﻿Mɛkana Bot ɛ Ebele.
1.
Eghɛŋ namwa, Zɛɛb naalii nɛ bɛbhaab'enaka esok nɛ esok. Nyɛ naalii nɛ nɔɔ membi nɛ membi mɛ elii djas tɔ enuub bɛngoolel ɛ mɛkpa ɛ Zɛɛb, 
mos, é mɛlu mɛ mɛsik mena dika mos'aak, nyɛ kalii nɛ nena ɛ́ tɔ nuub mɔn'ɛ. Ye ɛ́ nyɛy ɛ́ di, mot aalik nɛ esa djas ɔ, dum nɛ nɛ ɛ Zɛɛb nakus gwoo nɛ bɔs. 
Ye ɛ́ mɔn tak ɛ́ di mɛkas mɛ duma ɛ Zɛɛb. Ye ɛ́ nyɛy ɛ́ di elyaal dáa Zɛɛb di ɛ. Nyɛ ɛ́ di epyet esonok djas nɛ ghwyil mɛkpa mɛ nuub'ɛ. Bhis nyɛ nasilal ɛdis ɛ bot edhuu e mesyem mɔɔ ɛ, nyɛ naazɛnɔɔ nyel di-si pɛ tɔ gwoo, pɛ mbɔ eghɛŋ ɛ Zɛɛb, na ghaa mɛbwala. 
Zɛɛb naasa náá, mɔn'ɛ di kɔ elo efofop. Etɛɛ náá, nyɛ naadjɛ nyɛ boo din ɛ mɛbwala dhaa yii efofop. 
Ye ɛ́ tsɛɛtsɛ náá, Zɛɛb dinaa ààpaake nɛ dhiiti fofop'ɛ ngɔt náá: «Wɔy ɛ́ mɔn'am, kana dwoo pan mos'ak, mɛ eebya wɔ.» Tin, nyɛ ààpakoke-keak nɛ dhiiti fofop náá: «Mɛ waaboodi nɛ nɛ sɛɛg, nyɛ aadi nɛ nam ɛ́ mɔn.» 
Tin, é sok Zɛɛb nadhis mɔn mɛgwyak mɛ kɔ bɔs ɛ, nyɛ nabɛ ɛ́, nyɛ naake náá: «Efofop ɛ Zɛɛb djas goka ɛ́ nɛ ɛduwal ɛ nyɛ!» 
Dum nɛ efofop, ye nabɛ ɛ́ Zɛɛb naake náá: «Nyɛ naasa náá, efofop bɛ di tyee epup. Tin, nyɛ naasa náá, bot ɛ mɛsa mɛ di tyee ngel du.» 
Tin, dum nɛ mɔn, nyɛ naake náá: «Zɛɛb, boo mɛkoozi mɔ ɛ́ kɔm-kɔm sii nɛ kɔm. Deenek, ye ɛ́ é ɛkɛ tɔ esosoob ɛ wɔ di edjɛɛd ɛyoŋ ɛ lɔ. 
Wɔ kwyɛl ɛ́ epiki, da wɔ ɛ́ bhina ɛbiyo, dum nɛ tɛp tak ɛ, Zɛɛb Sɛɛg, Zɛɛb'ɔ natɔ́ wɔ étɛp wɔ di mot-mɛsa mɛ. Nyɛ naso wɔ mul mɛ ebotan kɔ lo ɛ́ étɛp tak, tɔ sama bɔn ɛ nyoog djas, ye ɛ́ wɔy ɛ́ nyɛ nasɛ́ɛ.» 
Zɛɛb naabake náá: «É mɛken tɔɔ, ye ɛ́ wɔy Ghɛŋ ɛ nakus bɔs, dɔɔ nɛ wɔy ɛ́ nasa gwoo nɛ mɛmbɔ mɔ ɛmet. 
Esonok binek djas aadi ɛ́ nɛ ɛsik, ye ɛ́ kabɛ wɔy ɔ, wɔy aadi ɛ́ kɔm-kɔm. Gwoo nɛ bɔs ɛ́ waapulel dáa ekaad. 
Wɔ waabwaada bɛ dáa bɛ di ebwaada kaad ɛ, deenek, wɔ waakaswoola bɛ ɛ́ dáa bot di eswoola ekaad e nyel ɛ. Yɛ kabɛ wɔy ɔ, wɔy ààswoola, tsik'ɔ tok nɛ ɛsik.» 
Zɛɛb nabɛ ààke nɛ dhiiti fofop'ɛ ngɔt náá: «Dia si pɛ kyee mbɔ eghɛŋ bam, kɛkum dwoo mɛ aasa náá, bot ɛ mɛbhuka di dáa poba wɔ di ekɛl mɛbɔ mɔ kɔ tak ɛ.» 
Efofop ɛ́ bɛzɛ? Bɛ tok esisim di esa mɛsa mɛ Zɛɛb ɔ? Zɛɛb lwom bɛ ɛ́, étɛp bɛ neegheekwyee-kwyee bot aabela tsik na kɔm-kɔm ɔ. 
