﻿1 Teshalonika.
3.
Nthɛ yie ghɔ, ndɨɨ ŋa a kaŋ ni nthɛ paʼa pigi lɔ nuʼuŋ ŋgwɛ̄iŋ njùʼɔ yigi mbīgi ŋgə̄ɨ shhɨ nɛ, pigi pīʼi ŋa a pwa ŋa pigi kɨna njiŋ təʼɨ vigi Atɛŋ. 
Pigi ni ntaoŋ Timoti ndǐŋ vigi ndɔ mbɔ ŋgaŋ kwò fàʼa Minnwi moŋ chīi nu pwa pishaʼakhɔ Krishto ŋa a thɔ nchwīe pəɨ tɨnɨ, ndɔ mbɨnɨ māʼaŋ ghrɨ́ yəɨ moŋ piŋ yəɨ, 
ŋa kiʼi taʼa ŋoŋ vəɨ chɨ̄ʼɨ nthɛ pi ŋgəʼɨ pei, nthɛ ŋa pəɨ ŋkaa pəɨ ji ŋa ŋkwaŋ ŋgəʼɨ pighɔ pɔ pi pichəɨ pa yaoŋ ŋa Minnwi ŋkwo kāʼa ni pia nɛ. 
Nthɛ ŋa ndɨɨ ŋa pia ni mbɔ kaʼa nɛ, pigi ni ŋkwo wuʼɔ nthɔ nshwei vəɨ ni shhɨ ŋa pia shi njəɨ ŋgəʼɨ, nnɛ a thɔ nɔ lɔ̄gɔ nu lɨʼɨ wuʼɔ nɔ haʼaŋ pəɨ ji nɛ. 
Nthɛ yie ghɔ, a ni ŋga nuʼuŋ mbɔ ŋa minthɛ paʼa ǹdɔ nuʼuŋ ŋgwɛ̄iŋ njùʼɔ a mbīgi ŋgə̄ɨ shhɨ, ǹtaoŋ ŋoŋ ni pəɨ nɔ ji nu ŋkwaŋ haʼaŋ piŋ yəɨ pɔ nɛ, nthɛ ŋa ŋki pɔgɔ nu ŋa kəʼɨchəɨ Shata kwo mōoŋ vəɨ nɔ chwīe nu pəɨ mieŋ piŋ yəɨ, nnɛ, fàʼa yigi phɛ gha. 
Ndɔ ndwɛ ŋa Timoti thɔ njəɨ vigi llɔ mbhɔ pəɨ, ndɔ nthɔ pi ni ŋkɨ̀nɨ shiʼi nthɛ piŋ yəɨ pugu pa khwǎ yəɨ nɛ, ndɔ mbɨnɨ nchhu ŋa pəɨ ghà ŋguʼɔ ŋkwiŋ vigi shishiʼi, ŋkhwā nu nɔ yəɨ nu vigi wuʼɔ nɔ haʼaŋ pigi khwā nu nɔ yəɨ nu vəɨ nɛ, 
nthɛ yei nnu, ma pa lǐŋ paŋ, moŋ ŋguoŋ yúʼɔ pugu pa ŋgəʼɨ yigi, pigi fāʼo ghrɨnjuʼɔ nthɛ vəɨ ntɔgɔ pi ŋkuoŋ piŋ yəɨ. 
Nthɛ ŋa minthɛ pigi fɛrɛ ndwɛ nɔ haʼaŋ p̈əɨ nthi a tɨnɨ mbɨŋ Taathɔ. 
Pinthɛ pigi fɛ pi fɨʼɨ yəɨ ŋkwaŋ tōo nu ni Minnwi nthɛ vəɨ, nthɛ ŋguoŋ pwanjuʼɔ ŋa pigi fāʼo nthɛ vəɨ shhɨ Minnwi yigi, 
nɔ haʼaŋ pigi luoŋ nu moŋ tuʼu pugu pa naoŋchɨ ni ŋguoŋ njùʼɔ yigi ŋa minthɛ pia yəɨ ligi pigi fɛ yaoŋ ŋa a pou nu moŋ piŋ yəɨ nɛ? 
Ǹduoŋ ŋa Minnwi yia, ndɔ mbɔ Tǎa via, pugu Taathɔ via, mbɔ Jishɔ, fie ndaoŋ ni pigi nɔ thɔ nu njəɨ vəɨ. 
Ǹduoŋ ŋa Taathɔ chwīe khwǎ noŋ shɨna pəɨ pugu pa khwǎ yəɨ ni ŋguoŋ ŋgwa pigi ti ndɨnaoŋ, wuʼɔ nɔ haʼaŋ pigi khwā vəɨ nɛ, 
nɛnnɛ ŋa Taathɔ chwīe njùʼɔ yəɨ tithi ki ntəɨ moŋ taoŋtaoŋ shhɨ Minnwi yia, ndɔ mbɔ Tǎa via, moŋ ndɨɨ ŋa Taathɔ via, mbɔ Jishɔ, shi nthɔ nu pugu pa ŋguoŋ ŋgwa pi pi taoŋtaoŋ nɛ. 
