hale na viri. O matakari kamumu ioe, go malamala na matana Vure.
1TI 5:23 Naha ni ninu a naru kunana. O ninu ranga vain ge kori a tamudimu na gilanga i rata bala ioe.
1TI 5:24 A naro hale ne huriki ranga i kava­kava. I uka ma ni pelekado ma, si matakilaka vona a naro hale ne ria. Pali a naro hale ne huriki ranga i kapiloho. Bara ni matakilala muri ma.
1TI 5:25 I mavonga, a naro kamumu ranga, ni mata­kilala. Pali a viri ge rata kapiloho a naro kamumu, i uka ma ge tabaka, bara i bele kavakava.
1TI 6:1 E huriki a tara na Vure ra ri made manga a vorakato, ri gi togo kamumu e huriki a matakari ne ria. Ri gi rata mavonga, lakea i uka tara viri ge ta hale vona a Vure, i uka tara viri ge biu a nitovo ne hita.
1TI 6:2 E huriki a vora ri tahoka a matakari ri luhoi torea e Kristo, nahea ri gi taki a viri dagi ne ria ga turane ria, lakea ri gi makoko ni togo ria. I uka. Ri gi leho kamumu hateka, a vuhuna ri kori a viri i luhoi torea a Vure, ri kori a viri ri ngaru hateka. O vara e huriki iene na ngava nga, o taki tora ria ri gi ramai.
1TI 6:3 A viri i vara na ngava tebi, i uka ma i longo mai a ngava muholi ne Isu Kristo a Bakovi Dagi ne hita, i uka ma i longo mai a ngava i vakasiri a dala kamumu na Vure,
1TI 6:4 ra bakovi maea i tagege hateka. I uka ma i lohoka vona tara maki. I tahoka a ningaru hale ni vahehe viliha na ngava. Muri bara i vakabele a maka naro hale nga: a nimasigoro, e huriki bara ri vapida lae, a nivapadimomo, a niluhoi hale,
1TI 6:5 e huriki bara ri vagege bala. E huriki ri rata mavonga, a niluhoi ne ria i hale liu, i uka ma ri lohoka tabu na nita muholi. Ri luhoi ta a naro ni ramai a Vure a dala ni bole a mahala i kupo vona.
1TI 6:6 Pali a viri i ramai a Vure, i vivi vona a maki i tahoka pali, bara i vivi hateka.
1TI 6:7 I mavonga, a vuhuna na tahuna ni poda hita vona si luve papa na malala. Pali na tahuna si pea a malala iea bara si laho papa tabu, i uka ma si gi bolea tara maki.
1TI 6:8 Si gi vivi vona a hini si tahoka a maki ni kani, a varakia ni rea.
1TI 6:9 Pali e huriki ri ngaru ni tahoka a mahala i kupo, bara i luve ne ria a nitoni hale. Bara ri puru na hoa. Bara ri ngaru ni rata a naro manga manga legelege, ge rata hale ria, ri gi bole a vuranga vona.
1TI 6:10 A ta maea, a vuhuna a rabu ni ngaru hatekea a moni i vakabele a naro hale legelege. I ranga e huriki ri pe pali e Kristo, ri bole a nimadihi dagi, a vuhuna ri ngaru hateka a moni.
1TI 6:11 Pali ioe, a bakovi na Vure, o ha taro a maka naro hale nga. O toni a bulumu ni ramai a naro malamala, a naro na Vure. O toni a bulumu ni luhoi torea a Vure, ni ngaru e huriki, ni pesi tata, ni rata kamumu e huriki.
1TI 6:12 O toni a bulumu ni nunu hateka turane Kristo. Muri ma bara o mulangi, o bole a nimahuri vakaroro. Ra nimahuri vakaroro iea, a Vure i gale ioe go bolea hosi na tahuna o taki tala na matane huriki a bakovi a ngatavine, ne ioe o luhoi torea e Kristo.
1TI 6:13 Iau a taki tora ioe na matana Vure, ra i habi a nimahuri na maki lobo. A taki tora ioe na matane Isu Kristo, ra i ta muholi na matane Ponsius Pilato, i taki tala a ngava.
1TI 6:14 A taki ioe, o longototo a nitana Vure. Naha ni longotaroa tara, ge harena na tahuna e Isu Kristo a Bakovi Dagi ne hita ge hamule valai.
1TI 6:15 Bara i bele na parava a Vure i vulakia. A Vure a viri si kavurikea. Ia kikeri a Matakari, a Hariki ne huriki a hariki, a Bakovi Dagi ne huriki a bakovi dagi.
1TI 6:16 Ia kikeri i uka ma ge mate. Bara i mahuri vakaroro. I made na nipara. A nipara iea i para hateka, i uka tara viri ge lokovonga tabukoi vona. I uka tara viri ge masia ma a Vure. I uka tara viri ge kara ni masia. Si gi togo vakaroroa. A nitora, ne vona kunana vakaroro. I muholi.
1TI 6:17 O taki e huriki ri tahoka a mahala i kupo, nahea ri gi bibi rike mule ria. A mahala na malala bara i lobo vakaturutu, lakea nahea ri gi luhoi ge kori ria. Ri gi luhoi kunanea a Vure, a vuhuna a Vure i hatebalala. I habi ne hita a maki lobo si gi pitei vona.
1TI 6:18 O taki ria ge ria a mari ni rata a naro kamumu, ni tuhori e huriki, ri gi hatebalala.
1TI 6:19 Na tahuna ri rata mavonga, bara ri ru kadolu a mahala muholi na hunu ge tuhori ria ma, bara ri bole a nimahuri muholi.
1TI 6:20 Timoti, o rata kamumu a leho a Vure i habi vomu go rata. O malele ha vona a ngava tavula hale. O malele ha vona a ngava i vaperesi na nitana Vure, ni taki ta a ngava na lohokanga.
1TI 6:21 I ranga e huriki ri ramaia ra ngava ni gale a lohokanga, lakea ri pe a ngava muholi. A vasileki na Vure ge rata kamumu mua lobo.
2TI 1:1 Iau e Paulus a apostolo ne Isu Kristo. A Vure i vulaki iau ge iau a apostolo vona ga vakalongo e huriki na ngava na nimahuri ra i ta muholi vona ge habia ne huriki ri luhoi torea e Isu Kristo.
2TI 1:2 O Timoti, ngane a here lakene vomu tabu. Ioe o manga e tugu muholi, a ngaru hateka ioe. A Vure, e Tamane hita, turane Bakovi Dagi e Isu Kristo ru gu rata kamumu ioe, ru gu dodo ioe, ru gu habi a nivalemu vomu.
2TI 1:3 E huriki a gare nau hosi ri vora na Vure, ri lohoka vona ri ramai a naro kamumu. Ngane iau tara a rata mavonga. A luhoi ioe vakaroro, lakea a vasileki na Vure ge tuhori ioe. A vivi vomu, lakea a kavurikea a Vure.
2TI 1:4 A luhoi mule a parava i masiri pasi na matamu a luha. Pali ngane a pasimata ni matai ioe, ga vivi.
2TI 1:5 A luhoi mule a hini o luhoi tora hatekea a Vure, i manga hosi e tubumu a ngatavine e Lois, e kinamu e Iunis ru luhoi tora hatekea. Ngane a lohoka vona ioe tara o tahoka a niluhoi iea.
2TI 1:6 I mavonga, a ngaru ni taki tabu ioe, naha ni longo kaburungia a maki kamumu a Vure i habi tavula vomu hosi na tahuna a ru langa a limagu vomu.
2TI 1:7 O rata mavonga, a vuhuna i uka ma i rata hita si gi mangenge. I habi ne hita a nitora. I kori hita ni vangaru. I kori hita ni matakari kamumu a nilaho ne hita.
2TI 1:8 Lakea, naha ni maruhu ni vakalongo e huriki ne Bakovi Dagi ne hita. Naha ni maruhu ne nau ni ru dili na bavi. Tu gu bole a nimadihi a vuhuna tu ramai a Velenga Kamumu. Tu gu kaloho a nimadihi iea na nitora na Vure.
2TI 1:9 A Vure i korimule hita, i gale hita si gi laho malamala. I uka ma si ratea tara maki kamumu ge gale hita. I gale hita na ningaru vona kunana. I gale hita ge rata a naro kamumu ne hita, i rudu vilia e Isu Kristo ge korimule hita. Hosi na tahuna a hunu a malala i uka ma ni ratarike ma, a Vure i luhoi pali a naro iea ge ratea.
2TI 1:10 Ra naro, hosi i luhoi ni ratea, ngane a Vure i vakasiria pali a naro kamumu vona, i rudu vilia pali e Isu Kristo, ra Bakovi i korimule hita. I vakaloboa a nitora na matenga. I vakalongoa ne hita a Velenga Kamumu si gi bole navai a nimahuri vakaroro.
2TI 1:11 I vulaki iau ge iau a apostolo, ga tovo, ga vakalongo a Velenga Kamumu iea.
2TI 1:12 Ngane a bole a nimadihi a vuhuna a vakalongo e huriki na Velenga Kamumu. Pali iau i uka ma a maruhu, a vuhuna ra viri a luhoi torea, a lohoka vona. A lohoka vona bara i matakari kamumu a leho i ru na limagu ga rata, bara i tabuli kamumu vakaroro ge harena na parava e Kristo ge hamule valai.
2TI 1:13 O ramai kamumu a ngava muholi a tovo ioe vona. O ngaru e huriki, o luhoi torea e Isu Kristo, a vuhuna o madoko turana.
2TI 1:14 O matakari kamumu a ngava muholi i habia vomu a Vure. A Hanu Kiripiripi ra i made pololilo ne hita, ge tuhori ioe go rata mavonga.
2TI 1:15 O lohoka vona pali e huriki lobo iene, na tabeke ne Asia, ri ha taro iau pali. E Pigelus e Hermogenes rua ranga ru ha taro iau.
2TI 1:16 A vasileki ne Bakovi Dagi ge dodo e Onesiporus turana kabu vona. Na tahuna i made turagu, i tuhori vakaroro iau, i uka ma i maruhu nau, iau a made na bavi.
2TI 1:17 Na tahuna i valai o Rom i vururu a matana ni matakana iau, muri i matavisi iau.
2TI 1:18 A vasileki ne Bakovi Dagi ge dodoa na nilobona parava. O lohoka vona i kupo a leho i tuhori iau vona na tanga dagi e Epesus.
2TI 2:1 O tugu o Timoti, e Isu Kristo ge rata kamumu ioe, ge vakatora ioe.
2TI 2:2 A ngava o longo a vakalongo na matane huriki, ra ngava nga o tovo ne huriki a bakovi ni longototo a ngava, ri gi tovo polo tabu ne huriki ranga.
2TI 2:3 O pahataga manga a nugumaheto ne Isu Kristo, o bole a nimadihi ge manga mia mi bole a nimadihi.
2TI 2:4 A nugumaheto i uka ma ge leho viliha lae. Bara i nugu kunana a leho ge vakavivi a ubu vona.
2TI 2:5 A bakovi na rihiva i varangi na rihiva ge muri mai a vinara na rihiva, bara i bole a tama na tahuna i mulangi.
2TI 2:6 A bakovi i leho hateka na hania bara i bole muga a maki ni kani i varo na hania.
2TI 2:7 O luhoi kado a maki a taki, a vuhuna e Bakovi Dagi bara i habi a lohokanga vomu go lohoka vona a pelegona ngava.
2TI 2:8 O luhoi vakaroroa e Isu Kristo. Naha ni longokaburungi vona ia a hamone Davit, i mate, i pesi rike mule na matenga. Iau a vakalongo e huriki maea na tahuna a taki tala ne ria a Velenga Kamumu,
2TI 2:9 lakea ri rata hale iau, manga iau a bakovi hale, ri kolotata iau na sen. Pali a nitana Vure i uka ma ni gi kolotata.
2TI 2:10 I mavonga a hatenono, a pesi tora, a bole lobo a nimadihi nga. A rata mavonga ga tuhori e huriki a bakovi a ngatavine a Vure i vulaki ria, ri gi bolea ra nimahuri i tabuli ne Isu Kristo, ri gi made palupu turana vakaroro na bagetuanga vona.
2TI 2:11 A ngava i muholi hateka, e huriki ri gi longoa, ri gi longo maia i maea: “E huriki ri mate turane Kristo, bara ri made turana;
2TI 2:12 E huriki ri hatenono na tahuna ri bole a nimadihi, bara ni rata ria a hariki, ri matakari turane Kristo; E huriki ri lohopilea e Kristo, ia tara bara i lohopile ria;
2TI 2:13 E huriki i uka ma ri ramai a nitane ria, pali e Kristo bara i tabana ni pesi tora na ngavana, a vuhuna i uka ma ge pulo lae a ngavana.”
2TI 2:14 Na parava vakaroro o tovo e huriki ri gi luhoi a maka ngava nga. O taki tora ria na matana Vure nahea ri gi vahehe lae na maka ngava kiroko. A nivahehe i uka ma i tuhori e huriki. I vakahale kunana a niluhoi ne huriki ri longoa.
2TI 2:15 O toni a bulumu ni leho kamumu, lakea na tahuna o vakasiri ioe na Vure, bara i ta maea, “O leho kamumu hateka.” Lakea o uka ma go maruhu, a vuhuna ioe a vora kamumu. O vakalongo kavakava a ngava muholi.
2TI 2:16 O malele ha na maka ngava viliha i uka ma i muri mai a niluhoi na Vure. Ra ngava maea i rata e huriki ri marava basi na Vure.
2TI 2:17 A ngava taminga maea bara i pagepolo viliha, i ratapile a niluhoi ne huriki, i manga a ngarava i ratapile a kakaina viri. E Himeneus e Piletus rua ranga ru rata a ngava maea.
2TI 2:18 Ru varoru pali na dala na ngava muholi, ru taki e huriki ta i bele pali a parava e huriki ri gi mahuri mule na matenga. Ru vakahale a niluhoi ne huriki ranga.
2TI 2:19 Pali a Vure i vunua pali a butu i tora hateka. I uka tara viri ge ulua. A butu iea, a ngava ni here vona, i ta maea, “E Bakovi Dagi i lohoka vona e huriki a tara vona.” A ngava tara tabu ni here i maea: “E huriki ri galea a rane Bakovi Dagi ri gi malele ha na naro hale.”
2TI 2:20 Na ruma na bakovi na mahala, i kupo a maka ulo, a tavila. I ranga ni rata na gol, i ranga ni rata na silva, i ranga ni kau na kai, i ranga ni pipi na malala. Ri tahoka a leho legelege. I ranga ni tahoni a maki kamumu ne ria, i ranga ni tahoni a maki katoki ne ria.
2TI 2:21 I mavonga kunana, a bakovi bara i pe a maki hale nga, bara i bele manga a ulo na Vure ni tahoni a maki kamumu vona. Ra viri iea ni kisi puru, a Vure ge rata a leho kamumu vona.
2TI 2:22 Lakea o malele ha vona a maka ningaru hale i bele na niluhoi ne huriki a bakovi karaba. O leho tora ni rata a naro kiripiripi, ni luhoi torea a Vure. O ngaru e huriki, o made na nivalemu ge manga e huriki ranga ri malamala, ri kavurikea a Vure.
2TI 2:23 O malele ha vona a maka nivahehe manga manga. Ri uka leho, ri vakabele kunana a rongova.
2TI 2:24 A vora ne Bakovi Dagi nahea ge rata a nivahehe. Ge rata a naro kamumu ne huriki lobo, ge lohoka kamumu ni tovo e huriki, ge hatenono ne huriki ri rata halea.
2TI 2:25 Ge leho madoru ge pelekado a niluhoi ne huriki ri longotaro a ngava. E Satan i lakavu pali ria, ri gi rata a leho vona. Pali a Vure ge ngaru, bara i kori ria ri gi bole mule a niluhoi ne ria, ri gi ha taroa a hoa na hanitu, re Satan, ri gi pulo a vilone ria, ri gi lohoka vona a nita muholi.
2TI 3:1 Iau a ngaru ioe go lohoka vona, na tahuna na nilobona parava popote ge valai, a nimava dagi bara i bele.
2TI 3:2 E huriki bara ri luhoi mule ria kunana. Bara ri ngaru hateka ni bole a mahala. Bara ri bibi rike mule a rane ria, ri tagege, ri ta hale na Vure, ri ta hale ne huriki. Bara ri longotaro a ngavane tamane, e kinane ria. Bara ri bole lupu a maki. Bara ri ngalahere vona a maka naro na Vure.
2TI 3:3 I uka ma ri gi ngaru e huriki. I uka ma ri gi lohopile a naro hale ne turane ria. Bara ri vapadikidu. I uka ma ri gi pahadanu a ningaru hale na kakaine ria. Bara ri ratapile vakaroro e huriki. Bara ri marikoi na naro kamumu.
2TI 3:4 Bara ri rata hale e huriki a turane ria. I uka ma ri gi luhoi a maki ri ratea, bara ri rata tavula kunana a maki. Bara ri luhoi mule ria, ta ri kamumu hateka. Bara ri ngaru hateka a maka nivivi tavula na malala, i uka ma ri gi ngarua a Vure.
2TI 3:5 Bara ri kavurikea a Vure na kuline ria kunana, pali bara ri koi vona a nitora na Vure ge pulo a vilone ria. O malele ha ne huriki a bakovi maea.
2TI 3:6 I ranga e huriki a bakovi maea ri dili na maka ruma, ri tami e huriki a ngatavine manga manga, bara ri muri mai ria. Re huriki a ngatavine nga, ri rata vakaroro a maka naro hale i kupo. A hatene ria i bole rike ria, i turari ria ri rata a maka naro hale nga.
2TI 3:7 Re huriki a ngatavine nga, ri ngaru bala ni gi tovo ria, pali uka ma ri kara ni lohoka vona a ngava muholi na Vure.
2TI 3:8 Hosi e Ianes rua e Iambres ru marikoi vona a ngavane Moses. I mavonga kunana e huriki a bakovi nga ri marikoi a ngava muholi, a niluhoi ne ria i hale kunana. Ri tamilalu ni luhoi torea a Vure.
2TI 3:9 Pali i uka ma ge tabaka, e huriki lobo bara ri matakilaka vona a niluhoi ne ria i varoru hateka, i manga hosi e huriki ri matakilaka vona a narone Ianes rua e Iambres.
2TI 3:10 Timoti, o lohoka vona a nitovo nau. O matai pali a narogu. O lohoka vona i navai a ratea a leho nau. O matai iau a luhoi torea e Kristo. O matai iau a hatenono na maka maregoa, a ngaru e huriki lobo, a pesi tora ni bole a nimadihi.
2TI 3:11 O lohoka vona a maka naro hale ni rata virihi iau vona, a nimadihi a bole o Antiok, o Ikonium, o Listra. A bole a nimadihi hateka. Pali e Bakovi Dagi i korimule iau na maka maregoa nga.
2TI 3:12 I muholi hateka, e huriki ri luhoi torea e Isu Kristo, ri laho na narona Vure, bara ni vakamadihi.
2TI 3:13 Pali e huriki a bakovi hale, e huriki a bakovi na taminga, a narone ria bara i hale liu. Ri tami e huriki. Ria ranga, e huriki bara ri tami ria.
2TI 3:14 Pali ioe, a ngava muholi ni tovo ioe vona, o luhoi tora pali. Naha ni taparaki. O muri mai, a vuhuna o lohoka ne huriki ri tovo ioe vona.
2TI 3:15 Hosi na tahuna ioe a koma kiroko, o vakatubu ni longo a nitana Vure. A nitana i tovo hita si gi luhoi torea e Isu Kristo, si gi bole a nimahuri vakaroro.
2TI 3:16 A Hinere lobo i valai na Vure. I tovo hita. I vakasiri hita na a ra maki i hale na nimade ne hita. I pelekado hita na tahuna si rata a naro hale. I tovo hita na naro kamumu.
2TI 3:17 I mavonga, a bakovi i laho turana Vure bara i kara ni rata a naro kamumu legelege.
2TI 4:1 A taki tora ioe na matana Vure turana e Isu Kristo, ra viri ge hamule valai, ge pelekado e huriki ri mahuri, e huriki ri mate pali. A taki tora ioe, a vuhuna ge valai ge matakari a maki lobo.
2TI 4:2 A taki tora ioe go tovo e huriki na Velenga Kamumu. O tovo ria na tahuna ri malopi, o tovo ria na tahuna i uka ma ri malopi. O pelekado a niluhoi ne huriki ri varoru. O tahate e huriki ri rata a naro hale. O vakatora a niluhoi ne huriki. O hatenono na tahuna o tovo ria.
2TI 4:3 O rata mavonga, a vuhuna i uka ma ge tabaka e huriki bara ri koi ni longo a ngava muholi. Bara ri matakana lae e huriki ri gi tovo ria na ngava ri ngaru ni longo.
2TI 4:4 Bara ri ha taroa a ngava muholi, ri vakatubu ni longo mai a nuverei tavula.
2TI 4:5 Pali ioe i uka. O matakari vakaroroa a nilaho vomu, o kaloho a nimadihi ge bele vomu. O vakalongo a Velenga Kamumu ne huriki, o rata lobo a leho a Vure i habi vomu.
2TI 4:6 A parava nau ni mate i valai tabukoi pali. I uka ma ge tabaka, a daragu bara i pori, i tua tala, ge manga a vain ni guru langa na nihabi.
2TI 4:7 A toni a bulugu ni nunu hateka. A vakalobo ngane a nivarangi. A leho lobo i habi nau ga rata, a rata kamumu pali. A ramai kamumua a Vure. I uka ma a ha taroa.
2TI 4:8 I mavonga, e Bakovi Dagi, ra viri i pelekado malamala e huriki, i kisi puru a mapa kamumu nau, i manga a viri i mulangi na rihiva i bole a tama. Bara i habia nau na parava i pelekado e huriki. Bara i habia nau a mapa kamumu, a vuhuna i matai iau a malamala na matana. I uka ma ge habi nau kunana. Bara i habi ne huriki lobo ri pasimata vona ge hamule valai.
2TI 4:9 O toni a bulumu, o valai malaviriri,
2TI 4:10 a vuhuna e Demas i ha taro iau pali. I ngaru hateka a naro na malala, i lakea o Tesalonika. E Kresens i lakea o Galesia. E Titus i lakea o Dalmesia.
2TI 4:11 E Lukas kikeri i made turagu koea. O tuli vilia e Markus. I moro ni tuhori iau na leho.
2TI 4:12 E Tikikus a rudua pali i lakea o Epesus.
2TI 4:13 Na tahuna o valai, o bolea a varakia dagi nau. A pea na ruma ne Karpus o Troas. A buk nau ranga o bole valai. Naha ni longo kaburungi a buk ni rata na kulina sipsip.
2TI 4:14 E Aleksander, a mari ni kau a maki na aen, i rata hale hateka iau. Muri e Bakovi Dagi bara i kolia a naro i rata virihi iau vona.
2TI 4:15 Ioe tara, o matadoko vona ra bakovi iea, a vuhuna i hehe hateka a ngava si tovo e huriki vona.
2TI 4:16 A mugana parava nau ni pesi na matana mari ni pelekado a ngava, i uka tara viri ge pesi turagu, ge tuhori iau na ngava. E huriki lobo ri ha taro iau. Pali iau a vasileki na Vure nahea ge luhoi a naro hale ne ria.
2TI 4:17 Pali e Bakovi Dagi kunana i pesi turagu, i habi a nitora nau, ga vakalongo a Velenga Kamumu lobo koea ne huriki i uka ma ria a Iuda. A Vure i korimule iau na ngina laion.
2TI 4:18 E Bakovi Dagi bara i korimule iau na naro hale legelege, i bole iau a dili na harikia vona na hunu. Si gi kavurike vakaroroa. I muholi.
2TI 4:19 A haro kamumu ne Prisila rua e Akuila, turana kabu ne Onesiporus.
2TI 4:20 E Erastus i made liu o Korin. E Tropimus i giloa, lakea a pea o Miletus.
2TI 4:21 O toni a bulumu ni valai malaviriri, muga na parava na malangia ge bele. E Ibulus, e Pudens, e Linus, e Klaudia, e huriki a turane hita koea ri talo rike a haro kamumu vomu.
2TI 4:22 E Bakovi Dagi ge made turamu, ge rata kamumu vakaroro mua.
TIT 1:1 Iau, e Paulus, a herea a raukea iea i lakene vomu, o Titus. Iau a vora na Vure, a apostolo ne Isu Kristo. I rudu iau ga vakatora a niluhoi ne huriki a bakovi a ngatavine a Vure i vulaki ria. A tuveve ne ria a nita muholi, ri gi laho na narona Vure. Lakea bara ri pasimata ni bole a nimahuri vakaroro. Ra nimahuri vakaroro iea, a Vure i ta muholi vona hosi si gi bolea. A Vure i uka ma ia a viri ni tatami. A Vure, ra viri i korimule hita, i puka talea a nita muholi iea na parava i vulakia. Muri i ru na limagu, i vakuku iau ga vakalongo ne huriki. Titus, o manga e tugu muholi, a vuhuna o luhoi torea e Isu i manga iau a luhoi torea. A Vure, e Tamane hita, turane Isu Kristo, a bakovi i korimule hita, ru gu rata kamumu ioe, ru gu habi a nivalemu vomu.
TIT 1:5 Iau a taparaki ioe iene na bodu e Krit, a vuhuna a ngaru ioe go vakalobo ranga leho i uka ma a rata ma. A ngaru go vulaki e huriki a bakovi ri gi matakari a lotu na tanga takutaku. I manga a hini a taki ioe vona hosi,
TIT 1:6 a matakari na lotu ge muri mai kunana a naro kamumu, bara ni keri ni padi virihia na naro hale. Ri gi tahoka e girihine ria i taku kunana. E tune ria ri gi luhoi torea e Kristo, ri gi ramai a naro kamumu, nahea ni gi padi virihi ria ni longotaro a ngava, ni laho viliha na ningaru hale na kakaine ria.
TIT 1:7 O bole kunana e huriki a bakovi kamumu, a vuhuna o lohoka vona, a matakari na lotu i matakari e huriki a tara na Vure. Ge muri mai kunana a naro kamumu, bara ni keri ni padi virihia na naro hale. Nahea ge tagege. Nahea ge hinihate. Nahea ge ia a bakovi ni ninu. Nahea ge ia a bakovi ni vaubi. Nahea ge ngaru hateka a mahala.
TIT 1:8 Ge matakari kamumu e huriki a mosi vona. Ge ngaru kunana a naro kamumu. Nahea ge rata tavula a maki. Ge ramai a niluhoi kamumu. Ge malamala, ge kiripiripi na matana Vure. Ge matakari kamumu a ningaru hale na kakaina.
TIT 1:9 Ge loho tata tora vona a vinara muholi, ra mete tovo e huriki vona. I mavonga, bara i kara ni vakatora a niluhoi ne huriki na ngava muholi. Bara i kara ni vakasiri ria, i varoru navai a niluhoi ne ria, re huriki ri tovo a ngava i vaperesi na ngava muholi.
TIT 1:10 O vulaki e huriki a bakovi kamumu, a vuhuna i kupo e huriki iene ri longotaro a ngava. Ri ta tavulavula, ri tami lae e huriki. I kupo hateka ne ria a Iuda, ri ta tora hateka ni pala a kulina viri.
TIT 1:11 O ta pupukari ria nahea ri gi ta, a vuhuna a ngava taminga ne ria i ratapile pali a niluhoi ne huriki a kabu ranga. Ri ngaru ni bole kunana a moni ne huriki.
TIT 1:12 Hosi a propet tara ne huriki a Krit i ta maea, “E huriki a Krit a bakovi na taminga. Ria a bakovi hale hateka ri manga a livoa. Ri rakoli kunana. A maki ri paki vona ni kani.”
TIT 1:13 A ngava iea i muholi, lakea a ngaru go tahate ria, ri gi pesi tora ni luhoi torea a Vure.
TIT 1:14 Nahea ri gi longo mai a nuverei tavula ne huriki a Iuda. Nahea ri gi longototo e huriki ri marikoi na ngava muholi.
TIT 1:15 A maki lobo i kamumu na matane huriki a bakovi kiripiripi. Pali e huriki a bakovi hale, i uka ma ri luhoi e Kristo, a maki lobo i hale na matane ria. A niluhoi ne ria i hale, i uka ma ri lohoka vona a ra maki i kamumu, a ra maki i hale.
TIT 1:16 Re huriki nga ri taki ta ri lohoka na Vure. Pali a narone ria i vakasiri hita, i uka ma ri lohoka na Vure. I uka ma ri longototoa a Vure, i uka ma i kara ria ri gi ratea tara maki kamumu. Re huriki nga, a huluvonga.
TIT 2:1 Pali ioe, o vara e huriki na ngava muholi.
TIT 2:2 O taki e huriki a gare bakovi nahea ri gi ramai a ningaru tavula­vula ne ria. A narone ria ge kamumu, lakea e huriki ri gi togo ria. Nahea ri gi rata tavulavula a maki. Ri gi ramai a niluhoi kamumu. Ri gi luhoi tora hatekea a Vure, ri gi ngaru hateka e huriki, ri gi hatenono, ri gi kaloho a nimadihi.
TIT 2:3 I mavonga kunana, o taki e huriki a gare ngatavine. A nimade ne ria ge vakasiri ria ri togoa a Vure. Nahea ri gi padimomo. Nahea ge vakavora ria a naru vagole. Ri gi vakasiri a naro kamumu.
TIT 2:4 I mavonga, e huriki a gare ngatavine bara ri tovo e huriki a ngatavine karaba na maka vinara nga: Ri gi ngaru e girihine ria, e tune ria.
TIT 2:5 Nahea ri gi rata tavulavula a maki. Ri gi ramai a niluhoi kamumu. Ri gi kiripiripi na matana Vure. Ri gi lohoka vona a naro ni matakari kamumu a ruma ne ria. Ri gi rata kamumu e girihine ria, ri gi longototo ria. Na tahuna ri rata a naro nga, i uka tara viri ge ta hale vona a nitana Vure.
TIT 2:6 I mavonga kunana o taki e huriki a bakovi karaba nahea ri gi rata tavulavula a maki. Ri gi ramai a niluhoi kamumu.
TIT 2:7 Na maki lobo o rata, o vakasiri a naro kamumu kunana, ri gi matai ri gi ramai. Na tahuna o tovo ria, naha ni tami ria, o tovo kamumu ria, ri gi togo ioe.
TIT 2:8 Na tahuna o tovo e huriki o ta kavakava kunana, lakea i uka tara viri ge hehe. Ioe bara o rata mavonga, e huriki a pile vomu bara ri maruhu, a vuhuna bara ri keri ni ta hale ne hita.
TIT 2:9 O tovo e huriki a vorakato ri gi longototo e huriki a matakari ne ria. Ri gi rata kamumu a leho ne ria, lakea a matakari ne ria ri gi vivi ne ria. Nahea ri gi vahehe turana matakari ne ria.
TIT 2:10 Nahea ri gi panaho. Ri gi vakasiri a naro kamumu ni gi matakilala, ria e huriki a viri kamumu. Na tahuna ri rata a maka naro nga, e huriki bara ri ngaru a nitana Vure, ra viri i korimule hita.
TIT 2:11 A ta maea, a vuhuna a Vure i vakasiri pali a naro kamumu vona, i ngaru ni korimule e huriki.
TIT 2:12 A naro kamumu na Vure i tovo hita i uka ma si gi longotaroa a Vure, si gi lohopile a ningaru hale na malala. Ngane si made koea na malala, nahea si gi rata tavula a maki. Si gi ramai a niluhoi kamumu. Si gi ramai a naro kiripiripi na Vure.
TIT 2:13 Si gi pasimata vona a parava ge valai, na tahuna e Isu Kristo a Vure Tuhaka ne hita, ra viri i korimule hita, ge vakasiri a nipara dagi vona.
TIT 2:14 Na ningaru vona i mate, ge vakamatukapaga hita na naro hale lobo, ge vahilolo hita si gi kabakaba, ge bole hita, si gi leho tora ni rata a naro kamumu.
TIT 2:15 O tovo polo a ngava nga. O vakarike a hatene huriki ri gi muri mai. O tahate e huriki ri longotaro a ngava. A Vure i habia vomu a leho iea. Naha ni mata taro ria ri gi biu ioe.
TIT 3:1 O vakalohoka e huriki iene ri gi longototo kamumu e huriki a hariki, a bakovi dagi. Ri gi rata vakaroro a naro kamumu.
TIT 3:2 Nahea ri gi padi kidu. Ri gi made na nivalemu. Ri gi luhoi muga a ningaru ne huriki ranga. Nahea ri gi rata polomugamuga.
TIT 3:3 O lohoka vona, hosi tarua tu manga a viri i manga. Tu longotaro a ngava. Tu longo mai a ngava taminga, tu vora na ningaru legelege na malala, ra tu ngaru ni rata. Hosi tu laho na naro hale. Tu rata a naro ni masigoro. E huriki ri tepu tarua; tarua ranga tu tepu ria.
TIT 3:4 Pali a Vure, ra viri i korimule hita, i vakasiri hita i ngaru hateka e huriki, i rata kamumu hita,
TIT 3:5 lakea i korimule hita. I uka ma i hita a bakovi kamumu, a Vure i korimule hita. I uka. I korimule tavula hita, a vuhuna i dodo hita. I korimule hita na Hanu Kiripiripi, ra viri i vahilolo hita, i habi ne hita a nimahuri karaba, a naro karaba.
TIT 3:6 A Vure i hatebalala, i rudua e Isu Kristo, ra viri i korimule hita, ge habia ne hita a Hanu Kiripiripi.
TIT 3:7 I rata mavonga si gi pasimata ni bole a nimahuri vakaroro, a vuhuna i rata kamumu hita, i rata hita si malamala na matana.
TIT 3:8 A ngava nga a ngava muholi. A ngaru go ta tora vona a ngava nga, lakea e rei a viri i luhoi torea a Vure ge leho tora ni ramai a naro kamumu. A maka naro nga ri kamumu hateka, ri tuhori e huriki.
TIT 3:9 Naha ni dili na rabu ni vahehe manga manga. Naha ni ramai e huriki na tahuna ri bibi rike a rane huriki e tubune ria. Naha ni vahehe vona a vinara ne Moses. A maka nivahehe maea, a ngava tavula, i uka lehona.
TIT 3:10 E rei a viri i rata hateka a ngava i vakalipida e huriki a tara na Vure, o tahatea. Ia i uka ma ge pulo a vilona, o tahate tabua. I tabana i uka ma ge pulo a vilona, o mata taroa, o ngalahere vona.
TIT 3:11 I muholi hateka, e huriki a bakovi maea ri naro marogo, ri hale. A naro hale ne ria bara i pelekado mule ria.
TIT 3:12 Ga rudua e Artemas o e Tikikus, ge lakene. Na tahuna ge bele iene, o toni a bulumu ni valai, o matai iau na tanga dagi e Nikopolis. Bara made vonga na tahuna na malangia.
TIT 3:13 Mu matakari kamumu e Apolos turana e Senas, ra mari na vinara. Mu tuhori rua na maki ranga ru ngaru na tahuna ru gu vano. A ngaru e huriki e turane hita ri gi tovo ni rata vakaroro a rabu kamumu. I uka ma ri gi made tavula. Ri gi kori e huriki ri bala a maki.
TIT 3:15 E huriki ri made turagu ri talo rike a haro kamumu ne vomu. O habi a haro kamumu ne huriki ri luhoi e Kristo, ri ngaru mia. A Vure ge rata kamumu mua lobo.
PHM 1:1 Iau e Paulus, ni ru dili iau na bavi, a vuhuna a ramai e Isu Kristo. Maria e Timoti, a turane tarua, miri here lakene vomu o Pilemon. Miri ngaru hateka ioe, te leho palupu.
PHM 1:2 Miri here tabu lakea na tara na Vure ri vapopo na ruma vomu, e kurabane hita e Apia, turana e Arkipus i leho turane maria na leho na Vure.
PHM 1:3 A Vure e Tamane hita, rua e Isu Kristo a Bakovi Dagi ru gu rata kamumu mua, ru gu habi a nivalemu ne mua.
PHM 1:4 Na tahuna a luhoi ioe, a kavurikea a Vure,
PHM 1:5 a vuhuna a longo ta o luhoi torea e Isu Kristo, o ngaru hatekea, o ngaru e huriki a tara vona.
PHM 1:6 A vasileki vona na tahuna o taki e huriki a niluhoi vomu ne Kristo, bara i vakabele a kanena, ri gi lohoka kamumu vona a maki kamumu lobo si gi bole a vuhuna si rihi e Kristo.
PHM 1:7 O vakasiri manga o ngaru hateka e huriki a tara na Vure, o rata kamumu hateka ria, o vakatora a niluhoi ne ria. Na naro iea kunana, o vakatora a niluhoi nau, o rata iau a vivi.
PHM 1:8 I uka ma a mangenge ni vakuku ioe go rata a naro kamumu tara, a vuhuna tarua varago a viri ne Kristo.
PHM 1:9 Pali a vuhuna tu vangaru, a koi ni vakuku ioe. Iau, a gare, a made na bavi, a vuhuna a ramai e Isu Kristo. Lakea a ngaru ni taki kunana ioe.
PHM 1:10 A ngaru go rata kamumua e tugu, e Onesimus. A bele manga e tamana na tahuna a made na bavi.
PHM 1:11 Hosi ia a vora tavula, i uka ma i kori kamumu ioe. Pali ngane i tahoka a leho ne tarua.
PHM 1:12 Ngane ga rudua, ge hamule lakene vomu. Ia a hategu.
PHM 1:13 Bara vivi ge made turagu koea, ge bole a murimu, ge tuhori iau koea na bavi, a made vona a vuhuna a taki tala a Velenga Kamumu.
