﻿1 Timoti.
4.
Jijwɛ Minnwi chhu ŋa moŋ pa ndugwi llɛ́ pei, pichəɨ ŋgwa shi ntaoŋ moŋ piŋ mfɛ noŋ yugu ni pa jijwɛ mifɨɨ pugu pa yaoŋ yɛʼi ŋa pa miŋwɛiŋ tāʼa nu ŋa ŋgwa thi ŋkuoŋ ghɔ nɛ. 
A ghà nshɛ̄rɛ ghaŋ mifɨɨ, mbɔ pa ndɛʼi ŋgiɛŋ, shɛ̄rɛ ŋkwaŋ yaoŋ yɛʼi yei, ŋgwa pei pɔ pi ŋgwa pɛ ŋa ŋgaŋthɔ yugu lɔ njiʼi nji khu nduŋ nɛ. 
Pugu ŋgwa pɛ ŋa pugu lāa láŋ, pugu pa pichəɨ ŋkwaŋ maoŋ jɨ, mbɔ pa maoŋ jɨ ŋa Minnwi chwīe ŋa ŋgwa pɛ ŋa pugu piŋ ndɔ nji nnu shini nɛ, jɨ ni tōo nu. 
Ŋguoŋ yaoŋ ŋa Minnwi chwīe nɛ pwa, paʼa ndɔ mbie ŋa pi lāa sheshe yaoŋ nɔ haʼaŋ p̈i ŋkwe ni tōo nu. 
Nthɛ ŋa pi ghà nchwīe a pɔ yi taoŋtaoŋ ntɔgɔ pi ŋkuoŋ chrà Minnwi pugu luoŋ Minnwi. 
Ɔ̈ mfɨ̄ʼɨ nnu pei ni ŋguoŋ pichəɨ ghaŋ piŋ, ɔ pɔ ŋkiɛŋ muuŋ fàʼa Krishto Jishɔ, ŋa a chhɔ ŋkugwi noŋ yi moŋ pa chrà ŋa ghaŋ piŋ thi ŋkuoŋ ghɔ nɛ pugu pa ŋkiɛŋ yaoŋ yɛʼi ŋa ɔ ni ŋkwo thɔ njōu njiŋ yi nɛ. 
Kiʼi mfāʼo nnu pəɨ pa mishweishwei ghagha ŋa a lɔ ŋgɛ̄rɛ ghɔ ŋa ɔ ji Minnwi nɛ, ka thɔ njɛʼi noŋ yɔ pi nɔ fāʼo nu chɔmbhi pɔgɔ Minnwi. 
Nthɛ ŋa nɔ haʼaŋ yɛʼi nu frɛinoŋ ni pa yaoŋ ŋa a shi nchwīe a pɔ shiʼi fāʼo yichəɨ fɨʼɨ ghɛ̀rɛ nɛ, chɔmbhi pɔgɔ Minnwi fāʼo ghɛ̀rɛ moŋ ŋguoŋ shɛndaoŋ ghao nthɛ ŋa a fāʼo kàʼa moŋ yei chɔmbhi pugu pa yɛ chɔmbhi ŋa a thɔ nu nɛ. 
Nnu yei nnu ŋa pinthɛ ŋoŋ yɨʼə noŋ yi ŋkuoŋ ghɔ, mbɔ nnu ŋa a pie ŋa pi piŋ ghao. 
A pɔ nthɛ pi yei nnu ŋa pigi ghà mfāʼa, ndɔ ŋgwie noŋ yigi, nthɛ ŋa pigi nūʼɔŋ kwàʼa yigi pi ŋkuoŋ Minnwi maoŋ, ŋa a ŋkwe ŋguoŋ ŋgwa ghao, mīʼɛŋ mbɔ ŋgwa pɛ ŋa pugu ghaŋ piŋ nɛ. 
Fɛ gɨ́ ndɔ njɛʼi pa nnu pei ni pugu. 
Kiʼi shesheŋoŋ chɨ̄ʼə ghɔ nthɛ ŋa ɔ mikəʼɨ, ndɔ nōoŋ lì ni ghaŋ piŋ moŋ chrà yɔ, mbha nnu yɔ, ni khwǎ, ni piŋ yɔ, ni chɔmbhi taoŋtaoŋ yɔ. 
Fɛ noŋ yɔ ni mɛ̄iŋ nu Ŋwaʼaŋlɨ Minnwi ŋgwa yaʼo, pugu pa chīi nu, ni yɛʼi nu chrà Minnwi, ti ǹshi nuʼuŋ nthɔ. 
Kiʼi nchɨ̄ʼə fɛ́ moŋ Jijwɛ ŋa ɔ fāʼo nɛ ŋa Minnwi ni mfɛ ntɔgɔ pi ŋkuoŋ nōoŋ nu ni ŋgwa pugu chhu ndɨɨ yɛ ŋa pa thishɨ nɔ ghaŋ chhu chrà Minnwi ni nūʼɔŋ mbhɔ yugu mbɨŋ ghɔ nɛ. 
Chwīe nnu pei, mfɛ noŋ yɔ moŋ ghɔ, nnɛ ŋa ŋguoŋ ŋgwa yəɨ ŋkwaŋ haʼaŋ ɔ ghə̄ɨ nu shhɨ nɛ. 
Lɨna ni noŋ yɔ pugu pa yaoŋ ŋa ɔ yɛʼi nu nɛ. Ghə̄ɨ shhɨ nchwīe nu nnɛ, nthɛ ŋa moŋ chwīe nu nnɛ, ɔ shi ŋkwe noŋ yɔ pugu pa ŋgwa pɛ ŋa pugu ywɛrɛ ghɔ nɛ. 
