﻿Nnu Nōoŋ.
18.
Yei ni ŋga ntɔgɔ, ǹjəɨ yichəɨ ŋgaŋ ntaoŋ Minnwi, a shwiʼi nu shhɛ llɔ po. A ni mfāʼo ŋkiɛŋ mmɛ ghrɨ́, ŋkuoŋ shhɛ chhɔ shɛiŋ nu nthɛ ndighaʼo yi. 
A mɛ̄iŋ ni ŋkiɛŋ mmɛ ŋggì ŋa, “Mmɛ Babiloŋ gū, a gū! A gū lɨʼɨ chhɔ pa miŋwɛiŋ, mbɔ lɨʼɨ ŋa ŋguoŋ pa jijwɛ pɨphɨ ghà ŋgə̄ɨ ŋkra fɔ ŋguoŋ ndɨɨ nɛ, lɨʼɨ ŋa ŋguoŋ pa mishi pɨphɨ ghà ŋgə̄ɨ ŋkra fɔ ŋguoŋ ndɨɨ ghao, lɨʼɨ ŋa ŋguoŋ pa minyieŋ pɨphɨ, minyieŋ ŋa pi lɔ njiʼi ntāʼa nu nɛ ghà ŋgə̄ɨ fɔ ŋguoŋ ndɨɨ. 
Nthɛ ŋa ŋguoŋ pa laʼataoŋ ghao kwo nnu làʼo tɨtɨnɨ shɔ̄rɔ nu kwoshuoŋ yi, pa fùoŋ ŋkuoŋ shhɛ hɛiŋ kwo pɔ pugu pugu moŋ shúoŋ, pa ghaŋ piʼɛ taŋ ŋkuoŋ shhɛ hɛiŋ kwo gū ghaŋ fàʼo llɔ ŋkuoŋ tɨtɨnɨ pɨ̀ga pugu pa njùʼɔ shúoŋ yi.” 
Nnɛ ǹjaʼo yichəɨ ŋggì po, a chhu nu ŋa, “P̂əɨ taoŋ ni vəɨ moŋ laʼataoŋ ghɔ, ma ŋgwa paŋ, nnɛ ŋa kiʼi pəɨ yiʼi mbɔ ŋgia phɨ yi, pugu pa nɛnnɛ ŋa kiʼi pəɨ shi mbɔ ŋgia ŋgəʼɨ yi. 
Nthɛ ŋa pi kwo kɨrɨ phɨ yi moŋ gwí ti a kuʼɔ ti mbɔ nɔ po. Minnwi kwiŋ ŋguoŋ mbha nnu pɨphɨ pi ghao. 
P̂əɨ fāʼa mbɨŋ yu wuʼɔ nɔ haʼaŋ juju fāʼa mbɨŋ ŋgwa nduoŋ nɛ. P̂əɨ luʼu mbha fàʼa yi ghɔ paa lɨʼɨ. N̂iʼiŋ làʼo moŋ ndua yi a tɨnɨ ti mbɔ paa lɨʼɨ ŋkwaŋ haʼaŋ juju ni niʼiŋ yi ŋgwa nɛ. 
Nɔ haʼaŋ a ni nchhɔ ŋgaʼo noŋ yi nchhɔ nu moŋ nchhɔ́ shiʼi nɛ, nnɛ fɛ ŋgəʼɨ ghɔ pugu pa yuʼɔ njùʼɔ pi nɔ fɨʼɨ ŋkwaŋ ghaʼo noŋ pugu pa nchhɔ́ shiʼi ŋa a ni nchhɔ moŋ ghɔ nɛ. Nthɛ ŋa moŋ njùʼɔ yu a chhu ŋa, ‘Ǹchhɔ pi nɔ ŋgwafuoŋ, ndɔ njiʼi mbɔ pi ŋkugu, m̀baʼa ma njiʼi mfāʼo yuʼɔ njùʼɔ.’ 
Nthɛ yie ghɔ, ŋgəʼɨŋgəʼɨ pi, gu, yuʼɔ njùʼɔ, ni njì shi nthɔ pi taʼa llɛ́ pi lɔ mbɨnɨ ntūoŋ vi ni móŋoŋ nthɛ ŋa Minnwi Taathɔ, ŋa a shaʼa vi nɛ, fāʼo njɨ.” 