PHM 1:14 Pali a koi ge made koea, i uka ma ga nana taro ioe. Na naro iea, ioe bara o ngaru ge made koea ge kori iau, bara i ramai a ningaru vomu, i uka ma ge ramai a hini ga taki tuhare ioe.
PHM 1:15 I uka ma tu palala, ma ge ha taro muga ioe, ge made turagu popote, lakea muri a Vure ge ratea ge hamule, ge made liu turamu.
PHM 1:16 I muga ia a vorakato vomu. Pali ngane ia e turagu, a ngarua. Ngane ia e turamu o ngaru hatekea, i manga e turamu na malala, e turamu ne Bakovi Dagi.
PHM 1:17 I mavonga, ioe go luhoi iau, ga manga a viri tu leho palupu, o taguia, o bole mulea e Onesimus, i manga kunana a hini bara o tagui iau.
PHM 1:18 Ia ge rata hale muga ioe, o ge panaho ranga moni vomu, o here puru, bara koli.
PHM 1:19 Iau, e Paulus, a here na limagu ra ngava iea. Ioe bara o ngaru, bara koli a mapana maki i bole muga. Pali ga ta maea tabu, ioe tara bara o koli a maki tara o bole hosi nau, ra a nimahuri na hanumu.
PHM 1:20 I muholi, o turagu. A ngaru go kori iau na rane Bakovi Dagi. O vakatora a niluhoi nau na rane Kristo.
PHM 1:21 A lohoka vona bara o longototo. A here lakene vomu, a lohoka vona a naro go rata virihi e Onesimus vona bara i rangi a hini a taki ioe vona.
PHM 1:22 Ga taki tabua tara maki. O pelekadoa a roho vomu. A luhoia a Vure bara i longo a nivasileki ne mua, bara lakene, a made turane mua.
PHM 1:23 E Epapras i talo mua. I made na bavi turagu, a vuhuna i ramai e Isu Kristo.
PHM 1:24 E Markus, e Aristakus, e Demas, e Lukas, ra ri leho turagu, ria ranga ri talo mua.
PHM 1:25 E Isu Kristo a Bakovi Dagi ge rata kamumu mua.
HEB 1:1 Hosi a Vure i habi a ngava ne huriki a propet, muri ri taki polo ne huriki a gare ne hita hosi. I rata mavonga balaka kupo, na naro legelege.
HEB 1:2 Pali ngane, na tahuna a nilobona parava i tubu, a Vure i habi a ngava ne Tuna, lakea e Tuna i taki polo ne hita. Ne Tuna kunana, a Vure i ratarike a hunu, a malala, a maki lobo. A Vure i rata a maki lobo nga ge ne vona e Isu.
HEB 1:3 E Tuna i vakasiri a bagetuanga na Vure. I manga muholi a Vure. A nitana i tahoka a nitora. Na nitana kunana i rata a maki lobo ri tabuli tora. I vakaloboa a leho vona ni bole a nimadhi na naro hale ne huriki, ge rata ria ri gi malamala na matana Vure. Muri i made na limana kanena Vure, ra Viri Dagi na hunu, a rana i dagi hateka, i tahoka a nitora dagi.
HEB 1:4 I rata mavonga, i vakasiri manga i rangi liu e huriki a agelo. I manga a rana Tuna Vure i rangi a rane huriki a agelo.
HEB 1:5 Hosi a Vure i uka ma i takia tara agelo ge ta maea, “Ioe e tugu. Ngane Iau e Tamamu.” O ge ta maea, “Iau ge Iau e Tamana, Ia ge Ia e Tugu.”
HEB 1:6 Na tahuna a Vure i rudu vilia na malala e Tuna a tabua, i ta maea, “E huriki a agelo lobo ri gi kavurike ia.”
HEB 1:7 A Vure i luhoi e huriki a agelo, lakea i ta maea, “A Vure i rata e huriki a agelo vona ri manga vilu. I rata e huriki a vora vona ri manga hubena kanono.”
HEB 1:8 Pali a Vure i luhoia e Tuna, lakea i ta maea, “Ioe, a Vure, go matakari vakaroro, o matakari e huriki na naro kiripiripi.
HEB 1:9 O ngaru a naro kamumu. O marikoi a naro hale. I mavonga a Vure, a Vure vomu, i rata ioe o vivi, a nivivi vomu i rangi a nivivi ne huriki e turamu.”
HEB 1:10 A Vure i taki tabu e Tuna, i ta maea, “Ioe, o Bakovi Dagi, o ratarike a malala hosi na nitubuna maki lobo. A hunu tara, o ratarikea.
HEB 1:11 A malala a hunu bara ru lobo, pali ioe bara o made vakaroro. A malala a hunu bara ru ropo manga a varakia.
HEB 1:12 Go pilu rua i manga a varakia, o vuroki rua. Bara o kuloi rua, i manga a viri i kuloi a varakia vona. Pali ioe bara o made mavonga kunana. O uka ma go mapulo. Go made vakaroro.”
HEB 1:13 A Vure i uka ma i takia tara agelo ge ta maea, “O valai o made na limagu a kanegu, ge harena na tahuna ga ru na tarumu e huriki a pile vomu.”
HEB 1:14 E huriki a agelo a hanu kunana. A Vure i rudu ria ri gi tuhori e huriki a bakovi a ngatavine a Vure i korimule ria.
HEB 2:1 I mavonga, si gi luhoi kamumua a ngava si longoa pali, ma si gi lohopilea.
HEB 2:2 A ta mavonga, a vuhuna a vinara na Vure, hosi e huriki a agelo na Vure ri habi ne huriki e tubune hita. A vinara nga ri muholi. E rei a viri i uka ma i longototo, i kamumu a Vure ge habi a nimadihi vona.
HEB 2:3 Pali a Velenga Kamumu, e Isu a Bakovi Dagi i habia ne hita. Muri e huriki ri longoa a ngavana ri taki hita vona a velenga iea i muholi. Pali si gi lohopilea a Velenga Kamumu iea, na Vure ge korimule hita, si gi ha navai? A Vure bara i vakamadihi hale hita.
HEB 2:4 A Vure tara, i ngaru ni vakasiri a Velenga Kamumu iea i muholi, lakea i rata a maka nivakasiri, a maki ni turutu vona. A Hanu Kiripiripi tara i habi tavula a maki ne huriki, na ningaru na Vure. Na naro iea kunana i vakasiri i muholi ra Velenga Kamumu ne Tuna.
HEB 2:5 A Vure i uka ma ge ru e huriki a agelo ri gi matakari a malala karaba, ra malala a ta ta vona ge valai.
HEB 2:6 A ngava ni here puru hosi na Hinere, i ta maea, “E rei a bakovi o luhoia? I navai a hini o matakari kamumua a tuna bakovi?
HEB 2:7 O ru ia ge polotano taro ne huriki a agelo. O ru langa ia, o vakabagetua a rana,
HEB 2:8 ge matakari a maki lobo o ratarike.” Na tahuna i ru a bakovi ge matakari a maki lobo, i uka tara maki ge longo kaburungia. A maki lobo. Pali mona i uka ma si matai a maki lobo ge polotano vona.
HEB 2:9 Pali si masia e Isu, ra muga a Vure i ratea i polotano popote ne huriki a agelo, ge mate na murine hita. Na naro iea, a Vure i rata kamumu hita. Ngane si masia e Isu, a Vure i vakabagetua, i kavurikea a rana, a vuhuna i bole a nimadihi na matenga.
HEB 2:10 A Vure i ratarike a maki lobo, i matakari a maki lobo. Lakea i kamumu a Vure i ratea e Isu i bole a nimadihi, ge malamala liu, ge korimule e huriki ala kupo, ge gale ria e huriki e tuna, ri gi made turana na bagetua vona. E Isu kunana a viri i korimule e huriki.
HEB 2:11 E Isu, ra i valai na Vure, ia a viri i rata e huriki ri malamala. Pali e huriki i rata ria ri malamala, ria ranga ri valai na Vure. I mavonga, e Isu i vivi ni gale ria e huriki e turana.
HEB 2:12 Lakea i ta maea, “Iau ga vakalongo ne huriki a turagu a maki kamumu o rata. Na tahuna ri vapopo ni kavurike ioe, ga kalolo a linge ni kavurike ioe.”
HEB 2:13 I ta rike tabu, i ta maea, “Ga luhoi tora kunanea a Vure.” A ngava i taki tabua i maea, “O longo! Iau a made turana e huriki a bakovi a ngatavine a Vure i habi nau. Ri manga e huriki e tugu.”
HEB 2:14 E Isu i bele manga kunana a bakovi, a vuhuna hita e huriki a Vure i gale hita e tuna a bakovi. I bele manga a bakovi, ge mate, ge ratapilea a viri i nugua a nitora na matenga, re Satan.
HEB 2:15 E Isu i mate, ge korimule hita, re hita si made manga a vorakato, a vuhuna si mangenge ni mate.
HEB 2:16 I muholi hateka, e Isu i ratea a leho iea, i uka ma ge korimule e huriki a agelo. I ratea a leho iea, ge korimule e huriki a hamone Abraham.
HEB 2:17 Na naro iea kunana e Isu i bele manga muholi e huriki e turana, ge ia a prister dagi na Vure, ge rata lobo a leho a Vure i habi vona, ge dodo hita e huriki a bakovi, a ngatavine, ge puga vuroki a naro hale ne hita.
HEB 2:18 I kara ia ge korimule hita e huriki si bole a nitoni, a vuhuna ia tara i bole a nimadihi hosi na tahuna ni toni.
HEB 3:1 Mua o huriki a turagu, a Vure i gale hita. Mu luhoia e Isu. A Vure i rudu vilia, ge ia a Prister Dagi na lotu ne hita.
HEB 3:2 E Isu i rata lobo a leho a Vure i habi vona, i manga e Moses tara i rata a leho lobo a Vure i habi vona.
HEB 3:3 A roho takutaku ri tahoka a viri i hae. I mavonga kunana a Vure i ratarike a maki lobo. A viri i hae a roho, a rana i dagi hateka vona a roho i haea. I maea kunana, a rane Isu i dagi hateka na rane Moses.
HEB 3:5 Hosi e Moses a vora na Vure, i rata lobo a leho a Vure i takia ge ratea, i matakari e huriki a tara na Vure. E Moses i rata mavonga, i vakasiri muga i muholi a ngava a Vure ta ge taki muri ma.
HEB 3:6 Pali e Kristo i uka ma ia a vora. Ia a Tuna Vure. I matakari kamumu e huriki a tara na Vure, i manga e Tamana i ngarua ge ratea. Hita bara si pesi tata ni luhoi torea a Vure, ni pasimata vona a maki a Vure ge rata ne hita, bara hita e huriki a tara vona.
HEB 3:7 I manga a ngava a Hanu Kiripiripi hosi i taki, “Mona na tahuna mu longoa a Vure ge taki mua,
HEB 3:8 nahea mu gu putu ngingi i manga e huriki e tubune mua hosi, ri longotaro a ngavana Vure, ri laho viliha na malala golea, ri tonia a Vure.
HEB 3:9 A rata a maka nivakasiri dagi na matane ria na pida i ravulu va, pali ri tabana ni toni iau. I mavonga, a rihate ne huriki nga, a ta maea, ‘I uka ma ri lohoka vona a narogu. Ri lohopile vakaroro iau.’
HEB 3:11 I madihi a hategu ne ria, lakea a kaba, a ta maea, ‘I muholi hateka, i uka ma ri gi dili na tanga na nimalo nau.’”
HEB 3:12 Mua o huriki a turagu, mu matadoko, ma ge rata mua a niluhoi hale, mu gu lobo ni luhoi torea a Vure, mu gu ngalahere na Vure Mahuri.
HEB 3:13 Na parava mona mu vatuhori, mu vakatora a niluhoi ne mua na parava vakaroro, ma ge tami mua a naro hale, mu gu gigi tora.
HEB 3:14 Na tahuna si luhoi tora karabea e Kristo, i gale hita e huriki e turana. I mavonga, si gi pesi tata ni luhoi torea, ge vano, ge harena na parava si mate vona. Bara i uka, i uka ma ge gale tabu hita e huriki e turana.
HEB 3:15 I manga a ngava ni here puru hosi na Hinere i ta maea, “Mona, na tahuna mu longoa a Vure ge taki mua, nahea mu gu putu ngingi i manga e huriki e tubune mua hosi, ri longotaro a ngavana Vure.”
HEB 3:16 Re huriki nga, e Moses i vakamariu tala ria o Egipto na nitora na Vure, ri longoa a ngavana Vure, pali i uka ma ri longototoa. Ri longotaroa.
HEB 3:17 Ri ratea a Vure, i madihi a hatena na pida i ravulu va. Ria kunana ri rata a naro hale, ri mate na tabeke i ngeki.
HEB 3:18 I taki e huriki nga, ra ri longotaroa a ngavana, i uka ma ri gi dili na tanga na nimalo vona.
HEB 3:19 I mavonga, si matakilaka vona i uka ma ri dili, a vuhuna i uka ma ri luhoi torea a Vure.
HEB 4:1 Hosi a Vure i rata a ngava dagi maea, e huriki a tara vona ri gi dili na tanga na nimalo vona. Mona a ngava dagi iea i tabana. I mavonga, si gi mangenge, ma ge ranga ne mua, a Vure ge matai mua mu keri ni dili.
HEB 4:2 Mona si longoa a Velenga Kamumu. Nahea si gi rata manga e huriki a Israel hosi. Ri longoa a Velenga Kamumu na Vure, pali i uka ma i kori ria, a vuhuna i uka ma ri luhoi torea. E huriki ala popote kunana ri luhoi torea.
HEB 4:3 Hita e huriki si luhoi torea a ngavana Vure, si dili na nimalo iea. Hosi a Vure i ta maea, “I madihi a hategu ne ria, lakea a kaba, a ta maea, ‘I muholi hateka, i uka ma ri gi dili na tanga na nimalo nau.’” I ta mavonga, a vuhuna i lobo ni leho na tahuna i ratarikea pali a malala.
HEB 4:4 Ni here na tabeke tara na Nitana Vure, i taki a poloruana parava. I ta maea, “Na poloruana parava a Vure i malo, a vuhuna i vakalobo pali a leho vona.”
HEB 4:5 Ni here tabu i maea, “I uka ma ri gi dili na tanga na nimalo nau.”
HEB 4:6 Mona a bakovi a ngatavine takutaku ri dili na nimalo iea. Hosi e huriki i uka ma ri dili na nimalo iea, a vuhuna ri longoa a Velenga Kamumu, pali i uka ma ri longototo.
HEB 4:7 Pali a Vure i ru tabua tara parava si gi dili na nimalo vona. A parava iea, ra ngane. E huriki a Israel hosi ri ngalahere na Vure na tabeke i ngeki. Muri na pida i kupo e Davit i herea a ngava, ra si masia pali, ra i maea, “Mona na tahuna mu longoa a Vure ge taki mua, nahea mu gu putu ngingi.”
HEB 4:8 Hosi, e Iosua bara i habi a nimalo ne huriki a Iuda, a Vure i uka ma ge taki tabua tara parava ge bele muri ma.
HEB 4:9 I mavonga, i tahoka a nimalo ne huriki a tara na Vure. A nimalo iea i manga a Parava Nimalo,
HEB 4:10 a vuhuna e huriki ri dili na nimalo na Vure ri malo na leho ne ria, i manga a hini a Vure i malo na tahuna i vakalobo a leho vona.
HEB 4:11 Si gi toni a bulune hita ni dili na nimalo iea, lakea i uka tara viri ge longotaroa a nita na Vure, ge velu.
HEB 4:12 Si gi toni a bulune hita, a vuhuna a nitana Vure i mahuri, i tahoka a nitora. I vere hateka, i rangi a bainat i vere a tabekena i rua. I dili liu na hatene hita, a hanune hita, i manga a bainat i dili na bobona viri, i pala pida a tuhana viri. I pelekado a niluhoi, a ningaru kapiloho ne hita.
HEB 4:13 I uka tara viri ge kapiloho na Vure. A maki lobo si rata, a maki lobo si luhoi, a Vure i lohoka vona. Muri ma hita lobo bara si pesi na matana, ge nana hita vona a naro lobo si rata.
HEB 4:14 E Isu, a Tuna Vure, a Prister Dagi ne hita, i sike pali na hunu, i made turana Vure. I mavonga, si gi pesi tata ni luhoi torea.
HEB 4:15 A Prister Dagi ne hita i lohoka vona a maka nitoni hale ni rata virihi hita vona, lakea si boru, a vuhuna ia tara i hataki a maka nitoni lobo nga. Pali i uka ma i boru. I uka ma i rata a naro hale.
HEB 4:16 I mavonga, si gi lakea tabukoi na Vure. I made na gula hariki vona, i rata kamumu hita. Si gi lakea tabukoi vona, ge dodo hita, ge rata kamumu hita, ge tuhori hita na tahuna si bole a nimava.
HEB 5:1 A Vure i vulaki tala e huriki a prister dagi ne huriki a bakovi tavula o Israel. I vulaki ria, ri gi rata a leho vona na murine huriki lobo, ra ni habi a nihabi ne huriki i lakea na Vure, ni padimate a sipsip, a bulmakau, ni habi na Vure, ge puga vuroki a naro hale ne ria.
HEB 5:2 A prister dagi i ta madoru mai e huriki ri rata ruru a naro hale, a vuhuna ia tara a bakovi kunana.
HEB 5:3 A prister dagi i habi a nihabi ni puga vuroki a naro hale ne huriki, turana naro hale vona, a vuhuna ia tara a bakovi hale.
HEB 5:4 I uka tara viri ge kavurike mule a rana, ge bole a leho iea na ningaru vona. A Vure kunana a viri i gale a viri ge ia a prister dagi, i manga hosi i galea e Aron.
HEB 5:5 E Kristo tara, i uka ma i vulaki mule ia ge bole a leho na prister dagi. A Vure kunana i vulakia ge nugua a leho iea, lakea i takia, i ta maea, “Ioe e Tugu. Mona iau e Tamamu.”
HEB 5:6 A ngava tara ni here na Hinere i ta maea, “Go leho vakaroro manga a prister. Ge manga kunana e Melkisadek.”
HEB 5:7 Na tahuna e Isu i made manga a bakovi na malala, i vasileki na Vure, i nanea ge tuhori ia. I gale tala dagi turana luha, na Viri i tahoka a nitora ni korimule ia na matenga. A Vure i longoa a nivasileki, a ningaru vona, a vuhuna i vakakiroko mule ia, i longototoa a Vure.
HEB 5:8 I muholi, e Isu a Tuna Vure, pali i tovo ni longototoa a Vure na tahuna i bole a nimadihi.
HEB 5:9 Muri i vakalobo a leho vona, ngane i korimule e huriki ri longototo a ngavana, i habi a nimahuri vakaroro ne ria.
HEB 5:10 A Vure i ratea e Isu ia a prister dagi, i manga e Melkisadek hosi.
HEB 5:11 I kupo a ngava i tabana ta ga taki mua vona na ngava iea. Pali a keri ni tuveve polo ne mua, a vuhuna a gine mua i tora, i uka ma i palala.
HEB 5:12 Mu lohoka vona muga pali a nitana Vure. Ngane i kara mua bara mu tovo polo e huriki ranga. Pali i uka. I tabana i kapo a niluhoi ne mua, lakea e huriki ranga bara ri tovo mua na ngava, ra ni tovo muga mua vona. I uka ma mu kara ni bole a maki ni kani i tora. Mu tabana ni ruru.
HEB 5:13 Si lohoka vona, a koma kiroko, i vakarurua e kinana, i uka ma i lohoka vona a naro kamumu, a naro hale, a vuhuna ia a koma kiroko kunana.
HEB 5:14 Pali e huriki ri paki pali, ri kani a maki ni kani tora. Ri tovo pali, ri matakilaka vona pali a naro kamumu, a naro hale.
HEB 6:1 I mavonga, a ngaru mu gu lobo ni bole a nitovo manga a koma kiroko. A ngaru mu gu koru rike, mu gu paki. Mu gu lobo ni bole vakaroro a nitovo na vuhuna ngava ne Kristo, ra nitovo manga e huriki ri gi pulo a vilone ria, ri gi pe a naro hale ne ria, ri gi luhoi torea a Vure.
HEB 6:2 Nahea mu gu hamule tabu mai a nitovo na nivahilolo, a naro ni ru langa a limana viri, a nitovo na nipesi rike mule na matenga, a nitovo ne huriki ri gi pesi na matana Vure ge pelekado ria, ri gi vurua vakaroro.
HEB 6:3 A Vure ge ngaru, bara tovo mua ngane na nitovo na viri i dagi, i paki pali.
HEB 6:4 A viri i luhoi tora mugea e Kristo, pali i ngalahere vona, i uka ma ge pulo tabu a vilona. A viri a Vure i vakapalalea pali, i masia a maki kamumu a Vure i vakaparu ia vona i namika hateka, i bole a Hanuna Vure turane hita, i namika pali a nitana Vure, i hataki pali a nitora na Harikianga na Vure, ra ge valai muri ma, pali muri i ngalahere na Vure, i manga i padi tata tabua a Tuna Vure na kai tavalavala, i rata e huriki ri biua a Tuna Vure.
HEB 6:7 A vala i boru, i vakamea a malala. A malala i vakabele kamumu a maki ni kani na viri i varo vonga, a Vure bara i vakabagetua a malala iea.
HEB 6:8 Pali a malala ge vakabele kunana a mota padipadi, a kukuni madaro, ra malala iea i hale. I uka ma ge tabaka, a Vure bara i rudurahea a malala iea. Muri ma ge gutu parinea na kanono.
HEB 6:9 Mua o huriki a turagu, mete ta tora hateka, pali mete lohoka vona a maka maki i kamumu hateka ri gi bele ne mua, a kanena hini a Vure i korimule pali mua.
HEB 6:10 Mu leho tora vakaroro ni kori e huriki a tara na Vure. Mu vakasiri manga mu ngarua a Vure. I uka ma ge mata kepa vona a Vure, a vuhuna a narona i kiripiripi kunana.
HEB 6:11 A ngaru mua lobo mu gu leho tora mavonga, mu gu lohoka vona i muholi a maki mu pasimata vona, ge vano, ge harena na tahuna mu bolea.
HEB 6:12 Naha ni malai. Mu muri mai a narone huriki ri luhoi tora, ri hatenono, ri bole a maki i ta muholi muga vona a Vure ge habi ne huriki e tuna.
HEB 6:13 Hosi a Vure i rata a ngava dagi turane Abraham. Pali a Vure, ge kaba navai? I uka tara viri ge dagi hateka na Vure, ge kurahi a rana. Lakea i kaba mule na rana,
HEB 6:14 i ta maea, “I muholi hateka, ga gamai ioe, ga rata e huriki a hamomu ri gi bele kupo hateka.”
HEB 6:15 Lakea e Abraham i dava, i hatenono. Muri i bele a maki a Vure i ta muholi vona ge bele.
HEB 6:16 Na tahuna a bakovi i ngaru ni kaba, bara i kurahi a rana viri tara i tahoka a rana. A bakovi i kaba i vakatora a nitana, i vakavulai e huriki ri ngaru ni hehe a nitana.
HEB 6:17 I mavonga, na tahuna a Vure i ta muholi hosi ge rata kamumu hita e huriki a hamone Abraham, i ngaru ni vakasiri kamumu hita, i uka ma ge puloa a ngavana, lakea i kaba ge vakatorea a nitana.
HEB 6:18 A Vure i ta muholi, i kaba. A Vure tara, i keri ni tatami. I mavonga, hita e huriki si ha lakea na Vure ge matakari hita, si gi pesi tora, si gi pasimata ni bole a maki i ta muholi vona si gi bolea.
HEB 6:19 Ra maki a Vure i taki hita si gi pasimata vona, i rata hita si pesi tata, i manga a vago ni hori a aga vona, i ratea a aga i pasi na tabeke i taku kunana. I tuli hita si bele na matana Vure, i manga a prister dagi hosi ri dili na Tabeke Nitaba Hateka, na bitona lavalava dagi ni topi rike na roho na Vure.
HEB 6:20 E Isu i bele manga a prister dagi i manga e Melkisadek hosi. Ngane i muga ne hita pali, i bele na matana Vure.
HEB 7:1 Hosi, e Melkisadek a hariki na tanga dagi e Salem. Ia a prister dagi na Vure Meli Liu. E Abraham i vaubi turane huriki a hariki ranga, i rabalaki ria. Muri i laho hamule lakea na tanga vona. E Melkisadek i taguia na dala, i vakabagetua.
HEB 7:2 Lakea e Abraham i ru na naguna i ravulu a maka maki i bole na vabinga, i habia ne Melkisadek a naguna i taku. A rane Melkisadek, na nita Hibru, i manga i maea, “a Hariki Na Naro Malamala”. E Melkisadek a hariki na tanga dagi e Salem. A ngava e Salem na nita Hibru i manga i maea, “Nivalemu”. I mavonga e Melkisadek a hariki na Nivalemu.
HEB 7:3 I uka tara viri ge lohoka vona e tamane e kinane Melkisadek. A hamona tara i uka ma ni lohoka vona. A parava ni poda ia vona, a parava i mate vona, ngi ranga i uka ma ni lohoka vona. I mavonga, i manga a prister vakaroro, manga kunana a Tuna Vure.
HEB 7:4 Mu masia e Melkisadek, i tahoka a rana i dagi hateka. A gare ne hita, e Abraham, i ru na naguna i ravulu a maki i bole na vabinga, i habia vona a naguna i taku.
HEB 7:5 A vinara i taki e huriki na kabu ne Levi kunana ri gi bole a naguna i taku ne huriki a Israel, a vuhuna ria e huriki a prister. I muholi, e huriki a Israel, e huriki a hamone Abraham, pali e huriki a prister bara ri bole ne ria a naguna i taku.
HEB 7:6 E Melkisadek i uka ma ia a hamone Levi, pali i bole ne Abraham a nihabi iea. Muri i vakabagetua e Abraham, ra bakovi a Vure i ta muholi vona na ngava dagi.
HEB 7:7 Si lohoka vona a bakovi i vakabagetu a viri, ia a bakovi dagi. A viri ni vakabagetu, a bakovi tavula kunana.
HEB 7:8 E huriki a Levi ri bole a naguna i taku ne huriki, ria e huriki a bakovi kunana. Bara ri mate. Pali e Melkisadek i bole a naguna i taku, a nita na Vure i taki i uka ma i mate.
HEB 7:9 Bara si ta maea, e Levi, ra viri i bole a naguna i taku ne huriki a Israel, ia tara, i manga i habi a naguna i taku vona i lakea ne Melkisadek. I manga i habi polo ne Abraham,
HEB 7:10 a vuhuna i tabana i pololilo na kakaina gare vona, e Abraham, na tahuna e Abraham i taguia e Melkisadek.
HEB 7:11 A vinara, a leho na prister, rua varago ru valai na Vure. Pali a leho na prister i keri ni rata hita si gi malamala na matana Vure. I mavonga, a Vure i rudu vilia a prister karaba. I uka ma i manga e Aron. I manga e Melkisadek.
HEB 7:12 Na tahuna ni gi kuloi a prister, a vinara tara bara ni kuloi.
HEB 7:13 A ngava iea ni taki virihi e Isu vona. Pali a Bakovi Dagi ne hita i uka ma i valai na kabu ne Levi. I valai na kabu ne Iuda. Hosi, i uka tara bakovi na kabu ne Iuda ge leho manga a prister. A vinara ne Moses, tara, i uka ma i taki e huriki a Iuda ri gi rata a leho na prister.
HEB 7:15 A ngava iea i kavakava hateka ngane, a vuhuna tara prister i manga e Melkisadek i valai pali.
HEB 7:16 Ia a prister, i uka ma i ramai a vinara, ra i taki e huriki a Levi kunana ri gi rata a leho na prister. Ia a prister a vuhuna i tahoka a nitora ni pesi rike mule na matenga.
HEB 7:17 Si lohoka vona, a vuhuna a Vure i ta tora, i ta maea, “Ge ioe a prister vakaroro. O manga kunana e Melkisadek.”
HEB 7:18 A Vure i bole vuroki pali a vinara na prister, a vuhuna i uka nitora, i uka leho.
HEB 7:19 A vinara i uka ma i rata hita si gi malamala na matana Vure. Muri a Vure i vakasiri ne hita a dala kamumu si gi bele tabukoi na Vure vona.
HEB 7:20 Na tahuna a Vure i vulakia e Isu ge ia a prister, i uka ma i ru tavulea. I ta muholi, i kaba, i ru ia ge ia a prister. E huriki a prister hosi i uka ma i mavonga. I uka viri ge kaba langa ne ria, ri gi bele manga a prister. Pali e Isu, a Vure i kaba, i ta maea, “E Bakovi Dagi i kaba pali, i ta maea, ‘Ge ioe a prister vakaroro.’ A Vure i uka ma ge pulo a ngavana.”
HEB 7:22 Ra ngava iea i ratea e Isu ge ia a viri ni vakatora a ngava dagi karaba. A ngava dagi karaba i kamumu hateka vona a ngava dagi hosi.
HEB 7:23 Hosi e huriki a bakovi ala kupo ri leho manga prister. I uka ma ri leho vakaroro, a vuhuna bara ri mate, muri a viri tara bara i bole a murina.
HEB 7:24 Pali e Isu i mahuri vakaroro, i leho manga prister vakaroro, i uka ma ge lobo.
HEB 7:25 I mavonga i tahoka a nitora ni korimule e huriki ri luhoi torea, ri valai tabukoi na Vure, a vuhuna i mahuri vakaroro, i takia a Vure ge kori hita.
HEB 7:26 E Isu a prister dagi kamumu hateka. I malamala, i uka ma i ratea tara naro hale. I made herehere ne hita e huriki a bakovi na malala. A Vure i vakamadea polomeli liu na hunu.
HEB 7:27 E huriki a prister dagi ri tahoka a leho ni habi a nihabi na parava vakaroro. Muga bara ri habi a nihabi ni puga vuroki a naro hale ne ria. Muri ri habi a nihabi ni puga vuroki a naro hale ne huriki. Pali e Isu i uka ma i tahoka a naro hale ge rata mavonga. I habi a nihabi balaka taku kunana. I habi mule ia na Vure, i mate, i manga a nihabi.
HEB 7:28 Hosi a vinara i ru e huriki a bakovi na malala ge ria a prister dagi. Pali muri, na tahuna a Vure i kaba, i ru a Tuna Vure ge ia a prister, re Isu, i rata lobo a maka maki a Vure i takia ge rata.
HEB 8:1 A vuhuna ngava nga i maea: Si tahoka pali a prister dagi. I made na limana kanena Hariki na hunu, i matakari.
HEB 8:2 Ngane i leho manga prister pololilo na kape muholi na Vure. A kape iea, i uka tara bakovi ge haea. A Vure kunana a viri i haea.
HEB 8:3 E huriki a prister dagi lobo ri tahoka a leho ni habi a nihabi na Vure. E Kristo tara, i habi a nihabi na Vure, a vuhuna ia a prister dagi.
HEB 8:4 Ia bara i made na malala, i uka ma ge ia a prister dagi, a vuhuna i tahoka e huriki a prister ri made pali, ri habi a maka nihabi na Vure, ri muri mai kunana a vinara.
HEB 8:5 Ri leho manga prister na kape na Vure koea na malala. Ra kape na Vure iea, i manga kunana a hanuna kape muholi na Vure i pesi na hunu. Hosi, muga ne Moses ta ge vakapesia a kape na Vure, a Vure i takia, i ta maea, “O lohotata vona a naro na kape a vakasiri ioe vona na lolo, o ramai kamumua.”
HEB 8:6 Pali ngane a leho i bolea e Isu na ngava dagi karaba i rangi a leho na ngava dagi hosi, a vuhuna a nita muholi a Vure i habi turana ngava dagi karaba i rangi a nita muholi na ngava dagi hosi.
HEB 8:7 A ngava dagi hosi bara i kamumu kunana, a Vure i uka ma ge vakabele tabu a ngava dagi karaba.
HEB 8:8 Pali a Vure i pukatala a naro hale ne huriki nga, i ta maea, “E Bakovi Dagi i ta maea, ‘Mu longo, iau a vulakia pali tara parava, ga rata a ngava dagi karaba turane huriki a Israel, e huriki a Iuda.
HEB 8:9 Ra ngava dagi iea, i uka ma ge manga a ngava dagi hosi a rata turane huriki a gare ne ria, na tahuna a tuli tala ria o Egipto. I uka ma ri muri maia a ngava dagi nau. Lakea iau e Bakovi Dagi, a ngalahere ne ria.
HEB 8:10 A ngava dagi karaba ta ga ratea ne huriki a Israel i maea: Iau e Bakovi Dagi a ta maea, ‘Muri ma ga ru a vinara nau ge tabuli na niluhoi ne ria, ga here a ngava nau na hatene ria. Iau, ge iau a Vure ne ria. Ge ria e huriki a ngate nau.
HEB 8:11 Na tahuna iea, i uka ma ri gi vatovo ria na ngava ne Bakovi Dagi, a vuhuna e huriki lobo bara ri lohoka nau, i vakatubu ne huriki a matasia, i lakea ne huriki a kakaina tanga.
HEB 8:12 Ga dodo ria, i uka ma ga habi a nimadihi ne ria vona a naro hale ne ria. Ga longo kaburungi liu a vilo hale ne ria.’”
HEB 8:13 Na tahuna a Vure i taki talea a ngava dagi karaba vona, i ratea ngane a vinara hosi i uka lehona. A ra maki hosi, i uka lehona, bara i velu.
HEB 9:1 A ngava dagi muga i tahoka a vinara na naro na nikavurikea a Vure. I tahoka tabu a naro ni hae a mailo na Vure koea na malala.
HEB 9:2 Ra Mailo na Vure iea, ni hae maea. A tabeke ni dili vona muga ni gale a ‘Tabeke Nitaba’. A butuna lam turana dede ni ru langa a bret ni habi na Vure ru tabuli pololilo vona.
HEB 9:3 A tabeke ni dili vona muri ni gale a ‘Tabeke Nitaba Hateka.’ A lavalava dagi ni vulala kari a matana.
HEB 9:4 Na tabeke iea i tahoka a dede ni rata na gol. Ra dede iea, ne vona ni rungani a havu mangisipa, ge poko, ge huli pololilo vonga a mangina. A Tava na Ngava Dagi ni naviri na gol tara i tabuli vonga. Ni ru pololilo vona a ulo ni rata na gol, ni tahoni vona a bret na hunu ni gale a mana. A kodo e Aron, ra i tuvu tabu hosi, turana ngava dagi hosi ni here na kedo, ngi ranga ni ru pololilo vona.
HEB 9:5 Na matana tava iea i tahoka a murina na nidodo. I pesi langa vona a hanuna agelo i rua, ru vulala tala a karapane rua, ru kavitagu a matana tava. Ra hanuna agelo nga ru vakasiri a Vure i made vona a hini nga. Pali ngane i uka ma ga vakalongo lobo mua vona a maka ngava nga.
HEB 9:6 Muri ni kisi puru lobo a maki na Mailo na Vure, e huriki a prister bara ri dili na Tabeke Nitaba, ri rata a leho ne ria.
HEB 9:7 Pali a Tabeke Nitaba Hateka, a prister dagi kunana bara i dili vona. Na pida takutaku, bara i dili balaka taku kunana. I uka ma i dili tavula. I bole a darana sipsip, i dili turana, i habi na Vure ne vona ni puga vuroki a naro hale vona, a naro hale ne huriki, ri rata ruru.
HEB 9:8 Na naro iea kunana a Hanu Kiripiripi i vakasiri hita vona i uka tara viri ge dili na Tabeke Nitaba, a vuhuna a kape na malala i tabana ni pesi.
HEB 9:9 I manga a nita vakakika ne hita mona. I vakasiri manga a maka nitabari, a maka nihabi ri keri ni rata a viri i habi ria ri gi malamala na matana Vure.
HEB 9:10 A leho ne ria, ri habi kunana a vinara na rabu ni kani, ni ninu, ni hilolo, ni matakari mule a kakaina viri. A vinara nga, bara ni ramai, i harena kunana na tahuna a Vure i vakasiri a dala kamumu karaba.
HEB 9:11 Pali e Kristo i valai manga a prister dagi. A leho i ratea i korimule hita. I dili na mailo tara na Vure. I uka ma a Mailo vona na malala, i uka ma ni hae na limana bakovi. A Mailo iea i kamumu hateka, i rangi a viri muga.
HEB 9:12 E Kristo i dili balaka taku kunana. I uka ma i dili turana darana meme, a darana tuna bulmakau. A nihabi i habia, a darana. Na naro iea i konamule hita, si gi tahoka a nimahuri vakaroro.
HEB 9:13 E huriki a prister ri bole a darana meme, a darana bulmakau a toga, turana havulana tuna bulmakau a kinana ni gutuvuro, ri guru langa na viri i katoki na matana Vure. Na naro iea, ri ratea ge matapado na matana Vure.
HEB 9:14 Pali a darane Kristo i rangi a darana sipsip, a bulmakau. Na nitora na Hanu Kiripiripi, ra i mahuri vakaroro, i habi mule ia na Vure manga a nihabi malamala liu. I mavonga, a darana i rata hita si malamala na matana Vure, si lobo ni rata a rabu hale bara si mate vona, si tubu ni ratea a leho na Vure Mahuri.
HEB 9:15 Ngane e Isu i pesi na kurukuruna Vure, e huriki a bakovi a ngatavine, i vakatora a ngava dagi karaba. E huriki a viri a Vure i gale ria, bara ri bole a maki a Vure i ta muholi ge habi ne huriki e tuna. Ri gi bole, ri gi tahoka vakaroro, a vuhuna e Isu i mate na murine hita, ge puga vuroki a naro hale si rata na tahuna si ramai a ngava dagi muga.
