﻿1 Koriŋ.
3.
Nɔ chrā nu nnu shini, ma lǐŋ paŋ, a kaŋ ni nthɛ paʼa ǹdɔ nchrā ni pəɨ nɔ haʼaŋ ǹchrā pi ni ŋgwa haʼaŋ pugu fāʼo Jijwɛ Minnwi nɛ, ŋki chrā ni pəɨ pi nɔ haʼaŋ pəɨ pɔ pi ŋgwa ŋkuoŋ mbhi, nɔ pa puoŋ prɔ moŋ piŋ nu Krishto. 
Ŋki fɛ pi pɨnɨ ni pəɨ ŋa pəɨ nnu, ǹshini ndɔ mfɛ pi maoŋ chiɛŋchiɛŋ ni pəɨ, nthɛ ŋa pəɨ shini ndɔ naa ŋkāʼo nɔ yi chiɛŋchiɛŋ. Njiʼi nthɛ pi ndwɛ pəɨ shi lɔ naa njiʼi ŋkāʼo, 
nthɛ ŋa pəɨ wuʼɔ mbiʼi nchhɔ chɔmbhi yəɨ nɔ haʼaŋ ŋgwa ŋkuoŋ mbhi ghà nchhɔ nɛ. Nthɛ ŋa nɔ haʼaŋ kighɨʼə pugu pa fɛ̀ʼi wuʼɔ mbɔ nu shɨna pəɨ nɛ, a lɔ nōoŋ ŋa pəɨ pɔ pi yi ŋkuoŋ mbhi, nchhɔ chɔmbhi yəɨ nɔ ŋgwa ŋkuoŋ mbhi? 
Nthɛ ŋa ndɨɨ ŋa ŋoŋ vəɨ chhu ŋa, “Ǹjōu pi njiŋ Pɔɔ,” yichəɨ ŋa, “Ǹjōu pi njiŋ Apolo,” yie ghɔ shi lɔ nōoŋ ŋa pəɨ thɔ mbɔ pi nɔ ŋgwa ŋkuoŋ mbhi? 
Apolo pɔ pi gɔ̌? Pɔɔ pɔ gɔ̌? Pugu pa puoŋ fàʼa ŋa pəɨ kie pi mbhɔ pugu mbiŋ Taathɔ, nɔ haʼaŋ a fɛ shɨ̀na ni shesheŋoŋ vigi nɛ. 
Ŋki phi mbhɛ̌, Apolo shāʼo ŋkhǐ ŋkuoŋ ghɔ. A chwīe Minnwi a kuʼɔ. 
Nnɛ, mmɛ nnu shi lɔ njiʼi mbɔ pi ŋoŋ ŋa a phī nɛ, ki ŋoŋ ŋa a shāʼo ŋkhǐ ŋkuoŋ ghɔ nɛ, a pɔ pi Minnwi ŋa a chwīe a khɛ̄ nɛ. 
Ŋoŋ ŋa a phī nɛ pugu ŋoŋ ŋa a shāʼo ŋkhǐ ŋkuoŋ ghɔ nɛ wuʼɔ taʼa yaoŋ, sheshe ŋgaŋ vi shi mfāʼo kɨ̀nɛiŋ yi wuʼɔ nɔ fɨʼɨ fàʼa yi. 
Nthɛ ŋa pigi ghao pɔ pi puoŋ fàʼa Minnwi, pəɨ pɔ pi moŋ nyieŋ Minnwi, mbɨnɨ mbɔ pi nda Minnwi. 
Ni fɨʼɨ pwapuŋ ŋa Minnwi fɛ vəɨ, nɔ ŋkiɛŋ ŋgaŋ krao nda ŋa a ji fàʼa ŋgaʼa nɛ, ŋki nūʼɔŋ kwonda, ŋoŋ nduoŋ krao nda ŋkuoŋ ghɔ. Shesheŋoŋ lɨna nu ŋkwaŋ nɔ haʼaŋ a krao nu ŋkuoŋ kwonda ghɔ nɛ. 
Nthɛ ŋa minthɛ paʼa yichəɨ ŋoŋ lɔ mbɨnɨ nūʼɔŋ yichəɨ kwonda nduoŋ, ŋkiɛŋ yɛ ŋa a kwo pɔ nɛ, mbɔ Jishɔ Krishto. 
Ndwɛ, s̈hesheŋoŋ ŋkrao nu ŋkuoŋ kwonda ghɔ pi ni laoŋgo, ki tɨ́nɨ, ki pa ŋgùʼɔ tɨnɨnchuoŋ, ki thɨ, ki trǔ yó, ki pi, 
kaŋ mbha fàʼa shesheŋoŋ shi nōoŋ noŋ yi, ndɨɨ ŋa mmɛ llɛ́ Krishto shi ntūgu vi ni móŋoŋ nɛ. Móŋoŋ shi njwɛʼi ŋkwaŋ fàʼa ŋa shesheŋoŋ fāʼa nɛ. 
Fàʼa ŋa a fāʼa ŋkuoŋ kwonda ghɔ nɛ mieŋ ki kɨɨ, a fāʼo kɨ̀nɛiŋ. 
Fàʼa s̈hesheŋoŋ ŋkɨɨ, ŋgaŋ vi shiɛŋ, ndɔ nduthɔ yi lūgu pi wuʼɔ nɔ haʼaŋ a tei ntaoŋ pi moŋ móŋoŋ. 
Pəɨ lɔ njiʼi nji ŋa pəɨ pɔ pi Nda Minnwi? Pugu pa ŋa Jijwɛ Minnwi chhɔ mbɨŋ pəɨ? 
S̈hesheŋoŋ mbɨrɨ Nda Minnwi, Minnwi pɨrɨ vi ŋkaa yu. Nthɛ ŋa Nda Minnwi pɔ pi yi taoŋtaoŋ, Nda Minnwi ghɔ ya ndɔ mbɔ pi pəɨ. 
Kiʼi shesheŋoŋ fɨ̄ɨ noŋ yi. S̈hesheŋoŋ shɨna pəɨ mbīʼi ŋa a fāʼo shiethɔ moŋ mbhi yei, a pie ŋa a gū na nnɛ ŋa minthɛ a gū ŋkiɛŋ ŋgaŋ shiethɔ. 
Nthɛ ŋa shiethɔ ŋkuoŋ mbhi yei pɔ pi nnu na ni Minnwi. Nthɛ ŋa pi nāʼaŋ ŋa, “A wɛ̄iŋ pa ghaŋ shiethɔ wuʼɔ ni yugu shiethɔ.” 
Ŋkamuʼɔŋ, “Taathɔ ji kwāʼa nu ghaŋ shiethɔ, ŋa a lɔ mfāʼo ghɛ̀rɛ.” 
Nnɛ kiʼi ŋoŋ kwēi njùʼɔ yi nthɛ ŋgwamishua nthɛ ŋa ŋguoŋ pa yaoŋ ghao pɔ pi yəɨ. 
Ki a pɔ pi Pɔɔ, ki Apolo, ki Kefa, ki ŋkuoŋ mbhi, ki chɔmbhi, ki gu, ki mbhi ndwɛ, ki yɛ ŋa a thɔ nu nɛ. Ŋguoŋ yi ghao pɔ pi yəɨ. 
Pəɨ pɔ yi Krishto, Krishto pɔ yi Minnwi. 