Pa fùoŋ ŋkuoŋ shhɛ, ŋa pugu pugu ni mbɔ moŋ nnu kwoshuoŋ, nchhɔ moŋ nchhɔ́ shiʼi pugu pugu nɛ shi ŋkə̄ɨ ndɔ njūa nthɛ vi ndɨɨ ŋa pugu shi njəɨ ndindhi móŋoŋ ŋa a chhɔ ŋkɨɨ vi nɛ. 
Pugu shi ntithi fie hini, moŋ pɔgɔ nu yúʼɔ ŋa pi niʼiŋ nu mbɨŋ yu nɛ, nchhu ŋa, “A nnu wuwuru! A nnu wuwuru! Gɔ̀ mmɛ laʼataoŋ, gɔ̀ mmɛ laʼataoŋ, mbɔ Babiloŋ! Wuʼɔ moŋ taʼa awa, ghaʼa nu mɔ thɔ.” 
Pa ghaŋ piʼɛ taŋ ŋkuoŋ shhɛ kə̄ɨ ndɔ njūa vi, nthɛ ŋa shesheŋoŋ lɔ nuʼuŋ njuoŋ kaku pugu ŋkamuʼɔŋ. 
Shesheŋoŋ shini ndɔ nuʼuŋ njuoŋ pa laoŋgo, pugu yichəɨ ŋkwaŋ tɨ́nɨ tɨnɨnchuoŋ, shɨ́ga pugu pa ŋgùʼɔ tɨnɨnchuoŋ, pi mɛ̄iŋ ni pəə, pa ndhwí tɨnɨnchuoŋ mbɔ yi frǔ, pichəɨ pa ndhwí ŋa a pie shishini, pugu pa pichəɨ ndhwí tɨnɨnchuoŋ pi mɛ̄iŋ ni shilki, pugu pa ndhwí ŋa a pie nɔ pɨ̀ɨ, pugu pa ŋguoŋ ŋkwaŋ thɨ ŋa pugu fāʼo mbwa luŋ nɛ, pa ŋguoŋ pa ŋkwaŋ yaoŋ ŋa pi chwīe ni shua shɨnəɨ nɛ, pugu pa ŋguoŋ yaoŋ ŋa pi chwīe ni thɨ tɨnɨnchuoŋ nɛ, pugu pa yichəɨ ŋkwaŋ tɨ́nɨ mbɔ yi pipie, ni tɨ́nɨ, ni yichəɨ ŋkwaŋ ŋgùʼɔ ŋgwraŋgwra, 
pugu pa shinamoŋ, pugu pa mbhɛ nyiaŋ yaoŋ, pugu pa lěi, pugu pa laminda tɨnɨnchuoŋ ŋa pi mɛ̄iŋ ni məə, pugu fraŋkishɛŋ, pugu pa làʼo, pugu pa wru, pugu pa prupɨna gato, pugu pa shíe gɛ, pugu pa nàʼaŋ, pugu pa minjɨɨ, pugu pa minyieŋləɨ, pugu pa yichəɨ ŋkwaŋ mitu ŋa pi mɛ̄iŋ ni kalɨ, pugu pa kǔna, mbɔ ŋgwamishua. 
Pa ghaŋ piʼɛ taŋ pighɔ chhu ŋa, “Pa maoŋ pwapwa pɛ ŋa ɔ khwā ni njùʼɔ yɔ nɛ taoŋ nɛ mbhɛ mbhɔ ghɔ, ŋguoŋ pa maoŋ nchhɔ́ shiʼi pɔ pugu pa maoŋ shiʼi pɔ phɛ nɛ mbhɔ ghɔ ti mbaʼa ɔ ma nuʼuŋ mbɨnɨ njəɨ ŋkamuʼɔŋ.” 
Pa ghaŋ taŋ pɛ ŋa pugu fāʼo taŋ pighɔ nɛ, ŋa pugu ni ŋkie pi mbhɔ yu ŋgū ghaŋ fàʼo nɛ, shi nthi pi fie hini nthɛ ŋa pugu chhɔ mbɔgɔ nūʼuŋ nu ŋa pi nūʼuŋ vi nɔ ghɔ nɛ, ŋkə̄ɨ nu ndɔ njūa nu ni njɨ, 
nchhu nu ŋa, “A nnu wuwuru! A nnu wuwuru ni mmɛ laʼataoŋ ŋa a ni māʼaŋ pi ŋkiɛŋ ndhwí nɛ, ndhwí ŋa a pie shishini pugu pa ndhwí pipie, mbūoŋ noŋ yi ni laoŋgo pugu pa shɨ́ga ni pa ŋgùʼɔ tɨnɨnchuoŋ pi mɛ̄iŋ ni pəə! 