HEB 9:16 Ra naro ni varodo a ngava ne rei ge bole a maki muri na viri i mate. I uka ma ge bole a maki muga na bakovi i mate. Ni gi matai taro i mate muholi, muri bara ni veru tala a maki vona.
HEB 9:17 Na tahuna a bakovi i mate pali, ngane a nita na ngava dagi i tahoka a nitora. Na tahuna a bakovi iea i rata a ngava dagi i tabana na nimahuri, a ngava dagi vona i tabuli tavula.
HEB 9:18 I mavonga, a mugana ngava dagi na Vure tara, ni vakatora na dara.
HEB 9:19 Muri ne Moses i vakalongo ne huriki a vinara na Vure i ravulu, i palakudu a lohona tuna bulmakau, a meme, i bole a dara, i vuli turana naru. Muri i bole a rahana kai a hisop, a mota vururu ni viri na vuna sipsip, i lutu purua na dara iea, i voro tamali rike na puhu na raukea a dara, i voro tamali rike ne huriki a bakovi a ngatavine.
HEB 9:20 Muri i ta maea, “Ra dara iea, ne vona ni vakatora a ngava dagi a Vure i vakuku mua vona mu gu ramai.”
HEB 9:21 Muri i voro tamali rike a dara iea na Mailo na Vure, na maki na lotu pololilo na kape.
HEB 9:22 I muholi hateka, a vinara na Vure i taki a dara kunana i rata a maki lobo ge matapado. A dara i uka ma ge tua, a Vure i uka ma ge puga vuroki a naro hale ne huriki.
HEB 9:23 A kape i manga a hanuna maki muholi i tabuli na hunu. Ni vaka­matapado na matana Vure na naro iea, ra na darana sipsip, a bulmakau. Pali a maki muholi na hunu ni vakamatapado na nihabi tebi, ge rangi a nihabi nga,
HEB 9:24 a vuhuna e Kristo i uka ma ia a prister na malala, ge dili na tabeke ni taba, ra i tabuli pololilo na kape ni hae na limana bakovi. I uka. A mailo iea a hanuna maki muholi na hunu. I sike liu na hunu, na matana Vure, i leho ni kori hita.
HEB 9:25 E huriki a prister dagi ri dili na tabeke ni taba na pida takutaku. A nihabi ne ria, i uka ma a darane ria. A darana meme, a bulmakau kunana. Pali e Kristo i uka ma i rata mavonga. I mate balaka taku kunana, i dili lakea na matana Vure, a nihabi vona a darana, i vakalobo a mapana naro hale ne hita e huriki a bakovi a ngatavine.
HEB 9:26 Ia ge rata manga e huriki a prister na malala, bara i bole a nimadihi vakaroro, i vakatubu na tahuna a Vure i ratarike a malala i valai i harena mona. Pali i uka. Ngane i tabukoi a nilobo na parava, e Kristo i bele na malala balaka taku kunana, ge habi mule ia na Vure, ge ia a nihabi, ge puga vuroki liu a maka naro hale.
HEB 9:27 Hita lobo bara si mate balaka taku kunana. Muri bara si pesi na matana Vure, ge pelekado hita.
HEB 9:28 E Kristo i mate balaka taku, i manga a nihabi na Vure, i bole a mapana naro hale ne huriki ala kupo. I mavonga, muri ma na tahuna i hamule valai, i uka ma ge mate tabu ni bole tabu a mapana naro hale ne huriki. Na tahuna i hamule valai, bara i korimule e huriki ri pasimata vona ge valai.
HEB 10:1 A vinara ne Moses, ra i taki ni gi habi na Vure a nihabi na pida takutaku, i uka ma ri manga a maki muholi na hunu. Ri tebi. Ria a hanuna maka maki kamumu kunana ta ri gi valai a vuhuna ri keri ni korimule e huriki ri valai tabukoi na Vure.
HEB 10:2 A nihabi bara i rata e huriki ri malamala, i uka ma ri gi habi vakaroro, a vuhuna bara i rata e huriki ri dili na roho na Vure ri malamala. Bara ri hataki na hatene ria ri uka rarenga na naro hale.
HEB 10:3 A nihabi nga, ri rata e huriki ri longo visi tabu na pida vakaroro a naro hale ne ria,
HEB 10:4 a vuhuna a darana bulmakau, a darana meme, ru keri ni puga vuroki a naro hale ne huriki.
HEB 10:5 I mavonga, na tahuna e Kristo i puru valai na malala, i ta maea, “I uka ma o ngaru a nihabi, a nitabari. Pali o kisi purua a kakaigu.
HEB 10:6 I uka ma o vivi vona a nihabi gutu-vuro, a nihabi na naro hale.
HEB 10:7 Muri a ta maea, ‘O Vure, o longo! A valai ngane, ga ratea a ningaru vomu, i manga a ngava ni here puru virihi mai iau na Hinere.’”
HEB 10:8 I muga i ta maea, “O uka ma o vivi vona a nihabi gutu-vuro, a nihabi na naro hale.” Pali a maka nihabi nga, a vinara i taki ni gi rata.
HEB 10:9 Muri i ta maea, “O longo! A valai ngane, ga ratea a ningaru vomu.” Lakea a Vure i ravunu a ngava dagi hosi, i habi a ngava dagi karaba ge bole a murina.
HEB 10:10 Na ningaru na Vure, e Isu Kristo i mate, i habi mulea na Vure a kakaina, i manga a nihabi. Na naro iea, i ru here here hita, hita ne vona Vure kunana.
HEB 10:11 E huriki a prister ri leho na parava vakaroro. Ri habi vakaroro a nihabi. Pali a nihabi ne ria i uka ma ri ravunu vuroki a naro hale ne huriki.
HEB 10:12 Pali a nihabi ne Kristo, i habi balaka taku kunana. A nihabi vona i kara ni puga vuroki a naro hale ne huriki lobo na parava vakaroro. Muri i made puru na limana kanena Vure.
HEB 10:13 Ngane i davea a parava a Vure ge ratapile e huriki a pile vona.
HEB 10:14 Ra ni habi i taku iea, i rata e huriki a bakovi a ngatavine, ra Vure i ru here here ria ne vona, ri malamala liu.
HEB 10:15 A Hanu Kiripiripi i pukatala a ngava ne hita, i ta maea,
HEB 10:16 “E Bakovi Dagi i ta maea, ‘A ngava dagi ga ratea turane ria muri ma ge maea: Ga ru a maka vinara nau na hatene ria. Ga here na niluhoi ne ria.’”
HEB 10:17 Muri i ta tabu, i ta maea, “I uka ma ga luhoi tabu a naro hale ne ria, ra ri putu puru a vinara nau.”
HEB 10:18 Na tahuna a Vure i puga vuroki a naro hale na viri, i uka tabu tara nihabi si gi habia ni puga vuroki a naro hale.
HEB 10:19 Mua o huriki a turagu. Ngane i uka ma si mangenge. Na darane Isu, si dili kunana, si bele na matana Vure, i manga e huriki a prister ri dili na tabeke ni taba.
HEB 10:20 Si dili na dala karaba na nimahuri. A dala iea, e Isu i rata puru ne hita, i dili polo na lavalava, ra kakaine Isu.
HEB 10:21 Si tahoka a prister dagi i matakari e huriki a tara na Vure.
HEB 10:22 A ngava nga i muholi, i mavonga, si gi lakea tabukoi na Vure. Si gi bele vona turana naro muholi, si gi lohoka vona a maki si luhoi torea i muholi. I guru langa na hatene hita a darana, i vakalobo a rarenga na naro hale si rata, ge vakasiri hita si matapado na matana Vure. I vahilolo a kakaine hita na naru i maga.
HEB 10:23 Nahea si gi loho ruarua. Si gi pesi tata na ni luhoi tora a maki si pasimata vona si gi bole, a vuhuna a Vure i keri ni tatami. I rata lobo a maki i taki ge rata.
HEB 10:24 Hita takutaku si gi matakana a dala ni vadorike hita na naro ni vangaru, ni rata a naro kamumu.
HEB 10:25 Nahea si gi lohopile a naro na nivapopo, manga e huriki ranga ri koi ni vapopo. Hita lobo si gi vakatora a niluhoi ne huriki e turane hita, a vuhuna i tabukoi ge bele a parava e Bakovi Dagi ge hamule valai vona.
HEB 10:26 E rei a viri i lohoka vona pali a nita muholi, pali i tabana i luhoi ge rata a naro hale, lakea i rata, i uka tabu a nihabi na naro hale vona.
HEB 10:27 A viri i rata mavonga, ge mangenge. Ge dava kunanea a Vure, ra viri ge pelekado e huriki, ge ratapile na kanono dagi e huriki ri hehea.
HEB 10:28 Si lohoka vona pali, a viri i putu puru a vinara ne Moses, lakea a viri ala rua o ala tolu to masia, bara to taki talea, ra bakovi iea i uka ma ni gi dodo. Bara ni rabalaki.
HEB 10:29 Pali a viri i lohopilea a Tuna Vure bara i bole a nimadihi dagi hateka, a vuhuna i biua a darane Isu, ra i vakatorea a ngava dagi na Vure. A ngava dagi iea i ru here hita ne vona a Vure kunana. Pali a viri i lohopilea a Tuna Vure, i ratea a Hanuna Vure i madihi a hatena. Ra Hanuna Vure, a mari ni rata kamumu hita.
HEB 10:30 Si lohoka vona a Vure i ta maea, “A ni koli a naro hale a leho nau. Iau kunana ga koli a naro hale ne huriki, ga vakamadihi ria.” Lakea i ta tabu i ta maea, “E Bakovi Dagi ge pelekado a narone huriki a ngate vona.”
HEB 10:31 A maki ni mangenge hateka vona, a Vure Mahuri ge lakavu ioe, ge vakamadihi ioe.
HEB 10:32 Mu luhoi mule tabu na tahuna hosi mu bole a ngava muholi na Vure. Na tahuna iea e huriki ri habi a maregoa dagi ne mua, mu bole a nimadihi i kupo. Pali mu pesi tora, mu rura kunana.
HEB 10:33 Na parava ranga ni vakapesi mua na matane huriki, lakea ri biu mua, ri vakamadihi mua. Na parava ranga mu pesi turana e huriki ranga ri bole a maka maregoa, mu tuhori ria.
HEB 10:34 Mu dodo, mu kori e huriki ni ru dili na bavi. Na tahuna e huriki ri radi a maka maki ne mua, mu vivi kunana, a vuhuna mu lohoka vona, a maki muholi ne mua i tabuli na hunu, bara i tabuli vakaroro.
HEB 10:35 I mavonga, nahea mu gu loho ruarua, a vuhuna na tahuna mu pesi tata ni luhoi torea a Vure, bara mu bole a mapa dagi muri ma.
HEB 10:36 Mu pesi tora, mu muri mai a ningaru na Vure. Muri bara mu bole a maka maki a Vure i ta muholi vona hosi ge habi ne mua.
HEB 10:37 A ta mavonga, a vuhuna a Hinere i ta maea, “I uka ma ge tabaka a viri a ta muholi vona ge valai, bara i valai. I uka ma ge maradoi.
HEB 10:38 A viri malamala nau ge luhoi tora vakaroro iau. Pali ia bara i pesi hoho mule, i uka ma ga vivi vona.”
HEB 10:39 Pali i uka ma si pesi hoho mule ge ratapile hita a Vure. I uka. Hita si luhoi torea a Vure, lakea ge habi a nimahuri vakaroro ne hita.
HEB 11:1 A ra pelegona ngava, e “luhoi tora?” I mata navai a viri i luhoi torea a Vure? A viri i luhoi torea a Vure i lohoka vona ge bole a maki i pasimata vona. I uka ma i matai a maki nga, pali i lohoka vona bara i bole ria.
HEB 11:2 E huriki a bakovi hosi ri luhoi torea a Vure, lakea i gale ria e huriki a bakovi kamumu.
HEB 11:3 Hita, si luhoi torea a Vure i ta kunana, i vakabele a maki lobo. A maki lobo si matai, a Vure i ratarike na maki i uka ma si matai.
HEB 11:4 Hosi e Abel i luhoi torea a Vure, i habi a nihabi vona. A nihabi ne Abel i rangia a nihabi ne tukana, e Kain, lakea a Vure i bolea a nihabi ne Abel, i galea a bakovi kamumu. I muholi, e Abel i mate pali. Pali a naro i rata hosi i tabana ni tovo hita vona a naro na niluhoi torea a Vure.
HEB 11:5 E Enok i luhoi torea a Vure, lakea a Vure i bole sikea na hunu. I uka ma i mate. A podana i uka ma ni matavisi, a vuhuna a Vure i bole sikea na hunu. Muga na Vure i bole sikea, i taki ia a bakovi kamumu, i vivi vona.
HEB 11:6 E rei a viri i uka ma i luhoi torea a Vure, a Vure i uka ma i vivi vona. E rei a viri i ngaru ni lakea tabukoi na Vure, ge lohoka vona a Vure i made, ge luhoia a Vure ra viri i rata kamumu e huriki ri matakanea.
HEB 11:7 Hosi e Noa i luhoi torea a Vure. Lakea a Vure i taki mugea e Noa, i vakalongoa na maka maki hale ri gi bele muri ma. E Noa i mangenge na Vure, i haea a aga rungu, ge korimule na vuranga e huriki a kabu vona. E Noa i rata mavonga, a maka naro hale ne huriki lobo na malala ri bele kavakava. A Vure i gale ia a bakovi malamala, a vuhuna i luhoi torea a Vure.
HEB 11:8 Hosi e Abraham i luhoi torea a Vure, i longototoa na tahuna a Vure i takia ge pe a tanga vona, ge lakea na tanga i ngaru ni habia vona, ge a malala vona. E Abraham i malaga na tanga vona, i havai. I uka ma i lohoka vona a tabeke ge lakea vona.
HEB 11:9 I luhoi torea a Vure, i vano kunana, i made kunana na kape, i manga a mosi na malala a Vure i ta muholi vona ge habia vona. E tuna, e Isak, e tubuna e Iakop, rua ranga ru made vonga na kape, ru dava ni bole a malala, ra a Vure i ta muholi ge habi ne tou.
HEB 11:10 E Abraham i luhoi torea a Vure, i davea a parava ge masia a tanga dagi, ra tanga i tahoka a vuhuna. Ra tanga iea, a Vure kunana i luhoi kadoa, i kisi purua.
HEB 11:11 Hosi e Sara i gare liu, i keri ni vakabele a koma. Pali i luhoi torea a Vure, lakea a Vure i vakatorea a kakaina, i singou. A Vure i tuhoria, a vuhuna e Sara i lohoka vona, a Vure a viri i rata a maki i taki ge rata.
HEB 11:12 Na naro iea, e Abraham i tahoka e huriki a hamona ala kupo hateka. Re Abraham, i gare liu pali, i ngalai a matenga. Pali ngane e huriki a hamona ri ala kupo hateka, i manga a maka hada na hunu, a hire na lavu. Ni keri ni gi.
HEB 11:13 Re huriki a bakovi a ngatavine nga, i uka ma ri bole ma a maki a Vure i ta muholi vona ri gi bole. Pali ri vivi kunana ni lohoka vona a maki nga bara ri bele muri ma. I uka ma ri bole a maki nga, pali na tahuna ri mate, ri tabana ni luhoi torea a Vure. Ri lohoka vona, ri made manga a mosi kunana koea na malala.
HEB 11:14 Si lohoka vona, ri matakanea a malala, ga tanga muholi ne ria, e huriki ri taki ri made manga a mosi kunana koea na malala.
HEB 11:15 Bara ri luhoi kunana a tanga ri pea ri valai, bara ri hamule lakea tabu vona.
HEB 11:16 Pali i uka ma ri dodoa a tanga muga ne ria. Ri ngaru ni bele na tanga tara, ra i rangi a tanga lobo na malala. Ri ngaru ni bele na tanga na hunu. I mavonga, a Vure i uka ma i maruhu ne ria. I vivi vona a hini ri gale ia a Vure ne ria. I kisi puru pali a tanga dagi ne ria.
HEB 11:17 Hosi e Abraham i luhoi torea a Vure. A Vure i tonia, i takia ge habia e tuna, e Isak, ge manga a nihabi na Vure. I muholi, a Vure i ta muholi muga ne Abraham, i ta maea, “E huriki e tune Isak kunana bara ni gale e huriki a hamomu.” Pali e Abraham i longototo kunana, i vakatubu ni habi na Vure e Isak, ge manga a nihabi ni gutu vuro.
HEB 11:19 E Abraham i lohoka vona a Vure, i kara ni vakamahuri mule e huriki ri mate pali. I muholi hateka, bara si takia ngane e Abraham, i manga i bole mulea na matenga e tuna.
HEB 11:20 Hosi e Isak i luhoi torea a Vure. I gamai e tuna ala rua, e Iakop, e Esau, i vakalongo muga ne rua a ra maka maki ge bele ne rua muri ma.
HEB 11:21 Hosi e Iakop i luhoi torea a Vure. Na tahuna i popote ge mate, i gamai e tune Iosep ala rua, i doga rike na kodo vona, i kavurikea a Vure.
HEB 11:22 E Iosep i luhoi torea a Vure. Na tahuna i popote ge mate, i vakalongo muga ne huriki a Israel bara ri ha taroa e Egipto. I taki ria ri gi bole turane ria a tuhana, na tahuna ri vano.
HEB 11:23 Hosi e tamane kinane Moses ru luhoi torea a Vure. A hariki ne huriki a Egipto i taki ni gi vakapasiri e huriki e tune Israel a bakovi ri gi mate. Pali na tahuna e Moses ni poda, i uka ma ru mangenge ni putu puru a ngava na hariki. Ru ruhuloloa e Moses na keva i tolu, a vuhuna ru masia i mata kamumu hateka.
HEB 11:24 E Moses i luhoi torea a Vure. Na tahuna i koru rike pali, i marikoi ni gi gale ge ia e tubune Parao.
HEB 11:25 I marikoi ni pitei na naro hale, a vuhuna a nipitei iea i tabuli popote kunana. I ngaru ni bole taro a maregoa turane huriki a tara na Vure.
HEB 11:26 E Moses i luhoi maea, i kamumu e huriki ri gi biu ia, a vuhuna i luhoi torea e Kristo. Pali bara i hale i uka ma ge luhoi tora, pali ge bole a mahala i kupo o Egipto.
HEB 11:27 E Moses i luhoi torea a Vure, i ha taroa e Egipto. I uka ma i mangenge na hariki o Egipto, a vuhuna i masia a Vure, ra Viri i uka tara viri ge masia.
HEB 11:28 E Moses i luhoi torea a Vure, i longototoa a ngavana na tahuna i takia ge ramai a naro na Nipagepolo. I rabalakia a tuna sipsip, i kalu na logo a darana. I rata mavonga, a agelo na matenga ge masia, i uka ma ge rabalaki e huriki a koma tabua ne huriki a Israel.
HEB 11:29 E huriki a Israel ri luhoi torea a Vure, ri laho page poloa a Dari Vururu, ri laho langa na malala i vu pololilo na dari iea. Na tahuna e huriki a nugumaheto o Egipto ri tonia, ria lobo ri pasiri, ri mate.
HEB 11:30 E huriki a Israel ri luhoi torea a Vure, lakea ri laho haluia na parava i polorua a nure o Ieriko. Muri, a nure dagi iea i mapuka puru tavula.
HEB 11:31 A ngatavine a ngoi e Rahap i luhoi torea a Vure, i kori a Israel ala rua, ru kasisi a tanga vona. Lakea, i uka ma i vurua turane huriki ri putu puru a nitana Vure.
HEB 11:32 Pali a ra ngava ga taki tabua? I ola hateka ga tuverei kado tabu a narone Gidion, e Barak, e Samson, e Iepta, e Davit, e Samuel, e huriki a propet.
HEB 11:33 Ria lobo ri luhoi torea a Vure, ri mulangi na vabinga, ri ratapile a robo i kupo. Ri vakamadihi e huriki a bakovi, a maka tanga ri gegea a Vure. Ri bole a maka maki a Vure i ta muholi ge habi ne ria. Ri nugu pupu a ngavana maka laion.
HEB 11:34 Ri tutu mate a kanono dagi. Ri ha, i uka ma ri bole a vuranga na bainat ne huriki a pile. Ri uka a nitora, pali a Vure i vakatora ria. Ri gao hateka na vabinga, ri ratapile e huriki a pile. Ri valili vona e huriki a tara dagi na pile ne ria, ri ha.
HEB 11:35 E huriki ri mate pali ni vakamahuri mule, lakea e kinane ria ri bole mule ria. E huriki ranga ni vakamadihi hateka. A viri i vakamadihi ria i taki ria, bara ri lohopilea a Vure, bara ri voro taparaki ria. Pali i uka ma ri lohopilea a Vure, a vuhuna ri ngaru ni bole a nimahuri kamumu na Vure na tahuna i vakapesi mule ria na matenga.
HEB 11:36 E huriki ranga ri luhoi torea a Vure, ni harogi pile, ni lagu, ni kolotata na sen, ni ru dili na bavi.
HEB 11:37 E huriki ranga ri luhoi torea a Vure ni padimate na kedo, ni palakudu ria bale rua na so, ni padimate na bainat. E huriki ranga ri luhoi torea a Vure, ri uka varakia, ri rea kunana na kulina sipsip, a meme. Ri uka ruma, ri matasia, ri bole a maregoa, e huriki ri ratapile ria.
HEB 11:38 Ri kamumu hateka. E huriki a bakovi a ngatavine na malala, i uka ma i kara ria ri gi made turane huriki nga. Ri laho lae na tabeke i ngeki, na lolo. Ri mahita na dupi na malala, ri mahita na babe.
HEB 11:39 Re huriki lobo nga, ri luhoi torea a Vure, a Vure i taki ria, ri kamumu. Pali i uka ma ri bole a maki a Vure i ta muholi vona ge habi ne ria,
HEB 11:40 a vuhuna a Vure i kisi purua hosi tara maki i kamumu hateka ne vona e hita lobo. I koi vona e huriki hosi ri gi malamala muga ne hita mona. I ngaru si gi malamala palupu turane ria.
HEB 12:1 Re huriki a bakovi a ngatavine na Vure hosi nga, ri pesi halui hita. A tara dagi. Ri vakasiri pali hita na dala na ni luhoi torea a Vure. Ri matanono hita, ri ngaru si gi mulangi na nivarangi si nunu vona. I mavonga, si gi kinigao ni nunu kamumu. Si gi puga vuroki na nimadene hita a maka maki i vakamarego hita, a naro hale i nugu tata mule hita.
HEB 12:2 A niluhoi ne hita ge doko kunana ne Isu. Ia a vuhuna a niluhoi ne hita, ia a viri kunana i malamala liu na naro vona ni luhoi tora. Na tahuna i bole a nimadihi dagi ni mate na kai tavalavala, i hatenono kunana. I uka ma i mangenge vona a nimaruhu dagi ge mate na naro iea, a vuhuna i luhoi kunana a nivivi dagi hateka ge bole muri ma. Ngane i made na limana kanena Vure.
HEB 12:3 Mu luhoi kamumua a narone Isu. I hatenono na tahuna e huriki a bakovi hale ri vakamadihi ia. Mu luhoi a narona, nahea ge malulu a tuhane mua, nahea mu gu kini malulu.
HEB 12:4 Muholi ngi, mua mu rura na nivakaloboa a naro hale. Pali a nirura ne mua i uka ma i rata mua mu gu mate ma.
HEB 12:5 I navai? Mu longo kaburungia pali a hini a Vure i vara mua i manga mua e huriki e tuna? I ta maea, “O tugu, na tahuna e Bakovi Dagi i habi a nimadihi vomu, naha ni biua. Naha ni kini malulu na tahuna i tahate ioe.
HEB 12:6 A vuhuna e Bakovi Dagi i vara e huriki a viri i ngaru hatekea ria. I habi a nimadihi ne huriki i bole ria pali, ge ria e huriki e tuna.”
HEB 12:7 Mu hatenono na tahuna a Vure i habi a nimadihi ne mua. E huriki a tamana koma ri habi a nimadihi ne tune ria na tahuna ri rata hale. A Vure tara, i rata mavonga ne mua, e huriki e tuna.
HEB 12:8 A Vure i habi a nimadihi ne huriki e tuna ri rata hale. Pali ioe, a Vure i uka ma i rata mavonga na tahuna o rata hale, i manga ioe a tuna ngoi, i uka e tamamu.
HEB 12:9 Hita lobo, e tamane hita ri habi a nimadihi ne hita na tahuna si rata hale. Si togo ria. I mavonga, i kamumu hateka si gi togoa e Tamana a hanune hita na tahuna i habi a nimadihi ne hita, si gi bole a nimahuri vakaroro.
HEB 12:10 E huriki e tamane hita ri habi a nimadihi ne hita na parava popote kunana, na naro ri luhoia i kamumu. Pali a Vure i habi a nimadihi ne hita ni kori hita, si gi malamala manga ia.
HEB 12:11 Na tahuna i habi a nimadihi ne hita, i uka ma si ngarua, a vuhuna i madihi. Pali i tovo hita. Muri ma i tahoka a kanena kamumu, ra si laho malamala, si made na nivalemu.
HEB 12:12 A limane mua i uka nitora, i malai, pali mu toto rike, mu rata leho. A turune mua i vareru, pali mu pesi tora.
HEB 12:13 Mu laho na dala kiripiripi. Bara mu rata mavonga, a vahane mua i hale i uka ma ge hale liu. Bara ri kamumu tabu.
HEB 12:14 Mu rura ni made na nivalemu turane huriki lobo. Mu rura ni bele malamala, a vuhuna a viri i uka ma i malamala, i uka ma ge masia e Bakovi Dagi.
HEB 12:15 Nahea tara viri ne mua ge boru, ge ha taroa a naro kamumu na Vure. A viri i rata mavonga, ma ge bole dili a naro hale, ge bele a maregoa, lakea e huriki ala kupo bara ri katoki na matana Vure.
HEB 12:16 Nahea tara viri ne mua ge rata a naro na molenga, o ge biua a Vure, i manga e Esau hosi. E Esau a tabua. Bara i bole a maki lobo ne tamana, a nigamai ne tamana. Pali i habi polo ne tarina a maki lobo nga, ge kani balaka taku kunana.
HEB 12:17 Muri, na tahuna e tamana i popote ge mate, i ngaru ni gamai e tuna. E Esau i ngaru ni bole a nigamai iea, pali i uka ma i bolea. I tangi hateka ni bole mulea a nigamai iea, pali i bolea pali e tarina. I uka tabu a dalana ge bole mulea.
HEB 12:18 I uka ma mu bele na lolo e huriki a Israel hosi ri bele vona. A lolo iea i vona a kanono dagi. A lolo iea i uvo hateka, e huriki ri mangenge vona. A lolo iea i bele vona a vilu dagi hateka.
HEB 12:19 Ri longo a tavure i tangi. Ri longoa a lohona Vure, lakea ri mangenge hateka, ri taki torea e Moses ri marikoi ni longo tabua.
HEB 12:20 Ri mangenge hateka a ngava a Vure i taki ria vona, ra i maea, “A bakovi, o a sipsip a meme kunana ge laho sike na lolo, mu padimatea na kedo.”
HEB 12:21 A maka maki nga ri dagi hateka, e Moses tara i mangenge, i ta maea, “Iau a mangenge hateka, i vakulu a tagagu.”
HEB 12:22 E huriki a Israel ri bele na tanga maea. Pali mua, a tanga mu bele vona i uka ma i maea. Mua mu bele na Lolo e Sion. Mu bele na tanga dagi na Vure Mahuri, e Ierusalem na Hunu. E huriki a agelo ala kupo hateka ri made vonga, ri rata a habu dagi.
HEB 12:23 A tabeke mu bele vona, i vapopo vona e huriki a tara na Tuna Vure a Tabua. A rane ria, a Vure i here puru meli na hunu. Mu bele na matana Vure, a Mari Ni Pelekado, ge pelekado e huriki lobo. A tabeke mu bele vona, i made vona a hanune huriki a viri hosi, ri ramaia a Vure. Ngane a Vure i rata ria ri malamala liu.
HEB 12:24 Mu bele ne Isu. I vakatora a ngava dagi karaba. Mu bele na darane Isu. A ngava na darane Isu i rangi a ngava na darane Abel.
HEB 12:25 Nahea mu gu longotaroa a lohona Vure. Hosi e Moses, a bakovi na malala, i patutu mule e huriki a Israel. Ri longotaroa a ngavana, muri ri keri ni lelea a rongova na Vure. Pali hita, a Vure meli na hunu i patutu mule hita. I mavonga, nahea si gi longotaro, a vuhuna bara si keri liu ni lelea a rongova na Vure.
HEB 12:26 Hosi, na tahuna iea, a lohona Vure i polua a malala, i vuruke. Pali ngane i ta muholi ne hita, i ta maea, “Pali muri ma bara polu tabua a malala. I uka ma ga polu kunana a malala. A hunu tara bara polua.”
HEB 12:27 A ngava e “tabu”, i vakasiri manga a Vure ge vakalobo a maki lobo i ratarike. A maki lobo i kara ni gi polu, a Vure ge vakalobo. Muri, a maki lobo i keri ni gi polu, bara ri tabuli.
HEB 12:28 I mavonga, si gi vivi ni bole a harikianga muholi, ra i keri ni gi polu. Si gi kavurikea a Vure na naro i vivi vona. Si gi togoa, si gi mangenge vona,
HEB 12:29 a vuhuna a Vure ne hita i manga a kanono i gutu i vuro lobo liu a maka maki.
HEB 13:1 Mua o huriki a tara na Vure, mu vangaru.
HEB 13:2 Mu tagui, mu matakari e huriki a mosi ri bele ne mua. Hosi e huriki ranga ri matakari a mosi, pali i uka ma a bakovi ri matakari. A agelo ri pahaluhoi ta a bakovi.
HEB 13:3 Mu kori e huriki ri made na bavi, i manga mua ranga mu made turane ria na bavi. Mu kori e huriki ni vakamadihi, i manga mua ranga ni vakamadihi turane ria.
HEB 13:4 A parangia, mua lobo mu togoa. Naha ni vakahale a parangia, a vuhuna a Vure ge pelekado, ge ratapile e huriki ri mole.
HEB 13:5 Naha ni nunu muri mai a mahala. A maki mu tahoka pali, mu vivi vona kunana, a vuhuna a Vure i ta maea, “I uka ma ga ha taro mua. I uka ma ga lohopile mua.”
HEB 13:6 I muholi hateka a ngava iea, si gi takia, ra i maea, “I uka ma ga mangenge. E huriki a bakovi, ri uka a nitora ni rata hale iau, a vuhuna e Bakovi Dagi i tuhori iau.”
HEB 13:7 Mu luhoi e huriki a matakari ne mua, ri vakalongo mua vona a nitana Vure hosi. Ri laho navai? Ri mate navai? Mu ramai a narone ria ni luhoi torea a Vure.
HEB 13:8 E Isu Kristo i uka ma i pulo lae a narona. I palupulupu kunana na hini ravi, na hini mona, na parava vakaroro.
HEB 13:9 Naha ni nunu muri mai a maka nitovo tebi legelege. I kamumu a Vure ge vakatora a hatene mua na naro kamumu vona. A maka vinara na maki ni kani i uka ma i kori e huriki ri muri mai. Naha ni muri mai a maka vinara nga.
HEB 13:10 A dede na nihabi ne hita i tebi na dede i tabuli na kape na Vure. E huriki ri leho vonga i uka ma ri gi valai ni kani na dede ne hita.
HEB 13:11 E huriki a prister dagi ri rabalaki a bulmakau polovavo na mada, ri bole dili na Tabeke Nitaba a darana, ni puga vuroki a naro hale ne huriki. A podana ni gutu vuro polovavo na mada.
HEB 13:12 Na naro iea kunana, e Isu i bole a nimadihi polovavo na tanga, ge tua a darana, ni rata e huriki a viri vona ri gi malamala.
HEB 13:13 Ngane si gi pagitala, si gi lakea ne Isu polovavo na tanga, lakea e huriki ri gi biu hita i manga ri biua e Isu.
HEB 13:14 Si gi rata mavonga, a vuhuna si uka tanga muholi koea na malala. Si pasimata vona a tanga dagi muholi ta ge bele muri ma.
HEB 13:15 E Isu ge kori hita, nahea si gi malo ni kavurike vakaroroa a Vure. Si gi taki tala a rana ne huriki.
HEB 13:16 Naha ni longo kaburungi ni rata a naro kamumu ne huriki a turane mua, a vuhuna a Vure i ngarua ra naro iea. E huriki ranga ri bala a maki, mu habi ne ria ranga maki mu tahoka.
HEB 13:17 Mu longototo e huriki a matakari ne mua. Mu muri mai a ngava ri taki, a vuhuna ri matakari a hanune mua. Muri ma bara ri pesi na matana Vure, ge nana ria vona ri matakari navai mua. Mu rata kamumu ria, ri gi vivi kunana ni matakari mua. Bara mu rata hale ria, bara ri deke ne mua. I mavonga, mua ranga i uka ma mu gu made kamumu.
HEB 13:18 A ngaru mu gu vasileki na Vure ge tuhori iau. Na hategu, a lohoka vona i uka ma a ratea tara naro hale ga rare vona. A ngaru ni rata kamumu a maki lobo a rata.
HEB 13:19 A ngaru hateka mu gu vasileki mavonga, lakea a Vure ge rudu mule iau, ga lakene malaviriri ne mua.
HEB 13:20 A Bakovi Dagi ne hita e Isu, ia a matakari dagi ne hita, re hita huriki a sipsip vona. I habi a darana ge vakatora a ngava karaba ge tabuli vakaroro. Lakea a Vure i vakamahuri mulea na matenga. Ngane ra Vure na nivalemu,
HEB 13:21 ge habi ne mua a maka maki ge tuhori mua mu gu rata a maki lobo i ngaru mu gu rata. I rata pololilo ne hita tara maki i vivi vona na nitora ne Isu Kristo. Si gi kavurikea, si gi vakabagetua ngane, na parava vakaroro. I muholi.
HEB 13:22 Mua o huriki a turagu, a raukea nau i uka ma i ola hateka. Mu hatenono vona a ngava tora a habi ne mua, a vara mua vona.
HEB 13:23 A ngaru ni vakalongo mua vona e Timoti. Ni vakapagitala pali ia na bavi. Ia ge bele malaviriri nau ieni, maria varago miri gi lakene, miri gi gosi mua.
HEB 13:24 Iau a talo rike a haro kamumu ne huriki a matakari ne mua, turana e huriki a tara na Vure iene. E huriki ri mariu valai o Itali, ria ranga ri talo rike a haro kamumu ne mua.
HEB 13:25 A Vure ge rata kamumu mua lobo.
JAM 1:1 A haro kamumu ne mua lobo. Iau, e Iakop, a vora na Vure, a vora ne Isu Kristo, a Bakovi Dagi ne hita. A herea a raukea iea i lakene ne mua, a kabu ne Israel i ravulu a polona i rua, ra mu pe a tanga ne mua, mu made viliha na tanga lobo na malala.
JAM 1:2 Mua e huriki a turagu, a ngaru mu gu vivi hateka na tahuna a nitoni ge bele ne mua,
JAM 1:3 a vuhuna mu lohoka vona a nitoni i bele ne vona ni toni a niluhoi ne mua, mu gu pesi tora.
JAM 1:4 Mu kaloho a nimava, naha ni malo, muri bara mu malamala liu, i uka ma mu gu bala vona tara naro kamumu na Vure.
JAM 1:5 E rei a viri i uka ma i tahoka a loho­kanga kamumu ni laho kamumu, ge nanea a Vure ge habia vona a lohokanga. Muri a Vure bara i habia a lohokanga vona, a vuhuna a Vure ia a mari ni hate­balala. Na tahuna a Vure i habi a maki, i habi kunana. I uka ma ge vakamaruhu a viri.
JAM 1:6 Pali na tahuna a viri ge nana, nahea ge loho rua. Ge luhoi tora. A viri i loho rua i manga a bokona dari i bolea a vilu i rere viliha.
JAM 1:7 Ra bakovi maea, ma ge luhoi e Bakovi Dagi ge habia vona tara maki.
JAM 1:8 A bakovi i loho rua, i uka ma i tabuli kamumu a niluhoi vona, bara i ruru.
JAM 1:9 E huriki a turane hita ri matasia, ri gi vivi na tahuna a Vure ge kavurike ria.
JAM 1:10 Pali e huriki ri tahoka a mahala i kupo ri gi vivi na tahuna a Vure ge vakakiroko ria, a vuhuna bara ri mate tavula manga a hurumade.
JAM 1:11 I rike a haro, i hua a hurumade, i malai a kaina, i maparu a vuana, i uka ma i mata kamumu tabu. I mavonga kunana a viri i tahoka hateka a mahala bara i mate na tahuna i tabana ni rata a leho vona.
JAM 1:12 A viri i pesi tora na tahuna a nitoni i bele ge vivi, a vuhuna a Vure bara i habi a mapana, ge bole a nimahuri vaka­roro, i manga a viri i mulangi na rihiva i bole a tama. A Vure i taki muga pali ge habi a mapa ne huriki ri ngarua a Vure.
JAM 1:13 Na tahuna a bakovi tara i ngaru ni rata a naro hale, nahea ge ta maea, “A Vure i turari iau a ratea a naro hale iea.” Naha ni ta mavonga, a vuhuna a Vure i uka ma ge turari ioe go rata a naro hale. Pali a Vure tara, a naro hale i uka ma ge turaria. A Vure tara i uka ma ge turari ioe go rata a naro hale.
JAM 1:14 Pali a nitoni i bele na bakovi na tahuna a ningaru hale na hatena i turari ia i rata a naro hale.
JAM 1:15 Muri a ningaru hale i vakabele a naro hale. Muri a naro hale i vakabele a matenga.
