﻿Nnu Nōoŋ.
5.
Nnɛ ǹjəɨ ŋwaʼaŋlɨ ŋgei mbhɔ jɨ ju ghɔ ŋa a ni nchhɔ ŋkuoŋ faaŋ ghɔ nɛ. Pi nāʼaŋ yaoŋ moŋ ghɔ pugu pa ŋkǔnu yi, ndia ni khwachəɨ lěi tɨtɨnɨ. 
Ǹjəɨ yichəɨ mmɛ ŋgaŋ ntaoŋ Minnwi, a chhu ni mmɛ ŋggì ŋa, “A kāʼo gɔ̌ nɔ fēi nu ŋwaʼaŋlɨ yei, ndɔ mbāʼa lěi yei?” 
Ndɔ paʼa yichəɨ ŋoŋ po, ki ŋkuoŋ shhɛ ki laʼo shhɛ lɔ njiʼi mfāʼo njɨ nɔ fēi nu ŋwaʼaŋlɨ ghɔ ki ndīi moŋ yi. 
Ndɔ ǹjɛ̄ kə̄ɨ nu ni njɨ nthɛ ŋa pi shini ndɔ njəɨ yichəɨ ŋoŋ ŋa a ŋkāʼo nɔ fēi nu ŋwaʼaŋlɨ ghɔ ki ndīi moŋ yi. 
Ndɔ yichəɨ taʼa nthishɨ chɨɨchɨɨ ghɔ chhu vəɨ ŋa, “Kiʼi nuʼuŋ ŋkə̄ɨ. Paʼo ŋa a llɔ moŋ ndaaŋoŋ Juda, mbɔ Ŋǐeŋ Fùoŋ Devi, kwo māʼaŋ ti ŋgaʼa ti minthɛ a fēi ŋwaʼaŋlɨ ghɔ pugu pa khwachəɨ lěi ŋa pi lia nɔ ghɔ nɛ.” 
Ndɔ shɨna faaŋ ghɔ pugu pa khwɛ mimaoŋ maoŋ pighɔ, pugu pa thishɨ chɨɨchɨɨ pighɔ, mi ni njəɨ Muuŋ Minjɨɨ a tithi, nɔ haʼaŋ pi sho vi sho, ni khwachəɨ ndua pugu pa khwachəɨ ligi, mbɔ khwachəɨ Jijwɛ Minnwi ŋa pi taoŋ moŋ ŋguoŋ shhɛ ghao. 
A ghə̄ɨ ŋkwe ŋwaʼaŋlɨ ghɔ llɔ ŋgei mbhɔ jɨ ju ŋa a ni nchhɔ ŋkuoŋ faaŋ ghɔ nɛ. 
A ni ŋga kwo kwe ŋwaʼaŋlɨ ghɔ, khwɛ mimaoŋ maoŋ pighɔ pugu paa wuŋ thishɨ chɨɨchɨɨ ni yi khwɛ pighɔ gū shhɨ Muuŋ Minjɨɨ ghɔ, sheshe taʼa yi tuo yaoŋ paʼo lóu pugu pa kumbu ŋa pi chwīe pi ni laoŋgo, laminda lɨnaoŋ moŋ ghɔ, mbɔ luoŋ Minnwi pa ŋgwa Minnwi pi taoŋtaoŋ. 
Pugu yrāo ŋkhǐ fhi, nchhu nu ŋa, “A kāʼo gɔ̀ nɔ lɔ̄gɔ nu ŋwaʼaŋlɨ ghɔ mbāʼa pa lěi ŋa pi lēi nɔ ghɔ nɛ. Nthɛ ŋa pi ni nsho ghɔ, ndɔ ntɔgɔ pi ŋkuoŋ chhǐ yɔ ɔ yuoŋ ŋgwa mfuʼu mfɛ ni Minnwi llɔ moŋ ŋguoŋ kɨrɨ ndaaŋoŋ pugu pa llɔ moŋ ŋguoŋ ŋkwaŋ chrà taoŋtaoŋ pugu pa kɨrɨ pa ŋgwa pugu pa laʼataoŋ. 
Ndɔ mbɨnɨ nchwīe vugu pugu shaʼafuoŋ mbɨnɨ mbɔ ghaŋ fɛʼiŋgiɛŋ Minnwi yia, ndɔ pugu lɛ nshaʼa fùoŋ yugu ŋkuoŋ shhɛ.” 
Nnɛ m̀bɛʼi njaʼo ŋggì ntou ghaŋ ntaoŋ Minnwi, pugu yiɛŋ ti mbɔ shia kie, ti mbɔ pi ŋkaŋŋkaŋ yugu, ŋkɨŋ faaŋ ghɔ pugu pa mimaoŋ maoŋ pugu pa yəɨ pa thishɨ chɨɨchɨɨ pighɔ. 
Pugu chhu nu ni mmɛ ŋggì ŋa, “A kāʼo Muuŋ Minjɨɨ ŋa pi ni nsho vi ŋa a kwe ghrɨ́, pugu pa fàʼo pugu pa shiethɔ, pugu pa njɨ ni ghaʼo nu, ni ndighaʼo, pugu pa mbɔrɔ.” 
Ndɔ m̀bɨnɨ njaʼo ŋguoŋ mimaoŋ ŋa pi chwīe nɛ po pugu pa ŋkuoŋ shhɛ pugu pa laʼo shhɛ pugu pa mooŋ ŋkhǐ pugu pa ŋguoŋ maoŋ ŋa a pɔ moŋ ŋguoŋ yugu ghao nɛ chhu nu ŋa, “Mbɔrɔ, ghaʼo nu pugu pa ndighaʼo ni ghrɨ́ ki ndugwi yi pɔ ni ju yɛ ŋa a chhɔ ŋkuoŋ faaŋ nɛ, pugu Muuŋ Minjɨɨ ghɔ.” 
Khwɛ mimaoŋ maoŋ pighɔ chhu ŋa, “A pɔ nɛnnɛ!” Pa thishɨ chɨɨchɨɨ pighɔ gū shhɛ ŋgaʼo vi. 
