﻿1 Koriŋ.
2.
Ndɨɨ ŋa ŋki thɔ njəɨ vəɨ nɛ, ma pa lǐŋ paŋ, ǹshini ndɔ nthɔ nchīi nnu shini Minnwi ŋa a ni ndə̄ɨŋ nɛ pi moŋ pa mmɛ chrà pugu pa nōoŋ nu shiethɔ. 
Nthɛ ŋa mi ni ndɔ̄gɔ nthí ma ŋa m̀baʼa njiʼi nji sheshe nnu shɨna pəɨ ŋkiɛŋ Jishɔ Krishto pugu pa ŋa pi kwīŋ vi ŋkuoŋ wáʼa. 
Mi ni nthɔ njəɨ vəɨ moŋ kɨ̌ʼɨ pugu pa pɔ́gɔ ni ntou wrū nu. 
Ndɔ chrà a pugu pa nnu ŋa mi ni nchīi nu nɛ shini ndɔ mbɔ moŋ shiethɔ ŋgwamishua pugu pa mɛmmɛ chrà lɨlɨŋ, ndɔ a ni mbɔ pi moŋ lì Jijwɛ Minnwi pugu pa njɨ, 
nnɛ ŋa kiʼi piŋ yəɨ pɔ pi ŋkuoŋ shiethɔ ŋgwamishua, â pɔ pi ŋkuoŋ njɨ Minnwi. 
Ndɔ pigi ghà nchīi ŋkɨ̀nɨ shiethɔ ni ŋgwa pɛ ŋa pugu pa ntɨnɨmmɛ moŋ piŋ nɛ, njiʼi nthɛ nɔ haʼaŋ a lɔ mbɔ pi shiethɔ ŋkuoŋ mbhi yei nɛ, ki yi pa ghaŋ shaʼa ŋgwa ŋkuoŋ mbhi yei ŋa a yīʼi ŋa pugu chhɔ ntɔgɔtɔgɔ nɛ. 
Ndɔ pigi ghà nchīi shiethɔ Minnwi ŋa a lə̄ɨŋ ki ŋgwa lɔ nji nɛ, mbɔ shiethɔ lə̄ɨŋ ŋa Minnwi ni nchuʼɔ ŋkaoŋ mbhi maa njɛ̄ nɔ ndighaʼo yia nɛ. 
Kaŋ taʼa ŋgaŋ shaʼa ŋgwa ŋkuoŋ mbhi yei lɔ njiʼi nji shiethɔ yei, nthɛ ŋa pugu kaŋ nji, pugu shi kaŋ ŋkwīŋ Taathɔ ndighaʼo ŋkuoŋ wáʼa. 
Ndɔ nɔ haʼaŋ pi nāʼaŋ moŋ Ŋwaʼaŋlɨ Minnwi ŋa, “Pa nnu ŋa muuŋ ligi lɔ naa njəɨ nɛ, paʼa tə́nə lɔ naa njaʼo nɛ, mbɔ yaoŋ ŋa ŋoŋmishua lɔ naa mbīʼi thɔ yu mbɔ yaoŋ ŋa Minnwi pīri ni pa ŋgwa haʼaŋ pugu khwā vi nɛ.” 
Minnwi nōoŋ pa maoŋ pei ni pigi ntɔgɔ pi mbhɔ Jijwɛ. Nthɛ ŋa Jijwɛ ghà ntāʼa ŋguoŋ yaoŋ ghao, njiʼi nthɛ pi láʼo pa nnu ŋa Minnwi kāʼa ndɔ ndə̄ɨŋ nɛ. 
A gɔ̌ shɨna ŋgwamishua ŋa minthɛ a ji nnu ŋa ŋoŋ pīʼi nu nɛ ŋkiɛŋ jijwɛ ŋoŋ ghɔ ŋa a pɔ mbɨŋ yu nɛ. Wuʼɔ nɛnnɛ ŋoŋ lɔ nji nnu ŋa Minnwi pīʼi nu nɛ ŋkiɛŋ Jijwɛ Minnwi. 
Pi lɔ njiʼi mfɛ pi jijwɛ ŋkuoŋ mbhi ni pia, pi fɛ pi Jijwɛ ŋa a llɔ mbhɔ Minnwi nɛ ni pia, nnɛ ŋa minthɛ pia ji pa yaoŋ ŋa Minnwi fɛ ni pia moŋ pwapuŋ yi nɛ. 
Nɛnnɛ kiʼɛ, pigi lɔ njiʼi nchrā pi ni chrà ŋa pigi yɛʼi llɔ ŋkuoŋ shiethɔ ŋoŋmishua, pigi chrā pi chrà ŋa Jijwɛ Minnwi yɛʼi vigi nɔ ghɔ nɛ, nthɔ ntūgu njiŋ nnu shini moŋ jijwɛ ni pa ŋgwa pɛ ŋa pugu fāʼo Jijwɛ nɛ. 
Ŋoŋ ŋa a lɔ njiʼi mfāʼo Jijwɛ Minnwi nɛ minthɛ paʼa a lɔ njiʼi mbiŋ pa nnu ŋa a llɔ mbhɔ Jijwɛ Minnwi nɛ, nthɛ ŋa pa nnu pighɔ pɔ pi nɔ pa nnu na, nthɛ ŋa minthɛ pi wuʼɔ nji ghɛ̀rɛ nnu pighɔ pi moŋ Jijwɛ. 
Ŋoŋ ŋa a fāʼo Jijwɛ nɛ ghà ntou mooŋ ŋguoŋ yaoŋ ghao nji, ndɔ minthɛ paʼa shesheŋoŋ lɔ ntou vi. 
Nthɛ ŋa, “A gɔ̌ ŋa a ji pīʼi nu Taathɔ ti a nthɛ a tɨgɨ vi?” Ndɔ pia fāʼo pīʼi nu Krishto. 