Nthɛ ŋa moŋ shɨna taʼa awa, ŋguoŋ maoŋ pei ghao shiʼi.” Ŋguoŋ pa taathɔ moŋ ŋkhǐ ghɔ, pugu pa ŋgwa moŋ ghɔ, ni ghaŋ fàʼa moŋ mitu ŋkhǐ pighɔ, pugu pa ŋgwa pɛ ŋa taŋ yugu pɔ pi ŋkuoŋ ŋkhǐ nɛ, thi pi fie hini. 
Pugu ni ŋkə̄ɨ ni njɨ nɔ haʼaŋ pugu ni njəɨ ndindhi ŋa a taoŋ nu moŋ móŋoŋ ŋa a ni nchhɔ ŋkie vi nɛ, ŋa, “A yəɨ laʼataoŋ ŋa a ni mbɔ nɔ mmɛ Babiloŋ?” 
Pugu shāʼo pru thɔ pugu nɔ haʼaŋ pugu ni ŋkə̄ɨ nu ndɔ njūa nu nɛ, ŋkə̄ɨ nu ni njɨ ŋa, “A nnu wuwuru ni mmɛ laʼataoŋ ghɔ, mbɔ lɨʼɨ ŋa ŋguoŋ ŋgwa pɛ ŋa pugu fāʼo pa mitu ŋkhǐ moŋ ŋkhǐ nɛ, tɔgɔ pi ŋkuoŋ fàʼo yi ŋgū ghaŋ fàʼo! Nthɛ ŋa shɨna taʼa awa, a gū gha.” 
Fāʼo pwanjuʼɔ nthɛ vi, ma po, pugu pa ŋgwa Minnwi pi taoŋtaoŋ, pugu pa ghaŋ ntaoŋ Jishɔ, ni pa njəɨlɨʼɨ Minnwi. Nthɛ ŋa Minnwi shaʼa vi mfɛ njɔ́ ghɔ nthɛ vəɨ! 
Nnɛ yichəɨ tɨtɨnɨ ŋgaŋ ntaoŋ Minnwi lɔ̄gɔ ŋgùʼɔ nɔ fɨʼɨ mmɛ ŋgùʼɔ wūʼɔ yaoŋ māʼaŋ moŋ ŋkhǐ, nchhu nu ŋa, “A haʼaŋ pi shi māʼaŋ Babiloŋ pɨphɨ, mbɔ mmɛ laʼataoŋ ghɔ, paʼa pi lɔ ma nuʼuŋ njəɨ vi ŋkamuʼɔŋ. 
Nnɛ ŋggì lóu ŋa pi ghà ŋkraokrao, pugu pa ghaŋ paʼo lóu, pugu pa yi maoŋ tua, ni ghaŋ tua ntàŋ, mbaʼa pi ma nuʼuŋ njaʼo shɨna ghɔ ŋkamuʼɔŋ ki ghaŋ chwīe sheshe ŋkwaŋ maoŋ ni mbhɔ, mbaʼa pi nuʼuŋ njəɨ vugu shɨna ghɔ ŋkamuʼɔŋ ki ŋggì ŋgùʼɔ wuʼɔ yaoŋ, mbaʼa pi nuʼuŋ njaʼo shɨna ghɔ. 
Líʼɛ ŋa laŋ ghà mfɛ nɛ, mbaʼa a ma nuʼuŋ nthɛ shɨna pəɨ ŋkamuʼɔŋ. Ŋggì mimbia láŋ pugu miŋgwɛ fhi, mbaʼa pi ma nuʼuŋ njaʼo shɨna pəɨ ŋkamuʼɔŋ. Nthɛ ŋa ŋgwa ŋa pugu ni nthɔ mbiʼɛ taŋ nɛ ni mbɔ pugu mbɔ pa mmɛ ŋgwa ŋkuoŋ shhɛ. Pəɨ ni mfɨ̄ɨ ŋguoŋ ŋgwa laʼataoŋ ghao ni ŋgáŋ yəɨ. 
Pi ni mfɛ njɔ́ ni Babiloŋ ghɔ nthɛ ŋa pi ni njəɨ ŋa chhǐ pa njəɨlɨʼɨ Minnwi pugu pa ŋgwa Minnwi pi taoŋtaoŋ, pugu pa ŋguoŋ ŋgwa pɛ ŋa pi ni ŋkwo ma njwi nɛ, pɔ mbhɔ yu.” 