JAM 1:16 Mua e huriki a turagu, a ngaru hateka mua. Naha ni tami mule mua.
JAM 1:17 A maki kamumu lobo si bole, a maki kamumu lobo ni habi tavula ne hita, ri valai ne Tamane hita na hunu, ra viri i ratarike a haro, a keva, a maka hada ri para polomeli na hunu. A maka nipara nga, ri para dagi na parava ranga, ri para kiroko na parava ranga. Pali e Tamane hita i uka ma i mavonga. I uka ma i pulo lae a vilona.
JAM 1:18 Na ningaru vona i vakasiri a nita muholi vona, ge rata hita ge hita e huriki e tuna. I rata mavonga, ge bole tala hita na maki lobo i ratarike, si gi muga ne ria.
JAM 1:19 Mua e huriki a turagu, a ngaru hateka mua. Mu longo kamumu. Na tahuna a viri i ta, naha ni koli malaviriri a ngava. Mu longo kamumu taro a ngava, mu luhoi kado, muri mu koli. Naha ni hini­hate,
JAM 1:20 a vuhuna a nihinihate na bakovi i uka ma ge vakabele a naro malamala na Vure.
JAM 1:21 Lakea, a ngaru mu gu pe a naro i katoki, a maka naro hale legelege ne mua. Mu vakakiroko mua, mu longototo a nitana Vure, ra ni ru na hatene mua. Ra ngava iea i kara ge korimule mua.
JAM 1:22 Na tahuna mu longoa a nitana Vure, naha ni longo tavulea. Mu longototoa. Na tahuna mu longo tavulea, mu tami mule mua.
JAM 1:23 A ta mavonga a vuhuna e huriki ri longo a nitana Vure, pali i uka ma ri muri mai, ri manga a bakovi i mata­nono a matana na tuku.
JAM 1:24 I masia a matana, pali i uka ma i ratea tara maki. I vano kunana, i uka ma i luhoi tabua a matana i mata navai.
JAM 1:25 Pali a viri i longo kamumu a vinara kamumu na Vure, i ramai a ngava i tabuli vona, i uka ma i longo kaburungia, a Vure bara i rata kamumu ia. Si lohoka vona, a vinara na Vure i vakamatukapaga hita na naro hale.
JAM 1:26 E huriki ri luhoi ta ri ramai a Vure, pali i uka ma ri matakari kamumu a tabelene ria, re huriki maea ri tami mule ria. A maka maki ri rata, ri luhoi ta a maki a Vure ge vivi vona, ri rata tavula kunana.
JAM 1:27 A naro i malamala na matana Vure, e Tamane hita, i maea: si gi kori e huriki a duku, e huriki a havuri, na tahuna ri bole a maregoa. A maki tara si gi ratea si gi matakari kamumu a nilaho ne hita, i uka ma si gi ramai a rabu na malala, ma si gi katoki na matana Vure.
JAM 2:1 Mua e huriki a turagu, mu rata a naro ge palupu ne huriki lobo, a vuhuna mu luhoi torea e Isu Kristo a Bakovi Dagi ne hita, i muga ne huriki lobo.
JAM 2:2 A bakovi na mahala tara i bagetu kamumu ge dili na roho na lotu ne mua, pali a matasia tara ge dili, i marape kesi a varakia vona.
JAM 2:3 Bara mu rata kamumua a bakovi na mahala, mu takia ge made na gula, pali mu vakahalea a matasia mu tono ragea ge made polotano, o mu takia ge pesi basi,
JAM 2:4 mu rata a naro hale. Na niluhoi hale ne mua, mu vakalipida e huriki a bakovi. Mu taki ranga ri kamumu, mu taki ranga ri hale. A niluhoi mavonga i uka ma i kamumu.
JAM 2:5 Mua e huriki a turagu, a ngaru hateka mua, mu longo kamumu. A Vure i vulaki e huriki a matasia na malala ri gi luhoi torea, ri gi tahoka a mahala meli na hunu, ri gi dili na harikianga vona, i manga a hini hosi i ta muholi vona, e huriki ri ngaru hatekea ri gi bole.
JAM 2:6 Pali mua mu vakamaruhua a matasia iea. E huriki a bakovi na mahala mu rata kamumu ria, pali ria kunana ri habi a maregoa ne mua, ri turari mua lakea na mari ni pelekado a ngava.
JAM 2:7 Re huriki a bakovi na mahala nga, ria kunana ra viri ri biu a rane Isu Kristo. A rana i kamumu hateka. Pali mua e huriki a ngate vona.
JAM 2:8 A vinara na Hariki ne hita, ni here puru na Hinere i ta maea, “O ngaru e huriki lobo i manga a hini o ngaru mule ioe.” Na tahuna mu ramai a vinara iea, mu rata a naro kamumu.
JAM 2:9 Pali na tahuna i uka ma mu rata a naro i taku ne huriki lobo, mu rata a naro hale. Lakea ra vinara iea i vakasiri mua, mua a viri ni longotaro a vinara.
JAM 2:10 A taki mavonga, a vuhuna e rei a bakovi tara i ramai a ngava lobo na vinara, pali i longotaro a vinara i taku kunana, ra bakovi iea i tahoka a rarenga pali, i manga a bakovi i longotaro a vinara lobo.
JAM 2:11 Mu lohoka vona a Vure i ta maea, “Naha ni rata a naro na molenga.” I ta maea tabu, “Naha ni rabalaki a viri.” E rei a viri i uka ma i rata a naro na molenga, pali i rabalaki a viri, ngane ia a viri ni longotaro a vinara.
JAM 2:12 Lakea a ngaru mu gu laho kamumu, a vuhuna a maki lobo mu rata, a ngava lobo mu taki, a Vure bara i pelekado mua na vinara. Na vinara iea kunana, a Vure i rata hita si matukapaga na naro hale ne hita.
JAM 2:13 Mu laho kamumu, a vuhuna e rei a viri i uka ma i dodo e huriki, a Vure tara i uka ma ge dodoa muri ma na tahuna ge pelekado e huriki. Pali a viri i dodo e huriki, a Vure bara i dodoa na tahuna i pelekado e huriki.
JAM 2:14 Mua e huriki e turagu, a ra a maki i kamumu vona a bakovi ge takia ta i luhoi torea e Isu, pali a narona i uka ma i vakasiri mavongea? A niluhoi maea, i uka ma ge korimulea.
JAM 2:15 Bara e turane hita tara i ramai e Kristo i tahoka a matutuna varakia, i bala a maki ni kani,
JAM 2:16 lakea tara ne mua ge takia ge ta maea, “O made na nivalemu. Go tahoka a maki ni kavitagu ioe vona, go kani go maru,” pali i uka ma ge koria na limana, ra ngava iea ge tuhori navia?
JAM 2:17 A naro na niluhoi tora i mavonga kunana. Na tahuna a viri i taki ta i luhoi torea e Kristo, pali i uka ma i rata a naro kamumu, a niluhoi vona a maki tavula kunana.
JAM 2:18 Pali bara viri tara i ta maea, “I ranga e huriki ri tahoka a niluhoi tora, pali i ranga e huriki ri tahoka a naro kamumu.” Pali a ngava bara kolia i maea, “Ga matakilala navai a niluhoi vomu na tahuna o uka ma o ratea tara maki. Pali iau ga vakasiri ioe vona a niluhoi nau na maki a rata.”
JAM 2:19 Ioe, o luhoia a Vure i taku kunana. O moro hateka, ke! Pali e huriki a hanitu ranga ri luhoi mavonga, lakea ri mangenge i vakulu a tagane ria.
JAM 2:20 Ioe a manga! I uka ma o matakilaka vona, a niluhoi a maki tavula na tahuna i uka kanena. Bara vakasiri ioe.
JAM 2:21 Hosi a Vure i masia a narone Abraham, ra gare ne hita, i habia e tuna e Isak ge a nihabi na Vure, lakea a Vure i galea e Abraham a bakovi malamala.
JAM 2:22 O luhoi kamumu: a niluhoi, a narone Abraham, ru leho palupu. A naro kamumu vona i ratea a niluhoi vona i kamumu liu.
JAM 2:23 A nitana Vure i muholi, ni here i ta maea, “E Abraham i luhoi torea a Vure, lakea a Vure i galea a bakovi malamala.” Lakea ni taki e Abraham e turana Vure.
JAM 2:24 Ngane mu lohoka vona, a viri i luhoi tavulea a Vure i uka ma ni gi gale ge ia a viri malamala. A viri i luhoi, i rata a naro kamumu, a Vure bara i galea a viri malamala.
JAM 2:25 I mavonga kunana hosi ne Rahap, a ngatavine a ngoi. A Vure i masia a narona na tahuna i matakari e huriki a vinuru, i vakahamule ria na dala tebi, lakea i galea a ngatavine malamala.
JAM 2:26 Si lohoka vona na tahuna a hanuna viri i pe a kakaina, a bakovi iea bara i mate. I mavonga kunana, a bakovi i luhoi tavulavula, pali a niluhoi vona i uka ma i vakabelea tara kanena, ra niluhoi vona i uka lehona, i mate pali.
JAM 3:1 Mua e huriki a turagu, nahea ge kupo ne mua ri gi bole a leho ni tovo e huriki na narona Vure, a vuhuna mu lohoka vona mia e huriki mi vara, a Vure bara i matai kamumu a narone mia, i pelekado mia. A nipelekado ne mia bara i dagi na nipelekado ne huriki a bakovi tavula.
JAM 3:2 Hita lobo si varoru na rabu i kupo. Pali a viri i uka ma i varoru na ngavana, ra viri iea a viri kamumu hateka, i kara ni matakari a nilaho vona.
JAM 3:3 E huriki ri rike na hos ri ru a aen kiroko na ngavana hos, lakea a hos bara i ramai kunanea a ningaru na bakovi i rike vona, ge lakea na hini a bakovi i ngaru ge lakea vona.
JAM 3:4 Mu masia a sip i vona a sel. I dagi hateka, i bolea a vilu, i nunu na dari. Pali a nikau vona i uka ma i dagi. I kiroko. Pali na tahuna a tahona i ngarua ge lokovai, bara i huria a nikau, lakea a sip bara i longototo, i lakea na hini a tahona i ngaru ge lakea vona.
JAM 3:5 I mavonga kunana, a tabelene hita a maki kiroko kunana, pali i bibi hateka na maki dagi. I manga a katona kanono. Ia a maki kiroko kunana, pali i kara ni vakatubu a kanono dagi na robo, bara ri nono lobo a maka kai.
JAM 3:6 A tabelene hita i manga a kanono i valai na imperno. I vakabele a naro hale i kupo. A tabelene hita a mahalana kakaine hita, pali i ratea a kakaine hita i katoki lobo. I ratapile a nimade ne hita.
JAM 3:7 E huriki a bakovi ri bole a maka maki na robo, a kadirovo, a mata, a maka maki i tabuli na dari, ri matakari ria, ri malou.
JAM 3:8 Pali uka tara viri ge matakari mulea a tabelena. A tabelene hita i uka ma i malo ni taki a maka ngava i hale, i manga a bega, i rabalaki e huriki.
JAM 3:9 Si kavurikea na tabelene hita e Tamane hita, e Bakovi Dagi. Pali muri si harogi e huriki a turane hita, re huriki a bakovi a ngatavine a Vure i ratarike ria ri gi manga ia kunana.
JAM 3:10 A nita ni kavurike a viri, a nita ni ruduraha a viri, ru bele varago na tabele i taku kunana. Mua e huriki a turagu, ra naro iea i uka ma i kamumu.
JAM 3:11 A naru piu, a naru na navuha, i uka ma ru gu tua tala na matana naru i taku kunana.
JAM 3:12 A kai a kulu, ge vakabele a vao? A kai a tarile, ge vakabele a kulu? I mavonga kunana a navuha i uka ma ge vakabele a naru piu.
JAM 3:13 E rei ne mua i luhoi ta i moro, i tahoka a lohokanga, ge vakasiria na nimade kamumu vona, na maka rabu kamumu vona i rata na lohokanga. Pali nahea ge bibi rike mule a rana. Ge vakakiroko ia.
JAM 3:14 Pali e rei a viri i rata a rabu ni masigoro, e huriki ri ngaru ni polomugamuga, nahea ri gi bibi rike a rane ria, nahea ri gi lavuni vona a ngava muholi.
JAM 3:15 Ra rabu nga i uka ma ru valai na Vure, a naro na malala kunana. Ra naro maea ru bele na vilo hosi, ru valai na hanitu.
JAM 3:16 I mavonga, na tahuna mu rata a naro ni masigoro, na tahuna mu ngaru ni rata polomugamuga, i uka ma mu gu made kamumu palupu. Bara mu rata kunana a naro hale.
JAM 3:17 Pali e huriki ri tahoka a lohokanga i valai na Vure, ri maea: ri uka a naro hale, ri ngaru a nivalemu, ri luhoi muga a ningaru ne huriki ranga, i uka ma ri kulirua, ri dodo e huriki a turane ria, a leho ne ria i tahoka a kanena, ri rata virihi e huriki lobo a naro i taku kunana. I uka ma ri tamirabu ni ramai a naro kamumu, ri ramai muholi.
JAM 3:18 A viri i rata a leho ni kori e huriki bara i made na nivalemu i manga a bakovi i varo a vutuna maki na hania. Bara i vakabele a kanena i kupo, ra maka rabu kamumu.
JAM 4:1 I navai mu vaubi, mu vatahate? Mu vaubi a vuhuna a ningaru hale na kakaine mua i rata mua mu vaubi.
JAM 4:2 Mu ngaru hateka ni bole a maki, pali mu keri ni bolena, lakea mu rabalaki a viri. Mu masigoro na maki na viri tara, pali mu keri ni bole a maki mu ngaru, lakea mu vakatubu a vabinga. I uka ma mu tahoka a maki, a vuhuna i uka ma mu nanea a Vure.
JAM 4:3 Pali na tahuna mu nanea a Vure, i uka ma mu bole a maki mu ngaru, a vuhuna na tahuna mu nanea, a niluhoi ne mua i hale. Mu ngaru kunana ni bole a maki ni vuroki na ningaru tavula.
JAM 4:4 Mu ha taroa a Vure i manga a ngatavine i ha taroa e girihina, i vano i ngoi viliha. Mu longo, mu lohoka vona, e huriki ri ngaru a vilo na malala, ria a pile na Vure. I mavonga, e rei a viri ne mua i ngaru ni ramai a naro na malala, ia a pile na Vure.
JAM 4:5 A nitana Vure i ta maea, “A hanuna i ru pololiloa ne hita i ngaru hatekea si gi ramai kunanea.” Mu luhoi navai, ra ngava iea a ngava tavula?
JAM 4:6 Pali a Vure i rata kamumu hateka hita. I mavonga a Hinere i ta maea, “A Vure i tepu e huriki ri putu ngingi, pali i rata kamumu e huriki ri vakakiroko ria.”
JAM 4:7 I mavonga, mu longototoa a Vure. Mu gegea a hanitu, re Satan, lakea bara i pe mua, i ha.
JAM 4:8 Mu karuku tabukoi na Vure, lakea ia tara bara i valai tabukoi ne mua. Mua e huriki a bakovi hale, mu pe a naro hale ne mua. Mua e huriki mu loho rua, mu vuroki ra niluhoi hale na hatene mua,
JAM 4:9 mu duku, mu tangi na naro hale ne mua. Mua e huriki mu nongo, ngane mu pulo a vilone mua, mu tangi. Mua e huriki mu vivi, ngane mu pulo a vilone mua, mu tangi.
JAM 4:10 Mu vakakiroko mua na matane Bakovi Dagi, lakea ia bara i kavurike a rane mua.
JAM 4:11 Mua e huriki a turagu, naha ni vapadimomo. A viri i padimomo e turana, i manga i ta hale na vinara na Vure, i pelekadoa. Na tahuna mu pelekadoa a vinara na Vure, i uka ma mu ramaia. I manga mu ngaru ge mua a mari ni pelekado, mu gu pelekado a nitana Vure.
JAM 4:12 A Vure kikeri kunana i vakabele a nitana, ia kikeri kunana a mari ni pelekado e huriki. Ia kikeri kunana i kara ge korimule a viri, o ge ratapile a viri. Pali mua, mua e rei muholi mu gu pelekado e huriki a turane mua?
JAM 4:13 I ranga ne mua mu ta maea, “Kuduvi si gi vano, si gi lakea na tanga dagi tara, si gi made vonga na pida i taku, si gi vahabi a maki, ni gi kona, si gi bole a moni dagi.”
JAM 4:14 Mu ratea a ngava iea, pali i uka ma mu lohoka vona a ra maki ge bele kuduvi. A nimahuri ne hita i manga a havu. I tabuli popote kunana muri i lobo.
JAM 4:15 Pali i kamumu hateka mu gu ta maea, “E Bakovi Dagi bara i ngaru si gi mahuri, bara si rata a maki si luhoi ni rata.”
JAM 4:16 Pali mu bibi rike mule a rane mua, mu vakalongo a leho dagi mu ngaru ni rata. A naro ni bibi rike mule a rane mua, a naro hale hateka.
JAM 4:17 Mu luhoi kamumu. Na tahuna o lohoka pali vona tara naro kamumu go ratea, pali i uka ma o ratea, o rata pali a naro hale.
JAM 5:1 Mua e huriki mu tahoka a mahala i kupo, mu longo kamumu! Mu tangi mu haloho vona a maka maregoa dagi ge bele ne mua.
JAM 5:2 A mahala ne mua bara i mavuru. A varakia ne mua, bara i kani a madume.
JAM 5:3 A maka gol a silva ne mua bara i piduku, pali a nipiduku iea bara i rata a maka naro hale ne mua ri gi bele kavakava, bara i gutu a kakaine mua i manga kanono. A nilobona parava i tabukoi ge bele, pali i navai mu ru kadolu a mahala ne mua?
JAM 5:4 Masia! E huriki a mari ni leho ri mirio na hania ne mua i uka ma mu kona ria ma. Mu longo a nideke ne ria! A nideke ne huriki a mari ni leho i longoa pali e Bakovi Dagi, ra i tahoka a nitora lobo.
JAM 5:5 Na parava lobo mu bole a maka maki kamumu mu vivi, mu ramai kunana a ningaru na kakaine mua. Mu ramai lobo a ningaru ne mua, pali i uka ma ge tabaka, a Vure bara i ratapile e huriki a pile vona.
JAM 5:6 Mu padi virihi e huriki a bakovi malamala na ngava, mu rabalaki ria. Pali i uka ma ri gege mua.
JAM 5:7 Mua e huriki a turagu, mu hatenono ge harena na tahuna e Bakovi Dagi ge hamule valai tabu. A bakovi i tahoka a hania i dava a maki ni kani ge moro na hania vona. I hatenono, i made madoru i dava a vala a haro ru gu rata taro a leho ne rua, muri bara i bole a maki ni kani.
JAM 5:8 Mua ranga mu hatenono, mu pesi tora na maka maregoa ne mua, a vuhuna e Bakovi Dagi i popote ge hamule valai.
JAM 5:9 Mua e huriki a turagu nahea mu gu ta tutu, ma ge pelekado mua a Vure. Mu longo kamumu, a Mari ni pelekado i popote ge valai.
JAM 5:10 Mua e huriki a turagu, mu luhoi e huriki a propet hosi ri vakalongo a ngava na rane Bakovi Dagi. E huriki a pile ri rata hale ria, pali ri pesi tora. Mu ramai a narone ria.
JAM 5:11 Si lohoka vona, e huriki ri hatenono bara ri vivi. Mu longoa pali a nuverei ne Iob, i hatenono na tahuna i bole a maregoa dagi. Muri e Bakovi Dagi i korimulea. Muholi hateka, e Bakovi Dagi a Mari ni dodo, a Mari ni rata kamumu hateka hita.
JAM 5:12 Mua e huriki a turagu, a maki dagi hateka i maea: nahea mu gu kaba, mu gu taki a ngava muholi. Naha ni kaba na rana Vure, o na rana maki tara na malala. Pali na tahuna mu taki e “emi” nahea mu gu pulo lae a ngavane mua. Na tahuna mu taki e “uka”, nahea mu gu pulo lae a ngavane mua. Mua bara mu pulo lae a ngavane mua, a Vure bara i pelekado mua.
JAM 5:13 E rei ne mua i bole a maregoa? Ge takia a Vure. E rei ne mua i vivi? Ge kalolo a linge ni kavurikea a Vure.
JAM 5:14 E rei ne mua i tahoka gilanga? Ge gale e huriki a matakari na lotu ri gi valai vona, ri gi vasileki vona, ri gi biria na nibiri a kakaina na rane Bakovi Dagi.
JAM 5:15 Ria bara ri luhoi torea a Vure, ri vasileki, e Bakovi Dagi bara i vakatavaga ia, ge mahuri. Ia bara i tahoka a naro hale i ratea, e Bakovi Dagi bara i puga vuroki a naro hale vona.
JAM 5:16 Ra i mavonga, a ngaru mua mu gu vatakitala a naro hale ne mua. Mu vasileki ne huriki e turane mua, a Vure ge vakamahuri ria. Na tahuna a bakovi malamala i vasileki, a nivasileki vona i tahoka a nitora dagi, i tahoka a kanena.
JAM 5:17 E Elaisa a bakovi manga hita. I vasileki tora na Vure nahea ge boru a vala, lakea a vala i uka ma i boru na pida i tolu, a keva i polo tara.
JAM 5:18 Muri i vasileki tabu, a vala i boru tabu, i gaga tabu a maka uve na hania.
JAM 5:19 Mua e huriki a turagu, a viri tara ne mua ge ha taro a ngava muholi na Vure, ge ruru, a ngarua tara ne mua ge tuli hamule lakea na Vure.
JAM 5:20 Mu luhoi tabua a ngava iea: Bara a turane hita tara i lakea na bakovi i rata a naro hale, i tuhoria ge ha taroa a dala hale, i hamule valai na Vure, ra turane hita iea i korimulea a bakovi iea, i uka ma ge mate. I ratea a Vure i uka ma ge luhoi tabu a naro hale vona.
1PE 1:1 Iau e Petrus, a apostolo ne Isu Kristo. A here lakene mua e huriki a Vure i vulaki mua, mu made manga mosi na provins e Pontus, e Galesia, e Kapadosia, e Asia, e Bitinia.
1PE 1:2 A Vure, e Tamane Hita, i lohoka muga pali ge vulaki mua. A Hanuna Vure i vulaki mua, ge mua ne vona kunana, mu gu longototo e Isu Kristo, a darana ge vahilolo mua, mu gu malamala. A Vure ge rata kamumu mua, ge habi ne mua a nivalemu, ge uka harena.
1PE 1:3 Si gi kavurikea a Vure, e Tamane Isu Kristo, a Bakovi Dagi ne hita! I dodo hateka hita, lakea i habi ne hita a nimahuri karaba. Ngane si pasimata muholi, a vuhuna e Isu Kristo i mahuri mule na matenga.
1PE 1:4 Si pasimata vona a maki ni kado puru ne hita meli na hunu. A maki nga, ri gi tabuli vakaroro. I uka ma ri gi hale, i uka ma ri gi lobo.
1PE 1:5 Mu luhoi torea pali e Kristo, lakea a nitora na Vure i matakari mua. Ge matakari mua ge vano ge harena na nilobona parava na tahuna ge vakasiri kavakava ne huriki a naro i korimule mua vona.
1PE 1:6 I mavonga, mu vivi hateka. Pali i muholi, ngane bara mu bole a nimadihi na nitoni legelege na parava popote kunana.
1PE 1:7 Mu gu bole taro a nimadihi na nitoni legelege, ge vakasiri mu luhoi tora muholi. A gol a maki i uka ma ge tabuli vakaroro. Pali ia tara, ni toni na kanono. I mavonga, a niluhoi ne mua, ra i dagi hateka na gol, ni gi toni taro, ge tabuli tabaka. Na tahuna mu bole a nitoni, pali mu pesi tata ni luhoi tora, bara ni kavurike mua, bara ni vakabagetu mua, bara ni togo mua na tahuna e Isu Kristo i bele kavakava.
1PE 1:8 I uka ma mu masia hosi, pali mu ngaru hatekea. I uka ma mu masia ngane, pali mu luhoi tora ia, mu vivi hateka. A nivivi ne mua i rangi a nivivi lobo na malala, i uka ngava ge tuvevea a nivivi ne mua,
1PE 1:9 a vuhuna a mapane mua mu luhoi torea e Kristo, bara i korimule mua.
1PE 1:10 E huriki a propet ri ta muga vona a naro a Vure ta ge rata kamumu mua vona. Ri ngaru hateka ni lohoka vona a Vure ge korimule navai hita.
1PE 1:11 A Hanune Kristo i leho pololilo ne ria, ri ta muga na nimadihi ta ge bolea e Kristo, a bagetuanga ta ge bolea muri, lakea ri ngaru ni lohoka vona ia e rei, pali garika ge valai?
1PE 1:12 Ni vakalongo ria vona a nita propet ri rata i uka ma ne vona ni korimule ria. A nita propet ri ratea ne vona ni kori mua. A nita propet ne ria i bele muholi na ngava ni vakalongo ne mua pali, na tahuna e huriki ri vara ne mua a Velenga Kamumu na nitora na Hanu Kiripiripi, ra i valai na hunu. E huriki a agelo ranga, ri ngaru ni lohoka vona a ngava nga.
1PE 1:13 I mavonga, mu luhoi kamumu, mu matakari a nilaho ne mua. Mu pasimata vona a naro kamumu a Vure ge rata virihi mua vona na tahuna e Isu Kristo ge hamule valai, ge bele kavakava ne huriki lobo.
1PE 1:14 Naha ni longototo a ningaru hosi na kakaine mua, ra mu ramai hosi na tahuna i uka ma mu lohoka, a vuhuna ngane mua e huriki a tuna Vure, mu longototoa.
1PE 1:15 A Viri i gale mua i malamala. I mavonga, mua ranga, mu laho malamala na maki lobo mu rata,
1PE 1:16 a vuhuna ni here hosi i maea, “Mu ramai a naro ge kiripiripi, a vuhuna iau a kiripiripi.”
1PE 1:17 A Viri mu vasileki vona, e Tamane hita, i pelekado e huriki lobo na naro i taku kunana, i pelekado ria i ramai a narone ria. I mavonga, mu mangenge na Vure, mu laho kamumu manga a mosi koea na malala.
1PE 1:18 A Vure i konamule mua na maka naro tavulavula mu bole ne huriki a gare ne mua. I uka ma i konamule mua na mahala ge lobo, manga a silva o a gol.
1PE 1:19 I konamule mua na mapana i dagi hateka, ra darane Kristo. I manga a darana tuna sipsip gavutuvutu.
1PE 1:20 A Vure i vulaki mugea na malala ni ratarike. Pali i bele kavakava ne mua ngane, na nilobona parava.
1PE 1:21 I rata mua mu luhoi torea a Vure. Mu luhoi tora ia, mu lohoka vona ge korimule mua, a vuhuna i vakamahuri mulea na matenga e Kristo, i vakabagetua.
1PE 1:22 Naha ni tamilalu. Mu vangaru muholi na naro kiripiripi, i manga mua a maki tari, a vuhuna mu longo pali a ngava muholi, i rata a hanune mua i malamala pali.
1PE 1:23 Mu vangaru a vuhuna mu bole pali a nimahuri karaba. A nimahuri karaba iea i uka ma ge lobo. Bara i tabuli vakaroro. I valai na nita mahuri na Vure. A nita iea bara i tabuli vakaroro.
1PE 1:24 I manga a ngava ni here na Hinere, i maea, “E huriki a bakovi a ngatavine ri manga a varili kunana. A bagetua ne ria i manga a bagetua na keke. A varili bara i malai, a keke bara i mapasi.
1PE 1:25 Pali a Nitane Bakovi Dagi bara i tabuli vakaroro.” A nita iea, a Velenga Kamumu ni vara mua vona.
1PE 2:1 I mavonga, mu lobo liu ni rata a naro hale. Mu lobo ni tatami, mu lobo ni ngava naru, mu lobo ni tahate ne huriki ri tahoka a maki, mu lobo ni vakahale a rana turane mua.
1PE 2:2 Ge muholi mu hataki pali a naro kamumu ne Bakovi Dagi, mu ngaru hateka a nita na Vure, i manga a koma kiroko, ni poda karaba, i ngaru hateka ni ruru. Muri bara mu korurike, a Vure ge korimule mua.
1PE 2:4 E Kristo i manga a kedo mahuri, ri koi vona e huriki a bakovi. Pali a Vure i vulakia, i ngaru hatekea. Na tahuna mu valai ne Kristo, mua ranga mu manga a kedo mahuri. Ni ru palupu mua, mu bele manga a roho na Vure, ge mua e huriki a prister na Vure, mu gu habi na Vure a nihabi ge vivi vona, a vuhuna a leho i ratea e Isu Kristo.
1PE 2:6 A Hinere i ta maea, “A ru puru o Sion a kedo. Ia a vuhu kedo a vulakia. A ngaru hatekea. E rei a viri i luhoi tora ia i uka ma ge maruhu.”
1PE 2:7 Lakea mua e huriki mu luhoi torea a kedo iea, mu ngaru hatekea. Pali e huriki i uka ma ri luhoi torea, a Hinere i ta maea, “A kedo i marikoi vona e huriki a mari ni hae a ruma, i bele manga a vuhu butu.”
1PE 2:8 I ta maea tabu, “A kedo iea i rata e huriki ri sibo, ri boru.” Ri sibo a vuhuna ri longotaroa a nitana, i manga a hini a Vure i taki muga ri gi rata.
1PE 2:9 Pali mua, a Vure i vulaki mua. Mua e huriki a prister na hariki, a tara malamala, ne vona a Vure kunana. A Vure i rata mavonga, mu gu vakasiri e huriki vona a Vure i kamumu hateka, a vuhuna muga mu made na uvo. Pali i gale tala mua, mu gu made na nipara kamumu vona.
1PE 2:10 I muga mu manga a bakovi a ngatavine tavula. Pali ngane mua e huriki a bakovi a ngatavine na Vure. I muga i uka tara viri ge dodo mua. Pali ngane a Vure i vakasiri pali ne mua a nidodo vona.
1PE 2:11 Mua o huriki a turagu, mu manga a mosi, mu laho polo kunanea a malala iea. A taki tora mua mu gu pile a ningaru hale na kakaine mua. A ningaru hale nga ri vaubi na hanune mua.
1PE 2:12 Mu laho malamala na matane huriki ri made na uvo. Lakea na tahuna ri padi virihi mua, ta mu rata a naro hale, bara ri matakilaka vona a naro malamala ne mua. Muri bara ri kavurikea a Vure na Parava i valai vona.
1PE 2:13 Mu longototo a matakari lobo koea na malala, a vuhuna e Bakovi Dagi i ngaru si gi rata mavonga. Mu longototoa a hariki i matakari.
1PE 2:14 Mu longo tabu e huriki a matakari, ra i rudu a hariki ge vakamadihi e huriki ri rata a naro hale, ge kavurike e huriki ri rata a naro kamumu.
1PE 2:15 A Vure i ngaru mu gu longototo ria. Na naro iea, bara mu tukari a ngavane huriki a bakovi manga manga.
1PE 2:16 I muholi i uka ma mua a vora. Pali mu laho manga a vora na Vure, mu ramai a ningaru vona. Naha ni rata a naro hale.
1PE 2:17 Mu togo e huriki lobo. Mu ngaru e huriki e turane hita. Mu mangenge na Vure. Mu togoa a hariki.
1PE 2:18 Mua o huriki a vorakato, mu longo­toto, mu togo e huriki a matakari ne mua. Ria a bakovi navai, mu longototo ria. Ge ria a bakovi kamumu, a bakovi madoru, o ge ria a bakovi hale, mu longototo ria.
1PE 2:19 A viri i luhoi torea a Vure, lakea i bole tavula a nimadihi, i uka ma i rata a naro hale ge bole a nimadihi vona. Ia ge kaloho kunana, i rata a naro kamumu.
1PE 2:20 Mua bara mu rata a naro hale, ni lagu mua, pali mu kalohoa, ni gi kavurike navai mua? Pali mua bara mu rata a naro kamumu, ni lagu mua, mu kalohoa, a Vure bara i vivi ne mua.
1PE 2:21 I gale mua mu gu rata mavonga, a vuhuna e Kristo tara i bole a nimadihi na murine mua, mu gu muri mai a narona.
1PE 2:22 I uka ma i ratea tara naro hale. I uka ma i ratea tara ngava taminga.
1PE 2:23 Na tahuna e huriki ri harogia, i uka ma i koli. Na tahuna i bole a nimadihi, i uka ma i ta vakamengenge. I ru kunana ia na limana Viri i pelekado e huriki na naro malamala.
1PE 2:24 Na tahuna i tavore na kai tavalavala, i bole na kakaina a naro hale ne hita. I rata mavonga, si gi mate na naro hale, si gi mahuri mule na naro malamala. A harena lebo na kakaina i vakatavaga mua.
1PE 2:25 I muga mu manga a maka sipsip ri ruru. Pali mu hamule pali na Matakari na hanune mua.
1PE 3:1 Mua o huriki a ngatavine, mua ranga, mu longototo e girihine mua. Bara mu rata mavonga, bara ri pulo a vilone ria e girihine mua i uka ma ri luhoi torea a nita na Vure. I uka ma ni gi vara ria, pali bara ri pulo a vilone ria na tahuna ri matai a naro kamumu ne girihine ria,
1PE 3:2 ra naro ni togo, a naro malamala.
1PE 3:3 Nahea mu gu roe vona a maki polovavo ga bagetua ne mua, manga a naro ni kolo tata a vune mua, ni rodo a gol, ni rodo a maki kamumu hateka.
1PE 3:4 A bagetua ne mua ge valai pololilo na hatene mua, manga a naro ni vakakiroko mua, ni made madoru. A Vure i ngaru hateka a bagetua maea. I uka ma ge lobo.
1PE 3:5 E huriki a ngatavine malamala ri luhoi tora a Vure hosi, ri rata maea. A bagetua ne ria, ri longototo e girihine ria.
1PE 3:6 E Sara i longototoa e Abraham, i galea a bakovi dagi vona. Bara mua e huriki a ngatavine kamumu manga e Sara na tahuna i uka ma mu mangenge vona a maki tara, mu rata a naro kamumu.
1PE 3:7 Mua o huriki a bakovi ranga, mu lohoka vona e huriki a ngatavine i uka ma ri tuhaka. Mu made kamumu turana e girihine mua. Mu togo ria, a vuhuna ria ranga, ri gi bole na Vure a nimahuri vakaroro. I uka ma mu gu rata mavonga, a Vure i uka ma ge longo a nivasileki ne mua.
1PE 3:8 I pali. Mua lobo mu pesi na niluhoi i taku kunana. Mu vadodo. Mu vangaru i manga mua a maki tari. Mu valemu. Mu vakakiroko mua.
1PE 3:9 A viri ge rata hale mua, naha ni koli. A viri ge harogi mua, naha ni koli. Pali mu gamai ria, a vuhuna a Vure i gale mua mu gu rata mavonga, lakea mua ranga, bara ni gamai.
1PE 3:10 I manga a ngava ni here na Hinere, “E rei a viri i ngaru a nimahuri, i ngaru ni made kamumu, ge matakaria a tabelena, i uka ma ge rata a ngava hale, ge matakari a ngavana, i uka ma ge tatami.
1PE 3:11 Ge ngalahere na naro hale, ge rata kamumu kunana. Ge toni a buluna ni made na nivalemu.
1PE 3:12 A vuhuna e Bakovi Dagi i mata­kari e huriki a bakovi malamala, i longo a nivasileki ne ria. Pali i gege e huriki ri rata a naro hale.”
1PE 3:13 Mua bara mu leho tora ni ramai a naro kamumu, e rei ge rata hale mua?
1PE 3:14 Pali bara mu laho malamala, lakea ni vakamadihi mua vona, a Vure bara i gamai mua. I mavonga, naha ni mangenge ne ria. Naha ni loho pae.
1PE 3:15 Pali mu togoa na hatene mua e Kristo, ia kikeri a Bakovi Dagi. Mu kisi mua, mu gu tuveve polo ne huriki ri nana mua, na ra maki mu pasimata vona.
1PE 3:16 Na tahuna mu tuveve ne ria, mu togo ria, mu ta madoru. Mu laho malamala, i uka ma mu gu hataki manga mu tahoka a naro hale, lakea na tahuna e huriki ri padi momo tavula mua, bara ri maruhu, a vuhuna ri matai mua, mu rata a naro kamumu, a vuhuna mu rihi e Kristo.
1PE 3:17 A koi mu gu bole a nimadihi. Pali bara mu bole, nahea mu gu bole a vuhuna mu rata a naro hale. Mu gu bole a vuhuna mu rata a naro kamumu.
1PE 3:18 E Kristo tara i bole a nimadihi. Ia a bakovi malamala, i mate balaka taku na naro hale ne hita, ge korimule e huriki a bakovi hale. I rata mavonga, ge tuli valai hita na Vure. A kakaina ni rabalaki, pali a Vure i vakamahuri mulea.
1PE 3:19 I vano, i vara ne huriki ri mate pali, ri made na bavi.
1PE 3:20 Ri made vonga, a vuhuna hosi i uka ma ri longo mai a ngavane Noa, na tahuna a Vure i tabana ni hatenono, na tahuna e Noa i kisi a aga rungu vona. E huriki ala popote kunana ri dili na agarungu iea. A bakovi a ngatavine ala polotolu kunana a Vure i korimule ria na marungulolo vona.
1PE 3:21 A hilova tara i maea. I korimule mua. I uka ma ne vona ni vahilolo a kuline mua. E Kristo i mahuri mule na matenga, lakea i korimule mua na tahuna mu takia a Vure ge puga vuroki a naro hale ne mua. Ngane i uka ma mu gu hataki manga mu tahoka a naro hale.
1PE 3:22 I sike pali na hunu, i made na limana kanena Vure. I matakari e huriki a agelo, e huriki a matakari, a maka nitora ni habi na limana.
1PE 4:1 A vuhuna e Kristo i bole a nimadihi na kakaina, mua ngane mu bole a niluhoi vona, mu dava ni bole a nimadihi. E rei a viri i bole a nimadihi na kakaina, i lobo pali ni ratena a naro hale.
1PE 4:2 I uka ma ge ramai tabu a ningaru hale na kakaina. Bara i nunu muri mai kunana a ningaru na Vure.
1PE 4:3 A hini hosi mu rata a maka naro hale, ngane i lobo. A naro hale nga e huriki i uka ma ri lohoka na Vure ri ngaru ni rata: i manga a naro na molenga, a naro ni ngutu na viri, a naro ni ninu a naru vagole, a naro ni vapopo, ni ninu hateka, a naro ni mole, a naro ni lakea na klab, a naro hale ni kavurike a vure ranga.
1PE 4:4 Ri turutu na tahuna mu koi ni turane ria ni rata a naro hale nga, lakea ri harogi mua.
1PE 4:5 Pali muri ma, bara ri pesi na matana Viri ge pelekado a narone huriki ri mahuri, e huriki ri mate pali, ri takia i navai ri rata a maka naro ri rata.
1PE 4:6 I mavonga, a Velenga Kamumu ni vara pali ne huriki ri mate muga ne Kristo, i bele. Ri mate manga hita lobo bara si mate, pali ngane i mahuri a hanune ria, i manga a Vure.
1PE 4:7 A malala i tabukoi ge lobo, i mavonga, mu matakari kamumu a ningaru ne mua, mu matadoko, mu gu kara ni vasileki.
1PE 4:8 A maki dagi hateka, mu gu tabana ni vangaru muholi, a vuhuna na tahuna mu vangaru, bara i kavitagu a naro hale i kupo.
1PE 4:9 Mu bole dili na ruma ne mua e huriki a turane mua, mu matakari ria, naha ni marikoi.
1PE 4:10 Mu matakari kamumu a nitora legelege a Vure i habi ne mua. Mu vakori na nitora nga.
1PE 4:11 E rei a viri i moro ni ta, ge ta manga a Vure i habia a ngava vona. E rei a viri i moro ni kori e huriki, ge kori na nitora a Vure i habia vona. Mu rata mavonga, a maki lobo mu rata bara i habi a bagetua na Vure polo ne Isu Kristo. A bagetua lobo, a nitora lobo, ge ne vona kunana vakaroro.
1PE 4:12 Mua o huriki a turagu, a maka nitoni dagi bara ri valai, ri toha mua manga a kanono. Naha ni turutu manga a maki maea i uka ma ge bele.
1PE 4:13 Na tahuna ri bele, mu vivi, a vuhuna mu bole a maregoa i manga e Kristo i bole a maregoa. Muri bara mu vivi hateka na tahuna a bagetuanga vona i bele kavakava.
1PE 4:14 Na tahuna e huriki ri harogi mua a vuhuna mu luhoi torea a rane Kristo, mu vivi, a vuhuna a Hanuna Vure i bagetu hateka i made turane mua.
1PE 4:15 Naha ni rabalaki a viri, naha ni panaho, naha ni rata a naro hale, naha ni rahi dili mua na maki na viri tara. A naro nga ri hale. Bara mu rata a maki nga, mu bole a maregoa, i kamumu.
1PE 4:16 Pali a viri i bole a maregoa a vuhuna ia a Kristian, nahea ge maruhu. Ge kavurikea a Vure, a vuhuna ni gale ia a viri ne Kristo.
1PE 4:17 A parava i bele pali e huriki a tara na Vure ni gi pelekado. A nipelekado ge tubu ne hita, ge bele navai ne huriki i uka ma ri longototo a Velenga Kamumu na Vure?
1PE 4:18 A Hinere i ta maea, “I gutu ni korimule e huriki a bakovi malamala. I mavonga, ge bele navai ne huriki a bakovi hale ri marikoi a Vure?”
1PE 4:19 I mavonga, e huriki ri bole a maregoa na naro a Vure i vivi vona ri gi tabana ni rata a naro kamumu, ri gi ru mule ria na limana Viri i ratarike a maki lobo. I rata a maki lobo i taki ge rata.
1PE 5:1 Mua o huriki a gare na lotu, iau tara a gare. Iau a matai a maregoa i bolea e Kristo. Bara te vaveru vona a bagetuanga vona, ra ge bele kavakava muri ma. I mavonga, a taki tora mua,
1PE 5:2 mu matakari kamumu a kabu na Vure, ra ri made turane mua. Mu rata mavonga, i uka ma mu ramai kunana a nitagu. Nahea mu gu rata kunana a leho ni bole a moni. A naro iea, a naro ni maruhu vona. Mu matakari ria a vuhuna mu ngaru hateka ni rata, i manga a Vure i ngaru.
1PE 5:3 Naha ni matakari hateka a kabu na Vure. Mu muga ria, mu vakasiri a naro kamumu ne ria, ri gi ramai.
1PE 5:4 Muri, na tahuna a Matakari dagi i bele, bara i habi ne mua a mapa kamumu ge tabuli vakaroro.
1PE 5:5 Mua o huriki a riau, mu longototo e huriki a gare ne mua. Mu vakakiroko mua, mu vakori, a vuhuna a Hinere i ta maea, “E huriki ri bibi rike mule a rane ria, a Vure bara i gege ria. Pali e huriki ri vakakiroko ria, a Vure bara i rata kamumu ria.”
1PE 5:6 I mavonga, mu vakakiroko mua polo­tano na nitora dagi na Vure. Muri, na parava i vulakia, bara i kavurike mua.
1PE 5:7 Mu habi na limana a maki lobo mu loho lege vona, a vuhuna i ngaru hateka mua.
1PE 5:8 Mu matapara, mu matadoko, a vuhuna a pile ne mua, e Satan, i laho viliha manga a laion i roro, i matakana a viri ge ratapilea.
1PE 5:9 Mu gegea, mu pesi tora na niluhoi tora, a vuhuna mu lohoka vona e huriki e turane mua na tabeke ranga na malala, ria ranga ri bole a nimadihi manga mua.
1PE 5:10 I mavonga, na tahuna mu bole pali a nimadihi popote, a Vure na nidodo bara i kisi mua, i vakatora mua, i rata mua mu pesi tora. Ra Vure i rata kamumu mua, i gale mua mu gu made turana vakaroro na bagetuanga vona, a vuhuna mu luhoi torea e Isu Kristo.
1PE 5:11 A nitora lobo ge ne vona kunana vakaroro. I muholi.
1PE 5:12 E Sailas i manga e turagu muholi, i rata kamumu a leho lobo a habi vona. I kori iau, i here poloa a raukea kiroko iea, ra a vara mua, a taki tala ne mua a naro kamumu muholi na Vure. Mu pesi tora vona.
1PE 5:13 A ngatavine ra i made o Babilon i talo mua. Ia tara, a Vure i vulakia. E tugu e Markus tara, i talo mua.
1PE 5:14 Mu vatagui na naro kamumu ni vangaru. Mua o huriki mu rihi e Kristo, a niva­lemu ge tabuli ne mua.
2PE 1:1 Iau e Simon Petrus, a vora, a apos­tolo ne Isu Kristo. A herea a raukea iea i lakene ne mua e huriki a bakovi a ngatavine a Vure i rata mua mu luhoi torea e Kristo, i manga mia. Si luhoi torea e Isu Kristo, ra viri i korimule hita, ia a Vure, i malamala liu.
2PE 1:2 A Vure ge rata kamumu vakaroro mua, ge habi vakaroro a nivalemu ne mua, a vuhuna mu lohoka kamumu na Vure, rua e Isu a Bakovi Dagi ne hita.
2PE 1:3 Ia a Vure. Na nitora vona, i habi pali ne hita a maka maki ge vakatora a nimade ne hita, ge tuhori hita na ni laho mala­mala. I habi ne hita a maka maki nga, a vuhuna si lohoka vona a Vure i gale hita si gi tahoka a bagetua manga ia, si gi malamala liu manga ia.
2PE 1:4 Na naro iea, i ta muholi ne hita ge kori hita na naro kamumu legelege, si gi ha taro a naro hale na ningaru hale na malala, si gi malamala manga ia.
2PE 1:5 I mavonga, a niluhoi ne mua, mu toni a bulune mua ni vakatorea na naro kiripiripi. A naro kiripiripi, mu vakatorea na lohokanga.
2PE 1:6 A lohokanga, mu vakatorea na naro ni pahadanu a ningaru hale na kakaine mua. A naro iea, mu vakatorea na naro na ni hatenono na maregoa. A naro iea, mu vakatorea ni rata a naro na Vure.
2PE 1:7 A naro na Vure mu rata, mu vakatorea na naro ni ngaru e huriki a tara na Vure. A naro iea, mu vakatorea na naro na ni vangaru.
2PE 1:8 Na tahuna mu ramai vakaroro a naro nga, a leho na Vure mu ratea bara i tahoka a kanena. A hini mu lohoka vona e Isu Kristo, a Bakovi Dagi ne hita, ia tara bara i tahoka a kanena.
2PE 1:9 Pali e rei a viri i uka ma i ramai a naro nga, i kepa vona a hini a Vure i puga vuroki pali a naro hale lobo vona.
2PE 1:10 I mavonga, mua e huriki a turagu, a narone mua ri gi vakasiri manga a Vure i gale mua, i vulaki mua. Bara mu ramai a maka naro kamumu nga, i uka ma mu gu boru.
2PE 1:11 Mu ramai a maka naro nga, muri a Vure bara i vivi hateka ni tagui mua na tahuna mu dili na harikianga ne Isu Kristo, a Bakovi Dagi ne hita, a Viri i Korimule hita. A harikianga vona i uka nilobona.
2PE 1:12 I muholi, mu lohoka vona pali a maka maki nga. Mu bolea pali a ngava muholi, mu pesi tora vona. Pali a koi mu gu longokaburungi, lakea a ngaru ni vakalohoka mua tabu vona.
2PE 1:13 Na tahuna iau a tabana ni mahuri, a luhoi i kamumu ga taki mua tabu. Ga vakarike a hatene mua, mu gu luhoi tabu a maka maki nga,
2PE 1:14 a vuhuna a lohoka vona pali, i popote bara mate. E Bakovi Dagi ne hita, e Isu Kristo i taki iau pali.
2PE 1:15 I mavonga, ga vakalohoka bala mua. Muri ma, na tahuna a mate pali, bara mu luhoi mule vakaroro a ngavagu.
2PE 1:16 Hosi, mi vakalongo mua vona e Isu Kristo, a Bakovi Dagi ne hita, ge hamule valai na nitora. A ngava mi vakalongo mua vona, i uka ma a nuverei tavula mi rata kunana na lohokanga ne mia. A nitora dagi ne Isu, mi masia na matane mia, mi vakalongo mua vona.
2PE 1:17 Hosi, mete made turane Isu na lolo na Vure, mi longoa a Vure, e Tamane hita, i ta valai na hunu, i vakabagetua, i kavurikea a rane Isu, i ta maea, “A Bakovi iea e Tugu, a hategu. A vivi hateka vona.”
2PE 1:19 A ngavane huriki a propet hosi, ri ta virihi mai e Isu vona, i muholi hateka. I kamumu mu gu longo kamumu. A ngavane ria i manga a kanono i para na uvo, i vakasiri a dala. Mu loho doko vona, ge vano ge harena na tahuna a nipara ne Kristo ge parai a hatene mua, i manga a hini i malaharere, i rike a hada e Lagavago.
2PE 1:20 A maki dagi mu gu lohoka vona i maea: a pelegona nita propet na Hinere i uka ma i tavore na lohokanga na viri,
2PE 1:21 a vuhuna a nita propet i uka ma i luve na ningaru na bakovi. A Vure i ta polo ne ria na tahuna a Hanu Kiripiripi i habi a niluhoi ne ria.
2PE 2:1 Hosi e huriki a nitamina propet ri bele ne huriki a Israel. I mavonga kunana, bara ri bele ne mua. Bara ri tamilalu ni tovo a ngava muholi, pali a maki ri tovo, a ngava taminga ni ratapile e huriki. Bara ri marikoi ni takia e Isu ga Bakovi Dagi ne ria, re Bakovi Dagi i konamule ria. I mavonga, a Vure bara i ratapile malaviriri ria.
2PE 2:2 Pali e huriki ala kupo bara ri ramai a naro hale ne ria, ri mole lae. A naro hale ne ria bara i rata e huriki ri biua a dala muholi.
2PE 2:3 Ri raha, bara ri rata a ngava taminga ni bole a moni ne mua. A Vure i taki hosi pali ge pelekado ria, ge habi a nimadihi ne ria. I uka ma i tabaka, bara ri vurua.
2PE 2:4 Bara ri vurua, a vuhuna hosi e huriki a agelo ri rata a naro hale, a Vure i uka ma i dodo ria. I kolo tata ria na sen, i voro puru ria na lovo i uvo hateka, ri gi davea a parava a Vure ge pelekado ria, ge habi a nimadihi ne ria.
2PE 2:5 E huriki a bakovi a ngatavine hosi, na parava ne Noa, ria ranga ri rata a naro hale. A Vure i uka ma i dodo ria. I ratapile ria na marungulolo. E Noa, a bakovi ni vara e huriki na naro malamala na Vure. Ia kunana a Vure i korimulea na marungulolo, turana e huriki a viri vona, a bakovi a ngatavine ala polorua.
2PE 2:6 E huriki a bakovi a ngatavine na tanga dagi i rua, e Sodoma, e Gomora, a Vure i rungani ria na kanono dagi, ri vuro, i vakalobo liu ria na malala. I rata ria, ri manga a kilakila na a ra maki ge bele ne huriki a bakovi a ngatavine ri ngalahere na Vure.
2PE 2:7 Pali a Vure i korimulea e Lot na vuranga iea, a vuhuna e Lot a bakovi malamala, i loho lege vona a maka naro na molenga ne huriki a bakovi hale nga.
2PE 2:8 A bakovi malamala iea i made turane ria, i matai na parava vakaroro a naro hale ne ria, i longo na parava vakaroro a ngava hale ne ria. I mavonga, i lege a lohona.
2PE 2:9 A Bakovi Dagi i kara ia ge korimule e huriki a bakovi malamala na nitoni. I habi a nimadihi ne huriki a bakovi hale, ge vano ge harena na parava ge pelekado e huriki lobo vona.
2PE 2:10 Bara i habi hateka a nimadihi ne huriki a nitamina mari ni tovo nga. Ri rata hateka a naro na molenga. Ri longotaro a ngavane huriki a matakari. Ri kuli rua hateka, i uka ma ri mangenge ni harogi pile e huriki a agelo.
2PE 2:11 Ri uka nitora dagi manga e huriki a agelo, pali e huriki a agelo i uka ma ri harogi pile ria na matane Bakovi Dagi.
2PE 2:12 Pali e huriki a bakovi nga, ri manga a livoa. Ri uka a niluhoi. Ri ramai kunana a ningaru ne ria. A leho na livoa, e huriki ri gi lakavu ria, ri gi rabalaki ria. E huriki a bakovi hale nga, ria ranga, a Vure bara i ratapile ria, a vuhuna ri harogi pile tavula a maki i uka ma ri lohoka vona.
2PE 2:13 Bara ri bole a mapana naro hale ne ria. Ri vivi ni ramai na matane huriki a naro hale na kakaine ria. Ri muto. Ri vivi ni tami mua na tahuna ri kani turane mua na habu ne mua.
2PE 2:14 Ri ngutu vakaroro na ngatavine, ri ngaru ni mole. I uka ma ri maru vona a naro hale ne ria. Ri bole dili turane ria e huriki a bakovi a ngatavine loho rua. A hatene ria ri paki kunana ni kani muma. A Vure i ruduraha ria.
2PE 2:15 Ri lohopile pali a dala kamumu, ri ruru. Ri muri mai a narone Balam, e tune Beor. Re Balam, i ngaru ni rata a naro hale, ge bole a mahala.
2PE 2:16 Pali a donki vona i ta manga a bakovi, i tahatea, i pupukaria a propet iea, nahea ge ratea a naro manga manga.
2PE 2:17 Re huriki a nitamina mari ni tovo nga, a ngavane ria i uka kanena, i manga a lomu i uka naru ge tua vona. Ri manga a bubu, i vakabebe viliha a vilu dagi. A Vure i kado puru pali a murine ria, i uvo hateka.
2PE 2:18 Ri ta paki paki, pali a ngavane ria a ngava tavula, a ngava taminga. Ri tuli tabu e huriki ngane kunana ri ha taro a naro nga, ri pulo a vilone ria. Ri tuli ria na naro na molenga.
2PE 2:19 Ri taki e huriki ri gi vakamatukapaga ria, pali ria a vorakato na naro hale. A ra maki i matakaria a bakovi, a bakovi a vorakato na maki iea.
2PE 2:20 A viri i lohoka ne Isu Kristo, a Bakovi Dagi ne hita, a viri i korimule hita, lakea i matukapaga na naro katoki na malala, pali i hamule mai a naro katoki nga, i koro tabu ne ria, i uka ma i kamumu. Ngane a nimadena bara i hale hateka na nimadena muga.
2PE 2:21 Bara i kamumu hateka i uka ma ge longo muga a ngava na dala malamala. Ngane a Vure bara i habi a nimadihi dagi vona, a vuhuna i longo pali a ngava na naro a Vure i vakuku hita vona si gi ramaia, pali i longotaro, i ngalahere.
2PE 2:22 I bele ne ria a nita vakakika muholi ni here hosi, i ta maea, “A ligo i muta pali, muri i hamule, i kani mulea a mutana. A kinana boro i hilolo pali na naru, muri i hamule, i taka tabu na kokota.”
2PE 3:1 Mua o huriki a turagu, a raukea iea, a ruana raukea a here lakene mua. A raukea varago nga, a vakalohoka tabu mua vona a ngava mu lohoka vona pali. A ngaru mu gu luhoi kado kamumu.
2PE 3:2 A ngaru mu gu luhoi tabu a ngava ne huriki a propet hosi, ri vakalongo muga vona a ra maki ge bele muri ma. Mu luhoi tabu a ngava i vakuku mua vona a Bakovi Dagi ne hita, a Viri i korimule hita. Mia e huriki a apostolo mi vakalongo mua vona pali.
2PE 3:3 A ngava iea i maea: Muga na nilobona parava, a ngava e Isu Kristo ge hamule valai, bara ni nongo vaki. E huriki bara ri ramai kunana a ningaru hale na kakaine ria.
2PE 3:4 Bara ri ta maea, “I ta muholi, ta ge hamule valai. Pali vai? Hosi e huriki a gare hosi ne hita ri mate. I uka tara maki ge bele. A maka maki lobo i palupulupu kunana, i vakatubu hosi na malala ni ratarike, i valai i harena mona.”
2PE 3:5 Ri ta mavonga, a vuhuna ri marikoi ni luhoi kamumu, ri mata kepa vona a maki nga: Hosi a Vure i ta kunana, i vakabele a hunu. I ratarike na naru a malala na kurukuruna naru.
2PE 3:6 Muri a Vure i takia a naru, i kavitagu a malala. A maki lobo i tabuli pololilo vona ri pasiri, ri mate.
2PE 3:7 I mavonga muri ma, a nitana Vure bara i ratapile tabu a hunu a malala. Na parava a Vure ge pelekado e huriki lobo, bara i rungani a hunu, a malala, bara i ratapile e huriki ri ngalahere na Vure.
2PE 3:8 Mua e huriki a turagu, naha ni longo kaburungi a ngava iea: Na matane Bakovi Dagi, a parava i taku i manga a pida i 1,000. Pali a pida i 1,000 i manga a parava i taku kunana.
2PE 3:9 E huriki ranga ri takia a Vure, ta i leho kemi kemi hateka ni rata a maki i ta muholi vona ge ratea. Pali i uka ma i mavonga. Ia a mari ni hatenono. I marikoi vona tara viri ge velu. I ngaru e huriki lobo ri gi pulo a vilone ria.
2PE 3:10 A Parava ne Bakovi Dagi bara i bele vaka­turutu kunana, i manga a bakovi ni panaho. Na parava iea a hunu bara i tangi pahumu dagi, i marakavelu. A maka maki na hunu, a Vure bara i gutu parina ria na kanono, ri gi lobo liu. I mavonga, a naro lobo ni rata koea na malala ri gi bele kavakava.
2PE 3:11 Mu luhoi kamumu. A Vure ge ratapile a maki lobo na naro iea. I mavonga, i vai a naro kamumu mu gu ratea? Mu laho na naro mala­mala, a naro na Vure.
2PE 3:12 Mu pasimata vona a Parava na Vure ge valai, mu toni ni ratea ge bele malaviriri. Na Parava iea, a hunu bara i nono, i lobo liu. A maki lobo na hunu bara ri gutu hateka, ri bele manga a naru.
2PE 3:13 Pali hita, i ta muholi ne hita ge ratarike a hunu a malala karaba, e huriki a bakovi a ngatavine malamala kunana bara ri made vonga.
2PE 3:14 I mavonga, mua e huriki a turagu, mu toni a bulune mua ni laho malamala, ge uka ranga naro hale mu gu rata, lakea bara mu made na nivalemu. Muri ma, na tahuna a Parava iea ge valai, ra mu davea, e Bakovi Dagi bara i matai mua mu laho kamumu.
2PE 3:15 Mu luhoia: ra hini a Bakovi Dagi a mari ni hatenono, i rata mavonga, a vuhuna i ngaru ni korimule hita. E turane hita, e Paulus, ia tara i here mavonga, a vuhuna a Vure i habi a lohokanga vona.
2PE 3:16 A raukea lobo ne Paulus, i here, i ta mavonga. A ngava ranga vona i gutu popote ni longokilala a pelegona. E huriki ri uka a lohokanga ri pulo lae a ngavana, lakea a Vure i habi a nimadihi ne ria. I uka ma ri rata mavonga na ngava ne Paulus kunana. Ri rata mavonga tabu na Hinere ranga.
2PE 3:17 Mua e huriki a turagu, mu lohoka vona pali a narone ria. Mu matadoko ne huriki a bakovi ri longotaro a vinara na Vure. Ma ri gi tami mua, mu gu loho rua.
2PE 3:18 Mu koru rike na naro kamumu ne Isu Kristo, a Bakovi Dagi ne hita, a Viri i korimule hita. Mu koru rike na lohokanga vona. Si gi kavurikea a rana mona, na parava vakaroro. I muholi.
1JO 1:1 A Nita Mahuri i made hosi, muga na maka maki ni ratarike. Mi longoa a nitana, mi masia na matane mia. I muholi mi masia, mi padoi ia na limane mia.
1JO 1:2 A Nimahuri iea i bele kavakava, mi masia. Mi vakalongo mua vona a Nimahuri Vakaroro iea, ra i made muga turana e Tamana, muri i bele kavakava ne mia.
1JO 1:3 A maki lobo mi matai, a maki lobo mi longo, ngane mi taki tala ne mua, lakea mua ranga mu gu rihi mia. I muholi, si rihi e Tamana turana e Tuna, re Isu Kristo.
1JO 1:4 A herea a raukea iea, a nivivi ne mia ge bele dagi.
1JO 1:5 A ngava mi longo vona, ngane mi vakalongo mua vona i maea: A Vure a Nipara. I uka ranga hini ge uvo ge tabuli vona.
1JO 1:6 E rei a viri i taki ta i rihi a Vure, pali i laho na uvo, i uka ma i ta muholi. Ia a bakovi na taminga.
1JO 1:7 A Vure i made na hini palala. I mavonga, na tahuna si laho na hini palala, si varihi, a darane Tuna, e Isu, i vahilolo hita na naro hale lobo ne hita.
1JO 1:8 Pali a viri i taki ta i uka naro hale, i uka ma i ta muholi. I tami mulea.
1JO 1:9 Pali na tahuna si taki tala na Vure a naro hale ne hita, a Vure bara i ramai a ngava muholi i taki pali, bara i ramai a naro kiripiripi vona, i puga vuroki a naro hale ne hita, i vahilolo hita, si malamala na matana.
1JO 1:10 Pali a viri i taki ta i uka naro hale ge rata, ngane i takia a Vure, ta ia a bakovi na taminga. A bakovi maea i marikoi a nitana Vure.
1JO 2:1 Mua e huriki e tugu, a here lakene ne mua a nita iea, nahea mu gu rata a naro hale. Pali a viri tara ge rata a naro hale, si tahoka a Viri i made turane Tamana, i takia ge puga vuroki a naro hale si rata. Ra viri iea, e Isu Kristo a Viri malamala.
1JO 2:2 Ia kunana a dala ne hita, ge puga vuroki a naro hale ne hita. I uka ma a dala ne hita kunana. Ia a dala ne huriki lobo na malala.
1JO 2:3 Si gi matakilaka navai na viri i lohoka na Vure? A viri i lohoka na Vure bara i longototo a vinara vona.
1JO 2:4 E rei a viri i taki ta i lohoka na Vure, pali i uka ma i longo mai a vinara vona, a bakovi iea a bakovi na taminga. I marikoi na nita muholi.
1JO 2:5 Pali e rei a viri i longototoa a nitana Vure, ia i ngaru muholia a Vure. A kilakila na viri i madoko turana Vure i maea,
1JO 2:6 a viri i madoko turana Vure bara i laho manga e Kristo i laho.
1JO 2:7 Mua e huriki a turagu, a vinara a vakalongo mua vona i uka ma a vinara karaba. A vinara a vakalongo mua vona a vinara hosi, mu lohoka vona pali. A vinara hosi a ngava mu longoa pali.
1JO 2:8 I muholi, a vinara iea, a vinara hosi. Pali a vinara iea, ia tara, a vinara karaba. A narone Kristo i vakasiri a vinara iea i muholi. A narone mua ranga, i vakasiri i muholi, a vuhuna a uvo i vakatubu ni lobo, a nipara muholi i para pali.
1JO 2:9 E rei a bakovi i taki ta i laho na hini palala, pali i marikoi ne turana, a bakovi iea i tabana ni made na uvo.
1JO 2:10 A viri i ngarua e turana, i made na hini palala. I uka naro ge sibo vona ge boru.
1JO 2:11 Pali e rei a viri i marikoi e turana, a viri iea i made na uvo, i laho na uvo. I ruru, a vuhuna i uvo a matana.
1JO 2:12 Mua e huriki e tugu, a here lakea ne mua, a vuhuna a Vure i puga vuroki na rane Kristo a naro hale ne mua.
1JO 2:13 Mua e huriki a tamana koma, a here lakea ne mua a vuhuna mu lohoka vona e Kristo, ra Viri i made hosi, muga na maki lobo ni ratarike. Mua e huriki a riau, a here lakea ne mua a vuhuna mu rangia pali e Satan. Mua e huriki e tugu, a here lakea ne mua a vuhuna mu lohoka vona e Tamane hita.
1JO 2:14 Mua e huriki a tamana koma, a here lakea ne mua a vuhuna mu lohoka vona a Viri i made hosi, muga na maki lobo ni ratarike. Mua e huriki a riau, a here lakea ne mua a vuhuna mu pesi tora ni luhoi torea a Vure, mu loho doko vona a nitana Vure mu rangia pali e Satan.
1JO 2:15 Naha ni ngaru a naro na malala. Naha ni ngaru a maka maki na malala. E rei a viri i ngaru a maka maki na malala, i uka ma i ngarua e Tamane hita.
1JO 2:16 A maki lobo na malala, i manga a ningaru hale na kakaine hita, a ningutu na maki na viri tara, a naro na viri i bibi rike mule ia na hini i tahoka a mahala i kupo, a naro nga i uka ma ri valai ne Tamane hita. Ria a naro na malala.
1JO 2:17 E huriki a bakovi a ngatavine na malala bara ri velu. A ningaru lobo na malala bara ri lobo. Pali e rei a viri i ratea a ningaru ne Tamane Hita, bara i made vakaroro.
1JO 2:18 Mua e huriki e tugu, ngane a nilobo­na parava i tabukoi. Mu longo pali vona a pile ne Kristo ge valai na nilobona parava. Mona e huriki a pile ne Kristo ala kupo ri bele pali. I mavonga, ngane si lohoka vona, a nilobona parava i tabukoi.
1JO 2:19 Ranga e huriki a pile ne Kristo, muga ri dili turane hita, pali i uka ma ria e huriki e turane hita muholi. Bara ria e turane hita muholi, i uka ma ri gi ha taro hita, bara ri tabana ni made turane hita. Pali ri ha taro hita pali, i vakasiri manga i uka ma ria a turane hita muholi.
1JO 2:20 Pali mua, a Viri Malamala i habi ne mua a Hanu Kiripiripi. Mu tahoka a lohokanga.
1JO 2:21 A here lakea ne mua a vuhuna mu lohoka vona a ngava muholi. A ngava muholi i uka ma ge vakabele a ngava taminga.
1JO 2:22 E rei a viri i takia e Isu, ta a Vure i uka ma i rudua ge korimule e huriki, a viri iea a bakovi na taminga. Ia a pile ne Kristo. I ngalahere varago ne Tamana, ne Tuna.
1JO 2:23 A viri i ngalahere na Tuna Vure, i ngalahere ne Tamana. A viri i luhoi torea a Tuna Vure, i luhoi torea e Tamana.
1JO 2:24 A ngava mu longo muga, mu loho doko vona. Na tahuna mu rata mavonga, bara mu rihi e Tuna, e Tamana.
1JO 2:25 E Isu i ta muholi ne hita ge habi ne hita a nimahuri vakaroro.
1JO 2:26 A ngava nga, a here virihi e huriki a bakovi ri ngaru ni tami mua.
1JO 2:27 Pali mua, e Kristo i habi pali ne mua a Hanu Kiripiripi, i made turane mua. A Hanu Kiripiripi i tovo mua na maki lobo, lakea i uka ma ge tovo mua tara viri. I muholi hateka a hini i tovo mua vona, ra mu gu rihi e Kristo. I mavonga mu rihia.
1JO 2:28 Mua e huriki e tugu, mu rihi e Kristo. Mu rata mavonga, i uka ma mu gu maruhu na tahuna ge hamule valai.
1JO 2:29 E Kristo i malamala. I mavonga, e huriki ri ramai a naro malamala, ria e huriki a tuna Vure.
1JO 3:1 E Tamane hita i ngaru hateka hita, i gale hita e huriki e tuna. Ngane hita e huriki e tuna. E huriki a bakovi a ngatavine na malala i uka ma ri matakilala hita, a vuhuna i uka ma ri matakilalea a Vure.
1JO 3:2 Mua e huriki a turagu, ngane hita e huriki a tuna Vure. I uka ma si lohoka vona a kakaine hita ge mata navai muri ma. Pali si lohoka vona a ngava nga: na tahuna i hamule valai, bara si mapulo, si manga ia, a vuhuna si masia na matane hita, i mata navai.
1JO 3:3 E rei a viri i pasimata ni masia, bara i ramai a naro malamala, i manga e Kristo i malamala.
1JO 3:4 A viri i rata vakaroro a naro hale, i putu puru vakaroro a vinara. A naro ni putu puru a vinara ni gale a naro hale.
1JO 3:5 Mu lohoka vona, e Kristo, i uka liu a naro hale ge ratea. I valai ge puga vuroki a naro hale.
1JO 3:6 Pali e rei a viri i rihi e Kristo, i uka ma ge ramai tabu a naro hale. E huriki ri rata vakaroro a naro hale i uka ma ri lohoka ne Kristo, i uka ma ri matakilalea.
1JO 3:7 Mua e huriki e tugu, mu matadoko, ma ge tami mua a viri tara. E rei a viri i ramai a naro malamala, ia a bakovi malamala, i manga e Kristo.
1JO 3:8 Pali e rei a viri i ramai vakaroro a naro hale, ia a bakovi ne Satan, a vuhuna e Satan i ramai a naro hale, i vakatubu hosi na nidoko na hunu a malala. A Tuna Vure i puru valai koea na malala ge vakalobo a leho ne Satan.
1JO 3:9 E rei a viri ni gale a tuna Vure i uka ma ge ramai tabu a naro hale, a vuhuna i bole pali a vilona Vure. Bara i keri ni ramai a naro hale, a vuhuna i bele manga a tuna Vure ngane.
1JO 3:10 Na naro iea bara mu matakilaka vona e rei e huriki a tuna Vure, e rei e huriki e tune Satan. E rei a viri i uka ma i ramai a naro kamumu, i uka ma i valai na Vure. A viri i marikoi e turana, ia tara i uka ma i valai na Vure.
1JO 3:11 A ngava ni vara paru hosi i maea, “Mu vangaru.”
1JO 3:12 Nahea si gi naro manga e Kain. Ia a bakovi ne Satan, lakea i rabalakia e tarina, i mate. I rabalakia a vuhuna a narona i hale, a narone tarina i malamala.
1JO 3:13 Mua e huriki a turagu, naha ni turutu na tahuna e huriki na malala ri marikoi mua.
1JO 3:14 Si lohoka vona, si ha taro pali a dala na matenga, si bole a nimahuri, a vuhuna si vangaru. E rei a viri i uka ma i ngarua e turana i tabana ni laho na dala na matenga.
1JO 3:15 E rei a viri i marikoi e turana, i manga a mari ni rabalaki a viri. Pali mu lohoka vona, e rei a viri i rabalaki a viri i uka ma i bole a nimahuri vakaroro.
1JO 3:16 E Kristo i vakasiria ne hita a naro ni vangaru muholi. I mate na murine hita. I mavonga, hita ranga, i kamumu si gi ramai a narone Kristo, si gi lohopile mule hita, si gi vatuhori.
1JO 3:17 Pali a bakovi tara ge tahoka a mahala na malala, i matai e turana i bala a maki, pali i uka ma i dodoa, i uka ma i tuhoria, ngane a ningaru na Vure i uka ma i tabuli na hatena.
1JO 3:18 Mua e huriki e tugu, nahea si gi taki kunana si vangaru. Si gi vangaru muholi, si gi vakasiri na narone hita.
1JO 3:19 Na tahuna si vangaru, si lohoka vona si ramai a ngava muholi. I mavonga i luke a hatene hita na matana Vure.
1JO 3:20 Na tahuna si hataki manga si rare na matana Vure, si lohoka vona a Vure i rangi a niluhoi iea. I lohoka na maki lobo.
1JO 3:21 Pali na tahuna i uka ma si hataki manga si rare na matana Vure, si lohoka vona a Vure ge longo hita na tahuna si vasileki.
1JO 3:22 A ra maki si takia vona, bara i habi, a vuhuna si longototo a vinara vona, si rata a naro i vivi vona.
1JO 3:23 A vinara vona i maea, si gi luhoi torea a rane Tuna, e Isu Kristo, si gi vangaru, i manga a hini i vakuku hita vona.
1JO 3:24 E huriki ri longototo a vinara vona ri rihi ia. Ia tara i rihi ria. Si lohoka vona si rihi a Vure, a vuhuna i habi ne hita a Hanu Kiripiripi.
1JO 4:1 Mua e huriki a turagu, e huriki a nitamina propet ri laho lae. I mavonga, naha ni longo mai a nitovo ne huriki a bakovi lobo. Mu toni a niluhoi ne ria, ri valai na Vure, o i uka.
1JO 4:2 A nitovo i valai na Vure, bara mu matakilaka vona maea: Bara i taki tala ne Isu Kristo i valai na Vure, i bele manga a bakovi.
1JO 4:3 Pali a maka nitovo i uka ma ri valai na Vure bara ri takia e Isu, ta i uka ma i valai na Vure. A maka nitovo maea i valai na hanitu, a pile ne Kristo. Mu longo pali ta ge valai. Ngane i bele pali.
1JO 4:4 Mua e huriki e tugu, mua a tara na Vure. Mu rangi pali e huriki a nitamina propet nga, a vuhuna a Hanuna Vure, ra i made pololilo ne mua i rangi a hanitu, ra i made turane huriki na malala.
1JO 4:5 Ria a bakovi na malala. A ngavane ria a ngava na malala. I mavonga e huriki a bakovi a ngatavine na malala ri longo mai ria.
1JO 4:6 Pali hita si valai na Vure. E huriki ri lohoka na Vure, ri longo mai hita. E huriki i uka ma ri valai na Vure, i uka ma ri longo mai hita. Na naro iea kunana, si matakilaka vona e huriki ri ramai a ngava muholi, e huriki ri ramai a ngava taminga.
1JO 4:7 Mua e huriki a turagu, si gi vangaru, a vuhuna a naro ni vangaru, a naro na Vure. E huriki ri ngaru e huriki e turane ria, ria a tuna Vure, ri lohoka na Vure.
1JO 4:8 E rei a viri i uka ma i ngaru e huriki e turana, i uka ma i lohoka na Vure, a vuhuna a Vure ia a vuhuna naro na nivangaru.
1JO 4:9 A Vure i rudu vilia na malala e Tuna a madiva, si gi bole a nimahuri vakaroro. Na naro iea kunana a Vure i vakasiri a ningaru dagi vona ne hita.
1JO 4:10 A naro ni ngaru muholi a viri i maea: Hita i uka ma si ngaru mugea a Vure. Pali a Vure i ngaru muga hita, i rudua e Tuna, ge a nihabi, ge kadoa a dala a Vure ge ravunu vuroki a naro hale ne hita.
1JO 4:11 Mua e huriki a turagu, a Vure i ngaru hateka hita. I mavonga hita ranga, si gi vangaru.
1JO 4:12 I uka tara viri ge masia a Vure. Pali na tahuna si vangaru, a Vure i made turane hita, i rata hita si gi vangaru hateka tabu.
1JO 4:13 A Vure i habi ne hita a Hanu Kiripi­ripi. I mavonga si lohoka vona si rihi a Vure. A Vure tara i rihi hita.
1JO 4:14 Mia, mi masia na matane mia e Tuna, lakea mi vakalongo mua vona e Tamana i rudu vilia, ge korimule e huriki.
1JO 4:15 E huriki ri taki tala ne Isu ia a Tuna Vure, a Vure i rihi ria, ria ranga ri rihi a Vure.
1JO 4:16 Si lohoka vona a Vure i ngaru hita. Si roe vona a hini i ngaru hita. A Vure kunana a vuhuna a naro na nivangaru. E rei a viri i rihi a Vure, a Vure tara i rihi ia.
1JO 4:17 Na tahuna si rihi a Vure, a naro na nivangaru i bele dagi ne hita. Muri, na parava a Vure ge pelekado e huriki vona, i uka ma si gi mangenge, a vuhuna si laho manga e Isu koea na malala.
1JO 4:18 E huriki ri ngarua a Vure, i uka ma ri gi mangenge na Vure. Na tahuna a naro na nivangaru i bele dagi ne hita, ra naro iea i valai na Vure, i uka ma si gi mangenge tabu na Vure. E huriki ri mangenge na Vure, a vuhuna ri rata hale. Ri lohoka vona a Vure ge habi a nimadihi ne huriki ri rata hale. E huriki ri mangenge na Vure ri vakasiri manga a naro na Vure na nivangaru i uka ma i leho pololilo ne ria.
1JO 4:19 Si vangaru a vuhuna a Vure i ngaru muga hita.
1JO 4:20 E rei a viri i taki ta i ngarua a Vure, pali i mari koi e turana, ia i tatami. I uka ma i ngarua e turana, ra i masia na matana, pali ge ngaru navia a Vure, ra i uka ma i masia ma.
1JO 4:21 A Vure i vakuku hita maea: E rei a viri i ngarua a Vure ge ngaru tabu e huriki e turana.
1JO 5:1 E huriki ri takia a Vure i rudu vilia e Isu ge korimule hita, ria a tuna Vure. E huriki ri ngarua e Tamana bara ri ngaru tabu e huriki e tuna.
1JO 5:2 Na tahuna si ngarua a Vure, si longototo a vinara vona, si vakasiri manga si ngaru e huriki a tuna Vure.
1JO 5:3 E huriki ri ngarua a Vure ri longototo a vinara vona. Pali a maka vinara na Vure, i uka ma ri habi a maregoa ne hita.
1JO 5:4 Hita e huriki a tuna Vure, si rangi a maka nitoni na malala, a vuhuna si luhoi torea a Vure.
1JO 5:5 E rei a viri i rangi a maka nitoni na malala? A bakovi i lohoka vona e Isu ia a Tuna Vure i rangi a maka nitoni na malala.
1JO 5:6 A Vure i rudu vilia e Isu Kristo ge puru valai na malala. A Vure i vakasiri i rudua na tahuna e Isu ni vahilolo na naru. I vakasiri tabu na tahuna e Isu i mate na kai tavalavala, i tua a darana. A Hanu Kiripiripi i vakalongo hita vona i muholi, a vuhuna a Hanu Kiripiripi ia a vuhuna ngava muholi.
1JO 5:7 A maki i tolu to vakalongo hita ne Isu i valai na Vure.
1JO 5:8 A maki i tolu nga: a Hanu Kiripiripi, a naru, a dara. To vakalongo palupu a ngava i taku.
1JO 5:9 Si longo mai a ngavane huriki a bakovi tavula. Pali a ngavana Vure i muholi hateka. I vakalongo hita pali ne Tuna, i mavonga si gi longo maia.
1JO 5:10 E huriki ri luhoi torea a Tuna Vure, ri lohoka na hatene ria i muholi ia a Tuna Vure. E rei a viri i uka ma i luhoi torea a Tuna Vure, i manga i galea a Vure a bakovi na taminga, a vuhuna i uka ma i longo mai a ngava a Vure i vaka­longo hita vona e Tuna.
1JO 5:11 A ngava a Vure i vakalongo hita vona i maea, ge habi ne hita a nimahuri vakaroro. A nimahuri vakaroro iea i valai ne Tuna.
1JO 5:12 E rei a viri i laho turana Tuna Vure bara i tahoka a nimahuri vakaroro. Pali e rei a viri i uka ma i laho turana Tuna Vure i uka ma ge tahoka a nimahuri vakaroro.
1JO 5:13 Iau a here a ngava nga lakene mua e huriki mu luhoi torea a rana Tuna Vure, mu gu lohoka vona mu tahoka a nimahuri vakaroro.
1JO 5:14 Na tahuna si takia vona tara maki, pali a maki si nana vona i ramai a ningaru vona, si lohoka vona bara i longo.
1JO 5:15 Na naro iea, si lohoka vona i longo a ninana ne hita. A ra maki si nanea vona, bara i habi kunanea.
1JO 5:16 Na tahuna mu matai e turane hita tara i rata a naro hale, ra i uka ma i vakabele a matenga, mu vasileki vona, lakea a Vure ge habi a nimahuri vakaroro vona. Pali e huriki ranga, a naro hale ri ratea bara i vakabele a matenga. I uka ma a taki mu gu vasileki ne huriki ngi.
1JO 5:17 A naro hale lobo ri hale. Pali a naro hale ranga i uka ma ri vakabele a matenga.
1JO 5:18 Si lohoka vona e huriki a tuna Vure i uka ma ri ramai tabu a naro hale. E Satan i keri ni padoi ria, a vuhuna a Tuna Vure i matakari ria.
1JO 5:19 Hita e huriki a ngate na Vure. Pali e huriki ranga, a nitora ne Satan i matakari ria.
1JO 5:20 A Tuna Vure i valai, i vakapalala a gine hita, si gi lohoka vona a Viri Muholi. Si rihia e Tuna, re Isu Kristo, a Bakovi Muholi. Ia a Vure Muholi. Ia a vuhuna a nimahuri vakaroro.
1JO 5:21 Mua e huriki e tugu, mu malele ha na maka vure taminga.
2JO 1:1 Mu lohoka nau, iau a bakovi dagi na lotu. A here lakea na ngatavine, ra Vure i vulakia, turana e huriki e tuna. A ngaru hateka mua. Pali i uka ma i iau kunana. E huriki ri lohoka na ngava muholi, ria ranga ri ngaru hateka mua,
2JO 1:2 a vuhuna si lohoka vona a ngava muholi, si gi ramai vakaroro.
2JO 1:3 A Vure, e Tamane hita, e Tuna e Isu Kristo ru gu rata kamumu hita, ru gu dodo hita, ru gu habi a nivalemu ne hita na naro muholi, na naro na nivangaru.
2JO 1:4 A vivi hateka na tahuna a longo ranga ne huriki e tumu ri tabana ni ramai a nita muholi, i manga a hini e Tamane hita i vakuku hita si gi rata.
2JO 1:5 Ngane, o kurabagu, a ngaru si gi vangaru. A vinara a herea, i uka ma a vinara karaba. A vinara iea si longoa hosi pali.
2JO 1:6 Na tahuna si longototo a maka vinara na Vure, bara si vangaru. Pali a Vure i vakuku hita hosi si gi vangaru, lakea a ngaru mu gu longototo.
2JO 1:7 A bakovi ala kupo ri laho lae, ri takia e Isu Kristo, na tahuna i valai koea na malala, ta i uka ma i bele manga a bakovi. E rei a viri i tovo maea, ia a bakovi na taminga, a pile ne Kristo.
2JO 1:8 Mu mata­doko, ma mu gu vakavelu a maki si leho tora hateka ni bole. A ngaru mu gu bole lobo a mapane mua.
2JO 1:9 E huriki ri pe a nitovo ne Kristo, ri pagepolo lakea na ngava ranga, e huriki nga, a Vure i uka ma i made turane ria. Pali e huriki ri pesi tora ni muri mai a nitovo iea, e Tamana, e Tuna rua varago ru made turane ria.
2JO 1:10 I mavonga, e rei a bakovi ge valai ne mua, ge tovo na ngava vaperesi, naha ni taguia. Naha ni mata­karia na ruma ne mua,
2JO 1:11 a vuhuna e rei a viri ge tagui a bakovi maea, i koria na leho hale vona.
2JO 1:12 A tahoka a ngava i kupo a ngaru ni vakalongo mua vona, pali a koi ni here kunana. A ngaru ni lakene mai mua, si gi vivi ni vamatai, ni tuverei.
2JO 1:13 A re tarimu a ngatavine. E huriki e tuna ri talo rike a haro kamumu vomu, re tarimu a Vure i vulakia.
3JO 1:1 Mu lohoka nau, iau a gare na lotu. A here lakene vomu, o Gaius. A ngaru ioe na hategu.
3JO 1:2 Turagu, a vasileki na Vure, go made kamumu, i uka ma go giloa, ge kinigao kunana a kakaimu, i manga a hini a hanumu i kinigao turana Vure.
3JO 1:3 E huriki a turane hita ri valai ri vakalongo iau, ta o ramai kamumu a ngava muholi. A longoa a ngava iea, a vivi hateka. I muholi, o ramai vakaroro a ngava muholi.
3JO 1:4 Na tahuna a longo e huriki a koma nau ri ramai a ngava muholi, a vivi hateka.
3JO 1:5 Turagu, i kamumu o matakari e huriki a tara na Vure ri havai mua. I uka ma o lohoka ne ria, pali o ramai kamumu a ningaru na Vure na tahuna o matakari ria.
3JO 1:6 E huriki ranga ne ria ri bele pali koea. Ri vakalongo koea e huriki a tara na Vure, a naro kamumu o rata virihi ria vona, o ngaru hateka ria. A ngaru go tabana ni tuhori e huriki a bakovi maea, na naro a Vure ge vivi vona, ri gi laho tala,
3JO 1:7 a vuhuna ri laho tala ni taki tala a rane Kristo. Ri koi ni bole a kinori ne huriki i uka ma ri lohoka na Vure.
3JO 1:8 I mavonga, si gi do rike e huriki a bakovi ri leho maea. Bara si rata mavonga, bara si leho turane ria ni taki tala a ngava muholi.
3JO 1:9 A herea pali tara raukea i lakea ne huriki a tara na Vure vonga. Pali e Diotrepes i rata polo muga muga. I uka ma i longo mai a nitane mia.
3JO 1:10 I mavonga, na tahuna a bele iene, bara taki tala ne huriki a narona. I padimomo mia na ngava hale tavula. I uka ma i ngi kunana. I marikoi ni tagui e huriki a turane hita ri bele ne mua. Pali e huriki ranga ri ngaru ni tagui ria, i pupukari ria, i lili tala ria na vaponga na Vure.
3JO 1:11 Turagu, naha ni ramai a naro hale. O ramai a naro kamumu. E rei a viri i rata a naro kamumu, ia a bakovi na Vure. Pali e rei a viri i rata a naro hale, i uka ma i masia a Vure.
3JO 1:12 E huriki lobo ri taki tala a naro kamumu ne Demitrius. A nita muholi na Vure tara i taki tala a naro kamumu vona. Mia ranga, mi taki tala vona a naro kamumu vona. Ioe o lohoka ne mia, a ngavane mia i muholi.
3JO 1:13 A ngava i kupo ta ga here lakene vomu, pali a koi ni here.
3JO 1:14 A ngaru i uka ma ge tabaka, ga lakene, ga matai ioe, tu gu vata.
3JO 1:15 O made na nivalemu. E huriki e turane tarua ieni ri talo rike a haro kamumu vomu. A haro kamumu ne huriki e turane tarua iene.
JUD 1:1 Iau e Iuda, a vora ne Isu Kristo. Iau e tarine Iakop. A herea a raukea iea i lakene mua e huriki a Vure i gale mua. A Vure e Tamane hita i ngaru mua, ge matakari mua i vano i harena na tahuna e Isu Kristo ge hamule valai.
JUD 1:2 A Vure ge dodo mua, ge habi a nivalemu ne mua, ge ngaru hateka mua vakaroro.
JUD 1:3 Mua o huriki a turagu, a herea a raukea iea, i muga ta ga taki mua vona a naro a Vure i korimule hita vona. Pali ngane, ga here taro, ga taki tora mua mu gu kinigao ni tagari a Velenga Kamumu. Ra ngava na Velenga Kamumu, a Vure i habi na limane huriki a ngate vona.
JUD 1:4 I ranga e huriki ri dili turane mua ri tamilalu, i uka ma mu matakilala ria. Ri ngalahere na Vure. A narona Vure, i rata kamumu hita, ri puloa, ri taki ta i kamumu ri gi tabana ni mole lae. Ri marikoi ni taki e Isu Kristo a Bakovi Dagi ne ria. I paru hosi, a Vure i lohoka ne ria, i taki ge ratapile ria.
JUD 1:5 Ngane a ngaru ni vakalohoka tabu mua vona tara ngava. Hosi mu lohoka kamumu vona. A ngava iea i maea, hosi e Bakovi Dagi i korimule e huriki a Iuda, i vakamatukapaga ria o Egipto. Muri i ratapile e huriki i uka ma ri luhoi torea.
JUD 1:6 Hosi e Bakovi Dagi i kolo tata e huriki a agelo hale. I ru dili ria na tabeke i uvo hateka, ri gi dava a parava ge pelekado ria, ge ratapile ria vakaroro. I rata mavonga, a vuhuna ri koi ni ramai a leho a Vure i habi ne ria, ri page poloa a murine ria.
JUD 1:7 Hosi e huriki a bakovi a ngatavine o Sodoma, o Gomora, na maka tanga tabukoi ne rua, ria ranga ri rata a naro hale. E Bakovi Dagi i ratapile ria, a vuhuna ri ramai a maka naro hale legelege na molenga. Ri ramai a ningaru hale na kakaine ria. A naro ri rata, i uka ma a naro muholi. I ratapile ria na kanono i tabuli vakaroro. A Vure i rata ria ri manga a kilakila na a ra maki ge bele ne huriki ri ngalahere vona.
JUD 1:8 Pali e huriki nga, ri made turane mua, i uka ma ri mangenge. Ria ranga ri luhoi hateka a maki ri vurena vona, ri katoki na naro na molenga, ri longotaro e huriki a matakari, ri harogi pile e huriki a agelo ri tahoka a nipara dagi.
JUD 1:9 Pali a agelo dagi, e Mikael, i uka ma i harogi tavula e huriki a agelo hale. Hosi, i vaubi turane Satan, ru vagege vona a podane Moses, e rei ge bolea. I uka ma i ratapilea e Satan na ngava. I ta kunana, i ta maea, “E Bakovi Dagi ge tahate ioe.”
JUD 1:10 Pali e huriki nga, ra ri made turane mua, ri harogi pile a maka maki i uka ma ri lohoka vona. Ri manga a livoa, ri uka a niluhoi. Ri ramai kunana a ningaru ne ria, i mavonga, a Vure bara i ratapile ria.
JUD 1:11 A Vure bara i ratapile ria, a vuhuna ri muri mai a narone Kain. Ri lohopile mule ria, ri gi bole a mahala, i manga e Balam hosi. Ri gegea a Vure, i manga e Kora hosi, lakea bara ri velu liu.
JUD 1:12 Na tahuna mu vapopo, mu rata a habu ni vakasiri a narone mua na nivangaru, ria ranga ri vapopo turane mua. Mu matadoko ne ria, a vuhuna ri manga a kedo i kapiloho na rakaru, bara i bipodea a aga. Ri vapopo turane mua, i uka ma ri maruhu. Ri matakari mule ria kunana. Ri manga a bubu, i uka ma i vakaboru a vala. A vilu i vakabebe viliha ria. Ri manga a kai i uka vuana muri na haro poki, ni lipu rike, ni vuroki. I manga ri mate liu.
JUD 1:13 Ri laho viliha lae, ri manga a bokona dari i rere. I uka ma ri maruhu ni rata a maka naro hale, ri bele kavakava manga a verena dari. Ri manga a hada i uka ma ri ramai a dalane ria na hunu. A Vure i kisi purua pali a tanga i uvo hateka, ri gi vano ri gi made vona na parava vakaroro.
JUD 1:14 E Enok, a hamone Adam, hosi i vakalongo muga ne huriki a bakovi hale maea, i ta maea, “Mu longo! E Bakovi Dagi ge valai turana tara dagi ne huriki a agelo vona.
JUD 1:15 Ge valai, e huriki lobo ri gi pesi na matana, ge pelekado ria, ge ratapile e huriki a bakovi a ngatavine ri marikoi a Vure. Ge ratapile ria vona a maka naro hale ri rata, na naro i vakasiri ri marikoi vona. Ge ratapile ria vona a maka ngava hale ri taki virihia vona e huriki ri marikoi vona.”
JUD 1:16 Re huriki a nitamina mari ni tovo, ra ri made turane mua, ri marikoi, ri hehe vona a naro kamumu na Vure. I uka ma ri vivi ranga, ri deke bala. Ri ramai kunana a ningaru hale na kakaine ria. Ri bibi rike mule ria. Ri tamilalu ni rata kamumu e huriki, ri gi bole a maka maki ne ria.
JUD 1:17 Mua o huriki a turagu, nahea mu gu turutu vona e huriki a bakovi nga, a vuhuna e huriki a apostolo ne Isu Kristo, a Bakovi Dagi ne hita, ri taki muga vona a maka naro nga.
JUD 1:18 Ri taki mua, ri ta maea, “Muri ma, na nilobona parava, e huriki a bakovi hale bara ri bele, ri biu a maka maki na Vure, bara ri ramai a ningaru hale na kakaine ria.”
JUD 1:19 E huriki a bakovi nga, ria kunana ri rata mua mu vapida lae. Ri ramai kunana a naro na malala. A Hanu Kiripiripi i uka ma i made turane ria.
JUD 1:20 Pali mua, o huriki a turagu, mu vaka­tora a niluhoi malamala ne mua. Mu vasileki na nitora na Hanu Kiripiripi.
JUD 1:21 Mu luhoi vakaroro a hini a Vure i ngaru hateka mua. Mu davea a nidodo ne Isu Kristo, a Bakovi Dagi ne hita. A nidodo vona i habi ne hita a nimahuri vakaroro.
JUD 1:22 Mu dodo e huriki ri loho rua.
JUD 1:23 Mu korimule e huriki ranga na rongova na Vure. E huriki ranga, mu dodo ria, pali mu matadoko, mu mangenge, ma ge mua ranga mu gu boru.
JUD 1:24 A Vure, i kara ia ge matakari kamumu mua, nahea mu gu boru. I kara ia ge matakari mua mu gu malamala, i vano i harena na tahuna muri ma mu pesi na matana, na nipara dagi vona, mu gu tahoka a nivivi dagi.
JUD 1:25 A Vure i taku kunana. Na matenga ne Isu Kristo, a Bakovi Dagi ne hita i korimule hita. Ni gi vakabagetu a rana. Ia kunana a Hariki ne huriki lobo. Ia kunana i matakari a tanga lobo. I mavonga muga na maki lobo ni ratarike. I mavonga ngane. Ge mavonga na parava vakaroro. I muholi.
REV 1:1 Iea ngane a ngava a Vure i vakalongo ne Isu Kristo, ge vakalongo polo ne huriki a vora vona. A ngava na maka maki ge bele malaviriri. I rudua a agelo vona ge vakalongo a ngava nga na vora vona, ra iau, e Ioanes.
REV 1:2 Ngane a vakalongo a maki lobo a matai, ra nitana Vure, a ngava ne Isu Kristo.
REV 1:3 E rei a viri ge gi tala a ngava na nita propet iea, ge vivi. E huriki ri longoa, ri longototo a ngava nga ni here, ria ranga ri gi vivi, a vuhuna a parava i valai tabukoi pali.
REV 1:4 Iau e Ioanes a here lakea ne mua e huriki a tara na Vure i polorua, mu made o Asia. Ra Viri i made mona, i made hosi, bara i hamule valai, i rata kamumu mua, i habi a nivalemu ne mua. Pali e huriki a hanu i polorua, ra ri pesi na ngalana gula hariki vona, ria ranga ri gi rata kamumu mua, ri gi habi a nivalemu ne mua.
REV 1:5 E Isu Kristo, ra viri i vakalongo hita na maki lobo a Vure i takia ge taki ne hita, ra viri i mahuri mule na matenga muga ne hita lobo, ra matakari ne huriki a matakari lobo na malala, ia tara ge rata kamumu mua, ge habi a nivalemu ne mua. I ngaru hateka hita. Na darana i vakamatukapaga hita na naro hale ne hita.
REV 1:6 I rata hita si bele manga a harikianga vona, si manga a prister na Vure vona, re Tamana. Ne vona kunana a bagetuanga, a nitora lobo ni matakari a maki lobo vakaroro. I muholi.
REV 1:7 Mu longo! I popote ge valai na bubu. E huriki lobo ri gi masia. E huriki ri rabalakia, ria ranga ri gi masia. E huriki a kabu lobo na malala ri gi masia, ri gi duku. Ge bele mavonga. I muholi.
REV 1:8 A Vure e Bakovi Dagi i ta maea, “Iau kunana a nitubuna maki lobo. Iau kunana a nilobona maki lobo. Iau a made ngane, a made hosi, ga made vakaroro. Iau a tahoka a nitora lobo.”
REV 1:9 Iau e Ioanes, a turane mua. Si vaveru na ni bole a nimadihi na rane Isu. A dili turane mua na harikianga na Vure, si pesi tora ni ramaia e Isu. Iau a vara e huriki na nitana Vure, a ngava ne Isu, lakea ni lakavu iau, ni ru dili iau na bavi, koea na bodu e Patmos.
REV 1:10 Na parava ne Bakovi Dagi a Hanu Kiripiripi i bele tora nau. A longo na bitogu a lohona bakovi i gale dagi, i nangi i manga a tavure.
REV 1:11 A loho iea i ta maea, “A maki lobo o matai, o here puru na raukea, o vakaru lakea ne huriki a tara na Vure o Epesus, o Smerna, o Pergamum, o Tiatira, o Sardis, o Piladelpia, o Laodisia.”
REV 1:12 Muri a matagege, ta ga masia ra viri i ta turagu, lakea a matai a butu na nipara i polorua, ni rata na gol.
REV 1:13 Na koropalana maka butu na nipara nga, a matai a viri i manga a tuna bakovi. I rodoa a varakia ola ola, na ngalana i rea na mota ni rata na gol.
REV 1:14 A vuna i kea hateka, manga a vuna sipsip, manga a bubu keakea. A matana i para manga a huvina kanono.
REV 1:15 A vahana ru para manga a bras ni ravu, i para hateka. Ru mata manga a bras ni gutu na kanono, i bele maga hateka. A lohona i nangi dagi, i manga a nangina bokona dari i rere.
REV 1:16 I nugu na limana a kanena a hada i polorua. A bainat i tahoka a ngina i rua i vere hateka i toro toro tala na ngavana. A matana i para hateka i manga a haro i para na kuru haro.
REV 1:17 Na tahuna a masia, a boru puru tabukoi na vahana, a tabuli manga a viri i mate. Pali i padoi iau na limana a kanena, i ta maea, “Naha ni mangenge. Iau kunana a nitubuna maki lobo. Iau kunana a nilobona maki lobo.
REV 1:18 Iau a mahuri. Hosi a mate, pali ngane a mahuri vakaroro. Iau a nugua a ki na matenga, a ki na murine huriki ri mate pali.
REV 1:19 I mavonga, a ngaru ioe go here puru a maki lobo o matai pali, ra maka maki i tabuli ngane, turana maka maki ri gi bele muri ma.
REV 1:20 Pali a hada i polorua a nugu na limagu a kanegu, turana butu na nipara i polorua ni rata na gol, ngane ga taki ioe vona a pelegona nita kapiloho. A hada i polorua nga, a agelo na tara na Vure i polorua. A butu na nipara nga, a tara na Vure i polorua.”
REV 2:1 Muri i ta tabu, i ta maea, “O here lakea na agelo ne huriki a tara na Vure o Epesus, o here maea: A ngava iea i valai na Bakovi i nugu a hada i polorua na limana a kanena, ra viri i laho na kurukuruna maka butu na nipara i polorua ni rata na gol.
REV 2:2 Iau a lohoka vona a narone mua. A lohoka na maka maregoa mu bole pali. A lohoka vona a hini mu hatenono na tahuna e huriki ri vakamadihi mua. A matakilaka vona mu koi ne huriki a bakovi hale. Mu toha e huriki ri taki ta ria a apostolo. Mu matai pali ria ri tatami.
REV 2:3 Mu hatenono, mu pesi tora na tahuna mu bole a maregoa a vuhuna mu luhoi torea a ragu. I uka ma mu tuha malulu, mu tabana ni kinigao.
REV 2:4 Pali iau a tahoka a ngava ne mua. I muga mu ngaru hateka iau. Pali ngane mu pe pali a naro ni ngaru hateka iau.
REV 2:5 I mavonga, a ngaru mu gu luhoi mule a naro kamumu ne mua hosi, mu matakilaka vona a hini mu boru valai meli, mu puru liu. Mu pulo a vilone mua, mu rata tabu a maka naro kamumu mu rata hosi na tahuna mu luhoi tora karaba. Ge uka, bara valai, a bole vurokia a butu na nipara ne mua.
REV 2:6 Pali a naro kamumu tara ne mua i maea, mu marikoi a narone huriki a murimuri ne Nikolas, i manga iau tara a marikoi a narone ria.
REV 2:7 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure. E huriki ri mulangi na vabinga, ga taki ria ri gi kani a kanena kai na nimahuri, ra i pesi na hania na Vure.”
REV 2:8 Muri a bakovi iea i ta tabu, i ta maea, “O here lakea na agelo ne huriki a tara na Vure o Smerna, o here maea: A ngava iea i valai na viri ia a nitubuna maki lobo, a nilobona maki lobo, ra viri i mate, i mahuri mule.
REV 2:9 Iau a lohoka vona, mua ni vakamarego, mu bala a maki na malala, pali mu tahoka a mahala. A lohoka ne huriki ri taki ta ria a Iuda muholi, pali ria a tara ne Satan, ri padi a kidune mua.
REV 2:10 I popote mu gu bole a maregoa, pali naha ni mangenge. Mu longo, e Satan i popote ge ru dili ranga ne mua na bavi, ge toha mua, bara mu tahoka a maregoa na parava i ravulu. Mu pesi tora ni luhoi tora iau, ge vano ge harena na tahuna mu mate, lakea iau bara habi ne mua a mapane mua, ra a nimahuri vakaroro, i manga a viri i mulangi na rihiva i bole a tama.
REV 2:11 E rei a viri i ngaru ni longokilala, ge longo kamumu, ge luhoi kado a ngava a Hanuna Vure i taki virihi e huriki a tara na Vure. E huriki ri mulangi na vabinga, a ruana matenga i uka ma ge padoi ria.”
REV 2:12 “O here lakea na agelo ne huriki a tara na Vure o Pergamum, o here maea: A ngava iea i valai na viri i tahoka a bainat i tahoka a ngina i rua i vere hateka.
REV 2:13 Iau a lohoka vona mu made vai. A gula hariki ne Satan i tabuli na tanga iea. Pali mu tabana ni pesi tora na ragu. E Antipas, ra bakovi ne mua i kinigao ni taki tala a nitagu, ni rabalaki vonga na tanga ne Satan. Pali i uka ma mu lobo ni luhoi tora iau.
REV 2:14 Pali iau a tahoka a ngava ne mua. E huriki ranga ne mua ri muri mai a nitovo ne Balam. Re Balam hosi, i takia e Balak ge tami e huriki a Israel ri gi puru na hoa. I taki ria ri gi kani a kinani ni habi ne huriki a nitamina vure. I taki ria ri gi mole lae.
REV 2:15 I mavonga, mua ranga, e huriki ranga ri muri mai a nitovo ne huriki a murimuri ne Nikolas.
REV 2:16 I mavonga, mu pulo a vilone mua. Ge uka, bara valai malaviriri, ga vaubi turane ria na bainat, ra i toro toro tala na ngavagu.
REV 2:17 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure. E huriki ri mulangi na vabinga, ga habi ne ria ranga mana, ra i tabuli kapiloho. Ga habi ne ria a kedo keakea, a rane ria karaba ni here vona. A rana karaba iea, i uka tara viri ge lohoka vona. A viri i bole a kedo iea, ia kikeri ge lohoka vona a rana karaba iea.”
REV 2:18 Muri i ta tabu, i ta maea, “O here lakea na agelo ne huriki a tara na Vure o Tiatira, o here maea: A ngava iea i valai na Tuna Vure. A matana i para manga a huvina kanono. A vahana ru para manga a bras ni ravu, lakea i para hateka.
REV 2:19 Iau a lohoka na narone mua. Mu vangaru, mu luhoi tora iau, mu vakori, mu hatenono na maregoa. I muga a narone mua i kamumu, pali ngane i kamumu hateka.
REV 2:20 Pali iau a tahoka a ngava ne mua, a vuhuna i uka ma mu ta pupukaria ra ngatavine e Iesebel. I taki ta ia a propet, i tovo e huriki a vora nau, i tuli ria ri gi mole, ri gi kani a kinani ni habi lakea ne huriki a nitamina vure.
REV 2:21 A habi a parava ranga ge pulo a vilona, pali i koi ni pulo a vilona, a vuhuna i ngaru hateka a naro hale vona ni ngoi.
REV 2:22 Mu longo! Iau ga habi a gilanga dagi vona. E huriki lobo ri mole turana, ria i uka ma ri gi pulo a vilone ria, ga habi a maregoa dagi ne ria.
REV 2:23 Ga rabalaki e huriki e tuna. Na naro iea, e huriki a tara na Vure lobo ri gi lohoka vona, iau a viri a lohoka na niluhoi, na ningaru ne huriki lobo. Ga habi a mapane mua, i muri mai a narone mua.
REV 2:24 Pali e huriki ranga ne mua o Tiatira, i uka ma mu muri mai a nitovo hale iea. I uka ma mu tovo na maki ni gale a nitovo dagi ne Satan. A taki mua, i uka ma ga habi tara nimava ne mua.
REV 2:25 Mu nugu tata kunana a niluhoi ne mua, ge harena na parava ga valai vona.
REV 2:26 E huriki ri mulangi na vabinga, ri muri mai a narogu ge vano ge harena na tahuna ri mate, iau ga habi ne ria a nitora, ri gi matakari e huriki lobo i uka ma ria a Iuda.
REV 2:27 ‘Ri gi matakari tora hateka, ri gi ratapile e huriki a pile ne ria, i manga a viri i bipoda a ulo, i mapua kesi.’ Ri gi matakari mavonga a vuhuna e Tata i habi nau a nitora ni matakari.
REV 2:28 Muri ga habi ne ria a hada e Lagavago.
REV 2:29 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure.”
REV 3:1 Muri i ta tabu, i ta maea, “O here lakea na agelo ne huriki a tara na Vure o Sardis, o here maea: A ngava iea i valai na Viri i matakari a hanuna Vure i polorua, i nugu a hada i polorua. A lohoka na narone mua. E huriki ri pahaluhoi ta mu tahoka a nimahuri, pali mu mate pali.
REV 3:2 Mu hadongo. Ranga naro kamumu ne mua i tabana, pali i popote ri gi mate. Mu vakatora ria, a vuhuna a leho ne mua, i uka ma mu vakalobo kamumu na matana Vure nau.
REV 3:3 Mu luhoi tabu a ngava mu longoa, mu longototoa hosi. Mu longototoa, mu pulo a vilone mua. Mua bara mu koi ni hadongo, bara valai manga a viri i panaho. Bara valai vakaturutu, a habi a nimadihi ne mua.
REV 3:4 Pali e huriki ranga ne mua o Sardis ri tabana ri tahoka a rane ria, i uka ma ri vakakatoki a varakia ne ria. Muri bara ri rodo a varakia keakea, ri gi laho turagu, a vuhuna i kara ria ri gi rata mavonga.
REV 3:5 E rei a viri i mulangi, ga vakarodoa na varakia keakea. A rana bara i tabuli vakaroro na buk na nimahuri. I uka ma ga ravunu vurokia. Ga taki tala a rana na matane Tata, na matane huriki a agelo vona.
REV 3:6 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure.”
REV 3:7 I ta tabu, i ta maea, “O here lakea na agelo ne huriki a tara na Vure o Piladelpia, o here maea: A ngava iea i valai na Viri Malamala, a Viri Muholi, ra viri i tahoka a ki ne Davit. A maki a talea, i uka tara viri ge tukari mulea. Pali a maki a tukaria, i uka tara viri ge talea.
REV 3:8 A lohoka na narone mua. Mu longo! A ru na ngalane mua a dua i mata ka. I uka tara viri ge tukaria. A lohoka ne mua, mu uka nitora. Pali mu longototo a nitagu, i uka ma mu lohopilea a ragu.
REV 3:9 Mu longo! Re huriki a tara ne Satan, ri taki ta ria a Iuda, pali ri tatami. I uka ma ria a Iuda. Mu longo! Ga rata ria ri gi valai mai mua, ri gi turume puru na vahane mua. I mavonga, ri gi matakilaka vona iau a ngaru hateka mua.
REV 3:10 Mu longototo iau na tahuna a taki mua mu gu hatenono, mu gu pesi tora na maregoa. I mavonga ga matakari mua, i uka ma mu gu dili na tahuna na nitoni, ra popote ge valai na tanga lobo na malala, ge toha e huriki lobo ri made na malala.
REV 3:11 Iau ga bele malaviriri. A maki mu tahoka, mu nugu tata torea. A mapane mua, ma ge radia a bakovi tara.
REV 3:12 E rei a viri i mulangi ga vakapesia, ge manga a butu na roho na Vure nau. I uka ma ge pagitala vona a roho iea. Ga here vona a rana Vure nau, a rana tanga na Vure nau, re Ierusalem karaba, ra ge puru valai na Vure nau meli na hunu, ga here vona a ragu karaba.
REV 3:13 E rei a viri i ngaru ni longokilala, ge longo kamumu, ge luhoi kado a ngava a Hanuna Vure i taki virihi e huriki a tara na Vure.”
REV 3:14 I ta tabu, i ta maea, “O here lakea na agelo ne huriki a tara na Vure o Laodisia, o here maea: A ngava iea i valai na viri ni gale I Muholi, ra viri i ta muholi, i taki tala a ngava lobo a Vure i takia ge taki. Ia a vuhuna maki lobo a Vure i ratarike.
REV 3:15 A lohoka vona a narone mua. I uka ma mu piu, i uka ma mu rongo. A ngaru mu gu piu, o mu gu rongo!
REV 3:16 I uka ma mu piu, i uka ma mu rongo, mu nami hurari. I mavonga ga muta tala mua na ngavagu,
REV 3:17 a vuhuna mu taki ta mu tahoka a mahala, mu ru kadolu a maki i kupo, i uka ma mu ngarua tara maki. Pali mu matasia hateka, mu bala a maki, mu kepa, mu kabobo.
REV 3:18 Ngane a taki mua, a gol nau ni gutu na kanono i maga hateka. Mu konea, mu gu tahoka a mahala. Mu kona nau a varakia keakea, mu gu kavitagu mua vona, i uka ma mu gu kabobo, i uka ma mu gu maruhu tabu. Mu kona nau a marasin na matane mua, mu gu matai tabu.
REV 3:19 Iau a tahate e huriki a bakovi a ngatavine a ngaru hateka ria, a habi a nimadihi ne ria. I mavonga, mu habi a hatene mua ni pulo a vilone mua.
REV 3:20 Mu longo! A pesi na logo, a tutulidi. E rei a viri i longo a lohogu, i talea a logo, iau bara dili, a kani turana.
REV 3:21 E rei a viri i mulangi, bara ratea ge made turagu na gula hariki nau, i manga a hini iau tara a mulangi hosi, a made turane Tata na gula hariki vona.
REV 3:22 E rei a viri i ngaru ni longokilala, ge longo kamumu, ge luhoi kado a ngava a Hanu Kiripiripi i taki virihi e huriki a tara na Vure.”
REV 4:1 Muri a mata lakea, a masia a logo i mata ka na hunu. Muri, a longo tabu a lohona viri a longo mugea, ra viri i nangi dagi manga a nangina tavure. I taki iau, i ta maea, “O sike valai. Ga vakasiri ioe vona a maki ge bele muri ma.”
REV 4:2 Malaviriri kunana, a Hanu Kiripiripi i bele tora nau, a matai a gula hariki i tabuli na hunu, a bakovi tara i made vona.
REV 4:3 A bakovi iea i para hidi manga a kedo a iaspa, a kedo a kanelian. A kuriki i pesi halui a gula hariki, i para manga a kedo goma goma ni gale a emeral.
REV 4:4 A gula hariki i ravulu rua a polona i va ri pesi halui a gula hariki iea. E huriki a nupesi ala ravulu rua a polona i va ri made na gula hariki nga. Ri rodo a varakia keakea, ri kube a tama hariki ni rata na gol.
REV 4:5 A matai a vila i maravila tala na gula hariki, a longoa a nangina hini i kururu. A nipara i polorua ri huvi na ngalana gula hariki. Ra nipara nga, a hanuna Vure i polorua.
REV 4:6 A maki manga a dari i malilo kamumu, i mata manga a glas, i maga hateka, i tabuli na ngalana gula hariki iea. A maki mahuri i va to pesi halui a gula hariki, na tabekena i va. A matane tou i kupo hateka, to kavitagu a ngalane tou, a bitone tou.
REV 4:7 A viri tara i mata manga a laion. A viri tara i mata manga a tuna bulmakau. A viri tara, a matana i mata manga a matana bakovi. A viri tara i mata manga a loha i bebe.
REV 4:8 Ra maka maki mahuri nga, tou lobo to tahoka a karapane tou i polotara. Tou lobo to tahoka a matane tou i kupo na tabeke lobo. Pololilo na karapane tou ranga, i vona a matane tou i kupo. I uka ma ri malo ni kavurikea a Vure. Na haro, na rodo ri ta maea,
REV 4:9 Na tahuna a maki mahuri nga to vakabagetua, to togoa, to kavurikea ra viri i made na gula hariki, ra viri i mahuri vakaroro,
REV 4:10 lakea e huriki a nupesi ala ravulu rua a polona i va ri tabuli puru na ngalana, ri kavurikea ra viri i made vakaroro. Ri voro puru na vahana a tama hariki ne ria, ri ta maea,
REV 4:11 “O Bakovi Dagi ne mia, a Vure ne mia. Ioe kunana i kara ioe e huriki ri gi vakabagetu ioe, ri gi togo ioe, ri gi kavurike a nitora vomu, a vuhuna ioe o ratarike a maki lobo na ningaru vomu kunana o ratarike ria, ri bele.”
REV 5:1 Muri a matai a viri i made na gula hariki, i nugu na limana a kanena a raukea ola ni pilu. A raukea iea ni here a ngava na ngalana, na bitona varago. Ni tango kapi na tabeke i polorua na buluka na kadel.
REV 5:2 Muri a masia a agelo hateka i gale tala dagi, i nana maea, “E rei a bakovi kamumu, i kara ia ge laga vuroki a buluka na kadel ni tango kapi a raukea iea, ge vevea?”
REV 5:3 Pali i uka tara viri meli na hunu, o na malala, o polotano na malala ge kara ia ge vevea a raukea iea, ge masia.
REV 5:4 Lakea a vakatubu ni tangi dagi, a vuhuna i uka tara viri ge kamumu, ge kara ni vevea a raukea iea, ge masia.
REV 5:5 Pali tara ne huriki a nupesi nga i taki iau, “Naha ni tangi. O mata lakea! A viri ni gale a Laion na kabu ne Iuda, ra Hamone Davit, i mulangi. Ngane i kara ia ge laga vuroki a buluka na kadel i polorua, ra ri kapi karia a raukea, ge vevea.”
REV 5:6 Muri a masia a Tuna Sipsip, i mata manga ni rabalaki pali. I pesi na kurukuruna gula hariki, e huriki a maki mahuri i va. E huriki a nupesi ri pesi haluia. I tahoka a tupina i polorua, a matana i polorua, ra hanuna Vure i polorua ni rudu tala na tabeke lobo na malala.
REV 5:7 A Tuna sipsip i laho lakea, i bolea a raukea iea na limana kanena viri i made na gula hariki.
REV 5:8 I bole loboa a raukea iea, muri a maki mahuri i va, turana e huriki a nupesi ala ravulu rua a polona i va, ri tabuli puru na ngalana Tuna Sipsip. Ria lobo ri nugu a hap turana ulo ni rata na gol ri vona a havu mangisipa. A havu iea a maka nivasileki ne huriki a tara na Vure.
REV 5:9 Lakea ri kaloloa a linge karaba, ri kalolo maea, “Ioe kunana, i kara ioe go bolea a raukea iea, go laga vuroki a buluka ni pipikari vona, a vuhuna ni rabalaki ioe, a daramu i konamule e huriki a bakovi a ngatavine, ri gi ne vona a Vure. O kona tala ria na kabu lobo na malala, a tabele lobo na malala, a kuli lobo na malala, na robo lobo na malala.
REV 5:10 O rata ria ri bele manga a harikia, a prister na Vure ne hita. Ri gi matakari na malala.”
REV 5:11 Muri a mata lakea, a longo a lohone huriki a agelo ala kupo, ala kupo hateka, ni keri ni gi! Ri pesi halui a gula hariki, a maka maki mahuri, e huriki a nupesi,
REV 5:12 ri gale tala dagi, ri ta maea, “E huriki lobo ri gi kavurikea a Tuna Sipsip, ra ni rabalaki! Ri gi matakilaka vona a nitora dagi vona, a mahala dagi vona, a lohokanga vona, a harikianga vona! Ri gi togoa, ri gi vakabagetua, ri gi kavurikea!”
REV 5:13 Muri a longo a maki mahuri lobo na hunu, a maki mahuri lobo na malala, polotano na malala, pololilo na dari, ria lobo ri ta maea, “A viri i made na gula hariki, turana Tuna Sipsip, si gi vakabagetu, si gi togo, si gi kavurike vakaroro rua!”
REV 5:14 A maki mahuri i va ri ta maea, “I muholi!” Lakea e huriki a nupesi ri tabuli puru, ri kavurike rua.
REV 6:1 Ngane a masia a Tuna Sipsip i laga talea tara buluka ni pipikari a raukea vona. Lakea tara ne huriki a maki mahuri ala va i ta dagi manga a hini i kururu, i ta maea, “O valai!”
REV 6:2 A mata lakea, a matai a hos keakea! A bakovi i rike vona i nugu a kiniperi. Ni habi vona a tama hariki. Ia a bakovi hateka. I pagitala ge vaubi ne huriki, ge mulangi.
REV 6:3 Na tahuna a Tuna Sipsip i lagea a ruana buluka ni pipikari a raukea vona, lakea a longo a ruana maki mahuri i ta maea, “O valai!”
REV 6:4 Lakea i pagitala tabu tara hos, a hos vururu. A bakovi i rike vona, ni habi vona tara bainat dagi, ni habi a nitora ge vakalobo a nivalemu na malala, e huriki a bakovi ri gi varabalaki.
REV 6:5 Na tahuna a Tuna Sipsip i lagea a toluna buluka, a longoa a toluna maki mahuri i ta maea, “O valai!” Lakea a mata lakea, a hos katokato i pagitala valai! A bakovi i rike vona i nugu a skel.
REV 6:6 Lakea a longo a lohona viri i pesi na kurukurune huriki a maki mahuri i va, i ta maea, “A mapana maki ni kani i rike hateka! A lita na vit ni gi kona na mapana bakovi i leho na parava i taku. A lita i tolu na barli ranga, ni gi kona na mapana bakovi i leho na parava i taku. Pali naha ni ratapile a vina oliv, naha ni ratapile a vain!”
REV 6:7 Na tahuna a Tuna Sipsip i lagea a vuana buluka, lakea a longoa a lohona vuana maki mahuri, i ta maea, “O valai!”
REV 6:8 A mata lakea, a masia a hos havura! A bakovi i rike vona, a rana e Matenga. A viri ni gale A Murine Huriki Ri Mate Pali i muri vona. Ni habi ne rua a nitora ni rabalaki e huriki ala kupo (¼) Ru gu rabalaki ria na bainat, na pago, na gilanga dagi, ru gu rudu a maka maki ri tegi na robo ri gi kara mate ria.
REV 6:9 Na tahuna a Tuna Sipsip i lagea a limana buluka, a matai a hanune huriki ri made na taruna dede na nihabi. Re huriki nga ni rabalaki a vuhuna ri taki tala ne huriki a nitana Vure.
REV 6:10 Ra hanune huriki nga ri gale dagi, ri ta maea, “O Bakovi Dagi, ioe o tahoka a nitora lobo. Ioe o kiripiripi. Ioe a vuhuna ngava muholi. Garika go pelekado e huriki na malala, go koli a naro hale ne ria, ri rabalaki mia?”
REV 6:11 Muri ni habi ne ria a varakia ola keakea, ni taki ria ri gi dava popote taro, ge harena na tahuna e huriki e turane ria, ra ri leho palupu, ge rabalaki ria taro e huriki, i manga a hini ria ranga ni rabalaki muga. A Vure i lohoka i riva e huriki ri gi mate maea.
REV 6:12 Na tahuna a Tuna Sipsip i lagea a polotarana buluka, a vuruke dagi i bele na malala. A haro i kato manga a gabu. A keva i mapulo i vururu manga a dara.
REV 6:13 A maka hada na hunu ri mapasi puru na malala, i manga a kanena kai a pik i pado, ri mapasi na vilu dagi.
REV 6:14 A hunu ni lopi manga a raukea, i marakavelu. A maka lolo lobo, a bodu lobo ri ha taro a murine ria, ri mariu lakea na hini ranga.
REV 6:15 Lakea e huriki a hariki na malala, e huriki a bakovi dagi, e huriki a ubu na tara, e huriki a bakovi na mahala, e huriki ri tahoka a nitora, e huriki lobo, re huriki a vorakato, e huriki i uka ma ria a vorakato, ria lobo ri ha, ri kapiloho pololilo na maka babe, polotano na maka kedo dagi na lolo.
REV 6:16 Ri gale tala, ri taki a maka lolo, a maka kedo, ri ta maea, “Mu taho mia, mu ruhulolo mia na matana Viri i made na gula hariki, mu ruhulolo mia na rongova na Tuna Sipsip,
REV 6:17 a vuhuna a parava dagi na rongova ne rua i bele ngane. Pali e rei ge mahuri?”
REV 7:1 Muri a masia a agelo i va ri pesi na harena malala i va, ri kapi kari a vilu na malala i va, nahea ri gi ngalu a malala, a dari, a maka kai.
REV 7:2 Muri a masia a agelo tara i valai na nirikena haro. I nugua a kilakila na Vure Mahuri, i gale tala dagi, i taki a agelo i va, ra ni habi ne ria a nitora ni ratapile a malala a dari,
REV 7:3 i ta maea, “Mu dava. Naha ni rata hale ma a malala, a dari, a maka kai. Mi gi ru taro a kilakila na Vure ne teu na dumene huriki a vora vona.”
REV 7:4 Muri a longo ri ala riva e huriki ni ru a kilakila ne ria. Ri ala 144,000, ri valai na kabu lobo ne Israel.
REV 7:5 Ri ala 12,000 ri valai na kabu ne Iuda ni ru a kilakila ne ria. Ri ala 12,000 ri valai na kabu ne Reuben. Ri ala 12,000 ri valai na kabu ne Gad.
REV 7:6 Ri ala 12,000 ri valai na kabu ne Aser. Ri ala 12,000 ri valai na kabu ne Naptali. Ri ala 12,000 ri valai na kabu ne Manase.
REV 7:7 Ri ala 12,000 ri valai na kabu ne Simeon. Ri ala 12,000 ri valai na kabu ne Levi. Ri ala 12,000 ri valai na kabu ne Isakar.
REV 7:8 Ri ala 12,000 ri valai na kabu ne Sebulun. Ri ala 12,000 ri valai na kabu ne Iosep. Ri ala 12,000 ri valai na kabu ne Bensamin.
REV 7:9 Muri a matai a tara dagi hateka, ni keri ni gi! Ri valai na robo lobo na malala, na kabu lobo na malala, na kuli lobo na malala, na tabele lobo na malala. Ri pesi na ngalana gula hariki, na ngalana Tuna Sipsip. Ri rodo a varakia ola keakea, ri nugu a pagana niu.
REV 7:10 Ria lobo ri gale dagi, ri ta maea, “A Vure ne hita, ra i made na gula hariki, i korimule hita! A Tuna Sipsip tara, i korimule hita!”
REV 7:11 E huriki a agelo lobo ri pesi haluia a gula hariki, e huriki a nupesi, a maki mahuri i va. Ri tabuli puru na matane ria, na ngalana gula hariki, ri kavurikea a Vure,
REV 7:12 ri ta maea, “I muholi! A Vure ne hita i bagetu kamumu hateka! I tahoka a nipara dagi hateka! I tahoka a lohokanga lobo! Si gi kavurike vakaroro ia! Si gi togo vakaroro ia! I tahoka a nitora lobo! I tuhaka hateka! I muholi!”
REV 7:13 Muri tara ne huriki a nupesi i nana iau, “Re huriki nga ri rodo a varakia ola keakea, ria e rei? Ri valai vai?”
REV 7:14 Lakea a koli a ta maea, “Bakovi dagi ioe o lohoka ne ria.” Muri i taki iau, i ta maea, “Ri pagitala valai na tahuna maregoa dagi. Ri loi a varakia ne ria na darana Tuna Sipsip, lakea ri kea mahaha.
REV 7:15 “I mavonga ri pesi na ngalana gula hariki na Vure. Na haro, na rodo ri kavurike ia kunana. A viri i made na gula hariki ge made turane ria, ge matakari ria.
REV 7:16 I uka ma ri gi vitolo tabu. I uka ma ri gi marohu tabu. A haro i uka ma ge kani ria. I uka ma ri gi kakarongo tabu,
REV 7:17 a vuhuna a Tuna Sipsip, ra i pesi na ngalana gula hariki, ge matakari ria manga a matakari na sipsip. Ge tuli ria, ri gi lakea na naru bele, ra naru na nimahuri. A Vure ge ravunu na matane ria a luhane ria, i uka ma ri gi tangi tabu.”
REV 8:1 Na tahuna a Tuna Sipsip i laga vuroki a poloruana buluka ni pipikari a mapiluna raukea vona, e huriki na hunu ri mangaulu tata, i uka ma ri ta, i harena na minit i 30.
REV 8:2 Muri a matai a agelo ala polorua nga, ra ri pepesi na ngalana Vure. Ni habi ne ria a tavure i polorua.
REV 8:3 A agelo tara i valai, i pesi tabukoi na dede na nihabi. I nugu a ulo ni rata na gol. Ni habi vona a havu mangisipa i kupo ge habi turana maka nivasileki ne huriki a tara na Vure, ge habi na dede na nihabi, ra ni rata na gol, i pesi na ngalana gula hariki.
REV 8:4 A pokona mangisipa, turana maka nivasileki ne huriki a tara na Vure, ru malaga rike na limana agelo, ru sike na matana Vure.
REV 8:5 Muri, a agelo i bolea a ulo iea, i tahonia na kanono na dede na nihabi. I voro purua na malala, lakea i kururu i pelaka, i maravila, a vuruke i pulua a malala.
REV 8:6 Muri a agelo i polorua, ra ri nugu a tavure i polorua, ri dava ni vaki.
REV 8:7 A agelo muga i vakia a tavure vona, lakea a vala kedo turana kanono, a dara, ni voro puru na malala. A maka maki ni nagi na tabeke i tolu. A tabekena malala i taku, a tabekena kai i taku ni gutu na kanono, i lobo. A varili lobo na malala i nono lobo liu.
REV 8:8 A ruana agelo i vakia a tavure vona. Lakea a maki tara i manga a lolo dagi i nono ni voro puru na dari.
REV 8:9 A maka maki ni nagi na tabeke i tolu. A tabekena tara na dari i mapulo i manga a dara. A tabeke tara na maka maki mahuri na dari ri mate. A maka sip ranga, a tabeke tara ne ria ri mabubu.
REV 8:10 A toluna agelo i vakia a tavure vona. A maka naru ni nagi na tabeke i tolu. Lakea a hada dagi tara ni gale e Vingungu, i huvi dagi, i mapasi tala na hunu, i puru na tabekena tara na maka naru, a naru bele. Lakea a maka naru ri mapulo, ri vagole. Lakea e huriki ala kupo ri mate a vuhuna ri ninu a naru vagole iea.
REV 8:12 A agelo i va i vakia a tavure vona. Muri a haro, a keva, a maka hada ni ubi, lakea a nipara ne ria i puru. A haro, a rodo, ranga, ni ratapile. Na haro, i uka ma i para a haro na tahuna ranga. Na rodo, a keva a hada i uka ma ri para na tahuna ranga.
REV 8:13 Muri a masia a loha, i bebe polo meli, i gale tala dagi, i ta maea, “A vuranga! A vuranga! A vuranga i popote ge bele ne huriki ri made na malala na tahuna a agelo i tolu, ra to tabana, to go vaki a tavure ne tou!”
REV 9:1 Muri a limana agelo i vakia a tavure vona, lakea a masia a hada i mapasi tala na hunu, i puru na malala. Ni habi vona a ki na lovo i marangeo.
REV 9:2 I talea a logo na lovo i marangeo, lakea a pokona kanono dagi i poko tala vona, i ratea a hini i katoki, i kavitagua a haro.
REV 9:3 Muri a kabuna koa ri pagitala vona a pokona kanono iea, ri puru valai na malala. Ni habi ne ria a nitora ni tura e huriki, i manga a maka kira.
REV 9:4 Ni taki ria nahea ri gi ratapile a varili, a maka hurumade, a maka kai. Ri gi ratapile kunana e huriki a bakovi a ngatavine ri uka kilakila na Vure ge tabuli na dumene ria.
REV 9:5 Ni taki ria ri gi vakamadihi hale e huriki nga na keva i lima, pali i uka ma ri gi rabalaki ria. Ri vakamadihi ria na nimadihi na kira i tura a viri.
REV 9:6 Na tahuna iea, e huriki bara ri ngaru ni mate, pali bara ri keri. Ri gi matakana a dala na nimate, pali bara ri keri ni mate.
REV 9:7 A maka koa nga, ri mata manga a hos ni kisi na vabinga. Ri kube a maki i mata manga a tama hariki ni rata na gol. A matane ria i manga a bakovi.
REV 9:8 A vune ria i ola, i manga a vuna ngatavine. A ngine ria i manga a ngina laion.
REV 9:9 Ri rodo na ngalane ria a maki manga a galeu ni rata na aen. A nangina karapane ria i manga a nangina a maka hos i kupo hateka ri lalu a karis, ri nunu lakea na vabinga.
REV 9:10 A kuna ria i manga a kuna kira, i tahoka a nitora ni habi a nimadihi ne huriki a bakovi a ngatavine na keva i lima.
REV 9:11 A hariki ne ria, a agelo na lovo i marangeo. A rana a hariki iea na nita Hibru, e Abadon. Na nita Grik, ni gale Apolion.
REV 9:12 A mugana vuranga i lobo. A vuranga i rua ru tabana.
REV 9:13 Muri a polotarana agelo i vakia a tavure vona, lakea a longo a lohona viri i pagitala na tupina i va na dede na nihabi ni rata na gol, ra i tabuli na ngalana Vure.
REV 9:14 A lohona viri iea i takia a polotarana agelo, ra i nugu a tavure, i ta maea, “O puga a agelo ala va, ra ni kolo tabukoi na naru dagi e Iupretis.”
REV 9:15 Lakea i vano, i puga a agelo i va nga, ra ni kolo puru hosi, ri gi davea a pida, a keva, a parava, a aua iea. E huriki a bakovi a ngatavine na malala ni kalipida na tete i tolu. Lakea e huriki a agelo nga, ri gi vano, ri gi rabalakia a tete i taku.
REV 9:16 E huriki a nugumaheto ra ri rike na hos ri ala 200 milion. A longo ni gi tala ria.
REV 9:17 A matai na vuregu, a maka hos nga, turana e huriki ri rike ne ria ri mata maea: ri rodo a galeu na ngalane ria, ni kalu ri vururu manga a kanono, ri goma goma manga a hunu, ri ngango ngango manga a viku. A gina maka hos nga ri mata manga a gina laion. I pagitala na ngutune ria a pokona kanono, a viku.
REV 9:18 Ri rabalaki e huriki a bakovi a ngatavine ala kupo na maki hale i tolu: a kanono, a pokona kanono, a viku. A maki i tolu nga, to pagitala na ngutune ria,
REV 9:19 a vuhuna a nitora na maka hos nga, i tabuli na ngutune ria, na kune ria. A kune ria i manga a mata, ri kara mate e huriki.
REV 9:20 E huriki a bakovi a ngatavine, ra i uka ma ri mate na maki hale i tolu nga, i uka ma ri pulo a vilone ria, i uka ma ri lobo ni vasileki na hanitu, a nitamina vure ni rata na gol, a silva, a brans, a kedo, a kai. A maka nitamina vure nga ri keri ni matai, ri keri ni longo, ri keri ni laho.
REV 9:21 E huriki nga, ri rabalaki a viri, ri rata a muto, ri mole, ri panaho, i uka ma ri pulo a vilone ria, ri gi ngalahere na maka naro hale nga.
REV 10:1 Muri a matai tabu tara agelo hateka i puru valai na hunu. A bubu i kavitagua. A kuriki i pesi haluia a gina. A matana i para manga a haro. A vahana ru para manga a kanono.
REV 10:2 I nugua a raukea ni veve na limana a kanena. A vahana a kanena i vakapesi langea na dari. A vahana a maurina i vakapesia na malala.
REV 10:3 I gale tala dagi hateka, i manga a laion i roro, lakea a kururu i polorua ri koli.
REV 10:4 Na tahuna a kururu i polorua nga ri koli, ta ga here puru a ngava ri taki, pali a longo tabu a lohona viri tara i ta valai na hunu, i ta maea, “Naha ni here a ngava na kururu i polorua nga. O ruhulolo kunana.”
REV 10:5 Muri a agelo, ra i pesi na dari a vahana tara, na malala a vahana tara, i toto rike na hunu a limana a kanena,
REV 10:6 i kaba na rana Viri i mahuri vakaroro, ra viri i ratarike a hunu, a maka maki lobo pololilo vona, turana malala, a maka maki i tabuli vona, turana dari, a maka maki i tabuli pololilo vona. I kaba, i taki i uka tabu ni dava,
REV 10:7 a vuhuna na tahuna a poloruana agelo ge vaki a tavure vona, a niluhoi kapiloho na Vure ge bele muholi. Ge bele manga kunana a Velenga Kamumu a Vure i vakalongo ne huriki a vora vona, re huriki a propet.
REV 10:8 Muri a longo tabua a lohona viri, ra a longo muga, i ta valai na hunu, i ta maea, “O vano, o bolea a raukea ni veve puru pali, ra i tabuli na limana agelo i pesi langa na dari, a malala.”
REV 10:9 Lakea a vano maia a agelo, a takia ge habia nau a raukea. Lakea i taki iau, i ta maea, “O bolea, o kania. Bara i ratea a tamudimu ge madihi, pali bara i namika na ngavamu, i manga a ame.”
REV 10:10 A bolea a raukea na limana agelo, a kania. I namika manga a ame, pali na tahuna a kani loboa, i madihi a tamudigu.
REV 10:11 Muri ni taki iau, “O ta propet tabu, o vakalongo e huriki vona a Vure ge rata navai na kabu i kupo, a robo i kupo, e huriki ri ta na tabele legelege, a hariki i kupo.”
REV 11:1 Muri ni habi nau a lebo ne vona ni rovai a maki, i manga a kodo na nilaho, lakea i taki maea iau, “O vano o rovai a niolana, a nibolana roho na Vure turana dede na nihabi. O gi palupu e huriki ri vasileki vonga.
REV 11:2 Pali naha ni rovai a mataruma, polovavo na Roho na Vure. Naha ni rovai, a vuhuna a tabeke iea ni habi ne huriki i uka ma ria a Iuda, ri gi paha katoa a tanga na Vure na keva i ravulu va a polona i rua.
REV 11:3 Ga rudu a bakovi ala rua nau, ru gu taki tala ne huriki a ngava nau. Ru gu rea na varakia katokato, ru gu rata a nita propet na parava i 1,260.”
REV 11:4 A bakovi ala rua nga, rua a kai a oliv i rua, a butu na nipara i rua, ra ri pesi na matana Vure, re Bakovi Dagi na tanga lobo na malala.
REV 11:5 E rei a viri i ngaru ni rata hale rua, a kanono bara i pagitala na ngavane rua, bara i gutu parina e huriki a pile ne rua. E huriki ri ngaru ni rata hale rua bara ri mate vona a naro iea.
REV 11:6 Ru tahoka a nitora ni tukaria a hunu, i uka ma ge boru a vala na parava lobo ru rata a nita propet. Ru tahoka a nitora ni rata a maka naru ri gi mapulo manga a dara. Ru tahoka a nitora ni ratapile a malala na vuranga legelege, na ningaru ne rua.
REV 11:7 Na tahuna ru vakalobo a leho ne rua ni ta propet, e Livoa bara i sike valai na lovo i marangeo, bara i vaubi turane rua. Bara i mulangi, i rabalaki rua,
REV 11:8 lakea a podane rua ru gu tabuli na rosi na tanga dagi, ra ni ta vakakika vona e Sodoma, e Egipto, na tanga ni paditata na kai tavalavala a Bakovi Dagi ne rua.
REV 11:9 E huriki a bakovi a ngatavine na kuli lobo, na kabu lobo, na tabele lobo, na robo lobo na malala ri gi matanono a podane rua na parava i tolu, a kalavana. Ri gi hate kari, nahea ni gi tanu rua.
REV 11:10 E huriki lobo na malala ri gi vivi hateka na matenga ne rua. Ri gi rata a habu dagi, ri gi vahabi a maki, a vuhuna a propet ala rua nga ru habi a nimadihi dagi ne huriki na malala, ru mate pali.
REV 11:11 Pali muri na parava i tolu, a kalavana, a Vure i bango dili ne rua a bangona na nimahuri, ru pesi rike. Lakea e huriki lobo ri matai rua, ri mangenge hateka.
REV 11:12 Muri ru longoa a lohona viri na hunu i ta dagi, i taki rua, i ta maea, “Muru sike valai!” Lakea ru sike na hunu turana bubu, pali e huriki a pile ne rua ri matanono kunana.
REV 11:13 Na tahuna iea kunana a vuruke dagi i pori. A tanga dagi ni nagi na tabeke i ravulu. A tabekena tara, a roho lobo ri mapuka puru. A bakovi a ngatavine ala 7,000 ri mate na vuruke iea, pali e huriki ri tabana ri mangenge hateka, ri vakabagetua a rana Vure na hunu.
REV 11:14 A ruana vuranga i lobo ngane. A toluna vuranga i popote ge valai.
REV 11:15 Muri, a poloruana agelo i vakia a tavure vona. Lakea a longo e huriki ri ta dagi meli na hunu, ri ta maea, “A harikianga na malala ngane ne vona e Bakovi Dagi ne hita, turana e Kristo vona. Ge matakari na parava vakaroro, i uka nilobona.”
REV 11:16 Lakea e huriki a nupesi ala ravulu rua a polona i va, ra ri made na matana Vure na gula hariki ne ria, ri tabuli puru na matane ria, ri kavurikea a Vure,
REV 11:17 ri ta maea, “O Bakovi Dagi, Vure Tuhaka Hateka, mi kavurike ioe. O made ngane. O made hosi. O vakasiri a nitora dagi vomu, o vakatubu ni matakari.
REV 11:18 E huriki i uka ma ria a Iuda, i madihi a hatene ria, pali a rongova vomu i bele. A parava i bele pali, go pelekado e huriki ri mate pali, go rata kamumu e huriki a vora vomu, re huriki a propet, e huriki a tara na Vure, e huriki lobo ri togoa a ramu, e huriki a bakovi tavula, e huriki a bakovi dagi. A parava i bele pali go ratapile e huriki ri ratapile a malala.”
REV 11:19 Muri a Roho na Vure meli na hunu, ni tala. A Tava na Ngava Dagi ni matai i tabuli pololilo na Roho vona. A vila i maravila, i kururu, i pelaka, a vuruke i pori, a vala kedo dagi i boru.
REV 12:1 Muri a kilakila vakaturutu i bele na hunu. A ngatavine i varaki na haro. A keva i tabuli polotano na vahana. I kubea a tama ni rata na hada i ravulu a polona i rua.
REV 12:2 I singou, i bolea a nimadihi, i haloho, a vuhuna i pahea a koma.
REV 12:3 Muri a kilakila tara i bele tabu na hunu. A masia a mata dagi i vururu! A mapana i polorua, a pelengana i ravulu. I kube na maka gina a tama hariki i polorua.
REV 12:4 A maka hada ni nagi na tabeke i tolu, lakea a kuna mata i kovo pasi a tabekena hada i taku, ri boru puru na malala. Ra mata iea, i tabuli na ngalana ngatavine, ra i pahea a koma. I davea a ngatavine ge poda, a vuhuna i ngaru ni kania a koma.
REV 12:5 Muri a ngatavine i podea a koma bakovi, ra viri ge matakari a tanga lobo na malala. Ge matakari ria na naro hateka, i manga a viri i matakari e huriki na lebo ni rata na aen. A ngatavine i poda, pali e tuna ni kini paru na limana, ni bole sike na Vure, na gula hariki vona.
REV 12:6 Lakea a ngatavine i ha lakea na tabeke a Vure i kado puru pali vona, na tabeke i ngeki. I made vonga, ni gi matakari na parava ge 1,260.
REV 12:7 Muri a vabinga dagi i bele na hunu. E Mikael turana e huriki a agelo vona ri vaubi turana Mata Dagi, e huriki a agelo vona. A mata dagi turana e huriki a agelo vona, ri koli,
REV 12:8 pali i uka ma ri gao, i uka ma ri mulangi, lakea ni tono tala ria na hunu.
REV 12:9 Lakea a Mata Dagi ni voro puru. Ra mata hosi ni gale a hanitu, o e Satan. Ra viri i tami e huriki lobo na malala. Ni voro puru na malala turana e huriki a agelo vona.
REV 12:10 Muri a longoa a lohona viri i gale dagi na hunu, i ta maea, “Ngane a Vure i korimule hita pali. A nitora, a harikianga na Vure ne hita i bele pali. A nitora na Kristo vona i bele pali, a vuhuna ra viri i padi virihi bala e huriki e turane hita, ni voro puru pali. Ra viri mona kuduvi i pesi na matana Vure, i padi virihi ria.
REV 12:11 E huriki e turane hita ri mulangi vona pali na darana Sipsip, na ngava muholi ri vakalongo e huriki vona. Ri mulangi a vuhuna i uka ma ri mangenge ni mate.
REV 12:12 I mavonga, mu vivi, mua e huriki mu made na hunu. Pali mua e huriki mu made na malala, mu made na dari, bara mu bole a vuranga! A hanitu i puru valai mai mua. I madihi hateka a hatena, a vuhuna i lohoka vona a parava vona i popote kunana i tabana.”
REV 12:13 Na tahuna a Mata Dagi i matakilaka vona ni voro puru na malala, i vano, i valili vona a ngatavine, ra muga i podea a koma bakovi.
REV 12:14 Pali a ngatavine ni habi a karapana i rua, i manga a karapana loha dagi, ge bebe ha na Mata Dagi, ge lakea na tabeke i ngeki, na tabeke ni gi matakari ia vona na pida i tolu, a kalavana.
REV 12:15 Lakea a mata i muta tala a naru, i tua lakea na ngatavine, ta ge vakapasiri ia vona.
REV 12:16 Pali a malala i koria a ngatavine, i ngapanganga, i todoa a naru, ra i muta talea a mata.
REV 12:17 Muri a mata, i madihi hateka a hatena vona a ngatavine, lakea i vano, i vaubi turana e huriki e tuna ranga, re huriki ri longo mai a vinara na Vure, ri luhoi tora a ngava muholi ne Isu. A mata i vano, i pesi na lavu na dari.
REV 13:1 Muri a masia tara livoa i pagitala na dari. A mapana i polorua. A pelengana i ravulu, i tabuli ne ria a tama hariki i ravulu. Ni here na maka gina takutaku a maka rana. A pelegona rana nga ri ta hale na Vure.
REV 13:2 A livoa iea i mata manga a pusi dagi tara ni gale a lepad. A vahana i manga a vahana bea. A ngavana i manga a ngavana laion. A mata dagi i habi a nitora dagi vona, i habia a gula hariki vona, a nitora ni matakari.
REV 13:3 A gina tara i mata manga i tahoka a harena bainat i mate vona, pali ni vakamahuri pali, a harena bainat i mavu pali. E huriki lobo na malala ri turutu vona, ri ramaia e Livoa iea.
REV 13:4 Ri kavurikea a Mata Dagi, a vuhuna i habi ne Livoa a nitora. Ri kavurike tabua e Livoa, ri ta maea, “I uka tara viri i manga a Livoa iea. E rei i kara ni vaubi turana?”
REV 13:5 A Vure i mata taroa e Livoa, i bibi rike mulea, i harogia a Vure. Ni habi a nitora vona ge matakari e huriki na keva i ravulu va a polona i rua (42).
REV 13:6 Lakea i harogia a Vure, i harogia a rana, i harogia a murina a Vure i made vona, i harogi e huriki ri made na hunu.
REV 13:7 A Vure i mata taroa, i vaubi turana e huriki a tara na Vure, i mulangi. I habi a nitora vona ge matakari e huriki lobo na malala, e huriki a kabu lobo, a kuli lobo, a maka tabele lobo, a maka robo lobo na malala.
REV 13:8 E huriki lobo na malala bara ri kavurikea e Livoa. Pali e huriki a rane ria ni here dili muga na nidoko na malala na buk na nimahuri na Sipsip, i uka ma ri gi kavurikea.
REV 13:9 E rei a viri i ngaru ni longokilala, ge longo kamumu, ge luhoi kado:
REV 13:10 E huriki ni gi lakavu, bara ni lakavu ria. E huriki ni gi rabalaki na bainat, bara ri mate na bainat. I mavonga, e huriki a tara na Vure ri gi hatenono, ri gi luhoi torea a Vure.
REV 13:11 Muri a matai tabua tara livoa, i pagitala valai na malala. A pelengana i rua, i manga a tuna sipsip. A nitana i manga a nitana Mata Dagi.
REV 13:12 I tahoka a nitora manga e Livoa muga, i matakari na rana. I rata e huriki lobo na malala ri kavurikea e Livoa muga, ra viri ni padi a gina, pali i mahuri mule.
REV 13:13 A ruana livoa i rata a maka nivakasiri dagi. A nivakasiri tara i ratea, i vakaboru na hunu a kanono, na matana e huriki a bakovi a ngatavine.
REV 13:14 Ni mata taro ge rata a maka nivakasiri na murina Livoa muga, lakea i tami e huriki lobo na malala, i taki ria ri gi kau a hanuna Livoa iea, ne vona ni togoa e Livoa, a harena bainat i tabuli na gina, pali i uka ma i mate, i mahuri.
REV 13:15 Ni mata taro ge ratea a hanuna Livoa iea ge mahuri, ge ta, ge vakuku ni gi rabalaki e huriki ri koi ni kavurike a hanune Livoa iea.
REV 13:16 A ruana Livoa i vakuku e huriki lobo, e huriki a bakovi dagi, e huriki a bakovi tavula, e huriki ri tahoka a mahala, e huriki a matasia, e huriki a vora, e huriki i uka ma ria a vora, e huriki lobo ni gi ru a kilakila na limana kanene ria, o na dumene ria.
REV 13:17 A kilakila iea, a rane Livoa muga, o a namba na rana. E rei a viri i uka kilakila, i uka ma ge kona a maki, i uka ma ge habi a maki ni gi kona.
REV 13:18 Mu luhoi kamumu. A viri i tahoka a lohokanga dagi ge luhoi kado a namba ne Livoa. A namba vona a namba na bakovi tara, ra 666.
REV 14:1 Muri a mata lakea. A Tuna Sipsip i pesi na lolo e Sion turana e huriki ala 144,000. A rana, turana rane Tamana ni here na dumene ria.
REV 14:2 Muri i roro valai na hunu, i manga a naru dagi i roro, i manga a nangina hini i kururu i pelaka. I nangi manga e huriki ala kupo ri sigi a gita ne ria.
REV 14:3 Ri pesi na ngalana gula hariki, na ngalana e huriki a maki mahuri i va, na ngalana e huriki a nupesi ala 24, ri kalolo a linge karaba. I uka tara viri ge tovoa a linge iea. E huriki ala 144,000, ra ni konamule na malala, ria kunana ri tovoa a linge iea.
REV 14:4 E huriki nga i uka ma ri mahita turana ngatavine. Ri malamala. Ri ramai vakaroro a Tuna Sipsip. I konamule ria ne huriki a bakovi lobo, ri gi ne vona a Vure, ne vona a Tuna Sipsip.
REV 14:5 I uka ma ri tatami kilala, a vuhuna ri malamala.
REV 14:6 Muri a masia a agelo tara, i bebe polomeli, i vakalongo e huriki na malala na Velenga Kamumu, ra i tabuli vakaroro. I vakalongo ne huriki lobo: a robo lobo, a kabu lobo, a maka tabele lobo, a kuli lobo.
REV 14:7 I gale tala dagi, i ta maea, “Mu mangenge na Vure, mu vakabagetua, a vuhuna a parava i bele pali, ge pelekado a narone huriki lobo. Mu kavurikea a viri i ratarike a hunu, a malala, a dari, a maka naru bele.”
REV 14:8 Muri a ruana agelo i valai, i ta maea, “A tanga dagi e Babilon i vurua! I vurua a vuhuna ri tami e huriki lobo ri muri mai a naro hale ne ria ni ngoi lae, i manga a viri i ninu a naru vagole, i manga.”
REV 14:9 Muri, i muri valai a toluna agelo, i ta dagi, i ta maea, “E huriki ri kavurikea e Livoa turana hanuna, ri bole a kilakila na dumene ria o na limane ria,
REV 14:10 bara ri ninu vona a naru vagole na rongova na Vure, i uka ma ge kiroko. A kanono, a viku ru gu ratapile ria na matane huriki a agelo na Vure, na matane Tuna Sipsip.
REV 14:11 A pokona nimadihi ne ria ge poko rike vakaroro. Ri uka nimalo, ri gi bole a nimadihi mavonga na haro, na rodo, re huriki ri kavurikea e Livoa turana hanuna, ri bole a kilakila na rana.”
REV 14:12 I mavonga, e huriki a tara na Vure ri gi luhoi kado ri gi hatenono, re huriki ri longototo a vinara na Vure, ri luhoi torea e Isu.
REV 14:13 Muri a longo a lohona viri i gale na hunu, i ta maea, “O here maea: I vakatubu ngane, e huriki ri luhoi torea e Bakovi Dagi, pali ri mate, ri gi vivi.” A Hanuna Vure i ta maea, “I muholi hateka ri gi vivi. Ri gi malo na leho dagi ri ratea, a vuhuna ni lohoka vona pali a naro kamumu ri ratea!”
REV 14:14 A mata rike tabu, a masia a bubu keakea. I made langa vona a viri i manga a tuna bakovi. I kubea a tama hariki ni rata na gol. I nugu a vito i vere hateka.
REV 14:15 Lakea a agelo tara tabu i pagitala na Roho na Vure, i gale tala dagi, i takia ra viri i made langa na bubu, i ta maea, “A maki ni kani na malala i moro pali. A parava ni mirio i valai pali. O bolea a vito vomu, o vali kadolu!”
REV 14:16 Lakea a bakovi i made langa na bubu i bolea a vito vona, i voro tamali purua na malala, i vali kadolu a maki ni kani i moro na malala.
REV 14:17 Muri a agelo tara tabu i pagitala na Roho na Vure na hunu. Ia tara i nugua a vito i vere hateka.
REV 14:18 Muri a agelo tara i pea a dede na nihabi, i pagitala na Roho na Vure, i valai. A agelo iea i tahoka a nitora ni matakari a kanono na dede. I gale tala dagi, i takia a agelo, ra i nugua a vito vere, i ta maea, “A kanena vain i rara pali. O bolea a vito vere vomu, o vali kadolu na malala a kanena vain, a vuhuna i rara pali.”
REV 14:19 Lakea a agelo i voro tamalia a vito vona, i vali kadolu na malala a kanena vain, i voro dili ria na muri ni paha bebe a vain na rongova na Vure, ni gi paha bebe.
REV 14:20 Ni paha bebe a maka kanena vain polovavo na tanga. Lakea a darane huriki ni paha bebe, i tua tala na murina, i tua na kilomita i 300! A niutu vona, i rike na aen na ngutuna maka hos, ra i manga a mita i taku, a kalavana.
REV 15:1 Muri a kilakila vakaturutu i bele na hunu. I dagi hateka, e huriki ri turutu vona. A matai a agelo ala polorua, ri nugu a vuranga i polorua. A vuranga nga, a iku na maka vuranga lobo, a vuhuna ri gi vakaloboa a rongova na Vure.
REV 15:2 Muri a masia tara maki, i mata manga a dari ni rata na glas, ni pulo turana kanono. A matai tabu e huriki ri rangi mugea e Livoa turana hanuna, ri rangia a namba na rana. Ri pesi na harena dari ni rata na glas, ri nugu a hap, i habi ne ria a Vure.
REV 15:3 Ri kalolo a linge ne Moses, a vora na Vure, a linge na Tuna Sipsip. Ri kalolo maea, “O Bakovi Dagi, a Vure tuhaka hateka! E huriki ri turutu na maka maki o rata, ri dagi hateka! Hariki ne huriki lobo na malala, A naromu i muholi, i malamala!
REV 15:4 O Bakovi Dagi, e huriki lobo ri vakabagetua a ramu, ri mangenge vomu. Ioe kikeri o malamala. E huriki na tanga lobo ri gi valai ri gi kavurike ioe, a vuhuna i bele kavakava a naro kiripi vomu.”
REV 15:5 Muri a masia a Roho na Vure na hunu ni tala, ra Kape na Ngava Dagi.
REV 15:6 E huriki a agelo i polorua ri pagitala valai, ri nugu a vuranga i polorua. Ri rodo a varakia ola keakea, ri kabakaba, ri para hateka. Ri huraki a mota ni rata na gol.
REV 15:7 Tara ne huriki a maki mahuri i va i valai, i habi ne ria a tavila i polorua ni rata na gol. A tavila nga ri vona a rongova na Vure, ra i mahuri vakaroro.
REV 15:8 Ngane a pokona bagetuanga turana nitora na Vure i vakavonu a Roho. E huriki ri keri ni dili na roho, i harena na tahuna a vuranga i polorua na agelo i polorua ri lobo.
REV 16:1 Muri a longoa a lohona viri i gale tala dagi na Roho na Vure, i taki e huriki a agelo ala polorua, i ta maea, “Mu vano, mu guru puru na malala a tavila i polorua nga, ra ri vona a rongova na Vure.”
REV 16:2 Lakea a mugana agelo i vano, i guru puru na malala a tavila vona. I rata mavonga, e huriki ri tahoka a kilakila ne Livoa, ri kavurike a hanuna, i tuvu ne ria a ngarava dagi i rongo hateka.
REV 16:3 A ruana agelo i guru puru na dari a tavila vona. I rata mavonga, a dari i mapulo, i bele manga a darana podana bakovi, lakea a maki mahuri lobo i tabuli na dari ri mate.
REV 16:4 A toluna agelo i guru puru na maka naru, a naru bele, a tavila vona. I rata mavonga, a naru i mapulo i manga a dara.
REV 16:5 Muri a longoa a agelo, ra i matakari a maka naru, i ta maea, “Ioe o Malamala hateka, ra Viri o made ngane, o made hosi. A naro o pelekado e huriki vona i kamumu.
REV 16:6 I kamumu, a vuhuna ri rabalaki e huriki a tara na Vure, e huriki a propet, i tua a darane ria. I mavonga i kamumu o habi ne ria a dara, ri gi ninu!”
REV 16:7 Muri a longoa a dede na nihabi i ta maea, “O Bakovi Dagi, Vure Tuhaka hateka, i muholi hateka, a naro vomu ni pelekado e huriki i malamala, i kamumu.”
REV 16:8 A vana agelo i guru puru na haro a tavila vona, i ratea a haro i gutu parina e huriki.
REV 16:9 A haro i kara hateka, i gutu parina kesi e huriki. Pali i uka ma ri pulo a vilone ria, ri gi vakabagetua a Vure. Ri harogia a rana Vure, ra viri i matakari a maka vuranga nga.
REV 16:10 A limana agelo i guru puru na gula hariki ne Livoa, a tavila vona. A uvo i kavitagua a harikianga vona. A nimadihi dagi i bele ne huriki, lakea ri kani mule a tabelene ria.
REV 16:11 Pali i uka ma ri pulo a vilone ria, ri gi ngalahere na naro hale ne ria. Ri harogia a Vure meli na hunu na nimadihi dagi ri bole, na maka ngarava i tuvu ne ria.
REV 16:12 A polotarana agelo i guru puru na naru dagi e Iupretis a tavila vona. I rata mavonga, a naru dagi e Iupretis i mara, ge kado puru a dala na tara ne huriki a hariki ri gi valai na nirikena haro.
REV 16:13 Muri a matai a hanitu i tolu, to page tala na ngavana Mata Dagi, a ngavane Livoa, a ngavana nitamina propet. A hanitu nga to mata manga a puho.
REV 16:14 A leho na hanitu nga, to go havai, to go rata a nivakasiri, to go tuli valai e huriki a hariki lobo na malala, ri gi vapopo turana maka tara ne ria, ri gi vaubi na parava dagi na Vure i tuhaka hateka ge pelekado e huriki vona.
REV 16:15 “Mu longo! Popote ga valai vakaturutu, i manga a panaho! E huriki i uka ma ri mahita, ri matapara, ri rodo a varakia ri gi vivi, a vuhuna i uka ma ri gi bobo. I uka ma ni gi matai a mudune ria.”
REV 16:16 A hanitu i tolu nga, to tuli valai e huriki a hariki nga, ri vapopo na tanga tara, ra ni gale na nita Hibru e Armagada.
REV 16:17 A poloruana agelo i guru puru na vilu a tavila vona. I rata mavonga, a lohona viri tara i gale tala dagi na Roho na Vure, na gula hariki, i ta maea, “I lobo pali!”
REV 16:18 Muri a vila i maravila, i kururu, i pelaka. A vuruke dagi hateka i pori. Hosi, na tahuna a bakovi i tubu ni made na malala, i valai i harena mona, i uka tara vuruke dagi ge pori maea.
REV 16:19 A vuruke i ratapilea a tanga dagi iea, i pukea na tabeke i tolu. A tanga dagi lobo na malala ri mapuka puru. A Vure i luhoia a tanga dagi e Babilon, i ratea ge ninu a kikei na naru vagole na rongova vona.
REV 16:20 A vuruke i rata a bodu lobo ri marakavelu, a lolo lobo ri mapuka puru.
REV 16:21 A vala kedo dagi i boru valai na hunu, ri taho e huriki. A nimava na vala kedo i taku i manga a kilo i 50! E huriki a bakovi a ngatavine ri harogia a Vure, a vuhuna a vuranga iea i dagi hateka.
REV 17:1 Muri a agelo tara, a turane huriki a agelo ala polorua, ra ri guru tala a tavila i polorua, i valai, i taki iau, “O valai, ga vakasiri ioe vona a Vure ge vakamadihi navai a ngoi dagi, ra i made langa na naru i kupo.
REV 17:2 E huriki a hariki na malala ri rata hateka a naro na molenga turana. Ngane ri manga, i manga a viri i ninu a naru vagole, i manga.”
REV 17:3 Lakea a Hanuna Vure i bele tora nau, a agelo i kaloho iau, miri lakea na tabeke i ngeki. A masia vonga a ngatavine i made langa na livoa vururu. Ni here vona a maka rana ri ta hale na Vure. A livoa iea, a mapana i polorua, a pelengana i ravulu.
REV 17:4 A ngatavine i rodoa a varakia kuakua, vururu. I bagetu vona a maki ni rata na gol, a kedo mata kamumu, a meki. I nugu a kikei ni rata na gol, i vonu vona a naru katoki, ra i manga a kanena naro katoki vona ni mole.
REV 17:5 A rana ni here na dumena matana, i tahoka a pelegona kapiloho. Ni here maea, “A tanga dagi e Babilon. E kinane huriki a ngoi, a kinana maka naro katoki na malala.”
REV 17:6 A masia a ngatavine iea, i ninu pali a darane huriki a tara na Vure, a dara ne huriki ri mate a vuhuna ri vakalongo e huriki ne Isu. I ninu a darane ria, i manga. Na tahuna a masia, a turutu.
REV 17:7 Pali a agelo i taki iau, i ta maea, “I navai o turutu? Ga taki ioe vona a pelegona kapiloho na ngatavine iea, turana livoa i rike vona, i tahoka a mapana i polorua, a pelengana i ravulu.
REV 17:8 Ra livoa o masia, hosi i made, pali ngane i uka. Ngane i popote ge sike valai na lovo i marangeo, ni gi ratapile. E huriki ri made na malala, re huriki, a rane ria i uka ma ni here dili na buk na nimahuri muga na nidoko na malala, bara ri masia a livoa iea, ri ngapa, a vuhuna i muga i made, pali ngane i uka ma i tabuli, pali muri ma bara i bele tabu.
REV 17:9 “Mu luhoi kamumu. A mapana livoa i polorua ri manga a lolo i polorua, ra i made ne ria a ngatavine iea.
REV 17:10 A maka mapana livoa iea, ri manga tabu a hariki ala polorua. A hariki ala lima ri mate pali. Tara i made ngane. Pali a viri tara i uka ma i bele ma. Na tahuna i bele, i uka ma ge made tabaka.
REV 17:11 “Pali a livoa, ra i made muga, pali ngane i uka ma i tabuli, i manga a polotoluna hariki. Ia e turane huriki a hariki ala polorua. Pali bara ni ratapile.
REV 17:12 “A pelengana livoa i ravulu o matai pali, ri manga a hariki i ravulu. I uka ma ri bole ma a nitora. Muri ma bara ri bole a nitora ni matakari, manga a hariki. Bara ri matakari turana e Livoa na parava popote kunana.
REV 17:13 E huriki a hariki nga ri tahoka a ningaru i taku kunana. Bara ri habi na livoa a nitora ne ria ni matakari.
REV 17:14 Bara ri vaubi na Tuna Sipsip, lakea a Tuna Sipsip bara i ratapile ria, a vuhuna ia a Bakovi Dagi ne huriki a bakovi dagi. Ia a Hariki ne huriki a hariki. I gale e huriki ri laho turana, i vulaki ria, ri rata a maki lobo i taki ria ri gi rata.”
REV 17:15 Muri a agelo i ta maea, “A maka naru o masia a ngoi i made langa ne ria, ri manga e huriki a bakovi a ngatavine na robo lobo, na tabele lobo na malala.
REV 17:16 Pali a livoa, ra o masia baroko, turana pelengana, bara ri marikoi a ngoi iea. A livoa tara, ge marikoi vona. Bara ri ratapilea, ri kali tala a varakia vona, ge bobo. Bara ri kani a bobona, ri gutua na kanono ge lobo.
REV 17:17 Ri gi rata mavonga, a vuhuna a Vure i habi a niluhoi ne ria ri gi rata mavonga, ri gi ratea a ningaru na Vure, ri gi tahoka a ningaru i taku kunana, ri gi habi na livoa a nitora ne ria ni matakari, ge matakari, ge vano ge harena na tahuna a nitana Vure i bele muholi.
REV 17:18 “Pali a ngatavine, ra o masia baroko, i manga a tanga dagi i matakari e huriki a hariki na malala.”
REV 18:1 Muri a matai tabua tara agelo i pe a hunu, i puru valai. I tahoka a nitora dagi. A bagetuanga vona i parai a malala, i ratea i palala hateka.
REV 18:2 I gale tala dagi hateka, i ta maea, “A tanga dagi e Babilon i vurua, i vurua pali! Ngane i made vona kunana e huriki a hanitu, a maka kadirovo hale, a maka maki ri tegi ri hale.
REV 18:3 I bele maea, a vuhuna a tanga lobo na malala ri ninu vona a naru vagole na moleanga vona, ri manga. E huriki a hariki na malala ri mole turana. E huriki a bakovi ni habi a maki ni gi kona, ri bole a moni dagi, a vuhuna i kona ne ria a maki i kupo, a vuhuna i ngaru ni tahoka a mahala i kupo.”
REV 18:4 Muri a longo tabu a lohona viri tara i ta valai na hunu, i ta maea, “Mua e huriki a ngate nau, mu ha taroa a tanga iea, ma mu gu ramai a naro hale vona, mu gu bole a vuranga turana.
REV 18:5 A naro hale vona i lolo rike hateka, i padoi a hunu. A Vure i uka ma i longo kaburungi.
REV 18:6 Mu rata virihi ia, i manga a hini i rata virihi e huriki ranga. Mu koli balaka rua a naro hale vona. Mu guru puru na kikei na vain vona a vain i vagole hateka na vain i habi ne huriki ranga.
REV 18:7 I vakabagetu mule ia, i pitei na mahala dagi vona. I mavonga, mu vakamadihia, mu ratea ge dedo. Mu rata mavonga, a vuhuna i taki mulea, i ta maea, ‘Iau a hariki ngatavine. Iau, i uka ma a havuri. I uka ma ge bele nau a vuranga, ga dedo.’
REV 18:8 I mavonga, a vuranga i kupo ge bele vona na parava i taku kunana. A matenga, a nidedo, a vitoloa ge bele vona. A kanono ge gutu parinea, ge lobo, a vuhuna a viri i pelekadoa i gao hateka, ra Vure, a Bakovi Dagi.”
REV 18:9 “E huriki a hariki na malala, ra ri mole turana, ri vivi ni muri mai a ningaru hale lobo na kakaine ria turana, bara ri tangi, ri haloho na tahuna ri masia a pokona kanono vona.
REV 18:10 Bara ri mangenge na nimadihi dagi hateka i bolea, ri pesi basi, ri ta maea, “‘Omo! O tanga dagi-o, ra tanga kamumu e Babilon! A Vure i pelekado ioe, o lobo maki tavula-o.’
REV 18:11 “E huriki a bakovi ri habi a mahala ni kona, ri tangi ngane. E rei ge kona ngane a mahala ne ria?
REV 18:12 E rei ge kona a gol, a silva, a kedo mata kamumu, a meki, a lavalava a mapana i dagi, a lavalava kuakua, a lavalava vururu ne ria. E rei ge kona a kai manginoro, a maki ni rata na togana elepen, a maki ni rata na kai a mapana i dagi, a maki ni rata na bras, a aen, a kedo padikuku ne ria?
REV 18:13 E rei ge kona a kulina kai manginoro ni kuku vona, a insens, a vain, a vel, a plaoa, a vit, a bulmakau, a sipsip, a hos, a karis, a vorakato. E rei ge kona ngane?
REV 18:14 “Bara ri ta maea, ‘A maki kamumu o ngaru hateka na hatemu ni bole, ngane i tabuli basi vomu. A maka mahala o vakabagetu mule ioe vona ri velu pali, i uka ma ni gi matai tabu!’
REV 18:15 E huriki ri habi a maka maki nga ni kona, re huriki ri bole a mahala i kupo na tanga dagi iea, bara ri mangenge na nimadihi dagi i bolea, bara ri pesi basi, ri dedo, ri tangi maea,
REV 18:16 “‘Omo! A tanga kamumu-o, e huriki ri made vona ri rodo a varakia kamumu hateka, a lavalava kuakua, a lavalava vururu. O vakabagetu mule ioe na gol, na kedo mata kamumu, a meki!
REV 18:17 Pali malaviriri kunana, a mahala lobo vona i lobo liu.’ “E huriki a bakovi ni vakanunu a sip, e huriki a taho dari, ra ri leho na dari, bara ri pesi basi,
REV 18:18 ri tangi dagi, ri matanono mavonga a pokona tanga dagi iea, ri ta maea, ‘I uka tabu tara tanga ge kamumu manga a tanga iea.’
REV 18:19 Bara ri dua, ri voro langa na gine ria a habulo, ri haloho, ri tangi dagi, ri ta maea, “‘Omo! A tanga kamumu-o! E huriki a tahona aga ri bole a mahala i kupo vona! Pali malaviriri kunana i vurua, i ngeki.
REV 18:20 Mua e huriki mu made na hunu, mu vivi! Mua e huriki a tara na Vure, e huriki a apostolo, e huriki a propet, mu vivi, a vuhuna a Vure i ratapilea a tanga iea, a vuhuna ri rata hale mua!”
REV 18:21 Muri a agelo hateka i bole rikea a kedo dagi, i manga a kedo ni ubi vila a vit vona. I bolea, i voro purua na dari, i ta maea, “A tanga dagi e Babilon tara, ni gi voro puru hale, i uka ma ni gi matai tabu.
REV 18:22 A nangina gita, a pinoli, a tavure, a kalova i uka ma ni gi longo tabu pololilo vomu. E huriki a mari ni rata a maki i uka ma ni gi matai tabu pololilo vomu. A nangina kedo ni ubi vila a vit i uka ma ni gi longo tabu pololilo vomu.
REV 18:23 A nipara i uka ma ge parai tabu ioe. A lohona bakovi a ngatavine ru parangi karaba i uka ma ni gi longo tabu pololilo vomu. E huriki a bakovi vomu ni habi a maki ni kona, ri dagi hateka ne huriki lobo na malala, o tami e huriki lobo na malala na muto vomu.
REV 18:24 Pali a Vure i matai pololilo vona a darane huriki a propet, e huriki a tara na Vure, e huriki lobo ni rabalaki na malala.”
REV 19:1 Muri a longo meli na hunu a maki i nangi manga e huriki ala kupo hateka ri roro, ri ta maea, “Kavurikea a Vure! A Vure ne hita i gao hateka, i tahoka a bagetuanga dagi, i korimule hita!
REV 19:2 A naro i pelekado e huriki vona i muholi, i malamala. I vakamadihi pali a ngoi dagi, ra viri i vakahale e huriki lobo na malala na moleanga vona. A Vure i koli a narona ni rabalaki e huriki a vora vona.”
REV 19:3 Muri ri gale tala tabu, ri ta maea, “Kavurikea a Vure! A pokona e Babilon i nono bara i sike vakaroro, i uka nilobona.”
REV 19:4 Muri e huriki a nupesi ala ravulu rua a polona i va (24), turana maki mahuri ala va, ri tabuli puru na ngalane ria, ri kavurikea a Vure, ra i made na gula hariki, ri ta maea, “I muholi. Kavurikea a Vure!”
REV 19:5 Muri a longoa a lohona viri tara na gula hariki i ta maea, “Mua e huriki a vora na Vure, mua e huriki a bakovi dagi, a bakovi tavula, ra mu mangenge na Vure, mu kavurikea a Vure ne hita!”
REV 19:6 Muri a longoa a maki i nangi manga a lohona e huriki ala kupo hateka ri roro. I nangi manga a bokona dari i rere, a hini i kururu i pelaka. Ri gale tala, ri ta maea, “Kavurikea a Vure! E Bakovi Dagi, a Vure ne hita i tuhaka hateka, i matakari a maki lobo!
REV 19:7 Si gi vivi, si gi pitei si gi vakabagetua, a vuhuna a parava i bele pali ne Tuna Sipsip ge parangi. E Girihina i kisi puru mule ia pali, i davea.
REV 19:8 Ni habi vona ge rodoa a varakia keakea, i para hateka, i kamumu hateka.” A varakia, ra mapana i dagi hateka, i manga a maka naro kamumu ne huriki a tara na Vure.
REV 19:9 Muri a agelo i taki iau, i ta maea, “O here maea: E huriki a Vure i gale ria ri gi valai na habu na parangia na Tuna Sipsip, ri gi vivi.” Muri i taki iau, “A ngava nga, a ngava muholi na Vure.”
REV 19:10 I ta mavonga, lakea a turume puru na vahana, ta ga kavurikea, pali i koi, i ta maea, “Naha ni rata mavonga! Iau tara a vora vona kunana manga ioe, manga e huriki e turamu, ra ri luhoi tora a ngava muholi ne Isu. O kavurike kunanea a Vure.” A nitora ne huriki ri taki tala a nita propet, a ngava muholi ne Isu.
REV 19:11 Muri a masia a hunu, i mata ka. A masia hos keakea! A viri i rike vona ni gale a ‘Viri Muholi’, a ‘Viri i Rata Lobo a Leho ni Habi Vona.’ I pelekado e huriki na naro i malamala, i vakatubu a vabinga na naro i malamala.
REV 19:12 A matana i manga a huvina kanono. I kube na gina a tama hariki i kupo. Ni here na kulina a rana. A rana iea, i uka tara viri ge lohoka vona. Ia kikeri i lohoka vona.
REV 19:13 I rodoa a varakia olaola, ni lutu na dara. A rana e Nitana Vure.
REV 19:14 E huriki a nugumaheto na hunu ri rike na hos keakea, ri ramaia. Ria lobo ri rodo a varakia keakea karaba.
REV 19:15 A bainat i vere hateka i pagitala na ngavana. Ge ratapile e huriki i uka ma ria a Iuda, “ge matakari hateka ria, i manga a viri i matakari e huriki na lebo ni rata na aen.” Ge pahabebe e huriki na murina ni pahabebe na rongova na Vure i Tuhaka Hateka.
REV 19:16 Ni here na varakia, na lebona a rana tara, ra i maea, ‘A Hariki ne huriki a hariki, a Bakovi Dagi ne huriki a bakovi dagi.’
REV 19:17 Muri a masia a agelo tara, i pesi langa na haro. I gale tala dagi, i taki a maka kadirovo ri bebe na hunu, i ta maea, “Mu valai, mu vapopo, mu davea a habu dagi na Vure.
REV 19:18 Mu valai, mu kani a bobone huriki a hariki, e huriki a ubu, e huriki a bakovi hateka, a maka hos turana e huriki ri rike ne ria, a bobone huriki a vora, e huriki i uka ma ria a vora, e huriki a bakovi tavula, e huriki a bakovi dagi, e huriki a bakovi lobo.”
REV 19:19 Muri a matai e Livoa turana e huriki a hariki na malala, turana maka tara ne ria, ri vapopo ta ri gi vaubi turana viri i made na hos keakea, a tara vona.
REV 19:20 Pali e Livoa ni lakavu turana nitamina propet vona, ra i rata muga a maka nivakasiri dagi na matane Livoa, i tami e huriki ri bole a kilakila ne Livoa, ri vasileki na hanuna. Rua varago ni voro puru mahuri na lovo na kanono, a viku.
REV 19:21 Pali e huriki ranga, a bainat i pagitala na viri i rike na hos keakea i tolo mate ria, lakea a maka kadirovo ri valai, ri kani a bobone ria, ri maru.
REV 20:1 Muri a matai tabu tara agelo, i pea a hunu, i puru valai. I nugua a ki na lovo i marangeo turana sen dagi.
REV 20:2 I puru valai, i lakavua a Mata Dagi, ra mata i laho paru hosi, ra hanitu, e Satan. I lakavua, i kolotatea ge tabuli na pida i ravulu rangale (1,000).
REV 20:3 I voro purua na lovo i marangeo, i tukari tahoa, i uka ma ge tami tabu e huriki, ge vano ge harena na tahuna a pida i ravulu rangale ge lobo. Muri na pida nga, bara ni puga, ge laho na parava popote kunana.
REV 20:4 Muri a matai a maka gula hariki. E huriki ri made ne ria, a Vure i habi a leho ne ria, ri gi pelekado a narone huriki. A matai tabu a hanune huriki a bakovi. E huriki nga ri taki tala a ngava ne Isu, a nitana Vure, i uka ma ri kavurikea e Livoa, o a hanuna, i uka ma ri bole a kilakila vona na dumene ria, na limane ria, lakea ni palakudu a lohone ria. Ngane ri mahuri mule, ri matakari turane Kristo na pida i ravulu rangale.
REV 20:5 Iea a mugana nimahuri mule na matenga. E huriki ri mahuri mule muga ri malamala, a Vure i vakabagetu ria, a vuhuna a ruana matenga i uka ma ge ratapile ria. Ge ria e huriki a prister na Vure, a prister ne Kristo. Ri gi matakari turana na pida i ravulu rangale. Pali e huriki ranga i uka ma ri mahuri mule ma. A pida i ravulu rangale ge lobo taro, muri ri gi mahuri mule.
REV 20:7 Na tahuna a pida i ravulu rangale i lobo, e Satan ni gi puga, ni gi vakaha na bavi vona.
REV 20:8 Bara i pagitala valai, i tami e huriki lobo na tabeke lobo na malala, re huriki a Gog, a Magog. Bara i gale valai ria, ri gi vapopo, ri gi vaubi. Ri ala kupo hateka, ni keri ni gi, i manga a hire na lavu.
REV 20:9 Ri laho na bila dagi na malala, ri pesi halui a mada ne huriki a tara na Vure, na tanga dagi a Vure i ngaru hatekea. Pali a kanono i mapasi tala na hunu, i gutu parina e huriki a nugumaheto nga, ri lobo.
REV 20:10 Lakea a hanitu, ra viri i tami e huriki nga, ni voro puru na darilomu na viku, a kanono, muga a nitamina propet turana e Livoa, ni voro puru vonga. To go bole a nimadihi dagi na haro, na rodo, na parava vakaroro, i uka nilobona.
REV 20:11 Muri a masia a gula hariki keakea dagi, i made vona tara viri. A malala a hunu ru ha taroa, i uka ma ni matai tabu.
REV 20:12 Lakea a matai e huriki ri mate pali, re huriki a bakovi dagi, e huriki a bakovi tavula, ria lobo ri pesi na ngalana gula hariki. A maka buk ni veve. A buk tara tabu ni veve, ra buk na nimahuri. Ni pelekado a narone huriki lobo ri mate pali, i ramai a ngava ni here na buk nga, ra a maka narone ria ri rata hosi na malala.
REV 20:13 E huriki ri mate na dari, ri mahuri mule na matenga. E huriki ri mate pali, ri made na murine huriki ri mate pali, ri pesi rike mule na matenga, lakea ni pelekado ria takutaku, i ramai a narone ria ri rata na malala.
REV 20:14 Muri, a matenga, a muri ne huriki ri mate pali, ni voro puru na darilomu na kanono. A naro iea ni gale a ruana matenga, a darilomu na kanono.
REV 20:15 E rei a viri, a rana i uka ma i tabuli na buk na nimahuri, ni voro puru ria na darilomu na kanono.
REV 21:1 Muri a matai a hunu karaba, a malala karaba. A hunu muga, a malala muga ru lobo. I uka tabu a dari.
REV 21:2 A masia a tanga na Vure, re Ierusalem karaba, i valai na Vure, i puru valai na hunu, i manga a ngatavine i parangi karaba i bagetu kamumu hateka, i davea e girihina.
REV 21:3 A longoa a lohona viri i gale valai na gula hariki, i ta dagi, i ta maea, “Mu longo! A Vure i made turana e huriki a bakovi. Ge made turane ria, ge ria e huriki a ngate vona, ge ia a Vure ne ria.
REV 21:4 Ge ravu vuroki a luhane ria, i uka ma ri gi tangi tabu, i uka ma ri gi mate tabu, i uka ma ri gi dodo tabu, i uka ma ri gi bole tabu a nimadihi, a vuhuna a maka maki hosi i lobo.”
REV 21:5 Lakea a viri i made na gula hariki i ta maea, “Mu longo! A rata a maki lobo ri bele karaba tabu.” Muri i ta maea, “O here puru a ngava nga, a vuhuna ri muholi, ri gi bele muholi.”
REV 21:6 Muri i ta maea tabu, “I lobo! Iau a Alpa, a Omega. Iau a nidoko na maki lobo, a nilobona maki lobo. A habi tavula ne huriki ri marohu a naru i valai na naru bele na nimahuri.
REV 21:7 E huriki ri mulangi, ga habi a maki nga ne ria. Ge iau a Vure ne ria, ge ria e huriki e tugu.
REV 21:8 Pali e huriki ri mangenge, e huriki i uka ma ri luhoi tora, e huriki ri katoki na matagu, e huriki ri rabalaki a viri, e huriki ri mole, e huriki ri rata a muto, a malulu, e huriki ri vasileki na nitamina vure, e huriki ri tatami, a murine ria a darilomu i nono na viku a kanono. Ia ni gale a ruana matenga.”
REV 21:9 Muri a turana e huriki a agelo ala polorua, ra ri guru tala a tavila i polorua na ikuna vuranga i polorua, i valai, i taki iau, i ta maea, “O valai, ga vakasiri ioe vona e Girihina Tuna Sipsip, ra i parangi karaba vona.”
REV 21:10 Lakea a Hanu Kiripiripi i bele tora nau, a agelo i bole sike iau na mapana lolo dagi. I vakasiri iau vona a tanga na Vure, e Ierusalem, i puru valai na Vure na hunu.
REV 21:11 A nipara dagi na Vure i paraia. I bagetu kamumu i manga a kedo i mata kamumu hateka, i manga a kedo a iaspa, a glas.
REV 21:12 A tanga iea i tahoka a nure dagi ni tura halui. I tahoka a logo i ravulu a polona i rua. A agelo i matakari a logo takutaku. A logo takutaku, ni here a rana kabu takutaku ne Israel.
REV 21:13 A logo i tolu to pesi na tabeke na nirikena haro. A logo i tolu to pesi na tabeke mule sike. A logo i tolu to pesi na tabeke mule puru. A logo i tolu to pesi na tabeke na nirolona haro.
REV 21:14 A nure iea, ni hae langa na kedo i ravulu a polona i rua. A kedo takutaku nga, ni here a rana a apostolo takutaku na Tuna Sipsip ala ravulu a polona i rua.
REV 21:15 Ra agelo i ta turagu, i nugu a kodo ni rovai, ni rata na gol, ne vona ni rovai a tanga, a nure vona, turana maka logo vona.
REV 21:16 A harena tanga i va, ri palupulupu. A niolana tanga i palupu turana nibolana. A agelo i rovaia na kodo vona. A niolana, a nibolana a nirike vona i manga a kilomita i 2, 200.
REV 21:17 Muri i rovaia a nure na tanga. I bele manga a mita i 66 na nirovai na bakovi, ra i rovai a maka maki vona a agelo iea.
REV 21:18 A nure ni rata na kedo a iaspa. A tanga ni rata na gol, i maga manga a glas.
REV 21:19 A vuhuna nure na tanga, ni vakabagetu na kedo mata kamumu legelege. A viri muga a kedo a iaspa, a ruana a kedo a sapaia, a toluna kedo a agete, a vana kedo a emeral gomagoma.
REV 21:20 A limana kedo a oniks, a polotarana kedo a kanelian, a poloruana kedo a krisolait, a polotoluna kedo a beril. A polovana kedo a topas. A ravuluna kedo a krisoprase, a ravulu a polona takuna kedo a iasint. A ravulu a polona ruana kedo a ametis.
REV 21:21 A logo i ravulu a polona i rua, ni rata takutaku na meki dagi i taku. A dala na tanga ni rata na gol, i maga hateka, i manga a glas.
REV 21:22 I uka roho na Vure ge tabuli pololilo na tanga dagi, a vuhuna e Bakovi Dagi, a Vure Tuhaka Hateka, rua a Tuna Sipsip, rua a roho na Vure.
REV 21:23 A tanga iea, i uka ma i ngarua a haro, a keva ru gu paraia, a vuhuna a nipara dagi na Vure i paraia, a Tuna Sipsip i manga a nipara vona.
REV 21:24 E huriki a kabu lobo bara ri laho na nipara vona. E huriki a hariki lobo na malala ri gi bole valai a mahala ne ria, ri gi habia na Vure ne vona ni togoa.
REV 21:25 A maka logo vona, i uka ma ni gi tukari, a vuhuna a rodo i uka ma ge puru vonga.
REV 21:26 E huriki na tanga lobo bara ri bole valai vona a mahala ne ria, ri gi habi na Vure ne vona ni togoa.
REV 21:27 I uka tara maki katoki ge dili vona. I uka tara viri i rata a naro ni maruhu vona, o a naro taminga ge dili vonga. E huriki ri gi dili vona kunana, e huriki a rane ria ni here dili na buk na nimahuri na Tuna Sipsip.
REV 22:1 Muri a agelo i vakasiri iau vona a naru na nimahuri. I parahidi manga a glas, i tua tala na gula hariki na Vure, a gula hariki na Tuna Sipsip.
REV 22:2 I tua tala, i tua na kurukuruna dala dagi na tanga. Na gaga varago na naru, a kai na nimahuri ri pesi. Ri vua balaka ravulu a polona i rua (12) na pida i taku. Ri vua na keva takutaku. A pagana kai iea, ne vona ni vakamahuri e huriki na tanga lobo.
REV 22:3 I uka tabu tara maki ni ruduraha. A gula hariki na Vure, na Tuna Sipsip ru gu tabuli na tanga iea. E huriki a vora vona ri gi kavurikea.
REV 22:4 Ri gi masia a matana. A rana bara ni here na dumene ria.
REV 22:5 A rodo i uka ma ge bele tabu vonga. I uka ma ri gi ngarua a nipara, o a haro, a vuhuna a Vure e Bakovi Dagi ia a nipara ne ria. Ri gi matakari turana na parava vakaroro, i uka nilobona.
REV 22:6 Muri a agelo iea i taki iau, “A ngava nga ri muholi, ri gi bele muholi. E Bakovi Dagi, a Vure ne huriki a propet, i rudua a agelo vona, ge vakasiri e huriki a vora vona, a ra maka maki i popote ge valai.”
REV 22:7 E Isu i ta maea, “Mu longo! I popote ga hamule valai! E huriki ri longototo a nita propet i tabuli na buk iea, ri gi vivi.”
REV 22:8 Iau, e Ioanes, iau a viri a longo, a matai a maki nga. Na tahuna a longo ria, a turume puru, ta ga kavurikea a agelo i vakasiri iau.
REV 22:9 Pali i taki iau, i ta maea, “Naha ni rata mavonga! Iau tara a vora manga ioe, e huriki e turamu, e huriki a propet, e huriki ri longo mai a ngava na buk iea. O kavurike kunanea na Vure.”
REV 22:10 Muri i taki iau, “Naha ni ruhulolo a nita propet na buk iea, a vuhuna a parava i popote ge valai.
REV 22:11 E huriki a bakovi hale, ri gi rata mavonga a naro hale. E huriki ri katoki na matana Vure, ri gi katoki mavonga. E huriki a bakovi malamala, ri gi malamala mavonga. E huriki a bakovi na Vure, ri gi ramai mavongea a Vure.”
REV 22:12 E Isu i ta maea, “Mu longo! Ga valai malaviriri, ga habi ne huriki lobo a mapane ria, i ramai a narone ria.
REV 22:13 Iau a Alpa, a Omega. Iau a viri a muga, iau a iku. Iau a nidokona maki lobo, a nilobona maki lobo.
REV 22:14 “E huriki ri loi a varakia ne ria ri gi vivi, a vuhuna a Vure bara i taki ria ri kani na kai na nimahuri, ri gi dili na logo, ri gi dili na tanga.
REV 22:15 Pali e huriki a ligo, re huriki a bakovi hale, e huriki a bakovi na malulu, a muto, e huriki ri mole, e huriki ri rabalaki a viri, e huriki ri kavurike a nitamina vure, e huriki ri ngaru hateka a naro taminga, bara ri made polovavo.
REV 22:16 “Iau e Isu, a rudua a agelo nau ge vakalongo vomu a ngava nga, go taki e huriki a tara nau na tabeke lobo. Iau a vuhune Davit, iau a hamone Davit. Iau a hada e Lagavago.”
REV 22:17 A Hanuna Vure, e girihine Tune Sipsip ru ta maea, “O valai.” E huriki ri longo, ria ranga ri gi ta maea, “O valai.” E huriki ri marohu ri gi valai. E huriki ri ngaru ni ninu ri gi valai, ri gi kiru a naru, i uka ma ri gi konea.
REV 22:18 Mua e huriki mu longo a nita propet na buk iea, mu matadoko. E rei a viri ge ru dili tabu ranga ngava na nita propet iea, a Vure tara ge habi vona a maka nimadihi dagi ni taki tala na buk iea.
REV 22:19 Pali e rei a viri i ravunu vuroki ranga nita propet i tabuli na buk iea, a Vure bara i ratea i uka ma ge kani na kai na nimahuri, i uka ma ge dili na tanga vona, i manga a ngava ni taki tala na buk iea.
REV 22:20 A viri i ta muholi na ngava nga i ta maea, “I muholi, iau ga valai malaviriri.” I muholi. O Isu, a Bakovi Dagi, o valai!
REV 22:21 E Isu a Bakovi Dagi ge rata kamumu hita lobo. I muholi.
